﻿1 ⵉⵊⴻⴵⵉⴷⴻⵏ.
17.
ⵉⵍⵉⵢⴰ, ⵣⵉ ⵜⵉⵛⴱⵉ, ⵣⴻⴳ ⵉⵎⴻⵄⵣⴰⴱ ⵏ ⵊⵉⵍⵄⴰⴷ, ⵉⵏⵏⴰ ⵉ ⴰⵅⴰⴱ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵡⴻⵏⵏⵉ ⵓⵎⵉ ⴱⴻⴷⴷⴻⵖ ⵣⵣⴰⵜ ⵉ ⵡⵓⴷⴻⵎ ⵏⵏⴻⵙ, ⵎⴰⵍⴰ ⴰⴷ ⴷⴷ-ⵢⴰⵙ ⵏⵏⴷⴰ ⵏⵉⵖ ⴰⵏⵥⴰⵔ ⴷⴻⴳ ⵉⵙⴻⴳⴳⵯⵓⵙⴰ-ⵢⴰ, ⴰⴷ ⵢⵉⵍⵉ ⴰⵢⴰ ⵎⵖⵉⵔ ⵙ ⵡⴰⵡⴰⵍ ⵉⵏⵓ!”    
ⵢⵓⵙⴰ-ⴷⴷ ⵖⴰⵔⴻⵙ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 
“ⵓⵢⵓⵔ ⵙⵙⴻⵏⵏⵉ, ⴰⵔⵔ ⵙ ⵓⵣⴻⴵⵉⴼ ⵖⴰⵔ ⵛⵛⴰⵔⵇ ⵓⵛⴰ ⵙⵏⵓⴼⴼⴰⵔ ⵉⵅⴻⴼ ⵏⵏⴻⵛ ⵖⴰⵔ ⵜⵉⵖⵣⴰⵔⵜ ⵏ ⴽⵔⵉⵜ ⵡⴻⵏⵏⵉ ⵉⴵⴰⵏ ⵖⴰⵔ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ. 
ⴰⴷ ⵉⵎⵙⴰⵔ ⴰⴷ ⵜⴻⵙⵡⴻⴷ ⵣⵉ ⵜⴻⵖⵣⴰⵔⵜ ⵓ ⵏⴻⵛⵛ ⵓⵎⵓⵔⴻⵖ ⵉ ⵉⴱⴰⵖⵍⵉⵡⴻⵏ, ⴰⵇⴰ ⴰⴷ ⵛⴻⴽ ⴷⵉⵏⵏⵉ ⵙⵙⴻⵛⵛⴻⵏ.” 
ⵏⴻⵜⵜⴰ ⵢⵓⵢⵓⵔ ⴷⴻⴳ ⵡⴻⴱⵔⵉⴷ ⵓⵛⴰ ⵉⴳⴳⴰ ⵄⵍⴰⵃⵙⴰⴱ ⴰⵡⴰⵍ ⵏ ⵙⵉⴷⵉ. ⵏⴻⵜⵜⴰ ⵢⵓⵢⵓⵔ ⴰⴷ ⵉⵣⴷⴻⵖ ⵖⴰⵔ ⵜⴻⵖⵣⴰⵔⵜ ⵏ ⴽⵔⵉⵜ ⵏⵏⵉ ⵉⴵⴰⵏ ⵖⴰⵔ ⵓⵊⴻⵎⵎⴰⴹ ⵏ ⵍ’ⵓⵔⴷⵓⵏ. 
ⵉⴱⴰⵖⵍⵉⵡⴻⵏ ⵉⵡⵢⴻⵏ ⴰⵙ-ⴷⴷ ⴰⵖⵔⵓⵎ ⴷ ⵡⴻⵢⵙⵓⵎ ⵖⴰⵔ ⵜⵓⴼⴼⵓⵜ ⵓⵍⴰ ⴷ ⴰⵖⵔⵓⵎ ⴷ ⵡⴻⵢⵙⵓⵎ ⵖⴰⵔ ⵜⴰⵎⴻⴷⴷⵉⵜ ⵓ ⵏⴻⵜⵜⴰ ⵉⵙⵡⴰ ⵣⵉ ⵜⴻⵖⵣⴰⵔⵜ. 
