GEN 1:1 Deg umezwaru ixřeq-dd AREBBI ijenwan d temmurt.
GEN 1:2 Tuɣa tammurt texřa, am mammec war tt ittḥidi ḥed u x wudem n [waman] ihewřen taǧest, u Arruḥ n AREBBI tuɣa ittraḥ ittas-dd x wudem n waman.
GEN 1:3 Uca inna AREBBI: “Ad tiři tfawt”, uca tusa-dd tfawt!
GEN 1:4 Iẓra AREBBI belli tafawt teṣbeḥ uca ibḍa AREBBI jar tfawt d taǧest.
GEN 1:5 Iřaɣa AREBBI tafawt ‘aziř’ u ‘taǧest’ iřaɣa as ‘ǧiřet’. Tedweř d tameddit u idweř d ṣṣbeḥ: d ass amezwaru.
GEN 1:6 Uca inna AREBBI: “Ad tiři ict n řqubbet di řwesṭ n waman, ad tebḍa aman x waman!”
GEN 1:7 AREBBI igga řqubbet [n ujenna] uca ibḍa aman i iǧan swadday i řqubbet x waman i iǧan sennej i řqubbet. Uca ammu i temsar.
GEN 1:8 Iřaɣa AREBBI i řqubbet ‘ajenna’. Uca tedweř d tameddit u idweř d ṣṣbeḥ: d ass wiss tnayen.
GEN 1:9 Uca inna AREBBI: “Ad munen waman i iǧan swadday i ujenna ɣar ijj n wemcan maḥend ad dd-iban řbarr!” Uca ammu i temsar.
GEN 1:10 Iřaɣa AREBBI i řbarr ‘tammurt’ u amuni n waman iřaɣa as ‘řebḥur’. Uca iẓra AREBBI [belli] man aya iṣbeḥ.
GEN 1:11 Uca inna AREBBI: “Ad dd-tesseɣmi temmurt aɣemmuy aziza: afsu [aziza] i izarrɛen zzariɛet d tcejjura s fruta i dd itticen frutat ɛlaḥsab marka nsent s zzariɛet nsent dayes x wudem n temmurt!” Uca ammu i temsar.
GEN 1:12 Tesseɣmi-dd temmurt aɣemmuy aziza: afsu [aziza] i izarrɛen zzariɛet ɛlaḥsab marka nnes d tcejjura i dd itticen řɣiǧet ɛlaḥsab marka nsent s zzariɛet nsent dayes. Uca iẓra AREBBI [belli] man aya iṣbeḥ.
GEN 1:13 Uca tedweř d tameddit u idweř d ṣṣbeḥ: d ass wiss třata.
GEN 1:14 Uca inna AREBBI: “Ad [din] iřint tfawin di řqubbet [n ujenna] ḥima ad bḍant jar wass d ǧiřet, ad iřint d řimarat, d wussan ittwaggen, d wussan, d iseggʷusa
GEN 1:15 uca ad iřint d tifawin di řqubbet [n ujenna] ḥima ad wcent tafawt x temmurt!” Uca ammu i temsar.
GEN 1:16 Igga AREBBI tnayen n tifawin mɣarent, tafawt tameqqrant, ḥima ad teḥkem x uziř, u tafawt tameẓyant ḥima ad teḥkem x ǧiřet, uca uřa d itran.
GEN 1:17 Issars i-tent AREBBI di řqubbet [n ujenna] ḥima ad wcent tafawt x temmurt
GEN 1:18 u ḥima ad ḥekment x wass d ǧiřet u ḥima ad bḍant jar tfawt d taǧest. Uca iẓra AREBBI [belli] man aya iṣbeḥ.
GEN 1:19 Uca tedweř d tameddit u idweř d ṣṣbeḥ: d ass wiss arebɛa.
GEN 1:20 Uca inna AREBBI: “Ad dd-ssefyen waman s waṭṭas n [marra min di iǧa] buḥbeř iddaren uca ad ḍwen ijḍaḍ sennej i temmurt ɣar mani [teǧa] řqubbet n ujenna!”
GEN 1:21 Ixřeq-dd AREBBI imuddaren imeqqranen di řebḥar u marra buḥbeř iddaren ittenhezzan, inni zi dd-ssefyen waman, ɛlaḥsab marka nsen uca marra ijḍaḍ s wafriwen ɛlaḥsab marka nsen. Uca iẓra AREBBI [belli] man aya iṣbeḥ.
GEN 1:22 Ibark i-ten AREBBI, inna: “Jjem-dd řɣiǧet, ktarem, ɛemmarem aman n řebḥur, uca ad ktaren ijḍaḍ di temmurt.”
GEN 1:23 Uca tedweř d tameddit u idweř d ṣṣbeḥ: d ass wiss xemsa.
GEN 1:24 Uca inna AREBBI: “Ejj temmurt ad tessuffeɣ [marra min ɣares] buḥbeř iddaren ɛlaḥsab marka nnes: řebhayem d [imuddaren] nni ittbuɛen d řmař n řexřa ɛlaḥsab marka nsen!” Uca ammu i temsar.
GEN 1:25 Igga AREBBI řmař [n řexřa] n temmurt ɛlaḥsab marka nsen, u řebhayem ɛlaḥsab marka nsent u marra [imuddaren] nni ittbuɛen x wudem n temmurt ɛlaḥsab marka nsen. Uca iẓra AREBBI [belli] man aya iṣbeḥ.
GEN 1:26 Uca inna AREBBI: “Ejj aneɣ ad negg Adam, [bnadem] di ṣṣifet nneɣ, deg warwas nneɣ, uca ad ɣares yiři jjehd x iseřman n řebḥar u x ijḍaḍ n ujenna u x řebhayem u x marra tammurt u x marra imuddaren nni ittbuɛen x temmurt!”
GEN 1:27 Ixřeq-dd AREBBI Adam di ṣṣifet nnes. Ixřeq i-t-i-dd di ṣṣifet n AREBBI, ixřeq i-ten-dd awtem d tewtemt.
GEN 1:28 Ibark i-ten AREBBI uca inna asen AREBBI: “Jjem-dd řɣiǧet, ktarem, ɛemmarem tammurt uca arrem tt sadu ufus nwem, ḥekmem x iseřman n řebḥar u x ijḍaḍ n ujenna u x marra imuddaren nni ittbuɛen x temmurt!”
GEN 1:29 Inna AREBBI: “Xzarem, ad awem wceɣ marra afsu [aziza] i izarrɛen zzariɛet x marra wudem n temmurt, uřa d marra ticejjura s řɣiǧet nni izarrɛen zzariɛet. Man aya ad awem yiři d macca.
GEN 1:30 U i marra řmař [n řexřa] n temmurt, u i marra ijḍaḍ n ujenna u i marra min ittbuɛen x temmurt i di iǧa buḥbeř iddaren, ad asen yiři marra afsu [aziza] d macca i nitni.” Uca ammu i temsar.
GEN 1:31 Uca iẓra AREBBI marra min igga, u xzar, tuɣa iṣbeḥ aṭṭas. Tedweř d tameddit u idweř d ṣṣbeḥ: d ass wiss setta.
GEN 2:1 Ammu i ttwakemmřen ijenwan d temmurt d qaɛ řɛeskar nsen.
GEN 2:2 Deg wass wiss sebɛa ikemmeř AREBBI řxedmet nnes i igga uca yareyyeḥ deg wass wiss sebɛa zi marra řxedmet nnes i igga.
GEN 2:3 Ibarek AREBBI ass wiss sebɛa uca issqeddes i-t, minzi dayes i yareyyeḥ zi marra řxedmet nnes, [řxedmet] i dd-ixřeq AREBBI maḥend ad tt igg [amenni]. Ina d imezruyen n wexřaq n ujenna d temmurt řami dd-ttwaxeřqen.
GEN 2:4 Deg wass i igga SIDI AREBBI tammurt d ijenwan
GEN 2:5 - qbeř tuɣi din marra cbarq di temmurt u qbeř dd-iɣmi wefsu n yeyyar, minzi SIDI AREBBI war ijji anẓar ad iwwet [ɛad] x temmurt - uca war tuɣi din Adam [ɛad] ḥima ad ixdem tammurt,
GEN 2:6 tgeɛɛed-dd tayyut zi temmurt, tessu marra udem n temmurt.
GEN 2:7 Uca ikewwen SIDI AREBBI Adam zi tɛejjajt n ucař uca isuḍ řeɛwin n tudart deg wenzaren nnes. Ammu i idweř Adam d ijj n nnefs iddar.
GEN 2:8 Xenni iẓẓu SIDI AREBBI jjennet di Ɛadn, jjihet n ccarq, uca issars din Adam i igga.
GEN 2:9 Uca isseɣmi-dd SIDI AREBBI zi temmurt kuř tacejjart, tecna i řxeẓrat u tmiẓidt i macca, uca [isseɣmi-dd řa d] tacejjart n tudart di řwesṭ n jjennet uřa d tacejjart n tussna n řxar d řɣar.
GEN 2:10 Iffeɣ-dd ijj n iɣzar zi Ɛadn, ḥima ad issuw jjennet u ssenni immsebḍa x arebɛa n izeǧifen i iggin tiseǧyawin.
GEN 2:11 Isem n [yeɣzar] amezwaru d Ficun. Netta i innḍen i marra tammurt n Ḥawila mani iǧa wureɣ.
GEN 2:12 Ureɣ n temmurt nni iṣbeḥ. Aqa din [aserɣaɣ acemřař qqaren as] ‘bᵉdula’, d weẓru n ‘uniks’.
GEN 2:13 Isem n iɣzar wiss tnayen d Jiḥun i tuɣa innḍen i marra tammurt n Kuc.
GEN 2:14 Isem n iɣzar wiss třata d Ḥiddaqil. Netta ittazzeř ɣar ccarq n Accur. U iɣzar wiss arebɛa d Lfuraṭ.
GEN 2:15 Iksi SIDI AREBBI Adam uca issars i-t di jjennet n Ɛadn, ḥima ad tt ixdem u ad tt iḥḍa.
GEN 2:16 SIDI AREBBI iweṣṣa Adam, inna: “Zi marra ticejjura n jjennet ad tecced macca,
GEN 2:17 maca zi tcejjart n tussna n řxar d řɣar war ttᵉtted ca zzayes, minzi deg wass i zzayes ɣa tecced, řmewt i ɣa temmted!”
GEN 2:18 Inna SIDI AREBBI: “War iɛeddeř ad yiři Adam weḥḥdes. Ad as ggeɣ wi t ɣa iɛawnen, am netta qibač nnes.”
GEN 2:19 Tuɣa SIDI AREBBI igga zeg ucař marra řmař n řexřa u marra ijḍaḍ n ujenna, uca indeh i-ten ɣar Adam, ḥima ad iẓar mammec i ten ɣa isemma. Mammec i ɣa isemma Adam kuř nnefs iddaren d wa d isem nnes.
GEN 2:20 Igga Adam ismawen i marra řebhayem d yejḍaḍ n ujenna u i marra řmař n řexřa, [maca] i Adam war yufi wi t ɣa iɛawnen d wi ɣa yiřin am netta qibač nnes.
GEN 2:21 Issehwa-dd SIDI AREBBI ijj n yiḍeṣ yuǧeɣ x Adam uca iṭṭeṣ. [Xenni] iksi icten zi tɣezdisin nnes uca iqqen [amcan yarezmen] nni s weysum.
GEN 2:22 Yarra SIDI AREBBI taɣezdist tenni i iksi zi Adam d tamɣart uca yiwyi tt-i-dd ɣar Adam.
GEN 2:23 [Xenni] inna Adam: “Twařa-ya tanita aqa-tt d iɣes zeg iɣsan inu d aysum zeg weysum inu. Tanita ad tᵉttwasemma ‘taryazt’, [ixs ad yini ‘tamɣart’], minzi nettat tᵉttwaksi-dd zeg weryaz.”
GEN 2:24 X uya ad ismeḥ weryaz di babas d yemmas, ad iqqen ɣar temɣart nnes uca ad iřin d ict n ddat.
GEN 2:25 Tuɣa-ten s tnayen idsen d iɛaryanen, Adam d temɣart nnes, [maca] tuɣa war din ca n řeḥya jar asen.
GEN 3:1 Tuɣa afiɣar d aḥraymi x marra řmař n řexřa i igga SIDI AREBBI. Inna i temɣart: “Ma d tidett inna AREBBI: ‘Ɣarwem war ttᵉttem ca zi marra ticejjura n jjennet’?”
GEN 3:2 Tenna temɣart i ufiɣar: “Zi řɣiǧet n tcejjura n jjennet nzemmar ad necc,
GEN 3:3 maca zi řɣiǧet n tcejjart di řwesṭ n jjennet, inna AREBBI: ‘War zzayes ttᵉttem, war tt ttḥadam, ḥima war tᵉttmettim.’”
GEN 3:4 Inna ufiɣar i temɣart: “Kenniw war tᵉttmettim ca s řmewt qaɛ,
GEN 3:5 [maca] AREBBI issen belli ass nni di zzayes i ɣa teccem, ad arzment tiṭṭawin nwem uca ad tiřim am AREBBI, ad tessnem řxar zi řɣar.”
GEN 3:6 Teẓra temɣart belli tacejjart teṣbeḥ i macca uca teɛjeb asent i tiṭṭawin, aqa tacejjart tegga dayes meẓri maḥend ad zzayes tedweř d tamiɣist. Xenni teksi zi řɣiǧet nnes, tecca uca tewca ɛawed i weryaz nnes i tuɣa akides, uca netta icca.
GEN 3:7 Nnarzment tiṭṭawin nsen uca ufin ixef nsen d iɛaryanen. Xenni xeyyḍen tifray n wartu, uca ggin [zzaysent] tibantiwin i yixef nsen.
GEN 3:8 [Xenni] sřin nitni tmijja n SIDI AREBBI iggur di jjennet ɣar uweṭṭu n tmeddit, uca iffar Adam d temɣart nnes zeg wudem n SIDI AREBBI jar tcejjura n jjennet.
GEN 3:9 Uca iřaɣa SIDI AREBBI Adam, inna as: “Mani teǧid?”
GEN 3:10 Netta inna: “Sřiɣ i tmijja nnec di jjennet uca ggʷedeɣ minzi necc d aɛaryan, xenni ffareɣ.”
GEN 3:11 Inna [as Netta]: “Wi d ac innan belli cek d aɛaryan? Ma teccid zi tcejjart nni x cek weṣṣiɣ ‘Aqa ad zzayes tecced?”
GEN 3:12 Inna Adam: “Tamɣart nni d ayi tewcid, nettat tewca ayi zi tcejjart uca cciɣ.”
GEN 3:13 Inna as SIDI AREBBI i temɣart: “Manawya i teggid?” Tenna [as] temɣart: “Iɣarra ayi ufiɣar uca cciɣ.”
GEN 3:14 Inna SIDI AREBBI i ufiɣar: “Řami teggid aya, aqa ac d amenɛuř jar marra řebhayem u jar marra řmař n řexřa. X uɛeddis nnec ad tmurded, uca ad tecced ucař marra ussan n tudart nnec.
GEN 3:15 Ad ggeɣ řeɛdawat jar ac d temɣart, jar zzariɛet nnec d zzariɛet nnes. D tenni nnes ad teřbez azeǧif nnec, u cek ad as třebzed anirz nnes.”
GEN 3:16 Inna i temɣart: “Aṭṭas i ɣa arniɣ řeḥriq d řewjeɛ n tarwa nnem. S řeḥriq ad dd-tarwed iḥenjiren, uca ɣar weryaz nnem ad temmeẓred, maca netta ad xam iḥkem.”
GEN 3:17 Uca inna i Adam: “Minzi tesřid ɣar tmijja n temɣart nnec u teccid zi tcejjart tenni x cek weṣṣiɣ: ‘Aqa ad zzayes tecced!’, ad tiři temmurt d nneɛřet x ssibbet nnec. S tamara ad zzayes tecced, marra ussan n tudart nnec.
GEN 3:18 Isennanen d tzeggʷart i d ac dd ɣa tesseɣmi, uca ad tecced afsu n yeyyar.
GEN 3:19 S tidi n uɣembub nnec ad tecced aɣrum ař dd ɣa tdewřed ɣar temmurt i zi temmeksid, minzi cek d acař uca ɣar ucař i ɣa dd-tdewřed.”
GEN 3:20 Iřaɣa Adam isem n temɣart nnes Ḥawwa minzi nettat d yemmas n marra inni iddaren.
GEN 3:21 Igga SIDI AREBBI i Adam d temɣart nnes arruḍ s yiřem uca yarḍ asen t.
GEN 3:22 Inna SIDI AREBBI: “Xzar, Adam wa, aqa idweř am yijjen zzayneɣ, issen řxar d řɣar. Řexxu, ejj i-t war isswaẓẓaḍ afus nnes maḥend ad iksi zi Tcejjart n Tudart ɛawed, ad yecc u [xenni] ad iddar i řebda.”
GEN 3:23 Uca issuffuɣ i-t SIDI AREBBI zi jjennet n Ɛadn ḥima ad ixdem tammurt i zi tuɣa immeksi.
GEN 3:24 Yuẓẓeř x Adam uca igga ikiruben ccarq i jjennet n Ɛadn d yijj n ssif itteḥduduq, ittecḍiḍiḥ ssa d ssa i uɛessi x webrid n tcejjart n tudart.
GEN 4:1 Issen Adam Ḥawwa, tamɣart nnes, uca teysi s ddeyset uca turuw-dd Qayin, tenna “Jjiɣ-dd aryaz, d SIDI!”
GEN 4:2 [Xenni] ɛawed turuw-dd umas Habil. Tuɣa Habil d ameksaw n wuǧi u Qayin iruḥ ixeddem tammurt.
GEN 4:3 Uca awarni ussan imsar belli Qayin iqeddem ict n tewhibt zi řɣiǧet n wudem n temmurt i SIDI.
GEN 4:4 Iqeddem Habil ɛawed [ict n tewhibt] zeg imenza n wuǧi nnes, zeg inni ɣar iǧa tadunt aṭṭas. Ixzar SIDI ɣar Habil d tewhibt nnes,
GEN 4:5 [maca] ɣar Qayin d tewhibt nnes war d as yarri ca taynit. Uca ixeyyeq Qayin aṭṭas, inneqřeb as uɣembub.
GEN 4:6 Inna SIDI i Qayin: “Mayemmi txeyyqed? Mayemmi d ac inneqřeb uɣembub?
GEN 4:7 Mařa teggid mliḥ, ma war [din] ittiři usgeɛɛed, u mařa war teggid mliḥ, ddenb aqa-t izzeř ɣar tewwart? Meẓri nnes ɣarek, [maca] ittxeṣṣa cek ad xas tseǧḍed.”
GEN 4:8 Issiweř Qayin ak-d Habil umas. Uca imsar am ǧan nitni deg iyyar, belli Qayin ikkar ɣar umas Habil uca inɣa i-t.
GEN 4:9 [Xenni] inna SIDI i Qayin: “Mani iǧa umac Habil?” Inna: “War ssineɣ. Ma necc d ameḥḍay x uma?”
GEN 4:10 Uca inna Netta: “Min teggid? Aqa tmijja n idammen n umac sɣuyyun-dd ɣari zi temmurt.
GEN 4:11 Řexxu, aqa cek d menɛuř zi temmurt, tenni yarezmen aqemmum nnes, ḥima ad teqbeř idammen n umac zeg ifassen nnec.
GEN 4:12 Xmi ɣa txedmed x temmurt, war ttᵉdikkʷiř ad ac tewc marra jjehd nnes uca cek ad tiřid d amennejru d ametluɛ di temmurt.”
GEN 4:13 Xenni inna Qayin i SIDI: “Lɛiqab inu imɣar aṭṭas x tzemmar inu.
GEN 4:14 Aqa Cek ass[-a] tuẓẓřed xafi zeg uɣembub n temmurt[-a] uca zeg uɣembub nnec ad ttwaffare. Ad iřiɣ d amennejru d ametluɛ di temmurt uca ad yiři marra wenni d ayi ɣa yafen ad ayi ineɣ.”
GEN 4:15 Xenni inna as SIDI: “S uya marra wenni i ɣa inɣen Qayin, ad zzayes xeřfen sebɛa n twařawin.” Uca igga SIDI řeɛřamet i Qayin belli marra wenni t ɣa yafen war t ineqq.
GEN 4:16 Xenni iffeɣ-dd Qayin zeg wudem n SIDI uca iruḥ izeddeɣ di temmurt n Nud, ccarq n Ɛadn.
GEN 4:17 Issen Qayin tamɣart nnes uca teysi s ddeyset uca turuw as-dd Ḥanux. Tuɣa [Qayen] ibna ict n tendint uca iřaɣa as i tendint am yisem n mmis Ḥanux.
GEN 4:18 Ḥanux ijja-dd Ɛirad, u Ɛirad ijja-dd Miḥuya’il u Miḥuya’il ijja-dd Matuca’il u Matuca’il ijja-dd Lamak.
GEN 4:19 Imřec Lamak tnayen n temɣarin. Icten qqaren as Ɛada, tenneɣni qqaren as Ṣilla.
GEN 4:20 Turuw-dd Ɛada Yabal. Netta idweř d babatsen i imezdaɣ n iqiḍan u i imeksawen n řebhayem.
GEN 4:21 Isem n umas tuɣa d Yubal wenni tuɣa d babatsen i marra inni ittiraren řgambri d temja.
GEN 4:22 Ṣilla turuw-dd ɛawed Tubal-Qayin, amziř n imziřen n marra inni ixeddmen s nnḥas d wuzzař. Učmas n Tubal-Qayin [tuɣa] d Naɛma.
GEN 4:23 Inna Lamak i temɣarin nnes, Ɛada d Ṣilla: “Sřent i tmijja inu, [a] timɣarin n Lamak! Sřent ɣar min ɣa iniɣ. Aqa nɣiɣ aryaz i uyezzim inu d uḥenjir i uyeddim inu!
GEN 4:24 Aqa ad xeřfen zi Qayin sebɛa n twařawin, maca zi Lamak sebɛa u-sebɛin n twařawin.”
GEN 4:25 Yudef Adam ɛawed x tamɣart nnes uca turuw-dd nettat aḥenjir. Třaɣa as Cit, minzi [tenna:] “AREBBI iwca ayi zzariɛet nneɣni deg wemcan n Habil, minzi Qayin inɣa i-t.”
GEN 4:26 Uřa i Cit ittwaxřeq-dd useymi, uca igga as Anuc. Řexdenni ibda bnadem s uřaɣi x Yisem n SIDI. Wa d adlis ittwanḍen n imezruyen n yinni dd-ittwaxeřqen zi Adam.
GEN 5:1 Ass min di igga AREBBI Adam, igga i-t di ṣṣifet n AREBBI.
GEN 5:2 Awtem d tewtemt ixřeq i-ten-dd. Ibark i-ten uca iřaɣa asen s yisem ‘Adam’, [bnadem], deg wass i di ten dd-ixřeq.
GEN 5:3 Awarni řami iddar Adam mya u-třatin n iseggʷusa, ijja-dd [aḥenjir] deg warwas nnes u di ṣṣifet nnes uca iřaɣa as Cit.
GEN 5:4 Awarni řami dd-ijja Cit, iddar Adam [ɛad] temn-mya n iseggʷusa, ijja-dd iḥenjiren d tḥenjirin.
GEN 5:5 Ammu i iddar Adam tesɛa-mya u-třatin n iseggʷusa uca immut.
GEN 5:6 Awarni řami iddar Cit mya u-xemsa n iseggʷusa, ijja-dd Anuc.
GEN 5:7 Awarni řami dd-ijja Anuc, iddar Cit [ɛad] temn-mya u-sebɛa n iseggʷusa, ijja-dd iḥenjiren d tḥenjirin.
GEN 5:8 Ammu i iddar Cit tesɛa-mya u-tenɛac n iseggʷusa uca immut.
GEN 5:9 Awarni řami iddar Anuc tesɛin n iseggʷusa, ijja-dd Qinan.
GEN 5:10 Awarni řami dd-ijja Qinan, iddar Anuc [ɛad] temn-mya u-xemmesṭac n iseggʷusa, ijja-dd iḥenjiren d tḥenjirin.
GEN 5:11 Ammu i iddar Anuc tesɛa-mya u-xemsa n iseggʷusa uca immut.
GEN 5:12 Awarni řami iddar Qinan sebɛin n iseggʷusa, ijja-dd Mahalal-Il.
GEN 5:13 Awarni řami dd-ijja Mahalal-Il, iddar Qinan [ɛad] temn-mya u-rebɛin n iseggʷusa, ijja-dd iḥenjiren d tḥenjirin.
GEN 5:14 Ammu i iddar Qinan tesɛa-mya u-ɛecra n iseggʷusa uca immut.
GEN 5:15 Awarni řami iddar Mahalal-Il xemsa u-settin n iseggʷusa, ijja-dd Yarad.
GEN 5:16 Awarni řami dd-ijja Yarad, iddar Mahalal-Il [ɛad] temn-mya u-třatin n iseggʷusa, ijja-dd iḥenjiren d tḥenjirin.
GEN 5:17 Ammu i iddar Mahalal-Il temn-mya u-xemsa u-tesɛin n iseggʷusa uca immut.
GEN 5:18 Awarni řami iddar Yarad mya u-tnayen u-settin n iseggʷusa, ijja-dd Ḥanux.
GEN 5:19 Awarni řami dd-ijja Ḥanux, iddar Yarad [ɛad] temn-mya n iseggʷusa, ijja-dd iḥenjiren d tḥenjirin.
GEN 5:20 Ammu i iddar Yarad tesɛa-mya u-tnayen u-settin n iseggʷusa uca immut.
GEN 5:21 Awarni řami iddar Ḥanux xemsa u-settin n iseggʷusa, ijja-dd Matucalaḥ.
GEN 5:22 Awarni řami dd-ijja Matucalaḥ, yuyur Ḥanux ak-d AREBBI teřt-mya n iseggʷusa, ijja-dd iḥenjiren d tḥenjirin.
GEN 5:23 Ammu i iddar Ḥanux teřt-mya u-xemsa u-settin n iseggʷusa.
GEN 5:24 Yuyur Ḥanux ak-d AREBBI uca war ittwif ɛad minzi AREBBI iksi i-t.
GEN 5:25 Awarni řami iddar Matucalaḥ mya u-sebɛa u-tmanyin n iseggʷusa, ijja-dd Lamak.
GEN 5:26 Awarni řami dd-ijja Lamak, iddar Matucalaḥ [ɛad] sebɛa-mya u-tnayen u-tmanyin n iseggʷusa, ijja-dd iḥenjiren d tḥenjirin.
GEN 5:27 Ammu i iddar Matucalaḥ tesɛa-mya u-tesɛa u-settin n iseggʷusa uca immut.
GEN 5:28 Awarni řami iddar Lamak mya u-tnayen u-tmanyin n iseggʷusa, ijja-dd ijj n uḥenjir.
GEN 5:29 Iřaɣa isem nnes Nuḥ, inna: “Wa ad aneɣ issfewwej x řxedmet nneɣ d tamara n ifassen nneɣ, minzi SIDI aqa inɛeř tammurt!”
GEN 5:30 Awarni řami dd-ijja Nuḥ, iddar Lamak [ɛad] xemsa-mya u-xemsa u-tesɛin n iseggʷusa, ijja-dd iḥenjiren d tḥenjirin.
GEN 5:31 Ammu i iddar Lamak sebɛa-mya u-sebɛa u-sebɛin n iseggʷusa uca immut.
GEN 5:32 Awarni řami iddar Nuḥ xemsa-mya n iseggʷusa, Nuḥ ijja-dd Cam d Ḥam d Yafat.
GEN 6:1 Řami bdan iwdan ad ktaren di temmurt uca urwent asen-dd yessitsen,
GEN 6:2 aqa ẓrin arrawen n AREBBI belli yessis n bnadem cnant, uca ksin timɣarin i yixef nsen zi marra tinni ixḍaren nitni.
GEN 6:3 [Xenni] inna SIDI: “War ittɣimi Arruḥ inu řebda di bnadem, aqa-t d ddat zi ssibbet n uweddar nnes. Ad iřin wussan [n tudart] nnes mya u-ɛicrin n iseggʷusa.”
GEN 6:4 Deg wussan nni tuɣa ‘inifilim’, [ixs ad yini ‘inni iwḍan’], di temmurt uca awarni man aya ɛawed, umi dd-udfen arraw n AREBBI ɣar yessis n iwdan uca urwent asen-dd. Nitni d ‘jjwaheř’ n zzman nni, d iryazen s yisem.
GEN 6:5 Iẓra SIDI belli řɣar n bnadem d aṭṭas x temmurt uca marra řemwayař n uxarreṣ n wuř nnes d aɛeffan kuř ass.
GEN 6:6 Uca indem SIDI umi igga bnadem di temmurt uca iqqes as wuř nnes.
GEN 6:7 Inna SIDI: “Ad mḥiɣ x wudem n temmurt bnadem i dd-xeřqeɣ, bnadem ak-d řebhayem d [imuddaren] ittbuɛen uřa d ijḍaḍ n ujenna, minzi nedmeɣ umi ten ggiɣ.”
GEN 6:8 [Maca] Nuḥ yufa arḍa di tiṭṭawin n SIDI. Ina d imezruyen n yinni dd-ittwaxeřqen zi Nuḥ.
GEN 6:9 Tuɣa Nuḥ d aryaz d amsegged ikmeř jar marra jjiřat nni iddaren akides. Yuyur Nuḥ ak-d AREBBI.
GEN 6:10 Uca ijja-dd Nuḥ třata n iḥenjiren: Cam d Ḥam d Yafat.
GEN 6:11 Tuɣa tammurt d ict n řxarbet di tiṭṭawin n AREBBI u tuɣa tammurt teccur s lɛunf.
GEN 6:12 Ixzar AREBBI ɣar temmurt, u xzar, aqa-tt d řxarbet, maɣar marra imeddaren s arrimet n weysum tuɣa xarrben abrid nsen x temmurt.
GEN 6:13 Inna AREBBI i Nuḥ: “Aneggar n marra imeddaren s arrimet n weysum aqa-t zzat i wudem inu, minzi tammurt teccur s lɛunf zzaysen. Aqa ad ten teḥḥiɣ ak-d temmurt.
GEN 6:14 Egg i yixef nnec ijj n uɣarrabu s ukeccuḍ n umerzi uca egg ixxamen [i marra řmař] deg uɣarrabu. Ɣeǧef aɣarrabu zi daxeř u zi barra s tizeft.
GEN 6:15 Ammu ittxeṣṣa ad t tegged: tuzzeggart n uɣarrabu [ad tiři] teřt-mya n iɣaǧen u tiru n uɣarrabu [ad tiři] xemsin n iɣaǧen u řuɛřa nnes [ad yiři] třatin n iɣaǧen.
GEN 6:16 Ittxeṣṣa ad tegged ict n tburjet i tfawt deg uɣarrabu uca ad tt tkemmřed anect n ijj n uɣiř zi sennej. Ad tegged tawwart n uɣarrabu deg uɣezdis nnes. Ad tegged ṭṭebqet n wadday d ṭṭebqet wiss tnayen [di řwesṭ] d ṭṭebqet wiss třata [sennej].
GEN 6:17 Aqa Necc ad ssekkeɣ sseḥřet n waman x temmurt, ḥima ad teḥḥiɣ sadu ujenna marra imeddaren s arrimet n weysum i di iǧa arruḥ n tudart. Marra min iǧan di temmurt ad iḍřeq i buḥbeř.
GEN 6:18 [Maca] ad ssbeddeɣ Řɛahd inu akidek uca cek ad tadfed ɣar uɣarrabu, cek d iḥenjiren nnec d temɣart nnec d temɣarin n iḥenjiren nnec akidek.
GEN 6:19 Uca zi marra min iddaren, zi marra imeddaren s arrimet n weysum ad tessidfed tyuya ɣar uɣarrabu ḥima ad ddaren akidek: ittxeṣṣa ad yiři d awtem d tewtemt.
GEN 6:20 Ad ɣarek dd-tas tyuya zi marra, ḥima ad teḥḍid tudart nsen: zeg ijḍaḍ ɛlaḥsab markat nsen, zi řebhayem ɛlaḥsab markat nsent u zi marra [imuddaren] nni ittbuɛen x temmurt ɛlaḥsab markat nsen.
GEN 6:21 Uca cek, ksi i yixef nnec zi marra macca i ittwaccan uca smun i-tt ɣarek, ḥima ad ac yiři d macca uca uřa i nitni.”
GEN 6:22 Uca igga Nuḥ am mammec marra i xef t iweṣṣa AREBBI, ammu i [t] igga.
GEN 7:1 Inna SIDI i Nuḥ: “Adef cek d marra [řaǧ n] taddart nnec ɣar uɣarrabu, minzi ẓriɣ cek d amsegged zzat i wudem inu di jjiř-a.
GEN 7:2 Zi marra řebhayem n řeḥřař ad ɣarek teksid sebɛa, sebɛa, awtem d tewtemt nnes, u zi řebhayem n řeḥram tyuya, awtem d tewtemt nnes.
GEN 7:3 Uřa zeg ijḍaḍ n ujenna ittxeṣṣa ad teksid sebɛa n tiyuyawin, awtem d tewtemt, ḥima ad teḥḍid zzariɛet [nsen] i tudart di marra tammurt,
GEN 7:4 minzi xmi ɣa ɛdun ɛad sebɛa n wussan Necc ad jjeɣ anẓar ad iwwet x temmurt arebɛin n wussan d arebɛin n ǧyaři, uca ad teḥḥiɣ zeg wudem n temmurt marra min iǧan, d min ggiɣ Necc.”
GEN 7:5 Uca igga Nuḥ am mammec kuřci i xef t iweṣṣa SIDI.
GEN 7:6 Tuɣa Nuḥ d mmis n setta-mya n iseggʷusa řami dd-tusa sseḥřet n waman x temmurt.
GEN 7:7 Uca yudef Nuḥ ɣar uɣarrabu di ssibbet n waman n sseḥřet, [netta d] iḥenjiren nnes d temɣart nnes d temɣarin n iḥenjiren nnes akides.
GEN 7:8 Zi řebhayem n řeḥřař u zi řebhayem n řeḥram u zeg ijḍaḍ u zi marra min ittbuɛen x [wudem n] temmurt
GEN 7:9 tudef tyuya s tyuya ɣar Nuḥ ɣar uɣarrabu, awtem d tewtemt am mammec iweṣṣa AREBBI i Nuḥ.
GEN 7:10 Awarni sebɛa n wussan imsar belli aman n sseḥřet usin-dd x temmurt.
GEN 7:11 Deg useggʷas wiss setta-mya zi tudart n Nuḥ, deg uyur wiss tnayen, deg wass wiss sbeɛṭac n uyur [nni], deg wass-a nnit, tuɣa ssefyen-dd marra řɛunṣarat n [waman] ihewřen uca ttwarezment tburjatin n ujenna.
GEN 7:12 Tuɣa anẓar iqqim iccat s jjehd x temmurt arebɛin n wussan d arebɛin n ǧyaři.
GEN 7:13 Deg wass nni [nnit] tuɣa Nuḥ yudef ɣar uɣarrabu ak-d Cam d Ḥam d Yafat, ayt n Nuḥ, uřa ak-d tamɣart n Nuḥ u ak-d třata n temɣarin n iḥenjiren nnes akidsen,
GEN 7:14 nitni d marra markat n řmař [n řexřa] d marra markat n řebhayem d marra markat n [imuddaren] nni ittbuɛen x temmurt d marra markat n ijḍaḍ, marra ajḍiḍ, d marra [min ɣar iǧa] afriwen.
GEN 7:15 Zi marra imeddaren s arrimet n weysum i di iǧa arruḥ n tudart, tusa-dd tyuya s tyuya ɣar Nuḥ ɣar uɣarrabu.
GEN 7:16 U zi marra imeddaren s arrimet n weysum i dd-yusin, yudef ijj n wewtem d ict n tewtemt am mammec [t] yumur AREBBI, uca iqqen SIDI [tawwart] awarni as.
GEN 7:17 Tuɣa sseḥřet x temmurt arebɛin n wussan uca geɛɛden waman uca ssgeɛɛden aɣarrabu ařami igeɛɛed sennej i [wudem n] temmurt.
GEN 7:18 Geɛɛden waman uca mmarenyen-dd aṭṭas sennej i temmurt uca yuyur uɣarrabu x wudem n waman.
GEN 7:19 Geɛɛden aman aṭṭas s waṭṭas, ařami marra idurar yuɛřan i din iǧan sadu marra ajenna, dewřen dřin.
GEN 7:20 Uřyen waman xemmesṭac n iɣaǧen sennej i idurar uca dřin idurar.
GEN 7:21 Marra imeddaren s arrimet n weysum i ittenhezzan x temmurt iḍřeq i buḥbeř nnes, ijḍaḍ d řebhayem, řmař [n řexřa], marra [imuddaren] ittbuɛen, inni ittbuɛen x wudem n temmurt uřa d marra iwdan.
GEN 7:22 Marra min di iǧa řeɛwin n arruḥ n tudart ɣarsen deg wenzaren nsen zi marra min din [iǧan] x řbarr, immut.
GEN 7:23 Uca marra min din iǧan x wudem n temmurt ittwamḥa, zi bnadem ař řmař d imuddaren inni ittbuɛen d ijḍaḍ n ujenna. Ina ttwateḥḥan zi temmurt. Nuḥ weḥḥdes i iqqimen d marra min kides i iǧan deg uɣarrabu.
GEN 7:24 Geɛɛden waman x temmurt mya u-xemsin n wussan.
GEN 8:1 Uca ixarreṣ AREBBI di Nuḥ u di marra řmař [n řexřa] d marra řebhayem i tuɣa akides deg uɣarrabu. Igga AREBBI ad yekk ijj n usemmiḍ x temmurt ařami arsan waman.
GEN 8:2 Bellɛent řɛunṣarat n [waman] ihewřen d tburjatin n ujenna uca ibedd wenẓar zeg ujenna.
GEN 8:3 Uca, am dd-ttasen ttraḥen, dewřen-dd waman zi temmurt. Awarni mya u-xemsin n wussan neqṣen waman.
GEN 8:4 Deg uyur wiss sebɛa, deg wass wiss sbeɛṭac n uyur [nni], yarsa uɣarrabu x idurar n Ararat.
GEN 8:5 Qqimen waman neqqṣen ař ayur wiss ɛecra. Deg uyur wiss ɛecra, deg [wass] amezwaru n uyur, ḍharent-i-dd tqiccatin n idurar.
GEN 8:6 Awarni řami ɛdun arebɛin n wussan, yarzem Nuḥ taburjet n uɣarrabu nni [dayes] tuɣa igga,
GEN 8:7 uca issekk abaɣeř. Wanita iffeɣ, iqqim ittraḥ ittas-dd ařami bdan waman ttaẓɣen x temmurt.
GEN 8:8 Xenni issekk ssenni tadbirt, ḥima ad iẓar, ma aman neqṣen x wudem n temmurt.
GEN 8:9 [Maca] war tufi tedbirt mani ɣa tessars tařeqqa n uḍar nnes uca teɛqeb-dd ɣares ɣar uɣarrabu, minzi aman tuɣa aten [ɛad] x wudem n marra tammurt. Isswiẓẓeḍ afus nnes, iṭṭef i-tt uca issidef i-tt-i-dd ɣares deg uɣarrabu.
GEN 8:10 Iraja ɛad sebɛa n wussan nneɣni, [xenni] issekk tadbirt ɛawed zeg uɣarrabu.
GEN 8:11 Uca tadbirt teɛqeb-dd ɣares ɣar tmeddit, u xzar, aqa afar n zzitun deg uqemmum nnes. [Xenni] ifhem Nuḥ belli aman neqṣen zi temmurt.
GEN 8:12 Iraja ɛad sebɛa n wussan, [xenni] issekk tadbirt [ɛawed] uca nettat war ɣares dd-teɛqib ɛad.
GEN 8:13 Deg useggʷas wiss setta-mya u-waḥit [n Nuḥ], deg [uyur] amezwaru, deg [wass] amezwaru n uyur nni, uẓɣen waman x temmurt. Iksi Nuḥ [tawwart n] useqqaf n uɣarrabu, ixzar ɣar barra, uca xzar, udem n temmurt aqa yuẓeɣ.
GEN 8:14 Deg uyur wiss tnayen, deg wass wiss sebɛa u-ɛicrin n uyur [nni], tuẓeɣ temmurt.
GEN 8:15 Xenni issiweř AREBBI ak-d Nuḥ, inna:
GEN 8:16 “Ffeɣ zeg uɣarrabu, cek d temɣart nnec d iḥenjiren nnec d temɣarin n iḥenjiren nnec akidek.
GEN 8:17 Marra min iddaren i iǧan akidek, zi marra min ɣarsen arrimet n weysum, zeg ijḍaḍ, zi řmař u zi marra [imuddaren] nni ittbuɛen x temmurt, ejj i-ten ad ffɣen akidek, ejj i-ten ad mṭarracen x temmurt, ad arren řɣiǧet uca ad mmarenyen x temmurt.”
GEN 8:18 Iffeɣ Nuḥ d iḥenjiren nnes d temɣart nnes d temɣarin n iḥenjiren nnes akides.
GEN 8:19 Marra řmař [n řexřa], marra min ittbuɛen, d marra ijḍaḍ, d marra min ittenhezzan x temmurt ffɣen zeg uɣarrabu ɛlaḥṣab řaǧat nsen.
GEN 8:20 Ibna Nuḥ ijj n uɛalṭar i SIDI uca iksi zi marra řmař n řeḥřař u zi marra ijḍaḍ n řeḥřař uca iqeddem tiɣarṣa n wecmaḍ x uɛalṭar.
GEN 8:21 Uca icemm SIDI řefwaḥet ittfuḥen uca inna SIDI deg wuř nnes: “War ttɛiqqibeɣ ɛad ad neɛřeɣ tammurt x ssibbet n bnadem, minzi min dd-itteffɣen zeg wuř n bnadem d aɛeffan waha zi temẓi nnes. War ttɛiqqibeɣ ɛad ad wteɣ marra min iddaren am mammec ggiɣ.
GEN 8:22 Marra ussan i ɣa teqqim temmurt teǧa, ad tiři tyarza d tmeyra, teṣmeḍ d řeḥmu, anebdu d řmecta uca ass d ǧiřet war ttbeddin [ɛemmarṣ].”
GEN 9:1 Xenni ibarek AREBBI Nuḥ d iḥenjiren nnes uca inna asen: “Jjem-dd řɣiǧet, marenyem u ɛemmarem tammurt!
GEN 9:2 Tiggʷudi d řɛurret zi kenniw ad iřint x marra řmař [n řexřa], x marra ijḍaḍ n ujenna u x marra min ittbuɛen x temmurt u x marra iseřman di řebḥar: aqa mmewcen deg ufus nwem.
GEN 9:3 Marra min ittbuɛen, min iddaren, ad awem yiři d macca. Necc ad awem t wceɣ marra, am d awem wciɣ afsu aziza,
GEN 9:4 maca aysum ak-d buḥbeř nnes i iǧan d idammen nnes, war [ten] ttᵉttem.
GEN 9:5 D tidett ad ttareɣ idammen nwem n řeɛmur nwem, ad ten ttareɣ zeg ifassen n marra imuddaren, uřa zeg ifassen n bnadem, u zeg ifassen n umas n kuř ijjen ad ttareɣ řeɛmar n bnadem.
GEN 9:6 Wi ɣa issizzřen idammen n bnadem, idammen nnes ad ten ssizzřen s ufus n bnadem, minzi AREBBI igga bnadem di ṣṣifet nnes.
GEN 9:7 U kenniw, jjem-dd řɣiǧet, dewřem deg waṭṭas, mṭarrcem di temmurt uca dewřem deg waṭṭas xas.”
GEN 9:8 Uca issiweř AREBBI ak-d Nuḥ d iḥenjiren nnes nni ɣares, inna:
GEN 9:9 “Necc, xzar, Necc tteggeɣ Řɛahd inu akidwem u ak-d zzariɛet nwem awarni awem,
GEN 9:10 u ak-d marra buḥbeř iddaren nni iǧan akidwem, ak-d ijḍaḍ, ak-d řmař u ak-d marra řmař [n řexřa] x temmurt inni akidwem, [wah, ak-d] marra min dd-iffɣen zeg uɣarrabu ař marra min iddaren x temmurt.
GEN 9:11 Ad ggeɣ Řɛahd inu akidwem, aqa marra imeddaren s arrimet n weysum war ttwakessin ɛad s waman n sseḥřet, u war din tᵉttiři ɛad sseḥřet i ɣa yareddǧen tammurt.”
GEN 9:12 Xenni inna AREBBI: “D ta ad tiři d řeɛřamet n Řɛahd tenni i ɣa ggeɣ jar ayi d kenniw d marra řeɛmar iddaren akidwem, i [marra] jjiřat [i] řebda:
GEN 9:13 Ad ggeɣ řqews inu deg iseynuten wenni i ɣa yiřin d řeɛřamet n Řɛahd jar ayi d temmurt.
GEN 9:14 Xmi ɣa bḍiɣ iseynuten x temmurt, xenni ad imsar belli řqews-a ad dd-iḍhar deg iseynuten.
GEN 9:15 Xenni ad idareɣ Řɛahd inu jar ayi d kenniw d marra řeɛmar iddaren n marra imeddaren s arrimet n weysum. War dd-ddikkʷiřen waman d sseḥřet ɛawed, maḥend ad ssɣarqen marra imeddaren s arrimet n weysum.
GEN 9:16 Ad dd-iḍhar řqews deg iseynuten, uca Necc ad t ẓareɣ ḥima ad idareɣ Řɛahd i řebda jar AREBBI d marra řeɛmar iddaren di marra imeddaren s arrimet n weysum i iǧan x temmurt.”
GEN 9:17 Uca inna AREBBI i Nuḥ: “D ta d řeɛřamet n Řɛahd inu wenni i ɣa ggeɣ jar ayi d marra imeddaren s arrimet n weysum i iǧan x temmurt.”
GEN 9:18 Tarwa n Nuḥ inni dd-iffɣen zeg uɣarrabu [tuɣa aten d] Cam d Ḥam d Yafat. Ḥam tuɣa d babas n Kenɛan.
GEN 9:19 Ina d třata n iḥenjiren n Nuḥ. Zzaysen ttwabezzɛen [iwdan] di marra tammurt.
GEN 9:20 Ibda Nuḥ [ixeddem] am ufeǧaḥ, iẓẓu tizayarin deg umarjeɛ n uḍiř.
GEN 9:21 [Umi] iswa binu, iscar uca iɛarra ixef nnes di řwesṭ n uqiḍun nnes.
GEN 9:22 Iẓra Ḥam, babas n Kenɛan, tuɛɛaryent n babas uca inna t i tnayen n aytmas di barra.
GEN 9:23 Ksin Cam d Yafat ca n werruḍ, ssarsen t x tɣarḍin n tnayen idsen nsen uca uyuren ɣar ḍeffar, dřin tuɛɛaryent n babatsen. Arrin aɣembub nsen ɣar ḍeffar, war ẓrin ca tuɛɛaryent n babatsen.
GEN 9:24 Ifaq-dd Nuḥ zi ssekra nnes uca idweř yargeb x min d as igga mmis amaẓuẓ.
GEN 9:25 Inna: “D amenɛuř [i yeǧa] Kenɛan! Ad yiři d amsexxar [qaɛ] n imsexxaren i aytmas!”
GEN 9:26 Uca inna: “Ad ittwabarek SIDI, AREBBI n Cam. Kenɛan ad yiři d amsexxar i nitni.
GEN 9:27 Zeɛma ad iwesseɛ AREBBI tazeddiɣt i Yafat, ad izdeɣ deg iqiḍan n Cam, u Kenɛan ad asen yiři d amsexxar.”
GEN 9:28 Awarni sseḥřet iddar Nuḥ [ɛad] teřt-mya u-xemsin n iseggʷusa.
GEN 9:29 Ammu i iddar Nuḥ tesɛa-mya u-xemsin n iseggʷusa, xenni immut. Ina d imezruyen n yinni dd-ittwaxeřqen zeg ayt n Nuḥ: Cam, Ḥam d Yafat.
GEN 10:1 Ttwarwen asen-dd iḥenjiren awarni i sseḥřet.   *
GEN 10:2 Ayt n Yafat [tuɣa aten d] Jumar, Majuj, Maday, Yawan, Tubal, Macik d Tiras.
GEN 10:3 Iḥenjiren n Jumar, [tuɣa aten d] Ackanaz, Rifat d Tujarma.
GEN 10:4 Iḥenjiren n Yawan [tuɣa aten d] Ilica, Tarcic d Ikittiyyen d Idudaniyyen.
GEN 10:5 Zzaysen i ttwabḍant tegzirin n řegnus di temmura nsen, kuř ijjen ɛlaḥsab iřes nnes uca [marra] ɛlaḥsab řaǧ nsen u di řegnus nsen.
GEN 10:6 Ayt n Ḥam [tuɣa aten d] Kuc, Miṣrayim, Fuṭ d Kenɛan.
GEN 10:7 Iḥenjiren n Kuc [tuɣa aten d] Seba, Ḥawila, Sabta, Raɛama d Sabtaka. Iḥenjiren n Raɛama [tuɣa aten d] Caba d Dadan.
GEN 10:8 Kuc ijja-dd Nimrud. Wanita ibda ad yiři d jjiheř di temmurt.
GEN 10:9 Wa tuɣa d anegmar d ameqqran zzat i wudem n SIDI. X uya qqaren: ‘Anegmar ameqqran am Nimrud zzat i wudem n SIDI.’
GEN 10:10 Amezwar n tgeldit nnes tuɣa atent [d tineddam n] Babil d Irix d Akkad d Kalna di temmurt n Cinɛar.
GEN 10:11 Zi temmurt nni dd-iffeɣ ɣar Accur uca ibna [din] Ninwa, Riḥubut-Ɛir d Kalaḥ
GEN 10:12 d Risin jar Ninwa d Kalaḥ, nettat d tandint tameqqrant.
GEN 10:13 Miṣrayim ijja-dd Iludiyyen, Iɛanamiyyen, Ilahabiyyen, Inaftuḥiyyen,
GEN 10:14 Ifatrusiyyen, Ikasluḥiyyen, inni zi dd-iqqarṣen Ifilisṭiniyyen, uřa d Ikafturiyyen.
GEN 10:15 Kenɛan ijja-dd Ṣidun, amenzu nnes, d Ḥit
GEN 10:16 d Uyabusi d Umuri d Ujirjaci
GEN 10:17 d Uḥiwi d Uɛarqi d Usini
GEN 10:18 d Urwadi d Uṣamari d Uḥamati. Awarni as mbezzɛent marra řaǧat n Kenɛan.
GEN 10:19 Tuɣa aymir n ayt n Kenɛan zi Ṣidun ɣar Xirar ař Ɣazza [u] ssenni ɣar Sadum d Ɛamurra d Adma d Ṣabuyim ař Lacaɛ.
GEN 10:20 Ina d ayt n Ḥam ɛlaḥsab řaǧat nsen, ɛlaḥsab iřsawen nsen, di timmura nsen u ak-d řegnus nsen.
GEN 10:21 I Cam, wenni d jedd n marra ayt n Ɛabir, umas n Yafat, ameqqran, ttwarwen as-dd ɛawed iḥenjiren.
GEN 10:22 Iḥenjiren n Cam [tuɣa aten d] Ɛilam, Accur, Arfakcad, Lud d Aram.
GEN 10:23 Iḥenjiren n Aram [tuɣa aten d] Ɛuṣ d Ḥul d Jatir d Mac.
GEN 10:24 Arfakcad ijja-dd Calaḥ u Calaḥ ijja-dd Ɛabir.
GEN 10:25 Ttwarwen-dd i Ɛabir tnayen n iḥenjiren. Ijjen qqaren as Falaj, minzi deg wussan nnes tᵉttwafeǧeq temmurt, u qqaren as i umas Yuqṭan.
GEN 10:26 Yuqṭan ijja-dd Almudad, Calaf, Haḍarmawt, Yaraḥ,
GEN 10:27 Haduram, Uzal, Diqla,
GEN 10:28 Ɛubal, Abimayil, Caba,
GEN 10:29 Ufir, Ḥawila d Yubab. Marra ina [tuɣa aten d] iḥenjiren n Yuqṭan.
GEN 10:30 Tammurt mani tuɣa zeddɣen [tuɣa-tt] zi Mica ař Safar, adrar n ccarq.
GEN 10:31 Ina d ayt n Cam ɛlaḥsab řaǧat nsen u ɛlaḥsab iřsawen nsen, di temmura nsen u ak-d řegnus nsen.
GEN 10:32 Tina d řaǧat n iḥenjiren n Nuḥ, ɛlaḥsab mammec dd-xeřqen, ak-d řegnus nsen. Zzaysen i zi ttwabḍan řegnus di temmurt awarni i sseḥřet. *
GEN 11:1 Tuɣa marra tammurt s yiřes d ijjen u s řhard d ijjen.
GEN 11:2 Imsar řami fesyen iqiḍan nsen [uca ffɣen-dd] zi ccarq, ufin ijj n řewḍa di temmurt n Cinɛar, uca [qqimen] zeddɣen dinni.
GEN 11:3 Nitni nnan, kuř ijj i wenneɣni: “Araḥem-dd, ad negg iẓra zi třaxt, ad ten nesseḥma!” Ammu i d asen tedweř třaxt d aẓru u acarmuḍ [idweř] ɣarsen d tarrist.
GEN 11:4 [Xas] uca nnan: “Zid, ad nebna ict n tendint d ict n ṣṣumɛet, taqiccat nnes [ad dd-taweḍ] ɣar ujenna, u jjem aneɣ ad negg ijj n yisem i neccin, ḥima war nᵉttemsebḍi ca x wudem n marra tammurt.”
GEN 11:5 [Xenni] ihwa-dd SIDI, ḥima ad iẓar tandint d ṣṣumɛet nni bnan tarwa n bnadem.
GEN 11:6 Inna SIDI: “Xzar, aqa aten d řgens d ijjen u marra ina ɣarsen ijj n yiřes. Wa d beddu n min ɣa ggen. Řexxu war din min ten i ɣa issbedden x webrid nsen nni nwan ad ggen.
GEN 11:7 Araḥem-dd, ad nehwa uca ad nessxarweḍ iřes nsen, ḥima kuř ijjen war ifehhem [ɛad] iřes n wenni t yudsen.”
GEN 11:8 Ammu i ten izzuzar SIDI ssenni x wudem n marra tammurt uca ssbedden řebni n tendint.
GEN 11:9 X uya i d as řaɣan [i tendint nni] s yisem n ‘Babil’, minzi din issxarweḍ SIDI iřes n marra tammurt u ssenni i ten izzuzar SIDI x wudem n marra tammurt. Ina d imezruyen n yinni dd-ittwaxeřqen zi Cam.
GEN 11:10 Umi tuɣa ɣar Cam mya n iseggʷusa, ijja-dd Arfakcad, tnayen n iseggʷusa awarni i sseḥřet.
GEN 11:11 Awarni řami dd-ijja Arfakcad, iddar Cam [ɛad] xemsa-mya n iseggʷusa, uca ijja-dd iḥenjiren d tḥenjirin.
GEN 11:12 Iddar Arfakcad xemsa u-třatin n iseggʷusa, [xenni] ijja-dd Calaḥ.
GEN 11:13 Awarni řami dd-ijja Arfakcad Calaḥ, iddar [ɛad] arebɛa-mya u-třata n iseggʷusa, uca ijja-dd iḥenjiren d tḥenjirin.
GEN 11:14 Iddar Calaḥ třatin n iseggʷusa, [xenni] ijja-dd Ɛabir.
GEN 11:15 Awarni řami dd-ijja Calaḥ Ɛabir, iddar [ɛad] arebɛa-mya u-třata n iseggʷusa, uca ijja-dd iḥenjiren d tḥenjirin.
GEN 11:16 Iddar Ɛabir arebɛa u-třatin n iseggʷusa, [xenni] ijja-dd Falaj.
GEN 11:17 Awarni řami dd-ijja Falaj, iddar Ɛabir [ɛad] arebɛa-mya u-třatin n iseggʷusa, uca ijja-dd iḥenjiren d tḥenjirin.
GEN 11:18 Iddar Falaj třatin n iseggʷusa, [xenni] ijja-dd Raɛuw.
GEN 11:19 Awarni řami dd-ijja Raɛuw, iddar Falaj [ɛad] mitayen u-tesɛa n iseggʷusa, uca ijja-dd iḥenjiren d tḥenjirin.
GEN 11:20 Iddar Raɛuw tnayen u-třatin n iseggʷusa, [xenni] ijja-dd Saruj.
GEN 11:21 Awarni řami dd-ijja Saruj, iddar Raɛuw [ɛad] mitayen u-sebɛa n iseggʷusa, uca ijja-dd iḥenjiren d tḥenjirin.
GEN 11:22 Iddar Saruj třatin n iseggʷusa, [xenni] ijja-dd Naḥur.
GEN 11:23 Awarni řami dd-ijja Naḥur, iddar Saruj [ɛad] mitayen n iseggʷusa, uca ijja-dd iḥenjiren d tḥenjirin.
GEN 11:24 Iddar Naḥur tesɛa u-ɛicrin n iseggʷusa, [xenni] ijja-dd Taraḥ.
GEN 11:25 Awarni řami dd-ijja Naḥur Taraḥ, iddar [ɛad] mya u-tesɛaṭac n iseggʷusa, uca ijja-dd iḥenjiren d tḥenjirin.
GEN 11:26 Iddar Taraḥ sebɛin n iseggʷusa, [xenni] ijja-dd Abram, Naḥur d Haran. Ina d imezruyen n yinni dd-ittwaxeřqen zi Taraḥ.
GEN 11:27 Taraḥ ijja-dd Abram, Naḥur d Haran, u Haran ijja-dd Luṭ.
GEN 11:28 Immut Haran zzat i babas Taraḥ di temmurt mani dd-ixřeq netta, di Ur n Ikaldaniyyen.
GEN 11:29 Uca ksin Abram d Naḥur i yixef nsen timɣarin. Isem n temɣart n Abram tuɣa-t d Saray u isem n temɣart n Naḥur d Milka, yeǧis n Haran, babas n Milka d Yiska.
GEN 11:30 Saray tuɣa-tt war dd-tᵉttiruw, tuɣa war ɣares bu uḥenjir.
GEN 11:31 Uca iksi Taraḥ Abram, mmis, d Luṭ mmis n Haran, mmis n mmis, d Saray, tasřit nnes, tamɣart n mmis Abram, uca nitni ffɣen jmiɛ zi Ur n Ikaldaniyyen, ḥima ad raḥen ɣar temmurt n Kenɛan. Iwḍen ɣar Ḥaran uca zeddɣen dinni.
GEN 11:32 Umi tegga Taraḥ mitayen u-xemsa n iseggʷusa, immut Taraḥ di Ḥaran.
GEN 12:1 Inna SIDI i Abram: “Ffeɣ zi temmurt nnec, zi temmurt mani dd-txeřqed u zi taddart n babac, ruḥ ɣar temmurt i d ac ɣa ssecneɣ.
GEN 12:2 Ad zzayek dd-ssuffɣeɣ ijj n řgens imɣar, ad cek barkeɣ u ad ssemɣareɣ isem nnec uca iři d cek [ɛawed] d lbaraka.
GEN 12:3 Ad barkeɣ wenni cek i ɣa ibarken d wenni cek i ɣa ineɛřen, ad t neɛřeɣ. Dayek i ɣa ttwabarkent marra řaǧat n temmurt.”   *
GEN 12:4 Uca iruḥ Abram am mammec d as inna SIDI, uca iruḥ Lut akides. Tuɣa Abram ɣares xemsa u-sebɛin n iseggʷusa umi dd-iffeɣ zi Ḥaran.
GEN 12:5 Uca indeh Abram Saray tamɣart nnes, d Luṭ mmis n umas, d marra agřa i yarebḥen, d iwdan d řmař nni dd-kesben di Ḥaran. Ffɣen [zi Ḥaran] ḥima ad raḥen ɣar temmurt n Kenɛan uca iwḍen ɣar temmurt n Kenɛan.
GEN 12:6 Iẓwa Abram zi temmurt nni ɣar wemcan n Cakim ař tacejjart n yigg n Mura. Di řweqt nni tuɣa ayt n Kenɛan [zeddɣen] di temmurt.
GEN 12:7 Iban-dd SIDI i Abram, inna as: “I zzariɛet nnec umi i ɣa wceɣ tammurt-a.” Uca ibna din ijj n uɛalṭar [min xef issars taɣarṣt] i SIDI, wenni d as dd-ibanen.
GEN 12:8 Xenni iɛdu ssenni ɣar idurar i iǧan x ccarq n Bayt-Il uca iwta dinni iqiḍan nnes, ijja Bayt-Il x jjihet n řɣarb u Ɛay x ccarq. Din ibna ijj n uɛalṭar i SIDI uca iřaɣa Isem n SIDI.
GEN 12:9 Awarni man aya ifsi Abram iqiḍan nnes, immuṭṭi [zeg wemcan ɣar wemcan], ɣar [Temmurt n] Ljanub.
GEN 12:10 Idweř řaẓ di temmurt uca ikemmeř Abram x webrid nnes, ihwa ɣar Miṣra, ḥima ad izdeɣ din am ubarrani, minzi [tuɣa] řaẓ imɣar di temmurt.
GEN 12:11 Řami dd-tiweḍ řweqt nni umi i ɣa yudef ɣar Miṣra, inna i Saray, tamɣart nnes: “Xzar, aqa ssneɣ belli cem d tamɣart dayes aẓri.
GEN 12:12 Xmi cem i ɣa ẓaren Imiṣriyyen, zemmaren ad inin: ‘Ta d tamɣart nnes!’, ad ayi nɣen uca ad cem jjen di tudart.
GEN 12:13 Ini, aqa cem d učma, ḥima ad ayi yiři řxir di ṭṭweɛ nnem uca ad iqqim řeɛmar inu iddar i cem.”
GEN 12:14 Imsar umi yudef Abram ɣar Miṣra, ẓrin Imiṣriyyen belli tamɣart teṣbeḥ aṭṭas.
GEN 12:15 Uřa d řḥukkam n firɛun, [ajeǧid], ẓrin tt uca ssemɣaren tt ɣar Firɛun uca iwyen tt ɣar taddart n firɛun.
GEN 12:16 Uca imṣuref [Firɛun] mlih ak-d Abram di ṭṭweɛ nnes. [Ammu] i iksi uǧi d ifunasen d tfunasin d yeɣyař d isemɣan d tiyya d teɣyař d iřeɣman.
GEN 12:17 [Maca] SIDI iwta firɛun d [aytbab n] taddart nnes s jjrayeḥ mɣarent di řesbab n Saray, tamɣart n Abram.
GEN 12:18 [Xenni] firɛun iřaɣa-dd i Abram, inna as: “Manawaya i dayi teggid? Maɣar war d ayi tennid belli nettat d tamɣart nnec?
GEN 12:19 Mayemmi tennid: ‘Nettat d učma!’, ařami tt ggiɣ necc d tamɣart i yixef inu? Řexxu xzar, aqa ac tamɣart nnec, ksi [tt], tbeɛɛded!”
GEN 12:20 Yumur firɛun iryazen nnes xas uca ssqebbḍen t ak-d temɣart nnes u ak-d marra min tuɣa ɣares.
GEN 13:1 Ammu i yuyur Abram zi Miṣra ɣar [Temmurt n] Ljanub [n Kenɛan], netta d temɣart nnes, ak-d marra min ɣares, d Luṭ akides.
GEN 13:2 Abram tuɣa ɣares aṭṭas n wagřa d řebhayem d nnuqart d wureɣ.
GEN 13:3 Uca immuṭṭi [zeg wemcan ɣar wemcan] zi [Temmurt n] Ljanub ɣar Bayt-Il ař amcan mani tuɣa iǧa uqiḍun nnes qbeř, jar Bayt-Il d Ɛay,
GEN 13:4 ař amcan n uɛalṭar i tuɣa igga qbeř, [min xef issars tiɣarṣa d tewhibin], uca dinni iřaɣa Abram Isem n SIDI.
GEN 13:5 Uca Luṭ, wenni yuyuren ak-d Abram, tuɣa ɣares ɛawed uǧi d ifunasen d tfunasin d iqiḍan.
GEN 13:6 Tammurt war d asen tiriw ḥima ad qqimen zeddɣen jmiɛ, minzi agřa nsen imɣar aṭṭas ař war zemmaren ad [din] zedɣen jmiɛ.
GEN 13:7 Uca imsar umcubbec jar imeksawen n řebhayem n Abram d imeksawen n řebhayem n Luṭ. Tuɣa ayt n Kenɛan d Ifiriziyyen zeddɣen řexdenni di temmurt.
GEN 13:8 Inna Abram i Luṭ: “War ittiři ɛad umcubbec jar ayi d cek, jar imeksawen inu d imeksawen nnec, minzi neccin d iryazen awmaten.
GEN 13:9 Ma war tarzem temmurt zzatec? Ttzawgeɣ cek ad xafi tebḍiḍ, ma x uzeřmaḍ, niɣ x yefus! Mařa cek truḥed x yefus, necc ad raḥeɣ x uzeřmaḍ.”
GEN 13:10 Issgeɛɛed Luṭ tamuɣři nnes uca iẓra adewwar n [yeɣzar n] L’Urdun tuɣa marra iswa. Qbeř areddeǧ zi SIDI tuɣa Sadum d Ɛamurra am jjennet n SIDI, am temmurt n Miṣra xmi dd ɣa tased ɣar Ṣuɣar.
GEN 13:11 Uca ixḍar Luṭ i yixef nnes marra adewwar n [yeɣzar n] L’Urdun u ifsi Luṭ iqiḍan nnes [uca yuyur] ɣar ccarq. [Ammu i] mmsebḍan nitni ijjen x wenneɣni.
GEN 13:12 Abram izdeɣ di temmurt n Kenɛan, [maca] Luṭ izdeɣ di tneddam n udewwar [n L’Urdun], iwta iqiḍan nnes ař Sadum.
GEN 13:13 Iryazen n Sadum tuɣa aten d iɛeffanen d imednab ak-d SIDI ař ṭṭarf.
GEN 13:14 Awarni řami xas immsebḍa Luṭ, inna SIDI i Abram: “Sarreḥ řexxu tiṭṭawin nnec, texzared zeg wemcan mani teǧid ɣar ccamal, ɣar ljanub, ɣar ccarq u ɣar řɣarb,
GEN 13:15 minzi marra tammurt i tᵉttwařid, ad ac tt wceɣ, i cek d zzariɛet nnec i řebda.
GEN 13:16 Ad ggeɣ zzariɛet nnec am tɛejjajt n temmurt, ḥima, mařa izemmar ḥed ad iḥseb taɛejjajt n temmurt, uřa d zzariɛet nnec tzemmar ɛawed ad tᵉttwaḥseb.
GEN 13:17 Kkar, cuq di temmurt di tuzzeggart nnes d tiru nnes, minzi i cek umi tt i ɣa wceɣ.”
GEN 13:18 [Xenni] ikkes Abram iqiḍan nnes uca yuyur ad izdeɣ ɣar tcejjura n yigg n Mamri, inni iǧan di Ḥabrun. Dinni ibna ijj n uɛalṭar i SIDI.
GEN 14:1 Deg wussan n Amrafil, ajeǧid n Cinɛar, d Ariyuc, ajeǧid n Illasar, d Kidurlaɛumer, ajeǧid n Ɛilam, d Tidal, ajeǧid n řegnus, imsar belli
GEN 14:2 ina ggin řbaruḍ ak-d Bira, ajeǧid n Sadum u ak-d Bircaɛ, ajeǧid n Ɛamurra, u [ak-d] Cinab, ajeǧid n Adma, u [ak-d] Cim’ibar, ajeǧid n Ṣabuyim, u [ak-d] ujeǧid n Bilaɛ, wenni iǧan d Ṣuɣar.
GEN 14:3 Marra ina munen di řewḍa n teɣzurt n Siddim, aqa d Řebḥar Ameǧaḥ.
GEN 14:4 Tuɣa xeddmen tenɛac n iseggʷusa i Kidurlaɛumir, [maca] ɣar useggʷas wiss třeṭṭac ɣewwɣen.
GEN 14:5 Uca deg useggʷas wiss arbeɛṭac yusa-dd Kidurlaɛumir d ijeǧiden i [yeǧan] akides uca ɣeřben x Irafawiyyen di Actirut-Qarnaym, x Izuziyyen di Ham, x Imitiyyen di Cawa-Qaryatayim
GEN 14:6 u x Ixuriyyen deg idurar nsen n Saɛir ař Faran, wenni [iǧan] zzat i řexřa.
GEN 14:7 [Awarni aya] dewřen-dd, usin-dd ɣar Ɛayn-Micfat, wenni d Qadac, uca ɣeřben [x yewdan nni izeddɣen di] marra tammurt n ayt n Ɛamaliq u ɛawed x Imuriyyen inni izeddɣen di Haṣṣun-Tamar.
GEN 14:8 [Xenni] iffeɣ ujeǧid n Sadum d ujeǧid n Ɛamurra d ujeǧid n Adma d ujeǧid n Ṣabuyim d ujeǧid n Bilaɛ, aqa-tt d Ṣuɣar. Ruḥen nitni ɣar řewḍa n teɣzurt n Siddim, maḥend ad mmenɣen
GEN 14:9 ak-d Kidurlaɛumir, ajeǧid n Ɛilam d Tidɛal, ajeǧid n řegnus, d Amrafil, ajeǧid n Cinɛar, d Aryuk, ajeǧid n Illasar: arebɛa n ijeǧiden [ggin řbaruḍ] ak-d xemsa.
GEN 14:10 Tuɣa řewḍa n teɣzurt n Siddim teccur s wanuten n tizeft. Uca arewřen ijeǧiden n Sadum d Ɛamurra uca wḍan daysen, u inni iqqimen arewřen ɣar idurar.
GEN 14:11 Ksin marra agřa n Sadum d Ɛamurra d marra macca i xeznen uca uyuren.
GEN 14:12 Ksin ɛawed Luṭ, mmis n umas n Abram, d wagřa nnes uca ruḥen. Netta tuɣa izeddeɣ di Sadum.
GEN 14:13 [Xenni] yusa-dd ijjen zeg inni yarewřen, inna man aya i Abram, Aɛibrani, wenni tuɣa izeddɣen ɣar tcejjura n yigg n Mamri, aryaz d Amuriy, umas n Ackul d Ɛanir. Nitni d arfiqen di řɛahd n Abram.
GEN 14:14 [Řami] isřa Abram belli umas ṭṭfen t d ameḥbus, yiwi [iryazen] inni idarrben i umenɣi, inni dd-ittwaxeřqen di taddart nnes, di teřt-mya u-tmenṭac, uca iḍfar i-ten ař Dan.
GEN 14:15 S ǧiret bḍan xasen nitni, [ggin terfiqin], netta d imsexxaren nnes, uca iɣřeb xasen uca iḍfar i-ten ɣar [tendint n] Ḥuba, tenni [iǧan] x uzeřmaḍ n Dimacq.
GEN 14:16 Yarra-dd marra agřa uřa d umas Luṭ d wagřa nnes uřa d timɣarin d řgens.
GEN 14:17 Umi dd-iɛqeb, awarni řami iɣřeb netta x Kidurlaɛumir u x ijeǧiden nni tuɣa akides, iffeɣ ujeǧid n Sadum ḥima ad t iřqa di Řewḍa n Teɣzurt n Cawa, tenni iǧan d Taɣzurt n Ujeǧid.
GEN 14:18 U Malkiṣadiq, ajeǧid n Calim, yiwi-dd aɣrum d binu. Netta tuɣa d akehhan n Arebbi, Amɛuǧi x kuřci.
GEN 14:19 Ibark i-t, inna as: “Ad ittwabarek Abram zi Arebbi, Amɛuǧi x kuřci, wenni iggin ijenwan d temmurt.
GEN 14:20 Ad ittwabarek Arebbi, Amɛuǧi x kuřci, wenni isellmen iɣrimen nnec deg ifassen nnec!” Uca [Abram] iwca as řeɛcur n marra.
GEN 14:21 Uca inna ujeǧid n Sadum i Abram: “Ewc ayi marra min [iddaren], maca ksi agřa i yixef nnec.”
GEN 14:22 [Maca] Abram yarra-dd x ujeǧid n Sadum: “Aqa ssgeɛɛdeɣ afus inu ɣar SIDI Arebbi, Amɛuǧi x kuřci, wenni iggin ajenna d temmurt, [jjuǧeɣ]
GEN 14:23 maḥend war kessiɣ afiřu niɣ taḥezzemt n sandaliyat uřa [ca n řḥajjet] zi marra min iǧan nnec, ḥima war teqqared: ‘Necc sstejjareɣ Abram!’
GEN 14:24 War ɣari dayes bu tasɣart! Mɣir min ccin imsexxaren d tesɣart n iryazen nni kidi iruḥen, Anir d Ickul d Mamri, ejj i-ten ad ksin tasɣart nsen!”
GEN 15:1 Awarni man aya yusa-dd wawař n SIDI ɣar Abram deg ijj n řewḥiy. Inna as “War tteggʷed ca, Abram, Necc d aseřqi i cek, řmunet nnec temɣar aṭṭas [d Necc].”
GEN 15:2 Uca inna Abram: “Sidi inu, SIDI, min d ayi ɣa tewced, maɣar necc ad raḥeɣ ammu břa mmi u Aliɛazir zi Dimacq ad yiři [amecnaw] mmi x wagřa n taddart inu?”
GEN 15:3 Inna Abram ɛawed: “Xzar, war d ayi tewcid zzariɛet, s uyenni, [wenni iǧan am] mmi n taddart inu, ad yiři d awrit inu!”
GEN 15:4 Uca xzar, awař n SIDI yusa-dd ɣares, inna: “War cek iwarret ca wa, maca wenni i ɣa iffɣen zzayek ad yiři d awrit nnec.”
GEN 15:5 Issuffeɣ i-t ɣar barra, inna: “Xzar ɣar ujenna, tḥesbed itran, mařa tzemmared ad ten tḥesbed!” Uca inna as: “Ammu i ɣa tiři zzariɛet nnec!”
GEN 15:6 Uca netta yumen di SIDI uca iḥseb as t-i-dd d tasegda.
GEN 15:7 Inna as ɛawed: “Necc d SIDI, wenni cek dd-yiwyen zi Ur n Ikaldaniyyen, ḥima ad ac wceɣ tammurt-a d řwart.”
GEN 15:8 [Xenni] netta inna: “[A] Sidi inu, SIDI, s minzi i ɣa ssneɣ, belli ad tt warteɣ?”
GEN 15:9 Inna as Netta: “Awi ayi-dd ict n tɛejmit n třata n iseggʷusa d ijj n iɣayḍ n třata iseggʷusa d ijj n icarri n třata iseggʷusa d ict n tejlilleḥt d ijj n wedbir d ameẓyan.”
GEN 15:10 Netta yiwi-dd ɣares marra man aya, ibḍa ten x wezyen u igga kuř azyen qibač i wenneɣni, [maca] war ibḍi ca ijḍaḍ.
GEN 15:11 Hwan-dd ijḍaḍ ittkeccaḍen x imurḍas, [maca] Abram yuẓẓeř xasen.
GEN 15:12 Ɣar uɣeǧay n tfuct, imsar aqa yusa as-dd i Abram ijj n yiḍeṣ yuǧeɣ, uca xzar, tiggʷudi [d] taǧest iḥedqen wḍan-dd xas.
GEN 15:13 [Xenni] inna i Abram: “Ssen s tidett aqa zzariɛet nnec ad tiři d tabarranect deg ict n temmurt i war iǧin nnes uca ad asen xedmen [am isemɣan] u nitni ad xasen ggen aɣiř arebɛa-mya n iseggʷusa.
GEN 15:14 [Maca] řgens umi ɣa xedmen am isemɣan, ad xasen ḥekmeɣ ɛawed, uca awarni man aya ad ffɣen s wagřa imɣar.
GEN 15:15 Ad tᵉttwassmuned ɣar řejdud nnec s řehna uca ad cek neḍřen am umeccaybu iweqqar.
GEN 15:16 Jjiř wiss arebɛa ad dd-iɛqeb danita, minzi [řqedd n] řmuɛṣiyyet n Imuriyyen ɛad war ikemmeř.”
GEN 15:17 Řami teɣři tfuct uca tedweř d taǧest, tuɣa din afarran iddexxnen u iɛdu ijj n weṣfeḍ n tmessi jar izeynan nni.
GEN 15:18 Deg wass nni nnit igga SIDI ijj n Řɛahd ak-d Abram, inna: “I zzariɛet nnec umi wciɣ tammurt-a zeg iɣzar n Miṣra ař iɣzar ameqqran, iɣzar n Lfuraṭ:
GEN 15:19 [tammurt n] Iqiniy[yen], Iqeniziy[yen], Iqadmiy[yen],
GEN 15:20 Iḥittiy[yen], Ifirziy[yen], Irafawiyyen,
GEN 15:21 Imuriy[yen], ayt n Kenɛan, Igirgaciy[yen] d Iyibusiy[yen].”
GEN 16:1 Saray, tamɣart n Abram, war d as dd-tiruw ca. Tuɣa ɣares ict n tayya zi Miṣra qqarent as Hajar.
GEN 16:2 Tenna Saray i Abram: “Aqa teẓrid belli SIDI iṭṭef xafi tarwa. Adef x tayya inu, balak ad zzayes ksiɣ tarwa.” Abram tuɣa issḥessa ɣar Saray.
GEN 16:3 Awarni řami izdeɣ Abram ɛecra n iseggʷusa di temmurt n Kenɛan, tiwi-dd Saray, tamɣart n Abram, tayya nnes Hajar, tenni zi Miṣra, uca tewca as-dd i Abram, aryaz nnes, d tamɣart nnes.
GEN 16:4 Yudef x Hajar uca nettat teksi ddeyset. Umi teẓra belli teksi ddeyset, xenni tedweř lallas tᵉttwasseḥqar di tiṭṭawin nnes.
GEN 16:5 Tenna Saray i Abram: “Zi ssibbet nnec ggin dayi řmunkar. Necc ggiɣ tayya inu deg weḥsin nnec. Umi teẓra belli teksi ddeyset, dewřeɣ d tameḥguret di tiṭṭawin nnes. Ejj ad iḥkem SIDI jar ayi d cek!”
GEN 16:6 Inna Abram i Saray: “Xzar, tayya nnem deg ifassen nnem. Egg zzayes min tᵉttwařid cem mliḥ di tiṭṭawin nnem.” Uca Saray tqemmeɛ i-tt u xenni nettat tarweř zzayes.
GEN 16:7 Uca lmalak n SIDI iřqa i-tt ɣar tařa n waman di řexřa, ɣar tařa deg webrid ittawyen ɣar Cur.
GEN 16:8 Inna: “Hajar, tayya n Saray, manis dd-tusid u mani ɣa traḥed?” Nettat tenna: “Ttrakkwařeɣ zeg wudem n lalla Saray!”
GEN 16:9 Xenni inna as lmalak n SIDI: “Dweř ɣar lallam, uḍar sadu ifassen nnes.”
GEN 16:10 Inna as ɛawed lmalak n SIDI: “Ad kettareɣ aṭṭas zzariɛet nnem, ař war izemmar ad tᵉttwaḥseb řami i ɣa tiři deg waṭṭas.”
GEN 16:11 Inna as lmalak n SIDI ɛawed: “Aqa řexxu, teksid ddeyset uca ad tarwed aseymi. Ad as tegged Ismaɛil, minzi SIDI isřa am di řemḥayen nnem.
GEN 16:12 Uca netta ad yiři d ijj n bnadem amecnaw asnus n řexřa. Afus nnes ad yiři x marra, u afus n marra ad yiři xas. Ad izdeɣ arendad n marra aytmas.”
GEN 16:13 U nettat třaɣa x Yisem n SIDI i ɣares-dd issiwřen, [tenna:] “Cek d Arebbi i ittwařan!”, minzi tenna: “Ma war da ẓriɣ wenni d ayi ittwařan?”
GEN 16:14 X uya semman anu nni: anu ‘Laḥay-Ru’i’. Xzar, aqa-t jar Qadac d Barad.
GEN 16:15 Uca turuw-dd Hajar i Abram aseymi. Igga as Abram isem n mmis nni [i d as] dd-turuw Hajar ‘Ismaɛil’.
GEN 16:16 Abram tuɣa ɣares setta u-tmanyin n iseggʷusa, umi dd-turuw Hajar Ismaɛil i Abram.
GEN 17:1 [Řami] tuɣa ɣares ɣar Abram tesɛa u-tesɛin n iseggʷusa, iban as-dd SIDI i Abram, inna as: “Necc d Arebbi Amzemmar x kuřci! Uyur zzat i wudem inu uca iři [d bnadem] ikemmřen!
GEN 17:2 Necc ad ggeɣ Řɛahd inu jar ayi d cek uca ad cek sskettareɣ s yijj n cckel imɣar.”
GEN 17:3 [Xenni] iwḍa Abram x uɣembub nnes uca issiweř AREBBI akides, inna as:
GEN 17:4 “Xzar, Necc [ad ggeɣ] Řɛahd inu akidek uca cek ad tiřid d babatsen n waṭṭas n řegnus.
GEN 17:5 War ittiři isem nnec ɛad ‘Abram’ maca ‘Ibrahim’, minzi Necc ggiɣ cek d babatsen n waṭṭas n řegnus.
GEN 17:6 Uca Necc ad cek arreɣ ad tegged řɣiǧet aṭṭas s waṭṭas u ad cek arreɣ d řegnus, uca ijeǧiden ad zzayek dd-ffɣen.
GEN 17:7 Ad ggeɣ Řɛahd inu jar ayi d cek d zzariɛet nnec awarni ac di [marra] jjiřat nsen, am yijj n Řɛahd i řebda, ḥima ad iřiɣ d AREBBI i cek u i zzariɛet nnec awarni ac.
GEN 17:8 Ad ac wceɣ, i cek u i zzariɛet nnec awarni ac, tammurt mani tzeddɣed am ubarrani, marra tammurt n Kenɛan d agřa i řebda. Necc ad iřiɣ d AREBBI i nitni.”
GEN 17:9 Inna AREBBI ɛawed i Ibrahim: “Cek ad teḥḍid Řɛahd inu, cek d zzariɛet nnec awarni ac, di [marra] jjiřat nsen.
GEN 17:10 D wa d Řɛahd inu wenni i ɣa teḥḍam jar ayi-dd d kenniw d zzariɛet nnec awarni ac: ittxeṣṣa ad ixten zzaywem marra min iǧan d awtem.
GEN 17:11 Kenniw ad txetnem aysum n řeɛdařyet nwem uca man aya ad tiři d řeɛřamet n Řɛahd jar ayi-dd d kenniw.
GEN 17:12 Mmis n tmenya n wussan ad ixten jar awem, mkuř awtem di [marra] jjiřat nwem, [am] wenni dd-ixeřqen di taddart nnec [am] wenni ittwasɣen s nnuqart zi kuř abarrani u war [iǧin] zi zzariɛet nnec.
GEN 17:13 [Am] wenni dd-ixeřqen di taddart nnec, [am] wenni tesɣid s nnuqart, ittxeṣṣa as ad ixten. [Ammu] i ɣa yiři Řɛahd inu deg weysum nwem d Řɛahd i řebda.
GEN 17:14 Aryaz war ixtinen, wenni řeɛdařyet nnes war tt xtin, aryaz nni ittxeṣṣa ad t qessen zi řgens nnes, aqa yarẓa Řɛahd inu.”
GEN 17:15 Inna AREBBI ɛawed i Ibrahim: “I Saray tamɣart nnec war d as třiɣid [ɛad] ‘Saray’, maca ‘Sara’ d wa i ɣa yiřin isem nnes.
GEN 17:16 [Minzi] ad tt barkeɣ u zzayes ad ac wceɣ mmic. [Wah], ad tt barkeɣ uca nettat ad tedweř d řegnus u ijeǧiden n řegnus ad zzayes dd-ffɣen!”
GEN 17:17 [Xenni] iwḍa Ibrahim x uɣembub nnes uca iḍḥec, inna deg wuř nnes: “Aryaz n mya n iseggʷusa ma ad as dd-ittwaxřeq mmis? U Sara, tenni ɣar iǧa tesɛin n iseggʷusa, [ma ɛad] ad dd-taruw?”
GEN 17:18 Inna Ibrahim i AREBBI: “Mři Ismaɛil iddar qibač i wudem nnec!”
GEN 17:19 [Maca] AREBBI inna: “Lla, ɛad Sara, tamɣart nnec, d tenni d ac dd ɣa yarwen aseymi, uca cek ad as třaɣid Isḥaq. Necc ad ggeɣ Řɛahd inu akides d Řɛahd i řebda, i zzariɛet nnes awarni as.
GEN 17:20 Zi jjihet n Ismaɛil, aqa seǧeɣ ac. Xzar, Necc barkeɣ t uca ad t arreɣ ittaruw řɣiǧet u ad t arreɣ d aṭṭas. Tenɛac n řḥukkam i dd ɣa yejj, ad t ggeɣ d ijj n řgens imɣar.
GEN 17:21 [Maca] ad ggeɣ Řɛahd inu ak-d Isḥaq, wenni i d ac dd ɣa taruw Sara di řweqt-a, deg useggʷas i dd ɣa yasen.”
GEN 17:22 [Umi] ikemmeř awař nnes akides, igeɛɛed AREBBI, [iggʷej] x Ibrahim.
GEN 17:23 Iksi Ibrahim mmis Ismaɛil d marra isemɣan i dd-ittwaxeřqen di taddart nnes d marra inni immesɣen s nnuqart, marra [min iǧan d] awtem jar aytbab n taddart n Ibrahim uca ixten řeɛdařyet nsen deg wass nni am mammec d as inna AREBBI.
GEN 17:24 Tuɣa ɣar Ibrahim tesɛa u-tesɛin n iseggʷusa umi ixten deg weysum n řeɛdařyet nnes.
GEN 17:25 Igga mmis Ismaɛil třeṭṭac n iseggʷusa, umi t xetnen deg weysum n řeɛdařyet nnes.
GEN 17:26 Ixten Ibrahim d mmis Ismaɛil deg wass d ijjen.
GEN 17:27 Xetnen akides marra iryazen n taddart nnes, inni dd-ittwaxeřqen di taddart nnes uřa d inni immesɣen s nnuqart zeg ubarrani.
GEN 18:1 Uca iḍhar SIDI i Ibrahim ɣar tcejjura n yigg n Mamri [umi] tuɣa yareyyeḥ ɣar wadaf n uqiḍun nnes di ṭṭḥa n uziř.
GEN 18:2 Issgeɛɛed tamuɣři nnes, iẓra, aqa din třata n yeryazen qibač nnes. [Umi] ten iẓra, ikkar ittazzeř ɣarsen zi wadaf n uqiḍun. Uca ibendeq [s uɣembub nnes] ɣar temmurt,
GEN 18:3 inna: “[A] Sidi inu, mařa [řexxu] ufiɣ arḍa di tiṭṭawin nnec, ttzawageɣ cek, war ɛeddu x umsexxar nnec.
GEN 18:4 Ejj [imsexxaren inu] ad dd-awyen cwayt n waman uca sirdem iḍaren nwem uca zzřem cwayt sadu tcejjart-a.
GEN 18:5 Ad dd-awyeɣ ařeqquz n weɣrum ḥima ad ttwaneɛcen wuřawen nwem, xenni ad teɛdum. Aqa x uya i dd-tekkim zzat i umsexxar nwem!” Nitni nnan: “Egg am mammec tennid.”
GEN 18:6 Iruḥ Ibrahim deɣya ɣar uqiḍun ɣar Sara, inna: “Deɣyat, [ksi] třata n řeqyas n waren azdad, eggw [i-ten] uca egg [zzayes] tifḍirin.”
GEN 18:7 [Xas uca] yuzzeř Ibrahim ɣar ifunasen uca iṭṭef-dd ijj n umeẓyan n ufunas igma d lemliḥ, iwca i-t i ubřiɣ, uca wa iqeǧeq, ḥima ad t issewjed.
GEN 18:8 Netta iksi ɛawed ddhen d uɣi d umeẓyan n ufunas nni issewjed, uca issars [i-t] zzatsen, u netta tuɣa ibedd qibač nsen sadu tcejjart, uca ccin.
GEN 18:9 [Xenni] nnan as: “Mani teǧa Sara tamɣart nnec?” Yarra-dd xasen: “[Aqa-tt din] deg uqiḍun.”
GEN 18:10 Uca Netta inna: “D tidett ad ɣarek dd-dewřeɣ ɣar řweqt n tudart u xzar, ad ɣares yiři uḥenjir ɣar Sara, tamɣart nnec.” U Sara tesřa ɣar wadaf n uqiḍun nni [iǧan] awarni as.
GEN 18:11 Ibrahim d Sara tuɣa wsaren, uyuren deg wussan, uca Sara tuɣa tbedd as tubbart n temɣarin.
GEN 18:12 Uca teḍḥec Sara deg wuř nnes, tenna: “Awarni tewsar inu, ma ad ɣari yiři řxir[-a] d lemliḥ qaɛ, [am] iǧa sidi inu uřa d netta iwsar?”
GEN 18:13 Inna SIDI i Ibrahim: “Maɣar teḍḥec Sara, tenna: ‘Ma zemmareɣ ad arweɣ am wsareɣ řexxu?’
GEN 18:14 Ma aqa din ca n řḥajjet x SIDI tewɛar? Ad ɣarek dd-ɛeqbeɣ di řweqt i negga, ɣar řweqt n tudart uca [ad yiři] ɣar Sara mmis!”
GEN 18:15 Sara tenkar, tenna: “War ḍeḥceɣ ca!”, minzi tuɣa teggʷed. Netta inna as: “Lla, aqa cem tḍeḥced!”
GEN 18:16 [Xenni] kkaren iryazen nni ssenni, sewḍen ɣar Sadum, uca iruḥ Ibrahim akidsen, issqebbeḍ i-ten.
GEN 18:17 Uca inna SIDI: “Ma ad ffareɣ Necc x Ibrahim min i ɣa ggeɣ?
GEN 18:18 Ad yiři Ibrahim zeɛma d ijj n řgens imɣar ijhed, aqa ad dayes ttwabarken marra řegnus n ddunect.
GEN 18:19 Minzi Necc qqneɣ ixef inu akides, ḥima ad isseřmed iḥenjiren nnes uřa d taddart nnes awarni as, maḥend ad ḥḍan abrid n SIDI, ad ggen tasegda d řḥeqq, ḥima SIDI ad dd-yawi i Ibrahim min tuɣa xas inna.”
GEN 18:20 [Xenni] inna SIDI: “Tɣuyyit n Sadum d Ɛamurra temɣar aṭṭas u ddnub nsen deqřen.
GEN 18:21 Ad dd-hwiɣ, ad ẓareɣ ma ggin nican am tɣuyyit nsen i ɣari dd-yusin niɣ lla, ad ssneɣ.”
GEN 18:22 [Xenni] dewřen iryazen ssenni uca ṭṭfen [abrid] ɣar Sadum. [Maca] Ibrahim tuɣa iqqim ɛad ibedd zzat i wudem n SIDI.
GEN 18:23 Uca iqarreb-dd Ibrahim, inna: “Ma s tidett ad taredǧed ɛawed amsegged ak-d uɛeffan?
GEN 18:24 Aqa dinni balak xemsin n imseggaden daxeř i tendint. Ma s tidett ad ten taredǧed, u war tsemmḥed deg wemcan nni di ṭṭweɛ n xemsin n imseggaden i dayes iǧan?
GEN 18:25 Iggʷej xak ad tegged aya, ad tenɣed amsegged ak-d uɛeffan, [wah,] iggʷej xak ad yiři umsegged meḥsub am uɛeffan. Aqa řqaḍi n ddunect ma war ittegg s řḥeqq?”
GEN 18:26 [Řexdenni] inna as SIDI: “Mařa ufiɣ di Sadum xemsin n imseggaden daxeř i tendint, ad semḥeɣ i wemcan di ṭṭweɛ nsen.”
GEN 18:27 Ibrahim yarra-dd, inna: “Xzar řexxu, bdiɣ zeɛɛmeɣ ad ssiwřeɣ ak-d Sidi inu, [waxxa] necc d cař d yiɣɣeḍ.
GEN 18:28 Ad taɣ neqṣen zi xemsin n imseggaden xemsa, ma ad taredǧed x xemsa nni marra tandint?” Inna: “War [tt] ttaredǧeɣ mařa ufiɣ din xemsa u-rebɛin.”
GEN 18:29 Yarni deg wawař akides, inna as: “Ad taɣ ad yiři ad ittwaf din arebɛin!” Yarra-dd Netta: “War [tt] tteggeɣ ca di ṭṭweɛ n arebɛin [nni].”
GEN 18:30 [Xas uca] inna: “War ttxeyyiq řexxu Sidi inu, xmi ɣa ssiwřeɣ [ɛawed]. Ad taɣ ad yiři din třatin!” Yarra-dd: “War [tt] ttaredǧeɣ mařa ufiɣ din třatin.”
GEN 18:31 Inna [ɛawed]: “Xzar řexxu, bdiɣ zeɛmeɣ ad ssiwřeɣ ak-d Sidi inu. Ad taɣ ad yiři din [mɣir] ɛicrin!” Yarra-dd: “War [tt] ttaredǧeɣ ca di ṭṭweɛ n ɛicrin [nni].”
GEN 18:32 [Xenni] inna: “War ttxeyyiq řexxu Sidi inu, xmi ɣa ssiwřeɣ [ɛawed]. Ad taɣ ad yiři din [mɣir] ɛecra!” Yarra-dd: “War [tt] ttaredǧeɣ di ṭṭweɛ n ɛecra [nni].”
GEN 18:33 [Xenni] iruḥ SIDI awarni řami ikemmeř awař [nnes] ak-d Ibrahim uca Ibrahim idweř-dd ɣar wemcan n tzeddiɣt nnes.
GEN 19:1 Uca iwḍent xenni tnayen n lmalakat [nni] ɣar Sadum s ǧiřet. Tuɣa Luṭ iqqim ɣar tewwart n Sadum. Umi [ten] iẓra Luṭ, ikkar maḥend ad ten iřqa uca ibendeq [s uɣembub nnes] ɣar temmurt.
GEN 19:2 Inna: “Xzar, [a] isiditen inu, ttzawageɣ kenniw ad dd-tasem ɣar taddart n umsexxar nwem uca ad [dayes] tessensem, ad tessirdem iḍaren nwem. Xenni ad tfaqem zic, ad tkemmřem x webrid nwem.” [Maca] nitni nnan: “Lla, aqa deg wazzay ad neqqim ad nessens.”
GEN 19:3 [Maca] netta ikellef xasen aṭṭas ařami akides ruḥen, udfen ɣar taddart nnes uca igga asen amensi, iggʷa aɣrum břa antun uca ccin.
GEN 19:4 Aqa qbeř i ɣa ṭṭṣen, qewwaren i taddart iryazen n tendint, iryazen n Sadum, zeg umeẓyan ař awessar, marra iwdan zi marra imucan iṭṭurfen [n tendint].
GEN 19:5 Nitni řaɣan i Luṭ, nnan as: “Mani ǧan iryazen inni ɣarek dd-yusin ǧiret-a? Suffeɣ i-ten-dd, ḥima ad ten nessen.”
GEN 19:6 Iffeɣ-dd ɣarsen Luṭ, ɣar tewwart, uca iqqen tawwart awarni as.
GEN 19:7 Inna: “Ttzawgeɣ, [a] aytma inu, war tteggem [qaɛ] řɣar!
GEN 19:8 Xzar, ɣari tnayen n yessi, tinni [ɛad] war issinen aryaz. Ejj ayi ad awem tent i-dd-ssuffɣeɣ barra uca ggem daysent min tᵉttwařam mliḥ di tiṭṭawin nwem. Mɣir i iryazen-a war daysen tteggem walu, aqa x uya dd-usin nitni swadday n tiři n tzeqqa inu ɣar tmensiwt.”
GEN 19:9 Nitni nnan: “Aggʷej diha!” Uca nnan [ɛawed]: “Aqa wanita yusa-dd [da] d abarrani uca ixs ad [xaneɣ] iḥkem am řqaḍi! Řexxu ad cek nḍarr ktar zzaysen.” Uca ggin aṭṭas n uɣiř x weryaz nni, x Luṭ, uca qarrben-dd ḥima ad arẓen tawwart.
GEN 19:10 [Maca] iryazen nni sswiẓẓḍen afus nsen, ssidfen Luṭ ɣar taddart akidsen uca bellɛen tawwart.
GEN 19:11 Nitni wtin iryazen [nni tuɣa ibedden] ɣar tewwart n taddart s tuddarɣeč, am umeẓyan am umeqqran, [ařami] ssihřen nitni ixef nsen di tarezzut x tewwart.
GEN 19:12 [Xenni] nnan iryazen nni i Luṭ: “Wi ɣarek da ɛad? Ma aḍeggʷař niɣ iḥenjiren niɣ tḥenjirin, marra inni ɣarek di tendint, ejj i-ten ad ffɣen zeg wemcan-a.
GEN 19:13 Aqa ad nareddeǧ amcan-a, minzi tɣuyyit nnes temɣar zzat i wudem n SIDI, u SIDI issekk aneɣ-dd, ḥima ad tt nareddeǧ.”
GEN 19:14 Iffeɣ Luṭ uca issiweř ak-d iḍeggʷařen nnes, inni iggin ad meřcen yessis, inna: “Kkarem, ffɣem zeg wemcan-a, minzi SIDI ad yareddeǧ tandint-a.” [Maca] iban-dd ittqeṣṣar di tiṭṭawin n iḍeggʷařen nnes.
GEN 19:15 Umi iṣbeḥ řhař, ssqeǧqent lmalakat Luṭ, nnant: “Kkar, teksid tamɣart nnec d tnayen n yessic, [tinni akidek], ḥima war thelliked ca di řmuɛṣiyyet n tendint-a.”
GEN 19:16 [Maca] netta war izɛim. Xenni ṭṭfen iryazen nni afus nnes d ufus n temɣart nnes d ifassen n tnayen n yessis, minzi SIDI tuɣa ixs ad xas iḥinn. Nitni ssuffɣen t ɣar barra, nedhen t barra i tendint.
GEN 19:17 Ařami ten ssuffɣen barra, inna Netta: “Senjem ixef nnec! War xezzar awarni ac, war ttbeddi di jjihet-a am tekmeř. Arweř ɣar idurar, ḥima war tᵉttwateḥḥid ca.”
GEN 19:18 Inna asen Luṭ: “Lla, ttzawageɣ, [a] Sidi inu!
GEN 19:19 Xzar, amsexxar nnec yufa arḍa di tiṭṭawin nnec, [wah] tessemɣared tamexsiwt nnec icewwaren, tenni kidi teggid umi d ayi tejjid ddareɣ. [Maca] war zemmareɣ ad arewřeɣ ɣar idurar qbeř d ayi ɣa iṭṭef řɣar uca ad mmteɣ!
GEN 19:20 Xzar řexxu, tandint-a aqa tudes-dd aṭṭas, [aqa] zemmareɣ ad dinni arewřeɣ. Nettat d tameɛnanuct. Ejj ayi ad arewřeɣ řexxu dinni. Ma war teǧi d [ict n tendint] d tameɛnanuct? [Xenni] zemmareɣ ad qqimeɣ ddareɣ.”
GEN 19:21 Yarra-dd xas: “Xzar, tiweḍ ayi-dd ɛawed tzawegt nnec x uya, war ttareddǧeɣ ca tandint min xef tessiwřed.
GEN 19:22 Qeǧeq, arweř din, minzi war zemmareɣ ad ggeɣ walu ař dd ɣa tawḍed ɣar dinni.” X uya semman isem n tendint [nni] Ṣuɣar.
GEN 19:23 [Ařami] yiweḍ Luṭ ɣar Ṣuɣar, tenqar-dd tfuct x temmurt.
GEN 19:24 Ijja SIDI ad iwwet wenẓar x Sadum u x Ɛamurra, d řecbareyyet d tmessi zeg ujenna zi ɣar SIDI.
GEN 19:25 Yareddeǧ Netta tineddam nni d marra adewwar nni, ak-d marra imezdaɣ n tneddam nni uřa d aɣemmuy n temmurt.
GEN 19:26 Tamɣart nnes, [tenni tuyur] ɣar ḍeffar nnes, texzar awarni as uca tedweř d ijj n uqellij n tmeǧaḥt.
GEN 19:27 Ɣar ṣṣbeḥ zic ikkar Ibrahim, [yuyur] ɣar wemcan mani tuɣa ibedd zzat i wudem n SIDI.
GEN 19:28 Isweḍ ɣar Sadum d Ɛamurra u ɣar marra tammurt n udewwar nni, uca iẓra belli ddexxan ittgeɛɛad zi temmurt am ddexxan n ict n tefqunt.
GEN 19:29 Ařami yareddeǧ AREBBI tineddam n udewwar [nni], ifekkar AREBBI di Ibrahim uca issekk Luṭ barra zi řwesṭ n uceřwaw, umi iqřeb tineddam i di izdeɣ Luṭ.
GEN 19:30 Igeɛɛed Luṭ zi Ṣuɣar uca iruḥ izdeɣ ak-d tnayen n yessis deg idurar, minzi iggʷed [ad iqqim] izeddeɣ di Ṣuɣar. Uca izdeɣ deg ifri ak-d tnayen n yessis.
GEN 19:31 Tenna tmenzut i tmaẓuẓt: “Babatneɣ d awessar, war iqqim uɛezri di temmurt ad xaneɣ dd-yadef am mammec teggur di marra ddunect.
GEN 19:32 Zid, ejj aneɣ ad newc binu i babatneɣ ad issu uca ad kis nezzeř, [maḥend] ad newc tudart i zzariɛet n babatneɣ.”
GEN 19:33 Di ǧiřet nni wcint binu i babatsent, iswa. [Xenni] tudef tmenzut, tᵉṭṭeṣ ak-d babas, [maca] netta war yuci ca belli tezzeř akides niɣ tekkar [ɛawed].
GEN 19:34 Tiwecca nnes tenna tmenzut i tmaẓuẓt: “Aqa necc zzřeɣ ǧiret iɛdun ak-d baba, ad as newc ad issu binu ɛawed ǧiret-a. [Xenni] ad tadfed cem ad kides tezzřed, maḥend ad dd-nejj jjiř ad iqqim iddar zi ẓẓariɛet n babatneɣ.”
GEN 19:35 Wcint binu i babatsent ɛawed di ǧiret nni, iswa. [Xenni] tekkar tmaẓuẓt uca tᵉṭṭeṣ ak-d babas. [Maca] netta war yuci ca belli tezzeř akides niɣ tekkar [ɛawed].
GEN 19:36 [Ammu] ksint tnayen n yessis n Luṭ s ddeyset zi babatsent.
GEN 19:37 Uca turuw-dd tmenzut aseymi, třaɣa isem nnes Mu’ab. Wa d babatsent n ayt n Mu’ab ɣar ass[-a].
GEN 19:38 Tamaẓuẓt ɛawed turuw-dd aseymi uca třaɣa isem nnes Ben-Ɛammi. Netta d babatsen n iḥenjiren n Ɛammun ɣar ass-a.
GEN 20:1 Ssenni issmuṭṭiy Ibrahim iqiḍan nnes, [yuyur] ɣar Temmurt n Ljanub. Izdeɣ netta jar Qadac d Cur uca iqqim am ubarrani di Jirar.
GEN 20:2 [Umi] inna Ibrahim x Sara tamɣart nnes: “Nettat d učma i teǧa!”, issekk Abimalik, ajeǧid n Jirar, yiwi [akis] Sara.
GEN 20:3 [Maca] iḍhar-dd AREBBI i Abimalik di tarjit n ǧiret, inna as: “Aqa řexxu ad temmted di ssibbet n temɣart, tenni dd-tiwyed akidek, [minzi] nettat temřec ak-d weryaz.”
GEN 20:4 [Maca] Abimalik tuɣa war ɣares dd-iqarreb, inna: “[A] Sidi inu, ma [xenni] ad tawḍed ad tenɣed ijj n řgens iseggden?
GEN 20:5 Ma war d ayi inni netta: ‘Nettat d učma [i teǧa]!’, u nettat s yixef nnes tenna ɛawed: ‘Netta d uma [i yeǧa]!’ S tidett n wuř u s ifassen izdigen i ggiɣ aya.”
GEN 20:6 Inna as AREBBI di tarjit: “Necc ssneɣ ɛad belli teggid man aya s tidett n wuř, x uya ḥḍiɣ cek ḥima war xafi txeṭṭiḍ u war cek jjiɣ ad tt tḥadid.
GEN 20:7 Řexxu, arr tamɣart ɣar weryaz nnes, minzi netta d anabi uca netta ad xak iẓẓaǧ, ḥima ad teddared. [Maca] mařa war tt tarrid ca, ssen belli aqa ad temmted, cek d marra min iǧan nnec!”
GEN 20:8 Ikkar Abimalik zic ɣar ṣṣbeḥ. Iřaɣa i marra imsexxaren nnes, inna marra awařen-a deg imezzuɣen nsen uca iryazen nni dewřen ggʷeden aṭṭas.
GEN 20:9 [Xenni] iřaɣa Abimalik x Ibrahim uca inna as: “Min d aneɣ teggid d min di xḍiɣ akidek umi tɣeḍred xafi u x tgeldit inu ddenb ameqqran? Cek teggid akidi min war icuwwaren ad [t] tegged.”
GEN 20:10 Uca [yarni] inna Abimalik i Ibrahim: “Min cek yejjin řami teggid man aya?”
GEN 20:11 Inna Ibrahim: “Minzi nwiɣ: ‘Nican war dinni tiggʷudi zi AREBBI deg wemcan-a uca ad ayi nɣen di ssibbet n temɣart inu.’
GEN 20:12 Uca s tidett nettat ɛawed d učma. Nettat d yeǧis n baba, maca war teǧi d yeǧis n yemma uca tedweř d tamɣart inu.
GEN 20:13 Umi d ayi issetleɛ AREBBI zi taddart n baba, nniɣ as: ‘Ad yiři wa d [řeɛřamet n] tmexsiwt nnec icewwaren i necc, aqa ad tinid di marra imucan mani ɣa naweḍ: Netta aqa d uma!’”
GEN 20:14 [Xenni] iksi Abimaliki uǧi d ifunasen d tfunasin d isemɣan d tiyya uca iwca i-ten i Ibrahim uca yarr as Sara, tamɣart nnes.
GEN 20:15 Inna Abimalik: “Xzar, tammurt inu aqa-tt qibač nnec. Zdeɣ mani i d ac dd-[iḍhar] mliḥ di tiṭṭawin nnec.”
GEN 20:16 I Sara inna: “Xzar, wciɣ ařef n [uqiyyat n] nnuqart i umam. Aqa atent d ařeḥḥaf x tiṭṭawin i kuřci inni kidem iǧan, [wah,] i kuřci idweř am-dd d ttiqart.”
GEN 20:17 Iẓẓuǧ Ibrahim i AREBBI uca AREBBI issgenfa Abimalik d temɣart nnes d temsexxarin nnes uca urwent.
GEN 20:18 Minzi tuɣa SIDI ibelleɛ qaɛ marra řemřawat n [temɣarin di] taddart n Abimalik di ssibbet n Sara, tamɣart n Ibrahim.
GEN 21:1 Uca yarzef SIDI ɣar Sara, am mammec t inna, uca ikemmeř SIDI [awař] i inna i Sara.
GEN 21:2 Teksi Sara s ddeyset uca turuw-dd ijj n useymi i Ibrahim x tewsar nnes, di řmijar nni i d as inna AREBBI.
GEN 21:3 Uca iřaɣa Ibrahim i mmis aseymi, wenni d as dd-turuw Sara, Isḥaq.
GEN 21:4 Ibrahim ixten i mmis Isḥaq umi tuɣa ɣares tmenya n wussan, am mammec d as yumur AREBBI.
GEN 21:5 Tuɣa ɣar Ibrahim mya n iseggʷusa, ařami ɣares dd-ixřeq mmis Isḥaq.
GEN 21:6 Tenna Sara: “Isseḍḥec ayi AREBBI u kuř ijj wenni i ɣa isřan [i man aya], ad iḍḥec [ɛawed] akidi.”
GEN 21:7 Tenna [ɛawed]: “Man wen [izeɛmen] ad yini i Ibrahim, aqa Sara ad tessuṭṭeḍ iseyman? Aqa urweɣ [as-dd] aḥenjir x tewsar nnes!”
GEN 21:8 Igma useymi uca ittwakkes as uṭṭuḍ. Deg wass i d as kksen uṭṭuḍ i Isḥaq, issewjed Ibrahim ict n zzardet temɣar.
GEN 21:9 [Umi] teẓra Sara mmis n Tmiṣrect Hajar, wenni dd-turuw [Hajar] i Ibrahim, iqeṣṣar xas,
GEN 21:10 tenna i Ibrahim: “Aẓẓeř x tayya-ya d mmis, minzi mmis n tayya-ya war iwarret ca ak-d mmi, ak-d Isḥaq.”
GEN 21:11 Awař-a iban-dd d aɛeffan aṭṭas di tiṭṭawin n Ibrahim di ssibbet n mmis.
GEN 21:12 [Maca] inna AREBBI i Ibrahim: “War ttejji aḥenjir d tayya nnec ad iřin d tisineft di tiṭṭawin nnec. Seř ɣar marra min i d ac ɣa tini Sara, minzi di Isḥaq ad ac tiři zzariɛet.
GEN 21:13 Ad ggeɣ ɛawed ijj n řgens zi mmis n tayya-ya, minzi uřa d netta d zzariɛet nnec.”
GEN 21:14 [Xenni] ikkar Ibrahim zic uca iksi aɣrum d ict n tecyart n waman, iwca [i-ten] i Hajar, issars [as ten] x teɣruḍt. [Iwca as ɛawed] aḥenjir uca issqebbeḍ i-tt. Uca nettat truḥ, tennejru di řexřa n Bi’r-Sebɛa.
GEN 21:15 [Řami] neqṣen waman zi tecyart, tenḍar aḥenjir sadu ijj n cbarq,
GEN 21:16 uca truḥ teqqim qibač nnes řaggʷaj n tecti n řqews, minzi tenna: “War zemmareɣ ad ẓareɣ meřmi i ɣa immet uḥenjir.” [Ammu] i teqqim qibač nnes uca tessgeɛɛed tmijja nnes, tesɣuyyu.
GEN 21:17 Isřa AREBBI ɣar tmijja n uḥenjir uca lmalak n AREBBI iřaɣa i Hajar zeg ujenna, inna as: “Min cem yuɣin, Hajar? War tteggʷed ca, minzi AREBBI isřa řḥess n uḥenjir, din mani iǧa.
GEN 21:18 Kkar, sgeɛɛed aḥenjir uca ṭṭef as deg ufus nnem, minzi ad zzayes ggeɣ ijj n řgens imɣar.”
GEN 21:19 Uca yarzem AREBBI tiṭṭawin nnes, teẓra řɛunṣar n waman. Truḥ, tɛemmar tacyart s waman, tewca as i uḥenjir, ad isu.
GEN 21:20 Tuɣa AREBBI ak-d uḥenjir, iyma, izdeɣ di řexřa u tuɣa-t d amjebbad n řqews.
GEN 21:21 Tuɣa izeddeɣ di řexřa n Faran uca teksi as-dd yemmas tamɣart zi temmurt n Miṣra.
GEN 21:22 Di řweqt nni d ict imsar, belli Abimalik ak-d Fikul, akumandar n řɛeskar nnes, issiweř ak-d Ibrahim, inna: “AREBBI aqa-t akidek di marra min tᵉttegged.
GEN 21:23 Řexxu, jaǧ ayi ɣar AREBBI, aqa war tᵉttɣeccid iḥenjiren inu uřa d ayyawen inu! [Maca] s muxas tamexsiwt icewwaren i kik ggiɣ qbeř, ad zzayes tegged cek akidi u ak-d temmurt mani teqqimed am ubarrani.”
GEN 21:24 Inna Ibrahim: “Necc ad jjaǧeɣ!”
GEN 21:25 [Xas uca] iɛeyyeb Ibrahim Abimalik x řɛunṣar n waman nni iṭṭfen [zzayes] imsexxaren n Abimalik s uɣiř.
GEN 21:26 [Xenni] inna Abimalik: “Necc war ssineɣ wi iggin man aya u cek war d ayi t tennid ca qbeř. Aqa ař řexxu i zzayek t sřiɣ.”
GEN 21:27 Iksi Ibrahim uǧi d ifunasen d tfunasin uca iwca as ten i Abimalik uca nitni s tnayen idsen ggin ijj n řɛahd [jar asen].
GEN 21:28 [Maca] issars Ibrahim sebɛa n txeswin zeg wuǧi ɣar uɣezdis.
GEN 21:29 [Xenni] inna Abimalik i Ibrahim: “Min ɛnant sebɛa n txeswin nni teggid ɣar uɣezdis?”
GEN 21:30 Inna netta: “Ksi zeɛma sebɛa aya n txeswin zeg ifassen inu, ḥima ad iřint d cchadet di ṭṭweɛ inu belli necc i iɣzin anu-ya.”
GEN 21:31 X uya semman amcan nni Bi’r-Sebɛa, minzi nitni s tnayen idsen tuɣa jjuǧen din.
GEN 21:32 [Ammu i] ggin řɛahd di Bi’r-Sebɛa. [Awarni man aya] ikkar Abimalik ak-d Fikul, akumandar n řɛeskar nnes, iɛqeb ɣar temmurt n Ifilisṭiniyyen.
GEN 21:33 Iẓẓu Ibrahim ict n tcejjart n tmarist di Bi’r-Sebɛa uca iřaɣa din isem n SIDI, Arebbi n řebda.
GEN 21:34 Izdeɣ Ibrahim am ubarrani di temmurt n Ifilisṭiniyyen aṭṭas n wussan.
GEN 22:1 Awarni man aya temsar, aqa ijarreb AREBBI Ibrahim, inna as: “Ibrahim!” Uca inna as: “Xzar, necc aqa ayi da!”
GEN 22:2 Inna as Netta: “Ksi ayenni n mmic, wenni texsed, Isḥaq, uca ruḥ ɣar temmurt n Muriya uca tqeddmed t din d taɣraṣt x yijj n wedrar jar idurar i d ac ɣa iniɣ.”
GEN 22:3 Ikkar Ibrahim zic, iḥezzem i weɣyuř nnes uca iksi akides tnayen n imsexxaren nnes d mmis Isḥaq. Iqess akeccuḍ i tewhibt n tɣarṣt, ikkar, iruḥ deg webrid ɣar wemcan i d as inna AREBBI.
GEN 22:4 Deg wass wiss třata issgeɛɛed Ibrahim tamuɣři nnes uca iẓra amcan zi řaggʷaj.
GEN 22:5 Inna Ibrahim i imsexxaren nnes: “Rajam da ak-d weɣyuř, necc d uḥenjir ad nraḥ diha, ad nesjed. [Awarni as] ad ɣarwem dd-neɛqeb.”
GEN 22:6 Iksi Ibrahim akeccuḍ i wecmaḍ n tɣarṣt, issars i-t x mmis Isḥaq u netta [s yixef nnes] iksi s ufus nnes timessi d txedmect, uca [ammu i] ruḥen nitni s tnayen idsen.
GEN 22:7 [Xenni] issiweř Isḥaq ak-d Ibrahim babas, inna: “Baba inu!” Inna netta: “Xzar, necc aqa ayi da, mmi!” Uca inna netta: “Xzar, [aqa da] timessi d ukeccuḍ, maca mani iǧa izmar i tɣarṣt?”
GEN 22:8 Inna Ibrahim: “AREBBI Simant nnes ad issarzeq s yezmar i tɣarṣt, [a] mmi!” Uca [ammu i] ruḥen s tnayen idsen
GEN 22:9 uca iwḍen ɣar wemcan nni i d as inna AREBBI. Din i ibna Ibrahim ijj n uɛalṭar uca iɛdeř akeccuḍ, icarf mmis Isḥaq uca issars i-t x uɛalṭar x ikecwaḍ.
GEN 22:10 [Xas uca] isswiẓẓeḍ Ibrahim afus nnes uca iksi-dd taxedmect, ḥima ad iɣarṣ i mmis.
GEN 22:11 [Maca] lmalak n SIDI iřaɣa as-dd zeg ujenna, inna as: “Ibrahim, Ibrahim!” Netta inna: “Necc aqa ayi da!”
GEN 22:12 [Xenni] inna as: “War swiẓẓiḍ afus nnec ɣar uḥenjir. war d ttegg ca, minzi řexxu aqa ssneɣ belli tᵉtteggʷeded AREBBI u war xafi tessɛizzed ayenni n mmic.”
GEN 22:13 Issgeɛɛed Ibrahim tiṭṭawin nnes, u xzar, aqa awarni as tuɣa ijj n icarri iqqen ɣar cbarq zeg waccawen nnes. Yuyur Ibrahim dinni, iṭṭef icarri uca igga-i-t d taɣarṣt deg wemcan n mmis.
GEN 22:14 Iřaɣa Ibrahim isem n wemcan nni: “SIDI ad issarzeq!” S uyenni iqqar bnadem ař ass-a: “Deg wedrar n SIDI ad yiři yarzeq!”
GEN 22:15 Iřaɣa-dd lmalak n SIDI wiss martayen zeg ujenna x Ibrahim,
GEN 22:16 inna: “Minzi teggid man aya uca war xafi tᵉṭṭifed ayenni n mmic, ad jjaǧeɣ x Simant inu, iqqar SIDI,
GEN 22:17 aqa ad cek barkeɣ aṭṭas uca ad kettareɣ zzariɛet nnec aṭṭas am yitran n ujenna u am yijdi x tma n řebḥar. Zzariɛet nnec ad tᵉṭṭef tawwart n řɛedyan nnes d řwart
GEN 22:18 u di zzariɛet nnec ad ttwabarken marra řegnus n temmurt, minzi tesřid i tmijja inu.”
GEN 22:19 [Xenni] iɛqeb-dd Ibrahim ɣar imsexxaren nnes. Nitni kkaren uca ruḥen jmiɛ [deg webrid] ɣar Bi’r-Sebɛa, uca igga Ibrahim ad izdeɣ di Bi’r-Sebɛa.
GEN 22:20 Awarni man aya imsar aqa xebbaren Ibrahim, nnan as: “Xzar, ɛawed Milka turuw-dd iḥenjiren i Naḥur umac:
GEN 22:21 Ɛuṣ, amenzu nnes, d Buz umas, d Qamuwil wenni d babas n Aram,
GEN 22:22 d Kasad d Ḥazu d Fildac d Yidlaf d Bituwil.”
GEN 22:23 Bituwil ijja-dd Rifqa. Tmenya aya i dd-turuw Milka i Naḥur, umas n Ibrahim.
GEN 22:24 U tayya nnes, tenni umi qqaren Riɛuma, turuw [as]-dd ɛawed Ṭabaḥ d Jaḥam d Taḥac d Maɛka.
GEN 23:1 Tuɣa ɣar Sara mya u-sebɛa u-ɛicrin n iseggʷusa. [Man aya d řmijař n] iseggʷusa n tudart n Sara.
GEN 23:2 Uca temmut Sara di Qaryat-Arbaɛ, ixs ad yini Ḥabrun, di temmurt n Kenɛan. Uca yudef-dd Ibrahim [ɣar uqiḍun], icḍen x Sara, isɣuy xas.
GEN 23:3 [Xas uca] ikkar Ibrahim ṭṭarf i umettin nnes, uca issiweř ak-d tarwa n Ḥit, inna:
GEN 23:4 “Necc d abarrani d amɛezzeb ɣar awem. Wcem ayi mɣir anḍeř d agřa jar awem, ḥima ad neḍřeɣ amettin inu zi zzat inu.”
GEN 23:5 Arrin-dd tarwa n Ḥit x Ibrahim, nnan as:
GEN 23:6 “Seř ɣarneɣ, [a] sidi inu! Cek d řḥakem n AREBBI jar aneɣ. Nḍeř amettin nnec deg wenḍeř nneɣ iṣebḥen. Uřa d ijj zzayneɣ ad cek iṭṭef x wenḍeř nnes, ḥima ad [dayes] tneḍřed amettin nnec.”
GEN 23:7 [Xenni] ikkar Ibrahim, ibendeq zzat i řgens n temmurt, zzat i tarwa n Ḥit
GEN 23:8 uca issiweř akidsen, inna: “Mařa kenniw s array nwem ad neḍřeɣ amettin inu zi zzat inu, sřem ɣari uca zawgem di ṭṭweɛ inu ɣar Ɛifrun, mmis n Zuhar,
GEN 23:9 maḥend ad ayi iwc ifri n Makfila, d wenni nnes, ɣar ṭṭarf n yeyyar nnes. Ejj i-t ad ayi t iwc s ttaman nnes ikmeř. Ad yiři d anḍeř inu i ɣa mellkeɣ jar awem.”
GEN 23:10 Ɛifrun tuɣa iqqim jar tarwa n Ḥit uca Ɛifrun, Aḥitti, yarra-dd x Ibrahim deg imejjan n tarwa n Ḥit d marra inni yudfen ɣar tewwart n tendint nnes, inna:
GEN 23:11 “Lla, a sidi inu, seř-dd ɣari! Necc ad ac wceɣ iyyar uřa d ifri nni dayes iǧan. Zzat i tiṭṭawin n tarwa n řgens inu ad ac t wceɣ, nḍeř amettin nnec!”
GEN 23:12 [Xenni] ibendeq Ibrahim s uɣembub nnes ɣar temmurt zzat i řgens n temmurt
GEN 23:13 uca issiweř ak-d Ɛifrun deg imezzuɣen n řgens n temmurt, inna: “Ttzawgeɣ, mařa texsed, seř-dd ɣari. Ad ac wceɣ nnuqart n yeyyar, qbeř i-tt zzayi, [xenni] ad dayes neḍřeɣ amettin inu.”
GEN 23:14 Yarra-dd Ɛifrun x Ibrahim, inna as:
GEN 23:15 “Sidi inu, seř-dd ɣari! Min ixs ad yini iyyar isekkwan arebɛa-mya ciqlu n nnuqart jar ayi d cek? Nḍeř amettin nnec!”
GEN 23:16 Isřa Ibrahim i Ɛifrun uca iwzen Ibrahim i Ɛifrun tmenyat n nnuqart i xef issiweř deg imezzuɣen n tarwa n Ḥit: arebɛa-mya ciqlu n nnuqart, am tt nnumen isebbaben.
GEN 23:17 [Ammu i] idweř yeyyar n Ɛifrun, wenni iǧan di Makfila arendad n Mamri, iyyar d ifri wenni dayes iǧan d marra ticejjura inni deg iyyar ɣar iymiren nnes i d as dd-innḍen,
GEN 23:18 d agřa n Ibrahim zzat i tarwa n Ḥit d marra inni yudfen ɣar tewwart n tendint.
GEN 23:19 Awarni aya inḍeř Ibrahim Sara, tamɣart nnes, deg ifri n yeyyar n Makfila qibač i Mamri, wenni iǧan d Ḥabrun di temmurt n Kenɛan.
GEN 23:20 [Ammu i] idweř iyyar ak-d yefri i dayes iǧan zi tarwa n Ḥit ɣar Ibrahim am wenḍeř nnes.
GEN 24:1 Ibrahim tuɣa iwsar u imɣar deg wussan uca SIDI ibarek Ibrahim di kuřci.
GEN 24:2 [Xenni] inna Ibrahim i umsexxar nnes awessar nni iǧan x taddart nnes, awkiř n marra min ɣares: “Egg řexxu afus nnec sadu tmeṣṣaḍt inu,
GEN 24:3 ad ac ssjjaǧeɣ s SIDI, AREBBI n ijenwan d AREBBI n temmurt, belli war dd-tᵉttiwyed tamɣart i mmi zi tḥenjirin n ayt n Kenɛan mani zeddɣeɣ necc jar asen,
GEN 24:4 [maca] ad traḥed ɣar temmurt [i zi dd-usiɣ], ɣar raǧ inu, [maḥend] ad dd-tawyed tamɣart i mmi Isḥaq.”
GEN 24:5 Inna as umsexxar: “Balak war tᵉttexs temɣart ad ayi dd-teḍfar ɣar temmurt-a. Ma ittxeṣṣa ad arreɣ mmic ɣar temmurt nni manis dd-tusid?”
GEN 24:6 Inna as Ibrahim: “Ḥḍat, war dd-ttarri ca mmi dinni!
GEN 24:7 SIDI, AREBBI n ijenwan wenni d ayi iṭṭfen zi taddart n baba u zi temmurt n raǧ inu, wenni ɣari issiwřen, ijjuǧ ayi umi d ayi inna: ‘I zzariɛet nnec ad wceɣ tammurt-a!’, d Netta i ɣa issekken lmalak nnes zzat i wudem nnec, maḥend ad tawyed ssenni tamɣart i mmi.
GEN 24:8 Mařa tamɣart war tᵉttexs ad cek dd-teḍfar, ad tiřid třellid zi tjaǧit-a, mɣir war dd-ttarri din mmi.”
GEN 24:9 Issars umsexxar afus nnes sadu tmeṣṣaḍt n sidis Ibrahim ijjuǧ as x man aya.
GEN 24:10 Iksi umsexxar ɛecra n iřeɣman zeg iřeɣman n sidis, iruḥ. Tuɣa ɣares ɛřam kuř agřa iɣřan n sidis. Ikkar uca iṭṭef abrid ɣar [temmurt n] Aram-Nahrayn, [aqa-tt d Misuputamya], ɣar tendint n Naḥur.
GEN 24:11 Ɣar uxecci n tmeddit ijja iřeɣman ad jjnen barra i tendint zzat i řɛunṣar n waman, ɣar tsaɛɛet i di dd-ffɣent temɣarin, maḥend ad ayment aman.
GEN 24:12 [Xenni] inna: “SIDI, AREBBI n sidi inu Ibrahim, ttzawageɣ Cek ad ayi tɛawned ass-a uca scen tamexsiwt [nnec] icewwaren i sidi inu Ibrahim.
GEN 24:13 Aqa ayi ɣar řɛunṣar n waman d tḥenjirin n yeryazen n tendint ad dd-ffɣent maḥend ad ayment aman.
GEN 24:14 Ejj tabřiɣt nni umi ɣa iniɣ: ‘Sehwa-dd aqbuc nnem, mařa texsed, ad sweɣ!’, [uca xenni] ad tini: ‘Su, ad wardeɣ uřa d iřeɣman nnec!’, aqa d nettat i teggid i umsexxar nnec Isḥaq, u s uya ad ssneɣ aqa tessecned tamexsiwt [nnec] icewwaren i sidi inu.”
GEN 24:15 Uca ɛad qbeř i ɣa ikemmer awař, iẓra Rifqa, tenni i dd-yurwen i Bituwil, mmis n Milka, tamɣart n Naḥur umas n Ibrahim, teffeɣ-dd [zi tendint] s weqbuc nnes x teɣruḍt.
GEN 24:16 Tabřiɣt tuɣa dayes aẓri imɣar, d taɛzarect, war tt issin weryaz. Nettat tehwa-dd ɣar řɛunṣar, teccur aqbuc nnes uca tgeɛɛed ɛawed.
GEN 24:17 Yuzzeř ɣares umsexxar [nni], inna: “Ttzawgeɣ cem ad ayi tewced ad sweɣ cwayt n waman zeg weqbuc nnem!”
GEN 24:18 Nettat tenna: “Su, a sidi inu!” Tqeǧeq tessehwa aqbuc nnes x ufus nnes, tewca as ad isu.
GEN 24:19 [Řami] d as tewca iswa mliḥ, tenna: “Ad aymeɣ aman ɛawed i iřeɣman nnec, ař ɣarsen i ɣa yiři s zzyada.”
GEN 24:20 Tqeǧeq tᵉssexwa aqbuc di tarya, tuzzeř ɛawed ɣar řɛunṣar, ḥima ad tayem aman, uca tuyem asen-dd aman i iřeɣman nnes marra.
GEN 24:21 [Waxxa] itebhet dayes weryaz, isqar, ḥima ad issen ma SIDI issehwen xas abrid nnes niɣ lla.
GEN 24:22 Umi jjiwnen iřeɣman tisessi, iksi weryaz deg ijj n umur ict n txadent n wureɣ, [tenni iweznen] azyen ciqlu, d tnayen n tmeqyasin i ifassen nnes, [tinni iweznen] ɛecra ciqlu n wureɣ,
GEN 24:23 inna: “Ini ayi, umi teggid d yeǧis? Ma aqa din amcan di taddart n babam mani nzemmar ad nessens?”
GEN 24:24 Nettat tenna as: “Necc d yeǧis n Bituwil, mmis n Milka, wenni i-tt-i-dd-yurwen i Naḥur.”
GEN 24:25 Uca tarni tenna as: “Aqa ɛawed ɣarneɣ aṭṭas n uřum d iɣeǧ, u ɣarneɣ ɛawed amcan i tmensiwt.”
GEN 24:26 Uca yuḍar weryaz uca ibendeq i SIDI,
GEN 24:27 inna: “Ad ittwabarek SIDI, AREBBI n sidi inu Ibrahim, wenni war ikkisen tamexsiwt nnes icewwaren d řaman nnes zi sidi inu. Indeh ayi SIDI deg webrid ɣar taddart n wawmaten n sidi inu.”
GEN 24:28 Tuzzeř tebřiɣt, tɛawed timesřayin-a i yemmas di taddart.
GEN 24:29 Uca Rifqa tuɣa ɣares umas, qqaren as Laban, uca Laban yuzzeř ɣar weryaz nni tuɣa [din] di barra ɣar řɛunṣar.
GEN 24:30 Tuɣa iẓra taxadent d tnayen n tmeqyasin deg ifassen n učmas uca isřa i wawařen i tuɣa teqqar učmas Rifqa, tenna: “Ammu i kidi issiweř weryaz nni.” Uca yuyur ɣar weryaz. Xzar, ibedd [diha] zzat i iřeɣman, ɣar řɛunṣar.
GEN 24:31 Inna: “Araḥ-dd, [a cek d] amimun n SIDI! Mayemmi teqqimed di barra, necc aqa sswejdeɣ taddart d wemcan i iřeɣman.”
GEN 24:32 Iruḥ weryaz akides ɣar taddart u netta iḍřeq i iseɣwan n iřeɣman. Netta iwca asen řum d macca, uca iksi aman, ḥima ad issird iḍaren nnes uřa d iḍaren n iryazen nni kides iǧan.
GEN 24:33 Issars zzates min ɣa yecc. Uca netta inna: “War ttᵉtteɣ qbeř i ɣa iniɣ tabrat inu.” Netta inna as: “Siweř!”
GEN 24:34 [Xenni] inna: “Necc d amsexxar n Ibrahim.
GEN 24:35 SIDI ibark sidi inu aṭṭas s waṭṭas uca ccan nnes imɣar aṭṭas. Aqa iwca as uǧi d ifunasen d tfunasin, nnuqart d wureɣ, isemɣan d tiyya, iřeɣman d yeɣyař.
GEN 24:36 D Sara, tamɣart n sidi inu, turuw-dd aḥenjir i sidi inu awarni umi tewsar u netta iwca as marra min ɣares.
GEN 24:37 Uca sidi inu ijja ayi jjuǧeɣ, inna: ‘War dd-ttawi tamɣart i mmi zi tḥenjirin n ayt n Kenɛan inni mani zedɣeɣ di temmurt nsen.
GEN 24:38 [Uct xak] mařa war ttriḥed ɣar taddart n baba, ɣar raǧ inu uca ad dd-tawyed tamɣart i mmi [ssenni].’
GEN 24:39 [Xenni] necc nniɣ i sidi inu: ‘Balak tamɣart war d ayi dd-tḍeffar.’
GEN 24:40 Uca netta inna ayi: ‘SIDI i umi uyureɣ zzat i wudem nnes, aqa Netta ad dd-issekk lmalak nnes akidek uca ad xak issehwen abrid nnec ař dd ɣa tawyed i mmi ict n temɣart zi řaǧ inu u zi taddart n baba.
GEN 24:41 Ad tiřid tfekked zi tjaǧit i d ayi tejjuǧed, xmi ɣa traḥed ɣar řaǧ inu u nitni war d ac tt tticen, [xenni] ad cek ssuffɣeɣ zi tjaǧit nnec i tuɣa tejjuǧed.’
GEN 24:42 Ass-a usiɣ-dd ɣar řɛunṣar uca nniɣ: ‘[A] SIDI, AREBBI n sidi inu Ibrahim, ttzawageɣ ad tᵉsshewned řexxu abrid i di ggureɣ.
GEN 24:43 Aqa ayi da zzat i řɛunṣar n waman. Ejj ad tiři ammu, aqa taɛzarect, tenni dd ɣa iffɣen, maḥend ad tayem aman u i tenni umi ɣa iniɣ: Ewc ayi ad sweɣ cwayt n waman zeg uqbuc nnem!
GEN 24:44 uca [xenni] nettat ad ayi tini: Su cek u necc ad aymeɣ ɛawed i iřeɣman nnec!, d ta ad tiři d tamɣart nni d issewjed SIDI i mmis n sidi inu.’
GEN 24:45 Uca qbeř i ɣa kemmřeɣ [taẓaǧit-a] deg wuř inu, xzar, Rifqa teffeɣ-dd s uqbuc nnes x teɣruḍt nnes, tehwa ɣar řɛunṣar uca tuyem-dd aman. Nniɣ as: ‘Ttzawgeɣ cem ad ayi tewced ad sweɣ!’
GEN 24:46 Deɣya tessehwa aqbuc nnes, tenna: ‘Su u necc ad ssesweɣ ɛawed iřeɣman nnec!’ Swiɣ uca nettat tewca ɛawed i iřeɣman ad swen.
GEN 24:47 Sseqsiɣ tt, nniɣ: ‘Umi teggid d yeǧis?’ Nettat tarra: ‘[Necc d] yeǧis n Bituwil, mmis n Naḥur wenni d as dd-yurwen Milka.’ [Xenni] ggiɣ as taxadent di tinzart nnes d tmeqyasin deg ifassen nnes.
GEN 24:48 [Xas uca] uḍareɣ, bendqeɣ i SIDI uca barkeɣ SIDI, AREBBI n sidi inu Ibrahim, wenni d ayi inedhen nican deg webrid, ḥima ad dd-awyeɣ iǧis n umas n sidi inu d temɣart i mmis.
GEN 24:49 [Xenni] řexxu, mařa kenniw texsem ad tessecnem tamexsiwt icewwaren d řaman i sidi inu, ini ayi t, mařa lla, ini ayi t [ɛawed], [xenni] ad kkeɣ yefus niɣ uzeřmaḍ.”
GEN 24:50 [Xenni] Laban d Bituwil arrin-dd, nnan: “Zi SIDI i dd-iffeɣ uya, war nzemmar ad dayek nini řɣar niɣ řxar.
GEN 24:51 Xzar, Rifqa qibač nnec, ksi [tt] uca truḥed. Ad tiři nettat d tamɣart n mmis n sidi nnec, am mammec inna SIDI!”
GEN 24:52 Umi isřa umsexxar n Ibrahim awařen nsen, ibendeq ɣar temmurt zzat i SIDI.
GEN 24:53 Uca issuffeɣ-dd umsexxar řeqcuɛ n nnuqart d řeqcuɛ n wureɣ d warruḍen, iwca i-ten i Rifqa. Ɛawed iwca tirzifin iɣřan i umas d yemmas.
GEN 24:54 Ccin, swin, netta d yeryazen inni kis dd-yusin. Ssensen [din] uca faqen ɣar ṣṣbeḥ. [Xenni] inna: “Samḥem ayi ad raḥeɣ [řexxu] ɣar sidi inu!”
GEN 24:55 Arrin-dd umas d yemmas: “Ejj tabřiɣt akidneɣ waxxa mɣir ɛecra n wussan, awarni as ad tuyured.”
GEN 24:56 Maca netta inna asen: “War dayi tᵉṭṭifem ɛad umi SIDI issehwen abrid inu! Mɣir ejj ayi ad raḥeɣ ɣar sidi inu.”
GEN 24:57 Nitni arrin-dd řexdenni: “Ejj aneɣ ad nřaɣa i tebřiɣt, ad nseř [i min ɣa tini] zeg uqemmum nnes.”
GEN 24:58 Řaɣan i Rifqa uca nnan as: “Ma ad traḥed cem ak-d weryaz-a?” Uca nettat tarra-dd: “Wah, ad raḥeɣ.”
GEN 24:59 [Xenni] ssqebbḍen nitni Rifqa, učmatsen, ak-d tmeṭṭaḍt nnes, uca [ssqebbḍen] ɛawed amsexxar n Ibrahim d iryazen nnes.
GEN 24:60 Uca barken Rifqa, nnan as: “[A] učmatneɣ, ad tawḍed ad temɣared d řuřuf n ɛecra n řuřuf uca zzariɛet nnem ad tᵉṭṭef tawwart n yinni tt icarrhen!”
GEN 24:61 Tekkar Rifqa d temsexxarin nnes timeẓyanin, nyint x iřeɣman, ḍfarent aryaz. [Ammu] i dd-yiwi umsexxar Rifqa uca iruḥ.
GEN 24:62 Aqa iffeɣ-dd Isḥaq zeg wanu n Laḥay-Ru’i. Tuɣa izeddeɣ di Temmurt n Ljanub.
GEN 24:63 Iffeɣ-dd Isḥaq maḥend ad iẓẓaǧ deg iyyar. Tuɣa-tt ɣar uweṭṭu n tmeddit. Netta issgeɛɛed tamuɣři nnes, iqceɛ, u xzar, iřeɣman ttqarraben-dd!
GEN 24:64 Rifqa ɛawed tessgeɛɛed tiṭṭawin nnes, teẓra Isḥaq. Nettat tejja ixef nnes ad tḍar deɣya x weřɣem
GEN 24:65 uca tenna i umsexxar: “Min iɛna weryaz nni dd-yusin deg iyyar ɣarneɣ?” Uca inna umsexxar: “Wa d sidi inu!” Xenni teksi takenbuct uca třeḥḥef.
GEN 24:66 Uca iɛawed umsexxar i Isḥaq marra min igga.
GEN 24:67 Igewwed i-tt Isḥaq ɣar uqiḍun n yemmas Sara, yiwi Rifqa uca nettat tedweř d tamɣart nnes u netta tuɣa ittexs i-tt. Ammu i ifewwej Isḥaq awarni [řmewt] n yemmas.
GEN 25:1 Iksi Ibrahim tamɣart nneɣni, qqaren as Qatura.
GEN 25:2 Netta turuw as-dd Zimran, Yaqcan, Midyan, Yicbaq d Cuḥa.
GEN 25:3 Yuqcan ijja-dd Caba d Dadan. Uca arrawen n Dadan tuɣa aten d Iccuriyyen d Ilituciyyen d Iliyumiyyen.
GEN 25:4 Iḥenjiren n Midyan [tuɣa aten d] Ɛiyfa, Ɛifar, Ḥanux, Abidaɛ d Aldaɛa. Marra ina [tuɣa aten d] iḥenjiren n Qaṭura.
GEN 25:5 Ibrahim iwca marra min ɣares i Isḥaq.
GEN 25:6 Maca i iḥenjiren n tiyya i tuɣa ɣar Ibrahim, iwca asen Ibrahim arriɣalut uca, am t tuɣa [ɛad] iddar, issekk i-ten ssenni ɣar ccarq, ɣar temmurt n ccarq, issiggʷej i-ten x Isḥaq mmis.
GEN 25:7 Ibrahim tuɣa iddar mya u-xemsa u-sebɛin n iseggʷusa, wa d řmijař n tudart nnes.
GEN 25:8 Iḍřeq Ibrahim i buḥbeř nnes uca immut di ccib isegged, di tewsar d tyawant. Uca immarni ɣar řgens nnes.
GEN 25:9 Isḥaq d Ismaɛil, iḥenjiren nnes, neḍřen t deg ifri n Makfila deg iyyar n Ɛifrun, mmis n Ṣuḥar, Aḥitti, [iyyar] i iǧan qibač i Mamri.
GEN 25:10 Ittwanḍeř Ibrahim d temɣart nnes Sara deg iyyar nni isɣa Ibrahim zi tarwa n Ḥit.
GEN 25:11 Awarni i řmewt n Ibrahim ibarek AREBBI mmis Isḥaq. Uca izdeɣ Isḥaq zzat i wanu n Laḥay-Ru’i.
GEN 25:12 Ina d imezruyen n yinni dd-ittwaxeřqen zi Ismaɛil, mmis n Ibrahim, inni dd-tejja Hajar, tayya n Sara zi Miṣra, i Ibrahim.
GEN 25:13 D yina d ismawen n iḥenjiren n Ismaɛil, s ismawen nsen ɛlaḥsab axřaq nsen. Amenzu n Ismaɛil [tuɣa-t d] Nabayut, [xenni] Qidar, Adbiyil, Mibsam,
GEN 25:14 Misma, Duma, Massa,
GEN 25:15 Ḥadar, Tayma, Yaṭur, Nafic d Qidma.
GEN 25:16 D yina d iḥenjiren n Ismaɛil s ismawen nsen, s dcurat nsen d řmarageḥ nsen: tenɛac n řḥukkam s řaǧat nsen.
GEN 25:17 Tuɣa iddar Ismaɛil mya u-sebɛa u-třatin n iseggʷusa. [Xenni] iḍřeq Ismaɛil i buḥbeř nnes, immut uca immarni ɣar řgens nnes.
GEN 25:18 Nitni zeddɣen zi Ḥawila ɣar Cur, wenni iǧan arendad n Miṣra, am tᵉṭṭfed abrid ɣar Accur. Netta izdeɣ arendad n marra aytmas. Ina d imezruyen n yinni dd-ittwaxeřqen zi Isḥaq, mmis n Ibrahim.
GEN 25:19 Ibrahim ijja-dd Isḥaq.
GEN 25:20 Tuɣa ɣar Isḥaq arebɛin n iseggʷusa umi yiwi Rifqa d tamɣart. Nettat d yeǧis n Bituwil, Aramiyu zi Faddan-Aram, učmas n Laban, Aramiyu.
GEN 25:21 Iḥeccem Isḥaq SIDI di ṭṭweɛ n temɣart nnes, tenni tuɣa war ittirwen ca, uca istajeb as SIDI s tẓaǧit nnes yuǧɣen, ařami teksi temɣart nnes, Rifqa, ddeyset.
GEN 25:22 Uca mmdeḥsen iḥenjiren deg uɛeddis nnes. [Xenni] tenna: “Manawya [ɛawed], mayemmi d ayi ittemsar man aya?”, uca truḥ ad tesseqsa SIDI.
GEN 25:23 Inna as SIDI: “Aqa din tnayen n řegnus di ddeyset nnem u tnayen n ccuɛub ad mmsebḍan zi dwaxeř nnem. Ijj n cceɛb ad yiři ijhed x cceɛb nneɣni u wenni d amenzu ad ixdem i umaẓuẓ.”
GEN 25:24 Ařami dd-iwḍen wussan nnes ad taru, xzar, aqa da deg uɛeddis nnes acniwen.
GEN 25:25 Iffeɣ-dd umezwar. Tuɣa-t d azeggʷaɣ, iceɛɛar qaɛ am yict n thiḍurt. S uyenni ggin as Ɛisu.
GEN 25:26 Awarni as iffeɣ-dd umas. Iṭṭef afus nnes deg unirz n Ɛisu. S uya semman t s yisem Yaɛqub. Tuɣa ɣar Isḥaq settin n iseggʷusa ɣar wexřaq nsen.
GEN 25:27 [Řami] gman iḥenjiren, idweř Ɛisu d ijj n weryaz issen aneymar, ijj n weryaz n barra, maca Yaɛqub idweř d ijj n weryaz yarsa, wenni izeddɣen deg iqiḍan.
GEN 25:28 Isḥaq tuɣa ittexs Ɛisu, minzi iɛjeb as ad yecc aysum n řmař n řexřa, u Rifqa tuɣa tᵉttexs Yaɛqub.
GEN 25:29 Uca issnenni Yaɛqub ict n macca, umi dd-iɛqeb Ɛisu zi řexřa, yuḥeř.
GEN 25:30 Inna Ɛisu i Yaɛqub: “Ttzawgeɣ cek ad ayi tewced ad cceɣ zeg uzeggʷaɣ, azeggʷaɣ nni diha, maɣar aqa fniɣ [s ufadi].” X uya qqaren as ‘Idum’.
GEN 25:31 [Řexdenni] inna Yaɛqub: “Zenz ayi ass-a [řḥeqq] nnec [n] umenzu.”
GEN 25:32 Inna Ɛisu: “Xzar, aqa necc ad mmteɣ, min ɣa ggeɣ s [řḥeqq n] umenzu?”
GEN 25:33 [Xenni] inna Yaɛqub: “Jaǧ ayi řexxu!” Uca ijjuǧ as, izzenz i Yaɛqub [řḥeqq n] umenzu nnes.
GEN 25:34 [Xas uca] iwca Yaɛqub i Ɛisu aɣrum d umecři n řeɛdes, u Ɛisu icca, iswa, ikkar, iruḥ. [Ammu] isseḥqar Ɛisu [řḥeqq n] umenzu nnes.
GEN 26:1 Tuɣa iǧa řaẓ di temmurt, ijj n řaẓ nneɣni x umezwar nni tuɣa iǧan deg wussan n Ibrahim. S uya iruḥ Isḥaq ɣar Abimalik, ajeǧid n Ifilisṭiniyyen, ɣar [jjwayeh n] Jirar.
GEN 26:2 [Dinni] iban as-dd SIDI, inna: “War hekkwi ca ɣar Miṣra. Zdeɣ di temmurt i d ac ɣa iniɣ.
GEN 26:3 Zdeɣ di temmurt-a am ubarrani u Necc ad kik iřiɣ, ad cek barkeɣ, minzi i cek u i zzariɛet nnec umi ɣa wceɣ marra timmura-ya uca ad kemmřeɣ tjaǧit i jjuǧeɣ i Ibrahim babac.
GEN 26:4 Ad kettareɣ zzariɛet nnec am yitran n ujenna uca ad wceɣ i zzariɛet nnec marra timmura-ya. Marra řegnus n ddunect ad ttwabarken di zzariɛet nnec,
GEN 26:5 minzi isřa Ibrahim i wawař inu uca iḥḍa min d as wciɣ maḥend ad iḥḍa: řumurat inu, tiweṣṣa inu d izerfan inu.”
GEN 26:6 Ammu i iqqim Isḥaq izeddeɣ di Jirar.
GEN 26:7 [Řami] t sseqsan iryazen n wemcan nni x temɣart nnes, inna asen: “Nettat d učma!”, minzi iggʷed ad yini: “D tamɣart inu!”. [Maɣar inna deg yixef nnes:] “Mařa war nniɣ amenni ad ayi nɣen iryazen n wemcan-a di ṭṭweɛ n Rifqa, minzi aqa dayes aẓri.”
GEN 26:8 Řami din izdeɣ aṭṭas n wussan, imsar belli Abimalik, ajeǧid n Ifilisṭiniyyen, ixzar-dd zi řkazi, iẓra Isḥaq ittɛatab Rifqa, tamɣart nnes.
GEN 26:9 Uca iřaɣa Abimalik x Isḥaq, inna as: “Xzar, ta s tidett d tamɣart nnec! Mammec teggid tennid aneɣ d učma?” Isḥaq inna as: “S minzi nniɣ [i yixef inu]: ‘Aqa tiři ad ayi nɣen x ssibbet nnes.’”
GEN 26:10 Abimalik inna: “Maɣar d aneɣ teggid aya? X drus ad yiři iṭṭeṣ ca n ijj zi řgens ak-d temɣart nnec uca ad tiři teggid ddenb x yiři nneɣ.”
GEN 26:11 Yumur Abimalik marra řgens, inna: “Wenni i ɣa iḥadan aryaz-a niɣ tamɣart nnes, ad t nɣen nican!”
GEN 26:12 Izarɛ Isḥaq di temmurt nni uca iksi aseggʷas nni mya n imuren n zzyada, [minzi] ibark i-t SIDI.
GEN 26:13 Temmarni ccenɛet n weryaz [nni] uca netta iqqim imeqqar, ařami tedweř ccenɛet nnes d tameqqrant aṭṭas.
GEN 26:14 Tuɣa ɣares uǧi u ɣares [ɛawed] ifunasen d tfunasin d waṭṭas n isemɣan, ařami zzayes usmen Ifilisṭiniyyen.
GEN 26:15 Marra anuten nni ɣzan imsexxaren deg wussan n Ibrahim babas, netyen ten Ifilisṭiniyyen uca ccuren ten s ucař.
GEN 26:16 [Xenni] inna Abimalik i Isḥaq: “Beɛɛed xaneɣ, minzi tdewřed tjehded xaneɣ s waṭṭas.”
GEN 26:17 Isḥaq iruḥ ssenni, iwta iqiḍan nnes di teɣzurt n Jirar uca izdeɣ dinni.
GEN 26:18 Uca idweř Isḥaq iɣza anuten n waman inni tuɣa ɣzin deg wussan n Ibrahim babas, inni netyen Ifilisṭiniyyen awarni i řmewt n Ibrahim. Isemma ten s ismawen inni d asen iřaɣa babas.
GEN 26:19 Uca imsexxaren n Isḥaq ɣzan di teɣzurt nni uca ufin din řɛunṣar n waman ddaren.
GEN 26:20 [Xenni] qacḥen imeksawen n Jirar ak-d imeksawen n Isḥaq, nnan: “Aman nneɣ!” [S uyenni] řaɣan isem n řɛunṣar nni ‘Ɛisiq’, minzi tuɣa ttqacaḥen xas.
GEN 26:21 [Xenni] ɣzan ijj n řɛunṣar nneɣni uca mmennɣen xas ɛawed. [S uyenni] d as igga isem n ‘Sitna’.
GEN 26:22 Uca ibeɛɛed ssenni, iɣza ijj n řɛunṣar nneɣni, war xas qicḥen ca uca ggin as isem nnes ‘Raḥubut’, inna: “Řexxu SIDI iwca aneɣ ttasiɛ uca ad ɣarneɣ tiři řɣiǧet di temmurt.”
GEN 26:23 Uca igeɛɛed ssenni ɣar Bi’r-Sebɛa.
GEN 26:24 Iban as-dd SIDI di ǧiret nni, inna as: “Necc d AREBBI n Ibrahim babac! War tteggʷed ca, aqa Necc akidek u Necc ad cek barkeɣ, ad kettareɣ zzariɛet nnec di ṭṭweɛ n umsexxar inu Ibrahim.”
GEN 26:25 [Xenni] ibna din ijj n uɛalṭar [min xef igga taɣarṣt], uca iřaɣa Isem n SIDI. Iwta din aqiḍun nnes uca ɣzin din imsexxaren n Isḥaq ijj n wanu.
GEN 26:26 Abimalik yusa-dd ɣares zi Jirar, ak-d Aḥuzzat, ameddukkeř nnes, d Fikul, akumandar n řɛeskar nnes.
GEN 26:27 Inna asen Isḥaq: “Maɣar ɣari dd-tusim, waxxa kenniw tcarrhem ayi uca tessuffɣem ayi xawem?”
GEN 26:28 Nitni nnan: “Aqa neẓra belli SIDI akidek. S uya nenna, ad din tiři řexxu ict n tjaǧit jaraneɣ, jaraneɣ d cek, uca ejj aneɣ ad kik negg ijj n řɛahd,
GEN 26:29 ḥima cek war d aneɣ tᵉttegged řɣar, am mammec uřa d neccin war cek nḥidi ca uca aqa nemṣurref akidek mliḥ uca nessekk i cek di řaman. Aqa cek řexxu d amimun n SIDI!”
GEN 26:30 [Xenni] igga asen ict n zzardet uca ccin, swin.
GEN 26:31 Kkaren zic uca jjuǧen ijjen i wenneɣni. Xas uca issqebbeḍ i-ten Isḥaq uca ruḥen nitni zi ɣares di řehna.
GEN 26:32 Deg wass nni d ijj usin-dd imsexxaren n Isḥaq, xebbaren t x wanu i iɣzan uca nnan as: “D aman i nufa.”
GEN 26:33 Isemma [anu-ya] Sebɛa. X uya i iǧa yisem n tendint nni Bi’r-Sebɛa, ař ass-a.
GEN 26:34 Umi tuɣa ɣar Ɛisu arebɛin n iseggʷusa, yiwi Yudit, yeǧis n Biri, Aḥitti, d tamɣart, uřa d Basmat, yeǧis n Ilun, Aḥitti.
GEN 26:35 Tuɣa atent d tarzugi n wuř i Isḥaq d Rifqa.
GEN 27:1 Řami idweř Isḥaq d awessar u tiṭṭawin nnes ɛemcent ařami ɛřaḥař war ittwiři, iřaɣa Ɛisu, mmis amenzu, inna as: “Mmi!” Uca netta inna as: “Aqa ayi da!”
GEN 27:2 Uca inna: “Aqa necc wsareɣ, war ssineɣ ass i di ɣa mmteɣ.
GEN 27:3 Řexxu, ksi řesnaḥ nnec d weqrab nnec n fřitcat d řqews nnec, teffɣed ɣar řexřa uca gmar ayi-dd taymart i macca.
GEN 27:4 Sewjed ayi-dd ict n macca icnan i d ayi ɣa iɛejben uca tewced ayi tt-i-dd, ad tt cceɣ, ḥima ad cek barkeɣ qbeř ma ad mmteɣ.”
GEN 27:5 Rifqa tuɣa tesřa umi issiweř Isḥaq ak-d mmis Ɛisu. Uca iruḥ Ɛisu ɣar řexřa ḥima ad iymar timeyra, maḥend ad tt-i-dd-yawi.
GEN 27:6 [Xenni] tessiweř Rifqa ak-d Yaɛqub mmis, tenna as: “Xzar, necc sřiɣ babac issawař ak-d Ɛisu umac, inna [as]:
GEN 27:7 ‘Awi ayi-dd ict n teymart uca sewjed ayi ict n macca lemliḥ, maḥend ad tt cceɣ, ḥima necc ad ac barkeɣ qibač i wudem n SIDI qbeř i ɣa mmteɣ.’
GEN 27:8 Řexxu, mmi, seř-dd ɣari min zi cek ɣa umureɣ.
GEN 27:9 Řuh ɣar tḥimart uca awi ayi-dd tnayen n iɣayḍen imeẓyanen zeg iɣayḍen. Necc ad zzaysen sswejdeɣ ict n macca icnan i babac, am mammec d as ittaɛjib
GEN 27:10 u ittxeṣṣa cek ad t tawyed i babac, ad yecc, ḥima ad cek ibarek qbeř řmewt nnes.”
GEN 27:11 [Xenni] inna Yaɛqub i Rifqa, yemmas: “Xzar, Ɛisu uma d aryaz bu-cɛar u necc d aryaz d ařeqqaɣ.
GEN 27:12 Balak ad ayi iḥada baba uca ad iřiɣ amecnaw aɣeccac di tiṭṭawin nnes. [Xenni] ad ksiɣ ict n nneɛřet xafi, war kessiɣ lbaraka.”
GEN 27:13 Yemmas tenna as: “Nneɛřet nnec ad tiři xafi, a mmi! Ṭaɛ i wawař inu waha, awyi ten-dd ɣari.”
GEN 27:14 [Xenni] netta iruḥ, iksi [ten] uca yiwyi [ten] i yemmas. Uca yemmas tegga ict n macca icnan am mammec d as ittaɛjib i babas.
GEN 27:15 Teksi Rifqa arruḍ ifeccḥen aṭṭas i tuɣa ɣares di taddart zeg warruḍ n Ɛisu, mmis amenzu, uca tarḍ [i-t] Yaɛqub, mmis amaẓuẓ.
GEN 27:16 Tegga as iřem n iɣayḍen imeẓyanen zeg iɣayḍen x ifassen nnes u x yiri nnes ařeqqaɣ.
GEN 27:17 Tewca macca-ya icnan ak-d weɣrum nni tenggʷa deg ifassen n mmis Yaɛqub.
GEN 27:18 Netta yusa-dd ɣar babas, inna: “[A] Baba!” Netta inna: “Aqa ayi da! Min teɛnid cek, [a] mmi?”
GEN 27:19 Inna Yaɛqub i babas: “Necc d Ɛisu, amenzu nnec. Ggiɣ min d ayi tennid. Kkar řexxu, qqim, ecc zi tmeyra inu, ḥima ad ayi ibarek řeɛmar nnec.”
GEN 27:20 [Xenni] inna Isḥaq i mmis: “Mammec teggid tufid tt deɣya, [a] mmi?” Inna: “Maɣar SIDI, AREBBI nnec, igga [i-tt] deg webrid inu.”
GEN 27:21 Isḥaq inna i Yaɛqub: “Qarreb-dd řexxu, ḥima ad cek ḥadiɣ, [a] mmi, ma cek d mmi Ɛisu niɣ lla.”
GEN 27:22 [Řami] dd-iqarreb Yaɛqub ɣar babas Isḥaq, iḥada t uca inna: “Tmijja d tmijja n Yaɛqub, [maca] ifassen d ifassen n Ɛisu.”
GEN 27:23 Netta war t iɛqiř, minzi ifassen nnes tuɣa ceɛɛaren amecnaw ifassen n Ɛisu uca ibark i-t.
GEN 27:24 Inna: “Ma d cek d mmi Ɛisu?” Netta inna: “D necc!”
GEN 27:25 [Xenni] inna: “Sqarreb ayi tt-i-dd zzati, ḥima ad cceɣ zi tmeyra n mmi, ḥima necc ad cek barkeɣ.” Issars i-tt-i-dd zzates uca icca. Yiwi as-dd ɛawed binu uca iswa.
GEN 27:26 Inna as babas Isḥaq: “Qarreb-dd ɣari řexxu, sudem ayi, [a] mmi!”
GEN 27:27 Uca iqarreb-dd ɣares, issudem i-t. Icemm Isḥaq arriḥet n warruḍ nnes uca ibark i-t, inna: “Xzar, řefwaḥet n mmi am řefwaḥet n yeyyar i ibarek SIDI.
GEN 27:28 Ad ac iwc AREBBI zi nnda n ujenna u zi řeydam n temmurt uřa d waṭṭas n imendi d binu n jdid.
GEN 27:29 Ad ac xedmen řegnus uca ccuɛub ad ac bendqen. Ḥkem x aytmac u ejj iḥenjiren n yemmac ad ac bendqen! Inni cek i ɣa ineɛřen, ad ttwaneɛřen, u inni cek ɣa ibarken, ad ttwabarken.”
GEN 27:30 Awarni řami ikemmeř Isḥaq lbaraka i Yaɛqub uca am dd-iffeɣ Yaɛqub [ɛad] x babas Isḥaq, iɛqeb-dd Ɛisu, umas, zi teymart nnes.
GEN 27:31 Issewjed xenni ict n macca icnan uca iksi tt ɣar babas, inna as: “Ttzawgeɣ, baba, kkar tecced zi teymart n mmic, [ḥima] cek ad ayi tbarked.”
GEN 27:32 Inna as Isḥaq, babas: “Min teɛnid cek?” Netta inna: “Necc d mmic, amenzu nnec, Ɛisu.”
GEN 27:33 Uca innexřeɛ Isḥaq, inna: “Min iɛna wanita i dd-yusin da, iṭṭef taymart uca yiwi ayi tt-i-dd? Cciɣ zi marra [man aya] qbeř dd-tusid uca necc barkeɣ t u ad ittwabarek ɛawed.”
GEN 27:34 Umi isřa Ɛisu awařen n babas, isɣuy s yijj n řeɛyad ijhed yarzeg, inna i babas: “Barek ayi uřa d necc, [a] baba!”
GEN 27:35 Inna: “Yusa-dd umac s teḥraymect, iksi lbaraka nnec.”
GEN 27:36 [Xenni] inna: “Ma war iǧi isem nnes s řḥeqq Yaɛqub? Aqa icmet ayi tnayen n twařawin. Iksi [řḥeqq n] umenzu inu uca aqa řexxu iksi [ɛawed] lbaraka inu.” [Xenni] inna: “Ma war ɣarek teqqim ca n lbaraka i necc?”
GEN 27:37 [Xenni] yarra-dd Isḥaq, inna i Ɛisu: “Xzar, necc ggiɣ t d řḥakem xak uca wciɣ as aytmas d imsexxaren, uřa s imendi d binu n jdid ɛewwřeɣ t. Min din ɛad, ad ac wceɣ řexxu, [a] mmi?”
GEN 27:38 Inna Ɛisu i babas: “Ma ɣarek mɣir lbaraka-ya waha, [a] baba? Barek ayi ɛawed, uřa d necc, [a] baba!” Uca issgeɛɛed Ɛisu tmijja nnes, isɣuy.
GEN 27:39 [Xenni] yarra-dd Isḥaq x babas, inna as: “Xzar, ad tiři tzeddiɣt nnec iggʷejjen x řeydam n temmurt u x nnda n ujenna sennej.
GEN 27:40 S ssif nnec i ɣa teqqimed teddared u ad txedmed i umac. Maca xmi ɣa teqqimed ad tenhezzed, ad imsar ad tawḍed ad tekksed zayřu nnes x yiri nnec.”
GEN 27:41 Uca icarh Ɛisu Yaɛqub di ssibbet n lbaraka i zi t ibarek babas, uca inna Ɛisu deg wuř nnes: “Ad awḍen wussan n uɛezzi n baba, xenni ad nɣeɣ uma Yaɛqub.”
GEN 27:42 [Umi] nnan i Rifqa awařen n Ɛisu, mmis amenzu, tᵉssekk ijjen ad iřaɣa i Yaɛqub, mmis amaẓuẓ, tenna as: “Xzar, Ɛisu umac yarezzu mammec zzayek i ɣa ixřef, netta ixs ad cek ineɣ.
GEN 27:43 Řexxu, [a] mmi, ṭaɛ i wawař inu. Kkar uca tarewřed ɣar Ḥaran ɣar uma Laban.
GEN 27:44 Zdeɣ akides ca n wussan ař ɣa yarsa wesɛar n umac.
GEN 27:45 Xmi ɣa ixsi uxeyyeq n umac uca ad ittu min d as teggid, necc ad ssekkeɣ [ijjen], maḥend ad cek dd-yawi ssenni. Mayemmi i zzaywem ɣa ttwaḥarrmeɣ s tnayen idwem deg ijj n wass?”
GEN 27:46 Tenna Rifqa i Isḥaq: “Carrheɣ tudart inu di ssibbet n yessis n Ḥit. Mařa Yaɛqub yiwi tamɣart zi tebřiɣin n Ḥit, am tnayen-a, zi tḥenjirin n temmurt-a, man lqima i ɣa yiřin ɣar tudart inu?”
GEN 28:1 Iřaɣa Isḥaq i Yaɛqub, ibarek i-t uca issekk i-t, inna as: “War ttawi tamɣart zi yessis n Kenɛan.
GEN 28:2 Kkar, ruḥ ɣar Fadan-Aram, ɣar taddart n Bituwil, babas n yemmac, uca awi-dd ssenni tamɣart i cek zeg yessis n Laban, umas n yemmac.
GEN 28:3 Arebbi, Amzemmar x kuřci, ad cek ibarek u ad ac iwc řɣiǧet uca ad cek ikettar ař ɣa tdewřed d ijj n wegraw n řegnus.
GEN 28:4 Iři Netta ad ac iwc lbaraka n Ibrahim, i cek u i zzariɛet nnec akidek, ḥima ad twarted tammurt nni di tzeddɣed am ubarrani, tenni iwca AREBBI i Ibrahim.”
GEN 28:5 [Xenni] issekk Isḥaq Yaɛqub. Uca netta iruḥ ɣar Faddan-Aram, ɣar Laban, mmis n Bituwil, Aramiyu, umas n Rifqa, yemmas n Yaɛqub d Ɛisu.
GEN 28:6 [Umi] iẓra Ɛisu belli Isḥaq ibarek Yaɛqub uca issekk i-t-i-dd ɣar Faddan-Aram ḥima ad yawi i yixef nnes tamɣart ssenni, u řami t ibarek, yumur i-t, inna as: “War kessi tamɣart zeg yessis n Kenɛan!”,
GEN 28:7 uca [iẓra ɛawed] belli Yaɛqub iṭaɛ babas d yemmas, iruḥ ɣar Faddan-Aram,
GEN 28:8 [xenni] itwařa Ɛisu belli yessis n Kenɛan d tiɛeffanin di tiṭṭawin n babas Isḥaq.
GEN 28:9 [Xenni] iruḥ Ɛisu ɣar Ismaɛil uca yiwi Maḥalat d tamɣart i yixef nnes, yarni tt-i-dd ɣar temɣarin nneɣni. Nettat tuɣa-tt d yeǧis n Ismaɛil, mmis n Ibrahim, učmas n Nabayut.
GEN 28:10 Uca iffeɣ Yaɛqub zi Bi’r-Sebɛa, iruḥ ɣar Ḥaran.
GEN 28:11 Yiweḍ ɣar ijj n wemcan mani yensa, minzi tuɣa tafuct teɣri. Iksi zeg yeẓra n wemcan nni, issars i-ten sadu uzeǧif nnes uca iwḍa iṭṭeṣ deg wemcan nni.
GEN 28:12 Yurja, aqa ijj n ddruj ibedd x temmurt uca ittḥada ixef n ddruj ajenna, u xzar, lmalakat n AREBBI ttařyent hekkwant zzayes.
GEN 28:13 U xzar, SIDI ibedd xas, inna: “Necc d SIDI, AREBBI n babac Ibrahim, d AREBBI n Isḥaq. Tammurt i xef tᵉṭṭṣed ad ac tt wceɣ i cek u i zzariɛet nnec.
GEN 28:14 Ad tiři zzariɛet nnec am ucař n temmurt uca ad tiriwed ɣar řɣarb d ccarq, ɣar ccamal d ljanub. Dayek u di zzariɛet nnec ad ttwabarkent marra řaǧat n temmurt.
GEN 28:15 Aqa ayi Necc akidek u Necc ad cek ḥḍiɣ qaɛ mani i ɣa traḥed, ad cek arreɣ ɣar temmurt-a, minzi Necc war cek ttejjiɣ ař ɣa kemmřeɣ min d ac nniɣ.”
GEN 28:16 Řami dd-ifaq Yaɛqub zeg yiḍeṣ nnes, inna: “S tidett, SIDI aqa-t deg wemcan-a u necc war ssineɣ!”
GEN 28:17 Tuɣa iggʷed aṭṭas, inna: “Mecḥař issaggʷad wemcan-a! Aqa ta mɣir d Taddart n AREBBI u tanita d tawwart n ujenna!”
GEN 28:18 Ikkar Yaɛqub uca iksi aẓru nni tuɣa issars sadu uzeǧif nnes, igga i-t am yijj n weẓru n řidaret uca ifarreɣ zzect x uzeǧif n weẓru.
GEN 28:19 Igga amcan nni Bayt-Il, maca zeg umezwaru tuɣa isem n wemcan nni Luz.
GEN 28:20 Uca iwaɛd Yaɛqub, inna: “Mařa AREBBI aqa-t akidi uca ad ayi iḥḍa deg webrid i ɣa uyureɣ, ad ayi iwc aɣrum ḥima ad cceɣ, d warruḍ ḥima ad arḍeɣ
GEN 28:21 u mařa dewřeɣ ɣar taddart n baba di řaman, xenni SIDI ad yiři d AREBBI i necc.
GEN 28:22 Uc aẓru-ya i ggiɣ d aẓru n řidaret, ad yiři d Taddart n AREBBI u zi marra min d ayi ɣa tewced, ad ac wceɣ řeɛcur!”
GEN 29:1 Iksi Yaɛqub deg iḍaren nnes, iruḥ ɣar temmurt n ayt n ccarq.
GEN 29:2 Ixzar uca iẓra ijj n wanu deg iyyar u tuɣa din třata n tḥimriwin n wuǧi jnint zzates, minzi zeg wanu nni warrden nitni tiḥimriwin. Tuɣa din ijj n weẓru x uqemmum n wanu.
GEN 29:3 Ssmunen din marra tiḥimriwin. [Xas uca] kksen aẓru x uqemmum n wanu uca warden uǧi. [Awarni as] arrin aẓru [ɛawed] x uqemmum n wanu.
GEN 29:4 Inna asen Yaɛqub: “Aytma inu, manis kenniw?” Nitni arrin-dd: “Zi Ḥaran i neǧa.”
GEN 29:5 Netta inna asen: “Ma tessnem Laban, mmis n Naḥur?” Nitni arrin-dd: “Wah, nessen i-t.”
GEN 29:6 Inna asen netta: “Mammec iǧa?” Arrin-dd: “Aqa-t mliḥ, aqa da yeǧis Raḥil tusa-dd ak-d wuǧi.”
GEN 29:7 Inna as: “Aqa da aziř ɛad imɣar, war yeǧi bu řweqt ḥima ad nendeh řebhayem. Wardem uǧi uca ruḥem, maḥend ad ten tarewsem.”
GEN 29:8 Nitni arrin-dd: “War nzemmar ad [t] negg ař dd ɣa munent marra tiḥimriwin. [Xenni] ad sseḥřuǧden aẓru x uqemmum n wanu, ḥima ad nwared uǧi.”
GEN 29:9 Řami tuɣa [ɛad] issawař akidsen, tusa-dd Raḥil s wuǧi n babas, minzi nettat tuɣa-tt d tameksawt.
GEN 29:10 Řami iẓra Yaɛqub Raḥil, yeǧis n Laban, umas n yemmas, ak-d wuǧi n Laban, umas n yemmas, ixecc-dd Yaɛqub uca isseḥřuǧed aẓru x uqemmum n wanu, iward uǧi n Laban, umas n yemmas.
GEN 29:11 Issudem Yaɛqub Raḥil, issgeɛɛed tmijja nnes uca isɣuy.
GEN 29:12 Inna Yaɛqub i Raḥil aqa netta zi řaǧ n babas i iǧa, uřa d mmis n Rifqa. Uca nettat tuzzeř, txebbar babas.
GEN 29:13 Umi isřa Laban řexbar x Yaɛqub, mmis n učmas, yuzzeř ad t iřqa uca idarreɛ as, issudem i-t, indeh i-t ɣar taddart nnes. Uca netta iɛawed marra timesřayin-a i Laban.
GEN 29:14 Inna as Laban: “D tidett cek d iɣes inu d aysum inu i teǧid.” Uca iqqim ɣares řqedd n ijj n uyur ikmeř.
GEN 29:15 [Řexdenni] inna Laban i Yaɛqub: “Umi cek d uma i teǧid, ma ad ɣari txedmed baṭeř? Ini ayi min [i ɣa tiři] řmunet nnec?”
GEN 29:16 Laban ɣares tnayen n yessis. Isem n tmenzut d Liya u isem n tmaẓuẓt, Raḥil.
GEN 29:17 Tiṭṭawin n Liya tuɣa kecɛent, [maca] Raḥil tuɣa dayes aẓři n waddud u n řxezrat.
GEN 29:18 Yaɛqub ixs Raḥil. Inna: “Necc ad ɣarek xedmeɣ sebɛa n iseggʷusa x Raḥil yeǧis tmaẓuẓt.”
GEN 29:19 Laban yarra-dd: “Xar ad ac tt wceɣ i cek niɣ ad tt wceɣ i weryaz nneɣni. Qqim akidi.”
GEN 29:20 [Ammu] i ixdem Yaɛqub x Raḥil sebɛa n iseggʷusa maca ḍharen as-dd [iseggʷusa nni] amecnaw ca n wussan, minzi tuɣa ittexs i-tt.
GEN 29:21 Inna Yaɛqub i Laban: “Ewc ayi [řexxu] tamɣart inu, minzi aqa kemmřen wussan [n řmijař] inu, [ařami] xas i ɣa yadfeɣ.”
GEN 29:22 [Xenni] issmun Laban marra iryazen n wemcan nni, igga urar.
GEN 29:23 Ɣar tmeddit iksi yeǧis Liya uca issiweḍ i-tt ɣares uca yudef xas Yaɛqub.
GEN 29:24 Iwca Laban tayya nnes Zilpa i yeǧis Liya d tayya.
GEN 29:25 Tiwecca nnes iẓra [Yaɛqub] belli d Liya. Xenni inna i Laban: “Min d ayi teggid? Ma war d ac xdimeɣ x Raḥil? Maɣar d ayi tcemted?”
GEN 29:26 Laban inna: “War ittiři uya di temmurt nneɣ ad nessizzar tamaẓuẓt x tmenzut.
GEN 29:27 Kemmeř ssimana-ya [n wurar] n ta, xenni ad ac newc [ɛawed] tin x řxedmet i ɣa tegged ssa tsawent akidi ɛad sebɛa n iseggʷusa nneɣni.”
GEN 29:28 Igga Yaɛqub [amenni], ikemmeř ssimana-ya [n wurar]. [Xenni] iwca as yeǧis Raḥil d tamɣart
GEN 29:29 uca iwca Laban tayya nnes Bilha i yeǧis Raḥil maḥend ad tiři d tayya nnes.
GEN 29:30 Yudef [Yaɛqub] ɛawed x Raḥil uca ixs Raḥil ɛad ktar x Liya. Uca isexxar as ɛawed sebɛa n iseggʷusa nneɣni.
GEN 29:31 [Umi] iẓra SIDI belli Liya tuɣa tᵉttwasseḥqar, yarzem řemřawet nnes, [maca] Raḥil tuɣa war dd-tᵉttiruw ca.
GEN 29:32 Teksi Liya s ddeyset uca turuw-dd aḥenjir, igga as Rubin, minzi tenna: “Aqa SIDI ixzar ɣar řemḥayem inu. Řexxu ad ayi ixs weryaz inu.”
GEN 29:33 Teksi ɛawed s ddeyset, turuw-dd aḥenjir, tenna: “Umi isřa SIDI belli necc ttwasseḥqareɣ, iwca ayi ɛawed wa.” Uca tegga as Cimɛun.
GEN 29:34 Teksi ɛawed s ddeyset, turuw-dd aḥenjir, tenna: “Řexxu twařa-ya ad imun weryaz inu akidi, minzi urweɣ as-dd třata n iḥenjiren.” X uya netta igga as Lawi.
GEN 29:35 Teksi twařa nneɣni s ddeyset, turuw-dd aḥenjir uca tenna: “Twařa-ya ad qadiɣ SIDI.” X uya tegga as Yahuda. [Awarni man aya] tessbedd tarwa.
GEN 30:1 [Umi] teẓra Raḥil belli war dd-tiruw i Yaɛqub, tusem zeg učmas, tenna i Yaɛqub: “Ewc ayi tarwa! Mařa war teqbiřed, [xenni] ad mmteɣ.”
GEN 30:2 Ixeyyeq Yaɛqub x Raḥil, inna: “Ma aqa ayi necc deg wemcan n AREBBI, wenni xam iṭṭfen řɣiǧet n uɛeddis nnem?”
GEN 30:3 Tenna: “Aqa da tayya inu Bilha. Adef xas, ḥima ad dd-taruw x ifadden inu maḥend uřa d necc ad ɣari tiři tarrawt zzayes.”
GEN 30:4 Tewca as Bilha, tayya nnes, d tamɣart uca yudef xas Yaɛqub.
GEN 30:5 Teksi Bilha s ddeyset uca turuw-dd aḥenjir i Yaɛqub.
GEN 30:6 Tenna Raḥil: “Iwca ayi AREBBI tasɣart uca isřa ɛawed ɣari. Iwca ayi mmi.” X uya tegga as Dan.
GEN 30:7 Teksi Bilha, tayya n Raḥil, twařa nneɣni s ddeyset uca turuw-dd i Yaɛqub aḥenjir wiss tnayen.
GEN 30:8 Tenna Raḥil: “S imenɣan n AREBBI menɣeɣ ak-d učma uca ɣeřbeɣ.” Tegga as Naftali.
GEN 30:9 [Umi] teẓra Liya tessbedd tarwa, teksi Zilpa, tayya nnes, tewca i-tt i Yaɛqub d tamɣart,
GEN 30:10 uca Zilpa, tayya n Liya, turuw-dd aḥenjir i Yaɛqub.
GEN 30:11 Tenna Liya: “Mana řxir-a!” uca tegga as Jad.
GEN 30:12 Uca turuw-dd Zilpa, tayya n Liya, aḥenjir wiss tnayen i Yaɛqub.
GEN 30:13 Uca tenna Liya: “A sseɛd inu!”, minzi tibřiɣin ad ayi ḥesbent d sseɛd!” Uca tegga as Acir.
GEN 30:14 Deg wussan n tmeyra n irden iffeɣ Rubin uca yufa ‘titeffaḥin n tayri’ deg iyyar uca netta yiwy i-tent i Liya, yemmas. [Xenni] tenna Raḥil i Liya: “Ttzawgeɣ cem ad ayi tewced zi ‘tteffaḥin n tayri’ n mmim.”
GEN 30:15 [Maca Liya] tenna as: “Ma war iǧi drus ařami tiwyed aryaz inu, umi texsed ɛawed ad dd-tawyed ‘titeffaḥin n tayri’ n mmi?” Tenna Raḥil: “S uya ad iṭṭeṣ akidem ǧiřet-a x ‘tteffaḥin n tayri’ n mmim.”
GEN 30:16 [Umi] dd-iɛqeb Yaɛqub zeg iyyar s tmeddit, teffeɣ-dd Liya ɣares tenna as: “Ad xafi tadfed, minzi nican criɣ cek s ‘tteffaḥin n tayri’ n mmi.” Uca [ammu i] iṭṭeṣ akides ǧiret nni.
GEN 30:17 Isřa AREBBI i Liya uca teksi s ddeyset uca turuw-dd aḥenjir wiss xemsa i Yaɛqub.
GEN 30:18 Tenna Liya: “AREBBI iwca ayi řmunet inu x umi wciɣ tayya inu i weryaz inu!” Uca tegga as Issakar.
GEN 30:19 Teksi Liya ɛawed s ddeyset uca turuw-dd aḥenjir wiss setta i Yaɛqub.
GEN 30:20 Uca tenna Liya: “AREBBI iwca ayi ict n lbaraka tecna. Řexxu ad kidi izdeɣ weryaz inu, minzi urweɣ as-dd setta n iḥenjiren.” Uca tegga as Zabulun.
GEN 30:21 Awarni as turuw-dd taḥenjirt. Tegga as Dina.
GEN 30:22 [Xenni] idar AREBBI Raḥil uca isřa as AREBBI uca yarzem řemřawřet nnes.
GEN 30:23 Teksi s ddeyset uca turuw-dd aḥenjir, tenna: “Ikkes AREBBI řḥegra inu!”
GEN 30:24 Uca tegga as Yusuf, tenna: “Ad ayi yarni SIDI aḥenjir nneɣni.”
GEN 30:25 Řami dd-turuw Raḥil Yusuf, inna Yaɛqub i Laban: “Sekk ayi uca ad raḥeɣ ɣar dcar inu d temmurt inu.
GEN 30:26 Ewc ayi timɣarin inu d iḥenjiren inu min zi ɣarek xedmeɣ. [Xenni] ad ffɣeɣ. Aqa cek tessned řxedmet i zi tuɣa d ac ttsexxareɣ.”
GEN 30:27 Inna as Laban: “Mři ufiɣ řexxu arḍa di tiṭṭawin nnec. Aqa ẓriɣ s ijj n řeɛjeb belli SIDI ibarek ayi di ṭṭweɛ nnec.”
GEN 30:28 [Yarni] inna: “Ini ayi [zeɛma] man řmunet [i texsed], uca ad ac tt wceɣ.”
GEN 30:29 [Xenni] inna as: “Cek tessned mammec d ac xedmeɣ d mammec uyureɣ ak-d řebhayem nnec zeg wami kic ǧiɣ.
GEN 30:30 Minzi drust i tuɣa ɣarek [řexdenni] qbeř i dd-usiɣ, aqa idweř deg waṭṭas, uca ibarek i cek SIDI deg iṣuraf inu. [Xenni] řexxu, meřmi zemmareɣ ad xedmeɣ i taddart [inu]?”
GEN 30:31 Inna as: “Min d ac i ɣa wceɣ?” Yarra-dd Yaɛqub: “War d ayi ttic walu, maca samḥ ayi aya [waha], [xenni] ad dd-dewřeɣ ad arewseɣ uǧi nnec ɛawed uca ad ten ḥḍiɣ.
GEN 30:32 Ass-a ad ɛduɣ x marra [taḥimart n] wuǧi nnec. Egg cek x uɣezdis zzayes marra uǧi ibeqqḍen d iqarqacen, marra uǧi abarcan jar iḥuřiyyen d min iǧan d aqarqac niɣ s ibeqqiḍen jar iɣayḍen. Man aya ad yiři d řmunet inu.
GEN 30:33 Xmi dd ɣa tased deg ijj n wass n yimař maḥens ad tẓared řmunet inu, ad tban tsegda inu zzat i wudem nnec [ammu nican]: min war iǧin ibeqqeḍ niɣ min war iǧin iqqarqec jar iɣayḍen d min war iǧin d abarcan jar iḥuřiyyen, aqa [ad ittwaḥseb] ittwacar jar min iǧan inu.”
GEN 30:34 [Xenni] inna Laban: “Xzar, aqa ad yiři am mammec [i d ayi] tennid!”
GEN 30:35 Deg wass nni ifarq iwetman n iɣayḍen icarḍen d iqarqacen uřa d marra tiɣayḍtin ibeqqḍen d iqarqacen, d marra inni di teǧa temřeř, uřa d marra min iǧan d abarcan jar iḥuřiyyen, uca issars i-ten deg ufus n iḥenjiren nnes.
GEN 30:36 [Xenni] igga třata n wussan n webrid jar ixef nnes d Yaɛqub. Uca yarwes Yaɛqub uǧi iqqimen n Laban.
GEN 30:37 [Xenni] iksi Yaɛqub tiseḍwin n ṣṣefṣaf u zi tcejjart n ǧuz u zi tcejjart n dulb. Netta iqeccar i-tent d iceṭṭiḍen d icemřařen umi iɛarra x ucemřař n tseḍwin.
GEN 30:38 Issars tiseḍwin-a iqeccaren qibač i wuǧi di taryiwin d řeqwareb mani dd-usin wuǧi maḥend ad swent uca dewřent ttweḥḥament xmi dd-tasent ad wardent.
GEN 30:39 [Xmi] i ɣa iweḥḥem wuǧi ɣar tseḍwin, urwent-i-dd tɣarṭin min icarḍen d min ibeqqḍen d min iqarqacen.
GEN 30:40 [Xenni] tuɣa ibeṭṭa Yaɛqub iḥuřiyyen uca yarra uǧi s uzeǧif nsen ɣar min icarḍen d min iǧan d abarcan jar wuǧi n Laban. Uca igga tiḥimriwin nnes ɣar uɣezdis, war tent iggi ak-d wuǧi n Laban.
GEN 30:41 Kuř amuř xmi ttweḥḥament tinni ijehden zeg wuǧi, ittegg Yaɛqub tiseḍwin qibač i wuǧi di taryiwin, ḥima ad weḥḥment ɣar tseḍwin.
GEN 30:42 [Maca] war tent issars ca ak-d tenni iḍeɛfen jar wuǧi. Ammu tuɣa tinni iḍeɛfen i Laban u tinni ijehden i Yaɛqub.
GEN 30:43 Uca imɣar [wagřa] n weryaz-a břa qeṭṭu. Tuɣa ɣares aṭṭas n wuǧi d tiyya d isemɣan d iřeɣman d yeɣyař.
GEN 31:1 Uca isřa [Yaɛqub] awařen n iḥenjiren n Laban, nnan: “Yaɛqub iksi marra min tuɣa n babatneɣ u s min tuɣa n babatneɣ aqa ikseb marra aɛuǧi-ya.”
GEN 31:2 Ixzar Yaɛqub ɣar uɣembub n Laban. Xzar, war kides iǧi am iḍennaḍ d fariḍennaḍ.
GEN 31:3 Inna SIDI i Yaɛqub: “Dweř ɣar temmurt n řejdud nnec u ɣar řaǧ nnec. Aqa Necc ad iřiɣ akidek.”
GEN 31:4 Isekk Yaɛqub uca iřaɣa-dd x Raḥil d Liya ɣar yeyyar, ɣar wuǧi nnes.
GEN 31:5 Inna asent: “Ttwařiɣ belli aɣembub n babatkent war kidi iǧi am iḍennaḍ d fariḍennaḍ. [Maca] AREBBI n řejdud inu aqa-t akidi.
GEN 31:6 Kennint tessnent belli aqa xedmeɣ i babatkent s marra min ɣari d jjehd.
GEN 31:7 [Maca] babatkent iɣecc ayi, ibeddeř řmunet inu ɛecra n twařawin, [maca] AREBBI war d as isemmeḥ ḥima ad ayi igg řɣar.
GEN 31:8 Mařa netta inna: ‘Ibeqqiḍen ad iřin d řmunet nnec!’, řexdenni marra uǧi urwent-i-dd [uǧi] s ibeqqiḍen, mařa inna: ‘Inni s icariḍen ad iřin d řmunet nnec!’, řexdenni marra uǧi urwent-i-dd [uǧi] s icariḍen.
GEN 31:9 [Ammu] ikkes AREBBI řebhayem n babatkent uca iwca ayi [tent] i necc.
GEN 31:10 Imsar ɣar řweqt umi weḥḥment uǧi, ssgeɛɛdeɣ tamuɣři inu uca ẓriɣ di tarjit, aqa da iɣayḍen nni ineggzen x wuǧi, tuɣa aten s icariḍen d ibeqqiḍen d iqarqacen.
GEN 31:11 Inna ayi lmalak n AREBBI di tarjit ‘Yaɛqub!’ Necc nniɣ ‘Aqa ayi da!’
GEN 31:12 Inna: ‘Nḍar tiṭṭawin nnec, xzar, marra iɣayḍen, inni ineggzen x wuǧi, aqa aten s icariḍen d ibeqqiḍen d iqarqacen, minzi Necc ẓriɣ marra min d ac ittegg Laban.
GEN 31:13 Necc d Arebbi n Bayt-Il, mani tdehned aẓru n řidaret u mani d ayi tewcid awař. Kkar řexxu, ffeɣ zi temmurt-a, ɛqeb ɣar temmurt mani txeřqed.’”
GEN 31:14 [Xenni] arrint-i-dd Raḥil d Liya, nnant as: “Ma din ɛad ca n tesɣart niɣ ict n řwart i neccin di taddart n babatneɣ?
GEN 31:15 Ma war nettwiḥsib am tbarraniyyin? Aqa netta izzenz aneɣ u netta aqa iqeṭṭa marra nnuqart nneɣ.
GEN 31:16 Minzi marra agřa nni ikkes AREBBI i babatneɣ, nneɣ i iǧa u n iḥenjiren nneɣ. Řexxu [ɛad], egg marra min d ac inna AREBBI.”
GEN 31:17 [Xenni] ikkar Yaɛqub uca issgeɛɛed iḥenjiren nnes d temɣarin nnes x iřeɣman.
GEN 31:18 Igga deg webrid marra řebhayem nnes d marra agřa nnes nni dd-ikseb, aqa řebhayem nni iṭṭef, inni dd-ikseb di Fadan-Aram, ḥima ad dd-iɛqeb ɣar Isḥaq, babas, di temmurt n Kenɛan.
GEN 31:19 Umi iruḥ Laban ɣar tiřsa n wuǧi nnes, tucar Raḥil řexyařat timeẓyanin n l’aṣnam n babas.
GEN 31:20 Yaɛqub ixdeɛ Laban, Aramiyu, řami war d as iɛřim aqa ad yarweř.
GEN 31:21 Yarweř s marra min ɣares. Ikkar, iẓwa iɣzar [n Lfuraṭ] uca yarra azeǧif nnes ɣar idurar n Jilɛad.
GEN 31:22 Deg wass wiss třata xebbaren Laban, aqa yarweř Yaɛqub.
GEN 31:23 [Xenni] yiwi aytmas akides, iruḥ awarni as ticři n sebɛa n wussan, ixecc xas deg idurar n Jilɛad.
GEN 31:24 Uca yusa-dd AREBBI ɣar Laban, Aramiyu, di tarjit di ǧiret, inna as: “Ɣarek ad tessiwřed s řxar niɣ s řɣar ak-d Yaɛqub.”
GEN 31:25 Ireḥḥeg xenni Laban x Yaɛqub. Yaɛqub tuɣa iwta aqiḍun nnes deg idurar. Laban ɛawed iwta iqiḍan nnes ak-d aytmas deg idurar n Jilɛad.
GEN 31:26 [Xenni] inna Laban i Yaɛqub: “Min teggid, teẓwid ayi uř uca tiwyid-dd yessi am tmeḥbas n garra?
GEN 31:27 Mayemmi tarewřed s tnuffra u tucared ayi u [mayemmi] war d ayi txebbared, ḥima ad cek ssqebbḍeɣ s řefraḥet, s řeɣnuj, s ubendir u s řgambri?
GEN 31:28 War d ayi tejjid ad ssudmeɣ iḥenjiren inu d tḥenjirin inu. Řexxu d tubbuheřya i teggid.
GEN 31:29 Ɣari tizemmar deg ifassen inu, ḥima ad cek ḍarreɣ, [maca] AREBBI n babatwem issiweř akidi ǧiret-a, inna: ‘Ɣarek ad tessiwřed s řxar niɣ s řɣar ak-d Yaɛqub.’
GEN 31:30 Uca řexxu tuyured, umi zeɛma tweḥḥced taddart n babac. [Maca] maɣar i d ayi tucared irebbiten inu?”
GEN 31:31 Yarra-dd Yaɛqub, inna i Laban: “Minzi tuɣa ggʷedeɣ, nniɣ [ak-d yixef inu] ad taɣ ad ayi tekksed yessic s uɣiř!
GEN 31:32 Ɣar wenni i ɣa tafed l’aṣnam nnec, ejj i-t war iddar [ɛad]! Qibač i wawmaten nneɣ ad tmeyyzed min iǧan nnec jar min iǧan ɣari uca awyi t akidek.” [Maɣar] Yaɛqub war issin belli Raḥil i ten yucaren.
GEN 31:33 Uca yudef Laban ɣar uqiḍun n Yaɛqub, ɣar uqiḍun n Liya, ɣar uqiḍun n tnayen n tiyya uca war yufi walu. [Řami] dd-iffeɣ zeg uqiḍun n Liya, yudef ɣar uqiḍun n Raḥil.
GEN 31:34 [Maca] teksi Raḥil řexyařat timeẓyanin n l’aṣnam, tegga i-tent deg iɣaynen n weřɣem uca teqqim xasen. Yarzu Laban deg uqiḍun am ikmeř, maca war yufi walu.
GEN 31:35 Tenna i babas: “War ittiři aya d řɣar di tiṭṭawin n sidi inu, minzi war zemmareɣ ad kkareɣ qibač nnec, maɣar aqa ayi s tnamit n temɣarin.” Uca yarzu, maca war yufi řexyařat timeẓyanin n l’aṣnam.
GEN 31:36 [Xenni] ixeyyeq Yaɛqub uca imcubbec ak-d Laban. Yaɛqub iṭṭef deg wawař, inna i Laban: “Mani iǧa uxeṭṭu inu? Man wen iǧan d ddenb inu, umi d ayi dd-teḍfared s zzɛaf?
GEN 31:37 Cek tbeqced marra řqecc inu. Min tufid zi marra řeḥwayej n taddart nnec? Egg i-t da zzat n yaytma d aytmac uca ejj i-ten ad ḥekmen jar aneɣ s tnayen.
GEN 31:38 Ɛicrin n iseggʷusa i kik kkiɣ. Tixeswin nnec d tɣayḍin nnec ɛemmarṣ ssutment niɣ ɛemmarṣ cciɣ icarriyen n wuǧi nnec.
GEN 31:39 War d ac iwyeɣ min ittwamezzqen, [maca] xeṭṣeɣ t simant inu. Min ittwacaren zzayi deg wass niɣ di ǧiret, aqa zeg ifassen inu tᵉttared t.
GEN 31:40 S uziř ittett ayi řeḥmu yuẓɣen [tiřmect] u s ǧiret ttejmideɣ [zi sqiɛ], [ařami] yarweř iḍeṣ zi ɣari.
GEN 31:41 Ammu i d ayi tuɣa di taddart nnec ɛicrin n iseggʷusa. Xedmeɣ ɣarek arbeɛṭac n iseggʷusa x tnayen n yessic d setta n iseggʷusa x wuǧi uca tbeddřed řmunet inu ɛecra n twařawin.
GEN 31:42 Mařa AREBBI n baba, AREBBI n Ibrahim d tiggʷudi n Isḥaq, iři war kidi iǧi, d ṣṣeḥ iři ad ayi tessqaded řexxu s ifassen xwan! Iẓra AREBBI tamara d tumar n ifassen inu uca ideqmar i cek ǧiřet n iḍennaḍ.”
GEN 31:43 Yarra-dd Laban uca inna i Yaɛqub: “Tiḥenjirin-a d yessi u iḥenjiren-a d iḥenjiren inu, u uǧi-ya d uǧi inu, u marra min tᵉttwařid aqa inu. Min zemmareɣ xenni ad ggeɣ řexxu s yessi niɣ s iḥenjiren nsent nni urwent?
GEN 31:44 Ɣawer ɛad řexxu, ad negg ijj n řɛahd, necc d cek, ad yiři Netta d cchadet jar ayi d cek!”
GEN 31:45 Uca iksi Yaɛqub aẓru, issgeɛɛed i-t am weẓru n řidaret.
GEN 31:46 Uca inna Yaɛqub i yaytmas: “Smunem iẓra!” Ksin iẓra uca ggin taɛurrict uca ccin din x tɛurrict nni.
GEN 31:47 Uca igga Laban [i uɛurric n iẓra nni] ‘Jigar-Sahaduta’, maca Yaɛqub igga as ‘Jilɛad’.
GEN 31:48 [Xenni] inna Laban: “Taɛurrict-a ad tiři d cchadet ass-a jar ayi d cek!” X uya tegga as Jilɛad
GEN 31:49 d Miṣfa, minzi netta inna: “Iři SIDI ad iḥḍa jar ayi d cek, xmi ɣa niři am nᵉnuffar ijjen zeg wenneɣni.
GEN 31:50 Mařa tesseḥqared yessi niɣ ad tmeřced timɣarin nneɣni x yessi, [am] war din iǧi ḥed akidneɣ [ḥima ad yiři d acehhad], aqa AREBBI ad yiři d acehhad jar ayi d cek!”
GEN 31:51 Inna ɛawed Laban i Yaɛqub: “Xzar, taɛurrict-a [n yeẓra], xzar, aẓru n řidaret nni ssbeddeɣ jar ayi d cek.
GEN 31:52 Taɛurrict-a [n yeẓra] d weẓru-ya n řidaret ad cehden belli necc war ɣarek dd-ẓekkʷiɣ ca x tɛurrict-a uca uřa d cek war ɣari dd-tẓekkʷwid ca i řɣar x tɛurrict-a uřa x weẓru-ya n řidaret!
GEN 31:53 AREBBI n Ibrahim d AREBBI n Naḥur, aqa AREBBI n babatsen, ejj i-t ad iḥkem jar aneɣ!” [Maca] Yaɛqub ijjuǧ s ‘Tiggʷudi n Isḥaq babas’.
GEN 31:54 [Xenni] iɣarṣ Yaɛqub i yict n tɣarṣt deg idurar uca iřaɣa i yaytmas ad ccen aɣrum. Uca ccin aɣrum, senssen ǧiret nni deg idurar.
GEN 32:1 Ikkar Laban ɣar tuffut n ṣṣbeḥ, issudem iḥenjiren nnes d yessis, ibark i-ten. [Xenni] iruḥ Laban, iɛqeb ɣar wemcan nnes.
GEN 32:2 Uca iṭṭef Yaɛqub ɛawed abrid nnes uca usint-i-dd lmalakat n AREBBI, řqant t-i-dd.
GEN 32:3 Inna Yaɛqub umi ten iẓra: “Řmargeḥ n řɛeskar n AREBBI d wa!”, uca iřaɣa isem n wemcan nni Maḥanayim.
GEN 32:4 Issekk Yaɛqub ireqqasen ɣar zzat, ɣar Ɛisu umas ɣar temmurt n Saɛir, aqa-tt d jjihet n Idum.
GEN 32:5 Uca iweṣṣa i-ten, inna asen: “Ammu i ɣa tinim i sidi inu Ɛisu: ‘Ammu i iqqar umsexxar nnec Yaɛqub: Tuɣa zeddɣeɣ ak-d Laban am ubarrani uca qqimeɣ din ař i řexxu.
GEN 32:6 Ɣari ifunasen d yeɣyař d wuǧi d isemɣan d tiyya uca ssekkeɣ [ireqqasen], maḥend ad [t] iniɣ i sidi inu, maḥend ad afeɣ arḍa di tiṭṭawin nnec.’”
GEN 32:7 Ireqqasen dewřen-dd ɣar Yaɛqub, nnan: “Nruḥ ɣar umac Ɛisu, u netta ɛawed yusa-dd ad cek iřqa u aqa din arebɛa-mya n yeryazen akides.”
GEN 32:8 [Xenni] Yaɛqub tudef i-t tiggʷudi temɣar uca issqenḍ i-t řḥař. Netta ibḍa iwdan, inni akides d wuǧi d ifunasen d tfunasin d iřeɣman x tnayen n řemrageḥ n řɛeskar.
GEN 32:9 Inna: “Mařa yusa-dd Ɛisu ɣar ijj n řmargeḥ n řɛeskar, ad xas iɣřeb, [xenni] ad yarweř řmargeḥ n řɛeskar i iqqimen.”
GEN 32:10 Uca inna Yaɛqub: “[A] AREBBI n baba Ibrahim d AREBBI n baba Isḥaq, [a] SIDI, [Cek] wenni d ayi innan: ‘Dweř ɣar temmurt nnec d raǧ nnec uca Necc ad ac ggeɣ min icnan!’
GEN 32:11 Aqa ayi qell x marra timegga n tmexsiwt icewwaren d marra řaman i tessecned i umsexxar nnec, minzi ẓwiɣ L’Urdun s teɣɣarct inu [řami dd-ffɣeɣ] uca řexxu dewřeɣ-dd d tnayen n řemrageḥ n řɛeskar.
GEN 32:12 Fekk ayi řexxu zeg ufus n Ɛisu uma, minzi tteggʷedeɣ balak ad dd-yas uca ad ineɣ uřa d tiyemmatin ak-d iḥenjiren!
GEN 32:13 Uca Cek tennid: ‘Necc ad kik ggeɣ mliḥ, ad ggeɣ zzariɛet nnec am yijdi n řebḥar i war izemmar ad ittwaḥseb zi ssibbet n ubarru nnes!’”
GEN 32:14 Issens din ǧiřet nni uca iksi zi min dd-yusin deg ifassen nnes d agřa, maḥend ad t yewc d arriɣalu i umas Ɛisu:
GEN 32:15 mitayen n tɣayḍin d ɛicrin n imuyan d mitayen n txeswin d ɛicrin n icarriyyen
GEN 32:16 d třatin n třeɣmin issuṭṭuḍen ak-d tarwa nsent, arebɛin n tfunasin timeẓyanin, ɛecra n ifunasen imeẓyanen d ɛicrin n teɣyař d ɛecra n yeɣyař imeẓyanin.
GEN 32:17 Isseɛdu ten ɣar ifassen n imsexxaren nnes, kuř taḥimart weḥḥdes, uca inna i imsexxaren nnes: “Ɛdum kenniw [řexxu] zzat inu, ggem ttasiɛ jar tḥimart d tḥimart.”
GEN 32:18 [Xenni] yumur umezwar, inna as: “Mařa yusa-dd Ɛisu i umsagar akidek uca isseqsa ac, inna: ‘Wi cek yiřan d mani ɣa traḥed?’ u ‘Umi tina i iǧan zzatek?’,
GEN 32:19 [řexdenni] ad tinid: ‘D arriɣalu i yeǧa n umsexxar nnec Yaɛqub, wenni dd-issekk i sidi inu Ɛisu. Xzar, netta ɛawed [yusa-dd] awarni [aneɣ]!’”
GEN 32:20 Yumur ɛawed wenni wiss tnayen d wiss třata inni igguren awarni i tḥimriwin, inna: “Siwřem awařen-a d ijjen ak-d Ɛisu, xmi t ɣa teřqam.
GEN 32:21 Kenniw ɛawed ad tinim: ‘Xzar, amsexxar nnec Yaɛqub yusa-dd awarni aneɣ!’” Minzi inna: “Ad t ssareyyḥeɣ s arriɣalu-ya i dd-yusin zzat inu. Xenni awarni man aya ad ẓareɣ aɣembub nnes, balak ad iqbeř aɣembub inu [zzates].”
GEN 32:22 [Ammu] i issizzar arriɣalu zzates ɣar ujemmaḍ am issens netta ǧiret nni di řmargeḥ n řɛeskar.
GEN 32:23 Ikkar ǧiřet nni uca iksi tnayen n temɣarin nnes d tnayen n tiyya nnes d ḥiṭac n iḥenjiren nnes, iẓwa amcan n uẓekkwu n [yeɣzar n] Yabbuq.
GEN 32:24 Yiwyi i-ten uca isseẓwa ten i teɣzurt u [marra] min ɣares isseɛdu t ɣar ujemmaḍ.
GEN 32:25 [Maca] iqqim Yaɛqub weḥḥdes u netta immuɣzeř ak-d ijj n Weryaz ařmi d tuffut n řefjar.
GEN 32:26 [Umi] iẓra Wanita aqa war xas iqedd ca, iḥada t ɣar wemcan n temqiqqect n tmeṣṣaḍt nnes, maḥend ad dd-tenxuxer tamqiqqect n tmeṣṣaḍt n Yaɛqub umi kides tuɣa ittmuɣzuř.
GEN 32:27 Inna: “Ejj ayi ad raḥeɣ, aqa iṣbeḥ řḥař.” Maca netta inna: “War Cek ttejjiɣ, mɣir mařa tbarked ayi.”
GEN 32:28 Uca Netta inna as: “Mammec d ac qqaren?” Yarra-dd xas: “Yaɛqub.”
GEN 32:29 [Xenni] inna as: “War d ac qqaren ɛad Yaɛqub, maca Israil, minzi temmenɣed ak-d AREBBI d iwdan, uca cek tɣeřbed.”
GEN 32:30 Isseqsa Yaɛqub [xenni], inna: “Ini ayi řexxu Isem nnec!” Yarra-dd xas: “Maɣar tesseqsid x Yisem inu?” Uca ibark i-t din.
GEN 32:31 Uca isemma Yaɛqub amcan nni Fanuwil, inna: “Minzi ẓriɣ AREBBI aɣembub deg uɣembub uca injem řeɛmar inu.”
GEN 32:32 Tenqar-dd xas tfuct umi tuɣa iɛdu x Fanuwil, uca yuyur ittzeḥḥef zi tmeṣṣaḍt nnes.
GEN 32:33 X uya war ttᵉtten ayt n Israil ař ass-a zeg weẓwar igdaren i ittekken x temqiqqect n tmeṣṣaḍt, minzi iḥada tameṣṣaḍt n Yaɛqub ɣar mani iǧa weẓwar igdaren.
GEN 33:1 Issgeɛɛed Yaɛqub tamuɣři nnes uca iẓra Ɛisu d arebɛa-mya n yeryazen akides xeccen-dd. Ifarq [Yaɛqub] iḥenjiren x Liya d Raḥil d tnayen n tiyya.
GEN 33:2 Igga tiyya d tarwa nsent ɣar zzat, awarni asent Liya d tarwa nnes u Raḥil d Yusuf d ineggura.
GEN 33:3 Umi iɛdu zzat i tiṭṭawin nsen, ibendeq ɣar temmurt sebɛa n twařawin ařami dd-yiweḍ ɣar umas.
GEN 33:4 Ɛisu yuzzeř-dd ḥima ad t iřqa, idarreɛ as, ingez as x yiri nnes, issudem i-t uca run s tnayen.
GEN 33:5 [Xas uca] issgeɛɛed tiṭṭawin nnes, iẓra timɣarin d iḥenjiren nni uca inna: “Min ɛnan ina inni akidek?” Netta yarra-dd xas: “D tarwa nni iwca AREBBI zeg arḍa [nnes] i umsexxar nnec.”
GEN 33:6 Uca reḥḥgent-i-dd tiyya, nitenti d tarwa nsent, uca bendqent.
GEN 33:7 Treḥḥeg-dd ɛawed Liya d iḥenjiren nnes uca bendqen. Řexdenni iqarreb-dd Yusuf d Raḥil uca bendqen.
GEN 33:8 Inna as: “Min texsed ak-d ubarru-ya n řɛeskar nni řqiɣ?” Netta inna: “[Necc ssekkeɣ t,] maḥend ad afeɣ arḍa di tiṭṭawin n sidi inu!”
GEN 33:9 Inna Ɛisu: “Aqa ɣari aṭṭas, uma inu! Ad yiři i cek min iǧan nnec!”
GEN 33:10 [Xas uca] inna Yaɛqub: “Lla, ttzawageɣ cek! Mařa ufiɣ řexxu arḍa di tiṭṭawin nnec, ksi arriɣalu inu zeg ifassen inu, maɣar ẓriɣ udem nnec axmi ẓriɣ udem n AREBBI uca tqebřed xafi s řemřaḥet.
GEN 33:11 Ttzawgeɣ cek, ksi lbaraka inu i d ac dd-iwyeɣ, minzi AREBBI imṣurruf akidi s arḍa uca necc ɣari kuřci.” Ikellef i-t uca iksi t.
GEN 33:12 Netta inna: “Ejj aneɣ ad nefsi iqiḍan nneɣ, ad nraḥ. Necc ad raḥeɣ zzatec.”
GEN 33:13 [Maca] netta inna as: “Sidi inu issen, aqa iḥenjiren-a arehfen u aqa ɣari uǧi d tfunasin urwent ssuṭṭuḍent. Mařa bnadem izeyyar xasent aṭṭas, [waxxa mɣir i] yijj n wass, ad immet wuǧi marra.
GEN 33:14 Ad iɛdu řexxu sidi inu zzat i uɣembub n umsexxar nnes u necc ad dd-aseɣ cwayt cwayt ak-d iṣuraf n řeksibet i iǧan zzati uřa ak-d iṣuraf n iḥenjiren, ař dd ɣa awḍeɣ ɣar sidi inu di Saɛir.”
GEN 33:15 Inna Ɛisu: “Ad jjeɣ řexxu akidek [ca n] iwdan inni iǧan akidi.” [Maca] netta inna: “Umi ddegga? Ejj ayi ad afeɣ arḍa di tiṭṭawin n sidi inu!”
GEN 33:16 Iɛqeb-dd Ɛisu deg wass nni x webrid ɣar Saɛir.
GEN 33:17 Uca ifsi Yaɛqub iqiḍan nnes, [yuyur] ɣar Sukkut, ibna din taddart i yixef nnes uca igga iɛuccuten n tseṭṭa i řebhayem nnes. X uya iřaɣa isem n wemcan nni Sukkut, [ixs ad yini ‘Iɛuccuten’].
GEN 33:18 Umi dd-iɛqeb Yaɛqub zi Fadan-Aram, yusa-dd ɣar Calim, ict n tendint n Cakim, tenni iǧan di temmurt n Kenɛan, uca iwta iqiḍan nnes zzat i tendint.
GEN 33:19 Isɣa ṭṭarf n yeyyar mani iwta iqiḍan nnes, zeg ifassen n iḥenjiren n Ḥamur, babas n Cakim, s mya n iziynat n nnuqart iweznen.
GEN 33:20 Issgeɛɛed din ijj n uɛalṭar [min xef temmars tɣarṣt] uca iřaɣa as: ‘Arebbi [d] AREBBI n Israil!’
GEN 34:1 Dina, yeǧis n Liya, tenni dd-turuw i Yaɛqub, teffeɣ, ḥima ad temmeřqa ak-d yessis n temmurt.
GEN 34:2 Cakim, mmis n Ḥamur Aḥiwi, řḥakem n temmurt nni, iẓra i-tt, iksi tt uca iṭṭeṣ akides, issexsar i-tt.
GEN 34:3 Iṭṭarbeṭ di Dina, yeǧis n Yaɛqub, u netta ixs tabřiɣt uca issiweř ɣar wuř n tebřiɣt.
GEN 34:4 Issiweř Cakim ɣar Ḥamur babas, inna as: “Awyi ayi-dd tabřiɣt-a d tamɣart.”
GEN 34:5 Řami isřa Yaɛqub belli Cakim iḍeyyeɛ [ccaraf n] yeǧis Dina, tuɣa iḥenjiren nnes ak-d řebhayem deg iyyar. Issusem Yaɛqub ařami dd-ɛeqben nitni.
GEN 34:6 Iruḥ Ḥamur, babas n Cakim ɣar Yaɛqub, ḥima ad kis issiweř.
GEN 34:7 Tarwa n Yaɛqub dewřen-dd zeg iyyar uca areggben x řexbar. Xeyyqen x man aya [deg wuř] u ffugmen aṭṭas, minzi igga řefḍiḥet-a di Israil umi iṭṭeṣ ak-d yeǧis n Yaɛqub. man aya war icuwwar ad t yegg.
GEN 34:8 Issiweř Ḥamur akidsen, inna: “Řeɛmar n mmi Cakim iqqen ɣar yeǧitwem, ttzawageɣ, ad as tt tewcem d tamɣart,
GEN 34:9 uca ad nemḍeggwař. Ad aneɣ tewcem yeǧitwem, kenniw ad teksim yessitneɣ i yixef nwem.
GEN 34:10 Zedɣem akidneɣ, minzi tammurt aqa-tt zzatwem. Zedɣem u uyurem dayes uca ṭṭfem dayes agřa i kenniw.”
GEN 34:11 Uca inna Cakim [ɛawed] i babas d aytmas: “Ejj ayi ad afeɣ arḍa di tiṭṭawin nwem uca ad wceɣ min d ayi ɣa tinim.
GEN 34:12 [Waxxa] ad tessḍeqřem xafi [řeḥmeř] aṭṭas [n] ṣṣadaq d ssunan, aqa necc ad wceɣ mecḥař ma d ayi ɣa tinim. Wcem ayi mɣir tabřiɣt d tamɣart.”
GEN 34:13 Arrin-dd iḥenjiren n Yaɛqub x Cakim d Ḥamur, babas, s ict n teḥraymect, minzi aqa issexsar Dina, učmatsen.
GEN 34:14 Nitni ssiwřen, nnan asen: “War nzemmar ad negg ammu, ad newc učmatneɣ i weryaz nni [ɛad] s řeɛdařyet. Degga d řɛar xaneɣ.
GEN 34:15 Mɣir s umtawi-ya waha ad kenniw nseɛɛef, mařa teggim am neccin, ad tᵉttwaxetnem marra iwetman nwem.
GEN 34:16 [Xenni] ad awem newc yeǧitneɣ uca ad neksi yessitwem, ad kidwen nezdeɣ, ad niři d ijj n řgens.
GEN 34:17 [Maca] mařa war d aneɣ tesřim di tmesřact n wextan, [xenni] ad neksi yeǧitneɣ uca ad nuyur.”
GEN 34:18 Banen wawařen nsen mliḥ deg imezzuɣen n Ḥamur u deg imejjan n Cakim, mmis n Ḥamur.
GEN 34:19 Aɛezri war d as icqi ad igg man aya, minzi netta ittexs aṭṭas yeǧis n Yaɛqub u netta tuɣa-t qaɛ mweqqar di marra taddart n babas.
GEN 34:20 Uca usin-dd Ḥamur d mmis Cakim ɣar tewwart n tendint nnes, ssiwřen ak-d yeryazen n tendint, nnan:
GEN 34:21 “Iryazen-a d imhudnen akidneɣ. Ejj aneɣ ad ten nejj ad zedɣen di temmurt-a uca ad dayes uyuren. Xzar, tammurt tewseɛ i nitni ɣar marra iɣezdisen nnes. Neccin ad neksi yessitsen d timɣarin, ad asen newc yessitneɣ.
GEN 34:22 [Maca] s umtawi-ya waha ad seɛɛfen yeryazen-a, ḥima ad kidneɣ zedɣen u ḥima ad dewřen d ijj n řgens [akidneɣ], mařa marra iryazen i iǧan jar aneɣ ad ttwaxetnen am mammec ttwaxetnen nitni.
GEN 34:23 Řebhayem nsen d agřa nsen d marra řmař nsen, ma war ttiřin nneɣ? Ejj aneɣ ad ten nseɛɛef, [xenni] ad zedɣen akidneɣ.”
GEN 34:24 Marra inni dd-yusin ɣar tewwart n tendint nnes sřin i Ḥamur d mmis Cakim uca marra iryazen inni dd-yusin ɣar tewwart n tendint nnes, ttwaxetnen.
GEN 34:25 Umi tuɣa ɛad daysen řehriq deg wass wiss třata, temsar belli iḥenjiren n Yaɛqub, Cimɛun d Lawi, aytmas n Dina, aqa kuř ijj zzaysen iksi ssif nnes uca ruḥen ɣar tendint mani d asen ittɣiř aqa dayes řaman uca nɣin marra iryazen.
GEN 34:26 Nɣin Ḥamur d mmis Cakim s řeqḍeɛ n ssif uca ksin Dina zi taddart n Cakim, ffɣen.
GEN 34:27 Tarwa n Yaɛqub usin-dd ɣar yinni ittwanɣen uca keccḍen tandint, minzi nitni ssexsaren učmatsen.
GEN 34:28 Ksin uǧi nsen d ifunasen d tfunasin nsen d yeɣyař nsen d marra min tuɣa di tendint u deg iyyar.
GEN 34:29 Ksin marra agřa nnes uca iwyen-dd marra iḥenjiren d temɣarin nsen d imeḥbas uca ucaren marra min tuɣa di tudrin.
GEN 34:30 [Xenni] inna Yaɛqub i Cimɛun d Lawi: “Kenniw tessidfem ayi deg imxumbar ařami d ayi tessarzgem ɣar imezdaɣ n temmurt-a, ɣar ayt n Kenɛan d Ifiriziyyen. D necc ɣari ijj n wuru n yeryazen [waha]. [Mařa] ad munen x uzeřmaḍ inu, ad ayi qeẓẓren, ad iřiɣ areyyteɣ, necc d taddart inu.”
GEN 34:31 Nitni nnan: “Ma iɛeddeř xenni ad iḥseb učmatneɣ amecnaw ict n lfasda?”
GEN 35:1 Uca inna AREBBI i Yaɛqub: “Kkar, geɛɛed ɣar Bayt-Il uca qqim din. Egg din ijj n uɛalṭar [min xef i ɣa tessarsed taɣarṣt] i Arebbi, wenni d ac dd-ibanen umi dd-tarewřed zeg uɣembub n umac Ɛisu.”
GEN 35:2 [Xenni] inna Yaɛqub i řwacun [n taddart] nnes u i marra inni tuɣa akides: “Kksem irebbiten iɣriben nni iǧan jar awem, sizedgem ixef nwem uca beddřem arruḍ nwem.
GEN 35:3 Ad nekkar, ad ngeɛɛed ɣar Bayt-Il. Necc ad ggeɣ din ijj n uɛalṭar i Arebbi nni xafi dd-yarrin deg wass n řeḥṣaret inu, d wenni tuɣa akidi deg webrid nni uyureɣ.”
GEN 35:4 Uca wcin i Yaɛqub marra irebbiten iɣriben nni tuɣa ɣarsen uřa d tixrazin deg imezzuɣen nsen uca iffar i-ten Yaɛqub sadu tcejjart n yigg i tuɣa zzat i Cakim.
GEN 35:5 [Řami] fesyen iqiḍan, [uyuren] ssenni, tuɣa tiggʷudi n AREBBI x tneddam nni tuɣa di jjwayeh i d asen dd-innḍen, ařami nitni war ḍeffaren iḥenjiren n Yaɛqub.
GEN 35:6 Ammu i yiweḍ Yaɛqub ɣar Luz di temmurt n Kenɛan, aqa-tt d Bayt-Il, netta d marra řgens i tuɣa akides.
GEN 35:7 Ibna din ijj n uɛalṭar uca iřaɣa i wemcan nni Il-Bayt-Il, minzi dinni i d as dd-iḍhar AREBBI, umi dd-yarweř zeg uɣembub n umas.
GEN 35:8 Temmut Dibura, tamesseṭṭaḍt n Rifqa uca neḍřen tt swadday i Bayt-Il, sadu tabeǧuḍt uca iřaɣa isem nnes ‘Allun-Bakut’, [aqa-tt d ‘tabeǧuḍt n imeṭṭawen’].
GEN 35:9 Iḍhar as-dd ɛawed AREBBI i Yaɛqub umi dd-idweř zi Fadan-Aram uca ibark i-t.
GEN 35:10 Inna as AREBBI: “Isem nnec d Yaɛqub. Zi ssa d tsawent war tteggen ɛad isem nnec ‘Yaɛqub’, maca ‘Israil’, d wa i ɣa yiřin d isem nnec.” Uca isemma t Israil.
GEN 35:11 Inna as AREBBI: “Necc d Arebbi, Amzemmar x kuřci! Egg řɣiǧet, mmarniy! Zzayek i ɣa iffeɣ ijj n řgens, wah, d ijj n wegraw n řegnus ad ffɣen zzayek u ijeǧiden ad ffɣen zi tejɛinna nnec.
GEN 35:12 Uca tammurt-a i wciɣ i Ibrahim d Isḥaq, i cek umi tt i ɣa wceɣ uca uřa i zzariɛet nnec awarni ac ad wceɣ tammurt.”
GEN 35:13 [Xas uca] igeɛɛed AREBBI sennej zeg wemcan mani kides issiweř.
GEN 35:14 Yaɛqub issgeɛɛed ijj n weẓru n řidaret deg wemcan mani kis issiweř, ijj n weẓru n řidaret. Iseyyeb xas ict n tewhibt n useyyeb uca ifarreɣ zzect x uzeǧif nnes.
GEN 35:15 Igga Yaɛqub isem n wemcan mani kides issiweř AREBBI ‘Bayt-Il!’
GEN 35:16 Fesyen nitni iqiḍan nsen, [ffɣen] zi Bayt-Il uca umi tuɣa tteggwijen mɣir cwayt x Ifrata, xenni turuw-dd Raḥil u teɛdu xas tarwa teqseḥ.
GEN 35:17 Imsar, umi teɣɣuḍed di tarwa nnes, tenna as řqabřa: “War tteggʷed, aqa wa ɛawed ad yiři d mmim!”
GEN 35:18 Řami teḍřeq i buḥbeř am temmut [din], aqa třaɣa as Bin-Uni, [isem-a ixs ad yini ‘mmis n řeḥriq inu’], [maca] babas iřaɣa as Binyamin, [ixs ad yini ‘mmis n zzhar inu’].
GEN 35:19 [Ammu] i temmut Raḥil uca neḍřent tt deg webrid ɣar Ifrata, ixs ad yini Bayt-Laḥm.
GEN 35:20 Uca igga Yaɛqub ijj n weẓru n řidaret x wenḍeř nnes. D wa d aẓru n řidaret n Raḥil x wenḍeř n Raḥil ař ass-a.
GEN 35:21 [Xas uca] ifsi Israil iqiḍan uca iwta aqiḍun nnes x uɛeddu n Majdal-Ɛidr.
GEN 35:22 Umi izdeɣ Israil di temmurt nni, imsar belli Rubin iruḥ iṭṭeṣ ak-d Bilha, tayya n babas, uca yiweḍ ad [t] ifhem Israil. Aqa řexxu iwḍen ayt n Yaɛqub tenɛac.
GEN 35:23 Tarwa n Liya [tuɣa aten]: Rubin, amenzu n Yaɛqub d Cimɛun d Lawi d Yahuda d Issakar d Zabulun.
GEN 35:24 Tarwa n Raḥil [tuɣa aten]: Yusuf d Binyamin.
GEN 35:25 Tarwa n Bilha, tayya n Raḥil, [tuɣa aten]: Dan d Naftali.
GEN 35:26 Tarwa n Zilpa, tayya n Liya, [tuɣa aten]: Jad d Acir. Ina [tuɣa aten d] iḥenjiren n Yaɛqub inni d as dd-ittwaxeřqen di Fadan-Aram.
GEN 35:27 Uca yusa-dd Yaɛqub ɣar babas Isḥaq di Mamri, di tendint n Arbaɛ, tenni iǧan d [tandint n] Ḥabrun, mani tuɣa Ibrahim izeddeɣ am ubarrani, uca Isḥaq amenni [awarni as].
GEN 35:28 Iddar Isḥaq mya u-tmanyin n iseggʷusa.
GEN 35:29 Iḍřeq Isḥaq i buḥbeř, immut uca immarni ɣar řgens nnes, iwsar, ijjiwen zi tudart, uca Ɛisu d Yaɛqub, iḥenjiren nnes, neḍřen t.
GEN 36:1 Ina d imezruyen n yinni dd-ittwaxeřqen zi Ɛisu, wenni iǧan d Idum.
GEN 36:2 Ɛisu iksi timɣarin nnes zeg yessis n Kenɛan: Ɛada, yeǧis n Ilun, Aḥitti, d Ahulibama, yeǧis n Ɛana, yeǧis n Ṣabɛun, Aḥiwi,
GEN 36:3 d Basmat, yeǧis n Ismaɛil, učmas n Nabayut.
GEN 36:4 Ɛada turuw-dd Ilifaz i Ɛisu uca Basmat turuw [as-dd] Raɛuwil.
GEN 36:5 Ahulibama turuw-dd Yaɛus d Yaɛlam d Quraḥ. Ina [tuɣa aten d] iḥenjiren n Ɛisu, inni d as dd-yurwen di temmurt n Kenɛan.
GEN 36:6 Uca iksi Ɛisu timɣarin nnes d iḥenjiren nnes d yessis d marra aytbab n taddart nnes uřa d řebhayem nnes d marra řmař nnes d marra agřa nnes nni tuɣa dd-ikseb zi temmurt n Kenɛan uca iruḥ ɣar temmurt [nneɣni] i iggʷejen x uɣembub n umas Yaɛqub,
GEN 36:7 minzi agřa nsen tuɣa imɣar ařami war zemmaren ad zedɣen jmiɛ, uca tammurt mani tuɣa zeddɣen am řbarrani, war tqedd i řebhayem nsen.
GEN 36:8 [Xenni] izdeɣ Ɛisu deg idurar n Saɛir. Ɛisu, netta d Idum.
GEN 36:9 Ina d imezruyen n yinni dd-ittwaxeřqen zi Ɛisu, babas n Idum, deg idurar n Saɛir.
GEN 36:10 Ina tuɣa aten d ismawen n iḥenjiren n Ɛisu: Ilifaz, mmis n Ɛada tenni d tamɣart n Ɛisu, Raɛuwil, mmis n Basmat, tenni d tamɣart n Ɛisu.
GEN 36:11 Iḥenjiren n Ilifaz tuɣa aten d Tayman, Umar, Ṣafu, Jaɛtam d Qanaz.
GEN 36:12 Timnaɛ tedweř d tayya n Ilifaz, mmis n Ɛisu, u nettat turuw-dd Ɛamaliq i Ilifaz. Ina tuɣa aten d iḥenjiren n Ɛada, tamɣart n Ɛisu.
GEN 36:13 Ina tuɣa aten d iḥenjiren n Raɛuwil: Naḥat, Zaraḥ, Camma d Mizza. Ina tuɣa aten d iḥenjiren n Basmat, tenni d tamɣart n Ɛisu.
GEN 36:14 Ina tuɣa aten d iḥenjiren n Ahulibama, tenni d tamɣart n Ɛisu, yeǧis n Ɛana, tenni d yeǧis n Zibyun. Nettat turuw-dd Yaɛuc, Jaɛlam d Quraḥ i Ɛisu.
GEN 36:15 Ina tuɣa aten d imɣaren n tqebbař n ayt n Ɛisu. Iḥenjiren n Ilifaz, amenzu n Ɛisu: amɣar Timan d umɣar Umar d umɣar Ṣafu d umɣar Qinaz,
GEN 36:16 d umɣar Quraḥ, d umɣar Gatam, d umɣar Ɛamaliq. Ina tuɣa aten d imɣaren n Ilifaz di temmurt n Idum, ina tuɣa aten d iḥenjiren n Ɛada.
GEN 36:17 Ina tuɣa aten d iḥenjiren n Raɛuwil, mmis n Ɛisu: amɣar Naḥat d umɣar Zaraḥ d umɣar Samma d umɣar Mizza. Ina tuɣa aten d imɣaren n Raɛuwil di temmurt n Idum, d ina tuɣa aten d iḥenjiren n Basmat, tamɣart n Ɛisu.
GEN 36:18 Ina tuɣa aten d ayt n Ahulibama, tamɣart n Ɛisu: amɣar Yaɛuc d umɣar Yaɛlam d umɣar Quraḥ. Ina tuɣa aten d imɣaren n Ahulibama, tamɣart n Ɛisu, yeǧis n Ɛana.
GEN 36:19 Ina tuɣa aten d iḥenjiren n Ɛisu d ina tuɣa aten d imɣaren [n tqebbař nsen], nitni d Idum.
GEN 36:20 Ina tuɣa aten d iḥenjiren n Saɛir, Axuri, inni d imezdaɣ n temmurt nni: Luṭan, Cubal, Ṣabɛun, Ɛana,
GEN 36:21 Dicun, Iṣar d Dican. Ina tuɣa aten d imɣaren n tqebbař n Ixuriyyen, ayt n Saɛir di temmurt n Idum.
GEN 36:22 Iḥenjiren n Luṭan tuɣa aten d Axuri d Haymam uca tuɣa Timnaɛ d učmas n Luṭan.
GEN 36:23 Ina tuɣa aten d iḥenjiren n Cubal: Ɛalwan, Manaḥat, Ɛibal, Cafu d Unam.
GEN 36:24 Ina tuɣa aten d iḥenjiren n Ṣabɛun: Aya d Ɛana. D Ɛana wanita d wenni d yufin řɛunṣarat s waman iḥman di řexřa, umi yarwes iɣyař n Zibiyun babas.
GEN 36:25 Ina tuɣa aten d iḥenjiren n Ɛana: [mɣir] Dicun, d Ahulibama, yeǧis n Ɛana.
GEN 36:26 Ina tuɣa aten d iḥenjiren n Dican: Ḥamdan d Ahban d Yitran d Karan.
GEN 36:27 Ina tuɣa aten d iḥenjiren n Iṣar: Bilhan, Zaɛwan d Ɛaqan.
GEN 36:28 Ina tuɣa aten d iḥenjiren n Dican: Ɛuṣ d Aran.
GEN 36:29 Ina tuɣa aten d imɣaren n tqebbař n Ixuriyyen: amɣar Luṭan d umɣar Cubal d umɣar Ṣabɛun d umɣar Ɛana
GEN 36:30 d umɣar Dicun d umɣar Iṣar d umɣar Dican. Ina tuɣa aten d imɣaren n Ixuriyyen ɛlaḥsab imɣaren nsen di temmurt n Saɛir.
GEN 36:31 Ina tuɣa aten d ijeǧiden nni iḥekmen di temmurt n Idum qbeř ma ad iḥkem ujeǧid x ayt n Israil:
GEN 36:32 Bilaɛ, mmis n Baɛur, iḥkem di Idum uca isem n tendint nnes tuɣa-t d Dinhaba.
GEN 36:33 Immut Bilaɛ uca Yubab, mmis n Zaraḥ zi Buṣra idweř d ajeǧid deg wemcan nnes.
GEN 36:34 Yubab immut uca Ḥucam, zi temmurt n Itaymaniyyen, idweř d ajeǧid deg wemcan nnes.
GEN 36:35 Immut Ḥucam uca Hadad, mmis n Badad, wenni iɣeřben x Midyan deg iyyar n Mu’ab, idweř d ajeǧid deg wemcan nnes. Isem n tendint nnes qqaren as Ɛawit.
GEN 36:36 Immut Hadad uca Samla zi Masriqa idweř d ajeǧid deg wemcan nnes.
GEN 36:37 Immut Samla uca Cawul, zi Raḥubut ɣar yeɣzar [n Lfuraṭ], idweř d ajeǧid deg wemcan nnes.
GEN 36:38 Immut Cawul uca Baɛl-Ḥanan, mmis n Ɛakbur, idweř d ajeǧid deg wemcan nnes.
GEN 36:39 Immut Baɛl-Ḥanan, mmis n Ɛakbur, uca Hadar idweř d ajeǧid deg wemcan nnes. Tandint nnes qqaren as Faɛu u tamɣart nnes qqaren as Mahiṭab’il, yeǧis n Maṭrid, yeǧis n Ma-Dahab.
GEN 36:40 Ina tuɣa aten d ismawen n imɣaren n tqebbař n Ɛisu ɛlaḥsab řaǧat nsen d imucan nsen d ismawen nsen: amɣar Timnaɛ d umɣar Ɛalwa d umɣar Yatit
GEN 36:41 d umɣar Ahulibama d umɣar Ila d umɣar Finun
GEN 36:42 d umɣar Qanaz d umɣar Tayman d umɣar Mibṣar
GEN 36:43 d umɣar Majdiyil d umɣar Ɛiram. Ina tuɣa aten d imɣaren n Idum ɛlaḥsab imucan nsen, di temmurt n řmelk nsen. Wanita d Idum, wenni d babas n Idumiyyen.
GEN 36:44 Uca izdeɣ Yaɛqub di temmurt n Kenɛan mani tuɣa izeddeɣ babas am ubarrani. Ina d imezruyen n yinni dd-ittwaxeřqen zi Yaɛqub.
GEN 37:1 Řami tuɣa ɣar Yusuf sbeɛṭac n iseggʷusa, yarwes uǧi n babas ak-d aytmas. Tuɣa Yusuf d amsexxar ɣar iḥenjiren n Bilha d iḥenjiren n Zilpa, timɣarin n babas uca issiweḍ Yusuf awařen nsen iɛeffanen i babatsen.
GEN 37:2 Uca ixs Israil Yusuf qaɛ x marra iḥenjiren nnes, minzi tuɣa-t ɣares d mmis x tewsar nnes uca igga as arruḍ [s ifassen d iziraren].
GEN 37:3 [Řami] ẓrin aytmas belli babas ittexs i-t qaɛ xasen, carhen t uca war zemmaren akides ssiwřen [ɛad] s řehna.
GEN 37:4 Uca yurja Yusuf ict n tarjit, iɛawd i-tt i yaytmas. S uya nitni dewřen carhen t ɛad ktar.
GEN 37:5 Inna asen: “Sřem řexxu tarjit-a nni urjiɣ.
GEN 37:6 Xzar, tuɣa nettcedda tiqebbiḍin [n imendi] di řwesṭ n yeyyar. U xzar, taqebbiḍt inu tbedd, teqqim tbedd u tiqebbiḍin nwem nni tuɣa d as dd-innḍent, bendqen i tqebbiḍt inu.”
GEN 37:7 Arrin-dd xas aytmas: “Ma ad tḥekmed [zeɛma] nican xaneɣ [am ujeǧid] niɣ ad xaneɣ tseǧḍed d aseǧeḍ?” Uca carhen t ɛad ktar di ssibbet n tirja nnes d wawařen nnes.
GEN 37:8 Uca yurja ɛad tarjit nneɣni, iɛawd i-tt i yaytmas, inna: “Xzar, arjiɣ ɛad tarjit nneɣni. Xzar tafuct d uyur d ḥiṭac n itran bendqen ayi.”
GEN 37:9 Iɛawed [i-tt] i babas d aytmas uca iwebbex i-t babas, inna as: “Mana tarjit-a i tarjid? Ma ad dd-nas [jmiɛ], necc d yemmac d aytmac, ad ac nbendeq ɣar temmurt?”
GEN 37:10 Aytmas usmen zzayes. Maca babas iɛqeř x wawařen[-a].
GEN 37:11 Uca ruḥen aytmas, ḥima ad arewsen uǧi n babatsen ɣar Cakim.
GEN 37:12 [Xenni] inna Israil i Yusuf: “Ma war arewsen aytmac [uǧi] ɣar Cakim? Zid, ad cek ɣarsen ssekkeɣ.” Uca yarra-dd xas: “Aqa ayi da!”
GEN 37:13 Uca inna as: “Ruḥ cek, xzar muxas ǧan aytmac d muxas ǧan wuǧi uca awi ayi-dd řexbar ɛawed.” [Ammu] i-t issekk zi řewḍa n teɣzurt n Ḥabrun uca netta yiweḍ-dd ɣar Cakim.
GEN 37:14 Yufa i-t ijj n weryaz umi iweddar deg iyyar. Isseqsa t weryaz, inna: “Min tarezzud?”
GEN 37:15 Inna: “Arezzuɣ x aytma. Ttzawgeɣ cek, ini ayi mani arewsen.”
GEN 37:16 Aryaz yarra-dd: “Aqa muṭṭiyen iqiḍan nsen ssa, necc sřiɣ asen qqaren: ‘Ejj aneɣ ad nraḥ ɣar Dutan.’” [Řexdenni] iruḥ Yusuf awarni aytmas uca yufa i-ten di Dutan.
GEN 37:17 Umi t ẓrin zi řaggʷaj, qbeř ma ad ɣarsen dd-iqarreb, mɛahaden ḍidd nnes ḥima ad t nɣen,
GEN 37:18 nnan ijj i wenneɣni: “Xzar, yusa-dd bu-tirja nni!
GEN 37:19 Zid řexxu, ejj aneɣ ad t nᵉnneɣ uca ad t nenḍar deg wanu, ad nini: ‘Ca n řweḥc yewɛar icca i-t!’, uca [xenni] ad nẓar min ɣa iřint tirja nnes.”
GEN 37:20 Isřa Rubin man aya uca ifekk i-t zeg ifassen nsen, inna: “War t nneqq ca!”
GEN 37:21 Inna asen [ɛawed] Rubin: “War sizziřem idammen! Nḍarem t deg wanu-ya [da] di řexřa. War xas tteggem afus!”. Inna ammu ḥima ad t ifekk zeg ifassen nsen uca ad t yarr ɣar babas.
GEN 37:22 Uca imsar, umi dd-yiweḍ Yusuf ɣar aytmas, kksen nitni arruḍ x Yusuf, arruḍ [s ifassen d iziraren] nni xas tuɣa,
GEN 37:23 uca ṭṭfen t, nḍaren t deg wanu. [Maca] anu tuɣa ixwa, war dayes tuɣi ca aman.
GEN 37:24 Awarni man aya qqimen maḥend ad ccen aɣrum, uca řami ssgeɛɛden nitni tiṭṭawin nsen, zřin ijj n ukaravan n Ismaɛiliyyen i dd-yusin zi Jilɛad. Iřeɣman nsen arbun řeɛṭur d řefwah n balsam d mirru, gguren ad t awyen ɣar Miṣra.
GEN 37:25 [Xenni] inna Yahuda i yaytmas: “Man řefḍeř mařa nenɣa umatneɣ uca ad neffar idammen nnes?
GEN 37:26 Ɣawrem, ad t nezzenz i Ismaɛiliyyen, war ittiři ufus nneɣ xas, aqa d umatneɣ d aysum nneɣ.” Uca sřin aytmas ɣares.
GEN 37:27 Am dd-ɛdun tujjar n Midyan, ssgeɛɛden-dd Yusuf zeg wanu uca zzenzen t s ɛicrin n [uqiyyat n] nnuqart i Ismaɛiliyyen, inni dd-yiwyen Yusuf ɣar Miṣra.
GEN 37:28 [Řami] dd-idweř Rubin ɣar wanu, war din yufi Yusuf ɛad deg wanu. [Xenni] icarreg arruḍ nnes.
GEN 37:29 Idweř ɣar aytmas uca inna: “Aḥenjir war din iǧi [ɛad]. I necc, mani ɣa raḥeɣ?”
GEN 37:30 [Xenni] ksin arruḍ n Yusuf uca ɣarṣen i yijj n umyan zeg iɣayḍen uca marɣen arruḍ s idammen.
GEN 37:31 Ssekken [ijjen] s arruḍ d lemliḥ [s ifassen d iziraren], jjin t ad t yawi ɣar babatsen, nnan: “D wa i nufa. Xzar řexxu, ma wah niɣ lla arruḍ n mmic?”
GEN 37:32 Uca netta iɛeqř i-t, inna: “Arruḍ n mmi i yeǧa! Ca n řweḥc yewɛar icca i-t. Yusuf s tidett bettqen t!”
GEN 37:33 Icarreg Yaɛqub arruḍ nnes uca yarḍ ict n txancet [n wecḍan] x tejɛinna nnes, icḍen x mmis aṭṭas n wussan.
GEN 37:34 Kkaren marra iḥenjiren nnes d marra tiḥenjirin nnes maḥend ad t ɛezzan, ɛad netta war ixs ad ittwaɛezza, inna: “Lla, ad dd-hwiɣ nnuryeɣ ɣar řaxart.” Uca isɣuy xas babas.
GEN 37:35 Imidiyaniyyen zzenzen t di Miṣra i Putifar, amsexxar amcenneɛ n firɛun, řqebṭan n iɛessasen n arrimet.
GEN 38:1 Di řweqt d ict ihwa Yahuda, [iffeɣ] x aytmas, uca iwta [iqiḍan nnes] ɣar yijj n weryaz d Adullamiti wenni umi qqaren Ḥira.
GEN 38:2 Uca iẓra din Yahuda yeǧis n yijj n weryaz d Akenɛani wenni umi qqaren Cuɛa. Uca [Yahuda] yiwi [yeǧis n Cuɛa] [d tamɣart], uca yudef xas.
GEN 38:3 Nettat teksi s ddeyset uca turuw-dd aḥenjir uca [Yahuda] iřaɣa as Ɛir.
GEN 38:4 Uca teksi ɛawed s ddeyset, turuw-dd aḥenjir uca třaɣa as Unan.
GEN 38:5 Uca turuw-dd ɛawed aḥenjir uca třaɣa as Cayla. Netta tuɣa-t di Kazib umi d as t-i-dd-turuw.
GEN 38:6 Yahuda iksi tamɣart i Ɛir, amenzu nnes. Tamɣart-a qqarent as Tamar.
GEN 38:7 Ɛir, amenzu n Yahuda, tuɣa-t d aɛeffan di tiṭṭawin n SIDI uca inɣa i-t SIDI.
GEN 38:8 [Xenni] inna Yahuda i Unan: “Adef x temɣart n umac, mřec akides deg wemcan n umac, tejjed-dd zzariɛet i umac.”
GEN 38:9 [Maca] Unan issen belli zzariɛet war tᵉttiři nnes. Uca ammu imsar, umi yudef x temɣart n umas, inɣeř [zzariɛet nnes] di temmurt, ḥima war ittic zzariɛet i umas.
GEN 38:10 Min igga tuɣa d aɛeffan di tiṭṭawin n SIDI uca inɣa i-t uřa d netta.
GEN 38:11 [Xenni] inna Yahuda i Tamar, tasřit nnes: “Qqim [am] tajjač di taddart n babam, ař ɣa imɣar mmi Cayla!”, minzi inna: “Aqa war ittmetti uřa d wa am yaytmas.” Uca truḥ Tamar, tezdeɣ di taddart n babas.
GEN 38:12 Ɛdun wussan aṭṭas, xenni temmut yeǧis n Cuɛa, tamɣart n Yahuda. Yahuda yarezzu ad ittwaɛezza uca igeɛɛed ɣar tḥimart n wuǧi nnes ɣar Timnata, netta d Ḥira, ameddukkeř nnes zi Adullam.
GEN 38:13 Ɛeřmen t i Tamar, nnan: “Xzar, aḍeggʷař nnem igeɛɛed ɣar Timnata, ad iřs uǧi nnes.”
GEN 38:14 [Xenni] tekkes xas arruḍ n tajjač, třeḥḥef s tkenbuct, tesřeḥhef ixef nnes zzayes, uca truḥ ad teqqim ɣar wadaf n Ɛaynayim, wenni iǧan deg webrid ɣar Timnata, minzi teẓra Cayla imɣar, u nettat tuɣa war d as temmewc d tamɣart.
GEN 38:15 Uca iẓra i-tt Yahuda, iḥesb i-tt d lfasda, minzi tuɣa-tt třeḥḥef i uɣembub nnes.
GEN 38:16 Uca imeyyeř ɣares ɣar webrid, inna as: “Ejj ayi ad xam adfeɣ!”, minzi netta tuɣa war issin, belli nettat d tasřit nnes. Nettat tenna: “Min d ayi ɣa tewced, ḥima ad xafi tadfed?”
GEN 38:17 Yarra-dd: “Necc ad [am]-dd ssekkeɣ ijj n iɣayḍ d ameẓyan zeg iɣayḍen, zeg wuǧi.” Tenna as: “Mɣir ewc ayi ijj n warhan ař d ayi t-i-dd tᵉssekked.”
GEN 38:18 Inna: “Man aḍman i d am i ɣa wceɣ?” Nettat tenna: “Taxadent nnec n ucemmiɛ d ttesbiḥ nnec d taɣɣarct i ɣarek deg ufus.” Uca iwca as ten, yudef xas uca teksi zzayes ddeyset.
GEN 38:19 Uca tekkar, truḥ, tekkes xas takenbuct nnes uca tyarḍ arruḍ nnes n tajjač.
GEN 38:20 Uca issekk Yahuda iɣayḍ d ameẓyan zeg iɣayḍen x ufus n umeddukkeř nnes Adullami, ḥima ad iṭṭef [ɛawed] aḍman zeg ufus n temɣart, [maca] war tt yufi.
GEN 38:21 Isseqsa iryazen x wemcan nnes, inna: “ Mani teǧa temɣart n farq-ccɣeř nni tuɣa iqqimen x webrid ɣar Ɛanayim?” Nitni arrin-dd xas: “War da tuɣi qaɛ ca n temɣart n farq-ccɣeř ɣar zzawect.”
GEN 38:22 [Xenni] iɛqeb-dd ɣar Yahuda, inna: “War tt ufiɣ ca, uřa d iryazen n wemcan [nni] nnan: ‘War da tuɣi qaɛ ca n temɣart n farq-ccɣeř [ɣar zzawect].’”
GEN 38:23 Uca inna Yahuda: “Ejj i-tt ad tᵉṭṭef [aḍman] ɣares, ḥima war nettiři d řɛar. Xzar, necc aqa ssekkeɣ iɣayḍ-a d ameẓyan, [maca] cek war tt tufid.”
GEN 38:24 Ɛřaḥař awarni třata n iyuren temsar, aqa xebbaren Yahuda, nnan: “Tamar, tasřit nnec, aqa tessefsed ixef nnes uca řexxu nettat aqa-tt s ddeyset s farq-ccɣeř [nnes].” [Xenni] inna Yahuda: “Suffɣem tt-i-dd, ad tecmeḍ!”
GEN 38:25 Umi tt-i-dd-yiwyen ɣar barra, tessekk-dd [ijjen] ɣar uḍeggʷař nnes, maḥend ad yini: “Zeg weryaz n řeḥwayej-a, aqa ksiɣ s ddeyset.” Tenna ɛad: “Arzu xenni wi iřan taxadent-a n ucemmiɛ d ttesbiḥin-a d taɣɣarct-a.”
GEN 38:26 Yahuda iɛeqř [i-tent], inna: “Aqa-tt d nican xafi, minzi war tt wciɣ [d tamɣart] i Cayla mmi.” War iqqim issen i-tt [ɛad].
GEN 38:27 Di řweqt umi dd-tiweḍ ad dd-taruw, aqa da acniwen deg uɛeddis nnes.
GEN 38:28 Imsar umi dd-turuw, issuffeɣ-dd ijjen afus uca teksi t řqabřa uca tcedd i-t ɣar ufus nnes s ufiřu d azeggʷaɣ, tenna: “Wa i dd-iffɣen d amezwar.”
GEN 38:29 Řami dd yarra afus nnes, iban-dd umas, uca tenna: “Mammec teggid tazzit. [Ad tiřid] d bu-ittareẓẓan!” Uca semman t Fariṣ.
GEN 38:30 Awarni man aya iffeɣ-dd umas, wenni ɣar iǧa ufiřu azeggʷaɣ deg ufus nnes uca isemma t Zaraḥ.
GEN 39:1 Nedhen [xenni] Yusuf ɣar Miṣra. Putifar, amsexxar amcenneɛ n firɛun, řqebṭan n iɛessasen n arrimet, ijj n Umiṣri, isɣa i-t zeg ufus n Ismaɛiliyyen, inni din t yiwyen.
GEN 39:2 Tuɣa SIDI ak-d Yusuf. Tuɣa netta d aryaz ifřeḥ uca tuɣa-t di taddart n sidis, Amiṣri.
GEN 39:3 Iẓra sidis belli SIDI tuɣa-t akides u belli SIDI issekkwaḍ s ufus nnes marra min tuɣa ittegg.
GEN 39:4 [Ammu i] yufa Yusuf arḍa di tiṭṭawin nnes, isexxar as. Uca igga i-t [Putifar] d ameḥḍay x taddart nnes uca igga as deg ufus nnes marra min ɣares.
GEN 39:5 Zeg wass min di t igga x taddart nnes u x marra min ɣares, ibark SIDI taddart n Umiṣri di ṭṭweɛ n Yusuf. Tuɣa lbaraka n SIDI x marra min ɣares, [am] daxeř n taddart, [am barra] deg iyyar.
GEN 39:6 Marra min ɣares, ijja i-t deg ifassen n Yusuf, ař war issin netta ca ktar mɣir aɣrum i ittett. Tuɣa Yusuf icna deg waddud u udem nnes dayes aẓri.
GEN 39:7 Imsar awarni man aya, aqa tamɣart n sidis tenḍar tiṭṭawin nnes di Yusuf, tenna: “Zid, ṭṭeṣ akidi.”
GEN 39:8 [Maca] netta yugi, inna i temɣart n sides: “Xzar, sidi inu war issin min iǧan di taddart řami da akides ǧiɣ. Marra min ɣares, igga i-t deg ufus inu.
GEN 39:9 Netta war iǧi sennej inu di taddart-a, war d ayi iṭṭif s walu mɣir cem, umi teǧid d tamɣart nnes. Mammec i ɣa ggeɣ ljarima-ya tameqqrant am tanita uca ad ggeɣ ddenb ak-d AREBBI!”
GEN 39:10 Tuɣa tessawař ak-d Yusuf kuř ass, war ɣares ittesři, ḥima ad iṭṭeṣ ṭṭarf nnes u ḥima ad akides yiři.
GEN 39:11 Deg [ijj n] wass temsar, umi dd-yudef ɣar taddart, ḥima ad igg řxedmet nnes, war tuɣi [din] uřa d ijj zeg yeryazen n taddart.
GEN 39:12 [Xenni] tᵉṭṭeff i-t zeg warruḍ nnes, tenna: “Araḥ-dd zzeř akidi!” [Řexdenni] ijja as netta arruḍ nnes deg ufus, yarweř, iffeɣ barra.
GEN 39:13 Umi teẓra belli ijja as arruḍ nnes deg ufus nnes, yarweř ɣar barra,
GEN 39:14 třaɣa i aytbab n taddart, tenna asen: “Xzarem, aqa netta yiwy aneɣ-dd aryaz Aɛibrani, ḥima ad xaneɣ iḍḥec. Yusa-dd ɣari, ḥima akidi iṭṭeṣ uca necc sɣuyeɣ s jjehd.
GEN 39:15 Umi isřa belli ssgeɛɛdeɣ tmijja inu uca sɣuyeɣ, ijja ɣari arruḍ nnes, yarweř, iffeɣ barra.”
GEN 39:16 Uca nettat tegga arruḍ nnes zzates, ař dd ɣa yas sidis ɣar taddart.
GEN 39:17 [Xenni] tessiweř akides s wawařen nni d ijjen, tenna: “Amsexxar Aɛibrani wenni dd-tiwyed ɣarneɣ, yusa-dd ɣari ḥima ad ayi issɛurra.
GEN 39:18 [Umi] ssgeɛɛdeɣ tmijja inu, sɣuyeɣ, ijja arruḍ nnes ɣari uca yarweř barra.”
GEN 39:19 Sides isřa i wawařen inni d as tenna temɣart nnes, tenna: “Ammu i d ayi igga umsexxar nnec!”, uca ixeyyeq aṭṭas.
GEN 39:20 Iṭṭef i-t sidi n Yusuf, igga i-t di řeḥbes, mani tuɣa imeḥbas n ujeǧid. Ammu i iqqim di řeḥbes.
GEN 39:21 Maca SIDI tuɣa-t ak-d Yusuf uca isswiẓẓeḍ ɣares s tmexsiwt nnes icewwaren uca iwca as arḍa nnes di tiṭṭawin n umeqqran n řeḥbes.
GEN 39:22 Uca ameqqran n řeḥbes yarra marra imeḥbas nni tuɣa di řeḥbes sadu ufus n Yusuf. Marra min tuɣa tteggen din tuɣa ittekk x ufus nnes.
GEN 39:23 Ameqqran n řeḥbes war d as iqqim min xef ɣa innehweř zi min tuɣa sadu ufus nnes, minzi SIDI tuɣa ak-d Yusuf. Min ma tuɣa ittegg netta, SIDI issekkwaḍ i-t.
GEN 40:1 Imsar awarni man aya belli awarrad n ujeǧid n Miṣra d uxebbaz dennben ḍidd i siditsen, ajeǧid n Miṣra.
GEN 40:2 Iffugem firɛun x tnayen n imsexxaren icennɛen nnes, x umeqqran n iwarraden u x umeqqran n ixebbazen.
GEN 40:3 Igga i-ten deg uḥeṭṭu di taddart n řqebṭan n iɛessasen n arrimet, di taddart n tɛessast, mani iḥebbes Yusuf.
GEN 40:4 Řqebṭan n iɛessasen n arrimet igga Yusuf d ameḥḍay nsen, uca netta tuɣa ittsexxar xasen. [Ammu] tuɣa aten ussan [d iziraren] di řeḥbes.
GEN 40:5 Urjin tarjit s tnayen idsen nsen, kuř ijjen zzaysen yurja di ǧiřet nni tarjit nnes s řmeɛna nnes, am uwarrad am uxebbaz n ujeǧid n Miṣra, inni tuɣa ittwaḥebbsen di taddart n tɛessast.
GEN 40:6 Uca yusa-dd ɣarsen Yusuf x ṣṣbeḥ, ixzar daysen uca iẓra i-ten ttqellqen.
GEN 40:7 [Řexdenni] isseqsa netta imsexxaren icennɛen n firɛun, inni tuɣa akides di řeḥbes di taddart n sidis, inna: “Maɣar barecnen udmawen nwem ass-a qaɛ ammu?”
GEN 40:8 Nitni nnan: “Aqa nurja tarjit, war da wi tt ɣa ifekken.” Inna asen Yusuf: “Ma war ǧin ca ifessaren zi AREBBI? Iwa, ɛawdem ayi tent řexxu!”
GEN 40:9 [Xenni] iɛawed umeqqran n iwarraden tarjit nnes i Yusuf, inna as: “Necc di tarjit inu ẓriɣ tazayart zzati tbedd.
GEN 40:10 Tazayart [nni] ɣares třata n tseḍwin. [Xmi] tessendiy, ittgeɛɛad nnuwwar nnes u ɣar izekkunen nnes iban-dd řḥebb n uḍiř yiweḍ.
GEN 40:11 Uca řkas n firɛun tuɣa-t ɣari deg ufus inu uca ksiɣ aḍiř nni uca ɛessareɣ t di řkas n firɛun uca sseɛduɣ řkas ɣar ufus n firɛun.”
GEN 40:12 Inna as Yusuf: “D wa d afessar nnes: třata n tiseḍwin, aqa d třata n wussan.
GEN 40:13 Ɛad třata n wussan [xenni] ad ac issgeɛɛed firɛun azeǧif nnec uca ad cek yarr ɣar tsexxart nnec, ad tesseɛdud řkas i firɛun deg ufus nnes, am mammec tuɣa tasɣart nnec zic řami cek tuɣa d awarrad nnes.
GEN 40:14 Maca ɛqeř xafi xmi d ac dd ɣa yas řxar, ttzawageɣ cek ad kidi tegged s tmexsiwt icewwaren uca ejj firɛun ad xafi iɛqeř uca fekk ayi-dd zi taddart-a.
GEN 40:15 Minzi ucaren ayi zi temmurt n Iɛibraniyyen u da war ggiɣ x min xef dayi i ɣa ggen deg weḥfur [n imeḥbas].”
GEN 40:16 [Řami] iẓra umeqqran n ixebbazen belli ifessar as mliḥ, inna i Yusuf: “Uřa d necc ẓriɣ di tarjit inu třata n tsuǧatin s weɣrum d acemřař x uzeǧif inu.
GEN 40:17 Di tsuǧet n sennej tuɣa dayes aṭṭas n macca i firɛun i igga uxebbaz u ijḍaḍ ttᵉtten zi tsuǧet i iǧan x uzeǧif inu.”
GEN 40:18 Yarra-dd [xas] Yusuf, inna: “D wa d afessar nnes. Třata n tsuǧatin d třata n wussan.
GEN 40:19 Ɛad třata n wussan [xenni] ad xak issgeɛɛed firɛun azeǧif nnec [jmiɛ akik] uca ad cek yayeř x ict n tcejjart u ijḍaḍ ad ccen aysum nnec.”
GEN 40:20 Deg wass wiss třata, ass n wexřaq n firɛun, imsar belli issewjed ict n zzardet i marra imsexxaren nnes uca issgeɛɛed azeǧif n umeqqran n iwarraden u azeǧif n umeqqran n ixebbazen tuɣa-t jar imsexxaren nnes.
GEN 40:21 Uca netta yarra ameqqran n iwarraden ɣar řxedmet nnes n uwarrad, ařami wanita iwca [ɛawed] řkas deg ufus n firɛun.
GEN 40:22 [Maca] ameqqran n ixebbazen yuyeř i-t, am mammec d as ifessar Yusuf.
GEN 40:23 Maca ameqqran n iwarraden war ifekkar ca [ɛad] di Yusuf, ittu t.
GEN 41:1 Awarni řami ɛdun tnayen n iseggʷusa yurja firɛun aqa netta zeɛma ibedd x yeɣzar [n Nil].
GEN 41:2 Xzar, geɛɛdent-i-dd sebɛa n tfunasin zeg iɣzar, ṣebḥent i řxezrat u ɛemmarent s weysum, heddant jar weḥtic n uɣanim.
GEN 41:3 U xzar, sebɛa n tfunasin nneɣni geɛɛdent-i-dd awarni asent zeg iɣzar. Nitenti war ḥřint i řxezrat, aqa kkuccḍent uca beddent zzat i tfunasin nneɣni ɣar tma n iɣzar.
GEN 41:4 Tifunasin i war iḥřin i řxeẓrat, tinni ikuccḍen, ṣarḍent sebɛa n tfunasin iṣebḥen i řxezrat, tinni iṣeḥḥen. Uca ifaq-dd firɛun.
GEN 41:5 Iṭṭeṣ [ɛawed] uca yurja twařa nneɣni, u xzar, zeg ict n tseṭṭa geɛɛdent sebɛa n tidrin ccurent, cnant.
GEN 41:6 U xzar, ɣemyent-i-dd sebɛa n tidrin qqusbaren awarni asent, isscemḍ i-tent usemmiḍ acarqi.
GEN 41:7 Sebɛa n tidrin qqusbarent ṣarḍent sebɛa n tidrin iyman d iccuren. Uca ifaq-dd firɛun, u xzar, aqa d ict n terjit.
GEN 41:8 Ɣar ṣṣbeḥ iban-dd belli buḥbeř nnes innehweř uca issekk maḥend ad dd-řaɣan i marra tarwa n tseḥḥart n Miṣra u i marra imiɣisen. Iɛawd asen firɛun tarjit nnes, maca war din tuɣi ḥed izemmar ad [tt] ifessar i firɛun.
GEN 41:9 Issiweř umeqqran n iwarraden ak-d firɛun, inna: “Deg wass-a ad ttwasɛeqřeɣ x ddnub inu.
GEN 41:10 [Umi] iffugem firɛun x imsexxaren nnes, igga ayi di řeḥbes di taddart n řqebṭan n iɛessasen n arrimet, [am] necc [am] umeqqran n ixebbazen.
GEN 41:11 Necc d netta nurja ict n tarjit di ǧiret d ict. Kuř ijj zzayneɣ yurja tarjit nnes s řmeɛna nnes.
GEN 41:12 Tuɣa din akidneɣ ijj n ubřiɣ d Aɛibrani. Tuɣa-t d amsexxar n řqebṭan n iɛessasen n arrimet. Nḥaja as tirja nneɣ uca ifessar aneɣ tent. I kuř ijj [zzayneɣ] ifessar as tarjit nnes.
GEN 41:13 Am mammec tent ifessar, amenni i imsar. Aqa [Firɛun] yarra ayi necc ɣar řxedmet inu u wenneɣni yuyeř i-t.”
GEN 41:14 Issekk firɛun ḥima ad dd-řaɣan x Yusuf uca ssuffɣen t-i-dd deɣya zeg weḥfur [n imeḥbas]. Iḥeff acuwwaf, ibeddeř arruḍ uca ammu i yudef ɣar firɛun.
GEN 41:15 Inna firɛun i Yusuf: “Necc urjiɣ ict n tarjit, war iǧi wi tt ɣa ifessaren. [Maca] aqa sřiɣ xak belli cek, [xmi i ɣa] tesřid i tarjit, tzemmared ad tt tfessared.”
GEN 41:16 Yarra-dd Yusuf x firɛun, inna: “War iǧi ca zzayi, [maca] AREBBI ad dd-yarr x mammec ɣa idweř umeddur n firɛun.”
GEN 41:17 Inna firɛun i Yusuf: “Di tarjit inu ẓriɣ ixef inu beddeɣ x tma n iɣzar.
GEN 41:18 Aqa geɛɛdent-i-dd sebɛa n tfunasin zeg iɣzar, ṣeḥḥent u ṣebḥent i řxezrat, heddant jar weḥtic n uɣanim.
GEN 41:19 Awarni asent sebɛa n tfunasin nneɣni geɛɛdent-i-dd. Tuɣa kkuccḍent u war ḥřint deg wudem, uẓɣent. Ammu war ḥřint, ɛemmarṣ war tent ẓriɣ di temmurt n Miṣra am tekmeř.
GEN 41:20 Tifunasin yuẓɣen, war iḥřin, sarḍent sebɛa n tyenduzin timezwura iṣeḥḥen.
GEN 41:21 [Umi] udfent tina deg uɛeddis nsent, ɛad war issin ḥed, belli aqa udfent deg uɛeddis nsent, aqa qqiment war ḥřint i řxezrat am qbeř. [Xenni] faqeɣ.
GEN 41:22 [Ɛawed] ẓriɣ di tarjit inu, xzar, zeg ict n tseṭṭa ffɣent-i-dd sebɛa n tidrin ccurent u cnant.
GEN 41:23 Xzar, ẓriɣ, geɛɛdent-i-dd sebɛa n tidrin qqusbarent, uẓɣent, isscemḍ i-tent usemmiḍ acarqi.
GEN 41:24 U sebɛa n tidrin yuẓɣen, ṣarḍent sebɛa n tidrin nni icnan. Nniɣ [tarjit] i tarwa n tseḥḥart, maca war din tuɣi ḥed i izemmaren ad ifessar [tarjit-a].”
GEN 41:25 [Xenni] inna Yusuf i firɛun: “Tarjit n firɛun d ict. AREBBI ibeyyen i firɛun min i ɣa yegg Netta.
GEN 41:26 Sebɛa n tfunasin cnant aqa atent d sebɛa n iseggʷusa. Uca tidrin cnant aqa d sebɛa n iseggʷusa. D tarjit d ict.
GEN 41:27 Sebɛa n tfunasin uẓɣent war iḥřin tinni dd-yuřyen awarni asent, aqa d sebɛa n iseggʷusa, u sebɛa n tidrin qqusbarent, tinni isscemḍ usemmiḍ acarqi, aqa atent d sebɛa n iseggʷusa i di ɣa yiři řaẓ.
GEN 41:28 D wa d awař i nniɣ i firɛun. Min ɣa yegg AREBBI, aqa isscen i-t i firɛun.
GEN 41:29 Xzar, di sebɛa n iseggʷusa i dd-igguren ad tiři tyawant tameqqrant x marra tammurt n Miṣra.
GEN 41:30 Awarni asen ad dd-asen sebɛa n iseggʷusa n řaẓ. Di marra tammurt n Miṣra ad ttun marra tyawant uca řaẓ ad iteḥḥa tammurt.
GEN 41:31 Uca tyawant war tᵉttiři tᵉttwassen [ɛad] zi ssibbet n řaẓ i tt-i-dd-iḍfaren, maɣar řḥař ad yiři iqseḥ aṭṭas.
GEN 41:32 Ɛlaḥsab ṭṭbiɛet n tnayen n wudmawen n tarjit n firɛun, aqa tnayen n tseqqar, aqa man aya s minzi yura tt AREBBI nican u AREBBI aqa ad tt yegg deɣya.
GEN 41:33 Ejj firɛun řexxu ad yarzu x ijj n weryaz s řefhamet d tiɣit, maḥend ad t igg x temmurt n Miṣra.
GEN 41:34 Ejj firɛun ad igg [ammu]: ejj i-t ad igg iweqqafen x temmurt, maḥend ad ksin řexmus [n řɣiǧet] n temmurt n Miṣra di sebɛa n iseggʷusa n tyawant.
GEN 41:35 Ejj i-ten ad ssmunen marra řeɛweč deg iseggʷusa iṣebḥen i dd ɣa yasen uca ad xemmřen řḥebb n yirden sadu ufus n firɛun, maḥend ad t xemmřen d macca di tneddam.
GEN 41:36 Ad yiři d řexzen n macca i temmurt i sebɛa n iseggʷusa n řaẓ nni dd ɣa iwḍan x temmurt n Miṣra, ḥima tammurt war tᵉttmetti ca s řaẓ.”
GEN 41:37 Awařen-a banen-dd d lemliḥ i firɛun d marra imsexxaren nnes.
GEN 41:38 [Xenni] inna firɛun i imsexxaren nnes: “Ma izemmar ad ittwaf ca n weryaz am wa i di izeddeɣ Arruḥ n AREBBI?”
GEN 41:39 Uca inna firɛun i Yusuf: “Umi AREBBI immeř ac-dd marra aya, x uya war din yeǧi wenni ɣar teǧa řefhamet d tiɣit am cek.
GEN 41:40 Cek ad tiřid x taddart inu u i wawař nnec ad iṭaɛ řgens inu marra. Mɣir x řɛarc waha ad iřiɣ necc d ameqqran xak.”
GEN 41:41 [Yarni] inna firɛun i Yusuf: “Xzar, ggiɣ cek x marra tammurt n Miṣra.”
GEN 41:42 Uca ikkes firɛun taxadent nnes zeg ufus nnes, igga i-tt deg ufus n Yusuf uca issyarḍ as arruḍ n řeqṭen azdad uca igga as taseddect n wureɣ deg yiri nnes.
GEN 41:43 Issenya i-t di tkarrut wiss tnayen i tuɣa ɣares uca řaɣan [am gguren] zzates: “Qews!” Ammu i t igga x marra tammurt n Miṣra.
GEN 41:44 Inna firɛun i Yusuf: “Necc d firɛun, břa cek uřa d ijj ad igeɛɛed afus nnes niɣ aḍar nnes di marra tammurt n Miṣra.”
GEN 41:45 Iřaɣa firɛun i Yusuf s yisem n Ṣafnat-Faɛniḥ uca iwca as Asnat d tamɣart, tenni d yeǧis n Futi-Faraɛ, akehhan n Un. Uca ijuř Yusuf di temmurt n Miṣra.
GEN 41:46 Tuɣa Yusuf d mmis n třatin n iseggʷusa řami ibedd netta zzat i firɛun, ajeǧid n Miṣra, uca iffeɣ Yusuf zzat i firɛun uca ijuř x marra tammurt n Miṣra.
GEN 41:47 Uca tesseɣmi-dd temmurt di sebɛa n iseggʷusa s tyawant.
GEN 41:48 Issmun marra macca n sebɛa n iseggʷusa [n tyawant], inni tuɣa di temmurt n Miṣra, uca ixemmeř macca di tneddam. Macca n iyyaren i d as dd-innḍen i kuř tandint, ixemmeř i-tt dayes daxeř [di tendint].
GEN 41:49 Yusuf ixemmeř řḥebb n irden aṭṭas, anect n ijdi n řebḥar, ařami war izemmar ad ittwaḥseb, minzi tuɣa-t břa řeḥsab.
GEN 41:50 Qbeř i dd-yusa useggʷas [amezwaru] n řaẓ, mmarenyen-dd ɣar Yusuf tnayen n iḥenjiren, inni d as dd-turuw Asnat, yeǧis n Futi-Faraɛ, akehhan n Un.
GEN 41:51 Isemma Yusuf amenzu Manassa, minzi [inna:] “AREBBI aqa issettu ayi marra tamara inu d marra taddart n baba.”
GEN 41:52 Wiss tnayen isemma i-t Ifrayim, minzi inna: “AREBBI igga ayi s řɣiǧet di temmurt n řeḥṣaret inu.”
GEN 41:53 [Xenni] kemmřen sebɛa n iseggʷusa n ufeyyeḍ [n řɣiǧet] nni ikkin x temmurt n Miṣra,
GEN 41:54 uca bdan ad dd-asen sebɛa n iseggʷusa n řaẓ, am mammec xas issiweř Yusuf. Tuɣa řaẓ di marra timmura, [maca] di marra tammurt n Miṣra tuɣa dayes [ɛad] aɣrum.
GEN 41:55 [Ařami] tuɣa řaẓ di marra tammurt n Miṣra, isɣuy řgens ɣar firɛun x weɣrum. Uca inna firɛun i marra Imiṣriyyen: “Ruḥem ɣar Yusuf, ggem min d awem ɣa yini!”
GEN 41:56 Tuɣa řaẓ izeǧeɛ x marra tammurt uca yarzem Yusuf x marra min tuɣa ixemmeř, uca izzenz i-t i Imiṣriyyen, minzi tuɣa řaẓ idweř imɣar aṭṭas di temmurt n Miṣra.
GEN 41:57 Zi marra timmura usin-dd [iwdan] ɣar Miṣra ɣar Yusuf ḥima ad sɣen, minzi di marra timmura tuɣa řaẓ imɣar aṭṭas.
GEN 42:1 [Řami] iẓra Yaɛqub belli aqa din řḥebb [n yirden] di Miṣra, [xenni] inna i iḥenjiren nnes “Maɣar teqqimem txezzarem ijjen deg wenneɣni?”
GEN 42:2 Inna: “Aqa necc sřiɣ belli din imendi di Miṣra. Ruḥem dinni uca sɣem aneɣ-dd ssenni [řḥebb], ḥima ad neqqim neddar uca war nettmetti ca.”
GEN 42:3 Hwan ɛecra n wawmaten n Yusuf, maḥend ad raḥen ad sɣen imendi zi Miṣra.
GEN 42:4 [Maca] Yaɛqub war issekk Binyamin, umas n Yusuf, ak-d aytmas, minzi inna: “Ḥima war d as ittemsar ca n řḥajjet d taɛeffant.”
GEN 42:5 Jar inni dd-yusin [dinni], usin-dd [ɛawed] ayt n Israil, maḥend ad sɣen [macca], minzi tuɣa din řaẓ di temmurt n Kenɛan.
GEN 42:6 Tuɣa Yusuf d řḥakem x temmurt uca izzenz [imendi] i marra řgens n temmurt. Umi dd-iwḍen aytmas n Yusuf, bendqen as s uɣembub nsen ɣar temmurt.
GEN 42:7 [Umi] iẓra Yusuf aytmas, iɛqeř i-ten, maca igga ixef nnes axmi war ten issin uca issiweř akidsen s řeqsaḥet, inna asen: “Manis dd-tusim?” Nnan: “Zi temmurt n Kenɛan, maḥend ad nseɣ macca.”
GEN 42:8 Yusuf iɛeqř aytmas, maca nitni war t ɛqiřen ca.
GEN 42:9 Ifekkar Yusuf di tirja nni tuɣa xasen yurja, inna asen: “Kenniw d ibergagen i teǧam, tusim-dd, ḥima ad tẓarem mani war tᵉttwaḥḍi temmurt.”
GEN 42:10 Arrin-dd xas: “Lla, a sidi inu, ɛad imsexxaren nnec usin-dd, maḥend ad sɣen macca.
GEN 42:11 Marra neccin aqa aneɣ d tarwa n ijj n weryaz. Aqa aneɣ d [iryazen] d imtiqqan, imsexxaren nnec war ǧin ca d ibergagen.”
GEN 42:12 Netta yarra-dd xasen: “Lla, kenniw tusim-dd maḥend ad tẓarem tuɛɛaryent n temmurt.”
GEN 42:13 Nnan nitni: “Neccin d imsexxaren nnec, aqa aneɣ di tenɛac n wawmaten, tarwa n ijj n weryaz di temmurt n Kenɛan. Aqa amaẓuẓ aqa-t ak-d babatneɣ u wenneɣni war iǧi [ɛad].”
GEN 42:14 Inna asen Yusuf: “Ma war d awem t nniɣ umi nniɣ: ‘Aqa kenniw d ibergagen!’
GEN 42:15 S uya tᵉttwaqeǧbem. S tidett am iddar firɛun, kenniw war dd-tteffɣem ssa, mɣir xmi dd ɣa yas umatwem amaẓuẓ danita!
GEN 42:16 Sekkem ijj n zzaywem, maḥend ad dd-yawi umatwem. [Xenni] kenniw ad tᵉttwaḥebbsem uca awařen nwem ad ttwaqeǧben, ma daywem řaman. Mařa lla, s tidett am iddar firɛun, aqa kenniw d ibergagen!”
GEN 42:17 Uca igga i-ten třata n wussan di řeḥbes.
GEN 42:18 Deg wass wiss třata inna asen Yusuf: “Ggem aya, ḥima ad teqqimem teddarem, necc tteggʷdeɣ AREBBI.
GEN 42:19 Mařa kenniw d iryazen d imtiqqan, jjem [xenni] ijj n umatwem ad iqqim icarf di taddart mani tᵉttwaḥebbsem kenniw, [xenni] ruḥem, ksim imendi i řaẓ n aytbab n taddart nwem.
GEN 42:20 Awyem-dd [xenni] umatwem, amaẓuẓ, maḥend ad ttwaqeǧben wawařen nwem, war tᵉttmettim ca.” Uca nitni ggin amenni.
GEN 42:21 Nnan i wayawya: “S tidett aqa ittxeṣṣa aneɣ ad dd-narr ddeyyet n umatneɣ, aqa neẓra řḥeṣran n řeɛmar nnes umi d aneɣ ittar aḥinni, maca war d as nesři ca! X uya dd-yusa řḥeṣran-a xaneɣ.”
GEN 42:22 Yarra-dd xasen Rubin, inna: “Ma war d awem t nniɣ, umi nniɣ: ‘War xeṭṭim ca ak-d uḥenjir!’, maca kenniw war tesřim ca. Xzar, idammen nnes ttwattaren [řexxu]!”
GEN 42:23 Nitni war ssinen belli ifhem asen Yusuf, minzi tuɣa aturjman jar asen.
GEN 42:24 Inneqřeb xasen uca isɣuy. [Awarni as] inneqřeb-dd ɛawed ɣarsen, issiweř akidsen, iksi zzaysen Cimɛun uca iḥebbes i-t zzat i tiṭṭawin nsen.
GEN 42:25 Yumur Yusuf maḥend ad ccuren tixuncay nsen s imendi u ad ggen [tmenyat n] nnuqart di kuř ict n txancet nsen uca wcin asen macca i webrid. U ammu i kidsen ggin.
GEN 42:26 Ssarbun imendi nsen x yeɣyař nsen uca ffɣen ssenni.
GEN 42:27 [Umi] yarzem ijjen zzaysen taxancet nnes, ḥima ad issecc aɣyuř nnes ɣar mani ɣa ssensen, iẓra nnuqart nnes deg arzam n uqemmum n txancet nnes.
GEN 42:28 Inna i yaytmas: “Nnuqart inu tedweř ayi-dd. Xzar, aqa-tt da di txancet inu!” Řexdenni ibedd asen wuř, arjijen uca nnan i wayawya: “Manawya i d aneɣ ittegg AREBBI?”
GEN 42:29 Uca reḥḥgen ɣar babatsen Yaɛqub di temmurt n Kenɛan uca ɛawden as marra min xasen ikkin, nnan:
GEN 42:30 “Aryaz, bab n temmurt, issiweř akidneɣ s řeqsaḥet, iḥesb aneɣ d ibergagen n temmurt.
GEN 42:31 [Maca] nenna as: ‘Neccin d iryazen d imtiqqan, [ɛemmarṣ] war neǧi d ibergagen.
GEN 42:32 Aqa aneɣ di tenɛac n wawmaten, iḥenjiren n babatneɣ. Ijjen war iqqim, amaẓuẓ aqa-t ass-a ak-d babatneɣ di temmurt n Kenɛan.’
GEN 42:33 U aryaz nni, bab n temmurt, inna aneɣ: ‘S uya ad ssneɣ, ma aqa kenniw d imtiqqan. Ad kidi tejjem ijjen zeg aytmatwem uca ad teksim [macca] i řaẓ nni din ɣar aytbab n taddart nwem, xenni ffɣem.
GEN 42:34 Awyem-dd [da] umatwem, amaẓuẓ, [xenni] ad ssneɣ belli war teǧim d ibergagen, maca d imtiqqan uca ad awem dd-arxuɣ i wamatwem nwem uca ad traḥem ad tjuřem di temmurt.’”
GEN 42:35 [Umi] ssexwan tixuncay nsen, ḥekkaren belli di txancet n kuř ijjen, aqa dayes tacyart s nnuqart nnes. Ẓrin nitni d babatsen ticyar s nnuqart nsen uca tudef i-ten tiggʷudi.
GEN 42:36 Inna asen babatsen Yaɛqub: “Aqa tḥarrmem ayi [zeg iḥenjiren inu]! Yusuf war dd-iḍhar [ɛad] uřa d Cimɛun, uca [řexxu] tᵉttexsem ad tnedhem Binyamin. Marra man aya ittemsaren di řeɛkes inu!”
GEN 42:37 [Xenni] issiweř Rubin ɣar babas, inna: “Ad tenɣed tnayen n iḥenjiren inu, mařa war d ac t-i-dd-arriɣ. Ewc ayi t deg ufus inu, necc aqa ad ac t-i-dd-arreɣ!”
GEN 42:38 [Maca] netta inna as: “Mmi war ittriḥ ca akidwem, minzi umas immut u netta weḥḥdes i d ayi iqqimen. Mařa iřqef i-t ca n řɣar deg webrid nni i ɣa tekkem, ad tessehwam ccib inu s wecḍan ɣar řaxart.”
GEN 43:1 [Maca] řaẓ tuɣa imɣar aṭṭas di temmurt.
GEN 43:2 [Řami] kemmřen ccin řḥebb [n yirden] nni kidsen dd-iwyen zi Miṣra, inna asen babatsen: “Dewřem-dd ɛawed uca sɣem aneɣ-dd cwayt n macca.”
GEN 43:3 [Xenni] issiweř Yahuda, inna: “Aqa aryaz nni inna aneɣ s urekkez: “War tẓarrem [ɛad] udem inu, mɣir mařa tiwyem-dd umatwem akidwem.”
GEN 43:4 Mařa tessekked umatneɣ akidneɣ, ad nraḥ din uca ad ac dd-nseɣ macca,
GEN 43:5 maca mařa war t tᵉssekkid [akidneɣ], xenni war dinni nettraḥ, minzi aryaz nni inna aneɣ: ‘War tẓarrem [ɛad] udem inu mɣir mařa yusa-dd umatwem akidwem.’”
GEN 43:6 Inna Israil: “Maɣar d ayi teggim řɣar uca tennam i weryaz nni belli aqa ɣarwem ɛad umatwem nneɣni?”
GEN 43:7 Nitni nnan: “Aryaz nni isseqsa xaneɣ nican, u x temmurt mani nexřeq, inna: ‘Ma iddar ɛad babatwem? Ma ɣarwem ca n umatwem nneɣni?’ [Xenni] nɛawed as [t]. Ma nzemmar zeg wawařen-a ad dd-nejbed illa ad nessen zeɛma ad yini: ‘Awyem-dd umatwem?’”
GEN 43:8 Uca inna Yahuda i babas Israil: “Sekk akidi aḥenjir uca ad nekkar ad nraḥ, ḥima ad neddar u war nᵉttmetti ca neccin d cek d tarwa nneɣ.
GEN 43:9 Necc ad as iřiɣ d aḍman u zeg ufus inu ad t tᵉttared ɛawed. Mařa war d ac t-i-dd-arriɣ, ad t ssbeddeɣ zzatek, ad yiři xḍiɣ akidek i řebda!
GEN 43:10 Meɛlik war neqqim nettraja [aṭṭas], tiři řexxu nedweř-dd tnayen n twařawin.”
GEN 43:11 [Uca] yarra-dd xasen Israil, babatsen: “Mařa ammu i yeǧa s tidett, ggem ammu uca ksim min icnan aṭṭas n temmurt di txuncay nwem, hwam-dd maḥend ad t tiwyem d arriɣalu i weryaz nni: cwayt n balsam d cwayt n tamment, řeɛṭur d mirru d teɣyact n pistac d ǧuz.
GEN 43:12 Ksim tnayen n tseqqar n [tenɛacin n] nnuqart akidwem uca arrem s ufus nwem nnuqart i dd-iɛeqben di txuncay nwem. Ad taɣ tuɣa d ca n lɣalaṭ.
GEN 43:13 Awyem-dd ɛawed umatwem akidwem, kkarem, ɛeqbem ɣar weryaz nni.
GEN 43:14 Uca aqa Arebbi, Amzemmar x kuřci, ad awem iwc arreḥmet zzat i wudem n weryaz nni uca ad yarxu i umatwem nneɣni d Binyamin. U min d ayi iqqimen necc, mařa ttwaḥarrmeɣ zeg iḥenjiren inu, aqa ad zzaysen ttwaḥarrmeɣ!”
GEN 43:15 [Xenni] iwyen iryazen arriɣalu uca ksin deg ufus nsen tnayen n tseqqar n [tmenyat] n nnuqart uřa d Binyamin uca kkaren, hwan ɣar Miṣra uca bedden zzat i wudem n Yusuf.
GEN 43:16 [Umi] iẓra Yusuf Binyamin akidsen, inna i wenni [tuɣa] x taddart nnes: “Sidef iryazen-a ɣar taddart, tɣarṣed [i ca] min iǧan i tɣarṣt, sewjed i-tt, minzi iryazen-a ad kidi ccen ɣar wezyen n wass.”
GEN 43:17 Igga weryaz am mammec d as inna Yusuf uca yiwi iryazen ɣar taddart n Yusuf.
GEN 43:18 [Xenni] dewřen yeryazen nni ggʷeden aṭṭas, umi ten ssidfen di taddart n Yusuf uca nitni nnan: “X [tmenyat n] nnuqart i d aneɣ dd-idewřen di txuncay nneɣ twařa tamezwarut iwyen aneɣ-dd da ḥima [xenni ɛawed] ad xaneɣ ɛefsen uca ad xaneɣ ɛeddan, [xenni] ad aneɣ ksin d isemɣan ak-d yeɣyař nneɣ.”
GEN 43:19 Qarrben-dd ɣar weryaz nni igga Yusuf x taddart uca ssiwřen akides ɣar wadaf n taddart,
GEN 43:20 nnan: “A sidi inu, neccin aqa nican nehwa-dd d amezwar, maḥend ad nseɣ macca.
GEN 43:21 Imsar umi dd-niweḍ ɣar řemraḥ uca narzem tixuncay nneɣ, neẓra nnuqart n kuř ijj ɣar werzam n uqemmum n txancet nnes, nnuqart nneɣ s řmizan nnes nican. Aqa narra i-tt-i-dd s ifassen nneɣ.
GEN 43:22 Ɛawed niwi-dd deg ifassen nneɣ nnuqart nneɣni, ḥima ad nseɣ macca. Neccin war nessin wi iggin nnuqart di txuncay nneɣ.”
GEN 43:23 Yarra-dd [xasen]: “Sřam xawem, war tteggʷedem ca! AREBBI nwem d AREBBI n babatwem iwca awem ict n txabect di txuncay nwem. Aqa nnuqart nwem ṭṭfeɣ tt.” Uca issuffeɣ-dd ɣarsen Cimɛun.
GEN 43:24 [Xenni] issidef weryaz iryazen nni ɣar taddart n Yusuf, iwca [asen] aman uca sirden iḍaren nsen. Iwca [asen] ɛawed řeɛřef i yeɣyař nsen.
GEN 43:25 U nitni sswejden arriɣalu i Yusuf, wenni igguren ad dd-yas ɣar wezyen n wass, minzi nitni sřin aqa ad ccen dinni.
GEN 43:26 [Řami dd-] yudef Yusuf ɣar taddart, wcin as-dd di taddart arriɣalu nni dd-iwyen akidsen, uca bendqen as ɣar temmurt.
GEN 43:27 Isseqsa ten x mammec ǧan uca inna: “Mammec iǧa babatwem awessar i xef tessiwřem? Ma aqa ɛad iddar?”
GEN 43:28 Nitni arrin: “Mlih i yeǧa umsexxar nnec, babatneɣ, netta ɛad iddar.” Uḍaren nitni uca netta ibendeq.
GEN 43:29 [Řami] netta issgeɛɛed tiṭṭawin nnes uca iẓra Binyamin, umas, mmis n yemmas, inna: “Ma d wa d umatwem, amaẓuẓ, min xef d ayi tessiwřem?” [Xenni] inna: “Ad xak iḥinn AREBBI, a mmi!”
GEN 43:30 Yusuf iffeɣ xenni deɣya, minzi taḥnunect nnes x umas tuɣa temɣar. Yarzu x mani ɣa iru uca yudef ɣar ijj n wexxam uca iru din.
GEN 43:31 Issird udem nnes uca iffeɣ-dd ɣar barra, iṭṭef deg ixef nnes, inna: “Qedmem-dd macca.”
GEN 43:32 Nitni sswejden as i netta weḥḥdes u i nitni weḥḥedsen uřa i Imiṣriyyen inni akides ccin weḥḥedsen, minzi Imiṣriyyen war zemmaren ad ccen aɣrum ak-d Iɛibraniyyen, minzi d man aya d jjɛifect ɣar Imiṣriyyen.
GEN 43:33 Uca nitni qqimen zzat i wudem nnes: amenzu [deg wemcan nnes] ɛlaḥsab tasɣart n tmenzut nnes uca amaẓuẓ [deg wemcan nnes] ɛlaḥsab temẓi nnes. Tuɣa iryazen ttbehaten, xezzaren ijjen deg wenneɣni.
GEN 43:34 Uca netta iqeddem asen-dd zi min [tuɣa iǧan] zzates, maca tasɣart n Binyamin tuɣa-tt xemsa n tseqqar ktar zi tseqqar n marra idsen. Uca swin nitni, ssenni dewřen farḥen akides.
GEN 44:1 Issekk Yusuf ɣar [umsexxar] nni [tuɣa] x taddart nnes, inna as: “Ɛemmar tixuncay n yeryazen nni s macca, marra min zemmaren ad ksin. Egg nnuqart n kuř ijj deg warzam n uqemmum n txancet nnes.
GEN 44:2 Sars řkas inu, řkas n nnuqart, deg warzam n uqemmum n txancet n umaẓuẓ ak-d [tmenyat] n nnuqart n řḥebb nnes [n yirden].” Uca igga am mammec d as inna Yusuf.
GEN 44:3 Ɣar ṣṣbeḥ umi dd-yeffu řhař, jjin iryazen ad uyuren, nitni ak-d yeɣyař nsen.
GEN 44:4 Umi ffɣen nitni zi tendint, tuɣa [ɛad] war ggʷijen ca, inna Yusuf i wenni [tuɣa] x taddart nnes: “Kkar, ḍfar iryazen nni uca, xmi xasen ɣa teɛdud, ini asen: ‘Maɣar dd-tarram řxar s řɣar?
GEN 44:5 Ma war iǧi d wa [d řkas] i zi isess sidi inu u [ma war iǧi] s wa i zi ɣa ikacef min ɣa imsaren tiwecca? Aqa teggim řɣar umi teggim amya.’”
GEN 44:6 [Am] ten iɛdu, inna asen awařen-a simant nsen.
GEN 44:7 Nitni arrin-dd xas: “Mayemmi iqqar sidi inu awařen-a? Iggʷej x imsexxaren nnec ad ggen man aya.
GEN 44:8 Xzar, nnuqart i nufa deg warzam n uqemmum n txuncay nneɣ, aqa narr ac tt-i-dd zi temmurt n Kenɛan. Mammec [ɛad] i ɣa negg ad nacar nnuqart niɣ ureɣ zi taddart n sidi nnec?
GEN 44:9 Wi zeg imsexxaren nnec i ɣar i ɣa ittwaf [řkas], ad immet, uca neccin ɛawed ad niři d isemɣan n sidi inu!”
GEN 44:10 Netta inna: “Xenni řexxu ad yiři am mammec tennam kenniw. Wenni ɣar t ɣa naf, d netta ad yiři d ismeɣ inu, maca kenniw ad tiřim d ifurra.”
GEN 44:11 Uca kuř ijj zzaysen iqeǧeq ad issars taxancet nnes di temmurt uca kuř ijj yarzem taxancet.
GEN 44:12 Uca netta ifettec i-tent, ibda zeg umeqqran, ikemmeř zeg umeẓyan, uca ufin řkas di txancet n Binyamin.
GEN 44:13 [Xenni] carrgen arruḍ nsen, uca kuř ijj issarbu [ɛawed] x weɣyuř nnes uca ɛeqben nitni ɣar tendint.
GEN 44:14 Uca yiweḍ Yahuda ak-d aytmas ɣar taddart n Yusuf, wenni tuɣa din ɛad, uca wḍan zzates ɣar temmurt.
GEN 44:15 Inna asen Yusuf: “Mana cɣeř-a i teggim? Ma war tefhimem ca belli ijj n weryaz am necc, iggur ad xas ikacef nican?”
GEN 44:16 Inna Yahuda: “Min ɣa nini i sidi inu d mammec i ɣa nessiweř niɣ s min zi ɣa nsegged ixef nneɣ? AREBBI iqeǧeb ddenb n imsexxaren nnec, xzar, neccin d imsexxaren n sidi inu, neccin d wi ɣar ufin řkas.”
GEN 44:17 [Maca] netta yarra: “Iggʷej xafi ad ggeɣ aya! Aryaz nni ɣar ufin řkas, netta ad yiři d ismeɣ inu, [maca] kenniw ruḥem di řehna ɣar babatwem.”
GEN 44:18 [Xenni] yiweḍ-dd Yahuda ɣares, inna: “[A] sidi inu, ejj ad issiweř umsexxar nnec ijj n wawař deg umezzuɣ n sidi inu, war yareqq uxeyyeq nnec x umsexxar nnec, minzi aqa cek am firɛun.
GEN 44:19 Sidi inu isseqsa imsexxaren nnes, inna: ‘Ma ɣarwem [ɛad] babatwem niɣ tawmat?’
GEN 44:20 Uca neccin narra x sidi inu: ‘Aqa ɣarneɣ babatneɣ d awessar d yijj n uḥenjir, [wenni d as dd-ittwaxeřqen] x tewsar nnes, d amaẓuẓ ɛad. Umas immut, netta waha i iqqimen [zeg iḥenjiren] n yemmas, u babas ittexs i-t.’
GEN 44:21 [Xas uca] tennid cek i imsexxaren nnec: ‘Awyem t-i-dd [da] ɣari, ḥima ad t ẓareɣ s tiṭṭawin inu.’
GEN 44:22 Uca neccin nenna i sidi inu: ‘War izemmar uḥenjir ad yejj babas, minzi mařa ijja i-t, babas ad immet.’
GEN 44:23 [Xenni] tennid i imsexxaren nnec: ‘Mařa umatwem amaẓuẓ war dd-yusi akidwem, war tẓarrem ɛad udem inu.’
GEN 44:24 Řami ngeɛɛed ɣar baba, amsexxar nnec, nesseɛdu as awařen n sidi inu.
GEN 44:25 Uca babatneɣ inna: ‘Ɛeqbem ɛawed maḥend ad tesɣem cwayt n macca i neccin.’
GEN 44:26 [Xenni] narra-dd: ‘War nzemmar ad nraḥ. [Maca] mařa umatneɣ, amaẓuẓ, iruḥ akidneɣ, ad nraḥ, minzi war nzemmar ad nẓar udem n weryaz nni, mɣir mařa aqa akidneɣ umatneɣ amaẓuẓ.’
GEN 44:27 [Xenni] inna aneɣ umsexxar nnec, babatneɣ: ‘Kenniw tessnem belli tnayen [n iḥenjiren] i d ayi dd-turuw temɣart inu.
GEN 44:28 Iffeɣ ijjen zi ɣari uca nniɣ: Aqa s tidett ittwabetteq! U ař řexxu ɛad war t ẓriɣ.
GEN 44:29 Mařa ɛawed tekksem ayi wa uca imsar ca n řɣar, ad tessehwam ccib inu s wecḍan ɣar řaxart!’
GEN 44:30 Řexxu [xenni], mařa ruḥeɣ necc ɣar umsexxar nnec, baba, uca aḥenjir war kidi iǧi - řeɛmar nnes iřṣeq ɣar řeɛmar n [babas] -
GEN 44:31 aqa ad immet xmi ɣa iẓar aḥenjir war iǧi, uca imsexxaren nnec ad ssehwan ccib n umsexxar nnec, babatneɣ, s wecḍan ɣar řaxart.
GEN 44:32 Aqa zeɛma amsexxar nnec d aḍman i uḥenjir-a ɣar baba umi inna: ‘Mařa war d ac t-i-dd-arriɣ, řexdenni necc ad iřiɣ d amednub i baba i řebda!’
GEN 44:33 Iwa řexxu, ejj amsexxar nnec ad iqqim deg wemcan n uḥenjir-a am yismeɣ ɣar sidi inu, uca ejj aḥenjir ad iraḥ ak-d aytmas!
GEN 44:34 Maɣar mammec ɣa ggeɣ ad geɛɛdeɣ ɣar baba, břa aḥenjir[-a] akidi? Mammec i ɣa ẓareɣ řemḥayen i dd ɣa iwḍan x baba?”
GEN 45:1 [Xenni] war izemmar [ɛad] Yusuf ad iṭṭef ixef nnes zzat i yinni akides marra uca iřaɣa: “Suffɣem marra inni akidi [da]!” War iqqim ḥed akides řami isscen Yusuf i yaytmas min iɛna.
GEN 45:2 [Řexdenni] yarxu tmijja nnes s iɣuyyan, [ařami d as] sřin Imiṣriyyen, uca uřa d taddart n firɛun tesřa [aya].
GEN 45:3 Inna Yusuf i yaytmas: “Necc d Yusuf! Ma iddar ɛad baba?” Aytmas war zemmaren ad xas dd-arren, minzi tuɣa ggʷeden zzayes.
GEN 45:4 Inna Yusuf i yaytmas: “Qarrbem-dd řexxu ɣari!” Uca nitni qarrben [ɣares]. Inna xenni: “Necc d Yusuf umatwem, wenni tezzenzem i Miṣra.
GEN 45:5 Řexxu, war kessim s wemnus u war t ttejjim ad yiři d axeyyeq di tiṭṭawin nwem umi d ayi tezzenzem danita [i Miṣra], aqa AREBBI issekk ayi-dd, maḥend ad [kenniw] jjeɣ teddarem.
GEN 45:6 Aqa řexxu [ɛad] tnayen n iseggʷusa n řaẓ di temmurt uca qqim ɛad xemsa n iseggʷusa war daysen ittiři tyarza niɣ tameyra.
GEN 45:7 [Maca] AREBBI issekk ayi-dd zzatwem, ḥima ad awem ggeɣ min iqqimen x temmurt u ḥima ad ḥḍiɣ tudart nwem i yijj n usenjem imɣar.
GEN 45:8 [Xenni] řexxu, kenniw war d ayi dd-tessekkem ca da, maca AREBBI d wenni d ayi iggin d babas i firɛun d sidi x marra taddart nnes d řḥakem x marra tammurt n Miṣra.
GEN 45:9 Qeǧqem deɣya, sgeɛɛdem ɣar baba, inim as: ‘Ammu i iqqar mmic Yusuf: AREBBI igga ayi d sidi n marra Miṣra. Araḥ-dd ɣari, war tteɛgiz.
GEN 45:10 Ad tzedɣed di temmurt n Jucan, ad tiřid zzati, cek d iḥenjiren nnec, d iḥenjiren n iḥenjiren nnec, d wuǧi d ifunasen d tfunasin uřa d marra min ɣarek.
GEN 45:11 Ad ac ggeɣ arzeq din, minzi [ad dd-asen] ɛad xemsa n iseggʷusa n řaẓ, ḥima war tᵉtteḍɛifed, cek [lla], taddart nnec [lla], uřa d marra min ɣarek [lla]!
GEN 45:12 Xzar, tiṭṭawin nwem ẓrint, uřa d tiṭṭawin n uma Binyamin, aqa d necc i kidwem issawařen.
GEN 45:13 Ɛeřmem i baba x marra aɛuǧi inu di Miṣra u x marra min teẓrim. Qeǧqem deɣya, tiwyem-dd baba da.”
GEN 45:14 Uca ingez x yiri n Binyamin umas, iru, uca Binyamin iru x yiri nnes.
GEN 45:15 Issudem marra aytmas, iru xasen. Awarni man aya ssiwřen akides aytmas.
GEN 45:16 [Řami] tesřa taddart n firɛun řexbar[-a], nnan: “Aytmas n Yusuf usin-dd!”. Tuɣa-t d řexbar aṣebḥan di tiṭṭawin n firɛun d imsexxaren nnes.
GEN 45:17 Inna firɛun i Yusuf: “Ini i aytmac: ‘Ggem aya: sarbum zwayeř nwem uca geɛɛdem, ruḥem ɣar temmurt n Kenɛan.
GEN 45:18 Ksim-dd babatwem d raǧ nwem, tusim-dd ɣari. Aqa ad awem wceɣ lemliḥ n temmurt n Miṣra uca ad teccem zi min icnan n temmurt.
GEN 45:19 Aqa ttwaggent tiweṣṣa di ṭṭweɛ nnek. Ggem aya: Ksim zi temmurt n Miṣra ikarruten i iḥenjiren nwem u i temɣarin nwem, awyem-dd [zzayes] babatwem uca asem-dd [da].
GEN 45:20 War ttejjim tiṭṭawin nwem ad ssḥissfent i řqecc nwem, minzi lemliḥ n temmurt n Miṣra ad yiři nwem.’”
GEN 45:21 Uca ammu i ggin ayt n Israil. Iwca asen Yusuf ikarruten x řumur n firɛun uca iwca asen [ɛawed] macca i webrid.
GEN 45:22 Iwca i kuř ijj zzaysen weḥḥdes arruḍ n jdid, maca i Binyamin iwca as teřt-mya n [uqiyyat n] nnuqart d xemsa n warruḍ d jdid.
GEN 45:23 U ammu [ɛawed] issekk i babas ɛecra n yeɣyař ccuren s min ifarzen n Miṣra u ɛecra n teɣyař ccurent s imendi d weɣrum d macca i babas [umi ɣa yiři netta] deg webrid.
GEN 45:24 Iqebbeḍ aytmas uca ruḥen. Inna asen netta: “War ttmenɣim ca deg webrid.”
GEN 45:25 Geɛɛden zi Miṣra, iwḍen ɣar temmurt n Kenɛan ɣar Yaɛqub, babatsen.
GEN 45:26 Wcin as řexbar, nnan: “Yusuf aqa iddar ɛad, wah, aqa-t d řḥakem n marra tammurt n Miṣra!” [Xenni] isxef wuř nnes, minzi war ten yumin ca.
GEN 45:27 Umi d as ɛawden marra awařen n Yusuf inni d asen inna u [řami] iẓra ikarruten inni dd-issekk Yusuf ḥima ad t awyen, iɛqeb-dd buḥbeř n babatsen Yaɛqub.
GEN 45:28 Uca inna Israil: “Kfa! Yusuf mmi aqa iddar! Ad raḥeɣ uca ad t ẓarɣ qbeř i ɣa mmteɣ!”
GEN 46:1 Ifsi Israil iqiḍan nnes [ssenni], [yuyur] s marra min ɣares uca yiweḍ ɣar Bi’r-Sebɛa. Iqeddem [din] tiɣarṣa i AREBBI n babas Isḥaq.
GEN 46:2 Uca issiweř AREBBI ak-d Israil di iweḥḥan di ǧiřet, inna: “Yaɛqub, Yaɛqub!” uca inna netta: “Aqa ayi da!”
GEN 46:3 [Xenni] inna: “Necc d Arebbi, AREBBI n babac. War tteggʷed, maḥend ad tehwid ɣar Miṣra, minzi Necc ad cek ggeɣ din d ijj n řgens imɣar.
GEN 46:4 Ad kidek hwiɣ ɣar Miṣra uca Necc ad cek ssgeɛɛdeɣ [ɛawed] u Yusuf ad xak issars ifassen nnes x tiṭṭawin nnec.”
GEN 46:5 Ikkar Yaɛqub, iffeɣ zi Bi’r-Sebɛa. Ksin ayt n Israil babatsen Yaɛqub d iḥenjiren nsen d temɣarin nsen deg ikarruten nni dd-issekk firɛun maḥend ad t yawi.
GEN 46:6 Ksin řebhayem nsen d wagřa i yarebḥen di temmurt n Kenɛan uca iwḍen ɣar Miṣra, Yaɛqub d marra iḥenjiren nnes akides:
GEN 46:7 iḥenjiren nnes d iḥenjiren n iḥenjiren nnes [jmiɛ] akides, uřa d yessis d yessitsen n iḥenjiren nnes, aqa yiwi akides marra tarwa nnes ɣar Miṣra.
GEN 46:8 Ina d ismawen n ayt n Israil, inni yudfen ɣar Miṣra: Yaɛqub d iḥenjiren nnes. Amenzu n Yaɛqub: Rubin.
GEN 46:9 Tarwa n Rubin: Ḥanuk d Fallu d Ḥaṣrun d Karmi.
GEN 46:10 Tarwa n Cimɛun: Yamuyil d Yamin d Uhad d Yakin d Ṣuḥar d Cawul, mmis n [temɣart] Takenɛanit.
GEN 46:11 Tarwa n Lawi: Jarcun d Qahat d Marari.
GEN 46:12 Tarwa n Yahuda: Ɛir d Unan d Cayla d Fariṣ d Zaraḥ. Maca Ɛir d Unan mmuten di temmurt n Kenɛan. Tarwa n Fariṣ tuɣa aten Ḥaṣrun d Ḥamul.
GEN 46:13 Tarwa n Issakar: Tulaɛ d Fawwa d Yub d Cimrun.
GEN 46:14 Tarwa n Zabulun: Sarad d Ilun d Yaḥliyil.
GEN 46:15 Ina tuɣa aten d iḥenjiren n Liya inni d as dd-turuw i Yaɛqub di Fadan-Aram, uca [ɛawed] yeǧis Dina. Marra řeɛmur n iḥenjiren nnes d tḥenjirin tuɣa aten di třata u-třatin.
GEN 46:16 Tarwa n Jad: Ṣifyun d Ḥajji d Cuni d Aṣbun d Ɛiri d Arudi d Arwili.
GEN 46:17 Iḥenjiren n Acir: Yimna d Yiswi d Bariɛa d učmatsen Caraḥ. D iḥenjiren n Bariɛa: Ḥabir d Malkiyil.
GEN 46:18 Ina tuɣa aten d iḥenjiren n Zilpa tenni iwca Laban i yeǧis Liya. Nettat turuw-dd ina i Yaɛqub, ina seṭṭac d arruḥ.
GEN 46:19 Tarwa n Raḥil, tamɣart n Yaɛqub: Yusuf d Binyamin.
GEN 46:20 Ttwaxeřqen-dd i Yusuf di temmurt n Miṣra Manassa d Ifrayim, inni d as dd-turuw Asnat, yeǧis n Fuṭi-Faraɛ, akehhan n Un.
GEN 46:21 Tarwa n Binyamin: Bilaɛ d Bakir d Acbil d Jira d Naɛman d Iḥi d Ruc d Muffim d Ḥuffim d Ard.
GEN 46:22 Ina tuɣa aten d iḥenjiren n Raḥil, inni dd-ittwawarwen i Yaɛqub, marra arbeɛṭac d arruḥ.
GEN 46:23 Tarwa n Dan: [mɣir] Ḥucim.
GEN 46:24 Tarwa n Naftali: Yaḥaṣwil d Juni d Yiṣru d Cillim.
GEN 46:25 Ina tuɣa aten d iḥenjiren n Bilha, tenni i d as iwca Laban i Raḥil yeǧis. Turuw as-dd ina i Yaɛqub, ina marra [tuɣa aten] sebɛa d arruḥ.
GEN 46:26 Marra řeɛmur nni dd-yusin ɣar Miṣra ak-d Yaɛqub, inni dd-iffɣen zeg uɣezdis nnes, břa timɣarin n iḥenjiren n Yaɛqub, ina marra tuɣa aten di setta u-settin řeɛmur.
GEN 46:27 Tarwa n Yusuf inni d as dd-ittwaxeřqen di Miṣra, aqa tnayen n řeɛmur. Marra řeɛmur n taddart n Yaɛqub nni dd-yusin ɣar Miṣra, [tuɣa aten] di sebɛin.
GEN 46:28 Uca netta issekk Yahuda zzates ɣar Yusuf, ḥima ad isscen abrid zzates ɣar Jucan uca iwḍen ɣar temmurt n Jucan.
GEN 46:29 Indeh Yusuf [ɛawed] akarru nnes uca igeɛɛed ɣar Jucan, maḥend ad iřqa Israil, babas. Umi d as immeř ixef nnes, ingez as x yiri, iqqim ittru x yiri nnes aṭṭas.
GEN 46:30 Inna Israil i Yusuf: “Řexxu zemmareɣ necc ad mmteɣ, řexxu umi ẓriɣ aɣembub nnec, zeɛma aqa ɛad teddared!”
GEN 46:31 [Xenni] inna Yusuf i yaytmas u i [aytbab n] taddart n babas: “Ad geɛɛdeɣ ad xebbareɣ firɛun, ad iniɣ: ‘Aytma d taddart n baba, inni iǧan di temmurt n Kenɛan, aqa usin-dd ɣari.
GEN 46:32 Iryazen d imeksawen n wuǧi, tuɣa ceɣřen ixef nsen ak d řebhayem. Aqa iwyen-dd uǧi nsen d ifunasen d tfunasin nsen d marra min ɣarsen.’
GEN 46:33 Mařa imsar ad awem dd-iřaɣa firɛun uca ad awem yini: ‘Min teɛna řxedmet i tᵉtteggem?’,
GEN 46:34 ad tinim: ‘Imsexxaren nnec d iryazen inni iceɣřen ak-d řebhayem zi temẓi nsen ař i řexxu, neccin uřa d řejdud nneɣ!’, ḥima ad ɣarwem yiři ttesriḥ maḥend ad tzedɣem di temmurt n Jucan, minzi kuř ameksaw n wuǧi, aqa-t d jjɛifect i Imiṣriyyen.”
GEN 47:1 [Řami] dd-yusa Yusuf, ixebbar firɛun, inna as: “Baba d aytma d wuǧi nsen d ifunasen d tfunasin nsen d marra min ɣarsen, aqa usin-dd zi temmurt n Kenɛan. Xzar, [aqa aten] di temmurt n Jucan.”
GEN 47:2 Uca zi jar marra aytmas yiwi xemsa n yeryazen, iqeddem as ten i firɛun.
GEN 47:3 [Xenni] inna firɛun i yaytmas: “Min teɛna řxedmet i tᵉtteggem?” Nitni arrin-dd x firɛun: “Imsexxaren nnec d imeksawen n wuǧi, am neccin am řejdud nneɣ.”
GEN 47:4 Nnan ɛawed i firɛun: “I tzeddiɣt di temmurt-a am ibarraniyyen i dd-nusa, minzi war yeǧi wefsu i wuǧi n imsexxaren nnec, minzi řaẓ iqseḥ di temmurt n Kenɛan. [Xenni] řexxu, nettzaweg i cek, ejj imsexxaren nnec ad zedɣen di temmurt n Jucan!”
GEN 47:5 Uca issiweř firɛun ak-d Yusuf, inna: “Babac d aytmac usin-dd ɣarek.
GEN 47:6 Tammurt n Miṣra aqa-tt nnec marra. Ejj babac d aytmac ad zedɣen di temmurt iṣebḥen, ejj i-ten ad zedɣen di temmurt n Jucan uca mařa tḥekkared belli aqa jar asen iryazen iwengiten, ggem ten d imeḥḍayen x řebhayem inu.”
GEN 47:7 Uca indeh Yusuf babas, iqeddem i-t i firɛun uca Yaɛqub ibarek firɛun.
GEN 47:8 Inna firɛun i Yaɛqub: “Mechař ɣarek n iseggʷusa?”
GEN 47:9 Yaɛqub yarra-dd x firɛun: “Mya u-třatin n iseggʷusa i ddareɣ d abarrani. Ussan n iseggʷusa n tudart inu yuqřiřen u [ccuren s] řɣar. War iwiḍen ca wussan n iseggʷusa n tudart n řejdud inu deg wussan n lɣurba nsen.”
GEN 47:10 [Xenni] Yaɛqub ibark firɛun uca iffeɣ ssenni zzat i wudem n firɛun.
GEN 47:11 Isscen Yusuf tazeddiɣt i babas d aytmas, iwca asen tasɣart di temmurt n Miṣra, zi lemliḥ n temmurt, di temmurt n Raɛamsis am mammec t iweṣṣa firɛun.
GEN 47:12 Iɛewweř Yusuf babas d aytmas d marra taddart n babas. [Iɛewweř uřa d] macca i iḥenjiren imeẓyanen.
GEN 47:13 Aɣrum tuɣa war iǧi di temmurt marra, minzi řaẓ tuɣa iqseḥ aṭṭas, ařami tiweḍ temmurt n Miṣra d temmurt n Kenɛan fennant s řaẓ.
GEN 47:14 [Xenni] iyru Yusuf marra nnuqart nni ittwafen di temmurt n Miṣra u di temmurt n Kenɛan deg ubeddeř n imendi i isɣin. Igga Yusuf nnuqart nni di taddart n firɛun.
GEN 47:15 [Umi] teqḍa nnuqart zi temmurt n Miṣra d temmurt n Kenɛan, usin-dd marra Imiṣriyyen ɣar Yusuf nnan: “Ewc aneɣ aɣrum, maɣar mayemmi ɣa nemmet zzatek? War din [ɛad] ca nnuqart.”
GEN 47:16 Yusuf inna: “Mařa war ɣarwem bu nnuqart ɛad, wcem [xenni] řebhayem nwem u necc ad awem wceɣ [macca] deg ubeddeř n řebhayem nwem.”
GEN 47:17 Nitni iwyen-dd řebhayem nsen ɣar Yusuf uca iwca asen Yusuf aɣrum deg [wemcan n] iysan d wuǧi d ifunasen d tfunasin d yeɣyař [nsen] uca issecc i-ten s weɣrum deg [wemcan n] marra řebhayem nsen deg useggʷas nni.
GEN 47:18 [Umi] iɛdu useggʷas nni, usin-dd ɣares deg useggʷas wiss tnayen uca nnan as: “War nᵉtteffar ca x sidi inu belli aqa nnuqart nneɣ teqḍa uca řebhayem aqa atent [deg ufus] n sidi inu. War iqqim walu zzat i wudem n sidi inu, mɣir arrimet nneɣ d iyyaren nneɣ.
GEN 47:19 Mayemmi ɣa nemmet zzat i tiṭṭawin nnec, uřa d neccin uřa d iyyaren nneɣ? Seɣ aneɣ, tesɣed tammurt nneɣ i weɣrum uca neccin d temmurt nneɣ ad niři d imsexxaren n firɛun. Ewc [aneɣ] zzariɛet [ḥima] ad neddar war nettmetti ca uca tammurt war tᵉddikkwiř d amessuci!”
GEN 47:20 [Xenni] isɣa Yusuf marra tammurt n Miṣra i firɛun, minzi Imiṣriyyen zzenzen marra iyyar nsen, minzi tuɣa řaẓ iqseḥ xasen. U [ammu i] tedweř temmurt [d agřa] n firɛun.
GEN 47:21 Uca issmuṭṭiy řgens zeg uneggaru n weymir ař aneggaru nneɣni n [weymir] n Miṣra ɣar tneddam.
GEN 47:22 Mɣir tammurt n ikehhanen war tt isɣi ca. Aqa ikehhanen ɣarsen ict n řmunet zi firɛun, nitni ttᵉtten tasɣart nsen, tenni i d asen iwca firɛun. X uya war zzenzen ca tammurt nsen.
GEN 47:23 [Xenni] inna Yusuf i řgens: “Xzar, ass-a necc sɣiɣ kenniw uřa d tammurt nwem i firɛun. Xzarem, aqa da zzariɛet nwem. Zarɛem zzayes tammurt!
GEN 47:24 Zi řɣiǧet ad tewcem tasɣart texmusect i firɛun u arebɛa n tseqqar [i iqqimen] ad iřint [i yixef] nwem d zzariɛet i yeyyar uca [ad iřint], maḥend ad zzaysent teccem kenniw ak-d aytbab n taddart nwem u [ɛawed], maḥend ad [zzaysent] ccen iḥenjiren imeẓyanen nwem.”
GEN 47:25 Nitni nnan: “Cek teḥḍid tudart nneɣ. Ejj aneɣ ad naf arḍa di tiṭṭawin n sidi inu uca neccin ad niři d imsexxaren i firɛun.”
GEN 47:26 Igga Yusuf man aya d tawṣeyyet i din iǧan ař ass-a, belli ict n tesɣart n texmusect [n řɣiǧet] n temmurt n Miṣra ad tiři i firɛun. Mɣir iyyaren n ikehhanen [qqimen] d agřa nsen, war ddikkwiřen ca [d agřa] n firɛun.
GEN 47:27 Ammu i izdeɣ Israil di temmurt n Miṣra, di temmurt n Jucan, mellken dayes uca wcin řɣiǧet uca ktaren s yijj n cckel imɣar.
GEN 47:28 Iddar Yaɛqub di temmurt n Miṣra sbeɛṭac n iseggʷusa uca tuɣa ussan n Yaɛqub, iseggʷusa n tudart nnes, mya u-sebɛa u-rebɛin n iseggʷusa.
GEN 47:29 [Umi] dd-iwḍen wussan i Israil ad immet, iřaɣa-dd x Yusuf mmis, inna as: “Mařa ufiɣ arḍa di tiṭṭawin nnec, ttzawageɣ cek, ad tegged afus nnec sadu tmeṣṣaḍt inu uca egg akidi s tmexsiwt icewwaren d řaman u war d ayi neṭṭeř ca di Miṣra,
GEN 47:30 maca xmi ɣa ggeɣ ad areyyḥeɣ jar řejdud inu, [xenni] awi ayi zi Miṣra uca nḍeř ayi deg wenḍeř nsen. Yarra-dd xas: “Necc ad ggeɣ min tennid!”
GEN 47:31 [Xas uca] inna as: “Jaǧ ayi!”, uca ijjuǧ as. Řexdenni yuḍar Israil x uzeǧif n qama.
GEN 48:1 Awarni man aya imsar, ittwanna i Yusuf: “Xzar, aqa babac iḥřec!” [Xenni] iksi akides tnayen n iḥenjiren nnes Manassa d Ifrayim.
GEN 48:2 Xebbaren Yaɛqub, nnan: “Xzar, aqa mmic Yusuf ad ɣarek dd-yas!” [Xenni] igga Israil uř deg ixef nnes uca ikkar iqqim x qama.
GEN 48:3 [Xenni] inna Yaɛqub i Yusuf: “Arebbi, Amzemmar x kuřci, aqa iban ayi-dd di Luz, di temmurt n Kenɛan, u aqa Netta ibark ayi.
GEN 48:4 U aqa Netta inna ayi: “Xzar, ad cek arreɣ ad tegged řɣiǧet uca ad cek kettareɣ, ad cek ggeɣ d ijj n wegraw n řegnus, ad ac wceɣ tammurt-a d agřa i řebda u i zzariɛet nnec awarni ac.
GEN 48:5 Uca řexxu, aqa tnayen n iḥenjiren nnec, Ifrayim d Manassa, inni d ac dd-ittwaxeřqen di temmurt n Miṣra qbeř i ɣarek dd-usiɣ di temmurt n Miṣra, aqa aten inu, am Rubin d Cimɛun i iǧan inu.
GEN 48:6 [Maca] inni d ac dd-ittwaxeřqen awarni asen, ad iřin nnec. Ad ttwasemman x yisem n aytmatsen di řwart nsen.
GEN 48:7 Umi dd-usiɣ zi Fadan-Aram, temmut Raḥil zzati di temmurt n Kenɛan deg webrid, řami tuɣa ɛad war tiggʷij x Ifrata. Neḍřeɣ tt din deg webrid ɣar Ifrata!”, aqa-tt d Bayt-Laḥm.
GEN 48:8 Iẓra Israil iḥenjiren n Yusuf, inna: “Min ɛnan ina?”
GEN 48:9 Yarra-dd Yusuf x babas: “D iḥenjiren inu i d ayi iwca AREBBI danita.” Inna [as]: “Sqarrbem ten-dd ɣari uca ad ten barkeɣ!”
GEN 48:10 Tuɣa tiṭṭawin n Israil uẓɣent s tewsar, war iqqim ittwařa. Issqarreb as ten-dd, xenni issudem i-ten, idarreɛ asen.
GEN 48:11 Inna Israil i Yusuf: “War d ayi ittɣiř ad ẓareɣ [ɛad] udem nnec. Xzar, AREBBI igga ayi ad ẓareɣ ɛad tarwa nnec!”
GEN 48:12 [Xenni] issḍar i-ten Yusuf x ifadden nnes uca ibendeq s wudem nnes ɣar temmurt.
GEN 48:13 Uca iksi i-ten Yusuf s tnayen idsen, Ifrayim s ufusi nnes arendad n uzeřmaḍ n Israil u Manassa s uzeřmaḍ nnes arendad n ufusi n Israil uca issqarreb as [ten]-dd.
GEN 48:14 Isswiẓẓeḍ Israil yefus nnes, issars i-t x uzeǧif n Ifrayim, waxxa tuɣa-t d amaẓuẓ, d azeřmaḍ nnes x uzeǧif n Manassa. Issars ammu ifassen nnes mammec nneɣni neɛmada, waxxa Manassa tuɣa-t d amenzu.
GEN 48:15 Israil ibark Yusuf, inna: “D AREBBI, wenni umi řejdud inu, Ibrahim d Isḥaq, uyuren zzates, AREBBI, wenni iǧan d Ameksaw inu zeg wami ǧiɣ ař ass-a,
GEN 48:16 lmalak nni d ayi ifdin zi marra tuɛeffna, iři netta ad ibark iḥenjiren-a u iři ad ittwařaɣa isem inu daysen uřa d isem n řejdud inu, Ibrahim d Isḥaq. Iři ad mmarenyen ař ɣa dewřen d ijj n ubarru [am iseřman deg waman] di řwesṭ n temmurt!”
GEN 48:17 [Umi] iẓra Yusuf, belli babas igga afus afusi nnes x uzeǧif n Ifrayim, tuɣa-tt d ict n řeɛřamet war teḥḥři ɣares di tiṭṭawin nnes uca iṭṭef afus n babas, ḥima ad t ibeddeř zeg uzeǧif n Ifrayim ɣar uzeǧif n Manassa.
GEN 48:18 Inna Yusuf i babas: “War ttegg ca ammu, [a] baba, minzi d wa d amenzu, egg afusi nnec x uzeǧif nnes.”
GEN 48:19 [Maca] babas war ixs ca, inna: “Ssneɣ, [a] mmi, ssneɣ. Ɛawed netta ad idweř d ijj n řgens, ad imɣar ɛawed, maca umas amaẓuẓ ad yiři ktar zzayes, zzariɛet nnes ad tedweř d tacurret n řegnus.”
GEN 48:20 Uca [ammu] i ten ibarek deg wass nni, inna: “Dayek, [deg yisem nnek], [a Yusuf] ad ibarek [řgens] Israil, ad inin: ‘Ad kenniw yarr AREBBI am Ifrayim d Manassa!’” Uca yarra Ifrayim ad ibedd zzat i Manassa.
GEN 48:21 [Awarni as] inna Israil i Yusuf: “Xzar, ad mmteɣ, maca AREBBI ad yiři akidwem, ad kenniw issmuṭṭiy ɣar temmurt n řejdud nwem.
GEN 48:22 Aqa wciɣ ac ict n tesɣart n idurar x min wciɣ i yaytmac, tenni ksiɣ necc zeg ifassen n Imuriyyen s ssif d řqews inu.”
GEN 49:1 Iřaɣa Yaɛqub x iḥenjiren nnes, inna: “Smunem-dd ixef nwem, ad awem iniɣ min d awem ɣa imsaren deg uneggar n wussan.
GEN 49:2 Smunem-dd ixef nwem uca sřem, [a] tarwa n Yaɛqub, sřem i Israil, babatwem.
GEN 49:3 Rubin, cek d amenzu inu, jjehd inu, d amezwar n teryast inu, aqa cek d amseḍfar inu di řuɛřa, d amseḍfar [inu] di řɛezz.
GEN 49:4 Cek amecnaw aman ittneqřaben, war dd ayi tḍeffared, aqa cek tgeɛɛded ɣar řectu n řemřac n babac, řexdenni tessfeḍḥed [t], aqa ɣar řectu inu igeɛɛed.
GEN 49:5 Cimɛun d Lawi d awmaten! Řemwas nsen d řesnaḥ n lɛunf.
GEN 49:6 Di tmeɛmuč nsen war ittidef řeɛmar inu deg wegraw nsen war icarrec wuř inu. Aqa deg uxeyyeq nsen nɣin ijj n weryaz uca iɛjeb asen ad qessen iẓewran n iḍaren n ufunas.
GEN 49:7 D amenɛuř axeyyeq nsen, minzi wanita ijhed aṭṭas, uřa d aduqqez [n ufugem] nsen, minzi iqseḥ. Necc ad ten bḍiɣ x Yaɛqub, ad ten ssuyuseɣ di Israil.
GEN 49:8 Yahuda, aytmac ad cek ssemɣaren. Afus nnec ad yiři x yiri n řɛedyan nnec u iḥenjiren n babac ad ac bendqen.
GEN 49:9 Yahuda d ijj n mmis n wayrad. Zi zzardet i tuřyed, [a] mmi. Iqwes amecnaw ayrad u amecmaw tayradt. Wi izeɛɛemen ad t-dd-issfaq?
GEN 49:10 Taɣɣarct [n řḥakem] war ittwakkes x Yahuda uřa d azeǧaḍ [n ṣṣulṭa] zi jar iḍaren nnes, ař dd ɣa yas wenni i ɣa iwcen arraḥet uca ad as ṭaɛen řegnus.
GEN 49:11 Iqqen ɣar tzayart asnus nnes d mmis nnes n teɣyuč ɣar tzayart icennɛen aṭṭas, issird arruḍ nnes di binu u arruḍ nnes deg idammen n uḍiř.
GEN 49:12 Tiṭṭawin [nnes] d tibarcanin s binu u tiɣmas [nnes] d ticemřařin s uɣi.
GEN 49:13 Zabulun ad izdeɣ ɣar tma n řebḥar, ad yiři d řmuyyi i iɣarruba. Aɣezdis nnes ad yareyyeḥ x Ṣidun.
GEN 49:14 Issakar d ijj n weɣyuř iqseḥ, izzeř jar tnayen n řmedwat.
