﻿ⵉⵥⴻⵀⵀⵉⴷⴻⵏ.
81.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ⵓⵊⵉⵜⵜⵉ, ⴰⵔⵢⴰⵣ ⵣⵉ ⵊⴰⵜ. ⵏ ⴰⵙⴰⴼ. 
ⵙⵍⵉⵡⵍⴻⵎ ⵉ ⴰⵔⴻⴱⴱⵉ, ⵊⵊⴻⵀⴷ ⵏⵏⴻⵖ, ⴷⵓⵇⵇⵣⴻⵎ ⵙ ⵓⵙⵍⵉⵡⵍⴻⵡ ⵉ ⴰⵔⴻⴱⴱⵉ ⵏ ⵢⴰⵄⵇⵓⴱ. 
ⵙⴳⴻⵄⵄⴷⴻⵎ ⵉⵛⵜ ⵏ ⵢⴻⵣⵍⵉ ⵏ ⵓⵚⴻⴱⴱⴻⵃ, ⴰⵡⵉ ⴰⴱⴻⵏⴷⵉⵔ, ⵍⴳⴰⵎⴱⵔⵉ ⵎⵉⵥⵉⴷ ⴷ ⵍⵀⴰⵔⴱⴰ. 
ⵙⵓⴹⴻⵎ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⵖⴰⵔ ⵓⴱⴻⴷⴷⵉ ⵏ ⵓⵢⵓⵔ, ⵖⴰⵔ ⵜⵣⵉⵔⵉ ⵉⵇⴻⴼⵍⴻⵏ, ⵖⴰⵔ ⵡⴰⵙⵙ ⵏ ⵍⵄⵉⴷ ⵏⵏⴻⵖ. 
ⵎⴰⵖⴰⵔ ⵜⴰ ⴷ ⵜⴰⵡⵚⴻⵢⵢⴻⵜ ⵉ ⵉⵙⵔⴰⵉⵍ, ⵉⵛⵜ ⵏ ⵍⴼⴰⵔⵉⴹⴰ ⵏ ⴰⵔⴻⴱⴱⵉ ⵏ ⵢⴰⵄⵇⵓⴱ. 
ⵉⴳⴳⴰ ⵉ-ⵜⵜ ⴷ ⵛⵛⵀⴰⴷⴻⵜ ⴷⵉ ⵢⵓⵙⵓⴼ, ⵍⴰⵎⵉ ⴷⴷ-ⵉⴼⴼⴻⵖ ⴹⵉⴷⴷ ⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. ⴰⵇⴰ ⵙⵍⵉⵖ ⵉⵊⵊ ⵏ ⵢⵉⵍⴻⵙ ⵡⴰⵔ ⴷ ⴰⵙ ⴼⴻⵀⵎⴻⵖ. 
ⵜⴰⵖⵔⵓⴹⵜ ⵏⵏⴻⵙ ⴼⴻⴽⴽⴻⵖ ⵜⵜ ⵣⵉ ⴷⴷⵇⴻⵍ, ⵉⴼⴰⵙⵙⴻⵏ ⵏⵏⴻⵙ ⴰⵔⵅⵓⵏ ⵣⵉ ⵜⵙⵓⴵⴻⵜ ⵉ ⵜⵓⵖⴰ ⵢⴰⵔⴻⴱⴱⵓ. 
ⵛⴻⴽ ⵜⵍⴰⵖⵉⴷ ⴷⵉ ⵍⴻⵃⵚⴰⵔⴻⵜ ⵓ ⵏⴻⵛⵛ ⴼⴻⴽⴽⴻⵖ ⵛⴻⴽ ⵣⵣⴰⵢⴻⵙ. ⵏⴻⵛⵛ ⴰⵔⵔⵉⵖ-ⴷⴷ ⵅⴰⴽ ⴰⵎ ⵜⵜⵏⵓⴼⴼⴰⵔⴻⵖ ⴷⴻⴳ ⵡⴰⵊⵊⴰⵊ, ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ ⵇⴻⴵⴱⴻⵖ ⵛⴻⴽ. ⵙⵉⵍⴰⵀ. 
ⵙⴻⵍ, ⵍⴳⴻⵏⵙ ⵉⵏⵓ, ⵅⴻⵏⵏⵉ ⵏⴻⵛⵛ ⴰⴷ ⵛⴻⵀⴷⴻⵖ ⴷⵉ ⵍⵡⴻⵙⵟ ⵏⵏⴻⵛ, ⴰ ⵉⵙⵔⴰⵉⵍ, ⵎⴰⵍⴰ ⵅⴻⵏⵏⵉ ⵜⵓⵖⴰ ⵜⴻⵅⵙⴻⴷ ⴰⴷ ⵖⴰⵔⵉ ⴷⴷ-ⵜⴻⵙⵍⴻⴷ. 
