﻿ⵉⵥⴻⵀⵀⵉⴷⴻⵏ.
69.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ‘ⵜⵍⵉⵍⵍⵉⵛⵉⵏ’. ⵏ ⴷⴰⵡⵓⴷ. 
ⵙⴻⵏⵊⴻⵎ ⴰⵢⵉ, ⴰ ⴰⵔⴻⴱⴱⵉ, ⵎⴰⵖⴰⵔ ⴰⵎⴰⵏ ⵉⵡⴹⴻⵏ ⴰⵢⵉ ⵖⴰⵔ ⵍⴻⵄⵎⴰⵔ ⵉⵏⵓ. 
ⵏⴻⵛⵛ ⵖⴻⴱⴱⵉⵖ ⴷⴻⴳ ⵓⴱⴰⵔⵢⵓⴹ ⵢⵓⴵⴻⵖ, ⵡⴰⵔ ⴷⵉⵏ ⵎⴰⵏⵉ ⵖⴰ ⴱⴻⴷⴷⴻⵖ. ⴰⵇⴰ-ⵢⵉ ⴷⴻⴳ ⵡⴰⵎⴰⵏ ⵢⵓⴵⵖⴻⵏ ⵓ ⵍⵃⴻⵎⵍⴻⵜ ⵜᵉⵜⵜⴰⵣⵣⴻⵍ ⵅⴰⴼⵉ. 
ⵏⴻⵛⵛ ⵓⵃⵍⴻⵖ ⵙ ⵉⵖⵓⵢⵢⴰⵏ, ⵜⵎⵉⵊⵊⴰ ⵉⵏⵓ ⵜⴻⴱⴱⵓⵢⴱⴻⵃ, ⵜⵉⵟⵟⴰⵡⵉⵏ ⵉⵏⵓ ⵇⴹⴰⵏⵜ ⵣⴻⴳ ⵓⵔⴰⵊⵉ ⵅ ⴰⵔⴻⴱⴱⵉ ⵉⵏⵓ. 
ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⵅ ⵡⴰⵍⵓ ⵜⵜⵡⴻⵙⵙⵄⴻⵏ ⵅ ⵓⵛⵓⵡⵡⴰⴼ ⵉ ⵉⴵⴰⵏ ⵅ ⵓⵣⴻⴵⵉⴼ ⵉⵏⵓ. ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴰⵢⵉ ⴰⵔⴻⴷⴷⴵⴻⵏ, ⵍⵄⴻⴷⵢⴰⵏ ⵉⵏⵓ ⵉ ⵅⴰⴼⵉ ⵉⵙⵙⵅⴰⵔⵔⵉⵇⴻⵏ, ⴷⴻⵡⵍⴻⵏ ⵊⴻⵀⵀⴷⴻⵏ. ⵎⵉⵏ ⵡⴰⵔ ⵓⵛⴰⵔⴻⵖ, ⵉⵜⵜⵅⴻⵚⵚⴰ ⴰⵢⵉ ⴰⴷ ⵜⵜ-ⵉ-ⴷⴷ-ⴰⵔⵔⴻⵖ ⵄⴰⴷ. 
ⴰ ⴰⵔⴻⴱⴱⵉ, ⵛⴻⴽ ⵜⴻⵙⵙⵏⴻⴷ ⵜⵓⴱⴱⵓⵀⴻⵍⵢⴰ ⵉⵏⵓ, ⵉⵎⴻⵔⵡⵓⵙⴰ ⵏ ⴷⴷⵏⵓⴱ ⵉⵏⵓ ⵡⴰⵔ ⵅⴰⴽ ⴼⴼⴰⵔⴻⵏ. 
ⴻⵊⵊ ⵉⵏⵏⵉ ⵅⴰⴽ ⵉⵙⵙⵉⵜⵉⵎⴻⵏ, ⵡⴰⵔ ⵜⵜⵙⴻⴹⵃⵉⵏ, ⴰ ⵙⵉⴷⵉ ⵉⵏⵓ, ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴻⵊⵊ ⵉⵏⵏⵉ ⵅⴰⴽ ⵢⴰⵔⴻⵣⵣⵓⵏ, ⵡⴰⵔ ⵣⵣⴰⵢⵉ ⵜⵜⵡⴰⴼⴻⵟⵟⵃⴻⵏ, ⴰ ⴰⵔⴻⴱⴱⵉ ⵏ ⵉⵙⵔⴰⵉⵍ. 
