﻿ⵉⵥⴻⵀⵀⵉⴷⴻⵏ.
73.
ⴰⵣⴻⵀⵀⴻⴷ ⵏ ⴰⵙⴰⴼ. ⵡⴰⵀ, ⴰⵔⴻⴱⴱⵉ ⴷ ⴰⵚⴻⴱⵃⴰⵏ ⵉ ⵉⵙⵔⴰⵉⵍ, ⵉ ⵢⵉⵏⵏⵉ ⵙ ⵡⵓⵍ ⵉⵚⴼⴰⵏ. 
ⵏⴻⵛⵛ ⵎⴰⵛⴰ, ⵄⵍⴰⵃⴰⵍ ⵜⵓⵖⴰ ⵉⴹⴰⵔⴻⵏ ⵉⵏⵓ ⴼⴼⵖⴻⵏ ⵣⴻⴳ ⵡⴻⴱⵔⵉⴷ, ⵡⴰⵔ ⵉⵇⵇⵉⵎ ⵡⴰⵍⵓ ⴰⴷ ⵃⵍⵓⴵⴹⴻⵏ ⵉⵚⵓⵔⴰⴼ ⵉⵏⵓ. 
ⵎⴰⵖⴰⵔ ⵜⵓⵖⴰ ⵓⵙⵎⴻⵖ ⵣⴻⴳ ⵉⴱⵓⵀⴰⵍⵉⵢⵢⴻⵏ, ⵍⴰⵎⵉ ⵥⵔⵉⵖ ⴰⵇⴰ ⵉⵄⴻⴼⴼⴰⵏⴻⵏ ⵎⵍⵉⵃ ⵉ ⴵⴰⵏ. 
ⵎⴰⵖⴰⵔ ⵡⴰⵔ ⴷⵉⵏ ⴱⵓ ⵉⵙⴻⵖⵡⴰⵏ ⵖⴰⵔ ⵍⵎⴻⵡⵜ ⵏⵙⴻⵏ, ⵚⵚⵓⵍⵟⴰ ⵏⵙⴻⵏ ⴰⵇⴰ ⵉⴱⴻⴷⴷ ⵏⵉⵛⴰⵏ. 
ⵏⵉⵜⵏⵉ ⵡⴰⵔ ⵛⴰⵔⵔⵛⴻⵏ ⴷⵉ ⵜⴰⵎⴰⵔⴰ ⵏ ⵉⵡⴷⴰⵏ, ⵡⴰⵔ ⵜⵜⵡⴰⵍⴻⵇⵇⴼⴻⵏ ⵙ ⵍⵎⵓⵚⵉⴱⴰⵜ ⴰⵎ ⵡⴻⵣⵢⴻⵏ ⵏⵏⴻⵖⵏⵉ ⵏ ⴱⵏⴰⴷⴻⵎ. 
ⵙ ⵓⵢⴰ ⵜᵉⵜⵜⴰⵢⴻⵍ ⴰⵙⴻⵏ-ⴷⴷ ⵏⵏⴼⴰⵅⴻⵜ ⴰⵎ ⵜⵙⴻⴷⴷⴻⵛⵜ ⵖⴰⵔ ⵢⵉⵔⵉ ⵏⵙⴻⵏ ⵓⵛⴰ ⵉⵍⴻⵃⵃⴻⴼ ⴰⵙⴻⵏ ⵍⵄⵓⵏⴼ ⴰⵎ ⵢⵉⵊⵊ ⵏ ⵡⴰⵔⵔⵓⴹ. 
ⵜⵉⵟⵟⴰⵡⵉⵏ ⵏⵙⴻⵏ ⵜⵜⵡⴰⴼⴼⵖⴻⵏⵜ ⵣⵉ ⵜⴰⴷⵓⵏⵜ, ⵏⵉⵜⵏⵉ ⵄⴻⴷⴷⵓⵏ ⵍⴻⵅⵢⴰⵍⴰⵜ ⵏ ⵡⵓⵍ ⵏⵙⴻⵏ. 