GEN 49:15 Umi iẓra arraḥet d lemliḥ u tammurt aqa tarecceq, iqwes, igga tiɣarḍin nnes maḥend ad yarbu [arrmeḥ] uca [ammu i] idweř sadu azayřu n ismeɣ.
GEN 49:16 Dan ad iḥkem řgens nnes am yict zi tqebbař n Israil.
GEN 49:17 Ad yiři Dan d afiɣar deg webrid, tařefsa deg umesruq, wenni izeɛɛfen deg inirzawen n uyis, ař ɣa iwḍa wenni [xas] inyin ɣar ḍeffar.
GEN 49:18 Asenjem nnec i ttrajiɣ, [a] SIDI!
GEN 49:19 Jad, ad xas ḥejment bandiyyat, [maca] ad xasen idarrec.
GEN 49:20 Acir, aɣrum nnes ad yiři d aɣrum ismen, netta ad iqeddem macca yiziden igellden.
GEN 49:21 Naftali d ict n tudadt ittwaḍeřqen, issuffuɣ awařen cnan.
GEN 49:22 Yusuf d mmis n tcejjart itticen řɣiǧet, mmis n tcejjart itticen řɣiǧet ɣar tařa. Yessis ggurent x weɣbar.
GEN 49:23 Nitni ssarezgen xas [tudart], neyycen xas, [wah] imjebbaden n řqews ḍfaren t,
GEN 49:24 maca řqews nnes iqqim imḥeḍ u iɣaǧen n ifassen nnes qqimen arxun s ifassen n Umzemmar n Yaɛqub - x uya Netta d Ameksaw d taṣḍart n Israil -
GEN 49:25 s Arebbi n babac wenni cek i ɣa iɛawnen, Amzemmar x kuřci, wenni cek i ɣa ibarken s lbarakat n ujenna sennej, s lbarakat n [waman] ihewřen i din iǧan swadday, s lbarakat n tubbect d řemřawet.
GEN 49:26 Lbarakat n babac d timeqqranin uɛřant x lbarakat n yinni d ayi dd-yejjin [uca ttakkwaḍent] ɣar tqiccatin n tewririn n řebda. Ad iřint x uzeǧif n Yusuf, x tuccent n ucuwwaf n wenni yarebbu ttaj [n weɛzar] jar aytmas .
GEN 49:27 Binyamin d ijj n wuccen ittmezzaq. Ɣar ṣṣbeḥ ad isarḍ zzardet u s ǧiřet ibeṭṭa takeccaḍt.”
GEN 49:28 Marra ina d tenɛac n tqebbař n Israil. D man aya min d asen inna babatsen uca ibark i-ten, [wah,] ibark i-ten, kuř ijj s lbaraka nnes.
GEN 49:29 Yumur i-ten, inna asen: “Ad mmarenyeɣ ɣar řgens inu. Neḍřem ayi ak-d řejdud inu deg ifri wenni iǧan deg iyyar n Ifrun, Aḥitti,
GEN 49:30 deg ifri wenni iǧan deg iyyar n Makfila i iǧan zzat i Mamri di temmurt n Kenɛan, tenni isɣa Ibrahim ak-d yeyyar zi Ifrun, Aḥitti, ḥima ad yiři d anḍeř nnes.
GEN 49:31 Dinni i neḍřen Ibrahim d Sara tamɣart nnes. Dinni i neḍřen Isḥaq d temɣart nnes Rifqa. U necc neḍřeɣ din Liya.
GEN 49:32 Iyyar s ifri i tuɣa dayes iǧan immseɣ x tarwa n Ḥit.”
GEN 49:33 [Umi] ikemmeř Yaɛqub ad iweṣṣa iḥenjiren nnes, ikemmec iḍaren nnes di qama, iffeɣ i-t buḥbeř uca immarni ɣar řgens nnes.
GEN 50:1 [Xenni] ingez Yusuf x uɣembub n babas, iru xas uca issudem i-t.
GEN 50:2 Yumur Yusuf i imsexxaren nnes, iḍbiben, ad ḥennḍen babas uca iḍbiben ḥennḍen Israil.
GEN 50:3 Arebɛin n wussan i dayes kkin, minzi ḥdajen ussan nni maḥend ad kemmřen aḥenneṭ uca run marra Imiṣriyyen sebɛin n wussan di ssibbet nnes.
GEN 50:4 [Umi] ɛdun wussan n řeɛzat xas, issiweř Yusuf ak-d [yenni n] taddart n firɛun, inna: “Mařa ufiɣ řexxu arḍa di tiṭṭawin nwem, ttzawageɣ kenniw, ad tessiwřem deg imejjan n firɛun, inim:
GEN 50:5 “Baba inu ijja ayi ad jjaǧeɣ uca inna: ‘Aqa ttmettiɣ. Ittxeṣṣa ad ayi tneḍřed deg wenḍeř nni neqceɣ i yixef inu di temmurt n Kenɛan!’ Xenni, ttzawageɣ, ejj ayi ad raḥeɣ řexxu ad neḍřeɣ baba uca [awarni man aya] ad dd-ɛeqbeɣ.”
GEN 50:6 Uca inna firɛun: “Ruḥ, nḍeř babac, am mammec yarra cek ad as tejjuǧed.”
GEN 50:7 Uca igeɛɛed Yusuf ḥima ad inḍeř babas uca geɛɛden marra imsexxaren n firɛun akides, imɣaren n taddart nnes d marra imɣaren n temmurt n Miṣra,
GEN 50:8 uřa d marra taddart n Yusuf d aytmas nnes d taddart n babas. Mɣir iḥenjiren imeẓyanen nsen d wuǧi nsen d ifunasen d tfunasin nsen jjin ten di temmurt n Jucan.
GEN 50:9 Geɛɛden akides ikarruten d yinni inyin x yeysan uca ggin ijj n uqarru n řɛeskar imɣar.
GEN 50:10 [Umi] iwḍen ɣar unedrar n Atad, wenni iǧan x ujemmaḍ n L’Urdun, ssgeɛɛden din ict n tɣuyyit temɣar, tejhed aṭṭas uca igga Yusuf [din] ijj n wecḍan x babas i yijj n řmijař n sebɛa n wussan.
GEN 50:11 Ẓrin imezdaɣ n temmurt, ayt n Kenɛan, acḍan deg unedrar n Atad, nnan: “Wa d acḍan imɣar n Imiṣriyyen.” X uya řaɣan isem nnes Abal-Miṣrayim, wenni iǧan x ujemmaḍ n L’Urdun.
GEN 50:12 Ggin as iḥenjiren nnes am mammec ten iweṣṣa.
GEN 50:13 Arbun t iḥenjiren nnes ɣar temmurt n Kenɛan, neḍřen t deg ifri deg iyyar n Makfila nni isɣa Ibrahim ak-d yeyyar zi Ifrun, Aḥitti, arendad n Mamri, maḥend ad yiři d anḍeř nnes.
GEN 50:14 Awarni řami inḍeř babas, iɛqeb Yusuf ɣar Miṣra, netta d yaytmas d marra inni akides dd-igeɛɛden, maḥend ad neḍřen babas.
GEN 50:15 [Umi] ẓrin aytmas n Yusuf babatsen immut, nnan: “Mařa icarh aneɣ Yusuf, ad aneɣ ixeǧeṣ nican marra řɣar nni dayes negga.”
GEN 50:16 [S uyenni] ssekken ad xebbaren Yusuf [s man aya], nnan: “Babac iweṣṣa qbeř řmewt nnes, inna:
GEN 50:17 ‘Ammu i ɣa tinim i Yusuf: Ttzawgeɣ cek, ɣfar řexxu axeṭṭu n aytmac d ddenb nsen d řɣar i d ac ggin. Ɣfar řexxu axeṭṭu n imsexxaren n AREBBI n babac!’” Uca isɣuy Yusuf am kis ssiwřen [ammu].
GEN 50:18 [Xenni] usin-dd ɛawed aytmas [s yixef nsen], wḍan as zzat i uɣembub nnes, nnan: “Aqa-neɣ da d imsexxaren nnec!”
GEN 50:19 Yarra-dd xasen Yusuf: “War tteggʷdem ca! Ma aqa ayi necc deg wemcan n AREBBI?
GEN 50:20 Waxxa kenniw txarrṣem dayi s řɣar, aqa AREBBI inwa zzayes řxar, ḥima ad yegg am mammec [i teǧa] ass-a, ad yejj di tudart ijj n řgens d ameqqran.
GEN 50:21 Řexxu, war tteggʷdem ca! Necc ad kenniw ɛewwřeɣ, kenniw d iḥenjiren imeẓyanen nwem.” Ammu ten issfewwej uca issiweř akidsen ɣar wuřawen nsen.
GEN 50:22 Tuɣa Yusuf izeddeɣ di Miṣra, netta d taddart n babas, uca iddar Yusuf mya u-ɛecra n iseggʷusa.
GEN 50:23 Iẓra Yusuf iḥenjiren n Ifrayim ař jjiř wiss třata. Aqa ttwarwen-dd iḥenjiren n Makir, mmis n Manassa, ɛawed x ifadden n Yusuf.
GEN 50:24 Uca inna Yusuf i yaytmas: “Necc ad mmteɣ, maca AREBBI ad kenniw yarzef s tidett uca ad kenniw issgeɛɛed zi temmurt-a ɣar temmurt i iwaɛd s tjaǧit i Ibrahim d Isḥaq d Yaɛqub.”
GEN 50:25 [Xas uca] issjjuǧ Yusuf ayt n Israil, inna: “AREBBI ad kenniw yarzef s tidett uca [xenni] ad teksim ssa iɣsan inu!”
GEN 50:26 Immut Yusuf umi tuɣa ɣares mya u-ɛecra n iseggʷusa. Ḥennḍen t uca ssarsen t di řmeḥmeř n umettin di Miṣra.
EXO 1:1 Ina d ismawen n ayt n Israil i dd-yiwḍen ak-d Yaɛqub ɣar Miṣra. Yusa-dd kuř ijj [zzaysen] ak-d [aytbab] n taddart nnes:
EXO 1:2 Rubin, Cimɛun, Lawi d Yahuda,
EXO 1:3 Issakar, Zabulun d Binyamin,
EXO 1:4 Dan d Naftali, Jad d Acir.
EXO 1:5 Marra řeɛmur nni dd-iffɣen zi tmeṣṣaḍt n Yaɛqub, [tuɣa aten] di sebɛin. Yusuf tuɣa-t di Miṣra.
EXO 1:6 Immut Yusuf d marra aytmas, d jjiř nni marra.
EXO 1:7 Mmarenyen ayt n Israil u jjin-dd řɣiǧet [ařami] zzaysen tesfuffi [temmurt] uca ttwaktaren uca dewřen jehden aṭṭas, [minzi] teccur zzaysen temmurt.
EXO 1:8 Iffeɣ-dd xenni ijj n ujeǧid d jdid [iḥekkem] x Miṣra, wenni tuɣa war issin Yusuf.
EXO 1:9 Inna i řgens nnes: “Xzar, řgens n ayt n Israil imɣar u ijhed xaneɣ.
EXO 1:10 Řexxu, aqa ad xas neḥkem s řeɛqeř, ḥima war ittmarni [řgens ktar,] uca, mařa imsar ikkar ca n řbaruḍ, ad idweř ak-d řɛedyan nneɣ, ad yegg řḥarb akidneɣ uca [xenni] ad iffeɣ zi temmurt.”
EXO 1:11 Nitni ggin xasen imeḥḍayen x warbar n tesmuɣi, ḥima ad ssdeǧen řgens s ddquřat i xasen ssarebbun. Bnan i firɛun, [ajeǧid], tineddam n řexzen: Fitum d Raɛamsis.
EXO 1:12 [Maca] mecḥař ma deǧen nitni řgens, amenni i igma u ibezzeɛ [řgens], ařami iwḍen nitni ad carhen ayt n Israil aṭṭas.
EXO 1:13 Uca arrin Imiṣriyyen ayt n Israil d isemɣan s uɣiř
EXO 1:14 uca ssarezgen tudart nsen s tesmuɣi iqesḥen deg ubeǧaɛ d llajur uřa di marra tesmuɣi deg iyyaren. Marra tasmuɣi i ggin nitni di [řwest] nsen, tuɣa tt s uɣiř.
EXO 1:15 Issiweř ujeǧiḍ n Miṣra ak-d řqabřat tiɛibraniyyin, icten zzaysent qqaren as Sifra, u tenneɣni qqaren as Fuɛat.
EXO 1:16 Inna: “Xmi ɣa tɛawnent timɣarin tiɛibraniyyin ad arwent, uca ad texzarent xmi ttɣimant x iẓra [maḥend ad arwent], ittxeṣṣa kennint ad nɣent [aḥenjir] mařa d mmis, [maca] mařa d yeǧis, jjent tt ad teddar!”
EXO 1:17 [Maca] řqabřat tuɣa tteggʷedent AREBBI, war ggint muxas tent yumur ujeǧid n Miṣra, [maca] ḥḍant tudart n iḥenjiren.
EXO 1:18 [Xenni] iřaɣa ujeǧid n Miṣra i řqabřat, inna asent: “Maɣar teggint aya, aqa teḥḍant tudart n iḥenjiren?”
EXO 1:19 Řqabřat arrint x firɛun: “Tiɛibraniyyin war ǧint am Timiṣriyyin, minzi nitenti jehdent, ttarwent qbeř ma ad ɣarsent dd-tas řqabřa.”
EXO 1:20 Uca AREBBI igga mliḥ i řqabřat uca immarni řgens, dewřen jehden s waṭṭas.
EXO 1:21 Minzi řqabřat ggʷedent AREBBI, imsar, aqa yarzeq i-tent-i-dd s tudrin [ak-d řwacun].
EXO 1:22 [Řexdenni] yumur firɛun marra řgens nnes, inna: “Kuř aḥenjir i dd ɣa ixeřqen ad t tenḍarem deg iɣzar u marra taḥenjirt [i dd ɣa ixeřqen] ad tt tejjem ad teddar.”   *
EXO 2:1 Uca iffeɣ ijj n weryaz zi [raǧ n] taddart n Lawi, yiwi ict n tḥenjirt n Lawi [d tamɣart].
EXO 2:2 Teksi temɣart s ddeyset uca turuw-dd aḥenjir. [Umi] teẓra belli iṣbeḥ [uḥenjir], teffar i-t třata n iyuren.
EXO 2:3 [Umi] war tezmar ɛad ad t teffar, teksi as-dd ict n tsenduqt n uɣanim, tebra i-tt s ucarmuḍ d tizeft uca tessars dayes aḥenjir, tegga [tasenduqt nni] jar uɣanim x tma n iɣzar.
EXO 2:4 Tbedd wučmas ɣar řaggʷaj, maḥend ad tẓar min zzayes ɣa ggen.
EXO 2:5 U [xzar], tehwa yeǧis n firɛun, maḥend ad tessird ixef nnes deg iɣzar. Tuɣa timsexxarin tibřiɣin nnes ggurent x tma n iɣzar. Nettat teẓra tasenduqt deg uɣanim uca tessekk tismeɣt nnes uca teksi tt-i-dd.
EXO 2:6 Ařami tt tarzem, teẓra aḥenjir nni, uca xzar, aḥenjir tuɣa ittru. Yudef i-tt uziǧez, tenna: “Wa d [ijj] zeg iḥenjiren n Iɛibraniyyen!”
EXO 2:7 [Řexdenni] tenna učmas i yeǧis n firɛun: “Ma ad raḥeɣ ad řaɣiɣ x ict n temsuḍeḍt zi Tɛibraniyyin maḥend ad am tessuṭṭeḍ aḥenjir?”
EXO 2:8 Tenna as yeǧis n firɛun: “Ruḥ!” Truḥ teɛzarect, třaɣa i yemmas n uḥenjir.
EXO 2:9 [Řexdenni] tenna as yeǧis n firɛun: “Awi-dd aḥenjir-a, tessuṭṭeḍ i-t i necc u necc ad cem xeǧṣeɣ.” Teksi temɣart aḥenjir uca tessuṭṭeḍ i-t.
EXO 2:10 [Umi] igma uḥenjir, tiwyi i-t ɣar yeǧis n firɛun, idweř as am mmis uca tegga as Musa, tenna: “Aqa jebdeɣ t-i-dd zeg waman.”
EXO 2:11 Deg wussan nni imsar, umi igma Musa, aqa iffeɣ-dd ɣar aytmas, uca iẓra ddquřat i xasen [ssarebbun]. Iẓra ijj n Umiṣri iccat ijj n Uɛibrani, [ijjen] zeg aytmas.
EXO 2:12 Ixzar da d diha, iẓra belli war din ḥed, [xenni] inɣa Amiṣri nni uca issnuffar i-t deg ijdi.
EXO 2:13 Umi dd-iffeɣ tiwecca nnes, iẓra tnayen n yeryazen Iɛibraniyyen ttmenɣan. Inna [Musa] i uɛeffan nni ittɛeddan: “Maɣar teccated jjar nnec?”
EXO 2:14 Inna netta: “Wi i cek iggin d řḥakem d řqaḍi xaneɣ? Ma cek teqqared aya umi cek tenwid ad ayi tenɣed am mammec tenɣid Amiṣri?” [Řexdenni] iggʷed Musa, inna: “S tidett tamesřact tᵉttwassen!”
EXO 2:15 Umi isřa firɛun man aya, yarzu ad ineɣ Musa. [Maca] Musa yarweř zi firɛun uca izdeɣ di temmurt n Midyan uca iqqim [din] ɣar ijj n wanu.
EXO 2:16 Akehhan n Midyan tuɣa ɣares sebɛa n yessis, tinni i dd-yusin ad ayment aman [din] uca ccurent sswarej, ḥima ad wardent uǧi n babatsent.
EXO 2:17 Usin-dd imeksawen uca uẓẓřen xasent. Ikkar Musa [řexdenni], ifekk i-tent, iward uǧi nsent.
EXO 2:18 [Umi] dewřent ɣar babatsent [umi qqaren] Raɛuyil, inna [asent]: “Mayemmi dd-ttɛeqbent ass-a deɣya?”
EXO 2:19 Nitenti arrint-i-dd xas: “Ijj n weryaz d Amiṣri ifekk aneɣ zeg ifassen n imeksawen uca [ɛawed] yuyem aneɣ-dd aṭṭas n waman uca iward uǧi.”
EXO 2:20 Inna i yessis: “I mani yeǧa? Mayemmi tejjint aryaz [nni din]? Ruḥent řaɣant-i-dd xas ḥima ad icc aɣrum!”
EXO 2:21 Uca iqbeř Musa ad izdeɣ ak-d weryaz nni uca netta iwca as i Musa yeǧis Ṣaffura [d tamɣart].
EXO 2:22 Tejja as-dd aḥenjir, igga as Jarcum, minzi inna: “Necc tuɣa ayi d aɣrib deg ict n temmurt d taɣribt xafi.”
EXO 2:23 Řami teɛdu waṭṭas n řweqt, immut ujeǧid n Miṣra uca weḥweḥen ayt n Israil di tesmuɣi [i di tuɣa ddaren], ssɣuyen uca iɣuyyan nsen geɛɛden ɣar AREBBI zi tesmuɣi [nsen].
EXO 2:24 Uca issḥess AREBBI i tɣuyyit nsen uca ixarreṣ AREBBI di Řɛahd nnes ak-d Ibrahim u ak-d Isḥaq u ak-d Yaɛqub.
EXO 2:25 Ixzar AREBBI ɣar ayt n Israil uca yargeb AREBBI [x řeɣben nsen].
EXO 3:1 Yarwes Musa uǧi n Yitru, aḍeggʷař nnes, akehhan n Midyan. Indeh uǧi awarni i řexřa uca yiwiḍ-dd ɣar wedrar n AREBBI, ɣar Ḥurib.
EXO 3:2 Iban as-dd lmalak n SIDI deg ijj n uceɛɛuř di řwesṭ n ijj n cbarq ak-d isennanen, u xzar, netta iẓra belli cbarq ak-d isennanen tuɣa tekkar dayes tmessi, [maca] cbarq war ittwacmeḍ ca.
EXO 3:3 Inna Musa: “Ejj ayi ad qewseɣ [cwayt], maḥend ad ẓareɣ tameẓriwt nni tameqqrant, mayemmi cbarq ak-d isennanen war icemmeḍ ca.”
EXO 3:4 [Řami] iẓra AREBBI belli ijja abrid, maḥend ad iẓar [man aya], iřaɣa-dd xas AREBBI zi řwesṭ n cbarq ak-d isennanen, inna: “Musa, Musa!” Netta yarra: “Aqa ayi da!”
EXO 3:5 [Xenni] inna Netta: “War dd-ttqarrab ca danita! Kkes tisiřa nnec zeg iḍaren nnec, minzi amcan i xef tbedded, aqa-t d tammurt tqeddes.”
EXO 3:6 Inna [ɛawed:] “Necc d AREBBI n babac, AREBBI n Ibrahim, AREBBI n Isḥaq d AREBBI n Yaɛqub.” [Řexdenni] issduriy Musa aɣembub nnes, minzi iggʷed ad isweḍ di AREBBI.
EXO 3:7 Inna SIDI: “Aqa ẓriɣ řmeḥnet [i di iddar] řgens inu i iǧan di Miṣra uca sřiɣ iɣuyyan nsen zzat i imzeyyaren nsen, aqa ssneɣ tamara nsen.
EXO 3:8 Hwiɣ-dd ḥima ad fekkeɣ [řgens] zeg ifassen n Imiṣriyyen, ad t ssuffɣeɣ zi temmurt nni ɣar ict n temmurt teṣbeḥ d tmiriwt, ɣar ict n temmurt ifeyyḍen s uɣi d tamment, ɣar wemcan n ayt n Kenɛan d Iḥittiyyen d Imuriyyen d Ifiriziyyen d Iḥiwiyyen d Iyibusiyyen.
EXO 3:9 Xzar řexxu, aqa tiweḍ-dd ɣari tɣuyyit n ayt n Israil uca ɛawed ẓriɣ ddeǧ nsen i zi ten deǧen Imiṣriyyen.
EXO 3:10 Řexxu [xenni], ruḥ, Necc ad cek ssekkeɣ ɣar firɛun u cek ad tsuffɣed řgens inu, ayt n Israil, zi Miṣra.”
EXO 3:11 [Xenni] inna Musa i AREBBI: “Min ɛniɣ necc ařami ɣa raḥeɣ ɣar firɛun, ad ssuffɣeɣ ayt n Israil zi Misra?”
EXO 3:12 Netta inna as: “Necc ad kik iřiɣ u tanita ad ac tiři d řeɛřamet, belli Necc ssekkeɣ-dd cek: x minni i ɣa tessuffɣed řgens-a zi Miṣra, ad tɛebdem AREBBI x wedrar-a.”
EXO 3:13 [Xenni] inna Musa i AREBBI: “Xzar, xmi dd ɣa awḍeɣ necc ɣar ayt n Israil, ad asen iniɣ: ‘AREBBI n řejdud nwem issekk ayi-dd ɣarwem!’, [uca] nitni ad ayi sseqsan: ‘Mammec d as qqaren?’, min d asen ɣa iniɣ [xenni]?”
EXO 3:14 Inna AREBBI i Musa: “NECC d NECC i ǧiɣ”. Uca inna [ɛawed]: “Ammu i ɣa tinid i ayt n Israil: NECC d NECC i ǧiɣ! aqa Netta d Wenni d ayi dd-issekken ɣarwem.”
EXO 3:15 Inna AREBBI ɛawed i Musa: “Ammu i ɣa tinid i ayt n Israil: ‘SIDI, AREBBI n řejdud nwem, AREBBI n Ibrahim d AREBBI n Isḥaq d AREBBI n Yaɛqub, issekk ayi-dd ɣarwem. D wa d Isem inu i řebda u [Yisem] wanita [ad yiři] i řidaret dayi zi jjiř ař jjiř.’
EXO 3:16 Ruḥ, tessmuned imɣaren n Israil, ini asen: ‘SIDI, AREBBI n řejdud nwem, AREBBI n Ibrahim d Isḥaq d Yaɛqub iban ayi-dd, inna: ‘Aqa xawem ḥinneɣ uca [ẓriɣ] min xawem sseɛdun di Miṣra.
EXO 3:17 Nniɣ: Necc ad kenniw ssuffɣeɣ zi řmeḥnet di Miṣra ɣar temmurt n ayt n Kenɛan d Iḥittiyyen d Imuriyyen d Ifiriziyyen d Iḥiwiyyen d Iyibusiyyen, ɣar ict n temmurt ifeyyḍen s uɣi d tamment.’
EXO 3:18 Ad sřen i tmijja nnec, uca ad traḥed, cek d imɣaren n Israil, ɣar ujeǧid n Miṣra, ad as tinim: ‘SIDI, AREBBI n Iɛibraniyyen, imsagar akidneɣ. Xenni řexxu, ejj aneɣ ad neṭṭef abrid ticři n třata n wussan di řexřa, ḥima ad nqeddem tiɣarṣa i SIDI, AREBBI nneɣ.’
EXO 3:19 [Maca] Necc ssneɣ belli ajeǧid n Miṣra war kenniw ittejji ad traḥem uřa s ufus ijehden.
EXO 3:20 Xenni ad sswiẓẓḍeɣ afus inu, ad wteɣ Miṣra s marra lmuɛjizat inu i dayes i ɣa ggeɣ di řwesṭ nnes, uca awarni i man aya, netta ad kenniw yejj ad traḥem.
EXO 3:21 Ad ḥinneɣ x řgens-a zzat i tiṭṭawin n Imiṣriyyen uca ad imsar, xmi ɣa traḥem, war tᵉtteffɣem ca s ifassen xwan.
EXO 3:22 Ad tᵉttar kuř tamɣart zi tajjart nnes u zi tbarranit nni akides izeddɣen di taddart, řeqcuɛ n nnuqart d wureɣ d warruḍ, uca kenniw ad ten teggem x iḥenjiren d tḥenjirin nwem, uca [ammu i] ɣa tkeccḍem Miṣra.”
EXO 4:1 [Xenni] yarra-dd Musa, inna: “Xzar, nitni war dayi ttimnen ca uca war ttesřin ca i wawař inu, minzi ad inin: ‘SIDI war d ac dd-iban ca!’”
EXO 4:2 [Xenni] inna as SIDI: “Min ɣarek deg ufus nnec?” Uca yarra-dd: “D taɣɣarct.”
EXO 4:3 Inna: “Nḍar i-tt x temmurt!” Inḍar i-tt x temmurt, tedweř d ijj ufiɣar uca yarweř Musa zzayes.
EXO 4:4 [Řexdenni] inna SIDI i Musa: “Swiẓẓeḍ afus nnec, ṭṭef i-tt zeg unewwar nnes ...” - uca isswiẓẓeḍ [Musa] afus nnes, iṭṭef i-tt uca tedweř [ɛawed] d taɣɣarct deg ufus nnes -
EXO 4:5 “... ḥima ad amnen belli aqa iban ac-dd SIDI, AREBBI n řejdud nsen, AREBBI n Ibrahim, AREBBI n Isḥaq d AREBBI n Yaɛqub.”
EXO 4:6 Inna as SIDI ɛawed: “Sidef afus nnec deg weḥsin nnec.” Uca issidef afus nnes deg weḥsin uca umi t-i-dd-ikkes, xzar, afus nnes ibarṣ am wedfeř.
EXO 4:7 Uca inna: “Arr afus nnec [ɛawed] deg weḥsin!” Yarra afus nnes deg weḥsin uca iɛqeb issuffeɣ i-t-i-dd [ɛawed] zeg weḥsin, uca xzar, idweř [ɛawed] am [min iqqimen n] arrimet nnes.
EXO 4:8 “Mařa war zzayek uminen ca u war ɣarek dd-ttesřin i min d asen i ɣa tini řeɛřamet tamezwarut, [xenni] ad amnen di min d asen ɣa tini řeɛřamet taneggarut.
EXO 4:9 Mařa nitni war uminen ca di tnayen n řeɛřamat-a u war d ac sřin ca, xenni ksi aman n iɣzar uca farreɣ i-ten x řaẓaɣ u aman nni teksid zeg iɣzar ad dewřen d idammen x řaẓaɣ.”
EXO 4:10 [Řexdenni] inna Musa i SIDI: “A Sidi inu!, necc war [ǧiɣ ca] d aryaz n bu-tawařin, iḍennaḍ lla, [uřa d] fariḍennaḍ lla u zeg wami tebdid ad tessiwřed ak-d umsexxar nnec lla, minzi necc ɣari aqemmum ideqřen d iřes ideqřen.”
EXO 4:11 Inna as SIDI: “Wi iwcin aqemmum i bnadem? Niɣ wi iggin ḥed d aziynun niɣ d adehcur niɣ d wenni ittwařan niɣ d adarɣař? Ma war [iǧi] d Necc, SIDI?
EXO 4:12 Řexxu, ruḥ [din], ad iřiɣ ak-d uqemmum nnec, ad ac ssecneɣ mliḥ min ɣa tinid.”
EXO 4:13 [Maca] netta inna: “A Sidi inu, sekk s ufus nnec [man wen i texsed] ad tessekked.”
EXO 4:14 [Řexdenni] ittwassarɣ weɣḍab n SIDI x Musa, inna: “Ma war iǧi Harun, Alawi, d umac? Necc ssneɣ, aqa netta issen ad issiweř. Xzar, aqa ad kic imsagar u xmi cek ɣa iẓar, ad ifarḥ wuř nnes.
EXO 4:15 Uca cek ad kis tessiwřed, ad as tegged awařen deg uqemmum [nnes]. Ggur ad iřiɣ ak-d uqemmum nnec d uqemmum nnes, ad awem ssɣareɣ min ɣa tinim.
EXO 4:16 Netta ad issiweř ak-d řgens deg wemcan nnec. Ad imsar ammu: netta ad ac yiři [amecnaw] aqemmum nnec u cek ad tiřid i netta [amecnaw] AREBBI.
EXO 4:17 Ad teksid taɣɣarct-a i zi ɣa tegged řeɛřamat deg ufus nnec.”
EXO 4:18 Iruḥ Musa uca idweř ɣar uḍeggʷař nnes Yitru, inna as: “Ejj ayi ad raḥeɣ, ad ɛeqbeɣ ɣar aytma nni iǧan di Miṣra, ḥima ad ẓareɣ, ma ɛad ddaren.” Inna Yitru i Musa: “Ruḥ di řehna.”
EXO 4:19 Inna SIDI ɛawed i Musa di Midyan: “Řuḥ, tdewřed ɣar Miṣra, minzi aqa mmuten marra inni tuɣa yarezzun řmewt nnec.”
EXO 4:20 Iksi Musa tamɣart nnes d iḥenjiren nnes uca issenya i-ten x weɣyuř, idweř-dd ɣar temmurt n Miṣra uca iksi Musa taɣɣarct n AREBBI deg ufus nnes.
EXO 4:21 Inna SIDI i Musa: “Xmi ɣa traḥed, ad dd-tdewřed ɛawed ɣar Miṣra, xzar ad tegged i firɛun marra lmuɛjizat nni d ac ggiɣ deg ufus nnec. [Maca] Necc ad ssqesḥeɣ uř nnes, řami war ixs ad iḍřeq i řgens.
EXO 4:22 [Xenni] ad tinid i firɛun: ‘Ammu i iqqar SIDI: Israil d mmi d amenzu inu.
EXO 4:23 Aqa nniɣ ac: Ejj ad iffeɣ mmi ad ayi iɛbed! [Maca] cek tugid ad t tejjed. Xzar, Necc ad nɣeɣ mmic, amenzu nnec.’”
EXO 4:24 Imsar deg webrid, deg ijj n wemcan mani ɣa ssensen, immeřqa SIDI akides u Netta tuɣa ixs ad t ineɣ.
EXO 4:25 [Řexdenni] teksi Ṣaffura ict n txedmect n weẓru, texten řeɛdařyet n mmis uca teřqef as iḍaren nnes, tenna: “S tidett cek [teǧid] am yijj n yesři n idammen i necc”
EXO 4:26 Ijja i-t xenni. Řexḍenni tenna: “Cek d isři n idammen i teǧid!”, di ssibbet n ixtanen.
EXO 4:27 Inna SIDI i Harun: “Ruḥ ad teřqid Musa di řexřa!” Uca iruḥ, imsagar akides ɣar wedrar n AREBBI, issudem i-t.
EXO 4:28 Ixebbar Musa Harun x marra awařen [i d as inna] SIDI wenni i-t-i-dd-issekken uřa x marra řeɛřamat i d as yumur [ad igg].
EXO 4:29 [Xenni] iruḥ Musa d Harun, ssmunen marra imɣaren n ayt n Israil,
EXO 4:30 uca issiweř Harun s marra awařen i tuɣa inna SIDI i Musa uca igga řeɛřamat qibač i tiṭṭawin n řgens.
EXO 4:31 Uca yumen zzaysen řgens, sřin belli SIDI izziǧez as ayt n Israil umi iẓra řmeḥnet [i di ǧan], uḍaren uca bendqen [as].
EXO 5:1 Awarni man aya yudef Musa d Harun ɣar Firɛun, nnan as: “Ammu i iqqar SIDI, AREBBI n Israil: ‘Ejj ad iraḥ řgens inu, ḥima ad ayi iɛeyyed di řexřa!’”
EXO 5:2 [Maca] firɛun inna: “Min iɛna SIDI umi ɣa sřeɣ i wawař nnes uca ad jjeɣ Israil ad iffeɣ. Necc war ssineɣ SIDI u war ttejjiɣ ad iraḥ Israil.”
EXO 5:3 Nitni nnan: “AREBBI n Iɛibraniyyen imsagar akidneɣ, ejj aneɣ xenni ad nraḥ ticři n třata n wussan di řexřa, ad nqeddem taɣarṣt i SIDI, AREBBI nneɣ, ḥima war d aneɣ iřeqqef s ṭṭaɛun niɣ s ssif.”
EXO 5:4 [Řexdenni] inna asen ujeǧid n Miṣra: “Mayemmi, [a kenniw,] Musa d Harun, tessbeddem řgens x řxedmet nnes? Ruḥem kenniw, dewřem ɣar ddquřat i xawem iǧan!”
EXO 5:5 Inna firɛun: “Xzar, aqa řexxu řgens n temmurt d aṭṭas u kenniw texsem ad ten tessbeddem x warbar n ddquřat i xasen ttwaggent.”
EXO 5:6 Yumur firɛun deg wass nni i imzeyyaren n řgens u i iweqqafen nsen, inna:
EXO 5:7 “Zi ssa d tsawent war tticem ɛad řum i řgens maḥend ad zzayes ggen llajur am yiḍennaḍ d fariḍennaḍ. Jjem ten ad raḥen nitni, ad yrun řum i yixef nsen.
EXO 5:8 Řqedd n llajur i ggin iḍennaḍ d fariḍennaḍ ad xasen t teggem [ɛawed], war zzayes tessneqqisem walu, minzi nitni d ifinyanen. X uya sɣuyyun [ammu], qqaren: ‘Ejj aneɣ ad nraḥ ad nqeddem taɣarṣt i AREBBI nneɣ.’
EXO 5:9 Ittxeṣṣa řxedmet ad tiři tedqeř x iryazen-a, ḥima ad dayes řhan ammu uca war tticen [ɛad] taynit i wawařen ixarriqen.”
EXO 5:10 [Řexdenni] ruḥen imzeyyaren n řgens d iweqqafen nsen [ggʷejen x Firɛun] uca ssiwřen ak-d řgens, nnan: “Ammu i iqqar firɛun: ‘Necc war d awem tticeɣ ca ɛad řum.’
EXO 5:11 Ruḥem kenniw ad tyarwem řum mani t ɣa tafem, maɣar war xawem tᵉttwakkes walu zi řxedmet nwem.”
EXO 5:12 [Řexdenni] imbezzeɛ řgens x marra tammurt n Miṣra, ḥima ad yrun iɣeǧ deg wemcan n uřum.
EXO 5:13 Imzeyyaren ziyyaren xasen, nnan: “Kemmřem řxedmet nwem, kuř ass min dd-ittasen i kuř ass, am mammec tuɣa din řexdenni řum.”
EXO 5:14 Ttwafarcen iweqqafen n ayt n Israil, inni xasen ggin imzeyyaren n firɛun, nnan [asen]: “Mayemmi war tkemmřem tasɣart nwem n llajur am řebda, iḍennaḍ lla u ɛawed ass-a lla?”
EXO 5:15 [Řexdenni] usin-dd iweqqafen n ayt n Israil, sɣuyen ɣar firɛun, nnan: “Mayemmi tᵉttegged ammu ak-d isemɣan nnec?
EXO 5:16 War ittmewci bu uřum i isemɣan nnec, [waxxa] qqaren aneɣ: ‘Ggem llajur!’ U xzar, aqa isemɣan nnec ttᵉtten aɛmud, waxxa řɛib aqa-t di řgens nnec!”
EXO 5:17 Netta yarra-dd: “Kenniw d ifinyanen, d ifinyanen [aṭṭas]. X uya teqqarem: ‘Jjem aneɣ ad nraḥ maḥend ad nqeddem taɣarṣt i SIDI.’
EXO 5:18 Ruḥem řexxu ad txedmem. War d awem tticen ɛad [a]řum, [waxxa] ittxeṣṣa kenniw ad teqqimem tsebbřem řeɛbar n llajur!”
EXO 5:19 [Řexdenni] ẓrin iweqqafen n ayt n Israil, aqa-ten ḥařa, minzi ittwanna: “Kenniw war ssneqṣem walu zi llajur i dd-ittasen i kuř ass.”
EXO 5:20 [Umi] dd-ffɣen x firɛun, mmṣadafen ak-d Musa d Harun, inni tuɣa din ibedden ḥima ad ten rajan.
EXO 5:21 Nnan asen: “D SIDI, d wenni kenniw ittwařan, d wenni xawem i ɣa iḥekmen, minzi kenniw aqa tessarzgem aneɣ ɣar firɛun d imsexxaren nnes umi d asen teggim ssif deg ifassen nsen maḥend ad aneɣ nɣen.”
EXO 5:22 [Řexdenni] idweř Musa ɣar SIDI, inna: “[A] Sidi inu, mayemmi tegged řɣar di řgens-a, mayemmi d ayi tessqaded xenni?
EXO 5:23 Zeg wami udfeɣ ɣar firɛun ḥima ad ssiwřeɣ s Yisem nnec, ideǧ [firɛun] řgens-a u Cek qaɛ war tfekkid ca řgens nnec.”
EXO 6:1 [Řexdenni] inna SIDI i Musa: “Řexxu ad tẓared min ɣa ggeɣ i firɛun, minzi s ufus ijehden ad ten yejj ad raḥen, [wah,] s ufus ijehden ad xasen yaẓẓeř zi temmurt nnes.”
EXO 6:2 Issiweř AREBBI ɣar Musa, inna as: “Necc d SIDI,
EXO 6:3 Necc baneɣ-dd i Ibrahim, d Isḥaq d Yaɛqub am Arebbi, Amzemmar x kuřci, [maca] s Yisem inu ‘SIDI’, tuɣa war ɣarsen ttwassneɣ ca.
EXO 6:4 Ɛawed ssgeɛɛdeɣ Řɛahd inu akidsen aqa ad asen wceɣ tammurt n Kenɛan, tammurt n unewji nsen mani ten tuɣa am yibarraniyyen.
EXO 6:5 Ɛawed Necc sřiɣ anixses n ayt n Israil, inni ittwaggen d isemɣan zeg Imiṣriyyen, aqa xarrṣeɣ di Řɛahd inu.
EXO 6:6 S uya ad tinid i ayt n Israil: Necc aqa ayi d SIDI u Necc ad kenniw ssuffɣeɣ zi sadu zayřu n Imiṣriyyen. Necc ad kenniw fekkeɣ zi tesmuɣi nsen, ad kenniw fdiɣ s uɣiř isswiẓẓḍen d řeḥkamat imɣaren.
EXO 6:7 Ad kenniw qebřeɣ d řgens inu uca ad awem iřiɣ d AREBBI u kenniw ad tessnem belli Necc d SIDI, AREBBI nwem, d wenni tuɣa kenniw issuffuɣen zi sadu zayřu n Imiṣriyyen.
EXO 6:8 Ad kenniw ssidfeɣ ɣar temmurt mixef ssgeɛɛdeɣ afus inu maḥend ad tt wceɣ i Ibrahim d Isḥaq d Yaɛqub u Necc ad awem tt wceɣ d řwart, Necc d SIDI!”
EXO 6:9 Ammu i issiweř Musa ak-d ayt n Israil, maca nitni war sřin ca ɣar Musa zi ssibbet n řeḥṣaret n tnefsect d tasmuɣi iqesḥen.
EXO 6:10 Uca issiweř SIDI ak-d Musa, inna:
EXO 6:11 “Adef ɣar firɛun, ajeǧid n Miṣra, tinid as ad iḍřeq i ayt n Israil maḥend ad ffɣen zi temmurt nnes.”
EXO 6:12 [Maca] Musa issiweř zzat i SIDI, inna: “Xzar, ayt n Israil war ɣari dd-sřin, mammec i d ayi ɣa iseř firɛun u necc [aqa] ɣari iyencicen war ittwaxetnen.”
EXO 6:13 [Řexdenni] issiweř SIDI ɣar Musa d Harun uca yumur i-ten ad uyuren ɣar ayt n Israil d firɛun, ajeǧid n Miṣra, ḥima ad issuffeɣ ayt n Israil zi temmurt n Miṣra.
EXO 6:14 Ina d izeǧifen x řaǧat zi tudrin n ibabaten nsen. Ayt n Rubin, amenzu n Israil, [nitni d] Hanuk d Fallu, Ḥaṣrun d Karmi. D yina d řaǧat n Rubin.
EXO 6:15 Ayt n Cimɛun tuɣa aten d Yamuyil d Yamin d Uhad d Yakin d Ṣuḥar d Cawul, mmi n ict n temɣart Takenɛanit. Ina d řaǧat n Cimɛun.
EXO 6:16 Ina d ismawen n ayt n Lawi ɛlaḥsab asettef n wexřaq nsen: Jarcum d Qahat d Marari. Tuɣa [řmijař n] tudart n Lawi mya u-sebɛa u-třatin n iseggʷusa.
EXO 6:17 Ayt n Jarcum tuɣa aten d Libna d Cimɛi ɛlaḥsab řaǧat nsen.
EXO 6:18 Ayt n Qahat tuɣa aten d Ɛamram d Yiṣhar d Ḥabrun d Ɛuzziyil. Tuɣa [řmijař n] tudart n Qahat mya u-třata u-třatin n iseggʷusa.
EXO 6:19 Ayt n Marari tuɣa aten d Maḥli d Muci. Ina d řaǧat n Lawi ɛlaḥsab [asettef n] wexřaq nsen.
EXO 6:20 Uca Ɛamram iksi Yukabad, ɛentis, d tamɣart i yixef nnes u nettat turuw as-dd Harun d Musa. Tuɣa [řmijař] n tudart n Ɛamram mya u-sebɛa u-třatin n iseggʷusa.
EXO 6:21 Ayt n Yiṣhar tuɣa aten d Quraḥ d Nafaj d Dikri.
EXO 6:22 Ayt n Ɛuzziyil tuɣa aten d Micayil d Alṣafan d Sitri.
EXO 6:23 Uca iksi Harun Ilicabaɛ, yeǧis n Ɛamminadab, učmas n Naḥcun, d tamɣart i yixef nnes u nettat turuw as-dd Nadab d Abihu d Aliɛazar d Itamar.
EXO 6:24 Ayt n Quraḥ [tuɣa aten d] Assir d Alqana d Abiyasaf. Ina d řaǧat n Iquraḥiyyen.
EXO 6:25 Uca Aliɛazar, mmis n Harun, iksi icten zeg yessis n Futiyil d tamɣart i yixef nnes uca nettat turuw as-dd Finaḥas. Ina d izeǧifen [n tudrin] n ibabaten n Ilawiyyen ɛlaḥsab řaǧat nsen.
EXO 6:26 Aqa wa d Harun d Musa i umi inna SIDI: “Suffɣem ayt n Israil zi temmurt n Miṣra [am ttwasettfen nitni] ɛlaḥsab iseddiyyen n řɛeskar nsen.”
EXO 6:27 Ina d inni issiwřen ak-d firɛun, ajeǧid n Miṣra, ḥima ad ssuffɣen ayt n Israil zi Miṣra, Musa d Harun, [nitni] d ina.
EXO 6:28 Imsar deg wass i issiweř SIDI ak-d Musa di temmurt n Miṣra,
EXO 6:29 aqa issiweř SIDI ak-d Musa, inna: “Necc d SIDI i ǧiɣ! Marra min d ac qqareɣ, ini t i firɛun, ajeǧid n Miṣra.”
EXO 6:30 [Xenni] inna Musa zzat i SIDI: “Aqa ɣari necc iyencicen war ittwaxetnen, mammec ɣa yegg [xenni] ad ɣari iseǧ firɛun?”
EXO 7:1 Inna SIDI i Musa: “Xzar, Necc aqa ggiɣ cek d AREBBI i firɛun d umac Harun ad ac yiři d anabi i cek.
EXO 7:2 Cek ad tinid marra min zi cek ɣa umureɣ uca Harun, umac, ad issiweř ak-d firɛun, ḥima ad yejj ad ffɣen ayt n Israil zi temmurt nnes.
EXO 7:3 [Maca] Necc ad ssqesḥeɣ uř n firɛun uca ad kettareɣ řeɛřamat d lmuɛjizat inu di temmurt n Miṣra.
EXO 7:4 [Maca] firɛun war ɣarwem-dd issḥessi u Necc ad ggeɣ afus inu x Miṣra uca ad ssuffɣeɣ řɛeskarat inu, řgens inu, ayt n Israil, zi temmurt n Miṣra s řeḥkamat imɣaren.
EXO 7:5 [Řexdenni] ad ssnen Imiṣriyyen belli Necc d SIDI i ǧiɣ xmi ɣa sswiẓẓḍeɣ afus inu x Miṣra uca ad ssuffɣeɣ ayt n Israil zi řwesṭ nsen.”
EXO 7:6 Uca ggin Musa d Harun am mammec ten yumur SIDI, [wah,] amenni i ggin.
EXO 7:7 Tuɣa Musa d ijj n bnadem n tmenyin n iseggʷusa u tuɣa Harun [d ijj n bnadem] n třata u-tmenyin n iseggʷusa, řami ssiwřen ak-d firɛun.
EXO 7:8 Uca issiweř SIDI ak-d Musa d Harun, inna:
EXO 7:9 “Mařa issiweř akidwem firɛun, ad yini: ‘Secnem, aqa kenniw tzemmarem ad teggem ict n lmuɛjiza!’, xenni ad tinid i Harun: ‘Ṭṭef taɣɣarct nnec uca nḍar i-tt zzat i firɛun!’, [xenni] ad tedweř d ict n řhaycet.”
EXO 7:10 Udfen [xenni] Musa d Harun ɣar firɛun uca ggin mammec [i d asen] yumur SIDI. Inḍar Harun taɣɣarct nnes zzat i firɛun d imsexxaren nnes uca tedweř d ict n řhaycet.
EXO 7:11 [Řexdenni] iřaɣa-dd ɛawed firɛun x imiɣisen d iseḥḥaren, uca tarwa n tseḥḥart n Miṣra ggin ɛawed amenni s tmegga nsen n swadday swadday d ict.
EXO 7:12 Inḍar kuř ijjen taɣɣarct nnes uca dewřent [tiɣɣaryen nni] d řhaycat. [Maca] taɣɣarct n Harun tsarḍ tiɣɣaryen nsen.
EXO 7:13 Uř n firɛun idweř iqseḥ uca war ɣarsen isři ca, am mammec tuɣa i d asen inna SIDI [qbeř].
EXO 7:14 [Řexdenni] inna SIDI i Musa: “Uř n firɛun idweř iqseḥ. War ixs ad yejj ad iffeɣ řgens.
EXO 7:15 Ruḥ tiwecca ɣar ṣṣbeḥ ɣar firɛun. Xzar, netta ad iffeɣ ɣar waman. Cek raja din ɣar tma n yiɣzar uca ksi-dd taɣɣarct nni idewřen d afiɣar deg ufus nnec.
EXO 7:16 Ad as tinid: ‘SIDI, AREBBI n Iɛibraniyyen issekk ayi-dd ɣarek, inna: Ejj ad iraḥ řgens inu, ḥima ad ayi iɛbed di řexřa! Xzar, ař řexxu war texsed ad tseǧed.
EXO 7:17 Ammu i iqqar SIDI: ‘S man aya ad tessned belli Necc d SIDI!’ Xzar, Necc ad wteɣ aman i iǧan deg iɣzar s teɣɣarct i ɣari deg ufus inu uca ad dewřen d idammen.
EXO 7:18 Iseřman i iǧan deg iɣzar ad mmten [ař ɣa] yurṣuḍ iɣzar [n Nil], ad ɛiffen Imiṣriyyen ad swen aman n iɣzar [n Nil].’”
EXO 7:19 Inna SIDI [ɛawed] i Musa: “Ini i Harun: ‘Ksi taɣɣarct nnec, swiẓẓeḍ afus nnec x waman n Miṣra, x iɣezran nsen, x tɣezratin nsen, x iyeřmamen nsen x marra imucan manis ttmunan waman uca ad dewřen d idammen. Ad dewřen d idammen x marra tammurt n Miṣra, [uřa] di [řeqcuɛ] n ukeccuḍ d weẓru.’”
EXO 7:20 Musa d Harun ggin am mammec [i d asen] yumur SIDI. Issgeɛɛed Harun taɣɣarct, iwta aman nni tuɣa deg iɣzar qibač i tiṭṭawin n firɛun d imsexxaren nnes uca marra aman nni tuɣa deg iɣzar dewřen d idammen.
EXO 7:21 Mmuten iseřman inni tuɣa deg iɣzar uca yurṣuḍ yeɣzar ařami dewřen Imiṣriyyen war zemmaren ad zzayes swen aman uca dewřen [waman] d idammen di marra tammurt n Miṣra.
EXO 7:22 [Maca] tarwa n tseḥḥart n Miṣra ggin amenni s tmegga nsen n swadday swadday [ařami] uř n firɛun idweř iqseḥ, u netta war ɣarsen issḥess ca, am mammec d asen tuɣa inna SIDI.
EXO 7:23 Inneqřeb firɛun uca yudef ɣar taddart nnes uca war iggi uř nnes ɛad di man aya.
EXO 7:24 Marra Imiṣriyyen ɣzan x tma n iɣzar [n Nil] maḥend ad afen aman n tessit, minzi war zemmaren ad swen aman n iɣzar [n Nil].
EXO 7:25 [Ammu i] ɛdun sebɛa ussan awarni řami iwta SIDI iɣzar [n Nil].
EXO 7:26 [Xenni] inna SIDI i Musa: “Adef ɣar firɛun, ini as: ‘Ammu i iqqar SIDI: Ejj ad iffeɣ řgens inu ḥima ad ayi iɛbed.
EXO 7:27 Mařa tugid ad [ten] tejjed ad raḥen, aqa ad wteɣ marra tammurt nnec s iqarqriwen
EXO 7:28 uca iɣzar [n Nil] ad dd-iseffiy x iqarqriwen, ad [zzayes-dd] geɛɛden, ad adfen ɣar taddart nnec u ɣar wexxam nnec n yiḍeṣ, [ad dd-asen] x qama nnec uřa di taddart n imsexxaren nnec u jar řgens nnec, u [ɛad] deg ifarranen nnec u di tbeqyin nnec.
EXO 7:29 Ad xak dd-geɛɛden iqarqriwen uřa x řgens nnec u x marra imsexxaren nnec.’”
EXO 8:1 Inna SIDI [ɛawed] i Musa: “Ini i Harun: ‘Swiẓẓeḍ afus nnec s teɣɣarct nnec x iɣezran, x tɣezratin uřa x iyeřmamen, sgeɛɛed iqarqriwen x temmurt n Miṣra.’”
EXO 8:2 Uca isswiẓẓeḍ Harun afus nnes x waman n Miṣra uca geɛɛden-dd iqarqriwen uca dřin tammurt n Miṣra.
EXO 8:3 Uca uřa d tarwa n tseḥḥart ggin amenni s tmegga nsen n swadday swadday d ict, uca ssgeɛɛden-dd [ɛawed] iqarqriwen x temmurt n Miṣra.
EXO 8:4 Iřaɣa-dd firɛun x Musa d Harun, inna asen: “Ẓaǧem s řaǧaɣ i SIDI ḥima ad xafi iksi iqarqriwen u x řgens inu, uca xenni ad jjeɣ ad iffeɣ řgens, maḥend ad qeddmen tiɣarṣa i SIDI.”
EXO 8:5 Inna Musa i firɛun: “Ṭṭef xafi řḥurmet meřmi d ayi ɣa tinid ad xak ẓẓaǧeɣ u x imsexxaren nnec u x řgens nnec, maḥend ad xak qeḍɛeɣ iqarqriwen u x tudrin nnec, ad qqimen deg iɣzar waha.”
EXO 8:6 Yarra-dd xas: “Tiwecca!” Inna [Musa]: “Ad yiři am mammec tennid ḥima ad tessned belli war [din] iǧi ḥed am SIDI, AREBBI nneɣ.
EXO 8:7 Uca iqarqriwen ad mmeksin xak u x tudrin nnec uřa x imsexxaren nnec u x řgens nnec, ad qqimen deg iɣzar waha.”
EXO 8:8 [Řexdenni] iffeɣ Musa d Harun x firɛun uca iřaɣa Musa i SIDI di ssibbet [n jjriḥect] n iqarqriwen nni tuɣa igga x firɛun.
EXO 8:9 Uca igga SIDI am mammec dd-ittas ak-d wawař n Musa uca mmuten iqarqriwen [uca weddaren] zi tudrin, zi řemraḥat u zeg iyyaren.
EXO 8:10 Uca ssmunen ten d iɛurrac uca turṣuḍ [zzaysen] temmurt.
EXO 8:11 [Řami] iẓra firɛun belli aqa bnadem izemmar ad yarr nnefs, isseqseḥ uř nnes uca war ɣarsen issḥess, am mammec tuɣa inna SIDI.
EXO 8:12 [Řexdenni] inna SIDI i Musa: “Ini i Harun: ‘Swiẓẓeḍ taɣɣarct nnec, tewted [zzayes] acař n temmurt. [Xenni] ad idweř d nnamus x marra tammurt n Miṣra.’”
EXO 8:13 Uca ammu i ggin nitni. Isswiẓẓeḍ Harun afus nnes s teɣɣarct nnes i dayes, iwta acař n temmurt. Uca yusa-dd nnamus am x iwdan am x řmař. Marra acař n temmurt idweř d nnamus di marra tammurt n Miṣra.
EXO 8:14 Tarwa n tseḥḥart ggin tizemmar nsen amenni [ɛawed] s tmegga nsen n swadday swadday, maḥend ad ssuffɣen nnamus, maca war zemmaren. Uca tuɣa nnamus x iwdan d řmař.
EXO 8:15 [Řexdenni] nnan tarwa n tseḥḥart i firɛun: “Man aya d aḍaḍ n AREBBI!” [Maca] isseqseḥ uř n firɛun uca war dd ɣarsen iseǧ ca, am mammec tuɣa inna SIDI.
EXO 8:16 Uca inna SIDI i Musa: “Tiwecca kkar zic, ad tbedded zzat i firɛun. Xzar, netta ad iffeɣ ɣar tma n waman, ad as tinid: ‘Ammu i iqqar SIDI: Ejj ad iraḥ řgens inu, ḥima ad ayi iɛbed!
EXO 8:17 Minzi mařa war tejjid řgens inu ad iraḥ, xzar, Necc ad xak ssekkeɣ iyřafen n ibeɛɛac, x imsexxaren nnec, x řgens nnec, x tudrin nnec, ař ɣa ttwaccurent tudrin n Imiṣriyyen s iyřafen n ibeɛɛac uca amenni uřa d tammurt mani [zeddɣen].
EXO 8:18 Deg wass nni ad ssḥuzeɣ tammurt n Jucan mani izeddeɣ řgens inu, ḥima war din ttiřin weyřafen n ibeɛɛac ḥima ad tessned belli Necc d SIDI di řwesṭ n temmurt.
EXO 8:19 Uca ad ggeɣ ijj n ttaman n weṣřaḥ jar řgens inu d wenni nnec. Tiwecca ad tiři řeɛřamet-a.’”
EXO 8:20 Uca ammu i igga SIDI. Usin-dd iyřafen imeqqranen n ibeɛɛac x taddart n firɛun, x tudrin n imsexxaren nnes u x marra tammurt n Miṣra uca tᵉttwaxarreb temmurt s iyřafen n ibeɛɛac.
EXO 8:21 [Řexdenni] iřaɣa firɛun i Musa d Harun, inna asen: “Ruḥem, tqeddmem taɣarṣt i AREBBI nwem di temmurt-a.”
EXO 8:22 Inna Musa: “War dd-yusi ad negg ammu, minzi ad nqeddem taɣarṣt i SIDI, AREBBi nneɣ, min iǧan d ict n jjɛifect ɣar Imiṣriyyen. Xzar, mařa nqeddem d taɣarṣt zzat i tiṭṭawin n Imiṣriyyen [min d asen ittɣiř d] jjɛifect, ma war d aneɣ tarejjmen ca?
EXO 8:23 Ejj aneɣ ad nraḥ ticři n třata n wussan di řexřa, ḥima ad nqeddem taɣarṣt i SIDI, AREBBI nneɣ, am mammec d aneɣ yumur Netta.”
EXO 8:24 [Xenni] inna firɛun: “Necc ad kenniw jjeɣ ad traḥem uca ad tqeddmem taɣarṣt i SIDI, AREBBI nwem, di řexřa, maca war iɛeddeř ad tiggʷijem aṭṭas. Ẓaǧem [uřa] xafi.”
EXO 8:25 Musa inna: “Aqa ad xak ffɣeɣ, ad ẓẓaǧeɣ i SIDI, ḥima ad ikkes tiwecca iyřafen n ibeɛɛac x firɛun, x imsexxaren nnes uřa x řgens nnes. Maca ittxeṣṣa firɛun war ixeddeɛ twařa nneɣni, war ittejji ad iraḥ řgens, maḥend ad iqeddem taɣarṣt i SIDI.”
EXO 8:26 [Řexdenni] iffeɣ Musa x firɛun uca iẓẓuǧ i SIDI.
EXO 8:27 Igga SIDI ɛlaḥsab awař [i inna] Musa uca ikkes iyřafen n ibeɛɛac x firɛun, x imsexxaren nnes, uřa x řgens nnes. War iqqim uřa d ijj [n ubeɛɛuc].
EXO 8:28 [Maca] firɛun isseqseḥ uř nnes twařa-ya ɛawed, war ijji ad iraḥ řgens.
EXO 9:1 [Řexdenni] inna SIDI i Musa: “Adef ɣar firɛun, ini as: ‘SIDI, AREBBI n Iɛibraniyyen iqqar ammu: Ejj ad iraḥ řgens inu, maḥend ad ayi iɛbed.
EXO 9:2 Minzi mařa tugid ad [ten] tejjed ad raḥen uca ad ten tᵉṭṭfed ɛad ktar,
EXO 9:3 xzar, afus n SIDI ad yiři x řmař nnec nni iǧan deg iyyar, x iysan d yeɣyař d yiřeɣman d ifunasen d tfunasin uřa x wuǧi s yijj n ṭṭaɛun iqesḥen aṭṭas.
EXO 9:4 Ad ifarz SIDI jar řebhayem n ayt n Israil d řebhayem n Imiṣriyyen, ḥima war ittmetti walu zi marra min iǧan n ayt n Israil.’”
EXO 9:5 Uca ineyyec SIDI ict n řweqt umi inna: “Tiwecca ad yegg SIDI man aya di temmurt.”
EXO 9:6 Tiwecca nnes igga SIDI ddeqq nni uca mmuten marra řebhayem n Miṣra, maca zi řebhayem n ayt n Israil war temmut uřa d ict [zzaysent].
EXO 9:7 Uca issekk firɛun [ijjen], uca aqa da, war temmut uřa d ict zi řebhayem n ayt n Israil. [Maca] uř n firɛun idweř iqseḥ uca war yejji ad iffeɣ řgens.
EXO 9:8 [Řexdenni] inna SIDI i Musa d Harun: “Ɛemmar uru [n ifassen] nwem s iɣɣeḍ zi tefqunt uca ejj Musa ad t izzuzar deg ujenna qibač i tiṭṭawin n firɛun.
EXO 9:9 Ad idweř [iɣɣeḍ] d taɛejjajt ifsusen x marra tammurt n Miṣra uca [taɛejjact] ad tedweř d tiḥebba s řewɛi x bnadem u x řmař di marra tammurt n Miṣra.”
EXO 9:10 Uca ksin iɣɣeḍ zi tefqunt [am] tuɣa bedden zzat i firɛun uca izzuzar i-t Musa deg ujenna uca idweř d tiḥebba s řewɛi am deg iwdan am di řmař,
EXO 9:11 [ařami] tarwa n tseḥḥart war zemmaren ad qqimen bedden zzat i Musa di ssibbet n tḥebba, minzi [tiḥebba] ḥekment iseḥḥaren d marra Imiṣriyyen.
EXO 9:12 [Maca] SIDI isseqseḥ uř n firɛun, [ařami] war d asen iseǧ ca, am mammec tuɣa inna SIDI i Musa.
EXO 9:13 [Řexdenni] inna SIDI i Musa: “Tiwecca kkar zic, tbedded zzat i wudem n firɛun uca ini as: ‘Ammu i iqqar SIDI, AREBBI n Iɛibraniyyen: Ejj ad iraḥ řgens inu, maḥend ad ayi iɛbed.
EXO 9:14 Minzi twařa-ya Necc ad cek řeqfeɣ deg wuř s marra jjrayeḥ inu uca uřa d imsexxaren nnec d řgens nnec, ḥima ad tessned belli war iǧi ḥed am Necc di marra tammurt.
EXO 9:15 Minzi [ɛad] řexxu tuɣa zemmareɣ ad sswiẓẓḍeɣ afus inu, ḥima ad cek wteɣ uřa d řgens nnec s ṭṭaɛun uca tuɣa izemmar ad tᵉttwateḥḥid zi temmurt.
EXO 9:16 [Maca] s tidett Necc ssbeddeɣ cek ḥima ad ac ssecneɣ jjehd inu u ḥima ad ittwacenneɛ Isem inu di marra tammurt.
EXO 9:17 Ma tᵉttegged ɛad tiɛinkrifin ḍidd i řgens inu, ḥima war ten tejjid ad raḥen?
EXO 9:18 Xzar, tiwecca ɣar tsaɛɛet-a Necc ad arreɣ tabrurri iddeqřen ad tewwet, [tabrurri] i war tuɣi ɛemmarṣ di Miṣra zeg wass i di tᵉttwabna ař i řexxu.
EXO 9:19 [Xenni] sekk řexxu [imsexxaren nnek], maḥend ad ssidfen řebhayem d marra min ɣarek deg iyyar ɣar daxeř. Kuř bnadem niɣ d řmař nni i ɣa ittwafen deg iyyar, war t ssidfen ɣar [daxeř n] taddart, ad xas dd-tewḍa tebrurri uca nitni ad mmten.’”
EXO 9:20 Wenni iggʷeden awař n SIDI zeg imsexxaren n firɛun, ijja imsexxaren nsen d řebhayem nsen arewřen ɣar daxeř di tudrin.
EXO 9:21 [Maca] wenni war ittiqqen awař n SIDI s wuř nnes, aqa ijja imsexxaren nnes d řebhayem nnes deg iyyar.
EXO 9:22 [Xenni] inna SIDI i Musa: “Swiẓẓeḍ afus nnec ɣar ujenna uca ad tiři tebrurri x marra tammurt n Miṣra, x iwdan, x řmař u x marra afsu deg iyyaren di temmurt n Miṣra.”
EXO 9:23 [Xenni] isswiẓẓeḍ Musa taɣɣarct nnes ɣar ujenna uca SIDI igga ajjaj d tebrurri uca tesswiẓẓeḍ tmessi ɣar temmurt. [Ammu] i igga SIDI maḥend ad tewwet tebrurri x temmurt n Miṣra.
EXO 9:24 Tuɣa [din] tabrurri d tmessi ixeǧḍen ak-d tebrurri. Tuɣa tejhed aṭṭas, war tt tuɣi ɛemmarṣ di marra tammurt n Miṣra zeg wami tuɣa tedweř d ijj n řgens.
EXO 9:25 Uca tewta tebrurri x marra tammurt n Miṣra, x marra min tuɣa deg iyyar, x iwdan d řmař. Tewta tebrurri [ɛawed] x marra afsu deg iyyar uca ttwarẓent marra tcejjura n řexřa.
EXO 9:26 Mɣir di tammurt n Jucan, mani ǧan ayt n Israil, war tewti tebrurri.
EXO 9:27 [Řexdenni] issekk firɛun ad řaɣan i Musa d Harun uca inna asen: “Necc xḍiɣ twařa-ya. SIDI, aqa-t d Amsegged uca necc d řgens inu d iɛeffanen!
EXO 9:28 Ẓaǧem s řaǧaɣ i SIDI, minzi cfa, aqa ajjajen n AREBBI d aṭṭas uřa d tabrurri. Necc ad kenniw jjeɣ ad traḥem, war kenniw ttᵉṭṭfeɣ ca ɛad [danita].”
EXO 9:29 [Xenni] inna as Musa: “Meřmi ɣa ffɣeɣ zi tendint ad sswiẓẓḍeɣ ifassen inu ɣar SIDI uca ad bedden wajjajen, war tᵉttiři ɛad tebrurri, maḥend ad tessned belli tammurt aqa-tt n SIDI.
EXO 9:30 [Maca] xak d x imsexxaren nnec, aqa ssneɣ [mazal] war teggʷedem ca zi SIDI AREBBI.”
EXO 9:31 Tiffest d imendi tuɣa ttwařeqfen, minzi imendi tuɣa-t s tidrin d tiffest tnewwar.
EXO 9:32 [Maca] irden d karṣana war ttwařeqfen ca, minzi tuɣa aten war dd-ffiɣen [ɛad].
EXO 9:33 [Xenni] yuyur Musa zi firɛun, iffeɣ zi tendint uca iksi ifassen nnes ɣar SIDI. [Řexdenni] bedden wajjajen d tebrurri uřa d ibuda n wenẓar x temmurt.
EXO 9:34 [Umi] iẓra firɛun belli anẓar d tebrurri d wajjajen bedden, ixḍa ɛad ktar uca isseqseḥ uř nnes, netta d imsexxaren nnes.
EXO 9:35 Uř n firɛun yarni di řeqsaḥet, war ijji ad iraḥ ayt n Israil, am mammec tuɣa inna SIDI s tsexxart n Musa.
EXO 10:1 [Xenni] inna SIDI i Musa: “Adef ɣar firɛun, minzi Necc ssqesḥeɣ uř nnes d wuř n imsexxaren nnes, ḥima ad ssecneɣ řeɛřamat [inu] di řwesṭ [n temmurt] nnes,
EXO 10:2 u ḥima ad tɛawded deg imezzuɣen n mmic d mmis n mmic min ggiɣ ak-d Miṣra, u [ad tɛawded x] řeɛřamat i ggiɣ jar asen, [maḥend] ad tessnem belli Necc d SIDI.”
EXO 10:3 [Řexdenni] yudef Musa d Harun ɣar firɛun, nnan as: “SIDI, AREBBI n Iɛibraniyyen inna: ‘Mecḥař ɣa tekked tugid ad tehwid ɣar wudem inu? Ejj ad iraḥ řgens inu ḥima ad ayi iɛbed.
EXO 10:4 Minzi mařa tugid ad tejjed ad iraḥ řgens inu, aqa ad ssiwḍeɣ tiwecca tmurɣi x temmurt nnec.
EXO 10:5 Ad dřen udem n temmurt ař war izemmar ḥed ad itwařa tammurt [ɛad] uca ad ccen min iqqimen i ittwanejmen, min d awem iqqimen ɛad awarni i tebrurri. Ad tecc [tmuɣri] [ɛawed] marra ticejjura i d awem dd-iɣemmyen deg iyyar.
EXO 10:6 Uca ad ccurent tudrin nnec d tudrin n imsexxaren nnec d tudrin n marra Imiṣriyyen. Ammu war tt ẓrin ɛemmarṣ ibabaten nnec d řejdud n ibabaten nnec zeg wami ten tuɣa x temmurt ɣar wass-a.’” Uca idweř-dd netta, ismeḥ di firɛun.
EXO 10:7 Nnan as imsexxaren n firɛun: “Ař meřmi i d aneɣ ɣa yiři wanita d řfex? Ejj ad raḥen iryazen nni, maḥend ad ɛebden SIDI AREBBI nsen! Ma war tessined ɛad belli Miṣra aqa tᵉttwaxarreb?”
EXO 10:8 [Řexdenni] ssiwḍen [imsexxaren n firɛun] Musa d Harun ɛawed ɣar firɛun. Netta inna asen: “Ruḥem, ɛebdem SIDI, AREBBI nwem! [Ini ayi], min ɛnan inni ixsen ad raḥen?”
EXO 10:9 Inna Musa: “Ad nraḥ [ak-d] iḥramen nneɣ d iwessura nneɣ, s iḥenjiren nneɣ d tḥenjirin nneɣ, s wuǧi nneɣ d ifunasen d tfunasin nneɣ, minzi ɣarneɣ ijj n Řɛid i SIDI.”
EXO 10:10 [Xenni] yarra-dd xasen: “[Xenni] ittxeṣṣa ad yiři SIDI [aṭṭaṣ] akidwem mařa ad jjeɣ ad traḥem kenniw d iḥenjiren imeẓyanen nwem. Xzarem, aqa kenniw tenwim řɣar!
EXO 10:11 War ittiři amenni. Jjem ad ɛebden iryazen ijehden i SIDI, minzi d man aya i tᵉttexsem.” Uca uẓẓřen xasen zi qibač n wudem n firɛun.
EXO 10:12 [Xenni] inna SIDI i Musa: “Swiẓẓeḍ afus nnec x temmurt n Miṣra, ḥima tamurɣi ad tgeɛɛed x temmurt n Miṣra, maḥend ad tecc marra afsu [aziza] n temmurt, marra min iceṭṭen x tebrurri.”
EXO 10:13 Isswiẓẓeḍ Musa ɣar teɣɣarct nnes x temmurt n Miṣra uca igga SIDI ad dd-isuḍ ijj n usemmiḍ i dd-yusin zi ccarq x temmurt war iqeṭṭin marra ass nni d marra ǧiřet nni. Ɣar ṣṣbeḥ yiwi-dd usemmiḍ tamurɣi.
EXO 10:14 Tgeɛɛed-dd tmurɣi x marra tammurt n Miṣra, tṣeyyeḥ x marra jjwayeh n Miṣra. Aqa tuɣa řḥař yewɛar aṭṭas. Tamurɣi am tanita war tt tuɣi qbeř uca war tᵉttiři ɛemmarṣ zi ssa ɣar zzat.
EXO 10:15 Aqa dřint udem n marra tammurt ařami tessutem temmurt. Nitenti ccint marra afsu n temmurt d marra řɣiǧet n tcejjura i tuɣa iqqimen zi tebrurri. Di marra tammurt n Miṣra war iqqim walu zi marra tuzzizewt di tcejjura niɣ deg wefsu n iyyar.
EXO 10:16 [Řexdenni] iřaɣa firɛun deɣya i Musa d Harun, inna: “Aqa xḍiɣ ak-d SIDI, AREBBI nwem, uřa akidwem.
EXO 10:17 Ttzawgeɣ řexxu ad ayi tsamḥem x uxeṭṭu inu twařa-ya. Ẓaǧem s řaǧaɣ i SIDI, AREBBI nwem, ḥima ad xafi ikkes řmewt-a waha.”
EXO 10:18 Uca iffeɣ x firɛun uca iẓẓuǧ s řaǧaɣ ɣar SIDI.
EXO 10:19 [Xenni] ijja SIDI ad dd-iɛqeb usemmiḍ i dd-yusin zi ccarq ɣar řɣarb, [issjehd i-t] aṭṭas, uca ikkes [usemmiḍ] tamurɣi, inḍar i-tt di Řebḥar n Telga. War teqqim uřa d ict n tmurɣi di marra jjwayeh n Miṣra.
EXO 10:20 [Maca] isseqseḥ SIDI uř n firɛun [umi] war ijji ayt n Israil ad raḥen.
EXO 10:21 [Xenni] inna SIDI i Musa: “Swiẓẓeḍ afus nnec ɣar ujenna, [xenni] ad tiři taǧest x temmurt n Miṣra ař ɣa tafed tzemmared ad tḥadid taǧest.”
EXO 10:22 Isswiẓẓeḍ Musa afus nnes ɣar ujenna uca tehwa-dd taǧest tejhed x marra tammurt n Miṣra, třata n wussan.
EXO 10:23 Uřa d ijj war itwiři wenneɣni. Uřa d ijj war ikkar zeg wemcan nnes třata n wussan. [Maca] marra ayt n Israil tuɣa ɣarsen tafawt deg imucan mani tuɣa zeddɣen.
EXO 10:24 [Řexdenni] iřaɣa firɛun i Musa, inna: “Ruḥem, tɛebdem SIDI! Jjem waha ad iqqim wuǧi nwem d ifunasen d tfunasin nwem. [Maca] tzemmarem ad dd-tawyem iḥenjiren imeẓyanen akidwem.”
EXO 10:25 Yarra-dd [xas] Musa: “Ittxeṣṣa cek ɛawed ad aneɣ tewced deg ufus tiɣarṣa uřa d tiɣarṣa n wecmaḍ. Ad tent nessewjed [d tɣarṣṭ] i SIDI, AREBBI nneɣ.
EXO 10:26 Uřa d řebhayem nneɣ ittxeṣṣa ad kidneɣ raḥent, war ittɣimi uřa d ijj n ucekrud, minzi zzaysent i ɣa neksi, ḥima ad neɛbed SIDI, AREBBI nneɣ, minzi war nessin s minzi ɣa neɛbed SIDI, AREBBI nneɣ, ař din ɣa naweḍ.”
EXO 10:27 [Maca] SIDI isseqseḥ uř n firɛun uca yugi ad ten yejj ad raḥen.
EXO 10:28 Inna as firɛun: “Aggʷej xafi! Ḥḍa, ḥima war tẓarred [ɛad] udem inu, minzi ass i di ɣa tẓared udem inu, ad temmted!”
EXO 10:29 Inna Musa: “[Ad yiři] am mammec i tennid: war ẓarreɣ ɛad udem nnec!”
EXO 11:1 Inna SIDI i Musa: “Ad řeqfeɣ ɛad [mɣir] s yicten jjriḥect x firɛun d Miṣra. Awarni ta ad kenniw issekk ssa. Ɣar uneggar xmi kenniw ɣa yejj ad truḥem marra, ad xawem yaẓẓeř ssa s tidett.
EXO 11:2 Siweř xenni deg imezzuɣen n řgens maḥend ad ittar kuř aryaz zeg wajjar nnes u kuř tamɣart zi tajjart nnes řeqcuɛ n nnuqart d wureɣ.”
EXO 11:3 SIDI iwca as i řgens arḍa di tiṭṭawin n Imiṣriyyen. Ɛawed tuɣa Musa d ijj weryaz s ccan ameqqran di temmurt n Miṣra di tiṭṭawin n řgens u di tiṭṭawin n imsexxaren n firɛun.
EXO 11:4 Inna Musa: “Ammu i inna SIDI: ‘Ɣar wezyen n ǧiřet Necc ad ɛduɣ di řwesṭ n Miṣra
EXO 11:5 uca ad immet kuř amenzu di temmurt n Miṣra, zeg umenzu n firɛun, wenni iqqimen x řɛarc n tgeldit, ař amenzu n tayya, tenni iqqimen awarni i tsirt [tḥarri imendi], uřa d kuř amenzu zi řebhayem.
EXO 11:6 Ad din tiři ict n tɣuyyit d tameqqrant x marra tammurt n Miṣra i war tuɣi ɛemmarṣ niɣ ɛemmarṣ ɛad ad tiři.
EXO 11:7 [Maca] ɣar marra ayt n Israil, war ittẓu uřa d ijj n weqzin x iwdan uřa x řmař, maḥend ad tessnem, belli SIDI ittegg řfarz jar Imiṣriyyen d Israil.’
EXO 11:8 [Xenni] ad ɣari dd-hwan marra imsexxaren nnec, ad ayi bendqen, ad inin: ‘Ffeɣ cek d marra řgens i cek iḍeffaren deg iṣuraf nnec!’ Awarni man aya necc ad ffɣeɣ.’” Uca iffeɣ x firɛun, tekkar dayes tmessi s uxeyyeq.
EXO 11:9 [Aqa] inna SIDI i Musa: “Firɛun war d awem ittesři ca, ḥima ad mɣarent řeɛřamat inu di temmurt n Miṣra.”
EXO 11:10 Aqa Musa d Harun ggin marra řeɛřamat-a zzat i wudem n firɛun, maca SIDI tuɣa isseqseḥ uř n firɛun ařami war ijji ad ffɣen ayt n Israil zi temmurt nnes.
EXO 12:1 Issiweř SIDI ak-d Musa d Harun di temmurt n Miṣra, inna:
EXO 12:2 “Ayur-a ad awem yiři d azeǧif n iyuren. Ad awem yiři wa i kenniw d amezwaru n iyuren n useggʷas.
EXO 12:3 Siweř ɣar marra tamesmunt n Israil, ini: ‘Deg wass wiss ɛecra ad iksi kuř ijj i yixef nnes ijj n yezmar x [marra] [řaǧ n] taddart [i dd-iqqarṣen zeg] ibabaten, [ijj n] yezmar x [ict n] taddart.
EXO 12:4 [Maca] mařa [raǧ n] taddart tuɣa imẓi i yezmar, [xenni] ittxeṣṣa ad iksi ak-d wajjar nnes yudsen ɣar taddart nnes ɛlaḥsab [řqedd n] iwdan. Zi jjihet n yezmar ad tewtem řeḥsab i min ɣa yecc kuř ijjen.
EXO 12:5 Ad yiři d izmar icnan qaɛ, awtem n ijj n useggʷas. Ad [t] teksim zeg iḥuřiyyen niɣ zeg iɣayḍen.
EXO 12:6 Ad t txemmřem ař ass arbeɛṭac zeg uyur-a uca ad as iɣarṣ marra agraw n tmesmunt n Israil jar beddu n wezyen n wass ař dd-tewḍa tmeddit.
EXO 12:7 Ad ksin ca zeg idammen uca ad t ggen x tnayen n řeḍruf [i iǧan ɣar uɣezdis n tewwart] u x tnebdat sennej [i tewwart] n tudrin mani t ɣa ccen.
EXO 12:8 Ad ccen aysum di ǧiřet nni, [aysum] icennfen ɣar tmessi ak-d weɣrum břa antun. Ad t ccen s řebzar [yarzeg].
EXO 12:9 War t ttᵉttem ca d aziza niɣ yenwan deg waman, maca mɣir mařa ittwacennef di tmessi, ak-d uzeǧif nnes d iḍaren nnes d wadan nnes.
EXO 12:10 War zzayes ttejjim walu ɣar ṣṣbeḥ, maca min zzayes ɣa iqqimen ɣar ṣṣbeḥ, ittxeṣṣa kenniw ad t tcemḍem di tmessi.
EXO 12:11 Ammu i d awem ittxeṣṣa ad t teccem: tajɛinna nwem ad tiři tebyes, sandaliyat nwem deg iḍaren nwem u taɣɣarct nwem deg ufus nwem uca ad t teccem deɣya. Aqa-t d Taɣarṣt n Useɛdu n SIDI.
EXO 12:12 [Minzi] di ǧiřet-a, Necc ad ɛduɣ x temmurt n Miṣra uca ad wteɣ kuř amenzu di temmurt n Miṣra, ammu deg iwdan uřa di řmař, uca ad ssiwḍeɣ řeḥkamat inu x marra irebbiten n Miṣra, Necc d SIDI!
EXO 12:13 Uca idammen ad awem iřin d ict n řeɛřamet x tudrin mani [tzeddɣem] kenniw. [Mařa] ẓriɣ idammen, ad xawem ɛduɣ. War tᵉttiři jjriḥect ineqqen jar awem, xmi ɣa wteɣ tammurt n Miṣra.
EXO 12:14 Ass-a ad awem yiři d ijj n wass i řidaret uca ad zzayes tɛeyydem i SIDI. Aqa-tt d ict n tewṣeyyet i řebda i [marra] jjiřat nwem, ḥima ad zzayes tɛeyydem.
EXO 12:15 Sebɛa n wussan ad teccem aɣrum břa antun. Nican deg wass amezwaru ad tessuffɣem antun zi tudrin nwem, minzi man wen i ɣa iccen ca s wentun, zeg wass amezwaru ař ass wiss sebɛa, bnadem nni ad ittwaqess zi Israil.
EXO 12:16 Deg wass amezwaru ad yiři ijj n umuni iqeddsen uca [ɛawed] deg wass wiss sebɛa ad din yiři ijj n umuni iqeddsen. Uřa d ict n řxedmet war tᵉttwagg ca deg [wussan] nni. Mɣir min ɣa yecc kuř ijj, d man aya waha iɛeddeř ad zzaywem ittwassewjed.
EXO 12:17 Ad teḥḍam [Řɛid n] Weɣrum břa Antun, minzi deg wass nni aqa ssuffɣeɣ-dd kenniw zi temmurt n Miṣra. Ad teḥḍam ass-a di [marra] jjiřat nwem, aqa-tt d ict n tewṣeyyet i řebda.
EXO 12:18 Deg [uyur] amezwaru, deg wass wiss arbeɛṭac n uyur, di ǧiřet, ad teccem aɣrum břa antun ař ǧiřet n wass waḥit u-ɛicrin zeg uyur.
EXO 12:19 Sebɛa n wussan war ittwiffi wentun di tudrin nwem, minzi man wen i ɣa iccen zi min iǧan s wentun, ma d abarrani niɣ d mmis n temmurt, bnadem nni ad ittwaqess zi tmesmunt n Israil.
EXO 12:20 War ttᵉttem walu zi min iǧan s wentun. Di marra tizeddaɣ nwem ad teccem aɣrum břa antun.’”
EXO 12:21 Iřaɣa Musa i marra imɣaren n Israil, inna asen: “Ṭṭfem, ksim [ijjen zeg] wuǧi i yixef nwem, i řaǧat nwem u ɣarṣem t i [Tɣarṣt n] Useɛdu.
EXO 12:22 Ṭṭfem ict n tqebbiḍt n tɛelǧet, sɣeḍsem [tt] deg idammen nni iǧan di ṭṭebṣi, ɣemsen xenni zeg idammen i iǧan di ṭṭebṣi x tnebdat sennej [i tewwart] u x tnayen n řeḍruf [ɣar uɣezdis n tewwart]. Ař ṣṣbeḥ war itteffeɣ uřa d ijjen zzaywem zi tewwart n taddart nnes.
EXO 12:23 SIDI ad iẓwa [x temmurt], maḥend ad iwwet Imiṣriyyen, [maca xmi] ɣa iẓar idammen x tnebdat n nnej u x tnayen n řeḍruf [ɣar uɣezdis n tewwart], xenni ad iɛdu SIDI tawwart nni, war ittejji amteḥḥay ad yadef ɣar tudrin nwem, ḥima ad iwwet.
EXO 12:24 Ḥḍam awař-a [i nniɣ], aqa d tewṣeyyet i cek u i iḥenjiren nnec i řebda.
EXO 12:25 Ad yiři, xmi ɣa tadfem ɣar temmurt tenni d awem ɣa yewc SIDI, am mammec inna Netta, ad teḥḍam aɛbad-a [n řidaret].
EXO 12:26 Uca x minni d awem ɣa inin iḥenjiren nwem: ‘Min ixs ad yini weɛbad-a [n řidaret] i kenniw?’,
EXO 12:27 [xenni] ad tinim: ‘Aqa d Taɣarṣt n Useɛdu i SIDI wenni iɛdun x tudrin n ayt n Israil di Miṣra, umi iwta Imiṣriyyen uca ifekk tudrin nneɣ.’” Řexdenni yuḍar řgens uca bendqen nitni.
EXO 12:28 Ruḥen ayt n Israil uca ggin am mammec ten yumur SIDI i Musa d Harun u ammu i tt ggin.
EXO 12:29 Tuɣa ɣar wezyen n ǧiřet umi iwta SIDI marra imenza di temmurt n Miṣra s řmewt, zeg umenzu n firɛun, wenni iqqimen x řɛarc nnes, ař amenzu n umeḥbus i iǧan di řeḥbes, uřa d marra imenza n řebhayem.
EXO 12:30 Ikkar firɛun di ǧiřet nni, netta d marra imsexxaren nnes d marra Imiṣriyyen uca tuɣa din ict n tɣuyyit temɣar minzi war tuɣi uřa d ict n taddart mani war iǧi umettin.
EXO 12:31 Uca iřaɣa-dd i Musa d Harun s ǧiřet, inna: “Kkarem, teffɣem zi řwesṭ n řgens inu, kenniw [jmiɛ] ak-d ayt n Israil, ruḥem, tɛebdem SIDI, am mammec tennam kenniw.
EXO 12:32 Awyem uǧi nwem d ifunasen d tfunasin nwem, am mammec tennam. Ruḥem, [maca ttzawgeɣ kenniw,] barkem ayi necc ɛawed!”
EXO 12:33 Zeyyaren Imiṣriyyen aṭṭas x řgens, maḥend nitni ad ffɣen s uqeǧeq zi temmurt, minzi [Imiṣriyyen] nnan: “Aqa neccin marra d imettan!”
EXO 12:34 Uca yiwi řgens arecti nnes qbeř ma ɣa inḍu uca tibeqyin nnḍen tent jar warruḍ nsen x ṭɣarḍin nsen.
EXO 12:35 Ayt n Israil ggin ɛlaḥsab awař [i d asen inna] Musa, ttaren řeqcuɛ n nnuqart d wureɣ d warruḍ zeg Imiṣriyyen.
EXO 12:36 SIDI iwca řgens arḍa di tiṭṭawin n Imiṣriyyen, wcin asen min ttaren, u [ammu i] keccḍen nitni Imiṣriyyen.
EXO 12:37 Fesyen ayt n Israil iqiḍan nsen, [uyuren] zi Raɛamsis ɣar Sukkut, [tuɣa aten] ɛřaḥař di setta-myat-ařef x iḍaren, ttwaḥesben iryazen waha, břa iḥenjiren.
EXO 12:38 Igeɛɛed akidsen ijj n ubarru d ameqqran n ɛřam kuř iwdan, [xenni ɛawed] uǧi d ifunasen d tfunasin, aqa-tt d ict n tḥimart temɣar aṭṭas.
EXO 12:39 S warecti i kidsen dd-iwyen zi Miṣra ggʷin tifḍirin břa antun, minzi tuɣa [ɛad] war ismim, minzi uẓẓřen xasen-dd zi Miṣra u war zemmaren ad bedden maḥend ad areyyḥen u war sswejden macca i webrid i yixef nsen.
EXO 12:40 Tuɣa [řmijař n] tzeddiɣt n ayt n Israil di Miṣra, [řmijar] i [din] izedɣen, arebɛa-mya u-třatin n iseggʷusa.
EXO 12:41 Ɣar uneggar n arebɛa-mya u-třatin n iseggʷusa, deg wass nni simant nnes, ffɣen marra řɛeskar n SIDI zi temmurt n Miṣra.
EXO 12:42 Tanita aqa-tt d ict n ǧiret ittxeṣṣa ad tᵉttwaḥḍa [i řewqar] i SIDI, maɣar Netta indeh i-ten zi temmurt n Miṣra. Ǧiřet-a tanita, aqa-tt i SIDI. Ittxeṣṣa ad tᵉttwaḥda zi marra ayt n Israil, di [marra] jjiřat nsen.
EXO 12:43 Inna SIDI i Musa d Harun: “D ta d tawṣeyyet x [Tɣarṣt n] Useɛdu: war zzayes ittett mmis n ubarrani,
EXO 12:44 [maca] kuř ismeɣ immesɣen zeg ijj n weryaz s nnuqart, izemmar ad zzayes yecc, mařa txetned as.
EXO 12:45 Amɛezzeb d ucewwař war zzayes ttᵉtten ca.
EXO 12:46 Ad ittwacc di taddart d ict u war itteffeɣ walu zeg weysum nni ɣar barra n taddart uca war zzayes ittareẓẓi uřa d ijj n yiɣes.
EXO 12:47 Marra tamesmunt n Israil ad tegg [amenni].
EXO 12:48 Mařa ca n ubarrani innewjew-dd ɣarek uca ixs ad issewjed [Taɣarṣt n] Useɛdu i SIDI, ittxeṣṣa ad ittwaxten kuř aryaz nni ɣares iǧan. Řexdenni ad dd-iqarreb, ad tt issewjed, uca ad yiři am wenni dd-ixeřqen di temmurt. Maca uřa d ijj zeg inni war ixtinen war izemmar ad zzayes yecc.
EXO 12:49 Ad din yiři ijj n uzerf i wenni dd-ixeřqen [di temmurt] u i ubarran i izeddɣen jar awem am ubarrani.”
EXO 12:50 Uca marra ayt n Israil ggin am mammec d asen yumur Musa d Harun, ammu i tt ggin.
EXO 12:51 Uca imsar deg wass nni simant nnes issuffuɣ SIDI ayt n Israil zi temmurt n Miṣra [am ttwasettfen nitni] ɛlaḥsab [iseddiyyen n] řɛeskar nsen.
EXO 13:1 Issiweř SIDI ak-d Musa, inna:
EXO 13:2 “Sqeddes ayi kuř amenzu, wenni zi jar ayt n Israil yarezmen řemřawet [d amezwaru], am zeg iwdan am zi řebhayem. Netta aqa inu.”
EXO 13:3 Inna Musa i řgens: “Idarem ass-a min di teffɣem zi Miṣra, zi taddart n tesmuɣi, minzi SIDI issuffeɣ-dd kenniw zzayes s ufus ijehden. [Deg wass-a] war tᵉttettem walu min di iǧa wentun.
EXO 13:4 Ass-a ad teffɣem, deg uyur n Abib.
EXO 13:5 Mařa SIDI issidef i cek ɣar temmurt n ayt n Kenɛan d Iḥittiyyen d Imuriyyen d Iḥiwiyyen d Iyabusiyyen, x tenni ijjuǧ i řejdud nwem ad ac tt iwc, tammurt ifeyyḍen s uɣi d tamment, [xenni] ad teḥḍam aɛbad-a [n řidaret] deg uyur-a.
EXO 13:6 Sebɛa n wussan ad tecced aɣrum břa antun uca deg wass wiss sebɛa [ad din yiři] ijj n Řɛid i SIDI.
EXO 13:7 Sebɛa n wussan ad ittwacc weɣrum břa antun uca war ɣarek ittwiffi min ixemmren. Di marra jjwayeh nnec war ittwifi wentun ɣarek.
EXO 13:8 Deg wass nni ad tḥajid i mmic, ad as tinid: Man aya di ṭṭweɛ n min d ayi igga SIDI umi dd-ffɣeɣ zi Miṣra.
EXO 13:9 Ad ac yiři am yijj n uceyyar x ufus nnec u i řidaret jar tiṭṭawin nnec, maḥend Ccariɛa n SIDI ad tiři deg uqemmum nnec, minzi s ufus ijehden issuffeɣ SIDI i kenniw zi Miṣra.
EXO 13:10 S uya i ɣa teḥḍid tawsiyyet-a di řweqt nnes i d as ittwaggen, zeg useggʷas ɣar useggʷas.
EXO 13:11 Ad yiři xmi cek ɣa issidef SIDI di temmurt n ayt n Kenɛan, am mammec i d ac ijjuǧ uřa i řejdud nnec, uca iwca ac tt,
EXO 13:12 [xenni] ad tesseɛdud ɣar SIDI kuř [amenzu] i yarezmen řemřawet [d amezwaru] uřa d kuř amenzu n řebhayem i yarezmen řemřawet [d amezwaru]: iwetman ad iřin i SIDI.
EXO 13:13 Maca kuř [amenzu] i yarezmen řemřawřet n weɣyuř [d amezwaru], ad t tefdid s yijj zeg wuǧi. Mařa war t tefdid, ad as tarẓed iri. Kuř amenzu n bnadem zeg iḥenjiren nnec ad t tefdid.
EXO 13:14 Uca ad imsar, xmi cek ɣa isseqsa mmic tiwecca, ad yini: ‘Manawya?’, ad as tinid: ‘Aqa issuffuɣ aneɣ-dd SIDI zi Miṣra s ufus ijehden, zi taddart n tesmuɣi.
EXO 13:15 [Řami] d aneɣ ibedd firɛun deg webrid i wuffuɣ nneɣ, imsar aqa SIDI inɣa marra imenza di temmurt n Miṣra, zeg umenzu n bnadem ař amenzu n řebhimet. X uya qeddmeɣ kuř amenzu i yarezmen řemřawet [d amezwaru] d taɣraṣt i SIDI, [maca] kuř amenzu jar iḥenjiren inu, ad t fdiɣ.
EXO 13:16 Ad yiři d aceyyar x ufus nnec d ijj n ufiřu n useggem jar tiṭṭawin nnec, minzi SIDI aqa issuffeɣ aneɣ-dd zi Miṣra s ufus ijehden.’”
EXO 13:17 [Umi] ijja firɛun řgens ad iraḥ, war ten indih AREBBI ɣar webrid n temmurt n Ifilisṭiniyyen, waxxa nettat tudes, minzi AREBBI inna: “Maḥend war ittendemmi řgens xmi ɣa iẓar řbaruḍ uca ad dd-idweř ɣar Miṣra.”
EXO 13:18 Indeh AREBBI řgens, maḥend ad ikk x webrid n řexřa ɣar Řebḥar n Telga. Uca geɛɛden ayt n Israil zi Miṣra wejden i umenɣi.
EXO 13:19 Iksi Musa akides iɣsan n Yusuf, minzi netta issjuǧ ayt n Israil s ict n tẓaǧit, inna: “S tidett ad ɣarwem dd-yarzef AREBBI, uca ad tessgeɛɛdem iɣsan inu ssa akidwem!”
EXO 13:20 Uca fesyen iqiḍan nsen, [ggʷejen] x Sukkut uca wtin iqiḍan nsen di Itam, ɣar ṭṭarf n řexřa.
EXO 13:21 SIDI izwar i tiṭṭawin nsen deg uẓiř deg ijj n uqellij n useynu, maḥend ad ten igewwed deg webrid, u di ǧiřet deg ijj n uqellij n tmessi, ḥima ad ɣarsen igg tafawt, ḥima [ad taf zemmaren] ad uyuren ass d ǧiřet.
EXO 13:22 Deg wass war dd-ikkis aqellij n useynu zzat i uɣembub n řgens uřa di ǧiřet [war dd-ikkis] aqellij n tmessi.
EXO 14:1 [Xenni] issiweř SIDI ak-d Musa, inna:
EXO 14:2 “Siweř ak-d ayt n Israil, [maḥend] ad dd-dewřen uca ad wten iqiḍan nsen zzat i Fi-Haxirut, jar Migdul d řebḥar, qibač i Baɛal-Ṣafun. Arendad nnes ad tewtem iqiḍan nwem x tma n řebḥar.
EXO 14:3 [Xenni] ad yini firɛun x ayt n Israil: ‘Aqa nitni weddaren di temmurt, aqa řexřa iḥṣar i-ten.’
EXO 14:4 Uca Necc ad ssqesḥeɣ uř n firɛun, [ḥima] ad ten iḍfar u Necc ad ttwassɛuǧiɣ x firɛun u x marra řɛeskar nnes uca ad ssnen Imiṣriyyen belli Necc d SIDI.” Uca ammu i tt ggin nitni.
EXO 14:5 Uca xebbaren i ujeǧiḍ n Miṣra belli řgens yarweř. [Xenni] ibeddeř wuř n firɛun d imsexxaren nnes x řgens uca nnan: “Mammec i negga aya, nessekk Israil zi tesmuɣi i iggin i neccin?”
EXO 14:6 Uca iḥezzem [Firɛun] akarru nnes, iksi akides řgens nnes.
EXO 14:7 Iksi akides setta-mya n ikarruten icewwaren d marra ikarruten n Miṣra uca [igga] acewwar n ineɣrafen [zi řɛeskar] nnes x kuř [ijj zzaysen].
EXO 14:8 Aqa isseqseḥ SIDI uř n firɛun, ajeǧid n Miṣra, uca yardef netta ayt n Israil, maca ayt n Israil tuɣa ffɣen s yijj n ufus ittwassgeɛɛden.
EXO 14:9 Aredfen ten Imiṣriyyen uca iwḍen ɣarsen s marra iysan d ikarruten n firɛun d imnayen nnes d řɛeskar nnes, ɣar Fi-Haxarut, ɣar ujemmaḍ n Baɛal-Ṣafun, mani wtin iqiḍan nsen ɣar řebḥar.
EXO 14:10 [Řami] ten dd-yudes firɛun, ssgeɛɛden ayt n Israil tamuɣři nsen, ẓrin belli Imiṣriyyen ḍfaren ten-dd uca nitni ggʷeden aṭṭas. [Xenni] sɣuyen ayt n Israil ɣar SIDI.
EXO 14:11 Nnan i Musa: “Ma war ǧin [ɛad] imeḍřan di Miṣra ař d aneɣ dd-tawyed, maḥend ad nemmet di řexřa-ya? Maɣar teggid ammu, tessuffɣed aneɣ-dd zi Miṣra?
EXO 14:12 Ma war kidek nessiweř marra awařen-a di Miṣra, nenna: ‘Ejj aneɣ ad nexdem i Imiṣriyyen’? Xar mařa [tuɣa neqqim] nexdem i Imiṣriyyen x mařa nemmut di řexřa.”
EXO 14:13 [Xenni] inna Musa i řgens: “War tteggʷedem, beddem, texzarem asenjem n SIDI i d awem ɣa yewc ass-a, minzi Imiṣriyyen nni tᵉttwařam ass-a, ɛemmarṣ ad ten tẓarem ɛad i řebda.
EXO 14:14 SIDI ad xawem immneɣ uca kenniw ad tseɣdem [waha].”
EXO 14:15 Inna SIDI i Musa: “Mayemmi ɣari tᵉttřaɣid? Ini i ayt n Israil [ḥima] ad fesyen iqiḍan nsen.
EXO 14:16 Sgeɛɛed taɣɣarct nnec, swiẓẓeḍ afus nnec x řebḥar uca farq i-t, ḥima ad iẓwa ayt n Israil x řbarr di řwesṭ n řebḥar.
EXO 14:17 Xzar, Necc ad ssqesḥeɣ uř n Imiṣriyyen, maḥend ad ten aredfen [di řebḥar] u Necc ad ssɛuǧiɣ Ixef inu s firɛun u s marra řɛeskar nnes, ikarruten nnes d imnayen nnes [n iysan].
EXO 14:18 Ad ssnen Imiṣriyyen belli Necc d SIDI, xmi ɣa ttwassɛuǧiɣ s firɛun, s ikarruten nnes d imnayen nnes [n iysan].”
EXO 14:19 [Xenni] immuṭṭi lmalak n AREBBI nni yuyuren zzat i řɛeskar n Israil uca idweř ɣar ḍeffar [nsen]: aqellij n useynu immuṭṭi zi zzat i wudem nsen uca ibedd ɣar ḍeffar nsen.
EXO 14:20 Yudef [uqellij] jar řɛeskar n Imiṣriyyen d řɛeskar n Israil. Tuɣa aseynu d taǧest [ɣar uɣezdis-a] u issiɣ [i uɣezdis nneɣni] s ǧiřet u war dd-iqarreb ijjen ɣar wenneɣni ǧiřet tekmeř.
EXO 14:21 Uca isswiẓẓeḍ Musa afus nnes x řebḥar uca iɛarn SIDI xenni řebḥar ɣar uɣezdis s yijj n usemmiḍ d acarqi ijhed, marra ǧiřet [nni], uca yarra řebḥar ad ijeffef. [Ammu] i ttwammsebḍan waman.
EXO 14:22 Uyuren ayt n Israil x min yuẓɣen di řwesṭ n řebḥar uca aman ggin amecnaw řḥiḍ x yefus nsen d uzeřmaḍ nsen.
EXO 14:23 Aredfen ten Imiṣriyyen, ruḥen awarni asen di řwesṭ n řebḥar s marra iysan n firɛun d ikarruten nnes d imnayen nnes [n yiysan].
EXO 14:24 Řami d yeffu řḥař, imsar belli SIDI iṣweḍ ɣar řɛeskar n Imiṣriyyen zeg uqellij n tmessi d iseynuten uca issxarweḍ řɛeskar n Miṣra.
EXO 14:25 Ijja tijarrarin n ikarruten nsen ad fesxent, ařami idweř iwɛar xasen ad uyuren ɣar zzat. [Řexdenni] nnan Imiṣriyyen, [kuř ijjen zzaysen i yixef nnes]: “Ittxeṣṣa ayi ad arewřeɣ zi zzat n tiṭṭawin n Israil, minzi SIDI immneɣ di ṭṭweɛ nsen ḍidd i Imiṣriyyen.”
EXO 14:26 Inna SIDI i Musa: “Swiẓẓeḍ afus nnec x řebḥar, ḥima ad dewřen waman x Imiṣriyyen, x ikarruten nsen u x imnayen nsen [n iysan].”
EXO 14:27 [Xenni] isswiẓẓeḍ Musa afus nnes x řebḥar u ɣar řefjar n ṣṣbeḥ idweř řebḥar ɣar mani t tuɣa qbeř uca arewřen Imiṣriyyen nican ḍidd nnes uca iɣḍeř SIDI Imiṣriyyen di řwesṭ n řebḥar.
EXO 14:28 Dewřen-dd waman uca ttwaneḍřen ikarruten d imnayen [n iysan] n marra řɛeskar n firɛun i tuɣa yudef awarni asen ɣar řebḥar. War zzaysen iqqim uřa d ijjen.
EXO 14:29 [Maca] ayt n Israil uyuren x min yuẓɣen di řwesṭ n řebḥar u aman tuɣa ggin amecnaw řḥiḍ ɣar yefus nsen d uzeřmaḍ nsen.
EXO 14:30 [Ammu] i issenjem SIDI Israil deg wass nni zeg ufus n Imiṣriyyen uca Israil iẓra Imiṣriyyen i immuten x tma n řebḥar.
EXO 14:31 Iẓra Israil afus imɣaren i igga SIDI deg Imiṣriyyen uca iggʷed řgens zi SIDI, uca umnen nitni di SIDI u di Musa, amsexxar nnes.
EXO 15:1 Řexdenni izehhed Musa jmiɛ ak-d ayt n Israil zhid-a i SIDI, nnan: “Ad zehhdeɣ i SIDI, minzi Netta yuɛřa di řuɛřa! Ayis d wenni xas yenyin inḍar i-ten di řebḥar.
EXO 15:2 SIDi d jjehd inu d azehhed inu. Netta idweř d asenjem inu. Wa d Arebbi inu, necc ad t ssemɣareɣ. Netta d AREBBI n baba, necc ad t ssɛuǧeɣ!
EXO 15:3 SIDI d aryaz n umenɣi, SIDI d Isem nnes!
EXO 15:4 Ikarruten n firɛun d řɛeskar nnes inḍar i-ten di řebḥar u acewwar n ineɣrafen nnes n řɛeskar ɣarqen di Řebḥar n Telga.
EXO 15:5 Aman ihewřen dřin i-ten. Amecnaw aẓru, hwan ɣar řaǧaɣ.
EXO 15:6 A SIDI, afus afusi nnec ittwaɛezz s jjehd, afus afusi nnec, a SIDI, aqa iřbez řeɛdu.
EXO 15:7 S řemɣaret n uɛuǧi nnec tᵉteḥḥid inni kik ittemɛařan. Mařa tessekked řḥaduq n weɣḍab nnec, ad ten yecc wanita amecnaw iɣeǧ.
EXO 15:8 S usuḍi n wenzaren nnec ɛurrcen waman, ttwassbedden tseǧya am weɣbar, aman ihewřen jemden di řwesṭ n řebḥar.
EXO 15:9 Inna řeɛdu: ‘Ad ten aredfeɣ, ad ten ɛduɣ, ad bḍiɣ řmur, řeɛmar inu ad zzaysen ijjiwen, ad dd-jebdeɣ ssif inu, afus inu ad zzaysen ikkes řwart nsen.’
EXO 15:10 Tsuḍed s nnefs nnec uca ideř i-ten řebḥar. Nitni hwan-dd am řexfif deg waman imɣaren.
EXO 15:11 A SIDI, man wen i iǧan am Cek jar irebbiten? Wi iǧan am Cek, d wenni ittwassɛuǧen di tqeddast, amweqqar deg izřan n uṣebbeḥ, man wen itteggen řeɛjayeb am Cek?
EXO 15:12 Tesswiẓẓḍed afus afusi nnec, tsarḍ i-ten temmurt.
EXO 15:13 Cek tgewwded řgens-a s tmexsiwt nnec icuwwaren, aqa tefdid t, s jjehd nnec tnedhed ten ɣar Tzeddiɣt Iqeddsen nnec.
EXO 15:14 Řegnus sřin x uya uca arjijen. Teṭṭef teggʷudi deg imezdaɣ n Filicit.
EXO 15:15 Řexdenni imeqqranen n tqebbař n Idum ttbehten, inni ɣar teǧa ṣṣulṭa di Mu’ab ttarjijen, u marra imezdaɣ n Kenɛan aqa fesyen!
EXO 15:16 Tewḍa xasen řɛurret d tiggʷudi. S řemɣaret n uɣiř nnec seɣden am weẓru, ařami iẓwa řgens nnec, a SIDI, ařami iẓwa řgens-a i tkesbed i Yixef nnec.
EXO 15:17 Cek ad ten tnedhed uca ad ten teẓẓud x wedrar n řwart nnec, amcan i teggid d Tazeddiɣt nnec, a SIDI, Zzawect Iqeddsen i iggin ifassen nnec, a Sidi inu.
EXO 15:18 SIDI ad iḥkem i řebda qaɛ!
EXO 15:19 Minzi ayis n firɛun yudef ɣar řebḥar s ikarruten nnes d imnayen nnes uca iqřeb xasen SIDI ɛawed aman n řebḥar. Maca ayt n Israil ẓwan x řaẓaɣ di řwesṭ n řebḥar.”
EXO 15:20 U Maryam, tanabit, učmas n Harun, teksi aǧun deg ufus nnes u marra timeṭṭa ffɣent awarni as s ibendiren d ccḍiḥ [s nnubtat].
EXO 15:21 [Xenni] tarra-dd xasen Maryam snnubet nnes: “Ɣennjem i SIDI, minzi aqa Netta yuɛřan aṭṭas! Inḍar ayis ak-d wenni xas yenyin di řebḥar.”
EXO 15:22 [Xenni] ijja Musa [řgens n] Israil ad ifsi iqiḍan nsen, inni iǧan x tma n Řebḥar n Telga, uca ruḥen di řexřa n Cur, uyuren třata n wussan di řexřa břa ad afen aman.
EXO 15:23 Uca iwḍen ɣar Mara, [maca] war zemmaren ad swen aman n Mara, minzi tuɣa aten d imerzagen. X uya ggin as i wemcan nni ‘Mara’.
EXO 15:24 Innedqem řgens x Musa, inna: “Min ɣa nsu?”
EXO 15:25 Netta iřaɣa i SIDI uca SIDI immeř as ijj n ukeccuḍ uca inḍar i-t daxeř deg waman uca dewřen waman d imiẓiden. Din i d as igga [i řgens] ict n tewṣeyyet d ict n lfariḍa u dinni i-ten iqeǧeb.
EXO 15:26 Inna: “Mařa tesřid mliḥ i wawař n SIDI, AREBBI nnec, teggid min iǧan nican di tiṭṭawin nnes, ad tesřed i řumarat nnes, ad teḥḍid marra tiweṣṣa nnes, [xenni] Necc war d awem-dd ssekkiɣ řehřac i dd-ssekkeɣ x Miṣra, minzi Necc d SIDI, Amesgenfi nnec!”
EXO 15:27 [Řexdenni] iwḍen ɣar Ilim, mani tuɣa tenɛac n řɛunṣarat n waman, d sebɛin n tcejjura n tini uca wtin iqiḍan nsen dinni zzat i waman.
EXO 16:1 Uca fesyen iqiḍan nsen, [uyuren] zi Ilim, u marra tamesmunt n ayt n Israil tiweḍ ɣar řexřa n Sin i iǧan jar Ilim d Sina. Tuɣa [man aya] deg wass xemmesṭac n uyur wiss tnayen awarni řami dd-ffɣen zi temmurt n Miṣra.
EXO 16:2 Marra tamesmunt n ayt n Israil tennedqem zi Musa d Harun di řexřa.
EXO 16:3 Nnan asen ayt n Israil: “Mři nemmut s ufus n SIDI di temmurt n Miṣra umi tuɣa neqqim ɣar ṭṭbaṣi n weysum, necca aɣrum ařami nejjiwen! Minzi kenniw tessuffɣem aneɣ-dd ɣar řexřa-ya maḥend ad tenɣem marra agraw aya s řaẓ.”
EXO 16:4 [Xenni] inna SIDI i Musa: “Xzar, ad jjeɣ aɣrum ad xawem dd-iwḍa zeg ujenna am wenẓar. [Xenni] ad iffeɣ řgens, ad ksin min ḥdajen i wass deg wass nni, ḥima ad ten qeǧbeɣ, ma gguren di [tɣuri n] Ccariɛa inu, niɣ lla.
EXO 16:5 Ad yiři deg wass wiss setta, ad sswejden min dd-iwyen ɣar daxeř. Man aya ad yiři d tnayen n tseqqar x min ɣa ssmunen kuř ass.”
EXO 16:6 [Řexdenni] inna Musa d Harun i marra ayt n Israil: “Ɣar uɛecci ad tessnem belli SIDI i kenniw dd-issuffɣen zi temmurt n Miṣra,
EXO 16:7 u ɣar ṣṣbeḥ ad tẓarem aɛuǧi n SIDI, minzi aqa Netta isřa anedqem nwem x SIDI. Ma neccin, [min neɛna], ḥima kenniw ad xaneɣ tenndeqmem?”
EXO 16:8 Inna Musa: “Řami d awem iwca SIDI aysum i macca deg uɛecci u aɣrum di tyawant di ṣṣbeḥ, aqa isřa SIDI anedqem nwem i zi xas tᵉttnedqamem. I neccin, [min neɛna]? Kenniw war xaneɣ tᵉttnedqamem, maca x SIDI.”
EXO 16:9 Inna Musa i Harun: “Ini i tmesmunt n ayt n Israil marra: ‘Reḥḥgem-dd ɣar zzat i wudem n SIDI, minzi aqa isřa i unedqem nwem.’”
EXO 16:10 [Am] issiweř Harun ak-d tmesmunt n ayt n Israil marra, tuɣa xezzaren ɣar řexřa uca xzar, aɛuǧi n SIDI iḍhar-dd deg useynu.
EXO 16:11 Issiweř SIDI ak-d Musa, inna:
EXO 16:12 “Necc sřiɣ i unedqem n ayt n Israil. Siweř akidsen uca ini: Jar beddu n wezyen n wass ař dd-tewḍa tmeddit ad teccem aysum, ɣar ṣṣbeḥ ad tejjiwnem s weɣrum uca ad tessnem belli Necc d SIDI, AREBBI nwem.”
EXO 16:13 Ɣar uɛecci uřyent i-dd ijḍaḍ qqaren as ‘tsalwa’ uca dřint řmargeḥ n řɛeskar u ɣar ṣṣbeḥ tuɣa nnda inneḍ-dd i řmargeḥ.
EXO 16:14 Řami dd-igeɛɛed nnda, aqa da, ict n řḥajjet d tazdat am teqcurt, d tazdat am nnda igarsen, [tᵉttwaf] x wudem n řexřa, x temmurt.
EXO 16:15 Ẓrin tt ayt n Israil, nnan ijjen i wenneɣni: “Manawya?”, minzi war ssinen min iɛna. [Řexdenni] inna asen Musa: “Wa d aɣrum nni d awem iwca SIDI, ḥima ad teccem.
EXO 16:16 Wa d awař i [d awem] yumur SIDI: ‘Ejj ad zzayes iksi kuř ijj ɛlaḥsab min iḥdaj, [řeqyas n] ijj n uɛumir, [ɛřaḥař tnayen litru], i [ijjen] bnadem. [Kuř] aryaz ad iksi ɛlaḥsab řqedd n iwdan i ɣares deg uqiḍun.’”
EXO 16:17 Uca ammu i ggin ayt n Israil. Yrun [zzayes], [ijjen] aṭṭas, [wenneɣni] drus.
EXO 16:18 Weznen aya s [řeqyas n] uɛumir. Wenni yrun aṭṭas war ɣares zzyada d wenni yrun drus, war d as ittxeṣṣi ɛad. Kuř ijj iyru macca nnes ɛlaḥsab min iḥdaj.
EXO 16:19 Inna asen Musa: “Uřa d ijj ad zzayes yejj ař ṣṣbeḥ.”
EXO 16:20 [Maca] nitni war sřin ca i Musa u ca n yeryazen xemmřen [ca] zzayes ař ṣṣbeḥ. [Xenni] udfen dayes ikeccawen uca ibda ad igg ccum. Uca iffugem xasen Musa aṭṭas.
EXO 16:21 Kuř ṣṣbeḥ yrun t, kuř ijj ɛlaḥsab izemmar ad icc netta, minzi mařa teḥma tfuct, tuɣa ittfessi.
EXO 16:22 Deg wass wiss setta yrun tnayen n tseqqar n weɣrum, [řeqyas n] tnayen n iɛumiren i kuř azeǧif. Uca usin-dd marra řḥukkam n tmesmunt uca xebbaren Musa.
EXO 16:23 Netta inna asen: “D man aya min xef issiweř SIDI: ‘Tiwecca d ijj n [wass n] arraḥet, ijj [n wass] n ssebt d amqeddas i SIDI. Sengʷem min texsem ad tᵉssengʷem, snennam min texsem ad tᵉssennam uca marra min ɣa iqqimen, xemmřem t ař ṣṣbeḥ.’”
EXO 16:24 Nitni xemmřen t ař ṣṣbeḥ am mammec ten yumur Musa uca war yarṣuḍ u war dayes tuɣi tkecca.
EXO 16:25 [Xenni] inna Musa: “Ccem aya ass-a, minzi ass-a d ass n ssebt n SIDI. Ass-a war t tᵉttifem deg iyyar.
EXO 16:26 Setta n wussan ad teyrum, maca deg wass wiss sebɛa aqa d ssebt, war ittiři walu.”
EXO 16:27 Deg wass wiss sebɛa imsar belli ffɣen ca zi řgens, maḥend ad yrun [ca], maca war ufin walu.
EXO 16:28 Inna SIDI i Musa: “Ař meřmi tugim ad teḥḍam řumurat inu d izerfan inu?
EXO 16:29 Xzarem, minzi SIDI iwca awem [ass n] ssebt, x uya iwca awem deg wass wiss setta aɣrum i tnayen n wussan. Kuř ijj zzaywem ad iqqim deg wemcan nnes! Deg wass wiss sebɛa war dd-itteffiɣ uřa d ijj zeg wemcan nnes!”
EXO 16:30 Uca yareyyeḥ řgens deg wass n ssebt.
EXO 16:31 Taddart n Israil třaɣa as ‘manna’. Tuɣa-tt d tacemřařt am zzariɛet n řqeṣbur uca aředdi nnes amecnaw tifḍirin n tamment.
EXO 16:32 [Xenni] inna Musa: “Ddegga d awař i zi yumur SIDI: ‘Ccurem zzayes [řeqyas n] yijj n uɛumir uca xemmeř i-t i [marra] jjiřat nwem [i dd ɣa yasen], ḥima ad ẓaren aɣrum min zi kenniw ssecceɣ di řexřa, umi kenniw ssuffɣeɣ zi temmurt n Miṣra.”
EXO 16:33 Inna Musa i Harun: “Ksi ijj n uzenbiř uca ɛemmar i-t s yijj n uɛumir n ‘manna’ uca egg i-t zzat i wudem n SIDI, ḥima ad ittwaxemmeř i [marra] jjiřat nwem.”
EXO 16:34 Uca igga i-tt Harun zzat i Cchadet, ḥima ad tᵉttwaxemmeř am mammec d as yumur SIDI i Musa.
EXO 16:35 Ammu i ccin ayt n Israil ‘manna’ arebɛin n iseggʷusa, ařami iwḍen ɣar temmurt mani ɣa raḥen ad zedɣen. Ccin manna ařami iwḍen ɣar weymir n temmurt n Kenɛan.
EXO 16:36 Ijj n uɛumir d ɛecra di tesɣart n ijj n ifa.
EXO 17:1 Uca fesyen marra tamesmunt n ayt n Israil iqiḍan nsen, [uyuren] zi řexřa n Sin, am mammec d asen yumur SIDI uca wtin iqiḍan nsen di Rafidim. War din tuɣi aman, ḥima ad issu řgens.
EXO 17:2 [Xenni] imcubbec řgens ak-d Musa, nitni nnan: “Ewc aneɣ aman, ḥima ad nsu!” Musa inna asen: “Mayemmi tᵉttexsem ad kidi temcubbucem? Mayemmi tᵉttqeǧabem SIDI?”
EXO 17:3 Tuɣa řgens iffud aṭṭas ɣar waman uca nndeqmen zi Musa, nnan: “Maɣar d aneɣ tessgeɛɛded zi Miṣra? Ma ḥima ad ayi thellked s ufadi uřa d tarwa inu d řebhayem inu?”
EXO 17:4 [Řexdenni] isɣuy Musa ɣar SIDI, inna: “Min ɣa ggeɣ ak-d řgens-a? Mɣir cwayt uca ad ayi arejmen.”
EXO 17:5 Inna SIDI i Musa: “Ekk zzat i řgens uca ksi akidek ca zeg imɣaren n Israil uca ksi ɛawed deg ufus nnec taɣɣarct nni zi tewtid iɣzar uca ruḥ.
EXO 17:6 Xzar, Necc ad beddeɣ din zzatek x teṣḍart ɣar Ḥurib, ad tewted taṣḍart, ad zzayes dd-ffɣen waman uca ad issu řgens.” Igga Musa amenni zzat i tiṭṭawin n imɣaren n Israil.
EXO 17:7 Uca iřaɣa isem n wemcan nni Massa d Mariba, minzi ayt n Israil mmcubbcen [din] u minzi nitni qeǧben SIDI, nnan: “Ma SIDI aqa-t řexxu di řwesṭ nneɣ niɣ lla?”
EXO 17:8 [Xenni] yusa-dd Ɛamaliq uca immneɣ ak-d Israil di Rafidim.
EXO 17:9 Inna Musa i Yacuwa: “Ejj aneɣ ad nixḍar iryazen uca ad neffeɣ, maḥend ad nemmneɣ ak-d Ɛamaliq. Tiwecca ad beddeɣ sennej x tqiccat n tewrirt uca taɣɣarct n AREBBI ad tiři deg ufus inu.”
EXO 17:10 Igga Yacuwa am mammec d as inna Musa, immneɣ ak-d Ɛamaliq, maca Musa d Harun d Ḥur uřyen ɣar tqiccat n tewrirt.
EXO 17:11 Uca imsar řami issgeɛɛed Musa afus nnes, [řexdenni] tuɣa Israil tɣeǧeb, maca xmi ittejja afus nnes ad ihwa, [řexdenni] ɣeǧben [ayt n] Ɛamaliq.
EXO 17:12 Ifassen n Musa dewřen ddeqřen. [Xenni] ksin ijj n weẓru uca ggin t sadu Musa uca iqqim xas uca Harun d Ḥur sennden ifassen nnes, ijj zeg uɣezdis-a, wenneɣni zeg [uɣezdis] nneɣni. Ammu i iqqimen ifassen nnes geɛɛden ařami teɣři tfuct.
EXO 17:13 Uca iɣřeb Yacuwa x Ɛamaliq d řgens nnes s řeqḍeɛ n ssif.
EXO 17:14 [Xenni] inna SIDI i Musa: “Ari aya deg ijj n wedlis ittwannḍen i řidaret [dayes] uca egg i-t deg imejjan n Yacuwa, belli aqa Necc ad mḥiɣ qaɛ řidaret di Ɛamaliq sadu ujenna.”
EXO 17:15 Ibna Musa ijj n uɛalṭar uca iřaɣa as s yisem: “SIDI d taɛeǧant inu!”
EXO 17:16 Uca inna: “Afus tuɣa x řɛarc n SIDi. SIDI ad yegg garra x Ɛamaliq zi jjiř ař jjiř.”
EXO 18:1 Isřa Yitrun, akehhan n Midyan, aḍeggʷař n Musa, marra min igga AREBBI ak-d Musa u ak-d řgens nnes Israil, aqa issuffeɣ-dd SIDI Israil zi Miṣra.
EXO 18:2 Iṭṭef Yitrun, aḍeggʷař n Musa, Ṣaffura, tamɣart n Musa, awarni řami d as iwca tirzifin nnes n tesřit,
EXO 18:3 uřa d tnayen n iḥenjiren nnes, ijjen qqaren as Jarcum, minzi tuɣa inna: “Tuɣa ayi d abarrani di temmurt d tabarranect!”,
EXO 18:4 u wenneɣni qqaren as Aliɛazir, [minzi tuɣa inna:] “AREBBI n baba iɛawen ayi uca ifekk ayi zi ssif n firɛun.”
EXO 18:5 Yitrun aḍeggʷař n Musa, ak-d iḥenjiren nnes d tmeṭṭut nnes, iwḍen ɣar Musa di řexřa, ɣar mani iwta iqiḍan, ɣar wedrar n AREBBI.
EXO 18:6 Uca netta ijja ad inin i Musa: “Necc, aḍeggʷař nnec Yitrun, usiɣ-dd ɣarek s temɣart nnec d tnayen n iḥenjiren nnes akides.”
EXO 18:7 [Xenni] iffeɣ Musa ad iřqa aḍeggʷař nnes, ibendeq uca issudem i-t. Ijjen isseqsa wenneɣni x umeddur nnes uca udfen ɣar uqiḍun.
EXO 18:8 Musa iḥaja i uḍeggʷař nnes marra min igga SIDI ak-d firɛun u ak-d Imiṣriyyen di ṭṭweɛ n Israil u x marra tamara nni xasen ikkin deg webrid d mammec ten ifekk SIDI.
EXO 18:9 Ifarḥ Yitrun zi marra řxir nni igga SIDI i Israil, umi t ifekk zeg ufus n Imiṣriyyen.
EXO 18:10 Inna Yitrun: “Ad ittwabarek SIDI d wenni kenniw ifekken zeg ufus n Imiṣriyyen u zeg ufus n firɛun, d wenni ifekken řgens zeg ufus n Imiṣriyyen!
EXO 18:11 Řexxu ssneɣ belli SIDI imɣar aṭṭas x marra irebbiten, aqa di tmesřact nni dessaren xasen.”
EXO 18:12 [Xenni] iksi Yitrun, aḍeggʷař n Musa, taɣarṣt n wecmaḍ d tiɣarṣa i AREBBI uca yusa-dd Harun jmiɛ ak-d marra imɣaren n ayt n Israil, maḥend ad yecc aɣrum [jmiɛ] ak-d uḍeggʷař n Musa zzat i wudem n AREBBI.
EXO 18:13 Tiwecca nnes tuɣa Musa ittɣima [x řkursi], maḥend ad iḥkem řgens. Tuɣa řgens ibedd zzat i Musa zi ṣṣbeḥ [zic] ař ǧiřet.
EXO 18:14 Iẓra uḍeggʷař n Musa marra min tuɣa ittegg [Musa] i řgens, inna: “Manawaya i teggid cek i řgens? Mayemmi tᵉttɣimid cek weḥḥdek u marra řgens ibedd zzatek zi ṣṣbeḥ [zic] ař ǧiřet?”
EXO 18:15 Yarra-dd Musa x uḍeggʷař nnes: “Minzi řgens ittas-dd ɣari ḥima ad ittar [ccwar] n AREBBI.
EXO 18:16 X minni ɣarsen tᵉttiři ca n tmesřact, ttasen-dd ɣari [s man aya] uca necc ad carrɛeɣ jar ijj d wenneɣni, ssecaneɣ asen tiweṣṣa d izerfan n AREBBI.”
EXO 18:17 [Řexdenni] inna as uḍeggʷař n Musa: “Min teggid war iǧi ca mliḥ.
EXO 18:18 Ammu i ɣa taḥřed aṭṭas, cek d řgens-a i kik iǧan, minzi man aya idqeř xak aṭṭas, war d as tzemmared ad t tegged weḥḥdek.
EXO 18:19 Seř řexxu i wawař inu, necc ad cek neṣḥeɣ uca AREBBI ad kik yiři. Iři cek d aweṣṣay x řgens zzat i AREBBI uca qeddem ddɛawi zzat i AREBBI.
EXO 18:20 Scen asen tiweṣṣa d izerfan uca scen asen abrid i ten ittxeṣṣan ad uyuren u řxedmet i d asen ittxeṣṣan ad tt ggen.
EXO 18:21 Ɛawed xzar cek, ad tarzud jar marra řgens x iryazen izeɛɛamen, inni itteggʷeden AREBBI, iryazen iṣdiqen, inni icarrhen tarezzut x arbeḥ. Egg i-ten d imeqqranen x wařef, d imeqqranen x mya, d imeqqranen x xemsin d imeqqranen x ɛecra.
EXO 18:22 Ejj i-ten ad carrɛen jar řgens řebda. Ejj i-ten ad qeddmen marra ddɛawi iwɛaren zzatek, [maca] marra ddɛawi timeẓyanin ad xasent carrɛen s yixef nsen. Egg i-t tefsus x yixef nnec uca ejj i-ten ad tt arbun akidek.
EXO 18:23 Mařa teggid aya, u AREBBI i cek yumuren, tzemmared ad teqqimed tbedded uca marra řgens aya ad yaweḍ ɛawed di řehna ɣar wemcan i d asen ittwagg.”
EXO 18:24 Isřa Musa ɣar wawař n uḍeggʷař nnes, igga marra min [d as] inna.
EXO 18:25 Ixḍar Musa iryazen izeɛɛamen zi marra Israil uca igga i-ten d izeǧifen x řgens: imeqqranen x wařef, imeqqranen x mya, imeqqranen x xemsin d imeqqranen x ɛecra.
EXO 18:26 Uca nitni tuɣa ttcarrɛen řgens řebda uca ddɛawi iwɛaren qedmen tent ɣar Musa, [maca] marra ddɛawi timeẓyanin carrɛen tent s yixef nsen.
EXO 18:27 Iqebbeḍ Musa aḍeggʷař nnes uca iɛqeb netta ɣar temmurt nnes.
EXO 19:1 Deg uyur wiss třata awarni i wuffuɣ n ayt n Israil zi temmurt n Miṣra, deg wass nni nnit, iwḍen-dd ɣar řexřa n Sina.
EXO 19:2 Aqa fesyen iqiḍan nsen, [uyuren] zi Rafidim uca iwḍen ɣar řexřa n Sina uca wtin iqiḍan nsen di řexřa. Iwta Israil iqiḍan nnes qibač i wedrar.
EXO 19:3 Yuři Musa ɣar AREBBI uca iřaɣa as-dd SIDI zeg wedrar, inna as: “Ammu i ɣa tessiwřed ak-d taddart n Yaɛqub u [ammu i] ɣa tinid i ayt n Israil:
EXO 19:4 ‘Kenniw teẓrim min ggiɣ ak-d Imiṣriyyen u [mammec] kenniw ksiɣ x wafriwen n ugider uca iwyeɣ-dd kenniw ɣari.
EXO 19:5 [Xenni] řexxu, mařa tesřim mliḥ ɣar wawař inu u ad teḥḍam Řɛahd inu, ad ɣari tiřim kenniw tiɣřam x marra řegnus, minzi marra tammurt aqa-tt inu.
EXO 19:6 Kenniw ad ayi tiřim d ict n tgeldit n ikehhanen d ijj n řgens amqeddas.’ Ina d awařen nni d ac ittxeṣṣan ad ten tinid i ayt n Israil.”
EXO 19:7 Ihwa-dd Musa uca iřaɣa-dd x imɣaren n řgens uca ibarreḥ asen marra awařen-a i d as yumur SIDI.
EXO 19:8 Uca yarra-dd marra řgens, nnan: “Marra min issiweř SIDI, ad t negg!” Uca issiweḍ Musa awařen n řgens ɛawed i SIDI.
EXO 19:9 Inna SIDI i Musa: “Xzar, Necc ad ɣarek dd-aseɣ deg ijj n useynu d abarcan, ḥima ad iseř řgens xmi Necc kik ɣa ssiwřeɣ uca ɛawed ad zzayek amnen i řebda.” [Minzi] Musa ixebbar awařen n SIDI i řgens.
EXO 19:10 SIDI inna i Musa: “Ruḥ ɣar řgens uca sqeddes i-ten ass-a d tiwecca, ejj i-ten ad ssirden arruḍ nsen
EXO 19:11 uca ad iřin wejden i wass wiss třata, minzi deg wass wiss třata ad dd-ihwa SIDI ɣar wedrar n Sina zzat i tiṭṭawin n marra řgens.
EXO 19:12 Egg iymiren i řgens deg wenneḍ n wedrar, ini: ‘Ɣarwem, war tiřyem ɣar wedrar niɣ ad tḥadam ṭṭarf nnes. Man wen i ɣa iḥadan adrar, ad ittwaneɣ nican.
EXO 19:13 War t ittḥidi [ḥed s] ufus, minzi [xenni] ad ittwarjem niɣ ad ittwawwet nican [s fřitcat] min ma iɛna, řebhimet niɣ d bnadem, war ittɣimi iddar. Mařa ad din yiři ijj n usuḍi [deg uyicc n usřiwřew] d azirar, zemmaren nitni ad ařyen adrar.’”
EXO 19:14 [Xenni] ihwa-dd Musa zeg wedrar ɣar řgens, issqeddes řgens uca ssirden arruḍ nsen.
EXO 19:15 Inna i řgens: “Iřim ttwejdem i wass wiss třata, war dd-ttqarrabem ɣar temɣart.”
EXO 19:16 Di ṣṣbeḥ n wass wiss třata usin-dd wajjajen d wassamen. Aqa yarsa ijj n useynu iddeqřen x wedrar u řḥess [n usuḍi] deg uyicc n icarri idweř ijhed aṭṭas. Marra řgens di řmargeḥ n řɛeskar yarjij.
EXO 19:17 Musa indeh řgens zi řmargeḥ n řɛeskar, maḥend ad iřqa AREBBI uca bedden nitni swadday i wedrar.
EXO 19:18 Marra adrar n Sina iddexxen, minzi SIDI tuɣa ihwa-dd xas di tmessi. Ddexxan nnes yuři-dd am ddexxan n ufarran uca marra adrar inhezz aṭṭas.
EXO 19:19 Am idweř usuḍi deg uyicc n icarri ijhed [aṭṭas], issiweř Musa uca yarra-dd xas AREBBI s yijj n řḥess [ijhed].
EXO 19:20 Uca ihwa-dd SIDI x wedrar n Sina, x tqiccet n wedrar, uca iřaɣa SIDI i Musa ɣar tqiccet n wedrar. [Xenni] igeɛɛed Musa.
EXO 19:21 Inna SIDI i Musa: “Hwa-dd, ɛřem i řgens, maḥend war ttcuqin di SIDI, maḥend ad t ẓaren uca [xenni] balak ad ttwahellken aṭṭas zzaysen.
EXO 19:22 Ejj ɛawed ikehhanen, inni i dd ɣa iqarrben ɣar SIDI, ad ssqeddsen ixef nsen, ḥima SIDI war xasen iseɛɛar ca.”
EXO 19:23 Inna Musa i SIDI: “Řgens war izemmar ad igeɛɛed adrar n Sina, minzi Cek tɛeřmed aneɣ tennid: ‘Egg iymiren x wedrar uca sqeddes i-t.’”
EXO 19:24 Inna as SIDI: “Ruḥ, hwa! Ad tgeɛɛded cek d Harun akidek, [maca] ikehhanen d řgens war zemmaren ad cuqen, ḥima ad geɛɛden ɣar SIDI, ḥima Netta war xasen iseɛɛar ca.”
EXO 19:25 [Řexdenni] ihwa-dd Musa ɣar řgens uca inna asen [marra] aya.
EXO 20:1 Issiweř AREBBI marra awařen-a, inna:
EXO 20:2 “Necc d SIDI, AREBBI nnec, wenni cek dd-issuffɣen zi temmurt n Miṣra, zi taddart n tesmuɣi.
EXO 20:3 War ɣarek ttiřin irebbiten nneɣni zzat i wudem inu.
EXO 20:4 War ttegg i yixef nnec řexyař ineqcen niɣ ca n řḥajjet tarwes di min [iǧan] sennej deg ujenna niɣ di ca [da] swadday di temmurt niɣ di ca deg waman [i iǧan] sadu temmurt.
EXO 20:5 War d asen ttbendiq uřa ad xasen tsexxared, minzi Necc, SIDI, AREBBI nnec, d ijj n Arebbi ittasmen, wenni dd-yarezfen řmuɛṣiyyet n ibabaten di tarwa ař [jjiř] wiss třata d wiss arebɛa n yinni d ayi icarrhen,
EXO 20:6 d wenni isscanen tamexsiwt nnes icewwaren i řuřuf n yinni d ayi ittexsen u ḥeṭṭan řumurat inu.
EXO 20:7 War neṭṭeq s Yisem n SIDI, AREBBI nnec, di řbaṭeř, minzi war ittbarri SIDI i wenni i ɣa ineṭqen s Yisem nnes di řbaṭeř.
EXO 20:8 Idar ass n ssebt, ḥima ad t tessqeddsed.
EXO 20:9 Setta n wussan i ɣa txedmed, ad tegged marra řxedmet nnec.
EXO 20:10 Ass wiss sebɛa d wass n ssebt n SIDI, AREBBI nnec. War [dayes] ttegg uřa d ict n řxedmet, cek lla, uřa d mmic lla, d yeǧic lla, d ismeɣ nnec lla, d tayya nnec lla, d řebhimet nnec lla, uřa d abarrani nni akidek iǧan daxeř i tewwura nnec lla.
EXO 20:11 Minzi di setta n wussan igga SIDI ijenwan d temmurt, řebḥar d marra min dayes uca yareyyeḥ deg wass wiss sebɛa. X uya ibarek SIDI ass n ssebt uca issqeddes i-t.
EXO 20:12 Weqqar babac d yemmac, maḥend ussan [n tudart] nnec [zemmaren] ad zzuggarten di temmurt i d ac ɣa yewc SIDI, AREBBI nnec.
EXO 20:13 War neqq.
EXO 20:14 War zenna.
EXO 20:15 War ttacar.
EXO 20:16 War cehhed s ẓur ḍidd i jjar nnec.
EXO 20:17 War meẓri di ca, taddart n jjar nnec [war dayes meẓri]. War meẓri di tamɣart n jjar nnec, niɣ deg yismeɣ nnes, niɣ di tayya nnes, niɣ deg ufunas nnes, niɣ deg weɣyuř nnes uřa deg ict n řḥajjet i iǧan n jjar nnec.”
EXO 20:18 Marra řgens iẓra [u isřa] i wajjajen d wassamen d ddriz n usuḍi deg uyicc n icarri d wedrar idduxxunen. [Umi] iẓra řgens man aya, [xenni] arjijen uca beɛɛden [nitni] ɣar řaggʷaj.
EXO 20:19 Nnan i Musa: “Siweř cek akidneɣ uca ad nseř. [Maca] ittxeṣṣa AREBBI war kidneɣ issiwiř, ḥima war nettmetti!”
EXO 20:20 Inna Musa i řgens: “War teggʷedem ca, aqa yusa-dd AREBBI, ḥima ad kenniw iqeǧeb u ḥima ad zzayes teggʷedem maḥend war txeṭṭim ca.”
EXO 20:21 Ibedd řgens zi řaggʷaj, maca Musa iqarreb-dd ɣar useynu ibbumbsen mani [tuɣa] AREBBI.
EXO 20:22 Inna SIDI i Musa: “Ammu ittxeṣṣa ad tinid i ayt n Israil: ‘Kenniw teẓrim belli ssiwřeɣ-dd akidwem zeg ujenna.
EXO 20:23 War kidi tteggem irebbiten n nnuqart u war tteggem irebbiten n wureɣ i yixef nwem.
EXO 20:24 Egg ayi ijj n uɛalṭar s ucař, qeddem xas tiɣarṣa nnec n wecmaḍ d tiɣarṣa nnec n řehna, uǧi nnec d ifunasen d tfunasin nnec. Di kuř amcan mani ɣa ggeɣ řidaret n Yisem inu, ad ɣarek dd-aseɣ uca ad ac barkeɣ.
EXO 20:25 Mařa teggid ayi ijj n uɛalṭar n iẓra, war t tbennid s tṣuḍar ittwassuydan, minzi mařa teddzed s uřeyzim nnec, [iři] ad t tessɛiǧted.
EXO 20:26 War ttgiɛɛid ɣar uɛalṭar inu s yijj n ddruj, ḥima war ittbin useḍḥi nnec.”
EXO 21:1 “Tina [i iǧan] d lfarayiḍ nni d asen ɣa tessiwḍed.
EXO 21:2 Mařa tesɣid ismeɣ d Aɛibrani, [xenni] netta ad ac isexxar setta n iseggʷusa, maca deg [useggʷas] wiss sebɛa ad iffeɣ d aḥurri baṭeř.
EXO 21:3 Mařa yudef weḥḥdes, weḥḥdes i ɣa iffeɣ, mařa ɣares tamɣart, ad iffeɣ netta d temɣart nnes.
EXO 21:4 Mařa sidis iwca as tamɣart uca nettat tejja as-dd iḥenjiren d tḥenjirin, [xenni] tamɣart d tarwa nnes ad iřin n sidis, u xenni netta ad iffeɣ s iman nnes.
EXO 21:5 [Maca] mařa ismeɣ inna nican: ‘Necc xseɣ sidi inu d temɣart inu d tarwa inu, war xseɣ ad ffɣeɣ d aḥurri!’,
EXO 21:6 [řexdenni] sidis ad t issbedd zzat i AREBBI. Ad t yawi ɣar tewwart niɣ ɣar tefřawt [ɣar uɣezdis n tewwart] uca sidis ad as issnuqqeb amejjun nnes s yict n tsineft uca netta ad as isexxar i řebda.
EXO 21:7 Mařa izzenz ḥed yeǧis d tayya, war itteffiɣ am muxas tteffɣen isemɣan.
EXO 21:8 Mařa war teɛjib i tiṭṭawin n sidis u netta tuɣa ixḍeb i-tt, ad tt yejj ad tᵉttwafdi. War izemmar ad tt izzenz i yijj n řgens n barra minzi netta iɣdar zzayes s [min igga].
EXO 21:9 Mařa ixḍeb i-tt i mmis, ad kides yegg ɛlaḥsab lfariḍa zi jjhet n yeǧis.
EXO 21:10 Mařa iksi [tamɣart] nneɣni i yixef nnes, war ineqqeṣ [řɛuč n] weysum nnes, niɣ arruḍ nnes, niɣ řɛacart nnes.
EXO 21:11 Mařa netta war d as iggi třata-ya, [xenni] nettat ad teffeɣ baṭeř, břa řexraṣ.”
EXO 21:12 “Wenni i ɣa iwten ḥed ař ɣa immet, ad t nɣen nican.
EXO 21:13 Mařa war t iggi neɛmada, [maca] AREBBI igga as-dd deg ufus nnes, [řexdenni] Necc ad ac ssecneɣ amcan mani izemmar ad yarweř.
EXO 21:14 [Maca] mařa yuff ḥed x wajjar nnes uca inɣa i-t s řeɣdaret, [xenni] ad t teksid ɣar uɛalṭar inu, maḥend ad t nɣen.
EXO 21:15 Wenni iwtin babas niɣ yemmas, ad ittwaneɣ nican.
EXO 21:16 Wenni yucaren bnadem uca izzenz i-t, niɣ ittwaf [ɛad] ɣares, ad ittwaneɣ nican.
EXO 21:17 Wenni i ɣa ineɛřen babas niɣ yemmas, ad ittwaneɣ nican.
EXO 21:18 Mařa iryazen mmcubbcen uca ijjen iwta wenneɣni s weẓru niɣ s řpuniyyet, uca wanita war immut, [maca] iwḍa di tassut,
EXO 21:19 [xenni], mařa wanita ikkar ɛawed uca yuyur ɣar barra x teɣɣarct, ad yiři wenni t iwtin d amezdag. Ad as ixeǧeṣ mɣir min yareyyeḥ uca ad t yejj ad iggenfa mliḥ.
EXO 21:20 Mařa iwta ḥed ismeɣ nnes niɣ tayya nnes s weɛmud uca immut sadu ufus nnes, [xenni] ittxeṣṣa ad as yaɣ x tesɣart nnes nican.
EXO 21:21 Maca mařa iqqim ibedd ijj niɣ tnayen n wussan, war d as yuɣi tasɣart, minzi netta d [tamenyat n] nnuqart nnes i yeǧa.
EXO 21:22 Mařa iryazen mmenɣen uca wtin ict n temɣart s ddeyset uca iwḍa as-dd uɛeddis nnes, maca war iǧi ca d ayezzim, [xenni] netta ad ixeǧeṣ nican ijj n multa ɛlaḥsab min d as ɣa ittar weryaz n temɣart uca ad tt iwc i řquḍat.
EXO 21:23 Mařa imsar ca n uyezzim d aɛeffan, [řexdenni] ad tewced tudart s tudart,
EXO 21:24 tiṭṭ s tiṭṭ, tiɣmest s teɣmest, afus s ufus, aḍar s uḍar,
EXO 21:25 acmaḍ s wecmaḍ, ayezzim s uyezzim, ticti s tecti.
EXO 21:26 Mařa iřqef ḥed tiṭṭ n ismeɣ nnes niɣ tiṭṭ n tayya nnes, iḍeyyeɛ i-tt, [xenni] ad t yejj ad yuyur amenni zi ssibbet n tiṭṭ nnes.
EXO 21:27 Mařa s tecti ittekkes tiɣmest n ismeɣ nnes, niɣ tiɣmest n tayya nnes, [xenni] ad as yejj ad yuyur amenni zi ssibbet n teɣmest nnes.
EXO 21:28 Mařa afunas ibarrez aryaz niɣ tamɣart, u wanita immut, [xenni] ad arjmen afunas u aysum nnes war zzayes ttᵉtten. Bab n ufunas ad yiři d afurri.
EXO 21:29 [Maca] mařa afunas tuɣa d abarrez iḍennaḍ d fariḍennaḍ uca bab nnes tuɣa issen uca war t iḥḍi uca inɣa aryaz niɣ tamɣart, [xenni] ad arjmen afunas uca ɛawed ad nɣen bab nnes.
EXO 21:30 Mařa ggin xas ddeyyet, [řexdenni] ad iwc marra min xas ggin d ttaman n ufekki i tudart nnes,
EXO 21:31 niɣ mařa [afunas] ibarrez aḥenjir niɣ taḥenjirt. Ad as ggen ɛlaḥsab lfariḍa-ya.
EXO 21:32 Mařa afunas ibarrez ismeɣ niɣ tayya, ad wcen třatin ciqlu n nnuqart i sidis, uca afunas ad t arjmen.
EXO 21:33 Mařa yarzem ḥed anu niɣ mařa iɣza ḥed anu uca war t idři, uca iwḍa dayes ufunas niɣ aɣyuř,
EXO 21:34 [xenni] bab n wanu ad ixeǧeṣ. Ad yarr nnuqart i bab nnes uca [řebhimet] immuten ad tiři nnes.
EXO 21:35 Mařa afunas iyzem afunas n wajjar nnes ařami immut, [řexdenni] ad zzenzen afunas iddaren, ad bḍan tamenyat-a [jar asen] uca ad bḍan ɛawed [afunas] amettin.
EXO 21:36 [Maca mařa] issen belli afunas ibarrez iḍennaḍ d fariḍennaḍ, uca bab nnes war t iḥḍi, ad ixeǧeṣ afunas s ufunas uca [afunas] amettin ad yiři nnes.
EXO 21:37 Mařa yucar ḥed afunas niɣ ijjen zeg wuǧi uca iɣarṣ as niɣ izzenz i-t, [xenni] ad ixeǧeṣ xemsa n ifunasen x yijj n ufunas u arebɛa n wuǧi x yijjen n wuǧi.”
EXO 22:1 “Mařa ittwaf uceffar [ɛad] am ittacar, uca iwta i-t uca immut, war [ttiřin] idammen x wenni t yufin.
EXO 22:2 Mařa tenqar-dd xas tfuct, [ad] xas [iřin] idammen di ssibbet-a. Ad as ixeǧeṣ uceffar marra. Mařa war ɣares ca, ad immenz di ssibbet n tucceffra nnes.
EXO 22:3 Mařa tᵉttwaf tucceffart teddar deg ufus nnes, ma d afunas [i tt tuɣa] niɣ d aɣyuř niɣ d ijjen zeg wuǧi, ittxeṣṣa as ad ixeǧeṣ tnayen n tseqqar.
EXO 22:4 Mařa ijja ḥed ad heddan [řmař] iyyar niɣ amarjeɛ n uḍiř uca yarwes dayes taḥimart nnes uca ad asen iḍřeq ařami ad heddan di temmurt n wenneɣni, [xenni] ad [tt] ixeǧeṣ zi řemxeyyer n yeyyar nnes u zi řemxeyyer n umarjeɛ n uḍiř nnes.
EXO 22:5 Mařa teffeɣ-dd tmessi uca teřqef asennan uca tecca tiqebbiḍin [n imendi] niɣ imendi ibedden niɣ iyyar, [xenni] wenni iqqden timessi ad ixeǧeṣ marra min ittwacemḍen.
EXO 22:6 Mařa iḥḍa ḥed i wajjar nnes nnuqart niɣ řeqcuɛ u man aya ittwacar as zi taddart n weryaz [nni], [xenni] aceffar, mařa ufin t, ad ixeǧeṣ tnayen n tseqqar.
EXO 22:7 Mařa war ittwif uceffar, [řexdenni] ad ssqarrben bab n taddart ɣar AREBBI [maḥend ad ssnen] ma [war] isswiẓẓeḍ ufus nnes ɣar wagřa n wajjar nnes.
EXO 22:8 Kuř aɛeddi zi jjihet n ufunas niɣ n weɣyuř niɣ n ijj zeg wuǧi niɣ n warruḍ niɣ n min iweddaren i zzayes inna [ḥed:] ‘Aqa-t d wa!’, ad dd-tas tmesřact i iǧan jar asen s tnayen zzat i řquḍat uca wenni ad xas ḥekmen řquḍat ad ixeǧeṣ i wajjar nnes tnayen n tseqqar.
EXO 22:9 Mařa iwca ḥed i wajjar nnes aɣyuř niɣ afunas niɣ ijj n zeg wuǧi, niɣ mammec ma tegga řebhimet, ḥima ad t iḥḍa uca immut niɣ yarreẓ niɣ ucaren t, am war iẓri ḥed,
EXO 22:10 [xenni] ad tiři tjaǧit ɣar SIDI jar asen s tnayen belli war isswiẓẓeḍ afus nnes ɣar wagřa n wajjar nnes. Bab nnes ad iqbeř [tajaǧit nnes] uca ad taf břa ma ad [t] ittxeǧeṣ wenneɣni.
EXO 22:11 [Maca] mařa ittwacar nican zzayes, [di lḥala-ya] ad ixeǧeṣ i bab nnes.
EXO 22:12 Mařa iban aqa ittwamezzeq nican, ad t yawi d burhan uca war ittxeǧiṣ min ittwamezzqen.
EXO 22:13 Mařa yarḍeř ḥed ca x wajjar nnes uca tarreẓ niɣ temmut di řɣayeb n bab nnes, ittxeṣṣa as ad tt ixeǧeṣ marra.
EXO 22:14 Maca mařa bab nnes tuɣa iḥḍar, war tt ittxiǧaṣ. Mařa tuɣa icra tt [xas], ad dd-yas x řexřaṣ nnes.”
EXO 22:15 “Uca mařa immarḍen ḥed x ca n teɛzařect, tuɣa war tt ixḍib ḥed ɛad, uca iṭṭeṣ akides, ittxeṣṣa as ad as iwc ṣṣadaq imun [maḥend] ad tt yawi d tamɣart.
EXO 22:16 Mařa babas war ixs ad as tt iwc, ad [as] iwzen ɛad ṣṣadaq n teɛzuray s nnuqart.
EXO 22:17 War ttejji taseḥḥart ad teddar.
EXO 22:18 Man wen i ɣa iṭṭṣen ak-d ijj n řmař, ad t nɣen nican.
EXO 22:19 Wenni i ɣa iwehhben ca n tɣarṣt i irebbiten, war iǧi mɣir i SIDI waha, ittxeṣṣa ad ittwaḥarrem [i uteḥḥi].
EXO 22:20 War ddeǧem abarrani u war xas ttzeyyarem, minzi tuɣa uřa d kenniw d ibarraniyyen di temmurt n Miṣra.
EXO 22:21 War ttdeǧi ca ict n tajjač niɣ ijj n uyujiř.
EXO 22:22 Mařa tiwḍed ad t tesseḥqared aṭṭas uca netta isɣuy-dd ɣari, aqa Necc s uɣiř ad sřeɣ i tɣuyyit nnes.
EXO 22:23 Ad yareɣ weɣḍab inu uca Necc ad kenniw nɣeɣ s ssif, timeṭṭa nwem ad dewřent d tijjař d tarrawt nwem d iyujiřen.
EXO 22:24 Mařa tareḍřed nnuqart i řgens inu, i umezřuḍ i [din] ɣarek, [xenni] war kides ttegged am ittegg bab n umarwas: war xas ttegg ca arriba.
EXO 22:25 Mařa teksid arruḍ n wajjar nnec d aḍman, arr as t qbeř ma ad teɣři tfuct.
EXO 22:26 Minzi war ɣares mɣir ařeḥḥaf wanita, aqa-t d arruḍ x teřmect nnes. Min di ɣa iṭṭeṣ [xenni]? Xmi ɣari dd ɣa isɣuy, řexdenni ad as sřeɣ, minzi Necc aqa d aḥnin!
EXO 22:27 War ttceqqif di AREBBI u war ttekkʷar řḥakem n řgens nnec.
EXO 22:28 War sɛeṭṭařa taccuret [n tmeyra] nnec niɣ aḥřay [n teysart] nnec. Ad ayi tewced [uřa] d amenzu n iḥenjiren nnec.
EXO 22:29 Ammu i ɣa tegged [ɛawed] s ifunasen nnec d wuǧi nnec. Sebɛa n wussan ad iřin ak-d yemmatsen uca ɣar wass wiss tmenya ad ayi ten tewced.
EXO 22:30 Ad ayi tiřim d imqeddasen u war ttᵉttem aysum i ittwamezzqen di řexřa. Ad t tenḍarem i yiṭan.”
EXO 23:1 “War ssuffuɣ řexbar issxarriqen. War ttic afus nnec i uɛeffan, maḥend ad tiřid d acehhad n ddeǧ.
EXO 23:2 War areddef azyen ameqqran di řɣar u war dd-ttarri di ddeɛwet ař ɣa tmeyyřed [teggʷejed x řḥeqq] awarni i waṭṭas, ad tfarɣed [řḥeqq].
EXO 23:3 Di ddeɛwet nnes war ttriḥ ca ak-d řmeskin.
EXO 23:4 Mařa teřqid afunas niɣ aɣyuř iweddar n řeɛdu nnec, ittxeṣṣa ad as t tarred nican.
EXO 23:5 Mařa teẓrid aɣyuř n wenni tcarrhed iwḍa s ddqeř nnes, ittxeṣṣa cek ad teḥḍid ixef nnec ad tejjed [tamesřact] i netta waha, [maca] cek d netta jmiɛ ad tfekkem [aɣyuř] qaɛ.
EXO 23:6 War sfarraɣ tasɣart n umezřuḍ i [din] ɣarek di ddeɛwet nnes.
EXO 23:7 Beɛɛed x tmesřact iɣeccen. War neqq afurri niɣ amsegged, minzi Necc war ttbarriɣ aɛeffan.
EXO 23:8 War kessi tarzeft, minzi tarzeft tessdarɣař tiṭṭawin yarezmen u tessfarraɣ awařen n imseggden.
EXO 23:9 War tzeyyarem x ubarrani. Aqa kenniw tessnem nnefs n ubarrani, minzi tuɣa kenniw d ibarraniyyen di temmurt n Miṣra.
EXO 23:10 Setta n iseggʷusa ad tzarɛed tammurt nnec uca ad tessmuned řɣiǧet nnes.
EXO 23:11 Deg [useggʷas] wiss sebɛa ad tt tejjed ad tareyyḥed uca ad as tarxud, ḥima ad [zzayes] ccen imezřaḍ n řgens nnec. Uca min ɣa jjen nitni ad [zzayes] ccen řmař n řexřa. Ammu i ɣa tegged ɛawed s umarjeɛ n uḍiř nnec d zzitun nnec.
EXO 23:12 Di setta n wussan ad tegged řxedmet nnec u deg wass wiss sebɛa ad tareyyḥed, maḥend ad yareyyeḥ ufunas nnec d weɣyuř nnec u ad yarr nnefs mmis n tayya nnec d ubarrani.”
EXO 23:13 Di marra min d awem nniɣ, ḥḍam t. War ttidarem isem n irebbiten nneɣni. War ttesřan [isem nnes] zeg uqemmum nnec.
EXO 23:14 Třata n twařawin deg useggʷas ad ayi tɛeyydem ijj n řɛid.
EXO 23:15 Řɛid n Weɣrum břa Antun ad t teḥḍam. Sebɛa n wussan ad tecced aɣrum břa antun, am mammec kenniw umureɣ Necc, di řweqt ittwaggen deg uyur Abib, minzi dayes i dd-teffɣed zi Miṣra. War dd-ttusim [s ifassen] xwan zzat i wudem inu.
EXO 23:16 [Ḥḍam ɛawed] Řɛid n Tmeyra, [Řɛid n] Tmenzut n řxedmet nnec i tzarɛed deg iyyar, u Řɛid n Usmuni [n ṣṣabet] deg uneggar n useggʷas, xmi ɣa tessmuned [řɣiǧet n] řxedmet nnec zeg iyyar.
EXO 23:17 Třata n twařawin deg useggʷas ad ḍharen marra iryazen [n řgens nnec] i wudem n Sidi, SIDI.
EXO 23:18 War ttqeddam idammen n tɣarṣt inu ak-d min ixemmaren, u tadunt n [tɣarṣt n] řɛid inu war ttnusi ǧiřet [tekmeř] ař ṣṣbeḥ.
EXO 23:19 Tamezwarut n tmenzut zeg wudem n temmurt nnec ad [tt] tawyed ɣar Taddart n SIDI, AREBBI nnec. War snenni iɣayḍ d ameẓyan s uɣi n yemmas.
EXO 23:20 Xzar, ad ssekkeɣ ijj n lmalak zzat i wudem nnec, ḥima ad cek iḥḍa deg webrid uca ad cek yawi ɣar wemcan nni sswejdeɣ.
EXO 23:21 Ḥḍa arendad i wudem nnes uca seř i wawař nnes, war xas ssarzig ca [řeɛmar], minzi netta war ittekkes iɛeddiyen nwem, minzi Isem inu aqa-t dayes.
EXO 23:22 Maca mařa s tidett ad tesřed i wawař nnes, ad tegged marra min d ac ɣa iniɣ, ad iřiɣ d řeɛdu i řɛedyan nnec uca ad ḥṣareɣ inni cek iḥeṣṣaren.
EXO 23:23 Minzi lmalak inu ad yiři zzatek, ad cek ssidfeɣ di [temmurt n] Imuriyyen d Iḥittiyyen d Ifiriziyyen d ayt n Kenɛan d Iḥiwiyyen d Iyabusiyyen, u Necc ad ten teḥḥiɣ.
EXO 23:24 War ttbendiq i irebbiten nsen niɣ ad ten tɛebded niɣ ad tegged am tteggen nitni, maca ad ten tᵉteḥḥid qaɛ uca ad tarẓed marra imayḍuten nsen [iqeddsen].
EXO 23:25 Ad tɛebdem SIDI, AREBBI nwem, u Netta ad ibarek aɣrum nnec d waman nnec. Necc ad kkseɣ řehřacat zi řwesṭ nnec.
EXO 23:26 War ttiři [temɣart] nni umi iwḍa uɛeddis niɣ war ittirwen di temmurt nnec. Necc ad kemmřeɣ řqedd n wussan nnec.
EXO 23:27 Ad ssekkeɣ anexřiɛ zzat i uɣembub nnec, ad ssxarewḍeɣ marra řgens i ɣa tafed [deg webrid nnec] uca ad arreɣ marra řɛedyan nnec ad xak arewřen.
EXO 23:28 Necc ad ssekkeɣ irezzan zzat i uɣembub nnec, inni ɣa yaẓẓřen x Iḥiwiyyen d ayt n Kenɛan d Iḥittiyyen zzat i wudem nnec.
EXO 23:29 War xasen ttaẓẓřeɣ zi zzat nwem deg ijj n useggʷas, maḥend war tᵉttɣimi temmurt d řexřa u řmař [n řexřa] war xak ttmarnin aṭṭas.
EXO 23:30 S cway cway ad xasen aẓẓřeɣ zi zzat necc, ař ɣa temmarenyed [deg waṭṭas] uca [ad tzemmared] ad teksid tammurt d řwart.
EXO 23:31 Necc ad ggeɣ iymiren zi Řebḥar n Telga ař řebḥar n Ifilisṭiniyyen u zi řexřa ař iɣzar [n Lfuraṭ], minzi ad arreɣ imezdaɣ n temmurt deg ufus nnec uca [ad cek arreɣ] ad xasen taẓẓřed zi zzat nnec.
EXO 23:32 War kidsen ttegg řɛahd niɣ ak-d irebbiten nsen.
EXO 23:33 War iɛeddeř ad zedɣen di temmurt nnec, ḥima war cek ttarrin ad akidi texḍid. Mařa tɛebded i irebbiten nsen, ad ac yiři man aya d řfex i cek.”
EXO 24:1 Uca inna Netta i Musa: “Geɛɛed ɣar SIDI, cek d Harun d Nadab d Abihu, d sebɛin n imɣaren n Israil, uca bendqem zi řaggʷaj.
EXO 24:2 Musa weḥḥdes ad dd-iqarreb ɣar SIDI, [maca] war iɛeddeř ad qarrben nitni. Uřa d řgens war kides ittgiɛɛid ca.”
EXO 24:3 Musa iɛqeb-dd uca ixebbar řgens x marra awařen n SIDI u x marra lfarayiḍ. Marra řgens yarra-dd s yijj n wawař, nnan: “Marra awařen i inna SIDI ad zzaysen negg.”
EXO 24:4 Musa yura marra awařen n SIDI. Ɣar ṣṣbeḥ zic ikkar uca ibna ijj n uɛalṭar ɣar iḍaren n wedrar uca [igga] tenɛac n imayḍuten n weẓru, ɛlaḥsab [řqedd n] tenɛac n tqebbař n Israil.
EXO 24:5 Issekk iḥudriyyen zeg ayt n Israil, inni issbexxaren tiɣarṣi n wecmaḍ u qeddmen tiɣarṣi n řehna zeg ifunasen imeẓyanen i SIDI.
EXO 24:6 Iksi Musa azyen n idammen, igga [i-t] di ṭṭbaṣi uca azyen [nneɣni] n idammen izeǧeɛ i-ten x uɛalṭar.
EXO 24:7 Iksi adlis ittwannḍen n Řɛahd, iɣra i-t x imezzuɣen n řgens uca nitni nnan: “Marra min [d aneɣ] inna SIDI, ad [t] negg, ad [t] nṭaɛ.”
EXO 24:8 Iksi Musa idammen, irucc i-ten x řgens, inna: “Xzar, ina d idammen n Řɛahd nni igga SIDI akidwem x marra awařen-a.”
EXO 24:9 Igeɛɛed Musa ak-d Harun d Nadab d Abihu d sebɛin n imɣaren n Israil.
EXO 24:10 Ẓrin AREBBI n Israil. Tuɣa sadu iḍaren nnes am tisi n zzellij i ittwaggen n ṣaffir aziza, iṣfa am ujenna simant nnes.
EXO 24:11 War isswiẓẓeḍ afus nnes x imcennɛen n ayt n Israil uca nitni xzaren ɣar AREBBI, ccin, swin.
EXO 24:12 Inna SIDI i Musa: “Geɛɛed-dd ɣari ɣar wedrar uca qqim din uca Necc ad ac wceɣ tiřwiḥin n weẓru, Ccariɛa d řumarat tinni uriɣ x teřwiḥin, ḥima ad asen [tent] tessřemded.”
EXO 24:13 Ikkar Musa ak-d Yacuwa, amsexxar nnes, uca igeɛɛed Musa ɣar wedrar n AREBBI.
EXO 24:14 Inna i imɣaren: “Rajam aneɣ danita ař dd ɣarwem i ɣa nedweř. Xzar, Harun d Ḥur akidwem. Mařa din ḥed ɣares ddɛawi, ittxeṣṣa as ad ɣarsen iraḥ.”
EXO 24:15 [Xenni] igeɛɛed Musa ɣar wedrar, uca ijj n useynu idřa adrar.
EXO 24:16 Aɛuǧi n SIDI tuɣa izeddeɣ deg wedrar n Sina u aseynu idřa i-t setta n wussan uca deg wass wiss sebɛa iřaɣa-dd Netta x Musa zi řwesṭ n useynu.
EXO 24:17 Ascan n uɛuǧi n SIDI tuɣa-t di tiṭṭawin n ayt n Israil am tmessi ittetten x tqiccat n wedrar.
EXO 24:18 Yudef Musa ɣar řwesṭ n useynu uca igeɛɛed adrar. Tuɣa Musa iqqim arebɛin n wussan d arebɛin n ǧyaři deg wedrar.
EXO 25:1 Issiweř SIDI ak-d Musa, inna:
EXO 25:2 “Ini i ayt n Israil ad ayi dd-ssgaɛɛden tawhibt. Zi kuř aryaz nni d as iɛarren wuř nnes, ad zzayes teksim tawhibt n usgaɛɛed i Necc.
EXO 25:3 Ta d tawhibt n usgeɛɛed, tenni i ɣa teksid zzaysen: ureɣ d nnuqart d nnḥas,
EXO 25:4 d [ufiřu] adeḥmi d urjuwani d uzeggʷaɣ iḥedqen d řeqṭen azdad d ccɛar n iɣayḍen,
EXO 25:5 d iřmawen izeggʷaɣen n icarriyyen, d iřmawen n ddenfiřat, d ukeccuḍ n [tcejjart n] ukasiya,
EXO 25:6 zzect i tfawt n řqendiř, řeɛṭur i zzect n wedhan u i řebxur ittfuḥen,
EXO 25:7 iẓra n uniks d iẓra [iɣřan nneɣni], maḥend ad ten ggen x upalṭu u x tajmect.
EXO 25:8 Ad ayi ggen ict n Zzawect Iqeddsen, ḥima ad zedɣeɣ di řwesṭ nsen.
EXO 25:9 Ad [t] tegged am marra min d ac ɣa ssecneɣ, [ɛlaḥsab] amedya n Tzeddiɣt u [ɛlaḥsab] amedya n marra řeqcuɛ i dayes iǧan.
EXO 25:10 Ad ggen ɛawed ict n Ttabut n ukeccuḍ n [tcejjart n] ukasiya. Ad tiři tuzzeggart [nnes] tnayen n iɣaǧen d wezyen u tiru [nnes] ijj n uɣiř d wezyen u řuɛřa [nnes] ijj n uɣiř d wezyen.
EXO 25:11 Ad t ttcelled s wureɣ iṣfan, zi daxeř u zi barra ad tt tcelled, uca ɣar sennej ad as tennḍed ijj n zzwaq n wureɣ.
EXO 25:12 Ad as tessfesyed arebɛa n texrazin n wureɣ. Ad tent tcedded ɣar arebɛa n tyarsawin nnes. Tnayen n texrazin ad iřint ɣar yijj n uɣezdis u tnayen n texrazin i uɣezdis nneɣni.
EXO 25:13 Ad tegged iɛumad [i trebbut] zeg ukeccuḍ n [tcejjart n] ukasiya uca ad ten tedřed s wureɣ.
EXO 25:14 Sidfem iɛumad di texrazin nni iǧan ɣar iɣezdisen n Ttabut, ḥima ad zzaysen arbun Ttabut.
EXO 25:15 Iɛumad ad iřin di texrazin n Ttabut, war zzaysent ten ttekksen ca.
EXO 25:16 Ad tessarsed Cchadet, tenni i d ac ɣa wceɣ, di Ttabut.
EXO 25:17 Ad tegged ɛawed ict n tqebbart n weṣřaḥ n wureɣ iṣfan s yict n tuzzeggart n tnayen n iɣaǧen d wezyen u s ict n tiru n ijj n uɣiř d wezyen.
EXO 25:18 Ad tegged ɛawed tnayen n ikiruben n wureɣ iɛdeř s wefḍis, ařami i ɣa ffɣen [ikiruben] zi tnayen n ixfawen n tqebbart n weṣřaḥ.
EXO 25:19 Ad tegged ijj n ukirub ɣar ijj n yixef u ijj n ukirub nneɣni ɣar yixef nneɣni. Ad teggem ikiruben zi tqebbart n weṣřaḥ ɣar tnayen n ixfawen nnes.
EXO 25:20 Ad bezzɛen ikiruben afriwen nsen sennej nsen uca ad dřen taqebbart n weṣřaḥ s wafriwen nsen. Udmawen nsen ad iřin ijj qibač i wenneɣni uca ad ẓaren udmawen n ikiruben ɣar tqebbart n weṣřaḥ.
EXO 25:21 Ad tegged taqebbart n weṣřaḥ x Ttabut uca ad tessarsed Cchadet i d ac ɣa wceɣ di Ttabut.
EXO 25:22 Dinni i kic ɣa mmeřqiɣ uca ad kik ssiwřeɣ zi sennej i tqebbart n weṣřaḥ, zi jar tnayen n ikiruben nni iǧan sennej i Ttabut n Cchadet, x marra min d ac ɣa umureɣ i ayt n Israil.
EXO 25:23 Ad tegged ict n tzewḍa n ukeccuḍ n [tcejjart n] ukasiya, ad ɣares tiři ict n tuzzeggart n tnayen n iɣaǧen d ict n tiru n ijjen uɣiř d ijj n řuɛřa n ijjen uɣiř d wezyen.
EXO 25:24 Ad tt tedřed s wureɣ iṣfan uca ad as tegged ɣar tma nnes ijj zzwaq n wureɣ.
EXO 25:25 Ad tegged ict n tma i d as dd-innḍen n ijj n cbar n ufus u ɣar tma i d as dd-innḍen ad tegged ijj n zzwaq n wureɣ.
EXO 25:26 Ad tegged arebɛa n texrazin n wureɣ uca ad tent tcedded ɣar arebɛa n tɣemmura nni iǧan ɣar arebɛa n iḍaren nsen.
EXO 25:27 Tixrazin ad iřint udsent i tma, maḥend ad [daysent] ttwaṭṭfen iɛumad i tarebbut n tzewḍa.
EXO 25:28 Ad tegged iɛumad [i tarebbut] zeg ukeccuḍ n [tcejjart n] ukasiya, ad ten tɣeǧfed s wureɣ uca ad zzaysen arbun tazewḍa.
EXO 25:29 Ad tegged ɛawed ṭṭbaṣi nnes d tɣenjayin nnes d iɣarrafen nnes d řkisan nnes i zi ɣa farrɣen. Ad ten tegged s wureɣ iṣfan.
EXO 25:30 X tzewḍa ad tegged aɣrum n wescan řebda zzat i wudem inu.
EXO 25:31 Ad tegged řqendiř s wureɣ iṣfan. Ad tegged řqendiř s wefḍis n wemziř. Afud ak-d uḍar nnes d iɣaǧen nnes uřa d řkisan nnes d tɛebbuzin nnes i dd-ittasen ak-d nnuwwarat nnes ad iřin d aɣezdis d ijj.
EXO 25:32 Setta n iɣaǧen ad dd-ffɣen zeg iɣezdisen nnes, třata n iɣaǧen zeg ijj n uɣezdis n řqendiř d třata n iɣaǧen zeg uɣezdis nneɣni n řqendiř.
EXO 25:33 Třata n řkisan [ad iřin] deg ijj n uɣiř di furma n nnuwwarat n ǧewz [ak-d] tɛebbuzt d nnewwac, uca [ɛawed] ɣar uɣiř nneɣni třata n řkisan di furma n nnuwwarat n ǧewz [ak-d] tɛebbuzt d nnewwac. Ammu [i ɣa ggen] marra setta n iɣaǧen nni dd-iffɣen zi řqendiř.
EXO 25:34 Ɣar řqendiř [simant nnes ad din iřin] arebɛa n řkisan di furma n nnuwwarat n ǧewz, [ak-d] tɛebbuzin nsen i dd-ittasen ak-d nnuwwarat nsen.
EXO 25:35 Ad [din] tiři ict n tɛebbuzt sadu tyuya n iɣaǧen i zzayes dd-iffɣen u ict n tɛebbuzt sadu tyuya n iɣaǧen i zzayes dd-iffɣen [awarni as], u [ɛawed] ict n tɛebbuzt sadu tyuya n iɣaǧen i zzayes dd-iffɣen [awarni as]. [Ammu i ɣa yiři] i setta n iɣaǧen i dd-iffɣen zi řqendiř.
EXO 25:36 Tiɛebbuzin [nsen] d iɣaǧen nsen ad zzayes-dd ffɣen uca marra aya ad yiři d ict n řqecɛet tᵉttwaɛdeř s wefḍis n wemziř s wureɣ iṣfan.
EXO 25:37 Ad tegged setta n řefnarat nnes uca ad ssarsen řefnarat nnes x řqendiř, maḥend ad wcent tfawt ɣar ṭṭarf n ujemmaḍ.
EXO 25:38 Tijeqqaḍin [n teftič] nnes d tmejmarin nnes [ad iřint] s wureɣ iṣfan.
EXO 25:39 Ad ittwagg [řqendiř] zeg ict n talint n wureɣ iṣfan s marra řeqcuɛ-a [akides].
EXO 25:40 Uca xzar, ad t tegged am umedya nnes, wenni i d ac ittwamřen deg wedrar.”   *
EXO 26:1 “Ad tegged Tazeddiɣt s ɛecra n tjartiřin s řeqṭen azdad imuden u s ufiřu adeḥmi d urjuwani d uzeggʷaɣ iḥedqen, ak-d ikiruben. Ad ten tegged [am] řxedmet n ufennan.
EXO 26:2 Tuzzeggart n yict n tjartiřt ad tiři tmenya u-ɛicrin n iɣaǧen u tiru n yict n tjartiřt arebɛa n iɣaǧen. Marra tijartiřin [ad ɣarsent yiři] řeɛbar d ijj.
EXO 26:3 Xemsa n tjartiřin ad tent ssmunen ict ak-d tenneɣni u [ɛawed] xemsa n tjartiřin ad tent ssmunen ict ak-d tenneɣni.
EXO 26:4 Ɣar tma n yict n tjartiřt ɣar ṭṭarf mani tt ɣa ssmunen, ad tegged tisarawin tideḥmanin. Ammu i tent ɣa tegged [ɛawed] ɣar tma n tjartiřt [nneɣni] ɣar ṭṭarf i ɣar iǧa useřqi nneɣni.
EXO 26:5 Xemsin n tsarawin i ɣa tegged deg ict n tjartiřt u xemsin n tsarawin ɣar ṭṭarf n tjartiřt nni ɣar iǧa useřqi nneɣni, maḥend tisarawin ad mmeřqant ict ak-d tenneɣni.
EXO 26:6 Ad tegged ɛawed xemsin n tsennarin n wureɣ uca ad tessmuned tijartiřin ict ak-d tenneɣni s tsennarin, maḥend ad tedweř d ict n Tzeddiɣt.
EXO 26:7 Ad tegged ɛawed tijařtiřin s ccɛar n iɣayḍen, maḥend ad iřint d ijj n uqiḍun x Tzeddiɣt. Ad tegged ḥiṭac n tjartiřin.
EXO 26:8 Tuzzeggart n ict n tjartiřt [ad tiři] třatin n iɣaǧen u tiru n ict n tjartiřt [ad tiři] arebɛa n iɣaǧen. Ḥiṭɛac n tjartiřin [ad ɣarsent yiři] řeɛbar d ijj.
EXO 26:9 Ad tessmuned xemsa n tjartiřin weḥḥedsent d setta n tjartiřin [ɛawed] weḥḥedsent. Tajartiřt wiss setta ad tt tḍefṣed zzat i wudem n Uqiḍun.
EXO 26:10 Ad tegged xemsin n tsarawin ɣar tma n yict n tjartiřt ɣar ṭṭarf ɣar useřqi, uca xemsin n tsarawin x tma n tjartiřt ɣar useřqi nneɣni.
EXO 26:11 Ad tegged xemsin n tsennarin n nnḥas uca ad tent tessidfed di tsarawin uca ad tessmuned Aqiḍun, maḥend ad yiři d ijjen.
EXO 26:12 Min iceṭṭen n tjartiřin n uqiḍun, azyen n tjartiřt nni iceṭṭen ad yayeř ɣar ḍeffar n Tzeddiɣt.
EXO 26:13 Zi min iceṭṭen di tuzzeggart n tjartiřin, ijj n uɣiř ad yayeř ɣar yijj n ṭṭarf d ijj n uɣiř ɣar ṭṭarf nneɣni, ɣar tnayen n iɣezdisen n Tzeddiɣt, maḥend ad as iřeḥḥef i yijj [n uɣezdis] u i [uɣezdis] nneɣni.
EXO 26:14 Ad tegged i Uqiḍun [ɛawed] ict n tseqqaft n iřmawen izeggʷaɣen n icarriyyen u sennej i man aya ict n tseqqaft n iřmawen n ddenfiřat.
EXO 26:15 Ad tegged i Tzeddiɣt tifeřwin n ukeccuḍ n [tcejjart n] ukasiya nni ibedden nican.
EXO 26:16 Řeɛbar n tuzzeggart n ict n tefřawt dayes ɛecra n iɣaǧen u řeɛbar n tiru n ict n tefřawt dayes ijj n uɣiř d wezyen.
EXO 26:17 I kuř tafřawt ad ɣares iřin tnayen n iḍaren, inni issmeřqan twečmatin ict ak-d tenneɣnit, ammu i ɣa tegged i marra tifeřwin n Tzeddiɣt.
EXO 26:18 Ad tegged i Tzeddiɣt tifeřwin, ɛicrin n tfeřwin ɣar jjihet n ljanub, ɣar yefus.
EXO 26:19 Ad tegged arebɛin n tyarsawin n nnuqart [maḥend ad tent ssarsen] sadu ɛicrin n tfeřwin, tnayen n tyarsawin sadu ict n tefřawt i tnayen n iḍaren nnes, d tnayen n tyarsawin sadu tafřawt nneɣni i tnayen n iḍaren nnes.
EXO 26:20 [Ɛawed ad tegged] ɛicrin n tfeřwin i uɣezdis nneɣni n Tzeddiɣt, ɣar jjihet n ccamal,
EXO 26:21 s arebɛin n tyarsawin nsen n nnuqart: tnayen n tyarsawin i kuř tafřawt d tnayen n tyarsawin sadu tafřawt nneɣni.
EXO 26:22 U ɣar uɣezdis n řɣarb n Tzeddiɣt ad as tegged setta n tfeřwin.
EXO 26:23 Ad tegged tnayen n tfeřwin i tɣemmura n Tzeddiɣt i iǧan ɣar tnayen n iɣezdisen n ḍeffar.
EXO 26:24 Zi swadday ad iřint ṣqent am wacniwen uca ammu i ɣa iřint nican d icten ař ɣa awḍent sennej deg ict n texrazt. Ammu i ɣa yiři i tnayen [n tfeřwin] ɣar tnayen n tɣemmura.
EXO 26:25 Ad [din] iřint tmenya n tfeřwin ak-d tyarsawin nsent n nnuqart. [Xenni] seṭṭac n tyarsawin, tnayen n tyarsawin sadu ict n tefřawt d tnayen n tyarsawin sadu tafřawt nneɣni.
EXO 26:26 Ad tegged tiḥenya n uɛarreḍ zeg ukeccuḍ n [tcejjart n] ukasiya, [inni ɣa iɛdun x tfeřwin], xemsa i tfeřwin n ijj n uɣezdis n Tzeddiɣt
EXO 26:27 u xemsa n tḥenya n uɛarreḍ i tfeřwin ɣar uɣezdis nneɣni n Tzeddiɣt u xemsa n tḥenya n uɛarreḍ i tfeřwin n uɣezdis n Tzeddiɣt ɣar uɣezdis n řɣarb ɣar tnayen n iɣezdisen n ḍeffar.
EXO 26:28 Taḥnact n uɛarreḍ di řwesṭ ad teɛdu x tfeřwin di řwesṭ, zeg ijj n yixef ɣar wenneɣni.
EXO 26:29 Ad tɣeǧfed tifeřwin s wureɣ uca ad tegged tixrazin nsen n wureɣ, maḥend ad daysent ssidfen tiḥenya n uɛarreḍ. Ad tedřed [ɛawed] tiḥenya n uɛarreḍ s wureɣ.
EXO 26:30 Ad tessgeɛɛded Tazeddiɣt ɛlaḥsab amedya [n řebni] nni d ac ittwamřen x wedrar.
EXO 26:31 Ad teggeḍ ijj n uřeḥḥaf s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden, ad t ggen [am] řxedmet n ufennan, uca ikiruben [ad xas iřin].
EXO 26:32 Ad t tayřed x arebɛa n ipilaren n ukeccuḍ n [tcejjart n] ukasiya i idřin s wureɣ. Tisennarin nsen [ad iřint] n wureɣ uca [ipilaren nni] [ad bedden] x arebɛa n tyarsawin n nnuqart.
EXO 26:33 Ad tayřed ařeḥḥaf ɣar wadday n tsennarin uca ad tessidfed Ttabut n Cchadet daxeř i uřeḥḥaf uca ařeḥḥaf ad ibḍa jar Uqeddas d Weqdas x Uqeddas.
EXO 26:34 Ad tessarsed taqebbart n weṣřaḥ x Ttabut n Cchadet deg Weqdas x Uqeddas.
EXO 26:35 Ad tegged tazewḍa barra i uřeḥḥaf uca ad tessarsed řqendiř qibač i tzewḍa ɣar uɣezdis n Tzeddiɣt ɣar jjihet n ljanub u ad tegged tazewḍa ɣar uɣezdis ɣar jjihet n ccamal.
EXO 26:36 Ad tegged arwaq s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden i wadaf n Uqiḍun, [am] ijj n umudi n uxeyyaḍ.
EXO 26:37 Uca ad tegged i arwaq xemsa n ipilaren n ukeccuḍ n [tcejjart n] ukasiya uca ad ten tcelled s wureɣ. Tisennarin nsen ad iřint n wureɣ u [i ipilaren nni] ad asen tfesyed xemsa n tyarsawin n nnḥas.” *
EXO 27:1 “Ad tegged aɛalṭar n ukeccuḍ n ukasiya n xemsa n iɣaǧen di tuzzeggart d xemsa n iɣaǧen di tiru. Ad yiři s arebɛa n tɣemmura u řuɛřa nnes [ad yiři] třata n iɣaǧen.
EXO 27:2 Ɣar arebɛa n tɣemmura ad tegged accawen nnes. Accawen nnes ad dewřen d ijjen akides uca ad t třeḥḥfed s nnḥas.
EXO 27:3 Ad tegged tiydurin nnes, ḥima ad daysent tenḍared iɣɣeḍ n min iqqimen n tadunt nnes ittwacemḍen uca [ad tegged] ɛawed iɣenjayen nnes d ṭṭawyat nnes i urucci d furcayat nnes d tmejmarin nnes. Ad tegged marra řeqcuɛ nnes s nnḥas.
EXO 27:4 Ad tegged ict n tracca, ict n umudi n nnḥas, uca ad tegged arebɛa n texrazin n nnḥas i umudi nni, ɣar arebɛa n tɣemmura nnes.
EXO 27:5 Ad t tzeyyared sadu i tma n uɛalṭar, swadday, [maḥend] ad yiři umudi [n nnḥas nni] ɣar wezyen n uɛalṭar.
EXO 27:6 Ad tegged iɛumad [i tarebbut] i uɛalṭar, iɛumad n ukeccuḍ n ukasiya uca ad ten třeḥḥfed s nnḥas.
EXO 27:7 Iɛumad nnes ad ttwassidfen di texrazin. Ad iřin iɛumad [i tarebbut] ɣar tnayen n iɣezdisen n uɛalṭar xmi [t] ɣa arbun.
EXO 27:8 Ad tegged ijj n řxawi [ɣar daxeř] n tfeřwin. Am mammec i d ac imřa x wedrar, ammu i [t] ɣa ggen nitni.
EXO 27:9 Ad tegged řemraḥ n Tzeddiɣt. Ɣar jjihet n ljanub, ɣar yefus, ad tegged řizarat s řeqṭen azdad imuden, [kuř ict zzaysent] n mya n iɣaǧen di tuzzeggart i yijj n uɣezdis.
EXO 27:10 Ɛicrin n ipilaren nnes d ɛicrin n tyarsawin nnes [ad iřin] n nnḥas. Tisennarin n ipilaren d iqeḍban nsen i useřqi [ad iřin] n nnuqart.
EXO 27:11 Ammu ɣar jjihet n ccamal, di tuzzeggart, [ad din iřint] řizarat n mya [iɣaǧen]. Ad iřin ɛicrin n ipilaren nsent d ɛicrin n tyarsawin nsen n nnḥas. Tisennarin n ipilaren d iqeḍban nsen i useřqi [ad iřin] n nnuqart.
EXO 27:12 Di tiru n řemrah, ɣar uɣezdis n řɣarb, [ad din iřint] řizarat n xemsin n iɣaǧen [di tuzzeggart] ak-d ɛecra n ipilaren nsent d ɛecra n tyarsawin nsen.
EXO 27:13 Tiru n řemraḥ ɣar uɣezdis n ccarq, zi manis dd-tneqqar tfuct, [ad tiři] xemsin [iɣaǧen].
EXO 27:14 Řizarat ɣar [yijj] n uɣezdis n zzat [ad iřint] xemmesṭac n iɣaǧen [di tuzzeggart], ak-d třata n ipilaren nsent d třata n tyarsawin nsen.
EXO 27:15 Ɣar uɣezdis n zzat nneɣni [ad din iřint ɛawed] řizarat n xemmesṭac n iɣaǧen [di tuzzeggart] ak-d třata n ipilaren nsent d třata n tyarsawin nsen.
EXO 27:16 Ɣar wadaf n řemraḥ [ad din yiři] ijj n arwaq n ɛicrin n iɣaǧen, [ggin t] s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden, ijj n umudi n uxeyyaḍ, ak-d arebɛa n ipilaren nnes d arebɛa n tyarsawin nsen.
EXO 27:17 Marra ipilaren i d as dd-innḍen i řemraḥ [ad iřin] s iqeḍban n nnuqart i useřqi uca tisennarin nsen [ad iřint] n nnuqart d tyarsawin nsen n nnḥas.
EXO 27:18 Tuzzeggart n řemraḥ [ad tiři] mya n iɣaǧen u tiru [ad tiři] xemsin n iɣaǧen d xemsin [ɛawed] uca řuɛřa [ad yiři] xemsa n iɣaǧen, [marra] s řeqṭen azdad imuden uca tyarsawin nsen [ad iřint] n nnḥas.
EXO 27:19 Marra řeqcuɛ n Tzeddiɣt i iǧan i marra tasexxart nnes uřa d marra řewtad nnes d marra řewtad n řemraḥ [ad iřin] n nnḥas. *
EXO 27:20 Ad tumured ayt n Israil, ḥima ad ac dd-awyen zzect teṣfa teddez zi zzitun i tfawt, ḥima ad tareɣ tfawt řebda.
EXO 27:21 Harun d warraw nnes ad ḥḍan man aya zi ǧiřet ař ṣṣbeḥ zzat i wudem n SIDI deg Uqiḍun n Umsagar zzat i uřeḥḥaf i iǧan zzat i Cchadet. D man aya ad yiři d ict n tewṣeyyet i řebda [nni ittxeṣṣa ad tᵉttwaḥḍa] zi jjihet n ayt n Israil di [marra] jjiřat nsen.”
EXO 28:1 “Uca cek ad ɣarek dd-tessqarrbed Harun, umac, d warraw nnes akides zi řwesṭ n ayt n Israil, ḥima ad ayi ɛebden am yikehhanen, Harun, Nadab, Abihu, Aliɛazar d Itamar, zeg warraw n Harun.
EXO 28:2 Ad tegged arruḍ iqeddsen i Harun, umac, ad [as] yiři i uɛuǧi d telwizt.
EXO 28:3 Ad tessiwřed ɣar marra inni iǧan d imiɣisen n wuř, inni ccureɣ s arruḥ n tiɣit, [maḥend] ad ggen arruḍ i Harun, ḥima ad as ssqeddsen d akehhan i Necc.
EXO 28:4 Ina d arruḍ i ɣa ggen: ict n tejmect d ijj n upalṭu d ijj n useřham d ict tcamir imuden am ijj n ureqqam n ufennan, d ict n areẓẓet d ict n tḥezzamt. Ad ggen arruḍ iqeddsen i Harun, umac, u i warraw nnes, ḥima ad ayi sexxaren am ukehhan.
EXO 28:5 Nitni ad ksin [ifiřan n] wureɣ d [afiřu] adeḥmi d urjuwani d uzeggʷaɣ iḥedqen d řeqṭen azdad,
EXO 28:6 uca ad ggen apalṭu s [ifiřan n] wureɣ u s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden, [ad yiři] [am] řxedmet n ufennan.
EXO 28:7 Ad ɣares yiři tnayen n tɣarḍin immseřsaqen ɣar tnayen n ṭṭrufa nnes i zi ɣa ittwassmun [upalṭu].
EXO 28:8 Taḥezzamt izewwqen, wenni iǧan x upalṭu nnes n ukehhan, ad zzayes tᵉttwagg d icten akides, s [ifiřan n] wureɣ u s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden.
EXO 28:9 Ad teksid tnayen n iẓra n uniks uca ad xasen tneqced ismawen n ayt n Israil.
EXO 28:10 Setta n ismawen x yijj n weẓru d setta n ismawen nneɣni x weẓru nneɣni ɛlaḥsab [asettef n] wexřaq nsen.
EXO 28:11 [D man aya] d ict n ṣṣenɛet n uneqqac n weẓru [iɣřan]. Am ict n txadent n ucemmiɛ, [ammu i] ɣa ttwaneqcen tnayen n yeẓra s ismawen n ayt n Israil. Ad asen tegged ticuyar n wureɣ i d as dd-innḍen.
EXO 28:12 Ad tegged iẓra nni x tɣarḍin n upalṭu, [aqa aten d] iẓra n řidaret i ayt n Israil. Harun ad yarbu ismawen nsen i řidaret zzat i wudem n SIDI x tnayen tɣarḍin nnes.
EXO 28:13 Ad tegged ticuyar n wureɣ
EXO 28:14 uca [ɛawed] tnayen n ssnaseř n wureɣ iṣfan. Ad ten tegged [amecnaw] ifiřan, [amecnaw] ict n řxedmet n umudi. Ad tcedded ssnaseř imuden ɣar tcuyar.
EXO 28:15 Ad tegged tajmect i řeḥkam. Ad tt tegged [am] řxedmet n ufennan, am upalṭu [n ukehhan]. Ad tt tegged s [ifiřan n] wureɣ u s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden.
EXO 28:16 [Tajmect] ad [tiři] s arebɛa n tɣemmura, tᵉttwaḍfeṣ. Tuzzeggart nnes ad tiři d ijj n wezyen n uɣiř, u tiru nnes d ijj n wezyen n uɣiř.
EXO 28:17 Ad xas tegged iẓra, arebɛa n řeṣfuf n iẓra. Ijj n ṣṣef [ad yiři s] yijj n řeɛqiq d azeggwaɣ d ict n tyaqut d ict n smaraxt. [Wa] d ṣṣef amezwaru.
EXO 28:18 Ṣṣef wiss tnayen [ad yiři s] yijj n karbunkel d yijj n ṣaffir aziza d yijj n diamanti.
EXO 28:19 Ṣṣef wiss třata [ad yiři s] yijj n [weẓru n] yasintu d yijj n axat d yijj n umatist.
EXO 28:20 U ṣṣef wiss arebɛa [ad yiři s] yict n texrisulit d yijj n uniks d yijj n yaspis. Ina ad ttwaṭṭfen deg wureɣ di tcuyar nsen.
EXO 28:21 Iẓra ad xasen iřin ismawen n ayt n Israil, tenɛac [n yeẓra] ɛlaḥsab ismawen nsen, s ineqqacen n txadent n ucemmiɛ, kuř [aneqqic] ɛlaḥsab isem nnes i d as dd-yusin. Aqa aten i tenɛac n tqebbař.
EXO 28:22 Ad tegged ssnaseř x tejmect, ifiřan imuden n wureɣ iṣfan.
EXO 28:23 Ad tegged tnayen n texrazin n wureɣ ɣar tejmect uca ad tcedded tnayen n texrazin nni ɣar tnayen n ṭṭrufa n tejmect.
EXO 28:24 Ad tcedded tnayen n ssnaseř n wureɣ imuden ɣar tnayen n texrazin ɣar řeḍruf n tejmect.
EXO 28:25 Ad tcedded tnayen n ixfawen n tnayen n [ssnaseř] imuden ɣar tnayen n tcuyar uca ad tent tcedded ɣar tɣarḍin [i iǧan] ɣar uɣezdis n zzat n upalṭu [n ukehhan].
EXO 28:26 Ad tegged [ɛawed] tnayen n texrazin n wureɣ uca ad tent tegged ɣar tnayen n ixfawen n tejmect [ɣar swadday], x tma nsen [nni iǧan] ɣar upalṭu, ɣar daxeř.
EXO 28:27 Ad tegged tnayen n texrazin n wureɣ, tinni i ɣa tcedned x tnayen n tɣarḍin n upalṭu [n ukehhan], swadday, ɣar zzat, qibač i useřqi nnes ɣar sennej i tḥezzamt izewwqen n upalṭu.
EXO 28:28 Ad tessmuned tajmect s texrazin nnes ɣar texrazin n upalṭu ak-d ijj n ufiřu imuden adeḥmi, maḥend ad tiři [tejmect] sennej i tḥezzamt izewwqen n upalṭu uca war tᵉttbeṭṭi tejmect x upalṭu.
EXO 28:29 [Ammu] i ɣa yawi Harun ismawen n ayt n Israil di tejmect n řeḥkam x wuř nnes x minni i ɣa yadef ɣar Uqeddas, [ařami i ɣa qqimen] i řidaret zzat i wudem n SIDI i řebda.
EXO 28:30 Ad tessarsed [iẓra n] ‘Urim’ d ‘Tummim’ di tejmect n řeḥkam, [maḥend] ad iřin x wuř n Harun x minni i ɣa yadef zzat i wudem n SIDI. [Ammu] i ɣa yarbu Harun řebda řeḥkam n ayt n Israil x wuř nnes zzat i wudem n SIDI.
EXO 28:31 Ad tegged aseřham n upalṭu [n ukehhan] marra zeg [ufiřu] adeḥmi.
EXO 28:32 Ad yiři warzam i uzeǧif nnes di řwesṭ nnes. Ɣar tma n warzam ad din tiři ict n tma imuden, tenni i ɣa yiřin am warzam [i yiri] deg ijj n warruḍ n wuzzař n uɛeskari, war tᵉttcarrig.
EXO 28:33 Ɣar tmuwwa nnes ad tegged tiremmanin n [ifiřan] adeḥmi d urjuwani d uzeggʷaɣ iḥedqen, ɣar tmuwwa nnes i d as dd-innḍen, u jar asent [ad tegged] nnwaqes n wureɣ i d as dd-innḍen.
EXO 28:34 Ijj awarni i wenneɣni, ijj n nnaqus n wureɣ d ict n tremmant, uca [ɛawed] ijj awarni i wenneɣni, ijj n nnaqus n wureɣ d ict n tremmant, [ammu i ɣa iřin] ɣar tmuwwa n useřham u deg wenneḍ nnes.
EXO 28:35 Harun ad t yarḍ xmi ittssexxar netta, [ařami] i ɣa ittwaseř ddriz nnes x minni i ɣa yadef ɣar Zzawect Iqeddsen zzat i wudem n SIDI u xmi ɣa iffeɣ [ɛawed], [ḥima] war ittmetti.
EXO 28:36 Ad tegged ict n teřwiḥt s nnuwwar n wureɣ iṣfan uca ad xas tneqced [awařen-a] am mammec neqqcen taxadent n ucemmiɛ: “AMQEDDAS i SIDI.”
EXO 28:37 Ad tt tcedded ɣar yijj n ufiřu adeḥmi x areẓẓet. Ad tiři [teřwiḥt] ɣar zzat n ureẓẓet.
EXO 28:38 Ad tiři [teřwiḥt] x tenyart n Harun, [ḥima] Harun ad yarbu řmuɛṣiyyet i iǧan di tmesřayin iqeddsen nni i ɣa ssqeddsen ayt n Israil ak-d marra tiwhibin n tmesřayin nsen iqeddsen. Ad tiři řebda x tenyart nnes, ḥima ad iřint [tmesřayin nni] arḍant zzat i wudem n SIDI.
EXO 28:39 Ad tegged tcamir s řeqṭen azdad. Ad tegged areẓẓet [ɛawed] s řeqṭen azdad. Taḥezzamt ad tt tegged [am] ijj n umudi n uxeyyaḍ.”*
EXO 28:40 “I warraw n Harun ad tegged tcamir u ad asen tegged tiḥezzamin u ad asen tegged ticuccay, maḥend ad [asen] iřin i uɛuǧi d telwizt.
EXO 28:41 Ad tessyarḍed Harun, umac, d warraw nnes i kides iǧan, uca cek ad ten tdehned, ad ten třeqqmed u ad ten tessqeddsed, ḥima ad ayi xedmen am yikehhanen.
EXO 28:42 Egg asen ssraweř n řeqṭen, ḥima ad dřen aysum n useḍḥi nsen. Ad iřin zi tejɛinna uca ad awḍen ɣar ifadden.
EXO 28:43 [Ssřaweř nni] ad iřin x [arrimet] n Harun d warraw nnes xmi ɣa yadfen ɣar Uqiḍun n Umsagar niɣ xmi dd ɣa qarrben ɣar uɛalṭar maḥend ad sexxaren di Zzawect Iqeddsen, [ḥima] war dd-ttiwyen řmuɛṣiyyet uca ad mmten. Ta ad tiři d ict n tewṣeyyet i řebda i netta u i zzariɛet nnes awarni as.”
EXO 29:1 “D man aya i d asen ɣa tegged, ḥima ad ten tessqeddsed, maḥend ad ayi iřin d ikehhanen. Ksi ijj n ufunas - ameẓyan n ufunas - d tnayen n wacraren icnan qaɛ,
EXO 29:2 u [ɛawed] aɣrum břa antun d řemsemnat břa antun ixeǧḍen s zzect d teřfaf břa antun ttwadehnent s zzect, tinni i ɣa tegged [marra] s waren azdad n yirden.
EXO 29:3 Ad tent tegged deg ict n tsuǧet uca ad tent tawyed di tsuǧet [jmiɛ] ak-d ufunas ameẓyan d tnayen n icarriyyen.
EXO 29:4 Ad dd-tessqarrbed Harun d warraw nnes ɣar wadaf n Uqiḍun n Umsagar uca ad ten tessirded s waman.
EXO 29:5 Ad teksid arruḍ, ad tyarḍed Harun tcamir d useřḥam i upalṭu d upalṭu [simant nnes] d tejmect uca ad as tbeysed s tḥezzamt izewwqen n upalṭu.
EXO 29:6 Ad tessarsed areẓẓet x uzeǧif nnes u x areẓẓet ad tegged ttaj iqeddsen [n weɛzař].
EXO 29:7 Ad teksid zzect i wedhan uca ad tt tzeǧɛed x uzeǧif nnes uca ad t tdehned.
EXO 29:8 [Xenni] ad tawyed iḥenjiren nnes, ad asen tyarḍed tcamirat.
EXO 29:9 Ad asen tbeysed s tḥezzamt, i Harun d warraw nnes, uca ad asen tarekkbed ticuccay. Ad ɣarsen tiři tukehhant ɛlaḥsab ict n tewṣeyyet i řebda. Ad tařeqqmed Harun d warraw nnes.
EXO 29:10 [Xenni] ad tawyed afunas ameẓyan zzat i Uqiḍun n Umsagar u Harun d warraw nnes ad ssarsen ifassen nsen x uzeǧif n ufunas ameẓyan.
EXO 29:11 Ad tɣarṣed i ufunas ameẓyan zzat i wudem n SIDI, ɣar wadaf n Uqiḍun n Umsagar.
EXO 29:12 [Xenni] ad teksid idammen n ufunas ameẓyan uca ad ten tegged s uḍaḍ nnec x waccawen n uɛalṭar uca ad tzeǧɛed marra idammen [iqqimen] ɣar iḍaren n uɛalṭar.
EXO 29:13 Ad teksid [ɛawed] marra tadunt nni idřin adan d min yuyřen ɣar tsa, d tnayen n tiẓẓař ak-d tadunt i xasent [iǧan] uca ad tessbexxared aya x uɛalṭar.
EXO 29:14 [Maca] aysum n ufunas ameẓyan d yiřem nnes d umessař nnes ad ten tesscemḍed s tmessi barra i řmargeḥ n řɛeskar, aqa d taɣarṣt n ddenb.
EXO 29:15 [Xenni] ad teksid ijj n ucarri uca Harun d warraw nnes ad ssarsen ifassen nsen x uzeǧif n icarri.
EXO 29:16 Ad tɣarṣed i icarri uca ad teksid idammen nnes, ad [ten] tzeǧɛed x uɛalṭar zi marra iɣezdisen nnes.
EXO 29:17 Ad tebḍid icarri d iceǧiqen, ad tessirded adan nnes d icekrad nnes uca ad ten tegged x iceǧiqen nnes u x uzeǧif nnes.
EXO 29:18 Ad tessiɣed i icarri am ikmeř x uɛalṭar, aqa d taɣarṣt n wecmaḍ i SIDI, ict n řefwaḥet ittfuḥen, aqa d ict n tewhibt n tmessi i SIDI.
EXO 29:19 [Xenni] ad teksid icarri nneɣni uca Harun d warraw nnes ad ssarsen ifassen nsen x uzeǧif n icarri.
EXO 29:20 Ad tɣarṣed i icarri uca ad teksid zeg idammen nnes uca ad tegged man aya x iɣes n umezzuɣ afusi n Harun u x iɣes n umezzuɣ afusi n warraw nnes u [ɛawed] x uḍaḍ n yimez n ufus nsen afusi u x uḍaḍ n yimez n uḍar nsen afusi uca ad tzeǧɛed iḍammen [iqqimen] x uɛalṭar zi kuř jjihet.
EXO 29:21 [Xenni] ad teksid zeg idammen nni iǧan x uɛalṭar u zi zzect i wedhan uca ad zzaysen trucced Harun d warruḍ nnes uca [ad trucced ɛawed] arraw nnes d arruḍ n warraw nnes akides, ḥima ad yiři ittwaqeddes, netta d arruḍ nnes, uřa d tarwa nnes d arruḍ n tarwa nnes akides.
EXO 29:22 Ad teksid tadunt n icarri řa d tadunt ɣar unewwar řa tadunt nni idřin adan, uřa min yuyřen ɣar tsa d tnayen n tiẓẓař s tadunt i xasent iǧan d acekrud afusi, minzi wa d icarri i udeccen [n ikehhanen].
EXO 29:23 Ksi [ɛawed] ict n tecnift n weɣrum d ict n temsemment n weɣrum [ittwasswejden] s zzect d ict n teřfeft zi tsuǧet n weɣrum břa antun [i iǧan] zzat i wudem n SIDI.
EXO 29:24 Sars man aya marra x ifassen n Harun u x ifassen n warraw nnes uca ad ten tessenhezzed zi ssa ɣar da [am] ict n tewhibt n wenhezzi zzat i wudem n SIDI.
EXO 29:25 [Awarni as] ad tt teksid zeg ifassen nsen uca ad tt tessbexxared x uɛalṭar, x tɣarṣt n wecmaḍ, [ad tiři] d ict n řefwaḥet ittfuḥen zzat i wudem n SIDI. [Aqa-tt] d ict n tewhibt n tmessi i SIDI.
EXO 29:26 Ad teksid idmaren n icarri i udeccen n Harun uca ad ten tᵉssenhezzed zi ssa ɣar da [am] ict n tewhibt n wenhezzi zzat i wudem n SIDI. Tanita ad tiři d tasɣart nnec.
EXO 29:27 Ad tessqeddsed idmaren n tewhibt n wenhezzi i ittwanhezzen zi ssa ɣar da, uřa d ucekrud i ittwanhezzen zi ssa ɣar da d wenni ittwassgeɛɛden. Aqa-ten zeg icarri n udeccen, am zeg wenni i yeǧan i Harun am zeg wenni i yeǧan i warraw nnes.
EXO 29:28 Aya ad yiři i Harun d warraw nnes d ict n tewṣeyyet i řebda zi jjihet n ayt n Israil, minzi d tawhibt n usgeɛɛed i teǧa. Ad tiři d ict n tewhibt i ɣa ssgeɛɛden ayt n Israil zi tɣarṣa nsen n řehna. Aqa d tawhibt nsen n usgeɛɛed i SIDI.
EXO 29:29 Arruḍ iqeddsen n Harun ad yiři i warraw nnes awarni as, maḥend ad ten dehnen u ad ten ařeqmen dayes.
EXO 29:30 Man wen zeg iḥenjiren nnes [i ɣa yiřin] d akehhan deg wemcan nnes uca ad yadef ɣar Uqiḍun n Umsagar, maḥend ad isexxar di Zzawect Iqeddsen, ad t yarḍ sebɛa n wussan.
EXO 29:31 Ad teksid icarri i udeccen uca ad tᵉssengwed aysum nnes deg ijj n wemcan iqeddsen.
EXO 29:32 Harun d warraw nnes ad ccen aysum n icarri d weɣrum i iǧan di tsuǧet ɣar wadaf n Uqiḍun n Umsagar.
EXO 29:33 Ad ccen zi min zi ittwagg wesřaḥ, ḥima ad ten řeqqmen u ad ten ssqeddsen. [Maca] ijj n ubarrani war zzayes ittett, minzi aqa d ict n řḥajjet d tamqeddest.
EXO 29:34 Mařa iceṭṭ ca zeg weysum [n tɣarṣa] i udeccen niɣ zeg weɣrum ař ṣṣbeḥ, ad tesscemḍed min iceṭṭen di tmessi. Ittxeṣṣa war t ittett ḥed, minzi d ict n řḥajjet iqeddsen [i yeǧa].
EXO 29:35 Ammu i ɣa tegged ak-d Harun u ak-d warraw nnes, [ad tegged] ɛlaḥsab marra min d ac weṣṣiɣ. Ad ten tařeqqmed sebɛa n wussan.
EXO 29:36 Kuř ass ad tesswejded afunas ameẓyan d taɣarṣt n ddenb i weṣřaḥ uca ad tekksed ddenb x uɛalṭar umi xas ɣa tessiwḍed aṣřaḥ, uca [xenni] ad t tdehned, maḥend ad t tessqeddsed.
EXO 29:37 Sebɛa n wussan ad tegged aṣřaḥ x uɛalṭar uca ad t tessqeddsed, [xenni] ad yiři d amqeddas qaɛ. Wenni i ɣa iḥadan aɛalṭar, ad yiři d amqeddas.
EXO 29:38 D man aya i ɣa tesswejded x uɛalṭar: tnayen n izmaren n ijj n useggʷas, kuř ass řebda.
EXO 29:39 Ad tesswejded ijj n yezmar di ṣṣbeḥ u izmar nneɣni ad t tesswejded jar beddu n wezyen n wass ař dd-tewḍa tmeddit.
EXO 29:40 I yijj n yezmar [ad teksid] ɛecra di tesɣart n ijj n ifa n waren azdad ixeǧḍen s zzect ddzen tt-i-dd [zi zzitun], u arebɛa di tesɣart n ijj n uhinu n binu d tawhibt n useyyeb.
EXO 29:41 Ad tɣarṣed i yezmar nneɣni jar beddu n wezyen n wass ař dd-tewḍa tmeddit. Ad ɣares tarnid tawhibt [n řɣiǧet] am mammec tenni n ṣṣbeḥ u [ɛawed] tawhibt nnes n useyyeb. Aqa d řefwaḥet ittfuḥen. [Aqa] d tawhibt n tmessi i SIDI.
EXO 29:42 [Ad tiři] d taɣarṣt n wecmaḍ řebda di [marra] jjiřat nwem ɣar wadaf n Uqiḍun n Umsagar zzat i wudem n SIDI, mani ɣa ssmuneɣ akidwem, maḥend ad kidek ssiwřeɣ din.
EXO 29:43 Ad mmsagareɣ din ak-d ayt n Israil, u [Aqiḍun] ad ittwaqeddes s uɛuǧi inu.
EXO 29:44 Ad ssqeddseɣ Aqiḍun n Umsagar d uɛalṭar. Ad ssqeddseɣ [ɛawed] Harun d warraw nnes, ḥima ad ayi iřin d ikehhanen.
EXO 29:45 Ad zedɣeɣ di řwesṭ n ayt n Israil, ad asen iřiɣ d AREBBI
EXO 29:46 uca ad ssnen belli Necc d SIDI, AREBBI nsen, wenni ten issuffɣen zi temmurt n Miṣra, maḥend ad zedɣeɣ di řwesṭ nsen. Necc d SIDI, AREBBI nsen.”
EXO 30:1 “Ad tegged [ɛawed] aɛalṭar n řebxur. Ad t tegged zeg ukeccuḍ n [tcejjart n] ukasiya.
EXO 30:2 Tuzzeggart ad tiři d ijjen uɣiř, u tiru [ɛawed] d ijjen uɣiř. Ad yiři [uɛalṭar] s arebɛa n tɣemmura. Řuɛřa nnes ad yiři d tnayen n iɣaǧen u accawen nnes ad iřin d ijjen akides.
EXO 30:3 Ad t tɣeǧfed s wureɣ iṣfan, udem nnes n sennej d iɣezdisen nnes i d as dd-innḍen d waccawen nnes. Ad as tegged ijj n zzwaq n wureɣ i d as dd-innḍen.
EXO 30:4 Ad as tegged tnayen n texrazin n wureɣ sadu zzwaq nnes. Ad tent tegged ɣar tnayen n iɣezdisen nnes, ɣar tnayen n tɣemmar nnes. Ad iřint i iɛumad, ḥima ad zzaysen arbun [aɛalṭar n řebxur].
EXO 30:5 Ad tegged tnayen n iɛumad [i tarebbut] zeg ukeccuḍ n ukasiya uca ad ten tɣeǧfed s wureɣ.
EXO 30:6 Ad t tessarsed zzat i uřeḥḥaf i iǧan zzat i Ttabut n Cchadet, zzat i tqebbart n weṣřaḥ tenni iǧan x Cchadet, mani kik i ɣa mmsagareɣ.
EXO 30:7 Ad issbexxar Harun řebxur ittfuḥen kuř ṣṣbeḥ. [Awarni řami] iɛdeř tiftiřin, ad issbexxar.
EXO 30:8 Meřmi i ɣa issireɣ Harun tiftiřin jar beddu n wezyen n wass ař dd-tewḍa tmeddit, ad yejj řebxur ad ibexxar. [Ad yiři] d ijj n řebxur i řebda zzat i wudem n SIDI i [marra] jjiřat nwem.
EXO 30:9 Kenniw war xas tessgeɛɛdem ca řebxur d aɣrib, niɣ taɣarṣt n wecmaḍ niɣ tawhibt [n řɣiǧet] u war xas ttzeǧaɛem tawhibt n useyyeb.
EXO 30:10 Harun ad igg aṣřaḥ x waccawen nnes ict n twařa deg useggʷas s idammen n tɣarṣa n ddenb i weṣřaḥ. Ad t isseṣřeḥ ict n twařa deg useggʷas i [marra] jjiřat nwem. [Aqa-t] d amqeddas qaɛ i SIDI.”
EXO 30:11 Issiweř SIDI ak-d Musa, inna:
EXO 30:12 “Xmi ɣa teksid řqedd n ayt n Israil, [řqedd n] yinni ittwaḥesben, [xenni] nitni ad wcen, kuř ijj i yixef nnes, ttaman n weṣřaḥ i SIDI ɣar useddi nsen, [ḥima] war tᵉttiři jjriḥect jar asen x minni ten ɣa tḥesbed.
EXO 30:13 D man aya i ɣa wcen nitni, kuř ijj zeg inni ɣa iẓwan ɣar yinni ittwaḥesben: azyen ciqlu ɛlaḥsab ciqlu n Zzawect Iqeddsen - ciqlu-ya d ɛicrin jira - azyen ciqlu-ya ad yiři d tawhibt n usgeɛɛed i SIDI.
EXO 30:14 Kuř ijj zeg inni ɣa iẓwan ɣar yinni ittwaḥesben, zi ɛicrin iseggʷusa sennej, ad issgeɛɛed tawhibt i SIDI.
EXO 30:15 Bu-wagřa war ittic ktar u amezřuḍ war issenqis zeg wezyen ciqlu, xmi ɣa tessgeɛɛdem tawhibt n SIDI i weṣřaḥ n řeɛmur nwem.
EXO 30:16 Ad teksid nnuqart i weṣřaḥ n ayt n Israil uca ad tt tfarzed i tsexxart n Uqiḍun n Umsagar. Ad tiři d řidaret i ayt n Israil zzat i wudem n SIDI i weṣřaḥ n řeɛmur nwem.”
EXO 30:17 Issiweř SIDi ak-d Musa, inna:
EXO 30:18 “Ad tegged ɛawed tbanyut n nnḥas i usird, ak-d uḍar n nnuqart nnes i x tt ɣa ssarsen, maḥend ad ssirden [ixef nsen]. Ad tt tessarsed jar Uqiḍun n Umsagar d uɛalṭar uca ad dayes tegged aman,
EXO 30:19 maḥend Harun d warraw nnes ad zzayes ssirden ifassen nsen d iḍaren nsen.
EXO 30:20 Xmi ɣa yadfen ɣar Uqiḍun n Umsagar ad ssirden s waman [ḥima] war ttmettin ca, uřa xmi dd ɣa qarrben ɣar uɛalṭar, maḥend ad sexxaren xmi ɣa ssbexxaren tawhibt n tmessi i SIDI.
EXO 30:21 [Xenni] ad ssirden ifassen nsen d iḍaren nsen ḥima war ttmettin ca. Man aya ad asen yiři d ict n tewṣeyyet i řebda, i netta u i zzariɛet nnes, i [marra] jjiřat nsen.”
EXO 30:22 Issiweř SIDI ak-d Musa, inna:
EXO 30:23 “Cek, ksi řexxu ɣarek řeɛṭur icnan aṭṭas: xems-mya [ciqlu] n mirru yuzzřen ak-d řqedd n wezyen n manawenni, aqa-t d mitayen u-xemsin [ciqlu] zi řqarfa ittfuḥen u mitayen u-xemsin [ciqlu] zeg uɣanim uḥemmum ittfuḥen,
EXO 30:24 xemsa-mya [ciqlu] n qassiya [iwezznen] ɛlaḥsab ciqlu n Zzawect Iqeddsen, d ijj n uhinu n zzect n zzitun.
EXO 30:25 Egg zzaysen ict n zzect tamqeddast i wedhan, ijj n řeɛṭur ixeǧḍen ɛlaḥsab ṣṣenɛet n uɛeṭṭar. Aya ad yiři d ict n zzect tamqeddest i wedhan.
EXO 30:26 S man aya ad tdehned Aqiḍun n Umsagar, Ttabut n Cchadet,
EXO 30:27 tazewḍa ak-d marra řeqcuɛ nnes d řqendiř ak-d marra řeqcuɛ nnes d uɛalṭar n řebxur,
EXO 30:28 d uɛalṭar n wecmaḍ ak-d marra řeqcuɛ nnes d tbanyut ak-d uḍar nnes.
EXO 30:29 Ad tessqeddsed marra aya, ḥima ad yiři d amqeddas qaɛ. Marra wi ɣa iḥadan zi man aya, ad ittwaqeddes.
EXO 30:30 Ad tdehned Harun d warraw nnes uca ad ten tessqeddsed, ḥima [ad] ayi [iřin] d ikehhanen.
EXO 30:31 Ad tessiwřed ak-d ayt n Israil uca ad tinid: ‘Ta ad tiři d ict n zzect tamqeddast i wedhan i Necc di [marra] jjiřat nwem.
EXO 30:32 War iɛeddeř ad tt farrɣen x arrimet n bnadem, u mammec teǧa war zzayes tteggem učmas. Tamqeddast i teǧa uca ad tiři d tamqeddast i kenniw.
EXO 30:33 Wenni i ɣa isswejden s řebzar [ict n zzect n wedhan] am tanita uca ad zzayes tmesḥed x yijj n ubarrani, ad ittwaqess zi řgens nnes.’”
EXO 30:34 Inna SIDI i Musa: “Ksi i yixef nnec řebzar ittfuḥen: tuddimin n userɣaɣ d weqcur n tcejjart n řqarfa d ɣalba, řebzar ittfuḥen d jjawi iṣfan. [Ad yiři] řqedd nnes am řqedd n wenneɣni.
EXO 30:35 Egg zzayes ijj n řeɛṭur, ijj n uxeǧeḍ am tenni igga uɛeṭṭar: ittwameǧed, iṣfa, iqeddes.
EXO 30:36 Ḥri-dd zzayes taneɣda tazdadt uca sars [ca] zzayes zzat i Cchadet deg Uqiḍun n Umsagar mani akidek ɣa msagareɣ. Ad awem tiři d tamqeddast qaɛ.
EXO 30:37 Řeɛtur nni i ɣa tegged, war t tteggem s uxeǧeḍ d ijjen akides i yixef nwem. Ad yiři d amqeddas i cek, [ad yiři] i SIDI.
EXO 30:38 Wenni i iggin ca am wanita uca ad t icemm, ad ittwaqess zi řgens nnes.”
EXO 31:1 Issiweř SIDI ak-d Musa, inna:
EXO 31:2 “Xzar, Necc řaɣiɣ-dd x Baṣaliyil, mmis n Uri, mmis n Ḥur, zi teqbič n Yahuda s yisem nnes.
EXO 31:3 Ccureɣ t s Arruḥ n AREBBI, s tiɣit, s řeɛqeř, s tussna u s marra [min ittxeṣṣan n] tzemmar n ṣṣnayeɛ,
EXO 31:4 ḥima ad ixemmem ireqqamen s lfenn, maḥend ad [ten] tteggen s wureɣ d nnuqart d nnḥas,
EXO 31:5 u ḥima ad neqcen iẓra [iɣřan] maḥend ad ten ggen [di tcuyar nsen], u ḥima ad neqcen akeccuḍ, ḥima [ammu] i ɣa ggen marra řxedmet.
EXO 31:6 Aqa Necc ggiɣ akides Ahuliyab, mmis n Axisamak, zi řaǧ n Dan. Deg wuř n marra [inni ɣar iǧa] wuř d amiɣis, ggiɣ tiɣit. Nitni ad ggen marra min xef weṣṣiɣ:
EXO 31:7 Aqiḍun n Umsagar, Ttabut n Cchadet, taqebbart n weṣřaḥ nni xas iǧan, u marra řeqcuɛ n Uqiḍun:
EXO 31:8 tazewḍa ak-d marra řeqcuɛ nnes, d řqendiř iṣfan s marra řeqcuɛ nnes d uɛalṭar n řebxur,
EXO 31:9 aɛalṭar n wecmaḍ ak-d marra řeqcuɛ nnes d tbanyut s uḍar nnes,
EXO 31:10 arruḍ n tsexxart d warruḍ iqeddsen n Harun, akehhan, d warruḍ n warraw nnes, maḥend ad sexxaren am ukehhan,
EXO 31:11 d zzect i wedhan, d řebxur ittfuḥen i Zzawect Iqeddsen. Ɛlaḥsab marra minzi cek umureɣ ad ggen [marra] aya.”
EXO 31:12 Issiweř SIDI ak-d Musa, inna:
EXO 31:13 “Cek, siweř ak-d ayt n Israil, ini: ‘Ad teḥḍam [ussan n] ssebt inu, minzi [ssebt] d řeɛřamet jar ayi d kenniw, i [marra] jjiřat nwem, ḥima ad tessnem belli Necc d SIDI, wenni kenniw issqeddsen.
EXO 31:14 Ḥḍam [ass n] ssebt, minzi iqeddes [i iǧa] i kenniw! Wenni t ɣa issfesden, ad t nɣen nican, minzi man wen i dayes ɣa iggin ca n řxedmet, ad ittwaqḍeɛ zi řwesṭ n řgens nnes.
EXO 31:15 Setta n wussan ad tegged řxedmet uca deg wass wiss sebɛa ad yiři d ssebt, arraḥet tmun, tqeddes i teǧa i SIDI! Kuř ijj, wenni iggin [ca n] řxedmet deg wass n ssebt, ad t nɣen nican.
EXO 31:16 Ayt n Israil ad ḥḍan [ass n] ssebt, ad ḥḍan ssebt di [marra] jjiřat nsen [am] ijj n Řɛahd i řebda.
EXO 31:17 [Ad tiři] d ict n řeɛřamet jar ayi d ayt n Israil, minzi di setta n wussan igga SIDI ajenna d temmurt u deg wass wiss sebɛa yareyyeḥ, yarra nnefs.”
EXO 31:18 [Řami] ikemmeř [SIDI] awař i kides issiwřen x wedrar n Sina, iwca i Musa tnayen n teřwiḥin n Cchadet. [Tuɣa] tiřwiḥin nni zeg weẓru, ttwarint s uḍaḍ n AREBBI.
EXO 32:1 [Řami] iẓra řgens belli Musa iɛeṭṭař, war dd-ihwi ɛad zeg wedrar, inneyru-dd řgens ɣar Harun, nnan as: “Kkar, egg aneɣ irebbiten, inni i ɣa yuyuren zzatneɣ, minzi Musa aya, aryaz nni d aneɣ dd-issuffɣen zi Miṣra, war nessin min t yuɣin.”
EXO 32:2 Harun inna asen: “Qeřɛem tixrazin n wureɣ nni iǧan deg imejjan n temɣarin nwem u n iḥenjiren nwem uřa n yessitwem, awyem [tent-i-dd] ɣari.”
EXO 32:3 Ikkes marra řgens tixrazin n wureɣ nni iǧan deg imejjan nsen uca iwyen as tent-i-dd ɣar Harun.
EXO 32:4 Netta iksi [tent] zeg ifassen nsen uca icekkeř i-tent s imeydi, igga zzaysent ijj n uɛejmi n ufessi. [Řexdenni] nnan: “[A] Israil, wa d arebbi nnec, wenni cek dd-issuffɣen zi temmurt n Miṣra.”
EXO 32:5 [Řami] iẓra Harun aya, ibna ijj n uɛalṭar zzat i [uɛejmi] uca iřaɣa Harun, inna: “Tiwecca [ad yiři] d řɛid i SIDI.”
EXO 32:6 Tiwecca nnes kkaren zic uca ssbexxaren tiɣarṣa n wecmaḍ uca qeddmen [akidsent] [ɛawed] tiɣarṣa n řehna. [Xenni] iqqim řgens, icca, iswa, ikkar, maḥend ad yegg řefrayej.
EXO 32:7 [Xas uca] issiweř SIDI ak-d Musa: “Uyur, hwa, minzi řgens nnec, wenni dd-tessuffɣed zi temmurt n Miṣra, aqa igga min war iḥřin.
EXO 32:8 Aqa ffɣen deɣya x webrid nni x ten weṣṣiɣ. Ggin ijj n uɛejmi n ufessi i yixef nsen uca bendqen as, qeddmen as tiɣarṣa uca nnan: ‘A Israil, wanita d arebbi nnec, wenni cek dd-issuffɣen zi temmurt n Miṣra.’”
EXO 32:9 Inna SIDI i Musa: “Necc ẓriɣ řgens-a, xzar, aqa-t d ijj n řgens iqseḥ!
EXO 32:10 Řexxu ejj ayi ad raḥeɣ, ad areɣ aɣḍab inu xasen uca ad ten teḥḥiɣ, u Necc ad cek arreɣ d ijj n řgens imɣar.”
EXO 32:11 [Maca] Musa izawg zzat i wudem n SIDI, AREBBI nnes, inna: “[A] SIDI, mayemmi ɣa yareɣ weɣḍab nnec x řgens nnec, wenni dd-tessuffɣed zi temmurt n Miṣra s yijj n jjehd imɣar u s ufus ijehden?
EXO 32:12 Mayemmi ssawařen Imiṣriyyen jar asen, qqaren: ‘Netta issuffeɣ i-ten s nneyyet taɛeffant, maḥend ad ten ineɣ x idurar u maḥend ad ten iteḥḥa zeg wudem n temmurt?’ Dweř x řḥaduq n weɣḍab nnec uca ndem x tuɛeffna [i texsed ad tarred] x řgens nnec.
EXO 32:13 Fekkar di Ibrahim d Isḥaq d Israil, imsexxaren nnec, inni umi tejjuǧed s Yixef nnec u tessiwřed akidsen: ‘Necc ad arniɣ zzariɛet nwem am yitran n ujenna uca ad wceɣ marra tammurt-a i xef ssiwřeɣ i zzariɛet nnec uca nitni ad tt ṭṭfen d ict n řwart i řebda.”
EXO 32:14 [Xenni] indem SIDI x tuɛeffna i tuɣa inna ad tt yegg x řgens nnes.
EXO 32:15 Uca idweř-dd Musa, ihwa-dd zeg wedrar s tnayen n teřwiḥin n Cchadet deg ufus nnes. Tiřwiḥin-a ttwarint x tnayen n iɣezdisen nsent: ttwarint x yijj n uɣezdis u x uɣezdis nneɣni.
EXO 32:16 Tiřwiḥin tuɣa atent d řxedmet n AREBBI uca tira nni ineqcen di teřwiḥin d tira n AREBBI.
EXO 32:17 Isřa Yacuwa i řḥess n řgens isɣuyyu uca inna i Musa: “[Aqa da], řḥess n umenɣi di řmargeḥ n řɛeskar.”
EXO 32:18 [Maca] netta inna: “War iǧi d řḥess n usřewřiw ɣar řeɣřeb niɣ d řḥess n usɣuyyi ɣar txessart, maca min ttesřiɣ d řḥess n iɣuyyan war iḥřin.”
EXO 32:19 Uca imsar, am dd-ireḥḥeg ɣar řmargeḥ n řɛeskar uca iẓra aɛejmi d ccḍiḥ [s nnubtat], yarɣa weɣḍab n Musa uca inḍar tiřwiḥin zeg ifassen nnes, yarẓa i-tent ɣar iḍaren n wedrar.
EXO 32:20 Iṭṭef uɛejmi nni ggin, isscemḍ i-t di tmessi, ařami idweř d iɣɣeḍ uca izzuzar i-t x wudem n waman uca yarra ayt n Israil ad [t] swen.
EXO 32:21 Inna Musa i Harun: “Min zzayek igga řgens-a ařami d as dd-tiwyed ijj n ddenb d ameqqran aṭṭas?”
EXO 32:22 Harun inna: “War yareqq weɣḍab n sidi inu! Cek tessned řgens-a, aqa-t di řɣar.
EXO 32:23 Nnan ayi: ‘Egg aneɣ irebbiten nni ɣa yuyuren zzat i uɣembub nneɣ, minzi Musa wanita, aryaz wenni d aneɣ dd-issuffɣen zi temmurt n Miṣra, war nessin min t yuɣin.’
EXO 32:24 [Xenni] nniɣ asen: ‘Wi ɣar iǧa ureɣ, ad [t-i-dd-]ikkes, uca ad ayi t yewc!’ Uca nḍareɣ t di tmessi uca iffeɣ-dd uɛejmi-ya.”
EXO 32:25 [Umi] iẓra Musa, aqa řgens idweř d imfelles, minzi Harun ijja afelles [nsen] ad idweř d taḍeḥḥact jar řɛedyan nsen,
EXO 32:26 ibedd Musa ɣar wadaf n řmargeḥ, inna: “Man wen i iǧan i SIDI, [as-dd da] ɣari!” Uca munen-dd ɣares marra iḥenjiren n Lawi.
EXO 32:27 Inna asen: “Ammu i iqqar SIDI, AREBBI n Israil! Sarsem kuř ijj ssif nnes x tmeṣṣaḍt nnes, ɛdum uca ɛeqbem x řmargeḥ zeg wadaf ɣar wadaf [nneɣni] uca ad ineɣ kuř ijj umas d kuř ijj umeddukkeř nnes d kuř ijj jjar nnes!”
EXO 32:28 Tarwa n Lawi ggin ɛlaḥsab awař n Musa. Deg wass nni wḍan ɛřaḥař teřt-ařaf n yeryazen n řgens.
EXO 32:29 Musa inna: “Ksim ifassen nwem ass-a ɣar SIDI, kuř ijj x mmis u x umas. Meɛlik ufiɣ Netta ad ibarek i kenniw [ammu] ass-a!”
EXO 32:30 Tiwecca nnes inna Musa i řgens: “Kenniw teggim ijj n ddenb imɣar. [Ɛad] necc ad ařyeɣ řexxu ɣar SIDI, balak ad ufiɣ aṣřaḥ x ddenb nwem.”
EXO 32:31 Idweř-dd Musa ɣar SIDI uca inna [as]: “[Wayyaw], řgens-a igga ijj n ddenb imɣar, minzi ggin ijj n arebbi n wureɣ i yixef nsen.
EXO 32:32 Řexxu, ɣfar [asen] i ddenb nsen! Niɣ mḥa ayi zeg wedlis nnec ittwannḍen nni turid.”
EXO 32:33 Inna SIDI i Musa: “Wenni xafi ixḍan, d wa i ɣa mḥiɣ zeg wedlis inu ittwannḍen.
EXO 32:34 Ruḥ řexxu, awi řgens-a ɣar mani d ac nniɣ. Aqa lmalak inu ad iraḥ zzat nnec! Deg wass n uxeǧeṣ inu ad asen xeǧṣeɣ ddnub nsen!”
EXO 32:35 [Ammu i] iwta SIDI řgens, minzi ggin aɛejmi nni igga Harun.
EXO 33:1 Issiweř SIDI ak-d Musa: “Ruḥ, geɛɛed ssa, cek d řgens nni dd-tessuffɣed zi temmurt n Miṣra, ɣar temmurt nni x jjuǧeɣ i Ibrahim d Isḥaq d Yaɛqub, nniɣ: ‘I zzariɛet nnec ad tt wceɣ!’
EXO 33:2 Necc ad ssekkeɣ zzat i uɣembub nnec lmalak, uca ad aẓẓřeɣ x ayt n Kenɛan d Imuriyyen d Iḥittiyyen d Ifiriziyyen d Iḥiwiyyen d Iyibusiyyen
EXO 33:3 [deg webrid nwem] ɣar ict n temmurt ifeyyḍen s uɣi d tamment. Necc [s imant inu] war ttgiɛɛideɣ akidwem, ḥima war kenniw tᵉtteḥḥiɣ deg webrid, minzi kenniw d ijj n řgens iqseḥ.”
EXO 33:4 Umi isřa řgens awař-a aɛeffan, ceḍnen uca uřa d ijj igga [ɛad] řehzuṭ nnes.
EXO 33:5 Aqa inna SIDI i Musa: “Ini i ayt n Israil: ‘Kenniw d ijj n řgens iqseḥ. Mařa geɛɛdeɣ jar awem mɣir ijj n wermac, ad kenniw teḥḥiɣ. [Xenni] řexxu kksem řehzuṭ nwem, aqa Necc ad ssneɣ min d ac ɣa ggeɣ.’”
EXO 33:6 Kksen ayt n Israil řehzuṭ nsen zeg wedrar n Hurib.
EXO 33:7 Iksi Musa Aqiḍun uca iwta [Aqiḍun] barra i řmargeḥ n řɛeskar, iggʷej aṭṭas x řmargeḥ, uca iřaɣa as ‘Aqiḍun n Umsagar’. Kuř ijj wenni tuɣa yarezzun SIDI, iffeɣ ɣar Uqiḍun n Umsagar, wenni iǧan barra i řmargeḥ.
EXO 33:8 Umi iffeɣ Musa ɣar Uqiḍun, ikkar marra řgens, bedden barra, kuř ijj ɣar wadaf n uqiḍun nnes, uca nitni xzaren ɣares am tiṭṭawin nsen ḍeffaren Musa ařami yudef ɣar Uqiḍun.
EXO 33:9 Umi yudef Musa ɣar Uqiḍun, aqa aqellij n useynu ihwa, ibedd ɣar wadaf n Uqiḍun uca Netta issiweř ak-d Musa.
EXO 33:10 Uca marra řgens iẓra aqellij n useynu ibedd ɣar wadaf n Uqiḍun, [xenni] ikkar marra řgens uca ibendeq kuř ijj ɣar wadaf n uqiḍun nnes.
EXO 33:11 Issiweř SIDI ak-d Musa aɣembub deg uɣembub, am mammec issiweř bnadem ak-d umeddukkeř nnes. Xenni iɛqeb-dd ɣar řmargeḥ n řɛeskar, [maca] amsexxar nnes Yacuwa, mmis n Nun, [wenni ɛad d] aḥudri, ɛemmarṣ war ibeɛɛed x řwesṭ n Uqiḍun.
EXO 33:12 Inna Musa i SIDI: “Xzar, Cek tennid ayi: ‘Ndeh řgens-a!’, maca Cek war d ayi tessecned wi kidi i ɣa tessekked. Cek tennid: ‘Necc ssneɣ cek s yisem nnec!’ uřa: ‘Tufid arḍa di tiṭṭawin inu!’
EXO 33:13 Řexxu xenni, mařa ufiɣ arḍa di tiṭṭawin nnec, zawgeɣ Cek ad ayi tessecned abrid nnec, ḥima ad Cek ssneɣ, maḥend ad afeɣ arḍa di tiṭṭawin nnec. Xzar, cceɛb-a d řgens nnec!”
EXO 33:14 Inna: “[Lmalak n] wudem inu ad yuyur [akidek] u Necc ad cek ssareyyḥeɣ.”
EXO 33:15 [Xenni] yarra-dd xas: “Mařa udem nnec war [kidneɣ] ittriḥ, war ttejji [xenni] ad ngeɛɛed ssa!
EXO 33:16 Mammec ɣa ssnen belli aqa ufiɣ arḍa di tiṭṭawin nnec, necc d řgens nnec? Ma war iǧi minzi Cek truḥed akidneɣ, aqa neccin, necc d řgens nnec, nfarrez x kuř řgens i iǧan x wudem n temmurt?”
EXO 33:17 Inna SIDI i Musa: “[Ɛawed] ad ggeɣ awař-a i tennid umi tufid arḍa di tiṭṭawin inu uca ssneɣ cek s yisem [nnec].”
EXO 33:18 [Xas uca] inna [Musa]: “Zawgeɣ Cek, scen ayi aɛuǧi nnec!”
EXO 33:19 Inna: “Necc ad sseɛduɣ marra tcuni inu zzatek uca ad ɛeyydeɣ Isem n SIDI zzat i uɣembub nnec uca ad ḥinneɣ x wi ɣa ḥinneɣ, ad areḥmeɣ x wi ɣa areḥmeɣ.”
EXO 33:20 Inna [ɛawed]: “Cek war tzemmared ad tẓared udem inu, minzi war d ayi iẓarr bnadem uca ad iqqim iddar.”
EXO 33:21 [Xas uca] inna SIDI: “Xzar, zzat inu amcan [mani] ɣa tbedded x teṣḍart.
EXO 33:22 Xmi ɣa iɛdu uɛuǧi inu, ad cek ggeɣ deg ijj n ufeǧiq n teṣḍart uca ad cek dřeɣ s třeqqa n ufus inu ař dd-ẓwiɣ.
EXO 33:23 U xmi ɣa kkseɣ afus inu, [xenni] ad ayi tẓared zi ḍeffar, [maca] war tẓarred udem inu!”
EXO 34:1 SIDI inna i Musa: “Qess i yixef nnec tnayen n teřwiḥin n weẓru am tmezwura, uca Necc ad ariɣ x teřwiḥin nni awařen [d ijjen] i tuɣa di teřwiḥin timezwura i tarẓid.
EXO 34:2 Sewjed i ṣṣbeḥ uca geɛɛed di ṣṣbeḥ ɣar wedrar n Sina uca bedd din zzati x tqiccet n wedrar.
EXO 34:3 War iɛeddeř ad igeɛɛed uřa d ijj n bnadem akidek, niɣ ad iban ḥed deg wedrar am ikmeř. Uřa d uǧi d ifunasen d tfunasin war zemmaren ad arewsen ṭṭarf i wedrar.”
EXO 34:4 [Xenni] iqess tnayen n teřwiḥin n weẓru am tmezwura, uca ikkar Musa di ṣṣbeḥ zic uca igeɛɛed ɣar wedrar n Sina am mammec t iweṣṣa SIDI uca yiwi [akis] deg ufus nnes tnayen n teřwiḥin n weẓru.
EXO 34:5 Ihwa-dd SIDI deg useynu, ibedd akides din uca iřaɣa s Yisem n ‘SIDI’.
EXO 34:6 Iẓwa SIDI zzat i uɣembub nnes uca iɛeyyed: “SIDI, SIDI, Arebbi, d wenni iccuren s arreḥmet d teḥnunect, ɣares ttasiɛ n řxaḍar, dayes aṭṭas n tmexsiwt icewwaren d řaman,
EXO 34:7 d wenni iḥeṭṭan tamexsiwt [nnes] icewwaren i řuřuf, d wenni iɣeffaren řmuɛṣiyyet d xeṭṭu d ddnub, d wenni war ittbarrin wenni itteggen ddenb, d wenni dd-yarezfen řmuɛṣiyyet n ibabaten deg iḥenjiren u deg iḥenjiren n iḥenjiren nsen ař [jjiř] wiss třata d wiss arebɛa.”
EXO 34:8 Musa yuḍar [s wudem nnes] ɣar temmurt uca ibendeq.
EXO 34:9 Inna: “[A] Sidi inu, mařa ufiɣ xenni arḍa di tiṭṭawin nnec, ad yuyur xenni Sidi inu di řwesṭ nneɣ, minzi řgens iqseḥ. Ɣfar aneɣ řmuɛṣiyyet nneɣ u qbeř aneɣ d řwart nnec!”
EXO 34:10 Netta inna: “Xzar, Necc ad ggeɣ Řɛahd. Zzat i marra řgens nnek, ad ggeɣ řeɛjayeb war ittwaggen ca di marra tammurt u jar marra řegnus, ařami marra řgens di řwesṭ nnes i zi teǧid, ad iẓar min igga SIDI, minzi min ɣa ggeɣ akidek ad isseggʷed aṭṭas.
EXO 34:11 Ḥḍa min x cek weṣṣiɣ ass-a! Xzar, ad aẓẓřeɣ zzat i uɣembub nnec x Imuriyyen d ayt n Kenɛan d Iḥittiyyen d Ifiriziyyen d Iḥiwiyyen d Iyibusiyyen.
EXO 34:12 Ɣarek ad tegged řɛahd ak-d umezduɣ n temmurt mani ɣa tadfed, ḥima netta war d ac ittiři d řfex di řwesṭ nnec.
EXO 34:13 Ittxeṣṣa awem ad tɣeḍřem iɛalṭaren nsen u ad tarẓam imayḍuten nsen [iqeddsen] u ad thedmem tirebbin nsen n cwarti.
EXO 34:14 War ttbendiq i arebbi nneɣni, minzi SIDI, wenni umi qqaren ‘Anessam’, aqa-t d ijj n Arebbi ittasmen.
EXO 34:15 Ɣarek ad tegged řɛahd ak-d imezdaɣ n temmurt, uca [xenni] ad ssfesden nitni ixef nsen umi ɣa dewřen awarni i irebbiten nsen, ad qeddmen tiɣarṣa i irebbiten nsen, uca ad cek ɛarḍen i macca n tɣarṣa nsen.
EXO 34:16 Ad teksid tiḥenjirin nsen [d timɣarin] i iḥenjiren nnec, [maca] ad ssfesdent tḥenjirin nsen ixef nsent umi ɣa dewřen awarni i irebbiten nsent uca ad arrent iḥenjiren nnec ad dewřen awarni i irebbiten nsent.
EXO 34:17 War ttegg i yixef nnec irebbitten n ufessay.
EXO 34:18 Ad teḥḍiḍ Řɛid n Weɣrum břa Antun: sebɛa n wussan ad tecced aɣrum břa antun, di řweqt ittwaggen deg uyur Abib, am mammec cek weṣṣiɣ, minzi deg uyur Abib i dd-teffɣed zi Miṣra.
EXO 34:19 Marra min yarezzmen řemřawet [d amezwaru] Inu, marra iwetman n řebhayem nnec i ɣa yarzzmen [řemřawet d amezwaru], am wenni n ufunas, am wenni n wuǧi.
EXO 34:20 [Mařa] amenzu n weɣyuř yarzem [řemřawrat d amezwaru], ad t tefdid s yijj zeg wuǧi. Mařa war t tefdid, ad as tarẓed iri. Ad tefdid marra imenza n iḥenjiren nnec. War iɛeddeř ad ḍharen s ifassen xwan zzat i wudem inu.
EXO 34:21 Setta n wussan ad txedmed, [maca] deg wass wiss sebɛa ad tareyyḥed. Uřa di [řweqt n] tyarza d tmeyra ad tareyyḥed.
EXO 34:22 Ad tegged Řɛid n Simanat, aqa-t d [Řɛid n] Tmenzut n tmeyra n yirden, uřa d Řɛid n Usmuni ɣar uneggar n useggʷas.
EXO 34:23 Kuř aryaz ad dd-iban třata n twařawin deg useggʷas zzat i wudem n Sidi, SIDI, AREBBI n Israil,
EXO 34:24 minzi zzat i uɣembub nnec ad kkseɣ tasɣart n řwart x řegnus uca ad sswesɛeɣ iymiren nnec uca uřa d ijjen ad immeẓri [ad yacar] tammurt nnec, xmi ɣa tgeɛɛded třata n twařawin deg useggʷas, ḥima ad tbaned zzat i wudem n SIDI, AREBBI nnec.
EXO 34:25 War ttqeddem idammen n tɣarṣt inu ak-d min ixemmaren. Taɣarṣt n Řɛid [n Tɣarṣt] n Useɛdu war ttnusi ǧiřet ař ṣṣbeḥ.
EXO 34:26 Tamezwarut n tmenzut n wudem n temmurt nnec ad [tt]-i-dd-tawyed ɣar Taddart n SIDI, AREBBI nnec. War snenni iɣayḍ d ameẓyan s uɣi n yemmas.”
EXO 34:27 Inna SIDI i Musa: “Ari awařen-a i yixef nnec, minzi am mammec qqaren wawařen-a, aqa ggiɣ Řɛahd akidek u ak-d Israil.”
EXO 34:28 Uca [Musa] tuɣa din ak-d SIDI arebɛin n wussan d arebɛin n ǧyaři. War icci aɣrum niɣ iswa aman. Uca yura di teřwiḥin awařen n Řɛahd, Ɛecra n Wawařen.
EXO 34:29 [Řami] dd-ihwa Musa zeg wedrar n Sina, am tuɣa tnayen n teřwiḥin n Cchadet deg ifassen n Musa am dd-ihwa zeg wedrar, imsar aqa war issin Musa belli tiřmect n uɣembub nnes tareqq minzi tuɣa akides issawař.
EXO 34:30 Harun d marra ayt n Israil ṣewḍen ɣar Musa, u xzar, tiřmect n wudem nnes tuɣa tareqq, ggʷeden ad ɣares dd-qarrben.
EXO 34:31 Iřaɣa-dd xasen Musa uca idweř-dd Harun d marra řḥukkam n tmesmunt ɣares uca issiweř Musa akidsen.
EXO 34:32 Awarni as qarrben-dd marra ayt n Israil uca netta yumur i-ten marra min xef issiweř SIDI akides deg wedrar n Sina.
EXO 34:33 [Řami] ikemmeř Musa awař nnes akidsen, igga ařeḥḥaf x wudem nnes.
EXO 34:34 [Xmi] i ɣa yiři Musa zzat i wudem n SIDI ḥima ad kides issiweř, ikkes ařeḥḥaf, ař dd-iffeɣ [ɛawed]. U řami dd-iffeɣ ɣar barra, issiweř ak-d ayt n Israil min d as yumur [SIDI].
EXO 34:35 Uca ẓrin ayt n Israil aɣembub n Musa, aqa tiřmect n wudem nnes tareqq, [xenni] yarra Musa ařeḥḥaf x wudem nnes, ař dd-yudef [ɛawed], ḥima akides issiweř.
EXO 35:1 Musa issmun marra tamesmunt n ayt n Israil uca inna asen: “Ina d awařen nni yumur SIDI, ḥima ad ten teggem.
EXO 35:2 Setta n wussan ad tegged řxedmet u ass wiss sebɛa ad awem yiři iqeddes, aqa d ssebt, arraḥet tmun i SIDI. Kuř ijj, wenni dayes iggin [ca n] řxedmet, ad ittwaneɣ.
EXO 35:3 War tessruɣim kenniw timessi di marra tizeddiɣin nwem deg wass n ssebt.”
EXO 35:4 Issiweř Musa ak-d marra tamesmunt n ayt n Israil, inna: “D wa d min iweṣṣa SIDI, [umi] inna:
EXO 35:5 ‘Ksim zi min ɣarwem ict n tewhibt n usgeɛɛed i SIDI. Kuř ijj, wenni umi yennurzem wuř nnes, ad tt yawi, aqa-tt d tawhibt n usgeɛɛed i SIDI: ureɣ d nnuqart d nnḥas,
EXO 35:6 [afiřu] adeḥmi d urjuwani d uzeggʷaɣ iḥedqen d řeqṭen azdad d ccɛar n iɣayḍen,
EXO 35:7 iřmawen izeggʷaɣen n icarriyyen d iřmawen n ddenfiřat d ukeccuḍ n ukasiya,
EXO 35:8 zzect i tfawt, řeɛṭur i zzect n wedhan u i řebxur ittfuḥen,
EXO 35:9 iẓra n uniks d iẓra [iɣřan nneɣni], maḥend ad ten ggen x upalṭu u x tejmect.
EXO 35:10 Marra inni [iǧan] jar awem s wuř d amiɣis, ad dd-asen ad ggen marra min yumur SIDI:
EXO 35:11 Tazeddiɣt, Aqiḍun nnes d tseqqaft nnes d tsennarin nnes d tfeřwin nnes d tḥenya nnes n uɛarreḍ d ipilaren nnes d tyarsawin nnes,
EXO 35:12 d Ttabut ak-d iɛumad nnes [i tarebbut] d tqebbart n weṣřaḥ d uřeḥḥaf i dduri,
EXO 35:13 d tzewḍa ak-d iɛumad nnes [i tarebbut] d marra řeqcuɛ nnes d weɣrum n wescan,
EXO 35:14 d řqendiř i tfawt d řeqcuɛ nnes d teftiřin nnes d zzect i tfawt
EXO 35:15 d uɛalṭar n řebxur ak-d iɛumad nnes [i tarebbut] d zzect i wedhan d řebxur ittfuḥen d arwaq n wadaf ɣar wadaf n Tzeddiɣt,
EXO 35:16 d uɛalṭar n wecmaḍ d tracca nnes n nnḥas d iɛumad nnes [i tarebbut] d marra řeqcuɛ nnes d tbanyut s uḍar nnes,
EXO 35:17 d řizarat n řemraḥ, ipilaren nnes ak-d tyarsawin nsen d arwaq i wadaf n řemraḥ,
EXO 35:18 d řewtad n Tzeddiɣt d řewtad n řemraḥ d ifiřan nsen,
EXO 35:19 arruḍ i řxedmet deg Uqeddas, arruḍ iqeddsen n ukehhan Harun d warruḍ n warraw nnes, maḥend ad xedmen am yikehhanen.’”
EXO 35:20 [Xenni] ffɣen nitni, marra tamesmunt n ayt n Israil, [ggʷejen] zi zzat n uɣembub n Musa.
EXO 35:21 [Xenni] yusa-dd kuř ijj, wenni umi inhezz wuř nnes, u marra wenni umi innurzem buḥbeř nnes, uca iwyen-dd nitni tawhibt n usgeɛɛed, [tenni ssgeɛɛden nitni ɣar] SIDI, d tenni i ɣa yiřin i Uqiḍun n Umsagar u i tsexxart i dayes u i warruḍ iqeddsen.
EXO 35:22 [Ammu] dd-usin iryazen jmiɛ ak-d temɣarin, marra inni umi innurzem wuř [nsen] uca iwyen-dd timessakin d texrazin n umezzuɣ d tinzar d txudan [n ucemmiɛ] d tseddiyin s wedmam n wureɣ d marra řeqcuɛ n wureɣ, [wah,] kuř ijjen yiwi ict n tewhibt n wenhezzi n wureɣ i SIDI.
EXO 35:23 Marra wi ɣar ittwaf [afiřu] adeḥmi d urjuwani d uzeggʷaɣ iḥedqen niɣ řeqṭen azdad niɣ ccɛar n iɣayḍen niɣ iřmawen izeggʷaɣen n icarriyyen niɣ iřmawen n ddenfiřat, iwyen-dd [man aya].
EXO 35:24 Marra wi issgeɛɛden tawhibt n nnuqart niɣ n nnḥas, iwyen tawhibt-a n usgeɛɛed ɣar SIDI, d marra wi ɣar ittwaf ukeccuḍ n ukasiya i marra řxedmet n tsexxart, iwyen [man aya].
EXO 35:25 Marra timɣarin s wuř amiɣis ttqarḍcent s ifassen nsent uca nitenti iwyent-i-dd min qareḍcent: [afiřu] adeḥmi d urjuwani d uzeggʷaɣ iḥedqen d řeqṭen azdad.
EXO 35:26 Marra timɣarin nni umi inhezz wuř nsent s tiɣit, qareḍcent ccɛar n iɣayḍen.
EXO 35:27 Řḥukkam iwyen-dd iẓra n uniks d iẓra [iɣřan nneɣni], ḥima ad ten ggen x upalṭu u x tejmect,
EXO 35:28 řeɛṭur d zzect i tfawt d zzect i wedhan u i řebxur ittfuḥen.
EXO 35:29 Ayt n Israil wcin s řxaḍar i SIDI, marra iryazen d temɣarin, inni umi inhezz wuř nsen, maḥend ad wcen s řxaḍar i marra řxedmet nni yumur SIDI, ḥima ad tᵉttwagg s tsexxart n Musa.
EXO 35:30 [Xenni] inna Musa i ayt n Israil: “Xzarem, SIDI iřaɣa-dd i Baṣaliyil, mmis n Uri, mmis n Ḥur, zi řaǧ n Yahuda, s yisem [nnes].
EXO 35:31 Iccur i-t Arruḥ n AREBBI s tiɣit d řeɛqeř d tussna u s marra [min ittxeṣṣan n] tzemmar n ṣṣnayeɛ
EXO 35:32 i uxemmem n [ɛřam kuř] ireqqamen, ḥima ad ten yegg s wureɣ d nnuqart d nnḥas,
EXO 35:33 u i uneqqac n iẓra [iɣřan] d usarsi nsen, u i uneqqac n ukeccuḍ u ḥima ad igg marra ireqqamen s lfenn.
EXO 35:34 Igga [Arebbi] deg wuř nnes tawengit i useřmed, [deg wuř] nnes u [deg wuř n] Ahuliyab, mmis n Axisamak, zi řaǧ n Dan.
EXO 35:35 Iccur i-ten s tiɣit n wuř, maḥend ad ggen marra řxedmet: [řxedmet n] taneqqact d warcam d umudi s [ufiřu] adeḥmi d urjuwani d uzeggʷaɣ iḥedqen d řeqṭen azdad uřa d [řxedmet n] uxeyyaḍ.” Nitni ggin kuř řxedmet u ttsaqaren arcamen s lfenn.
EXO 36:1 Baṣaliyil d Ahuliyab d kuř aryaz s wuř amiɣis i umi iwca SIDI tiɣit d řeɛqeř, maḥend ad ssnen mammec ɣa ggen marra řxedmet i tsexxart n Zzawect Iqeddsen, ggin marra am mammec ten yumur SIDI.
EXO 36:2 Musa iřaɣa-dd i Baṣaliyil d Ahuliyab d kuř aryaz s wuř amiɣis, umi igga SIDI tiɣit deg wuř nnes, uřa marra wenni umi inhezz wuř nnes, maḥend ad dd-yas ɣar řxedmet uca ad tt igg.
EXO 36:3 Nitni ksin zi zzat n wudem n Musa marra tawhibt nni ssgeɛɛden ayt n Israil i řxedmet di ṭṭweɛ ni tsexxart n Zzawect Iqeddsen, maḥend ad ggen řxedmet nni. Uca [aqa] ɛad ggin ad as dd-awyen kuř ṣṣbeḥ tiwhibin s řxaḍar.
EXO 36:4 [Xenni] usin-dd marra iryazen imiɣisen, inni tuɣa iceɣřen x marra řxedmet n Zzawect Iqeddsen, ijj ijj dewřen-dd zi řxedmet nni ggin nitni,
EXO 36:5 uca ssiwřen ak-d Musa, nnan: “Řgens yiwi-dd ktar zi min ittxeṣṣan di ṭṭweɛ n řxedmet nni i [d aneɣ] yumur SIDI, ḥima ad tt negg.”
EXO 36:6 [Xas uca] yumur Musa, ḥima ad barrḥen di řmargeḥ n řɛeskar, ad inin: “War ttejji aryaz niɣ tamɣart ɛad ad yegg ca n řxedmet nni i ɣa issgeɛɛed d tawhibt i Zzawect Iqeddsen!” Ammu i issbedd [Musa] řgens ad yawi [ɛad ktar],
EXO 36:7 minzi cfa timesřayin nni d iwyen i marra řxedmet i ɣa ggen, aqa tceṭṭ [ɛad] ktar.
EXO 36:8 Jar yinni ɣar tuɣa řxedmet, aqa marra imiɣisen n wuř ggin Tazeddiɣt zi ɛecra n tjartiřin n řeqṭen azdad imuden u s ufiřu adeḥmi d urjuwani d uzeggʷaɣ iḥedqen ak-d ikiruben nni [xasent] igga am yijj n warcam n ufennan.
EXO 36:9 Tuzzeggart n ict n tjartiřt tuɣa-tt tmenya u-ɛecrin n iɣaǧen u tiru n ict n tjartiřt tuɣa-t arebɛa n iɣaǧen u marra tijartiřin ɣarsent d řeɛbar d ijj.
EXO 36:10 Issmun xemsa n tjartiřin ict ak-d tenneɣni uca xemsa n tjartiřin issmun i-tent [ɛawed] ict ak-d tenneɣnit.
EXO 36:11 [Xenni] igga tisarawin ideḥmaniyyen di tma n yict n tjartiřt ɣar ṭṭarf ɣar useřqi uca amenni i tent igga [ɛawed] di tma n tjartiřt nneɣni ɣar ṭṭarf, ɣar [mani iǧa] useřqi nneɣni.
EXO 36:12 Igga xemsin n tsarawin x tma n yict n tjartiřt d xemsin n tsarawin ɣar ṭṭarf n tjartiřt [nneɣni] ɣar useřqi nneɣni. Tisarawin ṭṭfent [nican] ict di tenneɣnit.
EXO 36:13 Igga [ɛawed] xemsin n tsennarin n wureɣ uca issmun tijartiřin ict i tenneɣni s tsennarin uca [ammu] tedweř Tzeddiɣt d ict.
EXO 36:14 Igga [ɛawed] tijařtiřin n ccɛar n iɣayḍen, ad iřint d Aqiḍun x Tzeddiɣt. Igga ḥiṭac n tjartiřin.
EXO 36:15 Tuzzeggart n ict n tjartiřt tuɣa-tt třatin n iɣaǧen u tiru n ict n tjartiřt d arebɛa n iɣaǧen. Ḥiṭɛac n tjartiřin ɣarsent řeɛbar d ijj.
EXO 36:16 Netta issmun xemsa n tjartiřin weḥḥedsent u [ɛawed] setta n tjartiřin weḥḥedsent.
EXO 36:17 Igga xemsin n tsarawin x tma n tjartiřt taneggarut ɣar [ṭṭarf n] useřqi [ak-d tenneɣni] uca igga [ɛawed] xemsin n tsarawin x tma n tjartiřt ɣar [ṭṭarf n] useřqi nneɣni.
EXO 36:18 Igga [ɛawed] xemsin n tsennarin n nnḥas, ḥima ad issmun Aqiḍun maḥend ad t yarr d ijjen.
EXO 36:19 Igga [ɛawed] ict n tseqqaft n iřmawen izeggʷaɣen n icarriyyen i Uqiḍun uca sennej i man aya ict n tseqqaft n iřmawen n ddenfiřat.
EXO 36:20 Igga tifeřwin i Tzeddiɣt s ukeccuḍ n ukasiya nni ibedden [nican].
EXO 36:21 Tuzzeggart n [ict n] tefřawt tuɣa-tt ɛecra n iɣaǧen u tiru n yict n tefřawt d ijj n uɣiř d wezyen.
EXO 36:22 Kuř tafřewt ɣares tnayen n iḍaren, inni issmeřqan ict ak-d tenneɣnit am twečmatin Ammu i igga s marra tifeřwin n Tzeddiɣt.
EXO 36:23 Igga tifeřwin i Tzeddiɣt, ɛicrin n tfeřwin ɣar jjihet n ljanub, ɣar yefus.
EXO 36:24 Igga ɛawed arebɛin n tyarsawin n nnuqart sadu ɛicrin n tfeřwin, tnayen n tyarsawin sadu ict n tefřawt i tnayen n iḍaren nnes, uřa d tnayen n tyarsawin sadu tafřawt nneɣni i tnayen n iḍaren nnes.
EXO 36:25 Igga [ɛawed] ɛicrin n tfeřwin i uɣezdis nneɣni n Tzeddiɣt, ɣar uɣezdis n ccamal,
EXO 36:26 s arebɛin n tyarsawin nnes n nnuqart: tnayen n tyarsawin sadu ict n tefřawt d tnayen n tyarsawin sadu tafřawt nneɣni.
EXO 36:27 I iɣezdisen n ḍeffar n Tzeddiɣt, ɣar uɣezdis n řɣarb, igga setta n tfeřwin.
EXO 36:28 Igga tnayen n tfeřwin [d tifeřwin] i tɣemmura n Tzeddiɣt ɣar tnayen n iɣezdisen ɣar ḍeffar.
EXO 36:29 Zi swadday tuɣa řeṣqent am wacniwen uca ammu i tent tuɣa d icten ař dd-awḍent sennej deg ict n texrazt. Ammu i igga s tnayen [n tfeřwin] i tnayen n tɣemmura.
EXO 36:30 [Ammu] i din tuɣa tmenya n tfeřwin s tyarsawin nsent n nnuqart, [aqa atent] d seṭṭac n tyarsawin, tnayen n tyarsawin sadu kuř tafřewt.
EXO 36:31 Igga ɛawed tiḥenya n uɛarreḍ zeg ukeccuḍ n ukasiya, xemsa n tfeřwin ɣar ijj n uɣezdis n Tzeddiɣt,
EXO 36:32 u xemsa n tḥenya n uɛarreḍ i tfeřwin ɣar uɣezdis nneɣni n Tzeddiɣt d xemsa n tḥenya n uɛarreḍ i tfeřwin n Tzeddiɣt ɣar tnayen n tɣemmura n ḍeffar ɣar řɣarb.
EXO 36:33 Taḥnact n uɛarreḍ di řwesṭ igga i-tt ad teẓwa zi řwesṭ n tfeřwin zeg ixef ař wenneɣni.
EXO 36:34 Iɣeǧef tifeřwin s wureɣ uca igga tixrazin nsent n wureɣ, maḥend ad daysent ssidfen tiḥenya n uɛarreḍ uca [uřa d] tiḥenya n uɛarreḍ icellel i-tent s wureɣ.
EXO 36:35 Igga ijj n uřeḥḥaf s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden, igga i-t d ijj n warcam n ufennan ak-d ikiruben [xas].
EXO 36:36 Igga as arebɛa n ipilaren n ukeccuḍ n ukasiya uca iɣeǧef i-ten s wureɣ. Tisennarin nsen tuɣa atent n wureɣ. Issefsi [i ipilaren] arebɛa n tyarsawin nsent n nnuqart.
EXO 36:37 Igga ijj n arwaq i wadaf n Uqiḍun s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden, [igga i-t] d ijj n umudi n uxeyyaḍ,
EXO 36:38 s xemsa n ipilaren nnes d tsennarin nnes. Iɣeǧef tizeǧifin nsen d iqeḍban nsen i useřqi s wureɣ. Tiyarsawin nsen tuɣa atent n nnḥas.
EXO 37:1 Igga Baṣaliyil Ttabut n ukeccuḍ n [tcejjart n] ukasiya. Tuzzeggart nnes tuɣa-tt tnayen n iɣaǧen d wezyen u tiru nnes ijj n uɣiř d wezyen uca řuɛřa nnes ijj n uɣiř d wezyen.
EXO 37:2 Iɣeǧef i-t zi daxeř d barra s wureɣ iṣfan uca igga as ijj n zzwaq n wureɣ i d as dd-innḍen.
EXO 37:3 Issefsi as arebɛa n texrazin i arebɛa n tɣemmura nnes: tnayen n texrazin ɣar yijj n uɣezdis d tnayen n texrazin ɣar uɣezdis nneɣni.
EXO 37:4 Igga iɛumad [i tarebbut] zeg ukeccuḍ n ukasiya uca iɣeǧef i-ten s wureɣ.
EXO 37:5 Igga iɛumad [i tarebbut] di texrazin ɣar tnayen n iɣezdisen n Ttabut, maḥend ad [zzaysen] arbun Ttabut.
EXO 37:6 Igga taqebbart n weṣřaḥ n wureɣ iṣfan s tuzzeggart nnes n tnayen n iɣaǧen d wezyen u tiru nnes n ijj n uɣiř d wezyen.
EXO 37:7 Igga tnayen n ikiruben n wureɣ. Iɛdeř i-ten [am] řxedmet n wemziř [i dd-itteffɣen] zi tnayen n ixfawen n tqebbart n weṣřaḥ.
EXO 37:8 Ijj n ukirub [iffeɣ] zeg ijj n ixef ɣar uɣezdis-a u akirub nneɣni zeg ixef nneɣni ɣar uɣezdis nneɣni. Igga ikiruben zi tnayen n ixfawen n tqebbart n weṣřaḥ.
EXO 37:9 Ikiruben sswiẓẓḍen afriwen nsen sennej uca s wafriwen nsen dřin taqebbart n weṣřaḥ. Iɣembab nsen tuɣa ijjen qibač i wenneɣni uca [di řweqt d icten tuɣa] iɣembab n ikiruben ɣar tqebbart n weṣřaḥ.
EXO 37:10 Igga tazewḍa n ukeccuḍ n [tcejjart n] ukasiya. Tuɣa tuzzeggart nnes tnayen n iɣaǧen u tiru nnes ijj n uɣiř d řuɛřa nnes ijj n uɣiř d wezyen.
EXO 37:11 Iɣeǧef i-tt s wureɣ iṣfan uca igga as ijj n zzwaq n wureɣ i d as dd-innḍen.
EXO 37:12 Igga [ɛawed] ict n tma i d as dd-innḍen n ijj n cbar n ufus uca igga ijj n zzwaq n wureɣ ɣar tmewwa nnes i d as dd-innḍen.
EXO 37:13 Issefsi as arebɛa n texrazin n wureɣ uca igga tixrazin ɣar arebɛa n tɣemmura nni iǧan ɣar arebɛa n iḍaren nnes.
EXO 37:14 Tuɣa tixrazin zzat n tma, maḥend ad [daysent] ssidfen iɛumad [i tarebbut], ḥima ad [zzaysen] arbun tazewḍa.
EXO 37:15 Igga iɛumad [i tarebbut] zeg ukeccuḍ n ukasiya uca iɣeǧef i-ten s wureɣ, maḥend ad [zzaysen] arbun tazewḍa.
EXO 37:16 Igga řeqcuɛ i ɣa yiřin x tzewḍa s wureɣ iṣfan: ṭṭbaṣi nnes d tɣenjayin nnes d řkisan nnes d iɣarrafen, maḥend ad zzaysen kebben.
EXO 37:17 Igga řqendiř n wureɣ iṣfan. Iɛdeř řqendiř s wefḍis n wemziř: afud x uḍar nnes d iɣaǧen nnes d řkisan nnes d tɛebbuzin nnes i dd-ittasen ak-d nnuwarat nnes, aqa-ten [marra] tuɣa zzayes [dd-itteffɣen].
EXO 37:18 Zeg iɣezdisen nnes ffɣen-dd setta n iɣaǧen, třata n iɣaǧen n řqendiř zeg ijj n uɣezdis d třata n iɣaǧen n řqendiř zeg uɣezdis nneɣni.
EXO 37:19 Ɣar ijj n uɣiř [tuɣa] din třata n řkisan am [nnewwac n] ǧewz s tɛebbuzt d nnewwac uca x uɣiř nneɣni [ɛawed] třata n řkisan am [nnewwac n] ǧewz s [ict n] tɛebbuzt i dd-ittasen ak-d [ijj n] nnewwac. Ammu [i yeǧan marra] setta n iɣaǧen nni dd-itteffɣen zi řqendiř.
EXO 37:20 Ɣar řqendiř [simant nnes] tuɣa din arebɛa n řkisan am [nnuwarat n] ǧewz ak-d tɛebbuzin nsen i dd-ittasen ak-d nnuwarat nsen.
EXO 37:21 Sadu tyuya n iɣaǧen i zzayes [dd-iffɣen d amezwaru] aqa din ict n tɛebbuzt uca [amenni] i din ict n tɛebbuzt sadu tyuya n iɣaǧen i zzayes [dd-iffɣen awarni as] uca ɛawed din ict n tɛebbuzt sadu tyuya n iɣaǧen i zzayes [dd-iffɣen d aneggaru]. [Man aya iǧa amenni] i setta n iɣaǧen i zzayes dd-iffɣen.
EXO 37:22 Tuɣa tiɛebbuzin nsen d iɣaǧen nsen ffɣen-dd zzayes. Marra aya [tuɣa] d ict n řxedmet n wemziř s wureɣ iṣfan.
EXO 37:23 Igga setta n řefnarat nnes ak-d tjeqqaḍin [n teftič] nnes d tmejmarin nnes, [marra] s wureɣ iṣfan.
EXO 37:24 Igga [řqendiř] ak-d marra řeqcuɛ nnes zeg ict n talint n wureɣ iṣfan.
EXO 37:25 Igga aɛalṭar n řebxur zeg ukeccuḍ n [tcejjart n] ukasiya s tuzzeggart nnes n ijj uɣiř u tiru nnes n ijj n uɣiř. Tuɣa-t s arebɛa n tɣemmura. Řuɛřa nnes tuɣa-t tnayen n iɣaǧen. Zzayes tuɣa accawen nnes [d ijj akides].
EXO 37:26 Iɣeǧef i-t s wureɣ iṣfan, udem nnes n sennej d iɣezdisen nnes i d as dd-innḍen u ɛawed accawen nnes. Igga as ijj n zzwaq n wureɣ i d as dd-innḍen.
EXO 37:27 Igga as tnayen n texrazin n wureɣ sadu zzwaq nnes i tnayen n tɣemmura nnes, ɣar tnayen n iɣezdisen nnes, ḥima ad daysent ssidfen iɛumad, maḥend ad zzaysen arbun aɛalṭar n řebxur.
EXO 37:28 Igga iɛumad [i tarebbut] zeg ukeccuḍ n ukasiya uca iɣeǧef i-ten s wureɣ.
EXO 37:29 Igga ɛawed zzect tamqeddest i wedhan d řebxur iṣfan ittfuḥen, [ɛlaḥsab] ṣṣenɛet n uɛeṭṭař.
EXO 38:1 Igga aɛalṭar n wecmaḍ s ukeccuḍ n ukasiya. Tuzzeggart nnes tuɣa-tt xemsa n iɣaǧen u tiru nnes xemsa n iɣaǧen, tuɣa-t s arebɛa n tɣemmura, u řuɛřa nnes tuɣa-t třata n iɣaǧen.
EXO 38:2 Ɣar arebɛa n tɣemmura igga accawen nnes. Accawen nnes tuɣa aten d ijjen akides. Iɣeǧef i-t s nnḥas.
EXO 38:3 Igga marra řeqcuɛ i uɛalṭar: tiydurin d iɣenjayen d ṭṭawyat i urucci d furcayat d tmejmarin, marra řeqcuɛ-a igga i-ten s nnḥas.
EXO 38:4 Igga ict n tracca i uɛalṭar, ijj n umudi n nnḥas sadu tma nnes, swadday ɣar wezyen [n uɛalṭar].
EXO 38:5 Issefsi arebɛa n texrazin i arebɛa n ixfawen n tracca n nnḥas maḥend ad daysent ssidfen iɛumad [i tarebbut].
EXO 38:6 Igga iɛumad [i tarebbut] zeg ukeccuḍ n ukasiya uca iɣeǧef i-ten s nnḥas.
EXO 38:7 Igga iɛumad [i tarebbut] di texrazin ɣar iɣezdisen n uɛalṭar, maḥend ad zzaysen t arbun. Igga i-t s tfeřwin [ak-d] řxawi [di daxeř nsent].
EXO 38:8 Igga tabanyut n nnḥas s uḍar nnes n nnḥas zi tisitin n terbiɛin n temɣarin nni xedment ɣar wadaf n Uqiḍun n Umsagar.
EXO 38:9 Igga řemraḥ. Ɣar jjihet n ljanub, ɣar yefus, tuɣa tuzzeggart n řizarat n řemraḥ mya n iɣaǧen n řeqṭen azdad imuden.
EXO 38:10 Ɛicrin n ipilaren nnes d ɛicrin n tyarsawin nsen [tuɣa aten] n nnḥas. Tisennarin n ipilaren d iqeḍban nsen i useřqi [tuɣa aten] n nnuqart.
EXO 38:11 Ɣar uɣezdis n ccamal [tuɣa din řizarat s ict n tuzzeggart n] mya n iɣaǧen ak-d ɛicrin n ipilaren nsent u ak-d ɛicrin n tyarsawin nsen n nnḥas. Tisennarin n ipilaren d iqeḍban nsen i useřqi [tuɣa aten] n nnuqart.
EXO 38:12 Ɣar uɣezdis n řɣarb [tuɣa din] řizarat n xemsin n iɣaǧen ak-d ɛecra n ipilaren nsent d ɛecra n tyarsawin nsen. Tisennarin n ipilaren d iqeḍban nsen i useřqi [tuɣa aten] n nnuqart.
EXO 38:13 Ɣar uɣezdis n ccarq, ɣar jjihet n wenqar n tfuct, [tuɣa din řizarat n] xemsin n iɣaǧen.
EXO 38:14 Tuɣa řizarat ɣar ijj n uɣezdis n zzat xemmesṭac n iɣaǧen [di tuzzeggart] ak-d třata n ipilaren nsent d třata n tyarsawin nsen.
EXO 38:15 Ɣar uɣezdis n zzat nneɣni n wadaf n řemraḥ, ɣar uɣezdis-a d uɣezdis nni, [tuɣa] řizarat daysent xemmesṭac n iɣaǧen di tuzzeggart, ak-d třata n ipilaren nsent d třata n tyarsawin nsen.
EXO 38:16 Marra řizarat nni d as dd-innḍen i řemraḥ tuɣa atent n řeqṭen azdad imuden.
EXO 38:17 Tiyarsawin n ipilaren [tuɣa atent] n nnḥas d tsennarin n ipilaren d iqeḍban nsen i useřqi [tuɣa aten] s nnuqart uca takursit x tzeǧifin nsen [tuɣa-tt] zi nnuqart d marra ipilaren n řemraḥ [tuɣa ɣarsen] iqeḍban n nnuqart i useřqi.
EXO 38:18 Arwaq ɣar wadaf n řemraḥ ggin t d ijj n umudi n uxeyyaḍ s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden. Tuzzeggart [nnes] tuɣa ɛicrin n iɣaǧen u řuɛřa x [marra] tiru [n řemraḥ] xemsa n iɣaǧen, am řizarat n řemraḥ.
EXO 38:19 Arebɛa n ipilaren d arebɛa n tyarsawin nsen tuɣa aten s nnḥas d tsennarin nsen s nnuqart uca takursit x tzeǧifin nsen uřa d iqeḍban nsen i useřqi [tuɣa aten] s nnuqart.
EXO 38:20 Marra řewtad n Tzeddiɣt d řemraḥ i d as dd-innḍen [tuɣa aten] s nnḥas.
EXO 38:21 Man aya d min ssuffɣen nitni i Tzeddiɣt, Tazeddiɣt n Cchadet, uca zemmen t s řumur n Musa s tsexxart n Ilawiyyen, s ufus n Itamar, mmis n Harun, akehhan.
EXO 38:22 Baṣaliyil mmis n Uri, mmis n Ḥur, zi teqbič n Yahuda, igga marra min d as yumur SIDI i Musa.
EXO 38:23 [Tuɣa] akides Ahuliyab, mmis n Axisamak, zi teqbič n Dan. [Tuɣa-t] d aneqqac d bu-ṣṣenɛet, axeyyaḍ n [ufiřu] adeḥmi d urjuwani d uzeggʷaɣ iḥedqen d řeqṭen azdad.
EXO 38:24 Marra ureɣ i ssxedmen nitni i řxedmet ɣar marra řxedmet [i iggin] di Zzawect Iqeddsen, [ixs ad yini] ureɣ n tewhibin n wenhezzi, tuɣa: tesɛa u-ɛicrin talint u sebɛa-mya u-třatin ciqlu ɛlaḥsab ciqlu iqeddsen.
EXO 38:25 Nnuqart n yinni ittwaḥesben n tmesmunt tuɣa-tt mya talint d ařef u-sebɛa-mya u-xemsa u-sebɛin ciqlu, ɛlaḥsab ciqlu iqeddsen.
EXO 38:26 Ijj n wezyen i yijj n bnadem, aqa-t d azyen ciqlu ɛlaḥsab min dd-ittawi ciqlu iqeddsen, zi marra wi iɛdun ɣar yinni ittwaḥesben zi ɛicrin n iseggʷusa sennej, [d man aya] i setta-mya u-teřt-ařaf u-xemsa-mya u-xemsin [n yeryazen].
EXO 38:27 Mya talint n nnuqart nni tuɣa atent ḥima ad [zzaysent] ssfesyen tyarsawin n Zzawect Iqeddsen d tyarsawin n uřeḥḥaf: mya n tyarsawin zi mya talint, [ixs ad yini] ict n talint i yict n tyarsa.
EXO 38:28 Zeg wařef u-sebɛa-mya u-xemsa u-sebɛin [ciqlu] igga tisennarin i ipilaren. Iɣeǧef tizeǧifin nsen uca icedd [ɣarsen] iqeḍban i useřqi.
EXO 38:29 Nnḥas n tewhibin n wenhezzi [tuɣa-t] sebɛin talint d ařfayen u-arebɛa-mya ciqlu.
EXO 38:30 S man aya igga tyarsawin i wadaf n Uqiḍun n Umsagar d uɛalṭar n nnḥas d tracca nnes n nnḥas d marra řeqcuɛ n uɛalṭar
EXO 38:31 d tyarsawin [n ipilaren] n řemraḥ i d as dd-innḍen d tyarsawin n wadaf n řemraḥ d marra řewtad n Tzeddiɣt d marra řewtad n [ipilaren] i d as dd-innḍen i řemraḥ.
EXO 39:1 Ggin [ɛawed] arruḍ i tsexxart s [ufiři] adeḥmi d urjuwani d uzeggʷaɣ iḥedqen, ḥima ad [zzayes] sexxaren [ikehhanen] di Zzawect Iqeddsen. [Ɛawed] ggin arruḍ iqeddsen i Harun, am mammec d as yumur SIDI i Musa.
EXO 39:2 Igga apalṭu n ukehhan s [ifiřan n] wureɣ u s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden.
EXO 39:3 Nitni bezzɛen tiřwiḥin n wureɣ uca qessen zzaysent ifiřan, ḥima ad ten xeyyḍen jar [ufiřu] adeḥmi d urjuwani d uzeggʷaɣ iḥedqen u jar řeqṭen azdad, [d man aya tuɣa] d ict n řxedmet [am] tt ittegg ufennan.
EXO 39:4 Ggin as tiɣarḍin imseřsaqen uca ssmunen [apalṭu] ɣar tnayen n ixfawen nnes.
EXO 39:5 Taḥezzamt izewwqen i tuɣa ɣar upalṭu nnes, tuɣa teřseq dayes, tedweř d ict akides. Tᵉttwagg tḥezzamt s webrid d ijjen [ak-d upalṭu] s [ifiřan n] wureɣ u s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden, am mammec yumur SIDI i Musa.
EXO 39:6 Nitni ggin ɛawed iẓra n uniks, inni ittwaṭṭfen di tcuyar n wureɣ, neqcen ten am yijj n wenqac n txadent n ucemmiɛ s ismawen n ayt n Israil.
EXO 39:7 Igga i-ten x tɣarḍin n upalṭu, [am] iẓra n řidaret i ayt n Israil, am mammec yumur SIDI i Musa.
EXO 39:8 Igga tajmect, ict n řxedmet [am] tt ittegg ufennan, [am mammec igga] apalṭu, s [ifiřan n] wureɣ u s [ufiřu] adeḥmi d urjuwani d uzeggʷaɣ iḥedqen u s řeqṭen azdad imuden.
EXO 39:9 [Tuɣa-tt] s arebɛa n tɣemmura. Ḍefsen tajmect. [Tuɣa] tuzzeggart nnes d ijj n wezyen n uɣiř, uca uřa d tiru nnes d ijj n wezyen n uɣiř. Tuɣa iḍfes x tnayen.
EXO 39:10 Settfen dayes arebɛa n řeṣfuf n yeẓra: ijj n ṣṣef [s] yijj n řeɛqiq d azeggwaɣ d ict n tyaqut d yict n smaraxt. D wa d ṣṣef amezwar.
EXO 39:11 Ṣṣef wiss tnayen s yijj n karbunkel d yijj n ṣaffir aziza d yijj n diamanti.
EXO 39:12 Ṣṣef wiss třata s yijj [n weẓru] n yasintu d yijj n axat d yijj umatist.
EXO 39:13 Ṣṣef wiss arebɛa s yict n texrisulit d yijj n uniks d yijj n yaspis. Tuɣa ttwaṭṭfen di tcuyar nsen n wureɣ.
EXO 39:14 Iẓra tuɣa xasen ismawen n ayt n Israil, tenɛac [n yeẓra] ɛlaḥsab ismawen nsen, s ineqqacen n ijj n ucemmiɛ, kuř [aneqqac] ak-d yisem nnes i d as dd-yusin. Aqa aten i tenɛac n tqebbař.
EXO 39:15 Ɣar ixfawen n tejmect ggin tiseddyin s wureɣ iṣfan, [tinni] imuden am yijj n ufiřu.
EXO 39:16 Ggin tnayen n tcuyar n wureɣ d tnayen n texrazin n wureɣ uca cedden tnayen n texrazin ɣar tnayen n ixfawen n tejmect.
EXO 39:17 Cedden tnayen n ssnaseř imuden n wureɣ ɣar tnayen n texrazin ɣar ixfawen n tejmect.
EXO 39:18 Tnayen n ixfawen nneɣni n tnayen n ssnaseř imuden, cedden ten ɣar tnayen n tcuyar uca wcin ten x ṭɣarḍin n upalṭu, deg wudem n zzat.
EXO 39:19 Ggin [ɛawed] tnayen n texrazin n wureɣ, cedden tent ɣar tnayen n ixfawen nneɣni n tejmect, di tma nnes nni qibač i upalṭu, ɣar daxeř.
EXO 39:20 Ggin [ɛawed] tnayen n texrazin n wureɣ, cedden tent x tnayen n tɣarḍin n upalṭu [n ukehhan], swadday, ɣar zzat, qibač i useřqi nnes ɣar sennej i tḥezzamt izewwqen n upalṭu.
EXO 39:21 Uca cedden tajmect s texrazin nnes ɣar texrazin n upalṭu [n ukehhan] ak-d ijj n ufiřu adeḥmi ařami idweř sennej i tḥezzamt izewwqen n upalṭu, uca [xenni] war tbeṭṭi tejmect x upalṭu, am mammec yumur SIDI i Musa.
EXO 39:22 Igga ɛawed aseřham n upalṭu [n ukehhan] [am mammec t] ittegg uxeyyaḍ, [tuɣa-t d] adeḥmi marra.
EXO 39:23 Arzam n useřham [tuɣa-t] di řwesṭ nnes [am mammec ggin] arzam n yiri n warruḍ n wuzzař n uɛeskari. Deg wenneḍ n warzam tuɣa din ict n tma, [ḥima] war ittcarrig.
EXO 39:24 Ɣar tmuwwa [n wadday] n useřham ggin tiremmanin s [ufiřu] adeḥmi d urjuwani d uzeggʷaɣ iḥedqen [zeg ifiřan] imuden.
EXO 39:25 Ggin ɛawed nnwaqes n wureɣ iṣfan uca ssarsen nnwaqes nni jar tremmanin ɣar tmuwwa [n wadday] n useřham, deg wenneḍ jar tremmanin.
EXO 39:26 Ijj n nnaqus d ict n tremmant, [xenni ɛawed] ijj n nnaqus d ict n tremmant ɣar tmuwwa [n wadday] n useřham deg wenneḍ, maḥend ad dayes ggen tasexxart nsen, am mammec yumur SIDI i Musa.
EXO 39:27 Ggin tcamir i Harun d warraw nnes s řeqṭen azdad, [am mammec t] ittegg uxeyyaḍ,
EXO 39:28 areẓẓet n řeqṭen azdad d tcuccay izewwqen n řeqṭen azdad d ssraweř n řeqṭen s řeqṭen azdad imuden
EXO 39:29 u tuɣa taḥezzamt n řeqṭen azdad imuden u n [ufiřu] adeḥmi d urjuwani d uzeggʷaɣ iḥedqen, aqa-tt d ijj n umudi n uxeyyaḍ, am mammec yumur SIDI i Musa.
EXO 39:30 Ggin tařwiḥt s nnuwar n ttaj iqeddsen n weɛzař s wureɣ iṣfan uca neqcen dayes tira-ya: “AMQEDDAS i SIDI!”, am mammec neqcen taxadent n ucemmiɛ.
EXO 39:31 Uca cedden as ijj n ufiřu imuden adeḥmi, ḥima ad tt ayřen sennej i areẓẓet, am mammec yumur SIDI i Musa.
EXO 39:32 Ammu i tkemmeř marra řxedmet n Tzeddiɣt, Aqiḍun n Umsagar. Ayt n Israil aqa ggin tt am mammec yumur SIDI i Musa, ammu i tt ggin.
EXO 39:33 Ksin Tazeddiɣt ɣar Musa, Aqiḍun d marra řeqcuɛ nnes d tsennarin nnes d tfeřwin nnes d tḥenya nnes n uɛarreḍ d ipilaren nnes d tyarsawin nnes
EXO 39:34 d tseqqaft n iřmawen izeggʷaɣen n icarriyyen d tseqqaft n iřmawen n ddenfiřat d uřeḥḥaf i dduri,
EXO 39:35 Ttabut n Cchadet d iɛumad nnes [i tarebbut] d tqebbart n weṣřaḥ
EXO 39:36 d tazewḍa ak-d marra řeqcuɛ nnes d weɣrum n wescan
EXO 39:37 d řqendiř [n wureɣ] iṣfan d řefnarat nnes - řefnarat nni tuɣa ittxeṣṣa ad ttwasswejdent, d marra řeqcuɛ nnes d zzect i tfawt -
EXO 39:38 d uɛalṭar n wureɣ d zzect i wedhan d řebxur ittfuḥen d arwaq i wadaf n Uqiḍun
EXO 39:39 d uɛalṭar n nnḥas s tracca n nnḥas d iɛumad nnes [i tarebbut] d marra řeqcuɛ nnes d tbanyut ak-d uḍar nnes
EXO 39:40 d řizarat n řemraḥ ak-d ipilaren nsent d tyarsawin nsen, uřa d arwaq n wadaf n řemraḥ d ifiřan nnes d řewtad nnes d marra řeqcuɛ i tsexxart n Tzeddiɣt, i Uqiḍun n Umsagar
EXO 39:41 uřa d arruḍ i tsexxart, ḥima ad [zzayes] sexxaren [ikehhanen] di Zzawect Iqeddsen, arruḍ iqeddsen i ukehhan Harun d arruḍ i warraw nnes, ḥima [ad sexxaren d] ikehhanen.
EXO 39:42 Ggin ayt n Israil marra řxedmet am mammec marra i yumur SIDI i Musa.
EXO 39:43 Ixzar Musa ɣar marra řxedmet uca iẓra belli tᵉttwagg am mammec yumur SIDI, [wah,] ammu i-tt ggin. Uca ibark i-ten Musa.
EXO 40:1 Issiweř SIDI ak-d Musa, inna:
EXO 40:2 “Deg wass amezwaru n uyur amezwaru ad tessgeɛɛded Tazeddiɣt, Aqiḍun n Umsagar.
EXO 40:3 Ad dayes tegged Ttabut n Cchadet uca ad tedřed Ttabut s uřeḥḥaf.
EXO 40:4 Ad tessidfed tazewḍa uca ad tt tsettfed asettef nnes. Ad tessidfed řqendiř uca ad tessiɣed řefnarat nnes.
EXO 40:5 Ad tessarsed aɛalṭar n wureɣ i řebxur zzat i Ttabut n Cchadet uca ad tegged arwaq n wadaf zzat n Tzeddiɣt.
EXO 40:6 Ad tessarsed aɛalṭar n wecmaḍ zzat i wadaf n Tzeddiɣt, Aqiḍun n Umsagar.
EXO 40:7 Ad tessarsed tabanyut jar Uqiḍun n Umsagar d uɛalṭar uca ad dayes tegged aman.
EXO 40:8 Ad tessbedded řemraḥ ɣar marra iɣezdisen nnes uca ad tayřed arwaq n wadaf n řemraḥ.
EXO 40:9 Ad teksid zzect i wedhan uca ad tdehned Tazeddiɣt d marra min dayes [iǧan]. Ad tt tessqeddsed ak-d marra řeqcuɛ nnes. Ad tiři nettat d tamqeddast.
EXO 40:10 Ad tdehned aɛalṭar n wecmaḍ s marra řeqcuɛ nnes. Ad tessqeddsed aɛalṭar. Aɛalṭar [ad yiři] d amqeddas qaɛ.
EXO 40:11 Ad tdehned tabanyut d uḍar nnes uca ad tt tessqeddsed.
EXO 40:12 Ad dd-tessqarrbed Harun d warraw nnes ɣar wadaf n Uqiḍun n Umsagar uca ad ten tessirded s waman.
EXO 40:13 Ad tessyarḍed i Harun arruḍ iqeddsen uca ad t tdehned uca ad t tessqeddsed, maḥend ad ayi yiři d akehhan i Necc.
EXO 40:14 Xenni ad dd-tessqarrbed iḥenjiren nnes uca ad asen tyarḍed tcamirat.
EXO 40:15 Ad ten tdehned am mammec tdehned babatsen, maḥend ad ayi sexxaren am yikehhanen. Ad yiři wedhan nsen i nitni d ict n tukehhant i řebda i [marra] jjiřat nsen.”
EXO 40:16 Igga Musa marra am mammec yumur SIDI, [wah,] ammu i t igga.
EXO 40:17 Imsar deg uyur amezwaru n useggʷas wiss tnayen, deg wass amezwaru n uyur, aqa ssgeɛɛden Tazeddiɣt.
EXO 40:18 Musa issgeɛɛed Tazeddiɣt, issars tiyarsawin nnes, igga daysent tifeřwin, igga xasent tiḥenya n uɛarreḍ [tinni xasent iẓwan], uca issbedd ipilaren nnes.
EXO 40:19 Ibezzeɛ Aqiḍun x Tzeddiɣt uca issars xas taseqqaft n Uqiḍun am mammec yumur SIDI i Musa.
EXO 40:20 Iksi Cchadet uca issars i-tt daxeř di Ttabut uca icedd iɛumad [i tarebbut] ɣar Ttabut uca issars taqebbart n weṣřaḥ x Ttabut.
EXO 40:21 Issidef Ttabut di Tzeddiɣt uca yuyeř ařeḥḥaf am dduri uca issduriy Ttabut n Cchadet am mammec yumur SIDI i Musa.
EXO 40:22 Issars tazewḍa deg Uqiḍun n Umsagar, ɣar uɣezdis n ccamal n Tzeddiɣt, ɣar barra n uřeḥḥaf.
EXO 40:23 Isettef xas aɣrum zzat i wudem n SIDI, am mammec yumur SIDI i Musa.
EXO 40:24 Issars řqendiř deg Uqiḍun n Umsagar, nican deg urendad n tzewḍa, ɣar jjihet n ljanub n Tzeddiɣt.
EXO 40:25 Issars xas tiftiřin zzat i wudem n SIDI, am mammec yumur SIDI i Musa.
EXO 40:26 Iwca amcan i uɛalṭar n wureɣ deg Uqiḍun n Umsagar zzat i uřeḥḥaf.
EXO 40:27 Issbexxar xas řebxur ittfuḥen am mammec yumur SIDI i Musa.
EXO 40:28 Yuyeř arwaq ɣar wadaf n Tzeddiɣt.
EXO 40:29 Iwca amcan i uɛalṭar n wecmaḍ ɣar wadaf n Tzeddiɣt, Aqiḍun n Umsagar. Issbexxar xas taɣarṣt n wecmaḍ d tewhibt [n řɣiǧet], am mammec yumur SIDI i Musa.
EXO 40:30 Issars tabanyut jar Uqiḍun n Umsagar d uɛalṭar. Igga dayes aman i usird.
EXO 40:31 Musa d Harun d warraw nnes ssirden zzayes ifassen d iḍaren nsen.
EXO 40:32 Řami tuɣa ttadfen ɣar Uqiḍun n Umsagar u řami dd-ttqarraben ɣar uɛalṭar, ssirden ixef nsen am mammec yumur SIDI i Musa.
EXO 40:33 Ɣar marra iɣezdisen n Tzeddiɣt d uɛalṭar ittwagg as-dd řemraḥ uca yuyeř netta arwaq n wadaf n řemraḥ. [Ammu] i ikemmeř Musa řxedmet.
EXO 40:34 [Xenni] idřa useynu Aqiḍun n Umsagar uca aɛuǧi n SIDI iccur Tazeddiɣt.
EXO 40:35 War izemmar Musa ad yadef ɣar Uqiḍun n Umsagar, minzi aseynu yarsa xas u aɛuǧi n SIDI iccur Tazeddiɣt.
EXO 40:36 Řami dd-igeɛɛed useynu zi sennej n Tzeddiɣt, fesyen ayt n Israil iqiḍan nsen uca [ammu] muṭṭyen [zeg wemcan ɣar wemcan].
EXO 40:37 Mařa war dd-igeɛɛed useynu, war fesyen iqiḍan nsen ař ass i di tuɣa ittgeɛɛed.
EXO 40:38 Minzi aseynu n SIDI tuɣa yarsa x Tzeddiɣt s uziř uca di ǧiřet tuɣa timessi zzat i tiṭṭawin n marra taddart n Israil deg imuṭṭuyen nsen [zeg wemcan ɣar wemcan].
LEV 1:1 Iřaɣa i Musa uca issiweř SIDI akides zeg Uqiḍun n Umsagar, inna:
LEV 1:2 “Siweř ak-d ayt n Israil uca ini asen: ‘Mařa issqarreb ijj n bnadem zzaywem tawhibt i SIDI, [xenni] ad dd-tessqarrbem tawhibt nwem zi řebhayem, zeg ifunasen d tfunasin niɣ zeg wuǧi.
LEV 1:3 Mařa tawhibt nnes d taɣarṣt n wecmaḍ zeg ifunasen d tfunasin, [xenni] ad dd-issqarreb ijj n uwtem icnan qaɛ. Ad t yiwi ɣar wadaf n Uqiḍun n Umsagar, maḥend ad yaf arḍa zzat i wudem n SIDI.
LEV 1:4 Ad yegg afus nnes x uzeǧif n tɣarṣt n wecmaḍ uca ammu i ɣa tᵉttwaqbeř [tɣarṣt] s arḍa di ṭṭweɛ nnes, maḥend ad yiři i weṣřaḥ nnes.
LEV 1:5 Ad iɣarṣ i umeẓyan n ufunas zzat i wudem n SIDI uca arraw n Harun, ikehhanen, ad dd-iwyen idammen, ad zeǧɛen idammen ɣar marra iɣezdisen x uɛalṭar nni iǧan ɣar wadaf n Uqiḍun n Umsagar.
LEV 1:6 Ad ikkes tiřmect n tɣarṣt n wecmaḍ uca ad ibḍa [afunas] d iceǧiqen.
LEV 1:7 Arraw n akehhan Harun ad ssarɣen timessi x uɛalṭar uca ad settfen akeccuḍ x tmessi.
LEV 1:8 Arraw n Harun, ikehhanen, ad settfen iceǧiqen d uzeǧif d tadunt x ukeccuḍ nni iǧan x tmessi i iǧan x uɛalṭar.
LEV 1:9 Netta ad issird adan nnes d iḍaren nnes s waman. Akehhan ad issbexxar man aya marra x uɛalṭar, aqa d taɣarṣt n wecmaḍ, d tawhibt n tmessi, d ict n řefwaḥet ittfuḥen i SIDI.
LEV 1:10 Mařa tawhibt nnes d taɣarṣt n wecmaḍ zeg wuǧi, zeg iḥuřiyyen niɣ zeg iɣayḍen, [xenni] ittxeṣṣa ad dd-issqarreb awtem icnan qaɛ.
LEV 1:11 Ad as iɣarṣ zzat i wudem n SIDI ɣar uɣezdis n ccamal n uɛalṭar uca arraw n Harun, ikehhanen, ad zeǧɛen idammen nnes x uɛalṭar ɣar marra iɣezdisen nnes.
LEV 1:12 Ad t ibḍa d iceǧiqen, ak-d azeǧif nnes d tadunt nnes, uca akehhan ad ten isettef x ukeccuḍ nni iǧan x tmessi [i iǧan] x uɛalṭar.
LEV 1:13 Ad issird adan nnes d icekraden nnes s waman. Akehhan ad yawi man aya marra u ad t issbexxar x uɛalṭar. [Aqa] d ict n tɣarṣt n wecmaḍ, ict n tewhibt n tmessi, ict n řefwaḥet ittfuḥen i SIDI.
LEV 1:14 Mařa tawhibt nnes d taɣarṣt n wecmaḍ zeg ijḍaḍ i SIDI, [xenni] ad yawi tawhibt nnes zi tejlilliḥin niɣ zeg idbiren imeẓyanen.
LEV 1:15 Akehhan ad t yawi ɣar uɛalṭar, ad as ikkes azeǧif uca ad t issbexxar x uɛalṭar. Ad iẓemm idammen nnes x uɣezdis n uɛalṭar
LEV 1:16 uca ad as ikkes aseyru ak-d min dayes iqqimen u ad inḍar aya zzat i uɛalṭar ɣar uɣezdis n ccarq x wemcan n iɣɣeḍ n min iqqimen n tadunt
LEV 1:17 Ad t icarreg ɣar wefriwen, [maca] war t ibeṭṭi ca qaɛ, uca akehhan ad t issbexxar x uɛalṭar, x ukeccuḍ nni iǧan x tmessi. Aqa d ict n tɣarṣt n wecmaḍ, d ict n tewhibt n tmessi, d ict n řefwaḥet ittfuḥen i SIDI.’”
LEV 2:1 “Mařa iqeddem ḥed tawhibt n řɣiǧet ɣar SIDI, ad tiři tewhibt nnes n waren azdad uca ad xas iseyyeb zzect uca ad xas issars jjawi.
LEV 2:2 Ad tt yawi ɣar warraw n Harun, ikehhanen, uca ad zzayes iksi ukehhan ijj n wuru iccur zeg waren azdad nni u zi zzect nni ak-d marra jjawi, uca akehhan ad issbexxar aya x uɛalṭar i řidaret [i tewhibt nni], aqa d ict n tewhibt n tmessi d ict n řefwaḥet ittfuḥen i SIDI.
LEV 2:3 Min iqqimen n tewhibt [n řɣiǧet] [ad yiři] i Harun u i warraw nnes. [Aqa] d amqeddas qaɛ zi marra tiwhibin n tmessi n SIDI.
LEV 2:4 Mařa tqeddmed tawhibt i iǧan d tawhibt n řɣiǧet darḥen tt di tefqunt, [xenni ad tiři] d řemsemnat břa antun, ixeǧḍen s zzect, uřa d tiřfaf břa antun ttwadehnent s zzect, [marra] zeg waren azdad.
LEV 2:5 Mařa tawhibt nnec d tawhibt n řɣiǧet ggʷin tt x wexdim, ad tiři n waren azdad ixeǧḍen s zzect, wardayes bu wentun.
LEV 2:6 Ad ten tarẓed d ifetwiten uca ad xas tseyybed zzect. Aqa-tt d ict n tewhibt [n řɣiǧet].
LEV 2:7 Mařa tawhibt nnec d tawhibt n řɣiǧet ggʷin tt di ṭṭajjin, ad tiři tewjed s waren azdad ak-d zzect.
LEV 2:8 Tawhibt [n řɣiǧet] i zzaysen iwejden, ad tt tawyed ɣar SIDI. Bnadem ad zzayes dd-iqarreb ɣar ukehhan uca wanita ad tt yawi ɣar uɛalṭar.
LEV 2:9 Ad iksi ukehhan zi tewhibt [n řɣiǧet] ict n řidaret uca ad [tt] issbexxar x uɛalṭar, [aqa] d tawhibt n tmessi, d řefwaḥet ittfuḥen i SIDI.
LEV 2:10 Min iqqimen n tewhibt [n řɣiǧet] ad yiři i Harun u i warraw nnes. [Aqa-t] d amqeddas qaɛ zi tewhibin n tmessi n SIDI.
LEV 2:11 War iɛeddeř i uřa d ict n tewhibt [n řɣiǧet] i ɣa tqeddmem i SIDI ad tiři tewjed s wentun. Maɣar zi min ma n wentun d zi min ma tamment war zzayes tessbexxaram ca uřa d ict n tewhibt n tmessi i SIDI.
LEV 2:12 Ad tiwyem tawhibt n usuffeɣ amezwaru n ṣṣabet ɣar SIDI, maca nitni war zemmaren ad ssbexxaren [tawhibt-a] x uɛalṭar [am] řefwaḥet ittfuḥen i SIDI.
LEV 2:13 Kuř tawhibt n tewhibt [n řɣiǧet] nnec ad tiři tmeǧḥed s tmeǧaḥṭ. Tameǧaḥt n Řɛahd n AREBBI nnec war tzemmar ad tenqeṣ ɣar tewhibt [n řɣiǧet] nnec. Ad tqeddmed tameǧaḥt ɣar kuř tawhibt nnec.
LEV 2:14 Mařa tiwyed ict n tewhibt [n řɣiǧet] n tmenzut, ad tiwyed tidrin yiwḍen, tinni ittwafaren x tmessi, ak-d řḥebb aziza ibaryen am tewhibt [n řɣiǧet] zi tmenzut nnec.
LEV 2:15 Ad xas tseyybed zzect u ad xas tessarsed jjawi, aqa d tawhibt [n řɣiǧet].
LEV 2:16 [Xenni] ad issbexxar ukehhan [ijj n wezyen] zi řḥebb ibaryen u zi zzect nnes ak-d marra jjawi nnes i xas iǧan am tewhibt n řidaret di man aya. [Aqa] d tawhibt n tmessi i SIDI.”
LEV 3:1 “Mařa tawhibt nnes d taɣarṣt n řehna, ittxeṣṣa, mařa xenni issqarreb-dd [amuddar], ad yiři d awtem [niɣ] d tawtemt n ifunasen d tfunasin, ad dd-issqarreb [ijj n umuddar] icnan qaɛ zzat i wudem n SIDI.
LEV 3:2 Ad issars afus nnes x uzeǧif n tewhibt nnes uca ad as iɣarṣ qibač i wadaf n Uqiḍun n Umsagar uca arraw n Harun, ikehhanen, ad zeǧɛen idammen nnes x uɛalṭar ɣar [marra] iɣezdisen [nnes].
LEV 3:3 Zi tewhibt n řehna ad iqeddem ict tewhibt n tmessi i SIDI, [ixs ad yini] tadunt i idřin adan d marra tadunt [i iǧan] x wadan.
LEV 3:4 Ad ikkes tnayen n tiẓẓař ak-d tadunt i xasent [iǧan] ɣar tejɛinna uřa d min yuyřen ɣar tsa u [yarsa] x tiẓẓař.
LEV 3:5 Arraw n Harun ad ssbexxaren aya x uɛalṭar x tɣarṣt n wecmaḍ i iǧan x ukeccuḍ i din iǧan x tmessi. Aqa-t d tawhibt n tmessi, d ict n řefwaḥet ittfuḥen i SIDI.
LEV 3:6 Mařa tawhibt nnes d taɣarṣt n řehna i SIDI, awtem [niɣ] d tawtemt n wuǧi, [xenni] ad dd-issqarreb [ijj n umudar] icnan qaɛ.
LEV 3:7 Mařa d uḥuři i dd-issqarreb d taɣarṣt, [xenni] ad t-i-dd issqarreb zzat i wudem n SIDI.
LEV 3:8 Netta ad issars afus nnes x uzeǧif n tewhibt nnes uca ad as iɣarṣ zzat i Uqiḍun n Umsagar, uca arraw n Harun ad zeǧɛen idammen nnes x uɛalṭar ɣar [marra] iɣezdisen [nnes].
LEV 3:9 Ad iqeddem tadunt n tɣarṣt n řehna am yict n tewhibt n tmessi i SIDI: marra tanewwart [n tadunt] nni yudsen abeɛṣuṣ ad tt ikkes, uřa d tadunt i idřin adan d marra tadunt [i iǧan] x wadan
LEV 3:10 uca ad ikkes uřa d tnayen n tiẓẓař ak-d tadunt i xasent [iǧan] ɣar tejɛinna d min yuyřen ɣar tsa u [yarsa] x tiẓẓař.
LEV 3:11 Akehhan ad issbexxar aya x uɛalṭar. [Aqa] d macca, ict n tewhibt n tmessi i SIDI.
LEV 3:12 Mařa tawhibt nnes d iɣayḍ, [xenni] ad t-i-dd-issqarreb zzat i wudem n SIDI.
LEV 3:13 Ad issars afus nnes x uzeǧif nnes uca ad as iɣarṣ zzat i Uqiḍun n Umsagar, uca arraw n Harun ad zeǧɛen [cwayt n] idammen nnes x uɛalṭar ɣar [marra] iɣezdisen [nnes].
LEV 3:14 Ad zzayes iqeddem tawhibt nnes, [ixs ad yini] tadunt i idřin adan, u marra tadunt i [iǧan] x wadan, am tewhibt n tmessi i SIDI
LEV 3:15 uca ad ikkes uřa d tnayen n tiẓẓař ak-d tadunt i xasent [iǧan] ɣar tejɛinna uřa d min yuyřen ɣar tsa u [yarsa] x tiẓẓař.
LEV 3:16 Akehhan ad issbexxar aya x uɛalṭar, [aqa] d macca n tewhibt n tmessi s ict n řefwaḥet ittfuḥen. Marra tadunt [ad tiři] i SIDI.
LEV 3:17 [Ta] d tawṣeyyet i řebda i [marra] jjiřat nwem, mani ma i ɣa tzedɣem: marra tadunt d marra idammen war ten ttᵉttem.”
LEV 4:1 Issiweř SIDI ak-d Musa, inna:
LEV 4:2 “Siweř ak-d ayt n Israil, ini: ‘Mařa ca n yijjen ixḍa am iweddar x marra tiweṣṣa n SIDI, min war ittxeṣṣi ad ittwagg, u netta ixḍa deg ict zzaysent, [xenni ad tiři tmesřact ammu]:
LEV 4:3 Mařa akehhan amedhun ixḍa, ařami idweř řgens ixḍa, ad dd-issqarreb ijj n ufunas. - ameẓyan icnan qaɛ n ict n tfunast - am tɣarṣt n ddenb i SIDI di ṭṭweɛ n ddenb nnes i igga.
LEV 4:4 Ad yawi afunas [nni] ameẓyan ɣar wadaf n Uqiḍun n Umsagar, zzat i wudem n SIDI, uca netta ad issars afus nnes x uzeǧif n ufunas ameẓyan uca ad as iɣarṣ i ufunas ameẓyan zzat i wudem n SIDI.
LEV 4:5 [Xenni] akehhan amedhun ad iksi [ca] zeg idammen n ufunas ameẓyan uca ad t yawi ɣar Uqiḍun n Umsagar.
LEV 4:6 Ad issuf ukehhan aḍaḍ nnes deg idammen uca ad irucc ca zeg idammen nni sebɛa n twařawin zzat i wudem n SIDI, zzat i uřeḥḥaf n Zzawect Iqeddsen.
LEV 4:7 Ad igg ukehhan [cwayt] n idammen x waccawen n uɛalṭar i řebxur ittfuḥen i [din] zzat i wudem n SIDI deg Uqiḍun n Umsagar. Netta ad ifarreɣ marra idammen [i iqqimen] n ufunas ameẓyan ɣar uḍar n uɛalṭar n wecmaḍ ɣar wadaf n Uqiḍun n Umsagar.
LEV 4:8 Ad ikkes marra tadunt n ufunas ameẓyan n tɣarṣt: tadunt i idřin adan d marra tadunt [i iǧan] x wadan
LEV 4:9 uca ad ikkes tnayen n tiẓẓař ak-d tadunt i xasent [iǧan] ɣar tejɛinna uřa d min yuyřen ɣar tsa u [yarsa] x tiẓẓař,
LEV 4:10 am mammec ikkes man aya x ufunas n tɣarṣi n řehna, uca akehhan ad issbexxar aya x uɛalṭar n wecmaḍ.
LEV 4:11 Iřem n ufunas ameẓyan d marra aysum nnes ak-d uzeǧif d icekrad nnes d wadan nnes d umessař nnes [i dayes],
LEV 4:12 aqa marra afunas ameẓyan ad t issuffeɣ barra i řmargeḥ n řɛeskar ɣar ijj n wemcan iṣfa mani tteggen iɣɣeḍ i iqqimen n tadunt uca ad t issecmeḍ s tmessi x ukeccuḍ. Ad t cemḍen mani zeǧɛen iɣɣeḍ.
LEV 4:13 Mařa teffeɣ tmesmunt n Israil marra zeg webrid uca teffar tmesřact x tiṭṭawin n wegraw [n řgens], uca nitni ggin ict [n řḥajjet] [nni iffɣen] x marra tiweṣṣa n SIDI, [zi jjihet n] min war ittxeṣṣi ad yegg, uca idweř daysen umarwas,
LEV 4:14 uca iban-dd ddenb i zi iffɣen x webrid n řumurat, [xenni] ad dd-issqarreb wegraw [n řgens] ijj n ufunas - ameẓyan n tfunast - d taɣarṣt i ddenb, uca ad t awyen zzat i Uqiḍun n Umsagar.
LEV 4:15 Imɣaren n tmesmunt ad ssarsen ifassen nsen x uzeǧif n ufunas ameẓyan zzat i wudem n SIDI uca netta ad as iɣarṣ i ufunas [nni] ameẓyan zzat i wudem n SIDI.
LEV 4:16 Akehhan amedhun ad yawi [cwayt] zeg idammen n ufunas ameẓyan ɣar Uqiḍun n Umsagar,
LEV 4:17 uca ad issuf ukehhan aḍaḍ nnes deg idammen uca ad irucc [s idammen nni] sebɛa n twařawin zzat i wudem n SIDI, zzat i uřeḥḥaf.
LEV 4:18 Netta ad igg [cwayt] zeg idammen [nni] x waccawen n uɛalṭar nni [iǧan] zzat i wudem n SIDI deg Uqiḍun n Umsagar. [Xenni] ad ifarreɣ marra idammen [iceṭṭen] ɣar uḍar n uɛalṭar n wecmad i din zzat i wadaf n Uqiḍun n Umsagar.
LEV 4:19 Ad xas ikkes marra tadunt uca ad [tt] issbexxar x uɛalṭar.
LEV 4:20 Uca ad igg s ufunas ameẓyan am mammec igga s ufunas ameẓyan n tɣarṣt n ddenb, ammu i ɣa yegg. Akehhan ad xasen igg aṣřaḥ uca ad asen ittwaɣfar.
LEV 4:21 [Xenni] ad issuffeɣ afunas ameẓyan barra i řmargeḥ n řɛeskar uca ad t issecmeḍ am mammec issecmeḍ afunas amezwaru. [Aqa-tt] d taɣarṣt n ddenb n wegraw [n řgens].
LEV 4:22 Mařa ijj n řḥakem ixḍa, uca s uweddar igga ict n řḥajjet [nni itteffɣen x webrid] n marra tiweṣṣa n SIDI, AREBBI nnes, i war ittcuwwaren ad ittwagg, uca idweř dayes umarwas,
LEV 4:23 niɣ [mařa] ittwassargeb as uxeṭṭu nnes i igga ḍidd i [řumur], ad tiři tewhibt nnes, tenni i ɣa iqeddem, d ijj n umyan zeg iɣayḍen, ijj n wewtem icnan qaɛ.
LEV 4:24 Ad issars afus nnes x uzeǧif n umyan uca ad as iɣarṣ deg wemcan mani ɣarṣen i taɣarṣt n wecmaḍ zzat i wudem n SIDI. [Aqa] d taɣarṣt n ddenb.
LEV 4:25 [Xenni] ad iksi ukehhan s uḍaḍ nnes [cwayt] zeg idammen n tɣarṣt n ddenb uca ad ten igg x waccawen n uɛalṭar n wecmaḍ uca [xenni] ad ifarreɣ idammen [iceṭṭen] ɣar uḍar n uɛalṭar n wecmaḍ.
LEV 4:26 Ad issbexxar marra tadunt nnes x uɛalṭar, am mammec [d as igga i] tadunt n tɣarṣt n řehna. Akehhan ad xas igg aṣřaḥ di ṭṭweɛ n ddenb nnes uca ad as ittwaɣfar.
LEV 4:27 Mařa ijjen bnadem zi řgens n temmurt ixḍa s uweddar am igga [mɣir] ict n řḥajjet [nni itteffɣen] x icten n tweṣṣa n SIDI, min war ittcuwwar ad ittwagg, uca idweř dayes umarwas,
LEV 4:28 niɣ ittwassargeb as uxeṭṭu nnes i igga, [xenni] ad tiři tewhibt nnes nni i ɣa iqeddem d ict n tɣayḍet, ict n tewtemt icnan qaɛ, d taɣarṣt x ddenb i igga.
LEV 4:29 Ad issars afus nnes x uzeǧif n tɣarṣt n ddenb uca ad as iɣarṣ i tɣarṣt n ddenb deg wemcan n tɣarṣt n wecmaḍ.
LEV 4:30 [Xenni] ad iksi ukehhan s uḍaḍ nnes [cwayt] zeg idammen uca ad t igg ɣar waccawen n uɛalṭar n tɣarṣt n wecmaḍ uca ad ifarreɣ marra idammen [iceṭṭen] ɣar uḍar n uɛalṭar.
LEV 4:31 Ad xas ikkes marra tadunt nnes am mammec kksen tadunt n tɣarṣt n řehna uca akehhan ad tt issbexxar x uɛalṭar, ad tiři d ict n řefwaḥet ittfuḥen i SIDI. Uca akehhan ad xas igg aṣřaḥ uca ad as ittwaɣfar.
LEV 4:32 Mařa iqeddem ijj n izmar d tawhibt i tɣarṣt n ddenb, [xenni] ad iqeddem ict n tawtemt icnan qaɛ.
LEV 4:33 Ad issars afus nnes x uzeǧif n tɣarṣt n ddenb uca ad as iɣarṣ i tɣarṣt n ddenb deg wemcan mani ɣarṣen i tɣarṣt n wecmaḍ.
LEV 4:34 [Xenni] ad iksi ukehhan s uḍaḍ nnes [cwayt] zeg idammen n tɣarṣt n ddenb uca ad t igg x waccawen n uɛalṭar n wecmaḍ uca ad ifarreɣ marra idammen nnes [iceṭṭen] ɣar uḍar n uɛalṭar.
LEV 4:35 Ad xas ikkes marra tadunt nnes, am mammec ikkes tadunt n uḥuři n tɣarṣt n řehna, uca akehhan ad tt issbexxar x uɛalṭar, x tewhibin n tmessi i SIDI uca akehhan ad xas igg aṣřaḥ x ddenb i igga, uca ad as ittwaɣfar.’”
LEV 5:1 “Mařa ixḍa ḥed [umi] isřa ahejji n ict n nneɛřet uca netta d acehhad xas, niɣ iẓra [i-t] niɣ issen [i-t]: mařa war [xas] iqqar walu, [xenni] ad yarbu řmuɛṣiyyet nnes.
LEV 5:2 Niɣ mařa iḥada ḥed min ma zi tmesřact ixemjen, řxecbet n řmař ixmej, niɣ řxecbet n řebhimet ixemjen, niɣ řxecbet n [umuddar] ixmej ittbuɛen, uca netta war issin [aya], aqa ixmej u dayes amarwas.
LEV 5:3 Niɣ mařa iḥada ca n řexmej n bnadem, min ma zi řexmej nnes i zi idweř netta ixmej, mařa tennuffar xas uca issen it [awarni as], aqa dayes amarwas.
LEV 5:4 Niɣ mařa iẓẓuǧ ḥed s tcarfayeḥ nnes, maḥend ad igg řɣar niɣ ad igg řxar, [niɣ] min ma izemmar bnadem ad inṭeq amenni waha s ict n tjaǧit, am war tt issin, [maca] issen i-t [awarni man aya], aqa dayes amarwas di ssibbet n ict zi tmesřayin-a.
LEV 5:5 [Xenni] ad imsar, mařa dayes amarwas di ssibbet n icten [zi tmesřayin-a], ad inɛem x min tuɣa ixḍa.
LEV 5:6 X ddenb i igga, ittxeṣṣa as ad iqeddem ict n tewtemt n wuǧi d taɣarṣt n umarwas, ict n texsi niɣ ict n tɣayḍet, d taɣarṣt n ddenb i SIDI, uca akehhan ad xas igg aṣřaḥ di ssibbet n ddenb nnes.
LEV 5:7 Maca mařa afus nnes war [ɣares min] iqedden i yijj zeg wuǧi, [xenni] ad yawi i SIDI i tɣarṣt n umarwas x ddenb i igga, tnayen n tejlilliḥin niɣ tnayen n idbiren imeẓyanen, ijjen i tɣarṣt n ddenb u ijjen i tɣarṣt n wecmaḍ.
LEV 5:8 Ad ten yawi ɣar ukehhan, wenni dd ɣa yawyen d amezwaru [tajlilliḥt niɣ aḍbir] i [iǧan] i tɣarṣt n ddenb uca ad ikkes azeǧif nnes zi cwayt awarni yiri nnes, [maca] war t ibeṭṭi [marra].
LEV 5:9 Ad irucc [cwayt] n idammen ɣar uɣezdis n uɛalṭar uca min iceṭṭen zeg idammen, ad [t] iẓemm ɣar uḍar n uɛalṭar. [Aqa-tt] d taɣarṣt n ddenb.
LEV 5:10 Ad issewjed [ameddar] nneɣni am tɣarṣt n wecmaḍ ɛlaḥsab lfariḍa uca [ammu] i xas i ɣa yegg ukehhan aṣřaḥ x ddenb nnes i igga uca ad as ittwaɣfar.
LEV 5:11 Mařa afus nnes war [ɣares min] iqedden i tnayen n tejlilliḥin niɣ i tnayen n idbiren imeẓyanen, [xenni] wenni ixḍan, ad yawi am tewhibt nnes taɛcart n ijj n ifa n waren azdad d tawhibt n ddenb. War xas ittegg zzect uřa war xas issrusi jjawi, minzi aqa-tt d taɣarṣt n ddenb.
LEV 5:12 Ad tt yawi ɣar ukehhan uca akehhan ad zzayes iksi ijj n wuru iccur uca ad issbexxar aya am řidaret dayes x uɛalṭar, x tewhibin n tmessi i SIDI. [Aqa-tt] d taɣarṣt n ddenb.
LEV 5:13 [Ammu i] xas ɣa yegg ukehhan aṣřaḥ x ddenb nnes nni igga zi jjihet n icten zi tmesřayin-a uca ad as ittwaɣfar. Min iceṭṭen ad yiři i ikehhanen am mammec [i yeǧan ak-d] tewhibt [n řɣiǧet].”
LEV 5:14 Issiweř SIDI ak-d Musa, inna:
LEV 5:15 “Mařa igga ḥed s řeɣdar uca ixḍa s uweddar di tmesřayin iqeddsen n SIDI, ittxeṣṣa ad yawi icarri icnan qaɛ zeg wuǧi d taɣarṣt n umarwas i SIDI. [Ad tiři řqimet nnes] ɛlaḥsab řqimet i tqeddared cek deg iciqluten n nnuqart ɛlaḥsab ciqlu n Zzawect Iqeddsen. [Aqa] d taɣarṣt n umarwas.
LEV 5:16 Zi tmesřayin iqeddsen ad yarr di min di ixḍa qbeř, uca ad dayes yarni řexmus. Uca ad iwc man aya i ukehhan uca akehhan ad t isseṣřeḥ s icarri n tɣarṣt n umarwas uca ad as ittwaɣfar.
LEV 5:17 Mařa ixḍa ḥed uca igga ict n tmesřact i war tᵉttcuwwar ad tᵉttwagg, [am dd-iffeɣ] deg ict n tmesřact zi tweṣṣa n SIDI, uca tuɣa tnuffar xas, ad dayes yiři umarwas uca ad yarbu řmuɛṣiyyet nnes.
LEV 5:18 Ad yawi ijj n icarri icnan qaɛ zeg wuǧi ɣar ukehhan i tɣarṣt n umarwas, [ad tiři řqimet nnes] ɛlaḥsab řqimet i tqeddared cek uca ad t isseṣřeḥ ukehhan x uweddar nnes i di iweddar am war t issin uca ad as ittwaɣfar.
LEV 5:19 Aqa d taɣarṣt n umarwas. S tidett tuɣa dayes amarwas zzat i SIDI.”
LEV 5:20 Issiweř SIDI ak-d Musa, inna:
LEV 5:21 “Mařa ixḍa ḥed uca iɣdar SIDI am issxarriq x jjar nnes x min [d as] immewcen, maḥend ad t iḥḍa, niɣ x min ijja deg ufus nnes, niɣ x min [xas] yucaren, niɣ x ca n ubeɛɛej i igga i jjar nnes,
LEV 5:22 niɣ am issxarriq x [ca] min iweddaren [i ca n yijjen] u ittwaf zzayes uca [xenni] netta ijjuǧ ẓur, [wah, am issxarriq netta] x icten zi marra [timesřayin nni] ittegg bnadem ařami ixeṭṭa s man aya,
LEV 5:23 xenni ittxeṣṣa, umi ixḍa uca idweř dayes umarwas, aqa netta ad dd-yarr tuceffart nni yucar, niɣ min ittwakksen nni iksi netta s uɣiř, niɣ min tuɣa iḥḍa nni d as immewcen maḥend ad tt iḥḍa, niɣ min iweddaren nni yufa.
LEV 5:24 Uca marra min xef ijjuǧ ẓur, ad dd-yarr řqimet nnes tmun uca ad yarni řexmus. Netta ad t iwc i wenni umi dd-tusa deg wass n tɣarṣt nnes n umarwas.
LEV 5:25 Netta ad yawi taɣarṣt nnes n umarwas ɣar SIDI, ijj n icarri icnan qaɛ zeg wuǧi, [wenni řqimet nnes ad tiři] ɛlaḥsab řqimet i tqeddared cek, ad tiři d taɣarṣt n umarwas, [uca ad t yawi] ɣar ukehhan.
LEV 5:26 [Xenni] akehhan ad xas igg asřaḥ zzat i wudem n SIDI uca ad as ittwaɣfar x min igga, mařa idweř dayes amarwas s ict n tmesřact zi marra timesřayin-a.”
LEV 6:1 Issiweř SIDI ak-d Musa, inna:
LEV 6:2 “Umur Harun d warraw nnes, ini asen: ‘Wa d azerf i tɣarṣt n wecmaḍ. Taɣarṣt n wecmaḍ x ukeccuḍ x uɛalṭar ad teqqim tareqq ǧiřet tekmeř ař ṣṣbeḥ u ittxeṣṣa timessi n uɛalṭar ad teqqim ad tecmeḍ dayes.
LEV 6:3 Akehhan ad yarḍ aseřham nnes n řeqṭen, ad ibyes ssarwař nnes n řeqṭen x arrimet nnes, uca ad iksi iɣɣeḍ n min iqqimen n tadunt n tɣarṣt n wecmaḍ, tenni tecca tmessi, uca ad t issars zzat i uɛalṭar.
LEV 6:4 [Xenni] ad ikkes arruḍ nnes uca ad yarḍ arruḍ nneɣni, ad yawi iɣɣeḍ n min iqqimen n tadunt barra i řmargeḥ n řɛeskar ɣar yijj n wemcan iṣfa.
LEV 6:5 Ittxeṣṣa ad teqqim tmessi tareqq x uɛalṭar, ittxeṣṣa war txessi ca. Akehhan ad xas issarɣ akeccuḍ kuř ṣṣbeḥ uca ad xas isettef taɣarṣt n wecmaḍ uca ad xas issbexxar tadunt n tɣarṣa n řehna.
LEV 6:6 Timessi x uɛalṭar ad teqqim tareqq řebda, war txessi.’”
LEV 6:7 “Wa d azerf i tewhibt n řɣiǧet. Arraw n Harun ad tt awyen zzat i wudem n SIDI zzat i uɛalṭar.
LEV 6:8 Netta ad zzayes iksi ijj n wuru zeg waren azdad n tewhibt [n řɣiǧet] ak-d [ca n] zzect nnes d marra jjawi i iǧan x tewhibt [n řɣiǧet]. Ad issbexxar [aya x] uɛalṭar. [Aqa] d ict n řefwaḥet ittfuḥen, ict n řidaret dayes i SIDI.
LEV 6:9 Harun d warraw nnes ad ccen min zzayes iceṭṭen. Ittxeṣṣa ad t ccen břa antun deg wemcan amqeddas. Ad t ccen di řemraḥ n Uqiḍun n Umsagar.
LEV 6:10 War iɛeddeř ad t ggʷen s wentun. Ta d taɣarṣt nsen nni wciɣ Necc zi tewhibin inu n tmessi. Aqa-tt d tamqeddast qaɛ am tɣarṣt n ddenb d tɣarṣt n umarwas.
LEV 6:11 Marra iwetman jar warraw n Harun ad zzayes ccen. Aqa-tt d ict n tewṣeyyet i řebda x tewhibin n tmessi n SIDI i [marra] jjiřat nwem. Marra wi tt ɣa iḥadan, ad ittwaqeddes.”
