﻿ⴰⵢⵓⴱ.
18.
ⵅⴰⵙ ⵓⵛⴰ ⵢⴰⵔⵔⴰ-ⴷⴷ ⴱⵉⵍⴷⴰⴷ, ⵡⴻⵏⵏⵉ ⴷⴷ-ⵢⵓⵙⵉⵏ ⵣⵉ ⵛⵓⵃⴰ, ⵉⵏⵏⴰ: 
ⴰⵍ ⵎⴻⵍⵎⵉ ⵄⴰⴷ ⵜⴰⵔⴻⵣⵣⵓⵎ ⴰⴷ ⵜᵉⵟⵟⴼⴻⵎ ⵉⵊⵊ ⵏ ⴱⵏⴰⴷⴻⵎ ⵅ ⵡⴰⵡⴰⵍⴻⵏ ⵏⵏⴻⵙ? ⵎⴰⵍⴰ ⵜⴼⴻⵀⵎⴻⵎ, ⵅⴻⵏⵏⵉ ⴰⵡⴰⵔⵏⵉ ⵉ ⵓⵢⴰ ⴰⴷ ⵏⴻⵙⵙⵉⵡⴻⵍ. 
ⵎⴰⵢⴻⵎⵎⵉ ⴷ ⴰⵏⴻⵖ ⵉⵜⵜⵡⴰⴳⴳ ⴰⵎ ⵍⵎⴰⵍ ⵓ ⵏⴻⵜⵜⵡⴰⵃⵚⴰⵔ ⴷⵉ ⴱⵓⵃⴱⴻⵍ ⴷⵉ ⵜⵉⵟⵟⴰⵡⵉⵏ ⵏⵡⴻⵎ? 
ⵛⴻⴽ, ⴰ ⵢⴰⵔⵢⴰⵣ ⵡⴻⵏⵏⵉ ⵉⵜⵜⵎⴻⵣⵣⵇⴻⵏ ⵉⵅⴻⴼ ⵏⵏⴻⵙ ⴷⴻⴳ ⵓⵅⴻⵢⵢⴻⵇ ⵏⵏⴻⵙ! ⵎⴰ ⴰⴷ ⵊⵊⴻⵏ ⵜⴻⵎⵎⵓⵔⵜ ⴷⵉ ⵙⵙⵉⴱⴱⴻⵜ ⵏⵏⴻⵛ, ⴰⴷ ⵉⵜⵜⵡⴰⵙⵙⵎⵓⵟⵟⵉ ⵊⵊⴰⵔⴼ ⵣⴻⴳ ⵡⴻⵎⵛⴰⵏ ⵏⵏⴻⵙ ⴷⵉ ⵙⵙⵉⴱⴱⴻⵜ ⵏⵏⴻⵛ?    
ⵡⴰⵀ, ⵜⴰⴼⴰⵡⵜ ⵏ ⵉⵄⴻⴼⴼⴰⵏⴻⵏ ⴰⴷ ⵜⴻⵅⵙⵉ, ⴰⵛⴻⵄⵄⴰⵍ ⵏ ⵜⵎⴻⵙⵙⵉ ⵏ ⵓⵄⴻⴼⴼⴰⵏ ⵡⴰⵔ ⵉⵜⵜⴻⴳⴳ ⵜⴰⴼⴰⵡⵜ ⵄⴻⵎⵎⴰⵔⵚ ⵄⴰⴷ. 
ⵜⴰⴼⴰⵡⵜ ⴷⵉ ⵜⵇⵉⴷⵓⵏⵜ ⵏⵏⴻⵙ ⴰⴷ ⵜⴻⴱⴱⴰⵔⵛⴻⵏ, ⵍⴻⴼⵏⴰⵔ ⵏⵏⴻⵙ ⵜⵉⵡⴰ ⵏⵏⴻⵙ ⴰⴷ ⵜ ⵙⵙⵅⴻⵙⵢⴻⵏ. 
ⵜⵜⴰⵔⵊⵉⵊⴻⵏ ⵉⵚⵓⵔⴰⴼ ⵏⵏⴻⵙ ⵉⵊⴻⵀⴷⴻⵏ, ⵛⵛⵡⴰⵔ ⵏ ⵢⵉⵅⴻⴼ ⵏⵏⴻⵙ ⴰⴷ ⵜ ⵉⵖⴹⴻⵍ. 
