﻿ⴰⵢⵓⴱ.
39.
ⵎⴰ ⵜⴻⵙⵙⵏⴻⴷ ⵎⴻⵍⵎⵉ ⵜⵜⴰⵔⵡⴻⵏⵜ ⵜⵖⴰⵢⴷⵉⵏ ⵏ ⵜⵚⵓⴹⴰⵔ? ⵎⴰ ⵜⵃⴻⵟⵟⵉⴷ ⵜⵉⵔⵡⴰ ⵏ ⵜⵓⴷⴰⴷⵉⵏ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⵃⴻⵙⴱⴻⴷ ⵉⵢⵓⵔⴻⵏ ⵏ ⵜⴽⴻⵙⵙⵉⵜ ⵏⵙⴻⵏⵜ, ⵎⴰ ⵜⴻⵙⵙⵏⴻⴷ ⵍⵃⴰⵍ ⵏ ⵜⵉⵔⵡⴰ ⵏⵙⴻⵏⵜ? 
ⵏⵉⵜⴻⵏⵜⵉ ⵜⵜⴻⵇⵡⵉⵙⴻⵏⵜ, ⵜⵜⴰⵔⵡⴻⵏⵜ ⵉⵎⴻⵥⵢⴰⵏⴻⵏ ⵏⵙⴻⵏⵜ, ⵍⴻⵡⵊⴻⵄ ⵏ ⵜⴰⵔⵓⵜ ⵏⵙⴻⵏⵜ ⵙⵙⵓⴼⴼⵓⵖⴻⵏ ⵜⴻⵏ. 
ⵎⴻⵃⴹⴻⵏ ⵉⵎⴻⵥⵢⴰⵏⴻⵏ ⵏⵙⴻⵏⵜ, ⵎⴻⵇⵇⴰⵔⴻⵏ ⴷⵉ ⵍⴻⵅⵍⴰ, ⵜⵜⴻⴼⴼⵖⴻⵏ ⵖⴰⵔ ⴱⴰⵔⵔⴰ ⵓ ⵡⴰⵔ ⵖⴰⵔⵙⴻⵏⵜ ⵜⵜⵄⵉⵇⵇⵉⴱⴻⵏ. 
ⵎⴰⵏ ⵡⴻⵏ ⵢⴰⵔⵅⵓⵏ ⵉ ⵡⴻⵖⵢⵓⵍ ⵏ ⵍⴻⵅⵍⴰ ⵓ ⵜⵉⵙⴰⵔⵔⵉⴼⵉⵏ ⵏ ⵡⴻⵖⵢⵓⵍ ⵏ ⵍⴻⵅⵍⴰ, ⵎⴰⵏ ⵡⴻⵏ ⵜⴻⵏⵜ ⵉⴼⴻⵙⵢⴻⵏ? 
ⵏⴻⵛⵛ ⵡⵛⵉⵖ ⴰⵙ ⵜⴰⵏⴻⵣⵔⵓⴼⵜ ⴷ ⵜⴰⴷⴷⴰⵔⵜ, ⵍⴻⵡⴹⴰ ⴰⵎⴻⴵⴰⵃ ⴷ ⵜⵉⵣⴻⴷⴷⵉⵖⵉⵏ ⵏⵏⴻⵙ. 
ⵏⴻⵜⵜⴰ ⵉⴹⴻⵃⵃⴻⵛ ⵅ ⵍⵖⴰⵛⵉ ⵉⵏⵀⴻⵡⵍⴻⵏ ⵏ ⵜⴻⵏⴷⵉⵏⵜ, ⵡⴰⵔ ⵉⵜⵜⴻⵙⵍⵉ ⵉⵖⵓⵢⵢⴰⵏ ⵏ ⵢⵉⵏⵏⵉ ⵉⵣⴻⵢⵢⴰⵔⴻⵏ ⵉⵙⴻⵎⵖⴰⵏ. 
ⵊⵊⵡⴰⵢⴻⵀ ⵏ ⵉⴷⵓⵔⴰⵔ ⴷ ⴷⴷⵎⴰⵏⵉ ⵏⵏⴻⵙ ⵏ ⵜⴰⵔⴻⵡⵙⴰ, ⵢⴰⵔⴻⵣⵣⵓ ⴷⴰⵢⵙⴻⵏ ⵅ ⵇⴰⵄ ⵎⵉⵏ ⵉⴵⴰⵏ ⴷ ⴰⵣⵉⵣⴰ. 