LEV 6:12 Issiweř SIDI ak-d Musa, inna:
LEV 6:13 “Ta d tawhibt n Harun d warraw nnes i zi dd ɣa qarrben ɣar SIDI deg wass min di i ɣa ittwadhen Harun: taɛcart n ijj n ifa n waren azdad [am] ict n tewhibt [n řɣiǧet] i řebda, azyen nnes di ṣṣbeḥ d wezyen nnes [nneɣni] ɣar uɛecci.
LEV 6:14 Deg ijj n uxdim ad tessewjed aya s zzect [n zzitun] uca ad t tawyed [d tawhibt] awarni t txeǧḍed. Ad tqeddmed iřeqqwaz ttwarẓan n tewhibt [n řɣiǧet am] ict n řefwaḥet ittfuḥen i SIDI.
LEV 6:15 Akehhan nni ɣa dehnen deg wemcan nnes zeg iḥenjiren nnes, ad tt issewjed. Aqa-tt d tawṣeyyet i řebda. [Tawhibt-a] ad tᵉttwabexxar i SIDI marra.
LEV 6:16 Marra tawhibt [n řɣiǧet] n ukehhan ad tiři tekmeř. War zzayes ttᵉtten ca.”
LEV 6:17 Issiweř SIDI ak-d Musa, inna:
LEV 6:18 “Siweř ak-d Harun d warraw nnes, ini asen: ‘Wa d azerf i tɣarṣt n ddenb: deg wemcan mani tᵉttwaɣarṣ taɣarṣt n wecmaḍ, ad tᵉttwaɣarṣ [ɛawed] taɣarṣt n ddenb zzat i wudem n SIDI. Aqa-tt d tamqeddast qaɛ.
LEV 6:19 Akehhan nni tt ɣa iqeddmen d taɣarṣt ad zzayes yecc. Ittxeṣṣa ad tᵉttwacc deg ijj n wemcan amqeddas di řemraḥ n Uqiḍun n Umsagar.
LEV 6:20 Marra wi ɣa iḥadan aysum nnes ad [zzayes] ittwaqeddes. Mařa ingez [cwayt] zeg idammen x yijj n warruḍ, [xenni] ittxeṣṣa ad tessirded min xas ibeqqḍen deg ijj n wemcan amqeddas.
LEV 6:21 Uca řqecɛet n třaxt i di tt ssnennan, ad tᵉttwarẓ, [maca] mařa ssenwen tt deg ict n řqecɛet n nnḥas, [xenni] ittxeṣṣa ad ḥekken u ad ssřiřen [řqecɛet] s waman.
LEV 6:22 Marra wi iǧan d awtem jar ikehhanen ad zzayes yecc. Aqa-tt d tamqeddast qaɛ.
LEV 6:23 [Maca] uřa d ict n tɣarṣt n ddenb i zi ttwaqeddmen idammen nnes deg Uqiḍun n Umsagar, maḥend ad iřin i weṣřaḥ di Zzawect Iqeddsen, war zzayes ittwacc ca. Ad tᵉttwacmeḍ s tmessi.’”
LEV 7:1 “Wa d azerf i tɣarṣt n umwarwas. Aqa d tamqeddast qaɛ.
LEV 7:2 Deg wemcan mani ɣarrṣen i tɣarṣt n wecmaḍ, ad ɣarṣen i tɣarṣt n umarwas. Ad izeǧeɛ idammen nnes x uɛalṭar ɣar [marra] iɣezdisen [nnes].
LEV 7:3 Ad yawi marra tadunt nnes: anewwar n tadunt d tadunt nni idřin adan,
LEV 7:4 uca ad ikkes tnayen n tiẓẓař ak-d tadunt i xasent iǧan ɣar tejɛinna, uřa d min yuyřen ɣar tsa uca [yarsa] x tiẓẓař,
LEV 7:5 uca akehhan ad issbexxar aya x uɛalṭar am yict n tewhibt n tmessi i SIDI. Aqa-tt d taɣarṣt n umarwas.
LEV 7:6 Marra awtem jar ikehhanen ad zzayes yecc. Ad ittwacc deg ijj n wemcan amqeddas, aqa-tt d tamqeddast qaɛ.
LEV 7:7 Ad yiři ijj n uzerf am i tɣarṣt n ddenb am i tɣarṣt n umwarwas. Ad yiři [weysum n tɣarṣt] i ukehhan, wenni tuɣa zzayes igg aṣřaḥ [x ca n yijjen].
LEV 7:8 Akehhan nni i ɣa iqeddmen taɣarṣt n wecmaḍ n ca n ijjen, i ukehhan [nni] [ad tiři] teřmect n tɣarṣt n tmessi nni dd-iqeddem, [tiřmect] ad tiři i netta.
LEV 7:9 Kuř tawhibt [n řɣiǧet] nni ḍarrḥen nitni di tefqunt uřa d marra min ittwasswejden di ṭṭajjin niɣ deg wexdim, d man aya ad yiři i ukehhan nni t iqeddmen, ad yiři i netta.
LEV 7:10 Kuř tawhibt [n řɣiǧet] i ittwaxeǧḍen s zzect [n zzitun] niɣ yuẓɣen, ad tiři i marra arraw n Harun, am i yijj am i wenneɣni.”
LEV 7:11 “Wa d azerf i tɣarṣt n řehna tenni i ɣa iqeddem [bnadem] i SIDI.
LEV 7:12 Mařa ad tt iqeddem i uqadi, [xenni] ad iqeddem ak-d [tewhibt n] uqadi uřa d řemsemnat břa antun ixeǧḍen s zzect d teřfaf břa antun ttwadehnent s zzect d řemsemnat n waren azdad ttwaxeǧḍent s zzect.
LEV 7:13 Ad iqeddem tawhibt nnes ak-d řemsemnat n weɣrum s wentun, [jmiɛ] ak-d [tewhibt n] uqadi, [tenni iǧan] zi tewhibin nnes n řehna.
LEV 7:14 Zi kuř [ddarb n] tawhibt ad iqeddem icten zzayes [am] tewhibt n usgeɛɛed i SIDI. [Ad tiři] i ukehhan nni i ɣa izeǧɛen idammen n tɣarṣa n řehna x uɛalṭar [ɣar marra iɣezdisen nnes], ad tiři i netta.
LEV 7:15 Aysum n tewhibt n uqadi, [tenni iǧan zi] tewhibin nnes n řehna, ad ittwacc deg wass [i di ɣa iqeddem] tawhibt nnes. War ittejji zzayes walu ař ṣṣbeḥ.
LEV 7:16 Mařa tawhibt nnes [tusa-dd ak-d] ijj n lwaɛd niɣ [teǧa] d ict n tewhibt s řxaḍar, ad tᵉttwacc deg wass i di i ɣa iqeddem taɣarṣt nnes uca min zzayes iceṭṭen ad ittwacc deg wass i-t-i-dd-iḍfaren.
LEV 7:17 Min iceṭṭen ɛad zeg weysum n tɣarṣt ad ittwacmeḍ s tmessi deg wass wiss třata.
LEV 7:18 Mařa ittwacc [ɛad] zeg weysum n tɣarṣt nnes n řehna deg wass wiss třata, [xenni] wenni tt iqeddmen war ittiři i arḍa [n SIDI] u [taɣarṣt nnes] war d as tᵉttwiḥsib ca [d taɣarṣt n řehna]. Ad tiři d ict n jjɛifect uca wenni zzayes ɣa iccen ad yarbu řmuɛṣiyyet nnes.
LEV 7:19 Aysum nni iḥadan ca n tmesřact ixemjen, war zzayes ttᵉttem. Ad t sscemḍen s tmessi. Zi [min iceṭṭen n] weysum, izemmar ad zzayes yecc marra wenni izedgen.
LEV 7:20 D wenni i ɣa iccen zeg weysum n tɣarṣt n řehna, tenni iǧan i SIDI, am xas yarsa řexmej nnes, řeɛmar nni ad ittwaqess zi řgens nnes.
LEV 7:21 Mařa iḥada ḥed ca n tmesřact ixmej, [amecnaw] řexmej n bnadem niɣ [řexmej] n yict n řebhimet ixemjen niɣ ca n tmesřact i iǧan d nnɛi n řexmej, uca [xenni] ad yecc zeg weysum n tɣarṣin n řehna i SIDI, řeɛmar nni ad ittwaqess zi řgens nnes.”
LEV 7:22 Issiweř SIDI ak-d Musa, inna:
LEV 7:23 “Siweř ak-d ayt n Israil, ini: ‘Kenniw war ttᵉttem ca qaɛ tadunt n ufunas niɣ n izmar niɣ n iɣayḍ.
LEV 7:24 Tadunt n ict n řxecbet d tadunt n [ijj n umuddar] mezzqen t, tɛeddeř ad tᵉttwagg i mammec ma tegga řxedmet, maca kenniw war zzayes ttᵉttem walu.
LEV 7:25 Man wen i ɣa iccen tadunt n yict n řebhimet i zi dd ɣa ssqarrben ict n tewhibt n tmessi i SIDI, řeɛmar nni zzayes i ɣa iccen, ad ittwaqess zi řgens nnes.
LEV 7:26 Di marra tizeddiɣin nwem war ttᵉttem uřa d ca zeg idammen, am zeg ijḍaḍ am zi řebhayem.
LEV 7:27 Kuř ijj n řeɛmar nni i ɣa iccen [mɣir ca] zeg idammen, řeɛmar nni ad ittwaqess zi řgens nnes.’”
LEV 7:28 Issiweř SIDI ak-d Musa, inna:
LEV 7:29 “Siweř ak-d ayt n Israil, ini: ‘Wi i dd ɣa issqarrben tɣarṣt nnes n řehna i SIDI, ad iqeddem tawhibt nnes i SIDI zi tɣarṣt n řehna nnes.
LEV 7:30 S ifassen nnes ad yawi tiwhibin n tmessi zzat i SIDI. Tadunt [i iǧan] x idmaren ad tt yawi ak-d idmaren nni, maḥend ad tt issenhezz zi ssa ɣar da am yict n tewhibt n wenhezzi zzat i wudem n SIDI.
LEV 7:31 Akehhan ad issbexxar tadunt x uɛalṭar, [maca] idmaren ad iřin i Harun d warraw nnes.
LEV 7:32 Zi tɣarṣa nwem n řehna ad tqeddmem i ukehhan [ɛawed] acekrud afusi d tawhibt n usgeɛɛed.
LEV 7:33 Acekrud afusi ad yiři d tasɣart n wenni zeg warraw n Harun i ɣa iqeddmen idammen n tɣarṣi n řehna d tadunt [nsent].
LEV 7:34 Minzi Necc ksiɣ idmaren n wenhezzi d ucekrud i dd-ittwassgeɛɛden d tawhibt zi tɣarṣi n řehna n ayt n Israil u wciɣ ten i ukehhan Harun u i warraw nnes am yict n lfariḍa i řebda, zi jjihet n ayt n Israil.
LEV 7:35 Ta d tasɣart ittwassdehnen n Harun d tesɣart ittwassdehnen n warraw nnes zi tewhibin n tmessi n SIDI deg wass i ten dd-issqarreb, maḥend ad iřin d ikehhanen i SIDI,
LEV 7:36 [tasɣart] nni iwca SIDI i ayt n Israil deg wass i ten idhen. Aqa d ict n tewṣeyyet i řebda i [marra] jjiřat nsen.’”
LEV 7:37 Wa d azerf i tɣarṣt n wecmaḍ d tewhibt [n řɣiǧet] d tɣarṣt n ddenb d tɣarṣt n umarwas d tɣarṣa i udeccen d tɣarṣa n řehna,
LEV 7:38 [azerf] i iweṣṣa SIDI i Musa deg wedrar n Sina, ass min di iweṣṣa ayt n Israil ad qeddmen tiwhibin nsen i SIDI di řexřa n Sina.
LEV 8:1 Issiweř SIDI ak-d Musa, inna:
LEV 8:2 “Ksi Harun jmiɛ ak-d warraw nnes d warruḍ d zzect i wedhan d ufunas ameẓyan n tɣarṣt n ddenb d tnayen n icarriyyen d tsuǧet s weɣrum břa antun,
LEV 8:3 u řaɣa i marra tamesmunt ɣar wadaf n Uqiḍun n Umsagar.”
LEV 8:4 Igga Musa am mammec d as iweṣṣa SIDI uca tmun tmesmunt ɣar wadaf n Uqiḍun n Umsagar.
LEV 8:5 Inna Musa i tmesmunt: “Wa d min iweṣṣa SIDI ad ittwagg.”
LEV 8:6 Musa issqarreb-dd Harun d warraw nnes uca issird i-ten s waman.
LEV 8:7 Issars xas tcamir, ibyes as s tḥezzamt, issyarḍ as aseřham. Igga xas apalṭu uca ibyes as s tḥezzamt izewwqen n upalṭu uca iqqen as zzayes [apaltu].
LEV 8:8 Issemten xas tajmect uca igga [iẓra n] ‘Urim’ d ‘Tumim’ di tajmect.
LEV 8:9 Igga areẓẓet x uzeǧif nnes uca ɣar zzat x areẓẓet igga [tařwiḥt s] nnuwwar n wureɣ n ttaj iqeddsen [n weɛzař], am mammec yumur SIDI i Musa.
LEV 8:10 [Xenni] iksi Musa zzect i wedhan uca idhen Tazeddiɣt d marra min dayes iǧan uca issqeddes [marra] aya.
LEV 8:11 Irucc zzayes x uɛalṭar sebɛa n twařawin uca idhen [ɛawed] aɛalṭar d marra řeqcuɛ nnes uřa d tabanyut ak-d uḍar nnes maḥend ad ten issqeddes.
LEV 8:12 Iseyyeb zzect i wedhan x uzeǧif n Harun uca idhen i-t, ḥima ad t issqeddes.
LEV 8:13 Issqarreb-dd Musa arraw n Harun uca yarḍ asen tcamirat uca ibyes asen s tḥezzamin uca inneḍ asen ticuccay am mammec yumur SIDI i Musa.
LEV 8:14 Issqarreb-dd afunas ameẓyan n tɣarṣt n ddenb uca Harun d warraw nnes ssarsen ifassen nsen x uzeǧif n ufunas ameẓyan n tɣarṣt n ddenb.
LEV 8:15 Iɣarṣ [as] uca [iksi] Musa idammen uca igga [cwayt zzaysen] s uḍaḍ nnes x waccawen n uɛalṭar [i iǧan] ɣar [marra] iɣezdisen nnes uca [ammu i] issizdeg aɛalṭar. [Xenni] iseyyeb idammen ɣar uḍar n uɛalṭar. [Ammu i] issqeddes i-t i weṣřaḥ xas.
LEV 8:16 Iksi marra tadunt nni iǧan x wadan d min yuyřen ɣar tsa d tnayen n tiẓẓař d tadunt nsent uca Musa issbexxar [aya] x uɛalṭar.
LEV 8:17 [Maca] afunas ameẓyan d yiřem nnes d weysum nnes d amessař nnes, issarɣ [i-ten] barra i řmargeḥ n řɛeskar, am mammec yumur SIDI i Musa.
LEV 8:18 Issqarreb-dd [Musa] icarri n tɣarṣt n wecmaḍ uca Harun d warraw nnes ssarsen ifassen nsen x uzeǧif n icarri.
LEV 8:19 Iɣarṣ [i icarri] uca izeǧeɛ Musa idammen x uɛalṭar ɣar [marra] iɣezdisen nnes.
LEV 8:20 Ibḍa icarri d iceǧiqen nnes uca issbexxar Musa azeǧif d iceǧiqen d tadunt.
LEV 8:21 Issird adan d iḍaren s waman uca issbexxar Musa marra icarri x uɛalṭar, aqa d taɣarṣt n wecmaḍ s yict n řefwaḥet ittfuḥen, aqa d tawhibt n tmessi i SIDI, am mammec yumur SIDI i Musa.
LEV 8:22 Issqarreb-dd [xenni] icarri nneɣni, icarri i udeccen, uca Harun d warraw nnes ssarsen ifassen nsen x uzeǧif n icarri.
LEV 8:23 Uca iɣarṣ [as] uca iksi Musa [cwayt] zeg idammen uca igga i-ten x iɣes n umezzuɣ afusi n Harun u x uḍaḍ n yimez n ufus nnes afusi u x uḍaḍ n yimez n uḍar nnes afusi.
LEV 8:24 Issqarreb-dd [ɛawed] arraw n Harun uca igga Musa [cwayt] zeg idammen x iɣes n umezzuɣ nsen afusi u x uḍaḍ n yimez n ufus nsen afusi u x uḍaḍ n yimez n uḍar nsen afusi uca izeǧeɛ Musa idammen [iqqimen] x uɛalṭar ɣar [marra] iɣezdisen [nnes].
LEV 8:25 Iksi tadunt d unewwar [s tadunt] d marra tadunt tenni iǧan x wadan d min yuyřen ɣar tsa d tnayen n tiẓẓař ak-d tadunt nsent uřa d acekrud afusi.
LEV 8:26 Zi tsuǧet s weɣrum břa antun, tenni tuɣa zzat i wudem n SIDI, iksi ijj n řemsemmem břa antun d yict n temsemmemt [isswejden] s zzect d ict n teřfeft uca issars i-ten x tadunt u x ucekrud afusi.
LEV 8:27 Igga marra man aya deg ifassen n Harun u deg ifassen n warraw nnes uca issenhezz aya am yict n tewhibt n wenhezzi zzat i wudem n SIDI.
LEV 8:28 [Awarni as] iksi ten Musa [ɛawed] zeg ifassen nsen uca issbexxar [i-ten] x uɛalṭar, x tɣarṣt n wecmaḍ. Aqa d tiɣarṣa i udeccen s yict n řefwaḥet ittfuḥen, aqa d tawhibt n tmessi i SIDI.
LEV 8:29 Iksi Musa idmaren uca issenhezz i-ten am yict n tewhibt n wenhezzi zzat i wudem n SIDI. Man aya d tasɣart n ucarri i udeccen, tenni iǧan i Musa, am mammec yumur SIDI i Musa.
LEV 8:30 Iksi Musa [cwayt] n zzect i wedhan u n idammen i iǧan x uɛalṭar uca irucc man aya x Harun u x warruḍ nnes, x warraw nnes u x warruḍ n warraw nnes, [inni] akides [iǧan]. [Ammu i] issqeddes Harun d warruḍ nnes d warraw nnes d warruḍ n warraw nnes akides.
LEV 8:31 Inna Musa i Harun u i warraw nnes: “Senwem aysum nni ɣar wadaf n Uqiḍun n Umsagar uca teccem t dinni s weɣrum nni iǧan di tsuǧet n tɣarṣa i udeccen, am mammec weṣṣiɣ necc, nniɣ: ‘Harun d warraw nnes ad t ccen.’
LEV 8:32 Min iceṭṭen n weysum d weɣrum, ad t tesscemḍen s tmessi.
LEV 8:33 Zeg wadaf n Uqiḍun n Umsagar war zzayes dd-tᵉtteffɣem ca sebɛa n wussan, ař ass min di i ɣa kemmřen wussan n uřeqqem nwem, minzi netta ad kenniw yařeqqem sebɛa n wussan.
LEV 8:34 Am mammec igga [marra] deg wass-a, [ammu] i iweṣṣa SIDI, maḥend ad xawem igg aṣřaḥ.
LEV 8:35 Ad teqqimem ɣar wadaf n Uqiḍun n Umsagar, ass d ǧiřet, sebɛa n wussan uca ad tᵉṭṭfem [a]ḥeṭṭu i SIDI, ḥima war tᵉttmettim ca, minzi ammu i [t] ttweṣṣiɣ necc.”
LEV 8:36 Harun d warraw nnes ggin marra min d [asen] iweṣṣa SIDI s tsexxart n Musa.
LEV 9:1 Deg wass wiss tmenya imsar, aqa Musa iřaɣa i Harun d warraw nnes d imɣaren n Israil
LEV 9:2 uca inna i Harun: “Ksi ɣarek ijj n uɛejmi, ameẓyan n ufunas, [am] tɣarṣt n ddenb, uřa d ijj n icarri [am] tɣarṣt n wecmaḍ, [aqa ad iřin] cnan qaɛ, uca ejj i-ten ad dd-qarrben ɣar wudem n SIDI.
LEV 9:3 Siweř ak-d ayt n Israil uca ini: “Ksim ijj n umyan zeg iɣayḍen am tɣarṣt n ddenb u [ksi] ijj n uɛejmi d ijj n yezmar, [aqa ad iřin imuddaren] cnan qaɛ n ijj n useggʷas, i tɣarṣt n wecmaḍ,
LEV 9:4 uca [ksi ɛawed] ijj n ufunas d ijj n ucarri am tɣarṣa n řehna, maḥend ad [ten] qeddmen [d ddbiḥet] i SIDI, uřa d ict n tewhibt [n řɣiǧet] ixeǧḍen s zzect, minzi ass-a ad awem dd-iban SIDI.”
LEV 9:5 [Xenni] awyen min xef iweṣṣa Musa ɣar zzat n Uqiḍun n Umsagar uca tamesmunt tqarreb-dd uca bedden nitni zzat i wudem n SIDI.
LEV 9:6 Uca Musa inna: “D man aya min xef iweṣṣa SIDI maḥend ad [t] teggem. Uca [xenni] ad awem dd-iban uɛuǧi n SIDI.”
LEV 9:7 Inna Musa i Harun: “Qarreb-dd ɣar uɛalṭar uca sewjed taɣarṣt nnec n ddenb d tɣarṣt nnec n wecmaḍ uca egg aṣřaḥ x yixef nnec u x řgens. Sewjed [ɛawed] tawhibt n řgens uca egg xasen aṣřaḥ am mammec [t] iweṣṣa SIDI.”
LEV 9:8 [Xenni] iqarreb-dd Harun ɣar uɛalṭar uca iɣarṣ i uɛejmi n tɣarṣt n ddenb [i iǧan] i yixef nnes.
LEV 9:9 Arraw n Harun iwyen as-dd idammen uca netta issuf aḍaḍ nnes deg idammen uca igga i-ten x waccawen n uɛalṭar. [Min iceṭṭen n] idammen iseyyeb i-ten ɣar uḍar n uɛalṭar.
LEV 9:10 Issbexxar tadunt d tiẓẓař d min yuyřen ɣar tsa n tɣarṣt n ddenb x uɛalṭar am mammec yumur SIDI i Musa.
LEV 9:11 Issecmeḍ aysum d yiřem s tmessi barra i řmargeḥ n řɛeskar.
LEV 9:12 Iɣarṣ taɣarṣt n wecmaḍ uca arraw n Harun qeddmen as idammen uca netta izeǧeɛ [i-ten] x uɛalṭar ɣar [marra] iɣezdisen nnes.
LEV 9:13 [Xenni] qeddmen as taɣarṣt n wecmaḍ [i ttwabḍan] d iceǧiqen, uřa d azeǧif, uca netta issbexxar i-tt x uɛalṭar.
LEV 9:14 Issird adan d iḍaren uca issbexxar [i-ten] x tɣarṣt n wecmaḍ i iǧan x uɛalṭar.
LEV 9:15 [Awarni as] issqarreb-dd tawhibt n řgens. Netta iksi amyan n tɣarṣt n ddenb i řgens uca iɣarṣ as uca issewjed i-t d taɣarṣt n ddenb am mammec [issewjed icarri] amezwaru.
LEV 9:16 Issqarreb-dd taɣarṣt n wecmaḍ uca issewjed i-tt ɛlaḥsab lfariḍa.
LEV 9:17 Iqeddem tawhibt [n řɣiǧet] uca iksi zzayes ijj n wuru iccur uca issbexxar [aya] x uɛalṭar, zzat i tɣarṣt n wecmaḍ n ṣṣbeḥ.
LEV 9:18 Iɣarṣ ɛawed i ufunas u i yicarri n tɣarṣt n řehna di ṭṭweɛ n řgens, uca arraw n Harun qeddmen as idammen uca izeǧeɛ i-ten x uɛalṭar ɣar [marra] iɣezdisen nnes.
LEV 9:19 X tadunt n ufunas u n icarri: anewwar [s tadunt nnes] d min idřin [aḍan] d tiẓẓař d min yuyřen ɣar tsa,
LEV 9:20 aqa ssarsen tadunt [nni] x idmaren uca netta issbexxar tadunt x uɛalṭar.
LEV 9:21 [Maca] idmaren d ucekrud afusi issenhezz i-ten Harun [amecnaw] ict n tewhibt n wenhezzi zzat i wudem n SIDI, am mammec [t] iweṣṣa Musa.
LEV 9:22 [Xenni] issgeɛɛed Harun ifassen nnes ɣar řgens uca ibarek i-ten uca ihwa awarni řami iqeddem taɣarṣt n ddenb d tɣarṣt n wecmaḍ d tɣarṣt n řehna.
LEV 9:23 Uca yudef Musa ak-d Harun ɣar Uqiḍun n Umsagar uca nitni ffɣen [zzayes ɛawed] uca barken řgens uca iban uɛuǧi n SIDI i marra řgens
LEV 9:24 uca teffeɣ-dd tmessi zi zzat i wudem n SIDI, tecca taɣarṣt n wecmaḍ x uɛalṭar uřa d tadunt. [Umi] iẓra řgens [man aya], sřiweřwen uca wḍan [ɣar temmurt] x uɣembub nsen.
LEV 10:1 Nadab d Abihu, arraw n Harun, ksin kuř ijj řmejmar nnes uca ggin dayes řebxur uca [ammu i] yiwyen nitni timessi teɣrib zzat i wudem n SIDI, min war d asen iweṣṣa Netta.
LEV 10:2 Teffeɣ-dd tmessi zi zzat i wudem n SIDI, tecc i-ten uca mmuten zzat i wudem n SIDI.
LEV 10:3 Inna Musa i Harun: “D man aya x min xef issiweř SIDI [umi] inna: ‘S yinni i ɣari dd ɣa iqarrben ad ttwaqeddseɣ uca zzat i wudem n marra řgens ad ttwassɛuǧeɣ.’” Uca isqar Harun.
LEV 10:4 Iřaɣa Musa i Micayil d i Ilṣafan, arraw n Ɛuzziyil, ɛemmis n Harun, uca inna asen: “Qarrbem-dd, tarbum aytmatwem zi qibač n Zzawect Iqeddsen, [awyi ten barra] i řmargeḥ n řɛeskar.”
LEV 10:5 Qarrben-dd nitni uca arbun ten di tcamirat nsen barra i řmargeḥ n řɛeskar, am mammec [t] inna Musa.
LEV 10:6 [Xenni] inna Musa i Harun u i Aliɛazar d Itamar, arraw nnes: “War ḍeǧqem i [ucuwwaf x] izeǧifen nwem niɣ ttcarrgem arruḍ nwem [i wecḍan], ḥima war tᵉttmettim uca ad yiři uduqqez n weɣḍab x marra tamesmunt. [Maca] aytmatwem, marra taddart n Israil, ad run x tmessi-ya, tenni issecmeḍ SIDI.
LEV 10:7 War dd-tteffɣem ca zi wadaf n Uqiḍun n Umsagar, ḥima war tᵉttmettim ca, minzi zzect n wedhan n SIDI aqa tt xawem.” Uca nitni ṭṭaɛen i wawař n Musa.
LEV 10:8 Issiweř SIDI ak-d Harun, inna:
LEV 10:9 “War iɛeddeř ad tsessed binu niɣ ccrab ijehden xmi ɣa tadfem ɣar Uqiḍun n Umsagar, cek [lla] uřa d iḥenjiren nnec [nni] akidek [lla], ḥima war tᵉttmettim ca. Aqa-tt d ict n tewṣeyyet i řebda i [marra] jjiřat nwem,
LEV 10:10 ḥima ad af tzemmarem ad tfarzem jar min [iǧan] iqeddsen d min war [iǧin] iqeddsen u jar min iṣfan d min war iṣfin,
LEV 10:11 u ḥima ad tessřemdem i ayt n Israil marra tiweṣṣa nni ɣarsen issiweř SIDI s tsexxart n Musa.”
LEV 10:12 Uca issiweř Musa ak-d Harun u ak-d Aliɛazar d Itamar, arraw nnes iqqimen: “Ksim tawhibt [n řɣiǧet] nni iceṭṭen zi tewhibin n tmessi i SIDI uca ccem tt břa antun zzat i uɛalṭar, minzi aqa-tt d tamqeddast qaɛ.
LEV 10:13 Ad tt teccem deg ijj n wemcam iqeddsen, minzi ta d taɣarṣt i cek u i iḥenjiren nnec zi tewhibin n tmessi n SIDI, minzi ammu i d ayi ittwaweṣṣa.
LEV 10:14 Deg ijj n wemcan iṣfa ad teccem [ɛawed] idmaren n wenhezzi d ucekrud n tewhibt i dd-ittwassgeɛɛden, cek d iḥenjiren nnec d tḥenjirin nnec akidek, minzi [d man aya] d tasɣart nnec d tasɣart n tarwa nnec zi tɣarṣa n řehna n ayt n Israil.
LEV 10:15 Ad awyen acekrud n tewhibt i dd-ittwassgeɛɛden uřa d idmaren n wenhezzi ak-d tewhibin n tmessi n tadunt, maḥend ad ten ssenhezzen zzat i wudem n SIDI am tewhibt n wenhezzi. Aqa d ict n tewṣeyyet i řebda i cek u i iḥenjiren nnec akidek, am mammec [t] iweṣṣa SIDI.”
LEV 10:16 Uca Musa yarzu s cḍaret x umyan n tɣarṣt n ddenb, [maca] xzar, icemḍ. [Xenni] iffugem x Aliɛazar d Itamar, arraw iqqimen n Harun, inna:
LEV 10:17 “Mayemmi war teccim taɣarṣt n ddenb deg wemcan iqeddsen? Minzi aqa-tt d tamqeddast qaɛ uca netta iwca awem tt-i-dd ḥima kenniw ad tarbum řmuɛṣiyyet n tmesmunt, maḥend ad xasen teggem aṣřaḥ zzat i wudem n SIDI.
LEV 10:18 Xzarem, ḥdam war ssidfen walu zeg idammen daxeř i Zzawect Iqeddsen. Tuɣa ittxeṣṣa kenniw ad tt teccem di Zzawect Iqeddsen am mammec d awem weṣṣiɣ necc.”
LEV 10:19 [Xenni] issiweř Harun ak-d Musa: “Xzar, ass-a aqa qeddmen taɣarṣt n ddenb d tɣarṣt n wecmaḍ zzat i wudem n SIDI. [Mařa] necc, awarni řami xafi kkent tmesřayin-a, aqa cciɣ zi tɣarṣt n ddenb ass-a, ma [xenni] man aya icna di tiṭṭawin n SIDI?”
LEV 10:20 [Umi] isřa Musa aya, iban as-dd [man aya] d lemliḥ di tiṭṭawin nnes.
LEV 11:1 Issiweř SIDI ak-d Musa d Harun, inna asen:
LEV 11:2 “Siweř ak-d ayt n Israil uca inim: ‘Ina aqa aten d řmař, inni umi iɛeddeř ad teccem zi jar marra řmař nni din x temmurt.
LEV 11:3 Iɛeddeř ad teccem zi marra řmař i ɣar teǧa tecḍect immsebḍan, aqa farqa n tecḍect imssebḍan [qaɛ], u [sennej i man aya] ttarran ifeẓ.
LEV 11:4 Maca zeg inni ittarran ifeẓ d yinni ɣar teǧa tecḍect immsebḍan, war ttᵉttem ina: ařɣem, minzi itteffeẓ, [maca] war ɣares bu tecḍect immsebḍan, [s uyenni] aqa ixmej i kenniw,
LEV 11:5 akawka n teṣḍart, minzi ittarra ifeẓ, [maca] tacḍect war temmsebḍi, u [s uyenni] aqa ixmej i kenniw,
LEV 11:6 amenni ayarziz, minzi ittarra ifeẓ, maca war ɣares tacḍect immsebḍan, [s uyenni] aqa ixmej i kenniw,
LEV 11:7 ɛaweḍ iřef, minzi ɣares tacḍect immsebḍan uca aqa farqa n tecḍect immsebḍan [qaɛ], maca war ittarri ifeẓ, [s uyenni] aqa ixmej i kenniw.
LEV 11:8 Zeg weysum nsen war zzayes ttᵉttem niɣ ad tḥadam řxecbat nsen, aqa xemjen i kenniw.’”
LEV 11:9 “Ina iɛeddeř ad ten teccem zi jar marra [imuddaren] nni [iddaren] deg waman: marra wi ɣar iǧa wafriwen d teqcurt deg waman u di řebḥur u di tɣezratin, ina iɛeddeř ad ten teccem,
LEV 11:10 [maca] marra wi war ɣar yeǧi ifriwen niɣ taqcurt di řebḥur u di tɣezratin, zi jar marra i zi sseffyen aman uřa zi jar marra min iddaren deg waman, ad awem yiři d nnɛi.
LEV 11:11 [Wah] ad awem yiři d nnɛi. War iɛeddeř ad teccem zeg weysum nsen u řxecbat nsen ad ɣarwem iřint d nnɛi.
LEV 11:12 Marra min iǧan deg waman břa ifriwen d teqcurt, ad ɣarwem yiři d nnɛi.”
LEV 11:13 “Zeg ijḍaḍ ad ɣarwem iřin ina d nnɛi, war zzaysen ttᵉttem ca, aqa aten d nnɛi: agider, isɣi, agider n řebḥar,
LEV 11:14 [aceffar] iṭṭawen s tazřa, amessɣuy [amuqḍiɛ n tiṭṭawin] ak-d marra markat nnes,
LEV 11:15 marra markat n ubaɣeř,
LEV 11:16 yeǧis n tɣuyyit, aɛennaf, ajḍiḍ n řebḥar, řbaz ak-d markat nnes,
LEV 11:17 [aḥemmař] n řkas, bu-tcararrut, bu-usuḍi [n řmewt],
LEV 11:18 bu-yuntaḥ, bu-uɛuqqi, bu-uḥawar,
LEV 11:19 abellarj, bu-usuḍi iɛeffnen ak-d marra markat nnes, dundun d řweḍwaḍ.”
LEV 11:20 “Marra wi ɣar iǧa afriwen i ittbuɛen u igguren x arebɛa n iḍaren, ad ɣarwem yiři d nnɛi.
LEV 11:21 [Maca] zi marra inni ittbuɛen am ɣarsen afriwen [u] gguren x arebɛa n iḍaren, iɛeddeř i kenniw ad teccem inni ɣar iǧa iḍaren i wengaz sennej i iḍaren nsen i tecři, ḥima ad zzaysen negzen x temmurt.
LEV 11:22 Ina tzemmarem ad zzaysen teccem: tamurɣi n weyřaf ak-d markat nnes, tamuɣri n teṣḍart ak-d markat nnes, tamuɣri ineggzen ak-d markat nnes d tamuɣri iřeḥḥfen ak-d markat nnes.
LEV 11:23 Marra wi ɣar iǧa afriwen i ittbuɛen u ɣares arebɛa n iḍaren, ad ɣarwem yiři d nnɛi.”
LEV 11:24 “S [imuddaren-a] i ɣa tᵉttwaxemjem. Marra wi ɣa iḥadan řxecbat nsen, ad yiři ixmej ař tameddit.
LEV 11:25 Manwen yiwyen ca zi řxecbat nsen, ad issird arruḍ nnes uca ad yiři ixmej ař tameddit.
LEV 11:26 Marra řebhayem, inni ɣar teǧa tecḍect immsebḍan i zi farqa [n tecḍect] war tfarq qaɛ, uřa war ttarran ifeẓ, ad ɣarwem iřin xemjen. Marra wi ten i ɣa iḥadan, ad yiři ixmej.
LEV 11:27 Kuř [amuddar] jar imuddaren i igguren x arebɛa n třeqqa [n iḍaren] nsen, ad ɣarwem yiři ixmej. Marra wi ɣa iḥadan řxecbat nsen, ad yiři ixmej ař tameddit.
LEV 11:28 Wi yiwyen ca n řxecbat nsen, ad issird arruḍ nnes uca ad yiři ixmej ař tmeddit. Ad awem iřin xemjen.”
LEV 11:29 “Zi jar imuddaren ittbuɛen, inni ittbuɛen x temmurt, d ina ad xawem iřin xemjen i kenniw: ajarbuɛ, aɣerda, icfar ak-d markat nnes,
LEV 11:30 iqqli, taknakart, azermummuy, aḥdiḍ d tata.
LEV 11:31 Ina ad ɣarwem iřin xemjen zi jar marra [imuddaren] nni ittbuɛen [x temmurt]. Marra wi ten i ɣa iḥadan awarni řmewt nsen, ad yiři ixmej ař tameddit.
LEV 11:32 Marra min xef iwḍa ca zi řxecbat nsen ad yiři ixmej, niɣ ict n řqecɛet n tefřawt, niɣ arruḍ, niɣ tiřmect, niɣ taxancet, niɣ min ma řqecɛet i xef iwḍa ca zzaysent, ittxeṣṣa ad ittwassars deg waman, ad yiři ixmej ař tameddit u [awarni aya] ad yiři izdig.
LEV 11:33 Marra řqecɛet n třaxt, tenni umi di iwḍa [cwayt zzayes], aqa marra min dayes iǧan ad yiři ixmej uca ittxeṣṣa i kenniw ad tarẓem ṭṭebṣi.
LEV 11:34 Marra macca nni ttnuman [iwdan] ad ccen, tenni x wḍan waman nni, ad tiři texmej, u marra tissit nni ttnuman [iwdan] ad swen, mammec ma tegga řqecɛet i di teǧa [macca niɣ tissit], ad tiři texmej.
LEV 11:35 Marra min xef iwḍa ca n řxecbat nsen, ad yiři ixmej. Afarnu d tzewḍa ad ttwarẓen, aqa xemjen uca ad ɣarwem iřin xemjen.
LEV 11:36 Maca řɛunṣar niɣ d anu mani ɣar ssizzřen aman, ad yiři izdeg. [Maca] wi ɣa iḥadan řxecbat nsen, ad yiři ixmej.
LEV 11:37 Uca mařa iwḍa [ca] zi řxecbat nsen x ca n zzariɛet i uzarɛ, tenni ittxeṣṣa ɛad ad zarɛen, [xenni] ad tiři tizdeg.
LEV 11:38 [Maca] mařa seyyben aman x zzariɛet uca iwḍa xas [ca] zi řxecbat nsen, [xenni] ad ɣarwem tiři [zzariɛet nni] texmej.
LEV 11:39 Uca mařa immut [ijj] zi jar řmař nni teccim, [xenni] wi ɣa iḥaḍan řxecbet nnes, ad yiři ixmej ař tameddit.
LEV 11:40 Wenni iccen zi řxecbet nnes, ad issird arruḍ nnes uca ad yiři ixmej ař tameddit. Wenni yarbun ca zi řxecbet nnes, ad issird arruḍ nnes uca ad yiři ixmej ař tameddit.
LEV 11:41 Kuř [amuddar] ittbuɛen x temmurt, aqa-t d nnɛi. War iɛeddeř ad ittwacc.
LEV 11:42 Zi jar marra [imuddaren] ittbuɛen, inni ittbuɛen x [wudem n] temmurt, war ttᵉttem ca marra min igguren x uɛeddis niɣ marra min igguren x arebɛa [n iḍaren] ař marra min igguren x waṭṭas n iḍaren, minzi aqa aten d nnɛi.
LEV 11:43 War tteggem nnɛi i řeɛmur nwem s marra imuddaren ittbuɛen nni [din] ittbuɛen [x wudem n temmurt], war zzayes ssxemmajem ixef nwem ařami ad zzaysen txemjem.
LEV 11:44 Minzi Necc d SIDI, AREBBI nwem. Kenniw ad tessqedsem ixef nwem uca ad tiřim d imqeddasen, minzi Necc aqa d amqeddas. War ssxemmajem řeɛmur nwem s marra immudaren ittbuɛen, inni ittbuɛen x [wudem n] temmurt.
LEV 11:45 Minzi Necc D SIDI, wenni kenniw dd-issgeɛɛden zi temmurt n Miṣra, ḥima ad iřiɣ d AREBBI nwem. Iřim d imqeddasen, maɣar aqa Necc d amqeddas.”
LEV 11:46 Wa d azerf x řmař, x ijḍaḍ u x marra imuddaren nni zzaysen issefyen waman uca x marra imuddaren nni ittbuɛen x temmurt,
LEV 11:47 ḥima ad ittwagg řfarq jar min ixemjen d min izdigen u jar imuddaren inni iɛeddřen i macca d imuddaren inni war iɛeddřen i macca.
LEV 12:1 Issiweř SIDI ak-d Musa, inna:
LEV 12:2 “Siweř ak-d ayt n Israil, ini: ‘Mařa teksi ict n temɣart ddeyset uca turuw-dd aḥenjir, ad tiři texmej sebɛa n wussan. Ad tiři texmej am [deg] wussan n weɛzař xmi xas idammen.
LEV 12:3 Deg wass wiss tmenya ittxeṣṣa ad ittwaxten aysum n řeɛdařyet nnes.
LEV 12:4 Awarni man aya ad teqqim třata u-třatin n wussan deg idammen n usizdeg nnes. War tᵉttḥidi walu zi min iǧan iqeddes u war tᵉttraḥ ɣar Zzawect Iqeddsen ař ɣa kemmřen wussan n usizdeg nnes.
LEV 12:5 Mařa turuw d taḥenjirt, ad tiři texmej tnayen n ssimanat, am deg wussan n weɛzař nnes. [Awarni man aya] ad teqqim setta u-settin n wussan deg idammen n usizdeg nnes.
LEV 12:6 Xmi ɣa kemmřen wussan n usizdeg n mmis niɣ n yeǧis, [xenni] ad tawi ijj n izmar n ijj n useggʷas am tɣarṣt n wecmaḍ niɣ ijj n wedbir d ameẓyan niɣ ict n tejlilliḥt am tɣarṣt n ddenb ɣar ukehhan ɣar wadaf n Uqiḍun n Umsagar.
LEV 12:7 D netta ad yawi man aya zzat i wudem n SIDI uca ad xas igg aṣřaḥ. [Xenni] ad tiři tizdeg zi řɛunṣar n idammen nnes. Wa d azerf i tenni i ɣa yarwen ijj n mmis niɣ ict n yeǧis.
LEV 12:8 Mařa war tiwiḍ ad tawi ijj zeg wuǧi, [xenni] ad tᵉṭṭef tnayen n tejlilliḥin niɣ tnayen n idbiren imeẓyanen, ijj i tɣarṣt n wecmaḍ u ijj i tɣarṣt n ddenb, uca akehhan ad xas igg aṣřaḥ. [Xenni] ad tiři tizdeg.’”
LEV 13:1 Issiweř SIDI ak-d Musa d Harun, inna:
LEV 13:2 “Mařa ijj n bnadem ɣares di teřmect n arrimet nnes aɛebbuz niɣ ict n tḥebbuct niɣ ijj n wengaz iccemřeř, uca wanita izemmar ad idweř d uḍun n řbarṣ di teřmect n arrimet nnes, ad t awyen ɣar Harun, akehhan, niɣ ɣar yijjen zeg warraw nnes, ɣar ikehhanen.
LEV 13:3 Akehhan ad ixzar ɣar wuḍun di teřmect n arrimet nnes uca mařa iẓra aqa iẓuṭṭan deg [wemcan n] wuḍun dewřen d icemřařen uca iban wuḍun ɛad yuǧeɣ x teřmect n arrimet nnes, aqa [xenni] d uḍun n řbarṣ. Xmi t ɣa iẓar ukehhan, ad [t] ibarreḥ d amexmuj.
LEV 13:4 Maca mařa angaz iccemřeř di teřmect n arrimet nnes d acemřař u war yuǧiɣ x teřmect u iẓeṭṭan war dwiřen d icemřařen, [xenni] ad ibelleɛ ukehhan x wenni di iǧa uḍun [nni] sebɛa n wussan.
LEV 13:5 [Mařa] iẓra i-t ukehhan deg wass wiss sebɛa uca iẓra aqa uḍun amenni iqqim, war imɣir wuḍun di teřmect, [xenni] ad t ibelleɛ ukehhan [ɛawed] sebɛa n wussan nneɣni.
LEV 13:6 Deg wass wiss sebɛa ad t iẓar ukehhan ɛawed uca [mařa] iban aqa uḍun yarsa uca war imɣir [ɛad ktar] x teřmect, [xenni] akehhan ad t ibarreḥ d amezdag. Tuɣa-tt d ict n tfuriy. Ad issird arruḍ nnes uca ad yiři izdig.
LEV 13:7 [Maca] mařa imɣar wuḍun aṭṭas x teřmect awarni řami t iẓra ukehhan di ṭṭweɛ n usizdeg nnes, ittxeṣṣa ad isscen [ixef nnes] i ukehhan twařa nneɣni.
LEV 13:8 [Mařa] iẓra ukehhan, aqa řehřac imɣar x teřmect, ad t ibarreḥ d amexmuj. Aqa-t d řehřac n řbarṣ [i iǧa].
LEV 13:9 Xmi uḍun n řbarṣ aqa-t deg ijj n bnadem, ad t awyen ɣar ukehhan.
LEV 13:10 [Mařa] iẓra ukehhan, aqa iban ijj n uɛebbuz d acemřař di teřmect, u iẓeṭṭan dewřen d icemřařen u iban-dd weysum iddar deg uɛebbuz,
LEV 13:11 aqa-t d řbars aqdim di teřmect n arrimet nnes uca akehhan ad zzayes ibarreḥ d amexmuj. War xas ittbelliɛ ca, minzi netta aqa ixmej.
LEV 13:12 Mařa yuyur řbarṣ x tiřmect marra uca idřa řbarṣ marra tiřmect n wenni ɣar iǧa uḍun zeg uzeǧif nnes ař iḍaren nnes, ař mani izemmar ad iẓar ukehhan s tiṭṭawin nnes,
LEV 13:13 uca iẓra [i-t] ukehhan, iẓra řbars idřa marra arrimet nnes, [xenni] netta ad ibarreḥ d amezdag i wenni di iǧa wuḍun. [Tiřmect] aqa-tt d tacemřač qaɛ. Netta aqa izdig.
LEV 13:14 [Maca] deg wass mani dayes i ɣa dd-iban weysum iddar, ad yiři ixmej.
LEV 13:15 [Mařa] iẓra ukehhan aysum [nni] iddar, ad t ibarreḥ d amexmuj. Aysum iddaren ixmej, aqa-t d řehřac n řbarṣ.
LEV 13:16 [Maca] mařa ibeddeř weysum iddaren u idweř d acemřař, ittxeṣṣa as ad dd-yas ɣar ukehhan.
LEV 13:17 [Mařa] iẓra i-t ukehhan uca aqa [amcan n] uḍun idweř d acemřař, ad ibarreḥ ukehhan wenni di iǧa řehřac d amezdag. Netta aqa izdig.
LEV 13:18 [Mařa] din x teřmect n weysum ict n tḥebbuct u tᵉttwassgenfa tanita,
LEV 13:19 [maca] deg wemcan n tḥebbuct idweř d ijj n uɛebbuz imřeř niɣ d ijj n wengaz iccemřeř, acemřař iruḥ ɣar tezweɣ, [xenni] ad iẓar ukehhan man aya.
LEV 13:20 [Xmi] ɣares i ɣa ixzar ukehhan uca iẓra aqa-t sadu teřmect uca iẓeṭṭan nnes d icemřařen, [xenni] akehhan ad t ibarreḥ d amexmuj, aqa-t d uḍun n řbarṣ wenni yuyuren s tḥebbuct.
LEV 13:21 [Maca] mařa iẓra i-t ukehhan uca war [dayes] yufi uřa d ijj n uẓeṭṭu d acemřař uca war idwiř yuǧeɣ x teřmect, [maca] idweř yarsa, [xenni] ad xas ibelleɛ ukehhan sebɛa n wussan.
LEV 13:22 Mařa tuyur x teřmect marra, [xenni] akehhan ad t ibarreḥ d amexmuj. Aqa-t d uḍun [n řbarṣ].
LEV 13:23 [Maca] mařa angaz iccemřeř n teřmect iqqim deg wemcan nnes, war imɣir ca, aqa-t d ccamet n tḥebbuct uca akehhan ad t ibarreḥ d amezdag.
LEV 13:24 Niɣ mařa idweř di teřmect n arrimet ijj n uyezzim n wecmaḍ uca aysum iddaren n uyezzim n wecmaḍ idweř d ijj n wengaz iccemřeř, acemřař iruḥ ɣar tezweɣ niɣ d acemřař,
LEV 13:25 uca iẓra ukehhan man aya, uca xzar, iẓeṭṭan i iǧan deg wengaz iccemřeř aqa dewřen d icemřařen, uca iban [aqa amcan n wengaz] yuǧeɣ di teřmect, aqa-t d řbarṣ nni dd-iffɣen zeg uyezzim n wecmaḍ. Akehhan ad t ibarreḥ d amexmuj. Aqa-t d uḍun n řbarṣ.
LEV 13:26 [Maca] mařa akehhan iẓra man aya uca war ittwiři iẓeṭṭan icemřařen deg wengaz iccemřeř uca [iẓra angaz] war yuǧiɣ x teřmect uca yarsa, [xenni] ad xas ibelleɛ ukehhan sebɛa n wussan.
LEV 13:27 Deg wass wiss sebɛa ad t iẓar ukehhan uca mařa imɣar [wengaz] ktar x teřmect, akehhan ad t ibarreḥ d amexmuj. Aqa-t d uḍun n řbarṣ.
LEV 13:28 [Maca] mařa angaz iccemřeř iqqim deg wemcan nnes, war imɣir x teřmect uca yarsa, aqa-t d aɛebbuz n wecmaḍ. Akehhan ad t ibarreḥ d amezdag, minzi aqa-tt d ccamet n wecmaḍ.
LEV 13:29 Mařa ijj n weryaz niɣ ict n temɣart dayes uḍun deg uzeǧif niɣ di tmart,
LEV 13:30 uca ixzar ukehhan ɣar uḍun, u xzar, aqa ittban yuǧeɣ di teřmect uca dayes iẓeṭṭan iwarɣen d izdaden, [xenni] akehhan ad t ibarreḥ d amexmuj. Aqa-tt d tfuri [n yiřem], aqa-t d řbarṣ n uzeǧif niɣ n tmart.
LEV 13:31 [Maca] mařa iẓra ukehhan uḍun n tfuri [n yiřem], iẓra aqa war yuǧiɣ di teřmect uca war dayes iẓeṭṭan ibarcanen, [xenni] ad xas ibelleɛ ukehhan x wenni di iǧa wuḍun n tfuri [n yiřem] i yijj n řmijař n sebɛa n wussan.
LEV 13:32 Ad iẓar ukehhan uḍun deg wass wiss sebɛa uca mařa iẓra, aqa tfuri [n yiřem] war temɣir, war dayes yufi iẓeṭṭan iwarɣen uca tfuri [n yiřem] war tuǧiɣ x teřmect,
LEV 13:33 [xenni] netta ad iḥeff i yixef nnes, [maca] [amcan n] tfuri [n yiřem] war t ittḥeffi ca uca akehhan ad ibelleɛ x wenni di iǧa tfuri [n yiřem] ɛad ict n twařa nneɣni i yijj n řmijař n sebɛa n wussan.
LEV 13:34 Deg wass wiss sebɛa ad iẓar ukehhan [amcan n] tfuri [n yiřem]. [Mařa] iẓra aqa tfuri [n yiřem] war temɣir ca, war tuǧiɣ x teřmect, [xenni] akehhan ad t ibarreh d amezdag. Ad issird arruḍ nnes uca ad yiři izdig.
LEV 13:35 Maca mařa tfuri [n yiřem] temɣar aṭṭas x teřmect awarni i usizdeg nnes,
LEV 13:36 uca iẓra i-t ukehhan uca iẓra tfuri [n yiřem] temɣar x teřmect, [xenni] war yarezzu ukehhan x iẓeṭṭan iwarɣen ɛad, netta aqa ixmej.
LEV 13:37 [Maca] mařa tfuri [n yiřem] aqa tban-dd tbedd di tiṭṭawin nnes, uca ffɣen-dd zzayes iẓeṭṭan ibarcanen, [xenni] aqa tᵉggenfa tfuri [n yiřem] uca netta aqa izdeg. Akehhan ad t ibarreḥ d amezdag.
LEV 13:38 Mařa banen-dd imucan ccemřeřen, iccemřeřen d icemřařen, di teřmect n ijj n weryaz niɣ n ict n temɣart,
LEV 13:39 uca iẓra ukehhan man aya uca iẓra aqa di teřmect n arrimet banen-dd imucan arsan, icemřařen, [xenni] aqa-tt d ict n tfuri n teřmect, netta aqa izdeg.
LEV 13:40 [Mařa] iwḍa ucuwwaf n uzeǧif n ijj n weryaz, aqa d aqeccar, [xenni] netta aqa izdig.
LEV 13:41 Mařa tanyart n ca n yijj ad tedweř tařeqqaɣt, aqa tanyart nnes tqeccar [waha], netta aqa izdig.
LEV 13:42 [Maca] mařa [din] ijj n uḍun imřeř iruḥ ɣar tezweɣ x uzeǧif aqeccar niɣ x tenyart taqeccart, aqa-t d řbarṣ nni dd-iffɣen x uzeǧif nnes aqeccar niɣ x tenyart nnes taqeccart.
LEV 13:43 [Mařa] iẓra i-t ukehhan uca iẓra aqa aɛebbuz n wuḍun imřeř, iruḥ ɣar tezweɣ x uzeǧif nnes aqeccar niɣ x tenyart nnes taqeccart, iban-dd am řbarṣ n teřmect n arrimet,
LEV 13:44 [xenni] aqa aryaz d bu-řbarṣ i iǧa, netta aqa ixmej. Akehhan ad t ibarreḥ d amexmuj, uḍun aqa-t x uzeǧif nnes.”
LEV 13:45 “Ittxeṣṣa ad ittwacarreg warruḍ n bu-řbarṣ i di iǧa wuḍun uca ad iḍřeq i [ucuwwaf x] uzeǧif nnes, ad iřeḥḥef acřaɣem ɣar uyencic, ad iřaɣa: ‘Amexmuj! Amexmuj!’
LEV 13:46 Marra ussan i dayes i ɣa yiři wuḍun, ad yiři ixmej. Netta d amexmuj. Netta ad izdeɣ weḥḥdes uca tzeddiɣt nnes ad tiři barra i řmargeḥ n řɛeskar.”
LEV 13:47 “[Mařa] uḍun n řbarṣ deg ijj n warruḍ, deg ijj n warruḍ n taḍuft niɣ deg ijj n warruḍ n řeqṭen,
LEV 13:48 niɣ deg wecḍaḍ ixeyyḍen niɣ deg ufiřu immuden, [niɣ] n řeqṭen niɣ n taḍuft, niɣ ɣar yiřem, niɣ ɣar mammec ma řqecɛet n yiřem,
LEV 13:49 u [ticti] ittwawten deg warruḍ niɣ deg yiřem, niɣ ɣar wecḍaḍ ixeyyḍen niɣ ɣar ufiřu immuden, niɣ di mammec ma n řqecɛet [nni tteggen] s yiřem, tezzizu niɣ tezweɣ, aqa-t d uḍun n řbarṣ. Ad ittwasscen aya i ukehhan.
LEV 13:50 Akehhan ad ixzar [ɣar wemcan n] uḍun uca min iḍnen ad t ibelleɛ sebɛa n wussan.
LEV 13:51 Deg wass wiss sebɛa ad ixzar ɣar wuḍun. Mařa imɣar uḍun deg warruḍ, niɣ ɣar wecḍaḍ ixeyyḍen niɣ ɣar ufiřu immuden, niɣ deg yiřem n mammec ma řqecɛet nni tteggen s yiřem, aqa uḍun d řbars iqesḥen i yeǧa, aqa ixmej.
LEV 13:52 Ad issecmeḍ arruḍ niɣ afiřu d azirar niɣ afiřu immuden, niɣ n taḍuft niɣ n řeqṭen [i iǧa], niɣ mammec ma řqecɛet [nni tteggen] s yiřem i dayes tuɣa uḍun, minzi aqa-t d řbarṣ iqesḥen. Ittxeṣṣa ad ittwassecmeḍ s tmessi.
LEV 13:53 [Maca] mařa iẓra ukehhan man aya uca aqa uḍun war imɣir ca deg warruḍ, niɣ deg wecḍaḍ ixeyyḍen niɣ deg ufiřu immuden, niɣ di mammec ma řqecɛet [nni tteggen] s yiřem,
LEV 13:54 [xenni] ad yumur ukehhan maḥend ad ssirden min di yeǧa wuḍun, uca [awarni i man aya] ad xas ibelleɛ twařa nneɣni řqedd n sebɛa n wussan.
LEV 13:55 [Mařa] iẓra ukehhan uḍun awarni i usird, uca iẓra uḍun war ibeddiř ca uca uḍun war imɣir, aqa [arruḍ nni] ixmej. Ittxeṣṣa ad t tessecmeḍed s tmessi. Aqa [uḍun] idweř yuǧeɣ ittᵉtt ɣar ḍeffar niɣ ɣar zzat.
LEV 13:56 [Maca] mařa iẓra ukehhan man aya uca iẓra belli uḍun yarsa awarni i usird, [xenni] ad t iqess zeg warruḍ, niɣ zeg yiřem, niɣ zeg wecḍaḍ ixeyyḍen niɣ zeg ufiřu immuden.
LEV 13:57 [Maca] mařa iban [wuḍun] twařa nneɣni deg warruḍ, niɣ ɣar wecḍaḍ ixeyyḍen niɣ ɣar ufiřu immuden, niɣ di mammec ma řqecɛet [nni tteggen] s yiřem, [aqa] idduqqez [řbarṣ]. Ittxeṣṣa ad tessecmeḍ s tmessi min dayes i iǧan uḍun.
LEV 13:58 Arruḍ, niɣ afiřu d azirar niɣ afiřu immuden niɣ mammec ma řqecɛet [nni tteggen] s yiřem, wenni tessirded uca iruḥ xas wuḍun, ad t tessirded twařa nneɣni uca [xenni] ad yiři izdig.”
LEV 13:59 Wa d azerf n wuḍun n řbarṣ n warruḍ n taḍuft niɣ n řeqṭen, niɣ n wecḍaḍ ixeyyḍen niɣ n ufiřu immuden, niɣ n mammec ma řqecɛet [nni tteggen] s yiřem, maḥend xenni ad barrḥen s tezdeg [nnes] niɣ s řexmej [nnes].
LEV 14:1 Issiweř SIDI ak-d Musa, inna:
LEV 14:2 “Wa d azerf n bu-řbarṣ i wass n usizdeg nnes. Ittxeṣṣa ad t nedhen ɣar ukehhan,
LEV 14:3 uca ad iffeɣ ukehhan ɣar barra i řmargeḥ n řɛeskar. Xmi ɣares i ɣa ixzar ukehhan uca iẓra aqa iggenfa wuḍun n řbarṣ n bu-řbarṣ,
LEV 14:4 ad yumur ukehhan, maḥend ad ksin i wenni i ɣa ittwassizedgen tnayen n ijḍaḍ iddaren izdigen, uřa d akeccuḍ n [tcejjart n] tengelt, d uzeggʷaɣ iḥedqen, d tɛelǧet.
LEV 14:5 Ad yumur ukehhan maḥend ad ɣarṣen i yijj n wejḍiḍ deg ict n řqecɛet n třaxt, sennej i waman ittazzřen.
LEV 14:6 [Xenni] ad iksi ajḍiḍ iddaren d ukeccuḍ n [tcejjart n] tengelt d uzeggʷaɣ iḥedqen d tɛelǧet uca ad ten issuf ak-d wejḍiḍ iddaren deg idammen n wejḍiḍ i ittwaɣarṣen sennej i waman ittazzřen.
LEV 14:7 Ad irucc sebɛa n twařawin x wenni ittwassizedgen zi řbarṣ. [Xenni] ad t ibarreḥ d amezdag uca ad yarxu i wejḍiḍ iddaren maḥend ad iḍew sennej i wudem n yeyyar.
LEV 14:8 Uca wenni ittwassizedgen ad iṣebben arruḍ nnes uca ad iḥeff marra acuwwaf nnes, ad issird ixef nnes s waman. [Xenni] ad yiři izdeg. Awarni as ad yadef ɣar řmargeḥ n řɛeskar uca ad izdeɣ barra i uqiḍun nnes ɛad sebɛa n wussan.
LEV 14:9 Deg wass wiss sebɛa ad iḥeff marra acuwwaf n uzeǧif nnes d tmart nnes d temmiwin n tiṭṭawin nnes, [wah,] ad iḥeff marra acuwwaf nnes, ad iṣebben arruḍ nnes uca ad issird arrimet nnes s waman, [xenni] ad yiři izdeg.
LEV 14:10 Deg wass wiss tmenya ad iksi tnayen n izmaren kemmřen d icten texsi icnan qaɛ n ijjen useggʷas ak-d třata zi ɛecra n ijjen ifa n waren azdad am tewhibt [n řɣiǧet] ixeǧḍen s zzect, u [ɛawed] ijjen ulux n zzect.
LEV 14:11 Akehhan, wenni t issizedgen, ad yarr aryaz nni ittxeṣṣa ad ittwassizdeg, ak-d marra aya zzat i wudem n SIDI ɣar wadaf n Uqiḍun n Umsagar.
LEV 14:12 Ad iksi ukehhan izmar nni uca ad t-i-dd-issqarreb am tɣarṣt n umarwas ak-d ulux n zzect, uca ad t issenhezz am tewhibt n wenhezzi zzat i wudem n SIDI.
LEV 14:13 [Xenni] ad iɣarṣ i yezmar nni deg wemcan mani ɣarrṣen taɣarṣt n ddenb d tɣarṣt n wecmaḍ, deg wemcan amqeddas. Minzi taɣarṣt n umarwas, am tɣarṣt n ddenb, i ukehhan i teǧa, aqa-tt d tamqeddast qaɛ.
LEV 14:14 Ad iksi ukehhan [cwayt] zeg idammen n tɣarṣt n umarwas uca akehhan ad ten igg x iɣes n umezzuɣ afusi n wenni i ɣa ittwassizedgen uřa x yimez n ufus nnes afusi u x yimez n uḍar nnes afusi.
LEV 14:15 Amenni i ɣa iksi ukehhan [ca] zeg ulux n zzect uca ad tt inɣeř x třeqqa n ufus nnes azeřmaḍ.
LEV 14:16 Ad issuf ukehhan aḍaḍ nnes afusi s zzect nni ɣares deg ufus nnes azeřmaḍ uca [ammu i] ɣa irucc s uḍaḍ nnes [cwayt] zi zzect sebɛa n twařawin zzat i wudem n SIDI.
LEV 14:17 Uca min iqqimen zi zzect nni ɣares deg ufus nnes, ad tt igg ukehhan x iɣes n umezzuɣ afusi n wenni i ɣa ittwassizedgen, uřa x yimez n ufus nnes afusi u x yimez n uḍar nnes afusi, tiwa n idammen n tɣarṣt n umarwas [i xasen igga qbeř].
LEV 14:18 Min iqqimen n zzect nni iǧan ɣar ukehhan di třeqqa n ufus nnes, ad t inɣeř x uzeǧif n wenni i ɣa ittwassizedgen uca [ammu i] t ɣa isseṣřeḥ ukehhan zzat i wudem n SIDI.
LEV 14:19 Ad issewjed ukehhan [xenni] taɣarṣt n ddenb uca ad isseṣřeḥ wenni ittwassizedgen zi řexmej nnes. Awarni as ad iɣarṣ i tɣarṣt n wecmaḍ.
LEV 14:20 Ad issbexxar ukehhan taɣarṣt n wecmaḍ d tewhibt [n řɣiǧet] x uɛalṭar. [Ammu i] t ɣa isseṣřeḥ ukehhan uca ad yiři izdeg.
LEV 14:21 Mařa netta iẓřeḍ uca afus nnes war t issiweḍ, [xenni] ad iksi ijj n yizmar am tɣarṣt n umarwas maḥend ad xas igg aṣřaḥ am igga izmar d tewhibt n wenhezzi. Ad iksi řa d ict n teɛcart n [ijj n ifa] n waren azdad ixeǧḍen s zzect am tewhibt [n řɣiǧet], uřa d ijj n ulux n zzect
LEV 14:22 d tnayen n tejlilliḥin niɣ tnayen n idbiren imeẓyanin, anect izemmar ufus nnes ad issiweḍ. Ict ad tiři d taɣarṣt n ddenb u tenneɣni ad tiři d taɣarṣt n wecmaḍ.
LEV 14:23 Deg wass wiss tmenya ad ten yawi di ṭṭweɛ n usizdeg nnes ɣar ukehhan, ɣar wadaf n Uqiḍun n Umsagar, zzat i wudem n SIDI.
LEV 14:24 Ad iksi ukehhan izmar n tɣarṣt n umarwas d ulux nni n zzect uca akehhan ad ten issenhezz am tewhibt n wenhezzi zzat i wudem n SIDI.
LEV 14:25 [Xenni] ad iɣarṣ i izmar n tɣarṣt n umarwas uca akehhan ad iksi [cwayt] zeg idammen n tɣarṣt n umarwas, ad ten yarr x iɣes n umezzuɣ afusi n wenni ittwassizedgen uřa x yimez n ufus nnes afusi u x yimez n uḍar nnes afusi.
LEV 14:26 Ad ifarreɣ ukehhan [ca] n zzect x třeqqa n ufus aẓeřmaḍ n yixef nnes.
LEV 14:27 S uḍaḍ nnes afusi ad irucc ukehhan s zzect nni ɣares deg ufus nnes aẓeřmaḍ sebɛa n twařawin zzat i wudem n SIDI.
LEV 14:28 Akehhan ad igg [cwayt] zi zzect nni ɣares iǧan deg ufus nnes x iɣes n umezzuɣ afusi n wenni ittwassizedgen uřa x yimez n ufus nnes afusi u x yimez n uḍar nnes afusi, deg wemcan [nnit mani] ttwaggen idammen n tɣarṣṭ n umarwas [qbeř].
LEV 14:29 Min iqqimen zi zzect nni ɣar ukehhan deg ufus nnes, ad t igg x uzeǧif n wenni ittwassizedgen, maḥend ad xas igg aṣřaḥ zzat i wudem n SIDI.
LEV 14:30 [Xenni] ad issewjed ijj zi tnayen n tejlilliḥin niɣ zeg idbiren imeẓyanen, anect umi izemmar ufus nnes ad issiweḍ.
LEV 14:31 Zi min d as ɣa issiweḍ ufus nnes, ad yiři ijj i tɣarṣt n ddenb u wenneɣni i tɣarṣt n wecmaḍ, sennej i tewhibt [n řɣiǧet]. Akehhan ad igg aṣřaḥ x wenni ittwassizedgen zzat i wudem n SIDI.
LEV 14:32 Wa d azerf i wenni di iǧa wuḍun n řbarṣ uca afus nnes war izemmar ad issiweḍ i usizdeg nnes.”
LEV 14:33 Issiweř SIDI ak-d Musa d Harun, inna:
LEV 14:34 “Xmi ɣa tadfem ɣar temmurt n Kenɛan, tenni d awem ɣa wceɣ d agřa, uca mařa ggiɣ Necc uḍun n řbarṣ x ca n taddart n temmurt nni ɣarwem d agřa,
LEV 14:35 ad dd-yas [xenni] wenni ɣar teǧa taddart nni, ad ixebbar akehhan, ad yini: ‘Ittɣiř ayi-dd axmi din ca n wuḍun di taddart.’
LEV 14:36 [Xenni] akehhan ad issekk, maḥend ad ssexwan taddart qbeř i dd ɣa yas ukehhan [s yixef nnes], ḥima ad ixemm uḍun, ḥima war ittwassexmij marra min iǧan di taddart. Awarni as ad dd-yas ukehhan, maḥend ad ixemmem taddart.
LEV 14:37 Mařa ixzar ɣar uḍun uca iẓra aqa uḍun n řeḥyuḍ n taddart banen-dd dayes iḥufar zzizwen niɣ zewɣen, uǧɣen x [wudem n] řḥiḍ,
LEV 14:38 [xenni] ad iffeɣ ukehhan zi taddart [nni] zi wadaf n taddart uca ad iqqen taddart sebɛa n wussan.
LEV 14:39 Deg wass wiss sebɛa ad dd-idweř ukehhan uca mařa iẓra aqa uḍun ibezzeɛ x řeḥyuḍ n taddart,
LEV 14:40 [xenni] ad iweṣṣa ukehhan, maḥend ad kksen iẓra mani iřseq wuḍun u ad ten nḍaren deg ijj n wemcan ixemjen barra i tendint.
LEV 14:41 Ad yejj ad qeccaren daxeř n taddart ɣar [marra] iɣezdisen nnes, uca ad zeǧɛen abeǧaɛ i qeccaren barra i tendint deg ijj n wemcan d amexmuj.
LEV 14:42 [Xenni] ad ksin iẓra nneɣni, ad ten ggen deg wemcan n iẓra [nni iheřcen] uca ad ksin abeǧaɛ nneɣni maḥend ad zzayes ḥenncen taddart.
LEV 14:43 Mařa uḍun idweř-dd uca issfuffi [ɛawed] di taddart awarni řami kksen iẓra u qeccaren taddart awarni řami tt ḥenncen,
LEV 14:44 [xenni] ad dd-yas ukehhan ad [tt] iqeǧeb. Mařa iẓra, aqa uḍun ibezzeɛ di taddart, [xenni] aqa din ijj n řbarṣ iqesḥen di taddart. Aqa-tt texmej.
LEV 14:45 Ad hedmen taddart, iẓra nnes d tḥenya nnes d marra tarrist n taddart uca ad ssiggʷejen aya barra i tendint ɣar ijj n wemcan d amexmuj.
LEV 14:46 Wi ɣa yadfen ɣar taddart deg ijj n wass zeg wussan awarni řami bellɛen [taddart], netta ad yiři ixmej ař tameddit.
LEV 14:47 Wi ɣa iṭṭṣen di taddart, ad iṣebben arruḍ nnes u wi ɣa iccen di taddart, ad issird arruḍ nnes.
LEV 14:48 Mařa yudef ukehhan, maḥend ad [tt] iqeǧeb uca iẓra aqa uḍun war imɣir di taddart, awarni řami ḥenncen taddart, [xenni] ad ibarreḥ ukehhan belli taddart tezdeg, minzi uḍun ittwassgenfa.
LEV 14:49 Ad iksi tnayen n ijḍaḍ d ukeccuḍ n [tcejjart n] tengelt d uzeggʷaɣ iḥedqen d tɛelǧet, maḥend ad zzaysen ikkes ddenb x taddart.
LEV 14:50 Ad iɣarṣ i yijj n wejḍiḍ deg ict n řqecɛet n třaxt, sennej i waman iddaren.
LEV 14:51 Ad iksi akeccuḍ n [tcejjart n] tengelt d tɛelǧet d uzeggʷaɣ iḥedqen uřa d ajḍiḍ iddaren uca ad issuf [marra] aya deg idammen n wejḍiḍ ittwaɣarṣen u deg waman iddaren uca ad irucc taddart sebɛa n twařawin.
LEV 14:52 [Ammu] i ɣa ikkes ddenb x taddart s idammen n wejḍiḍ, s waman iddaren d wejḍiḍ iddaren d ukeccuḍ n [tcejjart n] tengelt d tɛelǧet d uzeggʷaɣ iḥedqen.
LEV 14:53 Ad yejj ajḍiḍ iddaren ad iḍwa barra i tendint sennej i wudem n yeyyar. [Ammu i] ɣa igg aṣřaḥ x taddart [nni] uca ad tiři tizdig.”
LEV 14:54 “Wa d azerf x marra řehřacat n řbarṣ u x tfuri [n yiřem],
LEV 14:55 x řbarṣ n arruḍ u n taddart,
LEV 14:56 x ijj n uɛebbuz, x ict n tḥebbuct u x ijj n wengaz iccemřeř [n teřmect].
LEV 14:57 [Azerf-a] aqa i tɣuri deg wass i di ɣa yiři ḥed ixmej niɣ deg wass i di ɣa yiři ḥed izdeg. Wa d azerf n řbarṣ.”
LEV 15:1 Issiweř SIDI ak-d Musa d Harun, inna:
LEV 15:2 “Siweř ak-d ayt n Israil, inim asen: ‘Mařa aryaz ɣares ijj n useyyeř zi arrimet nnes, [xenni] ad yiři ixmej zi ssibbet n useyyeř.
LEV 15:3 Wa ad yiři d řexmej nnes zi ssibbet n useyyeř nnes: [mařa] arrimet nnes tᵉttejja aseyyeř nnes niɣ arrimet nnes tessbedda aseyyeř nnes, aqa-t d řexmej nnes.
LEV 15:4 Kuř qama min xef ɣa iṭṭeṣ wenni di iǧa useyyeř, ad yiři ixmej u kuř řqecɛet i xef ɣa iqqim, ad tiři texmej.
LEV 15:5 Marra wi ɣa iḥadan qama nnes, ad iṣebben arruḍ nnes, ad issird ixef nnes [ɛawed] s waman uca ad yiři ixmej ař tameddit.
LEV 15:6 Wenni i ɣa iqqimen x ca x min xef tuɣa iqqim wenni di iǧa useyyeř, ad iṣebben arruḍ nnes, ad issird ixef nnes [ɛawed] s waman uca ad yiři ixmej ař tameddit.
LEV 15:7 Wenni i ɣa iḥadan arrimet n wenni di iǧa useyyeř, ad iṣebben arruḍ nnes uca netta simant nnes ad issird s waman, uca ad yiři ixmej ař tameddit.
LEV 15:8 Mařa wi di iǧa useyyeř issusef x ijj n umezdag, aqa [wa] ad iṣebben arruḍ nnes, ad issird ixef nnes s waman uca ad yiři ixmej ař tameddit.
LEV 15:9 Kuř trict min xef iqqim wenni di iǧa useyyeř, ad tiři texmej.
LEV 15:10 Marra wi ɣa iḥadan [mammec ma] řqecɛet nni iǧan sadu nnes, ad yiři ixmej ař tameddit uca wi tt ɣa iksin, ad iṣebben arruḍ nnes, ad issird ixef nnes s waman uca ad yiři ixmej ař tameddit.
LEV 15:11 Marra wi ɣa ittwaḥadan zeg wenni di iǧa useyyeř břa ma ad issird wa ifassen nnes [amezwaru], ad iṣebben arruḍ nnes, ad issird ixef nnes s waman uca ad yiři ixmej ař tameddit.
LEV 15:12 Ṭṭebṣi n třaxt nni iḥada wenni di iǧa useyyeř, ittxeṣṣa ad ittwarẓ, [maca] marra řqecɛet n tefřawt ad tt sirden s waman.
LEV 15:13 Xmi wenni di iǧa useyyeř ad ittwassizdeg zeg useyyeř nnes, ittxeṣṣa as simant nnes ad iḥseb i sebɛa n wussan. [Xenni] ad iṣebben arruḍ nnes, ad issird arrimet nnes s waman iddaren uca ad yiři izdig.
LEV 15:14 Deg wass wiss tmenya ad iksi tnayen n tejlilliḥin niɣ tnayen n idbiren imeẓyanen uca ad dd-yas zzat i wudem n SIDI ɣar wadaf n Uqiḍun n Umsagar uca ad ten iwc i ukehhan.
LEV 15:15 Akehhan ad issewjed ict n tɣarṣt n ddenb d ict n tɣarṣt n wecmaḍ. Akehhan ad xas igg aṣřaḥ zzat i wudem n SIDI x useyyeř nnes.’”
LEV 15:16 “Mařa iffeɣ-dd useyyeř n waǧu zeg weryaz, ad issird arrimet nnes marra s waman uca ad yiři ixmej ař tameddit.
LEV 15:17 Kuř arruḍ d kuř iřem i xef iǧa useyyeř n waǧu, ittxeṣṣa ad t sirden s waman uca ad yiři ixmej ař tameddit.
LEV 15:18 [Mařa] iṭṭeṣ yijj weryaz ak-d temɣart uca inḍar [dayes] netta, [xenni] ad ssirden [s tnayen idsen] s waman uca ad iřin xemjen ař tameddit.”
LEV 15:19 “Mařa tamɣart tuɣa-tt tseyyeř, aqa xas idammen di arrimet nnes, [xenni] ad teɛzeř sebɛa n wussan. Marra wi tt ɣa iḥadan ad yiři ixmej ař tameddit.
LEV 15:20 Marra min xef tuɣa tᵉṭṭeṣ deg weɛzař nnes, ad yiři ixmej uca marra min xef tuɣa teqqim, ad yiři ixmej.
LEV 15:21 Marra wi ɣa iḥadan qama nnes, ad issird arruḍ nnes, ad issird ixef nnes s waman uca ad yiři ixmej ař tameddit.
LEV 15:22 Marra wi ɣa iḥadan ca n řqecɛet min xef tuɣa tᵉttɣima, ad iṣebben arruḍ nnes, ad issird ixef nnes s waman uca ad yiři ixmej ař tameddit.
LEV 15:23 Niɣ mařa iqqim x qama niɣ x řqecɛet i xef tuɣa teqqim nettat, umi iḥada aya ad yiři ixmej ař tameddit.
LEV 15:24 Mařa iṭṭeṣ akides ijj n weryaz uca yusa-dd xas weɛzař nnes, [xenni] ad yiři ixmej sebɛa n wussan. Kuř qama i x tuɣa iṭṭeṣ, ad tiři texmej.
LEV 15:25 Mařa usin-dd idammen x ict n temɣart aṭṭas n wussan barra i řmijař n weɛzař nnes niɣ mařa tuɣa aseyyeř ktar x řmijař n weɛzař nnes, [xenni] ad tiři texmej marra ussan n useyyeř i dd-yusin ak-d řexmej nnes, am deg wussan n weɛzař nnes.
LEV 15:26 Kuř qama min xef tᵉṭṭeṣ marra ussan n useyyeř nnes, ad as tiři am qama n weɛzař nnes u marra řqecɛet min xef teqqim, ad tiři texmej amecnaw řexmej n weɛzař nnes.
LEV 15:27 Marra wi ɣa iḥadan timesřayin nni, ad yiři ixmej. Ad iṣebben arruḍ nnes uca ad issird ixef nnes s waman uca ad yiři ixmej ař tameddit.
LEV 15:28 Mařa tᵉttwassizdeg zeg useyyeř nnes, ittxeṣṣa ad teḥseb i yixef nnes sebɛa n wussan, awarni as ad tiři tezdeg.
LEV 15:29 Deg wass wiss tmenya ad teksi i yixef nnes tnayen n tejlilliḥin niɣ tnayen n idbiren imeẓyanen uca ad ten tawi ɣar ukehhan ɣar wadaf n Uqiḍun n Umsagar.
LEV 15:30 Akehhan ad issewjed ict n tɣarṣt n ddenb d ict n tɣarṣt n wecmaḍ uca akehhan ad xas igg aṣřaḥ [di tmesřact] n useyyeř n řexmej nnes zzat i wudem n SIDI.
LEV 15:31 [Ammu] i ɣa tɛezřed ayt n Israil x řexmej nsen, ḥima war ttᵉmettin di řexmej nsen, umi ssxemmajen Tazeddiɣt inu nni [iǧan] di řwesṭ nsen.”
LEV 15:32 Wa d azerf i wenni ɣar iǧa useyyeř u i wenni zi ɣa iffeɣ waǧu nnes uca [xenni] ad yiři ixmej
LEV 15:33 u [ɛawed] i tenni min xef iǧa idammen uca [xenni] teɛzeř ixef nnes u [ɛawed] i wi di tuɣa aseyyeř, i weryaz uřa i temɣart, u [ɛawed] i weryaz i tuɣa iṭṭṣen ak-d tenni iǧan texmej.
LEV 16:1 Issiweř SIDI ak-d Musa awarni i řmewt n tnayen n warraw n Harun, awarni řami dd-qarrben nitni zzat i wudem n SIDI uca mmuten.
LEV 16:2 SIDI inna i Musa: “Siweř ak-d Harun, umac, ḥima war ittidef řebda ɣar Uqeddas daxeř i uřeḥḥaf zzat i tqebbart n weṣřaḥ nni iǧan x Ttabut, ḥima war ittmetti ca, minzi Necc ttbaneɣ-dd deg ijj n useynu sennej i tqebbart n weṣřaḥ.
LEV 16:3 S uya ad yadef Harun ɣar Uqeddas: s ijj n ufunas, ameẓyan n tfunast, i tɣarṣt n ddenb, u [s] yijj n icarri i tɣarṣt n wecmaḍ.
LEV 16:4 Ad yarḍ tcamir iqeddsen n řeqṭen uca ssarwař n řeqṭen ad yiři x arrimet nnes. Ad ibyes taḥezzamt n řeqṭen uca ad yarekkeb areẓẓet n řeqṭen. Aqa man aya d arruḍ iqeddsen. Mařa ad ten yarḍ, ittxeṣṣa as ad issird arrimet nnes s waman d amezwaru.
LEV 16:5 Ad iksi zi tmesmunt n ayt n Israil tnayen n imyanen zeg iɣayḍen i tɣarṣt n ddenb d ijj n icarri i tɣarṣt n wecmaḍ.
LEV 16:6 Ad dd-issqarreb Harun afunas ameẓyan n tɣarṣt n wecmaḍ, wenni iǧan i yixef nnes, uca ad igg aṣřaḥ i yixef nnes u i taddart nnes.
LEV 16:7 Ad iksi tnayen n imyanen uca ad ten igg zzat i wudem n SIDI ɣar wadaf n Uqiḍun n Umsagar.
LEV 16:8 Ad inḍar Harun taqedduḥt x tnayen n imyanen: ict n tqedduḥt x SIDI u ict n tqedduḥt x iɣayḍ innufsřen, [qqaren as ‘Ɛazazil’].
LEV 16:9 Ad dd-issqarreb Harun amyan nni x dd-tewḍa taqedduḥt i SIDI uca ad t issewjed d tɣarṣt n ddenb.
LEV 16:10 Amyan i x dd-tewḍa taqedduḥt n iɣayḍ innufsřen, ad t igg iddar zzat i wudem n SIDI, maḥend ad zzayes igg aṣřaḥ uca [xenni] ad t issekk am yiɣayḍ innufsřen ɣar řexřa.
LEV 16:11 Ad dd-issqarreb Harun afunas ameẓyan n tɣarṣt n ddenb, wenni tuɣa i yixef nnes, uca ad igg aṣřaḥ i yixef nnes u i [aytbab n] taddart nnes uca ad iɣarṣ i ufunas ameẓyan n tɣarṣt n ddenb, wenni [iǧan] i yixef nnes.
LEV 16:12 Ad iksi [ɛawed] ijj n řmejmar iccur s řefḥem itteḥduduqen n uɛalṭar zzat i wudem n SIDI uca ad iccur tnayen n ifassen nnes s řebxur azdad ittfuḥen, uca ad yawi marra aya daxeř i uřeḥḥaf.
LEV 16:13 Ad igg řebxur x tmessi zzat i wudem n SIDI, ḥima aseynu [n řefwar] n řebxur ad ideř taqebbart n weṣřaḥ i iǧan x Cchadet, uca war ittmetti ca.
LEV 16:14 Ad iksi [cwayt] zeg idammen n ufunas ameẓyan uca ad ten irucc s uḍaḍ nnes x wudem n tqebbart n weṣřaḥ ɣar uɣezdis n ccarq uca [ɛawed] ad irucc [cwayt] zeg idammen sebɛa n twařawin s uḍaḍ nnes zzat i tqebbart n weṣřaḥ.
LEV 16:15 [Xenni] ad iɣarṣ i umyan n tɣarṣt n ddenb, wenni [iǧan] i řgens uca ad yawi idammen ɣar daxeř i uřeḥḥaf uca ad igg s idammen nnes am mammec igga s idammen n ufunas ameẓyan: ad ten irucc x tqebbart n weṣřaḥ u zzat i tqebbart n weṣřaḥ.
LEV 16:16 [Ammu i] i ɣa igg aṣřaḥ x Uqeddas i řḥajjat ixemjen n ayt n Israil u i ixeṭṭan nsen i dd-ittasen ak-d marra ddnub nsen. Ammu i ɣa yegg di ssibbet n Uqiḍun n Umsagar, wenni iǧan akidsen di řwesṭ n marra timesřayin ixemjen nsen.
LEV 16:17 Uřa d ijj n bnadem ad yiři ɛad deg Uqiḍun n Umsagar zeg wami i ɣa yadef maḥend ad igg aṣřaḥ deg Uqeddas ař ɣa iffeɣ [ɛawed]. [Ammu] i ɣa igg aṣřaḥ i yixef nnes u i marra agraw [n řgens] n Israil.
LEV 16:18 Ad iffeɣ ař uɛalṭar i iǧan zzat i wudem n SIDI uca ad igg asřaḥ x uɛalṭar. Ad iksi [cwayt] zeg idammen n ufunas ameẓyan u [cwayt] zeg idammen n umyan uca ad issars [aya] x waccawen n uɛalṭar deg wenneḍ nnes.
LEV 16:19 Sebɛa n twařawin ad xas irucc s uḍaḍ nnes [cwayt] zeg idammen uca ad t issizdeg u ad t issqeddes zi řexmej n ayt n Israil.
LEV 16:20 [Awarni řami] ikemmeř aṣřaḥ n Uqeddas d Uqiḍun n Umsagar d uɛalṭar, ad dd-issqarreb [xenni] amyan iddaren.
LEV 16:21 Ad issars Harun tnayen n ifassen nnes x uzeǧif n umyan iddaren uca [ammu i] ɣa inɛem Harun sennej [i uzeǧif n umyan] x marra řmuɛṣiyyet n ayt n Israil d marra ixeṭṭan nsen i dd-yusin ak-d marra ddnub nsen uca ad ten issars x uzeǧif n umyan uca ad t issekk ɣar řexřa s ufus n ijj n weryaz [wenni isswejden] i ddegga.
LEV 16:22 Uca iɣayḍ ad yawi ak-d ixef nnes marra řmuɛṣiyyet nsen ɣar ict n jjihet texřa. Netta ad issekk amyan ɣar řexřa.
LEV 16:23 [Xenni] ad yadef Harun ɣar Uqiḍun n Umsagar uca ad ikkes arruḍ n řeqṭen nni yarḍ, umi yudef ɣar Uqeddas uca ad t yejj din.
LEV 16:24 Ad issird arrimet nnes s waman deg wemcan amqeddas uca ad yarḍ arruḍ nnes. [Xenni] ad iffeɣ, ad issewjed taɣarṣt n wecmaḍ nnes d tɣarṣt n řgens uca ad igg aṣřaḥ i yixef nnes u i řgens.
LEV 16:25 Ad issbexxar tadunt n tɣarṣt n ddenb x uɛalṭar.
LEV 16:26 Wi dd-isekken amyan am umyan innufsřen, ad iṣebben arruḍ nnes, ad issird arrimet nnes s waman. Awarni as ad yadef ɣar řmargeḥ n řɛeskar.
LEV 16:27 Afunas ameẓyan n tɣarṣt n ddenb d umyan n ṭɣarṣt n ddenb i zi ttwassidfen idammen nsen, maḥend ad zzaysen ittwagg aṣřaḥ deg Uqeddas, ad ten ssuffɣen barra i řmargeḥ n řɛeskar uca ad zzaysen sscemḍen iřmawen nsen d weysum nsen d umessař nsen s tmessi.
LEV 16:28 Wi ten ɣa isscemḍen, ad iṣebben arruḍ nnes, ad issird arrimet nnes s waman. Awarni as ad yadef ɣar řmargeḥ n řɛeskar.
LEV 16:29 Ta d ict n tewṣeyyet i řebda i kenniw. Deg uyur wiss sebɛa, deg [wass] wiss ɛecra n uyur, ad tesswaḍɛem ixef nwem uca war tteggem uřa d ict n řxedmet, niɣ wenni dd-ixeřqen di temmurt niɣ ubarrani nni izeddɣen di řwest nwem.
LEV 16:30 Minzi deg wass nni ad ittwagg weṣřaḥ i kenniw, maḥend ad tᵉttwassizedgem. Kenniw marra ad tᵉttwassizedgem zzat i wudem n SIDI.
LEV 16:31 [Ass nni] ad yiři d ijj wass n ssebt, arraḥet tmun i kenniw. Ad tesswaḍɛem ixef nwem, aqa-tt d ict n tewṣeyyet i řebda.
LEV 16:32 Akehhan, wenni dehnen u řeqqmen nitni deg wemcan n babas, maḥend ad yiři d akehhan, ad igg aṣřaḥ uca ad yarḍ arruḍ n řeqṭen, arruḍ iqeddsen.
LEV 16:33 Ad igg aṣřaḥ x Zzawect Iqeddsen u x Tqiḍunt n Umsagar u x uɛalṭar. Ad igg aṣřaḥ [ɛawed] x marra ikehhanen u x marra řgens n wegraw.
LEV 16:34 Ta d ict n tewṣeyyet i řebda i kenniw, ḥima ad ittwagg weṣřaḥ x marra ayt n Israil i marra ddnub nsen, ict n twařa deg useggʷas.” Uca igga am mammec iweṣṣa SIDI i Musa.
LEV 17:1 Issiweř SIDI ak-d Musa, inna:
LEV 17:2 “Siweř ak-d Harun d warraw nnes u ak-d marra ayt n Israil, ini asen: ‘Wa d awař i iweṣṣa SIDI, iqqar:
LEV 17:3 Kuř aryaz zi taddart n Israil, wenni iɣarṣen i ufunas niɣ i yezmar niɣ i iɣayḍ di řmargeḥ niɣ wenni [t] iɣarṣen barra i řmargeḥ,
LEV 17:4 [maca] war t yiwi d tawhibt ɣar wadaf n Uqiḍun n Umsagar, maḥend ad t-i-dd-issqarreb d tawhibt ɣar SIDI zzat n Tzeddiɣt n SIDI, ad as dd-ittwaḥseb idammen [nni]. Netta issizzeř idammen, [s uyenni] ad ittwaqes weryaz nni zi řgens nnes,
LEV 17:5 maḥend, xmi ɣa qeddmen ayt n Israil tiɣarṣa nsen, tinni [nnumen] ɣarrṣen barra deg iyyar, nitni ad tent awyen ɣar SIDI, ɣar ukehhan ɣar wadaf n Uqiḍun n Umsagar, maḥend ad tent qeddmen [din am] tɣarṣa n řehna i SIDI.
LEV 17:6 Akehhan ad izeǧeɛ idammen x uɛalṭar n SIDI ɣar wadaf n Uqiḍun n Umsagar u netta ad issbexxar tadunt am yict n řefwaḥet ittfuḥen i SIDI.
LEV 17:7 War ttqeddamen ɛad tiɣarṣa nsen i imuyan [ijennin], inni ḍeffaren nitni am ayt n farq-ccɣeř. Ta d ict n tewṣeyyet i řebda i nitni i [marra] jjiřat nsen.’
LEV 17:8 Ad asen tinid ɛawed: ‘Kuř aryaz n ayt n Israil u n ibarraniyyen, inni iǧan di řwesṭ nsen, wenni ixsen ad issbexxar ict n tɣarṣt n wecmaḍ niɣ ca n ṭaɣarṣt [i ɣares],
LEV 17:9 [maca] war tt-i-dd-yiwi ɣar wadaf n Uqiḍun n Umsagar, ḥima ad tt issewjed i SIDI, aryaz nni ad ittwaqess zi řgens nnes.’”
LEV 17:10 “Kuř ijj zi taddart n Israil niɣ zeg ibarraniyyen, inni izeddɣen di řwesṭ nsen, wenni i ɣa iccen idammen mammec ma ggin, Necc ad qeřbeɣ udem inu x řeɛmar nni iccen idammen nni, uca ad t qeḍɛeɣ zi řwesṭ n řgens nnes.
LEV 17:11 Minzi řeɛmar n arrimet deg idammen uca Necc wciɣ awem [idammen] x uɛalṭar, maḥend ad zzaysen ittwagg weṣřaḥ i řeɛmur nwem, minzi idammen d ina i ɣa iwyen aṣřaḥ i řeɛmar.
LEV 17:12 X uya aqa nniɣ i ayt n Israil: Uřa d ijj zzaywem war ittett zeg idammen, uřa d abarrani i izeddɣen di řwesṭ nwem war ittett idammen.
LEV 17:13 Kuř ijj zeg ayt n Israil u zeg ibarraniyyen i izeddɣen di řwesṭ nwem, wenni iymaren ijj n umuddar niɣ ijj n wejḍiḍ nni izemmar ad ittwacc, ad issizzeř idammen nnes uca ad ten issduriy s ucař.
LEV 17:14 Minzi řeɛmar n kuř aysum d idammen nnes, aqa aten [d ijjen] ak-d řeɛmar nnes. S uyenni nniɣ i ayt n Israil: ‘War ttᵉttem zeg idammen n mammec ma igga weysum!’, minzi řeɛmar n marra aysum d idammen nnes. Wenni zzaysen ɣa iccen, ad ittwaqess [zi řgens nnes].
LEV 17:15 Marra wenni i ɣa iccen zeg ict n řxecbet niɣ zeg ijj n [umuddar] imezzqen, ma netta zi tarwa n temmurt niɣ netta d ijj n ubarrani, ad iṣebben arruḍ nnes uca ad issird ixef nnes s waman uca ad yiři ixmej ař tameddit. [Awarni aya] ad yiři izdeg.
LEV 17:16 Mařa war issird [arruḍ] u war issird arrimet nnes, [xenni] ad yarbu řmuɛṣiyyet nnes.”
LEV 18:1 Issiweř SIDI ak-d Musa, inna:
LEV 18:2 “Siweř ak-d ayt n Israil uca ini asen: ‘Necc d SIDI, AREBBI nwem!
LEV 18:3 War tteggem am mammec tteggen di temmurt n Miṣra mani tuɣa tzeddɣem kenniw, u war tᵉtteggem am mammec tteggen di temmurt n Kenɛan mani kenniw ɣa nedheɣ, u war tᵉtteggem ɛlaḥsab tiweṣṣa nsen.
LEV 18:4 Ad teggem lfarayiḍ inu uca ad teḥḍam tiweṣṣa inu, maḥend ad daysen tuyurem: Necc d SIDI, AREBBI nwem!
LEV 18:5 Ad teḥḍam tiweṣṣa inu d lfarayiḍ inu: bnadem nni tent itteggen, ad zzaysent iddar, Necc d SIDI!
LEV 18:6 Uřa d ijj ad dd-iqarreb ɣar ca n yijjen zi raǧ nnes, ḥima ad issɛarra řɛar nnes: Necc d SIDI.
LEV 18:7 War ttessɛarri ca řɛar n babac d řɛar n yemmac. Aqa-tt d yemmac, war ttessɛarri ca řɛar nnes.
LEV 18:8 Řɛar n temɣart n babac war t ttessɛarri ca. Aqa-t d řɛar n babac.
LEV 18:9 [X] řɛar n učmac, yeǧis n babac niɣ yeǧis n yemmac, niɣ nettat tᵉttwaxřeq-dd di taddart niɣ barra i taddart, aqa řɛar nnes war t tessɛarri ca.
LEV 18:10 [X] řɛar n yeǧis n mmic niɣ n yeǧis n yeǧic, war ttessɛarri ca řɛar nsen minzi aqa d řɛar nnec.
LEV 18:11 War ttessɛarri ca řɛar n yeǧis n temɣart n babac, tenni dd-ittwaxeřqen i babac. Aqa-tt d učmac.
LEV 18:12 War ttessɛarri ca řɛar n učmas n babac. Aqa-tt d raǧ n babac.
LEV 18:13 War ttessɛarri ca řɛar n učmas n yemmac, minzi nettat d raǧ n yemmac.
LEV 18:14 War ttessɛarri ca řɛar n umas n babac u war dd-ttqarrabed ɣar temɣart nnes, aqa-tt d ɛentic.
LEV 18:15 War ttessɛarri ca řɛar n temɣart n mmic, aqa-tt d tamɣart n mmic. War ttessɛarri ca řɛar nnes.
LEV 18:16 War ttessɛarri ca řɛar n temɣart n umac, aqa-t d řɛar n umac.
LEV 18:17 War tessɛarri ca řɛar n temɣart d yeǧis. War dd-ttawi ca yeǧis n mmis niɣ yeǧis n yeǧis, maḥend ad tessɛarrid řɛar nnes. Aqa atent d raǧ [nnec], aqa-tt d ict n tmeɛmuč [ifesden].
LEV 18:18 War dd-ttawi tamɣart [d tacna] ak-d učmas maḥend ad tt tɣenned [ammu], xmi ɣa tessɛarrid řɛar nnes am ɛad teddar.
LEV 18:19 War dd-ttqarrab ca ɣar ict n temɣart xmi ɣa teɛzeř ixef nnes zi ssibbet n řexmej nnes ḥima ad tessɛarrid řɛar nnes.
LEV 18:20 War ttᵉṭṭeṣ ak-d temɣart n jjar nnec, maɣar [ammu] i ɣa tfesded ixef nnec zzayes.
LEV 18:21 War ttejji arraw nnec ad ẓwan ɣar Mulak, war ssexsara Isem n AREBBI nnec, Necc d SIDI!
LEV 18:22 War ttᵉṭṭeṣ ca ak-d ca n weryaz am tᵉṭṭeṣed ak-d temɣart. Aqa-tt d jjɛifect.
LEV 18:23 War fessed ca ixef nnec ak-d ca n řebhimet am tfeḥḥřed ixef nnec akides, u tamɣart war tᵉttbeddi zzat i řebhimet maḥend ad tfesded ixef nnes zzayes. Aqa d ijj n uxeǧeḍ [ifesden].
LEV 18:24 War fessdem ca ixef nwem s marra timesřayin-a, minzi řegnus nni i ɣa ssuffɣeɣ zzat i uɣembub nwem, tuɣa fessden ixef nsen s marra timesřayin-a.
LEV 18:25 [S uyenni] tedweř temmurt tefsed uca Necc ad as xeǧṣeɣ řmuɛṣiyyet nnes, uca ad tɛuqq temmurt imezdaɣ nnes.
LEV 18:26 [Maca] kenniw ad teḥḍam tiweṣṣa d lfarayiḍ inu, war tteggem uřa d ict n řḥajjet zi marra jjɛayef-a, niɣ wenni zi tarwa n temmurt uřa d abarrani nni izeddɣen di řwesṭ nwem.
LEV 18:27 Minzi iryazen n temmurt, [inni tuɣa] qbeř nwem, aqa ggin marra jjɛayef-a uca [ammu i] tedweř temmurt tefsed.
LEV 18:28 War ttejji tammurt ad kenniw tɛuqq umi tt tfessdem, am mammec tɛuqq [temmurt] řgens nni tuɣa [din] qbeř nwem.
LEV 18:29 Minzi marra inni iggin ca zi marra jjɛayef-a, aqa řeɛmur i ɣa iggin [ammu], ad ttwaqeḍɛen zi řgens nsen.
LEV 18:30 Ad teḥḍam min d awem umureɣ, maḥend war tḍeffarem tiweṣṣa yurṣuḍen am mammec tt ggin [řegnus] qbeř nwem. War zzaysent tfessdem ixef nwem, Necc d SIDI, AREBBI nwem!’”
LEV 19:1 Issiweř SIDI ɣar Musa, inna:
LEV 19:2 “Siweř ak-d marra tamesmunt n ayt n Israil uca ini asen: ‘Ittxeṣṣa ad tiřim d imqeddasen, minzi Necc d SIDI, AREBBI nwem, aqa ayi d amqeddas!
LEV 19:3 Kuř ijj ad iweqqar yemmas d babas uca ussan inu n ssebt ad ten teḥḍam, Necc d SIDI, AREBBI nwem!
LEV 19:4 War ddikkʷiřem ɣar l’aṣnam u war tteggem i yixef nwem [řexyařat] ifesyen d irebbiten. Necc d SIDI, AREBBI nwem!
LEV 19:5 Xmi ɣa tqeddmen taɣarṣt n řehna i SIDI, [xenni] ad tt tqeddmem s ijj n webrid i zi ɣa tᵉttwaqebřem s arḍa.
LEV 19:6 Ittxeṣṣa ad tᵉttwacc deg wass n tɣarṣt nwem uřa di tiwecca awarni as. Min iqqimen ař wass wiss třata ad ittwassecmeḍ s tmessi.
LEV 19:7 Mařa tᵉttwacc ɛad deg wass wiss třata, ad tiři d jjɛifect, war tᵉttwaqebbeř s arḍa.
LEV 19:8 Wi zzayes ɣa iccen ad yarbu řmuɛṣiyyet nnes, minzi issexsara min iǧan d amqeddas n SIDI uca [xenni] ad ittwaqess bnadem nni zi řgens nnes.
LEV 19:9 Mařa temjarem ṣṣabet n temmurt nwem, war mejjar cek iyyar nnec ař aɣezdis aneggar niɣ ad tjemɛed min iqqimen awarni tameyra nnec.
LEV 19:10 War řeqqeḍ uḍiř n umarjeɛ nnec kuřci, war ḥruw marra min din iqqimen [di temmurt] deg umarjeɛ nnec n uḍiř. Ad tejjed aya i umezřuḍ u i ubarrani, Necc d SIDI, AREBBI nwem!
LEV 19:11 War ttacar u war ssxarriq, uřa d ijj ad icmet jjar nnes.
LEV 19:12 War ttjaǧam ẓur s Yisem inu. War ssexsara Isem n AREBBI nnec. Necc d SIDI.
LEV 19:13 War ssḥissif jjar nnec niɣ ad [t] tacared. War ttᵉṭṭef řmunet n icewwařen zi ǧiřet ař tiwecca.
LEV 19:14 War ttekkʷar adehcur u war ttegg ca min di ɣa inqareḍ udarɣař, maca ittxeṣṣa ad teggʷeded AREBBI, Necc d SIDI!
LEV 19:15 Ɣar weḥkam war ttɣeccim. War sɛizzi amezřuḍ u war sɛeddu ɣar bu-txuba. Ittxeṣṣa ad tḥekmed x jjar nnec s usegged.
LEV 19:16 War ggur jar řgens nnec s unemmem, war ttbeddi x idammen n jjar nnec, Necc d SIDI!
LEV 19:17 War carreh umac deg wuř nnec. Ad tɛeřmed aɛřam i jjar nnec u war tkessid ddenb xak zi ssibbet nnes.
LEV 19:18 War ttentiqim niɣ ad txemmřed antaqem x tarwa n řgens nnec. Ad texsed jjar nnec amecnaw ixef nnec, Necc d SIDI.
LEV 19:19 Ad teḥḍam tiweṣṣa inu. War ttřeqqam ca řebhimet nnec ak-d ijj n marka nneɣni. War zarreɛ tnayen n markat n zzariɛet deg iyyar nnec u war yarreḍ arruḍ ittwaggen s tnayen n markat n ukettan.
LEV 19:20 Mařa aryaz iṭṭeṣ ak-d ict n temɣart, ict n tayya ixḍeb i-tt yijj n weryaz [nneɣni], maca war ittwaxeǧeṣ ɛad ttaman nnes n ufekki niɣ temmewc as třelli, [xenni] ad yiři řeḥsab, [maca] war ttwaneqqen ca, minzi nettat tuɣa [ɛad] war tᵉttwaḥar ca.
LEV 19:21 Netta ad yawi taɣarṣt n umarwas nnes i SIDI ɣar wadaf n Uqiḍun n Umsagar, ijj n icarri [am] tɣarṣt n umarwas.
LEV 19:22 Akehhan ad xas igg aṣřaḥ s icarri n tɣarṣt n umarwas zzat i wudem n SIDI i ddenb nnes i igga uca ddenb nnes i igga ad as ittwaɣfar.
LEV 19:23 Xmi ɣa tawḍem di temmurt uca teẓẓum ɛřam kuř ticejjura, maḥend ad zzaysent teccem, [xenni] war txettnem ‘řeɛdařyet nnes’, tenni d řɣiǧet nnes. Třata n iseggʷusa war tent txettnem, war zzaysent ttettem ca.
LEV 19:24 Deg useggʷas wiss arebɛa ad tiři marra řɣiǧet nnes tqeddes, i usemɣar i SIDI.
LEV 19:25 Deg useggʷas wiss xemsa ad teccem řɣiǧet nnes uca ṣṣabet nnes ad tt tewcem i yixef nwem. Necc d SIDI, AREBBI nwem!
LEV 19:26 War ttettem ca ak-d idammen. War iɛeddeř ad tgezznem niɣ ad tceɣřem ixef nwem s tbezgiwt.
LEV 19:27 War ttḥeffim acuwwaf n uzeǧif nwem deg wenneḍ nnes u war ttḍeyyiɛem ca tma n tmart nwem.
LEV 19:28 War iɛeddeř ad tcarḍem arrimet nwem zi ssibbet n yijj n umettin niɣ ad tarecmem tiggaz di [arrimet] nwem. Necc d SIDI!
LEV 19:29 War sdeǧi yeǧic, ad tt tarred d tamɣart n farq-ccɣeř, ḥima war tweṭṭi temmurt di farq-ccɣeř uca [xenni] ad teccur temmurt s řefḍiḥet.
LEV 19:30 Ad teḥḍam ussan inu n ssebt uca ad tweqqarem Zzawect inu Iqeddsen. Necc d SIDI!
LEV 19:31 War ttdikkwiřem ɣar yinni issawařan ak-d imettan u ɣar igezzanen, war ɣarsen arezzfem, ḥima ad zzaysen tᵉttwaxemjem. Necc d SIDI, AREBBI nwem!
LEV 19:32 Ad tekkared i wenni ɣar iǧa ucuwwaf icab uca ad tweqqared udem n iwessura uca ad teggʷeded AREBBI nnec. Necc d SIDI!
LEV 19:33 Xmi kidek ɣa izdeɣ ijj n ubarrani di temmurt nwem, war t ttḍeǧmem.
LEV 19:34 Abarrani, wenni ɣarwem izeddɣen, ad awem yiři am yijjen zi tarwa n temmurt nwem. Ad t texsed am yixef nnec, minzi tuɣa kenniw d ibarraniyyen di temmurt n Miṣra. Necc d SIDI, AREBBI nwem!
LEV 19:35 Xmi ɣa tiřim ɣar weḥkam war ttɣeccem ca s [řeɛbar n] tuzzeggart niɣ n ddqeř niɣ s [řeɛbar] n min dayes.
LEV 19:36 Ad ɣarwem yiři d ijj n řmizan nican d iẓra n řmizan nican uřa d ijj n ifa nican d ijj n uhinu nican, Necc d SIDI, AREBBI nwem, wenni kenniw dd-issuffɣen zi temmurt n Miṣra.
LEV 19:37 Ad teḥḍam marra tiweṣṣa d řumur inu uca ad ten teggem. Necc d SIDI!’”
LEV 20:1 Issiweř SIDI ak-d Musa, inna:
LEV 20:2 “Ad tinid i ayt n Israil: ‘Kuř ijjen zeg ayt n Israil niɣ zeg ibarraniyyen, wenni i ɣa iwcin zeg iḥenjiren nnes i Mulak, ad ittwaneɣ nican. Řgens n temmurt ad t yarjem.
LEV 20:3 Necc ad qeřbeɣ udem inu x weryaz nni uca ad t qeḍɛeɣ zi řgens nnes, minzi netta aqa iwca zi zzariɛet nnes i Mulak. S uyenni tuɣa issexmej Zzawect inu Iqeddsen uca issexsar Isem amqeddas inu.
LEV 20:4 Mařa tarwa n temmurt qqnen tiṭṭawin nsen x weryaz nni, xmi ɣa iwc netta zi zzariɛet nnes i Mulak, uca nitni war t neqqen,
LEV 20:5 xenni Necc ad qeřbeɣ udem inu x weryaz nni u x řaǧ nnes uca ad t qeḍɛeɣ zi jar řgens nnes, netta d marra inni issefsaden ixef nsen am ddekkwařen awarni as maḥend ad ssfesden ixef nsen ak-d Mulak.’”
LEV 20:6 “Bnadem nni i ɣa iqeřben ixef nnes ɣar yinni issawařan ak-d imettan d igezzanen, maḥend ad dewřen awarni asen am ssfesden ixef nsen, Necc ad qeřbeɣ udem inu x bnadem nni uca ad t qeḍɛeɣ zi jar řgens nnes.”
LEV 20:7 “Sqeddsem ixef nwem, iřim d imqeddasen, minzi Necc d SIDI, AREBBI nwem!
LEV 20:8 Ḥḍam tiweṣṣa inu uca ggem zzaysent. Necc d SIDI, wenni kenniw issqeddsen.”
LEV 20:9 “Maɣar kuř aryaz nni i ɣa ineɛřen x babas niɣ x yemmas, ad ittwaneɣ nican. Inɛeř x babas niɣ x yemmas, idammen nnes [aqa aten] xas.
LEV 20:10 [Mařa] ijj n weryaz izna ak-d temɣart n weryaz [nneɣni], [xenni] wenni tuɣa izennan ak-d temɣart n jjar nnes ad ittwaneɣ nican, wenni iznan d tenni iznan.
LEV 20:11 [Mařa] ijj n weryaz, am iṭṭeṣ ak-d temɣart n babas, aqa issɛurri řɛar n babas, [xenni] nitni s tnayen ad ttwanɣen nican. Idammen nsen aqa aten xasen.
LEV 20:12 [Mařa] ijj n weryaz iṭṭeṣ ak-d temɣart n mmis, [xenni] nitni s tnayen ad ttwanɣen nican. Aqa ggin ijj n uxeǧeḍ ifesden. Idammen nsen aqa aten xasen.
LEV 20:13 [Mařa] ijj n weryaz iṭṭeṣ ak-d ijj n weryaz nneɣni am mammec itteṭṭeṣ [weryaz] ak-d ict n temɣart, [xenni] aqa nitni s tnayen idsen ggin ict n řefḍiḥet temɣar. Ad ttwanɣen nican. Idammen nsen [aqa aten] xasen.
LEV 20:14 [Mařa] imeřc ijj n weryaz ca n temɣart uřa d yemmas, aqa-tt d řefḍiḥet. Ad t sscemḍen s tmessi, netta d nitenti [s tnayen], ḥima xenni war tᵉttiři [ɛad] d řefḍiḥet di řwesṭ nwem.
LEV 20:15 [Mařa] ijj n weryaz iṣṣur ixef nnes ak-d ict n řebhimet, [xenni] ittxeṣṣa ad ittwaneɣ nican. Ittxeṣṣa [ɛawed] ad tenɣem řebhimet.
LEV 20:16 [Mařa] ca n temɣart tqarreb-dd ɣar ca n řebhimet mammec ma tegga, maḥend ad kides tfeḥḥeř, [xenni] ad tenɣed tamɣart d řebhimet. Ad ttwanɣen nican. Idammen nsen [aqa aten] xasen.
LEV 20:17 [Mařa] ijj n weryaz iṭṭef učmas, yeǧis n babas niɣ yeǧis n yemmas, uca iẓra řɛar nnes uca nettat teẓra řɛar nnes, aqa-tt d řefḍiḥet. Ad ttwanɣen [s tnayen] zzat i tiṭṭawin n tarwa n řgens nsen. Aqa issɛurri řɛar n učmas, ad yarbu řmuɛṣiyyet nnes.
LEV 20:18 [Mařa] ijj n weryaz iṭṭeṣ ak-d ict n temɣart tenni x iǧa idammen uca aqa issɛurri řɛar nnes, issɛurri anu [n idammen] nnes, uca nettat simant nnes tessɛurri anu n idammen nnes, [xenni] ad ttwaqeḍɛen s tnayen zi řwesṭ n řgens nsen.
LEV 20:19 War sɛarri ca učmas n yemmac niɣ učmas n babac, minzi [xenni] issfeṭṭaḥ [bnadem] řɛar n raǧ nnes. Nitni ad arbun řmuɛṣiyyet nsen.
LEV 20:20 [Mařa] ijj n weryaz, wenni ittᵉṭṭṣen ak-d ɛentis, aqa issɛurri řɛar n ɛemmis, ad arbun nitni řmuɛṣiyyet nsen. Ad mmten břa tarwa.
LEV 20:21 [Mařa] ijj n weryaz yiwi tamɣart n umas, [aqa] man aya d [aɛeddi] x weɛzař [n temɣart]. Aqa issɛurri řɛar n umas. Ad iřin břa iḥenjiren.’”
LEV 20:22 “Ḥḍam marra tiweṣṣa inu d marra lfarayiḍ inu uca ggem tent, maḥend war kenniw tᵉttɛuqqi temmurt mani kenniw i ɣa nedheɣ, ḥima ad dayes tzedɣem.
LEV 20:23 War ggurem x tebridt n tweṣṣa n řgens nni ɣa ssuffɣeɣ zzat i wudem nwem, minzi nitni ggin marra timesřayin-a u [s uya] carrheɣ ten.
LEV 20:24 Necc nniɣ awem: Kenniw ad twartem tammurt nsen uca ad awem tt-i-dd wceɣ d řwart, ict n temmurt ifeyyḍen s uɣi d tamment. Necc d SIDI, AREBBI nwem, wenni kenniw ifarzen zi jar řegnus.
LEV 20:25 [X uya] kenniw ad tmeyyzem jar řebhayem n řeḥřař d yinni ixemjen u jar ijḍaḍ ixemjen d yinni n řeḥřař. War ssexsaram řeɛmuř nwem ak-d [ca] n řebhimet niɣ ak-d [ca] n wejḍiḍ niɣ ak-d [ca] zi marra min ittbuɛen x temmurt, [marra] min d awem ḥarrmeɣ, ḥima ad t tḥesbem d řexmej.”
LEV 20:26 “Aqa kenniw ad ayi tiřim d imqeddasen, minzi Necc d SIDI d amqeddas uca Necc farzeɣ kenniw zi řegnus, ḥima ad tiřim inu.
LEV 20:27 Mařa ijj n weryaz niɣ ict n temɣart ɣares buḥbeř n uɛezzem n imettan niɣ n tgezzant, [xenni] ad ttwanɣen nican. Ad ten arejmen. Idammen nsen [aqa aten] xasen.”
LEV 21:1 Inna SIDI i Musa: “Siweř ak-d ikehhanen, arraw n Harun, uca ini asen: ‘War iɛeddeř i uřa d ijj [zzaywem] ad issexmej ixef nnes s ijj n umettin jar řgens nnes.
LEV 21:2 mɣir s raǧ nnes yudsen, s yemmas niɣ s babas niɣ s mmis niɣ s yeǧis niɣ s umas.
LEV 21:3 Uřa s učmas nni d taɛzarct, tenni d řaǧ nnes yudsen u war ɣares tuɣi weryaz, aqa iɛeddeř ad zzayes issexmej ixef nnes.
LEV 21:4 Bab [n taddart] war issxemmaj ixef nnes jar řgens nnes. S uya ittwaf issexsar ixef nnes.”
LEV 21:5 “War tteggen ca n wemcan iquccar x izeǧif nsen, u war ttḥeffin ṭṭarf n tmart nsen u war carrḍen acarreḍ deg weysum nsen.
LEV 21:6 Ad iřin d imqeddasen i AREBBI nsen uca war feṭṭḥen Isem n AREBBI nsen, minzi aqa d nitni i ittawyen tiwhibin n tmessi ɣar AREBBI, tinni d macca n AREBBI nsen. S uya ad iřin d imqeddasen.
LEV 21:7 War iɛeddeř ad awyen tamɣart nni iǧan d lfasda niɣ icten tᵉttwaɣṣeb. Uřa d ict n temɣart nni ittwaǧfen zeg weryaz nnes, war tt ttiwyen, minzi [akehhan] d amqeddas i AREBBI nnes.
LEV 21:8 Ad t tḥesbed d amqeddas, minzi netta ittawi macca n AREBBI nnec. Ad yiři d amqeddas i cek, minzi Necc d amqeddas, [Necc d] SIDI wenni kenniw issqeddsen.”
LEV 21:9 “Mařa yeǧis n ijj n weryaz [nni iǧan d] akehhan tessefḍeḥ ixef nnes s farq-ccɣeř [nnes], [xenni] aqa tessefḍeḥ babas uca ittxeṣṣa as ad tᵉttwassecmeḍ s tmessi.”
LEV 21:10 “Arrays n ikehhanen jar aytmas, wenni x uzeǧif nnes tᵉttwafarreɣ zzect n wedhan u wenni ittwařeqqmen, maḥend ad yarḍ arruḍ [n ukehhan], netta war izemmar ad iḍřeq i [ucuwwaf x] uzeǧif nnes niɣ ad icarreg arruḍ nnes.
LEV 21:11 War iɛeddeř ad dd-iqarreb ɣar ijj n umettin, [ɛad] s babas d yemmas war iɛeddeř ad issexmej ixef nnes.
LEV 21:12 War itteffeɣ zi Zzawect Iqeddsen, ḥima war issexsara Zzawect Iqeddsen n AREBBI, minzi ttaj [n weɛzař] n zzect n wedhan n AREBBI nnes aqa-t xas. Necc d SIDI!
LEV 21:13 Ad yawi ict n teɛzarect d tamɣart.
LEV 21:14 War ittiwi tajjač niɣ taneǧaft niɣ tenni ittwaɣeṣben [d tamɣart], maca ad yawi ict n teɛzarect zi řgens nnes d tamɣart.
LEV 21:15 War issexsara zzariɛet nnes jar řgens nnes, minzi Necc d SIDI, wenni t issqeddsen.”
LEV 21:16 Issiweř SIDI ak-d Musa, inna:
LEV 21:17 “Siweř ak-d Harun, ini: ‘Uřa d ijj zi zzariɛet nnec di [marra] jjiřat nsen i di iǧa ca n uneɛḍab, ad dd-iqarreb, ḥima ad yawi macca [n tewhibt] n AREBBI nnes.
LEV 21:18 Minzi uřa d ijj n weryaz war dd-ittqarrib ca s yijj n řɛib, ma d adarɣař i iǧa niɣ d aqidar niɣ s ca war iḥři niɣ ɣares ṣṣifet tfarɣ
LEV 21:19 niɣ ijj n weryaz yarẓ as uḍar niɣ afus
LEV 21:20 niɣ bu-teɛrurt niɣ [ḥed yařwes di ca n] yijj n ttejjař niɣ s ict n tiṭṭ tuff niɣ s jdam niɣ s ict n ccamet texsar niɣ s iqeǧařen idgedgen.
LEV 21:21 War iɛeddeř i uřa d ijj n weryaz zi zzariɛet n ukehhan Harun, wenni di iǧa ca n řɛib, ad ireḥḥeg, maḥend ad iqeddem tiwhibin n tmessi n SIDI. Aqa dayes aneɛḍab, war izemmar ad iffeɣ maḥend ad iqeddem macca [n tewhibt] n AREBBI nnes.
LEV 21:22 Zi macca [n tewhibt] n AREBBI nnes iɛeddeř ad zzayes yecc, am zi min iǧan iqeddsen qaɛ am zi min iqeddsen.
LEV 21:23 Maca war iɛeddeř ad dd-iqarreb ɣar uřeḥḥaf uřa ɣar uɛalṭar, minzi dayes ict n uneɛḍab, ḥima war issexsara Tizawiyyin Iqeddsen inu, minzi Necc d SIDI wenni ten issqeddsen.’”
LEV 21:24 [Ammu] i issiweř Musa ak-d Harun u ak-d warraw nnes u ak-d marra ayt n Israil.
LEV 22:1 Issiweř SIDI ak-d Musa, inna:
LEV 22:2 “Siweř ak-d Harun u ak-d warraw nnes, maḥend, [mařa ittxeṣṣa], war ttakkwaḍen ɣar tewhibin iqeddsen n ayt n Israil tinni d ayi ssqeddsen, ḥima war ssexsaran Isem amqeddas inu. Necc d SIDI!
LEV 22:3 Ini asen: ‘Marra aryaz zi zzariɛet nwem di [marra] jjiřat nwem, wenni dd ɣa iqarrben ɣar tewhibin iqeddsen, tinni ssqeddsen ayt n Israil i SIDI, am ixmej netta, aqa ad ittwaqess řeɛmar nni zi zzat i wudem inu. Necc d SIDI.
LEV 22:4 Uřa d ijjen zi zzariɛet n Harun nni di iǧa řbarṣ niɣ wenni ɣar iǧa useyyeř, war ittett zi tewhibin iqeddsen ař ɣa yiři izdig. Wenni iḥadan ca zi min ittwassxemjen s ijj n umettin niɣ s ijj n weryaz nni tuɣa s useyyeř n waǧu,
LEV 22:5 niɣ s ijj n weryaz nni iḥadan ca min ittbuɛen i zi idweř ixmej, niɣ [iḥada] ijj n bnadem i zi idweř ixmej s mammec ma tegga texmuji nnes,
LEV 22:6 řeɛmar nni iḥadan tmesřact niɣ bnadem nni ad yiři ixmej ař tameddit, war ittett zi tewhibin iqeddsen, mɣir awarni i ɣa issird arrimet nnes s waman.
LEV 22:7 [Xmi] dd ɣa teɣři tfuct, ad yiři izdig. Awarni aya ad yecc zi tewhibin iqeddsen, minzi aqa atent d macca nnes.
LEV 22:8 War ittett zeg ict n řxecbet niɣ zeg [ijj n umuddar] imezzqen, minzi zzayes i ɣa issexmej ixef nnes, Necc d SIDI!
LEV 22:9 Ad ḥḍan min xef ten weṣṣiɣ, ḥima war ssarebbun x yixef nsen ddenb u xenni ad zzayes mmten, xmi ɣa ssɛiǧten aya. Necc d SIDI wenni ten issqeddsen.
LEV 22:10 Uřa d ijj n ubarrani war ittett zi tewhibt iqeddsen. Amɛezzeb [i izeddɣen] jar ikehhanen uřa d acewwař war ttᵉtten zi tewhibt iqeddsen.
LEV 22:11 [Maca] mařa akehhan isɣa ijj n bnadem s nnuqart nnes, aqa iɛeddeř i wa maḥend ad yecc zi macca [n tewhibt] nnes, uřa i yinni dd-ittwaxeřqen di taddart nnes.
LEV 22:12 Mařa yeǧis n ukehhan tedweř d tamɣart n ijj n ubarrani, war tᵉttett ca zi [tewhibt] i dd-ittwassgeɛɛden zi tewhibin iqeddsen.
LEV 22:13 [Maca] mařa yeǧis n ukehhan aqa-tt d tajjač niɣ tᵉttwaǧef [zeg weryaz nnes] uca war ɣares aḥenjir uca tedweř-dd ɣar taddart n babas, am di temẓi nnes, [xenni] ad tecc zi macca [n tewhibt] n babas, [maca] uřa d ijj n ubarrani ad zzayes yecc.
LEV 22:14 Mařa ca n yijjen icca zi tewhibt iqeddsen s uweddar, [xenni] ad ɣares yarni tasɣart n texmusect uca ad yarr tawhibt iqeddsen ɣar ukehhan.
LEV 22:15 War iɛeddeř ad ssexsaren tiwhibin iqeddsen n ayt n Israil, tinni ssgeɛɛden nitni ɣar SIDI,
LEV 22:16 [ařami] i ɣa ssarbun amarwas n řmuɛṣiyyet [x ayt n Israyil], umi ɣa ccen nitni zi tewhibin nsen iqeddsen [i d yawyen nitni s yixef nsen], minzi Necc d SIDI, wenni ten issqeddsen.’”
LEV 22:17 Issiweř SIDI ak-d Musa inna:
LEV 22:18 “Siweř ak-d Harun d warraw nnes u ak-d marra ayt n Israil uca ini asen: ‘D man aya iggur i kuř ijjen zi taddart n Israil u i ibarraniyyen di Israil, wenni i ɣa yiwyen tawhibt nnes tenni dd-yusin ak-d marra řewɛud nsen d marra tiwhibin nsen nni wcin s řxaḍar, tenni qeddmen nitni d taɣarṣt n wecmaḍ i SIDI.
LEV 22:19 Maḥend ad kenniw yarr ad tiřim tᵉttwaqebbřem ittxeṣṣa ad tiři tewhibt d ijj n wewtem icnan qaɛ zeg ifunasen niɣ zeg izmaren niɣ zeg icarriyyen.
LEV 22:20 War iɛeddeř ad tqeddmem ca [n řmař] dayes aneɛḍab, minzi aya war kenniw dd-ittarri ad daywem ittwaf arḍa.
LEV 22:21 Mařa ijj n weryaz iqeddem ict n tɣarṣt n řehna ɣar SIDI, maḥend ad ikemmeř ijj n lwaɛd niɣ am yict n tewhibt s řxaḍar, [xenni ad tiři taɣarṣt d ijj n umuddar] icnan qaɛ zi řebhayem niɣ zeg wuǧi, ḥima ad dayes ittwaf arḍa. War iɛeddeř ad dayes yiři uřa d ijj n řɛib.
LEV 22:22 Min iǧan d adarɣař niɣ min ittwarẓen niɣ min di iǧan ijj n uyezzim yarezmen niɣ min di ǧant tfiḍřiwin niɣ jdam niɣ ccamet texsar war t-i-dd-tessqarrabem ca ɣar SIDI uca war zzayes ttiwyem tawhibt n tmessi i SIDI x uɛalṭar.
LEV 22:23 [Maca] ijj n ufunas niɣ ijjen zeg wuǧi i iqebḥen zi ssibbet n tuzzeggart niɣ tuquḍeḍt aṭṭas, iɛeddeř ad t-i-dd-tesswejded am yict n tewhibt s řxaḍar, maca war dayes ittwaf arḍa i yijj n lwaɛd.
LEV 22:24 Min idgeddgen, min iřebzen, min imezzqen, min ittwaqessen war t ttiwyem ɣar SIDI, war tteggem [aya] di temmurt nwem.
LEV 22:25 Zeg ufus n mmis n ubarrani war ttqeddamem ca zi marra man aya uřa d [ict n tewhibt d macca] i AREBBI, minzi dayes řɣecc nsen uřa d nneqṣan nnes, [man aya] war ittwaqebbiř ca di ṭṭweɛ nwem.’”
LEV 22:26 Issiweř SIDI ak-d Musa, inna:
LEV 22:27 “Xmi dd-ixeǧeq ufunas niɣ izmar niɣ iɣayḍ, [xenni] ad yiři sadu [ḥeṭṭu] n yemmas sebɛa n wussan. Zeg wass wiss tmenya u awarni as ad iṣřeḥ i yarḍa am tewhibt n tmessi i SIDI.
LEV 22:28 War iɛeddeř ad tɣarṣed i ufunas niɣ i yijjen zeg wuǧi ak-d mmis deg wass d ijj.
LEV 22:29 X minni texsem ad tqeddmem tawhibt n uqadi i SIDI, qeddem [xenni] min iṣeřḥen i yarḍa nwem.
LEV 22:30 Ad tᵉttwacc deg wass nni nnit. War zzayes ttejjim ca ař ṣṣbeḥ. Necc d SIDI!
LEV 22:31 Ad teḥḍam tiweṣṣa inu uca ad zzaysent teggem. Necc d SIDI!
LEV 22:32 War ssexsaram Isem inu iqeddsen, [ḥima] Necc ad ttwaqeddseɣ di řwest n ayt n Israil. Necc d SIDI, wenni kenniw issqeddsen,
LEV 22:33 d wenni kenniw dd-issuffɣen zi temmurt n Miṣra, ḥima ad iřiɣ d AREBBI i kenniw. Necc d SIDI!’”
LEV 23:1 Issiweř SIDI ak-d Musa, inna:
LEV 23:2 “Siweř ak-d ayt n Israil uca ini asen: ‘Řeɛyudat ittwaggen n SIDI, inni x ɣa tbarrḥem, ad iřin d imuniten iqeddsen, aqa atent d řeɛyudat inu ittwaggen.
LEV 23:3 Setta n wussan ad txedmem, maca deg wass wiss sebɛa ad yiři d ssebt, arraḥet imun, ijj n umuni iqeddsen. Ittxeṣṣa war dayes txeddmem. Aqa d ssebt i SIDI di marra tizeddiɣin nwem.
LEV 23:4 Aqa d ina d řeɛyudat ittwaggen n SIDI, imuniten iqeddsen, inni i ɣa tbarrḥem deg wussan nsen ittwaggen.
LEV 23:5 Deg uyur amezwaru, deg [wass] wiss arbeɛṭac n uyur, jar beddu n wezyen n wass ař dd-tewḍa tmeddit, ad tiři d Tɣarṣt n Useɛdu n SIDI.
LEV 23:6 Deg wass wiss xemmesṭac n uyur nnit, [ad yiři] d Řɛid n Weɣrum břa Antun i SIDI. Sebɛa n wussan ad teccem aɣrum břa antun.
LEV 23:7 Ass amezwar ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg.
LEV 23:8 Sebɛa n wussan [kemmřen] ad tawyem ict n tewhibt n tmessi i SIDI uca deg wass wiss sebɛa ad din yiři ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg.’”
LEV 23:9 Issiweř SIDI ak-d Musa, inna:
LEV 23:10 “Siweř ak-d ayt n Israil, ini asen: ‘Mařa tiwḍem ɣar temmurt nni d awem ɣa wceɣ uca ad temjarem ṣṣabet nnes, xenni ad tawyem ict n tqebbiḍt zi tmezwarut n ṣṣabet nwem ɣar ukehhan.
LEV 23:11 Uca netta ad issenhezz taqebbiḍt [nni] zi ssa ɣar da zzat i wudem n SIDI, maḥend ad tᵉttwaqebřem s arḍa. Di tuffut awarni ssebt ad tt issenhezz ukehhan.
LEV 23:12 Deg wass min di i ɣa tenhezzem taqebbiḍt, ad tesswejdem [ɛawed] ijj n izmar icnan qaɛ n ijj n useggʷas am yict n tɣarṣt n wecmaḍ i SIDI.
LEV 23:13 Ad tiři tewhibt [n řɣiǧet] zi tnayen n teɛcuray n ijj n ifa n waren azdad ixeǧḍen s zzect, aqa-tt d ict n tewhibt n tmessi s ict n řefwaḥet ittfuḥen i SIDI, u tawhibt nnes n useyyeb ad tiři d binu, ijj n arbeɛ zeg ijj n uhinu.
LEV 23:14 War ttᵉttem aɣrum uřa d tidrin yurfen niɣ tizizawin ař ass min di dd-tiwyem tawhibt nwem ɣar AREBBI. Aqa-tt d ict n tewṣeyyet i řebda i [marra] jjiřat nwem mani ma tzeddɣem.
LEV 23:15 [Awarni as] ad tḥesbem s řmeqřub i yixef nwem zi ṣṣbeḥ awarni i ssebt, zeg wass min di dd-tiwyem taqebbiḍt n tewhibt n wenhezzi: ittxeṣṣa ad iřin sebɛa n wussan n ssebt kemmřen.
LEV 23:16 Ad tḥessbem xemsin n wussan ař tuffut n ssebt wiss sebɛa. Xenni ad tawyem ict n tewhibt [n řɣiǧet] n jdid i SIDI.
LEV 23:17 Ad dd-tawyem tnayen n tecnifin n weɣrum i wenhezzi zeg imucan mani tzeddɣem. Ad iřint zi tnayen n teɛcuray [n yijj n ifa] n waren azdad, ggwint s wentun. Aqa atent d timenza i SIDI.
LEV 23:18 Kenniw ad dd-tessqarrbem ak-d weɣrum [ɛawed] sebɛa n izmaren cnan qaɛ n ijj n useggʷas d ijj n ufunas - ameẓyan n tfunast - d tnayen n icarriyyen. Ad iřin i tɣarṣt n wecmaḍ i SIDI ak-d tewhibt nsen [n řɣiǧet] d tewhibin nsen n useyyeb, [aqa] d ict n tewhibt n tmessi s ict n řefwaḥet ittfuḥen i SIDI.
LEV 23:19 Ad tesswejdem [ɛawed] ijj n umyan zeg iɣayḍen d taɣarṣt n ddenb u tnayen n izmaren n ijj n useggʷas d tɣarṣt n řehna.
LEV 23:20 Ad ten issenhezz ukehhan ak-d weɣrum n tamenzut zi ssa ɣar da am yict n tewhibt n wenhezzi zzat i wudem n SIDI, uřa d tnayen n izmaren. Ad iřin qeddsen i SIDI, i ukehhan.
LEV 23:21 Deg wass nnit ad tbarrḥem i yijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. [Aqa-tt] d ict n tewṣeyyet i řebda mani ma i ɣa tzedɣem i [marra] jjiřat nwem.
LEV 23:22 Xmi ɣa temjarem řɣiǧet n temmurt nwem, war mejjar ař aneggar n ṭṭarf n yeyyar nnec, u min iqqimen n řɣiǧet nnec war t tkessed ca. Ittxeṣṣa ad tejjem [cwayt] i umezřuḍ u i ubarrani. Necc d SIDI, AREBBI nwem!’”
LEV 23:23 Issiweř SIDI ak-d Musa, inna:
LEV 23:24 “Siweř ak-d ayt n Israil, ini asen: ‘Deg uyur wiss sebɛa, deg [wass] amezwaru n uyur, ad yiři d ssebt i kenniw, ijj n wass n řidaret ak-d usuḍi s wesruddeḥ deg uyicc n icarri, ijj n umuni iqeddsen.
LEV 23:25 War tteggem uřa d ict n řxedmet i ittxeṣṣan ad tᵉttwagg. Ad dd-tesqarrbem ict n tewhibt n tmessi i SIDI.’”
LEV 23:26 Issiweř SIDI ak-d Musa, inna:
LEV 23:27 “Deg [wass] wiss ɛecra n uyur wiss sebɛa ad yiři d Ass n Weṣřaḥ. Ad teggem ijj n umuni iqeddsen i kenniw. Ad tesswaḍɛem ixef nwem uca ad tqeddmem ict n tewhibt n tmessi i SIDI.
LEV 23:28 War tteggem uřa d ict n řxedmet deg wass nni nnit, minzi aqa-t d Ass n Weṣřaḥ, maḥend ad ittwagg weṣřaḥ i kenniw zzat i wudem n SIDI, AREBBI nwem.
LEV 23:29 Minzi marra bnadem nni war isswaḍɛen ixef nnes deg wass nni nnit, ad ittwaqess zi řgens nnes.
LEV 23:30 Kuř bnadem nni i ɣa iggin ca n řxedmet deg wass nni nnit, Necc ad teḥḥiɣ bnadem nni zi řwesṭ n řgens nnes.
LEV 23:31 War tteggem uřa d ict n řxedmet. [Aqa-tt] d ict n tewṣeyyet i řebda i [marra] jjiřat nwem mani ma i ɣa tzedɣem.
LEV 23:32 Ad yiři d ijj n ssebt n arraḥet tmun i kenniw. Ad iřin řeɛmur nwem ḥṣaren. Deg [wass] wiss tesɛa n uyur, di ǧiřet, zeg uɛecci ɣar uɛecci nneɣni ad teḥḍam arraḥet nwem n ssebt.”
LEV 23:33 Issiweř SIDI ak-d Musa, inna:
LEV 23:34 “Siweř ak-d ayt n Israil uca ini: ‘Deg wass wiss xemmesṭac n uyur wiss sebɛa [ad yiři] d Řɛid n Iɛuccuten i SIDI, sebɛa n wussan.
LEV 23:35 Deg wass amezwaru ad yiři yijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg.
LEV 23:36 Sebɛa n wussan ad tqeddmem tiwhibin n tmessi ɣar SIDI. Deg wass wiss tmenya ad din yiři yijj n umuni iqeddsen uca ad tawyem ict n tewhibt n tmessi i SIDI. Aqa d ijj n umuni ifarzen [d amqeddes], war tteggem uřa d ict n řxedmet i ittxeṣṣan ad tᵉttwagg.
LEV 23:37 Tina d řeɛyudat ittwaggen n SIDI, tinni zi ɣa tbarrḥem d imuniten iqeddsen, maḥend ad tqeddmem ict n tewhibt n tmessi ɣar SIDI, ict n tɣarṣt n wecmaḍ d ict n tewhibt [n řɣiǧet,] ict n tewhibt i tɣarṣt d tewhibin n useyyeb, kuř ass min ittwaggen i wass nni,
LEV 23:38 barra i [tɣarṣa nwem n] wussan n ssebt n SIDI d tewhibin nwem n lwuɛud nwem d tewhibin nwem s řxaḍar, inni [tᵉttnumem] ad tent tewcem i SIDI.
LEV 23:39 Maca deg wass wiss xemmesṭac n uyur wiss sebɛa, xmi ɣa tessmunem řɣiǧet n temmurt, [xenni] ad tɛeyydem Řɛid n SIDI, sebɛa n wussan. Deg wass amezwaru [ad yiři] yijj n wass n ssebt uřa deg wass wiss tmenya [ad din yiři] yijj n wass n ssebt.
LEV 23:40 Deg wass amezwaru ad teksim řɣiǧet n tcejjura icewwaren: tiseḍwin n tini d tiseḍwin n tcejjura s tefray aṭṭas d [tseḍwin] n tcejjart n tnemřač n tɣezratin. Sebɛa n wussan ad tfarḥem zzat i wudem n SIDI, AREBBI nwem.
LEV 23:41 Ad tɛeyydem Řɛid [n Iɛuccuten] sebɛa n wussan deg useggʷas i SIDI. [Aqa-tt] d ict n tewṣeyyet i řebda i [marra] jjiřat nwem. Ad t tɛeyydem deg uyur wiss sebɛa.
LEV 23:42 Ad tzedɣem sebɛa n wussan deg iɛuccuten. Marra inni dd-ittwaxeřqen di Israil ad zedɣen deg iɛuccuten,
LEV 23:43 ḥima ad ssnen [marra] jjiřat nwem, belli Necc ggiɣ ad zedɣen ayt n Israil deg iɛuccuten, umi ten ssuffɣeɣ zi temmurt n Miṣra. Necc d SIDI, AREBBI nwem!’”
LEV 23:44 [Ammu] i issiweř Musa ak-d ayt n Israil x řeɛyudat ittwaggen n SIDI.
LEV 24:1 Issiweř SIDI ak-d Musa, inna:
LEV 24:2 “Umur ayt n Israil maḥend ad ac dd-awyen i tfawt zzect iṣfan ttwaddzen tt-i-dd zi zzitun, ḥima ad tejjem tafawt tareqq řebda.
LEV 24:3 Harun ad tt isettef řebda zzat i wudem n SIDI zi ǧiřet ař ṣṣbeḥ zzat n uřeḥḥaf n Cchadet deg Uqiḍun n Umsagar. [Aqa-tt] d ict n tewṣeyyet i řebda i [marra] jjiřat nwem.
LEV 24:4 Ittxeṣṣa as ad isettef řebda [tiftiřin n] tfawin i iǧan x řqendiř izdigen zzat i wudem n SIDI.
LEV 24:5 Ad teksid waren azdad uca ad zzayes tᵉssenggʷed tenɛac n řemsemnat. Ict n temsemmemt ad tiři zi tnayen n teɛcurin [n yijj n ifa n waren azdad].
LEV 24:6 Ad tent tegged di tnayen n isettifen, setta deg ijj n usettif x tzewḍa izdigen zzat i wudem n SIDI.
LEV 24:7 Ad tegged x [kuř] asettif jjawi iṣfan nni ɣa yiři i řidaret ak-d weɣrum. [Aqa-tt] d ict n tewhibt n tmessi i SIDI.
LEV 24:8 Di kuř ass n ssebt ad isettef aya řebda zzat i wudem n SIDI di ṭṭweɛ n ayt n Israil. [Aqa-t] d ijj n Řɛahd i řebda.
LEV 24:9 Ad yiři [weɣrum] i Harun d warraw nnes, inni t ɣa iccen deg wemcan amqeddas, minzi i netta i iǧa uya d amqeddas qaɛ zi tewhibin n tmessi n SIDI. [Aqa-tt] d ict n tewṣeyyet i řebda.”
LEV 24:10 Mmis n ict n temɣart Tisra’ilect teffeɣ ɣar barra. Netta tuɣa-t d mmis n ijj n weryaz d Amiṣri izeddɣen jar ayt n Israil. Mmis n temɣart-a Tisra’ilect u ijj n weryaz Israyili mmenɣen ak-d wayawya di řmargeḥ n řɛeskar.
LEV 24:11 Mmis n temɣart Tisra’ilect iceqqef deg Yisem uca ikkʷar. [Xenni] iwyen t ɣar Musa. Yemmas, qqaren as Cilumiya, yeǧis n Dibri, zi teqbič n Dan.
LEV 24:12 Ggin ad xas ḥḍan ařami d asen i ɣa immeř [min i ɣa ggen] zeg uqemmum n SIDI.
LEV 24:13 Uca issiweř SIDI ak-d Musa, inna:
LEV 24:14 “Suffeɣ wenni ineɛřen barra i řmargeḥ n řɛeskar uca ejj marra inni d as isřin ad ssarsen ifassen nsen x uzeǧif nnes. [Xenni] ad t tarjem tmesmunt am tekmeř.
LEV 24:15 Ad tessiwřed ak-d marra ayt n Israil uca ad asen tinid: ‘Kuř aryaz i ɣa ineɛřen AREBBI, ad yarbu ddenb nnes.
LEV 24:16 Wenni ittceqqafen deg Yisem n SIDI, ad ittwaneɣ nican!’ Marra tamesmunt ad t tarjem. Ad ittwaneɣ ubarrani uřa d wenni dd-ittwaxeřqen di temmurt mařa ittceqqef deg Yisem.”
LEV 24:17 “Mařa ijj n weryaz inɣa řeɛmar n ca n bnadem nneɣni, [xenni] ad ittwaneɣ nican.
LEV 24:18 [Maca] wenni inɣin řeɛmar n ict n řebhimet, ad yarr řeɛmar s řeɛmar.
LEV 24:19 Mařa ijj n weryaz issyizem jjar nnes, [xenni] ad zzayes ggen am mammec igga netta:
LEV 24:20 tareẓẓit s tareẓẓit, tiṭṭ s tiṭṭ, tiɣmest s teɣmest. Anect issyizzem netta ijj n bnadem, [ammu] i d as ɣa ggen [ɛawed].
LEV 24:21 Wenni inɣin ict n řebhimet, ad tt yarr, u wenni inɣin ijj n bnadem, ad ittwaneɣ [simant nnes].
LEV 24:22 Ad ɣarwem yiři d ijj n uzerf i ubarrani am i wenni dd-ixeřqen di temmurt, minzi Necc d SIDI, AREBBI nwem!”
LEV 24:23 [Xenni] inna Musa i ayt n Israil ad ssuffɣen wenni tuɣa ineɛɛřen barra i řmargeḥ n řɛeskar, ḥima ad t arejmen. Uca ayt n Israil ggin am mammec d as yumur SIDI i Musa.
LEV 25:1 Issiweř SIDI ak-d Musa x wedrar n Sina, inna:
LEV 25:2 “Siweř ak-d ayt n Israil uca ini asen: ‘Xmi ɣa tawḍem ɣar temmurt nni d awem ɣa wceɣ, xenni ad tareyyeḥ temmurt, ijj n wareyyeḥ n ssebt i SIDI.
LEV 25:3 Setta n iseggʷusa ad tzarɛed iyyar nnec uca setta n iseggʷusa ad tezbared tizayarin n umarjeɛ nnec uca ad tessmuned řɣiǧet nnes,
LEV 25:4 maca deg useggʷas wiss sebɛa ad tiři ict n arraḥet n ssebt i temmurt, ijj n ssebt i SIDI. War tzarrɛed ca iyyar nnec u war tzebbared ca tizayarin n umarjeɛ nnec.
LEV 25:5 Min dd-iɣemmyen amenni waha, war t mejjarem u aḍiř war t zebbarem zi [tzayart] nnec i war ittwiḥidin. Ad yiři d ijj n useggʷas n ssebt i temmurt.
LEV 25:6 Ṣṣabet n arraḥet n ssebt n temmurt nnec ad awem tiři d macca, i cek, i yismeɣ nnec, i tayya nnec, i ucewwař nnec uřa i umɛezzeb nnec, inni akidek izeddɣen am yibarraniyyen.
LEV 25:7 Ṣṣabet nnes marra ad tiři d macca i řebhayem u i řmař nni [iǧan] di temmurt nnec.’”
LEV 25:8 “Ad tḥessbem kenniw [ɛawed] sebɛa n ssimanat n iseggʷusa, sebɛa wwet i-tt di sebɛa n iseggʷusa, maḥend ad awḍen wussan n sebɛa n simanat n iseggʷusa [munen] ɣar tesɛa u-rebɛin n iseggʷusa.
LEV 25:9 Xenni deg uyur wiss sebɛa, deg wass wiss ɛecra n uyur, ad tejjed asuḍi deg uyicc n icarri ad ittekk [x temmurt nwem] s wesruddeḥ. Deg Wass n Weṣřaḥ ad tejjem ad ittekk usuḍi deg uyicc n icarri x marra tammurt nwem.
LEV 25:10 Ad tessqeddsem aseggʷas n useggʷas wiss xemsin. Ad tbarrḥem s třelli i marra imezdaɣ di [marra] tammurt. Ad yiři d ijj n useggʷas n usřiwřew i kenniw uca ad dd-iɛqeb kuř aryaz ɣar wagřa nnes u ɣar raǧ nnes.
LEV 25:11 Aseggʷas n useggʷas wiss xemsin ad awem yiři d ijj n [useggʷas] n usřiwřew. War tzarrɛem u war tmejjarem min dd-iɣemmyen amenni waha, u war tzebbarem ca zi tzayart war ittwiḥidin,
LEV 25:12 minzi aqa d aseggʷas n usřiwřew! Aqa tzemmarem ad teccem řɣiǧet n yeyyar.
LEV 25:13 Deg useggʷas-a n usřiwřew ad dd-iɛqeb kuř ijjen ɣar wagřa nnes.”
LEV 25:14 “Meřmi cek ɣa tezzenzed ca i jjar nnec niɣ mařa tesɣid ca zeg ufus n jjar nnec, war iɛeddeř uřa d ijjen ad iɣebben wenneɣni.
LEV 25:15 [Ɛlaḥsab] řqedd n iseggʷusa zeg wami iǧa useggʷas n usřiwřew ad tesɣed [tammurt] zi jjar nnec u [ɛlaḥsab] řqedd n iseggʷusa n ṣṣabet ad kik yegg tamenziwt.
LEV 25:16 Ma aqa dinni ɛad aṭṭas n iseggʷusa ɣar zzat, xenni ad tarnid di ttaman n tmesɣiwt nnes u mařa aqa dinni ɛad drus n iseggʷusa ɣar zzat, xenni ad tessneqṣem di ttaman n tmesɣiwt nnes, minzi netta ad ac tt izzenz ɛlaḥsab řqedd n [iseggʷusa n] ṣṣabet.
LEV 25:17 War ittɣebbi ḥed jjar nnes. Ggʷed AREBBI nnec, minzi aqa Necc d SIDI, AREBBI nwem!”
LEV 25:18 “Ḍfarem tiweṣṣa inu, ḥḍam lfarayiḍ inu uca ggem zzaysent, ad tzedɣem [xenni] di temmurt di řaman.
LEV 25:19 Tammurt ad tewc řɣiǧet nnes u kenniw ad zzayes teccem ař ɣa tejjiwnem uca ad din tzedɣem di řaman.
LEV 25:20 Uca mařa tennim: ‘Min ɣa necc deg useggʷas wiss sebɛa? Xzar, war nzemmar ad nzarreɛ u war nzemmar ad nessmuni ṣṣabet nneɣ!’,
LEV 25:21 [xenni] deg useggʷas wiss setta Necc ad awem dd-ssekkeɣ lbaraka inu ḥima tammurt ad tewc rɣiǧet i třata n iseggʷusa.
LEV 25:22 Deg useggʷas wiss tmenya ad tzarɛem [ɛawed]. Uca ad teccem zi ṣṣabet taqdimt ař aseggʷas wiss tesɛa. Ař i ɣa tiři ṣṣabet nnes n jdid, ad teccem [ɛad] zi [ṣṣabet] taqdimt.”
LEV 25:23 “Tammurt war tᵉttmenzi i řebda, minzi tammurt aqa-tt Inu uca kenniw [xenni] d ibarraniyyen d imeɛzab ɣari.
LEV 25:24 S uya ittxeṣṣa kenniw ad tewcem ttesriḥ maḥend ad ifdi tammurt di marra tammurt i ɣarwem iǧan d wagřa.
LEV 25:25 Mařa umac iẓřeḍ uca izzenz ca zeg wagřa nnes, ad dd-yas umefdi nnes, řaǧ nnes yudsen, maḥend ad ifdi min izzenz umas.
LEV 25:26 Mařa aryaz war ɣares bu umefdi, [maca] afus nnes izemmar ad yaf min icfan, maḥend ad t ifdi,
LEV 25:27 [xenni] ad iḥseb iseggʷusa zeg wami tᵉttwammenz [temmurt] uca ad ixeǧeṣ min iqqimen i weryaz umi tt izzenz uca ad tt-i-dd-yarr ɣar wagřa nnes.
LEV 25:28 Mařa afus nnes war yufi řqedd, ḥima ad as dd-yarr min tuɣa izzenz, [xenni] min tuɣa izzenz ad iqqim deg ufus n wenni t isɣin ař [aseggʷas n] usřiwřew. [Maca] deg useggʷas n usřiwřew ad ittwafekk man aya uca ad t-i-dd-yarr ɣar wagřa nnes.”
LEV 25:29 “Mařa ca n yijjen izzenz taddart nnes deg ict n tendint umi dd-nnḍen s weɣbar [xenni] iɛeddeř ad yiři ufekki nnes ař d iɛdu ijj n useggʷas am ikmeř zi tmenziwt nnes. [Marra] ussan nni iɛeddeř ad tt ifdi.
LEV 25:30 [Maca] mařa war tᵉttwafdi di řmijař n ijj n useggʷas, [xenni] taddart di tendint nni dd-innḍen s weɣbar, ad tiři řebda i wenni tt isɣin, i [marra] jjiřat nnes. War tᵉttwafekk deg useggʷas n usřiwřew.
LEV 25:31 [Maca] tudrin nni n ředcur i umi war dd-inniḍ řeɣbar ad ttwaḥesbent am yijj n yeyyar n temmurt. Danita izemmar ad yiři řḥeqq n ufekki uca ad ittwafekk yeyyar deg useggʷas n usřiwřew.
LEV 25:32 [X] tneddam n Ilawiyyen, tudrin di tneddam n wagřa nsen, aqa Ilawiyyen ɣarsen řḥeqq i řebda ḥima ad tent fdin.
LEV 25:33 Mařa ca n yijjen ifda [i-tt] zeg [ufus n] Ilawiyyen, xenni ad tᵉttwafekk taddart i immenzen [i ijjen i war iǧin zeg Ilawiyyen], [tenni iǧan] di tendint n wagřa nnes, deg useggʷas n usřiwřew, minzi tudrin n tneddam n Ilawiyyen aqa atent d agřa nsen di řwesṭ n ayt n Israil.
LEV 25:34 Iyyar nni iqqnen ɣar tneddam, war ittmenzi, minzi [aqa-t] d agřa nsen i řebda.”
LEV 25:35 “Mařa umac iẓřeḍ uca ifassen nnes bdan ad arjijen din ɣarek, [xenni] ittxeṣṣa ad t-i-dd-tsennded maḥend ad ibedd, uřa d abarrani niɣ d amɛezzeb, maḥend ad iqqim ad ɣarek iddar.
LEV 25:36 War zzayes tkessid arriba uřa d arbeḥ, maca ad teggʷded AREBBI nnec, ḥima umac i din ɣarek ad iqqim iddar.
LEV 25:37 War d as ttic [tmenyat n] nnuqart s arriba u war d as ttic macca s warbeḥ.
LEV 25:38 Aqa Necc d SIDI, AREBBI nwem, wenni kenniw dd-issuffɣen zi temmurt n Miṣra, ḥima ad awem wceɣ tammurt n Kenɛan u ḥima ad iřiɣ d AREBBI i kenniw.”
LEV 25:39 “Mařa umac iẓřeḍ am kik iǧa uca immenz ac i cek, war t tᵉttarrid ad ixdem am yismeɣ.
LEV 25:40 Ad kik izdeɣ amecnaw acewwař, amecnaw ijj n umɛezzeb, uca ad ɣarek ixdem ař aseggʷas n usřiwřew.
LEV 25:41 [Xenni] ad xak iffeɣ, netta [simant nnes] ak-d tarwa nnes, uca ad idweř ɣar řaǧ nnes u ad idweř ɣar wagřa n řejdud nnes.
LEV 25:42 Minzi aqa aten d imsexarren inu inni ssuffɣeɣ Necc zi temmurt n Miṣra. War ttmenzin am mammec ittmenza ijj n ismeɣ.
LEV 25:43 War xas ttṣeǧeḍ s řeqsaḥet, maca ad teggʷded AREBBI nnec.
LEV 25:44 [X] ismeɣ nnec niɣ x tayya nnec, inni ɣarek ɣa yiřin, ad iřin zi řegnus i d ac dd-innḍen. Zzaysen ad tesɣed isemɣan d teyyawin.
LEV 25:45 Tzemmarem ad ten tesɣem zeg iḥenjiren n imeɛzab nni izeddɣen jar awem am yibarraniyyen u zi řaǧat nsen, inni akidwem iǧan, inni ten dd-ijjin di temmurt nwem. Nitni ad dewřen d agřa nwem.
LEV 25:46 Uca ad ten tejjed d řwart i iḥenjiren nwem awarni awem. Tzemmarem ad ten tarrem ad awem sexxaren řebda, [maca] x aytmatwem, ayt n Israil, war ttṣellṭem kuř ijj x wenneɣni s řeqsaḥet.”
LEV 25:47 “Mařa yiweḍ ufus n ijj n ubarrani niɣ n ijj n umɛezzeb [i izeddɣen] jar awem, uca umac i ɣares izeddɣen idweř iẓřeḍ uca ad izzenz ixef nnes i ubarrani nni izeddɣen ɣarek niɣ i yijjen zi jjadira n řaǧ n ubarrani nni,
LEV 25:48 [xenni] iɛeddeř, awarni ma izzenz ixef nnes, ad ittwafdi. Ijjen zeg aytmas ad t ifdi.
LEV 25:49 Iɛeddeř i ɛemmis niɣ i mmis n ɛemmis ad t ifdi niɣ ijjen zi raǧ nnes i-t-i-dd-yudsen, zi řwacun nnes, ad t ifdi, niɣ mařa ɣares s min zi, [xenni] iɛeddeř ad ifdi ixef nnes.
LEV 25:50 Ad igg řeḥsab ak-d wenni t isɣin zeg useggʷas min di izzenz ixef nnes ař aseggʷas n usřiwřew u ttaman n tmenziwt s nnuqart ad yiři ɛlaḥsab řqedd n iseggʷusa, [inni i ɣa ittwaḥesben] am wussan n ijj n ucewwař [ixeddmen] akides.
LEV 25:51 Mařa aqa din ɛad aṭṭas n iseggʷusa ɣar zzat, ad ixeǧeṣ maḥend ad ittwafdi anect n tesɣart n ttaman s [tmenyat n] nnuqart i zi ittwaseɣ.
LEV 25:52 Mařa [ɛad] drus i iqqimen n iseggʷusa ař aseggʷas n usřiwřew, [xenni] ad igg i yixef nnes ijj n řeḥsab uca ad ixeǧeṣ ttaman n ufekki nnes ɛlaḥsab iseggʷusa [i din iqqimen].
LEV 25:53 Am yijj n ucewwař ad ɣares iqqim zeg useggʷas ař aseggʷas. War iɛeddeř ad xas ṣellṭen s řeqsaḥet zzat i tiṭṭawin nnec.
LEV 25:54 Mařa war ittwafdi s marra aya, [xenni] ad ifekk deg useggʷas n usřiwřew, netta d tarwa nnes akides.
LEV 25:55 Minzi ayt n Israil aqa aten d imsexxaren inu, inni ssuffɣeɣ zi temmurt n Miṣra. Aqa Necc d SIDI, AREBBI nwem.”
LEV 26:1 “War tteggem i yixef nwem l’aṣnam, war sbeddam řexyař ineqcen uřa d umayḍu [iqeddsen], war ssrusam řexyař n weẓru di temmurt nwem, ḥima ad as tbendqem, minzi Necc d SIDI, AREBBI nwem!
LEV 26:2 Ad teḥḍam ussan n ssebt inu uca ad awem iqarr ijj n uweqqar yuǧɣen i Zzawect inu Iqeddsen, aqa Necc d SIDI!”
LEV 26:3 “Mařa ad tuyurem di tweṣṣa inu uca ad tᵉṭṭfem di tweṣṣa inu uca ad zzaysent teggem,
LEV 26:4 [xenni] Necc ad awem wceɣ anẓar di řweqt nnes, uca tammurt ad dd-tawi ṣṣabet nnes, uca ticejjura n yeyyar ad wcent řɣiǧet nsent.
LEV 26:5 Ad yiři usarwet ař ařqaḍ n uḍiř uca ařqaḍ n uḍiř ad yiři ař [řweqt n] uzarreɛ uca ad teccem ař ɣa tejjiwnem uca ad tzedɣem di řaman di temmurt nwem.
LEV 26:6 Necc ad ggeɣ řehna di temmurt. [Mařa] tᵉṭṭṣem, war ittiři wi [kenniw] i ɣa issiggʷden. Necc ad mḥiɣ řewḥuc iwɛaren zi temmurt uca ssif war dd-iẓekkʷi x temmurt nwem.
LEV 26:7 Ad teḍfarem řɛedyan nwem uca nitni ad wḍan s ssif nwem zzat i tiṭṭawin nwem.
LEV 26:8 Xemsa n yeryazen zzaywem ad ḍfaren mya uca mya zzaywem ad ḍfaren ɛecra-ařaf uca řɛedyan nwem ad wḍan s [řeqḍeɛ n] ssif zzat i tiṭṭawin nwem.
LEV 26:9 Minzi Necc ad ɣarwem dd-dewřeɣ uca ad awem dd-jjeɣ řɣiǧet uca ad kenniw arniɣ uca ad ssmetneɣ Řɛahd inu akidwem.
LEV 26:10 [Am] i ɣa teccem [ɛad] zi zzad nni txeznem, ad tekksem deɣya [zzad] aqdim, [maḥend ad tejjem amcan] i jdid.
LEV 26:11 Necc ad ggeɣ Tazeddiɣt inu di řwest nwem uca řeɛmar inu war zzaywem ittɛiffi ca [ɛad].
LEV 26:12 Ad uyureɣ jar awem, Necc ad iřiɣ d AREBBI nwem uca kenniw ad ayi tiřim d řgens inu.
LEV 26:13 Necc d SIDI, AREBBI nwem, wenni kenniw dd-issuffɣen zi temmurt n Miṣra, ḥima war tᵉttiřim [ɛad] d isemɣan nsen. Necc arẓiɣ imqeǧaḍen n uzayřu nwem uca nedheɣ kenniw s wudem yuři.”
LEV 26:14 “[Maca] mařa war d ayi tesřim niɣ war tᵉtteggim marra min zi kenniw weṣṣiɣ,
LEV 26:15 uca mařa tesseḥqarem tiweṣṣa inu u řeɛmar nwem ad iɛiff zi lfarayiḍ inu, ař ɣa tawḍem war tᵉtteggem [ɛad] marra tiweṣṣa inu, uca [ammu i] ɣa tarẓem Řɛahd inu,
LEV 26:16 [xenni] Necc ad awem ggeɣ aya: ad xawem dd-ssehwiɣ arjef d bu-deǧis d tmessi n arwaḥ nni i ɣa iteḥḥan tiṭṭawin uca ad ɛeddben řeɛmar. Ad tzarɛem zzariɛet nwem baṭeř, [minzi] řɛedyan nwem ad tt ccen.
LEV 26:17 Ad ggeɣ udem inu ḍidd nwem ařami i ɣa ttwassexsarem zzat i wudem n řɛedyan nwem uca inni kenniw icarrhen ad xawem ṣellṭen uca kenniw ad tarewřem břa ad yiři wi kenniw iraran.”
LEV 26:18 “U mařa awarni man aya ɛad war ɣari tesřim, Necc ad ɣares arniɣ sebɛa n twařawin, maḥend ad kenniw webbxeɣ x ddnub nwem.
LEV 26:19 Necc ad arẓeɣ aɛeffar n jjehd nwem, Necc ad arreɣ ajenna nwem am wuzzař d temmurt nwem am nnḥaṣ.
LEV 26:20 Ad tḍeyyɛem jjehd nwem baṭeř, [minzi] tammurt nwem war tᵉttic ṣṣabet nnes u ticejjura n temmurt war tticent řɣiǧet.
LEV 26:21 Mařa temɛařam kidi uca war tᵉttexsem ad ayi tesřim, [xenni] Necc ad xawem dd-ssehwiɣ [ɛad] sebɛa n jjrayeḥ anect n ddnub nwem.
LEV 26:22 Ad ɣarwem dd-ssekkeɣ řewḥuc n řexřa, maḥend ad awem xeḍfen tarwa nwem, ad sshellken řebhayem nwem, uca ad ssneqṣen [lɛadad nwem], [ařami] ibriden nwem ad dewřen d ddmani.”
LEV 26:23 “Mařa s man aya kenniw war ɣari dd-ttesřim, maca [teqqimem] tᵉttemɛařam akidi,
LEV 26:24 [xenni] uřa d Necc ad qqimeɣ ttemɛařaɣ akidwem uca ad xawem dd-ssehwiɣ [ɛad] sebɛa n jjrayeḥ x ddnub nwem.
LEV 26:25 Ad xawem ssekkeɣ ijj n ssif nni i ɣa issekkaren antaqem n Řɛahd inu ař ɣa tᵉttwassmunem di tneddam nwem. [Xenni] Necc ad ssekkeɣ ṭṭaɛun di řwesṭ nwem uca kenniw ad tᵉttwasellmem deg ufus n řeɛdu nwem.
LEV 26:26 Xmi ɣa arẓeɣ řeɛweč n weɣrum nwem, [xenni] ɛecra n temɣarin ad ssenggʷent aɣrum nwem di tefqunt d ict, uca awarni i ɣa weznent aɣrum ad t i-dd-arrent uca kenniw ad t teccem, maca war tᵉttjiwinem.
LEV 26:27 Mařa [ɛad] s man aya war ɣari dd-tᵉttesřim, [maca ad teqqimem] ad temɛařam akidi,
LEV 26:28 [xenni] Necc ad xawem sɛareɣ u ad kenniw arebbiɣ, wah sebɛa n imuren Necc [ad kenniw arebbiɣ] di ssibbet n ddnub nwem.
LEV 26:29 Ad teccem aysum n iḥenjiren nwem uřa d aysum n tḥenjirin nwem ad t teccem.
LEV 26:30 Ad areddǧeɣ řegɛudi [mani tᵉttwehhabem ddbayeḥ nwem], ad nḍareɣ ipilaren nwem n arebbi n tfuct, ad arreɣ řxecbat nwem x řxecbat n imeyḍa [n l’aṣnam nwem] uca řeɛmar inu ad zzaywem iɛiff.
LEV 26:31 Ad arreɣ tineddam nwem d řxarbet uca ad areddǧeɣ tizawiyyin iqeddsen nwem uca war ttexseɣ ad cemmeɣ [ɛad] řefwaḥet ittfuḥen nwem.
LEV 26:32 Wah, Necc ad areddǧeɣ tammurt uca řɛedyan nwem, inni dayes izeddɣen, ad zzayes nnxeřɛen.”
LEV 26:33 “Ad kenniw zuzzareɣ jar řegnus uca ad kseɣ ssif awarni awem uca tammurt nwem ad tedweř d řexřa uca tineddam nwem ad iřint d řxarbet.
LEV 26:34 Xenni tammurt ad xas arḍan wussan n ssebt nnes, marra ussan n wareddeǧ [n temmurt], [umi] i ɣa tiřim di temmurt n řɛedyan nwem. Xenni ad tareyyeḥ temmurt u ad tegg tcuni x wussan n ssebt nnes.
LEV 26:35 Mařa ussan n wareddeǧ ad ɣares yiři wareyyeḥ, minzi tammurt war tareyyiḥ ca deg wussan n ssebt nwem řami tuɣa kenniw tzeddɣem dinni.”
LEV 26:36 “Ad ggeɣ tiggʷudi deg wuřawen n yinni zzaywem i ɣa iqqimen di temmura n řɛedyan nsen, ařami řḥess n ict n tfarect i yiwi usemmiḍ ad xasen yaẓẓeř u ad ten yarr ad arewřen am mammec ittarekkwař bnadem zi ssif. Nitni ad wḍan, waxxa war xasen ittiẓẓeř ḥed.
LEV 26:37 Ad nqarḍen ijjen deg wenneɣni am xmi ẓrin [řeqdeɛ n] yijj n ssif, waxxa war xawem ittiẓẓeř ḥed. Kenniw war tzemmaren ad teqqimem tbeddem zzat i tiṭṭawin n řɛedyan nwem,
LEV 26:38 [maca] kenniw ad tᵉttwahellkem jar řegnus uca tammurt n řɛedyan nwem ad kenniw tecc.”
LEV 26:39 “Inni zzaywem i ɣa iqqimen ad isřawen di temmura n řɛedyan nwem di ssibbet n řmuɛṣiyyet nsen. Uřa di ssibbet n řmuɛṣiyyet n řejdud nsen ad sřawen nitni [jmiɛ] akidsen.
LEV 26:40 [Maca] mařa neɛmen x řmuɛṣiyyet nsen d řmuɛṣiyyet n ibabaten nsen zi ssibbet n řeɣdar nsen i zi d ayi ɣdaren uca ɛawed mmɛařan akidi
LEV 26:41 - uca [xenni] uřa d Necc mmɛařiɣ akidsen u iwyeɣ ten ɣar temmurt n řɛedyan nsen, maḥend ad taɣ uř nsen war ixtinen ad yaḍar uca ad qebřen řexřaṣ i řmuɛṣiyyet nsen -
LEV 26:42 [xenni] Necc ad xarrṣeɣ [ɛawed] di Řɛahd inu ak-d Yaɛqub uca ɛawed di Řɛahd inu ak-d Isḥaq uca ad xarrṣeɣ di Řɛahd inu ak-d Ibrahim uca ad xarrṣeɣ [ɛawed] di temmurt.
LEV 26:43 Tammurt ad tᵉttwajj zzaysen uca ad xas arḍan wussan n ssebt nnes umi ɣa teqqim d ict n řxarbet xmi war dayes zeddɣen ɛad, uca nitni [ad řemden] ad qebřen lɛiqab n řmuɛṣiyyet nsen, minzi nḍaren lfarayiḍ inu u minzi řeɛmar nsen iɛiff zi tweṣṣa inu.”
LEV 26:44 “Sennej i uya, aqa d man aya: mařa aqa aten di temmurt n řeɛdyan nsen, Necc war ten neṭṭareɣ ca u war ten ttɛiffiɣ ař ten ɣa teḥḥiɣ u ad mḥiɣ Řɛahd inu akidsen minzi Necc d SIDI, AREBBI nsen!
LEV 26:45 [Maca] di ṭṭweɛ nsen ad ɛeqřeɣ x Řɛahd inu ak-d imezwura, inni nedheɣ zi temmurt n Miṣra zzat i tiṭṭawin n řegnus, maḥend ad iřiɣ d AREBBI i nitni, Necc d SIDI!”
LEV 26:46 Tina d tiweṣṣa d lfarayiḍ d izerfan nni igga SIDI jar as d jar ayt n Israil deg wedrar n Sina s tsexxart n Musa.
LEV 27:1 Issiweř SIDI ak-d Musa, inna:
LEV 27:2 “Siweř ak-d ayt n Israil uca ini asen, aqa mařa ixs ḥed ad igg ijj n lwaɛd i AREBBI, ad yiři ttaman n ufekki n řeɛmur [ittwassqeddsen] i SIDI ɛlaḥsab řqimet i tqeddared cek.
LEV 27:3 Mařa řqimet i tqeddared cek aqa d řqedd n ijj n weryaz zi ɛicrin ař settin n iseggʷusa, [xenni] ad tiři řqimet i tqeddared xemsin ciqlu n nnuqart ɛlaḥsab ciqlu n Zzawect Iqeddsen.
LEV 27:4 Mařa d ict n temɣart, [xenni] ad tiři řqimet i tqeddared třatin ciqlu.”
LEV 27:5 “Uca mařa d ijj n ubřiɣ zi xemsa ař ɛicrin n iseggʷusa, [xenni] ad tiři řqimet i tqeddared i yijj n weryaz ɛicrin ciqlu u i yict n temɣart ɛecra ciqlu.”
LEV 27:6 “Mařa d ijj n uḥenjir zeg yijj n uyur ař xemsa n iseggʷusa, [xenni] ad tiři řqimet i tqeddared i yijj n weryaz xemsa ciqlu n nnuqart u i yict n temɣart třata ciqlu n nnuqart.”
LEV 27:7 “Mařa d ijj n mmis [n bnadem] zi settin iseggʷusa niɣ sennej, [xenni], mařa netta d aryaz, ad tiři řqimet i tqeddared xemmesṭac ciqlu u mařa d tamɣart [ad tiři řqimet i tqeddared] ɛecra n ciqlu.”
LEV 27:8 “Mařa tuɣa iẓřeḍ aṭṭas u war izemmar [ad iwc] řqimet [i tqeddared] cek, [xenni] ad t ssbedden zzat i wudem n ukehhan uca [xenni] ad iqeddar ukehhan řqimet nnes. Ad t iqeddar ukehhan ɛlaḥsab min izemmar ad issmun ufus n wenni iwcin awař, [ammu] i t ɣa iqeddar ukehhan.”
LEV 27:9 “Mařa d řebhayem i zi ɣa qeddmen tawhibt i SIDI, [xenni] marra min zzaysen ɣa iwc netta i SIDI, ad yiři iqeddes.
LEV 27:10 War ittbeddiř u war ixeǧef [amuddar] icnan x wenni iqebḥen niɣ [amuddar] iqebḥen x wenni icnan. Mařa ibeddeř ɛad ict n řebhimet s ict n řebhimet nneɣni, [xenni] ta d tenni i x tt ibeddeř ad iřint qeddsent.
LEV 27:11 Mařa teǧa d ict n řebhimet texmej, war iɛeddeř ad tt qeddmen d tawhibt i SIDI, [xenni] ad yarr řebhimet nni ad tbedd zzat i wudem n ukehhan.
LEV 27:12 Akehhan ad iqeddar řqimet nnes jar min icnan d min war iḥřin. Uca am mammec i tt ɣa tqeddared cek, am ukehhan, ammu i ɣa tiři.
LEV 27:13 Mařa netta ixs ɛad ad tt ifdi, ad xas yarni ict n tesɣart n texmusect n řqimet i tqeddared cek.”
LEV 27:14 “Mařa ca n yijjen issqeddes taddart nnes, maḥend ad tiři tqeddes i SIDI, [xenni] ad iqeddar ukehhan řqimet nnes jar min icnan d min iqebḥen. Am mammec iqeddar ukehhan řqimet nnes, [ammu i] ɣa tiři.
LEV 27:15 Mařa wenni tt issqeddsen ixs ad ifdi taddart nnes, [xenni] netta ad xas yarni ict n tesɣart n texmusect n řqimet ittwaggen s nnuqart uca ad tiři nnes [ɛawed].”
LEV 27:16 “Mařa ca n yijjen issqeddes i SIDI [ca n tesɣart] n yeyyar nni ɣares iǧan, [xenni] ad tqeddared řqimet nnes ɛlaḥsab zzariɛet nnes. Zzariɛet n ijj n uḥumir n imendi [ad as ggen] xemsin ciqlu.
LEV 27:17 Mařa tuɣa issqeddes iyyar nnes zeg useggʷas n usřiwřew, [xenni] ad tedweř [řqimet n yeyyar] tbedd ɛlaḥsab řqimet i tqeddared.
LEV 27:18 Mařa tuɣa issqeddes iyyar nnes awarni i useggʷas n usřiwřew, [xenni] akehhan ad as ihṣeb [řqimet s] nnuqart n iseggʷusa iqqimen ař aseggʷas n usřiwřew [i dd ɣa yasen] u [xenni] ad tiři řqimet qell x řqimet [tmun] i tuɣa tqeddared cek.
LEV 27:19 Mařa wenni issqeddsen iyyar, ixs ad t ifdi nican, [xenni] ad yarni ict n tesɣart n texmusect di nnuqart x řqimet i tqeddared cek uca [xenni] ad as yiři [ɛawed].”
LEV 27:20 “Mařa war ixs ad ifdi iyyar [nni] niɣ mařa izzenz iyyar i yijj n weryaz nneɣni, [xenni] war izemmar ad ittwafdi ɛad [yeyyar].
LEV 27:21 Awarni řami dd-iffeɣ deg useggʷas n usřiwřew, ad yiři iyyar iqeddes i SIDI am yijj n yeyyar ittwaḥarrmen qaɛ. Ad yiři d agřa n ukehhan.”
LEV 27:22 “Mařa ca n yijjen issqeddes ijj n yeyyar nni isɣa i SIDI, [maca] war iǧi yeyyar n wagřa nnes,
LEV 27:23 [xenni] akehhan ad as iḥseb ttaman n řqimet i tqeddared cek ař aseggʷas n usřiwřew uca netta ad ixeǧeṣ řqimet i tqeddared deg wass nni d ijj [am] ict n tmesřact tqeddes i SIDI.
LEV 27:24 Deg useggʷas n usřiwřew ad dd-iɛqeb yeyyar ɛawed i wenni x t isɣa, i wenni tuɣa ɣar teǧa temmurt d agřa.
LEV 27:25 Aqeddar ad yiři ɛlaḥsab ciqlu n Zzawect Iqeddsen. Ad yiři ciqlu ɛicrin jira.”
LEV 27:26 “Maca amenzu, wenni ifarzen i SIDI zi řebhayem am umenzu, war iɛeddeř ad t issqeddes uřa d ijjen, niɣ d afunas [i iǧa] niɣ d ijjen zeg wuǧi, aqa-t i SIDI.
LEV 27:27 [Maca] mařa tuɣa-t zeg ict n řebhimet ixemjen, izemmar ad tt ifdi ɛlaḥṣab řqimet i tqeddared cek uca ad xas yarni ict n tesɣart n texmusect. Mařa war tᵉttwafeddi, [xenni] ad temmenz ɛlaḥsab řqedd i tqeddared cek.”
LEV 27:28 “[Maca] uřa d ict n řḥajjet nni ittwaḥarrmen zeg ijj n weryaz i SIDI zi marra min ɣares iǧan n iwdan d řebhayem d iyyaren, war iɛeddeř ad temmenz niɣ ad tᵉttwafdi. Marra min ittwaḥarrmen, ad yiři d amqeddas qaɛ i SIDI.
LEV 27:29 Marra min ittwaḥarrmen qaɛ [i uteḥḥi], min ittwaḥarrmen zeg iwdan, war iɛeddeř ad ittwafdi, [maca] ittxeṣṣa ad ittwaneɣ nican.”
LEV 27:30 “Marra tiɛcuray n temmurt, zi zzariɛet n temmurt u zi řɣiǧet n tcejjura, [ad iřint] i SIDI, aqa atent qeddsent i SIDI.
LEV 27:31 Mařa ca n yijjen ixs ad ifdi ca zi řeɛcur nnes, [xenni] ad xas yarni ict n tesɣart di xemsa.
LEV 27:32 X marra tiɛcuray zeg ifunasen d tfunasin d wuǧi, zi marra min ikkin sadu uzeǧaḍ [n umeksaw], ad yiři [umuddar] wiss ɛecra iqeddes i SIDI.
LEV 27:33 War iɛeddeř ad yarzu mammec tecna niɣ mammec war teḥři [i teǧa], uřa war t ittbeddiř ca, [maca] mařa ibeddeř i-t, [xenni] [amuddar] nni d wenni zi t i ɣa ibeddeř ad iřin qeddsen. War iɛeddeř ad ittwafdi.”
LEV 27:34 Aqa tina d tiweṣṣa nni i zi iweṣṣa SIDI i Musa u i ayt n Israil deg wedrar n Sina.
NUM 1:1 Issiweř SIDI ak-d Musa di řexřa n Sina, deg Uqiḍun n Umsagar, deg [wass] amezwaru n uyur wiss tnayen, deg useggʷas wiss tnayen awarni řami dd-ffɣen zi temmurt n Miṣra, inna:
NUM 1:2 “Ksim řqedd n ismawen n marra iryazen n marra tamesmunt n ayt n Israil, azeǧif azeǧif, [am ttwasettfen nitni] ɛlaḥsab řaǧat nsen, ɛlaḥsab tudrin n ibabaten nsen.
NUM 1:3 Ittxeṣṣa cek d Harun ad tḥesbem kuř ijj di Israil zi ɛicrin n iseggʷusa sennej, [marra] inni dd-iffɣen ak-d řɛeskar, ɛlaḥsab [tirbiɛin n] řɛeskar nsen.
NUM 1:4 Ad awem iwc afus ijj n weryaz zi [kuř] taqbič, aryaz i iǧan d azeǧif n taddart n babas.
NUM 1:5 Aqa d ina d ismawen n yeryazen nni d awem ɣa iwcen afus: I Rubin, Iliṣur mmis n Cadayur,
NUM 1:6 i Cimɛun, Calumiyil, mmis n Ṣuriycadday,
NUM 1:7 i Yahuda, Naḥcun, mmis n Ɛamminadab,
NUM 1:8 i Issakar, Natanayil, mmis n Ṣuɣar.
NUM 1:9 i Zabulun, Iliyab, mmis n Ḥilun,
NUM 1:10 i ayt n Yusuf: i Ifrayim, Ilicamaɛ, mmis n Ammihud, i Manassa, Jamliyil, mmis n Fadahṣur,
NUM 1:11 i Binyamin, Abidan mmis n Jidɛuni,
NUM 1:12 i Dan, Axiɛazar, mmis n Ɛammicadday,
NUM 1:13 i Acir, Fajɛiyil, mmis n Ɛukran,
NUM 1:14 i Jad, Iliyasaf, mmis n Daɛuyil,
NUM 1:15 i Naftali, Axiraɛ, mmis n Ɛinan.”
NUM 1:16 Ina tuɣa d inni ittwařaɣan zi tmesmunt, [nitni] d řḥukkam n tqebbař n ibabaten nsen, izeǧifen x řuřuf n Israil.
NUM 1:17 Ksin Musa d Harun iryazen nni tuɣa ittwarecmen s ismawen nsen
NUM 1:18 uca ssmunen tamesmunt marra deg wass amezwaru n uyur wiss tnayen uca nitni xebbaren jjdira nsen, ɛlaḥsab řaǧat nsen, ɛlaḥsab tudrin n ibabaten nsen, am ttwazemmemen ismawen n yinni ɣar iǧa ɛicrin n iseggʷusa sennej, azeǧif azeǧif.
NUM 1:19 Am mammec d as yumur SIDI i Musa, aqa iḥseb i-ten di řexřa n Sina.
NUM 1:20 Ayt n Rubin, amenzu n Israil: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen [nsen] azeǧif azeǧif, kuř aryaz zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:21 [wah,] inni ittwaḥesben [ammu] i teqbič n Rubin, tuɣa aten di setta u-rebɛin-ařef u-xemsa mya.
NUM 1:22 Ayt n Cimɛun: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab lɛadad n ismawen [nsen], azeǧif azeǧif, kuř aryaz zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:23 [wah,] inni ittwaḥesben [ammu] i teqbič n Cimɛun tuɣa aten di tesɛa u-xemsin-ařef u-teřt-mya.
NUM 1:24 Ayt n Jad: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:25 [wah,] inni ittwaḥesben [ammu] i teqbič n Jad tuɣa aten di xemsa u-rebɛin-ařef u-setta-mya u-xemsin.
NUM 1:26 Ayt n Yahuda: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, kuř ijjen i dd-itteffɣen ak-d řɛeskar,
NUM 1:27 [wah,] inni ittwaḥesben [ammu] i teqbič n Yahuda tuɣa aten di arebɛa u-sebɛin-ařef u-setta-mya.
NUM 1:28 Ayt n Issakar: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥṣab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:29 [wah,] inni ittwaḥesben [ammu] i teqbič n Issakar tuɣa aten di arebɛa u-xemsin-ařef u-arebɛa-mya.
NUM 1:30 Ayt n Zabulun: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen - inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:31 [wah,] inni ittwaḥesben [ammu] i teqbič n Zabulun tuɣa aten di sebɛa u-xemsin-ařef u-arebɛa-mya.
NUM 1:32 Ayt n Yusuf: Ayt n Ifrayim: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:33 [wah,] inni ittwaḥesben [ammu] i teqbič n Ifrayim tuɣa aten di arebɛin-ařef u-xemsa-mya.
NUM 1:34 Ayt n Manassa: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:35 [wah,] inni ittwaḥesben [ammu] i teqbič n Manassa tuɣa aten di tnayen u-třatin-ařef u-mitayen.
NUM 1:36 Ayt n Binyamin: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:37 [wah,] inni ittwaḥesben [ammu] i teqbič n Binyamin tuɣa aten di xemsa u-třatin-ařef u-arebɛa-mya.
NUM 1:38 Ayt n Dan: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:39 [wah,] inni ittwaḥesben [ammu] i teqbič n Dan tuɣa ten di tnayen u-settin-ařef u-sebɛa-mya.
NUM 1:40 Ayt n Acir: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:41 [wah,] inni ittwaḥesben [ammu] i teqbič n Acir tuɣa ten di waḥit u-rebɛin-ařef u-xemsa-mya.
NUM 1:42 Ayt n Naftali: tarwa nsen - [ttwasettfen] ɛlaḥsab řaǧat nsen, ɛlaḥsab tudrin n ibabaten nsen, inni zzayes ittwaḥesben ɛlaḥsab ismawen n [marra iryazen] zi ɛicrin iseggʷusa sennej, marra wenni i ɣa iffɣen ak-d řɛeskar,
NUM 1:43 [wah,] inni ittwaḥesben [ammu] i teqbič n Naftali tuɣa aten di třata u-xemsin-ařef u-arebɛa-mya.
NUM 1:44 Ina d inni ittwaḥesben, inni ttwaḥesben s [ufus] n Musa d Harun d řḥukkam n Israil, tenɛac n yeryazen, ijjen weryaz i taddart n babas.
NUM 1:45 Marra inni ittwaḥesben zeg ayt n Israil - [am ttwasettfen nitni] ɛlaḥsab taddart n ibabaten nsen - marra inni ɣar iǧa ɛicrin n iseggʷusa sennej, kuř ijj wenni dd-itteffɣen ak-d řɛeskar,
NUM 1:46 [wah,] marra inni ittwaḥesben tuɣa aten di setta-mya u-ṭeřt-ařaf u-xemsa-mya u-xemsin.
NUM 1:47 Ilawiyyen war carcen ca jar asen di řeḥsab di ṭṭweɛ n teqbič n ibabaten nsen,
NUM 1:48 minzi SIDI tuɣa issiweř ak-d Musa, inna:
NUM 1:49 “Mɣir taqbič n Lawi war tt ttᵉḥseb ca u war tt zemmi ca [azeǧif] azeǧif jar ayt n Israil.
NUM 1:50 [Maca] ittxeṣṣa cek s yixef nnec, ad tegged Ilawiyyen x Tzeddiɣt n Cchadet u x marra řeqcuɛ nnes u x marra min d as dd-yusin. Nitni ad arbun Tazeddiɣt ak-d řeqcuɛ nnes marra, uca ad dayes sexxaren. Ittxeṣṣa ad wten iqiḍan nsen min dd-innḍen i Tzeddiɣt.
NUM 1:51 Mařa ad tᵉttwafsi Tzeddiɣt, ad tt hedmen Ilawiyyen uca mařa tiweḍ Tzeddiɣt ɣar řmargeh [aneḍfar], [xenni] ad tt ssbedden Ilawiyyen [ɛawed]. Mařa dd-iqarreb ca n ubarrani, xenni netta ad ittwaneɣ.
NUM 1:52 Ayt n Israil ad wten iqiḍan n řmargeḥ nsen, kuř ijj ɣar tɛeǧant nnes, [am ttwasettfen nitni] ɛlaḥsab [tirbiɛin n] řɛeskar nsen.
NUM 1:53 Ilawiyyen ad wten iqiḍan nsen ɣar kuř jjihet n Tzeddiɣt n Cchadet, ḥima war ittiři uduqqez [n weɣḍab] x tmesmunt n ayt n Israil. Ittxeṣṣa i Ilawiyyen ad ḥḍan x Tzeddiɣt n Cchadet.”
NUM 1:54 Uca ggin ayt n Israil s marra min yumur SIDI i Musa, [wah,] ammu [i-t] ggin.
NUM 2:1 Issiweř SIDI ak-d Musa d Harun, inna:
NUM 2:2 “Ayt n Israil ad wten iqiḍan nsen kuř ijj ɣar tɛeǧant nnes, ɣar řeɛřamat n taddart n ibabaten nsen. Ad wten iqiḍan nsen cwayt ɣar řaggʷaj ɣar marra iɣezdisen n Uqiḍun n Umsagar.”
NUM 2:3 Inni iǧan sadu n tɛeǧant n řmargeḥ n řɛeskar n Yahuda ad wten iqiḍan nsen, [am ttwasettfen nitni] ɛlaḥsab [tirbiɛin n] řɛeskar nsen ɣar ccarq, ɣar manis dd-tneqqar tfuct. Naḥcun, mmis n Ɛamminadab, [ad yiři] d řḥakem n ayt n Yahuda.
NUM 2:4 Inni ittwaḥesben i řɛeskar nnes, tuɣa aten di arebɛa u-sebɛin-ařef u-setta-mya.
NUM 2:5 Zzates ad tewwet teqbič n Issakar iqiḍan nnes. Natanayil, mmis n Ṣuɣar, [ad yiři] d řḥakem n ayt n Issakar.
NUM 2:6 Inni ittwaḥesben i řɛeskar nnes, tuɣa aten di arebɛa u-xemsin-ařef u-arebɛa-mya.
NUM 2:7 [Xenni] taqbič n Zabulun. Iliyab, mmis n Hilun, [ad yiři] d řḥakem n ayt n Zabulun.
NUM 2:8 Inni ittwaḥesben i řɛeskar nnes, tuɣa aten di sebɛa u-xemsin-ařef u-arebɛa-mya.
NUM 2:9 Inni ittwaḥesben i řmargeḥ n řɛeskar n Yahuda tuɣa aten marra [jmiɛ] di mya u-setta u-tmanin-ařef u-arebɛa-mya [n yeryazen], [ttwasettfen] ɛlaḥsab [tirbiɛin n] řɛeskar nsen. Nitni ad fesyen iqiḍan nsen amezwaru.
NUM 2:10 Ɣar ljanub ad tiři tɛeǧant n řmargeḥ n řɛeskar n Rubin. [Nitni ad iřin ttwasettfen] ɛlaḥsab [tirbiɛin n] řɛeskar nsen. Iliṣur, mmis n Cadayyur, [ad yiři] d řḥakem n ayt n Rubin.
NUM 2:11 Inni ittwaḥesben i řɛeskar nnes, tuɣa aten di setta u-rebɛin-ařef u-xemsa-mya.
NUM 2:12 Zzates ad tewwet teqbič n Cimɛun iqiḍan nnes. Calumiyil, mmis n Ṣuriycadday, [ad yiři] d řḥakem n ayt n Cimɛun.
NUM 2:13 Inni ittwaḥesben i řɛeskar nnes, tuɣa aten di tesɛa u-xemsin-ařef u-teřt-mya.
NUM 2:14 [Xenni] taqbič n Jad. Ilyasaf, mmis n Raɛuyil, [ad yiři] d řḥakem n ayt n Jad.
NUM 2:15 Inni ittwaḥesben i řɛeskar nnes, tuɣa aten di xemsa u-rebɛin-ařef u-setta-mya u-xemsin.
NUM 2:16 Inni ittwaḥesben i řmargeḥ n řɛeskar n Rubin, tuɣa aten marra di mya u-waḥit u-xemsin-ařef u-arebɛa-mya u-xemsin [n yeryazen], [ttwasettfen] ɛlaḥsab [tirbiɛin n] řɛeskar nsen. Nitni ad fesyen iqiḍan nsen wiss tnayen.
NUM 2:17 [Xenni] ad ittwafsi Uqiḍun n Umsagar ak-d řmargeḥ n Ilawiyyen, di řwesṭ n marra řɛeskar. Am mammec ɣa wten iqiḍan nsen, ammu ittxeṣṣa ad mmuṭṭiyen [ɛawed], kuř ijj deg wemcan nnes, [am ttwasettfen nitni] ɛlaḥsab tiɛeǧanin nsen.
NUM 2:18 Ɣar řɣarb ad tiři tɛeǧant n řmargeḥ n řɛeskar n Ifrayim. [Nitni ad iřin ttwasettfen] ɛlaḥsab [tirbiɛin n] řɛeskar nsen. Ilicamaɛ, mmis n Ɛammihud, [ad yiři] d řḥakem n ayt n Ifrayim.
NUM 2:19 Inni ittwaḥesben i řɛeskar nnes, tuɣa aten di arebɛin-ařef u-xemsa-mya.
NUM 2:20 Zzates [ad tiři] teqbič n Manassa. Jamliyil, mmis n Fadahṣur [ad yiři] d řḥakem n ayt n Manassa.
NUM 2:21 Inni ittwaḥesben i řɛeskar nnes, tuɣa aten di tnayen u-třatin-ařef u-mitayn.
NUM 2:22 [Xenni] taqbič n Binyamin. Abidan, mmis n Jidɛuni, [ad yiři] d řeḥkam n ayt n Binyamin.
NUM 2:23 Inni ittwaḥesben i řɛeskar nnes, tuɣa aten di xemsa u-ṭřatin-ařef u-arebɛa-mya.
NUM 2:24 Inni ittwaḥesben i řmargeḥ n řɛeskar n Ifrayim, tuɣa aten di mya u-tmenya-ařef u-mya [n yeryazen], [ttwasettfen] ɛlaḥsab [tirbiɛin n] řɛeskar nsen. Nitni ad fesyen iqiḍan nsen wiss třata.
NUM 2:25 Ɣar ccmal ad tiři tɛeǧant n řmargeḥ n řɛeskar n Dan. [Nitni ad iřin ttwasettfen] ɛlaḥsab [tirbiɛin n] řɛeskar nsen. Axiɛazar, mmis n Ɛammicadday, [ad yiři] d řḥakem n ayt n Dan.
NUM 2:26 Inni ittwaḥesben i řɛeskar nnes, tuɣa aten di tnayen u-settin-ařef u-sebɛa-mya.
NUM 2:27 Zzates ad tewwet teqbič n Acir iqiḍan nnes. Fajɛiyil, mmis n Ɛukran, [ad yiři] d řḥakem n ayt n Acir.
NUM 2:28 Inni ittwaḥesben i řɛeskar nnes, tuɣa aten di waḥit u-rebɛin-ařef u-xemsa-mya.
NUM 2:29 [Xenni] taqbič n Naftali. Axiraɛ, mmis n Ɛinan, [ad yiři] d řḥakem n ayt n Naftali.
NUM 2:30 Inni ittwaḥesben i řɛeskar nnes, tuɣa aten di třata u-xemsin-ařef u-arebɛa-mya.
NUM 2:31 Inni ittwaḥesben i řmargeḥ n řɛeskar n Dan, tuɣa aten di mya u-sebɛa u-xemsin-ařef u-setta-mya [n yeryazen]. Nitni ad fesyen iqiḍan nsen d aneggaru, [am ttwasettfen nitni] ɛlaḥsab tiɛeǧanin nsen.
NUM 2:32 Ina d inni ittwaḥesben n ayt n Israil, [am ttwasettfen nitni] ɛlaḥsab taddart n ibabaten nsen. Marra inni ittwaḥesben di řemrageḥ n řɛeskar, [am ttwasettfen nitni] ɛlaḥsab [tirbiɛin n] řɛeskar nsen, [tuɣa aten] di setta-mya u-teřt-ařaf u-xemsa-mya u-xemsin [n yeryazen].”
NUM 2:33 Ilawiyyen jar ayt n Israil war ttwaḥesben ca, [nican] am mammec d as yumur SIDI i Musa.
NUM 2:34 Uca ggin ayt n Israil am mammec marra min d as yumur SIDI i Musa: am mammec wtin iqiḍan nsen s usettef ɣar tɛeǧanin nsen, ammu i ɣa fesyen iqiḍan nsen [ɛawed], kuř ijjen [ittwasettef] ɛlaḥsab řaǧat nnes, ɣar taddart n ibabaten nnes.
NUM 3:1 Aqa ina d tarwa n Harun d Musa deg wussan nni issiweř SIDI ak-d Musa x wedrar n Sina.
NUM 3:2 Aqa ina d ismawen n warraw n Harun: Nadab d amenzu, [xenni] Abihu, Aliɛazar d Itamar.
NUM 3:3 Aqa ina d ismawen n warraw n Harun, ikehhanen inni ittwadehnen u inni ittwařeqqmen am yikehhanen.
NUM 3:4 [Maca] Nadab d Abihu mmuten zzat i wudem n SIDI, umi qeddmen timessi tařɣibt zzat i wudem n SIDI di řexřa n Sina. War tuɣi ɣarsen arraw. [S uya] tuɣa Aliɛazar d Itamar sexxaren [am] ukehhan zzat i wudem n babatsen Harun.
NUM 3:5 Issiweř SIDI ak-d Musa, inna:
NUM 3:6 “Sqarreb-dd taqbič n Lawi uca egg i-ten zzat i wudem n ukehhan Harun, ḥima ad xas sexxaren.
NUM 3:7 Ejj i-ten ad řhan tasexxart nnes d tsexxart n marra tamesmunt zzat i Uqiḍun n Umsagar, maḥend ad kemmřen řxedmet n Tzeddiɣt.
NUM 3:8 Ad ḥḍan x marra řeqcuɛ n Uqiḍun n Umsagar uca ad ṭṭfen aḥeṭṭu n ayt n Israil maḥend ad sexxaren di tsexxart n Tzeddiɣt.
NUM 3:9 Cek ad tewced Ilawiyyen i Harun u i warrawen nnes. Aqa d yina i d as immewcen i netta waha zeg ayt n Israil.
NUM 3:10 Ad třeqqmed Harun d warraw nnes maḥend ad ḥḍan x tukehhant. Abarrani nni i dd ɣa iqarrben ad ittwaneɣ.”
NUM 3:11 Issiweř SIDI ak-d Musa, inna:
NUM 3:12 “Xzar, Necc ksiɣ Ilawiyyen zi řwesṭ n ayt n Israil deg wemcan n imenza, marra inni yarezmen řemřawet [d amezwaru] jar ayt n Israil. Ilawiyyen ad iřin inu,
NUM 3:13 minzi kuř amenzu aqa inu. Deg wass min di wtiɣ marra imenza di temmurt n Miṣra, aqa ssqeddseɣ i Yixef inu marra imenza di Israil, zi bnadem ař řmař. Nitni ad iřin inu, Necc d SIDI!”
NUM 3:14 Issiweř SIDI ak-d Musa di řexřa n Sina, inna:
NUM 3:15 “Ḥseb ayt n Lawi, [am ttwasettfen nitni] ɛlaḥsab tudrin n ibabaten nsen, ɛlaḥsab řaǧat nsen. Marra iwetman nni iǧan d [ijj n] uyur sennej, ad ten teḥseb.”
NUM 3:16 Uca Musa iḥseb i-ten x řumur n SIDI, am mammec [d as] iweṣṣa.
NUM 3:17 Tuɣa ina d ayt n Lawi ak-d ismawen nsen: Jarcun, d Qahat d Marari.
NUM 3:18 [Tuɣa] ina d ismawen n ayt n Jarcun, ɛlaḥsab řaǧat nsen: Libni d Cimɛi.
NUM 3:19 Ayt n Qahat, ɛlaḥsab řaǧat nsen: Ɛamram d Yiṣhar d Ḥabrun d Ɛuzziyil.
NUM 3:20 Ayt n Marari, ɛlaḥsab řaǧat nsen: Maḥli d Muci. [Tuɣa] ina d řaǧat n Ilawiyyen, [ttwasettfen] ɛlaḥsab tudrin n ibabaten nsen.
NUM 3:21 Ɣar Jarcun [tuɣa teǧa] řaǧ n Ilibniyyen d řaǧ n Icimɛiyyen. [Tuɣa] tina d řaǧat n Ijarcuniyyen.
NUM 3:22 Řqedd n yinni zzaysen ittwaḥesben, n marra iwetman zeg [ijj n] uyur sennej, [aqa řqedd nni n] yinni zzaysen ittwaḥesben tuɣa di sebɛa-ařaf u-xemsa-mya.
NUM 3:23 Wtint řaǧat n Ijarcuniyyen iqiḍan nsen ɣar ḍeffar n Tzeddiɣt, ɣar řɣarb.
NUM 3:24 [Tuɣa] Ilyasaf, mmis n Layil, d řḥakem n taddart n babatsen n Ijarcuniyyen.
NUM 3:25 Zi jjihet n Uqiḍun n Umsagar ḥḍan ayt n Jarcun x Tzeddiɣt, x Uqiḍun ak-d tseqqafin nnes, x warwaq ɣar wadaf n Uqiḍun n Umsagar,
NUM 3:26 x řizarat n řemraḥ d warwaq ɣar wadaf n řemraḥ i zi tᵉttwanneḍ Tzeddiɣt d uɛalṭar, u x ifiřan nnes, uřa x marra [min dd-ittasen ak-d] tsexxart nni.
NUM 3:27 Zi Qahat [tuɣa iqqarṣ-dd] řaǧ n Iɛamramiyyen d řaǧ n Iṣhariyyen d řaǧ n Iḥibruniyyen d řaǧ n Iɛaziyiliyyen. [Tuɣa] tina d řaǧat n Iqahatiyyen.
NUM 3:28 [Tuɣa] řqedd n marra iwetman zeg [ijj n] uyur sennej temn-ařaf u-setta-mya. Nitni ḥḍan x Zzawect Iqeddsen.
NUM 3:29 Wtint řaǧat n ayt n Qahat iqiḍan nsen ɣar uɣezdis n Tzeddiɣt, ɣar ljanub.
NUM 3:30 Iliṣafan, mmis n Ɛuzziyil, [tuɣa] d řḥakem n taddart n babatsen n řaǧat n Iquhatiyyen.
NUM 3:31 Nitni tuɣa ḥeṭṭan x Ttabut d tzewḍa d řqendiř d iɛalṭaren u x řeqcuɛ n Zzawect Iqeddsen i ssxedmen u x uřeḥḥaf, [wah,] x marra [i dd-ittasen ak-d] tsexxart nni.
NUM 3:32 [Tuɣa] Aliɛazar, mmis n ukehhan Harun, d řḥakem amezwaru qaɛ x [marra] řḥukkam n Lawi. Netta iṭṭef acbar x yinni tuɣa iḥeṭṭan x Zzawect Iqeddsen.
NUM 3:33 Zi Marari [tuɣa iqqarṣ] řaǧ n Imaḥliyyen d řaǧ n Imuciyyen. [Tuɣa] tina d řaǧat n Marari.
NUM 3:34 [Tuɣa] řqedd n yinni zzaysen ittwaḥesben, n marra iwetman zeg [ijj n] uyur sennej, di setta-ařaf u-mitayn.
NUM 3:35 [Tuɣa] Suriyil, mmis n Abixayil, d řḥakem n taddart n babatsen n řaǧat n Marari. Nitni wtin iqiḍan nsen ɣar uɣezdis n Tzeddiɣt, ɣar ccamal.
NUM 3:36 Ayt n Marari tuɣa tᵉṭṭfen acbar maḥend ad wcen taynit i marra tifeřwin n Tzeddiɣt, i tḥenya n uɛarreḍ, i ipilaren nnes, i tyarsawin nnes u i marra řeqcuɛ nnes, [wah.] i marra [min dd-ittasen ak-d] tsexxart nni,
NUM 3:37 uřa i ipilaren nni dd-innḍen i řemraḥ ak-d tyarsawin nsen d řewtad nsen d ifiřan nsen.
NUM 3:38 Musa d Harun ak-d warraw nnes wtin iqiḍan nsen zzat i wudem n Tzeddiɣt, zzat i wudem n Uqiḍun n Umsagar, ɣar ccarq manis dd-tneqqar tfuct. Nitni ḥḍan x Zzawect Iqeddsen di ṭṭweɛ n ayt n Israil. Abarrani nni dd-iqarrben, tuɣa ittxeṣṣa ad ittwaneɣ.
NUM 3:39 Marra inni ittwaḥesben n Ilawiyyen, inni iḥseb Musa ak-d Harun ɛlaḥsab řumur n SIDI, [am ttwasettfen nitni] ɛlaḥsab řaǧat nsen, marra iwetman zeg [ijj n] uyur sennej, tuɣa aten di tnayen u-ɛicrin-ařef.
NUM 3:40 Inna SIDI i Musa: “Ḥseb marra imenza n iwetman n ayt n Israil, zeg [ijj n] uyur sennej, uca ksi řqedd n ismawen nsen.
NUM 3:41 Ad teksid Ilawiyyen i Necc - Necc d SIDI! - deg wemcan n marra imenza jar ayt n Israil uřa d řebhayem n Ilawiyyen deg wemcan n marra imenza jar řebhayem n ayt n Israil.”
NUM 3:42 Uca iḥseb Musa marra imenza jar ayt n Israil am mammec d as yumur SIDI.
NUM 3:43 Řqedd n ismawen n marra imenza iwetman n [ijj n] uyur sennej, n yinni zzaysen ittwaḥesben, tuɣa aten di tnayen u-ɛicrin-ařef u-mitayn u-třata u-sebɛin.
NUM 3:44 Issiweř SIDI ak-d Musa, inna:
NUM 3:45 “Ksi Ilawiyyen deg wemcan n marra imenza jar ayt n Israil uřa d řebhayem n Ilawiyyen deg wemcan n řebhayem nsen, minzi Ilawiyyen ad iřin inu. Aqa Necc d SIDI.
NUM 3:46 Zi jjihet n mitayen u-třata u-sebɛin, inni ittxeṣṣa ad ttwafdin, maɣar nitni qqimen sennej i Ilawiyyen n imenza n ayt n Israil,
NUM 3:47 ittxeṣṣa ad teksid xemsa ciqlu i [kuř ijj n] uzeǧif. Ad t teksid anect n ciqlu n Zzawect Iqeddsen. Ciqlu [wanita] aqa dayes ɛicrin jira.
NUM 3:48 Ad tewced nnuqart nni i Harun u i warraw nnes, aqa-tt i ttaman n ufekki n yinni iqqimen [sennej i řqedd n Ilawiyyen].”
NUM 3:49 [Xenni] iksi Musa nnuqart n ttaman n ufekki n yinni iqqimen sennej n yinni ittwafdin s Ilawiyyen.
NUM 3:50 Uca iṭṭef nnuqart [nni] zeg imenza n ayt n Israil: ařef u-teřt-mya u-xemsa u-settin [ciqlu], ɛlaḥsab ciqlu n Zzawect Iqeddsen.
NUM 3:51 U Musa iwca nnuqart n yinni iwcin ttaman n ufekki i Harun u i warraw nnes, ɛlaḥsab [awař n] uqemmum n SIDI, am mammec d as yumur SIDI i Musa.
NUM 4:1 Issiweř SIDI ak-d Musa d Harun, inna:
NUM 4:2 “Ḥseb ayt n Qahat azeǧif [azeǧif] jar ayt n Lawi, [am ttwasettfen nitni] ɛlaḥsab řaǧat nsen, ɛlaḥsab tudrin n ibabaten nsen,
NUM 4:3 zi třatin n iseggʷusa sennej ař xemsin n iseggʷusa, marra wenni i ɣa yadfen ɣar řɛeskar maḥend ad yegg řxedmet deg Uqiḍun n Umsagar.
NUM 4:4 D ta [i ɣa yiřin] d tasexxart n ayt n Qahat deg Uqiḍun n Umsagar: [aḥeṭṭu x] Weqdas x Uqeddas.
NUM 4:5 Xmi dd ɣa fesyen řmargeḥ, ad dd-yas Harun d warraw nnes uca ad kksen ařeḥḥaf i iǧan i dduri uca ad zzayes ssduryen Ttabut n Cchadet.
NUM 4:6 Ittxeṣṣa ad xas ggen ijj n dduri n iřmawen n ddenfiřat uca ad xas bezzɛen ijj n dduri marra d adeḥmi uca ad as ggen iɛumad nnes [i tarebbut].
NUM 4:7 Ad bezzɛen ict n tjartiřṭ tadeḥmit x tzewḍa i weɣrum n wescan uca ad xas ggen ṭṭbaṣi, tiɣenjayin d řkisan d iɣarrafen s inni i ɣa kebben. Uca ittxeṣṣa ad xas yiři weɣrum n řebda.
NUM 4:8 [Awarni uya] ad xas bezzɛen ijj n dduri azeggʷaɣ iḥedqen uca ad tt dřen [ɛawed] s ijj n dduri n iřmawen n ddenfiřat uca ad as ggen iɛumad nnes [i tarebbut].
NUM 4:9 [Xenni] ad ksin ict n tjartiřt tadeḥmanit uca ad zzayes dřen řqendiř i tfawt uřa d řefnarat nnes d tjeqqaḍin [n teftič] nnes d tmejmarin nnes d marra řeqcuɛ nnes i zzect di ṭṭweɛ n tsexxart i [řqendiř].
NUM 4:10 Ad ggen [řqendiř-a] d marra řeqcuɛ nnes deg ijj n dduri n iřmawen n ddenfiřat uca ad t ssarsen x ǧuḥ n tkessit.
NUM 4:11 Ad bezzɛen ijj n dduri adeḥmani x uɛalṭar [n řebxur] uca ad t dřen [ɛawed] s yijj n dduri n iřmawen n ddenfiřat uca ad as ggen iɛumad nnes [i tarebbut].
NUM 4:12 Uca ad ksin marra řeqcuɛ i tsexxart i ssxeddmen di Zzawect Iqeddsen uca ad ten ggen deg ijj n dduri adeḥmani uca ad t dřen s yijj n dduri n iřmawen n ddenfiřat, [xenni] ad ssarsen aya x ǧuḥ n tkessit.
NUM 4:13 Ad kksen min iqqimen n tadunt n uɛalṭar uca ad xas bezzɛen ict n tjartiřt tarjuwanit.
NUM 4:14 Ad xas ssarsen marra řeqcuɛ i ssxedmen i tsexxart: timejmarin, furcayat, iɣenjayen, ṭṭawyat i urucci d marra dduzan n uɛalṭar. Tiwwa nnes ad bezzɛen ijj n dduri n iřmawen n ddenfiřat uca ad as ggen iɛumad nnes [i tarebbut].
NUM 4:15 Xmi ɣa ikemmeř Harun d warraw nnes dduri n Zzawect Iqeddsen d marra řeqcuɛ n Zzawect Iqeddsen xmi ɣa fesyen iqiḍan n řmargeḥ n řɛeskar, [xenni] ad dd-asen warraw n Quhat ḥima ad arbun [marra], maca ittxeṣṣa war ttḥidin min iǧan iqeddsen, minzi mařa lla ad mmten. Man aya d min ittxeṣṣa ad arbun warraw n Qahat di tmesřact n Uqiḍun n Umsagar.
NUM 4:16 Aliɛazar, mmis n ukehhan Harun, ad iṭṭef acbar x zzect i tfawt d řebxur ittfuḥen d tewhibt [n řɣiǧet] n řebda d zzect i wedhan, [wah, Harun ad iṭṭef acbar] x Tzeddiɣt marra u x marra min dayes, řa x min iǧan di Zzawect Iqeddsen uřa x řeqcuɛ nnes.”
NUM 4:17 Issiweř SIDI ak-d Musa d Harun, inna:
NUM 4:18 “Ɣarwem ad tqeḍɛem taqbič n řaǧat n Iqahatiyyen zi řwesṭ n Ilawiyyen.
NUM 4:19 Ggem kisen ammu ḥima ad ddaren, war ttmettin xmi dd ɣa qarrben ɣar Weqdas x Uqeddas: ittxeṣṣa as i Harun d warraw nnes ad dd-adfen uca ad ggen kuř aryaz di řxedmet nnes u di ddqeř i ittxeṣṣa ad yarbu.
NUM 4:20 War iɛeddeř ad adfen maḥend ad ẓaren Zzawect Iqeddsen, mɣir i yict n wermac n wabřiwen waha, [maɣar xenni] ad mmten.”
NUM 4:21 Issiweř SIDI ak-d Musa, inna:
NUM 4:22 “Ḥseb ɛawed ayt n Jarcun azeǧif [azeǧif], [am ttwasettfen nitni] ɛlaḥsab tudrin n ibabaten nsen, ɛlaḥsab řaǧat nsen.
NUM 4:23 Ad ten tḥesbed zi třatin n iseggʷusa sennej, ař xemsin n iseggʷusa, kuř ijj i ɣa yadfen ɣar řɛeskar ḥima ad yegg tasexxart deg Uqiḍun n Umsagar.
NUM 4:24 D ta d tasexxart n řaǧat n Jarcun di tmesřact n tsexxart d tarebbut.
NUM 4:25 Ad arbun tijartiřin n Tzeddiɣt d Uqiḍun n Umsagar: taseqqaft nnes d tseqqaft nnes n iřmawen n ddenfiřat nni i ɣa yiřin tiwwa nnes, d warwaq n wadaf n Uqiḍun n Umsagar,
NUM 4:26 d řizarat n řemraḥ d arwaq i tewwart n wadaf ɣar řemraḥ i dd-innḍen i Tzeddiɣt d uɛalṭar d [marra] ifiřan nsen d marra řeqcuɛ [i dd-ittasen ak-d] tsexxart nsen u marra min d as ṣennɛen, [d man aya] ad tiři řxedmet nsen.
NUM 4:27 Marra řxedmet n ayt n Jarcun di tmesřact n marra tarebbut d marra tasexxart nsen, ad tiři ɛlaḥsab řumur n Harun d warraw nnes. Ittxeṣṣa awem ad ten tessecnem s [u]ḥeṭṭu marra min ittxeṣṣa ad arbun.
NUM 4:28 Ta d tasexxart n řaǧat n ayt n Jarcun deg Uqiḍun n Umsagar. Nitni ad ksin amnus [i uya] sadu ufus n Itamar, mmis n Harun, akehhan.
NUM 4:29 Ad tḥesbed ayt n Marari, [am ttwasettfen nitni] ɛlaḥsab řaǧat nsen, ɛlaḥsab tudrin n ibabaten nsen.
NUM 4:30 Ad ten tḥesbed zi třatin n iseggʷusa sennej, ař xemsin n iseggʷusa, marra wenni i ɣa yadfen ɣar řɛeskar maḥend ad isexxar di tsexxart n Uqiḍun n Umsagar.
NUM 4:31 D ta d tasɣart nsen di trebbut ɣar marra tasexxart nsen deg Uqiḍun n Umsagar: tifeřwin n Tzeddiɣt d tḥenya n uɛarreḍ d ipilaren nnes d tyarsawin nnes,
NUM 4:32 d ipilaren n řemraḥ i d as dd-innḍen ak-d tyarsawin nsen d řewtad nsen d iseɣwan nsen, [aqa d ta d tasɣart nsen di trebbut] n marra řeqcuɛ nsen u di marra tasexxart [i dd-ittasen ak-d marra man aya]. Řeqcuɛ i ittxeṣṣa ad ten arbun, ittxeṣṣa kenniw ad ten tzemmed s ismawen nsen.
NUM 4:33 D ta d tasexxart n řaǧat n ayt n Marari ɣar marra tasexxart nsen deg Uqiḍun n Umsagar sadu ufus n Itamar, mmis n Harun, akehhan.”
NUM 4:34 Musa d Harun d řḥukkam n tmesmunt ḥesben ayt n Qahat, [am ttwasettfen nitni] ɛlaḥsab řaǧat nsen u ɛlaḥsab tudrin n ibabaten nsen,
NUM 4:35 zeg [wenni ɣar iǧa] třatin n iseggʷusa sennej, ař [wenni ɣar iǧa] xemsin n iseggʷusa, kuř ijj i ɣa yadfen maḥend ad isexxar deg Uqiḍun n Umsagar.
NUM 4:36 Inni zzaysen ittwaḥesben, [am ttwasettfen nitni] ɛlaḥsab řaǧat nsen, tuɣa aten di ařfayen u-sebɛa-mya u-xemsin.
NUM 4:37 Ina d inni ittwaḥesben zi řaǧat n Iqahatiyyen, marra wi ittsexxaren deg Uqiḍun n Umsagar, inni ḥesben Musa d Harun x řumur n SIDI sadu ufus n Musa.
NUM 4:38 Inni ittwaḥesben zeg ayt n Jarcun, [am ttwasettfen nitni] ɛlaḥsab řaǧat nsen u ɛlaḥsab tudrin n ibabaten nsen,
NUM 4:39 zeg [wenni ɣar iǧa] třatin n iseggʷusa sennej, ař [wenni ɣar iǧa] xemsin n iseggʷusa, kuř ijj i ɣa yadfen maḥend ad isexxar deg Uqiḍun n Umsagar,
NUM 4:40 aqa inni zzaysen ittwaḥesben, [am ttwasettfen nitni] ɛlaḥsab řaǧat nsen, ɛlaḥsab tudrin n ibabaten nsen, tuɣa aten di ařfayen u-setta-mya u-třatin,
NUM 4:41 Ina d inni ittwaḥesben n řaǧat n ayt n Jarcun, marra wi ittsexxaren deg Uqiḍun n Umsagar, inni ḥesben Musa d Harun x řumur n SIDI.
NUM 4:42 Ina d inni ittwaḥesben n řaǧat n ayt n Marari, [am ttwasettfen nitni] ɛlaḥsab řaǧat nsen, ɛlaḥsab tudrin n ibabaten nsen,
NUM 4:43 zeg [wenni ɣar iǧa] třatin n iseggʷusa sennej, ař [wenni ɣar iǧa] xemsin n iseggʷusa, kuř ijj i ɣa yadfen di řɛeskar maḥend ad isexxar deg Uqiḍun n Umsagar,
NUM 4:44 aqa inni zzaysen ittwaḥesben, [am ttwasettfen nitni] ɛlaḥsab řaǧat nsen, tuɣa aten di teřt-ařaf u-mitayen.
NUM 4:45 Ina d inni ittwaḥesben n řaǧat n Marari, inni ḥesben Musa d Harun x řumur n SIDI sadu ufus n Musa.
NUM 4:46 Marra inni ittwaḥesben, inni ḥesben Musa d Harun d řḥukkam n Israil zeg Ilawiyyen, [am ttwasettfen nitni] ɛlaḥsab řaǧat nsen u ɛlaḥsab tudrin n ibabaten nsen,
NUM 4:47 zeg [wenni ɣar iǧa] třatin n iseggʷusa sennej ař [wenni ɣar iǧa] xemsin n iseggʷusa, marra wenni i ɣa yadfen maḥend ad igg řxedmet n tsexxart u řxedmet n [trebbut] n ddquřat deg Uqiḍun n Umsagar,
NUM 4:48 aqa inni zzaysen ittwaḥesben tuɣa aten di temn-ařaf u-xemsa-mya u-tmanin.
NUM 4:49 Nitni ttwaḥesben x řumur n SIDI sadu ufus n Musa, kuř aryaz [ittwařeqqem] di tsexxart nnes u x ddqeř nnes. Nitni ttwaḥesben zzayes am mammec d as yumur SIDI i Musa.
NUM 5:1 Issiweř SIDI ak-d Musa, inna:
NUM 5:2 “Umur ayt n Israil ad ssuffɣen marra ayt n řbarṣ zi řmargeḥ n řɛeskar, uřa d marra inni ɣar iǧa useyyeř d marra inni ittwassxemjen zeg ict n řxecbet.
NUM 5:3 Ad ten tessuffɣem, am yeryazen am temɣarin. Kenniw ad ten tessuffɣem barra i řmargeḥ n řɛeskar ḥima war ssxemmajen řemrageḥ nsen mani zeddɣeɣ Necc di řwesṭ nsen.”
NUM 5:4 Uca ggin ayt n Israil ammu. Nitni ssuffɣen ten barra i řmargeḥ n řɛeskar. Ayt n Israil ggin am mammec i inna SIDI i Musa.
NUM 5:5 Issiweř SIDI ak-d Musa, inna:
NUM 5:6 “Siweř ak-d ayt n Israil: ‘Mařa ijj n weryaz niɣ ict n temɣart i iggin ca n ddenb n bnadem i zi iɣdar di SIDI, [xenni] ad yiři řeɛmar nni d bu-umarwas.
NUM 5:7 Ad neɛmen x ddenb nsen i ggin. Netta ad ixeǧeṣ amarwas nnes marra u ad as yarni ict n tesɣart texmusect uca ad iwc aya i wenni idewřen itturs as netta.
NUM 5:8 [Maca] mařa war din iǧi umefdi i weryaz [nni], maḥend ad as ixeǧeṣ amarwas, [xenni] ad yiři umarwas, i ittxeṣṣa ad ixeǧeṣ i SIDI, i ukehhan, ak-d d icarri n weṣřaḥ i zzayes t ɣa isseṣřeḥ.
NUM 5:9 Kuř tawhibt nni ssgeɛɛden ayt n Israil n tewhibin iqeddsen nni dd-ittawyen ɣar ukehhan ad tiři nnes.
NUM 5:10 Marra [tiwhibin] iqeddsen n ca n weryaz ad iřint i netta, min ma i ɣa iwc ijj n weryaz i ukehhan, [d man aya] ad yiři i netta.’”
NUM 5:11 Issiweř SIDI ak-d Musa, inna:
NUM 5:12 “Siweř ak-d ayt n Israil uca ini asen: ‘Mařa tamɣart n ca n weryaz teffeɣ u teɣdar i-t,
NUM 5:13 u ca n weryaz issen i-tt, uca man aya innufaren i tiṭṭawin n weryaz nnes u nettat tessnuffar i-t uca [ammu] tessexmej ixef nnes u war din wi xas ɣa icehden u nettat [ɛemmarṣ] war tᵉttwaṭṭef,
NUM 5:14 uca [xenni] yusa-dd xas buḥbeř n tusmi uca yusem x temɣart nnes umi nettat tᵉttwassexmej, niɣ yusa-dd xas buḥbeř n tusmi uca yusem x temɣart nnes umi nettat war tᵉttwassexmij ca,
NUM 5:15 [xenni] aryaz ad yawi tamɣart nnes ɣar ukehhan uca ad yawi tawhibt nnes i nettat, aqa-tt d taɛcart n ijj n ifa n waren n imendi. War xas ifarreɣ zzect niɣ ad xas issars jjawi, minzi aqa-tt d tawhibt [n řɣiǧet] di ssibbet n tusmi, ict n tewhibt [n řɣiǧet] i řidaret, [tenni] dd ɣa yawyen axarreṣ di řmuɛṣiyyet.
NUM 5:16 Ad tt-i-dd-issqarreb ukehhan uca ad tt issars zzat i wudem n SIDI.
NUM 5:17 Ad iksi ukehhan aman iqeddsen deg ict n řqecɛet n třaxt uca ad iksi [ca] zeg ucař i iǧan di temmurt n Tzeddiɣt, ad yegg [aya] deg waman.
NUM 5:18 [Xenni] ad igg ukehhan tamɣart [nni] zzat i wudem n SIDI, ad ifekk [acuwwaf n] uzeǧif n temɣart uca ad igg tawhibt [n řɣiǧet] i řidaret deg ifassen nnes, aqa d tawhibt [n řɣiǧet] n tusmi. Akehhan ad iṭṭef deg ufus nnes aman imerzagen nni dd-ittawyen nneɛřet.
NUM 5:19 Akehhan ad tt yejj ad tejjaǧ uca ad yini i temɣart: Mařa war kim iṭṭiṣ ḥed u war tewḍid zeg weryaz nnem di texmuji, aqa ad tiřid tᵉttwaṣfid zeg waman-a imerzagen inni dd-ittawyen nneɛřet.
NUM 5:20 [Maca uct xam,] mařa tewḍid zeg weryaz nnem uca tᵉttwassxemjed uca ijj n weryaz mɣir aryaz nnem iṭṭeṣ akim!
NUM 5:21 [Xenni] ad yejj ukehhan tamɣart ad tejjaǧ tajaǧit n nneɛřet. Ad yini ukehhan i temɣart: SIDI ad cem yarr d [ijj n umedya] n nneɛřet[-a] d tjaǧit[-a] di řwesṭ n řgens nnem, xmi ɣa yejj SIDI ad iwḍa umeṣṣaḍ nnem uca ad yarr aɛeddis nnem yuff,
NUM 5:22 uca aman-a i dd-ittawyen nneɛřet ad adfen ɣar wadan nnem maḥend ad ssuffen aɛeddis nnem uca ad ssɣeḍřen ameṣṣaḍ nnem! Uca ad tini temɣart: Amin Amin!
NUM 5:23 Ad yari ukehhan nnɛaři-ya x ict n tewriqt ittwannḍen uca [xenni] ad [tent] imḥa deg waman imerzagen.
NUM 5:24 Ad iwc aman imerzagen i dd-ittawyen nneɛřet i temɣart u nettat ad tsu ařami aman i dd-ittawyen nneɛřet ad dayes adfen daxeř uca ad dewřen d imerzagen.
NUM 5:25 Akehhan ad iksi tawhibt [n řɣiǧet] n tusmi zeg ufus n temɣart uca ad issenhezz tawhibt [n řɣiǧet] zzat i wudem n SIDI uca ad tt-i-dd issqarreb ɣar uɛalṭar.
NUM 5:26 Ad iksi ukehhan ijj n wuru zi tewhibt [n řɣiǧet], aqa-tt d tawhibt n řidaret, uca ad issbexxar aya x uɛalṭar uca xenni ad iwc aman i temɣart ad tsu.
NUM 5:27 Mařa iwca as aman ad tsu, [xenni], mařa tᵉttwassexmej uca nettat teɣdar aryaz nnes, aman i dd-ittawyen nneɛřet ad dayes dewřen d imerzagen uca aɛeddis nnes ad yuff uca ameṣṣaḍ nnes ad ittwaɣḍeř u tamɣart ad tedweř d nneɛřet di řwesṭ n řgens nnes.
NUM 5:28 [Maca] mařa war texmij ca temɣart, [maca] tezdeg, [xenni] ad tiři war xas ca, ad tiři tᵉttaru.’”
NUM 5:29 Wa d azerf zi jjihet n tusmi, xmi tewḍa ict n temɣart zeg weryaz nnes uca tᵉttwassexmej
NUM 5:30 niɣ xmi dd yusa buḥbeř n tusmi x weryaz uca netta yusem x temɣart nnes. [Xenni] ad yarra tamɣart ad tbedd zzat i wudem n SIDI u akehhan ad as ikemmeř marra azerf-a wa.
NUM 5:31 Aryaz ad yiři d amezdag zi ssibbet n řmuɛṣiyyet, tamɣart-a ad tarbu řmuɛṣiyyet nnes.
NUM 6:1 Issiweř SIDI ak-d Musa, inna:
NUM 6:2 “Siweř ak-d ayt n Israil uca ini asen: ‘Mařa ijj n weryaz niɣ ict n temɣart i iwejden maḥend ad iwc awař n ttaj [n ucuwwaf n lwaɛd], maḥend ad iɛzeř ixef nnes [s ttaj nni] i SIDI,
NUM 6:3 [xenni] ad iggʷej x binu d ccrab. War isess řxeǧ zi binu niɣ řxeǧ zi ccrab u war isess aman n uḍiř, u war ittett zeg uḍiř azeyza niɣ zeg uḍiř yuẓɣen.
NUM 6:4 Marra ussan n ttaj nnes [n weɛzař] war ittett ca min dd-iffɣen zi tzayart, zeg uɛeqqa [nnes] ař taqcurt [nnes].’”
NUM 6:5 “Marra ussan n wawař i dd ttasen ak-d ttaj nnes [n weɛzař] war ittekk řmus x uzeǧif nnes ař ɣa kemmřen wussan nni iɛzeř i SIDI uca ad yiři iqeddes uca ad yejj iɛeyyacen n ucuwwaf n uzeǧif nnes ad mɣaren.
NUM 6:6 Marra ussan i issḥuzz i SIDI, war dd-ittqarrib ca ɣar řeɛmar n ijj n umettin.
NUM 6:7 War issxemmij ixef nnes x babas niɣ x yemmas niɣ x umas niɣ x učmas mařa gguren ad mmten, minzi ttaj [n weɛzař] n AREBBI nnes aqa-tt x uzeǧif nnes.”
NUM 6:8 “Marra ussan n ttaj nnes [n weɛzař] ad yiři iqeddes i SIDI.
NUM 6:9 Mařa wenni ittmettan ad immet deɣya deg wermac n wabřiwen uca issexmej azeǧif [nnes] s ttaj nnes [n weɛzař], [xenni] ad iḥeff azeǧif nnes deg wass n usizdeg nnes. Deg wass wiss sebɛa ittxeṣṣa ad t iḥeff.
NUM 6:10 Deg wass wiss tmenya ad yawi tnayen n tejlilliḥin niɣ tnayen n iḍbiren ɣar ukehhan ɣar wadaf n Uqiḍun n Umsagar.
NUM 6:11 Akehhan ad issewjed ict d taɣarṣt n ddenb d ict d taɣarṣt n wecmaḍ uca ad t isseṣřeḥ, minzi netta aqa ixḍa di ssibbet n umettin. Netta ad issqeddes azeǧif nnes [ɛawed] deg wass nni
NUM 6:12 uca [twařa nneɣni] ad ineyyec netta ussan n ttaj nnes [n weɛzař] i SIDI uca ad iqeddem ijj n izmar n ijj n useggʷas d taɣarṣt n umarwas. Ussan iɛdun ad iřin wḍan minzi aqa tᵉttwassexmej ttaj nnes [n weɛzař].”
NUM 6:13 “Wa d azerf n wenni yarebbun ttaj [n weɛzař]: deg wass min di ttwakemmřen wussan n ttaj nnes [n weɛzař], ad t awyen ɣar wadaf n Uqiḍun n Umsagar.
NUM 6:14 [Xenni] ad dd-issqarreb tawhibt nnes ɣar SIDI, ijj n izmar icnan qaɛ n ijj n useggʷas am tɣarṣt n wecmaḍ d ict n texsi icnan qaɛ n ijj n useggʷas am tɣarṣt n ddenb d ijj n icarri icnan qaɛ am tɣarṣt n řehna
NUM 6:15 d ict n tsuǧet ak-d weɣrum břa antun d řemsemnat n waren azdad ixeǧḍen s zzect d teřfaf n weɣrum břa antun ttwadehnent s zzect uřa d tawhibt nnes [n řɣiǧet] d tewhibin nnes n useyyeb.”
NUM 6:16 “Akehhan ad yawi [man aya] zzat i wudem n SIDI uca ad issewjed taɣarṣt nnes n ddenb d tɣarṣt nnes n wecmaḍ.
NUM 6:17 Ad issewjed icarri am tɣarṣt n řehna i SIDI uřa d tasuǧet ak-d tecnifin břa antun uca akehhan ad issewjed [ɛawed] tawhibt [n řɣiǧet] nnes d tewhibin n useyyeb nnes.”
NUM 6:18 “[Xenni] wenni yarebbun ttaj [n weɛzař] ad iḥeff azeǧif n ttaj nnes [n weɛzař] ɣar wadaf n Uqiḍun n Umsagar uca ad iksi acuwwaf n uzeǧif n ttaj nnes [n weɛzař] uca ad yegg aya x tmessi [i iǧan] sadu tɣarṣt n řehna.
NUM 6:19 [Xenni] ad iksi ukehhan tameṣṣaḍt n zzat yenggʷan n icarri d ict n temsemment břa antun zi tsuǧet d ict n teřfeft břa antun uca ad tent issars x ifassen n wenni yarebbun ttaj [n weɛzař] awarni ma iḥeff ttaj nnes [n weɛzař].
NUM 6:20 Akehhan ad tent issenhezz zi ssa ɣar da zzat i wudem n SIDI. Aqa-tt d ict n tmesřact tamqeddast i ukehhan, ak-d idmaren n wenhezzi u ak-d ucekrud n tewhibt ittwassgeɛɛden. Awarni aya iɛeddeř i wenni yarebbun ttaj [n weɛzař] maḥend ad isu binu.”
NUM 6:21 “Wa d azerf n wenni yarebbun ttaj [n weɛzař], wenni tuɣa iwaɛden i SIDI tawhibt nnes di ssibbet n ttaj [n weɛzař] nnes, barra min izemmar ufus nnes [ɛad] ad issiweḍ. Ittxeṣṣa as ad yegg ɛlaḥsab awař i iwcin, [ɛlaḥsab] azerf n ttaj [n weɛzař] nnes.”
NUM 6:22 Issiweř SIDI ak-d Musa, inna:
NUM 6:23 “Siweř ak-d Harun d warraw nnes uca ini: ‘Ammu ad tbarkem ayt n Israil uca ad asen tinim:
NUM 6:24 SIDI ad ac ibarek uca ad cek iḥḍa!
NUM 6:25 SIDI ad yarr udem nnes ad xak yegg tfawt uca ad xak iḥinn.
NUM 6:26 SIDI ad ɣarek dd-inneqřeb udem nnes uca ad ac iwc řehna!’
NUM 6:27 Ad ssiwḍen Isem inu x ayt n Israil u Necc ad ten barkeɣ.’”
NUM 7:1 Imsar deg wass min di ikemmeř Musa asbeddi n Tzeddiɣt, idhen u issqeddes i-tt ak-d řeqcuɛ nnes uřa d marra aɛalṭar ak-d řeqcuɛ nnes. Aqa idhen i-ten uca issqeddes i-ten.
NUM 7:2 [Xenni] qarrben-dd řḥukkam n Israil, izeǧifen n tudrin n řejdud nsen. Nitni d řḥukkam n tqebbař, nitni tuɣa x yinni ittwaḥesben.
NUM 7:3 Nitni iwyen-dd tawhibt nsen zzat i wudem n SIDI: setta n ikarruten ak-d tseqqift d tenɛac n ifunasen, aqa d ijj n ukarru i tnayen n řḥukkam d ijj n ufunas i kuř ijj [n řḥakem] uca iwyen ten zzat i wudem n Tzeddiɣt.
NUM 7:4 Issiweř SIDI ak-d Musa, inna:
NUM 7:5 “Ksi aya zzaysen, ḥima ad iřin i řxedmet n tsexxart n Uqiḍun n Umsagar. Ittxeṣṣa ad ten tewced i Ilawiyyen, [i kuř aryaz] am mammec dd-ittas ak-d tsexxart nnes.”
NUM 7:6 Uca Musa iṭṭef ikarruten d ifunasen uca iwca i-ten i Ilawiyyen.
NUM 7:7 Tnayen n ikarruten d arebɛa n ifunasen i iwca i ayt n Jarcun, am mammec dd-ittas ak-d tsexxart nsen,
NUM 7:8 u i ayt n Marari iwca asen arebɛa n ikarruten d tmenya n ifunasen, am mammec dd-ittas ak-d tsexxart nsen sadu ufus n Itamar, mmis n ukehhan Harun.
NUM 7:9 I ayt n Qahat war d asen iwci walu, minzi tuɣa xasen tasexxart n Zzawect Iqeddsen, nitni arbun [Zzawect] x tɣarwaḍ [nsen].
NUM 7:10 [Xenni] qarrben-dd řḥukkam ak-d tewhibt i udeccen n uɛalṭar deg wass min di ittwadhen [uɛalṭar]. Iwyen řḥukkam tiwhibin nsen zzat i wudem n uɛalṭar.
NUM 7:11 Inna SIDI i Musa: “Ijj n řḥakem deg [ijj n] wass, [xenni ɛawed] ijj n řḥakem deg wass [awarni as], [ammu] i ɣa qeddmen nitni tiwhibin nsen i udeccen n uɛalṭar.”
NUM 7:12 Deg wass amezwaru iqeddem Naḥcun, mmis n Ɛamminadab, zi teqbič n Yahuda, tawhibt nnes.
NUM 7:13 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:14 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:15 ijj n ufunas - ameẓyan n tfunast - ijj n icarri, ijj n izmar n ijj n useggʷas am tɣarṣt n wecmaḍ,
NUM 7:16 ijj n umyan zeg iɣayḍen i tɣarṣt n ddenb
NUM 7:17 u i tɣarṣt n řehna: tnayen n ifunasen d xemsa n icarriyyen d xemsa n iɣayḍen d xemsa n izmaren n ijj n useggʷas. Aqa ta d tawhibt n Naḥcun, mmis n Ɛamminadab.
NUM 7:18 Deg wass wiss tnayen iqeddem Natanayil, mmis n Ṣuɣar, wenni d řḥakem n Issakar, tawhibt nnes.
NUM 7:19 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:20 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:21 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:22 ijj n umyan zeg iɣayḍen i tɣarṣt n ddenb
NUM 7:23 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Natanayil, mmis n Ṣuɣar.
NUM 7:24 Deg wass wiss třata iqeddem řḥakem n ayt n Zabulun, Iliyab, mmis n Ḥilun, tawhibt nnes.
NUM 7:25 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:26 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:27 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:28 ijj n umyan zeg iɣayḍen i tɣarṣt n ddenb
NUM 7:29 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Iliyab, mmis n Ḥilun.
NUM 7:30 Deg wass wiss arebɛa iqeddem řḥakem n ayt n Rubin, Aliṣur, mmis n Cadayyur, tawhibt nnes.
NUM 7:31 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:32 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:33 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:34 ijj n umyan zeg iɣayḍen i tɣarṣt n ddenb
NUM 7:35 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Aliṣur, mmis n Cadayyur.
NUM 7:36 Deg wass wiss xemsa iqeddem řḥakem n ayt n Cimɛun, Calumiyil, mmis n Ṣuricadday, tawhibt nnes.
NUM 7:37 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:38 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:39 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:40 ijj n umyan zeg iɣayḍen i tɣarṣt n ddenb
NUM 7:41 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Calumiyil, mmis n Ṣuricadday.
NUM 7:42 Deg wass wiss setta iqeddem řḥakem n ayt n Jad, Aliyasaf, mmis n Daɛuyil, tawhibt nnes.
NUM 7:43 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:44 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:45 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:46 ijj n umyan zeg iɣayḍen i tɣarṣt n ddenb
NUM 7:47 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Aliyasaf, mmis n Daɛuyil.
NUM 7:48 Deg wass wiss sebɛa iqeddem řḥakem n ayt n Ifrayim, Ilicamaɛ, mmis n Ɛammihud, tawhibt nnes.
NUM 7:49 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:50 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:51 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:52 ijj n umyan zeg iɣayḍen i tɣarṣt n ddenb
NUM 7:53 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Ilicamaɛ, mmis n Ɛammihud.
NUM 7:54 Deg wass wiss tmenya iqeddem řḥakem n ayt n Manassa, Jamaliyil, mmis n Fadahṣur, tawhibt nnes.
NUM 7:55 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:56 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:57 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:58 ijj n umyan zeg iɣayḍen i tɣarṣt n ddenb
NUM 7:59 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Jamaliyil, mmis n Fadahṣur.
NUM 7:60 Deg wass wiss tesɛa iqeddem řḥakem n ayt n Binyamin, Abidan, mmis n Jidɛuni, tawhibt nnes.
NUM 7:61 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:62 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:63 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:64 ijj n umyan zeg iɣayḍen i tɣarṣt n ddenb
NUM 7:65 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Abidan, mmis n Jidɛuni.
NUM 7:66 Deg wass wiss ɛecra iqeddem řḥakem n ayt n Dan, Axiɛazar, mmis n Ɛamicadday, tawhibt nnes.
NUM 7:67 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:68 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:69 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:70 ijj n umyan zeg iɣayḍen i tɣarṣt n ddenb
NUM 7:71 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Axiɛazar, mmis n Ɛamicadday.
NUM 7:72 Deg wass wiss ḥiṭac iqeddem řḥakem n ayt n Acir, Fajɛiyil, mmis n Ɛukran, tawhibt nnes.
NUM 7:73 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:74 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:75 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:76 ijj n umyan zeg iɣayḍen i tɣarṣt n ddenb
NUM 7:77 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Fajɛiyil, mmis n Ɛukran.
NUM 7:78 Deg wass wiss tenɛac iqeddem řḥakem n ayt n Naftali, Axiraɛ, mmis n Ɛiynan, tawhibt nnes.
NUM 7:79 Tuɣa-tt tawhibt nnes: ijjen ṭṭebṣi n nnuqart n mya u-třatin ciqlu [n ddqeř], d icten ṭṭawya i urucci n nnuqart n sebɛin ciqlu, ɛlaḥsab ciqlu n Zzawect Iqeddsen. Tuɣa-ten s tnayen ccuren s waren azdad ixeǧḍen s zzect am tewhibt [n řɣiǧet].
NUM 7:80 [Xenni] ict n tɣenjact n wureɣ n ɛecra [ciqlu] teccur s řebxur,
NUM 7:81 ijj n ufunas - ameẓyan n tfunast - ijj n icarri d ijj n izmar n ijj n useggʷas am tɣarṣt n wecmaḍ,
NUM 7:82 ijj n umyan zeg iɣayḍen i tɣarṣt n ddenb
NUM 7:83 u i tɣarṣt n řehna: tnayen n ifunasen, xemsa n icarriyyen, xemsa n iɣayḍen d xemsa n izmaren n ijj n useggʷas. Aqa ta d tawhibt n Axiraɛ, mmis n Ɛiynan.
NUM 7:84 Tuɣa ta d tawhibt i udeccen n uɛalṭar zi řḥukkam n Israil deg wass nni di ittwadhen [uɛalṭar]: tenɛac n ṭṭbaṣi n nnuqart d tenɛac n ṭṭawyat i urucci n nnuqart d tenɛac n tɣenjayin n wureɣ.
NUM 7:85 Ijjen ṭṭebṣi n nnuqart [iwzen] mya u-třatin [ciqlu] d icten ṭṭawya i urucci [iwzen] sebɛin [ciqlu]. Marra nnuqart n řeqcuɛ [nni tewzen] ařfayen u-arebɛa-mya [ciqlu] ɛlaḥsab ciqlu n Zzawect Iqeddsen.
NUM 7:86 Tenɛac n tɣenjayin n wureɣ ccurent s řebxur. Kuř taɣenjayt [tewzen] ɛecra ciqlu, ɛlaḥsab ciqlu n Zzawect Iqeddsen. Marra ureɣ n tɣenjayin [iwzen] mya u-ɛicrin [ciqlu].
NUM 7:87 Marra řebhayem i tɣarṣt n wecmaḍ aqa daysent tenɛac n ifunasen imeẓyanen, tenɛac n icarriyyen, tenɛac n izmaren n ijj n useggʷas ak-d tewhibt [n řɣiǧet] nsen, u tenɛac imyanen zeg iɣayḍen i tɣarṣt n ddenb.
NUM 7:88 Marra řebhayem n tɣarṣt n řehna aqa daysent arebɛa u-ɛicrin n ifunasen imeẓyanen, settin n icarriyyen d settin n iɣayḍen d settin n izmaren n ijj n useggʷas. Man aya d tawhibt i udeccen n uɛalṭar awarni ittwadhen.
NUM 7:89 [Umi] yudef Musa ɣar Uqiḍun n Umsagar, ḥima ad kides issiweř, isřa Tmijja tessiweř akides zi sennej n tqebbart n weṣřaḥ i iǧan x Ttabut n Cchadet, zi jar tnayen n ikiruben. [Ammu i] issiweř [SIDI] akides.
NUM 8:1 Issiweř SIDI ak-d Musa, inna:
NUM 8:2 “Siweř ak-d Harun, ini as: ‘Xmi ɣa tessarsed tifawin [x řqendiř], ittxeṣṣa sebɛa n tfawin ad wcent tafawt ɣar zzat n řqendiř.’”
NUM 8:3 Uca ammu i igga Harun. Issars tifawin nnes ɣar zzat n řqendiř, am mammec d as yumur SIDI i Musa.
NUM 8:4 Tuɣa řqendiř d ict n ṣṣenɛet n wureɣ yeɛdeř s wefḍis. Zeg ufuḍ x uḍar nnes ař nnuwwarat nnes tuɣa ittwagg s wefḍis. Ɛlaḥsab amedya i d as isccen SIDI, ammu i iṣenneɛ řqendiř.
NUM 8:5 Issiweř SIDI ak-d Musa, inna:
NUM 8:6 “Ksi Ilawiyyen zi jar řwesṭ n ayt n Israil uca sizdeg i-ten.
NUM 8:7 Ammu i d asen ɣa tegged ḥima ad ten tessizedged: Rucc i-ten s waman n usizdeg. Ittxeṣṣa asen ad ḥeffen marra arrimet nsen uca ad ssirden arruḍ nsen uca ad ssizdegen ixef nsen.
NUM 8:8 Xenni ad ksin ijj n ufunas, ameẓyan n tfunast, ak-d tewhibt [n řɣiǧet] nnes n waren azdad ixeǧḍen s zzect u [ɛawed] ijj n ufunas wiss tnayen, ameẓyan n tfunast, am tɣarṣt n ddenb.
NUM 8:9 Ad tawyed Ilawiyyen zzat i Uqiḍun n Umsagar uca ad tessmuned marra tamesmunt n ayt n Israil.
NUM 8:10 Ad dd-tessqarrbed Ilawiyyen zzat i wudem n SIDI uca ayt n Israil ad ssarsen ifassen nsen x Ilawiyyen.
NUM 8:11 Ad yejj Harun ad hezzen Ilawiyyen zi ssa ɣar da zzat i wudem n SIDI am yict n tewhibt n wenhezzi di ṭṭweɛ n ayt n Israil. Nitni ad dewřen ttsexxaren di tsexxart n SIDI.
NUM 8:12 Ilawiyyen ad ssarsen ifassen nsen x izeǧifen n ifunasen imeẓyanen uca ad tesswejded ijj i tɣarṣt n ddenb d yijj i tɣarṣt n wecmaḍ i SIDI, ḥima ad zzaysen ittwagg weṣřaḥ i Ilawiyyen.
NUM 8:13 Ad tegged Ilawiyyen ad bedden zzat i wudem n Harun u zzat i wudem n warraw nnes uca [ad ten tarred] ad hezzen zi ssa ɣar da am yict n tewhibt n wenhezzi zzat i wudem n SIDI.
NUM 8:14 [Ammu] i ɣa tḥuzzed Ilawiyyen zi řwesṭ n ayt n Israil ḥima Ilawiyyen ad iřin inu.
NUM 8:15 Awarni man aya ad dd-asen Ilawiyyen ḥima ad sexxaren deg Uqiḍun n Umsagar. Ad ten tessizedged uca ad ten tarred ad hezzen zi ssa ɣar da am yict n tewhibt n wenhezzi,
NUM 8:16 minzi nitni ttwammewcen ayi nican zi řwesṭ n ayt n Israil, uca Necc ksiɣ ten i Yixef inu deg wemcan n marra min yarezmen řemřawet [d amezwaru], [deg wemcan n] umenzu n marra ayt n Israil.
NUM 8:17 Minzi marra amenzu jar ayt n Israil aqa-t inu, zeg iwdan, ammu zi řmař, zeg wass i di nɣiɣ Necc marra imenza di temmurt n Miṣra, ssqeddseɣ ten i Necc.
NUM 8:18 Necc ksiɣ Ilawiyyen deg wemcan n marra imenza jar ayt n Israil.
NUM 8:19 Necc wciɣ Ilawiyyen i Harun u i warraw nnes am yijj n uriɣalu zi řwesṭ n ayt n Israil, maḥend ad ggen tasexxart n ayt n Israil deg Uqiḍun n Umsagar u maḥend ad ittwagg weṣřaḥ di ṭṭweɛ n ayt n Israil, ḥima war tᵉttiři jjriḥect x ayt n Israil xmi dd ɣa qarrben ayt n Israil ɣar Zzawect Iqeddsen.”
NUM 8:20 Musa d Harun d marra tamesmunt n ayt n Israil ggin ak-d Ilawiyyen ɛlaḥsab marra min d as yumur SIDI i Musa zi jjihet n Ilawiyyen, ammu i ggin ayt n Israil akidsen.
NUM 8:21 Ilawiyyen ssizdigen ixef nsen zi ddenb nsen uca ṣebbnen arruḍ nsen uca Harun yarra i-ten ad nhezzen zi ssa ɣar da am yict n tewhibt n wenhezzi zzat i wudem n SIDI uca Harun isseṣřeḥ i-ten i usizdeg nsen.
NUM 8:22 Awarni man aya usin-dd Ilawiyyen ḥima ad sexxaren deg Uqiḍun n Umsagar zzat i wudem n Harun u zzat i wudem n warraw nnes am mammec d as yumur SIDI i Musa zi jjihet n Ilawiyyen, ammu i kidsen ggin.
NUM 8:23 Issiweř SIDI ak-d Musa, inna:
NUM 8:24 “Ta zi jjihet n Ilawiyyen: [aqa] ittxeṣṣa i [kuř] mmis n xemsa u-ɛicrin n iseggʷusa sennej ad dd-yas, ḥima ad isexxar di ṭṭweɛ n tsexxart n Uqiḍun n Umsagar
NUM 8:25 u xmi i ɣa yiweḍ ɣar xemsin n iseggʷusa ad iffeɣ zi řɛeskar n tsexxart u war iqqim ittsexxar ɛad ktar.
NUM 8:26 Ad iwc afus i yaytmas deg Uqiḍun n Umsagar ḥima ad [xas] ḥḍan, [maca] netta [s yixef nnes] war izemmar ad isexxar. Ammu i ɣa tegged ak-d Ilawiyyen zi jjihet n uḥeṭṭu i xasen ittwaggen.”
NUM 9:1 Issiweř SIDI ak-d Musa di řexřa n Sina deg useggʷas wiss tnayen awarni řami dd-ffɣen zi temmurt n Miṣra, deg uyur amezwaru, inna:
NUM 9:2 “Jjem ayt n Israil ad sswejden [Taɣarṣt n] Useɛdu di řweqt nnes ittwaggen.
NUM 9:3 Deg wass wiss arbeɛṭac n uyur-a, jar beddu n wezyen n wass ař dd-tewḍa tmeddit, ittxeṣṣa ad tt tesswejdem di řweqt nnes ittwaggen. Ittxeṣṣa ad tt tesswejdem ɛlaḥsab marra tiweṣṣa d lfarayiḍ nnes.”
NUM 9:4 Issiweř Musa ak-d ayt n Israil, [inna] ittxeṣṣa asen ad sswejden [Taɣarṣt n] Useɛdu.
NUM 9:5 Uca nitni sswejden [Taɣarṣt n] Useɛdu deg wass wiss arbeɛṭac n [uyur] amezwaru di řexřa n Sina, jar beddu n wezyen n wass ař dd-tewḍa tmeddit, ɛlaḥsab marra min d as yumur SIDI i Musa, ammu i tt sswejden ayt n Israil.
NUM 9:6 Ca n yeryazen ttwassxemjen s řxecbet n ijj n bnadem [immuten] uca war zemmaren ad sswejden [Taɣarṣt n] Useɛdu. [X uya] qarrben-dd nitni deg wass nni zzat i wudem n Musa u zzat i wudem n Harun
NUM 9:7 uca nnan as yeryazen nni: “Neccin nexmej s řxecbet n ijj n bnadem [immuten]. Mayemmi i nettwassbedd ařami war nzemmar ad dd-nessqarreb tawhibt n SIDI deg wass nnes ittwaggen di řwesṭ n ayt n Israil?”
NUM 9:8 Musa inna asen: “Qqimem tbeddem, [ḥima] ad sřeɣ min d awem ɣa iweṣṣa SIDI.”
NUM 9:9 Issiweř SIDI ak-d Musa, inna:
NUM 9:10 “Siweř ak-d ayt n Israil uca ini: ‘Mařa ḥed zzaywem niɣ zi jjiřat nwem [i dd ɣa yasen] ittwassexmej zi řxecbet [n yijj n umettin], niɣ netta deg webrid d azirar, [xenni] ad issewjed [ɛad] [Taɣarṣt n] Useɛdu i SIDI.
NUM 9:11 Deg uyur wiss tnayen, deg wass wiss arbeɛṭac, jar beddu n wezyen n wass ař dd-tewḍa tmeddit, ad tt sswejden. [Xenni] ad tt ccen ak-d weɣrum břa antun u ak-d řebzar yarezgen.
NUM 9:12 War ttejjin zzayes walu ař ṣṣbeḥ uca war zzayes ttareẓẓan iɣes. Ittxeṣṣa ad tt sswejden ɛlaḥsab marra tiweṣṣa n [Tɣarṣt n] Useɛdu.’”
NUM 9:13 “Mařa ijj n weryaz d amezdag i war iǧin deg webrid, ad yejj ad issewjed [Taɣarṣt n] Useɛdu, [xenni] ad ittwaqess řeɛmar nni zi řgens nnes, minzi netta war dd-issqarreb ca tawhibt n SIDI di řweqt nnes ittwaggen. Aryaz nni ad yarbu ddenb nnes.
NUM 9:14 Mařa izdeɣ akidwem ijj n ubarrani, wenni i ɣa isswejden [Taɣarṣt n] Useɛdu n SIDI, [xenni] ad issewjed [Taɣarṣt n] Useɛdu ɛlaḥsab tawṣeyyet n [Taɣarṣt n] Useɛdu u ɛlaḥsab lfarayiḍ nnes. Ad din tiři ict n tewṣeyyet i kenniw, i ubarrani ammu i wenni dd-ixeřqen di temmurt.”
NUM 9:15 Deg wass min di tᵉttwassgeɛɛed Tzeddiɣt, idřa useynu Tazeddiɣt ak-d Uqiḍun n Cchadet u di ǧiřet iḍhar-dd x Tzeddiɣt am tmessi ař ṣṣbeḥ.
NUM 9:16 Ammu i tuɣa řebda, aseynu idřa i-tt u di ǧiřet iḍhar-dd am tmessi.
NUM 9:17 Řami dd-igeɛɛed useynu zi sennej n Uqiḍun, [xenni] awarni aya fesyen ayt n Israil iqiḍan nsen u deg wemcan mani tuɣa dd-ibedd useynu, din i wtin ayt n Israil iqiḍan nsen.
NUM 9:18 Fesyen ayt n Israil iqiḍan nsen ɛlaḥsab řumur n SIDI uca x řumur n SIDI wtin iqiḍan nsen. Marra ussan tuɣa aseynu iqqim sennej i Tzeddiɣt, qqimen nitni zeddɣen [din].
NUM 9:19 Řami dd-ibedd useynu aṭṭas n wussan sennej i Tzeddiɣt, ḥḍan ayt n Israil tasexxart n SIDI uca war fesyen ca iqiḍan nsen.
NUM 9:20 Umi iqqim useynu cwayt n wussan sennej i Tzeddiɣt, [xenni] wtin nitni iqiḍan nsen ɛlaḥsab řumur n SIDI u x řumur n SIDI fesyen iqiḍan nsen [ɛawed].
NUM 9:21 Mařa imsar belli aseynu ibedd din zi ǧiřet ař ṣṣbeḥ uca igeɛɛed useynu di ṣṣbeḥ, [xenni] fesyen nitni iqiḍan nsen. Ma deg wass [i iǧa] niɣ di ǧiřet, xmi dd-igeɛɛed useynu, fesyen nitni iqiḍan nsen.
NUM 9:22 Uca mařa iqqim useynu ibedd sennej i Tzeddiɣt tnayen n wussan, niɣ ijj n uyur, niɣ aṭṭas n wussan, ařami xas ɣa yarsa, [xenni] qqimen ayt n Israil ttxeyymen [dinni], war fesyen ca iqiḍan nsen. Mařa igeɛɛed useynu, [xenni] fesyen nitni iqiḍan nsen.
NUM 9:23 X řumur n SIDI wtin iqiḍan nsen u x řumur n SIDI fesyen iqiḍan nsen. Aqa ḥḍan min d asen yumur SIDI, x řumur n SIDI, s tsexxart n Musa.
NUM 10:1 Issiweř SIDI ak-d Musa, inna:
NUM 10:2 “Egg i yixef nnec tnayen n řebwaq [iziraren] n nnuqart, [s yijj n umarsu] s wefḍis ad ten tegged uca ad iřin i ubarreḥ n tmesmunt u i usmuṭṭi n řemrageḥ n řɛeskar.
NUM 10:3 [Xmi] daysen ɣa suḍen, ad ɣarek tmun tmesmunt marra ɣar wadaf n Uqiḍun n Umsagar.
NUM 10:4 Xmi ɣa suḍen deg ijj [zi tnayen nni], [xenni] [mɣir] řḥukkam, izeǧifen x řuřuf n Israil, i xak dd ɣa imunen.
NUM 10:5 Xmi ɣa tsuḍem s wesruddeḥ [di řbuq], [xenni] ad mmuṭṭiyent řemrageḥ nni immarsen ɣar ccarq.
NUM 10:6 Xmi ɣa tsuḍem s wesruddeḥ [di řbuq] tnayen n twařawin, [xenni] ad mmuṭṭiyent řemrageḥ nni immarsen ɣar uɣezdis n ljanub. Ad suḍen s wesruddeḥ umi ɣa muṭṭiyen zeg wemcan ɣar wemcan [nneɣni].
NUM 10:7 I tmesmunt n wegraw [n řgens] ittxeṣṣa ad tsuḍem [di řebwaq], [maca] břa asruddeḥ.
NUM 10:8 Ad suḍen warraw n Harun, ikehhanen, di řebwaq. Ad tiři d ict n tewṣeyyet i řebda i [marra] jjiřat nwem.”
NUM 10:9 “Xmi dd ɣa teffɣem ɣar garra di temmurt nwem, ḥima ad tmenɣem ak-d weɣrim nni kenniw dd-ihekkweřen, [xenni] ad tsuḍem s wesruddeḥ di řebwaq uca kenniw ad tᵉttwatidarem zzat i wudem n SIDI, AREBBI nwem, uca ad tnejmem zi řɛedyan nwem.
NUM 10:10 [Ammu] di kuř ijj n wass n řefraḥet u di řeɛyudat ittwaggen u deg umezwaru n iyuren nwem ad tsuḍem di řebwaq xmi [ɣa tawyem] tiɣarṣa n wecmaḍ nwem d tɣarṣa n uqadi nwem uca [ammu i] ɣa iřint di ṭṭweɛ nwem i řidaret zzat i wudem n AREBBI, Necc d SIDI, AREBBI nwem.”
NUM 10:11 Imsar deg useggʷas wiss tnayen, deg uyur wiss tnayen, deg [wass] wiss ɛicrin n uyur, aqa ittwassgeɛɛed useynu zi sennej n Tzeddiɣt n Cchadet.
NUM 10:12 Uca fesyen ayt n Israil iqiḍan nsen, mmuṭṭiyen zeg wemcan ɣar wemcan zi řexřa n Sina uca ibedd-dd useynu di řexřa n Faran.
NUM 10:13 [Ammu] fesyen iqiḍan nsen twařa tamezwarut, x řumur n SIDI, x ufus n Musa.
NUM 10:14 D amezwaru tᵉttwakkes tɛeǧant n řmargeḥ n řɛeskar n ayt n Yahuda, [uyuren am ttwasettfen] ɛlaḥsab [tirbiɛin n] řɛeskar nsen. Naḥcun, mmis n Ɛamminadab, tuɣa [d azeǧif] x řɛeskar.
NUM 10:15 Natanayil, mmis n Ṣuɣar, tuɣa [d azeǧif] x řɛeskar n teqbič n ayt n Issakar.
NUM 10:16 Iliyab, mmis n Ḥilun, tuɣa [d azeǧif] x řɛeskar n teqbič n ayt n Zibulun.
NUM 10:17 Awarni man aya hedmen Tzeddiɣt uca fesyen ayt n Jarcun d ayt n Marari iqiḍan nsen uca arbun Tazeddiɣt.
NUM 10:18 Xenni tᵉttwakkes tɛeǧant n řmargeḥ n řɛeskar n Rubin [uyuren, ttwasettfen] ɛlaḥsab [tirbiɛin n] řɛeskar nsen. Iliṣur, mmis n Cadayur, tuɣa [d azeǧif] x řɛeskar nnes.
NUM 10:19 Calumiyil, mmis n Ṣuricadday, tuɣa [d azeǧif] x řɛeskar n teqbič n ayt n Cimɛun.
NUM 10:20 Ilyasaf, mmis n Daɛuyil, tuɣa [d azeǧif] x řɛeskar n teqbič n ayt n Jad.
NUM 10:21 [Xenni] fesyen ayt n Qahat iqiḍan nsen, arbun Zzawect Iqeddsen. Uca [ayt n Jarcun d ayt n Marari] bnan Tazeddiɣt qbeř twasit nsen.
NUM 10:22 Awarni as tᵉttwakkes tɛeǧant n řmargeḥ n řɛeskar n ayt n Ifrayim, [uyuren, ttwasettfen] ɛlaḥsab [tirbiɛin n] řɛeskar nsen. Ilicamaɛ, mmis n Ɛammihud, tuɣa [d azeǧif] x řɛeskar nnes.
NUM 10:23 Jamaliyil, mmis n Fadahṣur, tuɣa [d azeǧif] x řɛeskar n teqbič n ayt n Manassa.
NUM 10:24 Abidun, mmis n Jidɛuni, tuɣa [d azeǧif] x řɛeskar n teqbič n ayt n Binyamin.
NUM 10:25 Xenni tᵉttwakkes tɛeǧant n řmargeḥ n řɛeskar n ayt n Dan, am uɣezdis uneggar n marra řemrageḥ, [uca uyuren, ttwasettfen] ɛlaḥsab [tirbiɛin n] řɛeskar nsen. Axiɛazar, mmis n Ɛammicadday, tuɣa [d azeǧif] x řɛeskar nnes.
NUM 10:26 Fajɛiyil, mmis n Ɛukran, tuɣa [d azeǧif] x řɛeskar n teqbič n ayt n Acir.
NUM 10:27 Axiraɛ, mmis n Ɛinan, tuɣa [d azeǧif] x řɛeskar n teqbič n ayt n Zibulun.
NUM 10:28 [Ammu i] ssmuṭṭiyen ayt n Israil iqiḍan nsen [zeg wemcan ɣar wemcan], [am ttwasettfen nitni] ɛlaḥsab řɛeskarat nsen, [ammu i] fesyen nitni iqiḍan nsen.
NUM 10:29 Inna Musa i Ḥubab, mmis n Raɛuyil, Amidyani, aḍeggʷař n Musa: “Neccin ad nemmuṭṭi ɣar wemcan i d aneɣ inna SIDI: ‘Necc ad awem t-i-dd wceɣ!’ As-dd akidneɣ, ad ac negg tcuni, minzi SIDI issiweř x Israil s řxir.”
NUM 10:30 Netta inna as: “Necc war ttriḥeɣ, maɣar ad uyureɣ ɣar temmurt inu u ɣar řaǧ inu.”
NUM 10:31 Uca netta inna as: “Ttzawgeɣ cek, war d aneɣ ttejji, minzi cek tessned mammec icuwwar ad newwet iqiḍan nneɣ. Cek aqa tdewřed aneɣ [- am mammec neqqar -] am tiṭṭawin.
NUM 10:32 Xmi ɣa traḥed akidneɣ uca ad aneɣ dd-yas řxir i dayneɣ ɣa igg SIDI, aqa neccin ad ac negg tcuni [ɛawed].”
NUM 10:33 Uca fesyen iqiḍan nsen, [uyuren] zeg wedrar n SIDI ticři n třata n wussan. Ttabut n Řɛahd tuyur zzat i wudem nsen ticři n třata n wussan, ḥima ad yarzu x ijj n wemcan i arraḥet.
NUM 10:34 Deg uziř tuɣa aseynu n SIDI sennej nsen umi kksen iqiḍan nsen zi řmargeḥ n řɛeskar.
NUM 10:35 Řami tᵉttwassmuṭṭi Ttabut, temsar [řebda] belli Musa inna: “Kkar, [a] SIDI, ejj řeɛdyan nnec ad mmzeǧaɛen u inni kenniw icarrhen ad arewřen zeg wudem nnec!”
NUM 10:36 Ɣar ubeddi [n Ttabut], inna: “Dweř-dd, [a] SIDI, ɣar ɛecra n řuřuf n řuřuf n Israil!”
NUM 11:1 Imsar umi idweř řgens am yijj n ubarru ittcetcan, tuɣa man aya d řeḥriq i imezzuɣen n SIDI. [Řami] isřa SIDI aya, yarɣa weɣḍab nnes u timessi n SIDI tarɣa di řwesṭ nsen uca tecca řeḍruf n řmargeḥ n řɛeskar.
NUM 11:2 [Xenni] iřaɣa-dd řgens x Musa uca Musa iẓẓuǧ i SIDI uca texsi tmessi.
NUM 11:3 Uca iřaɣa as i wemcan nni ‘Tabɛira’, minzi timessi n SIDI tuɣa tarɣa di řwesṭ nsen.
NUM 11:4 Abarru imxeǧaḍen [n ibarraniyyen nni iǧan] di řwesṭ nsen, dewřen curren s umeẓri u bdan ayt n Israil ɛawed ad cettcan, nnan: “Wi d aneɣ ɣa iwcin aysum?
NUM 11:5 Nɛeqqeř ɛad x iseřman nni necca di Miṣra baṭeř u x řexyar d ddellaɛ d řebṣeř yuẓɣen d řebṣeř d ticcart.
NUM 11:6 Řexxu řeɛmur nneɣ uẓɣen uca war din walu mɣir ‘manna’-ya zzat i tiṭṭawin nneɣ!”
NUM 11:7 Tuɣa ‘manna’ ittemcabeh di zzariɛet n řqeṣbur uca ccuf nnes amecnaw ccuf n [userɣaɣ acemřař qqaren as] ‘bᵉdula’.
NUM 11:8 Řgens iffeɣ, immsebḍa uca yrun [tt] uca ḥaryen [tt] sadu tsirt niɣ ddzen [tt] s wezduz uca [xenni] ssenggʷen tt di arwa uca ggin zzayes tifḍirin. Tuɣa aředdi nnes am min inggʷan s zzect.
NUM 11:9 Xmi dd-ihekkwa nnda x řmargeḥ n řɛeskar, [xenni] thekkʷa-dd xas ‘manna’ [ɛawed].
NUM 11:10 Uca isřa Musa aqa řgens isɣuy, řaǧ awarni inneɣni, kuř ijj ɣar wadaf n uqiḍun nnes. Yarɣa weɣḍab n SIDI aṭṭas, uca tuɣa man aya uřa d tuɛeffna di tiṭṭawin n Musa.
NUM 11:11 Inna Musa i SIDI: “Mayemmi teggid řɣar deg umsexxar nnec u mayemmi war ufiɣ řxaḍar di tiṭṭawin nnec, umi xafi dd-tessarsed ddqeř n marra řgens-a?
NUM 11:12 Ma necc deyseɣ [balak] s marra řgens-a? Niɣ necc i-t-i-dd yurwen, maḥend tzemmared ad ayi tinid: ‘Awyi t deg wecyun nnec!’, am wenni issuṭṭuḍen yarebbu aseymi, ɣar temmurt min xef tejjuǧed Cek i řejdud nnes.
NUM 11:13 Zi manis [d asen-dd] ɣa yawyeɣ aysum i ɣa wceɣ [d macca] i marra řgens-a? Minzi nitni sɣuyyun-dd ɣari, qqaren: ‘Ewc aneɣ aysum i ɣa necc!’
NUM 11:14 Necc weḥḥdi war zemmareɣ ad arbuɣ řgens-a marra, aqa man aya idqeř xafi aṭṭas.
NUM 11:15 Mařa dayi teggid ammu, necc ttzawageɣ ad ayi tenɣed [ḥsen], mařa ufiɣ arḍa di tiṭṭawin nnec, [xenni] necc war ẓarreɣ řeɣben inu [ɛad] ktar!”
NUM 11:16 Xenni inna SIDI i Musa: “Smun ayi-dd sebɛin n yeryazen zeg imɣaren n Israil, inni tessned cek d imɣaren n řgens u d imeḥḍayen. Awyi ten-dd ɣar Uqiḍun n Umsagar uca ejj iten ad din bedden zzatek.
NUM 11:17 [Xenni] Necc ad hwiɣ uca ad kik ssiwřeɣ. Ad ksiɣ zi Arruḥ i xak iǧan uca ad xasen t ssarseɣ. [Ammu i kik ɣa] arbun ddqeř n řgens-a, maḥend war t tarebbud ca weḥḥdek.
NUM 11:18 Ad tinid i řgens: ‘Sqeddsem ixef nwem i tiwecca, [xenni] ad teccem aysum, minzi aqa trum deg imezzuɣen n SIDI, tennam: Wi d aneɣ ɣa iwcen ad necc aysum? Tuɣa-neɣ mliḥ di Miṣra! [S uya] i d awem ɣa iwc SIDI aysum ad teccem.
NUM 11:19 War t tᵉttettem ijj n wass [waha] uřa d tnayen n wussan, niɣ xemsa n wussan, niɣ ɛecra n wussan, niɣ ɛicrin n wussan,
NUM 11:20 [maca] [marra] ussan n uyur ař d awem dd-iffeɣ zeg wenzaren nwem uca ad zzayes tɛiffem, umi tenḍarem SIDI wenni iǧan di řwesṭ nwem, uca trum zzat i uɣembub nnes, tennam: Mayemmi [ɛad] dd-neffeɣ zi Miṣra?’”
NUM 11:21 Uca Musa inna: “Řgens-ya, di řwesṭ nsen i ǧiɣ, aqa-t di setta-ařaf n yeryazen x iḍaren uca Cek teqqared: ‘Ad asen wceɣ aysum uca ad [zzayes] ccen ijj n uyur amen ikmeř!’
NUM 11:22 [Mařa] ɣarṣen asen i [marra] wuǧi d ifunasen, ma ad yiři cfa asen? [Niɣ mařa] ssmunen asen marra iseřman n řebḥar, ma ad yiři cfa asen?”
NUM 11:23 Inna SIDI i Musa: “Ma [xenni] yebri ufus n SIDI? Řexxu [xenni], ad tẓared ma ad iqfeř awař nnes niɣ lla!”
NUM 11:24 Iffeɣ-dd Musa uca inna awařen n SIDI i řgens uca issmun sebɛin n yeryazen zeg imɣaren n řgens uca issbedd i-ten am dd-nnḍen i Uqiḍun.
NUM 11:25 [Xenni] ihwa-dd SIDI deg useynu uca issiweř akides uca iksi zi Arruḥ nni tuɣa xas uca issars i-t x sebɛin n yeryazen, [x] imɣaren. Uca imsar, umi tuɣa xasen Arruḥ, [bdan] ad nebban, maca awarni i uya war iqqim ɛad.
NUM 11:26 Uca qqimen tnayen n yeryazen di řmargeḥ n řɛeskar, ijjen qqaren as Ildad u wenneɣni qqaren as Midad uca Arruḥ n SIDI tuɣa-t xasen, [minzi] nitni aqa aten zeg inni yuran, [maca] war dd-ffiɣen ɣar Uqiḍun uca tuɣa ttnebban di řmargeḥ n řɛeskar.
NUM 11:27 Yuzzeř-dd ijj n uḥenjir uca ixebbar man aya i Musa, inna: “Ildad d Midad ttnebban di řmargeḥ n řɛeskar.”
NUM 11:28 Yarra-dd Yacuwa, mmis n Nun, [ijjen] zeg ibřiɣen ittfarzen, inna: “Sidi inu, Musa, ḥarrem i-ten!”
NUM 11:29 Inna as Musa: “Ma cek tecḍared di ṭṭweɛ inu? Mři marra řgens n SIDI tuɣa-t marra d inabiyyen, iři igga xasen SIDI Arruḥ nnes!”
NUM 11:30 Idweř-dd Musa ɣar řmargeḥ n řɛeskar, netta d imɣaren n Israil.
NUM 11:31 [Xenni] yusa-dd ijj n usemmiḍ, [issekkar i-t] SIDI, indeh-dd ijḍaḍ qqaren as ‘tsalwa’ zi řebḥar uca inḍar i-tent x řmargeḥ n řɛeskar, ticři n webrid n ijj n wass ɣar ijj n tma d ticři n webrid ɣar tma nneɣni, deg wenneḍ n řmargeḥ n řɛeskar, ař ɛřayen tnayen n iɣaǧen x wudem n temmurt.
NUM 11:32 Ikkar řgens uca ass [nni] ikmeř d ǧiřet [nni] tekmeř d marra ass i t-i-dd iḍfaren yrun nitni ijḍaḍ qqaren as ‘tsalwa’. Wenni ɣares drus, iksi ɛecra iḥumiren. Bezzɛen tent qibač nsen x tiru i innḍen i řmargeḥ n řɛeskar.
NUM 11:33 Mintra aysum ɛad jar teɣmas nsen, qbeř ma ad t ffẓen, yarɣa weɣḍab n SIDI x řgens uca SIDI iwta řgens s ict n tecti temɣar aṭṭas.
NUM 11:34 Isemma [Musa] amcan nni ‘Qabarut-Hata’awat’, minzi dinni i neḍřen řgens i tuɣa immeẓren [ammu].
NUM 11:35 Zi Qabarut-Hata’awat ifsi řgens iqiḍan [nnes], [uyuren] ɣar Ḥaḍayrut uca qqimen di Ḥaḍayrut.
NUM 12:1 Tessiweř Maryam ak-d Harun x Musa di ssibbet n temɣart Takucit nni tuɣa dd-yiwi, minzi netta yiwi-dd ict n temɣart Takucit.
NUM 12:2 Uca nnan: “Ma issiweř SIDI zi Musa waha? Ma war zzayneɣ issiweř ɛawed?” Uca isřa SIDI [man aya].
NUM 12:3 Tuɣa Musa d aryaz amwaḍeɛ aṭṭas, ktar zi marra iwdan i iddaren x temmurt.
NUM 12:4 Deɣya issiweř SIDI ak-d Musa d Harun d Maryam: “Ffɣem kenniw s třata, [uyurem] ɣar Uqiḍun n Umsagar!” Uca ffɣen-dd s třata.
NUM 12:5 [Xenni] ihwa-dd SIDI deg uqellij n useynu uca ibedd ɣar wadaf n Uqiḍun, iřaɣa i Harun d Maryam. Ffɣen-dd nitni s tnayen.
NUM 12:6 Uca inna asen Netta: “Sřem xenni i wawařen inu! Mařa din jar awem ijj n unabi, ad as ssecneɣ Ixef inu, Necc, SIDI, s ij n řewḥiy [uca] ad kis ssiwřeɣ s ict n tarjit.
NUM 12:7 [Maca] war tteggeɣ [amenni] s umsexxar inu Musa, aqa netta d amtiqqi di taddart inu tekmeř.
NUM 12:8 Necc ssiwřeɣ akides zeg uqemmum ɣar uqemmum, war iǧi s řemɛani innufaren. Aqa iẓra addud n SIDI. Mayemmi war teggʷidem zeg umsexxar inu u [mayemmi] i tessiwřem [ammu] x Musa?”
NUM 12:9 [Xenni] yarɣa xasen weɣḍab n SIDI uca iruḥ.
NUM 12:10 Uca aseynu iffeɣ x Uqiḍun, uca xzar, Maryam dayes řehřac n řbarṣ, aqa-tt d tacemřařt am wedfeř. Uca Harun inneqřeb-dd ɣar Maryam, u xzar, aqa nettat dayes řbarṣ.
NUM 12:11 Uca inna Harun i Musa: “A, sidi inu, war xaneɣ srussi ddenb i negga s tefɣuri umi dayes nexḍa!
NUM 12:12 War tt ttejji ad tedweř am umettin i zi ittwacc wezyen n arrimet nnes am dd-teffeɣ zi řemřawet n yemmas.”
NUM 12:13 Iřaɣa Musa i SIDI, inna: “[A] Arebbi, ttzawageɣ ad tt tessgenfid!”
NUM 12:14 Inna SIDI i Musa: “Ma mařa babas aqa inxar deg wudem nnes, ma war tᵉseḍḥi sebɛa n wussan? Ejj i-tt ad tᵉttwassuffeɣ zi řmargeḥ n řɛeskar sebɛa n wussan uca awarni as ad tᵉttwaqbeř [ɛawed].”
NUM 12:15 Tᵉttwassuffeɣ Maryam sebɛa n wussan barra i řmargeḥ n řɛeskar uca řgens war ikkis iqiḍan nnes ařami tᵉttwaqbeř Maryam [ɛawed].
NUM 12:16 Awarni man aya ifsi řgens iqiḍan nnes, [yuyur] zi Ḥaḍayrut uca wtin iqiḍan nsen di řexřa n Faran.
NUM 13:1 Issiweř SIDI ak-d Musa, inna:
NUM 13:2 “Sekk iryazen zzatek ḥima ad bergagen tammurt n Kenɛan, tenni i ɣa wceɣ i ayt n Israil. I kuř taqbič n řejdud ad tessekkem ijj n weryaz, kuř ijj [ad yiři] d řḥakem jar asen.”
NUM 13:3 Musa issekk i-ten zi řexřa n Faran, x řumur n SIDI. Tuɣa marra iryazen [nni] d izeǧifen n ayt n Israil.
NUM 13:4 Aqa d ina d ismawen nsen: zi teqbič n Rubin, Cammuɛ, mmis n Zakkur,
NUM 13:5 zi teqbič n Cimɛun, Cafat, mmis n Axuri,
NUM 13:6 zi teqbič n Yahuda, Kalib, mmis n Yafunni,
NUM 13:7 zi teqbič n Issakar, Yijɛal, mmis n Yusuf,
NUM 13:8 zi teqbič n Ifrayim, Hucaɛ, mmis n Nun,
NUM 13:9 zi teqbič n Binyamin, Falṭi, mmis n Rafu,
NUM 13:10 zi teqbič n Zabulun, Jaddiyil, mmis n Sudi,
NUM 13:11 zi teqbič n Yusuf, i teqbič n Manassa, Jaddi, mmis n Susi,
NUM 13:12 zi teqbič n Dan, Ɛammiyil, mmis n Jamalli,
NUM 13:13 zi teqbič n Acir, Satur, mmis n Mixayil,
NUM 13:14 zi teqbič n Naftali, Naḥbi, mmis n Wafsi,
NUM 13:15 zi teqbič n Jad, Ja’uyil, mmis n Maki.
NUM 13:16 Aqa ina d ismawen n yeryazen nni issekk Musa ḥima ad bergagen tammurt uca Musa iřaɣa i Huciɛa, mmis n Nun, s yisem n Yacuwa.
NUM 13:17 Issekk i-ten Musa ḥima ad bergagen tammurt n Kenɛan, inna asen: “Ařyem ssiha ař [Tammurt n] Ljanub uca ařyem xenni ɣar idurar,
NUM 13:18 uca xzarem mammec teǧa temmurt d řgens i dayes izeddɣen, ma ijhed niɣ iḍɛef [i yeǧa], ma [aqa din] drus niɣ aṭṭas.
NUM 13:19 [Xzarem ɛawed] mammec teǧa temmurt i di izeddeɣ [řgens], ma [tammurt] d taṣebḥant niɣ d taɛeffant i [teǧa], u mammec ǧant tneddam i di izeddeɣ [řgens], ma [zeddɣen di] řemrageḥ n iqiḍan niɣ [di] tneddam ifaryen [s iɣebřawen].
NUM 13:20 [U ɛawed] mammec teǧa temmurt, ma tessɣemmi niɣ tuẓeɣ, ma aqa din ticejjura niɣ lla. Ggem taryast uca ksim [ca] zi řɣiǧet n temmurt. Ussan nni tuɣa aten d ussan n tmenzut n uḍiř.”
NUM 13:21 Uca nitni geɛɛden uca bergagen tammurt zi řexřa n Ṣin ař Raḥub, mani ɣa tiwḍed ɣar Ḥamat.
NUM 13:22 Geɛɛden [ɛad ktar] ɣar [Temmurt n] Ljanub uca iwḍen ɣar Ḥabrun. Dinni i tuɣa Aximan, Cicay d Talmay, [nitni] d iḥenjiren n Ɛanaq. Ḥabrun tuɣa tᵉttwabna sebɛa n iseggʷusa qbeř Ṣuɛan di Miṣra.
NUM 13:23 [Xenni] iwḍen ař taɣzurt n Ackul uca ssenni kksen ict n tezremt s yijj n uzekkun n uḍiř wenni dd-iwyen s tnayen s yijj n uzeǧaḍ n trebbut. [Kksen ɛawed] zeg aremmam u zi tazart.
NUM 13:24 Qqaren as i wemcan nni taɣzurt n Ickul, [isem wanita ixs ad yini] ‘taɣzurt n Uzekkun’, di ssibbet n uzekkun [n uḍiř] nni qessen ayt n Israil din.
NUM 13:25 Umi kemmřen arebɛin n wussan, dewřen-dd zeg ubergag n temmurt.
NUM 13:26 Ɛeqben nitni uca usin-dd ɣar Musa d Harun u ɣar marra tamesmunt n ayt n Israil di řexřa n Faran, ɣar Qadac, uca wcin řexbar i marra tamesmunt uca ssecnen asen řɣiǧet n temmurt.
NUM 13:27 Ḥajan as, nnan: “Aqa nudef ɣar temmurt nni mani d aneɣ tessekked. S tidett tfeyyeḍ s uɣi d tamment u tanita d řɣiǧet nnes.
NUM 13:28 Maca řgens, wenni izeddɣen di temmurt, ijhed u tineddam ɣarsent iɣebrawen mɣarent aṭṭas, u neẓra ɛawed arrawen n Ɛanaq.
NUM 13:29 Ayt n Ɛamaliq zeddɣen di Temmurt n Ljanub, u Iḥittiyyen d Iyabusiyyen d Imuriyyen zeddɣen deg idurar u ayt n Kenɛan zeddɣen ɣar řebḥar u x tma n L’Urdun.”
NUM 13:30 Xenni issesqar Kalib řgens zzat i Musa, inna: “Ejj aneɣ ad ngeɛɛed s jjehd uca ad tt neṭṭef d řwart, [minzi] nzemmar as neccin!”
NUM 13:31 [Maca] iryazen nni geɛɛden akides, nnan: “War nzemmar ad ngeɛɛed ḍidd i řgens nni, minzi aqa ijhed xaneɣ aṭṭas.”
NUM 13:32 [Ammu] i dd-iwyen ijj n řexbar war iḥřin i ayt n Israil x temmurt nni x tuɣa ttbergagen, nnan: “Tammurt x manis nekka ḥima ad tt nbergeg, aqa d ict n temmurt tsarreḍ imezdaɣ nnes uca marra iwdan nni neẓra, aqa aten d iryazen n waddad imɣar.
NUM 13:33 Aqa neẓra din ‘nifilim’, [ixs ad yini] ‘jjwaheř iwḍan’, ayt n Ɛanaq, arrasa n jjwaheř iwḍan. Tuɣa neccin di tiṭṭawin nneɣ amecnaw tamurɣi uca ammu i dd asen nettban di tiṭṭawin nsen.”
NUM 14:1 Marra tamesmunt tebda tesɣuyyu s jjehd uca řgens iru marra ǧiřet nni.
NUM 14:2 Marra ayt n Israil tuɣa ttnedqamen ḍidd i Musa u ḍidd i Harun uca tenna as marra tmesmunt: “Meɛlik qaɛ nemmut di temmurt n Miṣra!” niɣ: “Meɛlik qaɛ nemmut di řexřa-ya!”
NUM 14:3 “Mayemmi d aneɣ dd-yiwi SIDI ɣar temmurt-a ḥima ad newḍa s ssif u [xenni] ad dewřent temɣarin nneɣ d tarwa nneɣ d takeccaḍt? Ma war yeǧi ḥsen zeɛma ad neɛqeb ɣar Miṣra?”
NUM 14:4 Uca nnan ijj i wenneɣni: “Ejj aneɣ ad negg ijj d azeǧif [xaneɣ] uca ad neɛqeb ɣar Miṣra!”
NUM 14:5 [Řexdenni] wḍan Musa d Harun x uɣembub nsen zzat i wudem n marra agraw n tmesmunt n ayt n Israil.
NUM 14:6 Yacuwa, mmis n Nun, d Kalib, mmis n Yafunni, inni tuɣa zeg inni tuɣa ittbergagen x temmurt, carrgen arruḍ nsen.
NUM 14:7 Nitni ssiwřen ɣar marra tamesmunt n ayt n Israil, nnan: “Tammurt nni x nekka maḥend ad tt nbergeg, aqa-tt d ict n temmurt mliḥ aṭṭas.
NUM 14:8 Mařa SIDI issfarnen ɣarneɣ, Netta ad aneɣ dd-yawi ɣar temmurt-a uca ad aneɣ tt iwc, ict n temmurt ifeyyḍen s uɣi d tamment.
NUM 14:9 Maca war ttiřim d imɣewwɣen ḍidd i SIDI uca war tteggʷedem ca zi řgens n temmurt-a, minzi aqa aten d aɣrum nneɣ. Tiři nsen teffeɣ-dd sennej nsen, aqa SIDI akidneɣ, war zzaysen tteggʷdem ca!”
NUM 14:10 [Maca řami] tessiweř marra tamesmunt belli ittxeṣṣa ad ten arejmen, iban-dd uɛuǧi n SIDI deg Uqiḍun n Umsagar zzat i marra ayt n Israil.
NUM 14:11 Inna SIDI i Musa: “Ař meřmi d ayi ɣa isɛar řgens-a? Ař meřmi war d ayi ttimnen s marra řeɛřamat nni ggiɣ di řwesṭ nsen?
NUM 14:12 Necc ad ten wteɣ s ṭṭaɛun uca ad xasen kkseɣ řwart uca ad cek ggeɣ d ijj n řgens d ameqqran, ijhed xasen.”
NUM 14:13 Inna Musa i SIDI: “Ad sřen Imiṣriyyen man aya, minzi Cek tessuffɣed řgens-a s jjehd nnec zi řwesṭ nsen.
NUM 14:14 uca ad t inin i imezdaɣ n temmurt-a, inni isřin belli Cek, [a] SIDI, di řwesṭ n řgens-a, belli Cek, a SIDI, tbaned-dd [amecnaw] udem deg wudem, belli aseynu nnec ittbedda sennej nsen u belli Cek teggured zzat i wudem nsen deg ijj n uqellij n useynu s uziř uca s ǧiřet deg ijj n uqellij n tmessi.
NUM 14:15 Mařa tenɣid řgens-a am yijj n weryaz, xenni řegnus nni isřin x usemɣar nnec ad ssiwřen ad inin:
NUM 14:16 ‘Minzi SIDI war izemmar ad issidef řgens-a di temmurt nni x ijjuǧ [ad asen tt iwc], aqa s uyenni d asen iɣarṣ di řexřa!’
NUM 14:17 Řexxu xenni, ejj ad yiři jjehd n Sidi inu imɣar am mammec tuɣa tessiwřed, tennid:
NUM 14:18 ‘SIDI ɣares ttasiɛ n řxaḍar uřa d aṭṭas n tmexsiwt icewwaren. Aqa yarebbu řmuɛṣiyyet d uxeṭṭu [nneɣ] u Netta war ittbarri wenni itteggen ddenb [u] isseɛɛdu řmuɛṣiyyet n ibabaten ɣar iḥenjiren [nnes] ař [jjiř] wiss třata d [jjiř] wiss arebɛa.’
NUM 14:19 Ɣfar i řgens-a řmuɛṣiyyet nnes ɛlaḥsab řemɣaret n tmexsiwt nnec icewwaren u am mammec themřed ak-d řgens-a zi temmurt n Miṣra ař danita!”
NUM 14:20 Inna SIDI: “Necc ɣfareɣ asen ɛlaḥsab awař nnec.
NUM 14:21 S tidett [am] ddareɣ Necc, aqa marra tammurt ad tᵉttwaccur s uɛuǧi n SIDI!
NUM 14:22 Minzi marra iryazen nni iẓrin aɛuǧi inu d řeɛřamat inu i ggiɣ di Miṣra u di řexřa, d yinni d ayi iqeǧben di řexřa [ɛad] ɛecra n twařawin u war sřin i tmijja inu,
NUM 14:23 war ẓarren tammurt nni x jjuǧeɣ i řejdud nsen [ad asen tt wceɣ], [wah,] marra inni d ayi issdduqqzen [ammu], war tt ẓarren.
NUM 14:24 [Maca] ad ssiwḍeɣ amsexxar inu Kalib ɣar temmurt mani tuɣa yudef [qbeř] uca ad tt warten tarwa nnes, minzi tuɣa akides ijj n arruḥ nneɣni uca netta iḍfar ayi nican.
NUM 14:25 Aqa ayt n Ɛamaliq d ayt n Kenɛan zeddɣen di řewḍa n teɣzurt. Ad dd-tdewřem tiwecca uca ad tekksem iqiḍan nwem [ssa], ffɣem ɣar řexřa, [uyurem] deg webrid ɣar Řebḥar n Telga.”
NUM 14:26 Issiweř SIDI ak-d Musa d Harun, inna:
NUM 14:27 “Ař meřmi ɣa teqqim tmesmunt-a taɛeffant tᵉttnedqam xafi? Anedqem n ayt n Israil i zi xafi ttnedqamen, aqa sřiɣ t.
NUM 14:28 Ini asen: ‘S tidett am ddareɣ Necc, iqqar SIDI, mařa war d awem tteggeɣ am mammec d awem sřiɣ s imezzuɣen inu min tennam kenniw.
NUM 14:29 Řxecbat nwem ad wḍant di řexřa-ya, [řxecbat n] marra inni ittwaḥesben [n řgens], marra řqedd n iḥenjiren nwem zi ɛicřin iseggʷusa sennej i tuɣa xafi ittnedqamen.
NUM 14:30 Kenniw war tᵉttidfem ca ɣar temmurt min xef ssgeɛɛdeɣ afus inu [maḥend ad jjaǧeɣ] ad kenniw ggeɣ ad dayes tzedɣem, mɣir Kalib, mmis n Yafunni, d Yacuwa, mmis n Nun.
NUM 14:31 Tarwa nwem i xef tennam: ‘Ad ttwakeccḍen!’, Necc ad ten ssidfeɣ dayes uca nitni ad ssnen tammurt nni tenḍarem kenniw ammu s useḥqar.
NUM 14:32 [Maca] řxecbat nwem, [wah,] kenniw [simant nwem], ad tewḍam di řexřa-ya,
NUM 14:33 uca iḥenjiren nwem ad tellɛen di řexřa-ya řmijař n arebɛin n iseggʷusa uca kenniw ad [kiwem] tarbum farq-ccɣeř nwem ař ɣa fnant řxecbat nwem di řexřa.
NUM 14:34 Anect i řqedd n wussan i tuɣa tᵉttbergagem tammurt, [iqqar] arebɛin n wussan - aqa ijj n wass d ijj n useggʷas - ad tarbum řmuɛṣiyyet nwem, řmijař n arebɛin n iseggʷusa. Kenniw ad tessnem aqa Necc beɛɛdeɣ [xawem].
NUM 14:35 Necc [d] SIDI ssiwřeɣ: Mařa war tteggeɣ ammu ak-d marra tamesmunt-a taɛeffant tenni ikksen awař xafi: ad mmten di řexřa-ya, ad mmten din!”
NUM 14:36 Iryazen nni issekk Musa maḥend ad bergagen tammurt, [řami] dd-dewřen, tamesmunt am tekmeř tedweř ḍidd nnes umi nitni ssiwřen s řɣar x tammurt,
NUM 14:37 aqa iryazen nni ibehdřen tammurt, mmuten s ict n jjriḥect zzat i wudem n SIDI.
NUM 14:38 [Maca] Yacuwa, mmis n Nun, d Kalib, mmis n Yafunni, qqimen ddaren jar iryazen nni iruḥen ad bergagen tammurt.
NUM 14:39 Issiweř Musa awařen-a ɣar marra ayt n Israil. Iḥzen [xenni] řgens aṭṭas.
NUM 14:40 Uca nitni kkaren zic uca uřyen ař taqiccat n wedrar, nnan: “Aqa-neɣ da uca ad ngeɛɛed ɣar wemcan min xef issiweř SIDI, minzi neccin aqa nexḍa!”
NUM 14:41 Maca Musa inna: “Mayemmi tᵉttɛeddam ammu řumur n SIDI? Man aya war iɛeddu!
NUM 14:42 War ttgeɛɛidem ca minzi SIDI war ittiři di řwesṭ nwem. War ttejjim ixef nwem ad texsarem zzat i wudem n řɛedyan nwem.
NUM 14:43 Minzi ayt n Ɛamaliq d ayt n Kenɛan aqa aten din zzat nwem uca ad tewḍam kenniw s ssif minzi kenniw tiggʷejem x SIDI. S uya SIDI war kiwem ittiři.”
NUM 14:44 Maca nitni tuɣa ttuffen maḥend ad dd-ařyen ař taqiccat n wedrar. [Maca] Ttabut n Řɛahd n SIDI d Musa war ffiɣen zi řwesṭ n řmargeḥ n řɛeskar.
NUM 14:45 [Xenni] hwan-dd ayt n Ɛamaliq d ayt n Kenɛan nni tuɣa izeddɣen deg wedrar nni uca arenyen ten u řebzen ten ař Ḥurma.
NUM 15:1 Issiweř SIDI ak-d Musa, inna:
NUM 15:2 “Siweř ak-d ayt n Israil, ini asen: ‘Xmi ɣa tadfem ɣar temmurt [mani ɣa] tzeddɣem, [tammurt] nni d awem ɣa wceɣ,
NUM 15:3 uca ad tesswejdem [din] ict n tewhibt n tmessi i SIDI, ict n tɣarṣt n wecmaḍ niɣ ict n tewhibt i tɣarṣt i ukemmeř n ijj n lwaɛd niɣ ict n tewhibt s řxaḍar niɣ [ict n tewhibt] i řeɛyudat nwem ittwaggen, maḥend ad tiři d ict n řefwaḥet ittfuḥen i SIDI, zi řebhayem niɣ zeg wuǧi,
NUM 15:4 [xenni] wenni dd ɣa iqeddmen tawhibt nnes i SIDI, ad yawi [ɛawed] ict n tewhibt [n řɣiǧet] zeg ict n teɛcart [n yijj n ifa] n waren azdad ixeǧḍen s yijj n arbeɛ n ijj n uhinu n zzect.
NUM 15:5 Ad tesswejded [ak-d man aya] ijj n arbeɛ n ijj n uhinu n binu am tewhibt n useyyeb i kuř ijj n izmar, [maḥend ad tiři] x tɣarṣt n wecmaḍ niɣ x tewhibt i tɣarṣt,
NUM 15:6 niɣ, [mařa ad tiři] i yijj n icarri, [xenni] ittxeṣṣa ad tesswejded ict n tewhibt [n řɣiǧet] zi tnayen n teɛcuray n ijj n ifa n waren azdad ixeǧḍen s ict n ttuřut n ijj n uhinu n zzect,
NUM 15:7 uca ad tqeddmed [ɛawed] ict n ttuřut n ijj n uhinu n binu am tewhibt n useyyeb, am yict n řefwaḥet ittfuḥen i SIDI.’”
NUM 15:8 “Xmi ɣa tesswejded ameẓyan n ufunas am tɣarṣt n wecmaḍ niɣ am tewhibt i tɣarṣt [maḥend ad yiři] i ukemmeř n ijj n lwaɛd niɣ am tɣarṣt n řehna i SIDI,
NUM 15:9 [xenni] ittxeṣṣa ad tqeddmed ak-d umeẓyan n ufunas [ɛawed] ict n tewhibt [n řɣiǧet] n třata n teɛcuray n ijj n [ifa] n waren azdad ixeǧḍen deg wezyen n uhinu n zzect,
NUM 15:10 uca ittxeṣṣa [ɛawed] ad dd-tawyed azyen n uhinu n binu am tewhibt n useyyeb, [am] tewhibt n tmessi, ict n řefwaḥet ittfuḥen i SIDI.
NUM 15:11 Ammu i ittxeṣṣa ad ggen i [kuř] afunas, niɣ i [kuř] icarri, niɣ i [kuř] ijj zeg wuǧi, zeg iḥuřiyyen niɣ zeg iɣayḍen.
NUM 15:12 Ɛlaḥsab řqedd [n imuddaren i tɣarṣt] i ɣa tesswejdem, ad teggem ammu i kuř ijj [n umuddar], ɛlaḥsab řqedd ikemmřen [n imuddaren].
NUM 15:13 Marra inni dd-ittwaxeřqen di temmurt ad ggen timesřayin-a ammu, xmi dd ɣa qeddmen nitni ict n tewhibt n tmessi, ict n řefwaḥet ittfuḥen i SIDI.
NUM 15:14 Xmi ɣa tafed jar [marra] jjiřat nwem ijj n ubarrani i iqqimen akidwem, niɣ ijjen wenni [izeddɣen] di řwesṭ nwem, aqa netta ad issewjed ict n tewhibt n tmessi, ict n řefwaḥet ittfuḥen i SIDI, [xenni] ad [tt] igg am mammec [tt] tᵉtteggem kenniw.”
NUM 15:15 [Ay,] agraw [n řgens], ad din tiři ict n tewṣeyyet, ict n tewṣeyyet i řebda i kenniw u i ubarrani nni [akidwem] iqqimen i [marra] jjiřat nwem. Ad yiři ubarrani am mammec [teǧam] kenniw zzat i wudem n SIDI.
NUM 15:16 Ad yiři ijj n uzerf d ict n lfariḍa i kenniw u i ubarrani nni akidwem iqqimen.”
NUM 15:17 Issiweř SIDI ak-d Musa, inna:
NUM 15:18 “Siweř ak-d ayt n Israil uca ini asen: ‘Xmi ɣa tadfem ɣar tammurt mani kenniw ɣa [y]awyeɣ,
NUM 15:19 [xenni] ad imsar, umi ɣa teccem aɣrum [zi řɣiǧet] n temmurt, aqa kenniw ad tessgeɛɛdem ict n tewhibt n usgeɛɛed i SIDI.
NUM 15:20 Zi tmezwarut n warecti nwem ad tessgeɛɛdem ict n temsemment [am] tewhibt n usgeɛɛed. Ad tt tessgeɛɛdem am mammec tessgeɛɛdem tawhibt n usgeɛɛed n unedrar.
NUM 15:21 Zi tmezwarut n warecti nwem ad tqeddmem ict n tewhibt n usgeɛɛed i SIDI di [marra] jjiřat nwem.’”
NUM 15:22 “Mařa tweddarem u war tᵉtteggem marra řumurat-a i tuɣa issawař SIDI ak-d Musa
NUM 15:23 - marra min d awem yumur SIDI s tsexxart n Musa zeg wass min zi [t] yumur SIDI, ssenni d tsawent, di [marra] rejyuř nwem -
NUM 15:24 [xenni] ad imsar, mařa ittwagg s uweddar barra i tiṭṭawin n tmesmunt, aqa tamesmunt marra ad tessewjed ijj n ufunas, ameẓyan n tfunast, am tɣarṣt n wecmaḍ, [am] ict n řefwaḥet ittfuḥen i SIDI ak-d tewhibt nnes [n řɣiǧet] d tewhibt nnes n useyyeb ɛlaḥsab lfariḍa u ak-d yijj n umyan zeg iɣayḍen am tɣarṣt n ddenb.
NUM 15:25 [Xenni] ad igg ukehhan asřaḥ i marra tamesmunt n ayt n Israil uca ad asen ittwaɣfar, minzi man aya imsar zeg uweddar, uca nitni qeddmen tawhibt nsen, ict n tewhibt n tmessi i SIDI, uřa d taɣarṣt nsen n ddenb, zzat i wudem n SIDI.
NUM 15:26 Marra tamesmunt n ayt n Israil ad tᵉttwaɣfar, uřa d abarrani nni izeddɣen di řwesṭ nwem, x umi imsar am iweddar marra řgens.”
NUM 15:27 “Mařa ijjen bnadem ixḍa am netta iweddar, [xenni] ad dd-issqarreb ict n tɣayḍet n ijj n useggʷas am tɣarṣt n ddenb.
NUM 15:28 Akehhan ad igg aṣřaḥ zzat i wudem n SIDI x bnadem nni tuɣa iweddar, am tuɣa ixḍa s uweddar zzat i wudem n SIDI, am xas i ɣa yegg asřaḥ uca [xenni] ad as ittwaɣfar.
NUM 15:29 Ad [din] yiři ijj n uzerf i wenni iggin [ca] s uweddar, i wenni dd-ixeřqen di temmurt uřa i ubarrani nni izeddɣen di řwesṭ nwem.”
NUM 15:30 “Maca bnadem nni iggin ca s ufus igeɛɛden, ma netta ittwaxřeq-dd di temmurt niɣ netta d abarrani, aqa netta iceqqef di SIDI uca bnadem nni ad ittwaqess zi řwesṭ n řgens nnes,
NUM 15:31 umi isseḥqar awař n SIDI u yarẓa řumur nnes. Bnadem nni ad ittwaqess qaɛ [zi řgens nnes], řmuɛṣiyyet nnes ad tiři xas.”
NUM 15:32 [Řami] tuɣa ayt n Israil di řexřa, ufin ijj n weryaz ittḥarwac akeccuḍ deg wass n ssebt.
NUM 15:33 Inni t yufin am tuɣa ittḥarwac akeccuḍ, iwyen t ɣar Musa d Harun d marra tamesmunt.
NUM 15:34 Ggin t di tḥeṭṭut, minzi tuɣa war dd-ibin min zzayes ɣa ggen.
NUM 15:35 [Xenni] inna SIDI i Musa: “Aryaz [nni] ad ittwaneɣ nican. Marra tamesmunt ad t tarjem barra i řmargeḥ n řɛeskar.”
NUM 15:36 [Xenni] tessuffeɣ i-t marra tmesmunt barra i řmargeḥ n řɛeskar uca nitni arejmen t ařami immut, am mammec [t] yumur SIDI i Musa.
NUM 15:37 Issiweř SIDI ak-d Musa, inna:
NUM 15:38 “Siweř ak-d ayt n Israil uca ini asen, ad ggen i yixef nsen ticarcifa ɣar tɣemmura n warruḍ nsen di [marra] jjiřat nsen uca ad ggen ijj n ufiřu d adeḥmi ɣar tcarcifa, tinni ɣar tɣemmura.
NUM 15:39 Ad yiři [ufiřu] ɣar tcarcift, ḥima ad twařam afiřu nni uca ad tidarem di marra řumurat n SIDI uca ad tent teggem u war tḍeffarem [ccehwat n] wuřawen nwem d tiṭṭawin nwem, inni awarni asent tennumem ad tessefsedem ixef nwem,
NUM 15:40 [u] ḥima ad txarrṣem di řumurat inu, ad [zzaysent] teggem, [maḥend] ad tiřim tᵉttwaqeddsem zzat i AREBBI nwem.
NUM 15:41 Necc d SIDI, AREBBI nwem wenni kenniw dd-issuffɣen zi temmurt n Miṣra ḥima ad iřiɣ d AREBBI nwem. Necc d SIDI, AREBBI nwem!”
NUM 16:1 Quraḥ, mmis n Yiṣhar, mmis n Qahat, mmis n Lawi, ak-d Datan d Abiram, tnayen n iḥenjiren n Iliyab, d Un, mmis n Falat, iḥenjiren n Rubin, iwyen [iryazen],
NUM 16:2 uca kkaren ḍidd i Musa, [jmiɛ] ak-d iryazen [nneɣni] zeg ayt n Israil, mitayen u-xemsin n řḥukkam n tmesmunt, aqa aten zeg inni dd-ittwařaɣan ɣar umuni, iryazen s ccan.
NUM 16:3 Nitni munen ḍidd i Musa d Harun, nnan asen: “Cfa awem kenniw! Minzi marra tamesmunt, [wah,] marra nitni d imqeddasen uca SIDI di řwesṭ nsen. Mayemmi tessuɛřam ixef nwem sennej i wegraw [n řgens] n SIDI?”
NUM 16:4 Umi isřa Musa [i man aya], iwḍa x wudem nnes.
NUM 16:5 Uca issiweř ak-d Quraḥ d marra abarru nnes, inna: “Tiwecca ad isscen SIDI wenni iǧan nnes d wenni [iǧan] d amqeddas d wenni i ɣares dd ɣa issqarreb. Wenni ifarz Netta, d wenni i dd ɣa issqarreb Netta ɣares.
NUM 16:6 Ggem aya! Ejj Quraḥ d marra abarru nnes ad awyen timejmarin.
NUM 16:7 Tiwecca ggem xasent [řefḥem i] tmessi, sarsem xas řebxur zzat i wudem n SIDI. [Xenni] ad imsar belli aryaz nni ixḍar SIDI, ad yiři d amqeddas. Aqa truḥem tiggʷijem, ayt n Lawi!”
NUM 16:8 Inna Musa i Quraḥ: “Sřem řexxu, ttzawageɣ, kenniw, ayt n Lawi!
NUM 16:9 Ma war xawem icfi umi kenniw issfarz AREBBI n Israil x tmesmunt n Israil maḥend ad kenniw ɣares dd-issqarreb, ḥima ad tsexxarem di Tzeddiɣt n SIDI uca [ḥima] ad tbeddem zzat i wudem n tmesmunt maḥend ad ten tsexxarem?
NUM 16:10 Netta issqarreb i cek-dd [ɣares], cek d marra aytmac, ayt n Lawi, [jmiɛ] akidek. Ma tarezzum [řexxu] ɛawed tukehhant?
NUM 16:11 S uya, cek d marra abarru nnec, aqa kenniw tmunem ḍidd n SIDI, minzi min iɛna Harun, min iɛna ḥima ad xas tennedqem?”
NUM 16:12 Uca issekk Musa ad řaɣan x Datan d Abiram, iḥenjiren n Iliyab, maca nitni nnan: “War dd-nettis ca!”
NUM 16:13 Ma war iǧi icfa awem umi d aneɣ dd-tssuffɣem zeg ict n temmurt ifeyyḍen s uɣi d tamment, ḥima ad aneɣ tesshelleked di řexřa uca [xenni] ɛawed tegged ixef nnec d řḥakem xaneɣ?
NUM 16:14 Uřa d cek war d aneɣ dd-tessidfed ca deg ict n temmurt ifeyyḍen s uɣi d tamment, u war d aneɣ tewcid iyyar[en] d imarjaɛen n uḍiř d řwart. Ma ittɣiř ac tzemmared ad tessdaɣřed tiṭṭawin n yeryazen-a? Neccin war dd-nettis ca!”
NUM 16:15 [Xenni] ittwassarɣ ufugem n Musa, inna i SIDI: “War xezzar ɣar tewhibt nsen! Necc war zzaysen kessiɣ qaɛ ijj n uɣyuř uca war ggiɣ řɣar uřa i yijj zzaysen.”
NUM 16:16 Inna Musa i Quraḥ: “Cek d marra abarru nnec, [asem-dd] tiwecca zzat i wudem n SIDI, cek d nitni, d Harun.
NUM 16:17 Ksim kuř ijj [zzaywem] ijj n řmejmar, ggem dayes řebxur uca qarrbem-dd akides zzat i wudem n SIDI. Kuř aryaz ak-d řmejmar nnes, mitayen u-xemsin n tmejmarin, uca [ɛawed] cek d Harun, kuř ijj [ak-d] řmejmar nnes.”
NUM 16:18 Iksi kuř ijj řmejmar nnes uca ggin dayes timessi u ssarsen xas řebxur uca uyuren ad bedden zzat i wadaf n Uqiḍun n Umsagar, uřa d Musa d Harun.
NUM 16:19 Quraḥ iɣewweɣ xasen marra abarru [nnes] ɣar wadaf n Uqiḍun n Umsagar. [Řexdenni] iban-dd uɛuǧi n SIDI ɣar marra tamesmunt.
NUM 16:20 Issiweř SIDI ak-d Musa d Harun, inna:
NUM 16:21 “Ḥeydem ixef nwem zeg ubarru-ya, [xenni] ad ten hellkeɣ deg wermac n wabřiwen!”
NUM 16:22 [Maca] nitni wḍan x wudem nsen, nnan: “[A] Arebbi, AREBBI n marra buḥbeřat n marra ddat! [Mařa] ixḍa ijj n weryaz, ma [xenni] ad tegged aɣḍab nnec ad idduqqez x marra tamesmunt?”
NUM 16:23 Issiweř SIDI ak-d Musa, inna:
NUM 16:24 “Siweř ak-d tmesmunt, ini: ‘Beɛɛdem x tzeddiɣt n Quraḥ d Datan d Abiram d min d as dd-innḍen.’”
NUM 16:25 [Xenni] Musa ikkar uca iruḥ ɣar Datan d Abiram uca uyuren imɣaren n Israil awarni as.
NUM 16:26 Uca issiweř netta ak-d tmesmunt, inna: “Ttzawgeɣ, beɛɛdem x iqiḍan n yeryazen-a iqejḥen u war ttḥadam uřa d ict n řḥajjet n min iǧan nsen, ḥima kenniw war tᵉttwahellikem ca s ddnub nsen!”
NUM 16:27 Kkaren nitni uca beɛɛden x iqiḍan n Quraḥ d Datan d Abiram d min d as dd-innḍen. Datan d Abiram ffɣen-dd, bedden ɣar wadaf n iqiḍan nsen ak-d temɣarin nsen d iḥenjiren nsen d iḥenjiren nsen imeẓyanen.
NUM 16:28 [Xenni] inna Musa: “S man aya i ɣa tessnem belli SIDI issekk ayi-dd, ḥima ad ggeɣ marra timegga-ya, minzi war dd-ffiɣent ca zeg wuř inu.
NUM 16:29 Mařa ina ad mmten am mammec [mmuten] iwdan marra u ad ten iřqef min iřeqfen marra iwdan, [xenni] ad taf SIDI war d ayi dd-issekk.
NUM 16:30 [Maca] mařa SIDI ixřeq-dd ca n řḥajjet d tamaynut qaɛ uca tammurt ad tarzem aqemmum nnes, ad ten tsarḍ ak-d marra [min iǧan] nsen uca ad hwan ddaren di řaxart, xenni i ɣa tessnem belli iryazen-a aqa ssduqqzen SIDI.”
NUM 16:31 Uca imsar, umi ikemmeř awařen-a, tfeǧeq temmurt nni swadday nsen.
NUM 16:32 Tarzem temmurt aqemmum nnes uca tsarḍ i-ten ak-d aytbab n taddart nsen u ak-d marra iwdan n Quraḥ d marra agřa [nsen].
NUM 16:33 Hwan-dd ddaren di řaxart ak-d marra [min iǧan] nsen uca tammurt tessduriy i-ten u ttwateḥḥan zi řwesṭ n wegraw [n řgens].
NUM 16:34 Marra Israil, inni tuɣa dd-innḍen, arewřen [umi sřin] i tɣuyyit nsen, minzi nnan: “Niɣ ad taf [uřa d neccin] ad aneɣ tṣarḍ temmurt.”
NUM 16:35 Uca teffeɣ-dd tmessi zi SIDI, tecca mitayen u-xemsin n yeryazen nni dd-yiwyen řebxur.
NUM 17:1 Issiweř SIDI ak-d Musa, inna:
NUM 17:2 “Ini i Aliɛazar, mmis n ukehhan Harun, belli ad iksi timejmarin zeg uḥaduq n tmessi uca ad issuyes [min iqqimen n] tmessi di řaggʷaj, minzi aqa timejmarin nni, qeddsent i ǧant!
NUM 17:3 Jjem ten ad ggen zi tmejmarin n [yeryazen-a], inni tuɣa ixeṭṭan ḍidd i řeɛmur nsen, tiřwiḥin d tizirarin i dduri i uɛalṭar, minzi iwyen tent zzat i wudem n SIDI, s uya ttwaqeddsent tina. Ad iřint d ijj n uceyyar i ayt n Israil.”
NUM 17:4 [Xenni] iksi ukehhan Aliɛazar timejmarin n nnḥas nni dd-iwyen yinni ittwacemḍen [i tewhibt], uca tketken tent ḥima ad [zzaysent] dřent aɛalṭar
NUM 17:5 i řidaret i ayt n Israil, ḥima uřa d ijj n weryaz war iǧin zi zzariɛet n Harun, war dd-ittqarrib ca břa ttesriḥ zzat i wudem n SIDI, ḥima ad issbexxar řebxur, maḥend war d as iřqef min iřeqfen Quraḥ d ubarru nnes, am mammec tuɣa issiweř SIDI s uqemmum n Musa.
NUM 17:6 Tiwecca nnes tuɣa marra tamesmunt n ayt n Israil tᵉttnedqam ḍidd i Musa d Harun, nnan: “Kenniw tenɣim řgens n SIDI!”
NUM 17:7 Uca [umi] tmun tmesmunt ḍidd i Musa d Harun uca bdan nitni gguren ɣar Uqiḍun n Umsagar, xzar, aqa din aseynu nni t idřin uca iban-dd uɛuǧi n SIDI.
NUM 17:8 Yusa-dd Musa ak-d Harun, [bedden] zzat i Uqiḍun n Umsagar.
NUM 17:9 Issiweř SIDI ak-d Musa, inna:
NUM 17:10 “Kkarem, [aggʷejem] zi řwesṭ n tmesmunt u Necc ad ten mḥiɣ deg ijj n wermac n wabřiwen!” [Xenni] wḍan x wudem nsen.
NUM 17:11 Inna Musa i Harun: “Ksi [deɣya] ijj n řmejmar, egg xas timessi n uɛalṭar uca sars xas řebxur. Azzeř ɣar tmesmunt uca egg aṣřaḥ di ṭṭweɛ nsen, minzi iffeɣ-dd uduqqez [n weɣḍab] zi zzat i wudem n SIDI. Aqa da jjriḥect am tebda [ɛad].”
NUM 17:12 Iksi Harun [řmejmar], am mammec inna Musa, uca yuzzeř ɣar řwesṭ n wegraw [n řgens], uca xzar, jjriḥect tuɣa am tebda [ɛad] jar řgens, uca netta issars dayes řebxur uca igga aṣřaḥ di ṭṭweɛ n řgens.
NUM 17:13 Tuɣa ibedd jar imettan d imuddaren uca tᵉttwassbedd jjriḥect.
NUM 17:14 Wi immuten zi jjriḥect tuɣa aten di arbeɛṭac-ařef u-sebɛa-mya, břa inni immuten di ssibbet n Quraḥ.
NUM 17:15 Idweř Harun ɣar Musa ɣar wadaf n Uqiḍun n Umsagar. Aqa tᵉttwassbedd jjriḥect.
NUM 17:16 Issiweř SIDI ak-d Musa, inna:
NUM 17:17 “Siweř ak-d ayt n Israil uca ksi zzaysen ict n teɣɣarct i kuř taddart n ibabaten [nsen], zi marra řḥukkam nsen, ɛlaḥsab [lɛadad n] tudrin n ibabaten nsen, tenɛac n tᵉɣɣaryen. Ittxeṣṣa ad tarid isem n kuř ijj [zzaysen] x teɣɣarct nnes.
NUM 17:18 Ad tarid isem n Harun x teɣɣarct n Lawi, minzi [ad din tiři] ict n teɣɣarct i yijj n uzeǧif n taddart n řejdud nsen.
NUM 17:19 Ad tent tegged deg Uqiḍun n Umsagar, zzat i Cchadet, mani kidwem ɣa msagareɣ.
NUM 17:20 [Xenni] ad imsar, aqa ad tnuwwar teɣɣarct n weryaz nni ixḍareɣ Necc uca ad ssbeddeɣ anedqem ḍidd inu i zi xawem nndeqmen ayt n Israil.”
NUM 17:21 Issiweř Musa ak-d ayt n Israil, uca marra řḥukkam nsen wcin ict n teɣɣarct i mkuř ijj n řḥakem, ɛlaḥsab [řqedd n] tudrin n ibabaten nsen, tenɛac n teɣɣaryen. Uca taɣɣarct n Harun tuɣa-t jar tᵉɣɣaryen nsen.
NUM 17:22 Musa issars tiɣɣaryen [nni] zzat i wudem n SIDI deg Uqiḍun n Cchadet.
NUM 17:23 Tiwecca nnes yudef Musa ɣar Uqiḍun n Cchadet, uca xzar, taɣɣarct n Harun di ṭṭweɛ n taddart n Lawi tuɣa tegga tacřařt uca taɛebbuzt tessuffeɣ-dd uca nnuwwar [nnes] yarzem uca yiwi-dd ǧuz yiwḍen.
NUM 17:24 Xenni issuffeɣ Musa marra tiɣɣaryen zi zzat i wudem n SIDI ɣar marra ayt n Israil. Ẓrin aya uca ṭṭfen kuř ijj taɣɣarct nnes.
NUM 17:25 [Xenni] inna SIDI i Musa: “Arr taɣɣarct n Harun zzat i Cchadet, ad tt teḥḍid am yijj n uceyyar ḍidd i yinni iɣewwɣen. [Ammu] i ɣa tessbedded anedqem nsen ḍidd inu maḥend nitni war ttmettin ca.”
NUM 17:26 Uca igga Musa am mammec d as yumur SIDI, ammu i igga netta.
NUM 17:27 [Xenni] ssiwřen ayt n Israil ak-d Musa, nnan: “Xzar, ad zzayneɣ iffeɣ buḥbeř, ad nettwahellek, ad nettwahellek marra neccin!
NUM 17:28 Man wen ma i dd ɣa iqarrben ɣar Uqiḍun n SIDI, ad immet. Ma ad nettwateḥḥa ař zzayneɣ iffeɣ buḥbeř?”
NUM 18:1 Inna SIDI i Harun: “Cek d warraw nnec d taddart n babac akidek, ad tarbum řmuɛṣiyyet n Zzawect Iqeddsen nwem. Cek d warraw nnec akidek ad arbun řmuɛṣiyyet n tukehhant nwem.
NUM 18:2 Ad dd-tiwyed akidek uřa d aytmac, taqbič n Lawi, taqbič n babac. Nitni ad dd-mmarenyen ɣarek, ad ac sexxaren, [maca] cek, jmiɛ ak-d iḥenjiren nnec, [ad tsexxared] zzat i wudem n Uqiḍun n Cchadet.
NUM 18:3 Ad ṭṭfen acbar nnec uca ad ḥḍan x marra Aqiḍun, maca war zemmaren ad dd-qarrben ɣar řeqcuɛ n Zzawect Iqeddsen u ɣar uɛalṭar ḥima war ttᵉttmettin, war iǧi řa d nitni uřa d kenniw.
NUM 18:4 Ittxeṣṣa asen ad mmarenyen ɣarek uca ad ṭṭfen acbar x Uqiḍun n Umsagar u x marra tasexxart n Uqiḍun. Wenni war ɣar iǧi ttesriḥ war izemmar ad ɣarwem dd-iqarreb.
NUM 18:5 Ad tᵉṭṭfem acbar x Zzawect Iqeddsen uřa x uɛalṭar, ḥima war dd-ittis [ɛad] uduqqez [n weɣḍab] x ayt n Israil.
NUM 18:6 Necc, aqa da Necc, ksiɣ awmaten nwem, Ilawiyyen, zi jar řwesṭ n ayt n Israil. Aqa nitni am yict n tewhibt i kenniw tenni ittxeṣṣa ad twehhbem i SIDI maḥend ad sexxaren nitni deg Uqiḍun n Umsagar.
NUM 18:7 [Maca] cek d iḥenjiren nnec akidek ad tᵉṭṭfem tukehhant nwem di marra min iqqnen ak-d uɛalṭar d min iǧan daxeř i uřeḥḥaf uca [ammu] ad tsexxarem kenniw. Necc ad awem wceɣ tukehhant d tsexxart am yict n terzeft. Abarrani nni dd ɣa iqarrben, ad ittwaneɣ.”
NUM 18:8 Issiweř SIDI ak-d Harun: “Necc, xzar, aqa d Necc i d ac iwcin [a]ḥeṭṭu x [tewhibin n] usgeɛɛed [i qeddmen nitni] i Necc. Necc wciɣ tent ak-d marra [tiwhibin] iqeddsen n ayt n Israil am tesɣart i x ittwagg wedhan, i cek u i warraw nnec, am yict n tewṣeyyet i řebda.
NUM 18:9 Zi [tewhibin] iqeddsen ad iřint iziynat i war yudifen ɣar tmessi i cek: marra tiwhibin nsen ak-d marra tiwhibin nsen [n řɣiǧet], ak-d marra tiɣarṣa nsen n ddenb u ak-d marra tiɣarṣa nsen n umarwas nni d ayi dd ɣa yarren [am texriṣt]. [Man aya marra] ad yiři d amqeddas qaɛ i cek u i iḥenjiren nnec.
NUM 18:10 Ad tecced aya deg ijj n wemcan iqeddsen qaɛ. Kuř awtem ad zzayes yecc. Aya ad yiři d amqeddas i kenniw.”
NUM 18:11 “[Ɛawed] d man aya [ad yiři] i cek: tawhibt n usgeɛɛed n tewhibt nsen ak-d marra tiwhibin n wenhezzi n ayt n Israil. Wciɣ tent i cek u i warrawen nnec d tarrawin nnec nni kidek [iǧan]. [Aqa-tt] d ict n tewṣeyyet i řebda. Kuř ijjen di taddart nnec nni iǧan d amezdag, ad zzaysent yecc.”
NUM 18:12 “Min iǧan řemxeyyar n zzect d min iǧan řemxeyyar n binu n jdid u zeg irden, aqa d tamezwarut i zzaysen ad wcen i SIDI, aqa wciɣ ac tt.
NUM 18:13 Tamenzut n marra min iǧan x temmurt nsen, nni dd ɣa yawyen ɣar SIDI, aqa [marra] man aya ad yiři i cek. Kuř ijjen wenni iǧan d amezdag di taddart nnec, izemmar ad zzayes yecc.”
NUM 18:14 “Marra min ittwaḥarrmen di Israil, ad yiři nnec.
NUM 18:15 Marra min yarezmen řemřawat [d amezwaru] jar marra aysum i ɣa qeddmen i SIDI, zi bnadem niɣ zi řebhimet, ad yiři nnec. Maca ad tefdid qaɛ amenzu n iwdan uca ittxeṣṣa [ɛawed] ad tefdid amenzu n řebhayem ixemjen.
NUM 18:16 Wi zzaysen ɣa ttwafdin nitni, ad ttwafdin d mmis n ijj n uyur ɛlaḥsab řqimet i tqeddared cek di nnuqart, xemsa ciqlu ɛlaḥsab ciqlu n Zzawect Iqeddsen, wenni [iǧan] ɛicrin jira.
NUM 18:17 Maca amenzu n ufunas d umenzu n uḥuři d umenzu n iɣayḍ, war t tfeddim ca. Aqa aten qeddsen [i ǧan]. Ad tzeǧɛed idammen nsen x uɛalṭar u tadunt nsen ad tt tessbexxared am tewhibt n tmessi, am yict n řefwaḥet ittfuḥen i SIDI.
NUM 18:18 Aysum nnes ad yiři nnec, am yidmaren n wenhezzi am ucekrud afusi ad iřin nnec.
NUM 18:19 Marra [tiwhibin n] usgeɛɛed zi [tewhibin] iqeddsen nni ɣa ssgeɛɛden ayt n Israil i SIDI, wciɣ tent i cek u i iḥenjiren nnec d tḥenjirin nnec [inni] akidek [iǧan]. [Aqa] d ict n tewṣeyyet i řebda, ad yiři d ijj n řɛahd s řemřaḥet i řebda zzat i wudem n SIDI, i cek u i zzariɛet nnec nni akidek [iǧan].”
NUM 18:20 Inna SIDI i Harun: “War tᵉttᵉṭṭfed řwart di temmurt nsen u war ɣarek tᵉttiři bu tesɣart di řwesṭ nsen. Necc d tasɣart nnec d řwart nnec di řwesṭ n ayt n Israil.
NUM 18:21 Xzar, Necc wciɣ i ayt n Lawi marra řeɛcur di Israil d řwart di ṭṭweɛ n tsexxart nni ggin nitni, tasexxart n Uqiḍun n Umsagar.
NUM 18:22 Ayt n Israil war dd-ttqarriben ɛad ɣar Uqiḍun n Umsagar, ḥima war dd-ttiwyen [ammu] ddenb x yixef nsen uca ad mmten.
