﻿ⵉⵥⴻⵀⵀⵉⴷⴻⵏ.
38.
ⴰⵣⴻⵀⵀⴻⴷ ⵏ ⴷⴰⵡⵓⴷ. ⵉ ⵍⵉⴷⴰⵔⴻⵜ. 
ⴰ ⵙⵉⴷⵉ, ⵡⴰⵔ ⴷ ⴰⵢⵉ ⵜⵜⵄⴰⵇⴰⴱ ⴷⴻⴳ ⵓⴷⵓⵇⵇⴻⵣ ⵏ ⵡⴻⵖⴹⴰⴱ ⵏⵏⴻⵛ, ⵡⴰⵔ ⴷ ⴰⵢⵉ ⵜⵜⵡⴻⴷⴷⴰⴱ ⵙ ⵡⴻⵙⵄⴰⵔ ⵏⵏⴻⵛ. 
ⵎⴰⵖⴰⵔ ⴼⵍⵉⵜⵛⴰⵜ ⵏ ⵍⵇⴻⵡⵙ ⵏⵏⴻⵛ ⵓⴷⴼⴻⵏⵜ ⴷⴰⵢⵉ, ⴰⴼⵓⵙ ⵏⵏⴻⵛ ⵉⵜⵜⵣⴻⵢⵢⴰⵔ ⵅⴰⴼⵉ. 
ⵡⴰⵔ ⴷⵉⵏ ⵉⵇⵇⵉⵎ ⵎⵉⵏ ⵉⴵⴰⵏ ⵉⴽⴻⵎⵎⵍⴻⵏ ⴷⵉ ⴰⵔⵔⵉⵎⴻⵜ ⵉⵏⵓ ⵣⴻⴳ ⵡⴻⵙⵅⴻⴹ ⵏⵏⴻⵛ, ⵡⴰⵔ ⵉⵇⵇⵉⵎ ⵎⵉⵏ ⵉⵚⴻⵃⵃⴻⵏ ⴷⴻⴳ ⵉⵖⵙⴰⵏ ⵉⵏⵓ ⵣⵉ ⵙⵙⵉⴱⴱⴻⵜ ⵏ ⴷⴷⴻⵏⴱ ⵉⵏⵓ. 
ⵎⴰⵖⴰⵔ ⵍⵎⵓⵄⵚⵉⵢⵢⴰⵜ ⵉⵏⵓ ⴳⴻⵄⵄⴷⴻⵏⵜ ⴰⵢⵉ ⵖⴰⵔ ⵓⵣⴻⴵⵉⴼ ⵉⵏⵓ, ⴷⴻⵇⵇⵍⴻⵏⵜ ⵅⴰⴼⵉ ⴰⵎ ⵢⵉⵊⵊ ⵏ ⴷⴷⵇⴻⵍ ⵉⵎⵖⴰⵔ ⴰⵟⵟⴰⵙ. 
ⵉⵢⴻⵣⵣⵉⵎⴻⵏ ⵉⵏⵓ ⴷⴰⵢⵙⴻⵏ ⴰⵔⵔⵉⵃⴻⵜ, ⴳⴻⵢⵢⵃⴻⵏ ⵙ ⵜⵓⴱⴱⵓⵀⴻⵍⵢⴰ ⵉⵏⵓ. 
ⴷⴻⵡⵍⴻⵖ ⵇⴻⵡⵙⴻⵖ, ⴷⴻⵡⵍⴻⵖ ⵖⴻⵏⵙⴻⵖ ⴰⵍ ⵟⵟⴰⵔⴼ. ⴰⵙⵙ ⵎⴰⵔⵔⴰ ⴳⴳⵓⵔⴻⵖ ⴷⴻⴳ ⵡⴰⵔⵔⵓⴹ ⵏ ⵡⴻⵛⴹⴰⵏ ⴷ ⴰⴱⴰⵔⵛⴰⵏ. 
ⵎⴰⵖⴰⵔ ⵜⵜⴰⵛⵉⵖ ⵜⵉⵊⵄⵉⵏⵏⴰⵜⵉⵏ ⵉⵏⵓ ⴰⵔⵖⵉⵏⵜ ⵙ ⵜⵎⴻⵙⵙⵉ ⵎⴰⵔⵔⴰ, ⵡⴰⵔ ⴷⵉⵏ ⵉⵇⵇⵉⵎ ⵎⵉⵏ ⵉⴵⴰⵏ ⵉⴽⴻⵎⵎⵍⴻⵏ ⴷⵉ ⴰⵔⵔⵉⵎⴻⵜ ⵉⵏⵓ. 
