﻿ⵉⵥⴻⵀⵀⵉⴷⴻⵏ.
51.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⴰⵣⴻⵀⵀⴻⴷ ⵏ ⴷⴰⵡⵓⴷ. 
ⴰⵍⴰⵎⵉ ⵉ ⵖⴰⵔⴻⵙ ⴷⴷ-ⵢⵓⵙⴰ ⵓⵏⴰⴱⵉ ⵏⴰⵜⴰⵏ, ⴰⵡⴰⵔⵏⵉ ⵍⴰⵎⵉ ⵢⵓⴷⴻⴼ ⴷⴰⵡⵓⴷ ⵅ ⴱⴰⵜ-ⵛⴰⴱⴰⵄ.    
ⵃⵉⵏⵏ ⵅⴰⴼⵉ, ⴰ ⴰⵔⴻⴱⴱⵉ, ⵄⵍⴰⵃⵙⴰⴱ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ. ⵎⵙⴻⵃ ⵉⵅⴻⵟⵟⴰⵏ ⵉⵏⵓ ⵄⵍⴰⵃⵙⴰⴱ ⴰⴼⴻⵢⵢⴻⴹ ⵏ ⴰⵔⵔⴻⵃⵎⴻⵜ ⵏⵏⴻⵛ. 
ⵙⵙⵉⵔⴷ ⵍⵎⵓⵄⵚⵉⵢⵢⴻⵜ ⵉⵏⵓ ⵣⵣⴰⵢⵉ ⵎⴰⵔⵔⴰ, ⵙⵉⵣⴷⴻⴳ ⴰⵢⵉ ⵣⵉ ⴷⴷⴻⵏⴱ ⵉⵏⵓ, 
ⵎⴰⵖⴰⵔ ⵏⴻⵛⵛ ⵙⵙⵏⴻⵖ ⵉⵅⴻⵟⵟⴰⵏ ⵉⵏⵓ, ⴷⴷⴻⵏⴱ ⵉⵏⵓ ⵍⴻⴱⴷⴰ ⵉⴱⴻⴷⴷ ⴰⵢⵉ-ⴷⴷ ⵖⴰⵔ ⵜⵉⵟⵟⴰⵡⵉⵏ. 
ⴰⴽⵉⴷⴻⴽ, ⴰⴽⵉⴷⴻⴽ ⵡⴰⵀⴰ ⵉ ⵅⴹⵉⵖ, ⴳⴳⵉⵖ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⵊⴰⵔ ⵜⵉⵟⵟⴰⵡⵉⵏ ⵏⵏⴻⵛ, ⴰⵍⴰⵎⵉ ⵛⴻⴽ ⵜⵙⴻⴳⴳⴷⴻⴷ ⴷⴻⴳ ⵡⴰⵡⴰⵍⴻⵏ ⵏⵏⴻⵛ, ⵜⴻⵚⴼⵉⴷ ⴷⵉ ⵍⴻⵃⴽⴰⵎⴰⵜ ⵏⵏⴻⵛ. 
ⵅⵣⴰⵔ, ⵜⵜⵡⴰⵅⴻⵍⵇⴻⵖ-ⴷⴷ ⴷⵉ ⴷⴷⵏⵓⴱ, ⴷⵉ ⴷⴷⵏⵓⴱ ⵜⴻⴽⵙⵉ ⴰⵢⵉ ⵢⴻⵎⵎⴰ. 
ⵅⵣⴰⵔ, ⵛⴻⴽ ⵜᵉⵜⵜⴻⵅⵙⴻⴷ ⵜⵉⴷⴻⵜⵜ ⴷⵉ ⴷⴰⵅⴻⵍ, ⴷⵉ ⵜⵏⵓⴼⴼⵔⴰ ⵜⴻⵙⵙⵛⴰⵏⴻⴷ ⴰⵢⵉ ⵜⵉⵖⵉⵜ. 
ⴽⵙⵉ ⵅⴰⴼⵉ ⴷⴷⵏⵓⴱ ⵙ ⵜⵄⴻⵍⴵⴻⵜ, ⵅⴻⵏⵏⵉ ⴰⴷ ⴷⴻⵡⵍⴻⵖ ⵇⵇⵓⵔⴻⵖ, ⵙⵉⵔⴷ ⴰⵢⵉ, ⵅⴻⵏⵏⵉ ⴰⴷ ⴷⴻⵡⵍⴻⵖ ⴷ ⴰⵛⴻⵎⵍⴰⵍ ⵅ ⵡⴻⴷⴼⴻⵍ. 
ⴰⵔⵔ ⴰⵢⵉ ⴰⴷ ⵙⵍⴻⵖ ⴰⵔⵛⵓⵇ ⴷ ⵍⴻⴼⵔⴰⵃⴻⵜ, ⵃⵉⵎⴰ ⵉⵖⵙⴰⵏ ⵏⵏⵉ ⵜⵍⴻⴱⵣⴻⴷ ⵛⴻⴽ, ⴰⴷ ⵛⴻⴹⵀⴻⵏ ⵙ ⵍⴻⴼⵔⴰⵃⴻⵜ. 
ⵙⵏⵓⴼⴼⴰⵔ ⵓⴷⴻⵎ ⵏⵏⴻⵛ ⵣⵣⴰⵜ ⵉ ⴷⴷⵏⵓⴱ ⵉⵏⵓ, ⵎⵙⴻⵃ ⵉ ⵎⴰⵔⵔⴰ ⵍⵎⵓⵄⵚⵉⵢⵢⴻⵜ ⵉⵏⵓ. 
