﻿ⵉⵥⴻⵀⵀⵉⴷⴻⵏ.
74.
ⴰⵅⴻⵎⵎⵉ ⵏ ⴰⵙⴰⴼ. ⵎⴰⵢⴻⵎⵎⵉ, ⴰ ⴰⵔⴻⴱⴱⵉ, ⵜⴻⵏⴹⴰⵔⴻⴷ ⵉ ⵍⴻⴱⴷⴰ? ⵎⴰⵢⴻⵎⵎⵉ ⵖⴰ ⵢⴰⵔⵖ ⵡⴻⵖⴹⴰⴱ ⵏⵏⴻⵛ ⵅ ⵡⵓⴵⵉ ⵏ ⴷⴷⵎⴰⵏⵉ ⵏ ⵜⴰⵔⴻⵡⵙⴰ ⵏⵏⴻⵛ? 
ⵅⴻⵎⵎⴻⵎ ⴷⵉ ⵜⵎⴻⵙⵎⵓⵏⵜ ⵏⵏⴻⵛ ⵏⵏⵉ ⵜⵓⵖⴰ ⵜⴽⴻⵙⴱⴻⴷ ⵣⴻⴳ ⵡⴻⵛⵃⴰⵍ ⵓⵢⴰ, ⵜⴰⵇⴱⵉⵍⵜ ⵏ ⵜⴻⵙⵖⴰⵔⵜ ⵏ ⵍⵡⴰⵔⵜ ⵏⵏⴻⵛ ⵜⴻⵏⵏⵉ ⵜⴻⴼⴷⵉⴷ, ⴰⴷⵔⴰⵔ ⵏ ⵚⵉⵀⵢⵓⵏ ⵡⴻⵏⵏⵉ ⵅ ⵜⵓⵖⴰ ⵜⵣⴻⴷⴷⵖⴻⴷ. 
ⵙⴳⴻⵄⵄⴻⴷ ⵉⵚⵓⵔⴰⴼ ⵏⵏⴻⵛ ⵖⴰⵔ ⵎⵉⵏ ⵢⴰⵔⴻⴷⴷⴵⴻⵏ ⵉ ⵍⴻⴱⴷⴰ. ⵍⴻⵄⴷⵓ ⵢⴰⵔⵔⴰ ⵎⴰⵔⵔⴰ ⴷ ⵍⵅⴰⵔⴱⴻⵜ ⴷⵉ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ. 
ⵉⵏⵏⵉ ⵜⵓⵖⴰ ⵛⴻⴽ ⵉⵃⴻⵚⵚⴰⵔⴻⵏ ⵙⵙⴱⵓⵄⵔⵓⵜⴻⵏ ⴷⵉ ⵍⵡⴻⵙⵜ ⵏ ⵡⴻⵎⵛⴰⵏ ⵏⵏⴻⵛ ⵏ ⵓⵎⵙⴰⴳⴰⵔ, ⵙⵙⴱⴻⴷⴷⴰⵏ ⵍⴻⵄⵍⴰⵎⴰⵜ ⵏⵙⴻⵏ ⴷ ⵍⴻⵄⵍⴰⵎⴰⵜ. 
ⴰⵇⴰ ⵏⴻⵜⵜⴰ ⵉⴷⵡⴻⵍ ⵉⵜⵜⵡⴰⵙⵙⴻⵏ ⴰⵎ ⵢⵉⵊⵊⴻⵏ ⵉⵙⵙⴳⴻⵄⵄⴰⴷ ⵛⵛⵡⴰⵇⴰⵔ ⴷⵉ ⵛⴱⴰⵔⵇ ⵉⵇⵇⵏⴻⵏ, 
ⵓ ⵅⴻⵏⵏⵉ ⴰⵔⵥⵉⵏ ⵎⴰⵔⵔⴰ ⵉⵏⵇⴰⵛⴻⵏ ⵏⵏⴻⵙ ⵊⵎⵉⵄ, ⵙ ⵛⵛⴰⵇⵓⵔ ⴷ ⵉⴼⴹⵉⵙⴻⵏ. 
ⵏⵉⵜⵏⵉ ⵇⵇⴻⴷⴻⵏ ⵜⵉⵎⴻⵙⵙⵉ ⵉ ⵜⵣⴰⵡⵉⵢⵢⵉⵏ ⵏⵏⴻⵛ ⵉⵇⴻⴷⴷⵙⴻⵏ, ⴰⵇⴰ ⵄⴰⵔⵔⴰⵏ ⵜⴰⵣⴻⴷⴷⵉⵖⵜ ⵏ ⵢⵉⵙⴻⵎ ⵏⵏⴻⵛ ⴰⵍ ⵜⴰⵎⵎⵓⵔⵜ. 
