﻿ⵉⵥⴻⵀⵀⵉⴷⴻⵏ.
132.
ⵉⵣⵍⵉ ⵏ ⵓⴳⴻⵄⵄⴻⴷ. ⴰ ⵙⵉⴷⵉ, ⵉⴷⴰⵔ ⴷⴰⵡⵓⴷ, ⵉⴷⴰⵔ ⵎⴰⵔⵔⴰ ⴰⵡⴻⴷⴷⴻⴱ ⵏⵏⴻⵙ, 
ⵎⴰⵎⵎⴻⵛ ⵉⵊⵊⵓⴵ ⵉ ⵙⵉⴷⵉ, ⵉⵡⴰⵄⴷ ⵉ ⵓⵎⵣⴻⵎⵎⴰⵔ ⵏ ⵢⴰⵄⵇⵓⴱ: 
“ⵓⵛⵜ, ⵎⴰⵍⴰ ⴰⴷ ⴰⴷⴼⴻⵖ ⵖⴰⵔ ⵜⴰⵇⵉⴷⵓⵏⵜ ⵏ ⵜⴰⴷⴷⴰⵔⵜ ⵉⵏⵓ, ⴰⴷ ⵃⴻⴱⵛⴻⵖ ⵅ ⵇⴰⵎⴰ ⵏ ⵍⴻⵛⵜⵓ ⵉⵏⵓ, 
ⴰⴷ ⵙⴻⵎⵎⵃⴻⵖ ⵢⵉⴹⴻⵚ ⵉ ⵜⵉⵟⵟⴰⵡⵉⵏ ⵉⵏⵓ, ⵓⵍⴰ ⴷ ⴰⵏⵓⴷⴻⵎ ⵉ ⵡⴰⴱⵍⵉⵡⴻⵏ ⵉⵏⵓ, 
ⵇⴱⴻⵍ ⵉ ⵖⴰ ⴰⴼⴻⵖ ⴰⵎⵛⴰⵏ ⵉ ⵙⵉⴷⵉ, ⵉⵛⵜ ⵏ ⵜⵣⴻⴷⴷⵉⵖⵜ ⵉ ⵙⵉⴷⵉ, ⴰⵎⵣⴻⵎⵎⴰⵔ ⵏ ⵢⴰⵄⵇⵓⴱ!” 
ⵅⵣⴰⵔ, ⵏⴻⵙⵍⴰ ⵅ ⵜⵜⴰⴱⵓⵜ ⴷⵉ ⵉⴼⵔⴰⵜⴰ, ⵏⵓⴼⴰ ⵉ-ⵜⵜ ⴷⴻⴳ ⵉⵢⵢⴰⵔⴻⵏ ⵏ ⵢⴰⵄⴰⵔ. 
ⴰⴷ ⵏⴰⴷⴻⴼ ⵖⴰⵔ ⵜⵣⴻⴷⴷⵉⵖⵉⵏ ⵏⵏⴻⵙ, ⴰⴷ ⵏⴻⵙⵊⴻⴷ ⵉ ⵜⵏⴻⴱⴷⴰⵜ ⵏ ⵉⴹⴰⵔⴻⵏ ⵏⵏⴻⵙ. 
ⴽⴽⴰⵔ, ⵙⵉⴷⵉ, ⵓⵢⵓⵔ ⵖⴰⵔ ⴰⵔⵔⴰⵃⴻⵜ ⵏⵏⴻⵛ, ⵛⴻⴽ ⴷ ⵜⵜⴰⴱⵓⵜ ⵏ ⵊⵊⴻⵀⴷ ⵏⵏⴻⵛ. 
ⴻⵊⵊ ⵉⴽⴻⵀⵀⴰⵏⴻⵏ ⵏⵏⴻⵛ ⴰⴷ ⵢⴰⵔⴹⴻⵏ ⵙ ⵜⵙⴻⴳⴷⴰ, ⵉⵎⵜⵉⵇⵇⴰⵏ ⵏⵏⴻⵛ ⴰⴷ ⵙⵍⵉⵡⴻⵍⵡⴻⵏ. 
ⵡⴰⵔ ⴷⴷ-ⵜⴰⵔⵔⵉ ⵓⴷⴻⵎ ⵏ ⵓⵎⴻⴷⵀⵓⵏ ⵏⵏⴻⵛ ⴷⵉ ⵟⵟⵡⴻⵄ ⵏ ⵓⵎⵙⴻⵅⵅⴰⵔ ⵏⵏⴻⵛ ⴷⴰⵡⵓⴷ. 
