﻿ⵉⵥⴻⵀⵀⵉⴷⴻⵏ.
71.
ⴰⵔⴻⴽⴽⵡⴰⵍⴻⵖ ⵖⴰⵔⴻⴽ, ⴰ ⵙⵉⴷⵉ, ⴻⵊⵊ ⴰⵢⵉ ⵄⴻⵎⵎⴰⵔⵚ ⵡⴰⵔ ⵜⵜⵙⴻⴹⵃⵉⵖ ⵉ ⵍⴻⴱⴷⴰ. 
ⴼⴻⴽⴽ ⴰⵢⵉ ⵙ ⵜⵙⴻⴳⴷⴰ ⵏⵏⴻⵛ ⵓ ⴰⵔⵅⵓ ⴰⵢⵉ. ⴰⵔⵔ-ⴷⴷ ⵖⴰⵔⵉ ⴰⵎⴻⵣⵣⵓⵖ ⵏⵏⴻⵛ ⵓ ⵙⴻⵏⵊⴻⵎ ⴰⵢⵉ. 
ⵉⵍⵉ ⴷ ⵉⵛⵜ ⵏ ⵜⴻⵚⴹⴰⵔⵜ ⵉ ⵜⵣⴻⴷⴷⵉⵖⵜ ⵉ ⵏⴻⵛⵛ, ⵃⵉⵎⴰ ⴰⴷ ⵖⴰⵔⴻⵙ ⴷⴷ-ⴰⵙⴻⵖ ⵍⴻⴱⴷⴰ. ⵛⴻⴽ ⵜⵡⴻⵚⵚⵉⴷ ⵃⵉⵎⴰ ⴰⴷ ⵜⵜⵡⴰⵙⵙⵏⴻⵊⵎⴻⵖ, ⵎⴰⵖⴰⵔ ⵛⴻⴽ ⴷ ⵜⴰⵙⴹⴰⵔⵜ ⵉⵏⵓ ⴷ ⵍⴱⵓⵔⵊ ⵉⵏⵓ. 
ⴰⵔⴻⴱⴱⵉ ⵉⵏⵓ, ⵙⴻⵏⵊⴻⵎ ⴰⵢⵉ ⵣⴻⴳ ⵓⴼⵓⵙ ⵏ ⵓⵄⴻⴼⴼⴰⵏ, ⵣⴻⴳ ⵓⴼⵓⵙ ⵏ ⵎⵎⵉⵙ ⵏ ⵍⵎⵓⵄⵚⵉⵢⵢⴻⵜ ⵓ ⵣⵉ ⴱⵓ-ⵖⴻⵣⵣⵓ. 
ⵎⴰⵖⴰⵔ ⵛⴻⴽ ⴷ ⵍⴰⵢⴰⵙ ⵉⵏⵓ, ⵙⵉⴷⵉ ⵉⵏⵓ, ⵙⵉⴷⵉ, ⵛⴻⴽ ⴷ ⴰⵜⴻⵛⵍⵉ ⵉⵏⵓ ⵣⵉ ⵜⴻⵎⵥⵉ ⵉⵏⵓ. 
ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ, ⵜⵓⵖⴰ ⴰⵢⵉ ⵄⴻⵎⵎⴷⴻⵖ ⵅⴰⴽ. ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ, ⴰⵇⴰ ⵛⴻⴽ ⴷ ⵡⴻⵏⵏⵉ ⴷ ⴰⵢⵉ ⵉⵃⵓⵣⴻⵏ, ⵏⴻⵛⵛ ⵚⴻⴱⵃⴻⵖ ⵛⴻⴽ ⵍⴻⴱⴷⴰ. 
ⵉ ⵡⴰⵟⵟⴰⵙ ⵏⴻⵛⵛ ⴰⵎ ⵢⵉⵛⵜ ⵏ ⵍⴻⵄⵍⴰⵎⴻⵜ ⵏ ⵍⴻⵄⵊⴻⴱ, ⵎⴰⵛⴰ ⵛⴻⴽ ⴷ ⴰⵎⵛⴰⵏ ⵉⵏⵓ ⵉⵊⵀⴻⴷ ⵉ ⵜⴰⵔⴻⵡⵍⴰ. 
ⴻⵊⵊ ⴰⵇⴻⵎⵎⵓⵎ ⵉⵏⵓ ⴰⴷ ⵉⵛⵛⵓⵔ ⵙ ⵓⵚⴻⴱⴱⴻⵃ ⵏⵏⴻⵛ, ⴰⵙⵙ ⵉⵎⵓⵏ ⵙ ⵛⵛⴰⵏ ⵏⵏⴻⵛ. 
ⵡⴰⵔ ⵅⴰⴼⵉ ⵜⵜⵎⴻⵏⴹⴰⵔ ⴷⴻⴳ ⵡⵓⵙⵙⴰⵏ ⵏ ⵜⴻⵡⵙⴰⵔ ⵉⵏⵓ, ⵡⴰⵔ ⴷ ⴰⵢⵉ ⵙⴻⵎⵎⴻⵃ ⵎⴰⵍⴰ ⵊⵊⴻⵀⴷ ⵉⵏⵓ ⵉⵔⵓⵃ. 
