﻿ⴰⵢⵓⴱ.
7.
ⵎⴰ ⵡⴰⵔ ⴷⵉⵏ ⵉⴵⵉ ⵓⵎⴻⵏⵖⵉ ⵉⵜⵜⵅⴻⵚⵚⴰ ⴰⴷ ⵜ ⵉⵎⵎⵏⴻⵖ ⴱⵏⴰⴷⴻⵎ ⵅ ⵜⴻⵎⵎⵓⵔⵜ, ⵎⴰ ⵡⴰⵔ ⴵⵉⵏ ⵡⵓⵙⵙⴰⵏ ⵏⵏⴻⵙ ⴰⵎ ⵡⵓⵙⵙⴰⵏ ⵏ ⵓⵛⴻⵡⵡⴰⵍ? 
ⴰⵎ ⵎⴰⵎⵎⴻⵛ ⵉⵜⵜⵎⴻⵥⵔⵉ ⵉⵎⵙⴻⵖ ⵖⴰⵔ ⵜⵉⵍⵉ, ⴰⵎⵎⵓ ⵉⵜⵜⵔⴰⵊⴰ ⵓⵛⴻⵡⵡⴰⵍ ⵍⵎⵓⵏⴻⵜ, 
ⵙ ⵓⵢⴰ ⴷⴻⵡⵍⴻⵏ ⵉⵢⵓⵔⴻⵏ ⵛⵛⵓⵔⴻⵏ ⵙ ⵓⴱⴰⵔⵔⴻⵇ ⴷ ⵜⴰⵙⵖⴰⵔⵜ ⵉⵏⵓ ⵓ ⴵⵢⴰⵍⵉ ⵛⵛⵓⵔⴻⵏⵜ ⵙ ⵜⴰⵎⴰⵔⴰ ⴱⴹⴰⵏ ⴰⵢⵉ ⵜⴻⵏⵜ. 
ⵅⵎⵉ ⵜⵜⴻⵣⵣⵍⴻⵖ ⵜⵜᵉⵟⵟⵚⴻⵖ, ⵇⵇⴰⵔⴻⵖ ‘ⵎⴻⵍⵎⵉ ⵣⴻⵎⵎⴰⵔⴻⵖ ⴰⴷ ⴽⴽⴰⵔⴻⵖ, ⵎⴻⵍⵎⵉ ⵉ ⵖⴰ ⵜⴻⵄⴷⵓ ⴵⵉⵍⴻⵜ?’ ⵊⵊⵉⵡⵏⴻⵖ ⵙ ⵍⴻⵃⵡⴻⵍ ⴰⵍ ⴷ ⵢⴻⴼⴼⵓ ⵍⵃⴰⵍ. 
ⴰⵔⵔⵉⵎⴻⵜ ⵉⵏⵓ ⵜⵢⴰⵔⴹ ⴷⴻⴳ ⵉⴽⴻⵛⵛⴰⵡⴻⵏ ⵓ ⴷⵉ ⵜⴻⵇⵛⵓⵔⵉⵏ ⵏ ⵓⵛⴰⵍ, ⵜⵉⵍⵎⴻⵛⵜ ⵉⵏⵓ ⵜⵇⴻⵟⵟⴰ ⵓ ⵜᵉⵜⵜⴳⴻⵢⵢⴻⵃ. 
ⴷⴻⵖⵢⴰ ⵅ ⵓⵎⴻⴽⴽⵓⴽ ⵏ ⵓⵅⴻⵢⵢⴰⴹ ⵄⴻⴷⴷⵓⵏ ⵡⵓⵙⵙⴰⵏ ⵉⵏⵓ, ⵄⴻⴷⴷⵓⵏ ⴱⵍⴰ ⵍⴰⵢⴰⵙ. 
ⵄⵇⴻⵍ, ⴰⵇⴰ ⵜⵓⴷⴰⵔⵜ ⵉⵏⵓ ⴷ ⴰⵙⵓⴹⵉ ⵏ ⵏⵏⴻⴼⵙ ⵡⴰⵀⴰ ⵓ ⵜⵉⵟⵟ ⵉⵏⵓ ⵡⴰⵔ ⵜⵥⴰⵔⵔ ⵄⴻⵎⵎⴰⵔⵚ ⵄⴰⴷ ⵎⵉⵏ ⵉⵚⴻⴱⵃⴻⵏ. 
