﻿ⵉⵥⴻⵀⵀⵉⴷⴻⵏ.
90.
ⵜⴰⵥⴰⴵⵉⵜ ⵏ ⵎⵓⵙⴰ, ⴰⵔⵢⴰⵣ ⵏ ⴰⵔⴻⴱⴱⵉ. ⴰ ⵙⵉⴷⵉ ⵉⵏⵓ, ⵛⴻⴽ ⵜⵓⵖⴰ ⴷ ⵜⴰⵣⴻⴷⴷⵉⵖⵜ ⵏⵏⴻⵖ ⵣⵉ ⵊⵊⵉⵍ ⴰⵍ ⵊⵊⵉⵍ. 
ⵇⴱⴻⵍ ⵎⴰ ⴰⴷ ⵉⵍⵉⵏ ⵉⴷⵓⵔⴰⵔ, ⵇⴱⴻⵍ ⵎⴰ ⴰⴷ ⴷⴷ-ⵜⴻⵙⵙⵓⴼⴼⵖⴻⴷ ⵜⴰⵎⵎⵓⵔⵜ ⴷ ⴷⴷⵓⵏⴻⵛⵜ, ⵡⴰⵀ ⴰⵇⴰ ⵛⴻⴽ ⴷ ⴰⵔⴻⴱⴱⵉ ⵣⵉ ⵍⴻⴱⴷⴰ ⴰⵍ ⵍⴻⴱⴷⴰ. 
ⵛⴻⴽ ⵜⴻⵊⵊⵉⴷ ⴱⵏⴰⴷⴻⵎ ⴰⴷ ⵉⵄⵇⴻⴱ ⵖⴰⵔ ⵜⵄⴻⵊⵊⴰⵊⵜ. ⵜⴻⵇⵇⴰⵔⴻⴷ: “ⵄⴻⵇⴱⴻⵜⵜⵉⵡ-ⴷⴷ ⵜⴰⵔⵡⴰ ⵏ ⴱⵏⴰⴷⴻⵎ!” 
ⵎⴰⵖⴰⵔ ⴰⵍⴻⴼ ⵏ ⵉⵙⴻⴳⴳⵯⵓⵙⴰ ⴷⵉ ⵜⵉⵟⵟⴰⵡⵉⵏ ⵏⵏⴻⵛ ⴰⵎ ⵡⴰⵙⵙ ⵏ ⵉⴹⴻⵏⵏⴰⴹ ⵏⵏⵉ ⵉⵄⴷⵓⵏ, ⵓⵍⴰ ⴰⵎ ⵢⵉⵛⵜ ⵏ ⵏⵏⵓⴱⴻⵜ ⵏ ⵜⵄⴻⵙⵙⴰⵙⵜ ⴷⵉ ⴵⵉⵍⴻⵜ. 
ⵛⴻⴽ ⵜⴼⴰⵔⴹⴻⴷ ⵜⴻⵏ, ⴰⵇⴰ ⴰⵜⴻⵏ ⴰⵎ ⵢⵉⴹⴻⵚ. ⵖⴰⵔ ⵜⵓⴼⴼⵓⵜ ⴳⴳⵉⵏ ⴰⵎ ⴰⵔⴱⵉⵄ ⵉⵢⴻⵎⵎⴰⵏ. 
ⵖⴰⵔ ⵜⵓⴼⴼⵓⵜ ⵉⵜⵜⵣᵉⵢⵣⵉⵡ ⴰⵔⵔⴱⵉⵄ ⵓⵛⴰ ⵉⵢⴻⵎⵎⴰ, ⵖⴰⵔ ⵜⵎⴻⴷⴷⵉⵜ ⵉⵜⵜⵡⴰⵎⵊⴰⵔ, ⵉⵜⵜⴰⵥⴻⵖ. 
ⵎⴰⵖⴰⵔ ⵏⴻⵛⵛⵉⵏ ⵏⴻⴼⵏⴰ ⵙ ⵡⴻⵖⴹⴰⴱ ⵏⵏⴻⵛ, ⵏⴻⵏⵏⴻⵅⵍⴻⵄ ⵣⴻⴳ ⵡⴻⵙⵄⴰⵔ ⵏⵏⴻⵛ. 
ⵛⴻⴽ ⵜⴻⴳⴳⵉⴷ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵇⵉⴱⴰⵍⵜ ⵏⵏⴻⵛ, ⴷⴷⵏⵓⴱ ⵏⵏⴻⵖ ⵉⵏⵏⵓⴼⴼⴰⵔⴻⵏ ⴷⵉ ⵜⴼⴰⵡⵜ ⵏ ⵡⵓⴷⴻⵎ ⵏⵏⴻⵛ. 
