﻿ⵉⵥⴻⵀⵀⵉⴷⴻⵏ.
66.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵉⵣⵍⵉ. ⴰⵣⴻⵀⵀⴻⴷ. ⴷⵓⵇⵇⵣⴻⵎ ⵙ ⵓⵙⵍⵉⵡⵍⴻⵡ ⵉ ⴰⵔⴻⴱⴱⵉ, ⵡⴰⵀ, ⵎⴰⵔⵔⴰ ⵜⴰⵎⵎⵓⵔⵜ! 
ⵣⴻⵀⵀⴷⴻⵎ ⵉ ⵓⵄⵓⴵⵉ ⵏ ⵢⵉⵙⴻⵎ ⵏⵏⴻⵙ, ⵙⵙⵄⵓⴵⴰ ⵉ-ⵜ ⵉ ⵓⵙⴻⵎⵖⴰⵔ ⵏⵏⴻⵙ. 
ⵉⵏⵉⵎ ⵉ ⴰⵔⴻⴱⴱⵉ: “ⵎⴰⵎⵎⴻⵛ ⵙⵙⴰⴳⴳⵯⴰⴷⴻⵏⵜ ⵜⵎⴻⴳⴳⴰ ⵏⵏⴻⵛ!” ⵣⵉ ⵍⴻⵎⵖⴰⵔⴻⵜ ⵏ ⵊⵊⵀⴻⴷ ⵏⵏⴻⵛ ⴰⴷ ⵅⴰⴽ ⵙⵙⵏⵉⵄⵎⵉⵍⴻⵏ ⵍⵄⴻⴷⵢⴰⵏ ⵏⵏⴻⵛ ⴰⴷ ⴰⴹⴰⵔⴻⵏ ⵉ ⵛⴻⴽ. 
ⵎⴰⵔⵔⴰ ⵜⴰⵎⵎⵓⵔⵜ, ⵡⴰⵀ ⵎⴰⵔⵔⴰ ⴰⴷ ⴰⵛ ⵙⴻⵊⴷⴻⵏ ⵓ ⴰⴷ ⵣⴻⵀⵀⴷⴻⵏ, ⴰⴷ ⵣⴻⵀⵀⴷⴻⵏ ⵉ ⵢⵉⵙⴻⵎ ⵏⵏⴻⵛ. ⵙⵉⵍⴰⵀ. 
ⴰⵙⴻⵎ-ⴷⴷ, ⵅⵣⴰⵔⴻⵎ ⵜⵉⵎⴻⴳⴳⴰ ⵏ ⴰⵔⴻⴱⴱⵉ. ⵎⵉⵏ ⵉⴳⴳⴰ ⵣⵣⴰⵜ ⵉ ⵜⴰⵔⵡⴰ ⵏ ⴱⵏⴰⴷⴻⵎ ⴰⵇⴰ ⵉⵙⵙⴰⴳⴳⵯⴰⴷ. 
ⵏⴻⵜⵜⴰ ⵢⴰⵔⵔⴰ ⵍⴻⴱⵃⴰⵔ ⴷ ⵍⴱⴰⵔ. ⵏⵉⵜⵏⵉ ⵥⵡⴰⵏ ⵉⵖⵣⴰⵔ ⵅ ⵉⴹⴰⵔⴻⵏ. ⴷⵉⵏⵏⵉ ⵉ ⵣⵣⴰⵢⴻⵙ ⵏⴼⴰⵔⵔⴻⵃ. 
ⵙ ⵊⵊⴻⵀⴷ ⵏⵏⴻⵙ ⵉⵃⴻⴽⴽⴻⵎ ⵉ ⵍⴻⴱⴷⴰ. ⵜⵉⵟⵟⴰⵡⵉⵏ ⵏⵏⴻⵙ ⵜⵜⵄⴻⵙⵙⴻⵏⵜ ⵅ ⵍⴻⴳⵏⵓⵙ. ⵖⴰⵔⵡⴻⵎ ⴰⴷ ⵎⵎⵄⴰⵍⴰⵏ ⵉⵏⵏⵉ ⵉⵜⵜⵖⴻⵡⵡⵖⴻⵏ. ⵙⵉⵍⴰⵀ. 
