﻿ⴰⵢⵓⴱ.
12.
ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ: 
ⴷ ⵜⵉⴷⴻⵜⵜ, ⴽⴻⵏⵏⵉⵡ ⴷ ⵉⵊⵊ ⵏ ⴷⴷⴰⵔⴱ ⵏ ⵍⴳⴻⵏⵙ, ⴰⵇⴰ ⵜⵉⵖⵉⵜ ⴰⴷ ⵜⴻⵎⵎⴻⵜ ⴰⴽⵉⴷⵡⴻⵎ! 
ⵏⴻⵛⵛ ⵖⴰⵔⵉ ⵍⴻⵄⵇⴻⵍ ⴰⵎ ⴽⴻⵏⵏⵉⵡ, ⵏⴻⵛⵛ ⵡⴰⵔ ⵡⴻⵟⵟⵉⵖ ⴷⴻⴳ ⵓⵎⵇⵓⴷⴷⵉ ⴰⴽⵉⴷⵡⴻⵎ. ⵡⵉ ⵡⴰⵔ ⵉⵙⵙⵉⵏⴻⵏ ⵎⴰⵔⵔⴰ ⴰⵢⴰ? 
ⵏⴻⵛⵛ ⴰⵎ ⵡⴻⵏⵏⵉ ⵉⴵⴰⵏ ⵉ ⵜⵙⴻⴹⵃⴰⵛ ⵉ ⵓⵎⴻⴷⴷⵓⴽⴽⴻⵍ ⵏⵏⴻⵙ, ⵏⴻⵛⵛ ⴷ ⵡⴻⵏⵏⵉ ⵜⵓⵖⴰ ⵉⵜⵜⵍⴰⵖⴰⵏ ⵖⴰⵔ ⴰⵔⴻⴱⴱⵉ ⵓⵛⴰ ⵅⴻⵏⵏⵉ ⵏⴻⵜⵜⴰ ⵉⵙⵍⴰ ⵖⴰⵔⵉ, ⵏⴻⵛⵛ ⴷ ⴰⵎⵙⴻⴳⴳⴻⴷ ⴷ ⵏⵉⵛⴰⵏ, ⴰⵇⴰ ⴷⴻⵡⵍⴻⵖ ⴷ ⵍⵇⴻⵛⵄⴻⵜ ⵏ ⵜⵙⴻⴹⵃⴰⵛⵜ. 
‘ⵍⵃⴻⴳⵔⴰ ⴷ ⵜⴰⵙⵖⴰⵔⵜ ⵏ ⵡⴻⵏⵏⵉ ⵉⵜⵜⵡⴰⵔⵥⴰⵏ!’, ⴰⵎⵎⵓ ⵉ ⵉⵜⵜⵅⴰⵔⵔⴰⵚⴻⵏ ⵢⵉⵏⵏⵉ ⵓⵎⵉ ⵉⵜⵜⵖⵉⵍ ⴰⵇⴰ ⴰⵜⴻⵏ ⴷⵉ ⵍⴰⵎⴰⵏ, ⵉⵜⵜⵖⵉⵍ ⴰⵙⴻⵏ ⴰⵢⴰ ⵉⵜⵜⵔⴰⵊⴰ ⵉⵏⵏⵉ ⵉⵜⵜⵏⴻⵇⵔⴰⴹⴻⵏ ⴷⴻⴳ ⵉⴹⴰⵔⴻⵏ ⵏⵙⴻⵏ. 
ⵉⵇⵉⴹⴰⵏ ⵏ ⵉⵎⵜⴻⵃⵃⴰⵢⵢⴻⵏ ⴰⵔⵙⴰⵏ, ⵓ ⵉⵏⵏⵉ ⵉⵙⴻⵄⵄⴰⵔⴻⵏ ⴰⵔⴻⴱⴱⵉ ⵖⴰⵔⵙⴻⵏ ⴰⵟⵟⴰⵙ ⵏ ⵍⴰⵎⴰⵏ. ⵎⴰⵛⴰ ⵡⵉ ⵉⵣⴻⵎⵎⴰⵔⴻⵏ ⴰⴷ ⵢⴰⵡⵉ ⴰⵔⴻⴱⴱⵉ ⵙ ⵓⴼⵓⵙ ⵏⵏⴻⵙ? 
ⵙⴻⵇⵙⴰ ⵅⴻⵏⵏⵉ ⵍⵎⴰⵍ, ⴰⴷ ⴰⵛ ⵜ ⵙⵙⵍⴻⵎⴷⴻⵏ, ⵉⵊⴹⴰⴹ ⵏ ⵓⵊⴻⵏⵏⴰ ⴰⴷ ⵛⴻⴽ ⵜ ⵃⴰⵊⴰⵏ. 
