﻿ⴰⵢⵓⴱ.
40.
ⵢⴰⵔⵏⵉ ⵢⴰⵔⵔⴰ-ⴷⴷ ⵙⵉⴷⵉ ⵅ ⴰⵢⵓⴱ, ⵉⵏⵏⴰ: 
ⵎⴰ ⵉⵅⵙ ⵡⴻⵏⵏⵉ ⵉⵜⵜⴻⵎⵛⴰⵔⵔⴰⵄⴻⵏ ⴰⴽ-ⴷ ⵓⵎⵣⴻⵎⵎⴰⵔ ⵅ ⴽⵓⵍⵛⵉ ⴰⴷ ⵜ ⵉⵙⴻⴳⴳⴻⵎ? ⴻⵊⵊ ⵡⴻⵏⵏⵉ ⵉⵅⵙⴻⵏ ⴰⴷ ⵉⴷⵄⴰ ⴰⵔⴻⴱⴱⵉ, ⴰⴷ ⴷⴷ-ⵢⴰⵔⵔ! 
ⵅⴻⵏⵏⵉ ⵢⴰⵔⵔⴰ-ⴷⴷ ⴰⵢⵓⴱ ⵅ ⵙⵉⴷⵉ, ⵉⵏⵏⴰ: 
ⵅⵣⴰⵔ, ⵏⴻⵛⵛ ⴷⵔⵓⵙ, ⵎⵉⵏ ⵣⴻⵎⵎⴰⵔⴻⵖ ⴰⴷ ⵅⴰⴽ ⴷⴷ-ⴰⵔⵔⴻⵖ? ⵏⴻⵛⵛ ⴰⴷ ⴳⴳⴻⵖ ⴰⴼⵓⵙ ⵉⵏⵓ ⵅ ⵓⵇⴻⵎⵎⵓⵎ ⵉⵏⵓ. 
ⴰⵇⴰ ⵙⵙⵉⵡⵍⴻⵖ ⵉⵛⵜ ⵏ ⵜⵡⴰⵍⴰ, ⵎⴰⵛⴰ ⵡⴰⵔ ⴷⴷ-ⵜⵜⴰⵔⵔⵉⵖ ⵄⴰⴷ. ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ ⵡⴰⵔ ⴷ ⴰⵙ ⴰⵔⴻⵏⵏⵉⵖ! 
ⵅⴰⵙ ⵓⵛⴰ ⵢⴰⵔⵏⵉ ⵢⴰⵔⵔⴰ-ⴷⴷ ⵙⵉⴷⵉ ⵅ ⴰⵢⵓⴱ ⵣⵉ ⵜⵃⴰⵔⵢⴰⴹⵜ, ⵉⵏⵏⴰ: 
ⴱⵢⴻⵙ ⵅⴻⵏⵏⵉ ⵜⵉⵊⵄⵉⵏⵏⴰⵜⵉⵏ ⵏⵏⴻⵛ ⴰⵎ ⵡⴻⵔⵢⴰⵣ. ⵏⴻⵛⵛ ⵅⵙⴻⵖ ⴰⴷ ⵛⴻⴽ ⵙⵙⴻⵇⵙⵉⵖ ⵓ ⵛⴻⴽ, ⴰⵔⵔ-ⴷⴷ ⵅⴰⴼⵉ! 
ⵎⴰ ⵜⴻⵅⵙⴻⴷ ⵙ ⵜⵉⴷⴻⵜⵜ ⴰⴷ ⵜⴰⵔⵥⴻⴷ ⵍⵃⵓⴽⵎ ⵉⵏⵓ? ⵎⴰ ⵜⴻⵅⵙⴻⴷ ⴰⴷ ⵖⴰⵔⵉ ⴷⴷ-ⵜⴰⵔⵔⴻⴷ ⵍⵄⵉⴱ, ⵎⴰⵃⴻⵏⴷ ⴰⴷ ⵜⴱⴰⵏⴻⴷ ⵛⴻⴽ ⴷ ⴰⵎⵙⴻⴳⴳⴻⴷ? 