ⵏⵉⵜⵏⵉ ⵙⵜⴻⵀⵣⴰⵏ ⵙ ⴱⵟⴰⵢⵟⴰⵢ ⵙⵙⴰⵡⴰⵍⴻⵏ ⵅ ⵍⵖⴰⵔ, ⵅ ⴷⴷⴻⴵ, ⴰⵇⴰ ⵙⵙⴰⵡⴰⵍⴻⵏ ⵣⵉ ⵙⴻⵏⵏⴻⵊ. 
ⵏⵉⵜⵏⵉ ⴰⵔⴻⵣⵣⵎⴻⵏ ⵓⵇⴻⵎⵎⵓⵎ ⵏⵙⴻⵏ ⵅ ⵓⵊⴻⵏⵏⴰ, ⵍⵀⴰⵔⴷ ⵏⵙⴻⵏ ⵉⴳⴳⵓⵔ ⵅ ⵜⴻⵎⵎⵓⵔⵜ. 
ⵙ ⵓⵢⴰ ⵉⵏⵏⴻⵇⵍⴻⴱ ⴷⴷⴰⴱ ⵏⵙⴻⵏ ⵏ ⵍⴳⴻⵏⵙ ⵖⴰⵔ ⴷⴰ, ⴰⵎⴰⵏ ⵉⴼⴻⵢⵢⴹⴻⵏ ⵜⵜⵙⴻⴽⴽⴰⴼⴻⵏ ⵜⴻⵏ ⵏⵉⵜⵏⵉ. 
ⵇⵇⴰⵔⴻⵏ: “ⵎⴰⵎⵎⴻⵛ ⵉ ⵖⴰ ⵉⵙⵙⴻⵏ ⴰⵔⴻⴱⴱⵉ?” “ⵎⴰⵎⵎⴻⵛ ⵉ ⵖⴰ ⵉⴳⴳ ⵓⵎⵄⵓⴵⵉ ⵅ ⴽⵓⵍⵛⵉ ⴰⴷ ⵉⵙⵙⴻⵏ?” 
ⵅⵣⴰⵔ, ⴰⵇⴰ ⴰⵜⴻⵏ ⴷ ⵉⵄⴻⴼⴼⴰⵏⴻⵏ! ⵄⴰⴷ ⴷⴷⴰⵔⴻⵏ ⵍⴻⴱⴷⴰ ⴷⵉ ⵍⵀⵓⴷⵏⴻⵜ, ⵙⵙⴻⵡⵙⵉⵄⴻⵏ ⴰⴳⵍⴰ ⵏⵙⴻⵏ. 
ⵙ ⵜⵉⴷⴻⵜⵜ, ⴰⵎⴻⵏⵏⵉ ⵡⴰⵀⴰ ⵙⵙⵉⵣⴻⴷⴳⴻⵖ ⵓⵍ ⵉⵏⵓ ⵓ ⵙⵙⵉⵔⴷⴻⵖ ⵉⴼⴰⵙⵙⴻⵏ ⵉⵏⵓ ⴷⵉ ⵜⴰⵣⴷⵓⴳⵉ. 
ⴰⵙⵙ ⴰⵎ ⵉⵎⵓⵏ ⵏⴻⵛⵛ ⵜⵉⵢⵢⵉⵜⴰ ⴷⴰⵢⵉ, ⴽⵓⵍ ⵚⵚⴱⴻⵃ ⵜᵉⵜⵜⵡⴰⵔⴻⴱⴱⵉⵖ. 
ⵎⴰⵍⴰ ⵏⵏⵉⵖ: “ⵓⵍⴰ ⴷ ⵏⴻⵛⵛ ⴰⴷ ⵙⵙⵉⵡⵍⴻⵖ ⴰⵎⵎⵓ!”, ⵅⵣⴰⵔ, ⵉⵍⵉ ⵖⴷⴰⵔⴻⵖ ⵊⵊⵉⵍ ⵏ ⵉⵃⴻⵏⵊⵉⵔⴻⵏ ⵏⵏⴻⵛ. 
