﻿ⵉⵥⴻⵀⵀⵉⴷⴻⵏ.
16.
ⵜⵉⵔⴰ ⵉⵏⴻⵇⵛⴻⵏ. ⵏ ⴷⴰⵡⵓⴷ. ⵃⴹⴰ ⵅⴰⴼⵉ, ⴰ ⴰⵔⴻⴱⴱⵉ, ⵎⴰⵖⴰⵔ ⵏⴻⵛⵛ ⴰⵔⴻⴽⴽⵡⴰⵍⴻⵖ ⵖⴰⵔⴻⴽ. 
ⵍⴻⵄⵎⴰⵔ ⵉⵏⵓ ⵜⴻⵏⵏⴰ ⵉ ⵙⵉⴷⵉ: “ⵛⴻⴽ ⴷ ⵙⵉⴷⵉ ⵉⵏⵓ, ⵛⴻⴽ ⴷ ⵍⵅⴰⵔ ⵉⵏⵓ, ⵡⴰⵔ ⴷⵉⵏ ⵎⵉⵏ ⵅⴰⴽ ⵢⵓⵄⵍⴰⵏ!” 
ⵅ ⵉⵎⵇⴻⴷⴷⴰⵙⴻⵏ ⵉ ⵉⵣⴻⴷⴷⵖⴻⵏ ⵅ ⵜⴻⵎⵎⵓⵔⵜ, ⵏⵉⵜⵏⵉ ⴷ ⴰⵢⵜ ⵏ ⵊⵊⴻⵀⴷ ⵣⵉ ⵙⵙⵉⴱⴱⴻⵜ ⵏ ⵎⴰⵔⵔⴰ ⴰⵔⴹⴰ ⵉⵏⵓ ⵉ ⴷⴰⵢⵙⴻⵏ ⵉⴵⴰⵏ. 
ⵜⴰⵎⴰⵔⴰ ⵏ ⵢⵉⵏⵏⵉ ⵉⴹⴻⴼⴼⴰⵔⴻⵏ ⴰⵎⵎⵓ ⴷⴻⵖⵢⴰ ⵉⵊⵊ ⵏ ⴰⵔⴻⴱⴱⵉ ⵏⵏⴻⵖⵏⵉ ⴰⴷ ⵜⵜⵡⴰⴽⵜⴰⵔⴻⵏⵜ. ⵏⴻⵛⵛ ⵡⴰⵔ ⵜⵜⴼⴰⵔⵔⵉⵖⴻⵖ ⵜⴰⵡⵀⵉⴱⵜ ⵏⵙⴻⵏ ⵏ ⵓⵙⴻⵢⵢⴻⴱ ⵏ ⵉⴷⴰⵎⵎⴻⵏ, ⵡⴰⵔ ⵜⵜⵉⴷⴰⵔⴻⵖ ⵉⵙⵎⴰⵡⴻⵏ ⵏⵙⴻⵏ ⵅ ⵉⵢⴻⵏⵛⵉⵛⴻⵏ ⵉⵏⵓ. 
ⵙⵉⴷⵉ ⴷ ⵜⴰⵙⵖⴰⵔⵜ ⵉⵏⵓ ⴷ ⵍⴽⴰⵙ ⵉⵏⵓ. ⵛⴻⴽ ⵜᵉⵟⵟⴼⴻⴷ ⵜⴰⵇⴻⴷⴷⵓⵃⵜ ⵉⵏⵓ ⴷⴻⴳ ⵓⴼⵓⵙ ⵏⵏⴻⵛ. 
ⵉⴼⵉⵍⴰⵏ ⵏ ⵍⴻⵄⴱⴰⵔ ⴽⴽⴰⵔⴻⵏ ⴰⵢⵉ-ⴷⴷ ⴷⴻⴳ ⵉⵎⵓⵛⴰⵏ ⵉⵚⴻⴱⵃⴻⵏ, ⵡⴰⵀ, ⵜⴰⵙⵖⴰⵔⵜ ⵉⵏⵓ ⴰⵇⴰ ⵜⵓⵙⴰ-ⴷⴷ ⵅⴰⴼⵉ ⵎⵍⵉⵃ. 
ⴰⴷ ⴱⴰⵔⴽⴻⵖ ⵙⵉⴷⵉ, ⵡⴻⵏⵏⵉ ⴷ ⴰⵢⵉ ⵉⵏⴻⵚⵃⴻⵏ. ⵓⵍⴰ ⵙ ⴵⵉⵍⴻⵜ ⵙⵙⵍⴻⵎⴷⴻⵏⵜ ⴰⵢⵉ ⵜⵉⵥⵥⴰⵍ ⵉⵏⵓ. 
ⵜⵜⴻⴳⴳⴻⵖ ⵙⵉⴷⵉ ⵍⴻⴱⴷⴰ ⵊⴰⵔ ⵜⵉⵟⵟⴰⵡⵉⵏ ⵉⵏⵓ. ⵓⵎⵉ ⵏⴻⵜⵜⴰ ⵉⴵⴰ ⵅ ⵓⴼⵓⵙ ⴰⴼⵓⵙⵉ ⵉⵏⵓ, ⵏⴻⵛⵛ ⵡⴰⵔ ⵜⵜⴻⴼⵛⵉⵔⴻⵖ. 
ⵙ ⵓⵢⴰ ⵉⴼⴰⵔⵔⴻⵃ ⵓⵍ ⵉⵏⵓ, ⵉⵜⵜⴰⵔⵛⵉⵇ ⵍⴻⵄⵎⴰⵔ ⵉⵏⵓ. ⵡⴰⵀ, ⵓⵍⴰ ⴷ ⴷⴷⴰⵜ ⵉⵏⵓ ⴰⴷ ⵉⴷⴷⴰⵔ ⵙ ⵍⴰⵎⴰⵏ. 
ⵎⴰⵖⴰⵔ ⵛⴻⴽ ⵡⴰⵔ ⵜⵙⴻⵎⵎⵃⴻⴷ ⵛⴰ ⴷⵉ ⵍⴻⵄⵎⴰⵔ ⵉⵏⵓ ⴷⵉ ⵍⴰⵅⴰⵔⵜ, ⵡⴰⵔ ⵜᵉⵜⵜⴰⵔⵔⵉⴷ ⴰⵎⵜⵉⵇⵇⵉ ⵏⵏⴻⵛ ⴰⴷ ⵉⴽⵉⵛⵛⵓ. 
ⵛⴻⴽ ⴰⴷ ⴰⵢⵉ ⵜⴻⵙⵙⴻⵛⵏⴻⴷ ⴰⴱⵔⵉⴷ ⵏ ⵜⵓⴷⴰⵔⵜ, ⵜⵢⴰⵡⴰⵏⵜ ⵣⵉ ⵍⴻⴼⵔⴰⵃⴻⵜ ⴰⵇⴰ-ⵜ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ, ⵏⵏⵉⵄⵎⴰⵜ ⴰⵇⴰ ⴰⵜⴻⵏⵜ ⴷⴻⴳ ⵓⴼⵓⵙ ⵏⵏⴻⵛ ⵉ ⵍⴻⴱⴷⴰ. 