ⴰⵡⴰⵔⵏⵉ ⵡⴰⵟⵟⴰⵙ ⵏ ⵡⵓⵙⵙⴰⵏ, ⵉⵎⵙⴰⵔ, ⴰⵇⴰ ⵢⵓⵥⴻⵖ ⵜⵉⵖⵣⴰⵔⵜ, ⵎⴰⵖⴰⵔ ⵡⴰⵔ ⵉⵡⵜⵉ ⵛⴰ ⵡⴻⵏⵥⴰⵔ ⴷⵉ ⵜⴻⵎⵎⵓⵔⵜ. 
ⵢⵓⵙⴰ ⴰⵙ-ⴷⴷ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ: 
“ⴽⴽⴰⵔ, ⵓⵢⵓⵔ ⵖⴰⵔ ⵚⴰⵔⴼⴰⵜ ⵏⵏⵉ ⵉⴵⴰⵏ ⵖⴰⵔ ⵚⵉⴷⵓⵏ, ⵣⴷⴻⵖ ⴷⵉⵏⵏⵉ. ⵅⵣⴰⵔ, ⵏⴻⵛⵛ ⵓⵎⵓⵔⴻⵖ ⴷⵉⵏⵏⵉ ⵉ ⵢⵉⵛⵜ ⵏ ⵜⴰⵊⵊⴰⵍⵜ, ⵎⴰⵃⴻⵏⴷ ⴰⴷ ⵛⴻⴽ ⵜⴻⵙⵙⴻⵛⵛ.” 
ⵏⴻⵜⵜⴰ ⵉⴽⴽⴰⵔ, ⵢⵓⵢⵓⵔ ⵖⴰⵔ ⵚⴰⵔⴼⴰⵜ. ⵓⵎⵉ ⴷⴷ-ⵢⵓⵙⴰ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ, ⵅⵣⴰⵔ, ⵉⵛⵜ ⵏ ⵜⴰⵊⵊⴰⵍⵜ ⵜᵉⵜⵜⵃⴰⵔⵡⴰⵛ ⴰⴽⴻⵛⵛⵓⴹ. ⵏⴻⵜⵜⴰ ⵉⵍⴰⵖⴰ ⵅⴰⵙ, ⵉⵏⵏⴰ: “ⴰⵡⵉ ⴰⵢⵉ-ⴷⴷ ⵛⴰ ⵏ ⵡⴰⵎⴰⵏ ⴷⴻⴳ ⵓⵖⴰⵔⵔⴰⴼ-ⴰ, ⵃⵉⵎⴰ ⴰⴷ ⵙⵡⴻⵖ.” 
ⵓⵎⵉ ⵜⵓⵢⵓⵔ ⵏⴻⵜⵜⴰⵜ ⵃⵉⵎⴰ ⴰⴷ ⴷⴷ-ⵜⴰⵡⵉ ⴰⵢⴰ, ⵉⵍⴰⵖⴰ-ⴷⴷ ⵏⴻⵜⵜⴰ ⵅⴰⵙ: “ⴰⵡⵉ ⴰⵢⵉ-ⴷⴷ ⵓⵍⴰ ⴷ ⵉⵊⵊ ⵏ ⵓⵍⴻⵇⵇⵉⵎ ⵏ ⵡⴻⵖⵔⵓⵎ ⴷⴻⴳ ⵓⴼⵓⵙ ⵏⵏⴻⵎ. 
