﻿ⴰⵢⵓⴱ.
24.
ⵎⴰⵢⴻⵎⵎⵉ ⵡⴰⵔ ⵜⵜⵡⴰⵙⵙⵏⵓⴼⴼⴰⵔⴻⵏⵜ ⵍⵎⵉⵊⴰⵍⴰⵜ ⵏ ⵓⵅⴻⴵⴻⵚ ⵙ ⵓⴼⵓⵙ ⵏ ⵡⴻⵏⵏⵉ ⵉⴵⴰⵏ ⴷ ⴰⵎⵣⴻⵎⵎⴰⵔ ⵅ ⴽⵓⵍⵛⵉ, ⵎⴰⵢⴻⵎⵎⵉ ⵡⴰⵔ ⵜⵜⵡⵉⵍⵉⵏ ⵉⵏⵏⵉ ⵜ ⵉⵙⵙⵏⴻⵏ ⵓⵙⵙⴰⵏ ⵏⵏⴻⵙ ⵏ ⵏⵏⴻⵇⵎⴻⵜ? 
ⵏⵉⵜⵏⵉ ⵙⵙⵎⵓⵟⵟⵓⵢⴻⵏ ⵍⴻⵀⴷⵓⴷ, ⵜⵜⴰⵛⴰⵔⴻⵏ ⵜⴰⵃⵉⵎⴰⵔⵜ ⵓⵛⴰ ⴰⵔⴻⴽⴽⵡⵙⴻⵏ ⵜⵜ. 
ⴰⵖⵢⵓⵍ ⵏ ⵉⵢⵓⵊⵉⵍⴻⵏ ⵙⵙⴰⴳⴳⵯⴰⵊⴻⵏ ⵜ, ⵜⵜⵃⴻⵡⵡⵙⴻⵏ ⴰⴼⵓⵏⴰⵙ ⵏ ⵜⴰⵊⵊⴰⵍⵜ. 
ⵏⵉⵜⵏⵉ ⵄⴰⵔⵔⵏⴻⵏ ⵉⵎⴻⵣⵍⴰⴹ ⵣⴻⴳ ⵡⴻⴱⵔⵉⴷ. ⵉⵏⵏⵉ ⵉⵜⵜⵡⴰⵃⵚⴰⵔⴻⵏ ⴷⵉ ⵜⴻⵎⵎⵓⵔⵜ ⵜⵜⵏⵓⴼⴼⴰⵔⴻⵏ ⵊⵎⵉⵄ. 
ⵅⵣⴰⵔ, ⴰⵇⴰ ⴰⵜⴻⵏ ⴰⵎ ⵢⵉⵖⵢⴰⵍ ⵏ ⵍⴻⵅⵍⴰ. ⵜⵜⴻⴼⴼⵖⴻⵏ ⵖⴰⵔ ⵍⵅⴻⴷⵎⴻⵜ ⵏⵙⴻⵏ, ⴰⵔⴻⵣⵣⵓⵏ ⵜⴰⵏⴻⵢⵎⴰⵔⵜ. ⵍⴻⵅⵍⴰ ⵉⵡⵛⴰ ⴰⵙ ⵎⴰⵛⵛⴰ ⵉ ⵉⵃⴻⵏⵊⵉⵔⴻⵏ ⵏⵙⴻⵏ. 
ⴷⴻⴳ ⵉⵢⵢⴰⵔ ⵃⴻⵜⵜⵛⴻⵏ ⵍⴻⵃⵜⵉⵛ ⵏⵏⴻⵙ, ⵍⴻⵇⵇⴹⴻⵏ ⴷⴻⴳ ⵓⵎⴰⵔⵊⴻⵄ ⵏ ⵓⴹⵉⵍ ⵏ ⵉⵄⴻⴼⴼⴰⵏⴻⵏ. 
ⵙⵙⵄⴻⴷⴷⵓⵏ ⴵⵉⵍⴻⵜ ⴷ ⵉⵄⴰⵔⵢⴰⵏⴻⵏ, ⵏⵀⵍⴰ ⴰⵔⵔⵓⴹ, ⵡⴰⵔ ⵖⴰⵔⵙⴻⵏ ⴱⵓ ⴷⴷⵓⵔⵉ ⴷⵉ ⵜⴻⵚⵎⴻⴹ. 