ⵡⴰⵔ ⵖⴰⵔⴻⴽ ⵉⵜⵜⵉⵍⵉ ⵉⵊⵊ ⵏ ⴰⵔⴻⴱⴱⵉ ⴷ ⴰⵖⵔⵉⴱ, ⵡⴰⵔ ⵙᵉⵊⴻⴷ ⵓⵍⴰ ⵉ ⵢⵉⵊⵊ ⵏ ⴰⵔⴻⴱⴱⵉ ⵉ ⵡⴰⵔ ⵜⴻⵙⵙⵉⵏⴻⴷ. 
ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵡⴻⵏⵏⵉ ⵛⴻⴽ ⴷⴷ-ⵉⵙⵙⵓⴼⴼⵖⴻⵏ ⵣⵉ ⵎⵉⵚⵔⴰ. ⴰⵔⵣⴻⵎ ⴰⵇⴻⵎⵎⵓⵏ ⵏⵏⴻⵛ ⵓ ⵏⴻⵛⵛ ⴰⴷ ⵜ ⵛⵛⵓⵔⴻⵖ. 
ⵎⴰⵛⴰ ⵍⴳⴻⵏⵙ ⵉⵏⵓ ⵡⴰⵔ ⵉⵙⵍⵉ ⵛⴰ ⵖⴰⵔ ⵜⵎⵉⵊⵊⴰ ⵉⵏⵓ, ⵉⵙⵔⴰⵉⵍ ⵡⴰⵔ ⴷ ⴰⵢⵉ ⵉⵅⵙ. 
ⵙ ⵓⵢⴻⵏⵏⵉ ⵊⵊⵉⵖ ⵜⴻⵏ ⵉ ⵡⵓⵍ ⵏⵙⴻⵏ ⵉⵇⴻⵙⵃⴻⵏ, ⴰⵍⴰⵎⵉ ⵉ ⵖⴰ ⵓⵢⵓⵔⴻⵏ ⴷⵉ ⵍⴻⵛⵡⴰⵔ ⵏ ⵓⵣⴻⴵⵉⴼ ⵏⵙⴻⵏ. 
ⵎⵍⵉ ⴷⴷ-ⵉⵙⵍⴰ ⵖⴰⵔⵉ ⵍⴳⴻⵏⵙ ⵉⵏⵓ, ⵎⵍⵉ ⵉⵙⵔⴰⵉⵍ ⵉⵅⵙ ⴰⴷ ⵢⵓⵢⵓⵔ ⴷⴻⴳ ⵉⴱⵔⵉⴷⴻⵏ ⵉⵏⵓ! 
ⵅⴻⵏⵏⵉ ⵎⴰⵎⵎⴻⵛ ⴷⴻⵖⵢⴰ ⵉⵍⵉ ⵇⴹⵉⵖ ⵅ ⵍⵄⴻⴷⵢⴰⵏ ⵏⵙⴻⵏ, ⴰⵔⵔⵉⵖ ⴰⴼⵓⵙ ⵉⵏⵓ ⴹⵉⴷⴷ ⵉ ⵢⵉⵏⵏⵉ ⵜⴻⵏ ⵉⵃⴻⵚⵚⴰⵔⴻⵏ. 
ⵉⵏⵏⵉ ⵉⵛⴰⵔⵔⵀⴻⵏ ⵙⵉⴷⵉ ⴰⴷ ⵖⴰⵔⴻⵙ ⴷⴷ-ⴷⴻⵡⵍⴻⵏ ⵜⵜⵎⵓⵔⵓⴷⴻⵏ ⴷⴻⴵⴻⵏ, ⵍⵡⴻⵇⵜ ⵏ ⵓⵅⴻⴵⴻⵚ ⵏⵙⴻⵏ ⴰⴷ ⵢⵉⵍⵉ ⵉ ⵍⴻⴱⴷⴰ. 
ⵉⵍⵉ ⴰⵇⴰ ⵉⵡⵛⴰ ⴰⵙ ⵎⴰⵛⵛⴰ ⵣⵉ ⵍⴻⵎⵍⵉⵃ ⵏ ⵢⵉⵔⴷⴻⵏ, ⵡⴰⵀ, ⵉⵍⵉ ⵙ ⵜⴰⵎⵎⴻⵏⵜ ⵣⵉ ⵊⵊⴰⵔⴼ ⴰⵇⴰ ⵏⴻⵛⵛ ⵙⵙⵊⵊⵉⵡⵏⴻⵖ ⵛⴻⴽ. 
