﻿ⵉⵥⴻⵀⵀⵉⴷⴻⵏ.
50.
ⵉⵊⵊ ⵏ ⵓⵣⴻⵀⵀⴻⴷ ⵏ ⴰⵙⴰⴼ. ⴰⵔⴻⴱⴱⵉ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ, ⵙⵉⴷⵉ ⵉⵙⵙⴰⵡⴰⵍ. ⵏⴻⵜⵜⴰ ⵉⵜⵜⵍⴰⵖⴰ ⵉ ⵜⴻⵎⵎⵓⵔⵜ ⵣⵉ ⵎⴰⵏⵉ ⴷⴷ-ⵜⴻⵏⵇⴰⵔ ⵜⴼⵓⵛⵜ ⴰⵍ ⵎⴰⵏⵉ ⵜⴻⵖⵍⵉ. 
ⵣⵉ ⵚⵉⵀⵢⵓⵏ, ⴰⵥⵔⵉ ⵉⴽⴻⵎⵎⵍⴻⵏ, ⵉⵜⵜⴱⴰⵏ ⴰⵔⴻⴱⴱⵉ ⵉⵜⵜⵉⵙⵙⵉⵇ. 
ⴰⵔⴻⴱⴱⵉ ⵏⵏⴻⵖ ⴰⴷ ⴷⴷ-ⵢⴰⵙ, ⵡⴰⵔ ⵉⵙⵙⴻⵖⴷ ⵛⴰ. ⵜⵉⵎⴻⵙⵙⵉ ⵣⵣⴰⵜⴻⵙ ⴰⴷ ⵜⴻⵛⵛ, ⵜⴰⵃⴰⵔⵢⴰⴹⵜ ⵉ ⴷ ⴰⵙ ⴷⴷ-ⵉⵜⵜⴻⵏⵏⴹⴻⵏ ⴰⴷ ⵜⵙⵓⴹ ⴰⵟⵟⴰⵙ. 
ⵏⴻⵜⵜⴰ ⴰⴷ ⵉⵍⴰⵖⴰ ⵉ ⵉⵊⴻⵏⵡⴰⵏ ⵙⴻⵏⵏⴻⵊ, ⵉ ⵜⴻⵎⵎⵓⵔⵜ ⵃⵉⵎⴰ ⴰⴷ ⵉⵃⴽⴻⵎ ⵅ ⵍⴳⴻⵏⵙ ⵏⵏⴻⵙ: 
“ⵙⵎⵓⵏⴻⵎ-ⴷⴷ ⵖⴰⵔⵉ ⵉⵎⵜⵉⵇⵇⴰⵏ ⵉⵏⵓ, ⵉⵏⵏⵉ ⴽⵉⴷⵉ ⵉⵜⵜⴻⴳⴳⴻⵏ ⵍⵄⴰⵀⴷ ⵙ ⵜⵖⴰⵔⵚⵜ.” 
ⵉⵊⴻⵏⵡⴰⵏ ⵜⵜⴱⴰⵔⵔⵃⴻⵏ ⵜⴰⵙⴻⴳⴷⴰ ⵏⵏⴻⵙ, ⵎⴰⵖⴰⵔ ⴰⵔⴻⴱⴱⵉ ⵙ ⵢⵉⵅⴻⴼ ⵏⵏⴻⵙ ⴰⵇⴰ-ⵜ ⴷ ⵍⵇⴰⴹⵉ. ⵙⵉⵍⴰⵀ. 
“ⵙⴻⵍ, ⴰ ⵍⴳⴻⵏⵙ ⵉⵏⵓ, ⵓ ⵏⴻⵛⵛ ⴰⴷ ⵙⵙⵉⵡⵍⴻⵖ, ⵉⵙⵔⴰⵉⵍ, ⵏⴻⵛⵛ ⴰⴷ ⵛⴻⵀⴷⴻⵖ ⴹⵉⴷⴷ ⵏⵏⴻⵛ: ⴰⵇⴰ ⵏⴻⵛⵛ, ⴰⵔⴻⴱⴱⵉ, ⴷ ⴰⵔⴻⴱⴱⵉ ⵏⵏⴻⵛ! 