ⵎⴰⵛⴰ ⵏⴻⵜⵜⴰⵜ ⵜⴻⵏⵏⴰ: “ⵙ ⵜⵉⴷⴻⵜⵜ ⴰⵎ ⵉⴷⴷⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵎⵉⵏ ⵖⴰⵔⵉ ⴷ ⵜⴰⴼⴷⵉⵍⵜ, ⴰⵇⴰ ⵎⵖⵉⵔ ⵉⵛⵜ ⵏ ⵡⵓⵔⵓ ⵏ ⵡⴰⵔⴻⵏ ⴷⴻⴳ ⵓⴱⵓⵇⴰⵍ ⴷ ⵛⴰ ⵏ ⵣⵣⴻⵛⵜ ⴷⴻⴳ ⵓⵖⴰⵔⵔⴰⴼ! ⵅⵣⴰⵔ ⵏⴻⵛⵛ ⵃⴰⵔⵡⵛⴻⵖ ⵜⵏⴰⵢⴻⵏ ⵏ ⵉⴽⴻⵛⵛⵓⴹⴻⵏ ⵓ ⴰⴷ ⵜ ⵙⵙⵡⴻⵊⴷⴻⵖ ⵉ ⵏⴻⵛⵛ ⴷ ⵎⵎⵉ, ⵅⴻⵏⵏⵉ ⴰⴷ ⵜ ⵏⴻⵛⵛ ⴰⴷ ⵏⴻⵎⵎⴻⵜ.” 
ⵉⵏⵏⴰ ⴰⵙ ⵉⵍⵉⵢⴰ: “ⵡⴰⵔ ⵜⵜⴻⴳⴳⵯⴻⴷ ⵛⴰ. ⵓⵢⵓⵔ, ⴻⴳⴳ ⵎⵉⵏ ⵜⵓⵖⴰ ⵜⴻⵏⵏⵉⴷ, ⵎⴰⵛⴰ ⴻⴳⴳ ⴰⵢⵉ-ⴷⴷ ⴷ ⴰⵎⴻⵣⵡⴰⵔⵓ ⵉⵛⵜ ⵏ ⵜⴻⴼⴹⵉⵍⵜ ⵓ ⴰⵡⵉ ⵜⵜ-ⵉ-ⴷⴷ ⴷⴰ ⵖⴰⵔⵉ. ⴰⵡⴰⵔⵏⵉ ⵓⵢⴰ ⴰⴷ ⵜⴻⵙⵙⴻⵡⵊⴻⴷ ⵛⴰ ⵉ ⵛⴻⵎ ⵓ ⵉ ⵉⵅⴻⴼ ⵏⵏⴻⵎ ⴷ ⵎⵎⵉⵎ. 
ⵎⴰⵖⴰⵔ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ: ‘ⴰⵔⴻⵏ ⴷⴻⴳ ⵓⴱⵓⵇⴰⵍ ⵡⴰⵔ ⵉⵅⴻⴽⴽⵯⵉ ⵓ ⵣⵣⴻⵛⵜ ⴷⴻⴳ ⵓⵖⴰⵔⵔⴰⴼ ⵡⴰⵔ ⵜⵏⴻⵇⵇⵉⵚ ⴰⵍ ⴰⵙⵙ ⵉ ⴷⵉ ⵉ ⵖⴰ ⵉⵡⵛ ⵙⵉⴷⵉ ⴰⵏⵥⴰⵔ ⵅ ⵡⵓⴷⴻⵎ ⵏ ⵜⴻⵎⵎⵓⵔⵜ.’” 
ⵏⴻⵜⵜⴰⵜ ⵜⵓⵢⵓⵔ ⵓⵛⴰ ⵜⴻⴳⴳⴰ ⵄⵍⴰⵃⵚⴰⴱ ⴰⵡⴰⵍ ⵏ ⵉⵍⵉⵢⴰ. ⴰⵎⵎⵓ ⵉ ⵉⵛⵛⴰ ⵏⴻⵜⵜⴰⵜ, ⵓⵛⴰ ⵓⵍⴰ ⴷ ⵏⴻⵜⵜⴰⵜ ⴷ ⵜⴰⴷⴷⴰⵔⵜ ⵏⵏⴻⵙ, ⴰⵟⵟⴰⵙ ⵏ ⵡⵓⵙⵙⴰⵏ. 
