﻿ⵉⵥⴻⵀⵀⵉⴷⴻⵏ.
55.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⴽ-ⴷ ⵓⵣⴻⵏⵣⵓⵏ ⵅ ⵉⴼⵉⵍⴰⵏ. ⴰⵅⴻⵎⵎⵉ ⵏ ⴷⴰⵡⵓⴷ. 
ⴰ ⴰⵔⴻⴱⴱⵉ, ⵙⴻⵍ ⵉ ⵜⵥⴰⴵⵉⵜ ⵉⵏⵓ, ⵡⴰⵔ ⵙⵙⵏⵓⴼⴼⴰⵔⴰ ⵛⴰ ⵉⵅⴻⴼ ⵏⵏⴻⵛ ⵣⵣⴰⵜ ⵉ ⵜⵓⵜⵔⴰ ⵉⵏⵓ. 
ⵃⴹⴰ ⴰⵢⵉ ⵓ ⴰⵔⵔ-ⴷⴷ ⵅⴰⴼⵉ. ⵏⴻⵛⵛ ⵜⵜⵔⴰⵃⴻⵖ ⵜⵜⴰⵙⴻⵖ-ⴷⴷ ⵖⴰⵔ ⵣⵣⴰⵜ ⴷ ⴹⴻⴼⴼⴰⵔ, ⴰⵎ ⵜⵜⵛⴻⵜⵛⵉⵖ ⵓ ⵙⵙⵖⵓⵏⴼⵉⵖ, 
ⵣⵉ ⵙⵙⵉⴱⴱⴻⵜ ⵏ ⵍⵃⴻⵙⵙ ⵏ ⵍⴻⵄⴷⵓ, ⵣⴻⴳ ⵓⵀⵓⴷⴷⵉ ⵏ ⵓⵄⴻⴼⴼⴰⵏ. ⵎⴰⵖⴰⵔ ⵏⵉⵜⵏⵉ ⵀⴻⵊⵎⴻⵏ-ⴷⴷ ⵅⴰⴼⵉ ⵙ ⵍⵎⵓⵄⵚⵉⵢⵢⴻⵜ, ⴹⴻⴼⴼⴰⵔⴻⵏ ⴰⵢⵉ ⵙ ⵓⵅⴻⵢⵢⴻⵇ. 
ⵓⵍ ⵉⵏⵓ ⵉⵜⵜⴼⴰⵔⴼⵉⵔ ⴷⴰⵢⵉ ⴷⴰⵅⴻⵍ, ⵉⵏⴻⵅⵍⵉⵄⴻⵏ ⵏ ⵍⵎⴻⵡⵜ ⵡⴹⴰⵏ-ⴷⴷ ⵅⴰⴼⵉ. 
ⵜⵉⴳⴳⵯⵓⴷⵉ ⴷ ⵜⴰⵔⵊⵉⵊⵉⵜ ⵜⵜᵉⵟⵟⴼⴻⵏⵜ ⴰⵢⵉ, ⵓⵍⴰ ⴷ ⴰⵔⵊⴻⴼ ⵉⵃⴻⵚⵚⴰⵔ ⴰⵢⵉ. 
ⵏⴻⵛⵛ ⵏⵏⵉⵖ: “ⵎⵍⵉ ⴷ ⴰⵢⵉ ⵡⵛⵉⵏ ⴰⴼⵔⵉⵡⴻⵏ ⴰⵎ ⵜⴻⴷⴱⵉⵔⵜ, ⵅⴻⵏⵏⵉ ⵉⵍⵉ ⴹⵡⵉⵖ, ⴰⴷ ⵣⴻⴷⵖⴻⵖ ⴷⵉ ⵛⴰ ⵏ ⵡⴻⵎⵛⴰⵏ ⵏⵏⴻⵖⵏⵉ.” 
ⵅⵣⴰⵔ, ⴰⴷ ⴰⵔⴻⵡⵍⴻⵖ ⵖⴰⵔ ⵍⴰⴳⴳⵯⴰⵊ ⵇⴰⵄ, ⴰⴷ ⵙⵙⴻⵏⵙⴻⵖ ⴷⵉ ⵍⴻⵅⵍⴰ. ⵙⵉⵍⴰⵀ. 
ⴰⴷ ⴷⴻⵖⵢⴻⵖ ⵖⴰⵔ ⵡⴻⵎⵛⴰⵏ ⵏ ⵓⴼⴻⴽⴽⵉ, ⵃⵉⵎⴰ ⴰⴷ ⵜⵜⵡⴰⴼⴻⴽⴽⴻⵖ ⵣⴻⴳ ⵓⵙⴻⵎⵎⵉⴹ, ⵣⵉ ⵜⵃⴰⵔⵢⴰⴹⵜ. 
ⵚⴰⵔⴹ ⵉ-ⵜⴻⵏ, ⴰ ⵙⵉⴷⵉ ⵉⵏⵓ, ⵙⴻⴱⴹⴰ ⵉⵍⴻⵙ ⵏⵙⴻⵏ, ⵎⵉⵏⵣⵉ ⵜⵜⵡⴰⵍⵉⵖ ⵍⵄⵓⵏⴼ ⴷ ⵓⵎⴻⵏⵖⵉ ⴷⵉ ⵜⴻⵏⴷⵉⵏⵜ. 
