﻿ⴰⵢⵓⴱ.
38.
ⴰⵡⴰⵔⵏⵉ ⴰⵙ ⵢⴰⵔⵔⴰ-ⴷⴷ ⵙⵉⴷⵉ ⵅ ⴰⵢⵓⴱ ⵣⵉ ⵜⵃⴰⵔⵢⴰⴹⵜ, ⵉⵏⵏⴰ: 
ⵎⴰⵏ ⵡⴻⵏ ⵉⵙⵙⴱⴰⵔⵔⵛⵏⴻⵏ ⴰⵛⴰⵡⴰⵔ, ⵙ ⵡⴰⵡⴰⵍⴻⵏ ⴱⵍⴰ ⵜⵓⵙⵙⵏⴰ? 
ⴱⵢⴻⵙ ⵅⴻⵏⵏⵉ ⵜⵉⵊⵄⵉⵏⵏⴰⵜⵉⵏ ⵏⵏⴻⵛ ⴰⵎ ⵡⴻⵔⵢⴰⵣ. ⵏⴻⵛⵛ ⵅⵙⴻⵖ ⴰⴷ ⵛⴻⴽ ⵙⵙⴻⵇⵙⵉⵖ ⵓ ⵛⴻⴽ, ⴰⵔⵔ-ⴷⴷ ⵅⴰⴼⵉ! 
ⵎⴰⵏⵉ ⵛⴻⴽ ⵜⵓⵖⴰ ⵓⵎⵉ ⴳⴳⵉⵖ ⵏⴻⵛⵛ ⴷⵙⴰⵙ ⵏ ⵜⴰⵎⵎⵓⵔⵜ? ⵉⵏⵉ ⵜ ⵎⴰⵍⴰ ⵖⴰⵔⴻⴽ ⵍⴻⴼⵀⴰⵎⴻⵜ ⵙ ⵜⵉⴷⴻⵜⵜ. 
ⵎⴰⵏ ⵡⴻⵏ ⵉⴳⴳⵉⵏ ⵍⴻⵄⴱⴰⵔ ⵏⵏⴻⵙ, ⵡⴰⵀ, ⵛⴻⴽ ⵜⴻⵙⵙⵏⴻⴷ ⵜⵜ, ⵎⴰ ⵡⴰⵔ ⵉⴵⵉ ⴰⵎⴻⵏⵏⵉ? ⵎⴰⵏ ⵡⴻⵏ ⵅⴰⵙ ⵉⵎⴻⵃⴹⴻⵏ ⴰⴼⵉⵍⵓ ⵏ ⵍⴻⵄⴱⴰⵔ? 
ⵎⵉⵏ ⵅⴻⴼ ⵀⵡⴰⵏ ⴷⵙⵓⵙⴰ ⵏⵏⴻⵙ, ⵏⵉⵖ ⵎⴰⵏ ⵡⴻⵏ ⵉⵙⵙⴰⵔⵙⴻⵏ ⴰⵥⵔⵓ ⵏ ⵜⴻⵖⵎⴰⵔⵜ ⵏⵏⴻⵙ, 
ⵓⵎⵉ ⵉⵜⵔⴰⵏ ⵏ ⵚⵚⴱⴻⵀ ⵖⴻⵏⵏⵊⴻⵏ ⵊⵎⵉⵄ ⵙ ⵍⴻⴼⵔⴰⵃⴻⵜ, ⵓⵎⵉ ⵙⵍⵉⵡⵍⴻⵡⴻⵏ ⵎⴰⵔⵔⴰ ⴰⵔⵔⴰⵡⴻⵏ ⵏ ⴰⵔⴻⴱⴱⵉ? 
