﻿ⴰⵢⵓⴱ.
34.
ⵉⵟⵟⴻⴼ ⵉⵍⵉⵀⵓ ⵄⴰⵡⴻⴷ ⴷⴻⴳ ⵡⴰⵡⴰⵍ, ⵉⵏⵏⴰ: 
ⵙⵍⴻⵎ-ⴷⴷ ⵖⴰⵔ ⵡⴰⵡⴰⵍⴻⵏ ⵉⵏⵓ, ⴰ ⵉⵎⵉⵖⵉⵙⴻⵏ, ⵡⵛⴻⵎ ⴰⵢⵉ ⴰⵎⴻⵣⵣⵓⵖ, ⴰ ⴽⴻⵏⵏⵉⵡ, ⴰⵢⵜ ⵏ ⵜⵓⵙⵙⵏⴰ. 
ⵎⴰⵖⴰⵔ ⴰⵎⴻⵣⵣⵓⵖ ⵉⵏⴻⴱⴱⴻⵛ ⴷⴻⴳ ⵡⴰⵡⴰⵍⴻⵏ, ⴰⵎ ⵎⴰⵎⵎⴻⵛ ⵉⵜⵜⵇⴰⵙⴰ ⵡⴰⵏⴻⵖ ⵎⴰⵛⵛⴰ. 
ⵊⵊⴻⵎ ⴰⵏⴻⵖ ⴰⴷ ⵏⵉⵅⴹⴰⵔ ⵊⴰⵔ ⴰⵏⴻⵖ ⵎⵉⵏ ⵉⴵⴰⵏ ⵏⵉⵛⴰⵏ, ⵊⵊⴻⵎ ⴰⵏⴻⵖ ⴰⴷ ⵏⴻⵙⵙⴻⵏ ⵊⴰⵔ ⴰⵏⴻⵖ ⵎⵉⵏ ⵉⴵⴰⵏ ⴷ ⴰⵚⴻⴱⵃⴰⵏ. 
ⵎⴰⵖⴰⵔ ⴰⵢⵓⴱ ⵉⵏⵏⴰ: ‘ⵏⴻⵛⵛ ⴷ ⴰⵎⵙⴻⴳⴳⴻⴷ, ⴰⵔⴻⴱⴱⵉ ⵉⴽⴽⴻⵙ ⴰⵢⵉ ⵜⴰⵙⵖⴰⵔⵜ ⵉⵏⵓ! 
ⵡⴰⵅⵅⴰ ⵖⴰⵔⵉ ⵍⵃⴻⵇⵇ, ⵄⴰⴷ ⵜⵜⵖⵉⵎⴻⵖ ⵜⵜⴱⴰⵏⴻⵖ ⴰⵎ ⵢⵉⵊⵊ ⵏ ⴱⵓ-ⵉⵅⴰⵔⵔⵉⵇⴻⵏ! ⴰⵢⴻⵣⵣⵉⵎ ⵏ ⴼⵍⵉⵜⵛⴰ ⵉ ⴷⴰⵢⵉ ⵉⴵⴰ, ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵙⵙⴳⴻⵏⴼⴰ ⴰⵎ ⵡⴰⵔ ⴷⵉⵏ ⵉⴵⵉ ⵓⵄⴻⴷⴷⵉ.’ 
ⵎⴰⵏ ⵡⴻⵏ ⵉⴵⴰⵏ ⴷ ⴰⵔⵢⴰⵣ ⴰⵎ ⴰⵢⵓⴱ, ⵡⴻⵏⵏⵉ ⵉⵙⴻⵙⵙⴻⵏ ⴰⵙⵜⴻⵀⵣⵉ ⴰⵎ ⵡⴰⵎⴰⵏ? 
ⵏⴻⵜⵜⴰ ⵉⴳⴳⵓⵔ ⴷⴻⴳ ⵡⴻⴱⵔⵉⴷ ⴰⵎ ⵉⵜⵜⵄⴰⵛⴰⵔ ⵉⵏⵏⵉ ⵉⵜⵜⴻⴳⴳⴻⵏ ⵍⵎⵓⵄⵚⵉⵢⵢⴻⵜ, ⵉⴳⴳⵓⵔ ⴰⴽ-ⴷ ⵉⵔⵢⴰⵣⴻⵏ ⵉⵄⴻⴼⴼⴰⵏⴻⵏ. 
