﻿ⵉⵥⴻⵀⵀⵉⴷⴻⵏ.
35.
ⵏ ⴷⴰⵡⵓⴷ. ⵎⵛⵓⴱⴱⴻⵛ, ⴰ ⵙⵉⴷⵉ, ⴰⴽ-ⴷ ⵢⵉⵏⵏⵉ ⴰⴽⵉⴷⵉ ⵉⵜⵜⴻⵎⵛⵓⴱⴱⵓⵛⴻⵏ, ⵎⵏⴻⵖ ⴰⴽ-ⴷ ⵢⵉⵏⵏⵉ ⴽⵉⴷⵉ ⵉⵜⵜⵎⴻⵏⵖⴰⵏ. 
ⵟⵟⴻⴼ ⵜⴰⵙⴻⴷⴷⴰⵔⵜ ⵏ ⵓⵙⴻⵍⵇⵉ ⴷ ⵜⵙⴻⴷⴷⴰⵔⵜ ⵜⴰⵎⴻⵇⵇⵔⴰⵏⵜ, ⵓⵛⴰ ⴽⴽⴰⵔ, ⴻⵡⵛ ⴰⵢⵉ ⴰⴼⵓⵙ. 
ⵊⴱⴻⴷ-ⴷⴷ ⵍⴰⵏⵙⴰ, ⵇⵇⴻⵏ ⴰⴱⵔⵉⴷ ⵉ ⵓⵎⵙⴰⴳⴰⵔ ⴰⴽ-ⴷ ⵢⵉⵏⵏⵉ ⴷⴷ ⴰⵢⵉ ⵉⴹⴰⴼⴼⴰⵔⴻⵏ, ⵉⵏⵉ ⵉ ⵍⴻⵄⵎⴰⵔ ⵉⵏⵓ: “ⴰⵙⴻⵏⵊⴻⵎ ⵏⵏⴻⵛ ⴰⵇⴰ ⴷ ⵏⴻⵛⵛ!” 
ⴰⵔⵔ ⵉⵏⵏⵉ ⵢⴰⵔⴻⵣⵣⵓⵏ ⵅ ⵍⴻⵄⵎⴰⵔ ⵉⵏⵓ ⴰⴷ ⵜⵜⵡⴰⵅⴰⵔⴻⵡⴹⴻⵏ ⵓ ⴰⴷ ⵜⵜⵡⴰⴼⴻⴹⵃⴻⵏ, ⴻⵊⵊ ⵉⵏⵏⵉ ⵉⵜⵜⵅⴰⵔⵔⵉⵚⴻⵏ ⴷⵉ ⵍⵖⴰⵔ ⵅⴰⴼⵉ ⴰⴷ ⵜⵜⵡⴰⵄⴰⵔⵔⵏⴻⵏ ⵖⴰⵔ ⴹⴻⴼⴼⴰⵔ, ⴻⵊⵊ ⵉ-ⵜⴻⵏ ⴰⴷ ⴷⴻⵡⵍⴻⵏ ⵜⵜⵙⴻⴹⵃⴰⵏ. 
ⴻⵊⵊ ⵉ-ⵜⴻⵏ ⴰⴷ ⴷⴻⵡⵍⴻⵏ ⴰⵎ ⵢⵉⵛⴰⵔⴼⴰ ⴷⴻⴳ ⵓⵙⴻⵎⵎⵉⴹ, ⴻⵊⵊ ⵍⵎⴰⵍⴰⴽ ⵏ ⵙⵉⴷⵉ ⴰⴷ ⵜⴻⵏ ⵉⵄⴰⵔⵏ. 
ⴻⵊⵊ ⴰⴷ ⵉⴷⵡⴻⵍ ⵡⴻⴱⵔⵉⴷ ⵏⵙⴻⵏ ⴷ ⵜⴰⴵⴻⵙⵜ, ⴰⴷ ⵢⵉⵍⵉ ⵉⵜⵜⴻⵃⵍⵓⴵⵓⴹ, ⵓⵛⴰ ⴻⵊⵊ ⵍⵎⴰⵍⴰⴽ ⵏ ⵙⵉⴷⵉ ⴰⴷ ⵜⴻⵏ ⵉⴹⴼⴰⵔ. 
