﻿ⵉⵥⴻⵀⵀⵉⴷⴻⵏ.
8.
ⵉ ⵓⵎⴻⵇⵇⵔⴰⵏ ⵏ ⵉⵎⴻⵖⵏⴰⵊⴻⵏ. ⵙ ⵜⴻⵖⵏⵉⵏⵜ ⵏ ⵓⵊⵜⵜⵉ, ⵡⴻⵔⵢⴰⵣ ⵣⵉ ⵊⴰⵜ. ⴰⵣⴻⵀⵀⴻⴷ ⵏ ⴷⴰⵡⵓⴷ. 
ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵎⴰⵎⵎⴻⵛ ⵉⵊⵀⴻⴷ ⵢⵉⵙⴻⵎ ⵏⵏⴻⵛ ⵅ ⵎⴰⵔⵔⴰ ⵜⴰⵎⵎⵓⵔⵜ, ⵛⴻⴽ ⴷ ⵡⴻⵏⵏⵉ ⵉⴳⴳⵉⵏ ⵍⵄⴰⴹⴰⵎⴰ ⵏⵏⴻⵛ ⵙⴻⵏⵏⴻⵊ ⵉ ⵉⵊⴻⵏⵡⴰⵏ. 
ⵣⴻⴳ ⵓⵇⴻⵎⵎⵓⵎ ⵏ ⵉⵃⴻⵏⵊⵉⵔⴻⵏ ⴷ ⵉⵙⴻⵢⵎⴰⵏ, ⵜⴻⴳⴳⵉⴷ ⴷⵙⴰⵙ ⵉⵊⵀⴻⴷ ⵣⵉ ⵙⵙⵉⴱⴱⴻⵜ ⵏ ⵢⵉⵏⵏⵉ ⵛⴻⴽ ⵉⵃⴻⵚⵚⴰⵔⴻⵏ, ⵃⵉⵎⴰ ⴰⴷ ⵜⴱⴻⵍⵍⵄⴻⴷ ⴰⴱⵔⵉⴷ ⵅ ⵍⴻⵄⴷⵓ ⵓ ⵅ ⵡⴻⵏⵏⵉ ⵢⴰⵔⴻⵣⵣⵓⵏ ⴰⴷ ⵉⵅⵍⴻⴼ. 
ⵎⴰⵍⴰ ⵜⵡⴰⵍⵉⵖ ⴰⵊⴻⵏⵏⴰ, ⵍⵅⴻⴷⵎⴻⵜ ⵏ ⵉⴹⴻⵡⴹⴰⵏ ⵏⵏⴻⵛ, ⵜⴰⵣⵉⵔⵉ ⴷ ⵢⴻⵜⵔⴰⵏ, ⵉⵏⵏⵉ ⵜⴻⴳⴳⵉⴷ, 
ⵎⵉⵏ ⵉⵄⵏⴰ ⵅⴻⵏⵏⵉ ⴱⵏⴰⴷⴻⵎ, ⴰⵇⴰ ⵛⴻⴽ ⵜⵅⴰⵔⵔⵚⴻⴷ ⴷⴰⵢⴻⵙ, ⵎⵎⵉⵙ ⵏ ⴱⵏⴰⴷⴻⵎ, ⴰⵇⴰ ⵛⴻⴽ ⵜⵅⴻⵣⵣⴰⵔⴻⴷ ⵖⴰⵔⴻⵙ? 
ⵛⴻⴽ ⵜⴰⵔⵔⵉⴷ ⵜ ⵎⵖⵉⵔ ⵛⵡⴰⵢⵜ ⵡⴰⵀⴰ ⵇⴻⵍⵍ ⵉ ⴰⵔⴻⴱⴱⵉ, ⵜⴻⵡⵛⵉⴷ ⴰⵙ ⵜⵜⴰⵊ ⵏ ⵓⵄⵓⴵⵉ ⴷ ⵍⵄⴻⵣⵣ. 
ⵛⴻⴽ ⵜⴰⵔⵔⵉⴷ ⵜ ⴰⴷ ⵉⵃⴽⴻⵎ ⵅ ⵜⵎⴻⴳⴳⴰ ⵏ ⵉⴼⴰⵙⵙⴻⵏ ⵏⵏⴻⵛ, ⵜⴻⵙⵙⴰⵔⵙⴻⴷ ⵎⴰⵔⵔⴰ ⵙⵡⴰⴷⴷⴰⵢ ⵉ ⵉⴹⴰⵔⴻⵏ ⵏⵏⴻⵙ: 
ⵓⴵⵉ ⴷ ⵉⴼⵓⵏⴰⵙⴻⵏ, ⵎⴰⵔⵔⴰ ⵉⵏⴰ, ⵓⵍⴰ ⴷ ⵍⵎⴰⵍ ⵏ ⵢⴻⵢⵢⴰⵔ, 
ⵉⵊⴹⴰⴹ ⵏ ⵓⵊⴻⵏⵏⴰ ⴷ ⵉⵙⴻⵍⵎⴰⵏ ⵏ ⵍⴻⴱⵃⴰⵔ, ⵎⴰⵔⵔⴰ ⵎⵉⵏ ⵉⵜⵜⵛⵓⵇⴰⵏ ⵉⴱⵔⵉⴷⴻⵏ ⵏ ⵍⴻⴱⵃⵓⵔ. 
ⴰ ⵙⵉⴷⵉ, ⵙⵉⴷⵉⵜⵏⴻⵖ, ⵎⴰⵎⵎⴻⵛ ⵉⵊⵀⴻⴷ ⵢⵉⵙⴻⵎ ⵏⵏⴻⵛ ⴷⵉ ⵎⴰⵔⵔⴰ ⵜⴰⵎⵎⵓⵔⵜ! 