ⵎⴰⵏ ⵡⴻⵏ ⵉⴱⴻⵍⵍⵄⴻⵏ ⵍⴻⴱⵃⴰⵔ ⵙ ⵜⴻⵡⵡⵓⵔⴰ, ⵓⵎⵉ ⴷⴷ-ⵉⴷⴷⵓⵇⵇⴻⵣ ⵓⵛⴰ ⵉⴼⴼⴻⵖ-ⴷⴷ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵙ, 
ⵓⵎⵉ ⴷ ⴰⵙ ⴳⴳⵉⵖ ⵉⵙⴻⵢⵏⵓⵜⴻⵏ ⴷ ⴰⵔⵔⵓⴹ ⵏⵏⴻⵙ, ⵉⵊⵊ ⵏ ⵓⵙⴻⵢⵏⵓ ⵉⴱⴱⵓⵎⴱⴻⵙ ⴷ ⴰⵎⴻⵏⴷⵉⵍ ⵎⴰⵃⴻⵏⴷ ⴰⴷ ⴷⴰⵢⴻⵙ ⵜ ⵙⵙⴻⵀⵏⵓⵏⵏⴹⴻⵖ, 
ⵓⵎⵉ ⴷ ⴰⵙ ⴰⵔⵥⵉⵖ ⴰⴼⵔⴰⵢ ⵉⵏⵓ ⴰⵎ ⵉⵊⵊ ⵏ ⵡⴻⵃⴼⵓⵔ ⵢⵓⴵⵖⴻⵏ, ⵓ ⵓⵎⵉ ⴷ ⴰⵙ ⴳⴳⵉⵖ ⴰⵄⵎⵓⴷ ⵉ ⵓⴱⴻⵍⵍⴻⵄ ⴷ ⵜⴻⵡⵡⵓⵔⴰ, 
ⵏⵏⵉⵖ: ‘ⴰⵍ ⴷⴰ ⵉ ⴷⴷ ⵖⴰ ⵜⴰⵙⴻⴷ, ⵡⴰⵔ ⵄⴻⴷⴷⵓ. ⴷⴰⵏⵉⵜⴰ ⴰⴷ ⵜᵉⵜⵜⵡⴰⵙⵙⴱⴻⴷⴷ ⵏⵏⴼⴰⵅⴻⵜ ⵏ ⵍⴻⵎⵡⴰⵊ ⵏⵏⴻⵛ.’ 
ⵎⴰ ⵜⵓⵎⵓⵔⴻⴷ ⵛⴻⴽ ⴰⵜⴻⴼⴼⵓ ⵏ ⵚⵚⴱⴻⵃ ⴷⴻⴳ ⵡⵓⵙⵙⴰⵏ ⵏⵏⴻⵛ? ⵎⴰ ⵜⴻⵙⵙⵛⴰⵏⴻⴷ ⵉ ⵜⴼⴰⵡⵜ ⵏ ⵍⴻⴼⵊⴰⵔ ⴰⵎⵛⴰⵏ ⵏⵏⴻⵙ, 
ⵎⴰⵃⴻⵏⴷ ⴰⴷ ⵜᵉⵟⵟⴻⴼ ⴰⴼⵔⵉⵡⴻⵏ ⵏ ⵜⴻⵎⵎⵓⵔⵜ, ⴰⵍⴰⵎⵉ ⴰⴷ ⵣⵣⴰⵢⴻⵙ ⵣⵣⴻⵔⵣⴻⵏ ⵉⵄⴻⴼⴼⴰⵏⴻⵏ? 
ⴰⴷ ⵜⴻⴷⵡⴻⵍ ⵜⴻⵎⵎⵓⵔⵜ ⴰⵎ ⵜⴰⵔⵔⵉⵙⵜ ⵙⴰⴷⵓ ⵟⵟⴰⴱⴻⵄ, ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⴰⴷ ⵅⴰⵙ ⵜⵜⵡⴰⵙⵙⴱⴻⴷⴷⴻⵏⵜ ⵄⴰⵡⴻⴷ ⴰⵎ ⵎⴰⵎⵎⴻⵛ ⵉ ⵜⴻⴵⴰ ⵉⵊⵊ ⵏ ⵡⴰⵔⵔⵓⴹ. 
ⵉⵄⴻⴼⴼⴰⵏⴻⵏ ⴰⴷ ⴰⵙⴻⵏ ⵜᵉⵜⵜⵡⴰⴽⴽⴻⵙ ⵜⴼⴰⵡⵜ ⵏⵙⴻⵏ ⵓ ⴰⵖⵉⵍ ⵉⵜⵜⵡⴰⵙⵙⴳⴻⵄⵄⴷⴻⵏ ⴰⴷ ⵉⵜⵜⵡⴰⵔⵥ. 
ⵎⴰ ⵜⵉⵡⴹⴻⴷ ⵖⴰⵔ ⵍⵄⵓⵏⵚⴰⵔⴰⵜ ⵏ ⵍⴻⴱⵃⴰⵔ, ⵎⴰ ⵜⵓⵢⵓⵔⴻⴷ ⵄⴻⵎⵎⴰⵔⵚ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ ⵏ ⵡⴰⵎⴰⵏ ⵉⵀⴻⵡⵍⴻⵏ? 
