﻿ⵄⵉⵥⵔⴰ.
4.
ⵓⵎⵉ ⵙⵍⴻⵏ ⵉⵖⵔⵉⵎⴻⵏ ⵏ ⵢⴰⵀⵓⴷⴰ ⴷ ⴱⵉⵏⵢⴰⵎⵉⵏ, ⴰⵇⴰ ⴰⵢⵜ ⵏ ⵍⵎⴻⵏⴼⴰ ⵜⵓⵖⴰ ⴱⴻⵏⵏⴰⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵉ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, 
ⵓⵙⵉⵏ-ⴷⴷ ⵏⵉⵜⵏⵉ ⵖⴰⵔ ⵣⴰⵔⵓⴱⴱⴰⴱⵉⵍ ⴷ ⵉⵣⴻⴵⵉⴼⴻⵏ ⵅ ⵉⴱⴰⴱⴰⵜⴻⵏ ⵏ ⵍⴰⴵⴰⵜ ⵓⵛⴰ ⵏⵏⴰⵏ ⴰⵙⴻⵏ: “ⴻⵊⵊ ⴰⵏⴻⵖ ⴰⴷ ⵏⴻⴱⵏⴰ ⵊⵎⵉⵄ ⴰⴽⵉⴷⵡⴻⵎ, ⵎⵉⵏⵣⵉ ⵓⵍⴰ ⴷ ⵏⴻⵛⵛⵉⵏ ⵏⴰⵔⴻⵣⵣⵓ ⴰⵔⴻⴱⴱⵉ, ⴰⵎ ⴽⴻⵏⵏⵉⵡ, ⵎⴰⵖⴰⵔ ⵏⴻⵛⵛⵉⵏ ⵜⵓⵖⴰ ⵏⵇⴻⴷⴷⴻⵎ ⵜⵉⵖⴰⵔⵚⵉ ⵣⴻⴳ ⵡⵓⵙⵙⴰⵏ ⵏ ⴰⵙⴰⵔⵃⴰⴷⴷⵓⵏ, ⴰⵊⴻⴵⵉⴷ ⵏ ⴰⵛⵛⵓⵔ, ⵡⴻⵏⵏⵉ ⴷ ⴰⵏⴻⵖ ⴷⴰ ⵉⵙⵙⴳⴻⵄⵄⴷⴻⵏ.” 
ⵎⴰⵛⴰ ⵣⴰⵔⵓⴱⴱⴰⴱⵉⵍ ⴷ ⵢⴰⵀⵓⵛⴰⵄ ⴷ ⵉⵣⴻⴵⵉⴼⴻⵏ ⵉⵇⵇⵉⵎⴻⵏ ⵊⴰⵔ ⵉⴱⴰⴱⴰⵜⴻⵏ ⵏ ⵉⵙⵔⴰⵉⵍ, ⵏⵏⴰⵏ ⴰⵙⴻⵏ: “ⵡⴰⵔ ⵉⴵⵉ ⵉ ⴽⴻⵏⵏⵉⵡ ⴷ ⵏⴻⵛⵛⵉⵏ ⵎⴰⵃⴻⵏⴷ ⴰⴷ ⵏⴻⴱⵏⴰ ⵊⵎⵉⵄ ⵉⵛⵜ ⵏ ⵜⴰⴷⴷⴰⵔⵜ ⵉ ⴰⵔⴻⴱⴱⵉ ⵏⵏⴻⵖ. ⵏⴻⵛⵛⵉⵏ ⵡⴻⵃⵃⴷⵏⴻⵖ ⴰⴷ ⵜⵜ ⵏⴻⴱⵏⴰ ⵉ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⴰⵎ ⵎⴰⵎⵎⴻⵛ ⵉ ⴷ ⴰⵏⴻⵖ ⵢⵓⵎⵓⵔ ⵓⵊⴻⴵⵉⴷ ⴽⵓⵔⴰⵛ, ⴰⵊⴻⴵⵉⴷ ⵏ ⵍⴼⵓⵔⵙ.” 
ⵓⵛⴰ ⵉⵎⵙⴰⵔ, ⴰⵇⴰ ⵍⴳⴻⵏⵙ ⵏ ⵜⴻⵎⵎⵓⵔⵜ ⵙⵙⴰⵔⵅⵓⵏ ⵉⴼⴰⵙⵙⴻⵏ ⵏ ⵍⴳⴻⵏⵙ ⵏ ⵢⴰⵀⵓⴷⴰ ⵓⵛⴰ ⵙⵙⵉⴳⴳⵯⵉⴷⴻⵏ ⵜⴻⵏ ⵅ ⵍⴻⴱⵏⵉ. 