ⵏⵉⵜⵏⵉ ⵏⵏⴰⵏ ⴷⴻⴳ ⵡⵓⵍ ⵏⵙⴻⵏ: “ⴻⵊⵊ ⴰⵏⴻⵖ ⴰⴷ ⵜⴻⵏⵜ ⵏⴰⵔⴻⴷⴷⴻⴵ ⵎⴰⵔⵔⴰ!” ⴰⵎⵎⵓ ⵉ ⵙⵙⴰⵔⵖⴻⵏ ⵏⵉⵜⵏⵉ ⵎⴰⵔⵔⴰ ⵉⵎⵓⵛⴰⵏ ⵏ ⵓⵎⵙⴰⴳⴰⵔ ⵏ ⴰⵔⴻⴱⴱⵉ ⴷⵉ ⵜⴻⵎⵎⵓⵔⵜ. 
ⵍⴻⵄⵍⴰⵎⴰⵜ ⵏⵏⴻⵖ ⵡⴰⵔ ⵜⴻⵏⵜ ⵏⴻⵜⵜⵡⵉⵍⵉ ⵄⴰⴷ, ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⵓⵏⴰⴱⵉ ⵄⴰⴷ, ⵓⵛⴰ ⵓⵍⴰ ⴷ ⵉⵊⵊ ⵊⴰⵔ ⴰⵏⴻⵖ ⵉⵙⵙⴻⵏ ⴰⵍ ⵎⴻⵍⵎⵉ ⵄⴰⴷ. 
ⴰⵍ ⵎⴻⵍⵎⵉ, ⴰ ⴰⵔⴻⴱⴱⵉ, ⴰⴷ ⵣⵣⴰⵢⴻⴽ ⵉⵙⵜⴻⵀⵣⴰ ⵡⴻⵏⵏⵉ ⵉⵃⴻⵚⵚⴰⵔⴻⵏ? ⵎⴰ ⴰⴷ ⵉⵛⴻⵇⵇⴻⴼ ⵍⴻⵄⴷⵓ ⵉ ⵍⴻⴱⴷⴰ ⴷⴻⴳ ⵢⵉⵙⴻⵎ ⵏⵏⴻⵛ? 
ⵎⴰⵢⴻⵎⵎⵉ ⵉ ⵜᵉⵜⵜⴻⴳⴳⴻⴷ ⴰⴷ ⴷⴰⵢⵏⴻⵖ ⵉⵙⵎⴻⵃ ⴰⴼⵓⵙ ⵏⵏⴻⵛ, ⴰⴼⵓⵙ ⵏⵏⴻⵛ ⴰⴼⵓⵙⵉ? ⵙⵓⴼⴼⵓⵖ ⵉ-ⵜ ⵣⴻⴳ ⵡⴻⵃⵙⵉⵏ ⵏ ⵓⴱⴰⵔⵜⴻⵙⵙⵓ ⵏⵏⴻⵛ, ⵇⴹⴰ ⵅⴰⵙⴻⵏ. 
ⵣⴻⴳ ⵡⴻⵛⵃⴰⵍ ⵓⵢⴰ ⴰⵇⴰ ⴰⵔⴻⴱⴱⵉ ⴷ ⴰⵊⴻⴵⵉⴷ ⵉⵏⵓ. ⵏⴻⵜⵜⴰ ⴷ ⵡⴻⵏⵏⵉ ⵉ ⴷⴷ-ⵉⵜⵜⴰⵡⵢⴻⵏ ⵉⵙⴻⵏⵊⴰⵎⴻⵏ ⴷⵉ ⵍⵡⴻⵙⵜ ⵏ ⵜⴻⵎⵎⵓⵔⵜ. 
ⵙ ⵜⵣⴻⵎⵎⴰⵔ ⵏⵏⴻⵛ ⵜⴼⴻⵜⵇⴻⴷ ⵍⴻⴱⵃⴰⵔ, ⵉⵣⴻⴵⵉⴼⴻⵏ ⵏ ⵍⵀⴰⵢⵛⴰⵜ ⵜⴻⴷⴷⵣⴻⴷ ⵉ-ⵜⴻⵏ ⵅ ⵡⴰⵎⴰⵏ. 
ⵛⴻⴽ ⵜⵍⴻⴱⵣⴻⴷ ⵉⵣⴻⴵⵉⴼⴻⵏ ⵏ ‘ⵍⵉ$ⵉⵢⴰⵜⴰⵏ’, ⵜⴻⵡⵛⵉⴷ ⵉ-ⵜ ⴷ ⵎⴰⵛⵛⴰ ⵉ ⵍⴻⵡⵃⵓⵛ ⵏ ⵍⴻⵅⵍⴰ. 
ⵛⴻⴽ ⵜⴼⴻⴵⵇⴻⴷ ⵍⵄⵓⵏⵚⴰⵔ ⴷ ⵜⴻⵖⵣⴰⵔⵜ, ⵛⴻⴽ ⵜⴻⵙⵙⵉⵥⵖⴻⴷ ⵉⵖⴻⵣⵔⴰⵏ ⵉⵜⵜⴰⵣⵣⵍⴻⵏ ⴱⵍⴰ ⵇⴻⵟⵟⵓ. 