ⵎⴰ ⵜⵜⵡⴰⵄⴰⵔⵔⴰⵏⵜ ⵜⴻⵡⵡⵓⵔⴰ ⵏ ⵍⵎⴻⵡⵜ ⵉ ⵛⴻⴽ, ⵎⴰ ⵜⴻⵥⵔⵉⴷ ⵜⵉⵡⵡⵓⵔⴰ ⵏ ⵜⵉⵍⵉ ⵏ ⵍⵎⴻⵡⵜ? 
ⵎⴰ ⵜᵉⵜⵜⴰⵡⵉ-ⴷⴷ ⵍⴻⴼⵀⴰⵎⴻⵜ ⵏⵏⴻⵛ ⴰⵍ ⵉⵏⴻⴳⴳⵓⵔⴰ ⵏ ⵜⴻⵎⵎⵓⵔⵜ? ⵉⵏⵉ ⵜ ⵎⴰⵍⴰ ⵜⴻⵙⵙⵏⴻⴷ ⴰⵢⴰ ⵎⴰⵔⵔⴰ. 
ⵎⴰⵏⵉ ⵉⴵⴰ ⵡⴻⴱⵔⵉⴷ ⵖⴰⵔ ⵜⵣⴻⴷⴷⵉⵖⵜ ⵏ ⵜⴼⴰⵡⵜ? ⵓ ⵜⴰⴵⴻⵙⵜ, ⵎⴰⵏⵉ ⵜⴻⴵⴰ ⵜⵣⴻⴷⴷⵉⵖⵜ ⵏⵏⴻⵙ, 
ⵃⵉⵎⴰ ⴰⴷ ⵜⵣⴻⵎⵎⴰⵔⴻⴷ ⴰⴷ ⵜⵜ ⵜⵏⴻⴷⵀⴻⴷ ⵖⴰⵔ ⵡⴻⵎⵛⴰⵏ ⵏⵏⴻⵙ, ⵓ ⴰⴷ ⵜⴻⵙⵙⵏⴻⴷ ⵎⵍⵉⵃ ⵉⵎⴻⵙⵔⴰⵇ ⵖⴰⵔ ⵜⴰⴷⴷⴰⵔⵜ ⵏⵏⴻⵙ? 
ⵛⴻⴽ ⴰⵇⴰ ⵜⴻⵙⵙⵏⴻⴷ ⵎⴰⵏ ⴰⵢⴰ ⵏⵉⵖ, ⵎⵉⵏⵣⵉ ⵛⴻⴽ ⵜⵓⵖⴰ ⵜⵅⴻⵍⵇⴻⴷ, ⵏⵉⵖ ⵍⵍⴰ? ⵓ ⵎⴰ ⵡⴰⵔ ⵉⴵⵉ ⵍⵇⴻⴷⴷ ⵏ ⵡⵓⵙⵙⴰⵏ ⵏⵏⴻⵛ ⴷ ⴰⵟⵟⴰⵙ? 
ⵎⴰ ⵜⵓⴷⴼⴻⴷ ⵖⴰⵔ ⵉⵅⵅⴰⵎⴻⵏ ⵏ ⵍⴻⵅⵣⴻⵏ ⵏ ⵡⴻⴷⴼⴻⵍ, ⵎⴰ ⵜⴻⵥⵔⵉⴷ ⵍⴻⵀⵔⵉⵜ ⵏ ⵜⴻⴱⵔⵓⵔⵉ, 
ⵏⵏⵉ ⵅ ⵛⴻⵟⵟⴰⵔⴻⵖ ⵉ ⵍⵡⴻⵇⵜ ⵏ ⵍⴻⵃⵚⴰⵔⴻⵜ, ⵉ ⵡⴰⵙⵙ ⵏ ⴳⴰⵔⵔⴰ ⴷ ⵓⵎⴻⵏⵖⵉ? 
ⵎⴰⵏⵉ ⵉⴵⴰ ⵡⴻⴱⵔⵉⴷ ⵉⵜⵜⴱⴻⵟⵟⴰⵏ ⵜⵉⴼⴰⵡⵜ, ⵓⵍⴰ ⴷ ⴰⴱⵔⵉⴷ ⵉ ⵣⵉ ⵉⵜⵜⵡⴰⴱⴻⵣⵣⴻⵄ ⵓⵙⴻⵎⵎⵉⴹ ⵏ ⵛⵛⴰⵔⵇ ⵅ ⵜⴻⵎⵎⵓⵔⵜ? 
