﻿ⵉⵥⴻⵀⵀⵉⴷⴻⵏ.
104.
ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ! ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵎⴰⵎⵎⴻⵛ ⴷ ⴰⵎⴻⵇⵇⵔⴰⵏ ⵛⴻⴽ! ⵛⴻⴽ ⵜⵢⴰⵔⴹⴻⴷ ⵙ ⵍⵄⴰⴹⴰⵎⴰ ⴷ ⵍⵄⴻⵣⵣ. 
ⵏⴻⵜⵜⴰ ⵉⵍⴻⵃⵃⴻⴼ ⵉⵅⴻⴼ ⵏⵏⴻⵙ ⵙ ⵜⴼⴰⵡⵜ ⴰⵎ ⵙ ⵉⵊⵊ ⵏ ⵓⴱⴰⵔⵜⴻⵙⵙⵓ, ⵏⴻⵜⵜⴰ ⵉⵜⵜⴱⴻⵣⵣⴻⵄ ⴰⵊⴻⵏⵏⴰ ⴰⵎ ⵜⵊⴰⵔⵜⵉⵍⵜ ⵏ ⵓⵇⵉⴹⵓⵏ. 
ⴰⵇⴰ ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⴰⵔⵙⴻⵏ ⵜⵉⵃⴻⵏⵢⴰ ⵏ ⵡⴻⵙⵇⴻⴼ ⵙⴰⴷⵓ ⵉⵅⵅⴰⵎⴻⵏ ⵏⵏⴻⵙ ⵅ ⵡⴰⵎⴰⵏ, ⴷ ⵡⴻⵏⵏⵉ ⵉⴳⴳⵉⵏ ⵉⵙⴻⵢⵏⵓⵜⴻⵏ ⴷ ⴰⴽⴰⵔⵔⵓ ⵏⵏⴻⵙ, ⴷ ⵡⴻⵏⵏⵉ ⵉⴳⴳⵓⵔⴻⵏ ⵅ ⵡⴰⴼⵔⵉⵡⴻⵏ ⵏ ⵓⵙⴻⵎⵎⵉⴹ, 
ⴷ ⵡⴻⵏⵏⵉ ⵉⴳⴳⵉⵏ ⵍⵎⴰⵍⴰⴽⴰⵜ ⵏⵏⴻⵙ ⴰⵎ ⵢⵉⵙⴻⵎⵎⵉⴹⴻⵏ ⵓ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴷ ⵉⵛⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ. 
ⵏⴻⵜⵜⴰ ⵉⵙⵙⴱⴻⴷⴷ ⵜⴰⵎⵎⵓⵔⵜ ⵅ ⴷⵙⵓⵙⴰ ⵏⵏⴻⵙ, ⵡⴰⵔ ⵜᵉⵜⵜⴻⵏⵀⴻⵣⵣⵉ ⵄⴻⵎⵎⴰⵔⵚ ⵉ ⵍⴻⴱⴷⴰ. 
ⵛⴻⴽ ⵜⵍⴻⵃⵃⴼⴻⴷ ⴰⵙ ⵙ ⵡⴰⵎⴰⵏ ⵉⵀⴻⵡⵍⴻⵏ ⴰⵎ ⵙ ⵢⵉⵊⵊ ⵏ ⵡⴰⵔⵔⵓⴹ, ⴰⵎⴰⵏ ⴱⴻⴷⴷⴻⵏ ⵜⵉⵡⴰ ⵉ ⵉⴷⵓⵔⴰⵔ. 
ⵏⵉⵜⵏⵉ ⴰⵔⴻⵡⵍⴻⵏ ⵣⴻⴳ ⵓⵙⵉⴳⴳⵯⴻⴷ ⵏⵏⴻⵛ, ⵇⴻⴵⵇⴻⵏ ⴰⴷ ⴼⴼⵖⴻⵏ ⵣⵉ ⵜⵎⵉⵊⵊⴰ ⵏ ⵡⴰⵊⵊⴰⵊ ⵏⵏⴻⵛ. 
