﻿ⴰⵢⵓⴱ.
10.
ⵉⵜⵜⵄⵉⴼⴼⵉ ⵍⴻⵄⵎⴰⵔ ⵉⵏⵓ ⵣⵉ ⵜⵓⴷⴰⵔⵜ ⵉⵏⵓ, ⴰⴷ ⴱⴰⵔⵔⵃⴻⵖ ⴰⵛⴻⵜⵛⵉ ⵉⵏⵓ ⴰⵎⵎⵓ ⵡⴰⵀⴰ ⴱⵍⴰ ⴰⵎⵏⴰⵄ, ⴰⴷ ⵙⵙⵉⵡⵍⴻⵖ ⵖⴰⵔ ⵜⴰⵔⵣⵓⴳⵉ ⵏ ⵍⴻⵄⵎⴰⵔ ⵉⵏⵓ. 
ⵏⴻⵛⵛ ⴰⴷ ⵉⵏⵉⵖ ⵉ ⴰⵔⴻⴱⴱⵉ: ‘ⵡⴰⵔ ⴷ ⴰⵢⵉ ⵜⵜⴻⴳⴳ ⴷ ⴰⵄⴻⴼⴼⴰⵏ, ⵙⵛⴻⵏ ⴰⵢⵉ, ⵎⴰⵢⴻⵎⵎⵉ ⴰⴽⵉⴷⵉ ⵜᵉⵜⵜⵎⴻⵏⵖⵉⴷ. 
ⵎⴰ ⵖⴰⵔⴻⴽ ⵍⴻⴼⴹⴻⵍ ⴰⵇⴰ ⵛⴻⴽ ⵜⵃⴻⵚⵚⴰⵔⴻⴷ ⴰⵢⵉ, ⴰⵇⴰ ⵜⵏⴻⵟⵟⴰⵔⴻⴹ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⵛ, ⴰⵎ ⵜᵉⵜⵜⴻⴳⴳⴻⴷ ⵜⴰⴼⴰⵡⵜ ⵅ ⵉⵅⴰⵔⵔⵉⵚⴻⵏ ⵏ ⵉⵄⴻⴼⴼⴰⵏⴻⵏ? 
ⵎⴰ ⵖⴰⵔⴻⴽ ⵜⵉⵟⵟⴰⵡⵉⵏ ⵏ ⴱⵏⴰⴷⴻⵎ, ⵎⴰ ⵜᵉⵜⵜⵡⴰⵍⵉⴷ ⵛⴻⴽ ⴰⵎ ⵎⴰⵎⵎⴻⵛ ⵜⵜⵡⴰⵍⴰⵏ ⵉⵡⴷⴰⵏ? 
ⵎⴰ ⵓⵙⵙⴰⵏ ⵏⵏⴻⵛ ⴰⵎ ⵡⵓⵙⵙⴰⵏ ⵏ ⴱⵏⴰⴷⴻⵎ? ⵎⴰ ⵉⵙⴻⴳⴳⵯⵓⵙⴰ ⵏⵏⴻⵛ ⴰⵎ ⵢⵉⵙⴻⴳⴳⵯⵓⵙⴰ ⵏ ⵡⴻⵔⵢⴰⵣ, 
ⴰⵇⴰ ⵛⴻⴽ ⵜⴰⵔⴻⵣⵣⵓⴷ ⴰⵎⵎⵓ ⵅ ⵍⵎⵓⵄⵚⵉⵢⵢⴻⵜ ⵉⵏⵓ, ⵜᵉⵜⵜⴱⴻⵇⵇⵛⴻⴷ ⴷⵉ ⴷⴷⵏⵓⴱ ⵉⵏⵓ? 
ⵡⴰⵅⵅⴰ ⵛⴻⴽ ⵜⴻⵙⵙⵏⴻⴷ ⴰⵇⴰ ⵏⴻⵛⵛ ⵡⴰⵔ ⴵⵉⵖ ⴷ ⴰⵄⴻⴼⴼⴰⵏ, ⵡⴰⵔ ⴷⵉⵏ ⵡⴻⵏⵏⵉ ⵉ ⵖⴰ ⵉⴼⴻⴽⴽⴻⵏ ⵣⴻⴳ ⵓⴼⵓⵙ ⵏⵏⴻⵛ. 