ⵎⴰⵖⴰⵔ ⴷⵉ ⵟⵟⵡⴻⵄ ⵏⵏⴻⵛ ⵉ ⴽⴻⵙⵙⵉⵖ ⴰⵙⴻⵃⵇⴰⵔ, ⴰⵙⴻⴹⵃⵉ ⵉⵍⴻⵃⵃⴻⴼ ⵉ ⵓⵖⴻⵎⴱⵓⴱ ⵉⵏⵓ. 
ⴷⴻⵡⵍⴻⵖ ⴷ ⴰⵖⵔⵉⴱ ⵖⴰⵔ ⴰⵢⵜⵎⴰ, ⵉ ⵉⵃⴻⵏⵊⵉⵔⴻⵏ ⵏ ⵢⴻⵎⵎⴰ ⴷⴻⵡⵍⴻⵖ ⴷ ⴰⴱⴰⵔⵔⴰⵏⵉ. 
ⵎⴰⵖⴰⵔ ⵜⵓⵙⵎⵉ ⵉⵇⴻⴷⴷⵙⴻⵏ ⵉ ⵜⴰⴷⴷⴰⵔⵜ ⵏⵏⴻⵛ ⵜⴻⵛⵛⴰ ⴰⵢⵉ, ⴰⵙⴻⵃⵇⴰⵔ ⵏ ⵢⵉⵏⵏⵉ ⵛⴻⴽ ⵉⵙⵙⴻⵃⵇⴰⵔⴰⵏ ⵉⵡⴹⴰ-ⴷⴷ ⵅⴰⴼⵉ. 
ⵏⴻⵛⵛ ⵔⵓⵖ ⵖⴰⵔ ⵓⵥⵓⵎⵎⵉ ⵏ ⵍⴻⵄⵎⴰⵔ ⵉⵏⵓ, ⵎⴰⵛⴰ ⴰⵢⴰ ⵢⵉⵡⵉ ⴰⵢⵉ-ⴷⴷ ⵄⵍⴰⵎ ⴽⵓⵍ ⴰⵙⴻⵃⵇⴰⵔ. 
ⵏⴻⵛⵛ ⵢⴰⵔⴹⴻⵖ ⵉⵛⵜ ⵏ ⵜⵅⴰⵏⵛⴻⵜ ⵏ ⵡⴻⵛⴹⴰⵏ, ⵎⴰⵛⴰ ⴷⴻⵡⵍⴻⵖ ⴰⵙⴻⵏ ⴷ ⵉⵊⵊ ⵏ ⵍⵎⴰⵜⴰⵍ. 
ⵉⵏⵏⵉ ⵉⵇⵇⵉⵎⴻⵏ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵙⵙⴰⵡⴰⵍⴻⵏ ⵅⴰⴼⵉ, ⵓⵍⴰ ⴷ ⵉⵣⵍⴰⵏ ⵏ ⵢⵉⵏⵏⵉ ⵉⵙⴻⵙⵙⴻⵏ ⵛⵛⵔⴰⴱ. 
ⵏⴻⵛⵛ ⵎⴰⵛⴰ ⵜⵜᵉⵜⵜⴰⵔⴻⵖ ⵖⴰⵔⴻⴽ, ⴰ ⵙⵉⴷⵉ! ⴰⵇⴰ ⴷⵉⵏ ⵉⵊⵊ ⵏ ⵍⵃⴰⵍ ⵏ ⴰⵔⴹⴰ, ⴰ ⴰⵔⴻⴱⴱⵉ, ⵙ ⵍⴻⵎⵖⴰⵔⴻⵜ ⵏ ⵜⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ. ⴰⵔⵔ-ⴷⴷ ⵅⴰⴼⵉ ⵙ ⵓⵙⴻⵏⵊⴻⵎ ⵏⵏⴻⵛ ⵉ ⴷⴷ-ⵉⴼⴼⵖⴻⵏ ⵣⵉ ⵍⵎⴰⵏⴻⵜ ⵏⵏⴻⵛ. 
