﻿ⴰⵢⵓⴱ.
29.
ⵓⵛⴰ ⵢⴰⵔⵏⵉ ⵉⵙⵙⴳⴻⵄⵄⴻⴷ ⴰⵢⵓⴱ ⵍⵀⴰⵔⴷ ⵏ ⵍⵎⴰⵜⴰⵍ ⵏⵏⴻⵙ, ⵉⵏⵏⴰ: 
ⵎⵍⵉ ⴵⵉⵖ ⴰⵎ ⴷⴻⴳ ⵓⵢⴻⵏⵏⵉ ⵏ ⵉⵢⵓⵔⴻⵏ ⵉⵄⴷⵓⵏ ⴰⵟⵟⴰⵙ ⵣⴻⴳ ⵡⴰⵎⵉ, ⴰⵎ ⴷⴻⴳ ⵓⵢⴻⵏⵏⵉ ⵏ ⵡⵓⵙⵙⴰⵏ ⵍⴰⵎⵉ ⴷ ⴰⵢⵉ ⵜⵓⵖⴰ ⵉⵃⴻⵟⵟⴰ ⴰⵔⴻⴱⴱⵉ, 
ⵍⴰⵎⵉ ⵉⴳⴳⴰ ⵍⴻⴼⵏⴰⵔ ⵏⵏⴻⵙ ⴰⴷ ⵢⴰⵔⴻⵖ ⵅ ⵓⵣⴻⴵⵉⴼ ⵉⵏⵓ, ⵓ ⵜⵓⵖⴰ ⴳⴳⵓⵔⴻⵖ ⴷⵉ ⵜⴰⴵⴻⵙⵜ ⵙ ⵜⴼⴰⵡⵜ ⵏⵏⴻⵙ. 
ⵎⵍⵉ ⴵⵉⵖ ⴰⵎ ⴷⴻⴳ ⵡⵓⵙⵙⴰⵏ ⵏ ⵜⴻⵎⵥⵉ ⵉⵏⵓ, ⵓⵎⵉ ⴰⵎⵓⵏⵉ ⴷⵉ ⵍⴰⵎⴰⵏ ⴰⴽ-ⴷ ⴰⵔⴻⴱⴱⵉ ⵜⵓⵖⴰ ⵉⴱⴻⴷⴷ ⵅ ⵜⵇⵉⴹⵓⵏⵜ ⵉⵏⵓ, 
ⵓⵎⵉ ⴰⵎⵣⴻⵎⵎⴰⵔ ⵅ ⴽⵓⵍⵛⵉ ⵜⵓⵖⴰ-ⵜ ⵄⴰⴷ ⴰⴽⵉⴷⵉ, ⵓ ⵉⵃⴻⵏⵊⵉⵔⴻⵏ ⵉⵏⵓ ⵄⴰⴷ ⵏⵏⴹⴻⵏ ⴰⵢⵉ-ⴷⴷ, 
ⵓⵎⵉ ⵉⵚⵓⵔⴰⴼ ⵉⵏⵓ ⵜⵓⵖⴰ ⵄⵓⵎⵎⴻⵏ ⴷⵉ ⵜⵔⵓⵙⵙⵉ, ⵓ ⵜⴰⵚⴹⴰⵔⵜ ⵜⵓⵖⴰ ⵜᵉⵜⵜⵣⴻⴵⴰⵄ ⵣⵣⴰⵜⵉ ⵜⵉⵖⴻⵣⵔⴰⵜⵉⵏ ⵏ ⵣⵣⴻⵛⵜ! 
ⵓⵎⵉ ⴷⴷ-ⴼⴼⵖⴻⵖ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ, ⵊⵊⵉⵖ ⵙⵙⴱⴻⴷⴷⴻⵏ ⴰⵢⵉ ⵍⴽⵓⵔⵙⵉ ⵉⵏⵓ ⴷⴻⴳ ⵡⴰⵣⵣⴰⵢ, 
ⵏⵏⵓⴼⴰⵔⴻⵏ ⵉⵃⵓⴷⵔⵉⵢⵢⴻⵏ ⵍⴰⵎⵉ ⴷ ⴰⵢⵉ ⵥⵔⵉⵏ, ⵓ ⵉⵎⴻⵛⵛⴰⵢⴱⵓⵜⴻⵏ ⴽⴽⴰⵔⴻⵏ, ⵇⵇⵉⵎⴻⵏ ⴱⴻⴷⴷⴻⵏ. 
