﻿ⵉⵥⴻⵀⵀⵉⴷⴻⵏ.
135.
ⵀⴰⵍⵍⵉⵍⵓ-ⵢⴰⵀ! ⵚⴻⴱⴱⵃⴻⵎ ⵉⵙⴻⵎ ⵏ ⵙⵉⴷⵉ, ⵚⴻⴱⴱⵃⴻⵎ ⵅⴰⵙ, ⴰ ⵉⵎⵙⴻⵅⵅⴰⵔⴻⵏ ⵏ ⵙⵉⴷⵉ, 
ⴽⴻⵏⵏⵉⵡ ⵉⵏⵏⵉ ⵉⴱⴻⴷⴷⴻⵏ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ, ⴷⵉ ⵍⴻⵎⵔⴰⵃⴰⵜ ⵏ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵏⵏⴻⵖ. 
ⵀⴰⵍⵍⵉⵍⵓ-ⵢⴰⵀ, ⵎⴰⵖⴰⵔ ⵙⵉⴷⵉ ⵉⵚⴱⴻⵃ, ⵣⴻⵀⵀⴷⴻⵎ ⵉ ⵢⵉⵙⴻⵎ ⵏⵏⴻⵙ, ⵎⴰⵖⴰⵔ ⵏⴻⵜⵜⴰ ⴷ ⵍⴻⴹⵔⴰⴼⴻⵜ. 
ⵎⴰⵖⴰⵔ ⵙⵉⴷⵉ ⵉⴼⴰⵔⵣ ⵢⴰⵄⵇⵓⴱ ⵉ ⵢⵉⵅⴻⴼ ⵏⵏⴻⵙ, ⵉⵙⵔⴰⵉⵍ ⴷ ⴰⴳⵍⴰ ⵏⵏⴻⵙ. 
ⵎⴰⵖⴰⵔ ⵏⴻⵛⵛ ⵙⵙⵏⴻⵖ ⴰⵇⴰ ⵙⵉⴷⵉ ⴷ ⴰⵎⴻⵇⵇⵔⴰⵏ, ⵙⵉⴷⵉⵜⵏⴻⵖ ⴷ ⴰⵎⴻⵇⵇⵔⴰⵏ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ. 
ⵎⴰⵔⵔⴰ ⵎⵉⵏ ⴷ ⴰⵙ ⵉⵜⵜⴻⵄⵊⵉⴱⴻⵏ ⵉ ⵙⵉⴷⵉ, ⵉⴳⴳⴰ ⵉ-ⵜ, ⴷⴻⴳ ⵉⵊⴻⵏⵡⴰⵏ ⵓ ⵅ ⵜⴻⵎⵎⵓⵔⵜ, ⴷⵉ ⵍⴻⴱⵃⵓⵔ ⵓ ⴷⴻⴳ ⵡⴰⵎⴰⵏ ⵉⵀⴻⵡⵍⴻⵏ ⵎⴰⵔⵔⴰ. 
ⵏⴻⵜⵜⴰ ⵉⵙⵙⴳⴻⵄⵄⴻⴷ ⵉⵙⴻⵢⵏⵓⵜⴻⵏ ⵣⵉ ⵟⵟⵔⵓⴼⴰ ⵏ ⵜⴻⵎⵎⵓⵔⵜ, ⵏⴻⵜⵜⴰ ⵉⵜⵜⴻⴳⴳ ⴰⵙⵙⴰⵎⴻⵏ ⴰⴽ-ⴷ ⵡⴻⵏⵥⴰⵔ, ⵉⵜⵜⴳⴻⵡⵡⴰⴷ ⴰⵙⴻⵎⵎⵉⴹ ⵣⵉ ⵍⴻⵀⵔⵉⵜ ⵏⵏⴻⵙ ⵖⴰⵔ ⴱⴰⵔⵔⴰ. 
ⵏⴻⵜⵜⴰ ⵉⵡⵜⴰ ⵉⵎⴻⵏⵣⴰ ⵏ ⵎⵉⵚⵔⴰ, ⵣⴻⴳ ⵉⵡⴷⴰⵏ ⴰⵍ ⵍⵎⴰⵔ. 
ⵏⴻⵜⵜⴰ ⵉⵙⵙⴻⴽⴽ ⵍⴻⵄⵍⴰⵎⴰⵜ ⴷ ⵍⵎⵓⵄⵊⵉⵣⴰⵜ ⴷⵉ ⵍⵡⴻⵙⵟ ⵏⵏⴻⵛ, ⴰ ⵎⵉⵚⵔⴰ, ⵖⴰⵔ ⴼⵉⵔⵄⵓⵏ ⵓ ⵖⴰⵔ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⵙ. 
ⵏⴻⵜⵜⴰ ⵉⵡⵜⴰ ⴰⵟⵟⴰⵙ ⵏ ⵍⴻⴳⵏⵓⵙ ⵓ ⵉⵏⵖⴰ ⵉⵊⴻⴵⵉⴷⴻⵏ ⵉⵊⴻⵀⴷⴻⵏ. 