ⵎⴰⵖⴰⵔ ⵉⵏⵏⴰ: ‘ⵡⴰⵔ ⵉⵏⴻⴼⴼⴻⵄ ⵡⴰⵍⵓ ⵉ ⴱⵏⴰⴷⴻⵎ, ⵎⴰⵍⴰ ⵏⴻⵜⵜⴰ ⴷ ⴰⵎⴰⵔⴹⵉ ⵖⴰⵔ ⴰⵔⴻⴱⴱⵉ.’ 
ⵙ ⵓⵢⴰ ⵙⵍⴻⵎ-ⴷⴷ ⵖⴰⵔⵉ, ⴽⴻⵏⵏⵉⵡ ⵉⵔⵢⴰⵣⴻⵏ ⵉ ⴷⵉ ⵜⴻⴵⴰ ⵍⴻⴼⵀⴰⵎⴻⵜ: ‘ⵉⴳⴳⵯⴻⵊ ⵅ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵢⴻⴳⴳ ⵜⵓⵄⴻⴼⴼⵏⴰ, ⵓⵍⴰ ⵅ ⵓⵎⵣⴻⵎⵎⴰⵔ ⵅ ⴽⵓⵍⵛⵉ ⵎⴰⵃⴻⵏⴷ ⴰⴷ ⵢⴻⴳⴳ ⵎⵉⵏ ⵉⴼⴰⵔⵖⴻⵏ.’ 
ⵎⴰⵖⴰⵔ ⵏⴻⵜⵜⴰ ⵉⵅⵍⴻⴼ ⵣⵉ ⴱⵏⴰⴷⴻⵎ ⵄⵍⴰⵃⵙⴰⴱ ⵜⵉⵎⴻⴳⴳⴰ ⵏⵏⴻⵙ, ⵓ ⴰⵎ ⵎⴰⵎⵎⴻⵛ ⵉⴵⴰ ⵡⴻⴱⵔⵉⴷ ⵏ ⵡⴻⵔⵢⴰⵣ, ⴰⵎⵎⵓ ⵉ ⴷ ⴰⵙ ⵖⴰ ⵢⴰⵔⵔ ⴰⴷ ⵜ ⵢⴰⴼ. 
ⵙ ⵜⵉⴷⴻⵜⵜ, ⵄⴻⵎⵎⴰⵔⵚ ⵡⴰⵔ ⵉⵜⵜⴻⴳⴳ ⴰⵔⴻⴱⴱⵉ ⵜⵓⵄⴻⴼⴼⵏⴰ, ⴰⵎⵣⴻⵎⵎⴰⵔ ⵅ ⴽⵓⵍⵛⵉ ⵡⴰⵔ ⵉⵙⵙⴼⴰⵔⵔⵉⵖ ⵛⵛⵔⴻⵄ. 
ⵎⴰⵏ ⵡⴻⵏ ⵜ ⵉⵡⴻⴽⴽⵍⴻⵏ ⵅ ⵜⴻⵎⵎⵓⵔⵜ, ⵎⴰⵏ ⵡⴻⵏ ⵉⵙⵙⴰⵔⵙⴻⵏ ⵎⴰⵔⵔⴰ ⴷⴷⵓⵏⴻⵛⵜ? 
ⵎⴰⵍⴰ ⵏⴻⵜⵜⴰ ⴰⴷ ⵅⴰⵙ ⵉⵙⵙⵏⴻⵇⵍⴻⴱ ⵓⵍ ⵏⵏⴻⵙ, ⵎⴰⵍⴰ ⴰⴷ ⵖⴰⵔⴻⵙ ⴷⴷ-ⵢⴰⵡⵉ ⵄⴰⵡⴻⴷ ⴱⵓⵃⴱⴻⵍ ⵏⵏⴻⵙ ⴷ ⵏⵏⴻⴼⵙ ⵏⵏⴻⵙ, 
ⵎⴰⵔⵔⴰ ⴱⵏⴰⴷⴻⵎ ⴷ ⵍⵎⴰⵍ ⴰⴷ ⵙⵙⵓⴼⴼⵖⴻⵏ ⴱⵓⵃⴱⴻⵍ ⵓ ⴱⵏⴰⴷⴻⵎ ⴰⴷ ⵉⵄⵇⴻⴱ ⵖⴰⵔ ⵓⵛⴰⵍ. 
ⵎⴰⵍⴰ ⴷⴰⵢⴻⴽ ⵍⴻⴼⵀⴰⵎⴻⵜ, ⵙⴻⵍ ⵅⴻⵏⵏⵉ ⵉ ⵎⴰⵏ ⴰⵢⴰ, ⴻⵡⵛ ⴰⵎⴻⵣⵣⵓⵖ ⵏⵏⴻⵛ ⵉ ⵍⵃⴻⵙⵙ ⵏ ⵡⴰⵡⴰⵍⴻⵏ ⵉⵏⵓ. 
