﻿ⴰⵢⵓⴱ.
8.
ⵅⴰⵙ ⵓⵛⴰ ⵢⴰⵔⵔⴰ-ⴷⴷ ⴱⵉⵍⴷⴰⴷ, ⵡⴻⵏⵏⵉ ⴷⴷ-ⵢⵓⵙⵉⵏ ⵣⵉ ⵛⵓⵃⴰ, ⵉⵏⵏⴰ: 
ⵎⴻⵛⵃⴰⵍ ⵉ ⵖⴰ ⵜⴻⴽⴽⴻⴷ ⵜⴻⵙⵙⴰⵡⴰⵍⴻⴷ ⴰⵎⵎⵓ, ⴰⴷ ⵉⵍⵉⵏ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵏⵏⴻⵛ ⴰⵎⴻⵛⵏⴰⵡ ⴰⵙⴻⵎⵎⵉⴹ ⵏ ⵜⵀⴰⵔⵢⴰⴹⵜ. 
ⵎⴰ ⴰⴷ ⵉⵙⵙⴼⴰⵔⵖ ⴰⵔⴻⴱⴱⵉ ⵜⴰⵙⵖⴰⵔⵜ, ⵏⵉⵖ ⴰⴷ ⵉⵙⵙⴼⴰⵔⵖ ⵓⵎⵣⴻⵎⵎⴰⵔ ⵅ ⴽⵓⵍⵛⵉ ⵜⴰⵙⴻⴳⴷⴰ? 
ⵎⴰⵍⴰ ⴰⴽⵉⴷⴻⵙ ⵅⴹⴰⵏ ⵉⵃⴻⵏⵊⵉⵔⴻⵏ ⵏⵏⴻⵛ, ⴰⵇⴰ ⵉⵙⵙⴻⴽⴽ ⵉ-ⵜⴻⵏ ⴷⴻⴳ ⵓⴼⵓⵙ ⵏ ⵓⵅⴻⵟⵟⵓ ⵏⵙⴻⵏ. 
ⵎⴰⵍⴰ ⵛⴻⴽ ⵜⴰⵔⴻⵣⵣⵓⴷ ⴰⵔⴻⴱⴱⵉ ⵙ ⵊⵊⴻⵀⴷ, ⵜᵉⵜⵜⵣⴰⵡⴳⴻⴷ ⴰⵃⵉⵏⵏⵉ ⵖⴰⵔ ⵓⵎⵣⴻⵎⵎⴰⵔ ⵅ ⴽⵓⵍⵛⵉ, 
ⵎⴰⵍⴰ ⵜⴻⴵⵉⴷ ⴷ ⴰⵎⴻⵣⴷⴰⴳ ⵓ ⵜⵙⴻⴳⴳⵎⴻⴷ, ⵅⴻⵏⵏⵉ ⴰⴷ ⴰⵛ ⵉⵡⵛⴰ ⵜⴰⵢⵏⵉⵜ ⵏⵉⵛⴰⵏ, ⴰⴷ ⵉⵄⴷⴻⵍ ⵜⴰⵣⴻⴷⴷⵉⵖⵜ ⵏⵏⴻⵛ ⵉ ⵛⴻⴽ. 
ⵡⴰⵅⵅⴰ ⵜⴰⵎⴻⵣⵡⴰⵔⵓⵜ ⵏⵏⴻⵛ ⴰⴷ ⵜⵉⵍⵉ ⴷ ⵜⵓⵇⵍⵉⵍⵜ, ⵜⴰⵏⴻⴳⴳⴰⵔⵓⵜ ⵏⵏⴻⵛ ⴰⴷ ⵜⵉⵍⵉ ⵜⴻⵎⵖⴰⵔ ⴰⵟⵟⴰⵙ. 
ⵡⴰⵀ, ⵙⴻⵇⵙⴰ ⵅⴻⵏⵏⵉ ⵖⴰⵔ ⵊⵊⵉⵍ ⵉⵄⴷⵓⵏ, ⵃⴻⴽⴽⴰⵔ ⴷⵉ ⵍⴻⵊⴷⵓⴷ ⵏⵙⴻⵏ. 