ⵏⴻⵛⵛ ⵊⴻⵎⵎⴷⴻⵖ ⵓ ⵜⵜⵡⴰⵖⴻⴹⵍⴻⵖ ⵇⴰⵄ, ⵙⵖⵓⵢⵢⵓⵖ ⵙ ⵣⵣⵀⵉⵔ ⵏ ⵡⵓⵍ ⵉⵏⵓ. 
ⴰ ⵙⵉⴷⵉ ⵉⵏⵓ, ⵎⴰⵔⵔⴰ ⵎⵉⵏ ⴷⵉ ⵖⴰⵔⵉ ⵎⴻⵥⵔⵉ ⴰⵇⴰ-ⵜ ⵣⵣⴰⵜⴻⴽ, ⴰⵡⴻⵄⵄⴻⴹ ⵉⵏⵓ ⵡⴰⵔ ⵣⵣⴰⵢⴻⴽ ⵉⵜⵜⵏⵓⴼⴼⴰⵔ. 
ⵓⵍ ⵉⵏⵓ ⵉⴷⴷⴻⵏⴷⵓⵏ, ⵎⴰⵔⵔⴰ ⵊⵊⴻⵀⴷ ⵉⴼⴼⴻⵖ ⴰⵢⵉ, ⵓⵍⴰ ⴷ ⵜⴰⴼⴰⵡⵜ ⵜⴻⴼⴼⴻⵖ ⵣⵉ ⵜⵉⵟⵟⴰⵡⵉⵏ ⵉⵏⵓ, ⵡⴰⵀ ⵓⵍⴰ ⴷ ⵏⵉⵜⴻⵏⵜⵉ ⵡⴰⵔ ⵖⴰⵔⵉ ⴱⴻⴷⴷⴻⵏⵜ ⵄⴰⴷ. 
ⵉⵎⵄⵉⵣⵣⴻⵏ ⵉⵏⵓ ⴷ ⵉⵎⴻⴷⴷⵓⴽⴽⴰⵍ ⵉⵏⵓ ⴱⴻⴷⴷⴻⵏ ⴰⵔⴻⵏⴷⴰⴷ ⵉⵏⵓ ⵖⴰⵔ ⵊⵊⵔⵉⵃⴻⵛⵜ ⵉⵏⵓ, ⵓⵍⴰ ⴷ ⵉⵏⵏⵉ ⵉ ⴷ ⴰⵢⵉ ⵢⵓⴷⵙⴻⵏ ⵜⵜⴰⴳⴳⵯⴻⵊⴻⵏ ⵅⴰⴼⵉ. 
ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴽⴽⵙⴻⵏ ⵜⵓⴷⴰⵔⵜ ⵉⵏⵓ, ⵏⴻⴷⵢⴻⵏ ⴰⵢⵉ ⵍⴻⴼⵅⵓⵅ, ⵉⵏⵏⵉ ⵢⴰⵔⴻⵣⵣⵓⵏ ⴰⴷ ⴰⵢⵉ ⴳⴳⴻⵏ ⵍⵖⴰⵔ, ⵙⵙⴰⵡⴰⵍⴻⵏ ⴰⵎ ⵎⵎⴻⵥⵔⴻⵏ ⴰⴷ ⴰⵔⴻⴷⴷⴵⴻⵏ, ⵏⵉⵜⵏⵉ ⵛⴻⵍⵖⴻⵏ ⵙ ⵍⵖⴻⵛⵛ ⴰⵙⵙ ⵎⴰⵔⵔⴰ. 
ⵎⴰⵛⴰ ⵏⴻⵛⵛ ⵜⵜⴻⴳⴳⴻⵖ ⵉⵅⴻⴼ ⵉⵏⵓ ⴰⵅⵎⵉ ⴷ ⴰⴷⴻⵀⵛⵓⵔ, ⴰⵎ ⵡⴻⵢⵏⴰⵡ ⵏⵏⵉ ⵡⴰⵔ ⵢⴰⵔⴻⵣⵣⵎⴻⵏ ⴰⵇⴻⵎⵎⵓⵎ ⵏⵏⴻⵙ. 