ⵎⴰⵖⴰⵔ ⵎⴰⵔⵔⴰ ⵓⵙⵙⴰⵏ ⵏⵏⴻⵖ ⴰⴷ ⵄⴷⵓⵏ ⴷⴻⴳ ⵓⴼⵓⴳⴻⵎ ⵏⵏⴻⵛ ⵉⵙⵙⴻⴳⴳⵯⴰⴷⴻⵏ, ⵏⴻⵙⵙⴻⵄⴷⵓ ⵉⵙⴻⴳⴳⵯⵓⵙⴰ ⵏⵏⴻⵖ ⴰⵎ ⵢⵉⵊⵊ ⵏ ⵓⵙⵓⴹⵉ. 
ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵖ ⵜⵜⴻⴽⴽⴻⵏ ⵙⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ, ⵏⵉⵖ, ⵎⴻⵍⵎⵉ ⵉ ⵖⴰ ⵏⵉⵍⵉ ⵏⴻⵊⵀⴻⴷ, ⴰⵇⴰ ⵜⵎⴰⵏⵢⵉⵏ ⵏ ⵉⵙⴻⴳⴳⵯⵓⵙⴰ. ⵎⵉⵏ ⴷⴰⵢⴻⵙ ⴷ ⴰⵄⵓⴵⵉ, ⵉⵜⵜⴰⵔⵓ-ⴷⴷ ⵜⴰⵎⴰⵔⴰ ⴷ ⵍⵡⴻⵃⵔⴰⵏ, ⴷⴻⵖⵢⴰ ⵜᵉⵜⵜⴻⴽⴽ ⵜⵄⴻⴷⴷⵓ ⵓ ⵏⴻⵟⵟⴰⵡ ⵖⴰⵔ ⴷⵉⵏ. 
ⵎⴰⵏ ⵡⴻⵏ ⵉⵙⵙⵏⴻⵏ ⵍⵇⴻⵙⵃⴰⵏ ⵏ ⵡⴻⵖⴹⴰⴱ ⵏⵏⴻⵛ, ⵓ ⵎⴰⵏ ⵡⴻⵏ ⵉⵙⵙⵏⴻⵏ ⵜⵉⴳⴳⵯⵓⴷⵉ ⵣⵣⴰⵢⴻⴽ ⴰⵎ ⴷⴷ-ⵉⵜⵜⵍⵉⵇ ⴰⴽ-ⴷ ⴰⴷⵓⵇⵇⴻⵣ ⵏⵏⴻⵛ ⵏ ⵓⴼⵓⴳⴻⵎ? 
ⵙⴻⵍⵎⴻⴷ ⴰⵏⴻⵖ ⴰⴷ ⵏⵃⴻⵙⵙⴻⴱ ⵓⵙⵙⴰⵏ ⵏⵏⴻⵖ, ⵃⵉⵎⴰ ⴰⴷ ⴷⴷ-ⵏⴰⵡⵉ ⵓⵍ ⵉⵛⵛⵓⵔⴻⵏ ⵙ ⵜⵉⵖⵉⵜ. 
ⴷⵡⴻⵍ-ⴷⴷ, ⴰ ⵙⵉⴷⵉ, ⴰⵍ ⵎⴻⵍⵎⵉ? ⵃⵉⵏⵏ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵛ. 
ⵙⵊⵊⵉⵡⴻⵏ ⴰⵏⴻⵖ ⵖⴰⵔ ⵓⵜⴻⴼⴼⵓ ⵙ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⵅⴻⵏⵏⵉ ⴰⴷ ⵏⴻⵙⵍⵉⵡⵍⴻⵡ, ⴰⴷ ⵏⴼⴰⵔⵃ ⵎⴰⵔⵔⴰ ⵓⵙⵙⴰⵏ ⵏⵏⴻⵖ. 
ⵙⴼⴰⵔⵃ ⴰⵏⴻⵖ ⴰⵏⴻⵛⵜ ⵏ ⵡⵓⵙⵙⴰⵏ ⵉ ⴷ ⴰⵏⴻⵖ ⵜⴻⵃⵚⴰⵔⴻⴷ, ⴰⵏⴻⵛⵜ ⵏ ⵉⵙⴻⴳⴳⵯⵓⵙⴰ ⵉ ⴷⵉ ⵏⴻⵥⵔⴰ ⵍⵖⴰⵔ. 
ⵙⵛⴻⵏ ⵍⵅⴻⴷⵎⴻⵜ ⵏⵏⴻⵛ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵛ, ⵍⵄⴻⵣⵣ ⵏⵏⴻⵛ ⵅ ⵉⵃⴻⵏⵊⵉⵔⴻⵏ ⵏⵙⴻⵏ. 
ⴰⴷ ⵅⴰⵏⴻⵖ ⵜⴻⵀⵡⴰ ⵍⴻⴹⵔⴰⴼⴻⵜ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⴹⵎⴻⵏ ⵛⴻⴽ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵖ, ⵡⴰⵀ, ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵖ ⴹⵎⴻⵏ ⵉ-ⵜⵜ. 
