﻿1 ⵚⴰⵎⵡⵉⵍ.
5.
ⵉⴼⵉⵍⵉⵙⵟⵉⵏⵉⵢⵢⴻⵏ ⴽⵙⵉⵏ ⵜⵜⴰⴱⵓⵜ ⵏ ⴰⵔⴻⴱⴱⵉ ⵓⵛⴰ ⵉⵡⵢⴻⵏ ⵜⵜ ⵣⵉ ⴰⴱⵉⵏ-ⵀⴰⵄⵉⵣⵉⵔ ⵖⴰⵔ ⴰⵛⴷⵓⴷ. 
ⵅⴻⵏⵏⵉ ⴽⵙⵉⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵜⵜⴰⴱⵓⵜ ⵏ ⴰⵔⴻⴱⴱⵉ ⵓⵛⴰ ⵙⵙⵉⵡⴹⴻⵏ ⵜⵜ ⴷⵉ ⵜⴰⴷⴷⴰⵔⵜ ⵏ ⴷⴰⵊⵓⵏ ⵓⵛⴰ ⵙⵙⴰⵔⵙⴻⵏ ⵜⵜ ⵅ ⵓⵖⴻⵣⴷⵉⵙ ⵏ ⴷⴰⵊⵓⵏ. 
ⵜⵉⵡⴻⵛⵛⴰ ⵏⵏⴻⵙ ⵓⵎⵉ ⵉⵎⴻⵣⴷⴰⵖ ⵏ ⴰⵛⴷⵓⴷ ⴽⴽⴰⵔⴻⵏ ⵣⵉⵛ, ⵅⵣⴰⵔ, ⴷⴰⵊⵓⵏ ⵜⵓⵖⴰ ⵉⵡⴹⴰ ⵅ ⵓⵖⴻⵎⴱⵓⴱ ⵏⵏⴻⵙ ⵅ ⵜⴻⵎⵎⵓⵔⵜ ⵣⵣⴰⵜ ⵉ ⵜⵜⴰⴱⵓⵜ ⵏ ⵙⵉⴷⵉ. ⴽⵙⵉⵏ ⵏⵉⵜⵏⵉ ⴷⴰⵊⵓⵏ, ⵙⵙⴱⴻⴷⴷⴻⵏ ⵜ ⵄⴰⵡⴻⴷ ⴷⴻⴳ ⵡⴻⵎⵛⴰⵏ ⵏⵏⴻⵙ. 
ⵜⵉⵡⴻⵛⵛⴰ ⵏⵏⴻⵙ ⵓⵎⵉ ⴷⴷ-ⴽⴽⴰⵔⴻⵏ ⵏⵉⵜⵏⵉ ⵣⵉⵛ ⵄⴰⵡⴻⴷ, ⵅⵣⴰⵔ, ⴷⴰⵊⵓⵏ ⵜⵓⵖⴰ ⵉⵡⴹⴰ ⵄⴰⵡⴻⴷ ⵅ ⵓⵖⴻⵎⴱⵓⴱ ⵏⵏⴻⵙ ⵅ ⵜⴻⵎⵎⵓⵔⵜ ⵣⵣⴰⵜ ⵉ ⵜⵜⴰⴱⵓⵜ ⵏ ⵙⵉⴷⵉ, ⵎⴰⵛⴰ ⴰⵣⴻⴵⵉⴼ ⵏ ⴷⴰⵊⵓⵏ ⴷ ⵉⴼⴰⵙⵙⴻⵏ ⵏⵏⴻⵙ ⵙ ⵜⵏⴰⵢⴻⵏ ⵎⵎⴰⵔⵙⴻⵏ ⵇⴻⵙⵙⴻⵏ ⵖⴰⵔ ⵜⵏⴻⴱⴷⴰⵜ. ⵎⵖⵉⵔ ⴰⵔⵔⵉⵎⴻⵜ ⵏ ⴷⴰⵊⵓⵏ ⵜⵓⵖⴰ ⵜⴻⵇⵇⵉⵎ ⴷⴻⴳ ⵡⴻⵎⵛⴰⵏ ⵏⵏⴻⵙ. 
