﻿ⴰⵎⴻⵥⵡⴰⵔⵓ.
12.
ⵉⵏⵏⴰ ⵙⵉⴷⵉ ⵉ ⴰⴱⵔⴰⵎ: “ⴼⴼⴻⵖ ⵣⵉ ⵜⴻⵎⵎⵓⵔⵜ ⵏⵏⴻⵛ, ⵣⵉ ⵜⴻⵎⵎⵓⵔⵜ ⵎⴰⵏⵉ ⴷⴷ-ⵜⵅⴻⵍⵇⴻⴷ ⵓ ⵣⵉ ⵜⴰⴷⴷⴰⵔⵜ ⵏ ⴱⴰⴱⴰⵛ, ⵔⵓⵃ ⵖⴰⵔ ⵜⴻⵎⵎⵓⵔⵜ ⵉ ⴷ ⴰⵛ ⵖⴰ ⵙⵙⴻⵛⵏⴻⵖ. 
ⴰⴷ ⵣⵣⴰⵢⴻⴽ ⴷⴷ-ⵙⵙⵓⴼⴼⵖⴻⵖ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ, ⴰⴷ ⵛⴻⴽ ⴱⴰⵔⴽⴻⵖ ⵓ ⴰⴷ ⵙⵙⴻⵎⵖⴰⵔⴻⵖ ⵉⵙⴻⵎ ⵏⵏⴻⵛ ⵓⵛⴰ ⵉⵍⵉ ⴷ ⵛⴻⴽ ⵄⴰⵡⴻⴷ ⴷ ⵍⴱⴰⵔⴰⴽⴰ. 
ⴰⴷ ⴱⴰⵔⴽⴻⵖ ⵡⴻⵏⵏⵉ ⵛⴻⴽ ⵉ ⵖⴰ ⵉⴱⴰⵔⴽⴻⵏ ⴷ ⵡⴻⵏⵏⵉ ⵛⴻⴽ ⵉ ⵖⴰ ⵉⵏⴻⵄⵍⴻⵏ, ⴰⴷ ⵜ ⵏⴻⵄⵍⴻⵖ. ⴷⴰⵢⴻⴽ ⵉ ⵖⴰ ⵜⵜⵡⴰⴱⴰⵔⴽⴻⵏⵜ ⵎⴰⵔⵔⴰ ⵍⴰⴵⴰⵜ ⵏ ⵜⴻⵎⵎⵓⵔⵜ.”   * 
ⵓⵛⴰ ⵉⵔⵓⵃ ⴰⴱⵔⴰⵎ ⴰⵎ ⵎⴰⵎⵎⴻⵛ ⴷ ⴰⵙ ⵉⵏⵏⴰ ⵙⵉⴷⵉ, ⵓⵛⴰ ⵉⵔⵓⵃ ⵍⵓⵜ ⴰⴽⵉⴷⴻⵙ. ⵜⵓⵖⴰ ⴰⴱⵔⴰⵎ ⵖⴰⵔⴻⵙ ⵅⴻⵎⵙⴰ ⵓ-ⵙⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⴷⴷ-ⵉⴼⴼⴻⵖ ⵣⵉ ⵃⴰⵔⴰⵏ. 
ⵓⵛⴰ ⵉⵏⴷⴻⵀ ⴰⴱⵔⴰⵎ ⵙⴰⵔⴰⵢ ⵜⴰⵎⵖⴰⵔⵜ ⵏⵏⴻⵙ, ⴷ ⵍⵓⵟ ⵎⵎⵉⵙ ⵏ ⵓⵎⴰⵙ, ⴷ ⵎⴰⵔⵔⴰ ⴰⴳⵍⴰ ⵉ ⵢⴰⵔⴻⴱⵃⴻⵏ, ⴷ ⵉⵡⴷⴰⵏ ⴷ ⵍⵎⴰⵍ ⵏⵏⵉ ⴷⴷ-ⴽⴻⵙⴱⴻⵏ ⴷⵉ ⵃⴰⵔⴰⵏ. ⴼⴼⵖⴻⵏ ⵣⵉ ⵃⴰⵔⴰⵏ ⵃⵉⵎⴰ ⴰⴷ ⵔⴰⵃⴻⵏ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵓⵛⴰ ⵉⵡⴹⴻⵏ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ. 