ⵎⴰ ⴰⴷ ⵉⵅⵙ ⵉⵖⴰⵢⴹ ⵏ ⵍⴻⵅⵍⴰ ⴰⴽ-ⴷ ⵡⴰⵛⵛⴰⵡⴻⵏ ⴷ ⵉⵣⵉⵔⴰⵔⴻⵏ ⴰⴷ ⵅⴰⴽ ⵉⵙⴻⵅⵅⴰⵔ? ⵎⴰ ⴰⴷ ⵉⵙⵙⴻⵏⵙ ⵖⴰⵔ ⵍⵎⴻⴷⵡⴻⴷ ⵏⵏⴻⵛ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⵎⴻⵏⵄⴻⴷ ⵉⵖⴰⵢⴹ ⵏ ⵍⴻⵅⵍⴰ ⴰⴽ-ⴷ ⵡⴰⵛⵛⴰⵡⴻⵏ ⴷ ⵉⵣⵉⵔⴰⵔⴻⵏ ⵙ ⵡⴻⵙⵖⵓⵏ ⵏⵏⴻⵙ ⵖⴰⵔ ⵓⵄⴻⵢⵢⴻⴷ ⵏ ⵡⴻⵛⵔⴰⵣ? ⵎⴰ ⴰⴷ ⵉⵛⴰⵔⵣ ⵜⵉⵢⵙⴰⵔⵉⵏ ⴰⵡⴰⵔⵏⵉ ⴰⵛ? 
ⵎⴰ ⵜᵉⵜⵜⵛⴰⵍⴻⴷ ⵅⴰⵙ, ⵎⵉⵏⵣⵉ ⵏⴻⵜⵜⴰ ⵉⵊⵀⴻⴷ ⴰⵟⵟⴰⵙ, ⵎⴰ ⴰⴷ ⴰⵙ ⵜⴻⵊⵊⵉⴷ ⵍⵅⴻⴷⵎⴻⵜ ⵏⵏⴻⵛ? 
ⵎⴰ ⴰⴷ ⵅⴰⵙ ⵜᵉⵜⵜⴻⵛⵍⴻⴷ ⴰⴷ ⵖⴰⵔⴻⴽ ⴷⴷ-ⵢⴰⵔⵔ ⵣⵣⴰⵔⵉⵄⴻⵜ ⵏⵏⴻⵛ, ⴰⴷ ⵜⵜ ⵢⴰⵡⵉ ⵖⴰⵔ ⵓⵏⴻⴷⵔⴰⵔ ⵏⵏⴻⵛ? 
ⴰⴼⵔⵉⵡⴻⵏ ⵏ ⵏⵏⵄⴰⵎⴻⵜ ⵛⵛⴰⵜⴻⵏ ⵙ ⵍⵅⴰⴹⴰⵔ. ⵎⴰⵛⴰ ⵎⴰ ⴰⵇⴰ-ⵜⴻⵏ ⴷ ⴰⴼⵔⵉⵡⴻⵏ ⴷ ⵡⴰⵔⵔⵉⵛ ⵉⴷⴰⵍⴼⴻⵏ ⵏ ⵓⴱⴻⵍⵍⴰⵔⵊ? 
ⵎⴰⵖⴰⵔ ⵜᵉⵜⵜⴻⵊⵊⴰ ⵜⵉⵎⴻⴵⴰⵍⵉⵏ ⵏⵏⴻⵙ ⴷⴻⴳ ⵓⵛⴰⵍ ⵏ ⵜⴻⵎⵎⵓⵔⵜ, ⵜᵉⵜⵜⴻⵊⵊⴰ ⵉ-ⵜⴻⵏⵜ ⵜⵜⴻⵃⵎⴰⵏⵜ ⴷⴻⴳ ⵉⵊⴷⵉ. 
ⵜᵉⵜⵜᵉⵜⵜⵓ ⴰⵇⴰ ⵉⵊⵊ ⵏ ⵓⴹⴰⵔ ⵉⵣⴻⵎⵎⴰⵔ ⴰⴷ ⵜⴻⵏⵜ ⵉⵍⴱⴻⵣ, ⴰⵇⴰ ⵍⴻⵡⵃⵓⵛ ⵏ ⵍⴻⵅⵍⴰ ⵣⴻⵎⵎⴰⵔⴻⵏ ⴰⴷ ⵅⴰⵙⴻⵏⵜ ⵄⴻⴼⵙⴻⵏ. 