ⵎⴰⵖⴰⵔ ⵍⵄⴻⴷⵢⴰⵏ ⵉⵏⵓ ⵙⵙⴰⵡⴰⵍⴻⵏ ⵅⴰⴼⵉ, ⵉⵏⵏⵉ ⵢⴰⵔⴻⵣⵣⵓⵏ ⵍⴻⵄⵎⴰⵔ ⵉⵏⵓ, ⵎⵛⴰⵡⴰⵔⴻⵏ ⵅⴰⴼⵉ ⵊⵎⵉⵄ. 
ⵏⵉⵜⵏⵉ ⵇⵇⴰⵔⴻⵏ: “ⴰⵔⴻⴱⴱⵉ ⵉⵙⵎⴻⵃ ⴷⴰⵢⴻⵙ. ⴹⴼⴰⵔⴻⵎ ⵜ ⵓ ⵎⴻⵏⵄⴻⵎ ⵜ, ⵎⴰⵖⴰⵔ ⵡⴰⵔ ⴷⵉⵏ ⵡⴻⵏⵏⵉ ⵉ ⵖⴰ ⵉⴼⴻⴽⴽⴻⵏ. 
ⴰ ⴰⵔⴻⴱⴱⵉ, ⵡⴰⵔ ⵜⵜⵖⵉⵎⵉ ⵜⵉⴳⴳⵯⴻⵊⴻⴷ ⵅⴰⴼⵉ, ⴰ ⴰⵔⴻⴱⴱⵉ ⵉⵏⵓ, ⴻⵡⵛ ⴰⵢⵉ ⴷⴻⵖⵢⴰ ⴰⴼⵓⵙ. 
ⴻⵊⵊ ⵉⵖⵔⵉⵎⴻⵏ ⵏ ⵜⵓⴷⴰⵔⵜ ⵉⵏⵓ ⴰⴷ ⵜⵜⵡⴰⵙⴻⴹⵃⴰⵏ ⵓ ⴰⴷ ⵜⵜⵡⴰⵛⵛⴻⵏ, ⴻⵊⵊ ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴰⵢⵉ ⴳⴳⴻⵏ ⵍⵖⴰⵔ ⴰⴷ ⵜⵜⵡⴰⴷⵍⴻⵏ ⵙ ⵓⵙⴻⵃⵇⴰⵔ ⴷ ⵍⴻⴼⴹⵉⵃⴻⵜ. 
ⵏⴻⵛⵛ ⵎⴰⵛⴰ ⴰⴷ ⵇⵇⵉⵎⴻⵖ ⵜⵜⵔⴰⵊⵉⵖ ⵛⴻⴽ ⵍⴻⴱⴷⴰ, ⵓ ⴰⴷ ⴰⵔⵏⵉⵖ ⵄⴰⴷ ⵖⴰⵔ ⵓⵚⴻⴱⴱⴻⵃ ⵏⵏⴻⵛ. 
ⴰⵇⴻⵎⵎⵓⵎ ⵉⵏⵓ ⴰⴷ ⵉⴱⴰⵔⵔⴻⵃ ⵙ ⵜⵙⴻⴳⴷⴰ ⵏⵏⴻⵛ, ⴰⵙⴻⵏⵊⴻⵎ ⵏⵏⴻⵛ, ⴰⵙⵙ ⵉⵎⵓⵏ, ⵎⴰⵖⴰⵔ ⵡⴰⵔ ⵙⵙⵉⵏⴻⵖ ⵍⵇⴻⴷⴷ ⵏⵏⴻⵙ. 
ⵏⴻⵛⵛ ⴰⴷ ⴷⴷ-ⴰⵙⴻⵖ ⵙ ⵜⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ ⵏ ⵙⵉⴷⵉ ⵉⵏⵓ, ⵙⵉⴷⵉ, ⴰⴷ ⵉⴷⴰⵔⴻⵖ ⵜⴰⵙⴻⴳⴷⴰ ⵏⵏⴻⵛ, ⵎⵖⵉⵔ ⵜⴻⵏⵏⵉ ⵏⵏⴻⵛ ⵡⴰⵀⴰ. 
ⴰ ⴰⵔⴻⴱⴱⵉ, ⵛⴻⴽ ⵜⵓⵖⴰ ⵜⴻⵙⵙⴻⵍⵎⴰⴷⴻⴷ ⴰⵢⵉ ⵣⵉ ⵜⴻⵎⵥⵉ ⵉⵏⵓ, ⵓ ⵏⴻⵛⵛ ⴰⵍ ⴰⵙⵙ-ⴰ ⵜⵜⴱⴰⵔⵔⵃⴻⵖ ⵙ ⵍⵎⵓⵄⵊⵉⵣⴰⵜ ⵏⵏⴻⵛ. 