ⵅⵍⴻⵇ-ⴷⴷ ⴷⴰⵢⵉ ⵓⵍ ⵉⵣⴷⵉⴳ, ⴰ ⴰⵔⴻⴱⴱⵉ, ⵊⴻⴷⴷⴻⴷ ⴷⵉ ⴷⴰⵅⴻⵍ ⵉⵏⵓ ⵉⵊⵊ ⵏ ⴰⵔⵔⵓⵃ ⵉⵎⴻⵜⵏⴻⵏ. 
ⵡⴰⵔ ⴷ ⴰⵢⵉ ⵏⴻⵟⵟⴰⵔ ⵣⴻⴳ ⵡⵓⴷⴻⵎ ⵏⵏⴻⵛ, ⵡⴰⵔ ⵣⵣⴰⵢⵉ ⵜⵜⴻⴽⴽⴻⵙ ⴰⵔⵔⵓⵃ ⵉⵇⴻⴷⴷⵙⴻⵏ ⵏⵏⴻⵛ. 
ⴻⵡⵛ ⴰⵢⵉ ⵄⴰⵡⴻⴷ ⵍⴻⴼⵔⴰⵃⴻⵜ ⵏ ⵓⵙⴻⵏⵊⴻⵎ ⵏⵏⴻⵛ, ⵓⵍⴰ ⴷ ⵉⵊⵊ ⵏ ⴱⵓⵃⴱⴻⵍ ⴰⵎⵙⴻⵄⵄⴰⴼ ⵉ ⴽⵉⴷⵉ ⵖⴰ ⵉⴱⴻⴷⴷⴻⵏ. 
ⵅⴻⵏⵏⵉ ⴰⴷ ⵙⵙⵖⴰⵔⴻⵖ ⵉⴱⵔⵉⴷⴻⵏ ⵏⵏⴻⵛ ⵉ ⵢⵉⵏⵏⵉ ⵅⴰⴽ ⵉⵄⴻⴷⴷⴰⵏ, ⵃⵉⵎⴰ ⴰⴷ ⵖⴰⵔⴻⴽ ⴷⴷ-ⵄⴻⵇⴱⴻⵏ ⵉⵎⴻⴷⵏⴰⴱ. 
ⴼⴻⴽⴽ ⴰⵢⵉ ⵣⴻⴳ ⵓⵎⴰⵔⵡⴰⵙ ⵏ ⵉⴷⴰⵎⵎⴻⵏ, ⴰ ⴰⵔⴻⴱⴱⵉ, ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ, ⵅⴻⵏⵏⵉ ⴰⴷ ⵉⵙⵍⴻⵡⵍⵉⵡ ⵉⵍⴻⵙ ⵉⵏⵓ ⵅ ⵜⵙⴻⴳⴷⴰ ⵏⵏⴻⵛ. 
ⴰⵔⵣⴻⵎ ⴰⵢⵉ ⵉⵢⴻⵏⵛⵉⵛⴻⵏ ⵉⵏⵓ, ⴰ ⵙⵉⴷⵉ ⵉⵏⵓ, ⵅⴻⵏⵏⵉ ⴰⴷ ⵉⴱⴰⵔⵔⴻⵃ ⵓⵇⴻⵎⵎⵓⵎ ⵉⵏⵓ ⵙ ⵛⵛⴰⵏ ⵏⵏⴻⵛ, 
ⵎⴰⵖⴰⵔ ⵡⴰⵔ ⴷ ⴰⴽ ⵜⴻⵛⵇⵉ ⵜⵖⴰⵔⵚⵜ, ⵉⵍⵉ ⵡⵛⵉⵖ ⴰⵛ ⵜⵜ, ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵡⴰⵔ ⴷ ⴰⵛ ⴷⴷ-ⵜᵉⵜⵜⵉⵙ ⵅ ⵍⵅⴰⴹⴰⵔ. 
ⵜⵉⵖⴰⵔⵚⴰ ⵏ ⴰⵔⴻⴱⴱⵉ ⴰⵇⴰ ⴰⵜⴻⵏⵜ ⴷ ⵉⵊⵊ ⵏ ⴱⵓⵃⴱⴻⵍ ⵢⴰⵔⴻⵥ, ⵉⵊⵊ ⵏ ⵡⵓⵍ ⵉⴷⴷⴻⵣ ⵡⴰⵔ ⵜ ⵜⴻⵙⵙⴻⵃⵇⴰⵔⵉⴷ, ⴰ ⴰⵔⴻⴱⴱⵉ! 
ⴻⴳⴳ ⵍⵅⴰⵔ ⵉ ⵚⵉⵀⵢⵓⵏ ⵄⵍⴰⵃⵙⴰⴱ ⴰⵔⴹⴰ ⵏⵏⴻⵛ, ⴱⵏⴰ ⵍⴻⵃⵢⵓⴹ ⵏ ⵓⵔⵛⴰⵍⵉⵎ! 
ⵅⴻⵏⵏⵉ ⴰⴷ ⵜⴰⵔⴹⵉⴷ ⴷⵉ ⵜⵖⴰⵔⵚⴰ ⵏ ⵍⵎⵓⵄⵚⵉⵢⵢⴻⵜ, ⴷⵉ ⵜⵖⴰⵔⵚⵜ ⵏ ⵡⴻⵛⵎⴰⴹ ⵉⴽⴻⵎⵎⵍⴻⵏ. ⵅⴻⵏⵏⵉ ⴰⴷ ⵇⴻⴷⴷⵎⴻⵏ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⵅ ⵓⵄⴰⵍⵟⴰⵔ ⵏⵏⴻⵛ, 