ⵎⴰⵏ ⵡⴻⵏ ⵉⴼⴻⴵⴻⵇ ⵍⵎⵉⵣⴰⴱ ⵉ ⵍⵃⴻⵎⵍⴻⵜ ⵏ ⵡⴻⵏⵥⴰⵔ, ⵓⵍⴰ ⴷ ⴰⴱⵔⵉⴷ ⵉ ⵡⴰⵙⵙⴰⵎ ⵏ ⵡⴰⵊⵊⴰⵊⴻⵏ 
ⵃⵉⵎⴰ ⴰⴷ ⵉⵙⵙⴻⴽⴽ ⴰⵏⵥⴰⵔ ⵅ ⵜⴻⵎⵎⵓⵔⵜ ⵏⵏⵉ ⴷⵉ ⵡⴰⵔ ⵉⵣⴷⵉⵖ ⵃⴻⴷ, ⵅ ⵍⴻⵅⵍⴰ ⵉ ⵡⴰⵔ ⴷⵉ ⵉⵣⴷⵉⵖ ⵓⵍⴰ ⴷ ⵉⵊⵊ, 
ⵃⵉⵎⴰ ⴰⴷ ⵉⵙⵙⴰⵔⵡⴰ ⵊⵊⵡⴰⵢⴻⵀ ⵉⵅⵍⴰⵏ ⵓ ⵉⵜⵜⵡⴰⵅⵍⴰⵏ ⵓ ⵃⵉⵎⴰ ⴰⴷ ⵉⵙⵙⴻⵖⵎⵉ ⴰⵔⴱⵉⵄ ⴷ ⵟⵟⵔⵉ? 
ⵎⴰ ⴰⵏⵥⴰⵔ ⵖⴰⵔⴻⵙ ⵛⴰ ⵏ ⴱⴰⴱⴰⵙ, ⵏⵉⵖ ⵎⴰⵏ ⵡⴻⵏ ⵉ ⴷⴷ-ⵉⵜⵜⴻⵊⵊⴰⵏ ⵜⵓⴷⴷⵉⵎⵉⵏ ⵏ ⵏⵏⴷⴰ? 
ⵣⵉ ⵎⴰⵏ ⴰⵄⴻⴷⴷⵉⵙ ⵉ ⵣⵉ ⴷⴷ-ⵉⴼⴼⴻⵖ ⵡⴻⵊⵔⵉⵙ, ⵓ ⵏⵏⴷⴰ ⵉⵊⴻⵔⵙⴻⵏ ⵏ ⵓⵊⴻⵏⵏⴰ, ⵡⵉ ⵉ-ⵜ-ⵉ-ⴷⴷ-ⵢⵓⵔⵡⴻⵏ? 
ⴷⴷⴰⴽⴽⵡⴰⵍⴻⵏ ⵡⴰⵎⴰⵏ ⴰⵎ ⵡⴻⵥⵔⵓ ⵓⵛⴰ ⵉⵊⴰⵔⵙ ⵡⵓⴷⴻⵎ ⵏ ⵡⴰⵎⴰⵏ ⵉⵀⴻⵡⵍⴻⵏ. 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⵛⴻⴷⴷⴻⴷ ⴰⴳⵔⴰⵡ ⵏ ⵙⴻⴱⵄⴰ ⵏ ⵢⴻⵜⵔⴰⵏ, ⵏⵉⵖ ⵜⴼⴻⵙⵙⵢⴻⴷ ⵙⵙⵏⴰⵙⴻⵍ ⵏ ⵢⴻⵜⵔⴰⵏ ⵏ ⵓⵔⵉⵢⵓⵏ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⴷⴷ-ⵜⴻⵙⵙⵓⴼⴼⵖⴻⴷ ⵉⵜⵔⴰⵏ ⵏ ⵣⵓⴷⵢⴰⴽ ⵖⴰⵔ ⵍⵃⴰⵍ ⵏⵙⴻⵏ, ⵓⵍⴰ ⴷ ⴷⴷⵓⴱ ⴰⵎⴻⵇⵇⵔⴰⵏ ⴰⴽ-ⴷ ⵜⴰⵔⵡⴰ ⵏⵏⴻⵙ? 