ⴱⴰⵔⴽⴻⵎ ⴰⵔⴻⴱⴱⵉ ⵏⵏⴻⵖ, ⴽⴻⵏⵏⵉⵡ ⴰ ⵍⴻⴳⵏⵓⵙ, ⴳⴳⴻⵎ ⴰⴷ ⵉⵜⵜⵡⴰⵙⴻⵍ ⵍⵃⴻⵙⵙ ⵏ ⵓⵚⴻⴱⴱⴻⵃ ⵏⵏⴻⵙ. 
ⵏⴻⵜⵜⴰ ⴷ ⵡⴻⵏⵏⵉ ⴷ ⴰⵏⴻⵖ ⵉⵜⵜⵉⵛⴻⵏ ⵜⵓⴷⴰⵔⵜ, ⴷ ⵡⴻⵏⵏⵉ ⵡⴰⵔ ⵉⵊⵊⵉⵏ ⴰⴹⴰⵔ ⵏⵏⴻⵖ ⴰⴷ ⵉⴼⴰⵔⵖ. 
ⵎⵉⵏⵣⵉ ⵛⴻⴽ, ⴰ ⴰⵔⴻⴱⴱⵉ, ⵜⵇⴻⴵⴱⴻⴷ ⴰⵏⴻⵖ, ⵛⴻⴽ ⵜⴻⵙⵙⵉⵣⴻⴷⴳⴻⴷ ⴰⵏⴻⵖ ⴰⵅⵎⵉ ⵙⵙⵉⵣⴷⴰⴳⴻⵏ ⵏⵏⵓⵇⴰⵔⵜ. 
ⵛⴻⴽ ⵜⵏⴻⴷⵀⴻⴷ ⴰⵏⴻⵖ ⴷⵉ ⵜⵔⴰⵛⵛⴰ ⵏ ⵍⴼⴻⵅ. ⵜⴻⵙⵙⴰⵔⵙⴻⴷ ⵅⴰⵏⴻⵖ ⵉⵊⵊ ⵏ ⴷⴷⵇⴻⵍ ⵅ ⵜⴻⵊⵄⵉⵏⵏⴰ ⵏⵏⴻⵖ. 
ⵛⴻⴽ ⵜⴻⵊⵊⵉⴷ ⵉⵡⴷⴰⵏ ⴰⴷ ⵏⵢⴻⵏ ⵅ ⵉⵣⴻⴵⵉⴼⴻⵏ ⵏⵏⴻⵖ, ⴰⵇⴰ ⵏⴻⴷⵡⴻⵍ ⴷⵉ ⵜⵎⴻⵙⵙⵉ ⴷ ⵡⴰⵎⴰⵏ, ⵎⴰⵛⴰ ⵛⴻⴽ ⵜⴻⵙⵙⵓⴼⴼⵖⴻⴷ ⴰⵏⴻⵖ ⵙ ⵉⵊⵊ ⵏ ⵍⵇⴻⴷⴷ ⵉⴼⴻⵢⵢⴻⴹ. 
ⵏⴻⵛⵛ ⴰⴷ ⴷⴷ-ⴰⴷⴼⴻⵖ ⵖⴰⵔ ⵜⴰⴷⴷⴰⵔⵜ ⵏⵏⴻⵛ ⵙ ⵜⵖⴰⵔⵚⴰ ⵏ ⵡⴻⵛⵎⴰⴹ, ⴰⴷ ⴰⵛ ⵅⴻⴵⵚⴻⵖ ⵍⵡⵓⵄⵓⴷ ⵉⵏⵓ, 
ⵍⵡⵓⵄⵓⴷ ⵏⵏⵉ ⵣⵣⴰⵢⵙⴻⵏ ⵏⴻⵟⵇⴻⵏ ⵉⵢⴻⵏⵛⵉⵛⴻⵏ ⵉⵏⵓ, ⵏⵏⵉ ⵣⵣⴰⵢⵙⴻⵏ ⵉⵙⵙⵉⵡⴻⵍ ⵓⵇⴻⵎⵎⵓⵎ ⵉⵏⵓ, ⵍⴰⵎⵉ ⵜⵓⵖⴰ ⴰⵢⵉ ⴷⵉ ⵍⴻⵃⵚⴰⵔⴻⵜ. 