ⵜⵉⵟⵟ ⵏ ⵡⴻⵏⵏⵉ ⴷ ⴰⵢⵉ ⵉⵜⵜⵡⴰⵍⴰⵏ, ⵡⴰⵔ ⴷ ⴰⵢⵉ ⵜⵥⴰⵔⵔ ⵄⴰⴷ. ⵜⵉⵟⵟⴰⵡⵉⵏ ⵏⵏⴻⵛ ⴰⴷ ⵅⴰⴼⵉ ⵉⵍⵉⵏⵜ, ⵎⴰⵛⴰ ⵏⵏⴻⵛ ⵡⴰⵔ ⴷⴰ ⵜⵜⵉⵍⵉⵖ ⵄⴰⴷ. 
ⴰⵎ ⵎⴰⵎⵎⴻⵛ ⵉⵜⵜⴷⵓⵔⵔⵓⵇ ⵓⵙⴻⵢⵏⵓ, ⵉⵄⴻⴷⴷⵓ, ⴰⵎⵎⵓ ⵉ ⵖⴰ ⵉⵀⵡⴰ ⴷⵉ ⵍⴰⵅⴰⵔⵜ, ⵡⴰⵔ ⵣⵣⴰⵢⴻⵙ ⴷⴷ-ⵉⵜⵜⴳⴻⵄⵄⵉⴷ ⵄⴰⴷ. 
ⵄⴻⵎⵎⴰⵔⵚ ⵡⴰⵔ ⴷⴷ-ⵉⵜⵜⵄⵉⵇⵇⵉⴱ ⵖⴰⵔ ⵜⴰⴷⴷⴰⵔⵜ ⵏⵏⴻⵙ, ⵄⴻⵎⵎⴰⵔⵚ ⵡⴰⵔ ⵅⴰⵙ ⵉⵜⵜⴻⵄⵇⵉⵍ ⵡⴻⵎⵛⴰⵏ ⵏⵏⴻⵙ. 
ⴰⵎⵎⵓ ⵉ ⵡⴰⵔ ⵜⵜⴻⵇⵇⵏⴻⵖ ⴰⵇⴻⵎⵎⵓⵎ ⵉⵏⵓ, ⴰⴷ ⵙⵙⵉⵡⵍⴻⵖ ⴷⵉ ⵍⴻⵃⵚⴰⵔⴻⵜ ⵏ ⴱⵓⵃⴱⴻⵍ ⵉⵏⵓ, ⴰⴷ ⵛⴻⵜⵛⵉⵖ ⴷⵉ ⵜⴰⵔⵣⵓⴳⵉ ⵏ ⵍⴻⵄⵎⴰⵔ ⵉⵏⵓ. 
ⵎⴰ ⵏⴻⵛⵛ ⴷ ⵍⴻⴱⵃⴰⵔ ⵏⵉⵖ ⴷ ⵍⵀⴰⵢⵛⴻⵜ, ⴰⵇⴰ ⵛⴻⴽ ⵜⴻⵙⵙⴱⴻⴷⴷⴻⴷ ⵅⴰⴼⵉ ⴰⵄⴻⵙⵙⴰⵙ? 
ⵎⴰⵍⴰ ⵏⵏⵉⵖ ⵏⴻⵛⵛ: ‘ⵜⴰⵙⵙⵓⵜ ⴰⴷ ⴰⵢⵉ ⵜⵄⴻⵣⵣⴰ, ⵇⴰⵎⴰ ⵉⵏⵓ ⴰⴷ ⵅⴰⴼⵉ ⵜⴻⵙⵙⴻⵀⵡⴻⵏ ⴰⵛⴻⵜⵛⵉ ⵉⵏⵓ!’, 
ⴰⵎⵎⵓ ⵉⴷ ⴰⵢⵉ ⵜᵉⵜⵜⵖⴻⵣⵣⵉⴷ ⵙ ⵜⵉⵔⵊⵉⵡⵉⵏ ⵓ ⵙ ⵉⵡⴻⵃⵃⴰⵏ ⵜⴻⵙⵙⴰⴳⴳⵯⴰⴷⴻⴷ ⴰⵢⵉ, 
ⴰⵍⴰⵎⵉ ⵉⴷⵡⴻⵍ ⵍⴻⵄⵎⴰⵔ ⵉⵏⵓ ⵉⵜⵜⵉⵅⴹⴰⵔ ⴰⵊⴻⵢⵢⴻⴼ, ⵉⵜⵜⵉⵅⴹⴰⵔ ⵍⵎⴻⵡⵜ ⵅ ⵢⴻⵢⵙⴰⵏ ⵉⵏⵓ. 