ⵏⵉⵖ ⵅⴻⵣⵣⴰⵔⴻⵖ ⵎⵍⵉⵃ ⵖⴰⵔ ⵜⴻⵎⵎⵓⵔⵜ, ⵏⴻⵜⵜⴰⵜ ⴰⴷ ⵛⴻⴽ ⵜⴻⵙⵙⵖⴰⵔ, ⵓⵍⴰ ⴷ ⵉⵙⴻⵍⵎⴰⵏ ⵏ ⵍⴻⴱⵃⴰⵔ ⴰⴷ ⴰⵛ ⵜ ⵄⴰⵡⴷⴻⵏ. 
ⵎⴰⵏ ⵡⴻⵏ ⵡⴰⵔ ⵉⵙⵙⵉⵏⴻⵏ ⵎⴰⵔⵔⴰ ⴰⵢⴰ, ⴰⵇⴰ ⴰⴼⵓⵙ ⵏ ⵙⵉⴷⵉ ⵉ ⵜ ⵉⴳⴳⵉⵏ? 
ⵏⴻⵜⵜⴰ ⴷ ⵡⴻⵏⵏⵉ ⴷⴻⴳ ⵓⴼⵓⵙ ⵏⵏⴻⵙ ⵉⴵⴰ ⵍⴻⵄⵎⴰⵔ ⵏ ⵎⴰⵔⵔⴰ ⵎⵉⵏ ⵉⴷⴷⴰⵔⴻⵏ, ⵓⵍⴰ ⴷ ⴱⵓⵃⴱⴻⵍ ⵏ ⴽⵓⵍ ⴰⵔⵔⵉⵎⴻⵜ ⵏ ⴱⵏⴰⴷⴻⵎ. 
ⵎⴰ ⵡⴰⵔ ⵉⵜⵜⵇⴻⴵⵉⴱ ⵓⵎⴻⵣⵣⵓⵖ ⴰⵡⴰⵍⴻⵏ, ⴰⵎ ⵉⵜⵜⵇⴰⵙⴰ ⵡⴰⵏⴻⵖ ⵎⴰⵛⵛⴰ? 
ⵖⴰⵔ ⵉⵡⴻⵙⵙⵓⵔⴰ ⵉ ⵜⴻⴵⴰ ⵜⵉⵖⵉⵜ ⵓ ⴷⵉ ⵜⵓⴷⴰⵔⵜ ⵜⴰⵣⵉⵔⴰⵔⵜ ⵜⴻⴵⴰ ⵍⴻⴼⵀⴰⵎⴻⵜ? 
ⵏⴻⵜⵜⴰ ⵖⴰⵔⴻⵙ ⵉ ⵜⴻⴵⴰ ⵜⵉⵖⵉⵜ ⴷ ⵊⵊⴻⵀⴷ ⵙ ⵜⵉⴷⴻⵜⵜ, ⵏⴻⵜⵜⴰ ⵖⴰⵔⴻⵙ ⵉ ⵢⴻⴵⴰ ⵛⵛⵡⴰⵔ ⴷ ⵍⴻⴼⵀⴰⵎⴻⵜ ⵏⵉⵛⴰⵏ. 
ⵅⵣⴰⵔ, ⵎⴰⵍⴰ ⵏⴻⵜⵜⴰ ⵉⵀⴻⴷⴷⴻⵎ, ⵡⴰⵔ ⵉⴱⴻⵏⵏⵉ ⵓⵍⴰ ⴷ ⵉⵊⵊ ⵄⴰⵡⴻⴷ, ⵎⴰⵍⴰ ⵏⴻⵜⵜⴰ ⵉⴱⴻⵍⵍⴻⵄ ⵅ ⵛⴰ ⵏ ⵢⵉⵊⵊⴻⵏ, ⵡⴰⵔ ⴷ ⴰⵙ ⵢⴰⵔⴻⵣⵣⴻⵎ ⵄⴰⴷ. 
ⵅⵣⴰⵔ, ⵎⴰⵍⴰ ⵏⴻⵜⵜⴰ ⵉⵙⵙⴱⴻⴷⴷ ⴰⵎⴰⵏ, ⴰⴷ ⴰⵥⵖⴻⵏ ⵏⵉⵜⵏⵉ, ⵎⴰⵍⴰ ⵢⴰⵔⵅⵓ ⴰⵙⴻⵏ, ⴰⴷ ⵙⵙⴻⵏⵇⴻⵍⴱⴻⵏ ⵜⴰⵎⵎⵓⵔⵜ. 
ⵏⴻⵜⵜⴰ ⵖⴰⵔⴻⵙ ⵊⵊⴻⵀⴷ ⴷ ⵓⴼⴻⴽⴽⵉ, ⵏⵏⴻⵙ ⴷ ⵡⴻⵏⵏⵉ ⵉⵡⴻⴷⴷⴰⵔⴻⵏ ⵓⵍⴰ ⴷ ⵡⴻⵏⵏⵉ ⵉⵙⵙⵡⴻⴷⴷⴰⵔⴻⵏ. 
ⵏⴻⵜⵜⴰ ⵉⵜⵜⴻⵊⵊⴰ ⵉⵔⵢⴰⵣⴻⵏ ⵏ ⵛⵛⵡⴰⵔ ⴳⴳⵓⵔⴻⵏ ⵙ ⵍⴻⵃⴼⴰ, ⵍⵇⵓⴹⴰⵜ ⵉⵜⵜⴰⵔⵔⴰ ⵉ-ⵜⴻⵏ ⴷ ⵉⴱⵓⵀⴰⵍⵉⵢⵢⴻⵏ. 