ⵛⵔⴰⵏ ⵉⵎⵛⴰⵡⴰⵔⴻⵏ ⴹⵉⴷⴷ ⵏⵙⴻⵏ, ⵎⴰⵃⴻⵏⴷ ⴰⴷ ⵙⵙⴱⴻⵟⵟⵍⴻⵏ ⴰⵏⵡⴰⵢ ⵏⵙⴻⵏ, ⵓ ⴰⵢⴰ ⵉⴽⴽⴰ ⵎⴰⵔⵔⴰ ⵓⵙⵙⴰⵏ ⵏ ⴽⵓⵔⴰⵛ, ⴰⵊⴻⴵⵉⴷ ⵏ ⵍⴼⵓⵔⵙ, ⴰⵍ ⵜⴰⴳⴻⵍⴷⴰ ⵏ ⴷⴰⵔⵉⵢⵓⵙ, ⴰⵊⴻⴵⵉⴷ ⵏ ⵍⴼⵓⵔⵙ. 
ⵓⵎⵉ ⵜⵓⵖⴰ ⴰⵃⴰⵛⵡⵉⵔⵓⵛ ⴷ ⴰⵊⴻⴵⵉⴷ, ⵖⴰⵔ ⴱⴻⴷⴷⵓ ⵏ ⵜⴳⴻⵍⴷⴰ ⵏⵏⴻⵙ, ⵓⵔⴰⵏ ⵏⵉⵜⵏⵉ ⵉⵊⵊ ⵏ ⵓⵛⴻⵜⵛⵉ ⴹⵉⴷⴷ ⵉ ⵉⵎⴻⵣⴷⴰⵖ ⵏ ⵢⴰⵀⵓⴷⴰ ⴷ ⵓⵔⵛⴰⵍⵉⵎ. 
ⴷⴻⴳ ⵡⵓⵙⵙⴰⵏ ⵏ ⴰⵔⵜⴰⵃⵛⴰⵙⵜⴰ ⵢⵓⵔⴰ ⴱⵉⵛⵍⴰⵎ ⴰⴽ-ⴷ ⵎⵉⵜⵔⴰⴷⴰⵜ ⴷ ⵟⴰⴱⴰⵢⵉⵍ ⴷ ⵉⵄⵛⵉⵔⴻⵏ ⵏⵏⴻⵙ ⵉⵏⵏⴻⵖⵏⵉ, ⵉ ⵓⵊⴻⴵⵉⴷ ⴰⵔⵜⴰⵃⵛⴰⵙⵜⴰ, ⴰⵊⴻⴵⵉⴷ ⵏ ⵍⴼⵓⵔⵙ. ⵜⵓⵖⴰ ⵜⴰⴱⵔⴰⵜ ⵜⵓⵔⴰ ⵙ ⵜⵉⵔⴰ ⵏ ⵉⵍⴻⵙ ⵏ ⵜⵔⴰⵎⵉⵜ ⵓ ⵜⵓⵖⴰ ⵜⴰⵔⵊⵎⴻⵏ ⵜⵜ ⵄⴰⵡⴻⴷ ⵖⴰⵔ ⵜⵔⴰⵎⵉⵜ. 
