﻿ⵉⵥⴻⵀⵀⵉⴷⴻⵏ.
109.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ. ⴰ ⴰⵔⴻⴱⴱⵉ ⵏ ⵓⵚⴻⴱⴱⴻⵃ ⵉⵏⵓ, ⵡⴰⵔ ⵙⵖⵉⴷⵉ! 
ⵎⴰⵖⴰⵔ ⴰⵇⴻⵎⵎⵓⵎ ⵏ ⵉⵊⵊ ⵏ ⵓⵄⴻⴼⴼⴰⵏ, ⴰⵇⴰ ⴰⵇⴻⵎⵎⵓⵎ ⵉⵛⵛⵓⵔ ⵙ ⵉⵅⴰⵔⵔⵉⵇⴻⵏ ⵉⵏⵏⵓⵔⵣⴻⵎ ⵅⴰⴼⵉ. ⵏⵉⵜⵏⵉ ⵙⵙⴰⵡⴰⵍⴻⵏ ⴰⴽⵉⴷⵉ ⵙ ⵢⵉⵊⵊ ⵏ ⵢⵉⵍⴻⵙ ⵉⵙⵙⵅⴰⵔⵔⵉⵇⴻⵏ. 
ⵏⵏⴹⴻⵏ ⴰⵢⵉ-ⴷⴷ ⵙ ⵡⴰⵡⴰⵍⴻⵏ ⵉⵛⵛⵓⵔⴻⵏ ⵙ ⵡⴻⵛⵔⴰⵀ, ⵜⵜⵎⴻⵏⵖⴰⵏ ⴰⴽⵉⴷⵉ ⵅ ⵡⴰⵍⵓ. 
ⵉ ⵜⵡⴰⵔⵔⵉⵜ ⵅ ⵜⵎⴻⵅⵙⵉⵡⵜ ⵉⵏⵓ, ⵛⵛⴻⵜⵛⴰⵏ ⵏⵉⵜⵏⵉ ⵣⵣⴰⵢⵉ ⵓ ⵏⴻⵛⵛ ⴽⴻⵙⵙⵉⵖ ⵙ ⵍⵎⴻⵄⵔⵓⴼ. 
ⵏⵉⵜⵏⵉ ⵅⴻⴵⵚⴻⵏ ⴰⵢⵉ ⵍⵅⴰⵔ ⵙ ⵍⵖⴰⵔ, ⵜⴰⵎⴻⵅⵙⵉⵡⵜ ⵉⵏⵓ ⵙ ⵡⴻⵛⵔⴰⵀ. 
ⴻⴳⴳ ⵅⴰⵙ ⵉⵊⵊ ⵏ ⵓⵄⴻⴼⴼⴰⵏ, ⴻⵊⵊ ⵉⵊⵊ ⵏ ⵛⵛⵉⵟⴰⵏ ⴰⴷ ⵉⴱⴻⴷⴷ ⵖⴰⵔ ⵓⵖⴻⵣⴷⵉⵙ ⵏⵏⴻⵙ. 
ⵎⴰⵍⴰ ⵅⴰⵙ ⵛⴰⵔⵔⵄⴻⵏ, ⴰⴷ ⵉⴼⴼⴻⵖ ⴰⵎ ⵓⵇⵟⴰⵟⵄⵉ ⵓⵛⴰ ⴻⵊⵊ ⵜⴰⵥⴰⴵⵉⵜ ⵏⵏⴻⵙ ⴰⴷ ⵜⵉⵍⵉ ⴷ ⴷⴷⴻⵏⴱ. 
ⴰⴷ ⴷⴻⵡⵍⴻⵏ ⵓⵙⵙⴰⵏ ⵏⵏⴻⵙ ⵓⴷⵔⵓⵙⴻⵏ, ⴻⵊⵊ ⵡⴻⵏⵏⴻⵖⵏⵉ ⴰⴷ ⵉⵟⵟⴻⴼ ⵍⴼⵓⵙⵉⵏⴰ ⵏⵏⴻⵙ. 
ⴰⴷ ⴷⴻⵡⵍⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵉⵢⵓⵊⵉⵍⴻⵏ, ⵜⴰⵎⵖⴰⵔⵜ ⵏⵏⴻⵙ ⴷ ⵜⴰⵊⵊⴰⵍⵜ. 