ⵉⴼⴰⵙⵙⴻⵏ ⵏⵏⴻⵛ ⵅⴻⵍⵇⴻⵏ ⴰⵢⵉ, ⴳⴳⵉⵏ ⴰⵢⵉ, ⴰⵇⴰ ⵜⵜⴻⵏⵏⴹⴻⵏ ⴰⵢⵉ, ⵓⵛⴰ ⵍⴻⵅⵅⵓ ⵛⴻⴽ ⵜⵚⴰⵔⴹⴻⴷ ⴰⵢⵉ. 
ⵄⵇⴻⵍ ⴰⵇⴰ ⵛⴻⴽ ⵜⴻⴳⴳⵉⴷ ⴰⵢⵉ ⴰⵎ ⵜⴰⵔⵔⵉⵙⵜ, ⵓ ⵖⴰⵔ ⵜⵄⴻⵊⵊⴰⵛⵜ ⵜⴻⵅⵙⴻⴷ ⴰⴷ ⴰⵢⵉ ⵜⴰⵔⵔⴻⴷ. 
ⵎⴰ ⵡⴰⵔ ⴷ ⴰⵢⵉ ⵜⵣⴻⴵⵄⴻⴷ ⴰⵎ ⵓⵖⵉ, ⴰⵎ ⴽⵉⵙⵓ ⵜⴻⵊⵊⵉⴷ ⴰⵢⵉ ⴰⴷ ⵛⵛⵔⴻⵖ? 
ⵙ ⵜⴻⵍⵎⴻⵛⵜ ⴷ ⵡⴻⵢⵙⵓⵎ ⵜⴻⵙⵙⵢⴰⵔⴹⴻⴷ ⴰⵢⵉ, ⵙ ⵉⵖⵙⴰⵏ ⴷ ⵉⵥⴻⵡⵔⴰⵏ ⵜⴻⵎⵎⵓⴷⴻⴷ ⴰⵢⵉ. 
ⵜⵓⴷⴰⵔⵜ ⴷ ⵜⵎⴻⵅⵙⵉⵡⵜ ⵉⵛⵓⵡⵡⴰⵔⴻⵏ ⵜⴻⵡⵛⵉⴷ ⴰⵢⵉ ⵜⴻⵏⵜ, ⴰⵃⴻⵟⵟⵓ ⵏⵏⴻⵛ ⵉⵃⴹⴰ ⴱⵓⵃⴱⴻⵍ ⵉⵏⵓ. 
ⵜⵅⴻⵎⵎⵍⴻⴷ ⴰⵢⴰ ⴷⴻⴳ ⵡⵓⵍ ⵏⵏⴻⵛ, ⵏⴻⵛⵛ ⵙⵙⵏⴻⵖ ⴱⴻⵍⵍⵉ ⴰⵢⴰ ⵜⵓⵖⴰ-ⵜ ⵖⴰⵔⴻⴽ ⴷⵉ ⵍⴱⴰⵍ. 
ⵎⴰⵍⴰ ⵅⴹⵉⵖ, ⵛⴻⴽ ⴰⴷ ⴰⵢⵉ ⵜⴻⵃⴹⵉⴷ, ⵡⴰⵔ ⴷ ⴰⵢⵉ ⵜᵉⵜⵜⴱⴰⵔⵔⵉⴷ ⵣⵉ ⵍⵎⵓⵄⵚⵉⵢⵢⴻⵜ ⵉⵏⵓ. 
ⵎⴰⵍⴰ ⴳⴳⵉⵖ ⵍⵖⴰⵔ, ⵓⵛⵜ ⵅⴰⴼⵉ! ⵎⴰⵍⴰ ⵏⴻⵛⵛ ⴷ ⴰⵎⵙⴻⴳⴳⴻⴷ ⵉ ⴵⵉⵖ, ⵡⴰⵔ ⵣⴻⵎⵎⴰⵔⴻⵖ ⴰⴷ ⵙⵙⴳⴻⵄⵄⴷⴻⵖ ⴰⵣⴻⴵⵉⴼ ⵉⵏⵓ. ⵊⵊⵉⵡⵏⴻⵖ ⵙ ⵍⴻⴼⴹⵉⵃⴻⵜ, ⵜⵜⴰⵛⵉⵖ ⴰⴽ-ⴷ ⵍⴻⵎⵃⴰⵢⴻⵏ ⵉⵏⵓ. 