ⵎⴰ ⵖⴰⵔⴻⴽ ⴰⵖⵉⵍ ⴰⵎ ⴰⵔⴻⴱⴱⵉ? ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⴻⴷⴷⴰⵔⴷⵃⴻⴷ ⴰⵎ ⵡⴰⵊⵊⴰⵊ ⵙ ⵜⵎⵉⵊⵊⴰ ⵏⵏⴻⵛ? 
ⵇⵇⴻⵏ ⵅⴻⵏⵏⵉ ⵉⵅⴻⴼ ⵏⵏⴻⵛ ⵙ ⵍⵄⴰⴹⴰⵎⴰ ⴷ ⵓⵄⵓⴵⵉ, ⴰⵔⴹ ⵙ ⵜⵉⵙⵙⵉⵇⵜ ⴷ ⵍⵄⴻⵣⵣ. 
ⴻⵊⵊ ⴰⴷⵓⵇⵇⴻⵣ ⵏ ⵓⴼⵓⴳⴻⵎ ⵏⵏⴻⵛ ⴰⴷ ⵉⵣⴻⴵⴻⵄ, ⵅⵣⴰⵔ ⵖⴰⵔ ⴽⵓⵍ ⴱⵓ ⵏⵏⴼⴰⵅⴻⵜ, ⵓⵛⴰ ⵙⴻⵀⵡⴰ ⵉ-ⵜ! 
ⵅⵣⴰⵔ ⵎⵍⵉⵃ ⵖⴰⵔ ⵎⴽⵓⵍ ⴱⵓ-ⵏⵏⴼⴰⵅⴻⵜ, ⵙⴻⵀⵡⴰ ⵉ-ⵜ, ⵍⴱⴻⵣ ⵉⵄⴻⴼⴼⴰⵏⴻⵏ ⴷⴻⴳ ⵡⴻⵎⵛⴰⵏ ⵏⵙⴻⵏ. 
ⴼⴼⴰⵔ ⵉ-ⵜⴻⵏ ⵎⴰⵔⵔⴰ ⴰⵎ ⵎⵓⵏⴻⵏ ⴷⴻⴳ ⵓⵛⴰⵍ, ⵛⴼⴻⵏ ⵉⵖⴻⵎⴱⴰⴱ ⵏⵙⴻⵏ ⴷⵉ ⵜⵏⵓⴼⴼⵔⴰ ⵙⴰⴷⵓ ⵜⴰⵎⵎⵓⵔⵜ. 
ⵅⴻⵏⵏⵉ ⵓⵍⴰ ⴷ ⵏⴻⵛⵛ ⴰⴷ ⵛⴻⴽ ⵙⵙⴻⵎⵖⴰⵔⴻⵖ, ⵎⵉⵏⵣⵉ ⴰⴼⵓⵙ ⵏⵏⴻⵛ ⴰⴼⵓⵙⵉ ⵉⵙⵙⴻⵏⵊⴻⵎ ⵉ ⵛⴻⴽ. 
ⵅⵣⴰⵔ ⵎⴰⵛⴰ ⵍⵡⴻⵃⵛ, ‘ⴱᵉⵀⵉⵎⵓⵜ’, ⵡⴻⵏⵏⵉ ⴳⴳⵉⵖ ⴰⵎ ⵎⴰⵎⵎⴻⵛ ⵛⴻⴽ ⴳⴳⵉⵖ. ⵉⵜⵜⴻⵜⵜ ⴰⵔⴱⵉⵄ ⴰⵎ ⵓⴼⵓⵏⴰⵙ. 
ⵅⵣⴰⵔ ⵊⵊⴻⵀⴷ ⵏⵏⴻⵙ ⴷⵉ ⵜⴻⵊⵄⵉⵏⵏⴰⵜⵉⵏ ⵏⵏⴻⵙ, ⵍⵄⴻⵣⵣ ⵏⵏⴻⵙ ⴷⴻⴳ ⵉⵥⴻⵡⵔⴰⵏ ⵏⵏⴻⵙ ⵏ ⵓⵄⴻⴷⴷⵉⵙ! 
ⵎⴰⵍⴰ ⵉⵅⵙ, ⴰⴷ ⵉⴳⴳ ⴰⴽⴻⵏⵏⴰⵙ ⵏⵏⴻⵙ ⴰⵎ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ, ⵉⵥⴻⵡⵔⴰⵏ ⵏ ⵜⵎⴻⵚⵚⴰⴹⵉⵏ ⵏⵏⴻⵙ ⵎⴻⵃⴹⴻⵏ ⵎⵎⵓⴷⴻⵏ. 