ⴰⴷ ⵜⴻⵍⵍⵄⴻⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷⴰ ⴷ ⴷⵉⵀⴰ, ⴰⴷ ⵜⵜⴰⵔⴻⵏ, ⴰⴷ ⴰⵔⵣⵓⵏ ⵅ ⵎⴰⵛⵛⴰ ⵖⴰⵔ ⵍⴰⴳⴳⵯⴰⵊ ⵏ ⵍⵅⵉⵔⴱⴰⵜ ⵏ ⵜⵣⴻⴷⴷⵉⵖⵉⵏ ⵏⵙⴻⵏ. 
ⴰⴷ ⵉⵜⵜⴰⵔ ⴱⵓ-ⵓⵎⴰⵔⵡⴰⵙ ⵎⴰⵔⵔⴰ ⵎⵉⵏ ⵖⴰⵔⴻⵙ, ⴰⴷ ⴽⴻⵛⵛⴹⴻⵏ ⵉⴱⴰⵔⵔⴰⵏⵉⵢⵢⴻⵏ ⵍⵖⵉⴵⴻⵜ ⵏ ⵡⴰⵔⴱⴻⵔ ⵏⵏⴻⵙ. 
ⵡⴰⵔ ⵖⴰⵔⴻⵙ ⵉⵜⵜⵉⵍⵉ ⵓⵍⴰ ⴷ ⵉⵊⵊⴻⵏ ⵡⴻⵏⵏⵉ ⴷ ⴰⵙ ⵉ ⵖⴰ ⵉⴳⴳⵉⵏ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ, ⴻⵊⵊ ⵓⵍⴰ ⴷ ⵉⵊⵊ ⴰⴷ ⵉⵃⵉⵏⵏ ⵅ ⵉⵢⵓⵊⵉⵍⴻⵏ ⵏⵏⴻⵙ. 
ⴰⴷ ⵜⵜⵡⴰⵜⴻⵃⵃⴰⵏ ⵜⴰⵔⵡⴰ ⵏⵏⴻⵙ ⴰⵡⴰⵔⵏⵉ ⴰⵙ, ⴰⴷ ⵉⵜⵜⵡⴰⵎⵃⴰ ⵉⵙⴻⵎ ⵏⵙⴻⵏ ⴷⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ. 
ⴰⴷ ⵢⵉⴷⴰⵔ ⵙⵉⴷⵉ ⵍⵎⵓⵄⵚⵉⵢⵢⴻⵜ ⵏ ⵍⴻⵊⴷⵓⴷ ⵏⵏⴻⵙ, ⵄⴻⵎⵎⴰⵔⵚ ⵡⴰⵔ ⵉⵎⴻⵃⵃⵉ ⴷⴷⴻⵏⴱ ⵏ ⵢⴻⵎⵎⴰⵙ. 
ⵉⵍⵉ ⴰⴷ ⴱⴻⴷⴷⴻⵏ ⵍⴻⴱⴷⴰ ⵇⵉⴱⴰⵍⵜ ⵉ ⵙⵉⴷⵉ, ⴻⵊⵊ ⵉ-ⵜ ⴰⴷ ⵉⴽⴽⴻⵙ ⵍⵉⴷⴰⵔⴻⵜ ⵏⵙⴻⵏ ⵅ ⵜⴻⵎⵎⵓⵔⵜ. 
ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⵄⵇⵉⵍ ⵃⵉⵎⴰ ⴰⴷ ⵢⴻⴳⴳ ⵙ ⵜⵎⴻⵅⵙⵉⵡⵜ ⵉⵛⴻⵡⵡⴰⵔⴻⵏ, ⵎⴰⵛⴰ ⵉⵎⴰⵔⵔⴻⵜ ⵍⵎⴻⵙⴽⵉⵏ ⴷ ⵓⵎⴻⵣⵍⵓⴹ, ⵓⵍⴰ ⴷ ⵡⴻⵏⵏⵉ ⵓⵎⵉ ⵉⵜⵜⵡⴰⵔⵥ ⵡⵓⵍ, ⵃⵉⵎⴰ ⴰⴷ ⵜ ⵉⵏⴻⵖ. 