ⵊⴱⴻⴷ ⴰⵢⵉ-ⴷⴷ ⵣⴻⴳ ⵓⴱⴰⵔⵢⵓⴹ, ⴻⵊⵊ ⴰⵢⵉ ⵡⴰⵔ ⵜⵜⵖⴻⴱⴱⵉⵖ, ⵃⵉⵎⴰ ⴰⴷ ⵜⵜⵡⴰⴼⴻⴽⴽⴻⵖ ⵣⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⵓ ⵣⴻⴳ ⵡⴰⵎⴰⵏ ⵢⵓⴵⵖⴻⵏ. 
ⵡⴰⵔ ⵜⵜⴻⵊⵊⵉ ⴰⴷ ⴰⵢⵉ ⵜⴰⵡⵉ ⵍⵃⴻⵎⵍⴻⵜ, ⵡⴰⵔ ⵜⵜⴻⵊⵊⵉ ⵍⴰⴵⴰⵖ ⴰⴷ ⴰⵢⵉ ⵉⵙⴰⵔⴹ, ⴰⴷ ⵅⴰⴼⵉ ⵉⴱⴻⵍⵍⴻⵄ ⵡⴰⵏⵓ ⴰⵇⴻⵎⵎⵓⵎ ⵏⵏⴻⵙ. 
ⴰⵔⵔ ⵅⴰⴼⵉ, ⴰ ⵙⵉⴷⵉ, ⵎⴰⵖⴰⵔ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ ⵜⴻⵚⴱⴻⵃ. ⵇⵍⴻⴱ ⵖⴰⵔⵉ ⵄⵍⴰⵃⵚⴰⴱ ⴰⵔⵔⴻⵃⵎⴻⵜ ⵏⵏⴻⵛ ⵉⴼⴻⵢⵢⴹⴻⵏ. 
ⵡⴰⵔ ⵜⵜⴻⴼⴼⴰⵔ ⵛⴰ ⵓⴷⴻⵎ ⵏⵏⴻⵛ ⵅ ⵓⵎⵙⴻⵅⵅⴰⵔ ⵏⵏⴻⵛ, ⵎⴰⵖⴰⵔ ⵜⵜⵡⴰⵃⵚⴰⵔⴻⵖ. ⴰⵔⵔ-ⴷⴷ ⵅⴰⴼⵉ ⴷⴰⵡⴻⵃⴷⴰ. 
ⴰⴷⴻⵙ ⴰⵢⵉ-ⴷⴷ ⵖⴰⵔ ⵍⴻⵄⵎⴰⵔ ⵉⵏⵓ, ⴼⴻⴽⴽ ⵉ-ⵜ. ⵙⴻⵚⵍⴻⵃ ⴰⵢⵉ ⴷⵉ ⵙⵙⵉⴱⴱⴻⵜ ⵏ ⵍⵄⴻⴷⵢⴰⵏ ⵉⵏⵓ. 
ⵛⴻⴽ ⵜⴻⵙⵙⵏⴻⴷ ⵍⵄⴰⵔ ⵉⵏⵓ ⴷ ⵓⵙⴻⴹⵃⵉ ⵉⵏⵓ ⴷ ⵍⴻⴼⴹⵉⵃⴻⵜ ⵉⵏⵓ, ⴰⵇⴰ ⵎⴰⵔⵔⴰ ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⴱⴻⴷⴷⴻⵏ ⵣⵣⴰⵜⴻⴽ. 
ⴰⵙⴻⵃⵇⴰⵔ ⵢⴰⵔⵥ ⴰⵢⵉ ⵓⵍ ⵓ ⵏⴻⵛⵛ ⵇⴻⵏⴹⴻⵖ ⴰⵟⵟⴰⵙ. ⵔⴰⵊⵉⵖ ⴰⵣⵉⴵⴻⵣ, ⵎⴰⵛⴰ ⵡⴰⵍⵓ, ⵏⴻⵛⵛ ⵔⴰⵊⵉⵖ ⵉⵏⵏⵉ ⴷ ⴰⵢⵉ ⵖⴰ ⵉⵄⴻⵣⵣⴰⵏ, ⵎⴰⵛⴰ ⵡⴰⵔ ⵓⴼⵉⵖ ⵓⵍⴰ ⴷ ⵉⵊⵊⴻⵏ. 
ⵏⵉⵜⵏⵉ ⴳⴳⵉⵏ ⵙⵙⴻⵎ ⴷⵉ ⵎⴰⵛⵛⴰ ⵉⵏⵓ, ⵉ ⵓⴼⴰⴷⵉ ⵉⵏⵓ ⴳⴳⵉⵏ ⴰⵢⵉ ⴰⴷ ⵙⵡⴻⵖ ⵍⵅⴻⴵ. 