ⵍⵃⵓⴽⴽⴰⵎ ⵎⴻⵏⵄⴻⵏ ⴰⵡⴰⵍⴻⵏ ⵏⵙⴻⵏ ⵓ ⵙⵙⴰⵔⵙⴻⵏ ⴰⴼⵓⵙ ⵅ ⵓⵇⴻⵎⵎⵓⵎ ⵏⵙⴻⵏ. 
ⵜⵎⵉⵊⵊⴰ ⵏ ⵍⵃⵓⴽⴽⴰⵎ ⵜⴻⵙⵇⴰⵔ, ⵉⵍⵙⴻⵇ ⵉⵍⴻⵙ ⵏⵙⴻⵏ ⵖⴰⵔ ⵡⴰⵏⴻⵖ ⵏⵙⴻⵏ. 
ⵎⴰⵍⴰ ⵉⵙⵍⴰ ⴰⵢⵉ ⵓⵎⴻⵣⵣⵓⵖ, ⵉⵙⵙⴻⵎⵖⴰⵔ ⴰⵢⵉ, ⵎⴰⵍⴰ ⵜⴻⵥⵔⴰ ⴰⵢⵉ ⵜⵉⵟⵟ, ⵜⴻⵛⵀⴻⴷ ⵅ ⵍⵅⴰⴹⴰⵔ ⵉⵏⵓ. 
ⵎⴰⵖⴰⵔ ⵙⵙⵏⴻⵊⵎⴻⵖ ⵍⵎⴻⵙⴽⵉⵏ ⵏⵏⵉ ⵉⵙⵖⵓⵢⴻⵏ, ⴰⵢⵓⵊⵉⵍ ⵏⵏⵉ ⵡⴰⵔ ⵖⴰⵔⴻⵙ ⵜⵓⵖⵉ ⵡⴻⵏⵏⵉ ⵜ ⵉ ⵖⴰ ⵉⵄⴰⵡⵏⴻⵏ. 
ⵍⵅⴰⴹⴰⵔ ⵏ ⵡⴻⵏⵏⵉ ⵜⵓⵖⴰ ⵄⵍⴰⵢⴻⵏ ⴰⴷ ⵉⵀⴻⵍⵍⴻⴽ, ⵜⵓⵙⴰ-ⴷⴷ ⵅⴰⴼⵉ, ⵓⵍ ⵏ ⵜⴰⵊⵊⴰⵍⵜ ⴳⴳⵉⵖ ⵜ ⵉⵙⵍⵉⵡⵍⴻⵡ ⵙ ⵍⴻⴼⵔⴰⵃⴻⵜ. 
ⵢⴰⵔⴹⴻⵖ ⵜⴰⵙⴻⴳⴷⴰ ⵓ ⵜⴰⵙⴻⴳⴷⴰ ⵜⴻⵙⵙⵢⴰⵔⴹ ⴰⵢⵉ. ⵜⵓⵖⴰ ⵛⵛⵔⴻⵄ ⵉⵏⵓ ⴰⵎ ⵓⵙⴻⵍⵀⴰⵎ ⵓ ⴰⵎ ⴰⵔⴻⵥⵥⴻⵜ. 
ⵜⵓⵖⴰ ⴰⵢⵉ ⴷ ⵜⵉⵟⵟⴰⵡⵉⵏ ⵉ ⵉⴷⴰⵔⵖⴰⵍⴻⵏ, ⵓⵍⴰ ⴷ ⵉⴹⴰⵔⴻⵏ ⵉ ⵉⵇⵉⴹⴰⵔⴻⵏ. 
ⵜⵓⵖⴰ ⴰⵢⵉ ⴷ ⴱⴰⴱⴰⵜⵙⴻⵏ ⵉ ⵉⵎⴻⵣⵍⴰⴹ, ⵓⵛⴰ ⴷⴷⴻⵄⵡⴻⵜ ⵏ ⵡⴻⵏⵏⵉ ⵡⴰⵔ ⵙⵙⵉⵏⴻⵖ, ⴱⴻⵇⵇⵛⴻⵖ ⵜⵜ. 
ⴰⵔⵥⵉⵖ ⵜⵉⵖⵎⴰⵙ ⵏ ⵜⴻⵖⵎⴰⵔⵜ ⵏ ⵡⴻⵏⵏⵉ ⵉⴳⴳⵉⵏ ⵎⵉⵏ ⵡⴰⵔ ⵉⵙⴻⴳⴳⴷⴻⵏ ⵓⵛⴰ ⴽⴽⵙⴻⵖ ⵣⵣⴰⵔⴷⴻⵜ ⵉ ⵜⴻⵖⵎⴰⵙ ⵏⵏⴻⵙ. 