ⵔⴰⵃⵓⵎ, ⴰⵎⵙⵓⴼⴼⴻⵖ ⵏ ⵍⴻⵃⴽⴰⵎⴰⵜ, ⴷ ⵓⵎⴰⵔⵉⵔ ⵛⵉⵎⵛⴰⵢ ⵓⵔⵉⵏ ⵉⵛⵜ ⵏ ⵜⴻⴱⵔⴰⵜ ⵉ ⵓⵊⴻⴵⵉⴷ ⴰⵔⵜⴰⵃⵛⴰⵙⵜⴰ ⴹⵉⴷⴷ ⵉ ⵓⵔⵛⴰⵍⵉⵎ, ⵜⴻⵏⵏⵉ ⴷⴰⵢⴻⵙ ⵢⵓⵔⴰ ⴰⵎⵎⵓ: 
“ⵔⴰⵃⵓⵎ, ⴰⵎⵙⵓⴼⴼⴻⵖ ⵏ ⵍⴻⵃⴽⴰⵎⴰⵜ, ⴷ ⵓⵎⴰⵔⵉⵔ ⵛⵉⵎⵛⴰⵢ ⴷ ⵉⵏⵏⵉ ⵉⵇⵇⵉⵎⴻⵏ ⵣⴻⴳ ⵉⵇⵔⵉⵏⴻⵏ ⵏⵙⴻⵏ ⴷⵉ ⵍⵅⴻⴷⵎⴻⵜ, ⵍⵇⵓⴹⴰⵜ, ⵉⵎⵅⴰⵣⵏⵉⵢⵢⴻⵏ, ⴰⵢⵜ ⵏ ⵛⵛⴻⵏⵄⴻⵜ ⴷ ⴰⵢⵜ ⵏ ⵍⴼⵓⵔⵙ ⴷ ⴰⵢⵜ ⵏ ⵉⵔⵉⵅ ⴷ ⴱⴰⴱⵉⵍⵓⵏ ⴷ ⵛⵓⵛⴰⵏ, ⴰⵇⴰ ⴰⵜⴻⵏ ⴷ ⵉⵄⵉⵍⴰⵎⵉⵢⵢⴻⵏ, 
ⴷ ⵛⵛⵓⵄⵓⴱ ⵏⵏⴻⵖⵏⵉ, ⵉⵏⵏⵉ ⵉⵡⵢⵉ ⵜⴻⵏ ⴰⵙⵏⴰⴼⴼⴰⵔ ⴰⵎⴻⵇⵇⵔⴰⵏ ⴰⵎⵛⴻⵏⵏⴻⵄ ⵖⴰⵔ ⵍⵎⴻⵏⴼⴰ ⵓ ⵉⵙⵙⴻⵣⴷⴻⵖ ⵉ-ⵜⴻⵏ ⴷⵉ ⵜⴻⵏⴷⵉⵏⵜ ⵏ ⵙⴰⵎⴰⵔⵢⴰ ⵓ ⴷⵉ ⵊⵊⵉⵀⴻⵜ ⵉⵇⵇⵉⵎⴻⵏ ⵅ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵍⴼⵓⵔⴰⵟ ... ⵓⵛⴰ ⵄⴰⴷ.” 
ⵜⴰ ⴷ ⵜⵉⵍⴻⵎⵜ ⵏ ⵜⴻⴱⵔⴰⵜ ⵉ ⴷⴷ-ⵙⵙⴻⴽⴽⴻⵏ ⵏⵉⵜⵏⵉ ⵉ ⵓⵊⴻⴵⵉⴷ ⴰⵔⵜⴰⵃⵛⴰⵙⵜⴰ: “ⵉⵎⵙⴻⵅⵅⴰⵔⴻⵏ ⵏⵏⴻⵛ, ⵉⵔⵢⴰⵣⴻⵏ ⵏⵏⵉ ⵉⴵⴰⵏ ⵅ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵍⴼⵓⵔⴰⵟ ... ⵓⵛⴰ ⵄⴰⴷ.” 
“ⵉⵍⵉ ⴰⴷ ⵉⵙⵙⴻⵏ ⵓⵊⴻⴵⵉⴷ ⴰⵇⴰ ⵓⴷⴰⵢⴻⵏ ⵉ ⴷⴷ-ⵉⴳⴻⵄⵄⴷⴻⵏ ⵣⵉ ⵖⴰⵔⴻⴽ, ⴰⵇⴰ ⵉⵡⴹⴻⵏ-ⴷⴷ ⵖⴰⵔⵏⴻⵖ ⵖⴰⵔ ⵓⵔⵛⴰⵍⵉⵎ ⵓⵛⴰ ⵏⵉⵜⵏⵉ ⴰⵇⴰ ⴱⴻⵏⵏⴰⵏ ⵜⴰⵏⴷⵉⵏⵜ ⵏⵏⵉ ⵉⵖⴻⵡⵡⵖⴻⵏ ⵜⴰⵄⴻⴼⴼⴰⵏⵜ, ⴰⵇⴰ ⵜⵜⴽⴻⵎⵎⴰⵍⴻⵏ ⵍⴻⵃⵢⵓⴹ ⵓ ⵄⴻⴷⴷⵍⴻⵏ ⴷⵙⵓⵙⴰ. 