ⵉⵥⵡⴰ ⴰⴱⵔⴰⵎ ⵣⵉ ⵜⴻⵎⵎⵓⵔⵜ ⵏⵏⵉ ⵖⴰⵔ ⵡⴻⵎⵛⴰⵏ ⵏ ⵛⴰⴽⵉⵎ ⴰⵍ ⵜⴰⵛⴻⵊⵊⴰⵔⵜ ⵏ ⵢⵉⴳⴳ ⵏ ⵎⵓⵔⴰ. ⴷⵉ ⵍⵡⴻⵇⵜ ⵏⵏⵉ ⵜⵓⵖⴰ ⴰⵢⵜ ⵏ ⴽⴻⵏⵄⴰⵏ ⵣⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ.    
ⵉⴱⴰⵏ-ⴷⴷ ⵙⵉⴷⵉ ⵉ ⴰⴱⵔⴰⵎ, ⵉⵏⵏⴰ ⴰⵙ: “ⵉ ⵣⵣⴰⵔⵉⵄⴻⵜ ⵏⵏⴻⵛ ⵓⵎⵉ ⵉ ⵖⴰ ⵡⵛⴻⵖ ⵜⴰⵎⵎⵓⵔⵜ-ⴰ.” ⵓⵛⴰ ⵉⴱⵏⴰ ⴷⵉⵏ ⵉⵊⵊ ⵏ ⵓⵄⴰⵍⵟⴰⵔ ⵎⵉⵏ ⵅⴻⴼ ⵉⵙⵙⴰⵔⵙ ⵜⴰⵖⴰⵔⵚⵜ ⵉ ⵙⵉⴷⵉ, ⵡⴻⵏⵏⵉ ⴷ ⴰⵙ ⴷⴷ-ⵉⴱⴰⵏⴻⵏ.    
ⵅⴻⵏⵏⵉ ⵉⵄⴷⵓ ⵙⵙⴻⵏⵏⵉ ⵖⴰⵔ ⵉⴷⵓⵔⴰⵔ ⵉ ⵉⴵⴰⵏ ⵅ ⵛⵛⴰⵔⵇ ⵏ ⴱⴰⵢⵜ-ⵉⵍ ⵓⵛⴰ ⵉⵡⵜⴰ ⴷⵉⵏⵏⵉ ⵉⵇⵉⴹⴰⵏ ⵏⵏⴻⵙ, ⵉⵊⵊⴰ ⴱⴰⵢⵜ-ⵉⵍ ⵅ ⵊⵊⵉⵀⴻⵜ ⵏ ⵍⵖⴰⵔⴱ ⵓ ⵄⴰⵢ ⵅ ⵛⵛⴰⵔⵇ. ⴷⵉⵏ ⵉⴱⵏⴰ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ ⵓⵛⴰ ⵉⵍⴰⵖⴰ ⵉⵙⴻⵎ ⵏ ⵙⵉⴷⵉ. 
ⴰⵡⴰⵔⵏⵉ ⵎⴰⵏ ⴰⵢⴰ ⵉⴼⵙⵉ ⴰⴱⵔⴰⵎ ⵉⵇⵉⴹⴰⵏ ⵏⵏⴻⵙ, ⵉⵎⵎⵓⵟⵟⵉ ⵣⴻⴳ ⵡⴻⵎⵛⴰⵏ ⵖⴰⵔ ⵡⴻⵎⵛⴰⵏ, ⵖⴰⵔ ⵜⴻⵎⵎⵓⵔⵜ ⵏ ⵍⵊⴰⵏⵓⴱ. 