ⵣⴻⴳ ⵡⴻⵏⵥⴰⵔ ⵉⵛⵛⴰⵜⴻⵏ ⵣⴻⴳ ⵉⴷⵓⵔⴰⵔ ⵜⵜⵓⴼⴼⴻⵏ, ⵜⵜⵛⴻⴱⴱⴰⵔⴻⵏ ⴷⵉ ⵊⵊⴰⵔⴼ ⵎⴰⵖⴰⵔ ⵡⴰⵔ ⵖⴰⵔⵙⴻⵏ ⴰⴷⵓⵔⵔⵉ. 
ⵣⴻⴳ ⵉⴼⴼⴰⵏ ⵏ ⵢⴻⵎⵎⴰⵜⵙⴻⵏ ⵜⵜⴻⴽⴽⵙⴻⵏ ⴰⵢⵓⵊⵉⵍ, ⵓⵛⴰ ⵜⵜᵉⵟⵟⴼⴻⵏ ⴰⴹⵎⴰⵏ ⵣⴻⴳ ⵓⵎⴻⵣⵍⵓⴹ. 
ⴳⴳⵓⵔⴻⵏ ⴷ ⵉⵄⴰⵔⵢⴰⵏⴻⵏ, ⵏⵀⵍⴰ ⴰⵔⵔⵓⴹ, ⴰⵎ ⴵⵓⵥⴻⵏ ⴰⵔⴻⴱⴱⵓⵏ ⵉⵛⵓⵡⵡⴰⴼⴻⵏ ⵏ ⵉⵎⴻⵏⴷⵉ. 
ⵊⴰⵔ ⵍⴻⵃⵢⵓⴹ ⵜⵜⵄⴻⵙⵙⴰⵔⴻⵏ ⵣⵣⴻⵛⵜ, ⵄⴻⴼⴼⵙⴻⵏ ⵅ ⵜⵙⵉⵔⵜ ⵏ ⵓⴹⵉⵔ, ⵎⴰⵛⴰ ⵜⵜⵖⵉⵎⴰⵏ ⴼⴼⵓⴷⴻⵏ. 
ⵣⵉ ⵜⴻⵏⴷⵉⵏⵜ ⵉⵜⵜⴻⴼⴼⴻⵖ-ⴷⴷ ⵍⵃⴻⵙⵙ ⵏ ⵓⵙⴻⵖⵏⴻⴼ ⵏ ⵢⴻⵔⵢⴰⵣⴻⵏ, ⵍⴻⵄⵎⴰⵔ ⵏ ⵢⵉⵏⵏⵉ ⵉⵙⵙⵓⴼⴼⵖⴻⵏ ⴱⵓⵃⴱⴻⵍ ⵉⵙⵖⵓⵢⵢⵓ ⴷⴻⴳ ⵓⵊⴻⵏⵏⴰ. ⵡⴰⵅⵅⴰ ⴰⵎⴻⵏⵏⵉ ⴰⵔⴻⴱⴱⵉ ⵡⴰⵔ ⵉⵃⴻⵟⵟⵉ ⵎⵉⵏ ⵡⴰⵔ ⵉⵃⵍⵉⵏ. 
ⵉⵏⵏⴻⵖⵏⵉ ⴷ ⵉⵎⵖⴻⵡⵡⵖⴻⵏ ⵅ ⵜⴼⴰⵡⵜ, ⵡⴰⵔ ⵙⵙⵉⵏⴻⵏ ⵉⴱⵔⵉⴷⴻⵏ ⵏⵏⴻⵙ, ⵡⴰⵔ ⵜⵜⵖⵉⵎⵉⵏ ⴷⵉ ⵜⵉⴱⵔⵉⴷⵉⵏ ⵏⵏⴻⵙ. 