ⵏⴻⵜⵜⴰⵜ ⵜⵇⴻⵙⵙⴻⵃ ⴷⴻⴳ ⵉⵎⴻⵥⵢⴰⵏⴻⵏ ⵏⵏⴻⵙ ⴰⵅⵎⵉ ⵡⴰⵔ ⴵⵉⵏ ⵏⵏⴻⵙ. ⴱⴰⵟⴻⵍ ⵉ ⵜᵉⵜⵜⴻⴳⴳ ⵜⵉⵣⴻⵎⵎⴰⵔ ⵏⵏⴻⵙ, ⵎⴰⵖⴰⵔ ⵏⴻⵜⵜⴰⵜ ⵡⴰⵔ ⵜⴽⴻⵙⵙⵉ ⵙ ⵡⴻⵎⵏⵓⵙ, 
ⵎⴰⵖⴰⵔ ⴰⵔⴻⴱⴱⵉ ⵉⵊⵊⴰ ⵉ-ⵜⵜ ⴰⴷ ⵜᵉⵜⵜⵓ ⵜⵉⵖⵉⵜ, ⵡⴰⵔ ⴷ ⴰⵙ ⵉⵡⵛⵉ ⴱⵓ ⵜⴻⵙⵖⴰⵔⵜ ⴷⵉ ⵍⴻⴼⵀⴰⵎⴻⵜ. 
ⵎⴰⵛⴰ ⵎⴰⵍⴰ ⵜⴻⴽⵙⵉ ⴷⴻⴳ ⵓⴹⴰⵔ ⵏⵏⴻⵙ, ⵜⴻⵙⵙⴳⴻⵄⵄⴰⴷ ⵉⵅⴻⴼ ⵏⵏⴻⵙ, ⵜⴹⴻⵃⵃⴻⵛ ⵅ ⵓⵢⵉⵙ ⴷ ⵡⴻⵏⵏⵉ ⵅⴰⵙ ⵉⵏⵢⵉⵏ. 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵡⵛⴻⴷ ⵊⵊⴻⵀⴷ ⵉ ⵓⵢⵉⵙ? ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵙⵙⵢⴰⵔⴹⴻⴷ ⵉⵊⵉⵎⴰⵏ ⵏⵏⴻⵙ ⵙ ⵙⵙⴱⵉⴱ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜ ⵢⴰⵔⵔ ⵉⵏⴻⵟⵟⵓ ⴰⵎ ⵓⴱⵓⵔⵅⴻⵙ? ⵍⵄⴻⵣⵣ ⵏ ⵓⵙⵏⴻⵃⵏⴻⵃ ⵏⵏⴻⵙ ⵉⵙⵙⴰⴳⴳⵯⴰⴷ ⴰⵟⵟⴰⵙ. 
ⵅⴻⴱⴱⵛⴻⵏ ⵉⵢⵙⴰⵏ ⵙ ⵉⴹⴰⵔⴻⵏ ⵏⵙⴻⵏ ⴰⵎ ⵜⵜⵔⴰⵊⴰⵏ ⴷⵉ ⵍⴻⵡⴹⴰ ⵏ ⵜⴻⵖⵣⵓⵔⵜ, ⵉⴼⴰⵔⵃ ⵓⵢⵉⵙ ⵙ ⵊⵊⴻⵀⴷ ⵏⵏⴻⵙ, ⵉⵜⵜⴻⴼⴼⴻⵖ, ⵎⴰⵃⴻⵏⴷ ⴰⴷ ⵉⵎⵎⴻⵍⵇⴰ ⴰⴽ-ⴷ ⵍⴻⵙⵏⴰⵃ. 
ⵉⴹⴻⵃⵃⴻⵛ ⵅ ⵎⴰⵔⵔⴰ ⵎⵉⵏ ⵉⵙⵙⴰⴳⴳⵯⴰⴷⴻⵏ, ⵡⴰⵔ ⵉⵜⵜⵏⴻⵅⵍⵉⵄ ⵣⵉ ⵡⴰⵍⵓ, ⵡⴰⵔ ⵉⴷⴷⵉⴽⴽⵡⵉⵍ ⵖⴰⵔ ⴹⴻⴼⴼⴰⵔ ⵣⵉ ⵙⵙⵉⴼ. 