ⵎⴰ ⵉⵣⴻⵎⵎⴰⵔ ⵡⴻⵏⵏⵉ ⵉⵛⴰⵔⵔⵀⴻⵏ ⵍⵃⴻⵇⵇ ⴰⴷ ⵉⵃⴽⴻⵎ, ⵏⵉⵖ ⵜⴻⵅⵙⴻⴷ ⵛⴻⴽ ⴰⴷ ⵜⴻⴷⵄⵉⴷ ⵅ ⵡⴻⵏⵏⵉ ⵉⴵⴰⵏ ⴷ ⴰⵎⵙⴻⴳⴳⴻⴷ ⴷ ⴰⵎⴻⵇⵇⵔⴰⵏ? 
ⵎⴰ ⴰⴷ ⵉⵏⵉⵏ ⵉ ⵓⵊⴻⴵⵉⴷ: ‘ⵛⴻⴽ ⵡⴰⵔ ⵜⵙⴻⴽⴽⵯⵉⴷ ⵡⴰⵍⵓ!’ ⵓ ⵉ ⵜⴰⵔⵡⴰ ⵏ ⵜⴰⵚⵉⵍⴻⵜ: ‘ⴽⴻⵏⵏⵉⵡ ⴷ ⵉⵄⴻⴼⴼⴰⵏⴻⵏ’? 
ⵎⴰⵎⵎⴻⵛ ⵅⴻⵏⵏⵉ ⵉ ⵡⴻⵏⵏⵉ ⵡⴰⵔ ⵉⵙⵙⵉⵣⵡⵉⵍⵉⵏ ⵍⵃⵓⴽⴽⴰⵎ ⵓ ⵡⴰⵔ ⵉⵜⵜⵔⵉⵃ ⴰⴽ-ⴷ ⴱⵓ-ⵡⴰⴳⵍⴰ ⵅ ⵓⵎⴻⵣⵍⵓⴹ, ⵎⴰⵖⴰⵔ ⵎⴰⵔⵔⴰ ⵏⵉⵜⵏⵉ ⴷ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵙ. 
ⵎⵎⵓⵜⴻⵏ ⴷⴻⴳ ⵡⴻⵔⵎⴰⵛ ⵏ ⵡⴰⴱⵍⵉⵡⴻⵏ, ⴷⴻⴳ ⵡⴻⵣⵢⴻⵏ ⵏ ⴵⵉⵍⴻⵜ. ⵜⵜⵡⴰⵏⵀⴻⵣⵣⴻⵏ ⵏⵉⵜⵏⵉ, ⵍⴳⴻⵏⵙ ⵏⵏⵉ, ⵓⵛⴰ ⵀⴻⵍⵍⴽⴻⵏ. ⵡⴻⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⵉⵜⵜⵡⴰⵄⴰⵔⵔⴻⵏ ⵖⴰⵔ ⵓⵖⴻⵣⴷⵉⵙ, ⴱⵍⴰ ⵎⴰ ⵉⵃⴰⴷⴰ ⵉ-ⵜ ⵓⴼⵓⵙ ⵏ ⴱⵏⴰⴷⴻⵎ. 
ⵎⴰⵖⴰⵔ ⵜⵉⵟⵟⴰⵡⵉⵏ ⵏⵏⴻⵙ ⵅⴻⵣⵣⴰⵔⴻⵏⵜ ⵖⴰⵔ ⵉⴱⵔⵉⴷⴻⵏ ⵏ ⵎⴽⵓⵍ ⵉⵊⵊ, ⵏⴻⵜⵜⴰ ⵉⵜⵜⵡⴰⵍⴰ ⵎⵍⵉⵃ ⵎⴰⵔⵔⴰ ⵉⵚⵓⵔⴰⴼ ⵏⵙⴻⵏ. 
ⵡⴰⵔ ⵜⴻⴵⵉ ⵜⵓⴱⴱⴰⵔⵛⴻⵏⵜ ⵓ ⵡⴰⵔ ⵜⴻⴵⵉ ⵜⵉⵍⵉ ⵏ ⵍⵎⴻⵡⵜ, ⵎⴰⵏⵉ ⵣⴻⵎⵎⴰⵔⴻⵏ ⴰⴷ ⵏⵏⵓⴼⴼⴰⵔⴻⵏ ⵉⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ. 
