﻿ⵉⵥⴻⵀⵀⵉⴷⴻⵏ.
48.
ⵉⵣⵍⵉ, ⴰⵣⴻⵀⵀⴻⴷ ⵣⴻⴳ ⴰⵢⵜ ⵏ ⵇⵓⵔⴰⵃ. 
ⵙⵉⴷⵉ ⴷ ⴰⵎⴻⵇⵇⵔⴰⵏ, ⵉⵙⴷⴰⵃⴻⴵⴰ ⴰⴷ ⵉⵜⵜⵡⴰⵙⵙⴻⵎⵖⴰⵔ ⴰⵟⵟⴰⵙ, ⴷⵉ ⵜⴻⵏⴷⵉⵏⵜ ⵏ ⴰⵔⴻⴱⴱⵉ ⵏⵏⴻⵖ, ⵅ ⵡⴻⴷⵔⴰⵔ ⵏⵏⴻⵙ ⵉⵇⴻⴷⴷⵙⴻⵏ. 
ⵍⵓⵄⵍⴰ ⵏⵏⴻⵙ ⴷ ⵍⴻⵎⵍⴰⵃⴻⵜ, ⴰⴷⵔⴰⵔ ⵏ ⵚⵉⵀⵢⵓⵏ ⴰⵇⴰ-ⵜ ⴷ ⵍⴻⴼⵔⴰⵃⴻⵜ ⵉ ⵎⴰⵔⵔⴰ ⵜⴰⵎⵎⵓⵔⵜ, ⵖⴰⵔ ⵓⵖⴻⵣⴷⵉⵙ ⵏ ⵛⵛⴰⵎⴰⵍ ⵏ ⵜⴻⵏⴷⵉⵏⵜ ⵏ ⵓⵊⴻⴵⵉⴷ ⴷ ⴰⵎⴻⵇⵇⵔⴰⵏ. 
ⴰⵔⴻⴱⴱⵉ ⴰⵇⴰ-ⵜ ⴷⵉ ⵍⴻⵇⵚⵓⵔ ⵏⵏⴻⵙ, ⵏⴻⵜⵜⴰ ⵉⵜⵜⵡⴰⵙⵙⴻⵏ ⴰⵎ ⵢⵉⵊⵊ ⵏ ⵍⴱⵓⵔⵊ ⵢⵓⵄⵍⴰⵏ. 
ⵎⴰⵖⴰⵔ ⵅⵣⴰⵔ, ⵉⵊⴻⴵⵉⴷⴻⵏ ⵎⵓⵏⴻⵏ, ⴰⵇⴰ ⴼⴼⵖⴻⵏ ⵊⵎⵉⵄ. 
ⵍⴰⵎⵉ ⵜ ⵥⵔⵉⵏ, ⵜⴱⴻⵀⵜⴻⵏ, ⴰⵇⴰ ⵏⵏⵊⴻⵔⴼⴰⵏ ⵓⵛⴰ ⴰⵔⴻⵡⵍⴻⵏ ⴷⴻⵖⵢⴰ. 
ⴷⵉⵏⵏⵉ ⵜᵉⵟⵟⴻⴼ ⵉ-ⵜⴻⵏ ⵜⴰⵔⵊⵉⵊⵉⵜ, ⴰⵎ ⵍⴻⵃⵔⵉⵇ ⵏ ⵉⵛⵜ ⵏ ⵜⴻⵎⵖⴰⵔⵜ ⵜᵉⵜⵜⴰⵔⵓ. 
ⵙ ⵓⵙⴻⵎⵎⵉⴹ ⵣⵉ ⵛⵛⴰⵔⵇ ⵜᵉⵜⵜⴰⵔⴻⵥⵥⵉⴷ ⵉⵖⴰⵔⵔⵓⴱⴰ ⵏ ⵜⴰⵔⵛⵉⵛ. 