ⵅ ⵓⵢⴰ ⵡⴰⵔ ⵄⴼⵉⵙⴻⵏ ⵉⴽⴻⵀⵀⴰⵏⴻⵏ ⵏ ⴷⴰⵊⵓⵏ ⴷ ⵎⴰⵔⵔⴰ ⵉⵏⵏⵉ ⵉ ⴷⴷ-ⵉⵜⵜⴰⵙⴻⵏ ⵖⴰⵔ ⵜⴰⴷⴷⴰⵔⵜ ⵏ ⴷⴰⵊⵓⵏ ⵅ ⵜⵏⴻⴱⴷⴰⵜ ⵏ ⴷⴰⵊⵓⵏ ⴷⵉ ⴰⵛⴷⵓⴷ ⴰⵍ ⴰⵙⵙ-ⴰ. 
ⴰⴼⵓⵙ ⵏ ⵙⵉⴷⵉ ⵉⴷⵇⴻⵍ ⵅ ⵉⵎⴻⵣⴷⴰⵖ ⵏ ⴰⵛⴷⵓⴷ. ⵏⴻⵜⵜⴰ ⵉⵙⵙⴰⵔⵄⴻⴱ ⵉ-ⵜⴻⵏ ⵓⵛⴰ ⵉⵡⵜⴰ ⵜⴻⵏ ⵙ ⵜⵃⴻⴱⴱⴰ, ⴷⵉ ⵜⴰⵏⴷⵉⵏⵜ ⵏ ⴰⵛⴷⵓⴷ ⴷ ⵊⵊⵡⴰⵢⴻⵀ ⵏⵏⴻⵙ. 
ⵓⵎⵉ ⵉⵔⵢⴰⵣⴻⵏ ⵏ ⴰⵛⴷⵓⴷ ⵥⵔⵉⵏ, ⴰⵇⴰ ⴰⵎⵎⵓ ⵉ ⵉⵎⵙⴰⵔ, ⵏⵏⴰⵏ ⵏⵉⵜⵏⵉ: “ⵜⵜⴰⴱⵓⵜ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⵡⴰⵔ ⵜⵣⴻⵎⵎⴰⵔ ⴰⴷ ⵖⴰⵔⵏⴻⵖ ⵜⴻⵇⵇⵉⵎ, ⵎⴰⵖⴰⵔ ⴰⴼⵓⵙ ⵏⵏⴻⵙ ⵉⴳⴳⴰ ⵅⴰⵏⴻⵖ ⴷⴷⵇⴻⵍ ⵓⵍⴰ ⵅ ⴰⵔⴻⴱⴱⵉ ⵏⵏⴻⵖ ⴷⴰⵊⵓⵏ.” 
ⵏⵉⵜⵏⵉ ⵙⵙⴻⴽⴽⴻⵏ ⵉⵔⵢⴰⵣⴻⵏ ⵓⵛⴰ ⴳⴳⵉⵏ ⴰⴷ ⵙⵙⵎⵓⵏⴻⵏ ⵎⴰⵔⵔⴰ ⵍⴱⴰⵛⴰⵜ ⵏ ⵜⵏⴻⴷⴷⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵏⵏⴰⵏ: “ⵎⵉⵏ ⵖⴰ ⵏⴻⴳⴳ ⵙ ⵜⵜⴰⴱⵓⵜ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ?” ⵏⵏⴰⵏ ⵏⵉⵜⵏⵉ: “ⵜⵜⴰⴱⵓⵜ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⴰⴷ ⵜᵉⵜⵜⵡⴰⵙⵙⵎⵓⵟⵟⵉⵢ ⵖⴰⵔ ⵊⴰⵜ.” ⵅⴻⵏⵏⵉ ⵙⵙⵎⵓⵟⵟⵉⵢⴻⵏ ⵜⵜⴰⴱⵓⵜ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⵖⴰⵔ ⵊⴰⵜ. 
ⵎⴰⵛⴰ ⴰⵡⴰⵔⵏⵉ ⵉ ⵓⵎⵉ ⵜⵜ ⵙⵙⵎⵓⵟⵟⵉⵢⴻⵏ, ⵉⵙⵙⵉⵡⴻⴹ ⵓⴼⵓⵙ ⵏ ⵙⵉⴷⵉ ⵉⵊⵊ ⵏ ⵓⵅⴰⵔⵡⴻⴹ ⴷ ⴰⵎⴻⵇⵇⵔⴰⵏ ⵅ ⵜⴻⵏⴷⵉⵏⵜ ⵏⵏⵉ ⵓⵛⴰ ⵉⵡⵜⴰ ⵉⵔⵢⴰⵣⴻⵏ ⵏ ⵜⴻⵏⴷⵉⵏⵜ, ⵣⴻⴳ ⵓⵎⴻⵥⵢⴰⵏ ⴰⵍ ⴰⵎⴻⵇⵇⵔⴰⵏ, ⵙ ⵜⵃⴻⴱⴱⴰ ⵉⵏⵏⵓⴼⴰⵔⴻⵏ. 
