﻿ⵉⵥⴻⵀⵀⵉⴷⴻⵏ.
27.
ⴰⵣⴻⵀⵀⴻⴷ ⵏ ⴷⴰⵡⵓⴷ. ⵙⵉⴷⵉ ⴷ ⵜⴰⴼⴰⵡⵜ ⵉⵏⵓ ⴷ ⵓⵙⴻⵏⵊⴻⵎ ⵉⵏⵓ, ⵡⵉ ⵣⵉ ⵖⴰ ⴳⴳⵯⴻⴷⴻⵖ? ⵙⵉⴷⵉ ⴷ ⵍⵇⴻⵍⵄⴰ ⵉⵊⴻⵀⴷⴻⵏ ⵉ ⵜⵓⴷⴰⵔⵜ ⵉⵏⵓ, ⵡⵉ ⵣⵉ ⵖⴰ ⵏⵏⵅⴻⵍⵄⴻⵖ ⵄⴰⴷ? 
ⵓⵎⵉ ⵖⴰⵔⵉ ⴷⴷ-ⵇⴰⵔⵔⴱⴻⵏ ⵉⵄⴻⴼⴼⴰⵏⴻⵏ ⵃⵉⵎⴰ ⴰⴷ ⵛⵛⴻⵏ ⴷⴷⴰⵜ ⵉⵏⵓ, ⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ ⴷ ⵍⵄⴻⴷⵢⴰⵏ ⵉⵏⵓ, ⵏⵏⵇⴰⵔⴹⴻⵏ ⵏⵉⵜⵏⵉ, ⵡⴹⴰⵏ ⵖⴰⵔ ⵜⴻⵎⵎⵓⵔⵜ. 
ⵡⴰⵅⵅⴰ ⴰⴷ ⵅⴰⴼⵉ ⵉⵃⵊⴻⵎ ⵉⵊⵊ ⵏ ⵍⵄⴻⵙⴽⴰⵔ, ⵓⵍ ⵉⵏⵓ ⵡⴰⵔ ⵉⵜⵜⴻⴳⴳⵯⴻⴷ ⵛⴰ. ⵡⴰⵅⵅⴰ ⴰⴷ ⵅⴰⴼⵉ ⵉⴽⴽⴰⵔ ⵓⵎⴻⵏⵖⵉ, ⵄⴰⴷ ⵏⴻⵛⵛ ⵜⵜⵖⵉⵎⵉⵖ ⵜⵜⴻⵛⵍⴻⵖ. 
ⵉⵛⵜ ⵏ ⵍⵃⴰⵊⵊⴻⵜ ⵜⵜⴰⵔⴻⵖ ⵣⵉ ⵙⵉⴷⵉ, ⵜⴰ ⴰⴷ ⵅⴰⵙ ⴰⵔⵣⵓⵖ: ⵎⵉⵏ ⵖⴰ ⴽⴽⴻⵖ ⴷⴷⴰⵔⴻⵖ ⴰⴷ ⵇⵇⵉⵎⴻⵖ ⴰⴷ ⵣⴻⴷⵖⴻⵖ ⴷⵉ ⵜⴰⴷⴷⴰⵔⵜ ⵏ ⵙⵉⴷⵉ, ⵃⵉⵎⴰ ⴰⴷ ⵥⴰⵔⴻⵖ ⵍⴻⴹⵔⴰⴼⴻⵜ ⵏ ⵙⵉⴷⵉ, ⵃⵉⵎⴰ ⴰⴷ ⴱⴻⵇⵛⴻⵖ ⴷⵉ ⵣⵣⴰⵡⴻⵛⵜ ⵏⵏⴻⵙ ⵜⴰⵎⴻⵇⵇⵔⴰⵏⵜ. 
ⵎⴰⵖⴰⵔ ⵏⴻⵜⵜⴰ ⵉⵙⵙⴷⵓⵔⵔⵓⵢ ⴰⵢⵉ ⴷⴻⴳ ⵓⵄⵓⵛⵛⵉ ⵏⵏⴻⵙ ⴷⴻⴳ ⵡⴰⵙⵙ ⵏ ⵍⵖⴰⵔ. ⵏⴻⵜⵜⴰ ⵉⵙⵙⵍⴻⵇⵇⴰ ⴰⵢⵉ ⴷⴻⴳ ⵓⵙⴻⵍⵇⵉ ⵏ ⵓⵇⵉⴹⵓⵏ ⵏⵏⴻⵙ, ⵏⴻⵜⵜⴰ ⵉⵙⵙⴳⴻⵄⵄⴰⴷ ⴰⵢⵉ ⵅ ⵉⵛⵜ ⵏ ⵜⴻⵚⴹⴰⵔⵜ. 
ⵍⴻⵅⵅⵓ ⴰⴷ ⵉⵜⵜⵡⴰⵙⵙⴳⴻⵄⵄⴻⴷ ⵓⵣⴻⴵⵉⴼ ⵉⵏⵓ ⵅ ⵍⵄⴻⴷⵢⴰⵏ ⵉⵏⵓ ⵉⵏⵏⵉ ⴷ ⴰⵢⵉ ⴷⴷ-ⵉⵏⵏⴹⴻⵏ, ⵖⴰⵔ ⵡⴻⵙⵔⵓⴷⴷⴻⵃ ⴷⵉ ⵍⴱⵓⵇ ⴰⴷ ⴰⵡⵢⴻⵖ ⵜⵉⵖⴰⵔⵚⴰ ⵖⴰⵔ ⵓⵇⵉⴹⵓⵏ ⵏⵏⴻⵙ, ⴰⴷ ⵖⴻⵏⵏⵊⴻⵖ, ⵡⴰⵀ, ⴰⴷ ⵣⴻⵀⵀⴷⴻⵖ ⵉ ⵙⵉⴷⵉ. 