ⴰⵙⵙ ⴷ ⴵⵉⵍⴻⵜ ⵇⵓⵡⵡⴰⵔⴻⵏ ⵏⵉⵜⵏⵉ ⵉ ⵍⴻⵃⵢⵓⴹ ⵏⵏⴻⵙ. ⵖⴰⵔ ⴷⴰⵅⴻⵍ ⵏ ⵜⴻⵏⴷⵉⵏⵜ ⴰⵇⴰ ⴷⵉⵏ ⵍⴻⵖⴱⴻⵏ ⴷ ⵜⴰⵎⴰⵔⴰ, 
ⵍⵖⴻⵛⵛ ⴰⵇⴰ-ⵜ ⴷⴰⵅⴻⵍ ⵏⵏⴻⵙ, ⴰⵣⵣⴰⵢ ⵏⵏⴻⵙ ⵡⴰⵔ ⵣⵣⴰⵢⴻⵙ ⵉⵜⵜⵃⴻⵢⵢⵉⴷ ⵛⴰ ⴷⴷⴻⴵ ⴷ ⵡⴻⵛⵎⴰⵜ. 
ⵎⴰⵖⴰⵔ ⵡⴰⵔ ⵉⴵⵉ ⴷ ⵍⴻⵄⴷⵓ ⵡⴻⵏⵏⵉ ⴷ ⴰⵢⵉ ⵉⵙⵙⴻⵃⵇⴰⵔⴰⵏ, ⵎⵉⵏⵣⵉ ⴰⵢⴰ ⵣⴻⵎⵎⴰⵔⴻⵖ ⴰⴷ ⵜ ⴽⵙⵉⵖ. ⵡⴰⵔ ⵉⴵⵉ ⵓⵍⴰ ⴷ ⵡⴻⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⴷ ⵡⴻⵏⵏⵉ ⵉⵙⵙⴻⵎⵖⴰⵔⴰⵏ ⵉⵅⴻⴼ ⵏⵏⴻⵙ ⵙ ⵡⴰⵡⴰⵍ ⵅⴰⴼⵉ, ⵎⵉⵏⵣⵉ ⵣⵣⴰⵢⴻⵙ ⵣⴻⵎⵎⴰⵔⴻⵖ ⴰⴷ ⵏⵏⵓⴼⴼⴰⵔⴻⵖ! 
ⵎⴰⵛⴰ ⴰⵇⴰ ⴷ ⵛⴻⴽ, ⴰ ⴱⵏⴰⴷⴻⵎ, ⵛⴻⴽ ⴷ ⴰⵇⵔⵉⵏ ⵉⵏⵓ, ⴰⵎⴻⴷⴷⵓⴽⴽⴻⵍ ⵉⵏⵓ ⴷ ⵊⵊⴰⵔ ⵉⵏⵓ! 
ⵏⴻⵛⵛⵉⵏ ⵉⵏⵏⵉ ⵉⴳⴳⵓⵔⴻⵏ ⴷ ⵍⴻⵎⵍⵉⵃ ⴰⴽ-ⴷ ⵡⴰⵢⴰⵡⵢⴰ ⴷⵉ ⵜⵜⵉⵇⵇⴻⵜ, ⵏⴻⴳⴳⵓⵔ ⵖⴰⵔ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⴷⴻⴳ ⵓⵀⵉⵎⵓⵔ. 
ⴰⴷ ⵅⴰⵙⴻⵏ ⵜⴻⵡⴹⴰ ⵍⵎⴻⵡⵜ ⴰⵍⴰⵎⵉ ⵉ ⵖⴰ ⵀⵡⴰⵏ ⴰⵎ ⴷⴷⴰⵔⴻⵏ ⴷⵉ ⵍⴰⵅⴰⵔⵜ, ⵎⴰⵖⴰⵔ ⴰⵇⴰ ⴷⵉⵏ ⵍⵖⴰⵔ ⴷⵉ ⵜⵣⴻⴷⴷⵉⵖⵉⵏ ⵏⵙⴻⵏ, ⴷⴻⴳ ⵡⵓⵍⴰⵡⴻⵏ ⵏⵙⴻⵏ. 
ⵏⴻⵛⵛ, ⵡⴰⵀ, ⵏⴻⵛⵛ ⴰⴷ ⵍⴰⵖⵉⵖ ⵅ ⴰⵔⴻⴱⴱⵉ, ⵙⵉⴷⵉ ⴰⴷ ⴰⵢⵉ ⵉⵙⵙⴻⵏⵊⴻⵎ. 
ⵖⴰⵔ ⵜⵎⴻⴷⴷⵉⵜ, ⵖⴰⵔ ⵜⵓⴼⴼⵓⵜ ⵓ ⵙ ⵓⵣⵉⵍ ⴰⴷ ⵛⴻⵜⵛⵉⵖ, ⴰⴷ ⵙⵙⵖⵓⵏⴼⴻⵖ ⵓ ⵏⴻⵜⵜⴰ ⴰⴷ ⵉⵙⴻⵍ ⵉ ⵜⵎⵉⵊⵊⴰ ⵉⵏⵓ. 