ⵎⴰⵖⴰⵔ ⵙ ⵉⴹⴰⵔⴻⵏ ⵏⵏⴻⵙ ⴰⴷ ⵉⵏⵏⴰⵖ ⴷⴻⴳ ⵓⵚⴻⵏⵏⴰⵊ, ⴰⴷ ⵢⵓⵢⵓⵔ ⵅ ⵜⵔⴰⵛⵛⴰ, ⵎⵎⵓⴷⴻⵏ ⵜⵜ ⵉ ⵜⵏⴻⵢⵎⴰⵔⵜ. 
ⵜⴰⵅⵛⴻⴼⵜ ⴰⴷ ⵜ ⵜⴻⵎⵏⴻⵄ ⵣⴻⴳ ⵓⵏⵉⵔⵣ, ⵍⴼⴻⵅ ⴰⴷ ⴷⴰⵢⴻⵙ ⵜᵉⵟⵟⴻⴼ. 
ⵜⴻⵏⵏⵓⴼⴼⴰⵔ ⵜⴻⵙⵖⵓⵏⵜ ⵏ ⵍⴼⴻⵅ ⴷⵉ ⵜⴻⵎⵎⵓⵔⵜ, ⵍⴼⴻⵅ ⴰⵇⴰ-ⵜⵜ ⵅ ⵡⴻⴱⵔⵉⴷ. 
ⵙⵙⵉⴳⴳⵯⴻⴷⴻⵏ ⵜ ⵉⵏⴻⵅⵍⵉⵄⴻⵏ ⵣⵉ ⵎⴰⵔⵔⴰ ⵉⵖⴻⵣⴷⵉⵙⴻⵏ, ⴹⴻⴼⴼⴰⵔⴻⵏ ⵜ ⵖⴰⵔ ⵉⴹⴰⵔⴻⵏ ⵏⵏⴻⵙ. 
ⵉⵜⵜⵡⴰⵃⵚⴰⵔ ⴷⴰⵢⴻⵙ ⵊⵊⴻⵀⴷ ⵏⵏⴻⵙ, ⴰⴹⴻⵢⵢⴻⵄ ⵉⵜⵜⵔⴰⵊⴰ ⵉ-ⵜ ⵖⴰⵔ ⵓⵖⴻⵣⴷⵉⵙ ⵏⵏⴻⵙ. 
ⴰⵔⵥⵉⵢⵢⴻⵜ ⴰⴷ ⵜⴻⵛⵛ ⵎⴰⵔⵔⴰ ⵉⵖⴻⵣⴷⵉⵙⴻⵏ ⵏ ⴰⵔⵔⵉⵎⴻⵜ ⵏⵏⴻⵙ, ⵉⵖⴻⵣⴷⵉⵙⴻⵏ ⵏ ⴰⵔⵔⵉⵎⴻⵜ ⵏⵏⴻⵙ ⴰⴷ ⵜⴻⵏ ⵢⴻⵛⵛ ⵉⵊⵊ ⵏ ⵍⴻⵃⵍⴰⵛ ⵉⵏⴻⵇⵇⴻⵏ. 
ⵎⵉⵏⵅⴻⴼ ⵜⵓⵖⴰ ⵉⵜⵜⵛⴻⵍ, ⵉⵜⵜⵡⴰⵇⵍⴻⵄ ⵣⵉ ⵜⵇⵉⴹⵓⵏⵜ ⵏⵏⴻⵙ. ⵜⵏⴻⴷⴷⴻⵀ ⵉ-ⵜ ⴰⵔⵥⵉⵢⵢⴻⵜ ⵖⴰⵔ ⵓⵊⴻⴵⵉⴷ ⵏ ⵉⵏⴻⵅⵍⵉⵄⴻⵏ. 
