﻿ⵉⵥⴻⵀⵀⵉⴷⴻⵏ.
58.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ‘ⵡⴰⵔ ⵜ ⵜⵜⴰⵔⴻⴷⴷⴻⴵ!’ ⵏ ⴷⴰⵡⵓⴷ. ⵜⵉⵔⴰ ⵉⵏⴻⵇⵛⴻⵏ. 
ⵎⴰ ⵜⴻⵙⵙⴰⵡⴰⵍⴻⵎ ⵙ ⵜⵉⴷⴻⵜⵜ ⵜⴰⵙⴻⴳⴷⴰ ⴷⴻⴳ ⵓⵙⴻⵖⴷⵉ? ⵎⴰ ⵜⵃⴻⴽⴽⵎⴻⵎ ⵜⴰⵔⵡⴰ ⵏ ⴱⵏⴰⴷⴻⵎ ⵙ ⵍⵃⴻⵇⵇ? 
ⵍⵍⴰ, ⵎⴰⵛⴰ ⴷⴻⴳ ⵡⵓⵍ ⵏⵡⴻⵎ ⵜᵉⵜⵜⴻⴳⴳⴻⵎ ⵍⵖⴻⵛⵛ, ⵅ ⵜⴻⵎⵎⵓⵔⵜ ⵜⵡⴻⵣⵣⵏⴻⵎ ⵍⵄⵓⵏⴼ ⵏ ⵉⴼⴰⵙⵙⴻⵏ ⵏⵡⴻⵎ. 
ⵣⴻⴳ ⵡⴰⵎⵉ ⴵⴰⵏ ⴷⵉ ⵍⴻⵎⵍⴰⵡⴻⵜ ⴼⴼⵖⴻⵏ ⵉⵄⴻⴼⴼⴰⵏⴻⵏ ⵣⴻⴳ ⵡⴻⴱⵔⵉⴷ, ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵜⵙⴻⵏ ⵡⴻⴷⴷⴰⵔⴻⵏ ⴰⵢⵜ ⵏ ⴱⵓ-ⵉⵅⴰⵔⵔⵉⵇⴻⵏ. 
ⴰⵇⴰ ⴷⴰⵢⵙⴻⵏ ⵙⵙⴻⵎ ⴰⵎ ⵙⴻⵎⵎ ⵏ ⵓⴼⵉⵖⴰⵔ. ⵏⵉⵜⵏⵉ ⴰⵎ ⵢⵉⵛⵜ ⵏ ⵜⵍⴻⴼⵙⴰ ⵜⴰⴷⴻⵀⵛⵓⵔⵜ, ⵜⴻⵏⵏⵉ ⵉⵇⵇⵏⴻⵏ ⴰⵎⴻⵣⵣⵓⵖ ⵏⵏⴻⵙ, 
ⵜⴻⵏⵏⵉ ⵡⴰⵔ ⵉⵜⵜⴻⵙⵍⵉⵏ ⵖⴰⵔ ⵜⵎⵉⵊⵊⴰ ⵏ ⵉⵄⴻⵣⵣⴰⵎⴻⵏ, ⵓⵍⴰ ⵖⴰⵔ ⵜⵎⵉⵊⵊⴰ ⵏ ⵓⵙⴻⵃⵃⴰⵔ ⵏⵏⵉ ⵉⵜⵜⵃⴰⴽⴰⵏ ⴰⵟⵟⴰⵙ ⴷⵉ ⵜⵙⴻⵃⵃⴰⵔⵜ. 
ⴰ ⴰⵔⴻⴱⴱⵉ, ⴰⵔⵥ ⴰⵙⴻⵏ ⵜⵉⵖⵎⴰⵙ ⴷⴻⴳ ⵓⵇⴻⵎⵎⵓⵎ ⵏⵙⴻⵏ, ⴰⵔⵥ ⵜⵉⵖⵎⴰⵙ ⵏ ⵜⴻⵖⵎⴰⵔⵜ ⵏ ⵉⵢⵔⴰⴷⴻⵏ ⵉⵎⴻⵥⵢⴰⵏⴻⵏ, ⴰ ⵙⵉⴷⵉ! 
