﻿ⵉⵥⴻⵀⵀⵉⴷⴻⵏ.
91.
ⵜⵎⵉⵊⵊⴰ ⵜⴰⵎⴻⵣⵡⴰⵔⵓⵜ: ⵡⴻⵏⵏⵉ ⵉⵣⴻⴷⴷⵖⴻⵏ ⴷⴻⴳ ⵓⴷⵓⵔⵔⵉ ⵏ ⵓⵎⵄⵓⴵⵉ ⵅ ⴽⵓⵍⵛⵉ, ⴰⵇⴰ ⵏⴻⵜⵜⴰ ⴰⴷ ⵉⵙⵙⴻⵏⵙ ⴷⵉ ⵜⵉⵍⵉ ⵏ ⵓⵎⵣⴻⵎⵎⴰⵔ ⵅ ⴽⵓⵍⵛⵉ. 
ⵜⵎⵉⵊⵊⴰ ⵡⵉⵙⵙ ⵜⵏⴰⵢⴻⵏ: ⴰⴷ ⵉⵏⵉⵖ ⵉ ⵙⵉⴷⵉ: ⵛⴻⴽ ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ ⴷ ⵍⴱⵓⵔⵊ ⵉⵏⵓ, ⴰⵔⴻⴱⴱⵉ ⵉⵏⵓ, ⵡⴻⵏⵏⵉ ⵅ ⵜⵜⴻⵛⵍⴻⵖ! 
ⵜⵎⵉⵊⵊⴰ ⵜⴰⵎⴻⵣⵡⴰⵔⵓⵜ: ⵎⴰⵖⴰⵔ ⵏⴻⵜⵜⴰ ⴰⴷ ⵛⴻⴽ ⵉⴼⴻⴽⴽ ⵣⵉ ⵍⴼⴻⵅ ⵏ ⵉⵏⴻⵢⵎⴰⵔⴻⵏ ⵏ ⵉⵊⴹⴰⴹ, ⵣⵉ ⵟⵟⴰⵄⵓⵏ ⵢⴰⵔⴻⴷⴷⴵⴻⵏ. 
ⵙ ⴰⵔⵔⵉⵛ ⵏⵏⴻⵙ ⴰⴷ ⵛⴻⴽ ⵉⴷⴻⵍ, ⵙⴰⴷⵓ ⵡⴰⴼⵔⵉⵡⴻⵏ ⵏⵏⴻⵙ ⴰⴷ ⵜⴰⴼⴻⴷ ⴰⴷⵓⵔⵔⵉ. ⵍⵎⴰⵏⴻⵜ ⵏⵏⴻⵙ ⴷ ⵜⴰⵙⴻⴷⴷⴰⵔⵜ ⵜⴰⵎⴻⵇⵇⵔⴰⵏⵜ ⴷ ⴰⵔⵔⵓⴹ ⵏ ⵡⵓⵣⵣⴰⵍ. 
ⵡⴰⵔ ⵜᵉⵜⵜⴻⴳⴳⵯⴻⴷⴻⴷ ⵛⴰ ⵣⴻⴳ ⵓⵏⴻⵅⵍⵉⵄ ⵏ ⴵⵉⵍⴻⵜ, ⵣⵉ ⴼⵍⵉⵜⵛⴰ ⵏ ⵍⵇⴻⵡⵙ ⵉ ⴷⵉⵏ ⵉⵟⵟⴰⵡⴻⵏ ⵙ ⵡⴰⵙⵙ, 
ⵓⵍⴰ ⵣⵉ ⵟⵟⴰⵄⵓⵏ ⵉ ⴷⴷ-ⵉⵜⵜⴻⵏⵏⴹⴻⵏ ⴷⵉ ⵜⴰⴵⴻⵙⵜ, ⵣⵉ ⵍⵀⴰⵍⴰⴽ ⵉ ⵢⴰⵔⴻⴷⴷⴵⴻⵏ ⵙ ⵓⵣⵉⵍ. 
ⵡⴰⵅⵅⴰ ⴰⴷ ⵡⴹⴰⵏ ⴰⵍⴻⴼ ⵖⴰⵔ ⵓⵖⴻⵣⴷⵉⵙ ⵏⵏⴻⵛ ⵓ ⵄⴻⵛⵔⴰ ⴰⵍⴻⴼ ⵖⴰⵔ ⴰⴼⵓⵙ ⴰⴼⵓⵙⵉ ⵏⵏⴻⵛ, ⵄⴰⴷ ⵡⴰⵔ ⵛⴻⴽ ⴷⴷ-ⵉⵜⵜⵉⴽⴽⵯⵉⴹ. 
ⴰⴷ ⵜⵡⴰⵍⵉⴷ ⴰⵢⴰ ⵙ ⵜⵉⵟⵟⴰⵡⵉⵏ ⵏⵏⴻⵛ ⵡⴰⵀⴰ, ⴰⴷ ⵜⵥⴰⵔⴻⴷ ⵎⴰⵎⵎⴻⵛ ⵖⴰ ⵉⵜⵜⵡⴰⵅⵍⴻⴼ ⵣⴻⴳ ⵉⵄⴻⴼⴼⴰⵏⴻⵏ. 