ⵙⵉⴷⵉ ⵉⵊⵊⵓⴵ ⵉ ⴷⴰⵡⵓⴷ ⵙ ⵍⴰⵎⴰⵏ, ⵄⴻⵎⵎⴰⵔⵚ ⴰⴷ ⵉⵃⴻⵢⵢⴻⴷ ⵏⴻⵜⵜⴰ ⵅ ⵜⵊⴰⴵⵉⵜ ⵏⵏⴻⵙ: “ⵣⵉ ⵍⵖⵉⴵⴻⵜ ⵏ ⵓⵄⴻⴷⴷⵉⵙ ⵏⵏⴻⵛ ⴰⴷ ⵙⵙⵖⵉⵎⴻⵖ ⵉⵊⵊ ⵅ ⵍⵄⴰⵔⵛ ⵏⵏⴻⵛ. 
ⵎⴰⵍⴰ ⵉⵃⴻⵏⵊⵉⵔⴻⵏ ⵏⵏⴻⵛ ⴰⴷ ⵃⴹⴰⵏ ⵍⵄⴰⵀⴷ ⵉⵏⵓ ⴷ ⵛⵛⵀⴰⴷⴰⵜ ⵉⵏⵓ, ⵜⵉⵏⵏⵉ ⴷ ⴰⵙⴻⵏ ⵉ ⵖⴰ ⵙⵙⵍⴻⵎⴷⴻⵖ, ⵅⴻⵏⵏⵉ ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵙⴻⵏ ⴰⴷ ⵇⵇⵉⵎⴻⵏ ⵅ ⵍⴽⵓⵔⵙⵉ ⵏⵏⴻⵛ ⵉ ⵍⴻⴱⴷⴰ.” 
ⵎⴰⵖⴰⵔ ⵙⵉⴷⵉ ⵉⴼⴰⵔⵣ ⵚⵉⵀⵢⵓⵏ, ⵉⵎⴻⵥⵔⵉ ⵜⵜ ⴷ ⵜⴰⵣⴻⴷⴷⵉⵖⵜ ⵉ ⵢⵉⵅⴻⴼ ⵏⵏⴻⵙ. 
“ⵡⴰ ⴷ ⴰⵎⵛⴰⵏ ⵏ ⴰⵔⵔⴰⵀⴻⵜ ⵉⵏⵓ ⵉ ⵍⴻⴱⴷⴰ, ⴷⴰ ⵉ ⵅⵙⴻⵖ ⴰⴷ ⵣⴻⴷⵖⴻⵖ, ⵏⴻⵛⵛ ⵅⵙⴻⵖ ⵜ. 
ⴰⴷ ⴱⴰⵔⴽⴻⵖ ⵏⵏⵉⵄⵎⴻⵜ ⵏ ⵚⵉⵀⵢⵓⵏ, ⴰⴷ ⵙⵙⵊⵉⵡⵏⴻⵖ ⵉⵎⴻⵣⵍⴰⴹ ⵏⵏⴻⵙ ⵙ ⵡⴻⵖⵔⵓⵎ. 
ⴰⴷ ⵙⵙⵢⴰⵔⴹⴻⵖ ⵉⴽⴻⵀⵀⴰⵏⴻⵏ ⵏⵏⴻⵙ ⵙ ⵓⵙⴻⵏⵊⴻⵎ, ⵉⵎⵜⵉⵇⵇⴰⵏ ⵏⵏⴻⵙ ⴰⴷ ⵙⵍⵉⵡⴻⵍⵡⴻⵏ ⵙ ⵊⵊⴻⵀⴷ. 
ⴷⵉⵏⵏⵉ ⴰⴷ ⵙⵙⵖⴻⵎⵎⵢⴻⵖ ⵉⵊⵊ ⵏ ⵓⵢⵉⵛⵛ ⵉ ⴷⴰⵡⵓⴷ, ⵉⵊⵊ ⵏ ⵍⴻⴼⵏⴰⵔ ⵉ ⵓⵎⴻⴷⵀⵓⵏ ⵉⵏⵓ ⵙⵙⵡⴻⵊⴷⴻⵖ ⵜ ⴷⵉⵏ. 
ⴰⴷ ⵙⵙⵢⴰⵔⴹⴻⵖ ⵍⵄⴻⴷⵢⴰⵏ ⵏⵏⴻⵙ ⵙ ⵓⵙⴻⴹⵃⵉ, ⵎⴰⵛⴰ ⴰⴷ ⵅⴰⵙ ⵉⵏⵏⵓⵡⴰⵔ ⵜⵜⴰⵊ ⵏ ⵡⴻⵄⵣⴰⵍ ⵏⵏⴻⵙ.” 