NUM 18:23 [Maca] Ilawiyyen ad sexxaren di tsexxart n Uqiḍun n Umsagar uca ad arbun řmuɛṣiyyet nsen. [Aqa-tt] d ict n tewṣeyyet i řebda i [marra] jjiřat nwem, aqa nitni war ttᵉṭṭfen řwart di řwesṭ n ayt n Israil,
NUM 18:24 minzi řeɛcur n ayt n Israil nni ssgeɛɛden nitni i SIDI am tewhibt n usgeɛɛed, wciɣ ten i Ilawiyyen. X uya nniɣ asen: War warrten di řwesṭ n ayt n Israil!”
NUM 18:25 Issiweř SIDI ak-d Musa, inna:
NUM 18:26 “Ammu i ɣa tessiwřed ak-d Ilawiyyen uca ad asen tinid: ‘Xmi teksim řeɛcur n ayt n Israil nni wciɣ kenniw d řwart, [xenni] ad zzaysen tessgeɛɛdem ict n tewhibt n usgeɛɛed i SIDI, řeɛcur zi řeɛcur.
NUM 18:27 Ad awem dd-tᵉttwaḥseb am tewhibt n usgeɛɛed, am yirden n unedrar u am teccuret n tsirt [n uḍiř].
NUM 18:28 Ammu i d awem ittxeṣṣa ad tessgeɛɛdem ict n tewhibt n usgeɛɛed i SIDI zi marra řeɛcur nwem nni ɣa teksim zeg ayt n Israil. Ittxeṣṣa ad tewcem tawhibt, tenni tessgeɛɛdem zzaysen i SIDI, ɣar ukehhan Harun.
NUM 18:29 Zi marra min d awem ɣa wcen, ad tessgeɛɛdem tawhibt n usgeɛɛed tmun i SIDI, zi řemxeyyar nnes, tasɣart nnes iqeddsen zzayes.’
NUM 18:30 Uca ittxeṣṣa ac ad asen tinim: ‘Mařa teksim zzayes řemxeyyar nnes, [aqa] aya ad dd-ittwaḥseb d řɣiǧet n unedrar d řɣiǧet n tsirt [n uḍiř] i Ilawiyyen.
NUM 18:31 Ad teccem aya di kuř amcan, kenniw d [aytbab n] taddart nwem, minzi ta d řmunet i tsexxart nwem deg Uqiḍun n Umsagar.
NUM 18:32 Mařa ad zzayes teksim min iǧan ḥsen, [xenni] war xawem tarebbum ddenb. War iɛeddeř ad tfesdem [tiwhibin] iqeddsen n ayt n Israil, [ḥima] war tᵉttmettim ca.’”
NUM 19:1 Issiweř SIDI ak-d Musa d Harun, inna:
NUM 19:2 “Ta d tawṣeyyet n CCariɛa nni yumur SIDI, [umi] inna: ‘Siweř ak-d ayt n Israil ad ac dd-awyen ict n tfunast tazeggʷaɣt, tenni icnan u tenni war di iǧi uneɛḍab uca war xas ssarsen ɛad azayřu.
NUM 19:3 Ad tt tewcem i ukehhan Aliɛazar u netta ad tt issuffeɣ barra i řmargeḥ n řɛeskar u ad as ɣarṣen zzat i wudem nnes.
NUM 19:4 Akehhan Aliɛazar ad iksi [cwayt] n idammen nnes s uḍaḍ nnes uca ad irucc sebɛa n twařawin [cwayt] zeg idammen nnes jjihet n wudem n Uqiḍun n Umsagar.
NUM 19:5 Ad sscemḍen tafunast zzat i tiṭṭawin nnes. Tiřmect nnes, aysum nnes d idammen nnes ad ten sscemḍen [jmiɛ] ak-d umessař nnes.
NUM 19:6 Ad iksi ukehhan akeccuḍ n [tcejjart n] tengelt d tɛelǧet d uzeggʷaɣ iḥedqen uca ad inḍar aya di řwesṭ n tmessi [i di tᵉttwacmeḍ] tfunast.
NUM 19:7 Xenni ad iṣebben ukehhan arruḍ nnes, ad issird arrimet nnes deg waman, uca awarni as ad yadef ɣar řmargeḥ. Akehhan ad yiři ixmej ař tameddit.
NUM 19:8 D wenni tt isscemḍen, ad iṣebben [ɛawed] arruḍ nnes deg waman uca ad issird arrimet nnes s waman. Netta ad yiři ixmej ař tameddit.
NUM 19:9 Aryaz amezdag ad iyru iɣɣeḍ n tfunast uca ad ten igg barra i řmargeḥ deg ijj n wemcan izdig. Aqa x tmesmunt n ayt n Israil maḥend ad teḥḍa x waman n weɛzař, aqa aten i usizdeg n ddenb.
NUM 19:10 Wenni iyrun iɣɣeḍ n tfunast ad iṣebben arruḍ nnes uca ad yiři ixmej ař tameddit. [Aqa] d ict n tewṣeyyet i řebda i ayt n Israil u i ubarrani nni izeddɣen di řwesṭ nsen.’”
NUM 19:11 “Wi ɣa iḥadan ca n umettin, mammec ma [tegga] ca n řxecbet n bnadem, ad yiři ixmej sebɛa n wussan.
NUM 19:12 Deg wass wiss třata ad ikkes ddenb x yixef nnes [s waman n weɛzař]. [Xenni] ad yiři izdig deg wass wiss sebɛa. Mařa war ikkis ddenb x yixef nnes deg wass wiss třata, war ittiři izdig deg wass wiss sebɛa.
NUM 19:13 Marra wi iḥadan ijj n umettin, řeɛmar n ijj n bnadem immut, uca war ikkis ddenb x yixef nnes, aqa issexmej Tazeddiɣt n SIDI. Řeɛmar nni ad ittwaqess zi Israil. Minzi war xas zzuzaren ca aman n weɛzař, ad yiři ixmej. Řexmej nnes [aqa-t] xas ɛad.”
NUM 19:14 “Wa d azerf x ijj n bnadem nni immuten deg ijj n uqiḍun. Marra wi ɣa yadfen ɣar uqiḍun nni u marra wi [ɣa iqqimen] deg uqiḍun nni, ad yiři ixmej sebɛa n wussan.
NUM 19:15 [Ɛawed] kuř řqecɛet yarezmen, war xas taqebbart teqqen s tesɣunt, ad tiři texmej,
NUM 19:16 Marra wi iḥadan ḥed ittwassnuqqben s ssif deg iyyar, niɣ ca n umettin niɣ iɣsan n ijj n bnadem, niɣ ijj n wenḍeř, ad yiři ixmej sebɛa n wussan.
NUM 19:17 I yijj n umexmuj ittxeṣṣa ad ksin [cwayt] n iɣɣeḍ n [tɣarṣt n] ddenb icemḍen uca ad xas ssfarrɣen aman iddaren deg ict n řqecɛet.
NUM 19:18 Ijj n weryaz d amezdag ad iksi tɛelǧet, ad [tt] issuf deg waman uca [xenni] ad tt irucc x uqiḍun u x marra řeqcuɛ u x řeɛmur nni tuɣa din iǧan, uca [ammu ɛawed] x wi iḥadan iɣsan niɣ ca n yijjen nni ittwassnuqqben niɣ ca n umettin niɣ ca n wenḍeř.
NUM 19:19 Amezdag ad irucc x umexmuj deg wass wiss třata u deg wass wiss sebɛa ad xas irucc u deg wass wiss sebɛa ad xas ikkes ddenb. Ad iṣebben arruḍ nnes ad issird ixef nnes s waman uca ad yiři izdeg ař tameddit.
NUM 19:20 Aryaz ixemjen i war ittejjin ad ikkes ddenb x yixef nnes, řeɛmar nni ad ittwaqess zi řwesṭ n wegraw [n řgens], minzi aqa issexmej Zzawect Iqeddsen n SIDI. War xas ruccen aman n weɛzař, aqa ixmej.
NUM 19:21 Ta d ict n tewṣeyyet i řebda i nitni. Wenni iruccen aman n weɛzař ad iṣebben arruḍ nnes u wi ɣa iḥadan aman n weɛzař, ad yiři ixmej ař tameddit.
NUM 19:22 Marra min ittwaḥadan zeg umexmuj, ad yiři ixmej, uca bnadem nni i ɣa iḥadan aya, ad yiři ixmej ař tameddit.”
NUM 20:1 Deg uyur amezwaru tiweḍ marra tamesmunt n ayt n Israil ɣar řexřa n Ṣin. Řgens iqqim di Qadac. Din i temmut Maryam uca neḍřen tt din.
NUM 20:2 War tuɣi din ca aman i tmesmunt. [Xenni] munen ḍidd i Musa d Harun.
NUM 20:3 Tuɣa řgens imcubbec ak-d Musa, nnan: “Mři tuɣa zzayneɣ iffeɣ buḥbeř umi tuɣa iffeɣ buḥbeř zeg aytmatneɣ zzat i wudem n SIDI!
NUM 20:4 Mayemmi tessidfem wegraw [n řgens] n SIDI di řexřa-ya maḥend ad mmten din, neccin d řebhayem nneɣ?
NUM 20:5 U mayemmi d aneɣ dd-tessiřyem zi Miṣra ḥima ad aneɣ tessiwḍem ɣar wemcan-a aɛeffan? Deg wemcan-a war [din] zzariɛet niɣ tazart niɣ tzayart niɣ aremmam u war din ɛad aman ḥima ad nsu.”
NUM 20:6 [Xenni] yiweḍ Musa ak-d Harun zi zzat n wudem n wegraw [n řgens] ɣar wadaf n Uqiḍun n Umsagar uca wḍan x wudmawen nsen uca iban asen-dd uɛuǧi n SIDI.
NUM 20:7 Issiweř SIDI ak-d Musa, inna:
NUM 20:8 “Ksi taɣɣarct uca smun tamesmunt, cek d Harun, umac. Ittxeṣṣa ad tessiwřem ak-d teṣḍart zzat i tiṭṭawin nsen uca [xenni] ad tewc aman nnes. [Ammu] i ɣa tessuffɣem aman i nitni zi teṣḍart uca ad tᵉssessud tamesmunt d řebhayem.”
NUM 20:9 [Xenni] iksi Musa taɣɣarct zi zzat n wudem n SIDI am mammec d as yumur Netta,
NUM 20:10 uca issmun Musa d Harun agraw [n řgens] zzat i wudem n teṣḍart. Netta inna asen: “Sřem [řexxu], [a kenniw] inni iɣewwɣen, ma ittxeṣṣa aneɣ ad dd-nessuffeɣ aman zi teṣḍart-a?”
NUM 20:11 Uca issgeɛɛed Musa afus nnes uca iwta taṣḍart tnayen n twařawin s taɣɣarct nnes uca ffɣen-dd zzayes aṭṭas n waman uca teswa tmesmunt d řebhayem nsen.
NUM 20:12 [Xenni] inna SIDI i Musa d Harun: “Minzi kenniw war d ayi tᵉttecřem zzat i tiṭṭawin n ayt n Israil ařami d ayi tweqqarem s uweqqar iqeddsen, s uya war tessidifem agraw-a [n řgens] di temmurt nni d asen wciɣ.”
NUM 20:13 Ina aqa d aman n Mariba min xef arezzun ayt n Israil ad mcubbcen ak-d SIDI u [mani] Netta iban-dd d Amqeddes jar asen.
NUM 20:14 Issekk Musa ireqqasen zi Qadac ɣar ujeǧid n Idum, nnan: “Ammu i iqqar Israil, umac: ‘Cek tessned marra tamara nni xaneɣ ikkin,
NUM 20:15 aqa řejdud nneɣ hwan-dd ɣar Miṣra u tuɣa nzeddeɣ aṭṭas n iseggʷusa di Miṣra u Imiṣriyyen ggin dayneɣ u di řejdud nneɣ aṭṭas n řɣar.
NUM 20:16 Nřaɣa x SIDI uca Netta isřa tmijja nneɣ uca issekk-dd lmalak uca issuffeɣ aneɣ-dd zi Miṣra. Xzar, aqa aneɣ di Qadac, ict n tendint ɣar ṭṭarf n jjihet nnec.
NUM 20:17 Ejj aneɣ, mařa texsed, ad neẓwa x temmurt nnec. War nẓekkwi x iyyaren niɣ x imarjaɛen nnec n uḍiř u war nᵉsess aman zeg wanuten. X webrid igellden ad neɛdu břa ma ad nḥeyyed [ɣar] yefus uřa [ɣar] uzeřmaḍ, ař ɣa neɛdu [ɛawed] iymiren [n temmurt] nnec.’”
NUM 20:18 Inna as Idum: “War ttẓekkʷid xafi, niɣ ak kic mmsagareɣ s ssif balak!”
NUM 20:19 [Xenni] nnan as ayt n Israil: “Ad neḍfar abrid ameqqran u mařa ad sweɣ aman nnec, necc d řebhayem inu, ad ten xeǧṣeɣ. Ad ẓwiɣ [tammurt] x iḍaren d wenni netta waha.”
NUM 20:20 [Maca] netta inna: “War xas tẓekkʷid!” Uca iffeɣ Idum maḥend ad kis imsagar s yijj n ubarru d ameqqran d ufus ijehden.
NUM 20:21 [Ammu] yugi Idum ad iwc ttesriḥ i Israil maḥend ad iẓwa aymir nnes. S uyenni i ijja Israil abrid di ssibbet nnes.
NUM 20:22 Fesyen iqiḍan nsen, [ffɣen] zi Qadac, uca [xenni] iwḍen ayt n Israil ɣar wedrar n Hur, tamesmunt marra.
NUM 20:23 Issiweř SIDI ak-d Musa d Harun ɣar wedrar n Hur, ɣar weymir n temmurt n Idum, inna:
NUM 20:24 “Ad immarni Harun ɣar řgens nnes, minzi war ittidef ɣar temmurt nni wciɣ i ayt n Israil, minzi kenniw tɣennanem x řumur inu ɣar waman n Mariba.
NUM 20:25 Ksi Harun d Aliɛazar, mmis, uca arr i-ten ad geɛɛden x wedrar n Hur.
NUM 20:26 Ɛarra Harun zeg warruḍ nnes uca syarḍ i-t i Aliɛazar, mmis. [Xenni] ad ittwaksi Harun uca ad immet din.”
NUM 20:27 Musa igga am mammec d as yumur SIDI. Uřyen adrar n Hur zzat i tiṭṭawin n marra tamesmunt.
NUM 20:28 Musa iɛarra Harun zeg warruḍ nnes uca issyarḍ i-t i Aliɛazar, mmis. Uca immut Harun din x tqiccat n wedrar. [Xenni] ihwa-dd Musa zeg wedrar ak-d Aliɛazar.
NUM 20:29 Marra tamesmunt teẓra belli Harun iḍřeq i buḥbeř nnes uca run třatin n wussan di ssibbet n Harun, marra taddart n Israil.
NUM 21:1 [Umi] isřa Akenɛani, ajeǧid n Ɛarad nni izeddɣen di [Temmurt n] Ljanub, belli yusa-dd Israil x webrid n ibergagen, immneɣ ḍidd i Israil uca iṭṭef [ca] zzaysen d imeḥbas.
NUM 21:2 [Xenni] iwca Israil ijj n wawař i SIDI uca inna: “Mařa d tidett tɛarrned řgens-a deg ufus inu, necc ad ḥarrmeɣ tineddam nsen [i uteḥḥi].”
NUM 21:3 SIDI istajeb i Israil uca isellem as ayt n Kenɛan uca nitni ḥarrmen i-ten i uteḥḥi uřa d marra tineddam nsen uca iřaɣa amcan nni s yisem n Ḥurma.
NUM 21:4 [Xenni] fesyen iqiḍan nsen zeg wedrar n Hur, [ruḥen] x webrid ɣar Řebḥar n Telga uca s man aya [tuɣa ittxeṣṣa] ad nnḍen i temmurt n Idum. Uca řgens war iṣbir deg webrid.
NUM 21:5 Aqa iqaceḥ řgens ḍidd i AREBBI d Musa: “Mayemmi d aneɣ dd-tessuffɣem zi Miṣra, maḥend ad nemmet di řexřa-ya? War da iǧi weɣrum uřa d aman. Řeɛmar nneɣ iɛiff zeg weɣrum-a i war isekkwin!”
NUM 21:6 [Xenni] iḍřeq SIDI ifiɣran yareqqen jar řgens, inni izeɛfen řgens uca immut waṭṭas n řgens n Israil.
NUM 21:7 Yusa-dd řgens ɣar Musa, nnan: “Aqa nexḍa, minzi nqaceḥ ak-d SIDI u akidek. Ẓaǧ i SIDI maḥend ad xaneɣ ikkes ifiɣran-a.” [Xenni] iẓuǧ Musa di ṭṭweɛ n řgens.
NUM 21:8 Inna SIDI i Musa: “Egg ijj n ufiɣar yareqqen uca sars i-t x ict n teḥnact uca man wen ma ittwazeɛfen u ad ɣares ixzar, ad iddar.”
NUM 21:9 Uca igga Musa ijj n ufiɣar n nnḥas uca issars i-t x teḥnact uca xmi izeɛɛef ca n ufiɣar ca n yijjen, uca wanita ixezzar ɣar ufiɣar n nnḥas, [xenni] ad iqqim iddar.
NUM 21:10 [Xenni] fesyen ayt n Israil iqiḍan nsen uca wtin iqiḍan nsen di Ubut.
NUM 21:11 [Xenni] kksen iqiḍan nsen zi Ubut, wtin iqiḍan nsen ɣar arwinat n Ɛabarim di řexřa i [iǧan] zzat i wudem n Mu’ab manis dd-tneqqar tfuct.
NUM 21:12 Ssenni kksen iqiḍan nsen uca wtin iqiḍan nsen di teɣzurt n Zarad.
NUM 21:13 Ssenni kksen iqiḍan nsen uca wtin iqiḍan nsen x ujemmaḍ n [yeɣzar n] Arnun, wenni [issizřen] di řexřa, iffeɣ zi jjihet n weymir n Imuriyyen, minzi aqa Arnun d aymir ak-d Mu’ab, jar Mu’ab d Imuriyyen.
NUM 21:14 X uya qqaren deg wedlis ittwannḍen n garrat n SIDI: “Wahib di Sufa d tɣezratin n Arnun,
NUM 21:15 u tiɣezratin i dd-ihekkwan, ařami meyyřent ɣar tzeddiɣt n Ɛar, d tenni isennden x weymir n Mu’ab.”
NUM 21:16 Ssenni [ruḥen] ɣar Bi’r, [‘Anu’]. Wa aqa d anu min xef inna SIDI i Musa: “Smun řgens, [xenni] ad asen wceɣ aman.”
NUM 21:17 Xenni iɣennej Israil izři-ya: “Ngez, a anu!” Arrim-dd xas s ijj n izři:
NUM 21:18 “Cek anu, wenni ɣzin řḥukkam, wenni ineqcen tarwa n taṣiřet n řgens ak-d umgewwad nsen s izeǧaḍen nsen n řeḥkamet.” Zi řexřa ruḥen ɣar Mattana,
NUM 21:19 uca zi Mattana ɣar Naḥliyil, zi Naḥliyil ɣar Bamut,
NUM 21:20 uca zi Bamut ɣar teɣzurt nni [iǧan] deg iyyar n Mu’ab, x tqiccat n Fisja nni ittsijjan ɣar tnezruft.
NUM 21:21 [Xenni] issekk Israil ireqqasen ɣar Siḥun, ajeǧid n Imuriyyen, inna:
NUM 21:22 “Ejj ayi ad cuqeɣ di temmurt nnec. War nettmeyyiř ca ɣar iyyaren niɣ ɣar imarjaɛen [nnec] n uḍiř u war nsess aman zeg wanuten. Ad neɛdu x webrid igellden, ař ɣa neɛdu x temmurt nnec.”
NUM 21:23 [Maca] Siḥun war yejji ad iẓwa Israil x jjwayeh nnes. Issmun Siḥun marra řgens nnes uca iffeɣ, ḥima ad imsagar ak-d Israil, ɣar řexřa, uca yusa-dd di Yahaṣ uca immneɣ ak-d Israil.
NUM 21:24 Uca Israil iwta i-t s řeqḍeɛ n ssif uca iksi temmurt nnes d řwart, zi Arnun ař Yabbuq, ař ayt n Ɛammun, minzi jjihet n ayt n Ɛammun aqa-t d [ijj n lburj] ijehden.
NUM 21:25 Iksi Israil marra tineddam-a uca izdeɣ Israil di marra tineddam n Imuriyyen, di Ḥacbun u di marra tneddam i ɣares dd-iqqnen.
NUM 21:26 Minzi Ḥacbun tuɣa d tandint n Siḥun, ajeǧid n Imuriyyen, uca netta tuɣa immneɣ ak-d ujeǧid i d as dd-izwaren n Mu’ab uca iksi zzayes marra tammurt nnes ař Arnun.
NUM 21:27 X uya qqaren inni issawařen s wawařen iweznen: “Asem-dd ɣar Ḥacbun, ad tᵉttwabna u ad tᵉttwaɛdeř tendint n Siḥun!
NUM 21:28 Minzi teffeɣ-dd tmessi zi Ḥacbun d ijj n uɛeccař zi tendint n Siḥun, aceɛɛař nni icca Ɛar n ayt n Mu’ab řḥukkam n řuɛřat n Arnun.
NUM 21:29 Uct xak, Mu’ab! Aqa ittwahellek řgens n Kamuc. Iḥenjiren nnes i tuɣa yarewřen d tḥenjirin nnes, aqa isellem i-ten d imeḥbas i Siḥun, ajeǧid n Imuriyyen.
NUM 21:30 Aqa newwet i-ten s fřitcat. Ḥacbun ittwahellek ař Dibun. Nareddeǧ i-ten ař Nufaḥ tenni iǧan ař Midaba.”
NUM 21:31 Ammu i idweř Israil ad izdeɣ di temmurt n Imuriyyen.
NUM 21:32 Uca issekk Musa ibergagen ɣar Yaɛzir uca ksin tineddam i ɣares dd-iqqnen uca kksen tasɣart n Imuriyyem nni tuɣa din [izeddɣen].
NUM 21:33 [Xenni] meyyřen zeg webrid nsen, uřyen abrid ɣar Bacan. [Xenni] iffeɣ-dd Ɛuj, ajeǧid n Bacan, netta d marra řgens nnes, maḥend ad kidsen imsagar i umenɣi di Idraɛi.
NUM 21:34 Inna SIDI i Musa: “War zzayes tteggʷed ca, minzi Necc ggiɣ t deg ufus nnec, ak-d marra řgens nnes d temmurt nnes uca ad zzayes tegged am mammec teggid zi Siḥun ajeǧid n Imuriyyen, wenni tuɣa izeddɣen di Ḥacbun.”
NUM 21:35 Uca areddǧen t, netta d iḥenjiren nnes d marra řgens nnes, ař mani war iqqim uřa d ijj n umařwar zzayes uca ksin tammurt nnes d řwart.
NUM 22:1 [Xenni] fesyen ayt n Israil iqiḍan nsen uca wtin iqiḍan nsen di řewḍat n Mu’ab, arendad n Ariḥa nni iǧan x ujemmaḍ n L’Urdun.
NUM 22:2 Uca iẓra Balaq, mmis n Ṣiffur, marra min igga Israil deg Imuriyyen.
NUM 22:3 Mu’ab tuɣa itteggʷed aṭṭas zi řgens-a, minzi tuɣa aten deg waṭṭas. Mu’ab tuɣa ittnexřaɛ zeg ayt n Israil.
NUM 22:4 [Xenni] inna Mu’ab i imɣaren n Midyan: “Řexxu řɣaci-ya ad iřseḥ marra min d aneɣ-dd innḍen, am mammec iřesseḥ ufunas taziyzawt n yeyyar.” [Tuɣa] Balaq, mmis n Ṣiffur, ajeǧid n Mu’ab.
NUM 22:5 Issekk ireqqasen ɣar Balɛam, mmis n Baɛur, ɣar [tendint n] Fatur ɣar yeɣzar [n Lfuraṭ], [di] temmurt n ayt n řgens nnes, maḥend ad as dd-řaɣan uca [netta] inna: “Xzar, iffeɣ-dd ijj n řgens zi Miṣra uca xzar, aqa idřa udem n temmurt uca aqa nitni zeddɣen nican arendad inu.
NUM 22:6 As-dd řexxu, nɛeř řgens di ṭṭweɛ inu, minzi aqa ijhed xafi. Ad taɣ necc zemmareɣ ad t ɣeřbeɣ niɣ ad t ssuffɣeɣ zi temmurt, minzi necc ssneɣ belli wi ɣa tbarked cek, ad ittwabarek u wi ɣa tneɛřed, ad ittwanɛeř.”
NUM 22:7 [Xenni] ruḥen imɣaren n Mu’ab d imɣaren n Midyan ak-d řmunet n uɛezzem deg ufus nsen, iwḍen ɣar Balɛam uca ssiwřen akides [s] wawařen n Balak.
NUM 22:8 Netta inna asen: “Sensem da ǧiřet-a, [xenni] necc ad xawem dd-arreɣ am mammec ɣari ɣa issiweř SIDI.” [Xenni] qqimen řḥukkam n Mu’ab ɣar Balɛam.
NUM 22:9 Yusa-dd AREBBI ɣar Balɛam, inna: “Min ɛnan iryazen nni iǧan akidek?”
NUM 22:10 Inna Balɛam i AREBBI: “Balak, mmis n Ṣiffur, ajeǧid n Mu’ab, issekk i-ten-dd ɣari, [inna]:
NUM 22:11 ‘Xzar, ijj n řgens iffeɣ-dd zi Miṣra u aqa idřa udem n temmurt. As-dd, nɛeř i-t di ṭṭweɛ inu. Ad taɣ zemmareɣ [xenni] ad kisen menɣeɣ niɣ ad ten ssuffɣeɣ.’”
NUM 22:12 Inna AREBBI i Balɛam: “War ttriḥ kisen niɣ ad tneɛřed řgens nni, minzi řgens aqa ittwabarek.”
NUM 22:13 [Xenni] ikkar Balɛam di ṣṣbeḥ uca inna i řḥukkam n Balak: “Dewřem-dd ɣar temmurt nwem, minzi SIDI war d ayi ismiḥ ḥima ad raḥeɣ akidwem.”
NUM 22:14 [Xenni] kkaren řḥukkam n Mu’ab uca dewřen-dd ɣar Balak uca nnan: “Balɛam yugi ad dd-yas akidneɣ.”
NUM 22:15 Issekk Balak ɛawed řḥukkam, [ɛad] ktar u [ɛad] wenni icennɛen ktar x yina [imezwura].
NUM 22:16 Usin-dd ɣar Balɛam, nnan: “Ammu i iqqar Balak, mmis n Ṣiffur: ‘Ttzawgeɣ cek, war ttejji ixef nnec maḥend war ɣari dd-ttased,
NUM 22:17 minzi ad cek karrmeɣ s waṭṭas uca ad ggeɣ marra min d ayi ɣa tinid. Ttzawgeɣ cek, as-dd uca nɛeř řgens-a di ṭṭweɛ inu!”
NUM 22:18 Yarra-dd Balɛam uca inna i imsexxaren n Balak: “Waxxa Balak ad ayi iwc taddart nnes teccur s nnuqart d wureɣ, [ɛad] war zmireɣ ad ffɣeɣ x řumur n SIDI, AREBBI inu, [maḥend ad ggeɣ] ca n řḥajjet d tameẓyant niɣ ca n řḥajjet d tameqqrant.
NUM 22:19 [Xenni] řexxu, ttzawageɣ kenniw, qqimem danita ǧiřet-a ḥima ad ssneɣ min d ayi ɣa yini SIDI ɛad ktar.”
NUM 22:20 Di ǧiřet yusa-dd AREBBI ɣar Balɛam, inna as: “Mařa dewřen-dd yeryazen nni maḥend ad ac dd-řaɣan, kkar [xenni] uca ruḥ akidsen. Maca war ttegg mɣir min d ac ɣa iniɣ.”
NUM 22:21 Ikkar Balɛam ɣar ṣṣbeḥ uca iḥezzem i teɣyuč nnes uca yuyur ak-d řḥukkam n Mu’ab.
NUM 22:22 [Xenni] yarɣa weɣḍab n AREBBI, minzi netta iruḥ uca lmalak n SIDI ibedd deg webrid [am] cciṭan ḍidd nnes. Netta inya x teɣyuč nnes uca tnayen n imsexxaren tuɣa aten akides.
NUM 22:23 Uca taɣyuč teẓra lmalak n SIDI ibedd deg webrid s ssif nnes ittwajebden deg ufus nnes. S uyenni teřḥem teɣyuč zeg webrid uca tuyur deg iyyar. [Xenni] iwta Balɛam taɣyuč ḥima ad tt yarr ɣar webrid.
NUM 22:24 Maca lmalak n SIDI ibedd deg ict n tebridt teḥṣar jar imarjaɛen n uḍiř s yijj n weɣbar ɣar ṭṭarf d ijj n weɣbar ɣar ṭṭarf nneɣnit.
NUM 22:25 Umi teẓra teɣyuč lmalak n SIDI, teřṣeq ɣar weɣbar uca ittwaḥṣar uḍar n Balɛam ak-d weɣbar uca netta iqqim iccat i-tt.
NUM 22:26 [Uca] iruḥ lmalak n SIDI ɣar zzat uca ibedd deg ijj n wemcan iḥṣar aṭṭas ař mani war ittwif ttasiɛ maḥend ad iḥeyyed [ɣar] yefus uřa [ɣar] uzeřmaḍ.
NUM 22:27 Umi teẓra teɣyuč lmalak n SIDI, tbarc sadu Balɛam uca Balɛam ixeyyeq aṭṭas uca ifarc taɣyuč s yijj n ukeccuḍ.
NUM 22:28 [Xenni] yarzem SIDI aqemmum n teɣyuč uca tenna i Balɛam: “Min d ac ggiɣ umi d ayi tfarced [řexxu ɛad] třata n imuren?”
NUM 22:29 [Xenni] inna Balɛam i teɣyuč: “Minzi cem tbuṣared xafi. Mři ɣari ssif deg ufus inu, ad tiři xenni nɣiɣ cem!”
NUM 22:30 Tenna teɣyuč i Balɛam: “Ma war ǧiɣ necc taɣyuč nnec i xef tenyid zeg wami necc ɣarek ǧiɣ ař ass-a? Ma aqa necc nnumeɣ tteggeɣ ak kik ammu?” Uca yarra-dd [xas]: “Lla!”
NUM 22:31 Xenni yarzem SIDI tiṭṭawin n Balɛam ařami iẓra lmalak n SIDI ibedd deg webrid s ssif nnes ittwajebden deg ufus nnes. [Xenni] yuḍar Balɛam, ibendeq s uɣembub nnes [ɣar temmurt].
NUM 22:32 Inna as lmalak n SIDI: “Mayemmi tewtid taɣyuč nnec třata n imuren? Xzar, aqa Necc ffɣeɣ-dd [am] ijj n weɣrim, minzi abrid-a ittḍarra ayi Necc nican.
NUM 22:33 Teẓra ayi teɣyuč uca teřḥem xenni zi zzat i wudem inu třata n imuren. Mařa war teřḥim zi zzat i wudem inu, [xenni] Necc ad yiři aqa řexxu nɣiɣ cek u nettat ad tt jjeɣ ad teddar.”
NUM 22:34 [Xenni] inna Balɛam i lmalak n SIDI: “Aqa necc xḍiɣ, minzi war ssineɣ belli Cek tbedded zzati deg webrid. Ɛad řexxu, mařa aya d řɛib di tiṭṭawin nnec, necc ad dd-dewřeɣ.”
NUM 22:35 Inna lmalak n SIDI i Balɛam: “Ruḥ ak-d iwdan-a, maca siweř waha min d ac ɣa iniɣ Necc.” [Ammu] iruḥ Balɛam ak-d řḥukkam n Balak.
NUM 22:36 [Umi] Balak isřa, aqa Balɛam yusa-dd, iruḥ ḥima ad t immeřqa ɣar tandint n Mu’ab i iǧan ɣar jjihet n weymir n Arnun, ɣar ṭṭarf n jjihet n weymir.
NUM 22:37 Uca Balak inna i Balɛam: “Ma war ssekkeɣ necc [iwdan] ad ac dd-řaɣan? Mayemmi war ɣari dd-tusid? Ma war zemmareɣ necc ad cek karmeɣ?”
NUM 22:38 [Xenni] yarra-dd Balɛam x Balak: “Xzar, necc usiɣ-dd ɣarek, [maca] ma zemmareɣ necc řexxu ad ssiwřeɣ x ca? Awař nni i ɣa yegg SIDI deg uqemmum inu, ad t iniɣ.”
NUM 22:39 Uca iruḥ Balɛam ak-d Balak uca usin-dd ɣar Qaryat-Ḥaṣut.
NUM 22:40 [Xenni] iɣarṣ Balak i ifunasen d wuǧi, issekk [zzaysen] ɣar Balɛam u ɣar řḥukkam nni tuɣa akides.
NUM 22:41 Ɣar ṣṣbeḥ imsar belli Balak yiwi akis Balɛam uca issiři i-t x řuɛřat n Baɛl mani tuɣa izemmar ad iẓar řgens ař ṭṭarf iggʷejen qaɛ.
NUM 23:1 [Xenni] inna Balɛam i Balak: “Bna sebɛa n iɛalṭaren danita i necc uca sewjed ayi sebɛa n ifunasen imeẓyanen d sebɛa n icarriyyen.”
NUM 23:2 Balak igga am mammec d as inna Balɛam uca Balak d Balɛam qeddmen ijj n ufunas ameẓyan d ijj n icarri x [kuř ijj n] uɛalṭar.
NUM 23:3 [Xenni] Balɛam inna i Balak: “Bedd [din] zzat i tɣarṣt n wecmaḍ nnec, [xenni] necc ad raḥeɣ. Ad taɣ ad kidi imsagar SIDI uca mammec ma igga wawař nni d ayi ɣa isscen, necc ad ac t-i-dd-ssargbeɣ.” [Xenni] iruḥ [Balɛam] ɣar [tqiccat] d taqeccart [n wedrar].
NUM 23:4 U immeřqa AREBBI ak-d Balɛam uca [netta] inna as: “Aqa sswejdeɣ sebɛa n iɛalṭaren uca qeddmeɣ ijj n ufunas ameẓyan d ijj n icarri x [kuř ijj n] uɛalṭar.”
NUM 23:5 [Xenni] igga SIDI ijj n wawař deg uqemmum n Balɛam uca inna: “Dweř ɣar Balak uca siweř [akides] ammu.”
NUM 23:6 Uca [umi] ɣares-dd idweř, xzar, ibedd zzat i tɣarṣt n wecmaḍ nnes, [jmiɛ] ak-d marra řḥukkam n Mu’ab.
NUM 23:7 [Xenni] ibda iqqar awař nnes iweznen, inna: “Zi Aram indeh ayi-dd Balak, ajeǧid n Mu’ab, zeg idurar n ccarq, inna: ‘As-dd, nɛeř ayi Yaɛqub, as-dd, zawar Israil!’
NUM 23:8 Maca mammec ɣa neɛřeɣ, wenni war ittwaneɛřen zi Arebbi, u mammec ɣa zawareɣ wenni war izawar SIDI?
NUM 23:9 Minzi zi tqiccat n tṣuḍar twařiɣ t, uca zi tiwririn xezzareɣ dayes. Aqa wa d ijj n řgens izeddɣen weḥḥdes u war iḥesseb ixef nnes jar řegnus.
NUM 23:10 Wi ɣa iḥesben acař n Yaɛqub niɣ wi i ɣa iḥesben řqedd n ijj n arbeɛ zi Israil? Ejj ad immet řeɛmar inu řmewt n imseggaden u ejj ɛawed ad yiři uneggar n tudart inu ad imqudda akides!”
NUM 23:11 [Xenni] inna Balak i Balɛam: “Min d ayi teggid? Necc iwyeɣ cek ḥima ad tneɛřed řɛedyan inu, [maca] xzar, aqa nican tbarked i-ten!”
NUM 23:12 Netta yarra-dd, inna: “Ma war ittxeṣṣi ad ḥḍiɣ maḥend ad ssiwřeɣ min igga SIDI deg uqemmum inu?”
NUM 23:13 [Xenni] inna Balak: “Ttzawgeɣ cek ad dd-tased akidi ɣar ijj n wemcan nneɣni zi manis ɣa tẓared řgens [ɛawed]. Ad tẓared ṭṭrufa nnes waha, war t tẓarred marra. Ssenni ad t tneɛřed di ṭṭweɛ inu!”
NUM 23:14 Uca yiwyi i-t ɣar řewḍa n Ṣufim x tqiccat n Fisja uca ibna [din] sebɛa n iɛalṭaren uca x [kuř ijj n] uɛalṭar iqeddem ijj n ufunas ameẓyan d ijj n icarri.
NUM 23:15 Netta inna i Balak: “Mařa cek ad tbedded da zzat i tɣarṣt nnec n wecmaḍ, xenni necc ad [kis] mmsagareɣ din.”
NUM 23:16 Uca imsagar SIDI ak-d Balɛam uca igga ijj n wawař deg uqemmum nnes, inna: “Dweř ɣar Balak uca ini as ammu.”
NUM 23:17 Uca netta yusa-dd ɣares, u xzar, netta tuɣa ibedd zzat i tɣarṣt n wecmaḍ nnes uca řḥukkam n Mu’ab bedden zzates. Inna as Balak: “Min inna SIDI?”
NUM 23:18 [Xenni] ibda netta awař nnes iweznen, inna: “Kkar, Balak, sḥess! Seř ɣari, cek, mmis n Ṣiffur!
NUM 23:19 Arebbi war iǧi d mmis n bnadem, maḥend zeɛma ad issxarriq, niɣ d mmis n bnadem maḥend zeɛma ad t iřqef wendam. Ma ad yini uca war tt ittegg, niɣ ad issiweř uca war tt ittkemmiř?
NUM 23:20 Xzar, aqa ṭṭfeɣ řumur ḥima ad barkeɣ. Umi ibarek Netta, necc war zemmareɣ ad dd-arreɣ aya.
NUM 23:21 War ittwiři řmuɛṣiyyet n Yaɛqub u řeɣben n Israil war t iẓar. SIDI, AREBBI nnes, aqa-t akides uca asuḍi s wesruddeḥ di řbuq di ṭṭweɛ n Ujeǧid aqa-t dayes.
NUM 23:22 Arebbi issuffeɣ i-ten-dd zi Miṣra. Netta i nitni am waccawen iziraren n iɣayḍ n řexřa.
NUM 23:23 Aqa zeɛma war din aɛezzem di Yaɛqub u war din tagezzant di Israil. Ta d řweqt i di tᵉttwanna x Yaɛqub d Israil: ‘Aqa xzar, min igga Arebbi!’
NUM 23:24 Aqa da, řgens ad ikkar am teyradt u ad dd-igeɛɛed am weyrad. War issezzeř ixef nnes ař ɣa yecc taymart nnes uca ad issu idammen n min imezzeq.”
NUM 23:25 [Xenni] inna Balak i Balɛam: “Mařa [xenni] war texsed qaɛ ad t tneɛřed, war t ttbarak ca ɛawed.”
NUM 23:26 Balɛam yarra-dd, inna i Balak: “Ma war d ac nniɣ: ‘Marra min d ayi ɣa yini SIDI, ad t ggeɣ?’”
NUM 23:27 [Xenni] inna Balak i Balɛam: “Ttzawgeɣ cek ad dd-tased, ad cek awyeɣ ɣar ijj n wemcan nneɣni. Ad taɣ ad yiři nican di tiṭṭawin n AREBBI mařa ad t tneɛřed ssenni di ṭṭweɛ inu.”
NUM 23:28 Uca Balak indeh Balɛam ɣar tqiccat n Faɣur nni ixezzaren ɣar tnezruft.
NUM 23:29 [Xenni] inna Balɛam i Balak: “Bna danita sebɛa n iɛalṭaren uca sewjed ayi danita sebɛa n ifunasen imeẓyanen d sebɛa n icarriyyen.”
NUM 23:30 Balak igga am mammec d as inna Balɛam uca x kuř ijj n uɛalṭar iqeddem [din] ijj n ufunas ameẓyan d ijj n icarri.
NUM 24:1 Iẓra Balɛam belli aqa yarḍa i tiṭṭawin n SIDI umi ibarek Israil uca [xenni] war yarezzu, am umur [amezwaru] d umur [wiss tnayen], ḥima [ad iɛezzem] s ifiɣran, maca yarra udem nnes ɣar řexřa.
NUM 24:2 [Umi] issgeɛɛed tamuɣři nnes, iẓra Israil izdeɣ [din], [tᵉttwasettef] ɛlaḥsab tiqebbař nnes, [xenni] yusa-dd Arruḥ n AREBBI xas.
NUM 24:3 Ibda netta awař nnes iweznen, inna: “Awař n Balɛam, mmis n Baɛur, awař n weryaz ijehden, wenni umi teqqen tiṭṭ,
NUM 24:4 ijj n wawař n wenni isřin awařen n Arebbi, d wenni ixezzaren řewḥiy n Umzemmar x kuřci, am dd-iwḍa s tiṭṭawin yarezmen.
NUM 24:5 A Yaɛqub, mecḥař ṣebḥen iqiḍan nnec, d tzeddiɣin nnec, a Israil!,
NUM 24:6 aqa sswiẓẓaḍen amecnaw tiɣzurin, amecnaw aɣemmuy icewwaren ak-d yeɣzar, amecnaw acfiř nni iẓẓu SIDI, amecnaw ticejjura n tengelt zzat i waman.
NUM 24:7 Zeg ibuqařen nnes ad ssizzřen waman uca zzariɛet nnes ad tiři di tuffet. Ajeǧid nnes ad ittwassgeɛɛed x Ajaj u tageldit nnes ad tᵉttwassuɛřa.
NUM 24:8 Arebbi issuffeɣ i-t-i-dd zi Miṣra. Jjehd nnes am waccawen iziraren n iɣayḍ n řexřa. Ad yecc řegnus, iɣrimen nnes, ad iřbez iɣussan nsen uca ad ten issnuqqeb s fřitcat nnes.
NUM 24:9 Aqa iɣnes, issezzeř ixef nnes am weyrad, am teyradt. Wi t i dd ɣa issekkaren? Wenni cek ittbarken, ad ittwabarek u wenni cek ineɛɛřen, ad yiři ittwanɛeř!’”
NUM 24:10 [Xenni] yarɣa uxeyyeq n Balak x Balɛam. Iwta netta deg ifassen nnes uca Balak inna i Balɛam: “Aqa řaɣiɣ-dd cek maḥend ad tneɛřed řɛedyan inu, [maca] xzar, aqa tbarked [i-ten] ɛad nican třata n imuren!
NUM 24:11 Xenni řexxu, arweř ɣar wemcan mani tzeddɣed! Necc nniɣ ac t, ad cek cenɛeɣ aṭṭas, [maca] xzar, SIDI imneɛ xak ccenɛet nni!”
NUM 24:12 [Xenni] inna Balɛam i Balak: “Ma war ssiwřeɣ ak-d ireqqasen nni d ayi dd-tᵉssekked uca nniɣ:
NUM 24:13 ‘Waxxa Balak ad ayi iwc taddart nnes teccur s nnuqart d wureɣ, [xenni] necc [ɛad] war zmireɣ ad ɛeddiɣ x řumur n SIDI, maḥend ad ggeɣ ca n řḥajjet n řxar niɣ n řɣar [i dd-itteffɣen] zeg wuř inu. Min ɣa yini SIDi, ad t iniɣ.’
NUM 24:14 Řexxu xenni, xzar, necc ad dd-dewřeɣ ɣar řgens inu. As-dd, necc ad cek ssaregbeɣ x řefhamet uca ad ac iniɣ min d ac ɣa yegg řgens-a deg uneggar n wussan.”
NUM 24:15 [Xenni] ibda netta awař iweznen nnes, inna: “Awař n Balɛam, mmis n Baɛur, awař n weryaz ijehden, wenni umi teqqen tiṭṭ!
NUM 24:16 Tawařt n wenni isřin awařen n Arebbi, d wenni issnen zi tussna n wenni d Amɛuǧi x kuřci, d wenni ixezzaren řewḥiy n Umzemmar x kuřci, am dd-iwḍa s tiṭṭawin yarezmen.
NUM 24:17 Ad t ẓarɣ, war iǧi řexxu, ad t twařiɣ, maca war iǧi zi řadaset. Ad dd-iffeɣ itri zi Yaɛqub uca ad tekkar uzeǧaḍ n řḥakem zi Israil, wenni i ɣa iřebzen lḥenkat n uzeǧif n Mu’ab uca ad iřbez marra tarwa n ssdeɛ
NUM 24:18 uca ad ittwaṭṭef Idum d řwart u Saɛir, wenni d řeɛdu nnes, ad t ṭṭfen d řwart ɛawed, uca ammu i ɣa yegg Israil s taryast.
NUM 24:19 U wenni i dd ɣa iffɣen zi Yaɛqub ad iḥkem u netta ad isshellek wenni yarewřen zi tendint.”
NUM 24:20 [Umi] netta iẓra Ɛamaliq, ibda awař iweznen nnes, inna: “Ɛamaliq d amezwaru n řegnus, maca aneggaru nnes ad idweř d ahellek!”
NUM 24:21 [Řami] iẓra Iqiniyyen, ibda netta awař iweznen nnes, inna: “Tazeddiɣt nnec temten uca teggid řɛucc nnec di teṣḍart.
NUM 24:22 Ɛad Qayin ad ittwassecmeḍ. Ař meřmi izemmar Accur ad ac dd-yawi d ameḥbus?”
NUM 24:23 Uca ibda netta awař iweznen nnes, inna: “Ay, wi ɣa iqqimen iddaren xmi xas i ɣa issars Arebbi man aya?
NUM 24:24 Iɣarruba zi jjwayeh n Kittim ad ɣezzan Accur uca ad ɣezzan ɛawed Ɛabir u netta ad ittwateḥḥa.”
NUM 24:25 Ikkar Balɛam, yuyur uca idweř ɣar wemcan nnes [n tzeddiɣt]. Uřa d Balak iṭṭef abrid nnes.
NUM 25:1 Izdeɣ Israil di Ciṭṭim uca ibda řgens ad issefsed ixef nnes ak-d yessis n Mu’ab.
NUM 25:2 Ɛarḍen-dd řgens ɣar tɣarṣi n irebbiten nsent uca řgens icca [zzaysent], uca nitni bendqen i irebbiten nsent.
NUM 25:3 [Ammu] imun řgens ak-d Baɛl-Faɣur uca yarɣa weɣḍab n SIDI x Israil.
NUM 25:4 Inna SIDI i Musa: “Ksi marra [iryazen nni iǧan] d izeǧifen n řgens uca ayeř i-ten zzat i SIDI di tfuct [iḥarren], [xenni] ad iggʷej řḥaduq n weɣḍab n SIDI x Israil.”
NUM 25:5 [Xenni] inna Musa i řquḍat n Israil: “Ejj kuř ijj ad ineɣ [inni] zi jar yeryazen nnes i imunen ak-d Baɛl-Faɣur!”
NUM 25:6 Uca xzar, ijj n weryaz zeg ayt n Israil yusa-dd uca netta yiwi-dd ict n [temɣart] Tmidiyanect ɣar aytmas zzat i tiṭṭawin n Musa u zzat i tiṭṭawin n marra tamesmunt n ayt n Israil, am ttrun nitni ɣar wadaf n Uqiḍun n Umsagar.
NUM 25:7 Iẓra i-t Finaḥas, mmis n Aliɛazar, mmis n Harun. Netta ikkar zi řwesṭ n tmesmunt, iksi ijj n uḥric deg ufus nnes
NUM 25:8 uca iruḥ awarni i weryaz zi Israil ɣar uqiḍun s řqubbet uca issnuqqeb i-ten s tnayen, [am] weryaz nni zi Israil, am temɣart s uɛeddis nnes. [Xenni] tbedd jjriḥect x ayt n Israil.
NUM 25:9 Uca mmuten di jjriḥect arebɛa u-ɛicrin-ařef [n iwdan].
NUM 25:10 Issiweř SIDI ak-d Musa, inna:
NUM 25:11 “Fineḥas, mmis n Aliɛazar, mmis n Harun, akehhan, isseggwej asɛar inu x ayt n Israil, minzi netta tuɣa imḥeḍ [aṭṭas] di řwesṭ nsen di ṭṭweɛ n tusmi inu [iqeddsen], ařami Necc war [hdijeɣ ɛad] ad teḥḥiɣ ayt n Israil di [řweqt n] tusmi inu [iqeddsen].
NUM 25:12 S uya ini: ‘Xẓar, Necc ad as wceɣ Řɛahd inu n řehna.
NUM 25:13 I netta u i zzariɛet nnes awarni as ad ɣarsen yiři Řɛahd n tukehhant i řebda, minzi netta tuɣa imḥeḍ di ṭṭweɛ n AREBBI nnes uca igga aṣřaḥ di ṭṭweɛ n ayt n Israil.’”
NUM 25:14 Isem n weryaz n Israil nni inɣa Fineḥas, i tuɣa ittwaneɣ [jmiɛ] ak-d temɣart Tamidyanect, [tuɣa-t] d Zimri, mmis n Salu, ijj n řḥakem x taddart n babatsen, x Icimɛuniyyen.
NUM 25:15 Isem n temɣart Tamidyanict i tuɣa ittwanɣen [tuɣa-tt] Kuzbi, yeǧis n Ṣur, wenni d ijj n uzeǧif x tqebbařt n taddart n ijj n tbabat n Imidyaniyyen.
NUM 25:16 Issiweř SIDI ak-d Musa, inna:
NUM 25:17 “Ḥṣarem x Imidyaniyyen uca ɣellbem xasen,
NUM 25:18 minzi nitni ḥṣaren kenniw s teḥraymect nsen s minzi kenniw zeřɣen zi jjihet n Faɣur d Kuzbi, yeǧis n řḥakem n Midyan, učmatsen, tenni ittwanɣen deg wass n jjriḥect di ssibbet n Faɣur.”
NUM 25:19 Uca awarni i jjriḥect imsar [min dd-igguren.]
NUM 26:1 Issiweř SIDI ak-d Musa d Aliɛazar, mmis n Harun, akehhan, inna:
NUM 26:2 “Ḥesbem marra tamesmunt n ayt n Israil, azeǧif [azeǧif], zi ɛicřin n iseggʷusa sennej, [am ttwasettfen nitni] ɛlaḥsab taddart n ibabaten nsen, marra wenni dd-itteffɣen di Israil ak-d řɛeskar.”
NUM 26:3 Musa d Aliɛazar, akehhan, ssiwřen akidsen di řewḍat n Mu’ab, ɣar L’Urdun [arendad n] Ariḥa uca nnan:
NUM 26:4 “Zi ɛicřin n iseggʷusa sennej!” am mammec [t] yumur SIDI i Musa. [Ina d] ayt n Israil nni tuɣa dd-iffɣen zi temmurt n Miṣra:
NUM 26:5 Rubin tuɣa d amenzu n Israil. Aqa ina d iḥenjiren n Rubin: [zi] Ḥanuk řaǧ n Iḥanukiyyen, zi Fallu řaǧ n Ifalluwiyyen,
NUM 26:6 zi Ḥaṣrun řaǧ n Iḥaṣruniyyen, zi Karmi řaǧ n Ikarmiyyen.
NUM 26:7 Tina [tuɣa] d řaǧat n Irubiniyyen uca inni zzaysen ittwaḥesben tuɣa aten di třata u-rebɛin-ařef u-sebɛa-mya u-třatin [n yeryazen].
NUM 26:8 Tarwa n Fallu [tuɣa aten]: [mɣir] Iliyab.
NUM 26:9 [Tuɣa] arraw n Iliyab: Nimuyil, Datan d Abiram. Ina, Datan d Abiram, tuɣa aten d imřaɣan n tmesmunt inni iɣewwɣen ḍidd i Musa d Harun, [jmiɛ] ak-d ubarru n Quraḥ, umi ɣewwɣen ḍidd i SIDI.
NUM 26:10 Tammurt tarzem aqemmum nnes uca tsarḍ i-ten, [jmiɛ] ak-d Quraḥ, řami immut ubarru nni umi timessi tecca mitayen u-xemsin n yeryazen. Dewřen nitni d ijj n weɛřam [issiggwiden].
NUM 26:11 Maca iḥenjiren n Quraḥ war mmuten ca.
NUM 26:12 Ina tuɣa d iḥenjiren n Cimɛun ɛlaḥsab řaǧat nsen: [zi] Nimuyil [iqqarṣ] řaǧ n Inimuyiliyyen, zi Yamin řaǧ n Iyaminiyyen, zi Yakin řaǧ n Iyakiniyyen,
NUM 26:13 zi Zaraḥ řaǧ n Izaraḥiyyen, zi Cawul řaǧ n Icawuliyyen.
NUM 26:14 Tina [tuɣa] d řaǧat n Icimɛuniyyen: tnayen u-ɛicrin-ařef u-mitayn [n yeryazen].
NUM 26:15 Ina tuɣa d iḥenjiren n Jad ɛlaḥsab řaǧat nsen: [zi] Ṣifun [iqqarṣ] řaǧ n Iṣifuniyyen, zi Ḥajji řaǧ n Iḥajjiwiyyen, zi Cuni řaǧ n Icuniyyen,
NUM 26:16 zi Uzni řaǧ n Iyuzniyyen, zi Ɛiri řaǧ n Iɛiriyyen,
NUM 26:17 zi Arud řaǧ n Irudiyyen, zi Ariyili řaǧ n Iriyiliyyen.
NUM 26:18 Tina [tuɣa atent d] řaǧat n Jad uca inni zzaysen ittwaḥesben tuɣa aten di arebɛin-ařef u-xemsa-mya.
NUM 26:19 Ayt n Yahuda [tuɣa aten d] Ɛir d Unan. [Maca] mmuten Ɛir d Unan di temmurt n Kenɛan.
NUM 26:20 Ina tuɣa aten d iḥenjiren n Yahuda ɛlaḥsab řaǧat nsen: [zi] Cayla [iqqarṣ] řaǧ n Icilayyen, zi Fariṣ řaǧ n Ifaraṣiyyen, zi Zaraḥ řaǧ n Izaraḥiyyen.
NUM 26:21 Ina tuɣa aten d iḥenjiren n Fariṣ: [zi] Ḥaṣrun [iqqarṣ] řaǧ n Iḥaṣruniyyen, zi Ḥamul řaǧ n Iḥamuliyyen.
NUM 26:22 Tina [tuɣa atent d] řaǧat n Yahuda uca inni zzaysen ittwaḥesben tuɣa aten di setta u-sebɛin-ařef u-xemsa-mya [n yeryazen].
NUM 26:23 Ina tuɣa aten d iḥenjiren n Issakar ɛlaḥsab řaǧat nsen: [zi] Tulaɛ [iqqarṣ] řaǧ n Itulaɛiyyen, zi Puwa řaǧ n Ipuwaniyyen,
NUM 26:24 zi Yacub řaǧ n Iyacubiyyen, zi Cimrun řaǧ n Icimruniyyen.
NUM 26:25 Tina [tuɣa atent d] řaǧat n Issakar uca inni zzaysen ittwaḥesben tuɣa aten di arebɛa u-settin-ařef u-teřt-mya [n yeryazen].
NUM 26:26 Ina tuɣa aten d iḥenjiren n Zabulun ɛlaḥsab řaǧat nsen: [zi] Sarid [iqqarṣ] řaǧ n Isaridiyyen, zi Ilun řaǧ n Iluniyyen, zi Yaḥliyil řaǧ n Iyaḥliyiliyyen.
NUM 26:27 Tina [tuɣa atent d] řaǧat n Izabuluniyyen uca inni zzaysen ittwaḥesben tuɣa aten di settin-ařef u-xemsa-mya [n yeryazen].
NUM 26:28 Ina tuɣa aten d iḥenjiren n Yusuf ɛlaḥsab řaǧat nsen: Manassa d Ifrayim.
NUM 26:29 Ina tuɣa aten d iḥenjiren n Manassa: [zi] Makir [iqqarṣ] řaǧ n Imakiriyyen. Makir yejj-dd Jilɛad. Zi Jilɛad [iqqarṣ] řaǧ n Ijilɛadiyyen.
NUM 26:30 Ina tuɣa aten d iḥenjiren n Jilɛad: [zi] Iɛazar [iqqarṣ] řaǧ n Iɛazariyyen, zi Ḥalaq řaǧ n Iḥalaqiyyen,
NUM 26:31 zi Asriyil řaǧ n Isriyiliyyen, zi Cakam řaǧ n Icakamiyyen,
NUM 26:32 zi Cimidaɛ řaǧ n Icimdaɛiyyen, zi Ḥafar řaǧ n Iḥafariyyen.
NUM 26:33 Ṣalufḥad, mmis n Ḥafar, war tuɣi ɣares ca iḥenjiren, mɣir tiḥenjirin. [Ina tuɣa aten] d ismawen n yessis n Ṣalufḥad: Maḥla, Nuɛa, Ḥujla, Milka d Tirṣa.
NUM 26:34 Tina [tuɣa atent d] řaǧat n Manassa uca inni zzaysen ittwaḥesben tuɣa aten di tnayen u-xemsin-ařef u-sebɛa-mya [n yeryazen].
NUM 26:35 Ina tuɣa aten d iḥenjiren n Ifrayim, ɛlaḥsab řaǧat nsen: [zi] Cutalaḥ [iqqarṣ] řaǧ n Icutalaḥiyyen, zi Bakar řaǧ n Ibakariyyen, zi Taḥan řaǧ n Itaḥaniyyen.
NUM 26:36 Ina [tuɣa aten d] iḥenjiren n Cutalaḥ: zi Ɛiran řaǧ n Iɛiraniyyen.
NUM 26:37 Tina [tuɣa atent d] řaǧat n warrawen n Ifrayim uca inni zzaysen ittwaḥesben tuɣa aten di tnayen u-třatin-ařef u-xemsa-mya [n yeryazen]. Ina tuɣa aten d arrawen n Yusuf, [ttwasettfen] ɛlaḥsab řaǧat nsen.
NUM 26:38 Ina tuɣa aten d iḥenjiren n Binyamin ɛlaḥsab řaǧat nsen: [zi] Bilaɛ [iqqarṣ] řaǧ n Ibilaɛiyyen, zi Acbil řaǧ n Icbiliyyen, zi Aḥiram řaǧ n Iḥiramiyyen,
NUM 26:39 zi Cafufam řaǧ n Icafufamiyyen, zi Ḥufam řaǧ n Iḥufamiyyen.
NUM 26:40 Ina tuɣa aten d iḥenjiren n Balaɛ: Ard d Nuɛman. [Zi] Ard [iqqarṣ] řaǧ n Irdiyyen, zi Nuɛman řaǧ n Inuɛmaniyyen.
NUM 26:41 Ina [tuɣa aten d] iḥenjiren n Binyamin, ɛlaḥsab řaǧat nsen uca inni zzaysen ittwaḥesben tuɣa aten di xemsa u-rebɛin-ařef u-setta-mya [n yeryazen].
NUM 26:42 Ina tuɣa aten d iḥenjiren n Dan ɛlaḥsab řaǧat nsen: [zi] Cuḥam [iqqarṣ] řaǧ n Icuḥamiyyen. Tina [tuɣa] d řaǧat n Dan, [ttwasettfent] ɛlaḥsab řaǧat nsen.
NUM 26:43 Marra řaǧat n Icuḥamiyyen, aqa inni zzaysen ittwaḥesben tuɣa aten di arebɛa u-settin-ařef u-arebɛa-mya [n yeryazen].
NUM 26:44 Ina tuɣa aten d iḥenjiren n Acir ɛlaḥsab řaǧat nsen: [zi] Yimna [iqqarṣ] řaǧ n Iyimniyyen, zi Yicwi řaǧ n Iyicwiyyen, zi Beriɛa řaǧ n Ibariɛiyyen.
NUM 26:45 Ina tuɣa aten d iḥenjiren n Beriɛa: [zi] Ḥabir [iqqarṣ] řaǧ n Iḥabiriyyen, zi Malkiyil řaǧ n Imalkiyiliyyen.
NUM 26:46 Isem n yeǧis n Acir tuɣa-tt d Saraḥ.
NUM 26:47 Ina [tuɣa aten] d iḥenjiren n Acir uca inni zzaysen ittwaḥesben tuɣa aten di třata u-xemsin-ařef u-arebɛa-mya [n yeryazen].
NUM 26:48 Ina tuɣa aten d iḥenjiren n Naftali ɛlaḥsab řaǧat nsen: [zi] Yaḥasyil [iqqarṣ] řaǧ n Iyaḥasliyyen, zi Juni řaǧ n Ijuniyyen,
NUM 26:49 zi Yaṣir řaǧ n Iyaṣiriyyen, zi Cillim řaǧ n Icillimiyyen.
NUM 26:50 Tina [tuɣa atent] d řaǧat n Naftali, ɛlaḥsab řaǧat nsen uca inni zzaysen ittwaḥesben tuɣa aten di xemsa u-rebɛin ařaf u-arebɛa-mya [n yeryazen].
NUM 26:51 Ina d inni ittwaḥesben zeg ayt n Israil: setta-mya u-waḥit-ařef u-sebɛa-mya u-třatin n yeryazen.
NUM 26:52 Issiweř SIDI ak-d Musa, inna:
NUM 26:53 “Jar ina ad tᵉttwabḍa temmurt d řwart, ɛlaḥsab řqedd n ismawen [nsen].
NUM 26:54 I wenni umi ɣar iǧa aṭṭas [n iwdan], ad tewced ktar d řwart uca i wenni umi ɣar iǧa drus [n iwdan], ad tewced qell d řwart. Kuř ijjen ɛlaḥsab inni ittwaḥesben ad as temmewc tasɣart nnes.
NUM 26:55 Tammurt ad tᵉttwabḍa s tqedduḥt. Nitni ad warten ɛlaḥsab ismawen n tqebbař n řejdud nsen.
NUM 26:56 Ad tᵉttwabḍa tesɣart n kuř ijj s tqedduḥt jar [inni iǧan s] waṭṭas d [inni iǧan] drus.”
NUM 26:57 Ina tuɣa aten d inni ittwaḥesben zi Lawi ɛlaḥsab řaǧat nsen: zi Jarcun řaǧ n Ijarcuniyyen, zi Qahat řaǧ n Iqahatiyyen, zi Marari řaǧ n Imarariyyen.
NUM 26:58 [Tuɣa] tina d řaǧat n Ilawiyyen: řaǧ n Ilibniyyen, řaǧ n Iḥibruniyyen, řaǧ n Imahliyyen, řaǧ n Imuciyyen, řaǧ n Iquraḥiyyen. Uca Qahat yejj-dd Ɛamram.
NUM 26:59 Tamɣart n Ɛamram qqarent as Jukabad, yeǧis n Lawi, tenni dd-ittwarwen i Lawi di Miṣra. D nettat turuw-dd Harun d Musa d Maryam, učmatsen, i Ɛamram.
NUM 26:60 I Harun ttwarwen as-dd Nadab d Abihu, Aliɛazar d Itamar.
NUM 26:61 Maca Nadab d Abihu mmuten, umi dd-iwyen timessi taɣribt zzat i wudem n SIDI.
NUM 26:62 Inni zzaysen ittwaḥesben, zeg Ilawiyyen, marra iwetman n ijj n uyur sennej, tuɣa aten di třata u-ɛicrin-ařef. Ina maca war ttwaḥesben ca ak-d ayt n Israil, minzi war d asen temmewc tesɣart d řwart jar ayt n Israil.
NUM 26:63 Ina [tuɣa aten d] inni ittwaḥesben s [ufus n] Musa d Aliɛazar, akehhan. Nitni ḥesben ayt n Israil di řewḍat n Mu’ab, ɣar L’Urdun arendad n Ariḥa.
NUM 26:64 War tuɣi jar asen uřa d ijj zeg inni ittwaḥesben n Musa d Harun, akehhan, umi ḥesben nitni ayt n Israil di řexřa n Sina.
NUM 26:65 minzi xasen tuɣa inna SIDI ad mmten s tidett di řexřa. War zzaysen iqqim uřa d ijj, mɣir Kalib, mmis n Yafunni, d Yacuwa, mmis n Nun.
NUM 27:1 [Xenni] usint-i-dd yessis n Ṣalufḥad, mmis n Ḥafar, mmis n Jilɛad, mmis n Makir, mmis n Manassa, [inni iǧan] n řaǧat n Manassa, mmis n Yusuf. Ina d ismawen n yessis: Maḥla, Nuɛa, Ḥujla, Milka d Tirṣa.
NUM 27:2 Tuɣa beddent zzat i wudem n Musa u zzat i wudem n Aliɛazar, akehhan, u zzat i wudem n řḥukkam u zzat i wudem n marra tamesmunt ɣar wadaf n Uqiḍun n Umsagar, nnant:
NUM 27:3 “Babatneɣ immut di řexřa u war t tuɣi jar ubarru n yinni imunen ḍidd i SIDI, deg ubarru n Quraḥ [war din t tuɣi netta], minzi immut di ddnub nnes u war ɣares tuɣi iḥenjiren.
NUM 27:4 Mayemmi ɣa ikkes isem n babatneɣ zi jar řaǧ nnes, ma minzi war ɣares tuɣi bu uḥenjir? Ewc aneɣ agřa di řwesṭ n aytmas n babatneɣ.”
NUM 27:5 Musa yiwi ddeɛwa nsent zzat i wudem n SIDI.
NUM 27:6 Issiweř SIDI ak-d Musa, inna:
NUM 27:7 “[Aqa aya] am mammec t nnant yessis n Ṣalufḥad. Ittxeṣṣa ad asent tewced tasɣart n řwart di  řwest n aytmas n babatsen uca ad xasent tesseɛdud řwart n babatsent.
NUM 27:8 Uca ad tessiwřed ak-d ayt n Israil, ad tinid: ‘Mařa ca n yijjen immut břa mmis, [xenni] ad tesseɛdum řwart nnes ɣar yeǧis,
NUM 27:9 u mařa war ɣares yeǧis, ad tewcem řwart nnes i yaytmas.
NUM 27:10 Mařa war ɣares aytmas [ɛawed], ad tewcem řwart nnes i yaytmas n babas.
NUM 27:11 Mařa babas war ɣares aytmas [ɛawed], ad tewcem řwart nnes i raǧ nnes, [i] wenni [i d as dd-]yudsen zi řaǧ nnes, ḥima ad tt iwart netta.’ Man aya ad tiři d ict n tewṣeyyet n uzerf i řebda i ayt n Israil, am mammec [t] yumur SIDI i Musa.”
NUM 27:12 [Xenni] inna SIDI i Musa: “Geɛɛed-dd adrar-a Abarim uca xzar tammurt nni wciɣ i ayt n Israil.
NUM 27:13 Xmi tt ɣa tẓared, ad tᵉmmarnid ɣar řgens nnec, uřa d cek, am mammec uřa d umac Harun immarni ɣar řgens nnes,
NUM 27:14 minzi kenniw tɣewwɣem zzat i tiṭṭawin nsen ḍidd i řumur inu maḥend ad ayi tessqeddsem di řexřa n Ṣin, řami din [tuɣa] amcubbec di tmesmunt. Aqa d ina d aman n Mariba, ɣar Qadac di řexřa n Ṣin.”
NUM 27:15 Issiweř Musa ak-d SIDI, inna:
NUM 27:16 “Ad igg SIDI, AREBBI n buḥbeřat n marra ddat, aḥeṭṭu x tmesmunt [deg ufus n] ijj n weryaz,
NUM 27:17 [ḥima] netta ad iffeɣ zzat i wudem nsen uca ad yadef zzat i wudem nsen uca ad ten indeh ɣar barra, ad ten issidef ɣar daxeř, maḥend tamesmunt n SIDI war tᵉttiři am wuǧi břa ameksaw.”
NUM 27:18 [Xenni] inna SIDI i Musa: “Ksi Yacuwa, mmis n Nun, ijj n weryaz i di iǧa Arruḥ, uca sars xas afus nnec
NUM 27:19 uca ad t tegged zzat i wudem n ukehhan Aliɛazar u zzat i marra tamesmunt, ad as tewced řumur zzat i tiṭṭawin nsen.
NUM 27:20 Ewc as [ca] zeg uweqqar nnec ḥima ad [as] tseř marra tamesmunt n ayt n Israil.
NUM 27:21 Netta ad ibedd zzat i ukehhan Aliɛazar, wenni i ɣa icawar zzat i wudem n SIDI ɛlaḥsab řeḥkam n Urim. X řumur nnes ad dd-ffɣen ɣar barra u x řumur nnes ad adfen ɣar daxeř, netta d marra ayt n Israil uřa d marra tamesmunt.”
NUM 27:22 Uca Musa igga am mammec d as yumur SIDI. Yiwi Yacuwa uca issbedd i-t zzat i ukehhan Aliɛazar u zzat i wudem n marra tamesmunt.
NUM 27:23 Issars xas ifassen nnes uca isseɛdu as řumur am mammec d as inna SIDI s tsexxart n Musa.
NUM 28:1 Issiweř SIDI ak-d Musa, inna:
NUM 28:2 “Umur ayt n Israil, ini asen: ‘Ittxeṣṣa kenniw ad teḥḍam x tɣarṣṭ inu, macca inu i tewhibin inu n tmessi, ict n řefwaḥet ittfuḥen i Necc, maḥend ad ayi tent tqeddmem di řweqt nnes ittwaggen.’
NUM 28:3 Ad asen tinid: ‘Aqa ta d tawhibt n tmessi i ittxeṣṣan ad tqeddmem: tnayen n izmaren icnan n ijj n useggʷas, [am] tɣarṣt n wecmaḍ řebda.
NUM 28:4 Ijj n izmar ad t tesswejded di ṣṣbeḥ uca izmar nneɣni ad t tesswejded jar beddu n wezyen n wass ař dd-tewḍa tmeddit
NUM 28:5 uca [ak-d man aya] am tewhibt [n řɣiǧet] ict n teɛcart [n yijj n ifa] n waren azdad ixeǧḍen s yijj n arbeɛ n ijj n uhinu n zzect, ttwaddzen t-i-dd [zi zzitun].
NUM 28:6 Aqa-tt d taɣarṣṭ n wecmaḍ n řebda, tenni tuɣa ittwaggen deg wedrar n Sina am yict n řefwaḥet ittfuḥen, [aqa-tt] d ict n tewhibt n tmessi i SIDI.
NUM 28:7 Tawhibt nnes n useyyeb ad tiři d ijj n arbeɛ n ijj n uhinu i yijj n izmar. Seyyeb tawhibt n useyyeb n ccrab di Zzawect Iqeddsen zzat i SIDI.
NUM 28:8 Ad tesswejded izmar nneɣni jar beddu n wezyen n wass ař dd-tewḍa tmeddit. Ad t tesswejded am mammec [tesswejded] tawhibt [n řɣiǧet] di ṣṣbeḥ u am mammec [tesswejded] tawhibt n useyyeb nnes, [am] ict n tewhibt n tmessi, ict n řefwaḥet ittfuḥen i SIDI.’”
NUM 28:9 “Deg wass n ssebt [ad tesswejded] tnayen n izmaren icnan n ijj n useggʷas d tnayen n teɛcurin [n yijj n ifa] n waren azdad am tewhibt [n řɣiǧet] ixeǧḍen s zzect ak-d tewhibt nnes n useyyeb.
NUM 28:10 Aqa-tt d taɣarṣṭ n wecmaḍ n ssebt i mkuř ssebt, ad tt tarnid i tɣarṣt n wecmaḍ n řebda d tewhibt nnes n useyyeb.”
NUM 28:11 “Deg umezwar n [kuř ijj n] iyuren nwem ittxeṣṣa ad tqeddmem ict n tɣarṣt n wecmaḍ i SIDI: tnayen n ifunasen - imeẓyanen n ict n tfunast - ijj n icarri, sebɛa n izmaren icnan qaɛ n ijj n useggʷas
NUM 28:12 uca [ak-d man aya] třata n teɛcurin n [ijj n ifa n] waren azdad [am] tewhibt [n řɣiǧet] ixeǧḍen s zzect i yijj n ufunas ameẓyan u tnayen n teɛcurin n [yijj n ifa n] waren azdad [am] tewhibt [n řɣiǧet] ixeǧḍen s zzect i yijj n icarri
NUM 28:13 [uca arni] ict n teɛcart n [yijj n ifa] n waren azdad [am] tewhibt [n řɣiǧet] ixeǧḍen s zzect i yijj n izmar. [Aqa-tt] d taɣarṣt n wecmaḍ s ict n řefwaḥet ittfuḥen, [aqa-tt] d ict n tewhibt n tmessi i SIDI.
NUM 28:14 Tiwhibin nsen n useyyeb ad iřint d azyen n uhinu n binu ak-d ufunas ameẓyan d ict n ttuřut n ijj n uhinu ak-d icarri d yijj n arbeɛ n ijj n uhinu ak-d izmar. Ta d taɣarṣt n wecmaḍ n kuř ayur, i kuř ayur zeg iyuren n useggʷas.
NUM 28:15 Ittxeṣṣa ad tesswejded ijj n umyan zeg iɣayḍen d taɣarṣt n ddenb i SIDI, ad tt tarnid i tɣarṣt n wecmaḍ n řebda ak-d tewhibt nnes n useyyeb.”
NUM 28:16 Deg uyur amezwaru, deg wass wiss arbeɛṭac n uyur, ad tiři [Tɣarṣt n] Useɛdu n SIDI.
NUM 28:17 Deg wass wiss xemmesṭac n simant n uyur [ad yiři] Řɛid. Sebɛa n wussan ad ccen aɣrum břa antun.
NUM 28:18 Deg wass amezwaru [n Řɛid] ad yiři yijj n umuni iqeddsen. War tteggem uřa d ict řxedmet i ittxeṣṣan ad tᵉttwagg.
NUM 28:19 Ad tqeddmem ict n tewhibt n tmessi [am] tɣarṣt n wecmaḍ i SIDI: tnayen n ifunasen imeẓyanen d ijj n icarri d sebɛa n izmaren n ijj n useggʷas. Ittxeṣṣa ad iřin cnan qaɛ.
NUM 28:20 [Ad tiři] tewhibt [n řɣiǧet] n waren azdad ixeǧḍen s zzect. Ad [zzayes] tesswejdem třata n teɛcurin [n yijj n ifa] i yijj n ufunas ameẓyan d tnayen n teɛcurin [n yijj n ifa] i yijj n icarri.
NUM 28:21 Ad tesswejded ict n teɛcart [n yijj n ifa] i yijj n izmar, [uca ammu] i [marra] sebɛa n izmaren [nni].
NUM 28:22 [Sewjed ɛawed] ijj n umyan zeg iɣayḍen d taɣarṣt n ddenb maḥend ad ittwagg weṣřaḥ i kenniw.
NUM 28:23 Ad tesswejdem man aya sennej i [usewjed n] tɣarṣt wecmaḍ di ṣṣbeḥ nni [iǧan] d ict n tɣarṣt n wecmaḍ i řebda.
NUM 28:24 Am mammec uya ad tesswejdem macca n tewhibin n tmessi sebɛa n wussan, di kuř ass [zzaysen], [am] ict n řefwaḥet ittfuḥen i SIDI. Ad ittwassewjed sennej i [usewjed n] tɣarṣt n wecmaḍ n řebda ak-d tewhibt nnes n useyyeb.
NUM 28:25 Deg wass wiss sebɛa ad teggem ijj n umuni iqeddsen. War tteggem uřa d ict řxedmet i ittxeṣṣan ad tᵉttwagg.”
NUM 28:26 “Deg wass n tmenzut [n ṣṣabet] di Řɛid n Ssimanat, xmi dd ɣa tqeddmem ict n tewhibt [n řɣiǧet] n jdid ɣar SIDI, ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg.
NUM 28:27 Ad tqeddmem ict n tɣarṣt n wecmaḍ am yict n řefwaḥet ittfuḥen i SIDI: tnayen n ifunasen imeẓyanen i yijj n icarri d sebɛa n izmaren n ijj n useggʷas
NUM 28:28 ak-d tewhibt nnes [n řɣiǧet] n waren azdad ixeǧḍen s zzect: třata n teɛcurin [n yijj n ifa] i yijj n ufunas ameẓyan d tnayen n teɛcurin [n yijj n ifa] i yijj n icarri
NUM 28:29 uřa d ict n teɛcart [n yijj n ifa] i kuř izmar, [uca ammu] i [marra] sebɛa n izmaren [nni].
NUM 28:30 [Swejdem ɛawed] ijj n umyan zeg iɣayḍen am tɣarṣt n ddenb maḥend ad ittwagg weṣřaḥ i kenniw.
NUM 28:31 Ad ten tesswejdem sennej i [usewjed n] tɣarṣt n wecmaḍ n řebda d tewhibt nnes [n řɣiǧet]. Ad iřin cnan qaɛ i kenniw ak-d tewhibin nsen n useyyeb.”
NUM 29:1 “Deg uyur wiss sebɛa, deg [wass] amezwaru n uyur, ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. Ad awem yiři d ijj n wass n usuḍi s wesruddeḥ [deg uyicc n icarri].
NUM 29:2 Ad tesswejdem ict n tɣarṣt n wecmaḍ am yict n řefwaḥet ittfuḥen i SIDI: ijj n ufunas - ameẓyan n ict n tfunast - d yijj n icarri d sebɛa n izmaren icnan qaɛ n ijj n useggʷas
NUM 29:3 ak-d tewhibt nsen [n řɣiǧet] zeg waren azdad ixeǧḍen s zzect: třata n teɛcurin [n yijj n ifa] i ufunas ameẓyan d tnayen n teɛcurin [n yijj n ifa] i icarri
NUM 29:4 ak-d ict n teɛcart [n yijj n ifa] i kuř izmar, [uca ammu] i sebɛa n izmaren [marra].
NUM 29:5 [Swejdem ɛawed] ijj n umyan zeg iɣayḍen am tɣarṣt n ddenb maḥend ad ittwagg weṣřaḥ i kenniw.
NUM 29:6 sennej i [usewjed n] tɣarṣt n wecmaḍ ak-d tewhibt nnes [n řɣiǧet] d [sennej i usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibin nsen n useyyeb, ɛlaḥsab lfariḍa nsent, am yict n řefwaḥet ittfuḥen, ict n tɣarṣt n tmessi i SIDI.
NUM 29:7 Deg [wass] wiss ɛecra ad teggem ijj n umuni iqeddsen uca ad tesswaḍɛem ixef nwem. War tteggem uřa d ict n řxedmet i ittxeṣṣan ad tᵉttwagg.
NUM 29:8 Ad tqeddmem ict n tɣarṣt n wecmaḍ am yict n řefwaḥet ittfuḥen i SIDI: ijj n ufunas ameẓyan d yijj n icarri d sebɛa n izmaren icnan qaɛ n ijj n useggʷas. Ittxeṣṣa ad awem iřin cnan [aṭṭas].
NUM 29:9 [Ɛawed] tawhibt nsen [n řɣiǧet] n waren azdad ixeǧḍen s zzect: třata n teɛcurin [n yijj n ifa] i yijj n ufunas ameẓyan, tnayen n teɛcurin [n yijj n ifa] i yijj n icarri
NUM 29:10 u ict n teɛcart [n yijj n ifa] i kuř izmar, [uca ammu] i sebɛa n izmaren [marra].
NUM 29:11 [Swejdem ɛawed] ijj n umyan zeg iɣayḍen am tɣarṣt n ddenb, sennej i [usewjed n] tɣarṣt n ddenb i zi tᵉttwagg weṣřaḥ uca uřa d taɣarṣt n wecmaḍ n řebda ak-d tewhibt nnes [n řɣiǧet] d tewhibin nsen n useyyeb.
NUM 29:12 Deg wass wiss xemmesṭac n uyur wiss sebɛa ad teggem ijj n umuni iqeddsen. War tteggem uřa d ict n řxedmet i ittxeṣṣan ad tᵉttwagg. Sebɛa n wussan ad tɛeyydem řɛid i SIDI.
NUM 29:13 Ad tqeddmem ict n tɣarṣt n wecmaḍ [am] tewhibt n tmessi, [am] ict n řefwaḥet ittfuḥen i SIDI: třeṭṭac n ifunasen - imeẓyanen n ict n tfunast - tnayen n icarriyyen [u] arbeɛṭac n izmaren n ijj n useggʷas. Ittxeṣṣa ad iřin cnan [qaɛ].
NUM 29:14 [Ɛawed] tawhibt nsen [n řɣiǧet] n waren azdad ixeǧḍen s zzect: třata n teɛcurin [n yijj n ifa] i yijj n ufunas ameẓyan, i [marra] třeṭṭac n ifunasen imeẓyanen, u tnayen n teɛcurin [n yijj n ifa] i yijj n ucarri, i tnayen n icarriyyen [nni]
NUM 29:15 uřa d ict n teɛcart [n yijj n ifa] i kuř izmar, [uca ammu] i [marra] arbeɛṭac n izmaren [nni].
NUM 29:16 [Swejdem ɛawed] ijj n ijj n umyan zeg iɣayḍen am tɣarṣt n ddenb, sennej i [usewjed n] tɣarṣt n wecmaḍ n řebda [ak-d] tewhibt nnes [n řɣiǧet] d tewhibt nnes n useyyeb.
NUM 29:17 Deg wass wiss tnayen: tenɛac n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
NUM 29:18 ak-d tewhibt nsen [n řɣiǧet] d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
NUM 29:19 [Swejdem ɛawed] ijj n umyan zeg iɣayḍen am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibin nsen n useyyeb.
NUM 29:20 Deg wass wiss třata: ḥiṭac n ifunasen imeẓyanen d tnayen n icarriyyen d arbeɛṭac n izmaren n ijj n useggʷas, ican [qaɛ],
NUM 29:21 ak-d tewhibt nsen [n řɣiǧet] d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
NUM 29:22 [Swejdem ɛawed] ijj n umyan zeg iɣayḍen am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibt nnes n useyyeb.
NUM 29:23 Deg wass wiss arebɛa: ɛecra n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
NUM 29:24 ak-d tewhibt nsen [n řɣiǧet] d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
NUM 29:25 [Swejdem ɛawed] ijj n umyan zeg iɣayḍen am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibt nnes n useyyeb.
NUM 29:26 Deg wass wiss xemsa: tesɛa n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
NUM 29:27 ak-d tewhibt nsen [n řɣiǧet] d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
NUM 29:28 [Swejdem ɛawed] ijj n umyan [zeg iɣayḍen] am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibt nnes n useyyeb.
NUM 29:29 Deg wass wiss setta: tmenya n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
NUM 29:30 ak-d tewhibt nsen [n řɣiǧet] d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
NUM 29:31 [Swejdem ɛawed] ijj n umyan [zeg iɣayḍen] am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibin nnes n useyyeb.
NUM 29:32 Deg wass wiss sebɛa: sebɛa n ifunasen imeẓyanen d tnayen n icarriyyen d arbeɛṭac n izmaren icnan n ijj n useggʷas,
NUM 29:33 ak-d tewhibt nsen [n řɣiǧet] d tewhibin nsen n useyyeb i ifunasen imeẓyanen, i icarriyyen u i izmaren, ɛlaḥsab řqedd nsen, ɛlaḥsab lfariḍa.
NUM 29:34 [Swejdem ɛawed] ijj n umyan [zeg iɣayḍen] am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibt nnes n useyyeb.
NUM 29:35 Deg wass wiss tmenya ad teggem ijj n umuni ifarzen. War tteggem uřa d ict řxedmet i ittxeṣṣan ad tᵉttwagg.
NUM 29:36 Ad tqeddmem ict n tɣarṣt n wecmaḍ [am] tewhibt n tmessi, [am] ict n řefwaḥet ittfuḥen i SIDI: ijj n ufunas ameẓyan d yijj n icarri d sebɛa n izmaren icnan n ijj n useggʷas
NUM 29:37 ak-d tewhibt nsen [n řɣiǧet] d tewhibin nsen n useyyeb i ufunas ameẓyan, i icarri u i izmaren, ɛlaḥsab řqedd nsen, ɛlaḥsab lfariḍa.
NUM 29:38 [Swejdem ɛawed] ijj n umyan [zeg iɣayḍen] am tɣarṣt n ddenb, sennej i [usewjed n] tɣarṣt n wecmaḍ n řebda ak-d tewhibt nnes [n řɣiǧet] d tewhibt nnes n useyyeb.
NUM 29:39 Ad teggem timesřayin-a i SIDI di řeɛyudat nwem ittwaggen sennej i tewhibin n řewɛud nwem d tewhibin nwem s řxaḍar i ittraḥen ak-d tɣarṣa n wecmaḍ nwem d tewhibin nwem [n řɣiǧet] d tewhibin nwem n useyyeb d tewhibin nwem n řehna.”
NUM 30:1 Uca issiweř Musa ak-d ayt n Israil ɛlaḥsab marra min yumur SIDI i Musa.
NUM 30:2 Issiweř Musa ak-d izeǧifen n tqebbař n ayt n Israil, inna: “Aqa d ta min xef yumur SIDI:
NUM 30:3 ‘Xmi ɣa tafed ijj n weryaz iwca awař niɣ ijjuǧ ict n tjaǧit ḥima ad iqqen ixef nnes s yijj n řɛahd, [xenni] war ittareẓẓi awař nnes. Ittxeṣṣa as ad igg ɛlaḥsab min dd-iffɣen zeg uqemmum nnes.
NUM 30:4 Xmi ɣa tafed ict n temɣart tewca awař nnes i SIDI uca ad teqqen ixef nnes s yijj n řɛahd di temẓi nnes di taddart n babas,
NUM 30:5 uca babas isřa i wawař n lwaɛd nnes d řɛahd nnes i zi teqqen ixef nnes, uca babas isqar zzates, [xenni] marra lwuɛud nnes ad iřin ṣeřḥen d kuř aqqan nnes ad yiři iṣřeḥ.
NUM 30:6 [Maca] mařa babas issbedd i-tt [zi man aya] deg wass nni di isřa aya, [xenni] uřa d ijj zi lwuɛud nnes u uřa d ijj zeg waqqan nnes i zi teqqen ixef nnes, war iṣeǧeḥ ca. SIDI ad as iɣfar, minzi babas issbedd i-tt [x man aya].
NUM 30:7 Mařa tuɣa-tt temřec ak-d yijj n weryaz uca xas lwuɛud niɣ nettat tuɣa teqqen ixef nnes s yijj n wawař iffeɣ-dd s tcarfayeḥ zeg iyencicen nnes,
NUM 30:8 uca aryaz nnes isřa as uca isqar zzates deg wass i di isřa [aya], [xenni] ad seřḥen lwuɛud nnes d kuř aqqan nnes ad yiři iṣřeḥ.
NUM 30:9 [Maca] mařa aryaz nnes deg wass nni di isřa [aya], inhar i-tt, [xenni] netta issebḍeř lwaɛd nni xas uřa d awař s tcarfayeḥ zeg iyencicen nnes i zi tuɣa teqqen ixef nnes uca AREBBI ad as iɣfar [aya].’”
NUM 30:10 “X lwaɛd n tajjač niɣ n tenni ittwaǧfen: marra min zi tuɣa teqqen ixef nnes, ad yiři iṣeǧeḥ.
NUM 30:11 Mařa tuɣa tewca awař niɣ teqqen ixef nnes s ict n tjaǧit i yijj n řɛahd di taddart n weryaz nnes,
NUM 30:12 uca aryaz nnes isřa [i uya] uca isqar zzates uca war tt issbedd x man aya, [xenni] ad ṣeřḥen marra lwuɛud nnes u kuř aqqan nnes i zi tuɣa teqqen ixef nnes ad yiři iṣřeḥ.
NUM 30:13 [Maca] mařa aryaz nnes issebḍeř aya qaɛ deg wass i di isřa, [xenni] war ittiři iṣeǧeḥ ca qaɛ zi min dd-iffɣen zeg iyencicen nnes n lwuɛud niɣ n waqqan. Aryaz nnes issebḍeř aya uca AREBBI ad as iɣfar.
NUM 30:14 Kuř lwaɛd d kuř aqqan s ict n tjaǧit i umi ɣa tesswaḍeɛ ixef nnes, aryaz nnes izemmar ad t issemten niɣ aryaz nnes izemmar ad t issebḍeř.
NUM 30:15 Mařa aryaz nnes isqar qaɛ zeg wass x wass, [xenni] issemten marra lwuɛud nnes niɣ kuř aqqan nnes i xas iǧan. Aqa issemten i-ten minzi isqar zzates deg wass i di [ten] isřa.
NUM 30:16 Mařa netta, awarni řami [d asen] isřa, ad ten issebḍeř, [xenni] ad yarbu netta řmuɛṣiyyet n [temɣart] nnes.”
NUM 30:17 Aqa d tina d tiweṣṣa i zi yumur SIDI i Musa, [i iǧan] jar weryaz d temɣart, jar babas d yessis, [tenni iqqimen] di taddart n babas di temẓi nnes.
NUM 31:1 Issiweř SIDI ak-d Musa, inna:
NUM 31:2 “Ntaqem di ṭṭweɛ n ayt n Israil x Imidyaniyyen. Awarni as ad tᵉmmarnid ɣar řgens nnec.”
NUM 31:3 Issiweř Musa ak-d řgens, inna: “Swejdem zi ɣarwem iryazen i umenɣi ḍidd i Midyan u nitni ad iřin ḍidd i Midyan maḥend ad ssiwḍen nneqmet n SIDI x Midyan.
NUM 31:4 Ittxeṣṣa awem ad tessekkem ařef [n yeryazen] zi kuř taqbič ɣar umenɣi, [zi kuř ict zi] marra tiqebbař n Israil.”
NUM 31:5 [Ammu] i ttwafarzen zi řuřuf n Israil ařef [n yeryazen] zi kuř taqbič, aqa aten [jmiɛ] tenɛac-n-řuřuf [n yerazen] iwejden i umenɣi.
NUM 31:6 Musa issekk i-ten ɣar umenɣi, ařef [n yeryazen] zi kuř taqbič. [Netta issekk] i-ten ɣar umenɣi ak-d Finaḥas, mmis n ukehhan Aliɛazar, u [netta ɣares] řeqcuɛ iqeddsen d řebwaq i usuḍi s wesruddeḥ [i umenɣi] deg ufus nnes
NUM 31:7 uca mmenɣen ḍidd i Imidyaniyyen, am mammec [t] yumur SIDI i Musa uca nɣin marra min iǧan d awtem.
NUM 31:8 Sennej i yinni [zzaysen] ittwassnuqqben, nɣin ɛawed ijeǧiden n Midyan: Iwi, Raqim, Ṣur, Ḥur d Rabaɛ, xemsa n ijeǧiden n Midyan, [uřa] Balɛam, mmis n Baɛur, nɣin t s ssif.
NUM 31:9 Ayt n Israil ḥebbsen timɣarin n Midyan d tarwa nsen, u keccḍen řebhayem nsen d tḥimriwin nsen d marra min ɣarsen.
NUM 31:10 Sscemḍen s tmessi marra tineddam nsen mani tuɣa zeddɣen d marra lqelɛat nsen.
NUM 31:11 Ksin marra min keccḍen, marra takeccaḍt n iwdan d řebhayem
NUM 31:12 uca iwyen-dd imeḥbas d marra takeccaḍt ɣar Musa u ɣar ukehhan Aliɛazar u ɣar tmesmunt n ayt n Israil, di řmargeḥ n řɛeskar, di řewḍat n Mu’ab, ɣar L’Urdun, [arendad n] Ariḥa.
NUM 31:13 Uca iffeɣ-dd Musa ak-d ukehhan Aliɛazar d marra řḥukkam n tmesmunt barra i řmargeḥ n řɛeskar maḥend ad ten mmsagaren.
NUM 31:14 Iffugem Musa aṭṭas x imgewwaden n řɛeskar, x imeqqranen x wařef u x imeqqranen x mya, inni dd-iɛeqben zeg umenɣi.
NUM 31:15 Inna asen Musa: “Ma tejjim marra min iǧan d tawtent iddar?
NUM 31:16 Xzar, s wescan n Balɛam, [timɣarin-a] tuɣa atent d řesbab aqa ayt n Israil ɣdaren SIDI di tmesřact n Faɣur uca tewḍa-dd jjriḥect x tmesmunt n SIDI.
NUM 31:17 Řexxu [xenni], nɣem marra iwetman nni jar iḥenjiren imeẓyanen uca nɣem marra tamɣart nni imunen ak-d ijj n weryaz am tᵉṭṭeṣ nettat ak-d ijj n weryaz.
NUM 31:18 Maca marra tiḥenjirin jar temɣarin nni war imunen ak-d ijj n weryaz am [akides] ṭṭṣent, jjem tent i yixef nwem ad ddarent.
NUM 31:19 Ittxeṣṣa awem ad tewtem iqiḍan nwem barra i řmargeḥ n řɛeskar řmijař n sebɛa n wussan. Kuř ijjen, wenni inɣin ijj n řeɛmar [n bnadem], u kuř ijjen, wenni iḥadan ijjen i ittwassnuqqben, ad yejj ad kksen ddenb x yixef nnes deg wass wiss třata u deg wass wis sebɛa, [ammu] i ɣa teggem kenniw uřa d imeḥbas nwem.
NUM 31:20 Ittxeṣṣa ad tekksem ddenb ɛawed x marra arruḍ d marra řeqcuɛ n iřmawen d marra min ittwaggen s thiḍurt n iɣayḍ d marra řeqcuɛ n ukeccuḍ.”
NUM 31:21 Aliɛazar, akehhan, inna i iɛeskariyyen nni dd-iffɣen ɣar umenɣi: “Ta d tawṣeyyet zi Ccariɛa nni yumur SIDI i Musa:
NUM 31:22 Mɣir ureɣ d nnuqart d nnḥas d uzzař d istanyu d řexfif,
NUM 31:23 marra min izemmaren i tmessi, x tmessi ad t tessekkem, [xenni] ad yiři izdig, [maca] ittxeṣṣa ad zzayes tekksem ddenb s waman n weɛzař. Marra min war izemmaren i tmessi, ad t tessekkem x waman.
NUM 31:24 Deg wass wiss sebɛa ad tṣebbnem arruḍ nwem, [xenni] ad tiřim d imezdagen. Awarni uya tzemmarem ad tadfem ɣar řmargeḥ n řɛeskar.”
NUM 31:25 Issiweř SIDI ak-d Musa, inna:
NUM 31:26 “Ṭṭef řeɛbar n tkeccaḍt n iwdan d řebhayem nni tᵉttwaḥebbes, cek [jmiɛ] ak-d ukehhan Aliɛazar u ak-d izeǧifen n [tudrin n] ibabaten n tmesmunt.
NUM 31:27 Bḍa takeccaḍt x tnayen jar inni icarcen deg umenɣi d yinni iffɣen ak-d řɛeskar [zeg ict n jjihet] d marra tamesmunt [zi jjihet nneɣnit].
NUM 31:28 Sgeɛɛdet ict n ṣṣedqet i SIDI zeg iɛeskariyyen nni dd-iffɣen ɣar umenɣi ak-d řɛeskar: ijj n řeɛmar zi xemsa mya n iwdan uca [amenni] zeg ifunasen d tfunasin u zeg iɣyař u zeg wuǧi.
NUM 31:29 Zeg wezyen nsen n [tkeccaḍt] ad teksid [ṣṣedqet-a] uca ad tt tewced i ukehhan Aliɛazar [am] ict n tewhibt n usgeɛɛed i SIDI.
NUM 31:30 Zeg wezyen [n tkeccaḍt] n ayt n Israil ad teksid ijj zi kuř xemsin: zeg iwdan, zeg ifunasen d tfunasin, zeg iɣyař u zeg wuǧi, [wah,] zi marra řebhayem. Ad tewced aya i Ilawiyyen nni iṭṭfen acbar x Tzeddiɣt n SIDI.”
NUM 31:31 Uca igga Musa d ukehhan Aliɛazar am mammec [t] yumur SIDI i Musa.
NUM 31:32 [Awarni as] tuɣa řeksibet nni iqqimen n tkeccaḍt nni ikecceḍ řgens n řɛeskar setta-mya u-xemsa u-sebɛin-ařef n wuǧi.
NUM 31:33 tnayen u-sebɛin-ařef n ifunasen d tfunasin,
NUM 31:34 waḥit u-settin-ařef n iɣyař
NUM 31:35 uca [zi jjihet n] řeɛmar n bnadem, zi temɣarin nni war iṭṭiṣen di qama ak-d ijj n weryaz, aqa atent marra tnayen u-třatin-ařef.
NUM 31:36 Ijj n wezyen, tasɣart n yinni dd-iffɣen ak-d řɛeskar, aqa-t di teřt-mya u-sebɛa u-třatin-ařef n wuǧi.
NUM 31:37 Ṣṣedqet i SIDI n wuǧi [tuɣa-tt di] setta-mya u-xemsa u-sebɛin.
NUM 31:38 Uca [tuɣa din] setta u-třatin-ařef n ifunasen d tfunasin uca ṣṣedqet [zzaysen] i SIDI [tuɣa-tt] di tnayen u-sebɛin.
NUM 31:39 Uca [tuɣa din] třatin-ařef u-xemsa-mya n iɣyař uca ṣṣedqen zzaysen i SIDI, waḥit u-settin.
NUM 31:40 Uca [zi jjihet n] řeɛmur n bnadem [tuɣa din] seṭṭac-ařef [n temɣarin] u aṣeddeq zzaysent i SIDI aqa tnayen u-třatin [n temɣarin].
NUM 31:41 Iwca Musa ṣṣedqet, tenni d tawhibt n usgeɛɛed i SIDI, i ukehhan Aliɛazar, am mammec [t] yumur SIDI i Musa.
NUM 31:42 Zeg wezyen [nneɣni] i ayt n Israil, wenni ifarz Musa [di ṭṭweɛ nsen] zeg yeryazen nni tuɣa immenɣen,
NUM 31:43 - azyen nni n tesɣart i tmesmunt tuɣa-t di teřt-mya u-sebɛa u-třatin-ařef u-xemsa mya n wuǧi,
NUM 31:44 setta u-třatin-ařef n ifunasen d tfunasin,
NUM 31:45 třatin-ařef u-xemsa-mya n yeɣyař
NUM 31:46 uca seṭṭac-ařef n řeɛmur n iwdan -
NUM 31:47 zeg wezyen nni i ayt n Israil iksi Musa ijj zi kuř xemsin, [ammu] zeg iwdan [am] zi řebhayem, uca iwca aya i Ilawiyyen, inni iṭṭfen acbar x Tzeddiɣt n SIDI, am mammec [t] yumur SIDI i Musa.
NUM 31:48 [Xenni] usin-dd ikumandaren x řuřuf n řɛeskar, imeqqranen x wařef d imeqqranen x mya, ɣar Musa,
NUM 31:49 nnan i Musa: “Imsexxaren nnec aqa ḥesben marra iɛeskariyyen nni sadu ufus nneɣ u war d aneɣ iruḥ uřa d [ijj n] weryaz.
NUM 31:50 S uya niwi tawhibt n SIDI, kuř ijj min yufa: ict n řqecɛet n wureɣ, ict n txeřxařt, ict n tmeqyast, ict n txatent [n ucemmiɛ], ict n texrazt niɣ ict n tseddect s wedmam n wureɣ, ḥima ad zzaysent ittwagg weṣřaḥ x řeɛmur nneɣ zzat i wudem n SIDI.”
NUM 31:51 Musa d ukehhan Aliɛazar ksin zzaysen ureɣ nsen, marra řeqcuɛ i ggin [s lfenn].
NUM 31:52 Marra ureɣ n tewhibt nni ssgeɛɛden i SIDI zeg imeqqranen x wařef u zeg imeqqranen x mya tuɣa di seṭṭac-ařef u-sebɛa-mya u-xemsin ciqlu.
NUM 31:53 Iɛeskariyyen aqa keccḍen kuř ijj i yixef nnes [min xsen].
NUM 31:54 Musa d ukehhan Aliɛazar ṭṭfen ureɣ [nni] n imeqqranen x wařef u x mya uca iwyen t ɣar Uqiḍun n Umsagar, am yict n řidaret i ayt n Israil zzat i wuden n SIDI.
NUM 32:1 Ayt n Rubin ɣarsen aṭṭas n řebhayem u ayt n Jad ɣarsen aṭṭas s waṭṭas [n řebhayem] uca nitni ẓrin tammurt n Yaɛzir d temmurt n Jilɛad, uca xzar, jjihet [nni] [tecna] i řebhayem.
NUM 32:2 Usin-dd ayt n Jad u ayt n Rubin, ssiwřen ak-d Musa d ukehhan Aliɛazar u ak-d řḥukkam n tmesmunt, nnan:
NUM 32:3 “Ɛaṭarut, Dibun, Yaɛzir, Nimra, Ḥacbun, Aliɛala, Cabam, Nabu d Baɛun,
NUM 32:4 tammurt nni x iɣřeb SIDI zzat i wudem n tmesmunt n Israil, aqa-tt d ict n temmurt [tecna] i řebhayem u [neccin], imsexxaren nnec ɣarsen řebhayem.”
NUM 32:5 Nnan: “Mařa nufa arḍa di tiṭṭawin nnec, ma zeɛma ad temmewc temmurt-a d agřa i imsexxaren nnec u war d aneɣ ttejji ad neẓwa L’Urdun.”
NUM 32:6 Yarra-dd Musa x ayt n Jad u x ayt n Rubin: “Mařa aytmatwem ad dd-ffɣen ɣar garra, ma xenni kenniw ad teqqimem da?
NUM 32:7 Mayemmi ɣa tessɛegzem uř n ayt n Israil maḥend war ẓekkʷin ɣar temmurt i d asen iwca SIDI?
NUM 32:8 Ammu i ggin řejdud nwem umi ten ssekkeɣ zi Qadac-Barniɛ ḥima xenni ad ẓaren tammurt.
NUM 32:9 Iwḍen nitni ɣar teɣzurt [n teɣzart] n Ickul uca ẓrin tammurt uca qeřben uřawen n ayt n Israil, maḥend war ttidfen ca di temmurt i d asen iwca SIDI.
NUM 32:10 Deg wass nni yarɣa weɣḍab n SIDI uca ijjuǧ, inna:
NUM 32:11 ‘Iryazen nni dd-iffɣen zi Miṣra, zi ɛicrin iseggʷusa sennej, war ẓarren tammurt nni x jjuǧeɣ ad tt wceɣ i Ibrahim d Isḥaq d Yaɛqub, minzi nitni war d ayi ḍfaren nican,
NUM 32:12 mɣir Kalib, mmis n Yafunni, Aqinizi, d Yacuwa, mmis n Nun, minzi nitni ḍfaren nican i SIDI.’
NUM 32:13 Uca [ammu] yarɣa weɣdab n SIDI x Israil uca igga i-ten ad tellɛen di řexřa arebɛin n iseggʷusa, ařami ifna marra jjiř nni iggin řɣar di tiṭṭawin n SIDI,
NUM 32:14 Uca xzar, kenniw tɣewwɣem am řejdud nwem, [kenniw] d ijj n ubarru n yeryazen d imednab, [uca ammu] i ɣa tarnim ɛad řḥaduq n weɣḍab n SIDI x Israil.
NUM 32:15 Mařa tdewřem-dd kenniw zi ḍeffar nnes, Netta ad yejj [řgens] di řexřa ɛawed uca [ammu i ɣa] tejjem marra řgens aya ad ihellek.”
NUM 32:16 Xenni qarrben-dd ɣares, nnan: “Ad nebna da řkuriyyat i wuǧi nneɣ u tineddam i iḥenjiren nneɣ,
NUM 32:17 maca neccin ad dd-neffeɣ newjed i umenɣi zzat i wudem n ayt n Israil s řesnaḥ [nneɣ], ařami ten nessiweḍ ɣar wemcan nsen. Iḥenjiren nneɣ ad qqimen di tneddam ifaryen zi ssibbet n imezdaɣ n temmurt.
NUM 32:18 War nᵉddekkwiř ɣar tudrin nneɣ ař i ɣa temmewc tesɣart n řwart i kuř ijj zeg ayt n Israil.
NUM 32:19 Minzi war nteṭṭef di řwart akidsen ɣar tma nneɣni n L’Urdun uřa ɣar zzat, minzi tasɣart i d aneɣ dd-ittasen aqa-tt ɣar tma-ya tanita n L’Urdun, ɣar ccarq.”
NUM 32:20 [Xenni] inna asen Musa: “Mařa teggim ammu, mařa tesswejdem ixef nwem i umenɣi zzat i wudem n SIDI,
NUM 32:21 u kuř ijj, wenni isswejden ixef nnes i umenɣi, ad iẓwa L’Urdun zzat i wudem n SIDI, ař Netta ad yaẓẓeř x řɛedyan nnes zzat i wudem nnes zi tesɣart nsen n řwart,
NUM 32:22 u ad tiři temmurt tᵉttwaxḍeɛ zzat i wudem n SIDI, [xenni] iɛeddeř ad dd-tdewřem u ad tiřim tbeddem zzat i SIDI u zzat i Israil břa amarwas u ad tiři temmurt-a d agřa nwem zzat i wudem n SIDI.
NUM 32:23 [Maca] mařa war teggim ammu, [xenni] aqa texḍam ḍidd i SIDI uca ad tessnem aqa ddenb nwem ad kenniw yaf.
NUM 32:24 Bnam tineddam i iḥenjiren nwem d řkuriyyat i wuǧi nwem uca ggem min dd-iffɣen zeg uqemmum nwem.”
NUM 32:25 [Xenni] ssiwřen ayt n Jad d ayt n Rubin ak-d Musa, nnan: “Imsexxaren nnec ad ggen am mammec ten yumur sidi inu.
NUM 32:26 Tarwa nneɣ, timɣarin nneɣ, řeksibet nneɣ d marra řebhayem nneɣ ad qqimen di tneddam n Jilɛad,
NUM 32:27 [maca] imsexxaren nnec ad ẓwan i umenɣi zzat i wudem n SIDI, marra inni isswejden [ixef nsen] i umenɣi, am mammec issiweř sidi inu.”
NUM 32:28 Uca yumur xasen Musa i ukehhan Aliɛazar u i Yacuwa, mmis n Nun, u i izeǧifen n [tudrin n] ibabaten n tqebbař n ayt n Israil,
NUM 32:29 inna asen Musa: “Mařa ayt n Jad d ayt n Rubin ad kiwem ẓwan L’Urdun, kuř ijj wenni isswejden ixef nnes i umenɣi zzat i wudem n SIDI, u mařa [xenni] tammurt ad tiři tᵉttwaxḍeɛ zzat i wudem nwem, [ad taf] ad asen tewcem tammurt n Jilɛad d agřa.
NUM 32:30 Maca mařa war kiwem ẓekkʷim wejden i umenɣi, [xenni] ad ṭṭfen agřa di řwesṭ nwem di temmurt n Kenɛan.”
NUM 32:31 Ayt n Jad d ayt n Rubin arrin-dd, nnan: “Am mammec issiweř SIDI ak-d imsexxaren nnec, ammu i ɣa negg.
NUM 32:32 Neccin ad neẓwa ɣar temmurt n Kenɛan ad niři newjed i umenɣi zzat i wudem n SIDI, [maca] tasɣart nneɣ n řwart ad tiři ɣar tma-ya wanita n L’Urdun.”
NUM 32:33 U iwca asen Musa, i ayt n Jad u i ayt n Rubin u i wezyen n teqbič n Manassa, mmis n Yusuf, tageldit n Siḥun, ajeǧid n Imuriyyen, d tgeldit n Ɛuj, ajeǧid n Bacan, tammurt s tneddam nnes nni iǧan di jjwayeh nnes uřa d tineddam di temmurt i d as dd-innḍen.
NUM 32:34 Ayt n Jad bnan Dibun, Ɛaṭarut, Ɛaruɛir,
NUM 32:35 Ɛaṭrut-Cufan, Yaɛzir, Yujbaha,
NUM 32:36 Bayt-Nimra d Bayt-Haran, tineddam ifaryen d řkuriyyat i wuǧi.
NUM 32:37 Ayt n Rubin bnan Ḥacbun, Aliɛala, Qaryatayim,
NUM 32:38 Nabu, Baɛl-Maɛun, tenni zi ittwabeddeř isem nsen, d Sibma, uca řaɣan ismawen n tneddam i bnan [ɛawed] s yisem [nneɣni].
NUM 32:39 Ayt n Makir, mmis n Manassa, ruḥen ɣar Jilɛad uca ṭṭfen tt uca uẓẓřen x Imuriyyen nni din iǧan zi řwart nsen.
NUM 32:40 Uca Musa iwca Jilɛad i Makir, mmis n Manassa, uca iruḥ netta ad izdeɣ din.
NUM 32:41 Uca Ya’ir, mmis n Manassa, iruḥ uca iṭṭef dcurat nnes uca iřaɣa asent dcurat n Ya’ir.
NUM 32:42 Amenni iruḥ Nubaḥ uca iṭṭef Qinat d tneddam i ɣares dd-iqqnen uca isemma as Nubaḥ s yisem nnes.
NUM 33:1 Ammu i ssmmuṭṭiyen ayt n Israil inni dd-iffɣen zi temmurt n Miṣra, zeg wemcan ɣar wemcan, [am ttwasettfen nitni] ɛlaḥsab [tirbiɛin n] řɛeskar nsen, s ufus n Musa d Harun.
NUM 33:2 X řumur n SIDI yura Musa imucan manis dd-ffɣen ak-d ireḥḥalen nsen. Ina d ireḥḥalen nsen ak-d imucan manis dd-ffɣen.
NUM 33:3 Fesyen iqiḍan nsen, [ffɣen] zi Raɛamsis deg uyur amezwaru, deg wass wiss xemmesṭac n uyur amezwaru. Di ṣṣbeḥ, [deɣya] awarni i [Tɣarṣt n] Useɛdu ffɣen-dd ayt n Israil s yijj n ufus ittwassgeɛɛden zzat i tiṭṭawin n marra Imiṣriyyen,
NUM 33:4 [umi] tuɣa ceɣřen Imiṣriyyen neṭṭřen marra imenza nsen, inni iwta SIDI [s řmewt] jar asen. [Ɛawed] issiweḍ SIDI řeḥkam [nnes] x irebbiten nsen.
NUM 33:5 Fesyen ayt n Israil iqiḍan nsen, [ffɣen] zi Raɛamsis uca wtin iqiḍan nsen di Sukkut.
NUM 33:6 Fesyen iqiḍan nsen, [ffɣen] zi Sukkut uca wtin iqiḍan nsen di Itam ɣar tma n řexřa.
NUM 33:7 Fesyen iqiḍan nsen, [ffɣen] zi Itam uca dewřen-dd ɣar Pi-Haḥirut nni iǧan arendad n Baɛl-Ṣafun uca wtin iqiḍan nsen zzat i wudem n Majdal.
NUM 33:8 Fesyen iqiḍan nsen, [ffɣen] zi Pi-Haḥirut uca cukken di řwesṭ n řebḥar ɣar řexřa uca uyuren ticři n třata n wussan di řexřa n Itam, [xenni] wtin iqiḍan nsen di Mara.
NUM 33:9 Fesyen iqiḍan nsen, [ffɣen] zi Mara uca iwḍen ɣar Ilim, mani iǧa tenɛac n iɣbaluten n waman d sebɛin n tcejjura n tini uca wtin iqiḍan nsen din.
NUM 33:10 Fesyen iqiḍan nsen, [ffɣen] zi Ilim uca wtin iqiḍan nsen ɣar Řebḥar n Telga.
NUM 33:11 Fesyen iqiḍan nsen, [ffɣen] zi Řebḥar n Telga uca wtin iqiḍan nsen di řexřa n Sin.
NUM 33:12 Fesyen iqiḍan nsen, [ffɣen] zi řexřa n Sin uca wtin iqiḍan nsen di Dufqa.
NUM 33:13 Fesyen iqiḍan nsen, [ffɣen] zi Dufqa uca wtin iqiḍan nsen di Aluc.
NUM 33:14 Fesyen iqiḍan nsen, [ffɣen] zi Aluc uca wtin iqiḍan nsen di Rafidim, mani war yufi aman i řgens maḥend ad swen.
NUM 33:15 Fesyen iqiḍan nsen, [ffɣen] zi Rafidim uca wtin iqiḍan nsen di řexřa n Sina.
NUM 33:16 Fesyen iqiḍan nsen, [ffɣen] zi řexřa n Sina uca wtin iqiḍan nsen di Qabarut-Hata’awat.
NUM 33:17 Fesyen iqiḍan nsen, [ffɣen] zi Qabarut-Hata’awat uca wtin iqiḍan nsen di Ḥaḍayrut.
NUM 33:18 Fesyen iqiḍan nsen, [ffɣen] zi Ḥaḍayrut uca wtin iqiḍan nsen di Ritma.
NUM 33:19 Fesyen iqiḍan nsen, [ffɣen] zi Ritma uca wtin iqiḍan nsen di Rimmun-Fariṣ.
NUM 33:20 Fesyen iqiḍan nsen, [ffɣen] zi Rimmun-Fariṣ uca wtin iqiḍan nsen di Libna.
NUM 33:21 Fesyen iqiḍan nsen, [ffɣen] zi Libna uca wtin iqiḍan nsen di Rissa.
NUM 33:22 Fesyen iqiḍan nsen, [ffɣen] zi Rissa uca wtin iqiḍan nsen di Qihaylata.
NUM 33:23 Fesyen iqiḍan nsen, [ffɣen] zi Qihaylata uca wtin iqiḍan nsen di wedrar n Cafar.
NUM 33:24 Fesyen iqiḍan nsen, [ffɣen] zeg wedrar n Cafar uca wtin iqiḍan nsen di Ḥarada.
NUM 33:25 Fesyen iqiḍan nsen, [ffɣen] zi Ḥarada uca wtin iqiḍan nsen di Maqhaylut.
NUM 33:26 Fesyen iqiḍan nsen, [ffɣen] zi Maqhaylut uca wtin iqiḍan nsen di Taḥat.
NUM 33:27 Fesyen iqiḍan nsen, [ffɣen] zi Taḥat uca wtin iqiḍan nsen di Taraḥ.
NUM 33:28 Fesyen iqiḍan nsen, [ffɣen] zi Taraḥ uca wtin iqiḍan nsen di Mitqa.
NUM 33:29 Fesyen iqiḍan nsen, [ffɣen] zi Mitqa uca wtin iqiḍan nsen di Ḥacmuna.
NUM 33:30 Fesyen iqiḍan nsen, [ffɣen] zi Ḥacmuna uca wtin iqiḍan nsen di Musirut.
NUM 33:31 Fesyen iqiḍan nsen, [ffɣen] zi Musirut uca wtin iqiḍan nsen di Bani-Yaɛqan.
NUM 33:32 Fesyen iqiḍan nsen, [ffɣen] zi Bani-Yaɛqan uca wtin iqiḍan nsen di Ḥur-Jidjad.
NUM 33:33 Fesyen iqiḍan nsen, [ffɣen] zi zi Hur-Jidjad uca wtin iqiḍan nsen di Yutbat.
NUM 33:34 Fesyen iqiḍan nsen, [ffɣen] zi zi Yutbat uca wtin iqiḍan nsen di Ɛabruna.
NUM 33:35 Fesyen iqiḍan nsen, [ffɣen] zi zi Ɛabruna uca wtin iqiḍan nsen di Ɛiṣyun-Jabar.
NUM 33:36 Fesyen iqiḍan nsen, [ffɣen] zi zi Ɛiṣyun-Jabar uca uca wtin iqiḍan nsen di řexřa n Ṣin nni [yeǧa] Qadac.
NUM 33:37 Fesyen iqiḍan nsen, [ffɣen] zi Qadac uca wtin iqiḍan nsen ɣar wedrar n Hur, ɣar tma n temmurt n Idum.
NUM 33:38 Yuři ukehhan Harun adrar n Hur am mammec d as inna SIDI uca immut din deg useggʷas wiss arebɛin awarni i uffuɣ n ayt n Israil zi temmurt n Miṣra, deg uyur wiss xemsa, deg wass amezwaru n uyur.
NUM 33:39 Tuɣa Harun ɣares mya u-třata u-ɛicrin n iseggʷusa umi immut deg wedrar n Hur.
NUM 33:40 Uca Akenɛani, ajeǧid n Ɛarad, [wenni] tuɣa izeddɣen di ljanub n temmurt n Kenɛan, isřa s twasit n ayt n Israil.
NUM 33:41 Fesyen iqiḍan nsen, [ffɣen] zeg wedrar n Hur uca wtin iqiḍan nsen di Ṣalmuna.
NUM 33:42 Fesyen iqiḍan nsen, [ffɣen] zi Ṣalmuna uca wtin iqiḍan nsen di Funun.
NUM 33:43 Fesyen iqiḍan nsen, [ffɣen] zi Funun uca wtin iqiḍan nsen di Ubut.
NUM 33:44 Fesyen iqiḍan nsen, [ffɣen] zi Ubut uca wtin iqiḍan nsen di řxirbat n Ɛabarim di jjwayeh n weymir ak-d Mu’ab.
NUM 33:45 Fesyen iqiḍan nsen, [ffɣen] zi řxirbat [n Ɛabarim] uca wtin iqiḍan nsen di Dibun-Jad.
NUM 33:46 Fesyen iqiḍan nsen, [ffɣen] zi Dibun-Jad uca wtin iqiḍan nsen di Ɛalmun-Diblatayim.
NUM 33:47 Fesyen iqiḍan nsen, [ffɣen] zi Ɛalmun-Diblatayim uca wtin iqiḍan nsen deg idurar n Ɛabarim zzat i wudem n wedrar n Nabu.
NUM 33:48 Fesyen iqiḍan nsen, [ffɣen] zeg idurar n Ɛabarim uca wtin iqiḍan nsen di řewḍat n Mu’ab ɣar L’Urdun arendad i Ariḥa.
NUM 33:49 Nitni wtin iqiḍan nsen ɣar L’Urdun zi Bayt-Yacimut ař Abal-Ciṭṭim di řewḍat n Mu’ab.
NUM 33:50 Issiweř SIDI ak-d Musa di řewḍat n Mu’ab ɣar L’Urdun [arendad n] Ariḥa, inna:
NUM 33:51 “Siweř ak-d ayt n Israil uca ini asen: ‘Xmi i ɣa teẓwam L’Urdun ɣar temmurt n Kenɛan,
NUM 33:52 [xenni] ittxeṣṣa kenniw ad tessuffɣem marra imezdaɣ n temmurt zzat i uɣembub nwem d marra řexyařat nsen ineqcen ad tent taredǧem. [Ɛawed] ittxeṣṣa kenniw ad tᵉteḥḥam marra řexyařat ifesyen nsen d marra řegɛudi nsen.
NUM 33:53 Ad tᵉṭṭfem tammurt d řwart uca ad dayes tzedɣem, minzi Necc wciɣ awem tammurt nni d agřa.
NUM 33:54 Ad tebḍam tammurt s tqedduḥt am řwart x řaǧat nwem. Wi ɣar iǧa aṭṭas, ad as tewcem aṭṭas, u wenni ɣar iǧa drus, ad as tewcem drus. Mani d as dd-tusa tqedduḥt, ad yiři nnes. Ɛlaḥsab tiqebbař n řejdud nwem ad twartem tasɣart nwem.
NUM 33:55 Maca mařa kenniw war tessuffuɣem ca imezdaɣ n temmurt zzat i wudem nwem, [xenni] ad imsar aqa inni i ɣa tejjem ad qqimen, ad dewřen d isennanen di tiṭṭawin nwem d iwezwizen deg iɣezdisen nwem uca nitni ad kenniw ḥṣaren di temmurt nni mani tzeddɣem.
NUM 33:56 Uca [xenni] ad imsar ad awem ggeɣ am mammec tuɣa xarrṣeɣ ad akidsen ggeɣ.”
NUM 34:1 Issiweř SIDI ak-d Musa, inna:
NUM 34:2 “Umur ayt n Israil uca ini asen: ‘Xmi ɣa tadfem tammurt n Kenɛan, [xenni] ta d tammurt i d awem ɣa yiřin d řwart, tammurt n Kenɛan ak-d iymiren nnes [ad tiři ammu]:
NUM 34:3 Jjihet n ljanub ad ɣarwem tiři zi řexřa n Ṣin ař aymir n Idum uca aymir n ljanub ad ɣarwem yiři zi ṭṭarf aneggaru n Řebḥar Ameǧaḥ di ccarq
NUM 34:4 uca aymir ad imeyyeř zi ljanub ɣar Tsunta n Tɣarḍmiwin uca ad iɛdu ɣar Ṣin uca ṭṭrufa nnes [ad dd-awḍen] jjihet n ljanub n Qadac-Barniɛ uca ad iɛdu ɣar Ḥaṣar-Addar uca ad iẓwa ɣar Aṣmun.
NUM 34:5 Ad inneḍ weymir zi Aṣmun ɣar Teɣzart n Miṣra uca ṭṭrufa nnes [ad awḍen] ař řebḥar.
NUM 34:6 Uca aymir n řɣarb ad awem yiři Řebḥar Ameqqran. Wa ad awem yiři d aymir n řɣarb.”
NUM 34:7 Wa ad awem yiři d aymir n ccamal: ad t tarcmem i yixef nwem zeg Řebḥar Ameqqran ař adrar n Hur.
NUM 34:8 Zeg wedrar n Hur ad t tarcmem ař mani ɣa tawḍed ɣar Ḥamat uca ṭṭrufa n weymir ad awḍen ař Ṣadad.
NUM 34:9 Ad yeɛdu weymir ař Zifrun uca ṭṭrufa nnes ad awḍen ař Ḥaṣar-Ɛinan. Wa ad awem yiři d aymir n ccamal.
NUM 34:10 Ad tarcmem aymir nwem n ccarq zi Ḥaṣar-Ɛinan ɣar Cafam
NUM 34:11 uca ad dd-ihwa weymir zi Cfam ař Ribla, ccarq n Ɛayn. [Xenni] ad dd-ihwa weymir [ɛad] ktar uca ad imun ak-d tma n ccarq n Řebḥar n Kinnarat.
NUM 34:12 [Xenni] ad dd-ihwa weymir ɣar L’Urdun uca ṭṭrufa nnes ad awḍen ař Řebḥar Ameǧaḥ. Ta ad awem tiři d tammurt ak-d iymiren nnes i d as dd-innḍen.”
NUM 34:13 Uca Musa yumur ayt n Israil, inna: “Ta d tammurt nni i ɣa tebḍam jar awem s tqedduḥt, tenni x yumur SIDI ad temmewc i tesɛa n tqebbař u i wezyen n teqbič [n Manassa].
NUM 34:14 Minzi taqbič n ayt n Rubin [tᵉttwasettef] ɛlaḥsab taddart n ibabaten nsen u taqbič n Jad [tᵉttwasettef] ɛlaḥṣab taddart n ibabaten nsen, aqa nitni ṭṭfen [ɛad tasɣart nsen], u azyen n teqbič n Manassa tᵉṭṭef [uřa d nettat] tasɣart nnes n řwart.
NUM 34:15 Tnayen n tqebbař d wezyen aqa ṭṭfent řwart nsent ɣar ujemmaḍ n L’Urdun, zi Ariḥa ɣar ccarq ɣar manis dd-tneqqar [tfuct].”
NUM 34:16 Issiweř SIDI ak-d Musa, inna:
NUM 34:17 “Ina d ismawen n yeryazen inni i ɣa ibḍan tammurt jar awem: Akehhan Aliɛazar d Yacuwa, mmis n Nun.
NUM 34:18 Ad teksim [ɛawed] ijj n řḥakem zi kuř taqbič maḥend ad tebḍam tammurt.
NUM 34:19 Ina d ismawen n yeryazen: i teqbič n Yahuda, Kalib, mmis n Yafunni
NUM 34:20 i teqbič n ayt n Cimɛun, Cimuwil, mmis n Ɛammihud,
NUM 34:21 i teqbič n Binyamin, Ilidad, mmis n Kaslun,
NUM 34:22 i teqbič n ayt n Dan, řḥakem Buqqi, mmis n Yujli,
NUM 34:23 i teqbič n ayt n Yusuf: i teqbič n ayt n Manassa, řḥakem Ḥanniyil, mmis n Ifud,
NUM 34:24 i teqbič n ayt n Ifrayim, řḥakem Qimuyil, mmis n Cifṭan,
NUM 34:25 i teqbič n ayt n Zabulun, řḥakem Iliṣafan, mmis n Farnax,
NUM 34:26 i teqbič n ayt n Issakar, řḥakem Falṭiyil, mmis n Ɛazzan,
NUM 34:27 i teqbič n ayt n Acir, řḥakem Axihud, mmis n Calumi,
NUM 34:28 i teqbič n ayt n Naftali, řḥakem Fadahyil, mmis n Ɛammihud.”
NUM 34:29 Ina d inni x yumur SIDI ad bḍan řwart i ayt n Israil di temmurt n Kenɛan.
NUM 35:1 Issiweř SIDI ak-d Musa di řewḍat n Mu’ab ɣar L’Urdun [arendad n] Ariḥa uca inna:
NUM 35:2 “Umur ayt n Israil ḥima ad wcen, zi řwart nsen i ṭṭfen, tineddam i Ilawiyyen maḥend ad daysent zedɣen. Ad tewcem i Ilawiyyen [ɛawed] ddmani n tarewsa, inni d asen dd-innḍen i tneddam.
NUM 35:3 Tineddam-a ad iřint maḥend ad daysent zedɣen, uca ddmani n tarewsa ad iřin i řebhayem nsen u i wagřa nsen u i marra imuddaren nsen.
NUM 35:4 Uca ddmani n tarewsa i iǧan ɣar tneddam nni i ɣa tewcem i Ilawiyyen, ad iřin zeg weɣbar n tendint ɣar barra ařef n iɣaǧen uca [amenni] ɣar marra iɣezdisen [nnes].
NUM 35:5 Barra n tendint ɣar ccarq ad tɛebbarem ařfayen n iɣaǧen u ɣar ljanub ařfayen n iɣaǧen u ɣar řɣarb ařfayen n iɣaǧen u ɣar ccamal ařfayen n iɣaǧen uca tandint [ad tiři] di řwesṭ. Ina ad asen iřin d ddmani n tarewsa n tneddam.
NUM 35:6 Tineddam i ɣa tewcem i Ilawiyyen [ad iřint] setta n tneddam n tarewřa. Ad tent tewcem maḥend ad din yarweř uqettař. Sennej i man aya ad [tent] tewcem [ɛad] tnayen u-rebɛin n tneddam.
NUM 35:7 Marra tineddam i ɣa tewcem i Ilawiyyen, [ad iřint] tmenya u-rebɛin n tneddam, tina [simant nsent] d ddmani nsent n tarewsa.
NUM 35:8 X tneddam i ɣa tewcem zeg wagřa n ayt n Israil, ad tent teksim ktar zeg wenni ɣar iǧa waṭṭas u zeg wenni ɣar iǧa drus, ad teksid drus. Kuř ijj ad iwc zi tneddam nnes i Ilawiyyen ɛlaḥsab [řqedd n] tesɣart nnes zi řwart i iṭṭef.”
NUM 35:9 Issiweř SIDI ak-d Musa, inna:
NUM 35:10 “Siweř ak-d ayt n Israil uca ini asen: ‘Xmi ɣa teẓwam L’Urdun ɣar temmurt n Kenɛan,
NUM 35:11 ad tneyycem i yixef nwem tineddam nni d awem i ɣa iřint d tineddam n tarewřa, ḥima aqettař, wenni inɣin ḥed zeg uweddar, izemmar ad din yarweř.
NUM 35:12 Tineddam-a ad awem iřint i tarewřa zeg uneqqam n idammen, ḥima war ittmetti uqettař qbeř ma ad ibedd zzat i wudem n tmesmunt i řḥukm.
NUM 35:13 Zi tneddam i ɣa tewcem, ad [zzaysent] iřint setta d tineddam n tarewřa i kenniw.
NUM 35:14 Třata n tneddam ad [tent] tewcem ɣar ujemmaḍ n L’Urdun u třata n tneddam ad [tent] tewcem di temmurt n Kenɛan. Ad iřint d tineddam n tarewřa.
NUM 35:15 Setta n tneddam-a ad iřint i tarewřa i ayt n Israil uřa i ubarrani d umɛezzeb di řwesṭ nsen, ḥima wenni inɣin ḥed zeg uweddar, izemmar ad din yarweř.
NUM 35:16 Mařa iwwet i-t s ict n řqecɛet n wuzzař uca immut, [xenni] aqa netta d aqettař. Aqettař ad ittwaneɣ nican.
NUM 35:17 Mařa iwwet i-t s ijj n weẓru deg ufus i zi izemmar ad immet uca [xenni] immut, aqa netta d aneqqam. Aneqqam ad ittwaneɣ nican.
NUM 35:18 Niɣ [mařa] iwwet i-t s ict n řqecɛet n ukeccuḍ deg ufus i zi izemmar ad immet uca [xenni] immut, aqa netta d aqettař. Aqettař ad ittwaneɣ nican.
NUM 35:19 Aneqqam n idammen ad ineɣ aqettař. Mařa ad t iřqa, ad t ineɣ.
NUM 35:20 U mařa iɛarn i-t s wecrah, niɣ inḍar ɣares [ca] s neɛmada ařami [zzayes] immut,
NUM 35:21 niɣ iwwet i-t s řeɛdawet s ufus nnes, ařami [zzayes] immut, [xenni] wenni [t] inɣin ad ittwaneɣ nican. Aqa-t d aqettař. Aneqqam n idammen ad ineɣ aqettař xmi t ɣa iřqa.
NUM 35:22 [Maca] mařa tuɣa iɛarren i-t amenni deg wermac n wabřiwen břa řeɛdawet, niɣ inḍar ɣares ca n řqecɛet am iweddar,
NUM 35:23 niɣ am war t iẓri, igga ad xas dd-iwḍa ca n weẓru i zi izemmar ad immet, uca [xenni] immut am war tuɣi d řeɛdu nnes u netta tuɣa war d as yarezzu řɣar,
NUM 35:24 [xenni] tamesmunt ad teḥkem jar uqettař d uneqqam n idammen ɛlaḥsab lfarayiḍ-a.
NUM 35:25 Tamesmunt ad tfekk aqettař zeg ufus n uneqqam n idammen uca tamesmunt ad tejj netta ad iɛqeb ɣar tendint nnes n tarewřa. Ad din iqqim ař řmewt n arrays n ikehhanen, wenni dehnen nitni s zzect iqeddsen.
NUM 35:26 [Maca] mařa aqettař iffeɣ barra n iymiren n tendint n tarewřa mani yarweř,
NUM 35:27 uca aneqqam n idammen yufa i-t barra n iymiren n tendint n tarewřa uca aneqqam n idammen inɣa wenni inɣin, war xas ca idammen [xenni].
NUM 35:28 Minzi tuɣa xas ad iqqim di tendint nnes n tarewřa ař řmewt n arrays n ikehhanen. [Maca] awarni řmewt n arrays n ikehhanen izemmar ad iɛqeb uqettař ɣar temmurt nni iǧan nnes.
NUM 35:29 Aya ad awem tiři d tawṣeyyet n řḥeqq i [marra] jjiřat nwem mani ma ɣa tzedɣem.
NUM 35:30 Kuř ijj, wenni inɣin ḥed, aqa aqettař ad ittwaneɣ ɛlaḥsab aqemmum n řechud, [maca] ijj n ucehhad [waha], war izemmar ad iched x ict n nnefs s řmewt.
NUM 35:31 War kessim ddeyyet x řeɛmar n uqettař nni x ittwaḥkem s řmewt, maɣar ittxeṣṣa ad ittwaneɣ nican.
NUM 35:32 War kessim ddeyyet x wenni yarewřen ɣar tendint nnes n tarewřa di ṭṭweɛ n weɛqab nnes, maḥend ad izdeɣ di temmurt qbeř řmewt n arrays n ikehhanen.
NUM 35:33 War iɛeddeř ad tessexsarem tammurt mani teǧam, minzi idammen ssexsaran tammurt uca war izemmar ad ittwagg weṣřaḥ i temmurt di ṭṭweɛ n idammen i dayes ittwassizřen, mɣir s idammen n wenni ten issizzřen.
NUM 35:34 War sxemmijem tammurt mani ɣa tzedɣem kenniw, di řwesṭ nnes i ɣa zedɣeɣ Necc, minzi Necc d SIDI, wenni izeddɣen di řwesṭ n ayt n Israil.”
NUM 36:1 Zi řaǧat n iḥenjiren n Yusuf qarrben-dd izeǧifen jar ibabaten n řaǧ n iḥenjiren n Jilɛad, mmis n Makir, mmis n Manassa uca nitni ssiwřen zzat i wudem n Musa u zzat i wudem n řḥukkam, izeǧifen [nneɣni] x ibabaten [n řaǧat] n ayt n Israil
NUM 36:2 uca nitni nnan: “SIDI yumur sidi inu maḥend ad iwc tammurt s tqedduḥt i ayt n Israil d řwart. Uca yumur SIDI i sidi inu ad iwc tasɣart n řwart n umatneɣ Ṣalufḥad i yessis.
NUM 36:3 Mařa dewřent nitenti d tinemřač ak-d ijjen zeg iḥenjiren n tqebbař nneɣni n ayt n Israil, xenni ad tᵉttwakkes tesɣart nsent di řwart n řejdud nneɣ uca ad tᵉttwarni [tasɣart nsent] i tesɣart n teqbič i ɣar ɣa munent uca [ammu] ad ittwassemẓi min iǧan d tasɣart nneɣ s tqedduḥt.
NUM 36:4 Xmi dd ɣa yas useggʷas [n usřiwřew] i ayt n Israil, [xenni] ad tᵉttwamarni tesɣart nsent i tesɣart n teqbič ak-d wi ɣa munent. [Ammu] i ɣa tᵉttwakkes [xenni] tesɣart nsent di řwart n teqbič n řejdud nneɣ.”
NUM 36:5 [Xenni] yumur Musa i ayt n Israil ɛlaḥsab řumur n SIDI, inna: “[Aqa d tidett] am mammec tessiweř teqbič n ayt n Yusuf.
NUM 36:6 Wa d awař i zi yumur SIDI x yessis n Ṣalufḥad, iqqar: ‘Ejj i-tent ad meřcent ak-d wenni d asent yarecqen. Ittxeṣṣa mɣir ad meřcent di řaǧ n teqbič n babatsent.
NUM 36:7 War iɛeddeř ad traḥ tesɣart n ayt n Israil zi teqbič ɣar teqbič [nneɣni], minzi kuř aryaz n ayt n Israil ad iqqim iṭṭef di tesɣart n teqbič n řejdud nnes.
NUM 36:8 Yeǧis n kuř ijj i ɣa iṭṭfen ict n tesɣart zeg ayt n Israil, ittxeṣṣa as ad temřec ak-d ijj zeg ijj n řaǧ zi teqbič n babas, ḥima kuř ijj zeg ayt n Israil ad iwart tasɣart n řejdud nnes.
NUM 36:9 War iɛeddeř ad traḥ tesɣart n ict n teqbič ɣar teqbič nneɣni, minzi ittxeṣṣa i kuř ict zi tqebbař n ayt n Israil ad iqqim iṭṭef di tesɣart nnes.’”
NUM 36:10 Yessis n Ṣalufḥad ggint am mammec [t] yumur SIDI i Musa.
NUM 36:11 Maḥla, Tirṣa, Ḥujla, Milka d Nuɛa, yessis n Ṣalufḥad, dewřent d tinemřač ak-d iḥenjiren n ɛemmitsent.
NUM 36:12 Dewřent d tinemřač di řaǧat n ayt n Manassa, mmis n Yusuf. [Ammu i] teqqim tesɣart nsent di teqbič n babatsent.
NUM 36:13 Tina d tiweṣṣa d lfarayiḍ nni yumur SIDI s tsexxart n Musa i ayt n Israil di řewḍat n Mu’ab, ɣar L’Urdun [arendad n] Ariḥa.
DEU 1:1 Ina d awařen nni issiweř Musa i marra Israil x ujemmaḍ n L’Urdun, di řexřa, di Řewḍa arendad n Ṣuf, jar Faran d Tufal d Laban d Ḥaḍayrut d Di-Dahab.
DEU 1:2 Zi Ḥurib x webrid n idurar n Saɛir ař Qadac-Barniɛ aqa-tt d ict n ticti n ḥiṭac n wussan.
DEU 1:3 Imsar deg useggʷas wiss arebɛin, deg uyur wiss ḥiṭac, deg [wass] amezwaru n uyur, issiweř Musa ak-d ayt n Israil ɛlaḥsab marra min d as iweṣṣa SIDI zi jjihet nsen,
DEU 1:4 awarni umi iɣřeb di Idraɛi x Siḥun, ajeǧid n Imuriyyen wenni tuɣa izeddɣen di Ḥacbun, u x Ɛuj, ajeǧid n Bacan, wenni tuɣa izeddɣen di Ɛactarut.
DEU 1:5 X ujemmaḍ n L’Urdun, di temmurt n Mu’ab, ibda Musa ad ifessar Ccariɛa-ya, inna:
DEU 1:6 “SIDI, AREBBI nneɣ, issiweř akidneɣ ɣar Ḥurib, inna: ‘Kenniw teqqimen aṭṭas ɣar wedrar-a, aqa d aṭṭas.
DEU 1:7 Dewřem, kksem iqiḍan nwem uca adfem ɣar idurar n Imuriyyen u ɣar marra [imucan] yudsen di Řewḍa, di Temmurt n Idurar, di Temmurt Iwaṭan, di [Temmurt n] Ljanub u ɣar tma n řebḥar, tammurt n ayt n Kenɛan, d Lubnan ař iɣzar ameqqran, iɣzar n Lfuraṭ.
DEU 1:8 Xzar, Necc wciɣ awem tammurt i iǧan zzat i wudem nwem. Adfem ɣares, tᵉṭṭfem tammurt nni x ijjuǧ SIDI ad tt iwc i řejdud nwem, i Ibrahim, Isḥaq d Yaɛqub, u i zzariɛet nsen awarni asen.’
DEU 1:9 Di řweqt nni ssiwřeɣ necc akidwem, nniɣ: ‘Necc waha war zemmareɣ ad arbuɣ [amnus i kenniw].
DEU 1:10 SIDI, AREBBI nwem, igga kenniw d aṭṭas, uca xzar, kenniw řexxu d aṭṭas am yitran n ujenna.
DEU 1:11 Ad taf ad daywem immarni SIDI, AREBBI n řejdud nwem, am mammec kenniw [teǧam řexxu] ařef n twařawin uca ad taf ad kenniw ibarek am mammec tuɣa ɣarwem dd-issiweř.
DEU 1:12 Mammec zemmareɣ necc weḥḥdi waha ad arbuɣ isḥessifen nwem d ddquřat nwem d imcubbecen nwem?
DEU 1:13 Ksim zi jar teqbič nwem iryazen imiɣisen, ifehhmen, inni ittwassnen [icnan], ḥima ad ten ggeɣ d izeǧifen xawem.’
DEU 1:14 [Xenni] kenniw tarrim-dd xafi, tennam ayi: ‘Awař i tessiwřed, aqa iban-dd icna, ḥima ad [t] negg.’
DEU 1:15 Uca ksiɣ izeǧifen n teqbič nwem, iryazen imiɣisen, ifehhmen, inni ittwassnen icnan, uca ggiɣ ten d izeǧifen xawem, [am] imeqqranen x wařef, imeqqranen x mya, imeqqranen x xemsin d imeqqranen x ɛecra, u [am] imeḥḍayen x tqebbař nwem.
DEU 1:16 Di řweqt nni umureɣ i řquḍat nwem uca nniɣ: ‘Sřem ɣar aytmatwem uca ḥekmem s yijj n řḥukm iseggden jar weryaz d umas d ubarrani [nni] kides [iǧan].
DEU 1:17 War tteggem s wudmawen di řeḥkam. Ad tesřem ɣar umeẓyan d umeqqran. War teggʷdem zeg wudem n ca n yijjen, minzi řeḥkam ɣar AREBBI. Tamesřact nni tewɛar xawem, awyem tt-i-dd ɣari uca necc ad tt sřeɣ.’
DEU 1:18 [Ammu] i kenniw umureɣ di řweqt nni marra timesřayin nni xawem ad tent teggem.”
DEU 1:19 “[Xenni] nefsi iqiḍan nneɣ [uca neffeɣ] zi Ḥurib uca neẓwa marra řexřa ameqqran issaggʷaden nni teẓrim, [nuyur] deg webrid n idurar n Imuriyyen am mammec d aneɣ yumur SIDI, AREBBI nneɣ, uca niweḍ ɣar Qadac-Barniɛ.
DEU 1:20 [Xenni] nniɣ awem: ‘Aqa tiwḍem ɣar idurar n Imuriyyen nni i d aneɣ ɣa iwc SIDI, AREBBI nneɣ.
DEU 1:21 Xzar, SIDI, AREBBI nnec, aqa iwca [as] tammurt i din iǧan zzat i wudem nnec. Geɛɛed, ṭṭef i-tt, am mammec ɣarek issiweř SIDI, AREBBI n řejdud nwem. War tteggʷed u war ttejji ad iɛgez wuř nnec.’
DEU 1:22 Tusim-dd ɣari marra kenniw, tennam: ‘Ejj aneɣ ad nessekk iryazen zzat i wudem nneɣ ḥima ad bergagen tammurt maḥend ad aneɣ xebbaren x man abrid i zi ɣa ngeɛɛed di [tammurt] u mammec [ǧant] tneddam i ɣar dd ɣa nas.’
DEU 1:23 Tuɣa awař-a d lemliḥ i necc uca ksiɣ tenɛac n yeryazen zi [řwest] nwem, zi [kuř] taqbič ijj n weryaz.
DEU 1:24 Nnḍen nitni uca uyuren x webrid ɣar idurar uca usin-dd ɣar teɣzurt n Ickul uca bergagen temmurt.
DEU 1:25 Ksin s ifassen nsen řɣiǧet n temmurt uca hwan-dd ɣarneɣ. Iwyen aneɣ-dd řexbar, nnan: ‘Tammurt i d aneɣ ɣa iwc SIDI, AREBBI nneɣ, teṣbeḥ.’”
DEU 1:26 “Qaɛ amenni, war texsem ad tgeɛɛdem uca tɣewwɣem ḍidd i řumur n SIDI, AREBBI nwem.
DEU 1:27 Uca tnedqem-dd deg iqiḍan nwem, tennam: ‘Deg weqřab nnes xaneɣ, aqa issuffeɣ aneɣ SIDI zi temmurt n Miṣra maḥend ad aneɣ yarr ɣar ifassen n Imuriyyen maḥend ad aneɣ yareddeǧ.
DEU 1:28 Mani [xenni] i ɣa ngeɛɛed? Aytmatneɣ ssfessyen uřawen nneɣ, nnan: Řgens imɣar uca zzugaren xaneɣ. Tineddam mɣarent uca ttwafaryent ař ajenna uca neẓra din uřa d ayt n Ɛanaq.’
DEU 1:29 Necc nniɣ awem: ‘War tarjijem ca u war zzaysen tteggʷdem.
DEU 1:30 SIDI, AREBBI nwem, wenni igguren zzatwem, ad immneɣ di ṭṭweɛ nwem, ammu nican am mammec igga zzat i tiṭṭawin nwem di ṭṭweɛ nwem di Miṣra
DEU 1:31 uřa di rexřa, mani teẓrid mammec tuɣa cek yarebbu SIDI, AREBBI nnec, marra abrid nni tuyured, am yijj n weryaz yarebbun mmis, ařami dd-tiwḍem ɣar wemcan-a.’
DEU 1:32 [Maca] kenniw ɛad war tuminem ca s wawař-a di SIDI, AREBBI nwem,
DEU 1:33 wenni tuɣa igguren zzat i wudem nwem deg webrid, ḥima ad awem yarzu mani ɣa tewtem iqiḍan nwem, [u wenni tuɣa igguren], s ǧiřet di tmessi, maḥend ad awem isscen abrid mani kenniw ittxeṣṣa ad tuyurem, u s uziř deg ijj n useynu.
DEU 1:34 SIDI isřa [řḥess n] wawařen nwem uca ijja aɣḍab nnes ad idduqqez, ijjuǧ, inna:
DEU 1:35 ‘Uřa d ijj zeg yeryazen-a n jjiř-a aɛeffan war iẓarr tammurt icnan nni x jjuǧeɣ maḥend ad tt wceɣ i řejdud nwem,
DEU 1:36 mɣir Kalib, mmis n Yafunni, netta ad tt iẓar uca i netta d iḥenjiren nnes ad wceɣ tammurt nni x igga iḍaren nnes, minzi netta tuɣa iḍeffar SIDI nican.’
DEU 1:37 Isɛar xafi SIDI di ssibbet nwem, inna: ‘Uřa d cek war [ɣares] ttidfed ca!
DEU 1:38 Yacuwa, mmis n Nun, wenni ibedden zzat i wudem nnec, ad ɣares yadef. Sjehd i-t, minzi netta d wenni tt ɣa iwcen d řwart i Israil.
DEU 1:39 Uca tarwa nwem i x tennam: Ad dewřen d teymart!, iḥenjiren nwem nni war ssinen [ɛad] řxar niɣ řɣar, nitni ad ɣares adfen uca Necc ad asen tt-i-dd-wceɣ uca nitni ad tt warten.
DEU 1:40 [Maca] kenniw ad dd-tdewřem, ad tekksem iqiḍan nwem ssa [uca ad tuyurem] ɣar řexřa ɣar Řebḥar n Telga.’
DEU 1:41 Kenniw tarrim-dd, tennam ayi: ‘Aqa nexḍa ak-d SIDI. Ad ngeɛɛed uca ad nemmneɣ qaɛ am mammec d aneɣ yumur SIDI, AREBBI nneɣ.’ [Xenni] tbeysem, kuř ijj s řesnaḥ nnes n garra u kenniw s zzɛamet nwem tbeddem ad tgeɛɛdem ɣar wedrar.
DEU 1:42 [Xenni] inna ayi SIDI: ‘Ini asen: War ttgeɛɛdem, war ttmenɣim, minzi Necc war ǧiɣ di řwesṭ nwem, ḥima war txeṣṣarem zzat i wudem n řɛedyan nwem.’
DEU 1:43 [Ammu] i kiwem ssiwřeɣ, [maca] kenniw war ttesřim uca tɣewwɣem ḍidd i řumur n SIDI uca teggim s tuffet, tgeɛɛdem ɣar idurar.
DEU 1:44 Uca ffɣen Imuriyyen nni tuɣa izeddɣen deg idurar uca uẓẓřen xawem, am tteggent tzizwa, uca řebzen kenniw di Ṣaɛir ař Ḥurma.
DEU 1:45 Tdewřem-dd, tessɣuyem zzat i wudem n SIDI. SIDI war isři i tmijja nwem, war d awem iwci amezzuɣ,
DEU 1:46 uca teqqimem di Qadac ict n řweqt d azirar, ussan aṭṭas i dinni teqqimem.”
DEU 2:1 “[Xenni] nedweř-dd uca nefsi iqiḍan [uca nuyur] ɣar řexřa, deg webrid ɣar Řebḥar n Telga, am mammec d ayi inna SIDI uca nenneḍ aṭṭas n wussan i idurar n Saɛir.
DEU 2:2 [Xenni] issiweř SIDI akidi, inna:
DEU 2:3 ‘Aṭṭas i tennḍem i wedrar-a, aqa cfa. Arrem [azeǧif] ɣar ccamal
DEU 2:4 uca umur řgens, ini: Ad tekkem kenniw x weymir n aytmatwem, ayt n Ɛisu, inni izeddɣen di Saɛir. Nitni ad zzaywem ggʷeden, [maca] ittxeṣṣa kenniw ad teḥḍam ixef nwem aṭṭas.
DEU 2:5 War kisen ttemɛařam, minzi war d awem tticeɣ uřa d ijj n cbar zi temmurt nsen, minzi Necc wciɣ idurar n Saɛir d řwart i Ɛisu.
DEU 2:6 Ad xasen tesɣem řeɛweč s nnuqart ḥima [ad tzemmarem] ad teccem u ad xasen tesɣem ɛawed aman s nnuqart ḥima ad teswem.
DEU 2:7 Minzi SIDI, AREBBI nnec, tuɣa ibarek i cek di marra řxedmet n ifassen nnec. Netta issen ticři nnec di řexřa-ya ameqqran. [Marra] arebɛin n iseggʷusa-ya tuɣa SIDI, AREBBI nnec, akidek uca war d ac ixeṣṣi walu.’”
DEU 2:8 “[Umi] nekka x yaytmatneɣ, ayt n Ɛisu nni tuɣa izeddɣen di Saɛir, x webrid n Řewḍa n Ilat d Ɛiṣyun-Jabir, nedweř-dd uca nekka x webrid n řexřa n Mu’ab.
DEU 2:9 [Xenni] issiweř akidi SIDI: ‘War ssaggʷad Mu’ab u war kisen ttmenɣam, minzi Necc war d awem tticeɣ walu d řwart zi temmurt nsen, minzi Necc wciɣ Ɛar d řwart i ayt n Luṭ.’
DEU 2:10 Tuɣa zeddɣen din Imiyyen, ijj n řgens d ameqqran d aṭṭas uca nitni d iziraren am Iɛanaqiyyen.
DEU 2:11 Nitni ttwaḥesben d Irafawiyyen am Iɛanaqiyyen uca ayt n Mu’ab qqaren as Imiyyen.
DEU 2:12 Uřa d Ixuriyyen tuɣa zeddɣen qbeř di Saɛir, maca ayt n Ɛisu ksin řwart nsen uca teḥḥan ten zzat i wudem nsen uca ggin zeddɣen din deg wemcan nsen, am mammec tuɣa ittegg Israil s temmurt n řwart nnes, tenni i d asen iwca SIDI.
DEU 2:13 ‘Kkarem řexxu, teẓwam teɣzurt n Zarad!’ Uca neẓwa teɣzurt n Zarad.
DEU 2:14 Tmenya u-třatin n iseggʷusa i nuyur zi Qadac-Barniɛ ařami neẓwa taɣzurt n Zarad, ařami iqḍa jjiř nni n iɛeskariyyen inni issnen amenɣi zi řwesṭ n řmargeḥ n řɛeskar, am mammec tuɣa d asen ijjuǧ SIDI.
DEU 2:15 Ammu i xasen tuɣa afus n SIDI, [ḥima] ad ten iteḥḥa zi řwesṭ n řmargeḥ n řɛeskar ařami qḍan marra.
DEU 2:16 Umi qḍan u mmuten marra iɛeskariyyen inni issnen amenɣi zi řwesṭ n řgens, imsar
DEU 2:17 aqa issiweř akidi SIDI, inna:
DEU 2:18 ‘Ass-a ad teẓwid aymir n [temmurt n] Mu’ab, ɣar [tendint n] Ɛar.
DEU 2:19 Ad dd-tqarrbed ɣar urendad n ayt n Ɛammun. War ten ttessiggʷid ca, war xasen ttɛeddid ca, minzi war d awem tticeɣ řwart zi temmurt n ayt n Ɛammun, minzi wciɣ tt d řwart i ayt n Luṭ.’
DEU 2:20 Tᵉttwaḥseb uřa d Ɛammun d ict n temmurt n Irafawiyyen. Tuɣa Irafawiyyen zeddɣen din qbeř u Iɛamuniyyen qqaren asen Izamzumiyyen.
DEU 2:21 Tuɣa-ten d ijj n řgens imɣar aṭṭas, d azirar n waddud am Iɛanaqiyyen. Tuɣa yareddeǧ i-ten SIDI zzat i wudem nnes u nitni ksin řwart nsen uca zeddɣen deg wemcan nsen.
DEU 2:22 Tuɣa Netta igga ammu ɛawed i ayt n Ɛisu, inni tuɣa izedɣen di Saɛir, maɣar iteḥḥa Ixuriyyen zzatsen uca nitni ksin řwart nsen uca zeddɣen din ař ass-a.
DEU 2:23 Uca Ikafturiyyen nni tuɣa iffɣen zi Kaftur, teḥḥan Iɛawiyyen, inni tuɣa izeddɣen di dcurat ař Ɣazza, uca nitni ggin ad din zedɣen ař ass-a.
DEU 2:24 ‘Kkarem, fesyem [iqiḍan nwem] uca ẓwam taɣzurt [n teɣzart] n Arnun. Xzar, wciɣ Siḥun, ajeǧid n Ḥacbun, Amuri, d temmurt nnes deg ifassen nwem. Bda ad tt teksid uca tadfed akides ɣar garra.
DEU 2:25 Ass-a ad bdiɣ ad arreɣ tiggʷudi d řɛurret zzayek x [marra] řegnus sadu ajenna marra, inni i xak ɣa isřen řexbar uca ad arjijen u ad qdiddsen zzatek.’
DEU 2:26 [Xenni] ssekkeɣ ireqqasen zi řexřa n Qadimut ɣar Siḥun, ajeǧid n Ḥacbun s wawařen n řehna, nniɣ:
DEU 2:27 ‘Ad kkeɣ x temmurt nnec d abrid, x webrid ad raḥeɣ. War heyyḍeɣ x [webrid] [ɣar] yefus uřa [ɣar] uzeřmaḍ.
DEU 2:28 Ad ayi tezzenzed macca i nnuqart ḥima ad cceɣ, aman ad ayi ten tewced i nnuqart ḥima ad sweɣ. Ad ẓwiɣ x iḍaren inu waha
DEU 2:29 - am mammec d ayi sarrḥen ayt n Ɛisu nni izeddɣen di Saɛir d ayt n Mu’ab nni izeddɣen di Ɛar - ařami ɣa ẓwiɣ L’Urdun ɣar temmurt i d aneɣ ɣa iwc SIDI, AREBBI nneɣ.’
DEU 2:30 [Maca] Siḥun, ajeǧid n Ḥacbun war ixs ad aneɣ yejj ad tt neẓwa, minzi SIDI, AREBBI nnec, isseqsaḥ buḥbeř nnes, u isseqsaḥ uř nnes ḥima ad t isellem deg ifassen nnec, am [teǧa] ass-a.
DEU 2:31 Uca inna ayi SIDI: ‘Xzar, Necc bdiɣ ad sellmeɣ Siḥun d temmurt nnes ɣarek. Bda ad tt teksid ḥima ad twarted tammurt nnes.’
DEU 2:32 [Xenni] iffeɣ-dd Siḥun ɣar umsagar akidneɣ, netta ak-d marra řgens nnes, i garra di Yahaṣ.
DEU 2:33 SIDI, AREBBI nneɣ, isellem aneɣ t uca narni t, netta d iḥenjiren nnes d marra řgens nnes.
DEU 2:34 Neksi marra tineddam nnes uca nḥarrem kuř tandint [i uteḥḥi], iryazen d temɣarin d iḥenjiren, war nejji ad iqqim uřa d ijj n umarweř.
DEU 2:35 Mɣir řebhayem d min ittwakeccḍen zi tneddam aqa neksi aya d tkeccaḍt i yixef nneɣ.
DEU 2:36 Zi Aruɛir nni yeǧan ɣar tma n teɣzart n Arnun, u [zi] tendint nni [yeǧan] di teɣzurt ař Jilɛad, war din tuɣi uřa d ict n tendint tuɛřa xaneɣ ɛad. SIDI, AREBBI nneɣ, isellem aneɣ marra.
DEU 2:37 Maca cek war dd-tqarrbed ca ɣar temmurt n ayt n Ɛammun, marra min tuɣa ɣar tma n teɣzart n Yabbuq d tneddam x idurar, u war dd-tqarrbed ca ɣar uřa d ict n [temmurt] i d aneɣ iḥarrem SIDI.”
DEU 3:1 “[Xenni] nedweř-dd uca ngeɛɛed abrid n Bacan. Iffeɣ-dd Ɛuj, ajeǧid n Bacan, i umsagar akidneɣ, netta d marra řgens nnes, i garra di Idraɛi.
DEU 3:2 [Xenni] inna ayi SIDI: ‘War zzayes tteggʷed ca, minzi sellmeɣ t, netta d marra řgens nnes d temmurt nnes, ɣar ifassen nnec uca ad zzayes tegged am mammec teggid s Siḥun, ajeǧid n Imuriyyen nni tuɣa izeddɣen di Ḥacbun.’
DEU 3:3 Uca SIDI, AREBBI nneɣ, isellem Ɛuj, ajeǧid n Bacan d marra řgens nnes ɣar ifassen nneɣ uca narniy t ař mani war nejji ad iqqim uřa d ijj n umarweř.
DEU 3:4 Di řweqt nni neṭṭef marra tineddam. War din tuɣi uřa d ict n tendint war zzaysen tt neṭṭif: settin n tneddam d marra jjihet n Arjub, tageldit n Ɛuj di Bacan.
DEU 3:5 Marra tineddam nni ttwafaryent s řeḥyuḍ d tiwwura d iɛumad i ubelleɛ. Sennej i uya [tuɣa din] aṭṭas n tneddam deg iyyaren.
DEU 3:6 Uca nḥarrem i-tent [i uteḥḥi], am mammec negga zi Siḥun, ajeǧid n Ḥacbun. Di kuř tandint aqa nḥarrem iryazen d temɣarin d iḥenjiren [i uteḥḥi].
DEU 3:7 [Maca] neksi i yixef nneɣ marra řebhayem d min iqqimen d takeccaḍt zi tineddam.
DEU 3:8 Ammu i neṭṭef di řweqt nni tammurt zi tnayen n ijeǧiden n Imuriyyen nni iǧan x ujemmaḍ n L’Urdun, zi teɣzart n Arnun ař adrar n Ḥarmun
DEU 3:9 - tenni umi qqaren Iṣayduniyyen s yisem n Hirmun Siryun u Imuriyyen qqaren as Sinir -
DEU 3:10 marra tineddam n řwaṭa [yuɛřan] d marra Jilɛad d marra Bacan ař Salxa d Idraɛi, [marra] tineddam n tgeldit n Ɛuj di Bacan.
DEU 3:11 Minzi mɣir Ɛuj, ajeǧid n Bacan, tuɣa iqqim zi min iqqimen n Irafawiyyen. Xzar, qama nnes d ict n qama n wuzzař, ma war iǧi di Rabba n ayt n Ɛammun? Tuzzeggart nnes tesɛa n iɣaǧen u tiru nnes arebɛa n n iɣaǧen, [ɛbaren tt] s uɣiř n ijj n weryaz.
DEU 3:12 Di řweqt nni neṭṭef tammurt-a d řwart, zi [tendint n] Ɛaruɛir, nni iǧan ɣar teɣzart n Arnun, uřa d azyen n idurar n Jilɛad ak-d tneddam nnes, uca wciɣ tt i Irubiniyyen d Ijadiyyen.
DEU 3:13 Min iqqimen n Jilɛad d marra Bacan, tageldit n Ɛuj, wciɣ tt i wezyen n teqbič n Manassa. Marra jjihet n Arjub ak-d marra Bacan qqaren as tammurt n Irafawiyyen.
DEU 3:14 Ya’ir, mmis n Manassa, iṭṭef marra tammurt n Arjub ař weymir i iǧan ak-d Ijacuriyyen d Imaɛkiyyen uca iřaɣa jjwayeh nni s yisem nnes: [jjihet n] Bacan, dcurat n Ya’ir. D wa [d isem nsen ař] ass-a.”
DEU 3:15 “I Makir wciɣ as Jilɛad.
DEU 3:16 I Irubiniyyen d Ijadiyyen wciɣ asen [min iqqimen] n Jilɛad ař teɣzart n Arnun, [ař] řwesṭ n iɣzar [nni iǧan] d aymir, ař tiɣzart n Yabbuq [nni iǧan] d aymir ak-d ayt n Ɛammun.
DEU 3:17 [Ɛawed wciɣ asen] Řewḍa d L’Urdun [nni iǧan] d aymir zi Kinnarat ař řebḥar n Řewḍa, Řebḥar Ameǧah, wadday n teysarin [n wedrar n] Fisja, ɣar uɣezdis n ccarq.”
DEU 3:18 “Di řweqt nni weṣṣiɣ kenniw, nniɣ: ‘SIDI, AREBBI nwem, iwca awem tammurt-a, ḥima ad tt tᵉṭṭfem d řwart. Ittxeṣṣa ad teẓwam twejdem i umenɣi zzat i aytmatwem, ayt n Israil, marra ayt n umenɣi.
DEU 3:19 Iɛeddeř ad qqimen di tneddam nwem, tenni d awem wciɣ necc, mɣir temɣarin nwem d iḥenjiren nwem d řebhayem nwem - aqa ssneɣ belli ɣarwem aṭṭas n řebhayem -
DEU 3:20 ař ɣa iwc SIDI arraḥet i aytmatwem am mammec i d awem iwca, uca uřa d nitni ad ksin tammurt nni i d asen ɣa iwc SIDI, AREBBI nwem, d řwart x ujemmaḍ n [yeɣzar n] L’Urdun. Xenni iɛeddeř ad dd-tdewřem, kuř ijj ɣar tesɣart i d awem wciɣ necc [i kuř ijjen zzaywem].’
DEU 3:21 Di řweqt nni weṣṣiɣ i Yacuwa, nniɣ: ‘Tiṭṭawin nnec ẓrint marra min igga SIDI, AREBBI nwem, s tnayen n ijeǧiden-a. Ammu i ɣa yegg SIDI s marra tigeldiwin i ɣar ɣa teẓwid.
DEU 3:22 War zzaysen teggʷdem, minzi SIDI, AREBBI nwem, ad immneɣ di ṭṭweɛ nwem.’
DEU 3:23 Uca ẓuǧeɣ ɣar SIDI di řweqt nni, nniɣ:
DEU 3:24 ‘Sidi inu, SIDI! Cek tebdid ad tessecned i umsexxar nnec řemɣaret nnec d ufus nnec ijehden, minzi man arebbi i din deg ujenna niɣ di temmurt izemmar ad yegg řexdayem d jjehd am mammec ten tᵉttegged Cek?
DEU 3:25 Ejj ayi ad ẓwiɣ, zawgeɣ Cek, uca ad ẓarɣ tammurt icnan, tenni iǧan x ujemmaḍ n L’Urdun, aqa idurar nni icnan d Lubnan!’
DEU 3:26 Maca SIDI iṣxeḍ xafi [afugem nnes] di ṭṭweɛ nwem uca war d ayi isři. Inna ayi SIDI: ‘Cfa min d ayi tᵉttared, aqa d aṭṭas. War kidi ssiwiř ɛad x tmesřact-a.
DEU 3:27 Aři ɣar tqiccat n Fisja uca sgeɛɛed tamuɣři nnec ɣar řɣarb, ɣar ccamal, ɛar ljanub u ɣar ccarq u xzar [i tt] s ixef n tiṭṭawin nnec, minzi war tẓekkʷwid ca L’Urdun-a.
DEU 3:28 Sellem [řumur] i Yacuwa, egg dayes uř u sejhed i-t, minzi netta ad iẓwa zzat i wudem n řgens-a uca netta ad ten yarr ad warten tammurt i ɣa tẓared [x wedrar Fisja].’
DEU 3:29 Uca neqqim di teɣzurt zzat i Bayt-Faɣur.”
DEU 4:1 “Xenni řexxu, [a] Israil, seř ɣar tweṣṣa d lfarayiḍ nni d awem sseřmadeɣ, maḥend ad [tent] teggem ḥima ad teddarem uca ad tadfem ɣar temmurt nni i d awem ɣa iwc SIDI, AREBBI n řejdud nwem, uca ad tt twartem.
DEU 4:2 War arennyem ɣar wawař i d awem ɣa umureɣ u war zzayes ttekksem, ḥima ad tiřim tᵉttᵉṭṭfem di tweṣṣa n SIDI, AREBBI nwem, tinni zi d awem ttumureɣ.
DEU 4:3 Tiṭṭawin nwem ẓrint min igga SIDI ak-d Baɛl-Faɣur, minzi [marra] aryaz nni iḍeffaren Baɛl-Faɣur, aqa iteḥḥa i-t SIDI, AREBBI nwem, zi řwesṭ nwem.
DEU 4:4 [Maca] kenniw, inni iřessqen ɣar SIDI, AREBBI nwem, aqa kenniw marra teddarem [ɛad] ass-a.
DEU 4:5 Xzarem, necc ssřemdeɣ awem tiweṣṣa d lfarayiḍ am mammec d ayi yumur SIDI, AREBBI inu, ḥima ad [zzaysent] teggem di temmurt i ɣar ɣa tadfem maḥend ad tt twartem.
DEU 4:6 Ṭṭfem [daysent] u ggem [tent], minzi ta ad tiři tiɣit nwem d řeɛqeř nwem zzat i tiṭṭawin n řegnus nni i ɣa isřen marra tiweṣṣa-ya. [Xenni] ad inin nitni: ‘Řgens-a ameqqran wanita d tidett d ijj n řgens d amiɣis u s řeɛqeř!’
DEU 4:7 Minzi man řgens imɣaren i da iǧan, aqa ɣares arebbi yudsen am SIDI, AREBBI nneɣ, řebda xmi xas nettřaɣa?
DEU 4:8 U man řgens da iǧan imɣar, aqa ɣares tiweṣṣa d lfarayiḍ iseggmen am marra Ccariɛa-ya nni d awem ɣa wceɣ ass-a?
DEU 4:9 Maca ḥḍa x yixef nnec uca ṭṭef nican acbar x řeɛmur nnec ḥima war tᵉttud min ẓrint tiṭṭawin nnec u ḥima [timesřayin-a] war dd-tteffiɣent ca zeg wuřawen nnec. Ittxeṣṣa ad tent tessargbed i iḥenjiren nnec u i iḥenjiren n iḥenjiren nnec.
DEU 4:10 Ass min di tuɣa tbedded ɣar [wedrar n] Ḥurib zzat i wudem n SIDI, AREBBI nnec, řami d ayi inna SIDI: ‘Smun ɣari řgens-a, [xenni] Necc ad ten arreɣ ad sřen awařen inu maḥend ad ten ssřemden ḥima ad zzayi ggʷeden marra ussan nni iddaren di temmurt uca [ḥima] ad [ten] ssřemden i iḥenjiren nsen.’
DEU 4:11 [Xenni] tqarrbem-dd kenniw uca tbeddem ɣar iḍaren n wedrar uca adrar yarɣa ařami timessi nnes [tiweḍ] ɣar řwesṭ n ujenna, [uca aqa din] taǧest d iseynuten d yijj n useynu ibbumbes.
DEU 4:12 [Xenni] issiweř akidwem SIDI zi řwesṭ n tmessi. Kenniw tesřim i řḥess n wawařen, [maca] war teẓrim ca addud [nnes], mɣir ict n tmijja [umi tesřim] waha.
DEU 4:13 Netta issargeb kenniw x Řɛahd nnes, wenni yumur ad t teggem, ɛecra n wawařen. Yura ten di tnayen n teřwiḥin n weẓru.
DEU 4:14 I necc [ɛawed] yumur SIDI di řweqt nni maḥend ad kenniw ssřemdeɣ tiweṣṣa d lfarayiḍ maḥend ad zzaysent teggem di temmurt i ɣar ɣa teẓwam ḥima ad tt twartem.”
DEU 4:15 “Ḥḍam nican x řeɛmur nwem, minzi kenniw war teẓrim uřa d ijj n waddud deg wass umi akidwem issiweř SIDI [x wedrar n] Ḥurib zi řwesṭ n tmessi!
DEU 4:16 War ttessefsadem [ixef nwem] umi ɣa teggem i yixef nwem ijj n řexyař ineqcen, addud n ca n ijj n ṣṣanam, addud n ca n ijj n wewtem niɣ n ict n tewtemt,
DEU 4:17 ijj n řexyař n ca n ijj n umuddar nni [iǧan] x temmurt, [niɣ] ijj n řexyař n ca n ijj n wejḍiḍ s wefriwen i iṭṭawen deg ujenna,
DEU 4:18 [niɣ] ijj n řexyař n ca n ijj [n umuddar] nni ittbuɛen x temmurt, [niɣ] ijj n řexyař n ca n ijj n wesřem nni iǧan deg waman sadu temmurt.
DEU 4:19 Ɣarek ad tessgeɛɛded tamuɣři nnec ɣar ujenna uca [xenni] ad tẓared tafuct d uyur d itran, marra řɛeskar n ujenna, uca [xenni] ad ttwaɛarrned ad asen tbendqed uca ad asen tɛebded i nitni, inni ibḍa SIDI, AREBBI nnec, i marra řegnus sadu marra ajenna.
DEU 4:20 SIDI aqa iqbeř i kenniw uca issuffeɣ i kenniw-dd zeg ufarran n wuzzař, zi Miṣra, ḥima ad as tiřim d řgens nnes i iwart, am [teǧa] ass-a.
DEU 4:21 Ɛawed isɛar xafi SIDI di ssibbet n wawařen nwem uca ijjuǧ belli war ẓekkʷwiɣ ca L’Urdun u war ttidfeɣ ɣar temmurt iṣebḥen nni i d ac ɣa iwc SIDI, AREBBI nnec, d řwart,
DEU 4:22 minzi necc ad mmteɣ di temmurt-a, war ẓekkʷiɣ ca L’Urdun. Kenniw ad teẓwam uca ad tᵉṭṭfem tammurt-a icnan.
DEU 4:23 Ḥḍam war tᵉttum Řɛahd n SIDI, AREBBI nwem, wenni igga akidwem uca [ḥḍam] war tteggem i yixef nwem ijj n řexyař ineqcen zi ca n [n řḥajjet] i d ac iḥarrem SIDI, AREBBI nnec.
DEU 4:24 Minzi SIDI, AREBBI nnec, aqa-t d ict n tmessi ittetten, d ijj n Arebbi ittasmen.
DEU 4:25 Xmi ɣa tarwem arraw d ayyawen uca ad tewsarem di temmurt uca [xenni] ad tdeǧmem [ixef nwem], ad teggem ijj n řexyař ineqcen, ṣṣiffet n ca n řḥajjet uca ad teggem řɣar di tiṭṭawin n SIDI, AREBBI nwem umi t ɣa tesɛarem [ammu],
DEU 4:26 [xenni] necc ass-a ad řaɣiɣ x ujenna d temmurt d řechud xawem, aqa kenniw ad tᵉttwahellkem deɣya s tidett di temmurt i ɣar ɣa teẓwam x L’Urdun maḥend ad tt teksim d řwart. War dayes tᵉttɣimim kenniw ca n wussan ktar ɛad, minzi ad tᵉttwateḥḥam qaɛ.
DEU 4:27 SIDI ad kenniw ibezzeɛ jar řegnus uca ad zzaywem iqqim ijj n wuru n yeryazen [waha] jar řegnus mani kenniw ɣa indeh SIDI.
DEU 4:28 Din ad tsexxarem irebbiten nni ittwaggen s ifassen n bnadem s ukeccuḍ d weẓru, inni war ittwařin, war ittesřin, war ittetten u war ittcemman.”
DEU 4:29 “Ad tarzum ssenni SIDI, AREBBI nnec, u cek ad t tafed, mařa tarezzud xas s marra uř nnec d marra řeɛmar nnec.
DEU 4:30 Mařa cek di řeḥṣaret uca ad ɣarek dd-asen marra awařen-a deg uneggar n wussan, [xenni] ad dd-tdewřed ɣar SIDI, AREBBI nnec, u ad tesřed i tmijja nnes,
DEU 4:31 minzi SIDI, AREBBI nnec, d ijj n Arebbi yareḥḥmen, war cek ittejji u war cek ittareddeǧ. War ittettu Řɛahd n řejdud nnec, wenni d asen ijjuǧ.
DEU 4:32 Seqsa xenni x wussan iɛdun, inni iǧan qbeř i cek, zeg wass min di igga AREBBI bnadem x temmurt, [seqsa] zi ṭṭarf n ujenna ɣar ṭṭarf nneɣni n ujenna, ma [ɛemmarṣ] temsar ca n řḥajjet temɣar anect n tanita niɣ ittwaseř [ca] am man aya?
DEU 4:33 Ma [ɛemmarṣ] isřa ca n řgens tmijja n AREBBI tessiweř zi řwesṭ n tmessi am mammec tt ttesřid cek uca [xenni iqqim] iddar?
DEU 4:34 Niɣ ma iqeǧeb [ɛemmarṣ] ijj n arebbi ad dd-yas maḥend ad iksi i yixef nnes ijj n řgens zi řwesṭ n ijj n řgens [nneɣni] s tjarribin, s řeɛřamat, s lmuɛjizat, s umenɣi, s ufus ijehden, s uɣiř isswiẓẓḍen u s tmegga ssiggʷident mɣarent, am marra min igga SIDI, AREBBI nwem, zzat i tiṭṭawin nwem di Miṣra?
DEU 4:35 Aqa i cek umi dd-ittwassban aya, ḥima ad tessned belli SIDI d AREBBI [i iǧa]. War din ca nneɣni mɣir Netta.
DEU 4:36 Zeg ujenna igga ad tesřed i tmijja nnes ḥima ad cek inebbeh u x temmurt aqa isscen ac timessi nnes imɣaren u aqa tesřid awařen nnes zi řwesṭ n tmessi.
DEU 4:37 Minzi Netta tuɣa ixs řejdud nnec, u ifarz zzariɛet nnes awarni as, aqa issuffeɣ i cek-dd s Yixef nnes zi Miṣra s jjehd nnes imɣaren
DEU 4:38 ḥima ad yaẓẓeř zzat i wudem nnec x řegnus imɣaren d yinni xak ijehden zi teṣɣart nsen, u [ḥima] ad dayes issidef cek u ad ac iwc tammurt nsen d řwart, am mammec [i teǧa] ass-a.
DEU 4:39 [Xenni] ssen ass-a uca xarreṣ [x man aya] deg wuř nnec belli SIDI d AREBBI i yeǧa, sennej deg ujenna u swadday di temmurt, war din ḥed nneɣni!
DEU 4:40 Ṭṭef di tweṣṣa nnes u di řumurat nnes, tinni d ac umureɣ ass-a ḥima ad iffeɣ umeddur mliḥ i cek u i iḥenjiren nnec awarni ac uca ad zzugarten ussan di temmurt i d ac ɣa iwc SIDI, AREBBI nnec, i řebda.”
DEU 4:41 Xenni ifarz Musa třata n tneddam n tarewřa x ujemmaḍ n L’Urdun manis dd-tneqqar tfuct,
DEU 4:42 ḥima ad din yařwer uqettař nni inɣin, břa ma ad as igg řeḥsab, jjar nnes, wenni umi war icarrhen ɛemmarṣ [iḍennaḍ uřa d fariḍennaḍ]. Wanita izemmar ad yarweř ɣar ict zi tneddam-a ařami [iqqim] iddar netta.
DEU 4:43 Baṣir di řexřa, di řwaṭa [yuɛřan], i Rubiniyyen, u Ramut di Jilɛad i Ijadiyyen u Julan d Bacan i Imanassiyyen.
DEU 4:44 Ta d Ccariɛa nni igga Musa zzat i ayt n Israil.
DEU 4:45 Ina d cchadat d tiweṣṣa d lfarayiḍ nni issiweř Musa ɣar ayt n Israil umi dd-ffɣen zi Miṣra.
DEU 4:46 [Aya tuɣa] x ujemmaḍ n L’Urdun, di teɣzurt arendad n Bayt-Faɣur, di temmurt n Siḥun, ajeǧid n Imuriyyen, wenni tuɣa izeddɣen di Ḥacbun, wenni x iɣřeb Musa ak-d ayt n Israil umi dd-ffɣen zi Miṣra.
DEU 4:47 [Aqa] ksin tammurt nnes am řwart uřa d tammurt n Ɛuj, ajeǧid n Bacan, [timmura n] tnayen n ijeǧiden n Imuriyyen nni [tuɣa zeddɣen] x ujemmaḍ n L’Urdun manis dd-tneqqar tfuct,
DEU 4:48 zi Ɛaruɛir nni iǧan ɣar tma n teɣzart n Arnun ař wedrar n Siyun nni iǧan d [wedrar n] Ḥirmun,
DEU 4:49 d marra řewḍa x ujemmaḍ n L’Urdun, ɣar ccarq, ař Řebḥar n Řewḍa nni [iǧan] wadday n teysarin [n wedrar n] Fisja.
DEU 5:1 Iřaɣa Musa i marra Israil uca inna asen: “Sřem, a Israil, i tweṣṣa d lfarayiḍ, tinni i xef ssiwřeɣ necc ass-a deg imezzuɣen nwem, ḥima ad tent třemdem u ad tent teḥḍam maḥend ad zzaysent teggem.
DEU 5:2 SIDI, AREBBI nneɣ, igga ijj n Řɛahd akidneɣ di Ḥurib.
DEU 5:3 War iǧi ak-d řejdud nneɣ i igga AREBBI Řɛahd-a, maca akidneɣ, neccin, inni da [ibedden] ddaren marra ass-a.
DEU 5:4 Udem ak-d wudem issiweř akidwem SIDI x wedrar, zi řwesṭ n tmessi.
DEU 5:5 Tuɣa ayi di řweqt nni beddeɣ jar SIDI d kenniw ḥima ad kenniw ssaregbeɣ x wawař n SIDI, minzi tuɣa kenniw teggʷdem zi tmessi u war tgeɛɛadem ca ɣar wedrar. [Uca] Netta inna:
DEU 5:6 ‘Necc d SIDI, AREBBI nnec, wenni cek-dd issuffɣen zi temmurt n Miṣra, zi taddart n tesmuɣi.
DEU 5:7 War ɣarek ttiřin ca irebbiten nneɣni zzat i wudem inu.
DEU 5:8 War ttegg i yixef nnec ijj n řexyař ineqcen [niɣ] min ma řexyař n min [din iǧan] sennej deg ujenna niɣ swadday x temmurt niɣ deg waman sadu temmurt.
DEU 5:9 War d asen ttbendeq u ad asen tɛebded, minzi Necc, SIDI, AREBBI nnec, d ijj n Arebbi ittasmen, wenni dd-yarezfen řmuɛṣiyyet n ibabaten deg iḥenjiren ař [jjiř] wiss třata u wiss arebɛa n yinni d ayi icarrhen,
DEU 5:10 [maca] wenni issecnen tamexsiwt icewwaren i řuřuf n yinni d ayi ittexsen u ḥeṭṭan tiweṣṣa inu.
DEU 5:11 War neṭṭeq s Yisem n SIDI, AREBBI nnec, di řbaṭeř, minzi SIDI war ittbarri wenni i ɣa ineṭqen s Yisem nnes di řbaṭeř.
DEU 5:12 Ḥḍa ass n ssebt ḥima ad t tessqeddsed am mammec d ac yumur SIDI, AREBBI nnec.
DEU 5:13 Setta n wussan ad txedmed, ad tegged marra řxedmet nnec,
DEU 5:14 maca ass wiss sebɛa d ass n ssebt n SIDI, AREBBI nnec. War [dayes] tᵉttegged uřa d ict n řxedmet, cek [lla] uřa d mmic d yeǧic d yismeɣ nnec d tayya nnec d ufunas nnec d weɣyuř nnec d řebhayem nnec uřa d abarrani nni [akik] iǧan daxeř i tewwura nnec [lla], ḥima ismeɣ nnec d tayya nnec ad areyyḥen am cek.
DEU 5:15 Ad tɛeqřem belli tuɣa cek d ismeɣ di temmurt n Miṣra u SIDI, AREBBI nnec, aqa issuffeɣ i cek-dd ssenni s yijj n ufus ijehden d ijj n uɣiř isswiẓẓḍen. X uya yumur cek SIDI, AREBBI nnec, ad teḥḍid ass n ssebt.
DEU 5:16 Weqqar babac d yemmac, am mammec i d ak yumur SIDI, AREBBI nnec maḥend ussan [n tudart] nnec [zemmaren] ad zzuggarten uca ad iffeɣ umeddur nnec mliḥ x wudem [n temmurt] i d ac ɣa iwc SIDI, AREBBI nnec.
DEU 5:17 War neqq.
DEU 5:18 War zenna.
DEU 5:19 War ttacar.
DEU 5:20 War cehhed s ẓur ḍidd i jjar nnec.
DEU 5:21 War ttegg meẓri di temɣart n jjar nnec u war ḍemmeɛ di taddart n jjar nnec, niɣ deg iyyar nnes, niɣ deg yismeɣ nnes, niɣ di tayya nnes, niɣ deg ufunas nnes, niɣ deg weɣyuř nnes, niɣ di ca zi marra min iǧan ɣar jjar nnec.’
DEU 5:22 Issiweř SIDI awařen-a ak-d marra agraw nwem [n řgens] s ict n tmijja ijehden x wedrar, zi řwesṭ n tmessi, zeg iseynuten u zeg useynu ibbumbes u war immarni ca ktar. Yuri ten x tnayen n teřwiḥin n weẓru uca iwca i-tent i necc.
DEU 5:23 Uca imsar, umi tesřim kenniw i tmijja zi řwesṭ n taǧest uca adrar icemmeḍ s tmessi, aqa tqarrbem-dd ɣari, marra izeǧifen n tqebbař nwem d imɣaren nwem,
DEU 5:24 tennam ayi: ‘Xzar, SIDI, AREBBI nneɣ, isscen aneɣ-dd aɛuǧi nnes d řemɣaret nnes uca nesřa i tmijja nnes zi řwesṭ n tmessi. Ass-a neẓra belli SIDI issiweř ak-d bnadem uca wa [iqqim] iddar.
DEU 5:25 Řexxu [xenni], mayemmi ɣa nemmet? Minzi timessi-ya imɣaren ad aneɣ tecc. Mařa neqqim nᵉttesřa i tmijja n SIDI, AREBBI nneɣ, ad nemmet.
DEU 5:26 Minzi man wen [i din yeǧan] jar marra min ɣares arrimet, wenni isřan i tmijja n AREBBI iddaren tessiweř-dd zi řwesṭ n tmessi am neccin, d wenni iddaren [ɛad]?
DEU 5:27 Ad dd-tqarrbed cek u ad tesřed ɣar marra min ɣa yini SIDI, AREBBI nneɣ, uca [xenni] ad tessiwřed akidneɣ x marra min d ac ɣa yini SIDI, AREBBI nneɣ, u neccin ad [as] nseř uca ad [zzayes] negg.’
DEU 5:28 Isřa SIDI i tmijja n wawařen nwem umi kidi tessiwřem uca inna ayi SIDI: ‘Sřiɣ i tmijja n wawařen n řgens-a, [awařen] nni kik ssiwřen. Aqa mliḥ, marra kik ssiwřen nitni.
DEU 5:29 Iři ad asen immewc ijj n wuř maḥend ad ayi ggʷeden uca ad ḥḍan tiweṣṣa inu marra ussan qaɛ ḥima nitni d tarwa nsen ad iřin mliḥ i řebda!
DEU 5:30 Ruḥ, tinid asen: Dewřem-dd ɣar iqiḍan nwem!
DEU 5:31 Uca cek, bedd da kidi, ḥima ad akidek ssiwřeɣ tiweṣṣa d lfarayiḍ nni i d asen ɣa tessřemded ḥima ad zzaysent ggen di temmurt nni i d asen ɣa wceɣ d řwart.’
DEU 5:32 Ḥḍam ḥima ad teggem am mammec i d awem yumur SIDI, AREBBI nwem, war ttḥeyydem [x man aya], war iǧi [ɣar] yefus uřa [ɣar] uzeřmaḍ.
DEU 5:33 Ad tuyurem marra abrid nni d awem yumur SIDI, AREBBI nwem, ḥima ad teddarem uca ad tiřim mliḥ u ḥima ad zzuggarten ussan nwem di temmurt nni i ɣa teksim d řwart.”
DEU 6:1 “Tina d tiweṣṣa d lfarayiḍ nni yumur SIDI, AREBBI nwem, maḥend ad awem tent ssřemdeɣ, ḥima ad zzaysent teggem di temmurt i ɣar ɣa teẓwam maḥend ad tt teksim d řwart,
DEU 6:2 ḥima ad teggʷded SIDI, AREBBI nnec, uca ad teḥḍid marra tiweṣṣa nnes d řumurat nnes nni i d ac umureɣ, cek d mmic d mmis n mmic, marra ussan n tudart nnec, ḥima ussan [n tudart] nnec ad zzuggarten.
DEU 6:3 Seř, a Israil, ḥḍa ad [zzaysent] tegged, ḥima ad tiřid mliḥ u ḥima kenniw ad temmarnim s waṭṭas di temmurt ifeyyḍen s uɣi d tamment, am mammec tuɣa inna SIDI, AREBBI n řejdud nnec.”
DEU 6:4 “Seř, a Israil, SIDI, AREBBI nneɣ, SIDI d Ijj.
DEU 6:5 Ad texsed SIDI, AREBBI nnec, s marra wuř nnec u s marra řeɛmar nnec u s marra jjehd nnec.
DEU 6:6 Awařen-a nni i d ac umureɣ ass-a, ad iřin deg wuř nnec.
DEU 6:7 Ad ten tessiggzed i iḥenjiren nnec uca ad xasent tessiwřed xmi ɣa teqqimed di taddart nnec u xmi ɣa tuyured deg webrid u xmi ɣa tᵉṭṭṣed u xmi ɣa tekkared.
DEU 6:8 Ad ten tbeysed am yict n řeɛřamet deg ufus nnec, ad iřint am yijj n ufiřu n useggem jar tiṭṭawin nnec.
DEU 6:9 Uca ad ten tarid x řeḍruf [ɣar uɣezdis n tewwart] n taddart nnec u di tewwura nnec.”
DEU 6:10 “Uca ad imsar, xmi SIDI, AREBBI nnec, ad cek yawi di temmurt i x ijjuǧ i řejdud nwem, i Ibrahim d Isḥaq d Yaɛqub, maḥend ad ac tt iwc, [s] tneddam imɣaren icnan, tinni war tebnid cek
DEU 6:11 u s tudrin iccuren [s] marra řxar i zi war [tent] teccured cek, u [s] teɣzin nni cek war teɣzid, u [s] tzayarin d tzemmurin nni war teẓẓud cek. Uca xmi ɣa tecced u ad tejjiwned,
DEU 6:12 ḥḍa [xenni] maḥend war ttᵉttud SIDI wenni cek dd-issuffɣen zi temmurt n Miṣra, zi taddart n tesmuɣi.
DEU 6:13 Ad teggʷded SIDI, AREBBI nnec, ad t tɛebded u s Yisem nnes ad tejjaǧed.
DEU 6:14 War ggurem awarni i irebbiten nneɣni zi irebbiten n řegnus i d awem dd-innḍen
DEU 6:15 - minzi SIDI, AREBBI nwem d ijj n Arebbi ittasmen di řwesṭ nnec - ḥima war xak yareqq weɣḍab n SIDI, AREBBI nnec, uca ad cek iteḥḥa zeg [wudem n] temmurt.
DEU 6:16 War ttqeǧabem ca SIDI, AREBBI nwem, am mammec [t] tqeǧbem di Massa.
DEU 6:17 Ad teḥḍid nican řumurat n SIDI, AREBBI nwem uřa d cchadat nnes d tweṣṣa nnes nni i d ac yumur.
DEU 6:18 Egg min iǧan iseggden d min icnan di tiṭṭawin n SIDI, ḥima ad tiřid mliḥ u ḥima ad tadfed ɣar temmurt icnan i zi ijjuǧ SIDI i řejdud nnec, [ḥima ad asen tt iwc].
DEU 6:19 ḥima ad taẓẓřed x marra řɛedyan zzat i wudem nnec, am mammec issiweř SIDI.”
DEU 6:20 “Xmi cek ɣa isseqsa mmic, ad yini: ‘Min teɛna cchadat d tweṣṣa d lfarayiḍ nni d awem yumur SIDI, AREBBI nneɣ?’,
DEU 6:21 [xenni] ad tinid i mmic: ‘Neccin tuɣa aneɣ d isemɣan n firɛun di Miṣra, [maca] SIDI issuffeɣ aneɣ-dd zi Miṣra s ufus ijehden.
DEU 6:22 SIDI igga, qibač i tiṭṭawin nneɣ, řeɛřamat d lmuɛjizat imɣaren d issiggʷden di Miṣra, ɣar firɛun u ɣar marra taddart nnes.
DEU 6:23 Uca issuffeɣ aneɣ-dd ssenni ḥima ad aneɣ issidef maḥend ad aneɣ yewc tammurt nni x ijjuǧ i řejdud nneɣ,[ḥima ad asen tt iwc].
DEU 6:24 SIDI yumur aneɣ ad negg ɛlaḥsab marra tiweṣṣa-ya, ad neggʷed zi SIDI, AREBBI nneɣ, i řebda, di ṭṭweɛ n tizi nneɣ ḥima ad neddar am [teǧa] ass-a.
DEU 6:25 Man aya ad yiři d tasegda nneɣ xmi ɣa neḥḍa maḥend ad negg marra řumurat-a zzat i wudem n SIDI, am mammec d aneɣ yumur Netta.”
DEU 7:1 “Xmi SIDI, AREBBI nnec, ad cek issidef di temmurt mani ɣa traḥed maḥend ad tt teksid d řwart, uca Netta ad yaẓẓeř zi zzatek aṭṭas n řegnus: Iḥittiyyen d Ijirjaciyyen d Imuriyyen d ayt n Kenɛan d Ifiriziyyen d Iḥiwiyyen d Iyabusiyyen, sebɛa n řegnus mɣaren u jehden xak aṭṭas,
DEU 7:2 uca SIDI, AREBBI nnec, ad ten isellem zzat i wudem nnec u cek ad ten tɣeřbed, [xenni] ittxeṣṣa ad ten tḥarrmed qaɛ i uteḥḥi. War kisen ttegg řɛahd u war d asen sscen řeḥnunect nnec.
DEU 7:3 War teddikkwiřem d iḍeggʷařen ɛawed akidsen. War ttic yeǧic i mmis u war dd-ttawi yeǧis i mmic,
DEU 7:4 minzi aya ad yarr mmic ad dd-idweř zi ḍeffar inu uca ad isexxar i irebbiten nneɣni uca [ammu] ad xawem yareɣ weɣḍab n SIDI uca ad kenniw iteḥḥa deɣya.
DEU 7:5 Ammu [maca] i ittxeṣṣa ad kisen teggem: ad thedmem iɛalṭaren nsen, ad tarẓam imayḍuten nsen [iqeddsen] u ad thedmen tirebbin nsen n cwarti uca ad tesscemḍem řexyařat nsen ineqcen n ukeccuḍ s tmessi.
DEU 7:6 Minzi cek d ijj n řgens iqeddes i SIDI, AREBBI nnec. SIDI, AREBBI nnec, wenni cek ifarzen ḥima ad as tiřid d ijj n řgens iɣřan x marra řegnus [nni yeǧan] x wudem n temmurt.
DEU 7:7 SIDI war ɣarwem iqqen u war kenniw ixḍar umi tuɣa kenniw d aṭṭas zi marra řegnus, minzi tuɣa kenniw teswam qell jar marra řegnus,
DEU 7:8 maca tayri n SIDI i kenniw d uḥeṭṭu nnes x tjaǧit nni ijjuǧ i řejdud nwem, [tajaǧit] i zi kenniw dd-issuffeɣ SIDI s ufus ijehden d [i zi] cek issenjem zi taddart n tesmuɣi, zeg ufus n firɛun, ajeǧid n Miṣra.
DEU 7:9 Ssen xenni, belli SIDI, AREBBI nnec, d AREBBI, aqa Netta d Arebbi amtiqqi, wenni iḥeṭṭan Řɛahd d tmexsiwt icewwaren zi jjihet n yinni t ittexsen uca ḥeṭṭan řumurat nnes, ař jjiř wiss ařef,
DEU 7:10 [maca] marra wi t icarrhen deg uɣembub nnes, aqa Netta ad zzaysen tt ixřef am ten i ɣa yareddeǧ. War ittriji, maḥend ad ixeǧeṣ wenni t icarrhen deg uɣembub nnes.
DEU 7:11 Ḥḍa xenni řumurat d tweṣṣa d lfarayiḍ nni d ac umureɣ necc ass-a maḥend ad zzaysent tegged.”
DEU 7:12 “Ad imsar, umi tesřim i lfarayiḍ-a u kenniw ad tent teḥḍam u ad zzaysent teggem, aqa SIDI, AREBBI nnec, ad ac ibedd x Řɛahd d tamexsiwt icewwaren i tuɣa ijjuǧ i řejdud nnec.
DEU 7:13 Netta ad cek ixs, ad cek ibarek u ad cek yarr deg waṭṭas. Ad ibarek řɣiǧet n uɛeddis nnec d řɣiǧet n temmurt nnec, irden nnec, binu nnec n jdid, zzect nnec [n ṭṭri], tarrawt n tfunasin nnec d imeẓyanen iɛizzen n wuǧi nnec, di temmurt nni tuɣa ijjuǧ i řejdud nnek ad ac tt-i-dd-iwc.
DEU 7:14 Aqa cek tᵉttwabarked jar řegnus! War dayek ittɣimi [ɛad] ḥed i war dd-ittejjin uřa d tenni war ittiriwen, uca ammu uřa di řebhayem nnec.
DEU 7:15 Ad zzayek ikkes SIDI marra řehřac u war cek iřeqqef uřa s ca n řehřacat tiɛeffanint i ɣarek ittwassnen zi Miṣra, [maca] Netta ad tent issiweḍ x marra inni i cek icarrhen.
DEU 7:16 Ad tecced marra řegnus nni d ac ɣa iwc SIDI, AREBBI nnec. Tiṭṭ nnec war xasen tᵉttḥinni u irebbiten nsen war ten tsexxared, minzi aya ad yiři d řfex i cek.
DEU 7:17 Mařa tennid deg wuř nnec: Řegnus-a mɣaren xafi, mammec ɣa zemmareɣ ad zzaysen kkseɣ [ɛemmarṣ] řwart nsen?
DEU 7:18 [Xenni] war zzaysen tteggʷed. Xarreṣ mliḥ di min igga SIDI, AREBBI nnec, ak-d firɛun u ak-d marra Imiṣriyyen,
DEU 7:19 [xarreṣ di] tqeǧabin imɣaren, tinni teẓrid s tiṭṭawin nnec u [di] řeɛřamat d lmuɛjizat d ufus ijehden d uɣiř isswiẓẓḍen ak-d wi cek dd-issuffeɣ SIDI, AREBBI nnec. Ammu i ɣa yegg SIDI, AREBBI nnec, s marra řegnus i zi tteggʷeded.
DEU 7:20 SIDI, AREBBI nnec, ad issekk irezzan iḍarɣařen jar asen, ař ɣa ttwahellken inni iqqimen, inni ittwassnuffaren zzatek.
DEU 7:21 War tteggʷed zzat i wudem nsen, minzi SIDI, AREBBI nnec, aqa-t di řwesṭ nnec, aqa-t d Arebbi imɣaren u issaggʷaden.
DEU 7:22 SIDI, AREBBI nnec, ad issuffeɣ řegnus-a zzatek cwayt cwayt. War izemmar ad xasen teqḍid deɣya, mařa lla ad mmarenyen řewḥuc deg iyyar aṭṭas xak.
DEU 7:23 SIDI, AREBBI nnec, ad ten isellem zzat i wudem nnec u ad ten issxarweḍ s yijj n uxarweḍ imɣar ař ɣa ttwateḥḥan.
DEU 7:24 Ad isellem ijeǧiden nsen deg ufus nnec uca ad temḥid isem nsen zi sadu ujenna. Uřa d ijj n weryaz war izemmar ad ibedd zzat i wudem nnec ař ten ɣa tᵉteḥḥid.
DEU 7:25 Řexyařat ineqcen ad tent tesscemḍed s tmessi. Nnuqart d wureɣ i xasent iǧan war dayes ɛecceq u war t kessi i yixef nnec, ḥima war zzayes tᵉttxarwiḍed, minzi aya d ict n jjɛifect i SIDI, AREBBI nnec.
DEU 7:26 War ttiwi ict n jjɛifect [am ta] ɣar taddart nnec, mařa lla ad tᵉttwaḥarrmed [i uteḥḥi] am netta. Ad zzayes tɛiffed aṭṭas u ad ac tiři d tamennɛit, minzi aqa-tt d ict n řqecɛet n řeḥram.”
DEU 8:1 “Ad teḥḍam marra řumurat i zi d awem umureɣ ass-a, maḥend ad tent teggem, ḥima ad teddarem u ad temmarenyem uca ad tadfem ɣar temmurt, tenni ijjuǧ SIDI i řejdud nwem, uca ad tt teksim d řwart.
DEU 8:2 Ad tidared marra abrid x mani cek igewwed SIDI, AREBBI nnec, arebɛin n iseggʷusa di řexřa ḥima ad cek isswaḍeɛ u ad cek iqeǧeb maḥend ad issen min [din] deg wuř nnec, ma ad teḥḍid řumurat nnes niɣ lla.
DEU 8:3 Netta isswaḍeɛ i cek u issřaẓ i cek u iwca ac ‘manna’ d macca, tenni war tessined ca cek uřa d řejdud nnec war tt ssinen ca, ḥima ad ac isscen belli bnadem war iddar s weɣrum waha, maca aqa bnadem iddar s marra min dd-iffɣen zeg uqemmum n SIDI.
DEU 8:4 Arruḍ nnec [ɛemmarṣ] war xak iwsar uřa d aḍar nnec war yuff ca di [marra] arebɛin n iseggʷusa-ya.
DEU 8:5 Sen deg wuř nnec, belli SIDI, AREBBI nnec, aqa yarebba i cek, am mammec yarebba aryaz mmis
DEU 8:6 uca ḥḍa řumurat n SIDI, AREBBI nnec, ařami teǧid deg ibriden nnes u ařami zzayes tteggʷeded.”
DEU 8:7 “Minzi SIDI, AREBBI nnec, ad cek issidef deg ict n temmurt icnan, ict n temmurt n tɣezratin d řɛunṣarat d [waman] ihewřen, inni dd-iffɣen zi teysart d wedrar,
DEU 8:8 ict n temmurt n irden d imendi d tzayarin d wartan n tazart d iremmamen, ict n temmurt [teccur] s zzect n tzitunt u n tamment,
DEU 8:9 ict n temmurt mani ɣa tecced aɣrum umi war din řexṣeṣ u war cek ittxeṣṣi ca dayes, ict n temmurt, iẓra nnes [ccuren] s wuzzař u zeg idurar nnes ad tneqced nnḥas.
DEU 8:10 Mařa teccid u tejjiwned, ad tbarked SIDI, AREBBI nnec, x temmurt icnan, tenni d ac iwca.”
DEU 8:11 “Ḥḍa ixef nnec, ḥima war tᵉttud SIDI, AREBBI nnec, ařami war teḥḍid řumurat nnes, lfarayiḍ nnes d tweṣṣa nnes, tinni d ac umureɣ ass-a,
DEU 8:12 ḥima war ittiři - mařa teccid u tejjiwned uca aqa tebnid tudrin icnan, tinni i di teggid ad [daysent] tzedɣed,
DEU 8:13 uca ifunasen d tfunasin nnec d wuǧi nnec ttwammarnin u nnuqart d wureɣ nni ɣarek aqa ttwammarnin, u marra min ɣarek aqa ittwammarni -
DEU 8:14 ad tessgeɛɛded uř nnec, ad tᵉttud SIDI, AREBBI nnec, wenni cek dd-issuffɣen zi temmurt n Miṣra, zi taddart n tesmuɣi ...
DEU 8:15 d Wenni i cek dd-inedhen di řexřa imɣaren u issaggʷaden mani tuɣa ifiɣran yarɣin d tɣarḍmiwin uřa di tammurt ittfadan břa aman, d Wenni dd-issuffɣen aman zeg weẓru n sseǧaḥ,
DEU 8:16 d Wenni d ac iwcin ‘manna’ i macca di řexřa, [manna] nni war ssinen řejdud nwem, ḥima ad cek isswaḍeɛ u ḥima ad cek iqeǧeb u ḥima ad ac igg tcuni ɣar uneggar,
DEU 8:17 uca [xenni] ad tinid deg wuř nnec: ‘[S] tzemmar inu d jjehd n ufus inu ṭṭfeɣ marra řeksibet-a i yixef inu.’
DEU 8:18 Idar SIDI, AREBBI nnec aqa Netta i d ac iwcin jjehd ḥima ad tkesbed ict n řeksibet temɣar maḥend ad imten [ammu] Řɛahd nnes nni tuɣa ijjuǧ i řejdud nnec, am [teǧa] ass-a.
DEU 8:19 Mařa tiwḍed ad tᵉttud SIDI, AREBBI nnec, uca ad tuyured awarni i irebbiten nneɣni, ad asen tɛebded u ad asen tbendqed, necc ass-a barrḥeɣ ac-dd, aqa ad tᵉttwahellkem s ttidet.
DEU 8:20 Ad tᵉttwahellkem am řegnus nni x yuẓẓeř SIDI zzat i wudem nwem, minzi war tesřim i tmijja n SIDI, AREBBI nwem.”
DEU 9:1 “Seř, Israil, ass-a ad teẓwid L’Urdun, maḥend ad tadfed [ɣar temmurt], ḥima ad tekksed řwart n řegnus imɣaren u zeg inni xak ijehden, [inni ɣarsen] tineddam timeqqranin nni ttwafaryent ař ajenna,
DEU 9:2 ijj n řgens [n iwdan] izzugarten, ayt n Iɛanaqiyyen inni tessned [ɛad] u x yinni tesřid [qqaren]: ‘Wi ɣa ibedd zzat i wudem n ayt n Iɛanaqiyyen?’
DEU 9:3 Ssen xenni, aqa SIDI, AREBBI nnec, d wenni izwaren zzat i wudem nnec. Netta d ict n tmessi ittetten, Netta ad ten iteḥḥa u ad ten isswaḍeɛ zzat i wudem nnec uca cek ad zzaysen tekksed řwart nsen u ad ten taredǧed deɣya am mammec ɣarek dd-issiweř SIDI.
DEU 9:4 Řami SIDI, AREBBI nnec, xasen yuẓẓeř zzatek, [xenni] war qqar deg wuř nnec, ad tinid: ‘SIDI issidef ayi-dd di ssibbet n tsegda inu maḥend ad ksiɣ tammurt-a d řwart’. [Minzi] di ssibbet n tuɛeffna n řegnus-a ad zzaysen ikkes SIDI řwart nsen zzat i wudem nnec.
DEU 9:5 War iǧi di ssibbet n tsegda nnec, war iǧi di ssibbet n řeṣfayet n wuř nnec, ad din traḥed ḥima ad teksid tammurt nsen d řwart, maca di ssibbet n tuɛeffna n řegnus-a u ḥima ad iḥḍa awař nni zi ijjuǧ SIDI, AREBBI nnec, i řejdud nnec, i Ibrahim d Isḥaq d Yaɛqub, ad zzaysen ikkes SIDI, AREBBI nnec, řwart nsen zzat i wudem nnec.”
DEU 9:6 “S uya i ɣa tessned, belli war iǧi di ssibbet n tsegda nnec i d ac iwca SIDI, AREBBI nnec, tammurt-a icnan maḥend ad tt teksid d řwart, minzi kenniw d ijj n řgens d aɣennan.
DEU 9:7 Idar, war ttᵉttu, belli teggid ad idduqqez weɣḍab n SIDI, AREBBI nnec, di řexřa. Zeg wass nni di teffɣed zi temmurt n Miṣra ařami dd-tudfed ɣar wemcan-a, tuɣa tɣewwɣem kenniw x SIDI.
DEU 9:8 Minzi di Hurib teggim ad idduqqez weɣḍab n SIDI, ařami xawem isɛar SIDI ařami ixs ad kenniw iteḥḥa.
DEU 9:9 Řami uřyeɣ ɣar wedrar ḥima ad ṭṭfeɣ tiřwiḥin n weẓru, tiřwiḥin n Řɛahd nni akidwem igga SIDI, qqimeɣ arebɛin n wussan d ǧyaři deg wedrar. Aɣrum war t cciɣ, aman war ten swiɣ.
DEU 9:10 Iwc ayi SIDI tnayen n teřwiḥin n weẓru urint s uḍaḍ n AREBBI u daysent marra awařen nni tuɣa kiwem issiweř SIDI deg wedrar zi řwesṭ n tmessi deg wass n wegraw [n řgens].
DEU 9:11 Imsar ɣar uneggar n arebɛin n wussan d arebɛin n ǧiyaři, řami d ayi iwca SIDI tnayen n teřwiḥin n weẓru, tiřwiḥin n Řɛahd,
DEU 9:12 inna ayi SIDI: ‘Kkar, hwa deɣya ssa, minzi řgens nnec, wenni tnedhed zi Miṣra, aqa iḍeyyeɛ i-t. Weddaren deɣya abrid nni i x ten weṣṣiɣ. Ggin i yixef nsen ijj n řexyař ifesyen.’
DEU 9:13 Issiweř akidi SIDI ɛawed, inna: ‘Necc ẓriɣ řgens-a, uca xzar, netta d ijj n řgens iqseḥ.
DEU 9:14 Ejj ayi ad ten teḥḥiɣ u ad mḥiɣ isem nsen zi swadday n ujenna, ad cek ggeɣ d ijj n řgens ijehden u imɣar x wanita.’”
DEU 9:15 “Uca dewřeɣ-dd, hwiɣ-dd zeg wedrar. Tuɣa adrar yareqq s tmessi u tuɣa ɣari tnayen n teřwiḥin n Řɛahd di tnayen n ifassen inu.
DEU 9:16 Ẓriɣ, aqa da, kenniw texḍam ak-d SIDI, AREBBI nwem. Teggim i yixef nwem ijj n uɛejmi ifesyen. Kenniw tiggʷejem deɣya x webrid nni x d awem yumur SIDI.
DEU 9:17 [Xenni] ṭṭfeɣ tnayen n teřwiḥin, nḍareɣ tent zi tnayen n ifassen inu, arẓiɣ tent zzat i tiṭṭawin nwem.
DEU 9:18 Wḍiɣ [ɣar temmurt] zzat i wudem n SIDI am umur amezwaru, arebɛin n wussan d arebɛin n ǧyaři war cciɣ aɣrum u war swiɣ aman di ssibbet n ddnub i teggim umi teggim min iǧan d řɣar di tiṭṭawin n SIDI u umi t tesɛarem.
DEU 9:19 Minzi ggʷedeɣ zeg weɣḍab d wesɛar i zi xawem tuɣa SIDI iffugem u tuɣa ixs ad kenniw iteḥḥa. [Maca] SIDI isřa ayi ɛad twařa-ya.
DEU 9:20 Tuɣa SIDI ɛawed isɛar aṭṭas x Harun ařami tuɣa ixs ad t iteḥḥa. Ẓẓuǧeɣ ɛawed di ṭṭweɛ n Harun di řweqt nni d ijjen.
DEU 9:21 Ddenb nwem, wenni d aɛejmi nni teggim, ksiɣ t uca sscemḍeɣ t di tmessi, ceǧqeɣ t, haryeɣ t mliḥ, ařami idweř d ifsus am tɛejjajt uca nḍareɣ taɛejjact nnes di teɣzart nni dd-ihekkwan zeg wedrar.
DEU 9:22 Tanya di Tabɛira, di Massa u di Qabarut-Hata’awat tessffugmem SIDI.
DEU 9:23 Uca umi kenniw issekk SIDI zi Qadac-Barniɛ, inna: ‘Ařyem u ṭṭfem tammurt d řwart, [tammurt] nni i d awem wciɣ Necc!’, tuɣa kenniw [ɛawed] tɣewwɣem x [řumur zeg] uqemmum n SIDI, AREBBI nwem, war tuminem, war tesřim i tmijja nnes.
DEU 9:24 Tuɣa kenniw tɣewwɣem x SIDI zeg wass nni kenniw ssneɣ.
DEU 9:25 Ɣenseɣ ixef inu zzat i wudem n SIDI, [marra] arebɛin n wussan d arebɛin n ǧyaři nni, tuɣa ayi [din] ɣenseɣ zzat i wudem n SIDI, minzi SIDI inna, belli Netta ad kenniw iteḥḥa.
DEU 9:26 Ẓuǧeɣ i SIDI uca nniɣ: ‘[A] Sidi inu, SIDI, war tthellak řgens d řwart nnec, wenni tfekked s řemɣaret nnec, aqa Cek tnedhed ten zi Miṣra s ufus nnec ijehden.
DEU 9:27 Idar imsexxaren nnec, Ibrahim, Isḥaq d Yaɛqub, war xezzar ɣar tɣennant n řgens-a uřa ɣar tuɛeffna nnes d ddenb nnes,
DEU 9:28 ḥima, inni [di] temmurt i zi d aneɣ dd-tessuffɣed, war qqaren: Minzi SIDI war izemmar ad ten issidef di temmurt i x tuɣa kisen issawař, u minzi icarh i-ten, aqa issuffeɣ i-ten-dd maḥend ad ten ineɣ di řexřa.
DEU 9:29 Aqa nitni d řgens nnec d řwart nnec, wenni dd-tessuffɣed s tzemmar nnec tameqqrant u s uɣiř nnec isswiẓẓḍen!’”
DEU 10:1 “Di řweqt nni d ijjen inna ayi SIDI: ‘Nqec tnayen n teřwiḥin n weẓru am tinni timezwura uca geɛɛed-dd ɣari ɣar wedrar uca egg i cek ict n Ttabut n ukeccuḍ.
DEU 10:2 Ad ariɣ di teřwiḥin awařen nni tuɣa di teřwiḥin timezwura nni tarẓid uca ad tent tessarsed di Ttabut.
DEU 10:3 Necc ggiɣ ict n Ttabut n ukeccuḍ n ukasiya uca neqceɣ tnayen n teřwiḥin n weẓru am tmezwura. Geɛɛdeɣ ɣar wedrar s tnayen n teřwiḥin deg ufus inu.
DEU 10:4 Yura x teřwiḥin, anect n tira tamezwarut, ɛecra n wawařen nni tuɣa issiweř SIDI deg wass n wegraw [n řgens] x wedrar zi řwesṭ n tmessi uca iwca i-tent ayi-dd SIDI.
DEU 10:5 Dewřeɣ-dd u hwiɣ-dd zeg wedrar uca ssarseɣ tiřwiḥin di Ttabut nni ggiɣ uca diha i ǧant [ɛad], am mammec d ayi yumur SIDI.”
DEU 10:6 Fesyen ayt n Israil iqiḍan nsen zi Biɛrut-Bani-Yaɛqan, ffɣen ɣar Musira. Dinni immut Harun uca ittwanḍeř din. Mmis Aliɛazar idweř d akehhan deg wemcan nnes.
DEU 10:7 Ssenni mmuṭṭiyen ɣar Judjud u zi Judjud ɣar Yuṭbata, tammurt n tɣezratin n waman.
DEU 10:8 Di řweqt nni d ijjen iḥuzz SIDI taqbič n Lawi ḥima ad arbun Ttabut n Řɛahd n SIDI maḥend ad bedden zzat i wudem n SIDI, ad as sexxaren u ad barken deg Yisem nnes, ař ass-a.
DEU 10:9 X uya Lawi war ɣares tuɣi ca n tesɣart, uřa d ca n řwart ak-d aytmas. SIDI d řwart nnes, am mammec d as inna SIDI, AREBBI nnec.
DEU 10:10 “Uca necc qqimeɣ x wedrar, am wussan imezwura, arebɛin n ussan d arebɛin n ǧyaři uca isřa ayi SIDI ɛawed twařa-ya, aqa SIDI tuɣa war ixs ad kenniw issexsar.
DEU 10:11 Inna ayi SIDI: ‘Kkar, uyur deg webrid zzat i wudem n řgens, ḥima ad adfen ɣar temmurt, tenni jjuǧeɣ i řejdud nsen ad asen tt-i-dd-wceɣ, ad tt ksin d řwart.’
DEU 10:12 Řexxu xenni, [a] Israil! Min zzayek ittar SIDI, AREBBI nnec, mɣir ad teggʷeded SIDI, AREBBI nnec, ad tuyured deg ibriden nnes u ad t texsed uca ad tsexxared i SIDI, AREBBI nnec s marra uř nnec u s marra řeɛmar nnec,
DEU 10:13 uca ad teḥḍid řumurat n SIDI d tweṣṣa nni necc xak carḍeɣ ass-a i tizi nnec.
DEU 10:14 Xzar, ajenna d ujenna n ijenwan d marra min dayes i SIDI, AREBBI nnec i iǧan.
DEU 10:15 Mɣir ɣar řejdud nnec waha i iqqen SIDI Ixef nnes ḥima ad ten ixs u Netta ixḍar zzariɛet nsen awarni asen, aqa d kenniw, zi marra řegnus, am [teǧa] ass-a.
DEU 10:16 Xetnem xenni i řeɛdařyet n wuř nwem, war sqessiḥem ca ɛad ktar uřawen nwem,
DEU 10:17 minzi SIDI, AREBBI nwem, d AREBBI x [marra] irebbiten d Sidi x [marra] isiditen, ijj n Arebbi imɣar d ajebbar d ameggʷed, wenni war itteggen řfarz deg iwdan niɣ ikessi ccarḍ,
DEU 10:18 wenni itteggen tasegda i uyujiř d tajjač, wenni ittexsen abarrani u iwca as aɣrum d arruḍ.
DEU 10:19 Ittxeṣṣa ad texsem abarrani, minzi tuɣa kenniw d ibarraniyyen di temmurt n Miṣra.
DEU 10:20 Ad teggʷeded SIDI, AREBBI nnec, ad as tsexxared uca ad as třeṣqed u s Yisem nnes ad tejjaǧed.
DEU 10:21 Aqa Netta d asebbaḥ nnec, uca Netta d AREBBI nnec, wenni ɣarek iggin řxedmet-a d tameqqrant uřa d [marra] timesřayin-a issaggʷaden tinni ẓrint tiṭṭawin nnec.
DEU 10:22 Řejdud nwem hwan-dd s sebɛin n řeɛmur ɣar Miṣra uca řexxu igga i-c SIDI, AREBBI nnec, aṭṭas am yitran n ujenna.”
DEU 11:1 “Ad texsed SIDI, AREBBI nnec uca ad teḥḍid min [d ac] yumur Netta, tiweṣṣa nnes d lfarayiḍ nnes d řumurat nnes, marra ussan.
DEU 11:2 Ittxeṣṣa ad tessnem ass-a, necc war ssiwřeɣ ak-d iḥenjiren nwem, inni war tt issinen u war ẓrin ttarbiyyet n SIDI, AREBBI nwem, d řemɣaret nnes d ufus nnes ijehden d uɣiř nnes isswiẓẓḍen
DEU 11:3 d řeɛřamat nnes d timegga nnes, tinni igga di řwesṭ n Miṣra, zzat i firɛun, ajeǧid n Miṣra, u zzat i marra tammurt nnes,
DEU 11:4 ... min igga ak-d řɛeskar n Imiṣriyyen d iysan nsen d ikarruten nsen, mammec d yarra aman n Řebḥar n Telga ad feyyḍen x izeǧifen nsen umi kenniw ḍfaren. Aqa ihellek i-ten SIDI, ař ass-a,
DEU 11:5 ... d min akidwem igga di řexřa ařami tiwḍem ɣar wemcan-a,
DEU 11:6 ... d min igga ak-d Datan d Abiram, iḥenjiren n Iliyab, mmis n Rubin, mammec tarzem temmurt aqemmum nnes uca tsarḍ i-ten ak-d raǧ nsen d iqiḍan nsen u ak-d marra inni [din] ibedden, inni ten dd-iḍfaren deg iṣuraf nsen, di řwesṭ n marra Israil.
DEU 11:7 Aqa tiṭṭawin nwem ẓrint marra timegga timeqqranin n SIDI nni tuɣa igga Netta.”
DEU 11:8 [Xenni] ḥḍam marra tiweṣṣa nni i d awem umureɣ ass-a, ḥima ad zzaysent tjehdem uca ad tadfem ɣar temmurt i ɣar ɣa teẓwam, maḥend ad tt tᵉṭṭfem d řwart, uca [xenni] ad tt tᵉṭṭfem d řwart,
DEU 11:9 u ḥima ad zzugarten wussan nwem x wudem [n temmurt] nni ijjuǧ SIDI i řejdud nwem ad asen tt-i-dd-iwc u i zzariɛet nsen, ict n temmurt ifeyyḍen s uɣi d tamment.
DEU 11:10 Minzi tammurt nni mani tᵉttraḥed ḥima ad tt tᵉṭṭfed d řwart, war teǧi am temmurt n Miṣra manis dd-teffɣem, mani tzarɛed zzariɛet nnec u tenni tesswed s iḍaren nnec am yict n teḥwict tazizawt.
DEU 11:11 Tammurt i ɣar ɣa teẓwam maḥend ad tt tᵉṭṭfem d řwart, aqa-tt d ict n temmurt n idurar d teysarin, tenni isessen aman n wenẓar zeg ujenna,
DEU 11:12 ict n temmurt i x iḥeṭṭa SIDI, AREBBI nnec, i x ǧant řebda tiṭṭawin n SIDI, AREBBI nnec, zi beddu n useggʷas ař aneggar n useggʷas.
DEU 11:13 Mařa tesřim nican i tweṣṣa inu, tinni d awem umureɣ ass-a, ḥima ad texsem SIDI, AREBBI nwem, uca ad as tsexxarem s marra uř nwem u s marra řeɛmar nwem, [xenni] ad imsar,
DEU 11:14 aqa Necc ad wceɣ anẓar di temmurt nwem di řweqt nnes, [anẓar] n zic d uneggar, ḥima ad tessmuned irden nnec d binu nnec n jdid d zzect nnec [n ṭṭri]
DEU 11:15 uca Necc ad ac wceɣ arbiɛ deg iyyar nnec i řebhayem nnec uca cek ad tecced u ad tejjiwned.”
DEU 11:16 “Ḥḍam war ittwassɣekkʷi wuř nwem uca ad teffɣem [zeg webrid], ad tɛebdem i irebbiten nneɣni, ad asen tbendqem.
DEU 11:17 Iři [xenni] ad xawem yareɣ weɣḍab n SIDI uca ad iqqen ijenwan maḥend war iccit wenẓar [ɛad] u war tᵉttic temmurt [ɛad] ṣṣabet nnes u kenniw ad ttwaredǧem deɣya zi temmurt icnan, tenni i d awem ɣa iwc SIDI.
DEU 11:18 S uya ḥḍam awařen-a inu deg wuřawen nwem u di řeɛmar nwem u ad ten tbeysem am yict n řeɛřamet x ufus nwem, ad iřin d ifiřan n useggem x tiṭṭawin nwem
DEU 11:19 uca sřemdem ten i iḥenjiren nwem am xasen tessawařem xmi ɣa tiřim di tudrin nwem u xmi ɣa tiřid deg webrid u deg yiḍeṣ nnec u xmi ɣa tiřid tfaqed,
DEU 11:20 u arim ten x řeḍruf [ɣar uɣezdis n tewwart] n taddart nnec u x tewwura nnec
DEU 11:21 ḥima ad ktaren wussan nwem d wussan n iḥenjiren nwem x temmurt, tenni min xef ijjuǧ SIDI i řejdud nwem ad asen ten-i-dd-iwc, am wussan n ujenna [qqimen ktaren] sennej i temmurt.
DEU 11:22 Minzi mařa teḥḍam nican marra tawṣeyyet-a nni d awem umureɣ ass-a maḥend ad tt teggem u maḥend ad texsem SIDI, AREBBI nwem, ad tuyurem deg ibriden nnes marra u ad ɣares dd-třeṣqem,
DEU 11:23 [xenni] SIDI ad issuffeɣ marra řegnus-a zzat i wudem nwem uca [ammu i] ɣa twartem tasɣart n řegnus imɣaren d ijehden xawem.
DEU 11:24 Marra amcan nni i ɣa teɛjen třeqqa n uḍar nwem ad yiři nwem. Zi řexřa u zi Lubnan, u zeg iɣzar, iɣzar n Lfuraṭ, ař řebḥar di řɣarb, ad yiři weymir [n temmurt] nnec.
DEU 11:25 War izemmar uřa d ijj ad iqqim ibedd zzat i wudem nwem. SIDI, AREBBI nwem, ad igg tiggʷudi d řɛurret zzaywem x marra tammurt nni i x ɣa tɛejnem, am mammec tuɣa akidwem issiweř.”
DEU 11:26 “Xzar, necc ad ggeɣ ass-a lbaraka d nneɛřet zzat i wudem nwem:
DEU 11:27 ... lbaraka, mařa ad tesřem i tweṣṣa n SIDI, AREBBI nwem, tinni x d awem umureɣ ass-a,
DEU 11:28 ... d nneɛřet, mařa war tesřim i tweṣṣa n SIDI, AREBBI nwem, uca ad teggʷejem x webrid i x d awem umureɣ ass-a, x minni i ɣa teḍfarem irebbiten nneɣni i war tessinem ca.
DEU 11:29 Xmi SIDI, AREBBI nnec, ad cek issidef di temmurt nni i ɣar ɣa traḥed ḥima ad tt tᵉṭṭfed d řwart, [xenni] ad tegged lbaraka x wedrar n Jirizim d nneɛřet x wedrar n Ɛibal.
DEU 11:30 Ma war ǧin [idurar nni] x ujemmaḍ n L’Urdun, awarni i webrid, manis dd-tneqqar tfuct, di temmurt n ayt n Kenɛan nni izeddɣen di Řewḍa, arendad n Jiljal, zzat i tcejjura n yigg n Mura?
DEU 11:31 Minzi kenniw ad teẓwam L’Urdun ḥima ad [din] tadfem u ḥima ad tᵉṭṭfem tammurt, tenni i d awem ɣa iwc SIDI, d řwart u kenniw ad tt twartem u ad dayes tzedɣem.
DEU 11:32 Ḥḍam [xenni] marra tiweṣṣa d lfarayiḍ nni i d awem ssecneɣ ass-a.”
DEU 12:1 “D tina d tiweṣṣa d lfarayiḍ nni i ɣa teḥḍam maḥend ad tent teggem di temmurt nni i d ac iwca SIDI, AREBBI n řejdud nnec, ḥima ad tt teksid d řwart, marra ussan nni i ɣa teddarem kenniw x wudem n temmurt.
DEU 12:2 Ad tareddǧem qaɛ marra imucan mani tuɣa sexxaren řegnus i irebbiten nsen, [marra imucan] nni i ɣa teṭṭfem d řwart: x idurar yuɛřan, x tewririn u sadu kuř tacejjart tazizawt.
DEU 12:3 Ad tenḍarem iɛalṭaren nsen, ad tarẓem imayḍuten nsen [iqeddsen] u tirebbin nsen n cwarti ad tent tesscemḍem s tmessi uca ad thedmem řexyařat ineqcen n irebbiten nsen uca ad temḥam isem nsen zeg wemcan nni.
DEU 12:4 [Minzi ammu] war tɛebbdem i SIDI, AREBBI nwem am [tteggen nitni],
DEU 12:5 maca ad tarzum x wemcan nni i ɣa yixḍar SIDI, AREBBI nwem, zi jar marra tiqebbař nwem, ḥima ad din igg Isem nnes, [wah,] ɣar Tzeddiɣt nnes i ɣa tarzum u din i ɣa tawḍem
DEU 12:6 uca dinni i ɣa tawyem tiɣarṣa nwem n wecmaḍ d tɣarṣa nwem d řeɛcur nwem d tewhibt nni issgeɛɛed ufus nwem d tewhibin nwem s řxaḍar d imenza n ifunasen d tfunasin nwem d [imenza] n wuǧi nwem,
DEU 12:7 uca dinni i ɣa teccem zzat i wudem n SIDI, AREBBI nwem, ad tfarḥem, kenniw d [řaǧ n] tudrin nwem, zi marra min igga ufus nwem u zi min di kenniw ibarek SIDI, AREBBI nnec.
DEU 12:8 War tteggem am marra min nᵉttegg neccin da ass-a: kuř aryaz [ittegg] min d as ittwařa nican di tiṭṭawin nnes.
DEU 12:9 Minzi aqa [ɛad] řexxu war tudifem ca ɣar arraḥet u ɣar řwart nni d awem iwca SIDI, AREBBI nnec.
DEU 12:10 Xmi ɣa teẓwam L’Urdun uca ad tzedɣem di temmurt nni d awem ɣa iwc SIDI, AREBBI nwem, d řwart, Netta ad awem iwc arraḥet zi marra řɛedyan nwem i d awem dd-innḍen uca ad tzedɣem di řaman.
DEU 12:11 Din i ɣa yiři wemcan nni i ɣa yixḍar SIDI, AREBBI nwem, ḥima ad issezdeɣ din Isem nnes uca dinni i ɣa tawyem marra min x cek umureɣ: tiɣarṣa n wecmaḍ nwem, tiɣarṣa nwem, řeɛcur nwem, tiwhibin n usgeɛɛed n ufus nwem d marra [tiwhibin] n lwaɛd nni i ɣa tweɛdem i SIDI.
DEU 12:12 Ad tfarḥem zzat i wudem n SIDI, AREBBI nwem, kenniw d iḥenjiren nwem d tḥenjirin nwem d isemɣan nwem d tiyya nwem d Ulawi nni izeddɣen daxeř i tewwura nwem, minzi war ɣares tasɣart niɣ řwart akidwem.
DEU 12:13 Ḥḍa war ssbexxara tiɣarṣa nnec n wecmaḍ di min ma amcan nni twařid,
DEU 12:14 maca [waha] deg wemcan nni i ɣa yixḍar SIDI deg icten zi tqebbař nnec, dinni [waha] i ɣa tessbexxared tiɣarṣa n wecmaḍ uca dinni i ɣa tegged marra min d ac umureɣ.
DEU 12:15 S marra tzemmared ad tɣarṣed daxeř i tewwura nnec marra min immeẓri wuř nnec uca ad [zzayes] tecced ɛlaḥsab lbaraka nni d ac ɣa iwc SIDI, AREBBI nnec, daxeř i tewwura nnec. Amexmuj d umezdag zemmaren ad zzayes ccen, axmi [ttetten zeg] iɣayḍ n wezɣar u [zeg] udad.
DEU 12:16 Mɣir idammen war ten tᵉttetted. Ad ten tneɣřed x temmurt am waman.
DEU 12:17 War iɛeddeř ad tecced daxeř i tewwura nnec zi řeɛcur n irden d binu nnec n jdid d zzect nnec [n ṭṭri] uřa zeg imenza n ifunasen d tfunasin d wuǧi nnec niɣ zi tewhibin n wawař i tewcid niɣ zi tewhibin s řxaḍar niɣ zi tewhibt nni issgeɛɛed ufus nnec.
DEU 12:18 Minzi ad ten tecced zzat i wudem n SIDI, AREBBI nnec, deg wemcan nni ɣa yixḍar SIDI, AREBBI nnec, cek, mmic, yeǧic, ismeɣ nnec, tayya nnec d Ulawi nni izeddɣen daxeř i tewwura nnec uca ad tfarḥed zzat i wudem n SIDI, AREBBI nnec, di marra min ɣar ɣa isswiẓẓed ufus nnec.
DEU 12:19 Ḥḍa, war semmeḥ [ɣar uzeǧif nnes] Alawi di marra ussan nnec x temmurt nnec.”
DEU 12:20 “Xmi SIDI, AREBBI nnec, ad issiyru aymir [n temmurt] nnec, am mammec d ac inna, uca ad tinid: ‘Xseɣ ad cceɣ aysum’, minzi immeẓri řeɛmar nnec ad yecc aysum, [xenni] ad tecced aysum anect n marra min imeẓri řeɛmar nnec.
DEU 12:21 Mařa tuɣa cek tiggʷejed x wemcan nni i ɣa yixḍar SIDI, AREBBI nnec, ḥima ad din issemten Isem nnes, [xenni] tzemmared ad tɣarṣed zeg ifunasen d tfunasin nnec u zeg wuǧi nnec nni d ac iwca SIDI, am mammec cek umureɣ, uca ad zzayes tecced daxeř i tewwura nnec anect n marra min dayes immeẓri řeɛmar nnec.
DEU 12:22 Am mammec ittwacc iɣayḍ n wezɣar d udad, amenni i zzayes ɣa tecced. Amexmuj d umezdag zemmaren ad zzayes ccen.
DEU 12:23 Mɣir war ttᵉtt ɛemmarṣ zeg idammen, minzi idammen d řeɛmar. War ttᵉtt řeɛmar ak-d weysum.
DEU 12:24 War ten tᵉttᵉtted, [maca] ad ten tneɣřed x temmurt am waman.
DEU 12:25 War ten tᵉttᵉtted, ḥima ad tiřid cek mliḥ d iḥenjiren nnec awarni ac, xmi ɣa tegged min iseggden zzat i tiṭṭawin n SIDI.
DEU 12:26 Ad tawyed mɣir timesřayin nni ɣarek qeddsent d [tɣarṣa n] lwaɛd nnec uca ad [kidsent] dd-tased ɣar wemcan i ɣa yixḍar SIDI
DEU 12:27 uca ad tesswejded tiɣarṣa n wecmaḍ, aysum nnes d idammen nnes, x uɛalṭar n SIDI, AREBBI nnec, uca idammen n tɣarṣa ad ttwazeǧɛen x uɛalṭar n SIDI, AREBBI nnec, [maca] iɛeddeř ad tecced aysum.
DEU 12:28 Ḥḍa, u seř i marra awařen-a nni d ac umureɣ, ḥima ad tiřid mliḥ, cek d iḥenjiren nnec awarni ac i řebda, umi ɣa tegged min icnan d min iseggden di tiṭṭawin n SIDI, AREBBI nnec.”
DEU 12:29 “Xmi ɣa iteḥḥa SIDI, AREBBI nnec, řegnus mani ɣa traḥed ḥima ad ten teksid d řwart uca [xenni] cek ad ten teksid d řwart uca ad tzedɣed di temmurt nsen,
DEU 12:30 ḥḍa maḥend war tḍeffared awarni asen di řfex d ict, awarni ma ad ttwateḥḥan zzat i wudem nnec, uca ad tarzud x irebbiten nsen, ad tinid: ‘Am mammec sexxaren nitni i irebbiten nsen, ammu i ɣa ggeɣ uřa d necc.’
DEU 12:31 War ttegg amenni i SIDI, AREBBI nnec, minzi marra min iǧan d jjɛifect i SIDI d min icarreh Netta, aqa ggin t nitni i irebbiten nsen. Ɛad sscemḍen iḥenjiren nsen d yessitsen di tmessi i irebbiten nsen.”
DEU 13:1 “Marra awař nni x kenniw weṣṣiɣ, ad t teḥḍam ad zzayes teggem. War ɣares arenni u war zzayes ttekkes.
DEU 13:2 Mařa ikkar ijj n unabi niɣ ijj n umerji n tirja di řwesṭ nnec uca igga ca n řeɛřamet niɣ s ca n lmuɛjiza ɣarek,
DEU 13:3 uca řeɛřamet nni niɣ lmuɛjiza nni x d ac issiweř temsar uca [xenni] inna: ‘Ejj ad nuyur awarni i irebbiten nneɣni!’, inni war tessined, uca: ‘Ejj aneɣ ad asen neɛbed!’,
DEU 13:4 [xenni] war ttesři i wawařen n unabi nni niɣ n umerji n tirja nni, minzi SIDI, AREBBI nwem, ittqeǧab kenniw, ḥima ad issen ma tᵉttexsem SIDI, AREBBI nwem s marra uř nwem u s marra řeɛmar nwem.
DEU 13:5 Ad tuyurem awarni i SIDI, AREBBI nwem, ad zzayes teggʷdem, ad tᵉṭṭfem di tweṣṣa nnes, ad tesřem i tmijja nnes, ad as tsexxarem u ad dayes třeṣqem.
DEU 13:6 Ittxeṣṣa ad ittwaneɣ unabi nni niɣ umerji nni n tirja, minzi issiweř x řaggʷajet x webrid n SIDI, AREBBI nwem - wenni kenniw issuffɣen zi temmurt n Miṣra, d wenni cek ifdin zi taddart n tesmuɣi - maḥend ad cek issuffeɣ zeg webrid nni x yumur SIDI, AREBBI nnec, ad [dayes] tuyured. Ittxeṣṣa ad tekksed řɣar zi řwesṭ nnec.
DEU 13:7 Mařa umac, mmis n yemmac, niɣ mmic niɣ yeǧic niɣ tamɣart n wuř nnec niɣ ameddukkeř nnec nni i iǧan am řeɛmar nnec, ad cek iɣar s tnuffra ad yini: ‘Ejj aneɣ ad nuyur ad nsexxar i irebbiten nneɣni!’ inni war tessined ca cek uřa d řejdud nnec,
DEU 13:8 inni iǧan zeg irebbiten n řegnus i d ac-dd innḍen, inni yudsen niɣ inni xak iggʷejen zi ṭṭarf n temmurt ař ṭṭarf nneɣni,
DEU 13:9 [xenni] war xas ttegg ca, war ɣares ttesři ca. War t areḥḥem ca, war d ac izziǧiz ca niɣ ad t teffared,
DEU 13:10 maca ittxeṣṣa ad t tenɣed nican. Afus nnec ad xas yiři d amezwaru, maḥend ad t tenɣed u xenni [ad xas yiři] ufus n řgens marra.
DEU 13:11 Ad t tḥejjarem s yeẓra ař ɣa immet, minzi tuɣa yarezzu ad cek issiggʷej x SIDI, AREBBI nnec, wenni i cek dd-issuffɣen zi temmurt n Miṣra, zi taddart n tesmuɣi.
DEU 13:12 Marra Israil ad sřen uca ad ggʷeden, [ařami] war dd-dikkʷiřen ad ggen řɣar-a di řwesṭ nnec.”
DEU 13:13 “Mařa tesřid aqa qqaren deg icten zi tneddam nni i d awem ɣa iwc SIDI ḥima ad daysent tzedɣed:
DEU 13:14 ‘Aqa ffɣen-dd zi řwesṭ nwem yeryazen, ayt i war isekkwin, uca ssɣekkwan imezdaɣ n tendint nsen, qqaren: Ejj ad nraḥ ad neɛbed irebbiten nneɣni, inni war tessinem!’,
DEU 13:15 [xenni] ad tarzud u ad tesseqsid mliḥ, u xzar, mařa tufid tamesřact nni tbedd x tidett, aqa jjɛifect nni tᵉttwagg di řwesṭ nnec,
DEU 13:16 [řexdenni] ad tegged ict n tecti i imezdaɣ n tendint s řeqḍeɛ n ssif. Ad tt tḥarrmed i uteḥḥi s marra min dayes, uřa d řebhayem nnes, s řeqḍeɛ n ssif.
DEU 13:17 Ad tessmuned marra takeccaḍt nnes ɣar řwesṭ n wazzay nnes, ad tessecmeḍ tandint s tmessi ak-d marra takeccaḍt i dayes, i SIDI, AREBBI nnec, uca ad tedweř [tendint] d ict n řxarbet i řebda, ɛemmarṣ ad tᵉttwabna ɛawed.
DEU 13:18 War ttejji min ittwaḥarrmen [i uteḥḥi] ad iqqim iřeṣṣeq jar ifassen nnec, ḥima SIDI ad [xak] issiggʷej řḥaduq n weɣḍab nnes uca ad ac iwc arreḥmet, ad cek yarḥem ad cek yarni, am mammec ijjuǧ i řejdud nnec,
DEU 13:19 xmi ɣa tesřed ɣar tmijja n SIDI, AREBBI nnec, ḥima ad teḥḍid marra tiweṣṣa nnes, tinni i x d ac weṣṣiɣ ass-a, u ḥima ad tegged min iseggden di tiṭṭawin n SIDI, AREBBI nnec.”
DEU 14:1 “Kenniw d iḥenjiren n SIDI, AREBBI nwem. War xebbcem ca x [arrimet] nwem, war tqeccarem ca jar tiṭṭawin nwem di ssibbet n ijj n umettin.
DEU 14:2 Minzi aqa cek d ijj n řgens iqeddes ɣar SIDI, AREBBI nnec, uca SIDI ifarz cek ḥima ad as tiřid d řgens iɣřan zi marra řegnus i iǧan x temmurt.
DEU 14:3 War ttett zi kuřci min iǧan d jjɛifect.
DEU 14:4 Aqa d ina d imuddaren i iɛeddeř ad ten teccem: afunas, ijjen zeg iḥuřiyyen, ijjen zeg iɣayḍen,
DEU 14:5 udad, iɣayḍ n wezɣar, izerzer, iɣayḍ ak-d waccawen imeqqranen, amellal, afunas n řexřa d iɣayḍ n idurar.
DEU 14:6 Iɛeddeř ad teccem marra řmař i ɣar iǧa třeqqa n tecḍect immsebḍan, tacḍect immsebḍan x tnayen, u [sennej i man aya] ttarran ifeẓ jar řmař.
DEU 14:7 Maca zeg inni ittarran ifeẓ d yinni i ɣar teǧa tecḍect immsebḍan qaɛ x tnayen, war iɛeddeř ad teccem ina: ařɣem, d uyarziz d ukawka n teṣḍart minzi tteffẓen, [maca] war ɣarsen bu tecḍect immsebḍan, u [xenni] ad ɣarwem iřin xemjen.
DEU 14:8 [Ammu uřa d] iřef, waxxa ɣares tacḍect immsebḍan, war ittarri ifeẓ, [s uyenni] ad ɣarwem yiři ixmej. War ttᵉttem ca zeg weysum nnes, war ttḥadam ca řxecbat nsen.
DEU 14:9 Iɛeddeř ad teccem ina zi marra min iǧan deg waman: marra wi ɣar iǧa wafriwen d teqcurt iɛeddeř ad ten teccem.
DEU 14:10 [Maca] marra min war ɣar ǧin wafriwen niɣ taqcurt, war iɛeddeř ad ten teccem, ad ɣarwem iřin xemjen.
DEU 14:11 Marra ijḍaḍ izdigen iɛeddeř ad ten teccem,
DEU 14:12 [maca] war iɛeddeř ad zzaysen teccem ina: agider, isɣi, agider n řebḥar,
DEU 14:13 bu-řxeẓrat d amesɣuy [amuqḍiɛ n tiṭṭawin] d bu-umeṭṭaw s tazřa ak-d marra markat nnes,
DEU 14:14 marra markat n ubaɣeř,
DEU 14:15 yeǧis n buheyyaf, aɛennaf, ajḍiḍ n řebḥar, řbaz ak-d markat nnes,
DEU 14:16 [aḥemmař n] řkas, bu-usuḍi [n řmewt], bu-yuntaḥ,
DEU 14:17 bu-uɛuqqi, bu-uḥawař, bu-tcararrut,
DEU 14:18 abellarj, bu-usuḍi iɛeffnen ak-d markat nnes, dundun d řweḍwaḍ.
DEU 14:19 Marra min ɣar iǧa wafriwen nni ittbuɛen ad ɣarwem yiři ixmej. War iɛeddeř ad ttwaccen.
DEU 14:20 Marra ijḍaḍ izdigen iɛeddeř ad ten teccem.
DEU 14:21 War iɛeddeř ad teccem uřa zeg ict n řxecbet. Ad tt tewced i ubarrani nni [iǧan] daxeř i tewwura nnec, ḥima ad zzayes yecc, niɣ ad tt tezzenzed i ubarrani, minzi cek d ijj n řgens d amqeddas i SIDI, AREBBI nnec.” “War snenni iɣayḍ d ameẓyan deg uɣi n yemmas.”
DEU 14:22 Ad tɛeccared nican marra řɣiǧet n zzariɛet nni ittejja iyyar nnec zeg useggʷas ɣar useggʷas [nneɣni].
DEU 14:23 Ad tecced řeɛcur n irden nnec, n binu nnec n jdid, n zzect nnec [n ṭṭri], uřa n imenza n řebhayem nnec u n wuǧi nnec zzat i wudem n SIDI, AREBBI nnec, deg wemcan i ɣa yixḍar Netta maḥend ad din izemmem Isem nnes, ḥima ad třemded ad teggʷeded SIDI, AREBBI nnec kuř ass.
DEU 14:24 Mařa abrid izzuggart xak aṭṭas, ař ɣa tafed war tzemmared ad tawyed [řeɛcur] din, minzi amcan nni yixḍar SIDI, AREBBI nnec, ḥima ad din izemm Isem nnes, iǧan iggʷej xak aṭṭas, [uca] mařa [xenni] SIDI, AREBBI nnec ibarek i cek,
DEU 14:25 qřeb i-ten [xenni] d [tmenyat n] nnuqart uca uyur s tkemmust n tmenyat deg ufus nnec ɣar wemcan nni i ɣa yixḍar SIDI, AREBBI nnec,
DEU 14:26 ad tṣarfed tmenyat nni x marra min di immeẓri wuř nnec, x ifunasen d tfunasin, x wuǧi, x binu, x ccrab niɣ x min ma ixs wuř nnec uca ad tecced din zzat i wudem n SIDI, AREBBI, ad tfarḥed, cek d [řaǧ n] taddart nnec.”
DEU 14:27 “War semmeḥ ca di Alawi nni izeddɣen ɣar daxeř i tewwura nnec, minzi war ɣares bu tasɣart niɣ řwart akidek.
DEU 14:28 Ɣar uneggar n třata n iseggʷusa ad tessuffɣed marra řeɛcur n řɣiǧet deg useggʷas nni uca ad ten txezned jar daxeř n tewwura nnec.
DEU 14:29 [Xenni] Alawi ad dd-yas, minzi war ɣares teǧi tesɣart niɣ řwart akidek, uřa d abarrani d uyujiř d tajjač nni iǧan ɣar daxeř i tewwura nnec uca ad ccen, ad jjiwnen, ḥima [xenni] SIDI, AREBBI nnec, ad ac ibarek di marra řxedmet i ɣa tegged s ufus nnec.”
DEU 15:1 “Ɣar uneggar n sebɛa n iseggʷusa ad yiři ijj n wesmaḥ n imerwusa.
DEU 15:2 Ta d tamesřact n ufekki zeg imerwusa: kuř bab n umarwas, wenni yareḍřen zeg ufus nnes i jjar nnes, ad [as] isemḥ i umarwas. War ittettar ca amarwas zeg jjar nnes uřa zeg umas, minzi ittwabarreḥ s ufekki n imerwusa i SIDI.
DEU 15:3 Iɛeddeř ad třaɣid abarrani x umarwas, [maca] min iǧan nnec ɣar umac, [d man aya] ad dayes ismeḥ ufus nnec.
DEU 15:4 Aqa war ittxeṣṣi ca ad ɣarek yiři uřa d ijj n umezřuḍ, minzi SIDI ad cek ibarek aṭṭas di temmurt nni i d ac ɣa iwc, SIDI, AREBBI nnec, d tasɣart i ɣa twarted,
DEU 15:5 mařa [xenni] tesřid s teynit ɣar tmijja n SIDI, AREBBI nnec, ḥima ad teḥḍid uca ad tegged marra tiweṣṣa-ya, tinni x d ac weṣṣiɣ ass-a.
DEU 15:6 Minzi SIDI, AREBBI nnec, ad ac ibarek am mammec tuɣa d ac inna, uca aṭṭas n řegnus ad xak arḍřen s weḍman, maca cek war tareṭṭřed walu s weḍman [x uřa d yijjen zzaysen]. Cek ad tḥekmed x waṭṭas n řegnus, maca nitni war xak ḥekkmen ca.”
DEU 15:7 “Xmi [din] ɣarek ɣa yiři ijj n umezřuḍ, ijj zeg aytmac, ɣar daxeř i yict zi tewwura n temmurt nnec nni i d ac ɣa yewc SIDI, AREBBI nnec, [xenni] war sseqsaḥ ca uř nnec u war ttzeyyar ca afus nnec x umac nni izeřḍen,
DEU 15:8 maca ad as tarzmed afus nnec s wecrim u ad as tareḍřed s weḍman, ɛlaḥsab min iḥwaj deg uzeyyar nnes.
DEU 15:9 Ḥḍa, war ittiři deg wuř nnec uřa d ijj n uxarriṣ baṭeř, teqqared [deg yixef nnec]: ‘Aqa yudes-dd useggʷas wiss sebɛa, aseggʷas n ufekki n imerwusa!’, uca [xenni] ad texzared s tiṭṭawin ixeyyqen x umac nni i di iǧa zzeřḍ uca war d as tᵉtticed walu u netta ad zzayek icetca ɣar SIDI uca ad xak yiři ddenb.
DEU 15:10 Ittxeṣṣa ad as tewced deɣya, war ittiři uxeyyeq deg wuř nnec xmi i d as ɣa tewced, minzi x uya ad ac ibarek SIDI, AREBBI nnec, di marra řxedmet nnec u di marra mani ɣa yaweḍ ufus nnec.
DEU 15:11 Minzi ameẓřuḍ war ittwameḥḥi zi temmurt. X uya necc umureɣ cek, qqareɣ: Arzem afus nnec ař ṭṭarf i umac, i wenni ittwaḥṣaren u i umezřuḍ nni [iǧan] di temmurt nnec.”
DEU 15:12 “Mařa umac, ijj n Uɛibrani niɣ ict n Tɛibranect, ittwazzenz ɣarek, [xenni] ad ac ixdem setta n iseggʷusa, [maca] deg useggʷas wiss sebɛa ad as tsarrḥed ad as tarxud zi ɣarek s třelli.
DEU 15:13 Xmi i d as ɣa tsarrḥed, [xenni] war t ttejji ad iraḥ s [ifassen] xwan.
DEU 15:14 [Axmi] d as ɣa tegged tiseddect [ammu i d as ɣa tegged ict n tewhibt] zeg wuǧi u zeg unedrar u zi tsirt [n uḍiř]. S min d ac ibarek SIDI, AREBBI nnec, ad as tewced i netta.
DEU 15:15 Ad tidared belli tuɣa cek d ismeɣ di temmurt n Miṣra uca SIDI, AREBBI nnec, aqa ifdi xak. X uya, necc umureɣ cek tiweṣṣa-ya ass-a.
DEU 15:16 Mařa netta inna ac: ‘War xak ttaggʷjeɣ!’, minzi ittexs i cek d [řaǧ n] taddart nnec, minzi aqa netta mliḥ ɣarek,
DEU 15:17 xenni ad teksid ijj n usiyni uca ad tessnuqqeb amezzuɣ nnes uřa d tewwart uca [ammu i] ɣa yiři d ismeɣ nnec i řebda u ammu i ɣa tegged [ɛawed] s tayya nnec.
DEU 15:18 War dd-ittbin iqseḥ di tiṭṭawin nnec, xmi t ɣa tessekked di třelli, minzi tuɣa isexxar i cek setta n iseggʷusa, yarebbeḥ i cek řexřaṣ n ijj n ucewwař tnayen n tseqqar. [Ammu] i cek ɣa ibarek SIDI, AREBBI nnec, di marra min ɣa tegged.”
DEU 15:19 “Ad tessqeddsed i SIDI, AREBBI nnec, marra imenza iwetman nni dd-ittwaxeřqen jar ifunasen d tfunasin nnec d wuǧi nnec. War iɛeddeř ad tessxedmed amenzu n ifunasen nnec uca amenzu n wuǧi nnec war t tteǧas.
DEU 15:20 Aseggʷas awarni i useggʷas ad ten tecced, cek d [řaǧ n] taddart nnec, zzat i wudem n SIDI, AREBBI nnec, deg wemcan i ɣa yixḍar SIDI.
DEU 15:21 Maca mařa tuɣa dayes řɛib, tuɣa-t d aqidar niɣ d adarɣař niɣ min ma řɛib aɛeffan [i ɣares iǧan], war d as ɣarreṣ ca i SIDI, AREBBI nnec.
DEU 15:22 Daxeř i tewwura nnec ad zzayes tecced, am umexmuj am umezdag, am mammec [i ɣa tecced] zeg iɣayḍ n wezɣar u zeg udad.
DEU 15:23 Mɣir idammen nnes, war ten ttᵉtt ca, ad ten tfarrɣed x temmurt am waman.”
DEU 16:1 “Ḥḍa ayur n Abib, ad tesswejded Taɣarṣt n Useɛdu i SIDI, AREBBI nnec, minzi deg uyur n Abib issuffeɣ i cek-dd SIDI, AREBBI nnec, zi temmurt n Miṣra s ǧiřet.
DEU 16:2 Ad tɣarṣed i [Taɣarṣt n] Useɛdu i SIDI, AREBBI nnec, uǧi d ifunasen d tfunasin deg wemcan nni i ɣa yixḍar SIDI, maḥend ad din issezdeɣ Isem nnes.
DEU 16:3 War kis ttᵉtt ca s wentun. Sebɛa n wussan ad kis tecced aɣrum břa antun, aɣrum n tamara, minzi deɣya teffɣed zi temmurt n Miṣra, ḥima ad tɛeqřed x wass i dd-tteffɣed zi Miṣra marra ussan n tudart nnec.
DEU 16:4 War kik ittemẓar wentun di marra jjihet nnec sebɛa n wussan uca zeg weysum nni i tɣarṣed ɣar uɛecci n wass amezwaru, war ittnusi ca ař tiwecca nnes.
DEU 16:5 War iḥeǧeř ad tɣarṣed i [Tɣarṣṭ n] Useɛdu ɣar daxeř i yict n tewwura [n tneddam] i d ac ɣa yewc SIDI, AREBBI nnec,
DEU 16:6 maca deg wemcan nni i ɣa yixḍar SIDI, AREBBI nnec, ḥima ad din issizdeɣ Isem nnes, din i ittxeṣṣa ad tɣarṣed i [Tɣarṣt n] Useɛdu ɣar uɛecci xmi ɣa teɣři tfuct di tsaɛɛet nni di teffɣed zi Miṣra.
DEU 16:7 Uca ad tt tessengʷed ad tt tecced deg wemcan nni i ɣa yixḍar SIDI, AREBBI nnec. Ɣar ṣṣbeḥ [awarni as] ad tɛeqbed uca ad traḥed ɣar iqiḍan nnec.
DEU 16:8 Setta n wussan ad tecced aɣrum břa antun uca deg wass wiss sebɛa ad yiři ijj n umuni ifarzen i SIDI, AREBBI nnec. [Xenni] war iḥeǧeř ad tegged uřa d ict n řxedmet [i ittxeṣṣa ad tᵉttwagg].”
DEU 16:9 “Ad tḥesbed sebɛa n ssimanat i yixef nnec. Zeg wami [i ɣa tebdid ad tegged] amjar deg imendi ibedden, ad tebdid ad tḥesbed sebɛa n simanat.
DEU 16:10 [Xas uca] ad tegged Řɛid n Ssimanat i SIDI, AREBBI nnec. Ad tewced ict n ṣṣedqet s řxaḍar zeg ufus nnec am mammec cek ibarek SIDI, AREBBI nnec.
DEU 16:11 Ad tfarḥed zzat i wudem n SIDI, AREBBI nnec, cek, mmic, yeǧic, ismeɣ nnec, tayya nnec, Alawi nni [ittɣiman] daxeř i tewwura nnec, abarrani, ayujiř d tajjač nni iǧan di řwesṭ nnec, deg wemcan nni i ɣa yixḍar SIDI, AREBBI nnec, ḥima ad din issezdeɣ Isem nnes.
DEU 16:12 Ad tɛeqřed belli tuɣa cek d ismeɣ di Miṣra uca ittxeṣṣa ad teḥḍid tiweṣṣa-ya u ad ten tegged.”
DEU 16:13 “Ad tɛeyyded Řɛid n Iɛuccuten sebɛa n wussan, xmi tkemmřed asmuni n ṣṣabet n unedrar nnec d uẓemmi n tsirt nnec [n uḍiř].
DEU 16:14 Uca ad tfarḥed di Řɛid nnec, cek, mmic, yeǧic, ismeɣ nnec, tayya nnec, Alawi, abarrani, ayujiř d tajjač nni [ittɣiman] daxeř i tewwura nnec.
DEU 16:15 Sebɛa n wussan ad tɛeyyded i SIDI, AREBBI nnec, deg wemcan nni i ɣa yixḍar SIDI, minzi SIDI, AREBBI nnec, ad cek ibarek di marra řɣiǧet nnec u di marra řxedmet n ifassen nnec uca ad tfarḥed s tidett!”
DEU 16:16 “Třata n twařawin deg useggʷas ad dd-banen marra iwetman nnec zzat i wudem n SIDI, AREBBI nnec, deg wemcan nni i ɣa yixḍar Netta: di Řɛid n Weɣrum břa Antun, di Řɛid n Ssimanat, di Řɛid n Iɛuccuten. War dd-ittbin uřa d ijj [s ifassen] xwan zzat i wudem n SIDI.
DEU 16:17 Kuř aryaz [ad iwc] am mammec d as immewcen deg ufus nnes, anect n lbaraka i d ac iwca SIDI, AREBBI nnec.
DEU 16:18 Ad tfarned řquḍat d imeḥḍayen ɣar daxeř i tewwura nni d ac ɣa iwc SIDI, AREBBI nnec, jar [marra] tiqebbař nnec. Nitni ad ḥekmen [jar] řgens s ict n řeḥkamet iseggden.
DEU 16:19 War tteffeɣ ca x webrid n tidett, war ttegg s wudmawen [xmi ɣa tḥekmed]. War ttᵉṭṭef ca arrecwet, minzi arrecwet tessdarɣař tiṭṭawin n yinni iḥekkmen u tessfarraɣ awařen n yinni iqqaren tidett.
DEU 16:20 Tasegda [uca ɛawed] tasegda ad teḍfared, ḥima ad teddared uca ad twarted tammurt nni i d ac ɣa iwc SIDI, AREBBI nnec.
DEU 16:21 War ttegg ca tarebbit n cwarti zi ca n tcejjart zzat i uɛalṭar n SIDI, AREBBI nnec, wenni ɣa tegged.
DEU 16:22 War ssgeɛɛad ameyḍa [iqeddsen] i yixef nnec, minzi d man aya icarreh SIDI, AREBBI nnec.”
DEU 17:1 “War ɣarreṣ ca i ufunas niɣ i yijjen zeg wuǧi i di iǧa ca n řɛib, [niɣ] ca n řmař iɛeffnen, i SIDI, AREBBI nnec, minzi man aya d jjɛifect i SIDI, AREBBI nnec.
DEU 17:2 Umi yufa di řwesṭ nnec, ɣar daxeř i tewwura nnec, tinni d ac iwca SIDI, AREBBI nnec, ca n weryaz niɣ ca n temɣart i iggin min iǧan d řɣar di [tiṭṭawin n] SIDI, AREBBI nnec, [uca ammu] i ɣa iɛeddu x Řɛahd nnes,
DEU 17:3 uca ad yuyur, ad iɛbed i irebbiten nneɣni uca ad asen ibendeq, i tfuct niɣ i yuyur niɣ i marra itran n ujenna, min war xef umureɣ necc,
DEU 17:4 uca yiweḍ i cek-dd řexbar uca tesřid [tt], [xenni] ittxeṣṣa ad tt tarzud mliḥ, u xzar, mařa d tidett uca tban belli tᵉttwagg di Israil jjɛifect tanita,
DEU 17:5 [xenni] ad tessuffɣed aryaz nni niɣ tamɣart nni i iggin řɣar-a ɣar tewwura nnec, aryaz nni niɣ tamɣart nni, uca ad ten tḥejjared s iẓra ař ɣa mmten.”
DEU 17:6 “X [wawař zeg] uqemmum n tnayen niɣ třata n řechud ad ittwaneɣ wenni ittwaḥkem s řmewt. X [wawař zeg] uqemmum n ijj n ucehhad war iḥeǧeř ad ittwaneɣ.
DEU 17:7 Afus n řechud ad xas wḍan d amezwaru maḥend ad t nɣen uca awarni as [ad xas wḍan ifassen] n marra řgens. Ammu i ɣa tekksed řɣar zi řwesṭ nnec.”
DEU 17:8 “Xmi xak ɣa teqseḥ ca n tmesřact di lḥukm jar [usizzeř n] idammen d [usizzeř n] idammen [nneɣni], jar ddeɛwet d ddeɛwet, jar ticti d tecti, [niɣ di lḥukm deg] imcubbac ɣar daxeř i tewwura nnec, [xenni] ad tekkared, ad tgeɛɛded ɣar wemcan nni ɣa yixḍar SIDI, AREBBI nnec.
DEU 17:9 Uca ad dd-tawḍed ɣar ikehhanen, ɣar Ilawiyyen, uca [xenni] ɣar řqaḍi nni din iǧan deg wussan nni, uca ad tesseqsid u nitni ad cek xebbaren x řeḥkam.
DEU 17:10 Ad tegged am tenfuč nni i cek ɣa xebbaren deg wemcan nni i ɣa yixḍar SIDI uca ad teḥḍid marra min d ac ɣa sseɛdun.
DEU 17:11 Ad tegged ɛlaḥsab awař n Ccariɛa nni d ac ɣa seccnen u ɛlaḥsab řeḥkam nni d ac ɣa inin. War ttḥeyyid x wawař i d ac ɣa inin [ɣar] yefus uřa [ɣar] uzeřmaḍ.
DEU 17:12 Aryaz nni itteggen s tuffet u war ittesři ɣar ukehhan nni [i din] ibedden, ḥima ad din isexxar SIDI, AREBBI nnec, niɣ [war ittesři] ɣar řqaḍi, aqa aryaz nni ad immet. Ittxeṣṣa ad tekksed řɣar zi Israil.
DEU 17:13 Marra řgens ittxeṣṣa asen ad sřen u ad ggʷeden u war ttuffen ɛad.”
DEU 17:14 “Xmi ɣa tadfed ɣar temmurt nni i d ac ɣa iwc SIDI, AREBBI nnec uca ad tt tᵉṭṭfed d řwart uca ad dayes tzedɣed u [xenni] ad tinid: ‘Ad xafi ggeɣ ijj n ujeǧid am marra řegnus i d ayi dd-innḍen!’,
DEU 17:15 [xenni] ad xak tegged d ajeǧid wenni i ɣa yixḍar SIDI, AREBBI nnec. Zi řwesṭ n aytmac ad tegged d ijj n ujeǧid xak, war xak ttegg ca abarrani i war iǧin ca d umac.
DEU 17:16 Maca war iḥeǧeř ad yarni iysan i ixef nnes u war ittarri ca řgens ɣar Miṣra maḥend ad yarni iysan, [minzi] SIDI inna awem: Zi ssa d tsawent war dd-tɛiqqibem ɛemmarṣ x webrid-a!
DEU 17:17 War ikessi ca i ixef nnes aṭṭas n temɣarin, ḥima war ittɣarri wuř nnes. War yarenni ca i yixef nnes nnuqart niɣ ureɣ s waṭṭas.
DEU 17:18 Xmi ɣa iqqim x řɛarc n tgeldit nnes, [xenni] ad yari i yixef nnes ict n uɛawed n tira n Ccariɛa-ya deg ijj n wedlis ittwannḍen zzat i wudem n ikehhanen, Ilawiyyen.
DEU 17:19 Ad ɣares yiři [uɛawed n tira-ya], ad dayes iɣar marra ussan n tudart nnes, ḥima ad iřmed ad iggʷed SIDI, AREBBI nnes, ad iḥḍa marra awařen n Ccariɛa-ya d tweṣṣa-ya uca ad zzaysent igg,
DEU 17:20 ḥima war issiřiy uř nnes x yaytmas niɣ ad iḥeyyed x webrid n tewṣeyyet, [war iǧi] [ɣar] yefus uřa [ɣar] uzeřmaḍ, maḥend ad izzugart ussan n tgelda nnes, netta d warraw nnes, di řwesṭ n Israil.”
DEU 18:1 “War tᵉttiři tesɣart niɣ řwart ak-d Israil i ikehhanen, Ilawiyyen, i marra taqbič n Lawi. Ad ccen tiɣarṣa n wecmaḍ n SIDI u zi teṣɣart nnes.
DEU 18:2 War ɣares ittiři d řwart di řwesṭ n aytmas. SIDI d řwart nnes, am mammec d as inna.
DEU 18:3 Man aya ad yiři d tasɣart n řḥeqq n ikehhanen qibač i řgens, qibač i yinni iṣeddqen ict n tɣarṣt, ma d afunas niɣ ijjen zeg wuǧi: ad wcen i ukehhan tameṣṣaḍt n zzat, tnayen n iɣesmiren d tekrict.
DEU 18:4 Asuffuɣ amezwaru [n ṣṣabet] n irden nnec u zi binu n jdid nnec u zi zzect nnec [n ṭṭri] u tamezwarut n waǧas zi [taḍuft n] wuǧi nnec, ad as tewced.
DEU 18:5 Minzi yixḍar i-t SIDI, AREBBI nnec zi jar marra tiqebbař nnec, ḥima ad ikkar, ad isexxar di ṭṭweɛ n Yisem n SIDI, netta d arraw nnes, marra ussan.
DEU 18:6 Xmi dd ɣa yas Ulawi zeg ijjen zi tewwura nnec zi marra Israil, mani izeddeɣ [am ubarrani], uca yusa-dd s marra řxaḍar nnes ɣar wemcan i ɣa yixḍar SIDI
DEU 18:7 uca ad isexxar [dinni] deg Yisem n SIDI, AREBBI nnes, am marra aytmas, Ilawiyyen, inni din ibedden zzat i wudem n SIDI,
DEU 18:8 [xenni] ad ccen nitni tasɣart anect n wayawya, barra i [ttaman n] min immenzen zeg [min iǧan nnes] ɛlaḥṣab [jjadira nnes n taddart n] řejdud.”
DEU 18:9 “Xmi ɣa tadfed ɣar temmurt nni i d ac ɣa yewc SIDI, AREBBI nnec, war sseřmad ca i yixef nnec ad tegged am jjɛayef n řegnus-a.
DEU 18:10 War ittwiffi ḥed jar awem wenni i ɣa isseɛdun mmis niɣ yeǧis x tmessi niɣ wenni [iǧan] d aɛezzem, [niɣ] abezgaw, [niɣ] amegzu, [niɣ] aseḥḥar,
DEU 18:11 [niɣ] wenni itteggen tira, [niɣ] wenni issawařan ak-d imettan [niɣ] wenni ittgezzan uřa d wenni yarezzun ccwar zeg imettan.
DEU 18:12 Minzi marra wenni itteggen timesřayin-a, aqa-t d jjɛifect ɣar SIDI u zi ssibbet n jjɛayef-a ad zzaysen ikkes SIDI, AREBBI nnec, řwart nsen zzat i wudem nnec.
DEU 18:13 [Maca] cek ad tiřid d addud zzat i SIDI, AREBBI nnec.
DEU 18:14 Minzi řegnus nni i ɣa twarted s uɣiř, ad sřen i ibezgawen d iɛezzamen, maca cek, war d ac isemmeḥ SIDI, AREBBI nnec, [ad tegged] aya.”
DEU 18:15 “Ad ac igg SIDI, AREBBI nnec, ijj n unabi zi řwesṭ nnec, zeg aytmac, am necc, i netta umi ɣa tesřem,
DEU 18:16 [minzi d man aya] am mammec marra min tᵉttared zi SIDI, AREBBI nnec, di Ḥurib deg wass n wegraw [n řgens], umi tennid: ‘War dd-ddikkwiřeɣ necc ad sřeɣ i tmijja n SIDI, AREBBI inu, uca war ẓarreɣ necc ɛad timessi-ya imɣaren, [ḥima] war ttmettiɣ.’
DEU 18:17 [Xenni] inna ayi SIDI: ‘Aqa ggin mliḥ umi kik ssiwřen marra aya.’
DEU 18:18 Ad asen dd-ssekkeɣ ijj n unabi zi řwesṭ n aytmatsen, am cek, uca necc ad ggeɣ awařen inu deg uqemmum nnes uca netta ad awem issiweř x marra min xef d as weṣṣiɣ.
DEU 18:19 Uca ad imsar, ad ttareɣ řeḥsab zeg weryaz nni war isřin i wawařen inu i ɣa issiweř s Yisem inu.
DEU 18:20 Maca anabi nni i ɣa yuffen ḥima ad issiweř ijj n wawař s Yisem inu, wenni necc war umureɣ ca ad zzayes issiweř, d wenni i ɣa issiwřen s yisem n irebbiten nneɣni, aqa anabi nni ad immet.
DEU 18:21 Mařa teqqared deg wuř nnec: ‘Mammec ɣa negg ad nessen aqa SIDI war issiweř awař nni?’,
DEU 18:22 [xenni ittxeṣṣa ad tessnem,] xmi anabi nni tuɣa issawař s Yisem n SIDI uca [xenni] awař nnes war imsar u war dd-iffiɣ, aqa awař nni war d as ittwanna zi ɣar SIDI. Anabi nni issawař s uɛeffar. War zzayes tteggʷed ca.”
DEU 19:1 “Xmi SIDI, AREBBI nnec, ɣa iteḥḥa řegnus i zzaysen d ac ɣa iwc, SIDI, AREBBI nnec, tammurt uca [xenni] ad teksid řwart nsen uca ad tzedɣed di tneddam nsen u di tudrin nsen,
DEU 19:2 [xenni] ittxeṣṣa cek ad tḥuzed i yixef nnec třata n tneddam di řwesṭ n temmurt i d ac ɣa iwc SIDI, AREBBI nnec, maḥend ad tt teksid d řwart.
DEU 19:3 Ad tɛedřed ijj n webrid uca tammurt, tenni d ac ɣa iwc SIDI, AREBBI nnec, d řwart, ad tt tebḍid x třata n tseqqar. Man aya ḥima kuř aqettař izemmar ad din yarweř.
DEU 19:4 D wa d amtawi i zi iɛeddeř i uqettař maḥend ad din yarweř, ḥima ad [iqqim] iddar: mařa inɣa jjar nnes břa ma ad as igg řeḥsab, u tuɣa war t icarreh ca iḍennaḍ d fariḍennaḍ.”
DEU 19:5 “Wenni iruḥen ak-d jjar nnes ɣar wezɣar ḥima ad iqess ticejjura uca isswiẓẓeḍ afus nnes s ccaqur ḥima ad iḥarwec tacejjart uca [xenni] iffeɣ as wuzzař n ccaqur uca iřqef jjar nnes uca wanita immut, aqa wanita izemmar ad yarweř ɣar icten zi n tneddam-a maḥend ad [iqqim] iddar.
DEU 19:6 Ammu war izemmar uneqqam n idammen, xmi ɣa iɣeřɣeř wuř nnes, ad iḍfar aqettař uca ad xas iḥart, mařa abrid d azirar uca ad t ineɣ am war xas iǧi řeḥkam s řmewt, minzi tuɣa war t icarreh, [war iǧi] iḍennaḍ [uřa d] fariḍennaḍ.
DEU 19:7 X uya necc umureɣ cek, qqareɣ: ‘Ḥuz třata n tneddam i yixef nnec.’
DEU 19:8 Uca mařa SIDI, AREBBI nnec ad iwesseɛ tammurt nnec, am mammec ijjuǧ i řejdud nnec, u ad ac iwc marra tammurt i x inna ad tt iwc i ibabaten nnec,
DEU 19:9 - mařa ad teḥḍid marra tawṣeyyet-a maḥend ad tt tegged am mammec d ac umureɣ ass-a ḥima ad texsed SIDI, AREBBI nnec, uca ad tuyured deg ibriden nnes i řebda - xenni ad tarnid ɛad třata n tneddam ɣar třata-ya,
DEU 19:10 ḥima war ttwassizřen idammen imezdagen di řwesṭ n temmurt nnec, tenni i d ac ɣa iwc SIDI, AREBBI, d řwart uca ad xak yiři ddenb.
DEU 19:11 [Maca] mařa ca n weryaz icarh jjar nnes uca iqabeř i-t uca ikkar ɣares u [xenni] igga as ict n tecti uca immut, xenni yarweř ɣar icten zi tneddam nni,
DEU 19:12 [xenni] ad ssekken imɣaren n tendint nnes, ad t ksin t zeg wemcan nni, ad t ggen deg ifassen n uneqqam n idammen uca ad immet.
DEU 19:13 War d ac izziǧiz, [maca] ad temḥid zi Israil idammen n wenni war iggin ddenb ḥima ad tiřid mliḥ.”
DEU 19:14 “War smuṭṭiy aymir n jjar nnec, wenni neyycen řejyuř [n qbeř] di tesɣart nnec, tenni i ɣa twarted di temmurt i d ac ɣa iwc SIDI, AREBBI nnec, ḥima ad tt tᵉṭṭfed.
DEU 19:15 Ijj n ucehhad [waha] war izemmar ad ikkar [d acehhad] x ca n weryaz di ssibbet n ca n řmuɛṣiyyet niɣ di ca n ddenb nni izemmar ad ittwagg. X [wawař zeg] uqemmum n tnayen niɣ x [wawař zeg] uqemmum n ṭrata n řechud ad tᵉttwaḍmen tmesřact.
DEU 19:16 Xmi ɣa ikkar ijj n ucehhad aqṭaṭɛiy x ca n weryaz ḥima ad zzayes icetca x ca n ddenb,
DEU 19:17 [xenni] ad bedden tnayen n yeryazen, inni ittemmcubbucen zzat i wudem n SIDI, zzat i wudem n ikehhanen d řquḍat nni i din ɣa yiřin deg wussan nni.
DEU 19:18 Uca řquḍat ad arzun mlih [di tmesřact], u aqa, mařa acehhad d ijj n ucehhad issxarriqen, ad iched s řbaṭeř x umas,
DEU 19:19 [xenni] ad zzayes teggem am mammec tuɣa ittxarreṣ ad igg netta ak-d umas. [Ammu] i ɣa tekksed řɣar zi řwesṭ nnec,
DEU 19:20 ḥima inni iqqimen ad sřen, ad ggʷeden, war ddikkʷiren ad ggen řḥajjet taɛeffant di řwesṭ nnec.
DEU 19:21 War d ac izziǧiz: řeɛmar s řeɛmar, tiṭṭ s tiṭṭ, tiɣmest s teɣmest, afus s ufus, aḍar s uḍar.”
DEU 20:1 “Mařa teffɣed ɣar umenɣi ak-d řɛedyan nnec uca teẓrid iysan d ikarruten, ijj n řgens ktar zzayek, war zzaysen tteggʷed ca, s minzi SIDI, AREBBI nnec, wenni cek dd-issuffɣen zi temmurt n Miṣra, aqa-t akidek.
DEU 20:2 Xmi ɣa tadsem i umenɣi, ad dd-iqarreb ukehhan uca ad issiweř ɣar řgens,
DEU 20:3 ad asen yini: ‘Seř, Israil, kenniw qarrbem-dd ass-a ɣar umenɣi ak-d řɛedyan nwem. War ssemẓayem uř nwem, war tteggʷdem niɣ ad tarjijem, niɣ [ɛawed] ad tqefqifem zzat i wudem nsen,
DEU 20:4 minzi SIDI, AREBBI nwem, Netta aqa ad kiwem yuyur ḥima ad xawem immneɣ zzat i řɛedyan nwem maḥend ad kenniw issenjem.’
DEU 20:5 Uca imeḥḍayen ad ssiwřen ak-d řgens ad inin: ‘Wi ibnan taddart n jdid uca war dayes izdiɣ ɛad? Ejj i-t ad yuyur, ad dd-idweř ɣar taddart nnes, ḥima war ittmetti deg umenɣi uca ad dd-yas ḥed nneɣni ad dayes izdeɣ.
DEU 20:6 Wi yeẓẓun tizayarin uca war iɣebbi ɛad zi řɣiǧet nnes? Ejj i-t ad yuyur, ad dd-idweř ɣar taddart nnes, ḥima war ittmetti deg umenɣi uca ad zzayes iɣebba ḥed nneɣni.
DEU 20:7 Wi ixeḍben tamɣart u war tt imřic ɛad? Ejj i-t ad yuyur, ad dd-idweř ɣar taddart nnes, ḥima war ittmetti deg umenɣi uca ad tt yawi weryaz nneɣni.
DEU 20:8 Imeḥḍayen ad arnin deg wawař ak-d řgens, ad inin: ‘Wi iǧan d aryaz d amaggʷad niɣ ittɣaca? Ejj i-t ad yuyur, ad dd-idweř ɣar taddart nnes, ḥima war tteɣnisen wuřawen n aytmas am wuř nnes.’
DEU 20:9 Xmi ɣa kemmřen imeḥḍayen awař ak-d řgens, xenni ad ggen ikumandaren n řɛeskar ɣar uzeǧif n řgens.”
DEU 20:10 “Xmi ɣa tadsed ca n tendint ḥima ad kides temmenɣed, ittxeṣṣa ad as třaɣid i weṣřaḥ.
DEU 20:11 Mařa tarra-dd xak s weṣřaḥ, [xenni] marra řgens nni dayes ittwaf, ad cek isexxar s uɣiř uca ad cek ixdem.
DEU 20:12 Mařa war kik teggi řehna, maca d amenɣi i tarezzu, [xenni] ad as tennḍed.
DEU 20:13 SIDI, AREBBI nnec, ad ac tt iwc i cek deg ufus nnec u marra [min iǧan d] awtem dayes, ad t tewted s řeqḍeɛ n ssif.
DEU 20:14 Mɣir timeṭṭa d iḥenjiren d řebhayem d marra min dayes di tendint, marra takeccaḍt nnes, ad tt teksid i yixef nnec d tkeccaḍt uca ad tecced zi tkeccaḍt n řɛedyan nnec, inni d ac iwca SIDI, AREBBI nnec.
DEU 20:15 Amenni i ɣa tegged di marra tineddam nni xak iggʷejen aṭṭas, tinni war iǧin zi tneddam n řegnus-a.
DEU 20:16 Maca tineddam n řegnus nni d ac iwca SIDI, AREBBI nnec, d řwart, war zzaysent tejjid uřa d ca min ɣa yarren nnefs ad iqqim iddar.
DEU 20:17 Ad tent tḥarrmed i uteḥḥi: Iḥittiyyen, Imuriyyen, ayt n Kenɛan, Ifiriziyyen, Iḥiwiyyen d Iyabusiyyen, am mammec i d ac yumur SIDI, AREBBI nnec,
DEU 20:18 ḥima nitni war d awem ssřemmaden ad teḍfarem marra jjɛayef nni ggin nitni i irebbiten nsen uca [xenni] ad texḍam ak-d SIDI, AREBBI nwem.
DEU 20:19 Mařa tennḍed i yict n tendint aṭṭas n wussan řami temmenɣed akides maḥend ad tt tᵉṭṭfed, [xenni] war ttareddaǧ ca ticejjura s teyyita n ccaqur, minzi ad zzaysent tecced. S uya war tent ttqessid, minzi ma tacejjart n yeyyar am bnadem nni dd-ittbanen zzat i wudem nnec umi teḥṣared [tandint]?
DEU 20:20 Mɣir tacejjart nni tessned war teǧi d tacejjart i zi ɣa tecced, aqa tanita ad tt taredǧed, ad tt tqessed, ad [zzayes] tebnid ijj n ssur x tendint nni akidek ittmenɣan, ař ɣa tɣeḍřed [tandint nni].”
DEU 21:1 “Mařa ittwaf ḥed ittwaneɣ di temmurt nni d ac ɣa iwc SIDI, AREBBI nnec, maḥend ad tt tᵉṭṭfed d řwart, izzeř deg iyyar uca war issin ḥed wi t inɣin,
DEU 21:2 [xenni] imɣaren nnec d řquḍat nnec ad dd-ffɣen uca ad ksin řeɛbar ař tineddam i d as dd-innḍen i wenni ittwanɣen.
DEU 21:3 Zi tendint nni yudsen i wenni ittwanɣen, ad zzayes ksin yemɣaren ict n tɛejmit n tfunasin nni ɛemmarṣ war zzayes crizen ca u tenni war ijbiden ɛad azayřu.
DEU 21:4 Uca imɣaren n tendint nni ad ssehwan taɛejmit [nni] ɣar ict n teɣzurt [ittazřen] řebda [s waman], ɛemmarṣ war tᵉttwacarz u war tᵉttwaẓẓu uca ad arẓen iri n tɛejmit din di teɣzurt.
DEU 21:5 [Xenni] ad dd-qarrben ikehhanen, ayt n Lawi, minzi SIDI, AREBBI nnec, ixḍar i-ten maḥend ad xas sexxaren u maḥend ad barken s Yisem n SIDI, u ɛlaḥsab awař nsen [ad ittwaḥkem] kuř amcubbec d kuř řexcunet.
DEU 21:6 Uca marra imɣaren n tendint nni yudsen x wenni ittwanɣen, ad ssirden ifassen nsen sennej i tɛejmit nni umi ittwarẓ yiri di teɣzurt.
DEU 21:7 Ad barrḥen, ad inin: ‘Ifassen nneɣ war ssizzřen ca idammen-a u tiṭṭawin nneɣ war t ẓrin.
DEU 21:8 Egg aṣřaḥ i řgens nnec Israil nni tefdid, [a] SIDI, uca war ssrusa idammen imezdagen di řwesṭ n řgens nnec Israil!’ [Xenni] idammen [ittwassizřen] nni ad ttwaḥesben d řefdiyyet i nitni.
DEU 21:9 Ammu i ɣa tekksed idammen imezdagen zi řwesṭ nnec, minzi ittxeṣṣa ad tegged min iǧan nican di tiṭṭawin n SIDI.”
DEU 21:10 “Xmi ɣa teffɣed ɣar umenɣi ak-d řɛedyan nnec uca SIDI, AREBBI nnec, igga ac ten deg ifassen nnec uca tiyed ten d imeḥbas,
DEU 21:11 uca teẓrid jar imeḥbas ict n temɣart, tecna deg waddud, uca temmeẓred ad tt teksid d tamɣart i yixef nnec,
DEU 21:12 [xenni] ad tt tessidfed ɣar taddart nnec uca ad tḥeff azeǧif nnes, ad tqessed iccaren nnes.
DEU 21:13 Ad tekkes arruḍ n tmeḥbast nnes uca ad teqqim di taddart nnec uca ad tesɣuy i babas d yemmas ijj n uyur ikmeř u awarni man aya tzemmared ad xas tadfed uca ad tiřid d aryaz nnes u nettat ad tiři d tamɣart nnec.
DEU 21:14 Uca mařa war d ac teɛjib, ad tt tejjed ad tuyur ɣar řxaḍar nnes, war tt znuzi s nnuqart. War zzayes tegged axmi sseřɛet [i teǧa], minzi aqa tesseḥqared tt.”
DEU 21:15 “Mařa aryaz ɣares tnayen n temɣarin, icten ittexs i-tt, tenneɣnit icarreh i-tt, uca tenni icarreh d tenni ittexs urwent as-dd iḥenjiren, maca amenzu tuɣa-t n tenni icarreh,
DEU 21:16 [xenni] deg wass nni i di ɣa ibḍa řwart n min ɣares iǧan i iḥenjiren nnes, war izemmar ad iwc tasɣart n umenzu i mmis n tenni ittexs deg wemcan i ɣa iwc i mmis n tenni icarreh, [wenni d] amenzu [i yeǧa].
DEU 21:17 Ittxeṣṣa ad inɛem s mmis amenzu n tenni icarreh umi d as ɣa iwc tnayen n tseqqar zi marra min d as dd-ikkaren, minzi netta d amezwar n teryast nnes u tasɣart n tmenzut nnes i teǧa.”
DEU 21:18 “Mařa ijj n weryaz ɣares mmis d aɣennan d amɣewweɣ nni war ittesřin i wawař n babas niɣ i wawař n yemmas, uca nitni wtint t, [maca] netta war d asen ittesři,
DEU 21:19 [xenni] babas d yemmas ad t ksin uca ad t awyen barra zzat i imɣaren n tendint nnes, ɣar tewwart n wemcan [mani izeddeɣ].
DEU 21:20 Ad inin i imɣaren n tendint: ‘Wa d mmitneɣ d aɣennan d amɣewweɣ, war ittesři i wawař nneɣ, aqa afus nnes innuqqeb u netta d ameskar.’
DEU 21:21 [Xenni] marra iryazen n tendint ad t arejmen ař ɣa immet. Ittxeṣṣa ad tekksed aɛeffan zi řwesṭ nwem [ḥima] marra Israil ad tseř uca ad teggʷed.”
DEU 21:22 “Mařa ijj n weryaz igga ijj n ddenb i x [iǧa] řḥukm n řmewt uca ittwaneɣ, tuyřed i-t x ict n teḥnact [n ukeccuḍ],
DEU 21:23 [xenni] war ttejjim řxecbet nnes ad tessens x teḥnact, maca ad t tneḍřed deg wass nni, minzi wenni ittwayřen aqa-t d amenɛuř zi AREBBI. War sxemmaj tammurt nnec, tenni d ac ɣa iwc SIDI, AREBBI nnec, d řwart.”
DEU 22:1 “War iɛeddeř ad txezzared [waha] deg uweddar n ufunas niɣ n ijjen zeg wuǧi n umac, niɣ ad xasen tqeřbed tiṭṭawin, maca ittxeṣṣa ad ac ten-i-dd-tarred nican i umac.
DEU 22:2 Mařa umac war iǧi ca yudes niɣ war t tessined, ad t tessidfed ɣar daxeř i taddart nnec uca ad ɣarek iqqim ař dd ɣa yas umac ad xas yarzu uca [xenni] ad as [t-i-]dd tarred.
DEU 22:3 Amenni i ɣa tegged s weɣyuř nnes, amenni i ɣa tegged [ɛawed] s warruḍ nnes, [wah,] ammu i ɣa tegged ak-d marra tamesřact n umac, tenni d as iweddaren uca tufid tt cek. War iɛeddeř ad as tennufared.
DEU 22:4 War [teqqimed] ad texzared deg weɣyuř n umac niɣ deg ufunas nnes am wḍan deg webrid, war xasen qeǧeb ca tiṭṭawin. S tidett ad ten tessekkared akides.”
DEU 22:5 “Tamɣart war tyarreḍ min ittřiqen i weryaz, niɣ aryaz ad yarḍ arruḍ n temɣart, minzi marra wi itteggen aya aqa-tt d jjɛifect i SIDI, AREBBI nnec.
DEU 22:6 Mařa iban-dd zzat i wudem nnec x webrid ca n řɛucc n wejḍiḍ, di ca n tcejjart niɣ x temmurt, [s] iwarruden niɣ [s] tmeǧařin, uca yemmatsen tessdeř x iwarruden niɣ x tmeǧařin, [xenni] war ttᵉṭṭef yemmatsen ak-d iwarruden.
DEU 22:7 Ad tejjed ad tuyur yemmatsen, maca ad teksid iwarruden i yixef nnec, ḥima ad tiřid mliḥ, uca ad ac zuggarten wussan [n tudart] nnec.
DEU 22:8 Xmi ɣa tebnid taddart n jdid, ad tegged taɛmadt x tzeqqa nnec, [ḥima] war ttikkʷiḍen idammen ɣar taddart nnec, mařa iwḍa-dd zzayes ḥed.
DEU 22:9 War zarreɛ ca amarjeɛ n uḍiř nnec s tnayen n markat n zzariɛet, ḥima war tᵉttwassɛiǧit marra ṣṣabet n zzariɛet nni tzarɛed uřa d řɣiǧet n umarjeɛ n uḍiř.
DEU 22:10 War carrez ca s ufunas d weɣyuř jmiɛ.
DEU 22:11 War yarreḍ ca arruḍ ittwaggen zi txeǧeḍt n taḍuft d řeqṭen jmiɛ.
DEU 22:12 Ad tegged tcarcifa x arebɛa n iɣemmura n useřham nnec i zi třeḥḥfed.”
DEU 22:13 “Mařa ijj n weryaz yiwi ict n temɣart uca yudef-dd xas, [xenni] ad tt icarh,
DEU 22:14 uca issekkar xas awařen uca yarra isem nnes d aɛeffan, inna: ‘Aqa tamɣart-a iwyeɣ tt, uca [umi] ɣares-dd qarrbeɣ, iwḍeɣ ad ssneɣ aqa war teǧi ca d taɛzarect!’,
DEU 22:15 [xenni] ad isscen babas n tebřiɣt nni d yemmas [lburhanat] n tɣuni n tebřiɣt i yemɣaren ɣar tewwart n tendint.
DEU 22:16 Ad yini babas n tebřiɣt nni i yemɣaren: ‘Necc wciɣ yeǧi i weryaz-a d tamɣart uca netta idweř icarh i-tt,
DEU 22:17 uca aqa netta issekkar xas awařen, inna: War ufiɣ ɣar yeǧic [lburhanat] n tɣuni n tebřiɣt. Aqa aya d [lburhanat n] tɣuni n yeǧi!’ Uca nitni ad bezzɛen ařeḥḥaf zzat i wudem n imɣaren n tendint.
DEU 22:18 [Xenni] ad ṭṭfen imɣaren n tendint aryaz nni uca ad t farcen
DEU 22:19 uca ad as ggen multa n mya [n uqiyyat] n nnuqart uca ad tent wcin i babas n tebřiɣt [nni], minzi netta yarra isem d aɛeffan x ict n teɛzarect zi Israil. Ad tiři d tamɣart nnes, war iḥeǧeř ad as iǧef marra ussan [min ɣa yekk iddar].
DEU 22:20 [Maca] mařa iffeɣ man aya d tidett uca war ufin [lburhanat] n tɣuni ɣar tebřiɣt,
DEU 22:21 [xenni] ad ssuffɣen tabřiɣt nni ɣar tewwart n taddart n babas uca ad tt arejmen yeryazen n tendint, [ař] ɣa temmet, minzi tegga řefḍiḥet di Israil umi tessefḍeḥ ixef nnes di taddart n babas. Ittxeṣṣa ad tekksed řɣar zi řwesṭ nnec.”
DEU 22:22 “Mařa ittwaṭṭef ijj n weryaz umi iṭṭeṣ ak-d ca n temɣart i [iǧan] ak-d weryaz, [xenni] ad mmten s tnayen, aryaz nni iṭṭṣen ak-d temɣart d temɣart [ɛawed]. Ittxeṣṣa ad tekksed řɣar zi Israil.
DEU 22:23 Mařa ict n tebřiɣt d taɛzarect tᵉttwaxḍeb zeg ijj n weryaz, uca yufa i-tt ijj n weryaz di tendint uca iṭṭeṣ akides,
DEU 22:24 [xenni] ad ten tessuffɣem barra s tnayen ɣar tewwart n tendint, ad ttwarejmen ař ɣa mmten nitni: tabřiɣt minzi war tessekkar ca tɣuyyit di tendint, aryaz minzi isseḥqar tamɣart n jjar nnes. Ittxeṣṣa ad tekksed řɣar zi řwesṭ nnec.
DEU 22:25 Mařa ijj n weryaz yufa ict n tebřiɣt ittwaxeḍben deg iyyar uca issexsar i-tt weryaz, iṭṭeṣ akides, [xenni] ittxeṣṣa ad immet weryaz waha, wenni kis iṭṭṣen.
DEU 22:26 War ttegg walu i tebřiɣt. Tabřiɣt war teggi ca ddenb ař řmewt, minzi tamesřact-a am [tmesřact] n weryaz nni ikkaren ak-d jjar nnes uca inɣa i-t,
DEU 22:27 minzi netta yufi tt deg iyyar, tesɣuy tebřiɣt nni ittwaxeḍben, maca war tuɣi din wi tt ɣa issnejmen.
DEU 22:28 Xmi ca n weryaz yufa ict n tebřiɣt d taɛzarect, war tt ixḍib ḥed, uca netta iṭṭef i-tt, iṭṭeṣ akides uca ttwafen nitni,
DEU 22:29 [xenni] aryaz nni iṭṭṣen akides ad iwc i babas n tebřiɣt xemsin n [uqiyyat n] nnuqart u nettat ad tedweř d tamɣart nnes, umi tt isseḥqar. War izemmar ad as iǧef marra ussan [n tudart] nnes.
DEU 22:30 War iɛeddeř i weryaz ad iksi tamɣart n babas u war iɛeddeř ad issɛarra x wafriw [ittsarran] n warruḍ n babas.”
DEU 23:1 “War iɛeddeř i wenni umi deqfen, umi ttwaddzen [imeǧařen] niɣ ttwakksen imenyaren ad yadef ɣar wegraw [n řgens] n SIDI.
DEU 23:2 War iɛeddeř i mmis n řeḥram ad yadef ɣar wegraw [n řgens] n SIDI. Ɛad ař jjiř wiss ɛecra nnes [uřa d ijj zzayes] war d as iɛeddeř ad yadef ɣar tmesmunt n SIDI.
DEU 23:3 War iɛeddeř i yijjen n zeg ayt n Ɛammun niɣ i yijjen zeg ayt n Mu’abi ad yadef ɣar wegraw n řgens n SIDI. Waxxa ař jjiř wiss ɛecra nnes ɛad war iɛeddeř i [uřa d ijj zzaysen] ad yadef ɣar wegraw [n řgens] n SIDI i řebda,
DEU 23:4 minzi nitni war ɣarwem dd-ffiɣen ḥima ad kidwem msagaren ɣar webrid s weɣrum d waman umi dd-teffɣem zi Miṣra uca umi netta xak icra Balɛam, mmis n Baɛur, zi Fatur zi [temmurt n] Aram-Nahrayn, [aqa-tt d Misuputamya], maḥend ad cek inɛeř.
DEU 23:5 [Maca] SIDI, AREBBI nnec, tuɣa war ixs ad iseř i Balɛam uca SIDI, AREBBI nnec, yarra nneɛřet d lbaraka, minzi SIDI, AREBBI nnec, tuɣa ittexs i cek.
DEU 23:6 War tarezzu x řehna nsen d řxar nsen, marra ussan [n tudart nnec], ař i řebda.
DEU 23:7 War carreh Adumi, minzi netta d umac, war carreh Amiṣri, minzi tuɣa cek d abarrani di temmurt nnes.
DEU 23:8 Iḥenjiren i d asen ittwarwen iɛeddeř asen ad adfen ɣar wegraw [n řgens] n SIDI zi jjiř wiss třata.”
DEU 23:9 “Umi dd ɣa teffɣed s řɛeskar ḍidd i řɛedyan nnec, ad teḥḍid ixef nnec zi marra řɣar.
DEU 23:10 Mařa din ijj n weryaz akidek, war iǧi ca d amezdag ak-d min imsaren s ǧiřet, ad iffeɣ barra i řmargeḥ n řɛeskar. War d as iɛeddeř maḥend ad yadef ɣar daxeř n řmargeḥ.
DEU 23:11 Ɣar uweṭṭu n tmeddit, ad issird ixef nnes s waman u awarni i uɣeǧay n tfuct izemmar ad yadef [ɛawed] ɣar řmargeḥ.
DEU 23:12 Ittxeṣṣa ad ɣarek yiři wemcan barra i řmargeḥ n řɛeskar mani ɣa teffɣed di barra.
DEU 23:13 Ad ɣarek yiři ɛawed jar řeqcuɛ nnec ijj n ujij uca xmi ɣa teqqimed barra, ad zzayes txebced ijj n weḥfur, ad tenqeřbed u ad txemmřed isuffɣan nnec.
DEU 23:14 Minzi SIDI, AREBBI nnec, iggur di řmargeḥ nnec n řɛeskar ḥima ad cek ifekk u ḥima ad [ac] isellem řɛedyan nnec zzat i wudem nnec. Tasqift nnec at tiři tqeddes, ḥima Netta war dayek ittwiři ca n řefḍiḥet uca ad xak inneqřeb awarni ac.”
DEU 23:15 “Ismeɣ i ɣarek dd-yarewřen zi bab nnes, war tzemmared ad t tsellmed [ɛawed] i bab nnes.
DEU 23:16 Ad kik izdeɣ di řwesṭ nnec, deg wemcan nni ɣa yixḍar ɣar daxeř i yict zi tewwura nnec, mani ɣa yiři mliḥ. War iɛeddeř ad t tḍeřmed.
DEU 23:17 War tᵉttiři uřa d ict n temɣart n farq-ccɣeř n zzawect jar yessis n Israil uca war ittiři uřa d ijj n umetli [n zzawect] jar ayt n Israil.
DEU 23:18 Mammec ma yegga wawař nnec, war iɛeddeř ad dd-tawyed i uya řmunet n farq-ccɣeř niɣ ttaman n weqzin ɣar Taddart n SIDI, AREBBI nnec, minzi aqa aten s tnayen d ict n jjɛifect ɣar SIDI, AREBBI nnec.
DEU 23:19 War ttegg arriba x umac, war iǧi arriba x nnuqart, war iǧi arriba x macca, war iǧi arriba x marra tamesřact nni izemmaren ad dd-tawi arriba.
DEU 23:20 Tzemmared ad tegged arriba x ubarrani, maca war tzemmared ad tegged arriba x umac, ḥima ad ac ibarek SIDI, AREBBI nnec, di marra řxedmet n ifassen nnec di temmurt mani ɣa traḥed ḥima ad tt teksid d řwart.
DEU 23:21 Xmi ɣa tegged ijj n lwaɛd i SIDI, AREBBI nnec, war teddikkwiřed ca ɣar ḍeffar maḥend ad t tkemmřed, minzi SIDI, AREBBI nnec, ad zzayek ittar [ad] t [tkemmřed], [mařa lla] ad xak yiři d ddenb.
DEU 23:22 Mařa war teggid ijj n lwaɛd, war xak ittiři ddenb.
DEU 23:23 Min dd-iffɣen zi jar iyencicen nnec, ad t tkemmřed s tidett, am mammec ittxeṣṣa ad tkemmřed lwaɛd n tewhibt s řxaḍar nni zi twaɛded SIDI, AREBBI nnec, u wenni x tessiwřed s uqemmum nnec.
DEU 23:24 Xmi ɣa tadfed ɣar umarjeɛ n uḍiř n umqarrab nnec, tzemmared ad tecced aḍiř ɛlaḥsab meẓri n řeɛmar nnec, maca ittxeṣṣa war tᵉttegged walu di tsuǧet nnec.
DEU 23:25 Mařa tudfed ɣar imendi ibedden n jjar nnec, tzemmared ad teksid tidrin s ifassen nnec, maca war iɛeddeř ad tewted amjar deg imendi ibedden n jjar nnec.”
DEU 24:1 “Xmi ɣa yawi ijj n weryaz ict n temɣart uca imřec akides uca war d as teɛjib umi dayes yufa ca n řefḍiḥet, uca [xenni] ad as yari tabrat n weǧaf, ad as tt iwc deg ufus nnes uca ad tt issufeɣ zi taddart nnes,
DEU 24:2 uca [xenni] teffeɣ nettat zi taddart nnes, truḥ uca tedweř d tamɣart ɣar ijj n weryaz nneɣni,
DEU 24:3 uca aryaz aneggaru icarh i-tt, ad as yari tabrat n weǧaf uca ad as tt iwc deg ufus nnes uca ad tt issekk zi taddart nnes, niɣ aryaz aneggaru nni i-tt yiwyen d tamɣart [nnes], immut,
DEU 24:4 [xenni] war iɛeddeř i weryaz nnes amezwaru, wenni d as iṭellqen, ad tt yegg [ɛawed] d tamɣart i yixef nnes, awarni umi tᵉttwassexmej nettat, minzi man aya d jjɛifect zzat i wudem n SIDI. War iɛeddeř ad tessiwiḍ ddenb x temmurt i d ac iwca SIDI, AREBBI nnec, d řwart.”
DEU 24:5 “Xmi ijj n weryaz tuɣa am imřec, [xenni] war itteffeɣ ca ak-d řɛeskar u war xas tᵉttwagg uřa d ict n tmesřact. Ad yiři ijj n useggʷas i taddart nnes waha u ad issfarḥ tamɣart nnes i yiwi [i yixef nnes].”
DEU 24:6 “War iɛeddeř ad teksid iẓra n tsirt s tnayen d aḍman, niɣ [aẓru] nni [zzaysen] ittenhezzan [waha], minzi aqa [xenni] ad yiři řeɛmar d aḍman.”
DEU 24:7 “Mařa ittwaf ijj n weryaz yucar ca n yijj zeg wawmaten nnes, zeg ayt n Israil, uca netta yarra i-t d ismeɣ uca izzenz i-t, [xenni] ad immet uceffar [nni]. Ittxeṣṣa ad tekksed řɣar zi řwesṭ nnec.”
DEU 24:8 “Xmi [din teǧa] jjriḥect n řbarṣ, ḥḍa ad teḥḍid u ad tegged nican ɛlaḥsab marra min d ac ɣa ssřemden ikehhanen Ilawiyyen. Ad teḥḍam maḥend ad teggem marra am mammec ten umureɣ.
DEU 24:9 Idar min igga SIDI, AREBBI nnec, ak-d Maryam deg webrid umi dd-teffɣem zi Miṣra.”
DEU 24:10 “Mařa tarḍřed ca i jjar nnec, [xenni] war ttidef ɣar taddart nnes ḥima ad zzayes teksid ca d aḍman [i yixef nnec].
DEU 24:11 Ad teqqimed barra uca aryaz i umi tarḍřed ad ac dd-yawi ddiyyet ɣar barra.
DEU 24:12 Mařa tuɣa d aryaz d amezřuḍ, [xenni] war ttᵉttnusi deg werhan nnes [amecnaw i yeǧa d tassut nnes].
DEU 24:13 Ad as dd-tarred ddiyyet nni nican ɣar uɣeǧi n tfuct, ḥima ad iṭṭeṣ di tassut nnes uca ad ac ibarek. Man aya ad ac tiři d tasegda zzat i wudem n SIDI, AREBBI nnec.”
DEU 24:14 “War sḥissfem acewwař ameḥdaj amezřuḍ zeg aytmac niɣ zeg ibarraniyyen i izeddɣen di temmurt nnec u daxeř i tewwura nnec.
DEU 24:15 Ad as tewced řmunet nnes kuř ass. War xas tɣeǧi tfuct x man aya, minzi netta d amezřuḍ uca immeẓri dayes, ḥima netta war ittřiɣi i SIDI di ssibbet nnec uca ad dayek yiři ddenb.”
DEU 24:16 “Ibabaten war ttwaneqqen di ssibbet n iḥenjiren nsen u iḥenjiren war ttwaneqqen di ssibbet n ibabaten nsen. Kuř ijj ad ittwaneɣ di ssibbet n ddenb nnes.”
DEU 24:17 “War sfarraɣ řeḥkam n ubarrani d uyujiř niɣ ad teksid arruḍ n tajjač d aḍman.
DEU 24:18 Ad tɛeqřed belli tuɣa cek d ismeɣ di Miṣra uca aqa SIDI, AREBBI nnec, ifdi cek ssenni. X uya necc ttumureɣ cek ad tegged man aya.
DEU 24:19 Xmi tmejjared ṣṣabet nnec deg iyyar nnec uca tᵉttud ca n tqebbiḍt deg iyyar, [xenni] war dd-tᵉddikkʷiřed maḥend ad tt teksid. Ad tiři [d tasɣart] i ubarrani, i uyujiř u i tajjač, ḥima ad cek ibarek SIDI, AREBBI nnec, di marra řxedmet n ifassen nnec.
DEU 24:20 Xmi ɣa tẓewḍed tacejjart nnec n zzitun, war ttic taynit [ɛad] i min iqqimen awarni ac. D man aya i ɣa yiřin i ubarrani, i uyujiř u i tajjač.
DEU 24:21 Awarni řami třeqḍed aḍiř n umarjeɛ nnec n uḍiř, war arezzu ad třeqḍed min iqqimen awarni ac ɛawed. Aqa man aya ad yiři i ubarrani, i uyujiř u i tajjač.
DEU 24:22 Ad tɛeqřed belli tuɣa cek d ismeɣ di temmurt n Miṣra. X uya necc ttumureɣ cek ad tegged man aya.”
DEU 25:1 “Mařa [din] ijj n umcubbec jar iryazen uca ittxeṣṣa asen ad uyuren ɣar řmeḥkama, ad [xasen] ḥekmen, [xenni] ad barrḥen x wenni ɣar iǧa řḥeqq uca ad ḥekmen x umednub.
DEU 25:2 Mařa amednub issdaheǧ tiyyita, [xenni] řqaḍi ad yejj ad t ɣeḍřen ɣar temmurt uca ad [t] farcen zzat i wudem nnes anect itturs [di řeḥsab] n řɣecc nnes.
DEU 25:3 Iɛeddeř ad as iwc arebɛin n teyyita, war ɣarsent yarenni ca, minzi mařa ad t ifarc ɛad ktar sennej i tiyyita-ya, aqa umac ad ac dd-iban d ameḥgur jar tiṭṭawin nnec.”
DEU 25:4 “War ttegg tacmant i ufunas xmi issarwat.”
DEU 25:5 “Xmi zeddɣen wawmaten ak-d wayawya uca immut ijj zzaysen, uca war dd-yejji ca mmis, [xenni] tamɣart n umettin war tmeǧec ca ak-d ca n weryaz barra familiya nnes. Ad xas yadef wařews uca ad tt igg d tamɣart nnes uca ad as yegg xenni lwajib n wařews.
DEU 25:6 Uca amenzu nni i dd ɣa taruw, ad ixřef isem n umas immuten, [ḥima] isem n wa war imeḥḥi ca zi Israil.
DEU 25:7 [Maca] mařa aryaz war ixs ad iksi tamɣart n umas, ad třah [xenni] temɣart n umas ɣar tewwart, ɣar imɣaren, ad tini: ‘Ařews inu yugi ad ixřef isem n umas di Israil, war ixs ad igg lwajib n wařews.’
DEU 25:8 [Xenni] imɣaren n tendint nni ad as dd-řaɣan uca ad akides ssiwřen. Mařa netta imneɛ deg wawař nnes uca inna: ‘War xseɣ ca ad tt awyeɣ!’,
DEU 25:9 ad ɣares dd-tqarreb [xenni] tařewst zzat i tiṭṭawin n imɣaren, ad as tekkes sandala nnes zeg uḍar uca ad xas tessusef x uɣembub, ad tbarreḥ, ad tini: ‘Ammu i ittwagg deg weryaz nni war ixsen ad ibna taddart n umas!’
DEU 25:10 Uca ad as řaɣan di Israil s yisem wanita: ‘Taddart n wenni umi ittwakkes sandala nnes!’”
DEU 25:11 “Mařa [din] iryazen mcubbucen uca treḥḥeg-dd temɣart n ca n ijj ḥima ad tfekk aryaz nnes zeg ufus n wi t iccaten uca nettat tesswiẓẓeḍ afus nnes uca tᵉṭṭef i-t zi tfulin n useḍḥi nnes,
DEU 25:12 ad as tqessed [xenni] afus nnes, war d am ttezziǧiz.”
DEU 25:13 “War ɣarek ittiři di txancet nnec ijj n weẓru [n řewzen] d ijj n weẓru [nneɣni], ijj n weẓru d ameqqran uřa d ijj n weẓru d ameẓyan.
DEU 25:14 War ɣarek ittiři di taddart nnec, [řmud] n ijj n ifa uřa d ijj n ifa [nneɣni], ijj n ifa d ameqqran uřa d ijj n ifa d ameẓyan.
DEU 25:15 Ijj n weẓru n řewzen iwaṭa, iseggem ad ɣarek yiři uřa d ij n řmud n yijj n ifa nican, iwaṭa, ḥima ussan nnec ad zzuggarten x wudem [n temmurt] nni i d ac ɣa iwc, SIDI, AREBBI nnec.
DEU 25:16 Minzi marra wi ɣa iggin man aya, marra wi ɣa iggin řɣecc, aqa netta d nnɛi ɣar SIDI, AREBBI nnec.”
DEU 25:17 “Idar min zzayek igga Ɛamaliq deg webrid, umi dd-teffɣed zi Miṣra,
DEU 25:18 mammec dd-iffeɣ ɣar umsagar akidek deg webrid uca ihjem xak zi ḍeffar [mani ǧan] marra inni iḍeɛfen, umi cek tuɣa tuḥřed, tefnid. Netta war iggʷid ca AREBBI.
DEU 25:19 Ad imsar, xmi SIDI, AREBBI nnec, ad cek issareyyeḥ zi marra řɛedyan i d ac-dd innḍen di temmurt i d ac ɣa iwc SIDI, AREBBI nnec, d řwart, ḥima ad tt teksid, aqa ad temḥid řidaret n Ɛamaliq zi sadu ujenna. War t ttᵉttu!”
DEU 26:1 “Xmi ɣa tadfed ɣar temmurt nni d ac ɣa iwc SIDI, AREBBI nnec, d řwart, uca ad tt tᵉṭṭfed uca ad dayes tzedɣed,
DEU 26:2 [xenni] ad teksid zi tmezwarut n kuř řɣiǧet i ɣa tessmuned zi temmurt nni d ac ɣa iwc SIDI, AREBBI nnec, ad t tegged di tsuǧet uca ad traḥed ɣar wemcan i ɣa yixḍar SIDI maḥend ad din issezdeɣ Isem nnes.
DEU 26:3 Uca ad dd-tased ɣar ukehhan, wenni [din] ɣa yiřin deg wussan nni, ad as tinid: ‘Aqa ass-a ad barrḥeɣ i SIDI, AREBBI nnec, belli aqa udfeɣ ɣar temmurt nni x ijjuǧ SIDI i řejdud nneɣ ḥima ad aneɣ tt iwc.’
DEU 26:4 Uca ad iksi ukehhan tasuǧet zeg ufus nnec, ad tt issars zzat i uɛalṭar n SIDI, AREBBI nnec.
DEU 26:5 Ad tbarrḥed zzat i wudem n SIDI, AREBBI nnec, ad tinid: ‘Aramiyu nni tuɣa iǧan ɛřaḥař ad ifna aqa tuɣa-t d baba. Netta ihwa ɣar Miṣra uca izdeɣ din am ubarrani ak-d ijj n wuru n yeryazen [waha] uca iyma, idweř d ijj n řgens imɣar, ijhed u deg waṭṭas.
DEU 26:6 Imiṣriyyen ḍeřmen u ḥṣaren aneɣ u ggin xaneɣ tasmuɣi teqseḥ.
DEU 26:7 Uca nesɣuy ɣar SIDI, AREBBI n řejdud nneɣ, uca isřa SIDI i tmijja nneɣ u iẓra arẓiyyet nneɣ d řeɣben nneɣ d řmeḥnet nneɣ.
DEU 26:8 Issuffeɣ aneɣ-dd SIDI zi Miṣra s ufus ijehden, s uɣiř isswiẓẓḍen, s timegga imɣaren issiggʷiden, s řeɛřamat u s lmuɛjizat,
DEU 26:9 uca issidef aneɣ ɣar wemcan-a uca iwca aneɣ tammurt-a, tammurt ifeyyḍen s uɣi d tamment.
DEU 26:10 Uca řexxu, xzar, iwyeɣ-dd tamezwarut n řɣiǧet n temmurt nni d ayi tewcid, [a] SIDI!’ [Xenni] ad t tegged zzat i wudem n SIDI, AREBBI nnec, ad tbendqed zzat i wudem n SIDI, AREBBI nnec.
DEU 26:11 Ad tfarrḥed zi marra řxař i ɣa iwc SIDI, AREBBI nnec, i cek u i [aytbab n] taddart nnec: cek d Ulawi d ubarrani i iǧan di řwesṭ nnec.”
DEU 26:12 “Xmi ɣa tkemmřed zeg uɛeccar n marra řeɛcur n řɣiǧet nnec deg useggʷas wiss třata, wenni d aseggʷas n řeɛcur, xenni ad ten tewced i Ulawi, i ubarrani, i uyujiř, i tajjač, [ḥima] ad ccen daxeř i tewwura nnec u ad jjiwnen.
DEU 26:13 Uca ad tinid zzat i wudem n SIDI, AREBBI nnec: ‘Aqa ksiɣ min iǧan iqeddsen zi taddart inu uca ɛawed wciɣ t i Ulawi, i ubarrani, i uyujiř, i tajjač, am mammec marra tiweṣṣa i d ayi tweṣṣid. Necc war ɛeddiɣ uřa x icten zi tweṣṣa nnec u war ttuɣ walu.
DEU 26:14 War zzayes cciɣ deg wecḍan inu u war zzayes ksiɣ umi xemjeɣ uřa war zzayes wciɣ i yijj n umettin. Aqa sřiɣ i tmijja n SIDI, AREBBI inu, u ggiɣ marra min d ayi tumured.
DEU 26:15 Xzar zi Tzeddiɣt nnec iqeddsen, zeg ujenna, ɣar swadday uca barek řgens nnec Israil d temmurt nni d aneɣ tewcid, am mammec tejjuǧed i řejdud nneɣ, tammurt nni ittfeyyḍen s uɣi d tamment.’”
DEU 26:16 “SIDI, AREBBI nnec, aqa yumur i cek ass-a, ad tegged tiweṣṣa-ya d lfarayiḍ-a. Ḥḍa tent uca egg zzaysen s marra uř nnec d marra řeɛmar nnec.
DEU 26:17 Ass-a tennid aqa SIDI ad yiři d AREBBI nnec, ad tuyured deg ibriden nnes, ad teḥḍid tiweṣṣa d řumurat nnes d lfarayiḍ nnes uca ad tesřed i tmijja nnes.
DEU 26:18 Uca SIDI inna ac ass-a i cek, aqa cek ad ɣares tiřid d ijj n řgens iɣřa aṭṭas, am mammec d awem inna, u ittxeṣṣa ac ad teḥḍid marra tiweṣṣa nnes,
DEU 26:19 ḥima Netta ad cek issuɛřa x marra řegnus i usemɣar d yisem d řɛezz, ḥima ad tiřid d ijj n řgens iqeddsen i SIDI, AREBBI nnec, am mammec tuɣa inna.”
DEU 27:1 Musa, ak-d imɣaren n Israil, yumur řgens, inna: “Ḥḍam marra tiweṣṣa-ya, tinni d awem umureɣ necc ass-a.
DEU 27:2 Ad imsar deg wass umi ɣa teẓwam iɣzar n L’Urdun ɣar temmurt nni d ac ɣa iwc SIDI, AREBBI nnec, aqa ad tessbedded iẓra imeqqranen uca ad ten tḥennced s jjar.
DEU 27:3 Ad dayes tarid marra awařen n Ccariɛa-ya, xmi ɣa teẓwid ḥima ad tadfed ɣar temmurt nni d ac ɣa iwc SIDI, AREBBI nnec, ict n temmurt ifeyyḍen s uɣi d tamment, am mammec i d ac inna SIDI, AREBBI n řejdud nnec.
DEU 27:4 Xmi ɣa teẓwam iɣzar n L’Urdun, ad tessbeddem iẓra, inni x d awem umureɣ ass-a x wedrar n Ɛibal uca ad ten tḥennced s jjar.
DEU 27:5 Ad din tebnid ijj n uɛalṭar i SIDI, AREBBI nnec, ijj n uɛalṭar n yeẓra. War xas tessiřiyed [dduzan n] wuzzař zi ssa ɣar da.
DEU 27:6 Ittxeṣṣa ad tebnid aɛalṭar n SIDI, AREBBI nnec, s yeẓra kemřen [waha] uca ad xas tessbexxared tiɣarṣa n wecmaḍ i SIDI, AREBBI nnec.
DEU 27:7 [Ɛawed] ad as tqeddmed tiɣarṣi nnec n řehna. Ad din tecced uca ad tfarḥed zzat i wudem n SIDI, AREBBI nnec.
DEU 27:8 Ad tarid marra awařen n Ccariɛa-ya deg yeẓra s ijj n wenqac icewwaren icnan.”
DEU 27:9 Tuɣa Musa issawař ak-d ikehhanen, Ilawiyyen, ɣar marra Israil, inna: “Sqar, sḥess, [a] Israil! Ass-a tiwḍed ad tiřid d ijj n řgens i SIDI, AREBBI nnec.
DEU 27:10 Ad tesřed i tmijja n SIDI, AREBBI nnec, uca ad tegged zi řumurat nnes d tweṣṣa nnes, tinni x cek umureɣ ass-a.”
DEU 27:11 Iweṣṣa Musa řgens deg wass nni, inna:
DEU 27:12 “Xmi ɣa teẓwam L’Urdun ad bedden tqebbař aya x wedrar n Jirizim ḥima ad barken řgens: Cimɛun d Lawi d Yahuda d Issakar d Yusuf d Binyamin.”
DEU 27:13 “Uca [tiqebbař-a] ad bedden x wedrar n Ɛibal ḥima ad neɛřen: Rubin, Jad d Ɛacir d Zabulun, Dan d Naftali.”
DEU 27:14 “Ad barrḥen Ilawiyyen uca ad inin s tmijja ijehden i marra arraw n Israil:
DEU 27:15 ‘D amenɛuř aryaz nni iggin ijj n řexyař ineqcen niɣ ifesyen, aqa-t d jjɛifect i SIDI, ict n řxedmet n ifassen n uḥrayfi, uca ad tt igg deg wemcan nnes s tnuffra.’ Uca marra řgens ad dd-yarr ad yini: ‘Amin!’
DEU 27:16 ‘D amenɛuř wi ɣa isseḥqaren babas niɣ yemmas!’ Uca marra řgens ad yini: ‘Amin!’
DEU 27:17 ‘D amenɛuř wi ɣa issmuṭṭyen aymir n jjar nnes!’ Uca marra řgens ad yini: ‘Amin!’
DEU 27:18 ‘D amenɛuř wi ɣa issweddaren adarɣař deg webrid!” Uca marra řgens ad yini: ‘Amin!’
DEU 27:19 ‘D amenɛuř wi ɣa issfarrɣen tasɣart n ubarrani, n uyujiř u n tajjač!’ Uca marra řgens ad yini: ‘Amin!’
DEU 27:20 ‘D amenɛuř wi ɣa iṭṭṣen ak-d temɣart n babas, minzi ittɛarra babas’ Uca marra řgens ad yini: ‘Amin!”
DEU 27:21 ‘D amenɛuř wi ɣa iṭṭṣen ak-d ca n umuddar!’ Uca marra řgens ad yini: ‘Amin!’
DEU 27:22 ‘D amenɛuř wi ɣa iṭṭṣen ak-d učmas, yeǧis n babas niɣ yeǧis n yemmas!’ Uca marra řgens ad yini: ‘Amin!’
DEU 27:23 ‘D amenɛuř wi ɣa iṭṭṣen ak-d tadeggʷač nnes!’ Uca marra řgens ad yini: ‘Amin!’
DEU 27:24 ‘D amenɛuř wi ɣa inɣen jjar nnes s tnuffra!’ Uca marra řgens ad yini: ‘Amin!’
DEU 27:25 ‘D amenɛuř wi ɣa iṭṭfen arrecwet maḥend ad inɣa ijj n bnadem, [mahend ad issizzeř] idammen imezdagen!’ Uca marra řgens ad yini: ‘Amin!’
DEU 27:26 ‘D amenɛuř wi war ittqarran awařen n Ccariɛa-ya maḥend ad ten yegg!’ Uca marra řgens ad yini: ‘Amin!’”
DEU 28:1 “Ad imsar, mařa tesřid mliḥ i tmijja n SIDI, AREBBI nnec, ad teḥḍid marra tiweṣṣa nnes, tinni d ac ttumureɣ ass-a ḥima ad tent tegged, [xenni] ad cek issuɛřa SIDI, AREBBI nnec, x marra řegnus n temmurt.
DEU 28:2 Marra lbarakat-a ad xak dd-asent, ad ac dd-awḍent, mařa tesřid i tmijja n SIDI, AREBBI nnec.
DEU 28:3 Ad tᵉttwabarked di tendint u ad tᵉttwabarked deg iyyar.
DEU 28:4 Ad tᵉttwabarek řɣiǧet n uɛeddis nnec d řɣiǧet n temmurt nnec d řɣiǧet n řebhayem nnec d twarura n tfunasin nnec d imeẓyanen iɛizzen n wuǧi nnec.
DEU 28:5 Ad tᵉttwabarek tsuǧet nnec d tebqect nnec.
DEU 28:6 Ad tᵉttwabarked ɣar wadaf nnec, ad tᵉttwabarked deg wuffuɣ nnec.”
DEU 28:7 “SIDI ad isellem řɛedyan nnec, inni xak ɣa ikkaren d ibarḥaḍ zzat i wudem nnec. Ad xak dd-ffɣen deg webrid d ijj uca ad arewřen zzat i wudem nnec x sebɛa n ibriden.
DEU 28:8 SIDI ad ac yumur s lbaraka di tesrafin nnec u x marra min igga ufus nnec. Netta ad cek ibarek di temmurt nni i d ac ɣa iwc SIDI, AREBBI nnec.
DEU 28:9 SIDI ad cek yarr ad tekkared am yijj n řgens iqeddsen i Yixef nnes am mammec i d ac ijjuǧ, xmi ɣa teḥḍid tiweṣṣa n SIDI, AREBBI nnec, uca ad tuyured deg ibriden nnes.
DEU 28:10 Marra řegnus n temmurt ad ẓaren belli Isem n SIDI ittwadenna xak uca ad zzayek ggʷeden.
DEU 28:11 SIDI ad ac iwc řxar s ufeyyeḍ di řɣiǧet n uɛeddis nnec u di řɣiǧet n řebhayem nnec u di řɣiǧet n temmurt nnec, di temmurt nni ijjuǧ SIDI i řejdud nnec ad ac tt-i-dd-iwc.
DEU 28:12 SIDI ad ac yarzem [tawwart n] wexxam nnes n txubay iṣeřḥen, ijenwan, ḥima ad iwc anẓar i temmurt nnec di řweqt nnes u ḥima ad ibarek marra řxedmet n ufus nnec. Ad tarḍřed i waṭṭas n řegnus, maca cek war [xasen] tareṭṭřed.
DEU 28:13 SIDI ad cek yarr d azeǧif, war iǧi d unewwar, uca cek waha ad tiřid sennej, war tᵉttiřid swadday, mařa tesřid i tweṣṣa n SIDI, AREBBI nnec, wenni i d ac ttumureɣ ass-a ḥima ad tent teḥḍid uca ad zzaysent tegged.
DEU 28:14 War ttḥeyyid ca [ɣar] yefus uřa [ɣar] uzeřmaḍ x marra awařen nni d ac umureɣ ass-a ařami ɣa teḍfared irebbiten nneɣni, ad xasen tsexxared.
DEU 28:15 [Maca] ad imsar, mařa war tesřid i wawař n SIDI, AREBBI nnec, ḥima ad teḥḍid marra řumurat d tweṣṣa nnes i x d ac ttumureɣ ass-a, ḥima ad zzaysent tegged, [xenni] marra nnɛaři-ya ad xak dd-hwant u ad cek řeqfent:
DEU 28:16 [Ad tiřid] d amenɛuř di tendint u [ad tiřid] d amenɛuř deg iyyar.
DEU 28:17 Tasuǧet nnec d tebqect nnec [ad iřint] ttwaneɛřent.
DEU 28:18 D tamenɛuřt i ɣa tiři řɣiǧet n uɛeddis nnec d řɣiǧet n temmurt nnec u twarura n tfunasin nnec d imeẓyanen iɛizzen n wuǧi nnec.
DEU 28:19 [Ad tiřid] d amenɛuř ɣar wadaf nnec u [ad tiřid] d amenɛuř deg uffuɣ nnec.”
DEU 28:20 “Ad ac dd-issekk SIDI nneɛřet d uxarweḍ d uheddi ɣar marra mani isswiẓẓed ufus nnec, ař ɣa tᵉttwamḥid u ad tefnid deɣya zzat i wudem inu di ssibbet n řexdayem nnec tiɛeffanin, minzi tejjid ayi.
DEU 28:21 SIDI ad dayek isseřṣeq ṭṭaɛun ař cek ɣa iqḍa zi temmurt nni ɣar ɣa tadfed ḥima ad tt teksid d řwart.
DEU 28:22 SIDI ad cek iwwet s bu-deǧis, s tmessi [n arwaḥ] d ugeyyeḥ, s řeḥmu d řaẓaɣ, s [imendi] ittwasscemḍen [zeg usemmiḍ] uřa d jjriḥect n wefsu. Ina ad cek ḍfaren ař ɣa thellked.
DEU 28:23 Ajenna nni [iǧan] tiwa i uzeǧif nnec ad yiři d nnḥas u tammurt nni [iǧan] sadu nnec d uzzař.
DEU 28:24 Ad yarr SIDI, AREBBI nnec, anẓar n temmurt nnec d [ijj n useynu n] řeɛjaj d [ibquqen n] řeɛjaj. Man aya ad xak dd-ihwa ař ɣa tᵉttwateḥḥid.
DEU 28:25 SIDI ad cek yarr tᵉttwaɣeřbed zzat i wudem n řɛedyan nnec. Deg ijj n webrid ad dd-teffɣed ḍidd i řeɛdu nnec uca ad tarewřed zzat i wudem nnes x sebɛa n ibriden uca ad tiřid d [ict n řqecɛet] n unexřiɛ i marra tigeldiwin n ddunect.