ⵜⵜⵡⴰⵙⵙⴳⴻⵄⵄⴷⴻⵏ ⵉⴷⵓⵔⴰⵔ, ⵀⴻⴽⴽⵡⴰⵏⵜ ⵜⴻⵢⵙⴰⵔⵉⵏ ⴷⴻⴳ ⵡⴻⵎⵛⴰⵏ ⵉ ⴷ ⴰⵙⴻⵏ ⵜⴻⴳⴳⵉⴷ. 
ⵛⴻⴽ ⵜⴻⴳⴳⵉⴷ ⴰⵢⵎⵉⵔ ⵉ ⵡⴰⵎⴰⵏ ⵏⵏⵉ ⵡⴰⵔ ⵄⴻⴷⴷⵓⵏ, ⵡⴰⵔ ⴷⴷ-ⴷⴻⴽⴽⵡⵉⵍⴻⵏ ⵎⴰⵃⴻⵏⴷ ⴰⴷ ⴷⵍⴻⵏ ⵜⴰⵎⵎⵓⵔⵜ. 
ⵛⴻⴽ ⴷ ⵡⴻⵏⵏⵉ ⵉⵏⴻⴷⴷⵀⴻⵏ ⵜⴰⵍⴰⵡⵉⵏ ⴷⵉ ⵜⴻⵖⵣⵓⵔⵉⵏ, ⴰⵇⴰ ⵜⵜⴰⵣⵣⵍⴻⵏⵜ ⴷⵉⵏ ⵊⴰⵔ ⵉⴷⵓⵔⴰⵔ. 
ⴰⵇⴰ ⵡⴰⵔⵔⴷⴻⵏⵜ ⵎⴰⵔⵔⴰ ⵍⵎⴰⵍ ⵏ ⵢⴻⵢⵢⴰⵔ, ⵉⵖⵢⴰⵍ ⵏ ⵍⴻⵅⵍⴰ ⵜⵜⴻⴽⴽⵙⴻⵏ ⴰⴼⴰⴷⵉ ⵏⵙⴻⵏ ⵣⵣⴰⵢⵙⴻⵏⵜ. 
ⵉⵊⴹⴰⴹ ⵏ ⵓⵊⴻⵏⵏⴰ ⵣⴻⴷⴷⵖⴻⵏ ⵖⴰⵔ ⵜⴻⵎⵎⴰⵡⵉⵏ ⵏⵙⴻⵏ, ⵣⵉ ⵊⴰⵔ ⵍⴻⴼⵔⵓⵄ ⵜᵉⵜⵜⴻⴽⴽ-ⴷⴷ ⵜⵎⵉⵊⵊⴰ ⵏⵙⴻⵏ. 
ⵏⴻⵜⵜⴰ ⴰⵇⴰ ⴷ ⵡⴻⵏⵏⵉ ⵉⵜⵜⴻⵙⵙⵓⵏ ⵉⴷⵓⵔⴰⵔ ⵣⴻⴳ ⵉⵅⵅⴰⵎⴻⵏ ⵏⵏⴻⵙ ⴷⴻⴳ ⵓⵊⴻⵏⵏⴰ, ⵜⴰⵎⵎⵓⵔⵜ ⵜᵉⵜⵜⵢⴰⵡⴰⵏ ⵣⵉ ⵍⵖⵉⴵⴻⵜ ⵉ ⴷⴷ-ⵉⴼⴼⵖⴻⵏ ⵣⵉ ⵎⵉⵏ ⵜⴻⴳⴳⵉⴷ ⵛⴻⴽ. 
