﻿ⴰⵢⵓⴱ.
42.
ⴰⵢⵓⴱ ⵢⴰⵔⵔⴰ-ⴷⴷ ⵅ ⵙⵉⴷⵉ, ⵉⵏⵏⴰ: 
“ⵏⴻⵛⵛ ⵙⵙⵏⴻⵖ ⴰⵇⴰ ⵛⴻⴽ ⵜⵣⴻⵎⵎⴰⵔⴻⴷ ⵉ ⴽⵓⵍⵛⵉ ⵡⴰⵔ ⵉⵙⵙⴱⴻⵟⵟⵉⵍ ⵓⵍⴰ ⴷ ⵉⵊⵊ ⵏ ⵡⴻⵏⵡⴰⵢ ⵏⵏⴻⵛ. 
ⵛⴻⴽ ⵜⴻⵇⵇⴰⵔⴻⴷ: ‘ⵎⴰⵏ ⵡⴻⵏ ⵉⵙⵙⴱⴰⵔⵔⵛⵏⴻⵏ ⴱⵍⴰ ⵜⵓⵙⵙⵏⴰ ⵛⵛⵡⴰⵔ ⵏ ⴰⵔⴻⴱⴱⵉ?’ ⵙ ⵓⵢⴰ ⵙⵙⵉⵡⵍⴻⵖ ⵅ ⵎⵉⵏ ⵡⴰⵔ ⴼⵀⵉⵎⴻⵖ, ⵅ ⵜⵎⴻⵙⵍⴰⵢⵉⵏ ⵏⵏⵉ ⴷⵉ ⵜⵜⴱⴻⵀⵜⴻⵖ ⴰⵟⵟⴰⵙ, ⵡⴰⵔ ⵜⴻⵏⵜ ⵙⵙⵉⵏⴻⵖ.” 
“ⵙⴻⵍ ⵎⴰⵛⴰ ⵓⵛⴰ ⴰⴷ ⵙⵙⵉⵡⵍⴻⵖ, ⵅⵙⴻⵖ ⴰⴷ ⵛⴻⴽ ⵙⵙⴻⵇⵙⵉⵖ ⵓⵛⴰ ⵅⴻⵏⵏⵉ ⵛⴻⴽ ⴰⴷ ⴰⵢⵉ ⵅⴰⵙ ⵜⴻⵙⵙⴰⵔⴳⴱⴻⴷ. 
ⵙ ⵓⵎⴻⵣⵣⵓⵖ ⵅⴰⴽ ⵉ ⵙⵍⵉⵖ ⵡⴰⵀⴰ, ⵎⴰⵛⴰ ⵍⴻⵅⵅⵓ ⵜⵉⵟⵟ ⵉⵏⵓ ⵜⴻⵥⵔⵉ ⵛⴻⴽ. 
ⵅ ⵓⵢⴰ ⵜⵜⵄⵉⴼⴼⵉⵖ ⵉⵅⴻⴼ ⵉⵏⵓ ⵓⵛⴰ ⵏⴷⴻⵎⵎⴻⵖ, ⵇⵇⵉⵎⴻⵖ ⴷⵉ ⵜⵄⴻⵊⵊⴰⵊⵜ ⴷ ⵢⵉⵖⵖⴻⴹ.” 
ⴰⵡⴰⵔⵏⵉ ⵍⴰⵎⵉ ⵜⵓⵖⴰ ⵉⵙⵙⵉⵡⵉⵍ ⵙⵉⴷⵉ ⴰⵡⴰⵍⴻⵏ-ⴰ ⴰⴽ-ⴷ ⴰⵢⵓⴱ, ⵉⵏⵏⴰ ⵙⵉⴷⵉ ⵉ ⵉⵍⵉⴼⴰⵣ ⵣⵉ ⵜⴰⵢⵎⴰⵏ: “ⵍⵖⴰⴹⴰⴱ ⵉⵏⵓ ⵢⴰⵔⵖⴰ ⵅⴰⴽ ⵓ ⵅ ⵜⵏⴰⵢⴻⵏ ⵏ ⵉⵎⴻⴷⴷⵓⴽⴽⴰⵍ ⵏⵏⴻⵛ, ⵎⴰⵖⴰⵔ ⴽⴻⵏⵏⵉⵡ ⵡⴰⵔ ⵅⴰⴼⵉ ⵜⴻⵙⵙⵉⵡⵍⴻⵎ ⵛⴰ ⵏⵉⵛⴰⵏ ⴰⵎ ⵎⴰⵎⵎⴻⵛ ⵅⴰⴼⵉ ⵉⵙⵙⵉⵡⴻⵍ ⵓⵎⵙⴻⵅⵅⴰⵔ ⵉⵏⵓ ⴰⵢⵓⴱ. 