ⵉⴷⵡⴻⵍ ⵍⴰⵥ ⴷⵉ ⵜⴻⵎⵎⵓⵔⵜ ⵓⵛⴰ ⵉⴽⴻⵎⵎⴻⵍ ⴰⴱⵔⴰⵎ ⵅ ⵡⴻⴱⵔⵉⴷ ⵏⵏⴻⵙ, ⵉⵀⵡⴰ ⵖⴰⵔ ⵎⵉⵚⵔⴰ, ⵃⵉⵎⴰ ⴰⴷ ⵉⵣⴷⴻⵖ ⴷⵉⵏ ⴰⵎ ⵓⴱⴰⵔⵔⴰⵏⵉ, ⵎⵉⵏⵣⵉ ⵜⵓⵖⴰ ⵍⴰⵥ ⵉⵎⵖⴰⵔ ⴷⵉ ⵜⴻⵎⵎⵓⵔⵜ. 
ⵍⴰⵎⵉ ⴷⴷ-ⵜⵉⵡⴻⴹ ⵍⵡⴻⵇⵜ ⵏⵏⵉ ⵓⵎⵉ ⵉ ⵖⴰ ⵢⵓⴷⴻⴼ ⵖⴰⵔ ⵎⵉⵚⵔⴰ, ⵉⵏⵏⴰ ⵉ ⵙⴰⵔⴰⵢ, ⵜⴰⵎⵖⴰⵔⵜ ⵏⵏⴻⵙ: “ⵅⵣⴰⵔ, ⴰⵇⴰ ⵙⵙⵏⴻⵖ ⴱⴻⵍⵍⵉ ⵛⴻⵎ ⴷ ⵜⴰⵎⵖⴰⵔⵜ ⴷⴰⵢⴻⵙ ⴰⵥⵔⵉ. 
ⵅⵎⵉ ⵛⴻⵎ ⵉ ⵖⴰ ⵥⴰⵔⴻⵏ ⵉⵎⵉⵚⵔⵉⵢⵢⴻⵏ, ⵣⴻⵎⵎⴰⵔⴻⵏ ⴰⴷ ⵉⵏⵉⵏ: ‘ⵜⴰ ⴷ ⵜⴰⵎⵖⴰⵔⵜ ⵏⵏⴻⵙ!’, ⴰⴷ ⴰⵢⵉ ⵏⵖⴻⵏ ⵓⵛⴰ ⴰⴷ ⵛⴻⵎ ⵊⵊⴻⵏ ⴷⵉ ⵜⵓⴷⴰⵔⵜ. 
ⵉⵏⵉ, ⴰⵇⴰ ⵛⴻⵎ ⴷ ⵓⵞⵎⴰ, ⵃⵉⵎⴰ ⴰⴷ ⴰⵢⵉ ⵢⵉⵍⵉ ⵍⵅⵉⵔ ⴷⵉ ⵟⵟⵡⴻⵄ ⵏⵏⴻⵎ ⵓⵛⴰ ⴰⴷ ⵉⵇⵇⵉⵎ ⵍⴻⵄⵎⴰⵔ ⵉⵏⵓ ⵉⴷⴷⴰⵔ ⵉ ⵛⴻⵎ.” 
ⵉⵎⵙⴰⵔ ⵓⵎⵉ ⵢⵓⴷⴻⴼ ⴰⴱⵔⴰⵎ ⵖⴰⵔ ⵎⵉⵚⵔⴰ, ⵥⵔⵉⵏ ⵉⵎⵉⵚⵔⵉⵢⵢⴻⵏ ⴱⴻⵍⵍⵉ ⵜⴰⵎⵖⴰⵔⵜ ⵜⴻⵚⴱⴻⵃ ⴰⵟⵟⴰⵙ. 