ⵅⴻⵏⵏⵉ ⵍⴻⵅⵅⵓ, ⵉⵜⵜⵅⴻⵚⵚⴰ ⴰⴷ ⵉⵙⵙⴻⵏ ⵓⵊⴻⴵⵉⴷ, ⵎⴰⵍⴰ ⵜⴰⵏⴷⵉⵏⵜ ⵏⵏⵉ ⴰⴷ ⵜᵉⵜⵜⵡⴰⵙⵙⴱⴻⴷⴷ ⵜⵡⴰⵍⴰ ⵏⵏⴻⵖⵏⵉ ⵓ ⵍⴻⵃⵢⵓⴹ ⴰⴷ ⵜⵜⵡⴰⴽⴻⵎⵎⵍⴻⵏ, ⴰⵇⴰ ⵏⴻⵜⵜⴰⵜ ⵡⴰⵔ ⵜᵉⵜⵜⵉⵛ ⵍⵊⵉⵣⵢⴰ ⵍⴰ ⴷ ⵍⴻⵄⵛⵓⵔ ⵓⵍⴰ ⴷ ⴹⴹⴰⵔⵉⴱⴰ ⵏ ⵡⴻⴱⵔⵉⴷ ⵓⵛⴰ ⴰⵎⵎⵓ ⵉ ⵖⴰ ⵉⵙⵙⴻⵅⵙⴰⵔ ⴰⵔⴱⴻⵃ ⵏ ⵉⵊⴻⴵⵉⴷⴻⵏ. 
ⵅⴻⵏⵏⵉ ⵍⴻⵅⵅⵓ, ⵓⵎⵉ ⵏⴻⵛⵛⵉⵏ ⵏⴻⵜⵜⵎⴻⴵⴰⵃ ⵎⴰⵛⵛⴰ ⵏⵏⴻⵖ ⵙ ⵜⵎⴻⴵⴰⵃⵜ ⵏ ⵍⴻⵇⵚⴰⵔ ⵓ ⵡⴰⵔ ⴷ ⴰⵏⴻⵖ ⴷⴷ-ⵜⵓⵙⵉ ⵎⴰⵍⴰ ⵏⴻⵛⵛⵉⵏ ⵏⵅⴻⵣⵣⴰⵔ ⵓⵎⵉ ⵉⵜⵜⵡⴰⵙⵙⴱⴻⵀⴷⴻⵍ ⵓⵊⴻⴵⵉⴷ, ⵅ ⵓⵢⴻⵏⵏⵉ ⵏⴻⵙⵙⴻⴽⴽ-ⴷⴷ ⵜⴰⴱⵔⴰⵜ-ⴰ ⵓⵛⴰ ⵏⴻⵙⵙⴰⵔⴳⴻⴱ ⴰⵢⴰ ⵉ ⵓⵊⴻⴵⵉⴷ, 
ⵃⵉⵎⴰ ⴰⴷ ⴰⵔⵣⵓⵏ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵏ ⵍⴻⵊⴷⵓⴷ ⵏⵡⴻⵎ ⵓⵛⴰ ⴰⴷ ⵜⴰⴼⴻⴷ ⴷⴻⴳ ⵡⴻⴷⵍⵉⵙ ⵏ ⵉⵎⴻⵣⵔⵓⵢⴻⵏ ⵓⵛⴰ ⴰⴷ ⵣⵣⴰⵢⴻⵙ ⵜⴻⵙⵙⵏⴻⴷ ⴰⵇⴰ ⵜⴰⵏⴷⵉⵏⵜ-ⴰ ⴷ ⵉⵛⵜ ⵏ ⵜⴻⵏⴷⵉⵏⵜ ⵉⵖⴻⵡⵡⵖⴻⵏ, ⵜⵉⵡⵉ-ⴷⴷ ⴰⵔⵔⵥⵉⵢⵢⴻⵜ ⵉ ⵉⵊⴻⴵⵉⴷⴻⵏ ⵓ ⵉ ⵍⵄⴰⵎⴰⵍⴰⵜ ⵓ ⵣⴻⴳ ⵡⴻⵛⵃⴰⵍ ⵓⵢⴰ ⵙⵙⴻⴽⴽⴰⵔⴰⵏ ⴷⴰⵢⴻⵙ ⴰⵖⴻⵡⵡⴻⵖ. ⵙ ⵓⵢⴻⵏⵏⵉ ⵜᵉⵜⵜⵡⴰⵀⴷⴻⵎ ⵜⴻⵏⴷⵉⵏⵜ-ⴰ. 