ⴰⵣⵉⵢⵢⴰⵔ ⵏ ⵉⵊⴻⴵⵉⴷⴻⵏ ⵉⵙⵙⴱⴻⵟⵟⴻⵍ ⵉ-ⵜ ⵓ ⵅⴻⵏⵏⵉ ⵏⴻⵜⵜⴰ ⵉⵜⵜⵛⴻⴷⴷⴰ ⵉ-ⵜⴻⵏ ⵙ ⵉⵊⵊ ⵏ ⵡⴻⴱⵢⴰⵙ ⵣⵉ ⵜⴻⵊⵄⵉⵏⵏⴰ ⵏⵙⴻⵏ. 
ⵏⴻⵜⵜⴰ ⵉⵏⴻⴷⴷⴻⵀ ⵉⴽⴻⵀⵀⴰⵏⴻⵏ ⵙ ⵍⴻⵃⴼⴰ, ⴰⵢⵜ ⵏ ⵊⵊⴻⵀⴷ ⵉⵖⴻⵟⵟⴻⵔ ⵉ-ⵜⴻⵏ. 
ⵉⵜⵜⴻⴽⴽⴻⵙ ⴰⵡⴰⵍ ⵉ ⵉⵔⵢⴰⵣⴻⵏ ⵉⵜⵜⵡⴰⵇⴻⴵⴱⴻⵏ, ⵉ ⵉⵡⴻⵙⵙⵓⵔⴰ ⵉⵜⵜⴻⴽⴽⴻⵙ ⴰⵙⴻⵏ ⵍⴻⴼⵀⴰⵎⴻⵜ. 
ⴰⵙⴻⵃⵇⴰⵔ ⵉⵜⵜⵣⴻⴵⴰⵄ ⵉ-ⵜ ⵅ ⵜⴰⵔⵡⴰ ⵏ ⵜⴰⵚⵉⵍⴻⵜ, ⵉ ⴰⵢⵜ ⵏ ⴱⵓ-ⵍⴻⵅⵛⵓⵏⴻⵜ ⵉⵙⵙⴰⵔⴻⵅⵅⵓ ⴰⵙⴻⵏ ⴰⴱⵢⴰⵙ. 
ⵉⵎⵓⵛⴰⵏ ⵢⵓⴵⵖⴻⵏ ⵏ ⵜⴰⴵⴻⵙⵜ ⵉⵜⵜⵄⴰⵔⵔⴰ ⵅⴰⵙⴻⵏ, ⴷ ⵜⵉⵍⵉ ⵏ ⵍⵎⴻⵡⵜ ⵉⵙⵙⵓⴼⴼⵓⵖ ⵉ-ⵜⵜ ⵖⴰⵔ ⵜⴼⴰⵡⵜ. 
ⵍⴻⴳⵏⵓⵙ ⵉⵙⵙⴻⵎⵖⴰⵔ ⵉ-ⵜⴻⵏ ⵓⵛⴰ ⵉⵖⴻⵟⵟⴻⵔ ⵉ-ⵜⴻⵏ, ⵏⴻⵜⵜⴰ ⵉⵜⵜⴱⴻⵣⵣⴰⵄ ⵍⴻⴳⵏⵓⵙ ⵓⵛⴰ ⵉⵏⴻⴷⴷⴻⵃ ⵉ-ⵜⴻⵏ. 
ⵉⵜⵜⴻⴽⴽⴻⵙ ⵍⴻⴼⵀⴰⵎⴻⵜ ⵉ ⵉⵣⴻⴵⵉⴼⴻⵏ ⵏ ⵍⴳⴻⵏⵙ ⵅ ⵜⴻⵎⵎⵓⵔⵜ, ⵉⵊⵊⴰ ⵉ-ⵜⴻⵏ ⵜⵜᵉⵜⵍⵉⵄⴻⵏ ⴷⵉ ⵍⴻⵅⵍⴰ ⵎⴰⵏⵉ ⵡⴰⵔ ⴵⵉⵏ ⵉⴱⵔⵉⴷⴻⵏ. 
ⵏⵉⵜⵏⵉ ⵜⵜⴻⵎⵀⴰⴼⴰⵏ ⴷⴰ ⴷ ⴷⵉⵀⴰ ⴷⵉ ⵜⴰⴵⴻⵙⵜ, ⵎⴰⵏⵉ ⵡⴰⵔ ⵜⴻⴵⵉ ⵜⴼⴰⵡⵜ, ⵏⴻⵜⵜⴰ ⵉⵜⵜⴻⵊⵊⴰ ⵉ-ⵜⴻⵏ ⴰⴷ ⵎⵎⵀⴰⴼⴰⵏ ⴰⵎ ⵢⵉⵎⴻⵙⵛⴰⵔⴻⵏ. 