ⵉⵜⵜⵍⵉⵖ ⴰⵢⵉ ⵣⴻⵎⵎⴰⵔⴻⵖ ⴰⴷ ⴼⴻⵀⵎⴻⵖ ⴰⵢⴰ, ⵎⴰⵛⴰ ⴷⵉ ⵜⵉⵟⵟⴰⵡⵉⵏ ⵉⵏⵓ ⵉⵜⵜⴰⵡⵉ-ⴷⴷ ⵎⵖⵉⵔ ⵜⴰⵎⴰⵔⴰ ⵉⴱⴻⵟⵟⵍⴻⵏ, 
ⴰⵍⴰⵎⵉ ⵓⴷⴼⴻⵖ ⵖⴰⵔ ⵜⵣⴰⵡⵉⵢⵢⵉⵏ ⵉⵇⴻⴷⴷⵙⴻⵏ ⵏ ⴰⵔⴻⴱⴱⵉ, ⵓⵛⴰ ⵃⴻⴽⴽⴰⵔⴻⵖ ⵉ ⵜⵏⴻⴳⴳⴰⵔⵓⵜ ⵏⵙⴻⵏ. 
ⵡⴰⵀ, ⵛⴻⴽ ⵜⴻⵙⵙⵔⵓⵙⵉⴷ ⵜⴻⵏ ⵅ ⵉⵎⵓⵛⴰⵏ ⵉⵜⵜⴻⵃⵔⵓⴵⵓⴹⴻⵏ, ⵛⴻⴽ ⵜⵖⴻⵟⵟⵍⴻⴷ ⵜⴻⵏ ⴷ ⵍⵅⵉⵔⴱⴰⵜ. 
ⵎⴰⵎⵎⴻⵛ ⴷⴻⵡⵍⴻⵏ ⴷ ⵉⵛⵜ ⵏ ⵍⵇⴻⵛⵄⴻⵜ ⵏ ⵓⵏⴻⵅⵍⵉⵄ ⴷⴻⴳ ⵉⵛⵜ ⵏ ⵜⴻⵛⵜⵉ, ⵜⵜⵡⴰⵎⵃⴰⵏ ⵓ ⵜⵜⵡⴰⵇⴹⴰⵏ ⵙ ⵉⵛⴻⵍⵡⴰⵡⴻⵏ ⵉⵙⵙⴰⴳⴳⵯⴰⴷⴻⵏ. 
ⴰⵎ ⵜⴰⵔⵊⵉⵜ ⵖⴰⵔ ⵓⴼⴰⵇⵉ, ⴰ ⵙⵉⴷⵉ ⵉⵏⵓ, ⴰⵎⵎⵓ ⵉ ⵖⴰ ⵜⴻⵙⵙⴻⵃⵇⴰⵔⴻⴷ ⴰⴱⴻⵢⵢⴻⵏ ⵏ ⵍⴻⵅⵢⴰⵍ ⵏⵙⴻⵏ ⵅⵎⵉ ⴷⴷ ⵖⴰ ⵜⴼⴰⵇⴻⴷ. 
ⵍⴰⵎⵉ ⵉⵜⵜⵡⴰⵙⵙⴰⵔⵣⴻⴳ ⵓⵍ ⵉⵏⵓ ⴷⵉ ⵍⵡⴻⵇⵜ ⵏⵏⵉ, ⵉⵜⵜⴻⵊⵊⵓ ⴰⵢⵉ ⵍⴻⵃⵔⵉⵇ ⴷⵉ ⵜⵉⵥⵥⴰⵍ ⵉⵏⵓ. 
ⵏⴻⵛⵛ ⵜⵓⵖⴰ ⴰⵢⵉ ⴷ ⴰⵇⴻⴼⴼⵓⵃ, ⵜⵓⵖⴰ ⴰⵢⵉ ⵖⴰⵔⴻⴽ ⴰⵎ ⵢⵉⵊⵊ ⵏ ⵍⵡⴻⵃⵛ ⴱⵍⴰ ⵍⴻⵄⵇⴻⵍ. 
