﻿ⵉⵥⴻⵀⵀⵉⴷⴻⵏ.
108.
ⵉⵣⵍⵉ. ⴰⵣⴻⵀⵀⴻⴷ ⵏ ⴷⴰⵡⵓⴷ. 
ⴰ ⴰⵔⴻⴱⴱⵉ, ⵓⵍ ⵉⵏⵓ ⵉⵄⴻⵡⵡⴻⵍ, ⴰⴷ ⵖⴻⵏⵏⵊⴻⵖ ⴰⴷ ⵣⴻⵀⵀⴷⴻⵖ, ⵡⴰⵀ ⵓⵍⴰ ⴷ ⴰⵄⵓⴵⵉ ⵉⵏⵓ. 
ⴼⴰⵇ, ⵍⵀⴰⵔⴱⴰ ⴷ ⵍⴳⴰⵎⴱⵔⵉ! ⵏⴻⵛⵛ ⵅⵙⴻⵖ ⴰⴷ ⵙⵙⴼⴰⵇⴻⵖ ⵜⴰⴼⴰⵡⵜ ⵏ ⵍⴻⴼⵊⴰⵔ. 
ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⵊⴰⵔ ⵍⴻⴳⵏⵓⵙ, ⴰ ⵙⵉⴷⵉ, ⴰⴷ ⴰⴽ ⵣⴻⵀⵀⴷⴻⵖ ⵊⴰⵔ ⵛⵛⵓⵄⵓⴱ. 
ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⵜᵉⵜⵜⴰⴽⴽⵡⴰⴹ ⵜⵉⵡⴰ ⵉ ⵉⵊⴻⵏⵡⴰⵏ, ⵍⴰⵎⴰⵏ ⵏⵏⴻⵛ ⴰⵍ ⵉⵙⴻⵢⵏⵓⵜⴻⵏ. 
ⴰ ⴰⵔⴻⴱⴱⵉ, ⵙⴳⴻⵄⵄⴻⴷ ⵉⵅⴻⴼ ⵏⵏⴻⵛ ⵜⵉⵡⴰ ⵉ ⵉⵊⴻⵏⵡⴰⵏ, ⴰⵔⵔ ⴰⵄⵓⴵⵉ ⵏⵏⴻⵛ ⵅ ⵎⴰⵔⵔⴰ ⵜⴰⵎⵎⵓⵔⵜ, 
ⵃⵉⵎⴰ ⵉⵎⵄⵉⵣⵣⴻⵏ ⵏⵏⴻⵛ ⴰⴷ ⵜⵜⵡⴰⵏⴻⵊⵎⴻⵏ, ⴰⵡⵉ ⴰⵙⴻⵏⵊⴻⵎ ⵙ ⵓⴼⵓⵙ ⴰⴼⵓⵙⵉ ⵏⵏⴻⵛ ⵓ ⴰⵔⵔ-ⴷⴷ ⵅⴰⵏⴻⵖ ⴰⵡⴰⵍ. 
ⴰⵔⴻⴱⴱⵉ ⵜⵓⵖⴰ ⵉⵙⵙⴰⵡⴰⵍ ⴷⵉ ⵣⵣⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ, ⵙ ⵓⵢⴻⵏⵏⵉ ⵉ ⵖⴰ ⵏⴻⴳⵣⴻⵖ ⵙ ⵍⴻⴼⵔⴰⵃⴻⵜ. ⵏⴻⵛⵛ ⴰⴷ ⴱⴹⵉⵖ ⵛⴰⴽⵉⵎ, ⴰⴷ ⵄⴻⴱⴱⴰⵔⴻⵖ ⵜⴰⵢⵙⴰⵔⵜ ⵏ ⵙⵓⴽⴽⵓⵜ. 
ⵊⵉⵍⵄⴰⴷ ⵉⵏⵓ, ⵎⴰⵏⴰⵙⵙⴰ ⵉⵏⵓ, ⵉⴼⵔⴰⵢⵉⵎ ⴷ ⴰⵙⴻⵍⵇⵉ ⵉⵊⴻⵀⴷⴻⵏ ⵏ ⵓⵣⴻⴵⵉⴼ ⵉⵏⵓ, ⵢⴰⵀⵓⴷⴰ ⴷ ⴰⵎⴳⴻⵡⵡⴻⴷ ⵉⵏⵓ. 
ⵎⴰⵛⴰ ⵎⵓ’ⴰⴱ ⴷ ⵙⵙⴰⵔⵉⵊ ⵉⵏⵓ ⵏ ⵓⵙⵉⵔⴷ, ⵅ ⵉⴷⵓⵎ ⴰⴷ ⵏⴹⴰⵔⴻⵖ ⵙⴰⵏⴷⴰⵍⵉⵢⴰⵜ ⵉⵏⵓ, ⵅ ⵜⴻⵎⵎⵓⵔⵜ ⵏ ⴼⵉⵍⵉⵛⵉⵜ ⴰⴷ ⴷⵓⵇⵇⵣⴻⵖ ⵙ ⵓⵙⵍⵉⵡⵍⴻⵡ. 
ⵡⵉ ⴷ ⴰⵢⵉ ⵖⴰ ⵉⵏⴻⴷⵀⴻⵏ ⵖⴰⵔ ⵜⴻⵏⴷⵉⵏⵜ ⵉⴼⴰⵔⵢⴻⵏ? ⵡⵉ ⴷ ⴰⵢⵉ ⵖⴰ ⵉⴳⴻⵡⵡⴷⴻⵏ ⵖⴰⵔ ⵉⴷⵓⵎ? 
ⵎⴰ ⵡⴰⵔ ⴷ ⴰⵏⴻⵖ ⵜⴻⵏⴹⴰⵔⴻⴷ, ⴰ ⴰⵔⴻⴱⴱⵉ, ⵓ ⴰⴽ-ⴷ ⵍⵄⴻⵙⴽⴰⵔⴰⵜ ⵏⵏⴻⵖ ⵎⴰ ⵣⴻⵄⵎⴰ ⵡⴰⵔ ⴷⴷ-ⵜⴻⴼⴼⵉⵖⴻⴷ ⵄⴰⴷ ⴰⴽⵉⴷⵙⴻⵏ, ⴰ ⴰⵔⴻⴱⴱⵉ? 
ⴻⵡⵛ ⴰⵏⴻⵖ ⴰⴼⵓⵙ ⵃⵉⵎⴰ ⴰⴷ ⴰⵏⴻⵖ ⵜⴻⵙⵙⵏⴻⵊⵎⴻⴷ ⵣⵉ ⵍⴻⵃⵚⴰⵔⴻⵜ, ⵎⴰⵖⴰⵔ ⴰⵙⴻⵏⵊⴻⵎ ⵙ ⵓⴼⵓⵙ ⵏ ⵢⵉⵊⵊ ⵏ ⴱⵏⴰⴷⴻⵎ ⴰⵇⴰ ⵉⴱⴹⴻⵍ. 
ⴰⴽ-ⴷ ⴰⵔⴻⴱⴱⵉ ⴰⴷ ⵏⴻⴳⴳ ⵙ ⵡⴻⵎⵃⴰⴹ ⵓ ⵏⴻⵜⵜⴰ ⴰⴷ ⵉⵄⴼⴻⵙ ⵅ ⵢⵉⵏⵏⵉ ⴷ ⴰⵏⴻⵖ ⵉⵃⴻⵚⵚⴰⵔⴻⵏ. 