DEU 28:26 Řxecbet nnec ad tiři d macca i ijḍaḍ n ujenna u i marra řmař x temmurt uca uřa d ijj war izemmar ad ten issiggʷed.
DEU 28:27 SIDI ad cek iwwet s tḥebba n Miṣra, s iɛebbuzen, s jdam, s wajjiḍ ař ɣa taf war tzemmared ad teggenfid.
DEU 28:28 SIDI ad cek iwwet s tubbuheřya, s tuddarɣeč u s arjef n wuř.”
DEU 28:29 “Deg wezyen n uziř ad tḥadid am uḥadi n udarɣař di taǧest. Ibriden nnec war ttiřin ṣeřḥen, [wah,] ad tiřid tᵉttwaḥṣared u tᵉttwakeccḍed marra ussan [n tudart nnec] uca war ittiři wi cek ɣa issenjmen.
DEU 28:30 Ad txeḍbed ict n temɣart uca ijj n weryaz nneɣni ad tt issnuqqeb, ad tebnid taddart i yixef nnec uca war dayes tzeddɣed, ad teggid ijj n umarjeɛ n uḍiř ad dayes teẓẓud tizayarin maca war zzaysent testenfiɛed.
DEU 28:31 Afunas nnec ad ittwaɣarṣ zzat i tiṭṭawin nnec uca war zzayes tᵉttetted, aɣyuř nnec ad t ucaren zzat i wudem nnec uca war d ac dd-ittɛiqqib. Uǧi nnec ad t wcen i řɛedyan nnec uca war ɣarek ittiři wi ɣa issenjmen.
DEU 28:32 Ad mmewcen iḥenjiren nnec d tḥenjirin nnec i yijj n řgens nneɣni. Tiṭṭawin nnec ad twařant uca ad daysen temmeẓred ass ikmeř uca war ittiři jjehd deg ufus nnec.
DEU 28:33 Řɣiǧet n temmurt nnec d marra řxedmet nnec ad t icc ijj n řgens i war tessined uca ad tiřid teḥṣared u ad třebzed waha marra ussan [n tudart nnec].
DEU 28:34 Ad tdewřed d abuhaři zi ssibbet n min ɣa tẓared s tiṭṭawin nnec.”
DEU 28:35 “SIDI ad cek iwwet s tḥebba tiɛeffanin ɣar ifadden u ɣar iḍaren i zi war tzemmared ad zzaysen teggenfid, zi třeqqa n uḍar nnec ař aceqquf [n uzeǧif] nnec.
DEU 28:36 SIDI ad cek yarr [jmiɛ] ak-d ujeǧid nnec, wenni cek ɣa tegged x yixef nnec, ad traḥed ɣar ijj n řgens nni war tessined ca, uřa d řejdud nnec, uca din i ɣa tsexxared i irebbiten nneɣni n ukeccuḍ d weẓru.
DEU 28:37 Ad tiřid d [ict n řqecɛet n] unexřiɛ d ijj n umedya d ict [n ssibbet i] ustehzi iqesḥen jar marra řegnus mani cek ɣa indeh SIDI.
DEU 28:38 Ad tessuffɣed aṭṭas n zzariɛet ɣar yeyyar uca ad třeqḍed drus, minzi tamurɣi ad tt teḥřuw.
DEU 28:39 Ad teggid imarjaɛen n uḍiř ad daysen teẓẓud tizayarin uca ad tent tɛarrṣed, [maca] war tsessed binu uca war třeqqḍed walu, minzi ad tent icc ukecca.
DEU 28:40 Ad ɣarek iřin izemmuren di marra tammurt nnec, [maca] war tdehhned ixef nnec s zzect, minzi ad iwḍa [zzitun] zeg uzemmur nnec [qbeř řweqt].
DEU 28:41 Ad dd-tejjed iḥenjiren d tḥenjirin, [maca] war ttiřin ca nnec, minzi ad ruḥen di tmeḥbast.
DEU 28:42 Marra ticejjura d řɣiǧet n temmurt nnec ad tent tᵉṭṭef tmurɣi d tasɣart nnes.
DEU 28:43 Abarrani nni [iǧan] di řwesṭ nnec, ad xak issuɛřa ixef nnes, sennej u sennej ɛad, uca cek ad tᵉttwassehwid ɣar temmurt, swadday ɣar wadday.
DEU 28:44 Netta ad ac yarḍeř, [maca] cek war d as tareṭṭřed. Netta ad yiři d azeǧif, cek ad tiřid d anewwar.
DEU 28:45 Uca ad xak dd-hwant marra nnɛaři-ya, ad cek ḍfarent, ad cek řeqfent ař ɣa tᵉttwamḥid, umi war tesřid i tmijja n SIDI, AREBBI nnec, ḥima ad teḥḍid řumurat nnes d tiweṣṣa nnes, inni d ac yumur Netta.
DEU 28:46 Ad iřint d ict n řeɛřamet d ijj n usiggʷid yewɛaren i cek u i zzariɛet nnec i řebda.
DEU 28:47 Minzi war tsexxared i SIDI, AREBBI nnec s řefraḥet d tcuni n wuř zi ssibbet n ufeyyeḍ n marra min din [iǧan],
DEU 28:48 ad tsexxared i řɛedyan, inni i xak ɣa issekk SIDI, s řaẓ d ufadi, s tuɛɛaryent d řexṣeṣ n marra timesřayin, uca Netta ad igg azayřu n wuzzař x yiri nnec, ař cek ɣa imḥa.
DEU 28:49 SIDI ad xak dd-issgeɛɛed ijj n řgens iggʷej, zeg uneggaru n temmurt, am yijj n ugider iṭṭawen, ijj n řgens i umi war tzemmared ad tfehmed iřes nnes,
DEU 28:50 ijj n řgens ɣares udem iqḍeɛ, war ittweqqar awessar, war yareḥḥem x uḥenjir.
DEU 28:51 Ad yecc řɣiǧet n řebhayem nnec d řɣiǧet n temmurt nnec, ař ɣa tᵉttwamḥid, minzi war d ac ittejji irden, niɣ binu n jdid, niɣ zzect [n ṭṭri], niɣ twarura n tfunasin nnec niɣ imeẓyanen iɛizzen n wuǧi nnec, ař cek i ɣa yareddeǧ.
DEU 28:52 Ad cek iḥṣar jar marra tewwura nnec, ař ɣa wḍan řeḥyuḍ yuɛřan imetnen, inni x tuɣa tᵉttecřed di marra tammurt nnec. Ad cek iḥṣar jar marra tewwura nnec di marra tammurt nni d ac iwca SIDI, AREBBI nnec.
DEU 28:53 Xmi d ak-dd ɣa innḍen u di řeḥṣaret i zi cek ɣa iḥṣaren řɛedyan nnec, ad tecced řɣiǧet n uɛeddis nnec d weysum n iḥenjiren nnec d tḥenjirin nnec nni d ac ɣa iwc SIDI, AREBBI nnec.
DEU 28:54 Aryaz nni i yareḍben u wenni iḍebɛen aṭṭas ad tiři tamuɣři nnes d taɛeffant ɣar umas u ɣar temɣart n wuř nnes u ɣar min d as iqqimen zeg iḥenjiren nnes,
DEU 28:55 maḥend war ittic uřa i yijj zzaysen ca n weysum n iḥenjiren nnes, inni i ɣa yecc umi war d as iqqim ca [zi] marra [man aya] di řeḥṣaret u di ḍḍiqa i zi xak ɣa ibezzez řeɛdu nnec di marra tiwwura nnec.
DEU 28:56 Tamɣart i yareḍben u tenni iḍebɛen aṭṭas, ɛemmarṣ war teggi třeqqa n uḍar nnes x temmurt di ssibbet n warḍab u n weḍbeɛ nnes, ad tiři tmuɣři nnes d taɛeffant ɣar weryaz n wuř nnes u ɣar mmis d yeǧis,
DEU 28:57 di ssibbet n llufan nni dd-iffɣen jar iḍaren nnes u di ssibbet n iḥenjiren nni turuw, minzi ad ten tecc s tnuffra di ssibbet n řexṣeṣ n marra di řeḥṣaret u di ḍḍiqa i xak ɣa ibezzez řeɛdu nnec di marra tiwwura nnec.”
DEU 28:58 “Mařa war teḥḍid marra awařen n Ccariɛa-ya nni yuran deg wedlis-a ittwannḍen maḥend ad teggʷeded Isem-a iɛuǧan, issaggʷaden, SIDI, AREBBI nnec,
DEU 28:59 [xenni] ad yarr SIDI jjrayeḥ nnec d jjrayeḥ jar zzariɛet nnec d ijj n arjef ař ṭṭarf. Ad iřint d jjrayeḥ mɣarent, ad dument, uca ad iřin řehřacat iɛeffnen i ɣa iqqimen ɣar zzat.
DEU 28:60 Netta ad ɣarek dd-yarr marra řehřacat n Miṣra i zi tuɣa teggʷded uca ad dayek řeṣqent.
DEU 28:61 Amenni ad ɣarek dd-yarr SIDI marra řehřacat d marra jjrayeḥ nni war yurin deg wedlis ittwanḍen n Ccariɛa-ya, ař ɣa tᵉttwamḥid.
DEU 28:62 Ad teqqimed ak-d ijj n wuru n yeryazen deg wemcan i di ɣa tiřim am yitran n ujenna deg waṭṭas, umi war tesřid i tmijja n SIDI, AREBBI nnec.
DEU 28:63 Am mammec zzaywem ifarḥ SIDI ḥima ad daywem igg tcuni u ad awem ittmarni, ammu zzaywem i ɣa ifarḥ SIDI maḥend ad kenniw ihellek u maḥend ad kenniw iteḥḥa uca kenniw ad tᵉttwaqeřɛem zi temmurt nni ɣar ɣa tadfed ḥima ad tt teksid d řwart.
DEU 28:64 SIDI ad ac ibezzeɛ x marra řegnus, zeg ujemmaḍ n ddunect ař ujemmaḍ nneɣni n ddunect uca din ad tsexxared i irebbiten nneɣni [n] ukeccuḍ d weẓru nni war tessined cek niɣ řejdud nnec.
DEU 28:65 War tᵉttifed řhudnet jar řegnus-a uca tařeqqa n uḍar nnec war tᵉttif areyyaḥ, [minzi] SIDI ad ac iwc din uř yarejfen d tmuɣři txessi d ijj n řeɛmar isřawen.
DEU 28:66 Tudart nnec ad ac tiři am tuyeř zzat nnec, ad tiřid teggʷeded ǧiřet d wass uca war ittiři weḍman x tudart nnec.
DEU 28:67 Ɣar ṣṣbeḥ ad tinid: ‘A, iři ad tiři d ǧiřet!’ u di ǧiřet ad tinid: ‘A, iři ad yiři d ṣṣbeḥ!’ zi ssibbet n tiggʷudi deg wuř nnec i d ac issiggʷiden u zi ssibbet n min ɣa twařint tiṭṭawin nnec.
DEU 28:68 SIDI ad cek yarr ɣar Miṣra deg iɣurruba x webrid min xef d ac nniɣ: ‘War t tẓarred ɛemmarṣ!’, uca din ad tezzenzem ixef nwem i řɛedyan nnec d isemɣan d tiyya, [maca] war ittiři wi kenniw i ɣa isɣen.”
DEU 28:69 Ina d awařen n Řɛahd nni yumur SIDI i Musa ḥima ad t igg ak-d ayt n Israil di temmurt n Mu’ab, sennej i Řɛahd i kidsen igga ɣar Ḥurib.
DEU 29:1 Iřaɣa-dd Musa x marra Israil, inna asen: “Kenniw aqa teẓrim marra min igga SIDI di temmurt n Miṣra zzat i tiṭṭawin nwem di firɛun d marra imsexxaren nnes d marra tammurt nnes,
DEU 29:2 tiqeǧuba timeqqranin, tinni teẓrim s tiṭṭawin nwem, řeɛřamat d lmuɛjizat nni imɣaren.
DEU 29:3 Ař ass-a SIDI war d awem iwci uř ḥima ad tfehmem uřa d tiṭṭawin ḥima ad tẓarem uřa d imezzuɣen ḥima ad tesřem.
DEU 29:4 Ssnedheɣ kenniw arebɛin n iseggʷusa di řexřa. Arruḍ nwem war idwiř d řbaři u tisiřa nwem war dduysarent x iḍaren nwem.
DEU 29:5 War teccim aɣrum, war teswim binu uřa d ccrab, ḥima ad tessnem belli Necc d SIDI, AREBBI nwem.”
DEU 29:6 “[Řami] treḥḥgem ɣar wemcan-a, iffeɣ-dd Siḥun, ajeǧid n Ḥacbun, ak-d Ɛuj, ajeǧid n Bacan, ḥima ad kidneɣ imsagar i umenɣi uca neɣřeb i-ten
DEU 29:7 uca neṭṭef tammurt nsen uca newc i-tt d řwart i Irubiniyyen d Ijadiyyen u i wezyen n teqbič n Manassa.
DEU 29:8 Ḥḍam awařen n Řɛahd-a, teggem ten, ḥima ad tawḍem s řeɛqeř ɣar marra min ɣa teggem.
DEU 29:9 Ass-a marra kenniw tbeddem zzat i wudem n SIDI, AREBBI nwem - izeǧifen n tqebbař nwem d imɣaren nwem d imeḥḍayen nwem, marra iryazen n Israil,
DEU 29:10 imeẓyanen nwem, d temɣarin nwem, ibarraniyyen nni izeddɣen di řwest n řmargeḥ n řɛeskar nwem, zeg wenni ittqessen akeccuḍ ař wenni dd-ittaymen aman -
DEU 29:11 ḥima ad yadef [kuř ijj zzaywem] ɣar Řɛahd n SIDI, AREBBI nnec nni i ɣa iqqen SIDI, AREBBI nnec ass-a akidek, u ɣar nneɛřet [i iǧan d uɣezdis nnes nneɣni],
DEU 29:12 ḥima ad ac yegg ass-a ad tekkared am řgens nnes uca Netta ad ac yiři d AREBBI, am d ac inna u am ijjuǧ i řejdud nnec Ibrahim d Isḥaq d Yaɛqub.
DEU 29:13 War iǧi akidwem waha i ɣa ggeɣ Řɛahd-a d nneɛřet-a [i iǧan d uɣezdis nnes nneɣni],
DEU 29:14 ak-d yinni da ɣarneɣ iḥḍaren ass-a zzat i wudem n SIDI, AREBBI nneɣ, [maca ɛawed] ak-d yinni war da ɣarneɣ iǧin ass-a.
DEU 29:15 Minzi kenniw tessnem mammec tuɣa nzeddeɣ di temmurt n Miṣra, u mammec neẓwa di řwesṭ [n temmura] n řegnus nni x dd-tekkem uřa d kenniw,
DEU 29:16 uca teẓrim nnɛawat nsen n l’aṣnam d imeyḍa [n l’aṣnam nsen] nni ɣarsen n weẓru d ukeccuḍ d nnuqart d wureɣ.”
DEU 29:17 “War ittiři jar awem aryaz niɣ tamɣart niɣ řaǧ niɣ taqbič ad issiggʷej ass-a uř nnes x SIDI, AREBBI nwem, ḥima ad isexxar i irebbiten n řegnus nni u war ittiři jar awem aẓwar nni i ɣa ittarwen arrhaj niɣ cciḥ,
DEU 29:18 [uca] ad imsar, umi ɣa iseř awařen n nneɛřet-a, aqa netta ad iseggem ixef nnes deg wuř nnes, ad yini: ‘Ad ɣari yiři řehna, waxxa ggureɣ di řeqsaḥet n wuř inu, ař ɣa ihellek min issun ak-d min iffuden.’
DEU 29:19 SIDI war d as isemmeḥ, maca aɣḍab n SIDI d tusmi nnes [iqeddsen] ad dduxxnen deg weryaz nni, u marra nneɛřet nni yurin deg wedlis-a ittwannḍen ad xas tiři uca SIDI ad imḥa isem nnes zi sadu ujenna.
DEU 29:20 SIDI ad t iḥuz x marra tiqebbař n Israil i řɣar, ɛlaḥsab marra nnɛaři n Řɛahd nni yurin deg wedlis-a ittwanḍen n Ccariɛa-ya.
DEU 29:21 [Xenni] jjiř i dd ɣa yasen, iḥenjiren nwem, inni ɣa igeɛɛden awarni awem, uřa d ubarrani nni i dd ɣa yasen zeg ict n temmurt tiggʷej, [marra] nitni ad inin [ammu] xmi ɣa ẓaren jjrayeḥ n temmurt-a d řehřacat i zi issehřec SIDI tammurt:
DEU 29:22 ‘Řecbariyyet d tmeǧaḥt, aqa tecmeḍ marra tammurt, war tᵉttwaẓẓu niɣ tessɣemmi [ɛad] u war issgeɛɛid afsu [aziza], am mammec [imsar] deg uneqřeb n Sadum d Ɛamurra d Adma d Ṣabuyim nni issneqřeb SIDI deg weɣḍab nnes d wesɛar nnes!’,
DEU 29:23 uca [ɛawed] marra řegnus ad inin: ‘Mayemmi igga SIDI man aya i temmurt-a? Mana řḥaduq n weɣḍab-a imɣaren?’
DEU 29:24 [Xenni] ad dd-arren: ‘Minzi nitni jjin Řɛahd n SIDI, AREBBI n řejdud nsen, [Řɛahd] nni iqqen Netta akidsen umi ten dd-issuffeɣ zi temmurt n Miṣra.
DEU 29:25 Uyuren ɛebden i irebbiten nneɣni uca bendqen asen, [i] irebbiten nni war ssinen nitni, war d asen tent-i-dd-iwci Netta.
DEU 29:26 Aɣḍab n SIDI yarɣa x temmurt-a maḥend ad ɣares indeh marra nneɛřet nni yurin deg wedlis-a ittwannḍen.
DEU 29:27 SIDI iqřeɛ i-ten zi temmurt deg weɣḍab d wesɛar d uduqqez [n weɣḍab] imɣar uca inḍar i-ten ɣar temmurt nneɣni, am [teǧa] ass-a.’
DEU 29:28 Timesřayin innufaren aqa tent i SIDI, AREBBI nneɣ, maca [timesřayin] ttwassaregbent aqa tent i neccin u i iḥenjiren nneɣ i řebda, maḥend ad negg marra awařen n Ccariɛa-ya.”
DEU 30:1 “Xmi xak dd ɣa yasent marra tmesřayin-a, lbaraka d nneɛřet nni ggiɣ zzatek, uca ad tent tarred ɣar wuř [nnec] jar marra řegnus ɣar mani SIDI, AREBBI nnec, xak yuẓẓeř,
DEU 30:2 uca ad tɛeqbed ɣar SIDI, AREBBI nnec, ad tesřed i tmijja nnes s marra uř nnec u s marra řeɛmar nnec anect n marra min x cek umureɣ ass-a, cek [jmiɛ] ak-d iḥenjiren nnec,
DEU 30:3 [xenni] SIDI, AREBBI nnec, ad ibḍeř aḥebbes nnec uca ad xak yarḥem uca ad cek issmun zi jar marra řegnus ɣar mani cek ibezzeɛ SIDI, AREBBI nnec.
DEU 30:4 Waxxa inni x yuẓẓřen zzayek, aqa aten ɣar uneggaru n ujenna, aqa SIDI, AREBBI nnec, ad cek issmun uca ad cek dd-indeh ssenni.
DEU 30:5 SIDI, AREBBI nnec, ad cek issidef ɣar temmurt nni warten řejdud nnec uca ad tt teksid [ɛawed] d řwart. Netta ad dayek igg tcuni u ad dayek yarni [ɛad] ktar zi řejdud nnec.
DEU 30:6 SIDI, AREBBI nnec, ad ixten uř nnec d wuř n tarwa nnec ḥima ad texsed SIDI, AREBBI nnec, s marra uř nnec d marra řeɛmar nnec, ḥima ad teddared.
DEU 30:7 SIDI, AREBBI nnec, ad yarr marra nnɛaři nni x řɛedyan nnec u x yinni cek icarrhen, inni xak dd-idarrcen [ɛawed].
DEU 30:8 Ad tɛeqbed, ad tesřed i tmijja n SIDI uca ad tegged marra řumurat nni xef ac ttumureɣ ass-a.
DEU 30:9 SIDI, AREBBI nnec, ad ac iwc afeyyeḍ di marra řxedmet n ifassen nnec, di řɣiǧet n uɛeddis nnec, di řɣiǧet n řebhayem nnec u di řɣiǧet n temmurt nnec, [aya ad yiři] i řxar nnec, minzi SIDI ad iɛqeb ḥima ad zzayek ifarḥ i řxar nnec, am mammec tuɣa ifarḥ i řejdud nnec,
DEU 30:10 Xmi ɣa tesřed i tmijja n SIDI, AREBBI nnec ḥima ad teḥḍid řumurat nnes d tweṣṣa nnes, tinni yurin deg wedlis-a ittwanḍen n Ccariɛa uca xmi dd ɣa tdewřed ɣar SIDI, AREBBI nnec, s marra uř nnec, s marra řeɛmar nnec.”
DEU 30:11 “Minzi řumur-a i x cek ttumureɣ necc ass-a, war iǧi yuɛřa xak u war iggʷij ca.
DEU 30:12 War iǧi deg ujenna, ḥima ad tinid: ‘Wi ɣa igeɛɛden ɣar ujenna di ṭṭweɛ nneɣ ḥima ad aneɣ t-i-dd-yawi i neccin uca ad as nseř, [ḥima] [nzemmar] ad zzayes negg?’
DEU 30:13 War iǧi x ujemmaḍ n řebḥar, ařami [ɣa tzemmared] ad tinid: ‘Wi ɣa iẓwan ɣar ujemmaḍ n řebḥar ḥima ad aneɣ t-i-dd-yawi i neccin uca ad as nseř, [ḥima] nzemmar ad zzayes negg?’,
DEU 30:14 minzi awař-a yudes i cek aṭṭas, aqa-t deg uqemmum nnec, aqa-t deg wuř nnec, ḥima ad zzayes tegged.”
DEU 30:15 “Xzar, necc ggiɣ zzatek ass-a tudart d řxar uřa d řmewt d řɣar,
DEU 30:16 minzi necc ttumureɣ cek ass-a ḥima ad texsed SIDI, AREBBI nnec, ad tuyured deg ibriden nnes uca ad teḥḍid řumurat nnes d tweṣṣa nnes d lfarayiḍ nnes maḥend ad teddared u ad tᵉttwammarnid, uca SIDI, AREBBI nnec, ad ac ibarek di temmurt nni ɣar ɣa tadfed ḥima ad tt tᵉṭṭfed d řwart.
DEU 30:17 [Maca] mařa uř nnec ittaggʷej u war tᵉttesřid uca ad tᵉttwassuffɣed [zeg webrid], ad tbendqed zzat i irebbiten nneɣni uca ad asen tɛebded,
DEU 30:18 [xenni] necc ttbarrḥeɣ awem ass-a belli s tidett ad temmtem. War tarennyed ca ussan nnec x temmurt mani ɣa tadfed awarni řami teẓwid L’Urdun, ḥima ad tt tᵉṭṭfed d řwart.
DEU 30:19 Ass-a necc řaɣiɣ x ujenna d temmurt, maḥend ad iřin d řechud xawem: ggiɣ zzatek tudart d řmewt, lbaraka d nneɛřet! Ixḍar [xenni] tudart, ḥima ad teddared, cek d zzariɛet nnec,
DEU 30:20 maḥend ad texsed SIDI, AREBBI nnec, uca ad tesřed i tmijja nnes, ad as třeṣqed, minzi Netta d tudart nnec uřa d tuzzegart n wussan nnec, ḥima tzemmared ad tzedɣed x temmurt nni x ijjuǧ SIDI i řejdud nnec ad asen tt-i-dd-iwc, i Ibrahim d Isḥaq d Yaɛqub.”
DEU 31:1 Iruḥ Musa uca issiweř s wawařen-a ak-d marra Israil,
DEU 31:2 inna asen: “Ass-a necc ɣari mya u-ɛicrin n iseggʷusa. War zemmareɣ ɛad ad ffɣeɣ uřa ad adfeɣ uca SIDI inna ayi: ‘War tẓekkʷid [iɣzar-a n] L’Urdun!’
DEU 31:3 SIDI, AREBBI nnec, ad iẓwa zzat i wudem nnec. Netta ad yareddeǧ řegnus-a zzat i wudem nnec uca ad tᵉṭṭfed řwart nsen. Yacuwa ad iẓwa zzat i wudem nnec, am mammec inna SIDI.
DEU 31:4 SIDI ad kisen igg am mammec igga ak-d Siḥun d Ɛuj, ijeǧiden n Imuriyyen, inni yareddeǧ Netta s tnayen, u am mammec igga ak-d temmurt nsen.
DEU 31:5 [Xmi] ten ɣa isellem SIDI zzat i wudem nwem, ad kisen teggem ɛlaḥsab marra tawṣeyyet nni zi kenniw weṣṣiɣ
DEU 31:6 Iřim d iryazen u iřim tmeḥḍem, war tteggʷedem, war ttarjijem ca zzat i wudem nsen, minzi SIDI, AREBBI nnec, d wenni akidek igguren. Netta war dayek isemmeḥ niɣ cek ittejji.”
DEU 31:7 Iřaɣa Musa i Yacuwa, inna as zzat i tiṭṭawin n marra Israil: “Iři d aryaz u iři tmeḥḍed, minzi ad tadfed ak-d řgens-a ɣar temmurt nni ijjuǧ SIDI i řejdud nsen ad asen tt-i-dd-iwc uca cek ad ten tejjed ad tt ṭṭfen d řwart.
DEU 31:8 SIDI, d wenni yuyuren zzat i wudem nnec, d Netta i ɣa yiřin akidek, war cek ittettu ca niɣ ad dayek ismeḥ. War tteggʷed u war ttarjiji.”
DEU 31:9 Yura Musa Ccariɛa-ya uca iwca i-tt i ikehhanen, ayt n Lawi, inni yarbun Ttabut n Řɛahd n SIDI, u i marra imɣaren n Israil.
DEU 31:10 Musa yumur i-ten, inna: “Awarni sebɛa n iseggʷusa, di řweqt ittwaggen n useggʷas n ufekki n imerwusen di Řɛid n Iɛuccuten,
DEU 31:11 xmi ɣa imun marra Israil maḥend ad iḥḍar zzat i wudem n SIDI, AREBBI nnec, deg wemcan nni i ɣa yixḍar Netta, ad tɣared s jjehd Ccariɛa-ya zzat i marra Israil deg imezzuɣen nsen.
DEU 31:12 Ejj ad imun řgens, iryazen d temɣarin d iḥenjiren d ibarraniyyen nni iǧan ɣar daxeř n tewwura nnec ḥima ad sřen u ḥima ad řemden ad ggʷeden SIDI, AREBBI nwem uca ad ḥḍan marra awařen n Ccariɛa-ya
DEU 31:13 u ḥima iḥenjiren nsen, inni war tt issinen, ad sřen uca ad řemden ad ggʷeden SIDI, AREBBI nwem marra ussan nni i ɣa teddarem x wudem [n temmurt] nni ɣar ɣa teẓwam x L’Urdun maḥend ad tt tᵉṭṭfem d řwart.”
DEU 31:14 SIDI inna i Musa: “Aqa iwḍen-dd wussan nnec i di ɣa temmted. Řaɣa i Yacuwa u sbeddem ixef nwem deg Uqiḍun n Umsagar ḥima ad t umureɣ.” Musa d Yacuwa ruḥen, bedden deg Uqiḍun n Umsagar.
DEU 31:15 [Xenni] iban-dd SIDI deg Uqiḍun, deg ijj n uqellij n useynu, uca ibedd uqellij n useynu sennej i wadaf n Uqiḍun.
DEU 31:16 SIDI inna i Musa: “Aqa cek ad tᵉttwassmuned ak-d řejdud nnec uca [xenni] řgens-a ad ikkar ad issefsed ixef nnes am ɣa yuyur awarni i irebbiten n ibarraniyyen n temmurt nni ɣar ɣa yadef [řgens] ař řwesṭ nnes uca [řgens] ad dayi ismeḥ, ad yarẓ Řɛahd inu wenni kidsen ggiɣ.
DEU 31:17 Deg wass nni ad yareɣ weɣḍab inu x [řgens] uca ad ten jjeɣ, ad zzaysen ffareɣ udem inu uca ad ittwaṣarḍ [řgens] uca ad xas dd-asen waṭṭas n iceřwawen d řeḥṣarat, ař ɣa yini [řgens] deg wass nni: ‘Ma war xafi dd-usin iceřwawen-a, minzi AREBBI war kidi iǧi?’
DEU 31:18 Deg wass nni ad ffareɣ udem inu marra di ssibbet n řɣar nni igga umi idweř ɣar irebbiten nneɣni.
DEU 31:19 Řexxu xenni, ari tizřit-a i yixef nwem uca seřmed i-tt i ayt n Israil, egg i-tt deg uqemmum nsen, ḥima tizřit-a ad tiři d acehhad di ṭṭweɛ inu ḍidd i Israil,
DEU 31:20 minzi Necc ad ssidfeɣ řgens-a ɣar temmurt nni x jjuǧeɣ i řejdud nsen [ad asen tt wceɣ], [ict n temmurt] ifeyyḍen s uɣi d tamment, uca ad ccen, ad jjiwnen, ad dewřen qbubbzen. [Xenni] ad dewřen ɣar irebbiten nneɣni, ad xasen sexxaren uca ad ayi ssduqzen, ad arẓen Řɛahd inu.
DEU 31:21 Uca ad imsar umi d as dd-usin [i řgens-a] aṭṭas n iceřwawen d řeḥṣarat, aqa [xenni] izři-ya ad dd-tarr deg wudem nnes am yijj n ucehhad, minzi war tᵉttiři tᵉttwattu zeg uqemmum n tarwa nnes, minzi Necc ssneɣ axarreṣ nni iḥeṭṭa [ɛad] ass-a [di daxeř nnes], qbeř ma ad t ssidfeɣ di temmurt nni x jjuǧeɣ [ad asen tt wceɣ].”
DEU 31:22 Deg wass nni yura Musa tizřit-a uca isseřmed i-tt i ayt n Israil.
DEU 31:23 Uca Netta yumur i Yacuwa, mmis n Nun, inna: “Iři d aryaz, iři tmeḥḍed, minzi ad tessidfed ayt n Israil di temmurt nni x d asen jjuǧeɣ [maḥend ad asen tt wceɣ] uca Necc ad akidek iřiɣ.”
DEU 31:24 Uca imsar umi ikemmeř Musa tira n wawařen n Ccariɛa-ya deg ijj n wedlis ittwannḍen, ař aneggar nsen,
DEU 31:25 aqa Musa yumur Ilawiyyen nni yarbun Ttabut n Řɛahd n SIDI, inna:
DEU 31:26 “Ksim adlis-a ittwanḍen n Ccariɛa uca teggem t zzat i Ttabut n Řɛahd n SIDI, AREBBI nwem, maḥend ad din yiři d acehhad ḍidd nwem,
DEU 31:27 minzi necc ssneɣ aɣewweɣ nwem d tɣennant nwem. Xzar, umi necc ddareɣ ɛad akidwem ass-a, kenniw aqa tɣewwɣem x SIDI, mecḥař ɛad ktar i ɣa teggem awarni i řmewt inu!
DEU 31:28 Smunem-dd ɣari marra imɣaren n tqebbař nwem d imeḥḍayen nwem, [xenni] ad ssiwřeɣ awařen-a deg imezzuɣen nsen uca ad ggeɣ ajenna d temmurt d řechud ḍidd nsen.
DEU 31:29 minzi necc ssneɣ aqa awarni řmewt inu ad tfesdem ař ṭṭarf uca ad teffɣem x webrid nni x kenniw umureɣ. Deg uneggar n wussan, ad teggem řɣar di tiṭṭawin n SIDI ař ɣa t tesɛarem s řxedmet i teggim s ifassen nwem.”
DEU 31:30 [Xenni] issiweř Musa deg imezzuɣen n marra agraw [n řgens] n Israil s wawařen n tizřit-a ařami ten ikemmeř.
DEU 32:1 “Sřem, [a] ijenwan, ad ssiwřeɣ! Ejj tammurt ad tseř i wawařen n uqemmum inu!
DEU 32:2 Ejj taɣuri inu ad tudem am wenẓar, ad hwant tiwařin inu am nnda, am ict n thiḍurt x uɣemmuy aziza u am tnecnacin x wefsu,
DEU 32:3 minzi necc ad barrḥeɣ Isem n SIDI, arrem-dd řemɣaret i AREBBI nneɣ!
DEU 32:4 [Netta] d Taṣḍart, řxedmet nnes nican, minzi marra ibriden nnes ttwaseggden, ijj n Arebbi d amtiqqi břa řɣecc, aqa-t d amsegged, nican i yeǧa.
DEU 32:5 [Řgens] aqa issefsed ixef nnes, nitni war ǧin ca d iḥenjiren nnes, [maca] d řefḍiḥet, [aqa-t] d ijj n jjiř ifarɣ, ixnunnes.
DEU 32:6 Ma texsem ad teggem aya i SIDI, [a] řgens abuhaři d wefɣur! Ma war iǧi Netta d Babac nni cek isɣin, d wenni cek iggin u d wenni cek ikewwnen?
DEU 32:7 Idarem ussan iɛdun, xemmem iseggʷusa n jjiř ař jjiř, seqsa babac u netta ad ac t iɛawed [seqsa] imɣaren u nitni ad ac t inin.
DEU 32:8 Umi iwca Umɛuǧi x kuřci tasɣart [nsen] i marra řegnus, umi ibḍa tarwa n bnadem, issgeɛɛed iymiren n řegnus ɛlaḥsab řqedd n ayt n Israil.
DEU 32:9 Minzi tasɣart n SIDI d řgens nnes, Yaɛqub d afiřu [n řeɛbar] n tesɣart nnes.
DEU 32:10 Yufa i-t di temmurt n řexřa, di tnezruft ixřan [ak-d řewḥuc] ittzun, issɣuyyun. Inneḍ as-dd, isseřmed i-t, iḥḍa i-t am mummu n tiṭṭ nnes.
DEU 32:11 Am ugider nni issfaqen řɛucc nnes, iṭṭaw sennej i warrud nnes zi ssa ɣar da, ittbezzeɛ afriwen nnes, iksi i-t uca yarebbu t x wafriwen nnes,
DEU 32:12 [ammu] i indeh i-t SIDI waha uca war tuɣi din akides ca n arebbi d aɣrib.
DEU 32:13 Issenya i-t x tɛuřař n temmurt uca icca řɣiǧet n yeyyar. Ijja i-t ad iẓemm tamment zi jjarf, d zzect zeg weẓru n teṣḍart,
DEU 32:14 d trussi n tfunasin d uɣi n wuǧi s tadunt n izmaren d icarriyyen, [inni iǧan am] tarwa n Bacan, [u s tadunt n] iɣayḍen, s mummu n waren n irden. [Ɛawed] cek teswid zeg idammen n uḍiř, ak-d ukuffu nnes xas.
DEU 32:15 Idweř Yacurun iqbubbez uca iẓẓeɛbeḍ - ‘Aqa tmesřed u teqbubbzed, wah, s tadunt tᵉttwadřed!’ - uca ismeḥ di Arebbi nni i-t dd-ixeřqen uca isseḥqar Taṣḍart n usenjem nnes.
DEU 32:16 S irebbiten iɣriben ssekkaren nitni tusmi nnes, s jjɛayef sɛaren t.
DEU 32:17 Nitni qeddmen tiɣarṣa i ccwaṭen, war iǧi i Arebbi, i irebbiten nni war ssinen, [irebbiten] n jdid, inni dd-yusin ɛad mammec, war zzaysen ttarjijen řejdud nwem.
DEU 32:18 Taṣḍart nni i cek dd-yejjin, tsemḥed dayes u tᵉttud Arebbi nni i cek dd-yurwen s řewjeɛ.
DEU 32:19 Iẓra SIDI [man aya] uca issehqar i-ten, zi ssibbet n usduqqez n iḥenjiren nnes d yessis.
DEU 32:20 Netta inna: ‘Ad zzaysen ffareɣ udem inu, ad ẓareɣ mammec ɣa yiři [zzman] uneggaru nsen, minzi nitni d ijj n jjiř ittneqřab, d tarwa i di war iǧi řmanet.
DEU 32:21 Nitni ssekkaren tusmi inu s min war iǧin d Arebbi, sɛaren ayi s [l’aṣnam] nsen ibeṭṭřen. Necc ad ssekkareɣ tusmi nsen s [min] war iǧin d řgens, s yijj n řgens d abuhaři ad ten sɛareɣ.
DEU 32:22 Minzi s weɣḍab inu tekkar tmessi, ad tecmeḍ ař řaxart [din] swadday, uca ad tecc tammurt d řɣiǧet nnes, u ad tessecmeḍ tisi n idurar.
DEU 32:23 Necc ad asen arniɣ iceřwawen, ad xasen neyyceɣ fřitcat inu.
DEU 32:24 Ad ttwaheyyfen s řaẓ uca ad ttwaṣarḍen s ṭṭaɛun u s wareddeǧ amerzag u Necc ad daysen ssekkeɣ tiɣmas n řmař s ssem ineqqen n [ifiɣran] inni ittmuǧuɣen di tɛejjajt.
DEU 32:25 Zi barra ad ikkes ssif [tarrawt], u zeg wexxam n daxeř [ad teřqef] tiggʷudi: am ubřiɣ am teɛzarect, aseymi ak-d umeccaybu.
DEU 32:26 Tuɣa xseɣ ad iniɣ: ‘Am usemmiḍ ad ten faretkeɣ, ad ssbeddeɣ řidaret nsen jar iwdan!’,
DEU 32:27 mři war ǧiɣ tteggʷideɣ zeg wesɛar n řeɛdu, ḥima iɣrimen nsen war t nekkaren uca ad inin: ‘Ifassen nneɣ, inni ittwassgeɛɛden ammu [s jjehd], ggin aya marra, [war iǧi] d SIDI.’
DEU 32:28 Minzi nitni d ijj n řgens břa array u war daysen řefhamet.
DEU 32:29 Mři ggin tiɣit, [xenni] iggur ad fehmen aya u ad wcen taynit i uneggar nsen.
DEU 32:30 Mammec izemmar ad iḍfar ijj [n bnadem] ařef [n iwdan] u [mammec zemmaren] tnayen ad arren ɛecra-ařaf ad arewřen, mařa war d asen temmenz teṣḍart nsen uca [war d asen] isellem SIDI i nitni?
DEU 32:31 Minzi taṣḍart nsen war teǧi am Taṣḍart nneɣ. Ejj ad ḥekmen řɛedyan nneɣ [s ixef nsen].
DEU 32:32 Minzi tazayart nsen [teǧa] zi tzayart n Sadum u zeg iyyaren n Ɛamurra. Aḍiř nsen d aḍiř n ssem, ɣarsen izekkunen [ccuren s] tarzugi.
DEU 32:33 Binu nsen [amecnaw asuḍi n] tmessi n řhaycat, [amecnaw] ssem ineqqen n třefsiwin.
DEU 32:34 Ma [marra] aya war ɣari ittwaxzen, ittwacemmeɛ deg ixxamen n txubay inu?
DEU 32:35 D Necc i yeǧan x nneqmet d řexřaṣ, xmi ɣa iḥřuǧeḍ uḍar nsen. Ass n uḍeyyeɛ nsen aqa yudes, uca min xasen i ɣa yiři, ad imsar deɣya.
DEU 32:36 Minzi SIDI ad igg s řḥeqq di ṭṭweɛ n řgens nnes, Netta ad iḥenn x imsexxaren nnes xmi ɣa iẓar belli jjehd immeksi, uca war din iqqim [ɛad] wenni ittwaṭṭfen d wenni ijjin.
DEU 32:37 [Xenni] ad yini: ‘Mani ǧan irebbiten nsen, [mani] taṣḍart i ɣares ufin adurri?
DEU 32:38 [Mani ǧan irebbiten] nni zi ccin tadunt n tɣarṣa nsen, inni zi sessen binu n tewhibin n useyyeb nsen? Ejj i-ten ad kkaren, ad cek ɛawnen u ejj i-t ad xawem issduri.’
DEU 32:39 Xzarem řexxu, aqa d Necc, wah d Necc, u war [din] ca uřa d ijj n arebbi akidi. Necc neqqeɣ u Necc sseddareɣ, Necc řebbzeɣ u ssgenfiɣ u war din wi ɣa ifekken zeg ufus inu.
DEU 32:40 Minzi Necc ad sswiẓẓḍeɣ afus inu ɣar ujenna, ad iniɣ: ‘Necc aqa ddareɣ i řebda!’
DEU 32:41 Mařa ssqeḍɛeɣ ssif inu ittwessgen uca afus inu ad iṭṭef di řḥukm, [xenni] Necc ad ntaqmeɣ zi iɣrimen inu u zeg inni d ayi icarrhen.
DEU 32:42 Ad ssᵉscareɣ fřitcat [n řqews inu] s idammen, uca ssif inu ad isarḍ aysum, idammen n wenni ittwanɣen u n wenni ittwaḥebbsen azeǧif n řeɛdu ak-d [ijeṭṭayen n] ucuwwaf nnes.
DEU 32:43 Sřiwřewem, [a] řegnus!, [ak-d] řgens nnes, minzi Netta ad intaqem i idammen n imsexxaren nnes, ad yarra nneqmet x iɣrimen nnes, uca ad igg weṣřaḥ i temmurt nnes d řgens nnes.”
DEU 32:44 Yusa-dd Musa uca issiweř marra awařen n tizřit-a x imezzuɣen n řgens, netta [jmiɛ ak-d] Huciɛa, mmis n Nun.
DEU 32:45 [Umi] ikemmeř Musa marra awařen-a i zi issiweř ɣar marra Israil,
DEU 32:46 inna asen: “Arrem marra awařen-a nni x d awem nniɣ ass-a ɣar wuř nwem, ḥima ad ten tumurem i iḥenjiren nwem maḥend ad ḥḍan marra awařen n Ccariɛa-ya ad zzaysen ggen,
DEU 32:47 minzi war iǧi d awař n baṭeř i kenniw, maca d tudart nwem. S wawař-a ad tezzuggartem ussan nwem x temmurt i ɣar ɣa teẓwim x L’Urdun, maḥend ad tt tᵉṭṭfem d řwart.”
DEU 32:48 Issiweř SIDI ak-d Musa deg wass nni, inna:
DEU 32:49 “Geɛɛed adrar n Abarim, [aqa-t] d adrar n Nabu nni [iǧan] di temmurt n Mu’ab arendad n Ariḥa, uca xzar tammurt n Kenɛan nni i ɣa wceɣ d řwart i ayt n Israil,
DEU 32:50 uca mmet x wedrar nni ɣar ɣa tgeɛɛded. Ad tdewřed ad tᵉmmarnid ɣar řgens nnec, am mammec immut umac Harun x wedrar n Hur uca immarni ɣar řgens nnes,
DEU 32:51 minzi kenniw teɣdařem zzayi di řwesṭ n ayt n Israil ɣar waman n Mariba-Qadac di řexřa n Ṣin, minzi kenniw war d ayi tessqeddsem di řwesṭ n ayt n Israil.
DEU 32:52 [Xenni řexxu] ad ṭẓared tammurt zzatek, maca war ttidfed ca ɣar temmurt nni i ɣa wceɣ i ayt n Israil.”
DEU 33:1 D ta d lbaraka nni zi ibarek, Musa, aryaz n SIDI, ayt n Israil qbeř řmewt nnes.
DEU 33:2 Inna: “SIDI yusa-dd zeg [wedrar n] Sina, igeɛɛed-dd ittwesseg arendad nsen zi Saɛir, tuɣa ittissiq umi dd-iban zeg wedrar n Faran uca iffeɣ-dd zi [jar] ɛecra-ařaf n imqeddasen. Zeg ufus nnes afusi issberbic s wassamen arendad nsen.
DEU 33:3 Wah, Netta ittexs řegnus! Marra imqeddasen [iǧan] deg ufus nnec, aqa aten ɣar iḍaren nnec, [wah,] ad ikkar [kuř ijjen zzaysen] zeg wawařen nnec.
DEU 33:4 Musa yumur aneɣ x Ccariɛa, aqa-tt d řwart n tmesmunt n Yaɛqub.
DEU 33:5 Tuɣa Netta d Ajeǧid di Yacurun umi nyarwen izeǧifen n řgens, jmiɛ ak-d tqebbař n Israil.”
DEU 33:6 “Iři ad iddar Rubin, war itmetti, uca iři war ttiřin iryazen nnes udrusen!”
DEU 33:7 D man aya i inna x Yahuda: “[A] SIDI, seř ɣar tmijja n Yahuda uca yarr i-t ɣar řgens nnes. S ifassen nnes immneɣ di ṭṭweɛ nnes uca iři Cek ad as iwc afus ḍidd n iɣrimen nnes!”
DEU 33:8 U x Lawi inna: “Tummim nnec d Urim nnec [ad iřin] i weryaz nni d ameddukkeř nnec d amtiqqi, wenni tqeǧbed di Massa, ak-d wi tqacḥed ɣar waman n Mariba,
DEU 33:9 wenni innan x babas d yemmas: ‘War ten ttwiřiɣ!’, d wenni war issɛizz x yaytmas niɣ war ixs ad issen iḥenjiren nnes, minzi nitni ṭṭfen di min tennid Cek uca ḥḍan Řɛahd nnec.
DEU 33:10 Nitni ad ssřemden lfarayiḍ nnec i Yaɛqub u Ccariɛa nnec i Israil. Ad ssuyusen řebxur zzat i wenzaren nnec uřa d taɣarṣt [n wecmaḍ] ikemmřen x uɛalṭar nnec.
DEU 33:11 Barek tizemmar nnes di min igga, [a] SIDI, uca ṭṭef arḍa s řxedmet n ifassen nnes, ɣḍeř timeṣṣaḍin n yinni akides ittemɛařan d n yinni t icarrhen ḥima ɛemmarṣ war ttbeddin ɛad!”
DEU 33:12 U x Binyamin inna: “Amɛizz n SIDI, netta ad ɣares izdeɣ di řaman, ass marra ad t ideř uca ad izdeɣ jar tiɣarḍin nnes!”
DEU 33:13 U x Yusuf inna: “Ad ibarek SIDI tammurt nnes s min iǧan iɣřan qaɛ zeg ujenna, s nnda, u s [waman] ihewřen, inni [din] iǧan swadday,
DEU 33:14 u s řɣiǧet iɣřan n tfuct u s min iǧan iɣřan i ittic uyur,
DEU 33:15 u s řqimet n idurar tiqdimin u s min iɣřan n tewririn n řebda,
DEU 33:16 u s min iɣřan aṭṭas n temmurt d uɛemmar nnes, u s tcuni n wenni tuɣa izeddɣen di cbarq ak-d isennanen. Iři ad dd-yas x uzeǧif n Yusuf u x tuccent n ucuwwaf n wenni yarebbun ttaj [n weɛzař] jar aytmas.
DEU 33:17 Amenzu n ufunas nnes d ucewwar nnes u accawen nnes am waccawen [iziraren] n iɣayḍ n řexřa, ad zzaysen iwwet řegnus marra jmiɛ ař tineggura n ddunect. Ina d ɛecra n řuřuf n Ifrayim u ina d řuřuf n Manassa!”
DEU 33:18 U x Zabulun inna: “Farḥ, a Zabulun, s wuffuɣ nnec, u cek, [a] Issakar!, [farḥ] s iqiḍan nnec.
DEU 33:19 Ad řaɣan i řegnus ɣar wedrar. Din i ɣa ɣarṣen tiɣarṣa n tsegda, minzi ad ẓemmen afeyyeḍ n řebḥur d txubay innufaren deg ijdi.”
DEU 33:20 U x Jad inna: “Ad ittwabarek Wenni iggin ttasiɛ i Jad! Netta izeddeɣ [din] am teyradt uca icarreg aɣiř, [wah,] uřa d aceqquf n uzeǧif.
DEU 33:21 Iksi tammurt icnan i yixef nnes, minzi aqa din tᵉttwaḥḍa tesɣart n umgewwad [s weḍman]. Yusa-dd ak-d izeǧifen n řgens, ikemmeř tasegda n SIDI d řeḥkamat nnes, [jmiɛ] ak-d Israil.”
DEU 33:22 U x Dan inna: “Dan d ijj n mmis n wayrad nni i ineggzen ɣar zzat zi Bacan.”
DEU 33:23 U x Naftali inna: “[A] Naftali, iři tejjiwned s tcuni u teccured s lbaraka n SIDI. Ksi lɣarb d ljanub d řwart.”
DEU 33:24 U x Acir inna: “Aqa ittwabarek Acir ak-d iḥenjiren nnes. Iři ad yaf arḍa zeg aytmas uca ad issur aḍar nnes di zzect.
DEU 33:25 Zzekrunat nnec [aqa aten] zeg wuzzař d nnḥas, ad yiři jjehd nnec am wussan nnec!”
DEU 33:26 “War [din] iǧi am Arebbi, [a] Yacurun, wenni innayen x ujenna ḥima ad ac iwc afus, [wenni innayen] x iseynuten s lɛaḍama nnes.
DEU 33:27 AREBBI n řebda d tazeddiɣt [i udurri], u swadday [ttɛawanen] iɣaǧen nnes n řebda. Netta ad yaẓẓeř x řeɛdu zzat i wudem nnec, ad yini: ‘Aredeǧ!’
DEU 33:28 Israil ad izdeɣ weḥḥḍes di řaman. Ad yiři wanu n Yaɛqub deg ict n temmurt [iccuren] n irden d binu n jdid, [wah,] ijenwan nnes ad udmen s nnda.
DEU 33:29 Sseɛd nnec, [a] Israil! Wi iǧan am cek? Ijj n řgens ittwassnejmen zi SIDI. Aqa Netta d aseřqi i uɛawen uřa d ijj n ssif n lɛaḍama nnec. Řɛedyan nnec ad ssniɛmiřen ad sswaḍɛen i cek uca cek ad tɛefsed x idemrawen nsen!”
DEU 34:1 [Xenni] igeɛɛed Musa zi řewḍat n Mu’ab ɣar wedrar n Nabu, ɣar tqiccet n Fisja nni iwejjhen Ariḥa uca isscen as SIDI marra tammurt, zi Jilɛad ař Dan,
DEU 34:2 marra Naftali d temmurt n Ifrayim d Manassa d marra tammurt n Yahuda ař řebḥar d min din awarni as,
DEU 34:3 d [Temmurt n] Ljanub d udewwar n řewḍa n Ariḥa, Tandint n Tcejjura n Tini ař Ṣuɣar.
DEU 34:4 Uca inna as SIDI: “Ta d tammurt nni x jjuǧeɣ i Ibrahim, d Isḥaq d Yaɛqub, nniɣ: ‘I zzariɛet nnec, ad tt wceɣ!” Jjiɣ cek ad tt tẓared s tiṭṭawin nnec, [maca] war tẓekkʷid ca diha.”
DEU 34:5 [Ammu] i dinni immut Musa, amsexxar n SIDI, di temmurt n Mu’ab, am mammec [awař i dd-iffɣen] zeg uqemmum n SIDI.
DEU 34:6 Uca Netta inḍeř i-t di teɣzurt di temmurt n Mu’ab qibač i Bayt-Faɣur uca uřa d ijj issen amcan n wenḍeř nnes ař ass-a.
DEU 34:7 Tuɣa Musa ɣares mya u-ɛicrin n iseggʷusa umi immut. Tiṭṭ nnes war teɣri ca, war d as iruḥ řemɛezz.
DEU 34:8 Sɣuyyen ayt n Israil x Musa di řewḍat n Mu’ab třatin n wussan uca [ammu i] ttwakemmřen ussan n iɣuyyan d wecḍan n Musa.
DEU 34:9 Yacuwa, mmis n Nun, tuɣa iccur s buḥbeř n tiɣit, minzi Musa tuɣa issars xas ifassen nnes u ayt n Israil sřin ɣares uca ggin am mammec [t] yumur SIDI i Musa.
DEU 34:10 Ɛemmarṣ ɛad war dd-ikkar anabi di Israil am Musa, wenni tuɣa issnen SIDI udem ɣar wudem,
DEU 34:11 s marra řeɛřamat nni zi t issekk SIDI, ḥima ad tent igg di temmurt n Miṣra, zzat i firɛun d marra imsexxaren nnes d marra tammurt nnes,
DEU 34:12 u s marra afus nni ijehden u s marra [timegga] imɣaren issaggʷaden, tinni igga Musa zzat i tiṭṭawin n marra Israil.
JOS 1:1 Awarni i řmewt n Musa, amsexxar n SIDI, issiweř SIDI ak-d Yacuwa, mmis n Nun, amsexxar n Musa, inna:
JOS 1:2 “Musa, amsexxar inu immut. Řexxu kkar, ekk x L’Urdun-a, cek d marra řgens-a, ɣar temmurt i d asen ɣa wceɣ Necc, i ayt n Israil.
JOS 1:3 Kuř amcan min xef ɣa teɛjen třeqqa n uḍar nwem, aqa wciɣ awem t i kenniw, am mammec i ssiwřeɣ Necc ak-d Musa.
JOS 1:4 Tammurt nwem ad tiři zi řexřa ař Lubnan-a, ař iɣzar ameqqran, iɣzar n Lfuraṭ, marra tammurt n Iḥittiyyen ař Řebḥar Ameqqran [ɣar řɣarb] mani tɣeǧi tfuct.
JOS 1:5 Uřa d ijj war izemmar ad iqqim ibedd zzat i wudem nnec marra ussan n tudart nnec. Am mammec d ayi tuɣa ak-d Musa, ad iřiɣ uřa akidek. Necc war dayek semmḥeɣ niɣ ad cek ttejjiɣ.
JOS 1:6 Iři d aryaz u iři tmeḥḍed, minzi cek ad tarred řgens-a ad iṭṭef tammurt d řwart, [tammurt nni] x Necc jjuǧeɣ i řejdud nsen ad asen tt wceɣ.
JOS 1:7 Iři waha d aryaz u iři tmeḥḍed, maḥend ad teḥḍid ad tegged marra Ccariɛa nni d ac yumur Musa, amsexxar inu. War [xas] ttḥeyyed [ɣar] yefus uřa [ɣar] uzeřmaḍ, maḥend ad tegged s řeɛqeř mani ma i ɣa traḥed.
JOS 1:8 War ttejji ca adlis n Ccariɛa-ya ad ac ittwakkes x yiřes nnec, maca xarreṣ dayes ass d ǧiřet, maḥend ad teḥḍiḍ ad tegged ammu nican am mammec marra min dayes tura, minzi [xenni] i ɣa tfeřḥed deg webrid nnec uca ad tt tegged s řeɛqeř.
JOS 1:9 Ma war d ac t nniɣ? Iři d aryaz u iři tmeḥḍed, war tteggʷed u war ttejji ad iɛgez wuř nnec, minzi SIDI, AREBBI nnec, aqa-t akidek qaɛ mani ma i ɣa traḥed.”
JOS 1:10 Uca yumur Yacuwa i imeḥḍayen n řgens, inna:
JOS 1:11 “Uyurem x řwesṭ n řmargeḥ n řɛeskar uca umur řgens, inim [asen]: ‘Swejdet řeɛweč i yixef nwem, minzi awarni i třata n wussan ad teẓwam L’Urdun-a, ḥima ad tadfem ɣar temmurt i d awem ɣa iwc SIDI, AREBBI nwem, d řwart uca ad tt teksim d řwart.’”
JOS 1:12 Issiweř Yacuwa ak-d Irubiniyyen d Ijadiyyen u ak-d wezyen n teqbič n Manassa, inna:
JOS 1:13 “Ɛeqřet x wawař nni x i d awem yumur Musa, amsexxar n SIDI, umi inna awem: ‘SIDI, AREBBI nwem, iwca awem arraḥet uca iwca awem tammurt-a.
JOS 1:14 Timɣarin nwem, iḥenjiren nwem d řebhayem nwem ad qqimen di temmurt i d awem iwca Musa x ujemmaḍ n L’Urdun uca kenniw ad teẓwam tḥezzmem zzat i wudem n aytmatwem, marra ayt n bu-teɣruḍt imeḥḍen, uca kenniw ad asen tewcem afus,
JOS 1:15 ař ɣa yewc SIDI arraḥet i aytmatwem, am [tuɣa iwca i] kenniw, uca uřa d nitni ad ṭṭfen tammurt i d asen iwca SIDI, AREBBI nwem, d řwart. [Xenni] ad iɛeddeř ad dd-tdewřem ɣar temmurt tenni d řwart nwem uca ad twartem min d awem iwca Musa, amsexxar n SIDI, x ujemmaḍ n L’Urdun manis dd-tneqqar tfuct.”
JOS 1:16 Nitni arrin-dd x Yacuwa, nnan: “Marra min xef i d aneɣ tumured, ad t negg u mani ma i d aneɣ ɣa tessekked, ad nuyur.
JOS 1:17 Ammu nican am mammec nesřa ɣar Musa, ad ɣarek nseř. Mɣir iři ad kik yiři SIDI, AREBBI nnec, am mammec tuɣa iǧa ak-d Musa!
JOS 1:18 Kuř aryaz nni i ɣa iɛṣan řumur nnec u war ixs ad iseř i wawařen nnec ɣar marra min d as ɣa tumured, ad ittwaneɣ. Iři waha d aryaz u iři tmeḥḍed!”
JOS 2:1 Yacuwa, mmis n Nun, issekk zi Ciṭṭim tnayen n yeryazen maḥend ad bergagen s tnuffra, inna: “Uyurem, xzarem tammurt d Ariḥa!” Ffɣen, iwḍen ɣar taddart n ict n temɣart n farq-ccɣeř, qqaren as Raḥab, uca ssensen din.
JOS 2:2 Xebbaren t i ujeǧid n Ariḥa, nnan: “Xzar, di ǧiřet-a usin-dd danita ca n yeryazen n ayt n Israil, ḥima ad bergagen di temmurt.”
JOS 2:3 Issekk ujeǧid n Ariḥa ɣar Raḥab maḥend ad as inin: “Suffeɣ-dd iryazen i dd yudfen ɣar taddart nnem, minzi usin-dd, ḥima ad ksin řexbar x min ittemsaran di marra tammurt.”
JOS 2:4 Aqa tessidef temɣart tnayen n yeryazen nni uca tessnuffar i-ten. Tenna: “S tidett, iryazen usin-dd ɣari, maca war ssineɣ manis nitni.
JOS 2:5 Umi ttwabellɛent tewwura [n tendint] ɣar uweṭṭu n taǧest, ffɣen yeryazen. Necc war ssineɣ mani uyuren yeryazen [nni]. Ḍfarem ten deɣya, xenni tzemmarem ad xasen tḥartem.”
JOS 2:6 [Maca] nettat tessgeɛɛed i-ten x tzeqqa uca tessnuffar i-ten sadu iɣeddiwen n tiffest nni tuɣa ttwassarsen i nettat x tzeqqa.
JOS 2:7 Tuɣa ten ḍeffaren yeryazen x webrid n L’Urdun ař imucan n uẓekkwu uca awarni řami ffɣen inni tuɣa ten iḍeffaren, bellɛen xasen tawwart.
JOS 2:8 Qbeř i ɣa ṭṭṣen, tgeɛɛed [Raḥab] ɣarsen ɣar tzeqqa,
JOS 2:9 tenna asen: “Necc ssneɣ, aqa SIDI iwca awem tammurt-a u belli tiggʷudi zzaywem tewḍa-dd xaneɣ u marra imezdaɣ n temmurt fesyen deg wudem nwem.
JOS 2:10 Maɣar neccin nesřa, mammec issiẓeɣ SIDI aman n Řebḥar n Telga deg wudem nwem umi dd-teffɣem zi Miṣra, uca [nesřa ɛawed] min teggim ak-d Siḥun d Ɛuj, tnayen n ijeǧiden n Imuriyyen, inni tuɣa aɣirin i L’Urdun, inni tḥarrmem u tᵉtteḥḥam.
JOS 2:11 [Umi] nesřa aya, ifsiy wuř nneɣ, u war iqqim ca buḥbeř iddar di ca n yeryaz di ssibbet nwem, minzi SIDI, AREBBI nwem, d AREBBI, sennej deg ujenna d [da] swadday x temmurt.
JOS 2:12 Řexxu [xenni], jjaǧem ayi ɣar SIDI, minzi necc ggiɣ zzaywem s tamexsiwt icewwaren, aqa uřa d kenniw ad teggem s tmexsiwt icewwaren ak-d [řaǧ n] taddart n baba u wcem ayi ijj n weɛřam n řaman [nwem],
JOS 2:13 aqa kenniw ad tejjem baba d yemma, aytma d suyᵉtma ak-d marra min iǧan nsen, ad ddaren u belli kenniw ad tfekkem řeɛmurat nneɣ zi řmewt.”
JOS 2:14 Arrin-dd xas yeryazen: “Mařa war tefḍiḥem tamesřact nneɣ, ad immet řeɛmar nneɣ deg wemcan nwem. Uca ad imsar xmi d aneɣ ɣa iwc SIDI tammurt[-a], ad am nesscen tamexsiwt icewwaren d řaman [nneɣ].”
JOS 2:15 Xas uca tseyyeb i-ten temɣart s yijj n wesɣun zi řkazi, minzi tuɣa taddart nnes ɣar řḥiḍ [n barra] n wecbar [n tendint] uca tuɣa tzeddeɣ deg wecbar [n tendint]. *
JOS 2:16 Nettat tenna asen: “Ffɣem ɣar idurar, maḥend inni i kenniw iḍeffaren war xawem ḥarrten u ffarem dinni třata n wussan ař ɣa ɛeqben inni [kenniw] iḍeffaren. Awarni man aya tzemmarem ad tmenɛem abrid nwem.”
JOS 2:17 Iryazen nnan as: “Ad niři nettwassizdeg zi tjaǧit-a i d aneɣ teggid ad tt nejjaǧ,
JOS 2:18 [ila mařa ad tegged ammu:] Xzar, xmi i ɣa nadef ɣar temmurt, ittxeṣṣa ad tegged asɣun-a azeggʷaɣ imuden i zi d aneɣ tseyybed ɣar řkazi, uca ad tessmuned babam d yemmam d aytmam d marra řaǧ n babam ɣarem di taddart nnem.
JOS 2:19 [Maca] qaɛ wi ɣa iffɣen zi tewwura n taddart nnem, ad iřin idammen nnes x uzeǧif nnes, u neccin ad niři nettwassizdeg zzaysen, [maca] qaɛ wenni akidem ɣa iqqimen di taddart, idammen nnes ad iřin x uzeǧif nneɣ mařa [ca n yijj] ad xas issars afus.
JOS 2:20 Mařa cem tessuffɣed tamesřact nneɣ, [xenni] ad niři nettwassizdeg [ɛawed] zi tjaǧit i d aneɣ teggid ad am nejjuǧ i cem.”
JOS 2:21 Nettat tarra-dd xasen: “Ɛlaḥsab awařen nwem, ammu [i ɣa yiři]!” [Xenni] tejja i-ten ad uyuren uca tcedd asɣun azeggʷaɣ ɣar řkazi.
JOS 2:22 Uyuren nitni uca iwḍen ɣar wedrar uca qqimen dinni třata n wussan, ařami dd-ɛeqben inni i ten iḍeffaren. Inni ten iḍeffaren tuɣa arezzun [xasen] deg webrid marra, maca war [ten] ufin.
JOS 2:23 [Xenni] areggʷḥen-dd tnayen nni n yeryazen, hwan-dd zeg wedrar, ẓwan-dd uca usin-dd ɣar Yacuwa, mmis n Nun, u ḥajan as marra min d asen imsaren.
JOS 2:24 Nnan i Yacuwa: “S tidett, SIDI igga aneɣ marra tammurt deg ifassen u [ɛawed] fesyen marra imezdaɣ n temmurt di ssibbet nneɣ.”
JOS 3:1 Ɣar tuffut zic, ikkar Yacuwa uca ksin iqiḍan nsen zi Ciṭṭim uca usin-dd ɣar L’Urdun, netta d marra ayt n Israil, uca ssensen dinni qbeř i ɣa ẓwan.
JOS 3:2 Imsar awarni třata n wussan, aqa imeḥḍayen uyuren x řwesṭ n řmargeḥ n řɛeskar
JOS 3:3 uca umuren řgens, nnan: “Xmi ɣa tẓarem Ttabut n Řɛahd n SIDI, AREBBI nwem, uca ikehhanen Ilawiyyen arbun tt, [xenni] uřa d kenniw ad temmuṭṭyem zeg wemcam nwem, ad tt teḍfarem.
JOS 3:4 Maca ittxeṣṣa ad tɛebbarem ttasiɛ ɛřaḥař i ařfayen n iɣaǧen jar awem d netta, war ɣares tadsem. Ammu i ɣa tessnem abrid i ɣa tekkem, maɣar kenniw [zic] ɛemmarṣ war tekkim abrid-a, [war iǧi] iḍennaḍ u [war iǧi] fariḍennaḍ.”
JOS 3:5 Inna Yacuwa i řgens: “Qeddsem ixef nwem, minzi tiwecca ad igg SIDI řeɛjayeb di řwesṭ nwem.”
JOS 3:6 Issiweř Yacuwa [ɛawed] ak-d ikehhanen, inna: “Sgeɛɛdem Ttabut n Řɛahd uca ẓwam zzat i wudem n řgens!” Nitni ssgeɛɛden Ttabut n Řɛahd u izwaren ɣar zzat i wudem n řgens.
JOS 3:7 Tuɣa SIDI inna i Yacuwa: “Ass-a ad kkareɣ ad cek ssemɣareɣ zzat i tiṭṭawin n marra Israil, maḥend marra ad ssnen, aqa Necc akidek i ǧiɣ, am mammec i d ayi tuɣa ak-d Musa.
JOS 3:8 Cek ad tumured ikehhanen inni yarebbun Ttabut n Řɛahd, ad tinid: ‘X minni i ɣa tawḍem ɣar tma n waman n L’Urdun, ad din tbeddem di L’Urdun!’”
JOS 3:9 [Xas uca] inna Yacuwa i ayt n Israil: “Asem-dd da u tesřem awařen n SIDI, AREBBI nwem.”
JOS 3:10 Uca inna Yacuwa: “S man aya ad tessnem, aqa ijj n Arebbi iddar aqa-t jar awem u Netta ad issuffeɣ ayt n Kenɛan d Iḥittiyyen d Iḥiwiyyen d Ifariziyyen d Ijirjaciyyen d Imuriyyen d Iyabusiyyen zzat i tiṭṭawin nwem zi řwart nsen.
JOS 3:11 Xzarem, Ttabut n Řɛahd n Sidi n marra tammurt tezwar awem zzat i wudem nwem di L’Urdun.
JOS 3:12 Řexxu [xenni], farnem tenɛac n yeryazen zi tqebbař n Israil akidwem, ijj n weryaz zi kuř taqbič.
JOS 3:13 Xmi iḍaren n ikehhanen, inni yarebbun Ttabut n SIDI, Sidi n marra tammurt, ad bedden deg waman n L’Urdun, [xenni] ad imsar aqa aman n L’Urdun ad nqeḍɛen, aman i dd-ihekkwan zi sennej ɣar swadday, uca ad [qqimen] bedden am yijj n weɣbar.”
JOS 3:14 [Řami] ikkes řgens iqiḍan nnes ḥima ad iẓwa L’Urdun, arbun ikehhanen Ttabut n Řɛahd zzat i wudem n řgens.
JOS 3:15 [Umi] iwḍen iḥemmařen n Ttabut ɣar L’Urdun uca ḥadan iḍaren n ikehhanen, inni yarbun Ttabut, x tma n waman - tuɣa L’Urdun issfiy x marra tmewwa nnes di marra ussan n tmeyra -
JOS 3:16 bedden waman nni dd-ihekkwan zi sennej. [Aman] bedden nican am yijj n weɣbar iggʷej aṭṭas, ɣar tendint n Adam tenni zzat i Ṣartan. [Ammu] i bedden [waman] inni dd-ihekkʷan ɣar swadday, ɣar řebḥar n Řewḍa, ɣar Řebḥar Ameǧaḥ, aqa ttwaqeḍɛen qaɛ. [Xenni] iẓwa řgens deg urendad n Ariḥa.
JOS 3:17 Ikehhanen, inni yarbun Ttabut n Řɛahd n SIDI, bedden di řaman x řaẓaɣ, di řwesṭ n L’Urdun [umi] iẓwa marra Israil x řaẓaɣ ařami ikemmeř marra řgens aẓwi x L’Urdun.
JOS 4:1 Umi tuɣa ikemmeř marra řgens aẓwi x L’Urdun, imsar aqa SIDI issiweř ak-d Yacuwa, inna:
JOS 4:2 “Farnem tenɛac n yeryazen zi řgens, ijjen weryaz zi kuř taqbič,
JOS 4:3 u tumured xasen, ini: ‘Ksim ssa, zi řwest n L’Urdun, zeg wemcan mani tuɣa bedden iḍaren n ikehhanen di řaman, tenɛac n iẓra, ksim ten akidwem ɣar ujemmaḍin, ssarsem ten di řmargeḥ n řɛeskar mani ɣa tessensem ǧiřet-a.’”
JOS 4:4 [Xenni] iřaɣa Yacuwa tenɛac n yeryazen nni ifarn i-ten zeg ayt n Israil, ijj n weryaz zi kuř taqbič,
JOS 4:5 uca Yacuwa inna asen: “Uyurem zzat i wudem n Ttabut n SIDI, AREBBI nwem, ɣar řwesṭ n L’Urdun uca ad iksi kuř aryaz i yixef nnes ijj n weẓru x teɣruḍt nnes, ɛlaḥsab řqedd n tqebbař n ayt n Israil,
JOS 4:6 ḥima ad yiři aya d ict n řeɛřamet jar awem. Minzi [mařa] iḥenjiren nwem ad sseqsan, ad inin: ‘Min [ixs ad inin] yeẓra-ya i kenniw?’,
JOS 4:7 [xenni] kenniw ad asen tinim: ‘[Aqa-ten din] minzi nqeḍɛen waman n L’Urdun zzat i wudem n Ttabut n Řɛahd n SIDI! Ɣar uẓwi x L’Urdun nqeḍɛen waman n L’Urdun uca iẓra-ya d ict n řidaret i ayt n Israil [di man aya] i řebda.’”
JOS 4:8 Ayt n Israil ggin am mammec tuɣa yumur Yacuwa uca ksin tenɛac n iẓra zi řwesṭ n L’Urdun, am mammec tuɣa issiweř SIDI ɣar Yacuwa, ɛlaḥsab řqedd n tqebbař n ayt n Israil, uca ksin ten akidsen ɣar ujemmaḍin, ɣar řmargeḥ mani tuɣa ssensen, uca ssarsen ten din.
JOS 4:9 Issars Yacuwa [ɛawed] tenɛac n iẓra di řwesṭ n L’Urdun, deg wemcan mani tuɣa mmarsen iḍaren n ikehhanen, inni yarbun Ttabut n Řɛahd, u aqa aten ɛad din ař ass-a.
JOS 4:10 Ikehhanen, inni yarbun Ttabut, qqimen bedden di řwesṭ n L’Urdun, ařami tuɣa ittwakemmeř min inna SIDI i Yacuwa maḥend ad t yini i řgens ɛlaḥsab marra min yumur Musa i Yacuwa, uca iqeǧeq řgens ssenni, iẓwa.
JOS 4:11 Umi tuɣa marra řgens ikemmeř aẓwi, teẓwa Ttabut n SIDI ak-d ikehhanen zzat i wudem n řgens.
JOS 4:12 Ayt n Rubin d ayt n Jad d wezyen n teqbič n Manassa ẓwan ḥezzmen i umenɣi zzat i wudem n ayt n Israil, am mammec tuɣa akidsen issiweř Musa.
JOS 4:13 Tuɣa-ten ɛřaḥař di arebɛin-ařef [n yeryazen], ḥezzmen [marra] i umenɣi. Nitni ẓwan ɣar [wazzay n] umenɣi zzat i wudem n SIDI, ɣar řewḍat n Ariḥa.
JOS 4:14 SIDI issemɣar Yacuwa deg wass nni di tiṭṭawin n marra Israil uca ggʷeden zzayes am mammec tuɣa ggʷeden zi Musa, marra ussan n tudart nnes.
JOS 4:15 SIDI issiweř ak-d Yacuwa, inna:
JOS 4:16 “Umur i ikehhanen, inni yarebbun Ttabut n Cchadet, ad geɛɛden zi L’Urdun.”
JOS 4:17 [Xenni] yumur Yacuwa ikehhanen, inna: “Gaɛɛdem zi L’Urdun ɣar sennej!”
JOS 4:18 Umi geɛɛden ikehhanen, inni yarbun Ttabut n Řɛahd n SIDI, zi řwesṭ n L’Urdun u tuɣa tisi n iḍaren n ikehhanen ɛad am mammec dd-ffɣen [zeg waman], imsar aqa aman n L’Urdun dewřen ɣar wemcan nsen uca dewřen ssfayen x marra timmawin nnes am yiḍennaḍ d fariḍennaḍ.
JOS 4:19 Tuɣa řgens igeɛɛed zi L’Urdun deg wass wiss ɛecra deg uyur amezwaru uca wtin iqiḍan nsen di Jiljal, ɣar ccarq n Ariḥa.
JOS 4:20 Di Jiljal issbedd Yacuwa tenɛac n iẓra i tuɣa akidsen-dd iksin zi L’Urdun.
JOS 4:21 Uca netta issiweř ak-d ayt n Israil, inna: “Mařa sseqsan tiwecca iḥenjiren nwem ibabaten nsen uca ad inin: ‘Min [xsen ad inin] yeẓra-ya?’
JOS 4:22 [xenni] ad tɛeřmem i iḥenjiren nwem, ad tinim: ‘[Danita] iẓwa Israil L’Urdun-a x řaẓaɣ,
JOS 4:23 minzi SIDI, AREBBI nwem, issiẓeɣ aman n L’Urdun zzat i wudem nwem ařami teẓwam, am mammec i tuɣa igga SIDI, AREBBI nwem, [ɛawed] ak-d Řebḥar n Telga nni issiẓeɣ zzat i wudem nneɣ ařami [din] neẓwa,
JOS 4:24 ḥima marra řegnus x temmurt ad ssnen, aqa afus n SIDI ijhed, ḥima kenniw ad teggʷdem SIDI, AREBBI nwem, i řebda.’”
JOS 5:1 Umi marra ijeǧiden n Imuriyyen [i iǧan] x tma n řɣarb n L’Urdun d marra ijeǧiden n ayt n Kenɛan [i iǧan] ɣar řebḥar, sřan, aqa SIDI issiẓeɣ aman n L’Urdun zzat i wudem n ayt n Israil, ařami neẓwa ɣar ujemmaḍin, [xenni] ifsiy wuř nsen u war daysen iqqim ca arruḥ zzat i wudem n ayt n Israil.
JOS 5:2 Di řweqt nni issiweř SIDI ak-d Yacuwa: “Egg i yixef nnec ifarricen n weẓru uca xten i ayt n Israil i twařa wiss tnayen!”
JOS 5:3 [Xenni] igga Yacuwa ifarricen n weẓru i yixef nnes uca ixten i ayt n Israil ɣar Jibɛa-Haɛralut, [aqa d ‘Tawrirt n Řeɛdařeyyat n Wextan’].
JOS 5:4 Man aya d řesbab i zi ixten i-ten Yacuwa: marra řgens i tuɣa dd-iffɣen zi Miṣra, [marra] iwetman, [ixs ad yini] marra iɛeskariyyen mmuten deg webrid di řexřa awarni i wuffuɣ nsen zi Miṣra.
JOS 5:5 Minzi marra řgens nni dd-iffɣen, tuɣa-t ittwaxten, [maca] marra řgens nni dd-ittwaxeřqen deg webrid di řexřa awarni i uffuɣ nsen zi Miṣra, nitni war ttwaxetnen ca.
JOS 5:6 Minzi arebɛin n iseggʷusa gguren ayt n Israil di řexřa ařami ittwahellek řgens marra, marra iɛeskariyyen i tuɣa dd-iffɣen zi Miṣra, inni tuɣa war isřin ɣar tmijja n SIDI [d inni] tuɣa ijjuǧ asen SIDI, war ten ittejji ca ad ẓaren tammurt nni x tuɣa ijjuǧ SIDI i řejdud nsen ad asen tt iwc, ict n temmurt ifeyyḍen s uɣi d tamment.
JOS 5:7 Iḥenjiren nsen inni issnekkar Netta deg wemcan nsen, d ina d inni tuɣa ixten Yacuwa, minzi nitni ɣarsen ɛad řeɛdařyet minzi war d asen xetnen deg webrid.
JOS 5:8 Umi kemmřen ad xten marra řgens, imsar belli qqimen deg wemcan nsen di řmargeḥ n řɛeskar ařami ggenfan.
JOS 5:9 Inna SIDI i Yacuwa: “Ass-a aqa kkseɣ xawem řefḍiḥet n Miṣra.” [X uyenni] qqaren as i wemcan nni Jiljal, ař ass-a.
JOS 5:10 Wtin ayt n Israil iqiḍan nsen di Jiljal uca sswejden [Taɣarṣt n] Useɛdu deg wass arbeɛṭac n uyur [nni], di ǧiřet, di řewḍat n Ariḥa.
JOS 5:11 Nitni ccin aɣrum břa antun d teɣwawin icennfen zi řɣiǧet n temmurt, zi tiwecca awarni i [Taɣarṣt n] Useɛdu, deg wass nni simant nnes.
JOS 5:12 Tiwecca nnes, awarni řami ccin zi řɣiǧet n temmurt, inneqḍeɛ manna. Ssenni war iqqim ɛad ‘manna’ i ayt n Israil. Deg useggʷas nni ccin zi řɣiǧet n temmurt n Kenɛan.
JOS 5:13 Umi tuɣa iǧa Yacuwa zzat i Ariḥa, issgeɛɛed tiṭṭawin nnes, uca xzar, tuɣa ijj n weryaz ibedd zzates, ɣares ssif nnes deg ufus nnes. Yacuwa iruḥ ɣares inna as: “Cek ma zzayneɣ niɣ zeg iɣrimen nneɣ?”
JOS 5:14 Netta yarra-dd: “Lla, minzi necc d akumandar n řɛeskar n SIDI. Necc řexxu i dd-usiɣ!” Uca iwḍa Yacuwa x uɣembub nnes ɣar temmurt, yuḍar, uca inna as: “Min ixs ad yini Sidi inu i umsexxar nnes?”
JOS 5:15 [Xenni] inna akumandar n řɛeskar n SIDI i Yacuwa: “Kkes tisiřa nnec zeg iḍaren nnec, minzi amcan i xef tbedded d amqeddas [i iǧa].” Uca amenni i igga Yacuwa.
JOS 6:1 Ariḥa tuɣa teqqen [tiwwura nnes] nican zzat i wudem n ayt n Israil. Uřa d ijj war izemmar ad iffeɣ, uřa d ijj war izemmar ad [din] yadef.
JOS 6:2 [Xenni] inna SIDI i Yacuwa: “Xzar, Necc ggiɣ ac Ariḥa ak-d ujeǧid nnes, ayt n bu-teɣruḍt imeḥḍen, deg ufus nnec.
JOS 6:3 Ittxeṣṣa kenniw ad tennḍem i tendint. Marra iɛeskariyyen ad nnḍen i tendint ict n twařa. Amya i ɣa teggem setta n wussan.
JOS 6:4 Sebɛa n ikehhanen ad izwaren zzat i Ttabut ad arbun sebɛa n waccawen n icarri i usřiwřew. Deg wass wiss sebɛa ad tennḍem i tendint sebɛa n twařawin u [xenni] ad suḍen ikehhanen deg waccawen n icarri.
JOS 6:5 Xmi ɣa yiři ijj n usuḍi d azirar deg yicc n usřiwřew u kenniw ad tesřem řḥess-a n usuḍi deg uyicc n icarri, [xenni] ad yarreẓ řgens imun s tɣuyyit deg ujenna. Xas uca ad iwḍa řḥiḍ n tendint uca ad xas iẓwa řgens, kuř ijj n weryaz ad yuyur nican ɣar zzat.”
JOS 6:6 [Xenni] iřaɣa Yacuwa, mmis n Nun, x ikehhanen, inna asen: “Ksim kenniw Ttabut n Řɛahd u ttejjem sebɛa n ikehhanen ad izwaren ɣar zzat i wudem n Ttabut n SIDI ad arbun sebɛa n waccawen n icarri i usřiwřew.”
JOS 6:7 Nnan i řgens: “Ẓwam u tennḍem i tendint. Jjem iɛeskariyyen s řesnaḥ ad ẓwan zzat i wudem n Ttabut n SIDI.”
JOS 6:8 Imsar am mammec tuɣa inna Yacuwa i řgens. Sebɛa n ikehhanen tuɣa arebbun sebɛa n waccawen n icarri i usřiwřew uca ẓwan zzat i wudem n SIDI, suḍen deg waccawen n icarri uca Ttabut n Řɛahd n SIDI teggur awarni asen.
JOS 6:9 [Iryazen] iḥezzmen s řesnaḥ izwaren zzat i wudem n ikehhanen nni isuḍen deg waccawen n icarri u x ḍeffar n Ttabut yusa-dd uɣezdis aneggaru [n řɛeskar], am gguren, ttsuḍen nitni deg waccawen n icarri.
JOS 6:10 Yacuwa aqa yumur řgens, inna “War ttesɣuyyum, war ttejjim tmijja nwem ad as iseř ḥed, war dd-itteffeɣ uřa d ijj n wawař zeg uqemmum nwem ař ass nni d awem ɣa iniɣ: ‘Sɣuyyem!’ [Xenni] ad tesɣuyyem i umenɣi.”
JOS 6:11 Xas uca yejja Ttabut n SIDI ad tenneḍ i tendint, ict n twařa tenneḍ as-dd. [Xenni] dewřen ɣar řmargeḥ n řɛeskar, ssensen di řmargeḥ.
JOS 6:12 Tiwecca nnes ɣar tuffut n zic ikkar Yacuwa uca arbun ikehhanen Ttabut n SIDI.
JOS 6:13 Sebɛa n ikehhanen nni tuɣa yarebbun sebɛa n waccawen n icarri i usřiwřew zzat i wudem n Ttabut n SIDI, qqimen gguren, suḍen deg waccawen n icarri u [iryazen] iḥezzmen s řesnaḥ izwaren ɣar zzat u x ḍeffar n Ttabut n SIDI iḍfar uɣezdis aneggaru [n řɛeskar], am [qqimen] gguren am ttsuḍen deg waccawen n icarri.
JOS 6:14 Deg wass wiss tnayen nnḍen [ɛawed] ict n twařa i tendint uca dewřen ɣar řmargeḥ n řɛeskar. Ammu i ggin setta n wussan.
JOS 6:15 Deg wass wiss sebɛa, imsar, aqa kkaren zic, umi iṣbeḥ řḥař, uca nnḍen ammu sebɛa n twařawin i tendint. Deg wass nni waha nnḍen i tendint sebɛa n twařawin.
JOS 6:16 Uca imsar ɣar twařa wiss sebɛa umi suḍen ikehhanen deg waccawen n icarri, aqa Yacuwa inna i řgens: “Sɣuyyem, minzi SIDI igga awem tandint deg ufus!
JOS 6:17 Tandint ad tᵉttwaḥarrem i SIDI, tandint d marra min dayes. Mɣir tamɣart n farq-ccɣeř Raḥab waha d marra inni ɣares iǧan di taddart nnes ad qqimen ddaren, minzi nettat tessnuffar x ireqqasen nni tuɣa nessekk.
JOS 6:18 Ḥḍam ixef nwem zi marra min ittwaḥarrmen, maḥend kenniw war teddikkwiřem d ayt n řeḥram [am] teksim [ca] n min iǧan d řeḥram u ad tarrem řmargeḥ n řɛeskar n Israil d řeḥram u ad t tɣeḍřem d arrẓiyet.
JOS 6:19 Marra nnuqart d wureɣ d řeqcuɛ n nnḥas d wuzzař, [marra aya] d amqeddas i SIDI uca ad t tessidfem deg wexxam n txubay n SIDI.”
JOS 6:20 Xas uca isɣuy řgens i umenɣi uca suḍen deg waccawen n icarri. Uca imsar, umi isřa řgens řḥess n usuḍi deg uyicc n icarri, aqa řgens yarreẓ deg ict n tɣuyyit deg ujenna u řḥiḍ n tendint ihdem u řgens igeɛɛed, yudef ɣar tendint, kuř ijj n weryaz yuyur nican ɣar zzat, uca ṭṭfen nitni tandint.
JOS 6:21 Ḥarrmen marra min iǧan di tendint i řḥukm s řeqḍeɛ n ssif, zeg iryazen ař timɣarin, zeg iḥramen ař iwessura, ař afunas, uǧi d weɣyuř.
JOS 6:22 Inna Yacuwa i tnayen n yeryazen nni tuɣa ittbergagen tammurt: “Adfem ɣar taddart n temɣart n farq-ccɣeř, u ssuffɣem tamɣart nni ak-d marra min ɣares, am mammec kenniw i d as tejjuǧem.”
JOS 6:23 [Xenni] udfen ibřiɣen, ibergagen, uca ssuffɣen-dd Raḥab ak-d babas d yemmas d aytmas d marra min iǧan nnes. Ssuffɣen marra řaǧ nnes uca ggin asen mani ɣa qqimen barra i řmargeḥ n řɛeskar n Israil.
JOS 6:24 Sscemḍen tandint d marra min dayes s tmessi. Mɣir nnuqart d wureɣ d řeqcuɛ n nnḥas d wuzzař, ssidfen ten ɣar wexxam n txubay di Taddart n SIDI.
JOS 6:25 Raḥab, tamɣart n farq-ccɣeř d [řaǧ n] taddart n babas d marra min iǧan nnes, ijja i-ten Yacuwa ad ddaren. U nettat tzeddeɣ di řwesṭ n Israil ař ass-a, minzi tuɣa tessnuffar x ireqqasen i tuɣa issekk Yacuwa, ḥima ad bergagen tammurt.
JOS 6:26 Di řweqt nni ijjuǧ Yacuwa, inna: “Aryaz nni i ɣa issbedd Ariḥa ɛawed ad yiři ittwanɛeř zzat i wudem n SIDI. Ad as yegg dsas nnes di tareẓẓit n umenzu nnes, ad issbedd tiwwura nnes di tareẓẓit n mmis amaẓuẓ.”
JOS 6:27 [Ammu] i tuɣa SIDI ak-d Yacuwa, uca řexbar ikka marra tammurt.
JOS 7:1 Ayt n Israil ɣeccen ak-d min iǧan ittwaḥarrmen [i uteḥḥi]. Ɛaxan, mmis n Karmi, mmis n Zabdi, mmis n Zaraḥ, zi teqbič n Yahuda, iksi ca zi min ittwaḥarrmen [i uteḥḥi]. [Xenni] yarɣa weɣḍab n SIDI x ayt n Israil.
JOS 7:2 Yacuwa issekk iryazen zi Ariḥa ɣar Ɛay i iǧan ɣar Bayt-Awin, ɣar ccarq n Bayt-Il. Netta issiweř akidsen, inna: “Gaɛɛdem, bergagem tammurt!” Iryazen ffɣen u bergagen x Ɛay.
JOS 7:3 [Umi] dd-ɛeqben ɣar Yacuwa, nnan as: “Nhřa ma igeɛɛed din marra řgens. Ejj ad geɛɛden din ɛřaḥař ařfayen niɣ teřt-ařaf n yeryazen ḥima ad ɣeřben x Ɛay. War dd-ttiwyed ca dinni marra řgens, minzi nitni aqa aten di drus.
JOS 7:4 [Ammu] i geɛɛden zi řgens ɛřaḥař teřt-ařaf n yeryazen, [maca] nitni arewřen zzat i wudem n yeryazen n Ɛay.
JOS 7:5 Iryazen n Ɛay nɣin zzaysen setta u-třatin n yeryazen uca ḍfaren ten zi zzat n wudem n tewwart ař Cabarim uca ɣeřben xasen deg uhekkwu. [Xenni] ifsiy wuř n řgens, idweř am waman.
JOS 7:6 Yacuwa icarreg arruḍ nnes, iwḍa x uɣembub nnes ɣar temmurt zzat i Ttabut n SIDI, ař ǧiřet, netta d imɣaren n Israil, uca nitni ssuyusen ucař x uzeǧif nsen.
JOS 7:7 Yacuwa inna: “A, Sidi inu, SIDI, mayemmi tejjid řgens-a ad iẓwa L’Urdun? Ma ḥima ad aneɣ tegged deg ufus n ayt n Imuriyyen, maḥend ad aneɣ teḥḥan? Iři, negga ad neqbeř ad nezdeɣ ɣar ujemmaḍ n L’Urdun.”
JOS 7:8 A Sidi inu, min ɣa iniɣ, awarni i umi yarra Israil aɛrur ɣar wudem n řɛedyan nnes [maḥend ad yarweř]?
JOS 7:9 Mařa ad t sřen ayt n Kenɛan d marra imezdaɣ n temmurt, ad aneɣ qewwaren, ad qeḍɛen isem nneɣ zi tammurt. Min i ɣa tegged [xenni] i Yisem nnec ameqqran?”
JOS 7:10 [Xenni] inna SIDI i Yacuwa: “Kkar, mayemmi [da] tmedded ammu x uɣembub nnec ɣar temmurt?
JOS 7:11 Aqa Israil ixḍa uca nitni ɛeddan Řɛahd inu nni x d asen umureɣ. Ksin [ɛawed] zi min iǧan ittwaḥarrmen [i uteḥḥi], ucaren [ɛawed], ssxarrqen [ɛawed] uca ssarsen [aya] [ɛawed] ɣar řeqcuɛ nsen.
JOS 7:12 [X uya] war zemmaren ayt n Israil ad qqimen bedden zzat i wudem n řɛedyan nsen. Ad arrin aɛrur ɣar wudem n řɛedyan nsen [maḥend ad arewřen], minzi nitni dewřen ttwaḥarrmen [qaɛ] i lḥukm. Necc war kiwem ttiřiɣ ɛad, mařa war tekksem zi řwesṭ nwem min ittwaḥarrmen [i uteḥḥi].
JOS 7:13 Kkar, sqeddes řgens, ad tinid: ‘Sqeddsem ixef nwem i tiwecca, minzi ammu i iqqar SIDI, AREBBI n Israil: Aqa din ca min ittwaḥarrmen [i uteḥḥi] di řwesṭ nwem, Israil! War tzemmared ad tessbedded řɛedyan nnec, ař ɣa tekksem zi řwesṭ nwem min ittwaḥarrmen [i uteḥḥi].
JOS 7:14 Tiwecca ad dd-tqarrbem, [ad tiřim tᵉttwasettfem] ɛlaḥsab tiqebbař nwem uca [xenni] ad dd-tqarreb teqbič nni iɛeǧem SIDI, ɛlaḥsab řaǧat [nnes] u řaǧ i ɣa iɛeǧem SIDI ad dd-iqarreb ɛlaḥsab [řaǧat n] tudrin [nnes] uca [řaǧ n] taddart nni i ɣa iɛeǧem SIDI ad dd-iqarreb [am ttwasettfen nitni] ɛlaḥsab [iryazen] ibřiɣen [nsen].
JOS 7:15 Uca ad imsar, aqa wenni iksin ca zi min ittwaḥarrmen [i uteḥḥi] ad ittwassecmeḍ s tmessi ak-d marra min ɣares iǧan, minzi netta iɛedda x Řɛahd n SIDI u igga řefḍiḥet di Israil.’”
JOS 7:16 Ikkar Yacuwa zic uca ijja ad dd-isqarreb Israil taqbič taqbič uca tᵉttwaɛeǧem teqbič n Yahuda.
JOS 7:17 Ijja ad dd-tqarreb řaǧ n Yahuda uca tᵉttwaɛeǧem řaǧ n Izaraḥiyyen. [Xenni] ijja ad dd-tqarreb řaǧ n Izaraḥiyyen, [tᵉttwasettef] ɛlaḥsab [iryazen] ibřiɣen [nnes] uca ittwaɛeǧem Zabdi.
JOS 7:18 Netta ijja ad dd-iqarreb [řaǧ n] taddart nnes, [am ttwasettfen nitni] ɛlaḥsab [iryazen] ibřiɣen [nsen], uca ittwaɛeǧem Ɛaxan, mmis n Karmi, mmis n Zabdi, mmis n Zaraḥ, zi teqbič n Yahuda.
JOS 7:19 Yacuwa inna i Ɛaxan: “A mmi, ewc řɛezz i SIDI, AREBBI n Israil, u qada i-t! Ini ayi, min teggid cek, war xafi snuffar ca”
JOS 7:20 Ɛaxan yarra-dd x Yacuwa, inna: “Aqa s tidett, necc xḍiɣ ak-d SIDI, AREBBI n Israil, [maɣar] necc ggiɣ ta d ta.
JOS 7:21 Necc ẓriɣ jar tkeccaḍt ijj n upartessu izewwqen zi Cinar d mitayen ciqlu n nnuqart d ict n tbarrat n wureɣ tewzen xemsin ciqlu. Necc meẓreɣ daysen uca iwyeɣ ten-dd ɣari, aqa aten nnufaren di temmurt, di řwesṭ n uqiḍun inu, d nnuqart swadday.”
JOS 7:22 Yacuwa issekk ireqqasen. Nitni uzzřen ɣar uqiḍun, xzar, [řeḥwayej] tuɣa aten nuffaren deg uqiḍun, d nnuqart swadday.
JOS 7:23 Ksin nitni [řeḥwayej nni] zi řwesṭ n uqiḍun uca iwyen ten ɣar Yacuwa u ɣar marra ayt n Israil uca ssarsen ten zzat i wudem n SIDI.
JOS 7:24 Yacuwa, d marra Israil akides, iksi Ɛaxan, mmis n Zaraḥ, uřa d nnuqart d upartessu izewwqen d tbarrat n wureɣ d iḥenjiren nnes d yessis nnes d ifunasen nnes d iɣyař nnes d wuǧi nnes d uqiḍun nnes d marra min ɣares uca iwyen ten ɣar teɣzurt n Axur.
JOS 7:25 Inna Yacuwa: “Mayemmi d aneɣ teggid di arrẓiyet? SIDI ad cek yegg di arrẓiyet ass-a!” D marra Israil yarjem i-t s iẓra uca sscemḍen ten s tmessi uca nḍaren xasen iẓra.
JOS 7:26 Ssbedden xas ijj n uɛurric d ameqqran n iẓra [wenni din iǧan] ař ass-a. Uca SIDI igga ad dd-iɛqeb řḥaduq n weɣḍab nnes. X uya qqaren as i temmurt nni: ‘Taɣzurt n Axur’ ař ass-a.
JOS 8:1 [Xenni] inna SIDI i Yacuwa: “War tteggʷed, war ttejji ad iɛgez wuř nnec. Ksi akidek marra řgens n řɛeskar, kkar, tuyured ɣar Ɛay! Xzar, Necc ggiɣ ajeǧid n Ɛay d řgens nnes d tendint nnes d temmurt nnes deg ufus nnec.
JOS 8:2 Cek ad tegged ak-d Ɛay u ak-d ujeǧid nnes am mammec teggid ak-d Ariḥa u ak-d ujeǧid nnes, ad teksim mɣir takeccaḍt d řebhayem waha i yixef nwem. Egg deg weɛrur n tendint ijn n řfex.”   *
JOS 8:3 [Xas uca] ikkar Yacuwa ak-d marra řgens n řɛeskar ḥima ad igeɛɛed ɣar Ɛay. Ixḍar Yacuwa teřt-ařaf n yeryazen, ayt n bu-teɣruḍt imeḥḍen, uca issekk i-ten s ǧiřet
JOS 8:4 uca yumur i-ten, inna: “Xzarem, ad teggem řfex ɣar weɛřuř n tendint. War tiggʷejem aṭṭas x tendint u iřim tḥezzmem.
JOS 8:5 Necc ad dd-qarrbeɣ ɣar tendint ak-d marra řgens. Ad imsar mařa ffɣen i umsagar akidneɣ am [twařat] tamezwarut, [xenni] ad zzaysen narweř zzat i wudem nsen.
JOS 8:6 Nitni ad aneɣ dd-ḍfaren ař ten dd-nessiggʷej x tendint, minzi nitni ad inin: ‘Nitni arewřen zzat i wudem nneɣ am [twařat] tamezwarut.’ [Xmi] zzaysen ɣa narweř zzat i wudem nsen,
JOS 8:7 ittxeṣṣa kenniw ad tekkarem zeg wecbar, ad tᵉṭṭfem tandint, minzi SIDI, AREBBI nwem, ad tt iwc deg ufus nwem.
JOS 8:8 Uca ad imsar x minni i ɣa tiři tᵉṭṭfem tandint, ad tessarɣem tandint s tmessi. Ittxeṣṣa ad teggem ɛlaḥsab awař n SIDI. Xzarem, necc aqa umureɣ kenniw.”
JOS 8:9 [Xenni] issekk i-ten Yacuwa uca nitni ggin řfex uca qqimen jar Bayt-Il d Ɛay, ɣar řɣarb x Ɛay. Yacuwa issens ǧiřet nni di řwesṭ n řgens.
JOS 8:10 Tiwecca zic ikkar Yacuwa. Iḥseb řgens [i umenɣi] uca igeɛɛed ak-d imɣaren n Israil zzat i wudem n řgens ɣar Ɛay.
JOS 8:11 Marra řgens n řɛeskar, inni kis iǧan, iffeɣ-dd uca nitni qarrben-dd uca iwḍen ař qibač i tendint. Nitni wtin iqiḍan nsen ɣar ccamal n Ɛay. Tuɣa [din] ict n teɣzurt jar as-dd d Ɛay.
JOS 8:12 Iksi netta ɛřaḥař xemsa-ařaf n yeryazen uca igga asen řfex jar Bayt-Il d Ɛay, ɣar řɣarb n tendint.
JOS 8:13 Ssbedden řgens, zeɛma marra řɛeskar ɣar ccamal n tendint, uca aɣezdis aneggaru [n řɛeskar] ɣar řɣarb n tendint. Yacuwa iruḥ ǧiřet nni ɣar řwesṭ n řewḍa n teɣzurt.
JOS 8:14 [Umi] iẓra-ya ujeǧid n Ɛay, qeǧqen uca kkaren zic. Ffɣen iryazen n tendint i umsagar ak-d Israil, i umenɣi, netta ak-d marra řgens nnes, ɣar wazzay [n umenɣi] zzat i wudem n Řewḍa. Maca netta war issin belli tuɣa ggin as ijj n řfex ɣar weɛrur n tendint.
JOS 8:15 Yacuwa d marra Israil ggin axmi jjin ixef nsen ad ttwawten qibač nsen uca arewřen x webrid n řexřa.
JOS 8:16 Marra řgens i tuɣa iǧan di tendint řaɣan ten ḥima ad ten ḍfaren. Ḍfaren Yacuwa uca dewřen iggʷejen x tendint.
JOS 8:17 Uřa d ijj n weryaz war iqqim di Ɛay niɣ di Bayt-Il, wenni war dd-iffiɣen ca i weḍfar awarni i Israil, uca nitni jjin tandint tarzem uca qqimen ḍeffaren [ayt n] Israil.
JOS 8:18 [Xenni] issiweř SIDI ak-d Yacuwa: “Swiẓẓeḍ aḥric nni deg ufus nnec ɣar Ɛay, minzi Necc ad wceɣ tandint deg ufus nnec.” [Xenni] isswiẓẓeḍ Yacuwa aḥric nni deg ufus nnes ɣar tendint.
JOS 8:19 [Xenni] ikkar uɣezdis aneggaru [n řɛeskar] deɣya uca umi isarreḥ [Yacuɛa] afus nnes, bdan ad azzřen uca iwḍen ɣar tendint uca ṭṭfen tt. Ggin t s tazřa uca ssekkaren timessi di tendint.
JOS 8:20 Iryazen n Ɛay nnqeřben uca ẓrin ddexxan yuři ɣar ujenna zi tendint. Nitni war zemmaren ad arewřen ɣar da uřa ɣar din, [minzi] řgens i tuɣa yarewřen ɣar řexřa, inneqřeb-dd [i umenɣi] x wenni ten iḍeffaren.
JOS 8:21 [Umi] iẓar Yacuwa d marra ayt n Israil belli [inni tuɣa rajan di] tnuffra, ṭṭfen tandint uca yuři ddexxan zi tendint, ɛeqben-dd nitni uca wtin iryazen n Ɛay.
JOS 8:22 Inni dd-iffɣen zi tendint, ruḥen i umsagar akidsen, ařami [iryazen n Ɛay] dewřen di řwesṭ n Israiliyyen, ina ɣar uɣezdis-a d ina ɣar uɣezdis nneɣni, uca nitni ɣeřben xasen ařami war zzaysen iqqim uřa d ijjen ad yarweř niɣ ad injem.
JOS 8:23 Menɛen ajeǧid n Ɛay am iddar [ɛad] u iwyen t ɣar Yacuwa.
JOS 8:24 [Umi] ayt n Israil kemmřen ad nɣen marra imezdaɣ n Ɛay, [am] deg iyyar [am] di řexřa mani tuɣa ten dd-ḍfaren uca ttwanɣen marra s řeqḍeɛ n ssif, [xenni] iɛqeb Israil ɣar Ɛay uca wtin tt s řeqḍeɛ n ssif.
JOS 8:25 Marra inni ittwanɣen deg wass nni, iryazen d temɣarin, tuɣa aten di tenɛac-ařaf, dayes marra iryazen n Ɛay.
JOS 8:26 Yacuwa war issehwi afus nnes i isswiẓẓḍen s uḥric ařami tuɣa iḥarrem marra imezdaɣ n Ɛay [i uteḥḥi].
JOS 8:27 Ksin Israiliyyen mɣir řebhayem d tkeccaḍt n tendint nni i yixef nsen ɛlaḥsab awař n SIDI, [awař] nni yumur Netta i Yacuwa.
JOS 8:28 Issecmeḍ Yacuwa [tandint n] Ɛay uca yarra i-tt d ict n řxirbet i řebda, d ict n temmurt d řexřa ař ass-a.
JOS 8:29 Netta yuyeř ajeǧid n Ɛay ɣar ict n teḥnact ař tameddit u umi teɣři tfuct, yumur Yacuwa ad kksen řxecbet nnes zi teḥnact. Nḍaren tt ɣar wadaf n tewwart n tendint u ssbedden xas ijj n uɛurric d ameqqran n yeẓra, [i din iǧan] ɛad ař ass-a.
JOS 8:30 [Xenni] ibna Yacuwa ijj n uɛalṭar i SIDI, AREBBI n Israil, x wedrar n Ɛibal,
JOS 8:31 am mammec [t] yumur Musa, amsexxar n SIDI, i ayt n Israil, ɛlaḥsab min yuran deg wedlis ittwannḍen n Ccariɛa n Musa: ijj n uɛalṭar n weẓru qaɛ, war xas meyyřen s [uřa d ijj n dduzan n] wuzzař zi ssa ɣar da. Nitni bexxaren xas tiɣarṣa n tmessi i SIDI. Ɣarṣen [ɛawed] tiɣarṣa n řehna.
JOS 8:32 X yeẓra igga netta ict n tiřemt n tira n Ccariɛa n Musa, tenni yura zzat i wudem n ayt n Israil.
JOS 8:33 Marra ayt n Israil d imɣaren d imeḥḍayen d řquḍat bedden ɣar uɣezdis-a u ɣar uɣezdis nneɣni n Ttabut qibač i ikehhanen zi [ayt n] Lawi inni yarbun Ttabut n Řɛahd n SIDI, am ubarrani am aytbab n temmurt. Azyen zzaysen tuɣa zzat n wedrar n Jirizim u azyen nneɣni ɣar zzat n wedrar n Ɛibal, am mammec tuɣa yumur Musa, amsexxar n SIDI zic, maḥend ad barken [ammu] ayt n Israil.
JOS 8:34 Awarni uya iɣra marra awařen n Ccariɛa, lbaraka d nneɛřet, ɛlaḥsab marra min yuran deg wedlis n Ccariɛa.
JOS 8:35 Zi marra min tuɣa yumur Musa, war iǧi uřa d ijj n wawař, war t iɣri Yacuwa i marra agraw [n řgens] n Israil, uřa d timɣarin d iḥenjiren imeẓyanen d ubarrani wenni akidsen iruḥen, [tuɣa aten din].
JOS 9:1 Umi marra ijeǧiden, inni yeǧan x ujemmaḍ n L’Urdun ṣrin x man aya - [ijeǧiden] x Temmurt n Idurar, di Temmurt Iwaṭan u ɣar marra tma n Řebḥar Ameqqran ař qibač i [idurar n] Lubnan: Iḥittiyyen d Imuriyyen d ayt n Kenɛan d Ifariziyyen d Iḥiwiyyen d Iyabusiyyen -
JOS 9:2 munen nitni ḥima ad mmenɣen ak-d Yacuwa u ak-d Israil x ijj n array.
JOS 9:3 [Umi] imezdaɣ n Jibɛun sřin min tuɣa igga Yacuwa ak-d Ariḥa d Ɛay,
JOS 9:4 ggin t s teḥraymect. Nitni uyuren deg webrid uca ggin ixef nsen d imsekkan. Iwyen tixuncay tibuřay x iɣyař nsen, tixuncay n yiřem tibuřay ttwacarrgent u twaxeyyḍent [ɛawed] i binu.
JOS 9:5 [Qqnen ɛawed] tisiřa d řbari, ittwaḍarrfen x iḍaren nsen u yarḍen arruḍ abuřay, u marra aɣrum n řeɛweč nsen tuɣa yuẓeɣ ittfruruy.
JOS 9:6 Uyuren [ammu] ɣar Yacuwa di řmargeḥ n řɛeskar n Jiljal, nnan as i netta u i ayt n Israil: “Neccin nusa-dd zeg ict n temmurt tiggʷej. Řexxu xenni, ggem ijj n řɛahd akidneɣ.”
JOS 9:7 Arrin-dd iryazen n Israil x Iḥiwiyyen: “Ad taɣ kenniw tzeddɣem jar aneɣ. Mammec nzemmar ad kidwem negg ijj n řɛahd?”
JOS 9:8 Nitni maca nnan i Yacuwa: “Neccin d imsexxaren nnec.” [Xenni] inna asen Yacuwa: “Min teɛnam kenniw d manis i dd-tusim?”
JOS 9:9 Nitni arrin-dd xas: “Imsexxaren nnec usin-dd zeg ict n temmurt tiggʷej aṭṭas di ṭṭweɛ n Yisem n SIDI, AREBBI nwem. Minzi neccin nesřa xas řexbar u x marra min igga di Miṣra,
JOS 9:10 d marra min igga Netta ak-d ijeǧiden n ayt n Imuriyyen inni yeǧan aɣirin i L’Urdun, Siḥun, ajeǧid n Ḥacbun, d Ɛuj, ajeǧid n Bacan nni tuɣa izeddeɣ di Ɛactarut.
JOS 9:11 Uca ssiwřen akidneɣ imɣaren nneɣ d marra imezdaɣ n temmurt, nnan: ‘Ṭṭfem řeɛweč deg ufus nwem i webrid, uyurem i umsagar akidsen uca ad asen tinim: Neccin d imsexxaren nwem.’ Xenni řexxu, ggem akidneɣ ijj n řɛahd.
JOS 9:12 Aɣrum-a nneɣ da tuɣa ɛad iḥma umi t-i-dd akidneɣ neksi zi tudrin nneɣ d řeɛweč deg wass ařami ɣarwem dd-neṭṭef abrid. Řexxu aqa-t yuẓeɣ idweř ittfruruy.
JOS 9:13 Uřa d tixuncay n yiřem n binu nni neccur, tuɣa atent n jdid, maca xzarem, řexxu feǧqent. Aqa [d] arruḍ nneɣ d sandaliyat nneɣ ḥfant s webrid i iggʷejen s waṭṭas.”
JOS 9:14 [Xenni] ksin iryazen n Israil zi řeɛweč. War ksin ccwar zeg uqemmum n SIDI.
JOS 9:15 Igga Yacuwa akidsen řehna u igga akidsen [ɛawed] ijj n řɛahd, ad ten yejj ad ddaren uca uřa d řḥukkam n tmesmunt jjuǧen asen.
JOS 9:16 Awarni třata n wussan awarni i umi tuɣa i d asen wcin řɛahd, sřan nitni belli aqa d jjiran nsen, u aqa zeddɣen di řwesṭ nsen.
JOS 9:17 [Minzi] ayt n Israil kksen [iqiḍan nsen] uca iwḍen ɣar tneddam nsen deg wass wiss třata. Tuɣa tineddam nsen Jibɛun d Kafira d Biɛrut d Qaryat-Yaɛarim.
JOS 9:18 Ayt n Israil war ten nɣin ca, minzi řḥukkam n tmesmunt tuɣa jjuǧen asen [aya] ɣar SIDI, AREBBI n Israil. S uyenni i teqqim marra tmesmunt tmuɣmuɣ x řḥukkam.
JOS 9:19 [Xenni] nnan marra řḥukkam n tmesmunt: “Neccin nejjuǧ asen [aya] ɣar SIDI, AREBBI n Israil. S uyenni řexxu war nzemmar ad ten nḥada.
JOS 9:20 Ittxeṣṣa ad nkemmeř [tajaǧit-a] u ad ten nejj ad ddaren, maḥend war xaneɣ dd-iweṭṭi uduqqez n weɣḍab di ssibbet n tjaǧit nni d asen negga.
JOS 9:21 Řḥukkam nnan asen: “Nitni ad qqimen ddaren uca ad dewřen d inezdamen d inuyam i marra tamesmunt, am mammec d asen t nnan řḥukkam.”
JOS 9:22 Iřaɣa i-ten Yacuwa, inna: “Mayemmi xaneɣ tcemtem, tennam: ‘Neccin nzeddeɣ ɣar řaggʷaj s waṭṭas xawem!’, waxxa kenniw tzeddɣem di řwest n temmurt nneɣ?
JOS 9:23 Řexxu xenni, kenniw tᵉttwaneɛřem. War zzaywem ittwakkes ad tiřim d imsexxaren, inezdamen d inuyam i Taddart n AREBBI inu.”
JOS 9:24 Nitni arrin-dd x Yacuwa, nnan: “I imsexxaren nnec ittwanna nican belli SIDI, AREBBI nwem, yumur amsexxar nnes Musa, aqa Netta ad awem iwca marra tammurt uca ad ihellek marra imezdaɣ n temmurt zzat i tiṭṭawin nwem. [S uya] tuɣa neggʷed aṭṭas x tudart nneɣ zzat i wudem nwem. S uyenni i negga neccin aya.
JOS 9:25 Řexxu [xenni], xzar, aqa aneɣ deg ufus nnec. Egg akidneɣ min tᵉttwařid mliḥ d min iǧan nican di tiṭṭawin nnec ḥima ad zzayneɣ tegged.”
JOS 9:26 Ammu i zzaysen igga uca netta ifekk i-ten zeg ufus n ayt n Israil, ařami nitni war ten nɣin ca.
JOS 9:27 Deg wass nni simant nnes igga i-ten Yacuwa d inezdamen d inuyam i tmesmunt u i uɛalṭar n SIDI, ař ass-a, deg wemcan nni ɣa yixḍar Netta.
JOS 10:1 Imsar, umi Aduni-Ṣadaq, ajeǧid n Urcalim isřa, aqa Yacuwa tuɣa iṭṭef Ɛay, iḥarrem i-tt qaɛ uca aqa igga ak-d Ɛay d ajeǧid nnes am tuɣa igga ak-d Ariḥa u ak-d ujeǧid nnes u aqa imezdaɣ n Jibɛun ggin řehna ak-d ayt n Israil u zeddɣen di řwesṭ nsen,
JOS 10:2 [aqa] nitni ggʷeden aṭṭas, minzi Jibɛun tuɣa d ict n tendint temɣar, umi tt tuɣa am yicten zi [jar] tneddam n tgeldit. Tuɣa-tt temɣar x Ɛay u marra iryazen nnes tuɣa aten d ayt n bu-teɣruḍt.
JOS 10:3 Issekk Aduni-Zedek, ajeǧid n Urcalim, [imsekkan] ɣar Huham, ajeǧid n Ḥabrun, ɣar Fir’am, ajeǧid n Yarmut, ɣar Yafiɛ, ajeǧid n Laxic u ɣar Dabir, ajeǧid n Ɛajlun, inna:
JOS 10:4 “Geɛɛdem-dd ɣari u tewcem ayi afus. Ejj aneɣ ad newwet Jibɛun, minzi tegga řehna ak-d Yacuwa u ak-d ayt n Israil.”
JOS 10:5 Nitni munen uca geɛɛden xemsa n ijeǧiden n Imuriyyen: ajeǧid n Urcalim, ajeǧid n Ḥabrun, ajeǧid n Yarmut, ajeǧid n Ɛajlun, nitni d marra řɛeskar nsen uca nnḍen i Jibɛun uca kkaren mmenɣen akides.
JOS 10:6 Ssekken iryazen n Jibɛun [ireqqasen] i Yacuwa, ɣar řmargeḥ n řɛeskar di Jiljal, nnan: “War semmeḥ ifassen nnec deg imsexxaren nnec, as-dd deɣya ɣarneɣ. Senjem aneɣ d tewced aneɣ afus, minzi marra ijeǧiden n ayt n Imuriyyen, inni i izeddɣen deg idurar, aqa munen xaneɣ.”
JOS 10:7 [Xenni] igeɛɛed-dd Yacuwa zi Jiljal, netta d marra řgens n řɛeskar akides d marra ayt n bu-teɣruḍt imeḥḍen.
JOS 10:8 [Minzi] SIDI inna i Yacuwa “War tteggʷed ca zzaysen, minzi wciɣ ten deg ufus nnec. Uřa d ijj zzaysen war izemmar ad ibedd zzat i wudem nnec.”
JOS 10:9 Yacuwa ihwa-dd xasen s řɣefřet. Igeɛɛaden-dd zi Jiljal ǧiřet am tekmeř.
JOS 10:10 SIDI issnexřeɛ i-ten zzat i wudem n Israil uca igga asen ijj n weɣḍar d ameqqran ɣar Jibɛun uca netta iḍfar i-ten x webrid ittgeɛɛaden ɣar Bayt-Ḥurun uca iwwet i-ten ař ṭṭarf n Ɛaziqqa d Maqida.
JOS 10:11 Imsar umi nitni arewřen zzat i wudem n Israil deg uhekkwu ɣar Bayt-Ḥurun, aqa SIDI inḍar xasen iẓra d imeqqranen zeg ujenna ař Ɛaziqqa uca mmuten. Inni immuten s ibquqen n tebruri tuɣa aten ktar zeg inni ittwanɣen s ssif s ifassen n ayt n Israil.
JOS 10:12 Xenni issiweř Yacuwa ak-d SIDI, deg wass umi isellem SIDI Imuriyyen i ayt n Israil, inna zzat i tiṭṭawin n Israiliyyen: “[A] tafuct, bedd ɣar Jibɛun, i [cek a,] ayur, ɣar teɣzurt n Ayalun”
JOS 10:13 Uca tafuct tbedd d uyur iqqim ibedd ařami yuɣa řgens tasɣart x řɛedyan nnes. Ma war yura man aya deg wedlis ittwannḍen n umsegged? Tafuct tbedd di řwesṭ n ujenna u war tqeǧeq ad tɣeǧi, ɛřayen ijj n wass ikmeř.
JOS 10:14 War din iǧi uřa d ijj n wass am wanita, [war imsar] zic uřa awarni as, ijj n wass i di tuɣa isřa SIDI ɣar tmijja n ijj n weryaz ammu, minzi SIDI tuɣa immneɣ di ṭṭweɛ n Israil.
JOS 10:15 [Xenni] iɛqeb-dd Yacuwa d marra Israil akides, ɣar řmargeḥ n řɛeskar di Jiljal.
JOS 10:16 Xemsa n ijeǧiden nni arewřen uca nnufaren deg ifri ɣar Maqqida.
JOS 10:17 Ittwanna man aya i Yacuwa, nnan: “Aqa ttwafen xemsa n ijeǧiden. Nitni nnuffaren deg ifri ɣar Maqqida.
JOS 10:18 [Xenni] inna Yacuwa: “Seqnunniyem tiṣuḍar d timeqqranin x uqemmum n ifri uca ssbeddem iryazen xasen, ḥima ad xasen ɛessen.
JOS 10:19 Kenniw [s yixef nwem], war tᵉttɣimam tbeddem. Ḍfarem řɛedyan nwem, wtem aɣezdis aneggaru nsen. War ten ttejjim ad adfen ɣar tneddam nsen, minzi SIDI, AREBBI nwem, igga awem ten deg ufus nwem.”
JOS 10:20 Umi ikemmeř i-ten Yacuwa d ayt n Israil s ict n tecti tameqqrant ařami ttwaqḍan nitni, uca iwḍen [mɣir] inni yarewřen ɣar tneddam ifaryen,
JOS 10:21 aqa yareggʷeḥ marra řgens di řehna ɣar Yacuwa di řmargeḥ n řɛeskar ɣar Maqqida. Uřa d ijj [war izɛim] ad issenhez iřes nnes x ayt n Israil.
JOS 10:22 [Xenni] inna Yacuwa: “Arzmem aqemmum n ifri uca awyem-dd xemsa n ijeǧiden nni zeg ifri ɣari da!”
JOS 10:23 Nitni ggin [t] ammu, ssuffɣen-dd xemsa n ijeǧiden zeg ifri ɣares: ajeǧid n Urcalim, ajeǧid n Ḥabrun, ajeǧid n Yarmut, ajeǧid n Laxic d ujeǧid n Ɛajlun.
JOS 10:24 Umi dd-ssuffɣen nitni ijeǧiden nni ɣar Yacuwa, iřaɣa Yacuwa marra iryazen n Israil uca inna i ikumandaren x iɛeskariyyen nni tuɣa akides iruḥen: “Qarrbem-dd uca sarsem iḍaren nwem x tmejjarin n ijeǧiden-a.” Qarrben-dd nitni uca ssarsen iḍaren x timejjarin nsen.
JOS 10:25 [Xenni] inna asen Yacuwa: “War tteggʷdem ca, war ttejjim ad iɛqez wuř nwem, iřim d iryazen u iřim tmeḥḍem, minzi ammu i ɣa igg SIDI ak-d marra řɛedyan nwem, inni ak-d tᵉttmenɣam.”
JOS 10:26 Xenni iwwet i-ten Yacuwa uca inɣa i-ten. Yayeř i-ten ɣar xemsa n tḥenya uca qqimen ayřen ɣar tḥenya ařami d tameddit.
JOS 10:27 Imsar ɣar řweqt n uɣeǧay n tfuct, issekk Yacuwa maḥend ad ten-i-dd-kksen zi tḥenya, ad ten nḍaren deg ifri i di tuɣa nnuffaren. Xenni ggin tiṣuḍar d timeqqranin x uqemmum n ifri, [inni din iǧan] ař ass-a.
JOS 10:28 Deg wass nni iṭṭef Yacuwa Maqqida uca iwwet i-tt s řeqḍeɛ n ssif. Uca ajeǧid nnes, iḥarrem i-t uřa d [marra] nitni d kuř řeɛmar nni [iǧan] deg wemcan nni. War ijji ad iqqim uřa d ijj n umarweř uca igga ak-d ujeǧid n Maqqida am mammec tuɣa igga ak-d ujeǧid n Ariḥa.
JOS 10:29 [Xenni] iẓwa Yacuwa ak-d marra ayt n Israil zi Maqqida ɣar Libna uca immneɣ ak-d Libna.
JOS 10:30 Uca SIDI iwca i-tt deg ufus n Israil, ak-d ujeǧid nnes. Iwwet i-tt s řeqḍeɛ n ssif ak-d marra řeɛmar i dayes [iǧan], war ijji ad iqqim uřa d ijj n umarweř, uca igga ak-d ujeǧid nnes am mammec tuɣa igga ak-d ujeǧid n Ariḥa.
JOS 10:31 [Xenni] iẓwa Yacuwa zi Libna ɣar Laxic d marra Israil akides uca inneḍ as-dd i tendint uca immneɣ akides.
JOS 10:32 SIDI iwca Laxic deg ufus n Israil. Uca Israil iṭṭef i-tt deg wass wiss tnayen uca iwwet i-tt s řeqḍeɛ n ssif ak-d marra řeɛmar i dayes [iǧan], ammu nican am mammec tuɣa i-tt igga ak-d Libna.
JOS 10:33 Xenni igeɛɛed Huram, ajeǧid n Jazar, maḥend ad iɛawen Laxic, [maca] Yacuwa iwwet i-t uřa d řgens nnes ařami war ijji ad ɣares iqqim uřa d ijj n umarweř.
JOS 10:34 Yacuwa iẓwa zi Laxic ɣar Ɛajlun d marra Israil akides uca nnḍen as-dd uca mmenɣen akides.
JOS 10:35 Ṭṭfen tt deg wass nni uca wtin tt s řeqḍeɛ n ssif uca deg wass nni iḥarrem marra řeɛmar i dayes [iǧan], ammu nican am mammec tuɣa igga ak-d Laxic.
JOS 10:36 Iẓwa Yacuwa zi Ɛajlun ɣar Ḥabrun d marra Israil akides, uca mmenɣen akides.
JOS 10:37 Nitni ṭṭfen tt uca wtin tt s řeqḍeɛ n ssif, ajeǧid nnes d marra tineddam nnes ak-d marra řeɛmar i dayes [iǧan]. War ijji ad iqqim uřa d ijj n umarweř, ammu nican am mammec tuɣa igga ak-d Ɛajlun. Netta iḥarrem i-tt ak-d marra řeɛmar i dayes [iǧan].
JOS 10:38 Uca idweř-dd Yacuwa ɣar Dabir d marra Israil akides uca immneɣ akides.
JOS 10:39 Netta iṭṭef i-tt u nitni wtin ajeǧid nnes d marra tineddam nnes s řeqḍeɛ n ssif uca ḥarrmen marra řeɛmar i dayes [iǧan]. Netta war ijji ad iqqim uřa d ijj n umarweř. Am mammec tuɣa igga netta ak-d Ḥabrun, ammu igga [ɛawed] ak-d Dabir u ak-d ujeǧid nnes igga am tuɣa igga ak-d ujeǧid n Libna.
JOS 10:40 [Ammu] i iɣřeb Yacuwa x marra tammurt: Tammurt n Idurar d [Temmurt n] Ljanub d Temmurt Iwaṭan, d marra ijeǧiden nsen. War ijji ad iqqim uřa d ijj n umarweř. Marra min tuɣa ittarran nnefs, iḥarrem i-t i uteḥḥi, am mammec tuɣa i d as yumur SIDI AREBBI n Israil.
JOS 10:41 Yacuwa iwwet i-ten zi Qadac-Barniɛ ař Ɣazza u ammu uřa d marra tammurt n Jucan, ař Jibɛun.
JOS 10:42 Iṭṭef Yacuwa ijeǧiden-a d temmurt nsen s ict n tecti, minzi SIDI, AREBBI n Israil, immneɣ di ṭṭweɛ n Israil.
JOS 10:43 [Xenni] iɛqeb Yacuwa ɣar řmargeḥ n řɛeskar di Jiljal d marra Israil akides.
JOS 11:1 Umi Yabin, ajeǧid n Ḥaṣur, isřa aya, issekk ɣar Yubab, ajeǧid n Madun, ɣar ujeǧid n Cimrun, ɣar ujeǧid n Akcaf,
JOS 11:2 u ɣar ijeǧiden inni tuɣa [izeddɣen] ɣar ccamal di Temmurt n Idurar u di Řewḍa ɣar ljanub zi Kinnarut u di Temmurt Iwaṭan u x tiwririn n Dur ɣar řɣarb,
JOS 11:3 ɣar ayt n Kenɛan di ccarq d řɣarb, Imuriyyen, Iḥittiyyen, Ifiriziyyen, Iyabusiyyen deg idurar d Iḥiwiyyen ɣar uḍar n [wedrar] n Hirmun, di temmurt n Miṣfa.
JOS 11:4 Ffɣen-dd nitni s marra řɛeskar nsen akidsen, ijj n ubarra ameqqran n řgens, am yijdi ɣar tma n řebḥar, anect aṭṭas, uca [arni ɣares] aṭṭas s waṭṭas n iysan d ikarruten.
JOS 11:5 Marra ijeǧiden-a řaɣan-dd xasen uca usin-dd, wtin iqiḍan nsen jmiɛ ɣar waman n Mayrum i umenɣi ḍidd i Israil.*
JOS 11:6 Inna SIDI i Yacuwa: “War zzaysen tteggʷed, minzi tiwecca ɣar řweqt ammu řexxu ad ten ggeɣ ttwaɣeřben marra zzat i wudem n Israil. Cek ad tqessed iẓewran n iḍaren n iysan nsen uca ad tesscemḍed ikarruten nsen di tmessi.”
JOS 11:7 Yacuwa s marra řɛeskar akides, iffeɣ-dd ɣarsen s ict n řɣefřet ɣar waman n Mayrum uca wḍan-dd xasen.
JOS 11:8 SIDI igga i-ten deg ufus n Israil uca nitni wtin ten, ḍfaren ten ař Ṣidun-Ameqqran d Misrafut-Mayim, u ař taysart n Miṣfa ɣar ccarq. Nitni qḍan ten ařami war zzaysen jjin ad iqqim uřa d ijj n umarweř.
JOS 11:9 Yacuwa igga akidsen am mammec d as inna SIDI. Netta iqess iẓewran n iḍaren n iysan nsen uca issecmeḍ ikarruten nsen s tmessi.
JOS 11:10 Di řweqt nni iɛqeb Yacuwa uca iṭṭef Ḥaṣur uca iwta ajeǧid nnes s [řeqḍeɛ n] ssif, minzi Ḥaṣur tuɣa-t qbeř d azeǧif x marra tigeldiwin-a.
JOS 11:11 Wtin marra řeɛmar [iddaren] nni dayes iǧan s řeqḍeɛ n ssif uca ḥarrmen ten u nɣin ten. War iqqim walu zi marra min ittarran nnefs uca issecmeḍ Ḥaṣur s tmessi.
JOS 11:12 Iṭṭef Yacuwa marra tineddam n ijeǧiden-a s marra ijeǧiden nsen uca iwta i-ten s řeqḍeɛ n ssif uca iḥarrem i-ten, am mammec tuɣa yumur Musa, amsexxar n SIDI.
JOS 11:13 Marra tineddam nni ibedden x tiwririn war tent sscemḍen Israiliyyen s tmessi, mɣir Ḥaṣur umi issecmeḍ Yacuwa s tmessi.
JOS 11:14 Keccḍen ayt n Israil marra takeccaḍt n tneddam d řebhayem i ixef nsen. Maca nitni nɣin marra iwdan s řeqḍeɛ n ssif, ařami ten teḥḥan. Marra min ittaran nnefs, war zzayes jjin uřa d ijj.
JOS 11:15 Am mammec [t] yumur SIDI i umsexxar nnes Musa, ammu i t igga Musa x Yacuwa, uca ammu [i-t] igga Yacuwa. Netta war ismiḥ uřa deg ijj n wawař zi marra [awařen] i yumur SIDI i Musa [maḥend ad t igg].
JOS 11:16 [Ammu] iṭṭef Yacuwa marra tammurt nni: Tammurt n Idurar d marra [Tammurt n] Ljanub d marra tammurt n Jucan d Temmurt Iwaṭan d Řewḍa d idurar n Israil d řwaṭa nnes,
JOS 11:17 [marra tammurt] zeg Wedrar d Aqeccar, wenni isgeɛɛaden ɣar Saɛir ař Baɛl-Jad, di teysart n Lubnan, swadday i wedrar n Ḥirmun. Marra ijeǧiden nsen iḥebbes i-ten, iwta i-ten uca inɣa i-ten.
JOS 11:18 Aṭṭas n wussan i immneɣ Yacuwa ak-d marra ijeǧiden-a.
JOS 11:19 War iǧi uřa d ict n tendint i iggin řehna ak-d ayt n Israil, mɣir Iḥiwiyyen, inni tuɣa izeddɣen di Jibɛun. Nitni ṭṭfen tent marra s umenɣi.
JOS 11:20 Minzi SIDI tuɣa igga ad isseqseḥ uř nsen ař dd ɣa ffɣen ad mmenɣen ak-d Israil, ḥima ad ten iḥarrem uca war xasen yareḥḥem, ḥima ad ten iqḍa, am mammec tuɣa yumur SIDI i Musa.
JOS 11:21 Di řweqt nni iffeɣ Yacuwa uca iteḥḥa Iɛanaqiyyen zi temmurt n idurar, zi Ḥabrun, zi Dabir, zi Ɛanab, zi marra Tammurt n Idurar n Yahuda u zi marra tammurt n idurar n Israil. Yacuwa iḥarrem i-ten ak-d tneddam nsen i uteḥḥi.
JOS 11:22 Di temmurt n ayt Israil war qqimen ɛad Iɛanaqiyyen. Qqimen mɣir di Ɣazza, Jat d Acdud.
JOS 11:23 Iṭṭef Yacuwa marra tammurt nni, am mammec marra i tuɣa issiweř SIDI ɣar Musa, uca Yacuwa iwca i-tt d řwart i Israil ɛlaḥsab tirbiɛin n tqebbař nsen. [Xenni] tuɣa tammurt tareyyeḥ zeg umenɣi.
JOS 12:1 Ina d ijeǧiden n temmurt, inni x ɣeřben ayt n Israil uca [xenni] ṭṭfen nitni tammurt nsen d řwart, aɣirin i L’Urdun zi manis i d tneqqar tfuct, zi teɣzart n Arnun ař idurar n Ḥirmun d marra Řewḍa di ccarq.
JOS 12:2 Ɣar umezwaru nsen, Siḥun, ajeǧid n Imuriyyen, wenni tuɣa izeddɣen di Ḥacbun, netta iḥkem [x jjwayeh] zi Ɛaruɛir i iǧan ɣar tma n teɣzart n Arnun, [ař] řwesṭ n teɣzart, u x wezyen n Jilɛad ař tiɣzart n Yabbuq, [aqa-t] d aymir n ayt n Ɛammun,
JOS 12:3 u x Řewḍa ař řebḥar n Kinnarut di ccarq u ař řebḥar n Řewḍa, Řebḥar Ameǧaḥ, di ccarq, abrid n Bayt-Yacimut, u zi ljanub ař swadday i teysarin n Fisja.
JOS 12:4 [Xenni] tammurt n Ɛuj, ajeǧid n Bacan, [wenni iǧan] zi min iqqimen zeg Irafawiyyen, [jwaheř] i tuɣa izeddɣen di Ɛactarut d Idraɛi.
JOS 12:5 Netta iḥkem x idurar n Ḥirmun, x Salxa u x marra Bacan ař weymir n Ijacuriyyen d Imaɛkiyyen u x wezyen n Jilɛad ař tammurt n Siḥun, ajeǧid n Ḥacbun.
JOS 12:6 Musa, amsexxar n SIDI, ak-d ayt n Israil, wtin ten u Musa, amsexxar n SIDI, tuɣa iwca [tammurt nni] d řwart i Irubiniyyen d Ijadiyyen u i wezyen n teqbič n Manassa.
JOS 12:7 Ina d ijeǧiden n temmurt inni x iɣřeb Yacuwa d ayt n Israil, ɣar ujemmaḍ n L’Urdun di lɣarb, zi Baɛl-Jad di teysart n Lubnan ař adrar aqeccar wenni issgeɛɛden ɣar Saɛir. Uca Yacuwa iwca i-tt d řwart i tqebbař n Israil ɛlaḥsab tirbiɛin nsen,
JOS 12:8 Di Temmurt n Idurar u di Temmurt Iwaṭan u di Řewḍa u di teysarin u di řexřa u di [Temmurt n] Ljanub: Iḥittiyyen, Imuriyyen, ayt n Kenɛan, Ifariziyyen, Iḥiwiyyen d Iyabusiyyen.
JOS 12:9 Ajeǧid n Ariḥa: d ijj. Ajeǧid n Ɛay [i iǧan] ɣar uɣezdis n Bayt-Il: d ijj.
JOS 12:10 Ajeǧid n Urcalim: d ijj. Ajeǧid n Ḥabrun: d ijj.
JOS 12:11 Ajeǧid n Yarmut: d ijj. Ajeǧid n Laxic: d ijj.
JOS 12:12 Ajeǧid n Ɛajlun: d ijj. Ajeǧid n Jazar: d ijj.
JOS 12:13 Ajeǧid n Dabir: d ijj. Ajeǧid n Jadar: d ijj.
JOS 12:14 Ajeǧid n Ḥurma: d ijj. Ajeǧid n Ɛarad: d ijj.
JOS 12:15 Ajeǧid n Libna: d ijj. Ajeǧid n Ɛadullam: d ijj.
JOS 12:16 Ajeǧid n Maqqida: d ijj. Ajeǧid n Bayt-Il: d ijj.
JOS 12:17 Ajeǧid n Taffuḥ: d ijj. Ajeǧid n Ḥafar: d ijj.
JOS 12:18 Ajeǧid n Afiq: d ijj. Ajeǧid n Laccarun: d ijj.
JOS 12:19 Ajeǧid n Madun: d ijj. Ajeǧid n Ḥaṣur: d ijj.
JOS 12:20 Ajeǧid n Cimrun-Mara’un: d ijj. Ajeǧid n Akcaf: d ijj.
JOS 12:21 Ajeǧid n Taɛnak: d ijj. Ajeǧid n Majiddu: d ijj.
JOS 12:22 Ajeǧid n Qadac: d ijj. Ajeǧid n Yuqnaɛam ɣar Karmal: d ijj.
JOS 12:23 Ajeǧid n Dur x tiwririn ɣar Dur: d ijj. Ajeǧid n Juyim di Jiljal: d ijj.
JOS 12:24 Ajeǧid n Tirṣa: d ijj. Marra ijeǧiden-a aqa aten di waḥit u-třatin.
JOS 13:1 Umi tuɣa Yacuwa d awessar uca imɣar deg wussan [n tudart nnes], inna as SIDI: “Cek tewsared u temɣared deg wussan uca [ɛad] teqqim aṭṭas n temmurt maḥend ad tt teksid d řwart.
JOS 13:2 Ta d tammurt iqqimen: marra iduwwaren n Ifilisṭiniyyen u marra [jjwayeh n] Ijacuriyyen,
JOS 13:3 zeg [yeɣzar n] Ciḥur nni [issizzřen] zzat i wudem n Miṣra, ař aymir n Ɛiqrun di ccamal nni ittwaḥseb-dd [d tammurt] n ayt n Kenɛan, [dayes] xemsa n řbacat [n tneddam] n Ifilisṭiniyyen, [ixs ad yini] Aɣazi d Acdudi d Acqaluni, Ajitti, d Aɛaqruni, d Iɛawiyyen,
JOS 13:4 [uca xenni] zi ljanub marra tammurt n ayt n Kenɛan d Muɣara tenni n Iṣiduniyyen, ař Afiq u ař weymir n Imuriyyen,
JOS 13:5 uca [xenni] tammurt n Ijibliyyen d marra Lubnan manis i dd-tneqqar tfuct, zi Baɛl-Jad swadday i wedrar n Ḥirmun ař mani ittakkwaḍ [bnadem] ɣar Ḥamat,
JOS 13:6 marra inni izeddɣen [di jjwayeh] zeg idurar n Lubnan ař Misrafut-Mayim, marra Iṣiduniyyen. Necc ad xasen aẓẓřeɣ zzat i wudem n ayt n Israil. Egg [maca] tammurt d řwart i Israil waha, am mammec d ac umureɣ.”
JOS 13:7 “Bḍa řexxu tammurt-a d řwart jar tesɛa n tqebbař d wezyen n teqbič n Manassa,
JOS 13:8 [iryazen n Manassa] nni iksin ak-d Irubiniyyen d Ijadiyyen tasɣart n řwart nsen nni i d asen iwca Musa x ujemmaḍ n L’Urdun di ccarq, am mammec d asen [tt] iwca Musa, amsexxar n SIDI:
JOS 13:9 zi Aruɛir [i iǧan] x tma n Arnun d tendint i iǧan di řwesṭ n teɣzurt d marra řwaṭa [yuɛřan] zi Miydaba ař Dibun,
JOS 13:10 d marra tineddam n Siḥun, ajeǧid n Imuriyyen wenni tuɣa iḥekkmen di Ḥacbun, ař aymir n ayt n Ɛammun
JOS 13:11 uřa d Jilɛad d temmurt n Ijacuriyyen d Imaɛkiyyen d qaɛ wedrar n Ḥirmun d marra Bacan ař Salxa,
JOS 13:12 marra tageldit n Ɛuj, di Bacan, wenni tuɣa iḥekkmen di Ɛactarut d Idraɛi. Netta tuɣa iqqim zi min iqqimen n Irafawiyyen nni tuɣa iwta i-ten Musa uca yuẓẓeř xasen [zi tesɣart nsen].
JOS 13:13 [Maca] ayt n Israil war uẓẓřen x ayt n Ijacuriyyen d Imaɛkiyyen [zi tesɣart nsen]. Jacur d Maɛkat qqimen zeddɣen di řwesṭ n ayt n Israil ař ass-a.
JOS 13:14 I teqbič n Lawi waha umi i war iwci tasɣart. Tiɣarṣa n tmessi n SIDI, AREBBI n Israil, d tasɣart nnes, am mammec tuɣa i d as issiweř Netta.
JOS 13:15 Iwca Musa i teqbič n ayt n Rubin [tasɣart nsen], ɛlaḥsab řaǧat nsen.
JOS 13:16 I nitni umi dd-tekkar temmurt n Aruɛir, tenni i iǧan ɣar tma n teɣzart n Arnun ak-d tendint nni [iǧan] di řwesṭ n teɣzurt d marra řwaṭa [yuɛřan] ař Midiba.
JOS 13:17 Ḥacbun d marra tineddam nnes nni [iǧan] x řwaṭa [yuɛřan]: Dibun, Bamut-Baɛl d Bayt-Baɛl-Maɛun
JOS 13:18 d Yahṣa d Qadimut d Mayfaɛa
JOS 13:19 d Qaryatayim d Sibma d Ṣarat-Ha-Caḥar x wedrar n řewḍa n teɣzurt,
JOS 13:20 d Bayt-Faɣur d tisawnin n Fisja d Bayt-Yacimut,
JOS 13:21 marra tineddam x řwaṭa [yuɛřan] d marra tageldit n Siḥun, ajeǧid n Imuriyyen, inni i tuɣa iḥekkmen di Ḥacbun, i x iɣřeb Musa, [am iɣřeb] uřa x řḥukkam n Midyan: Awi d Raqam d Ṣur d Ḥur d Rabaɛ, inni i d asen iwca Ṣihun jjehd akides, imezdaɣ n temmurt.
JOS 13:22 Sennej i marra inni ittwanɣen di garra, nɣin ayt n Israil ɛawed Balɛam, mmis n Baɛur, agezzan, s řeqḍeɛ n ssif.
JOS 13:23 Tuɣa L’Urdun ak-d jjwayeh nnes d aymir n ayt n Rubin ak-d temmurt ɣar tma nnes. Ta d tasɣart n ayt n Rubin ɛlaḥsab řaǧat nsen, ak-d tneddam d dcurat nsen.
JOS 13:24 Iwca Musa i teqbič n Jad, i ayt n Jad, [tasɣart nsen] ɛlaḥsab řaǧat nsen.
JOS 13:25 I nitni umi dd-tekkar temmurt n Yaɛazir d marra tineddam n Jilɛad d wezyen n temmurt n ayt n Ɛammun ař Aruɛir nni [iǧan] zzat i wudem n Rabba,
JOS 13:26 zi Ḥacbun ař Ramat-Miṣfa d Buṭunim, u zi Maḥanayim ař aymir n Dabir.
JOS 13:27 U di řewḍa n teɣzurt: Bayt-Haram d Bayt-Nimra d Sukkut d Ṣafun d min iqqimen n tgeldit n Siḥun, ajeǧid n Ḥacbun, L’Urdun d jjwayeh nnes ař aneggar n řebḥar n Kinnarat x ujemmaḍ n L’Urdun ɣar ccarq.
JOS 13:28 Ta d tasɣart n ayt n Jad, ɛlaḥsab řaǧat nsen, tineddam d dcurat nnes.
JOS 13:29 Iwca Musa i wezyen n teqbič n Manassa [tasɣart nsen]. Tekkar as-dd i wezyen n teqbič n Manassa, ɛlaḥsab řaǧat nsen.
JOS 13:30 Tuɣa tammurt nsen zi Maḥanayim: marra Bacan, marra tageldit n Ɛuj, ajeǧid n Bacan, d marra dcurat n Ya’ir nni [iǧan] di Bacan, settin n tneddam.
JOS 13:31 D wezyen n Jilɛad d Ɛactarut d Idriɛi, tineddam n tgeldit n Ɛuj di Bacan, kkaren-dd i iḥenjiren n Maxir, mmis n Manassa, aqa i wezyen n iḥenjiren n Maxir, ɛlaḥsab řaǧat nsen.
JOS 13:32 Tina d [jjwayeh] i tuɣa ibḍa Musa d řwart di řewḍat n Mu’ab, x ujemmaḍ n L’Urdun, ɣar Ariḥa, ɣar ccarq.
JOS 13:33 Maca i teqbič n Lawi war d as iwci Musa ca tasɣart. SIDI, AREBBI n Israil d tasɣart nsen, am mammec tuɣa akidsen issiweř.   *
JOS 14:1 Tina d tseqqar i ṭṭfen ayt n Israil di temmurt n Kenɛan, tinni i d asen ibḍa [d řwart] ukehhan Aliɛazar d Yacuwa, mmis n Nun, d izeǧifen [n tudrin] n ibabaten n tqebbař n ayt n Israil.
JOS 14:2 S tqedduḥt [ṭṭfen] marra tasɣart nsen, am mammec [t] yumur SIDI s tsexxart n Musa zi jjihet n tesɛa n tqebbař d wezyen n teqbič.
JOS 14:3 Maɣar Musa tuɣa iwca i tnayen n tqebbař d wezyen n teqbič ict n tesɣart aɣirin i L’Urdun, [maca] i Ilawiyyen war d asen iwci ca tasɣart di řwesṭ nsen.
JOS 14:4 Aqa ayt n Yusuf ggin tnayen n tqebbař, Manassa d Ifrayim, u i Ilawiyyen war d as wcin ca tasɣart di temmurt maca [mɣir] tineddam i tzeddiɣt d min iǧan zzatsent n ddmani n tarewsa i řebhayem u i min ɣarsen iǧan.
JOS 14:5 Am mammec tuɣa yumur SIDI i Musa, ammu i ggin ayt n Israil řami bḍan tammurt.
JOS 14:6 [Xenni] qarrben-dd ayt n Yahuda ɣar Yacuwa di Jiljal. Kalib, mmis n Yafunni, Aqinizi, inna as: “Cek tessned min xafi d xak inna SIDI i Musa, aryaz n AREBBI, di Qadac-Barniɛ.
JOS 14:7 Necc ggiɣ arebɛin n iseggʷusa, umi i dd ayi issekk Musa, amsexxar n SIDI, zi Qadac-Barniɛ maḥend ad bergageɣ tammurt u necc ɛeqbeɣ ɣares, xebbareɣ as am mammec [t] tuɣa deg wuř inu.
JOS 14:8 [Waxxa amenni] aytma, inni i tuɣa akidi igeɛɛden, ssfessyen uř n řgens, [maca] necc tuɣa řebda ḍeffareɣ SIDI, AREBBI inu.
JOS 14:9 Deg wass nni ijjuǧ Musa, inna: “[Wayyaw,] mařa tammurt i di tessarsed aḍar nnec, war tᵉttiři i cek d iḥenjiren nnec d tasɣart i řebda, minzi tuɣa cek řebda tḍeffared SIDI, AREBBI inu!”
JOS 14:10 Řexxu, xzar, SIDI ijja ayi ddareɣ, am mammec issiweř. Řexxu aqa xemsa u-rebɛin n iseggʷusa zeg wami issiweř SIDI ɣar Musa awař-a, umi Israil yuyur di řexřa. Uca řexxu, aqa da, am mammec tᵉttwařid, ɣari xemsa u-tmanyin n iseggʷusa.
JOS 14:11 Necc ɛad meḥḍeɣ am mammec [meḥḍeɣ] deg wass nni umi i d ayi dd-issekk Musa. Am mammec tuɣa jehhdeɣ deg wussan nni, ammu i jehhdeɣ ɛawed iḍa i umenɣi maḥend ad ffɣeɣ u ad areggʷḥeɣ.
JOS 14:12 Řexxu [xenni], ewc ayi [tammurt-a n] idurar i x issiweř SIDI deg wass nni, maɣar cek tesřid simant nnec deg wass nni, aqa ayt n Iɛanaqiyyen aqa aten dinni uřa d tineddam mɣarent u faryent. Ad taɣ ad kidi yiři SIDI, ad awḍeɣ ad xasen aẓẓřeɣ am mammec inna SIDI.”
JOS 14:13 [Xenni] ibarek i-t Yacuwa uca iwca Ḥabrun d řwart i Kalib, mmis n Yafunni.
JOS 14:14 X uya teǧa [tendint n] Ḥabrun d řwart n Kalib, mmis n Yafunni, Aqinizi, ař ass-a, minzi netta tuɣa řebda iḍeffar SIDI, AREBBI n Israil.
JOS 14:15 Ḥabrun tuɣa qqaren as zic ‘tandint n Arbaɛ’. Tuɣa [Arbaɛ] d aryaz d ameqqran deg ayt n Iɛanaqiyyen. Uca tammurt tuɣa dayes řhudnet zeg umenɣi.
JOS 15:1 Taqedduḥt i ayt n Yahuda, ɛlaḥsab řaǧat nsen, tekkar-asent ɣar weymir n Idum, řexřa n Ṣin, ɣar ljanub, [ař] ljanub qaɛ.
JOS 15:2 Aymir n ljanub tuɣa-t i nitni zi manis iqeṭṭa Řebḥar Ameǧaḥ, zeg yiřes [n uqemmum] [n Řebḥar] i dd-itteffɣen ɣar ljanub,
JOS 15:3 uca iɛeddu [xenni] ɣar ljanub n Tsunta n Tɣarḍmiwin uca iɛeddu ɣar Ṣin uca ittgeɛɛed zi ljanub n Qadac-Barniɛ, ittekk x Ḥaṣrun u ittgeɛɛad ɣar Addar uca idekkwař ɣar Qarqaɛ
JOS 15:4 u [xenni] ittekk x Ɛaṣmun u itteffeɣ ɣar Teɣzart n Miṣra uca ṭṭrufa n weymir [ttakkwaḍen] ař řebḥar. Wa aqa d aymir n ljanub i kenniw.
JOS 15:5 Aymir n ccarq aqa-t d Řebḥar Ameǧaḥ ɣar qeṭṭu n L’Urdun u aymir n ccamal zeg yiřes n Řebḥar, zi manis iqeṭṭa L’Urdun
JOS 15:6 u [ssenni] ittgeɛɛed weymir [ɣar] Bayt-Ḥujla uca iɛeddu ɣar ccamal n Bayt-Ɛaraba u [xenni] ittgeɛɛed ař weẓru n Buhan, mmis n Rubin,
JOS 15:7 uca ittgeɛɛed weymir zi Dabir zi Teɣzurt n Axur u ittenneḍ ɣar ccamal ɣar Jiljal wenni [iǧan] ajemmaḍ i webrid n uẓekkwu x idurar n Adummim i [iǧan] ɣar ljanub n teɣzart u [xenni] iɛeddu weymir ɣar waman n Ɛayn-Camc uca itteffeɣ ɣar Ɛayn-Rujal.
JOS 15:8 [Zi ssa] ittgeɛɛed weymir zi teɣzurt n mmis n Hinnum, ɣar uɣezdis n ljanub [n wedrar n] n Uyabusi, aqa-t d Urcalim, u aymir yarenni ittgeɛɛed ɣar tqiccat n wedrar wenni iǧan ɣar řɣarb n teɣzurt n mmis n Hinnum tenni iǧan ɣar jjihet n ccamal n uneggaru n teɣzurt n Irafawiyyen.
JOS 15:9 Zi tqiccat n wedrar immars weymir ɣar tařa n Neftuḥa u iɛeddu ɣar tneddam n idurar n Ifrun u [xenni] immars weymir ɣar Baɛala, tenni d Qaryat-Yaɛarim.
JOS 15:10 Zi Baɛala ittakkwaḍ weymir ɣar řɣarb ɣar idurar n Saɛir uca iɛeddu zi ccamal ɣar uɣezdis n wedrar n Yaɛarim, aqa-t d Kasalun, uca ihekkwa ɣar Bayt-Cams u ittekk x Timnah.
JOS 15:11 [Xenni] iɛeddu weymir ɣar uɣezdis n ccamal n Ɛaqrun. [Xenni] immars weymir ɣar Cakrun u ittekk x uɣezdis n wedrar n Baɛla u itteffeɣ ɣar Yabniyil uca ṭṭrufa n weymir takkwaḍen ař řebḥar.
JOS 15:12 Aymir n řɣarb [iɛeddu] ař Řebḥar Ameqqran d tma [n řebḥar]. Wa d aymir n ayt n Yahuda zi marra iɣezdisen, ɛlaḥsab řaǧat nsen.
JOS 15:13 [Maca] Kalib, mmis n Yafunni, iwca as ict n tesɣart di řwesṭ n ayt n Yahuda, ɛlaḥsab tawṣeyyet zeg uqemmum n SIDI i Yacuwa, [aqa-tt] d tandint n Arbaɛ. [Arbaɛ] tuɣa d babas n Ɛanaq, ixs ad yini Ḥabrun.
JOS 15:14 Yuẓẓeř Kalib ssenni x třata n iḥenjiren n Ɛanaq: Cicay, Aximan u Talmay, [inni] dd-ittwaxeřqen i Ɛanaq.
JOS 15:15 Ssenni igeɛɛed ɣar imezdaɣ n Dabir. Dabir tuɣa qqaren as zic: tandint n Sifr.
JOS 15:16 Inna Kalib: “Man wen i ɣa iwten tandint n Sifr ad tt iṭṭef, ad as wceɣ yeǧi Axsa d tamɣart!”
JOS 15:17 Ɛutniyil, mmis n Qanaz, umas n Kalib, iṭṭef i-tt u [Kalib] iwca as yeǧis Axsa d tamɣart.
JOS 15:18 Imsar umi nettat tusa-dd ɣar Ɛutniyil, tarra i-t ad ittar ijj n yeyyar x babas uca teḍra x weɣyuř [nnes]. Kalib isseqsa tt: “Min cem yuɣin?”
JOS 15:19 Nettat tarra: “Ewc ayi ict n lbaraka, maɣar cek tewcid ayi ict n temmurt tuẓeɣ, [xenni] ewc ayi uřa d řɛunṣarat n waman!” Uca iwca as řɛunṣarat n nnej d řɛunṣarat n wadday.
JOS 15:20 Ta d tasɣart n teqbič n ayt n Yahuda, ɛlaḥsab řaǧat nsen.
JOS 15:21 [Tina] tuɣa d tineddam iggʷejen n teqbič n ayt n Yahuda, ɣar weymir ak-d Idum di Temmurt n Ljanub: Qabṣiyil d Ɛidar d Yajur
JOS 15:22 d Qina d Dimuna d Ɛadada
JOS 15:23 d Qadac d Ḥaṣur d Yitnan
JOS 15:24 d Zif d Ṭalam d Baɛlut
JOS 15:25 d Ḥaṣur-Xadata d tneddam [n] Ḥaṣrun, ta d Ḥaṣur.
JOS 15:26 [Xenni] Amam d Camaɛ d Mulada
JOS 15:27 d Ḥaṣa-Jadda d Ḥacmun d Bayt-Falaṭ
JOS 15:28 d Ḥaṣar-Cuɛal d Bi’r-Sebɛa d Bizyutiya
JOS 15:29 d Baɛla d Ɛayyim d Ɛazam,
JOS 15:30 d Altulad d Kisil d Ḥurma
JOS 15:31 d Ṣiqlaɣ d Madmanna d Sansanna
JOS 15:32 d Labayut d Cilḥim d Ɛayn d Rimmun. Marra tineddam aqa atent di tesɛa u-ɛicrin ak-d ředcur nsent.
JOS 15:33 Di Temmurt Iwaṭan: Icta’ul d Ṣurɛa d Acna
JOS 15:34 d Zanux d Ɛayn-Jannim d Taffuḥ d Ɛaynam,
JOS 15:35 d Yarmut d Adullam d Suku d Aziqa
JOS 15:36 d Caɛarayim d Ɛaditayim d Judayra d Judayratayim. [Marra jmiɛ] tuɣa atent di arbeɛṭac n tneddam ak-d ředcur nsent.
JOS 15:37 Ṣanan d Ḥadaca d Mijdal-Jad
JOS 15:38 d Dilan d Miṣfa d Yaqtiyil
JOS 15:39 d Laxic d Buṣqat d Ɛajlun
JOS 15:40 d Kabbun d Laḥmas d Kitlic
JOS 15:41 d Judayrut d Bayt-Dajun d Naɛama d Maqqada. [Marra jmiɛ] tuɣa atent di seṭṭac n tneddam ak-d ředcur nsent.
JOS 15:42 Libna d Ɛatir d Ɛacan
JOS 15:43 d Yaftaḥ d Acna d Naṣib
JOS 15:44 d Qaɛila d Aksib d Marica. [Marra jmiɛ] tuɣa atent di tesɛa n tneddam ak-d ředcur nsent.
JOS 15:45 Ɛaqrun ak-d tneddam i ɣares dd-iqqnen d ředcur nnes.
JOS 15:46 Zi Ɛaqrun ař rebḥar, marra min iǧan ɣar uɣezdis n Acdud ak-d ředcur nsen.
JOS 15:47 Acdud ak-d tneddam i ɣares dd-iqqnen d ředcur nnes, Ɣazza ak-d tneddam i ɣares dd-iqqnen d ředcur nnes ař Taɣzart n Miṣra d Řebḥar Ameqqran ak-d [temmurt n] tma [n řebḥar].
JOS 15:48 Di Temmurt n Idurar: Camir d Yattir d Suku
JOS 15:49 d Danna d tendint n Sanna, ta d Dabir,
JOS 15:50 d Ɛanab d Actimu d Ɛanim
JOS 15:51 d Jucan d Ḥulun d Jilu. [Marra jmiɛ] tuɣa atent di ḥiṭac n tneddam ak-d ředcur nsent.
JOS 15:52 Arab d Duma d Acɛan
JOS 15:53 d Yanum d Bayt-Taffuḥ d Afiqa
JOS 15:54 d Ḥumṭa d Qaryat-Arbaɛ, tenni d Ḥabrun, d Ṣaɛur. [Marra jmiɛ] tuɣa atent di tesɛa n tneddam ak-d ředcur nsent.
JOS 15:55 Maɛun d Karmal d Zif d Yuṭa
JOS 15:56 d Yizraɛil d Yuqdaɛam d Zanuḥ
JOS 15:57 d Qayin d Jibɛa d Timnah. [Marra jmiɛ] tuɣa atent di ɛecra n tneddam ak-d ředcur nsent.
JOS 15:58 Ḥalḥul d Bayt-Ṣur d Jadur
JOS 15:59 d Maɛarat d Bayt-Ɛanut d Iltaqun. [Marra jmiɛ] tuɣa atent di setta n tneddam ak-d ředcur nsent.
JOS 15:60 Qaryat-Baɛl, aqa-t d Qaryat-Yiɛarim d Rabba. [Marra jmiɛ] tuɣa atent di tnayen n tneddam ak-d ředcur nsent.
JOS 15:61 Di řexřa Bayt-Ɛaraba d Middin d Sakaka
JOS 15:62 d Nibcan d tendint n Umeǧaḥ d Ɛayn-Jadi. [Marra jmiɛ] tuɣa atent di setta n tneddam ak-d ředcur nsent.
JOS 15:63 [Maca] ayt n Yahuda war zemmaren ad aẓẓřen x Iyabusiyyen inni d imezdaɣ n Urcalim. [X uyenni] zeddɣen Iyabusiyyen [ɛad] ak-d ayt n Yahuda di Urcalim ař ass-a.
JOS 16:1 Taqedduḥt i ayt n Yusuf tekkar as-dd zi L’Urdun ɣar Ariḥa, [uca aymir] ittekk x tma n ccarq n waman n Ariḥa, [x] řexřa nni dd-ittgeɛɛaden zi Ariḥa x idurar n Bayt-Il.
JOS 16:2 U zi Bayt-Il itteffeɣ ɣar Luz, ittekk x temmurt n ayt n Arkit ɣar Ɛaṭarut
JOS 16:3 uca ihekkwa-dd ɣar řɣarb ɣar temmurt n Ifalaṭiyyen ař tammurt n Bayt-Ḥurun n wadday u ař Jazar u ṭṭrufa nnes ttakkwaḍen ař řebḥar.
JOS 16:4 [Xenni] ṭṭfen uřa d ayt n Yusuf, Manassa d Ifrayim, řwart nsen.
JOS 16:5 Aymir n ayt n Ifrayim, ɛlaḥsab řaǧat nsen, d wa. Aymir n tesɣart nsen ibedda ɣar ccarq n Ɛaṭarut-Adar [uca iggur] ař Bayt-Ḥurun n nnej,
JOS 16:6 uca iggur ɣar řɣarb ɣar uɣezdis n ccamal n Mikmata uca ittefriɣ weymir ɣar ccarq ɣar Ta’anat-Cilu u [xenni] ittekk xas x uɣezdis nnes n ccarq ɣar Yanuḥa,
JOS 16:7 u zi Yanuḥa ihekkwa ɣar Ɛaṭarut d Naɛarata uca ɛřayen ineḥḥed Ariḥa u [xenni] itteffeɣ ɣar L’Urdun.
JOS 16:8 Zi Taffuḥ iɛeddu weymir ɣar řɣarb ɣar tiɣzart n Qana uca ṭṭrufa nnes ttakkwaḍen ař řebḥar. Ta d tasɣart n teqbič n ayt n Ifrayim, ɛlaḥsab řaǧat nsen.
JOS 16:9 Tineddam i ittwaḥuzen i ayt n Ifrayim aqa atent di řwesṭ n tesɣart n Manassa, marra tineddam ak-d ředcur nsent.
JOS 16:10 War uẓẓiřen ca x ayt n Kenɛan nni tuɣa izeddɣen di Jazar [zi tesɣart nsen]. [Ammu] zeddɣen Ikenɛaniyyen [ɛad] di řwesṭ n ayt n Ifrayim ař ass-a. Tᵉttwagg xasen [maca] ljizya n tsexxart.
JOS 17:1 Tuɣa din [ɛawed] ict n taqedduḥt i teqbič n Manassa, minzi netta tuɣa d amenzu n Yusuf, tekkar as-dd i Makir, amenzu n Manassa, babas n [temmurt n] Jilɛad, Jilɛad d Bacan, maɣar netta tuɣa d ijj n uɛeskari imeḥḍen.
JOS 17:2 Tekkar asen-dd tqedduḥt i ayt iqqimen n Manassa ɛlaḥsab řaǧat nsen, i ayt n Abiɛazar d ayt n Ḥalaq d ayt n Asriyil d ayt n Cakam d ayt n Ḥafar d ayt n Camidaɛ. Ina d ayt n Manassa, mmis n Yusuf, ɛlaḥsab řaǧat nsen.
JOS 17:3 U Zeluḥfad, mmis n Ḥafar, mmis n Jilɛad, mmis n Makir, mmis n Manassa, war ɣares tuɣi ca iḥenjiren, maca tuɣa ɣares yessis. Ina d ismawen n yessis: Maḥla d Nuɛa, Ḥujla, Milka d Tirṣa.
JOS 17:4 Nitenti qarrbent-i-dd zzat i wudem n ukehhan Aliɛazar u zzat i wudem n Yacuwa, mmis n Nun, u zzat i wudem n řḥukkam, nnant: “SIDI yumur Musa, ad aneɣ iwc tasɣart jar aytmatneɣ.” Uca iwca asent, ɛlaḥsab řumur n SIDI, ict n tasɣart jar wawmaten n babatsent.
JOS 17:5 Ammu i iwḍan ifiřan [n řeɛbar] ɛecra n twařawin i Manassa, břa tammurt n Jilɛad d Bacan i iǧan aɣirin n L’Urdun.
JOS 17:6 Maɣar yessis n Manassa ṭṭfent tasɣart di řwesṭ n warrawen nnes u tammurt n Jilɛad tuɣa i warrawen n Manassa i iqqimen.
JOS 17:7 Aymir n Manassa itteffeɣ zi Acir iɛeddu ɣar Mikmata i iǧan ajemmaḍ i Cakim u aymir itteffeɣ ɣar ufusi ɣar imezdaɣ n Ɛayn-Taffuḥ.
JOS 17:8 Manassa ɣares tammurt n Taffuḥ, maca Taffuḥ [simant nnes] [nni] iǧan x weymir ak-d Manassa, tuɣa i ayt n Ifrayim.
JOS 17:9 [Xenni] ihekkwa weymir ɣar teɣzart n Qana ɣar ljanub n teɣzart. Tineddam n Ifrayim aqa-tent din jar tneddam n Manassa. Tammurt n Manassa teǧa ɣar tma n ccamal n iɣzar uca ṭṭrufa nnes ttakkwaḍen ař řebḥar.
JOS 17:10 Ljanub aqa n Ifrayim, ccamal aqa n Manassa u řebḥar d aymir nnes. Di ccamal ttenḥadan x Acir u di ccarq x Issakar.
JOS 17:11 Di Issakar u di Acir dewřen ina ɣar Manassa: Bayt-Can ak-d tneddam i ɣares dd-iqqnen u Yablaɛam ak-d tneddam nnes d imezdaɣ n Dur ak-d tneddam nnes d imezdaɣ n Ɛayn-Dur ak-d tneddam nnes d imezdaɣ n Taɛnak ak-d tneddam nnes d imezdaɣ n Majiddu ak-d tneddam nnes, třata n treqqiɛin uyřent.
JOS 17:12 Ayt n Manassa war zemmaren ad [zzaysen] ṭṭfen tineddam-a [d tesɣart n řwart], minzi ayt n Kenɛan ggin [ad qqimen] zeddɣen di temmurt.
JOS 17:13 Umi ayt n Israil dewřen jehden, ggin nitni ljizya x ayt n Kenɛan, [maca] war xasen uẓẓřen qaɛ.
JOS 17:14 Ssiwřen ayt n Yusuf ak-d Yacuwa, nnan: “Mayemmi d ayi tewcid d tasɣart mɣir ict n tqedduḥt d yijj n ufiřu [n řeɛbar], waxxa necc d ijj n řgens d ameqqran, awarni i umi d ayi igga SIDI lbaraka ammu?”
JOS 17:15 Yacuwa inna asen: “Mařa cek [xenni] d ijj n řgens ameqqran, geɛɛed [xenni] ɣar wezɣar uca zdem dinni ttasiɛ i yixef nnec di temmurt n Ifiriziyyen d Irafawiyyen, mařa ḥṣaren xak idurar n Ifrayim.”
JOS 17:16 [Xenni] nnan ayt n Yusuf: “Idurar nni war d aneɣ ttqiddin. Marra ayt n Kenɛan nni izeddɣen di temmurt n řewḍa n teɣzurt ɣarsen ikarruten n umenɣi n wuzzař, am yinni [izeddɣen] di Bayt-Can ak-d tneddam i ɣares dd-iqqnen u am yinni di řewḍa n teɣzurt n Yazraɛil.”
JOS 17:17 Issiweř Yacuwa ak-d taddart n Yusuf, ak-d Ifrayim d Manassa, inna: “Kenniw d ijj n řgens d ameqqran u ɣarwem jjehd ameqqran. Kenniw war tᵉttᵉṭṭfem mɣir ict n tqedduḥt,
JOS 17:18 maɣar uřa d idurar ad iřin nwem uca umi [teǧa] d azɣar, ittxeṣṣa ad tzedmem uca ṭṭrufa nnes ad iřin i kenniw, maɣar ad taẓẓřem x ayt n Kenɛan [zi tesɣart nsen], waxxa ɣarsen ikarruten n umenɣi n wuzzař u waxxa nitni jehden.”
JOS 18:1 Marra tamesmunt n ayt n Israil tmun di Cilu uca dinni i wtin Aqiḍun n Umsagar, [awarni] umi sswaḍɛen tammurt i yixef nsen.
JOS 18:2 Tuɣa qqiment jar ayt n Israil sebɛa n tqebbař, tinni tuɣa war d asent immewcen [ɛad] d tasɣart nsent.
JOS 18:3 Inna Yacuwa i ayt n Israil: “Ař meřmi ttrajam [ɛad] ař ɣa tadfem ad tᵉṭṭfem tammurt i d awem iwca SIDI, AREBBI n řejdud nwem, [d řwart]?
JOS 18:4 Ksim i yixef nwem třata n yeryazen zi kuř taqbič, ḥima necc ad ten ssekkeɣ uca nitni ad kkaren ad kken x temmurt uca ad tt zemmen zi jjihet mammec ittxeṣṣa ad tiři tesɣart nsen, [xenni] ad ɣari dd-ɛeqben.
JOS 18:5 Ad tt bḍan x sebɛa n tseqqar. Yahuda ad iqqim x temmurt nnes di ljanub u taddart n Yusuf ad teqqim x temmurt nnes di ccamal.
JOS 18:6 Kenniw ad tzemmem tammurt x sebɛa n tseqqar uca izemmanen nni ad ayi ten dd-tawyem danita, [xenni] necc ad awem nḍareɣ taqedduḥt zzat i wudem n SIDI, AREBBI nneɣ.
JOS 18:7 Minzi Ilawiyyen war ɣarsen bu tasɣart di řwest nwem, minzi tukehhant n SIDI d tasɣart nsen. Jad d Rubin d wezyen n teqbič n Manassa ṭṭfen tasɣart nsen x ujemmaḍ n L’Urdun, ɣar ccarq, [tasɣart] nni i d asen iwca Musa, amsexxar n SIDI.
JOS 18:8 Kkaren iryazen uca ṭṭfen abrid. Yumur Yacuwa i yinni iṭṭfen abrid maḥend ad zemmen tammurt s tira, inna: “Uyurem, ttekkem x temmurt uca zemmemem tt. [Xenni] ɛeqbettiw-dd ɣari u necc ad awem da nḍareɣ taqedduḥt di Cilu zzat i wudem n SIDI.”
JOS 18:9 Iryazen ṭṭfen abrid, cuqen tammurt uca zemmen tt deg ijj n wedlis ittwannḍen, [settfen tt] ɛlaḥsab tineddam, ɛlaḥsab sebɛa n tseqqar, uca ɛeqben ɣar Yacuwa di řmargeḥ n řɛeskar di Cilu.
JOS 18:10 [Xenni] inḍar Yacuwa taqedduḥt zzat i wudem n SIDI. Din i d asen ibḍa Yacuwa tammurt jar ayt n Israil, ɛlaḥsab tirbiɛin nsen.
JOS 18:11 Taqedduḥt n teqbič n Binyamin teḍhar-dd ɛlaḥsab řaǧat nsen, u tasɣart n tqedduḥt nsen tusa-dd jar ayt n Yahuda d ayt n Yusuf.
JOS 18:12 Itteffeɣ weymir nsen ɣar uɣezdis n ccamal zi L’Urdun uca ittgeɛɛad ɣar weɛrur n ccamal n Ariḥa, iɛeddu [xenni] ɣar řɣarb ittekk x idurar uca ṭṭrufa nnes ttakkwaḍen ař řexřa n Bayt-Awan.
JOS 18:13 Ssenni iẓekkwa weymir ɣar Luz x weɛrur n ljanub n Luz, wa d Bayt-Il, uca [xenni] ihekkwa-dd ɣar Ɛaṭarut x wedrar [i iǧan] ɣar ljanub n Bayt-Ḥurun n wadday.
JOS 18:14 Aymir iɛeddu uca ittmeyyeř jjihet n řɣarb, [xenni] ɣar ljanub zeg wedrar [i iǧan] arendad n Bayt-Ḥurun, [xenni] yarenni iggur ɣar ljanub uca ṭṭrufa nnes ttakkwaḍen ař Qaryat-Baɛla, ta d Qaryat-Yaɛarim, ict n tendint n ayt n Yahuda. Wa d aɣezdis n řɣarb.
JOS 18:15 Aɣezdis n ljanub [itteffeɣ] zi ṭṭarf aneggar n Qaryat-Yaɛarim. Ibedda weymir zi řɣarb u ittakkwaḍ ɣar tařa n waman n Naftuḥa.
JOS 18:16 [Xenni] ihekkwa-dd weymir ɣar ṭṭarf n wedrar i zi tᵉttwařid taɣzurt n mmis n Hinnum nni iǧan ɣar ṭṭarf n ccamal n teɣzurt n Irafawiyyen uca [xenni] ihekkwa-dd x teɣzurt n Hinnum ɣar uɣezdis n ljanub n [wedrar n] Iyabusiyyen uca ihekkwa-dd ɣar tařa n Rujil.
JOS 18:17 Uca ittekk x ccamal uca ittakkwaḍ ɣar Ɛayn-Camc uca iɛeddu ɣar Jalilut, nni [iǧan] arendad n webrid n uẓekkwu x idurar n Adummim uca ihekkwa-dd ɣar weẓru n Buhan, mmis n Rubin,
JOS 18:18 u iẓekkwa ɣar řgeɛɛdet nni [iǧan] ɣar ccamal arendad n Řewḍa uca [xenni] ihekkwa di Řewḍa.
JOS 18:19 [Xenni] iɛeddu weymir ɣar ccamal ɣar řgeɛɛdet n Bayt-Ḥujla u ṭṭrufa nnes aqa aten ɣar iřes n ccamal n Řebḥar Ameǧaḥ, ɣar uneggar n L’Urdun di ljanub. Wa d aymir n ljanub.
JOS 18:20 L’Urdun tuɣa d aymir nnes x uɣezdis n ccarq. Ta d tasɣart n ayt n Binyamin ɛlaḥsab iymiren nnes i d as iquwwaren, ɛlaḥasab řaǧat nsen.
JOS 18:21 Tineddam n teqbič n ayt n Binyamin, ɛlaḥsab řaǧat nsen d tina: Ariḥa d Bayt-Ḥujla d Ɛimaq-Qiṣiṣ
JOS 18:22 d Bayt-Ɛaraba d Ṣamarayim d Bayt-Il
JOS 18:23 d Iɛawiyyen d Ha-Fara d Ɛufra,
JOS 18:24 d Kafar-Ɛammuni d Ha-Ɛufni d Jabaɛ. [Marra jmiɛ] tuɣa atent di tenɛac n tneddam ak-d ředcur nsent.
JOS 18:25 Jibɛun d Rama d Biɛrut
JOS 18:26 d Miṣfa d Kafira d Muṣa
JOS 18:27 d Raqam d Yarafwil d Tarala
JOS 18:28 d Ṣalaɛ d Alaf d Ayabusi, wenni d Urcalim, d Jibɛa d Qaryat. [Marra jmiɛ] tuɣa atent di arbeɛṭac n tneddam ak-d ředcur nsent. Ta d tasɣart n ayt n Binyamin ɛlaḥsab řaǧat nsen.
JOS 19:1 Taqedduḥt wiss tnayen tekkar as-dd i Cimɛun, i teqbič n Cimɛun, ɛlaḥsab řaǧat nsen. Tasɣart nsen teǧa di řwest n tesɣart n ayt n Yahuda.
JOS 19:2 Di tesɣart nsen dewřent ɣarsen [tneddam-a]: Bi’r-Sebɛa d Cabɛa d Mulada
JOS 19:3 d Ḥaṣar-Cuɛal d Baɛla d Ɛaṣam
JOS 19:4 d Iltulad d Batul d Ḥurma
JOS 19:5 d Ṣiqlaɣ d Bayt-Markabut d Ḥaṣar-Susa
JOS 19:6 d Bayt-Labawut d Caruḥayn. [Marra jmiɛ] tuɣa atent di třeṭṭac n tneddam ak-d ředcur nsent.
JOS 19:7 [Xenni] Ɛayn d Rimmun d Ɛatar d Ɛacan. [Marra jmiɛ] tuɣa atent di arebɛa n tneddam ak-d ředcur nsent,
JOS 19:8 uřa d marra ředcur i dd-ittennḍen i tneddam-a ař Baɛlat-Bi’r, tenni d Rama n ljanub. Ta d tasɣart n teqbič n ayt n Cimɛun, ɛlaḥsab řaǧat nsen.
JOS 19:9 Tasɣart n ayt n Cimɛun tuɣa [tᵉttwaksi] zi [min ɛebbaren s] ufiřu [n řeɛbar] i ayt n Yahuda, minzi tasɣart n ayt n Yahuda tuɣa-tt i ina d tameqqrant aṭṭas. [X uyenni] warten ayt n Cimɛun ict n tesɣart di tesɣart nsen.
JOS 19:10 Taqedduḥt wiss třata teḍhar-dd i ayt n Zabulun, ɛlaḥsab řaǧat nsen. Aymir n tesɣart nsen iɛeddu ař Sarid.
JOS 19:11 Ittgeɛɛed weymir nsen ɣar řɣarb u [ɣar] Marɛala uca ittakkwaḍ ař Dabbaca u ař tiɣzart nni issizzřen zzat i Yuknaɛam.
JOS 19:12 Zi Sarid ittmeyyeř weymir ɣar ccarq, ɣar manis d tneqqar tfuct, ař weymir n Kislut-Tabur uca itteffeɣ ɣar Dubra u ittgeɛɛed ɣar Yafiɛ.
JOS 19:13 Ssenni iɛeddu ɣar ccarq, ɣar manis dd-tneqqar tfuct, ɣar Jat-Ḥafar u ɣar Ɛit-Qaṣin u itteffeɣ ɣar Rimmun, ittefriɣ [xenni ɣar] Nayɛa.
JOS 19:14 Ittefriɣ weymir zi ccamal ɣar Ḥannatun u ṭṭrufa nnes ttakkwaḍen ař teɣzurt n Jiftaḥ-Il.
JOS 19:15 [Xenni] Qaṭṭa d Nahlal d Cimrun d Yadala d Bayt-Laḥm. [Marra jmiɛ] tuɣa atent di tenɛac n tneddam ak-d ředcur nsent.
JOS 19:16 Ta d tasɣart n ayt n Zabulun, ɛlaḥsab řaǧat nsen, tineddam-a ak-d ředcur nsent.
JOS 19:17 Taqedduḥt wiss arebɛa tekkar as-dd i Issakar, i ayt n Issakar, ɛlaḥsab řaǧat nsen.
JOS 19:18 Iɛeddu weymir nsen ɣar Yazraɛil d Kislut d Cunam
JOS 19:19 d Ḥafarayim d Ciyun d Anaḥara
JOS 19:20 d Rabbit d Qicyun d Abaṣ
JOS 19:21 d Rama d Ɛayn-Jannim d Ɛayn-Ḥadda d Bayt-Qaṣṣays.
JOS 19:22 Ittakkwaḍ weymir ař Tabur d Caḥṣima d Bayt-Cams u ṭṭrufa n weymir ttakkwaḍen ař L’Urdun. [Marra jmiɛ] tuɣa atent di seṭṭac n tneddam ak-d ředcur nsent.
JOS 19:23 Ta d tasɣart n ayt n Issakar, ɛlaḥsab řaǧat nsen, tineddam ak-d ředcur nsent.
JOS 19:24 Taqedduḥt wiss xemsa tekkar as-dd i teqbič n ayt n Acir, ɛlaḥsab řaǧat nsen.
JOS 19:25 Aymir nsen aqa-t d Ḥalqa d Ḥali d Baṭan d Akcaf
JOS 19:26 d Allammalak d Amɛad d Mic-Al, uca ittakkwaḍ ař [wedrar n] Karmil di řɣarb u ař Cixur-Libna.
JOS 19:27 Ittmeyyeř weymir ɣar manis dd-tneqqar tfuct ɣar Bayt-Dajun uca ittakkwaḍ ař Zabulun d teɣzurt n Yiftaḥ-Il ɣar ccamal, [xenni ař] Bayt-Ɛamiq d Naɛiyil, uca itteffeɣ x uzeřmaḍ n Kabul
JOS 19:28 uca [iɛeddu ɣar] Ɛabrun d Raḥub d Ḥammun d Qana ař Ṣidun ameqqran.
JOS 19:29 Ittmeyyeř weymir ɣar Rama iggur ař tandint n Ṣur i ifaryen u [xenni] ittmeyyeř weymir ɣar Ḥuṣa u ṭṭrufa nnes ttakkwaḍen ař řebḥar, zi Ḥibl ař Akzib
JOS 19:30 d Ɛumma d Afiq d Raḥub. [Marra jmiɛ] tuɣa atent di tnayen u-ɛicrin n tneddam ak-d ředcur nsent.
JOS 19:31 Ta d tasɣart n teqbič n ayt n Acir, ɛlaḥsab řaǧat nsen, tineddam-a ak-d ředcur nsent.
JOS 19:32 Taqedduḥt wiss setta tekkar as-dd i ayt n Naftali, i ayt n Naftali, ɛlaḥsab řaǧat nsen.
JOS 19:33 Iɛeddu weymir nsen zi Ḥalaf, zi tcejjart n yigg di Ṣaɛanayim, d Adami-Naqib d Yabniyil ař Laqqum uca ṭṭrufa nnes ttakkwaḍen ař L’Urdun.
JOS 19:34 Ittmeyyeř weymir ɣar řɣarb ɣar Aznut-Tabur u ssenni iɛeddu ɣar Ḥuquq u ittakkwaḍ ař Zabulun di ljanub u di řɣarb issuffuɣ ař Acir u di ccarq ař Yahuda [ɣar] L’Urdun.
JOS 19:35 Tineddam ifaryen aqa atent Ṣiddim d Ṣayr d Ḥammat d Raqqat d Kinnarat
JOS 19:36 d Adama d Rama d Ḥaṣur
JOS 19:37 d Qadac d Idřaɛi d Ɛayn-Ḥaṣur
JOS 19:38 d Yirun d Mijdal-Il d Ḥurim d Bayt-Ɛanat d Bayt-Cams. [Marra jmiɛ] tuɣa atent di tseɛṭac n tneddam ak-d ředcur nsent.
JOS 19:39 Ta d tasɣart n ayt n Naftali, ɛlaḥsab řaǧat nsen, tineddam ak-d ředcur nsent.
JOS 19:40 Taqedduḥt wiss sebɛa tekkar as-dd i teqbič n ayt n Dan, ɛlaḥsab řaǧat nsen.
JOS 19:41 Aymir n tesɣart nsen aqa-t d Ṣurɛa d Icta’ul d Ɛir-Camc
JOS 19:42 d Caɛalbim d Ayalun d Yitla,
JOS 19:43 d Iylun d Timnata d Ɛaqrun
JOS 19:44 d Iltaqay d Jibbatun d Baɛlat
JOS 19:45 d Yahud d Bani-Baraq d Jat-Rimmun
JOS 19:46 d Miyah-Yarqun d Raqqun ak-d temmurt qibač i Yafa.
JOS 19:47 [Maca] tammurt n ayt n Dan teḥsar i nitni. Xenni geɛɛden ayt n Dan ɣar Lacam, arzmen amenɣi ak-d Lacam, řeɣben tt, wtin tt s řeqḍeɛ n ssif uca ṭṭfen tt [d tasɣart nsen] uca qqimen zeddɣen din. Nitni ggin as i Lacam [isem] Dan ɛlaḥsab isem n babatsen Dan.
JOS 19:48 Ta d tasɣart n teqbič n ayt n Dan, ɛlaḥsab řaǧat nsen, tineddam-a ak-d ředcur nsent.
JOS 19:49 [Umi] kemmřen ayt n Israil abeṭṭu n temmurt di tseqqar n řwart ɛlaḥsab iymiren nnes, wcin ayt n Israil uřa i Yacuwa, mmis n Nun, ict n tesɣart di řwesṭ nsen.
JOS 19:50 Wcin as, s řumur n SIDI, tandint i tuɣa ittar, Timnat-Saraḥ x idurar n Ifrayim. Netta ibna tandint nni, uca iruḥ izdeɣ dinni.
JOS 19:51 Tina d tiseqqar nni ittwabḍan [d řwart] s tqedduḥt i ayt n Israil di Cilu zzat i wudem n SIDI ɣar wadaf n Uqiḍun n Umsagar s ufus n ukehhan Aliɛazar d Yacuwa, mmis n Nun, d imɣaren [n tudrin] n ibabaten n tqebbař. [Ammu] kemmřen abeṭṭu n temmurt.
JOS 20:1 Issiweř SIDI ak-d Yacuwa, inna:
JOS 20:2 “Siweř ak-d ayt n Israil, ini: ‘Ad tfarzem tineddam n tarewřa i yixef nwem, min xef d awem ssiwřeɣ s tsexxart n Musa,
JOS 20:3 ḥima ad yarweř din uqettař nni inɣin ijj n bnadem zeg uweddar, břa ma ad as igg řeḥsab. Ad iřint d imucan mani ɣa tarewřem zeg uneqqam n idammen.
JOS 20:4 Mařa netta yarweř ɣar icten zi tneddam nni, ad ibedd ɣar tewwart n tendint uca ad iḥaja tamsart nnes deg imezzuɣen n imeqqranen n tendint. [Xenni] ad t ssidfen di tendint, ad as wcen ijj n wemcan maḥend ad ɣarsen izdeɣ.
JOS 20:5 Mařa [xenni] iḍfar i-t uneqqam n idammen, war d as tticen aqettař deg ufus nnes, maɣar netta inɣa jjar nnes břa ma ad as igg řeḥsab, tuɣa war t icarreh ca iḍennaḍ niɣ fariḍennaḍ.
JOS 20:6 Netta ad iqqim izdeɣ di tendint nni, ař ɣa ibedd i řeḥkam zzat i wudem n tmesmunt, [uca awarni man aya] ař ɣa immet arrays n ikehhanen wenni din iǧan deg wussan nni. Xenni izemmar uqettař ad iɛqeb ɣar tendint nnes u ɣar taddart nnes, ɣar tendint i zi dd-yarweř.
JOS 20:7 [Xenni] qeddsen Qadac deg idurar n Naftali di Ljalil u Cakim x idurar n Ifrayim u Qaryat-Arbaɛ, tenni d Ḥabrun, di Temmurt n Idurar n Yahuda.
JOS 20:8 Aɣirin n L’Urdun, di jjihet n ccarq zi Ariḥa, wcin nitni zi teqbič n Rubin Baṣar di řexřa x řwaṭa [yuɛřan] u zi teqbič n Jad [wcin nitni] Ramut di Jilɛad u zi teqbič n Manassa [tandint n] Julan di Bacan.
JOS 20:9 Tina d tineddam nni ittwaggen i marra ayt n Israil u i ubarrani nni i izeddɣen di řwesṭ nsen, ḥima kuř ijj zeg inni inɣin ijj n bnadem s uweddar, izemmar ad din yarweř, ḥima war ittmetti s ufus n ineqqamen n idammen ař ɣa ibedd i řḥukm zzat i wudem n tmesmunt.
JOS 21:1 [Xenni] qarrben-dd izeǧifen n [tudrin n] ibabaten n Ilawiyyen ɣar ukehhan Aliɛazar d Yacuwa, mmis n Nun, u [qarrben-dd] ɣar izeǧifen n [tudrin n] ibabaten n tqebbař n ayt n Israil.
JOS 21:2 Ssiwřen akidsen di Cilu di temmurt n Kenɛan, nnan: “SIDI yumur s ufus n Musa, ad aneɣ mmewcent tneddam, ḥima ad daysent nezdeɣ, ak-d ddmani nsent n tarewsa i řebhayem nneɣ.”
JOS 21:3 [Xenni] wcin ayt n Israil s řumur n SIDI, zi tesɣart nsen, tineddam ak-d ddmani nsent n tarewsa i Ilawiyyen.
JOS 21:4 Uca tekkar asent-dd tqedduḥt i řaǧat n Qahat. S tqedduḥt kkarent asen-dd i warraw n ukehhan Harun zeg Ilawiyyen třeṭṭac n tneddam zi [temmurt n] teqbič n Yahuda u n teqbič n Cimɛun u n teqbič n Binyamin.
JOS 21:5 I inni iqqimen n ayt n Qahat [kkarent asen-dd] s tqedduḥt ɛecra n tneddam zi [temmurt n] řaǧat n teqbič n Ifrayim u n teqbič n Dan u n wezyen n teqbič n Manassa.
JOS 21:6 I ayt n Jarcun [kkarent asen-dd] s tqedduḥt třeṭṭac n tneddam zi [temmurt n] řaǧat n teqbič n Issakar u n teqbič n Acir u n teqbič n Naftali u n wezyen n teqbič n Manassa di Bacan.
JOS 21:7 I ayt n Marari [kkarent asen-dd s tqedduḥt] tenɛac n tneddam, ɛlaḥsab řaǧat nsen, zi [temmurt n] teqbič n Rubin u n teqbič n Jad u n teqbič n Zabulun.
JOS 21:8 Ayt n Israil wcin tineddam-a ak-d ddmani nsent n tarewsa s tqedduḥt i Ilawiyyen, am mammec [t] yumur SIDI s tsexxart n Musa.
JOS 21:9 Zi [temmurt n] teqbič n ayt n Yahuda u zi teqbič n ayt n Cimɛun wcin asen tineddam-a i ittwannan s yisem nsent
JOS 21:10 u [marra aya] ikkar asen-dd i warraw n Harun nni iǧan zi řaǧat n Iqahatiyyen zeg ayt n Lawi, minzi taqedduḥt tamezwarut tewḍa xasen.
JOS 21:11 Nitni wcin asen tandint n Arbaɛ, babas n Ɛanaq, tenni d Ḥabrun, di Temmurt n Idurar n Yahuda ak-d ddmani nnes n tarewsa i d as dd-innḍen.
JOS 21:12 [Maca] iyyaren n tendint d ředcur nnes wcin ten d agřa i Kalib, mmis n Yafunni.
JOS 21:13 I ayt n ukehhan Harun wcin asen [tineddam-a d] tandint n tarewřa i uqettař: Ḥabrun ak-d ddmani nnes n tarewsa, d Libna ak-d ddmani nnes n tarewsa,
JOS 21:14 d Yattir ak-d ddmani nnes n tarewsa, d Ictumaɛ ak-d ddmani nnes n tarewsa,
JOS 21:15 d Ḥulun ak-d ddmani nnes n tarewsa, d Dabir ak-d ddmani nnes n tarewsa,
JOS 21:16 d Ɛayn ak-d ddmani nnes n tarewsa, d Yuṭṭa ak-d ddmani nnes n tarewsa, d Bayt-Cams ak-d ddmani nnes n tarewsa, [marra jmiɛ] tuɣa atent di tesɛa n tneddam zi tnayen n tqebbař-a.
JOS 21:17 Zi teqbič n Binyamin [wcin asen] Jibɛun ak-d ddmani nnes n tarewsa, d Jibɛa ak-d ddmani nnes n tarewsa,
JOS 21:18 Ɛanatut ak-d ddmani nnes n tarewsa, d Ɛalmun ak-d ddmani nnes n tarewsa. [Marra jmiɛ] tuɣa atent di arebɛa n tneddam.
JOS 21:19 Marra tineddam n warraw n Harun, n ikehhanen, [tuɣa atent di] třeṭṭac n tneddam ak-d ddmani nsent n tarewsa.
JOS 21:20 I řaǧat n ayt n Qahat, Ilawiyyen, nni iqqimen zeg ayt n Qahat kkarent asen-dd s tqedduḥt tineddam zi [temmurt n] teqbič n Ifrayim.
JOS 21:21 Wcin asen [tineddam-a d] tandint n tarewřa i uqettař: Cakim ak-d ddmani nnes n tarewsa x idurar n Ifrayim, d Jazar ak-d ddmani nnes n tarewsa,
JOS 21:22 d Qibṣayim ak-d ddmani nnes n tarewsa, d Bayt-Ḥurun ak-d ddmani nnes n tarewsa. [Marra jmiɛ] tuɣa atent di arebɛa n tneddam.
JOS 21:23 Zi teqbič n Dan [kkarent asen-dd:] Iltaqa ak-d ddmani nnes n tarewsa, Jibbatun ak-d ddmani nnes n tarewsa,
JOS 21:24 Ayalun ak-d ddmani nnes n tarewsa d Jad-Rimmun ak-d ddmani nnes n tarewsa. [Marra jmiɛ] tuɣa atent di arebɛa n tneddam.
JOS 21:25 Zi [temmurt n] wezyen n teqbič n Manassa [kkarent asen-dd] Taɛnak ak-d ddmani nnes n tarewsa d Jad-Rimmun ak-d ddmani nnes n tarewsa. [Marra jmiɛ] tuɣa atent di tnayen n tneddam.
JOS 21:26 Marra tineddam i řaǧat n ayt n Qahat nni iqqimen [tuɣa atent] di ɛecra n tneddam ak-d ddmani nsent n tarewsa.
JOS 21:27 Zi [temmurt n] wezyen n teqbič n Manassa [kkarent asen-dd tneddam-a] i ayt n Jarcun, zi řaǧat n Ilawiyyen, am tendint n tarewřa i uqettař: Julan di Bacan ak-d ddmani nnes n tarewsa d Baɛactara ak-d ddmani nnes n tarewsa. [Marra jmiɛ] [tuɣa atent di] tnayen n tneddam.
JOS 21:28 Zi [temmurt n] teqbič n Issakar [kkarent asen-dd:] Qicyun ak-d ddmani nnes n tarewsa, d Dabrat ak-d ddmani nnes n tarewsa,
JOS 21:29 Yarmut ak-d ddmani nnes n tarewsa, d Ɛayn-Jannim ak-d ddmani nnes n tarewsa. [Marra jmiɛ] [tuɣa atent di] arebɛa n tneddam.
JOS 21:30 Zi [temmurt n] teqbič n Acir [kkarent asen-dd:] Mic-Al ak-d ddmani nnes n tarewsa, d Ɛabdun ak-d ddmani nnes n tarewsa,
JOS 21:31 d Ḥalqat ak-d ddmani nnes n tarewsa d Raḥub ak-d ddmani nnes n tarewsa. [Marra jmiɛ] [tuɣa atent di] arebɛa n tneddam.
JOS 21:32 Zi [temmurt n] teqbič n Naftali [kkarent asen-dd] am tendint n tarewřa i uqettař: Qadac di Ljalil ak-d ddmani nnes n tarewsa, d Ḥammut-Dur ak-d ddmani nnes n tarewsa d Qartan ak-d ddmani nnes n tarewsa. [Marra jmiɛ] [tuɣa atent] di třata n tneddam.
JOS 21:33 Marra tineddam n ayt n Jarcun ɛlaḥsab řaǧat nsen [tuɣa atent di] třeṭṭac n tneddam ak-d ddmani nsent n tarewsa.
JOS 21:34 I řaǧat n ayt n Marari, aqa aten d inni iqqimen [ɛad] zeg Ilawiyyen, [mmewcent asen] zi [temmurt n] teqbič n Zabulun, Juqnaɛam ak-d ddmani nnes n tarewsa, Qarta ak-d ddmani nnes n tarewsa,
JOS 21:35 Dimna ak-d ddmani nnes n tarewsa d Nahalal ak-d ddmani nnes n tarewsa. [Marra jmiɛ] tuɣa atent di arebɛa n tneddam.
JOS 21:36 Zi [temmurt n] teqbič n Rubin [kkarent asen-dd] Baṣar ak-d ddmani nnes n tarewsa, d Yahṣa ak-d ddmani nnes n tarewsa,
JOS 21:37 Qadimut ak-d ddmani nnes n tarewsa d Mafaɛa ak-d ddmani nnes n tarewsa. [Marra jmiɛ] [tuɣa atent di] arebɛa n tneddam.
JOS 21:38 Zi [temmurt n] teqbič n Jad [kkarent asen-dd] am tendint n tarewřa i uqettař: Ramut di Jilɛad ak-d ddmani nnes n tarewsa, d Maḥanayim ak-d ddmani nnes n tarewsa,
JOS 21:39 Ḥacbun ak-d ddmani nnes n tarewsa, d Yaɛzir ak-d ddmani nnes n tarewsa. [Marra jmiɛ] [tuɣa atent di] arebɛa n tneddam.
JOS 21:40 [Tuɣa tina] marra d tineddam i ayt n Marari, ɛlaḥsab řaǧat nsen, tinni iqqimen zi řaǧat n Ilawiyyen, tinni x dd-tewḍa tqedduḥt nsen, marra jmiɛ tuɣa tent di tenɛac n tneddam.
JOS 21:41 Marra tineddam di řwesṭ n řwart n ayt n Israil [tuɣa atent di] tmenya u-rebɛin n tneddam ak-d ddmani nsent n tarewsa.
JOS 21:42 Tineddam-a tuɣa atent marra ak-d ddmani nsent n tarewsa i d asent innḍen. Ammu [i tuɣa teǧa] ɣar marra tineddam-a.
JOS 21:43 Ammu iwca SIDI i Israil marra tammurt nni tuɣa ijjuǧ ad tt iwc i řejdud nsen uca nitni warten tt uca ruḥen zeddɣen dayes.
JOS 21:44 Uca SIDI igga asen řhudnet zi marra iɣezdisen, am mammec marra nni tuɣa ijjuǧ i řejdud nsen. Uřa d ijj zi řɛedyan nsen war d asen izemmar zzat i wudem nsen. SIDI iwca asen marra řɛedyan deg ufus nsen.
JOS 21:45 Uřa d ijj n wawař zi marra awařen icnan i zi issiweř SIDI ɣar taddart n Israil iwḍa. Marra [aya] ittwakemmeř.
JOS 22:1 Xenni iřaɣa-dd Yacuwa i Irubiniyyen d Ijadiyyen d wezyen n teqbič n Manassa,
JOS 22:2 inna asen: “Kenniw teḥḍam marra min xef i d awem yumur Musa, amsexxar n SIDI, u kenniw tesřam [ɛawed] i tmijja inu di marra min xef d awem umureɣ.
JOS 22:3 Kenniw war tesmiḥem ca deg aytmatwem deg waṭṭas n wussan ař ass-a u teḥḍam aḥeṭṭu n řumur n SIDI, AREBBI nwem.
JOS 22:4 Uca řexxu igga SIDI, AREBBI nwem, i aytmatwem arraḥet, am mammec tuɣa i d asen tt iwaɛd. Ɛeqbem xenni řexxu ɣar iqiḍan nwem di temmurt n řwart nwem nni d awem iwca Musa, amsexxar n SIDI, x ujemmaḍ n L’Urdun.
JOS 22:5 Maca ḥḍam mliḥ ad teggem řumur d Ccariɛa i d awem iwca Musa, amsexxar n SIDI, ḥima ad texsem SIDI, AREBBI nwem, ad tuyurem di marra ibriden nnes, ad teḥḍam marra řumurat nnes uca ad ɣares třeṣqem u ad as tsexxarem s marra wuř d marra řeɛmar nwem.”
JOS 22:6 Ibarek i-ten Yacuwa, ijja i-ten ad uyuren uca nitni areggʷḥen ɣar iqiḍan nsen.
JOS 22:7 I wezyen n teqbič n Manassa tuɣa iwca Musa ict n tesɣart di Bacan, maca i yijj n wezyen nneɣni iwca as Yacuwa ict n tesɣart ɣar aytmatsen x uɣezdis-a n L’Urdun zi manis tɣeǧi tfuct. Umi ten issekk Yacuwa ɣar iqiḍan nsen, ibarek i-ten
JOS 22:8 uca issiweř akidsen, inna: “S wagřa d ameqqran ad tɛeqbem ɣar iqiḍan nwem, s waṭṭas n řebhayem u s nnuqart d wureɣ u s nnḥas d wuzzař u s waṭṭas n warruḍ. Bḍam takeccaḍt n řɛedyan nwem ak-d aytmatwem.”
JOS 22:9 Ɛeqben ayt n Rubin d ayt n Jad d wezyen n teqbič n Manassa, ffɣen zi ɣar ayt n Israil, iggʷejjen x Cilu [nni iǧan] di temmurt n Kenɛan, ḥima ad raḥen ɣar temmurt n Jilɛad, ɣar temmurt n řmuřk nsen nni iṭṭfen d agřa ɛlaḥsab řumur n SIDI s tsexxart n Musa.
JOS 22:10 [Umi] iwḍen nitni ɣar tmuwwa n L’Urdun nni [iǧan ɛad] di temmurt n Kenɛan, bnan ayt n Rubin d ayt n Jad d wezyen n teqbič n Manassa dinni ijj n uɛalṭar ɣar L’Urdun, ijj n uɛalṭar imɣar aṭṭas.
JOS 22:11 Uca sřin ayt n Israil aqa qqaren: “Xzarem, ayt n Rubin d ayt n Jad d wezyen n teqbič n Manassa bnan ijj n uɛalṭar ɣar weymir n temmurt n Kenɛan x tmuwwa n L’Urdun, x uɣezdis [n L’Urdun] n ayt n Israil.”
JOS 22:12 [Umi] sřin ayt n Israil aya, tmun marra tmesmunt n ayt n Israil di Cilu ḥima ad ffɣen i umenɣi akidsen s ijj n řɛeskar.
JOS 22:13 Uca ssekken ayt n Israil Finaḥas, mmis n ukehhan Aliɛazar, ɣar ayt n Rubin u ɣar ayt n Jad u ɣar wezyen n teqbič n Manassa di Jilɛad,
JOS 22:14 u [ssekken] akides ɛecra n řḥukkam, ijj n řḥakem zi kuř taddart n babas, zi marra tiqebbař n Israil. Kuř ijj [zzaysen] tuɣa d azeǧif n taddart n řejdud nsen i řuřuf n Israil.
JOS 22:15 Usin-dd nitni ɣar ayt n Rubin u ɣar ayt n Jad u ɣar wezyen n teqbič n Manassa di temmurt n Jilɛad, nnan asen:
JOS 22:16 “Ammu i tessiweř marra tmesmunt n SIDI: Min ixs ad yini řeɣdar-a i zi teɣdarem AREBBI n Israil umi tḥeyydem ass-a zi ḍeffar n SIDI, umi tebnam i yixef nwem ijj n uɛalṭar maḥend ad tɣewwɣem x SIDI ass-a?
JOS 22:17 Ma war iǧi cfa aneɣ řmuɛṣiyyet n Faɣur, [řmuɛṣiyyet i zi] ɣar ass-a [ɛad] war nettwassizdeg u zzayes i tewḍa jjriḥect x tmesmunt n SIDI?
JOS 22:18 Ma aqa kenniw ass-a tewcim s weɛrur i SIDI uca ad imsar [xenni], umi ɣa tɣewwɣem ass-a x SIDI, ad iffugem Netta x marra tmesmunt n Israil?
JOS 22:19 Mařa zeɛma texmej temmurt i iǧan d agřa nwem, [xenni] ɛdum ɣar temmurt nni iǧan d agřa n SIDI u mani teǧa Tzeddiɣt n SIDI uca ksim i yixef nwem ijj n wegra di řwesṭ nneɣ, [maca] war tɣewwɣem ca x SIDI u war tɣewwɣem ca xaneɣ umi ɣa tebnam ijj n uɛalṭar i yixef nwem, mɣir aɛalṭar n SIDI, AREBBI nneɣ.
JOS 22:20 Ma tuɣa Ɛaxan, mmis n Zaraḥ, war iɣdar di tmesřact n min ittwaḥarrmen [i uteḥḥi] u xenni ma war dd-ittis uduqqez n weɣḍab x marra tamesmunt n Israil? Uca aryaz nni war immut weḥḥḍes waha di řmuɛṣiyyet nnes.’”
JOS 22:21 [Xenni] arrin-dd ayt n Rubin d ayt n Jad d wezyen n teqbič n Manassa uca ssiwřen ak-d izeǧifen x řuřuf n Israil:
JOS 22:22 “Arebbi x [marra] irebbiten, SIDI, Arebbi x [marra] irebbiten issen [i-t] u Israil ad [t] issen [ɛawed]! Mařa iffeɣ-dd aya zeg uɣewweɣ niɣ zi řeɣdar x SIDI, [xenni] war xaneɣ tceṭṭar ca ass-a,
JOS 22:23 [mařa tuɣa] ḥima ad nebna i neccin ijj n uɛalṭar maḥend ad newc s weɛrur i SIDI niɣ [mařa tuɣa] ḥima ad nqeddem ict n tɣarṣt n wecmaḍ niɣ ict n tewhibt [n řɣiǧet] niɣ i usewjed n tɣarṣa n řehna, ejj SIDI simant nnes ad [t] ibeqqec.
JOS 22:24 [Uct xaneɣ], mařa war neggi aya zeg wemnus umi neqqar: ‘Iḥenjiren nwem [zemmaren] ad inin i iḥenjiren nneɣ tiwecca: Min jar awem-dd ak-d SIDI, AREBBI n Israil?
JOS 22:25 SIDI igga L’Urdun d aymir jar aneɣ d kenniw, ayt n Rubin d ayt n Jad! Kenniw war ɣarwem ca tasɣart di SIDI!’ [Ammu] zemmaren ad ssbedden iḥenjiren nwem iḥenjiren nneɣ x tiggʷudi n SIDI.
JOS 22:26 [X uyenni] nenna: Ejj aneɣ ad nebna aɛalṭar-a, war iǧi i tɣarṣt n wecmaḍ uřa i tɣarṣt,
JOS 22:27 [maca] ḥima ad yiři d acehhad jar neccin d kenniw u jar jjiřat nneɣ awarni aneɣ, ḥima ad nsexxar di tsexxart n SIDI zzat i wudem nnes s tɣarṣi nneɣ n wecmaḍ d tɣarṣi nneɣ [nneɣni] d tɣarṣi nneɣ n řehna u ḥima iḥenjiren nwem war qqaren i iḥenjiren nneɣ: Kenniw war ɣarwem ca tasɣart di SIDI.
JOS 22:28 Neccin nenna: Mařa imsar tiwecca ad inin nitni aya i neccin u i jjiřat [awarni aneɣ], xenni ad nini: ‘Xzarem, amedya n řebni n uɛalṭar-a n SIDI nni iggin řejdud nneɣ, war iǧi i tɣarṣt n wecmaḍ niɣ i tɣarṣt [nneɣni], [maca] ḥima ad yiři d acehhad jar neccin d kenniw.’
JOS 22:29 Iggʷej xaneɣ aqa neccin ad nɣewweɣ x SIDI niɣ ass-a ad newc s weɛrur i SIDI umi ɣa nebna ijj n uɛalṭar i tɣarṣt n wecmaḍ niɣ i tewhibt [n řɣiǧet] niɣ i tɣarṣt [nneɣni], illa aɛalṭar n SIDI, AREBBI nneɣ, wenni iǧan zzat i Tzeddiɣt nnes.”
JOS 22:30 Akehhan Finaḥas d řḥukkam n tmesmunt d izeǧifen x řuřuf n Israil nni kides [iǧan], sřin awařen i issiwřen ayt n Rubin d ayt n Jad d ayt n Manassa u tuɣa aya d lemliḥ di tiṭṭawin nsen.
JOS 22:31 Finaḥas, mmis n Aliɛazar, inna i ayt n Rubin u i ayt n Jad u i ayt n Manassa: “Ass-a ad tessnem belli SIDI aqa-t di řwesṭ nneɣ umi kenniw war teɣdarem ca SIDI. S uya kenniw tfekkem ayt n Israil zeg ufus n SIDI.”
JOS 22:32 [Xenni] yareggʷeḥ ukehhan Finaḥas, mmis n Aliɛazar, ak-d řḥukkam zeg ayt n Rubin d ayt n Jad, zi temmurt n Jilɛad ɣar temmurt n Kenɛan, ɣar ayt n Israil, uca nitni ggin daysen řexbar.
JOS 22:33 Tuɣa tamesřact d lemliḥ di tiṭṭawin n ayt n Israil uca ḥemden ayt n Israil AREBBI u war d asen nnan ɛad ad ffɣen ad mmenɣen maḥend ad areddǧen tammurt i di tuɣa zeddɣen ayt n Rubin d ayt n Jad.
JOS 22:34 Ayt n Rubin d ayt n Jad řaɣan as i uɛalṭar nni: “Ad yiři d acehhad jar aneɣ aqa SIDI d AREBBI.”
JOS 23:1 Imsar umi ɛdun aṭṭas n wussan awarni umi SIDI tuɣa igga i Israil řhudnet zi marra řɛedyan nnes i d as dd-innḍen u umi tuɣa Yacuwa iwsar, imɣar deg wussan,
JOS 23:2 aqa iřaɣa Yacuwa i marra Israil, imɣaren nnes d izeǧifen nnes d řquḍat nnes d imeḥḍayen nnes, inna asen: “Necc wsareɣ u mɣareɣ deg wussan
JOS 23:3 uca kenniw teẓrim marra min igga SIDI, AREBBI nwem, ak-d marra řegnus-a zzat i tiṭṭawin nwem, maɣar SIDI, AREBBI nwem Simant nnes, d wenni tuɣa immenɣen di ṭṭweɛ nwem.
JOS 23:4 Xzar necc bḍiɣ awem řegnus-a i iqqimen jar awem s tqedduḥt, am tesɣart [n řwart] i tqebbař nwem, ak-d marra řegnus i teḥḥiɣ zi L’Urdun ař řebḥar ameqqran mani tɣeǧi tfuct.
JOS 23:5 SIDI, AREBBI nwem, ad xasen ibarrez zzat i wudem nwem u ad xasen yaẓẓeř zzat i wudem nwem zi řwart nsen u kenniw ad tᵉṭṭfem tammurt nsen d řwart, am mammec i d awem issiweř SIDI, AREBBI nwem.
JOS 23:6 Ḥḍam aṭṭas s jjehd u ggem marra min yurin deg wedlis-a ittwannḍen n Ccariɛa n Musa, ḥima war xas tḥeyyidem uřa [ɣar] yefus uřa [ɣar] uzeřmaḍ,
JOS 23:7 ḥima kenniw war ttṣuram ixef nwem ak-d řegnus-a inni [ɛad] iqqimen ɣarwem, u war ttfekkarem [ɛad] deg yisem n irebbiten nsen u war [xasen] ttjaǧam u [ḥima] kenniw war d asen tɛebbdem u war d asen tᵉttbendqem.
JOS 23:8 Maɣar ittxeṣṣa ad třeṣqem i SIDI, AREBBI nwem, am mammec i t teggim ař ass-a.
JOS 23:9 SIDI yuẓẓeř x řegnus mɣaren u jjehden zzat i wudem nwem. U xawem kenniw, ař ass-a war din ḥed i izemmaren ad ibedd zzat i wudem nwem.
JOS 23:10 Ijj n weryaz zzaywem izemmar ad yaẓẓeř x wařef [n yeryazen], minzi SIDI, AREBBI nwem Simant nnes, d wenni ittmenɣan di ṭṭweɛ nwem, am mammec tuɣa akidwem issiweř.
JOS 23:11 Ḥḍam [xenni] ař ṭṭarf x řeɛmur nwem ḥima ad texsem SIDI, AREBBI nwem.
JOS 23:12 Minzi mařa kenniw tḥeyydem xas uřa d ict n jjurret [waha], uca ad třeṣqem i min kidwem iqqimen [ɛad] n řegnus, i yinni kiwem iqqimen, uca ad tdewřem d iḍeggʷařen u ad ɣarsen tadfem u nitni am nneɣni,
JOS 23:13 xenni ad tessnem nican, aqa SIDI, AREBBI nwem, war ittiẓẓeř ɛad x řegnus-a zzat i wudem nwem. Nitni ad dewřen d řfex d tracca i kenniw, d [tiyyita s] urekkuḍ x iɣezdisen nwem d isennanen i tiṭṭawin nwem, ař ɣa tᵉttwateḥḥam zi temmurt taṣebḥant i d awem iwca SIDI, AREBBI nwem.
JOS 23:14 Xzar, ass-a necc simant inu ad uyureɣ abrid n marra tammurt u kenniw ad tessnem s marra uř nwem u s marra řeɛmar nwem, aqa uřa d ijj n wawař zi marra awařen i xawem inna SIDI, AREBBI nwem, war dd-iffiɣ. Marra ffɣen-dd xawem, uřa d ijj n wawař war iqqim war dd-iffiɣ.
JOS 23:15 Uca ad imsar, am mammec xawem dd-yusa marra awař icnan i kidwem issiweř SIDI, AREBBI nwem, ammu i xawem i ɣa isseqfeř SIDI uřa d kuř awař iɛeffnen ař Netta kenniw iteḥḥa zi temmurt-a taṣebḥant i d awem iwca SIDI, AREBBI nwem.
JOS 23:16 Mařa kenniw tɛeddam x Řɛahd n SIDI, AREBBI nwem, [Řɛahd] nni x d awem yumur Netta uca kenniw ad tuyurem ad tɛebdem i irebbiten nneɣni uca ad asen tuḍarem, [xenni] ad xawem yareɣ weɣḍab n SIDI uca kenniw ad tᵉttwateḥḥam deɣya zi temmurt taṣebḥant i d awem iwca Netta.
JOS 24:1 Yacuwa issmun marra tiqebbař n Israil di Cakim uca iřaɣa i imɣaren n Israil d izeǧifen nsen d řquḍat nsen d imeḥḍayen nsen uca nitni ssbedden ixef nsen zzat i wudem n AREBBI.
JOS 24:2 [Xenni] inna Yacuwa i marra řgens: “Ammu i iqqar SIDI, AREBBI n Israil: ‘Řejdud nwem zeddɣen zi cḥař uya x ujemmaḍ n yeɣẓar [n Lfuraṭ], Taraḥ, babas n Ibrahim d babas n Naḥur, u nitni tuɣa ttsexxaren i irebbiten nneɣni.
JOS 24:3 [Xenni] iwyeɣ-dd jedditwem Ibrahim zeg uɣirin i iɣzar [n Lfuraṭ] u jjiɣ t yuyur di marra tammurt n Kenɛan. Necc arniɣ i zzariɛet nnes u wciɣ as Isḥaq.
JOS 24:4 I Isḥaq wciɣ Yaɛqub d Ɛisu, u i Ɛisu wciɣ [tammurt n] idurar n Saɛir d tasɣart, [maca] Yaɛqub d iḥenjiren nnes hwan ɣar Miṣra.
JOS 24:5 [Xenni] ssekkeɣ Musa d Harun uca wtiɣ Miṣra am mammec [t] ggiɣ di řwesṭ nnes u awarni as ssuffɣeɣ-dd kenniw.
JOS 24:6 Necc ssuffɣeɣ-dd řejdud nwem zi Miṣra u kenniw tiwḍem-dd ɣar řebḥar u Imiṣriyyen ḍfaren ibabaten nwem s ikarruten d imnayen ař Řebḥar n Telga.
JOS 24:7 Uca sɣuyen ɣar SIDI u Netta igga taǧest jar awem d Imiṣriyyen uca ijja řebḥar issfeyyeḍ xasen ařami ten idřa. S tiṭṭawin nwem teẓrim min ggiɣ di Miṣra. [Awarni aya] tuɣa tzeddɣem aṭṭas n wussan di řexřa.
JOS 24:8 Necc iwyeɣ-dd kenniw ɣar temmurt n Imuriyyen i tuɣa izeddɣen aɣirin i L’Urdun. Nitni mmenɣen akidwem, [maca] Necc ggiɣ ten deg ufus nwem u kenniw tᵉṭṭfem tammurt nsen u Necc qḍiɣ xasen zzat i wudem nwem.
JOS 24:9 [Xenni] ikkar Balak, mmis n Saffur, ajeǧid n Mu’ab, uca immneɣ ak-d Israil. Netta issekk ḥima ad řaɣan i Bilɛam, mmis n Baɛur, maḥend ad kenniw inɛeř.
JOS 24:10 [Maca] Necc war xseɣ ad sřeɣ i Balɛam. [S uya] ibarek netta i kenniw aṭṭas u Necc fekkeɣ-dd kenniw zeg ufus nnes.
JOS 24:11 [Xenni] teẓwam L’Urdun, tusim-dd ɣar Ariḥa. Imezdaɣ n Ariḥa, mmenɣen akidwem, Imuriyyen d Ifiriziyyen d ayt n Kenɛan d Iḥittiyyen d Ijirjasiyyen d Iḥiwiyyen d Iyabusiyyen uca wciɣ awem ten deg ufus nwem.
JOS 24:12 Necc ssekkeɣ irezzan iḍarɣařen uca uẓẓřen xasen zzatwem, [am mammec ttwaẓẓřen] tnayen n ijeǧiden nni zzat i wudem nwem. [D man aya] war iǧi s ssif nwem uřa s řqews nwem.
JOS 24:13 Necc wciɣ awem tammurt i x war tarebrem u tineddam nni war tebnim, ḥima ad tzeddɣem daysent. Uca teccim [ɛawed] zi tzayarin d izemmuren i tuɣa war teẓẓum.’
JOS 24:14 [Xenni] řexxu, ggʷedem SIDI uca sexxarem as s řekmaret d řaman. Nḍarem irebbiten nni umi sexxaren řejdud nwem aɣirin i iɣzar [n Lfuraṭ] u di Miṣra uca sexxarem i SIDI.
JOS 24:15 [Maca] mařa war dd-tusi x tiṭṭawin nwem maḥend ad tsexxarem i SIDI, xenni ixḍarem ass-a i man wen umi i ɣa tsexxarem, i irebbiten nni umi sexxaren řejdud nwem aɣirin i iɣzar [n Lfuraṭ], niɣ i irebbiten n Imuriyyen nni di temmurt nsen tzeddɣem. Necc maca d taddart inu, neccin ad nsexxar i SIDI!”
JOS 24:16 [Xenni] yarra-dd řgens: “Man aya iggʷej aneɣ, aqa neccin ad nejj SIDI ad nexdem irebbiten nneɣni.
JOS 24:17 Maɣar SIDI d AREBBI nneɣ d Netta i d aneɣ-dd issgeɛɛden zi temmurt n Miṣra, neccin d řejdud nneɣ, zi taddart n tesmuɣi u Netta d wenni iggin řeɛřamat timeqqranin zzat i tiṭṭawin nneɣ u Netta issřeqqa xaneɣ di marra abrid i nuyur u jar marra řegnus i umi ncuq [tammurt nsen].
JOS 24:18 SIDI yuẓẓeř x marra řegnus zzat i wudem nneɣ, uřa x Imuriyyen, imezdaɣ n temmurt. Uřa d neccin ad nsexxar i SIDI, maɣar Netta d AREBBI nneɣ.”
JOS 24:19 [Xenni] inna Yacuwa i řgens: “Kenniw war tzemmarem ad tsexxarem i SIDI, maɣar Netta d AREBBI Amqeddes aṭṭas u Netta d ijj n Arebbi ittasmen. Netta war d awem iɣeffar ixeṭṭan nwem d ddnub nwem.
JOS 24:20 Mařa kenniw tejjim SIDI, ad tsexxarem i irebbiten nneɣni, [xenni] Netta ad xawem inneqřeb, ad d awem igg řɣar uca ad kenniw iqḍa, awarni řami Netta igga akidwem [qbeř] taṣebḥant.”
JOS 24:21 [Xenni] inna řgens i Yacuwa: “Lla, minzi neccin ad nsexxar i SIDI.”
JOS 24:22 Inna Yacuwa i řgens: “Kenniw d řechud x ixef nwem, aqa kenniw tfarzem SIDI, ḥima ad as tsexxarem.” Nitni nnan “[Neccin] d řechud!”
JOS 24:23 “[Xenni] řexxu, nḍarem irebbiten iɣriben nni [iǧan] di řwesṭ nwem u tarrem uřawen nwem ɣar SIDI, AREBBI n Israil!”
JOS 24:24 Inna řgens i Yacuwa: “Neccin ad nsexxar i SIDI, AREBBI nneɣ, uca ad nseř i tmijja nnes.”
JOS 24:25 Deg wass nni igga Yacuwa ijj n řɛahd ak-d řgens uca igga asen di Cakim tawṣeyyet d lfariḍa.
JOS 24:26 Yura Yacuwa awařen-a deg wedlis ittwannḍen n Ccariɛa n SIDI uca netta iksi ijj n weẓru d ameqqran uca issbedd i-t di Cakim sadu ict n tcejjart n yigg nni ibedden ɣar Zzawect Iqeddsen n SIDI.
JOS 24:27 Inna Yacuwa i marra řgens: “Xzarem, aẓru-ya ad xaneɣ yiři d acehhad, minzi netta isřa marra awařen n SIDI nni kidneɣ issiweř u netta ad yiři d acehhad i kenniw ḥima war ttɣeccam AREBBI nwem.”
JOS 24:28 [Xenni] yarxu Yacuwa i řgens, kuř aryaz [iruḥ] ɣar tesɣart nnes.
JOS 24:29 Awarni i tmesřayin-a imsar, belli Yacuwa, mmis n Nun, amsexxar n SIDI, immut, netta d ijj n mmis [n bnadem] ɣares mya u-ɛecra n iseggʷusa.
JOS 24:30 Neḍřen t di temmurt n tesɣart nnes di Timnat-Saraḥ nni iǧan x idurar n Ifrayim, ɣar ccamal n wedrar n Jaɛac.
JOS 24:31 Israil isexxar i SIDI marra ussan n Yacuwa d marra ussan n imɣaren nni iqqimen ddaren ict n řweqt d azirar awarni i Yacuwa u ssnen marra min igga SIDI di ṭṭweɛ n Israil.
JOS 24:32 Ixsan n Yusuf i tuɣa dd-iwyen akidsen ayt n Israil zi Miṣra, neḍřen ten di Cakim di tkirat n yeyyar i tuɣa isɣa Yaɛqub x ayt n Ḥamur, babas n Cakim, s mya n i iziynat n nnuqart iweznen uca tedweř d tasɣart n ayt n Yusuf.
JOS 24:33 Uřa d Aliɛazar, mmis n Harun, immut uca neḍřen t di tewrirt n mmis n Finaḥas, [tawrirt] i d as immewcen [i Finaḥas] deg idurar n Ifrayim.
JDG 1:1 Awarni i řmewt n Yacuwa, imsar aqa ayt n Israil sseqsan SIDI, nnan: “Man wen zzayneɣ i ɣa ikkaren d amezwaru ad igeɛɛed ad immneɣ ak-d ayt n Kenɛan?”
JDG 1:2 Yarra-dd SIDI: “Yahuda ad igeɛɛed [d amezwaru]. Xzar, Necc wciɣ as tammurt deg ufus nnes.”
JDG 1:3 Uca inna Yahuda i umas Cimɛun: “Geɛɛed akidi di [temmurt n] tqedduḥt [n řeɛbar] inu uca ejj aneɣ ad nemmneɣ ak-d ayt n Kenɛan, [xenni] necc ad kik geɛɛdeɣ di [temmurt n] tqedduḥt nnec.” Uca yuyur akides Cimɛun.
JDG 1:4 Igeɛɛed Yahuda uca SIDI iɛarn ayt n Kenɛan d Ifiriziy[yen] deg ufus nsen uca ɣeřben xasen ɣar Bazaq, ɛecra-ařaf n yiryazen.
JDG 1:5 Nitni ufin Aduni-Bazaq di Bazaq uca mmenɣen akides u nitni ɣeřben x ayt n Kenɛan u x Ifiriziy[yen].
JDG 1:6 [Maca] Aduni-Bazaq yarweř uca nitni ḍfaren t uca ṭṭfen t uca qessen as imzawen [d tfednin timeqqranin] zeg ifassen nnes u zeg iḍaren nnes.
JDG 1:7 [Xenni] inna Aduni-Bazaq: “Sebɛin n ijeǧiden, ttwaqessen asen imzawen [d tfednin], tuɣa řeqqḍen [iřeqqʷaz] sadu ṭṭabřa inu. Mammec i kidsen ggiɣ, ammu i d ayi ixeǧeṣ AREBBI!” Iwyen t ɣar Urcalim uca netta immut dinni.
JDG 1:8 Ayt n Yahuda mmenɣen ak-d Urcalim uca ṭṭfen tt, wtin tt s řeqḍeɛ n ssif uca qqeden tandint s tmessi.
JDG 1:9 Awarni as hwan ayt n Yahuda ḥima ad mmenɣen ak-d ayt n Kenɛan, inni izeddɣen di Temmurt n Idurar, di [Temmurt n] Ljanub u di Temmurt Iwaṭan.
JDG 1:10 Iffeɣ Yahuda ɣar ayt n Kenɛan i tuɣa izeddɣen di Ḥabrun. Isem n Ḥabrun [tuɣa] zic qqaren as Qaryat-Arbaɛ. Nitni ɣeřben x Cicay d Aximan d Talmay.
JDG 1:11 Ssenni iffeɣ ɣar imezdaɣ n Dabir. Isem n Dabir [tuɣa] zic qqaren as Qaryat-Safar.
JDG 1:12 Inna Kalib: “Wenni i ɣa iwten Qaryat-Safar ad tt iṭṭef, ad as wceɣ yeǧi Axsa d tamɣart.”
JDG 1:13 Ɛutniyil, mmis n Qinaz, umas ameẓyan n Kalib, iṭṭef i-tt. Uca Kalib iwca as yeǧis Axsa d tamɣart.
JDG 1:14 Imsar umi [ɣares] dd-tusa nettat, tɛarn i-t s tutra x yeyyar n babas. Uca teḍra x weɣyuř. Isseqsa tt Kalib: “Min cem yuɣin?”
JDG 1:15 Nettat tarra-dd xas: “Ewc ayi ict n lbaraka, minzi tewcid ayi ict n treqqiɛt n temmurt [ɣar] ljanub. Ttzawgeɣ, ewc ayi uřa d řɛunṣarat!” Uca iwca as Kalib řɛunṣarat n nej d řɛunṣarat n wadday.
JDG 1:16 Geɛɛden arraw n Uqini, wenni d aḍegʷař n Musa, ak-d ayt n Yahuda zi Tendint n Tcejjura n Tini ɣar řexřa n Yahuda nni [iǧan] di [Temmurt n] Ljanub ɣar Ɛarad. Ffɣen nitni, zeddɣen ak-d řgens.
JDG 1:17 Iruḥ Yahuda ak-d umas Cimɛun uca ɣeřben nitni x ayt n Kenɛan inni i tuɣa izeddɣen di Ṣafat, ḥarrmen ten qaɛ uca teḥḥan ten uca ggin as i tendint [nni] Ḥurma.
JDG 1:18 Iṭṭef Yahuda uřa d Ɣazza ak-d temmurt nnes d Acqalun ak-d temmurt nnes d Ɛaqrun ak-d temmurt nnes.
JDG 1:19 SIDI tuɣa-t ak-d Yahuda ařami yuẓẓeř x [imezdaɣ n] Temmurt n Idurar, maca [imezdaɣ] n řewda n teɣzurt war izemmar ad xasen yaẓẓeř [zi tesɣart nsen], minzi nitni tuɣa ɣarsen ikarruten n umenɣi n wuzzař.
JDG 1:20 I Kalib wcin as Ḥabrun, am mammec tuɣa inna Musa, uca netta yuẓẓeř ssenni x třata n iḥenjiren n Ɛanaq.
JDG 1:21 Ayt n Binyamin war zemmaren ad aẓẓřen x Iyabusiyyen, inni izeddɣen di Urcalim. Ammu i qqimen Iyabusiyyen zeddɣen ɣar ayt n Binyamin di Urcalim, ař ass-a.
JDG 1:22 Taddart n Yusuf tgeɛɛed ɣar Bayt-Il uca SIDI [tuɣa-t] akidsen.
JDG 1:23 Tuyur taddart n Yusuf ḥima ad tbergag ɣar Bayt-Il. Isem n tendint [tuɣa] zic qqaren as Luz.
JDG 1:24 Inni tuɣa iřebten [i tendint], ẓrin ijj n weryaz iffeɣ-dd zi tendint, nnan as: “Scen aneɣ manis nzemmar ad nadef ɣar tendint, xenni neccin ad kik negg tamexsiwt icewwaren.”
JDG 1:25 [Xenni] isscen asen tawwart n wadaf ɣar tendint uca nitni wtin tandint s ict n tecti s řeqḍeɛ n ssif, [maca] nitni jjin aryaz nni ad yuyur ak-d marra raǧ nnes.
JDG 1:26 Uca yuyur weryaz ɣar temmurt n Iḥittiyyen uca ibna ict n tendint, igga as isem Luz. Wa d isem nnes ař ass-a.
JDG 1:27 Manassa war izemmar ad yaẓẓeř x [imezdaɣ] n Bayt-Can d tneddam i ɣares dd-iqqnen, řa [x imezdaɣ n] Taɛnak ak-d tneddam nnes řa x imezdaɣ n Dur d tneddam nnes řa x imezdaɣ n Yiblaɛam d tneddam nnes uřa x imezdaɣ n Majiddu d tneddam nnes. Tuɣa ayt n Kenɛan ɛewwřen ad qqimen zeddɣen di temmurt [nni].
JDG 1:28 Tuɣa Israil idweř ijhed ařami igga ljizya x ayt n Kenɛan, [maca] war zemmaren ad xasen aẓẓřen marra.
JDG 1:29 [Uřa d] Ifrayim war izemmar ad yaẓẓeř x ayt n Kenɛan i tuɣa izeddɣen di Jazar u qqimen ayt n Kenɛan zeddɣen di řwesṭ nsen di Jazar.
JDG 1:30 Zabulun war izemmar ad yaẓẓeř x imezdaɣ n Qiṭrun d imezdaɣ n Nahalul u qqimen ayt n Kenɛan zeddɣen di řwesṭ nsen u tᵉttwagg xasen ljizya.
JDG 1:31 Acir war izemmar ad yaẓẓeř x imezdaɣ n Ɛakku uřa x [imezdaɣ] n Ṣidun d Aḥlab d Akzib d Halba d Afiq d Raḥub.
JDG 1:32 Iciriyyen zeddɣen di řwesṭ n ayt n Kenɛan, inni d imezdaɣ n temmurt, minzi nitni war zemmaren ad xasen aẓẓřen.
JDG 1:33 Naftali war izemmar ad yaẓẓeř x imezdaɣ n Bayt-Cams d imezdaɣ n Bayt-Ɛanat. [Ammu] i tuɣa izdeɣ di řwesṭ n ayt n Kenɛan, inni d imezdaɣ n temmurt. Tᵉttwagg xasen ljizya x imezdaɣ n Bayt-Cams d Bayt-Ɛanat.
JDG 1:34 Imuriy[yen] ḥṣaren ayt n Dan ɣar idurar, minzi war ten jjin ad hwan ɣar řewḍa n teɣzurt.
JDG 1:35 Tuɣa Imuriy[yen] ɛewwřen ad qqimen zeddɣen deg idurar n Ḥaras, di Ayalun u di Caɛalbim, [maca] afus n taddart n Yusuf tuɣa izeyyar [xasen] aṭṭas [ařami xasen] tᵉttwagg ljizya.
JDG 1:36 Tuɣa aymir n Imuriy[yen] zi Tsunta n Tɣarḍmiwin, zi jjarf uca ssenni ɣar sennej.
JDG 2:1 lmalak n SIDI igeɛɛed zi Jiljal ɣar Bukim, inna: “Necc ssuffɣeɣ-dd kenniw zi Miṣra uca iwyeɣ-dd kenniw ɣar temmurt nni x jjuǧeɣ i řejdud nwem, nniɣ: ‘Necc ɛemmarṣ war ttareẓẓiɣ Řɛahd inu akidwem i řebda.
JDG 2:2 Uca kenniw, war d awem iɛeddeř ad teggem uřa d ijj n řɛahd ak-d imezdaɣ n temmurt-a, u ittxeṣṣa awem ad tɣeḍřem iɛalṭaren nsen!’ Maca kenniw war tesřim ca i tmijja inu. Mayemmi teggim aya?
JDG 2:3 U Necc nniɣ awem ɛawed: ‘Aqa war xasen taẓẓřeɣ zzat i wudem nwem, maca nitni ad iřin [am isennanen] deg iɣezdisen nwem uca irebbiten nsen ad awem dewřen d řfex.’”
JDG 2:4 Umi lmalak n SIDI tuɣa issiweř awařen-a ɣar marra ayt n Israil, imsar, aqa řgens issgeɛɛed tmijja nnes uca run nitni.
JDG 2:5 Nitni qqaren as i wemcan nni ‘Bukim’ uca nitni qeddmen din taɣarṣt i SIDI.
JDG 2:6 [Umi] issekk Yacuwa řgens, ffɣen ayt n Israil, [kuř] aryaz ɣar tesɣart nnes, maḥend ad ṭṭfen tammurt d řwart.
JDG 2:7 Tuɣa řgens isexxar i SIDI marra ussan n Yacuwa d marra ussan n imɣaren, inni [ɛad] iqqimen ddaren aṭṭas awarni i Yacuwa u inni iẓrin marra řxedmet tameqqrant n SIDI tenni igga i Israil.
JDG 2:8 Yacuwa, mmis n Nun, amsexxar n SIDI, immut [am] ijj n bnadem [d bab] n mya u-ɛecra n iseggʷusa.
JDG 2:9 Neḍřen t daxeř i weymir n tesɣart nnes di Timnat-Ḥaras, di temmurt n idurar n Ifrayim, ɣar uɣezdis n ccamal n wedrar n Jaɛac.
JDG 2:10 U ɛawed marra jjiř nni, aqa ittwassmun ɣar řejdud nsen. Awarni asen ikkar-dd ijj n jjiř nneɣni, jjiř nni war issin ca SIDI u war issin ca řxedmet i igga ak-d Israil.
JDG 2:11 [Xenni] ggin ayt n Israil min tuɣa iǧan d aɛeffan di tiṭṭawin n SIDI uca sexxaren i ‘Ibaɛlen’
JDG 2:12 Nitni jjin SIDI, AREBBI n řejdud nsen, wenni ten dd-issuffɣen zi Miṣra uca nitni ḍfaren irebbiten nneɣni, irebbiten n řegnus i d asen-dd innḍen, uca uḍaren asen u [ammu i] sɛaren SIDI.
JDG 2:13 Maɣar nitni jjin SIDI uca [dewřen] sexxaren i Baɛal u i ‘Ɛactarutin’.
JDG 2:14 [X uya] yarɣa weɣḍab n SIDI x Israil. Netta igga i-ten deg ufus n iceffaren i ten ikeccḍen u igga i-ten deg ufus n řɛedyan nsen i d asen dd-innḍen uca dewřen war zemmaren ad [qqimen] bedden zzat i wudem n řɛedyan nsen.
JDG 2:15 Mani ma ffɣen nitni, tuɣa afus n SIDI ḍidd nsen i řɣar, am mammec tuɣa issiweř SIDI u am mammec tuɣa i d asen ijjuǧ SIDI. Aqa ttwaḥṣaren ař aneggar.
JDG 2:16 [Maca] SIDI issekkar řquḍat, inni ten issnejmen zeg ufus n yinni ten ikeccḍen.
JDG 2:17 Nitni war sřin ca uřa ɣar řquḍat nsen, maca ssfesden ixef nsen umi uyuren awarni irebbiten nneɣni uca uḍaren asen. Deɣya ḥeyyden x webrid nni i di uyuren řejdud nsen, inni tuɣa isřin i tweṣṣa n SIDI. Nitni [maca] war ggin amenni!
JDG 2:18 Umi d asen dd-issekkar SIDI řquḍat, tuɣa SIDI ak-d řqaḍi uca issenjem i-ten zeg ufus n řɛedyan nsen, marra ussan n řqaḍi nni, maɣar SIDI tuɣa indem zi ssibbet n iɣuyyan nsen zzat i wudem n yinni ten iḥṣaren d yinni i xasen ittaẓẓřen.
JDG 2:19 Uca imsar umi immut řqaḍi, [aqa] nitni dewřen ɣar ḍeffar uca dewřen ɛeffnen ktar zeg řejdud nsen umi uyuren awarni irebbiten nneɣni, sexxaren asen uca bendqen asen. Nitni war jjin zi tmegga nsen [tiɛeffanin] u zi webrid nsen [i tuɣa ḍeffaren] s tɣennant.
JDG 2:20 [Xenni] yarɣa weɣḍab n SIDI x Israil uca Netta inna: “Minzi řgens-a iɛedda Řɛahd inu min xef weṣṣiɣ řejdud nsen u war sřin i tmijja inu,
JDG 2:21 uřa d Necc war qqimeɣ ɛad ad aẓẓřeɣ zzat i wudem nsen x řegnus nni ijja Yacuwa, umi immut,
JDG 2:22 ařami Necc ad zzaysen qeǧbeɣ Israil, ma ad ḥḍan nitni abrid n SIDI maḥend ad dayes uyuren am mammec t ḥḍan řejdud nsen, niɣ lla.”
JDG 2:23 Uca ijja SIDI řegnus-a [ad areyyḥen] uca war xasen yuẓẓiř deɣya u [ɛawed] netta war ten iggi deg ufus n Yacuwa.
JDG 3:1 Ina d řegnus i ijja SIDI [ad areyyḥen], ḥima ad zzaysen iqeǧeb Israil, [ixs ad yini] marra inni war issinen ca ɛad x marra garrat ak-d Kenɛan,
JDG 3:2 mɣir ḥima ad dewřen jjiřat n ayt n Israil ad ssnen amenɣi, ḥima ad řemden ad mmenɣen, mɣir inni war issinen ca amenɣi:
JDG 3:3 xemsa n řbacat [n tneddam] n ayt n Ifilisṭiniyyen d marra ayt n Kenɛan d Iṣiduniy[yen] d Iḥiwiy[yen] i izeddɣen x idurar n Lubnan, zeg wedrar n Baɛl-Hirmun ař mani ɣa tiwḍed ɣar Ḥamat.
JDG 3:4 Nitni tuɣa aten [din] ḥima ad zzaysen ittwaqeǧeb Israil, ḥima ad yiři ittwassnen ma nitni ad sřen i tweṣṣa n SIDI, tinni yumur Netta i řejdud nsen s tsexxart n Musa.
JDG 3:5 Ayt n Israil tuɣa zeddɣen di řwesṭ n ayt n Kenɛan: Iḥittiy[yen] d Imuriy[yen] d Ifiriziy[yen] d Iḥiwiy[yen] d Iyabusiy[yen].
JDG 3:6 Nitni iwyen yessitsen d temɣarin nsen i yixef nsen u tiḥenjirin nsen wcin tent i iḥenjiren nsen uca nitni [bdan ad] sexxaren i irebbiten nsen. *
JDG 3:7 Uca ggin ayt n Israil min [iǧan] d aɛeffan di tiṭṭawin n SIDI, ttun SIDI, AREBBI nsen, uca uyuren ad sexxaren i ‘Ibaɛlen’ d tirebbin nsen n cwarti.
JDG 3:8 [Xenni] yarɣa weɣḍab n SIDI x Israil u Netta iwca i-ten deg ufus n Kucan-Ricaɛtayim, ajeǧid n Aram-Nahrayn, [aqa-tt d Misuputamya]. [Xenni] sexxaren ayt n Israil tmenya n iseggʷusa i Kucan-Ricaɛtayim.
JDG 3:9 Sɣuyyen ayt n Israil ɣar SIDI uca SIDI igga ad ikkar ijj n umsenjem i ayt n Israil, wenni i ten ifekken, Ɛutniyil, mmis n Qanaz, umas n Kalib, wenni d ameẓyan xas.
JDG 3:10 Tuɣa xas Arruḥ n SIDI u tuɣa d řqaḍi x Israil uca iffeɣ ɣar umenɣi. Iwca as SIDI Kucan-Ricaɛtayim, ajeǧid n Aram, deg ufus nnes uca iɣřeb netta x Kucan-Ricaɛtayim.
JDG 3:11 Tareyyeḥ temmurt arebɛin n iseggʷusa. [Xenni] immut Ɛutniyil, mmis n Qanaz.
JDG 3:12 Ayt n Israil arnin ad ggen min [iǧan] d aɛeffan di tiṭṭawin n SIDI. Uca SIDI igga jjehd di Ɛijlun, ajeǧid n Mu’ab, ḍidd i Israil, minzi nitni ggin [min iǧan] d aɛeffan di tiṭṭawin n SIDI.
JDG 3:13 Netta issmun ɣares ayt n Ɛammun u n Ɛamaliq uca iffeɣ, iɣřeb x Israil uca nitni ṭṭfen Tandint n Tcejjura n Tini.
JDG 3:14 Tmenṭac n iseggʷusa tuɣa ayt n Israil ttsexxaren i Ɛijlun, ajeǧid n Mu’ab.
JDG 3:15 [Xenni] sɣuyen ayt n Israil ɣar SIDI uca SIDI igga ad dd-ikkar ijj n umsenjem, Ihud, mmis n Jira, [zi teqbič] n Binyamin, ijj n weryaz i war ittwadarreb mliḥ s ufusi nnes afusi. Uca ayt n Israil ssekken t ḥima ad wcen ict n terzeft i Ɛijlun, ajeǧid n Mu’ab, s ufus nnes.
JDG 3:16 Ihud igga i yixef nnes ijj n ssif ɣares tnayen n řeqduɛ, tuzzeggart nnes anect n ijj n uɣiř, iqqen i-t sadu warruḍ nnes ɣar tmeṣṣaḍt nnes tafusect.
JDG 3:17 Ammu i dd-iqarreb s terzeft ɣar Ɛijlun, ajeǧid n ayt n Mu’ab, Ɛijlun tuɣa d aryaz iṣeḥḥ aṭṭas.
JDG 3:18 Umi tuɣa Ihud ikemmeř timewca n tarzeft, imsar, aqa issqebbeḍ iwdan i tuɣa yarebbun tarzeft [ɣar řaggʷaj],
JDG 3:19 maca netta simant nnes iɛqeb [awarni man aya] zi řexyař ineqcen [i din iǧan] di Jiljal, inna: “Necc ɣari ijj n ssir xak, ajeǧid!” Uca wa inna: “Sqarem!” Marra wi tuɣa ibedden ɣares, ffɣen zi ɣares [ɣar barra].
JDG 3:20 Yusa-dd ɣares Ihud umi Ɛijlun iqqim deg wexxam n nnej asemmaḍ, wenni tuɣa i netta waha. [Xenni] inna Ihud: “Necc ɣari ijj n wawař n AREBBI i cek.” Uca ikkar [ujeǧid] zi řkursi nnes igellden.
JDG 3:21 [Xenni] isswiẓẓeḍ Ihud s ufus nnes azeřmaḍ, ijbed-dd ssif nni x tmeṣṣaḍt nnes tafusect, icukk i-t deg uɛeddis nnes,
JDG 3:22 ařami yudef s ufus nni awarni i řmus n ssif uca tadunt tbelleɛ-dd x řmus, maɣar netta war ikkis ssif zeg uɛeddis nnes. [Xas uca] iffeɣ s webrid n wexxam n yiḍeṣ.
JDG 3:23 [Xenni] iffeɣ Ihud zeg wuffuɣ [n wexxam n wesqif]. Ibelleɛ tiwwura n wexxam n nnej awarni as u yarra zzekrun.
JDG 3:24 [Umi] yuyur netta, usin-dd imsexxaren nnes uca umi ẓrin aqa tiwwura n wexxam n nnej ttwabellɛent s zzekrun, nnan: “Netta aqa idřa [waha] iḍaren nnes deg wexxam asemmaḍ n daxeř.”
JDG 3:25 Nitni qqimen ttrajan ařami dewřen sseṣḥan, u xzar, netta war yarzim ca tiwwura n wexxam n nnej. Nitni ksin ssarut, arzmen tawwart, uca xzar, immenḍar siditsen ɣar temmurt immut.
JDG 3:26 Ihud [maca] tuɣa yarweř, am tuɣa ttrajan nitni. Netta tuɣa ikka x řexyař ineqcen uca yarweř ɣar Siɛirat.
JDG 3:27 Řami dd-yiweḍ netta [dinni], isuḍ deg uyicc n icarri x idurar n Ifrayim. [Xenni] hwan ayt n Israil akides zeg wedrar u netta simant nnes [yuyur] zzat i wudem nsen.
JDG 3:28 Netta inna asen: “Ḍfarem ayi-dd, minzi SIDI iwca awem řɛedyan nwem, ayt n Mu’ab, deg ufus nwem.” Uca nitni ḍfaren t uca ṭṭfen imucan n uẓekkwu n L’Urdun ɣar Mu’ab uca war jjin uřa d ijj ad iẓwa.
JDG 3:29 Di řweqt nni wtin nitni ayt n Mu’ab, ɛřaḥař tenɛac-ařef n yeryazen, marra nitni jehden, iɛeskariyyen, uřa d ijj n weryaz war injim.
JDG 3:30 [Ammu] ittwassdeǧ Mu’ab deg wass nni sadu ufus n Israil uca tareyyeḥ temmurt tmenyin n iseggʷusa.
JDG 3:31 Awarni as yusa-dd Camjar, mmis n Ɛanat, wenni inɣin setta-mya n yeryazen zeg Ifilisṭiniyyen s yijj n řmacam n ifunasen. [Ammu] issenjem uřa d netta Israil.
JDG 4:1 Umi tuɣa Ihud immut, arnin ayt n Israil ad ggen min [iǧan] d aɛeffan di tiṭṭawin n SIDI.
JDG 4:2 SIDI igga i-ten SIDI deg ufus n Yabin, ajeǧid n ayt n Kenɛan, wenni tuɣa iḥekkem di Ḥaṣur. Tuɣa Sisara d akumandar n řɛeskar nnes. Wa tuɣa izeddɣen di Harucit-ha-Xuyim.
JDG 4:3 [Xenni] sɣuyen ayt n Israil i SIDI, maɣar Sisara ɣares tesɛa-mya n ikarruten n uzzař i umenɣi u netta tuɣa issdeǧ ayt n Israil s lɛunf [řmijař n] ɛicrin n iseggʷusa.
JDG 4:4 Tuɣa Dabura, tanabit, ict n temɣart s arruḥ am tmessi, teḥkem Israil di řweqt nni.
JDG 4:5 Nettat tuɣa tᵉqqim [x řkursi n řḥukm] swadday i tcejjart n tini n Dabura, jar Rama d Bayt-Il, x idurar n Ifrayim, uca ayt n Israil geɛɛden ɣares maḥend ad as awyen ddeɛwat [nsen].
JDG 4:6 Nettat tessekk, třaɣa i Baraq, mmis n Abinuɛam zi Qadac di Naftali, tenna as: “Ma war yumur SIDI, AREBBI n Israil: ‘Uyur, ffeɣ ɣar wedrar n Tabur u tawyed akidek ɛecra ařef n yeryazen zeg ayt n Naftali u zeg ayt n Zabulun!
JDG 4:7 Ɣar teɣzart n Qicun necc ad ɣarek nedheɣ Sisara, akumandar n řɛeskar n Yabin, ak-d ikarruten nnes d ubarru nnes [n yeryazen] uca ad ac t-i-dd-wceɣ deg ifassen nnec!’”
JDG 4:8 Baraq inna as: “Mařa cem tuyured akidi, ad uyureɣ, [maca] mařa cem war kidi tuyured, war ggureɣ.”
JDG 4:9 Nettat tenna: “Necc ad kik uyureɣ nican, mɣir war d ac ittiři ccan deg webrid i ɣa tuyured, minzi SIDI ad izzenz Sisara ɣar ufus n ict temɣart.” [Xenni] tekkar Dabura uca tuyur ak-d Baraq ɣar Qadac.
JDG 4:10 [Xenni] Baraq iřaɣa-dd i Zabulun d Naftali ɣar Qadac uca igeɛɛed x iḍaren ak-d ɛecra-ařaf n yeryazen uca uřa d Dabura tuyur akides.
JDG 4:11 Ḥabir, Aqini, wenni tuɣa ittnejřa x Qayin, netta [d ijj n] zeg ayt n Ḥubab, aḍeggʷař n Musa. Aqa iwta iqiḍan nnes ɣar tcejjart n yigg di Ṣaɛanayim nni [iǧan] ɣar Qadac.   *
JDG 4:12 Xebbaren i Sisara, aqa Baraq, mmis n Abinuɛam, igeɛɛed ɣar wedrar n Tabur.
JDG 4:13 [Xenni] issmun-dd Sisara marra ikarruten nnes, tesɛa-mya n ikarruten n wuzzař, d marra řgens i tuɣa ɣares iǧan, zi Ḥarucat-ha-Xuyim ař teɣzart n Qicun.
JDG 4:14 Uca tenna Dabura i Baraq: “Kkar, minzi wa d ass i di iwca SIDI Sisara deg ufus nnec. Ma war dd-itteffeɣ SIDI [simant nnes] ɣar zzat i cek!” [Xenni] ihwa-dd Baraq zeg wedrar n Tabur u ɛecra-ařaf n yeryazen ḍfaren t.
JDG 4:15 SIDI yaẓẓeř x Sisara u x marra ikarruten nnes u x marra řɛeskar nnes s řeqḍeɛ n ssif zzat i wudem n Baraq, [ařami] iḍra x ukarru, yarweř x iḍaren.
JDG 4:16 Uca Baraq iḍfar ikarruten d řɛeskar ař Ḥarucat-ha-Xuyim. Marra řɛeskar n Sisara iwḍa s řeqḍeɛ n ssif, ařami war iqqim uřa d ijj.
JDG 4:17 Sisara yarweř x iḍaren ɣar uqiḍun n Yaɛil, tamɣart n Ḥabir, Aqini, maɣar tuɣa řehna jar Yabin, ajeǧid n Ḥaṣur d taddart n Ḥabir, Aqini.
JDG 4:18 Yaɛil teffeɣ ɣar Sisara, tenna as: “Ejj abrid, [a] sidi inu, ejj abrid ɣari, war tteggʷed!” Uca netta iffeɣ [zeg webrid], [yuyur] ɣares ɣar uqiḍun uca nettat tedřa i-t s ict n tmaltat.
JDG 4:19 Netta inna as: “Ewc ayi aman ad sweɣ, necc dayi afadi!” Nettat tarzem ict n txancet n uɣi u tewca as ad isu, xenni tedřa i-t [twařat nneɣnit].
JDG 4:20 [Xenni] inna as ɛawed: “Bedd ɣar tewwart n uqiḍun uca mařa yusa-dd ijjen isseqsa [cem], iqqar: ‘Ma da ca n ijj?’, xenni arr xas: ‘Uřa d ijj!’”
JDG 4:21 Teṭṭef Yaɛil, tamɣart n Ḥabir, ijj n řewted n uqiḍun uca teksi ijj n wefḍis deg ufus nnes uca tudef ɣares nhřa řḥess uca tewta as řewted deg uɣezdis [n uzeǧif] nnes ařami yiweḍ [řewted] ɣar temmurt. Tuɣa netta yuǧeɣ deg yiḍeṣ s řweḥřan, uca [ammu i] immut.
JDG 4:22 U xzar, Baraq tuɣa iḍeffar Sisara uca teffeɣ Yaɛil, truḥ ad kis temmeřqa, tenna as: “As-dd, ad ac ssecneɣ aryaz wenni x tarezzud!” Netta yudef akides uca aqa Sisara ittazzeř [x temmurt] u řewted di lḥenk [n uzeǧif] nnes.
JDG 4:23 Ammu i ideǧ SIDI Yabin, ajeǧid n Kenɛan, zzat i wudem n ayt n Israil deg wass nni.
JDG 4:24 Afus n ayt n Israil yarenni ad iṭṭef uca idqeř aṭṭas x Yabin, ajeǧid n Kenɛan, ařami tuɣa teḥḥan Yabin, ajeǧid n Kenɛan.
JDG 5:1 Deg wass nni ɣennjen Dabura d Baraq, mmis n Abinuɛam, nnan:
JDG 5:2 “Barkem SIDI i ijeṭṭayen n ucuwwaf ittwafessyen di Israil, s uṭewweɛ n řgens s řxaḍar!
JDG 5:3 Sřem, kenniw, ijeǧiden, sḥessem, kenniw, ayt n jjehd! Necc ad ɣennjeɣ izřan i SIDI, necc ad zehhdeɣ i SIDI, AREBBI n Israil.
JDG 5:4 A SIDI, umi Cek dd-teffɣed zi Saɛir, umi Cek tuɣa teggured zeg iyyar n Idum, tenhezz temmurt, yarjij ujenna, wah, uřa d iseynuten farrɣen-dd s waman.
JDG 5:5 Idurar fesyen zzat i wudem n SIDI, adrar nni n Sina, ifsi zzat i wudem n SIDI, AREBBI n Israil.
JDG 5:6 Deg wussan n Camjar, mmis n Ɛanat, deg wussan n Yaɛil, qqimen ibriden xřan, u inni tuɣa igguren x tebridin, ttekken imesraq iɛarrqen.
JDG 5:7 Imjaheden war qqimen, war qqimen di Israil, ařami kkareɣ necc, Dabura, ařami kkareɣ necc, yemmas n Israil.
JDG 5:8 Umi ifarz řgens irebbiten nneɣni, xenni tuɣa din ijj n umenɣi ineqqen ɣar tewwura. Taseddart n uɛeskar d uḥric, war ittwaẓri ɛad jar arebɛa-ařaf di Israil!
JDG 5:9 Uř inu ak-d imgewwaden n Israil, inni iṭewwɛen ixef nsen jar řgens s řxaḍar, lbaraka i SIDI!
JDG 5:10 A kenniw, inni innayen x teɣyař d ticemřařin, kenniw inni ittɣiman x tzarbiyyin d kenniw inni igguren deg webrid, siwřem x man aya!
JDG 5:11 S tmijja n imjebbaden n řqews i din jar wanuten, aqa ittwaseř wawař x tmegga iseggden n SIDI, timegga iseggden n umjahad n Israil. Xenni ihwa-dd řgens n SIDI ɣar tewwura n tendint.
JDG 5:12 Ḥḍat, ḥḍat, Dabura, ḥḍat, ḥḍat, siweř s yijj n izři! Kkar, Baraq, awi imeḥbas nnec, a cek, mmis n Abinuɛam!
JDG 5:13 Xenni ihwa kuř wi yarewřen ɣar ayt n jjehd n řgens, SIDI ihwa-dd ɣari ak-d ayt n bu-teɣruḍt.
JDG 5:14 Zeg Ifrayim usin-dd inni aẓwar nsen di Ɛamaliq u awarni ac yuyur Binyamin jar řɛeskarat n yewdan nnec. Zi Maxir hwan imgewwaden, u zi Zabulun inni iṭṭfen aɛekkaz n wenni iḥessben.
JDG 5:15 Řḥukkam n Issakar hwan-dd ak-d Dabura, uca am mammec ittwassekk Issaxar, ammu i ittwassekk uřa d Baraq di řewḍa n teɣzurt. Di řeṣfuf n Rubin tuɣa ixarriṣen n wuř d aṭṭas.
JDG 5:16 Mayemmi teqqimed jar iɣendifen, tessḥessed ɣar wesbuɛriy n tḥimriwin? Di řeṣfuf n Rubin ggin ad beqqcendeg wuř aṭṭas.
JDG 5:17 Jilɛad iqqim izeddeɣ x ujemmaḍ n L’Urdun u mayemmi iqqim Dan ɣar tɣarruba? Acir iqqim ɣar tma n řebḥar uca iqqim izdeɣ ɣar iftasen nnes.
JDG 5:18 Zabulun d ijj n řgens isebbeř tudart nnes ař řmewt, am t igga uřa d Naftali x řegɛudi n wazzay n umenɣi.
JDG 5:19 Ijeǧiden usin-dd, mmenɣen. Řexdenni mmenɣen ijeǧiden n Kenɛan di Taɛnak ɣar waman n Majiddu, maca war ksin takeccaḍt n nnuqart.
JDG 5:20 Minzi itran mmenɣen zeg ujenna, mmenɣen ak-d Sisara zi tebridin nsen.
JDG 5:21 Iɣzar n Qicun iwyi i-ten, tiɣzart n mecḥař uya, tiɣzart n Qicun! Uyur s jjehd, a řeɛmar inu.
JDG 5:22 Řexdenni nnxuxřent ticeḍyin n iysan zeg urabeɛ břa uqeṭṭu zeg ayt n bu-ṣṣulṭa nnes.
JDG 5:23 Neɛřem Miruz, inna lmalak n SIDI, neɛřem imezdaɣ nnes s ict n nneɛřet, minzi war dd-usin ḥima ad wcen afus i SIDI, ḥima ad wcen afus i SIDI s ayt n bu-teɣruḍt nsen.
JDG 5:24 Tettwabarek Yaɛil, tamɣart n Ḥabir, Aqini, sennej i marra timɣarin. Tettwabarek nettat sennej i marra timɣarin izeddɣen deg iqiḍan.
JDG 5:25 Netta ittar aman, nettat tewca as aɣi, tiwi as-dd trussi deg ict n ṭṭebṣi d ameqqran aṭṭas.
JDG 5:26 S ufus nnes tesswiẓẓeḍ ɣar řewted, afus afusi nnes ɣar wefḍis n ixeddamen. Nettat tewta Sisara, texbeḍ as x uzeǧif nnes, teřbez uca tessnuqqeb as aɣezdis n uzeǧif nnes.
JDG 5:27 Ikmummec jar iḍaren nnes, ibbuzzeř, aqa izzeř din. Aqa ikmummec jar iḍaren nnes, ibbuzzeř. Umi tuɣa ittekmummuc, iwḍa din, uca iwḍa-dd iřeqqef!
JDG 5:28 Zi řkazi nnes texzar-dd yemmas n Sisara uca tesɣuy jar iqḍiben n wuzzař ‘Mayemmi iɛeṭṭař ukarru nnes n umenɣi ammu aṭṭas? Mayemmi iɛeṭṭař ddriz n ikarruten nnes’
JDG 5:29 Inni d tiɣmisin aṭṭas jar tjeǧidin nnes arrint-i-dd, uca uřa d nettat simant nnes tarra-dd x min tenna:
JDG 5:30 ‘Ma xenni nitni war ufin walu uca aqa aten war beṭṭin takeccaḍt? I kuř aryaz ijehden ict n teɛzarect niɣ tnayen n teɛzariyyin? Takeccaḍt n ikettanen ittwassqareqcen i Sisara, takeccaḍt n ikettanen ittwassqareqcen, aburḍa, řxedmet n umudi ɣar tnayen n iɣezdisen zeg ukettan ittwassqareqcen i irawen, am tkeccaḍt?’
JDG 5:31 Ammu i ɣa hellken řɛedyan nnec, a SIDI, maca inni Cek ittexsen ad iřin am tfuct i dd-ineqqaren di jjehd nnes.” [Awarni aya] tareyyeḥ temmurt arebɛin n iseggʷusa.
JDG 6:1 [Maca] ayt n Israil ggin min [iǧan] d aɛeffan di tiṭṭawin n SIDI uca isellem i-ten SIDI deg ufus n Midyan, [ijj n řmijař n] sebɛa n iseggʷusa.
JDG 6:2 [Umi] tuɣa afus n Midyan ijhed x Israil, ggin ayt n Israil i yixef nsen ifran deg idurar d ixerdusen d lqelɛat ḍidd i Midyan.
JDG 6:3 [Awarni řami] tuɣa zarrɛen ayt n Israil, ttgeɛɛed Midyan uca uřa d ayt n Ɛamaliq d ayt n ccarq ttgeɛɛden ḍidd nsen.
JDG 6:4 Nitni wtin iqiḍan nsen ḍidd nsen uca areddǧen řɣiǧet n temmurt ař [jjwayeh] n Ɣazza. Nitni war jjin di Israil i zi ɣa iddar [bnadem], řa d uǧi, řa d afunas uřa d aɣyuř.
JDG 6:5 Maɣar nitni geɛɛden s tḥimriwin nsen d iqiḍan nsen uca usin-dd am yijj n weyřaf n tmurɣi. War izemmar ad ttwaḥesben ak-d iřeɣman nsen uca nitni udfen ɣar tammurt, ḥima ad tt areddǧen.
JDG 6:6 [Ammu] iẓřeḍ Israil aṭṭas zi ssibbet n Midyan. Uca [xenni] sɣuyen ayt n Israil ɣar SIDI.
JDG 6:7 Xmi sɣuyen ayt n Israil ɣar SIDI di ssibbet n Midyan, imsar,
JDG 6:8 aqa SIDI issekk-dd ijj n weryaz, ijj n unabi, ɣar ayt n Israil. Netta inna asen: “Ammu i iqqar SIDI, AREBBI n Israil: ‘Necc ssgeɛɛdeɣ kenniw zi Miṣra u ssuffɣeɣ-dd kenniw zi taddart n tesmuɣi.
JDG 6:9 Necc fekkeɣ-dd kenniw zeg ufus n Imiṣriyyen u zeg ufus n marra inni kenniw iḥṣaren. Necc uẓẓřeɣ xasen zzat i wudem nwem u wciɣ awem tammurt nsen.
JDG 6:10 Necc nniɣ awem: Necc d SIDI, AREBBI nwem, war ttɛebbdem irebbiten n Imuriyyen, inni di temmurt nsen tzeddɣem!’ [Maca] kenniw war tesřim ɣar tmijja inu.”
JDG 6:11 [Xenni] yusa-dd lmalak n SIDI uca iqqim sadu n tcejjura n yigg nni iǧan ɣar Ɛafra, tenni n Yuwac, Abiɛazari. Mmis Jidɛun tuɣa-t [din] issarwat irden di tsirt n uḍiř ḥima ad t issarweř ammu zzat i wudem n Midyan.
JDG 6:12 [Řexdenni] iban as-dd lmalak n SIDI, inna as: “SIDI akidek, a cek, bu-teɣruḍt imeḥḍen!”
JDG 6:13 Jidɛun inna as: “A, Sidi inu, mařa SIDI aqa-t akidneɣ, mayemmi i d aneɣ iřqef [xenni] marra uya u mani ǧan marra řeɛjayeb i x d aneɣ ssiwřen řejdud nneɣ, umi nitni nnan: ‘Ma war d aneɣ-dd issuffeɣ SIDI zi Miṣra?’ Maca řexxu inḍar aneɣ SIDI, isellem aneɣ deg ifassen n Midyan.”
JDG 6:14 [Rexdenni] idweř-dd ɣares SIDI, inna: “Uyur di jjehd nnec wanita uca ad tfekked Israil zeg ufus n Midyan. Ma Necc war cek-dd ssekkeɣ?”
JDG 6:15 [Maca] netta yarra-dd xas: “A Sidi inu, s minzi i ɣa fekkeɣ Israil? Xzar řwacun inu d tamezřuḍt qaɛ di Manassa u necc d amudrus qaɛ di taddart n baba.”
JDG 6:16 Inna as SIDI: “Minzi Necc ad iřiɣ akidek, ad tɣeřbed Midyan, axmi d ijj n weryaz waha.”
JDG 6:17 [Xenni] inna as netta: “Mařa [xenni] ufiɣ arḍa di tiṭṭawin nnec, [xenni] iwca ayi ict n řeɛřamet, aqa d Cek simant nnec i kidi issawařen.
JDG 6:18 War ssa ttraḥ ca, ař ɣarek dd ɣa ɛeqbeɣ ad tiři iwyeɣ-dd tewhibt inu u ad tt-i-dd-ssarseɣ zzatek.” Netta inna: “Ad qqimeɣ ař dd ɣa tɛeqbed.”
JDG 6:19 Uca yudef Jidɛun, issewjed ijj n iɣayḍ d ameẓyan zeg iɣayḍen d iɣrumen břa aɣrum zeg yijj n ifa n waren. Netta issars aysum di tṣuǧet, igga arrwa deg ict n teydurt uca yiwi [man aya] ɣares ɣar barra sadu tcejjart n yigg uca issars as [man aya].
JDG 6:20 [Maca] inna as lmalak n AREBBI: “Ksi aysum d iɣrumen břa antun u tessarsed ten [da] x teṣḍart uca zeǧeɛ xas arrwa!” Uca ammu i t igga.
JDG 6:21 [Xas] uca isarreḥ lmalak n SIDI tixeft n teɣɣarct i tuɣa ɣares deg ufus, iḥada zzayes aysum d iɣrumen břa antun. [Řexdenni] tgeɛɛed tmessi zi teṣḍart, tecca aysum d iɣrumen. [Xenni] innufseř lmalak n SIDI x tiṭṭawin n Jidɛun.
JDG 6:22 [Umi] Jidɛun iẓra, aqa tuɣa-t d lmalak n SIDI, inna Jidɛun: “A, Sidi inu, SIDI, aqa necc ẓriɣ lmalak n SIDI aɣembub deg uɣembub.”
JDG 6:23 [Maca] SIDI yarra-dd xas: “[Ad] kidek [yiři] řehna, war tteggʷed ca, cek war ttmettid.”
JDG 6:24 Uca Jidɛun ibna dinni ijj n uɛalṭar i SIDI, igga as: “SIDI d řehna!” Aqa-t di Ɛafra n [ayt n] Abiɛazari ař ass-a.
JDG 6:25 Di ǧiřet nni simant nnes, imsar aqa SIDI inna as: “Ksi ijj n ufunas ameẓyan zeg ifunasen [i iǧan] n babac, aqa afunas ameẓyan wiss tnayen n sebɛa n iseggʷusa uca ɣḍeř aɛalṭar n Baɛl [i iǧan] n babac u zdem tarebbit n cwarti nni zzates!
JDG 6:26 Bna [xenni] ijj n uɛalṭar i SIDI, AREBBI nnec, x tqiccat n lqelɛa-ya, sewjed i-t, uca ksi afunas ameẓyan wiss tnayen uca awyi t-i-dd d tɣarṣt n wecmaḍ s ukeccuḍ n trebbit n cwarti nni ittxeṣṣa ad tzedmed.”
JDG 6:27 [Xenni] iksi Jidɛun ɛecra n yeryazen zeg imsexxaren nnes uca igga am mammec d as inna SIDI. [Maca] umi netta iggʷed zi [řwacun] n taddart n babas u zeg yeryazen n tendint ad t igg s wass, igga i-t di ǧiřet.
JDG 6:28 Umi dd-kkaren yeryazen n tendint tiwecca zic, ẓrin nitni aqa aɛalṭar n Baɛl ittwahdem uca tᵉttwazdem trebbit n cwarti nni zzates u afunas ameẓyan wiss tnayen ittwabexxar x uɛalṭar i [din] ittwabnan.
JDG 6:29 Uca nnan i wayawya: “Man wen iggin aya?” Nitni sseqsan, arzun uca nnan: “Jidɛun, mmis n Yuwac, i-t iggin.”
JDG 6:30 [Xenni] nnan yeryazen n tendint i Yuwac: “Sufeɣ-dd mmic [ḥima] ad immet, minzi netta iɣḍer aɛalṭar n Baɛl u minzi netta izdem tarebbit n cwarti i zzates [iǧan].”
JDG 6:31 Yuwac yarra-dd x marra inni i dd ɣares ibedden: “Ma texsem ad tmenɣem i Baɛl? Ma texsem ad t tessnejmem? Wenni akides i ɣa ibedden, ad ittwaneɣ di ṣṣbeḥ-a wanita. Mařa netta d ijj n arebbi, ejj i-t ad immneɣ i yixef nnes nnit, minzi ɣeḍřen aɛalṭar nnes.”
JDG 6:32 Deg wass nni iřaɣa as-dd [i Jidɛun] Yarubbaɛl, min ixs ad yini: “Baɛl immneɣ akides, maɣar netta iɣḍeř aɛalṭar nnes.”
JDG 6:33 Marra Midyan d Ɛamaliq d ayt n ccarq munen uca ẓwan-dd [L’Urdun] uca wtin iqiḍan nsen di řewḍa n teɣzurt n Yazraɛil.
JDG 6:34 Arruḥ n SIDI issyarḍ i Jidɛun uca netta isuḍ deg uyicc n icarri uca iřaɣa-dd x ayt n Abiɛazar maḥend [ad bedden] awarni as.
JDG 6:35 Issekk ireqqasen di marra Manassa uca ittwařaɣa Manassa [maḥend ad bedden nitni] awarni as. Xenni issekk ireqqasen ɣar Acir u ɣar Zabulun u ɣar Naftali uca nitni geɛɛden maḥend ad ten mmeřqan.
JDG 6:36 [Xas] uca inna Jidɛun i AREBBI: “Mařa Cek texsed [s tidett] ad tfekked Israil s ufus inu am mammec i d ayi tennid,
JDG 6:37 xzar, [xenni] necc ad ssarseɣ tahiḍurt n taḍuft x unedrar. Mařa iwḍa nnda mɣir x taḍuft waha, [maca] tammurt marra [teqqim] tuẓeɣ, [xenni] ssneɣ necc, aqa Cek ad tessnejmed Israil s ufus inu, am mammec i d ayi tennid.”
JDG 6:38 U ammu i temsar. Tiwecca nnes ikkar zic uca izři tahiḍurt uca iẓemm-dd nnda zi thiḍurt, ict n ṭṭawya teccur s waman.
JDG 6:39 [Xas uca] inna Jidɛun i AREBBI: “Ttzawgeɣ war xafi yareqq weɣḍab nnec mařa necc ssiwřeɣ ict n twařa nneɣnit. Ejj ayi ad qeǧbeɣ s thiḍurt [ɛad] ict n twařa nneɣni waha, uca ad teqqim thiḍurt tuẓeɣ u x marra tammurt [ad din yiři] nnda.”
JDG 6:40 Uca di ǧiřet nni igga [i-t] SIDI ammu: tahiḍurt waha i iqqimen tuẓeɣ u tuɣa nnda x marra tammurt.
JDG 7:1 Yarubbaɛl, wa d Jidɛun, ikkar zic uřa d marra řgens i ɣares iǧan uca wtin nitni řmargeḥ n řɛeskar nsen ɣar tařa n Ḥarud. Řmargeḥ n Midyan tuɣa iǧan zzates ɣar ccamal, zi tewrirt n Mura di řewḍa n teɣzurt.
JDG 7:2 SIDI inna i Jidɛun: “Řgens i ɣarek [iǧan] aqa-t deg waṭṭas. Ammu war zemmareɣ ad asen ggeɣ Midyan deg ufus nsen, niɣ izemmar Israil ad xafi ifeyyec ad yini: ‘Afus inu issenjem ayi.’
JDG 7:3 S uya, řaɣa deg imezzuɣen n řgens, ini: ‘Wenni itteggʷeden d wenni ittarjijen ad iɛqeb uca ad iffeɣ deɣya zeg idurar n Jilɛad!’” [Xenni] ɛeqben tnayen u-ɛicrin-ařef [n yeryazen] zi řgens uca qqimen [ɣares] ɛecra-ařaf.
JDG 7:4 [Maca] SIDI inna i Jidɛun: “Řgens aqa-t ɛad deg waṭṭas. Sehwa ten ɣar waman, dinni ad ten ddzeɣ i cek. Ad imsar x wenni i d ac ɣa iniɣ: ‘Wa ad kik iraḥ!’, win ad kik iraḥ, maca kuř ijj i x d ac ɣa iniɣ: ‘Wanita war kik ittriḥ!’, win war kik ittriḥ.”
JDG 7:5 Issehwa řgens ɣar waman. [Xenni] inna as SIDI: “Kuř ijj wenni i ɣa iřesḥen aman s yiřes nnes, am mammec i [ten] iřesseḥ weqzin, ad t tegged ɣar ijj n ṭṭarf. Ammu uřa d marra inni i ɣa yaḍaren x ifadden maḥend ad swen.”
JDG 7:6 Řqedd n yinni iwyen [aman] s ufus nsen ɣar uqemmum nsen maḥend ad řesḥen [aman] s yiřes nsen, tuɣa aten di teřt-mya n yeryazen, maca marra inneɣni uḍaren x ifadden ḥima ad swen aman.
JDG 7:7 [Xas] uca inna SIDI i Jidɛun: “S [ufus n] teřt-mya n yeryazen-a, inni iřesḥen [aman] s yiřes nsen, ad kenniw ssnejmeɣ u Necc ad ggeɣ Midyan deg ufus nnec. Marra řgens [nneɣni i iqqimen] ad uyuren, kuř ijj ɣar wemcan nnes.
JDG 7:8 Nitni ksin řeɛweč n řgens d waccawen nsen n icarri deg ufus, [umi] netta issekk marra iryazen n Israil, kuř ijj ɣar uqiḍun nnes. [Maca] teřt-mya n yeryazen nni ijja i-ten [ɣares]. Tuɣa řmargeḥ n řɛeskar n Midyan swadday nnes di řewḍa n teɣzurt.
JDG 7:9 Di ǧiřet nni temsar, aqa SIDI inna as: “Kkar bedd, hwa ɣar řmargeḥ n řɛeskar, maɣar Necc ggiɣ ac ten deg ufus nnec.
JDG 7:10 Mařa cek aqa teggʷded [ɛad] maḥend ad dd-tehwid, hwa-dd [xenni] ɣar řmargeḥ n řɛeskar ak-d Fura, amsexxar nnec.
JDG 7:11 Ad tesřed min xef ssawařen, uca xenni ad ac immewc jjehd deg ifassen nnec ařami ɣa tzemɛed ad tehwid ɣar řmargeḥ n řɛeskar.” [Xenni] ihwa netta ak-d Fura, amsexxar nnes, ařami [iwḍen] ař zzat i terbiɛin isswejden i umenɣi ɣar ṭṭarf n řmargeḥ.
JDG 7:12 Uca Midyan d Ɛamaliq d marra ayt n ccarq tuɣa ssun di řewḍa n teɣzurt am yijj n weyřaf n tmurɣi u iřeɣman nsen war zemmaren ad ttwaḥesben, tuɣa aten deg waṭṭas am yijdi ɣar tma n řebḥar.
JDG 7:13 [Umi] yiweḍ Jidɛun [din], xzar, ijj n weryaz, tuɣa ittḥaja i umeddukkeř nnes ict n tarjit, inna: “Xzar, necc ɣari ict n tarjit uca ẓriɣ mammec ijj n weɣrum n imendi i iwḍan ɣar swadday iqnunni-dd ɣar daxeř n řmargeḥ n řɛeskar n Midyan uca yiweḍ ař aqiḍun uca iřqef i-t ařami iwḍa u idweř x uzeǧif. Aqa [ammu i] iwḍa uqiḍun.”
JDG 7:14 Yarra-dd [xas] umeddukkeř nnes, inna: “Aya war ixs ad yini mɣir ssif n Jidɛun, mmis n Yuwac, aryaz zi Israil. AREBBI iwca Midyan d marra řmargeḥ n řɛeskar deg ufus nnes.”
JDG 7:15 [Umi] isřa Jidɛun tarjit-a d min texs ad tini, yuḍar uca [xenni] iɛqeb ɣar řmargeḥ n řɛeskar n Israil, inna: “Kkarem, SIDI igga řmargeḥ n řɛeskar n Midyan deg ufus nwem.”
JDG 7:16 Jidɛun ibḍa teřt-mya n yeryazen x třata n ibaṭayunen uca iwca kuř ijj [zzaysen] ijj n uyicc n icarri deg ufus nnes d ijj n weqḍuḥ ixwan d ijj n uṣefḍaw deg weqḍuḥ.
JDG 7:17 Netta inna asen: “Xzarem-dd ɣari uca ggem amenni. Xzar, mařa iwḍeɣ ɣar ṭṭarf n řmargeḥ, xenni ad teggem uřa d kenniw am mammec i ɣa ggeɣ necc.
JDG 7:18 Xmi ɣa suḍeɣ necc deg uyicc n icarri uřa d marra inni ɣari iǧan, xenni ad tsuḍem uřa d kenniw deg waccawen n icarri ɣar marra iɣezdisen n řmargeḥ, ad tinim: ‘I SIDI u i Jidɛun!’”
JDG 7:19 Uca Jidɛun d mya n yeryazen nni tuɣa ɣares, iwḍen-dd ɣar ṭṭarf n řmargeḥ n řɛeskar ɣar umezwaru n tɛessast n wezyen [n ǧiřet], umi ten tuɣa [ɛad] ggur ad ssbedden iɛessasen, uca suḍen deg waccawen n icarri, uca nitni wtin, arẓin iqḍuḥen nni ɣarsen deg ufus nsen.
JDG 7:20 Třata n ibaṭayunen suḍen deg waccawen n icarri uca arẓin iqḍuḥen u s ufus aẓeřmaḍ ṭṭfen iṣefḍawen u s ufus afusi accawen n icarri ḥima ad [daysen] suḍen uca sɣuyen: “Ssif n SIDI d Jidɛun!”
JDG 7:21 Qqimen bedden ɣar marra iɣezdisen n řmargeḥ kuř ijj deg wemcan nnes. [Xenni] bdan ad aẓẓřen [marra inni iǧan di] řmargeḥ, sɣuyen uca arewřen.
JDG 7:22 [Umi] suḍen teřt-mya n yeryazen deg waccawen n icarri, issekkar SIDI ssif n ijjen ḍidd i wenneɣni di marra řmargeḥ uca yarweř řɛeskar ař Bayt-Ciṭṭa, jjihet n Zarara ař tma n [yeɣzar i iǧan ɣar] Abil-Maḥula ɣar Ṭabbat.
JDG 7:23 [Xenni] řaɣan-dd x yeryazen n Israil, zi Naftali u zi Acir u zi marra Manassa uca ḍfaren nitni [ayt n] Midyan.
JDG 7:24 [Ɛawed] issekk Jidɛun ireqqasen ɣar marra idurar n Ifrayim, inna: “Hwam, uyurem ɣar umsagar ak-d ayt n Midyan u tekksem as iɣezran ař Bayt-Bara uřa d L’Urdun.” Ttwařaɣan marra iryazen n Ifrayim uca nitni ṭṭfen iɣezran ař Bayt-Bara d L’Urdun.
JDG 7:25 Nitni ḥebbsen tnayen n řḥukkam n Midyan, Ɣurab d Di’ab, uca nɣin Ɣurab x teṣḍart n Ɣurab u Di’ab nɣin t x tsirt [n uḍiř] n Di’ab uca nitni ɛerfen x Imidyaniyyen. Izeǧifen n Ɣurab d Di’ab iwyen ten ɣar Jidɛun x ujemmaḍ n L’Urdun.
JDG 8:1 [Xenni] nnan as yeryazen n Ifrayim: “Manawya i d aneɣ da teggid, aqa cek war i d xaneɣ třiɣid umi teffɣed, ḥima ad temmenɣed ak-d Midyan?” Uca nitni mmcubbecen akides aṭṭas.
JDG 8:2 [Jidɛun] yarra-dd xasen: “Mani i dd ɣa yas min ggiɣ ak-d min teggim? Ma war iǧi ařqaḍ n min iyuran n uḍiř n ayt n Ifrayim xar zi řɣiǧet n binu n ayt n Abiɛazar?
JDG 8:3 SIDI igga Ɣurab d Di’ab, řḥukkam n Midyan, deg ufus nwem. Min zemmareɣ ad ggeɣ ad t ssemquddeɣ akidwem?” Umi netta inna awař-a yarsa uxeyyeq nsen.
JDG 8:4 [Umi] dd-yusa Jidɛun ɣar L’Urdun, iẓwa netta ak-d teřt-mya n yeryazen nni tuɣa ɣares iǧan. Nitni fnan řami ten qqimen ḍeffaren [ayt n Midyan].
JDG 8:5 Inna netta i yeryazen n Sukkut: “Ttzawgeɣ, wcem i řgens i dd ayi iḍfaren x iḍaren ticnifin n weɣrum, maɣar nitni fnan u necc aqa ḍeffareɣ Zabaḥ d Ṣalmunnaɛ, ijeǧiden n Midyan.”
JDG 8:6 [Maca] řḥukkam n Sukkut nnan: “Zabaḥ d Ṣalmunnaɛ, ma aqa aten deg ufus nnec, maḥend ad newc aɣrum i řɛeskar nnec?”
JDG 8:7 S uya inna Jidɛun: “Xenni řexxu, xmi d ayi ɣa igg SIDI Zabaḥ d Ṣalmunnaɛ deg ufus inu, [xenni] ad awem ssarewteɣ aysum n arrimet nwem ak-d isennanen d yeẓra n tmessi zi řexřa.”
JDG 8:8 Uca igeɛɛed ssenni ɣar Fanuwil uca issiweř amenni akidsen. Arrin-dd xas yeryazen n Fanuwil am mammec i dd-arrin yeryazen n Sukkut.
JDG 8:9 S uyenni issiweř ɛawed ak-d yeryazen n Fanuwil, inna: “Mařa necc ɛeqbeɣ-dd di řehna, ad hedmeɣ ṣṣumɛet-a ta.”
JDG 8:10 [Tuɣa] Zabaḥ d Ṣalmunnaɛ ak-d řɛeskar nsen di Karkur, tuɣa aten ɛřaḥař di xemmesṭac-ařef n yeryazen, marra inni tuɣa iqqimen zi marra řɛeskar n ayt n ccarq. Aqa mya u-ɛicrin-ařef n yeryazen inni izemmaren x ssif tuɣa ttwanɣen [ɛad].
JDG 8:11 Uca igeɛɛed Jidɛun ak-d webrid n yinni izeddɣen deg iqiḍan, ɣar ccarq n Nubaḥ d Yujbaha u netta iɣřeb x řɛeskar nni, umi [iɛeskariyyen di] řmargeḥ [ittɣiř asen] aqa aten di řaman.
JDG 8:12 Zabaḥ d Ṣalmunnaɛ arewřen uca netta iḍfar i-ten. Iṭṭef tnayen n ijeǧiden n Midyan, Zabaḥ d Ṣalmunnaɛ, d imeḥbas uca issiggʷed marra řɛeskar.
JDG 8:13 [Umi] dd-iɛqeb Jidɛun, mmis n Yuwac, zeg umenɣi, ikka x tsunta n Ḥaras,
JDG 8:14 iṭṭef ijj n webřiɣ zeg yeryazen n Sukkut d ameḥbus uca isseqsa t. Wanita yura as [marra ismawen n] řḥukkam n Sukkut d imɣaren nsen, sebɛa u-sebɛin n yeryazen.
JDG 8:15 [Umi] dd-yiweḍ netta ɣar yeryazen n Sukkut, inna: “Ina d Zabaḥ d Ṣalmunnaɛ, inni zi i d ayi tessbarrqem umi tennam: ‘Ma Zabaḥ d Ṣalmunnaɛ aqa aten deg ufus nnec ař ɣa newc aɣrum i yeryazen nnec nni yuḥřen?’”
JDG 8:16 [Xenni] iṭṭef imɣaren n tendint d isennanen d iẓra n tmessi zi řexřa uca igga iryazen n Sukkut ad zzayes acan.
JDG 8:17 Lburj n Fanuwil ihdem i-t u inɣa iryazen n tendint.
JDG 8:18 [Xenni] inna i Zabaḥ d Ṣalmunnaɛ: “Mammec iǧan yeryazen nni tenɣim di Tabur?” Nitni arrin-dd xas: “Nitni tuɣa aten am cek, [ɣarsen] addud d ijjen [ak-d] iḥenjiren n ujeǧid.”
JDG 8:19 [Xenni] inna: “Nitni tuɣa d aytma, iḥenjiren n yemma. S tidett am iddar SIDI, mři ten tejjim ad ddaren, iři war kenniw neqqeɣ!”
JDG 8:20 [Xenni] inna i Yatar, amenzu nnes: “Kkar, neɣ i-ten!” [Maca] abřiɣ war dd-ikkis ssif nnes, minzi netta iggʷed umi ɛad d abřiɣ.
JDG 8:21 [Xenni] nnan Zabaḥ d Ṣalmunnaɛ: “Kkar cek simant nnec uca neɣ aneɣ, maɣar mammec aryaz, ammu tizemmar nnes.” Uca ikkar Jidɛun, inɣa Zabaḥ d Ṣalmunnaɛ uca iksi tiziriwin timeẓyanin i d yuyřen ɣar irawen n iřeɣman nsen.
JDG 8:22 Uca iryazen n Israil nnan i Jidɛun: “Ḥekmet xaneɣ, cek uřa d mmic d wayyaw nnec, maɣar cek tfekked aneɣ zeg ufus n Midyan.”
JDG 8:23 Inna asen Jidɛun: “Necc war xawem ḥekkmeɣ uřa d mmi war xawem iḥekkem. SIDI d wenni i xawem i ɣa iḥekmen.”
JDG 8:24 Jidɛun yarni inna asen: “Necc xseɣ ad zzaywem ttareɣ ca. Ad ayi iwc kuř ijj n weryaz ict n texrazt zi tkeccaḍt nnes!”, minzi [ttwafen] ɣarsen texrazin n wureɣ, maɣar nitni tuɣa aten d ayt n Ismaɛil.
JDG 8:25 Nitni nnan: “Neccin ad ac tent newc s řxaḍar!” Nitni bezzɛen ijj n werruḍ uca kuř aryaz inḍar xas ict n texrazt zi tkeccaḍt nnes.
JDG 8:26 Tixrazin n wureɣ nni ittar weznent sbeɛṭac-mya n [ciqlu] wureɣ, nhřa tiziriwin timeẓyanin d texrazin di ṣṣifet n tuddimin d werruḍ arjuwani i tuɣa yarḍen ijeǧiden n Midyan, nhřa tiseddyin [i yuyřen] ɣar irawen n iřeɣman nsen.
JDG 8:27 Jidɛun igga zzayes ijj n upalṭu [n ukehhan] uca igga i-t di tendint nnes, di Ɛafra, u marra Israil yuyur awarni as am awarni i yict n temɣart n farq-ccɣeř. Aya idweř d řfex i Jidɛun d taddart nnes.
JDG 8:28 [Ammu] tuɣa innbehdeř Midyan zeg ayt n Israil uca war zemmaren ad ssgeɛɛden azeǧif nsen ɛad. Tuɣa tammurt tareyyeḥ arebɛin n iseggʷusa deg wussan n Jidɛun.
JDG 8:29 Uca Yarubbaɛl, mmis n Yuwac, yuyur uca izdeɣ [ɛawed] di taddart nnes.
JDG 8:30 Jidɛun tuɣa ɣares sebɛin n iḥenjiren inni dd-iffɣen zi tmeṣṣaḍt nnes, minzi tuɣa ɣares aṭṭas n temɣarin.
JDG 8:31 Uřa d tayya nnes tenni [tuɣa iǧan] di Cakim, tejja as-dd ijj n uḥenjir u netta igga as Abimalik.
JDG 8:32 Jidɛun, mmis n Yuwac, immut [umi] acuwwaf nnes [tuɣa] icab aṭṭas uca nḍřen t deg wenḍeř n babas Yuwac, di Ɛafra, [tandint] n Abiɛazari.
JDG 8:33 [Awarni řami] immut Jidɛun, imsar, aqa ayt n Israil dewřen-dd uca ssfesden ixef nsen am uyuren awarni i ‘Ibaɛlen’ uca ggin Baɛl-Barit d arebbi nsen.
JDG 8:34 Ayt n Israil war fekkaren ɛad di SIDI, AREBBI nsen, wenni ten ifekken zeg ufus n marra řɛedyan i d asen dd-innḍen
JDG 8:35 uca war ssecnen tamexsiwt icewwaren i taddart n Yarubbaɛl, d tenni n Jidɛun, x marra řxar i igga di ṭṭweɛ n Israil.
JDG 9:1 Abimalik, mmis n Yarubbaɛl, yuyur ɣar Cakim, ɣar aytmas n yemmas. Netta issiweř akidsen u ak-d marra řwacun n taddart n babas n yemmas, inna:
JDG 9:2 “Siwřem maca deg imezzuɣen n marra imezdaɣ n Cakim: ‘Min iǧan mliḥ i kenniw: mařa sebɛin n yeryazen ad xawem ḥekmen, marra iḥenjiren n Yarubbaɛl, niɣ mařa mɣir ijj n weryaz waha ad xawem iḥkem? Ɛeqřem ɛawed, aqa necc d iɣussan nwem d aysum nwem.’”
JDG 9:3 [Xenni] ssiwřen aytmas n yemmas marra awařen-a deg imezzuɣen n marra imezdaɣ n Cakim ařami uř nsen imeyyeř ad dd-yas ak-d Abimalik, maɣar nitni nnan: “Netta d umatneɣ.”
JDG 9:4 Nitni wcin as sebɛin n [uqiyyat n] nnuqart zi zzawect n Baɛl-Barit. Zzaysent icra Abimalik iryazen ixwan d yinni iṭarrcen, uca nitni ḍeffaren t-i-dd.
JDG 9:5 Yudef ɣar taddart n babas di Ɛafra u inɣa x ijj n weẓru aytmas, iḥenjiren n Yarubbaɛl, sebɛin n yeryazen. Mɣir Yutam, aḥenjir amaẓuẓ n Yarubbaɛl iqqim weḥḥdes, minzi netta tuɣa innuffar.
JDG 9:6 Uca munen marra imezdaɣ n Cakim d marra inni di lqelɛa uca ffɣen, ggin Abimalik d ajeǧid ɣar tcejjart n yigg nni [iǧan] deg wemcan [iqeddsen] ɣar Cakim.
JDG 9:7 Nitni xebbaren aya i Yutam, ikkar ibedd x tqiccat n wedrar n Jarizim. Issgeɛɛed tmijja nnes, inna asen: “Sřem ɣari, [a kenniw] imezdaɣ n Cakim, uca AREBBI ad ɣarwem iseř!”
JDG 9:8 “Acḥař uya kkarent tcejjura, ffɣent ḥima ad dehnent ijj n ujeǧid x yixef nsent uca nnant i uzemmur: ‘Iři cek d ajeǧid nneɣ!’
JDG 9:9 Azemmur inna asen: ‘Ma ad semḥeɣ di tadunt [n zzect] inu nni i d ayi issemɣar AREBBI d iwdan? Ma ad ḍweɣ sennej i tcejjura nneɣni?’
JDG 9:10 Uca nnant tcejjura i wartu: ‘As-dd, iři cek d ajeǧid nneɣ!’
JDG 9:11 Urtu inna asen: ‘Ma ad semḥeɣ di taẓyudi inu d řɣiǧet iṣebḥen inu? Ma ad ḍweɣ sennej i tcejjura nneɣni?’
JDG 9:12 Uca nnant tcejjura i tzayart: ‘As-dd, iři cem d ajeǧid nneɣ!’
JDG 9:13 [Maca] tenna asen tzayart: ‘Ma ad semḥeɣ di binu n jdid inu nni issefraḥen AREBBI d iwdan? Ma ad ḍweɣ sennej i tcejjura nneɣni?’
JDG 9:14 [Xenni] nnan marra ticejjura i cbarq ak-d isennanen: ‘As-dd, iři cek d ajeǧid nneɣ!’
JDG 9:15 Uca cbarq ak-d isennanen inna i tcejjura: ‘Mařa texsent kennint s tidett ad ayi tdehnent d ajeǧid xakent, asent-dd xenni, afent adurri di tiři inu, maca mařa lla, [xenni] ad tekkar tmessi zi cbarq ak-d isennanen, ad tecc [ticejjura n] tengelt n Lubnan.’”
JDG 9:16 Řexxu xenni, kenniw, [imezdaɣ n Cakim], mařa teggim s tidett d řeṣfayet [umi] teggim Abimalik d ajeǧid, u mařa kenniw teggim mliḥ di Yarubbaɛl d taddart nnes, u mařa kenniw teggim dayes am mammec issdaheǧ,
JDG 9:17 - aqa baba immneɣ di ṭṭweɛ nwem uca isebbeř tudart nnes uca ifekk kenniw zeg ufus n Midyan,
JDG 9:18 [maca] kenniw tɣewwɣem ass-a x taddart n baba u x ijj n weẓru aqa tenɣim arraw nnes, sebɛin n yeryazen, u teggim Abimalik, mmis n tayya, d ajeǧid x imezdaɣ n Cakim, minzi netta d umatwem -
JDG 9:19 mařa kenniw teggim ass-a s tidett d řeṣfayet di Yarubbaɛl d taddart nnes, xenni ad tfarḥem di Abimalik u netta ad ifarḥ daywem.
JDG 9:20 Maca mařa war iǧi amenni, [xenni] ad tekkar tmessi zi Abimalik ad tecc iryazen n Cakim d imezdaɣ n lqelɛa uca ad tekkar tmessi zeg imezdaɣ n Cakim u zi marra inni di lqelɛa, ad tecc Abimalik!’”
JDG 9:21 [Xenni] yuyur Yutam, yarweř, iruḥ ɣar Bi’r. Tuɣa izeddeɣ din, [iggʷej] x umas Abimalik.
JDG 9:22 [Řami] tuɣa iḥekkem Abimalik x Israil třata n iseggʷusa,
JDG 9:23 issekk AREBBI ijj n řaryaḥ d aɛeffan jar Abimalik d imezdaɣ n Cakim. Imezdaɣ n Cakim ɣdaren zi Abimalik,
JDG 9:24 ḥima aɣeṣṣeb, [nni ittwaggen i] sebɛin n iḥenjiren n Yarubbaɛl, d idammen nsen ad dd-asen x umatsen Abimalik, wenni ten inɣin, u x imezdaɣ n Cakim, inni tuɣa issjehden ifassen nnes maḥend ad nɣen aytmas.
JDG 9:25 Imezdaɣ n Cakim wejden as řefxux x tqiccat n idurar u nitni keccḍen marra wenni din xasen i ɣa ikken d abrid. Aya ittwanna i Abimalik.
JDG 9:26 Jaɛal, mmis n Ɛabid, yusa-dd ak-d aytmas uca nitni uyuren ɣar Cakim u imezdaɣ n Cakim ttiqqen dayes.
JDG 9:27 Nitni ffɣen ɣar iyyaren, řeqḍen uḍiř deg imarjaɛen nsen, ɛeffsen x uḍiř uca ɣennjen izřan n řefraḥet, udfen ɣar taddart n arebbi nsen, ccin swin uca neɛřen Abimalik.
JDG 9:28 Uca Jaɛal, mmis n Ɛabid, inna: “Min [iɛna netta] Abimalik d man wen [i iǧan] d Cakim, aqa neccin ad as naḍar? Ma war iǧi netta d mmis n Yarubbaɛl? U ma war iǧi Zabul d lwali nnes? Sexxarem [xenni] i yeryazen n Ḥamur, babas n Cakim, minzi mayemmi i d as ɣa nsexxar?
JDG 9:29 Mři maca řgens-a deg ufus inu, [xenni] necc tuɣa xseɣ ad aẓẓřeɣ x Abimalik.” Uca inna i Abimalik: “Arni i řɛeskar nnec uca ffeɣ [ɣar umenɣi]!”
JDG 9:30 [Umi] Zabul, řḥakem n tendint, isřa awařen n Jaɛal, mmis n Ɛabid, yarɣa uxeyyeq nnes.
JDG 9:31 Netta issekk ireqqasen ɣar Abimalik di tnuffra, nnan: “Xzar, Jaɛal, mmis n Ɛabid, d aytmas usin-dd ɣar Cakim, u xzar, aqa ssɣewwɣen xak tandint.
JDG 9:32 [Xenni] řexxu, kkar di ǧiřet-a, cek d řgens nni ɣarek iǧan, uca egg ijj n řfex deg iyyar.
JDG 9:33 U ɣar tuffut, ɣar wenqar n tfuct, ittxeṣṣa ad tekkared zic uca ɛref x tendint. U xzar, mařa netta d řgens i ɣares ad ɣarek dd-iffeɣ, egg xenni akides min xef izemmar ufus nnec ad igg.”
JDG 9:34 Abimalik d marra řgens i ɣares, ikkar-dd di ǧiřet u nitni ggin ijj n řfex x Cakim s arebɛa n ibaṭayunen.
JDG 9:35 U Jaɛal, mmis n Ɛabid, iffeɣ-dd, yuyur ɣar tewwart n tendint u Abimalik, d marra řgens i ɣares, ikkar zeg wemcan innuffaren.
JDG 9:36 [Umi] Jaɛal iẓra řgens, inna i Zabul: “Xzar, aqa iwdan hekkwan-dd zi tqiccat n idurar.” Zabul inna as: “Cek twařid tiři n idurar d iwdan.”
JDG 9:37 Jaɛal yarni issawař, inna: “Xzar, aqa [ijj n ubarru] n řgens ihekkwa-dd zi tɛebbuḍt n temmurt u ict n řkumpaniyyet tusa-dd zeg webrid n tcejjart n yigg n ibezgawen.”
JDG 9:38 Xenni inna as Zabul: “Mani i ǧan řexxu wawařen nnec i zi tennid: ‘Min [iɛna] Abimalik, aqa neccin ad as nsexxar? Ma war ǧin ina d řgens i tesseḥqared cek? Ffeɣ [xenni] řexxu u temmenɣed akides!”
JDG 9:39 Uca iffeɣ Jaɛal zzat i wudem n imezdaɣ n Cakim uca immneɣ ak-d Abimalik.
JDG 9:40 Iḍfar i-t Abimalik, minzi netta yarweř zzat i wudem nnes uca aṭṭas n yinni ittwassnuqqben [s ssif] wḍan ař adaf n tewwart n tendint.
JDG 9:41 Iqqim Abimalik di Aruma u Zabul yuẓẓeř x Jaɛal d aytmas ařami war zemmaren ad qqimen ɛad di Cakim.
JDG 9:42 Tiwecca nnes, imsar, řgens iffeɣ ɣar iyyar. Aya ɛawden t i Abimalik.
JDG 9:43 [Xenni] iksi netta řgens, ibḍa t x třata n ibaṭayunen uca igga ijj n řfex deg iyyar uca netta ixezzar, aqa řgens iffeɣ zi tendint. [Xenni] ikkar ḍidd nsen uca iɣřeb xasen.
JDG 9:44 [Minzi] Abimalik d ibaṭayunen i ɣares, ffɣen uca uyuren ad bedden ɣar tewwart n tendint, u tnayen n ibaṭayunen nneɣnit udfen x yinni [tuɣa] deg iyyar uca qḍan xasen.
JDG 9:45 Ass nni marra immneɣ Abimalik ak-d tendint. Netta iṭṭef i-tt, inɣa řgens i dayes [iǧan]. [Xenni] ihdem tandint uca issuyes xas tameǧaḥt.
JDG 9:46 [Umi] t sřin marra imezdaɣ n lburj, udfen ɣar amcan n warwař n taddart n arebbi [nsen] Barit.
JDG 9:47 Ittwanna i Abimalik, aqa marra imezdaɣ n lburj n Cakim ggin ad munen [din].
JDG 9:48 [Xas] uca igeɛɛed Abimalik adrar n Ṣalmun, netta ak-d marra řgens i ɣares [iǧan], u Abimalik iṭṭef ccaqur nnes deg ufus uca iqřeɛ ict n tṣeṭṭa n tcejjart, iksi tt u issars i-tt x teɣruḍt nnes, inna i řgens nnes: “Min teẓrim ggiɣ necc, qeǧqem, ggem [t] uřa d kenniw am necc!”
JDG 9:49 U marra řgens, kuř aryaz, iqřeɛ taṣeṭṭa nnes uca ḍfaren Abimalik u ssarsen tent ɣar wemcan n warwař uca qqedmen asen timessi x wemcan n warwař ařami mmuten uřa d marra iryazen n lburj n Cakim, ɛřaḥař ařef n yeryazen d temɣarin.
JDG 9:50 Iruḥ Abimalik [ɛawed] ɣar Tabaṣ, iwta iqiḍan nnes ɣar Tabaṣ uca iṭṭef i-tt.
JDG 9:51 Tuɣa di řwesṭ n tendint ijj n lburj imettnen u arewřen ɣares marra iryazen d temɣarin d marra imezdaɣ n tendint uca nitni bellɛen xasen, nyin x tzeqqa n lburj.
JDG 9:52 Yiweḍ Abimalik ɣar lburj u immneɣ akides, [maca] xmi netta dd-iqarreb ɣar tewwart n lburj ḥima ad as iqqed timessi,
JDG 9:53 tenḍar ict n temɣart ict n taṣḍart n tsirt yuɛřan x uzeǧif n Abimalik uca teřbez as aceqquf [n uzeǧif].
JDG 9:54 Deɣya iřaɣa netta i umsexxar [nnes] wenni d as yarebbun řesnaḥ, inna as: “Jbedd ssif nnec uca neɣ ayi, ḥima war xafi qqaren: ‘Ict temɣart tenɣa i-t’.” Uca aḥudri nnes issnuqqeb i-t uca immut.
JDG 9:55 [Umi] ẓrin iryazen n Israil, aqa Abimalik immut, ffɣen-dd, [kuř ijj n] weryaz ɣar wemcan [n tzeddiɣt] nnes.
JDG 9:56 [Ammu] i ixeǧeṣ AREBBI tuɛeffna n Abimalik nni igga i babas umi inɣa sebɛin n aytmas.
JDG 9:57 Marra tuɛeffna i iggin iryazen n Cakim yarr i-tt AREBBI x uzeǧif nsen u nneɛřet n Yutam, mmis n Yarubbaɛl, tewḍa-dd xasen.
JDG 10:1 Awarni Abimalik ikkar Tulaɛ, mmis n Fuwa, mmis n Dudu, ijj n weryaz zi [teqbič n] Issakar, ḥima ad issenjem Israil. Netta tuɣa izeddeɣ di Camir x idurar n Ifrayim.
JDG 10:2 Netta tuɣa d řqaḍi x Israil třata u-ɛicrin n iseggʷusa. [Xenni] immut, ittwanḍeř di Camir.
JDG 10:3 Awarni as ikkar Ya’ir, Ajilɛadi. Netta tuɣa d řqaḍi x Israil tnayen u-ɛicrin n iseggʷusa.
JDG 10:4 Netta tuɣa ɣares třatin n iḥenjiren, inni innayen x třatin n iɣyař u ɣarsen třatin n tneddam, ttřaɣan asent ‘dcurat n Ya’ir’ ař ass-a. Aqa atent di temmurt n Jilɛad.
JDG 10:5 Uca immut Ya’ir, neḍřen t di Qamun.
JDG 10:6 Ayt n Israil arnin ad ggen min [iǧan] d aɛeffan di tiṭṭawin n SIDI. Nitni sexxaren i ‘Ibaɛlen’ d ‘Ɛactarutin’ uřa d irebbiten n Aram d irebbiten n Ṣidun d irebbiten n Mu’ab d irebbiten n Ɛammun d irebbiten n Ifilisṭiniyyen. Nitni jjin SIDI u war d as sexxaren [ɛad].
JDG 10:7 Yarɣa weɣḍab n SIDI x i Israil u Netta igga i-ten deg ufus n Ifilisṭiniyyen u deg ufus n ayt n Ɛammun.
JDG 10:8 Deg useggʷas nni řebzen u arẓin nitni ayt n Israil. [Ammu i iggin nitni] tmenṭac n iseggʷusa ak-d ayt n Israil inni [iǧan] x ujemmaḍ n L’Urdun, di temmurt n Imuriy[yen], tenni di Jilɛad.
JDG 10:9 Uca [ɛawed] ẓwan ayt n Ɛammun L’Urdun ḥima ad mmenɣen uřa ak-d Yahuda d Binyamin d taddart n Ifrayim [ařami] ittwaḥsar Israil aṭṭas.
JDG 10:10 [Xenni] sɣuyen ayt n Israil ɣar SIDI, nnan: “Neccin nexḍa akidek, minzi neccin nesmeḥ di AREBBI nneɣ, nsexxar ‘Ibaɛlen’.”
JDG 10:11 [Xenni] inna SIDI i ayt n Israil: “Ma war [kenniw ssnejmeɣ] zeg [ufus n] Imiṣriyyen d Imuriyyen u zeg [ufus n] ayt n Ɛammun d Ifilisṭiniyyen
JDG 10:12 u zeg [ufus n ayt n] Ṣidun u zeg [ufus n] ayt n Ɛamaliq d Imaɛuniyyen, inni tuɣa kenniw iḥṣaren umi kenniw i d ɣari tesɣuyem, ma [xenni] Necc war ssnejmeɣ kenniw zeg ufus nsen?
JDG 10:13 [Waxxa amenni] kenniw tsemḥem dayi u tsexxarem i irebbiten nneɣni. S uya war kenniw ssenjimeɣ ɛad.
JDG 10:14 Uyurem, tesɣuyem ɣar irebbiten nni tareccḥem i yixef nwem. Jjem ten ad kenniw ssnejmen di řweqt n řeḥṣaret nwem.”
JDG 10:15 [Maca] ayt n Israil nnan i SIDI: “Neccin aqa nexḍa. Egg Cek akidneɣ marra min i d ac iɛejben di tiṭṭawin nnec, mɣir fekk aneɣ ass-a waha!”
JDG 10:16 U nitni ssiggʷejen irebbiten iɣriben zi řwesṭ nsen uca sexxaren i SIDI. [Xenni] war izemmar řeɛmar nnes ad tarbu [ɛad] řeɣben n Israil.
JDG 10:17 Ttwasmunen ayt n Ɛammun uca wtin iqiḍan nsen di Jilɛad. Uřa d ayt n Israil munen u nitni wtin iqiḍan nsen di Miṣfa.
JDG 10:18 [Xenni] inna řgens, řḥukkam n Jilɛad, i wayawya: “Man aryaz i ɣa immenɣen d amezwaru ak-d ayt n Ɛammun? Netta ad idweř d azeǧif x marra imezdaɣ n Jilɛad.”
JDG 11:1 Yaftaḥ, zi [temmurt n] Jilɛad, tuɣa-t d ijj n bu-teɣruḍt imeḥḍen, [maca] netta [tuɣa] d mmis n ict n temɣart n farq-ccɣeř. Jilɛad aqa ijja-dd Yaftaḥ [ɣares].
JDG 11:2 Uřa d tamɣart n Jilɛad turuw as-dd iḥenjiren. [Umi] iḥenjiren n temɣart-a mɣaren, uẓẓřen x Yaftaḥ, nnan as: “Cek war tᵉttᵉṭṭifed ca tasɣart di taddart n babatneɣ, maɣar cek d mmis n ict n temɣart nneɣnit.”
JDG 11:3 Uca yarweř Yaftaḥ zeg wudem n aytmas u netta iqqim izdeɣ di temmurt n Ṭub. Uca ict n tewrawt n yeryazen xwan usin-dd ɣar Yaftaḥ, ffɣen-dd akides.
JDG 11:4 Awarni [aṭṭas n] wussan imsar, kkaren ayt n Ɛammun mmenɣen ak-d Israil.
JDG 11:5 Uca imsar, umi ayt n Ɛammun mmenɣen ak-d Israil, aqa imɣaren n Jilɛad ṭṭfen abrid ḥima ad awyen Yaftaḥ zi temmurt n Ṭub.
JDG 11:6 Nitni nnan i Yaftaḥ: “As-dd, iři d akumandar nneɣ u ejj aneɣ ad nemmneɣ ak-d ayt n Ɛammun.”
JDG 11:7 Yaftaḥ inna i imɣaren n Jilɛad: “Ma war d ayi tɛiffem u tuẓẓřem xafi zi taddart n baba? Mayemmi i dd ɣari tusim řexxu, [řexxu] umi teǧam di řeḥṣaret?”
JDG 11:8 Arrin-dd imɣaren n Jilɛad x Yaftaḥ: “S uya i dd ɣarek nusa řexxu, [ḥima] cek akidneɣ tuyured ad temmenɣed ak-d ayt n Ɛammun. Cek ad ɣarneɣ tiřid d azeǧif x marra imezdaɣ n Jilɛad.”
JDG 11:9 [Xenni] inna Yaftaḥ i imɣaren n Jilɛad: “Mařa kenniw tarrim ayi ɣar umenɣi ak-d ayt n Ɛammun u SIDI isellem i-ten zzat i wudem inu, ad dewřeɣ d azeǧif nwem!”
JDG 11:10 Imɣaren n Jilɛad nnan i Yaftaḥ: “Ad yiři SIDI d wenni ittesřan jar aneɣ. [Uct xaneɣ] mařa war nᵉttegg ɛlaḥsab awařen nnec.”
JDG 11:11 Xas uca yuyur Yaftaḥ ak-d imɣaren n Jilɛad u řgens igga i-t d azeǧif d akumandar x yixef nnes. Uca issiweř Yaftaḥ marra awařen nnes zzat i wudem n SIDI di Miṣfa.
JDG 11:12 Uca issekk Yaftaḥ ireqqasen ɣar ujeǧid n ayt n Ɛammun, inna: “Min din jar ayi d cek, aqa cek teffɣed, ḥima ad temmenɣed ḍidd i temmurt inu?”
JDG 11:13 Inna ujeǧid n ayt n Ɛammun i ireqqasen n Yaftaḥ: “Minzi Israil tuɣa iṭṭef tammurt inu zeg Arnun ař Yabbuq u ař L’Urdun, umi dd-iffeɣ zi Miṣra. Arr ayi-tt řexxu s řehna!”
JDG 11:14 Issekk Yaftaḥ ɛawed ireqqasen ɣar ujeǧid n ayt n Ɛammun.
JDG 11:15 Inna as: “Ammu i iqqar Yaftaḥ: ‘Israil war iṭṭif ca tammurt n Mu’ab d temmurt n ayt n Ɛammun,
JDG 11:16 minzi umi dd-ffɣen zi Miṣra, yuyur Israil di řexřa ař Řebḥar n Telga uca [ɣar uneggar] yusa-dd ɣar Qadac.
JDG 11:17 [Xenni] issekk Israil ireqqasen ɣar ujeǧid n Idum, inna: ‘Ejj ayi ad cuqeɣ di temmurt nnec!’ Maca ajeǧid n Idum war isři ca. Issekk ɛawed [ireqqasen] ɣar ujeǧid n Mu’ab uca uřa d netta war iwc ttesriḥ. [Ammu] iqqim Israil di Qadac.
JDG 11:18 Uca yuyur [řgens] di řexřa, inneḍ i temmurt n Idum d temmurt n Mu’ab uca yusa-dd [ammu] ɣar uɣezdis n temmurt n Mu’ab [i iǧan] ɣar mani tneqqar tfuct uca nitni wtin iqiḍan nsen aɣirin i Arnun, maca war dd-usin daxeř i weymir [n temmurt] n Mu’ab, maɣar Arnun d aymir n Mu’ab.
JDG 11:19 [Xenni] issekk Israil ireqqasen ɣar Siḥun, ajeǧid n Imuriyyen, ajeǧid n Ḥacbun, uca inna as Israil: ‘Ejj aneɣ ad ncuq tammurt nnec ař amcan [i ɣar i ɣa uyureɣ].’
JDG 11:20 [Maca] Siḥun war ittiqq Israil ař i ɣa icuq tammurt nnes [waha]. U Siḥun issmun marra řgens nnes uca nitni wtin iqiḍan nsen di Jahaṣ. Uca [xenni] immneɣ netta ak-d Israil.
JDG 11:21 SIDI, AREBBI n Israil, igga [xenni] Siḥun d marra řgens nnes deg ufus n Israil uca ɣeřben xasen. Marra tammurt n Imuriy[yen], inni tuɣa izeddɣen di temmurt nni, iṭṭef i-tt Israil d řwart.
JDG 11:22 Nitni ṭṭfen marra tammurt n Imuriy[yen] d tasɣart, zeg Arnun ař Yabbuq u zi řexřa ař L’Urdun.
JDG 11:23 [Xenni] řexxu, aqa yuẓẓeř SIDI, AREBBI n Israil, x Imuriy[yen] zzat i wudem n řgens n Israil zi řwart nsen u ma cek [xenni] ad tt tᵉṭṭfed d tasɣart?
JDG 11:24 Ma war tᵉṭṭifed ca d tasɣart min d ac ɣa iwc arebbi nnec Kamuc d řwart? [Ammu] i ɣa neṭṭef marra d řwart min d aneɣ ɣa iwc SIDI, AREBBI nneɣ, d řwart.
JDG 11:25 Xenni řexxu, ma cek xar s waṭṭas x Balak, mmis n Ṣiffur, ajeǧid n Mu’ab? Ma netta [ɛemmarṣ ma] imcubbec ak-d Israil? Ma [ɛemmarṣ ma] immneɣ akidsen?
JDG 11:26 Israil tuɣa izdeɣ ɛad teřt-mya n iseggʷusa di Ḥacbun u di tneddam i ɣares dd-iqqnen u di Ɛaruɛir d tneddam i ɣares dd-iqqnen u di marra tineddam nni [iǧan] ɣar tmuwwa n Arnun. Mayemmi war tent tfekkem [xenni] di marra řweqt nni?
JDG 11:27 Necc war kik xḍiɣ, [maca] cek tegged ayi řɣar umi akidi temmenɣed. SIDI, wenni d Řqaḍi, ad iḥkem ass-a jar ayt n Israil u jar ayt n Ɛammun!”
JDG 11:28 [Maca] ajeǧid n ayt n Ɛammun war isři ɣar wawařen nni d as dd-issekk Yaftaḥ [s ufus n ijj n ureqqas].
JDG 11:29 Uca ihwa-dd Arruḥ n SIDI x Yaftaḥ u netta iẓwa Jilɛad d Manassa. Netta iẓwa [ɛawed] x Miṣfa di Jilɛad uca iẓwa [xenni] ɣar ayt n Ɛammun.
JDG 11:30 Uca iwaɛd Yaftaḥ ijj n lwaɛd i SIDI, inna: “Mařa Cek ad tegged ayt n Ɛammun qaɛ deg ufus inu,
JDG 11:31 [xenni], mařa ɛeqbeɣ-dd di řehna zeg ayt n Ɛammun, min i dd ɣa iffɣen zi tewwura n taddart inu ḥima ad kidi immeřqa, ad yiři i SIDI u necc ad as t qeddmeɣ d tasɣart n wecmaḍ.”
JDG 11:32 [Xas uca] iẓwa Yaftaḥ ɣar ayt n Ɛammun ḥima ad kisen immneɣ uca SIDI igga i-ten deg ufus nnes.
JDG 11:33 Netta iɣřeb xasen zi Ɛaruɛir ař mani tiwḍed ɣar Minnit, ɛicrin n tneddam, ař Abal-Kurum, aqa-tt d ict n tecti d tameqqrant aṭṭas. [Ammu] i dd-ttwassehwan ayt n Ɛammun zzat i wudem n ayt n Israil.
JDG 11:34 Umi dd-yusa Yaftaḥ ɣar Miṣfa ɣar taddart nnes, xzar, teffeɣ-dd ɣares yeǧis ḥima ad t-i-dd teřqa barra s ibendiren d ccḍiḥ [s nnubtat]. Nettat tuɣa d ayenni ɣares [n yeǧis], netta tuɣa war ɣares aḥenjir uřa d taḥenjirt nneɣnit.
JDG 11:35 [Umi] tt iẓra, icarreg arruḍ nnes, inna: “A wayyaw, yeǧi, cem tessehwid ayi-dd aṭṭas u tdewřed ɣar yinni i d ayi itteggen řeḥřiq minzi necc arzmeɣ aqemmum inu i SIDI, war zemmareɣ ad dd-dewřeɣ [ɛad].”
JDG 11:36 Nettat tenna as: “Baba inu! [Mařa] cek tarzmed aqemmum nnec i SIDI, [xenni] egg kidi ɛlaḥsab [awař] i dd-iffɣen zeg uqemmum nnec, maɣar intaqem SIDI qaɛ di ṭṭweɛ nnec x řɛedyan nnec, x ayt n Ɛammun.”
JDG 11:37 U nettat tenna [ɛawed] i babas: “Iři ad kidi ittwagg [ɛlaḥsab] awař-a. Ejj ayi tnayen n iyuren, [maḥend] necc ad uyureɣ, ad dd-hwiɣ [maḥend] ad ruɣ x idurar x tuɛezriya inu, necc ak-d tmeddukař inu.”
JDG 11:38 Netta yarra-dd xas: “Uyur!” Uca ijja i-tt ad traḥ tnayen n iyuren. Nettat [maca] tᵉṭṭef abrid ak-d tmeddukař nnes uca tru x tuɛezriya nnes deg idurar.
JDG 11:39 Imsar, umi qefřen tnayen n iyuren, tareggʷweḥ-dd ɣar babas u netta iqfeř lwaɛd i iwaɛd. Nettat tuɣa [ɛemmarṣ] war tessin uřa d ijj n weryaz. Ammu idweř d lɛada di Israil,
JDG 11:40 aqa aseggʷas awarni i useggʷas yessis n Israil ad ṭṭfent abrid, ḥima ad idarent i yeǧis n Yaftaḥ, Ajilɛadi, arebɛa n wussan deg useggʷas.
JDG 12:1 [Xenni] ttwassmunen iryazen n Ifrayim [i umenɣi] u nitni ẓwan ɣar Zafun. Nnan i Yaftaḥ: “Mayemmi teẓwid ḥima ad temmenɣed ak-d ayt n Ɛammun u war d aneɣ třiɣid ḥima ad nuyur akidek? Neccin ad ac neqqed timessi i taddart nnec tiwa i uzeǧif nnec d cek akides.”
JDG 12:2 Yaftaḥ inna asen: “Necc d řgens inu tuɣa aneɣ deg ijj n umcubbec d ameqqran ak-d ayt n Ɛammun. Řaɣiɣ-dd xawem, [maca] kenniw war dd-tusim ḥima ad ayi tfekkem zeg ufus nsen.
JDG 12:3 [Umi] ẓriɣ, belli kenniw war dd-tusim i usenjem, sebbřeɣ tudart inu uca ẓwiɣ [L’Urdun] ɣar ayt n Ɛammun u SIDI igga ayi ten deg ufus. Mayemmi i dd ɣari tgeɛɛdem ass-a ḥima akidi temmenɣem?”
JDG 12:4 [Xas uca] issmun Yaftaḥ marra iryazen zi Jilɛad uca immneɣ ak-d Ifrayim u iryazen n Jilɛad ɣeřben x Ifrayim, minzi [iryazen n Ifrayim] nnan: “Kenniw d inni yarewřen zeg Ifrayim!”, [aqa] Jilɛad yusa-dd jar Ifrayim d Manassa.
JDG 12:5 Jilɛad iḥewwes imucan n uẓekkwu n L’Urdun [inni iǧan] n Ifrayim. D marra inni yarewřen n Ifrayim nnan: “Ejj ayi ad ẓwiɣ”, xenni sseqsan t iryazen zi Jilɛad: “Ma cek zi Ifrayim?” Mařa netta inna: “Lla!”,
JDG 12:6 [xenni] nnan as: “Ini ‘Cibbulit!’” Inna netta [xenni]: ‘Sibbulit!’ u [iban-dd] netta war izmir ad t inṭeq mliḥ, xenni ṭṭfen t uca nɣin t ɣar imucan n uẓekkwu n L’Urdun. [Ammu] i wḍan tnayen u-rebɛin-ařef n yeryazen n Ifrayim di řweqt nni.
JDG 12:7 Tuɣa Yaftaḥ iḥekkem Israil setta n iseggʷusa. [Xenni] immut Yaftaḥ, Ajilɛadi, u netta ittwanḍeř deg [ict zi] tneddam n Jilɛad.
JDG 12:8 Awarni as tuɣa Ibṣan zi Bayt-Laḥm d řqaḍi x Israil.
JDG 12:9 Netta tuɣa ɣares třatin n iḥenjiren u issmeǧec třatin n yessis ɣar barra u i třatin n arrawen nnes ijja i-ten ad awyen třatin n yessis zi barra. Tuɣa netta iḥekkem x Israil sebɛa n iseggʷusa.
JDG 12:10 [Xenni] immut Ibṣan uca ittwanḍeř di Bayt-Laḥm.
JDG 12:11 Awarni as tuɣa Ilun, Azabuluni, d řqaḍi x Israil. Netta iḥkem x Israil ɛecra n iseggʷusa.
JDG 12:12 [Xenni] immut Ilun, Azabuluni, uca ittwanḍeř di Ayalun di temmurt n Zabulun.
JDG 12:13 Awarni as tuɣa Ɛabdun, mmis n Hillal, zi Firɛatun, d řqaḍi x Israil.
JDG 12:14 Netta tuɣa ɣares arebɛin n iḥenjiren d třatin n wayyawen, inni innayen x sebɛin n iɣyař. Netta tuɣa d řqaḍi x Israil tmenya n iseggʷusa.
JDG 12:15 [Xenni] immut Ɛabdun, mmis n Hillel, zi Firɛatun, uca ittwanḍeř di Firɛatun, di temmurt n Ifrayim, x idurar n Ɛamaliq.
JDG 13:1 [Xenni] arnin ayt n Israil maḥend ad ggen min [iǧan] d aɛeffan di tiṭṭawin n SIDI. [Xenni] inḍar i-ten SIDI deg ufus n Ifilisṭiniyyen, [ijj n řmijař n] arebɛin n iseggʷusa.
JDG 13:2 Tuɣa din ijj n weryaz zi Ṣurɛa, zi řwacun n Dan. Tuɣa qqaren as Manuḥ. Tamɣart nnes tuɣa war ɣares bu tarwa u war dd-tiruw ca.
JDG 13:3 Iban-dd lmalak n SIDI i temɣart-a uca netta inna as: “Xzar, war ɣarem bu tarwa u war dd-tirwud ca, maca ad teksid ddeyset, ad tarwed ijj n uḥenjir.
JDG 13:4 [Xenni] řexxu, ḥḍa ixef nnem! War sess binu uřa d ccrab u war ttᵉtt walu zi marra min inegsen!
JDG 13:5 Maɣar xzar, cem ad teksid s ddeyset, ad tarwed ijj n uḥenjir. War d as ittekk řmus x uzeǧif nnes, maɣar aḥenjir ad yarbu ttaj [n weɛzař] n AREBBI zeg uɛeddis n yemmas u netta ad ibda ḥima ad ifekk Israil zeg ufus n Ifilisṭiniyyen.”
JDG 13:6 Tamɣart tudef u tessiweř ak-d weryaz nnes, tenna as: “Ijj n Weryaz n AREBBI yusa-dd ɣari. Aɣembub nnes igga am lmalak n AREBBI, issaggʷad aṭṭas, uca necc war t sseqsiɣ manis dd-yusa, u Netta war d ayi inni mammec d as qqaren.
JDG 13:7 Netta inna ayi: ‘Xzar, cem ad teksid s ddeyset, ad tarwed ijj n uḥenjir. War sess binu uřa d ccrab u war ttᵉtt walu min ixemjen, minzi aḥenjir ad yarbu ttaj [n weɛzař] n AREBBI zeg uɛeddis n yemmas ař ass n řmewt nnes.’
JDG 13:8 Uca iẓẓuǧ Manuḥ ɣar SIDI, inna: “A, Sidi inu, ttzawageɣ Cek, ejj aryaz n AREBBI wenni dd tessekked, ad ɣarneɣ dd-yas twařa nneɣnit, maḥend ad aneɣ isscen min ɣa negg ak-d uḥenjir wenni dd ɣa ixeřqen.”
JDG 13:9 Uca SIDI isřa ɣar Manuḥ u lmalak n AREBBI yusa-dd ict n twařa nneɣnit ɣar temɣart. Nettat teqqim deg iyyar uca aryaz nnes Manuḥ tuɣa war kides iǧi.
JDG 13:10 Nettat tqeǧeq u teɛřef, tɛawed aya i weryaz nnes, tenna as: “Xzar, Aryaz nni dd ɣari yusin, iban ayi-dd [ɛawed].”
JDG 13:11 Ikkar Manuḥ, iḍfar tamɣart nnes. Umi dd-yusa ɣar Weryaz, inna as: “Ma cek d Aryaz nni issiwřen ak-d temɣart inu?” Netta yarra-dd xas: “[Wah,] d Necc.”
JDG 13:12 [Xenni] inna Manuḥ: “Mařa ttwakemmřen xenni wawařen nnec řexxu, min [i ɣa tiři] řqaɛida [i zi ɣa nuyur] ak-d uḥenjir u min [i ɣa tiři] řxedmet nnes?”
JDG 13:13 Inna lmalak n SIDI i Manuḥ: “Tamɣart ad teḥḍa ixef nnes zi marra min d as nniɣ.
JDG 13:14 Nettat war ttᵉtt min dd-ittasen zi tzayart uca war tsess binu uřa d ccrab u war ttᵉtt walu zi marra min inegsen. Ad teḥḍa marra min d as umureɣ.”