ⵄⴰⴷ ⵎⴰⵛⴰ ⵍⴻⴱⴷⴰ ⴰⵇⴰ ⴰⵢⵉ ⵖⴰⵔⴻⴽ, ⵛⴻⴽ ⵜᵉⵟⵟⴼⴻⴷ ⴰⵢⵉ ⵣⴻⴳ ⵓⴼⵓⵙ ⴰⴼⵓⵙⵉ ⵉⵏⵓ. 
ⵛⴻⴽ ⴰⴷ ⴰⵢⵉ ⵜⴳⴻⵡⵡⴷⴻⴷ ⵙ ⵛⵛⵡⴰⵔ ⵏⵏⴻⵛ ⵓ ⴰⵡⴰⵔⵏⵉ ⵎⴰⵏ ⴰⵢⴰ ⴰⴷ ⴰⵢⵉ ⵜⴻⴽⵙⵉⴷ ⵖⴰⵔ ⵓⵄⵓⴵⵉ ⵏⵏⴻⵛ. 
ⵎⴰⵏ ⵡⴻⵏ ⵉ ⵖⴰⵔⵉ ⴷⴻⴳ ⵓⵊⴻⵏⵏⴰ ⵃⴰⵛⴰ ⵛⴻⴽ? ⴰⴽⵉⴷⴻⴽ ⵡⴰⵔ ⵜⵣⴻⵎⵎⴰⵔ ⴰⴷ ⴰⵢⵉ ⵜⴰⵔⴹⴰ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⴷⵉ ⵜⴻⵎⵎⵓⵔⵜ. 
ⵎⴰⵍⴰ ⴰⵔⵔⵉⵎⴻⵜ ⴷ ⵡⵓⵍ ⵉⵏⵓ ⵙⴻⵎⵎⵃⴻⵏ ⴷⴰⵢⵉ, ⵅⴻⵏⵏⵉ ⴰⵔⴻⴱⴱⵉ ⴷ ⵜⴰⵚⴹⴰⵔⵜ ⵏ ⵡⵓⵍ ⵉⵏⵓ ⴷ ⵜⴰⵙⵖⴰⵔⵜ ⵉⵏⵓ ⵉ ⵍⴻⴱⴷⴰ. 
ⵎⴰⵖⴰⵔ ⵅⵣⴰⵔ, ⵉⵏⵏⵉ ⵣⵣⴰⵢⴻⴽ ⵉⵜⵜⴻⴳⴳⵯⴻⵊⴻⵏ ⴰⴷ ⴼⵏⴰⵏ. ⵛⴻⴽ ⴰⴷ ⵜⴽⴻⵃⵃⴻⴹⴻⴷ ⴽⵓⵍ ⵉⵊⵊ ⵡⴻⵏⵏⵉ ⵅⴰⴽ ⵉⵜⵜⵃⴻⵢⵢⴰⴷⴻⵏ ⵓⵎⵉ ⵉ ⵖⴰ ⵉⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ, 
ⵏⴻⵛⵛ ⵎⴰⵛⴰ, ⵍⴷⴰⵙⴻⵜ ⵉ ⴰⵔⴻⴱⴱⵉ ⴷ ⵎⵍⵉⵃ ⵉ ⵏⴻⵛⵛ. ⵏⴻⵛⵛ ⴳⴳⵉⵖ ⵙⵉⴷⵉ ⵉⵏⵓ, ⵙⵉⴷⵉ, ⴷ ⴰⵎⵛⴰⵏ ⵉⵏⵓ ⵏ ⵜⴰⵔⴻⵡⵍⴰ, ⵃⵉⵎⴰ ⴰⴷ ⴱⴰⵔⵔⵃⴻⵖ ⵎⴰⵔⵔⴰ ⵜⵉⵎⴻⴳⴳⴰ ⵏⵏⴻⵛ. 