ⵡⴰⵔ ⵉⴵⵉ ⵅ ⵜⵖⴰⵔⵚⴰ ⵏⵏⴻⵛ ⴰⴷ ⵛⴻⴽ ⵡⴻⴱⴱⵅⴻⵖ, ⵎⴰⵖⴰⵔ ⵜⵉⵖⴰⵔⵚⴰ ⵏⵏⴻⵛ ⴰⵇⴰ ⴰⵜⴻⵏⵜ ⵍⴻⴱⴷⴰ ⵣⵣⴰⵜⵉ. 
ⵡⴰⵔ ⴽⴻⵙⵙⵉⵖ ⵛⴰ ⴰⴼⵓⵏⴰⵙ ⴰⵎⴻⵥⵢⴰⵏ ⵣⵉ ⵜⴰⴷⴷⴰⵔⵜ ⵏⵏⴻⵛ, ⵓⵍⴰ ⴷ ⵉⵖⴰⵢⴹⴻⵏ ⵣⵉ ⵜⴻⵇⵡⵉⵔⵉⵏ ⵏⵏⴻⵛ. 
ⵎⴰⵖⴰⵔ ⵎⴰⵔⵔⴰ ⵉⵎⵓⴷⴷⴰⵔ ⵏ ⵡⴻⵣⵖⴰⵔ, ⴰⵇⴰ ⵉⵏⵓ, ⵍⵎⴰⵍ ⵅ ⵡⴰⵍⴻⴼ ⵉⴷⵓⵔⴰⵔ. 
ⵏⴻⵛⵛ ⵙⵙⵏⴻⵖ ⵎⴰⵔⵔⴰ ⵉⵊⴹⴰⴹ ⵏ ⵉⴷⵓⵔⴰⵔ, ⵎⴰⵔⵔⴰ ⵎⵉⵏ ⵉⵜⵜⴻⵏⵀⴻⵣⵣⴰⵏ ⴷⴻⴳ ⵉⵢⵢⴰⵔ, ⴰⵇⴰ-ⵜ ⵉⵏⵓ. 
ⵎⵍⵉ ⵜⵓⵖⴰ ⴷⴰⵢⵉ ⵍⴰⵥ, ⵎⴰ ⵡⴰⵔ ⴷ ⴰⵛ ⵜ ⵇⵇⴰⵔⴻⵖ, ⵎⴰⵖⴰⵔ ⵉⵏⵓ ⴷⴷⵓⵏⴻⵛⵜ ⴷ ⵓⵄⴻⵎⵎⴰⵔ ⵏⵏⴻⵙ. 
ⵎⴰ ⴰⴷ ⵛⵛⴻⵖ ⵅⴻⵏⵏⵉ ⴰⵢⵙⵓⵎ ⵏ ⵉⴼⵓⵏⴰⵙⴻⵏ ⵉⵊⴻⵀⴷⴻⵏ, ⵏⵉⵖ ⵉⴷⴰⵎⵎⴻⵏ ⵏ ⵉⵖⴰⵢⴹⴻⵏ? 
ⴰⵡⵉ-ⴷⴷ ⵉ ⴰⵔⴻⴱⴱⵉ ⵜⴰⵡⵀⵉⴱⵜ ⵏ ⵓⵇⴰⴷⵉ, ⴽⴻⵎⵎⴻⵍ ⵍⵡⵓⵄⵓⴷ ⵏⵏⴻⵛ ⵉ ⵓⵎⵄⵓⴵⵉ ⵅ ⴽⵓⵍⵛⵉ. 
ⵍⴰⵖⴰ ⴰⵢⵉ-ⴷⴷ ⴷⴻⴳ ⵡⴰⵙⵙ ⵏ ⵍⴻⵃⵚⴰⵔⴻⵜ, ⵅⴻⵏⵏⵉ ⴰⴷ ⵛⴻⴽ ⵙⵙⵏⴻⵊⵎⴻⵖ ⵓⵛⴰ ⵛⴻⴽ ⴰⴷ ⴰⵢⵉ ⵜⴻⴳⴳⴻⴷ ⵛⵛⴰⵏ.” 