ⵎⴰⵖⴰⵔ ⵏⴻⵛⵛⵉⵏ ⵏ ⵉⴹⴻⵏⵏⴰⴹ ⵡⴰⵀⴰ, ⵡⴰⵔ ⵏⴻⵙⵙⵉⵏ ⵡⴰⵍⵓ, ⵎⴰⵖⴰⵔ ⵓⵙⵙⴰⵏ ⵏⵏⴻⵖ ⵅ ⵜⴻⵎⵎⵓⵔⵜ ⴰⵎ ⵜⵉⵍⵉ. 
ⵎⴰ ⵡⴰⵔ ⵛⴻⴽ ⵙⵙⴻⵍⵎⵉⴷⴻⵏ ⵏⵉⵜⵏⵉ, ⵎⴰ ⵡⴰⵔ ⵖⴰⵔⴻⴽ ⵙⵙⵉⵡⵉⵍⴻⵏ, ⵎⴰ ⵡⴰⵔ ⴷⴷ-ⵙⵙⵓⴼⴼⵓⵖⴻⵏ ⴰⵡⴰⵍⴻⵏ ⵣⴻⴳ ⵡⵓⵍ ⵏⵙⴻⵏ? 
ⵎⴰ ⵉⵖⴻⵎⵎⵉ ⵓⵖⴰⵏⵉⵎ ⵏ ⴱⴰⴱⵉⵔⵓⵙ ⴱⵍⴰ ⵙⵙⴻⴱⵅⴻⵜ, ⵎⴰ ⵉⵎⴻⵇⵇⴰⵔ ⵓⵖⴰⵏⵉⵎ ⵖⴰⵔ ⵜⵎⴰ ⵏ ⵉⵖⵣⴰⵔ ⴱⵍⴰ ⴰⵎⴰⵏ? 
ⵅⵎⵉ ⵉⵜⵜⵏⴻⵡⵡⴰⵔ, ⵡⴰⵔ ⵉⵎⵊⴰⵔ ⵄⴰⴷ, ⵉⵜⵜⴰⵥⴻⵖ ⵇⴱⴻⵍ ⵎⴰⵔⵔⴰ ⴰⵔⴱⵉⵄ ⵏⵏⴻⵖⵏⵉ. 
ⴰⵎⵎⵓ ⵉ ⴵⴰⵏ ⵉⵎⴻⵙⵔⴰⵇ ⵏ ⵎⴰⵔⵔⴰ ⵉⵏⵏⵉ ⵉⵜⵜⵓⵏ ⴰⵔⴻⴱⴱⵉ, ⵍⴰⵢⴰⵙ ⵏ ⵓⵎⵏⴰⴼⴻⵇ ⴰⴷ ⵉⴼⵏⴰ.    
ⵎⵉⵏ ⵅⴻⴼ ⵉⵄⴻⵎⵎⴻⴷ, ⴰⴷ ⵉⵜⵜⵡⴰⵇⴹⴻⵄ, ⵎⵉⵏ ⵅⴻⴼ ⵉⵜⵜⵛⴰⵍ, ⴰⴷ ⴷⴷ-ⵉⴱⴰⵏ ⴷ ⴰⵅⵎⴰⵍ ⵏ ⵇⵓⵏⴷⵄⴰ. 
ⴰⴷ ⵉⵙⴻⵏⵏⴻⴷ ⵅ ⵜⴰⴷⴷⴰⵔⵜ ⵏⵏⴻⵙ, ⵎⴰⵛⴰ ⵡⴰⵔ ⵜᵉⵜⵜⴱⴻⴷⴷⵉ, ⴰⴷ ⴷⴰⵢⴻⵙ ⵉⵛⴻⴱⴱⴰⵔ, ⵎⴰⵛⴰ ⵡⴰⵔ ⵜᵉⵜⵜⵖⵉⵎⵉ ⵜⴱⴻⴷⴷ. 