ⴰ ⴰⵔⴻⴱⴱⵉ, ⵡⴰⵔ ⴷ ⴰⵢⵉ ⵙⴻⵎⵎⴻⵃ ⵛⴰ, ⵡⴰⵅⵅⴰ ⵡⵙⴰⵔⴻⵖ ⵛⴰⴱⴻⵖ, ⴰⵍ ⵖⴰ ⵃⴰⵊⵉⵖ ⵉ ⵊⵊⵉⵍ-ⴰ ⵅ ⵜⵎⴻⴳⴳⴰ ⵏ ⵓⴼⵓⵙ ⵏⵏⴻⵛ ⵓⵍⴰ ⵅ ⵜⵎⴻⴳⴳⴰ ⵏⵏⴻⵛ ⵜⵉⵎⴻⵇⵇⵔⴰⵏⵉⵏ, ⵉ ⵎⴰⵔⵔⴰ ⵎⵉⵏ ⵉ ⴷⴷ ⵖⴰ ⵢⴰⵙⴻⵏ. 
ⴰ ⴰⵔⴻⴱⴱⵉ, ⵜⴰⵙⴻⴳⴷⴰ ⵏⵏⴻⵛ ⵜⵉⵡⴻⴹ ⴰⵍ ⵙⴻⵏⵏⴻⵊ ⵇⴰⵄ, ⵎⴰⵖⴰⵔ ⵛⴻⴽ ⵜⴻⴳⴳⵉⴷ ⵜⵉⵎⴻⴳⴳⴰ ⵜⵉⵎⴻⵇⵇⵔⴰⵏⵉⵏ, ⴰ ⴰⵔⴻⴱⴱⵉ, ⵎⴰⵏ ⵡⴻⵏ ⵉⴵⴰⵏ ⴰⵎ ⵛⴻⴽ! 
ⴰⵇⴰ ⵛⴻⴽ ⵜⴻⵊⵊⵉⴷ ⵜⴻⴽⴽⴰ ⵅⴰⴼⵉ ⴰⵟⵟⴰⵙ ⵏ ⵍⴻⵃⵚⴰⵔⴰⵜ ⴷ ⵍⵖⴰⵔ, ⵎⴰⵛⴰ ⵡⴰⵅⵅⴰ ⴰⵎⴻⵏⵏⵉ ⵛⴻⴽ ⴰⴷ ⴰⵢⵉ ⵜⴻⵙⵙⴻⴷⴷⴰⵔⴻⴷ ⵄⴰⵡⴻⴷ, ⵛⴻⴽ ⴰⴷ ⴰⵢⵉ ⵜⴻⵙⵙⵓⴼⴼⵖⴻⴷ ⵣⴻⴳ ⵡⴰⵎⴰⵏ ⵉⵀⴻⵡⵍⴻⵏ ⵏ ⵜⴻⵎⵎⵓⵔⵜ. 
ⵛⴻⴽ ⴰⴷ ⵜⴰⵔⵔⵉⴷ ⵍⴻⵎⵖⴰⵔⴻⵜ ⵉⵏⵓ ⴰⴷ ⵜⴻⵎⵖⴰⵔ, ⴰⴷ ⴰⵢⵉ ⴷⴷ-ⵜⴻⵏⵏⴹⴻⴷ ⵙ ⵓⴼⴻⵡⵡⴻⵊ ⵏⵏⴻⵛ. 
ⴰⴷ ⵛⴻⴽ ⵇⴰⴷⵉⵖ ⵄⴰⵡⴻⴷ ⵙ ⵍⵀⴰⵔⴱⴰ, ⵅ ⵍⴰⵎⴰⵏ ⵏⵏⴻⵛ, ⴰ ⴰⵔⴻⴱⴱⵉ, ⴰⴷ ⵛⴻⴽ ⵣⴻⵀⵀⴷⴻⵖ ⵙ ⵍⴳⴰⵎⴱⵔⵉ, ⴰ ⴰⵎⵇⴻⴷⴷⴰⵙ ⵏ ⵉⵙⵔⴰⵉⵍ. 
ⵉⵢⴻⵏⵛⵉⵛⴻⵏ ⵉⵏⵓ ⴰⴷ ⵙⵍⵉⵡⵍⴻⵡⴻⵏ, ⴰⵇⴰ ⴰⴷ ⵣⴻⵀⵀⴷⴻⵖ ⵉ ⵛⴻⴽ, ⵓⵍⴰ ⴷ ⵍⴻⵄⵎⴰⵔ ⵉⵏⵓ ⵏⵏⵉ ⵜⴻⴼⴷⵉⴷ ⵛⴻⴽ. 
ⵓⵍⴰ ⴷ ⵉⵍⴻⵙ ⵉⵏⵓ ⴰⴷ ⵉⵃⴰⵊⴰ ⵅ ⵜⵙⴻⴳⴷⴰ ⵏⵏⴻⵛ ⴰⵙⵙ ⵎⴰⵔⵔⴰ, ⵎⴰⵖⴰⵔ ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴰⵢⵉ ⴳⴳⴻⵏ ⵍⵖⴰⵔ, ⵙⴻⴹⵃⴰⵏ, ⵉⵡⴰ, ⵜⵜⵡⴰⴼⴻⴹⵃⴻⵏ. 