ⵎⴰⵛⴰ ⵉ ⵓⵄⴻⴼⴼⴰⵏ ⵉⵇⵇⴰⵔ ⴰⵔⴻⴱⴱⵉ: “ⵎⴰⵢⴻⵎⵎⵉ ⵜⴱⴰⵔⵔⵃⴻⴷ ⵜⵉⵡⴻⵚⵚⴰ ⵉⵏⵓ, ⵎⴰⵢⴻⵎⵎⵉ ⵉ ⵜⴻⴳⴳⵉⴷ ⵍⵄⴰⵀⴷ ⵉⵏⵓ ⴷⴻⴳ ⵓⵇⴻⵎⵎⵓⵎ ⵏⵏⴻⵛ, 
ⵓⵎⵉ ⵜⵛⴰⵔⵔⵀⴻⴷ ⵜⵜⴰⵔⴱⵉⵢⵢⴻⵜ ⵉⵏⵓ ⵓ ⵜⴻⵏⴹⴰⵔⴻⴷ ⴰⵡⴰⵍⴻⵏ ⵉⵏⵓ ⴰⵡⴰⵔⵏⵉ ⴰⵛ. 
ⵎⴰⵍⴰ ⵜⴻⵥⵔⵉⴹ ⵉⵊⵊ ⵏ ⵓⵅⴻⵡⵡⴰⵏ, ⴰⵎⵎⵓ ⵉ ⵜⴻⴳⴳⵓⵔⴻⴷ ⴰⴽⵉⴷⴻⵙ, ⵜᵉⵜⵜⵚⵓⵔⵉⴷ ⴰⴽ-ⴷ ⵢⵉⵏⵏⵉ ⵉⵣⴻⵏⵏⴰⵏ. 
ⴰⵇⴻⵎⵎⵓⵎ ⵏⵏⴻⵛ ⵜᵉⵜⵜⴰⵔⵔⵉⴷ ⵉ-ⵜ ⵉ ⵍⵖⴰⵔ, ⵉⵍⴻⵙ ⵏⵏⴻⵛ ⵉⵜⵜⵅⴰⵔⵔⴻⵚ ⴷⴻⴳ ⵡⴻⵛⵎⴰⵜ. 
ⵜⴻⵜⵜⵖⵉⵎⵉⴷ ⴷⵉⵏⵏⵉ, ⵜⴻⵙⵙⴰⵡⴰⵍⴻⴷ ⵅ ⵓⵎⴰⵛ, ⵜⴻⵙⵙⴻⴼⴷⴰⵃⴻⴹ ⵣⵉ ⵎⵎⵉⵙ ⵏ ⵢⴻⵎⵎⴰⵙ. 
ⴰⵢⴰ ⵜᵉⵜⵜⴻⴳⴳⴻⴷ ⵓ ⵏⴻⵛⵛ ⵙⵙⴻⵖⴷⵉⵖ. ⵜⵜⵖⵉⵍ ⴰⵛ, ⴰⵇⴰ ⴰⵢⵉ ⴰⵎ ⵛⴻⴽ. ⵏⴻⵛⵛ ⴰⴷ ⵛⴻⴽ ⵡⴻⴱⴱⵅⴻⵖ, ⴰⴷ ⵙⵙⴰⵔⵙⴻⵖ ⴷⴷⵏⵓⴱ ⵏⵏⴻⵛ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵛ. 
ⴼⵀⴻⵎ ⴰⵢⴰ ⵅⴻⵏⵏⵉ, ⴰ ⵛⴻⴽ ⵉ ⵉⵜⵜⵓⵏ ⴰⵔⴻⴱⴱⵉ, ⵃⵉⵎⴰ ⵡⴰⵔ ⵛⴻⴽ ⵜⵎⴻⵣⵣⵇⴻⵖ ⴰⵎ ⵡⴰⵔ ⴷⵉⵏ ⵉⵜⵜⵉⵍⵉ ⵓⴼⴻⴽⴽⵉ.” 
ⵡⴻⵏⵏⵉ ⴷⴷ-ⵉⵜⵜⴰⵡⵢⴻⵏ ⵜⴰⵖⴰⵔⵚⵜ ⵏ ⵓⵇⴰⴷⵉ, ⵉⵜⵜⴻⴳⴳ ⴰⵢⵉ ⵛⵛⴰⵏ ⵓ ⵉⵙⵙⴻⵡⵊⴰⴷ ⴰⴱⵔⵉⴷ, ⵃⵉⵎⴰ ⴰⴷ ⴰⵙ ⵙⵙⴻⵛⵏⴻⵖ ⴰⵙⴻⵏⵊⴻⵎ ⵏ ⴰⵔⴻⴱⴱⵉ. 