ⴰⵔⴻⵏ ⴷⴻⴳ ⵓⴱⵓⵇⴰⵍ ⵡⴰⵔ ⵉⵅⴻⴽⴽⵯⵉ ⴷ ⵣⵣⴻⵛⵜ ⴷⴻⴳ ⵓⵖⴰⵔⵔⴰⴼ ⵡⴰⵔ ⵜⵏⴻⵇⵇⵉⵚ ⵄⵍⴰⵃⵙⴰⴱ ⴰⵡⴰⵍ ⵏ ⵙⵉⴷⵉ ⵉ ⵉⵙⵙⵉⵡⴻⵍ ⵙ ⵓⵇⴻⵎⵎⵓⵎ ⵏ ⵉⵍⵉⵢⴰ. 
ⴰⵡⴰⵔⵏⵉ ⵎⴰⵏ ⴰⵢⴰ, ⵉⵎⵙⴰⵔ, ⴰⵇⴰ ⵉⵀⵍⴻⵛ ⵎⵎⵉⵙ ⵏ ⵜⴻⵎⵖⴰⵔⵜ-ⴰ, ⵎⵎⵉⵙ ⵏ ⵍⵍⴰⵍⴰ ⵏ ⵜⴰⴷⴷⴰⵔⵜ. ⵍⴻⵀⵍⴰⵛ ⵏⵏⴻⵙ ⵢⴰⵔⵏⵉ ⴰⵟⵟⴰⵙ ⴰⵍⴰⵎⵉ ⵡⴰⵔ ⵉⵜⵜⴰⵔⵉ ⵄⴰⴷ ⵏⵏⴻⴼⵙ. 
ⵏⴻⵜⵜⴰⵜ ⵜⴻⵏⵏⴰ ⵉ ⵉⵍⵉⵢⴰ: “ⵎⵉⵏ ⴷⵉⵏ ⵊⴰⵔ ⴰⵢⵉ ⴷ ⵛⴻⴽ, ⴰ ⵛⴻⴽ, ⴰⵔⵢⴰⵣ ⵏ ⴰⵔⴻⴱⴱⵉ? ⵎⴰ ⵜⵓⵙⵉⴷ-ⴷⴷ ⵖⴰⵔⵉ ⵃⵉⵎⴰ ⴰⴷ ⴰⵢⵉ ⵜⴻⵙⵙⵄⴻⵇⵍⴻⴷ ⵅ ⴷⴷⵏⵓⴱ ⵉⵏⵓ ⵓ ⵃⵉⵎⴰ ⴰⴷ ⵜⴻⵏⵖⴻⴷ ⵎⵎⵉ?” 
ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙ: “ⴻⵡⵛ ⴰⵢⵉ-ⴷⴷ ⵎⵎⵉⵎ!” ⵓ ⵏⴻⵜⵜⴰ ⵉⴽⵙⵉ ⵜ ⵣⴻⴳ ⵡⴻⵃⵙⵉⵏ ⵏⵏⴻⵙ, ⵢⴰⵔⴱⵓ ⵜ ⵖⴰⵔ ⵙⴻⵏⵏⴻⵊ ⵖⴰⵔ ⵡⴻⵅⵅⴰⵎ ⵏ ⵏⵏⴻⵊ ⵎⴰⵏⵉ ⵜⵓⵖⴰ ⵉⵣⴷⴻⵖ ⵏⴻⵜⵜⴰ ⵙⵉⵎⴰⵏⵜ ⵏⵏⴻⵙ, ⵓⵛⴰ ⵉⵙⵙⴰⵔⵙ ⵉ-ⵜ ⵅ ⵇⴰⵎⴰ ⵏⵏⴻⵙ. 
