﻿ⴰⵄⴰⵡⴻⴷ ⵏ ⵛⵛⴰⵔⵉⵄⴰ.
10.
“ⴷⵉ ⵍⵡⴻⵇⵜ ⵏⵏⵉ ⴷ ⵉⵊⵊⴻⵏ ⵉⵏⵏⴰ ⴰⵢⵉ ⵙⵉⴷⵉ: ‘ⵏⵇⴻⵛ ⵜⵏⴰⵢⴻⵏ ⵏ ⵜⴻⵍⵡⵉⵃⵉⵏ ⵏ ⵡⴻⵥⵔⵓ ⴰⵎ ⵜⵉⵏⵏⵉ ⵜⵉⵎⴻⵣⵡⵓⵔⴰ ⵓⵛⴰ ⴳⴻⵄⵄⴻⴷ-ⴷⴷ ⵖⴰⵔⵉ ⵖⴰⵔ ⵡⴻⴷⵔⴰⵔ ⵓⵛⴰ ⴻⴳⴳ ⵉ ⵛⴻⴽ ⵉⵛⵜ ⵏ ⵜⵜⴰⴱⵓⵜ ⵏ ⵓⴽⴻⵛⵛⵓⴹ. 
ⴰⴷ ⴰⵔⵉⵖ ⴷⵉ ⵜⴻⵍⵡⵉⵃⵉⵏ ⴰⵡⴰⵍⴻⵏ ⵏⵏⵉ ⵜⵓⵖⴰ ⴷⵉ ⵜⴻⵍⵡⵉⵃⵉⵏ ⵜⵉⵎⴻⵣⵡⵓⵔⴰ ⵏⵏⵉ ⵜⴰⵔⵥⵉⴷ ⵓⵛⴰ ⴰⴷ ⵜⴻⵏⵜ ⵜⴻⵙⵙⴰⵔⵙⴻⴷ ⴷⵉ ⵜⵜⴰⴱⵓⵜ. 
ⵏⴻⵛⵛ ⴳⴳⵉⵖ ⵉⵛⵜ ⵏ ⵜⵜⴰⴱⵓⵜ ⵏ ⵓⴽⴻⵛⵛⵓⴹ ⵏ ⵓⴽⴰⵙⵉⵢⴰ ⵓⵛⴰ ⵏⴻⵇⵛⴻⵖ ⵜⵏⴰⵢⴻⵏ ⵏ ⵜⴻⵍⵡⵉⵃⵉⵏ ⵏ ⵡⴻⵥⵔⵓ ⴰⵎ ⵜⵎⴻⵣⵡⵓⵔⴰ. ⴳⴻⵄⵄⴷⴻⵖ ⵖⴰⵔ ⵡⴻⴷⵔⴰⵔ ⵙ ⵜⵏⴰⵢⴻⵏ ⵏ ⵜⴻⵍⵡⵉⵃⵉⵏ ⴷⴻⴳ ⵓⴼⵓⵙ ⵉⵏⵓ. 
ⵢⵓⵔⴰ ⵅ ⵜⴻⵍⵡⵉⵃⵉⵏ, ⴰⵏⴻⵛⵜ ⵏ ⵜⵉⵔⴰ ⵜⴰⵎⴻⵣⵡⴰⵔⵓⵜ, ⵄⴻⵛⵔⴰ ⵏ ⵡⴰⵡⴰⵍⴻⵏ ⵏⵏⵉ ⵜⵓⵖⴰ ⵉⵙⵙⵉⵡⴻⵍ ⵙⵉⴷⵉ ⴷⴻⴳ ⵡⴰⵙⵙ ⵏ ⵡⴻⴳⵔⴰⵡ ⵏ ⵍⴳⴻⵏⵙ ⵅ ⵡⴻⴷⵔⴰⵔ ⵣⵉ ⵍⵡⴻⵙⵟ ⵏ ⵜⵎⴻⵙⵙⵉ ⵓⵛⴰ ⵉⵡⵛⴰ ⵉ-ⵜⴻⵏⵜ ⴰⵢⵉ-ⴷⴷ ⵙⵉⴷⵉ. 