ⵇⴱⴻⵍ ⴷⴷ-ⵜⵓⵙⴰ ⵜⴼⴰⵡⵜ, ⵉⵜⵜⴻⴽⴽⴰⵔ ⵓⵇⴻⵜⵜⴰⵍ, ⵉⵏⴻⵇⵇ ⵍⵎⴻⵙⴽⵉⵏ ⴷ ⵓⵎⴻⵣⵍⵓⴹ ⵓ ⴷⵉ ⴵⵉⵍⴻⵜ ⵉⴳⴳⴰ ⴰⵎ ⵓⵅⴻⵡⵡⴰⵏ. 
ⵜⵉⵟⵟ ⵏ ⵓⵣⴻⵏⵏⴰⵢ ⵜⵃⴻⵟⵟⴰ ⵜⴰⴵⴻⵙⵜ. ⵉⵇⵇⴰⵔ: ‘ⵓⵍⴰ ⴷ ⵉⵛⵜ ⵏ ⵜⵉⵟⵟ ⵡⴰⵔ ⴷ ⴰⵢⵉ ⵜⵃⴻⵟⵟⵉ!’ ⵉⵍⴻⵃⵃⴻⴼ ⵉ ⵓⵖⴻⵎⴱⵓⴱ ⵏⵏⴻⵙ. 
ⴷⵉ ⵜⴰⴵⴻⵙⵜ ⵜⵜⴰⴷⴼⴻⵏ ⵖⴰⵔ ⵜⵓⴷⵔⵉⵏ. ⵙ ⵡⴰⵙⵙ ⵜⵜⵏⵓⴼⴼⴰⵔⴻⵏ, ⵡⴰⵔ ⵙⵙⵉⵏⴻⵏ ⵡⴰⵍⵓ ⵅ ⵜⴼⴰⵡⵜ. 
ⵎⴰⵖⴰⵔ ⵜⵓⴼⴼⵓⵜ ⵜⴱⴰⵏ ⴰⵙⴻⵏ-ⴷⴷ ⴰⵎ ⵜⵉⵍⵉ ⵏ ⵍⵎⴻⵡⵜ, ⵎⴰⵖⴰⵔ ⵙⵙⵏⴻⵏ ⵉⵏⴻⵅⵍⵉⵄⴻⵏ ⵏ ⵜⵉⵍⵉ ⵏ ⵍⵎⴻⵡⵜ. 
ⵏⴻⵜⵜⴰ ⴷ ⴰⴼⵙⵓⵙ ⴰⵎ ⵓⴽⵓⴼⴼⵓ ⵅ ⵡⵓⴷⴻⵎ ⵏ ⵡⴰⵎⴰⵏ ⵉ ⵢⴻⴵⴰ. ⵜⴻⵜⵜⵡⴰⵏⵄⴻⵍ ⵜⴻⵙⵖⴰⵔⵜ ⵏⵙⴻⵏ ⵅ ⵜⴻⵎⵎⵓⵔⵜ. ⵡⴰⵔ ⵉⵜⵜⴻⵟⵟⴻⴼ ⵄⴰⴷ ⴰⴱⵔⵉⴷ ⵖⴰⵔ ⵉⵎⴰⵔⵊⴰⵄⴻⵏ ⵏ ⵓⴹⵉⵍ. 
ⵍⴰⵥⴰⵖ ⴷ ⵍⴻⵃⵎⵓ ⵇⴻⵟⵟⴰⵏ ⵅ ⵡⴰⵎⴰⵏ ⵏ ⵡⴻⴷⴼⴻⵍ, ⴰⵎⵎⵓ ⵉ ⵜᵉⵜⵜⴻⴽⴽⴻⵙ ⵍⴰⵅⴰⵔⵜ ⵓⵍⴰ ⴷ ⵉⵏⵏⵉ ⵉⵅⴹⴰⵏ. 