ⵏⴻⵜⵜⴰ ⵉⴳⴳⴰ ⴰⵚⵍⴰⵃ ⵅ ⵍⴻⵄⵎⴰⵔ ⵉⵏⵓ ⵙ ⵍⴻⵀⵏⴰ ⵣⴻⴳ ⵉⵏⵏⵉ ⵖⴰⵔⵉ ⴷⴷ-ⵉⵇⴰⵔⵔⴱⴻⵏ ⵉ ⵡⴻⵀⵊⴰⵎ, ⵎⵉⵏⵣⵉ ⴰⵇⴰ-ⵜⴻⵏ ⴷⴻⴳ ⵡⴰⵟⵟⴰⵙ ⴹⵉⴷⴷ ⵉⵏⵓ. 
ⴰⵔⴻⴱⴱⵉ ⴰⴷ ⵉⵙⴻⵍ, ⴰⴷ ⵜⴻⵏ ⴷⴷ-ⵉⵙⵙⴻⵀⵡⴰ. ⵏⴻⵜⵜⴰ ⵉⵜⵜⵖⵉⵎⴰ ⵅ ⵍⵄⴰⵔⵛ ⵣⴻⴳ ⵡⴻⵛⵃⴰⵍ ⵓⵢⴰ. ⵙⵉⵍⴰⵀ. ⴰⵇⴰ ⵏⵉⵜⵏⵉ ⵡⴰⵔ ⵜⵜⴱⴻⴷⴷⵉⵍⴻⵏ, ⵡⴰⵔ ⵜⵜⴻⴳⴳⵯⴻⴷⴻⵏ ⵛⴰ ⴰⵔⴻⴱⴱⵉ. 
ⵏⴻⵜⵜⴰ ⵉⵏⴻⵟⵟⴰⵔ ⴰⴼⵓⵙ ⴷⴻⴳ ⵉⵏⵏⵉ ⴰⴽ-ⴷ ⵡⵉ ⵉⴳⴳⴰ ⵍⴻⵀⵏⴰ, ⵏⴻⵜⵜⴰ ⵉⵙⵙⴻⵅⵙⴰⵔ ⵍⵄⴰⵀⴷ ⵏⵏⴻⵙ. 
ⴰⵇⴻⵎⵎⵓⵎ ⵏⵏⴻⵙ ⵢⴰⵔⴹⴻⴱ ⵃⵙⴻⵏ ⵣⵉ ⵜⵔⵓⵙⵙⵉ, ⵎⴰⵛⴰ ⴷⴻⴳ ⵡⵓⵍ ⵏⵏⴻⵙ ⵉⵜⵜⵓⵔⵊⴰ ⴰⵎⴻⵏⵖⵉ. ⴰⵡⴰⵍⴻⵏ ⵏⵏⴻⵙ ⴷ ⵉⵍⴻⵇⵇⴰⵖⴻⵏ ⵅ ⵣⵣⴻⵛⵜ, ⵎⴰⵛⴰ ⴰⵇⴰ ⴰⵜⴻⵏ ⴰⵎ ⵍⴻⵙⵢⵓⴼ ⵜⵜⵡⴰⵊⴻⴱⴷⴻⵏ. 
ⵏⴹⴰⵔ ⴰⵎⵏⵓⵙ ⵏⵏⴻⵛ ⵅ ⵙⵉⴷⵉ ⵓ ⵏⴻⵜⵜⴰ ⴰⴷ ⴷⴰⵢⴻⴽ ⵉⵜⵜⵀⵉⵍⵍⴰ. ⵄⴻⵎⵎⴰⵔⵚ ⵡⴰⵔ ⵉⵜⵜⴻⵊⵊⵉ ⴰⵎⵙⴻⴳⴳⴻⴷ ⴰⴷ ⵉⴼⴰⵔⵖ. 
ⵛⴻⴽ ⵎⴰⵛⴰ, ⴰ ⴰⵔⴻⴱⴱⵉ, ⴰⴷ ⵜⴻⵏ ⵜⴻⵙⵙⴻⵀⵡⵉⴷ ⴷⴻⴳ ⵡⴻⵃⴼⵓⵔ ⵏ ⵜⵓⵔⵚⵓⴹⵉ. ⵉⵔⵢⴰⵣⴻⵏ ⵏ ⵉⴷⴰⵎⵎⴻⵏ ⴷ ⵍⵖⴻⵛⵛ ⵡⴰⵔ ⵜⵜⴽⴻⵎⵎⵍⴻⵏ ⴰⵣⵢⴻⵏ ⵏ ⵡⵓⵙⵙⴰⵏ ⵏⵙⴻⵏ. ⵎⴰⵛⴰ ⵏⴻⵛⵛ ⵜⵜⴻⵛⵍⴻⵖ ⵅⴰⴽ. 