ⵏⴻⵜⵜⴰ ⵉⴳⴳⴰ ⴰⵔⴱⵉⵄ ⵉⵖⴻⵎⵎⵉ ⵉ ⵍⵎⴰⵔ, ⵓⵍⴰ ⴷ ⴰⵖⴻⵎⵎⵓⵢ ⴷⵉ ⵟⵟⵡⴻⵄ ⵏ ⴱⵏⴰⴷⴻⵎ. ⵉⴳⴳⴰ ⵉ-ⵜⵜ ⵎⴰⵃⴻⵏⴷ ⴰⴷ ⴷⴷ-ⵢⴰⵡⵉ ⴰⵖⵔⵓⵎ ⵣⵉ ⵜⴻⵎⵎⵓⵔⵜ 
ⵓ ⴱⵉⵏⵓ ⵏⵏⵉ ⵉⵙⵙⴼⴰⵔⵔⴰⵃⴻⵏ ⵓⵍ ⵏ ⴱⵏⴰⴷⴻⵎ., ⴰⵍⴰⵎⵉ ⵉⵖⴻⵎⴱⴰⴱ ⴰⴷ ⵣⵣⴰⵢⴻⵙ ⵡⴻⵙⵙⴳⴻⵏ ⵎⴰⵀⵓ ⵣⵉ ⵣⵣⴻⵛⵜ, ⵓⵍⴰ ⴷ ⴰⵖⵔⵓⵎ ⵏⵏⵉ ⵉⵙⵙⴻⵊⵀⴻⴷ ⵓⵍ ⵏ ⴱⵏⴰⴷⴻⵎ. 
ⵜⵉⵛⴻⵊⵊⵓⵔⴰ ⵏ ⵙⵉⴷⵉ ⵜⵜⵢⴰⵡⴰⵏⴻⵏⵜ, ⵜⵉⵛⴻⵊⵊⵓⵔⴰ ⵏ ⵜⴻⵏⴳⴻⵍⵜ ⵏ ⵍⵓⴱⵏⴰⵏ ⵏⵏⵉ ⵉⵥⵥⵓ ⵏⴻⵜⵜⴰ, 
ⵎⴰⵏⵉ ⵜⵜⴻⴳⴳⴻⵏ ⵉⵊⴹⴰⴹ ⵍⵄⵓⵛⵛ ⵏⵙⴻⵏ, ⵎⴰⵏⵉ ⵉ ⵜⴻⴵⴰ ⵜⴰⴷⴷⴰⵔⵜ ⵏ ⵓⴱⴻⵍⵍⴰⵔⵊ ⴷⵉ ⵜⵛⴻⵊⵊⵓⵔⴰ ⵏ ⵓⵎⴻⵔⵣⵉ. 
ⵉⴷⵓⵔⴰⵔ ⵢⵓⵄⵍⴰⵏ ⴰⵇⴰ ⴰⵜⴻⵏ ⵉ ⵉⵖⴰⵢⴹⴻⵏ ⵏ ⵜⵚⵓⴹⴰⵔ, ⵍⴻⵊⵔⵓⴼ ⴷ ⴰⵎⵛⴰⵏ ⵏ ⵜⴰⵔⴻⵡⵍⴰ ⵉ ⵉⴽⴰⵡⴽⴰⵡⴻⵏ ⵏ ⵜⴻⵚⴹⴰⵔⵜ. 
ⵏⴻⵜⵜⴰ ⵉⴳⴳⴰ ⵜⴰⵣⵉⵔⵉ ⴷ ⵍⴻⵄⴱⴰⵔ ⵉ ⵍⴻⵡⵇⴰⵜ ⵉⵜⵜⵡⴰⴳⴳⴻⵏ, ⵜⴰⴼⵓⵛⵜ ⵜⴻⵙⵙⴻⵏ ⵎⴻⵍⵎⵉ ⵉ ⵖⴰ ⵜⴻⵖⵍⵉ. 
ⵛⴻⴽ ⵜⴻⵙⵙⴻⴽⴽⵉⴷ-ⴷⴷ ⵜⴰⴵⴻⵙⵜ ⵓ ⵜⴻⵡⴹⴰ-ⴷⴷ ⴵⵉⵍⴻⵜ ⵉ ⴷⵉ ⵜⵜⴻⵅⵜⵓⵜⵢⴻⵏ ⵎⴰⵔⵔⴰ ⵍⴻⵡⵃⵓⵛ ⵏ ⵡⴻⵣⵖⴰⵔ. 
ⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ ⵣⴻⵀⵀⴰⵔⴻⵏ ⵅ ⵣⵣⴰⵔⴷⴻⵜ, ⴰⵔⴻⵣⵣⵓⵏ ⵅ ⵎⴰⵛⵛⴰ ⵏⵙⴻⵏ ⵣⵉ ⴰⵔⴻⴱⴱⵉ. 