ⵏⴻⵜⵜⴰ ⵜⵓⵖⴰ ⵉⵜⵜⴻⵅⵙ ⵏⵏⴻⵄⵍⴻⵜ, ⵅⴻⵏⵏⵉ ⴻⵊⵊ ⵉ-ⵜⵜ ⴰⴷ ⵅⴰⵙ ⵜⴻⵡⴹⴰ, ⵓ ⵓⵎⵉ ⵡⴰⵔ ⵉⴼⴰⵔⵃ ⵙ ⵍⴱⴰⵔⴰⴽⴰ, ⴻⵊⵊ ⵉ-ⵜⵜ ⴰⴷ ⵅⴰⵙ ⵜⵉⴳⴳⵯⴻⵊ. 
ⵓⵎⵉ ⵢⴰⵔⴹ ⵏⵏⴻⵄⵍⴻⵜ ⴰⵎ ⵡⴰⵔⵔⵓⴹ ⵏⵏⴻⵙ, ⴻⵊⵊ ⵉ-ⵜⵜ ⴰⴷ ⵜⴰⴷⴻⴼ ⵅⴻⵏⵏⵉ ⴰⵎ ⵡⴰⵎⴰⵏ ⵖⴰⵔ ⴷⴰⵅⴻⵍ ⵏⵏⴻⵙ, ⴰⵎ ⵣⵣⴻⵛⵜ ⴷⴻⴳ ⵉⵖⵙⴰⵏ ⵏⵏⴻⵙ. 
ⴻⵊⵊ ⴰⴷ ⵜⵉⵍⵉ ⵏⵏⴻⵄⵍⴻⵜ ⵏⵏⵉ ⴰⵎ ⵡⴰⵔⵔⵓⴹ ⵉ ⴷⵉ ⵉⵜⵜⵍⴻⵃⵃⴻⴼ, ⴰⵎ ⵡⴻⴱⵢⴰⵙ ⵉ ⵉⴱⴻⴽⴽⴻⵙ ⵍⴻⴱⴷⴰ. 
ⵜⴰ ⴷ ⵍⵎⵓⵏⴻⵜ ⵏ ⵙⵉⴷⵉ ⵉ ⵉⵖⵔⵉⵎⴻⵏ ⵉⵏⵓ, ⵉ ⵢⵉⵏⵏⵉ ⵉⵙⵙⴰⵡⴰⵍⴻⵏ ⵍⵖⴰⵔ ⵅ ⵍⴻⵄⵎⴰⵔ ⵉⵏⵓ. 
ⵎⴰⵛⴰ ⵛⴻⴽ, ⴰ ⵙⵉⴷⵉ, ⵙⵉⴷⵉ ⵉⵏⵓ, ⴻⴳⴳ ⴷⴰⵢⵉ ⴰⵎ ⵎⴰⵎⵎⴻⵛ ⵜⴻⵅⵙⴻⴷ ⴷⵉ ⵟⵟⵡⴻⵄ ⵏ ⵢⵉⵙⴻⵎ ⵏⵏⴻⵛ, ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⴷ ⵜⴰⵚⴻⴱⵃⴰⵏⵜ, ⴼⴻⴽⴽ ⴰⵢⵉ. 
ⵎⴰⵖⴰⵔ ⵏⴻⵛⵛ ⴷⵉ ⵍⴻⵖⴱⴻⵏ ⵓ ⵣⴻⵍⴹⴻⵖ, ⵓⵍ ⵉⵏⵓ ⵉⵜⵜⵡⴰⵙⵙⵏⵓⵇⵇⴻⴱ ⵖⴰⵔ ⴷⴰⵅⴻⵍ ⴷⴻⴳ ⵉⴷⵎⴰⵔⴻⵏ ⵉⵏⵓ. 
ⴰⵎ ⵉⵛⵜ ⵏ ⵜⵉⵍⵉ ⵉⵣⵣⵓⴳⴳⴰⵔⵜⴻⵏ ⵇⴻⵟⵟⵉⵖ, ⵣⵣⵔⵓⵣⴰⵏ ⴰⵢⵉ ⴰⵎ ⵢⵉⵛⵜ ⵏ ⵜⵎⵓⵔⵖⵉ. 