ⵡⴰⵔ ⴷ ⴰⵙ ⵉⵜⵜⵅⴻⵚⵚⵉ ⴰⴷ ⵉⵅⵣⴰⵔ ⴷⵉ ⴱⵏⴰⴷⴻⵎ ⴰⵟⵟⴰⵙ ⵏ ⵍⵡⴻⵇⵜ, ⵇⴱⴻⵍ ⵉ ⴷⴷ ⵖⴰ ⵢⴰⴷⴻⴼ ⵖⴰⵔ ⴷⴷⴻⵄⵡⴻⵜ ⵣⵣⴰⵜ ⵉ ⵓⵖⴻⵎⴱⵓⴱ ⵏ ⴰⵔⴻⴱⴱⵉ. 
ⵉⵍⴻⴱⴱⴻⵣ ⵊⵊⵡⴰⵃⴻⵍ ⴱⵍⴰ ⴰⵙⴻⵇⵙⵉ ⵓⵛⴰ ⵉⴳⴳⴰ ⵉⵏⵏⴻⵖⵏⵉ ⴷⴻⴳ ⵡⴻⵎⵛⴰⵏ ⵏⵙⴻⵏ. 
ⵎⴰⵖⴰⵔ ⵏⴻⵜⵜⴰ ⵉⵙⵙⴻⵏ ⵜⵉⵎⴻⴳⴳⴰ ⵏⵙⴻⵏ, ⵉⵙⵙⵏⴻⵇⵍⴰⴱ ⵉ-ⵜⴻⵏ ⴷⵉ ⴵⵉⵍⴻⵜ ⵓⵛⴰ ⵜⵜⵡⴰⵍⴻⴱⵣⴻⵏ. 
ⵉⵛⵛⴰⵜ ⵉ-ⵜⴻⵏ ⵊⴰⵔ ⵉⵄⴻⴼⴼⴰⵏⴻⵏ, ⴷⴻⴳ ⵉⵊⵊ ⵡⴻⵎⵛⴰⵏ ⵎⴰⵏⵉ ⵜⵜⴱⴻⴷⴷⴰⵏ ⵉⵡⴷⴰⵏ ⵜⵜⵡⴰⵍⴰⵏ, 
ⵎⵉⵏⵣⵉ ⵏⵉⵜⵏⵉ ⵃⴻⵢⵢⴷⴻⵏ ⵅⴰⵙ, ⵡⴰⵔ ⵜⵜⵃⴻⴽⴽⵉⵔⴻⵏ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ, 
ⵎⴰⵃⴻⵏⴷ ⴰⴷ ⵅⴰⵙ ⵉⵙⵙⵉⵡⴻⴹ ⵜⵖⵓⵢⵢⵉⵜ ⵏ ⵉⵎⴻⵣⵍⴰⴹ, ⵓ ⵎⴰⵃⴻⵏⴷ ⴰⴷ ⵉⵙⵜⴰⵊⴻⴱ ⵉ ⵉⵖⵓⵢⵢⴰⵏ ⵏ ⵍⵎⵓⵙⴰⴽⵉⵏ. 
ⵎⴰⵍⴰ ⵏⴻⵜⵜⴰ ⵢⵉⵡⵉ-ⴷⴷ ⵍⵀⵓⴷⵏⴻⵜ, ⵎⴰⵏ ⵡⴻⵏ ⴷⴰⵢⴻⵙ ⵉ ⵖⴰ ⵉⴳⴳⵉⵏ ⵍⵄⵉⴱ? ⵎⴰⵍⴰ ⵉⵙⵙⵏⵓⴼⴼⴰⵔ ⴰⵖⴻⵎⴱⵓⴱ ⵏⵏⴻⵙ, ⵡⵉ ⵜ ⵖⴰ ⵉⵥⴰⵔⴻⵏ? ⵉⵃⴻⴽⴽⴻⵎ ⵍⴰ ⵅ ⵍⴳⴻⵏⵙ ⴰⵎ ⵅ ⴱⵏⴰⴷⴻⵎ, 
ⵃⵉⵎⴰ ⵡⴰⵔ ⵉⵃⴻⴽⴽⴻⵎ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵉ ⵉⵜⵜⴻⴳⴳⴻⵏ ⵙ ⵜⵏⴰⵢⴻⵏ ⵏ ⵡⵓⴷⵎⴰⵡⴻⵏ, ⵓ ⵃⵉⵎⴰ ⵡⴰⵔ ⵜⵜⵉⵍⵉⵏⵜ ⵄⴰⴷ ⵜⵅⴻⵛⵉⴼⵉⵏ ⵉ ⵍⴳⴻⵏⵙ. 