JDG 13:15 [Xenni] inna Manuḥ i lmalak n SIDI: “Ejj aneɣ ad Cek nemneɛ ɣarneɣ [cwayt danita] u ad ac nessewjed ijj n iɣayḍ d ameẓyan zeg iɣayḍen zzat i wudem nnec.”
JDG 13:16 [Maca] lmalak n SIDI inna i Manuḥ: “Mařa texsed ad ayi tmenɛed, war ttᵉtteɣ zeg weɣrum nnec u mařa texsed ad tesswejded ict n tɣarṣt n wecmaḍ, ittxeṣṣa ad tt tqedmed i SIDI.” Minzi Manuḥ war issin, aqa-t d lmalak n SIDI.
JDG 13:17 Uca inna Manuḥ i lmalak n SIDI: “Mammec i d ac qqaren, ḥima ad ac negg ccan, xmi ɣa ittwakemmeř wawař nnec.”
JDG 13:18 Inna as [maca] lmalak n SIDI “Mayemmi d ayi tesseqsid x Yisem inu? Aqa wanita d Řeɛjeb.”
JDG 13:19 [Xenni] iksi Manuḥ ijj n iɣayḍ d ameẓyan zeg iɣayḍen ak-d tewhibt [n řɣiǧet] uca iqeddem [aya] x teṣḍart i SIDI. [Xas uca] igga Netta ijj n řeɛjeb umi Manuḥ d temɣart nnes tuɣa xezzaren.
JDG 13:20 Řami tuɣa aceɛɛař n uɛalṭar igeɛɛed deg ujenna, imsar aqa uřa lmalak n SIDI igeɛɛed deg uceɛɛař n uɛalṭar. Manuḥ d temɣart nnes ẓrin aya, wḍan ɣar temmurt x iɣembab nsen.
JDG 13:21 Ssenni [maca] war dd-ibin lmalak n SIDI ɛad ɣar Manuḥ d temɣart nnes. Xenni issen Manuḥ, belli tuɣa d lmalak n SIDI.
JDG 13:22 Inna Manuḥ i temɣart nnes: “S tidett neccin ad nemmet, minzi neccin neẓra AREBBI.”
JDG 13:23 Tenna as temɣart nnes: “Mařa SIDI ixs ad aneɣ ineɣ, iři Netta war iksi zeg ufus nneɣ taɣarṣt n wecmaḍ d tewhibt [n řɣiǧet] u ad tiři war dd aneɣ ittejji ad nẓar ad nseř qaɛ man aya di řweqt-a.”
JDG 13:24 Tamɣart turuw-dd ijj n uḥenjir, tegga as Camcun. Aḥenjir imɣar u SIDI ibarek i-t.
JDG 13:25 Uca Arruḥ n SIDI ibda ad t indeh di řmargeḥ n řɛeskar n Dan jar Ṣurɛa d Icta’ul.
JDG 14:1 Camcun ihwa ɣar Timnata. Di Timnata iẓra ict n temɣart jar yessis n Ifilisṭiniyyen.
JDG 14:2 Umi dd-igeɛɛed [ɛawed], iḥaja t i babas d yemmas, inna: “Necc ẓriɣ di Timnata ict n temɣart jar yessis n Ifilisṭiniyyen. Xenni řexxu, awyem ayi tt d tamɣart i necc!”
JDG 14:3 Inna as babas uřa d yemmas: “Ma war [din] teǧi ict n temɣart jar yessis n aytmac u jar marra řgens inu umi texsed ad tawyed ict n temɣart zeg Ifilisṭiniyyen i war ittwaxetnen?” Uca inna Camcun i babas: “Awi ayi i-tt i necc, minzi nettat [d tamɣart] tecna di tiṭṭawin inu.”
JDG 14:4 Babas d yemmas war ssinen, aqa man aya [tuɣa-t] zi SIDI, aqa netta yarezzu ssibbet ḍidd i Ifilisṭiniyyen, [minzi] di řweqt nni tuɣa Ifilisṭiniyyen ḥekkmen x Israil.
JDG 14:5 Ihwa-dd Camcun ɣar Timnata ak-d babas d yemmas. [Umi] iwḍen ɣar imarjaɛen n uḍiř n Timnata, xzar, iffeɣ-dd ɣares ijj n weyrad d ameẓyan izehhar.
JDG 14:6 Arruḥ n SIDI iṭṭef i-t [ařami] t imezzeq axmi ittwamezzeq ijj n iɣayḍ d ameẓyan uca [d man aya imsar am] war ɣares uřa d ict n řḥajjet deg ufus nnes. Netta war iɛawed i babas d yemmas min igga.
JDG 14:7 Xenni ihwa, issiweř ak-d tmeṭṭut. U nettat tuɣa d [tamɣart] tecna di tiṭṭawin n Camcun.
JDG 14:8 Awarni ca n wussan idweř ɣar din ɛawed, ḥima ad tt yawi [d tamɣart]. Iffeɣ [zeg webrid] ḥima ad ixzar řxecbet n weyrad, u xzar, tuɣa [din] ijj n weyřaf n tzizwa di řxecbet n weyrad, ak-d tamment.
JDG 14:9 Netta iyru tamment deg ifassen, iruḥ uca ittett zzayes am iggur. [Umi] dd-yusa ɣar babas d yemmas, iwca asen zzayes uca uřa d nitni ccin. Maca netta war d asen ini, aqa netta tuɣa ikkes-dd tamment zi řxecbet n weyrad.
JDG 14:10 [Xenni] ihwa babas ɣar temɣart u Camcun igga dinni ijj n wurar am mammec [nnumen] ad t tteggen iḥudriyyen.
JDG 14:11 [Umi] t ẓrin nitni, imsar, belli iwyen třatin n imɛacaren ḥima akides iřin.
JDG 14:12 Inna asen Camcun: “Ejj ayi ad awem iniɣ ict n tḥajit n twafit. Mařa kenniw tzemmaren ad ayi tt tcarrḥem u ad xas teffɣem di sebɛa n wussan n wurar-a, [xenni] ad awem wceɣ třatin n tikkas d třatin n warruḍ icnan.
JDG 14:13 [Maca] mařa war tzemmarem ad ayi tt tcarrḥem, xenni kenniw ad ayi tewcem třatin n tikkas d třatin n warruḍ icnan.” Nitni nnan as: “Ini aneɣ tḥajit n twafit nnec, neccin nexs ad [tt] nseř!”
JDG 14:14 Netta inna asen: “Macca iffeɣ-dd zeg wenni ittetten u taẓyudi teffeɣ-dd zeg wenni ijehden.” Třata n wussan war zemmaren ad carrḥen tḥajit n twafit [i d asen inna].
JDG 14:15 Deg wass wiss sebɛa imsar, aqa nnan i temɣart n Camcun: “Ɣwa aryaz nnem maḥend ad aneɣ ifessar tḥajit n twafit niɣ ad am neqqed timessi ak-d taddart n babam. Ma tɛarḍem aneɣ [da], ḥima ad aneɣ tekksem agřa nneɣ niɣ lla?”
JDG 14:16 Uca tru temɣart n Camcun zzates, tenna: “Cek aqa tcarrhed ayi waha, war d ayi tᵉttexsed. Cek tennid i tarwa n řgens inu ict n tḥajit n twafit u war d ayi tt tfessared.” Netta yarra-dd xas: “Xzar, war tt nniɣ ɛad uřa i baba uřa i yemma. Mammec i d am tt i ɣa iniɣ i cem?”
JDG 14:17 Nettat maca tru zzates [marra] sebɛa n wussan nni di ggin urar u deg wass wiss sebɛa imsar ařami i d as tt inna, minzi nettat tehweř i-t uca nettat tcarreḥ tḥajit n twafit i tarwa n řgens nnes.
JDG 14:18 [Xenni] nnan as yeryazen n tendint deg wass wiss sebɛa qbeř ma ad teɣři tfuct: “Min iǧan d amiẓid x tamment d min ijehden x weyrad?” [X uya] netta inna asen: “Mařa war tecrizem kenniw s tɛejmit inu, iři kenniw war teffiɣem tḥajit n twafit inu.”
JDG 14:19 [Xenni] iṭṭef i-t Arruḥ n SIDI uca ihwa ɣar Acqalun uca inɣa třatin n yeryazen u iksi takeccadṭ zzaysen uca iwca arruḍ icnan i yinni issfehmen tḥajit n twafit. Axeyyeq nnes [maca] tuɣa yareqq uca igeɛɛed [ɛawed] ɣar taddart n babas.
JDG 14:20 [S uya] temmewc temɣart nnes i umɛacar nnes, wenni tuɣa i-t iɛacaren.
JDG 15:1 Awarni ca n wussan, deg wussan n tmeyra n irden, imsar, issijji Camcun x temɣart nnes, yiwi akides ijj n iɣayḍ d ameẓyan zeg iɣayḍen, inna [i babas]: “Ejj ayi ad adfeɣ ɣar temɣart inu deg wexxam!” [Maca] babas war t ijji ad yadef.
JDG 15:2 Inna babas: “S tidett necc nniɣ [deg yixef inu], cek tɛiffed tt, s uyenni wciɣ tt i umɛacar nnec. Ma war teǧi učmas tamaẓuẓt ɛad tecna xas? Ejj i-tt ad ɣarek tiři deg wemcan nnes.”
JDG 15:3 [Maca] Camcun inna asen: “Twařat-a ad iřiɣ d acemrař zi jjihet n Ifilisṭiniyyen, mařa ggiɣ daysen min [iǧan] d aɛeffan.”
JDG 15:4 U Camcum yuyur, iymar-dd teřt-mya n iceɛbawen. Iksi iṣefḍawen uca issneqřeb i-ten ijj x wenneɣni s ikennasen [nsen] uca di řwesṭ, jar tnayen n ikennasen, icedd ijj n uṣefḍaw.
JDG 15:5 Netta issarɣ iṣefḍawen uca ijja [iceɛbawen] ad uyuren deg imendi ibedden n Ifilisṭiniyyen. Ammu issarɣ icuwwafen [n imendi] d imendi ibedden, uřa d iyyaren n uzemmur.
JDG 15:6 [Xenni] nnan Ifilisṭiniyyen: “Wi iggin aya?” Nnan; “Aqa d Camcun, aḍeggʷař n weryaz. zi Timnata, minzi wanita yiwi as tamɣart nnes, iwca i-tt i umɛacar nnes.” [Xenni] geɛɛden Ifilisṭiniyyen uca qqden timessi i temɣart d babas.
JDG 15:7 [Xas uca] inna asen Camcun: “Mařa kenniw teggim ammu, xenni ḥsen ad zzaywem ntaqmeɣ [d amezwaru] uca awarni aya waha ad ssbeddeɣ amenɣi.”
JDG 15:8 Netta yarẓa asen iɣsan x tnayen, aqa iwta i-ten s ict n tecti d tameqqrant. [Xenni] ihwa, yuyur izdeɣ deg ifri n teṣḍart n Ɛiṭam.
JDG 15:9 [Xenni] geɛɛden Ifilisṭiniyyen uca wtin iqiḍan nsen di Yahuda uca areyycen ixef nsen ař Laḥi.
JDG 15:10 Iryazen n Yahuda nnan: “Mayemmi i dd xaneɣ tgeɛɛdem?” Nitni arrin-dd nnan: “Neccin ngeɛɛed, ḥima ad ncarf Camcun maḥend ad kides negg am mammec i kidneɣ igga netta.”
JDG 15:11 Uca hwan teřt-ařaf n yeryazen zi Yahuda ɣar ifri n teṣḍart n Ɛiṭam, nnan i Camcun: “Ma war tessined cek, aqa Ifilisṭiniyyen ḥekkmen xaneɣ? Mayemmi d aneɣ teggid aya?” Netta yarra-dd xasen: “Am mammec akidi ggin, ammu akidsen i ɣa ggeɣ.”
JDG 15:12 Nitni nnan as: “Neccin nehwa-dd ḥima ad cek ncarf u ad cek negg deg ifassen n Ifilisṭiniyyen.” [Xenni] inna Camcun: “Jaǧem ayi, aqa kenniw war xafi thejjmem.”
JDG 15:13 Nitni ssiwřen akides, nnan as: “[Man aya] war ittiři, maca neccin ad cek ncarf u ad cek negg deg ufus nsen, maca s tidett war cek neneqq.” Uca carfen t nitni s tnayen n tseɣwin d timaynutin uca nedhen t zeg ifri ɣar sennej.
JDG 15:14 [Řami] yiweḍ ɣar Laḥi, ffɣen-dd ɣares Ifilisṭiniyyen s iɣuyyan [n umenɣi]. [Řexdenni] iṭṭef i-tt Arruḥ n SIDI uca tiseɣwin nni ɣar iɣaǧen nnes dewřent am tiffest i ittwasscemḍen s tmessi d iceddiyyen nnes fesyen zeg iɣaǧen nnes.
JDG 15:15 Netta yufa ijj n yiɣes n uqabsi d ṭṭri n ijj n weɣyuř. [Xenni] isswiẓẓeḍ afus nnes, iḥart xas uca inɣa zzayes ařef n yeryazen.
JDG 15:16 Inna Camcun: “S yijj n yiɣes n uqabsi n weɣyuř, ijj n uɛurric, tnayen n iɛurricen, aqa s yijj n iɣes n uqabsi n teɣyuč nɣiɣ ařef n yeryazen.”
JDG 15:17 Imsar, umi ikemmeř awař nnes, inḍar iɣes n uqabsi zeg ufus nnes uca igga as i wemcan nni Ramat-Laḥi, [‘Řgeɛɛdet n yiɣes n uqabsi’].
JDG 15:18 [Řexdenni] tuɣa dayes afadi aṭṭas uca iřaɣa ɣar SIDI inna: “Cek tewcid i umsexxar nnec asenjem-a ameqqran. Ma [xenni] ittxeṣṣa ad mmteɣ s ufadi, ad wḍiɣ deg ifassen n ina inni war ixetnen?”
JDG 15:19 [Xas uca] issfeǧeq AREBBI aḥfur n Laḥi, ffɣen-dd zzayes waman. Netta isu uca buḥbeř nnes idweř-dd uca idweř-dd ɣar tudart. X uya igga as [i tařa nni] ‘Ɛayn-Haqurey’, [ixs ad yini ‘Tařa n wenni ittřaɣan’]. Tanita aqa-tt di Laḥi ař ass-a.
JDG 15:20 Tuɣa netta d řqaḍi x Israil deg wussan n Ifilisṭiniyyen, ɛicrin n iseggʷusa.
JDG 16:1 Umi iṭṭef Camcun [abrid] ɣar Ɣazza, iẓra dinni ict n temɣart n farq-ccɣeř, uca yudef ɣares.
JDG 16:2 [Xenni] ittwanna i ayt n Ɣazza: “Camcun aqa-t da!” Innḍen as-dd uca ḥḍan ǧiřet tmun ɣar tewwart n tendint. Ǧiřet tmun ssqaren, nnan: “Ɣar tuffut n wass ad t neneɣ.”
JDG 16:3 Camcun [maca] iqqim izzeř [iṭṭeṣ] ař azyen n ǧiřet. [Xenni] ikkar-dd deg wezyen n ǧiřet, iṭṭef tiwwura n tendint ak-d řeḍruf [ɣar uɣezdis n tewwart], iqřeɛ i tent i-dd akl-d weɛmud i ubelleɛ, igga i-tent x tɣarḍin nnes uca yarbu tent ɣar tqiccet n wedrar nni [iǧan] qibač i Ḥabrun.
JDG 16:4 Awarni as, imsar iɛceq ict n temɣart ɣar teɣzart n Suraq, qqaren as Dalila.
JDG 16:5 Uca řbacat [n tneddam] n Ifilisṭiniyyen usin-dd ɣares, nnan as: “Ɣwa i-t, u xzar [ad tafed] zi manis ɣares jjehd-a tameqqrant u mammec xas i ɣa nzemmar. [Xenni] ad t ncarf, ḥima ad t neṭṭef. Neccin ad am newc kuř ijj [zzayneɣ] ařef u-mya n [uqiyyat n] nnuqart.”
JDG 16:6 Xas uca tenna Dalila i Camcun: “Ini ayi maca, zi manis ɣarek jjehd-a ameqqran d mammec zemmaren ad cek carfen ḥima ad tᵉttwaṭṭfed.”
JDG 16:7 Inna as Camcun: “Mařa carfen ayi s sebɛa n iẓewran ṭṭri [zeg weysum] nni war yuẓiɣen ɛad, xenni ad dewřeɣ arxuɣ am [kuř] ijj n bnadem nneɣni.”
JDG 16:8 Řbacat [n tneddam] n Ifilisṭiniyyen iwyen as-dd sebɛa n iẓewran d ṭṭri [zeg weysum] nni war yuẓiɣen ɛad u nettat tcarf i-t zzaysent.
JDG 16:9 [Deg ijj n umur] tuɣa ɣares ḥed di texxamt n daxeř iṭṭef aḥeṭṭu. Tenna as: “[A] Camcun, Ifilisṭiniyyen [usin-dd] xak!” [Xenni] iqḍuw iẓewran am mammec ittqeṭṭas bnadem afiřu n tiffest axmi tt teřqef tmessi. Uca [ssir n] jjehd nnes war idwiř ittwassen.
JDG 16:10 [Xas uca] tenna Dalila i Camcun: “Xzar, tcemted ayi u tessxarrqed xafi. Ini ayi maca řexxu, s min zi zemmaren ad cek carfen.”
JDG 16:11 Netta inna as: “Mařa carfen ayi s tseɣwin n jdid war ttwassxedment [ɛemmarṣ], ad dewřeɣ arxuɣ am [kuř] ijj n bnadem nneɣni.”
JDG 16:12 Uca Dalila teksi tiseɣwin timaynutin tcarf i-t zzaysent u tenna as: “A Camcun, Ifilisṭiniyyen [usin-dd] xak!”, [deg umur d ijjen] tuɣa ḥed deg ict n texxamt n daxeř iṭṭef aḥeṭṭu. [Xenni] iqeṭṭes tiseɣwin zeg iɣaǧen nnes am yijj n ufiřu.
JDG 16:13 Xas uca tenna Dalila i Camcun: “Xzar, cek tcemted ayi u tessxarrqed xafi. Ini ayi maca, s min zi zemmaren ad cek carfen?” Netta inna as: “Mařa cem tmuded sebɛa n tmuzarin x uzeǧif inu ak-d wexmar [n ddebbuz n txeyyaḍt]!”
JDG 16:14 [Xenni] nettat tessemted tent s yijj n umesmir, tenna as: “A Camcun, Ifilisṭiniyyen [usin-dd] xak!” [Xenni] ifaq-dd zeg yiḍeṣ nnes, ikkes-dd ddebbuz n txeyyaḍt d ufiřu.
JDG 16:15 [Xas uca] tenna as: “Mammec tzemmared ad tinid: ‘Necc ttexseɣ cem!’, mařa uř nnec war ɣari iǧi? Řexxu tcemted ayi třata n twařawin u war d ayi tennid zi manis ɣarek jjehd-a ameqqran.”
JDG 16:16 Uca imsar, umi nettat tegga xas aɣiř s wawařen nnes u tehweř i-t marra ussan, idweř řeɛmar nnes di řeḥṣaret ař řmewt.
JDG 16:17 Netta issargeb i-tt marra x wuř nnes, inna as: “Ijj n řmus i uḥeffi ɛemmarṣ war ɣari dd-yusi x uzeǧif inu, minzi necc arebbuɣ ttaj [n weɛzař] zeg uɛeddis n yemmas. Mařa ittwaḥeff ucuwwaf inu, xenni ad ayi iffeɣ jjehd inu, ad dewřeɣ arxuɣ am kuř bnadem [nneɣni].”
JDG 16:18 [Umi] teẓra Dalila, belli aqa netta issargeb i-tt marra x wuř nnes, nettat tessekk ɣar řbacat n [tneddam n] Ifilisṭiniyyen, tenna: “Asem-dd twařa-ya da, minzi issargeb ayi marra sirr n wuř nnes.” Řbacat n [tneddam n] Ifilisṭiniyyen geɛɛden-dd ɣares, iwyen-dd akidsen [řweznat n] nnuqart deg ufus nsen.
JDG 16:19 Nettat tejja Camcun ad iṭṭeṣ x ifadden nnes, třaɣa i weryaz, tqess as sebɛa n tmuzarin x uzeǧif nnes uca tebda nettat tᵉṭṭef i-t ɣares uca jjehd nnes iffeɣ zzayes.
JDG 16:20 [Xenni] tenna: “A Camcun, Ifilisṭiniyyen [usin-dd] xak!” Netta ifaq-dd zeg yiḍeṣ, inna: “Twařa-ya ad arxuɣ, ad ssfekkeɣ ixef inu”, [minzi] netta war issin, aqa SIDI tuɣa ismeḥ dayes.
JDG 16:21 [Xenni] ṭṭfen t Ifilisṭiniyyen, qeřɛen as tiṭṭawin uca nedhen t ɣar Ɣazza, carfen t s tnayen n ssnaseř n nnḥas u netta idweř issunnuḍ tasirt di řeḥbes.
JDG 16:22 [Maca] acuwwaf n uzeǧif nnes idweř imeqqar deɣya awarni řami i d as ḥeffen.
JDG 16:23 Řbacat n [tneddam n] Ifilisṭiniyyen munen, ḥima ad qeddmen ict n tɣarṣt d tameqqrant i Dajun, arebbi nsen, uřa i řefraḥet, uca nnan: “Arebbi nneɣ iwca aneɣ Camcun, řeɛdu nneɣ, deg ifassen nneɣ.”
JDG 16:24 [Umi] t iẓra řgens, ssemɣaren arebbi nsen, maɣar nnan: “Arebbi nneɣ igga řeɛdu nneɣ deg ufus nneɣ: netta, wenni ixřan tammurt nneɣ d wenni inɣin zzayneɣ aṭṭas!”
JDG 16:25 Uca imsar, umi uř nsen tuɣa ifarḥ, nnan: “Řaɣam i Camcun, ḥima ad aneɣ issfarḥ.” Uca řaɣan-dd x Camcun zi řeḥbes uca sstehzan zzayes zzat i wudem nsen uca jjin t ad ibedd jar ipilaren.
JDG 16:26 [Xenni] inna Camcun i uḥenjir wenni t inedhen zeg ufus: “Ewc ayi cwayt n arraḥet. Xseɣ ad ḥadiɣ ipilaren i yarebbun taddart, maḥend ad xasen senndeɣ.”
JDG 16:27 Taddart tuɣa teccur s yeryazen d temɣarin. Tuɣa din [ɛawed] marra řbacat n [tneddam n] Ifilisṭiniyyen. X tzeqqa [iwaṭan] tuɣa [qqimen] amenni teřt-ařaf n yeryazen d temɣarin nni xezzaren umi ittɣennen Camcun.
JDG 16:28 [Xenni] iřaɣa Camcun ɣar SIDI, inna: “Sidi inu, SIDI, xarreṣ dayi. Ewc ayi mɣir twařa-ya waha jjehd inu, [a] AREBBI, ḥima ad ntaqmeɣ ixef inu zeg Ifilisṭiniyyen di ssibbet n tiṭṭawin inu deg ict n twařa.”
JDG 16:29 Uca iṭṭef Camcun tnayen n ipilaren i [iǧan] di řwesṭ i yarbun u min xef tsenned taddart, [iṭṭef] ijj n upilar s ufus nnes afusi d wenneɣni s ufus nnes azeřmaḍ.
JDG 16:30 Xas uca Camcun inna: “Ejj řeɛmar inu ad immet ak-d Ifilisṭiniyyen!”, u netta iɣnes ixef nnes ɣar zzat s [marra] jjehd nnes uca tewḍa taddart x řbacat [n tneddam] u x marra řgens i dayes tuɣa iǧan. Tuɣa qedda n yinni i inɣa s řmewt nnes d ameqqran x yinni tuɣa inɣa umi tuɣa iddar.
JDG 16:31 Aytmas d marra taddart n babas hwan-dd u ssgeɛɛden t, iwyen t u neḍřen t jar Ṣurɛa d Icta’ul deg wenḍeř n babas Manuḥ. Tuɣa netta d řqaḍi x Israil ɛicrin n iseggʷusa.
JDG 17:1 Ijj n weryaz tuɣa izeddeɣ x idurar n Ifrayim, qqaren as Mixa-Yahu.
JDG 17:2 Netta inna i yemmas: “Ařef u-mya n [uqiyyat n] nnuqart i d am ittwakksen, i xasent tennid ict n nneɛřet i zi tneṭqed deg imezzuɣen inu, xzar, nnuqart nni aqa-tt ɣari, necc ksiɣ tt.” Yemmas tenna: “Ad ittwabarek mmi zi SIDI!”
JDG 17:3 Netta yarra ařef u-mya n [uqiyyat n] nnuqart i yemmas uca yemmas tenna as: “Nnuqart ssqeddseɣ tt i SIDI zeg ufus inu i mmi ḥima ad zzayes igg ijj n řexyař ineqcen d ijj n řexyař ifesyen. [Xenni] řexxu ad ac tt arreɣ.”
JDG 17:4 Netta [maca] yarra nnuqart [ɛawed] i yemmas. [Xenni] teksi yemmas mitayen n [uqiyyat n] nnuqart u tewca i-tent i yijj n wemziř n wureɣ, wenni zzayes iggin ijj n řexyař ineqcen d yijj n řexyař ifesyen uca ggin tent di taddart n Mixa-Yahu.
JDG 17:5 Tuɣa Mixa ɣares ict n taddart n arebbi u netta igga ijj n upalṭu [n ukehhan] d řexyařat timeẓyanin n l’aṣnam uca iřeqqem ijjen zeg iḥenjiren nnes ad ɣares yiři d akehhan.
JDG 17:6 Deg wussan nni war din tuɣi ajeǧid di Israil. Kuř ijj ittegg min [iǧan] nican di tiṭṭawin nnes.
JDG 17:7 Di Bayt-Laḥm di Yahuda tuɣa din ijj n webřiɣ zi řwacun n Yahuda. Netta tuɣa d ijj n Ulawi, tuɣa izeddeɣ dinni d abarrani.
JDG 17:8 Aryaz-a iffeɣ zi tendint nni, zi Bayt-Laḥm di Yahuda, ḥima ad izdeɣ am ubarrani mani ma izemmar ad yaf [amcan]. X webrid nnes yiweḍ ɣar idurar n Ifrayim ɣar taddart n Mixa.
JDG 17:9 Mixa isseqsa t: “Manis i dd-tusid cek?” Netta yarra-dd xas: “Necc d Alawi zi Bayt-Laḥm di Yahuda. Necc ggureɣ, ḥima ad zedɣeɣ mani ma i ɣa yafeɣ [amcan].”
JDG 17:10 [Xenni] inna as Mixa: “Qqim ɣari uca tiřid ayi d baba d akehhan! Necc ad ac wceɣ ɛecra n [uqiyyat n] nnuqart d ca n werruḍ d řeɛweč.” Uca Alawi yuyur akides.
JDG 17:11 Alawi yarḍa xas deg wawař ḥima ad iqqim ak-d weryaz u abřiɣ tuɣa i Mixa am yijjen zeg arraw nnes.
JDG 17:12 Mixa iccur Alawi uca idweř webřiɣ d akehhan i netta uca iqqim di taddart n Mixa.
JDG 17:13 Uca inna Mixa: “Řexxu ssneɣ necc, aqa SIDI ad ayi igg řxar, maɣar necc ɣari Alawi wanita d akehhan.”
JDG 18:1 Deg wussan nni war din tuɣi ajeǧid di Israil u deg wussan nni tuɣa taqbič n Dan tarezzu tasɣart i yixef nnes maḥend ad dayes tezdeɣ, minzi war d as dd-tekkar [ɛad] tesɣart jar tqebbař n Israil.
JDG 18:2 Ssekken ayt n Dan zi řwacun nsen xemsa n yeryazen zi marra ṭṭrufa nsen, iryazen [nni] d ayt n umenɣi inni dd-yusin zi Ṣurɛa d Icta’ul, ḥima ad arzun řexbar x temmurt, ad dayes yarzun. Nitni nnan asen: “Uyurem, arzum tammurt!” Usin-dd ɣar idurar n Ifrayim ɣar taddart n Mixa uca ssensen dinni.
JDG 18:3 [Umi] [iwḍen] nitni ɣar taddart n Mixa, ɛeqřen x tmijja n webřiɣ zeg ayt n Lawi, uca ffɣen [zeg webrid] ɣares, nnan as: “Min cek i da dd-yiwyen u min i da tᵉttegged u min i da tarezzud cek?”
JDG 18:4 Netta yarra-dd xasen: “Ta d ta i igga Mixa akidi. Netta icra ayi u ammu i dewřeɣ necc d akehhan nnes.”
JDG 18:5 Nitni nnan as: “Seqsa aneɣ AREBBI, maḥend ad nessen, ma abrid i ɣa nuyur, ad yiři mliḥ.”
JDG 18:6 Yarra-dd xasen ukehhan: “Uyurem di řehna! Abrid i texsem ad t tekkem, aqa-t [yarezmen] zzat i [tiṭṭawin n] SIDI.”
JDG 18:7 [Xenni] ruḥen xemsa n yeryazen nni, iwḍen ɣar Layic. Nitni ẓrin aqa řgens izdeɣ dayes di řaman am mammec t tuɣa d lqaɛida ɣar ayt n Ṣidun, s řhudnet u di řaman. Tuɣa war din uřa d ijj di temmurt wenni iḥṣaren x [yijjen] di ca n řḥajjet niɣ iṭṭef ca s řexcunet. Nitni tuɣa iggʷejen aṭṭas x ayt n Ṣidun u war ɣarsen tuɣi walu uřa ak-d ijj n bnadem.
JDG 18:8 Uca usin-dd ɣar aytmatsen di Ṣurɛa d Icta’ul uca nnan asen aytmatsen: “Man [awař i] ɣarwem?”
JDG 18:9 Nitni arrin-dd xasen: “Kkarem, jjem ad ngeɛɛed, minzi neẓra tammurt, u xzar, aqa-tt tecna aṭṭas. Ma xenni [texsem] ad teqqimem tᵉttarsam ammu? War tteɛgizem ca maḥend ad tadfem ɣar temmurt ḥima ad tt tᵉṭṭfem d řwart.
JDG 18:10 Mařa kenniw ad tawḍem din, [xenni] ad tafem ijj n řgens [izeddɣen] di řaman uca tammurt tewseɛ aṭṭas ɣar tnayen n iɣezdisen, minzi AREBBI igga awem tt deg ufus nwem, aqa-t d ijj n wemcan mani war d as ittxeṣṣi walu n min iǧan x temmurt.”
JDG 18:11 [Xas uca] kksen iqiḍan nsen ssenni, zi řaǧ n Dan zi Ṣurɛa d Icta’ul, setta mya n yeryazen ḥezzmen s řesnaḥ.
JDG 18:12 Nitni geɛɛden uca wtin iqiḍan nsen ɣar Qaryat-Yaɛarim di Yahuda. X uya qqaren as i wemcan nni ‘Maxan-Dan’ ař ass-a. Xzar, aqa-tt awarni i Qaryat-Yaɛarim.
JDG 18:13 Ssenni ffɣen, ɛdun ɣar idurar n Ifrayim iwḍen ɣar taddart n Mixa.
JDG 18:14 [Xenni] ssiwřen xemsa n yeryazen, inni tuɣa igguren ḥima ad bergen tammurt n Layic, nnan i aytmatsen: “Ma tessnem, aqa di tudrin nni aqa din ijj n upalṭu [n ukehhan] d řexyařat timeẓyanin n l’aṣnam d ijj n řexyař ineqcen d ijj n řexyař ifesyen? Xenni řexxu, tessnem min xawem ad t teggem.”
JDG 18:15 [Řexdenni] ffɣen [zeg webrid nsen], usin-dd ɣar taddart n webřiɣ, ɣar taddart n weryaz zeg ayt n Lawi, ɣar taddart n Mixa, uca sseqsan x mammec iǧa.
JDG 18:16 Setta-mya n yeryazen zeg ayt n Dan i iḥezzmen s řesnaḥ nsen, qqimen bedden ɣar wadaf n tewwart.
JDG 18:17 Xemsa n yeryazen, inni tuɣa iffɣen ḥima ad bergagen tammurt, geɛɛden, udfen u iwyen řexyař ineqcen d upalṭu [n ukehhan] d řexyařat timeẓyanin n l’aṣnam d řexyař ifesyen. Akehhan iqqim ibedd ɣar uqemmum n tewwart ak-d setta-mya n yeryazen iḥezzmen s řesnaḥ.
JDG 18:18 [Xemsa] ina udfen ɣar taddart n Mixa, kksen řexyař ineqcen d upalṭu n ukehhan d řexyařat timeẓyanin n l’aṣnam d řexyař ifesyen. [Xenni] inna asen ukehhan: “Min din tᵉtteggem?”
JDG 18:19 Nitni nnan as: “Susem, sars afus nnec x uqemmum nnec, uyur akidneɣ u dweř d baba d akehhan nneɣ! Min iḥřan, mařa cek d akehhan di taddart n ijj n weryaz waha niɣ mařa cek d akehhan i yict n teqbič d yijj n řaǧ di Israil?”
JDG 18:20 [Řexdenni] ifarḥ wuř n weryaz nni uca iksi apalṭu n ukehhan d řexyařat timeẓyanin n l’aṣnam d řexyař ineqcen uca yudef jar řgens.
JDG 18:21 Uca ɛeqben nitni, ffɣen uca nedhen iḥenjiren d řmař d ddquřat akidsen ɣar zzat.
JDG 18:22 Umi nitni tuɣa iggʷejen aṭṭas x taddart n Mixa, řaɣan-dd i yeryazen di tudrin yudsen x taddart n Mixa, ḥima ad munen uca nitni xeccen x ayt n Dan.
JDG 18:23 Nitni řaɣan awarni i ayt n Dan, [maca] ina nnqeřben azeǧif nsen, nnan i Mixa: “Min cek yuɣin? Mayemmi třaɣid ḥima ad ttwassmunen [marra]?”
JDG 18:24 Inna netta: “Kenniw tekksem xafi irebbiten inu i ggiɣ uřa d akehhan uca tuyurem. Min ɣari řexxu ɛad? Mammec teggim ɛad teqqarem ayi: ‘Min cek yuɣin?’”
JDG 18:25 Ayt n Dan nnan as: “Ɣarek ad nseř i tmijja nnec ɣarneɣ niɣ [izemmar] ad xawem wḍan iryazen yewɛaren u iři [ad taɣ] ad iweddar řeɛmar nnec uřa d řeɛmur n taddart nnec.”
JDG 18:26 Uca uyuren ayt n Dan deg webrid nsen uca umi iẓra Mixa belli nitni tuɣa jehden xas, inneqřeb, yareggʷeḥ ɣar taddart nnes.
JDG 18:27 Nitni [maca] iwyen min iggin Mixa uřa d akehhan wenni tuɣa ɣares [ittsexxaren]. Nitni iwḍen ɣar Layic, ɣar ijj n řgens [izeddɣen] di řhudnet d řaman uca nɣin ten s řeqḍeɛ n ssif u sscemḍen tandint s tmessi.
JDG 18:28 War din uřa d ijjen [izemmar] ad ifekk, minzi Layic tuɣa tiggʷwej aṭṭas x Ṣidun u war tuɣi ɣarsen walu uřa ak-d ijj n bnadem. Tuɣa-tt di řewḍa n teɣzurt nni ɣar Bayt-Raḥub. Awarni uya bnan tandint [ɛawed] uca zeddɣen dayes.
JDG 18:29 Nitni qqaren as i tendint ‘Dan’, x yisem n babatsen Dan, wenni dd-ittwarwen i Israil. Maca zic tandint tuɣa qqaren as Layic.
JDG 18:30 Ayt n Dan ssbedden řexyař ineqcen i yixef nsen. Uca Yahunatan, mmis n Jarcum, mmis n Musa, netta ak-d iḥenjiren nnes, tuɣa aten d ikehhanen n teqbič n Dan ař ass i di tᵉttwandeh temmurt ɣar lmenfa.
JDG 18:31 Nitni tuɣa ssbedden řexyař ineqcen n Mixa, tenni igga, zzat i yixef nsen marra ussan min tekka Taddart n AREBBI teǧa di Cilu.
JDG 19:1 Deg wussan nni, umi war din tuɣi ajeǧid di Israil, tuɣa din ijj n Ulawi izeddeɣ d abarrani [deg ijj n wemcan] ɣar iɣezdisen n idurar n Ifrayim. Netta yiwi ict n temɣart d tayya zi Bayt-Laḥm di Yahuda.
JDG 19:2 [Maca] tayya nnes tedweř tessefḍeḥ ixef nnes umi ɣares tt tuɣa uca tesmeḥ dayes, teɛqeb ɣar taddart n babas di Bayt-Laḥm di Yahuda. Dinni teqqim aṭṭas n wussan, arebɛa n iyuren.
JDG 19:3 [Xenni] ikkar weryaz, iḍfar i-tt ḥima ad kis issiweř s wuř nnes maḥend ad tt-i-dd-issareggʷeḥ. Tuɣa amsexxar nnes ameẓyan akides d ict n tyuya n yeɣyař. Uca nettat tiwyi i-t ɣar taddart n babas. [Umi] t iẓra babas n tḥenjirt ifarḥ řami kides i ɣa immeřqa.
JDG 19:4 Aḍeggʷař nnes, babas n tḥenjirt, igga xas [aṭṭas] aɣiř maḥend akides iqqim třata n wussan. Nitni ccin, swin u ssensen dinni.
JDG 19:5 Imsar deg wass wiss arebɛa, aqa nitni faqen zic ɣar tuffut u netta ikkar ixs ad yuyur. [Xenni] inna babas n tḥenjirt i wesři nnes: “Semḥeḍ ixef nnec s yijj n uřeqquz n weɣrum, xenni ad taf tzemmarem ad tuyurem.”
JDG 19:6 Nitni qqimen, ccin, swin s tnayen idsen nsen. [Xenni] inna babas n tḥenjirt i weryaz: “Ttzawgeɣ, qqim da, ad tessensed uca ad ifarḥ wuř nnec.”
JDG 19:7 Aryaz ikkar ḥima ad yuyur, [maca] aḍeggʷař nnes ikellef xas, igga xas aɣiř ḥima ad dinni issens ɛawed.
JDG 19:8 Deg wass wiss xemsa ikkar zic ɣar tuffut ḥima ad yuyur. Inna babas n tḥenjirt: “Arni semḥeḍ uř nnec!” U nitni qqimen ttrajan ař ɣa iɛdu wass uca ccin tnayen idsen munen.
JDG 19:9 [Xenni] ikkar weryaz ḥima ad yuyur, netta ak-d tayya nnes d umsexxar nnes. Aḍeggʷař nnes, babas n tḥenjirt, inna: “Xzar, ass ggur ad iɛdu tiweḍ-dd tmeddit, ttzawgeɣ sensem da. Xzar, sfarḥ uř nnec u kkarem tiwecca zic maḥend ad tᵉṭṭfem abrid ɣar tqiḍunt nnec.”
JDG 19:10 [Maca] aryaz war ixs ca [ɛad] ad issens. Ikkar uca yuyur, yiweḍ ař qibač Yabus, tenni d Urcalim, u tuɣa ict n tyuya n yeɣyař bardɛen d tayya nnes aqa-tt akides.
JDG 19:11 [Umi] ten [tuɣa] nitni ɣar Yabus, tuɣa ass ad iɛdu. [Xenni] inna umsexxar i bab nnes: “Uyur, ad da nḍar di tendint-a n Iyabusiyyen, ad dayes nessens.”
JDG 19:12 [Maca] sidi nnes yarra-dd xas: “Neccin war nettmeyyiř ɣar ict n tendint taɣribt, tenni war iǧin n ayt n Israil, [maca] ad narni ad nuyur ɣar Jibɛa.”
JDG 19:13 Netta inna [ɛawed] i umsexxar nnes: “As-dd, ejj aneɣ [ad narzu] ad naweḍ ɣar ijj zeg imucan nni, ad nessens di Jibɛa niɣ di Rama.”
JDG 19:14 Nitni arnin uyuren u teɣři xasen tfuct umi ten-tuɣa nitni ɣar Jibɛa nni [iǧan] n Binyamin.
JDG 19:15 Uca ssfarɣen [zeg webrid], ḥima ad adfen ɣar din maḥend ad ssensen di Jibɛa. [Umi] ɣar din yudef, iqqim deg wazzay n tendint, minzi war ten issidef ḥed ɣar taddart maḥend ad ssensen.
JDG 19:16 Uca xzar, ɣar tmeddit iɛqeb-dd yijj n uwessar zi řxedmet nnes zeg iyyar. Tuɣa aryaz nni [ɛawed] zeg idurar n Ifrayim, [maca] izdeɣ am abarrani di Jibɛa, maca imezdaɣ n temmurt nni tuɣa aten d ayt n Binyamin.
JDG 19:17 Issgeɛɛed netta tamuɣři nnes, ixzar aryaz nni tuɣa dd-ikkin d abrid deg wazzay n tendint. Awessar inna: “Mani ɣa tuyured u manis i dd-tusid?”
JDG 19:18 Inna as netta: “Neccin neffeɣ-dd zi Bayt-Laḥm ař ṭṭarf qaɛ ḍeffar x idurar n Ifrayim, ssenni i dd-usiɣ. Necc tuɣa uyureɣ ɣar Bayt-Laḥm di Yahuda, uca [řexxu] ggureɣ ɣar Taddart n SIDI uca war da uřa d ijj wenni ixsen ad ayi issidef ɣar taddart nnes,
JDG 19:19 waxxa neccin ɣarneɣ řum d řeɛřef i yeɣyař nneɣ uřa d aɣrum d binu i necc, i tayya nnec u i uḥudri nni iǧan ɣar imsexxaren nnec. War d aneɣ ixeṣṣ walu.”
JDG 19:20 [Xenni] inna uwessar: “Ad kik yiři řehna! Maca min i d ac iqqimen, aqa-t ɣari, mɣir ittxeṣṣa war tᵉttnusid deg wazzay.”
JDG 19:21 Netta issidef i-t ɣar taddart nnes, iwca řeɛřef i iɣyař u nitni ssirden iḍaren nsen, ccin swin.
JDG 19:22 Di řweqt d ict řami ifarḥ wuř nsen, xzar, deɣya nnḍen-dd yeryazen n tendint i taddart - iryazen nni d ayt i war isekkwin - uca ssqarqben di tewwart. Nitni ssiwřen ak-d weryaz awessar, bab n taddart, nnan: “Suffeɣ-dd aryaz, wenni dd-yudfen ɣar taddart nnec, ɣar barra, neccin nexs akides newḍa.”
JDG 19:23 Aryaz, bab n taddart, iffeɣ-dd ɣarsen, inna asen: “Lla, a aytma, war tteggem ca tuɛɛefna, awarni řami dd-yudef weryaz-a řexxu ɣar taddart inu. Ɣarwem ad teggem řefḍiḥet am tanita.
JDG 19:24 Xzar, yeǧi d taɛzarect d tayya nnes ad ɣarwem tent ssuffɣeɣ. Sehwam tent u ggem akidsent min texsem, maca deg weryaz-a war tteggem řefḍiḥet am tanita.”
JDG 19:25 [Maca] iryazen war xsen ad ɣarsen sřan. [Xenni] iṭṭef aryaz tayya nnes, issuffeɣ i-tt-dd ɣarsen ɣar barra. Nitni uřyen xas, jeyyḥen tt ǧiřet tekmeř ař tuffut u nitni jjin tt ad tuyur ařami isbeḥ řḥař.
JDG 19:26 Umi d tarreẓ tuffut, tusa-dd temɣart-a uca tewḍa ɣar tewwart n taddart n weryaz mani [tuɣa iǧa] sidis nnes, [teqqim din] ařami [i dd-teffeɣ] tfawt.
JDG 19:27 [Umi] dd-ikkar sidis ɣar tuffut, yarzem tiwwura n taddart uca iffeɣ ɣar barra, ḥima ad iṭṭef abrid nnes, xzar, din i tewḍa temɣart, tayya nnes, ɣar tewwart n taddart s ifassen nnes x tnebdat.
JDG 19:28 Netta inna as: “Kkar bedd, neccin nexs ad nuyur!” Maca uřa d ijj war xas dd-yarri. [Xenni] issars i-tt x weɣyuř uca iṭṭef abrid ɣar wemcan [n tzeddiɣt] nnes.
JDG 19:29 [Umi] yiweḍ netta ɣar taddart, iksi ijj n řmus, iṭṭef tayya nnes, iqess i-tt x tenɛac n tseqqar uca issekk i-tent ɣar marra jjwayeh n Israil.
JDG 19:30 Uca imsar, aqa qaɛ wenni iẓrin aya, inna: “Man aya ɛemmarṣ ɛad war imsar uřa war t neẓri zeg wass i di ffɣen ayt n Israil zi Miṣra ař ass-a. Xemmem dayes, mcawarem ak-d wayawya uca inim řeḥkam!”
JDG 20:1 [Xenni] ffɣen marra ayt n Israil, uca tmun tmesmunt am yijj n weryaz ɣar SIDI di Miṣfa, zi Dan ař Bi’r-Sebɛa uřa d tammurt n Jilɛad.
JDG 20:2 Imdebbaren n marra řgens, n marra tiqebbař n Israil, ssbedden ixef nsen di tmesmunt n AREBBI, arebɛa-mya-ařef n yeryazen x iḍaren, [marra iryazen] inni izemmaren x ssif.
JDG 20:3 Ayt n Binyamin sřin, aqa ayt n Israil geɛɛden ɣar Miṣfa. Ayt n Israil nnan: “Siwřem, mammec [tzemmar] ad temsar tuɛeffna-ya?”
JDG 20:4 Aryaz Alawi, aryaz n temɣart ittwanɣen, yarra-dd xasen: “Necc usiɣ-dd ak-d tayya inu zi Jibɛa tenni [iǧan] n Binyamin, ḥima ad ssenseɣ [din].
JDG 20:5 Uca imezdaɣ n Jibɛa nnqeřben xafi, nnḍen ayi-dd di ǧiřet i taddart, nwan ad ayi nɣen u ɣeṣben tayya inu ařami temmut.
JDG 20:6 [Xenni] ksiɣ tayya inu, bḍiɣ tt d tiseqqar, ssekkeɣ [ijj n wezyen] zzayes ɣar marra jjwayeh n [temmurt n] tesɣart n Israil, minzi nitni ggin řefḍiḥet d tubbuheřya di Israil.
JDG 20:7 Xzar, kenniw marra d ayt n Israil. Arrem-dd kenniw x man aya s wawař d ccwar!”
JDG 20:8 Uca ibedd řgens imun am yijj n weryaz, inna: “Uřa d ijjen zzayneɣ war iggur ɣar tqiḍunt nnes u uřa d ijjen zzayneɣ war ittɛiqqib ɣar taddart nnes.
JDG 20:9 Ammu i ɣa negg [xenni řexxu] ak-d Jibɛa: ‘[Ad] xas [neffeɣ] ɛlaḥsab taqedduḥt!
JDG 20:10 Ad narecceḥ zi marra tiqebbař n Israil ɛecra n yeryazen zi mya u mya zeg wařef u ařef zi ɛecra-ařaf, ḥima ad awyen řeɛweč i řgens, ḥima, xmi i dd ɣa yasen ɣar Jibɛa tenni [iǧan] n Binyamin, ad zemmaren ad ggen akides ɛlaḥsab marra tubbuheřya nni igga di Israil.”
JDG 20:11 Munen marra iryazen n Israil di tendint-a, [tuɣa] munen [ak-d wayawya] am yijj n weryaz.
JDG 20:12 Uca sekkent tiqebbař n Israil iryazen ɣar marra taqbič n Binyamin, nnan: “Mana řefḍiḥet-a i ɣarwem imsaren?
JDG 20:13 Xenni řexxu, wcem aneɣ-dd iryazen nni, ayt i war isekkwin i [iǧan] di Jibɛa, ḥima ad ten nenneɣ uca ad ittwamḥa min [iǧan] d aɛeffan zi Israil.” Maca ayt n Binyamin war xsen ad sřen ɣar aytmatsen, ayt n Israil.
JDG 20:14 Usin-dd ayt n Binyamin zi tneddam nsen ɣar Jibɛa munen ḥima ad ffɣen ɣar umenɣi ak-d ayt n Israil.
JDG 20:15 Deg wass nni sedden nitni ayt n Binyamin zi tneddam, setta u-ɛicrin-ařef n yeryazen inni izemmaren i ssif, břa imezdaɣ n Jibɛa i zzaysen ttwafarzen [ɛad] sebɛa-mya n yeryazen.
JDG 20:16 Jar marra řgens-a aqa [din] sebɛa-mya n yeryazen ttwafarzen i war ttwadarrben mliḥ s ufusi nsen afusi. Kuř ijj zzaysen izemmar ad iḥaka mliḥ aṭṭas s yeǧiy [s ufus uzeřmaḍ], war xeṭṭin.
JDG 20:17 Uřa d iryazen n Israil ttwasedden. Nhřa ayt n Binyamin tuɣa aten di arebɛa-mya-ařef n yeryazen inni izemmaren x ssif. Marra nitni d iɛeskariyyen.
JDG 20:18 Kkaren ayt n Israil uca ffɣen ɣar Bayt-Il. Sseqsan AREBBI, nnan: “Man wen zzayneɣ i ɣa iffɣen d amzwaru ɣar umenɣi ak-d ayt n Binyamin?” Inna SIDI: “Amezwaru Yahuda.”
JDG 20:19 Kkaren ayt n Israil ɣar tuffut, wtin iqiḍan nsen ajemmaḍ i Jibɛa
JDG 20:20 Ffɣen yeryazen n Israil ɣar umenɣi ak-d Binyamin uca sedden yeryazen n Israil ixef nsen qibač nsen i umenɣi ɣar Jibɛa.
JDG 20:21 [Xenni] ffɣen-dd ayt n Binyamin zi Jibɛa uca ɣeḍřen zi Israil deg wass nni tnayen u-ɛicrin-ařef n yeryazen.
JDG 20:22 [Maca] řgens, iryazen n Israil, ggin taryast, sedden ixef nsen ict n twařa nneɣnit i umenɣi ɣar mani tuɣa sedden ixef nsen deg wass amezwaru.
JDG 20:23 Uca ayt n Israil geɛɛden, run zzat i wudem n SIDI ař tameddit, sseqsan: “Ma ad ffɣeɣ ict n twařa nneɣnit ɣar umenɣi ak-d iḥenjiren n uma Binyamin?” SIDI yarra-dd: “Gaɛɛdem ḍidd i nnes [i umenɣi]!”
JDG 20:24 Deg wass wiss tnayen qarrben-dd ayt n Israil ɣar ayt n Binyamin,
JDG 20:25 uca iffeɣ Binyamin deg wass wiss tnayen zi Jibɛa maḥend ad kidsen immeřqa. Ɣeḍřen ɛawed tmenṭac-ařef n yeryazen ɣar temmurt, inni tuɣa marra zemmaren x ssif.
JDG 20:26 [Xas uca] ffɣen marra ayt Israil, řgens marra, uca iwḍen ɣar Bayt-Il, run. Qqimen dinni zzat i wudem n SIDI uca ẓummen deg wass nni ař tameddit uca qeddmen tiɣarṣa n wecmaḍ d tɣarṣa n řehna zzat i wudem n SIDI.
JDG 20:27 [Xenni] sseqsan ayt n Israil SIDI, minzi [di Bayt-Il] tuɣa din Ttabut n Řɛahd n AREBBI deg wussan nni.
JDG 20:28 Deg wussan nni tuɣa ibedd Finaḥas, mmis n Aliɛazar, mmis n Harun, zzat i wudem nnes uca inna: “Ma ad neffeɣ ict n twařa nneɣnit ɣar umenɣi ak-d arrawen n uma Binyamin niɣ ad [dayes] nesmeḥ?” SIDI yarra-dd: “Ffɣem, maɣar tiwecca ad ten ggeɣ deg ufus nnec.”
JDG 20:29 [Xas uca] igga Israil řefxux ɣar marra iɣezdisen n Jibɛa.
JDG 20:30 Deg wass wiss třata geɛɛden ayt n Israil ḍidd i ayt n Binyamin. Sedden ixef nsen [i umenɣi] ak-d Jibɛa, am mammec [tt ggin] twařawin iɛdun.
JDG 20:31 [Xenni] ffɣen ayt n Binyamin i umsagar ak-d ayt n Israil u ttwassiggʷejen x tendint uca, am mammec twařawin iɛdun, bdan ad nɣin [iryazen] zi řgens x ibriden imeqqranen i zzaysen ittgeɛɛed ijj n webrid ɣar Bayt-Il u wenneɣni ɣar Jibɛa, [nɣin] ɛřaḥař třatin n yeryazen n Israil.
JDG 20:32 [Xenni] nnan ayt n Binyamin: “Aqa nitni ttwaɣeřben zzat i wudem nneɣ, am twařa tamezwarut.” [Xenni] nnan ayt n Israil: “Ejj aneɣ ad narweř, ad ten nessiggʷej x tendint ɣar ibriden imeqqranen.”
JDG 20:33 [Xenni] kkaren marra iryazen n Israil zeg wemcan nsen [innuffaren] u sedden ixef nsen [i umenɣi] ɣar Baɛl-Tamar. Di řweqt d ict ffɣen inni zi Israil i tuɣa ggin ijj n řfex zeg wemcan nsen innufaren zeg yefri n Jibɛa.
JDG 20:34 Ɛecra-ařaf n yeryazen ittwafarzen zi marra Israil usin-dd zeg urendad n Jibɛa u amenɣi idweř iwɛar. [Maca ayt n Binyamin] war ssinen, aqa ticti tḥart xasen.
JDG 20:35 SIDI iwta ayt n Binyamin zzat i wudem n Israil, ařami ayt n Israil nɣin deg wass nni xemsa u-ɛicrin-ařef u-mya n yeryazen, inni izemmaren marra x ssif.
JDG 20:36 Ẓrin ayt n Binyamin aqa nitni tuɣa ttwawten. [Xenni] wcin iryazen n Israil ttasiɛ i ayt n Binyamin, minzi nitni ttecřen x řfex nni tuɣa ggin ḍidd i Jibɛa.
JDG 20:37 Inni i tuɣa innuffaren, qeǧqen ad ḥejmen x Jibɛa. [Ammu] i ḥejmen inni i tuɣa deg wemcan innuffaren uca wtin marra tandint s řeqḍeɛ n ssif.
JDG 20:38 Iryaz[en] n Israil tuɣa ggin awař ak-d yinni iggin řfex deg wemcan innuffaren, aqa nitni ad jjen aseynu ameqqran n ddexxan ad dd-igeɛɛed zi tendint,
JDG 20:39 [uca xenni] ad nnqeřben iryazen n Israil deg umenɣi. Binyamin tuɣa ibda ad ineɣ inni ittwassnuqqben zi Israil, ɛřaḥař třatin n yeryazen. Aqa nnan: “Nitni ttwawten nican zzat i wudem nneɣ am deg umenɣi amezwaru.”
JDG 20:40 [DI tsaɛɛet nni] ibda useynu ameqqran ad dd-igeɛɛed zi tendint am yijj n uqellij n ddexxan. Umi ixzar Binyamin ɣar ḍeffar, aqa tandint marra tgeɛɛed [am ddexxan] ɣar ujenna.
JDG 20:41 [Xenni] nnqeřben-dd iryazen n Israil uca iryazen n Binyamin iwta i-ten unexřiɛ, minzi nitni ẓrin aqa ticti taɛeffant tuɣa teřqef i-ten.
JDG 20:42 Nitni nnqeřben ɣar řexřa zzat i wudem n ayt n Israil. Amenɣi [maca] iḍfar i-ten, uca inni zi tneddam aqa ggin ict n tɣarṣt tameqqrant di řwesṭ nsen.
JDG 20:43 Nitni nnḍen i ayt n Binyamin, ḍfaren ten břa qeṭṭu, ɛefsen xasen ař amcan n arraḥet qibač n Jibɛa ɣar uɣezdis n [ccarq] manis dd-tneqqar tfuct.
JDG 20:44 Wḍan tmenṭac-ařef n yeryazen, marra nitni d iryazen imeḥḍen.
JDG 20:45 [Xenni] nnqeřben, arewřen ɣar řexřa, ɣar teṣḍart n Rimmun. U x webrid ameqqran qḍan zzaysen x xemsa-ařaf n yeryazen. Ḍfaren ten ař Jidɛum, wtin zzaysen ařfayen n yeryazen [s řmewt].
JDG 20:46 Deg wass nni tuɣa marra inni iwḍan zi Binyamin di xemsa u-ɛicrin-ařef n yeryazen nni zemmaren x ssif, marra nitni d iryazen imeḥḍen.
JDG 20:47 Setta-mya n yeryazen [maca] nnqeřben, arewřen ɣar řexřa, ɣar teṣḍart n Rimmun, uca nitni qqimen arebɛa n iyuren di teṣḍart n Rimmun.
JDG 20:48 Ɛeqben iryazen n Israil ɣar ayt n Binyamin uca wtin ten marra s řeqḍeɛ n ssif, zeg yeryazen n tendint ař řmař d marra min din ufin. Sennej i man aya ssarɣen marra tineddam i ufin deg webrid nsen s tmessi.
JDG 21:1 Iryaz[en] n Israil tuɣa jjuǧen di Miṣfa uca nnan: “Uřa d ijj zzayneɣ war ittic yeǧis i ayt n Binyamin d tamɣart.”
JDG 21:2 Yusa-dd řgens ɣar Bayt-Il uca qqimen nitni dinni zzat i wudem n AREBBI ař tameddit. Nitni ssgeɛɛden tmijja nsen uca run s imeṭṭawen ittazzřen.
JDG 21:3 Nnan: “[A] SIDI, AREBBI n Israil, mayemmi imsar uya di Israil, aqa ass-a teqqim ict n teqbič n Israil war tbin?”
JDG 21:4 Tiwecca nnes, imsar, aqa řgens ikkar zic. Nitni bnan ijj n uɛalṭar, qeddmen xas tiɣarṣa n wecmaḍ d tɣarṣa n řehna.
JDG 21:5 Nnan ayt n Israil: “Wi iqqimen zi marra tiqebbař n Israil war dd-igeɛɛden ɣar wegraw [n řgens] n SIDI?” Tuɣa ggin ict n tjaǧit zi jjihet n wenni war i dd-igeɛɛden ɣar SIDI ɣar Miṣfa, nnan: “Ad ittwaneɣ nican!”
JDG 21:6 Xas uca nedmen ayt n Israil x umatsen Binyamin, nnan: “Ass-a tᵉttwaqess ict n teqbič zi Israil.
JDG 21:7 Mammec i ɣa negg di tmesřact n temɣarin i [yeryazen n Binyamin] nni iqqimen? [Minzi] neccin nejjuǧ ɣar SIDI war d asen nettic ca yessitneɣ d tamɣart.”
JDG 21:8 Nnan: “Ma war dd-igeɛɛed ca n yijjen zi tqebbař n Israil ɣar SIDI di Miṣfa?” Xzar, war dd-yusi uřa d ijjen zi Yabic di Jilɛad ɣar řmargeḥ n řɛeskar, ɣar wegraw [n řgens],
JDG 21:9 [minzi] řgens ittwaḥseb, u xzar, zi Yabic di Jilɛad war din iǧi uřa d ijjen.
JDG 21:10 [Xenni] tessekk tmesmunt tenɛac-ařef n yeryazen zeg inni d ayt n umenɣi qaɛ uca umuren ten, nnan: “Gaɛɛdem, wtem imezdaɣ n Yabic di Jilɛad s řeqḍeɛ n ssif, uřa d timɣarin d iḥenjiren imeẓyanen.
JDG 21:11 Ammu i ittxeṣṣa ad teggem: marra min iǧan d awtem d marra timɣarin tinni tuɣa iṭṭṣen ak-d weryaz, ad ten tḥarrmem i uteḥḥi!”
JDG 21:12 Ufin jar imezdaɣ n Yabic di Jilɛad arebɛa-mya n tebřiɣin tinni d tiɛzariyyin, tinni tuɣa ɛad war ṭṭiṣent ak-d weryaz, uca iwyen tent ɣar řmargeḥ n řɛeskar di Cilu di temmurt n Kenɛan.
JDG 21:13 [Xas uca] tessekk tmesmunt tmun [ireqqasen] uca ssiwřen ak-d ayt n Binyamin i [iǧan] ɣar teṣḍart n Rimmun, barrḥen asen s řehna.
JDG 21:14 Di řweqt nni ɛeqben ayt n Binyamin uca wcin asen timɣarin tinni tuɣa jjin ddarent zi temɣarin n Yabic di Jilɛad. [Maca] tuɣa war ten ttqeddint [ɛad].
JDG 21:15 [Xenni] tuɣa řgens izziǧez as Binyamin, maɣar SIDI tuɣa igga tazzit deg iseddiyyen n tqebbař n Israil.
JDG 21:16 Uca imeqqranen n tmesmunt nnan: “Mammec i ɣa negg di tmesřact n temɣarin i [yeryazen n Binyamin] nni iqqimen, minzi timɣarin ttwateḥḥant zi Binyamin.”
JDG 21:17 U nnan ɛawed: “Tasɣart n yinni yarewřen aqa-tt n Binyamin. Ittxeṣṣa war tmeḥḥi uřa d ict n teqbič zi Israil.
JDG 21:18 [Maca] neccin war nzemmar ad asen newc timɣarin zi yessitneɣ, maɣar ayt n Israil jjuǧen, nnan: “Wenni iwcin tamɣart i ayt n Binyamin ad ittwanɛeř.”
JDG 21:19 [Xenni] nnan nitni: “Xzar, zeg useggʷas ař aseggʷas aqa din Řɛid n SIDI di Cilu. Řɛid ittwagg sennej i Bayt-Il, ɣar ccarq n webrid ameqqran i ineddhen zi Bayt-Il ɣar Cakim, ɣar uɣezdis n ljanub n Lebuna.”
JDG 21:20 U nitni ɛeřmen i ayt n Binyamin, nnan: “Uyurem din uca wḍam u ḥḍam deg imarjaɛen n uḍiř.
JDG 21:21 Mařa [xenni] kenniw txezzarem u teẓrim xmi i dd ɣa ffɣent yessis n Cilu, ḥima ad ceḍḥent, ffɣem-dd [xenni řexdenni] zeg imarjaɛen n uḍiř uca ejj ad iṭṭef [kuř] aryaz tamɣart nnes zi yessis n Cilu, u awarni as uyurem ɣar temmurt n Binyamin!
JDG 21:22 Mařa [xenni] babatsent niɣ aytmatsent usin-dd ḥima ad xaneɣ cetcan, ad asen nini: ‘Samḥem aneɣ, jjem ten, minzi deg umenɣi [ak-d Yabic] war nzemmar ad nawi i kuř aryaz tamɣart, u ɛawed kenniw war d asen tent tewcim, niɣ iři řexxu ad daywem yiři d amarwas.’”
JDG 21:23 Uca ammu i ggin ayt n Binyamin. Zi teɛzaryin iceṭṭḥen s nnubtat tinni iṭṭfen, ksin nitni timɣarin ɛlaḥsab řqedd nsen uca ffɣen, ɛeqben ɣar tesɣart nsen uca ssbedden tineddam nsen, ggin zeddɣen daysent.
JDG 21:24 Di řweqt nni ffɣen-dd ssenni uřa d ayt n Israil, kuř ijj [yuyur] ɣar teqbič nnes u ɣar řaǧ nnes. Ffɣen ssenni, kuř ijjen [yuyur] ɣar tesɣart nnes.
JDG 21:25 Deg wussan nni war tuɣi din ajeǧid di Israil. Kuř ijj ittegg min [iǧan] nican di tiṭṭawin nnes.
RUT 1:1 Deg wussan i di qeṭṭan řquḍat řeḥkamat [di temmurt], imsar ijj n řaẓ di temmurt. S uyenni iffeɣ ijj n weryaz zi Bayt-Laḥm di Yahudiyya ḥima ad izdeɣ d abarrani deg iyyaren n Mu’ab, netta d temɣart nnes d tnayen n iḥenjiren nnes akides.
RUT 1:2 Aryaz ttřaɣan as Alimalik, tamɣart nnes ttřaɣan as Naɛumi, d tnayen n iḥenjiren nnes ttřaɣan asen Maḥlun d Kilyun, [nitni tuɣa aten d] ayt n Ifrata zi Bayt-Laḥm di Yahudiyya. Nitni iwḍen ɣar iyyaren n Mu’ab, qqimen dinni.
RUT 1:3 Alimalik, aryaz n Naɛumi, immut. Teqqim nettat ak-d tnayen n warraw nnes.
RUT 1:4 Ina iwyen timɣarin n Mu’ab, isem n ict qqaren as Ɛurfa u isem n tenneɣni Raɛut, uca qqiment dinni řqedd n ɛřaḥař ɛecra n iseggʷusa.
RUT 1:5 U mmuten uřa d tnayen nni: Maḥlun d Kilyun. Teqqim temɣart [weḥḥdes], břa tnayen n warraw nnes u břa aryaz nnes.
RUT 1:6 Uca teɛdeř Naɛumi ixef nnes ak-d tesřatin nnes, ḥima ad dd-tedweř zeg iyyaren n Mu’ab, maɣar tuɣa tesřa aqa SIDI yarzef i řgens nnes uca iwca asen aɣrum.
RUT 1:7 [S uyenni] teffeɣ nettat ak-d tnayen n tesřatin nnes zeg wemcan mani tuɣa teqqim [marra řweqt nni]. Nitenti ruḥent deg webrid maḥend ad areggʷḥent ɣar temmurt n Yahudiyya.
RUT 1:8 Tenna Naɛumi i tnayen n tesřatin nnes: “Areggʷḥent-i-dd, dewřent-i-dd, kuř icten ɣar taddart n yemmas! SIDI ad akent iwc tamexsiwt [nnes] icewwaren, am mammec tt teggint deg imettan u dayi.
RUT 1:9 SIDI ad yejj ad tafent arraḥet, kuř icten di taddart n weryaz nnes!” Xenni tessudem i-tent uca nitenti ssgeɛɛdent tmijja nsent, sɣuyent,
RUT 1:10 nnant as: “Neccin ad dd-nedweř nican akidem ɣar řgens nnem!”
RUT 1:11 Naɛumi tenna: “Ɛeqbent-i-dd, a yessi! Mayemmi texsent akidi traḥent? Ma [ɣari] deg uɛeddis inu ɛad iḥenjiren nni izemmaren ad dewřen d iryazen i kennint?
RUT 1:12 Ɛeqbent-i-dd, a yessi inu! Ruḥent, minzi necc aqa wsareɣ maḥend ad ɣari yiři ɛad weryaz. Waxxa nniɣ: ‘Necc ɣari ɛad asitem!’, wah, iři ǧiřet-a ad iřiɣ i yijj n weryaz, wah, ad arweɣ iḥenjiren,
RUT 1:13 ma texsent ad trajant ař ɣa mɣaren, ma texsent ad tmenɛent ixef nkent maḥend ad tdewřent i yijj n weryaz? Lla, a yessi! Aqa ameddur inu iffeɣ d amerzag xakent aṭṭas, maɣar iffeɣ-dd ufus n SIDI ḍidd ayi.”
RUT 1:14 [Xenni] ssgeɛɛdent timijjawin nsent uca arnint ɛad deg iɣuyyan uca Ɛurfa tessudem lallas, maca Raɛut teqqim teřṣeq dayes.
RUT 1:15 Tenna: “Xzar, tanuṭ nnem aqa tedweř ɣar řgens nnes u ɣar irebbiten nnes. Dweř, teḍfared tanuṭ nnem!”
RUT 1:16 Raɛut tarra-dd xas: “War xafi ttziyyar ḥima ad dayem semḥeɣ uca ad dd-dewřeɣ awarni i weɛrur nnem, minzi mani ɣa tuyured cem, din i ɣa uyureɣ uřa d necc, u mani i ɣa tessensed cem, din i ɣa ssenseɣ uřa d necc, řgens nnem d řgens inu, d AREBBI nnem d AREBBI inu.
RUT 1:17 Mani i ɣa temmted, din i ɣa mmteɣ uřa d necc u din i ɣa ttwaneḍřeɣ uřa d necc. Ejj ad ayi igg SIDI ta d ta uca ad dayes yarni ɛad, minzi mɣir řmewt i d ayi ɣa ibḍan xam!”
RUT 1:18 Ařami teẓra [Naɛumi] belli nettat tegga x tecři, war teqqim tessawař ɛad akides.
RUT 1:19 Ammu i yuyurent s tnayen idsent ařami iwḍent ɣar Bayt-Laḥm. Umi iwḍent ɣar Baytlaḥm, imsar, aqa marra tandint tenneḥweř di ṭṭweɛ nsent uca nnant [temɣarin]: “Ma d ta d Naɛumi?”
RUT 1:20 Maca nettat tarra-dd xasen tenna: “War d ayi ttřaɣant ‘Naɛumi’ [ssa d tsawent], [maca] řaɣant ayi: ‘Mara’, maɣar Amzemmar x kuřci igga dayi tarzugi d tameqqrant.
RUT 1:21 Ffɣeɣ ccureɣ maca SIDI ijja ayi ad dd-areggʷḥeɣ s ifassen xwan. Mayemmi d ayi ttřaɣant [ɛad] ‘Naɛumi’ umi xafi iched SIDI u Amzemmar x kuřci igga ayi min iǧan d aɛeffan?”
RUT 1:22 [Ammu] i tareggʷeḥ Naɛumi ak-d Raɛut, Tamu’abect, tasřift nnes nni dd-idewřen akides zeg iyyaren n Mu’ab. Iwḍent nitenti ɣar Baytl-Laḥm ɣar umezwaru n tmeyra n imendi.
RUT 2:1 Naɛumi tuɣa ɣares ijjen zi řaǧ n weryaz nnes, ijj n weryaz s waṭṭas n wagřa, zi řaǧ n Alimalik, ttřaɣan as Buɛaz.
RUT 2:2 Tenna Raɛut Tamu’abect i Naɛumi: “Ejj ayi ad ffɣeɣ ɣar iyyar ad ssmuneɣ tidrin awarni i wenni i ɣa yafeɣ arḍa di tiṭṭawin nnes.” Uca nettat tarra-dd xas: “Uyur, yeǧi!”
RUT 2:3 Raɛut tuyur uca tusa-dd din, tessmuna awarni i yinni imejjaren. Uca imsar, tewḍa as-dd tesɣart n yeyyar n Buɛaz wenni zi řaǧ n Alimalik.
RUT 2:4 U xzar, yusa-dd Buɛaz zi Bayt-Laḥm, inna i yinni imejjaren: “SIDI akidwem!” Nitni arrin-dd xas: “SIDI ad cek ibarek!”
RUT 2:5 [Xenni] inna Buɛaz i umsexxar nnes wenni tuɣa x yinni imejjaren: “Umi tegga yeǧis taḥenjirt nni?”
RUT 2:6 Amsexxar wenni tuɣa x yinni imejjaren, yarra-dd xas, inna: “Nettat d taḥenjirt Tamu’abect i dd-yusin ak-d Naɛumi zeg iyyar n Mu’ab.
RUT 2:7 Nettat tenna: ‘Ejj ayi ad ssmuneɣ tidrin u ad yarweɣ tidrin ɣar icuwwafen [n imendi] awarni i yinni imejjaren!’ Ammu i dd-tusa uca teqqim zeg uteffu n řḥař ař řexxu. Drus waha i teqqim di taddart.”
RUT 2:8 Buɛaz inna i Raɛut: “Sḥes ɣari, a yeǧi! War třeqqḍed uřa ɣar ijj n yeyyar nneɣni, war ttaggʷej zi ssa, maca qqim tudsed ɣar temsexxarin inu.
RUT 2:9 [Tebbet] tiṭṭawin nnem deg iyyar aya mani mejjaren, uyur awarni asent. Necc ɛeřmeɣ i imsexxaren inu, war cem ttḥidin. [Mařa] teffuded, tzemmared ad tuyured ɣar iqubac ad teswed zi min d yuymen imsexxaren.”
RUT 2:10 Nettat tewḍa x wudem nnes uca tuḍar ɣar temmurt, tenna as: “Mayemmi ufiɣ arḍa di tiṭṭawin nnec, aqa cek tbedded akidi, [waxxa] necc d tabarranit?”
RUT 2:11 Buɛaz yarra-dd xas, inna: “Aqa nnan ayi nican marra min teggid i lallam awarni i řmewt n weryaz nnem, mammec teggid tsemḥed di babam d yemmam d temmurt nnem mani txeřqed uca tuyured ɣar ijj n řgens i war t tessined qbeř.
RUT 2:12 Ad cem ixeǧeṣ SIDI n Israil tasexxart nnem [taṣebḥant] i teggid uca ad am dd-tas řmunet teccur zi SIDI, AREBBI n Israil, sadu ifriwen nnes i dd-tusid maḥend ad dinni tedduryed.”
RUT 2:13 Nettat tenna: “Ejj ayi ad afeɣ arḍa di tiṭṭawin nnec, a sidi inu, minzi tessfewwjed xafi, tessiwřed ɣar wuř n tayya nnec, waxxa necc war ǧiɣ am uřa d ict zi tiyya nnec.”
RUT 2:14 Ɣar řḥař n macca inna as Buɛaz: “As-dd da uca ecc zeg weɣrum, sisen ařeqquz nnem di řxeǧ!” Nettat teqqim zzat i yinni imejjaren uca iwca as netta tiɣwawin, tecca tejjiwen, iceṭṭ xas ɛad.
RUT 2:15 Ařami tekkar ḥima ad tessmun tidrin, iɛřem Buɛaz i imsexxaren nnes: “Ejj i-tt ad tessmun jar icuwwafen [n imendi] u war tt tesseḥqaram ca!
RUT 2:16 Ɣeḍřem as-dd cwayt cwayt zi tqebbiḍin uca jjem tt [di tammurt], uca jjem tt ad tessmun aya, war tt tzawarem.”
RUT 2:17 Uca nettat tuɣa třeqqeḍ deg iyyar nni ař tameddit. Xenni tṣeffa min tuɣa teřqeḍ. Tuɣa ɛřaḥař řqedd n ijj n ifa n imendi.
RUT 2:18 Nettat tessmun i-t, tudef ɣar tendint uca teẓra lallas min tuɣa teřqeḍ. Tejbed [ɛawed] min tuɣa iceṭṭen zi macca nnes tameqqrant uca tewca as t.
RUT 2:19 [Xenni] tesseqsa lallas: “Mani třeqḍed ass-a u mani txedmed? Ad ittwabarek wenni tuɣa akidem ibedden!” Uca nettat tḥaja as i lallas wi i ɣar tuɣa texdem, tenna: “Aryaz i ɣar xedmeɣ ass-a ttřaɣan as Buɛaz.”
RUT 2:20 [Xenni] tenna Naɛumi i tesřift nnes: “Ad ittwabarek SIDI wenni war ikkisen tamexsiwt nnes icewwaren zeg yinni iddaren d yinni immuten!” Tenna as Naɛumi [ɛawed]: “Aryaz nni zzayneɣ, netta d ijj zeg imefdiyyen nneɣ [inni zemmaren ad sɣen afedday].”
RUT 2:21 Raɛut, Tamu’abect, tenna: “Netta inna ayi ɛad: ‘Qqim ɣar imsexxaren nni ɣari iǧan, ař ɣa kemmřen ad ssmunen marra tamegra nni ɣari iǧan.’”
RUT 2:22 Tenna Naɛumi i tesřift nnes Raɛut: “Mliḥ, a yeǧi, mařa teffɣed cem ak-d temsexxarin nnes, xenni war iǧi wi cem i ɣa ihewřen deg iyyar nneɣni.”
RUT 2:23 Raɛut teqqim tudes i temsexxarin n Buɛaz ḥima ad tessmun [tidrin], ařami teqḍa tmeyra n imendi d tmeyra n irden uca teqqim [tezdeɣ] ɣar lallas.
RUT 3:1 Uca lallas Naɛumi tenna as: “A yeǧi, ma tuɣa war ttexseɣ ad am afeɣ amcan n řaman ḥima ad tiřid mliḥ?
RUT 3:2 Ma war iǧi Buɛaz, i ɣar tuɣa cem jar temsexxarin nnes, d ijjen zi raǧ nneɣ? Xzar, ass-a ɣar tmeddit, ad izzuzar imendi deg unedrar.
RUT 3:3 Sird, dhen ixef nnem uca yarḍ taqendurt nnem, xenni hwa-dd ɣar unedrar! War seccan ixef nnem i weryaz ař ɣa yiři icca iswa.
RUT 3:4 Mařa iraḥ ad iṭṭeṣ, ad tiři ad tarzud amcan mani izzeř. Adef [xenni] ɣar din, tɛarrid x dduri x iḍaren nnes uca zzeř dinni! Netta ad am yini [xenni], min ittxeṣṣa ad t tegged.”
RUT 3:5 Nettat tarra-dd xas: “Marra min d ayi teqqared, ad t ggeɣ.”
RUT 3:6 Nettat tehwa ɣar unedrar uca tegga amenni qaɛ min tuɣa d as tenna lallas.
RUT 3:7 [Řami] icca iswa Buɛaz, ifarḥ wuř nnes, ikkar yuyur, ḥima ad izzeř ɣar ṭṭarf n ijj n uɛurric n tqebbiḍin [n imendi]. [Xenni] tusa-dd břa řḥess, tɛarra [x dduri] ɣar iḍaren nnes uca tezzeř.
RUT 3:8 Ɣar wezyen n ǧiřet innexřeɛ weryaz nni, inneqřeb, uca xzar, ict n temɣart tuɣa tezzeř ɣar iḍaren nnes.
RUT 3:9 Netta inna: “Min teɛnid cem?” Nettat tarra-dd xas: “Necc d Raɛut, tayya nnec. Egg maca afriw nnec x tayya nnec, maɣar cek d wenni izemmaren ad ayi ifdi.”
RUT 3:10 Inna netta: “Tettwabarked cem zi SIDI, a yeǧi! [Řexxu] deg uneggar teggid tamexsiwt nnem icewwaren mahu s min teggid deg umezwaru, maɣar cem war tuzziřed awarni i iɛezriyyen, imezřaḍ niɣ ayt n bu wagřa.
RUT 3:11 [Xenni] řexxu, [a] yeǧi, war tteggʷed ca! Marra min ɣa tinid, ad am t ggeɣ, maɣar qaɛ wi da di tewwart [n tendint] n řgens inu issen, aqa cem d ict n temɣart temḥeḍ.
RUT 3:12 Řexxu [xenni], d tidett necc d ijj n umefdi, maca din ɛad ijj n umefdi nneɣni, wenni d am itteɛnan ktar xafi necc.
RUT 3:13 Seɛdu ǧiřet-a da. Mařa imsar tiwecca di ṣṣbeḥ, netta ixs ad xam ifdi, mliḥ, [xenni] ejj i-t ad ifdi, maca mařa netta war ixs ad cem ifdi, xenni necc ad xam fdiɣ, s tidett xenni am iddar SIDI. Qqim zzeř ař tiwecca.”
RUT 3:14 [Ammu] i teqqim tezzeř ɣar iḍaren nnes ař tiwecca uca qbeř ma izemmar ijj ad iẓar wenneɣni, tekkar, [maɣar] netta inna: “War tᵉttiři tᵉttwassnen, aqa ict n temɣart tuɣa tusa-dd ɣar unedrar”
RUT 3:15 Netta inna [ɛawed]: “Ksi tacḍaḍt i zi třeḥḥfed, ṭṭef i-tt!” Uca netta iccur i-tt s setta n [řeqyasat] n imendi uca issarbu tt xas. Xenni yudef ɣar tendint.
RUT 3:16 Tusa-dd nettat ɣar lallas u tanita tesseqsa: “Min teɛnid cem, a yeǧi?” Nettat tḥaja as marra min kis igga weryaz [nni].
RUT 3:17 Tenna: “Setta n [řeqyas-a] n imendi iwca ayi ten, maɣar netta inna: ‘Cem war teggured ca ɣar lallam s ifassen ixwan.’”
RUT 3:18 [Xenni] tenna [Naɛumi]: “Raja, a yeǧi, qqim [da] ař ɣa tessned mammec ɣa teffeɣ tmesřact. Minzi aryaz [nni] war ittareyyiḥ ca ař dd-issuffeɣ tamesřact ɛad ass-a ɣar uneggar nnes.”
RUT 4:1 Buɛaz igeɛɛed ɣar tewwart n tendint uca iqqim dinni. U xzar, iɛdu-dd umefdi, wenni xef tuɣa issiweř Buɛaz. Netta inna as: “A cek, diha, as-dd ɣar ṭṭarf [n webrid] u teqqimed danita!” Yusa-dd ɣar ṭṭarf [n webrid] uca iqqim.
RUT 4:2 Yiwi-dd Buɛaz ɛecra n yeryazen zeg imɣaren n tendint, inna: “Qimem-dd danita!”, uca qqimen.
RUT 4:3 [Xenni] inna i umefdi: “Naɛumi tenni dd-iɛeqben zi temmurt n Mu’ab texs ad tezzenz takirat n yeyyar i tuɣa ɣar umatneɣ Alimalik.
RUT 4:4 Necc xemmeɣ, xseɣ ad cek xas xebbareɣ uca ad ac iniɣ: Seɣ i-tt zzat n yinni i da iqqimen u zzat n imɣaren n řgens. Mařa texsed ad tt tefdid, fdi tt u mařa war texsed ad tt tefdid, ini ayi t ḥima ad ssneɣ, minzi war da ḥed izemmar ad tt ifdi mɣir cek niɣ d necc, u necc i iǧan awarni ac.” [Xenni] inna netta: “Necc ad tt fdiɣ.”
RUT 4:5 Buɛaz yarni inna: “Deg wass i di i ɣa tesɣed iyyar zeg ufus n Naɛumi, [xenni] ad tesɣed akides uřa d Raɛut, Tamu’abect, tamɣart n wenni immuten, ḥima ad teḥḍid isem n umettin x tesɣart nnes n řwart.”
RUT 4:6 Inna umefdi: “[Xenni] necc war zemmareɣ ad t fdiɣ, ḥima war ttḍiyyɛeɣ tasɣart inu. Fdi [t] cek i yixef nnec min xafi maḥend ad t fdiɣ, maɣar necc war zemmareɣ ad t fdiɣ.”
RUT 4:7 Ammu tuɣa tteggen inni n zzman umi ggin ad beddřen [iyyar] jar asen niɣ umi t fdin, aqa, ḥima ad tewced tamesřact zzat i wudem n marra Israil, aqa aryaz ittekkes sandala nnes uca ittic i-tt i jjar nnes. D man aya tuɣa iǧan di Israil.
RUT 4:8 Amefdi inna i Buɛaz: “Seɣ i-t i yixef nnec!” Uca netta ikkes sandala nnes.
RUT 4:9 [Xenni] Buɛaz inna i marra imɣaren u i marra řgens: “Kenniw d řechud deg wass-a, aqa necc, marra min [iǧan] n Alimalik u marra min [iǧan] n Kilyun u n Maḥlun, sɣiɣ t zeg ufus n Naɛumi.
RUT 4:10 Uřa d Raɛut, Tamu’abect, tamɣart n Maḥlun, iwyeɣ tt d tamɣart, ḥima ad iqqim isem n wenni immuten x tesɣart n řwart nnes, maḥend isem n wenni immuten war ittekkes jar aytmac u zi tewwart n wemcan n tzeddiɣt nnes. Deg wass-a aqa kenniw d řechud.” *
RUT 4:11 Marra řgens nni iǧan di tewwart [n tendint] d imɣaren nnan: “Neccin d řechud! Iři SIDI ad yegg tamɣart nni i d ɣa yadfen ɣar taddart nnec am Raḥil d Liya, tinni zzaysent s tnayen tᵉttwagg teddart n Israil. Egg s cḍaret di Ifrata uca ad ittwabarreḥ isem [nnec] di Bayt-Laḥm!
RUT 4:12 Taddart nnec tegga am taddart n Fariṣ, wenni turuw-dd Tamar i Yahuda, zeg warraw i d ac ɣa iwc SIDI zi tebřiɣt-a.”
RUT 4:13 Buɛaz yiwi Raɛut uca nettat tedweř d tamɣart nnes uca yudef xas uca SIDI iwca as ad teksi s ddeyset uca turuw-dd ijj n uḥenjir.
RUT 4:14 Uca nnant timɣarin i Naɛumi: “Ad ittwabarek SIDI wenni war cem ijjin ass-a nhřa ijj n umefdi. Iři ad ittwabarreḥ isem nnes di Israil!
RUT 4:15 Ad ɣarwem yiři am wenni dd-issfaqen řeɛmar nnem uca ad cem iṣun x tewsar nnem, maɣar tasřift nnem, tenni cem ittexsen, turuw i-t-i-dd, aqa nettat teḥřa x sebɛa n iḥenjiren.”
RUT 4:16 Naɛumi teksi aḥenjir, tessars i-t x idmaren nnes u tedweř tessyam i-t.
RUT 4:17 Tajjarin wcint as ijj n yisem, nnant: “I Naɛumi ittwarwuw as-dd ijj n uḥenjir!”, u ggin as Ɛubid. Netta d babas n Yassa, babas n Dawud.
RUT 4:18 Ina d inni dd-ittwarwen zi Fariṣ: Fariṣ ijja-dd Ḥaṣrun,
RUT 4:19 Ḥaṣrun ijja-dd Ram, Ram ijja-dd Ɛamminadab,
RUT 4:20 Ɛamminadab ijja-dd Naḥcun, Naḥcun ijja-dd Salmun,
RUT 4:21 Salmun ijja-dd Buɛaz, Buɛaz ijja-dd Ɛubid,
RUT 4:22 Ɛubid ijja-dd Yassa d Yassa ijja-dd Dawud.
1SA 1:1 Tuɣa din ijj n weryaz zi Ramatayim-Ṣufim, zeg idurar n Ifrayim, qqaren as Ilqana, mmis n Yaruḥam, mmis n Alihu, mmis n Tuḥu, mmis n Ṣuf, ijj n [weryaz] zi Ifrayim.
1SA 1:2 Netta tuɣa ɣares tnayen n temɣarin. Icten qqaren as Ḥanna u tenneɣnit qqaren as Faninna. Faninna tuɣa ɣares iḥenjiren, [maca] Ḥanna war ɣares tuɣi bu iḥenjiren.
1SA 1:3 Aryaz-a tuɣa ittgeɛɛad aseggʷas x useggʷas zi tendint nnes ḥima ad isjed u ad iqeddem tiɣarṣa i SIDI n řɛeskarat [ɣar Taddart n SIDI] di Cilu. Dinni tuɣa tnayen n iḥenjiren n Ɛali, Ḥufni d Finaḥas. Nitni d ikehhanen n SIDI.
1SA 1:4 Deg wass řami dd-yiwi Ilqana taɣarṣt, imsar aqa iwca tiseqqar [n tɣarṣt] i temɣart nnes Faninna u i marra iḥenjiren nnes d tḥenjirin nnes,
1SA 1:5 [maca] i Ḥanna iwca as tnayen n tseqqar, maɣar netta tuɣa ittexs Ḥanna, waxxa SIDI tuɣa ibelleɛ as řemřawet.
1SA 1:6 Taɣrimt nnes tuɣa tseɛɛar i-tt aṭṭas maḥend ad tt tessfugem, minzi SIDI tuɣa ibelleɛ as řemřawet.
1SA 1:7 Ammu i igga [Ilqana] aseggʷas x useggʷas. Uca meřmi ma tᵉttgeɛɛed [Ḥanna akides] ɣar Taddart n SIDI, tseɛɛar i-tt [Faninna] u nettat tru, war tecci walu.
1SA 1:8 [Xenni] inna aryaz nnes Ilqana: “Ḥanna, mayemmi tᵉttrud, mayemmi war tᵉttᵉtted ca u mayemmi uř nnem icḍen? Ma necc war d am cniɣ x ɛecra n iḥenjiren?”
1SA 1:9 [Deg ijj n wass], awarni umi tecca u teswa di Cilu, tekkar Ḥanna. Tuɣa akehhan Ɛali iqqim x řkursi ɣar tefřawt [n uɣezḍis n tewwart] n Zzawect n SIDI.
1SA 1:10 [Tuɣa] řeɛmar [n Ḥanna] yarzeg, tᵉẓẓuǧ ɣar SIDI, tru aṭṭas.
1SA 1:11 Nettat tegga ijj n lwaɛd, tenna: “[A], SIDI n řɛeskarat, mařa Cek texzared s tidett ɣar řemḥayen n tayya nnec u txarrṣed dayi u war tᵉttᵉttud tayya nnec, ad tewced i tayya nnec ijj n uḥenjir d awtem, [xenni] ad t wceɣ i SIDI min ɣa yekk iddar uca uřa d ijj n řmus war ittḥeffi i uzeǧif nnes.”
1SA 1:12 Umi tekka aṭṭas tᵉttẓaǧa zzat i wudem n SIDI, imsar, aqa Ɛali iḥḍa aqemmum nnes.
1SA 1:13 Tuɣa Ḥanna tessiweř deg wuř nnes, iyencicen nnes ttenhezzan waha, [maca] tmijja nnes tuɣa war tᵉttwaseř. Ɛali ittɣiř as tescar.
1SA 1:14 Inna as Ɛali: “Mecḥař [ɛad] i ɣa teqqimed tescared? Kkes xam ssekra nnem!”
1SA 1:15 Ḥanna tarra-dd xas, tenna: “Lla, sidi inu, necc d ict n temɣart s buḥbeř icḍen. Necc war swiɣ binu uřa d ccrab, maca farrɣeɣ uř inu zzat i wudem n SIDI.
1SA 1:16 War ḥesseb ca tayya nnec d ict n tyeǧit i war tsekkʷi, maɣar ař i řexxu ssiwřeɣ [waha] zi řhemm inu ameqqran u zi tiqqest [n wuř] inu.”
1SA 1:17 Ɛali yarra-dd xas, inna: “Uyur di řehna uca AREBBI n Israil ad am iwc min zzayes tᵉttared.”
1SA 1:18 Nettat tenna: “Iři ad taf tayya nnec d aḥinni zzat i tiṭṭawin nnec!” [Xenni] tuyur temɣart abrid nnes, tecca u tuɣa aɣembub nnes war icḍin ɛad.
1SA 1:19 Ɣar tuffut n ṣṣbeḥ kkaren zic, bendqen zzat i wudem n SIDI uca ɛeqben ɣar taddart nsen di Rama. Tuɣa Ilqana iṭṭeṣ ak-d Ḥanna, tamɣart nnes, uca SIDI ixarreṣ dayes, di Ḥanna.
1SA 1:20 Umi ɛdun wussan awarni řami teksi Ḥanna s ddeyset, turuw-dd ijj n uḥenjir. Tegga as Camwil, [umi nettat tenna]: “Maɣar necc ttareɣ t zi SIDI.”
1SA 1:21 Uca aryaz nni, Ilqana, igeɛɛed [ɛawed] ak-d marra [inni n] taddart nnes, ḥima ad yawi taɣarṣt n kuř aseggʷas d tɣarṣt nnes n lwaɛd i SIDI.
1SA 1:22 [Maca] Ḥanna war kidsen tgiɛɛid ca, maca tenna i weryaz nnes: “Xmi d as ɣa kkseɣ uṭṭuḍ i useymi, [xenni] ad t-i-dd-awyeɣ [din], uca ad iḍhar [uḥenjir] zzat i wudem n SIDI u netta ad iqqim dinni i řebda.”
1SA 1:23 Aryaz nnes, Ilqana, inna as: “Egg min tᵉttwařid mliḥ di tiṭṭawin nnem. Qqim da [di taddart] ař d as i ɣa tekksed uṭṭuḍ. Ad iqfeř SIDI awař nnes!” Ammu i teqqim temɣart di taddart uca tessuṭṭuḍ aḥenjir nnes ařami i d as tekkes uṭṭuḍ.
1SA 1:24 Awarni řami i d as tekkes uṭṭuḍ, tiwyi t akides ak-d třata n ifunasen imeẓyanen d ijj n ifa n waren d ict n txancet n binu. Nettat tiwyi t ɣar Taddart n SIDI di Cilu. Tuɣa-t aḥenjir [ɛad] d ameẓyan.
1SA 1:25 Nitni ɣarṣen i ufunas ameẓyan uca iwyen aḥenjir ɣar Ɛali.
1SA 1:26 Nettat tenna: “A, sidi inu, s tidett am iddar řeɛmar nnec, [a] sidi inu, necc d tamɣart nni tuɣa i da ibedden ɣar uɣezdis nnec, ḥima ad ẓẓaǧeɣ ɣar SIDI.
1SA 1:27 Necc ttareɣ aḥenjir-a u SIDI isřa i tutra inu nni zzayes ttareɣ.
1SA 1:28 S uyenni aqa sellmeɣ t i SIDI marra ussan min ɣa yekk iddar. Aqa immewc i SIDI.” Uca netta ibendeq [din] zzat i wudem n SIDI.
1SA 2:1 [Xenni] teẓẓuǧ Ḥanna, tenna: “Uř inu ittesřiwřiw s řefraḥet di SIDI. Icc inu ittwassgeɛɛed di SIDI. Aqemmum inu yarzem d arzam x řɛedyan inu, maɣar farḥeɣ x usenjem nnec.
1SA 2:2 Uřa d ijj d amqeddes am SIDI, maɣar war din iǧi ḥed mɣir Cek, u war din teǧi teṣḍart am AREBBI nneɣ!
1SA 2:3 War tarennim tessawařem ammu s nnfaxet, war dd-tteffiɣ uřa d ca n tuffet zeg uqemmum nwem, maɣar SIDI d ijj n Arebbi issen marra, timegga nnes ttwaweznent.
1SA 2:4 Řqews n ayt n bu-teɣruḍt ittwarẓa, maca inni inqarḍen ḥezzmen s jjhed.
1SA 2:5 Inni ijjiwnen arehnen ixef nsen i weɣrum, maca inni iǧuẓen, war qqimen ɛad ǧuzen. Tenni war ittirwen turuw-dd sebɛa n iḥenjiren, tenni ɣar iǧa ubarru n iḥenjiren, tisřaw.
1SA 2:6 AREBBI ineqq u ittic tudart, Netta isshekkʷwa ɣar řaxart u issgeɛɛad-dd ssenni.
1SA 2:7 SIDI ittarra ijj d amezřuḍ u ijj nneɣni yarra i-t d bu-wagřa, isshekkwa d issgeɛɛad.
1SA 2:8 Amuqřiř issekkar i-t zi tɛejjajt, řmeskin ijebd i-t-i-dd zeg wefraḍ, maḥend ad ten issɣim ɣar tarwa n taṣiřet, maḥend ad iwc ijj n řkursi n řɛezz d řwart, minzi dsusa n temmurt iǧan n SIDI u Netta issbedd xasen ddunect.
1SA 2:9 Netta i issřeqqan x iṣuraf n imtiqqan nnes, maca iɛeffanen ad ttwassbekmen di taǧest, minzi aryaz war ittiři ca d bu teɣruḍt zi jjehd n yixef nnes.
1SA 2:10 Wenni ittemcubbucen ak-d SIDI, ad ittwarẓ. Ad xasen isshemhem deg ujenna. SIDI ad iḥkem tineggura n ddunect, ad iwc tizemmar i ujeǧid uca ad issgeɛɛed icc n lmasiḥ nnes.”
1SA 2:11 Iɛqeb Ilqana [ɛawed] ɣar taddart nnes ɣar Rama, [maca] aḥenjir isexxar i SIDI zzat i wudem n ukehhan Ɛali.
1SA 2:12 [Maca] tarwa n Ɛali tuɣa d tarwa i war isekkwin. Nitni war ssinen ca SIDI.
1SA 2:13 Ikehhanen nnumen ad ggen ak-d řgens [ammu]: mařa yiwi ijj n weryaz ict n tɣarṣt, [xenni], umi tuɣa aysum [ɛad] ittnenna, yusa-dd ijj n umsexxar n ikehhanen ak-d ict n furcita n třata n icukḍan deg ufus nnes,
1SA 2:14 ijju tt di řburmet niɣ deg uṭenjir niɣ di marmita niɣ di teydurt u marra min ɣa teksi furcita, iksi t ukehhan i yixef nnes. Ammu i t ggin ɣar marra [ayt n] Israil inni dd-yusin ɣar Cilu.
1SA 2:15 Ammu ɛawed, qbeř ɣa bexxaren tadunt, yusa-dd ijj n umsexxar n ikehhanen, inna i weryaz nni dd-iwyen taɣarṣt: “Ewc ayi aysum ḥima ad t qřiɣ i ukehhan, minzi netta war xak iksi ca aysum ittwanennan, maca mɣir aziza.”
1SA 2:16 Mařa yarra-dd xas weryaz: “Amezwar ittxeṣṣa ad bexxaren tadunt marra, xenni ksi min ixs wuř nnec i yixef nnec!”, inna as [umsexxar n ukehhan]: “Lla, ittxeṣṣa ad t tewced řexxu, mařa lla, ad t ksiɣ s uɣiř!”
1SA 2:17 Ddenb n imsexxaren tuɣa imɣar aṭṭas zzat i wudem n SIDI, maɣar iryazen sseḥqaren tawhibt [n řɣiǧet] n SIDI.
1SA 2:18 [Maca] Camwil tuɣa ittsexxar zzat i wudem n SIDI, aqa-t d ijj n uḥenjir iḥezzmen s yijj n upalṭu [n ukehhan] n řeqṭen.
1SA 2:19 Yemmas tegga as ijj n useřham uca tᵉttawyi as t-i-dd zeg useggʷas ɣar useggʷas, xmi tᵉttgeɛɛed ak-d weryaz nnes ḥima ad tawi din taɣarṣt n kuř aseggʷas.
1SA 2:20 Igga Ɛali lbaraka di Ilqana d temɣart nnes, inna: “Iři ad ac iwc SIDI zi temɣart-a ijj n uḥenjir deg wemcan n [uḥenjir] i tsellem nettat, [deg wemcan n uḥenjir] i immewcen i SIDI.” [Xenni] ɛeqben nitni ɣar wemcan n tzeddiɣt nnes.
1SA 2:21 SIDI maca ixzar ɣar Ḥanna u nettat teksi s ddeyset uca turuw-dd třata n iḥenjiren d tnayen n tḥenjirin, am tuɣa imeqqar Camwil ameẓyan ɣar SIDI.
1SA 2:22 Idweř Ɛali iwsar aṭṭas. Netta isřa x marra min ggin iḥenjiren nnes i marra Israil uca [isřa ɛawed] aqa nitni ṭṭṣen ak-d temɣarin i tuɣa ttsexxarent ɣar wadaf n Uqiḍun n Umsagar.
1SA 2:23 Netta inna asen: “Mayemmi tᵉtteggem aya ammu, ařami i ttesřiɣ zi marra řgens-a x tmegga nwem tiɛeffanin?
1SA 2:24 Lla, a iḥenjiren inu, aya war iǧi d ijj n řexbar iḥřa i sřiɣ. Kenniw tᵉttarram řgens-a n SIDI ad iwḍa di xeṭṭu.
1SA 2:25 Mařa ijj n bnadem ixḍa ak-d ijj bnadem [nneɣni], [xenni] ad xas iḥkem AREBBI, maca mařa ijj n bnadem ad ixḍa x SIDI, wi xas ɣa iwten?” [Waxxa amenni] nitni war sřin ca ɣar babatsen, maɣar SIDI tuɣa ixs ad ten ineɣ.
1SA 2:26 [Maca] Camwil ameẓyan tuɣa imeqqar uca yarni ittas-dd x řxaḍar i SIDI uřa ɣar iwdan.
1SA 2:27 Uca yusa-dd ijj n weryaz n SIDI ɣar Ɛali, inna as: “Ammu i iqqar SIDI: ‘Ma war i d ssecneɣ ixef inu nican i taddart n babac umi ten tuɣa di Miṣra, di taddart n firɛun?
1SA 2:28 Necc farzeɣ t zi marra tiqebbař n Israil d akehhan i Necc maḥend ad igeɛɛed ɣar uɛalṭar inu ḥima ad din issarɣ řebxur [u] maḥend ad yarḍ apalṭu [n ukehhan] zzat i wudem inu. Necc wciɣ [ɛawed] i taddart n babac marra tiɣarṣa n tmessi n ayt n Israil.
1SA 2:29 Mayemmi tɛeffsem kenniw x tɣarṣt inu d tewhibt [n řɣiǧet] i zi umureɣ [maḥend ad tent twehhbem] di Tzeddiɣt [inu], u [mayemmi] tᵉttweqqarem iḥenjiren nwem aṭṭas xafi umi tmesřem kenniw ixef nwem s mummu n marra tiwhibin [n řɣiǧet] n řgens inu Israil?’
1SA 2:30 S uya iqqar SIDI, AREBBI n Israil: ‘Necc nniɣ nican: Taddart nnec d taddart n babac ad uyurent zzat i wudem inu i řebda!’, [maca] řexxu iqqar SIDI: ‘Aya aqa iggʷej xafi, maɣar inni d ayi ittweqqaren, ad ten weqqareɣ, [maca] inni i d ayi isseḥqaran, ad ttwaḥesben d imuqřiřen.
1SA 2:31 Xzar ad asen wussan, ad qeḍɛeɣ aɣiř nnec d uɣiř n taddart n babac ařami war ittiři [ɛad] d awessar di taddart nnec.
1SA 2:32 Cek ad texzared [belli ad dd-yas] ijj n weɣrim [n] Tzeddiɣt, waxxa Netta ittegg tcuni-ya marra i Israil, uca ɛemmarṣ ad yiři [ɛad] ijj n uwessar di taddart nnec, marra ussan.
1SA 2:33 War qeṭṭɛeɣ ca kuř aryaz i ɣ̮arek iǧan x uɛalṭar inu, ařami ɣa uḥřent tiṭṭawin nnec qaɛ, ad tefna řeɛmar nnec uca marra arraw n taddart nnec ad mmten d iryazen.
1SA 2:34 D ta i d ak ɣa tiři d řeɛřamet nni dd ɣa tas x tnayen n iḥenjiren nnec, Ḥufni d Finaḥas: ad mmten s tnayen deg ijj n wass.
1SA 2:35 Necc maca ad ggeɣ i Ixef inu ijj n ukehhan d amtiqqi. Netta ad igg ɛlaḥsab uř d řeɛmar inu. Necc ad as ssbeddeɣ ict n taddart temten uca netta ad yuyur řebda zzat i wudem n lmasiḥ inu.
1SA 2:36 Uca ad imsar, belli marra wi ɣa iqqimen zi taddart nnec, ad dd-yas ad as ibendeq i yict n tuqiyyat n nnuqart niɣ i yict n tecnift n weɣrum, ad yini: ‘Arni ayi mɣir ɣar ict n řxedmet n tsexxart n ikehhanen, maḥend ad ɣari yiři ijj n uřeqqim n weɣrum i macca.’”
1SA 3:1 Camwil ameẓyan tuɣa ittsexxar i SIDI zzat i wudem n Ɛali. Deg wussan nni tuɣa awař n SIDI iqqiǧet. War tuɣi tᵉtteffiɣ ca n řewḥiy.
1SA 3:2 Deg wass nni, umi Ɛali iṭṭeṣ deg wemcan nnes uca dewřent tiṭṭawin nnes arxunt ařami tuɣa war izemmar ad ittwařa [ɛad], imsar -
1SA 3:3 [ɛad] qbeř ixsi řefnar n AREBBI u Camwil tuɣa iṭṭeṣ di Zzawect n SIDI mani teǧa Ttabut n AREBBI -
1SA 3:4 aqa SIDI iřaɣa i Camwil. Uca yarra-dd xas Camwil: “Necc aqa ayi da!”
1SA 3:5 Netta yuzzeř ɣar Ɛali, inna: “Danita i ǧiɣ, cek třaɣid ayi-dd.” [Maca] netta inna: “Necc war xak dd-řaɣiɣ ca, ɛqeb, ad tezzřed!” Uca iɛqeb, izzeř.
1SA 3:6 SIDI iřaɣa i Camwil twařa nneɣnit uca ikkar-dd Camwil, yuyur ɣar Ɛali, inna: “Necc aqa ayi da, minzi cek třaɣid ayi-dd.” Yarra-dd xas netta: “Necc war xak dd-řaɣiɣ ca, mmi, ɛqeb, ad tezzřed!”
1SA 3:7 Camwil ɛad war issin SIDI u awař n SIDI tuɣa ɛad war d as ittwassargeb.
1SA 3:8 Iřaɣa-dd SIDI x Camwil ɛawed i twařa wiss třata u netta ikkar-dd, yuyur ɣar Ɛali, inna: “Necc aqa ayi da, cek třaɣid ayi-dd.” [Xas uca] iḥekkar Ɛali, aqa SIDI tuɣa iřaɣa x uḥenjir,
1SA 3:9 uca Ɛali inna i Camwil: “Ruḥ, ad tezzřed! Mařa Netta iřaɣa ac-dd [ɛawed], xenni arr xas: ‘Siweř, SIDI, maɣar amsexxar nnec ittesřa!’” Uca iɛqeb Camwil, izzeř deg wemcan nnes.
1SA 3:10 [Xenni] yusa-dd SIDI uca ibedd din uca iřaɣa am twařawin nneɣni: “Camwil, Camwil!” Inna Camwil: “Siweř, maɣar amsexxar nnec ittesřa!”
1SA 3:11 SIDI inna i Camwil: “Xzar, Necc ad ggeɣ ca di Israil ařami marra wi xas i ɣa isřen, tnayen n imezzuɣen nnes ad ṭneṭnen.
1SA 3:12 Deg wass nni ad qefřeɣ marra i Ɛali, zeg umezwaru ař aneggaru min zi ssiwřeɣ x taddart nnes.
1SA 3:13 [Minzi] Necc ɛeřmeɣ as, aqa Necc ad ḥekmeɣ taddart nnes i řebda x řmuɛṣiyyet min xef issen, minzi řami ssiwḍen iḥenjiren nnes nneɛřet x yixef nsen, netta war ten iṭṭif ca.
1SA 3:14 S uya Necc jjuǧeɣ i taddart n Ɛali: ‘War ittwagg weṣřaḥ i řebda i řmuɛṣiyyet n taddart n Ɛali s tɣarṣt uřa s tewhibt [n řɣiǧet]!’”
1SA 3:15 Camwil iqqim izzeř ař ṣṣbeḥ, [xenni] yarzem tiwwura n Taddart n SIDI. [Maca] Camwil iggʷed ad iḥaja řewḥiy i Ɛali.
1SA 3:16 [Xenni] iřaɣa Ɛali x Camwil, inna: “Camwil, mmi!” Netta yarra-dd xas: “Necc aqa ayi da!”
1SA 3:17 [Xenni] inna: “Man awař i d ac inna? Ttzawgeɣ cek, war xafi snuffar! Ejj ad ac igg AREBBI ammu, ɛad mahu, mařa cek tessnuffared xafi ijj n wawař [waha] zi marra awař[en] i kidek issiweř Netta.”
1SA 3:18 [Xenni] iḥaja as Camwil marra awařen u war xas ten iffar. Uca yarra-dd xas [Ɛali]: “Aqa-t d SIDI, ejj i-t ad igg min iǧan nican di tiṭṭawin nnes!”
1SA 3:19 Camwil tuɣa imeqqar u SIDI tuɣa-t akides u war ijji [uřa d ijjen] zi marra awařen nnes ad iwḍa ɣar temmurt.
1SA 3:20 Marra Israil, zi Dan ař Bi’r-Sebɛa, tuɣa ittwařa aqa Camwil tuɣa ittwařeqqem d anabi n SIDI.
1SA 3:21 SIDI iqqim ad dd-iḍhar di Cilu, minzi SIDI issargeb Ixef nnes i Camwil di Cilu s wawař n SIDI.
1SA 4:1 Awař n Camwil yiweḍ ɣar marra Israil uca iffeɣ Israil ɣar umsagar ak-d Ifilisṭiniyyen i umenɣi [akidsen]. Nitni wtin iqiḍan nsen ɣar Abin-Haɛizir, uca Ifilisṭiniyyen wtin iqiḍan nsen ɣar Afiq.
1SA 4:2 Ifilisṭiniyyen sedden ixef nsen [i umenɣi] ak-d Israil uca [umi] imeyyeř umenɣi da d diha, ittwaɣelleb Israil zzat i wudem n Ifilisṭiniyyen uca nitni nɣin ɛřaḥař arebɛa-ařaf n yeryazen di řeṣfuf [n řɛeskar nsen] deg wazzay [n umenɣi].
1SA 4:3 [Umi] iɛqeb řgens ɣar řmargeḥ n řɛeskar, nnan imɣaren n Israil: “Mayemmi d aneɣ iwta SIDI ass-a zzat i wudem n Ifilisṭiniyyen? Ejj aneɣ ad neksi Ttabut n Řɛahd n SIDI zi Cilu, ad dd-tas di řwest nneɣ, ḥima ad aneɣ tfekk zeg ufus n řɛedyan nneɣ.”
1SA 4:4 Řgens issekk [iryazen] ɣar Cilu, iwyen-dd ssenni Ttabut n Řɛahd n SIDI n řɛeskarat wenni ittɣiman [x] ikiruben. Tuɣa dinni tnayen n iḥenjiren n Ɛali, Ḥufni d Finaḥas, ak-d Ttabut n Řɛahd n AREBBI.
1SA 4:5 [Umi] dd-tusa Ttabut n Řɛahd n SIDI ɣar řmargeḥ n řɛeskar, imsar, aqa marra Israil isřiwřew s yijj n usřiwřew ijehden, ařami tarjiji temmurt.
1SA 4:6 [Umi] sřan Ifilisṭiniyyen i řḥess n usřiwřew, nnan: “Mana řḥess-a n usřiwřew ijehden di řmargeḥ n řɛeskar n Iɛibraniyyen?” Uca nitni fehmen, aqa Ttabut n SIDI tusa-dd di řmargeḥ n řɛeskar.
1SA 4:7 Ggʷeden Ifilisṭiniyyen aṭṭas, maɣar nitni nnan: “AREBBI yusa-dd [ɣarsen] ɣar řmargeḥ n řɛeskar!” Uca nnan: “Ayyaw xaneɣ, maɣar aya ammu ɛemmarṣ war imsar!
1SA 4:8 Uct xaneɣ, man wen i d aneɣ ɣa ifekken zeg ufus n irebbiten ijehden? Ina d irebbiten i iwtin Imiṣriyyen s marra jjrayeḥ di řexřa!
1SA 4:9 Iřim tmeḥḍem u iřim d iryazen, [kenniw] Ifilisṭiniyyen, maḥend war tᵉttsexxarem i Iɛibraniyyen am mammec nitni ɣarwem sexxaren. Iřim d iryazen u menɣem!”
1SA 4:10 Uca ffɣen Ifilisṭiniyyen ɣar umenɣi u ittwaɣřeb Israil. Arewřen nitni, kuř ijj ɣar uqiḍun nnes. Tuɣa d ict n txessart d tameqqrant aṭṭas, ařami wḍan třatin-ařef n yeryazen zi Israil i dd-iffɣen ɣar umenɣi x iḍaren.
1SA 4:11 Ttabut n AREBBI tᵉttwaḥewwes u tnayen n iḥenjiren n Ɛali, Ḥufni d Finaḥas, mmuten.
1SA 4:12 [Xenni] yuzzeř ijjen zeg ayt n Binyamin zeg wazzay n umenɣi, yiweḍ ɣar Cilu deg wass nni simant nnes, s warruḍ icarreg uca [a]cař tuɣa x uzeǧif nnes.
1SA 4:13 [Řami] yiweḍ netta, iqqim Ɛali x řkursi nnes ɣar tma n webrid, iqceɛ, minzi uř nnes tuɣa ittarjiji zi ssibbet n Ttabut n AREBBI. [Umi] dd-yusa weryaz nni maḥend ad t iḥaja di tendint, tesɣuy tendint marra.
1SA 4:14 [Umi] isřa Ɛali řḥess n usɣuyyi, inna: “Mana řḥess n řharaj-a n řɣaci nni?” [Xenni] iqeǧeq weryaz, yusa-dd, iḥaja [t] i Ɛali.
1SA 4:15 Tuɣa ɣar Ɛali tmenya u-tesɛin n iseggʷusa. Tiṭṭawin nnes dewřent arxunt, ařami war ittwiři ɛad.
1SA 4:16 Aryaz inna i Ɛali: “Necc usiɣ-dd zeg wazzay n umenɣi. Ass-a arewřeɣ zi řeṣfuf [n řɛeskar].” Inna [as Ɛali]: “Min imsaren, a mmi?”
1SA 4:17 Areqqas yarra-dd xas, inna: “Israil yarweř zzat i wudem n Ifilisṭiniyyen u řgens igga ict n txessart tewɛar aṭṭas. Uřa d tnayen n iḥenjiren nnec, Ḥufni d Finaḥas, ttwanɣen u Ttabut n AREBBI tᵉttwaḥewwes.”
1SA 4:18 Umi netta yidar Ttabut n AREBBI, imsar, aqa Ɛali iwḍa ɣar ḍeffar zi řkursi zzat i tewwart. Netta yarreẓ zeg yiri uca iffeɣ as buḥbeř, maɣar aryaz tuɣa iwsar u idqeř. Netta tuɣa d řqaḍi x Israil arebɛin n iseggʷusa.
1SA 4:19 Tasřit nnes, tamɣart n [mmis] Finaḥas, tuɣa teksi s ddeyset, tuɣa [ɛřayen] ad dd-taruw. [Umi] nettat tesřa aqa Ttabut n AREBBI tᵉttwaḥewwes, u ɛemmis immut uřa d aryaz nnes, [xenni] tekmummec uca turuw-dd [aḥenjir nnes], minzi tuɣa iṭṭef i-tt řewjeɛ nnes n tarut.
1SA 4:20 [Umi] dd-tiweḍ řweqt n řmewt nnes, nnant temɣarin tinni ɣares ibedden: “War tteggʷed ca, cem turwed-dd ijj n uḥenjir.” Maca nettat war [xasent] dd-tarri ca u uř nnes war tḥekkar.
1SA 4:21 Nettat tegga as i uḥenjir ‘Ikabud’, tenna: “Ittwakkes uɛuǧi zi Israil!”, minzi tᵉmmeksi Ttabut n AREBBI, uca uřa di ssibbet [n řmewt] n ɛemmis d weryaz nnes.
1SA 4:22 Nettat tenna: “Ittwakkes uɛuǧi zi Israil, maɣar tᵉmmeksi Ttabut n AREBBI.”
1SA 5:1 Ifilisṭiniyyen ksin Ttabut n AREBBI uca iwyen tt zi Abin-Haɛizir ɣar Acdud.
1SA 5:2 [Xenni] ksin Ifilisṭiniyyen Ttabut n AREBBI uca ssiwḍen tt di taddart n Dajun uca ssarsen tt x uɣezdis n Dajun.
1SA 5:3 Tiwecca nnes [umi imezdaɣ] n Acdud kkaren zic, xzar, Dajun tuɣa iwḍa x uɣembub nnes x temmurt zzat i Ttabut n SIDI. Ksin nitni Dajun, ssbedden t ɛawed deg wemcan nnes.
1SA 5:4 Tiwecca nnes umi dd-kkaren nitni zic [ɛawed], xzar, Dajun tuɣa iwḍa [ɛawed] x uɣembub nnes x temmurt zzat i Ttabut n SIDI, maca azeǧif n Dajun d ifassen nnes s tnayen mmarsen qessen ɣar tnebdat. Mɣir [arrimet n] Dajun tuɣa teqqim deg [wemcan] nnes.
1SA 5:5 X uya war ɛfisen ikehhanen n Dajun d marra inni i dd-ittasen ɣar taddart n Dajun x tnebdat n Dajun di Acdud ař ass-a.
1SA 5:6 Afus n SIDI idqeř x [imezdaɣ] n Acdud. Netta issarɛeb i-ten uca iwta ten s tḥebba, [di tandint n] Acdud d jjwayeh nnes.
1SA 5:7 [Umi] iryazen n Acdud ẓrin, aqa ammu i imsar, nnan nitni: “Ttabut n AREBBI n Israil war tzemmar ad ɣarneɣ teqqim, maɣar afus nnes igga xaneɣ ddqeř uřa x arebbi nneɣ Dajun.”
1SA 5:8 Nitni ssekken [iryazen] uca ggin ad ssmunen marra řbacat [n tneddam] n Ifilisṭiniyyen, nnan: “Min ɣa negg s Ttabut n AREBBI n Israil?” Nnan nitni: “Ttabut n AREBBI n Israil ad tᵉttwassmuṭṭiy ɣar Jat.” [Xenni] ssmuṭṭiyen Ttabut n AREBBI n Israil [ɣar Jat].
1SA 5:9 Maca awarni i umi tt ssmuṭṭiyen, issiweḍ ufus n SIDI ijj n uxarweḍ d ameqqran x tendint nni uca iwta iryazen n tendint, zeg umeẓyan ař ameqqran, s tḥebba [innufaren].
1SA 5:10 [Xenni] ssekken nitni Ttabut n AREBBI ɣar Ɛaqrun. Umi dd-tusa Ttabut n AREBBI ɣar Ɛaqrun, imsar, aqa [imezdaɣ n] Ɛaqrun sɣuyen, nnan: “Nitni iwyen-dd Ttabut n AREBBI n Israil ɣarneɣ [danita], ḥima ad aneɣ nɣen uřa d řgens nneɣ.”
1SA 5:11 Ssekken nitni [ireqqasen] uca ggin ad ssmunen marra řbacat [n tneddam] n Ifilisṭiniyyen, nnan: “Siggʷejem Ttabut n AREBBI n Israil, jjem tt ad dd-tedweř ɣar wemcan nnes, ḥima war d ayi ineqq uřa d řgens inu!”, minzi tuɣa din ijj n uqezzeb imɣar di marra tandint uca afus n AREBBI idqeř aṭṭas [x Ɛaqrun].
1SA 5:12 Iwdan, inni war immuten, tuɣa ttwawten s tḥebba, ařami aɣuyyi n usɣati n tendint igeɛɛed ɣar ujenna sennej.
1SA 6:1 [Umi] Ttabut n SIDI tekka sebɛa n iyuren di temmurt n Ifilisṭiniyyen,
1SA 6:2 řaɣan Ifilisṭiniyyen x ikehhanen d igezzanen, nnan: “Min ɣa negg ak-d Ttabut n SIDI? Secnem aneɣ, mammec tt i ɣa nessekk ɣar wemcan nnes.”
1SA 6:3 Nitni arrin-dd [xasen]: “Mařa kenniw tessekkem Ttabut n AREBBI n Israil, xenni war tt tessekkem texwa, minzi ittxeṣṣa ad txeǧṣem ict n tewhibt n umarwas i weɛdař. Xenni ad teggenfam uca ad tessnem, mayemmi afus nnes war zzaywem ittekkes.”
1SA 6:4 [Xenni] nnan nitni: “Man tawhibt n umarwas i d as ɣa nqeddem i weɛdař?” Nitni arrin-dd [xasen]: “Xemsa n tḥebba n wureɣ d xemsa n iɣardayen n wureɣ, x qedda n řbacat [n tneddam] n Ifilisṭiniyyen, minzi kenniw marra [teřqef] kenniw jjriḥect d icten uřa d řbacat nwem.
1SA 6:5 Ggem řexyařat n tḥebba nwem d řexyařat n iɣardayen nwem nni yareddǧen tammurt, uca sɛuǧem AREBBI n Israil. Ad taɣ ad issefses afus nnes xawem, x irebbiten nwem u x temmurt nwem.
1SA 6:6 Mayemmi ɣa tessqesḥem uř nwem am ssqesḥen Imiṣriyyen d firɛun uř nsen? [Umi] xasen izeyyar Netta ař ṭṭarf, ma nitni war d arxun [i ayt Israil] u ma nitni war dd-ffiɣen ca [xenni]?
1SA 6:7 Xenni  řexxu, ksim ijj n ukarru n jdid, swejdem t s tnayen n tfunasin ssuṭṭuḍent, war xasent immars ɛad uzayřu, u qqnem tifunasin ɣar zzat i ukarru u kksem asent zi ḍeffar nsent imeẓyanen nsent u awyem ten ɣar taddart.
1SA 6:8 [Xenni] ksim Ttabut n SIDI, sarsem tt x ukarru u sarsem x uɣezdis nnes, deg ict n tsenduqt, řeqcuɛ n wureɣ i texsem ad as txeǧṣem [am] tewhibt n umarwas i weɛdař. Sekkem tt, ad traḥ.
1SA 6:9 Ḥḍam, mařa [akarru] igeɛɛed-dd deg webrid ɣar weymir nnes, ɣar Bayt-Cams, [xenni] d Netta i d aneɣ iwtin s tecti-ya tameqqrant, mařa lla, [xenni] nessen neccin, aqa war iǧi d afus nnes i d aneɣ iřeqfen: aqa tusa-dd amenni waha.”
1SA 6:10 Iryazen ggin [tt] ammu. Nitni ksin tnayen n tfunasin ssuṭṭuḍent, qqnen tent ɣar zzat i ukarru uca qqnen imeẓyanen nsent deg uyennir n taddart.
1SA 6:11 Nitni ssarsen Ttabut n SIDI x ukarru, uřa d tasenduqt ak-d iɣardayen n wureɣ d řexyařat n tḥebba nsen.
1SA 6:12 Tifunasin uyurent nican ɣar webrid jjihet n Bayt-Cams, uyurent x webrid iseggmen nni. Nitenti qqiment ggurent, am ssmuhrutent, war ḥeyydent [x webrid] [ɣar] yefus uřa [ɣar] uzeřmaḍ. Řbacat [n tneddam] n Ifilisṭiniyyen areddfen tent ař aymir n Bayt-Cams.
1SA 6:13 [Imezdaɣ] n Bayt-Cams tuɣa mejjaren ṣṣabet n irden di řewḍa n teɣzurt. [Umi] ssgeɛɛden nitni tamuɣři nsen, ẓrin Ttabut u farḥen aṭṭas umi tt ẓrin.
1SA 6:14 Akarru tuɣa yiweḍ ař iyyar n Yacuwa, wenni zi Bayt-Cams, uca ibedd [ukarru] dinni. Tuɣa dinni ijj n weẓru d ameqqran. Nitni zedmen tifeřwin n ukarru u ssgeɛɛden tifunasin d taɣarṣt n wecmaḍ i SIDI.
1SA 6:15 Ilawiyyen ksin Ttabut n SIDI d tsenduqt [immarsen] x uɣezdis nnes, i di tuɣa řeqcuɛ n wureɣ, u ssarsen aya x weẓru nni ameqqran. Deg wass nni simant nnes ssgeɛɛden yeryazen n Bayt-Cams tiɣarṣa n wecmaḍ i SIDI u qeddmen [ɛawed] tiɣarṣa.
1SA 6:16 [Umi] ẓrin xemsa n řbacat [n tneddam] n Ifilisṭiniyyen [man aya], dewřen-dd ɣar Ɛaqrun deg wass nni simant nnes.
1SA 6:17 Tina d tiḥebba n wureɣ nni ixeǧṣen Ifilisṭiniyyen am tewhibt n umarwas i weɛdař i SIDI: ict i Acdud, ict i Ɣaza, ict i Acqilun, ict i Jat, ict i Ɛakrun.
1SA 6:18 [Uřa d] iɣardayen n wureɣ x qedda n marra tineddam n Ifilisṭiniyyen tinni iqqnen i xemsa n řbacat [n tneddam], zi tneddam ifaryen ař dcurat i d asent i-dd-innḍen. [Yiweḍ ukarru] ař Abil, aẓru ameqqran i xef tuɣa ssarsen Ttabut n SIDI, [aẓru] i din [iqqimen] ař ass-a deg iyyar n Yacuwa zi Bayt-Cams.
1SA 6:19 Netta maca iwta iryazen n Bayt-Cams, minzi nitni tuɣa xzaren Ttabut n SIDI. Zi řgens iwta Netta sebɛin n yeryazen [zeg] xemsin-ařef n yeryazen. Uca icḍen řgens, minzi SIDI tuɣa igga i řgens ict n tecti d tameqqrant.
1SA 6:20 [Xenni] nnan iryazen n Bayt-Cams: “Wi izemmaren ad iqqim ibedd zzat i wudem n SIDI, AREBBI d amqeddes wa? D ɣar man wen zzayneɣ i ɣa tuyur Ttabut?”
1SA 6:21 Nitni ssekken ireqqasen ɣar imezdaɣ n Qaryat-Yaɛarim, nnan: “Ifilisṭiniyyen arrin-dd Ttabut n SIDI. Hwam uca ssgeɛɛdem tt ɣarwem sennej!”
1SA 7:1 [Xenni] usin-dd yeryazen n Qaryat-Yaɛarim uca iwyen Ttabut n SIDI ɣarsen sennej. Nitni ssidfen tt di taddart n Abinadab, x tewrirt, uca ssqeddsen mmis Aliɛazar ḥima ad iḥḍa x Ttabut n SIDI.
1SA 7:2 Zeg wass nni imsar aqa Ttabut teqqim di Qaryat-Yaɛarim. Tuɣa ɛdun aṭṭas n wussan ařami ɛdun ɛicrin n iseggʷusa. Marra taddart n Israil [tuyur] awarni i SIDI, tᵉttcetca.
1SA 7:3 [Xenni] issiweř Camwil ɣar marra taddart n Israil, inna: “Mařa kenniw texsem ad dd-tdewřem ɣar SIDI s marra uř nwem, [xenni] nḍarem xawem irebbiten iɣriben zi řwesṭ nwem, uřa d ‘Ɛactarutin’, u arrem uř nwem ɣar SIDI, xedmem as i Netta weḥḥdes, [xenni] Netta ad kenniw ifekk zeg ufus n Ifilisṭiniyyen.”
1SA 7:4 Uca nḍaren ayt n Israil ‘Ibaɛlen’ d ‘Ɛactarutin’ uca ɛebden i SIDI weḥḥdes.
1SA 7:5 Inna Camwil: “Smunem marra Israil di Miṣfat, [xenni] necc ad ẓẓaǧeɣ i SIDI i kenniw.”
1SA 7:6 Munen di Miṣfa uca uymen aman, farrɣen ten zzat i wudem n SIDI. Deg wass nni ẓummen uca nnan din: “Aqa nexḍa ak-d SIDI!” Ammu i iḥkem Camwil ayt n Israil di Miṣfa.
1SA 7:7 [Umi] Ifilisṭiniyyen sřin, aqa ayt n Israil tuɣa munen di Miṣfat, ffɣen řbacat [n tneddam] n Ifilisṭiniyyen ḍidd i Israil. [Řami] sřin ayt n Israil i mana aya, ggʷeden nitni zeg Ifilisṭiniyyen.
1SA 7:8 Nnan ayt n Israil i Camwil: “War sbeddi s uřaɣi di ṭṭweɛ nneɣ i SIDI, AREBBI nneɣ, [maḥend] Netta ad aneɣ ifekk zeg ufus n Ifilisṭiniyyen.”
1SA 7:9 [Xenni] iksi Camwil ijj n izmar iṭṭeḍ u iqeddem i-t qaɛ d taɣarṣt n wecmaḍ i SIDI u Camwil iřaɣa ɣar SIDI di ṭṭweɛ n Israil u SIDI isřa as.
1SA 7:10 Umi iqeddem Camwil taɣarṣt n wecmaḍ, imsar, aqa usin-dd Ifilisṭiniyyen i umenɣi ak-d Israil. Uca isshemhem SIDI aṭṭas deg wass nni x Ifilisṭiniyyen, issarjef i-ten [ařami] ttwaɣeřben zzat i wudem n Israil.
1SA 7:11 Ffɣen yeryazen n Israil zi Miṣfa, ḍfaren Ifilisṭiniyyen uca wtin ten ař sadu Bayt-Kar.
1SA 7:12 Iksi Camwil ijj n weẓru, issbedd i-t jar Miṣfa d San. Netta igga as isem ‘Abin-Haɛizir’, inna: “Ař danita i d aneɣ iwca SIDI afus.”
1SA 7:13 [Ammu] i ttwasseḥqaren Ifilisṭiniyyen uca war udifen ca ɛad daxeř i iymiren n Israil, [minzi] tuɣa afus n SIDI ḍidd i Ifilisṭiniyyen marra ussan n Camwil.
1SA 7:14 Tineddam zi Ɛaqrun ař Jat i tuɣa ṭṭfen Ifilisṭiyyen zeg ayt n Israil, dewřent-dd ɣar Israil uca jjwayeh i ɣarsen dd-iqqnen, iqřeɛ i-tent Israil zeg ufus n Ifilisṭiniyyen uca idweř din řehna jar Israil d Imuriyyen.
1SA 7:15 Tuɣa Camwil d řqaḍi x Israil marra ussan n tudart nnes.
1SA 7:16 Aseggʷas x useggʷas tuɣa netta itteffeɣ, iggur di Bayt-Il d Jiljal d Miṣfa. Di marra imucan nni tuɣa netta d řqaḍi x Israil.
1SA 7:17 [Awarni aya] idweř netta ɣar Rama, maɣar dinni i tuɣa taddart nnes u dinni tuɣa netta d řqaḍi x Israil uca ibna dinni ijj n uɛalṭar i SIDI.
1SA 8:1 [Umi] idweř Camwil iwsar, imsar, aqa igga iḥenjiren nnes d řquḍat x Israil.
1SA 8:2 Mmis amezwaru tuɣa qqaren as Yuwil u wenni wiss tnayen qqaren as Abiya. Nitni tuɣa aten d řquḍat di Bi’r-Sebɛa.
1SA 8:3 Maca iḥenjiren nnes war aredfen ibriden nnes. Nitni arezzun x arbeḥ [i yixef nsen], ṭṭfen arriɣalut u ssfarrɣen řḥeqq.
1SA 8:4 [Xenni] munen marra imɣaren n Israil, usin-dd ɣar Camwil di Rama.
1SA 8:5 Nitni nnan as: “Xzar, cek tewsared u iḥenjiren nnec war gguren ca x tebridin nnec. S uya egg řexxu ijj n ujeǧid xaneɣ maḥend ad xaneɣ iḥkem, am mammec [iǧa] ɣar marra řegnus nneɣni.”
1SA 8:6 Awař-a iǧa d aɛeffan di tiṭṭawin n Camwil, řami nnan: “Ewc aneɣ ijj n ujeǧid maḥend ad xaneɣ iḥkem!” Uca Camwil iẓẓuǧ i SIDI.
1SA 8:7 Inna SIDI i Camwil: “Seř ɣar řgens di marra min i d ac ɣa inin, maɣar war iǧi d cek i nḍaren nitni, maca d Necc i nḍaren nitni, ḥima Necc war ttiřiɣ d ajeǧid xasen.
1SA 8:8 Nitni tteggen [ɛad] am mammec ggin s marra timegga nsen zeg wass i ten dd-ssgeɛɛdeɣ zi Miṣra ař ass-a. Nitni semḥen d ayi uca sexxaren i irebbiten nneɣni. Ammu i dayek tteggen nitni ɛawed.
1SA 8:9 Seř řexxu ɣarsen, maca ɛřem asen nican uca sargeb i-ten s řḥeqq n ujeǧid wenni i xasen i ɣa iḥekmen.”
1SA 8:10 Issiweř Camwil marra awařen n SIDI ak-d řgens nni zzayes ittaren ijj n ujeǧid.
1SA 8:11 Netta inna: “Aya i ɣa yiři d řḥeqq n ujeǧid i xawem i ɣa iḥekmen: netta ad yawi iḥenjiren nwem, ad ten yarra i yixef nnes ɣar ikarruten nnes maḥend ad iřin d imnayen nnes, u ad zzřen ɣar zzat i ikarruten nnes.
1SA 8:12 Netta ad ten igg i yixef nnes d imeqqranen x wařef uřa d imeqqranen x xemsin, u ad ten yarr ad carzen iyyaren nnes, ad mjaren ṣṣabet nnes u ad ggen dduzan n umenɣi nnes d dduzan n ikarruten nnes.
1SA 8:13 Yessitwem ad tent-i-dd-yawi maḥend ad as ggent fumaḍat, ad ssnennant u ad ggʷent.
1SA 8:14 Ad iksi mummu n iyyaren nwem, n imarjaɛen nwem n uḍiř u n iḥwicen n tazart nwem, uca ad [t] iwc i imsexxaren nnes.
1SA 8:15 Ad iksi řeɛcur n zzariɛet nwem, n imarjaɛen nwem n uḍiř uca ad ten iwc i imsexxaren nnes icennɛen u i imsexxaren nnes inneɣni.
1SA 8:16 Ad iksi isemɣan d tiyya nwem d iḥudriyyen nwem iṣebḥen d iɣyař nwem, uca ad [ten] yejj ad as xedmen.
1SA 8:17 Ad iksi řeɛcur n tḥimriwin nwem u kenniw ad tiřim d imsexxaren nnes.
1SA 8:18 Deg wass nni ad tesɣuyem zzat i wudem n ujeǧid nwem i texḍarem kenniw, [maca] SIDI war d awem ittesři ca deg wass nni.”
1SA 8:19 [Maca] řgens war ixs ad iseř ɣar Camwil, nnan: “Lla, ittxeṣṣa ad xaneɣ yiři ijj n ujeǧid.”
1SA 8:20 Uřa d neccin ad niři am řegnus [nneɣni] marra, ajeǧid nneɣ ad xaneɣ iḥkem s řḥeqq. Netta ad yizwar zzat i wudem nneɣ uca ad issuyur imenɣan nneɣ.”
1SA 8:21 [Umi] isřa Camwil i marra awařen n řgens, inna ten deg imezzuɣen n SIDI.
1SA 8:22 SIDI inna i Camwil: “Seř ɣarsen, egg xasen ijj n ujeǧid!” [Xas uca] inna Camwil i yeryazen n Israil: “Ejj ad yuyur kuř ijj ɣar tendint nnes.”
1SA 9:1 Tuɣa [din] ijj n weryaz zi Binyamin, qqaren as Qis, mmis n Abiyil, mmis n Ṣarur, mmis n Bakurat, mmis n Afiyaḥ, ijj n weryaz zeg ayt n Binyamin, ijj n weryaz s wagřa aṭṭas.
1SA 9:2 Netta tuɣa ɣares ijj n mmis, qqaren as Cawul. Tuɣa-t d ameẓyan u dayes aẓri. Uřa d ijj n weryaz jar ayt n Israil war dayes tuɣi aẓri am netta. Netta yujar marra řgens s tiddi n uzeǧif.
1SA 9:3 Tuɣa tiɣyař n Qis, babas n Cawul, weddarent. [Xenni] inna Qis i mmis Cawul: “Ksi ijjen zeg imsexxaren, awyi t akidek uca kkar, arzu x teɣyař.”
1SA 9:4 Netta ikka x idurar n Ifrayim, ikka x temmurt n Calica, [maca] nitni war tent ufin. [Xas uca] kkin nitni x temmurt n Caɛalim, war [tent] ufin [dinni]. [Xenni] kkin x temmurt n Binyamin, war [tent] ufin dinni [ɛawed].
1SA 9:5 [Umi] iwḍen nitni ɣar temmurt n Ṣuf, inna Cawul i umsexxar nnes nni tuɣa akides: “As-dd, ad neɛqeb, niɣ baba war ikessi ɛad s wemnus di teɣyař, maca dayneɣ.”
1SA 9:6 Wanita yarra-dd xas: “Xzar xenni, aqa ijj weryaz n AREBBI izeddeɣ di tendint-a. Aqa-t d ijj n weryaz d amcenneɛ. Marra min iqqar, itteffeɣ-dd nican. Ejj aneɣ ad ɣares nraḥ dinni, xenni ad taɣ ad aneɣ isscen abrid i ittxeṣṣa ad dayes nuyur.”
1SA 9:7 [Xenni] inna Cawul i umsexxar nnes: “[Maca] xzar, mařa nraḥ, min ɣa nawi [xenni] i weryaz nni? Maɣar aɣrum jar řeḥwayej nneɣ iruḥ. Neccin war ɣarneɣ aɣiralut i nzemmar ad newc i weryaz n AREBBI. Niɣ min ɣarneɣ [nneɣni]?”
1SA 9:8 Yarra-dd umsexxar ɛawed x Cawul, inna: “Xzar, necc ɣari da [ɛad] ijj n arbeɛ n ijj n ciqlu n nnuqart. Ad t wceɣ i weryaz n AREBBI, [maḥend] netta ad aneɣ isscen abrid.”
1SA 9:9 Zic tuɣa iqqar weryaz di Israil, mařa tuɣa iffeɣ ḥima ad isseqsa AREBBI: “Asem-dd, ad nuyur ɣar umwařaw!”, maɣar anabi n wass-a, zic qqaren as ‘amwařaw’.
1SA 9:10 Inna Cawul i umsexxar nnes: “Awař nnec iṣbeḥ! As-dd, ejj aneɣ ad nuyur!” Uca uyuren nitni ɣar tendint mani [iǧa] aryaz n AREBBI.
1SA 9:11 [Umi] geɛɛden nitni tsawent n tendint msagaren ak-d tebřiɣin tinni dd-iffɣen maḥend ad ayment aman uca nnan asent: “Ma amwařaw da?”
1SA 9:12 Nitenti arrint xasen, nnant: “Xzar, netta aqa-t diha ɣar zzat. Deɣyat, maɣar netta yusa-dd ass-a ɣar tendint, minzi řgens ass-a ad igg ict n tɣarṣt x řgeɛɛdet.
1SA 9:13 Xmi ɣa tadfem ɣar tandint, ad t tafem qbeř ma ad igeɛɛed ɣar řgeɛɛdet ḥima ad imun i macca, maɣar řgens war ittett mařa war dd-yusi netta, minzi netta ad igg lbaraka di tɣarṣt, xenni ɛad ad ccen inewjiwen. Geɛɛdem řexxu, minzi ass-a aqa-t [d lfurṣa] ad t tafem [nican]!”
1SA 9:14 Nitni geɛɛden ɣar tendint uca [umi] iwḍen ɣar řwesṭ n tendint, xzar, iffeɣ-dd ɣarsen Camwil, imsagar akidsen maḥend ad iggur ɣar řgeɛɛdet.
1SA 9:15 [Minzi] ijj n wass qbeř i dd-yusa Cawul, issargeb SIDI i Camwil deg umezzuɣ, inna:
1SA 9:16 “Tiwecca ammu di řweqt-a, ad ɣarek ssekkeɣ ijj n weryaz zi temmurt n Binyamin. Ad t tdehned d řḥakem x řgens inu Israil. Netta ad ifekk řgens inu zeg ufus n Ifilisṭiniyyen, maɣar Necc ẓriɣ řgens inu Israil u tɣuyyit nsen i usɣati tiweḍ-dd ɣari.”
1SA 9:17 [Umi] Camwil iẓra Cawul [ittas-dd], yarra-dd xas SIDI: “Xzar, [d wa] d aryaz i x i d ac nniɣ: ‘Wa ad iḥkem x řgens inu.’”
1SA 9:18 Yuyur Cawul ɣar Camwil di řwesṭ n tewwart n tendint inna: “Scen ayi mani teǧa taddart n umwařaw.”
1SA 9:19 Yarra-dd Camwil x Cawul, inna: “Necc d amwařaw. Uyur ɣar zzat i wudem inu x řgeɛɛdet, ḥima kenniw ad kidi teccem ass-a. Tiwecca zic ad cek jjeɣ ad teɛdud u necc ad cek ssargbeɣ x marra min [iǧan] deg wuř nnec.
1SA 9:20 X teɣyař i d ac iweddaren ass-a ɛad třata n wussan zeg wami, war dayek ittiři bu wemnus, maɣar ttwafent nitenti. [Maca] wi ɣar ittraḥ marra meẓri n Israil? Ma war iǧi ɣarek u ɣar marra taddart n babac?”
1SA 9:21 [Xenni] yarra-dd Cawul, inna: “Ma war ǧiɣ necc zeg ayt n Binyamin, zi tmeẓyant qaɛ n tqebbař n Israil? Ma war teǧi řaǧ inu tamuqřiřt qaɛ zi marra řaǧat n teqbič n Binyamin? Mayemmi kidi tessawařed awařen am ina?”
1SA 9:22 Camwil iksi Cawul d umsexxar nnes akides, issidef i-ten deg wexxam [n arwa], issɣim i-ten deg wemcan amezwaru jar inewjiwen. Tuɣa [nnyarwen] amenni třatin n yeryazen.
1SA 9:23 [Xenni] inna Camwil i ugezzar: “Awi-dd [řexxu] tasɣart i d ac wciɣ, tenni x d ac nniɣ: ‘Ejj i-tt ɣarek!’”
1SA 9:24 D agezzar issgeɛɛed taɣruḍt ak-d marra min xas [iǧan], issars i-tt zzat i Cawul, inna: “Xzar, aya min iceṭṭen. Egg i-tt zzatek ad tecced, minzi ittwaḥḍa i tsaɛɛet-a, umi nniɣ: ‘Necc ɛarḍeɣ x řgens.’” Uca icca Cawul ak-d Camwil deg wass nni.
1SA 9:25 [Xenni] hwan-dd nitni zi řgeɛɛdet ɣar tendint u netta issiweř ak-d Cawul x tzeqqa.
1SA 9:26 Kkaren zic, uca imsar, ɣar řefjar n wass, aqa iřaɣa-dd Camwil x Cawul [i tuɣa iǧan] x tzeqqa, inna: “Kkar, necc xseɣ ad cek ssqebbḍeɣ!” [Xenni] ikkar Cawul uca ffɣen s tnayen idsen ɣar barra, netta ak-d Camwil.
1SA 9:27 Umi dd-hwan nitni ař ṭṭarf n tendint, inna Camwil i Cawul: “Ini i umsexxar ad ibeɛɛed zzat i wudem nneɣ!” [Xenni] iggʷej netta. [Inna Camwil]: “Qqim řexxu, bedd da u necc ad ac iniɣ awař n AREBBI.”
1SA 10:1 [Xas uca] iksi Camwil taziyyat n zzect, iseyyeb [i-tt] x uzeǧif nnes, issudem i-t, inna: “Ma [xenni] SIDI war cek idhin d řḥakem x řwart nnes?
1SA 10:2 Xmi xafi i ɣa tuyured ass-a, ad tafed tnayen n yeryazen ɣar wenḍeř n Raḥil di Ṣalṣaḥ di temmurt n Binyamin, nitni ad ac inin: ‘Tiɣyař i x tuɣa tarezzud, ttwafent uca babac ismeḥ di tmesřact n teɣyař, maca netta dayes [řexxu] amnus xawem, iqqar: Min ɣa ggeɣ x mmi?’”
1SA 10:3 Ssenni ad tarnid ad tuyured uca ad tawḍed ɣar tcejjart n yigg n Tabur. Dinni i ɣa temmeřqid ak-d třata n yeryazen nni ittgeɛɛaden ɣar SIDI ɣar Bayt-Il. Ijjen ad yarbu třata n iɣayḍen imeẓyanen, ijjen ad yarbu třata n tecnifin u ijjen ad yarbu ict n txancet n binu.
1SA 10:4 Nitni ad sseqsan x umeddur nnec uca ad ac wcen tnayen n tecnifin i ɣa tᵉṭṭfed zeg ufus nsen.
1SA 10:5 Awarni as ad dd-tased ɣar [tendint n] Jibɛa n AREBBI mani beddent tecbarin n tɛessast n Ifilisṭiniyyen. Xmi dinni i ɣa tawḍed ɣar tendint, ad imsar ad temmeřqid ak-d ict n kula n inabiyyen, inni dd-ihwan zi řgeɛɛdet, uca zzatsen lharpa d ubendir d tẓamart d řgambri am ttnebban nitni.
1SA 10:6 Ad xak dd-ihwa Arruḥ n SIDI u cek ad tnebbad akidsen uca ad tdewřed d ijj n bnadem nneɣni.
1SA 10:7 Ad imsar xmi ɣarek i dd ɣa yasen řeɛřamat-a, aqa ad xak yiři ḥima ad tegged min ɣa yaf ufus nnec, minzi AREBBI aqa-t akidek.
1SA 10:8 Ad ayi tizwared ad dd-tehwid ɣar Jiljal, u xzar, necc ad dd-hwiɣ ɣarek ḥima ad din ssgeɛɛdeɣ tiɣarṣa n wecmaḍ [d] tɣarṣa n řehna. Sebɛa n wussan i din i ɣa trajid ař dd ɣarek i ɣa yaseɣ, ad ac dd-barrḥeɣ min ɣa tegged.”
1SA 10:9 Umi issneqřeb aɛrur nnes ḥima ad yuyur x Camwil, imsar aqa AREBBI ibeddeř uř [nnes] deg ijj n [wuř] nneɣni. Marra řeɛřamat-a imsaren deg wass nni [simant nnes].
1SA 10:10 [Umi] iwḍen nitni ɣar Jibɛa, aqa iřqa i-t ijj n kula n inabiyyen uca Arruḥ n AREBBI ihwa-dd xas uca netta inebba di řwesṭ nsen.
1SA 10:11 Uca imsar, aqa marra inni tuɣa t issnen iḍennaḍ d fariḍennaḍ, ẓrin mammec tuɣa ittnebba ak-d inabiyyen, uca řgens inna jar asen: “Min yuɣin mmis n Qic? Ma uřa d Cawul jar inabiyyen?”
1SA 10:12 Ijj n weryaz ssenni yarra-dd, inna: “Man wen iǧan d babatsen?” Ammu i iqqim wawař-a ittwassnen: “Ma uřa d Cawul jar inabiyyen?”
1SA 10:13 Umi issbedd ittnebba, yusa-dd ɣar řgeɛɛdet.
1SA 10:14 Ɛemmis n Cawul inna as u i umsexxar nnes: “Mani tuɣa tᵉttrahem kenniw?” Netta yarra-dd xas: “Narezzu x teɣyař, [maca umi] neẓra, aqa nitenti war dinni ǧint, niweḍ ɣar Camwil.”
1SA 10:15 [Xenni] inna ɛemmis n Cawul: “Ini ayi, ɛafak, min d awem inna Camwil?”
1SA 10:16 Cawul yarra-dd x ɛemmis: “Netta inna aneɣ nican, aqa tiɣyař ttwafent.” Tamesřact n tgelda maca i x tuɣa issiweř Camwil, war d as tt iɛiwed ca.
1SA 10:17 Camwil iřaɣa-dd i řgens ɣar SIDI di Miṣfa.
1SA 10:18 Netta inna i ayt n Israil: “Ammu i iqqar SIDI, AREBBI n Israil: ‘Necc ssuffɣeɣ-dd Israil zi Miṣra u fekkeɣ kenniw zeg ufus n Imiṣriyyen u zeg ufus n marra tigeldiwin nni kenniw iḥṣaren.
1SA 10:19 [Maca] ass-a kenniw tenḍarem SIDI nwem, wenni tuɣa kenniw ifekken zi marra zzɛaf nwem u zi marra řeḥṣarat nwem. Kenniw tennam as: Egg ijj n ujeǧid xaneɣ! [Xenni] řexxu, beddem zzat i wudem n SIDI, ɛlaḥsab tiqebbař nwem d řuřuf nwem!’”
1SA 10:20 Camwil ijja marra tiqebbař n Israil ad dd-qarrbent uca taqbič n Binyamin tᵉttwakkes [zzaysent]
1SA 10:21 [Xas uca] ijja taqbič n Binyamin ad tqarreb, ɛlaḥsab řaǧat nnes, uca ittwakkes [zzayes] řaǧ n Matri u xenni ittwakkes [zzayes] Cawul, mmis n Qic. Arzun xas, [maca] war zemmaren ad t afen.
1SA 10:22 Nitni sseqsan SIDI ict n twařa nneɣnit: “Ma nican yusa-dd weryaz nni danita?” SIDI yarra-dd: “Xzar, netta iffar jar řeḥwayej.”
1SA 10:23 Nitni uzzřen [din], iwyen t-i-dd ssenni. [Umi] dd-yusa netta ibedd jar řgens, yujar netta marra řgens s tiddi n uzeǧif.
1SA 10:24 Inna Camwil i marra řgens: “Ma teẓrim [řexxu] man wen ifarz SIDI? Uřa d ijjen zi řgens war dayes yarwis.” Uca isřiwřew marra řgens, nitni nnan: “Tudart i ujeǧid!”
1SA 10:25 Camwil isscen i řgens řḥeqq n tgelda, yura i-t deg ijj n wedlis uca issars i-t zzat i wudem n SIDI. [Xenni] yarxu Camwil i marra řgens, kuř ijj yuyur ɣar taddart nnes.
1SA 10:26 Uřa d Cawul yuyur ɣar taddart nnes ɣar Jibɛa uca iruḥ akides [wezyen n] řɛeskar nni tuɣa iḥada SIDI uř nsen.
1SA 10:27 [Maca] ayt i war isekkwin nnan: “Mammec i d aneɣ ɣa ifekk weryaz-a?” U nitni sseḥqaren t u war d as dd-iwyen ca tarzeft, [maca] netta igga axmi war ittesři.
1SA 11:1 [Xenni] iffeɣ-dd Naḥac, Aɛammuni, uca inneḍ [s řɛeskar nnes] i [tendint n] Yabic di Jilɛad. Marra iryazen n Yabic nnan i Naḥac: “Egg ijj n řɛahd akidneɣ uca xenni ad ac nsexxar.”
1SA 11:2 Inna asen Aɛammuni Naḥac: “X webrid-a necc akidwem ggeɣ řɛahd, necc ad awem dd-qeřɛeɣ marra tiṭṭ tafusect, ad tt ggeɣ d řefḍiḥet x marra Israil.”
1SA 11:3 Imɣaren n Yabic nnan: “Ejj aneɣ sebɛa n wussan, ḥima ad dd-nessekk ireqqasen ɣar marra tammurt n Israil. Mařa war nufi uřa d ijj i d aneɣ ɣa issnejmen, [xenni] ad ɣarek dd-neffeɣ.”
1SA 11:4 [Umi] dd-iwḍen ireqqasen ɣar Jibɛa n Cawul, ssiwḍen-dd nitni awařen-a ɣar imezzuɣen n řgens u marra řgens issgeɛɛed tmijja nnes, run.
1SA 11:5 U xzar, Cawul yusa-dd awarni i ifunasen nnes zeg iyyar, inna: “Min yuɣin řgens ittru ammu?” Nitni ḥajan as awařen n yeryazen n Yabic.
1SA 11:6 Ihwa-dd Arruḥ n AREBBI x Cawul umi isřa awařen-a uca yarɣa uxeyyeq nnes aṭṭas.
1SA 11:7 Netta iksi ijj n uzayřu n ifunasen, iqeṭṭes i-ten d iceǧiqen, issekk iceǧiqen s ufus n ireqqasen ɣar marra tammurt n Israil. Ireqqasen nnan: “Wenni war iffiɣen awarni i Cawul u awarni Camwil [ɣar umenɣi], xzar, ammu i ɣa ittwagg ak-d ifunasen d tfunasin nnes.” [Xenni] tewḍa-dd tiggʷudi n SIDI x marra řgens uca ffɣen munen am yijj n weryaz.
1SA 11:8 Isedd i-ten Cawul di Bazaq. Tuɣa-ten di teřt-mya-ařef zeg ayt n Israil u třatin-ařef n yeryazen zi Yahuda.
1SA 11:9 Nitni nnan i ireqqasen nni tuɣa dd-yusin: “Ammu i ɣa tinim i yeryazen n Yabic di Jilɛad: ‘Tiwecca, xmi ɣa tiři tfuct tařɣa, ad tᵉttwassnejmem.’” [Umi] iwḍen ireqqasen, ɛawden tt i yeryazen n Yabic uca farḥen nitni.
1SA 11:10 Nnan yeryazen n Yabic: “Tiwecca ad ɣarek dd-neffeɣ uca [xenni] tzemmarem akidneɣ tᵉtteggem min tᵉttwařam kenniw mliḥ di tiṭṭawin nwem.”
1SA 11:11 Tiwecca nnes imsar, aqa Cawul ibḍa řgens x třata n ibaṭayunen u ɣar tuffut n ṣṣbeḥ udfen nitni ɣar řmargeḥ n řɛeskar, uca wtin ayt n Ɛammun ɣar ṭṭḥa n uziř. Inni iqqimen iddaren ttwabezzɛen ařami war iqqim uřa d tyuya zzaysen ak-d wayawya.
1SA 11:12 [Xenni] inna řgens i Camwil: “Man wen i innan: ‘Ma Cawul ad xaneɣ yiři d ajeǧid?’ Awyi ten-dd danita, ḥima ad ten neneɣ.”
1SA 11:13 [Maca] Cawul inna: “Deg wass-a uřa d ijjen war ittwaneɣ, maɣar ass-a SIDI issiweḍ-dd asenjem ɣar Israil.”
1SA 11:14 Inna Camwil i řgens: “Ejj aneɣ ad nuyur ɣar Jiljal, ad dinni nřeqqeḥ tagelda.”
1SA 11:15 [Xenni] yuyur marra řgens ɣar Jiljal u nitni ggin dinni di Jiljal Cawul d ajeǧid zzat i wudem n SIDI. Ɣarṣen tiɣarṣa n řehna zzat i wudem n SIDI uca ifarḥ Cawul aṭṭas ak-d marra iryazen n Israil.
1SA 12:1 [Xenni] inna Camwil i marra Israil: “Xzar, necc sřiɣ ɣarwem di marra min i d ayi tennam u necc ggiɣ ijj n ujeǧid xawem.
1SA 12:2 Uca řexxu, xzar, ajeǧid iruḥ zzat i wudem nwem. Necc wsareɣ, dewřeɣ cabeɣ, u xzar, arraw inu aqa aten jar awem. Zi temẓi inu ař ass-a necc ggureɣ [am ukehhan] zzat i wudem nwem.
1SA 12:3 Aqa ayi necc [da]. Cehdem xafi zzat i SIDI u zzat i lmasiḥ nnes. I umi iwyeɣ ca n ufunas? I umi iwyeɣ ijj n weɣyuř? Man wen i ḥṣareɣ u man wen i ɣezziɣ u zi man wen i ṭṭfeɣ ict n terzeft maḥend ad qqneɣ tiṭṭawin inu? Necc ad awem t arreɣ.”
1SA 12:4 Nitni arrin-dd xas: “Cek war d aneɣ teḥṣared ca u war d aneɣ tɣezzid u war tᵉṭṭifed uřa d ict n řḥajjet zi ca n yijjen.”
1SA 12:5 [Xenni] inna asen: “SIDI d acehhad xawem u lmasiḥ nnes d acehhad ass-a, aqa kenniw war tufim uřa d ict n řḥajjet deg ufus inu!” Inna řgens: “Aqa-t d acehhad!”
1SA 12:6 Inna Camwil i řgens: “D SIDI i tuɣa iggin Musa d Harun u Netta d wenni i dd-issuffɣen řejdud nwem zi Miṣra.
1SA 12:7 Xenni řexxu, beddem-dd ɣari, maḥend ad awem ssecneɣ řḥeqq zzat i wudem n SIDI, marra timegga iseggden n SIDI tinni igga i kenniw u i řejdud nwem.
1SA 12:8 Umi dd-yusa Yaɛqub ɣar Miṣra, sɣuyen řejdud nwem ɣar SIDI u SIDI issekk-dd Musa d Harun, uca nitni ssuffɣen-dd řejdud nwem zi Miṣra u sszedɣen ten deg wemcan-a.
1SA 12:9 [Maca] nitni ttun SIDI, AREBBI nsen. [Xenni] Netta izzenz i-ten i Sisara, akumandar n řɛeskar, di Ḥaṣur, u i Ifilisṭiniyyen u i ujeǧid n ayt n Mu’ab. Marra nitni tuɣa mmenɣen akidsen.
1SA 12:10 Uca sɣuyen nitni ɣar SIDI, nnan: ‘Neccin nexḍa, maɣar neccin nesmeḥ di SIDI, nsexxar i ‘Ibaɛlen’ d ‘Ɛactarutin’. U řexxu, fekk aneɣ zeg ufus n řɛedyan nneɣ uca neccin ad Cek nsexxar.’
1SA 12:11 [Xas uca] issekk-dd SIDI Yarubbaɛl d Badan d Yaftaḥ d Camwil u Netta ifekk kenniw zeg ufus n řɛedyan nwem i d awem dd-innḍen, [ařami] tzeddɣem kenniw di řaman.
1SA 12:12 [Umi] teẓrim kenniw aqa Naḥac, ajeǧid n ayt n Ɛammun, iffeɣ-dd ɣarwem, tennim ayi: ‘Lla, ittxeṣṣa ad xaneɣ yiři ijj n ujeǧid!’, waxxa SIDI, AREBBI nwem, d Ajeǧid nwem.
1SA 12:13 Řexxu, xzar, aqa ajeǧid nwem, wenni i tixḍarem, wenni tuɣa tᵉttrajam. Aqa SIDI igga i-t d ajeǧid xawem.
1SA 12:14 Mařa kenniw tᵉtteggʷedem SIDI, ad as tsexxarem u ad tesřam i tmijja nnes, u war ttɣewwɣem x [min dd-iffɣen] zeg uqemmum n SIDI, xenni kenniw, iwa kenniw d ujeǧid nwem wenni i xawem i ɣa iḥekmen, ad tiřim di řaman ɣar ḍeffar n SIDI, AREBBI nwem.
1SA 12:15 [Maca] mařa kenniw war tesřim ɣar tmijja n SIDI, ad tɣewwɣem x [min dd-iffɣen zeg] uqemmum n SIDI, xenni afus n SIDI ad xawem yiři am t tuɣa x řejdud nwem.
1SA 12:16 Xenni řexxu, beddem kenniw, xzarem [řxedmet] tameqqrant i d ɣa igg SIDI zzat i tiṭṭawin nwem.
1SA 12:17 Ma war iǧi ass-a ṣṣabet n irden? Necc ad řaɣiɣ ɣar SIDI u Netta ad iwc ajjajen d wenẓar ař ɣa tessnem u ad tẓarem mechař imɣar řɣar i teggim zzat i tiṭṭawin n SIDI maḥend ad as tᵉttarem ijj n ujeǧid i yixef nwem.”
1SA 12:18 U Camwil iřaɣa ɣar SIDI, u SIDI issekk-dd deg wass nni ajjajjen d wenẓar, uca marra řgens teřqef i-t tiggʷudi d tameqqrant zi SIDI u zi Camwil.
1SA 12:19 Marra řgens inna i Camwil: “Ẓaǧ i imsexxaren nnec ɣar SIDI, AREBBI nnec, maḥend war nettmetti ca, maɣar neccin narni-dd ɣar marra ddnub nneɣ ɛad tuɛeffna [aya], belli narzu ijj n ujeǧid i neccin.”
1SA 12:20 [Xenni] inna Camwil i řgens: “War tteggʷdem ca! Kenniw teggim marra tuɛeffna-ya, maca ḥḍam ařami war ttḥeyyadem [ca ɛad] zi ɣar ḍeffar n SIDI, uca sexxarem i SIDI s marra uř nwem.
1SA 12:21 War ttḥeyyadem ca, minzi [xenni] ad taf tḍaffarem [l’aṣnam] ixwan, [timesřayin] nni war ineffɛen u war ittfekkin, minzi nitenti xwant.
1SA 12:22 Minzi SIDI war isemmeḥ di řgens nnes di ṭṭweɛ n Yisem nnes ameqqran, maɣar SIDI igga ad kenniw igg d řgens i Yixef nnes.
1SA 12:23 Min d ayi icqan, iggʷej xafi aqa ad xḍiɣ ak-d SIDI umi ssbeddeɣ tẓaǧit akidwem, [maca] necc ad awem ssecneɣ abrid iṣebḥen iseggmen.
1SA 12:24 Mɣir, ggʷedem SIDI, sexxarem xas s řmanet s wuř nwem marra, maɣar xzarem, ma war iggi Netta jar awem [marra] timesřayin [nni] imɣaren!
1SA 12:25 [Maca] mařa kenniw ad tarnim ad teggem tuɛeffna, xenni řa d kenniw uřa d ajeǧid nwem ad thellkem.”
1SA 13:1 Tuɣa ɣar Cawul ɛicrin n iseggʷusa umi idweř d ajeǧid. Netta iḥkem arebɛin n iseggʷusa x Israil.
1SA 13:2 Cawul ifarz teřt-ařaf [n yeryazen] zi Israil. Ařfayen [zzaysen] tuɣa aten ɣar Cawul di Mixmas u x idurar n Bayt-Il, u ařef [zzaysen] tuɣa aten ɣar Yunatan di Jibɛa di [temmurt n] Binyamin. Min iqqimen zi řgens yarxu as ijj ijj ad yuyur ɣar uqiḍun nnes.
1SA 13:3 Yunatan iɣřeb x tecbart n řɛeskar n Ifilisṭiniyyen di Jibɛa, uca sřan xas Ifilisṭiniyyen. [Xenni] igga Cawul ad suḍen deg uyicc n icarri di marra tammurt, inna: “Ejj Iɛibraniyyen ad [t] sřen!”
1SA 13:4 Marra Israil isřa abarreḥ-a: “Cawul iɣřeb x ict n tecbart n řɛeskar n Ifilisṭiniyyen u s man aya issarzeg Israil ixef nnes ɣar Ifilisṭiniyyen.” Ittwařaɣa řgens [maḥend ad uyuren] awarni i Cawul ɣar Jiljal.
1SA 13:5 Ifilisṭiniyyen ssmunen i umenɣi ak-d Israil. [Nitni tuɣa ɣarsen] teřt-ařaf n ikarruten d setta-ařaf n imnayen, uca řgens n řɛeskar tuɣa deg waṭṭas am yijdi ɣar tma n řebḥar. Nitni geɛɛden u wtin iqiḍan nsen ɣar Mixmas, ɣar ccarq n Bayt-Awin.
1SA 13:6 [Kuř] aryaz di Israil tuɣa ittwařa aqa nitni di řeḥṣaret, minzi uẓẓřen x řgens. Uca innufar řgens deg ifran u deg ifeǧaqen n teṣḍart u di tṣuḍar u deg imucan n tnuffra u deg wanuten.
1SA 13:7 Ẓwan Iɛibraniyyen L’Urdun ɣar temmurt n Jad d Jilɛad. Tuɣa Cawul s yixef nnes ɛad di Jiljal u marra řgens tuɣa ittarjiji awarni as.
1SA 13:8 Netta iraja di Jiljal sebɛa n wussan ař řweqt i igga Camwil. Maca umi Camwil war dd-yusi, aqa ibezzeɛ řgens ixef nnes, [uyuren] xas.
1SA 13:9 [Řexdenni] inna Cawul: “Awyem ayi-dd da ict n tɣarṣt n wecmaḍ d tɣarṣa n řehna!” [Xenni] issgeɛɛed taɣarṣt n wecmaḍ.
1SA 13:10 Umi ikemmeř s tewhibt n tɣarṣt n wecmaḍ, imsar, aqa yusa-dd Camwil. Cawul iffeɣ ad t iřqa, ḥima ad as ibarek.
1SA 13:11 [Xenni] inna Camwil: “Min teggid cek?” Inna Cawul: “Minzi necc ẓriɣ, aqa řgens yuyur ayi u cek war dd-tusid ɛad deg wussan ittwaggen uca Ifilisṭiniyyen nnjarwen ɣar Mixmas,
1SA 13:12 nniɣ necc: ‘Řexxu ad ɣari dd-hwan Ifilisṭiniyyen u necc war zawgeɣ [ɛad] zzat i wudem n SIDI!’. [X uya] uciɣ aqa din aɣiř xafi, ḥima ad ssgeɛɛdeɣ ict n tɣarṣt n wecmaḍ.”
1SA 13:13 Camwil yarra-dd x Cawul: “Cek teggid tubbuheřya. War teḥḍid ca tawṣeyyet n SIDI, AREBBI nnec, tenni d ac yumur, minzi xenni iři aqa SIDI icedd řexxu tagelda nnec x Israil i řebda.
1SA 13:14 Řexxu maca tagelda nnec war tᵉttɣimi ca. SIDI ifarz i Yixef nnes ijj n weryaz x wuř nnes u SIDI yumur as [ad yiři] d řḥakem x řgens nnes, maɣar cek war teḥḍid ca min i d ac yumur SIDI.”
1SA 13:15 Ikkar Camwil, igeɛɛed zi Jiljal ɣar Jibɛa di Binyamin uca Cawul isedd řgens i tuɣa ɣares iǧan, ca n setta-mya n yeryazen.
1SA 13:16 Cawul, mmis Yunatan d řgens i ɣarsen iǧan, qqimen di Jibɛa di [temmurt n] Binyamin. Uca Ifilisṭiniyyen wtin iqiḍan nsen di Mixmas.
1SA 13:17 Uca iffeɣ [ubarru n] iqṭaṭɛiyyen zi řmargeḥ n řɛeskar n Ifilisṭiniyyen di třata n bandiyyat Ict n bandiyya tarra azeǧif ɣar webrid n Ɛufra, ɣar temmurt n Cuɛal,
1SA 13:18 u bandiyya [nneɣni] tarra azeǧif ɣar webrid n Bayt-Ḥurun u bandiyya [wiss třata] tarra azeǧif ɣar webrid n weymir nni ixezzaren di teɣzurt n Ṣabuɛim, ɣar řexřa.
1SA 13:19 Di marra Israil war ittwif uřa d ijj n wemziř, minzi Ifilisṭiniyyen tuɣa nnan: “Ḥima Iɛibraniyyen war tteggen ssif niɣ lansa.”
1SA 13:20 [X uya] marra Israil iqqim ihekkwa ɣar Ifilisṭiniyyen, ḥima ad isseqḍeɛ [kuř] aryaz uzzař n wesɣar nnes, dduzan nnes, wuzzař n uzeddam nnes d wuzzař n tsiřit nnes.
1SA 13:21 Tuɣa ɣarsen izeynaten war iqḍiɛen ɣar wuzzař n isuɣar u ɣar dduzan u ɣar tazzarin [s třata n icukḍan] u ɣar isennanen ibedden [n řmacam n iyenduzen].
1SA 13:22 Umi dd-yiweḍ wass n umenɣi war ittwif uřa d ijj n ssif uřa d ijj n uḥric di marra řgens nni tuɣa iǧan ɣar Cawul d Yunatan, aqa ttwafen mɣir ɣar Cawul d Yunatan.
1SA 13:23 Ict n terbiɛt n iɛessasen n řeskar n Ifilisṭiniyyen iffeɣ ɣar webrid n uẓekkwu x idurar n Mixmas.
1SA 14:1 Ijj n wass imsar, aqa Yunatan, mmis n Cawul, inna i umsexxar wenni d as yarebbun řesnaḥ: “As-dd, ejj aneɣ ad neẓwa ɣar terbiɛt n iɛessasen n řɛeskar n Ifilisṭiniyyen nni din [iǧan] x ujemmaḍ!”, [maca] netta war t inni i babas.
1SA 14:2 Tuɣa Cawul iqqim ɣar tma n Jibɛa sadu ict n tcejjart n aremmam nni [ibedden] di Miɣrun, uca řgens i tuɣa akides iǧan, dayes ɛřaḥař setta-mya n yeryazen.
1SA 14:3 Axiya, mmis n Axiṭub, umas n Ixabud, mmis n Finaḥas, mmis n Ɛali, akehhan n SIDI di Cilu, tuɣa yarḍ apalṭu [n ukehhan]. Řgens war issin aqa Yunatan tuɣa yuyur.
1SA 14:4 Jar imucan n uẓekkʷu [x idurar] i x tuɣa Yunatan yarezzu ad iẓwa ɣar terbiɛt n iɛessasen n řeskar n Ifilisṭiniyyen, tuɣa din ɣar uɣezdis-a ict n teṣḍart iqeḍɛen i dd-iffɣen uřa d ict teṣḍart iqeḍɛen i dd-iffɣen ɣar uɣezdis nneɣni. Ict ttřaɣan as Buṣayṣ d ict nneɣnit [ttřaɣan as] Sana.
1SA 14:5 Ict n teṣdart iqeḍɛen tuɣa ɣar ccamal arendad n Mixmas d [ict n tesḍart iqeḍɛen] nneɣni tuɣa ɣar ljanub arendad n Jibaɛ.
1SA 14:6 Inna Yunatan i umsexxar wenni d as yarebbun řesnaḥ: “As-dd, ejj aneɣ ad neẓwa ɣar terbiɛt n iɛessasen n řeskar n yinni war ittwaxetnen, ad taɣ ad igg SIDI ca di ṭṭweɛ nneɣ, minzi war iwɛar i SIDI, ḥima ad ifekk s ufus n waṭṭas niɣ s ufus n drus.”
1SA 14:7 Aḥemmař n řesnaḥ nnes yarra-dd xas: “Egg marra min ɣarek deg wuř nnec. Uyur, xzar, necc akidek am wuř nnec.”
1SA 14:8 Yunatan inna: “Xzar, neccin ad neẓwa ɣar yeryazen nni, ad asen nesscen ixef nneɣ.
1SA 14:9 Mařa nitni [xenni] ad aneɣ inin: ‘Beddem ař ɣarwem dd ɣa nas!’, [xenni] ad neqqim nbedd deg wemcan nneɣ, war ɣarsen nettgeɛɛid ca.
1SA 14:10 [Maca] mařa nitni ad inin: ‘Geɛɛdem-dd ɣarneɣ!’, [xenni] ad ɣarsen ngeɛɛed, minzi SIDI igga aneɣ ten deg ufus nneɣ. Aya ad aneɣ yiři d řeɛřamet.”
1SA 14:11 [Řami] dd seccnen nitni ixef nsen s tnayen idsen ɣar terbiɛt n iɛessasen n řeskar n Ifilisṭiniyyen, nnan Ifilisṭiniyyen: “Xzarem, Iɛibraniyyen ffɣen-dd zeg ixubac nsen i di tuɣa nnuffaren.”
1SA 14:12 Iryazen n terbiɛt n řɛeskar nnan i Yunatan u i wenni d as yarebbun řesnaḥ: “Geɛɛdem-dd ɣarneɣ, neccin ad awem dd-nessiweḍ řexbar!” Uca inna Yunatan i uḥemmař n řesnaḥ nnes: “Geɛɛed awarni ayi, maɣar SIDI igga i-ten deg ufus n Israil.”
1SA 14:13 [Xenni] igeɛɛed Yunatan x ifassen d iḍaren ɣar sennej, u aḥemmař n řesnaḥ nnes iḍfar i-t uca wḍan [iɛessasen nni] zzat i wudem n Yunatan u awarni as inɣa i-ten uḥemmař n řesnaḥ nnes.
1SA 14:14 Ticti-ya tamezwarut i zi iwta Yunatan d uḥemmař n řesnaḥ nnes ɛřaḥař ɛicrin n yeryazen, tuɣa teǧa x ijj n yeyyar i tuɣa anect n ijj n wezyen n yeyyar [i izemmar] ijj n uzayřu [n iyenduzen] ad t icarz [deg ijj n wass].
1SA 14:15 Amenni tudef tarjijet di řmargeḥ n řɛeskar x yeyyar, di marra řgens u deg yinni n terbiɛt n řɛeskar. Uřa d abarru n ikeccaḍen ttarjijen s yixef nsen, [wah,] uřa d tammurt tenhezz. Tuɣa-tt d ict n řɛurret temɣar n AREBBI.
1SA 14:16 Iɛessasen n Cawul di Jibɛa di Binyamin ẓrin, aqa ittwabezzeɛ řɣaci, dewřen nitni ttmenɣan ak-d wayawya.
1SA 14:17 [Xenni] inna Cawul i řgens i tuɣa ɣares iǧan: “Arzum xenni u xzarem man wen i zzayneɣ iffɣen.” Nitni arzun u xzar, aqa Yunatan d uḥemmař n řesnaḥ nnes war din ǧin.
1SA 14:18 [Xenni] inna Cawul i Axiya: “Awi-dd Ttabut n AREBBI danita!” Maɣar Ttabut tuɣa-tt deg wussan nni ɣar ayt n Israil .
1SA 14:19 Umi tuɣa Cawul issawař ɛad ak-d ukehhan, imsar, aqa řɣaci di řmargeḥ n řɛeskar n Ifilisṭiniyyen idweř innehweř aṭṭas. [Xenni] inna Cawul i ukehhan: “Fekk afus nnec!”
1SA 14:20 Cawul d marra řgens nni tuɣa ɣares, aqa ttwařaɣan-dd maḥend ad munen, uca usin-dd ɣar wazzay n umenɣi, u xzar, ssif n ijjen tuɣa x wenneɣni. Aqa ikkar ijj n uxarweḍ d ameqqran.
1SA 14:21 Tuɣa din ɛawed Iɛibraniyyen inni aṭṭas zeg wami tuɣa ibedden x uɣezdis n Ifilisṭiniyyen, tuɣa tteffɣen-dd akidsen mmṭarrcen jar řɛeskar. Uřa d nitni munen ɣar Israiliyyen nni iǧan ak-d Cawul d Yunatan.
1SA 14:22 [Umi] marra iryazen n Israil, inni tuɣa innuffaren x idurar n Ifrayim, sřan, aqa Ifilisṭiniyyen tuɣa arewřen, munen uřa d nitni ɣarsen i umenɣi maḥend ad ḍfaren [Ifilisṭiniyyen].
1SA 14:23 Deg wass nni ifekk SIDI Israil uca amenɣi iffeɣ uřa ɣar Bayt-Awin.
1SA 14:24 Ttwaɛarrnen iryazen n Israil deg wass nni [ar ṭṭarf], minzi Cawul ijjuǧ i řgens, inna: “Wenni i ɣa iccen macca qbeř tameddit u qbeř i ɣa ntaqmeɣ necc x řɛedyan inu, ad yiři ittwanɛeř!” [X uya] war icci marra řgens.
1SA 14:25 Marra [řgens n] temmurt yudef ɣar wezɣar uca tuɣa [din] tamment [tewseɛ] deg iyyar.
1SA 14:26 [Umi] dd-yudef řgens ɣar wezɣar, [aqa din] tamment s ufeyyeḍ, [maca] uřa d ijj war ɣares isswiẓẓeḍ s ufus maḥend ad zzayes iksi ɣar uqemmum nnes, maɣar řgens iggʷed tajaǧit [n Cawul].
1SA 14:27 [Maca] Yunatan tuɣa war isři řami issjuǧ babas řgens. Netta isswiẓẓeḍ s uneggar n uzeǧaḍ nnes nni [iǧan] deg ufus nnes uca issisen i-t deg ict n teɣraṣt n tamment. [Řami] yiwi afus nnes ɣar uqemmum nnes, aqa dewřent tiṭṭawin nnes izdigent aṭṭas.
1SA 14:28 [Xenni] yarra-dd ijj n weryaz zi řgens, inna: “Babac issjuǧ řgens s ict n tjaǧit, inna: ‘Aryaz i ɣa iccen ass-a aɣrum, ad yiři ittwanɛeř!’ [S uyenni] ifna řgens.”
1SA 14:29 [Xas uca] inna Yunatan: “Baba iɣḍeř tammurt di arrẓiyyet. Xzarem waha, tiṭṭawin inu ttceɛɛřent, minzi necc qqaseɣ drust zi tamment-a.
1SA 14:30 Iḥřa asen mři icca řgens mliḥ ass-a zi tkeccaḍt i iṭṭef zi řɛedyan nnes, minzi řexxu ticti [i zi wtin nitni] Ifilisṭiniyyen war teǧi d tameqqrant [ɛad].”
1SA 14:31 Deg wass nni wtin nitni Ifilisṭiniyyen zi Mixmas ař Ayalun, u řgens tuɣa ifna aṭṭas.
1SA 14:32 Řgens iɛemmed x tkeccaḍt u nitni ksin uǧi d ifunasen d tfunasin, uca ɣarṣen asen x temmurt, u řgens icca [aysum] s idammen.
1SA 14:33 Ssargben man aya i Cawul, nnan: “Aqa řgens ixḍa ak-d SIDI umi nitni ccin [aysum] ak-d idammen.” Netta inna: “Kenniw tɣeddarem. Seqnunniyem-dd kenniw ass-a ict n teṣḍart ɣari.”
1SA 14:34 Inna Cawul [ɛawed]: “Bezzɛem ixef nwem jar řgens, tinim asen: ‘Ejj [kuř] aryaz ad ayi dd-yawi afunas nnes, u [ejj kuř] aryaz [ad ayi dd-yawi ɛawed] ijjen zeg wuǧi nnes. Ɣarṣem asen da, ccem zzaysen, [maca] war ttxeṭṭim ak-d SIDI umi ɣa teccem s idammen.” Uca [kuř] aryaz zi marra řgens yiwi-dd afunas nnes s ufus di ǧiřet uca ɣarṣen as dinni.
1SA 14:35 Uca Cawul ibna ijj n uɛalṭar i SIDI. Tuɣa-t d aɛalṭar amezwaru i issbedd i SIDI.
1SA 14:36 [Xenni] inna Cawul: “Ejj aneɣ ad nehwa ǧiřet-a, ad neḍfar Ifilisṭiniyyen u ad ten nkecceḍ ař tuffut n ṣṣbeḥ, war zzaysen nᵉttejji uřa d ijjen [ad iddar ɛad].” Nnan nitni “Egg marra min tᵉttwařid nican di tiṭṭawin nnec.” Maca akehhan inna: “Jjem aneɣ ad dd-nqarreb ɣar AREBBI.”
1SA 14:37 [Xenni] isseqsa Cawul AREBBI “Ma ad hwiɣ, ad ḍfareɣ Ifilisṭiniyyen? Ma ad ten tegged deg ufus n Israil?” [Maca] SIDI war xas dd-yarri deg wass nni.
1SA 14:38 [Xas uca] inna Cawul: “Asem-dd da, marra imḍebbaren n řgens, snem u xzarem, min di iǧa ddnub-a i ittwaggen ass-a.
1SA 14:39 Minzi s tidett am iddar SIDI wenni ifekken Israil, waxxa tuɣa-t d mmi Yunatan, netta ad immet nican.” Maca uřa d ijj zi řgens war dd-yarri ca.
1SA 14:40 Inna [ɛawed] i marra ayt n Israil: “Ittxeṣṣa ad tbeddem ɣar ijj n uɣezdis, necc d mmi Yunatan ad nbedd ɣar uɣezdis nneɣni.” Řgens yarra-dd x Cawul: “Egg min tᵉttwařid cek mliḥ di tiṭṭawin nnec.”
1SA 14:41 [Xas uca] issiweř Cawul ak-d SIDI, AREBBI n Israil “Arr-dd xaneɣ maḥend ad t nessen nican!” [Xenni] ittwaṭṭef Yunatan d Cawul uca řgens iffeɣ [d amezdag].
1SA 14:42 Cawul inna: “Nḍarem taqedduḥt jar ayi necc d mmi Yunatan!” [Xenni] ittwaṭṭef Yunatan.
1SA 14:43 Inna Cawul i Yunatan: “Ini ayi, min teggid cek!” Yunatan iḥaja as t, inna: “Necc qqaseɣ mɣir cwayt n tamment s uneggaru n uẓeǧaḍ nni [iǧan] deg ufus inu. Aqa ayi da, ma ittxeṣṣa ayi ad mmteɣ?”
1SA 14:44 [Xenni] inna Cawul: “Ejj ad ayi igg AREBBI ta d ta u ad dayes yarni ɛad, [mařa war cek neqqeɣ] minzi [cek], Yunatan, ittxeṣṣa ac ad temmted nican.”
1SA 14:45 [Maca] řgens inna i Cawul: “Ma ittxeṣṣa ad immet Yunatan, wenni iwyen asenjem-a ameqqran i Israil? War xas nessiweř! S tidett am iddar SIDI, aya war ittiři, war zzayes iweṭṭa uřa d ict n uẓeṭṭu n ucuwwaf n uzeǧif nnes ɣar temmurt, minzi netta igga i-t ass-a ak-d AREBBI.” [Ammu] i ifekk řgens i Yunatan uca tuɣa war ittxeṣṣi ad immut.
1SA 14:46 Cawul ismeḥ deg weḍfar n Ifilisṭiniyyen uca Ifilisṭiniyyen ɛeqben ɣar imucan [n tzeddiɣt] nsen.
1SA 14:47 Uca Cawul iṭṭef tagelda x Israil, immneɣ ak-d marra řɛedyan nnes i d as dd-innḍen: ak-d Mu’ab, ak-d ayt n Ɛammun, ak-d Idum, ak-d ijeǧiden n Ṣuba u ak-d Ifilisṭiniyyen. Mani ma yarra s uzeǧif, yiwi-dd aɣelleb.
1SA 14:48 Netta igga s teryast, iɣřeb x ayt n Ɛamaliq u ifekk Israil zeg ufus n yinni t ikeccḍen.
1SA 14:49 Arrawen n Cawul [tuɣa aten d] Yunatan d Yicwi d Malkicuɛa. Ismawen n tnayen n yessis d Mirab, tenni d tamenzut, u isem n tmaẓuẓt [aqa] d Mixal.
1SA 14:50 Tamɣart n Cawul qqaren as Axinuɛam, yeǧis n Aximaɛaṣ. Uca isem n ukumandar n řɛeskar nnes, [aqa] d Abnir, mmis n Nir, ɛemmis n Cawul.
1SA 14:51 Qic, wenni d babas n Cawul, u Nir, wenni d babas n Abnir, [tuɣa aten d] iḥenjiren n Abiyil.
1SA 14:52 Tuɣa [din] ijj n umenɣi iwɛar ak-d Ifilisṭiniyyen marra ussan min ikka iddar Cawul. Kuř ijj n weryaz bu-teɣruḍt d kuř ijj n mmis n umenɣi i iẓra Cawul, iksi i-t ɣares.
1SA 15:1 Camwil inna i Cawul: “SIDI tuɣa issekk ayi-dd ḥima ad cek dehneɣ d ajeǧid x řgens nnes, x Israil. Seř xenni ɣar wawařen n SIDI.
1SA 15:2 Ammu i iqqar SIDI n řɛeskarat: ‘Necc ad xeǧṣeɣ min igga Ɛamaliq i Israil, aqa ibedd as deg webrid umi dd-igeɛɛed Israil zi Miṣra.
1SA 15:3 Kkar řexxu u wwet Ɛamaliq. Ḥarrem marra min ɣares i uteḥḥi u war xas ttḥiwiř ca, maca neɣ [marra], zeg weryaz ař temɣart, zeg uḥenjir ař aseymi, zeg ufunas ař uǧi, zeg weřɣem ař aɣyuř!’”
1SA 15:4 Iřaɣa-dd Cawul x řgens. Isedd i-ten di Ṭalayim. Tuɣa-ten di mitayen-ařef n yeryazen x iḍaren d tenɛac ařef n yeryazen n Yahuda.
1SA 15:5 [Umi] yiweḍ Cawul ɣar tendint n Ɛamaliq, igga ijj n řfex di teɣzurt,
1SA 15:6 uca Cawul ijja ad inin i ayt n Iqiniyyen: “Ffɣem, beɛɛdem, semḥem di řwesṭ n Ɛamaliq, ḥima necc war kenniw tteḥḥiɣ akidsen, maɣar kenniw teggim s tmexsiwt icewwaren ak-d ayt n Israil umi dd-ffɣen zi Miṣra.” [Xas uca] ffɣen Iqiniyyen zi řwesṭ n ayt n Ɛamaliq.
1SA 15:7 [Xenni] iɣřeb Cawul x ayt n Ɛamaliq zi Ḥawila ař Cur [i iǧan] arendad n Miṣra.
1SA 15:8 Ajaj, ajeǧid n Ɛamaliq, iṭṭef i-t iddar, maca marra řgens iḥarrem i-ten i uteḥḥi s řeqḍeɛ n ssif.
1SA 15:9 [Maca] Cawul d řgens ḥawřen x Ajaj uřa x řemxeyyer n wuǧi d ifunasen d tfunasin u x min [iǧan] iṣebḥen awarni as u x marra izmaren daysen tadunt u x marra min tuɣa d aṣebḥan qaɛ. War xsen ad ten ḥarrmen i uteḥḥi, [maca] marra min [iǧan] drus d min iḍeɛfen, ḥarrmen t i uteḥḥi.
1SA 15:10 [Xenni] yusa-dd wawař n SIDI ɣar Camwil, inna:
1SA 15:11 “Necc nedmeɣ, aqa ggiɣ Cawul d ajeǧid, maɣar netta iḥeyyed zi ḍeffar inu u war isseqfeř awařen inu.” Innehweř Camwil, isɣuy tameddit tmun ɣar SIDI.
1SA 15:12 Tiwecca nnes zic ikkar Camwil, yuyur ad iřqa Cawul. Ittwanna as i Camwil, nnan: “Cawul yusa-dd ɣar Karmil u issbedd [dinni] ijj n uqellij n řidaret i yixef nnes, xenni inneqřeb, iɛdu, ihwa ɣar Jiljal.”
1SA 15:13 Yusa-dd Camwil ɣar Cawul u Cawul inna as: “Aqa cek tᵉttwabarked zi SIDI! Necc ssqefřeɣ awař n SIDI.”
1SA 15:14 [Xenni] yarra-dd xas Camwil: “D min [ixs ad yini] řḥess-a n wuǧi [i d ayi ittadfen] deg imezzuɣen inu, d řḥess n ifunasen d tfunasin i ttesřiɣ?”
1SA 15:15 Cawul inna: “Nitni iwyen ten-dd akidsen zi Ɛamaliq, minzi řgens iḥaweř x mummu n wuǧi d ifunasen d tfunasin, ḥima ad ten qeddmen d taɣarṣt i SIDI, AREBBI nnec. Min iqqimen nḥarrem i-t i uteḥḥi.”
1SA 15:16 [Xenni] inna Camwil i Cawul: “Cfa! Necc ad cek iniɣ min i d ayi inna SIDI di ǧiřet-a.” Inna as Cawul: “Siweř!”
1SA 15:17 Inna Camwil: “Umi teǧid [ɛad] d ameẓyan di tiṭṭawin nnec, ma war tdewřed ca d azeǧif n tqebbař n Israil, u ma war cek idhen SIDI d ajeǧid x Israil?
1SA 15:18 SIDI issekk i cek ɣar webrid, inna: “Uyur, ḥarrem imednab nni, ayt n Ɛamaliq, i uteḥḥi u mneɣ akidsen ař ten ɣa teqḍid qaɛ.
1SA 15:19 Mayemmi war tesřid ca ɣar tmijja n SIDI uca tewḍiḍ cek x tkeccaḍt u teggid [min iǧan] d řɣar di tiṭṭawin n SIDI?”
1SA 15:20 [Xenni] inna Cawul i Camwil: “Necc sřiɣ ɣar tmijja n SIDI u necc kkeɣ abrid i x i d ayi dd-issekk SIDI. Necc iwyeɣ-dd danita Ajaj, ajeǧid n Ɛamaliq uca ayt n Ɛamaliq ḥarrmeɣ ten i uteḥḥi.
1SA 15:21 Řgens iksi uǧi d ifunasen d tfunasin zi tkeccaḍt, mummu n min ittwaḥarrmen, ḥima ad qeddmen aya i SIDI, AREBBI nnec, di Jiljal.”
1SA 15:22 [Maca] Camwil inna: “Ma teɛjeb as i SIDI tiɣarṣa n wecmaḍ d tiɣarṣa nneɣni am mammec i d as iɛjeb useǧi i tmijja n SIDI? Xzar aseǧi ḥsen zi tɣarṣt u asḥessi s taynit [ḥsen zi] tadunt n icarriyyen.
1SA 15:23 Minzi aɣewweɣ am ddenb n uɛezzem, u taɣennant am weɛbad n ṣṣanam d řexyařat timeẓyanin n l’aṣnam. Minzi cek tenḍared awař n SIDI, inḍar Netta i cek [am] ujeǧid.”
1SA 15:24 [Xenni] inna Cawul i Camwil: “Necc xḍiɣ, maɣar necc ttɛeddiɣ x [řumur i dd-iffɣen zeg] uqemmum n SIDI u x wawařen nnec, minzi necc ggʷedeɣ zi řgens u sřiɣ ɣarsen.
1SA 15:25 S uyenni, ɣfar ayi ddenb inu u dweř akidi, [xenni] ad sejdeɣ i SIDI.”
1SA 15:26 [Maca] Camwil yarra-dd x Cawul: “Necc war kidek dikkʷiřeɣ ca, maɣar cek tenḍared awař n SIDI. S uya SIDI inḍar i cek [am] ujeǧid x Israil.”
1SA 15:27 [Umi] Camwil inneqřeb ḥima ad yuyur, icebbar as [Cawul] di tma n useřham nnes, [maca] wanita icarreg.
1SA 15:28 [Xenni] inna as Camwil: “Deg wass-a icarreg ac SIDI tagelda n Israil u iwca i-tt i jjar nnec wenni iǧan ḥsen zzayek.
1SA 15:29 Uřa Lɛaḍim n Israil i ittduman i řebda war issxarriq ca u war indim, maɣar Netta war iǧi d bnadem ařami i ɣa indem.”
1SA 15:30 [Xas uca] inna as: “Necc xḍiɣ. Ewc ayi maca aweqqar zzat i imɣaren n řgens u zzat i Israil. Dweř akidi, [xenni] ad sejdeɣ i SIDI, AREBBI nnec.”
1SA 15:31 Uca idweř Camwil, yareddef Cawul u Cawul ibendeq zzat i SIDI.
1SA 15:32 [Xas uca] inna Camwil: “Awi-dd ɣari Ajaj, ajeǧid n Ɛamaliq. Ajaj yuyur ɣares s arratuḥ. Inna Ajaj [ak-d ixef nnes]: “S tidett, tarzugi n řmewt tᵉttwaḥeyyed [xafi].”
1SA 15:33 [Maca] Camwil inna: “Am mammec issḥarrem ssif nnec timɣarin x iḥenjiren nsent, ammu i ɣa tᵉttwaḥarrem yemmac jar timɣarin x tarwa nnes.” U Camwil iqeṭṭes Ajaj d iceǧiqen zzat i wudem n SIDI di Jiljal.
1SA 15:34 [Xenni] yuyur Camwil ɣar Rama u Cawul igeɛɛed ɣar taddart nnes di Jibɛa n Cawul.
1SA 15:35 Camwil war iẓri ɛad Cawul ař ass n řmewt nnes, maca Camwil icḍen x Cawul. Uca indem SIDI řami igga Cawul d ajeǧid x Israil.
1SA 16:1 [Xenni] inna SIDI i Camwil: “Mecḥař d acḍan [i yeǧan ɛad] ɣarek x Cawul, wenni ggiɣ Necc d ajeǧid x Israil? Ɛemmar icc nnec s zzect, uca tuyured. Necc ad cek ssekkeɣ ɣar Yassa zi Bayt-Laḥm, minzi jar arraw nnes aqa ẓriɣ ijj n ujeǧid i Necc.”
1SA 16:2 [Maca] Camwil inna: “Mammec i ɣa ggeɣ ad [din] raḥeɣ? Mařa iseř x man aya Cawul, ad ayi ineɣ.” Yarra-dd SIDI: “Ksi ict n tɛejmit zeg ifunasen akidek, ad tinid: ‘Necc usiɣ-dd ḥima ad qeddmeɣ ict n tɣarṣt d tawhibt i SIDI.’
1SA 16:3 Ittxeṣṣa ad tɛarḍed x Yassa ɣar tewhibt u Necc ad cek ssargbeɣ x min i ittxeṣṣan ad tegged. Cek ad tdehned wenni i d ac ɣa iniɣ.”
1SA 16:4 Camwil igga min tuɣa d as inna SIDI. Umi dd-yusa ɣar Bayt-Laḥm, ffɣen-dd ɣares imɣaren n tendint ttarjijin, nnan: “Ma tawasit nnec s řehna?”
1SA 16:5 Netta inna: “S řehna. Necc usiɣ-dd ḥima ad qeddmeɣ ict n tɣarṣt d ṣṣedqet i SIDI. Qeddsem ixef nwem u asem-dd akidi ɣar ṣṣedqet. Netta iqeddes Yassa d iḥenjiren nnes uca iɛarḍ i-ten ɣar tewhibt n tɣarṣt.
1SA 16:6 Uca imsar umi dd-usin nitni, iẓra netta Iliyab uca ixarreṣ: “D wa s tidett ɣar SIDI d amedhun nnes.”
1SA 16:7 SIDI [maca] inna i Camwil: “War xezzar ca ɣar waddud nnes uřa ɣar řuɛřa nnes n tiddi, minzi Necc nḍareɣ t, maɣar war itthimmi ca min ɣar ixezzar bnadem, minzi bnadem ittwařa min iǧan zzat i tiṭṭawin [nnes], [maca] SIDI ittwařa uř.”
1SA 16:8 [Xenni] iřaɣa Yassa x Abinadab, ijja i-t ad iɛdu x Camwil, [maca] netta inna: “Wanita ɛawed war t yixḍar SIDI.”
1SA 16:9 [Xas uca] ijja Yassa ad [xas] iɛdu Camma, maca netta inna: “Wanita ɛawed war t yixḍar SIDI.”
1SA 16:10 Ammu i ijja Yassa ad ɛdun sebɛa n iḥenjiren nnes x Camwil, [maca] Camwil inna i Yassa: “Ina war ten ixḍar ca SIDI.”
1SA 16:11 [Xenni] inna Camwil i Yassa: “Ma d ina marra iḥudriyyen [nnec]?” Netta yarra-dd xas: “Amaẓuẓ iqqim ɛad, aqa yarekkwes uǧi.” Inna Camwil i Yassa: “Sekk [ijj] maḥend ad t-i-dd-yawi, minzi neccin war nettquwwir ca [i ṭṭabřa] qbeř i dd ɣa yas netta.”
1SA 16:12 Netta issekk [ijj] maḥend ad t-i-dd yawi. Netta tuɣa d arrubyu u tuɣa ɣares tiṭṭawin cnant u tuɣa d muṣbiḥ i řxezrat. [Xenni] inna SIDI: “Kkar, dehn i-t, maɣar aqa d wa.”
1SA 16:13 Uca iksi Camwil icc s zzect, idehn i-t di řwest n aytmas. Uca Arruḥ n SIDI ihwa x Dawud zeg wass nni d tsawent. Camwil ikkar, yareggʷeḥ ɣar Rama.
1SA 16:14 Arruḥ n SIDI tuɣa iḥeyyed x Cawul u ijj n řaryah d aɛeffan zi ɣar SIDI issiggʷed i-t.
1SA 16:15 Nnan as imsexxaren n Cawul: “Xzar, ijj n řaryah d aɛeffan n AREBBI issiggʷed i cek.
1SA 16:16 Ejj ad yini siditneɣ i imsexxaren nnec inni ibedden zzat i wudem nnec, maḥend ad arzun x ijj n weryaz ittḥakan di řgambri. Mařa iṭṭef i cek řaryaḥ aɛeffan n AREBBI, ejj i-t [xenni] ad yirar netta s ufus nnes [di řgambri,] [ḥima] ad tiřid mliḥ.”
1SA 16:17 [Xenni] inna Cawul i imsexxaren nnes: “Arzum ayi-dd x ijj n weryaz nni ittiraren mliḥ [x řgambri] u awyem t-i-dd da ɣari!”
1SA 16:18 Ijjen zeg imsexxaren yarra-dd xas, inna: “Aqa ẓriɣ ijj n mmis n Yassa zi Bayt-Laḥm wenni izemmaren ad yirar [mliḥ]. Netta d ijj n bu-teɣruḍt imeḥḍen d ijj n weryaz aɛeskari, issen ad ixḍar awařen nnes. Aqa-t d ijj n weryaz d aṣebḥan n waddud u SIDI akides.”
1SA 16:19 Issekk Cawul ireqqasen ɣar Yassa, inna: “Sekk ayi-dd mmic Dawud wenni iǧan ak-d wuǧi.”
1SA 16:20 Yassa iksi ijj n weɣyuř ak-d weɣrum d ict n tecyart n binu d ijj n iɣayḍ d ameẓyan zeg iɣayḍen uca issekk aya s ufus n mmis Dawud ɣar Cawul.
1SA 16:21 Ammu dd-yusa Dawud ɣar Cawul uca ibedd zzat i wudem nnes u netta ittexs i-t aṭṭas. Netta idweř d aḥemmař n řesnaḥ nnes.
1SA 16:22 S uyenni issekk Cawul ɣar Yassa maḥend ad as yini: “Ttzawgeɣ cek, ejj Dawud ad iqqim ibedd zzat i wudem inu, maɣar netta yufa arḍa di tiṭṭawin inu.”
1SA 16:23 Meřmi ma dd-yusa řaryaḥ d aɛeffan n AREBBI ɣar Cawul, iksi Dawud řgambri uca ibda ittirar dayes s ufus nnes. D man aya dd-yarrin nnefs ɣar Cawul ařami idweř mliḥ, uca [xenni] iḥeyyed xas buḥbeř aɛeffan.
1SA 17:1 Ifilisṭiniyyen ssmunen řɛeskarat nsen i umenɣi u nitni nnyarwen ɣar Suku di [temmurt n] Yahuda. Wtin iqiḍan nsen jar Suku d Ɛaziqqa ɣar Afas-Dammim.
1SA 17:2 [Uřa d] Cawul d yeryazen n Israil nnyarwen uca wtin iqiḍan nsen di Teɣzurt n Ila. Nitni sedden ixef nsen i umenɣi qibač i Ifilisṭiniyyen.
1SA 17:3 Ifilisṭiniyyen bedden x wedrar ɣar uɣezdis-a u Israiliyyen bedden x wedrar ɣar uɣezdis nni u taɣzurt tuɣa jar asen.
1SA 17:4 [Xenni] iffeɣ-dd ijj n uɛeskari d azeɛɛam zi řmargeḥ n řɛeskar n Ifilisṭiniyyen, qqaren as Juliyat. Tuɣa-t zi Jat. Řuɛřa nnes setta n iɣaǧen d ijj n wezyen n uɣiř.
1SA 17:5 X uzeǧif nnes tuɣa ijj n lkask n nnḥas, u netta yarḍ arruḍ n wuzzař n uɛeskari s teqcurin. Tuɣa řewzen n warruḍ n wuzzař xemsa-ařaf ciqlu n nnḥas.
1SA 17:6 Netta tuɣa ɣares iseřqan n ifadden n nnḥas i uḥeṭṭu n iḍaren u jar tɣarḍin nnes [yarbu] ijj n uḥric n nnḥas.
1SA 17:7 Aɛmud n lansa nnes tuɣa t am yijj n ukeccuḍ n uxeyyeḍ u tixeft [n wuzzař] n lansa nnes tewzen setta-mya ciqlu n wuzzař u wenni d as yarebbun taseddart nnes tameqqrant n uɛeskari izwar as.
1SA 17:8 Netta tuɣa ibedd [din], iřaɣa i iseddiyyen n řɛeskar n Israil, inna asen: “Mayemmi i dd-teffɣem u tseddem ixef nwem i umenɣi? War iǧi necc d Afilisṭini u kenniw d imsexxaren n Cawul? Farzem ijj n weryaz i kenniw wenni ɣari dd ɣa ihwan.
1SA 17:9 Mři xafi izemmar deg umenɣi, ad ayi iwwet, [xenni] neccin ad niři d imsexxaren nwem, [maca] mařa necc arebḥeɣ uca ad xas ɣeřbeɣ, [xenni] kenniw ad tiřim d imsexxaren nneɣ, ad aneɣ tsexxarem.”
1SA 17:10 Inna Ufilisṭini [ɛawed]: “Deg wass-a stehziɣ zeg iseddiyyen n řɛeskar n Israil, ad [awem] iniɣ: ‘Ewc ayi ijj n weryaz maḥend ad nemmneɣ ak-d wayawya!’”
1SA 17:11 Cawul d marra Israil sřan awařen-a n Ufilisṭini uca nnxeřɛen u ggʷeden aṭṭas.
1SA 17:12 Dawud tuɣa d mmis n ijj n weryaz zi Ifrata, zi Bayt-Laḥm di [temmurt n] Yahuda, qqaren as Yassa. Netta tuɣa ɣares tmenya n iḥenjiren u deg wussan n Cawul [tuɣa ḥessben t] d awessar umi dd-yusa jar yeryazen.
1SA 17:13 Třata n iḥenjiren imeqqranen n Yassa ḍfaren Cawul ɣar umenɣi. Ismawen n třata n iḥenjiren nnes, inni dd-iffɣen ɣar umenɣi, aqa aten Iliyab, amenzu, u wenni wiss tnayen d Abinadab u wenni wiss třata d Camma.
1SA 17:14 Tuɣa Dawud d amaẓuẓ uca třata n [iḥenjiren] imeqqranen tuɣa ḍfaren Cawul.
1SA 17:15 Dawud tuɣa [innum] ittraḥ [dinni] u [xenni] ittareggʷeḥ-dd zi Cawul, ḥima ad yarwes uǧi n babas di Bayt-Laḥm.
1SA 17:16 Afilisṭini tuɣa ittas-dd ɣar tuffut u ɣar tmeddit, isscan ixef nnes [din], arebɛin n wussan.
1SA 17:17 Inna Yassa i mmis Dawud: “Ksi ɛafak i aytmac ijj n ifa n teɣwawin-a d ɛecra n tecnifin, awyi tent deɣya ɣar řmargeḥ n řɛeskar ɣar aytmac.
1SA 17:18 U ɛecra n trussi n uɣi-ya awyi tent ɣar umeqqran x wařef. Arzu x yaytmac, ma mliḥ i iǧan u awyi zzaysen ict n weḍman [d jjurret n tudart]!”
1SA 17:19 Cawul d aytmas d marra iryaz[en] n Israil, tuɣa ttmenɣan ak-d Ifilisṭiniyyen di Teɣzurt n Ila.
1SA 17:20 Ikkar Dawud zic ɣar tuffut, ijja tḥimart n wuǧi ɣar ijj n uɛessas u yiwi [marra aya] akides uca yuyur am mammec tuɣa i d as t yumur Yassa. Umi dd-yiweḍ ɣar řmargeḥ n ikarruten, řexdenni i iffeɣ řɛeskar ɣar useddi n umenɣi, [bdan] ad sɣuyen s iɣuyyan n umenɣi.
1SA 17:21 Israil d Ifilisṭiniyyen sedden ixef nsen [i umenɣi], aɣembub n ijj n useddi deg uɣembub n ijj n useddi nneɣni.
1SA 17:22 Dawud ijja řeḥwayej nni ɣares deg ifassen n ijj n uɛessas n řeḥwayej uca yuzzeř ɣar useddi n řɛeskar. Umi [din] yiweḍ, isseqsa x yaytmas mammec ǧan nitni.
1SA 17:23 [Řami] tuɣa akidsen issawař, xzar, iffeɣ-dd umjahed azeɛɛam nni, qqaren as Julyat zi Jat, zi řɛeskar n Ifilisṭiniyyen. Netta issiweř s wawařen d ijjen u Dawud isřa [xas].
1SA 17:24 Umi ẓrin marra iryazen n Israil aryaz [nni], arewřen. Nitni ggʷeden aṭṭas.
1SA 17:25 Nnan yeryazen n Israil: “Ma teẓrim kenniw mammec i dd-igeɛɛed weryaz nni? Netta igeɛɛed-dd ḥima ad istehza zi Israil. Aryaz wenni t i ɣa iɣeřben, ad t yarr ujeǧid d bu-wagřa ameqqran. Netta ad as iwc yeǧis u ad ikkes x [řaǧ n] taddart n babas ḍḍariba di Israil.”
1SA 17:26 [Xenni] issiweř Dawud ak-d yeryazen inni ɣares dd-ibedden, inna: “Min ɣa ittwagg i weryaz nni i ɣa iwten Afilisṭini-aya, wenni i ɣa ikkes astehzi x Israil? Min iɛna Afilisṭini-aya i war ittwaxetnen, aqa istehza x iseddiyyen n řɛeskar n AREBBI iddaren?”
1SA 17:27 Yarra-dd xas řgens s wawař d ijjen, nnan: “D man aya i ɣa ittwagg i weryaz nni t i ɣa iɣeřben.”
1SA 17:28 Umas ameqqran Iliyab isřa as issawař ak-d yeryazen. Yarɣa uxeyyeq n Iliyab x Dawud, inna: “Mayemmi i dd-tehwid cek [danita] u man wen i umi tejjid taḥimart tameẓyant n wuǧi di řexřa? Necc ssneɣ aɛeffar nnec d tuɛeffna n wuř nnec, minzi cek tehwid-dd [danita] ḥima ad texzared ɣar umenɣi.”
1SA 17:29 Dawud inna: “Min ggiɣ řexxu ɛawed? Ma war [iǧi] mɣir ijj n wawař [i sseqsiɣ]?”
1SA 17:30 Netta iḥeyyed xas, iruḥ ɣar ijjen nneɣni, isseqsa aseqsi d ijjen uca yarra-dd xas řgens s wawař d ijjen am mammec dd-arrin nitni twařa tamezwarut.
1SA 17:31 Nitni sřan i wawařen i tuɣa issawař Dawud uca ssiwřen x man aya zzat i wudem n Cawul u netta ijja ad t-i-dd-awyen.
1SA 17:32 Inna Dawud i Cawul: “Uřa d ijj n bnadem war ittefciř wuř nnes zeg Ufilisṭini. Amsexxar nnec ad yuyur ad immneɣ ak-d Ufilisṭini.”
1SA 17:33 Cawul inna i Dawud: “Cek war tzemmared ad traḥed ɣar Ufilisṭini-aya ḥima akides tᵉmmenɣed, maɣar cek d aḥudri [ɛad], [maca] netta d aryaz aɛeskari zi temẓi nnes.”
1SA 17:34 [Xas uca] inna Dawud i Cawul: “Amsexxar nnec tuɣa yarekkwes taḥimart n wuǧi n babas. [Mařa] yusa-dd ijj n weyrad niɣ ijj n ddub, uca iṭṭef ijjen zeg wuǧi n tḥimart,
1SA 17:35 [xenni] ḍfareɣ t, wtiɣ t u fekkeɣ-dd [izmar] zeg uqemmum nnes. [Řami] dd-ikkar akidi, cebbareɣ as di tmart, wtiɣ t uca nɣiɣ t.
1SA 17:36 Amsexxar nnec inɣa ayrad uřa d ddub. Ammu i ɣa yiři ak-d Ufilisṭini-aya i war ittwaxetnen, ad as temsar am i yijj n zzaysen, minzi netta istehza zeg iseddiyyen n řɛeskar n AREBBI iddaren.”
1SA 17:37 Inna Dawud [ɛawed]: “SIDI wenni d ayi ifekken zeg iceqřaḍen n wayrad u zeg iceqřaḍen n ddub, ad ayi ifekk zeg ufus n Afilisṭini-aya.” [Xenni] inna Cawul i Dawud: “Uyur, ad kidek yiři SIDI!”
1SA 17:38 Cawul issyarḍ i Dawud arruḍ nnes [n umenɣi], igga as ijj n lkask n nnḥas x uzeǧif nnes u iḥezzem as s yijj n warruḍ n wuzzař.
1SA 17:39 Icedd Dawud ssif nnes tiwa i warruḍ nnes, inwa ad yuyur [cwayt], minzi war t iqeǧeb ɛemmarṣ. [Xenni] inna Dawud i Cawul: “Necc war zemmareɣ ad uyureɣ di řeḥwayej-a, war tt qeǧbeɣ ɛemmarṣ!” Uca Dawud issars i-tent ɛawed.
1SA 17:40 Iksi aɛekkaz deg ufus nnes, ixḍar xemsa n iẓra iḥnunnyen zi teɣzart uca igga i-ten di tecyart nnes n tarewsa i ɣares tuɣa, [maca] mani ten i ɣa yaweḍ deɣya, u tuɣa iǧiy deg ufus nnes. [Ammu i] iffeɣ ɣar umsagar ak-d Ufilisṭini.
1SA 17:41 Afilisṭini yuyur, iqarreb-dd ɣar Dawud u wenni d as yarebbun taseddart tameqqrant izwar as.
1SA 17:42 [Umi] dd issgeɛɛed Ufilisṭini tamuɣři nnes, iẓra Dawud, isseḥqar i-t, maɣar Dawud tuɣa d aḥudri ɛad, netta tuɣa arrubyu d muṣbiḥ i řxezrat.
1SA 17:43 Afilisṭini inna i Dawud: “Ma necc d ijj n weqzin, aqa cek tusid-dd ɣari s ikecwaḍ?” Uca Afilisṭini tuɣa ineɛɛeř x Dawud ɣar irebbiten nnes.
1SA 17:44 Inna Ufilisṭini [ɛawed] i Dawud: “As-dd ɣari, [xenni] necc ad wceɣ aysum nnec, [maḥend ad t ṣarḍen] ijḍaḍ n ujenna d řmař n řexřa.”
1SA 17:45 [Xenni] inna Dawud i Ufilisṭini: “Cek tusid-dd ɣari s ssif d lansa d uḥric, maca necc usiɣ-dd ɣarek deg Yisem n SIDI n řɛeskarat, AREBBI n iseddiyyen n řɛeskar n Israil nni zi testᵉhezzid.”
1SA 17:46 Ass-a ad cek igg SIDI deg ufus inu. Necc ad cek ɣeřbeɣ. Ad ac kkseɣ azeǧif u deg wass-a ad wceɣ řxecbat n řɛeskar n Ifilisṭiniyyen, [maḥend ad tent ṣarḍen] ijḍaḍ n ujenna d řmař n řexřa. Marra ddunect ad tessen aqa Israil ɣares ijj n AREBBI.
1SA 17:47 Uřa d marra agraw-a [n řgens] ad issen aqa SIDI war ittfekki s ssif uřa s lansa, maɣar amenɣi n SIDI u Netta ad cek igg deg ifassen nneɣ.”
1SA 17:48 Uca imsar, umi Afilisṭini ikkar, iqarreb-dd ɣar Dawud, Dawud igga s tazřa uca yuzzeř ɣar useddi n řɛeskar [n řeɛdu] i umsagar ak-d Ufilisṭini.
1SA 17:49 Iwta Dawud ɣar tecyart nnes n tarewsa, ikkes-dd ijj n weẓru, iḥejjar [i-t] s iǧiy uca iřqef Afilisṭini di tenyart nnes. Aẓru indef i tenyart nnes ařami iwḍa netta x uɣembub nnes ɣar temmurt.
1SA 17:50 Ammu i iɣřeb Dawud x Ufilisṭini s ijj n yiǧiy d ijj n weẓru. Netta iřqef Afilisṭini, inɣa i-t. War ɣares tuɣi i Dawud qaɛ ssif deg ufus nnes.
1SA 17:51 [Xenni] yuzzeř Dawud [din] ɣar Ufilisṭini u [umi] dd-ibedd [zzates], iṭṭef ssif nnes, ijbed i-t-i-dd zeg weɣraf, inɣa i-t, uca iqess as azeǧif s ssif nnes. [Umi] ẓrin Ifilisṭiniyyen, aqa bu-teɣruḍt nsen immut, arewřen nitni.
1SA 17:52 Iryazen n Israil d Yahuda kkaren, sɣuyen ařaɣi n umenɣi uca ḍfaren Ifilisṭiniyyen ař Jat u ař tiwwura n Ɛaqrun. Inni ittwanɣen zeg Ifilisṭiniyyen wḍan deg webrid zi Caɛarayim ař Jat d Ɛaqrun.
1SA 17:53 [Awarni aya] ɛeqben-dd ayt n Israil zeg weḍfar s wecnaq n Ifilisṭiniyyen uca keccḍen řemrageḥ n řɛeskar nsen.
1SA 17:54 Iksi Dawud azeǧif n Ufilisṭini, yiwyi t ɣar Urcalim, [maca] řesnaḥ nnes igga i-ten deg uqiḍun nnes.
1SA 17:55 [Umi] iẓra Cawul aqa Dawud iggur ɣar umsagar ak-d Ufilisṭini, inna netta i Abnir, akumandar n řɛeskar: “Umi igga mmis uḥudri-ya?” Abnir yarra-dd xas: “S tidett am iddar řeɛmar nnec, [a] ajeǧid, necc war t ssineɣ.”
1SA 17:56 Ajeǧid inna: “Seqsa [xenni] umi igga mmis uḥuḍri-ya!”
1SA 17:57 [Umi] dd-iɛqeb Dawud awarni i umi tuɣa iɣřeb x Ufilisṭini, yiwyi t akides Abnir, indeh i-t ɣar Cawul. Dawud tuɣa ɣares ɛad azeǧif n Ufilisṭini deg ufus nnes.
1SA 17:58 Cawul isseqsa t: “Umi teggid mmis cek, [a] aḥudri?” Dawud yarra-dd xas: “Mmis n umsexxar nnec, [n] Yassa zi Bayt-Laḥm.”
1SA 18:1 Umi ikemmeř [Dawud] řhard ak-d Cawul, imsar, aqa řeɛmar n Yunatan iqqen ɣar Dawud, u Yunatan ittexs Dawud am řeɛmar nnes.
1SA 18:2 Cawul iksi ɣares Dawud deg wass nni u war t ijji ɛad ad iɛqeb ɣar taddart n babas.
1SA 18:3 Yunatan igga ijj n řɛahd ak-d Dawud, minzi netta ittexs i-t am yixef nnes.
1SA 18:4 Yunatan ikkes aseřham nnes i tuɣa yarḍ, iwca i-t i Dawud, uřa d arruḍ nnes, [uca] ɛawed ssif nnes d řqews nnes d webyas nnes [i řesnaḥ].
1SA 18:5 Dawud iffeɣ [ɣar umenɣi] mani ma issekk i-t Cawul. Tuɣa abrid nnes mliḥ ařami t yarra Cawul x iɛeskariyyen nnes. Tuɣa [Dawud] d lemliḥ di tiṭṭawin n marra řgens uřa di tiṭṭawin n imsexxaren n Cawul.
1SA 18:6 [Xmi] dd-usin umi yareggʷeḥ Dawud awarni i řeɣřeb x Ifilisṭiniyyen, imsar, aqa ffɣent-i-dd temɣarin zi marra tineddam n Israil i umsagar ak-d Cawul uca ɣennjent u ceḍḥent s ibendiren, s řefraḥet u s řgambriyat s třata n ifiřan.
1SA 18:7 Timɣarin arrint meẓri nsent, ɣennjent s nnubtat, nnant: “Cawul iɣřeb x řuřuf nnes, maca Dawud x ɛecra n řuřuf nnes!”
1SA 18:8 Cawul iffugem aṭṭas. Tuɣa d man aya d řɛib di tiṭṭawin nnes, inna: “Wcint i Dawud ɛecra n řuřuf, maca wcint ayi mɣir řuřuf. [Maca] teqqim as mɣir tgelda [waha]?”
1SA 18:9 Zeg wass nni sennej ibda Cawul iḥeṭṭa Dawud.
1SA 18:10 Tiwecca nnes imsar, aqa iwḍa-dd ɛawed řaryaḥ d aɛeffan n AREBBI x Cawul, u idweř ittekk x uzeǧif di taddart nnes, am tuɣa ittirar Dawud am wussan nneɣni s ufus nnes [x řgambri]. Cawul tuɣa ɣares lansa deg ufus.
1SA 18:11 Cawul inḍar lansa, inna: “Necc ad řeqfeɣ Dawud u [ad t semmareɣ] ɣar řḥiḍ.” Izemmar Dawud ad as ixnes tnayen n twařawin.
1SA 18:12 Tuɣa Cawul itteggʷed zi Dawud, minzi SIDI tuɣa-t ak-d Dawud, maca tuɣa ismeḥ di Cawul.
1SA 18:13 S uyenni issiggʷej Cawul [Dawud] x yixef nnes, igga i-t d ameqqran x wařef. Netta itteffeɣ u ittareggʷaḥ zzat i wudem n řgens.
1SA 18:14 Tuɣa Dawud ifřeḥ di marra ibriden nnes u SIDI tuɣa-t akides.
1SA 18:15 [Umi] iẓra Cawul, aqa Dawud ifřeḥ, tuɣa netta itteggʷed zzat i wudem nnes.
1SA 18:16 [Maca] marra Israil d Yahuda ttexsen Dawud, minzi netta itteffeɣ u ittareggʷaḥ zzat i wudem nsen.
1SA 18:17 Cawul inna i Dawud: “Xzar, necc ad ac wceɣ Mirab, yeǧi tameqqrant qaɛ, d tamɣart. Mɣir iři d ijj n uḍeggʷař imḥeḍ [deg umenɣi] i necc u mneɣ imenɣan n SIDI.” Inna Cawul [ak-d yixef nnes]: “Ḥima war ittiři ufus inu ḍidd nnes, maca afus n Ifilisṭiniyyen ad yiři ḍidd nnes.”
1SA 18:18 Inna Dawud i Cawul: “Min ɛniɣ necc d min teɛna tudart inu d min teɛna řaǧ n baba di Israil, aqa necc ad dewřeɣ d aḍeggʷař n ujeǧid?”
1SA 18:19 Umi dd-tiweḍ řweqt i di i ɣa temmewc Mirab, yeǧis n Cawul, d tamɣart i Dawud, imsar, aqa temmewc nettat d tamɣart i Ɛadriyil zi Maḥula.
1SA 18:20 Mixal, yeǧis n Cawul, tuɣa tᵉttexs Dawud. Xebbaren as t i Cawul u tuɣa aya d ict n tmesřact tecna di tiṭṭawin nnes.
1SA 18:21 Inna Cawul: “Necc ad as tt wceɣ, ḥima ad as idweř d řfex u ḥima ad yiři ufus n Ifilisṭiniyyen ḍidd nnes.” Inna Cawul i Dawud: “Ass-a tzemmared ad tdewřed d aḍeggʷař inu s tenni d wiss tnayen.”
1SA 18:22 Yumur Cawul i imsexxaren nnes: “Siweř ak-d Dawud di tnuffra, ini: ‘Aqa cek tusid-dd i ujeǧid x řxaḍar u marra imsexxaren ttexsen cek. [Xenni] dweř řexxu d aḍeggʷař n ujeǧid.’”
1SA 18:23 Ssiwřen imsexxaren n Cawul awařen-a deg imezzuɣen n Dawud. [Xenni] inna Dawud: “Ma d tamesřact tehwen di tiṭṭawin nwem ad idweř ijj d aḍeggʷař n ujeǧid? Ma war ǧiɣ d ijj n weryaz d amezřuḍ d amuqřiř?”
1SA 18:24 Imsexxaren n Cawul ḥajan as t, nnan: “Issiweř Dawud awařen-a.”
1SA 18:25 [Xenni] inna Cawul: “Ammu i ɣa tinim i Dawud: ‘Ajeǧid war d as teɛjib ṣṣadaq, maca [iɛjeb as] mya n řeɛdařeyyat n Ifilisṭiniyyen, ḥima ad intaqem zi řɛedyan n ujeǧid.” Tuɣa Cawul ittxarraṣ ad ineɣ Dawud s ufus n Ifilisṭiniyyen.
1SA 18:26 Ixeddamen nnes ɛawden awařen-a i Dawud. [Xenni] tuɣa aya d ict n tmesřact tecna di tiṭṭawin n Dawud, ḥima ad idweř d aḍeggʷar n ujeǧid. Řmijař n wussan [ittwaggen] tuɣa ɛad war ɛdun.
1SA 18:27 [Xenni] ikkar Dawud. Netta d yeryazen nnes ṭṭfen abrid, uca iwta netta mitayen n yeryazen n Ifilisṭiniyyen. Yiwi-dd Dawud řeɛdařeyyat nsen u s uya sedden nitni qaɛ [řqedd-a] i ujeǧid, ḥima ad idweř d aḍeggʷař n ujeǧid. [Xenni] iwca as Cawul yeǧis Mixal d tamɣart.
1SA 18:28 Cawul iẓra u issen, aqa SIDI tuɣa-t ak-d Dawud, u Mixal, yeǧis n Cawul, tuɣa tᵉttexs i-t.
1SA 18:29 Idweř Cawul iggʷed ɛad ktar zi Dawud uca Cawul idweř d řeɛdu n Dawud marra ussan [n tudart nnes].
1SA 18:30 Umi dd-ffɣen řḥukkam n Ifilisṭiniyyen, imsar, meřmi ma ffɣen tuɣa Dawud yarenni mahu di wefřaḥ nnes x marra imsexxaren n Cawul, ařami idweř isem nnes icennɛen ař ṭṭarf.
1SA 19:1 Issiweř Cawul ak-d mmis Yunatan u ak-d imsexxaren nnes belli ittxeṣṣa ad nɣen Dawud. [Maca] Yunatan, mmis n Cawul, tuɣa issɛizz xas Dawud aṭṭas.
1SA 19:2 Iḥaja Yunatan x uya i Dawud, inna: “Baba Cawul yarezzu ad cek ineɣ. Xenni řexxu, raja ař tiwecca. Adef ɣar wemcan n usneffar u xemmeř ixef nnec.
1SA 19:3 Necc ad ffɣeɣ, ad beddeɣ ak-d baba deg weḥwic mani ɣa tiřid cek. Ad xak ssiwřeɣ ak-d baba, ad xzareɣ mammec ggurent tmesřayin. [Xenni] ad cek ssargbeɣ.”
1SA 19:4 Yunatan issiweř s tizi n Dawud ak-d babas, inna as: “Ittxeṣṣa ujeǧid war ittegg ca ddenb deg umsexxar nnes Dawud, maɣar uřa d netta war dayek iggi ca ddenb, u timegga nnes aqa atent d řefḍeř i cek aṭṭas.
1SA 19:5 Netta isebbeř tudart nnes, iɣřeb x Ufilisṭini u SIDI yiwiḍ ijj n usenjem d ameqqran i marra Israil. Cek teẓrid t simant nnec u tfarḥed. Mayemmi texsed ad texḍid x idammen imezdagen ařami ɣa tenɣed Dawud břa ssibbet?”
1SA 19:6 Cawul isřa ɣar Yunatan u Cawul ijjuǧ: “S tidett am iddar SIDI, netta war ittwaneqq ca!”
1SA 19:7 Uca iřaɣa Yunatan x Dawud, iḥaja as Yunatan marra awařen-a. [Xenni] indeh Yunatan Dawud ɣar Cawul u netta tuɣa-t zzat i wudem nnes am iḍennaḍ d fariḍennaḍ.
1SA 19:8 Yiweḍ-dd umenɣi ɛawed uca iffeɣ Dawud, immneɣ ak-d Ifilisṭiniyyen. Netta ihettek i-ten s ict n tecti d tameqqrant u nitni ṭṭfen tarewřa zzat i wudem nnes.
1SA 19:9 Maca řaryaḥ d aɛeffan n SIDI iwḍa-dd [ɛawed] x Cawul. Umi netta iqqim di taddart nnes, imneɛ lansa deg ufus nnes umi tuɣa Dawud ittirar s ufus nnes [x řgambri].
1SA 19:10 Cawul tuɣa yarezzu ad isemmar Dawud di řḥiḍ s lansa nnes, maca netta ixnes as i Cawul u netta iřqef řḥiḍ s lansa. Dawud yarweř, issenjem ixef nnes ǧiřet nni.
1SA 19:11 Issekk Cawul ireqqasen ɣar taddart n Dawud, ḥima ad t ḥḍan u ad t nɣen ɣar tuffut. [Maca] Mixal, tamɣart n Dawud, tḥaja [xas] i Dawud, tenna: “Mařa cek war tessnejmed ixef nnec di ǧiřet-a, ad tᵉttwanɣed tiwecca.”
1SA 19:12 Mixal tessehwa Dawud zi řkazi. [Xenni] yuyur, yarweř uca issenjem ixef nnes.
1SA 19:13 [Xenni] teksi Mixal ijj n řexyař n ṣṣanam, tessars [i-t] di qama uca tegga ict n thiḍurt n cɛar n iɣayḍ ɣar mani iǧa uzeǧif u tedřa [i-t] s yijj n warruḍ.
1SA 19:14 Cawul issekk ireqqasen maḥend ad dd-awyen Dawud, [maca] nettat tenna: “Netta ihřec.”
1SA 19:15 [Xenni] issekk Cawul ireqqasen maḥend ad ssijjen x Dawud, inna: “Awyem t-i-dd di tassut ɣari da, ḥima ad t nɣeɣ.”
1SA 19:16 Umi dd-usin ireqqasen, xzar, aqa din ijj n řexyař n ṣṣanam di qama d ict n thiḍurt n cɛar n iɣayḍ ɣar mani iǧa uzeǧif nnes.
1SA 19:17 Uca inna Cawul i Mixal: “Mayemmi d ayi teɣdared ammu, tejjid řeɛdu inu ad yarweř, ařami issenjem ixef nnes?” Mixal tarra-dd x Cawul: “Netta inna ayi: ‘Ejj ayi ad uyureɣ, mayemmi i cem i ɣa nɣeɣ?’”
1SA 19:18 Ammu yarweř Dawud, issenjem ixef nnes uca yusa-dd ɣar Camwil di Rama, iḥaja as marra min tuɣa i d as igga Cawul. Xenni yuyur netta [jmiɛ] ak-d Camwil, qqimen di Nayut.
1SA 19:19 Uca ḥajan aya i Cawul, nnan: “Dawud aqa-t di Nayut ɣar Rama.”
1SA 19:20 [Xenni] issekk Cawul ireqqasen, ḥima ad awyen Dawud. Nitni ẓrin tarbiɛt n inabiyyen nni ittnebban. Tuɣa Camwil ibedd ɣarsen d ameḥḍay, uca ihwa-dd Arruḥ n AREBBI x ireqqasen n Cawul ařami uřa d nitni bdan ad nebban.
1SA 19:21 [Umi] ittwanna [aya] i Cawul, issekk netta ireqqasen nneɣni, maca uřa d nitni bdan ad nebban. Yarni Cawul deg usekki n ireqqasen i twařa wiss třata, uca uřa d nitni bdan ad nebban.
1SA 19:22 [Xas uca] yuyur netta simant nnes ɣar Rama. Yiweḍ netta ɣar wanu ameqqran di Sixu, isseqsa, inna: “Mani [ǧan] Camwil d Dawud?” Nnan as: “Xzar, [aqa aten] di Nayut ɣar Rama.”
1SA 19:23 [Xenni] yuyur din ɣar Nayut ɣar Rama, u ihwa-dd xas Arruḥ n AREBBI. Netta tuɣa iggur am ittnebba ař dd-yiweḍ ɣar Nayut ɣar Rama.
1SA 19:24 Uřa d netta ikkes arruḍ nnes uca uřa d netta ittnebba zzat i wudem n Camwil. Ass nni d ǧiřet tmun izzeř din d aqeddid. X uya qqaren: “Ma uřa d Cawul jar inabiyyen?”
1SA 20:1 Dawud yarweř zi Nayut tenni ɣar Rama uca yusa-dd ɣar Yunatan, inna: “Min ggiɣ necc? Man ljarima inu d ddenb i d as ggiɣ i babac, aqa netta ixs ad zzayi ikkes tudart?”
1SA 20:2 Inna as Yunatan: “War xas nessiweř! Cek war tᵉttmettid ca. Xzar baba war ittegg walu, uřa d ict n řḥajjet d tameqqrant niɣ tameẓyant, břa ma i d ayi tt ɣa issargeb. Mayemmi baba zzayi i ɣa issnuffar tamesřact-a? Aya war izemmar.”
1SA 20:3 [Xenni] ijjuǧ as Dawud twařa nneɣnit, inna: “Babac issen nican, aqa ufiɣ řxaḍar di tiṭṭawin nnec. [X uya] inna: ‘War ttejji ad issen Yunatan man aya, ḥima war ikessi s wemnus!’ [X uya], s tidett am iddar SIDI u am ddareɣ necc, aqa din jar ayi d řmewt mɣir ijj n uṣurif waha!”
1SA 20:4 Yunatan inna i Dawud: “Min [iǧan] deg wuř nnec, necc ad ac t ggeɣ.”
1SA 20:5 Dawud yarra-dd x Yunatan: “Xzar, tiwecca ad ibedd uyur uca ittxeṣṣa ayi ad qqimeɣ [ɣar ṭṭabřa] ak-d ujeǧid ad cceɣ. Ewc ayi ttesřiḥ ḥima ad uyureɣ maḥend ad nuffareɣ deg iyyar ař tameddit wiss třata.
1SA 20:6 Mařa yarzu xafi babac, ifqed ayi, xenni ini: ‘Dawud iḥeccem ayi s waṭṭas ḥima izemmar ad iraḥ ɣar tendint nnes deɣya, ɣar Bayt-Laḥm, minzi dinni i ɣa tiři tɣarṣt n useggʷas i marra řaǧ.’
1SA 20:7 Mařa netta xenni inna: ‘Mliḥ!’, ad yiři řehna i umsexxar nnec, maca mařa yarɣa ufugem nnes, xenni ad tessned, aqa netta igga di řbař nnes ad [d ayi] igg řɣar.
1SA 20:8 Egg s tmexsiwt icewwaren ak-d umsexxar nnec, minzi tessidfed amsexxar nnec akidek deg ijj n řɛahd n SIDI. [Maca] mařa ggiɣ ict n ljarima, neɣ ayi cek. Mayemmi texsed ad ayi tawyed ɣar babac?”
1SA 20:9 Inna Yunatan: “Aqa man aya iggʷej xak! Minzi waxxa aregbeɣ xas, aqa baba igga di řbař nnes ad dayek igg řɣar, ma xenni necc war d ac t qqareɣ?”
1SA 20:10 Inna Dawud i Yunatan: “Man wen i d ayi dd ɣa yawyen areqqas, mařa iwca ac babac ict n temwarrit teqseḥ?”
1SA 20:11 [Xenni] inna Yunatan i Dawud: “As-dd, ejj aneɣ ad neffeɣ barra ɣar yeyyar.” Uca ffɣen nitni s tnayen idsen, ɣar yeyyar barra.
1SA 20:12 Inna Yunatan i Dawud: “[Jjuǧeɣ ɣar] SIDI, AREBBI n Israil, mařa necc tiwecca niɣ farwicca ɣar řweqt-a, aqa wtiɣ řeḥsab ammu d wammu [zi jjihet] n baba, ufiɣ aqa mliḥ i Dawud uca xenni necc war ssekkiɣ [ḥed] ad ac [t] yini,
1SA 20:13 xenni ad igg SIDI ta d ta s Yunatan u ad dayes yarni ɛad. [Maca] mařa ittɣiř as mliḥ i baba ad dayek igg řɣar, xenni necc ad ac t iniɣ, ad cek jjeɣ ad teffɣed ḥima [tzemmared] ad tuyured di řehna. SIDI ad yiři akidek am mammec i tuɣa ak-d baba.
1SA 20:14 [Uca xak,] war ittiři [waha] am ddareɣ, war ittiři [xenni waha] ad ayi tessecned tamexsiwt icewwaren n SIDI ḥima war ttmettiɣ ca,
1SA 20:15 [maca ɛad] war tqeṭṭɛed tamexsiwt nnec icewwaren i řebda x taddart inu, uřa xmi ɣa iqḍeɛ SIDI marra řɛedyan n Dawud zeg wudem n temmurt!”
1SA 20:16 Uca igga Yunatan ijj n řɛahd ak-d taddart n Dawud uca SIDI ittar i-t zeg ufus n řɛedyan n Dawud.
1SA 20:17 Yunatan ijja Dawud ad ijjaǧ twařa nneɣnit, minzi netta tuɣa ittexs i-t, aqa ittexs i-t am mammec tuɣa ittexs ixef nnes.
1SA 20:18 [Xas uca] inna as Yunatan: “Tiwecca d ayur amaynu u nitni war cek ttifen, maɣar řkursi nnec ad iqqim ixwa.
1SA 20:19 Awarni ɛdun třata n wussan ittxeṣṣa ad tehwid qaɛ, ad truḥed ɣar wemcan mani tuɣa tennuffared deg wass nni di yarzu netta ad cek ineɣ, u qqim ɣar uɣezdis n weẓru n Ha’izil.
1SA 20:20 Necc ad wteɣ třata n fřitcat zzates axmi xseɣ ad řeqfeɣ tandayt.
1SA 20:21 Xzar, necc ad ssekkeɣ aḥudri [awarni asent], ad as iniɣ: ‘Uyur, arzu x fřitcat!’ Mařa necc ad iniɣ nican i uḥudri: ‘Ḥḍa, fřitcat aqa [udsent] ɣar uɣezdis-a zi ɣarek!’, [xenni] awyi tent-i-dd, as-dd, maɣar aqa din řehna i cek u war din walu, [s tidett am] iddar SIDI!
1SA 20:22 [Maca] mařa necc nniɣ i uḥudri: ‘Xẓar, fřitcat aqa aggʷejent xak [ɛad] ktar!’, xenni aggʷej, maɣar SIDI issekka cek ɣar řaggʷaj.
1SA 20:23 Uca [x] wawař i nekkes, necc d cek, aqa SIDI ad yiři [d acehhad] jar ayi d cek i řebda!”
1SA 20:24 Issnuffar Dawud ixef nnes barra deg iyyar. Řami dd-yusa uyur amaynu iqqim ujeǧid [ɣar ṭṭabřa] ḥima ad icc.
1SA 20:25 Tuɣa ajeǧid iqqim ɣar umensi-ya deg wemcan nnes am mammec [tuɣa iqqim] ɣar imensiyyen inneɣni, di řkursi [i iǧan] ɣar řḥiḍ. Yunatan ikkar u Abnir iqqim ɣar uɣezdis n Cawul u řkursi n Dawud iban-dd ixwa.
1SA 20:26 Deg wass nni Cawul war ini walu, maɣar netta inna [deg ixef nnes]: “Imsar as ca ařami netta war iǧi d amezdag. Aqa nican netta war iǧi d amezdag.”
1SA 20:27 Tiwecca nnes, deg wass wiss tnayen awarni i uyur amaynu, umi iqqim řkursi n Dawud ixwa [ɛawed], imsar, aqa inna Cawul i mmis Yunatan: “Mayemmi mmis n Yassa war dd-yusi iḍennaḍ d wass-a ɣar umensi?”
1SA 20:28 Yunatan yarra-dd x Cawul: “Dawud iḥeccem ayi aṭṭas [maḥend izemmar ad iraḥ] ɣar Bayt-Laḥm.
1SA 20:29 Netta inna: ‘Ejj ayi ad uyureɣ, maɣar neccin ad negg ict n tɣarṣt n řaǧ nneɣ di tendint. Uma igga xafi [ad ḥḍareɣ]. Mařa [xenni] ufiɣ řexxu arḍa di tiṭṭawin nnec, ttzawageɣ, ejj ayi ad uyureɣ ḥima ad ẓareɣ aytma.’ X uya war dd-yusi Dawud ɣar ṭṭabřa n ujeǧid.”
1SA 20:30 [Xenni] yareɣ uxeyyeq n Cawul x Yunatan, inna as: “Cek, mmis n [temɣart] iɣennan ifarɣen, necc ssneɣ mliḥ, aqa cek tixḍared aɣezdis n mmis n Yassa. D man aya d řefḍiḥet i cek d řefḍiḥet i tuɛɛaryent n yemmac!
1SA 20:31 Minzi marra ussan min ɣa yekk mmis n Yassa iddar x temmurt, war tbeddid cek uřa d tageldit nnec. Xenni řexxu, sekk [ijjen], awyi t-i-dd ɣari, maɣar netta d mmis n řmewt.”
1SA 20:32 Yarra-dd Yunatan x babas Cawul, inna as: “Mayemmi ittxeṣṣa ad ittwaneɣ netta? Min igga?”
1SA 20:33 [Xenni] iḥejjar i-t Cawul s lansa nnes, ḥima ad t iřqef. Ammu i issen Yunatan, aqa babas tuɣa igga di řbař nnes ad ineɣ Dawud.
1SA 20:34 Ikkar Yunatan x ṭṭabřa umi yarɣa uxeyyeq [nnes], war icci aɣrum deg wass wiss tnayen n uyur amaynu, maɣar netta tuɣa ikessi s wemnus i Dawud, minzi babas tuɣa issbehdeř i-t ammu.
1SA 20:35 Tiwecca nnes ɣar tuffut, imsar aqa Yunatan yuyur barra deg iyyar, di řweqt i igga amsagar ak-d Dawud u tuɣa akides ijj n uḥudri d ameẓyan.
1SA 20:36 Netta inna i uḥudri: “Uyur, arzu x fřitcat nni ɣa wteɣ.” Aḥudri yuzzeř u netta iwta ict n fřitca tekka sennej nnes.
1SA 20:37 [Umi] dd-yiweḍ uḥudri ɣar wemcan mani teǧa fřitca, iřaɣa-dd Yunatan awarni i uḥudri, inna: “Ma war tewḍi fřitca zzayek aɣirin ɛad?”
1SA 20:38 Iřaɣa Yunatan [ɛawed] i uḥudri “Deɣya, azzeř, war ttbeddi!” Aḥudri [i iǧan] ak-d Yunatan issmun fřitca uca iɛqeb ɣar bab nnes.
1SA 20:39 Aḥudri war issin walu. Mɣir Yunatan d Dawud ssnen x tmesřact [jar asen].
1SA 20:40 [Xenni] iwca Yunatan řeqcuɛ [n řesnaḥ nnes] i uḥudri i tuɣa ɣares iǧan, inna as: “Uyur, arr i-ten ɣar tendint!”
1SA 20:41 [Umi] yuyur uḥudri, ikkar Dawud zeg uɣezdis n ljanub, iwḍa s uɣembub nnes ɣar temmurt uca yuḍar třata n twařawin. Nitni ssudmen ayawya, run s tnayen idsen ařami Dawud yarni dayes.
1SA 20:42 U Yunatan inna i Dawud: “Uyur di řehna. Aqa nejjuǧ s tnayen idneɣ s Yisem n SIDI, nenna: ‘Ad yiři SIDI d acehhad jar ayi d cek, jar zzariɛet inu d zzariɛet nnec i řebda!’”
1SA 21:1 Xenni ikkar [Dawud], yuyur, uca yudef Yunatan ɣar tendint.
1SA 21:2 [Xenni] yiweḍ Dawud ɣar Nub ɣar ukehhan Aximalik. Aximalik iffeɣ-dd ɣar Dawud yarjef, inna as: “Mayemmi cek weḥḥdek, war kidek uřa d ijj?”
1SA 21:3 Dawud inna i ukehhan Aximalik: “Ajeǧid iwca ayi ijj n wareqqas, inna ayi: ‘Uřa d ijj war ittriggib x tmesřact i d ac dd-ssekkeɣ u xak ggiɣ!’ Sargbeɣ i imsexxaren aqa [ad ruḥen] ɣar wemcan-a d wemcan-in.
1SA 21:4 Xenni řexxu, min ɣarek? Ewc ayi xemsa n tecnifin deg ufus niɣ min ma tzemmared ad tafed.”
1SA 21:5 Akehhan yarra-dd x Dawud, inna: “War din aɣrum i macca ɣar ufus, mɣir aɣrum amqeddes waha i da. Meɛlik imsexxaren tuɣa ttaggʷejen waha x temɣarin!”
1SA 21:6 Dawud yarra-dd x ukehhan, inna as: “S tidett, timɣarin ttwaḥeyydent xaneɣ am mammec teǧa lqaɛida zeg wami ffɣeɣ, u řeqcuɛ n imsexxaren ttwaqeddsen. Waxxa amenni manawya d ijj n wuffuɣ am řebda, aqa uffuɣ-a ittwaqeddes ass-a s řeqcuɛ.”
1SA 21:7 [Xenni] iwca as ukehhan [aɣrum] iqeddsen, maɣar war tuɣi dinni aɣrum mɣir aɣrum n wescan nni ittwakkes zi zzat i wudem n SIDI, ḥima ad ssarsen deg wemcan nnes aɣrum iḥma deg wass nni ittwakkes.
1SA 21:8 Deg wass nni tuɣa dinni ijj zeg imsexxaren n Cawul. Netta tuɣa ittwaḥṣar dinni zzat i wudem n SIDI. Qqaren as Duwaɛ, zi Idum. Netta tuɣa ɣares ṣṣulṭa aṭṭas jar imeksawen inni [iǧan] ɣar Cawul.
1SA 21:9 Uca inna Dawud i Aximalik: “Ma war da ɣarek ict n lansa niɣ ijj n ssif ɣar ufus? Maɣar war kidi ksiɣ ssif d řesnaḥ inu deg ufus inu, minzi tamesřact n ujeǧid tuɣa tᵉttqeǧiq.”
1SA 21:10 Inna ukehhan: “Ssif n Julyat, Afilisṭini wenni x tɣeřbed di Řewḍa n Teɣzurt n Ila, aqa-t [da], ittwanneḍ deg ijj n warruḍ awarni i upalṭu n ikehhanen. Mařa texsed ad t teksid, ksi t, minzi war da walu mɣir wanita.” Inna Dawud: “War iǧi ijj am netta! Ewc ayi t!”
1SA 21:11 Ikkar Dawud, yarweř deg wass nni zzat i wudem n Cawul uca netta yusa-dd ɣar Axic, ajeǧid n Jat.
1SA 21:12 Imsexxaren n Axic nnan as: “Ma wanita war iǧi d Dawud, ajeǧid n temmurt? Ma war iǧi d wenni zi ɣennjent, ceḍḥent temɣarin s nnubtat, qqarent: ‘Cawul iɣřeb x řuřuf nnes, maca Dawud x ɛecra n řuřuf nnes?’”
1SA 21:13 Dawud yarra awařen-a ɣar wuř nnes u tuɣa itteggʷed aṭṭas zzat i wudem n Axic, ajeǧid n Jat.
1SA 21:14 [Xenni] igga ixef nnes axmi iweddar řeɛqeř nnes zzat i tiṭṭawin nsen, igga axmi ijjen dayes aṭemmes umi xas ssarsen ifassen, uca ibda ixebbec di tewwura n tewwart [n tendint], ijja ikuffan nnes hekkwan-dd x tmart nnes.
1SA 21:15 [Xenni] inna Axic i imsexxaren nnes: “Xzarem, kenniw tᵉttwařam aqa aryaz ibbuhři. Mayemmi i-t-i-dd-tiwyem ɣari?”
1SA 21:16 Ma ttxeṣṣan ayi ibuhařiyyen, aqa tiwyem-dd ɣari wanita maḥend ad ɣari igg tubbuheřya? Ma d wanita i dd ɣa yadfen ɣar taddart inu?”
1SA 22:1 [Xenni] yuyur Dawud ssenni, issenjem ixef nnes ɣar ifri n Adullam. Aytmas d marra taddart n babas sřan aya uca hwan ɣares dinni.
1SA 22:2 Uca [kuř] aryaz nni tuɣa di ca n řeḥṣaret u [kuř] aryaz i di tuɣa iǧa umarwas u [kuř] aryaz s řbař d amerzag, aqa [marra] nitni ffɣen ɣares uca netta idweř d amgewwed nsen. Tuɣa ɣares řqedd n arebɛa-mya n yeryazen.
1SA 22:3 Ssenni iffeɣ Dawud ɣar Miṣfat di Mu’ab. Inna netta i ujeǧid n Mu’ab: “Ejj baba d yemma ad ɣarwem dd-asen, ař ɣa ssneɣ min kidi i ɣa yegg SIDI.”
1SA 22:4 Netta yiwyi ten zzat i wudem n ujeǧid n Mu’ab uca nitni qqimen ɣares marra ussan i di ikka Dawud di lburj [deg idurar].
1SA 22:5 [Maca] anabi Jat inna i Dawud: “War ttɣimi di lburj [deg idurar], maca aggʷej, ad tadfed ɣar temmurt n Yahuda!” [Xenni] yuyur Dawud, yiweḍ ɣar wezɣar n Ḥarit.
1SA 22:6 Cawul isřa belli Dawud d iryazen, inni tuɣa ɣares [iǧan], ttwafen. Tuɣa Cawul iqqim di Jibɛa sadu ict n tcejjart n tmarist ɣar Rama. Tuɣa ɣares ict n lansa deg ufus nnes u marra imsexxaren nnes bedden ɣares.
1SA 22:7 Inna Cawul i imsexxaren nnes i ɣares ibedden: “Ttzawgeɣ, sřem, kenniw ayt n Binyamin! Ma ad iwc mmis n Yassa iyyaren d imarjaɛen n uḍiř i kenniw marra? Ma ad yarr kenniw marra d imeqqranen x wařef d imeqqranen x mya?
1SA 22:8 Aqa kenniw marra teggim xafi tameɛmuč uca uřa d ijjen war d ayi issargeb belli mmi igga ijj n řɛahd ak-d mmis n Yassa uca uřa d ijj zzaywem war d as cqiɣ, war d ayi tessargbem aqa mmi issamar amsexxar inu xafi maḥend ad xafi izeyyar s tḥraymect am mammec [iǧa] ass-a.”
1SA 22:9 [Xenni] yarra-dd Duwaɛ, wenni iǧan zi Idum, wenni d ameḥḍay x imsexxaren n Cawul, inna: “Necc ẓriɣ mmis n Yassa řami dd-yusa di Nub ɣar Aximalik, mmis n Axiṭub.
1SA 22:10 Netta ittar SIDI di ṭṭweɛ nnes, iwca as macca uřa d ssif n Julyat, Afilisṭini.”
1SA 22:11 [Xas uca] issekk ujeǧid [ijj] maḥend ad dd-iřaɣa x ukehhan Aximalik, mmis n Axiṭub, [jmiɛ] ak-d marra taddart n babas, ikehhanen, inni [iǧan] di Nub. Uca marra usin-dd ɣar ujeǧid.
1SA 22:12 Inna Cawul: “Seř, cek, mmis n Axiṭub!” Netta yarra-dd: “Xzar, aqa ayi da, a sidi inu!”
1SA 22:13 Cawul inna as: “Mayemmi xafi teggim tameɛmuč, cek d mmis n Yassa, aqa cek tewcid as macca d ssif u tᵉttared AREBBI di ṭṭweɛ nnes ḥima ad xafi iɣewweɣ u ad xafi izeyyar, am mammec [iǧa] ass-a.”
1SA 22:14 Yarra-dd Aximalik x ujeǧid, inna: “Man wen zi marra imsexxaren nnec d amtiqqi am Dawud, aḍeggʷař n ujeǧid, u [man wen] i ɣa yawḍen [amenni] ɣar imtiqqan nnec u wi ɣar iǧa ccan [ammu] di taddart nnec?
1SA 22:15 Ma ass-a waha i kkareɣ ad ttareɣ SIDI di ṭṭweɛ nnes? Aqa man aya iggʷej xafi. Ejj ajeǧid war ineṭṭar řbaṭeř x umsexxar nnes niɣ x marra taddart n baba di ssibbet n ca n řḥajjet, minzi amsexxar nnec war issin walu x marra aya, ma [d tamesřact] d tameẓyant niɣ d tameqqrant [i teǧa].”
1SA 22:16 [Maca] ajeǧid inna: “Cek s tidett ad temmted, [a] Aximalik, cek d marra taddart n babac.”
1SA 22:17 Ajeǧid inna i iřeqqasen n tazřa nni ɣares-dd ibedden: “Nqeřbem u nɣem ikehhanen n SIDI, maɣar uřa d nitni wcin afus i Dawud, minzi nitni ssnen aqa netta tuɣa ittrakkwař u nitni war d ayi xas ssargben ca.” [Maca] imsexxaren n ujeǧid war xsen ad sswiẓẓḍen afus nsen, ḥima ad zzayes wten ikehhanen n SIDI.
1SA 22:18 [Xenni] inna ujeǧid i Duwaɛ: “Neqřeb, wwet ikehhanen!” [Xenni] inneqřeb Duwaɛ, wenni iǧan zi Idum, iwta ikehhanen. Deg wass nni inɣa netta xemsa u-tmanyin n yeryazen nni yarḍen apalṭu [n ukehhan].
1SA 22:19 Netta iwta uřa d Nub, tandint n ikehhanen, s řeqḍeɛ n ssif, iryazen d temɣarin, iḥenjiren d iseyman. Iwta ɛawed ifunasen d yeɣyař d wuǧi s řeqḍeɛ n ssif.
1SA 22:20 Ijj zeg warraw n Aximalik, mmis n Axiṭub, issenjem ixef nnes. [Tuɣa] isem nnes Abyatar u netta iqeǧeq [ixef nnes] awarni i Dawud.
1SA 22:21 Abyatar iḥaja i Dawud, aqa Cawul tuɣa inɣa ikehhanen n SIDI.
1SA 22:22 [Xenni] inna Dawud i Abyatar: “Deg wass nni, umi tuɣa Duwaɛ zi Idum dinni, ssneɣ aqa netta ad iḥaja aya i Cawul. Necc d wenni x [iǧan] marra řeɛmur n taddart n babac.
1SA 22:23 Qim ɣari, war tteggʷed ca, maɣar wenni yarezzun [ad ineɣ] řeɛmar inu, yarezzu [ad ineɣ] uřa d řeɛmar nnec. Aqa cek [ɛawed] ɣari di řaman.”
1SA 23:1 Ḥajan i Dawud, nnan: “Aqa Ifilisṭiniyyen ttmenɣan ak-d Qaɛila uca ttkeccaḍen inedrar.”
1SA 23:2 Isseqsa Dawud SIDI, inna: “Ma ad ffɣeɣ din, ad wteɣ Ifilisṭiniyyen?” SIDI yarra-dd x Dawud: “Ffeɣ, wwet Ifilisṭiniyyen uca fekk Qaɛila!”
1SA 23:3 Nnan as yeryazen n Dawud: “Xzar, neccin nᵉtteggʷed [deɣya] da di Yahuda, mammec ɛad mařa neccin neffeɣ ɣar Qaɛila ɣar iseddiyyen n řɛeskar n Ifilisṭiniyyen.”
1SA 23:4 Uca Dawud isseqsa SIDI twařa nneɣnit u SIDI yarra-dd xas, inna: “Kkar, hwa ɣar Qaɛila, minzi Necc ad ac wceɣ Ifilisṭiniyyen deg ifassen [nnec].”
1SA 23:5 [Xas uca] iffeɣ Dawud ak-d yeryazen nnes ɣar Qaɛila, immneɣ ak-d Ifilisṭiniyyen. Netta yuẓẓeř x tḥimarin nsen uca iwta ten s ict n tecti d tameqqrant. [Ammu i] ifekk Dawud imezdaɣ n Qaɛila.
1SA 23:6 Umi Abyatar, mmis n Aximalik, yarweř ɣar Dawud ɣar Qaɛila, imsar, netta aqa ihwa ak-d upalṭu [n ukehhan] deg ifassen nnes.
1SA 23:7 Ḥajan as i Cawul, aqa Dawud yiweḍ ɣar Qaɛila. [Xenni] inna Cawul: “AREBBI igga ayi i-t deg ufus inu, minzi netta ittwaḥebbes ařami yudef ɣar ict n tendint s tewwura d iɛumad i ubelleɛ.”
1SA 23:8 Ijja Cawul ad řaɣan x marra řgens ɣar umenɣi, ḥima ad hwan ɣar Qaɛila maḥend ad nnḍen i Dawud d yeryazen nnes.
1SA 23:9 [Řami] yargeb Dawud belli Cawul issewjed as tuɛeffna-ya s tnuffra, inna netta i ukehhan Abyatar: “Awi-dd apalṭu [n ukehhan] da!”
1SA 23:10 Inna Dawud: “[A] SIDI, AREBBI n Israil, amsexxar nnec isřa nican, aqa Cawul iɛemmed ad dd-yas ɣar Qaɛila, ḥima ad ixarreb tandint di ssibbet inu.
1SA 23:11 Ma ad ayi sseɛdun imezdaɣ n Qaɛila deg ufus nnes? Ma ad ihwa Cawul am mammec isřa umsexxar nnec? [A] SIDI, AREBBI n Israil, ini t i umsexxar nnec!” SIDI yarra-dd: “Netta ad ihwa.”
1SA 23:12 [Xas uca] inna Dawud: “Ma imezdaɣ n Qaɛila ad sseɛdun necc d yeryazen inu i Cawul?” Inna SIDI “Nitni ad [cek] sseɛdun.”
1SA 23:13 [Xas uca] ikkar Dawud ak-d yeryazen nnes, amenni setta mya n yeryazen, uca ffɣen nitni zi Qaɛila, dewřen gguren mani ma zemmaren ad uyuren. [Umi] ittwanna i Cawul, aqa injem-dd Dawud zi Qaɛila, ijja [zeg webrid nnes], war iffiɣ ca.
1SA 23:14 Dawud iqqim di řexřa di lqelɛat n idurar uca iqqim x idurar di řexřa n Zif. Cawul yarzu xas marra ussan, [maca] AREBBI war t iggi deg ufus nnes.
1SA 23:15 [Umi] iẓra Dawud, aqa Cawul tuɣa iffeɣ ḥima ad xas yarzu, [tuɣa] Dawud di řexřa n Zif di Xurisa.
1SA 23:16 [Xenni] ikkar Yunatan, mmis n Cawul, uca yuyur ɣar Dawud di Xurisa, issejhed afus nnes di AREBBI.
1SA 23:17 Netta inna as: “War tteggʷed ca, minzi afus n baba Cawul war cek dd-ittikkʷiḍ u cek ad tdewřed d ajeǧid x Israil u necc ad dewřeɣ d wiss tnayen ɣarek. Uřa d baba Cawul issen aya.”
1SA 23:18 U nitni s tnayen idsen ggin ijj n řɛahd zzat i wudem n SIDI. Dawud iqqim di Xurisa u Yunatan yareggʷeḥ ɣar taddart nnes.
1SA 23:19 [Xas] uca geɛɛden yeryazen zi Zif ɣar Cawul di Jibɛa, nnan: “Ma war innuffar Dawud ɣarneɣ di lqelɛat [deg idurar] di Xurisa, x tewrirt n Ḥaxila, ɣar ljanub n tnezruft?
1SA 23:20 [Xenni] řexxu, [a] ajeǧid, hwa-dd ɛlaḥsab marra meẓri n wuř nnec. Ad tiři [xenni] tmesřact nneɣ, ḥima ad t nesseɛdu ɣar ufus n ujeǧid.”
1SA 23:21 Cawul inna: “Ad tᵉttwabarkem zi SIDI, minzi cqiɣ awem [ammu].
1SA 23:22 Uyurem, wejdem ɛad ktar u ḥḍam u snem u xzarem amcan mani iǧa uḍar nnes u man wen i t dinni iẓrin, maɣar qqaren ayi, aqa netta d aḥraymi aṭṭas.
1SA 23:23 Ḥḍam u ssnem marra imucan n tnuffra mani issnuffar ixef nnes u ɛeqbem mařa tkemmřem. [Xenni] ad kidwem uyureɣ u mařa netta di temmurt, necc ad xas arzuɣ jar marra řuřuf n Yahuda.”
1SA 23:24 Kkaren nitni, izzaren zzat i wudem n Cawul ɣar Zif. Dawud d yeryazen nnes tuɣa aten di řexřa n Maɛun, di Řewḍa ɣar ljanub n tnezruft.
1SA 23:25 Cawul d yeryazen nnes ffɣen ḥima ad xas arzun. Nnan aya i Dawud u netta ihwa-dd zi řejruf di řexřa n Maɛun. [Umi] t isřa Cawul, [řexdenni] iḍfar netta Dawud di řexřa n Maɛun.
1SA 23:26 Cawul ikka x ijj n uɣezdis n wedrar u Dawud d yeryazen nnes kken x uɣezdis nneɣni n wedrar. Řami iqeǧeq Dawud maḥend ad yaggʷej x wudem n Cawul, imsar, aqa Cawul d yeryazen nnes nnḍen-dd i Dawud d yeryazen nnes ḥima ad ten ṭṭfen.
1SA 23:27 [Maca] yusa-dd ijj n ureqqas ɣar Cawul inna: “Deɣya, as-dd, minzi Ifilisṭiniyyen hejmen x temmurt!”
1SA 23:28 [Xenni] iɛqeb-dd Cawul zeg weḍfar n Dawud uca iffeɣ ɣar umsagar ak-d Ifilisṭiniyyen. X uya qqaren as i wemcan nni Salaɛ-ha-Maxlikut.
1SA 24:1 Yuyur Dawud ssenni uca iqqim di lqelɛat [deg idurar] n Ɛayn-Jadi.
1SA 24:2 Uca imsar, umi dd-iɛqeb Cawul zeg weḍfar n Ifilisṭiniyyen, ɛawden as, nnan: “Dawud aqa-t di řexřa n Ɛayn-Jadi.”
1SA 24:3 [Xenni] iksi Cawul teřt-ařaf n yeryazen ittwafarzen zi marra Israil, iffeɣ ḥima ad yarzu x Dawud d yeryazen nnes arendad n tṣuḍar n Iɣayḍen n Řejruf.
1SA 24:4 Netta yusa-dd ɣar řkuriyyat n wuǧi i [iǧan] ɣar webrid mani tuɣa iǧa ijj n yefri. Cawul yudef ɣares, ḥima ad ideř iḍaren nnes. Tuɣa Dawud d yeryazen nnes qqimen ɣar ḍeffar deg ifri.
1SA 24:5 [Xenni] nnan as yeryazen n Dawud: “Xzar, wa d ass i x d ac inna SIDI: ‘Xzar, Necc ad ac ggeɣ řeɛdu nnec deg ufus nnec u cek tzemmared akides tegged min tᵉttwařid nican di tiṭṭawin nnec.” Uca ikkar Dawud, iqess s tnuffra ijj n ṭṭarf zeg useřham n Cawul.
1SA 24:6 Awarni as [maca] issdewdiw uř n Dawud dayes, minzi netta tuɣa icarreg ijj n ṭṭarf [zeg useřham] n Cawul.
1SA 24:7 Netta inna i yeryazen nnes: “SIDI ad ayi iḥḍa aqa necc ad ggeɣ aya i sidi inu, i umedhun n SIDI, aqa ad sswiẓẓḍeɣ afus inu ḍidd nnes, maɣar netta d amedhun n SIDI!”
1SA 24:8 Issiweř Dawud ak-d yeryazen nnes s wawařen iqesḥen u war ten ijji ad hejmen x Cawul. U Cawul ikkar, iffeɣ-dd zeg ifri, iṭṭef abrid.
1SA 24:9 [Xas uca] ikkar uřa d Dawud, iffeɣ-dd zeg ifri, iřaɣa-dd x Cawul, inna: “Sidi inu, ajeǧid!” U Cawul ixzar ɣar ḍeffar uca yuḍar Dawud s uɣembub [nnes] ɣar temmurt, ibendeq.
1SA 24:10 Inna Dawud i Cawul: “Mayemmi tesřid ɣar wawařen n iwdan, inni iqqaren: ‘Xẓar, Dawud ixs ad ac igg řɣar?’
1SA 24:11 Xzar ass-a teẓrid s tiṭṭawin nnec, aqa SIDI igga cek ass-a deg ifri deg ufus inu. Nnan ayi ḥima ad cek nɣeɣ, maca necc ḥawřeɣ xak, minzi nniɣ [ak-d yixef inu]: ‘Necc war sswiẓẓaḍeɣ afus inu ḍidd i sidi inu, maɣar netta d amedhun n SIDI.’
1SA 24:12 Xzar baba, ṭṭarf n useřham nnec aqa-t deg ufus inu. Umi necc carrgeɣ ijj n ṭṭarf n upartessu nnec, war cek nɣiɣ. [Xenni] ssen u xzar, aqa war ɣari deg ufus inu řa d tuɛeffna uřa d axeṭṭu u necc war kik xḍiɣ ca. [Maca] cek tarezzud ḥima ad ayi tekksed tudart inu.
1SA 24:13 SIDI ad iḥkem jar ayi d cek uca SIDI ad intaqem i necc zzayek, [maca] afus inu war ittiři xak.
1SA 24:14 Am mammec iqqar wawař iweznen n řejdud: ‘Zeg iɛeffanen ittas-dd tuɛeffna!’, maca afus inu war ittiři ḍidd i cek.
1SA 24:15 Awarni man wen iḍeffar ujeǧid n Israil? Man wen i tyemmared? Awarni yijj n weqzin immuten, awarni i yijj n uyenni n ucurdu!
1SA 24:16 SIDI ad yiři d řqaḍi nneɣ u netta ad iḥkem jar ayi d cek. Netta ad ixzar [di man aya] uca ad iḥkem x ddeɛwet inu u Netta ad ayi yaɣ tasɣart zeg ufus nnec.”
1SA 24:17 Umi ikemmeř Dawud x řhard n wawařen-a i Cawul, imsar, aqa Cawul inna: “Ma ta d tmijja nnec, mmi Dawud?” [Xenni] issgeɛɛed Cawul tmijja nnes, iru.
1SA 24:18 Inna netta i Dawud: “Cek d amsegged xafi necc, maɣar cek teggid akidi mliḥ, maca necc ggiɣ akidek tuɛeffna.
1SA 24:19 Cek, [wah] cek tessecned ayi ass-a, mammec d ayi teggid mliḥ, maɣar SIDI tuɣa igga ayi deg ufus nnec u cek war d ayi tenɣid ca.
1SA 24:20 Maɣar [mařa] ijj n weryaz yufa řeɛdu nnes, ma [xenni] ad t yejj ad yuyur abrid [nnes] di řxar? SIDI ad cek ixeǧeṣ s řxar di ssibbet n min d ayi teggid ass-a.
1SA 24:21 Řexxu ssneɣ, aqa cek ad tdewřed d ajeǧid u tageldit n Israil ad temten s ufus nnec.
1SA 24:22 [X uyenni] jjaǧ ayi řexxu ɣar SIDI, aqa cek war tqeṭṭɛeḍ zzariɛet inu awarni ayi u war tᵉttekksed isem inu zi taddart n baba!”
1SA 24:23 Dawud ijjuǧ i Cawul u Cawul yareggʷeḥ ɣar taddart nnes u Dawud d yeryazen nnes geɛɛden ɣar lburj [deg idurar].
1SA 25:1 Camwil immut u marra Israil imun. Nitni wtin xas agejdur u neḍřen t di taddart nnes di Rama. [Xas uca] ikkar Dawud, ihwa ɣar řexřa n Faran.
1SA 25:2 Tuɣa di Maɛun ijj n weryaz wenni tuɣa ɣar iǧa wagřa di Karmil. Aryaz tuɣa d bu-wagřa ař ṭṭarf, iǧa ɣares teřt-ařaf n wuǧi d ařef n iɣayḍen. Netta tuɣa iǧas uǧi nnes di Karmil.
1SA 25:3 Aryaz ttřaɣan as Nabal u tamɣart nnes ttřaɣan as Abijayil. Tamɣart tuɣa ɣares řeɛqeř mliḥ u tuɣa-tt d muṣbiḥ i řxezrat, maca aryaz tuɣa iqseḥ u timegga nnes d tiɛeffanin [i ǧant]. Netta tuɣa-t am wuř nnes.
1SA 25:4 [Umi] isřa Dawud di řexřa, aqa Nabal tuɣa iǧas uǧi nnes,
1SA 25:5 issekk Dawud ɛecra n imsexxaren din. Inna Dawud i iḥudriyyen: “Gaɛɛdem ɣar Karmil u xmi ɣa tawḍem ɣar Nabal, ittxeṣṣa awem ad tesseqsam x umeddur nnes deg yisem inu.
1SA 25:6 Ittxeṣṣa ad tinim ammu: ‘Iři ad xak yiři řehna uca ad yiři řehna x taddart nnec d řehna [ɣar] marra min iǧan nnec!
1SA 25:7 Aqa necc sřiɣ belli cek ɣarek irewwan. Iwa xenni, imeksawen nni ɣarek tuɣa aten akidneɣ uca neccin war ten nxewwej ca uca war ten inqiṣ walu zi min ɣarsen marra ussan i ikkin nitni [akidneɣ] di Karmil.
1SA 25:8 Seqsa imsexxaren nnec u nitni ad ac inin. Ejj ad afen imsexxaren arḍa di tiṭṭawin nnec, maɣar nusa-dd ɣar ijj n wass n wurar. Ttzawgeɣ, ewc i imsexxaren nnec u i mmic Dawud min ɣa yaf ufus nnec.’”
1SA 25:9 [Umi] iwḍen imsexxaren n Dawud [din], ssiwřen ak-d Nabal marra awařen-a deg yisem n Dawud, uca qqimen ttrajan.
1SA 25:10 [Maca] Nabal yarra-dd x imsexxaren n Dawud, inna: “Man wen i iǧan Dawud u man wen i iǧan d mmis n Yassa? Ass-a [aqa din] aṭṭas n imsexxaren nni yarewřen. Kuř ijj [yarweř] zi zzat n wudem n bab nnes.
1SA 25:11 Ma ad ksiɣ xenni aɣrum inu d waman inu d tɣarṣt i ɣarṣeɣ i irewwan inu uca ad t wceɣ i yeryazen x yinni war ssineɣ uřa d manis dd-usin nitni?”
1SA 25:12 [Xenni] nnqeřben imsexxaren n Dawud ɣar webrid i zi dd-usin, ɛeqben uca usin-dd [ɣar Dawud] u ḥajan as marra awařen-a.
1SA 25:13 [Xas uca] inna Dawud i yeryazen nnes: “Kur aryaz ad ibyes ssif nnes!” Uca [kuř] aryaz ibyes ssif nnes, uřa d Dawud ibyes ssif nnes. Nitni geɛɛden awarni i Dawud, amenni arebɛa-mya n yeryazen, u qqimen mitayen ɣar řeḥwayej.
1SA 25:14 Ijjen zeg imsexxaren tuɣa iḥaja aya i Abijayil, tamɣart n Nabal, inna [as]: “Xzar, Dawud issekk-dd ireqqasen zi řexřa ḥima ad ssiwḍen lbaraka i siditneɣ, maca wanita iqřeɛ xasen s tzawart.
1SA 25:15 Iryazen tuɣa aten cnan i neccin u nitni war d aneɣ seddɛen ca. War nefqid walu marra ussan i dinni nesseɛdu akidsen deg iyyar n tarewsa.
1SA 25:16 Nitni tuɣa aten am yijj n řḥiḍ i neccin, ǧiřet d wass, di marra ussan i kidsen neǧa u tuɣa neccin narwes uǧi.
1SA 25:17 Řexxu aqa tessned tt. Xzar mliḥ, min ittxeṣṣa ad t tegged, maɣar řɣar x siditneɣ d marra taddart nnes imten. Netta d ijj n weryaz war isekkwi wawař akides.”
1SA 25:18 Tqeǧeq Abijayil, teksi mitayen n tecnifin d tnayen n txuncay n yiřem i binu d xemsa n texsiwin wejdent d xemsa n řeqyas n teɣwawin d mya n tɣayiṭatin n zzbib d mitayen n iɣrumen n tazart, u nettat tessars manawenni marra x yeɣyař.
1SA 25:19 Tenna i imsexxaren nnes: “Uyurem zzat i wudem inu. Xzar necc ad kenniw aredfeɣ.” [Maca] nettat war d as tenni aya i weryaz nnes Nabal.
1SA 25:20 Umi tenya nettat x weɣyuř, tehwa x udurri n wedrar, xzar, imsar aqa Dawud d yeryazen nnes hwan-dd i umsagar akides u nettat temmeřqa akidsen.
1SA 25:21 Dawud tuɣa inna: “S tidett, baṭeř i ḥḍiɣ x marra min ɣares iǧan di řexřa, ařami war iweddar walu zi min ɣares. Netta ixeǧeṣ ayi min iṣebḥen s min war iḥřin.
1SA 25:22 Ejj ad igg AREBBI ta d ta ak-d řɛedyan n Dawud u ad dayes yarni ɛad, mařa necc ad jjeɣ ař tiwecca uřa d ijj wenni t itteggen x řḥiḍ zi marra min ɣares!”
1SA 25:23 Umi teẓra Abijayil Dawud, teḍra deɣya x weɣyuř nnes, tewḍa [x temmurt] zzat i Dawud, tuḍar [as] s uɣembub nnes ɣar temmurt.
1SA 25:24 Nettat tewḍa as ɣar iḍaren, tenna: “Necc, waha, i di iǧa řɛib, [a] Sidi inu. Ejj ad tessiweř tayya nnec akidek u seř i wawařen n tayya nnec.
1SA 25:25 Ejj sidi inu war ixezzar ɣar weryaz-a i war isekkwin, ɣar Nabal, maɣar am mammec d as qqaren, ammu [i yeǧa] netta. Nabal d isem nnes u tubbuheřya aqa-tt dayes. Necc, tayya nnec, war ẓriɣ ca imsexxaren n sidi inu i dd-tessekked.
1SA 25:26 Xenni řexxu, a sidi, [s tidett] am iddar SIDI u iddar řeɛmar nnec, aqa SIDI d wenni cek immenɛen maḥend ad tessizzřed idammen u ad tfekked ixef nnec s ufus nnec. Ad dewřen řexxu řɛedyan nnec d yinni yarezzun ad ggen řɣar di sidi inu am Nabal.
1SA 25:27 Iwa řexxu, man aya d lbaraka i dd-tiwi tayya nnec i sidi inu, maḥend ad tt wcen i imsexxaren nni yuyuren deg iṣuraf n sidi inu.
1SA 25:28 Ttzawgeɣ, ɣfar axeṭṭu i tayya nnec, maɣar SIDI [Arebbi] ad issbedd i sidi inu ict n taddart temten, minzi sidi inu ittegg garrat n SIDI u war dayek ittwaff řɣar zeg wussan [imezwura] nnec.
1SA 25:29 [Mařa] ijj n bnadem ikkar xak ḥima ad cek iḍfar, ḥima ad yarzu x řeɛmar nnec, xenni ad yiři řeɛmar n sidi inu [di řaman,] iqqen di tecyart n yinni iddaren ɣar SIDI AREBBI nnec, [maca] řeɛmar n řɛedyan nnec ad zzayes iḥejjar netta ɣar řaggʷaj zeg ukemmic n iǧiy.
1SA 25:30 Ad imsar, mařa SIDI ad igg ak-d sidi inu ɛlaḥsab marra taṣebḥant i xak issiweř u ad cek yegg d řḥakem x Israil,
1SA 25:31 xenni war ittiři aya i cek, [a] sidi inu, d ssibbet i zi ɣa tenqarḍed uřa d taɛenkrift i wuř, aqa cek tessizzřed idammen baṭeř u aqa sidi inu igga ad ifekk ixef nnes. Mařa SIDI [AREBBI] ad igg řxar di sidi inu, ɛqeř [xenni] x tayya nnec.”
1SA 25:32 [Xenni] inna Dawud i Abijayil: “Ad ittwabarek SIDI, AREBBI n Israil, wenni cem dd-issekken ass-a i umsagar akidi!
1SA 25:33 Aqa tᵉttwabarek řefhamet nnem uca tᵉttwabarked uřa d cem, řami d ayi tessbedded ass-a zeg usizzeř n idammen u zi nneqmet i yixef inu s ifassen inu!
1SA 25:34 [Maɣar] s tidett, am iddar SIDI, AREBBI n Israil, wenni d ayi issbedden ad am ggeɣ řɣar, mařa cem war ɣari dd-teffiɣed deɣya, xenni war ittɣimi ɣar tfawt n tuffut uřa d ijjen [zeg iwdan] n Nabal, wenni t itteggen x řḥiḍ!”
1SA 25:35 Uca iksi Dawud zeg ufus nnes min tuɣa i d as dd-tiwi, inna as: “Uyur di řehna ɣar taddart nnem! Xzar, necc sřiɣ-dd ɣarem u ad ssgeɛɛdeɣ udem nnem [iḥeznen].”
1SA 25:36 [Umi] dd-tusa Abijayil ɣar Nabal, ittegg netta ict n zzardet n tissit di taddart nnes am yict n zzardet n ujeǧid. Uř n Nabal tuɣa-t x řxaḍar nnes, iscar ař ṭṭarf. S uyenni nettat war d as tenni uřa d ijj n wawař, ameẓyan niɣ ameqqran, x min imsaren ař tafawt n tuffut.
1SA 25:37 Ɣar tuffut, řami iffeɣ binu x Nabal, imsar, aqa tamɣart nnes tenna as man aya. Uca ijmed wuř nnes, idweř am yijj n weẓru.
1SA 25:38 Awarni ɛecra n wussan, imsar, aqa SIDI iwta Nabal ařami immut.
1SA 25:39 Umi isřa Dawud belli Nabal immut, inna netta: “Ad ittwabarek SIDI wenni iggin řḥukm x řḥegra i d ayi ittwaggen, ittar i-t zeg ufus n Nabal, uca issbedd amsexxar nnes ḥima ad igg řɣar. SIDI yarra řɣar n Nabal ad dd-idweř x uzeǧif nnes!” Uca Dawud issekk [ijj] u wanita issiweř ak-d Abijayil, ḥima ad tt yawi d tamɣart i netta.
1SA 25:40 [Umi] dd-usin imsexxaren n Dawud ɣar Abijayil ɣar Karmil, ssiwřen akides, nnan: “Dawud issekk aneɣ-dd ɣarem, ḥima ad cem nawi d tamɣart i netta.”
1SA 25:41 [Řexdenni] tekkar, tbendeq s uɣembub nnes ɣar temmurt, tenna: “Xzar, tamsexxart nnec am yict n tayya, ḥima ad tessird iḍaren i imsexxaren n sidi inu.”
1SA 25:42 Tqeǧeq Abijayil, tekkar. Nettat tenya x weɣyuř nnes ak-d xemsa n temsexxarin nnes timeẓaynin tinni tt yareddfen x iḍaren. Nettat teḍfar ireqqasen n Dawud uca tedweř d tamɣart nnes.
1SA 25:43 Yiwi Dawud ɛawed Axinuɛam zi Yazraɛil [d tamɣart]. Nitenti s tnayen idsent dewřent d tamɣart i netta.
1SA 25:44 Cawul maca tuɣa iwca yeǧis Mixal, tamɣart n Dawud, i Palti, mmis n Layic wenni [iǧan] zi Jallim.
1SA 26:1 Iryazen n Zif usin-dd ɣar Cawul ɣar Jibɛa, nnan: “Ma war issnuffar Dawud ixef nnes x tewrirt n Ḥaxila arendad n tnezruft?”
1SA 26:2 [Xenni] ikkar Cawul uca ihwa ɣar řexřa n Zif, akides teřt-ařaf n yeryazen ittwafarzen zi Israil, ḥima ad yarzu x Dawud di řexřa n Zif.
1SA 26:3 Iwta Cawul iqiḍan nnes ɣar webrid x tewrirt n Ḥaxila tenni arendad n tnezruft. Dawud iqqim di řexřa, iẓra Cawul iḍfar i-t-i-dd ɣar řexřa.
1SA 26:4 [Maɣar] Dawud tuɣa issekk ixbarjiyyen u netta tuɣa issen aqa Cawul igga ad dd-yas.
1SA 26:5 Dawud ikkar u yusa-dd mani tuɣa iwta Cawul iqiḍan nnes. Dawud tuɣa ittwařa mani tuɣa izzeř Cawul ak-d ukumandar n řɛeskar nnes, Abnir, mmis n Nir. Cawul iṭṭeṣ di řmargeḥ n ikarruten u řgens tuɣa inneḍ as-dd [s iqiḍan nsen].
1SA 26:6 [Xenni] iṭṭef Dawud deg wawař. Issiweř ak-d Aximalik, Aḥitti, u ak-d Abicay, mmis n Ṣiruya, umas n Yuwab, inna: “Man wen akidi i ɣa ihwan ɣar Cawul di řmargeḥ n řɛeskar?” Abicay inna: “Necc ad kidek hwiɣ.”
1SA 26:7 Yusa-dd Dawud ak-d Abicay di ǧiřet ɣar řgens, u xzar, Cawul tuɣa iṭṭeṣ di řmargeḥ n ikarruten u lansa nnes tejju zzat i uzeǧif nnes di temmurt. Innḍen as-dd Abnir d řgens.
1SA 26:8 [Xenni] inna Abicay i Dawud: “Ass-a iqqen SIDI řeɛdu nnec deg ufus nnec. Ejj ayi řexxu ad t ssnuqqbeɣ ak-d temmurt s ict n tecti n lansa. War tteḥdijiɣ ad tt ggeɣ ict n twařa nneɣnit.”
1SA 26:9 Dawud inna i Abicay: “War t ttareddeǧ ca, maɣar man wen izemmaren ad yarr afus nnes ɣar umedhun n SIDI uca ad iqqim d afurri?”
1SA 26:10 [Xenni] inna Dawud: “[S tidett am] iddar SIDI, SIDI ad t iwwet: niɣ ad dd-yas wass nnes i di i ɣa immet niɣ ad dd-ihwa ɣar umenɣi uca ad ittwaneɣ.
1SA 26:11 SIDI ad ayi iḥḍa aqa necc ad wteɣ s ufus inu amedhun n SIDI. Ttzawgeɣ cek, ksi lansa i [iǧan] zzat i uzeǧif nnes d tebriqt n waman uca ejj aneɣ ad nuyur!”
1SA 26:12 Iksi Dawud lansa d tebriqt n waman [i tuɣa din iǧan] zzat i uzeǧif n Cawul uca ffɣen nitni. Uřa d ijj war [t] iẓri, řa d ijj war [t] yuci u uřa d ijj war ifiq, maɣar marra ṭṭṣen, minzi SIDI tuɣa isseɣḍes i-ten deg ijj n yiḍeṣ yuǧeɣ.
1SA 26:13 Dawud iɛdu ɣar uɣezdis nneɣni uca ibedd ɣar řaggʷaj x tqiccat n wedrar. Tuɣa iǧa ttasiɛ d ameqqran jar asen.
1SA 26:14 Iřaɣa-dd Dawud i řgens u i Abnir, mmis n Nir, inna: “Ma war dd-tarrid ca, Abnir?” [Xenni] yarra-dd Abnir, inna: “Min teɛnid cek wenni d ittřaɣan x ujeǧid?”
1SA 26:15 [Xenni] inna Dawud i Abnir: “Ma cek war teǧid d aryaz? Man wen di Israil i iǧan am cek? Mayemmi [xenni] war teḥḍid x sidi nnec, ajeǧid? Aqa ijjen zi řgens yudef-dd ḥima ad yareddeǧ ajeǧid, sidi nnec.
1SA 26:16 Min teggid war iǧi ca mliḥ. [S tidett am] iddar SIDI, kenniw d tarwa n řmewt, minzi kenniw war tɛessem x sidi nwem, amedhun n SIDI! Xzar mani ǧant řexxu lansa n ujeǧid d tebriqt n waman tinni tuɣa zzat i uzeǧif nnes!”
1SA 26:17 Cawul iɛqeř tmijja n Dawud, inna: “Ma ta d tmijja nnec, a mmi Dawud?” Dawud inna: “Aqa-tt d tmijja inu, sidi inu, ajeǧid!”
1SA 26:18 [Xenni] inna: “Mayemmi iḍeffar sidi inu amsexxar nnes ammu? Minzi min ggiɣ u man [t] řɛib i [yumsen] ɣar ufus inu?
1SA 26:19 Xenni řexxu, ejj ad iseř sidi inu, ajeǧid, i wawařen n umsexxar nnes. Mařa SIDI issehweř i cek xafi, iři ad icemm Netta tawhibt [n řɣiǧet], maca mařa d iwdan [i iǧan], [xenni] ad ttwaneɛřen nitni zzat i wudem n SIDI, maɣar nitni uẓẓřen xafi ass-a ařami war zemmareɣ ad qqimeɣ qqneɣ [ɛad] i řwart n SIDI, u [maɣar] nitni qqaren: ‘Ruh, sexxar i irebbiten inneɣni!’
1SA 26:20 [Xenni] řexxu, ejj idammen inu war ttizzřen deg ict n temmurt iggʷejen x SIDI. Minzi ajeǧid n Israil iffeɣ, ḥima ad yarzu x ijj n uyenni n ucurdu waha, am mammec yemmaren tasekkurt deg idurar.”
1SA 26:21 [Xas] uca inna Cawul: “Necc xḍiɣ, ɛqeb-dd, [a] mmi Dawud, maɣar necc war d ac tteggeɣ ɛad řɣar, minzi tudart inu tuɣa ass-a tsekkwa ɣarek di tiṭṭawin nnec. Xzar, necc ggiɣ tubbuheřya u weddareɣ s waṭṭas.”
1SA 26:22 Dawud yarra-dd, inna: “Xzar, aqa da lansa n ujeǧid. Ejj ijj zeg imsexxaren nnec ad iẓwa, ad tt-i-dd yawi.
1SA 26:23 Ad ixeǧeṣ SIDI kuř ijj x tsegda nnes d ttiqqet nnes, minzi SIDI tuɣa isellem i cek ass-a deg ufus inu, maca war xseɣ ca ad ggeɣ afus inu deg umedhun n SIDI.
1SA 26:24 Xzar, am mammec tuɣa tudart nnec ass-a tiɣřa di tiṭṭawin inu, ammu i ɣa tiři tudart inu di tiṭṭawin n SIDI tiɣřa. Netta ad ayi ifekk zi marra řeḥṣaret.”
1SA 26:25 Cawul inna i Dawud: “Aqa cek tᵉttwabarked, mmi Dawud. Min ma i ɣa tegged, aqa ad tawḍed ɛawed.” [Xenni] yuyur Dawud abrid nnes u Cawul iɛqeb ɣar wemcan nnes [mani tuɣa izeddeɣ].
1SA 27:1 Inna Dawud deg wuř nnes: “Řexxu ɛad ijj n wass uca ad ttwanɣeɣ x ufus n Cawul. War iqqim ḥaca ad arewřeɣ deɣya ɣar temmurt n Ifilisṭiniyyen, maḥend ad iqḍeɛ i Cawul řayas zi jjihet inu maḥend ad xafi yarzu ɛad [ktar] di marra tammurt n Israil. [Ammu] i ɣa nejmeɣ i ufus nnes.”
1SA 27:2 Dawud ikkar, netta d setta-mya n yeryazen nni tuɣa ɣares iǧan, ɛdun ɣar mmis n Maɛuk, ajeǧid n Jat.
1SA 27:3 Iqqim Dawud ɣar Axis, netta d yeryazen nnes, [kuř] aryaz ak-d taddart nnes. Dawud [izdeɣ din] ak-d tnayen n temɣarin nnes, Axinuɛam zi Yazraɛil u Abijayil, tamɣart n Nabal, zi Karmil.
1SA 27:4 [Umi] nnan i Cawul, aqa Dawud yarweř ɣar Jat, war yarni iqqim ad xas yarzu ɛad ktar.
1SA 27:5 Inna Dawud i Axic: “Mařa ufiɣ necc řxaḍar di tiṭṭawin nnec, xenni ewc ayi ijj n wemcan deg ict zi tneddam nnec n temmurt, ḥima zemmareɣ ad zedɣeɣ din. Mayemmi i ɣarek i ɣa izdeɣ umsexxar nnec akidek di tendint n ujeǧid?”
1SA 27:6 Deg wass nni iwca as Axic [tandint n] Ṣiqlaɣ. S uya tuɣa teǧa Ṣiqlaɣ n ijeǧiden n Yahuda ař ass-a.
1SA 27:7 Ussan i ikka Dawud di temmurt n Ifilisṭiniyyen, tuɣa d ijj n useggʷas d arebɛa n iyuren.
1SA 27:8 Dawud iffeɣ ak-d iryazen nnes u nitni keccḍen Ijacuriyyen d Ijarziyyen d ayt n Ɛamaliq, minzi ina tuɣa zeddɣen zeg wecḥař uya di temmurt, jjihet n Cur ař tammurt n Miṣra.
1SA 27:9 Dawud iwta tammurt u war ijji ad iddar uřa d ijj n weryaz niɣ uřa d ict n temɣart. Iṭṭef ɛawed uǧi d ifunasen d tfunasin d yeɣyař d iřeɣman d warruḍ uca iɛqeb, yusa-dd ɣar Axic.
1SA 27:10 U Axic inna: “Mani truḥem ass-a maḥend ad tkeccḍem?” Inna Dawud: “Ɣar ljanub n Yahuda!”, niɣ: “Ɣar ljanub n [temmurt n] Iyarḥamitiliyyen!”, niɣ: “Ɣar ljanub n [temmurt n] Iqiniyyen!”
1SA 27:11 War ijji Dawud ad iddar uřa d ijj n weryaz niɣ uřa d ict n temɣart ḥima ad dd-yas ɣar Jat. Inna: “Ḥima nitni war xaneɣ ttɛiwiden walu, ad inin: ‘Ta i igga Dawud!’” Ammu i iqqim ittegg di marra ussan i ikka di jjwayeh n Ifilisṭiniyyen.
1SA 27:12 Axic ittiqq di Dawud, inna: “S tidett netta issarzeg ixef nnes ɣar řgens nnes, ɣar Israil, uca x uyenni aqa netta ad yiři d amsexxar inu i řebda.”
1SA 28:1 Deg wussan nni, řami ssmunen Ifilisṭiniyyen řɛeskar nsen i umenɣi, ḥima ad mmenɣen ak-d Israil, imsar, aqa Axic inna i Dawud: “Ittxeṣṣa ad tessned mliḥ, aqa cek ad kidi teffɣed s uɣiř di řɛeskar, cek d yeryazen nnec.”
1SA 28:2 [Xenni] inna Dawud i Axic: “Di man aya ad tẓared min izemmar ad yegg umsexxar nnec!” Axic inna i Dawud: “S uya ad cek ggeɣ d aɛessas xafi di marra ussan.”
1SA 28:3 Camwil tuɣa immut d marra Israil tuɣa icḍen xas. Nitni neḍřen t di Rama, di tendint nnes. Cawul tuɣa issuffuɣ inni issawařen ak-d imettan uřa d igezzanen zi temmurt.
1SA 28:4 Ifilisṭiniyyen munen marra. Nitni usin-dd uca wtin iqiḍan nsen ɣar Cunam u Cawul issmun marra Israil u nitni wtin iqiḍan nsen ɣar Jilbuɛa.
1SA 28:5 Umi iẓra Cawul řmargeḥ n řɛeskar n Ifilisṭiniyyen, tusa as-dd tiggʷudi u wuř nnes idweř itteqdiddis s waṭṭas.
1SA 28:6 Cawul isseqsa SIDI, maca SIDI war xas dd-yarri ca, war iǧi s tirja, uřa s Urim, uřa s inabiyyen.
1SA 28:7 [Xenni] inna Cawul i imsexxaren nnes: “Arzum ayi-dd ict n temɣart iddebbaran x buḥbeřat n imettan, ḥima necc ad ɣares raḥeɣ u ad tt sseqsiɣ.” Imsexxaren nnes nnan as: “Xzar, di Ɛayn-Dur aqa din ict n temɣart tenni iddebbaran x buḥbeřat n imettan.”
1SA 28:8 Cawul issneqřeb ixef nnes, yarḍ arruḍ nneɣni uca yuyur. Tnayen n yeryazen ruḥen akides u nitni iwḍen di ǧiřet ɣar temɣart, uca inna netta: “Gezzen ayi zi buḥbeř n ijj n umettin uca řaɣa ayi-dd x wenni d am i ɣa iniɣ.”
1SA 28:9 [Xenni] tenna xas temɣart: “Aqa da cek tessned [mliḥ] min igga Cawul, mammec tuɣa itteḥḥa inni issawařen ak-d imettan d igezzanen zi temmurt. Mayemmi d ayi tᵉttegged řfex, ḥima ad ayi tenɣed?”
1SA 28:10 Cawul [maca] ijjuǧ as ɣar SIDI, inna: “[S tidett am] iddar SIDI, war cem iřeqqef di tmesřact-a ca řɛib!”
1SA 28:11 [Xenni] tenna temɣart: “Man wen i xef-dd i ɣa řaɣiɣ i cek?” Netta inna “Řaɣa ayi-dd x Camwil!”
1SA 28:12 [Umi] teẓra temɣart Camwil, tesɣuy deg ujenna u tessiweř temɣart ak-d Cawul, tenna as: “Mayemmi d ayi tcemted? Cek aqa d Cawul!”
1SA 28:13 Inna as ujeǧid: “War tteggʷed ca, maca min tᵉttwařid cem?” [Xenni] tenna temɣart i Cawul: “Necc ttwařiɣ inni yarewsen deg irebbiten i dd-ittgeɛɛaden zi temmurt.”
1SA 28:14 Netta inna as: “Mammec tegga tiddi nnes?” Nettat tenna: “Ijj n uwessar ittgeɛɛed u yarḍ s yijj n useřham.” [Xenni] issen Cawul, aqa-t d Camwil, yuḍar netta s uɣembub nnes ɣar temmurt uca ibendeq.
1SA 28:15 Uca Camwil inna: “Mayemmi d ayi thewřed, tejjid ad xafi dd-řaɣan?” Cawul inna: “Necc ttwaḥṣareɣ aṭṭas, maɣar Ifilisṭiniyyen ttmenɣan akidi u AREBBI iḥeyyed xafi u war iqqim ittarra-dd xafi ɛad, war iǧi x tebridin n inabiyyen uřa s tirja. S uyenni řaɣiɣ-dd xak, maḥend ad ayi tessecned min ɣa ggeɣ.”
1SA 28:16 [Xenni] inna Camwil: “Mayemmi d ayi tᵉttseqsid, [mařa] SIDI iḥeyyed xak u Netta idweř ḍidd nnec?
1SA 28:17 SIDI simant nnes igga am mammec tuɣa zzayi inna u netta iqřeɛ i cek tageldit zeg ufus nnec, iwca i-tt i jjar nnec, i Dawud.
1SA 28:18 Minzi cek war tesřid ca ɣar tmijja n SIDI u cek war tessiwḍed ca řḥaduq n weɣḍab nnes ɣar Ɛamaliq, x uya i d ac igga SIDI ass-a aya.
1SA 28:19 SIDI ad kidek igg uřa d Israil deg ufus n Ifilisṭiniyyen, u tiwecca ad tiřid cek d iḥenjiren nnec ɣari. Uřa d řɛeskar n Israil ad t igg SIDI deg ufus n Ifilisṭiniyyen.”
1SA 28:20 [Xenni] iwḍa Cawul deɣya, ibeqqeḍ di temmurt, tuɣa itteggʷed aṭṭas zeg wawařen n Camwil, uca jjehd war dayes iqqim, minzi war icci aɣrum, ass d ǧiřet kemmřen.
1SA 28:21 Tamɣart tuyur ɣar Cawul, uca teẓra i-t yarjef aṭṭas. Tenna as: “Xzar, tayya nnec tesřa ɣar tmijja nnec u necc sebbřeɣ tudart inu, sřiɣ ɣar wawařen i d ayi tennid.
1SA 28:22 Xenni řexxu maca seř ɣar tmijja n tayya nnec! Necc ad ac qeddmeɣ ijj n uřeqqim n weɣrum. Ecc ḥima ad tᵉttwassjheded xmi ɣa tᵉṭṭfed abrid.”
1SA 28:23 [Maca] netta yugi, inna: “Necc war ttᵉtteɣ!” [Maca] imsexxaren nnes uřa d tamɣart ḥṣaren t ařami isřa netta ɣarsen, uca netta ikkar zi temmurt, iqqim x qama.
1SA 28:24 Tamɣart tuɣa ɣares ijj n uɛejmi imseř di taddart uca tɣarṣ as deɣya. Nettat teksi awren, teggʷa arecti u tegga zzayes aɣrum břa antun.
1SA 28:25 Nettat tqeddem [aya] i Cawul d imsexxaren nnes uca ccin nitni. Awarni aya kkaren u areggʷḥen di ǧiřet nni.
1SA 29:1 Ifilisṭiniyyen ssmunen marra řɛeskar nsen ɣar Afiq uca Israil tuɣa iwta iqiḍan nnes ɣar tařa nni [iǧan] ɣar Yazraɛil.
1SA 29:2 Uca řbacat [n tneddam] n Ifilisṭiniyyen ẓwan ɣar din s řmyawat d řuřuf nsen uca iẓwa Dawud d yeryazen nnes ak-d Axic ɣar uɣezdis aneggaru.
1SA 29:3 [Xenni] nnan řḥukkam n Ifilisṭiniyyen: “Min da tteggen Iɛibraniyyen-a?” Yarra-dd Axic x řḥukkam n Ifilisṭiniyyen: “Ma wa war iǧi d Dawud, amsexxar n Cawul, ajeǧid n Israil, wenni tuɣa ɣari iǧan aseggʷas d wass? Zeg wass i ɣari dd-yeɛdu ař ass-a necc war dayes ufiɣ uřa d ijj n řɛib.”
1SA 29:4 Ffuggmen xas aṭṭas řḥukkam n Ifilisṭiniyyen. Nnan as řḥukkam n Ifilisṭiniyyen: “Sekk aryaz ad iɛqeb, ḥima ad idweř ɣar wemcan nnes nni i d as tessecned. War izemmar akidneɣ ihwa ɣar umenɣi, ḥima xenni war iddikkwiř d řeɛdu nneɣ deg umenɣi. Maɣar s minzi izemmar wanita ad iṣřeḥ ak-d sidis nnes? Ma war iǧi ak-d izeǧifen n yeryazen-a?
1SA 29:5 Ma wanita war iǧi d Dawud wenni x ɣennjent d ceḍḥent s nnubtat, nnant: ‘Cawul netta iɣřeb x řuřuf nnes, [maca] Dawud netta x ɛecra n řuřuf nnes?’”
1SA 29:6 Uca iřaɣa-dd Axic i Dawud inna as: “[S tidett am] iddar SIDI, cek d aṣdiq. Ufuɣ nnec d weɛqab nnec akidi di řɛeskar aqa aten mliḥ di tiṭṭawin inu, maɣar necc war dayek ufiɣ uřa d ca n řɣecc zeg wass i ɣari dd-tusid ař ass-a. [Maca] cek war teǧid mliḥ di tiṭṭawin n řbacat [n tneddam].
1SA 29:7 Xenni řexxu, ɛqeb, uyur di řehna, [ḥima] war tᵉttegged qaɛ ca n řɣecc di tiṭṭawin n řbacat [n tneddam] n Ifilisṭiniyyen.”
1SA 29:8 [Xenni] inna Dawud i Axic: “Maɣar min ggiɣ? Min tufid deg umsexxar nnec zeg wass [amezwaru] i d ayi tuɣa zzat i wudem nnec ař ass-a, ařami war ruḥeɣ akidwem ad menɣeɣ ak-d řɛedyan n sidi inu, ajeǧid?”
1SA 29:9 Axic yarra-dd, inna i Dawud: “Necc ssneɣ tt, minzi cek d lemliḥ di tiṭṭawin inu am yijj n lmalak n AREBBI, maca řḥukkam n Ifilisṭiniyyen nnan: ‘Netta war akidneɣ itteffeɣ ɣar umenɣi.’
1SA 29:10 S uyenni kkar tiwecca zic s imsexxaren n sidi nnec, inni akidek dd-yusin. Mařa tekkarem s wass zic uca iṣbeḥ řḥař, ffɣem [xenni].”
1SA 29:11 Dawud ikkar zic, netta d yeryazen nnes, ḥima ad uyuren di ṣṣbeḥ, ad dd-ɛeqben ɣar temmurt n Ifilisṭiniyyen. Ifilisṭiniyyen [maca] ffɣen, geɛɛden ɣar Yazraɛil.
1SA 30:1 [Umi] dd-yusa Dawud d yeryazen nnes ɣar Ṣiqlaɣ deg wass wiss třata, tuɣa imsar, aqa ayt n Ɛamaliq keccḍen ljanub uřa d Ṣiqlaɣ. Nitni wtin Ṣiqlaɣ, qqden as timessi
1SA 30:2 uca ḥebbsen timɣarin nni din [iǧan]. War nɣin uřa d ijj, ameẓyan niɣ d ameqqran, maca iwyen ten uca uyuren abrid nsen.
1SA 30:3 Yusa-dd Dawud ak-d yeryazen nnes ɣar tendint, uca xzar, aqa tᵉttwassecmeḍ [tendint] s tmessi u timɣarin d iḥenjiren d tḥenjirin tuɣa ttwaḥewwsen.
1SA 30:4 Dawud d řgens i ɣares [iǧan] ssgeɛɛden tmijja nsen, sɣuyen ařami war daysen iqqim jjehd ḥima ad sɣuyen.
1SA 30:5 Uřa d tnayen n temɣarin n Dawud ttwaḥewwsent, Axinuɛam zi Yazraɛil u Abijayil zi Karmil.
1SA 30:6 Tuɣa Dawud tᵉttwaḥṣared aṭṭas, minzi řgens tuɣa issawař maḥend ad t arejmen, maɣar řeɛmur n marra řgens tuɣa arezgen, [kuř] aryaz x [txessart] n iḥenjiren nnes d tḥenjirin nnes. [Maca] Dawud issejhed ixef nnes di SIDI, AREBBI nnes.
1SA 30:7 Inna Dawud i ukehhan Abyatar, mmis n Aximalik: “Awi-dd [da] ɣari apalṭu [n ukehhan]!” U Abyatar yiwi-dd apalṭu [n ukehhan] ɣar Dawud.
1SA 30:8 [Xenni] isseqsa Dawud i SIDI: “Ma ad ḍfareɣ bandiyya-ya? Ma ad xasen ḥarteɣ?” SIDI yarra-dd xas: “Ḍfar i-ten, maɣar cek ad xasen tḥarted u ad tfekked [imeḥbas] nican.”
1SA 30:9 Iffeɣ-dd Dawud, netta d setta-mya n yeryazen nni tuɣa ɣares. [Umi] dd-iwḍen nitni ař tiɣzart n Basur, bedden [din] inni iqqimen ɣar ḍeffar,
1SA 30:10 [maca] Dawud iqqim iḍeffar [bandiyya nni], netta d arebɛa-mya n yeryazen akides. Mitayn n yeryazen, inni tuɣa yuḥřen aṭṭas maḥend ad ẓwan tiɣzart n Bacur, qqimen bedden [din].
1SA 30:11 Nitni ufin ijj n weryaz d Amiṣri deg iyyar uca iwyen t ɣar Dawud. Nitni wcin as aɣrum u netta icca u nitni wcin as [ɛawed] aman maḥend ad isu.
1SA 30:12 Arnin as ict n tesɣart n ijj n weɣrum n tazart yuẓɣen d tnayen n iɣrumen n zzbib u netta icca, idweř as-dd buḥbeř nnes, maɣar netta tuɣa war icci war iswi třata n wussan d třata n ǧiyaři.
1SA 30:13 [Xenni] inna as Dawud: “Wi cek yiřan u manis cek?” [Xenni] inna uḥudri Amiṣri: “Necc d ijj n umsexxar n ijj n weryaz n Ɛamaliq u sidi inu ijja ayi, řami heřceɣ třata n wussan zeg wami.
1SA 30:14 Neccin tuɣa nkecceḍ [tammurt n] ljanub n Ikaritiyyin, tenni ɣar Yahuda, uřa d [tammurt n] ljanub n Kalib, u neccin nessecmeḍ Ṣiqlaɣ s tmessi.”
1SA 30:15 Dawud inna as: “Ma tzemmared ad ayi tnedhed ɣar bandiyya-ya n ixewwanen?” Netta inna: “Jaǧ ayi ɣar AREBBI, aqa cek war d ayi tneqqed u war d ayi tessɛeddud i sidi inu! Xenni necc ad cek nedheɣ ɣar bandiyya-ya.”
1SA 30:16 Uca indeh i-t din, u xzar, nitni tuɣa qqimen ttwabezzɛen x marra tammurt, ccin, swin u ceḍḥen zi ssibbet n tkeccaḍt tameqqrant i tuɣa dd-iwyen zi temmurt n Ifilisṭiniyyen u zi temmurt n Yahuda.
1SA 30:17 Dawud iwta xasen zi tbambast ař tameddit n wass i-tt-i-dd-iḍfaren uca uřa d ijjen zzaysen war injim, mɣir arebɛa-mya n iḥudriyyen nni inyin x iřeɣman, arewřen.
1SA 30:18 [Ammu] dd-ifekk Dawud marra min kksen ayt n Ɛamaliq. Dawud ifekk-dd uřa d tnayen n temɣarin nnes.
1SA 30:19 Zeg umeẓyan ař ameqqran, zeg iḥenjiren d tḥenjirin, zi tkeccaḍt u zi marra min zzaysen kksen, war iweddar walu. Marra yarra i-t-i-dd Dawud.
1SA 30:20 Iksi Dawud ɛawed marra uǧi d ifunasen d tfunasin. Nedhen [ten] ɣar zzat i řeksibet [n yixef] nsen, nnan: “Ta d takeccaḍt n Dawud.”
1SA 30:21 [Umi] dd-yiweḍ Dawud ɣar mitayen n yeryazen, inni tuɣa yuḥřen aṭṭas ḥima ad ḍfaren Dawud [ɛad], inni ijja Dawud ɣar teɣzart n Bacur, aqa ffɣen-dd nitni ɣar umsagar ak-d Dawud u ak-d řgens nni tuɣa ɣares. Dawud iqarreb-dd ɣarsen uca isseqsa x umeddur nsen.
1SA 30:22 [Xenni] yarra-dd kuř aryaz war iḥřin d wenni war isekkwin jar yeryazen nni tuɣa dd-iffɣen ak-d Dawud, nnan: “Maɣar nitni war kidneɣ ffiɣen, x uyenni war d asen nᵉttic walu zi tkeccaḍt i dd-nfekk, mɣir i [kuř] aryaz tamɣart nnes d iḥenjiren nnes. D ina zemmaren nitni ad awyen uca ad [kidsen] areggʷḥen.”
1SA 30:23 [Maca] Dawud inna: “War iɛeddeř ad teggem amenni, aytma, aqa SIDI d wenni d aneɣ iwcin [aya] u Netta iḥḍa aneɣ u iwca bandiyya i d aneɣ dd-iwḍan deg ufus nneɣ.
1SA 30:24 Wi ɣarwem i ɣa isřen ɣar wawař nwem? Maɣar tasɣart n wenni iffɣen ɣar umenɣi [ad tiři] am tesɣart n wenni iqqimen ɣar řexzin. Nitni ad [tt] bḍan [jmiɛ].”
1SA 30:25 Ammu i tt teqqim zeg wass nni, minzi netta igga i-tt d ict n tewṣeyyet d ict n lfariḍa di Israil ař ass-a.
1SA 30:26 [Umi] yareggʷeḥ Dawud ɣar Ṣiqlaɣ, issekk netta [tirzefin] zi tkeccaḍt ɣar imɣaren n Yahuda, imeddukkař nnes, [am i d asen] inna: “Ta d ict n lbaraka i kenniw zi tkeccaḍt n řɛedyan n SIDI”.
1SA 30:27 Issekk [i imɣaren] di Bayt-Il, i yinni di Ramat di ljanub, i yinni di Yattir,
1SA 30:28 i yinni di Ɛaruɛir, i yinni di Sifmut, i yinni di Icitimuɛa,
1SA 30:29 i yinni di Raxil, i yinni [tuɣa izeddɣen] di tneddam n Iyarḥamtiliyyen, i yinni [izeddɣen] di tneddam n Iqiniyyen,
1SA 30:30 i yinni di Ḥurma, i yinni di Kur-Ɛacan, i yinni di Ɛatak,
1SA 30:31 i yinni di Ḥabrun u ɣar marra imucan mani tuɣa ikka Dawud, netta ak-d iryazen nnes.
1SA 31:1 Mmenɣen Ifilisṭiniyyen ak-d Israil. Iryazen n Israil arewřen zzat i wudem n Ifilisṭiniyyen uca wḍan d imettan x temmurt n idurar n Jilbuɛa.
1SA 31:2 Ifilisṭiniyyen ḍfaren Cawul d arraw nnes břa qeṭṭu uca Ifilisṭiniyyen nɣin Yunatan d Abinadab d Malkicuɛa, arraw n Cawul.
1SA 31:3 Idweř umenɣi ak-d Cawul iwɛar. Imjebbaden, iryazen s řqews, ufin t u netta tuɣa itteggʷed aṭṭas zeg imjebbaden [n řqews].
1SA 31:4 [Xenni] inna Cawul i uḥemmař n řesnaḥ nnes: “Suffeɣ-dd ssif nnec, snuqqeb ayi zzayes! Niɣ ad taɣ ad dd-asen inni war ittwaxetnen, maḥend ad ayi ssnuqqben u ad zzayi stehzan.” [Maca] aḥemmař n řesnaḥ nnes war ixs [ad tt igg], maɣar netta tuɣa iggʷed aṭṭas. [Xenni] iksi Cawul ssif uca ijja ixef nnes ad xas iwḍa.
1SA 31:5 Umi aḥemmař n řesnaḥ iẓra, aqa Cawul immut, igga uřa d netta ad iwḍa s yixef nnes x ssif nnes uca immut akides.
1SA 31:6 Ammu i immut Cawul deg wass nni, [imun] ak-d třata n iḥenjiren nnes u ak-d uḥemmař n řesnaḥ nnes [uřa ak-d] marra iryazen nnes.
1SA 31:7 [Umi] ẓrin yeryazen n Israil, inni tuɣa ɣar uɣezdis nneɣni n řewḍa n teɣzurt d inni tuɣa x ujemmaḍ n L’Urdun, aqa iryazen n Israil arewřen u aqa Cawul d třata n iḥenjiren nnes ttwanɣen, semḥen nitni di tneddam nsen uca arewřen. [Řexdenni] usin-dd Ifilisṭiniyyen uca dewřen zeddɣen daysent.
1SA 31:8 Tiwecca nnes, umi dd-usin Ifilisṭiniyyen, ḥima ad keccḍen inni ittwanɣen, imsar, aqa ufin Cawul d třata n iḥenjiren nnes, inni tuɣa iwḍan x wedrar n Jilbuɛa.
1SA 31:9 Nitni qessen as azeǧif, ssarxun as řesnaḥ uca ssekken [ireqqasen] di temmurt n Ifilisṭiniyyen, ḥima ad ssiwḍen řexbar aṣebḥan ɣar taddart n řexyařat n l’aṣnam nsen u jar řgens.
1SA 31:10 Řesnaḥ n Cawul ssarsen t di taddart [n zzawect] n ‘Ɛactarutin’, u řxecbet nnes uyřen tt ɣar řḥiḍ n Bayt-Can.
1SA 31:11 [Umi] imezdaɣ n Yabic-Jilɛad sřan min ggin Ifilisṭiniyyen di Cawul,
1SA 31:12 kkaren marra iryazen imeḥḍen, uyuren ǧiřet tmun uca ksin řxecbet n Cawul d řxecbat n iḥenjiren nnes zi řḥiḍ n Bayt-Can uca iwḍen ɣar Yabic uca sscemḍen tent dinni.
1SA 31:13 Xenni ksin iɣsan nsen, neḍřen ten sadu tacejjart n tmarist n Yabic uca ẓummen sebɛa n wussan.
2SA 1:1 Imsar awarni i řmewt n Cawul, [umi] dd-iɛqeb Dawud zi řeɣřeb x ayt n Ɛamaliq, iqqim Dawud tnayen n wussan di Ṣiqlaɣ.
2SA 1:2 [Xenni] imsar deg wass wiss třata, aqa da, yusa-dd ijj n weryaz zi řmargeḥ n řɛeskar n Cawul s warruḍ icarreg u s ucař x uzeǧif nnes. [Umi] dd-yiweḍ netta ɣar Dawud, iwḍa ɣar temmurt, yuḍar [as].
2SA 1:3 Dawud inna as: “Manis i dd-tusid cek?” Netta yarra-dd xas: “Necc ssnejmeɣ-dd ixef inu zi řmargeḥ n řɛeskar n Israil.”
2SA 1:4 Dawud inna as: “Min [din] d řexbar? Ini ayi t!” Netta yarra-dd xas: “Řgens yarweř zeg umenɣi u aṭṭas n řgens i wḍan, mmuten. Uřa d Cawul d mmis Yunatan mmuten.”
2SA 1:5 Dawud inna i uḥudri nni d as dd-yiwyen řexbar: “Mammec teggid tessned, belli Cawul d mmis Yunatan mmuten?”
2SA 1:6 [Xenni] inna uḥudri i d as dd-yiwyen řexbar: “Necc usiɣ-dd amenni waha ɣar idurar n Jilbuɛa uca ẓriɣ mammec isenned Cawul x lansa nnes u ikarruten [n umenɣi] d imnayen inni xasen inyin ḍeffaren t břa qeṭṭu.
2SA 1:7 Netta, am dd-inneqřeb, iẓra ayi, iřaɣa ayi-dd u necc nniɣ as: ‘Aqa-yi da!’
2SA 1:8 Netta inna ayi: ‘Min teɛnid cek?’ Necc arriɣ-dd xas: ‘Necc zeg ayt n Ɛamaliq.’
2SA 1:9 [Xenni] inna ayi netta: ‘As-dd ɣari, neɣ ayi, maɣar necc teřqef ayi tuccent, maca [waxxa amenni] tudart aqa-tt dayi.’
2SA 1:10 [Řexdenni] necc uyureɣ u nɣiɣ t, maɣar necc ssneɣ, aqa war ittɣimi iddar awarni i uweṭṭu nnes. [Xenni] ksiɣ ttaj [n weɛzař] nni x uzeǧif nnes d tmeqyast i tuɣa ɣares deg uɣiř, iwyeɣ ten-dd [řexxu] da ɣar sidi inu.”
2SA 1:11 [Řexdenni] iṭṭef Dawud arruḍ nnes, icarreg i-t. [Ammu i tt ggin] uřa d marra iryazen i tuɣa ɣares iǧan.
2SA 1:12 Nitni wtin agejdur, run u ẓummen ař tameddit x Cawul, x mmis Yunatan, x řgens n SIDI u x taddart n Israil, minzi wḍan s ssif.
2SA 1:13 [Xenni] inna Dawud i uḥudri nni tuɣa i d as-dd-yiwyen řexbar: “Zi manis [dd-tusid] cek?” Netta inna as: “Necc d mmis n ijj n ubarrani, n ijj n weryaz zeg ayt n Ɛamaliq.”
2SA 1:14 Dawud inna as: “Mammec teggid, cek war teggʷided ca ad tesswiẓẓḍed s ufus ḥima ad tareddǧed amedhun n SIDI?”
2SA 1:15 [Xas] uca iřaɣa-dd Dawud x ijjen zeg imsexxaren inna: “Qarreb-dd, ḥeyyeḥ xas!” U netta iḥeyyeḥ xas ařami t inɣa.
2SA 1:16 Dawud inna as: “Idammen nnec [ad iřin] x uzeǧif nnec, maɣar aqemmum nnec iched xak umi tennid: ‘Necc nɣiɣ amedhun n SIDI.’”
2SA 1:17 Iɣennej Dawud izři-ya n wecḍan x Cawul u x mmis Yunatan.
2SA 1:18 Netta inna: “Ad řemden ayt n Yahuda [Izři n] Řqews.” Xzar, yura deg Wedlis n Umsegged.
2SA 1:19 “Talwizt n Israil ittwaneɣ x řegɛudi nnec. Mammec wḍan ayt n bu-teɣruḍt!
2SA 1:20 War tt ttḥajam di Jat, war ttsiwḍem řexbar deg ibriden n Acqalun, maḥend yessis n Ifilisṭiniyyen war farrḥent, maḥend yessis n yinni war ittwaxetnen war ssřiwřiwent.
2SA 1:21 A idurar n Jilbuɛa, war xawem ittiři nnda niɣ anẓar, war xawem ttiřin iyyaren maḥend ad zzaysen ttwakksent tiwhibin n usgeɛɛed, maɣar din ittwabeqqeḍ tseddart n ayt n bu-teɣruḍt s řɛar, taseddart n Cawul, axmi netta war iǧi d amedhun s zzect.
2SA 1:22 Zeg idammen n yinni ittwanɣen, zi tadunt n ayt n bu-teɣruḍt war d imniɛ řqews n Yunatan, u ssif n Cawul war dd-iɛqib baṭeř.
2SA 1:23 Cawul d Yunatan ttwaɛizzen d iɣřan ɣar iwdan di tudart nsen, u di řmewt nsen war mmsebḍin. Nitni tuɣa aten fsusen x igidaren d jehden x wayraden.
2SA 1:24 A yessis n Israil, runt x Cawul, wenni kennint issyarḍen s uzeggʷaɣ, s řeqcuɛ iɣřan, d wenni iggin talwizt n wureɣ x warruḍ nkent.
2SA 1:25 Mammec i wḍan ayt n bu-teɣruḍt di řwesṭ n umenɣi! A, Yunatan, tettwanɣed x řegɛudi nnec.
2SA 1:26 Di ssibbet nnec ttwaḥṣareɣ, a uma Yunatan! Cek tuɣa tᵉttwaɛizzed ɣari aṭṭas. Tuɣa tayri nnec ɣari d ssar ktar x tayri n temɣarin.
2SA 1:27 Mammec wḍan ayt n bu-teɣruḍt, mammec weddaren řesnaḥ n umenɣi!”
2SA 2:1 Awarni uya imsar, aqa Dawud isseqsa SIDI, inna: “Ma ad geɛɛdeɣ ɣar icten zi tneddam n Yahuda?” SIDI inna as: “Geɛɛed!” Uca Dawud inna: “Mani ɣa geɛɛdeɣ?” Netta inna: “Ɣar Ḥabrun.”
2SA 2:2 [Xenni] igeɛɛed Dawud ɣar Ḥabrun ak-d tnayen n temɣarin nnes, Axinuɛam zi Yazraɛil, u Abijayil, tamɣart n Nabal zi Karmil.
2SA 2:3 Dawud yarra ad geɛɛden ɛawed iryazen nni tuɣa akides [iǧan], [kuř] aryaz ak-d twacunt nnes, uca nitni uyuren ad zedɣen di tneddam n Ḥabrun.
2SA 2:4 [Awarni uya] usin-dd yeryazen n Yahuda [ɣar Ḥabrun] uca dehnen Dawud dinni d ajeǧid x taddart n Yahuda. [Xenni] usin-dd ḥima ad xebbaren Dawud, nnan: “Iryazen n Yabic di Jilɛad aqa neḍřen Cawul.”
2SA 2:5 [Xenni] issekk Dawud ireqqasen ɣar yeryazen n Yabic di Jilɛad, inna asen: “Ad kenniw ibarek SIDI, minzi kenniw teggim i Cawul, sidi nwem, s tmexsiwt icewwaren uca tneḍřem t.
2SA 2:6 Ad awem isscen SIDI řexxu tamexsiwt [nnes] icewwaren d řaman nnes. Uřa d necc ad awem ggeɣ s tcuni, minzi aqa kenniw teggim aya.
2SA 2:7 Xenni řexxu, jjem ad ttwassjehden ifassen nwem u iřim tmeḥḥdem, maɣar Cawul, sidi nwem, immut. Uřa d taddart n Yahuda tedhen ayi d ajeǧid xasen.”
2SA 2:8 Abnir, mmis n Nir, akumandar n řɛeskar n Cawul, tuɣa yiwi akides Ic-Bucat, mmis n Cawul, ɣar Maḥanayim.
2SA 2:9 Netta igga i-t d ajeǧid x Jilɛad, x Icuriyyen, x Yazraɛil, x Ifrayim, x Binyamin u x marra Israil.
2SA 2:10 Ic-Bucat, mmis n Cawul, tuɣa ɣares arebɛin n iseggʷusa umi idweř netta d ajeǧid x Israil, u netta iḥkem tnayen n iseggʷusa. Mɣir inni n taddart n Yahuda bedden ak-d Dawud.
2SA 2:11 Řqedd n wussan i tuɣa Dawud iḥkem di Ḥabrun am ujeǧid x taddart n Yahuda, tuɣa sebɛa n iseggʷusa d setta n iyuren.
2SA 2:12 Abnir, mmis n Nir, iffeɣ ak-d imsexxaren n Ic-Bucat, mmis n Cawul, zi Maḥanayim ɣar Jibɛun.
2SA 2:13 Uřa d Yuwab, mmis n Ṣaruya, d imsexxaren n Dawud ffɣen uca nitni mmeřqan ak-d wayawya ɣar uyeřmam n Jibɛun. [Dinni] qqimen nitni bedden, ijj ɣar uɣezdis-a n uyeřmam u wenneɣni x ujemmaḍ n uyeřmam.
2SA 2:14 Inna Abnir i Yuwab: “Ejj iḥudriyyen ad kkaren ad mmuɣzřen zzatneɣ.” Yuwab inna: “Nitni ad kkaren!”
2SA 2:15 Nitni kkaren, [xenni] ɛeddun. Aqa ḥesben tenɛac zi Binyamin i Ic-Bucat, mmis n Cawul, u tenɛac zeg imsexxaren n Dawud.
2SA 2:16 Ijj iṭṭef wenneɣni zeg uzeǧif u ijju as s ssif nnes deg uɣezdis n wenneɣni u nitni wḍan s tnayen idsen. S uyenni qqaren as i wemcan nni Ḥalqat-Haṣurim wenni [iǧan] ɣar Jibɛun.
2SA 2:17 Deg wass nni idweř umenɣi iqseḥ aṭṭas. Abnir d yeryazen n Israil ttwaɣellben zzat i wudem n imsexxaren n Dawud.
2SA 2:18 Tuɣa din třata n iḥenjiren n Ṣaruya, nitni d Yuwab d Abicay d Ɛasa’il. Ɛasa’il tuɣa ifsus x iḍaren am yijj zeg iɣayḍen n wezɣar deg iyyar.
2SA 2:19 Ɛasa’il iḍfar Abnir. Umi tuɣa iggur, war iḥeyyed ɣar ḍeffar n Abnir, [řa ɣar] yefus uřa [ɣar] uzeřmaḍ.
2SA 2:20 Uca inneqřeb Abnir, inna: “Ma d cek, Ɛasa’il?” U netta inna: “D necc!”
2SA 2:21 Abnir inna as: “Farɣ [ɣar] yefus niɣ [ɣar] uzeřmaḍ u cebbar deg ijj zeg iḥudriyyen u ksi i yixef nnec arruḍ nnes n řɛeskar!” Ɛasa’il [maca] war ixs ad xas iḥeyyed zi ḍeffar nnes.
2SA 2:22 [Xenni] inna Abnir ɛawed i Ɛasa’il: “Ḥeyyed zi ḍeffar inu. Mayemmi cek i ɣa wteɣ ɣar temmurt? Mammec i ɣa ggeɣ xenni ɛad ad xzareɣ i umac Yuwab di tiṭṭawin?”
2SA 2:23 Netta [maca] yugi ad as iḥeyyed. [Xenni] ijju as Abnir deg uɛeddis s yixef aneggaru n lansa nnes, ařami dd-issuffeɣ fřitca zi ḍeffar. Netta iwḍa din uca immut deg wemcan nni. Imsar belli marra inni dd-yusin ɣar wemcan mani iwḍa u mani immut Ɛasa’il, qqimen bedden.
2SA 2:24 Yuwab d Abicay ḍfaren Abnir. Řami dd-iwḍen nitni ař tawrirt n Amma, tenni zzat i Jiyaḥ, ɣar webrid n řexřa n Jibɛun, teɣři tfuct.
2SA 2:25 Ayt n Binyamin munen awarni Abnir, dewřen d ict n terbiɛt [akides], uca [ammu i qqimen] nitni bedden x tqiccet n ict n tewrirt.
2SA 2:26 Abnir iřaɣa-dd x Yuwab, inna: “Ma ad icc ssif i řebda? Ma war tessined cek, aqa aya ad indeh ɣar ijj n uqeṭṭu d amerzag? Ař meřmi [ɛad] war teqqared i řgens [nnec,] ḥima ad iɛqeb zeg weḍfar n aytmatsen?”
2SA 2:27 Yuwab inna: “[S tidett am] iddar AREBBI, mařa cek war tessiwřed [x ijj n umuɣzeř], xenni ad yiři řgens issbedd [zi man aya] ɣar ṣṣbeḥ, iři [kuř] aryaz [ad issbedd] zeg weḍfar n umas!”
2SA 2:28 [Xenni] isuḍ Yuwab deg uyicc n icarri u marra řgens issbedd. Nitni war ḍfaren ɛad Israil uca war mmenɣen ɛad ktar.
2SA 2:29 Abnir d yeryazen nnes cuqen ǧiřet nni marra di Řewḍa, ẓwan L’Urdun, kkin x marra taɣzurt uca iwḍen ɣar Maḥanayim.
2SA 2:30 Uřa d Yuwab iɛqeb-dd zeg weḍfar n Abnir u netta issmun marra řgens. Weddaren tseɛṭac n iryazen n Dawud uřa d Ɛasa’il.
2SA 2:31 Imsexxaren n Dawud [maca] tuɣa wtin [aṭṭas n yeryazen] zeg [ayt n] Binyamin u zeg yeryazen n Abnir. Mmuten teřt-mya u-settin n yeryazen.