ⵉⴼⴰⴷⴷⴻⵏ ⵉⵏⵓ ⵜⵜⴰⵔⵊⵉⵊⵉⵏ ⵙ ⵓⵥⵓⵎⵎⵉ, ⴰⵔⵔⵉⵎⴻⵜ ⵉⵏⵓ ⴷ ⵜⴰⵎⵓⵙⵔⵉⵡⵜ, ⵉⵜⵜⵅⴻⵚⵚⴰ ⵉ-ⵜⵜ ⵜⴰⴷⵓⵏⵜ. 
ⵏⴻⵛⵛ ⴷⴻⵡⵍⴻⵖ ⴰⵙⴻⵏ ⴷ ⵉⵛⵜ ⵏ ⵍⵇⴻⵛⵄⴻⵜ ⵏ ⵓⵙⴻⵃⵇⴰⵔ. ⵎⴰⵍⴰ ⵥⵔⵉⵏ ⴰⵢⵉ, ⵙⵙⴻⵏⵀⴻⵣⵣⴰⵏ ⴰⵣⴻⴵⵉⴼ ⵏⵙⴻⵏ. 
ⴻⵡⵛ ⴰⵢⵉ ⴰⴼⵓⵙ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵙⴻⵏⵊⴻⵎ ⴰⵢⵉ ⵄⵍⴰⵃⵚⴰⴱ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, 
ⵃⵉⵎⴰ ⴰⴷ ⵙⵙⵏⴻⵏ ⴰⵇⴰ ⴷ ⵎⴰⵏ ⴰⵢⴰ ⴷ ⴰⴼⵓⵙ ⵏⵏⴻⵛ, ⴰⵇⴰ ⵛⴻⴽ ⵉ ⵉⴳⴳⵉⵏ ⵎⴰⵏ ⴰⵢⴰ, ⴰ ⵙⵉⴷⵉ. 
ⵏⵉⵜⵏⵉ ⴷ ⵢⵉⵏⵏⵉ ⵉⵏⴻⵄⵄⵍⴻⵏ, ⵎⴰⵛⴰ ⵛⴻⴽ ⴰⴷ ⵜⴱⴰⵔⴽⴻⴷ, ⵎⴰⵍⴰ ⵜⵜⵖⴻⵡⵡⵖⴻⵏ, ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ ⵎⴰⵛⴰ ⴰⵎⵙⴻⵅⵅⴰⵔ ⵏⵏⴻⵛ ⴰⴷ ⵉⴼⴰⵔⵃ. 
ⴻⵊⵊ ⵉⵖⵔⵉⵎⴻⵏ ⵉⵏⵓ ⴰⴷ ⵢⴰⵔⴹⴻⵏ ⵙ ⵍⴻⴼⴹⵉⵃⴻⵜ, ⴰⴷ ⵍⴻⵃⵃⴼⴻⵏ ⴷⴻⴳ ⵓⵙⴻⴹⵃⵉ ⴰⵎ ⴷⴻⴳ ⵉⵊⵊ ⵏ ⵓⵙⴻⵍⵀⴰⵎ. 
ⵣⴻⴳ ⵡⵓⵍ ⵉⵏⵓ ⴰⴷ ⵇⴰⴷⵉⵖ ⵙⵉⴷⵉ ⵙ ⵓⵇⴻⵎⵎⵓⵎ ⵉⵏⵓ, ⴰⴷ ⵜ ⵙⵙⴻⵎⵖⴰⵔⴻⵖ ⵊⴰⵔ ⵡⴰⵟⵟⴰⵙ. 
ⵎⴰⵖⴰⵔ ⵏⴻⵜⵜⴰ ⴰⴷ ⵉⴱⴻⴷⴷ ⴰⴽ-ⴷ ⵓⵎⴻⵣⵍⵓⴹ ⵖⴰⵔ ⵓⴼⵓⵙ ⵏⵏⴻⵙ ⴰⴼⵓⵙⵉ, ⵃⵉⵎⴰ ⴰⴷ ⵜ ⵉⵙⵙⴻⵏⵊⴻⵎ ⵣⴻⴳ ⵉⵏⵏⵉ ⵉⵃⴻⴽⴽⵎⴻⵏ ⵅ ⵍⴻⵄⵎⴰⵔ ⵏⵏⴻⵙ. 