ⴻⵊⵊ ⵉ-ⵜⴻⵏ ⴰⴷ ⴼⴻⵙⵢⴻⵏ ⴰⵎ ⵡⴰⵎⴰⵏ, ⴰⵍⴰⵎⵉ ⴰⴷ ⴼⴼⵖⴻⵏ. ⵎⴰⵍⴰ ⵉⵎⴻⵃⵃⴻⴹ ⵍⵇⴻⵡⵙ ⵙ ⴼⵍⵉⵜⵛⴰⵜ ⵏⵏⴻⵙ, ⴻⵊⵊ ⵉ-ⵜⴻⵏ ⵡⴰⵔ ⵇⴹⵉⵄⴻⵏ. 
ⴻⵊⵊ ⵉ-ⵜ ⴰⴷ ⵉⴼⵏⴰ ⴰⵎ ⵓⴱⵓⵛⵛⴻⵍ ⵉⵔⵉⵣⵣⴻⵏ. ⴻⵊⵊ ⵉ-ⵜⴻⵏ ⵡⴰⵔ ⵥⴰⵔⵔⴻⵏ ⵜⴼⵓⵛⵜ, ⴰⵎ ⵡⴻⵟⵟⵓ ⵏ ⵓⵄⴻⴷⴷⵉⵙ ⵏ ⵜⵎⴻⵟⵟⵓⵜ. 
ⵇⴱⴻⵍ ⵉ ⵖⴰ ⴰⵛⴰⵏⵜ ⵎⴰⵔⵎⵉⵜⴰⵜ ⵏⵡⴻⵎ ⴰⴽ-ⴷ ⵍⴻⵃⵎⵓ ⵏ ⵛⴱⴰⵔⵇ ⴰⴽ-ⴷ ⵉⵙⴻⵏⵏⴰⵏⴻⵏ, ⴰⴷ ⴷⴰⵢⴻⵙ ⵉⵙⵓⴹ ⴰⵍⴰⵎⵉ ⴰⴷ ⵢⴰⵥⵥⴻⵍ ⵅ ⵡⴻⵢⵙⵓⵎ ⴷ ⴰⵣⵉⵣⴰ ⵏⵉⵖ ⵅ ⵡⴻⵢⵙⵓⵎ ⵉⵜⵜⴻⵃⴷⵓⴷⵓⵇⴻⵏ. 
ⴰⵎⵙⴻⴳⴳⴻⴷ ⴰⴷ ⵉⴼⴰⵔⵃ ⵅⵎⵉ ⵖⴰ ⵉⵥⴰⵔ ⴰⵏⵜⴰⵇⴻⵎ. ⵏⴻⵜⵜⴰ ⴰⴷ ⵉⵙⵙⵉⵔⴷ ⵉⴹⴰⵔⴻⵏ ⵏⵏⴻⵙ ⴷⴻⴳ ⵉⴷⴰⵎⵎⴻⵏ ⵏ ⵉⵄⴻⴼⴼⴰⵏⴻⵏ. 
ⴰⴷ ⵢⵉⵏⵉ ⴱⵏⴰⴷⴻⵎ: “ⵡⴰⵀ, ⴰⵇⴰ ⴷⵉⵏ ⵍⵖⵉⴵⴻⵜ ⵉ ⵓⵎⵙⴻⴳⴳⴻⴷ, ⴰⵇⴰ ⴷⵉⵏ ⵉⵊⵊ ⵏ ⴰⵔⴻⴱⴱⵉ ⵏⵏⵉ ⵉⵃⴻⴽⴽⵎⴻⵏ ⴷⵉ ⵜⴻⵎⵎⵓⵔⵜ.” 