ⵜⵎⵉⵊⵊⴰ ⵡⵉⵙⵙ ⵜⵏⴰⵢⴻⵏ: ⵎⴰⵖⴰⵔ ⵅⴰⴽ: ‘ⵛⴻⴽ ⴰ ⵙⵉⴷⵉ, ⴰⵇⴰ ⵛⴻⴽ ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ!’ ⵜⵎⵉⵊⵊⴰ ⵜⴰⵎⴻⵣⵡⴰⵔⵓⵜ ⴰⵇⴰ ⵛⴻⴽ ⵜⴻⴳⴳⵉⴷ ⴰⵎⵄⵓⴵⵉ ⵅ ⴽⵓⵍⵛⵉ ⴷ ⵜⴰⵣⴻⴷⴷⵉⵖⵜ ⵉ ⵢⵉⵅⴻⴼ ⵏⵏⴻⵛ, 
ⵡⴰⵔ ⴷⴰⵢⴻⴽ ⵜⵏⴻⵟⵟⴻⵃ ⵜⵓⵄⴻⴼⴼⵏⴰ, ⵓⵍⴰ ⴷ ⵉⵛⵜ ⵏ ⵊⵊⵔⵉⵃⴻⵛⵜ ⵡⴰⵔ ⴷⴷ-ⵜⵇⴰⵔⵔⴰⴱ ⵛⴰ ⵖⴰⵔ ⵓⵇⵉⴹⵓⵏ ⵏⵏⴻⵛ, 
ⵎⴰⵖⴰⵔ ⵏⴻⵜⵜⴰ ⴰⴷ ⵅⴰⴽ ⵢⵓⵎⵓⵔ ⵍⵎⴰⵍⴰⴽⴰⵜ ⵏⵏⴻⵙ, ⵎⴰⵃⴻⵏⴷ ⴰⴷ ⵛⴻⴽ ⵃⴹⴰⵏⵜ ⴷⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵛ. 
ⴰⴷ ⵛⴻⴽ ⴽⵙⵉⵏ ⵅ ⵉⴼⴰⵙⵙⴻⵏ ⵏⵙⴻⵏⵜ, ⵃⵉⵎⴰ ⴰⴹⴰⵔ ⵏⵏⴻⵛ ⵡⴰⵔ ⵉⵏⴻⴳⴳⴻⵃ ⴰⵥⵔⵓ. 
ⴰⴷ ⵜⵄⴻⴼⵙⴻⴷ ⵅ ⵡⴻⵢⵔⴰⴷ ⵉⵣⴻⵀⵀⴰⵔⴻⵏ ⵓ ⵅ ⵜⵍⴻⴼⵙⴰ, ⴰⴷ ⵜⵄⴻⵊⵏⴻⴷ ⵅ ⵡⴻⵢⵔⴰⴷ ⴰⵎⴻⵥⵢⴰⵏ ⴷ ⵍⵀⴰⵢⵛⴻⵜ ⵏ ⵍⴻⴱⵃⴰⵔ. 
ⵜⵎⵉⵊⵊⴰ ⵡⵉⵙⵙ ⵜⵍⴰⵜⴰ ⵣⵉ ⴰⵔⴻⴱⴱⵉ: ⵓⵎⵉ ⴷⴷ-ⵉⵇⵇⴻⵏ ⵏⴻⵜⵜⴰ ⵖⴰⵔⵉ, ⵏⴻⵛⵛ ⴰⴷ ⵜ ⵙⵙⵏⴻⵊⵎⴻⵖ. ⵏⴻⵛⵛ ⴰⴷ ⵜ ⵙⵙⴳⴻⵄⵄⴷⴻⵖ, ⵎⴰⵖⴰⵔ ⵏⴻⵜⵜⴰ ⵉⵙⵙⴻⵏ ⵉⵙⴻⵎ ⵉⵏⵓ. 
ⵏⴻⵜⵜⴰ ⴰⴷ ⴰⵢⵉ ⵉⵍⴰⵖⴰ ⵓ ⵏⴻⵛⵛ ⴰⴷ ⵅⴰⵙ ⴷⴷ-ⴰⵔⵔⴻⵖ. ⴷⵉ ⵍⴻⵃⵚⴰⵔⴻⵜ ⴰⵇⴰ ⴰⵢⵉ ⵖⴰⵔⴻⵙ. ⵏⴻⵛⵛ ⴰⴷ ⵜ ⴼⴻⴽⴽⴻⵖ, ⴰⴷ ⴰⵙ ⵙⵙⵄⵓⴵⴻⵖ. 
ⵏⴻⵛⵛ ⴰⴷ ⵜ ⵙⵙⵊⵊⵉⵡⵏⴻⵖ ⴰⴽ-ⴷ ⵜⵓⵣⵣⴻⴳⴳⴰⵔⵜ ⵏ ⵡⵓⵙⵙⴰⵏ, ⵏⴻⵛⵛ ⴰⴷ ⴰⵙ ⵙⵙⴻⵛⵏⴻⵖ ⴰⵙⴻⵏⵊⴻⵎ ⵉⵏⵓ. 