ⴷⴻⵡⵍⴻⵖ-ⴷⴷ ⵓ ⵀⵡⵉⵖ-ⴷⴷ ⵣⴻⴳ ⵡⴻⴷⵔⴰⵔ ⵓⵛⴰ ⵙⵙⴰⵔⵙⴻⵖ ⵜⵉⵍⵡⵉⵃⵉⵏ ⴷⵉ ⵜⵜⴰⴱⵓⵜ ⵏⵏⵉ ⴳⴳⵉⵖ ⵓⵛⴰ ⴷⵉⵀⴰ ⵉ ⴵⴰⵏⵜ ⵄⴰⴷ, ⴰⵎ ⵎⴰⵎⵎⴻⵛ ⴷ ⴰⵢⵉ ⵢⵓⵎⵓⵔ ⵙⵉⴷⵉ.” 
ⴼⴻⵙⵢⴻⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ ⵣⵉ ⴱⵉⵄⵔⵓⵜ-ⴱⴰⵏⵉ-ⵢⴰⵄⵇⴰⵏ, ⴼⴼⵖⴻⵏ ⵖⴰⵔ ⵎⵓⵙⵉⵔⴰ. ⴷⵉⵏⵏⵉ ⵉⵎⵎⵓⵜ ⵀⴰⵔⵓⵏ ⵓⵛⴰ ⵉⵜⵜⵡⴰⵏⴹⴻⵍ ⴷⵉⵏ. ⵎⵎⵉⵙ ⴰⵍⵉⵄⴰⵣⴰⵔ ⵉⴷⵡⴻⵍ ⴷ ⴰⴽⴻⵀⵀⴰⵏ ⴷⴻⴳ ⵡⴻⵎⵛⴰⵏ ⵏⵏⴻⵙ. 
ⵙⵙⴻⵏⵏⵉ ⵎⵎⵓⵟⵟⵉⵢⴻⵏ ⵖⴰⵔ ⵊⵓⴷⵊⵓⴷ ⵓ ⵣⵉ ⵊⵓⴷⵊⵓⴷ ⵖⴰⵔ ⵢⵓⵟⴱⴰⵜⴰ, ⵜⴰⵎⵎⵓⵔⵜ ⵏ ⵜⵖⴻⵣⵔⴰⵜⵉⵏ ⵏ ⵡⴰⵎⴰⵏ. 
ⴷⵉ ⵍⵡⴻⵇⵜ ⵏⵏⵉ ⴷ ⵉⵊⵊⴻⵏ ⵉⵃⵓⵣⵣ ⵙⵉⴷⵉ ⵜⴰⵇⴱⵉⵍⵜ ⵏ ⵍⴰⵡⵉ ⵃⵉⵎⴰ ⴰⴷ ⴰⵔⴱⵓⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ ⵎⴰⵃⴻⵏⴷ ⴰⴷ ⴱⴻⴷⴷⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⴷ ⴰⵙ ⵙⴻⵅⵅⴰⵔⴻⵏ ⵓ ⴰⴷ ⴱⴰⵔⴽⴻⵏ ⴷⴻⴳ ⵢⵉⵙⴻⵎ ⵏⵏⴻⵙ, ⴰⵍ ⴰⵙⵙ-ⴰ. 
ⵅ ⵓⵢⴰ ⵍⴰⵡⵉ ⵡⴰⵔ ⵖⴰⵔⴻⵙ ⵜⵓⵖⵉ ⵛⴰ ⵏ ⵜⴻⵙⵖⴰⵔⵜ, ⵓⵍⴰ ⴷ ⵛⴰ ⵏ ⵍⵡⴰⵔⵜ ⴰⴽ-ⴷ ⴰⵢⵜⵎⴰⵙ. ⵙⵉⴷⵉ ⴷ ⵍⵡⴰⵔⵜ ⵏⵏⴻⵙ, ⴰⵎ ⵎⴰⵎⵎⴻⵛ ⴷ ⴰⵙ ⵉⵏⵏⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ. 
“ⵓⵛⴰ ⵏⴻⵛⵛ ⵇⵇⵉⵎⴻⵖ ⵅ ⵡⴻⴷⵔⴰⵔ, ⴰⵎ ⵡⵓⵙⵙⴰⵏ ⵉⵎⴻⵣⵡⵓⵔⴰ, ⴰⵔⴻⴱⵄⵉⵏ ⵏ ⵓⵙⵙⴰⵏ ⴷ ⴰⵔⴻⴱⵄⵉⵏ ⵏ ⴵⵢⴰⵍⵉ ⵓⵛⴰ ⵉⵙⵍⴰ ⴰⵢⵉ ⵙⵉⴷⵉ ⵄⴰⵡⴻⴷ ⵜⵡⴰⵍⴰ-ⵢⴰ, ⴰⵇⴰ ⵙⵉⴷⵉ ⵜⵓⵖⴰ ⵡⴰⵔ ⵉⵅⵙ ⴰⴷ ⴽⴻⵏⵏⵉⵡ ⵉⵙⵙⴻⵅⵙⴰⵔ. 