ⵉⵅⵙⴰⵏ ⵏⵏⴻⵙ ⵜⵜⴻⴳⴳⴻⵏ ⴰⵎ ⵢⵉⵇⵓⴷⴰⵙ ⵏ ⵏⵏⵃⴰⵙ, ⴰⵎ ⴱⴰⵔⵔⴰⵜ ⵏ ⵡⵓⵣⵣⴰⵍ ⵉⴹⴰⵔⴻⵏ ⴷ ⵉⵖⴰⴵⴻⵏ ⵏⵏⴻⵙ. 
ⵏⴻⵜⵜⴰ ⴷ ⴰⵎⴻⵣⵡⴰⵔⵓ ⵏ ⵉⴱⵔⵉⴷⴻⵏ ⵏ ⴰⵔⴻⴱⴱⵉ. ⵡⴻⵏⵏⵉ ⵜ ⵢⴻⴳⴳⵉⵏ, ⵉⵡⵛⴰ ⴰⵙ ⵙⵙⵉⴼ ⵏⵏⴻⵙ. 
ⵉⵡⴰ, ⵉⴷⵓⵔⴰⵔ ⵜⵜⴰⵡⵢⴻⵏ ⴰⵙ-ⴷⴷ ⴰⵔⴱⵉⵄ, ⵎⴰⵔⵔⴰ ⵍⴻⵡⵃⵓⵛ ⵏ ⵢⴻⵢⵢⴰⵔ ⵜⵜⵉⵔⴰⵔⴻⵏ ⴷⵉⵏⵏⵉ. 
ⵉⴱⴱⵓⵣⵣⴻⵍ ⵙⴰⴷⵓ ⵉ ⵜⵛⴻⵊⵊⵓⵔⴰ ⵉⵜⵜⴻⴳⴳⴻⵏ ⵜⵉⵍⵉ, ⴷⴻⴳ ⵓⴷⵓⵔⵔⵉ ⵏ ⵓⵖⴰⵏⵉⵎ, ⴷⵉ ⵙⵙⴻⴱⵅⴻⵜ. 
ⴰⴷ ⵅⴰⵙ ⴷⴷⵓⵔⵢⴻⵏⵜ ⵜⵛⴻⵊⵊⵓⵔⴰ ⵉ ⵉⵜⵜⵉⵛⴻⵏ ⵜⵉⵍⵉ, ⴽⵓⵍ ⵉⵛⵜ ⵙ ⵜⵉⵍⵉ ⵏⵏⴻⵙ, ⵜⵉⵏⴻⵎⵔⴰⵍⵜ ⵏ ⵜⵖⴻⵣⵔⴰⵜⵉⵏ ⵜⵜⴻⵏⵏⴹⴻⵏⵜ ⴰⵙ-ⴷⴷ. 
ⵅⵣⴰⵔ, ⵎⴰⵍⴰ ⵉⵀⴰⵊ ⵢⴻⵖⵣⴰⵔ, ⵡⴰⵔ ⵉⵜⵜⴰⵔⵊⵉⵊⵉ, ⵉⵜⵜⵖⵉⵎⴰ ⵢⴰⵔⵙⴰ ⵎⴰⵍⴰ ⵍⵃⴻⵎⵍⴻⵜ ⵏ ⵍ’ⵓⵔⴷⵓⵏ ⵜⵓⴷⴻⴼ ⴰⵙ-ⴷⴷ ⵖⴰⵔ ⵓⵇⴻⵎⵎⵓⵎ. 