ⵜⵉⵖⴰⵔⵚⴰ ⵏ ⵡⴻⵛⵎⴰⴹ ⵏ ⵍⵎⴰⵔ ⵉⵚⴻⵃⵃⴻⵏ ⴰⴷ ⴰⵛ ⵜⴻⵏⵜ-ⵉ-ⴷⴷ-ⴰⵡⵢⴻⵖ ⴰⴽ-ⴷ ⵍⴻⴱⵅⵓⵔ ⵏ ⵉⵛⴰⵔⵔⵉⵢⵢⴻⵏ. ⵏⴻⵛⵛ ⴰⴷ ⴰⵛ ⵙⵙⵡⴻⵊⴷⴻⵖ ⵉⴼⵓⵏⴰⵙⴻⵏ ⴷ ⵉⵖⴰⵢⴹⴻⵏ. ⵙⵉⵍⴰⵀ. 
ⵎⴰⵔⵔⴰ ⴽⴻⵏⵏⵉⵡ ⵉ ⵉⵜⵜⴻⴳⴳⵯⴷⴻⵏ ⴰⵔⴻⴱⴱⵉ, ⴰⵙⵙⴻⵜⵜⵉⵡ-ⴷⴷ, ⵙⵍⴻⵎ, ⵏⴻⵛⵛ ⵅⵙⴻⵖ ⴰⴷ ⴰⵡⴻⵎ ⵄⴰⵡⴷⴻⵖ ⵎⵉⵏ ⵉ ⴷ ⴰⵢⵉ ⵉⴳⴳⴰ ⴷⵉ ⵍⴻⵄⵎⴰⵔ ⵉⵏⵓ. 
ⵄⴰⴷ ⵉⵍⴰⵖⴰ ⵅⴰⵙ ⵓⵇⴻⵎⵎⵓⵎ ⵉⵏⵓ, ⵅⴻⵏⵏⵉ ⴰⵇⴰ ⵏⴻⵜⵜⴰ ⵉⵜⵜⵡⴰⵙⵙⴻⵎⵖⴰⵔ ⵙⴰⴷⵓ ⵢⵉⵍⴻⵙ ⵉⵏⵓ. 
ⵎⵍⵉ ⵜⵓⵖⴰ ⵏⵡⵉⵖ ⵍⵎⵓⵄⵚⵉⵢⵢⴻⵜ ⴷⴻⴳ ⵡⵓⵍ ⵉⵏⵓ, ⵅⴻⵏⵏⵉ ⴰⵇⴰ ⵙⵉⴷⵉ ⵉⵏⵓ ⵡⴰⵔ ⴷ ⴰⵢⵉ ⵉⵜⵜⴻⵙⵍⵉ ⵛⴰ. 
ⴰⵔⴻⴱⴱⵉ ⵎⴰⵛⴰ ⴰⵇⴰ ⵉⵙⵍⴰ ⴰⵢⵉ, ⴰⵇⴰ ⵏⴻⵜⵜⴰ ⵉⵡⵛⴰ ⵜⴰⵢⵏⵉⵜ ⵉ ⵜⵎⵉⵊⵊⴰ ⵏ ⵜⵥⴰⴵⵉⵜ ⵉⵏⵓ. 
ⴰⴷ ⵉⵜⵜⵡⴰⴱⴰⵔⴻⴽ ⴰⵔⴻⴱⴱⵉ ⵡⴻⵏⵏⵉ ⵡⴰⵔ ⵉⵏⴹⴰⵔⴻⵏ ⵜⴰⵥⴰⴵⵉⵜ ⵉⵏⵓ, ⵡⴰⵔ ⴷ ⴰⵢⵉ ⵉⴽⴽⵉⵙ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ. 