ⵅⴻⵏⵏⵉ ⵍⴻⵅⵅⵓ, ⴽⵙⵉⵎ ⴽⴻⵏⵏⵉⵡ ⵙⴻⴱⵄⴰ ⵏ ⵉⴼⵓⵏⴰⵙⴻⵏ ⵉⵎⴻⵥⵢⴰⵏⴻⵏ ⴷ ⵙⴻⴱⵄⴰ ⵏ ⵉⵛⴰⵔⵔⵉⵢⵢⴻⵏ, ⵓⵛⴰ ⵓⵢⵓⵔⴻⵎ ⵖⴰⵔ ⵓⵎⵙⴻⵅⵅⴰⵔ ⵉⵏⵓ ⴰⵢⵓⴱ ⵓⵛⴰ ⵇⴻⴷⴷⵎⴻⵎ ⵜⴻⵏ ⴷ ⵜⴰⵖⴰⵔⵚⵜ ⵏ ⵡⴻⵛⵎⴰⴹ ⵉ ⵢⵉⵅⴻⴼ ⵏⵡⴻⵎ. ⵊⵊⴻⵎ ⴰⵎⵙⴻⵅⵅⴰⵔ ⵉⵏⵓ ⴰⵢⵓⴱ ⴰⴷ ⵅⴰⵡⴻⵎ ⵉⵥⵥⴰⴵ. ⵎⴰⵖⴰⵔ ⵏⴻⵛⵛ ⴰⴷ ⵙⵙⴳⴻⵄⵄⴷⴻⵖ ⴰⵖⴻⵎⴱⵓⴱ ⵏⵏⴻⵙ ⵉ ⵡⴻⵙⵜⴰⵊⴻⴱ, ⵃⵉⵎⴰ ⵡⴰⵔ ⵜⵜⴻⴳⴳⴻⵖ ⴰⴽⵉⴷⵡⴻⵎ ⴰⵎ ⵜⵓⴱⴱⵓⵀⴻⵍⵢⴰ ⵏⵡⴻⵎ, ⵎⵉⵏⵣⵉ ⴽⴻⵏⵏⵉⵡ ⵡⴰⵔ ⵅⴰⴼⵉ ⵜⴻⵙⵙⵉⵡⵉⵍⴻⵎ ⵏⵉⵛⴰⵏ ⴰⵎ ⵎⴰⵎⵎⴻⵛ ⵅⴰⴼⵉ ⵉⵙⵙⵉⵡⵉⵍ ⵓⵎⵙⴻⵅⵅⴰⵔ ⵉⵏⵓ ⴰⵢⵓⴱ.” 
ⵅⴻⵏⵏⵉ ⵉⴼⴼⴻⵖ ⵉⵍⵉⴼⴰⵣ ⵣⵉ ⵜⴰⵢⵎⴰⵏ, ⴱⵉⵍⴷⴰⴷ ⵣⵉ ⵛⵓⵃⴰ ⴷ ⵚⵓⴼⴰⵔ ⵣⵉ ⵏⴰⵄⵎⴰⵜ ⵓⵛⴰ ⴳⴳⵉⵏ ⵏⵉⵜⵏⵉ ⴰⵎ ⵎⴰⵎⵎⴻⵛ ⴷ ⴰⵙⴻⵏ ⵉⵏⵏⴰ ⵙⵉⴷⵉ. ⵙⵉⴷⵉ ⵉⵙⵙⴳⴻⵄⵄⴻⴷ ⴰⵖⴻⵎⴱⵓⴱ ⵏ ⴰⵢⵓⴱ ⵉ ⵓⵙⵜⴰⵊⴻⴱ ⵏ ⵜⵥⴰⴵⵉⵜ ⵏⵏⴻⵙ. 
ⴰⵡⴰⵔⵏⵉ ⵍⴰⵎⵉ ⵜⵓⵖⴰ ⵉⵜⵜⵥⴰⴵⴰ ⴰⵢⵓⴱ ⴷⵉ ⵟⵟⵡⴻⵄ ⵏ ⵉⵎⴻⴷⴷⵓⴽⴽⴰⵍ ⵏⵏⴻⵙ, ⵉⵏⵏⴻⵇⵍⴻⴱ ⵙⵉⴷⵉ ⵜⴰⵎⴻⵃⴱⴰⵙⵜ ⵏ ⴰⵢⵓⴱ ⵉ ⴷⵉ ⵉⴵⴰ ⵏⴻⵜⵜⴰ ⵣⵉ ⵙⵙⵉⴱⴱⴻⵜ ⵏ ⵍⴻⵀⵍⴰⵛ ⵏⵏⴻⵙ, ⵓⵛⴰ ⵢⴰⵔⵏⵉ ⵙⵉⴷⵉ ⴷⵉ ⵎⴰⵔⵔⴰ ⴰⴳⵍⴰ ⵏ ⴰⵢⵓⴱ ⵜⵏⴰⵢⴻⵏ ⵏ ⵜⵙⴻⵇⵇⴰⵔ. 