ⵏⴻⵜⵜⴰ ⴷ ⴰⵣⵉⵣⴰ ⴷⵉ ⵜⴼⴰⵡⵜ ⵏ ⵜⴼⵓⵛⵜ, ⵍⴻⴼⵔⵓⵄ ⵏⵏⴻⵙ ⵉⵎⴻⵥⵢⴰⵏⴻⵏ ⵜⵜⴱⴻⵣⵣⴰⵄⴻⵏ ⵅ ⵡⴻⵃⵡⵉⵛ ⵏⵏⴻⵙ. 
ⵉⵥⴻⵡⵔⴰⵏ ⵏⵏⴻⵙ ⵎⵎⵓⴷⴻⵏ ⵉⵅⴻⴼ ⵏⵙⴻⵏ ⵅ ⵉⵊⵊ ⵏ ⵓⵄⵓⵔⵔⵉⵛ ⵏ ⵢⴻⵥⵔⴰ, ⵉⵜⵜⴰⵔⵊⴰ ⵉⵛⵜ ⵏ ⵜⴰⴷⴷⴰⵔⵜ ⵏ ⵢⴻⵥⵔⴰ ⵉ ⵢⵉⵅⴻⴼ ⵏⵏⴻⵙ. 
ⵎⴰⵍⴰ ⵏⴻⵜⵜⴰ ⵉⵇⴻⴵⴻⵄ ⵉ-ⵜ ⵣⴻⴳ ⵡⴻⵎⵛⴰⵏ ⵏⵏⴻⵙ, ⴰⴷ ⵜ ⵉⵏⴽⴰⵔ ⵡⴻⵎⵛⴰⵏ ⵏⵏⵉ, ⴰⴷ ⵢⵉⵏⵉ: ‘ⵄⴻⵎⵎⴰⵔⵚ ⵡⴰⵔ ⵛⴻⴽ ⵥⵔⵉⵖ!’ 
ⵅⵣⴰⵔ, ⵜⴰ ⵜⴻⴵⴰ ⴷ ⵍⴻⴼⵔⴰⵃⴻⵜ ⵏ ⵡⴻⴱⵔⵉⴷ ⵏ ⵜⵓⴷⴰⵔⵜ ⵏⵏⴻⵙ ⵓ ⵉⵏⵏⴻⵖⵏⵉ ⴰⴷ ⵖⴻⵎⵢⴻⵏ ⵣⴻⴳ ⵓⵛⴰⵍ. 
ⵅⵣⴰⵔ, ⴰⵔⴻⴱⴱⵉ ⵡⴰⵔ ⵉⵏⴻⵟⵟⴰⵔ ⵡⴻⵏⵏⵉ ⵉⴽⴻⵎⵍⴻⵏ ⵎⴰⵛⴰ ⵡⴰⵔ ⵉⵜⵜⵉⵛ ⴰⴼⵓⵙ ⵉ ⵉⵄⴻⴼⴼⴰⵏⴻⵏ. 
ⵄⴰⴷ ⴰⴷ ⵉⵛⵛⵓⵔ ⴰⵇⴻⵎⵎⵓⵎ ⵏⵏⴻⵛ ⵙ ⵜⴹⴻⵃⵃⴰⵛⵜ, ⵓ ⵉⵢⴻⵏⵛⵉⵛⴻⵏ ⵏⵏⴻⵛ ⵙ ⵓⵙⵍⵉⵡⵍⴻⵡ. 
ⵉⵎⴻⵛⵔⴰⵀ ⵏⵏⴻⵛ ⴰⴷ ⵢⴰⵔⴹⴻⵏ ⵍⴻⴼⴹⵉⵃⴻⵜ ⵓ ⴰⵇⵉⴹⵓⵏ ⵏ ⵉⵄⴻⴼⴼⴰⵏⴻⵏ ⵡⴰⵔ ⵉⵜⵜⵉⵍⵉ ⵄⴰⴷ. 