ⵎⵍⵉ ⵉⵏⵏⴰ ⴱⵏⴰⴷⴻⵎ ⵏⵏⵉ ⵉ ⴰⵔⴻⴱⴱⵉ ‘ⵙⵙⴳⴻⵄⵄⴷⴻⵖ ⵉⵅⴻⴼ ⵉⵏⵓ, ⵡⴰⵔ ⵜⵜⵄⵉⵡⵉⴷⴻⵖ ⴰⴷ ⴳⴳⴻⵖ ⵍⵖⴰⵔ. 
ⵎⵉⵏ ⵡⴰⵔ ⵜⵜⵡⵉⵍⵉⵖ, ⵙⵖⴰⵔ ⴰⵢⵉ ⵜ ⵛⴻⴽ! ⵎⴰⵍⴰ ⴳⴳⵉⵖ ⵎⵉⵏ ⵡⴰⵔ ⵉⵙⴻⴳⴳⴷⴻⵏ, ⵡⴰⵔ ⵜ ⵜⵜⴻⴳⴳⴻⵖ ⵄⴰⴷ.’ 
ⵎⴰ ⵉⵜⵜⵅⴻⵚⵚⴰ ⴰⴷ ⵉⵅⵍⴻⴼ ⵏⴻⵜⵜⴰ ⴰⵎ ⵎⴰⵎⵎⴻⵛ ⵜ ⵜⴻⵅⵙⴻⴷ ⵛⴻⴽ? ⴰⵇⴰ ⵜⴻⵙⵙⴻⵃⵇⴰⵔⴻⴷ ⵜ! ⴰⵇⴰ ⵜⴻⵅⵙⴻⴷ ⴰⴷ ⵜⵉⵅⴹⴰⵔⴻⴷ ⵙ ⵢⵉⵅⴻⴼ ⵏⵏⴻⵛ, ⵏⴻⵛⵛ ⵎⴰⵛⴰ ⵍⵍⴰ! ⵎⴰⵍⴰ ⵉⵜⵜⵖⵉⵍ ⴰⵛ ⴰⵇⴰ ⵜⴻⵙⵙⵏⴻⴷ ⵜⵜ, ⵉⵏⵉ ⵜⵜ! 
ⵉⵔⵢⴰⵣⴻⵏ ⵙ ⵍⴻⴼⵀⴰⵎⴻⵜ ⴰⴷ ⴰⵢⵉ ⵉⵏⵉⵏ, ⴰⵎ ⵇⴰⵄ ⴰⵔⵢⴰⵣ ⴰⵎⵉⵖⵉⵙ ⵉⵜⵜⴻⵙⵍⴰ-ⴷⴷ ⵖⴰⵔⵉ, 
ⴰⵇⴰ ⴰⵢⵓⴱ ⵡⴰⵔ ⵉⵙⵙⵉⵡⴻⵍ ⵙ ⵜⵓⵙⵙⵏⴰ, ⴰⵇⴰ ⴰⵡⴰⵍⴻⵏ ⵏⵏⴻⵙ ⴱⵍⴰ ⵍⴻⴼⵀⴰⵎⴻⵜ ⵉ ⵢⴻⴵⴰⵏ. 
ⵉⵡⴰ, ⴻⵊⵊ ⴰⵢⵓⴱ ⴰⴷ ⵉⵜⵜⵡⴰⵇⴻⴵⴻⴱ ⴰⵍ ⴰⵏⴻⴳⴳⴰⵔ, ⵎⵉⵏⵣⵉ ⵉⵜⵜⴰⵔⵔⴰ-ⴷⴷ ⴰⵎ ⵉⵔⵢⴰⵣⴻⵏ ⵛⵛⵓⵔⴻⵏ ⵙ ⵍⵎⵓⵄⵚⵉⵢⵢⴻⵜ. 
ⵎⴰⵖⴰⵔ ⵉ ⴷⴷⴻⵏⴱ ⵏⵏⴻⵙ ⵢⴰⵔⴻⵏⵏⵉ ⵄⴰⴷ ⴰⵄⴻⴷⴷⵉ, ⵊⴰⵔ ⴰⵏⴻⵖ ⵉⵛⵛⴰⵜ ⵛⴰⵎⵅⴰ ⵙ ⵉⴼⴰⵙⵙⴻⵏ ⵓ ⵜⵜⵎⴰⵔⴻⵏⵢⴻⵏ ⵡⴰⵡⴰⵍⴻⵏ ⵏⵏⴻⵙ ⴹⵉⴷⴷ ⵉ ⴰⵔⴻⴱⴱⵉ. 