ⵅⴻⵏⵏⵉ ⵙⵙⴻⴽⴽⴻⵏ ⵏⵉⵜⵏⵉ ⵜⵜⴰⴱⵓⵜ ⵏ ⴰⵔⴻⴱⴱⵉ ⵖⴰⵔ ⵄⴰⵇⵔⵓⵏ. ⵓⵎⵉ ⴷⴷ-ⵜⵓⵙⴰ ⵜⵜⴰⴱⵓⵜ ⵏ ⴰⵔⴻⴱⴱⵉ ⵖⴰⵔ ⵄⴰⵇⵔⵓⵏ, ⵉⵎⵙⴰⵔ, ⴰⵇⴰ ⵉⵎⴻⵣⴷⴰⵖ ⵏ ⵄⴰⵇⵔⵓⵏ ⵙⵖⵓⵢⴻⵏ, ⵏⵏⴰⵏ: “ⵏⵉⵜⵏⵉ ⵉⵡⵢⴻⵏ-ⴷⴷ ⵜⵜⴰⴱⵓⵜ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ ⵖⴰⵔⵏⴻⵖ ⴷⴰⵏⵉⵜⴰ, ⵃⵉⵎⴰ ⴰⴷ ⴰⵏⴻⵖ ⵏⵖⴻⵏ ⵓⵍⴰ ⴷ ⵍⴳⴻⵏⵙ ⵏⵏⴻⵖ.” 
ⵙⵙⴻⴽⴽⴻⵏ ⵏⵉⵜⵏⵉ ⵉⵔⴻⵇⵇⴰⵙⴻⵏ ⵓⵛⴰ ⴳⴳⵉⵏ ⴰⴷ ⵙⵙⵎⵓⵏⴻⵏ ⵎⴰⵔⵔⴰ ⵍⴱⴰⵛⴰⵜ ⵏ ⵜⵏⴻⴷⴷⴰⵎ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ, ⵏⵏⴰⵏ: “ⵙⵉⴳⴳⵯⴻⵊⴻⵎ ⵜⵜⴰⴱⵓⵜ ⵏ ⴰⵔⴻⴱⴱⵉ ⵏ ⵉⵙⵔⴰⵉⵍ, ⵊⵊⴻⵎ ⵜⵜ ⴰⴷ ⴷⴷ-ⵜⴻⴷⵡⴻⵍ ⵖⴰⵔ ⵡⴻⵎⵛⴰⵏ ⵏⵏⴻⵙ, ⵃⵉⵎⴰ ⵡⴰⵔ ⴷ ⴰⵢⵉ ⵉⵏⴻⵇⵇ ⵓⵍⴰ ⴷ ⵍⴳⴻⵏⵙ ⵉⵏⵓ!”, ⵎⵉⵏⵣⵉ ⵜⵓⵖⴰ ⴷⵉⵏ ⵉⵊⵊ ⵏ ⵓⵇⴻⵣⵣⴻⴱ ⵉⵎⵖⴰⵔ ⴷⵉ ⵎⴰⵔⵔⴰ ⵜⴰⵏⴷⵉⵏⵜ ⵓⵛⴰ ⴰⴼⵓⵙ ⵏ ⴰⵔⴻⴱⴱⵉ ⵉⴷⵇⴻⵍ ⴰⵟⵟⴰⵙ ⵅ ⵄⴰⵇⵔⵓⵏ. 
ⵉⵡⴷⴰⵏ, ⵉⵏⵏⵉ ⵡⴰⵔ ⵉⵎⵎⵓⵜⴻⵏ, ⵜⵓⵖⴰ ⵜⵜⵡⴰⵡⵜⴻⵏ ⵙ ⵜⵃⴻⴱⴱⴰ, ⴰⵍⴰⵎⵉ ⴰⵖⵓⵢⵢⵉ ⵏ ⵓⵙⵖⴰⵜⵉ ⵏ ⵜⴻⵏⴷⵉⵏⵜ ⵉⴳⴻⵄⵄⴻⴷ ⵖⴰⵔ ⵓⵊⴻⵏⵏⴰ ⵙⴻⵏⵏⴻⵊ. 