ⴰⵙⵙ ⵏⵏⴻⵛ, ⵏⵏⴻⵛ ⵓⵍⴰ ⴷ ⴵⵉⵍⴻⵜ, ⵛⴻⴽ ⵜⴻⴳⴳⵉⴷ ⴷⵉⵏ ⵜⴰⴼⴰⵡⵜ ⴷ ⵜⴼⵓⵛⵜ. 
ⵛⴻⴽ ⵜⴻⵙⵙⵎⴻⵜⵏⴻⴷ ⵎⴰⵔⵔⴰ ⵉⵢⵎⵉⵔⴻⵏ ⵏ ⵜⴻⵎⵎⵓⵔⵜ, ⴰⵏⴻⴱⴷⵓ ⴷ ⵜⴳⴻⵔⵙⵜ ⴰⵇⴰ ⵜⴻⴳⴳⵉⴷ ⴰⵙⴻⵏ ⵜⵉⴼⵔⴰⵙ ⵏⵙⴻⵏ. 
ⵄⵇⴻⵍ ⵅ ⵎⴰⵏ ⴰⵢⴰ: ⵍⴻⵄⴷⵓ ⵉⵙⵙⴻⵃⵇⴰⵔ ⵙⵉⴷⵉ, ⵉⵊⵊ ⵏ ⵍⴳⴻⵏⵙ ⴰⴱⵓⵀⴰⵍⵉ ⵉⵛⴻⵇⵇⴻⴼ ⴷⴻⴳ ⵢⵉⵙⴻⵎ ⵏⵏⴻⵛ. 
ⵡⴰⵔ ⵜⵜⵉⵛ ⵍⴻⵄⵎⴰⵔ ⵏ ⵜⴻⵊⵍⵉⵍⵍⴻⵃⵜ ⵏⵏⴻⵛ ⵉ ⵍⴻⵡⵃⵓⵛ, ⵡⴰⵔ ⵜᵉⵜⵜⵓ ⵉ ⵍⴻⴱⴷⴰ ⵜⵓⴷⴰⵔⵜ ⵏ ⵍⵎⵓⵙⴰⴽⵉⵏ ⵏⵏⴻⵛ. 
ⵅⵣⴰⵔ ⵖⴰⵔ ⵍⵄⴰⵀⴷ, ⵎⴰⵖⴰⵔ ⴷⴻⴳ ⵉⵎⵓⵛⴰⵏ ⵏ ⵟⵟⵍⴰⵎ ⴷⵉ ⵜⴻⵎⵎⵓⵔⵜ ⴰⵇⴰ ⴷⴰⵢⵙⴻⵏ ⵜⵓⴷⵔⵉⵏ ⵄⴻⵎⵎⴰⵔⴻⵏⵜ ⵙ ⵍⵄⵓⵏⴼ. 
ⵡⴰⵔ ⵜⵜⴻⵊⵊⵉ ⵡⴻⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ ⴰⴷ ⴷⴷ-ⵉⵄⵇⴻⴱ ⵙ ⵓⵙⴻⴹⵃⵉ, ⴻⵊⵊ ⵍⵎⴻⵙⴽⵉⵏ ⴷ ⵓⵎⴻⵣⵍⴰⴹ ⴰⴷ ⵚⴻⴱⴱⵃⴻⵏ ⵉⵙⴻⵎ ⵏⵏⴻⵛ. 
ⴽⴽⴰⵔ ⴱⴻⴷⴷ, ⴰ ⴰⵔⴻⴱⴱⵉ, ⴱⴻⵍⵍⴻⵄ ⴷⴷⴻⵄⵡⴻⵜ ⵏⵏⴻⵛ, ⵅⴻⵎⵎ ⵎⴰⵎⵎⴻⵛ ⵛⴻⴽ ⵉⵙⵙⴻⵃⵇⴰⵔⴰⵏ ⵉⴱⵓⵀⴰⵍⵉⵢⵢⴻⵏ ⴰⵙⵙ ⵉⵎⵓⵏ. 
ⵡⴰⵔ ⵜⵜᵉⵜⵜⵓ ⵛⴰ ⴰⵖⵓⵢⵢⵉ ⵏ ⵉⵖⵔⵉⵎⴻⵏ ⵏⵏⴻⵛ, ⴰⵙⴱⵓⵄⴰⵔ ⵏ ⵢⵉⵏⵏⵉ ⵉ ⵅⴰⴽ ⵉⵖⴻⵡⵡⵖⴻⵏ ⵉⵜⵜⴳⴻⵄⵄⴰⴷ ⵖⴰⵔ ⵓⵊⴻⵏⵏⴰ ⴱⵍⴰ ⴰⵇⴻⵟⵟⵓ. 