ⵎⴰ ⵉⵣⴻⵎⵎⴰⵔ ⴱⵏⴰⴷⴻⵎ ⴰⴷ ⵜ ⵉⵟⵟⴻⴼ ⴰⵎ ⵉⵅⴻⵣⵣⴰⵔ ⵏⴻⵜⵜⴰ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ, ⴰⴷ ⴰⵙ ⵉⵙⵙⵏⵓⵇⵇⴻⴱ ⵜⵉⵏⵣⴰⵔⵜ ⵙ ⵜⴻⵙⵖⵓⵏⵉⵏ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⵊⴻⴱⴷⴻⴷ ‘ⵍⵉ$ⵉⵢⴰⵜⴰⵏ’ ⵙ ⵜⵙⴻⵏⵏⴰⵔⵜ ⵏ ⵡⴻⵢⵎⴰⵔ, ⵏⵉⵖ ⴰⴷ ⵜⴻⵙⵙⴻⵀⵡⵉⴷ ⵉⵍⴻⵙ ⵏⵏⴻⵙ ⴷⴻⴳ ⵓⴼⵉⵍⵓ ⵏ ⵡⴻⵢⵎⴰⵔ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⴰⵙ ⵜⴻⴳⴳⴻⴷ ⵜⴰⵅⴰⴷⴻⵏⵜ ⵏ ⵓⵖⴰⵏⵉⵎ ⴷⵉ ⵜⴻⵏⵣⴰⵔⵜ ⵏⵏⴻⵙ, ⵏⵉⵖ ⴰⴷ ⵜⴻⵙⵙⵏⵓⵇⵇⴱⴻⴷ ⴰⵖⴻⵙⵎⵉⵔ ⵏⵏⴻⵙ ⵙ ⵓⵖⴰⵏⵍⵜⵓ? 
ⵎⴰ ⴰⴷ ⵣⵣⴰⵢⴻⴽ ⵉⵜⵜⴰⵔ ⴰⵃⵉⵏⵏⵉ? ⵎⴰ ⴰⴷ ⵉⵙⵙⵉⵡⴻⵍ ⴰⴽⵉⴷⴻⴽ ⵙ ⵡⴰⵡⴰⵍⴻⵏ ⵉⵎⵉⵣⵉⴹⴻⵏ? 
ⵎⴰ ⴰⴷ ⵢⴻⴳⴳ ⴰⴽⵉⴷⴻⴽ ⵍⵄⴰⵀⴷ? ⵎⴰ ⵜⵣⴻⵎⵎⴰⵔⴻⴷ ⴰⴷ ⵜ ⵜⴻⴽⵙⵉⴷ ⴷ ⵉⵙⵎⴻⵖ ⵉ ⵍⴻⴱⴷⴰ? 
ⵎⴰ ⵜⵣⴻⵎⵎⴰⵔⴻⴷ ⴰⴽⵉⴷⴻⵙ ⵜᵉⵜⵜⵉⵔⴰⵔⴻⴷ ⴰⵎ ⴰⴽ-ⴷ ⵉⵊⵊ ⵏ ⵓⵊⴹⵉⴹ, ⵏⵉⵖ ⴰⴷ ⵜ ⵜⴻⵇⵇⵏⴻⴷ ⵉ ⵜⴻⵃⵔⴰⵎⵉⵏ ⵏⵏⴻⵛ? 
ⵎⴰ ⵣⴻⵎⵎⴰⵔⴻⵏ ⵉⵏⴻⵢⵎⴰⵔⴻⵏ ⴰⴷ ⴷⴰⵢⴻⵙ ⵙⴻⴱⴱⴻⴱⴻⵏ? ⵎⴰ ⵣⴻⵎⵎⴰⵔⴻⵏ ⴰⴷ ⵜ ⴱⴹⴰⵏ ⵊⴰⵔ ⴰⵢⵜ ⵏ ⴽⴻⵏⵄⴰⵏ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵊⵊⵓⴷ ⵜⵉⵍⵎⴻⵛⵜ ⵏⵏⴻⵙ ⵙ ⴼⵍⵉⵜⵛⴰⵜ, ⵏⵉⵖ ⵙ ⵍⴰⵏⵙⴰ ⵏ ⵉⵙⴻⵍⵎⴰⵏ ⴰⵣⴻⴵⵉⴼ ⵏⵏⴻⵙ? 
ⵙⴰⵔⵙ ⵅⴰⵙ ⴰⴼⵓⵙ ⵏⵏⴻⵛ, ⵅⴻⵎⵎ ⵖⴰⵔ ⵓⵎⴻⵏⵖⵉ, ⵡⴰⵔ ⵜ ⵜⵜⴻⴳⴳⵉⴷ ⵄⴻⵎⵎⴰⵔⵚ ⵄⴰⴷ. 