ⵏⴻⵛⵛ ⵜⵜⵄⵉⴼⴼⵉⵖ ⵎⴰⵏ ⴰⵢⴰ, ⵡⴰⵔ ⵜⵜⴻⵅⵙⴻⵖ ⴰⴷ ⴷⴷⴰⵔⴻⵖ ⵉ ⵍⴻⴱⴷⴰ. ⴰⵔⵅⵓ ⵣⵣⴰⵢⵉ, ⵎⴰⵖⴰⵔ ⵓⵙⵙⴰⵏ ⵉⵏⵓ ⴰⵎ ⴰⵙⵓⴹⵉ ⵏ ⵏⵏⴻⴼⵙ ⵡⴰⵀⴰ. 
ⵎⵉⵏ ⵉⵄⵏⴰ ⴱⵏⴰⴷⴻⵎ ⴰⵇⴰ ⵛⴻⴽ ⵜⵃⴻⵙⵙⴱⴻⴷ ⵜ ⴷ ⴰⵎⴻⵇⵇⵔⴰⵏ ⴰⵎⵎⵓ, ⴰⵇⴰ ⵜⴻⵍⵀⵉⴷ ⴰⴽⵉⴷⴻⵙ ⵙ ⵡⵓⵍ ⵏⵏⴻⵛ? 
ⴰⵇⴰ ⵛⴻⴽ ⵜⴰⵔⴻⵣⵣⴼⴻⴷ ⵖⴰⵔⴻⵙ ⵇⴰⵄ ⴰⵜⴻⴼⴼⵓ, ⵜⵇⴻⴵⴱⴻⴷ ⵉ-ⵜ ⵇⴰⵄ ⵜⴰⵣⴻⵃⵣⵉⵀⵜ? 
ⵎⴻⵛⵃⴰⵍ ⵄⴰⴷ ⵡⴰⵔ ⵣⵣⴰⵢⵉ ⵜᵉⵜⵜⴻⴽⴽⵙⴻⴷ ⵜⵉⵟⵟⴰⵡⵉⵏ, ⵡⴰⵔ ⴷ ⴰⵢⵉ ⵜⴰⵔⴻⵅⵅⵓⴷ ⵃⵉⵎⴰ ⴰⴷ ⵙⵙⵖⴻⵍⵢⴻⵖ ⵉⴽⵓⴼⴼⴰⵏ ⵉⵏⵓ? 
ⵎⴰ ⵅⴹⵉⵖ? ⵎⵉⵏ ⴷ ⴰⵛ ⵉ ⵖⴰ ⴳⴳⴻⵖ ⵉ ⵛⴻⴽ, ⵉ ⵛⴻⴽ ⴰ-ⵢ-ⴰⵄⴻⵙⵙⴰⵙ ⵏ ⴱⵏⴰⴷⴻⵎ? ⵎⴰⵢⴻⵎⵎⵉ ⴷ ⴰⵢⵉ ⵜⴻⵙⵙⴱⴻⴷⴷⴻⴷ ⴷ ⵜⴰⵃⵊⵓⵔⵜ ⵣⵣⴰⵜⴻⴽ, ⵓ ⴷⴻⵡⵍⴻⵖ ⴷ ⴷⴷⵇⴻⵍ ⵉ ⵢⵉⵅⴻⴼ ⵉⵏⵓ? 
ⵎⴰⵢⴻⵎⵎⵉ ⵡⴰⵔ ⴷ ⴰⵢⵉ ⵜⵖⴻⴼⴼⴰⵔⴻⴷ ⴰⵅⴻⵟⵟⵓ ⵉⵏⵓ, ⵓ ⵡⴰⵔ ⵜⵄⴻⴷⴷⵓⴷ ⵅ ⵍⵎⵓⵄⵚⵉⵢⵢⴻⵜ ⵉⵏⵓ? ⵎⴰⵖⴰⵔ ⴷⴻⵖⵢⴰ ⴰⴷ ⵣⵣⵍⴻⵖ ⴷⵉ ⵜⵄⴻⵊⵊⴰⵊⵜ ⵓ ⵛⴻⴽ ⴰⴷ ⵅⴰⴼⵉ ⵜⴰⵔⵣⵓⴷ, ⵎⴰⵛⴰ ⵡⴰⵔ ⵜⵜⵉⵍⵉⵖ ⵄⴰⴷ. 
