﻿ⵉⵥⴻⵀⵀⵉⴷⴻⵏ.
10.
ⵎⵉⵏ ⵉⵇⵇⵉⵎⴻⵏ ⵏ ⵓⵣⴻⵀⵀⴻⴷ 9 ⵍⴰⵎⵉⴷ. ⴰ ⵙⵉⴷⵉ, ⵎⴰⵢⴻⵎⵎⵉ ⵜⴻⵇⵇⵉⵎⴻⴷ ⵜⵉⴳⴳⵯⴻⵊⴻⴷ ⴰⵎⵎⵓ? ⵎⴰⵢⴻⵎⵎⵉ ⵜⴻⵙⵙⵏⵓⴼⴼⴰⵔⴻⴷ ⵉⵅⴻⴼ ⵏⵏⴻⵛ ⴷⵉ ⵍⵡⴻⵇⵜ ⵏ ⵍⴻⵃⵚⴰⵔⴻⵜ? 
ⵙ ⵏⵏⴼⴰⵅⴻⵜ ⵉⴹⴻⴼⴼⴰⵔ ⵓⵄⴻⴼⴼⴰⵏ ⵍⵎⴻⵙⴽⵉⵏ. ⴰⴷ ⵜⵜⵡⴰⵟⵟⴼⴻⵏ ⵙ ⵜⵎⴻⵄⵎⴰⵍⵜ ⵉ ⴷⵉ ⵜⵜⵅⴰⵔⵔⵚⴻⵏ. 
ⵎⴰⵖⴰⵔ ⴰⵄⴻⴼⴼⴰⵏ ⵉⵙⵙⵄⵓⴵⴰ ⵉⵅⴻⴼ ⵏⵏⴻⵙ ⵖⴰⵔ ⵎⴻⵥⵔⵉ ⵏ ⵍⴻⵄⵎⴰⵔ ⵏⵏⴻⵙ, ⵉⵜⵜⴱⴰⵔⴻⴽ ⴰⴹⴻⵎⵎⴰⵄ, ⵉⵜⵜⵛⴻⵇⵇⴰⴼ ⴷⵉ ⵙⵉⴷⵉ. 
ⴰⵄⴻⴼⴼⴰⵏ ⴰⵎ ⵡⴻⵏⵏⵉ ⵉⵙⵙⴳⴻⵄⵄⴰⴷⴻⵏ ⵜⵉⵏⵣⴰⵔⵜ ⵏⵏⴻⵙ ⵖⴰⵔ ⵓⵊⴻⵏⵏⴰ, ⵡⴰⵔ ⵉⵜⵜⴱⴻⵇⵇⴻⵛ, ⵉⵇⵇⴰⵔ. “ⵡⴰⵔ ⴷⵉⵏ ⴰⵔⴻⴱⴱⵉ”, ⵎⴰⵏ ⴰⵢⴰ ⴷ ⵎⴰⵔⵔⴰ ⵎⵉⵏ ⴷⵉ ⵉⵣⴻⵎⵎⴰⵔ ⴰⴷ ⵉⵜⵜⵅⴰⵔⵔⴻⵚ. 
ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ ⵜⵜⴻⴼⴼⵖⴻⵏ ⴰⵙ ⵎⵍⵉⵃ ⴽⵓⵍ ⵜⵡⴰⵍⴰ. ⵍⴻⵀⴽⴰⵎⴰⵜ ⵏⵏⴻⵛ ⵜⵜⵓⵄⵍⴰⵏⵜ ⵅⴰⵙ. ⵉⵜⵜⵣⴰⵡⴰⵔ ⵎⴰⵔⵔⴰ ⵉⵏⵏⵉ ⵜ ⵉⵃⴻⵚⵚⴰⵔⴻⵏ. 
ⵏⴻⵜⵜⴰ ⵉⵇⵇⴰⵔ ⴷⴻⴳ ⵡⵓⵍ ⵏⵏⴻⵙ: “ⵡⴰⵔ ⵜⵜⴻⵏⵀⴻⵣⵣⵉⵖ, ⵣⵉ ⵊⵊⵉⵍ ⴰⵍ ⵊⵊⵉⵍ ⵡⴰⵔ ⴷ ⴰⵢⵉ ⵉⵍⴻⵇⵇⴻⴼ ⵓⵍⴰ ⴷ ⵉⵊⵊ ⵏ ⵍⵖⴰⵔ.” 