ⵓⵍⴰ ⴷ ⵍⵃⵓⴽⴽⴰⵎ ⵏ ⴼⵉⵔⵄⵓⵏ, ⴰⵊⴻⴵⵉⴷ, ⵥⵔⵉⵏ ⵜⵜ ⵓⵛⴰ ⵙⵙⴻⵎⵖⴰⵔⴻⵏ ⵜⵜ ⵖⴰⵔ ⴼⵉⵔⵄⵓⵏ ⵓⵛⴰ ⵉⵡⵢⴻⵏ ⵜⵜ ⵖⴰⵔ ⵜⴰⴷⴷⴰⵔⵜ ⵏ ⴼⵉⵔⵄⵓⵏ. 
ⵓⵛⴰ ⵉⵎⵚⵓⵔⴻⴼ ⴼⵉⵔⵄⵓⵏ ⵎⵍⵉⵀ ⴰⴽ-ⴷ ⴰⴱⵔⴰⵎ ⴷⵉ ⵟⵟⵡⴻⵄ ⵏⵏⴻⵙ. ⴰⵎⵎⵓ ⵉ ⵉⴽⵙⵉ ⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵢⴻⵖⵢⴰⵍ ⴷ ⵉⵙⴻⵎⵖⴰⵏ ⴷ ⵜⵉⵢⵢⴰ ⴷ ⵜⴻⵖⵢⴰⵍ ⴷ ⵉⵍⴻⵖⵎⴰⵏ. 
ⵎⴰⵛⴰ ⵙⵉⴷⵉ ⵉⵡⵜⴰ ⴼⵉⵔⵄⵓⵏ ⴷ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ ⵙ ⵊⵊⵔⴰⵢⴻⵃ ⵎⵖⴰⵔⴻⵏⵜ ⴷⵉ ⵍⴻⵙⴱⴰⴱ ⵏ ⵙⴰⵔⴰⵢ, ⵜⴰⵎⵖⴰⵔⵜ ⵏ ⴰⴱⵔⴰⵎ. 
ⵅⴻⵏⵏⵉ ⴼⵉⵔⵄⵓⵏ ⵉⵍⴰⵖⴰ-ⴷⴷ ⵉ ⴰⴱⵔⴰⵎ, ⵉⵏⵏⴰ ⴰⵙ: “ⵎⴰⵏⴰⵡⴰⵢⴰ ⵉ ⴷⴰⵢⵉ ⵜⴻⴳⴳⵉⴷ? ⵎⴰⵖⴰⵔ ⵡⴰⵔ ⴷ ⴰⵢⵉ ⵜⴻⵏⵏⵉⴷ ⴱⴻⵍⵍⵉ ⵏⴻⵜⵜⴰⵜ ⴷ ⵜⴰⵎⵖⴰⵔⵜ ⵏⵏⴻⵛ? 
ⵎⴰⵢⴻⵎⵎⵉ ⵜⴻⵏⵏⵉⴷ: ‘ⵏⴻⵜⵜⴰⵜ ⴷ ⵓⵞⵎⴰ!’, ⴰⵍⴰⵎⵉ ⵜⵜ ⴳⴳⵉⵖ ⵏⴻⵛⵛ ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵉⵏⵓ? ⵍⴻⵅⵅⵓ ⵅⵣⴰⵔ, ⴰⵇⴰ ⴰⵛ ⵜⴰⵎⵖⴰⵔⵜ ⵏⵏⴻⵛ, ⴽⵙⵉ ⵜⵜ, ⵜⴱⴻⵄⵄⴷⴻⴷ!” 
ⵢⵓⵎⵓⵔ ⴼⵉⵔⵄⵓⵏ ⵉⵔⵢⴰⵣⴻⵏ ⵏⵏⴻⵙ ⵅⴰⵙ ⵓⵛⴰ ⵙⵙⵇⴻⴱⴱⴹⴻⵏ ⵜ ⴰⴽ-ⴷ ⵜⴻⵎⵖⴰⵔⵜ ⵏⵏⴻⵙ ⵓ ⴰⴽ-ⴷ ⵎⴰⵔⵔⴰ ⵎⵉⵏ ⵜⵓⵖⴰ ⵖⴰⵔⴻⵙ. 
