﻿ⵉⵥⴻⵀⵀⵉⴷⴻⵏ.
54.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⴽ-ⴷ ⵓⵣⴻⵏⵣⵓⵏ ⵅ ⵉⴼⵉⵍⴰⵏ. ⴰⵅⴻⵎⵎⵉ ⵏ ⴷⴰⵡⵓⴷ. 
ⵍⴰⵎⵉ ⴷⴷ-ⵓⵙⵉⵏ ⵉⵣⵉⴼⵉⵢⵢⴻⵏ, ⵏⵏⴰⵏ ⴰⵙ ⵉ ⵛⴰⵡⵓⵍ: “ⵎⴰ ⵡⴰⵔ ⵉⵙⵙⵏⵓⴼⴼⴰⵔ ⴷⴰⵡⵓⴷ ⵉⵅⴻⴼ ⵏⵏⴻⵙ ⵖⴰⵔⵏⴻⵖ?” 
ⵙⴻⵏⵊⴻⵎ ⴰⵢⵉ, ⴰ ⴰⵔⴻⴱⴱⵉ, ⵙ ⵢⵉⵙⴻⵎ ⵏⵏⴻⵛ, ⴰⵖ ⴰⵢⵉ ⵜⴰⵙⵖⴰⵔⵜ ⵙ ⵜⵣⴻⵎⵎⴰⵔ ⵏⵏⴻⵛ ⵉⵊⴻⵀⴷⴻⵏ. 
ⴰ ⴰⵔⴻⴱⴱⵉ, ⵙⴻⵍ ⵉ ⵜⵥⴰⴵⵉⵜ ⵉⵏⵓ, ⵙⵃⴻⵙⵙ ⵉ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ. 
ⵎⴰⵖⴰⵔ ⵉⴱⴰⵔⵔⴰⵏⵉⵢⵢⴻⵏ ⴽⴽⴰⵔⴻⵏ ⴰⴽⵉⴷⵉ, ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⴰⵔⴻⵣⵣⵓⵏ ⴰⴷ ⴰⵢⵉ ⵏⵖⴻⵏ. ⵡⴰⵔ ⵜⵜⴻⴳⴳⴻⵏ ⵛⴰ ⴰⵔⴻⴱⴱⵉ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ. ⵙⵉⵍⴰⵀ. 
ⵅⵣⴰⵔ, ⴰⵔⴻⴱⴱⵉ ⴷ ⴰⵎⵄⴰⵡⴻⵏ ⵉⵏⵓ. ⵙⵉⴷⵉ ⵉⵏⵓ ⴰⵇⴰ-ⵜ ⵊⴰⵔ ⵢⵉⵏⵏⵉ ⴷ ⴰⵢⵉ ⵉⵙⴻⵏⵏⴷⴻⵏ. 
ⵏⴻⵜⵜⴰ ⴰⴷ ⵉⵅⴻⴵⴻⵚ ⵍⵖⴰⵔ ⵉ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ. ⵇⴹⴰ ⵅⴰⵙⴻⵏ ⴷⵉ ⵍⴰⵎⴰⵏ ⵏⵏⴻⵛ. 
ⵙ ⵍⵅⴰⴹⴰⵔ ⴰⴷ ⴰⵛ ⴷⴷ-ⴰⵡⵢⴻⵖ ⵜⵉⵖⴰⵔⵚⴰ, ⴰⴷ ⵇⴰⴷⵉⵖ ⵉⵙⴻⵎ ⵏⵏⴻⵛ, ⴰ ⵙⵉⴷⵉ, ⵎⴰⵖⴰⵔ ⵏⴻⵜⵜⴰ ⴷ ⴰⵚⴻⴱⵃⴰⵏ, 
ⵎⴰⵖⴰⵔ ⵏⴻⵜⵜⴰ ⵉⴼⴻⴽⴽ ⴰⵢⵉ ⵣⵉ ⵎⴰⵔⵔⴰ ⵍⴻⵃⵚⴰⵔⴻⵜ, ⵓⵛⴰ ⵢⴰⵔⵔⴰ ⴰⵢⵉ-ⴷⴷ ⴰⴷ ⵅⴻⵣⵣⴰⵔⴻⵖ ⵅ ⵍⵄⴻⴷⵢⴰⵏ ⵉⵏⵓ ⵙⵡⴰⴷⴷⴰⵢ. 