ⴻⵊⵊ ⵟⵟⴰⴱⵍⴰ ⵏⵙⴻⵏ ⴰⴷ ⵜⴻⴷⵡⴻⵍ ⴷ ⵍⴼⴻⵅ, ⵓⵍⴰ ⴷ ⵜⴰⵅⵛⴻⴼⵜ ⵉ ⵢⵉⵏⵏⵉ ⴰⴽⵉⴷⵙⴻⵏ ⵉⴱⴻⴷⴷⴻⵏ. 
ⵙⴷⴰⵔⵖⴻⵍ ⵜⵉⵟⵟⴰⵡⵉⵏ ⵏⵙⴻⵏ, ⵃⵉⵎⴰ ⵡⴰⵔ ⵜⵜⵡⵉⵍⵉⵏ ⵄⴰⴷ, ⴰⵔⵔ ⵜⵉⵊⵄⵉⵏⵏⴰⵜⵉⵏ ⵏⵙⴻⵏ ⴰⴷ ⵜⵜⴻⵏⵀⴻⵣⵣⴰⵏⵜ ⵍⴻⴱⴷⴰ. 
ⵣⴻⴵⴻⵄ ⵅⴰⵙⴻⵏ ⴰⵙⵅⴻⴹ ⵏⵏⴻⵛ, ⴻⵊⵊ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵛ ⴰⴷ ⵜⴻⵏ ⵉⵍⵇⴻⴼ. 
ⴻⵊⵊ ⵍⵎⴰⵔⴳⴻⵃ ⵏ ⵜⵣⴻⴷⴷⵉⵖⵜ ⵏⵙⴻⵏ ⴰⴷ ⵉⴷⵡⴻⵍ ⴷ ⵍⵅⴰⵔⴱⴻⵜ, ⵎⴰⵃⴻⵏⴷ ⵡⴰⵔ ⴷⴰⵢⴻⵙ ⵉⵣⴻⴷⴷⴻⵖ ⵄⴰⴷ ⵓⵍⴰ ⴷ ⵉⵊⵊⴻⵏ. 
ⵎⴰⵖⴰⵔ ⵏⵉⵜⵏⵉ ⴷⴰⵔⵔⴰⵛⴻⵏ ⵅ ⵡⴻⵔⵢⴰⵣ ⵏⵏⵉ ⵜⵓⵖⴰ ⵜⴻⵡⵜⵉⴷ ⵛⴻⴽ, ⵙ ⵍⵀⴰⵔⴷ ⵏⵙⴻⵏ ⴰⵔⵏⵉⵏ ⵉ ⵍⴻⵃⵔⵉⵇ ⵏ ⵢⵉⵏⵏⵉ ⵣⵣⴰⵢⴻⴽ ⵉⵜⵜⵡⴰⵍⴻⵇⵇⴼⴻⵏ. 
ⴰⵔⵔ ⴷⴷⴻⵏⴱ ⵅ ⴷⴷⴻⵏⴱ ⵏⵙⴻⵏ, ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⴷⴷ-ⴰⴷⴼⴻⵏ ⵖⴰⵔ ⵜⵙⴻⴳⴷⴰ ⵏⵏⴻⵛ. 
ⴻⵊⵊ ⵉ-ⵜⴻⵏ ⴰⴷ ⵜⵜⵡⴰⵎⵃⴰⵏ ⵣⴻⴳ ⵡⴻⴷⵍⵉⵙ ⵉⵜⵜⵡⴰⵏⴹⴻⵏ ⵏ ⵜⵓⴷⴰⵔⵜ, ⴰⵍⴰⵎⵉ ⵡⴰⵔ ⵜⵜⵡⴰⵣⴻⵎⵎⴰⵎⴻⵏ ⵛⴰ ⵖⴰⵔ ⵉⵎⵙⴻⴳⴳⴰⴷⴻⵏ. 
ⵎⴰⵛⴰ ⵏⴻⵛⵛ ⴰⵇⴰ ⴰⵢⵉ ⴷⵉ ⵍⴻⵖⴱⴻⵏ ⵓ ⵜⵜⵏⴻⵣⴱⴰⵔⴻⵖ. ⵉⵍⵉ ⴰⴷ ⴰⵢⵉ ⵉⵙⵙⴳⴻⵄⵄⴻⴷ ⵙⴻⵏⵏⴻⵊ ⵓⵙⴻⵏⵊⴻⵎ ⵏⵏⴻⵛ, ⴰ ⴰⵔⴻⴱⴱⵉ. 