2SA 2:32 Nitni ssgeɛɛden Ɛasa’il u neḍřen t deg wenḍeř n babas di Bayt-Laḥm. Yuwab d yeryazen nnes uyuren ǧiřet nni marra u řami iwḍen ɣar Ḥabrun, tenqar-dd xasen tfawt.
2SA 3:1 Idweř ij n umenɣi jar taddart n Cawul d taddart n Dawud i ikkin aṭṭas. Dawud idweř yarenni di jjhed u inni n taddart n Cawul gguren arexxun.
2SA 3:2 Di Ḥabrun ttwarwen-dd i Dawud iḥenjiren. Amenzu nnes Amnun, n Axinuɛam Tayazraɛilit.
2SA 3:3 Wiss tnayen nnes Kil’ab, n Abijayil, tamɣart n Nabal, Akarmali, wiss třata Abcalum, mmis n Maɛka, yeǧis n Talmay, ajeǧid n Jacur,
2SA 3:4 wiss arebɛa Aduniya, mmis n Hajjit, wiss xemsa Cafaṭya, mmis n Abiṭal,
2SA 3:5 u wiss setta Yitraɛam, n Ɛajla, tamɣart n Dawud. Ina ttwarwen-dd ɣar Dawud di Ḥabrun.
2SA 3:6 Min ikka umenɣi jar taddart n Cawul d taddart n Dawud, imsar, aqa Abnir issemɣar tizemmar nnes di taddart n Cawul.
2SA 3:7 Cawul tuɣa ɣares ict n tayya, ttřaɣan as Riṣfa. Nettat tuɣa-tt d yeǧis n Ayya. Uca inna [Ic-Bucat] i Abnir: “Mayemmi tudfed ɣar tayya n baba?”
2SA 3:8 Abnir iffugem x wawařen n Ic-Bucat, inna: “Ma necc d ijj n uzeǧif n weqzin i iqqnen ɣar Yahuda? Ma war iǧi d necc d wenni isscanen [ɛad ař] ass-a tamexsiwt [inu] icewwaren i taddart n Cawul, babac, u i yaytmas u i imeddukkař nnes, ma war iǧi d necc d wenni war cek ijjin ad tewḍid deg ifassen n Dawud? Ma texsed [xenni] ad xafi tɛeyyared ass-a x řmuɛṣiyyet ak-d ict n temɣart?
2SA 3:9 Ejj AREBBI ad igg ta d ta ak-d Abnir u ad dayes yarni ɛad! Am mammec ijjuǧ SIDI i Dawud ammu i zzayes ɣa ggeɣ,
2SA 3:10 umi ɣa sseɛduɣ tageldit n taddart n Cawul uca ad ssmetneɣ řɛarc n Dawud x Israil u x Yahuda, zi Dan ař Bi’r-Sebɛa.”
2SA 3:11 Uca netta war izemmar x temwarrit i Abnir, maɣar netta tuɣa iggʷed zzayes.
2SA 3:12 [Xenni] issekk Abnir ireqqasen di ṭṭweɛ n yixef nnes ɣar Dawud, inna: “Wi [yiřan] tammurt?” Inna [ɛawed]: “Egg akidi řɛahd nnec, xzar, ad ac wceɣ afus ḥima marra Israil ad ɣarek dd-inneqřeb.”
2SA 3:13 U netta inna: “Mliḥ, necc ad ggeɣ ijj n řɛahd akidek, maca mɣir ict n tmesřact ad ac tt ttareɣ. Ad ac iniɣ: ‘Cek war tẓarred udem inu, mɣir mařa cek ad tawyed [da] d amezwaru Mixal, yeǧis n Cawul, xmi dd ɣa tased ḥima ad tẓared udem inu.’”
2SA 3:14 Xenni issekk Dawud ireqqasen ɣar Ic-Bucat, mmis n Cawul, inna: “Ewc ayi-dd tamɣart inu Mixal, tenni i dd-iwyeɣ s mya n řeɛdařeyyat n Ifilisṭiniyyen s wexḍab n tesřit!”
2SA 3:15 Ic-Bucat issekk [ireqqasen] uca ikkes i-tt x weryaz nnes, x Falṭiyil, mmis n Layic.
2SA 3:16 Aryaz nnes yuyur akides ař Baxurim, yuyur ittru awarni as. [Xenni] inna as Abnir: “Uyur, ɛqeb!” Uca iɛqeb netta.
2SA 3:17 Tuɣa issiweř Abnir x imɣaren n Israil, inna: “Aṭṭas zeg wami kenniw texsem Dawud [ad yiři] d ajeǧid xawem.
2SA 3:18 Řexxu ggem t, maɣar SIDI issiweř ak-d Dawud, inna: ‘S ufus n Dawud, amsexxar inu, ad fekkeɣ řgens inu Israil zeg ufus n Ifilisṭiniyyen u zeg ufus n marra řɛedyan nsen.’”
2SA 3:19 Issiweř Abnir uřa deg imezzuɣen n [ayt n] Binyamin. [Xenni] yuyur Abnir ɣar Ḥabrun, ḥima ad issiweř deg imezzuɣen n Dawud x marra min iǧan d lemliḥ di tiṭṭawin n Israil u di tiṭṭawin n taddart n Binyamin.
2SA 3:20 Uca yusa-dd Abnir ɣar Dawud di Ḥabrun. Tuɣa ɛicrin n yeryazen akides. Dawud igga ict n zzardet i Abnir d yeryazen i kides [iǧan].
2SA 3:21 [Xenni] inna Abnir i Dawud: “Necc ad kkareɣ ad ṭṭfeɣ abrid maḥend ad yarweɣ marra Israil ɣar sidi inu, ajeǧid, ḥima nitni ad ggen akidek ijj n řɛahd u cek ad tiřid d ajeǧid x marra min immeẓri řeɛmar nnec.” S uya ijja Dawud Abnir ad yuyur di řehna.
2SA 3:22 Uca xzar, imsexxaren n Dawud d Yuwab ɛeqben-dd zeg ijj n usafar n ukecceḍ. Nitni iwyen akidsen ict n tkeccaḍt d tameqqrant. Abnir tuɣa war iǧi ɛad ɣar Dawud di Ḥabrun, maɣar [Dawud] tuɣa ijja i-t ad yuyur di řehna.
2SA 3:23 [Řami] dd-yiweḍ Yuwab d marra řɛeskar nni ɣares, ɛawden i Yuwab, nnan: “Abnir, mmis n Nir, yusa-dd ɣar ujeǧid u netta ijja i-t ad yuyur uca [xenni] yuyur [Abnir] di řehna.”
2SA 3:24 [Xenni] yuyur Yuwab ɣar ujeǧid, inna as: “Min teggid? Aqa Abnir yusa-dd ɣarek. Mayemmi i t tessekked uca [xenni] yuyur netta amenni waha?
2SA 3:25 Cek tessned Abnir, mmis n Nir. Netta yusa-dd waha ḥima ad cek icmet u ḥima ad issen x wuffuɣ nnec [ɣar umenɣi] u x weɛqab nnec u x marra min texsed ad tegged.”
2SA 3:26 Yuwab iffeɣ zi ɣar Dawud uca issekk ireqqasen awarni i Abnir inni t-i-dd-yarrin ad idweř zeg wanu n Sira. [Maca] Dawud war issin walu x man aya.
2SA 3:27 [Umi] dd-iɛqeb Abnir ɣar Ḥabrun, indeh i-t Yuwab ɣar uɣezdis di řwesṭ n tewwart [n tendint] maḥend ad kides issiweř s řhudnet uca [xenni] ijju t din deg uɛeddis, ařami immut, di ssibbet [n wexřaf] n idammen n umas Ɛasa’il.
2SA 3:28 [Umi] isřa Dawud manawenni awarni as, inna: “Necc d tgeldit inu d afurri zzat i SIDI i řebda x idammen n Abnir, mmis n Nir.
2SA 3:29 Ejj i-ten ad iřin x uzeǧif n Yuwab u x marra taddart n babas. Ejj taddart n Yuwab war d as ineqqeṣ ɛemmarṣ ca n ijj ad dayes yiři useyyeř, niɣ wenni di iǧa řbarṣ, niɣ wenni iṭṭfen deg umekkuk n uxeyyaḍ, niɣ wenni iwḍan s ssif, niɣ wenni ittxeṣṣan aɣrum!”
2SA 3:30 Yuwab d umas Abicay nɣin Abnir, minzi netta tuɣa inɣa umatsen Ɛasa’il deg umenɣi ɣar Jibɛun.
2SA 3:31 [Maca] Dawud inna i Yuwab u i marra řgens nni tuɣa ɣares iǧan: “Carrgem arruḍ nwem, yarḍem arruḍ n wecḍan uca [uyurem] zzat i [řmeḥmeř n] Abnir [am] teccatem agejdur!” Ajeǧid Dawud [simant nnes] yuyur ɣar ḍeffar n řmeḥmeř.
2SA 3:32 [Řami] neḍřen Abnir di Ḥabrun, issgeɛɛed ujeǧid tmijja nnes, iru ɣar wenḍeř n Abnir uřa d řgens iru marra.
2SA 3:33 Ajeǧid issgeɛɛed ict n ucetci n imettan i Abnir, inna: “Ma immut Abnir am immut ijj n ubuhaři?
2SA 3:34 Ifassen nnec tuɣa war carfen u iḍaren nnec tuɣa war qeyyden s ssnaseř n nnḥas, maca cek tewḍid am mammec iwḍa [bnadem] sadu ufus n ayt n řmuɛṣiyyet.” [Řexdenni] yarni řgens marra ɛad deg imeṭṭawen.
2SA 3:35 Marra řgens yusa-dd ɣar Dawud ḥima ad xas ziyyaren ad icc aɣrum am tuɣa ɛad d aziř. [Maca] Dawud ijjuǧ, inna: “Ejj AREBBI ad ayi igg ta d ta uca ad dayes yarni ɛad, mařa necc cciɣ ca n weɣrum niɣ ca nneɣni qbeř ma ad teɣři tfuct!”
2SA 3:36 man aya idweř ittwassen ɣar marra řgens uca tuɣa d man aya d lemliḥ di tiṭṭawin nsen, am mammec tuɣa marra min igga ujeǧid d lemliḥ di tiṭṭawin n marra řgens.
2SA 3:37 Marra řgens d marra Israil ssnen deg wass nni, aqa war dd-yekki zeg ujeǧid maḥend ad nɣen Abnir, mmis n Nir.
2SA 3:38 Inna ujeǧid i imsexxaren nnes: “Ma war tessinem kenniw, aqa ass-a iwḍa ijj n řḥakem, [wah,] ijj n weryaz d ameqqran di Israil?
2SA 3:39 Ass-a ḍeɛfeɣ, [waxxa] necc ttwadehneɣ d ajeǧid. Iryazen-a, arraw n Ṣaruya, qesḥen xafi. SIDI ad ixeǧeṣ aɛeffan tuɛeffna nnes nni igga.”
2SA 4:1 [Umi] isřa mmis n Cawul, aqa Abnir immut di Ḥabrun, dewřen ifassen nnes ḍeɛfen u marra Israil innexřeɛ.
2SA 4:2 Mmis n Cawul tuɣa ɣares tnayen n yeryazen [jar imsexxaren nnes], inni [iǧan d] řqebṭanat n bandiyyat. Ijjen qqaren as Baɛna u wenneɣni Rakab, tuɣa aten d iḥenjiren n Rimmun, Abi’ruti, zeg ayt n Binyamin, maɣar uřa d Biɛrut ittwaḥseb-dd ɣar Binyamin.
2SA 4:3 Ibiɛrutiyyen arewřen ɣar Jattayim uca qqimen zeddɣen dinni ař ass-a am ibarraniyyen.
2SA 4:4 Yunatan, mmis n Cawul, tuɣa ɣares ijj n mmis nni tuɣa iqarrmen zi tnayen n iḍaren. Netta tuɣa ɣares xemsa n iseggʷusa umi dd-yusa řexbar x Cawul d Yunatan zi Yazraɛil. Tenni t isseymen tuɣa tᵉṭṭef i-t uca tarweř. Aqa deg uqeǧeq n tarewřa, imsar, netta iwḍa, idweř iqarrem. Qqaren as Mafibucat.
2SA 4:5 Rakab d Baɛna, iḥenjiren n Rimmun, Abiɛruti, ṭṭfen abrid uca usin-dd di ṭṭḥa n uziř ɣar taddart n Ic-Bucat. Netta tuɣa izzeř di qama di tmeddit.
2SA 4:6 Xzar, nitni udfen ɣar daxeř di taddart axmi tuɣa nwan ad ksin irden, uca ssnuqqben t deg uɛeddis. Rakab d umas Baɛna xtuttřen.
2SA 4:7 Nitni udfen ɣar taddart umi t tuɣa izzeř di qama nnes deg wexxam n yiḍeṣ nnes, uca ssnuqben t, nɣin t uca qessen as azeǧif. [Xenni] ksin azeǧif nnes [akidsen] uca uyuren ǧiřet tmun, kkin abrid n Řewḍa.
2SA 4:8 Nitni iwyen azeǧif n Ic-Bucat ɣar Dawud ɣar Ḥabrun, nnan i ujeǧid: “Xzar, azeǧif n Ic-Bucat, mmis n Cawul, řeɛdu nnec, wenni tuɣa yarezzun buḥbeř nnec. Aqa ass-a SIDI ixřef i sidi inu ajeǧid zi Cawul d zzariɛet nnes.”
2SA 4:9 [Maca] Dawud yarra-dd x Rakab d umas Baɛna, iḥenjiren n Rimmun, Abiɛruti, inna asen: “[S tidett am] iddar SIDI, wenni ifekken řeɛmar inu zi marra řeḥṣaret!
2SA 4:10 Aqa wenni d ayi dd-yiwyen řexbar uca inna: ‘Xẓar, Cawul immut!’, tuɣa ittɣiř as di tiṭṭawin nnes aqa netta am yijjen i dd-yiwyen řexbar aṣebḥan, [maca] necc ṭṭfeɣ t uca nɣiɣ t di Ṣiqlaɣ, waxxa netta [tuɣa iraja] ad as wceɣ řmunet i řexbar aṣebḥan.
2SA 4:11 Mecḥař ɛad [řexxu] iryazen iɛeffanen inni inɣin ijj n weryaz d amsegged di taddart nnes x qama nnes! Xenni řexxu, ma necc war xeǧfeɣ xenni zzaywem idammen nnes u ad kenniw mḥiɣ zi temmurt?”
2SA 4:12 [Xenni] yumur Dawud imsexxaren [nnes] u nitni nɣin ten. Qessen asen ifassen d iḍaren uca uyřen ten ɣar uyeřmam n Ḥabrun. Azeǧif n Ic-Bucat, [maca] ksin t nitni, neḍřen t deg wenḍeř n Abnir di Ḥabrun.
2SA 5:1 Marra tiqebbař n Israil usint-i-dd ɣar Dawud ɣar Ḥabrun, ssiwřent, nnant: “Xzar, neccin d iɣussan d weysum nnec.
2SA 5:2 Iḍennaḍ uřa d fariḍennaḍ umi tuɣa Cawul d ajeǧid xaneɣ, tuɣa d cek i dd-issuffɣen Israil [ɣar umenɣi] u tejjid i-t-i-dd ad idweř. Ɛawed inna ac SIDI: ‘Cek ad tarewsed řgens inu Israil u cek ad tiřid d řḥakem x Israil.’”
2SA 5:3 [Xenni] usin-dd marra imɣaren n Israil ɣar ujeǧid di Ḥabrun u ajeǧid Dawud igga ijj n řɛahd akidsen di Ḥabrun zzat i wudem n SIDI. Nitni dehnen Dawud d ajeǧid x Israil.
2SA 5:4 Tuɣa ɣar Dawud třatin n iseggʷusa umi idweř netta d ajeǧid. Netta iḥkem arebɛin n iseggʷusa.
2SA 5:5 Di Ḥabrun iḥkem x Yahuda sebɛa n iseggʷusa d setta n iyuren u di Urcalim iḥkem třata u-třatin n iseggʷusa x marra Israil d Yahuda.
2SA 5:6 Ajeǧid iffeɣ ak-d yeryazen nnes ɣar Urcalim, [ḥima ad immneɣ] ak-d ayt n Iyabusiyyen, imezdaɣ n temmurt. Ssiwřen ak-d Dawud, nnan: “Cek war tᵉttidfed ca da, maɣar idarɣařen d iqiḍaren ad cek ḥṣaren, ad inin: ‘Dawud war da ittidef ca.’”
2SA 5:7 Dawud iḥewwes lburj n Ṣihyun, d wenni d tandint n Dawud.
2SA 5:8 Deg wass nni inna Dawud: “Kur ijj i ɣa iwten ijj n Uyabusi, ejj-i-t ad t immenḍar deg waman [issizzřen aṭṭas]. Iqidaren d idarɣařen icarreh i-ten řeɛmar n Dawud.” X uya qqaren: “Ijj n udarɣař d ijj n uqidar war dd-ttidfen ɣar taddart.”
2SA 5:9 Dawud iqqim izdeɣ di lqelɛa uca igga as: ‘Tandint n Dawud’. Ibna Dawud deg wenneḍ n lburj uřa ɣar daxeř nnes.
2SA 5:10 Dawud idweř yarenni di řemɣaret, maɣar SIDI, AREBBI n řɛeskarat, [tuɣa-t] akides.
2SA 5:11 Ḥiram, ajeǧid n Ṣur, issekk ireqqasen ɣar Dawud ak-d akeccuḍ n [tcejjart n] tengelt d ineqqacen n ukeccuḍ d ineqqacen n weẓru n řḥiḍ. Nitni ssbedden ict n taddart i Dawud.
2SA 5:12 Dawud issen, aqa SIDI tuɣa igga i-t d ajeǧid x Israil u tuɣa issgeɛɛed tageldit nnes di ṭṭweɛ n řgens nnes Israil.
2SA 5:13 Awarni twasit nnes zi Ḥabrun tuɣa Dawud yarenni tiyya d temɣarin i yixef nnes zi Urcalim u ttwarwen as-dd i Dawud ɛad iḥenjiren d tḥenjirin.
2SA 5:14 Ina d ismawen n iḥenjiren i d as dd-ittwarwen di Urcalim: Cammuɛ, Cubab, Natan, Suliman,
2SA 5:15 Yibḥar, Ilicuɛ, Nafaj, Yafiɛ,
2SA 5:16 Alicamaɛ, Alyadaɛ d Ilifalaṭ.
2SA 5:17 [Umi] sřin Ifilisṭiniyyen, aqa dehnen Dawud d ajeǧid x Israil, geɛɛden marra Ifilisṭiniyyen ḥima ad arzun x Dawud. Dawud isřa [x man aya] u netta ihwa ɣar lqelɛa.
2SA 5:18 Ifilisṭiniyyen usin-dd uca bezzɛen ixef nsen di teɣzurt n Irafawiyyen.
2SA 5:19 [Xenni] isseqsa Dawud SIDI, inna: “Ma ad geɛɛdeɣ ḍidd i Ifilisṭiniyyen? Ma ad ten tegged deg ufus inu?” SIDI inna i Dawud: “Geɛɛed, maɣar Necc nican ad ggeɣ Ifilisṭiniyyen deg ufus nnec!”
2SA 5:20 U yiweḍ Dawud ɣar Baɛl-Faraṣim. Dinni iwta Dawud Ifilisṭiniyyen, inna: “SIDI icuq zzat i wudem inu di řɛedyan inu am yict n tareẓẓit n waman.” X uya igga as i wemcan nni Baɛl-Faraṣim.
2SA 5:21 Ifilisṭiniyyen jjin dinni řexyařat n l’aṣnam nsen u Dawud d yeryazen nnes ksin ten akidsen.
2SA 5:22 Geɛɛden Ifilisṭiniyyen ict n twařa nneɣnit u bezzɛen ixef nsen di teɣzurt n Irafawiyyen.
2SA 5:23 Dawud isseqsa SIDI u Netta inna: “War ttgeɛɛid ca ḍidd nsen, maca ekk asen-dd ɣar ḍeffar, ad ɣarsen dd-tased zi jjihet n tcejjura n umetti.
2SA 5:24 Xmi ɣa tesřed i tecři n iṣuraf di tqiccat n tcejjura n umetti, [xenni] ffeɣ, thejmed, maɣar SIDI ad ac izwar zzat i wudem nnec, ḥima ad iwwet řɛeskar n Ifilisṭiniyyen.”
2SA 5:25 Dawud igga am mammec d as yumur SIDI u netta iwta Ifilisṭiniyyen zi Jibɛa ař mani ɣa tawḍed ɣar Jazar.
2SA 6:1 Dawud issmun twařa nneɣnit marra [iɛeskariyyen] ittwafarzen di Israil, třatin-ařef [n yeryazen].
2SA 6:2 Uca ikkar Dawud, iffeɣ ak-d marra řgens i ɣares [iǧan] zi Baɛli-Yahuda ḥima ad ssenni issgeɛɛed Ttabut n SIDI, [Ttabut] i x ittwabarreḥ s Yisem, s Isem n SIDI n řɛeskarat, wenni ittɣiman [x] ikiruben.
2SA 6:3 Nitni nedhen Ttabut n SIDI x ijj n ukarru n jdid. Nitni iwyen tt-i-dd zi taddart n Abinadab tenni ibedden x ict n teɛrurt. Ɛuzza d Axiyu, iḥenjiren n Abinadab, nedhen akarru n jdid.
2SA 6:4 Nitni iwyen t-i-dd zi taddart n Abinadab i tuɣa ibedden x ict n teɛrurt, uca [uyuren] ak-d Ttabut n SIDI. Axiyu yuyur ɣar zzat i Ttabut.
2SA 6:5 Dawud d marra taddart n Israil uraren zzat i wudem n SIDI s ɛřam kuř dduzan n ǧɣa zeg ukeccuḍ n [tcejjart n] umerzi, s řgambriyat d lharpat d ibendiren d nnaqusat d teǧunin n wuzzař.
2SA 6:6 [Umi] iwḍen ɣar unedrar n Naxun, isswiẓẓeḍ Ɛuzza [afus nnes] ɣar Ttabut n AREBBI uca iṭṭef i-tt, minzi nderfen ifunasen.
2SA 6:7 [Xenni] yarɣa weɣḍab n SIDI x Ɛuzza uca iwta i-t AREBBI din x uxeṭṭu-ya. Netta immut din ɣar Ttabut n SIDI.
2SA 6:8 Yiweḍ ssem ɣar wuř n Dawud, aqa SIDI tuɣa isɛar ammu x Ɛuzza, uca iřaɣa as i wemcan nni Fariṣ-Ɛuzza ař ass-a.
2SA 6:9 Deg wass nni teřqef Dawud tiggʷudi zi SIDI, inna: “Mammec i ɣa yegg ad ɣari dd-tas Ttabut n SIDI?”
2SA 6:10 [S uyenni] Dawud war ixs ad yejj ad ɣares dd-awyen Ttabut n SIDI di tendint n Dawud. Dawud ijja i-tt ad taggʷej ɣar taddart n Ɛubid-Idum, Ajitti.
2SA 6:11 Tekka Ttabut n SIDI třata n iyuren di taddart n Ɛubid-Idum, Ajitti, uca SIDI ibarek Ɛubid-Idum d marra taddart nnes.
2SA 6:12 [Xenni] xebbaren i ujeǧid Dawud, nnan: “SIDI aqa ibarek taddart n Ɛubid-Idum d marra min iǧan nnes, di ṭṭweɛ n Ttabut n AREBBI.” [Xenni] yuyur Dawud [din], issgeɛɛed Ttabut n AREBBI s řefraḥet zi taddart n Ɛubid-Idum ɣar tendint n Dawud.
2SA 6:13 Řami uyuren inni yarebbun Ttabut n SIDI setta n iṣuraf, imsar, aqa iqeddem [Dawud] ijj n ufunas d [ijj n uɛejmi imesřen] [d tɣarṣt].
2SA 6:14 Dawud icḍeḥ s marra tizemmar [nnes] zzat i wudem n SIDI. Tuɣa Dawud yarḍ ijj n upalṭu [n ukehhan] n řeqṭen.
2SA 6:15 Dawud d marra taddart n Israil iwyen Ttabut n SIDI s usřiwřew u s řḥess n usuḍi deg uyicc n icarri ɣar sennej.
2SA 6:16 Řami dd-tiweḍ Ttabut n SIDI ɣar tendint n Dawud, imsar, aqa Mixal, yeǧis n Cawul, texzar-dd zi řkazi. [Umi] teẓra nettat mammec ineggez d iceṭṭeḥ ujeǧid Dawud zzat i wudem n SIDI, tesseḥqar i-t deg wuř nnes.
2SA 6:17 Arbun Ttabut n SIDI ɣar daxeř uca ssarsen tt deg wemcan nnes di řwesṭ n uqiḍun nni tuɣa i d as icedd Dawud uca Dawud issgeɛɛed tiɣarṣa n wecmaḍ zzat i wudem n SIDI, uřa d tiɣarṣa n řehna.
2SA 6:18 [Umi] ikemmeř Dawud zeg usgeɛɛed n tɣarṣa n wecmaḍ d tɣarṣa n řehna, ibarek řgens deg Yisem n SIDI n řɛeskarat.
2SA 6:19 Netta ibḍa x marra řgens, x marra řɣaci n Israil, x yeryazen d temɣarin, i kuř ijj iwca as ict n txebbazt n weɣrum, ijj n uřeqquz [n weysum] n ufunas d ijj n weɣrum n zzbib. [Xenni] yuyur řgens marra, [kuř] aryaz ɣar taddart nnes.
2SA 6:20 Yareggʷeḥ Dawud, ḥima ad ibarek taddart nnes. Teffeɣ-dd ɣares Mixal, yeǧis n Cawul, tenna as: “Mammec igga ujeǧid n Israil ass-a ccan d ameqqran i ixef nnes, umi iɛarra netta ixef nnes zzat i tiṭṭawin n tiyya n imsexxaren nnes am mammec iɛarra ca n yijjen zeg inni war isekkwin?”
2SA 6:21 Dawud yarra-dd x Mixal: “[Necc ggiɣ t] zzat i wudem n SIDI wenni d ayi ifarzen x babam d marra taddart nnes, ḥima ad ayi igg d řḥakem x řgens n SIDI, x Israil, aqa zzat i wudem n SIDI i ceṭṭḥeɣ s řefraḥet.
2SA 6:22 D ameẓyan ɛad i ɣa dewřeɣ. Necc ad iřiɣ d amuqřiř di tiṭṭawin inu. Ɣar tiyya i x tessiwřed cem, ɣarsent i ɣa ṭṭfeɣ ccan.”
2SA 6:23 Mixal, yeǧis n Cawul, teqqim břa aḥenjir ař ass n řmewt nnes.
2SA 7:1 Umi iqqim ujeǧid di taddart nnes u SIDI tuɣa igga as řehna zi marra řɛedyan nnes i d as dd-innḍen, imsar,
2SA 7:2 aqa inna ujeǧid i unabi Natan: “Xzar, necc zeddɣeɣ deg ict n taddart n ukeccuḍ n [tcejjart n] tengelt, [maca] Ttabut n AREBBI třeḥḥef sadu tajartiřt [n uqiḍun].”
2SA 7:3 Natan inna i ujeǧid: “Uyur waha, egg marra min ɣarek deg wuř nnec, maɣar SIDI akidek.”
2SA 7:4 Di ǧiřet nni imsar aqa iffeɣ wawař n SIDI ɣar Natan, inna:
2SA 7:5 “Uyur, ini i umsexxar inu, i Dawud: ‘Ammu i iqqar SIDI: Ma texsed ad ayi tebnid ict n taddart, maḥend ad dayes zedɣeɣ?
2SA 7:6 Ɛemmarṣ war zdiɣeɣ deg ict n taddart zeg wass umi dd-ssgeɛɛdeɣ ayt n Israil zi Miṣra ař ass-a, [maca] durryeɣ deg ijj n Uqiḍun, deg ict n Tzeddiɣt.
2SA 7:7 Mani ma uyureɣ ak-d ayt n Israil, ma Necc ssiwřeɣ ɛemmarṣ uřa s yijj n wawař i yict zi tqebbař n Israil tinni i umureɣ ad arwesen řgens inu Israil, u nniɣ: Mayemmi war d ayi tebnim ict n Taddart n ukeccuḍ n [tcejjart n] tengelt?
2SA 7:8 Xenni řexxu, ammu i ittxeṣṣa ad tinid i umsexxar inu, i Dawud: Ammu i iqqar SIDI n řɛeskarat: Necc iwyeɣ-dd cek zi řkuri, zi ḍeffar n wuǧi, maḥend ad tiřid d řḥakem x řgens inu, x Israil.
2SA 7:9 Mani ma tuyured, ǧiɣ Necc akidek u qḍiɣ x marra řɛedyan nnec zzat i wudem nnec. Necc ggiɣ ac ijj n isem d ameqqran am yismawen n imeqqranen nni [iǧan] x temmurt.
2SA 7:10 Necc neyyceɣ ijj n wemcan i řgens inu, i Israil, uca ẓẓuɣ t [din], maḥend ad izdeɣ deg wemcan [nnes], war ittwanhezzi ɛad u war t ḥeṣṣaren ɛad ayt n řmuɛṣiyyet am deg umezwaru,
2SA 7:11 zeg wass nni ggiɣ Necc řquḍat x řgens inu Israil. Necc wciɣ ac řehna zi marra řɛedyan nnec uca [řexxu] ad ac isscen SIDI, aqa SIDI ad ac igg ict n taddart.
2SA 7:12 Řami ttwakemmřen wussan nnec uca ad tegged ad tareyyḥed jar řejdud nnec, ad dd-ssekkareɣ zzariɛet nnec i dd-itteffɣen zi daxeř nnec u Necc ad ssmetneɣ tagelda nnes.
2SA 7:13 Netta ad ibna ict n taddart i Yisem inu u Necc ad ssmetneɣ řɛarc n tagelda nnes i řebda.
2SA 7:14 Necc ad iřiɣ d Babas i netta u netta ad yiři i Necc d mmi. Mařa netta iffaryeḍ, ad t arebbiɣ s weɛmud d teyyita n tarwa n bnadem.
2SA 7:15 Tamexsiwt inu icewwaren war zzayes tᵉttxennes am mammec ttessxenseɣ tt x Cawul i x tt kkseɣ zzat i tiṭṭawin nnec.
2SA 7:16 Taddart nnec d tgelda nnec ad ttwassmetnent zzat i wudem nnec i řebda, řɛarc nnec ad iqqim ibedd i řebda.’”
2SA 7:17 Natan issiweř ɣar Dawud [nican] ɛlaḥsab awařen-a u ɛlaḥsab marra řewḥiy-a.
2SA 7:18 [Xenni] yudef ujeǧid Dawud uca iqqim zzat i wudem n SIDI, inna: “Min ɛniɣ necc, Sidi inu, SIDI, u min teɛna taddart inu aqa Cek tnedhed ayi-dd ař danita?
2SA 7:19 Di tiṭṭawin nnec d man aya [marra] ɛad drus, [a] Sidi inu SIDI, [maca řexxu] tessiwřed ɛad x taddart n umsexxar nnec [deg wussan] iggʷejen [i dd ittasen]. D man aya d taɣuri [d tidett] i bnadem, [a] Sidi inu, SIDI!
2SA 7:20 Min d ac i ɣa yini Dawud ɛad ktar? Cek tessned amsexxar nnec, [a] Sidi inu, SIDI!
2SA 7:21 Di ṭṭweɛ n wawař nnec u ɛlaḥsab uř nnec aqa teggid marra [planu] imɣaren wanita, ḥima ad tessargbed amsexxar nnec.
2SA 7:22 X uya Cek d ameqqran, [a] Sidi inu SIDI, maɣar war [din] iǧi uřa d ijj am Cek u war [din] iǧi uřa d ijj n AREBBI mɣir Cek ɛlaḥsab marra min nesřa s imezzuɣen nneɣ.
2SA 7:23 Man wen [i iǧan] am řgens nnec, am Israil, ayenni n řgens x temmurt i ɣar iraḥ AREBBI ḥima ad t ifdi i Yixef nnes d řgens, u ḥima ad igg i Yixef nnes ijj n Yisem, u ḥima ad awem igg [ict n řxedmet d] tameqqrant uřa d tmegga d timeqqranin i temmurt nnec zzat i wudem n řgens nnec nni tefdid i Yixef nnec zi Miṣra, [zi] řegnus u [zeg] irebbiten nsen.
2SA 7:24 Cek teggid řgens nnec Israil d ijj n řgens i Yixef nnec i řebda. Cek, [a] SIDI, aqa Cek tdewřed d AREBBI i nitni.
2SA 7:25 Xenni řexxu, SIDI AREBBI, ejj awař nni tessiwřed x umsexxar nnec u x taddart nnes ad ibedd i řebda u egg am mammec tessiwřed.
2SA 7:26 Ejj Isem nnec ad ittwassemɣar i řebda, ad inin: ‘SIDI n řɛeskarat ijehden aqa-t d AREBBI x Israil!’, uca iři ad tᵉttwassemten taddart n umsexxar nnec Dawud zzat i wudem nnec.
2SA 7:27 Maɣar Cek, [a] SIDI n řɛeskarat, AREBBI n Israil, aqa tessargbed deg imezzuɣen n umsexxar nnec, tennid: ‘Necc ad ac ssbeddeɣ ict n taddart!’ X uya tusa-dd deg wuř n umsexxar nnec maḥend ad iẓẓaǧ taẓaǧit-a ɣarek.
2SA 7:28 [Xenni] řexxu, [a] Sidi inu, SIDI, Cek d AREBBi nni uca awařen nnec d tidett u Cek tessiwřed s [marra] tcuni-ya ɣar umsexxar nnec.
2SA 7:29 [Xenni] řexxu, mařa tusa ac-dd x řxaḍar, barek taddart n umsexxar nnec, ḥima ad tiři zzat i wudem nnec i řebda, minzi Cek, [a] Sidi inu, SIDI, tessiwřed [aya] u s lbaraka nnec ad tᵉttwabarek taddart n umsexxar nnec i řebda.’”
2SA 8:1 Awarni aya imsar aqa Dawud iɣřeb x Ifilisṭiniyyen uca yarra i-ten sadu afus nnes u Dawud ikkes řeḥkamet zeg ufus n Ifilisṭiniyyen.
2SA 8:2 [Ɛawed] iɣřeb netta x Mu’ab uca iɛbar i-ten s yijj n ufiřu [n řeɛbar] am zzřen di temmurt. Netta iɛbar tnayen n ifiřan [n řeɛbar], ḥima ad ten ineɣ, uřa d ijj n ufiřu imun, ḥima ad ten yejj ddaren. [Ammu] i dewřen ayt n Mu’ab d imsexxaren i Dawud nni ittxeṣṣan ad [as] wcen ljizya.
2SA 8:3 Dawud iɣřeb ɛawed x Hadad-Ɛazar, mmis n Raḥub, ajeǧid n Ṣuba, umi tuɣa dd-iffeɣ wanita ḥima ad ɣares dd-yarr řeḥkamet nnes ɣar yeɣzar [n Lfuraṭ].
2SA 8:4 Dawud ikkes zzayes ařef u sebɛa-mya n imnayen d ɛicrin-ařef n yeryazen x iḍaren, uca iqess Dawud iẓewran n iḍaren n marra [iysan n] ikarruten, [maca] ijja zzayes mya n [iysan n] ikarruten.
2SA 8:5 Yusa-dd Aram zi Dimacq, ḥima ad iwc afus i Hadad-Ɛazar, ajeǧid n Ṣuba, u Dawud iɣřeb x tnayen u-ɛicrin-ařaf n yeryazen n Aram.
2SA 8:6 Dawud igga řɛeskarat [n uḥewwes] jar Iramiyyen n Dimacq u Iramiyyen dewřen d imsexxaren n Dawud inni ittxeṣṣan ad [as] wcen tarzifin. SIDI igga ttasiɛ i Dawud mani ma iruḥ.
2SA 8:7 Dawud iksi tiseddariyin iqesḥen n uɛeskari nni ttwaggent s wureɣ, tinni tuɣa [iǧan] n imsexxaren n Hadad-Ɛazar u yiwyi tent ɣar Urcalim.
2SA 8:8 Iksi Dawud aṭṭas n nnḥas zi Bataḥ u zi Biratay, tineddam n Hadad-Ɛazar.
2SA 8:9 [Umi] Tuɛi, ajeǧid n Ḥamat, isřa aqa Dawud iɣřeb x marra řɛeskar n Hadad-Ɛazar,
2SA 8:10 issekk Tuɛi mmis Yuram ɣar ujeǧid Dawud, ḥima ad isseqsa x umeddur nnes u ḥima ad as ibarek, minzi netta immneɣ akides u iɣřeb xas, maɣar Hadad-Ɛazar tuɣa yarezzu ad immneɣ ak-d Tuɛi řebda. [Netta yiwi akides] deg ufus nnes řeqcuɛ n nnuqart d řeqcuɛ n wureɣ d řeqcuɛ n nnḥas,
2SA 8:11 inni issqeddes ujeǧid Dawud ɛawed i SIDI, [imun] ak-d nnuqart d wureɣ nni tuɣa issqeddes zi marra řegnus nni tuɣa yarra sadu nnes:
2SA 8:12 zi Aram, zi Mu’ab, zeg ayt n Ɛammun, zeg Ifilisṭiniyyen, zi Ɛamaliq uřa zi tkeccaḍt n Hadad-Ɛazar, mmis n Raxub, ajeǧid n Ṣuba.
2SA 8:13 Igga Dawud ɛawed ijj n yisem, umi dd-iɛqeb netta zeg řeɣřeb x Aram di Teɣzurt n Tmeǧaḥt, tmenṭac-ařef [n yeryazen].
2SA 8:14 Netta igga řɛeskarat [n uḥewwes] di Idum. Di marra Idum igga řɛeskarat [n uḥewwes] u marra Idumiyyen dewřen d imsexxaren i Dawud. SIDI igga ttasiɛ i Dawud mani ma iffeɣ netta.
2SA 8:15 Dawud iḥkem x marra Israil u Dawud igga s řḥeqq d tsegda i marra řgens nnes.
2SA 8:16 Yuwab, mmis n Ṣaruya, [tuɣa-t] x řɛeskar u Yahucafaṭ, mmis n Axilud, tuɣa-t d amarir n umezruy.
2SA 8:17 Ṣaduq, mmis n Axiṭub, d Aximalik, mmis n Abyatar, tuɣa aten d ikehhanen u Saraya tuɣa-t d amarir.
2SA 8:18 Banaya, mmis n Yahuyadaɛ, [tuɣa-t x] iɛessasen n arrimet [n ujeǧid] u [x] ireqqasen n tazřa. Iḥenjiren n Dawud [tuɣa aten d] ikehhanen nnes.
2SA 9:1 Dawud inna: “Ma iqqim ɛad ca n yijjen zi taddart n Cawul, ḥima necc ad as ssecneɣ tamexsiwt [inu] icewwaren di ṭṭweɛ n Yunatan?”
2SA 9:2 Tuɣa [din] ijj n umsexxar [ɣar] taddart n Cawul, ttřaɣan as Ṣiba. Řaɣan as-dd ɣar Dawud. Inna as ujeǧid: “Ma cek d Ṣiba?” Netta inna: “D amsexxar nnec.”
2SA 9:3 Ajeǧid inna: “Ma iqqim ɛad ca n ijj zi taddart n Cawul [iddar], ḥima ad as ssecneɣ tamexsiwt icewwaren n AREBBI?” [Xenni] inna Ṣiba i ujeǧid: “Aqa din ɛad ijj n mmis n Yunatan wenni d aneɛḍab zi tnayen n iḍaren.”
2SA 9:4 Inna as ujeǧid: “Mani iǧa netta?” Ṣiba inna as i ujeǧid: “Xzar, netta aqa-t di taddart n Maxir, mmis n Ɛammiyil, di Lu-Dabar.”
2SA 9:5 [Xenni] issekk ujeǧid Dawud din u yiwyi t-i-dd zi taddart n Maxir, mmis n Ɛammiyil di Lu-Dabar.
2SA 9:6 [Umi] Mafibucat, mmis n Yunatan, mmis n Cawul, yudef ɣar Dawud, iwḍa s uɣembub nnes [ɣar temmurt], yuḍar [as]. Dawud inna: “Mafibucat!” Netta inna: “Xzar, aqa da amsexxar nnec.”
2SA 9:7 Dawud inna as: “War tteggʷed, maɣar necc ad ac ssecneɣ tamexsiwt [inu] icewwaren di ṭṭweɛ n babac Yunatan. Necc ad ac arreɣ marra iyyaren n jedd nnec Cawul u cek ad tecced řebda macca ɣar ṭṭabřa inu.”
2SA 9:8 [Xenni] yuḍar [as], inna: “Min iɛna umsexxar nnec ařami cek texzared ɣar ijj n weqzin immuten am mammec ǧiɣ necc?”
2SA 9:9 [Xenni] iřaɣa ujeǧid x Ṣiba, amsexxar n Cawul, inna as: “Marra min iǧan n Cawul d marra taddart nnes, wciɣ t i mmis n sidi nnec.
2SA 9:10 Cek ad as tcarzed tammurt, cek d iḥenjiren nnec d imsexxaren nnec, uca ad as tawyed ṣṣabet nnes, ḥima mmis n sidi nnec ad ɣares yiři weɣrum maḥend ad yecc. Mafibucat, mmis n sidi nnec, ad yecc řebda aɣrum ɣar ṭṭabřa inu.” Ṣiba tuɣa ɣares xemmesṭac n iḥenjiren d ɛicrin n imsexxaren.
2SA 9:11 Ṣiba inna i ujeǧid: “Amsexxar nnec ad igg ɛlaḥsab marra min yumur sidi inu ajeǧid i umsexxar nnes!” [Dawud inna ɛad]: “Mafibucat ad icc ɣar ṭṭabřa inu am yijjen zeg iḥenjiren n ujeǧid.”
2SA 9:12 Mafibucat tuɣa ɣares ijj n mmis ttřaɣan as Mixa. Marra inni tuɣa izeddɣen di taddart n Ṣiba tuɣa aten d imsexxaren n Mafibucat.
2SA 9:13 U Mafibucat tuɣa izeddeɣ di Urcalim, maɣar netta ittett řebda ɣar ṭṭabřa n ujeǧid. Netta tuɣa-t d aneɛḍab zi tnayen n iḍaren.
2SA 10:1 Awarni aya imsar, aqa ajeǧid n ayt n Ɛammun immut. Mmis Ḥanun idweř d ajeǧid deg wemcan nnes.
2SA 10:2 [Xenni] inna Dawud: “Necc xseɣ ad ssecneɣ tamexsiwt icewwaren i Ḥanun, mmis n Naḥac, am mammec i d ayi isscen babas tamexsiwt [nnes] icewwaren.” Dawud issekk [ireqqasen] ḥima ad t iɛezza x [řmewt n] babas s ufus n imsexxaren nnes u imsexxaren n Dawud iwḍen ɣar temmurt n ayt n Ɛammun.
2SA 10:3 [Xenni] nnan řḥukkam n ayt n Ɛammun i sidi nsen Ḥanun: “Ma [ixs] Dawud [s tidett] ad iweqqar babac di tiṭṭawin nnec, umi dd-issekk netta imsexxaren maḥend ad cek ɛezzan? Ma war dd-issekk Dawud imsexxaren nnes ɣarek, ḥima ad arzun di tendint, ad ssmunen řexbar uca [xenni] ad tt arren war teǧi d nettat?”
2SA 10:4 [Xas uca] iṭṭef Ḥanun imsexxaren n Dawud, iḥeff asen azyen zi tmart u iqess asen azyen n warruḍ ař ḍeffar, uca issekk i-ten.
2SA 10:5 [Umi] xebbaren aya i Dawud, issekk asen [ireqqasen], minzi nitni tuɣa ttseḍḥan ixef nsen aṭṭas. Inna ujeǧid: “Qqimem di Ariḥa ař dd ɣa temɣar tmart nwem, xenni ad dd-tdewřem.”
2SA 10:6 [Umi] ẓrin ayt n Ɛammun belli nitni tuɣa ssarzgen ixef nsen ɣar Dawud, ssekken ayt n Ɛammun [ireqqasen] u cran zeg ayt n Aram zi Bayt-Raxub u zeg ayt n Aram zi Ṣuba ɛicrin-ařaf n yeryazen x iḍaren, u zeg ujeǧid n Maɛka ařef n yeryazen u zeg yeryazen n Ṭub tenɛac-ařaf n yeryazen.
2SA 10:7 [Umi] isřa Dawud aya, issekk netta Yuwab s marra řɛeskar nnes, ayt n bu-teɣruḍt.
2SA 10:8 Ayt n Ɛammun ffɣen-dd u sedden ixef nsen i umenɣi ɣar wadaf n tewwart [n tendint], maca ayt n Aram n Ṣuba d Raxub d yeryazen n Ṭub d Maɛka [tuɣa aten] s yixef nsen deg iyyar.
2SA 10:9 [Umi] iẓra Yuwab, aqa amenɣi ixeẓẓar i-ten deg uɣembub ɣar zzat u ɣar ḍeffar, ixḍar netta zi marra inni ittwafarzen [di řɛeskar] n Israil uca issbedd i-ten [i umenɣi] ajemmaḍ n ayt n Aram.
2SA 10:10 Min iqqimen n řgens igga i-ten sadu ufus n umas Abicay, wenni ten issbedden ajemmaḍ n ayt n Ɛammun.
2SA 10:11 Inna netta: “Mařa Aram ijhed xafi, xenni as-dd, fekk ayi! Mařa ayt n Ɛammun jehden xak, [xenni] ad dd-aseɣ ad cek fekkeɣ.
2SA 10:12 Iři d aryaz u ad niři d iryazen di ṭṭweɛ n řgens nneɣ u di ṭṭweɛ n tneddam n AREBBI. Ejj SIDI ad igg min iǧan d lemliḥ di tiṭṭawin nnes.”
2SA 10:13 [Xenni] iqarreb-dd Yuwab d řgens i ɣares iǧan i umenɣi ak-d Aram uca ina ṭṭfen di tarewřa zzat i wudem nnes.
2SA 10:14 [Umi] ẓrin ayt n Ɛammun, aqa ayt n Aram arewřen, ṭṭfen uřa d nitni di tarewřa zzat i wudem n Abicay uca iwḍen ɣar tendint. Yuwab iɛqeb awarni i umenɣi ak-d ayt n Ɛammun uca yiweḍ ɣar Urcalim.
2SA 10:15 [Umi] ẓrin ayt n Aram aqa nitni ttwaɣeřben zzat i wudem n Israil, nnyarwen twařa nneɣnit.
2SA 10:16 Uca Hadad-Ɛazar issekk [ireqqasen], ijja ad dd-asen ayt n Aram inni [izeddɣen] x ujemmaḍ n iɣzar [n Lfuraṭ] uca nitni usin-dd ɣar Ḥilam. Cubak, akumandar n řɛeskar n Hadad-Ɛazar, iffeɣ zzat i wudem nsen.
2SA 10:17 [Umi] ittwanna aya i Dawud, issmun netta marra Israil, iẓwa L’Urdun, yusa-dd ɣar Ḥilam. Ayt n Aram sedden ixef nsen i umenɣi qibač i Dawud u mmenɣen akides.
2SA 10:18 Ayt n Aram arewřen zzat i wudem n Israil u Dawud iqḍa x sebɛa-mya n ikarruten [n umenɣi] d arebɛin-ařef n imnayen n ayt n Aram. [Ɛawed] iwta netta Cubak, akumandar n řɛeskar nsen, ařami immut din.
2SA 10:19 [Umi] ẓrin marra ijeǧiden nni tuɣa ittraḥen ak-d Hadad-Ɛazar, belli aqa nitni twaɣellben zzat i wudem n ayt n Israil, ggin nitni řehna ak-d Israil u sexxaren as. Ayt n Aram ggʷeden ad fekken ayt n Ɛammun twařa nneɣnit.
2SA 11:1 Ɣar ubeddu n useggʷas n jdid, di řweqt i di itteffɣen ijeǧiden [ɣar umenɣi], imsar aqa Dawud issekk Yuwab ak-d yeryazen nnes nni akides [iǧan] d marra Israil. Nitni řebzen ayt n Ɛammun uca nnḍen i Rabba. Maca Dawud simant nnes iqqim di Urcalim.
2SA 11:2 Umi dd-ikkar Dawud ict n twařa di tmeddit zi qama nnes, imsar aqa netta yuyur x tzeqqa [iwaṭan] n tzeddiɣt n ujeǧid. Iẓra ssenni ict n temɣart tessirid ixef nnes. Tamɣart nni dayes aẓri aṭṭas.
2SA 11:3 Dawud issekk [ijj] din maḥend ad isseqsa x temɣart nni. Ittwanna [as]: “Ma war teǧi d Bat-Cabaɛ, yeǧis n Iliɛam, tamɣart n Aḥitti Uriya?”
2SA 11:4 [Xas uca] issekk Dawud ireqqasen, ijja ad tt-i-dd-awyen. Nettat tudef-dd ɣares uca iṭṭeṣ akides. [Awarni řami] tuɣa tᵉttwazidged zi řexmej nnes, teɛqeb ɣar taddart nnes.
2SA 11:5 Tamɣart tuɣa teksi s ddeyset uca tessekk [ijj], tessargeb Dawud, tenna: “Necc ksiɣ s ddeyset.”
2SA 11:6 [Xas uca] issekk Dawud [ict n tebrat] ɣar Yuwab: “Sekk-dd Aḥitti Uriya ɣari!” U Yuwab issekk Uriya ɣar Dawud.
2SA 11:7 [Umi] ɣares-dd yusa Uriya, isseqsa Dawud x mammec iǧa Yuwab u x mammec iǧa řgens u x mammec iggur umenɣi.
2SA 11:8 [Xenni] inna Dawud i Uriya:“ Hwa ɣar taddart nnec uca ssird iḍaren nnec!” Uriya ismeḥ di taddart n ujeǧid u sseḍfaren as [ɛad] ict n tarzeft n ujeǧid.
2SA 11:9 [Maca] Uriya izzeř iṭṭeṣ ɣar tewwart n taddart n ujeǧid ak-d marra imsexxaren n sidi nnes. Netta war ihwi ca ɣar taddart nnes.
2SA 11:10 Xebbaren i Dawud, nnan: “Uriya war ihwi ca ɣar taddart nnes.” [Xas uca] inna Dawud i Uriya: “Ma war dd-tedwiřed zeg usafar? Mayemmi cek war tehwid ɣar taddart nnec?”
2SA 11:11 Uriya yarra-dd x Dawud: “Ttabut d Israil d Yahuda ttɣiman deg iqiḍan u sidi inu Yuwab d imsexxaren n sidi inu wtin iqiḍan nsen deg iyyar yarezmen. Ma [xenni] ad uyureɣ necc ɣar taddart inu, ḥima ad cceɣ, ad sweɣ u ad wḍiɣ ak-d temɣart inu? [S tidett am] teddared cek u iddar řeɛmar nnec, war tteggeɣ aya!”
2SA 11:12 [Xas] uca inna Dawud i Uriya: “Qqim uřa d ass-a ɛad danita. Tiwecca ad cek ssekkeɣ [ɛawed].” Uca [ammu i] iqqim Uriya ass nni d wass i t-i-dd-iḍfaren di Urcalim.
2SA 11:13 Iɛarḍ i-t Dawud uca netta icca, iswa zzat i wudem nnes uca [Dawud] isscar i-t. Ɣar tmeddit [maca] iffeɣ Uriya, ḥima ad izzeř [ɛawed] ɣar imsexxaren n sidi nnes, [maca] netta war ihwi ca ɣar taddart nnes.
2SA 11:14 Ɣar tuffut imsar, aqa Dawud yura ict n tebrat i Yuwab uca issekk i-tt s ufus n Uriya.
2SA 11:15 Netta yura di tebrat nni: “Sbeddet Uriya ɣar zzat mani iǧa umenɣi iqesḥen, xenni ḥeyydet xas, ḥima ad t řeqfen, ad immet.”
2SA 11:16 [Am] iḥṣar Yuwab tandint, imsar netta issbedd Uriya ɣar mani netta issen aqa dinni bedden yeryazen imeḥḍen aṭṭas.
2SA 11:17 [Xenni] i dd-ffɣen yeryazen zi tendint, mmenɣen ak-d Yuwab. Wḍan [yeryazen] zi řgens, zeg imsexxaren n Dawud, uřa d Aḥitti Uriya immut.
2SA 11:18 Yuwab issekk [ijj n umsexxar] uca iḥaja i Dawud x mammec iggur umenɣi.
2SA 11:19 Netta yumur i umsexxar, inna: “Mařa cek tkemmřed řexbar nnec x mammec iggur marra umenɣi,
2SA 11:20 uca imsar ad ikkar wesɛar n ujeǧid, ad ac yini: “Mayemmi tudsem tandint deg umenɣi? Ma war tessinem kenniw, aqa nitni ad wtin kenniw zi řḥiḍ?
2SA 11:21 Man wen inɣin Abimalik, mmis n Yarubbucat? Ma war iǧi d ict n temɣart tenḍared xas tasirt yuɛřan n tsirt zi řḥiḍ, ařami netta immut di Tabaṣ? Mayemmi tuyurem tudsem ammu řḥiḍ?’, xenni cek ad tinid: ‘Uřa d amsexxar nnec, Aḥitti Uriya, ittwaneɣ.’”
2SA 11:22 Areqqas yuyur, yusa-dd ɣar Dawud uca iḥaja as marra x min xef t issekk Yuwab.
2SA 11:23 Areqqas inna i Dawud: “Iryazen tuɣa jehden xaneɣ u nitni tuɣa ffɣen-dd ɣarneɣ ař iyyar, maca neccin neḥṣar i-ten ař tawwart [n tendint].
2SA 11:24 [Xenni] wtin inni ittḥakan [s řqews] zi řḥiḍ x imsexxaren nnec, [ařami] mmuten imsexxaren n ujeǧid. Uřa d amsexxar nnec, Aḥitti Uriya, immut.”
2SA 11:25 [Xenni] inna Dawud i ureqqas: “Ammu i ɣa tinid i Yuwab: ‘War ttejji ad tiři tmesřact-a d taɛeffant di tiṭṭawin nnec, maɣar ssif ad icc wanita, daweḥda wenneɣni. Iři d aryaz deg umenɣi ak-d tendint u hdem i-tt!’ Egg dayes taryast [s wawař-a].”
2SA 11:26 Tamɣart n Uriya tesřa belli aqa aryaz nnes Uriya immut u nettat tegga x sidi nnes acḍan.
2SA 11:27 [Umi] teɛdu [řweqt n] wecḍan issekk Dawud ad tt-i-dd-awyen di taddart nnes. Nettat tedweř d tamɣart nnes uca turuw as-dd ijj n uḥenjir. [Maca] min tuɣa igga Dawud, tuɣa d aɛeffan di tiṭṭawin n SIDI.
2SA 12:1 Issekk SIDI Natan ɣar Dawud. [Řami] ɣares yudef netta, inna as: “Deg ict n tendint tuɣa din tnayen n yeryazen, ijjen [tuɣa] ɣares agřa, wenneɣni d amezřuḍ.
2SA 12:2 Bu-wagřa ɣares abarru n wuǧi d ifunasen d tfunasin.
2SA 12:3 Amezřuḍ maca war ɣares walu mɣir ict n tḥuřit d tameẓyant i tuɣa dd-isɣa. Netta tuɣa issecca i-tt u tedweř tmeqqar ɣares u ɣar iḥenjiren nnes. Tecca zeg uřeqquz n weɣrum nnes u teswa zeg ufenjař nnes u tᵉṭṭeṣ x ifadden nnes. Tuɣa-tt i netta am yict n yeǧis.
2SA 12:4 [Umi] dd-yusa ijj n umsebrid ɣar weryaz bu-wagřa, yewɛar xas ḥima ad issewjed [macca] i umsebrid i ɣares dd-yusin zeg [ijj n] wuǧi nnes niɣ zeg [ijj n] ifunasen d tfunasin nnes. S uyenni iksi netta taḥuřit tameẓyant n weryaz amezřuḍ uca issewjed i-tt i weryaz nni tuɣa ɣares dd-yusin.”
2SA 12:5 Yarɣa uxeyyeq n Dawud aṭṭas x weryaz nni, inna i Natan: “[S tidett am] iddar SIDI, aryaz i iggin aya, tekkar as-dd řmewt,
2SA 12:6 uca taḥuřit tameẓyant ad tt ixřef arebɛa n tseqqar, minzi netta igga aya, war [dayes] yarḥim.”
2SA 12:7 [Xenni] inna Natan i Dawud: “Cek [simant nnec] d aryaz [nni]. Ammu i iqqar SIDI, AREBBI n Israil: Necc dehneɣ cek d ajeǧid x Israil u Necc ssnejmeɣ cek zeg ufus n Cawul.
2SA 12:8 Necc wciɣ ac taddart n sidi nnec d temɣarin n sidi nnec x ifadden nnec u Necc wciɣ ac taddart n Israil d Yahuda. Mařa aya drus, iři ad arniɣ wa niɣ ta i cek.
2SA 12:9 Mayemmi tesseḥqared awař n SIDI u teggid min iǧan d aɛeffan di tiṭṭawin nnes? Cek tenɣid Aḥitti Uriya s ssif u teksid tamɣart nnes, teggid tt d tamɣart i yixef nnec uca tenɣid aryaz nnes s ssif n ayt n Ɛammun.
2SA 12:10 [Xenni] řexxu, ssif war ittḥeyyid i řebda x taddart nnec, maɣar cek tesseḥqared ayi u teksid tamɣart n Uḥitti Uriya, ḥima ad tedweř d tamɣart nnec.
2SA 12:11 Ammu i iqqar SIDI: Xẓar, Necc ad xak ssekkareɣ tuɛeffna zi taddart nnec u Necc ad ac kkseɣ timɣarin nnec zzat i tiṭṭawin nnec, ad tent wceɣ i jjar nnec u netta ad iṭṭeṣ ak-d temɣarin nnec ɣar tfuct deg ujenna.
2SA 12:12 Maɣar cek teggid tt s tnuffra, maca Necc ad ggeɣ aya zzat i tiṭṭawin n marra Israil u ɣar [tifawt] n tfuct.”
2SA 12:13 [Xas] uca inna Dawud i Natan: “Necc xḍiɣ ak-d SIDI!” Inna Natan i Dawud: “SIDI iɣfar ddenb nnec, war tmettid ca.
2SA 12:14 Maca, umi cek tarrid řɛedyan n SIDI ad ceqqfen aṭṭas, s tidett ittxeṣṣa ad immet mmic i d ac dd-ittwarwen.”
2SA 12:15 Xenni yuyur Natan ɣar taddart nnes. SIDI iřqef aḥenjir i tuɣa dd-turuw temɣart n Uriya i Dawud uca idweř iḥřec aṭṭas.
2SA 12:16 Dawud yarzu AREBBI di ṭṭweɛ n uḥenjir. Iẓumm Dawud břa qeṭṭu u netta yudef, izzeř x temmurt di ǧiřet.
2SA 12:17 Imɣaren n taddart nnes usin-dd, bedden ɣares ḥima ad t arren ad dd-ikkar zi temmurt. Netta maca war ixs u war icci aɣrum akidsen.
2SA 12:18 Deg wass wiss sebɛa imsar aqa aḥenjir immut. Imsexxaren n Dawud ggʷeden ad as inin, aqa aḥenjir immut, maɣar nitni nnan: “Xzar, umi aḥenjir tuɣa iddar ɛad, nessiweř akides, maca war ɣarneɣ isři ca. Mammec i nzemmar [řexxu] ad as nini: ‘Aḥenjir immut’? Netta ad igg tuɛeffna [deg ixef nnes].”
2SA 12:19 Dawud iẓra aqa imsexxaren nnes ssawařen s tḥessect jar asen u Dawud yuca illa aḥenjir tuɣa immut. Netta inna i imsexxaren nnes: “Ma immut uḥenjir?” Nitni nnan as: “Aqa immut!”
2SA 12:20 [Xenni] ikkar Dawud zi temmurt, issird, idhen ixef nnes, ibeddeř arruḍ nnes. Netta yudef ɣar Taddart n SIDI, isjed. [Umi xenni] yareggʷeḥ ɣar taddart, ittar aɣrum u nitni ssarsen aɣrum zzates uca icca.
2SA 12:21 Nnan as imsexxaren nnes: “Min teggid cek řexxu? Umi aḥenjir ɛad iddar, tẓummed di ṭṭweɛ nnes u trud. [Maca] awarni řami immut uḥenjir, tekkared uca teccid aɣrum.”
2SA 12:22 Netta yarra-dd xasen: “Umi aḥenjir ɛad iddar, ẓummeɣ u ruɣ, maɣar necc nniɣ: ‘Wi issnen, SIDI ad xafi iḥinn u aḥenjir ad iddar.’
2SA 12:23 Řexxu maca immut. Mayemmi ɣa ẓummeɣ ɛad? Ma zemmareɣ ad t-i-dd-arreɣ? Necc ad ɣares raḥeɣ ict n twařa, maca netta war dd ɣari ittɛiqqib.”
2SA 12:24 Dawud issfewwej tamɣart nnes Bat-Cabaɛ u netta yudef xas, iṭṭeṣ akides. Nettat turuw-dd ijj n uḥenjir, igga as Suliman. SIDI tuɣa ittexs i-t
2SA 12:25 uca igga as Yadid-Yah s ufus n unabi Natan, am mammec tuɣa ixs SIDI.
2SA 12:26 Yuwab immneɣ ak-d Rabba n ayt n Ɛammun u netta iḥewwes tandint n ujeǧid.
2SA 12:27 [Xas uca] issekk Yuwab ireqqasen ɣar Dawud, inna: “Necc mmenɣeɣ ak-d Rabba ṭṭfeɣ uřa d tandint n waman.
2SA 12:28 Smun min iqqimen n řɛeskar uca nneḍ i tendint, ṭṭef i-tt, niɣ ad ṭṭfeɣ necc tandint uca ad xas řaɣan s yisem inu.”
2SA 12:29 [Xenni] issmun Dawud marra řɛeskar, iffeɣ ɣar Rabba, immneɣ akides uca iṭṭef i-tt.
2SA 12:30 Ikkes ttaj x uzeǧif n ujeǧid, wenni s yijj n řewzen n ict n talint n wureɣ u xas tayaqutin iɣřan, uca tusa-dd [ttaj] x uzeǧif n Dawud. Netta yiwi [ɛawed] ict n tkeccaḍt d tameqqrant aṭṭas zi tendint.
2SA 12:31 Řgens nni dayes [iǧan] issuffeɣ i-t u iḥjem xasen s řmencarat d iyařzimen n wuzzař d ccwaqar n wuzzař uca netta ijja i-ten ad ɛdun s řkuccat n llajur. Ammu i igga netta ak-d marra tineddam n ayt n Ɛammun. [Xenni] iɛqeb Dawud d marra řgens ɣar Urcalim.
2SA 13:1 Imsar awarni aya, aqa Abcalum, mmis n Dawud, tuɣa ɣares ict n učmas dayes aẓri, qqaren as Tamar, uca Amnun, mmis n Dawud, iɛceq i-tt.
2SA 13:2 Amnun tuɣa icḍen aṭṭas ařami ihřec x ssibbet n učmas Tamar, maɣar nettat tuɣa d taɛzarect, uca tuɣa war izemmar di tiṭṭawin n Amnun ad as igg ca.
2SA 13:3 Amnun tuɣa ɣares ijj n umeddukkeř qqaren ass Yunadab, ijj n mmis n Cimɛa, umas n Dawud. Yunadab tuɣa d ijj n weryaz d aḥraymi aṭṭas.
2SA 13:4 Netta inna as: “Mayemmi tceḍned ammu zi tuffut ař tuffut, cek, mmis n ujeǧid? Ma war texsed cek ad ayi t tɛawded?” Amnun yarra-dd xas: “Necc ɛecqeɣ Tamar, učmas n uma Abcalum.”
2SA 13:5 Inna as Yunadab: “Zzeř di qama u egg ixef nnec theřced. Mařa [xenni] yusa-dd babac, ḥima ad xak issijj, ini as: ‘Ejj učma Tamar ad ɣari dd-tas maḥend ad ayi tewc macca u ad tessewjed macca zzat i tiṭṭawin inu, ḥima ad ẓarɣ, ad cceɣ zeg ufus nnes.’”
2SA 13:6 Amnun izzeř din, issniɛmiř ihřec. Umi dd-yusa ujeǧid, ḥima ad xas issijj, inna Amnun i ujeǧid: “Ejj ad dd-tas učma Tamar maḥend nettat ad ayi tessewjed tnayen n tɣaryiṭatin u necc ad tent cceɣ zeg ufus nnes.”
2SA 13:7 Dawud issekk [ijj] ɣar Tamar, di taddart [nnes], ḥima ad as inna: “Ruḥ ɣar taddart n umam Amnun u sewjed as macca.”
2SA 13:8 Tamar tuyur ɣar taddart n umas Amnun wenni din izzřen di qama. Nettat teksi arecti, teggʷa t u tessewjed tiɣaryiṭatin zzat i tiṭṭawin nnes uca teggʷa tiɣaryiṭatin.
2SA 13:9 Nettat teksi marmita teggid-i-tt zzates, maca netta yugi ad icc. [Xenni] inna Amnun: “Ejj ad xafi ffɣen marra!” U marra ffɣen xas.
2SA 13:10 [Xenni] inna Amnun i Tamar: “Awi-dd macca deg wexxam, ḥima ad cceɣ zeg ufus nnem.” U Tamar teksi tiɣaryiṭatin i tuɣa tegga u tiwyi tent i umas Amnun deg wexxam.
2SA 13:11 Nettat tessiẓẓwiḍ [i-tent] [s ufus nnes] ɣares maḥend ad icc. Netta iṭṭef i-tt, inna as: “As-dd, ṭṭeṣ ɣari, učma!”
2SA 13:12 [Maca] nettat tenna as: “Lla, a uma, war d ayi ssexsari ca, maɣar ammu war ittwagg di Israil. War ttegg ca řefḍiḥet-a!
2SA 13:13 Mani ɣa uyureɣ di řefḍiḥet inu? U cek, cek ad tiřid d ijjen zeg ibuhařiyyen di Israil. Siweř maca ak-d ujeǧid, minzi netta war d ayi itteṭṭef xak.”
2SA 13:14 [Maca] Amnun war ixs ca ad ɣares iseř, maca ijhed xas uca issbehdeř i-tt, iṭṭeṣ akides.
2SA 13:15 [Daweḥda nnes] iɛiff i-tt s yijj n uɛiffi d ameqqran aṭṭas, minzi aɛiffi i zi tt iɛiff, tuɣa-t d tameqqrant x tayri i zi tuɣa tt iɛceq. Amnun inna as: “Kkar, aggʷej!”
2SA 13:16 [Xenni] inna as: “War din řesbab maḥend ad ayi tessekked. Tuɛeffna-ya ad tiři ɛad [d řɛib] d ameqqran x min d ayi teggid.” Netta maca war ixs ad ɣares iseř.
2SA 13:17 Iřaɣa x umsexxar nnes wenni i xas ittsexxaren, inna as: “Sekk ta xafi ɣar barra u belleɛ tawwart awarni as!”
2SA 13:18 Nettat tuɣa xas arruḍ [s ifassen d iziraren], maɣar ammu i yarḍent yessis n ujeǧid min ɣa kkent d tiɛzariyyin. Amsexxar nnes yiwyi tt ɣar barra, ibelleɛ tawwart awarni as.
2SA 13:19 Tamar tzuzzar iɣɣeḍ x uzeǧif nnes u tcarreg arruḍ [s ifassen d iziraren] i tyarḍ, tessars ifassen nnes x uzeǧif nnes, [am] tuyur tesɣuyyu.
2SA 13:20 Umas Abcalum isseqsa tt: “Ma tuɣa umam Amnun akidem? Řexxu [xenni], učma, susem, netta d umam. War d am itteqqes bu řḥař!” U Tamar teqqim weḥḥdes di taddart n umas Abcalum.
2SA 13:21 [Řami] isřa ujeǧid Dawud x marra timesřayin-a, idweř ixeyyeq aṭṭas.
2SA 13:22 Abcalum war issiweř ɛad ak-d Amnun, war iǧi di tcuni uřa di tuɛeffna, maɣar Abcalum iɛiff Amnun minzi wanita tuɣa issbehdeř učmas Tamar.
2SA 13:23 Awarni řami [ɛdun] tnayen n iseggʷusa munen, imsar, aqa Abcalum [tuɣa ɣares] irewwan di Baɛl-Ḥaṣur nni [iǧan] ɣar Ifrayim u Abcalum iɛarḍ marra arraw n ujeǧid.
2SA 13:24 Yuyur Abcalum ɣar ujeǧid, inna: “Xzar, amsexxar nnec ɣares irewwan! Ejj ujeǧid s marra imsexxaren nnes ad uyuren ak-d umsexxar nnec.”
2SA 13:25 [Maca] ajeǧid yarra-dd x Abcalum: “LLa, [a] mmi, ejj aneɣ war dd-nettis marra, ḥima war xak nᵉttegg ddqeř!” Netta izeyyar xas, [maca] netta war ixs akides yuyur, [maca waxxa amenni] ibarek i-t.
2SA 13:26 [Xenni] inna Abcalum: “Mařa lla, ejj uma Amnun ad kidneɣ yuyur!” Ajeǧid inna as: “Mayemmi akidek i ɣa yuyur?”
2SA 13:27 [Umi] xas izeyyar Abcalum, ijja netta ad uyuren Amnun d marra arraw n ujeǧid akides.
2SA 13:28 Abcalum yumur imsexxaren nnes, inna: “Ḥḍam, xmi ɣa yarecceq uř n Amnun zi binu u necc ad awem iniɣ: ‘Wtem Amnun!’, xenni ittxeṣṣa kenniw ad t nɣem. War tteggʷedem ca! Ma necc simant inu war t umureɣ i kenniw? Iřim d iryazen u iřim d ayt n bu-teryast.”
2SA 13:29 Imsexxaren n Abcalum ggin ak-d Amnun am mammec i tuɣa xasen igga Abcalum. [Xenni] kkaren marra iḥenjiren n ujeǧid, nyin, kuř aryaz x usardun nnes, uca arewřen.
2SA 13:30 Umi nitni tuɣa aten ɛad deg webrid, imsar, aqa řexbar yiweḍ ɣar Dawud, nnan: “Abcalum inɣa marra iḥenjiren n Dawud, war iqqim uřa d ijjen zzaysen.”
2SA 13:31 Uca ikkar Dawud, icarreg arruḍ nnes, izzeř x temmurt. Marra imsexxaren nnes bedden [din ɣares] s warruḍ nsen icarrgen.
2SA 13:32 [Maca] Yunadab, mmis n Cimɛa, umas n Dawud, issiweř, inna: “Ittxeṣṣa i sidi inu war ittɣiř [deg ixef nnes], aqa nɣin marra iḥudriyyen, iḥenjiren n ujeǧid. Amnun waha i ittwanɣen, maɣar Abcalum igga aya di řbař nnes zeg wass i di issxarreg wanita učmas Tamar.
2SA 13:33 Ejj sidi inu, ajeǧid, war d as ittɣimi řḥař řexxu, ad yini: ‘Marra arraw n ujeǧid ttwanɣen!’, maɣar Amnun waha immut.”
2SA 13:34 Abcalum tuɣa yarweř. Uca amsexxar wenni ittɛessan, issgeɛɛed tamuɣři nnes, u xzar, aqa iwdan aṭṭas usin-dd zeg webrid [i iǧan] awarni as, zeg uɣezdis n wedrar.
2SA 13:35 [Xenni] inna Yunadab i ujeǧid: “Xzar, arraw n ujeǧid i dd-ttasen. Aqa imsar am mammec inna umsexxar nnec.”
2SA 13:36 Uca imsar umi ikemmeř awař nnes, aqa xeḍren-dd arraw n ujeǧid. Nitni ssgeɛɛden tmijja nsen, run. Uřa d ajeǧid d marra imsexxaren nnes ksin deg imeṭṭawen.
2SA 13:37 Abcalum tuɣa yarweř, yuyur ɣar Talmay, mmis n Ɛammixur, ajeǧid n Jacur. Dawud icḍen x mmis marra ussan.
2SA 13:38 Abcalum tuɣa yarweř, yuyur ɣar Jacur. Netta iqqim dinni třata n iseggʷusa.
2SA 13:39 Aya issbedd ajeǧid Dawud maḥend ad iffeɣ [i umenɣi] ak-d Abcalum, maɣar netta issɛezza ixef nnes zi jjihet n řmewt n Amnun, maɣar wanita aqa immut.
2SA 14:1 Umi Yuwab, mmis n Ṣaruya, iḥekkar aqa uř n ujeǧid tuɣa ḍidd i Abcalum,
2SA 14:2 issekk Yuwab [ijj n ureqqas] ɣar Taquɛa uca ijja ad ssenni dd-awyen ict n temɣart d tamiɣist, inna as: “Ttzawgeɣ, egg axmi cem tceḍned, yarḍ arruḍ n wecḍan, war dehhen ixef nnem s zzect! Sneɛmiř am yict n temɣart nni iceḍnen x ijj n umettin aṭṭas n wussan.
2SA 14:3 Adef ɣar ujeǧid u siweř akides awařen-a.” Uca Yuwab inna as min ɣa tini.
2SA 14:4 Tamɣart zi Taqquɛa tenna i ujeǧid, am tewḍa s uɣembub nnes ɣar temmurt, tuḍar [as]: “Senjem [ayi], [a] ajeǧid!”
2SA 14:5 Inna as ujeǧid: “Min cem yuɣin?” Nettat tenna as: “S tidett necc d tajjač, aryaz inu immut.
2SA 14:6 Tayya nnec tuɣa ɣares tnayen n iḥenjiren u nitni s tnayen idsen mmenɣen deg iyyar. Tuɣa war din uřa d ijj ad ten ibḍa. [Xenni] iwta ijjen wenneɣni uca inɣa i-t.
2SA 14:7 U xzar, marra řaǧ iɣewweɣ x tayya nnec, nnan: ‘Awi-dd wenni inɣin umas da, maḥend ad t nenneɣ di ssibbet n řeɛmar n umas wenni t inɣin u [ammu i] ɣa neqḍa uřa x wewrit.’ Ammu i xsen nitni ad ssxesyen [ayenni n] řefḥem itteḥduduqen i d ayi iqqimen ařami war ittɣimi i weryaz inu isem di temmurt qaɛ.”
2SA 14:8 [Xenni] inna ujeǧid i temɣart: “Uyur ɣar taddart! Necc ad ssuffɣeɣ řumurat xam.”
2SA 14:9 Tamɣart zi Taqquɛa tenna i ujeǧid: “Sidi inu ajeǧid, ejj ad tiři řmuɛṣiyyet xafi u x taddart n baba. Ajeǧid d řɛarc nnes d imezdagen.”
2SA 14:10 Inna ujeǧid: “Awi ayi-dd ɣari wenni ɣar iǧa ca xam, ařami netta war ittɣimi ɛad ad cem iṣeddeɛ.”
2SA 14:11 Nettat tenna: “Ejj ajeǧid ad ixarreṣ di SIDI, AREBBI nnec, ḥima wenni ixsen ad ixřef idammen war yarenni ɛad di arẓiyyet u war issuffuɣ mmi ɣar ṭṭarf.” [Xenni] inna netta: “[S tidett am] iddar SIDI, mařa uřa d ijj n uzeṭṭu n ucuwwaf [n uzeǧif] n mmim ad iwḍa di temmurt!”
2SA 14:12 [Xenni] tenna temɣart: “Ttzawgeɣ, ejj tayya nnec ad tini [ɛad] ijj n wawař i sidi inu ajeǧid.” Uca netta inna: “Siweř.”
2SA 14:13 Tamɣart tenna: “Mayemmi xenni tenwid cek s yixef nnek ad tegged ammu ak-d řgens n AREBBI? Umi inna ujeǧid [řexxu] awař-a, aqa netta simant nnes am wenni di iǧa řɛib, minzi ajeǧid war dd-ittarri [ɣares] wenni t inḍar.
2SA 14:14 Maɣar neccin [marra] ad nemmet, aqa neccin am waman ittwafarrɣen x temmurt, war nnyarwen. SIDI war ittekkes řeɛmar, [maca] ad ixarreṣ ḥima wenni zzayes ittwammenḍar, war ittɣimi immenḍar.
2SA 14:15 [Xenni] řexxu, necc usiɣ-dd [da] ḥima ad ssiwřeɣ awař-a ak-d sidi inu ajeǧid, minzi řgens issiggʷed ayi. [Xenni] tenna tayya nnec: Ejj ayi ad ssiwřeɣ ak-d ujeǧid, ad taɣ ad igg ujeǧid min ɣa tini tayya nnes,
2SA 14:16 maɣar ajeǧid ad iseř ɣar tayya nnes, maḥend ad tt ifekk zeg ufus n weryaz nni ixsen ad iteḥḥa necc d mmi zi tesɣart i [ṭṭfeɣ] zi AREBBI.
2SA 14:17 Tayya nnec tenna [ɛawed]: Ejj ad issareyyeḥ wawař n sidi inu ajeǧid, maɣar sidi inu ajeǧid, igga am yijj n lmalak n AREBBI ařami ittesřa min iṣebḥen d min war iḥřin. Ad kidek yiři SIDI AREBBI nnec.”
2SA 14:18 Ajeǧid yarra-dd xas, inna i temɣart: “War xafi teffar walu zi tmesřact i x cem i ɣa sseqsiɣ.” Tamɣart tenna: “Ejj sidi inu, ajeǧid, ad issiweř.”
2SA 14:19 Inna ujeǧid: “Ma Yuwab ɣares afus di marra man aya?” Tamɣart tarra-dd xas: “[S tidett am] iddar řeɛmar inu, [a] sidi inu, ajeǧid, [ma izemmar] uřa d ijjen [ad ibeɛɛed] ɣar yefus niɣ ɣar uzeřmaḍ x marra min issiweř sidi inu, ajeǧid! Wah, amsexxar nnec Yuwab d wenni d ayi yumuren. Netta igga marra awařen-a deg uqemmum n tayya nnec.
2SA 14:20 Aya igga i-t umsexxar nnec Yuwab, ḥima ad iwc i tmesřact ijj n uɣembub nneɣni. [Maca] sidi inu d amiɣis am yijj n lmalak n AREBBI, ařami issen marra min ittemsaran di temmurt.”
2SA 14:21 [Xas] uca inna ujeǧid i Yuwab: “Xzar ɛafak, necc ggiɣ man aya. Uyur, awi-dd aḥudri Abcalum!”
2SA 14:22 Yuwab iwḍa s uɣembub nnes ɣar temmurt, yuḍar [as], iqada i ujeǧid. Uca inna Yuwab: “Ass-a issen umsexxar nnec, aqa ufiɣ arḍa di tiṭṭawin nnec, sidi inu, ajeǧid, minzi ajeǧid igga ɛlahsab awař n umsexxar nnes.”
2SA 14:23 Ikkar Yuwab, yuyur ɣar Jacur u yiwiḍ ɣar Urcalim ak-d Abcalum.
2SA 14:24 Inna ujeǧid: “Ejj i-t ad iɛqeb ɣar taddart nnes. Udem inu [maca] war t iẓẓar.” [Xenni] iɛqeb Abcalum ɣar taddart nnes, [maca] war iẓri udem n ujeǧid.
2SA 14:25 Di marra Israil war iǧi uřa d ijj n weryaz icewwar am Abcalum ařami ittwassuɛřa aṭṭas. Zi tařeqqa n iḍaren ař tqiccit n uzeǧif nnes war dayes uřa d ijj n řɛib.
2SA 14:26 Mařa iḥeff acuwwaf nnes, [tuɣa innum] ad t iḥeff ɣar uneggar n wussan ɛlaḥsab ussan [n kuř aseggʷas], minzi tuɣa iddekkwař idqeř xas. Iḥeff u iwzen acuwwaf n uzeǧif nnes. [Tuɣa řewzen n ucuwwaf] mitayen ciqlu ɛlaḥsab aẓru s řewzen imten n ujeǧid.
2SA 14:27 Ttwarwen-dd třata n iḥenjiren i Abcalum d ict n yeǧis qqaren as Tamar. Nettat tedweř d ict n temɣart dayes aẓri.
2SA 14:28 Abcalum izdeɣ tnayen n iseggʷusa di Urcalim. Netta war iẓri udem n ujeǧid.
2SA 14:29 [Xenni] issekk Abcalum [ijj n ureqqas] ɣar Yuwab, ḥima ad t issekk ɣar ujeǧid [di ṭṭweɛ n yixef nnes], [maca] Yuwab war ixs ad ɣares dd-yas. Uca issekk [areqqas] twařa nneɣnit, maca netta war ixs ad dd-yas.
2SA 14:30 [Xenni] inna i imsexxaren nnes: “Xzarem, iyyar n Yuwab i iǧan x uɣezdis n wenni inu u netta [iẓẓu] dayes imendi. Uyurem din, qqedem as timessi!” Uca imsexxaren n Abcalum qqden timessi i iyyar [nni].
2SA 14:31 [Xas] uca ikkar Yuwab uca issijj x Abcalum di taddart [nnes], inna as: “Mayemmi qqden imsexxaren nnec timessi i ureqqiɛ n iyyar i iǧan inu?”
2SA 14:32 Abcalum inna i Yuwab: “Xzar, necc ssekkeɣ-dd ɣarek [ḥima] ad ac iniɣ: ‘As-dd da, ḥima ad cek ssekkeɣ ɣar ujeǧid ad tinid: Min ɣar dd-usiɣ [da] zi Jacur? Mliḥ i necc mři dinni qqimeɣ.’ Xenni řexxu ittxeṣṣa ad ẓareɣ udem n ujeǧid. Mařa dayi [ɛad] řmuɛṣiyyet, ejj i-t ad ayi ineɣ.”
2SA 14:33 [Xenni] yuyur Yuwab ɣar ujeǧid, inna as aya. U wanita iřaɣa-dd x Abcalum uca yudef netta ɣar ujeǧid, ibendeq as s uɣembub nnes ɣar temmurt, zzat i ujeǧid, uca ajeǧid issudem Abcalum.
2SA 15:1 Awarni uya imsar, aqa Abcalum ijja ad as iḍebbaran ijj n ukarru d iysan d xemsin n yeryazen inni ittazzřen ɣar zzat nnes.
2SA 15:2 Tuɣa ittekkar Abcalum zic ɣar tuffut [n řḥař] uca ibedd ɣar uɣezdis n webrid ɣar tewwart [n tendint]. Uca imsar, meřmi ma ixs ijj n weryaz ad iraḥ s ict n ddeɛwet ɣar ujeǧid i ccreɛ, iřaɣa-dd xas ɣares, inna: “Zi man tandint cek?” Mařa wanita yarra-dd: “Amsexxar nnec zeg ict zi tqebbař n Israil”,
2SA 15:3 inna as Abcalum: “Xzar, ddeɛwa nnec mliḥ u nican, [maca] ɣar ujeǧid war iǧi uřa d ijj wenni ɣarek ɣa isřen.”
2SA 15:4 Abcalum yarni inna: Mři d ayi ggin d řqaḍi di temmurt, [maḥend] [kuř] aryaz wenni ɣar iǧa umcubbec niɣ ddeɛwet, ad ɣari dd-yas, necc ad as aɣeɣ tasɣart?”
2SA 15:5 Mařa iqarreb-dd ɣares ijj n weryaz ḥima ad as ibendeq, isswiẓẓeḍ afus nnes, iṭṭef i-t uca issudem i-t.
2SA 15:6 Ammu igga Abcalum ɣar marra [inni iǧan zi] Israil, inni dd-yusin i ccreɛ ɣar ujeǧid. Ammu yucar Abcalum uř n yeryazen n Israil.
2SA 15:7 Awarni arebɛa n iseggʷusa imsar aqa Abcalum inna i ujeǧid: “Ejj ayi ad uyureɣ, ad ssqefřeɣ di Ḥabrun lwaɛd inu i waɛdeɣ i SIDI.
2SA 15:8 Maɣar amsexxar nnec igga ijj n lwaɛd umi tuɣa zeddɣeɣ [ɛad] di Jacur di Aram, nniɣ: ‘Mařa SIDI ijja ayi s tidett ad dd-dewřeɣ ɣar Urcalim, [xenni] ad xedmeɣ i SIDI.’”
2SA 15:9 [Xenni] inna as ujeǧid: “Uyur di řehna!” Ikkar netta uca yuyur ɣar Ḥabrun.
2SA 15:10 Abcalum [maca] issekk iryazen x iḍaren ɣar marra tiqebbař n Israil ḥima ad inin: “Mařa kenniw tesřam i usuḍi deg uyicc n icarri, xenni ittxeṣṣa ad tinim: ‘Abcalum d ajeǧid di Ḥabrun.’”
2SA 15:11 Zi Urcalim uyuren ak-d Abcalum mitayen n yeryazen inni ittwaɛarḍen. Nitni uyuren akides di řehna nsen, war ssinen x walu.
2SA 15:12 Řami [din] iqeddem tiɣarṣa, issekk Abcalum [ɛawed] ɣar Axitufil, zi Jilu, wenni d amcawar n Dawud, zi tendint nnes, zi Jilu. [Ammu] i tedweř tmeɛmuč tmeqqar uca immarni řgens [i iǧan] ɣar Abcalum.
2SA 15:13 [Xenni] dd-yusa ijj n ureqqas ɣar Dawud, inna: “Uř n [kuř] aryaz [idweř] ak-d Abcalum!”
2SA 15:14 [Xenni] inna Dawud i marra imsexxaren nnes, inni tuɣa ɣares iǧan di Urcalim: “Kkarem, ad narweř, maɣar war ittɣimi ɣarneɣ uřa d ijjen nni i ɣa injem zzat i wudem n Abcalum. Deɣyam deg wuffuɣ niɣ netta ad iqeǧeb ad xaneɣ iḥart, ad dayneɣ igg tuɛeffna uca ad iwwet tandint-a s řeqḍeɛ n ssif.”
2SA 15:15 [Xenni] nnan imsexxaren n ujeǧid i ujeǧid: “Xzar, imsexxaren nnec [ad ggen] ɛlaḥsab marra min ɣa yixḍar sidi inu ajeǧid.”
2SA 15:16 Ammu i iffeɣ ujeǧid [zi tendint], ak-d marra taddart nnes deg iṣuraf nnes. Ajeǧid ijja ɛecra n tiyya maḥend ad ḥḍant taddart.
2SA 15:17 [Umi] dd-iffeɣ ujeǧid [zi tendint] ak-d marra řgens nnes deg iṣuraf nnes, qqimen nitni bedden ɣar řaggʷaj.
2SA 15:18 Marra imsexxaren ɛdun xas uřa d iɛessasen n arrimet nnes marra, u marra ireqqasen nnes n tazřa. Uřa d marra ayt n Jat, setta-mya n yeryazen nni dd-yusin deg iṣuraf nnes zi Jat, aqa kkin zzat i wudem n ujeǧid.
2SA 15:19 [Xenni] inna ujeǧid i Ittay, wenni zeg ayt n Jat: “Mayemmi texsed uřa d cek ad tuyured akidneɣ? Ɛqeb u qqim ɣar ujeǧid, maɣar cek d ijj n ubarrani, aqa cek beɛda tᵉttwassuffɣed zi temmurt nnec.
2SA 15:20 Iḍennaḍ i dd-tusid cek. Ma necc ad cek awyeɣ akidneɣ ass-a ḥima ad dd-teffɣed, [umi] i ɣa uyureɣ necc mani ma i ttwariɣ izemmar ad řaḥeɣ. Ɛqeb, awi-dd akidek aytmac. Ad kidek tiři tmexsiwt icewwaren d řaman.”
2SA 15:21 [Maca] Ittay yarra-dd x ujeǧid, inna: “[S tidett am] iddar SIDI u iddar sidi inu ajeǧid, deg wemcan mani ɣa yiři sidi inu ajeǧid, ma immut niɣ iddar, dinni i ɣa yiři uřa d amsexxar nnec!”
2SA 15:22 [Xenni] inna Dawud i Ittay: “Uyur [xenni], ekk-dd!” Ikka xas Ittay, wenni iǧan zeg ayt n Jat, ak-d marra iryazen nnes d iḥenjiren i ɣares [iǧan].
2SA 15:23 Marra temmurt tru umi ikka řgens. Ajeǧid iẓwa tiɣzart n Qidrun uřa d marra řgens iẓwa, [ṭṭfen] abrid ɣar řexřa.
2SA 15:24 Aqa din uřa d Ṣaduq d marra Ilawiyyen inni yarbun Ttabut n Řɛahd akides. Nitni ssarsen Ttabut n AREBBI u Abyatar igeɛɛed [din] ařami iqfeř uɛeddu n marra řgens zi tendint.
2SA 15:25 [Xenni] inna ujeǧid i Ṣaduq: “Arr Ttabut n AREBBI ɣar tendint. Mařa necc ufiɣ arḍa zzat i tiṭṭawin n SIDI, xenni Netta ad ayi yarr [ɣar da], ad ayi yarr ad ẓarɣ [Ttabut] ɛawed uřa d Tazeddiɣt.
2SA 15:26 [Maca] mařa Netta ad yini: ‘Cek war d ayi dd-tusid x řxaḍar!’, aqa ayi da, ejj i-t ad kidi igg min iǧan d lemliḥ di tiṭṭawin nnes.”
2SA 15:27 Yarenni inna ujeǧid i ukehhan Ṣaduq: “Ma war teǧid cek d amwařaw? Ɛqeb di řehna ɣar temmurt nnec d tnayen n iḥenjiren nwem akidwem: mmic Aximaɛaṣ, d Yunatan, mmis n Abyatar.
2SA 15:28 Xzar, necc ad rajiɣ di řexřa ɣar manis ẓekkwan x [L’Urdun], ař dd ɣa tas tebrat zzaywem ɣari.”
2SA 15:29 [Xas uca] yiwyi Ṣaduq ak-d Abyatar Ttabut n AREBBI ɣar Urcalim uca qqimen dinni.
2SA 15:30 Dawud igeɛɛed tasawent n [wedrar n] Zzitun. Iru am dd-igeɛɛed. Tuɣa azeǧif nnes ireḥḥef, yuyur x iḍaren s řeḥfa. Uřa d marra řgens i ɣares, [kuř] aryaz [zzayes] ireḥḥef azeǧif nnes, uca geɛɛden nitni, run am geɛɛden.
2SA 15:31 [Xenni] ḥajan as i Dawud, nnan: “Axitufil tuɣa-t jar inni iggin tameɛmuč x uɣezdis n Abcalum.” Uca inna Dawud: “[A] SIDI, sbeṭṭeř ccwar n Axitufil.”
2SA 15:32 [Řami] Dawud yiweḍ ɣar tqiccet n wedrar, mani ttnuman ad sejden zzat i AREBBI, xzar, [yusa-dd] Ḥucay, Ayarki, i umsagar akides s warruḍ icarrgen u s ucař x uzeǧif nnes.
2SA 15:33 Dawud inna as: “Mařa cek teẓwid akidi, ad xafi tiřid d ddqeř.
2SA 15:34 Mařa maca cek tɛeqbed ɣar tendint, ad tinid i Abcalum: ‘Necc ad iřiɣ d amsexxar nnec, [a] ajeǧid! Tuɣa ayi zic d amsexxar n babac, řexxu maca ad iřiɣ d amsexxar nnec!’, [xenni] tzemmared ad tbeḍřed ccwar n Axitufil.
2SA 15:35 Ma war dinni ɣarek ikehhanen Ṣaduq d Abyatar? Ad imsar ad tɛawded marra min ɣa tesřed zi taddart n ujeǧid i ikehhanen Ṣaduq d Abyatar.
2SA 15:36 Aqa nitni ɣarsen dinni tnayen n iḥenjiren nsen, Aximaɛaṣ, mmis n Ṣaduq, d Yunatan, mmis n Abyatar. Ad ayi dd-tessiwḍem marra awař i tesřim [zzaysen].”
2SA 15:37 Uca Ḥucay, ameddukkeř n Dawud, yudef ɣar tendint uca uřa d Abcalum yudef ɣar Urcalim.
2SA 16:1 [Umi] iɛdu Dawud cwayt x tqiccet n wedrar, iffeɣ Ṣiba, amsexxar n Mafibucat, i umsagar akides s ict n tyuya n yeɣyař bardɛen, [issars] xasen mitayen n iɣrumen, mya n iɣrumen n zzbib u mya n tini n unebdu d ict n tecyart [dayes] binu.
2SA 16:2 Inna ujeǧid i Ṣiba: “Min texsed ad tegged s uya?” Inna Ṣiba: “Iɣyař i taddart n ujeǧid ḥima ad xasen nyen, u aɣrum d tini n unebdu i imsexxaren, ḥima ad ccen, u binu i yinni yuḥřen di řexřa, ḥima ad swen.”
2SA 16:3 [Xenni] inna ujeǧid: “Mani iǧa mmis n sidi nnec?” Inna Ṣiba i ujeǧid: “Xzar, netta iqqim di Urcalim, maɣar netta inna: ‘Ass-a taddart n Israil ad ayi dd-tarr tageldit n baba.’”
2SA 16:4 [Xenni] inna ujeǧid i Ṣiba: “Xzar, marra min [iǧan] n Mafibucat, ad yiři nnec!” Ṣiba inna: “Necc bendqeɣ, mři ufiɣ arḍa di tiṭṭawin nnec, [a] sidi inu ajeǧid!”
2SA 16:5 [Umi] dd-yusa ujeǧid Dawud ɣar Baxurim, iẓra ijj n weryaz iffeɣ-dd ssenni zi řaǧ n taddart n Cawul. Qqaren as Cimɛi, mmis n Jira. Netta iggur am ineɛɛeř.
2SA 16:6 Netta iḥejjar Dawud d marra imsexxaren n ujeǧid Dawud s yeẓra, [am] ibedd řgens marra d marra ayt n bu-teɣruḍt zzates ɣar yefus d uzeřmaḍ.
2SA 16:7 Ammu i iqqar Cimɛi am t ineɛɛeř: “Aggʷej, aggʷej, cek, aryaz n [usizzeř n] idammen d weryaz i war isekkwin!
2SA 16:8 SIDI issiweḍ xak marra idammen n taddart n Cawul wenni deg wemcan nnes i tḥekmed. SIDI iwca tageldit deg ifassen n mmic Abcalum. Xzar [man aya iffeɣ-dd] zi tuɛeffna nnec umi cek d ijj n weryaz n [usizzeř n] idammen.”
2SA 16:9 [Xenni] inna Abicay, mmis n Ṣaruya, i ujeǧid: “Mayemmi ɣa inɛeř weqzin-a immuten, sidi inu ajeǧid? Ejj ayi ad din ẓwiɣ, ad as qesseɣ azeǧif.”
2SA 16:10 [Maca] ajeǧid inna: “Min din jar ayi d kenniw, arraw n Ṣaruya? Aqa netta inɛeř, umi d as inna SIDI: ‘Nɛeř Dawud!’ Man wen izemmaren [xenni] ad yini: ‘Mayemmi i teggid aya?’”
2SA 16:11 Dawud yarni inna i Abicay d marra imsexxaren nnes: “Xzarem, mmi i dd-iffɣen zi ddat inu, yarezzu ad ayi ineɣ. Mahu xenni řexxu aryaz-a zeg ayt n Binyamin? Jjem t ad inɛeř, minzi SIDI i d as t innan.
2SA 16:12 Ad taɣ SIDI ad ittwařa tamara inu uca ad ayi dd-yarr SIDI taṣebḥant deg wemcan n nneɛřet nnes n wass-a.”
2SA 16:13 Dawud ak-d yeryazen nnes ṭṭfen abrid u Cimɛi yuyur arendad nnes ɣar uɣezdis nneɣni n tewrirt, am ineɛɛeř u ittḥejjar [Dawud] s yeẓra uca igga taɛejjajt ad tḍuw.
2SA 16:14 Yiweḍ-dd ujeǧid ak-d marra řgens i ɣares ɣar Ayafim. Dinni izemmar ad yarr nnefs [ɛawed].
2SA 16:15 Abcalum ak-d marra řgens, iryazen n Israil, usin-dd ɣar Urcalim u Axitufil tuɣa-t ɣares.
2SA 16:16 Umi i dd-yusa Ḥucay, Ayarki, ameddukkeř n Dawud, ɣar Abcalum, imsar belli Ḥucay inna i Abcalum: “Tudart i ujeǧid, tudart i ujeǧid!”
2SA 16:17 Abcalum inna i Ḥucay: “Ma d man aya [xenni] d [ijj n wescan n] tmexsiwt icewwaren i umeddukkeř nnec? Mayemmi war triḥed ak-d umeddukkeř nnec?”
2SA 16:18 Ḥucay inna i Abcalum: “Lla, necc ad iřiɣ ɣar wenni ittwafarzen zi SIDI u [zi] marra řgens-a u [zi] marra iryazen n Israil, u necc ad ɣares qqimeɣ.
2SA 16:19 I umi ɣa sexxareɣ xenni? Ma war ittiři zzat i wudem n mmis? Am mammec necc xedmeɣ zzat i wudem n babac, ammu i ɣa iřiɣ zzat i wudem nnec.”
2SA 16:20 Abcalum inna i Axitufil: “Wcem [aneɣ] ccwar, min ɣa negg?”
2SA 16:21 Axitufil inna i Abcalum: “Adef ɣar tiyya n babac tinni ijja awarni as ḥima ad ḥḍant taddart. [Ammu] i ɣa iseř marra Israil, aqa cek tessarzged ixef nnec ɣar babac uca ad ttwassjehden ifassen n marra inni akidek [iǧan].”
2SA 16:22 Wtin i Abcalum ict n tqiḍunt x tzeqqa u Abcalum yudef ɣar tiyya n babas zzat i tiṭṭawin n marra Israil.
2SA 16:23 Deg wussan nni ittwaḥseb ccwar n Axitufil axmi [ijjen] yarezzu awař n AREBBI. Ammu [i yeǧa] s marra ccwar n Axitufil, am ɣar Dawud am ɣar Abcalum.
2SA 17:1 Axitufil inna i Abcalum: “Ejj ayi ad farzeɣ tenɛac-ařef n yeryazen, ad sswejdeɣ ixef inu ḥima ad ḍfareɣ Dawud ǧiřet-a.
2SA 17:2 [Xenni] necc ad xas hejmeɣ, [mintra] ifassen nnes [ɛad] uḥřen u ḍeɛfen. Ad t ssiggʷideɣ u marra řgens i ɣares [iǧan] ad yarweř. [Xenni] necc ad nɣeɣ ajeǧid, netta waha.
2SA 17:3 Ad ɣarek dd-arreɣ marra řgens. [Řmewt n] weryaz i x tarezzud [aqa-t] am wedwař n yewdan marra, řgens [ad t iqbeř,] ad tiři řehna.”
2SA 17:4 Tuɣa aya d ijj n wawař nican di tiṭṭawin n Abcalum u di tiṭṭawin n marra imɣaren n Israil.
2SA 17:5 [Maca] inna Abcalum: “Řaɣat uřa i Ḥucay, Ayarki. Ejj aneɣ ad ɣares nseř ɛawed min ɣa yini.”
2SA 17:6 Umi dd-yudef Ḥucay, issiweř Abcalum akides, inna: “Ammu i issiweř Axitufil. Ma ad negg ɛlaḥsab awař nnes? Mařa war iǧi ammu, [xenni] siweř cek!”
2SA 17:7 [Xenni] inna Ḥucay i Abcalum: “Twařat-a ccwar nni iwcin Axitufil war iǧi mliḥ.”
2SA 17:8 [Yarni] Ḥucay inna: “Cek tessned aqa babac d yeryazen nnes, nitni d ayt n bu-teɣruḍt, u aqa řeɛmar nsen yarzeg am yijj n ddub di řexřa, wenni umi ittwacar wenjuɣ. Babac d ijj n weryaz aɛeskari u netta war ittnusi ak-d řgens.
2SA 17:9 Aqa řexxu innuffar deg ijj zeg ifran niɣ deg ijj zeg imucan n tnuffra. Mařa ɣar umezwaru wḍan ca zzaysen, [xenni] marra wi t ɣa isřen, ad yini: ‘Aqa din ict n tecti di řgens nni iḍfaren Abcalum.’
2SA 17:10 [Xenni] ɛad wenni dd-ixeřqen i umenɣi, wenni uř nnes am wuř n ijj n weyrad, ad ifceř deɣya, maɣar marra Israil issen aqa babac d ijj n bu-teɣřuḍt u ɣares ayt n umenɣi.
2SA 17:11 S uyenni ad ac ssecneɣ ad tessmuned deɣya marra Israil zi Dan ař Bi’r-Sebɛa, ijj n ubarru aṭṭas am yijdi ɣar tma n řebḥar, u cek ad kidsen teffɣed ɣar umenɣi.
2SA 17:12 [Xenni] neccin ad xas nehjem deg ijj zeg imucan n tnuffra mani ɣa ittwaf. Ad xas nehjem am iweṭṭa nnda x temmurt. War ittɣimi uřa d ijjen zzayes u zi marra iryazen i ɣares iǧan.
2SA 17:13 Mařa netta ad issmun ixef nnes di ca n tendint, marra Israil ad kkaren ad awyen iseɣwan ɣar tendint nni, ad tt njarr di teɣzurt ařami war zzayes ittwaf uřa d ijj n weẓru ɛad.”
2SA 17:14 [Xenni] inna Abcalum uřa d marra iryazen n Israil: “Ccwar n Ayarki Ḥucay iḥřa x ccwar n Axitufil.” Aqa SIDI tuɣa yumur ad beḍřen ccwar lemliḥ n Axitufil, ḥima SIDI ad yawi tuɛeffna x Abcalum.
2SA 17:15 Inna Ḥucay i ikehhanen Ṣaduq d Abyatar: “Ta d ta icawar Axitufil i Abcalum d imɣaren n Israil, maca d ta d ta ixef weṣṣiɣ necc.
2SA 17:16 [Xenni] řexxu, sekk deɣya [ijj n ureqqas] maḥend ad ixebbar i Dawud, ad yini: “War sens ǧiřet-a deg imucan n uẓekkwu n řexřa. Ẓwa deɣya, niɣ ad ittwaṣarḍ ujeǧid d marra řgens i ɣares [iǧan].”
2SA 17:17 Maca Yunatan d Aximaɛaṣ qqimen bedden ɣar tařa n Rujal. Ict n tayya tuyur dinni, tḥaja asen tt. Nitni uyuren u ḥajan tt i ujeǧid Dawud. Tuɣa-ten war zemmaren ad adfen ɣar tendint, umi ittxeṣṣa war ten ẓarren [iwdan].
2SA 17:18 [Waxxa amenni] ijj n umsexxar iẓra i-ten uca iḥaja t i Abcalum. [Maca] ina s tnayen idsen uzzřen, usin-dd ɣar taddart n ijj n weryaz di Baxurim wenni tuɣa ɣar iǧa ijj n wanu di řemraḥ. Nitni ḍrin dayes.
2SA 17:19 Tamɣart teksi tazarbeč uca tessars i-tt x uqemmum n wanu uca tareyyec xas iwzan i ittwaqeccaren n imendi. [Ammu] i war dd-tbin tmesřact.
2SA 17:20 [Řami] imsexxaren n Abcalum usin-dd ɣar temɣart di taddart, sseqsan tt: “Mani iǧa Aximaɛaṣ d Yunatan?” Tamɣart tarra-dd xasen: “Nitni ẓwan tiɣzart nni.” [Xenni] ffɣen imsexxaren nni, arzun, war [ten] ufin. [Xenni] ɛeqben ɣar Urcalim.
2SA 17:21 Awarni umi tuɣa nitni uyuren, imsar, nitni geɛɛden zeg wanu, uyuren, xebbaren aya i ujeǧid Dawud. Nitni nnan i Dawud: “Kkarem, ẓwam aman deɣya, maɣar ta d ta d ccwar i xawem igga Axitufil.”
2SA 17:22 Ikkar Dawud ak-d marra řgens i ɣares iǧan u nitni ẓwan L’Urdun. Ɣar tfawt n tuffut n wass, tuɣa war din ɛad uřa d ijjen war iẓwi L’Urdun.
2SA 17:23 [Umi] Axitufil iẓra, aqa ccwar nnes ittwabeṭṭeř, ibardeɛ netta i weɣyuř nnes, ikkar, yuyur ɣar taddart nnes di tendint nnes. Netta yumur i taddart nnes, [xenni] yuyeř ixef nnes. [Ammu] i immut u ittwanḍeř deg wenḍeř n babas.
2SA 17:24 Dawud yiweḍ ɣar Maḥanayim, u Abcalum iẓwa L’Urdun, netta d marra iryazen n Israil akides.
2SA 17:25 Abcalum tuɣa igga Ɛamasa x řɛeskar deg wemcan n Yuwab. Ɛamasa tuɣa d mmis n ijj n weryaz qqaren as Yitra, ijj n weryaz zi Israil, wenni tuɣa yudfen x Abijayil, yeǧis n Naḥac, učmas n Ṣaruya, yemmas n Yuwab.
2SA 17:26 Israil d Abcalum wtin iqiḍan nsen di temmurt n Jilɛad.
2SA 17:27 Umi dd-yusa Dawud ɣar Maḥanayim, imsar, aqa Cubi, mmis n Naḥac, zi Rabba, zeg ayt n Ɛammun, d Maxir, mmis n Ɛammiyil zi Lu-Dabar, d Barzilay, Ajilɛadi zi Rujalim [iwyen as-dd marra man aya]:
2SA 17:28 ifarracen d ṭṭbaṣi d iqdiḥen n třaxt d irden d imendi d waren, [aqa] řeḥbub qřan, uca uřa d ibawen d řeɛdes, [aqa] [uřa d nitni] qřan,
2SA 17:29 d tamment d ddhen d wuǧi d trussi n tfunasin. Nitni iwyen marra man aya ɣar Dawud d řgens i ɣares iǧan maḥend ad ccen. Maɣar nnan: “Řgens iǧuẓ, iheyyef, iffud [din] di řexřa.”
2SA 18:1 Isedd Dawud řgens nni tuɣa ɣares iǧan u igga xasen imeqqranen x wařef d imeqqranen x mya.
2SA 18:2 Dawud issekk řgens. Ict n tuřut zzaysen sadu ufus n Yuwab, ict n ttuřut sadu ufus n Abicay, mmis n Ṣaruya, umas n Yuwab, d ict n tuřut sadu afus n Ittay, zi Jat. Inna ujeǧid i řgens: “Uřa d necc ad akidwem ffɣeɣ [ɣar umenɣi].”
2SA 18:3 [Maca] řgens inna: “Cek war kidneɣ teffɣeḍ ca [ɣar umenɣi], maɣar mařa neccin narweř s tidett, war kidneɣ řehhin. Mařa azyen zzayneɣ immut, war kidneɣ řehhin. Maɣar cek [řexxu] tsekkwʷid am ɛecra n řuřuf zzayneɣ. S uyenni řexxu mlih, mařa cek ad aneɣ tewced afus zi tendint.”
2SA 18:4 [Xenni] inna asen ujeǧid: “Necc ad ggeɣ min tᵉttwařam mliḥ di tiṭṭawin nwem!” Ajeǧid ibedd ɣar tewwart [n tendint] u marra řgens iffeɣ s řmyawat d řuřuf.
2SA 18:5 Yumur ujeǧid i Yuwab, Abicay d Ittay: “Egg s uḥaweř ak-d uḥudri, ak-d Abcalum, di ṭṭweɛ inu.” Marra řgens isřa i ujeǧid am yumur marra imeqqranen x Abcalum.
2SA 18:6 Řgens iffeɣ ɣar iyyar, ɣar umsagar ak-d Israil. Amenɣi ikkar deg wezɣar n Ifrayim.
2SA 18:7 Ttwaɣellben din [iryazen n] řgens n Israil zzat i wudem n imsexxaren n Dawud. Deg wass nni temsar din ict n tecti tameqqrant [ařami wḍan] ɛicrin-ařef [n yeryazen].
2SA 18:8 Amenɣi iffeɣ ssenni di marra jjwayeh. Deg wass nni isarḍ wezɣar [iryazen] zi řgens ktar zeg inni isarḍ ssif.
2SA 18:9 Imsar Abcalum ibedd tiṭṭ di tiṭṭ ak-d imsexxaren n Dawud. Abcalum inya x ijj n userdun. Umi aserdun yuyur sadu řefruɛ imcubbcen n yict n tcejjart n yigg ameqqran, innuɣ netta s uzeǧif nnes di tcejjart n yigg ařami iqqim ittennuyeř jar ujenna d temmurt d userdun yuyur swadday nnes.
2SA 18:10 Ijj n weryaz iẓra i-t, iḥaja t i Yuwab, inna: “Xzar, necc ẓriɣ Abcalum yuyeř ɣar ict n tcejjart n yigg.”
2SA 18:11 Inna Yuwab i weryaz i d as iḥajan aya: “Xzar, cek teẓrid [t], mayemmi war t teẓwiḍed ca dinni ɣar temmurt? [Xenni iři] necc ad ac wceɣ ɛecra n [uqiyyat n] nnuqart d ijj n webyas!”
2SA 18:12 Inna weryaz i Yuwab: “War wezzneɣ uřa d ařef n [uqiyyat n] nnuqart deg ifassen inu, war sswiẓẓiḍeɣ afus inu x mmis n ujeǧid, maɣar ajeǧid yumur i cek d Abicay d Ittay deg imezzuɣen n řgens, inna: ‘Ejj kuř ijj ad iḥḍa x uḥuḍri Abcalum!’
2SA 18:13 Mařa necc ad ggeɣ s řɣecc ak-d řeɛmar nnes - aqa i ujeǧid war teqqim uřa d ict n řḥajjet txemmeř - xenni cek ad xafi tekkared.”
2SA 18:14 [Xenni] inna Yuwab: “Necc war xak ttrajiɣ.” U netta iksi třata n lansat, ijju as tent deg wuř n Abcalum, am netta ɛad yuyeř iddar di řwesṭ n tcejjart n yigg.
2SA 18:15 Ɛecra n imsexxaren inni d as yarebbun řesnaḥ i Yuwab, nnḍen as uca wtin Abcalum, nɣin t.
2SA 18:16 [Xenni] isuḍ Yuwab deg uyicc n icarri uca iɛqeb-dd řgens marra zeg weḍfar n Israil, minzi Yuwab ixs ad iḥaweř x řgens.
2SA 18:17 Nitni ksin Abcalum, nḍaren t deg wezɣar di tesraft tuǧeɣ u ssarbun xas ijj n uɛurric n yeẓra imɣar aṭṭas. Marra Israil iṭṭef di tarewřa, [kuř] aryaz ɣar uqiḍun nnes.
2SA 18:18 Umi tuɣa iddar, iksi Abcalum i yixef nnes ijj n umayḍu [iqeddsen], issbedd i-t di Teɣzurt n Ujeǧid, minzi inna: “Necc war ɣari bu mmi i ɣa isseɛqeř isem inu.” Netta iřaɣa as i umayḍu nni s yisem nnes. Ař ass-a qqaren as [i umayḍu nni] ‘afus n Abcalum’.
2SA 18:19 [Xenni] inna Aximaɛaṣ, mmis n Ṣaduq: “Ejj ayi ad azzřeɣ ɣar ujeǧid ad as ssiwḍeɣ řexbar aṣebḥan, aqa SIDI iḥḍa t zeg ifassen n řɛedyan nnes.”
2SA 18:20 [Maca] Yuwab inna as: “Ass-a war tessiwḍed ca řexbar aṣebḥan, [maca] deg ijj n wass nneɣni [tzemmared] ad tessiwḍed řexbar aṣebḥan. Ass-a war tessiwḍed areqqas d aṣebḥan maɣar mmis n ujeǧid immut.”
2SA 18:21 Inna Yuwab i Ukuci: “Uyur, ini i ujeǧid, min teẓrid cek!” Akuci ibendeq zzat i Yuwab uca [xenni] yuzzeř.
2SA 18:22 [Xenni] Aximaɛaṣ, mmis n Ṣaduq, inna ict n twařa nneɣnit i Yuwab: “Ad dd-yas wi ixsen, ejj ayi uřa d necc ad azzřeɣ awarni i Ukuci!” Inna Yuwab: “Mayemmi texsed [ɛad] ad tazzřed, a mmi? War ittwaf [ɛad] areqqas d aṣebḥan i cek, [maḥend ad t tessiwḍed]!”
2SA 18:23 [Inna]: “Ad dd-yas wi ixsen, necc xseɣ ad [din] azzřeɣ.” [Xenni] inna as Yuwab: “Azzeř!” Uca Aximaɛaṣ yuzzeř x webrid n udewwar [n L’Urdun] uca izzar netta Akuci.
2SA 18:24 Dawud iqqim jar tnayen n tewwura [n tendint]. Aɛessas igeɛɛed tazeqqa n tewwart [i iǧan] ɣar řḥiḍ, issgeɛɛed tamuɣři nnes, iceyyeɛ, iẓra ijj n weryaz ittazzeř, netta weḥḥdes.
2SA 18:25 Aɛessas iřaɣa, inna i-tt i ujeǧid. Ajeǧid inna: “Mařa netta weḥḥdes, xenni ad yaweḍ ijj n řexbar d aṣebḥan!” Yarni iqarreb-dd weryaz.
2SA 18:26 [Xenni] iẓra uɛessas [ɛad] ijj n weryaz nneɣni ittazzeř uca iřaɣa ɣar uɛessas n tewwart, inna: “Xzar, [ittazzeř din] ɛad ijj n weryaz nneɣni, uřa d netta weḥḥdes.” Ajeǧid inna: “Uřa d netta ad yaweḍ ijj n řexbar d aṣebḥan.”
2SA 18:27 Aɛessas inna [ɛawed]: “Necc ttwařiɣ amezwaru iggur am Aximaɛaṣ, mmis n Ṣaduq.” Inna ujeǧid: “Wa d ijj n weryaz iṣbeḥ, netta ad dd-yas s yijj n ureqqas d aṣebḥan.”
2SA 18:28 Aximaɛaṣ iřaɣa, inna i ujeǧid: “Řehna!” U netta ibendeq zzat i ujeǧid s uɣembub nnes ɣar temmurt, inna: “Ad ittwabarek SIDI, AREBBI nnec, wenni d ac isellmen iryazen nni igeɛɛden afus nsen x sidi inu ajeǧid.”
2SA 18:29 Inna ujeǧid: “Ma aḥudri, Abcalum, aqa-t mliḥ?” Inna Aximaɛaṣ: “Necc ẓriɣ ijj n ubarru d ameqqran umi Yuwab, amsexxar n ujeǧid, issekk amsexxar nnec, [maca] necc war ssineɣ min [imsaren].”
2SA 18:30 Inna ujeǧid: “Ḥeyyed ɣar uɣezdis, bedd da!” U netta iḥeyyed ɣar uɣezdis, iqqim ibedd [dinni].
2SA 18:31 Uca xzar, yusa-dd uřa d Akuci. Akuci inna: “Xzar, ijj n řexbar d aṣebḥan i sidi inu, ajeǧid. SIDI iḥḍa cek zeg ufus n marra inni xak iɣewwɣen.”
2SA 18:32 [Xenni] inna ujeǧid i Ukuci: “Ma aḥudri, Abcalum, aqa-t mliḥ?” Inna Ukuci: “Iři ad dewřen marra řɛedyan n sidi inu ajeǧid d marra inni xak iɣewwɣen maḥend ad cek ggen tuɛeffna am uḥuḍri.”
2SA 19:1 [Xenni] innexřeɛ ujeǧid aṭṭas, igeɛɛed ɣar wexxam i iǧan sennej i tewwart, iru. Uca am ikka ssa d ssa, inna [ammu]: “[A] mmi Abcalum, [a] mmi, [a] mmi Abcalum! Iři necc mmuteɣ deg wemcan nnec, [a] Abcalum, [a] mmi, [a] mmi!”
2SA 19:2 Nnan i Yuwab: “Xzar, ajeǧid ittru, ittecḍin x Abcalum.”
2SA 19:3 Deg wass nni idweř usenjem n marra řgens ɣar wecḍan, maɣar řgens isřa deg wass nni: “Ajeǧid icḍen x mmis.”
2SA 19:4 Deg wass nni yudef-dd řgens ɣar tendint am mammec ittḥama řgens i ittseḍḥa ixef nnes, xmi ttarekkʷařen zeg umenɣi.
2SA 19:5 Ajeǧid tuɣa iřeḥḥef i uɣembub nnes, ittřaɣa ujeǧid s tmijja ijehden: “[A] Mmi Abcalum, Abcalum, [a] mmi, [a] mmi!”
2SA 19:6 [Xenni] yudef Yuwab ɣar ujeǧid di taddart, inna: “Cek ass-a tessḥecmed udem n marra imsexxaren nnec inni dd-ifekken ass-a řeɛmar nnec d řeɛmar n iḥenjiren nnec d tḥenjirin nnec uřa d řeɛmar n temɣarin nnec d řeɛmar n tiyya nnec,
2SA 19:7 umi texsed inni cek ittɛiffen u umi tɛiffed inni cek ittexsen. Maɣar cek tewcid aneɣ ass-a ad nessen, aqa ɣarek imeqqranen d imsexxaren war sekkwin walu. Iwa ass-a ssneɣ, mařa Abcalum iddar u neccin marra tuɣa nemmut, man aya ad yiři nican di tiṭṭawin nnec.
2SA 19:8 Xenni řexxu, kkar, ffeɣ ɣar barra, uca siweř ɣar wuř n imsexxaren nnec, maɣar necc ad ac jjaǧeɣ ɣar SIDI, mařa cek war teffiɣed ɣar barra, xenni ǧiřet-a war ittɣimi ad ɣarek issens uřa d ijj n weryaz. D man aya ad yiři mahu i cek x marra tuɛeffna i cek iřeqfen zi temẓi nnec ař iḍa.”
2SA 19:9 [Xenni] ikkar ujeǧid, iqqim di tewwart n tendint. U nitni xebbaren marra řgens, nnan: “Xzar, ajeǧid iqqim di tewwart.” Uca yusa-dd marra řgens zzat i wudem n ujeǧid. [Maca] Israil yarweř, [kuř] aryaz ɣar iqiḍan nnes.
2SA 19:10 Uca marra řgens, di marra tiqebbař n Israil, tuɣa ittemcubbec, nitni nnan: “Ajeǧid issenjem aneɣ zeg ufus n řɛedyan nneɣ u netta ifekk aneɣ zeg ufus n Ifilisṭiniyyen u řexxu yarweř zi temmurt zi ssibbet n Abcalum,
2SA 19:11 [umi] Abcalum, wenni nedhen neccin [d ajeǧid] xaneɣ, immut deg umenɣi. [Xenni] řexxu, mayemmi tessusmem [ammu] ḥima ad dd-tarrem ajeǧid ɛawed [ɣar da]?”
2SA 19:12 [Xenni] issekk ajeǧid Dawud [ijj n ureqqas] ɣar ikehhanen Ṣaduq d Abyatar, inna: “Siweř ak-d imɣaren n Yahuda, ini: ‘Mayemmi texsem ad tiřim d ineggura ḥima ad tarrem ajeǧid ɣar taddart nnes?’ - [minzi] awařen n marra Israil iwḍen ɣar ujeǧid di taddart nnes -
2SA 19:13 ‘Kenniw d aytma inu, kenniw d iɣsan inu d weysum inu. Mayemmi texsem xenni ad tiřim d ineggura i d ɣa yarren ajeǧid?’
2SA 19:14 Uca i Ɛamasa ad as tinim: ‘Ma war iǧi cek d iɣsan inu d aysum inu? Ejj AREBBI ad ayi igg ta d ta, mařa war tᵉttiřid d akumandar n řɛeskar deg wemcan n Yuwab zzat i wudem inu marra ussan.’”
2SA 19:15 Ammu [izemmar] Dawud ad ɣares dd-ijbedd uř n marra iryazen n Yahuda am [uř] n ijj n weryaz u nitni ssekken ɣar ujeǧid nnan: “Ɛqeb, cek d marra imsexxaren nnec.”
2SA 19:16 [Xenni] iɛqeb-dd ujeǧid uca yiweḍ-dd ɣar L’Urdun, [uca] [ayt n] Yahuda usin-dd ɣar Jiljal i umsagar ak-d ujeǧid maḥend ad raḥen ad ɛawnen aẓekkʷi n ujeǧid x L’Urdun.
2SA 19:17 Uca Cimɛi, mmis n Jira, ijj zeg ayt n Binyamin zi Baxurim iksi deg uḍar nnes, ihwa ak-d yeryazen n Yahuda i umsagar ak-d ujeǧid Dawud.
2SA 19:18 Tuɣa akides [ɛawed] ařef n yeryazen zi Binyamin, uřa d Ṣiba, amsexxar n taddart n Cawul ak-d xemmesṭac n iḥenjiren nnes d ɛicrin n imsexxaren nnes akides. Nitni iwḍen ad ɛdun L’Urdun qbeř i dd ɣa yas [dinni] ujeǧid.
2SA 19:19 Teẓwa tɣarrabut i useẓwi n taddart n ujeǧid u ḥima ad tegg min iǧan d lemliḥ di tiṭṭawin nnes. U Cimɛi, mmis n Jira, iwḍa [s uɣembub nnes ɣar temmurt] zzat i wudem n ujeǧid, umi dd-iẓwa wanita L’Urdun,
2SA 19:20 u netta inna i ujeǧid: “Ejj sidi inu war d ayi iḥesseb řmuɛṣiyyet inu, ejj i-t war ittidar [ɛad] deg ufaryeḍ i igga umsexxar nnec deg wass umi iffeɣ sidi inu ajeǧid zi Urcalim, ḥima ajeǧid war tt ikessi ammu ɣar wuř [ḥima ad zzayi intaqem].
2SA 19:21 Maɣar amsexxar nnec issen: Necc, [wah,] necc xḍiɣ, [maca] xzar, necc ass-a d amezwaru zi marra taddart n Yusuf i dd-ihwan, ḥima ad msagareɣ sidi inu ajeǧid.”
2SA 19:22 [Xenni] yarra-dd Abicay, mmis n Ṣaruya, inna: “Zeɛma war ittxeṣṣi Cimɛi ad immet x man aya? Aqa netta inɛeř amedhun n SIDI.”
2SA 19:23 [Maca] Dawud inna: “Min jar ayi-dd akidwem, arraw n Ṣaruya, umi tdewřem ayi ass-a [am] ijj n weɣrim? Ma ittxeṣṣa ad ittwaneɣ ass-a ca n ijj di Israil? Axmi necc war ssineɣ, aqa necc ass-a dewřeɣ d ajeǧid x Israil?”
2SA 19:24 Ajeǧid inna i Cimɛi: “Cek war tᵉttmettid ca!” Uca ajeǧid ijjuǧ as [t].
2SA 19:25 Uřa d Mafibucat, mmis n Cawul, yusa-dd i umsagar ak-d ujeǧid. Netta tuɣa war issird iḍaren nnes, u war iḥeff acřaɣem nnes u war iṣebben arruḍ nnes zeg wass i di iffeɣ ujeǧid ař ass i di dd-iɛqeb netta di řehna.
2SA 19:26 Umi dd-yusa di Urcalim i umsagar ak-d ujeǧid, imsar, aqa inna as ujeǧid: “Mayemmi war kidi truḥed, Mafibucat?”
2SA 19:27 Netta inna as: “Sidi inu ajeǧid, amsexxar inu iɣdar ayi, maɣar amsexxar nnec inna: ‘Necc xseɣ ad bardɛeɣ i weɣyuř, ad xas nyeɣ, ad raḥeɣ ak-d ujeǧid!’, maɣar amsexxar nnec d aqejdaḥ.
2SA 19:28 Netta iceqqef deg umsexxar nnec ɣar sidi inu ajeǧid. [Maca] sidi inu ajeǧid, am yijj n lmalak n AREBBI. Egg min iǧan d lemliḥ di tiṭṭawin nnec.
2SA 19:29 Minzi marra taddart n baba tuɣa war teǧi mɣir iryazen imettinen i sidi inu ajeǧid. [Waxxa amenni] cek tessɣimed amsexxar nnec ɣar yinni ittetten ɣar ṭṭabřa nnec! Min ɣari ɛad d tasɣart u i umi ɣa ttareɣ ɛad ktar ɣar ujeǧid?”
2SA 19:30 Ajeǧid inna as: “Mayemmi tessawařed ɛad ammu x tmesřayin nnec? Necc qqareɣ ac: Cek d Ṣiba, kenniw ad tebḍam tammurt.”
2SA 19:31 Inna Mafibucat i ujeǧid: “Netta izemmar ad tt iksi marra, maɣar sidi inu ajeǧid, aqa iɛqeb ɣar taddart nnes di řehna.”
2SA 19:32 Barzillay, Ajilɛadi, ihwa zi Rujalim maḥend ad t iwc afus i ujeǧid ɣar uẓekkwu n L’Urdun, ḥima ad t issqebbeḍ [ammu] x L’Urdun.
2SA 19:33 Barzillay tuɣa iwsar aṭṭas, ijj n weryaz n tmenyin n iseggʷusa. Netta tuɣa iksi ɣares ajeǧid umi t tuɣa di Maḥanayim, minzi netta tuɣa-t d ijj n weryaz ɣares agřa aṭṭas.
2SA 19:34 Ajeǧid inna i Barzillay: “Ẓwa akidi. Necc ad cek ɣari ksiɣ di Urcalim.”
2SA 19:35 [Maca] Barzillay inna i ujeǧid: “Mecḥař n wussan n iseggʷusa n tudart inu [ɛad din] ařami ɣa ffɣeɣ ak-d ujeǧid ɣar Urcalim?
2SA 19:36 Ass-a necc ɣari tmenyin n iseggʷusa. Ma zemmareɣ ad farzeɣ [ɛad] min iṣebḥen zi min war iḥřin? Ma izemmar umsexxar nnec ad iqqas min ɣa cceɣ d min ɣa sweɣ? Ma zemmareɣ ad sřeɣ ɛad i tmijja n imedyazen d tmedyazin? Mayemmi ɣa issedqeř umsexxar nnec ɛad x sidi inu ajeǧid?
2SA 19:37 Amsexxar nnec ad iẓwa L’Urdun ak-d ujeǧid mɣir cwayt. Mayemmi d ayi ɣa iwc ujeǧid tarebbaḥt-a?
2SA 19:38 Ejj amsexxar nnec ad iɛqeb ḥima ad mmteɣ di tendint inu, ɣar wenḍeř n baba d yemma. Xzar, aqa da amsexxar nnec Kimham! Ejj i-t ad iẓwa ak-d sidi inu ajeǧid. Egg as min tᵉttwařid mliḥ di tiṭṭawin nnec.”
2SA 19:39 [Xenni] inna ujeǧid: “Kimham ad kidi iẓwa u min tᵉttwařid mliḥ di tiṭṭawin nnec, ad as t ggeɣ. Marra min zzayi tessutared, ad ac t ggeɣ.”
2SA 19:40 [Umi] iẓwa marra řgens L’Urdun, iẓwa uřa d ajeǧid. Ajeǧid issudem Barzillay, ibarek i-t. [Xas uca] idweř netta ɣar temmurt nnes.
2SA 19:41 Ajeǧid maca yarni iɛdu ɣar Jiljal u Kimham iɛdu akides. Marra řgens n Yahuda tuɣa isseɛdu ajeǧid, uřa d azyen n řgens n Israil.
2SA 19:42 U xzar, marra iryazen n Israil usin-dd ɣar ujeǧid, nnan i ujeǧid: “Mayemmi aytmatneɣ, iryazen n Yahuda, ucaren cek [i neccin] u nedhen ajeǧid d taddart nnes řami tuɣa iẓwa L’Urdun d marra iryazen n Dawud akides?”
2SA 19:43 [Xenni] arrin-dd marra iryazen n Yahuda x yeryazen n Israil: “Minzi ajeǧid itteɛna aneɣ-dd. Mayemmi txeyyqem x uya? Ma necca neccin zi [macca n] ujeǧid niɣ yiwi-dd netta ict n tarzeft i neccin?”
2SA 19:44 Iryaz[en] n Israil arrin-dd x yeryazen n Yahuda, nnan: “Neccin ɣarneɣ ɛecra n ifassen ɣar ujeǧid, uřa ak-d Dawud [ɣarneɣ xenni] ktar xawem. Mayemmi d aneɣ tesseḥqarem? Ma war iǧi wawař nneɣ d amezwaru, maḥend ad narr ajeǧid nneɣ?” [Uca] tuɣa awař n yeryazen n Yahuda ijhed x wawař n yeryazen n Israil.
2SA 20:1 Tuɣa din ijj n weryaz i war isekkwin, qqaren as Cabaɛ, mmis n Bikri, ijj n Ubinyamini. Netta isuḍ deg uyicc n icarri, inna: “Neccin war ɣarneɣ tasɣart di Dawud u neccin war ɣarneɣ řwart ak-d mmis n Yassa. [Ejj] [kuř] aryaz ad yuyur ɣar iqiḍan nnes, [a] Israil!”
2SA 20:2 [Xenni] iffeɣ kuř aryaz zi ḍeffar n Dawud, [iruḥ] awarni i Cabaɛ, mmis n Bikri. [Maca] iryazen n Yahuda qqimen řesqen ak-d ujeǧid nsen, zi L’Urdun ař Urcalim.
2SA 20:3 [Umi] yudef Dawud ɣar taddart nnes di Urcalim, iksi ujeǧid ɛecra n temɣarin, tiyya nnes tinni tuɣa ijja awarni as ḥima ad ḥḍant taddart. Netta igga i-tent deg ict n taddart tᵉttwaḥḍa u netta itthilla daysent, maca war ɣarsent yudif. Nitenti qqiment bellɛent ař ass n řmewt nsent, ddarent d tijjař.
2SA 20:4 Inna ujeǧid [ɛawed] i Ɛamasa: “Řaɣa-dd x yeryazen n Yahuda ad munen ɣari di třata n wussan, uca [xenni] bedd cek da!”
2SA 20:5 Ɛamasa iffeɣ ḥima ad iřaɣa x Yahuda ad ssmunen, [maca] netta iɛeṭṭeř x řweqt i tuɣa akides igga ujeǧid.
2SA 20:6 [Xenni] inna Dawud i Abicay: “Řexxu ad aneɣ igg Cabaɛ, mmis n Bikri, tuɛeffna mahu x Abcalum. Ksi akidek imsexxaren n sidi u ḍfar i-t, ḥima netta war izemmar ad yaf i yixef nnes tineddam ifaryen uca ad iweddar zi tiṭṭawin nneɣ.”
2SA 20:7 Ffɣen yeryazen n Yuwab, [uyuren] awarni as ak-d iɛessasen n arrimet d ireqqasen n tazřa d marra ayt n bu-teɣruḍt. Nitni ffɣen-dd zi Urcalim, ḥima ad ḍfaren Cabaɛ, mmis n Bikri.
2SA 20:8 [Umi] ten tuɣa ɣar weẓru ameqqran n Jibɛun, tuɣa Ɛamasa zzat i wudem nsen. Yuwab tuɣa ittḥezzam arruḍ nnes n umenɣi i yarḍ. Tuɣa xas ijj n uḥezzam ak-d ssif deg ufurru n weɣřaf i xas ittwaggen ɣar tejɛinna nnes. [Umi] yuyur netta ɣar zzat, iwḍa as ssif [zzayes].
2SA 20:9 Inna Yuwab i Ɛamasa: “Aqa cek mliḥ, uma?” Icebbar Yuwab s ufus afusi di tmart n Ɛamasa ḥima ad t issudem.
2SA 20:10 Ɛamasa war iḥekkar i ssif i tuɣa deg ufus n Yuwab uca netta iřqef i-t zzayes deg uɛeddis uca ffɣen as-dd wadan ɣar temmurt. Netta immut břa ma iřqef i-t ict n twařa nneɣnit. U Yuwab ak-d umas Abicay iḍfar Cabaɛ, mmis n Bikri.
2SA 20:11 Ijj n weryaz ibedd ɣares [ɣar Ɛamasa]. [Tuɣa netta] zeg imsexxaren n Yuwab, inna: “Ejj wenni ixḍaren Yuwab uřa d wenni iǧan ak-d Dawud, ad iḍfar Yuwab!”
2SA 20:12 Ɛamasa maca tuɣa izzeř ittwanneḍ deg idammen nnes deg webrid ameqqran. [Umi] iẓra aryaz nni, aqa marra řgens iqqim ibedd, ijarr netta Ɛamasa zeg webrid ɣar yeyyar u inḍar ijj n warruḍ tiwa nnes, minzi iẓra qaɛ wi ɣares dd-iwḍen, iqqim ittbedda.
2SA 20:13 Ařami tuɣa netta ittwaggʷej x webrid, ɛdun marra iryazen awarni i Yuwab, ḥima ad ḍfaren Cabaɛ, mmis n Bikri,
2SA 20:14 wenni tuɣa ikka x marra tiqebbař n Israil ɣar Abal u ɣar Bayt-Maɛka, ak-d marra Ibiriyyen nni ittwassmunen u ruḥen [ɛawed] awarni as.
2SA 20:15 [Ammu] dd-iwḍen nitni [ɣar din] uca nnḍen-dd i [Cabaɛ] di Abal-Bayt-Maɛka. Nitni ssefyen ijj n lbaraj x tendint u [lbaraj] nni ibedd ɣar řḥiḍ n zzat [i dd-innḍen i tendint]. Marra řgens i tuɣa ak-d Yuwab, ggin ad areddǧen řḥiḍ ḥima ad as ssɣeḍřen.
2SA 20:16 [Xenni] třaɣa ict n temɣart d tmiɣist zi tendin:t “Sřem, sřem, inim i Yuwab: ‘As-dd da, ades-dd, ařami zemmareɣ akidek ssiwřeɣ.’”
2SA 20:17 [Umi] dd-yusa netta, yudes-dd ɣares, tenna temɣart: “Ma cek d Yuwab?” Netta inna: “D necc.” Tenna as nettat: “Seř ɣar wawařen n tayya nnec.” Netta inna: “Necc ttesřiɣ.”
2SA 20:18 [Xenni] tenna: “Zic tuɣa ssiwřen di kuř amcan, nnan: ‘Ittxeṣṣa asen ad tt sseqsan nican di Abal!’, uca ammu i kemmřen nitni [tamesřact nni] mliḥ.
2SA 20:19 Necc zeg inni n ayt n řehna u zeg imtiqqan di Israil, [maca] cek texsed ad tenɣed ict n tendint, tenni d yemmas di Israil. Mayemmi ɣa tṣarḍed řwart n SIDI?”
2SA 20:20 Yuwab yarra-dd xas, inna: “Aya iggʷej xafi aqa necc ad ṣarḍeɣ u ad hedmeɣ!
2SA 20:21 Tamesřact war teǧi amenni. Maca ijj n weryaz zeg idurar n Ifrayim, qqaren as Cabɛa, mmis n Bikri, iksi afus nnes x ujeǧid, x Dawud. Netta waha ittxeṣṣa ad t tewcem, [xenni] ad ḥeyydeɣ zi tendint.” Tenna temɣart i Yuwab: “Xzar, azeǧif nnes ad ac t-i-dd-immenḍar tiwa i řḥiḍ.”
2SA 20:22 Tusa-dd temɣart s tiɣit nnes ɣar marra řgens u nitni qessen azeǧif i Cabɛa, mmis n Bikri, nḍaren t i Yuwab. [Xenni] isuḍ Yuwab deg uyicc n icarri u nitni bezzɛen ixef nsen, aggʷejen x tendint u [kuř] aryaz [yuyur] ɣar iqiḍan nnes u Yuwab iɛqeb ɣar Urcalim, ɣar ujeǧid.
2SA 20:23 Yuwab [ittwagg] d azeǧif x marra řɛeskar n Israil, u Banaya, mmis n Yahuyadaɛ, tuɣa x iɛessasen n arrimet u x ireqqasen n tazřa.
2SA 20:24 Aduram [ibedd] x ljizya u Yahucafaṭ, mmis n Axilud, [tuɣa-t] d amarir n umezruy.
2SA 20:25 Ciwa tuɣa d amarir, u Ṣaduq d Abyatar tuɣa aten d ikehhanen.
2SA 20:26 Uřa d Ɛira zi Ya’ir tuɣa d akehhan n Dawud.
2SA 21:1 Deg wussan n Dawud tuɣa din ijj n řaẓ, třata n iseggʷusa, aseggʷas awarni useggʷas. U Dawud yarzu udem n SIDI u SIDI inna: “[D man aya] x Cawul u x idammen [i iřeṣqen di] taddart [nnes], minzi netta inɣa ayt n Jibɛun.”
2SA 21:2 [Xenni] iřaɣa-dd ujeǧid x ayt n Jibɛun, issiweř akidsen. Ayt n Jibɛun war [dd-qqarṣen] ca zeg ayt n Israil, maca zi min [ɛad] iqqimen zeg Imuriyyen. Ayt n Israil tuɣa jjuǧen asen, [maca] Cawul tuɣa yarezzu ad ten iwwet deg wecḍar nnes i ayt n Israil d Yahuda.
2SA 21:3 Dawud inna i ayt n Jibɛun: “Min d awem i ɣa ggeɣ u s min zi ɣa ggeɣ aṣřaḥ, [maḥend] ad tbarkem řwart n SIDI?”
2SA 21:4 Ayt n Jibɛun nnan as: “War d aneɣ icqi nnuqart niɣ d wureɣ zi Cawul niɣ zi taddart nnes. Ɛawed war d aneɣ dd-ikkar ad neneɣ ca n ijj di Israil.” U netta inna: “Min ɣa tinim, ad awem t ggeɣ.”
2SA 21:5 Nitni nnan i ujeǧid: “[Icqa aneɣ] weryaz nni ixsen ad xaneɣ iqḍa u tuɣa inwa ad imḥa aɣimi nneɣ di marra tammurt n Israil.
2SA 21:6 Ad aneɣ mmewcen sebɛa n yeryazen zeg iḥenjiren nnes, ḥima ad ten ayřen zzat i SIDI di Jibɛa n Cawul, wenni ittwafarzen zi SIDI!” Uca ajeǧid inna: “Necc ad [ten] wceɣ.”
2SA 21:7 [Maca] ajeǧid issɛizz x Mafibucat, mmis n Yunatan, mmis n Cawul, di ṭṭweɛ n tjaǧit i SIDI, tenni [tᵉttwagg] jar asen, jar Dawud d Yunatan, mmis n Cawul.
2SA 21:8 Ajeǧid iksi tnayen n iḥenjiren n Riṣfa, yeǧis n Aya, i dd-turuw i Cawul, Armuni d Mafibucat, d xemsa n iḥenjiren n Mirab, yeǧis n Cawul, i dd-turuw i Ɛadriyil, mmis n Barzillay zi Maḥulay.
2SA 21:9 Netta iwca i-ten deg ifassen n ayt n Jibɛun inni ten ayřen x wedrar zzat i wudem n SIDI. Sebɛa nni wḍan deg ict n twařa u s ijj n webrid. Nitni ttwanɣen deg wussan n tmeyra, deg wussan imezwura, ɣar beddu n tmeyra n imendi.
2SA 21:10 [Xenni] teksi Riṣfa, yeǧis n Aya, ict n txancet tessu tt zzat i yixef nnes x ijj n jjarf. Zi beddu n tmeyra ař xasen dd-zeǧɛen waman zeg ujenna. Nettat war tejji ijḍaḍ n ujenna ad ɣarsen dd-asen s uziř uřa d řewḥuc n řexřa s ǧiřet.
2SA 21:11 Ḥajan as i Dawud min tuɣa tegga Riṣfa, yeǧis n Aya, tayya n Cawul.
2SA 21:12 Iṭṭef Dawud abrid maḥend ad iksi zeg imezdaɣ n Yabic di Jilɛad iɣussan n Cawul d iɣussan n mmis Yunatan nni dd-kksen nitni zeg wazzaɣ n Bayt-San, mani ten yuyřen Ifilisṭiniyyen deg wass i di ɣeřben Ifilisṭiniyyen Cawul x [idurar n] Jilbuɛa.
2SA 21:13 Netta issgeɛɛed ssenni iɣsan n Cawul d iɣsan n mmis Yunatan. Nitni ssmunen ɛawed iɣsan n yinni ittwayřen.
2SA 21:14 Neḍřen iɣsan n Cawul d mmis Yunatan di temmurt n Binyamin di Ṣaylaɛ deg wenḍeř n babas Qis u nitni ggin marra min d asen yumur ujeǧid. Awarni man aya ijja AREBBI ad ittwasseṣřeḥ ixef nnes di ṭṭweɛ n temmurt s tẓaǧit [nsen] yuǧɣen.
2SA 21:15 Ifilisṭiniyyen mmenɣen ɛawed ak-d Israil. Dawud ihwa d imsexxaren nnes akides. Nitni mmenɣen ak-d Ifilisṭiniyyen uca idweř Dawud yuḥeř aṭṭas.
2SA 21:16 Yicbi-Banub, ijj zeg iḥenjiren n Rafa, wenni lansa nnes tewzen teřt-mya ciqlu n nnḥas u [wenni] tuɣa ibyes s yijj n [ssif] n jdid, iṭṭɣiř as ad iwwet Dawud.
2SA 21:17 [Maca] Abicay, mmis n Ṣaruya, iwca afus [i Dawud], iwta Afilisṭini, inɣa i-t. Xenni jjuǧen as yeryazen n Dawud, nnan: “Cek war akidneɣ teffɣed ɛad ɣar umenɣi, war iɛeddeř ad txesyid řefnar n Israil.”
2SA 21:18 Awarni as imsar, aqa ikkar ɛawed umenɣi ak-d Ifilisṭiniyyen di Jub. Řexdenni Sabkay, Aḥucayi, iwta Saf, wenni d ijj zeg iḥenjiren n Rafa.
2SA 21:19 Ɛawed tuɣa din umenɣi ak-d Ifilisṭiniyyen di Jub. Ilḥanan, mmis n Yaɛri-Arjim, zi Bayt-Laḥm, iɣřeb x [učmas n] Julyat zi Jat. Akeccuḍ n lansa nnes igga am yijj n weɛmud n ukeccuḍ n uxeyyeḍ.
2SA 21:20 Uca ikkar ɛawed umenɣi di Jat. Tuɣa din ijj n weryaz d azirar, s setta n iḍewḍan ɣar ifassen nnes u setta n tfednin ɣar iḍaren nnes, [marra] řqedd nsen arebɛa u ɛicrin. Uřa d netta ittwaxřeq-dd i Rafa.
2SA 21:21 Netta istehza zi Israil, maca Yunatan, mmis n Cimɛa, umas n Dawud, iɣřeb xas.
2SA 21:22 Arebɛa-ya ttwaxeřqen-dd di Rafa di Jat u nitni wḍan s ufus n Dawud u s ufus n imsexxaren nnes.
2SA 22:1 Dawud issiweř awařen n izři-ya i SIDI deg wass umi t ifekk SIDI zeg ufus n marra řɛedyan nnes u zeg ufus n Cawul.
2SA 22:2 Netta inna: “SIDI d Taṣḍart inu d lburj inu d amfekki inu.
2SA 22:3 SIDI n Teṣḍart inu, ɣares arekkwařeɣ. Cek d aseřqi inu d yicc n usenjem inu, lburj inu yuɛřan, amcan inu n tarewřa d Amsenjam inu. Cek tfekked ayi zi lɛunf.
2SA 22:4 Řaɣiɣ: Asemɣar i SIDI!, uca ttwassnejmeɣ zi řɛedyan inu.
2SA 22:5 Maɣar nnḍen ayi-dd řemwaj n řmewt, ssiggʷedent ayi řḥemřat n waman ihajen.
2SA 22:6 Iseɣwan n řaxart carfen ayi, tixecfin n řmewt ḥṣarent ayi.
2SA 22:7 Di řeḥṣaret inu řaɣiɣ-dd x SIDI u x AREBBI inu i x dd-řaɣiɣ. Zi Zzawect Tameqqrant nnes isřa Netta i tmijja inu uca iɣuyyan inu udfen ɣar imezzuɣen nnes.
2SA 22:8 Xenni tenhezz u tarjiji temmurt, dsusa n ujenna ttraḥen-dd ttasen-dd, nhezzen, maɣar aɣḍab nnes tuɣa ittwassarɣ.
2SA 22:9 Ddexxan igeɛɛed-dd zeg wenzaren nnes, timessi zeg uqemmum nnes tṣarḍ, řefḥem itteḥduduqen ittwassarɣ zzayes.
2SA 22:10 Netta igga ajenna ad yaḍar, Netta ihwa-dd. Aqa din ijj n useynu ibbumbes sadu iḍaren nnes.
2SA 22:11 Netta indeh x ijj n ukirub, iḍwa, Netta ittwaẓar x wafriwen n usemmiḍ.
2SA 22:12 Netta igga taǧest ad as tenneḍ am iɛuccuten, ijj n wegraw n waman, iseynuten iqelljen ibbarecnen.
2SA 22:13 Zi tissiqt qibač nnes ttwassarɣen řefḥem itteḥduduqen.
2SA 22:14 Ijja SIDi ajjaj ad idduqqez zeg ujenna, uca Amɛuǧi x kuřci igga tmijja nnes ttnefrara.
2SA 22:15 Netta issekk fřitcat n řqews nnes uca ibezzeɛ i-ten, izzaryeḍ assamen uca issiggʷed i-ten.
2SA 22:16 Tisiwin n řebḥar dewřent ttbanent, dsusa n ddunect dewřen ɛarran zeg uweddeb n SIDI, zeg usuḍi n řeɛwin zeg wenzaren nnes.
2SA 22:17 Isswiẓẓeḍ-dd afus nnes zi řuɛřa, yiwi ayi, ijbed ayi-dd zeg waman mɣaren.
2SA 22:18 Netta ifekk ayi-dd zi řeɛdu inu ijehden, zeg inni d ayi icarrhen, minzi nitni tuɣa jehden xafi.
2SA 22:19 Ḥṣaren ayi deg wass n arẓiyyet inu, maca SIDI tuɣa d amɛemmed inu.
2SA 22:20 Netta indeh ayi ɣar ttasiɛ, issenjem ayi, maɣar Netta tuɣa ittɛizza dayi.
2SA 22:21 SIDI ixřef ayi ɛlaḥsab tasegda inu, ɛlaḥsab tazdugi n ifassen inu ixeǧeṣ ayi.
2SA 22:22 Maɣar necc ḥḍiɣ ibriden n SIDI, war ḥeyydeɣ ca x AREBBI inu s uxeyyeb.
2SA 22:23 Maɣar marra lfarayiḍ nnes tuɣa jar tiṭṭawin inu, war ḥeyyideɣ ca x tweṣṣa nnes.
2SA 22:24 Dewřeɣ kemřeɣ i Netta, ḥḍiɣ ixef inu zi řmuɛṣiyyet inu.
2SA 22:25 SIDI ixřef ayi anect n tasegda inu, anect n tazdugi inu zzat i tiṭṭawin nnes.
2SA 22:26 I umeddukkeř amtiqqi i teǧid d ameddukkeř d amtiqqi, i bu-teɣruḍt ikemmřen i teǧid Cek tkemmřed.
2SA 22:27 I wenni ittwassizedgen aqa Cek d amezdag, ak-d wenni ifarɣen, aqa tfarɣed.
2SA 22:28 Cek tessnejmed řgens ittwaḥṣar, maca tiṭṭawin nnec ḍidd i imɛeffaren, Cek ad ten tessehwid.
2SA 22:29 Minzi Cek d řefnar inu, a SIDI! SIDI ittegg tafawt di taǧest inu.
2SA 22:30 Minzi akidek ad azzřeɣ x ict n bandiyya, ak-d AREBBI inu ad neggzeɣ x ijj n řḥiḍ.
2SA 22:31 Abrid n Arebbi ikmeř, min iqqar SIDI aqa ittwaṣeffa di tmessi. Netta d aseřqi i marra inni ɣares yarekkwařen.
2SA 22:32 Maɣar man wen i iǧan d Arebbi, mɣir SIDI, u man wen i iǧan d taṣḍart, mɣir AREBBI nneɣ?
2SA 22:33 Arebbi nni d lqelɛa inu ijhed, Netta issarxu abrid inu nican.
2SA 22:34 Netta igga iḍaren inu am yinni n tudadin, Netta yarra ayi ad beddeɣ x řegɛudi inu.
2SA 22:35 Netta isseřmed ifassen inu i umenɣi, iɣaǧen inu maḥend ad meḥḍen ijj n řqews n nnḥas.
2SA 22:36 Tewcid ayi aseřqi n usenjem nnec, s uwaḍeɛ nnec tessemɣared ayi.
2SA 22:37 Aqa tegged ttasiɛ i uṣurif inu sadu inu, uca ticeɛbin inu war meyyřent.
2SA 22:38 Necc ḍfareɣ řɛedyan inu uca teḥḥiɣ ten, war dd-ttɛiqqibeɣ ař ten qḍiɣ.
2SA 22:39 Necc qḍiɣ ten u řebzeɣ ten, ařami war kkaren ɛawed. Nitni wḍan-dd sadu iḍaren inu.
2SA 22:40 Cek tbeysed ayi s jjehd i umenɣi, tarrid inni ɣari dd-ikkaren ad aḍaren sadu inu.
2SA 22:41 Cek tewcid ayi timejjart n řɛedyan inu, n yinni d ayi icarrhen, u necc areddǧeɣ ten.
2SA 22:42 Nitni řaɣan, maca war din tuɣi amsenjem, řaɣan, x SIDI, maca Netta war xasen dd-yarri.
2SA 22:43 Necc ssweddareɣ ten am tɛejjajt n temmurt, am ubeǧaɛ x ibriden ɛejneɣ xasen u řebzeɣ ten.
2SA 22:44 Cek tfekked ayi zeg imcubbecen n řgens inu, teḥḍid ayi d azeǧif n řegnus, ijj n řgens war t ssineɣ, ad ayi isexxar.
2SA 22:45 Tarwa n ijj n ubarrani ssniɛmiřen sswaḍɛen ayi. Mɣir řami d ayi isřa umezzuɣ nsen waha, sřin-dd ɣari.
2SA 22:46 Arrawen n ijj n ubarrani fecřen, waxxa nnḍen asen-dd lbarajat nsen.
2SA 22:47 Tudart i SIDI. Ad tᵉttwabarek Teṣḍart inu. Ejj AREBBI n teṣḍart n usenjem inu ad ittwassgeɛɛed ɣar ujenna!.
2SA 22:48 Arebbi wenni xafi ittentaqamen d wenni d ayi itteggen řegnus sadu ufus inu,
2SA 22:49 wenni d ayi ittfekkan zeg ufus n řɛedyan inu, wah, Cek tessgeɛɛaded ayi tiwa n yinni d ayi ittḍaddan, Cek tessenjamed ayi zeg weryaz n řexcunet.
2SA 22:50 X uya, SIDI, xseɣ ad Cek qadiɣ, xseɣ ad zehhdeɣ Isem nnec.
2SA 22:51 Netta igga isenjimen n ujeǧid nnes mɣaren, uca isscen tamexsiwt nnes icewwaren i umedhun nnes, i Dawud u i zzariɛet nnes i řebda.”
2SA 23:1 Ina d awařen ineggura n Dawud. Dawud, mmis n Yassa issawař, bu-teɣruḍt i ittwassɛuǧan issawař, amedhun n AREBBI n Yaɛqub, amedyaz iɛizzen n Israil.
2SA 23:2 Arruḥ n SIDI issiweř zzayi u awař nnes x iřes inu.
2SA 23:3 AREBBI n Israil inna, aqa Taṣḍart n Israil tessiweř akidi: “Ijj n řḥakem jar iwdan, ijj n umsegged, ijj n řḥakem nni itteggʷeden AREBBI,
2SA 23:4 wenni iggin am tfawt ɣar tuffut xmi dd-tneqqar tfuct, ɣar ict n tuffut břa iseynuten iɛbubbzen, xmi, s tissiqt n tfawt awarni i wenẓar, aqa issfuffuy aɣemmuy aziza zi temmurt.”
2SA 23:5 “Ma war teǧi taddart inu ɣar Arebbi amenni? Aqa igga ayi ijj n Řɛahd i řebda, msettef di marra u ittwaḥḍa. Qaɛ asenjem inu d marra min issnekkaran řefraḥet, ma Netta war issɣemmi aya?
2SA 23:6 Maca inni war isekkwin ad ttwammenḍaren am ict n tseṭṭa ak-d isennanen, marra nitni, maɣar war izemmar ad ttwaṭṭfen s ufus.
2SA 23:7 Aryaz i ixsen ad tent iḥada, ad iḥezzem ixef nnes s wuzzař d ukeccuḍ n lansa u nitni ad ttwasscemḍen s tmessi deg wemcan nsen.”
2SA 23:8 Ina d ismawen n ayt n bu-teɣruḍt i [iǧan] ɣar Dawud: Yucayb Bacabbat, mmis n Atahkamuni, azeǧif n ineɣrafen. Lansa nnes tuɣa d řehzuṭ nnes, issnuqqeb temn-mya n yeryazen deg ijj n umenɣi.
2SA 23:9 Awarni as [yusa-dd] Aliɛazar, mmis n Dudu, mmis n Axuxi. Netta tuɣa [d ijjen] zi třata n ayt n bu-teɣruḍt [nni iǧan] ak-d Dawud, řami nitni stehzan zeg Ifilisṭiniyyen nni tuɣa din munen i umenɣi, [am] geɛɛden iryazen n Israil ɣarsen [i umenɣi].
2SA 23:10 Netta ikkar, iwta deg Ifilisṭiniyyen ař yuḥeř ufus nnes. Iřṣeq ufus nnes di ssif. SIDI yiwiḍ ijj n usenjem d ameqqran deg wass nni uca [iryazen n] řgens ɛeqben awarni as, [maca] mɣir ḥima ad keccḍen.
2SA 23:11 Awarni as [yusa-dd] Camma, mmis n Aji, Aharari. [Řami] nnjarwen Ifilisṭiniyyen ɣar Laxi, tuɣa dinni ijj n iyyar iccuren s řeɛdes. Řgens tuɣa yarweř zzat i wudem n Ifilisṭiniyyen.
2SA 23:12 Netta ibedd di řwest n ureqqiɛ [n iyyar] [nni], ifekk i-t-i-dd uca iɣřeb x Ifilisṭiniyyen. [Ammu] yarra as SIDI ijj n weɣřab d ameqqran.
2SA 23:13 Třata zi třatin n izeǧifen hwan, usin-dd ɣar Dawud di [řweqt n] tmeyra, deg ifri n Abdullam. Tuɣa [din] ict n terbiɛt n Ifilisṭiniyyen tewta iqiḍan nsen di teɣzurt n Irafawiyyen.
2SA 23:14 Dawud [tuɣa-t] di lqelɛa u [tuɣa] din ict n teřbiḥt n řɛeskar n Ifilisṭiniyyen [di] Bayt-Laḥm.
2SA 23:15 Uca Dawud iřqef i-t ufadi, inna: “Wi d ayi i dd ɣa yawyen aman zi tařa n Bayt-Laḥm i [iǧan] ɣar tewwart [n tendint]?”
2SA 23:16 [Xenni] cuqen třata n ayt n bu-teɣruḍt nni řmargeḥ n řɛeskar n Ifilisṭiniyyen, uymen-dd aman zi tařa n Bayt-Laḥm, i [iǧan] ɣar tewwart [n tendint]. Ksin ten akidsen u iwḍen ɣar Dawud, [maca] netta yugi ad ten isu uca izeǧeɛ i-ten zzat i SIDI.
2SA 23:17 Netta inna: “Aya iggʷej xafi, [a] SIDI, aqa necc ad ggeɣ man aya. Ma ad sweɣ idammen n yeryazen, inni [din] iruḥen [am sebbřen] tudart nsen?” U netta war ixs ad ten isu. D man aya i t iggin třata n ayt n bu-teɣruḍt nni.
2SA 23:18 Abicay, mmis n Yuwab, mmis n Ṣaruya, tuɣa d azeǧif n třata [nni]. Netta iḥenneḍ lansa nnes x teřt-mya, issnuqqeb i-ten. Netta ɣares ijj n isem [ittwacenneɛ] jar třata [nni].
2SA 23:19 Ma war iǧi netta d wenni ittwacennɛen aṭṭas zi třata-ya? S uya tuɣa netta d řqebṭan nsen. Maca netta war yiwiḍ uřa ɣar třata n [imezwura].
2SA 23:20 [Xenni] Banaya, mmis n Yahuyadaɛ, mmis n ijj weryaz imeḥḍen, timegga nnes mɣarent, netta zi Qabḍiyil. Netta iɣřeb x tnayen n iyraden ijehden. Ɛawed tuɣa netta ihwa [ict n twařa], iɣřeb x ijj n weyrad di řwesṭ n ijj n wanu deg ijj n wass umi iwta wedfeř.
2SA 23:21 Netta iɣřeb uřa x yijj n weryaz d Amiṣri, ijj n [weryaz] isseggʷaden. Amiṣri tuɣa ɣares ict n lansa deg ufus [nnes]. Ihwa ɣares s yijj n weɛmud, ikkes lansa zeg ufus n Umiṣri u inɣa i-t s lansa nnes.
2SA 23:22 D man aya i igga Banaya, mmis n Yahuyadaɛ. S uya ɣares isem [icneɛ] jar třata n ayt n bu-teɣruḍt.
2SA 23:23 Netta tuɣa d wenni ittwacennɛen aṭṭas zi třatin, maca war yiweḍ ař třata imezwura. Dawud igga i-t jar imtiqqan nnes.
2SA 23:24 [Tuɣa] Ɛasa’il, umas n Yuwab, jar třatin; Ilḥanan, mmis n Dudu, zi Bayt-Laḥm;
2SA 23:25 Camɛa, Aḥarudi; Iliqa, Aḥarudi;
2SA 23:26 Halaṣ, Afalṭi; Ɛira, mmis n Ɛiqqic, Atiqquɛi;
2SA 23:27 Abiɛazar, Aɛanatuti; Mabunnay, Aḥucayi;
2SA 23:28 Ṣalmun, Axuxi; Mahray, Anaṭufati;
2SA 23:29 Xalab, mmis n Baɛna, Anaṭufati; Ittay, mmis n Ribay, zi Jibɛa zeg ayt n Binyamin;
2SA 23:30 Banaya, zi Firɛatun; Hidday, zi teɣzurin n Jaɛac;
2SA 23:31 Abu-Ɛalbun, Aɛarabati; Ɛazmawet, Abarḥumi;
2SA 23:32 Ilyaḥba, Acaɛlubuni; zeg iḥenjiren n Yacan, [mɣir] Yunatan;
2SA 23:33 Camma, Aharari; Axiyam, mmis Carar, Arari;
2SA 23:34 Ilifalaṭ, mmis n Aḥasbay, mmis n Umaɛki; Iɛam, mmis n Axiṭufil, Ajiluni;
2SA 23:35 Ḥaṣray, Akarmali; Faɛray, Alarbi;
2SA 23:36 Yijɛal, mmis n Natan, zi Ṣuba; Bani, Ajadi;
2SA 23:37 Ṣalaq, Aɛammuni; Naḥray, Abiɛruti, aḥemmař n řesnaḥ n Yuwab, mmis n Ṣaruya;
2SA 23:38 Ɛira, Ayitri; Jarib, Ayitri;
2SA 23:39 Uriya, Aḥitti. Marra [jmiɛ] sebɛa u-třatin [n yeryazen].
2SA 24:1 Tuɣa yarɣa weɣḍab n SIDI ɛawed x Israil. Netta issekkar Dawud xasen, inna: “Uyur ad tḥesbed Israil d Yahuda!”
2SA 24:2 Inna ujeǧid i Yuwab, akumandar n řɛeskar, wenni tuɣa ɣares [iǧan]: “Ekk marra tiqebbař n Israil, zi Dan ař Bi’r-Sebɛa, sedd řgens maḥend necc ad ssneɣ řqedd [n iryazen] n řgens.”
2SA 24:3 [Xenni] inna Yuwab i ujeǧid: “Ad yarni SIDI, AREBBI nnec, aṭṭas i řgens-a am mammec [ǧan] nitni [řexxu], [ɛad] mya n tseqqar am mammec [ǧan] nitni [řexxu], u ejj ad ẓarent tiṭṭawin n sidi inu ujeǧid [aya]. [Maca] i umi iwca sidi inu ajeǧid taynit i tmesřact-a?”
2SA 24:4 [Maca] awař n ujeǧid ijhed x Yuwab u x ikumandaren n řɛeskar, uca iffeɣ Yuwab ak-d ikumandaren n řɛeskar, yaggʷej x wudem n ujeǧid ḥima ad isedd řɛeskar n Israil.
2SA 24:5 Nitni ẓwan L’Urdun u wtin iqiḍan nsen ɣar uɣezdis afusi n tendint n Ɛaruɛir tenni ɣar řwesṭ n teɣzart n [yeɣzar n] Jad, uca [uyuren xenni] ɣar Yaɛzir.
2SA 24:6 Usin-dd di Jilɛad u di Taḥtim-Ḥudci. [Xas uca] usin-dd ɣar Dan-Yaɛan u ɣar jjwayeh n Ṣidun.
2SA 24:7 Uca usin-dd ɣar tendint n Ṣur i ifaryen [s iɣebřawen] u ɣar marra tneddam n Iḥiwiyyen d Ikenɛaniyyen, [Ɣar uneggar] iwḍen [nitni] ɣar ljanub n Yahuda di Bi’r-Sebɛa.
2SA 24:8 Ammu kkin nitni marra tammurt u awarni ɛdun tesɛa n iyuren d ɛicrin n wussan usin-dd ɣar Urcalim.
2SA 24:9 U Yuwab iwca i ujeǧid řqedd n řeḥsab n řgens. Di Israil tuɣa dayes temn-myat-ařef n yeryazen imeḥḍen inni izemmaren x ssif u xemsa-myat-ařef n yeryazen [tuɣa aten] zi Yahuda.
2SA 24:10 [Maca] uř n Dawud ibda ad ireddu as awarni iḥseb řgens u Dawud inna i SIDI: “Necc xḍiɣ [xak] aṭṭas s min ggiɣ. [A] SIDI, kkes řexxu řmuɛṣiyyet x umsexxar nnec, maɣar necc ggiɣ tubbuheřya tameqqrant.”
2SA 24:11 [Umi] Dawud ikkar ɣar tuffut, imsar, aqa yusa-dd awař n SIDI i unabi Jad, amwařaw n Dawud, inna:
2SA 24:12 “Uyur, siweř i Dawud: ‘Ammu i iqqar SIDI: Ad ac dd-ssarseɣ třata n tmesřayin. Ixḍar ict zzaysent uca ad ac tt ggeɣ.’”
2SA 24:13 Yusa-dd Jad ɣar Dawud, ixebbar i-t, inna as: “Ma ad iwḍa sebɛa n iseggʷusa n řaẓ x temmurt nnec? Niɣ texsed ad tarewřed třata n iyuren zzat i wudem n řɛedyan nnec u netta ad cek iḍfar? Niɣ [texsed] ad yiři ṭṭaɛun di temmurt nnec? Xenni řexxu, ssen [min i ɣa tixḍared] u xzar, min dd ɣa arreɣ ɣar wenni d ayi dd-issekken.”
2SA 24:14 [Xenni] inna Dawud i Jad: “Necc ttwaḥṣareɣ aṭṭas. Ejj aneɣ ad newḍa deg ifassen n SIDI, maɣar arreḥmet nnes temɣar, maca war xseɣ ca ad wḍiɣ deg ifassen n iwdan.”
2SA 24:15 [Xenni] issiweḍ SIDI ijj n ṭṭaɛun x Israil, zi tuffut ař ijj n řmijař ittwaggen. Mmuten sebɛin-ařef n yeryazen n řgens zi Dan ař Bi’r-Sebɛa.
2SA 24:16 [Umi] isswiẓẓeḍ lmalak afus nnes x Urcalim, ḥima ad iɣḍeř [tandint] deg uḍeyyeɛ, indem SIDI x tuɛeffna, inna i lmalak i iggur ad iɣḍeř řgens deg uḍeyyeɛ: “Cfa, sehwa afus nnec řexxu!” Tuɣa lmalak n SIDI ittaweḍ ɣar unedrar n Uyabusi Arawna.
2SA 24:17 [Umi] Dawud iẓra lmalak wenni iwtin řgens, issiweř Dawud ak-d SIDI, inna: “Xzar, necc xḍiɣ u necc, [wah] necc ggiɣ řmuɛṣiyyet, maca uǧi-ya, min ggin? Ejj ad yiři ufus nnec i tecti ɣari d ɣar taddart n baba.”
2SA 24:18 Deg wass nni beɛda yusa-dd Jad ɣar Dawud, inna as: “Geɛɛed, sbedd ijj n uɛalṭar i SIDI x unedrar n Uyabusi Arawna.”
2SA 24:19 Dawud igeɛɛed ɛlaḥsab awař n Jad, am mammec [t] yumur SIDI.
2SA 24:20 Arawna iceyyeɛ u iẓra ajeǧid ak-d imsexxaren nnes usin-dd ɣares. [Xenni] yuyur Arawna ɣar barra, ibendeq zzat i ujeǧid s uɣembub nnes ɣar temmurt.
2SA 24:21 Arawna inna: “Mayemmi i dd-yusa sidi inu ajeǧid, ɣar umsexxar nnes?” Dawud inna: “Ḥima ad xak sɣeɣ andrar ḥima ad bniɣ din ijj n uɛalṭar i SIDI, maḥend ad tbedd tecti di řgens.”
2SA 24:22 [Xenni] inna Arawna i Dawud: “Ejj sidi inu ajeǧid ad iksi u ad iwehheb min d as ittɣiř d lemliḥ di tiṭṭawin nnes. Xzar aqa din ifunasen d tfunasin i tɣarṣt n wecmaḍ u [ksi] tiřwiḥin itteḥřuǧuḍen i usarwet d řeḥwayej n ifunasen d tfunasin d akeccuḍ [i tmessi].
2SA 24:23 Aya marra, [a] ajeǧid, ad ac iwc Arawna i ujeǧid.” [Ɛawed] inna Arawna i ujeǧid: “Iři ad dd-tased cek x řxaḍar ɣar SIDI, AREBBI nnec!”
2SA 24:24 [Maca] ajeǧid inna i Arawna: “Lla, maɣar necc xseɣ ad xak t sɣeɣ s ttaman [nnes ikmeř], maɣar necc war ttwehhbeɣ i SIDI, AREBBI inu, tiɣarṣa n wecmaḍ i war isekkwin walu.” U Dawud isɣa andrar d ifunasen d tfunasin i xemsin ciqlu n nnuqart.
2SA 24:25 Dawud ibna din ijj n uɛalṭar i SIDI uca issgeɛɛed din tiɣarṣa n wecmaḍ d tewhibin [n řɣiǧet]. Ammu ittwasseṣřeḥ SIDI x temmurt s tẓaǧit yuǧɣen u tᵉttwassbedd tecti di Israil.
1KI 1:1 Tuɣa ajeǧid Dawud iwsar u imɣar deg wussan. Ssduryen t s warruḍ [maca] war t iřqif [ɛad] řeḥmu.
1KI 1:2 Nnan as imsexxaren nnes: “Ejj ad arzun i sidi inu ajeǧid ict n tebřiɣt d taɛzarect u ejj i-tt ad tbedd zzat i wudem n ujeǧid, ad dayes tᵉthilla. Ejj i-tt ad tᵉṭṭeṣ ɣar idmaren nnes, ḥima sidi inu ajeǧid, ad idweř iḥemma.”
1KI 1:3 Arzun nitni di marra tammurt n Israil x ict n tebřiɣt dayes aẓri. Ufin Abicaj, Tacunamit, uca iwyen tt ɣar ujeǧid.
1KI 1:4 Tabřiɣt tuɣa dayes aẓri aṭṭas u nettat tᵉthilla dayes u tsexxar xas. Ajeǧid war tt issin ca.
1KI 1:5 Aduniya, mmis n Hajjit, ixs ad issuɛřa ixef nnes, inna: “Necc ad dewřeɣ d ajeǧid.” Netta iḍebbar ikarruten d imnayen uca izwaren xemsin n yeryazen s tazřa zzat i wudem nnes.
1KI 1:6 Babas tuɣa ɛemmarṣ war xas isseqseḥ [x man aya] řami [d as] inna: “Mayemmi i teggid aya?” Ɛawed Aduniya tuɣa ɣares ijj n waddud icna. Yemmas turuw t-i-dd awarni i Abcalum.
1KI 1:7 Issiweř ak-d Yuwab, mmis n Ṣaruya, u ak-d Abyatar, akehhan, uca nitni wcin afus i Aduniya.
1KI 1:8 [Maca] akehhan Ṣaduq d Banaya, mmis n Yahuyadaɛ, d unabi Natan d Cimɛi d Riɛi uřa d ayt n bu-teɣruḍt nni [iǧan] ɣar Dawud, war qqinen ca ixef nsen ɣar Aduniya.
1KI 1:9 Aduniya iɣarṣ i wuǧi d ifunasen d tfunasin d řmař iṣeḥḥen ɣar weẓru n Zaḥifa wenni ɣar tařa n Rujil. Netta iɛarḍ marra aytmas, iḥenjiren n ujeǧid, u marra iryazen n Yahuda, imsexxaren n ujeǧid.
1KI 1:10 [Maca] anabi Natan d Banaya d ayt n bu-teɣruḍt [n Dawud] d umas Suliman, war ten iɛriḍ ca.
1KI 1:11 [Xenni] inna Natan i Bat-Cabaɛ, yemmas n Suliman, inna: “Ma war tesřid cem, aqa Aduniya, mmis n Hajjit, idweř d ajeǧid? Aqa Dawud, siditneɣ, war xas yargib?
1KI 1:12 Xenni řexxu, as-dd, ejj ayi ad am wceɣ ccwar, ḥima ad tessnejmed tudart nnem d tudart n mmim Suliman.
1KI 1:13 Uyur, adef ɣar ujeǧid Dawud, ini as: ‘[A] sidi inu ajeǧid, ma war tejjuǧed i tayya nnec, tennid: S tidett, mmim Suliman ad yiři d ajeǧid awarni ayi u netta ad iqqim x řɛarc inu? Mayemmi [idweř xenni] Aduniya d ajeǧid?’
1KI 1:14 Xzar, umi cem dinni tessawařed [ɛad] ak-d ujeǧid, ad adfeɣ uřa d necc ad kemmřeɣ awařen nnem.”
1KI 1:15 Bat-Cabaɛ tudef ɣar ujeǧid deg wexxam n daxeř. Ajeǧid tuɣa iwsar aṭṭas u Abicaj, Tasunamit, tsexxar xas.
1KI 1:16 Bat-Cabaɛ tuḍar, tbendeq i ujeǧid uca ajeǧid inna: “Min cem yuɣin?”
1KI 1:17 Nettat tenna as: “[A] sidi inu, cek tejjuǧed i tayya nnec ɣar SIDI, AREBBI nnec: ‘S tidett, Suliman, mmim, ad yiři d ajeǧid awarni ayi u netta ad iqqim x řɛarc inu!
1KI 1:18 Uca řexxu, xzar, Aduniya idweř d ajeǧid, u řexxu, sidi inu ajeǧid, cek war [xas] tessargibed ca.
1KI 1:19 Netta iɣarṣ i waṭṭas n ifunasen d řmař iṣeḥḥen d wuǧi u netta iɛarḍ x marra iḥenjiren n ujeǧid u x Abyatar, akehhan, u x Yuwab, akumandar n řɛeskar, [maca] amsexxar nnec Suliman, war t iɛriḍ ca.
1KI 1:20 Ɣarek cek, [a] sidi inu ajeǧid, ɣarek cek xezzarent marra tiṭṭawin n Israil, ḥima cek ad asen tessecned man wen i ɣa iqqimen x řɛarc n sidi inu ajeǧid awarni as netta.
1KI 1:21 Niɣ ad imsar, mařa sidi inu ajeǧid ad igg ad yareyyeḥ jar řejdud nnes, aqa necc d mmi Suliman [ad ttwaḥesben] d ayt n řmuɛṣiyyet.’”
1KI 1:22 U xzar, am tessawař nettat ɛad ak-d ujeǧid, yudef-dd anabi Natan.
1KI 1:23 Xebbaren [aya] i ujeǧid, nnan: “Xzar, aqa da anabi Natan.” Netta yusa-dd zzat i wudem n ujeǧid, ibendeq zzat i ujeǧid s uɣembub nnes ɣar temmurt.
1KI 1:24 Inna Natan: “Sidi inu ajeǧid, ma tennid cek: ‘Aduniya ad yiři d ajeǧid awarni ayi u netta ad iqqim x řɛarc inu’?
1KI 1:25 Maɣar netta ihwa ass-a u netta iɣarṣ i waṭṭas n ifunasen d řmař iṣeḥḥen d wuǧi u iɛarḍ x marra iḥenjiren n ujeǧid u x ikumandaren n řɛeskar u x ukehhan Abyatar. Xzar nitni ttᵉtten, sessen zzat i wudem nnes, qqaren: ‘Ad iddar ujeǧid Aduniya!’
1KI 1:26 [Maca] necc, necc wenni d amsexxar nnec, d ukehhan Ṣaduq d Banaya, mmis n Yahuyadaɛ, d Suliman, amsexxar nnec, war d aneɣ iɛriḍ ca.
1KI 1:27 Ma iffeɣ-dd wawař-a zi sidi inu ajeǧid? Ma [xenni] war tessargibed ca amsexxar nnec, man wen i ɣa iqqimen x řɛarc n sidi inu ajeǧid awarni as?”
1KI 1:28 Ajeǧid Dawud iṭṭef deg wawař, inna: “Řaɣat ayi-dd x Bat-Cabaɛ!” Nettat tusa-dd ɣar zzat i wudem n ujeǧid, tbedd [din] zzat i wudem n ujeǧid.
1KI 1:29 [Xenni] ijjuǧ ujeǧid, inna: “[S tidett am] iddar SIDI, wenni ifekken řeɛmar inu zi marra řeḥṣaret,
1KI 1:30 wah nican, am mammec d am jjuǧeɣ ɣar SIDI, AREBBI n Israil, nniɣ: ‘Aqa mmim Suliman ad yiři d ajeǧid awarni ayi u netta ad iqqim x řɛarc inu deg wemcan inu!’, wah, ammu [i-t] ɣa ggeɣ s tidett ass-a.”
1KI 1:31 [Xas uca] tuḍar Bat-Cabaɛ s uɣembub nnes ɣar temmurt, tbendeq i ujeǧid, tenna: “Ad iddar sidi inu, ajeǧid Dawud, i řebda!”
1KI 1:32 Xas uca inna ujeǧid Dawud: “Řaɣat ayi-dd i ukehhan Ṣaduq d unabi Natan d Banaya, mmis n Yahuyadaɛ!” Uca nitni usin-dd zzat i wudem n ujeǧid.
1KI 1:33 Inna asen ujeǧid: “Ksim imsexxaren n siditwem akidwem u ejj mmi Suliman ad iniy x usardun i ɣari [iǧan] u sehwa t ɣar Jiḥun.
1KI 1:34 Ejj akehhan Ṣaduq ak-d unabi Natan ad t idhen dinni d ajeǧid x Israil. [Xenni] ad tsuḍem deg uyicc n icarri, ad tinim: ‘Tudart i Suliman!’
1KI 1:35 Ittxeṣṣa ad tgeɛɛdem awarni as u netta ad dd-yas ad iqqim x řɛarc inu. Netta ad yiři d ajeǧid deg wemcan inu, [maɣar] necc umureɣ as ḥima ad yiři d řḥakem x Israil u x Yahuda.”
1KI 1:36 Banaya, mmis n Yahuyadaɛ, yarra-dd x ujeǧid, inna: “Amin, ammu i iqqar SIDI, AREBBI n sidi inu ajeǧid!
1KI 1:37 Am mammec tuɣa iǧa SIDI ak-d sidi inu ajeǧid, ammu i ɣa yiři Netta uřa ak-d Suliman. Iři Netta ad issemɣar [ɛad] řɛarc nnes x řɛarc n sidi inu, ajeǧid Dawud!”
1KI 1:38 [Xenni] ihwa ukehhan Ṣaduq ak-d unabi Natan d Banaya, mmis n Yahuyadaɛ, u ak-d iɛessasen n arrimet d ireqqasen n tazřa. Nitni ssenyen Suliman x usardun n ujeǧid Dawud u nedhen t ɣar Jiḥun.
1KI 1:39 Akehhan Ṣaduq, iksi icc s zzect zeg uqiḍun uca idhen Suliman. Nitni suḍen deg uyicc n icarri u marra řgens inna: “Tudart i ujeǧid Suliman!”
1KI 1:40 Marra řgens igeɛɛed awarni as. Iwdan ṣeffaren di tzamarin u farḥen s ict n řefraḥet temɣar [ařami] tfeǧeq temmurt s řḥess nsen.
1KI 1:41 Isřa aya Aduniya ak-d marra inewjiwen nni ɣares [iǧan]. Nitni tuɣa bḥřa mmunswen. Uřa d Yuwab isřa i usuḍi deg uyicc n icarri, inna: “Mana řḥess zi tendint ammu s zzhir aṭṭas?”
1KI 1:42 [Am] issawař netta ɛad, yusa-dd Yunatan, mmis n ukehhan Abyatar. Aduniya inna: “Adef-dd ɣar daxeř, minzi cek d ijj n weryaz imeḥḍen. Cek ad tawyeḍ [nican] ijj n řexbar aṣebḥan.”
1KI 1:43 Yunatan yarra-dd, inna i Aduniya: “S řemqřub, siditneɣ, ajeǧid Dawud, igga Suliman d ajeǧid.
1KI 1:44 Ajeǧid issekk akides akehhan Ṣaduq d unabi Natan d Banaya, mmis n Yahuyadaɛ, d iɛessasen n arrimet d ireqqasen n tazřa u ina ggin t ad iniy x usardun n ujeǧid.
1KI 1:45 Akehhan Ṣaduq d unabi Natan dehnen t d ajeǧid di Jiḥun u ssenni geɛɛden s řefraḥet ařami tehweř tendint. Aya d řḥess i tesřim.
1KI 1:46 Uřa d Suliman ittɣima x řɛarc n tgeldit.
1KI 1:47 Uřa d imsexxaren n ujeǧid usin-dd, ḥima ad barken siditneɣ, ajeǧid Dawud, nnan: ‘Iři ad yarr AREBBI nnec isem n Suliman [ɛad] icna x yisem nnec u ad yarr řɛarc nnes [ɛad] imɣar x řɛarc nnec.’ [Xas uca] ibendeq ujeǧid x tassut nnes.
1KI 1:48 Ɛawed inna ujeǧid: ‘Ad ittwabarek SIDI, AREBBI n Israil, wenni iwcin ass-a ad iqqim [ijjen] x řɛarc inu, [umi] tiṭṭawin inu [ɛad] zemmarent ad twařant [aya].’”
1KI 1:49 Marra inewjiwen inni [tuɣa iǧan] ɣar Aduniya nnxeřɛen, kkaren uca ffɣen, [kuř] aryaz yuyur abrid nnes.
1KI 1:50 Aduniya iggʷed zi Suliman. Netta ikkar, yuyur uca icebbar deg waccawen n uɛalṭar.
1KI 1:51 Xebbaren man aya ɣar Suliman, nnan: “Xzar, Aduniya, iggʷed zeg ujeǧid Suliman, [maɣar] aqa netta icebbar deg waccawen n uɛalṭar, iqqar: ‘Ejj ajeǧid Suliman ad ayi ijjaǧ ass-a, aqa netta war ineqq amsexxar nnes s ssif!’”
1KI 1:52 Inna Suliman: “Mařa netta iban-dd d ijj n weryaz d amtiqqi, war xas iweṭṭi uřa d ijj n uzeṭṭu n ucuwwaf nnes, maca mařa ittwaf dayes tuɛeffna, ittxeṣṣa ad immet.”
1KI 1:53 Ajeǧid Suliman issekk [ca n ireqqasen] u nitni kessin t zeg uɛalṭar u netta yusa-dd, ibendeq zzat i ujeǧid Suliman. Inna as Suliman: “Ruḥ ɣar taddart nnec!”
1KI 2:1 [Umi] dd-udsen wussan n Dawud ad immet, iɛřem netta i mmis Suliman, inna:
1KI 2:2 “Necc ad uyureɣ abrid n marra tammurt. Iři tmeḥḍed u iři d aryaz!
1KI 2:3 Ḥḍa awekkeř n SIDI, AREBBI nnec, ḥima ad tuyured di tebridin nnes, maḥend ad tᵉṭṭfed di tweṣṣa nnes d řumurat nnes d lfarayiḍ nnes d cchadat nnes am mammec t yura di Ccariɛa n Musa, ḥima ad tegged s řeɛqeř di marra min ɣa tegged d mani ma i ɣa traḥed,
1KI 2:4 ḥima ad ikemmeř SIDI awař nnes i xafi issiweř, [umi] inna: ‘Mařa iḥenjiren nnec ad ḥḍan abrid nsen s wuř nsen marra u s řeɛmar nsen marra, ḥima ad uyuren s řaman zzat i wudem inu, [xenni] war cek ittxeṣṣi weryaz x řɛarc n Israil.
1KI 2:5 Cek tessned ɛawed min i d ayi igga Yuwab, mmis n Ṣaruya, min igga netta i tnayen n ikumandaren n řɛeskarat n Israil, i Abnir, mmis n Nir, u i Ɛamasa, mmis n Yatir. Netta inɣa i-ten. Di [řweqt n] řehna issizzeř idammen [am di řweqt] n umenɣi uca [am di řweqt] n umenɣi igga idammen ɣar webyas nnes i ɣares ɣar tejɛinna nnes uřa ɣar sandaliyat nnes nni x iḍaren nnes.
1KI 2:6 Egg ɛlaḥsab tiɣit nnec u war ttejji acuwwaf nnes icaben ad ihwa ɣar řaxart di řehna.
1KI 2:7 Scen tamexsiwt icewwaren i ayt n Barzillay zi Jilɛad. Nitni ad iřin jar inni i ɣa iccen zi ṭṭabřa nnec, maɣar ammu i dd-yusin ɣari umi arewřeɣ zzat i wudem n umac Abcalum.
1KI 2:8 Xzar Cimɛi, mmis n Jira, zeg ayt nn Binyamin, zi Baxurim. uřa d netta akidek. Netta inɛeř ayi s ict n nneɛřet iqesḥen deg wass umi necc arewřeɣ ɣar Maḥanayim, maca immseřqa akidi ɣar L’Urdun u necc jjuǧeɣ as ɣar SIDI, nniɣ: ‘[Ɣari] mařa ad cek nɣeɣ s ssif!’
1KI 2:9 [Xenni] řexxu, war t ḥeṣṣeb d amezdag, maɣar cek d ijj n weryaz d amiɣis u tessned min d as ɣa tegged, ḥima acuwwaf nnes icaben ad ihwa ɣar řaxart s idammen.”
1KI 2:10 Dawud igga ad yareyyeḥ jar řejdud nnes. Netta ittwanḍeř di tendint n Dawud.
1KI 2:11 Ussan i di tuɣa iḥekkem Dawud x Israil, [tuɣa aten] arebɛin n iseggʷusa. Sebɛa n iseggʷusa iḥkem di Ḥabrun u di Urcalim iḥkem třata u-třatin n iseggʷusa.
1KI 2:12 Suliman iqqim x řɛarc n babas Dawud u tagelda nnes tedweř tarenni di řemten aṭṭas.
1KI 2:13 [Xenni] Aduniya, mmis n Hajjit, yusa-dd ɣar Bat-Cabaɛ, yemmas n Suliman. Nettat tenna: “Ma tawasit nnec s řehna?” Netta inna: “Řehna!”
1KI 2:14 Netta inna: “Necc ɣari kim ijj n wawař.” Nettat tenna [as]: “Siweř!”
1KI 2:15 Inna netta: “Cem tessned, aqa tageldit tusa ayi-dd u marra Israil igga dayi tiṭṭawin, ḥima ad dewřeɣ d ajeǧid. [Maca] tagelda tenneqřeb uca tedweř i uma, minzi tusa as-dd zi SIDI.
1KI 2:16 Řexxu [maca] xseɣ ad ɣarem ttareɣ ict n řḥajjet [waha]. War d ayi tagi!” Nettat tenna: as: “Siweř!”
1KI 2:17 Netta inna: “Siweř ak-d ujeǧid Suliman - maɣar netta war cem ittarri - [ḥima] netta ad ayi iwc Abicaj, Tasunamit, d tamɣart.”
1KI 2:18 Bat-Cabaɛ tenna: “Mliḥ, necc ad ssiwřeɣ ak-d ujeǧid di ṭṭweɛ nnec.”
1KI 2:19 [Xenni] tusa-dd Bat-Cabaɛ ɣar ujeǧid Suliman, ḥima akides tessiweř x Aduniya. Ajeǧid ikkar i umsagar akides, yuḍar zzates. [Awarni man aya] iqqim x řɛarc, ijja ad [din] ssarsen ijj n řkursi i yemmas n ujeǧid u nettat teqqim ɣar ufus afusi nnes.
1KI 2:20 [Xenni] tenna [as] nettat: “Necc xseɣ ad ac ttareɣ ict n řḥajjet [waha]. War d ayi tagi!” Inna as ujeǧid: “Seqsa, yemma, necc war cem ttarriɣ ca.”
1KI 2:21 Nettat tenna [as]: “[Ttzawgeɣ cek] ḥima ad temmewc Abicaj, Tasunamit, i umac Aduniya d tamɣart.”
1KI 2:22 Ajeǧid Suliman yarra-dd [xas], inna i yemmas: “Mayemmi tᵉttared cem i Aduniya Abicaj, Tasunamit? Ttar [xenni uřa d] tagelda, maɣar netta d uma wenni d ameqqran xafi, [wah ttar i-tt] i netta u i ukehhan Abyatar d Yuwab, mmis n Ṣaruya.”
1KI 2:23 Ajeǧid Suliman ijjuǧ ɣar SIDI, inna: “Ad ayi igg AREBBI ta d ta u [ɛad] ktar zi man aya, maɣar Aduniya issiweř awař-a ḍidd i tudart nnes!
1KI 2:24 [Xenni] řexxu, [s tidett am] iddar SIDI, wenni d ayi issemtnen u wenni d ayi issɣiman x řɛarc n tgeldit n baba Dawud u wenni d ayi iggin ict n taddart am mammec tuɣa inna [qbeř i baba Dawud], s tidett, Aduniya ad ittwaneɣ ass-a!”
1KI 2:25 Xas uca issekk ujeǧid Suliman [řumur-a] s ufus n Banaya, mmis n Yahuyadaɛ. Wanita iwta i-t uca immut Aduniya.
1KI 2:26 Inna ujeǧid i ukehhan Abyatar: “Uyur ɣar Ɛanatut, ɣar temmurt nnec, maɣar cek d ijj n weryaz [isdaḥeǧ] řmewt. Ass-a maca war cek neqqeɣ ca, minzi cek tarbud Ttabut n Sidi inu, SIDI, zzat i wudem n baba Dawud, u minzi cek tweddbed uřa s marra i zi iweddeb baba.”
1KI 2:27 Suliman yuẓẓeř x Abyatar ařami netta war tuɣi ɛad d akehhan i SIDI, ḥima ad ittwakemmeř wawař n SIDI i tuɣa issiweř zi jjihet n taddart n Ɛali di Cilu.
1KI 2:28 [Umi] yiweḍ řexbar ɣar Yuwab - aqa Yuwab iffeɣ, iḍfar Aduniya, waxxa netta war dd-iffiɣ ca, ḥima ad iḍfar Abcalum - yarweř Yuwab ɣar Uqiḍun n SIDI uca iṭṭef accawen n uɛalṭar.
1KI 2:29 Xebbaren ajeǧid Suliman aqa Yuwab yarweř ɣar Uqiḍun n SIDI. U xzar, ibedd [din] ɣar uɛalṭar. Suliman issekk [ɣares] Banaya, mmis n Yahuyadaɛ, inna: “Ruḥ [din], neɣ i-t!”
1KI 2:30 Banaya yusa-dd ɣar Uqiḍun n SIDI uca inna as: “Ammu i iqqar ujeǧid: ‘Ffeɣ-dd ɣar barra!’” Netta inna: “Lla, necc xseɣ ad mmteɣ da!” Banaya issiweḍ tamwarrit ɣar ujeǧid, inna: “Ammu i issiweř Yuwab u ammu xafi dd-yarra.”
1KI 2:31 Inna as ujeǧid: “Egg min i d ac inna netta, ɣeḍř i-t uca neḍř i-t, ḥima ad taggʷejed xafi u x taddart n baba idammen i issizzeř Yuwab baṭeř.
1KI 2:32 [Ammu] i ɣa yarr SIDI idammen i issizzeř netta x uzeǧif nnes, minzi netta issḥeyyed tnayen n yeryazen, inni iseggden u iḥřan xas, uca inɣa i-ten s ssif umi baba Dawud war t issin: Abnir, mmis n Nir, akumandar n řɛeskar n Israil, u Ɛamasa, mmis n Yatir, akumandar n řɛeskar n Yahuda.
1KI 2:33 [Ammu] i ɣa ɛeqben idammen nsen x uzeǧif n Yuwab u x uzeǧif n tarwa nnes i řebda. [Maca] Dawud d tarwa nnes d taddart nnes d řɛarc nnes, ad ɣarsen yiři řehna zi SIDI i řebda.”
1KI 2:34 Banaya, mmis n Yahuyadaɛ, igeɛɛed ɣar uɛalṭar, iwta i-t uca inɣa i-t. Netta ittwanḍeř di taddart nnes di řexřa.
1KI 2:35 Ajeǧid igga [xenni] Banaya, mmis n Yahuyadaɛ, deg wemcan nnes x řɛeskar uca ajeǧid igga Ṣaduq, akehhan, deg wemcan n Abyatar.
1KI 2:36 [Xenni] ijja ujeǧid ad řaɣan i Cimɛi, inna as: “Bna i yixef nnec ict n taddart di Urcalim uca zdeɣ din, war tteffeɣ ɣar da uřa ɣar diha!
1KI 2:37 Ad imsar deg wass i di i ɣa teffɣed, ad teẓwid tiɣzart n Qidrun, aqa ad tessned nican ad temmted nhřa mma. Idammen nnec ad iřin x uzeǧif nnec.”
1KI 2:38 Cimɛi yarra-dd x ujeǧid: “Awař-a d lemliḥ. Am mammec issiweř sidi inu ajeǧid, ammu i ɣa igg uřa d umsexxar nnec.” U Cimɛi tuɣa izeddeɣ aṭṭas n wussan di Urcalim.
1KI 2:39 [Maca] awarni i třata n iseggʷusa, imsar, aqa tnayen n imsexxaren n Cimɛi arewřen ɣar Axic, mmis n Maɛka, ajeǧid n Jat. Xebbaren aya i Cimɛi, nnan: “Xzar, imsexxaren nnec aqa aten di Jat.”
1KI 2:40 [Xenni] ikkar Cimɛi, ibardeɛ i weɣyuř nnes uca yuyur ɣar Axic ɣar Jat, ḥima ad yarzu x imsexxaren nnes. Cimɛi yuyur [din] u yarra i-ten-dd zi Jat.
1KI 2:41 Xebbaren aya i Suliman aqa Cimɛi iffeɣ zi Urcalim ɣar Jat uca iɛqeb-dd [ɛawed].
1KI 2:42 Ajeǧid issekk ad řaɣan i Cimɛi uca inna as: “Ma war cek jjiɣ ad tejjaǧed ɣar SIDI u ɛeřmeɣ ac, nniɣ: ‘Deg wass i di i ɣa teffɣed ɣar da niɣ ɣar diha ad tessned nican, ad temmted nḥřa mma’? U cek tennid ayi: ‘Awař-a i sřiɣ, aqa-t mliḥ.’
1KI 2:43 Mayemmi [xenni] war teḥḍid ca tajaǧit n SIDI d řumur i d ac ggiɣ?”
1KI 2:44 Inna ujeǧid ɛawed i Cimɛi: “Cek tessned deg wuř nnec marra tuɛeffna i teggid i baba Dawud. [S uyenni] SIDI ad dd-yarr tuɛeffna nnec x uzeǧif nnec.
1KI 2:45 [Maca] ad ittwabarek ujeǧid Suliman u řɛarc n Dawud ad ittwassemten i řebda zzat i wudem n SIDI.”
1KI 2:46 [Xas] uca iḍebbar ujeǧid x Banaya, mmis n Yahuyadaɛ, u wanita yuyur ɣar barra, iwta Cimɛi ařami immut wanita. [Ammu] i tᵉttwacedd tgeldit deg ufus n Suliman.
1KI 3:1 Suliman idweř d aḍeggʷař n firɛun, ajeǧid n Miṣra. Netta yiwi yeǧis n firɛun uca issidif i-tt ɣar tendint n Dawud, ařami tuɣa isseqfeř řebni n taddart nnes d Taddart n SIDI d řḥiḍ i d as dd-innḍen i Urcalim.
1KI 3:2 Mɣir řgens yarni ittqeddam tiɣarṣa x řegɛudi waha, minzi ař ussan nni war tᵉttwabenni ɛad Taddart i Yisem n SIDI.
1KI 3:3 Suliman tuɣa ittexs SIDI umi yuyur ɛlaḥsab tiweṣṣa n babas Dawud. Iqeddem mɣir tiɣarṣa d řebxur x řegɛudi waha.
1KI 3:4 [Ammu i] yuyur ujeǧid [ict n twařa] ɣar Jibɛun, ḥima ad dinni iɣarṣ, maɣar řgeɛɛdet nni tuɣa-tt d tameqqrant qaɛ. Issgeɛɛed Suliman x uɛalṭar nni ařef tiɣarṣa n wecmaḍ.
1KI 3:5 Iban-dd SIDI di Jibɛun s ǧiřet i Suliman deg ict n terjit, uca inna AREBBI: “Ttar! Min i d ac ɣa wceɣ?”
1KI 3:6 Inna Suliman: “Cek tessecned tamexsiwt icewwaren tameqqrant i umsexxar nnec, baba Dawud, am mammec yuyur netta zzat i wudem nnec s řaman d tsegda d řeṣfayet n wuř ɣarek, u Cek txemmřed as tamexsiwt-a icewwaren tameqqrant u tewcid as ijj n mmis, ḥima ad iqqim x řɛarc nnes, am [teǧa] ass-a.
1KI 3:7 [Xenni] řexxu, [a] SIDI, AREBBI inu, Cek teggid amsexxar nnec d ajeǧid deg wemcan n baba Dawud. [Maca] necc [ǧiɣ ɛad] d aḥenjir ameẓyan. Necc war ssineɣ mammec ɣa ffɣeɣ u mammec ɣa ɛeqbeɣ.
1KI 3:8 Amsexxar nnec aqa-t di řwesṭ n řgens nnec nni tixḍared Cek, ijj n řgens imɣar ařami war izemmar ad ittwaqedd niɣ ad ittwaḥesseb zeg ubarru [nnes ameqqran].
1KI 3:9 Ewc [xenni] i umsexxar nnec ijj n wuř iften ḥima ad taf izemmar ad iḥkem di řgens u ḥima ad ifarz s řeɛqeř jar min iǧan icna d min iǧan d aɛeffan, minzi man wen izemmaren ad iḥkem x řgens-a ameqqran nnec?”
1KI 3:10 Awař-a tuɣa d lemliḥ di tiṭṭawin n Sidi, řami zeɛma Suliman ittar man aya.
1KI 3:11 Inna as AREBBI: “Minzi cek tᵉttared aya u war tᵉttared ca tudart tazirart i yixef nnec, u war tᵉttared agřa i yixef nnec u war tᵉttared ca tudart n řɛedyan nnec, [maca] tᵉttared i yixef nnec řeɛqeř, ḥima ad tesřed [mliḥ] ddeɛwat [di řmeḥkama],
1KI 3:12 aqa [s uya] Necc ggiɣ ɛlaḥṣab awařen nnec. Xzar, Necc wciɣ ac ijj n wuř d amiɣis d afehham, am mammec war tuɣi qbeř i cek u war ittiři awarni ac.
1KI 3:13 Uřa d min war tᵉttared, ad ac t wceɣ, am wagřa am uɛuǧi, ařami marra ussan [n tudart] nnec war [din] ittiři weryaz am cek jar ijeǧiden.
1KI 3:14 Mařa cek tuyured x tebridin inu ařami ɣa teḥḍid tiweṣṣa inu d řumurat inu, am mammec yuyur babac Dawud, [xenni] Necc ad sszuggareɣ [řqedd n] wussan [n tudart] nnec.”
1KI 3:15 Ifaq-dd Suliman, u xzar, [tuɣa-tt d] ict n terjit. Netta yusa-dd ɣar Urcalim uca ibedd zzat i Ttabut n Řɛahd n Sidi u issgeɛɛed tiɣarṣa n wecmaḍ u igga tiwhibin n řehna u issewjed [ɛawed] ict n zzardet i marra imsexxaren nnes.
1KI 3:16 Xenni usint-i-dd tnayen n temɣarin ɣar ujeǧid. Tuɣa-tent d timɣarin n farq-ccɣeř, beddent zzat i wudem nnes.
1KI 3:17 Ict n temɣart tenna: “Mařa texsed, [a] sidi inu, necc zeddɣeɣ ak-d temɣart-a di taddart d ict, u necc urweɣ [umi d ayi tuɣa] ɣares di taddart.
1KI 3:18 Deg wass wiss třata awarni řami dd-urweɣ, imsar, aqa uřa d tamɣart-a turuw-dd [ijj n uḥenjir]. Neccin tuɣa nmun, war tuɣi ɣarneɣ uřa d ijj n ubarrani di taddart, mɣir neccin s tnayen di taddart.
1KI 3:19 Aḥenjir n temɣart-a immut di ǧiřet umi tezzeř xas deg iḍeṣ.
1KI 3:20 Nettat tekkar ɣar wezyen n ǧiřet, tekkes ayi aḥenjir inu, umi tayya nnec tᵉṭṭeṣ, u tessars i-t deg weḥsin nnes uca mmis immuten tessars i-t deg weḥsin inu.
1KI 3:21 [Umi] kkareɣ ɣar tuffut, ḥima ad ssuṭṭuḍeɣ aḥenjir inu, xzar, netta immut. Di ṣṣbeḥ tuɣa ayi xezzareɣ mliḥ, ẓriɣ tuɣa-t war iǧi ca d aḥenjir inu nni dd-urweɣ.”
1KI 3:22 [Xas] uca tenna temɣart nneɣnit: “Lla, wenni iddaren d aḥenjir inu u wenni immuten d aḥenjir nnem!” Tenneɣnit tenna: “Lla, wenni immuten d aḥenjir nnem u wenni iddaren d aḥenjir inu!” Ammu i ssiwřent zzat i wudem n ujeǧid.
1KI 3:23 Inna ujeǧid: “Tanita teqqar: ‘Wenni iddaren d aḥenjir inu u wenni immuten d aḥenjir nnem!’, uca wenneɣni teqqar: ‘Lla, wenni immuten d aḥenjir nnem u wenni iddaren d aḥenjir inu.’”
1KI 3:24 [Xenni] inna ujeǧid: “Awyem ayi-dd ijj n ssif!” Nitni iwyen ijj n ssif ɣar ujeǧid.
1KI 3:25 Ajeǧid inna: “Qessem aḥenjir iddaren x tnayen uca wcem ijj n wezyen i yicten [zzaysent] u wcem i [tᵉnneɣnit] ijj n wezyen [nneɣni].”
1KI 3:26 [Maca] řami tuɣa tacit nnes i uḥenjir nnes imɣar, tessiweř temɣart tenni ɣar iǧa uḥenjir iddar, ak-d ujeǧid, tenna: “A, sidi inu, wcet as aḥenjir nni iddaren mařa texsed, war t neqqet!” Tanita maca tenna: “War ittiři inu uřa nnem. Qesset t di řwesṭ!”
1KI 3:27 [Xenni] yarra-dd ujeǧid, inna: “Wcem as aḥenjir iddaren! War t neqqem. Nettat d yemmas.”
1KI 3:28 Marra Israil isřa x řeḥkam i zi iḥkem ujeǧid u nitni ggʷeden zzat i wudem n ujeǧid, minzi nitni ẓrin belli tiɣit n AREBBI dayes ḥima ad yaɣ tasɣart.
1KI 4:1 Tuɣa ajeǧid Suliman d ajeǧid x marra Israil.
1KI 4:2 Ina tuɣa d řḥukkam nnes imeqqranen: Ɛazarya, mmis n Ṣaduq, [tuɣa-t d] akehhan d amezwaru.
1KI 4:3 Iliḥuraf d Axiya, iḥenjiren n Cica, [tuɣa aten d] imariren. Yaḥucafaṭ, mmis n Axilud, tuɣa-t d amarir amezwaru.
1KI 4:4 Banaya, mmis n Yahuyadaɛ, [tuɣa-t] x řɛeskar. Ṣaduq d Abyatar [tuɣa aten d] ikehhanen.
1KI 4:5 Ɛazarya, mmis n Natan, [tuɣa-t] x řwulat. Zabud, mmis n Natan, [tuɣa-t d] akehhan d ameddukkeř n ujeǧid.
1KI 4:6 Axicar [tuɣa-t] x tzeddiɣt n ujeǧid. Aduniram, mmis n Abda [tuɣa-t] x ljizya.
1KI 4:7 Suliman ɣares tenɛac n řwulat x marra Israil, inni ibedden x řeɛweč n ujeǧid d taddart nnes. X [kuř] ijj s uyur nnes deg useggʷas, tuɣa xas ad t iksi.
1KI 4:8 Ina d ismawen nsen: Mmis n Ḥur x idurar n Ifrayim.
1KI 4:9 Mmis n Daqar di Maqas u di Caɛalubbim, Bayt-Cams d Ilun-Bayt-Ḥanan.
1KI 4:10 Mmis n Ḥasad di Arubut. Netta [tuɣa] ɣares Suku d marra tammurt n Ḥafir.
1KI 4:11 Mmis n Abinadab [ɣares] marra tiwririn n Dur. Tafat, yeǧis n Suliman, [tuɣa-tt] ɣares d tamɣart.
1KI 4:12 Baɛna, mmis n Axilud, [ɣares] Taɛnak, Majiddu d marra Bayt-Can i iǧan ɣar Ṣurtan, swadday n Yazraɛil, zi Bayt-Can ař Abal-Maḥula, ař uɣezdis nneɣni n Yuqmaɛam.
1KI 4:13 Mmis n Jabar [tuɣa] di Ramut-Jilɛad. Netta ɣares dcurat n Ya’ir, mmis n Manassa, tinni [iǧan] di Jilɛad. [Tuɣa] ɣares uřa d jjihet n Arjub, tenni di Bacan, settin n tineddam mɣarent s řḥiḍ u s weɛmud n nnḥas.
1KI 4:14 Axinadab, mmis n Ɛiddu, [ɣares] Maḥanayim.
1KI 4:15 Aximaɛaṣ [tuɣa-t d lwali] di Naftali. Netta yiwi uřa Basimat, yeǧis n Suliman, d tamɣart [nnes].
1KI 4:16 Baɛna, mmis n Hucai, [tuɣa-t d lwali] di Acir u di Baɛalut.
1KI 4:17 Yahucafaṭ, mmis n Faruḥ, [tuɣa-t d lwali] di Issakar.
1KI 4:18 Cimɛi, mmis n Iyla, [tuɣa-t d lwali] di Binyamin.
1KI 4:19 Jabar, mmis n Uri, [tuɣa-t d lwali] di temmurt n Jilɛad, tammurt n Siḥun, ajeǧid n Imuriyyen, u n Ɛuj, ajeǧid n Bacan. Netta [tuɣa] d ayenni n lwali di temmurt nni.
1KI 4:20 [Tuɣa řgens n] Yahuda d Israil s waṭṭas am yijdi ɣar [tma n] řebḥar, ammu aṭṭas. Nitni ccin, swin u farḥen.
1KI 5:1 Suliman iḥkem x marra tigeldiwin zeg iɣzar [n Lfuraṭ] ař tammurt n Ifilisṭiniyyen u ař aymir n Miṣra. Nitni tuɣa ttawyen tarzifin u sexxaren i Suliman, marra ussan n tudart nnes.
1KI 5:2 Asuniy n Suliman i yijj n wass tuɣa-t třatin ikuruten n waren azdad u settin ikuruten n waren,
1KI 5:3 ɛecra n ifunasen iṣeḥḥen, ɛicrin n ifunasen n heddu d mya n wuǧi, ahta i udaden, iɣayḍen n wezɣar, waccawen imeqqranen d iweẓẓiwen n řexřa.
1KI 5:4 Ammu i tuɣa iḥekkem x marra [tammurt] x tma-ya n iɣzar [n Lfuraṭ], zi Tifsax ař Ɣazza, x marra ijeǧiden x tma-ya n iɣzar uca idweř as řehna ɣar marra jjwayeh i d as dd-innḍen.
1KI 5:5 Yahuda d Israil tuɣa zeddɣen di řaman, kuř ijj sadu tzayart nnes u sadu wartu nnes, zi Dan ař Bi’r-Sebɛa, marra ussan n Suliman.
1KI 5:6 Suliman tuɣa ɣares arebɛin-ařef n řkurit n yeysan i ikarruten nnes [n umenɣi] u tenɛac-ařef n imnayen.
1KI 5:7 Lwulat-a, kuř ijj deg uyur nnes, tthillan deg ujeǧid Suliman u di marra inni tuɣa dd-ittasen ɣar ṭṭabřa n ujeǧid Suliman. Nitni war jjin ad ixeṣṣ walu.
1KI 5:8 Imendi d uřum i iysan u i iysan n tazřa ttawyen ten ɣar wemcan mani ma iǧa, kuř ijj am mammec awekkeř nnes.
1KI 5:9 SIDI iwca i Suliman tiɣit d řeɛqeř s waṭṭas uřa d ttasiɛ [n tussna] deg wuř am yijdi ɣar tma n řebḥar.
1KI 5:10 Tiɣit n Suliman tuɣa d tameqqrant x tiɣit n marra tarwa n manis i dd-tneqqar tfuct u x marra tiɣit n Imiṣriyyen.
1KI 5:11 Netta tuɣa d amiɣis x marra iwdan, x Itan, Azraḥi, x Hayman, Kalkul d Dardaɛ, iḥenjiren n Maḥul. Isem nnes idweř [ittwassnen] ɣar marra řegnus i d as dd-innḍen.
1KI 5:12 Netta issiweř teřt-ařaf n wawařen iweznen. Ařef u-xemsa n izřan tuɣa aten zzayes.
1KI 5:13 Netta issiweř [ɛawed] x tcejjura, zi [tcejjart n] tengelt x [idurar n] Lubnan ař tɛelǧet i dd-iɣemmyen zi řḥiḍ. Netta issiweř [ɛawed] x řmař, x ijḍaḍ, x marra imuddaren inni ittbuɛen u x iseřman.
1KI 5:14 Zi marra řegnus usin-dd [iwdan], ḥima ad sřen tiɣit n Suliman, zi marra ijeǧiden n temmurt inni tuɣa isřan x tiɣit nnes.
1KI 5:15 Ḥiram, ajeǧid n Ṣur, issekk imsexxaren nnes ɣar Suliman, maɣar netta tuɣa isřa, aqa dehnen Suliman d ajeǧid deg wemcan n babas. Iwa Ḥiram tuɣa řebda ittexs Dawud.
1KI 5:16 Suliman ijja ad inin i Ḥiram:
1KI 5:17 “Cek tessned aqa baba Dawud tuɣa war izemmar ad ibna ict n Taddart i Yisem n SIDI, AREBBI nnes, zi ssibbet n imenɣan i zi i d as dd-innḍen nitni, ařami ten igga SIDI sadu iḍaren nnes.
1KI 5:18 [Maca] řexxu iwca ayi SIDI, AREBBI inu, řehna zi marra iɣezdisen. War [din] iǧi [ɛad] bu weɣrim u war [din ɛad] asiggʷed n tuɛeffna.
1KI 5:19 Xzar, necc nwiɣ ad bniɣ ict n Taddart i Yisem n SIDI, AREBBI inu, am mammec issiweř SIDI i baba Dawud, inna: ‘Mmic, wenni i ɣa ssɣimeɣ x řɛarc nnec, ad ibna ict n Taddart i Yisem inu.’
1KI 5:20 Umur [xenni] řexxu, aqa ad ayi zedmen ticejjura n tengelt zeg [idurar] n Lubnan. Imsexxaren inu ad iřin ak-d imsexxaren nnec u necc ad ac wceɣ řmunet i imsexxaren nnec ɛlaḥsab marra min d ayi ɣa tinid, minzi cek tessned aqa neccin war ɣarneɣ uřa d ijj wenni izemmaren ad izdem akeccuḍ am [ayt n] Ṣidun.”
1KI 5:21 Umi isřa Ḥiram awařen n Suliman, imsar, aqa ifarḥ aṭṭas s waṭṭas, inna: “Ad ittwabarek SIDI ass-a, maɣar Netta iwca i Dawud ijj n mmis d amiɣis x řgens-a d ameqqran!”
1KI 5:22 Ḥiram issekk [ijj n ureqqas] ɣar Suliman, inna: “Necc sřiɣ i umi i tessekked [ijj n ureqqas] ɣari. Necc ad ssqefřeɣ marra meẓri nnec zi jjihet n ukeccuḍ n [tcejjart n] tengelt d ukeccuḍ n [tcejjart n] umerzi.
1KI 5:23 Imsexxaren inu ad t-i-dd-awyen zeg [idurar n] Lubnan ɣar řebḥar u necc ad t ssiwḍeɣ x tɣarruba n tḥenya x řebḥar ɣar wemcan i d ayi ɣa tinid. Dinni ad t ssarxuɣ u cek ad t teksid, u cek ad tessqefřed marra meẓri inu, maḥend ad tewced macca i taddart inu.”
1KI 5:24 Uca Ḥiram iwca akeccuḍ n [tcejjart n] tengelt d ukeccuḍ n [tcejjart n] umerzi i Suliman, marra anect meẓri nnes.
1KI 5:25 Iwca Suliman ɛicrin-ařef ikuruten n irden i Ḥiram d macca i taddart nnes u ɛicrin ikuruten n zzect [n zzitun] taḥurrect. D man aya i iwca Suliman aseggʷas x useggʷas i Ḥiram.
1KI 5:26 SIDI iwca i Suliman tiɣit am mammec tuɣa i d as inna netta. Tuɣa [din] řehna jar Ḥiram d Suliman, uca nitni s tnayen idsen ggin ijj n řɛahd.
1KI 5:27 Ajeǧid Suliman issgeɛɛed-dd zi marra Israil [iryazen] i tsexxart i ittxeṣṣan. Asgeɛɛed-a yiwi-dd třatin-ařef n yeryazen i řxedmet.
1KI 5:28 Issekk i-ten ɣar [idurar n Lubnan], ɛecra-ařaf [n yeryazen] deg uyur, s nnubet: ijj n uyur tuɣa aten x [idurar n] Lubnan u tnayen n iyuren tuɣa aten di taddart nsen. Aduniram [tuɣa] x yeryazen i iggin řxedmet.
1KI 5:29 Tuɣa Suliman ɣares [ɛawed] sebɛin-ařef n imsexxaren i trebbut n řehmeř d tmenyin-ařef n isuydayen x idurar.
1KI 5:30 Ahta ɛad i imeḥḍayen imeqqranen n Suliman nni [iǧan] x řxedmet, tuɣa din třata u-třatin-mya [n yeryazen] nni iǧan x řgens i iggin řxedmet.
1KI 5:31 Yumur ujeǧid maḥend ad neqcen tiṣuḍar timeqqranin, tiṣuḍar iɣřan, ḥima ad ssarsen dsas n Taddart [s] tiṣuḍar-a ittwassuydan.
1KI 5:32 Ibennayen n Suliman d ibennayen n Ḥiram uřa d Ijibayliyyen neqcen tent. Nitni sswejden akeccuḍ d yeẓra, ḥima ad bnan Taddart.
1KI 6:1 Deg useggʷas wiss arebɛa-mya u-tmanyin awarni i uffuɣ n ayt n Israil zi temmurt n Miṣra, deg useggʷas wiss arebɛa n tgelda n Suliman x Israil, deg uyur n Ziw, ayur wiss tnayen, imsar, aqa netta ibda ad ibna Taddart n SIDI.   *
1KI 6:2 Taddart i ibna ujeǧid Suliman i SIDI tuɣa-tt settin n iɣaǧen n tuzzeggart u ɛicrin [n iɣaǧen n] tiru u třatin n iɣaǧen n řuɛřa.
1KI 6:3 Asqif n wadaf ɣar zzat n [Wexxam n] Zzawect Tameqqrant n Taddart, tuɣa-t ɛicrin n iɣaǧen n tezzuggart ɣar wudem n tiru n Taddart, u tiru nnes tuɣa-t ɛecra n iɣaǧen ɣar wudem n Taddart.
1KI 6:4 Netta igga i Taddart tiburjatin, bellɛen tent s tewwura ak-d iɛumad i ubelleɛ.
1KI 6:5 Ɣar řḥiḍ, ɣar marra iɣezdisen nnes n Taddart, ibna ijj n řebni n zziyada, ɣar řeḥyuḍ i d as dd-innḍen i Taddart, [řeḥyuḍ] n [Wexxam n] Zzawect Tameqqrant u n [Wexxam n] Daxeř [n Zzawect]. Igga řebniyyat n řeḍruf [am wafriwen] ɣar iɣezdisen [n Taddart] deg wenneḍ.
1KI 6:6 Tisefři n wadday [tuɣa-tt] di xemsa n iɣaǧen n tiru u tenni di řwesṭ [tuɣa-tt di] setta n iɣaǧen u tenni wiss třata [tuɣa-tt di] sebɛa n iɣaǧen, maɣar igga tinebdatin ɣar barra n Taddart ɣar iɣezdisen nnes, ḥima [tisefřin] war ttidfent ca di řeḥyuḍ n Taddart.
1KI 6:7 [Umi] tᵉttwabna Taddart, [aqa] tᵉttwabna s tṣuḍar ittwaqessen zi mani tent neqcen, ařami war ttwisřen ifḍisen, niɣ ccaqur niɣ ca zi řeqcuɛ n wuzzař di Taddart řami tᵉttwabna.
1KI 6:8 Tawwart i řebni n řeḍruf ɣar umerwasu [tuɣa-tt] ɣar uɣezdis afusi ař zzat n Taddart. X ddrujat yennḍen ttgeɛɛaden ɣar wenni deg umerwasu u zeg umerwasu ɣar wenni wiss třata.
1KI 6:9 [Ammu] i ibna Taddart, ikemmeř i-tt. Issduriy Taddart s tḥenya u s teřwiḥin n [ukeccuḍ n] tneglin.
1KI 6:10 Ibna [ɛawed] řebni n zziyada ɣar marra Taddart, xemsa n iɣaǧen n řuɛřa [i kuř ṭṭebqet] Wanita yarsa s [tḥenya n] ukeccuḍ n [tcejjart n] tengelt x Taddart.
1KI 6:11 [Xenni] yusa-dd wawař n SIDI ɣar Suliman, inna:
1KI 6:12 “X Taddart-a i tbennid: Mařa cek tuyured ɛlaḥṣab tiweṣṣa inu u ad tegged lfarayiḍ inu u ad teḥḍid řumurat inu umi daysent tuyured, xenni Necc ad ac ssqefřeɣ awař i ssiwřeɣ ɣar babac Dawud.
1KI 6:13 Necc ad zedɣeɣ di řwesṭ n ayt n Israil u Necc war semmḥeɣ ca di řgens inu Israil.”
1KI 6:14 Suliman ibna Taddart u ikemmeř i-tt.
1KI 6:15 Netta ibna [uřa d] admawen n řeḥyuḍ n Taddart nni iǧan ɣar daxeř s tfeřwin n ukeccuḍ n [tcejjart n] tengelt. Zi tisi n Taddart ař řeḥyuḍ n tzeqqa iřeḥḥef i-ten s ukeccuḍ u iřeḥḥef i tisi n Taddart s ukeccuḍ n [tcejjart n] umerzi.
1KI 6:16 Tuɣa ibna [ɛad] ɛicrin n iɣaǧen [ktar] zeg iɣezdisen n ḍeffar n Taddart s tfeřwin n ukeccuḍ n [tcejjart n] tengelt, zi tisi ař [tazeqqa n] řeḥyuḍ, uca igga [ttasiɛ] di daxeř nnes d [Axxam n] Daxeř [n Zzawect] i Netta, d Aqdas x Uqeddas.
1KI 6:17 Taddart [tuɣa-tt] arebɛin iɣaǧen n tuzzeggart, [ixs ad yini] [Axxam n] Zzawect Tameqqrant nni ɣar zzat.
1KI 6:18 Tuɣa akeccuḍ n [tcejjart n] tengelt [i iǧan] ɣar daxeř n Taddart ittwaneqqec s tɛebbuzin d nnuwwarat ggur ad arezment. Marra tuɣa akeccuḍ n tengelt, war dd-ittbin uřa d ijj weẓru.
1KI 6:19 Igga [Axxam n] Daxeř [n Zzawect] ɣar daxeř qaɛ n Taddart, ḥima ad din issars Ttabut n Řɛahd n SIDI.
1KI 6:20 [Axxam n] Daxeř [n Zzawect] [tuɣa-t] ɛicrin n iɣaǧen n tuzzeggart ɣar uɣezdis n zzat u ɛicrin n iɣaǧen n tiru d ɛicrin n iɣaǧen n řuɛřa. Iřeḥḥef i-t s wureɣ izedgen. Iřeḥḥef [ɛawed] aɛalṭar s ukeccuḍ n [tcejjart n] tengelt.
1KI 6:21 Suliman iɣeǧef daxeř n Taddart s wureɣ izedgen. Ɣar zzat n [Wexxam n] Daxeř [n Zzawect] isseɛdu ssnaseř n wureɣ. Iɣeǧef [Wexxam n Daxeř] s wureɣ.
1KI 6:22 Iɣeǧef marra Taddart s wureɣ, ařami tkemmeř marra Taddart. Iɣeǧef marra aɛalṭar nni iǧan ɣar [Wexxam n] Daxeř [n Zzawect] s wureɣ.
1KI 6:23 Deg [Wexxam n] Daxeř [n Zzawect] igga tnayen n ikiruben [n ukeccuḍ] n uzemmur. Tiddi nsen tuɣa-tt di ɛecra n iɣaǧen.
1KI 6:24 Ijj n wafriw n ukirub [tuɣa dayes] xemsa n iɣaǧen u deg wafriw nneɣni n ukirub [tuɣa dayes ɛawed] xemsa n iɣaǧen. Zeg ixef n [yijj n] wafriw nnes ař ixef n wafriw nnes [nneɣni] [aqa] ɛecra n iɣaǧen.
1KI 6:25 Akirub nneɣni [tuɣa ɣares ɛawed řeɛbar n] ɛecra n iɣaǧen. Ikiruben tuɣa ɣarsen s tnayen idsen ijj n řeɛbar d ijj n waddud.
1KI 6:26 Ijj n ukirub tuɣa řuɛřa nnes ɛecra n iɣaǧen u ammu uřa d [řuɛřa n] ukirub nneɣni.
1KI 6:27 Netta issbedd ikiruben di řwesṭ n taddart n daxeř. Ifriwen n ikiruben tuɣa bezzɛen [ařami] afriw n ijj ittakkʷaḍ ijj n řḥiḍ u afriw n ukirub nneɣni ittakkwaḍ řḥiḍ nneɣni. Ɣar řwesṭ n taddart mmḥadan ifriwen nsen ayawya, afriw ɣar wefriw.
1KI 6:28 Netta iɣeǧef ikiruben s wureɣ.
1KI 6:29 Marra řeḥyuḍ n Taddart ɣar marra iɣezdisen nnes inqec i-ten s uqessi n ineqqicen n ikiruben d tcejjura n tini d nnuwwarat yarezmen, zi daxeř u ɣar barra.
1KI 6:30 Iɣeǧef tisi n Taddart s wureɣ am [deg wexxam] n ḍaxeř am [deg wexxam] n zzat.
1KI 6:31 Ɣar wadaf n [Wexxam n] Daxeř [n Zzawect] igga netta tiwwura [n ukeccuḍ] n uzemmur. Akwadrun s řeḍruf [ɣar uɣezdis n tewwart] [ittawi] ijj n řexmus [n řḥiḍ].
1KI 6:32 Tnayen n tewwura [tuɣa atent] zeg [ukeccuḍ n] uzemmur. Netta inqec [daysen] ineqqicen n ikiruben d tcejjura n tini d nnuwwarat yarezmen, uca iɣeǧef [tiwwura] s wureɣ. [Uřa d] ikiruben d tcejjura n tini ibezzeɛ i-ten s wureɣ.
1KI 6:33 Igga ɛawed řeḍruf [i tnayen n iɣezdisen] n wadaf [n Wexxam] n Zzawect Tameqqrant zeg [ukeccuḍ n] uzemmur, zeg ict n terbaɛt [n řḥiḍ].
1KI 6:34 Tnayen n tewwura [tuɣa atent] zeg ukeccuḍ n [tcejjart n] umerzi. Tnayen n tɣemmura [ɣar ṭṭarf] n ict n tewwart tuɣa ttquwwarent di [barra] u tnayen n tɣemmura ttwaneqcent [ɣar ṭṭarf] n tenneɣnit tuɣa ttquwwarent di [daxeř].
1KI 6:35 Netta inqec [daysent] ikiruben d tcejjura n tini d nnuwwarat yarezmen uca icellel i-tent s wureɣ, s ijj n wudem n teqcurt iřeɣɣen x wenqac.
1KI 6:36 Netta ibna řemraḥ ɣar daxeř s třata n iseddiyyen n tṣuḍar ittwassuydan u s yijj n useddi n [tḥenya n tcejjart n] tengelt.
1KI 6:37 Deg useggʷas wiss arebɛa ittwassars dsas n Taddart n SIDI, deg uyur Ziw.
1KI 6:38 Deg useggʷas wiss ḥiṭac n uyur Bul, aqa-t d ayur wiss tmenya, tᵉttwakemmeř Taddart s marra tiseqqar nnes u ɛlaḥsab marra lfarayiḍ nnes. Netta ibna i-tt [deg ijj n řmijař n] sebɛa n iseggʷusa.
1KI 7:1 Di taddart nnes ibna Suliman třeṭṭac n iseggʷusa, uca ikemmeř marra taddart nnes.
1KI 7:2 Netta ibna Taddart n Wezɣar n Lubnan. [Tuɣa-tt] di mya n iɣaǧen n tuzzeggart u xemsin n iɣaǧen n tiru u třatin n iɣaǧen n řuɛřa, [tᵉttwagg] x arebɛa n iseddiyyen n ipilaren n ukeccuḍ n [tcejjart n] tengelt u [ttwassarsent] tḥenya n ukeccuḍ n [tcejjart n] tengelt tiwa i ipilaren.
1KI 7:3 Tuɣa s ict n tzeqqa zeg ukeccuḍ n [tcejjart n] tengelt tiwa i tḥenya n uɛarreḍ nni [iǧan] x xemsa u-rebɛin n ipilaren [nni], aqa xemmesṭac [n tḥenya] x ijj n useddi [n ipilaren].
1KI 7:4 Tuɣa tiwwura [n řekwazi] di třata n iseddiyyen, [ict n] tburjet ajemmaḍ i tburjet [nneɣni], třata n twařawin.
1KI 7:5 Marra tiwwura d řeḍruf [nsent ɣar iɣezdisen] [tuɣa aten d] akwadrun, uca arzam [n ict n tewwart] [tuɣa-tt] ajemmaḍ n warzam [n ict n tewwart nneɣni], třata n twařawin.
1KI 7:6 Asqif igga i-t s ipilaren [ɣar zzat n taddart], xemsin n iɣaǧen n tuzzeggart u třatin n iɣaǧen n tiru. Ɣar wudem n [ipilaren nni] tuɣa ict n tesqift [nneɣni] ak-d ipilaren, uca ɛawed uřa d ijj n useqqef ɣar wudem n [ipilaren nni].
1KI 7:7 Netta igga [ɛawed] axxam i řɛarc mani tuɣa icarreɛ, axxam n taddart n ccraɛ, uca issduriy i-t zi tisi [swadday] ař tisi [nneɣni sennej] s ukeccuḍ n [tcejjart n] tengelt.
1KI 7:8 Taddart nnes, mani tuɣa izeddeɣ, di řemraḥ nneɣni nni iǧan [ktar] ɣar daxeř zeg wexxam [n taddart n ccraɛ], aqa tᵉttwagg amenni. Netta igga [ɛawed] ict n taddart i yeǧis n firɛun, tenni yiwi Suliman [d tamɣart], am wexxam-a wanita.   *
1KI 7:9 Man aya marra [tuɣa-t zi] tṣuḍar iɣřan, ttwassuydant ɛlaḥsab řeqyas, zi daxeř u zi barra ttwancaren s řmencar, u man aya zi dsas ař iẓra n sennej qaɛ u zi barra ař řemraḥ ameqqran.
1KI 7:10 Dsas ittwagg s tṣuḍar iɣřan, iẓra imeqqranen, iẓra n ɛecra n iɣaǧen u iẓra n tmenya n iɣaǧen,
1KI 7:11 u tiwa nsen tiṣuḍar iɣřan, ttwassuydant ɛlaḥsab řeqyas, uřa d akeccuḍ n [tcejjart n] tengelt.
1KI 7:12 Řemraḥ ameqqran i d as dd-innḍen [tuɣa-t ɛawed] zi třata n iseddiyyen n tṣuḍar ittwassuydan d ijj n useddi n ukeccuḍ n [tcejjart n] tengelt, [am mammec] i řemraḥ n daxeř i Taddart n SIDI am i wesqif n wadaf n Taddart.
1KI 7:13 Ajeǧid Suliman issekk ɣar Ḥiram zi Ṣur, ḥima ad dd-yas.
1KI 7:14 Wanita tuɣa d mmis n ict n tajjač zi teqbič n Naftali u babas tuɣa-t d ijj n weryaz zi Ṣur, ijj n wemziř n nnḥas. Netta tuɣa iccur s řefhamet d řeɛqeř d tussna ḥima ad issuffeɣ qaɛ řxedmet n nnḥas. Netta yusa-dd ɣar ujeǧid Suliman u marra min igga, igga i-t [n nnḥas].
1KI 7:15 Netta igga tnayen n ipilaren n nnḥas. Řuɛřa n ijj n upilar tuɣa-tt tmenṭac n iɣaǧen uca s yijj n ufiřu n tenɛac n iɣaǧen [izemmar] ad inneḍ i upilar nneɣni.
1KI 7:16 Netta igga tnayen n ttijan n nnḥas ifesyen ḥima ad ten ssarsen x izeǧifen n ipilaren. Řuɛřa n ijj n ttaj tuɣa-t xemsa n iɣaǧen u řuɛřa n ttaj nneɣni tuɣa-t uřa d xemsa n iɣaǧen.
1KI 7:17 [Uřa d] tijeṭṭayin ttwaggent s ict n řxedmet n umudi, [am] ifiřan ggin tent s ssnaseř i ttijan [i iǧan] x izeǧifen n ipilaren. Sebɛa i yijj n ttaj u sebɛa i ttaj nneɣni.
1KI 7:18 Igga ipilaren d tnayen n iseddiyyen [n iremmamen] i d as dd-innḍen i dd-yusin ak-d řxedmet n umudi i ittwaggen maḥend ad [zzayes] issduriy ttijan [i iǧan] tiwa i [iseddiyyen n] iremmamen. Ammu i igga uřa i ttaj nneɣni.
1KI 7:19 Ttijan x uzeǧif n ipilaren nni [iǧan] ɣar wesqif n wadaf ttwaggen [am] tlillicin, [s ijj n řuɛřa n] arebɛa n iɣaǧen.
1KI 7:20 Ttijan [i iǧan] x tnayen n ipilaren [dewřen] sennej ak-d wudem n uqurar nni tuɣa i-dd-ittasen ak-d řxedmet imuden. Uca mitayen n iremmamen quwwaren asen-dd s tnayen n iseddiyyen, uřa x ttaj nneɣni.
1KI 7:21 [Xenni] issbedd netta ipilaren ɣar wesqif n wadaf n Zzawect Tameqqrant. Issbedd apilar afusi, igga as Yaxin, uca issbedd uřa d apilar azeřmaḍ, igga as Buɛaz.
1KI 7:22 X uzeǧif n ipilaren tuɣa [din] ict n řxedmet [izewwqen] di furma n [ijj n řkas am] ict n tlillect. [Ammu] tᵉttwakemmeř řxedmet n ipilaren.
1KI 7:23 Netta igga tarimant ifesyen i waman. [Tuɣa-t] řeɛbar nnes zi ṭṭarf ař ṭṭarf nnes [nneɣni] ɛecra n iɣaǧen, d aqurar qaɛ, uca tiddi nnes [tuɣa-t] di xemsa n iɣaǧen u tzemmared ad as tennḍed s ict n ufiřu n řeɛbar n třatin n iɣaǧen.
1KI 7:24 Swadday i tma nnes i d as dd-innḍen qaɛ, tuɣa [din] tiɛebbuzin [ak-d nnuwwarat yarezmen]. Ɛecra di kuř ijj n uɣiř nnḍent i trimant. Tnayen n iseddiyyen nni n tɛebbuzin [ak-d nnuwwarat yarezmen] tuɣa ttwafesyen akides.
1KI 7:25 Tarimant tbedd x tenɛac n ifunasen. Třata zzaysen arrin s wudem nsen ɣar ccamal, třata zzaysen arrin s wudem nsen ɣar řɣarb, třata zzaysen arrin s wudem nsen ɣar ljanub u třata zzaysen arrin s wudem nsen ɣar ccarq. Tarimant [tarsa] xasen u marra zzɛenquqat nsen tuɣa dewřent xezzarent ɣar daxeř.
1KI 7:26 Tegdar [n trimant] d ijj cbar n ufus u tma nnes tuɣa am řxedmet izewwqen n tma n ijj n ufenjař, am tnewwact n tlillect. Twawit nnes tuɣa ařfayen ibatuten.
1KI 7:27 Netta igga ɛecra n tkarrutin n nnḥas. Tuɣa tuzzeggart n ict n tkarrut arebɛa n iɣaǧen u tiru nnes arebɛa n iɣaǧen u řuɛřa nnes třata n iɣaǧen.
1KI 7:28 Ammu i ttwaggent tkarrutin. Nitenti tuɣa ɣarsent tiřwiḥin ɛarrḍent u teřwiḥin ɛarrḍent [tuɣa atent] jar ccafud.
1KI 7:29 X teřwiḥin ɛarrḍent jar ccafud, [tuɣa din] [arcamen n] weyraden, ifunasen d ikiruben. Ɣar sennej x ccafud tuɣa [din] ijj n usennad. Sadu weyraden d ifunasen ttwaggent tiseddiyin n tefray nni yuyřen ɣar wadday .
1KI 7:30 Ict n tkarrut tuɣa ɣares arebɛa n tjarrarin n nnḥas d řeḥzamat n nnḥas. Arebɛa n iḍaren tuɣa ɣarsen tiɣarḍin. Tiɣarḍin ifesyen nni [tuɣa atent] sadu i tbanyut i usird, zzat i kuř taɣarḍt [tuɣa din] tiseddiyin n tefray.
1KI 7:31 Aqemmum nnes [tuɣa-t] ɣar daxeř n ttaj n tkarrut, ijj n uɣiř ɣar sennej. Aqemmum nnes tuɣa-t d aqurar, ijj n uɣiř d wezyen, ammu i ittwagg. X uqemmum [tuɣa din] ɛawed tinqacin, u tiřwiḥin nsen ɛarrḍent tuɣa atent s arebɛa n tɣemmura, war ǧint d tiqurarin.
1KI 7:32 Arebɛa n tjarrarin [tuɣa atent] sadu teřwiḥin ɛarrḍent u řeḥzamat n tjarrarin [tuɣa atent ceddnent] ɣar tkarrut. Řuɛřa n ict n tjarrart [tuɣa-t] ijj n uɣiř d wezyen.
1KI 7:33 Tijarrarin ttwaggent am ttwaggent tjarrarin n ijj n ukarru. Řeḥzamat nsent, yantat nsent, arradyawat nsent d iɣuřaf [n řeḥzamat] nsent ttwafesyent marra.
1KI 7:34 [Tuɣa din] arebɛa n tɣarḍin ɣar arebɛa n tɣemmura n ict n tkarrut. Tiɣarḍin nnes ffɣent zi tkarrut.
1KI 7:35 Sennej i tkarrut [tuɣa din] ijj n ṭṭarf n wezyen n uɣiř ibedd iquwwar as-dd zi marra iɣezdisen nnes. Sennej i tkarrut [tuɣa din] ɛawed ifassen ɣar teřwiḥin nnes.
1KI 7:36 X teřwiḥin ak-d ifassen nsent u x teřwiḥin tiqebbarin nsent inqec ikiruben, iyraden d tcejjura n tini, x kuř ijj n wemcan ixřa, uřa d tiseddiyin n tefray ɣar marra iɣezdisen.
1KI 7:37 Ammu i igga netta ɛecra n tkarrutin, marra s yijj n webrid n ufesyi, s yijj n řeqyas, s yijj n waddud.
1KI 7:38 Igga [ɛawed] ɛecra n tbanyutin n nnḥas. Ict n tbanyut iksi arebɛin ibatuten. Ict n tbanyut [tuɣa-tt] dayes arebɛa n iɣaǧen. X qaɛ ict zi ɛecra n tkarrutin [nni] [tuɣa tekkar as-dd] ict n tbanyut.
1KI 7:39 Igga xemsa n tkarrutin ɣar uɣezdis n zzat afusi n Taddart u xemsa ɣar uɣezdis n zzat azeřmaḍ n Taddart, maca tarimant [tameqqrant] i waman igga i-t ɣar uɣezdis n zzat afusi n Taddart, ɣar uɣezdis n ccarq, ɣar ljanub [nnes].
1KI 7:40 Igga Ḥiram [ɛawed] tibanyutin [i usird], iɣenjayen d ṭṭawyat i urucci. Ikemmeř Ḥiram marra řxedmet nni igga i ujeǧid Suliman [i] Taddart n SIDI:
1KI 7:41 tnayen n ipilaren d tnayen n iquraren n ttijan nni [iǧan] x izeǧifen n tnayen n ipilaren [nni], uřa d tnayen n řexdayem n umuddi i d asent-i-dd-innḍen i tnayen n iquraren n ttijan inni [iǧan] x izeǧifen n tnayen n ipilaren,
1KI 7:42 arebɛa-mya n iremmamen i tnayen n řexdayem n umuddi [ttwammsebḍan] x tnayen n iseddiyyen n iremmamen i kuř řxedmet n umuddi i zi dřin nitni tnayen n iquraren n ttijan inni x wudem sennej n ipilaren,
1KI 7:43 d ɛecra n tkarrutin d ɛecra n tbanyutin [nni iǧan] x tkarrutin [nni],
1KI 7:44 d tarimant d tenɛac n ifunasen sadu i trimant,
1KI 7:45 d teydurin d iɣenjajen d ṭṭawyat i urucci. Marra řeqcuɛ-a i igga Ḥiram i ujeǧid Suliman [i] Taddart n SIDI, [tuɣa aten] zi nnḥas ittwassuydan.
1KI 7:46 Ajeǧid ikebb i-ten deg udewwar n L’Urdun di třaxt igdaren jar Sukkut d Ṣartan.
1KI 7:47 Suliman issɛizz x [wewzan n] marra řeqcuɛ-a di ssibbet n řqedd nsen d ameqqran aṭṭas. War beqqcen di řewzen n nnḥas.
1KI 7:48 Suliman igga marra řeqcuɛ i Taddart n SIDI: aɛalṭar n wureɣ, tazewḍa n wureɣ min xef [ittwassars] weɣrum n wescan,
1KI 7:49 řa d řeqnadeř, xemsa ɣar yefus d xemsa ɣar uzeřmaḍ, zzat i [Wexxam n] Daxeř [n Zzawect] zeg wureɣ izedgen, řa d [nnuwarat] yarezmen d řefnarat d tjeqqaḍin [n teftič] n wureɣ,
1KI 7:50 uřa d ṭṭawyat d tjeqqaḍin d ṭṭawyat i urucci d tɣenjayin d tmejmarin n wureɣ izedgen. [Xenni igga ɛawed] řemfaseř i tewwura n Taddart n daxeř, i Weqdas x Uqeddas, uřa [řemfaseř] i tewwura n [Wexxam n] Zzawect Tameqqrant n Taddart zeg wureɣ.
1KI 7:51 Ammu i tᵉttwakemmeř marra řxedmet i igga ujeǧid Suliman i Taddart n SIDI. Uca Suliman issidef tiwhibin iqeddsen n babas. Issars nnuqart d wureɣ d řeqcuɛ deg ixxamen n txubay n Taddart n SIDI.
1KI 8:1 Xenni issmun Suliman imɣaren n Israil, marra izeǧifen n tqebbař, řḥukkam [n tudrin] n řejdud n ayt n Israil ɣar ujeǧid Suliman di Urcalim, ḥima ad ssgeɛɛden Ttabut n Řɛahd n SIDI zi tendint n Dawud, tenni d Ṣihyun.
1KI 8:2 Marra iryazen n Israil munen-dd ɣar ujeǧid Suliman ɣar řɛid deg uyur n Itanim, aqa-t d ayur wiss sebɛa.
1KI 8:3 Marra imɣaren n Israil usin-dd u ikehhanen ssgeɛɛden Ttabut.
1KI 8:4 Nitni ssgeɛɛden Ttabut n SIDI ak-d Uqiḍun n Umsagar uřa d marra řeqcuɛ iqeddsen i tuɣa iǧan deg Uqiḍun. Ssgeɛɛden tt ikehhanen d Ilawiyyen.
1KI 8:5 Ajeǧid Suliman ak-d marra tamesmunt n Israil i tuɣa ɣares dd-tmun u tuɣa-tt akides zzat i Ttabut, [marra nitni] wehhben uǧi d ifunasen d tfunasin, inni war zemmaren ad ttwaḥesben zi ssibbet n řqedd ameqqran nsen.
1KI 8:6 Ikehhanen iwyen Ttabut n Řɛahd n SIDI ɣar wemcan nnes, ɣar [Wexxam n] Daxeř n Taddart, deg Weqdas x Uqeddas, ař sadu wafriwen n ikiruben.
1KI 8:7 Maɣar ikiruben bezzɛen tnayen n wafriwen nsen tiwa n wemcan n Ttabut, uca ikiruben dřin Ttabut d iɛumad nnes [i tarebbut] zi sennej.
1KI 8:8 Iɛumad nnes [n tarebbut] tuɣa ffɣen-dd ařami ttwaẓarren ixfawen n iɛumad nnes zeg Uqeddas zzat i wudem n [Wexxam n] Daxeř [n Zzawect], [maca] zi barra war zemmaren ad ten ẓaren. [Iɛumad] qqimen dinni ař ass-a.
1KI 8:9 War iǧi uřa d ca di Ttabut mɣir tnayen n teřwiḥin i tuɣa dayes issars Musa ɣar Hurib, řami igga SIDI [Řɛahd] ak-d ayt n Israil umi dd-ffɣen zi Miṣra.
1KI 8:10 Řami dd-ffɣen ikehhanen zeg Uqeddas [ɣar barra], imsar, aqa ijj n useynu iccur Taddart n SIDI.
1KI 8:11 War zemmaren ikehhanen ad qqimen bedden ḥima ad sexxaren zi ssibbet n useynu, minzi aɛuǧi n SIDI tuɣa iccur Taddart n SIDI.
1KI 8:12 Xenni inna Suliman: “SIDI inna aqa Netta ad izdeɣ deg ijj n useynu ibbumbes.
1KI 8:13 [S tidett], necc bniɣ ict n Taddart, ict n Tzeddiɣt i Cek, ijj n wemcan imten i Cek, ḥima ad [din] tzedɣed i řebda.”
1KI 8:14 Inneqřeb ujeǧid s uɣembub nnes uca ibarek marra agraw-a [n řgens] n Israil u marra agraw n Israil tuɣa ibedd.
1KI 8:15 Netta inna: “Ad ittwabarek SIDI, AREBBI n Israil, wenni issiwřen s uqemmum nnes i baba Dawud d [wenni] [t] ikemmřen s ufus nnes umi inna:
1KI 8:16 ‘Zeg wass i di nedheɣ řgens inu Israil zi Miṣra, war ixḍareɣ uřa d ict n tendint zi marra tiqebbař n Israil, ḥima ad [dinni] bniɣ ict n Taddart, ḥima ad [din] yiři Isem inu, [maca] Necc ixḍareɣ Dawud, ḥima ad yiři d řḥakem x řgens inu Israil.’
1KI 8:17 Tuɣa deg wuř n baba Dawud, ḥima ad ibna ict n Taddart i Yisem n SIDI, AREBBI n Israil.
1KI 8:18 Inna SIDI i baba Dawud: ‘Umi teggid deg wuř nnec ḥima ad tebnid ict n Taddart i Yisem inu, di man aya i teggid mliḥ umi tt tuɣa deg wuř nnec.
1KI 8:19 Maca war iǧi cek i ɣa ibnan Taddart nni, maca mmic i dd-iffɣen zi tejɛinna nnec. D netta ad ibna Taddart i Yisem inu.’
1KI 8:20 SIDI issemten awař nnes nni issiweř, maɣar necc dewřeɣ beddeɣ deg wemcan n baba Dawud u qqimeɣ x řɛarc n Israil, am mammec tuɣa issiweř SIDI, u necc bniɣ Taddart i Yisem n SIDI, AREBBI n Israil.
1KI 8:21 Necc ggiɣ din ijj n wemcan i Ttabut tenni di iǧa Řɛahd n SIDI i igga Netta ak-d řejdud nneɣ umi ten dd-indeh zi Miṣra.”
1KI 8:22 Suliman ibedd zzat i uɛalṭar n SIDI arendad n marra agraw [n řgens] n Israil, uca netta iksi ifassen nnes ɣar ujenna,
1KI 8:23 inna: “[A] SIDI, AREBBI n Israil, war iǧi uřa d ijj n AREBBI am Cek deg ujenna sennej u x temmurt swadday, wenni iḥḍan Řɛahd d tmexsiwt icewwařen i imsexxaren nnec nni igguren zzat i wudem nnec s marra uř nsen,
1KI 8:24 wenni iḥḍan di ṭṭweɛ n umsexxar nnec, baba Dawud, x min xef akides tessiwřed, minzi s uqemmum nnec i tessiwřed u s ufus nnec i dd-tarrid ad ittwakemmeř, am [teǧa] ass-a.
1KI 8:25 [Xenni] řexxu, SIDI, AREBBI n Israil, ḥḍat di ṭṭweɛ n umsexxar nnec, baba Dawud, x min kides tessiwřed umi tennid: ‘War ittwaqess zzayek uřa d ijj n weryaz zi zzat i wudem inu wenni iqqimen x řɛarc n Israil, min ɣa kken iḥenjiren nnec ad ḥḍan ad uyuren abrid nsen zzat i wudem inu am mammec tuyured cek zzat i wudem inu!’
1KI 8:26 [Xenni] řexxu, [a] AREBBI n Israil, egget ad dewřen d tidett awařen nni tessiwřed ak-d umsexxar nnec, baba Dawud.
1KI 8:27 Maɣar ma s tidett ad izdeɣ AREBBI x temmurt? Xzar, ajenna, [wah,] ajenna n ijenwan war izemmar ad Cek iksi, mecḥař s drus Taddart-a nni ssbeddeɣ necc!
1KI 8:28 Meyyeř ɣar tẓaǧit n umsexxar nnec u ɣar uzaweg nnes, [a] SIDI, AREBBI inu, ḥima ad tesřed ɣar uřaɣi u ɣar tẓaǧit nni iẓẓuǧ umsexxar nnec ass-a zzat i wudem nnec.
1KI 8:29 Ejj tiṭṭawin nnec ad ttwarezment ǧiřet d wass tiwa i Taddart-a, tiwa i wemcan i x tennid: ‘Aqa Isem inu ad din yiři i useǧi ɣar tẓaǧit i iẓẓuǧ umsexxar nnec deg wemcan-a.’
1KI 8:30 Seř [xenni] i uzaweg n umsexxar nnec u n řgens nnec Israil, [i uzaweg] nni ttaren nitni deg wemcan-a, u seř Cek [xenni] deg wemcan n Tzeddiɣt nnec, deg ujenna, [wah,] seř uca ɣfar.
1KI 8:31 Mařa ixḍa ijj ak-d jjar nnes u tᵉttwagg xas ict n tjaǧit, ḥima ad tt ijjuǧ u wanita yusa-dd uca ijjuǧ zzat i uɛalṭar nnec di Taddart-a,
1KI 8:32 seř Cek [xenni] deg ujenna, kkar, ḥkem x imsexxaren nnec, [ḥima] ad ittwaḥkem x uɛeffan ařami abrid nnes ad dd-ihwa x uzeǧif nnes, u [ḥima] ad tᵉttwagg tsegda i umsegged ařami ad as tᵉttwaɣ tesɣart ɛlaḥsab tasegda nnes.
1KI 8:33 Mařa ittwaɣřeb řgens nnec Israil zzat i wudem n řeɛdu, minzi nitni xḍan akidek, [maca] nitni ad ɣarek dd-dewřen uca ad qadan Isem nnec u ad ẓaǧen ad ksin s řmeɛruf i Cek di Taddart-a,
1KI 8:34 seř Cek [xenni] deg ujenna u ɣfar ddnub n řgens nnec Israil u ndeh i-ten ad dd-dewřen ɣar temmurt nni tewcid i řejdud nsen.
1KI 8:35 Mařa ibelleɛ ujenna, xmi war din ittiři wenẓar, minzi nitni xḍan akidek u nitni ad ẓẓaǧen am nnqeřben ɣar wemcan-a, ad qadan Isem nnec u ad dd-dewřen x ddnub nsen umi Cek ten teḥṣared,
1KI 8:36 seř Cek [xenni] deg ujenna u ɣfar asen ddenb n imsexxaren nnec u n řgens nnec Israil, minzi Cek tesseřmaded i-ten abrid aṣebḥan nni ittxeṣṣa ad uyuren, u ewc Cek [xenni] anẓar x temmurt nni tewcid d řwart i řgens nnec.
1KI 8:37 Mařa din řaẓ di temmurt, [niɣ] ṭṭaɛun, [niɣ] ittwassecmeḍ [imendi zeg usemmiḍ], [niɣ] jjriḥect n wefsu [niɣ] tamuɣri [tenni] iṣarrḍen, [niɣ] mařa iḥṣar i-t řeɛdu [ɣar] tewwura nnes, [niɣ] teřqef i-t mammec ma tegga ca n jjriḥect [niɣ] ca n řeḥřac,
1KI 8:38 [xenni] man ma i ɣa iẓẓuǧ niɣ ɣa ittar ijj n bnadem [niɣ] marra řgens nnec Israil, [am] nitni, kuř ijj [zzaysen], ssnen jjriḥect n wuř nsen, u netta iksi [xenni] ifassen nnes ɣar Taddart-a,
1KI 8:39 seř Cek [ɣares] zeg ujenna, amcan imten n Tzeddiɣt nnec, ɣfar, kkar u ewc kuř ijj ɛlaḥsab tibridin nnes - am mammec tessned Cek uř nnes, maɣar Cek waha i issnen uř n kuř bnadem -
1KI 8:40 ḥima nitni ad Cek ggʷeden marra ussan i ɣa kken ddaren x wudem n temmurt nni tewcid i řejdud nneɣ,
1KI 8:41 [Uca seř Cek] uřa ɣar ubarrani nni war [iǧan] zi řgens nnec Israil, [maca] ad dd-yas di ṭṭweɛ n Yisem nnec zeg ict n temmurt iggʷejen.
1KI 8:42 Maɣar nitni ad sřen x Yisem nnec ameqqran, x ufus nnec ijehden u x uɣiř nnec isswiẓẓḍen! Mařa netta dd-yusa u ad iẓẓaǧ di Taddart-a,
1KI 8:43 seř Cek [xenni] zeg ujenna, amcan imten n Tzeddiɣt nnec, u egg ɛlaḥsab marra min xef d ɣarek ɣa iřaɣa ubarrani, ḥima marra řegnus n ddunect ad ssnen Isem nnec, ḥima nitni ad Cek ggʷeden, am řgens nnec Israil, u ad ucin, aqa Isem nnec ittwabarreḥ tiwa i Taddart-a i bniɣ.
1KI 8:44 Mařa řgens iffeɣ ɣar umenɣi ak-d řeɛdu nnes deg webrid min xef ten tessekked u nitni ad ẓẓaǧen i SIDI [am] nnqeřben ɣar tendint-a i tixḍared Cek u ɣar Taddart i bniɣ necc i Yisem nnec,
1KI 8:45 seř Cek [xenni] deg ujenna i tẓaǧit nsen u i uzaweg nsen uca taɣed asen tasɣart.
1KI 8:46 Mařa nitni xḍan akidek - maɣar war iǧi uřa d ijj bnadem i war ixḍan - u Cek tesɛared xasen, ad ten tsellmed zzat i wudem n řeɛdu uca nitni ad ten nedhen d imeḥbas ɣar temmurt n řeɛdu, ma teggʷej niɣ tudes [i teǧa],
1KI 8:47 u nitni ad tuben deg wuř nsen di temmurt mani ttwaḥebbsen, [wah], ad tuben u ad xak dd-řaɣan di temmurt n yinni ten iḥebbsen, ad inin: ‘Neccin nexḍa u negga min war iseggden, aqa negga tuɛeffna!’,
1KI 8:48 u nitni ad ɣarek dd-dewřen s marra uř nsen u s marra řeɛmar nsen di temmurt n řɛedyan nsen inni ten iḥebbsen uca ad ɣarek ẓẓaǧen [am] nnqeřben ɣar temmurt nni tewcid i řejdud nsen, ɣar tendint-a i tixḍared Cek u ɣar Taddart-a i bniɣ necc i Yisem nnec,
1KI 8:49 seř Cek [xenni] deg ujenna, amcan imten n Tzeddiɣt nnec, i tẓaǧit nsen u i uzaweg nsen uca aɣ asen tasɣart.
1KI 8:50 Ɣfar i řgens nnec min zi xḍan akidek u [ɣfar asen] marra ixeṭṭan nsen i kidek ixḍan, u ewc asen arreḥmet zzat i wudem n yinni i ten iḥebbsen, ḥima nitni ad xasen areḥmen.
1KI 8:51 Nitni maɣar d řgens nnec d tasɣart nnec nni dd-tessuffɣed zi Miṣra, zi řwesṭ n uferran n wuzzař.
1KI 8:52 Ejj tiṭṭawin nnec ad ttwarzment i uḥeccem n umsexxar nnec u i uḥeccem n řgens nnec Israil, maḥend ad ɣarsen tesřed ak-d marra min ɣarek i ɣa řaɣan,
1KI 8:53 maɣar Cek tfarzed i-ten i Yixef nnec d řwart zi marra řegnus n temmurt, am mammec tessiwřed Cek s tsexxart n Musa, umsexxar nnec, umi tessuffɣed řejdud nneɣ zi Miṣra, [a] Sidi inu, SIDI!”
1KI 8:54 Řami tuɣa Suliman ikemmeř marra tẓaǧit-a u [marra] aḥeccem-a ɣar SIDI, imsar, aqa netta ikkar zi zzat n uɛalṭar n SIDI, am t tuɣa x ifadden nnes s weɛrur iqwes am ttwasswiẓẓaḍen ifassen nnes ɣar ujenna.
1KI 8:55 Netta tuɣa ibedd [din] uca ibarek marra agraw [n řgens] n Israil, inna s tmijja ijehden:
1KI 8:56 “Ad ittwabarek SIDI, wenni issareyyḥen řgens nnes Israil ɛlaḥsab marra min tuɣa iqqar! Zi marra awař[en] iṣebḥanen i zi issiweř s tsexxart n umsexxar nnes Musa, war dd-iwḍi uřa d ijj.
1KI 8:57 Ad yiři SIDI, AREBBI nneɣ, akidneɣ am tuɣa iǧa ak-d řejdud nneɣ, maḥend Netta war d aneɣ ittejji u war d aneɣ ineṭṭar,
1KI 8:58 [maca] ad indeh uřawen nneɣ ɣares, maḥend neccin ad nuyur x tebridin nnes u ad neḥḍa řumurat nnes d tweṣṣa nnes d lfarayiḍ nnes nni yumur i řejdud nneɣ.
1KI 8:59 Ejj awařen-a i ssiwřeɣ s uḥeccem zzat i wudem n SIDI, ass d ǧiřet, ad iřin udsen ɣar SIDI, AREBBI nneɣ, ḥima Netta ad yaɣ tasɣart i umsexxar nnes d řgens nnes Israil, kuř ass [s] min [i ittřiqen] i wass nni,
1KI 8:60 maḥend marra řegnus n temmurt ad ssnen aqa SIDI d AREBBI, war din nneɣni,
1KI 8:61 maḥend uř nwem ad yiři imun ak-SIDI, AREBBI nneɣ, ḥima ad tuyurem ɛlaḥsab tiweṣṣa nnes, ad teḥḍam řumurat nnes, am [teǧa] ass-a.”
1KI 8:62 Iɣarṣ ujeǧid d marra Israil akides tiɣarṣa zzat i wudem n SIDI.
1KI 8:63 Suliman iɣarṣ tiɣarṣa n řehna nni iɣarṣ i SIDI: tnayen u-ɛicrin-ařaf n ifunasen d tfunasin d mya u-ɛicrin-ařaf n wuǧi d taɣarṣt n řehna. Ammu i ideccen ujeǧid Taddart n SIDI [jmiɛ] ak-d marra ayt n Israil.
1KI 8:64 Deg wass d ijjen issqeddes ujeǧid řwesṭ n řemraḥ n zzat wenni [iǧan] zzat i Taddart n SIDI, minzi issewjed din taɣarṣt n wecmaḍ d tewhibt [n řɣiǧet] uřa d tadunt n tɣarṣa n řehna. Maɣar aɛalṭar n nnḥas wenni [iǧan] zzat i wudem n SIDI, tuɣa d ameẓyan ḥima ad iksi tiɣarṣa n wecmaḍ d tewhibt [n řɣiǧet] d tadunt n tɣarṣa n řehna.
1KI 8:65 Di řweqt nni igga Suliman Řɛid [ɛawed] d marra Israil akides, zi mani ɣa tiwḍed ɣar Ḥamat ař Taɣzart n Miṣra: ijj n wegraw [n řgens] ameqqran zzat i wudem n SIDI, AREBBI nneɣ, sebɛa n wussan uřa d sebɛa n wussan ktar, arbeɛṭac n wussan.
1KI 8:66 Deg wass wiss tmenya yarxu netta i řgens, uca nitni barken ajeǧid. [Awarni uya] uyuren ɣar iqiḍan nsen s wuř ifarḥ u s řxaḍar x marra řxar i tuɣa igga SIDI i umsexxar nnes Dawud u i řgens nnes Israil.
1KI 9:1 Awarni řami ikemmeř Suliman řebni n Taddart n SIDI u [řebni n] taddart n ujeǧid, [wah,] marra min tuɣa immeẓri u tuɣa ixs ad t igg,
1KI 9:2 iban-dd SIDI i Suliman i twařa wiss tnayen, am mammec i d as dd-iban di Jibɛun.
1KI 9:3 Inna as SIDI: “Necc sřiɣ i tẓaǧit nnec u i uḥeccem nnec i zi tḥeccmed zzat i wudem inu. Taddart i tebnid, ssqeddseɣ tt, ḥima ad ssmetneɣ din Isem inu i řebda uca tiṭṭawin inu d wuř inu ad din iřin i řebda!
1KI 9:4 Mařa cek tuyured zzat i wudem inu am mammec tuɣa iggur babac Dawud s wuř imun u s řeṣfayet, ad tegged am mammec marra i d ac umureɣ u ad teḥḍid tiweṣṣa inu d lfarayiḍ inu,
1KI 9:5 [xenni] ad ssmetneɣ řɛarc n tgelda nnec x Israil i řebda, am mammec ssiwřeɣ ɣar babac Dawud, nniɣ: ‘War zzayek ittwaqessi ca n weryaz zi řɛarc n Israil!’
1KI 9:6 Maca mařa kenniw, cek d iḥenjiren nwem, ad tḥeyydem zi ḍeffar inu u kenniw war tḥeṭṭam ɛad řumurat inu d tweṣṣa inu nni wciɣ zzat i wudem nwem, u kenniw ad tuyurem ad tsexxarem i irebbiten nneɣni, ad asen tbendqem,
1KI 9:7 xenni ad qḍiɣ Israil zi temmurt nni d asen wciɣ uca Taddart-a i ssqeddseɣ i Yisem inu ad tt mmenḍareɣ zeg wudem inu u Israil ad idweř d ijj n umedya d [ict n řqecɛet] n ustehzi jar marra řegnus.
1KI 9:8 U x Taddart-a tenni yuɛřan qaɛ, marra wi xas i ɣa ikken, ad itebhet ad iṣeffar. Nitni ad inin: ‘Mayemmi igga SIDI ammu di temmurt-a u di Taddart-a?’
1KI 9:9 Ad inin: ‘Minzi nitni semḥen di SIDI, AREBBI nsen, wenni dd-issuffɣen řejdud nsen zi temmurt n Miṣra, u minzi nitni cebbaren di irebbiten nneɣni, uyuren ad asen bendqen u ad asen ɛebden, x uya issiweḍ SIDI marra řɣar-a xasen.’”
1KI 9:10 Awarni ɛicrin n iseggʷusa i di ibna Suliman tnayen n tudrin, Taddart n SIDI u taddart n ujeǧid, imsar
1KI 9:11 - [am] iwca Ḥiram, ajeǧid n Ṣur, i Suliman ɛlaḥsab meẓri nnes akeccuḍ n [tcejjart n] tengelt d ukeccuḍ n [tcejjart n] umerzi d wureɣ - aqa Suliman iwca i Ḥiram ɛicrin n tneddam di temmurt n Ljalil.
1KI 9:12 Ḥiram iffeɣ-dd zi Ṣur, ḥima ad ixzar tineddam nni d as iwca Suliman, maca tuɣa atent war cnant di tiṭṭawin nnes.
1KI 9:13 Netta inna: “Mana tineddam-a i d ayi tewcid, awma?” U netta iřaɣa asent: ‘Tammurt n Kabul’. [Nitenti ttwařaɣant ammu] ař ass-a.
1KI 9:14 Ḥiram tuɣa issekk i ujeǧid mya u-ɛicrin talint n wureɣ.
1KI 9:15 D wa d awař x ljizya i tuɣa issgeɛɛed ujeǧid Suliman, maḥend ad ibna Taddart n SIDI d taddart nnes d lqelɛa d řḥiḍ n Urcalim d Ḥaṣur d Majiddu d Jazar.
1KI 9:16 Firɛun, ajeǧid n Miṣra, tuɣa igeɛɛed, iṭṭef Jazar, iqedd as timessi. Inɣa ayt n Kenɛan i tuɣa izeddɣen di tendint uca iwca i-tt d tarzeft n tesřit i yeǧis, tamɣart n Suliman.
1KI 9:17 Suliman ibna [xenni] Jazar d Bayt-Ḥurun n wadday
1KI 9:18 d Baɛlat di temmurt [nni] d Tadmar di řexřa
1KI 9:19 d marra tineddam n řexzen nni ɣares ɣar Suliman uřa d tineddam n ikarruten d tineddam n imnayen, u marra min tuɣa immeẓri Suliman ad [t] ibna di Urcalim, x [idurar n] Lubnan u di marra tammurt i x iḥkem.
1KI 9:20 Marra řgens i iqqimen n Imuriyyen, Iḥittiyyen, Ifiriziyyen, Iḥiwiyyen d Iyabusiyyen, inni war [iǧin] ca zeg ayt n Israil,
1KI 9:21 tarwa nsen nni iqqimen awarni asen di temmurt, inni war zemmaren ayt n Israil ad ten ḥarrmen [i uteḥḥi], igga xasen Suliman ljizya n tesmuɣi ař ass-a.
1KI 9:22 Zeg ayt n Israil war iggi Suliman uřa d ijj d ismeɣ, minzi nitni tuɣa aten d iɛeskariyyen d imsexxaren nnes d řḥukkam nnes d ineɣrafen nnes [n řɛeskar] d imeqqranen n ikarruten nnes d imnayen nnes.
1KI 9:23 Ina d imeḥḍayen imeqqranen nni tuɣa ittwařeqqmen x řxedmet di ṭṭweɛ n Suliman, xemsa-mya u-xemsin [n yeryazen] nni tuɣa iḍebbaren x řgens nni tuɣa itteṭṭfen di řxedmet.
1KI 9:24 Maca yeǧis n firɛun tgeɛɛed zi tendint n Dawud ɣar taddart i tuɣa i d as ibna. Řexdenni ibna lqelɛa.
1KI 9:25 Třata n twařawin deg useggʷas issgeɛɛed Suliman tiɣarṣa n wecmaḍ d tewhibin n řehna x uɛalṭar i tuɣa ibna i SIDI. [Ɛawed] issbexxar x [uɛalṭar n řebxur] nni iǧan zzat i wudem n SIDI, uca [ammu] i isellem netta Taddart am tekmeř [i SIDI].
1KI 9:26 Ajeǧid Suliman ibna uřa d ijj n wagraw n iɣarruba di Ɛiṣyun-Jabar i iǧan ɣar Ilat, ɣar tma n Řebḥar n Telga, di temmurt Idum.
1KI 9:27 Ḥiram issekk imsexxaren nnes s wagraw n iɣarruba nni, ibeḥriyyen inni issnen řebḥar, [jmiɛ] ak-d imsexxaren n Suliman.
1KI 9:28 Nitni iwḍen ɣar Ufir u ksin ssenni arebɛa-mya u-ɛicrin talint n wureɣ u iwyen t ɣar ujeǧid Suliman.
1KI 10:1 Tajeǧidt n Caba tesřa x ccennɛet n Suliman tenni i dd-yusin ak-d Yisem n SIDI u nettat tusa-dd, ḥima ad t tqeǧeb s tḥuja n twafit.
1KI 10:2 Nettat tusa-dd ɣar Urcalim s ijj n ukaravan i d as dd-iḍfaren s ddqeř [n wagřa] aṭṭas, s iřeɣman nni yarebbun řeɛṭur d waṭṭas n wureɣ d iẓra iɣřan, u nettat tusa-dd ɣar Suliman u tessiweř akides x marra min ɣares deg wuř.
1KI 10:3 Suliman icarḥ marra awařen i tḥaja [nettat]. War din uřa d ijj n wawař [s řemɛani] innuffaren i war izemmar ujeǧid ad as t icarreḥ.
1KI 10:4 Tajeǧidt n Caba teẓra marra tiɣit n Suliman d taddart i ibna,
1KI 10:5 d macca x ṭṭabřa nnes, d mammec qqimen imsexxaren nnes, d mammec bedden ixeddamen nnes d warruḍ nsen, d iwarraden nnes, d ddruj nnes [izewwqen] i xef dd-igeɛɛed ɣar Taddart n SIDI, uca war iqqim dayes [ɛřaḥař] buḥbeř [ɛad].
1KI 10:6 Nettat tenna i ujeǧid: “Awař nni sřiɣ di temmurt inu x wawařen nnec u x tiɣit nnec, nican d tidett.
1KI 10:7 Necc war umineɣ ca s wawařen nni, ařami dd-usiɣ danita u [xenni] tiṭṭawin inu ẓrint aya. Xzar azyen [zi kuř man aya] war d ayi ittwanna. Tiɣit d tcuni ɛlaḥsab ccennɛet i x sřiɣ, aqa cek sennej nsent.
1KI 10:8 Sseɛd n yeryazen nnec, sseɛd n imsexxaren nnec, inni ibedden zzat i wudem nnec řebda, inni zemmaren ad sřen tiɣit nnec.
1KI 10:9 Ad ittwabarek SIDI, AREBBI nnec, wenni umi dd-tusid x řxaḍar, ḥima ad cek yegg x řɛarc n Israil. Minzi SIDI ittexs Israil i řebda, [s uya] igga cek d ajeǧid, maḥend ad tegged řḥeqq d tsegda.”
1KI 10:10 Nettat tewca i ujeǧid mya u-ɛicrin talint n wureɣ d waṭṭas n řeɛṭur d yeẓra iɣřan. Ijj n ufeyyeḍ n řeɛṭur am wanita i iwcin tajeǧidt n Caba i ujeǧid Suliman, ɛemmarṣ ɛad war dd-yusi ca.
1KI 10:11 Agraw n iɣarruba n Ḥiram i-dd yiwyen ureɣ zeg Ufir, yiwyi-dd ɛawed aṭṭas n ukeccuḍ n [tcejjart n] ṣandal d yeẓra iɣřan zi Ufir.
1KI 10:12 Ajeǧid igga zeg ukeccuḍ n ṣandal wanita afrayen izewwqen i Taddart n SIDI u i taddart n ujeǧid uřa d řgambriyat d lharpat i imedyazen. Akeccuḍ n sandal am wanita ɛemmarṣ war dd-yusi niɣ ittwaẓar ɛad ař ass-a.
1KI 10:13 Ajeǧid Suliman iwca i tjeǧidt n Caba marra di min tuɣa temmeẓri, min ma tuɣa tᵉttar sennej i min d as iwca [ɛad], ɛlaḥṣab [tacrimt n] ufus n ujeǧid Suliman. [Xenni] tenneqřeb, tedweř ɣar temmurt nnes, nettat d imsexxaren nnes.
1KI 10:14 Řqedd n wureɣ i ittadfen ɣar Suliman deg ijj n useggʷas tuɣa setta-mya u-setta u-settin talint n wureɣ,
1KI 10:15 břa [min iksi] zeg ittijariyyen u zi tsebbabt n isebbaben u zi marra ijeǧiden n Ɛarabiyya u zi lwulat n temmurt.
1KI 10:16 Ajeǧid Suliman igga [ɛawed] mitayen n tseddariyin [n uɛeskari] timeqqranin s wureɣ ittwaddzen. X ict n tseddart ttwaggen setta-mya [ciqlu] n wureɣ.
1KI 10:17 [Yarni igga netta] teřt-mya n tseddariyin n uɛeskari s wureɣ ittwaddzen. Ttwaggent teřt minayat n wureɣ x ict n tseddart. Ajeǧid issars i-tent di taddart n Wezɣar n Lubnan.
1KI 10:18 Ajeǧid Suliman igga [ɛawed] ijj n řɛarc ameqqran zi řɛaj uca iɣeǧef i-t s wureɣ ittwaṣeffan.
1KI 10:19 Řɛarc wanita ɣares setta n tareffidin u azeǧif n řɛarc tuɣa-t iquwwar ɣar ḍeffar nnes u ɣar tnayen n iɣezdisen n řkursi tuɣa ǧan iɣaǧen, u tnayen n wayraden tuɣa bedden zzat i iɣaǧen.
1KI 10:20 Tenɛac n wayraden bedden ɣar tnayen n iɣezdisen x setta n tareffidin. Am netta war ittwagg ɛad uřa deg ict n tgeldit.
1KI 10:21 Marra iɣarrafen n tissit n Suliman [tuɣa aten] n wureɣ u marra řeqcuɛ n Taddart n Wezɣar n Lubnan [tuɣa aten] s wureɣ izedgen, war din nnuqart [dayes], [maɣar] deg wussan n Suliman tuɣa ḥessben tt d walu.
1KI 10:22 Maɣar ajeǧid tuɣa ɣares ijj n wagraw n iɣarruba n Tarcic x řebḥar [jmiɛ] ak-d wegraw n iɣarruba n Ḥiram. Ict n twařa di třata n iseggʷusa yudef wegraw n iɣarruba n Tarcic, yiwi ureɣ d nnuqart, řɛaj d ibaɣusen d iṭawsen.
1KI 10:23 Ajeǧid Suliman iɛdu marra ijeǧiden n ddunect deg wagřa d tiɣit.
1KI 10:24 Marra ddunect yarzu [ad ẓaren] udem n Suliman, maḥend ad sřen tiɣit nnes i tuɣa issars AREBBI deg wuř nnes.
1KI 10:25 [S uyenni] usin-dd nitni aseggʷas awarni i umas, kuř ijj s tarzeft nnes, [s] řeqcuɛ n nnuqart, řeqcuɛ n wureɣ, arruḍ, řesnaḥ, řeɛṭur, iysan d isardan. Aqa d man aya imsar aseggʷas awarni i umas.
1KI 10:26 Suliman issmun ikarruten d imnayen. Netta tuɣa ɣares ařef u-arebɛa-mya n ikarruten d tenɛac-ařef n imnayen, uca yiwyi ten ɣar tneddam n ikarruten u ɣar ujeǧid di Urcalim.
1KI 10:27 Ajeǧid igga nnuqart [aṭṭas] di Urcalim, amecnaw iẓra, u [ticejjura n] tengelt igga [i-tent] aṭṭas amecnaw izemmuren nni [iǧan] di Temmurt Iwaṭan.
1KI 10:28 Iysan i Suliman ttwassuffɣen zi Miṣra, zi Qiwi. Isebbaben n ujeǧid iwyen [ten] s yijj n ttaman [imetnen] zi Qiwi.
1KI 10:29 Ijj n ukarru igeɛɛed-dd u ittwassuffeɣ-dd zi Miṣra s [ijj n ttaman n] setta-mya [ciqlu] n nnuqart u ijj n uyis s mya u-xemsin [ciqlu]. Nitni ssuffɣen ten s ufus nsen [ɛawed] i marra ijeǧiden n Iḥittiyyen u i ijeǧiden n Aram.
1KI 11:1 Ajeǧid Suliman tuɣa ittexs aṭṭas n temɣarin tibarraniyyin, [am mammec tuɣa ittexs] uřa d yeǧis n firɛun: [timɣarin] zi Mu’ab, zi Ɛammun, zi Idum, zi Ṣidun u zeg Iḥittiyyin,
1KI 11:2 [timɣarin] zi řegnus i x tuɣa inna SIDI i ayt n Israil: “Kenniw war ɣarsen ttadfem uca uřa d nitni war ɣarwem ttadfen. S tidett ad ɣwan nitni uř nwem, ḥima ad tuyurem awarni i irebbiten nsen!” [Maca] Suliman iqqen ɣarsen s tayri.
1KI 11:3 Netta tuɣa ɣares sebɛa-mya n temɣarin, tijeǧidin, u teřt-mya n tiyya. Timɣarin nnes ɣwant uř nnes.
1KI 11:4 Řami dd-tiweḍ tewsar ɣar Suliman ɣwant temɣarin nnes uř nnes, [ařami yuyur] awarni i irebbiten nneɣni. Uř nnes war iqqim imun i SIDI, AREBBI nnes, am wuř n babas Dawud.
1KI 11:5 Suliman yuyur awarni i Acturit, tarebbit n Iṣiduniyyen, u awarni i Milkum, nnɛi n l’aṣnam n ayt n Ɛammun.
1KI 11:6 Suliman igga [min iǧan d] aɛeffan di tiṭṭawin n SIDI. Netta war tuɣi icḍar aṭṭas i SIDI am babas Dawud.
1KI 11:7 Xenni ibna Suliman ict n řgeɛɛdet i Kamuc, nnɛi n ṣṣanam n ayt n Mu’ab, deg wedrar wenni [iǧan] zzat i Urcalim, uca [uřa d ict n řgeɛɛdet] i Mulik, nnɛi n ṣṣanam n ayt n Ɛammun.
1KI 11:8 Ammu i igga i marra timɣarin nnes tibarraniyyin, tinni iwyen řebxur d tɣarṣa n wecmaḍ i irebbiten nsent.
1KI 11:9 [S uyenni] isɛar SIDI x Suliman, minzi uř nnes tuɣa iḥeyyed x SIDI, AREBBI n Israil, i tuɣa ɣares-dd iban tnayen n twařawin,
1KI 11:10 [waxxa] tuɣa ɣares dd-yusa řumur [nican], maḥend war iggur awarni i irebbiten nneɣni u netta [xenni] war iḥḍa min d as yumur SIDI.
1KI 11:11 [S uyenni] inna SIDI i Suliman: “Minzi imsar ac ammu ařami war teḥḍid ca Řɛahd inu d tweṣṣa inu nni cek umureɣ, s tidett ad zzayek qeřɛeɣ tageldit-a uca ad tt wceɣ i umsexxar nnec.
1KI 11:12 Deg wussan nnec war t ggeɣ [ɛad] di ṭṭweɛ n babac Dawud, [maca] ad tt qeřɛeɣ zeg ufus n mmic.
1KI 11:13 Maca Necc war xak qeřɛeɣ tageldit marra. Ad wceɣ ict n teqbič i mmic di ṭṭweɛ n umsexxar inu Dawud u di ṭṭweɛ n Urcalim nni farzeɣ Necc.”
1KI 11:14 SIDI issekkar-dd i Suliman ijj n řeɛdu Hadad, zi Idum. Tuɣa Hadad zi tarwa n ujeǧid n Idum.
1KI 11:15 Umi tuɣa Dawud di Idum u Yuwab, akumandar nnes n řɛeskar, igeɛɛed maḥend ad inḍeř inni ittwassnuqqben, imsar, aqa Yuwab inɣa marra [min iǧan d] awtem di Idum.
1KI 11:16 Maɣar Yuwab iqqim dinni setta n iyuren ak-d marra Israil, ařami iteḥḥa marra [min iǧan d] awtem di Idum.
1KI 11:17 Maca Hadad izemmar ad yarweř, netta d ca n yeryazen Idumiyyen zeg imsexxaren n babas akides, ařami dd-usin ɣar Miṣra. Tuɣa Hadad [ɛad] d ijj n uḥenjir d ameẓyan.
1KI 11:18 Nitni tuɣa kkaren zi Midyan uca iwḍen ɣar Faran. Dinni ksin nitni iryazen n Faran akidsen uca usin-dd ɣar Miṣra ɣar firɛun, ajeǧid n Miṣra. Wanita iwca as ict n taddart, iwca as awař [ad as iwc] macca u iwca as ict n temmurt.
1KI 11:19 Hadad yufa arḍa ameqqran di tiṭṭawin n firɛun, ařami wanita iwca as učmas n temɣart nnes d tamɣart, učmas n tjeǧidt Taḥfanis.
1KI 11:20 Učmas n Taḥfanis turuw as-dd mmis Janubat, wenni tessuṭṭuḍ Taḥfanis di taddart n firɛun, ařami [xenni] Janubat [iyma] di řwesṭ n ayt n firɛun.
1KI 11:21 Isřa Hadad di Miṣra belli Dawud tuɣa igga ad yareyyeḥ jar řejdud nnes uca Yuwab, akumandar n řɛeskar, immut. [Xenni] inna Hadad i firɛun: “Sekk ayi-dd, ad raḥeɣ ɣar temmurt inu!”
1KI 11:22 [Maca] firɛun inna: “Min cek ixeṣṣen ɣari, řami dayek ẓriɣ, cek texsed ad tɛeqbed ɣar temmurt nnec?” Netta inna: “Walu, maca [waxxa amenni] sekk ayi-dd din!”
1KI 11:23 AREBBI issekkar xas [ɛawed] ijj n řeɛdu nneɣni, Razun, mmis n Ilidaɛ, wenni tuɣa yarewřen zi sidi nnes Hadad-Ɛazar, ajeǧid n Ṣuba.
1KI 11:24 Tuɣa issmun iryazen, idweř d řqebṭan n bandiyya [nsen] řami tuɣa ixs Dawud ad ten ineɣ. [Maca] nitni ruḥen ɣar Dimacq, zeddɣen din u areyysen di Dimacq.
1KI 11:25 Netta tuɣa-t d ijj n řeɛdu n Israil marra ussan n Suliman d man aya sennej i řɣar [i igga] Hadad. Netta iɛiff Israil u yareyyes am ujeǧid x Aram.
1KI 11:26 Yarubɛam, mmis n Nabaṭ, ijj n Ifrati zi Ṣaradata, ijj n umsexxar n Suliman issgeɛɛed afus nnes x ujeǧid. Yemmas qqaren as Ṣaruɛa, tuɣa-tt d tajjač.
1KI 11:27 D man aya d ssibbet i zi tuɣa dd-issgeɛɛed afus nnes x ujeǧid, [řami] tuɣa Suliman ibenna lqelɛa, iqqen tazzit di tendint n babas Dawud.
1KI 11:28 Tuɣa Yarubɛam d ijj n bu-teɣruḍt imeḥḍen. Iẓra Suliman aqa aḥudri imḥeḍ di řxedmet uca netta igga i-t x marra řxedmet n tarebbut n taddart n Yusuf.
1KI 11:29 Di řweqt nni imsar aqa Yarubɛam iffeɣ zi Urcalim uca yufa i-t unabi Axiya deg webrid. Wanita tuɣa yarḍ ijj n warruḍ n jdid u nitni s tnayen idsen tuɣa aten weḥḥedsen deg iyyar.
1KI 11:30 Axiya iṭṭef arruḍ n jdid nnes wenni yarḍen u icarreg i-t di tenɛac n iziynat.
1KI 11:31 Inna i Yarubɛam: “Ksi ɛecra n iziynat i cek, maɣar ammu i iqqar SIDI, AREBBI n Israil: ‘Xẓar, Necc ad carrgeɣ tageldit zeg ufus n Suliman uca ad ac wceɣ ɛecra n tqebbař,
1KI 11:32 [maca] ict n teqbič ad tiři i netta di ṭṭweɛ n umsexxar inu Dawud u di ṭṭweɛ n Urcalim, tandint nni farzeɣ Necc zi marra tiqebbař n Israil.
1KI 11:33 Maɣar nitni semḥen dayi u sejden i Acturit, tarebbit n Iṣiduniyyen, i Kamuc, arebbi n ayt n Mu’ab, u i Malkam, arebbi n ayt n Ɛammun. War uyuren nitni di tebridin inu maḥend ad ggen min [iǧan] nican di tiṭṭawin inu u [war ḥḍin] tiweṣṣa inu d lfarayiḍ inu am [t igga] babas Dawud.
1KI 11:34 Maca war d as ttekkseɣ ca marra tageldit zeg ufus nnes, maca ad t ssmetneɣ d řḥakem marra ussan n tudart nnes di ṭṭweɛ n umsexxar inu Dawud, wenni farzeɣ d wenni iḥḍan řumurat inu d tweṣṣa inu,
1KI 11:35 [maca] ad kkseɣ tagelda zeg ufus n mmis u ad cek wceɣ ɛecra n tqebbař zzayes,
1KI 11:36 u i mmis ad as wceɣ ict n teqbič, maḥend ad teqqim i umsexxar inu Dawud řebda ict n tfawt zzat i wudem inu di Urcalim, tandint nni farzeɣ Necc i Yixef inu, ḥima ad din ssmetneɣ Isem inu.
1KI 11:37 Necc ad cek ksiɣ u cek ad tḥekmed x marra min immeẓri řeɛmar nnec u ad tiřid d ajeǧid x Israil.
1KI 11:38 Mařa cek tesřid ɣar marra min zi cek umureɣ, ad tuyured x tebridin inu u ad tegged min [iǧan] nican di tiṭṭawin inu umi i ɣa teḥḍid tiweṣṣa inu d řumurat inu am t igga umsexxar inu Dawud, [xenni] ad imsar aqa Necc ad iřiɣ akidek u ad ac bniɣ ict n taddart i ɣa teqqim am mammec tt bniɣ i Dawud u Necc ad ac wceɣ Israil,
1KI 11:39 Necc ad ssehwiɣ tarwa n Dawud i man aya, maca war iǧi i řebda.”
1KI 11:40 Suliman tuɣa yarezzu ad ineɣ Yarubɛam, maca Yarubɛam ikkar, yarweř ɣar Miṣra, ɣar Cicak, ajeǧid n Miṣra. Netta iqqim di Misra ař řmewt n Suliman.
1KI 11:41 Min iqqimen n imezruyen n Suliman d marra min igga d tiɣit i ɣares, ma man aya [marra] war ittwazemmem ca deg wedlis n imezruyen n Suliman?
1KI 11:42 Řweqt nni iḥkem Suliman x marra Israil di Urcalim, tuɣa arebɛin n iseggʷusa.
1KI 11:43 Suliman igga ad yareyyeḥ jar řejdud nnes. Netta ittwanḍeř di tendint n babas Dawud u mmis Raḥabɛam idweř d ajeǧid deg wemcan nnes.
1KI 12:1 Raḥabɛam yuyur ɣar Cakim, maɣar marra Israil yusa-dd ɣar Cakim, ḥima ad t ggen d ajeǧid.
1KI 12:2 Umi isřa Yarubɛam, mmis n Nabaṭ, x man aya, umi tuɣa ɛad di Miṣra - aqa netta tuɣa yarweř zi zzat n wudem n ujeǧid Suliman u Yarubɛam tuɣa izdeɣ di Miṣra - imsar
1KI 12:3 aqa ssekken-dd ɣares ireqqasen, jjin ad xas řaɣan. Yarubɛam d marra agraw [n řgens] n Israil usin-dd, ssiwřen ak-d Raḥabɛam, nnan:
1KI 12:4 “Babac igga xaneɣ ijj n uzayřu iqseḥ. [Xenni] řexxu, sarxu cek řxedmet iqesḥen n babac uřa d azayřu iḍeqřen i xaneɣ igga, [xenni] ad cek nexdem.”
1KI 12:5 Netta inna asen: “Uyurem u ɛeqbem awarni i třata n wussan.” Uca yuyur řgens.
1KI 12:6 Imcawar ujeǧid Raḥabɛam ak-d imeqqranen, inni tuɣa ibedden zzat i wudem n babas Suliman umi tuɣa ɛad iddar, inna: “S min zi d ayi tweṣṣam ad dd-arreɣ x řgens-a?”
1KI 12:7 Nitni ssiwřen akides, nnan: “Mařa cek teggid ixef nnec ass-a d amsexxar i řgens-a, ad xasen tsexxared, ad xasen dd-tarred u ad kidsen tessiwřed s wawařen icnan, xenni ad dewřen nitni d imsexxaren nnec i řebda.”
1KI 12:8 [Maca] netta inḍar ccwar i d as tuɣa wcin imeqqranen uca imcawar ak-d iḥudriyyen nni tuɣa akides imɣaren u bedden řexxu zzat i wudem nnes.
1KI 12:9 Netta isseqsa ten: “Man tᵉttcawarem ad t dd-narr x wawař n řgens, minzi ssiwřen akidi, nnan [ayi]: ‘Sarxu azayřu i xaneɣ igga babac.’”
1KI 12:10 Iḥudriyyen nni akides tuɣa imɣaren ssiwřen akides, nnan: “Ammu i dd ɣa tarred x řgens i kidek issiwřen, innan: ‘Babac isseḍqeř azayřu nneɣ, maca [řexxu] cek sarxu t xaneɣ!’ u ammu i kidsen i ɣa tessiwřed: ‘[Aḍaḍ] ameẓyan inu ad yiři d ameqqran x tejɛinna n baba.
1KI 12:11 [Xenni] řexxu, aqa baba iqqen awem ijj n uzayřu iqesḥen, [xenni] necc ad t ssḍeqřeɣ ɛad. Baba yarebba kenniw s urekkuḍ, necc ad kenniw arebbiɣ s iɣarḍmiwen.’”
1KI 12:12 Deg wass wiss třata usin-dd Yarubɛam d marra řgens ɣar Raḥabɛam, am mammec tuɣa issiweř ujeǧid, inna: “Ɛeqbem-dd ɣari awarni i třata n wussan!”
1KI 12:13 Ajeǧid yarra-dd řgens s ict n temwarrit iqesḥen, [maɣar] netta inḍar ccwar i d as wcin imeqqranen.
1KI 12:14 Issiweř akidsen ɛlaḥsab ccwar n iḥudriyyen, inna: “Baba isseḍqeř azayřu nwem, maca necc ad ssḍeqřeɣ ɛad azayřu nwem. Baba yarebbi kenniw s urekkuḍ, necc ad kenniw arebbiɣ s iɣarḍmiwen.”
1KI 12:15 Ajeǧid war isři ca ɣar řgens, maɣar aneqřeb-a tuɣa i dd-yusa zi SIDI, ḥima ad issemten awař i tuɣa issiweř SIDI s ufus n Axiya, Aciluni, i Yarubɛam, mmis n Nabaṭ.
1KI 12:16 [Umi] marra Israil iẓra aqa ajeǧid war ɣarsen isři ca, yarra-dd řgens x ujeǧid, nnan: “Man tasɣart i ɣarneɣ di Dawud? Neccin war ɣarneɣ bu tesɣart ɣar mmis n Yassa. Ɣar iqiḍan nnec, [a] Israil! Řha řexxu ak-d taddart nnec, [a ayt n] Dawud!” Uca yuyur Israil ɣar iqiḍan nsen.
1KI 12:17 [Maca] x ayt n Israil inni tuɣa izeddɣen di tneddam n Yahuda, aqa Raḥabɛam tuɣa xasen d ajeǧid.
1KI 12:18 Ajeǧid Raḥabɛam issekk [ɣarsen] Aduram, wenni [iǧan] x ljizya n tesmuɣi, u marra Israil yarjem i-t s yeẓra ařami immut. Ajeǧid Raḥabɛam iqeǧeb, maḥend ad yenya deɣya x ijj n ukarru ḥima ad yarweř ɣar Urcalim.
1KI 12:19 Ammu i iɣewweɣ Israil x taddart n Dawud, ař ass-a.
1KI 12:20 [Umi] marra Israil isřa aqa Yarubɛam iɛqeb-dd, imsar, aqa ssekken ɣares maḥend ad as dd-řaɣan, ḥima ad dd-yas ɣar tmesmunt uca ggin t d ajeǧid x marra Israil. Uřa d ijj war iqqim iḍeffar ɛad taddart n Dawud mɣir taqbič n Yahuda.
1KI 12:21 [Umi] dd-yusa Raḥabɛam ɣar Urcalim, issmun marra taddart n Yahuda d teqbič n Binyamin, mya u-tmenyin-ařef [n iryazen] ittwafarzen, ttwadarrben i umenɣi, ḥima ad mmenɣen ak-d taddart n Israil, ḥima ad dd-arren tageldit ɣar Raḥubɛam, mmis n Suliman.
1KI 12:22 [Xenni] yusa-dd wawař n AREBBI ɣar Camɛiya aryaz n AREBBI, inna:
1KI 12:23 “Siweř ak-d Raḥabɛam, mmis n Suliman, ajeǧid n Yahuda, u ak-d marra taddart n Yahuda u tenni n Binyamin u i [marra] min iqqimen n řgens, ini:
1KI 12:24 ‘Ammu i iqqar SIDI: War ttgeɛɛdem u war ttmenɣam ak-d aytmatwem, ayt n Israil. Ittxeṣṣa ad iɛqeb [kuř ijj n] weryaz ɣar taddart nnes, maɣar d man aya i imsaren zzayi.’” Nitni sřin ɣar wawař n SIDI uca ɛeqben uca uyuren [ɣar wemcan nsen] ɛlaḥsab awař n SIDI. *
1KI 12:25 Yarubɛam ibna Cakim x idurar n Ifrayim uca izdeɣ dinni. Ssenni iffeɣ uca ibna Fanuwil.
1KI 12:26 Inna Yarubɛam deg wuř nnes: “Řexxu ad dd-teɛqeb tgeldit ɣar taddart n Dawud.
1KI 12:27 [Maɣar] mařa řgens-a ad dd-igeɛɛed, ḥima ad yawi tiwhibin di Taddart n SIDI di Urcalim, [xenni] ad dd-idweř wuř n řgens-a ɣar siditsen, ɣar Raḥabɛam, ajeǧid n Yahuda. Ad ayi nɣen u ad dd-ɛeqben ɣar Raḥabɛam, ajeǧid n Yahuda.”
1KI 12:28 Imcawar ujeǧid, [xenni] igga tnayen n iɛejmiyyen n wureɣ, inna asen [i řgens]: “D aṭṭas i kenniw maḥend ad tgeɛɛdem ɣar Urcalim. Xzar, irebbiten nnec, [a] Israil, inni cek i dd-issuffɣen zi Miṣra.”
1KI 12:29 Netta issbedd ijj [n ṣṣanam] n ufunas di Bayt-Il u wenneɣni issbedd i-t di Dan.
1KI 12:30 Aya idweř d aɛraḍ ɣar ddnub. Řgens izwar yuyur zzat i wudem n ijj [n ufunas] ař Dan.
1KI 12:31 Netta issbedd ict n zzawect x řegɛudi. Igga ikehhanen [i dd-iqqarṣen] zi marra ṭṭrufa n řgens inni war [iǧin] zeg ayt n Lawi.
1KI 12:32 Deg uyur wiss tmenya, deg wass wiss xemmesṭac n uyur, igga Yarubɛam ijj n řɛid, am řɛid i tteggen di Yahuda, u netta issgeɛɛed tiɣarṣa x uɛalṭar. Igga ammu di Bayt-Il ḥima ad iqeddem tiɣarṣa i iɛejmiyyem i yegga. Igga ɛawed ikehhanen di Bit-Il x řegɛudi nni igga.
1KI 12:33 Deg wass wiss xemmesṭac deg uyur wiss tmenya n uyur i tuɣa ixarreṣ netta deg wuř nnes, issgeɛɛed tiɣarṣa x uɛalṭar nni igga di Bayt-Il. Ammu i issbedd ijj n řɛid i ayt n Israil uca issbexxar řebxur x uɛalṭar.
1KI 13:1 Xzar, s wawař n SIDI yusa-dd ijj n weryaz n AREBBI zi Yahuda ɣar Bayt-Il. Yarubɛam tuɣa ibedd zzat i uɛalṭar, ḥima ad iwehheb řebxur.
1KI 13:2 Netta iřaɣa x uɛalṭar s wawař n AREBBI, inna: “[A] aɛalṭar, aɛalṭar, ammu i iqqar SIDI, ad dd-ittwaxřeq ijj n mmis di taddart n Dawud, ad as qqaren Yuciya. Netta ad xak igg d taɣarṣt ikehhanen n řegɛudi nni xak iwehhben řebxur, u ad xak cemḍen iɣsan n iwdan.”
1KI 13:3 Deg wass nni d ijjen iwca ict n řeɛřamet, inna: “Ta d řeɛřamet i x issiweř SIDI. Xzar, aɛalṭar ad icarreg u iɣɣeḍ n min iqqimen n tadunt i xas [iǧan] ad zzayes dd-iḥruǧeḍ.”
1KI 13:4 Umi isřa ujeǧid awař n weryaz n AREBBI wenni iřaɣan x uɛalṭar di Bayt-Il, imsar, aqa isswiẓẓeḍ Yarubɛam afus nnes x uɛalṭar, inna: “Ṭṭef i-t!” [Maca] afus nnes nni tuɣa ɣares isswiẓẓḍen, yuẓeɣ, ařami war izemmar ɛad ad t-i-dd-yarr ɣares.
1KI 13:5 Icarreg uɛalṭar uca iḥřuǧed zzayes [yiɣɣed n] tadunt ɛlaḥsab řeɛřamet i iwca weryaz n AREBBI s wawař n SIDI.
1KI 13:6 Xenni yarra-dd ujeǧid, inna i weryaz n AREBBI: “Zawg zzat i wudem n SIDI, AREBBI nnec, uca ẓaǧ xafi [ḥima] afus inu ad ɣari dd-idweř!” Uca izawg weryaz n AREBBI i wudem n SIDI uca afus n ujeǧid idweř-dd ɣares uca idweř am mammec t tuɣa qbeř.
1KI 13:7 [Xas uca] issiweř ujeǧid ak-d weryaz n AREBBI: “As-dd ɣar taddart inu uca areyyeḥ! Uřa d necc ad ac wceɣ ict n terzeft.”
1KI 13:8 [Maca] yarra-dd weryaz n AREBBI x ujeǧid: “Waxxa cek tewcid ayi azyen n taddart nnec, necc war [a]kidek ggureɣ u war tticeɣ aɣrum deg wemcan-a uřa war [da] sesseɣ.
1KI 13:9 Maɣar ammu i d ayi iweṣṣa s wawař n SIDI, inna: ‘Cek war [dinni] tᵉttᵉtted u war [dinni] tsessed u war tɛiqqibed x webrid i x dd-tusid.’”
1KI 13:10 Uca netta iruḥ x ijj n webrid nneɣni u war dd-iɛqib ca x webrid i x dd-yusa ɣar Bayt-Il.
1KI 13:11 Di Bayt-Il tuɣa izeddeɣ [ɛad] ijj n unabi iwsar. Mmis nnes yusa-dd, iḥaja as min tuɣa igga weryaz n AREBBI deg wass nni di Bayt-Il, uřa d awařen i inna i ujeǧid. Iḥenjiren nnes ḥajan as ten i babatsen.
1KI 13:12 Inna asen babatsen: “X man abrid i yuyur netta?” Iḥenjiren nnes tuɣa ẓrin man abrid tuɣa iṭṭef weryaz n SIDI wenni tuɣa i dd-yusin zi Yahuda.
1KI 13:13 Netta inna i iḥenjiren nnes: “Bardɛem ayi i weɣyuř!” Nitni bardɛen as i weɣyuř uca netta inya xas iruḥ.
1KI 13:14 Netta yareddef aryaz n AREBBI uca yufa i-t am iqqim sadu ict n tcejjart n yigg. Netta inna as: “Ma cek d aryaz n AREBBI wenni dd-iffɣen zi Yahuda?” Netta inna: “D necc!”
1KI 13:15 [Xenni] inna as: “As-dd akidi ɣar taddart inu u ecc aɣrum.”
1KI 13:16 [Maca] netta inna: “Necc war zemmareɣ akidek ɛeqbeɣ u necc war akidek dd-ttaseɣ. Uřa d necc war ttᵉtteɣ, war sesseɣ deg wemcan-a.
1KI 13:17 Maɣar yusa-dd ɣari wawař n SIDI, [inna]: ‘Cek war tzemmared ad [dinni] tecced aɣrum u war tsessed aman. Cek war tzemmared ad dd-tɛeqbed x webrid i x dd-tusid.’”
1KI 13:18 Netta inna as: “Uřa d necc d ijj n unabi am cek, u ijj n lmalak issiweř akidi s wawař n SIDI, inna: ‘Awyi t ɣarek di taddart nnec, ḥima ad yecc aɣrum, ad isess aman.’” [Ammu] i issxarreq xas.
1KI 13:19 Uca netta iɛqeb akides, icca aɣrum di taddart nnes u iswa aman.
1KI 13:20 Umi qqimen nitni ɣar ṭṭabřa, aqa yusa-dd wawař n SIDI ɣar unabi wenni tuɣa t-i-dd-yarrin,
1KI 13:21 u netta iřaɣa i weryaz n AREBBI i dd-yusin zi Yahuda, inna: “Ammu i iqqar SIDI: ‘Maɣar cek tɣewwɣed x wawař n SIDI u war teḥḍid řumur i d ac yumur SIDI, AREBBI nnec,
1KI 13:22 [maca] tɛeqbed u teccid aɣrum u teswid aman deg wemcan i x i d ac inna: ‘War tzemmared ad [din] tecced aɣrum u war [din] tssesed aman, x uya řxecbet nnec war dd-tusa deg wenḍeř n řejdud nnec.’”
1KI 13:23 Awarni umi tuɣa icca d iswa, ibardeɛ as i weɣyuř i unabi i d igga ad dd-idweř.
1KI 13:24 Ammu dd-iffeɣ uca imsagar akides ijj n weyrad, inɣa i-t. Řxecbet nnes tuɣa temmenḍar [din] x webrid u aɣyuř ibedd zzates uca uřa d ayrad ibedd zzat i řxecbet.
1KI 13:25 U xzar, ɛdun [ca n] yeryazen, ẓrin řxecbet temmenḍar x webrid uřa d ayrad ibedd zzat i řxecbet. Nitni iwḍen ɣar tendint n unabi iwsaren uca ssiwřen x man aya.
1KI 13:26 [Umi] anabi wenni i-t-i-dd-yarrin zeg webrid, isřa man aya, inna netta: “Wa d aryaz n AREBBI, wenni tuɣa iɣewwɣen x wawař n SIDI. [X uyenni] iwca i-t SIDI i weyrad u wanita imezzeq i-t uca inɣa i-t ɛlaḥsab awař n SIDI wenni tuɣa kides issiwřen.”
1KI 13:27 Uca netta issiweř ak-d iḥenjiren nnes, inna: “Bardɛem ayi i weɣyuř!” Nitni bardɛen as,
1KI 13:28 uca netta iffeɣ, yufa řxecbet temmenḍar x webrid uřa d aɣyuř d wayrad i ibedden zzat i řxecbet. Ayrad war yecci řxecbet u war imezzeq aɣyuř.
1KI 13:29 Xenni issgeɛɛed unabi řxecbet, issars i-tt x weɣyuř uca yiwyi tt akides. Ammu i dd-yusa unabi iwsaren di tendint, ḥima ad xas iwwet agejdur u ad t inḍeř.
1KI 13:30 Netta inḍeř řxecbet deg wenḍeř nnes u nitni wtin xas agejdur: “Uh, uma inu!”
1KI 13:31 Awarni umi tuɣa t inḍeř, imsar, aqa issiweř ak-d iḥenjiren nnes, inna: “Xmi ɣa mmteɣ, neḍřem ayi deg wenḍeř i di immenḍar weryaz n AREBBI u ssarsem iɣsan inu x uɣezdis n iɣsan nnes!
1KI 13:32 Maɣar awař i ibarreḥ s wawař n SIDI x uɛalṭar-a nni [iǧan] di Bayt-Il u x marra tizawiyyin n řegɛudi nni [iǧan] di tneddam n Samarya, ad dd-iffeɣ nican.”
1KI 13:33 Awarni i wawař-a war dd-iddekkʷiř ca Yarubɛam zeg webrid aɛeffan nnes, [maca] yařeqqem ɛawed ikehhanen zi [marra] ṭṭrufa n řgens x řegɛudi. Wenni t ixsen, yařeqqem i-t u wanita idweř d akehhan n řegɛudi.
1KI 13:34 Zi tmesřact-a tewḍa taddart n Yarubɛam di ddnub, ařami dd-tqarreb ɣar uteḥḥi d wareddeǧ zi temmurt.
1KI 14:1 Di řweqt nni idweř Abiya, mmis n Yarubɛam, ihřec.
1KI 14:2 Inna Yarubɛam i temɣart nnes: “Kkar, beddeř arruḍ nnem, maḥend war iɛeqqeř uřa d ijj aqa cem d tamɣart n Yarubɛam, ad tuyured ɣar Cilu. Aqa dinni anabi Axiya wenni xafi innan aqa necc ad dewřeɣ d ajeǧid x řgens-a.
1KI 14:3 Ksi akidem ɛecra n iɣrumen d tefḍiřin d ijj n uqdiḥ n tamment uca uyur ɣares! Netta ad am ini min ɣa imsaren ak-d uḥenjir.”
1KI 14:4 Uca ammu i tegga temɣart n Yarubɛam. Nettat tekkar, tuyur ɣar Cilu, tiweḍ ɣar taddart n Axiya. Axiya tuɣa war itwiři maɣar tiṭṭawin nnes tuɣa dewřent ṭṭemmsent di tewsar nnes.
1KI 14:5 [Maca] SIDI inna i Axiya: “Xzar, ad dd-tas temɣart n Yarubɛam, ḥima ad cek tesseqsa x mmis, minzi wanita ihřec. Ta d ta i d as ɣa tinid. Xmi i dd ɣa tas, ad imsar, nettat ad tessniɛmiř ixef nnes d icten nneɣnit.”
1KI 14:6 Umi isřa Axiya řḥess n iṣuraf nnes ɣar tewwart, imsar, aqa netta inna: “Adef-dd ɣar daxeř, a tamɣart n Yarubɛam! Mayemmi tessniɛmiřed ixef nnem amecnaw cem d icten nneɣnit? Necc ttwassekkeɣ-dd ɣarem s [ict n tebrat] iqesḥen.
1KI 14:7 Uyur, ini i Yarubɛam: ‘Ammu i iqqar SIDI, AREBBI n Israil: Minzi Necc ssgeɛɛdeɣ cek zi jar řwesṭ n řgens u ggiɣ cek d řḥakem x řgens inu Israil,
1KI 14:8 uca carrgeɣ tageldit zi taddart n Dawud uca wciɣ ac tt, [maca] cek war teǧid ca am umsexxar inu Dawud, wenni iḥḍan řumurat inu d wenni dd ayi iḍfaren, ḥima ad yegg mɣir min iǧan nican di tiṭṭawin inu,
1KI 14:9 u minzi teggid tt d taɛeffant mahu x [min ggin] marra [inni iǧan] qbeř i cek, uca cek tuyured teggid irebbiten nneɣni d řexyařat nneɣni ifesyen, ḥima ad ayi tesɛared, uca tenḍared ayi awarni i weɛrur nnec,
1KI 14:10 s uya, xzar, ad awyeɣ tuɛeffna x taddart n Yarubɛam u ad teḥḥiɣ zi Yarubɛam marra wi [t] itteggen x řḥiḍ, [am] wenni ittwaṭṭfen, [am] wenni umi jjin di Israil, u Necc ad mḥiɣ min iqqimen n taddart n Yarubɛam, am mammec farḍen řeɣbar ař ɣa iqḍa.
1KI 14:11 Man wen zi taddart n Yarubɛam i ɣa immten di tendint, ad t ccen yiṭan u wi ɣa immten deg iyyar, ad t ccen ijḍaḍ n ujenna, maɣar SIDI d wenni tt innan.”
1KI 14:12 “U cem, kkar, uyur ɣar taddart nnem! Mařa iḍaren nnem ad awyen ɣar tendint, ad immet uḥenjir.
1KI 14:13 Marra Israil ad xas wten agejdur u nitni ad t neḍřen, maɣar netta waha zi taddart n Yarubɛam ad iṭṭef anḍeř, maɣar di taddart n Yarubɛam ittwaf dayes netta [waha] min icnan i SIDI, AREBBI n Israil.
1KI 14:14 SIDI ad dd-issekkar i Yixef nnes ijj n ujeǧid x Israil nni i ɣa iteḥḥan taddart n Yarubɛam, ass aqa d wa. Min din? [Wah], ɛad řexxu!
1KI 14:15 SIDI ad iwwet Israil, ad t issenhezz ssa d ssa am uɣanim deg waman, u Netta ad iqřeɛ Israil zi temmurt-a iṣebḥen i iwca i řejdud nsen u Netta ad ten yareyyec x ujemmaḍ n iɣzar [n Lfuraṭ], minzi nitni ggin i yixef nsen tirebbin n cwarti u sɛaren [zzaysent] SIDI.
1KI 14:16 Netta ad isellem Israil di ssibbet n ddnub i igga Yarubɛam, i zi yarra Israil ad ixḍa.”
1KI 14:17 Uca tekkar temɣart n Yarubɛam, tᵉṭṭef abrid uca tiweḍ ɣar Tirṣa. Umi dd-tusa ɣar tnebdat n taddart, immut uḥenjir.
1KI 14:18 Nitni neḍřen t u marra Israil iwta xas agejdur, ɛlaḥsab awař n SIDI i issiweř s ufus n umsexxar nnes, anabi Axiya.
1KI 14:19 Imezruyen iqqimen n Yarubɛam, mammec immneɣ d mammec iḥkem, xzar, ma man aya [marra] war ittwazemmem ca deg wedlis n imezruyen n ijeǧiden n Israil.
1KI 14:20 Ussan i iḥkem Yarubɛam tuɣa tnayen u-ɛicrin n iseggʷusa. Netta igga ad yareyyeḥ jar řejdud nnes u mmis Nadab idweř d ajeǧid deg wemcan nnes.
1KI 14:21 Raḥabɛam, mmis n Suliman, tuɣa d ajeǧid di Yahuda. Tuɣa ɣares waḥit u-rebɛin n iseggʷusa umi idweř netta d ajeǧid. Netta iḥkem sbeɛṭac n iseggʷusa di Urcalim, di tendint i ixḍar SIDI zi jar marra tiqebbař n Israil, ḥima ad din issemten Isem nnes. Yemmas qqaren as Niɛma, nettat zi [temmurt] n Ɛammun.
1KI 14:22 Yahuda igga [min iǧan] d aɛeffan di tiṭṭawin n SIDI u nitni sɛaren t mahu x marra min tuɣa ggin řejdud nsen s ddnub nsen i zi xḍan.
1KI 14:23 [Maɣar] uřa d nitni bnan řegɛudi i yixef nsen d imayḍuten [iqeddsen] d tirebbin n cwarti, di marra tiwririn yuɛřan u sadu kuř tacejjart tazizit.
1KI 14:24 Tuɣa din uřa d imetleyyen di temmurt. Nitni ggin marra jjɛayef n řegnus i tuɣa issuffeɣ SIDI zi řwart zzat i wudem n ayt n Israil.
1KI 14:25 Deg useggʷas wiss xemsa n ujeǧid Raḥabɛam, imsar, aqa igeɛɛed Cicak, ajeǧid n Miṣra, ḍidd i Urcalim.
1KI 14:26 Netta ikkes řeknuz zi Taddart n SIDI u řeknuz zi taddart n ujeǧid, [iwa], netta yiwi marra. Yiwi uřa d marra tiseddariyin n uɛeskari n wureɣ nni igga Suliman.
1KI 14:27 Deg wemcan nsent igga ujeǧid Raḥabɛam tiseddariyin n uɛeskari ittwaggen zi nnḥas. Igga i-tent deg ifassen n imeqqranen x ireqqasen n tazřa nni tuɣa ttɛessan ɣar wadaf n taddart n ujeǧid.
1KI 14:28 Meřmi ma i ɣa yadef ujeǧid ɣar Taddart n SIDI, imsar, aqa ireqqasen n tazřa arebbun tent u iwyen tent xenni ɛawed ɣar wexxam n ireqqasen n tazřa.
1KI 14:29 Imezruyen iqqimen n Raḥabɛam d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
1KI 14:30 Tuɣa iǧa umenɣi jar Raḥabɛam d Yarubɛam marra ussan nsen.
1KI 14:31 Raḥabɛam igga ad yareyyeḥ jar řejdud nnes. Netta ittwanḍeř jar řejdud nnes di tendint n Dawud. Yemmas qqaren as Niɛma, ict n [temɣart] Taɛammunit. Mmis Abiyam idweř d ajeǧid deg wemcan nnes.
1KI 15:1 Deg useggʷas wiss tmenṭac n ujeǧid Yarubɛam, mmis n Nabaṭ, idweř Abiyam d ajeǧid x Yahuda.
1KI 15:2 Netta iḥkem třata n iseggʷusa di Urcalim. Yemmas qqaren as Maɛka, yeǧis n Abicalum.
1KI 15:3 Netta yuyur di marra ddnub n babas nni tuɣa igga qbeř nnes uca uř nnes war tuɣi ca icḍar ɣar SIDI, AREBBI nnes, am wuř n babas Dawud.
1KI 15:4 Maca di ṭṭweɛ n Dawud iwca as SIDI, AREBBI nnes, ijj n řefnar di Urcalim umi igga ad issekkar mmis awarni as, u umi igga ad teqqim tbedd Urcalim,
1KI 15:5 maɣar Dawud tuɣa igga [min iǧan] nican di tiṭṭawin n SIDI u netta tuɣa war iḥeyyed di marra tudart nnes x marra min i d as yumur Netta, mɣir di tmesřact n Uriya, Aḥitti.
1KI 15:6 Tuɣa [din] amenɣi jar Raḥabɛam d Yarubɛam, marra ussan n tudart nnes.
1KI 15:7 Imezruyen iqqimen n Abiyam d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda? Tuɣa din ɛawed amenɣi jar Abiyam d Yarubɛam.
1KI 15:8 Abiyam igga ad yareyyeḥ jar řejdud nnes. Neḍřen t di tendint n Dawud. Mmis Asa idweř d ajeǧid deg wemcan nnes.
1KI 15:9 Deg useggʷas wiss ɛicrin n Yarubɛam, ajeǧid n Israil, idweř Asa d ajeǧid x Yahuda.
1KI 15:10 Netta iḥkem waḥit u-rebɛin n iseggʷusa di Urcalim. Ḥennas qqaren as Maɛka, yeǧis n Abicalum.
1KI 15:11 Asa igga [min iǧan] nican di tiṭṭawin n SIDI, am igga babas Dawud.
1KI 15:12 Netta issuffeɣ imetleyyen zi temmurt uca iḥeyyed marra imeyḍa [n l’aṣnam nsen] i tuɣa ggin řejdud nnes.
1KI 15:13 Netta issḥeyyed uřa d ḥennas Maɛka zi jjehd nnes, maɣar nettat tuɣa tegga ijj n řexyař d jjɛifect i trebbit n cwarti. Asa iqess jjɛifect nnes uca isscemḍ [i-tt] ɣar teɣzart n Qidrun.
1KI 15:14 War ttwaḥeyydent řegɛudi, maca uř n Asa tuɣa icḍar nican i SIDI, marra ussan [n tudart] nnes.
1KI 15:15 Netta yiwi tiwhibin iqeddsen n babas uřa d tiwhibin nni issqeddes netta s yixef nnes di Taddart n SIDI: nnuqart d wureɣ d řeqcuɛ [nneɣni].
1KI 15:16 Tuɣa [din] amenɣi jar Asa d Baɛca, ajeǧid n Israil, marra ussan nsen.
1KI 15:17 Baɛca, ajeǧid n Israil, igeɛɛed [ɣar umenɣi] ḍidd i Yahuda uca ibna Rama, ḥima war ittejji uřa d ijj ad yuyur ɣar Asa, ḥima ad [ɣares] dd-yas.
1KI 15:18 [Xenni] iksi Asa marra nnuqart d wureɣ i tuɣa iqqimen deg ixxamen n txubay n Taddart n SIDI uřa d txubay n taddart n ujeǧid, uca isellem [marra] aya i imsexxaren nnes. Uca ajeǧid Asa issekk i-ten ɣar Binhadad, mmis n Tabrimun, mmis n Ḥazyun, ajeǧid n Aram, wenni tuɣa izeddɣen di Dimacq, ḥima ad yini:
1KI 15:19 “[Aqa din] ijj n řɛahd jar ayi d cek, jar baba d babac. Xzar necc ad ac dd-ssekkeɣ ict n terzeft n nnuqart d wureɣ. Ruḥ, fsi řɛahd nnec ak-d Baɛca, ajeǧid n Israil, maḥend ad ikkar ad xafi iggʷej.”
1KI 15:20 Binhadad isřa ɣar ujeǧid Asa uca issekk ikumandaren n řɛeskar nnes ɣar tneddam n Israil. Netta iɣřeb x Ɛiyun d Dan d Abal-Bayt-Maɛka d marra Kinnarut. [Aqa issekk i-ten] ɣar marra tammurt n Naftali.
1KI 15:21 Umi Baɛca isřa x uya, imsar, aqa netta issbedd di řebni n Rama uca iqqim izeddeɣ di Tirṣa.
1KI 15:22 Ajeǧid Asa ijja ad barrḥen di marra Yahuda, war ittɣimi ḥed, ḥima nitni ad kksen iẓra zi Rama d ukeccuḍ i zi tuɣa ibenna Baɛca. U s man aya ibna ujeǧid Asa [tandint n] Jibɛa di Binyamin d Miṣfa.
1KI 15:23 Imezruyen iqqimen n Asa, marra timegga nnes imeḥḍen d marra min igga uřa d tineddam nni ibna, ma man aya [marra] war ittwazemmem ca deg wedlis n imezruyen n ijeǧiden n Yahuda? Maca umi iwsar, ihřec netta zeg iḍaren nnes s tnayen.
1KI 15:24 Asa igga ad yareyyeḥ jar řejdud nnes. Netta ittwanḍeř jar řejdud nnes di tendint n babas Dawud. Mmis Yahucafaṭ idweř d ajeǧid deg wemcan nnes.
1KI 15:25 Nadab, mmis n Yarubɛam, idweř d ajeǧid x Israil deg useggʷas wiss tnayen n Asa, ajeǧid n Yahuda. Netta iḥkem tnayen n iseggʷusa x Israil.
1KI 15:26 Netta igga [min iǧan] d aɛeffan di tiṭṭawin n SIDI uca yuyur deg webrid n babas u di ddnub nnes i zi yarra Israil ad ixḍa.
1KI 15:27 Baɛca, mmis n Abiya, zi taddart n Issakar, igga xas ict n tmeɛmuč u Baɛca iɣřeb xas di Jibbatun nni [iǧan] n Ifilisṭiniyyen, umi Nadab d marra Israil tuɣa innḍen i Jibbatun.
1KI 15:28 Inɣa i-t Baɛca deg useggʷas wiss třata n Asa, ajeǧid n Yahuda, u netta idweř d ajeǧid deg wemcan nnes.
1KI 15:29 Umi idweř netta d ajeǧid, imsar, aqa iqḍa x marra taddart n Yarubɛam. Uřa d ca n Yarubɛam nni [yarrin] nnefs, war t ijji ad iqqim iddar, ařami t iteḥḥa ɛlaḥsab awař n SIDI nni tuɣa issiweř s uqemmum n umsexxar nnes Axiya, Aciluni,
1KI 15:30 di ssibbet n ddnub n Yarubɛam i zi ixḍa netta u i zi yarra Israil ad ixḍa s tmegga nnes ixewwjen i zi isɛar SIDI, AREBBI n Israil.
1KI 15:31 Imezruyen iqqimen n Nadab, d marra min igga, ma man aya [marra] war ittwazemmem ca deg wedlis n imezruyen n ijeǧiden n Israil?
1KI 15:32 Tuɣa [din] amenɣi jar Asa d Baɛca, ajeǧid n Israil, marra ussan nsen.
1KI 15:33 Deg useggʷas wiss třata n ujeǧid Asa, ajeǧid n Yahuda, idweř Baɛca, mmis n Axiya, d ajeǧid x marra Israil di Tirṣa, [u netta iḥkem] arebɛa u-ɛicrin n iseggʷusa.
1KI 15:34 Netta igga [min iǧan] d aɛeffan di tiṭṭawin n SIDI u yuyur deg webrid n Yarubɛam u di ddnub nnes i zi yarra Israil ad ixḍa.
1KI 16:1 Yusa-dd wawař n SIDI ɣar Yahu, mmis n Ḥanani. Awař tuɣa ḍidd i Baɛca, inna:
1KI 16:2 “Minzi Necc ssgeɛɛdeɣ-dd cek zi tɛejjajt u ggiɣ cek d řḥakem x řgens inu Israil, uca cek tuyured x webrid n Yarubɛam u tarrid řgens inu Israil ad ixḍa umi i d ayi tesɛared s ddnub nsen,
1KI 16:3 xzar, [s uya] ad mḥiɣ min iqqimen n Baɛca d min iqqimen n taddart nnes, u Necc ad ggeɣ taddart nnec am taddart n Yarubɛam, mmis n Nabaṭ.
1KI 16:4 Man wen zi taddart n Baɛca i ɣa immten di tendint, ad t ccen yiṭan u man wen zzayes i ɣa immuten deg iyyar, ad t ccen yijḍaḍ n ujenna.”
1KI 16:5 Imezruyen iqqimen n Baɛca, d marra min igga, ma man aya [marra] war ittwazemmem ca deg wedlis n imezruyen n ijeǧiden n Israil?
1KI 16:6 Baɛca igga ad yareyyeḥ jar řejdud nnes u netta ittwanḍeř di Tirṣa. Mmis Ila idweř d ajeǧid deg wemcan nnes.
1KI 16:7 Ammu dd-yusa wawař n SIDI s ufus n unabi Yahu, mmis n Ḥanani, uřa x Baɛca d taddart nnes zi ssibbet n marra taɛeffant i igga di tiṭṭawin n SIDI, umi t isɛar s řexdayem n ifassen nnes u umi idweř am taddart n Yarubɛam, uca uřa minzi netta tuɣa iqḍa wanita.
1KI 16:8 Deg useggʷas wiss setta u-ɛicrin n Asa, ajeǧid n Yahuda, idweř Ila, mmis n Baɛca, d ajeǧid x Israil di Tirṣa, [i ijj n řmijař n] tnayen n iseggʷusa.
1KI 16:9 Zimri, amsexxar nnes, wenni d akumandar x ijj n wezyen n ikarruten [n umenɣi], igga xas ict n tmeɛmuč umi t tuɣa di Tirṣa, tuɣa iscar di taddart n Arṣa, wenni tuɣa d ameḥḍay x taddart di Tirṣa.
1KI 16:10 Zimri yudef, iwta i-t uca inɣa i-t deg useggʷas wiss sebɛa u-ɛicrin n Asa, ajeǧid n Yahuda. Netta idweř d ajeǧid deg wemcan nnes.
1KI 16:11 Řami idweř d ajeǧid uca inya x řɛarc nnes, imsar, aqa iqḍa x marra taddart n Baɛca. Netta war ijji uřa d ijj wenni t iggin x řḥiḍ [ad iddar], u [war ijji uřa d ijj] wenni [izemmaren] ad as intaqem u [uřa d ijj] zeg imeddukkař nnes.
1KI 16:12 [Ammu] i iteḥḥa Zimri marra taddart n Baɛca ɛlaḥsab awař n SIDI nni issiweř Baɛca s ufus n unabi Yahu,
1KI 16:13 di ssibbet n marra ddnub n Baɛca d ddnub n mmis Ila i zi xḍan nitni u i zi arrin Israil ad ixḍa am sɛaren SIDI, AREBBI n Israil, s [l’aṣnam] nsen ibeṭṭřen.
1KI 16:14 Imezruyen iqqimen n Ila, d marra min igga, ma man aya [marra] war ittwazemmem ca deg wedlis n imezruyen n ijeǧiden n Israil?
1KI 16:15 Deg useggʷas wiss sebɛa u-ɛicrin n Asa, ajeǧid n Yahuda, tuɣa Zimri sebɛa n wussan d ajeǧid di Tirṣa. Řgens tuɣa iḥeṣṣar i Jibbatun nni [iǧan] n Ifilisṭiniyyen.
1KI 16:16 Řgens i tuɣa iwtin iqiḍan nnes [din], isřa aqa qqaren: “Zimri tuɣa igga d ict n tmeɛmuč uca inɣa ajeǧid.” Deg wass nni marra řgens yarra Ɛumri, wenni d akumandar x řɛeskar, d ajeǧid x Israil di řmargeḥ n řɛeskar.
1KI 16:17 Ɛumri igeɛɛed-dd zi Jibbatun d marra Israil akides uca nnḍen as-dd i Tirṣa.
1KI 16:18 Umi iẓra Zimri aqa tandint tuɣa tᵉttwaṭṭef, yudef ɣar lqelɛa n taddart n ujeǧid, iqedd tiwa nnes timessi i taddart n ujeǧid, ařami immut
1KI 16:19 di ssibbet n ddnub nnes i tuɣa igga, umi igga [min iǧan] d aɛeffan di tiṭṭawin n SIDI, umi yuyur deg webrid n Yarubɛam uřa di ssibbet n ddnub i igga am d yarra Israil ad ixḍa.
1KI 16:20 Imezruyen iqqimen n Zimri, d tameɛmuč i igga, ma man aya [marra] war ittwazemmem ca deg wedlis n imezruyen n ijeǧiden n Israil?
1KI 16:21 Xenni ittwammsebḍa řgens n Israil x tnayen n iziynat. Ijj n wezyen n řgens [ibedd] awarni i Tibni, mmis n Jinat, maḥend ad t ggen d ajeǧid, u ijj n wezyen [nneɣni] [ibedd] awarni i Ɛumri.
1KI 16:22 Řgens nni [ibedden] awarni i Ɛumri, tuɣa ijhed x řgens nni [ibedden] awarni i Tibni, mmis n Jinat. [Xenni] immut Tibni u Ɛumri idweř d ajeǧid.