ⵉⵏⵏⴰ ⴰⵢⵉ ⵙⵉⴷⵉ: ‘ⴽⴽⴰⵔ, ⵓⵢⵓⵔ ⴷⴻⴳ ⵡⴻⴱⵔⵉⴷ ⵣⵣⴰⵜ ⵉ ⵡⵓⴷⴻⵎ ⵏ ⵍⴳⴻⵏⵙ, ⵃⵉⵎⴰ ⴰⴷ ⴰⴷⴼⴻⵏ ⵖⴰⵔ ⵜⴻⵎⵎⵓⵔⵜ, ⵜⴻⵏⵏⵉ ⵊⵊⵓⴵⴻⵖ ⵉ ⵍⴻⵊⴷⵓⴷ ⵏⵙⴻⵏ ⴰⴷ ⴰⵙⴻⵏ ⵜⵜ-ⵉ-ⴷⴷ-ⵡⵛⴻⵖ, ⴰⴷ ⵜⵜ ⴽⵙⵉⵏ ⴷ ⵍⵡⴰⵔⵜ.’ 
ⵍⴻⵅⵅⵓ ⵅⴻⵏⵏⵉ, ⴰ ⵉⵙⵔⴰⵉⵍ! ⵎⵉⵏ ⵣⵣⴰⵢⴻⴽ ⵉⵜⵜⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⵎⵖⵉⵔ ⴰⴷ ⵜⴻⴳⴳⵯⴻⴷⴻⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⵜⵓⵢⵓⵔⴻⴷ ⴷⴻⴳ ⵉⴱⵔⵉⴷⴻⵏ ⵏⵏⴻⵙ ⵓ ⴰⴷ ⵜ ⵜⴻⵅⵙⴻⴷ ⵓⵛⴰ ⴰⴷ ⵜⵙⴻⵅⵅⴰⵔⴻⴷ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ ⵙ ⵎⴰⵔⵔⴰ ⵓⵍ ⵏⵏⴻⵛ ⵓ ⵙ ⵎⴰⵔⵔⴰ ⵍⴻⵄⵎⴰⵔ ⵏⵏⴻⵛ, 
ⵓⵛⴰ ⴰⴷ ⵜⴻⵃⴹⵉⴷ ⵍⵓⵎⵓⵔⴰⵜ ⵏ ⵙⵉⴷⵉ ⴷ ⵜⵡⴻⵚⵚⴰ ⵏⵏⵉ ⵏⴻⵛⵛ ⵅⴰⴽ ⵛⴰⵔⴹⴻⵖ ⴰⵙⵙ-ⴰ ⵉ ⵜⵉⵣⵉ ⵏⵏⴻⵛ. 
ⵅⵣⴰⵔ, ⴰⵊⴻⵏⵏⴰ ⴷ ⵓⵊⴻⵏⵏⴰ ⵏ ⵉⵊⴻⵏⵡⴰⵏ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ ⵉ ⵉⴵⴰⵏ. 
ⵎⵖⵉⵔ ⵖⴰⵔ ⵍⴻⵊⴷⵓⴷ ⵏⵏⴻⵛ ⵡⴰⵀⴰ ⵉ ⵉⵇⵇⴻⵏ ⵙⵉⴷⵉ ⵉⵅⴻⴼ ⵏⵏⴻⵙ ⵃⵉⵎⴰ ⴰⴷ ⵜⴻⵏ ⵉⵅⵙ ⵓ ⵏⴻⵜⵜⴰ ⵉⵅⴹⴰⵔ ⵣⵣⴰⵔⵉⵄⴻⵜ ⵏⵙⴻⵏ ⴰⵡⴰⵔⵏⵉ ⴰⵙⴻⵏ, ⴰⵇⴰ ⴷ ⴽⴻⵏⵏⵉⵡ, ⵣⵉ ⵎⴰⵔⵔⴰ ⵍⴻⴳⵏⵓⵙ, ⴰⵎ ⵜⴻⴵⴰ ⴰⵙⵙ-ⴰ. 