ⵙⵉⵃⵓⵏ, ⴰⵊⴻⴵⵉⴷ ⵏ ⵉⵎⵓⵔⵉⵢⵢⴻⵏ, ⵓ ⵄⵓⵊ, ⴰⵊⴻⴵⵉⴷ ⵏ ⴱⴰⵛⴰⵏ, ⵓ ⵎⴰⵔⵔⴰ ⵜⵉⴳⴻⵍⴷⵉⵡⵉⵏ ⵏ ⴽⴻⵏⵄⴰⵏ. 
ⵉⵡⵛⴰ ⴰⵙⴻⵏ ⵜⴰⵎⵎⵓⵔⵜ ⴷ ⵜⴰⵙⵖⴰⵔⵜ, ⴷ ⵜⴰⵙⵖⴰⵔⵜ ⵉ ⵉⵙⵔⴰⵉⵍ, ⵍⴳⴻⵏⵙ ⵏⵏⴻⵙ. 
ⴰ ⵙⵉⴷⵉ, ⵉⵙⴻⵎ ⵏⵏⴻⵛ ⵉⵜⵜⵖⵉⵎⴰ ⵉ ⵍⴻⴱⴷⴰ, ⴰⵅⴰⵔⵔⴻⵚ ⴷⴰⵢⴻⴽ ⴰⴷ ⵢⵉⵍⵉ ⵣⵉ ⵊⵊⵉⵍ ⴰⵍ ⵊⵊⵉⵍ. 
ⵎⴰⵖⴰⵔ ⵙⵉⴷⵉ ⴰⴷ ⵢⴰⵔⵔ ⵜⴰⵙⵖⴰⵔⵜ ⵖⴰⵔ ⵍⴳⴻⵏⵙ ⵏⵏⴻⵙ, ⵏⴻⵜⵜⴰ ⴰⴷ ⵉⵃⵉⵏⵏ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ. 
ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ ⵏ ⵍⴻⴳⵏⵓⵙ ⴰⵇⴰ ⴰⵜⴻⵏⵜ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ, ⵜⵜⵡⴰⴳⴳⴻⵏⵜ ⵙ ⵉⴼⴰⵙⵙⴻⵏ ⵏ ⵉⵡⴷⴰⵏ. 
ⵏⵉⵜⴻⵏⵜⵉ ⵖⴰⵔⵙⴻⵏⵜ ⵉⵊⵊ ⵏ ⵓⵇⴻⵎⵎⵓⵎ, ⵎⴰⵛⴰ ⵡⴰⵔ ⵙⵙⵉⵡⵉⵍⴻⵏⵜ, ⵖⴰⵔⵙⴻⵏ ⵜⵉⵟⵟⴰⵡⵉⵏ, ⵎⴰⵛⴰ ⵡⴰⵔ ⵜⵜⵡⵉⵍⵉⵏⵜ, 
ⵏⵉⵜⴻⵏⵜⵉ ⵖⴰⵔⵙⴻⵏ ⵜⵉⵎⴻⵣⵣⵓⵖⴻⵏ, ⵎⴰⵛⴰ ⵡⴰⵔ ⵜⵜⴻⵙⵍⵉⵏⵜ, ⵡⴰⵍⵓ ⴰⵙⵓⴹⵉ ⵏ ⵏⵏⴻⴼⵙ ⴷⴻⴳ ⵓⵇⴻⵎⵎⵓⵏ ⵏⵙⴻⵏ. 
ⴰⴷ ⴷⴻⵡⵍⴻⵏ ⵉⵏⵏⵉ ⵜⴻⵏⵜ ⵉⴳⴳⵉⵏ ⴰⵎ ⵏⵉⵜⴻⵏⵜⵉ, ⵎⴰⵔⵔⴰ ⵡⵉ ⵅⴰⵙⴻⵏⵜ ⵉⵜⵜⵛⴰⵍ. 
ⴰ ⵜⴰⴷⴷⴰⵔⵜ ⵏ ⵉⵙⵔⴰⵉⵍ, ⴱⴰⵔⴽⴻⵎ ⵙⵉⴷⵉ, ⴰ ⵜⴰⴷⴷⴰⵔⵜ ⵏ ⵀⴰⵔⵓⵏ, ⴱⴰⵔⴽⴻⵎ ⵙⵉⴷⵉ. 
ⴰ ⵜⴰⴷⴷⴰⵔⵜ ⵏ ⵍⴰⵡⵉ, ⴱⴰⵔⴽⴻⵎ ⵙⵉⴷⵉ! ⴻⵊⵊ ⵎⴰⵔⵔⴰ ⵉⵏⵏⵉ ⵉⵜⵜⴻⴳⴳⵯⴻⴷⴻⵏ ⵙⵉⴷⵉ, ⴰⴷ ⴱⴰⵔⴽⴻⵏ ⵙⵉⴷⵉ. 
ⴰⴷ ⵉⵜⵜⵡⴰⴱⴰⵔⴻⴽ ⵙⵉⴷⵉ ⵣⵉ ⵚⵉⵀⵢⵓⵏ, ⵏⴻⵜⵜⴰ ⴷ ⵡⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵓⵔⵛⴰⵍⵉⵎ. ⵀⴰⵍⵍⵉⵍⵓ-ⵢⴰⵀ! 