ⵏⵏⵉⵖ: ‘ⴰⴷ ⵙⵙⵓⴼⴼⵖⴻⵖ ⴱⵓⵃⴱⴻⵍ ⵉⵏⵓ ⵅ ⵍⵄⵓⵛⵛ ⵉⵏⵓ, ⴰⴷ ⴷⴷⴰⵔⴻⵖ ⵜⵓⴷⴰⵔⵜ ⵜⴰⵣⵉⵔⴰⵔⵜ ⴰⵎ ⵓⵊⴹⵉⴷ ⵏ ⴼⵓⵏⵉⴽⵙ.’ 
ⵉⵥⴻⵡⵔⴰⵏ ⵉⵏⵓ ⴱⴻⵣⵣⵄⴻⵖ ⵜⴻⵏ ⴰⵍ ⴰⵎⴰⵏ ⵓ ⴷⵉ ⴵⵉⵍⴻⵜ ⵉⵇⵇⵉⵎ ⵏⵏⴷⴰ ⵅ ⵍⴻⴼⵔⵓⵄ ⵉⵏⵓ. 
ⵜⵓⵖⴰ ⵍⵄⴻⵣⵣ ⵉⵏⵓ ⵉⵇⵇⵉⵎ ⴰⴽⵉⴷⵉ ⵍⴻⴱⴷⴰ, ⵍⵇⴻⵡⵙ ⵉⵏⵓ ⵉⵙⵀⴻⵍ ⴷⴻⴳ ⵓⴼⵓⵙ ⵉⵏⵓ ⵍⴻⴱⴷⴰ. 
ⵙⵍⵉⵏ-ⴷⴷ ⵖⴰⵔⵉ, ⵔⴰⵊⴰⵏ, ⵙⵇⴰⵔⴻⵏ ⴷⵉ ⵟⵟⵡⴻⵄ ⵏ ⵛⵛⵡⴰⵔ ⵉⵏⵓ. 
ⴰⵡⴰⵔⵏⵉ ⵡⴰⵡⴰⵍ ⵉⵏⵓ ⵡⴰⵔ ⵙⵙⵉⵡⵍⴻⵏ ⵜⵡⴰⵍⴰ ⵏⵏⴻⵖⵏⵉ, ⴰⵡⴰⵍⴻⵏ ⵉⵏⵓ ⵓⴷⵓⵎⴻⵏ ⵅⴰⵙⴻⵏ. 
ⵏⵉⵜⵏⵉ ⵔⴰⵊⴰⵏ ⴰⵢⵉ ⴰⵎ ⵔⴰⵊⴰⵏ ⴰⵏⵥⴰⵔ, ⴰⵔⵣⵎⴻⵏ ⴰⵇⴻⵎⵎⵓⵎ ⵏⵙⴻⵏ ⴰⵎ ⵜ ⴰⵔⴻⵣⵎⴻⵏ ⵖⴰⵔ ⵡⴻⵏⵥⴰⵔ ⵏ ⵜⴻⴼⵙⵓⵜ. 
ⵎⴰⵍⴰ ⵙⴼⴰⵔⵏⵉⵏⴻⵖ ⵖⴰⵔⵙⴻⵏ, ⵡⴰⵔ ⵣⴻⵎⵎⴰⵔⴻⵏ ⵄⴰⴷ ⴰⴷ ⵜⵜⵉⵇⵇⴻⵏ, ⵎⴰⵛⴰ ⵜⴰⴼⴰⵡⵜ ⵏ ⵓⵖⴻⵎⴱⵓⴱ ⵉⵏⵓ ⵡⴰⵔ ⵣⵎⵉⵔⴻⵏ ⴰⴷ ⴽⵉⴷⴻⵙ ⵎⵎⵄⴰⵍⴰⵏ. 
ⵉⵅⴹⴰⵔⴻⵖ ⴰⵙⴻⵏ ⴰⴱⵔⵉⴷ, ⴱⴻⴷⴷⴻⵖ ⴰⵙⴻⵏ ⵖⴰⵔ ⵓⵣⴻⴵⵉⴼ, ⵣⴻⴷⵖⴻⵖ ⴰⵎ ⵓⵊⴻⴵⵉⴷ ⵊⴰⵔ ⵍⵄⴻⵙⴽⴰⵔ, ⴰⵎ ⵡⴻⵏⵏⵉ ⵉⵜⵜⵄⴻⵣⵣⴰⵏ ⵉⵏⵏⵉ ⵉⵛⴻⴹⵏⴻⵏ. 