ⴰⵇⴻⵎⵎⵓⵎ ⵏⵏⴻⵙ ⵉⵛⵛⵓⵔ ⵙ ⵏⵏⴻⵄⵍⴻⵜ ⴷ ⵉⵅⴰⵔⵔⵉⵇⴻⵏ ⴷ ⴷⴷⴻⴵ. ⵙⴰⴷⵓ ⵢⵉⵍⴻⵙ ⵏⵏⴻⵙ ⴰⵇⴰ ⴷⵉⵏ ⵜⴰⵎⴰⵔⴰ ⴷ ⵍⵎⵓⵄⵚⵉⵢⵢⴻⵜ. 
ⵏⴻⵜⵜⴰ ⵉⵜⵜⵖⵉⵎⴰ ⵖⴰⵔ ⵡⴻⵛⴱⴰⵔ ⴷⵉ ⴷⵛⵓⵔⴰⵜ, ⴷⴻⴳ ⵉⵎⵓⵛⴰⵏ ⵉⵏⵏⵓⴼⴼⴰⵔⴻⵏ ⵉⵏⴻⵇⵇ ⵉⵏⵏⵉ ⵡⴰⵔ ⵉⴳⴳⵉⵏ ⵙ ⵛⴰ. ⵜⵉⵟⵟⴰⵡⵉⵏ ⵏⵏⴻⵙ ⵎⵎⴻⵏⴹⴰⵔⴻⵏⵜ ⵅ ⵍⵎⴻⵙⴽⵉⵏ. 
ⵉⵍⴱⴻⵜ ⴷⴻⴳ ⵡⴻⵎⵛⴰⵏ ⵉⵏⵏⵓⴼⴰⵔⴻⵏ ⴰⵎ ⵡⴻⵢⵔⴰⴷ ⴷⴻⴳ ⵓⴷⵓⵔⵔⵉ ⵏ ⵓⵄⵉⵛⵛⵓ ⵏⵏⴻⵙ. ⵏⴻⵜⵜⴰ ⵉⵜⵜⵃⴻⴽⴽⴰⵔ ⵃⵉⵎⴰ ⴰⴷ ⵢⴰⵛⴰⵔ ⵍⵎⴻⵙⴽⵉⵏ. ⵉⵜⵜⴰⵛⴰⵔ ⵍⵎⴻⵙⴽⵉⵏ ⵓⵎⵉ ⵜ ⵉⵊⴻⴱⴱⴻⴷ ⴷⵉ ⵜⵔⴰⵛⵛⴰ ⵏⵏⴻⵙ. 
ⵏⴻⵜⵜⴰ ⵉⵀⴻⴽⴽⵡⴰ-ⴷⴷ ⵖⴰⵔ ⵡⴰⴷⴷⴰⵢ, ⵉⵜⵜⴰⴹⴰⵔ, ⴰⵇⴰ ⵍⵎⴻⵙⴽⵉⵏ ⵉⵡⴻⵟⵟⴰ ⵊⴰⵔ ⵡⴰⵛⵛⴰⵔⴻⵏ ⵏⵏⴻⵙ ⵉⵊⴻⵀⴷⴻⵏ. 
ⵉⵇⵇⴰⵔ ⴷⴻⴳ ⵡⵓⵍ ⵏⵏⴻⵙ: “ⴰⵔⴻⴱⴱⵉ ⵉⵜⵜⵓ, ⵏⴻⵜⵜⴰ ⵉⵙⵙⵏⵓⴼⴼⴰⵔ ⵓⴷⴻⵎ ⵏⵏⴻⵙ, ⵄⴻⵎⵎⴰⵔⵚ ⴰⴷ ⵜ ⵉⵥⴰⵔ.” 
ⵇⵓⴼ. ⴽⴽⴰⵔ, ⴰ ⵙⵉⴷⵉ, ⴰⵔⴻⴱⴱⵉ, ⵙⴳⴻⵄⵄⴻⴷ ⴰⴼⵓⵙ ⵏⵏⴻⵛ, ⵡⴰⵔ ⵜⵜᵉⵜⵜⵓ ⵍⵎⵓⵙⴰⴽⵉⵏ. 