ⴰⵎ ⵎⴰⵎⵎⴻⵛ ⵜⵓⵖⴰ ⵜⵜ ⵏⴻⵙⵍⴰ, ⴰⵎⵎⵓ ⵉ ⵜⵜ ⵏⴻⵜⵡⴰⵍⴰ ⴷⵉ ⵜⴻⵏⴷⵉⵏⵜ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ, ⴷⵉ ⵜⴻⵏⴷⵉⵏⵜ ⵏ ⴰⵔⴻⴱⴱⵉ ⵏⵏⴻⵖ. ⴰⵔⴻⴱⴱⵉ ⴰⴷ ⵜⵜ ⵉⵙⵙⴻⵎⵜⴻⵏ ⵉ ⵍⴻⴱⴷⴰ. ⵙⵉⵍⴰⵀ. 
ⴰ ⴰⵔⴻⴱⴱⵉ, ⵏⵉⴷⴰⵔ ⵜⴰⵎⴻⵅⵙⵉⵡⵜ ⵏⵏⴻⵛ ⵉⵛⴻⵡⵡⴰⵔⴻⵏ, ⴷⵉ ⵍⵡⴻⵙⵟ ⵏ ⵣⵣⴰⵡⴻⵛⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ. 
ⴰⵎ ⵉⵙⴻⵎ ⵏⵏⴻⵛ, ⴰ ⴰⵔⴻⴱⴱⵉ, ⴰⵎⵎⵓ ⵉⵜⵜⴰⴽⴽⵡⴰⴹ ⵓⵍⴰ ⴷ ⵛⵛⴰⵏ ⵏⵏⴻⵛ ⴰⵍ ⵜⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ. ⴰⴼⵓⵙ ⵏⵏⴻⵛ ⴰⴼⵓⵙⵉ ⵉⵛⵛⵓⵔ ⵙ ⵜⵙⴻⴳⴷⴰ. 
ⴻⵊⵊ ⴰⴷⵔⴰⵔ ⵏ ⵚⵉⵀⵢⵓⵏ ⴰⴷ ⵉⴼⴰⵔⵃ, ⵊⵊⴻⵎ ⵢⴻⵙⵙⵉⵙ ⵏ ⵢⴰⵀⵓⴷⴰ ⴰⴷ ⴰⵔⴻⵛⵇⴻⵏⵜ ⵣⵉ ⵙⵙⵉⴱⴱⴻⵜ ⵏ ⵍⴻⵃⴽⴰⵎⴰⵜ ⵏⵏⴻⵛ. 
ⴽⴽⴻⵎ ⵅ ⵚⵉⵀⵢⵓⵏ, ⵏⵏⴹⴻⵎ ⴰⵙ-ⴷⴷ, ⵃⴻⵙⴱⴻⵎ ⵚⵚⵓⵎⵄⴰⵜ ⵏⵏⴻⵙ! 
ⴳⴳⴻⵎ ⵓⵍ ⵏⵡⴻⵎ ⵅ ⵍⵃⵉⴹ ⵏⵏⴻⵙ ⵉⵊⴻⵀⴷⴻⵏ, ⵅⵣⴰⵔⴻⵎ ⵎⵍⵉⵃ ⴷⵉ ⵍⴻⵇⵚⵓⵔ ⵏⵏⴻⵙ, ⵃⵉⵎⴰ ⴰⴷ ⵜⵜ ⵜⵜⵄⴰⵡⴷⴻⴷ ⵉ ⵊⵊⵉⵍ ⵉ ⴷⴷ ⵖⴰ ⵢⴰⵙⴻⵏ. 
ⵎⴰⵖⴰⵔ ⴰⵔⴻⴱⴱⵉ ⵡⴰⵏⵉⵜⴰ ⴷ ⴰⵔⴻⴱⴱⵉ ⵏⵏⴻⵖ ⵉ ⵍⴻⴱⴷⴰ ⵇⴰⵄ. ⵏⴻⵜⵜⴰ ⴰⴷ ⴰⵏⴻⵖ ⵉⵏⴷⴻⵀ ⵖⴰⵔ ⵓⵊⴻⵎⵎⴰⴹ ⵏ ⵍⵎⴻⵡⵜ. 