ⵎⴰⵖⴰⵔ ⴱⵍⴰ ⵙⵙⵉⴱⴱⴻⵜ ⵙⵙⵏⵓⴼⴼⴰⵔⴻⵏ ⵅⴰⴼⵉ ⴰⵃⴼⵓⵔ ⵏ ⵜⵓⵔⵚⵓⴹⵉ ⴷ ⵜⵔⴰⵛⵛⴰ ⵏⵙⴻⵏ, ⴱⵍⴰ ⵙⵙⵉⴱⴱⴻⵜ ⵖⵣⵉⵏ ⵜ ⵉ ⵍⴻⵄⵎⴰⵔ ⵉⵏⵓ. 
ⴻⵊⵊ ⴰⵔⴻⴷⴷⴻⴵ ⴰⴷ ⵅⴰⵙ ⴷⴷ-ⵢⴰⵙ ⴱⵍⴰ ⵎⴰ ⵉⵙⵙⴻⵏ, ⴻⵊⵊ ⵜⵔⴰⵛⵛⴰ ⵏⵏⴻⵙ ⵏⵏⵉ ⵉⵙⵙⵏⵓⴼⴼⴰⵔ ⴰⴷ ⵜ ⵜᵉⵟⵟⴻⴼ ⵙⵉⵎⴰⵏⵜ ⵏⵏⴻⵙ, ⴻⵊⵊ ⵉ-ⵜ ⴰⴷ ⴷⴰⵢⴻⵙ ⴷⴷ-ⵉⵡⴹⴰ ⵙⵉⵎⴰⵏⵜ ⵏⵏⴻⵙ, ⵙ ⵉⵊⵊ ⵏ ⵓⵡⴻⵟⵟⵓ ⵉ ⵜ ⵉ ⵖⴰ ⵢⴰⵔⴻⴷⴷⴵⴻⵏ. 
ⵍⴻⵄⵎⴰⵔ ⵉⵏⵓ ⴰⴷ ⵉⴼⴰⵔⵃ ⵣⵉ ⵙⵉⴷⵉ, ⴰⴷ ⵢⴰⵔⵛⴻⵇ ⴷⴻⴳ ⵓⵙⴻⵏⵊⴻⵎ ⵏⵏⴻⵙ. 
ⴰⴷ ⵉⵏⵉⵏ ⵎⴰⵔⵔⴰ ⵉⵖⵙⴰⵏ ⵉⵏⵓ: “ⴰ ⵙⵉⴷⵉ, ⵎⴰⵏ ⵡⴻⵏ ⵉⴵⴰⵏ ⴰⵎ ⵛⴻⴽ! ⵛⴻⴽ ⴷ ⵡⴻⵏⵏⵉ ⵉⵜⵜⴼⴻⴽⴽⴰⵏ ⵍⵎⴻⵙⴽⵉⵏ ⵣⴻⴳ ⵡⴻⵏⵏⵉ ⵅⴰⵙ ⵉⵊⴻⵀⵀⴷⴻⵏ, ⵍⵎⴻⵙⴽⵉⵏ ⴷ ⵓⵎⴻⵣⵍⵓⴹ ⵣⴻⴳ ⵉⵏⵏⵉ ⴷ ⴰⵙⴻⵏ ⵉⴽⴻⵛⵛⴹⴻⵏ.” 
ⵉⵛⴻⵀⵀⴰⴷⴻⵏ ⵉⵇⵟⴰⵟⵄⵉⵢⵢⴻⵏ ⴽⴽⴰⵔⴻⵏ. ⵎⵉⵏ ⵡⴰⵔ ⵙⵙⵉⵏⴻⵖ, ⵜⵜⵙⴻⵇⵙⴰⵏ ⴰⵢⵉ. 