ⵙⴻⵍ ⵖⴰⵔ ⵜⵎⵉⵊⵊⴰ ⵉⵏⵓ, ⴰ ⵙⵉⴷⵉ, ⵅⵎⵉ ⵖⴰ ⵍⴰⵖⵉⵖ, ⵃⵉⵏⵏ ⵅⴰⴼⵉ ⵓ ⴰⵔⵔ-ⴷⴷ ⵅⴰⴼⵉ. 
ⵣⵣⴰⵢⴻⴽ ⵉ ⵉⵙⵙⴰⵡⴰⵍ ⵡⵓⵍ ⵉⵏⵓ: “ⴰⵔⵣⵓ ⵅ ⵡⵓⴷⴻⵎ ⵉⵏⵓ!” ⵏⴻⵛⵛ ⴰⵔⴻⵣⵣⵓⵖ ⵅ ⵡⵓⴷⴻⵎ ⵏⵏⴻⵛ, ⴰ ⵙⵉⴷⵉ. 
ⵡⴰⵔ ⵣⵣⴰⵢⵉ ⵜⵜⴻⴼⴼⴰⵔ ⵓⴷⴻⵎ ⵏⵏⴻⵛ, ⵡⴰⵔ ⵜⵜⵅⵉⵢⵢⴰⴱ ⴰⵎⵙⴻⵅⵅⴰⵔ ⵏⵏⴻⵛ ⴷⴻⴳ ⵡⴻⵖⴹⴰⴱ. ⵜⵓⵖⴰ ⵛⴻⴽ ⴷ ⴰⵎⵄⴰⵡⴻⵏ ⵉⵏⵓ. ⵡⴰⵔ ⴷ ⴰⵢⵉ ⵜⵜⵙⴻⵎⵃⴻⴷ ⵓ ⵡⴰⵔ ⴷ ⴰⵢⵉ ⵜⵜⴻⵊⵊⵉ, ⴰ ⴰⵔⴻⴱⴱⵉ ⵏ ⵓⵙⴻⵏⵊⴻⵎ ⵉⵏⵓ. 
ⵎⴰⵖⴰⵔ ⴱⴰⴱⴰ ⴷ ⵢⴻⵎⵎⴰ ⴰⵇⴰ ⵙⴻⵎⵃⴻⵏ ⴷⴰⵢⵉ, ⵎⴰⵛⴰ ⵙⵉⴷⵉ ⴰⴷ ⴰⵢⵉ ⵉⴽⵙⵉ ⵖⴰⵔⴻⵙ. 
ⵙⵛⴻⵏ ⴰⵢⵉ ⴰⴱⵔⵉⴷ ⵏⵏⴻⵛ, ⴰ ⵙⵉⴷⵉ, ⵏⴷⴻⵀ ⴰⵢⵉ ⵖⴰⵔ ⵡⴻⴱⵔⵉⴷ ⵉⵙⴻⴳⴳⵎⴻⵏ, ⴷⵉ ⵙⵙⵉⴱⴱⴻⵜ ⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ. 
ⵡⴰⵔ ⴷ ⴰⵢⵉ ⵜⵜⵙⴻⵍⵍⴻⵎ ⵖⴰⵔ ⵎⴻⵥⵔⵉ ⴷⴻⴳ ⵍⴻⵄⵎⴰⵔ ⵏ ⵢⵉⵏⵏⵉ ⴷ ⴰⵢⵉ ⵉⵃⴻⵚⵚⴰⵔⴻⵏ, ⵎⴰⵖⴰⵔ ⵍⴻⵛⵀⵓⴷ ⵉⵙⵙⵅⴰⵔⵔⵉⵇⴻⵏ ⴽⴽⴰⵔⴻⵏ ⵅⴰⴼⵉ, ⵉⵏⵏⵉ ⵉ ⵅⴰⴼⵉ ⵉⵜⵜⵙⵓⴹⴻⵏ ⵙ ⵍⴻⵅⵛⵓⵏⴻⵜ. 
ⵓⵀ, ⵎⴰⵍⴰ ⵏⴻⵛⵛ ⵣⴻⵄⵎⴰ ⵡⴰⵔ ⵓⵎⵉⵏⴻⵖ ⴰⴷ ⵥⴰⵔⴻⵖ ⵍⵅⴰⵔ ⵏ ⵙⵉⴷⵉ ⴷⵉ ⵜⴻⵎⵎⵓⵔⵜ ⵏ ⵢⵉⵏⵏⵉ ⵉⴷⴷⴰⵔⴻⵏ! 
ⵔⴰⵊⴰ ⵙⵉⴷⵉ, ⵔⴰⵊⴰ ⵉ-ⵜ, ⵉⵍⵉ ⴷ ⴰⵔⵢⴰⵣ, ⵏⴻⵜⵜⴰ ⴰⴷ ⴷⴰⵢⴻⴽ ⵢⴻⴳⴳ ⵓⵍ, ⵡⴰⵀ ⵔⴰⵊⴰ ⵙⵉⴷⵉ. 