ⵎⴰⵍⴰ ⵜⴻⴼⴼⴻⵖ-ⴷⴷ ⵅⴻⵏⵏⵉ ⵜⴼⵓⵛⵜ, ⵜⵜⴻⵛⵔⵓⵔⵓⴷⴻⵏ ⵖⴰⵔ ⵍⵎⴰⵔⴳⴻⵃ, ⵜⵜⵖⴻⵎⵎⴰⵔⴻⵏ ⴷⴻⴳ ⵉⴼⵔⴰⵏ ⵏⵙⴻⵏ. 
ⵅⴻⵏⵏⵉ ⵉⵜⵜⴻⴼⴼⴻⵖ ⴱⵏⴰⴷⴻⵎ ⵖⴰⵔ ⵍⵅⴻⴷⵎⴻⵜ ⵏⵏⴻⵙ, ⵖⴰⵔ ⵜⴻⵡⵡⵓⵔⵉ ⵏⵏⴻⵙ ⴰⵍ ⵜⴰⵎⴻⴷⴷⵉⵜ. 
ⵎⴰⵎⵎⴻⵛ ⴰⵟⵟⴰⵙ ⵉ ⵜⴻⴳⴳⵉⴷ, ⴰ ⵙⵉⴷⵉ, ⵙ ⵜⵉⵖⵉⵜ ⵉ ⵜⴻⴳⴳⵉⴷ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ, ⵜⴰⵎⵎⵓⵔⵜ ⵜᵉⵜⵜⵡⴰⵛⵛⵓⵔ ⵙ ⵡⴰⴳⵍⴰ ⵏⵏⴻⵛ. 
ⴰⵇⴰ ⴷⵉⵏ ⵍⴻⴱⵃⴰⵔ ⵉⵎⵖⴰⵔ, ⵢⵉⵔⵉⵡ ⵖⴰⵔ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏⵏⴻⵙ, ⵎⴰⵏⵉ ⵉⵙⵙⴼⵓⴼⴼⴻⵢ ⵎⴰⵔⵔⴰ ⵙ ⵉⵎⵓⴷⴷⴰⵔⴻⵏ ⵉⵎⴻⵇⵇⵔⴰⵏⴻⵏ ⴷ ⵉⵎⴻⵥⵢⴰⵏⴻⵏ, ⴱⵍⴰ ⵍⴻⵃⵙⴰⴱ, 
ⵎⴰⵏⵉ ⴳⴳⵓⵔⴻⵏ ⵉⵖⴰⵔⵔⵓⴱⴰ, ⵓⵍⴰ ⴷ ‘ⵍⵉ$ⵉⵢⴰⵜⴰⵏ’ ⵏⵏⵉ ⵜⴻⴳⴳⵉⴷ ⵃⵉⵎⴰ ⴰⴷ ⴷⴰⵢⴻⵙ ⵉⵜⵜⵉⵔⴰⵔ. 
ⵏⵉⵜⵏⵉ ⵎⴰⵔⵔⴰ ⵜⵜⵔⴰⵊⴰⵏ ⵛⴻⴽ, ⴰⴷ ⴰⵙⴻⵏ ⵜⴻⵡⵛⴻⴷ ⵎⴰⵛⵛⴰ ⵏⵙⴻⵏ ⴷⵉ ⵍⵡⴻⵇⵜ ⵏⵏⴻⵙ. 
ⵎⴰⵍⴰ ⵜⴻⵡⵛⵉⴷ ⴰⵙⴻⵏ, ⵢⴰⵔⵔⵡⴻⵏ ⵏⵉⵜⵏⵉ, ⵎⴰⵍⴰ ⵜⴰⵔⵣⵎⴻⴷ ⴰⴼⵓⵙ ⵏⵏⴻⵛ, ⴷⴷⴰⴽⴽⵡⴰⵍⴻⵏ ⵊⵊⵉⵡⵏⴻⵏ ⵙ ⵍⵅⴰⵔ. 