ⵎⴰ ⵜⴻⵙⵙⵏⴻⴷ ⵉⵣⴻⵔⴼⴰⵏ ⵏ ⵓⵊⴻⵏⵏⴰ, ⵏⵉⵖ ⵜⵣⴻⵎⵎⴰⵔⴻⴷ ⴰⴷ ⵜⴹⴻⴱⴱⴰⵔⴻⴷ ⵅ ⵓⵇⴰⵔⵔⵉ ⵏⵙⴻⵏ ⴷⵉ ⵜⴻⵎⵎⵓⵔⵜ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵙⵙⴳⴻⵄⵄⴷⴻⴷ ⵖⴰⵔ ⵉⵙⴻⵢⵏⵓⵜⴻⵏ ⵜⵎⵉⵊⵊⴰ ⵏⵏⴻⵛ, ⴰⵍⴰⵎⵉ ⵛⴻⴽ ⵉ ⵖⴰ ⵜⴷⴻⵍ ⵉⵛⵜ ⵏ ⵍⵃⴻⵎⵍⴻⵜ ⵏ ⵡⴰⵎⴰⵏ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜⴻⵙⵙⴻⴽⴽⴻⴷ ⴰⵙⵙⴰⵎⴻⵏ ⵎⴰⵃⴻⵏⴷ ⴰⴷ ⵇⴻⴵⵇⴻⵏ, ⴰⴷ ⴰⵛ ⵉⵏⵉⵏ: ‘ⴰⵇⴰ-ⵏⴻⵖ ⴷⴰ’? 
ⵎⴰⵏ ⵡⴻⵏ ⵉⵙⵙⴰⵔⵙⴻⵏ ⵜⵉⵖⵉⵜ ⴷⵉ ⴷⴰⵅⴻⵍ ⵏ ⴱⵏⴰⴷⴻⵎ? ⵏⵉⵖ ⵎⴰⵏ ⵡⴻⵏ ⵉⵡⵛⵉⵏ ⵍⴻⴼⵀⴰⵎⴻⵜ ⵉ ⵍⴻⵄⵇⴻⵍ? 
ⵎⴰⵏ ⵡⴻⵏ ⵉⴼⴰⵔⵔⵣⴻⵏ ⵉⵙⴻⵢⵏⵓⵜⴻⵏ ⵙ ⵍⴻⵄⵇⴻⵍ, ⵉⵖⴰⵔⵔⴰⴼⴻⵏ ⵏ ⵡⴰⵎⴰⵏ ⵏ ⵓⵊⴻⵏⵏⴰ ⵡⵉ ⵜⴻⵏ ⵉⵜⵜⵣⴻⴵⴰⵄⴻⵏ, 
ⴰⵍⴰⵎⵉ ⵉⵜⵜⵡⴰⴼⵙⵉⵢ ⵓⵛⴰⵍ, ⵉⴷⵡⴻⵍ ⴷ ⴰⴱⴻⴵⴰⵄ, ⵓⵛⴰ ⵍⴻⵙⵇⴻⵏ ⵉⴱⵓⵔⵙⴰ ⵏ ⵜⴻⵎⵎⵓⵔⵜ? 
ⵎⴰ ⵜⵣⴻⵎⵎⴰⵔⴻⴷ ⴰⴷ ⵜᵉⵟⵟⴼⴻⴷ ⵣⵣⴰⵔⴷⴻⵜ ⵉ ⵜⴰⵢⵔⴰⴷⵜ, ⵏⵉⵖ ⴰⴷ ⵜⴻⵙⵙⴻⵍⵀⵓⴷ ⵍⴰⵥ ⵏ ⵡⴰⵢⵔⴰⴷⴻⵏ ⵉⵎⴻⵥⵢⴰⵏⴻⵏ, 
ⵍⴰⵎⵉ ⵏⵓⴼⴼⴰⵔⴻⵏ ⴷⴻⴳ ⵉⴼⵔⴰⵏ ⵏⵙⴻⵏ, ⵓ ⵜⵜⵃⴰⵎⴰⵏ ⵣⵉ ⵍⴻⵎⵔⴰⴳⴻⵃ ⵏⵙⴻⵏ? 
ⵎⴰⵏ ⵡⴻⵏ ⵉⵙⵙⴻⵡⵊⴰⴷⴻⵏ ⵉ ⵓⴱⴰⵖⴻⵍ ⵎⴰⵛⵛⴰ ⵏⵏⴻⵙ, ⵅⵎⵉ ⵙⵖⵓⵢⵢⵓⵏ ⵉⵎⴻⵥⵢⴰⵏⴻⵏ ⵏⵏⴻⵙ ⵖⴰⵔ ⴰⵔⴻⴱⴱⵉ, ⵅⵎⵉ ⵜⵜⴻⵎⵀⴰⴼⴰⵏ ⵏⵀⵍⴰ ⵎⴰⵛⵛⴰ? 