ⵅⴻⵏⵏⵉ ⵉⵍⴰⵖⴰ ⵖⴰⵔ ⵙⵉⴷⵉ, ⵉⵏⵏⴰ: “ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵎⴰ ⵜⴻⴳⴳⵉⴷ ⵅⴻⵏⵏⵉ ⵄⴰⴷ ⵜⵓⵄⴻⴼⴼⵏⴰ ⴷⵉ ⵜⴰⵊⵊⴰⵍⵜ-ⴰ ⵉ ⵖⴰⵔ ⵣⴻⴷⴷⵖⴻⵖ ⵏⴻⵛⵛ ⴰⵎ ⵓⴱⴰⵔⵔⴰⵏⵉ, ⴰⵍⴰⵎⵉ ⵜⴻⵏⵖⵉⴷ ⵎⵎⵉⵙ?” 
ⵏⴻⵜⵜⴰ ⵉⵙⴰⵔⵔⴻⵃ ⵉⵅⴻⴼ ⵏⵏⴻⵙ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⵜⵉⵡⴰ ⵉ ⵓⵃⴻⵏⵊⵉⵔ ⵓ ⵉⵍⴰⵖⴰ ⵖⴰⵔ ⵙⵉⴷⵉ, ⵉⵏⵏⴰ: “ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴻⵊⵊ ⴰⴷ ⵖⴰⵔⴻⵙ ⴷⴷ-ⵢⴻⵄⵇⴻⴱ ⵍⴻⵄⵎⴰⵔ ⵏ ⵓⵃⴻⵏⵊⵉⵔ-ⴰ!” 
ⵙⵉⴷⵉ ⵉⵙⵍⴰ ⵉ ⵜⵎⵉⵊⵊⴰ ⵏ ⵉⵍⵉⵢⴰ ⵓⵛⴰ ⵉⵄⵇⴻⴱ-ⴷⴷ ⵍⴻⵄⵎⴰⵔ ⵏ ⵓⵃⴻⵏⵊⵉⵔ ⵄⴰⵡⴻⴷ ⵖⴰⵔⴻⵙ ⴰⵍⴰⵎⵉ ⴷⴷ-ⵉⴷⵡⴻⵍ ⵉⴷⴷⴰⵔ. 
ⵉⵍⵉⵢⴰ ⵉⴽⵙⵉ ⴰⵃⴻⵏⵊⵉⵔ ⵓⵛⴰ ⵉⵙⵙⴻⵀⵡⴰ ⵜ ⵣⴻⴳ ⵡⴻⵅⵅⴰⵎ ⵏ ⵏⵏⴻⵊ ⴷⵉ ⵜⴰⴷⴷⴰⵔⵜ ⵓⵛⴰ ⵉⵡⵛⴰ ⴰⵙ ⵜ ⵉ ⵢⴻⵎⵎⴰⵙ. ⵉⵏⵏⴰ ⵉⵍⵉⵢⴰ: “ⵅⵣⴰⵔ, ⵎⵎⵉⵎ ⵉⴷⴷⴰⵔ!” 
ⵜⴻⵏⵏⴰ ⵜⴻⵎⵖⴰⵔⵜ ⵉ ⵉⵍⵉⵢⴰ: “ⵍⴻⵅⵅⵓ ⵙⵙⵏⴻⵖ ⴰⵇⴰ ⵛⴻⴽ ⴷ ⵉⵊⵊ ⵏ ⵡⴻⵔⵢⴰⵣ ⵏ ⴰⵔⴻⴱⴱⵉ ⵓ ⴰⵇⴰ ⴰⵡⴰⵍ ⵏ ⵙⵉⴷⵉ ⴷⴻⴳ ⵓⵇⴻⵎⵎⵓⵎ ⵏⵏⴻⵛ ⴷ ⵜⵉⴷⴻⵜⵜ.” 