ⵏⴻⵛⵛ ⴰⴷ ⵚⴻⴱⴱⵃⴻⵖ ⵉⵙⴻⵎ ⵏ ⴰⵔⴻⴱⴱⵉ ⵙ ⵢⵉⵊⵊ ⵏ ⵢⴻⵣⵍⵉ, ⵙ ⵓⵇⴰⴷⵉ ⴰⴷ ⴰⵙ ⵙⵙⴻⵎⵖⴰⵔⴻⵖ. 
ⴰⵢⴰ ⴰⴷ ⵢⴰⵔⴹⴰ ⵙⵉⴷⵉ ⴽⵜⴰⵔ ⵣⴻⴳ ⵉⵊⵊ ⵏ ⵓⴼⵓⵏⴰⵙ, ⵣⴻⴳ ⵉⵊⵊ ⵏ ⵓⴼⵓⵏⴰⵙ ⴰⵎⴻⵥⵢⴰⵏ ⵙ ⵡⴰⵛⵛⴰⵡⴻⵏ ⴷ ⵜⴻⵛⴹⴻⵛⵜ ⵉⵎⵎⵙⴻⴱⴹⴰⵏ. 
ⵉⵎⵀⵉⵏⴻⵏ ⵏⵏⵉ ⵜⵜ ⵉⵥⵔⵉⵏ, ⴰⴷ ⴼⴰⵔⵃⴻⵏ, ⵓ ⵉⵏⵏⵉ ⵢⴰⵔⴻⵣⵣⵓⵏ ⵅ ⴰⵔⴻⴱⴱⵉ, ⴰⵇⴰ ⵓⵍ ⵏⵡⴻⵎ ⴰⴷ ⵉⴷⴷⴰⵔ. 
ⵎⴰⵖⴰⵔ ⵙⵉⴷⵉ ⵉⵜⵜⴻⵙⵍⴰ ⵖⴰⵔ ⵉⵎⴻⵣⵍⴰⴹ, ⵡⴰⵔ ⵉⵙⵙⴻⵃⵇⵉⵔⵉ ⵛⴰ ⵉⵎⴻⵃⴱⴰⵙ ⵏⵏⴻⵙ. 
ⴻⵊⵊ ⵉⵊⴻⵏⵡⴰⵏ ⴷ ⵜⴻⵎⵎⵓⵔⵜ ⴰⴷ ⵜ ⵙⵙⴻⵎⵖⴰⵔⴻⵏ, ⵍⴻⴱⵃⵓⵔ ⴷ ⵎⴰⵔⵔⴰ ⵎⵉⵏ ⴷⴰⵢⵙⴻⵏ ⵉⵜⵜⴻⵏⵀⴻⵣⵣⴰⵏ. 
ⵎⴰⵖⴰⵔ ⴰⵔⴻⴱⴱⵉ ⴰⴷ ⵉⵙⵙⴻⵏⵊⴻⵎ ⵚⵉⵀⵢⵓⵏ, ⴰⴷ ⵉⴱⵏⴰ ⵄⴰⵡⴻⴷ ⵜⵉⵏⴻⴷⴷⴰⵎ ⵏ ⵢⴰⵀⵓⴷⴰ, ⵓⵛⴰ ⵏⵉⵜⵏⵉ ⴰⴷ ⴷⵉⵏ ⵣⴻⴷⵖⴻⵏ, ⴰⴷ ⵜⵜ ⵟⵟⴼⴻⵏ ⴷ ⵍⵡⴰⵔⵜ. 
ⵣⵣⴰⵔⵉⵄⴻⵜ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ ⴰⴷ ⵜⵜ ⵜᵉⵟⵟⴻⴼ ⴷ ⵜⴰⵙⵖⴰⵔⵜ, ⵉⵏⵏⵉ ⵉⵜⵜⴻⵅⵙⴻⵏ ⵉⵙⴻⵎ ⵏⵏⴻⵙ ⴰⴷ ⴷⴰⵢⴻⵙ ⵣⴻⴷⵖⴻⵏ. 