ⵎⴰⵍⴰ ⵜⴻⴼⴼⴰⵔⴻⴷ ⵓⴷⴻⵎ ⵏⵏⴻⵛ, ⴰⵇⴰ ⵜⵜⵏⴻⵅⵍⴰⵄⴻⵏ, ⵎⴰⵍⴰ ⵜⴽⴻⵙⵙⵉⴷ ⴰⵙⴻⵏ ⵏⵏⴻⴼⵙ, ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ ⵓⵛⴰ ⴰⴷ ⴷⴷ-ⴷⴻⵡⵍⴻⵏ ⵖⴰⵔ ⵓⵛⴰⵍ ⵏⵙⴻⵏ. 
ⵎⴰⵍⴰ ⵜⴻⵙⵙⴻⴽⴽⴻⴷ-ⴷⴷ ⴰⵔⵔⵓⵃ ⵏⵏⴻⵛ, ⵅⴻⵏⵏⵉ ⵜⵜⵡⴰⵅⴻⵍⵇⴻⵏ-ⴷⴷ ⵏⵉⵜⵏⵉ, ⴰⴷ ⵜⴰⵔⵔⵉⴷ ⴰⵖⴻⵎⴱⵓⴱ ⵏ ⵜⴻⵎⵎⵓⵔⵜ ⴷ ⴰⵎⴰⵢⵏⵓ. 
ⴰⵄⵓⴵⵉ ⵏ ⵙⵉⴷⵉ ⴰⴷ ⵢⵉⵍⵉ ⵉ ⵍⴻⴱⴷⴰ, ⵙⵉⴷⵉ ⴰⴷ ⵉⴼⴰⵔⵃ ⵉ ⵎⴰⵔⵔⴰ ⵎⵉⵏ ⵉⴳⴳⴰ. 
ⵎⴰⵍⴰ ⵏⴻⵜⵜⴰ ⵉⵅⴻⵣⵣⴰⵔ ⴷⵉ ⵜⴻⵎⵎⵓⵔⵜ, ⵜᵉⵜⵜⴰⵔⵊⵉⵊⵉ, ⵎⴰⵍⴰ ⵉⵃⴰⴷⴰ ⵉⴷⵓⵔⴰⵔ, ⴰⴷ ⴷⵓⵅⵅⵏⴻⵏ. 
ⵏⴻⵛⵛ ⵅⵙⴻⵖ ⴰⴷ ⵖⴻⵏⵏⵊⴻⵖ ⵉ ⵙⵉⴷⵉ ⵎⵉⵏ ⵖⴰ ⴽⴽⴻⵖ ⴷⴷⴰⵔⴻⵖ, ⴰⴷ ⵣⴻⵀⵀⴷⴻⵖ ⵉ ⴰⵔⴻⴱⴱⵉ ⵉⵏⵓ ⵎⵉⵏ ⴷⴰ ⵉ ⵖⴰ ⴽⴽⴻⵖ ⴵⵉⵖ. 
ⴰⵅⴻⵎⵎⴻⵎ ⵉⵏⵓ ⴰⴷ ⴷⴷ-ⵢⴰⵙ ⵅ ⵍⵅⴰⴹⴰⵔ ⵏⵏⴻⵙ, ⴰⴷ ⴼⴰⵔⵃⴻⵖ ⴷⵉ ⵙⵉⴷⵉ. 
ⵉⵎⴻⴷⵏⴰⴱ ⴰⴷ ⵜⵜⵡⴰⵜⴻⵃⵃⴰⵏ ⵇⴰⵄ ⵣⵉ ⵜⴻⵎⵎⵓⵔⵜ, ⵉⵄⴻⴼⴼⴰⵏⴻⵏ ⵡⴰⵔ ⵜⵜⵉⵍⵉⵏ ⵄⴰⴷ. ⴱⴰⵔⴻⴽ ⵙⵉⴷⵉ, ⴰ ⵍⴻⵄⵎⴰⵔ ⵉⵏⵓ. ⵀⴰⵍⵍⵉⵍⵓ-ⵢⴰⵀ! 