ⴰⵔⵔⵉⵏ ⴰⵢⵉ-ⴷⴷ ⵍⵖⴰⵔ ⴷⵉ ⵍⵅⴰⵔ, ⴳⴳⵉⵏ ⴷⴰⵢⵉ ⵍⴻⵃⵡⴻⵊ ⵏ ⵢⵉⵏⵏⵉ ⵅⴰⴼⵉ ⵉⵄⵉⵣⵣⴻⵏ. 
ⵏⴻⵛⵛ ⵎⴰⵛⴰ ⴰⵔⴹⴻⵖ ⵉⵛⵜ ⵏ ⵜⵅⴰⵏⵛⴻⵜ ⵏ ⵡⴻⵛⴹⴰⵏ, ⵍⴰⵎⵉ ⵜⵓⵖⴰ ⵀⴻⴵⵛⴻⵏ ⵏⵉⵜⵏⵉ, ⴳⴳⵉⵖ ⴰⴷ ⵉⵥⵓⵎⵎ ⵍⴻⵄⵎⴰⵔ ⵉⵏⵓ, ⵓⵛⴰ ⵜⴰⵥⴰⴵⵉⵜ ⵉⵏⵓ ⵜᵉⵜⵜⵖⵉⵎⴰ ⵜᵉⴷⴷⴻⴽⴽⵡⴰⵍ-ⴷⴷ ⵖⴰⵔⵉ ⴷⵉ ⴷⴰⵅⴻⵍ ⵉⵏⵓ. 
ⴰⵅⵎⵉ ⵜ ⵜⵓⵖⴰ ⴷ ⴰⵎⴻⴷⴷⵓⴽⴽⴻⵍ ⵉⵏⵓ ⵏⵉⵖ ⴷ ⵓⵎⴰ, ⴰⵎⵎⵓ ⵉ ⵜⵓⵖⴰ ⴳⴳⵓⵔⴻⵖ, ⴰⵎ ⵛⴰ ⵏ ⵉⵊⵊ ⵉⵛⴻⵟⵟ ⵅ ⵢⴻⵎⵎⴰⵙ, ⴰⵎⵎⵓ ⵜⵓⵖⴰ ⴰⵢⵉ ⴳⴳⵓⵔⴻⵖ ⵖⴻⵏⵏⵙⴻⵖ ⴷⴻⴳ ⵡⴰⵔⵔⵓⴹ ⴷ ⴰⴱⴰⵔⵛⴰⵏ. 
ⵎⴰⵛⴰ ⵅⵎⵉ ⵜⵜⵇⴻⵊⴷⵉⵃⴻⵖ, ⴼⴰⵔⵔⵃⴻⵏ ⵏⵉⵜⵏⵉ, ⵜⵜⵎⵓⵏⴻⵏ ⴰⴽ-ⴷ ⵡⴰⵢⴰⵡⵢⴰ. ⵜⵜⵎⵓⵏⴻⵏ ⴹⵉⴷⴷ ⵉⵏⵓ ⵉⵏⵏⵉ ⵏ ⵡⴰⴷⴷⴰⵢ, ⴱⵍⴰ ⵎⴰ ⴰⴷ ⵜ ⵙⵙⵏⴻⵖ. ⵛⴻⵇⵇⴼⴻⵏ ⴷⴰⵢⵉ, ⵡⴰⵔ ⵙⵙⵓⵙⵎⴻⵏ. 
ⴰⵎ ⵉⵏⵏⵉ ⵉⵖⴻⵟⵟⵚⴻⵏ ⴱⵏⴰⴷⴻⵎ ⵉ ⵢⵉⵊⵊ ⵏ ⵓⵍⴻⵇⵇⵓⵣ ⵏ ⵡⴻⵖⵔⵓⵎ, ⴰⵎⵎⵓ ⵖⴻⵣⵣⴰⵏ-ⴷⴷ ⵖⴰⵔⵉ ⵜⵉⵖⵎⴰⵙ. 