ⵓⵙⵉⵏ-ⴷⴷ ⵖⴰⵔⴻⵙ ⵎⴰⵔⵔⴰ ⴰⵢⵜⵎⴰⵙ ⴷ ⵎⴰⵔⵔⴰ ⵙⵓⵢᵉⵜⵎⴰⵙ ⴷ ⵎⴰⵔⵔⴰ ⵉⵏⵏⵉ ⵜ ⵉⵙⵙⵏⴻⵏ ⵣⵉⵛ. ⵏⵉⵜⵏⵉ ⵛⵛⵉⵏ ⴰⴽⵉⴷⴻⵙ ⴰⵖⵔⵓⵎ ⴷⵉ ⵜⴰⴷⴷⴰⵔⵜ ⵏⵏⴻⵙ ⵓⵛⴰ ⵙⵙⴻⵛⵏⴻⵏ ⴰⵙ ⴰⵣⵉⴵⴻⵣ ⵏⵙⴻⵏ ⵓⵛⴰ ⵄⴻⵣⵣⴰⵏ ⵜ ⵅ ⵎⴰⵔⵔⴰ ⵍⵖⴰⵔ ⵅⴰⵙ ⴷⴷ-ⵉⵖⴹⴻⵍ ⵙⵉⴷⵉ. ⵉⵡⵛⴰ ⴰⵙ ⴽⵓⵍ ⵉⵊⵊⴻⵏ ⵣⵣⴰⵢⵙⴻⵏ ⵉⵊⵊ ⵏ ⵏⵏⴻⵡⵣⴻⵏ ⵏ ⵏⵏⵓⵇⴰⵔⵜ ⵓⵍⴰ ⴷ ⵉⵛⵜ ⵏ ⵜⵅⴰⴷⴻⵏⵜ ⵏ ⵡⵓⵔⴻⵖ. 
ⵉⴱⴰⵔⴻⴽ ⵙⵉⴷⵉ ⵜⴰⵏⴻⴳⴳⴰⵔⵓⵜ ⵏ ⴰⵢⵓⴱ ⴽⵜⴰⵔ ⵣⵉ ⵜⵎⴻⵣⵡⴰⵔⵓⵜ ⵏⵏⴻⵙ, ⵎⴰⵖⴰⵔ ⵜⵓⵖⴰ ⵖⴰⵔⴻⵙ ⴰⵔⴻⴱⵄⴰ-ⴰⵍⴰⴼ ⵏ ⵡⵓⴵⵉ ⴷ ⵙⴻⵜⵜⴰ-ⴰⵍⴰⴼ ⵏ ⵉⵍⴻⵖⵎⴰⵏ ⴷ ⵡⴰⵍⴻⴼ ⵏ ⵉⴼⵓⵏⴰⵙⴻⵏ ⵏ ⵜⴻⵖⵏⴰⵛⵜ ⴷ ⵡⴰⵍⴻⴼ ⵏ ⵜⴻⵖⵢⴰⵍ. 
ⵜⵓⵖⴰ ⵖⴰⵔⴻⵙ ⵙⴻⴱⵄⴰ ⵏ ⵉⵃⴻⵏⵊⵉⵔⴻⵏ ⴷ ⵜⵍⴰⵜⴰ ⵏ ⵢⴻⵙⵙⵉⵙ. 
ⵜⴰⵎⴻⵣⵡⴰⵔⵓⵜ ⵉⴳⴳⴰ ⴰⵙ ⵢⴰⵎⵉⵎⴰ, ⵡⵉⵙⵙ ⵜⵏⴰⵢⴻⵏ ⵇⵇⴰⵔⴻⵏ ⴰⵙ ⵇⴰⵚⵉⵄⴰ ⴷ ⵡⵉⵙⵙ ⵜⵍⴰⵜⴰ ⵇⵇⴰⵔⴻⵏ ⴰⵙ ⵇⴰⵔⵏ-ⵀⴰⴼⴼⵓⴽ. 
ⵡⴰⵔ ⵓⴼⵉⵏ ⴷⵉ ⵎⴰⵔⵔⴰ ⵜⴰⵎⵎⵓⵔⵜ ⵜⵉⵃⵔⴰⵎⵉⵏ ⵛⵏⴰⵏⵜ ⴰⵎ ⵢⴻⵙⵙⵉⵙ ⵏ ⴰⵢⵓⴱ. ⴱⴰⴱⴰⵜⵙⴻⵏⵜ ⵉⵡⵛⴰ ⴰⵙⴻⵏⵜ ⵜⴰⵙⵖⴰⵔⵜ ⵊⴰⵔ ⴰⵢⵜⵎⴰⵜⵙⴻⵏⵜ. 
ⴰⵢⵓⴱ ⵉⴷⴷⴰⵔ ⴰⵡⴰⵔⵏⵉ ⵉ ⵓⵢⴰ ⵎⵢⴰ ⵓ-ⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ. ⵏⴻⵜⵜⴰ ⵉⵥⵔⴰ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵉⵃⴻⵏⵊⵉⵔⴻⵏ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵖⴰⵔⴻⵙ ⴰⵍ ⵊⵊⵉⵍ ⵡⵉⵙⵙ ⴰⵔⴻⴱⵄⴰ. 
ⴰⵢⵓⴱ ⵉⵎⵎⵓⵜ ⴰⵡⴰⵔⵏⵉ ⵍⴰⵎⵉ ⵉⵡⵙⴰⵔ ⴰⵟⵟⴰⵙ ⵓ ⵜⵓⵖⴰ ⵉⵊⵊⵉⵡⴻⵏ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ. 