ⵎⴰⵍⴰ ⵙⵙⴳⴻⵄⵄⴷⴻⵖ ⵉⵅⴻⴼ ⵉⵏⵓ, ⴰⴷ ⴰⵢⵉ ⵜⵏⴻⵢⵎⴰⵔⴻⴷ ⴰⵎ ⵡⴰⵢⵔⴰⴷ ⵉⵣⴻⵀⵀⴰⵔⴻⵏ, ⵍⴻⴱⴷⴰ ⵜᵉⵜⵜⵏⴻⵇⵍⴰⴱⴻⴷ ⵅⴰⴼⵉ ⵙ ⵍⵖⴻⴼⵍⴻⵜ. 
ⵎⴻⵄⵍⵉⴽ ⵓⴼⵉⵖ ⴰⴷ ⵅⴰⴼⵉ ⵜⴻⵙⵙⴱⴻⴷⴷⴻⴷ ⵍⴻⴱⴷⴰ ⵉⵛⴻⵀⵀⴰⴷⴻⵏ ⵏⵏⴻⵖⵏⵉ, ⴰⴷ ⵜⴰⵔⵏⵉⴷ ⵄⴰⴷ ⴷⴻⴳ ⵡⴻⵖⴹⴰⴱ ⵏⵏⴻⵛ ⵅⴰⴼⵉ, ⵉⵄⴻⵙⵙⴰⵙⴻⵏ ⵉ ⵉⵅⴻⴵⴼⴻⵏ ⵉⵊⵊ ⵉ ⵡⴻⵏⵏⴻⵖⵏⵉ ⵍⴻⴱⴷⴰ, ⵡⴰⵀ, ⴰⴷ ⵖⴰⵔⵉ ⵜⵏⴻⴷⵀⴻⴷ ⵉⵊⵊ ⵏ ⵍⵄⴻⵙⴽⴰⵔ. 
ⵎⴰⵢⴻⵎⵎⵉ ⴷ ⴰⵢⵉ ⵜⴻⵊⵊⵉⴷ ⴰⴷ ⴷⴷ-ⴼⴼⵖⴻⵖ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ? ⵎⵍⵉ ⵙⵙⵓⴼⴼⵖⴻⵖ ⴱⵓⵃⴱⴻⵍ, ⵡⴰⵔ ⴷ ⴰⵢⵉ ⵜⵥⴰⵔ ⵓⵍⴰ ⴷ ⵉⵛⵜ ⵏ ⵜⵉⵟⵟ!’ 
ⵎⴻⵄⵍⵉⴽ ⵓⴼⵉⵖ ⴰⵅⵎⵉ ⵡⴰⵔ ⵉⵍⵉⵖ ⵄⴻⵎⵎⴰⵔⵚ, ⵎⵎⴻⴽⵙⵉⵖ ⵖⴰⵔ ⵡⴻⵏⴹⴻⵍ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ. 
ⵎⴰ ⵡⴰⵔ ⴵⵉⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉⵏⵓ ⵓⴷⵔⵓⵙⴻⵏ? ⵎⵍⵉ ⴷ ⴰⵢⵉ ⵉⵊⵊⴰ, ⴰⴷ ⵅⴰⴼⵉ ⵉⵏⵏⴻⵇⵍⴻⴱ ⵎⴰⵃⴻⵏⴷ ⴰⴷ ⴼⴰⵔⵀⴻⵖ ⵛⵡⴰⵢⵜ ⵄⴰⵡⴻⴷ, 
ⵇⴱⴻⵍ ⵉ ⵖⴰ ⵓⵢⵓⵔⴻⵖ - ⵡⴰⵔ ⴷⵉⴽⴽⵡⵉⵍⴻⵖ ⵄⴰⴷ - ⵖⴰⵔ ⵜⴻⵎⵎⵓⵔⵜ ⵏ ⵜⴰⴵⴻⵙⵜ ⴷ ⵜⵉⵍⵉ ⵏ ⵍⵎⴻⵡⵜ, 
ⵖⴰⵔ ⵜⴻⵎⵎⵓⵔⵜ ⴷ ⵜⴰⴱⴰⵔⵛⴰⵏⵜ ⴰⵎ ⵜⵎⴻⴷⴷⵉⵜ, ⴰⵎ ⵜⵉⵍⵉ ⵏ ⵍⵎⴻⵡⵜ, ⵡⴰⵔ ⴷⵉⵏ ⵉⵜⵜⴱⵉⵏ ⵡⴰⵍⵓ, ⵎⴰⵏⵉ ⵜⴻⴳⴳⴰ ⵜⴼⴰⵡⵜ ⴰⵎ ⵜⵎⴻⴷⴷⵉⵜ. 