ⵎⴰⵢⴻⵎⵎⵉ ⵉⵜⵜⵛⴻⵇⵇⴰⴼ ⵓⵄⴻⴼⴼⴰⵏ ⴷⵉ ⴰⵔⴻⴱⴱⵉ, ⵎⴰⵢⴻⵎⵎⵉ ⵉⵇⵇⴰⵔ ⴷⴻⴳ ⵡⵓⵍ ⵏⵏⴻⵙ: “ⵛⴻⴽ ⵡⴰⵔ ⵜᵉⵜⵜⴱⴻⵇⵇⴰⵛⴻⴷ!”? 
ⵔⵉⵅ. ⴰⵇⴰ ⵛⴻⴽ ⵜⴻⵥⵔⵉⴷ, ⵎⵉⵏⵣⵉ ⵛⴻⴽ ⵜᵉⵜⵜⵡⴰⵍⵉⴷ ⵜⴰⵎⴰⵔⴰ ⴷ ⵡⴻⵛⴹⴰⵏ, ⵎⴰⵃⴻⵏⴷ ⴰⴷ ⵜⴻⵏ ⵜⴻⵙⵙⴰⵔⵙⴻⴷ ⴷⴻⴳ ⵓⴼⵓⵙ ⵏⵏⴻⵛ. ⵍⵎⴻⵙⴽⵉⵏ ⵉⵜⵜⴰⵔⵔ-ⴷⴷ ⵖⴰⵔⴻⴽ ⵙ ⵓⵣⴻⴵⵉⴼ. ⵛⴻⴽ ⴷ ⴰⵎⵄⴰⵡⴻⵏ ⵏ ⵓⵢⵓⵊⵉⵍ. 
ⵛⵉⵏ. ⴰⵔⵥ ⴰⵖⵉⵍ ⵏ ⵓⵄⴻⴼⴼⴰⵏ, ⵅⵍⴻⴼ ⵍⵖⴰⵔ ⵣⴻⴳ ⵡⴻⵏⵏⵉ ⵉⵜⵜⴻⴳⴳⴻⵏ ⵜⵓⵄⴻⴼⴼⵏⴰ, ⴰⵍ ⵡⴰⵔ ⵜᵉⵜⵜⵉⴼⴻⴷ ⵡⴰⵍⵓ ⵄⴰⴷ. 
ⵙⵉⴷⵉ ⴷ ⴰⵊⴻⴵⵉⴷ ⵉ ⵍⴻⴱⴷⴰ ⵇⴰⵄ. ⵜⵜⵡⴰⵜⴻⵃⵃⴰⵏ ⵍⴻⴳⵏⵓⵙ ⵣⵉ ⵜⴻⵎⵎⵓⵔⵜ ⵏⵏⴻⵙ. 
ⵜⴰⴼ. ⴰ ⵙⵉⴷⵉ, ⵛⴻⴽ ⵜⴻⵙⵍⵉⴷ ⵉ ⵎⴻⵥⵔⵉ ⵏ ⵉⵎⵡⴰⴹⵄⴻⵏ, ⴰⴷ ⵜⴻⵙⵙⵊⴻⵀⴷⴻⴷ ⵓⵍⴰⵡⴻⵏ ⵏⵙⴻⵏ, ⴰⴷ ⵖⴰⵔⵙⴻⵏ ⵜⵎⴻⵢⵢⵍⴻⴷ ⴰⵎⴻⵣⵣⵓⵖ ⵏⵏⴻⵛ, 
ⵃⵉⵎⴰ ⴰⴷ ⵜⴰⵖⴻⴷ ⵜⴰⵙⵖⴰⵔⵜ ⵉ ⵓⵢⵓⵊⵉⵍ ⵓ ⵉ ⵡⴻⵏⵏⵉ ⵉⵜⵜⵡⴰⵃⴻⵚⵚⴰⵔⴻⵏ, ⵎⴰⵃⴻⵏⴷ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵅ ⵜⴻⵎⵎⵓⵔⵜ ⵡⴰⵔ ⵉⵜⵜⵖⵉⵎⵉ ⵉⵙⵙⴰⴳⴳⵯⴰⴷ ⵄⴰⴷ ⵓⵍⴰ ⴷ ⵉⵊⵊ. 