ⵏⴻⵛⵛⵉⵏ ⵏⴻⵙⵙⴰⵔⴳⴻⴱ ⴰⵊⴻⴵⵉⴷ, ⴰⵇⴰ, ⵎⴰⵍⴰ ⴰⴷ ⵜᵉⵜⵜⵡⴰⴱⵏⴰ ⵜⴻⵏⴷⵉⵏⵜ-ⴰ ⵄⴰⵡⴻⴷ ⵓⵛⴰ ⴰⴷ ⵜⵜⵡⴰⴽⴻⵎⵎⵍⴻⵏ ⵍⴻⵃⵢⵓⴹ ⵏⵏⴻⵙ, ⵅⴻⵏⵏⵉ ⵡⴰⵔ ⵖⴰⵔⴻⴽ ⵜⵜᵉⵜⵜⵉⵍⵉ ⵛⴰ ⵜⴻⵚⵖⴰⵔⵜ ⵄⴰⴷ ⵅ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵍⴼⵓⵔⴰⵟ.” 
ⵉⵙⵙⴻⴽⴽ ⵓⵊⴻⴵⵉⴷ ⵜⴰⵎⵡⴰⵔⵔⵉⵜ ⵉ ⵔⴰⵃⵓⵎ, ⴰⵎⵙⵓⴼⴼⴻⵖ ⵏ ⵍⴻⵃⴽⴰⵎⴰⵜ, ⵓ ⵉ ⵓⵎⴰⵔⵉⵔ ⵛⵉⵎⵛⴰⵢ ⴷ ⵉⵏⵏⵉ ⵉⵇⵇⵉⵎⴻⵏ ⵣⴻⴳ ⵉⵇⵔⵉⵏⴻⵏ ⵏⵙⴻⵏ ⴷⵉ ⵍⵅⴻⴷⵎⴻⵜ ⵉⵏⵏⵉ ⵉⵣⴻⴷⴷⵖⴻⵏ ⴷⵉ ⵙⴰⵎⴰⵔⵢⴰ, ⵓ ⵓⵍⴰ ⵉ ⵢⵉⵏⵏⵉ ⵉⵇⵇⵉⵎⴻⵏ ⵣⴻⴷⴷⵖⴻⵏ ⵅ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵍⴼⵓⵔⴰⵟ: “ⵍⴻⵀⵏⴰ! ... ⵓⵛⴰ ⵄⴰⴷ.” 
“ⵜⴰⴱⵔⴰⵜ ⵉ ⴷ ⴰⵏⴻⵖ ⴷⴷ-ⵜⴻⵙⵙⴻⴽⴽⴻⵎ, ⴰⵇⴰ ⵜᵉⵜⵜⵡⴰⵖⴰⵔ ⵅⴰⴼⵉ ⵏⵉⵛⴰⵏ. 
ⵓⵛⴰ ⴰⵡⴰⵔⵏⵉ ⵍⴰⵎⵉ ⵓⵎⵓⵔⴻⵖ ⴰⵢⴰ, ⵜᵉⵜⵜⵡⴰⴳⴳ ⵉⵛⵜ ⵏ ⵜⴰⵔⴻⵣⵣⵓⵜ ⵓⵛⴰ ⵓⴼⵉⵏ ⴰⵇⴰ ⵜⴰⵏⴷⵉⵏⵜ-ⴰ ⵜⵖⴻⵡⵡⴻⵖ ⵅ ⵉⵊⴻⴵⵉⴷⴻⵏ ⵣⴻⴳ ⵡⴻⵛⵃⴰⵍ ⵓⵢⴰ ⵓⵛⴰ ⵙⵙⴻⴽⴽⴰⵔⴻⵏ ⴷⴰⵢⴻⵙ ⵍⴻⴱⴷⴰ ⴰⵖⴻⵡⵡⴻⵖ ⴷ ⵍⴻⵃⵡⴻⵍ. 