ⴰ ⵙⵉⴷⵉ ⵉⵏⵓ, ⴰⵍ ⵎⴻⵛⵃⴰⵍ ⵉ ⵖⴰ ⵜⴻⴽⴽⴻⴷ ⵜⵅⴻⵣⵣⴰⵔⴻⴷ ⵡⴰⵀⴰ? ⵙⴻⵏⵊⴻⵎ ⴰⵢⵉ ⵣⴻⴳ ⵡⴰⵔⴻⴷⴷⴻⴵ ⵏⵙⴻⵏ ⵉ ⵉⴳⴳⵉⵏ, ⴰⵢⴻⵏⵏⵉ ⵉⵏⵓ ⵣⴻⴳ ⵡⴻⵢⵔⴰⴷⴻⵏ ⵉⵎⴻⵥⵢⴰⵏⴻⵏ. 
ⵏⴻⵛⵛ ⴰⴷ ⵛⴻⴽ ⵇⴰⴷⵉⵖ ⴷⴻⴳ ⵢⵉⵊⵊ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⴷ ⴰⵎⴻⵇⵇⵔⴰⵏ, ⴰⴷ ⵛⴻⴽ ⵚⴻⴱⴱⵃⴻⵖ ⵊⴰⵔ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ ⴰⵟⵟⴰⵙ. 
ⵉⵏⵏⵉ ⵉⴵⴰⵏ ⴷ ⵍⵄⴻⴷⵢⴰⵏ ⵉⵏⵓ ⴷⵉ ⵍⴱⴰⵟⴻⵔ, ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵅⴰⴼⵉ ⴼⴰⵔⵃⴻⵏ, ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵅⴰⴼⵉ ⵎⵎⵙⴻⵖⵎⴰⵣⴻⵏ ⴱⵍⴰ ⵙⵙⵉⴱⴱⴻⵜ. 
ⵎⴰⵖⴰⵔ ⵏⵉⵜⵏⵉ ⵡⴰⵔ ⵙⵙⵉⵡⵉⵍⴻⵏ ⵛⴰ ⵅ ⵍⴻⵀⵏⴰ, ⵎⴰⵛⴰ ⵜⵜⵅⴰⵔⵔⵉⵚⴻⵏ ⴷⴻⴳ ⵉⵏⵡⴰⵢⴻⵏ ⵛⵛⵓⵔⴻⵏ ⵙ ⵍⵖⴻⵛⵛ ⴹⵉⴷⴷ ⵉⵏⵏⵉ ⵢⴰⵔⴻⵣⵣⵓⵏ ⵍⵀⵓⴷⵏⴻⵜ ⴷⵉ ⵜⴻⵎⵎⵓⵔⵜ. 
ⵏⵉⵜⵏⵉ ⴰⵔⴻⵣⵣⵎⴻⵏ ⴰⵇⴻⵎⵎⵓⵎ ⵏⵙⴻⵏ ⵇⴰⵄ, ⵇⵇⴰⵔⴻⵏ: “ⵀⴰ, ⵀⴰ, ⵜⵉⵟⵟ ⵏⵏⴻⵖ ⵙⵉⵎⴰⵏⵜ ⵏⵏⴻⵙ ⵜⴻⵥⵔⴰ ⵉ-ⵜⵜ!” 
ⴰ ⵙⵉⴷⵉ, ⵛⴻⴽ ⵜⴻⵥⵔⵉⴷ ⵜⵜ, ⵡⴰⵔ ⵜⵜⴻⵙⵇⴰⵔⴰ, ⵙⵉⴷⵉ ⵉⵏⵓ, ⵡⴰⵔ ⵅⴰⴼⵉ ⵜⵜⴻⴳⴳⵯⵉⵊ ⵛⴰ. 