ⵅⴻⵜⵏⴻⵎ ⵅⴻⵏⵏⵉ ⵉ ⵍⴻⵄⴷⴰⵍⵢⴻⵜ ⵏ ⵡⵓⵍ ⵏⵡⴻⵎ, ⵡⴰⵔ ⵙⵇⴻⵙⵙⵉⵃⴻⵎ ⵛⴰ ⵄⴰⴷ ⴽⵜⴰⵔ ⵓⵍⴰⵡⴻⵏ ⵏⵡⴻⵎ, 
ⵎⵉⵏⵣⵉ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴷ ⴰⵔⴻⴱⴱⵉ ⵅ ⵎⴰⵔⵔⴰ ⵉⵔⴻⴱⴱⵉⵜⴻⵏ ⴷ ⵙⵉⴷⵉ ⵅ ⵎⴰⵔⵔⴰ ⵉⵙⵉⴷⵉⵜⴻⵏ, ⵉⵊⵊ ⵏ ⴰⵔⴻⴱⴱⵉ ⵉⵎⵖⴰⵔ ⴷ ⴰⵊⴻⴱⴱⴰⵔ ⴷ ⴰⵎⴻⴳⴳⵯⴻⴷ, ⵡⴻⵏⵏⵉ ⵡⴰⵔ ⵉⵜⵜⴻⴳⴳⴻⵏ ⵍⴼⴰⵔⵣ ⴷⴻⴳ ⵉⵡⴷⴰⵏ ⵏⵉⵖ ⵉⴽⴻⵙⵙⵉ ⵛⵛⴰⵔⴹ, 
ⵡⴻⵏⵏⵉ ⵉⵜⵜⴻⴳⴳⴻⵏ ⵜⴰⵙⴻⴳⴷⴰ ⵉ ⵓⵢⵓⵊⵉⵍ ⴷ ⵜⴰⵊⵊⴰⵍⵜ, ⵡⴻⵏⵏⵉ ⵉⵜⵜⴻⵅⵙⴻⵏ ⴰⴱⴰⵔⵔⴰⵏⵉ ⵓ ⵉⵡⵛⴰ ⴰⵙ ⴰⵖⵔⵓⵎ ⴷ ⴰⵔⵔⵓⴹ. 
ⵉⵜⵜⵅⴻⵚⵚⴰ ⴰⴷ ⵜⴻⵅⵙⴻⵎ ⴰⴱⴰⵔⵔⴰⵏⵉ, ⵎⵉⵏⵣⵉ ⵜⵓⵖⴰ ⴽⴻⵏⵏⵉⵡ ⴷ ⵉⴱⴰⵔⵔⴰⵏⵉⵢⵢⴻⵏ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. 
ⴰⴷ ⵜⴻⴳⴳⵯⴻⴷⴻⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⴷ ⴰⵙ ⵜⵙⴻⵅⵅⴰⵔⴻⴷ ⵓⵛⴰ ⴰⴷ ⴰⵙ ⵜⵍⴻⵚⵇⴻⴷ ⵓ ⵙ ⵢⵉⵙⴻⵎ ⵏⵏⴻⵙ ⴰⴷ ⵜⴻⵊⵊⴰⴵⴻⴷ. 
ⴰⵇⴰ ⵏⴻⵜⵜⴰ ⴷ ⴰⵙⴻⴱⴱⴰⵃ ⵏⵏⴻⵛ, ⵓⵛⴰ ⵏⴻⵜⵜⴰ ⴷ ⴰⵔⴻⴱⴱⵉ ⵏⵏⴻⵛ, ⵡⴻⵏⵏⵉ ⵖⴰⵔⴻⴽ ⵉⴳⴳⵉⵏ ⵍⵅⴻⴷⵎⴻⵜ-ⴰ ⴷ ⵜⴰⵎⴻⵇⵇⵔⴰⵏⵜ ⵓⵍⴰ ⴷ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ ⵉⵙⵙⴰⴳⴳⵯⴰⴷⴻⵏ ⵜⵉⵏⵏⵉ ⵥⵔⵉⵏⵜ ⵜⵉⵟⵟⴰⵡⵉⵏ ⵏⵏⴻⵛ. 
ⵍⴻⵊⴷⵓⴷ ⵏⵡⴻⵎ ⵀⵡⴰⵏ-ⴷⴷ ⵙ ⵙⴻⴱⵄⵉⵏ ⵏ ⵍⴻⵄⵎⵓⵔ ⵖⴰⵔ ⵎⵉⵚⵔⴰ ⵓⵛⴰ ⵍⴻⵅⵅⵓ ⵉⴳⴳⴰ ⵉ-ⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⵛ, ⴰⵟⵟⴰⵙ ⴰⵎ ⵢⵉⵜⵔⴰⵏ ⵏ ⵓⵊⴻⵏⵏⴰ.” 