ⵄⴰⵡⴻⴷ ⵜⵓⵖⴰ ⴷⵉⵏ ⵉⵊⴻⴵⵉⴷⴻⵏ ⵉⵎⴻⵇⵇⵔⴰⵏⴻⵏ ⵅ ⵓⵔⵛⴰⵍⵉⵎ, ⵉⵏⵏⵉ ⵜⵓⵖⴰ ⵉⵃⴻⴽⴽⵎⴻⵏ ⴷⵉ ⵎⴰⵔⵔⴰ ⵊⵊⵡⴰⵢⴻⵀ ⵅ ⵓⵊⴻⵎⵎⴰⴹ ⵏ ⵉⵖⵣⴰⵔ ⵏ ⵍⴼⵓⵔⴰⵟ ⴰⵍⴰⵎⵉ ⵜᵉⵜⵜⵡⴰⵅⴻⴵⴻⵚ ⴰⵙⴻⵏ ⵍⵊⵉⵣⵢⴰ ⴷ ⵍⴻⵄⵛⵓⵔ ⴷ ⴹⴹⴰⵔⵉⴱⴰ ⵏ ⵡⴻⴱⵔⵉⴷ. 
ⵉⵡⴰ, ⵍⴻⵅⵅⵓ ⵓⵎⵓⵔⴻⵎ ⴰⴷ ⵙⵙⴱⴻⴷⴷⴻⵎ ⵉⵔⵢⴰⵣⴻⵏ-ⴰ. ⵜⴰⵏⴷⵉⵏⵜ ⵡⴰⵔ ⵜⴱⴻⵏⵏⵉ ⵜⵡⴰⵍⴰ ⵏⵏⴻⵖⵏⵉⵜ ⴰⵍ ⵖⴰ ⵉⵜⵜⵡⴰⵙⵙⵓⴼⴼⴻⵖ ⵣⵣⴰⵢⵉ ⵍⵓⵎⵓⵔ ⵉ ⵓⵢⴰ. 
ⵖⴰⵔⵡⴻⵎ ⴰⵇⴰ ⴰⴷ ⵜⴰⵔⵅⵓⵎ ⵣⵉ ⵜⵎⴻⵙⵍⴰⵛⵜ-ⴰ. ⵎⴰⵢⴻⵎⵎⵉ ⵖⴰ ⵜⴻⵎⵖⴰⵔ ⴷⵔⵓⵛⵜ ⵄⴰⴷ ⵉ ⵜⵅⴻⵙⵙⴰⵔⵜ ⵏ ⵉⵊⴻⴵⵉⴷⴻⵏ?” 
ⵍⴰⵎⵉ ⵜᵉⵜⵜⵡⴰⵖⴰⵔ ⵜⴻⴱⵔⴰⵜ ⵏ ⵓⵊⴻⴵⵉⴷ ⴰⵔⵜⴰⵃⵛⴰⵙⵜⴰ ⵉ ⵔⴰⵃⵓⵎ ⴷ ⵛⵉⵎⵛⴰⵢ, ⴰⵎⴰⵔⵉⵔ, ⴷ ⵉⵇⵔⵉⵏⴻⵏ ⵏⵙⴻⵏ ⴷⵉ ⵍⵅⴻⴷⵎⴻⵜ, ⵓⵢⵓⵔⴻⵏ ⵉⵏⴰ ⵙ ⵜⴰⵣⵍⴰ ⵖⴰⵔ ⵓⵔⵛⴰⵍⵉⵎ, ⵖⴰⵔ ⵡⵓⴷⴰⵢⴻⵏ ⵓⵛⴰ ⵙⵙⴱⴻⴷⴷⴻⵏ ⵜⴻⵏ ⵣⵉ ⵍⵅⴻⴷⵎⴻⵜ ⵏⵙⴻⵏ ⵙ ⵓⵖⵉⵍ ⵓ ⵙ ⵍⵅⵓⵏⵛⴻⵜ. 
ⵅⴻⵏⵏⵉ ⵜⴱⴻⴷⴷ ⵍⵅⴻⴷⵎⴻⵜ ⵉ ⵜⴰⴷⴷⴰⵔⵜ ⵏ ⴰⵔⴻⴱⴱⵉ ⵡⴻⵏⵏⵉ ⵉⵣⴻⴷⴷⵖⴻⵏ ⴷⵉ ⵓⵔⵛⴰⵍⵉⵎ ⵓⵛⴰ ⵉⵇⵇⵉⵎ ⵉⴱⴻⴷⴷ ⴰⵍ ⴰⵙⴻⴳⴳⵯⴰⵙ ⵡⵉⵙⵙ ⵜⵏⴰⵢⴻⵏ ⵏ ⵜⴳⴻⵍⴷⴰ ⵏ ⴷⴰⵔⵉⵢⵓⵙ, ⴰⵊⴻⴵⵉⴷ ⵏ ⵍⴼⵓⵔⵙ. 