ⵉⵜⵜⵇⴰⵔⵇⵓⴱ ⵡⴻⵇⵔⴰⴱ ⵏ ⴼⵍⵉⵜⵛⴰⵜ ⵙⴻⵏⵏⴻⵊ ⵏⵏⴻⵙ, ⵍⴰⵏⵙⴰ ⴷ ⴼⵍⵉⵜⵛⴰ ⵜⵜⵉⵙⵙⵉⵇⴻⵏ. 
ⵙ ⴷⴷⵔⵉⵣ ⵏ ⵜⵛⴻⴹⵢⵉⵏ ⴷ ⵣⵣⵄⴰⵎⴻⵜ ⵉⵚⴰⵔⵔⴻⴹ ⵜⴰⵎⵎⵓⵔⵜ, ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵙⵙⴱⴻⴷⴷ ⵖⴰⵔ ⵓⵙⵓⴹⵉ ⵏ ⵓⵢⵉⵛⵛ ⵏ ⵉⵛⴰⵔⵔⵉ. 
ⵖⴰⵔ ⵜⵎⵉⵊⵊⴰ ⵏ ⵓⵙⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⵉⵙⵙⵏⴻⵃⵏⵉⵃ: ‘ⵀⴻⵀⴻⵀ!’ ⵉⵜⵜⴰⵛⴰ ⴰⴽ-ⴷ ⵓⵎⴻⵏⵖⵉ ⵣⵉ ⵍⴰⴳⴳⵯⴰⵊ, ⵣⵣⴳⴰ ⵏ ⵍⵃⵓⴽⴽⴰⵎ ⴷ ⵉⵖⵓⵢⵢⴰⵏ ⵏ ⵓⵎⴻⵏⵖⵉ. 
ⵎⴰ ⵉⵟⵟⴰⵡ ⵍⴱⴰⵣ ⵣⵉ ⵍⴻⴼⵀⴰⵎⴻⵜ ⵏⵏⴻⵛ, ⴰⵇⴰ ⵉⵜⵜⴱⴻⵣⵣⴰⵄ ⴰⴼⵔⵉⵡⴻⵏ ⵏⵏⴻⵙ ⵖⴰⵔ ⵍⵊⴰⵏⵓⴱ? 
ⵎⴰ ⵉⵙⵙⴳⴻⵄⵄⴰⴷ ⵓⴳⵉⴷⴰⵔ ⵉⵅⴻⴼ ⵏⵏⴻⵙ ⵙⴻⵏⵏⴻⵊ ⵇⴰⵄ ⵙ ⵍⵓⵎⵓⵔ ⵏⵏⴻⵛ, ⵉⵜⵜⴻⴳⴳ ⵍⵄⵓⵛⵛ ⵏⵏⴻⵙ ⴷⵉ ⵍⵓⵄⵍⴰ? 
ⵉⵣⴻⴷⴷⴻⵖ ⵓ ⵉⵙⵙⵏⵓⵙⴰ ⵅ ⵊⵊⴰⵔⴼ, ⵅ ⵓⵛⴻⵏⵇⵓⴱ ⵏ ⵊⵊⴰⵔⴼ, ⴰⵇⴰ-ⵜ ⴷ ⵍⴱⵓⵔⵊ ⵏⵏⴻⵙ. 
ⵙⵙⴻⵏⵏⵉ ⵉⵃⴻⵟⵟⴰ ⵣⵣⴰⵔⴷⴻⵜ, ⵜⵉⵟⵟⴰⵡⵉⵏ ⵏⵏⴻⵙ ⵅⴻⵣⵣⴰⵔⴻⵏⵜ ⵉ-ⵜⵜ-ⴷⴷ ⵣⵉ ⵍⴰⴳⴳⵯⴰⵊ. 
ⵉⵎⴻⵥⵢⴰⵏⴻⵏ ⵏⵏⴻⵙ ⵙⴻⴽⴽⴼⴻⵏ ⵉⴷⴰⵎⵎⴻⵏ ⵓ ⵎⴰⵏⵉ ⴵⴰⵏ ⵉⵏⵏⵉ ⵉⵜⵜⵡⴰⵏⵖⴻⵏ, ⴰⵇⴰ-ⵜ ⴷⵉⵏ ⵉ ⵢⴻⴵⴰ. 