ⴼⴰⵇ, ⴽⴽⴰⵔ ⴷⵉ ⵟⵟⵡⴻⵄ ⵏ ⵍⵃⴻⵇⵇ ⵉⵏⵓ, ⴰ ⴰⵔⴻⴱⴱⵉ ⵉⵏⵓ ⴷ ⵙⵉⴷⵉ ⵉⵏⵓ, ⴷⵉ ⵟⵟⵡⴻⵄ ⵏ ⴷⴷⴻⵄⵡⴻⵜ ⵉⵏⵓ. 
ⵃⴽⴻⵎ ⵅⴰⴼⵉ ⵙ ⵍⵃⴻⵇⵇ ⵄⵍⴰⵃⵙⴰⴱ ⵜⴰⵙⴻⴳⴷⴰ ⵏⵏⴻⵛ, ⴰ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵅⴰⴼⵉ ⴼⴰⵔⵃⴻⵏ. 
ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵉⵏⵉⵏ ⴷⴻⴳ ⵡⵓⵍ ⵏⵙⴻⵏ: “ⵀⴰ, ⴰⵇⴰ ⴰⵏⴻⵖ ⵎⵍⵉⵃ!”, ⵡⴰⵔ ⵜⴻⵏ ⵜⵜⴻⵊⵊⵉ ⴰⴷ ⵉⵏⵉⵏ: “ⴰⵇⴰ ⵏⵙⴰⵔⴹ ⵉ-ⵜ!” 
ⴻⵊⵊ ⵉⵏⵏⵉ ⵉⴼⴰⵔⵔⵃⴻⵏ ⵅ ⴰⵔⵥⵉⵢⵢⴻⵜ ⵉⵏⵓ, ⴰⴷ ⵜⵜⵡⴰⵅⴰⵔⴻⵡⴹⴻⵏ ⵓ ⴰⴷ ⵙⵙⵏⵓⴼⴼⴰⵔⴻⵏ ⵉⵅⴻⴼ ⵏⵙⴻⵏ ⵊⵎⵉⵄ, ⴻⵊⵊ ⵉⵏⵏⵉ ⵉⴳⴳⵉⵏ ⵉⵅⴻⴼ ⵏⵙⴻⵏ ⵎⵖⴰⵔⴻⵏ ⵣⵣⴰⵜⵉ, ⴰⴷ ⵢⴰⵔⴹⴻⵏ ⵙ ⵓⵙⴻⴹⵃⵉ ⴷ ⵍⴻⴼⴹⵉⵃⴻⵜ. 
ⴻⵊⵊ ⵉⵏⵏⵉ ⵢⴰⵔⴹⴰⵏ ⴷⵉ ⵜⵙⴻⴳⴷⴰ ⴰⴷ ⵙⵍⵉⵡⴻⵍⵡⴻⵏ ⵓ ⴰⴷ ⴼⴰⵔⵃⴻⵏ, ⴻⵊⵊ ⵉ-ⵜⴻⵏ ⴰⴷ ⵉⵏⵉⵏ: “ⴷ ⴰⵎⴻⵇⵇⵔⴰⵏ ⵉ ⵢⴻⴵⴰ ⵙⵉⴷⵉ ⵡⴻⵏⵏⵉ ⵢⴰⵔⴹⴰⵏ ⴷⵉ ⵍⴻⵀⵏⴰ ⵏ ⵓⵎⵙⴻⵅⵅⴰⵔ ⵏⵏⴻⵙ.” 
ⵅⴻⵏⵏⵉ ⵉⵍⴻⵙ ⵉⵏⵓ ⴰⴷ ⵉⴱⴰⵔⵔⴻⵃ ⵜⴰⵙⴻⴳⴷⴰ ⵏⵏⴻⵛ ⴷ ⵓⵚⴻⴱⴱⴻⵃ ⵏⵏⴻⵛ ⴰⵙⵙ ⵎⴰⵔⵔⴰ. 