ⵏⴻⵛⵛ ⴰⵎ ⵡⴻⵔⵢⴰⵣ ⵡⴰⵔ ⵉⵜⵜⴻⵙⵍⵉⵏ, ⵡⴻⵏⵏⵉ ⵡⴰⵔ ⵖⴰⵔ ⵉⴵⵉ ⵜⵡⴰⵔⵔⵉⵜ ⵣⴻⴳ ⵓⵇⴻⵎⵎⵓⵎ ⵏⵏⴻⵙ. 
ⵎⴰⵖⴰⵔ ⵜⵜⵔⴰⵊⵉⵖ ⵛⴻⴽ, ⴰ ⵙⵉⴷⵉ, ⵛⴻⴽ ⴰⴷ ⴷⴷ-ⵜⴰⵔⵔⵉⴷ, ⴰ ⵙⵉⴷⵉ ⵉⵏⵓ, ⴰ ⴰⵔⴻⴱⴱⵉ ⵉⵏⵓ! 
ⵎⴰⵖⴰⵔ ⵏⵏⵉⵖ: “ⴻⵊⵊ ⵉ-ⵜⴻⵏ ⵡⴰⵔ ⵅⴰⴼⵉ ⴼⴰⵔⵔⵃⴻⵏ, ⵅⵎⵉ ⵖⴰ ⴼⴰⵔⵖⴻⵏ ⵉⴹⴰⵔⴻⵏ ⵉⵏⵓ, ⴻⵊⵊ ⵉ-ⵜⴻⵏ ⵡⴰⵔ ⵙⵙⴻⵎⵖⴰⵔⴰⵏ ⵉⵅⴻⴼ ⵏⵙⴻⵏ ⵅⴰⴼⵉ. 
ⵎⴰⵖⴰⵔ ⵏⴻⵛⵛ ⴰⵇⴰ ⴰⴷ ⵏⵇⴰⵔⴹⴻⵖ, ⵍⴻⵃⵔⵉⵇ ⵉⵏⵓ ⴰⵇⴰ-ⵜ ⵍⴻⴱⴷⴰ ⵣⵣⴰⵜⵉ. 
ⵎⴰⵖⴰⵔ ⵙⵙⴰⵔⴳⴱⴻⵖ ⴰⵛ ⵍⵎⵓⵄⵚⵉⵢⵢⴻⵜ ⵉⵏⵓ, ⴰⵇⴰ ⵜⵜⵡⴰⵃⴻⵚⵚⴰⵔⴻⵖ ⵣⵉ ⴷⴷⴻⵏⴱ ⵉⵏⵓ. 
ⵍⵄⴻⴷⵢⴰⵏ ⵉⵏⵓ ⴷⴷⴰⵔⴻⵏ, ⴰⵇⴰ ⴰⵜⴻⵏ ⵙ ⵊⵊⴻⵀⴷ, ⴰⵟⵟⴰⵙ ⴵⴰⵏ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ ⴱⵍⴰ ⵙⵙⵉⴱⴱⴻⵜ. 
ⵉⵏⵏⵉ ⵉⵜⵜⴰⵔⵔⴰⵏ ⵍⵅⴰⵔ ⵙ ⵍⵖⴰⵔ ⵙⵙⴱⴻⴷⴷⴻⵏ ⵉⵅⴻⴼ ⵏⵙⴻⵏ ⴹⵉⴷⴷ ⵉⵏⵓ, ⵓⵎⵉ ⵏⴻⵛⵛ ⴰⵔⴻⵣⵣⵓⵖ ⵅ ⵎⵉⵏ ⵉⵚⴻⴱⵃⴻⵏ. 
ⵡⴰⵔ ⴷⴰⵢⵉ ⵙⴻⵎⵎⴻⵃ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵡⴰⵔ ⵅⴰⴼⵉ ⵜⵜⴰⴳⴳⵯⴻⵊ. 
ⴷⴻⵖⵢⴻⵜ ⵃⵉⵎⴰ ⴰⴷ ⴰⵢⵉ ⵜⴻⵡⵛⵉⴷ ⴰⴼⵓⵙ, ⴰ ⵙⵉⴷⵉ ⵉⵏⵓ, ⴰⵙⴻⵏⵊⴻⵎ ⵉⵏⵓ. 