ⵉⵡⴷⴰⵏ ⵏⵏⵉ ⵡⴰⵔ ⴵⵉⵏ ⴷ ⵢⵉⵏⵏⵉ ⵏⵏⴻⵙ, ⵣⴻⴷⴷⵖⴻⵏ ⴷⴻⴳ ⵓⵇⵉⴹⵓⵏ ⵏⵏⴻⵙ, ⵍⴻⵛⴱⴰⵔⵉⵢⵢⴻⵜ ⵜᵉⵜⵜⵡⴰⵣⵓⵣⵣⴰⵔ ⵅ ⵜⵣⴻⴷⴷⵉⵖⵜ ⵏⵏⴻⵙ. 
ⵙⴰⴷⵓ ⵏⴻⵜⵜⴰ ⵜⵜⴰⵥⵖⴻⵏ ⵉⵥⴻⵡⵔⴰⵏ ⵏⵏⴻⵙ, ⵣⵉ ⵙⴻⵏⵏⴻⵊ ⵜⵜⵡⴰⵇⴻⵙⵙⴻⵏ ⵍⴻⴼⵔⵓⵄ ⵏⵏⴻⵙ. 
ⵍⵉⴷⴰⵔⴻⵜ ⵏⵏⴻⵙ ⴰⴷ ⵜᵉⵜⵜⵡⴰⴽⴽⴻⵙ ⵣⵉ ⵜⴻⵎⵎⵓⵔⵜ, ⵡⴰⵔ ⴷ ⴰⵙ ⵉⵜⵜⵖⵉⵎⵉ ⵄⴰⴷ ⵉⵙⴻⵎ ⴷⴻⴳ ⵡⴻⴱⵔⵉⴷⴻⵏ. 
ⴰⴷ ⵜ ⵄⴰⵔⵏⴻⵏ ⵣⵉ ⵜⴼⴰⵡⵜ ⵖⴰⵔ ⵜⴰⴵⴻⵙⵜ, ⴰⴷ ⵙⵙⵜⴻⵡⵡⵊⴻⵏ ⵣⵉ ⴷⴷⵓⵏⴻⵛⵜ. 
ⵡⴰⵔ ⵖⴰⵔⴻⵙ ⵉⵜⵜⵉⵍⵉ ⵡⴰⵔⵔⴰⵡ ⵏⵉⵖ ⵊⵊⴰⴷⵉⵔⴰ ⴷⵉ ⵍⴳⴻⵏⵙ ⵏⵏⴻⵙ, ⵡⴰⵔ ⵉⵜⵜⵖⵉⵎⵉ ⵓⵍⴰ ⴷ ⵉⵊⵊ ⴰⴷ ⵉⴷⴷⴰⵔ ⴷⵉ ⵜⵣⴻⴷⴷⵉⵖⵉⵏ ⵏⵏⴻⵙ. 
ⵅ ⵡⴰⵙⵙ ⵏⵏⴻⵙ ⴰⴷ ⴰⵔⵊⵉⵊⴻⵏ ⵉⵏⵏⵉ ⵉⵣⴻⴷⴷⵖⴻⵏ ⵖⴰⵔ ⵎⴰⵏⵉ ⵜⵖⴻⴵⵉ ⵜⴼⵓⵛⵜ, ⵉⵏⵏⵉ ⵉⵣⴻⴷⴷⵖⴻⵏ ⵖⴰⵔ ⵎⴰⵏⵉⵙ ⵉ ⴷⴷ-ⵜⵏⴻⵇⵇⴰⵔ ⵜⴼⵓⵛⵜ ⴰⴷ ⵜⴻⵏ ⵜᵉⵟⵟⴻⴼ ⵜⵉⴳⴳⵯⵓⴷⵉ. 
ⵡⴰⵀ, ⴰⵎⵎⵓ ⵉ ⵜᵉⵜⵜⴻⵎⵙⴰⵔ ⵉ ⵜⵣⴻⴷⴷⵉⵖⵉⵏ ⵏ ⵉⵎⴻⵇⵊⴰⵃⴻⵏ, ⵡⴰ ⴷ ⴰⵎⵛⴰⵏ ⵏ ⵢⵉⵏⵏⵉ ⵡⴰⵔ ⵉⵙⵙⵉⵏⴻⵏ ⴰⵔⴻⴱⴱⵉ. 