ⴰⵄⴻⴷⴷⵉⵙ ⵏ ⵢⴻⵎⵎⴰⵙ ⴰⴷ ⵜ ⵉⵜⵜⵓ, ⵉⴽⴻⵛⵛⴰⵡⴻⵏ ⴰⴷ ⵣⵣⴰⵢⴻⵙ ⴰⵔⵔⴻⵏ ⵎⴻⵥⵔⵉ. ⵄⴻⵎⵎⴰⵔⵚ ⵡⴰⵔ ⵜ ⵜⵜⵉⴷⴰⵔⴻⵏ ⵄⴰⴷ. ⵉⵜⵜⵡⴰⵔⵥ ⵍⵖⴻⵛⵛ ⴰⵎ ⵉⵛⵜ ⵏ ⵜⴼⵔⴻⵡⵜ ⵏ ⵓⴽⴻⵛⵛⵓⴹ, 
ⴰⵎⵎⵓ ⵓⵍⴰ ⴷ ⵡⴻⵏⵏⵉ ⵉⵜⵜⴻⴳⴳⴻⵏ ⵍⵖⴰⵔ ⴷⵉ ⵜⴻⵎⵖⴰⵔⵜ ⴱⵍⴰ ⵜⴰⵔⵡⴰ, ⴷⵉ ⵜⴻⵏⵏⵉ ⵡⴰⵔ ⵉⵜⵜⵉⵔⵡⴻⵏ, ⵓⵍⴰ ⴷ ⵡⴻⵏⵏⵉ ⵉⵜⵜⴻⴳⴳⴻⵏ ⵎⵉⵏ ⵡⴰⵔ ⵉⵃⵍⵉⵏ ⴰⴽ-ⴷ ⵜⴰⵊⵊⴰⵍⵜ. 
ⵙ ⵊⵊⴻⵀⴷ ⵏⵏⴻⵙ ⵉⵙⵙⴱⴻⴷⴷⴰ ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ. ⵉⴱⴻⴷⴷ ⵡⴰⵏⵉⵜⴰ, ⵎⴰⵛⴰ ⵡⴰⵔ ⵉⵙⵙⵉⵏ ⵏⵉⵛⴰⵏ ⴰⵇⴰ ⵜⵓⴷⴰⵔⵜ ⵏⵏⴻⵙ ⴷⵉ ⵍⴰⵎⴰⵏ. 
ⵏⴻⵜⵜⴰ ⵉⵡⵛⴰ ⴰⵙ ⵍⴰⵎⴰⵏ, ⴰⵍⴰⵎⵉ ⵖⴰⵔⴻⵙ ⴷⴷ-ⵜⵓⴷⴻⴼ ⵜⵜⵉⵇⵇⴻⵜ, ⵄⴰⴷ ⵜⵉⵟⵟⴰⵡⵉⵏ ⵏⵏⴻⵙ ⴰⵇⴰ ⴰⵜⴻⵏⵜ ⵅ ⵡⴻⴱⵔⵉⴷ ⵏⵙⴻⵏ. 
ⵜⵜⵡⴰⵙⵙⵓⵄⵍⴰⵏ ⵉ ⵢⵉⵊⵊ ⵏ ⵍⵃⴰⵍ ⴷ ⴰⵇⵓⴹⴰⴹ, ⵅⴻⵏⵏⵉ ⵡⴰⵔ ⴵⵉⵏ ⵄⴰⴷ. ⴰⴷ ⵀⵡⴰⵏ, ⴰⴷ ⵜⵜⵡⴰⴽⴽⵙⴻⵏ ⴰⵎ ⵎⴰⵔⵔⴰ ⵉⵡⴷⴰⵏ, ⴰⵎ ⵉⵅⴼⴰⵡⴻⵏ ⵏ ⵓⵖⴻⴷⴷⵓⵢ ⵏ ⵢⵉⵔⴷⴻⵏ ⴰⴷ ⵜⵜⵡⴰⵇⴻⵙⵙⴻⵏ. 
ⵎⴰ ⵡⴰⵔ ⵉⴵⵉ ⴰⵎⴻⵏⵏⵉ? ⵎⴰⵏ ⵡⴻⵏ ⵉ ⴷ ⴰⵢⵉ ⵖⴰ ⵉⵟⵟⴼⴻⵏ ⵉⵅⴰⵔⵔⵉⵇⴻⵏ, ⵎⴰⵏ ⵡⴻⵏ ⵉ ⵖⴰ ⵉⵙⵙⴻⴱⴹⴻⵍ ⵍⵀⴰⵔⴷ ⵉⵏⵓ? 