1KI 16:23 Deg useggʷas wiss waḥit u-třatin n Asa, ajeǧid n Yahuda, idweř Ɛumri d ajeǧid x Israil. [Netta iḥkem] tenɛac n iseggʷusa. Di Tirṣa iḥkem setta n iseggʷusa.
1KI 16:24 Isɣa adrar n Samarya zi Camir s tnayen talint n nnuqart, u netta [ibda] ad ibna [x] wedrar n Samarya. Iřaɣa as i tendint i ibna ‘Samarya’, ɛlaḥsab isem n Camir, bab n wedrar.
1KI 16:25 Ɛumri igga [min iǧan] d aɛeffan di tiṭṭawin n SIDI. Netta tuɣa igga [min iǧan d aɛeffan] mahu x marra inni tuɣa d as izwaren.
1KI 16:26 Netta yuyur di kuř tabridt n Yarubɛam, mmis n Nabaṭ, u di ddnub nnes i zi yarra Israil ad ixḍa, umi sɛaren nitni SIDI, AREBBI n Israil, s [l’aṣnam] nsen ibeṭṭřen.
1KI 16:27 Imezruyen iqqimen n Ɛumri d min igga d ṣṣulṭa nnes i zi igga, ma man aya [marra] war ittwazemmem ca deg wedlis n imezruyen n ijeǧiden n Israil?
1KI 16:28 Ɛumri igga ad yareyyeḥ jar řejdud nnes. Netta ittwanḍeř di Samarya. Mmis Axab idweř d ajeǧid deg wemcan nnes.
1KI 16:29 Axab, mmis n Ɛumri, idweř d ajeǧid x Israil deg useggʷas wiss tmenya u-třatin n Asa, ajeǧid n Yahuda. Axab mmis n Ɛumri, iḥkem tnayen u-ɛicrin n iseggʷusa x Israil di Samarya.
1KI 16:30 Axab, mmis n Ɛumri, igga [min iǧan] d aɛeffan di tiṭṭawin n SIDI, mahu x marra inni tuɣa zzayes izwaren.
1KI 16:31 Tuɣa tuyurt nnes di ddnub n Yarubɛam, mmis n Nabaṭ, drus waha, [maɣar] netta yiwi Izabal, yeǧis n It-Baɛal, ajeǧid n Iṣiduniyyen, d tamɣart, uca yuyur ad iɛbed i Baɛl, isjed as.
1KI 16:32 Netta issbedd ijj n uɛalṭar i Baɛl di zzawect n Baɛl nni ibna netta di Samarya.
1KI 16:33 Netta igga ɛawed ict n trebbit n cwarti. Axab iɛdu s wesɛar nnes i SIDI, AREBBI n Israil, x marra ijeǧiden nni tuɣa i d as izwaren.
1KI 16:34 Deg wussan nnes ibna Ḥiyil, zi Bayt-Il, [tandint n] Ariḥa. Issars dsas nnes di ssum n mmis amenzu Abiram u di ssum n mmis amaẓuẓ Sajub yarekkeb tiwwura nnes ɛlaḥsab awař n SIDI i issiweř s [uqemmum] n Yacuwa, mmis n Nun.
1KI 17:1 Iliya, zi Ticbi, zeg imeɛzab n Jilɛad, inna i Axab: “S tidett am iddar SIDI, AREBBI n Israil, wenni umi beddeɣ zzat i wudem nnes, mařa ad dd-yas nnda niɣ anẓar deg iseggʷusa-ya, [ad yiři] aya mɣir s wawař inu!”
1KI 17:2 Yusa-dd ɣares wawař n SIDI, inna:
1KI 17:3 “Uyur ssenni, arr [s uzeǧif] ɣar ccarq uca snuffar ixef nnec ɣar tiɣzart n Krit wenni [iǧan] ɣar ujemmaḍ n L’Urdun.
1KI 17:4 Ad imsar ad teswed zi teɣzart u Necc umureɣ i ibaɣřiwen, aqa ad cek dinni sseccen.”
1KI 17:5 Netta yuyur [deg webrid] uca igga ɛlaḥsab awař n SIDI. Netta yuyur ad izdeɣ ɣar teɣzart n Krit nni [iǧan] ɣar ujemmaḍ n L’Urdun.
1KI 17:6 Ibaɣřiwen iwyen as-dd aɣrum d weysum ɣar tuffut uřa d aɣrum d weysum ɣar tameddit u netta iswa zi teɣzart.
1KI 17:7 Awarni waṭṭas n wussan, imsar, aqa yuẓeɣ tiɣzart, maɣar war iwti ca wenẓar di temmurt.
1KI 17:8 Yusa as-dd wawař n SIDI, inna:
1KI 17:9 “Kkar, uyur ɣar Ṣarfat nni [iǧan] ɣar Ṣidun, zdeɣ dinni. Xzar, necc umureɣ dinni i yict n tajjač, maḥend ad cek tessecc.”
1KI 17:10 Netta ikkar, yuyur ɣar Ṣarfat. [Umi] dd-yusa ɣar tewwart n tendint, xzar, ict n tajjač tᵉttḥarwac akeccuḍ. Netta iřaɣa xas, inna: “Awi ayi-dd ca n waman deg uɣarraf-a, [ḥima] ad sweɣ.”
1KI 17:11 [Umi] tuyur nettat ḥima ad dd-tawi aya, iřaɣa-dd netta xas: “Awi ayi-dd uřa d ijj n uřeqqim n weɣrum deg ufus nnem.
1KI 17:12 [Maca] nettat tenna: “S tidett am iddar SIDI, AREBBI nnec, min ɣari d tafdiřt, aqa mɣir ict n wuru n waren deg ubuqař d ca n zzect deg uɣarraf! Xzar necc ḥarwceɣ tnayen n ikeccuḍen u ad t sswejdeɣ i necc d mmi, xenni ad t necc ad nemmet.”
1KI 17:13 Inna as Iliya: “War tteggʷed ca. Uyur, egg min tuɣa tennid, maca egg ayi-dd d amezwaru ict n tefḍiřt u awi tt-i-dd da ɣari. Awarni uya ad tessewjed [ca] i cem u i ixef nnem d mmim.
1KI 17:14 Maɣar ammu i iqqar SIDI, AREBBI n Israil: ‘Aren deg ubuqař war ixekkʷi u zzect deg uɣarraf war tneqqiṣ ař ass i di i ɣa iwc SIDI anẓar x wudem n temmurt.’”
1KI 17:15 Nettat tuyur uca tegga ɛlaḥṣab awař n Iliya. [Ammu] i icca nettat, uca [uřa] d nettat d taddart nnes, aṭṭas n wussan.
1KI 17:16 Aren deg ubuqař war ixekkʷi d zzect deg uɣarraf war tneqqiṣ ɛlaḥsab awař n SIDI i issiweř s uqemmum n Iliya.
1KI 17:17 Awarni man aya, imsar, aqa ihřec mmis n temɣart-a, mmis n llala n taddart. Řehřac nnes yarni aṭṭas ařami war ittari ɛad nnefs.
1KI 17:18 Nettat tenna i Iliya: “Min din jar ayi d cek, [a] cek, aryaz n AREBBI? Ma tusid-dd ɣari ḥima ad ayi tessɛeqřed x ddnub inu u ḥima ad tenɣed mmi?”
1KI 17:19 Netta yarra-dd xas: “Ewc ayi-dd mmim!” U netta iksi t zeg weḥsin nnes, yarbu t ɣar sennej ɣar wexxam n nnej mani tuɣa izdeɣ netta simant nnes, uca issars i-t x qama nnes.
1KI 17:20 [Xenni] iřaɣa ɣar SIDI, inna: “SIDI, AREBBI inu, ma teggid xenni ɛad tuɛeffna di tajjač-a i ɣar zeddɣeɣ necc [am ubarrani], ařami tenɣid mmis?”
1KI 17:21 Netta isarreḥ ixef nnes třata n twařawin tiwa i uḥenjir u iřaɣa ɣar SIDI, inna: “SIDI, AREBBI inu, ejj ad ɣares dd-yeɛqeb řeɛmar n uḥenjir-a!”
1KI 17:22 SIDI isřa i tmijja n Iliya uca iɛqeb-dd řeɛmar n uḥenjir ɛawed ɣares [ařami] dd-idweř iddar.
1KI 17:23 Iliya iksi aḥenjir uca issehwa t zeg wexxam n nnej di taddart uca iwca as t i yemmas. Inna Iliya: “Xzar, mmim iddar!”
1KI 17:24 Tenna temɣart i Iliya: “Řexxu ssneɣ aqa cek d ijj n weryaz n AREBBI u aqa awař n SIDI deg uqemmum nnec d tidett.”
1KI 18:1 Awarni waṭṭas n wussan, imsar, aqa yusa-dd wawař n SIDI ɣar Iliya deg useggʷas wiss třata, inna: “Uyur, scen ixef nnec i Axab, [maɣar] Necc ad wceɣ anẓar di temmurt.”
1KI 18:2 Uca yuyur Iliya ḥima ad isscen ixef nnes i Axab. Tuɣa řaẓ imɣar di Samarya.
1KI 18:3 Axab tuɣa iřaɣa i Ɛubadya wenni [iǧan] x taddart [n ujeǧid]. Ɛubadya tuɣa itteggʷed SIDI aṭṭas.
1KI 18:4 Umi Izabal iqḍa inabiyyen n SIDI, imsar, aqa Ɛubadya yiwi mya n inabiyyen, issnuffar i-ten, xemsin xemsin deg ijj n yefri, u iɛteq i-ten s weɣrum d waman.
1KI 18:5 Axab inna i Ɛubadya: “Uyur di temmurt ɣar marra tařawin n waman u ɣar marra tiɣezratin. Ad taɣ ad naf aheddu u [zemmaren] iysan d isardan ad qqimen ddaren u ad taf nhřa ma nenɣa řmař.”
1KI 18:6 Nitni bḍan tammurt jar asen ḥima ad tt cuqen. Axab yuyur x ijj n webrid, netta weḥḥdes, u Ɛubadya yuyur x ijj webrid nneɣni, [uřa d netta] weḥḥdes.
1KI 18:7 [Umi] tuɣa Ɛubadya deg webrid, xzar, aqa immeřqa akides Iliya. Ɛubadya iɛqeř i-t, iwḍa zzates s uɣembub nnes [ɣar temmurt], inna: “Ma d cek, sidi inu Iliya?”
1KI 18:8 Inna as wanita: “D necc. Uyur, inna i sidi nnec: ‘Xẓar, Iliya [aqa-t danita]!’”
1KI 18:9 [Maca] netta inna: “Man ddenb i [ggiɣ], aqa cek ad ayi tsellmed deg ifassen n Axab, ḥima ad ayi ineɣ?
1KI 18:10 S tidett am iddar SIDI, AREBBI nnec, war din uřa d ijj n řgens niɣ ict n tgeldit mani sidi inu war ijji ad xak yarzu! [Mařa] nnan nitni: ‘Netta war da iǧi!’, [xenni] ijja řgens nni ad ijjaǧ belli war zemmaren ad cek afen.
1KI 18:11 U řexxu cek tennid: ‘Uyur, ini i sidi nnec: Xzar Iliya [aqa-t danita]!’
1KI 18:12 [Ad taɣ] ad imsar, [xmi] i xak ɣa uyureɣ, aqa Arruḥ n SIDI ad cek iksi, war ssineɣ mani. Mařa xenni necc ad dd-aseɣ, ḥima ad [t] iniɣ i Axab u netta war cek ittif, netta ad ayi ineɣ, waxxa amsexxar nnec itteggʷed SIDI zi temẓi inu.
1KI 18:13 Ma war d ac ɛiwden ca i sidi inu, min ggiɣ necc, umi Izabal inɣa inabiyyen n SIDI? Aqa necc ssnuffareɣ mya n yeryazen zeg inabiyyen, kuř xemsin deg ijj n yefri? Uřa aqa necc ɛetqeɣ ten s weɣrum d waman?
1KI 18:14 U řexxu teqqared ‘Uyur, ini i sidi nnec: Xzar, Iliya [aqa-t da]!’ Netta ad ayi ineɣ.”
1KI 18:15 Inna Iliya: “S tidett am iddar SIDI n řɛeskarat zzat i wudem nnes umi beddeɣ, aqa nican necc ad seccneɣ ixef inu ass-a!”
1KI 18:16 [Xenni] yuyur Ɛubadya ɣar umsagar ak-d Axab, ixebbar as [t]. Uca Axab yuyur, maḥend ad imsagar ak-d Iliya.
1KI 18:17 Umi iẓra Axab Iliya, imsar, aqa Axab inna as: “Ma cek d aḍeyyeɛ n Israil?”
1KI 18:18 Netta inna: “Necc war ḍiyyɛeɣ ca Israil, maca cek d taddart n babac umi kenniw tejjim řumurat n SIDI [ɣar uɣezdis] u cek tuyured awarni i ‘Ibaɛlen’.
1KI 18:19 Xenni řexxu, smun marra Israil ɣari ɣar wedrar n Karmil uřa d arebɛa-mya u-xemsin n inabiyyen n Baɛl d arebɛa-mya n inabiyyen n trebbit n cwarti nni ittetten zi ṭṭabřa n Izabal.”
1KI 18:20 Axab issekk [ijj n ureqqas] ɣar marra ayt n Israil u issmun inabiyyen ɣar wedrar n Karmil.
1KI 18:21 Iliya iqarreb-dd ɣar marra řgens, inna: “Mecḥař ɛad i ɣa tekkem ɛad ttneqřabem kenniw ɣar tnayen n iɣezdisen? Mařa SIDI d AREBBI, ḍfarem as-dd, u mařa d Baɛl, [xenni] ḍfarem wanita!” Maca řgens war xas dd-yarri uřa s yijj n wawař.
1KI 18:22 [Xenni] inna Iliya i řgens: “Necc waha i iqqimen d anabi n SIDI uca inabiyyen n Baɛl aqa aten s arebɛa-mya u xemsin n yeryazen.
1KI 18:23 Ejj ad aneɣ wcen tnayen n ifunasen. Ejj i-ten [xenni] ad farzen afunas ameẓyan amezwaru i yixef nsen, ad t bḍan u ad t ssarsen x ukeccuḍ, [maca] war tteggen timessi [sadu] nnes. Necc ad sswejdeɣ afunas ameẓyan nneɣni, ad t ssarseɣ x ukeccuḍ u war tteggeɣ timessi [sadu] nnes.
1KI 18:24 [Xenni] ad třaɣam isem n arebbi nwem u necc ad řaɣiɣ Isem n SIDI, uca AREBBI wenni i dd ɣa yarren s tmessi, d Netta ad yiři d AREBBI.” Uca iřaɣa marra řgens, nnan: “Awař[-a] d lemliḥ!”
1KI 18:25 Inna Iliya i inabiyyen n Baɛl: “Xḍarem i yixef nwem afunas ameẓyan amezwaru u sswejdem as t d amezwaru, maɣar kenniw s waṭṭas. Řaɣam [xenni] isem n arebbi nwem, [maca] war srusam ca timessi sadu nnes.”
1KI 18:26 Nitni ksin afunas ameẓyan i d asen iwca netta u sswejden t. Xenni řaɣan i yisem n Baɛl, zi tuffut ař azal, nnan: “[A] Baɛl, arr aneɣ-dd!” [Maca] walu n řḥess uca uřa d ijj war dd-yarri ca. Nitni negzen x uɛalṭar i [din] ittwaggen.
1KI 18:27 Ɣar wazal ibda Iliya ittqessar xasen, inna: “Řaɣam s tmijja ijehden, aqa-t d arebbi. [Nican] netta ittxemmam, niɣ iɛezzeř [cwayt], niɣ netta [ɛad] deg webrid. Ad taɣ itteṭṭeṣ uca ittxeṣṣa as ad ifaq [ɛad].”
1KI 18:28 Nitni sɣuyen s tmijja ijehden u qessen ixef nsen s řesyuf d iḥricen am tnamit nsen, ařami uzzřen idammen nsen xasen.
1KI 18:29 Umi iɛdu azal, imsar, aqa nitni ttnebban ař dd ɣa yawyen tawhibt [n řɣiǧet]. [Maca] war din uřa d ict n tmijja uca uřa d ijj war dd-yarri u war [din] bu listijaba walu.
1KI 18:30 [Xenni] inna Iliya i řgens: “Qarrbem-dd ɣari!” Marra řgens iqarreb-dd ɣares u netta iɛdeř aɛalṭar n SIDI i tuɣa ittwahdem.
1KI 18:31 Iliya iksi tenɛac n yeẓra, x řqedd n tqebbař n iḥenjiren n Yaɛqub i umi dd-yusa wawař n SIDI i tuɣa inna: “Israil ad yiři d isem nnec.”
1KI 18:32 S yeẓra nni ibna netta aɛalṭar deg Yisem n SIDI. Iqewwar i uɛalṭar ict n tarya s řqedd n tnayen n řeqyas n zzariɛet.
1KI 18:33 Isettef akeccuḍ uca ibḍa afunas ameẓyan d iceǧiqen, issars [i-t] x ukeccuḍ.
1KI 18:34 Inna: “Ɛemmarem arebɛa n ibuqařen s waman uca zeǧɛem ten tiwa i tɣarṣt n wecmaḍ u x ukeccuḍ!” Uca yarni inna: “Ggem t twařa nneɣnit!” U nitni ggin t twařa nneɣnit. [Xenni] inna: “Ggem t wiss třata n twařawin!” U nitni ggin t wiss třata n twařawin.
1KI 18:35 Ttazzřen waman, nnḍen i uɛalṭar. U netta iɛemmar uřa d tarya s waman.
1KI 18:36 Umi qeddmen tawhibt [n řɣiǧet], imsar, aqa anabi Iliya iqarreb-dd, inna: “SIDI, AREBBI n Ibrahim d Isḥaq d Israil, ejj ad ittwassen ass-a aqa Cek d AREBBI di Israil u aqa necc d amsexxar nnec [i ǧiɣ] u belli necc ggiɣ marra man aya ɛlaḥsab awař nnec.
1KI 18:37 Arr ayi-dd, [a] SIDI, arr ayi-dd, ḥima řgens-a ad issen, aqa Cek, [a] SIDI, d AREBBI [i teǧid] u aqa Cek tarrid-dd uř nsen [ɣarek].”
1KI 18:38 Uca tehwa-dd tmessi n SIDI [zeg ujenna], tecca taɣarṣt n wecmaḍ d ukeccuḍ d yeẓra d tɛejjajt, uca teřseḥ uřa d aman [i iǧan] di tarya.
1KI 18:39 Marra řgens iẓra i-t. Nitni wḍan s uɣembub nsen [ɣar temmurt], nnan: “SIDI aqa-t d AREBBI, SIDI aqa-t d AREBBI!”
1KI 18:40 Iliya inna asen: “Ṭṭfem inabiyyen n Baɛl, war ttejjim uřa d ijj zzaysen ad yarweř.” Ṭṭfen ten, uca Iliya ijja i-ten ad ssehwan ɣar teɣzart n Qicun, inɣa i-ten dinni.
1KI 18:41 [Xenni] inna Iliya i Axab: “Geɛɛed, ecc, teswed, maɣar [necc aqa ttesřiɣ] řḥess n ijj n ucarcar n wenẓar aṭṭas.”
1KI 18:42 Axab igeɛɛed, ḥima ad icc ad isu uca igeɛɛed Iliya ɣar tqiccat n Karmil. Iqqunjeř x temmurt uca igga udem nnes jar ifadden nnes.
1KI 18:43 [Xenni] inna i umsexxar nnes: “Geɛɛed uca xzar ɣar řebḥar!” Wanita igeɛɛed, ixzar ɣar řaggʷaj, inna: “War [ttwiřiɣ] walu!” Iliya inna: “Dweř-dd twařa nneɣnit!”, [uca ammu] sebɛa n twařawin!
1KI 18:44 Ɣar twařa wiss sebɛa, imsar, aqa inna: “Xzar, ict n tseynut tameẓyant, am ufus n ijj n weryaz, igeɛɛed-dd zi řebḥar.” [Xenni] inna: “Uyur, ini i Axab: ‘Ḥezzem [iysan], hwa-dd, maḥend anẓar war cek ittᵉṭṭef.”
1KI 18:45 Jar u jar ibbarcen ujenna s iseynuten u s usemmiḍ uca ibda wenẓar ad iwwet aṭṭas. [Xenni] inya Axab [deg ukarru], iffeɣ, yuyur ɣar Yazraɛil.
1KI 18:46 Tuɣa afus n SIDI x Iliya. Netta ibyes taɛjinna nnes uca izwar ittazzeř zzat i wudem n Axab ařami dd-yiweḍ ɣar Yazraɛil.
1KI 19:1 Axab iḥaja i Izabal marra min igga Iliya uřa d marra x mammec inɣa [Iliya] marra inabiyyen s ssif.
1KI 19:2 Izabal tessekk ijj n ureqqas ɣar Iliya, maḥend ad as yini: “Ad ayi ggen irebbiten ta d ta uřa d ktar zi man aya, mařa war ggiɣ tiwecca di řweqt-a řeɛmar nnec am řeɛmar n ijj zzaysen.”
1KI 19:3 Netta ixzar, ikkar uca iruḥ, ḥima ad injem řeɛmar nnes. Yusa-dd ɣar Bi’r-Sebɛa nni [iǧan] di Yahuda, uca ijja aḥudri amsexxar nnes dinni.
1KI 19:4 Netta simant nnes yuyur ticři n webrid n ijj n wass di řexřa, iqqim izzeř sadu tazeggʷart n wazzu uca ittar, ḥima ad immet řeɛmar nnes, inna: “Kfa, [a] SIDI, ksi řexxu řeɛmar inu, maɣar war ǧiɣ ḥsen x řejdud inu.”
1KI 19:5 [Xenni] izzeř, iṭṭeṣ sadu ict n tzeggʷart n wazzu. U xzar, lmalak iḥada t, inna as: “Kkar, ecc!”
1KI 19:6 Umi netta issgeɛɛed tamuɣři nnes, xzar, zzat i uzeǧif nnes aqa din ict n tefḍiřt i tuɣa ssengʷen tt s řefḥem uřa d ict n tebriqt dayes aman. [Xenni] icca, iswa uca idweř ɛawed izzeř [din].
1KI 19:7 Lmalak n SIDI yusa-dd twařa wiss tnayen, iḥada t, inna: “Kkar, ecc, niɣ abrid [ad yiři] d azirar xak.”
1KI 19:8 Netta ikkar, icca, iswa. S jjehd n macca yuyur [ticti n] arebɛin n wussan d arebɛin n ǧiyaři ař adrar n AREBBI, Hurib.
1KI 19:9 Dinni yiweḍ ɣar ijj n yefri uca issens dinni. U xzar, [yusa] as-dd awař n SIDI, inna as: “Min da i ɣa tegged, Iliya?”
1KI 19:10 Netta inna: “Necc cḍareɣ ař ṭṭarf di ṭṭweɛ n SIDI, AREBBI n řɛeskarat, maɣar ayt n Israil semḥen di Řɛahd nnec, hedmen iɛalṭaren nnec u inabiyyen nnec ttwanɣen s ssif, mɣir necc d wenni iqqimen u nitni arezzun ad ayi kksen uřa d tudart inu.”
1KI 19:11 Netta inna: “Ffeɣ, bedd x wedrar zzat i wudem n SIDI.” U xzar, iɛdu-dd SIDI. Ict n tḥaryaḍt temɣar u tejhed aqa tewta idurar u teřbez řejruf zzat i wudem n SIDI. [Maca] SIDI tuɣa war iǧi ca di tḥaryaḍt. Awarni i tḥaryaḍt [yusa-dd] ijj n wenhezzi n temmurt. [Maca] SIDI [tuɣa] war iǧi ca deg wenhezzi n temmurt.
1KI 19:12 Awarni i wenhezzi n temmurt [tusa-dd] tmessi. [Maca] SIDI [tuɣa] war iǧi ca di tmessi. Awarni tmessi [tuɣa din] ict n tmijja tefsus, tarsa.
1KI 19:13 Umi isřa Iliya, imsar aqa iřeḥḥef aɣembub nnes deg upartessu nnes, iffeɣ ɣar barra uca ibedd ɣar uqemmum n yefri. U xzar, ict n tmijja [issiweř] akides, tenna: “Min da tegged Iliya?”
1KI 19:14 Netta inna: “Necc cḍareɣ ař ṭṭarf di ṭṭweɛ n SIDI, AREBBI n řɛeskarat, maɣar ayt n Israil semḥen di Řɛahd nnec, hedmen iɛalṭaren nnec, u inabiyyen nnec ttwanɣen s ssif, mɣir necc d wenni iqqimen, u nitni arezzun ad kksen uřa d tudart inu.”
1KI 19:15 Inna as SIDI: “Uyur, ɛqeb abrid nnec ɣar řexřa n Dimacq u xmi ɣa tawḍed ɣar din, dhen Ḥazayil d ajeǧid x Aram!
1KI 19:16 [Uřa d] Yahu, mmis n Nimci, ad t tdehned d ajeǧid x Israil uca Ilicaɛ, mmis n Cafat zi Abal-Maḥula, dhen i-t d anabi deg wemcan nnec.
1KI 19:17 Ad imsar, aqa Yahu ad ineɣ wi ɣa inejmen i ssif n Ḥazayil, u Ilicaɛ ad ineɣ wi ɣa inejmen i ssif n Yahu.
1KI 19:18 [Xenni] jjiɣ Necc di Israil sebɛa-ařaf [n řeɛmur], marra inni ifadden nsen war qqunjeřen zzat i Baɛl u marra inni war t issudmen s uqemmum nsen.”
1KI 19:19 Iffeɣ Iliya ssenni, yufa Ilicaɛ, mmis n Cafat. Netta tuɣa icarrez s tenɛac n izayřuten n [iyenduzen] u netta [simant nnes] [icarz] x wiss tenɛac. Iliya iɛdu ɣares, inḍar xas apartessu nnes.
1KI 19:20 [Řexdenni] ismeḥ deg ifunasen, iɛřef awarni i Iliya, inna: “Ttzawgeɣ, ejj ayi ad ssudmeɣ baba d yemma [i uqebbeḍ], xenni ad cek ḍfareɣ.” Netta inna as: “Uyur, dweř, minzi min dayek ggiɣ necc?”
1KI 19:21 Iɛqeb netta [xenni] awarni as, iksi ijj n uzayřu n ifunasen uca iɣarṣ asen. S ukeccuḍ n uzayřu issnenna aysum nsen, iwca i-t i řgens maḥend ad icc. [Awarni uya] ikkar, uca iḍfar Iliya, isexxar as.
1KI 20:1 Binhadad, ajeǧid n Aram, issmun marra řɛeskar nnes. Tuɣa akides tnayen u-třatin n ijeǧiden s iysan d ikarruten. Netta igeɛɛed, inneḍ i Samarya u immneɣ akides.
1KI 20:2 Xenni issekk netta ireqqasen ɣar Axab, ajeǧid n Israil, daxeř di tendint.
1KI 20:3 Inna as: “Ammu i iqqar Bin-Hadad: ‘Nnuqart nnec d wureɣ nnec inu. Uřa d timɣarin nnec d iḥenjiren nnec icewwaren, aqa aten inu.’”
1KI 20:4 Ajeǧid n Israil yarra-dd xas, inna: “Am mammec tennid, a sidi inu ajeǧid. Necc nnec s marra min ɣari.”
1KI 20:5 Ireqqasen usin-dd ict n twařa nneɣnit, nnan: “Ammu issiweř Binhadad, inna: ‘Necc jjiɣ ad ac inin: Ittxeṣṣa ad ayi tewced nnuqart d wureɣ nnec d temɣarin nnec d iḥenjiren nnec!,
1KI 20:6 maca tiwecca ɣar řweqt-a ad ssekkeɣ imsexxaren inu ɣarek, maḥend ad arzun di taddart nnec u di tudrin n imsexxaren nnec. Ad imsar belli nitni ad ṭṭfen marra min xak iɛizzen di tiṭṭawin nnec s ifassen nsen, ad [t] awyen.’”
1KI 20:7 [Xenni] iřaɣa ujeǧid n Israil x marra imɣaren n temmurt, inna: “Snem [xenni] u xzarem aqa wanita inwa řɣar, maɣar tuɣa issekk-dd ɣari [qbeř], maḥend [ad iksi] timɣarin inu d iḥenjiren inu d nnuqart inu d wureɣ inu u necc war d as t qḍiɛeɣ.”
1KI 20:8 Marra imɣaren d marra řgens nnan as: “War [ɣares] ttesři u war d as ttic ttesriḥ!”
1KI 20:9 [Xenni] inna i ireqqasen n Binhadad: “Inim i sidi inu ajeǧid: ‘Marra umi i tessekked amsexxar nnec ɣar umezwaru ad t ggeɣ, [maca] tamesřact-a war zemmareɣ ad t ggeɣ.’” Ffɣen ireqqasen uca iwyen as-dd awař-a.
1KI 20:10 [Xas uca] issekk Binhadad ɣares, inna: “Ad ayi ggen irebbiten ammu u ad arnin ɛad ktar, mařa taɛejjajt n Samarya tqedd, ḥima ad teccur uru n ifassen n marra řgens i yuyuren deg iṣuraf inu!”
1KI 20:11 Yarra-dd ujeǧid n Israil, inna: “Inim as: ‘Wenni ibeysen abyas, war ittcenneɛ ixef nnes am wenni t issarsen.’”
1KI 20:12 Umi isřa i wawař-a, [am] tuɣa isess ak-d ijeǧiden deg iqiḍan, aqa inna i imsexxaren nnes: “Sbeddem ixef nwem!” U nitni sswejden ixef nsen [i umenɣi] ḍidd i tendint.
1KI 20:13 U xzar ijj n unabi yusa-dd ɣar Axab, ajeǧid n Israil, inna: “Ammu i issiweř SIDI: ‘Ma tᵉttwařid cek řɣaci-ya ameqqran? Xzar ass-a Necc ad t wceɣ deg ufus nnec, ḥima ad tessned aqa Necc d SIDI.’”
1KI 20:14 Uca Axab inna: “Zi man wen?” Netta inna: “Ammu i iqqar SIDI: ‘S imsexxaren n řḥukkam n lɛamalat.’” U netta inna: “Man wen i ɣa ibdan amenɣi?” Inna netta: “D cek!”
1KI 20:15 [Xas uca] isedd netta imsexxaren n řḥukkam n lɛamalat. Tuɣa aten di mitayen u-tnayen u-třatin. Isedd awarni asen marra řgens. Marra ayt n Israil, tuɣa aten di sebɛa-ařaf [n yeryazen].
1KI 20:16 Ffɣen nitni ɣar wazal. Binhadad tuɣa iscar deg iqiḍan, netta d ijeǧiden, tnayen u-třatin n ijeǧiden i d as iwcin afus.
1KI 20:17 Imsexxaren n řḥukkam n lɛamalat ffɣen-dd d imezwura [zi Samarya]. Binhadad tuɣa issekk ca [n ibergagen] u nitni xebbaren as, nnan: “Aqa iryazen ffɣen-dd zi Samarya.”
1KI 20:18 Netta inna: “Mařa nitni ffɣen-dd i řehna, ṭṭfem ten ddaren u mařa nitni ffɣen-dd i umenɣi, ṭṭfem ten [ɛawed] ddaren!”
1KI 20:19 Ffɣen-dd imsexxaren n řḥukkam n lɛamalat zi tendint ak-d řɛeskar [i dd-yusin] awarni asen.
1KI 20:20 [Kuř] aryaz iɣřeb x weɣrim nnes ařami arewřen ayt n Aram u Israil iḍfar i-ten, [maca] Binhadad, ajeǧid n Aram, injem x uyis ak-d ca n imnayen.
1KI 20:21 [Xenni] iffeɣ uřa d ajeǧid n Israil u netta iɣřeb x yeysan d ikarruten [n umenɣi] ařami igga as ict n tecti d tameqqrant i Aram.
1KI 20:22 [Xenni] yusa-dd unabi ɣar ujeǧid n Israil, inna as: “Uyur, mḥeḍ ixef nnec. Ssen u xzar min ɣarek ad t tegged, maɣar ɣar ubeddu n useggʷas n jdid ad xak iffeɣ ujeǧid n Aram [twařa nneɣni].
1KI 20:23 Imsexxaren n ujeǧid n Aram nnan as: “AREBBI nsen d ijj n arebbi n idurar, x uya tuɣa jehden xaneɣ. Mařa neccin nemmneɣ akidsen di řwaṭa, [xenni] ad xasen nejhed nican!
1KI 20:24 Egg min iqqar wawař-a: Kkes kuř ijj zeg ijeǧiden zeg wemcan nnes u ggem lwulat deg wemcan nsen.
1KI 20:25 Smun ammu ijj n řɛeskar am řɛeskar nni tweddared, s yeysan am yeysan nni u s ikarruten am ikarruten nni, uca ejj aneɣ akidsen nemmneɣ di řwaṭa. [Uct] mařa [xenni] neccin war xasen nejhid!” U netta isřa ɣarsen uca amenni i igga.
1KI 20:26 Ɣar ubeddu n useggʷas n jdid, imsar, aqa Binhadad isedd Aram. Iffeɣ ɣar Afiq i umenɣi ak-d Israil.
1KI 20:27 Uřa d ayt n Israil ttwasedden. Wcin asen řeɛweč u nitni ffɣen i umsagar akidsen. Ayt n Israil wtin iqiḍan nsen ajemmaḍ nsen am tnayen n tḥimriwin timeẓyanin n iɣayḍen. [Inni n] Aram [maca] ɛemmaren tammurt.
1KI 20:28 Yusa-dd ɣarsen weryaz n SIDI, issiweř ak-d ujeǧid n Israil, inna: “Ammu i issiweř SIDI: ‘Minzi inni n Aram innan: SIDI d ijj n arebbi n idurar, war iǧi d ijj n arebbi n tseǧyin!’, x uya i ɣa wceɣ řɣaci-ya ameqqran deg ufus nnec, ḥima kenniw ad tɛeqřem, aqa Necc d SIDI.”
1KI 20:29 Tuɣa wtin iqiḍan nsen sebɛa n wussan arendad n wayawya. Deg wass wiss sebɛa, imsar, aqa ikkar umenɣi. Deg ijj n wass nɣin ayt n Israil myat-ařef [n yeryazen] x iḍaren zi Aram.
1KI 20:30 Inni iqqimen arewřen ɣar tendint n Afiq uca řḥiḍ iwḍa x sebɛa u-ɛicrin-ařef n yeryazen, nni tuɣa iqqimen. Uřa Binhadad tuɣa yarweř uca yudef ɣar tendint, [yuyur] zeg [ijj n] wexxam ɣar ijj n wexxam [nneɣni].
1KI 20:31 [Xenni] nnan as imsexxaren nnes: “Xzar, neccin nesřa, aqa ijeǧiden n taddart n Israil d ijeǧiden daysen tamexsiwt icewwaren. Ejj aneɣ ad nebyes s txuncay [n wecḍan] ɣar webyas u s iseɣwan ɣar izeǧifen nneɣ uca ad neffeɣ ɣar ujeǧid n Israil. Ad taɣ ad cek yejj ad teddared.”
1KI 20:32 Nitni beysen s txuncay [n wecḍan] u [ggin] iseɣwan ɣar izeǧifen nsen uca [ammu] dd-usin nitni ɣar ujeǧid n Israil, nnan: “Amsexxar nnec Binhadad inna: ‘Ejj ad iddar řeɛmar inu!’” U netta yarra-dd: “Ma netta iddar ɛad? Netta d uma!”
1KI 20:33 Iryazen fehmen aqa man aya d ict n řeɛřamet teṣbeḥ, uca arzun deɣya x ca, ma aqa man aya nican, uca nnan: “Umac Binhadad ...” Uca netta inna: “Asem-dd, awyem t-i-dd [danita].” [Xenni] iffeɣ Binhadad ɣares u netta issenya t deg ukarru.
1KI 20:34 Inna as [Binhadad]: “Tineddam nni tuɣa iṭṭef baba zi babac, ad tent arreɣ. [Iwa,] egg i yixef nnec dcurat [i tsebbabt] di Dimacq am mammec igga baba dcurat di Samarya.” Uca [Axab inna]: “Necc ad ac arxuɣ x ijj n řɛahd.” U netta iqqen akides ijj n řɛahd uca yarxu as.
1KI 20:35 Ijj n weryaz zeg ayt n inabiyyen inna i jjar nnes s wawař n SIDI: “Wwet ayi!” Aryaz yugi [maca] ad t iwwet.
1KI 20:36 Inna as netta: “Minzi cek war tesřid ɣar tmijja n SIDI, xzar, mɣir cek ad xafi teffɣed, ad cek ineɣ ijj n weyrad.” Umi xas yuyur, iřqef i-t ijj n weyrad u wanita inɣa i-t.
1KI 20:37 [Xenni] yufa ijj n weryaz nneɣni, inna: “Wwet ayi!” Aryaz nni iwta i-t ammu, ařami t iyzem.
1KI 20:38 Yuyur unabi, ibedd ɣar webrid i [umeřqi ak-d] ujeǧid. Issnuffar ixef nnes s ijj n řecfen x tiṭṭawin nnes.
1KI 20:39 Umi dd-iɛdu ujeǧid, imsar, aqa iřaɣa i ujeǧid, inna: “Amsexxar nnec tuɣa iffeɣ ɣar řwesṭ n umenɣi. Uca xzar, aqa din ijj weryaz yusa-dd ɣar uɣezdis, yiwi ayi-dd ijj n weryaz, inna: ‘Ḥḍa aryaz-a, maca mařa iweddar ɣar useddi [n řɛeskar], ad yiři řeɛmar nnec deg wemcan nnes niɣ ad txeǧṣed ict n talint n nnuqart.’
1KI 20:40 Řami tuɣa ittceɣeř umsexxar nnec da d diha, imsar, aqa war [din] iqqim [ɛad].” Inna as ujeǧid n Israil: “Wa d řḥukm nnec, tewtid [t] s yixef nnec!”
1KI 20:41 Netta ikkes deɣya řecfen x tiṭṭawin nnes, uca iɛqeř i-t ujeǧid n Israil, aqa-t [d ijj] zeg inabiyyen.
1KI 20:42 Netta inna as: “Ammu i issiweř SIDI: ‘Minzi cek tejjid aryaz nni ḥarrmeɣ necc [i uteḥḥi] ad injem zeg ufus nnec, ad yiři řeɛmar nnec deg wemcan n řeɛmar nnes u řgens nnec deg wemcan n řgens nnes.”
1KI 20:43 Ajeǧid n Israil yuyur s řxaḍar ixsaren d ixeyyiqen ɣar taddart uca yusa-dd ɣar Samarya.
1KI 21:1 Awarni tmesřayin-a aqa din min imsaren ak-d Nabut, Ayazraɛili, wenni ɣar iǧa ijj n umarjeɛ n uḍiř di Yazraɛil zzat i řeqṣar n Axab, ajeǧid n Samarya.
1KI 21:2 Axab issiweř ak-d Nabut, inna: “Ewc ayi amarjeɛ nnec n uḍiř, ḥima ad ɣari yiři d taḥwic tazizawt, maɣar aqa tudes i taddart inu. Necc ad ac wceɣ deg wemcan nnes ijj n umarjeɛ [nneɣni] n uḍiř iṣbeḥ xas, niɣ mařa man aya d lemliḥ di tiṭṭawin nnec, ad cek xeǧṣeɣ ttman nnes s [ttmenyat n] nnuqart.”
1KI 21:3 [Maca] Nabut inna i Axab: “SIDI ad ayi iḥḍa, aqa ad ac wceɣ tasɣart n řejdud inu!”
1KI 21:4 Uca iɛqeb Axab ɣar taddart nnes s řxaḍar ixsaren d ixeyyiqen zi ssibbet n wawař i kides issiweř Nabut, Ayazraɛili, umi inna: “Necc war d ac tticeɣ tasɣart n řejdud inu.” U netta izzeř x qama nnes, yarra aɣembub nnes [ɣar řḥiḍ], war icci aɣrum.
1KI 21:5 Tamɣart nnes Izabal tusa-dd ɣares, tessiweř akides: “Min din ařami řxaḍar nnec ixsar ammu u war tᵉttetted aɣrum?”
1KI 21:6 Netta issiweř akides: “Maɣar necc ssiwřeɣ ak-d Nabut, Ayazraɛili, nniɣ as: ‘Ewc ayi amarjeɛ nnec n uḍiř i [ttmenyat n] nnuqart, niɣ, mařa texsed ad ac wceɣ ijj n umarjeɛ n uḍiř [nneɣni] deg wemcan nnes!’, [maca] netta inna: ‘Necc war d ac tticeɣ amarjeɛ inu n uḍiř!’”
1KI 21:7 Tenna as temɣart nnes Izabal: “Ma [xenni] cek ttegged ixef nnec d ajeǧid x Israil? Kkar, ecc aɣrum u ejj uř nnec ad yiři mliḥ! Necc ad ac wceɣ amarjeɛ n uḍiř n Nabut, Ayazraɛili.”
1KI 21:8 Nettat tura tibratin x yisem n Axab uca tcemmeɛ i-tent s [txaḍent nnes n] ucemmiɛ u tessekk tibratin nni i imeqqranen u i tarwa n taṣiřet nni tuɣa izeddɣen ɣar Nabut di tendint nnes.
1KI 21:9 Di tebratin tura, tenna: “Barrḥem s yijj n uẓummi u sɣimem Nabut ɣar zzat n marra řgens
1KI 21:10 uca sbeddem tnayen n iryazen, ayt i war isekkwin, qibač nnes, ḥima ad xas cehden, ad inin: ‘Cek tceqqfed di AREBBI u deg ujeǧid!’ Sufɣem t xenni ɣar barra u arejmem t ař d immet.”
1KI 21:11 Iryazen n tendint, imeqqranen d tarwa n taṣiřet nni tuɣa izeddɣen di tendint nnes, ggin ɛlaḥsab min d asen tumur Izabal, am mammec yurin di tebratin nni tuɣa d asen dd-tessekk.
1KI 21:12 Nitni barrḥen s yijj n uẓummi u ssɣimen Nabut ɣar zzat n marra řgens.
1KI 21:13 [Xenni] usin-dd tnayen n yeryazen, ayt i war isekkwin, uca qqimen qibač nnes. Iryazen i war isekkwin cehden xas, x Nabut, zzat i řgens, nnan: “Nabut iceqqef di SIDI u deg ujeǧid.” [Xenni] ssuffɣen t barra i tendint uca arejmen t ařami immut.
1KI 21:14 [Awarni as] jjin ad inin i Izabal: “Nabut ittwarjem u immut.”
1KI 21:15 Umi tesřa Izabal aqa Nabut ittwarjem, immut, imsar, aqa Izabal tenna i Axab: “Kkar, ksi amarjeɛ n uḍiř n Nabut, Ayazraɛili, d řwart, [aḥwic] i yugin netta ad ac t iwc s [ttmenyat n] nnuqqart, maɣar Nabut war iddar ca [ɛad], maca immut.”
1KI 21:16 Umi isřa Axab, belli Nabut immut, imsar, aqa Axab ikkar, maḥend ad ihwa ɣar umarjeɛ n uḍiř n Nabut, Ayazraɛili, ḥima ad t iksi d řwart.
1KI 21:17 [Xenni] yusa-dd wawař n SIDI ɣar Iliya, Aticbi, inna:
1KI 21:18 “Kkar, hwa, ḥima ad temmeřqid ak-d Axab, ajeǧid n Israil, wenni [iǧan] di Samarya. Xzar, netta deg umarjeɛ n uḍiř n Nabut mani ɣar dd-ihwa, ḥima ad t iksi d řwart.
1KI 21:19 Ittxeṣṣa ad kides tessiwřed, ad tinid: ‘Ammu i iqqar SIDI: Ma tenɣid u [xenni] tekksed uřa d tasɣart?’ [Ɛawed] ittxeṣṣa ad kides tessiwřed, ad tinid: ‘Ammu i iqqar SIDI: Deg wemcan mani řesḥen iṭan idammen n Nabut, ad řesḥen iṭan uřa d idammen nnec, [wah,] d inni nnec!’”
1KI 21:20 Inna Axab i Iliya: “Ma tufid ayi, cek, řeɛdu inu?” Netta inna: “Necc ufiɣ cek minzi cek tezzenzed ixef nnec, maḥend ad tegged min iǧan d aɛeffan di tiṭṭawin n SIDI.
1KI 21:21 Xzar Necc ad xak ssiwḍeɣ řɣar u ad mḥiɣ min iqqimen nnec. Ad teḥḥiɣ marra wi t itteggen x řḥiḍ, [am] wenni ittwaṭṭfen, [am] wenni umi jjin di Israil.
1KI 21:22 Necc ad arreɣ taddart nnec am taddart n Yarubɛam, mmis n Nabaṭ, u am taddart n Baɛca, mmis n Axiya, zi ssibbet n wesɛar i zi [d ayi] tesɛared, u umi tarrid Israil ad ixḍa.”
1KI 21:23 Issiweř SIDI uřa x Izabal, inna: “Iṭan ad ccen Izabal ɣar řḥiḍ n zzat n Yazraɛil.
1KI 21:24 Man wen zi Axab i ɣa immuten di tendint, ad t ccen iṭan u man wen i ɣa immuten deg iyyar ad t ccen ijḍaḍ n ujenna.”
1KI 21:25 Uřa d ijj war iǧi [ɛemmarṣ] am Axab i izzenzen ixef nnes, ḥima ad yegg [min iǧan d] aɛeffan di tiṭṭawin n SIDI, am t tɛarren temɣart nnes Izabal.
1KI 21:26 Netta igga min iǧan d jjɛifect ař ṭṭarf umi yareddef imeyḍa [n l’aṣnam nsen] u [umi igga] ɛlaḥsab marra min iggin Imuriyyen nni tuɣa issuffeɣ SIDI zi řwart zzat i wudem n ayt n Israil.
1KI 21:27 Umi isřa Axab awařen-a, ibda ad icarreg arruḍ nnes, yarḍ ict txancet [n wecḍan] x arrimet nnes, iẓumm. Ɛawed iṭṭeṣ deg ict n txancet u yuyur s arexwan.
1KI 21:28 [Xenni] yusa-dd wawař n SIDI ɣar Iliya, Aticbi, inna:
1KI 21:29 “Ma teẓrid mammec issehwa Axab ixef nnes zzat i wudem inu? Minzi issehwa ixef nnes zzat i wudem inu, necc war ssikkʷiḍeɣ řɣar deg wussan nnes, maca deg wussan n mmis ad ssiwḍeɣ řɣar x taddart nnes.”
1KI 22:1 Třata n iseggʷusa ḥḍan nitni řhudnet, war din tuɣi amenɣi jar Aram d Israil.
1KI 22:2 Deg useggʷas wiss třata, řami dd-ihwa Yahucafaṭ, ajeǧid n Yahuda, ɣar ujeǧid n Israil, imsar,
1KI 22:3 aqa ajeǧid n Israil inna i imsexxaren nnes: “Ma tessnem aqa Ramut di Jilɛad nneɣ? Ma ittxeṣṣa aneɣ ad neḥḍa řhudnet, war ten nᵉttekkes zeg ufus n ujeǧid n Aram?”
1KI 22:4 [Xas uca] inna i Yahucafaṭ “Zeɛma ad kidi teffɣed ɣar umenɣi ak-d Ramut di Jilɛad?” Inna Yahucafaṭ i ujeǧid n Israil: “Necc [ad iřiɣ] am cek, řgens inu am řgens nnec, iysan inu am yeysan nnec.”
1KI 22:5 Inna Yahucafaṭ [ɛawed] i ujeǧid n Israil: “Seqsa ɛafak ass-a x wawař n SIDI.”
1KI 22:6 [Xenni] issmun ujeǧid n Israil inabiyyen, ɛřaḥař arebɛa-mya n yeryazen, inna asen: “Ma ad ffɣeɣ ɣar umenɣi ɣar Ramut di Jilɛad niɣ ad t jjeɣ?” Nitni nnan: “Geɛɛed, maɣar Sidi inu ad ten iwc deg ufus n ujeǧid.”
1KI 22:7 [Maca] Yahucafaṭ inna: “Ma war da ca ijj n unabi n SIDI, [maḥend ad nzemmar] ad t nesseqsa neccin?”
1KI 22:8 [Xenni] inna ujeǧid n Israil i Yahucafaṭ: “Aqa ɛad da ijj n weryaz i zzayes nzemmar ad nesseqsa SIDI. Maca necc carheɣ t, maɣar netta war d ayi ittnebba ɛemmarṣ s min iṣebḥen, maca mɣir s [min iǧan] d aɛeffan. Aqa-t d Mixa-Yahu, mmis n Yimla.” Inna Yahucafaṭ: “War iǧi ammu i ɣa issiweř ajeǧid!”
1KI 22:9 [Xenni] iřaɣa-dd ujeǧid n Israil i yijj n umsexxar amcenneɛ, inna: “Deɣya, awi-dd Mixa-Yahu, mmis n Yimla!”
1KI 22:10 Ajeǧid n Israil d Yahucafaṭ, ajeǧid n Yahuda, qqimen [din], kuř ijj x řɛarc nnes, yarḍen s warruḍ n ijeǧiden x wazzay n unedrar ɣar uqemmum n tewwart [n tendint] n Samarya u marra inabiyyen tuɣa ttnebban zzat i wudem nsen.
1KI 22:11 Ṣidqiya, mmis n Kanɛana, tuɣa igga i ixef nnes accawen n wuzzař, inna: “Ammu i inna SIDI: ‘S yina i ɣa tessnuqqbed ayt n Aram ař ten ɣa teqḍiḍ.’”
1KI 22:12 Marra inabiyyen tuɣa ttnebban kifkif, nnan: “Geɛɛed ɣar Ramut di Jilɛad, ad tiřid tfeřḥed, [minzi] SIDI ad ten iwc deg ufus n ujeǧid.”
1KI 22:13 Areqqas nni tuɣa iṭṭfen [abrid], ḥima ad iřaɣa i Mixa-Yahu, issiweř, inna:“Xzar xenni, awařen n inabiyyen [axmi dd-ffɣen] zeg ijj n uqemmum s řxir ɣar ujeǧid. Ttzawgeɣ ad iřin wawařen nnec am wawařen nsen, siweř min iṣebḥen.”
1KI 22:14 [Maca] Mixa-Yahu inna: “[S tidett am] iddar SIDI, min d ayi ɣa yini SIDI, ad t iniɣ.”
1KI 22:15 [Umi] dd-yusa ɣar ujeǧid, inna as ujeǧid: “Mixa-Yahu, ma ad neffeɣ neccin ɣar Ramut di Jilɛad niɣ ad t nejj?” Inna as netta: “Geɛɛed, ad tiřid tfeřḥed, minzi SIDI ad ten iwc deg ufus n ujeǧid.”
1KI 22:16 Inna as ujeǧid: “Mecḥař n twařawin ittxeṣṣa ayi ad cek ssjaǧeɣ, war d ayi tennid mɣir tidett deg Yisem n SIDI?”
1KI 22:17 Uca netta inna: “Necc ẓriɣ marra Israil ttwabezzɛen x idurar am wuǧi war ɣarsen bu umeksaw. Inna SIDI: ‘Ina war ɣarsen bu isiditen, ejj [kuř] aryaz ad dd-idweř ɣar taddart nnes di řehna.’”
1KI 22:18 [Xenni] inna ujeǧid n Israil i Yahucafaṭ: “Ma war d ac nniɣ: ‘Netta ittnebba xafi walu n min iṣebḥen, mɣir [min iǧan] d aɛeffan?’”
1KI 22:19 [Xas uca] inna wanita: “S uya seř i wawař n SIDI. Necc ẓriɣ SIDI iqqim x řɛarc d marra řɛeskar n ujenna ibedd ɣares, ɣar yefus nnes u ɣar uzeřmaḍ nnes.
1KI 22:20 SIDI inna: ‘Man wen i ɣa iɣwan Axab ař ɣa igeɛɛed, ad iwḍa di Ramut di Jilɛad?’ Wa inna ammu u win inna ammu.
1KI 22:21 [Xenni] iffeɣ-dd ijj n buḥbeř, ibedd zzat i wudem n SIDI, inna: ‘Necc ad t ɣwiɣ.’ SIDI isseqsa t: ‘S minzi?’
1KI 22:22 Netta inna: ‘Necc ad ffɣeɣ u ad dewřeɣ d ijj n buḥbeř issxarriqen deg uqemmum n marra inabiyyen nnes.’ U netta inna: ‘Ad tfeřḥed maḥend ad t teɣwid. Ffeɣ, egg amenni!’
1KI 22:23 [Xenni] řexxu, SIDI iwca ijj n buḥbeř issxarriqen deg ufus n marra inabiyyen nwem uca SIDI ibarreḥ xak s řɣar.”
1KI 22:24 [Xenni] iqarreb-dd Ṣidqiya, mmis n Kanɛana, ɣar Mixa-Yahu, iwti t ɣar uɣesmir, inna: “Mani [xenni] tuɣa zzayi iɛdu Arruḥ n SIDI ḥima ad kidek issiweř?”
1KI 22:25 Inna Mixa-Yahu: “Xzar, ad t tẓared deg wass nni di ɣa temhafed zeg [ijj n] wexxam ɣar wexxam [nneɣni], ḥima ad tessnuffared ixef nnec.”
1KI 22:26 Ajeǧid n Israil inna: “Ṭṭfem Mixa-Yahu, nedhem t ɣar Amun, řḥakem n tendint, u ɣar Yuwac, mmis n ujeǧid.
1KI 22:27 Ad tinid: ‘Ammu i iqqar ujeǧid: Nḍarem wa di řeḥbes u seccem t s weɣrum n řeḥṣaret u s waman n řeḥṣaret ař dd ɣa ɛeqbeɣ di řehna.’”
1KI 22:28 Mixa-Yahu inna: “Mařa cek tɛeqbed-dd [s tidett] di řehna, aqa SIDI war zzayi issiweř!” Netta inna [ɛawed]: “Sřem, řegnus, marra [kenniw]!”
1KI 22:29 [Xenni] igeɛɛed ujeǧid n Israil ak-d Yahucafaṭ, ajeǧid n Yahuda, ɣar Ramut di Jilɛad.
1KI 22:30 Inna ujeǧid n Israil i Yahucafaṭ: “Necc ad beddřeɣ arruḍ, [xenni] ad dd-ffɣeɣ ɣar umenɣi. Cek [maca] [tzemmared] ad tyarḍed arruḍ nnec!” Ajeǧid n Israil igga arruḍ war iǧi nnes, iffeɣ-dd ɣar umenɣi.
1KI 22:31 Ajeǧid n Aram tuɣa yumur i řqebṭanat n ikarruten [n umenɣi], inni zzaysen ɣares tnayen u-třatin, inna: “Ittxeṣṣa awem war ttmenɣim ak-d umeqqran niɣ ak-d umeẓyan, mɣir ak-d ujeǧid n Israil!”
1KI 22:32 Umi řqebṭanat n ikarruten [n umenɣi] ẓrin Yahucafaṭ, imsar, aqa nitni nnan: “Aqa d wa, ajeǧid n Israil!” Nitni meyyřen xas ḥima akides mmenɣen, maca Yahucafaṭ isɣuy.
1KI 22:33 Umi ẓrin řqebṭanat n ikarruten [n umenɣi], aqa netta tuɣa war iǧi d ajeǧid n Israil, imsar, aqa dewřen-dd, [war t areddfen ɛad].
1KI 22:34 [Xenni] iɛeyyen ijj n weryaz s řqews s řbař nnes d acemřař uca iřqef ajeǧid n Israil jar wawaḍen n warruḍ n wuzzař. [Řexdenni] inna wanita i wenni ineddhen akarru: “Qřeb afus nnec, suffeɣ ayi zi řɛeskar, maɣar iyzmeɣ aṭṭas.”
1KI 22:35 Deg wass nni idweř umenɣi yewɛar aṭṭas. Iqqim ujeǧid ibedd deg ukarru [deg umenɣi] ak-d ayt n Aram, maca ɣar tmeddit immut. Idammen n uyezzim tuɣa uzzřen deg uɛeddis n ukarru.
1KI 22:36 Ɣar uɣeǧay n tfuct jjin ad barrḥen s jjehd di marra řɛeskar, nnan: “[Kuř] aryaz [ad dd-iɛqeb] ɣar tendint nnes u [kuř] aryaz ɣar temmurt nnes!”
1KI 22:37 Immut ujeǧid, iwyen t ɣar Samarya. Nitni neḍřen ajeǧid di Samarya.
1KI 22:38 Ssirden akarru deg uyeřmam n Samarya uca řesḥen iṭan idammen nnes, mani timɣarin n farq-ccɣeř ssirdent dayes, ɛlaḥsab awař n SIDI i tuɣa inna.
1KI 22:39 Imezruyen iqqimen n Axab, d marra min igga d taddart n řɛaj i ibna d marra tineddam i ibna, ma man aya [marra] war ittwazemmem ca deg wedlis n imezruyen n ijeǧiden n Israil?
1KI 22:40 Axab igga ad yareyyeḥ jar řejdud nnes. Mmis Axazya idweř d ajeǧid deg wemcan nnes.
1KI 22:41 Yahucafaṭ, mmis n Asa, idweř d ajeǧid x Israil, deg useggʷas wiss arebɛa n Axab, ajeǧid n Israil.
1KI 22:42 Yahucafaṭ [tuɣa] ɣares xemsa u-třatin n iseggʷusa, umi idweř d ajeǧid. Netta iḥkem xemsa u-ɛicrin n iseggʷusa di Urcalim. Yemmas qqaren as Azuba, yeǧis n Calxi.
1KI 22:43 Netta yuyur di marra tibridin n babas Asa, war xasent iḥeyyed ca. Netta igga [min iǧan] nican di tiṭṭawin n SIDI.
1KI 22:44 Řegɛudi war ttwakksent. Řgens yiwi ɛad tiɣarṣa d tewhibin n řebxur x řegɛudi.
1KI 22:45 Yahucafaṭ iḥḍa x řehna ak-d ujeǧid n Israil.
1KI 22:46 Imezruyen iqqimen n Yahucafaṭ, d tmegga nnes imeḥḍen i igga d mammec immneɣ, ma man aya [marra] war ittwazemmem ca deg wedlis n imezruyen n ijeǧiden n Yahuda?
1KI 22:47 Netta imḥa imetleyyen iqqimen zi temmurt, inni tuɣa iqqimen zeg wussan n babas Asa.
1KI 22:48 Di Idum war tuɣi [din] ca n ujeǧid, [maca] ijj n lwali n ujeǧid.
1KI 22:49 Yahucafaṭ igga iɣarruba n Tarcic, ḥima ad nedhen ɣar Ufir ad awyen ureɣ. [Maca] war dd-ffiɣen ca, maɣar iɣarruba arẓin ɣar Ɛiṣyun-Jabar.
1KI 22:50 Xenni inna Axazya, mmis n Axab, i Yahucafaṭ: “Ejj imsexxaren inu ad nedhen ak-d imsexxaren nnec x iɣarruba!”, [maca] Yahucafaṭ yugi.
1KI 22:51 Yahucafaṭ igga ad yareyyeḥ jar řejdud nnes. Netta ittwanḍeř jar řejdud nnes di tendint n babas Dawud. Mmis Yahuram idweř d ajeǧid deg wemcan nnes.
1KI 22:52 Axazya, mmis n Axab, idweř d ajeǧid x Israil di Samarya, deg useggʷas wiss sbeɛṭac n Yahucafaṭ, ajeǧid n Yahuda. Netta iḥkem tnayen n iseggʷusa x Israil.
1KI 22:53 Netta igga [min iǧan d] aɛeffan di tiṭṭawin n SIDI. Netta yuyur x webrid n babas u x webrid n yemmas u x webrid n Yarubɛam, mmis n Nabaṭ, wenni yarrin Israil ad ixḍa.
1KI 22:54 Netta iɛbed Baɛl, ibendeq as. Netta isɛar SIDI, AREBBI n Israil, s marra min tuɣa igga babas.
2KI 1:1 Awarni řmewt n Axab iɣewweɣ Mu’ab x Israil.
2KI 1:2 Iwḍa-dd Axazya s tracca n řkazi n tɣurfet nnes di Samarya uca ihřec. Netta issekk ireqqasen inna asen: “Ruḥem ɣar Baɛal-Zabub, arebbi n Ɛaqrun, maḥend ad tesseqsam ma war d ayi ineqq řehřac-a.”
2KI 1:3 Maca lmalak n SIDI issiweř-dd ɣar Ilicaɛ, Aticbi: “Kkar, geɛɛed, řqa ireqqasen n ujeǧid n Samarya u siweř akidsen: ‘Ma s tidett war din AREBBI di Israil, ařami kenniw tuyurem, ḥima ad tesseqsam Baɛal-Zabub, arebbi n Ɛaqrun?’
2KI 1:4 S uya, ammu i iqqar SIDI: ‘War dd-thekkʷid ca zi tassut i x tgeɛɛded, maca ad temmted řmewt.’” Uca [xenni] iffeɣ Iliya.
2KI 1:5 [Řami] dd-ɛeqben ireqqasen ɣar [Axaziya], inna asen i nitni: “Min [ixs ad yini] man aya, [řami] dd-tɛeqbem ɛawed [deɣya]?”
2KI 1:6 Nitni arrin-dd xas: “Ijj n weryaz imsagar akidneɣ, inna aneɣ: ‘Ɛeqbem ɣar ujeǧid wenni kenniw dd-issekken, ad as tinim: Ammu i issiweř SIDI, ma s tidett war ɣarwem zeɛma AREBBI di Israil ařami tessekked, ḥima ad tesseqsid Baɛal-Zabub, arebbi n Ɛaqrun? S uya war dd-thekkʷid ca zi tassut i x tgeɛɛded, maca ad temmted řmewt.’”
2KI 1:7 Netta issiweř akidsen: “Mammec igga waddud n weryaz nni kidwem imsagaren u issiweř akidwem awařen-a?”
2KI 1:8 Nitni arrin-dd xas: “Netta d ijj n weryaz ɣares [ijj n upartessu n] ucuwwaf, ɣares ijj n webyas n ccark x tejɛinna nnes.” [Xenni] inna netta: “Wa d Iliya, Aticbi.”
2KI 1:9 Netta issekk ijj n umeqqran n xemsin ak-d xemsin [n yeryazen] nnes ɣares. Wanita igeɛɛed ɣares, u xzar, Iliya tuɣa ittɣima x tqiccat n wedrar. U netta issiweř ɣares: “[Cek,] aryaz n AREBBI, ajeǧid inna ac: ‘Hwa-dd!’”
2KI 1:10 Iliya yarra-dd, inna i umeqqran n xemsin: “Mařa necc aqa d aryaz n AREBBI, ejj ad tewḍa tmessi zeg ujenna, ad cek tecc, cek d xemsin [n yeryazen] nnec.” [Řexdenni] tewḍa-dd tmessi zeg ujenna, tecca i-t netta d xemsin [n yeryazen] nnes.
2KI 1:11 Xas uca issekk ɣares ɛawed ijj n umeqqran nneɣni n xemsin ak-d xemsin [n yeryazen] nnes. Wanita iṭṭef deg wawař, inna as: “Cek, [a] aryaz n AREBBI, ammu i iqqar ujeǧid: ‘Hwa-dd deɣya!’”
2KI 1:12 Iliya yarra-dd uca inna asen: “Mařa necc d aryaz n AREBBI, ammu i dd ɣa tewḍa tmessi zeg ujenna, ad cek tecc d yeryazen nnec,” [Řexdenni] tewḍa-dd tmessi zeg ujenna, tecca i-t netta d xemsin [n yeryazen] nnes.
2KI 1:13 Issekk ɛawed ijj n umeqqran n xemsin i twařa wiss třata, ak-d xemsin [n yeryazen] nnes. [Umi] igeɛɛed umeqqran n xemsin wiss třata uca yiweḍ [ɣares], yuḍar netta x ifadden nnes zzat i Iliya uca iḥeccem i-t, inna as: “[A] aryaz n AREBBI, ejj ad teswa tudart inu d tudart n imsexxaren nnec, n xemsin [n yeryazen-a], di tiṭṭawin nnec.
2KI 1:14 Xzar, timessi tewḍa-dd zeg ujenna, tecca tnayen n imeqqranen n xemsin ak-d xemsin [n yeryazen] nsen. Ejj ad teswa řexxu tudart inu di tiṭṭawin nnec!”
2KI 1:15 Uca inna lmalak n SIDI i Iliya: “Hwa akides, war tteggʷed ca zzat i wudem nnes!” Ikkar netta, ihwa akides ɣar ujeǧid.
2KI 1:16 [Xas uca] issiweř ak-d ujeǧid: “Ammu i iqqar SIDI: ‘Maɣar cek tessekked ireqqasen nnec, ḥima ad sseqsan Baɛal-Zabul, arebbi n Ɛaqrun, axmi war din iǧi s tidett AREBBI di Israil, ḥima ad [t] tesseqsid x wawař nnes, s uya war dd-thekkwid ca zi tassut i x tgeɛɛded, maca ad temmted řmewt.’”
2KI 1:17 [Ammu] i immut ɛlaḥsab awař n SIDI i tuɣa issiweř Iliya. Maɣar netta tuɣa war ɣares bu mmis, idweř Yuram d ajeǧid deg wemcan nnes deg useggʷas wiss tnayen n Yahuram, mmis n Yahucafaṭ, ajeǧid n Yahuda.
2KI 1:18 Imezruyen iqqimen n Axazya, d min igga, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 2:1 Imsar ɣar tmeksit n Iliya s [ufus n] SIDI deg ict n tḥaryaḍt ɣar ujenna, aqa iffeɣ Iliya ak-d Ilicaɛ zi Jiljal.
2KI 2:2 Inna Iliya i Ilicaɛ: “Qqim da, maɣar SIDI issekk ayi ɣar Bayt-Il.” [Maca] Ilicaɛ inna:“S tidett am iddar SIDI u iddar řeɛmar nnec, necc war cek ttejjiɣ.” [Ammu i] hwan nitni [s tnayen] ɣar Bayt-Il.
2KI 2:3 Ffɣen-dd ayt n inabiyyen, inni [tuɣa iǧan] di Bayt-Il, ɣar Ilicaɛ, nnan as: “Ma tessned, aqa SIDI ass-a ad ikkes bab nnec tiwa i uzeǧif nnec?” Netta yarra-dd: “Uřa d necc aqa ssneɣ t. Sqarem!”
2KI 2:4 Iliya inna as: “Qqim da, Ilicaɛ, maɣar SIDI issekk ayi ɣar Ariḥa.” Maca netta inna: “S tidett am iddar SIDI u iddar řeɛmar nnec, necc war cek ttejjiɣ ca!” [Ammu] dd-usin nitni ɣar Ariḥa.
2KI 2:5 [Xenni] usin-dd ayt n inabiyyen nni [iǧan] di Ariḥa ɣar Ilicaɛ, nnan as: “Ma tessned, aqa SIDI ass-a ad ikkes bab nnec tiwa i uzeǧif nnec?” Netta yarra-dd: “Uřa d necc aqa ssneɣ t. Sqarem!”
2KI 2:6 Iliya maca inna as: “Qqim da, maɣar SIDI issekk ayi ɣar L’Urdun.” [Maca] netta inna: “S tidett am iddar SIDI u am iddar řeɛmar inu, necc war cek ttejjiɣ ca!” Uca nitni uyuren s tnayen idsen.
2KI 2:7 Uřa d xemsin n yeryazen zeg ayt n inabiyyen uyuren, qqimen bedden arendad nsen ɣar řaggʷaj, am bedden nitni s tnayen idsen ɣar L’Urdun.
2KI 2:8 [Xenni] iksi Iliya aseřham nnes, issunneḍ i-t uca iwta zzayes x waman nni ttwabḍan x tnayen n iɣezdisen u nitni ẓwan s tnayen idsen x řaẓaɣ.
2KI 2:9 Řami ẓwan nitni, imsar, aqa Iliya inna i Ilicaɛ: “Ttar ict n řḥajjet i d ac ɣa ggeɣ, qbeř mma xak i ɣa mmeksiɣ!” Ilicaɛ yarra-dd: “Iři ad xafi dd-hwant tnayen n tseqqar n buḥbeř nnec!”
2KI 2:10 Iliya inna: “Cek tᵉttared ict n tmesřact tewɛar. Mařa cek teẓrid ayi řami xak i ɣa mmeksiɣ, ad ac imsar ammu, maca mařa war iǧi amenni, war ittemsar ca.”
2KI 2:11 Uca imsar am nitni gguren u ssawařen ak-d wayawya, xzar, aqa din ict n tkarrut n tmessi ak-d iysan n tmessi tenni tebḍa i-ten ijj x wenneɣni. [Ammu] igeɛɛed Iliya di tḥaryaḍt ɣar ujenna.
2KI 2:12 Ilicaɛ iẓra uca iřaɣa xas: “[A] baba, [a] baba! Akarru [n umenɣi] n Israil d imnayen nnes!” [Xenni] netta war t itwiři ɛad uca iksi arruḍ nnes, icarreg i-t x tnayen.
2KI 2:13 Xenni issmun-dd aseřham i dd-yewḍan zzayes netta uca iɛqeb, ibedd ɣar tma n L’Urdun.
2KI 2:14 Netta iksi aseřham n Iliya i dd-yewḍan zzayes netta, iwta zzayes x waman, inna: “Mani iǧa SIDI AREBBI n Iliya? Wah, Netta!” Uca netta iwta x waman uca mmsebḍan nitni x tnayen n iɣezdisen uca iẓwa Ilicaɛ.
2KI 2:15 [Umi] ayt n inabiyyen nni [din] ibedden arendad n Ariḥa, ẓrin t, nnan: “Buḥbeř n Iliya yarsa x Ilicaɛ.” Nitni usin-dd ɣares uca uḍaren zzates [s uɣembub nsen] ɣar temmurt.
2KI 2:16 Nitni nnan as: “Xzar xenni, jar imsexxaren nnec [aqa din] xemsin n yeryazen, ayt n umenɣi. Ejj i-ten ad uyuren, ad arzun x sidi nnec, ad taɣ SIDI iksi t uca inḍar i-t x ijj n wedrar niɣ deg ict zi teɣzurin.” [Maca] netta inna: “War sekkim uřa d ijj!”
2KI 2:17 Umi xas ɛemmden nitni ařami d as iweddar min ɣa yegg, inna: “[Iwa] sekkem [ten din]!” Nitni ssekken xemsin n yeryazen d ina arzun třata n wussan, maca nitni war t ufin.
2KI 2:18 Uca ɛeqben-dd nitni ɣares, minzi tuɣa iqqim di Ariḥa. Netta inna asen: “Ma war d awem nniɣ: ‘War ttriḥem ca’?”
2KI 2:19 Iryazen n tendint nnan i Ilicaɛ: “Xzar xenni, addud n tendint mliḥ, am mammec ittwařa sidi inu simant nnes, maca aman war iḥřin u tammurt tiwi-dd agray.”
2KI 2:20 Netta inna: “Awyem ayi-dd ijj n ṭṭebsi d amaynu u ggem dayes tameǧaḥt!” Uca nitni iwyen as t-i-dd.
2KI 2:21 [Xenni] iffeɣ [zi tendint] ɣar tařa n waman uca inḍar dayes tameǧaḥt nni, inna: “Ammu i iqqar SIDI: ‘Necc arriɣ aman-a ṣebḥen. War dd-ttiwyen řmewt niɣ d agray ɛad.’”
2KI 2:22 Aman dewřen ṣebḥen ɛawed ař ass-a ɛlaḥsab awař n Ilicaɛ i issiweř.
2KI 2:23 Ssenni igeɛɛed ɣar Bayt-Il. [Am] ittgeɛɛed abrid, ffɣen-dd iḥudriyyen zi tendint, inni t ikkʷaren, nnan as: “Aqeccar, geɛɛed! Aqeccar, geɛɛed!”
2KI 2:24 Netta inneqřeb-dd awarni as, ixzar daysen uca ixza i-ten deg Yisem n SIDI. Řexdenni usin-dd tnayen n ddubat zeg wezɣar u mezzqen tnayen-u-rebɛin n iḥudriyyen.
2KI 2:25 Ssenni yuyur netta ɣar wedrar n Karmil uca ssenni iɛqeb ɣar Samarya.
2KI 3:1 Deg useggʷas wiss tmenṭac n Yahucafaṭ, ajeǧid n Yahuda, idweř Yuram, mmis n Axab, d ajeǧid x Israil di Samarya. Netta iḥkem tenɛac n iseggʷusa.
2KI 3:2 Netta igga min iǧan d aɛeffan di tiṭṭawin n SIDI, maca war [t iggi] ammu [d taɛeffant] am babas d yemmas, maɣar ikkes amayḍu [iqeddsen] n Baɛal wenni igga babas.
2KI 3:3 Maca netta iqqim imenneɛ di ddnub n Yarubɛam, mmis n Nabaṭ, wenni yarrin Israil ad ixḍa. Netta war iḥeyyed x ddnub n Yarubɛam.
2KI 3:4 Micaɛ, ajeǧid n Mu’ab, tuɣa d ameksaw u tuɣa ittic i ujeǧid n Israil myat-ařef n izmaren d taḍuft n myat-ařef n icarriyyen.
2KI 3:5 Řami immut Axab, imsar, aqa iɣewweɣ ujeǧid n Mu’ab x ujeǧid n Israil.
2KI 3:6 Deg wass nni iffeɣ-dd ujeǧid Yuram zi Samarya uca isedd marra Israil.
2KI 3:7 Iṭṭef abrid uca issekk [ijj n ureqqas] ɣar Yahucafaṭ, ajeǧid n Yahuda, inna: “Ajeǧid n Mu’ab iɣewweɣ xafi. Ma cek ad kidi teffɣed deg umenɣi ak-d Mu’ab?” Netta inna: “Necc ad ffɣeɣ akidek. Necc ad iřiɣ am cek, řgens inu am řgens nnec d iysan inu am yiysan nnec.”
2KI 3:8 Inna: “X man abrid i ɣa ngeɛɛed?” Netta inna: “X webrid n řexřa n Idum.”
2KI 3:9 [Řexdenni] yuyur ujeǧid n Israil d ujeǧid n Yahuda d ujeǧid n Idum. Nitni nnḍen ijj n webrid n sebɛa n wussan uca war tuɣi din aman i řɛeskar u i řebhayem nni ten iḍfaren.
2KI 3:10 [Xenni] inna ujeǧid n Israil: “Axeyyeb i neccin umi dd-iřaɣa SIDI třata n ijeǧiden-a, ḥima ad ten iwc deg ufus n Mu’ab!”
2KI 3:11 Uca Yahucafaṭ inna: “Ma war da iǧi ijj n unabi n SIDI, wenni i zi ɣa nesseqsa SIDI?” [Xenni] yarra-dd ijjen zeg imsexxaren n ujeǧid n Israil, inna: “Ilicaɛ, mmis n Cafat, wenni izeǧɛen aman x ifassen n Iliya, aqa-t danita!”
2KI 3:12 Uca inna Yahucafaṭ: “Ɣares netta awař n SIDI.” Uca ajeǧid n Israil d Yahucafaṭ d ujeǧid n Idum hwan-dd ɣares.
2KI 3:13 Ilicaɛ inna i ujeǧid n Israil: “Min dinni jar ayi-dd d cek? Uyur ɣar inabiyyen n babac u ɣar inabiyyen n yemmac!” Maca ajeǧid n Israil yarra-dd xas: “Lla, maɣar SIDI iřaɣa-dd i třata-ya n ijeǧiden [ɣar da], ḥima ad ten iwc deg ufus n Mu’ab.”
2KI 3:14 Ilicaɛ yarra-dd xas: “[S tidett am] iddar SIDI n řɛeskarat nni umi beddeɣ zzat i wudem nnes, mři necc war ɣari bu uweqqar i Yahucafaṭ, ajeǧid n Yahuda, ad yiři necc war cek ḥessbeɣ u war dayek xezzareɣ!
2KI 3:15 [Xenni] řexxu, awi ayi-dd ijj iccat x ifiřan. Řami tuɣa ittirar wenni iccaten x ifiřan, imsar aqa afus n SIDI yarsa xas.
2KI 3:16 Inna netta: “Ammu i iqqar SIDI: ‘Ggem di teɣzurt-a tařyiwin d teřyiwin [ktar]!’
2KI 3:17 Maɣar ammu i iqqar SIDI: ‘Kenniw war tẓarrem asemmiḍ uřa d anẓar, [maca waxxa amenni] taɣzurt-a ad teccur s waman uca kenniw ad tessʷem, kenniw uřa d řebhayem nwem d zzwayeř nwem.’
2KI 3:18 [Maca] man aya [ɛad] drus di tiṭṭawin n SIDI, [maɣar] Netta ad awem iwc uřa d Mu’ab deg ifassen nwem.
2KI 3:19 Kenniw ad tewtem kuř tandint ifaryen u kuř tandint icennɛen, u ad tqeḍɛem kuř tacejjart iṣebḥen u ad tbellɛem marra řɛunṣarat n waman u ad tḍeyyɛem kuř iyyar iṣebḥen n temmurt s yeẓra.”
2KI 3:20 Uca di tiwecca ɣar [tsaɛɛet i ɣar] dd-ttawyen tawhibt [n řɣiǧet], imsar, aqa usin-dd waman zi Idum uca tɣebba temmurt s waman.
2KI 3:21 Mu’ab am ikmeř isřa belli ijeǧiden ffɣen-dd i umenɣi akidsen. [Xenni] řaɣan-dd x marra [iryazen], ixs ad yini, zeg inni [izemmaren] ad sennḥen s webyas [n řesnaḥ] ař [kuř ijj] sennej i uya, uca nitni settfen ixef nsen ɣar weymir.
2KI 3:22 Nitni kkaren ɣar tuffut n ṣṣbeḥ, u umi dd-tenqar tfuct x waman, ẓrin ayt n Mu’ab nni x ujemmaḍin, aqa aman d izeggʷaɣen am yidammen.
2KI 3:23 Nitni nnan: “Ina d idammen. Ijeǧiden nɣin ixef nsen am mmenɣen [jar asen] s ssif uca ijj iwta wenneɣni. Iwa [ayt n] Mu’ab, ṭṭfem takeccaḍt!”
2KI 3:24 [Maca umi] iwḍen nitni ɣar řmargeḥ n řɛeskar n Israil, kkaren [ayt n] Israil uca wtin [ayt n] Mu’ab. Arewřen [ayt n] Mu’ab zzat i wudem nsen uca xenni udfen nitni [ɣar temmurt], wtin Mu’ab.
2KI 3:25 Nitni hedmen tineddam uca [kuř] aryaz inḍar aẓru nnes x kuř iyyar iṣebḥen uca dřin t. [Ɛawed] netyen nitni marra řɛunṣarat n waman uca qeḍɛen kuř tacejjart iṣebḥen ařami ceṭṭen mɣir iẓra [n řḥiḍ] n Qir-Ḥarisat. Ayt bu-iǧayen nnḍen as uca ɣeḍřen tt.
2KI 3:26 [Umi] iẓra ujeǧid n Mu’ab belli amenɣi iwɛar xas aṭṭas, issmun-dd ɣares sebɛa mya n yeryazen nni [izemmaren] ad jebden ssif, ḥima ad icuq [iseddiyyen n řɛeskar] ɣar ujeǧid n Idum, [maca] nitni war zemmaren.
2KI 3:27 [Xenni] iksi netta mmis amenzu wenni i ɣa idewřen d ajeǧid awarni as, uca yiwyi t x řḥiḍ d taɣarṣt n wecmaḍ. Uca yusa-dd uduqqez d ameqqran n weɣḍab x Israil. Nitni ffɣen zzayes uca ɛeqben ɣar temmurt nsen.
2KI 4:1 Ict zi temɣarin n ayt n inabiyyen třaɣa i Ilicaɛ, tenna: “Amsexxar nnec, aryaz inu, immut, uca cek tessned belli amsexxar nnec tuɣa itteggʷed SIDI. [Řexxu maca] yusa-dd bab n wareṭṭař, ḥima ad iksi akides tnayen n iḥenjiren inu d isemɣan.”
2KI 4:2 Inna as Ilicaɛ: “Min zemmareɣ ad am ggeɣ? Ini ayi min ɣarem di taddart.” Nettat tarra-dd xas: “Tayya nnec war ɣares walu mɣir ict n tɣarraft dayes zzect.”
2KI 4:3 [Xenni] inna: “Ttar i yixef nnem tiqduḥin barra i taddart, tiqduḥin n jjiran nnem xwant, ḥḍa war iřint drus.
2KI 4:4 Xenni adef ɣar daxeř uca belleɛ tawwart awarni am u awarni i iḥenjiren nnem. Farreɣ [xenni zzect] di marra tiqduḥin nni, u min iǧan iccur, sars i-t ɣar uɣezdis!”
2KI 4:5 [Xas uca] tuyur xas uca tbelleɛ tawwart awarni as u awarni i iḥenjiren nnes. Nitni iwyen ɣares [tiqduḥin] u nettat tfarreɣ [daysent zzect].
2KI 4:6 [Umi] ccurent marra tiqduḥin, tenna i mmis: “Awi ayi-dd ɛad ict n teqduḥt!”, [maca] netta yarra-dd xas: “War da teqqim ca teqduḥt [ɛad]!” U zzect tuɣa teqḍa.
2KI 4:7 Nettat tuyur ad tt txebbar i weryaz n AREBBI u wanita inna: “Uyur, zenz zzect u xeǧeṣ bab n wareṭṭař nnem u zi min ɣa iqqimen ad zzayes teddared, cem ak-d iḥenjiren nnem.”
2KI 4:8 Deg ijj n wass umi dd-ikka Ilicaɛ x Cunam, imsar, aqa ict n temɣart icennɛen issbedd i-t din, ḥima ad [ɣares] icc. Řebda umi tuɣa dd-ittekk [x tendint nni], imsar, aqa iḥeyyed x webrid nnes ɣar din, ḥima ad icc ca n macca.
2KI 4:9 Nettat maca tenna i weryaz nnes: “Xzar, necc uciɣ aqa aryaz-a i ɣarneɣ dd-yusin řebda, aqa-t d aryaz amqeddas.
2KI 4:10 Ejj aneɣ ad nebna sennej ijj n wexxam d tameẓyant s řeḥyuḍ, uca ad negg din ijj n qama, ict n ṭṭabřa, ijj n řkursi d ijj n řefnar i netta. Mařa netta xenni yusa-dd ɣarneɣ, izemmar ad dinni iɛzeř ixef nnes.”
2KI 4:11 Deg ijj n wass imsar aqa Ilicaɛ yusa-dd din uca iɛzeř ixef nnes deg wexxam n nnej uca iruḥ izzeř dinni.
2KI 4:12 [Xenni] inna netta i umsexxar nnes Jiḥazi: “Řaɣa-dd i Tcunamect tanita!” Netta iřaɣa as u nettat tbedd zzat i wudem nnes.
2KI 4:13 Netta tuɣa i d as innan [i umsexxar nnes]: “Ini as: ‘Cem tᵉthillid dayneɣ aṭṭas. Min izemmar ad am ittwagg? Ma ad taɣ din ict n řḥajjet min xef nzemmar ad nessiweř ak-d ujeǧid niɣ ak-d ukumandar ameqqran n řɛeskar di ṭṭweɛ nnem?’” [Maca] nettat tenna: “Necc zeddɣeɣ di řwesṭ n řgens inu.”
2KI 4:14 [Xenni] tuɣa inna: “Min izemmaren ad as ittwagg?” Uca inna Jiḥazi: “Nettat war ɣares aḥenjir u aryaz nnes iwsar.”
2KI 4:15 [Xenni] tuɣa inna netta “Řaɣa-dd xas!” U netta iřaɣa-dd xas uca teqqim nettat tbedd di tewwart,
2KI 4:16 uca netta inna: “Di řweqt-a ittwaggen, ɣar tsaɛɛet n tudart, ad teksid aḥenjir deg iɣaǧen nnem.” Uca nettat tenna: “Lla, a sidi inu, [a] aryaz n AREBBI, war sxarriq [zeɛma] x tayya nnec!”
2KI 4:17 Tamɣart tedweř teksi s ddeyset uca turuw-dd ijj n uḥenjir di řweqt ittwaggen, ɣar řweqt n tudart nni x tuɣa issiweř Ilicaɛ akides.
2KI 4:18 [Umi] imɣar uḥenjir, imsar deg ijj n wass, iffeɣ-dd barra ɣar babas, ɣar yinni imejjaren.
2KI 4:19 Inna i babas: “[A] azeǧif inu, [a] azeǧif inu!” Uca babas inna i yijj n umsexxar: “Arbu t ɣar yemmas!”
2KI 4:20 Netta yarbu t uca yiwyi t ɣar yemmas. Netta tuɣa ittɣima x ifadden nnes ař azal, [xenni] immut.
2KI 4:21 Nettat tgeɛɛed sennej, tessars i-t x qama n weryaz n AREBBI. Tbelleɛ tawwart xas uca teffeɣ.
2KI 4:22 Třaɣa-dd x weryaz nnes, tenna as: “Sekk ayi-dd ijjen zeg imsexxaren d ijj zi teɣyař, ḥima ad uyureɣ deɣya ɣar weryaz n AREBBI u [xenni] ad ɛeqbeɣ [ɛawed].”
2KI 4:23 Netta inna: “Mayemmi ɣa tuyured ɣares ass-a? Aqa war iǧi d abeddi n uyur u war iǧi d ssebt.” Nettat tenna: “Kuřci ad yiři mliḥ!”
2KI 4:24 Nettat tbardeɛ i teɣyuč u tenna i umsexxar nnes: “Ndeh i-tt, qqim ggur. Am tnedhed war tbeddi di ṭṭweɛ inu mɣir xmi d ac t i ɣa iniɣ.”
2KI 4:25 Nettat teffeɣ uca tiweḍ-dd ɣar weryaz n AREBBI, ɣar wedrar n Karmil. Umi tt iẓra netta zi řaggʷaj, inna i Jiḥazi, amsexxar nnes: “Xzar, aqa din d Tacunamect.”
2KI 4:26 Řexxu, uyur deɣya, řqa tt uca ini as: ‘Ma aqa cem mliḥ? Ma aryaz nnem aqa-t mliḥ? Ma aḥenjir nnem aqa-t mliḥ?’” Uca nettat tenna: “Aqa-ten mliḥ!”
2KI 4:27 [Umi maca] dd-tusa ɣar weryaz n AREBBI x wedrar, tqebbeḍ nettat x iḍaren nnes. Jiḥazi yudef-dd din ḥima ad tt iɛarn ɣar uɣezdis, maca aryaz n AREBBI inna: “Aḥta as, maɣar řeɛmar nnes icḍen dayes u SIDI issnuffar xafi min xef u war d ayi issargeb ca.”
2KI 4:28 Tenna nettat: “Ma necc ttareɣ i sidi inu ijj n mmi? Ma war nniɣ necc: ‘War d ayi cemmet’?”
2KI 4:29 Inna netta i Jiḥazi: “Byes tajɛinna nnec, ksi taɣɣarct inu deg ufus nnec uca ṭṭef abrid! Mařa cek temmeřqid ca n yijj, war xas ttseǧam, u mařa iseǧem xak ḥed, war xas dd-ttarri ca! Sars taɣɣarct inu x uɣembub n uḥenjir!”
2KI 4:30 [Maca] yemmas n uḥenjir tenna: “[S tidett am] iddar SIDI u iddar řeɛmar inu, necc war xak ttḥeyyideɣ ca!” Netta ikkar, iḍfar i-tt.
2KI 4:31 Tuɣa Jiḥazi izwar deɣya zzatsen u issars taɣɣarct x uɣembub n uḥenjir, maca netta war iggi ca řḥess uřa d twarrit. [Xenni] iɛqeb ḥima ad xas iřqa, uca iḥaja as t, inna: “Aḥenjir war dd-ifiq.”
2KI 4:32 [Umi] dd-yusa Ilicaɛ ɣar taddart, tuɣa immut uḥenjir, immars x qama nnes.
2KI 4:33 Yudef netta ɣar wexxam, ibelleɛ tawwart awarni asen s tnayen idsen uca iẓẓuǧ i SIDI.
2KI 4:34 Xenni ibedd zzat i qama, iwḍa tiwa n uḥenjir uca issars netta aqemmum nnes x uqemmum nnes, tiṭṭawin nnes x tiṭṭawin nnes, ifassen nnes x ifassen nnes. Netta issbuzzeř [ammu] tiwa nnes uca teḥma arrimet n uḥenjir.
2KI 4:35 [Xenni] iɛqeb-dd, yuyur di taddart da d diha, igeɛɛed twařa nneɣnit uca issbuzzeř ixef nnes tiwa nnes. [Řexdenni] iɛḍes uḥenjir sebɛa n twařawin uca [xenni] yarzem uḥenjir tiṭṭawin nnes.
2KI 4:36 Iřaɣa-dd netta i Jiḥazi, inna: “Řaɣa-dd x Tcunamect!” Uca netta iřaɣa-dd xas uca tusa-dd nettat ɣares, uca inna [Ilicaɛ]: “Arbu mmim!”
2KI 4:37 Tudef nettat din, tewḍa ɣar iḍaren nnes uca yuḍar [as] [s uɣembub nnes] ɣar tammurt. [Xenni] teksi mmis uca teffeɣ ɣar barra.
2KI 4:38 [Umi] dd-iɛqeb Ilicaɛ ɣar Jiljal, tuɣa din řaẓ di temmurt u ayt n inabiyyen qqimen zzates. Inna netta i umsexxar nnes: “Egg marmita d tameqqrant u egg taḥrirt i ayt n inabiyyen.”
2KI 4:39 [Xenni] dd-iffeɣ ijjen [zzaysen] yuyur ɣar weḥwic barra, ḥima ad dd-yawi tibbi. Netta yufa ijj n wezbir n řexřa uca iřqeḍ-dd zzayes ařami iccur [ubeḥrur n] warruḍ nnes s texsact n řexřa. [Xenni] iɛqeb-dd uca iqess i-ten di marmita. Aqa nitni war tt ssinen.
2KI 4:40 [Xenni] farɣen aya i iryazen, ḥima ad ccen. Umi qqasen nitni zi teḥrirt-a, imsar, aqa nitni sɣuyen deg ujenna, řaɣan: “[A,] yeryaz n AREBBI, řmewt aqa-tt di marmita!” Uca nitni war zemmaren ad [zzayes] ccen.
2KI 4:41 Netta inna: “Awi ayi-dd [drus n] waren!” Netta issuyes i-t di marmita, inna: “Farɣem [aya] i řgens, ḥima ad ccen!” [Xenni] idweř war dinni ca war iḥři di marmita.
2KI 4:42 Yusa-dd ijj n weryaz zi Baɛl-Calica, yiwi-dd i weryaz n AREBBI aɣrum zi [ṣṣabet] tamenzut, ɛicrin n iɣrumen n imendi d řḥebb ibaryen [n imendi] deg ict n tecyart, uca netta inna: “Ewc [man aya] i řgens.”
2KI 4:43 Maca wanita inna: “Mammec t i ɣa ssarseɣ i mya n yeryazen?” Netta [maca] inna: “Ewc i-t i řgens ad t yecc, maɣar ammu i iqqar SIDI: ‘Ad ccen u ɛad ad iceṭṭ’.”
2KI 4:44 Netta issars asen [t] uca ccin nitni, u iceṭṭ xasen am mammec [tuɣa inna] wawař n SIDI.
2KI 5:1 Nuɛman, akumandar n řɛeskar n ujeǧid n Aram, tuɣa-t d ijj n weryaz ɣares ssumɛet zzat i wudem n sidis nnes u tuɣa ɣares ccan aṭṭas, maɣar zzayes i yiwi SIDI asenjem i Aram. Aryaz [nni] tuɣa d ijj n bu-teɣruḍt imeḥḍen, [maca] tuɣa dayes řbarṣ.
2KI 5:2 Tuɣa din bandiyyat zi Aram, iwyent-dd ict n tebřiɣt zi temmurt n Israil d tameḥbust. Tuɣa-tt [txeddem] i temɣart n Nuɛman.
2KI 5:3 Tenna i lallas: “Mři [tuɣa] sidi inu ɣar unabi di Samarya, [xenni] iři netta ad t issgenfa zi řbars nnes.”
2KI 5:4 [Xenni] yuyur wanita, ḥima ad t iḥaja i sidis nnes, inna: “Ammu d wammu i tessiweř tebřiɣt zi temmurt n Israil.”
2KI 5:5 [Xenni] inna ujeǧid n Aram: “Uyur din u necc ad ssekkeɣ ict n tebrat i ujeǧid n Israil.” Netta yuyur deg webrid uca iksi ɛecra talintat n nnuqart d setta-ařaf [ciqlu] n wureɣ d ɛecra n warruḍ icnan.
2KI 5:6 Netta issiweḍ tabrat i ujeǧid n Israil, [ammu i] yura: “Řexxu [xenni], xzar, mařa tiweḍ-dd tebrat-a ɣarek, aqa necc ssekkeɣ-dd ɣarek [ɛawed] amsexxar inu Nuɛman, maḥend ad t tessgenfid zi řbarṣ nnes.”
2KI 5:7 [Umi] iɣra ujeǧid n Israil tabrat, icarreg arruḍ nnes, iřaɣa: “Necc maɣar ma d AREBBI ařami zemmareɣ ad sseddareɣ ijj n umettin ařami netta dd-issekk weryaz-a ɣari, maḥend ad t ssgenfiɣ zi řbarṣ nnes? Iwa, ssnem, u xzarem, aqa netta yarezzu ayi řesbab waha!”
2KI 5:8 Umi isřa Ilicaɛ, aryaz n AREBBI, belli ajeǧid n Israil icarreg arruḍ nnes, imsar aqa netta issekk [ijj] ɣar ujeǧid, ḥima ad as yini: “Mayemmi tcarrged arruḍ nnec? Ejj i-t ad ɣari dd-yas, [ḥima] xenni netta ad issen, aqa din ijj n unabi di Israil.”
2KI 5:9 Ammu dd-yusa Nuɛman ak-d iysan d ukarru nnes uca ibedd ɣar tewwart n taddart n Ilicaɛ.
2KI 5:10 [Xenni] issekk Ilicaɛ ijj n ureqqas ɣares, iqqar: “Uyur u ssird ixef nnec sebɛa n twařawin di L’Urdun, [xenni] ad tedweř arrimet nnec teggenfa uca cek ad tiřid d amezdag.”
2KI 5:11 Iffugem Nuɛman, uca yuyur, iqqar: “Xzar, necc nniɣ deg ixef inu: ‘Netta ad iffeɣ ɣar barra, ad ibedd [din], maḥend ad iřaɣa Isem n SIDI, AREBBI nnes, uca ad issekk s ufus nnes amcan [i dayes iǧan řbarṣ] u ammu i ɣa iggenfa řbarṣ.’
2KI 5:12 Ma war iǧi Abana d Farfar, iɣezran n Dimacq, ḥsen x marra iɣezran n Israil? Ma war zemmareɣ ad dinni ssirdeɣ, ḥima ad zedgeɣ?” Netta inneqřeb uca yuyur, isɛar aṭṭas.
2KI 5:13 Imsexxaren nnes usin-dd ɣares, ssiwřen akides, nnan: “Baba, [mři] anabi nni ittar zzayek ca min iwɛaren, iři teggid t? I mařa inna xak ɛad: ‘Sird ixef nnec uca ad tdewřed cek tizdiged?’”
2KI 5:14 [Xenni] ihwa-dd ɣar L’Urdun uca isseɣḍeṣ ixef nnes sebɛa n twařawin di L’Urdun am mammec inna wawař n unabi n AREBBI uca [tedweř] arrimet nnes teggenfa am arrimet n ijj n uḥenjir u netta idweř izdig.
2KI 5:15 [Xenni] iɛqeb ɣar weryaz n AREBBI ak-d marra řɛeskar nnes uca yiweḍ [din], ibedd zzat i wudem nnes, inna: “Xzar, řexxu ssneɣ, aqa war iǧi AREBBI mani ma x marra tammurt mɣir di Israil waha. Xenni řexxu, ɛafek, ksi ict n tarzeft zeg umsexxar nnec!”
2KI 5:16 [Maca] netta inna: “[S tidett am] iddar SIDI wenni umi beddeɣ zzat i wudem nnes, necc war kessiɣ walu!” U netta issḥeccem i-t, ḥima ad iksi [ca], maca netta yugi.
2KI 5:17 Inna Nuɛman: “Mařa lla, iři xenni ad immewc i umsexxar nnec aṭṭas n ucař, anect [zemmaren] tnayen n iserdan ad arbun, maɣar amsexxar nnec war ittiwi ɛad taɣarṣt n wecmaḍ niɣ taɣarṣt i irebbiten inneɣni mɣir i SIDI waha.
2KI 5:18 [Maca] iři ad iɣfar SIDI i umsexxar nnec ta [waha], mařa sidi inu ad yadef ɣar zzawect n Rimmun ḥima ad ibendeq am ittɛemmed dinni x uɣiř inu, aqa necc xenni ad bendqeɣ [ammu] di zzawect n Rimmun. [Mařa] ad bendqeɣ [ammu] di zzawect n Rimmun, iři ad iɣfar SIDI tamesřact nni i umsexxar nnec.”
2KI 5:19 Inna as: “Uyur di řehna!” U netta isafar tammurt, iggʷej xas [ijj n webrid].
2KI 5:20 Inna Jiḥazi, amsexxar n Ilicaɛ, aryaz n AREBBI: “Xzar, sidi inu issɛizz x Naɛman, Aramiyu, maḥend ad iksi [ca] zeg ufus nnes zi min tuɣa i dd-yiwi netta. [S tidett am] iddar SIDI, necc ad t areddfeɣ deɣya uca ad zzayes ksiɣ ca!”
2KI 5:21 Jiḥazi yuyur, yardef Nuɛman. [Umi] Nuɛman iẓra, aqa netta yuzzeř awarni as, iḍra-dd zeg ukarru, maḥend akides imsagar, inna: “Mliḥ?”
2KI 5:22 Netta yarra-dd xas: “Mliḥ. Sidi inu issekk ayi-dd maḥend ad yini: ‘Aqa, ɣar řexxu ɛad usin-dd tnayen n iḥudriyyen zeg ayt n inabiyyen zeg idurar n Ifrayim. Ewc asen [xenni] ict n talint n nnuqart d tyuya n warruḍ icnan.’”
2KI 5:23 Inna Nuɛman: “Ɛafak, ksi zzayi tnayen talint n nnuqart.” Netta iḥeccem i-t u igga tnayen talint n nnuqart di tnayen n tecyarin uca iwca tnayen n warruḍ icnan i tnayen n imsexxaren nnes, inni ten yarbun ɣar zzat nnes.
2KI 5:24 [Umi] yiweḍ ɣar řgeɛɛdet, iksi ten zeg ifassen nsen uca innuffar i-ten di taddart. Ijja iryazen ad uyuren uca ffɣen nitni.
2KI 5:25 [Awarni man aya] yudef uca ibedd zzat i bab nnes. Ilicaɛ isseqsa t: “Manis dd-tusid, [a] Jiḥazi?” Uca netta yarra-dd: “Amsexxar nnec war dd-iffiɣ ca mani.”
2KI 5:26 [Maca] Ilicaɛ inna as: “Ma war tuɣi uř inu din iḥḍar umi dd-iḍra weryaz zeg ukarru nnes i umsagar akidek? Maɣar ma d řḥař ad tmenɛed nnuqart d warruḍ d tcejjura n zzitun d imarjaɛen n uḍiř d wuǧi d ifunasen d tfunasin d isemɣan d tiyya?
2KI 5:27 Řbarṣ n Nuɛman ad iřseq i řebda dayek u di zzariɛet nnec!” [Xenni] iffeɣ zi zzat i wudem nnes s řbarṣ, d acemřař am wedfeř.
2KI 6:1 Ayt n inabiyyen nnan i Ilicaɛ: “Xzar, amcan mani nzeddeɣ zzat i wudem nnec, iḥṣar i neccin.”
2KI 6:2 Ejj aneɣ ad nuyur ɣar L’Urdun u dinni qaɛ ijj zzayneɣ ad dd-yawi ijj n ukeccuḍ, maḥend ad negg ict n tzeddiɣt i neccin.” Netta inna: “Uyurem!”
2KI 6:3 Ijjen [zzaysen] maca inna: “Ɛafak, uyur ak-d imsexxaren nnec.” Netta inna: “Necc akidwem uyureɣ.”
2KI 6:4 [Xenni] yuyur akidsen. [Umi] dd-usin ɣar L’Urdun, zedmen ticejjura.
2KI 6:5 Řami izdem ijj ict n tcejjart, imsar, aqa [řeqḍeɛ n] wuzzař [n ccaqur] iwḍa deg waman uca netta iřaɣa, inna: “A sidi inu, [ccaqur] tuɣa ittwarḍeř!”
2KI 6:6 Aryaz n AREBBI inna: “Mani iwḍa?” [Umi] d as isscen amcan, iqess ijj n ukeccuḍ, inḍar i-t din u [ammu] yiwi-dd uzzař iggur sennej.
2KI 6:7 Inna netta: “Sgeɛɛed i-t-i-dd ɣarek!” [Xenni] isswiẓẓeḍ s ufus nnes uca iṭṭef i-t.
2KI 6:8 Ajeǧid n Aram immneɣ ak-d Israil uca imcawar ak-d imsexxaren nnes, inna: “Deg wemcan-in d win ad wteɣ iqiḍan i řɛeskar inu.”
2KI 6:9 [Maca] aryaz n AREBBI issekk [ijj] ɣar ujeǧid n Israil, inna: “Ḥḍa ixef nnec ad tekked x wemcan nni, maɣar din hwan ayt n Aram.”
2KI 6:10 Ajeǧid n Israil issekk [ireqqasen] ɣar wemcan i x tuɣa akides issiweř weryaz n AREBBI u i zi tuɣa i d as iɛřem wanita, uca igga ad ḥḍan din. [U man aya] war [imsar ca] ict n twařa niɣ tnayen n twařawin [waha].
2KI 6:11 Uř n ujeǧid n Aram ihaj x man aya u netta iřaɣa i imsexxaren nnes, inna asen: “Ma war tzemmarem kenniw ad ayi tinim man wen jar aneɣ ittraḥ ak-d ujeǧid n Israil?”
2KI 6:12 Ijjen zeg imsexxaren nnes inna: “Lla, sidi inu, ajeǧid! Maca Ilicaɛ, anabi wenni [iǧan] di Israil, issargeb ujeǧid n Israil awařen i tessawařed deg wexxam nnec n yiḍeṣ.”
2KI 6:13 Inna netta: “Uyurem uca xzarem mani ittiři netta. [Xenni] ad ssekkeɣ [iryazen inu], ad t ṭṭfen.” Xebbaren t, nnan: “Netta aqa-t di Dutan.”
2KI 6:14 [Xenni] issekk netta iysan d ikarruten d ijj n řɛeskar ameqqran. Nitni iwḍen din di ǧiřet uca nnḍen-dd i tendint.
2KI 6:15 Amsexxar n AREBBI ikkar ɣar tuffut uca iffeɣ ɣar barra, u xzar, ijj n řɛeskar tuɣa inneḍ i tendint s yeysan d ikarruten. [Xenni] inna as aḥudri: “A sidi inu, min ɣa negg?”
2KI 6:16 Netta inna: “War tteggʷed ca, maɣar inni ɣarneɣ aṭṭas x yinni ɣarsen.”
2KI 6:17 Ilicaɛ iẓẓuǧ, inna: “[A] SIDI, arzem as tiṭṭawin, [maḥend] ad iẓar!” U SIDI yarzem i umsexxar tiṭṭawin [ařami] itwařa. U xzar, adrar iccur s yeysan d ikarruten n tmessi i dd-innḍen i Ilicaɛ.
2KI 6:18 [Umi] ɣares dd-usin nitni, iẓẓuǧ Ilicaɛ i SIDI, inna: “Wwet maca řgens-a s tuddarɣeč!” Uca netta iwta ten s tuddarɣeč ɛlaḥsab awař n Ilicaɛ.
2KI 6:19 [Xas uca] inna asen Ilicaɛ: “Wa war iǧi d abrid nican u war teǧi d tandint nican. Ḍfarem ayi-dd! Necc ad kenniw nedheɣ ɣar weryaz nni x tarezzum!” U netta indeh i-ten ɣar Samarya.
2KI 6:20 Umi iwḍen nitni ɣar Samarya, imsar, aqa Ilicaɛ inna: “[A] SIDI arzem tiṭṭawin n iryazen-a, [maḥend] ad ẓaren!”. Uca yarzem asen SIDI tiṭṭawin ařami ẓrin. U xzar, aqa nitni [tuɣa aten] di řwesṭ n Samarya.
2KI 6:21 [Umi] ten iẓra, inna ujeǧid n Israil i Ilicaɛ: “Ma ad ten nɣeɣ, [a] baba?”
2KI 6:22 [Maca] wanita inna: “War ten neqq ca! Cek s yixef nnec, ma ad tenɣed inni tḥebbsed s ssif nnec d řqews nnec? Sars asen-dd aɣrum d waman maḥend ad ccen ad swen, uca xenni ad ɛeqben ɣar sidi nsen.”
2KI 6:23 Issewjed asen ijj n umensi d ameqqran uca nitni ccin, swin. [Awarni aya] yarxu asen uca ffɣen ɣar sidi nsen. [Xenni] war dd-usint bandiyyat n Aram ɛad di temmurt n Israil.
2KI 6:24 Awarni uya imsar, aqa Binhadad, ajeǧid n Aram, issmun marra řɛeskar nnes, iffeɣ, ḥima ad inneḍ i Samarya.
2KI 6:25 Imsar ijj n řaẓ d ameqqran di Samarya, maɣar xzar, nitni nnḍen as-dd ařami idweř ijj n uzeǧif n ijj weɣyuř isekkwa tmenyin n [uqiyyat n] nnuqart d yijj n arrbeɛ n ijj n řeqyas s řeɣbar n wedbir [idweř isekkwa] xemsa n [uqiyyat n] nnuqart.
2KI 6:26 Umi iɛdu ujeǧid n Israil x řḥiḍ, imsar, belli třaɣa as-dd ict n temɣart, tenna: “Ewc ayi-dd afus, a sidi inu ajeǧid!”
2KI 6:27 Netta inna: “[Mařa] SIDI war d am iwci afus, mammec necc d am ɣa wceɣ afus? Ma ad yiři [s ca] zeg unedrar niɣ zi tsirt n uḍiř?”
2KI 6:28 Inna as ujeǧid: “Min cek yuɣin?” Nettat tenna: “Tamɣart-a tenna ayi: ‘Awi-dd mmim, ḥima ass-a ad t necc u mmi ad t necc xenni tiwecca.’”
2KI 6:29 [Ammu] neccin nᵉssnenna mmi uca necca i-t. [Maca] řami d as nniɣ tiwecca nnes: ‘Ewc [řexxu] mmim, ḥima ad t necc!’, řexdenni tessnuffar nettat mmis.”
2KI 6:30 Umi isřa ujeǧid awařen n temɣart-a, icarreg arruḍ nnes uca [ammu i] yuyur x řḥiḍ uca iẓra řgens illa aqa yarḍ ict n txancet [n wecḍan] x arrimet nnes.
2KI 6:31 Netta inna: “Ejj ad ayi igg AREBBI ta d ta uca ad dayes yarni ɛad, mařa iqqim uzeǧif n Ilicaɛ, mmis n Cafat, xas ař ass-a!”
2KI 6:32 Ilicaɛ iqqim di taddart nnes d imeqqranen qqimen ɣares. Tuɣa [ujeǧid] issekk ijj n weryaz ɣar zzat nnes, maca qbeř ma yiweḍ ureqqas ɣares, inna [Ilicaɛ] i imeqqranen: “Ma teẓrim aqa wanita, mmis n ijj n uqettař, issekk-dd wenni d ayi ɣa iqessen azeǧif? Ḥḍam řexxu, xmi dd ɣa yas ureqqas, bellɛem tawwart u sbeddem t ɣar tewwart! Ma war [ittwaseř] řḥess n iṣuraf n sidis awarni as?”
2KI 6:33 Řami tuɣa akidsen issawař ɛad, xzar, ihwa-dd ureqqas ɣares. Uca ajeǧid inna: “Xzar, tuɛeffna-ya zi SIDI. Min ɣa rajiɣ ɛad [xenni] zi SIDI?”
2KI 7:1 [Xenni] inna Ilicaɛ: “Sřem i wawař n SIDI! Ammu i iqqar SIDI: ‘Tiwecca ɣar řweqt-a ad teswa ijj n řeqyas n waren azdad ɣar tewwart n Samarya mɣir ijj n ciqlu u ad mmenzen uřa d tnayen n řeqyas n imendi i yijj n ciqlu [waha]!”
2KI 7:2 Ijj n uneɣraf [n řɛeskar], wenni x uɣiř nnes iɛemmed ujeǧid, yarra-dd x weryaz n AREBBI: “Xzar, waxxa mařa SIDI igga řekwaza deg ujenna, ma izemmar aya ad imsar?” [Maca] netta inna: “Xzar, ad t tẓared s tiṭṭawin nnec, maca war zzayes tᵉttetted.”
2KI 7:3 Tuɣa din arebɛa n yeryazen zzat i wadaf n tewwart. Nnan ijj i wenneɣni: “Mayemmi ɣa neqqim da ař ɣa nemmet?
2KI 7:4 Mařa ad nini: ‘Ejj aneɣ ad nadef ɣar tendint!’, xenni iǧa řaẓ di tendint u neccin ad dayes nemmet. U mařa neqqim neccin da, ad nemmet [ɛawed]. Xenni řexxu, ejj aneɣ ad neffeɣ ad newḍa deg ifassen n řmargeḥ n řɛeskar n Aram. Mařa nitni jjin aneɣ neddar, ad neqqim neddar, u mařa nitni nɣin aneɣ, [xenni] ad nemmet.”
2KI 7:5 Nitni kkaren di tbambast, ḥima ad uyuren ɣar řmargeḥ n řɛeskar n Aram. [Maca umi] udfen nitni ɣar ṭṭarf n řmargeḥ n řɛeskar n Aram, war din tuɣi uřa d ijjen.
2KI 7:6 Maɣar Sidi ijja řɛeskar n Aram ad iseř i yijj n ujarri n ikarruten d ijj n ddriz n iysan d ǧɣa n ijj n řɛeskar d ameqqran, [ařami] nitni nnan ijjen i wenneɣni: “Xzar, ajeǧid n Israil icra d iḥarrec-dd xaneɣ ijeǧiden n Iḥittiyyen d ijeǧiden n Imiṣriyyen.”
2KI 7:7 Kkaren uca arewřen di tbambast uca jjin iqiḍan nsen d yeysan nsen d yeɣyař nsen uřa d řmargeḥ n řɛeskar am mammec ten tuɣa, uca arewřen maḥend ad ssnejmen řeɛmar nsen.
2KI 7:8 [Řami] dd-iwḍen ayt n bu-řbarṣ ɣar ṭṭarf n řmargeḥ n řɛeskar, udfen ɣar ijj n uqiḍun, ccin, swin u iwyen ssenni nnuqart d wureɣ d warruḍen uca ffɣen, ssnuffaren aya. [Awarni man aya] ɛeqben-dd, udfen ɣar ijj n uqiḍun nneɣni uca iwyen uřa ssenni [ca], uca ffɣen, ssnuffaren aya [ɛawed].
2KI 7:9 [Xenni] nnan i wayawya: “Neccin war nᵉttegg min iǧan nican. Ass-a d ijj n wass n řexbar aṣebḥan u neccin nesseɣd. [Mařa] nraja [da] ař i ɣa iffu řḥař, ad aneɣ teřqef řmuɛṣiyyet. [Xenni] řexxu, asem-dd, ejj aneɣ ad nuyur, ad t nɛawed di taddart n ujeǧid.”
2KI 7:10 Nitni iwḍen [din], řaɣan x uɛessas n tewwart n tendint, ḥajan asen, nnan: “Neccin nudef ɣar řmargeḥ n řɛeskar n Aram, u xzar, war din uřa d ijj, war nesři i ca n řḥess n yewdan, mɣir iysan tuɣa qqnen d yeɣyař tuɣa carfen, d iqiḍan am mammec [ǧan].”
2KI 7:11 Iřaɣa x iɛessasen n tewwart uca ssiwḍen nitni [areqqas] ɣar daxeř n taddart n ujeǧid.
2KI 7:12 Ikkar ujeǧid di ǧiřet, inna i imsexxaren nnes: “Necc ad awem iniɣ min akidneɣ i ɣa yegg Aram. Nitni ssnen, aqa neccin d ayt n bu-ǧuẓ. [X uyenni] ffɣen zi řmargeḥ n řɛeskar, ḥima ad nuffaren deg iyyar, qqaren: ‘Mařa nitni ad ffɣen zi tendint, ad ten neṭṭef ddaren uca ad nadef ɣar tendint.’”
2KI 7:13 Ijjen zeg imsexxaren yarra-dd, inna: “Ejj [iryazen] ad ksin xemsa n iysan nni ɛad din iǧan, inni iqqimen di tendint, [u xenni] ad nẓar ma ad asen imsar am waṭṭas n ayt n Israil inni da iqqimen, [niɣ] am waṭṭas n ayt n Israil inni ittwahellken. Ejj aneɣ ad ten nessekk uca xenni ad nẓar [min i ɣa yiři].”
2KI 7:14 Ksin nitni tnayen n iysan n tazřa. Ajeǧid issekk i-ten awarni i řɛeskar n Aram, inna: “Uyurem, texzarem!”
2KI 7:15 Nitni ḍfaren ten ař L’Urdun, u xzar, abrid marra inti s warruḍ d řeḥwayej nni immenḍaren ayt n Aram am tuɣa ttqeǧiqen [di tarewřa] nsen. Ireqqasen ɛeqben u ssiwḍen řexbar i ujeǧid.
2KI 7:16 [Xenni] iffeɣ řgens [zi tendint] uca keccḍen řmargeḥ n řɛeskar n Aram uca temmenz ijj n řeqyas n waren azdad s yijj n ciqlu d tnayen n řeqyas n imendi s yijj n ciqlu ɛlaḥsab awař n SIDI.
2KI 7:17 Igga ujeǧid aneɣraf [n řɛeskar] wenni x ittcař, ḥima ad yiři x tewwart, [maca] iɛfes xas řgens di tewwart ařami immut am mammec tuɣa inna weryaz n AREBBI, wenni issiwřen umi tuɣa ɣares dd-ihwa ujeǧid.
2KI 7:18 Aqa imsar am mammec tuɣa issiweř weryaz n AREBBI i ujeǧid, i innan: “Tiwecca ɣar řweqt-a [ad mmenzen] ɣar tewwart n Samarya tnayen n řeqyas n imendi s yijj n ciqlu d yijj n řeqyas n waren azdad s yijj n ciqlu.”
2KI 7:19 Tuɣa yarra-dd uneɣraf [n řɛeskar] x weryaz n AREBBI, inna: “Xzar, waxxa mařa SIDI igga řekwaza deg ujenna, ma izemmar ad imsar uya?” U netta tuɣa inna: “Xzar, ad t tẓared s tiṭṭawin nnec, maca war zzaysen tᵉttetted.”
2KI 7:20 Ammu i d as temsar, [maɣar] řgens iɛfes xas di tewwart. [ařami] immut.
2KI 8:1 Řami issiweř Ilicaɛ ak-d temɣart tenni umi tuɣa issfaq mmis, inna [as]: “Kkar, ffeɣ, cem ak-d twacunt nnem u zdeɣ am yict n tbarranect mani ma tzemmared ad tzedɣed, maɣar SIDI yura ict n řeḥṣaret n řaẓ tenni i ɣa yekken ɛawed sebɛa n iseggʷusa x temmurt.”
2KI 8:2 Uca tekkar temɣart, tegga ɛlaḥsab awař n weryaz n AREBBI. Nettat teffeɣ ak-d twacunt nnes uca tezdeɣ sebɛa n iseggʷusa di temmurt n Ifilisṭiniyyen.
2KI 8:3 Awarni sebɛa n iseggʷusa, imsar belli tamɣart teɛqeb-dd zi temmurt n Ifilisṭiniyyen. Nettat teffeɣ, ḥima ad tᵉttar twiza n ujeǧid x taddart nnes d yeyyar nnes.
2KI 8:4 Ajeǧid tuɣa ittḥarreḍ ak-d Jiḥazi, amsexxar n weryaz n AREBBI, inna: “Ḥaja ayi marra timesřayin timeqqranin i igga Ilicaɛ.”
2KI 8:5 Imsar am tuɣa ittɛawad wanita i ujeǧid x mammec dd-issfaq Ilicaɛ ijj n umettin, xzar, tusa-dd temɣart nni umi dd-issfaq mmis, ḥima ad tᵉttar twiza n ujeǧid x taddart nnes d yeyyar nnes. [Xenni] inna Jiḥazi: “[A] sidi inu ajeǧid, ta d tamɣart d wa d mmis i dd-issfaq Ilicaɛ ɣar tudart.”
2KI 8:6 Ajeǧid isseqsa tamɣart u nettat tḥaja as tt-i-dd. [Xas uca] iwca as ujeǧid ijj n umsexxar amcenneɛ, inna: “Ḥḍat ad ɣares ittwarr marra min iǧan nnes uřa d marra ṣṣabet n iyyar zeg wass nni di tejja nettat tammurt ař ass-a.”
2KI 8:7 Ilicaɛ yusa-dd ɣar Dimacq [umi] Binhadad, ajeǧid n Aram, ihřec. Ḥajan as man aya, nnan: “Aqa aryaz n AREBBI yusa-dd danita.”
2KI 8:8 [Xas uca] inna ujeǧid i Ḥazayil: “Awi-dd akidek ict n terzeft, ruḥ ad teřqid aryaz n AREBBI uca seqsa zzayes SIDI, ad tinid: “Ma necc ad ggenfiɣ zi řehřac-a?”
2KI 8:9 Ḥazayil yuyur ad t iřqa uca yiwi akides ict n terzeft, ɛřam kuř n min iǧan d lemliḥ zi Dimacq, ijj n ddqeř n arebɛin n iřeɣman. Netta yiweḍ u ibedd zzates, inna: “Mmic Binhadad, ajeǧid n Aram, issekk ayi-dd ɣarek, maḥend ad sseqsiɣ: ‘Ma ad ggenfiɣ zi řehřac-a?’”
2KI 8:10 Inna as Ilicaɛ: “Uyur, ad tinid: ‘Cek war teggenfid ca kuřci!’ SIDI isscen ayi, aqa netta ad immet nican.”
2KI 8:11 Udem nnes ibɛar u isseqseḥ dayes tamuɣři ařami war issin min ɣa yegg. [Xenni ibda] weryaz n AREBBI ittru.
2KI 8:12 [Xenni] inna Ḥazayil: “Mayemmi ittru sidi inu?” Netta inna: “Minzi necc ssneɣ řeḥřiq i d ɣa tawyed cek i ayt n Israil. Cek ad teqqded timessi i lqelɛat nsen, ad tenɣed iḥudriyyen nsen s ssif, ad třebzed iḥenjiren nsen u timɣarin nsen i iksin s ddeyset ad asent tcarrged aɛeddis.”
2KI 8:13 Ḥazayil inna: “Maɣar min iɛna umsexxar nnec, aqzin nni, aqa netta izemmar ad igg řḥajjet d tameqqrant am tanita?” Ilicaɛ inna: “SIDI isscen ayi-dd belli ad tiřid d ajeǧid x Aram.”
2KI 8:14 [Xenni] iggʷej netta x Ilicaɛ, uca yusa-dd ɣar sidis. Wanita inna as: “Min d ac inna Ilicaɛ?” U netta yarra-dd: “Netta inna ayi: ‘Aqa cek ad teggenfid!’”
2KI 8:15 Tiwecca nnes imsar aqa iksi netta ict n malta, isseɣḍeṣ i-tt deg waman uca issars i-tt x uɣembub nnes ařami immut. Uca idweř Ḥazayil d ajeǧid deg wemcan nnes.
2KI 8:16 Deg useggʷas wiss xemsa n Yuram, mmis n Axab, ajeǧid n Israil, umi tuɣa Yahucafat d ajeǧid n Yahuda, idweř Yahuram, mmis n Yahucafaṭ, d ajeǧid n Yahuda.
2KI 8:17 Netta [tuɣa] ɣares tnayen u-třatin n iseggʷusa umi idweř d ajeǧid. Netta iḥkem tmenya n iseggʷusa di Urcalim.
2KI 8:18 Netta yuyur deg webrid n ijeǧiden n Israil, am mammec tuɣa tegga taddart n Axab, maɣar yeǧis n Axab tedweř d tamɣart nnes. Netta igga min iǧan d aɛeffan di tiṭṭawin n SIDI.
2KI 8:19 [Maca] SIDI war ixs ad yareddeǧ Yahuda di ṭṭweɛ n umsexxar nnes Dawud, am mammec d as tuɣa inna, ad as iwc řebda ijj n řefnar zzat i tiṭṭawin nnes di ṭṭweɛ n warrawen nnes.
2KI 8:20 Deg wussan nnes izemmar Idum ad ixtutteř zeg ifassen n Yahuda umi ɣewwɣen, u nitni ggin ijj n ujeǧid x yixef nsen.
2KI 8:21 [Xas uca] iɛdu Yahuram ak-d marra ikarruten [n umenɣi] nnes ɣar Ṣaɛir. Uca imsar aqa ikkar s ǧiřet uca ihjem x ayt n Idum inni tuɣa i d as dd-innḍen i netta u i imeqqranen n ikarruten [n umenɣi], [maca] řgens yarweř ɣar iqiḍan nnes.
2KI 8:22 [S uyenni], xtuttřen ayt n Idum s uɣewweɣ zi jar ifassen n Yahuda ař ass-a. Di řweqt nni beɛda iɣewweɣ uřa d Libna.
2KI 8:23 Imezruyen i iqqimen n Yahuram, d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 8:24 Yahuram igga ad yareyyeḥ jar řejdud nnes. Netta ittwanḍeř jar řejdud nnes di tendint n Dawud. Mmis, Axazya, idweř d ajeǧid deg wemcan nnes.
2KI 8:25 Deg useggʷas wiss tenɛac n Yuram, mmis n Axab, ajeǧid n Israil, ibda Axazya, mmis n Yahuram, ajeǧid n Yahuda, ad iḥkem.
2KI 8:26 Axazya [tuɣa] ɣares tnayen u-ɛicrin n iseggʷusa umi idweř d ajeǧid. Netta iḥkem ijj n useggʷas di Urcalim. Yemmas qqaren as Ɛatalya, yeǧis n Ɛumri, ajeǧid n Israil.
2KI 8:27 Netta yuyur deg webrid n taddart n Axab u igga min iǧan d aɛeffan di tiṭṭawin n SIDI, am taddart n Axab, maɣar tuɣa d aḍeggʷař n taddart n Axab.
2KI 8:28 Iffeɣ [Axazya] ak-d Yuram, mmis n Axab, i umenɣi ak-d Ḥazayil, ajeǧid n Aram, ɣar Ramut di Jilɛad, [maca] ayt n Aram ɣeřben x Yuram.
2KI 8:29 [Xenni] yareggʷeḥ ujeǧid Yuram, maḥend ad yarzu di Yazraɛil agenfu zeg iyezzimen nni i d as ggin [ayt n] Aram umi immneɣ netta di Ramut ak-d ujeǧid nsen Ḥazayil, ajeǧid n Aram. Axazya, mmis n Yahuram, ajeǧid n Yahuda, ihwa-dd [din], ḥima ad issijj x Yuram, mmis n Axab, di Yazraɛil, umi tuɣa ihřec netta.
2KI 9:1 [Xenni] anabi Ilicaɛ iřaɣa-dd i yijjen zeg ayt n inabiyyen, inna as: “Byes, ksi aɣarraf-a n zzect deg ufus nnec uca tuyured ɣar Ramut [di] Jilɛad.
2KI 9:2 [Xmi] dinni i ɣa tawḍed, arzu x Yahu, mmis n Yahucafaṭ, mmis n Nimci. Adef [ɣares] uca ejj i-t ad dd-ikkar zi řwesṭ n yaytmas, ndeh i-t ɣar ijj n wexxam iṭṭurfiy mliḥ.
2KI 9:3 [Xenni] ksi aɣarraf n zzect, zeǧeɛ i-t x uzeǧif nnes uca ini: ‘Ammu i iqqar SIDI: Necc dehneɣ cek d ajeǧid x Israil.’ [Xenni] arzem tawwart, arweř, war ttriji ɛad ktar!”
2KI 9:4 Aḥudri, amsexxar n unabi, yuyur deg webrid ɣar Ramut [di] Jilɛad.
2KI 9:5 [Umi] [din] dd-yiweḍ, xzar, ikumandaren n řɛeskar tuɣa qqimen dinni. Netta inna: “Necc ɣari ijj n wawař i cek, [a] řqebṭan. Yahu isseqsa: “I man wen zzayneɣ marra?” Netta inna: “I cek, [a] řqebṭan!”
2KI 9:6 [Xenni] ikkar Yahu, yudef ɣar taddart. U netta ifarreɣ as zzect x uzeǧif nnes, inna as: “Ammu i iqqar SIDI, AREBBI n Israil: ‘Necc dehneɣ cek d ajeǧid x řgens n SIDI, x Israil.
2KI 9:7 Cek ad tewted taddart n Axab, sidi nnec, u necc ad ttareɣ zeg ufus n Izabil idammen n imsexxaren inu, inabiyyen, uřa d idammen n marra imsexxaren n SIDI.
2KI 9:8 Marra taddart n Axab ad tᵉttwakkes, u Necc ad qḍiɣ zi taddart n Axab marra wi t itteggen x řḥiḍ, [am] wenni ittwaṭṭfen, [am] wenni umi jjin di Israil.
2KI 9:9 Necc ad arreɣ taddart n Axab amecnaw taddart n Yarubɛam, mmis n Nabaṭ, u am taddart n Baɛca, mmis n Axiya.
2KI 9:10 Iṭan ad ccen Izabil deg iyyar n Yazraɛil uca war ittiři uřa d ijj wenni tt i ɣa ineḍřen.” [Xenni] yarzem netta tawwart uca yarweř.’”
2KI 9:11 Umi dd-iffeɣ Yahu ɣar barra ɣar imsexxaren n sidis, nnan as: “Aqa cek mliḥ? Mayemmi i ɣarek dd-yusa ubuhaři-ya?” Netta yarra-dd xasen: “Kenniw tessnem aryaz d řhard nnes!”
2KI 9:12 [Maca] nitni nnan “D ixarriqen, ini aneɣ [t]!” [xenni] inna: “Ammu d wammu i kidi issiweř, inna: ‘Ammu i iqqar SIDI: Necc dehneɣ cek d ajeǧid x Israil.’”
2KI 9:13 [Řexdenni] qeǧqen u kuř ijj iksi arruḍ nnes uca issars i-t sadu [iḍaren] nnes x tareddifin n ddruj uca suḍen deg uyicc n icarri, nnan: “Yahu d ajeǧid!”
2KI 9:14 Yahu, mmis n Yahucafaṭ, mmis n Nimci, igga ijj n řɛahd ḍidd Yuram. Yuram, netta [jmiɛ] ak-d marra Israil, tuɣa iḥḍa x Ramut [di] Jilɛad arendad n wudem n Ḥazayil, ajeǧid n Aram.
2KI 9:15 [Maca] ajeǧid Yuram yareggʷeḥ-dd, maḥend ad yarzu di Yazraɛil agenfu zeg iyezzimen i d as tuɣa ggin [ayt n] Aram, umi immneɣ ak-d Ḥazayil, ajeǧid n Aram. Yahu inna: “Mařa kenniw tᵉttafqem, [xenni] war ttejjim ad yarweř uřa d ijj zi tendint, ad yuyur maḥend ad issiweḍ řexbar-a ɣar Yazraɛil.”
2KI 9:16 [Xenni] inya [deg ukarru nnes], indeh ɣar Yazraɛil, maɣar dinni i tuɣa Yuram. Axazya, ajeǧid n Yahuda, tuɣa ihwa-dd, ḥima ad issijj x Yuram.
2KI 9:17 Aɛessas ibedd x ṣṣumɛet di Yazraɛil uca iẓra Yahu yusa-dd, inna: “Necc ttwařiɣ ijj n uhimur.” [Xenni] inna Yuram: “Awi-dd ijj n bu-uyis uca ssekk i-t-i-dd i umsagar akidsen, ad yini: “Ma d řehna [min xef dd-tusid]?”
2KI 9:18 Bu-uyis inya, ḥima ad t iřqa, inna: “Ammu i iqqar ujeǧid: ‘Ma d řehna [min xef dd-tusid]?’” [Maca] Yahu yarra-dd [xas]: “Mani cek icqa řehna? As-dd ɣar ḍeffar inu.” Aɛessas iɛřem [aya], inna: “Amsexxar yiweḍ ɣarsen, [maca] war dd-iɛqib ca.”
2KI 9:19 Issekk ujeǧid ijj n bu-uyis wiss tnayen. [Umi] dd-yusa wanita ɣarsen, inna: “Ammu i iqqar ujeǧid: ‘Ma d řehna [min xef dd-tusid]?’” [Maca] Yahu yarra-dd [xas]: “Mani cek icqa řehna. As-dd ɣar ḍeffar inu.”
2KI 9:20 Aɛessas iɛřem [s man aya] ɛawed: “Netta yiweḍ i-ten, [maca] war dd-iɛqib ca u mammec ineddeh ayis, igga am mammec ittegg Yahu, mmis n Nimci, maɣar netta ineddeh am ineddeh ijj n ubuhaři.”
2KI 9:21 [Xenni] inna Yuram: “Ḥezzem akarru!” Ḥezzmen akarru nnes u Yuram, ajeǧid n Israil, iffeɣ ak-d Axazya, ajeǧid n Yahuda, nedhen kuř ijj akarru nnes. Nitni ffɣen i umsagar ak-d Yahu uca ufin t ɣar yeyyar n Nabut, Ayazraɛili.
2KI 9:22 Imsar umi iẓra Yuram Yahu, inna: “Ma d řehna [i xef dd-tusid], [a] Yahu?” [Maca] wanita yarra-dd: “Mana řehna-ya min ɣa yekk farq-ccɣeř n yemmac Izabil d tseḥḥarin nnes [ammu] s waṭṭas?”
2KI 9:23 Inneqřeb Yuram, ḥima ad yarweř, uca inna i Axazya: “Tamenziwt, Axazya!”
2KI 9:24 Maca Yahu imneɛ řqews nnes deg ufus uca iřqef Yuram [s fřitca] jar iɣaǧen nnes. Fřitca tesnuqqeb qaɛ uř nnes uca iwḍa netta deg ukarru nnes.
2KI 9:25 [Xenni] inna Yahu i Bidkar, aneɣraf nnes [n řɛeskar]: “Ksi t uca nḍar i-t di tesɣart n yeyyar n Nabut, Ayazraɛili. Ɛqeř, necc d cek, ijj ɣar uɣezdis n wenneɣni, aqa nedhen [x ikarruten nneɣ] awarni i babas Axab umi xas icetca SIDI ammu, [inna]:
2KI 9:26 ‘S tidett am ẓriɣ iḍennaḍ idammen n Nabut d iḥenjiren nnes, iqqar SIDI, ammu i zzayek ten ɣa xeřfeɣ x yeyyar-a, issawař SIDI.’ Xenni řexxu, ksi t uca nḍar i-t deg iyyar ɛlaḥsab awař n SIDI.”
2KI 9:27 [Umi] Axazya, ajeǧid n Yahuda, iẓra [aya], iṭṭef abrid ɣar Bayt-Hagan. Yahu iḍfar i-t u [řami yiweḍ] ɣar teysart n Jur nni iǧan ɣar Jibliɛam, inna: “Wwet i-t uřa d netta x ukarru!” [Xenni] yarweř netta ɣar Majiddu uca immut din.
2KI 9:28 Imsexxaren nnes iwyen t [x ukarru] ɣar Urcalim uca neḍřen t deg wenḍeř nnes jar řejdud nnes di tendint n Dawud.
2KI 9:29 Deg useggʷas wiss ḥiṭac n Yuram, mmis n Axab, tuɣa idweř Axazya d ajeǧid x Yahuda.
2KI 9:30 [Xenni] yusa-dd Yahu ɣar Yazraɛil. [Řami] tt tesřa Izabil, tkeḥḥeř tiṭṭawin nnes, tzewweq acuwwaf nnes uca texzar zi řkazi ɣar swadday.
2KI 9:31 [Umi] dd-yudef Yahu zi tawwart, tenna: “Ma d řehna [i xef dd-tusid], Zimri, [a cek] wenni inɣin sidis?”
2KI 9:32 Netta ixzar ɣar řkazi sennej, inna: “Wi akidi iǧan? Man Wen?” [Xenni] xzaren tnayen niɣ třata n imsexxaren icennɛen ɣares [din] swadday.
2KI 9:33 Netta inna [asen]: “Nḍarem tt-i-dd swadday!” Nitni nḍaren-tt-i-dd swadday ařami idammen nnes ttwaruccen x řḥiḍ u x yeysan, u netta iřbez i-tt.
2KI 9:34 Netta yudef uca icca, iswa. [Awarni uya] inna: “Xzarem ɣar tmexziwt nni u neḍřem tt, maɣar nettat d yeǧis n ujeǧid.”
2KI 9:35 Nitni uyuren, ḥima ad tt neḍřen, [maca] nitni war tt ufin ca mɣir taceqquft n uzeǧif d iḍaren d ifassen waha.
2KI 9:36 [Umi] dd-ɛeqben, ɛawden as [t] u netta yarra-dd: “Wa d awař n SIDI nni issiwiř s uqemmum n umsexxar nnes, Ilicaɛ Aticbi. Netta inna: ‘X yeyyar n Yazraɛil iṭan ad ccen aysum [n řxecbet] n Izabil.
2KI 9:37 Řxecbet n Izabil ad tiři am řeɣbar x yeyyar deg weḥwic n Yazraɛil, ař ɣa taf war din wi ɣa inin: Ta d Izabil.’”
2KI 10:1 Axab tuɣa ɣares sebɛin n iḥenjiren di Samarya. Yahu yura tibratin, issekk [i-tent] ɣar Samarya i imeqqranen n Yazraɛil, i imɣaren u i yinni yarebban [iḥenjiren n] Axab. [Daysent] inna:
2KI 10:2 “Mařa řexxu tabrat-a tusa-dd ɣarwem, [am] ɣarwem iḥenjiren n siditwem řa d ikarruten d yeysan, d ict n tendint ifaryen d řesnaḥ,
2KI 10:3 arzum [xenni] x yinni iṣebḥen d inni imeḥḍen qaɛ jar iḥenjiren n siditwem u sɣimem [t] x řɛarc n babas u wtem di ṭṭweɛ n taddart n siditwem.”
2KI 10:4 [Maca] nitni dewřen tteggʷeden aṭṭas, nnan: “Xzar, tnayen n ijeǧiden war zemmaren ad qqimen bedden zzates, mammec [i ɣa nzemmar neccin] ad neqqim nbedd?”
2KI 10:5 Inni iǧan x taddart u x tendint, imɣaren d yinni yarebban [iḥenjiren n Axab], ssekken [ijj n ureqqas] ɣar Yahu, nnan: “Neccin d imsexxaren nnec, u marra min d aneɣ ɣa tinid, ad [t] negg. Neccin war nᵉttegg uřa d ijj d ajeǧid. Egg min tᵉttwařid nican di tiṭṭawin nnec.”
2KI 10:6 [Xenni] yura ɣarsen ict n tebrat i twařa wiss tnayen, inna: “Mařa aqa kenniw ɣar uɣezdis inu, ad tesřem ɣar min ɣa iniɣ, ksim [xenni] izeǧifen n iḥenjiren n siditwem, u asem-dd tiwecca ammu ɣar řweqt-a ɣari di Yazraɛil.” Iḥenjiren n ujeǧid, sebɛin n yeryazen, [tuɣa zeddɣen] ɣar imcennɛen n tendint, inni ten yarebban.
2KI 10:7 Umi ɣarsen dd-tiweḍ tebrat, imsar, belli nitni ṭṭfen iḥenjiren n ujeǧid, nɣin ten [marra], sebɛin n yeryazen. Nitni ggin izeǧifen nsen di řkurbat uca ssekken tent ɣares ɣar Yazraɛil.
2KI 10:8 Yusa-dd umsexxar, issiweḍ areqqas, inna: “Aqa iwyen-dd izeǧifen n iḥenjiren n ujeǧid.” Netta yarra-dd: “Sarsem ten ař tiwecca di tnayen n iɛurrac ɣar wadaf n tewwart.”
2KI 10:9 Ɣar tiwecca, umi iffeɣ ɣar barra, imsar, aqa ibedd [din], inna i marra řgens: “Kenniw d imseggaden. Xzarem, d necc i iggin ict n tmeɛmuč x sidi inu u nɣiɣ t. [Maca] wi inɣin marra ina?
2KI 10:10 Snem, aqa war iweṭṭi ɣar temmurt uřa d ijj n wawař n SIDI nni inna SIDI ḍidd i taddart n Axab, maɣar SIDI igga min tuɣa inna s uqemmum n umsexxar nnes Ilicaɛ.”
2KI 10:11 Yahu inɣa marra wi iqqimen zi taddart n Axab di Yazraɛil uřa d marra imcennɛen nnes d imeddukkař nnes d ikehhanen nnes, ařami war ijji ad zzayes iqqim uřa d ijj n umarweř.
2KI 10:12 [Xenni] ikkar uca iṭṭef abrid ɣar Samarya. Umi t tuɣa netta deg webrid, [imsar di] taddart n umeřqi n imeksawen,
2KI 10:13 aqa immeřqa Yahu ak-d awmaten n Axazya, ajeǧid n Yahuda, inna: “Min teɛnam kenniw?” Nitni arrin-dd: “Neccin d awmaten n Axazya u nehwa-dd, ḥima ad nseǧem x iḥenjiren n ujeǧid d iḥenjiren n tjeǧidt.”
2KI 10:14 [Xenni] inna: “Ṭṭfem ten ddaren!” Ṭṭfen ten ddaren u nɣin ten ɣar wanu n taddart n imeksawen. [Tuɣa-ten] di tnayen u arebɛin n yeryazen. War ijji uřa d ijj zzaysen iddar.
2KI 10:15 Netta iffeɣ ssenni uca yufa Yunadab, mmis n Rikab, wenni dd-iffɣen i umsagar akides. Netta iseǧem xas, inna as: “Ma uř nnec iseggem [akidi] am mammec iseggem wuř inu akidek?” Yunadab yarra-dd xas: “Amenni, amenni! Ewc [ayi-dd] afus nnec.” Netta iwca as afus uca ijja i-t ad dd-iniy ɣares deg ukarru.
2KI 10:16 Netta inna: “As-dd akidi uca ad tẓared asam inu i SIDI.” [Ammu i] jjin t ad dd-iniy akides deg ukarru.
2KI 10:17 [Umi] yiweḍ ɣar Samarya, inɣa netta marra inni tuɣa iqqimen n Axab di Samarya, ařami t iqḍa qaɛ am mammec inna wawař n SIDI nni tuɣa inna i Ilicaɛ.
2KI 10:18 Yahu issmun marra řgens uca inna asen: “Axab tuɣa isexxar i Baɛal cwayt, [maca] Yahu ad as isexxar aṭṭas [ɛad].
2KI 10:19 Xenni řexxu, řaɣam-dd x marra inabiyyen n Baɛal d marra imsexxaren nnes d marra ikehhanen nnes, [maḥend ad] ɣari [dd-asen]. Ḥḍam aqa ad iqqim ḥed, minzi ɣari ict n tɣarṣt d tameqqrant i Baɛal. Marra wi ɣa iɣaben, war ittɣimi iddar.” Yahu [maca] igga ta s tḥraymect, maḥend ad iqḍa x imsexxaren n Baɛal.
2KI 10:20 [Xas uca] inna Yahu: “Sqeddsem ijj n umuni ifarzen i Baɛal!” Uca nitni barrḥen i man aya.
2KI 10:21 Issekk Yahu [ireqqasen] di marra Israil u marra imsexxaren n Baɛal usin-dd, war iqqim uřa d ijj war dd-yusi. Nitni udfen ɣar zzawect n Baɛal ařami teccur zzawect n Baɛal zi ṭṭarf ař ṭṭarf.
2KI 10:22 [Xenni] inna i wenni iǧan x wexxam n warruḍ: “Awi-dd arruḍen i marra imsexxaren n Baɛal!” U wanita yiwi asen-dd arruḍen.
2KI 10:23 Yudef Yahu ak-d Yunadab, mmis n Rikab, ɣar zzawect n Baɛal u netta inna i imsexxaren n Baɛal: “Xzarem mliḥ, aqa war ɣarwem ittiři uřa d ijj zeg imsexxaren n SIDI, mɣir imsexxaren n Baɛal waha.”
2KI 10:24 [Umi] iwḍen, maḥend ad [din] awyen tiɣarṣa d tɣarṣa n wecmaḍ, tuɣa issbedd Yahu tmenyin n yeryazen i yixef nnes di barra, inna: “Zeg weryaz nni i ɣa yejj ad injem ijj zeg yeryazen nni ggiɣ deg ifassen nwem, ad [idweř] řeɛmar nnes deg wemcan n řeɛmar nni.”
2KI 10:25 [Řami] iqfeř usewjed n tɣarṣṭ n wecmaḍ, imsar belli netta inna i ireqqasem n tazřa u i řqebṭanat: “Adfem, wtem ten, war ttejjim uřa d ijj ad injem!” Nitni nɣin ten s řeqḍeɛ n ssif u řqebṭanat nḍaren ten [barra]. Nitni udfen ɣar uř n zzawect n Baɛal.
2KI 10:26 Nitni kksen imayḍuten [iqeddsen] zi zzawect n Baɛal uca ssarɣen ten.
2KI 10:27 Nitni arẓin ameyḍa [iqeddsen] n Baɛal. Hedmen [ɛawed] zzawect n Baɛal uca ggin tt d ict n tzubact ař ass-a.
2KI 10:28 [Ammu i] imḥa Yahu Baɛal zi Israil.
2KI 10:29 Maca Yahu war ibedd zeg weḍfar n ddnub n Yarubɛam, mmis n Nabaṭ, wenni yarrin Israil ad ixḍa: iɛejmiyyen n wureɣ nni [iǧan] di Bayt-Il.
2KI 10:30 SIDI inna i Yahu: “Minzi teggid nican umi teggid min iǧan nican di tiṭṭawin inu, uca teggid ak-d taddart n Axab marra min ɣari deg wuř, ad qqimen iḥenjiren nwem x řɛarc n Israil ař jjiř wiss arebɛa.”
2KI 10:31 [Maca] Yahu war iḥḍi ca maḥend ad yuyur ɛlaḥsab Ccariɛa n SIDI, AREBBI n Israil, s marra uř nnes. Netta war iḥeyyed x ddnub n Yarubɛam wenni yarrin Israil ad ixḍa.
2KI 10:32 Deg wussan nni ibda SIDI ad issemẓi Israil. Ḥazayil iwta i-ten di marra tammurt n Israil,
2KI 10:33 zi L’Urdun manis dd-tneqqar tfuct, marra [tammurt n] Jilɛad, [tammurt] n Ijadiyyen d Irubiniyyen d Imanassiyyen, zi Aruɛir wenni [iǧan] ɣar teɣzart n Arnun, uřa d Jilɛad d Bacan.
2KI 10:34 Imezruyen iqqimen n Yahu, d marra min igga d marra timegga nnes imeḥḍen, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 10:35 Yahu igga ad yareyyeḥ jar řejdud nnes. Neḍřen t di Samarya. Mmis Yahuyaḥaz idweř d ajeǧid deg wemcan nnes.
2KI 10:36 Ussan i di tuɣa Yahu iḥekkem di Samarya aqa aten di tmenya u-ɛicrin n iseggʷusa.
2KI 11:1 Umi Ɛatalya, yemmas n Axazya, teẓra, aqa mmis immut, tegga ad teqḍa x marra tarrawt [n řaǧ] n ujeǧid.
2KI 11:2 Maca Yahuciba, yeǧis n ujeǧid Yahuram, učmas n Axazya, teksi Yuwac, mmis n Axazya, s tnuffra zi jar iḥenjiren n ujeǧid nni ittwanɣen uca [tiwyi] t ak-d temɣart i t issuṭṭuḍen deg wexxam n tassut uca tessnuffar i-t [dinni] zi Ɛatalya, [ḥima] war ittwaneqq.
2KI 11:3 Netta iqqim inuffar akides setta n iseggʷusa di Taddart n SIDI, [umi] teḥkem Ɛatalya x temmurt.
2KI 11:4 Deg useggʷas wiss sebɛa issekk Yahuyadaɛ uca ijja ad dd-asen imeqqranen x mya n iɛessasen n arrimet u n ireqqasen n tazřa uca issmun i-ten ɣares di Taddart n SIDI. Netta igga akidsen ijj n řɛahd, ijja i-ten ad jjaǧen di Taddart n SIDI. [Xas uca] isscen asen mmis n ujeǧid.
2KI 11:5 Netta yumur i-ten, inna: “D man aya i ɣa teggem: ict n ttuřut nwem, inni i ɣa yadfen deg [wass n] ssebt, ad ɛessen ɣar taddart n ujeǧid.
2KI 11:6 Ict n ttuřut [ad tbedd] ɣar tewwart n Ṣur u ict n ttuřut ɣar tewwart awarni i ireqqasen n tazřa. [Ammu] i ɣa tɛessem x taddart di tnubbat.
2KI 11:7 Tnayen n izeynat nwem, zi marra inni i ɣa iffɣen di ssebt, ad ḥḍan ɣar Taddart n SIDI, ɣar ujeǧid.
2KI 11:8 Kenniw ad tennḍem i ujeǧid, [kuř] aryaz s řesnaḥ nnes deg ufus nnes, u wenni i ɣa yarzun ad yadef jar řeṣfuf ad ittwaneɣ. Ittxeṣṣa kenniw ad teqqimen ak-d ujeǧid mařa netta iffeɣ niɣ mařa yudef.
2KI 11:9 Imeqqranen x mya ggin am mammec iweṣṣa ukehhan Yahuyadaɛ uca kuř ijj zzaysen yiwi akides iryazen nnes inni yudfen deg wass n ssebt, [jmiɛ] ak-d yinni iffɣen deg wass n ssebt uca usin-dd ɣar ukehhan Yahuyadaɛ.
2KI 11:10 I imeqqranen n mya iwca ukehhan lansat d tseddariyin iqesḥen n řɛeskar i tuɣa iǧan n ujeǧid Dawud, tinni [tuɣa iǧan] di Taddart n SIDI.
2KI 11:11 Ireqqasen n tazřa bedden s řesnaḥ deg ufus zeg uɣezdis afusi n wudem n Taddart ař aɣezdis azeřmaḍ n wudem n Taddart, ɣar uɛalṭar u ɣar Taddart, [ammu] quwwaren-dd i ujeǧid.
2KI 11:12 [Xenni] issuffeɣ-dd mmis n ujeǧid ɣar barra uca igga as ttaj [n weɛzař] [x uzeǧif] uca iwca as Cchadet. [Ammu] i t ggin d ajeǧid, dehnen t. Nitni wtin deg ifassen, nnan: “Tudart i ujeǧid!”
2KI 11:13 [Umi] tesřa Ɛatalya řḥess n ireqqasen n tazřa d wenni n řgens, tusa-dd nettat ɣar řgens ɣar Taddart n SIDI.
2KI 11:14 Teẓra, u xzar, ajeǧid ibedd ɣar upilar am mammec teǧa di lqaɛida, uca ikumandaren [n řɛeskar] d inni iṣuden di řebwaq [bedden] ɣar ujeǧid. Marra řgens n temmurt ifraḥ u isuḍ di řebwaq. [Xenni] tcarreg Ɛatalya arruḍ nnes, tesɣuy: “Tamenziwt, tamenziwt!”
2KI 11:15 [Maca] yumur ukehhan Yahuyadaɛ i imeqqranen x mya, inni tuɣa iǧan x řɛeskar, inna asen: “Awyem tt jar iseddiyyen [n řɛeskar] ɣar barra uca nɣem wi tt ɣa iḍfaren s ssif.” Maɣar akehhan tuɣa inna: “War tt ttejji ad tᵉttwaneɣ di Taddart n SIDI.”
2KI 11:16 Nitni ssarsen xas ifassen, uca řami truḥ x webrid n wadaf n iysan ɣar taddart n ujeǧid, nɣin tt dinni.
2KI 11:17 Yahuyadaɛ igga ijj n řɛahd jar SIDI d ujeǧid d řgens, ḥima ad iřin d ijj n řgens i SIDI, uca [netta igga uřa d ijj n řɛahd] jar ujeǧid d řgens.
2KI 11:18 [Xas uca] yudef marra řgens n temmurt ɣar taddart [n zzawect] n Baɛal u hedmen tt. Iɛalṭaren nnes d řexyařat nnes arẓin ten qaɛ. U nitni nɣin Mattan, akehhan n Baɛal, zzat i iɛalṭaren. Akehhan yařeqqem imeḥḍayen x Taddart n SIDI.
2KI 11:19 Netta yiwi [akides] imeqqranen x mya d iɛessasen n arrimet d ireqqasen n tazřa d marra řgens n temmurt u nitni ssehwan ajeǧid zi Taddart n SIDI uca kkin x webrid n Tewwart n Ireqqasen n Tazřa tenni ɣar taddart n ujeǧid, u dinni iqqim x řɛarc n ijeǧiden.
2KI 11:20 Marra řgens n temmurt ifarḥ uca tarsa tendint. Aqa nɣin Ɛatalya s ssif ɣar taddart n ujeǧid.
2KI 12:1 Tuɣa ɣar Yuwac sebɛa n iseggʷusa umi idweř d ajeǧid.
2KI 12:2 Deg useggʷas wiss sebɛa n Yahu idweř Yuwac d ajeǧid. Netta iḥkem arebɛin n iseggʷusa di Urcalim. Yemmas qqaren as Ḍibya zi Bi’r-Sebɛa.
2KI 12:3 Yuwac igga min iǧan nican di tiṭṭawin n SIDI, marra ussan min ikka ukehhan Yahuyadaɛ isseřmed i-t.
2KI 12:4 War ttwakksent mɣir řegɛudi. Uca řgens tuɣa ittqeddem ɛad tiɣarṣa d tewhibin n řebxur x řegɛudi [nni].
2KI 12:5 Yuwac inna i ikehhanen: “Marra nnuqart n tewhibin iqeddsen nni i ɣa yiwyen di Taddart n SIDI, řa nnuqart i kuř řeɛmar i iɛeddun [ɣar inni ittwaḥesben], [řa] nnuqart n kuř řeɛmar ɛlaḥsab aqeddar nnes uca uřa marra nnuqart i x dd-yusa deg wuř n ijj n weryaz ḥima ad tt yawi ɣar Taddart n SIDI,
2KI 12:6 ad tt ksin ikehhanen i yixef nsen, [kuř] aryaz zeg inni issen. Uca nitni ad [zzayes] areqqɛen [řeḥyuḍ] ihruran n Taddart, marra min din ittwafen [n řeḥyuḍ] ihruran.”
2KI 12:7 Deg useggʷas wiss třata u-ɛicrin n ujeǧid Yuwac war ɛeddřen ikehhanen [ɛad] řeḥyuḍ ihruran n Taddart.
2KI 12:8 [Xenni] iřaɣa ujeǧid Yuwac i ukehhan Yahuyadaɛ u i ikehhanen [inneɣni], inna asen: “Mayemmi war tɛeddřem řeḥyuḍ icarrgen n Taddart? [Xenni] řexxu, war tkessim [ɛad] nnuqart i dd-ittasen zeg inni tessnem, mɣir ḥima ad tt tessiwḍem i weɛdař n min icarrgen [di řeḥyuḍ] di Taddart.”
2KI 12:9 Qebřen ikehhanen, maḥend war kessin ɛad nnuqart zi řgens u maḥend war [ḥdijen ca ɛad] ad ɛedřen řeḥyuḍ iqeṭṭsen n Taddart.
2KI 12:10 Akehhan Yahuyadaɛ iksi ict n tsenduqt, igga ijj n unuqqib di tqebbart nnes uca issars i-tt zzat i uɛalṭar ɣar yefus n kuř ijj n wenni ittadfen Taddart n SIDI, uca ikehhanen, inni iḥḍan x wadaf [ɣar Taddart], ggin dayes marra nnuqart i dd-ittwawyen di Taddart n SIDI.
2KI 12:11 Umi ẓrin aqa din aṭṭas n nnuqart di tsenduqt, imsar aqa igeɛɛed umarir n ujeǧid ak-d arrays n ikehhanen. Nitni ssmunen tt di txuncay uca weznen nnuqart nni ittwafen di Taddart n SIDI.
2KI 12:12 Nitni wcin [řqedd] iweznen n nnuqart deg ufus n yinni iggin řxedmet, i imeḥḍayen n Taddart n SIDI. U nitni wcin tt [ɛawed] i ineqqacen [n ukeccuḍ] u i ibennayen nni tuɣa ixeddmen di Taddart n SIDI,
2KI 12:13 u i imaṣṣuten d isuydayen, u i tmesɣiwt n ukeccuḍ d tṣuḍar yuydan itteḥwajan i wareqqeɛ n min iqeṭṭsen [zi řeḥyuḍ] di Taddart n SIDI, u i marra min seyyaren i wareqqeɛ n taddart.
2KI 12:14 Mɣir war ttwaggen ṭṭbaṣi n nnuqart řa tjeqqaḍin, řa ṭṭawyat i urucci d řebwaq, uřa d řeqcuɛ n wureɣ d nnuqart, zi nnuqart i dd-iwyen [iwdan] di Taddart n SIDI.
2KI 12:15 maɣar nitni wcin tt marra i yinni iggin řxedmet uca nitni areqqɛen zzayes Taddart n SIDI.
2KI 12:16 War mmseḥsiben ca ak-d yeryazen nni umi wcin nnuqart deg ufus nsen, ḥima ad tt wcen i yinni iggin řxedmet, minzi nitni tuɣa tteggen s utiqqi.
2KI 12:17 Nnuqart n tɣarṣt n umarwas d nnuqart n tɣarṣa n ddenb war tt ssidfen ɣar Taddart n SIDI. Tuɣa-tt i ikehhanen.
2KI 12:18 Xenni igeɛɛed Ḥazayil, ajeǧid n Aram, immneɣ ak-d Jat, iṭṭef i-t. [Awarni man aya] iɛewweř Ḥazayil tamuɣři nnes ɣar Urcalim, ḥima ad igeɛɛed ḍidd nnes.
2KI 12:19 [Maca] Yuwac iksi marra řeqcuɛ iqeddsen nni tuɣa issqeddes i-tent Yahucafaṭ, Yahuram d Axazya, řejdud nnes, ijeǧiden n Yahuda, uřa d řeqcuɛ iqeddsen nnes d marra wureɣ nni tuɣa iǧan deg ixxamen n txubay n Taddart n SIDI u n taddart n ujeǧid, uca issekk [aya] ɣar Ḥazayil, ajeǧid n Aram. [Xas uca] iggʷej netta x Urcalim.
2KI 12:20 Imezruyen iqqimen n Yuwac d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 12:21 Imsexxaren nnes ɣewwɣen xas, ggin [xas] ict n tmeɛmuč uca nɣin Yuwac di taddart n lqelɛa manis hekkwan ɣar Silla.
2KI 12:22 Aqa Yuzakar, mmis n Cimɛat, d Yahuzabad, mmis n Cumir, imsexxaren nnes, wtin t ařami immut. Nitni neḍřen t jar řejdud nnes di tendint n Dawud. Amaṣya, mmis, idweř d ajeǧid deg wemcan nnes.
2KI 13:1 Deg useggʷas wiss třata u-ɛicrin n Yuwac, mmis n Axazya, ajeǧid n Yahuda, idweř Yahuyaḥaz, mmis n Yahu, d ajeǧid x Israil, di Samarya. [Netta iḥkem] sbeɛṭac n iseggʷusa.
2KI 13:2 Netta igga min iǧan d aɛeffan di tiṭṭawin n SIDI. Netta iḍfar ddnub n Yarubɛam, mmis n Nabaṭ, wenni yarran Israil ad ixḍa. Netta war iḥeyyed x man aya.
2KI 13:3 [X uyenni] yarɣa weɣḍab n SIDI x Israil. Marra ussan [nni] iwca i-ten deg ifassen n Ḥazayil, ajeǧid n Aram, u deg ifassen n Binhadad, mmis n Ḥazayil.
2KI 13:4 [Maca] Yahuyaḥaz iḥeccem zzat i wudem n SIDI u SIDI isřa as, maɣar Netta iẓra řeḥṣaret n Israil, mammec i ten iḥṣař ujeǧid n Aram.
2KI 13:5 SIDI iwca ijj n umsenjem i Israil, ařami zemmaren ad nfekken zeg ufus n ayt n Aram, uca [xenni] tuɣa ayt n Israil zeddɣen [ɛawed] am qbeř deg iqiḍan nsen.
2KI 13:6 Maca nitni war ḥeyyden ca x ddnub n taddart n Yarubɛam wenni yarrin Israil ad ixḍa. Israil iqqim iggur ammu u teqqim tarebbit n cwarti tbedd di Samarya.
2KI 13:7 Maɣar netta war ijji zi řɛeskar n Yahuyaḥaz, mɣir xemsin n imnayen d ɛecra n ikarruten d ɛecra ařef n [yeryazen] x iḍaren, maɣar ajeǧid n Aram tuɣa iqḍa i-ten, igga i-ten am tɛejjajt ɣar usarwet.
2KI 13:8 Imezruyen iqqimen n Yahuyaḥaz, d marra min igga d marra timegga nnes imeḥḍen, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 13:9 Yahuyaḥaz igga ad yareyyeḥ jar řejdud nnes. Neḍřen t di Samarya. Mmis Yuwac idweř d ajeǧid deg wemcan nnes.
2KI 13:10 Deg useggʷas wiss sebɛa u-třatin n Yuwac, ajeǧid n Yahuda, idweř Yuwac, mmis n Yahuyaḥaz, d ajeǧid x Israil. [Netta iḥkem] seṭṭac n iseggʷusa di Samarya.
2KI 13:11 Netta igga min iǧan d aɛeffan di tiṭṭawin n SIDI. Netta war iḥeyyed x ddnub n Yarubɛam, mmis n Nabaṭ, wenni yarrin Israil ad ixḍa, [maca] netta yarni yuyur [amenni].
2KI 13:12 Imezruyen iqqimen n Yuwac d marra min igga d marra timegga nnes imeḥḍen i zi immneɣ ak-d Amaṣya, ajeǧid n Yahuda, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 13:13 Yuwac igga ad yareyyeḥ jar řejdud nnes. [Xas uca] inya Yarubɛam x řɛarc nnes. Yuwac ittwanḍeř di Samarya jar ijeǧiden n Israil.
2KI 13:14 Ilicaɛ ittwařqef s řehřac i zi ɣa immet. Yuwac, ajeǧid n Israil, ihwa-dd ɣares uca iru zzates, inna: “[A] baba, [a] baba! Akarru n Israil d imnayen nnes!”
2KI 13:15 Ilicaɛ inna: “Ksi řqews d fřitcat!” Netta iṭṭef i yixef nnes ijj n řqews d fřitcat.
2KI 13:16 [Xenni] inna netta i ujeǧid n Israil: “Sars afus nnec x řqews!” Uca issars netta afus nnes [x řqews] uca issars Ilicaɛ ifassen nnes x ifassen n ujeǧid,
2KI 13:17 inna: “Arzem řkazi [i iǧan] ɣar manis dd-tneqqar tfuct!”, uca netta yarzem i-t. [Xenni] inna Ilicaɛ: “Wwet!” U netta iwta [s řqews nnes]. Uca inna [Ilicaɛ]: “Aqa-tt d ict n fřitca n usenjem s [ufus n] SIDI uřa d ict n fřitca n usenjem [zeg ifassen] n Aram, minzi ad tɣeřbed Aram di Ɛafik ař ɣa ittwareddeǧ.”
2KI 13:18 [Xas uca] inna netta: “Ksi fřitcat!” Uca netta iṭṭef i-tent. [Xenni] inna i ujeǧid n Israil: “Wwet x temmurt!” Uca wanita iwta třata n twařawin x temmurt uca [řexdenni] ibedd.
2KI 13:19 Aryaz n AREBBI iffugem xas aṭṭas, inna: “Tuɣa ittxeṣṣa ad tewted xemsa niɣ setta n twařawin, iři ad teɣřeb x Aram ařami t i ɣa teqḍid [qaɛ]. Řexxu [maca] ad tɣeřbed x Aram [mɣir] třata n twařawin.
2KI 13:20 Ilicaɛ immut uca neḍřen t. Bandiyyat n ayt n Mu’ab tuɣa ttnumant ad adfent ɣar temmurt ɣar umezwaru n useggʷas.
2KI 13:21 Xzar, [umi] tuɣa neṭṭřen [ict n twařa] ijj n weryaz, imsar aqa ẓrin ict n bandiyya. Nitni nḍaren aryaz deg wenḍeř n Ilicaɛ. [Umi dayes] iwḍa weryaz, iḥada iysan n Ilicaɛ, idweř iddar ɛawed uca ikkar ibedd x iḍaren nnes.
2KI 13:22 Ḥazayil, ajeǧid n Aram, iḥṣar x Israil, marra ussan n Yahuyaḥaz.
2KI 13:23 [Maca] SIDI iḥinn x řgens nnes uca yarḥem xasen uca inneqřeb ɣarsen di ṭṭweɛ n Řɛahd nnes ak-d Ibrahim, Isḥaq d Yaɛqub. Netta tuɣa war ixs ad ten yareddeǧ u war ixs ad ten issekk zi zzat n wudem nnes, ař řexxu.
2KI 13:24 Ḥazayil, ajeǧid n Aram, immut u mmis Binhadad idweř d ajeǧid deg wemcan nnes.
2KI 13:25 Yuwac, mmis n Yahuyaḥaz, ikkes-dd zeg ifassen n Binhadad, mmis n Ḥazayil, tineddam nni tuɣa iṭṭef wanita zeg ifassen n babas Yahuyaḥaz. Yuwac iɣřeb xas třata n twařawin uca yarra-dd tineddam ɛawed ɣar Israil.
2KI 14:1 Deg useggʷas wiss tnayen n Yuwac, mmis n Yahuyaḥaz, ajeǧid n Israil, idweř Amaṣya, mmis n Yuwac, d ajeǧid n Yahuda.
2KI 14:2 Netta [tuɣa] ɣares xemsa u-ɛicrin n iseggʷusa, umi idweř d ajeǧid. Netta iḥkem di Urcalim. Yemmas qqaren as Yahuɛadan, zi Urcalim.
2KI 14:3 Netta igga min iǧan nican di tiṭṭawin n SIDI, maca war iǧi am babas Dawud. Igga nican am mammec igga babas Yuwac.
2KI 14:4 Mɣir war ttwakksent řegɛudi. Řgens yiwi ɛad tiɣarṣa d tewhibin n řebxur x řegɛudi.
2KI 14:5 Umi tuɣa tagelda temten deg ifassen nnes, imsar belli netta inɣa imsexxaren nni inɣin ajeǧid, babas.
2KI 14:6 [Maca] iḥenjiren n iqettařen war ten inɣi ca, am mammec [t] yura deg wedlis ittwannḍen n Ccariɛa n Musa, i di iweṣṣa SIDI, inna: “Ibabaten war ttwaneqqen di ssibbet n iḥenjiren [nsen] uřa iḥenjiren war ttwaneqqen di ssibbet n ibabaten [nsen], maɣar kuř ijj ad ittwaneɣ x ddnub [n yixef] nnes.”
2KI 14:7 Netta iɣřeb x ayt n Idum di Teɣzurt n Tmeǧaḥt, ɛecra ařef [n yeryazen], u iṭṭef Salaɛ deg umenɣi u igga as Yaqtayil, ař ass-a.
2KI 14:8 Xenni issekk Amaṣya ireqqasen ɣar Yuwas, mmis n Yahuyaḥaz, mmis n Yahu, ajeǧid n Israil, inna: “As-dd, ejj aneɣ ad nemmeřqa [i umenɣi].”
2KI 14:9 [Maca] Yuwac, ajeǧid n Israil, issekk [ijj n ureqqas] ɣar Amaṣya, ajeǧid n Yahuda, inna: “Cbarq ak-d isennanen [i iɣemmyen] x [idurar n] Lubnan, issekk [ict n tebrat] ɣar [tcejjart n] tengelt x [idurar n] Lubnan, inna: ‘Ewc yeǧis d tamɣart i mmi!’ [Maca] ijj n řweḥc n řexřa i [din yuyuren] x [idurar n] Lubnan, ikka u iɛfes x cbarq ak-d isennanen.
2KI 14:10 Iwa cek tɣeřbed x Idum u řexxu tdewřed dayek nnfaxet deg wuř nnec. Ṭṭef deg uweqqar i ɣarek u qqim di taddart nnec, [minzi] mayemmi ɣa temmenḍared ixef nnec di řɣar u ad tewḍid, cek d Yahuda akidek?”
2KI 14:11 [Maca] Amaṣya war ixs ad iseř, uca Yuwac, ajeǧid n Israil, igeɛɛed ařami netta d Amaṣya, ajeǧid n Yahuda, mmqabařen ɣar Bayt-Cams [i iǧan] di Yahuda.
2KI 14:12 Yahuda ittwaɣřeb s ufus n Israil, uca nitni arewřen, kuř ijj ɣar uqiḍun nnes.
2KI 14:13 Yuwac, ajeǧid n Israil, iṭṭef Amaṣya, ajeǧid n Yahuda, mmis n Yuwac, mmis n Axazya, di Bayt-Cams uca yiweḍ t-i-dd ɣar Urcalim. [Dinni] igga ict n tazzit di řḥiḍ n Urcalim, zi Tewwart n Ifrayim ař Tewwart n Teɣmart, x ijj n webrid n arebɛa-mya n iɣaǧen.
2KI 14:14 Yiwi marra ureɣ d nnuqart d marra řeqcuɛ i ittwafen di Taddart n SIDI u deg ixxamen n txubay n taddart n ujeǧid, [uřa d] irehhanen, uca iɛqeb ɣar Samarya.
2KI 14:15 Imezruyen iqqimen n Yuwac d min igga d tmegga nnes imeḥḍen d mammec immneɣ ak-d Amaṣya, ajeǧid n Yahuda, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 14:16 Yuwac igga ad yareyyeḥ jar řejdud nnes. Netta ittwanḍeř di Samarya jar ijeǧiden n Israil. Mmis Yarubɛam idweř d ajeǧid deg wemcan nnes.
2KI 14:17 Amaṣya, mmis n Yuwac, ajeǧid n Yahuda, iddar [ɛad] xemmesṭac n iseggʷusa awarni i řmewt n Yuwac, mmis n Yahuyaḥaz, ajeǧid n Israil.
2KI 14:18 Imezruyen iqqimen n Amaṣya, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 14:19 Nitni ggin ict n tmeɛmuč xas di Urcalim, ařami netta yarweř ɣar Laxic, [maca] nitni ssekken awarni as inni t iḍfaren ɣar Laxic uca nɣin t dinni.
2KI 14:20 Nitni iwyen t-i-dd x yeysan u netta ittwanḍeř di Urcalim jar řejdud nnes di tendint n Dawud.
2KI 14:21 Marra řgens n Yahuda yiwi Ɛazarya, wenni umi ɣar iǧa seṭṭac n iseggʷusa, u ggin t d ajeǧid deg wemcan n babas Amaṣya.
2KI 14:22 Netta ibna Ilat u yarra i-t [deg ufus] n Yahuda, awarni řami igga ad yareyyeḥ ujeǧid jar řejdud nnes.
2KI 14:23 Deg useggʷas wiss xemmesṭac n Amaṣya, mmis n Yuwac, ajeǧid n Yahuda, idweř Yarubɛam, mmis n Yuwac, ajeǧid n Israil di Samarya. [Netta iḥkem] waḥit u-ɛicrin n iseggʷusa di Samarya.
2KI 14:24 Netta igga min iǧan d aɛeffan di tiṭṭawin n SIDI. Netta war iḥeyyed x marra ddnub n Yarubɛam, mmis n Nabaṭ, wenni yarrin Israil ad ixḍa.
2KI 14:25 Netta yarra-dd marra tammurt n Israil [sadu ufus nnes] zi mani ɣa tiwḍed ɣar Ḥamat ař Řebḥar n Řewḍa ɛlaḥsab awař n SIDI, AREBBI n Israil, i tuɣa issiweř s uqemmum n umsexxar nnes Yunus, mmis n Amittay zi Jat-Ḥafir.
2KI 14:26 Maɣar SIDI iẓra aqa řeɣben n Israil d amerzag aṭṭas u war din iqqim [ɛad] wenni ittwaṭṭfen d wenni umi jjin u war tuɣi wenni iɛawnen i Israil.
2KI 14:27 SIDI tuɣa war yenni ad imḥa isem n Israil zi sadu ijenwan, uca issenjem i-ten s ufus n Yarubɛam, mmis n Yuwac.
2KI 14:28 Imezruyen iqqimen n Yarubɛam d marra min igga d marra timegga nnes imeḥḍen d mammec immneɣ u mammec ikesseb twařa nneɣnit Dimacq d Ḥamat inni [tuɣa iǧan] ɣar Yahuda, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 14:29 Yarubɛam igga ad yareyyeḥ jar řejdud nnes, jar ijeǧiden n Israil. Mmis Zakariyya idweř d ajeǧid deg wemcan nnes.
2KI 15:1 Deg useggʷas wiss sebɛa u ɛicrin n Yarubɛam, ajeǧid n Israil, idweř Ɛazarya, mmis n Amaṣya, ajeǧid n Yahuda.
2KI 15:2 Netta [tuɣa] ɣares seṭṭac n iseggʷusa umi idweř d ajeǧid. Netta iḥkem tnayen u-xemsin n iseggʷusa di Urcalim. Yemmas qqaren as Yakulya zi Urcalim.
2KI 15:3 Netta igga min iǧan nican di tiṭṭawin n SIDI, am mammec marra i tuɣa igga babas Amaṣya.
2KI 15:4 Mɣir war ttwakksent řegɛudi. Yiwi řgens ɛad tiɣarṣa d tewhibin n řebxur x řegɛudi.
2KI 15:5 [Maca] SIDI iwta ajeǧid ařami ihřec s řbarṣ ař ass n řmewt nnes. Netta iqqim izeddeɣ deg ict n taddart tᵉttwaɛzeř, [umi] Yutam, mmis n ujeǧid, tuɣa d řemqeddem n tzeddiɣt [n ujeǧid] u iḥekkem x řgens n temmurt.
2KI 15:6 Imezruyen iqqimen n Ɛazarya d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 15:7 Ɛazarya igga ad yareyyeḥ jar řejdud nnes. Neḍřen t jar řejdud nnes di tendint n Dawud. Mmis Yutam idweř d ajeǧid deg wemcan nnes.
2KI 15:8 Deg useggʷas wiss tmenya u-třatin n Ɛazarya, ajeǧid n Yahuda, iḥkem Zakariyya, mmis n Yarubɛam, x Israil di Samarya, [řqedd n] setta n iyuren.
2KI 15:9 Netta igga min iǧan d aɛeffan di tiṭṭawin n SIDI, [nican] am mammec t ggin řejdud nnes. Netta war iḥeyyed x ddnub n Yarubɛam, mmis n Nabaṭ, wenni yarrin Israil ad ixḍa.
2KI 15:10 Callum, mmis n Yabic, igga xas ict n tmeɛmuč uca iwta i-t zzat i řgens uca inɣa i-t. Netta idweř d ajeǧid deg wemcan nnes.
2KI 15:11 Imezruyen iqqimen n Zakariyya, xzar, aqa ttwazemmemen deg wedlis n imezruyen n ijeǧiden n Israil.
2KI 15:12 Wa d awař i tuɣa issiweř SIDI ɣar Yahu, inna: “Iḥenjiren nnec ad qqimen x řɛarc n Israil ař jjiř wiss arebɛa!” Uca ammu i temsar.
2KI 15:13 Deg useggʷas wiss tesɛa u-třatin n Ɛuzziya, ajeǧid n Yahuda, idweř Callum, mmis n Yabic, d ajeǧid. Netta iḥkem ijj n uyur ikmeř di Samarya.
2KI 15:14 Manaḥim, mmis n Jadi, iffeɣ-dd ɣares zi Tirṣa uca yusa-dd ɣar Samarya, iwta Callum, mmis n Yabic, di Samarya, uca inɣa i-t. Netta idweř d ajeǧid deg wemcan nnes.
2KI 15:15 Imezruyen iqqimen n Callum d tmeɛmuč i igga, xzar, man aya [marra] ittwazemmem deg wedlis n imezruyen n ijeǧiden n Israil.
2KI 15:16 Xenni iɣřeb Manaḥim x Tafsaḥ, d marra imezdaɣ nni dayes, uca iwta uřa d tammurt nnes zi Tirṣa, minzi nitni tuɣa war d as arzimen [tiwwura]. Aqa inɣa [i-ten]. Marra timɣarin s ddeyset ifetteq asent [aɛeddis].
2KI 15:17 Deg useggʷas wiss tesɛa u-třatin n Ɛazarya, ajeǧid n Yahuda, idweř Manaḥim, mmis n Jadi, d ajeǧid x Israil. [Netta iḥkem] ɛecra n iseggʷusa di Samarya.
2KI 15:18 Netta igga min iǧan d aɛeffan di tiṭṭawin n SIDI. Marra ussan [n tudart nnes] war iḥeyyed ca x ddnub n Yarubɛam, mmis n Nabaṭ, wenni yarrin Israil ad ixḍa.
2KI 15:19 [Xenni] yusa-dd Ful, ajeǧid n Accur, [ihjem] x temmurt. Iwca Manaḥim ařef talint n nnuqart i Ful, ḥima ad iqqim ad iḥkem u ḥima ad issemten tageldit deg ufus nnes.
2KI 15:20 Manaḥim igga Israil ad [ɣares] dd-yiwi nnuqart, marra ayt n bu-wagřa, ḥima ad issiweḍ nnuqart nni i ujeǧid n Accur. Zi kuř aryaz [iksi] xemsin ciqlu. [Xas uca] iɛqeb ujeǧid n Accur, war iqqim [ɛad] di temmurt.
2KI 15:21 Imezruyen iqqimen n Manaḥim d marra min igga, ma man aya [marra] war ittwazemmem ca deg wedlis n imezruyen n ijeǧiden n Israil?
2KI 15:22 Manaḥim igga ad yareyyeḥ jar řejdud nnes. Mmis Faqaḥya idweř d ajeǧid deg wemcan nnes.
2KI 15:23 Deg useggʷas wiss xemsin n Ɛazarya, ajeǧid n Yahuda, idweř Faqaḥya, mmis n Manaḥim, d ajeǧid x Israil. [Netta iḥkem] tnayen n iseggʷusa di Samarya.
2KI 15:24 Netta igga min iǧan d aɛeffan di tiṭṭawin n SIDI. Netta war iḥeyyed x ddnub n Yarubɛam, mmis n Nabaṭ, wenni yarrin Israil ad ixḍa.
2KI 15:25 Faqaḥ, mmis n Ramalyahu, aneɣraf [n řɛeskar], igga xas ict n tmeɛmuč, iwwet i-t di Samarya, di lburj n taddart n ujeǧid. Arjub d Aryah wcin as afus u tuɣa akides [ɛawed] xemsin n yeryazen zi Jilɛad. Netta inɣa Faqaḥya u idweř d ajeǧid deg wemcan nnes.
2KI 15:26 Imezruyen iqqimen n Faqaḥya d marra min igga, xzar, man aya [marra] ittwazemmem deg wedlis n imezruyen n ijeǧiden n Israil.
2KI 15:27 Deg useggʷas wiss tnayen u-xemsin n Ɛazarya, idweř Faqaḥ, mmis n Ramalyahu, d ajeǧid x Israil. [Netta iḥkem] ɛicrin n iseggʷusa di Samarya.
2KI 15:28 Netta igga min iǧan d aɛeffan di tiṭṭawin n SIDI. Netta war iḥeyyed ca x ddnub n Yarubɛam, mmis n Nabaṭ nni yarrin Israil ad ixḍa.
2KI 15:29 Deg wussan n Faqaḥ, ajeǧid n Israil, yusa-dd Tiɣlat-Filasir, ajeǧid n Accur. Netta iḥewwes Ɛayun d Abil-Bayt-Maɛka d Yanuḥ d Qadac d Ḥaṣur d Jilɛad d Ljalil d marra tammurt n Naftali. Netta indeh i-ten ɣar lmenfa ɣar Accur.
2KI 15:30 Huciɛa, mmis n Ila, igga ict n tmeɛmuč x Faqaḥ, mmis n Ramalyahu. Netta iwta i-t uca inɣa i-t. Netta idweř d ajeǧid deg wemcan nnes deg useggʷas wiss ɛicrin n Yutam, mmis n Ɛuzziya.
2KI 15:31 Imezruyen iqqimen n Faqaḥ d marra min igga, xzar, man aya [marra] ittwazemmem deg wedlis n imezruyen n ijeǧiden n Israil.
2KI 15:32 Deg useggʷas wiss tnayen n Faqaḥ, mmis n Ramalyahu, ajeǧid n Israil, idweř Yutam d ajeǧid. [Tuɣa netta] d mmis n Ɛuzziya, ajeǧid n Yahuda.
2KI 15:33 Netta [tuɣa] ɣares xemsa u-ɛicrin n iseggʷusa umi idweř d ajeǧid. [Netta iḥkem] seṭṭac n iseggʷusa di Urcalim. Yemmas qqaren as Yaruca, yeǧis n Ṣaduq.
2KI 15:34 Netta igga min iǧan nican di tiṭṭawin n SIDI, nican am mammec t igga babas Ɛuzziya.
2KI 15:35 Mɣir war ttwakksent řegɛudi. Řgens yiwyi-dd [ɛad] tiɣarṣa d tewhibin n řebxur x řegɛudi. Netta ibna Tewwart Yuɛřan di Taddart n SIDI.
2KI 15:36 Imezruyen iqqimen n Yutam, d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 15:37 Deg wussan nni ibda SIDI ad issekk Raṣin, ajeǧid n Aram, d Faqaḥ, mmis n Ramalyahu, ɣar Yahuda.
2KI 15:38 Yutam igga ad yareyyeḥ jar řejdud nnes. Netta ittwanḍeř jar řejdud nnes di tendint n babas Dawud. Mmis Aḥaz idweř d ajeǧid deg wemcan nnes.
2KI 16:1 Deg useggʷas wiss sbeɛṭac n Faqaḥ, mmis n Ramalyahu, idweř Aḥaz, mmis n Yutam, d ajeǧid n Yahuda.
2KI 16:2 Aḥaz [tuɣa] ɣares ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. Netta war iggi min iǧan nican di tiṭṭawin n SIDI, AREBBI nnes, am mammec [igga] babas Dawud.
2KI 16:3 Netta yuyur deg ibriden n ijeǧiden n Israil. Netta ijja ɛad mmis ad yuyur di tmessi am mammec marra jjɛayef n řegnus inni tuɣa iɛarren SIDI zzat i wudem n ayt n Israil.
2KI 16:4 Netta yiwyi-dd tiɣarṣa d tewhibin n řebxur x řegɛudi u x tewririn u sadu marra azɣar aziza.
2KI 16:5 Xas uca iffeɣ Raṣin, ajeǧid n Aram, d Faqaḥ, mmis n Ramalyahu, ajeǧid n Israil, immneɣ ak-d Urcalim. Nitni nnḍen i Aḥaz, [maca] war zemmaren ad xas ɣeřben.
2KI 16:6 Di řweqt nni yarra-dd Raṣin, ajeǧid n Aram, Ilat i Aram. Issuffeɣ ayt n Yahuda zi Ilat uca usin-dd ayt n Aram ɣar Ilat, [qqimen] zeddɣen din ař ass-a.
2KI 16:7 Aḥaz issekk ireqqasen i Tiɣlat-Filasir, ajeǧid n Accur, inna: “Necc d amsexxar nnec d mmic. Geɛɛed d tfekked ayi zeg ufus n ujeǧid n Aram d ujeǧid n Israil, inni xafi innqeřben.”
2KI 16:8 Aḥaz yiwi nnuqart d wureɣ i ittwafen di Taddart n SIDI u deg ixxamen n txubay n taddart n ujeǧid uca issekk [aya am] ict n terzeft i ujeǧid n Accur.
2KI 16:9 Ajeǧid n Accur isřa ɣares uca igeɛɛed ujeǧid n Accur ɣar Dimacq, iṭṭef i-tt. Netta indeh i-tt ɣar lmenfa ɣar Qir u inɣa Raṣin.
2KI 16:10 Ajeǧid Aḥaz iffeɣ ɣar Dimacq i umsagar ak-d Tiɣlat-Filasir, ajeǧid n Accur, uca iẓra ijj n uɛalṭar di Dimacq. Ajeǧid Aḥaz issekk ijj n umedya n uɛalṭar d tweṣṣaf nnes n řebni, qaɛ am mammec tuɣa ittxeṣṣa ad t ggen, ɣar ukehhan Uriya.
2KI 16:11 [Xas uca] ibna ukehhan Uriya aɛalṭar. Ɣar [řweqt i di] dd-iɛqeb ujeǧid Aḥaz zi Dimacq, aqa ibna t ukehhan Uriya am mammec marra min [ɣares] dd-issekk ujeǧid Aḥaz zi Dimacq.
2KI 16:12 [Umi] dd-yusa ujeǧid zi Dimacq, iẓra ujeǧid aɛalṭar uca iqarreb-dd ujeǧid ɣar uɛalṭar uca issbexxar xas [tiɣarṣa].
2KI 16:13 Netta issbexxar taɣarṣt nnes d tewhibt nnes [n řɣiǧet] u iseyyeb xas tawhibt n useyyeb nnes. Issfarrɣeɣ uřa d idammen n tɣarṣa nnes n řehna x uɛalṭar.
2KI 16:14 Aɛalṭar n nnḥas nni ibedden zzat i wudem n SIDI, issmuṭṭiy t zeg uɣezdis n zzat n Taddart, zi jar uɛalṭar [n jdid] d Taddart n SIDI, ɣar uɣezdis n ccamal n uɛalṭar [n jdid] uca issars i-t [dinni].
2KI 16:15 Řexdenni ajeǧid Aḥaz iweṣṣa akehhan Uriya, inna: “Sbexxar taɣarṣt n wecmaḍ n ṣṣbeḥ d tewhibt [n řɣiǧet] n tmeddit řa taɣarṣt n wecmaḍ n ujeǧid d tewhibt nnes [n řɣiǧet] d tɣarṣt n wecmaḍ di ṭṭweɛ n marra řgens n temmurt d tewhibin nsen [n řɣiǧet] d tewhibin nsen n useyyeb, u zeǧeɛ xas marra idammen n marra tiɣarṣa n wecmaḍ u n tɣarṣa [nneɣni]. Aɛalṭar n nnḥas ad yiři i nnec, ḥima ad [dayes] arzuɣ ɛad.
2KI 16:16 Akehhan Uriya igga am mammec marra s minzi iweṣṣa ujeǧid Aḥaz.
2KI 16:17 Ajeǧid Aḥaz iqess teřwiḥin [i yeǧan] x tkarrutin uca ikkes [zzaysent] tabanyut i xas iǧan. Ikkes uřa d tarimant n waman zeg ifunasen n nnḥas inni sadu nnes uca issars i-tt x ict n zzellij n weẓru.
2KI 16:18 Pasu n ssebt i tuɣa ibnan di Taddart, uřa d adaf n ujeǧid ɣar uɣezdis n barra ikkes i-ten zi Taddart n SIDI di ssibbet n ujeǧid n Accur.
2KI 16:19 Imezruyen iqqimen n Aḥaz d min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 16:20 Aḥaz igga ad yareyyeḥ jar řejdud nnes di tendint n Dawud. Mmis Ḥizqiya idweř d ajeǧid deg wemcan nnes.
2KI 17:1 Deg useggʷwas wiss tenɛac n Aḥaz, ajeǧid n Yahuda, idweř Huciɛa, mmis n Ila, d ajeǧid x Israil di Samarya. [Netta iḥkem] tesɛa n iseggʷusa.
2KI 17:2 Netta igga min iǧan d aɛeffan di tiṭṭawin n SIDI, maca war iǧi anect n ijeǧiden n Israil, inni tuɣa qbeř nnes.
2KI 17:3 Calmanassar, ajeǧid n Accur, ihjem xas uca Huciɛa idweř d amsexxar nnes uca ittwagg xas maḥend ad as iwc ljizya.
2KI 17:4 Ajeǧid n Accur yufa aqa Huciɛa igga ict n tmeɛmuč. Wanita tuɣa issekk ireqqasen nnes ɣar Su, ajeǧid n Miṣra, uca war dd-yiwi ɛad ljizya am qbeř i ujeǧid n Accur, zeg useggʷas ař aseggʷas. Ajeǧid n Accur iṭṭef i-t uca icedd i-t s iceddiyyen di řeḥbes.
2KI 17:5 Ajeǧid n Accur iwḍa x marra tammurt, igeɛɛed ɣar Samarya u inneḍ as-dd třata n iseggʷusa.
2KI 17:6 Deg useggʷas wiss tesɛa n Huciɛa, iḥewwes ajeǧid n Accur Samarya uca indeh [ayt n] Israil di lmenfa ɣar Accur u issezdeɣ i-ten di Ḥalaḥ u ɣar Xabur wenni d iɣzar n Juzan, u [di] tneddam n Imadayen.
2KI 17:7 Aya imsar minzi ayt n Israil xḍan x SIDI, AREBBI nsen, wenni ten dd-issgeɛɛden zi Miṣra, zi sadu i ufus n firɛun, ajeǧid n Miṣra, u umi ggʷeden nitni irebbiten nneɣni,
2KI 17:8 ggin ad ddaren ɛlaḥsab tiweṣṣa n řegnus nni iɛarren i-ten SIDI zi zzat i wudem nsen, u [ɛlaḥsab tiweṣṣa] n ijeǧiden n Israil inni [ten] iggin.
2KI 17:9 Ayt n Israil tuɣa dřin timesřayin i war ittřiqin zzat i SIDI. Nitni ssbedden i ixef nsen řegɛudi di marra tineddam nsen, [wah,] zi lburj n tɛessast ař tandint ifaryen [s iɣebřawen].
2KI 17:10 Nitni ssbedden imayḍuten [iqeddsen] d trebbin n cwarti x kuř tawrirt yuɛřan u sadu kuř azɣar d aziza.
2KI 17:11 Nitni qeddmen tiwhibin n řebxur x marra řegɛudi, am mammec ggin řegnus nni tuɣa issuffeɣ SIDI zi zzat n wudem nsen. Nitni ggin timesřayin d tiɛeffanin ařami sɛaren SIDI.
2KI 17:12 Nitni sexxaren i imeyḍa [n l’aṣnam] i x tuɣa d asen inna SIDI: “War iɛeddeř ad teggem aya!”
2KI 17:13 SIDI iɛřem i Israil d Yahuda s uqemmum n marra inabiyyen, u s kuř ijj n umwařaw, inna: “Tubem zi tbridin nwem tiɛeffanin u ḥḍam x lfarayiḍ inu d tweṣṣa inu ɛlaḥsab marra Ccariɛa i zi umureɣ řejdud nwem u wenni d awem dd-ssekkeɣ s ufus n imsexxaren inu, inabiyyen.
2KI 17:14 Nitni war sřin ca u tuɣa qesḥen aṭṭas am mammec tuɣa qesḥen aṭṭas řejdud nsen, inni war iggin ttiqet di SIDI, AREBBI nsen.
2KI 17:15 Nitni nḍaren tiweṣṣa nnes d Řɛahd nnes, wenni igga Netta ak-d řejdud nsen, uřa d cchadat nnes nni tuɣa xasen iched. Nitni ḍfaren min iǧan di řbaṭeř uca uřa d nitni [s yixef nsen] dewřen beṭṭřen. [Nitni ḍfaren ɛawed] řegnus nni d asen dd-innḍen i x tuɣa d asen inna SIDI aqa ad tteggen am mammec [ggin] nitni.
2KI 17:16 Nitni aggʷejen x marra tiweṣṣa n SIDI, AREBBI nsen, u ggin i yixef nsen řexyařat ifesyen: tnayen n iɛejmiyyen. Nitni ggin [ɛawed] ict n trebbit n cwarti uca bendqen i marra řɛeskar n ujenna u ɛebden i Baɛal.
2KI 17:17 Nitni arrin iḥenjiren nsen d tḥenjirin nsen ad cuqen di tmessi uca ssxedmen aɛezzem d tgezzant. Nitni zzenzen ixef nsen, maḥend ad ggen min iǧan d aɛeffan di tiṭṭawin n SIDI, ḥima ad t sɛaren.
2KI 17:18 [X uyenni] isɛar SIDI aṭṭas x Israil, [ařami] inḍar i-ten x wudem nnes. War [zzaysen] iqqim walu mɣir taqbič n Yahuda.
2KI 17:19 [Maca] uřa d Yahuda war iḥḍa lfarayiḍ n SIDI, AREBBI nsen. Nitni uyuren di tweṣṣa n Israil nni ggin s yixef nsen.
2KI 17:20 SIDI inḍar marra zzariɛet n Israil. Netta issbehdeř i-ten uca iwca i-ten deg ufus n imkeccaḍen ařami inḍar i-ten x wudem nnes.
2KI 17:21 Maɣar Netta tuɣa iqřeɛ Israil zi taddart n Dawud uca ggin Yarubɛam, mmis n Nabaṭ d ajeǧid. Yarubɛam [maca] ibḍa Israil x SIDI uca yarra i-ten ad ggen ijj n ddenb d ameqqran.
2KI 17:22 Ayt n Israil kkin di marra ddnub i igga Yarubɛam. Nitni war xasen ḥeyyden ca,
2KI 17:23 ařami inḍar SIDI Israil zi zzat i wudem nnes am mammec tuɣa issiweř s uqemmum n marra imsexxaren nnes, inabiyyen. Ssuffɣen Israil zeg wudem n temmurt nnes di lmenfa ɣar Accur, ař ass-a.
2KI 17:24 Ajeǧid n Accur yiwi-dd [iwdan] zi Babil d Kuta d Ɛawa d Ḥamat d Sfarwayim, uca issezdeɣ i-ten di tneddam n Samarya, deg wemcan n ayt n Israil. Nitni ṭṭfen Samarya d řwart [i yixef nsen] u ggin ad zedɣen di tneddam nnes.
2KI 17:25 Umi dinni zedɣen ɛad cwayt, imsar aqa nitni war ggʷiden ca SIDI. [Xenni] issekk SIDI iyraden jar asen inni inɣin ca zzaysen.
2KI 17:26 Nitni ssiwřen [x man aya] ak-d u ujeǧid n Accur, nnan: “Řegnus nni tessuffɣed u tesszedɣed di tneddam n Samarya, war ssinen mammec [teǧa] tubbart n AREBBI n temmurt. [X uya] Netta issekk iyraden jar asen, u xzar, nitni nɣin ten, maɣar war ssinen ca tubbart n AREBBI n temmurt.
2KI 17:27 Ajeǧid n Accur yumur, inna: “Jjem ad din iraḥ ijjen zeg ikehhanen nni tnedhem ssenni. Nitni ad [din] raḥen u ad [din] zedɣen u netta ad asen isseřmed tubbart n AREBBI n temmurt.”
2KI 17:28 Yusa-dd ijjen zeg ikehhanen nni tuɣa nedhen zi Samarya uca netta izdeɣ di Bayt-Il. Isseřmed i-ten mammec ɣa weqqaren SIDI.
2KI 17:29 [Maca] kuř řgens yarni ad igg irebbiten n yixef nnes uca ssbedden ten di tudrin x řegɛudi nni tuɣa bnan Isamariyyen, kuř řgens di tneddam nsen mani tuɣa zeddɣen.
2KI 17:30 Iryazen n Babil ggin [i yixef nsen] Sukkut-Bnut, u iryazen zi Kuta ggin Narjal, u iryazen zi Ḥamat ggin Acima,
2KI 17:31 u Iɛawiyyen ggin iwrafen n Nibḥaz d Tartaq, uca Isafarwayyin sscemḍen iḥenjiren nsen i Adrammilik d Ɛanammilix, irebbiten n Sfarwayim.
2KI 17:32 [S marra man aya] ggʷeden nitni [ɛawed] SIDI, [maca di řweqt d ijj] ggin nitni i yixef nsen zi [marra] řeṣfuf nsen [ɛawed] ikehhanen i řegɛudi, inni d asen isexxaren di tudrin x řegɛudi.
2KI 17:33 Nitni ggʷeden SIDI uca sexxaren uřa i irebbiten [n ixef nsen] am mammec [tuɣa teǧa] tubbart n řegnus i zi tuɣa ttwanedhen nitni.
2KI 17:34 Ař ass-a tteggen nitni ɛlaḥsab ṭṭbayeɛ nsen n zic. Nitni war tteggʷden ca SIDI u war tteggen ca ɛlaḥsab tiweṣṣa d lfariḍa, [ixs ad yini] Ccariɛa d řumur i igga SIDI x ayt n Yaɛqub wenni umi tuɣa iwca isem ‘Israil’.
2KI 17:35 SIDI igga ijj n Řɛahd akidsen, uca yumur i-ten, inna: “Kenniw war tzemmarem ad tweqqarem irebbiten nneɣni, war d asen ttaḍarem, war d asen ɛebbdem u war d asen ttawyem taɣarṣt.
2KI 17:36 Maca ittxeṣṣa ad teggʷdem SIDI, wenni kenniw dd-issuffɣen zi Miṣra s jjhed ameqqran u s uɣiř isswiẓẓḍen, u ad as tsejdem u ad as tawyem taɣarṣt.
2KI 17:37 Ad teḥḍam tiweṣṣa d lfarayiḍ d Ccariɛa d řumur nni d awem yura, maḥend ad ten teggem kuř ass. War iḥeǧeř ad teggʷdem irebbiten nneɣni.
2KI 17:38 War tᵉttᵉttum Řɛahd i ggiɣ akidwem u war tᵉttweqqarem i irebbiten nneɣni,
2KI 17:39 maɣar ad teggʷedem SIDI, AREBBI nwem. Netta ad kenniw issenjem zeg ufus n marra řɛedyan nwem.”
2KI 17:40 [Maca] nitni war xsen ad sřen, maca ggin ɛlaḥsab tubbart nsen n zic.
2KI 17:41 Řegnus ggʷeden SIDI u sexxaren uřa i řexyařat nsen ineqcen deg umur d ijjen. Uřa d iḥenjiren nsen d iḥenjiren n iḥenjiren nsen tteggen [ɛad] am mammec ggin řejdud nsen, ař ass-a.
2KI 18:1 Deg useggʷas wiss třata n Huciɛa, mmis n Ila, ajeǧid n Israil, imsar belli Ḥizqiya idweř d ajeǧid. [Netta tuɣa] d mmis n Aḥaz, ajeǧid n Yahuda.
2KI 18:2 Netta tuɣa ɣares xemsa u-ɛicrin n iseggʷusa umi idweř d ajeǧid. Netta iḥkem tesɛa u-ɛicrin n iseggʷusa di Urcalim. Yemmas qqaren as Abi, yeǧis n Zakariyya.
2KI 18:3 Netta igga min iǧan nican di tiṭṭawin n SIDI, nican am mammec t igga babas Dawud.
2KI 18:4 Netta ikkes řegɛudi, yarẓa imayḍuten [iqeddsen], ihdem tarebbit n cwarti uca iřbez afiɣar n nnḥas i tuɣa igga Musa, minzi ayt n Israil tuɣa i d as dd-yiwyen tiwhibin n řebxur ař ussan nni. Netta iřaɣa as Naḥuctan.
2KI 18:5 Netta ittceř x SIDI, AREBBI n Israil. Jar marra ijeǧiden n Yahuda inni dd-yusin awarni as niɣ [ddaren] qbeř nnes, war tuɣi iǧi uřa d ijj am netta.
2KI 18:6 Netta tuɣa iḍfar abrid n SIDI, war xas iḥeyyed ca zi ḍeffar nnes. Netta tuɣa iḥeṭṭa řumurat nnes nni tuɣa yumur SIDI i Musa.
2KI 18:7 SIDI tuɣa akides. Mani ma tuɣa ittraḥ, tuɣa ifřeḥ. Netta iɣewweɣ x ujeǧid n Accur u war xas isexxar [ɛad].
2KI 18:8 Netta iɣřeb x Ifilisṭiniyyen ař Ɣazza ak-d jjwayeh nnes, zi lburj n iɛessasen ař tandint ifaryen.
2KI 18:9 Deg useggʷas wiss arebɛa n ujeǧid Ḥizqiya, d aseggʷas wiss sebɛa n Huciɛa, mmis n Ila, ajeǧid n Israil, imsar belli Calmanassar, ajeǧid n Accur, igeɛɛed ḍidd i Samarya uca iṭṭef i-tt.
2KI 18:10 Nitni ṭṭfen tt awarni i třata n iseggʷusa. Deg useggʷas wiss setta n Ḥizqiya, aqa-t d aseggʷas wiss tesɛa n Ḥuciɛa, ajeǧid n Israil, ṭṭfen nitni Samarya.
2KI 18:11 Ajeǧid n Accur indeh [ayt n] Israil di lmenfa ɣar Accur uca yiwyi ten di Ḥalaḥ u ɣar Xabur, wenni d iɣzar n Juzan, u [di] tneddam n Imadayen,
2KI 18:12 maɣar nitni tuɣa war sřin ɣar min d asen inna SIDI, AREBBI nsen, uca arẓin Řɛahd nnes. Marra min yumur Musa, amsexxar n SIDI, war d as sřin u war t ggin.   *
2KI 18:13 Deg useggʷas wiss arbeɛṭac n ujeǧid Ḥizqiya iffeɣ Sanḥarib, ajeǧid n Assur, ɣar marra tineddam ifaryen [s iɣebrawen] n Yahuda uca iḥewwes i-tent.
2KI 18:14 Ḥizqiya, ajeǧid n Yahuda, issekk [ireqqasen] ɣar ujeǧid n Accur, ɣar Laxic, inna: “Necc xḍiɣ! Beɛɛed xafi! Marra min xafi ɣa tegged, ad t xeǧṣeɣ.” [Xenni] igga ujeǧid n Accur ict n ljizya x Ḥizqiya, ajeǧid n Yahuda: teřt mya talint n nnuqart d třatin talint n wureɣ.
2KI 18:15 Ḥizqiya iwca marra nnuqart nni ittwafen di Taddart n SIDI u deg ixxamen n txubay n taddart n ujeǧid.
2KI 18:16 Di řweqt nni iqess Ḥizqiya, ajeǧid n Yahuda, [marra wureɣ n] tewwura n Zzawect Tameqqrant n SIDI u n řeḍruf ɣar uɣezdis n tewwart inni tuɣa iɣeǧef Ḥizqiya, ajeǧid n Yahuda, [s wureɣ] uca iwca i-t i ujeǧid n Accur.
2KI 18:17 [Xenni] issekk ajeǧid n Accur ljiniral ak-d uzeǧif n imsexxaren icennɛen d ukumandar n řɛeskar ak-d ijj n řɛeskar d ameqqran aṭṭas zi Laxic ɣar ujeǧid Ḥizqiya di Urcalim. Nitni geɛɛden, iwḍen ɣar Urcalim. Uca [awarni řami] geɛɛden uca iwḍen nitni, bedden ɣar uqadus n waman n uyeřman n sennej, wenni [iǧan] ɣar webrid yuɛřan ɣar Weḥwic n Uṣebban.
2KI 18:18 Nitni řaɣan, [ḥima ad dd-yas] ujeǧid. [Xenni] uyuren ɣarsen Alyaqim, mmis n Ḥilqiya, wenni iǧan x taddart [n ujeǧid], ak-d umarir Cibna d Yuwax, mmis n Asaf, amarir n umezruy.
2KI 18:19 Akumandar n řɛeskar inna asen: “Inim i Ḥizqiya: ‘Ammu i iqqar ujeǧid ameqqran, ajeǧid n Accur: Man atecři-ya i x tᵉttecřed?
2KI 18:20 Aqa-t d řhard n iyencicen [waha], umi tennid: Aqa [ɣarneɣ] ccwar d jjehd i umenɣi! Man wen i x tᵉttecřed, aqa cek tɣewwɣed xafi?
2KI 18:21 Xzar, řexxu tᵉttecřed x Miṣra, x uɣanim nni innḍefsen, wenni, umi ḥed xas i ɣa iɛemmed, ittejjun deg ufus nnes uca issnuqqeb i-t. Ammu [i yeǧa] firɛun, ajeǧid n Miṣra, i marra inni xas ittecřen.
2KI 18:22 Mařa kenniw ad d ayi tinim: ‘Neccin nettceř x SIDI, AREBBI nneɣ!’, [xenni necc ad iniɣ:] ‘Ma Netta war iǧi d wenni i zi iḥeyyed Ḥizqiya řegɛudi d iɛalṭaren, u [xenni] inna i Yahuda d Urcalim: Ittxeṣṣa ad tbendqem zzat i uɛalṭar-a di Urcalim?’
2KI 18:23 Xenni řexxu, egg ijj n umḥarrem ak-d sidi inu, ajeǧid n Accur, necc ad ac wceɣ ařfayen n iysan mařa cek zeg uɣezdis nnec ad asen dd-tawyed ayt n bu-uyis.
2KI 18:24 Mammec texsed ad tennqeřbed x wudem n lwali, wenni qaɛ d ameẓyan n imsexxaren n sidi inu, uca ad tᵉttecřed x Miṣra di ssibbet n ikarruten d imnayen?
2KI 18:25 Ɛawed, maɣar ma necc geɛɛdeɣ-dd ḍidd n wemcan-a, ḥima ad t areddǧeɣ břa SIDI? SIDI ini ayi: ‘Geɛɛed ḍidd i temmurt-a, areddeǧ i-tt!’”
2KI 18:26 Uca nnan Alyaqim, mmis n Ḥilqiya d Cibna d Yuwax i ukumandar n řɛeskar: “Siweř ɛafek s [iřes n] Tramit ak-d imsexxaren nnec, minzi nefhem as mliḥ. War kidneɣ ssiwiř s Tyahudect deg imezzuɣen n řgens [i iǧan] x řḥiḍ.”
2KI 18:27 [Maca] akumandar n řɛeskar inna asen: “Ma issekk ayi-dd sidi inu ḥima ad ssiwřeɣ awařen-a ɣar sidi nnec u ɣarek [waha], war iǧi i yeryazen nni iqqimen x řḥiḍ, [maḥend ad iniɣ] aqa aten [jmiɛ] akidwem ad ccen asuffeɣ nsen u ad swen ibeccicen nsen?”
2KI 18:28 Xenni ikkar ukumandar, iřaɣa s jjhed s Tyahudect uca issiweř, inna: “Sřem i wawař n ujeǧid ameqqran, ajeǧid n Accur!
2KI 18:29 Ammu i iqqar ujeǧid: ‘Ḥḍam war kenniw ittɣecci Ḥizqiya, minzi netta war izemmar ad kenniw ifekk zeg ufus nnes.
2KI 18:30 War ttejjim Ḥizqiya ad kenniw yarr ad tᵉttecřem x SIDI, ad tinim: SIDI ad aneɣ ifekk nican u tandint-a war tᵉttmewci ca deg ifassen n ujeǧid n Accur.’
2KI 18:31 War tesřim ca ɣar Ḥizqiya, maɣar ammu i iqqar ujeǧid n Accur: ‘Ggem ayi array uca ffɣem-dd [zi tendint] ɣari, [xenni] izemmar kuř ijjen zzaywem ad icc zi tzayart nnes u zeg wartu n tazart nnes u ad isu aman zeg wanu nnes,
2KI 18:32 ař dd ɣa yaseɣ u ad kenniw awyeɣ ɣar ict n temmurt am temmurt nwem: ɣar ict n temmurt teccur s imendi d binu n jdid, ɣar ict n temmurt teccur s weɣrum d imarjaɛen n uḍiř, ict n temmurt n zzitun d zzect d tamment. Ammu i ɣa teqqimem teddarem, war tmettim ca. War ttesřim ɣar Ḥizqiya, maɣar netta ittɣarra kenniw xmi iqqar: SIDI ad aneɣ ifekk!
2KI 18:33 Ma zemmaren [xenni] irebbiten n řegnus, kuř ijj [zzaysen], ad fekken tammurt nsen zeg ufus n ujeǧid n Accur?
2KI 18:34 Mani ǧan irebbiten n Ḥamat d Arfad? Mani ǧan irebbiten n Sfarwayim d Haniɛ d Ɛiwa? Ma fekken nitni Samarya zeg ufus inu?
2KI 18:35 Man wen zi marra irebbiten n temmura [nneɣni] i issnejmen tammurt nsen zeg ufus inu ařami ɣa ifekk SIDI Urcalim zeg ufus inu?’”
2KI 18:36 [Maca] řgens iseɣd, war xas dd-yarri s uřa d ijj n wawař, maɣar řumur n ujeǧid inna: “Kenniw war xas dd-tarrim ca!”
2KI 18:37 [Xenni] yusa-dd Alyaqim, mmis n Ḥilqiya, řemqeddem n tzeddiɣt [n ujeǧid], ak-d Cibna amarir, d Yuwax, mmis n Asaf, amarir n umezruy s warruḍ icarrgen ɣar Ḥizqiya. Nitni ḥajan as marra awařen n ukumandar n řɛeskar.
2KI 19:1 Umi ten isřa ujeǧid Ḥizqiya, icarreg arruḍ nnes, idřa ixef nnes s ict n txancet [n wecḍan] uca yudef ɣar Taddart n SIDI.
2KI 19:2 [Xenni] issekk netta Alyaqim, řemqeddem n tzeddiɣt [n ujeǧid], d Cabna, amarir, d imɣaren n ikehhanen deg warruḍ n txuncay [n wecḍan] ɣar unabi Icaɛya, mmis n Amuṣ.
2KI 19:3 Nitni nnan as: “Ammu i iqqar Ḥizqiya: ‘Ass-a d ijj n wass n řeḥṣaret u n weɛqab u n ubehdeř, maɣar iḥenjiren iwḍen-dd ař arzam n uɛeddis [n yemmatsen], [maca] war din jjehd i twarut.
2KI 19:4 Ad taɣ SIDI, AREBBI nnec, isřa marra awařen n ukumandar n řɛeskar wenni ittwassekken zi sidis nnes, ajeǧid n Accur, ḥima ad istehza zi AREBBI iddaren, u [ad taɣ] SIDI, AREBBI nnec, ad iɛaqeb awařen i isřa. Sgeɛɛed [xenni] ict n tẓaǧit di ṭṭweɛ n řbaqi nni i ɣa ittwafen [ɛad].’”
2KI 19:5 [Ammu] iwḍen imsexxaren n ujeǧid Ḥizqiya ɣar Icaɛya.
2KI 19:6 Inna asen Icaɛya: “Ammu i ittxeṣṣa ad tinim i siditwem: ‘Ammu i iqqar SIDI: War teggʷed ca zeg wawařen i tesřid cek, i zi i d ayi ceqqfen imsexxaren n ujeǧid n Accur.
2KI 19:7 Xzar, Necc ad dayes ggeɣ ijj n buḥbeř u netta ad iseř i yijj n řexbar u ad iɛqeb ɣar temmurt nnes u Necc ad t nɣeɣ [din] di temmurt nnes s ssif.’”
2KI 19:8 [Xenni] iɛqeb-dd ukumandar n řɛeskar uca yufa ajeǧid n Accur ittmenɣa ak-d [tendint n] Libna, maɣar isřa aqa iqřeɛ iqiḍan nnes [iffeɣ] zi Laxic.
2KI 19:9 [Umi] isřa aqa nnan x Tirhaqa, ajeǧid n Kuc: “Xzar, iffeɣ-dd, ḥima akidek immneɣ!”, issekk [ɛawed] ireqqasen ɣar Ḥizqiya, inna:
2KI 19:10 “Ammu i ɣa tessiwřem ak-d Ḥizqiya, ajeǧid n Yahuda, ad tinim: ‘War ttejji ad cek iɣwa AREBBI nnec wenni x tᵉttecřed am iqqar: Urcalim war tᵉttweṭṭi i ujeǧid n Accur deg ifassen!
2KI 19:11 Xzar, tesřid min ggin ijeǧiden n Accur ak-d marra timmura nneɣnit, tinni tuɣa ad ttwareddǧent. Ma ittɣiř ac ad tᵉttwafekked?
2KI 19:12 Ma fekken ten irebbiten n řegnus inni yareddǧen řejdud inu? Juzan d Ḥaran d Rṣif d ayt n Ɛadan, inni [tuɣa izeddɣen] di Talassar?
2KI 19:13 Mani iǧa ujeǧid n Ḥamat d ujeǧid n Arfad d ujeǧid n tendint n Sfarwayim uřa d [ajeǧid n] Hanaɛ d Ɛiwwa?’”
2KI 19:14 Ḥizqiya iksi tibratin zeg ufus n imsexxaren uca iɣra i-tent. [Xenni] igeɛɛed ɣar Taddart n SIDI uca ibezzeɛ i-tent Ḥizqiya zzat i wudem n SIDI.
2KI 19:15 Uca iẓẓuǧ Ḥizqiya zzat i wudem n SIDI, inna: “[A] SIDI, AREBBI n Israil, wenni ittɣiman [jar] ikiruben! Cek, [wah] Cek weḥḥdek d AREBBI n marra tigeldiwin n ddunect. Cek teggid ijenwan d temmurt.
2KI 19:16 [A] SIDI, ewc amezzuɣ nnec, seř! [A] SIDI, arzem tiṭṭawin nnec, xzar! Seř i wawařen n Sanḥarib nni dd-issekk, ḥima ad istehza zi AREBBI iddaren.
2KI 19:17 D tidett, [a] SIDI, ijeǧiden n Accur qḍan řegnus nni, xarrben temmurt nsen,
2KI 19:18 u nḍaren irebbiten nsen di tmessi, maɣar tuɣa war ǧin d irebbiten, maca d timegga n ufus n yewdan waha, zeg ukeccuḍ d weẓru, uca nitni mḥan ten.
2KI 19:19 [Maca] řexxu, [a] SIDI, AREBBI nneɣ, senjem aneɣ zeg ufus nnes, maḥend marra tigeldiwin n ddunect ad ssnen, [a] SIDI, aqa Cek weḥḥdek d AREBBI.”
2KI 19:20 [Xenni] isekk Icaɛya, mmis n Amuṣ, [ijj n ureqqas] ɣar Ḥizqiya, inna: “Ammu i iqqar SIDI, AREBBI n Israil: ‘Necc sřiɣ s minzi ɣari teẓẓuǧed x Sanḥarib, ajeǧid n Accur.
2KI 19:21 Wa d awař i xas issiweř SIDI: ‘Taɛzarect, yeǧis n Ṣihyun, tesseḥqar i cek, testehza zzayek, yeǧis n Urcalim thezza azeǧif awarni ac!
2KI 19:22 Wi zi testehzid u wi di tceqqfed? Wi xef tessgeɛɛded tmijja [nnec], u mixef tessgeɛɛded s nnfaxet tiṭṭawin nnec? [Cek tᵉttɣennaned] x Umqeddas n Israil!
2KI 19:23 S uqemmum n imsexxaren nnec testehzid Sidi inu, tennid: S ubarru n ikarruten inu geɛɛdeɣ idurar yuɛřan, iɣezdisen n Lubnan. Necc ad zedmeɣ ticejjura nnes n tengelt yuɛřan uřa d řemxeyyer n ssibri nnes u necc ad dd-adfeɣ ɣar wemcan nnes n wareyyeḥ i iggʷejen aṭṭas, ɣar wezɣar n umarjeɛ nnes n uḍiř iṣebḥen.
2KI 19:24 Necc ɣziɣ [anuten], swiɣ aman. S tařeqqa n iḍaren inu ssiẓɣeɣ marra iɣezran n Miṣra.
2KI 19:25 Ma war tesřid aqa [aṭṭas] zeg wami ggiɣ man aya, uca wciɣ as udem deg wussan n mecḥař uya? Řexxu jjiɣ t ad dd-iffeɣ, aqa cek d wenni i ɣa yarren tineddam ifaryen d řxirbat.
2KI 19:26 Imezdaɣ nsen tuɣa aten arxun, arẓin u seḍḥan. Nitni tuɣa aten am wefsu deg iyyar, [am] uɣemmuy aziza, [am] uřum x tzeɣwin, u [am] [imendi] icemḍen [s usemmiḍ] qbeř ma ad iffeɣ.
2KI 19:27 [Maca] necc ssneɣ aɣimi nnec d uffuɣ nnec d weɛqab nnec d uɣewweɣ nnec xafi.
2KI 19:28 Minzi cek tɣewwɣed xafi u tuffet nnec tiweḍ ɣar imezzuɣen inu, ad ac ssekkeɣ tasennart deg wenzaren nnec u [ad ggeɣ] sřimet jar iyencicen nnec, u Necc ad cek arreɣ x webrid i di dd-tusid da.’
2KI 19:29 D ta ad ac tiři d řeɛřamet: Deg useggʷas-a ad teccem min ɣa iɣemmyen s yixef nnes u deg useggʷas wiss tnayen min zzayes ɣa iɣemmyen ɛawed, maca deg useggʷas wiss třata ad tzarɛem u ad temjarem, ad teggem imarjaɛen n uḍiř, ad daysen teẓẓum tzayarin uca ad teccem řɣiǧet nnes.
2KI 19:30 Maɣar min innejmen, min iqqimen zi taddart n Yahuda, ad iwwet ɛawed iẓewran ɣar swadday u sennej ad yawi řɣiǧet.
2KI 19:31 Maɣar zi Urcalim ad dd-iffeɣ min iqqimen u zeg wedrar n Ṣihyun ad iffeɣ min innejmen, asam n SIDI [n řɛeskarat ijehden] ad igg aya.
2KI 19:32 S uya, ammu i iqqar SIDI x ujeǧid n Accur: Netta war dd-ittidef ca di tendint-a u war dayes iccit ca uřa d ict n fřitca, war ɣares-dd iqarreb ca s ict n tseddart [n uɛeskari] u war xas ttbeqqiḍen ijj n lbaraj i řeḥṣaret.
2KI 19:33 X webrid i x dd ɣa yas, ad dd-iɛqeb. War ittidif ca ɣar tendint-a, iqqar SIDI.
2KI 19:34 Necc ad sseřqiɣ x tendint-a, ḥima ad tt ssnejmeɣ di ṭṭweɛ inu u di ṭṭweɛ n umsexxar inu Dawud.’”
2KI 19:35 Di ǧiřet nni, imsar, aqa iffeɣ lmalak n SIDI, inɣa mya u-xemsa u-tmenyin-ařef [n yeryazen] di řmargeḥ n řɛeskar n Accur. Umi i dd kkaren nitni tiwecca nnes, xzar, aqa aten marra idsen d řxecbat.
2KI 19:36 Uca Sanḥarib, ajeǧid n Accur, yarẓa iqiḍan nnes, iruḥ uca iɛqeb [ɣar temmurt nnes]. Netta iqqim izeddeɣ di Ninwa.
2KI 19:37 Umi isjed [ijj n wass] di taddart n arebbi nnes Nisrux, imsar, aqa [iḥenjiren nnes] Adrammilik d Caraṣar nɣin t s ssif. Nitni arewřen ɣar temmurt n Ararat. Mmis Asarḥaddun idweř d ajeǧid deg wemcan nnes.
2KI 20:1 Deg wussan nni iḥřec Ḥizqiya s ijj n řeḥřac ineqqen. Yusa-dd ɣares unabi Icaɛya, mmis n Amuṣ, inna as: “Ammu i iqqar SIDI: ‘Ewc řumurat i taddart nnec, maɣar ad temmted, war tᵉttɣimid teddared [ɛad ktar].’”
2KI 20:2 [Xenni] inneqřeb s uɣembub nnes ɣar řḥiḍ uca iẓuǧ i SIDI, inna:
2KI 20:3 “A, SIDI, ɛqeř aqa necc uyureɣ zzat i wudem nnec s řaman u s yijj n wuř ikemmřen u ggiɣ min iǧan nican di tiṭṭawin nnec.” Uca ibda Ḥizqiya ittru s jjhed.
2KI 20:4 Tuɣa ɛad war iffiɣ Icaɛya zi řwesṭ n tendint, řami ɣares dd-yusa wawař n SIDI, inna:
2KI 20:5 “Ɛqeb, ini i Ḥizqiya, řḥakem n řgens inu: ‘Ammu i iqqar SIDI, AREBBI n babac Dawud: Necc sřiɣ i tẓaǧit nnec u ẓriɣ i imeṭṭawen nnec. Xzar, ad cek ssgenfiɣ. Deg wass wiss třata ad tgeɛɛded [ɛawed] ɣar Taddart n SIDI.
2KI 20:6 Necc ad arniɣ xemmesṭac n iseggʷusa i wussan [n tudart] nnec u ad cek fekkeɣ zeg ufus n ujeǧid n Accur, uřa d tandint. Necc ad sseřqiɣ x tendint-a di ṭṭweɛ inu u di ṭṭweɛ n umsexxar inu Dawud.’”
2KI 20:7 [Xas uca] inna Icaɛya: “Ksi ijj n weɣrum n tazart!” Nitni iwyen t-i-dd, ssarsen x ubuɛrus uca idweř iggenfa.
2KI 20:8 Ḥizqiya [maca] inna i Icaɛya: “Man řeɛřamet aqa SIDI ad ayi issgenfa u necc ad geɛɛdeɣ ɣar Taddart n SIDI deg wass wiss třata?”
2KI 20:9 Inna Icaɛya: “Aya ad ac tiři d řeɛřamet n SIDI, aqa SIDI ad isseqfeř awař nni issiweř: ‘Ma ad tuyur tiři ɛecra n treffidin ɣar zzat niɣ ad dd-teɛqeb ɛecra n treffidin ɣar ḍeffar?’”
2KI 20:10 Ḥizqiya inna: “Ihwen i tiři, maḥend ad tezzuggar ɛecra n treffidin, lla, ejj tiři ad teɛqeb ɛecra n treffidin ɣar ḍeffar.”
2KI 20:11 Uca iřaɣa unabi Icaɛya ɣar SIDI u Wanita ijja tiři ad teɛqeb x treffidin i x tehwa x ddruj n Aḥaz: ɛecra n treffidin ɣar ḍeffar.
2KI 20:12 Di řweqt nni issekk Baradux-Baladan, mmis n Baladan, ajeǧid n Babil, tibratin d ict n tarzeft ɣar Ḥizqiya, maɣar netta tuɣa isřa aqa Ḥizqiya ihřec.
2KI 20:13 Ḥizqiya isřa asen uca isscen asen marra taddart n txubay nnes: nnuqart d wureɣ d řeɛṭur d zzect d řehri n řesnaḥ nnes d marra min ittwafen deg ixxamen nnes n txubay. War iqqim walu di taddart nnes u di marra řeḥkamet nnes nni war tuɣi d asen t isscen.
2KI 20:14 [Xenni] yusa-dd unabi Icaɛya ɣar ujeǧid Ḥizqiya, inna as: “Min nnan iryazen nni u manis dd-usin ɣarek?” Ḥizqiya inna: “Nitni usin-dd zeg ict n temmurt tiggʷej, zi Babil.”
2KI 20:15 Netta inna: “Min ẓrin nitni di taddart nnec?” Ḥizqiya inna: “Nitni ẓrin marra min iǧan di taddart inu. War iqqim ca zi min iǧan deg ixxamen n txubay inu, war d asen t ssecneɣ.”
2KI 20:16 [Xenni] inna Icaɛya i Ḥizqiya: “Seř i wawař n SIDI!
2KI 20:17 ‘Ad dd-asen wussan meřmi marra min iǧan di taddart nnec uřa d min yarwen řejdud nnec ař ass-a, ad t awyen ɣar Babil. War ittɣimi walu, iqqar SIDI.
2KI 20:18 Ad awyen uřa zeg iḥenjiren nnec inni dd ɣa iffɣen zzayek, inni dd ɣa tejjed, ḥima ad iřin d imsexxaren imcennɛen di řeqṣar n ujeǧid n Babil.’”
2KI 20:19 Ḥizqiya inna i Icaɛya: “Awař n SIDI i d ayi tennid iṣbeḥ.” Netta inna ɛawed: “Niɣ lla, mařa [xenni] deg wussan inu ad [din] yiři řehna d řaman!”
2KI 20:20 Imezruyen iqqimen n Ḥizqiya d marra timegga nnes imeḥḍen d mammec igga ayeřmam d uqadus n waman u [mammec] indeh aman di tendint, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 20:21 Ḥizqiya igga ad yareyyeḥ jar řejdud nnes. Mmis Manassa idweř d ajeǧid deg wemcan nnes.
2KI 21:1 Tuɣa ɣar Manassa tenɛac n iseggʷusa umi idweř d ajeǧid. Netta iḥkem xemsa u-xemsin n iseggʷusa di Urcalim. Yemmas qqaren as Hafṣi-Bah.
2KI 21:2 Netta igga min iǧan d aɛeffan di tiṭṭawin n SIDI, am mammec jjɛayef n řegnus nni tuɣa issuffeɣ SIDI zi zzat n wudem n ayt n Israil zi řwart nsen.
2KI 21:3 Netta ibda ad iɛdeř řegɛudi nni tuɣa ihdem babas Ḥizqiya. Netta issbedd iɛalṭaren i Baɛal uca igga ict n trebbit n cwarti am mammec tuɣa [tt] igga Axab, ajeǧid n Israil, uca ibendeq i marra řɛeskar n ujenna uca iɛbed asen.
2KI 21:4 Issbedd ɛawed iɛalṭaren di Taddart n SIDI i x inna SIDI: “Di Urcalim ad ssmetneɣ Isem inu.”
2KI 21:5 Netta ibna iɛalṭaren i marra řɛeskar n ujenna di tnayen n řemraḥat n Taddart n SIDI.
2KI 21:6 Netta ijja mmis ad yekk x tmessi u issxeddam tabezgiwt u tuɣa ittgezzen. Netta yiwi-dd inni issawařen ak-d imettan, d igezzanen. Netta igga aṭṭas min iǧan d aɛeffan di tiṭṭawin n SIDI, maḥend ad t isɛar.
2KI 21:7 Netta issbedd ijj n řexyař ineqcen n trebbit n cwarti nni tuɣa igga, di Taddart nni x tuɣa inna SIDI i Dawud, mmis n Suliman: “Di Taddart-a u di Urcalim i farzeɣ zi marra tiqebbař n Israil, ad ssmetneɣ Isem inu i řebda.
2KI 21:8 Necc war ttejjiɣ ɛad aḍar n Israil ad iweddar barra i temmurt i wciɣ i řejdud nsen. Mɣir ittxeṣṣa asen ad ḥḍan ad ggen am mammec marra min d asen umureɣ u am mammec marra Ccariɛa i d asen yumur umsexxar inu Musa.”
2KI 21:9 [Maca] nitni war sřin ca, maɣar Manassa yarra i-ten ad weddaren, ařami arenyen di tuɛɛefna mahu řegnus nni imḥa SIDI zzat i wudem n ayt n Israil.
2KI 21:10 [Xenni] issiweř SIDI s uqemmum n imsexxaren nnes, inabiyyen, inna:
2KI 21:11 “Minzi Manassa, ajeǧid n Yahuda, igga jjɛayef-a, igga netta tuɛɛefna mahu x [ayt n] Amur inni [i din iǧan] qbeř nnes. Netta yarra uřa d Yahuda ad ixḍa s imeyḍa nnes [n l’aṣnam].
2KI 21:12 S uya, ammu i iqqar SIDI, AREBBI n Israil: ‘Xzar, Necc ad ggeɣ tuɛeffna x Urcalim d Yahuda, maḥend marra wi xas i ɣa isřen, aqa tnayen n imezzuɣen nnes ad ṭneṭnen.
2KI 21:13 Necc ad qqneɣ i Urcalim fiřu n řeɛbar n Samarya d řmizan n taddart n Axab. Necc ad mesḥeɣ Urcalim am mammec mesḥeɣ ijj n ṭṭebṣi. Mesḥen t u [xenni] qeřben t x uzeǧif nnes.
2KI 21:14 Ad jjeɣ min iqqimen zi tesɣart n řwart inu, ad ten ssiwḍeɣ ɣar ifassen n řɛedyan nsen u nitni ad dewřen d taḥeggʷast d takeccaḍt i marra řɛedyan nsen,
2KI 21:15 maɣar nitni ggin min iǧan d aɛeffan di tiṭṭawin n SIDI u [maɣar] nitni sɛaren ayi zeg wass i di ffɣen řejdud nsen zi Miṣra ař ass-a.
2KI 21:16 Ɛawed tuɣa Manassa issizzeř aṭṭas n idammen imezdagen ařami zzaysen iccur marra Urcalim zeg ijj n ṭṭarf ɣar wenneɣni, břa ma nidar [ɛad] ddenb nnes i zi yarra Yahuda ad ixḍa, umi igga min iǧan d aɛeffan di tiṭṭawin n SIDI.
2KI 21:17 Imezruyen iqqimen n Manassa d marra min igga uřa d ddenb nnes i igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 21:18 Manassa igga ad yareyyeḥ jar řejdud nnes. Netta ittwanḍeř deg weḥwic n taddart nnes, di řemraḥ n Ɛuṣa. Mmis Amun idweř d ajeǧid deg wemcan nnes.
2KI 21:19 Amun [tuɣa] ɣares tnayen u-ɛicrin n iseggʷusa umi idweř d ajeǧid. Netta iḥkem tnayen n iseggʷusa di Urcalim. Yemmas qqaren as Mcullamit, yeǧis n Ḥaruz zi Yutba.
2KI 21:20 Netta igga min iǧan d aɛeffan di tiṭṭawin n SIDI, [ammu nican] am mammec t igga babas Manassa.
2KI 21:21 Netta yuyur kuř abrid i di yuyur babas. Netta isexxar i imeyḍa [n l’aṣnam] i tuɣa isexxar [uřa d] babas uca isjed asen.
2KI 21:22 Netta ismeḥ di SIDI, AREBBI n řejdud nnes, u netta war yuyur ca deg webrid n SIDI.
2KI 21:23 Imsexxaren n Amun ggin xas ict n tmeɛmuč uca nɣin ajeǧid di taddart nnes.
2KI 21:24 [Maca] řgens n temmurt nɣin marra inni tuɣa iggin ict n tmeɛmuč i ujeǧid Amun, uca řgens n temmurt ggin mmis Yuciya d ajeǧid deg wemcan nnes.
2KI 21:25 Imezruyen iqqimen n Amun d min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 21:26 Netta ittwanḍeř deg wenḍeř nnes deg weḥwic n Ɛuzza. Mmis Yuciya idweř d ajeǧid deg wemcan nnes.
2KI 22:1 Yuciya [tuɣa] ɣares tmenya n iseggʷusa umi idweř d ajeǧid. Netta iḥkem waḥit u-třatin n iseggʷusa di Urcalim. Yemmas qqaren as Yadidya, yeǧis n Ɛadaya zi Buṣqat.
2KI 22:2 Netta igga min iǧan nican di tiṭṭawin n SIDI. Netta yuyur di kuř abrid n babas Dawud, war iḥeyyed [x webrid] [ɣar] yefus uřa [ɣar] uzeřmaḍ.
2KI 22:3 Deg useggʷas wiss tmenṭac n ujeǧid Yuciya, imsar belli ajeǧid Yuciya issekk amarir Cafan, mmis n Aṣalya, mmis n Macullam, ɣar Taddart n SIDI, inna:
2KI 22:4 “Geɛɛed ɣar Ḥilqiya, arrays n ikehhanen, ḥima ad yegg ad sswejden tmenyat n nnuqart i dd yiwyen di Taddart n SIDI, d tinni i dd-yarwen iɛessasen n tewwura zi řgens.
2KI 22:5 Ejj i-ten ad tent ggen deg ifassen n yinni itteggen řxedmet, [deg ifassen n] imeḥḍayen n Taddart n SIDI, [ḥima] nitni ad tent wcen i yinni itteggen řxedmet i [din] iǧan di Taddart n SIDI, ḥima ad areqqɛen řeḥyuḍ ihruran n Taddart,
2KI 22:6 i ineqqacen [n ukeccuḍ d weẓru], i ibennayen d imaṣṣuten, u i tmesɣiwt n ukeccuḍ d tṣuḍar ittwassuydan i weɛdař n Taddart.”
2KI 22:7 Maca war ittxeṣṣi maḥend ad kidsen ggen řeḥsab zi jjihet n [ttmenyat n] nnuqart i d asen immewcen, maɣar nitni tteggen s utiqqi.
2KI 22:8 [Xenni] inna arrays n ikehhanen Ḥilqiya i umarir Cafan: “Necc ufiɣ adlis ittwannḍen n Ccariɛa di Taddart n SIDI.” Uca iwca Ḥilqiya i Cafan adlis ittwannḍen u wanita iɣra i-t.
2KI 22:9 [Awarni as] yuyur umarir Cafan ɣar ujeǧid uca issiweḍ řexbar i ujeǧid, inna: “Imsexxaren nnec ssmunen [ttmenyat n] nnuqart nni ittwafen di Taddart, farrɣen tent uca wcin tent deg ifassen n yinni iggin řxedmet, i imeḥḍayen n Taddart n SIDI.”
2KI 22:10 [Ɛawed] iḥaja umarir Cafan i ujeǧid, inna: “Akehhan Ḥilqiya iwca ayi ijj n wedlis.” Cafan iɣra i-t zzat i wudem n ujeǧid.
2KI 22:11 Umi isřa ujeǧid awařen n wedlis ittwannḍen n Ccariɛa, icarreg arruḍ nnes.
2KI 22:12 Ajeǧid yumur i ukehhan Ḥilqiya u i Axiqam, mmis n Cafan, u i Ɛakbur, mmis n Mixa-Yah, u i Cafan, amarir, u i Ɛasaya, amsexxar n ujeǧid, inna:
2KI 22:13 “Uyurem, arzum SIDI di ṭṭweɛ inu u di ṭṭweɛ n řgens u di ṭṭweɛ n marra Yahuda zi jjihet n wawařen-a n wedlis-a ittwannḍen i ittwafen, maɣar asɛar n SIDI i yarɣin ḍidd nneɣ d ameqqran, minzi řejdud nneɣ war sřin ca ɣar wawařen n wedlis-a ittwannḍen, ḥima ad ggen am mammec marra [min dayes] yuran i neccin.”
2KI 22:14 [Xenni] yuyur ukehhan Ḥilqiya ak-d Axiqam, Ɛakbur, Cafan d Ɛasaya ɣar tnabit Xulda, tamɣart n Callum, mmis n Tiqwa, mmis n Ḥarḥas, wenni iḥeṭṭan x warruḍen. Nettat tezdeɣ di Urcalim, deg wezyen nneɣni. Nitni ssiwřen akides.
2KI 22:15 Nettat tenna asen: “Ammu i iqqar SIDI, AREBBI n Israil: ‘Ini i weryaz nni kenniw i ɣari dd-issekken:
2KI 22:16 Ammu i iqqar SIDI: Xzar, Necc ad awyeɣ tuɛeffna x wemcan-a u x imezdaɣ nnes, aqa marra awařen n wedlis-a ittwannḍen i iɣra ujeǧid n Yahuda,
2KI 22:17 maɣar nitni semḥen dayi, iwyen tiwhibin n řebxur i irebbiten nneɣni ařami dayi sɛaren s marra řxedmet n ifassen nsen. Asɛar inu ad ittwassarɣ ḍidd i wemcan-a u war ixessi ca ɛad.
2KI 22:18 [Maca] inim i ujeǧid n Yahuda, wenni kenniw dd-issekken da ḥima ad tᵉttarem i SIDI: Ammu i iqqar SIDI, AREBBI n Israil, x wawařen i tesřid cek:
2KI 22:19 Minzi uř nnec idweř yarḍeb u tesswaḍɛed ixef nnec zzat i wudem n SIDI umi tesřid x min ssiwřeɣ x wemcan-a u x imezdaɣ nnes - aqa nitni ad dewřen d [ict n řqecɛet n] unexřiɛ d nneɛřet - u umi tcarrged arruḍ nnec uca trud zzat i wudem inu, x uya ad ac sřiɣ, iqqar SIDI.
2KI 22:20 S uya, aqa Necc ad cek ssmuneɣ ɣar řejdud nnec uca ad ttwassarsed deg wenḍeř di řehna u tiṭṭawin nnec war ẓarrent tuɛeffna i d ɣa awyeɣ x wemcan-a.’” [Xenni] ssiwḍen nitni awař-a ɣar ujeǧid.
2KI 23:1 [Xenni] issekk ujeǧid [ireqqasen] uca marra imɣaren n Yahuda d Urcalim munen ɣares.
2KI 23:2 Ajeǧid igeɛɛed ɣar Taddart n SIDI ak-d marra iryazen n Yahuda d marra imezdaɣ n Urcalim, uřa d ikehhanen d inabiyyen d marra řgens, zeg umeẓyan ař umeqqran, u netta iɣra xasen deg imezzuɣen nsen marra awařen n wedlis n Řɛahd nni tuɣa ufin di Taddart n SIDI.
2KI 23:3 Ajeǧid tuɣa ibedd ɣar ijj n upilar uca netta iqqen Řɛahd zzat i SIDI, ḥima ad iḍfar SIDI, ad iḥḍa řumurat nnes d cchadat nnes d tweṣṣa nnes s marra uř [nnes] u s marra řeɛmar [nnes], maḥend ad issemten awařen n Řɛahd-a nni yurin deg wedlis-a. Uca yudef řgens marra di Řɛahd.
2KI 23:4 Ajeǧid yumur i Ḥilqiya, arrays n ikehhanen, u i ikehhanen n usettef wiss tnayen u i iɛessasen n tewwart, aqa nitni ad ssuffɣen marra řeqcuɛ nni tuɣa ittwaggen i Baɛal u i trebbit n cwarti uřa i marra řɛeskar n ujenna zi Zzawect Tameqqrant n SIDI ɣar barra, u issecmeḍ man aya [marra] barra i Urcalim deg iyyaren n Qidrun u ijja ad arbun iɣɣeḍ nnes ɣar Bayt-Il.
2KI 23:5 Netta ikkes [ɛawed] ikehhanen n l’aṣnam nni tuɣa řeqqmen ijeǧiden n Yahuda, ḥima ad qeddmen tiwhibin n řebxur di řegɛudi, di tneddam n Yahuda u di jjwayeh i dd innḍen i Urcalim, uřa d yinni i iqeddmen tiwhibin n řebxur i Baɛal, d tfuct, d tziri, d temmura n ujenna u i marra řɛeskar n ujenna.
2KI 23:6 Issuffeɣ uřa d tarebbit n cwarti zi Taddart n SIDI, [igga i-tt] barra i Urcalim ɣar teɣzart n Qidrun. Netta issecmeḍ i-tt ɣar teɣzart n Qidrun u iddez i-tt d taɛejjajt u yareyyec i-tt x imeḍřan n ayt n řgens.
2KI 23:7 Netta ihdem ixxamen n imetleyyin nni tuɣa ɣar Taddart n SIDI, mani ttxeyyaḍent temɣarin iqiḍan nni ggint am tizzayiwin i trebbit n cwarti.
2KI 23:8 Netta ijja ad ssuffɣen marra ikehhanen zi tneddam n Yahuda uca issexmej řegɛudi mani qeddmen ikehhanen tiwhibin n řebxur, zi Jabɛa ař Bi’r-Sebɛa. Netta ihdem řegɛudi ɣar tewwura [n tendint], uřa d tinni [iǧan] ɣar wadaf n Tewwart n Yacuwa, azeǧif ameqqran n tendint, ɣar uzeřmaḍ n wenni [i tuɣa ittadef] Tawwart n Tendint.
2KI 23:9 Maca ikehhanen n řegɛudi war zemmaren ad geɛɛden ɣar uɛalṭar n SIDI di Urcalim, maca nitni ccin aɣrum břa antun di řwest n aytmatsen.
2KI 23:10 Netta issexmej uřa d Tufat nni [iǧan] di teɣzurt n ayt n Hinnum, ḥima uřa d ijj war issɛeddu mmis niɣ yeǧis x tmessi i Mulak.
2KI 23:11 Netta ikkes iysan i tuɣa ggin ijeǧiden n Yahuda i řewqar n tfuct ɣar wadaf n Taddart n SIDI, ɣar texxamt n Natan-Malak, amsexxar acenneɛ, wenni [iǧan] di řebniyyat barra [i Zzawect Tameqqrant]. Netta iqedd i ikarruten n tfuct s tmessi.
2KI 23:12 [Uřa d] iɛalṭaren nni tuɣa ibedden x tzeqqa n tɣurfet n Aḥaz nni ggin ijeǧiden n Yahuda, uřa d iɛalṭaren i igga Manassa di tnayen n řemraḥat n Taddart n SIDI, ihdem i-ten ujeǧid. Netta iřbez i-ten, [issiggʷej i-ten] ssenni uca inḍar taɛejjajt nsen di teɣzart n Qidrun.
2KI 23:13 Uca issexmej ujeǧid řegɛudi nni [din iǧan] zzat i Urcalim, ɣar yefus n wedrar n Uḍeyyeɛ, [řegɛudi] i ibna Suliman, ajeǧid n Israil, i Acturit, nnɛi n l’aṣnam n ayt n Ṣidun, u i Kamuc, nnɛi n l’aṣnam n ayt n Mu’ab, u i Milkum, jjɛifect n l’aṣnam n ayt n Ɛammun.
2KI 23:14 Netta yarẓa imayḍuten [iqeddsen] d iwetwiten uca ihdem tirebbin n cwarti uca iccur amcan nsen s yeɣsan n yewdan.
2KI 23:15 Uřa d aɛalṭar nni [iǧan] di Bayt-Il, řgeɛɛdet i iggin Yarubɛam, mmis n Nabaṭ, d wenni yarrin Israil ad ixḍa, aqa aɛalṭar nni d řgeɛɛdet nni, ihdem i-ten s tnayen idsen. Netta issecmeḍ řgeɛɛdet, iddez i-tt ařami tedweř d taɛejjajt uca issecmeḍ tarebbit n cwarti.
2KI 23:16 [Umi] dd-inneqřeb Yuciya, iẓra imeḍřan i [tuɣa] dinni x wedrar, uca issekk [din ca n yeryazen], iksi-dd iɣsan zeg imeḍřan uca issecmeḍ i-ten x uɛalṭar. [Ammu] i issexmej i-t ɛlaḥsab awař n SIDI i zi ibarreḥ weryaz n AREBBI wenni ibarrḥen awařen-a.
2KI 23:17 [Yarni] inna: “Mana weẓru nni i war ẓriɣ ɛemmars i din twařiɣ?” Nnan as yeryazen n tendint: “Wa d anḍeř n weryaz n AREBBI wenni tuɣa dd-yusin zi Yahuda, d wenni ibarrḥen s tmesřayin-a nni teggid ak-d uɛalṭar-a n Bayt-Il.”
2KI 23:18 Netta inna: “Jjem t din! Uřa d ijjen war ittḥidi iɣsan nnes!” Ammu i jjin nitni iɣsan nnes [jmiɛ] ak-d yeɣsan n unabi wenni dd-yusin zi Samarya.
2KI 23:19 Ikkes Yuciya marra tudrin n tzawiyyin n řegɛudi nni [iǧan] di tneddam n Samarya i tuɣa ssbedden ijeǧiden n Israil, maḥend ad sɛaren [SIDI]. Netta igga zzaysen am mammec igga di Bayt-Il.
2KI 23:20 Marra ikehhanen n řegɛudi inni [tuɣa iǧan] din, iɣarṣ asen x iɛalṭaren uca issecmeḍ iɣsan n iwdan. Awarni as iɛqeb ɣar Urcalim.
2KI 23:21 Ajeǧid yumur i marra řgens: “Swejdem [Řɛid n Tɣarṣt n] Useɛdu i SIDI, AREBBI nwem, am mammec ittwari deg wedlis-a n Řɛahd.”
2KI 23:22 Ict n [Řɛid n Tɣarṣt n] Useɛdu am wa war ittwagg [ɛemmarṣ] zeg wussan n řquḍat nni tuɣa iḥekkmen Israil, uřa di marra ussan n ijeǧiden n Israil d ijeǧiden n Yahuda.
2KI 23:23 Maca deg useggʷas wiss tmenṭac n ujeǧid Yuciya sswejden nitni [Řɛid n Tɣarṣt] n Useɛdu wanita i SIDI di Urcalim.
2KI 23:24 Yuciya ikkes uřa d yinni issawařen ak-d imettan, d igezzanen, d řexyařat timeẓyanin n l’aṣnam, d imeyḍa n [l’aṣnam], d marra nnɛawat n l’aṣnam i ittwařan di temmurt n Yahuda u di Urcalim, ḥima ad igg awařen n Ccariɛa i ittwarin deg wedlis ittwannḍen i tuɣa yufa ukehhan Ḥilqiya di Taddart n SIDI.
2KI 23:25 Qbeř nnes war din tuɣi uřa d ijj n ujeǧid am netta, idweř-dd ɣar SIDI s marra uř nnes u s marra řeɛmar nnes d s marra jjehd nnes, ɛlaḥsab Ccariɛa n Musa, u awarni as war din tuɣi uřa d ijjen am netta.
2KI 23:26 Maca SIDI war ijji zi řḥaduq n weɣḍab nnes ameqqran i zi tuɣa yarɣa weɣḍab nnes x Yahuda zi ssibbet n marra asɛar i d as igga Manassa.
2KI 23:27 SIDI inna: “Ad ssiggʷjeɣ uřa d Yahuda x wudem inu, am mammec ssiggʷejeɣ Necc Israil, u Necc ad nḍareɣ tandint-a Urcalim i farzeɣ, uřa d Taddart i xef nniɣ: ‘Ad yiři Isem inu diha!’”
2KI 23:28 Imezruyen iqqimen n Yuciya d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 23:29 Deg wussan nnes igeɛɛed firɛun Nixu, ajeǧid n Miṣra, ḍidd i ujeǧid n Accur ɣar yeɣzar n Lfuraṭ. Ajeǧid Yuciya iffeɣ, maḥend ad t iřqa, maca [firɛun Nixu] inɣa i-t ɣar Majiddu řami t yeẓra.
2KI 23:30 Imsexxaren nnes iwyen t d amettin x ijj n ukarru zi Majiddu ɣar Urcalim, ssiwḍen t ɣar Urcalim uca neḍřen t deg wenḍeř nnes. Řgens n temmurt iksi Yahuyaḥaz, mmis n Yuciya, uca dehnen t, ggin t d ajeǧid deg wemcan n babas.
2KI 23:31 Yahuyaḥaz [tuɣa] ɣares třata u-ɛicrin n iseggʷusa umi idweř d ajeǧid. Netta iḥkem třata n iyuren di Urcalim. Yemmas qqaren as Ḥamutal, yeǧis n Irmiya zi Libna.
2KI 23:32 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes.
2KI 23:33 Firɛun Nixu ijja ad t ibelleɛ di Ribla di temmurt n Ḥamat, ḥima war iḥekkem [ɛad] di Urcalim. Netta igga i temmurt ijj n multa n mya talint n nnuqart d ict n talint n wureɣ.
2KI 23:34 [Xenni] igga firɛun Alyaqim, mmis n Yuciya d ajeǧid deg wemcan n babas uca ibeddeř isem nnes ɣar Yahuyaqim. [Maca] Yahuyaḥaz yiwyi i-t uca yusa-dd ɣar Miṣra uca immut dinni.
2KI 23:35 Yahuyaqim iwca nnuqart d wureɣ i firɛun, maca netta tuɣa iqeddar tammurt, ḥima [izemmar] ad isellem nnuqart nni ɛlaḥsab řumur n firɛun. [Iqeddar kuř ijj n] weryaz ɛlaḥsab řeqdar nnes, [ammu i] ittar nnuqart d wureɣ n řgens n temmurt, ḥima ad t iwc i firɛun Nixu.
2KI 23:36 Yahuyaqim [tuɣa] ɣares xemsa u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Zabida, yeǧis n Fidaya zi Rumat.
2KI 23:37 Netta igga min iǧan d aɛeffan di tiṭṭawin n SIDI, nican am mammec t ggin řejdud nnes.
2KI 24:1 Deg wussan nnes igeɛɛed Nabuxadnaṣṣar, ajeǧid n Babil, u Yahuyaqim idweř iṭaɛ as třata n iseggʷusa. [Xenni] inneqřeb uca iɣewweɣ xas.
2KI 24:2 Issekk-dd ɣares SIDI bandiyyat n Ikaldaniyyen d bandiyyat n Aram d bandiyyat n Mu’ab d bandiyyat n ayt n Ɛammun. Netta issekk i-ten ɣar Yahuda, ḥima ad tt xarrben ɛlaḥsab awař n SIDI i tuɣa issiweř s uqemmum n imsexxaren nnes, inabiyyen.
2KI 24:3 Wah, man aya [imsar] ak-d Yahuda ɛlaḥsab řumur n SIDI, ḥima ad t issiggʷej x wudem nnes di ssibbet n ddnub n Manassa, di ssibbet n marra min igga wanita.
2KI 24:4 Uřa di ssibbet n idammen imezdagen i issizzeř řami tuɣa zzaysen iccur Urcalim. [S uya] SIDI tuɣa war ixs ad as iɣfar.
2KI 24:5 Imezruyen iqqimen n Yahuyaqim d marra min igga, ma man aya [marra] war ittwazemmem ca deg wedlis n imezruyen n ijeǧiden n Yahuda?
2KI 24:6 Yahuyaqim igga ad yareyyeḥ jar řejdud nnes. Mmis Yahuyakin idweř d ajeǧid deg wemcan nnes.
2KI 24:7 Ajeǧid n Miṣra war iffiɣ ɛad [ɣar umenɣi] zi temmurt nnes, maɣar ajeǧid n Babil tuɣa iksi marra min tuɣa [iǧan] n ujeǧid n Miṣra zi Teɣzart n Miṣra ař iɣzar n Lfuraṭ.
2KI 24:8 Yahuyakin [tuɣa] ɣares tmenṭac n iseggʷusa umi idweř d ajeǧid. Netta iḥkem třata n iyuren di Urcalim. Yemmas qqaren as Neḥucṭa, yeǧis n Il-Natan zi Urcalim.
2KI 24:9 Netta igga min iǧan d aɛeffan di tiṭṭawin n SIDI, nican am mammec t igga babas.
2KI 24:10 Di řweqt nni ffɣen imsexxaren n Nabuxadnaṣṣar, ajeǧid n Babil, ɣar Urcalim uca tᵉttwaḥsar tendint.
2KI 24:11 Uřa Nabuxadnaṣṣar, ajeǧid n Babil, [netta simant nnes] yusa-dd ɣar tendint am tt ḥṣaren imsexxaren nnes.
2KI 24:12 [Xenni] iffeɣ Yahuyakin, ajeǧid n Yahuda, [zi tendint, yuyur] ɣar ujeǧid n Babil, netta ak-d yemmas d imsexxaren nnes d řḥukkam nnes d imsexxaren nnes icennɛen. Ajeǧid n Babil iḥebbes i-t deg useggʷas wiss tmenya n tgelda nnes.
2KI 24:13 Netta iḥewwes ssenni marra tixubay zi Taddart n SIDI d txubay zi taddart n ujeǧid uca ikkes [ureɣ] x marra řeqcuɛ n wureɣ nni tuɣa igga Suliman, ajeǧid n Israil, di Zzawect Tameqqrant n SIDI, am mammec tuɣa issiweř SIDI.
2KI 24:14 Netta yiwi-dd marra Urcalim ak-d marra řḥukkam d marra ayt n bu-teɣruḍt imeḥḍen, ɛecra-ařaf n imeḥbas, uřa d kuř aneqqac [n ukeccuḍ d weẓru] d imziřen. War ijji uřa d ijj mɣir imezřaḍ n řgens n temmurt.
2KI 24:15 Netta indeh Yahuyakin ɣar Babil. Yemmas n ujeǧid d temɣarin n ujeǧid d imsexxaren nnes icennɛen d marra ayt n jjehd di temmurt yiwyi ten di lmenfa zi Urcalim ɣar Babil.
2KI 24:16 Marra iryazen imeḥḍen, sebɛa-ařaf [n yeryazen], uřa d ineqqacen [n ukeccuḍ d weẓru] d imziřen, ařef [n yeryazen], d marra [abarru] n ayt n bu-teɣruḍt inni ittqeddan x umenɣi, aqa ajeǧid n Babil indeh i-ten [marra] di lmenfa ɣar Babil.
2KI 24:17 Ajeǧid n Babil igga Mattanya, ɛemmis, d ajeǧid deg wemcan nnes uca ibeddeř isem nnes ɣar Ṣidqiya.
2KI 24:18 Ṣidqiya [tuɣa] ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Ḥamuṭal, yeǧis n Irmiya, zi Libna.
2KI 24:19 Netta igga min iǧan d aɛeffan di tiṭṭawin n SIDI, nican am mammec t igga Yahuyaqim.
2KI 24:20 Zi ssibbet n weɣḍab n SIDI, aqa imsar i Urcalim d Yahuda ařami ten-i-dd issekk zi zzat i wudem nnes. [Awarni as] iɣewweɣ Ṣidqiya x ujeǧid n Babil.
2KI 25:1 Deg useggʷas wiss tesɛa n řeḥkamet nnes, deg uyur wiss ɛecra, deg [wass] wiss ɛecra n uyur, imsar aqa yusa-dd Nabuxadnaṣṣar, ajeǧid n Babil, ɣar Urcalim, netta ak-d marra řɛeskar nnes. Iḥṣar i-tt uca nitni quwwaren as s ict n řgeɛɛdet i tɛessast.
2KI 25:2 Ḥṣaren tandint ař aseggʷas wiss ḥiṭac n ujeǧid Ṣidqiya.
2KI 25:3 Deg [wass] wiss tesɛa n uyur [wiss arebɛa] idweř řaẓ imɣar di tendint ařami war tuɣi [ɛad] macca ɣar řgens n temmurt.
2KI 25:4 [Xenni] tᵉttwarẓ tendint u marra iɛeskariyyen arewřen di ǧiřet x webrid n tewwart [i iǧan] jar tnayen n řeḥyuḍ nni [iǧan] ɣar weḥwic n ujeǧid, waxxa Ikaldaniyyen tuɣa quwwaren i tendint, uca ajeǧid yuyur deg webrid n Řewḍa.
2KI 25:5 [Maca] řɛeskar n Ikaldaniyyen ḍfaren ajeǧid u nitni ḥarten xas di řewḍat n Ariḥa u marra řɛeskar nnes bezzɛen t xas.
2KI 25:6 Ṭṭfen ajeǧid uca iwyen t ɣar ujeǧid n Babil, ɣar Ribla, uca ḥekmen xas.
2KI 25:7 Nitni ɣarṣen i iḥenjiren n Ṣidqiya zzat i tiṭṭawin nnes, ssdarɣřen tiṭṭawin n Ṣidqiya uca carfen t s tnayen n ssnaseř n nnḥas, iwyen t ɣar Babil.
2KI 25:8 [Awarni as] deg uyur wiss xemsa, deg [wass] wiss xemsa n uyur - tuɣa-t deg useggʷas wiss tseɛṭac n Nabuxadnaṣṣar, ajeǧid n Babil - yusa-dd Nabuzaradan, řqebṭan n iɛessasen n arrimet, amsexxar n ujeǧid n Babil, di Urcalim.
2KI 25:9 Issecmeḍ Taddart n SIDI d taddart n ujeǧid d marra tudrin n Urcalim uřa kuř taddart d tameqqrant issarɣ as timessi.
2KI 25:10 Řeḥyuḍ i dd-innḍen i Urcalim ɣeḍřen ten marra řɛeskar n Ikaldaniyyen nni [dd-yusin ak-d] řqebṭan n iɛessasen n arrimet.
2KI 25:11 Min iceṭṭen zi řgens nni ittwajjen di tendint, [ixs ad yini] [marra] inni tuɣa iɛdun ɣar ujeǧid n Babil d min iceṭṭen zi řɣaci, indeh i-ten Nabuzaradan, řqebṭan n iɛessasen n arrimet, ɣar lmenfa.
2KI 25:12 Řqebṭan n iɛessasen n arrimet ijja mɣir ca n imezřaḍ n temmurt am ayt n bu-tzayart d ifeǧaḥen.
2KI 25:13 Ipilaren n nnḥas di Taddart n SIDI d tkarrutin d trimant n nnḥas nni tuɣa [din] ɣar Taddart n SIDI, arẓin ten Ikaldaniyyen uca arbun marra nnḥas ɣar Babil.
2KI 25:14 Uřa d tiydurin, d iɣenjayen, d tjeqqaḍin, d tɣenjayin uřa d marra řeqcuɛ n nnḥas i zi tuɣa ttsexxaren, iwyen ten.
2KI 25:15 Řqebṭan n iɛessasen n arrimet yiwi-dd timejmarin d ṭṭawyat i urucci, [marra] min [tuɣa iǧan] qaɛ n wureɣ niɣ n nnuqart.
2KI 25:16 [Uřa d] tnayen n ipilaren d trimant d tkarrutin nni tuɣa igga Suliman i Taddart n SIDI. Tuɣa war izemmar ad weznen nnḥas n marra řeqcuɛ-a.
2KI 25:17 Řuɛřa n ijj n upilar tuɣa dayes tmenṭac n iɣaǧen, u ttaj i xas, tuɣa n nnḥas. Řuɛřa n ttaj tuɣa-t třata n iɣaǧen. , u tiracciwin d iremmamen i d as dd-innḍen i ttaj tuɣa aten marra n nnḥas. Ammu i tuɣa uřa ɣar upilar wiss tnayen, x tracca i xas [iǧan].
2KI 25:18 Yiwi-dd řqebṭan n iɛessasen n arrimet [ɛawed] Saraya, akehhan ameqqran, d Ṣafanya, akehhan wiss tnayen, uřa d třata n iɛessasen n tewwart.
2KI 25:19 Netta yiwi-dd ijj n umsexxar amcenneɛ wenni ittwařeqqmen x iɛeskariyyen d xemsa n yeryazen imeḥḍen zeg imtiqqan n ujeǧid, inni ittwafen di tendint, [jmiɛ] ak-d umarir n ukumandar n řɛeskar nni izemmemen řgens n temmurt i umenɣi, uřa d settin n yeryazen zi řgens n temmurt nni ittwafen di tendint.
2KI 25:20 Yiwi ten Nabuzaradan, řqebṭan n iɛessasen n arrimet uca yuyur akidsen ɣar ujeǧid n Babil, ɣar Ribla.
2KI 25:21 Ajeǧid n Babil iwwet i-ten, inɣa i-ten di Ribla di temmurt n Ḥamat. [Ammu i] ittwandeh Yahuda zi temmurt nnes ɣar lmenfa.
2KI 25:22 [X] řgens i tuɣa iqqimen di temmurt n Yahuda, i tuɣa ijja [din] Nabuxadnaṣṣar, ajeǧid n Babil, aqa igga xasen Jadalya, mmis n Axiqam, mmis n Cafan.
2KI 25:23 [Umi] sřin ikumandaren n řɛeskarat, nitni d yeryazen nsen, belli ajeǧid n Babil igga Jadalya [d awkiř], usin-dd nitni ɣar Jadalya di Miṣfa: Ismaɛil, mmis n Natanya, Yuḥanan, mmis n Qariḥa, Saraya, mmis n Tanḥumat, Anaṭufati, d Yazanyahu, mmis n Umaɛki, nitni ak-d yeryazen nsen.
2KI 25:24 Jadalya ijjuǧ asen u i yeryazen nsen, inna asen: “War tteggʷdem zeg imsexxaren n Ikaldaniyyen. Qqimem di temmurt uca sexxarem i ujeǧid n Babil, xenni ad tiřim mliḥ.”
2KI 25:25 [Maca] deg uyur wiss sebɛa yusa-dd Ismaɛil, mmis n Natanya, mmis n Ilicamaɛ, [wenni] dd-iqqarṣen zeg ujeǧid, ak-d ɛecra n yeryazen. Nitni wtin Jadalya [ařami] immut uřa d Iyahudiyyen d Ikaldaniyyen inni ɣares iǧan di Miṣfa.
2KI 25:26 [Xenni] ikkar marra řgens, am umeẓyan am umeqqran, uřa d ikumandaren n řɛeskar, ffɣen ɣar Miṣra, minzi ggʷeden zeg Ikaldaniyyen.
2KI 25:27 Deg useggʷas wiss sebɛa u-třatin n lmenfa n Yahuyakin, ajeǧid n Yahuda, deg uyur wiss tenɛac, deg [wass] wiss sebɛa u-ɛicrin n uyur, imsar, aqa Iwil-Marudax, ajeǧid n Babil, deg useggʷas i di idweř d ajeǧid, iḍřeq-dd i Yahuyakin, ajeǧid n Yahuda, zi řeḥbes.
2KI 25:28 Netta issiweř akides s řeḍrafet u igga řkursi nnes tiwa i řkarasi n ijeǧiden nneɣni i tuɣa ɣares iǧan di Babil.
2KI 25:29 Ibeddeř [Yahuyakin] arruḍ nnes n řeḥbes uca idweř ittett řebda ɣares marra ussan n tudart nnes.
2KI 25:30 X řɛuč nnes, aqa immewc as zeg ujeǧid řebda ijj n řɛuč aqedda n wass x wass nnes, marra ussan n tudart nnes.
1CH 1:1 Adam, Cit, Anuc,
1CH 1:2 Qinan, Mahalal-Il, Yarad,
1CH 1:3 Ḥanux, Matucalaḥ, Lamak,
1CH 1:4 Nuḥ, Cam, Ḥam, Yafat.
1CH 1:5 Arrawen n Yafat [tuɣa aten d] Jumar, Majuj, Maday, Yawan, Tubal, Macik d Tiras.
1CH 1:6 Arrawen n Jumar [tuɣa aten d] Ackanaz, Difat d Tujarma.
1CH 1:7 Arrawen n Yawan [tuɣa aten d] Ilica, Tarcica, Ikittiyyen d Idudaniyyen.
1CH 1:8 Arrawen n Ḥam [tuɣa aten d] Kuc, Miṣrayim, Fuṭ d Kenɛan.
1CH 1:9 Arrawen n Kuc [tuɣa aten d] Seba, Ḥawila, Sabta, Raɛama d Sabtaka. Arrawen n Raɛama [tuɣa aten d] Caba d Dadan.
1CH 1:10 Kuc ijja-dd Nimrud. Wanita ibda ad yiři d ijj n jjiheř x temmurt.
1CH 1:11 Miṣrayim ijja-dd Iludiyyen, Iɛanamiyyen, Ilahabiyyen, Inaftuḥiyyen,
1CH 1:12 Ifatrusiyyen, Ikasluḥiyyen, inni zi i dd-iqqarṣen Ifilisṭiniyyen, uřa d Ikafturiyyen.
1CH 1:13 Kenɛan ijja-dd Ṣidun, amenzu nnes, d Ḥit,
1CH 1:14 Ayabusi, Amuri, Ajirjaci,
1CH 1:15 Aḥiwi, Aɛarqi, Asiniy,
1CH 1:16 Arwadi, Aṣamari d Uḥamati.
1CH 1:17 Arrawen n Cam [tuɣa aten d] Ɛilam Accur, Arfakcad, Lud, Aram, Ɛuz, Ḥul, Jatar d Macik.
1CH 1:18 Arfakcad ijja-dd Calaḥ u Calaḥ ijja-dd Ɛabir.
1CH 1:19 Ttwarwen-dd i Ɛabir tnayen n warrawen. Ijjen qqaren as Falaj, minzi deg wussan nnes tᵉttwabḍa temmurt, uca qqaren as i umas Yuqṭan.
1CH 1:20 Yuqṭan ijja-dd Almudad, Calaf, Haḍarmawt, Yaraḥ,
1CH 1:21 Haduram, Uzal, Diqla,
1CH 1:22 Ɛibal, Abimayil, Caba,
1CH 1:23 Ufir, Ḥawila d Yubab. Marra ina [tuɣa aten d] arrawen n Yuqṭan.
1CH 1:24 Cam, Arfakcad, Calaḥ,
1CH 1:25 Ɛabir, Falaḥ, Raɛuw,
1CH 1:26 Saruj, Naḥur, Taraḥ,
1CH 1:27 Abram, wa d Ibrahim.
1CH 1:28 Arrawen n Ibrahim [tuɣa aten d] Isḥaq d Ismaɛil.
1CH 1:29 Ina d inni zzaysen dd-ittwarwen: amenzu n Ismaɛil [tuɣa-t d] Nabayut, [xenni] Qidar, Adabil, Mibsam,
1CH 1:30 Micmaɛ, Duma, Massa, Ḥadad d Tayma,
1CH 1:31 Yaṭur, Nafic d Qidma. Ina [tuɣa aten d] arrawen n Ismaɛil.
1CH 1:32 Arrawen n Qaṭura, tayya n Ibrahim: nettat turuw-dd Zimran, Yuqcan, Madan, Midyan, Yicbaq d Cuḥa. Arrawen n Yuqcan [tuɣa aten d] Caba d Dadan.
1CH 1:33 Arrawen n Midyan [tuɣa aten d] Ɛiyfa, Ɛifar, Ḥanux, Abidaɛ d Aldaɛa. Nitni marra [tuɣa aten d] arrawen n Qaṭura.
1CH 1:34 Ibrahim ijja-dd Isḥaq. Arrawen n Isḥaq [tuɣa aten d] Ɛisu d Israil.
1CH 1:35 Arrawen n Ɛisu [tuɣa aten d] Ilifaz, Raɛuwil, Yaɛuc, Yaɛlam d Quraḥ.
1CH 1:36 Arrawen n Ilifaz [tuɣa aten d] Tayman, Umar, Ṣafi, Jaɛtam, Qinaz, Timnaɛ d Ɛamaliq.
1CH 1:37 Arrawen n Raɛuyil [tuɣa aten d] Naḥat, Zaraḥ, Camma d Mizza.
1CH 1:38 Arrawen n Saɛir [tuɣa aten d] Luṭan, Cubal, Ṣibɛun, Ɛana, Dicun, Iṣar d Dican.
1CH 1:39 Arrawen n Luṭan [tuɣa aten d] Axuri d Humam uca [tuɣa] Timnaɛ d učmas n Luṭan.
1CH 1:40 Arrawen n Cubal [tuɣa aten d] Ɛalyan, Manaḥat, Ɛibal, Cafi d Unam. Arrawen n Ṣibɛun [tuɣa aten d] Aya d Ɛana.
1CH 1:41 Arrawen n Ɛana [mɣir]: Dicun. Arrawen n Dicun [tuɣa aten d] Ḥamran, Icban, Yitran d Karan.
1CH 1:42 Arrawen n Iṣar [tuɣa aten d] Bilhan d Zaɛwan d Yaɛkan. Arrawen n Dicun [tuɣa aten d] Ɛuṣ d Aran.
1CH 1:43 Ina d ijeǧiden i tuɣa iǧan x Idum, qbeř ma tuɣa iḥekkem ijj n ujeǧid x ayt n Israil: Bilaɛ, mmis n Baɛur. Tandint nnes qqaren as Dinhaba.
1CH 1:44 Immut Bilaɛ uca Yuwab, mmis n Zaraḥ, zi Buṣra, idweř d ajeǧid deg wemcan nnes.
1CH 1:45 Immut Yuwab uca Ḥucam zi temmurt n Itaymaniyyen idweř d ajeǧid deg wemcan nnes.
1CH 1:46 Immut Ḥucam uca Hadad mmis n Badad wenni iɣeřben Midyan deg iyyar n Mu’ab, idweř d ajeǧid deg wemcan nnes. Isem n tendint nnes qqaren as Ɛawit.
1CH 1:47 Immut Hadad uca Samla zi Masriqa idweř d ajeǧid deg wemcan nnes.
1CH 1:48 Immut Samla uca Cawul, zi Raḥubut ɣar yeɣzar [n Lfuraṭ], idweř d ajeǧid deg wemcan nnes.
1CH 1:49 Immut Cawul uca Baɛl-Ḥanan, mmis n Ɛakbur, idweř d ajeǧid deg wemcan nnes.
1CH 1:50 Immut Baɛl-Ḥanan uca Hadad idweř d ajeǧid deg wemcan nnes. Tandint nnes qqaren as Faɛi u tamɣart nnes qqaren as Mahiṭab’il, yeǧis n Maṭrid, yeǧis n Ma-Dahab.
1CH 1:51 Immut Hadad uca [xenni] dewřen [yina] d imɣaren n Idum: amɣar Timnaɛ, d umɣar Ɛalwa, d umɣar Yatit,
1CH 1:52 d umɣar Ahulibama, d umɣar Ila, d umɣar Finun,
1CH 1:53 d umɣar Qanaz, d umɣar Tayman, d umɣar Mibṣar,
1CH 1:54 d umɣar Majdiyil, d umɣar Ɛiram. Ina [tuɣa aten d] imɣaren n tqebbař n Idum.
1CH 2:1 Ina [tuɣa aten d] ayt n Israil: Rubin, Cimɛun, Lawi d Yahuda, Issakar d Zabulun,
1CH 2:2 Dan, Yusuf d Binyamin, Naftali, Jad d Acir.
1CH 2:3 Arrawen n Yahuda [tuɣa aten d] Ɛir d Unan d Cayla. Aqa třata[-ya] ttwarwen as-dd zeg yeǧis n Cuɛa, Takenɛanit. Ɛir, amenzu n Yahuda, tuɣa d aɛeffan di tiṭṭawin n SIDI. S uyenni inɣa i-t.
1CH 2:4 Tamar, tasřit nnes, turuw as-dd Fariṣ d Zaraḥ. Yahuda [tuɣa ɣares] s marra xemsa n warrawen.
1CH 2:5 Arrawen n Fariṣ [tuɣa aten d] Ḥaṣrun d Ḥamul.
1CH 2:6 Arrawen n Zaraḥ [tuɣa aten d] Zimri, Itan, Hayman, Kalkul d Daraɛ. S marra xemsa.
1CH 2:7 Arrawen n Karmi [tuɣa aten d] Ɛaxar, wenni iɣeḍřen Israil di řeɣben, minzi igga s řeɣdar ak-d min tuɣa ittwaḥarrmen [i uteḥḥi].
1CH 2:8 Arrawen n Itan: [mɣir] Ɛazarya.
1CH 2:9 Arrawen n Ḥaṣrun inni d as dd-ittwarwen [tuɣa aten d] Yarḥam’il d Ram d Kalubay.
1CH 2:10 Ram ijja-dd Ɛamminadab. Ɛamminadab ijja-dd Naḥcun, řḥakem n ayt n Yahuda.
1CH 2:11 Naḥcun ijja-dd Salmu. Salmu ijja-dd Buɛaz.
1CH 2:12 Buɛaz ijja-dd Ɛubid. Ɛubid ijja-dd Yassa.
1CH 2:13 Yassa ijja-dd Iliyab, amenzu nnes, wiss tnayen Abinadab, wiss třata Cimɛa,
1CH 2:14 wiss arebɛa Natanayil, wiss xemsa Radday,
1CH 2:15 wiss setta Uṣam d wiss sebɛa Dawud.
1CH 2:16 Suyᵉtmatsen [tuɣa aten d] Ṣaruya d Abijayil. Arrawen n Ṣaruya [tuɣa aten d] Abicay d Yuwab d Ɛasa’il, třata [n warrawen].
1CH 2:17 Abijayil turuw-dd Ɛamasa u babas n Ɛamasa [tuɣa-t] d Yatru, wenni d Asmaɛili.
1CH 2:18 Kalib, mmis n Ḥaṣrun, ijja-dd ak-d Ɛazuba, tamɣart [nnes], [yeǧis] Yariɛut. D ina [tuɣa aten] d arrawen nnes: Yacar, Cubab d Ardun.
1CH 2:19 [Umi] immut Ɛazuba, yiwi Kalib Ifrat[a] [d tamɣart] i yixef nnes u nettat turuw as-dd Ḥur.
1CH 2:20 Ḥur ijja-dd Uri u Uri ijja-dd Baṣalyil.
1CH 2:21 Awarni as yudef Ḥaṣrun x yeǧis n Maxir, babas n Jilɛad, u netta yiwyi tt [d tamɣart] umi ɣares tuɣa settin n iseggʷusa u nettat turuw as-dd Sajub.
1CH 2:22 Sajub ijja-dd Ya’ir. Netta [tuɣa] ɣares třata u-ɛicrin n tneddam di temmurt n Jilɛad.
1CH 2:23 Jacur ak-d Aram ikkes zzaysen dcurat n Ya’ir, uřa d Qanat d tneddam i ɣares dd-iqqnen, s marra settin n tneddam. Ina marra [tuɣa aten d] arrawen n Maxir, babas n Jilɛad.
1CH 2:24 Awarni řmewt n Ḥaṣrun di Kalib-Ifrata, turuw as-dd Abiya, tamɣart n Ḥaṣrun, Acḥur, babas n Taquɛa.
1CH 2:25 Arrawen n Yarḥam’il, amenzu n Ḥaṣrun, [tuɣa aten d] Ram, amenzu, [xenni] Buna, Awran, Uṣam d Axiya.
1CH 2:26 Yarḥam’il tuɣa ɣares ɛad ict n temɣart nneɣnit, qqaren as Aṭara. Nettat [tuɣa] d yemmas n Unam.
1CH 2:27 Arrawen n Ram, amenzu n Yarḥam’il, [tuɣa aten d] Maɛaṣ d Yamin d Ɛaqar.
1CH 2:28 Arrawen n Unam [tuɣa aten d] Cammay d Yadaɛ. Arrawen n Cammay [tuɣa aten d] Nadab d Abicur.
1CH 2:29 Tamɣart n Abicur qqaren as Abiḥayil. Nettat turuw as-dd Aḥban d Mulid.
1CH 2:30 Arrawen n Nadab [tuɣa aten d] Salad d Affayim. Salad immut břa arrawen.
1CH 2:31 Arrawen n Affayim: [mɣir] Yicɛi. Arrawen n Yicɛi: [mɣir] Cican. Arrawen n Cican: [mɣir ict n yeǧis], Aḥlay.
1CH 2:32 Arrawen n Yadaɛ, umas n Cammay, [tuɣa aten d] Yatru d Yunatan. Yatru immut břa arrawen.
1CH 2:33 Arrawen n Yunatan [tuɣa aten d] Falat d Zaza. Ina [tuɣa aten d] arrawen n Yarḥam’il.
1CH 2:34 Cican tuɣa war ɣares bu warrawen maca yessis [wah]. Cican tuɣa ɣares ijj n umsexxar d Amiṣri, qqaren as Yarḥaɛ.
1CH 2:35 Cican iwca yeǧis d tamɣart i umsexxar nnes Yarḥaɛ u nettat turuw as-dd Ɛattay.
1CH 2:36 Ɛattay ijja-dd Natan, Natan ijja-dd Zabad,
1CH 2:37 Zabad ijja-dd Iflal, Iflal ijja-dd Ɛubid,
1CH 2:38 Ɛubid ijja-dd Yahu, Yahu ijja-dd Ɛazarya,
1CH 2:39 Ɛazarya ijja-dd Ḥalaṣ, Ḥalaṣ ijja-dd Ilɛasa,
1CH 2:40 Ilɛasa ijja-dd Sismay, Sismay ijja-dd Callum,
1CH 2:41 Callum ijja-dd Yaqamya u Yaqamya ijja-dd Ilicamaɛ.
1CH 2:42 Arrawen n Kalib, umas n Yarḥam’il: [mɣir] Micaɛ, amenzu nnes wenni d babas n Zif, uřa d arrawen n Marica, babas n Ḥabrun.
1CH 2:43 Arrawen n Ḥabrun [tuɣa aten d] Quraḥ, Taffuɛ, Raqam d Camaɛ.
1CH 2:44 Camaɛ ijja-dd Raḥam, babas n Jaraqɛam, u Raqam ijja-dd Cammay.
1CH 2:45 Mmis n Cammai [tuɣa-t d] Maɛun. Maɛun tuɣa d babas n Bayt-Ṣur.
1CH 2:46 Ɛiyfa, tayya n Kalib, turuw-dd Ḥaran, Muṣa d Jaziz. Ḥaran ijja-dd Jaziz.
1CH 2:47 Arrawen n Jah-Day [tuɣa aten d] Rajam, Yutam, Jican, Falaṭ, Ɛiyfa d Caɛaf.
1CH 2:48 [Ak-d] tayya n Kalib, Maɛka, ijja-dd netta Cabar d Tarḥana.
1CH 2:49 Nettat turuw-dd Caɛaf, babas n Madmanna, d Cawa, babas n Makbina d babas n Jibɛa. Yeǧis n Kalib tuɣa Ɛaksa.
1CH 2:50 Ina d arrawen n Kalib: mmis n Ḥur, amenzu n Ifrata, [tuɣa] Cubal, babas n Qaryat-Yaɛarim,
1CH 2:51 Salma, babas n Bayt-Laḥm, [d] Ḥarif, babas n Bayt-Jadir.
1CH 2:52 Arrawen n Cubal, babas n Qaryat-Yaɛarim, [tuɣa aten d] Haruwa d Ḥaṣi-ha-Manuḥut.
1CH 2:53 Tiwacunin n Qaryat-Yaɛarim [tuɣa aten d] Iyitriyyen, Iffutiyyen, Icamatiyyen d Imacraɛiyyen. Zzaysen i dd-iqqarṣen Iṣarɛiyyen d Ictawuliyyen.
1CH 2:54 Arrawen n Salma: [mɣir] Bayt-Laḥm, uca Inaṭufatiyyen [tuɣa aten]: Ɛaṭarut-Bayt-Yu’ab d Ḥaṣi-ha-Manaḥti d Iṣurɛiyyen.
1CH 2:55 Tiwacunin n imariren nni izeddɣen di Yaɛbiṣ, [tuɣa aten d] Itirɛatiyyen d Icamɛayyen d Isukaniyyen. Nitni d Iqiniyyen inni dd-iqqarṣen zi Ḥammat, babas n taddart n Rakab.
1CH 3:1 Ina [tuɣa] d arrawen n Dawud inni d as dd-ittwarwen di Ḥabrun: amenzu [tuɣa] d Amnun n Axinuɛam, Tayazraɛilit; wiss tnayen Daniyal n Abijayil, Takarmalit;
1CH 3:2 wiss třata Abcalum, mmis n Maɛka, yeǧis n Talmay, ajeǧid n Jacur; wiss arebɛa Aduniya, mmis n Hajjit;
1CH 3:3 wiss xemsa Cafaṭya n Abiṭal, wiss setta Yitarɛam, n temɣart nnes Ɛajla.
1CH 3:4 Ttwarwen as-dd setta di Ḥabrun, minzi iḥkem dinni sebɛa n iseggʷusa d setta n iyuren u di Urcalim iḥkem třata u-třatin n iseggʷusa.
1CH 3:5 Ina ttwarwen as-dd di Urcalim: Cimɛa, Cubab, Natan, Suliman. Arebɛa-ya tuɣa aten d arrawen n Bat-Cuɛ, yeǧis n Ɛammiyil.
1CH 3:6 [Xenni] Yibḥar, Ilicamɛa, Ilifalaṭ,
1CH 3:7 Nujah, Nafaj, Yafiɛ,
1CH 3:8 Ilicamaɛ, Iliyadaɛ, Ilifalaṭ, tesɛa [n warrawen].
1CH 3:9 Ina marra d arrawen n Dawud, nhřa arrawen n tiyya, u Tamar [tuɣa] d učmatsen.
1CH 3:10 Mmis n Suliman tuɣa-t d Raḥabɛam, mmis Abiya, mmis Asa, mmis Yahucafaṭ,
1CH 3:11 mmis Yahuram, mmis Axazya, mmis Yuwac,
1CH 3:12 mmis Amaṣya, mmis Ɛazarya, mmis Yutam,
1CH 3:13 mmis Aḥaz, mmis Ḥizqiya, mmis Manassa,
1CH 3:14 mmis Amun [d] mmis Yuciya.
1CH 3:15 Arrawen n Yuciya [tuɣa aten d] amenzu Yuḥanan, wiss tnayen Yahuyaqim, wiss třata Ṣidqiya, wiss arebɛa Callum.
1CH 3:16 Arrawen n Yahuyaqim: mmis Yakunya [d] mmis Ṣidqiya.
1CH 3:17 Arrawen n Yakunya: Assir, Caɛaltiyil [tuɣa] d mmis,
1CH 3:18 u [xenni] Malkiram d Fadaya d Cinaṣṣar d Yaqamya d Hucamɛa d Nadabya.
1CH 3:19 Arrawen n Fadaya [tuɣa aten d] Zarubbabil d Cimɛi. Arrawen n Zarubbabil [tuɣa aten d] Macullam d Ḥananya, u učmatsen [tuɣa-tt d] Calumit,
1CH 3:20 u [xenni] Ḥacuba d Uwhil d Baraxya d Ḥasadya d Yucab-Ḥasad, xemsa [n warrawen].
1CH 3:21 Arrawen n Ḥanan-Yah [tuɣa aten] Falaṭ-Yah, d Icaɛya. Arrawen n Rafaya, arrawen n Arnan, arrawen n Ɛubadya, arrawen n Cakanya.
1CH 3:22 Arrawen n Caxanya, [mɣir] Camɛiya. Arrawen n Cimɛiya [tuɣa aten d] Ḥattuc, Yijɛal, Bariḥ, Naɛarya d Cafat, setta [n warrawen].
1CH 3:23 Arrawen n Naɛarya [tuɣa aten d] Ilyuɛinay, Ḥizqiya d Ɛazriqam, třata [n warrawen].
1CH 3:24 Arrawen n Ilyuɛinay [tuɣa aten d] Hudawyahu, Ilyacib, Falaya, Ɛaqqub, Yuḥanan, Dalaya d Ɛanani, sebɛa [n warrawen].
1CH 4:1 Arrawen n Yahuda [tuɣa aten d] Fariṣ, Ḥaṣrun d Karmi d Ḥur d Cubal.
1CH 4:2 Ra’aya, mmis n Cubal, ijja-dd Yaḥat u Yaḥat ijja-dd Axumay d Lahad. Tina [tuɣa atent] d řaǧat n Iṣarɛiyyen.
1CH 4:3 Ina tuɣa aten d arrawen n Abi-Ɛiṭam: Yazraɛil, Yacma d Yadbac. Isem n učmatsen [tuɣa-t d] Haṣṣalalfuni.
1CH 4:4 Fanuwil [tuɣa-t d] babas n Jadur, u Ɛazar [tuɣa-t d] babas n Ḥuca. Ina [tuɣa aten d] arrawen n Ḥur, amenzu n Ifrata, babas n Bayt-Laḥm.
1CH 4:5 Acḥur, babas n Taquɛa, tuɣa ɣares tnayen n temɣarin, Ḥala d Naɛara.
1CH 4:6 Naɛara turuw as-dd Axuzzam, Ḥafar, Taymani d Ixactariyyen. Ina [tuɣa aten d] arrawen n Naɛara.
1CH 4:7 Arrawen n Ḥala [tuɣa aten d] Ṣarat, Ṣuḥar d Itnan.
1CH 4:8 Quṣ ijja-dd Ɛanub d Haṣubiba, d řaǧat n Axarḥil, mmis n Harum.
1CH 4:9 Yaɛbiṣ tuɣa ɣares ccan x yaytmas. Yemmas tuɣa tegga as Yaɛbiṣ, maɣar nettat tenna: “Necc urweɣ t-i-dd s řeḥriq.”
1CH 4:10 Iřaɣa Yaɛbiṣ x AREBBI n Israil, inna: “Mařa Cek tbarked ayi u ad twessɛed aymir [n temmurt] inu uca ad kidi yiři ufus nnec, ad xafi tessiggʷejed řɣar ḥima war d ayi třeqqef tamara ...!” Uca AREBBI issiweḍ [as] min ittar.
1CH 4:11 Kalub, umas n Cuḥa, ijja-dd Maḥir. Wanita d babas n Ictun.
1CH 4:12 Ictun ijja-dd Bayt-Rafa d Fasiḥ d Taḥinna, babas [n tendint] n Ɛir-Naḥac. Ina d iryazen n Rayka.
1CH 4:13 Arrawen n Qanaz [tuɣa aten d] Ɛutniyil d Saraya. Arrawen n Ɛutniyil, [mɣir] Ḥatat.
1CH 4:14 Maɛunatay ijja-dd Ɛafra, u Saraya ijja-dd Yuwab, babas n Teɣzurt n Iḥrayfiyyen, maɣar nitni d iḥrayfiyyen, [ayt n bu-ṣṣenɛet].
1CH 4:15 Arrawen n Kalib, mmis n Yafunni, [tuɣa aten d] Ɛiru, Iyla d Naɛam. Arrawen n Ila, [mɣir] Qinaz.
1CH 4:16 Arrawen n Yahlaliyil [tuɣa aten d] Zif d Zifa d Tiriya d Asarayil.
1CH 4:17 Arrawen n Ɛizra [tuɣa aten d] Yatar d Marad d Ɛifar d Yalun. Nettat, [Bitya], turuw-dd Maryam d Cammay d Yicbaḥ, babas n Ictamuɛ,
1CH 4:18 u tamɣart nnes Tayahudect turuw-dd Yarad, babas n Jadur, d Ḥabir, babas n Suku, d Yaqutiyil, babas n Zanuḥ, [maca] [inneɣni] nitni [tuɣa aten d] arrawen n Bitya, yeǧis n firɛun, tenni yiwi Marad [d tamɣart].
1CH 4:19 Arrawen n temɣart n Hudiya, učmas n Naḥam, [tuɣa aten d] babas [n tendint] n Qaɛila, Ajarmi, d Ictamuɛa, Amaɛki.
1CH 4:20 Arrawen n Cimun [tuɣa aten d] Amnun d Rinna, Bin-Ḥanan d Tilun. Arrawen n Yiɛci [tuɣa aten d] Zuḥayt d Ban-Zuḥayt.
1CH 4:21 Arrawen n Cayla, mmis n Yahuda, [tuɣa aten d] Ɛir, babas n Lika, Laɛda, babas n Marica, d řaǧat n taddart n yinni ixeddmen s tiffest n taddart n Acbiɛa.
1CH 4:22 U [xenni] Yuqim d yeryazen n Kuziba, d Yuwac d Saraf, inni iṣeǧḍen x Mu’ab, d Yacubi-Laḥm. D man aya d řexbarat tiqdimin.
1CH 4:23 Nitni [tuɣa aten] d ayt n bu-třaxt u zeddɣen di Nataɛim d Jadira. Nitni qqimen zeddɣen din ḥima ad sexxaren i ujeǧid.
1CH 4:24 Arrawen n Cimɛun [tuɣa aten d] Namuyil d Yamin, Yarib, Zaraḥ, Cawul.
1CH 4:25 Callum d mmis, mmis Mibsam, mmis Micmaɛ.
1CH 4:26 Arrawen n Micmaɛ: mmis Ḥammuyil, mmis Zakkur [d] mmis Cimɛi.
1CH 4:27 Cimɛi tuɣa ɣares seṭṭac n warrawen d setta n tḥenjirin. [Maca] aytmas war ɣarsen tuɣi bu warrawen aṭṭas u marra řaǧat nsen war mmarnint ca am tinni n warrawen n Yahuda.
1CH 4:28 Nitni tuɣa zeddɣen di Bi’r-Sebɛa, di Mulada, di Ḥaṣar-Cuɛal,
1CH 4:29 di Bilha di Ɛaṣim, di Tulad,
1CH 4:30 di Bituwil, di Ḥurma, di Ṣiqlaɣ,
1CH 4:31 di Bayt-Markabut, di Ḥaṣar-Susim, di Bayt-Biri u di Caɛarayim. Ař idweř Dawud d ajeǧid [tuɣa] ina d tineddam nsen,
1CH 4:32 d dcurat nsen: Ɛiṭam, Ɛayn, Rimmun, Tukan d Ɛacan, xemsa n tneddam
1CH 4:33 ak-d marra dcurat i d asent-i-dd innḍen i tneddam-a, ař Baɛl. Tina d jjwayeh mani zedɣen u nitni ḥḍan s yixef nsen lista n jjadira.
1CH 4:34 Macubab d Yamlik d Yuca, mmis n Amaṣya,
1CH 4:35 d Yuwil d Yahu, mmis n Yuciba, mmis n Saraya, mmis n Ɛasiyil,
1CH 4:36 d Ilyuɛinay d Yaɛquba d Yacuḥaya d Ɛasaya d Ɛadiyil d Yasimiyil d Banaya
1CH 4:37 d Ziza, mmis n Cifɛi, mmis n Allun, mmis n Yadaya, mmis n Cimri, mmis n Camɛiya.
1CH 4:38 Ina, [inni i da] ittwařaɣan s yisem [nsen], [tuɣa aten d] řḥukkam di řaǧat nsen, uca tudrin n ibabaten nsen tuɣa mmarnint aṭṭas.
1CH 4:39 Nitni uyuren, kkin x uɣezdis n řɣarb n Jadur ař ccarq n teɣzurt, ḥima ad ufin mani ɣa hedden wuǧi nsen.
1CH 4:40 Nitni ufin [din] ddmani n tarewsa ccuren mliḥ, cnan. Tuɣa tammurt tewseɛ ɣar marra iɣezdisen, tarsa u dayes řhudnet, maɣar inni n Ḥam tuɣa zeddɣen din zic.
1CH 4:41 Ina, inni ittwazemmemen s ismawen [nsen], usin-dd deg wussan n ujeǧid Ḥizqiya, ajeǧid n Yahuda, u nitni hedmen iqiḍan nsen, uřa d Imaɛuniyyen inni din ufin, teḥḥan ten ař ass-a. Nitni ggin ad zedɣen deg wemcan nsen, maɣar tuɣa dinni [tammurt n] tarewsa i wuǧi nsen.
1CH 4:42 Zeg ina, zeg warrawen n Cimɛun, ffɣen [ɛawed] xemsa mya n yeryazen ɣar idurar n Saɛir. Falaṭya d Naɛriya d Rafaya d Ɛuzziyil, arrawen n Yicɛi, [bedden] ɣar uzeǧif nsen.
1CH 4:43 Nitni nɣin min iqqimen n ayt n Ɛamaliq inni dd innejmen u nitni zeddɣen dinni ař ass-a.
1CH 5:1 Arrawen n Rubin, amenzu n Israil - minzi netta tuɣa-t d amenzu, maca umi netta issexsar tassut n babas, temmewc tasɣart n tmenzut nnes i warrawen n Yusuf, mmis n Israil, maca war iǧi amenni ařami [Yusuf] ittwazemmem di lista n jjadira ɛlaḥsab tasɣart n tmenzut nnes,
1CH 5:2 maɣar Yahuda idweř d bu-teɣruḍt jar aytmas u zzayes iffeɣ řḥakem [waxxa] tasɣart n tmenzut tuɣa-tt ɣar Yusuf -
1CH 5:3 arrawen n Rubin, amenzu n Israil, [tuɣa aten d] Ḥanuk d Fallu, Ḥaṣrun d Karmi.
1CH 5:4 Arrawen n Yuwil: mmis Camɛiya, mmis [Ha]juj mmis Cimɛi,
1CH 5:5 mmis Mixa, mmis Ra’aya, mmis Baɛl
1CH 5:6 [d] mmis Ba’ira, wenni yiwyi Tiɣlat-Filasir, ajeǧid n Accur, di lmenfa. Netta tuɣa d řḥakem n Irubiniyyen.
1CH 5:7 Aytmas, [ttwasettfen] ɛlaḥsab řaǧat nsen, umi nitni ttwazemmemen di lista n jjadira ɛlaḥsab axřaq nsen, [tuɣa aten d] azeǧif Yaɛiyil d Zakariyya
1CH 5:8 d Bilaɛ, mmis n Asa, mmis n Camɛi, mmis n Yuwil. Netta tuɣa izeddeɣ di Ɛaruɛir ař Nabu d Baɛl-Maɛun.
1CH 5:9 Izdeɣ di ccarq ař wadaf ɣar řexřa i isswiẓẓḍen ixef nnes zeg iɣzar n Lfuraṭ, maɣar řebhayem nsen dewřen s waṭṭas di temmurt n Jilɛad.
1CH 5:10 Deg wussan n Cawul ggin nitni amenɣi ak-d Ihajriyyen, inni iwḍan s ufus nsen. Nitni ggin ad zedɣen deg iqiḍan nsen x marra aɣezdis ɣar ccarq n Jilɛad.
1CH 5:11 Arrawen n Jad tuɣa zeddɣen ajemmaḍin nsen di temmurt n Bacan ař Salxa.
1CH 5:12 Yuwil [tuɣa-t d] azeǧif nsen u Cafam [tuɣa-t d] wiss tnayen, d Yaɛnay d Cafat. [Nitni tuɣa zeddɣen] di Bacan.
1CH 5:13 Aytmatsen, [ttwasettfen] ɛlaḥsab tudrin n ibabaten nsen, [tuɣa aten d] Mixayil d Macullam d Cabɛa d Yuray d Yaɛkan d Ziɛa d Ɛabir, sebɛa [n wawmaten].
1CH 5:14 Ina [tuɣa aten d] arrawen n Abiḥayil, mmis n Ḥuri, mmis n Yaruḥ, mmis n Jilɛad, mmis n Mixayil, mmis n Yacicay, mmis n Yahdu, mmis n Buz.
1CH 5:15 Axi, mmis n Ɛabdiyil, mmis n Juni, [tuɣa-t d] azeǧif n taddart n ibabaten nsen.
1CH 5:16 Nitni tuɣa zeddɣen di Jilɛad, di Bacan u di tneddam i ɣares dd-iqqnen u di marra ddmani n tarewsa n Carun ař timawwin nsen.
1CH 5:17 Marra ina ttwazemmemen di listat n jjadira deg wussan n Yutam, ajeǧid n Yahuda, u deg wussan n Yarubɛam, ajeǧid n Israil.
1CH 5:18 Zeg warrawen n Rubin d warrawen n Jad d wezyen n teqbič n Manassa, zeg ayt n umenɣi, [zeg] iryazen inni yarebbun taseddart [n uɛeskari] d ssif d yinni imeḥḍen řqews u tuɣa darrben deg umenɣi, aqa [din] arebɛa u-rebɛin-ařef u-sebɛa-mya u-settin inni dd-iffɣen ak-d řɛeskar.
1CH 5:19 Nitni mmenɣen ak-d Ihajriyyen u [ak-d] Yaṭur d Nafic d Nudab.
1CH 5:20 Nitni ttwaɛawnen [deg umenɣi] akidsen uca Ihajriyyen d marra inni akidsen [iǧan], mmewcen deg ufus nsen, maɣar nitni sɣuyen deg umenɣi ɣar AREBBI u wanita ijja ad issarḍa ixef nnes s tẓaǧit yuǧɣen nsen, minzi nitni tecřen xas.
1CH 5:21 Nitni ḥewwsen řmař nsen: xemsin-ařef n iřeɣman nsen, mitayen u-xemsin-ařef n wuǧi u ařfayen n yeɣyař u myat-ařef n iwdan.
1CH 5:22 Minzi tuɣa [din] aṭṭas n yinni ittwanɣen, maɣar tuɣa-t d ijj n umenɣi n AREBBI. Nitni ggin ad [din] zedɣen deg wemcan nsen ař lmenfa.
1CH 5:23 Arrawen n wezyen n teqbič n Manassa zedɣen di temmurt [nni]. Nitni mmarnin zi Bacan ař Baɛl-Ḥirmun d Sanir d wedrar n Ḥarmun.
1CH 5:24 Ina [tuɣa aten d] izeǧifen n tudrin n ibabaten nsen: Ɛifar d Yicɛi d Iliyil d Ɛazriyil d Irmiya d Hudaya d Yaḥdiyil. [Nitni tuɣa aten d] ayt n bu-teɣruḍt, iryazen imeḥḍen, iryazen n yisem, izeǧifen n tudrin n ibabaten nsen.
1CH 5:25 Nitni ɣdaren AREBBI n řejdud nsen u ssfesden ixef nsen s irebbiten n řegnus n temmurt, inni tuɣa iteḥḥa AREBBI zzat i wudem nsen.
1CH 5:26 [Xenni] issekkar AREBBI n Israil buḥbeř n Ful, ajeǧid n Accur, d buḥbeř n Tiɣlat-Filnasir, ajeǧid n Accur, u wanita indeh i-ten ɣar lmenfa: ayt n Rubin d ayt n Jad d wezyen n teqbič n Manassa. Netta yiwyi ten ɣar Ḥalaḥ d Xabur d Hara[n] u ɣar iɣzar n Juzan, [u nitni qqimen dinni] ař ass-a.
1CH 5:27 Arrawen n Lawi [tuɣa aten d] Jarcun, Qahat d Marari.
1CH 5:28 Arrawen n Qahat [tuɣa aten d] Ɛamram, Yiṣhar d Ḥabrun d Ɛuzziyil.
1CH 5:29 Arrawen n Ɛamram [tuɣa aten d] Harun d Musa, u Maryam [učmatsen]. Arrawen n Harun [tuɣa aten d] Nadab d Abihu, Aliɛazar d Itamar.
1CH 5:30 Aliɛazar ijja-dd Finaḥas, Finaḥas ijja-dd Abicuɛa,
1CH 5:31 Abicuɣa ijja-dd Buqqi, Buqqi ijja-dd Ɛuzzi,
1CH 5:32 Ɛuzzi ijja-dd Zaraḥ-Yah, Zaraḥ-Yah ijja-dd Marayut,
1CH 5:33 Marayut ijja-dd Amarya, Amarya ijja-dd Axiṭub,
1CH 5:34 Axiṭub ijja-dd Ṣaduq, Ṣaduq ijja-dd Aximaɛaṣ,
1CH 5:35 Aximaɛaṣ ijja-dd Ɛazarya, Ɛazarya ijja-dd Yuḥanan
1CH 5:36 u Yuḥanan ijja-dd Ɛazarya. Wanita tuɣa d wenni ittsexxaren am ukehhan di Taddart i ibna Suliman di Urcalim.
1CH 5:37 Ɛazarya ijja-dd Amarya, Amarya ijja-dd Axiṭub,
1CH 5:38 Axiṭub ijja-dd Ṣaduq, Ṣaduq ijja-dd Callum,
1CH 5:39 Callum ijja-dd Ḥilqiya, Ḥilqiya ijja-dd Ɛazarya,
1CH 5:40 Ɛazarya ijja-dd Saraya u Saraya ijja-dd Yahuṣadaq.
1CH 5:41 Yahuṣadaq yuyur [akidsen] umi SIDI indeh Yahuda d Urcalim ɣar lmenfa s ufus n Nabuxadnaṣṣar.
1CH 6:1 Arrawen n Lawi [tuɣa aten d] Jarcun, Qahat d Marari.
1CH 6:2 Ina d ismawen n warrawen n Jarcun: Libni d Cimɛi.
1CH 6:3 Arrawen n Qahat [tuɣa aten d] Ɛamram, Yiṣḥar, Ḥabrun d Ɛuzziyil.
1CH 6:4 Arrawen n Marari [tuɣa aten d] Maḥli d Muci. Tina d řaǧat n Ilawiyyen, ɛlaḥsab řejdud nsen.
1CH 6:5 N Jarcun: mmis Libni, mmis Yaḥat, mmis Zimma,
1CH 6:6 mmis Yuwax, mmis Ɛiddu, mmis Zaraḥ [d] mmis Yatray.
1CH 6:7 Arrawen n Qaḥat: mmis Ɛamminadab, mmis Quraḥ, mmis Assir,
1CH 6:8 mmis Ilqana, mmis Abiyasaf, mmis Assir,
1CH 6:9 mmis Taḥat, mmis Uriyil, mmis Ɛuzziya [d] mmis Cawul.
1CH 6:10 Arrawen n Ilqana [tuɣa aten d] Ɛamasay d Aximut.
1CH 6:11 Ilqana: mmis [tuɣa-t] Ilqana, mmis Ṣufay, mmis Naḥat,
1CH 6:12 mmis Iliyab, mmis Yaruḥam [d] mmis Ilqana.
1CH 6:13 Arrawen n Camwil [tuɣa aten d] [Yuwil], amenzu nnes, u [wenni d] wiss tnayen [tuɣa-t] Abiya.
1CH 6:14 Arrawen n Marari: Maḥli, mmis Libni, mmis Cimɛi, mmis Ɛuzza,
1CH 6:15 mmis Cimɛa, mmis Ḥajiya [d] mmis Ɛasaya.
1CH 6:16 Ina d inni igga Dawud ḥima ad iřin x uɣennej n yizřan di Taddart n SIDI, awarni řami tuɣa tiweḍ Ttabut ɣar wemcan n arraḥet nnes.
1CH 6:17 Nitni tuɣa ttsexxaren s izřan zzat i Tzeddiɣt, zzat i Uqiḍun n Umsagar, ař ikemmeř Suliman řebni n Taddart n SIDI di Urcalim. Nitni bedden di tsexxart nsen ɛlaḥsab lfariḍa nsen.
1CH 6:18 Ina d inni i [din] ibedden ak-d warrawen nsen: Zeg warrawen n Iqaḥatiyyen: Hayman, amedyaz, mmis n Yuwil, mmis n Camwil,
1CH 6:19 mmis n Ilqana, mmis n Yaruḥam, mmis n Iliyil, mmis n Tuwaḥ,
1CH 6:20 mmis n Ṣuf, mmis n Ilqana, mmis n Maḥat, mmis n Ɛamasay,
1CH 6:21 mmis n Ilqana, mmis n Yuwil, mmis n Ɛazarya, mmis n Ṣafanya,
1CH 6:22 mmis n Taḥat, mmis n Assir, mmis n Abiyasaf, mmis n Quraḥ,
1CH 6:23 mmis n Yiṣhar, mmis n Qahat, mmis n Lawi, mmis n Israil.
1CH 6:24 Umas Asaf tuɣa ittbedda ɣar ufusi nnes. Tuɣa Asaf d mmis n Baraxya, mmis n Cimɛi,
1CH 6:25 mmis n Mixayil, mmis n Baɛasiya, mmis n Malkiya,
1CH 6:26 mmis n Itni, mmis n Zaraḥ, mmis n Ɛadaya,
1CH 6:27 mmis n Itan, mmis n Zimma, mmis n Cimɛi,
1CH 6:28 mmis n Yaḥat, mmis n Jarcum, mmis n Lawi.
1CH 6:29 Aytmatsen, arrawen n Marari, bedden ɣar uzeřmaḍ: Itan, mmis n Qici, mmis n Ɛabdi, mmis n Mallux,
1CH 6:30 mmis n Ḥacabya, mmis n Amaṣya, mmis n Ḥilqiya,
1CH 6:31 mmis n Amṣi, mmis n Bani, mmis n Camar,
1CH 6:32 mmis n Maḥli, mmis n Muci, mmis n Marari, mmis n Lawi.
1CH 6:33 Aytmatsen, Ilawiyyen, [tuɣa] ttwaggen i qaɛ tsexxart di Tzeddiɣt n Taddart n AREBBI.
1CH 6:34 [Maca] Harun d warrawen nnes, inni issbexxaren tiɣarṣa x uɛalṭar n wecmaḍ u x uɛalṭar n řebxur, aqa aten ḥima ad bedden ak-d qaɛ řxedmet deg Weqdas x Uqeddas u ḥima ad ggen aṣřaḥ i Israil am mammec marra min tuɣa yumur Musa, amsexxar n AREBBI.
1CH 6:35 Ina d arrawen n Harun: mmis Aliɛazar, mmis Finaḥas, mmis Abicuɛa,
1CH 6:36 mmis Buqqi, mmis Ɛuzzi, mmis Zaraḥ-Yah
1CH 6:37 mmis Marayut, mmis Amarya, mmis Axiṭub,
1CH 6:38 mmis Ṣaduq [d] mmis Aximaɛaṣ.
1CH 6:39 Ina d imucan mani tuɣa zeddɣen, ɛlaḥsab řemrageḥ nsen x temmurt nsen: i warrawen n Harun, i řaǧ n Iqahatiyyen, minzi tuɣa-tt teqduḥt i nitni.
1CH 6:40 Wcin asen Ḥabrun di temmurt n Yahuda ak-d ddmani n tarewsa nnes i d as dd-innḍen.
1CH 6:41 Iyyar n tendint d dcurat nnes wcin t i Kalib, mmis n Yafunni.
1CH 6:42 I warrawen n Harun wcin asen tineddam n tarewřa Ḥabrun d Libna ak-d ddmani n tarewsa nnes, Yattir d Ictamuɛa ak-d ddmani n tarewsa nnes,
1CH 6:43 Ḥilayn ak-d ddmani n tarewsa nnes, d Dabir ak-d ddmani n tarewsa nnes,
1CH 6:44 d Ɛacan ak-d ddmani n tarewsa nnes, d Bayt-Cams ak-d ddmani n tarewsa nnes.
1CH 6:45 Zi teqbič n Binyamin [ksin nitni] Jabɛa ak-d ddmani n tarewsa nnes, d Ɛallimat ak-d ddmani n tarewsa nnes, d Ɛanatut ak-d ddmani n tarewsa nnes. Marra tineddam nsen [tuɣa atent d] třeṭṭac n tneddam ak-d řaǧat nsen.
1CH 6:46 I warrawen n Qahat i iqqimen zi řaǧ n teqbič, [ttwaɛeyynent] s tqedduḥt ɛecra n tneddam zeg wezyen n teqbič, zeg wezyen n Manassa.
1CH 6:47 I warrawen n Jarcun [ttwaɛeyynent] ɛlaḥṣab řaǧat nsen zi teqbič n Issakar, u zi teqbič n Acir, u zi teqbič n Naftali, u zi teqbič n Manassa di Bacan třeṭṭac n tneddam.
1CH 6:48 I warrawen n Marari ɛlahsab řaǧat nsen [ttwaɛeyynent] s tqedduḥt tenɛac n tneddam zi teqbič n Rubin, u zi teqbič n Jad u zi teqbič n Zabulun.
1CH 6:49 Ayt n Israil wcin i Ilawiyyen tineddam-a ak-d ddmani nsent n tarewsa.
1CH 6:50 S tqedduḥt wcin nitni tineddam-a i ittwařaɣan s yisem nsent zi teqbič n warrawen n Yahuda u zi teqbič n warrawen n Cimɛun u zi teqbič n warrawen Binyamin.
1CH 6:51 Uca zi řaǧat n warrawen n Qahat ṭṭfen nitni [ɛawed] tineddam zi teqbič n Ifrayim di temmurt nsen.
1CH 6:52 Minzi wcin asen zi tneddam n tarewřa Cakim ak-d ddmani n tarewsa nnes x idurar n Ifrayim, d Jazar ak-d ddmani n tarewsa nnes,
1CH 6:53 d Yaqmaɛam ak-d ddmani n tarewsa nnes, d Bayt-Ḥurun ak-d ddmani n tarewsa nnes,
1CH 6:54 d Ayalun ak-d ddmani n tarewsa nnes d Jat-Rimmun ak-d ddmani n tarewsa nnes.
1CH 6:55 Zeg wezyen n teqbič n Manassa [ksin nitni] Anir ak-d ddmani n tarewsa nnes, d Bilɛam ak-d ddmani n tarewsa nnes i min iqqimen zi řaǧ n warrawen n Qahat.
1CH 6:56 Arrawen n Jarcum [ksin ɛawed] zi řaǧ n wezyen n teqbič n Manassa: Julan di Bacan ak-d ddmani n tarewsa nnes d Ɛactarut ak-d ddmani n tarewsa nnes.
1CH 6:57 U zi teqbič n Issakar [ksin nitni] Qadac ak-d ddmani n tarewsa nnes, Dubra ak-d ddmani n tarewsa nnes,
1CH 6:58 Ramut ak-d ddmani n tarewsa nnes u Ɛanim ak-d ddmani n tarewsa nnes.
1CH 6:59 Zi teqbič n Acir [ksin nitni] Macal ak-d ddmani n tarewsa nnes, d Ɛabdun ak-d ddmani n tarewsa nnes,
1CH 6:60 d Ḥuquq ak-d ddmani n tarewsa nnes, d Raḥub ak-d ddmani n tarewsa nnes.
1CH 6:61 Zi teqbič n Naftali [ksin nitni] Qadac di Ljalil ak-d ddmani n tarewsa nnes, d Ḥammun ak-d ddmani n tarewsa nnes d Qaryatayim ak-d ddmani n tarewsa nnes.
1CH 6:62 Inni iqqimen n warrawen n Marari [ksin ɛawed] zi teqbič n Zabulun Rimmunu ak-d ddmani n tarewsa nnes, d Tabur ak-d ddmani n tarewsa nnes
1CH 6:63 u x ujemmaḍ n L’Urdun ɣar Ariḥa, ccarq n L’Urdun, [ksin nitni] zi teqbič n Rubin Baṣar di řexřa ak-d ddmani n tarewsa nnes, d Yahṣa ak-d ddmani n tarewsa nnes,
1CH 6:64 d Qadimut ak-d ddmani n tarewsa nnes, d Mayfaɛa ak-d ddmani n tarewsa nnes,
1CH 6:65 u zi teqbič n Jad [ksin nitni] Ramut di Jilɛad ak-d ddmani n tarewsa nnes, d Maḥanayim ak-d ddmani n tarewsa nnes,
1CH 6:66 d Ḥacbun ak-d ddmani n tarewsa nnes, d Yaɛzir ak-d ddmani n tarewsa nnes.
1CH 7:1 Arrawen n Issakar [tuɣa aten d] Tulaɛ d Fuwwa d Yacub d Cimrun, arebɛa [n warrawen].
1CH 7:2 Arrawen n Tulaɛ [tuɣa aten d] Ɛuzzi, Rafaya, Yariyil, Yaḥmay, Yibcam d Cimuwil, izeǧifen n tudrin n ibabaten nsen n Tulaɛ, ayt n bu-teɣruḍt imeḥḍen, [nitni ttwazemmemen] ɛlaḥsab axřaq nsen. Deg wussan n Dawud tuɣa řqedd nsen tnayen u-ɛicrin-ařef u-setta-mya [n yeryazen].
1CH 7:3 Arrawen n Ɛuzzi, [mɣir] Yazraḥya, u arrawen n Yazraḥya [tuɣa aten d] Mixayil, Ɛubadya, Yuwil d Yacci-Yah, nitni marra [tuɣa aten] xemsa n izeǧifen.
1CH 7:4 [Tuɣa] xasen [řumur x] terbiɛin n řɛeskar, [u nitni tuɣa ttwasettfen] ɛlaḥsab jjadira nsen, ɛlaḥsab taddart n ibabaten nsen. [Aqa-ten] di setta u-třatin-ařef [n yeryazen], maɣar nitni tuɣa ɣarsen aṭṭas n temɣarin d warrawen.
1CH 7:5 Uca [xenni] aytmatsen zi marra řaǧat n Issakar, sebɛa u-tmanyin-ařef n ayt n bu-teɣruḍt imeḥḍen, [inni] ittwazemmemen marra di listat n jjadira.
1CH 7:6 Arrawen n Binyamin [tuɣa aten d] Bilaɛ, Bakar d Yadiɛayil, třata [n warrawen].
1CH 7:7 Arrawen n Bilaɛ [tuɣa aten d] Iṣbun, Ɛuzzi, Ɛuzziyil, Yarimut d Ɛayri, xemsa n izeǧifen n řaǧat n ibabaten, ayt n bu-teɣruḍt imeḥḍen. Ttwazemmemen zzaysen tnayen u-ɛicrin-ařef u-arebɛa u-třatin [n yeryazen] di listat n jjadira.
1CH 7:8 Arrawen n Bakar [tuɣa aten d] Zamira, Yuɛac, Iliɛazar, Ilyuɛinay, Ɛumri, Yarimut, Abiya, Ɛanatut d Ɛalamat. Nitni marra [tuɣa aten d] arrawen n Bakar.
1CH 7:9 Ttwazemmemen zzaysen ɛicrin-ařef u-mitayn n ayt n bu-teɣruḍt imeḥḍen di listat n řaǧat, ɛlaḥsab jjadira nsen [u nitni tuɣa ttwasettfen ɛlaḥsab] izeǧifen n tudrin n ibabaten nsen.
1CH 7:10 Arrawen n Yadiɛil, [mɣir] Bilhan. U arrawen n Bilhan [tuɣa aten d] Yaɛic, Binyamin, Ihud, Kanɛana, Zaytan, Tarcic d Axicaḥar.
1CH 7:11 Nitni marra [tuɣa aten d] arrawen n Yadiɛil. Sbeɛṭac-ařef u-mitayn n ayt n bu-teɣruḍt imeḥḍen ffɣen ɣar umenɣi ak-d řɛeskar, [am ttwasettfen nitni] ɛlaḥsab izeǧifen n řaǧat nsen.
1CH 7:12 Cuffim d Huffim [tuɣa aten d] arrawen n Ɛir, Hucim, arrawen n Aḥir.
1CH 7:13 Arrawen n Naftali [tuɣa aten d] Jaḥṣiyil, Juni, Yaṣar d Callum, arrawen n Bilha.
1CH 7:14 Arrawen n Manassa: Acriyil, wenni i d as dd-turuw [temɣart nnes]. Tayya nnes, [ict n temɣart] Taramit, turuw-dd Maxir, babas n Jilɛad.
1CH 7:15 Maxir iksi ict n temɣart i Ḥuffim d Cuffim. Isem n učmas [tuɣa-tt d] Maɛka. Isem n wenni wiss tnayen [tuɣa-t d] Ṣalufḥad. Ṣalufḥad ɣares yessis [waha].
1CH 7:16 Maɛka, tamɣart n Maxir, turuw-dd ijj n mmis uca tegga as Farac u umas qqaren as Carac u arrawen nnes [tuɣa aten d] Ulam d Raqam.
1CH 7:17 Arrawen n Ulam: [mɣir] Badan. Ina d arrawen n Jilɛad, mmis n Maxir, mmis n Manassa.
1CH 7:18 X učmas Hamulakat, nettat turuw-dd Ichud, Abiɛazar d Maḥla.
1CH 7:19 Arrawen n Camidaɛ [tuɣa aten d] Ixyan, Cakim d Laqḥi d Aniɛam.
1CH 7:20 Arrawen n Ifrayim, [mɣir] Cutalaḥ. Mmis tuɣa Barad, mmis Taḥat, mmis Ilɛada, mmis Taḥat,
1CH 7:21 mmis Zabad, mmis Cutalaḥ u [xenni] Ɛazar d Ilɛad. Iryazen n Jat, inni dd-ittwaxeřqen di temmurt, nɣin ten, minzi nitni tuɣa hwan, ḥima ad kksen řmař nsen.
1CH 7:22 Ifrayim, babatsen, icḍen aṭṭas n wussan uca aytmas usin-dd ḥima ad t ɛezzan.
1CH 7:23 Xenni yudef netta x temɣart nnes uca teksi ddeyset uca turuw-dd ijj n uḥenjir. Netta igga as Bariɛa, minzi [deg wussan nni] tuɣa d arẓiyyet di taddart nnes.
1CH 7:24 Yeǧis [tuɣa] Cira. Nettat tessbedd Bayt-Ḥurun n wadday d [Bayt-Ḥurun] n nnej d Uzzin-Cira.
1CH 7:25 Rafaɛ [tuɣa] d mmis uřa d Racaf. Uca mmis tuɣa d Talaḥ, mmis Taḥan,
1CH 7:26 mmis Laɛdan, mmis Ɛammihud, mmis Ilicamaɛ,
1CH 7:27 mmis Nun [d] mmis Yacuwa.
1CH 7:28 Agřa nsen d imucan mani zeddɣen [tuɣa] Bayt-Il ak-d tneddam i ɣares dd-iqqnen, d Naɛran ɣar ccarq u Jazar ɣar řɣarb ak-d tneddam i ɣarsent dd-iqqnen, uřa d Cakim ak-d tneddam i ɣares dd-iqqnen ař Ɣazza ak-d tneddam i ɣares dd-iqqnen.
1CH 7:29 Tuɣa Bayt-Can ak-d tneddam i ɣares dd-iqqnen, Taɛnak ak-d tneddam i ɣares dd-iqqnen, Majiddu ak-d tneddam i ɣares dd-iqqnen [u] Dur ak-d tneddam i ɣares dd-iqqnen deg ifassen n ayt n Manassa. Ayt n Yusuf, mmis n Israil, tuɣa zeddɣen daysent.
1CH 7:30 Arrawen n Acir [tuɣa aten d] Yimna, Yicwa, Yicwi, Bariɛa d Saraḥ [tenni d] učmatsen.
1CH 7:31 Arrawen n Bariɛa [tuɣa aten d] Ḥabir d Malkiyil. Netta d baba n Birzawat.
1CH 7:32 Ḥabir ijja-dd Yafliṭ, Cumir, Ḥutam d Cuɛa, učmatsen
1CH 7:33 Arrawen n Yafliṭ [tuɣa aten d] Fasak, Bimhal d Ɛacwat. Ina [tuɣa aten d] arrawen n Yafliṭ.
1CH 7:34 Arrawen n Camar [tuɣa aten d] Axi, Ruhja, Yahubba d Aram.
1CH 7:35 Arrawen n umas Hilam [tuɣa aten d] Ṣufaḥ, Yimnaḥ, Calac d Ɛamal.
1CH 7:36 Arrawen n Ṣufaḥ [tuɣa aten d] Suwaḥ, Ḥaranfar, Cuɛal, Biri, Yamra,
1CH 7:37 Baṣar, Hud, Camma, Cilca, Yitran d Ba’ira.
1CH 7:38 Arrawen n Yitram [tuɣa aten d] Yafunni, Ficfa d Ara.
1CH 7:39 Arrawen n Ɛulla [tuɣa aten d] Araḥ, Ḥaniyil d Riṣya.
1CH 7:40 Marra ina [tuɣa aten d] arrawen n Acir, izeǧifen n řaǧat n ibabaten, ayt n bu-teɣruḍt ifarzen imeḥḍen, izeǧifen n řḥukkam. Nitni ttwazemmemen di listat n jjadira n řɛeskar i umenɣi. [Tuɣa] řqedd nsen setta u-ɛicrin-ařef n yeryazen.
1CH 8:1 Binyamin ijja-dd Bilaɛ, amenzu nnes, Acbil d wiss tnayen, Axrax d wiss třata,
1CH 8:2 Naḥu d wiss arebɛa u Rafa d wiss xemsa.
1CH 8:3 Bilaɛ tuɣa ɣares arrawen-a: Addar, Jira d Abihud,
1CH 8:4 Abicuɛa, Nuɛman, Axuxa,
1CH 8:5 Jira, Cafufan d Ḥuram.
1CH 8:6 Ina d arrawen n Aḥud. Nitni [tuɣa aten d] izeǧifen x ibabaten [n řaǧat] n imezdaɣ n Jibɛa. Nedhen i-ten ɣar Manaḥat,
1CH 8:7 aqa d Naɛman, Axiya d Jira. Netta indeh i-ten. U netta ijja-dd Ɛuzza d Axiḥud.
1CH 8:8 Caḥarayim ijja-dd [iḥenjiren] di temmurt n Mu’ab, awarni i umi tuɣa issuffeɣ timɣarin nnes Ḥucim d Baɛra.
1CH 8:9 Ak-d temɣart nnes Xudac ijja-dd Yubab, Ḍibya, Mica, Malkam,
1CH 8:10 Yaɛuṣ, Cabiya d Mirma. Ina [tuɣa aten d] arrawen nnes, izeǧifen x ibabaten [n řaǧat].
1CH 8:11 Ak-d Ḥucim ijja-dd netta Abiṭub d Ilfaɛal.
1CH 8:12 Arrawen n Ilfaɛal [tuɣa aten d] Ɛabir, Micɛam, Camid nni ibnan Unu d Lud ak-d tneddam i ɣares dd-iqqnen,
1CH 8:13 Bariɛa d Camaɛ. Ina [tuɣa aten d] izeǧifen n ibabaten [n řaǧat] n imezdaɣ n Ayalun. Nitni uẓẓřen x imezdaɣ n Jat.
1CH 8:14 Axiyu, Cacaq, Yarimut,
1CH 8:15 Zabadya, Ɛarad, Ɛadar,
1CH 8:16 Mixayil, Jicfa d Yuxa [tuɣa aten d] arrawen n Bariɛa.
1CH 8:17 Zabadya, Macullam, Ḥazki, Ḥabir,
1CH 8:18 Yicmaray, Yazliya d Yubab [tuɣa aten d] arrawen n Ilfaɛal.
1CH 8:19 Yaqim, Zikri, Zabdi,
1CH 8:20 Iliɛinay, Ṣillatay, Iliyil,
1CH 8:21 Ɛadaya, Baraya d Cimra [tuɣa aten d] arrawen n Cimi.
1CH 8:22 Yicfan, Ɛabir, Iliyil,
1CH 8:23 Ɛabdun, Zixri, Ḥanan,
1CH 8:24 Ḥananya, Ɛilam, Ɛntutiya,
1CH 8:25 Yafdiya d Fanuwil [tuɣa aten d] arrawen n Cacaq.
1CH 8:26 Camcaray, Caḥarya, Ɛatalya,
1CH 8:27 Yaɛracya, Iliya d Zikri [tuɣa aten d] arrawen n Yaruḥam.
1CH 8:28 Ina [tuɣa aten d] izeǧifen x ibabaten, [ttwasettfen] ɛlaḥsab jjadira nsen, izeǧifen [i iǧan]. Nitni tuɣa zeddɣen di Urcalim.
1CH 8:29 Di Jibɛun izdeɣ babas n Jibɛun u tamɣart nnes qqaren as Maɛka.
1CH 8:30 Amenzu nnes [tuɣa] Ɛabdun, [xenni] Ṣur, Qis, Baɛal, Nadab,
1CH 8:31 Jadur, Axxiyu d Zakir.
1CH 8:32 Miqlut ijja-dd Cama. Uřa d nitni zedɣen di Urcalim ajemmaḍ n aytmatsen, [jmiɛ] ak-d yaytmatsen.
1CH 8:33 Nir ijja-dd Qis u Qis ijja-dd Cawul u Cawul ijja-dd Yunatan, Malkicuɛa, Abinadab d Icbaɛal.
1CH 8:34 Mmis n Yunatan [tuɣa] Marib-Baɛal. Marib-Baɛal ijja-dd Mixa.
1CH 8:35 Arrawen n Mixa [tuɣa aten d] Fitun, Malik, Tariɛ d Aḥaz.
1CH 8:36 Aḥaz ijja-dd Yahuɛadda u Yahuɛadda ijja-dd Ɛalmat, Ɛazmawet d Zimri. Zimri ijja-dd Muṣa,
1CH 8:37 u Muṣa ijja-dd Binɛa. Mmis [tuɣa] Rafaɛ, mmis Ilɛasa [d] mmis Aṣiyal.
1CH 8:38 Aṣiyal tuɣa ɣares setta n warrawen u ina d ismawen nsen: Ɛazriqam, Bukra, Ismaɛil, Caɛarya, Ɛubadya d Ḥanan. Nitni marra [tuɣa aten d] arrawen n Aṣiyal.
1CH 8:39 Arrawen n umas Ɛaciq [tuɣa aten d] Ulam, amezwaru nnes, [u] wiss tnayen [tuɣa-t d] Yaɛuc d wiss třata Ilifalaṭ.
1CH 8:40 Arrawen n Ulam [tuɣa aten d] iryazen, ayt n bu-teɣruḍt imeḥḍen nni imeḥḍen řqews. Nitni tuɣa ɣarsen aṭṭas n warrawen d wayyawen, [s marra] mya u-xemsin. Marra ina zeg warrawen n Binyamin.
1CH 9:1 Marra Israil ittwazemmem [di listat n jjadira] u xzar, nitni ttwazemmemen deg wedlis n ijeǧiden n Israil d Yahuda. Ittwandeh Yahuda ɣar lmenfa ɣar Babil di ssibbet n řeɣdar nsen.
1CH 9:2 Imezdaɣ imezwura [i iggin ad zedɣen] x wagřa nsen di tneddam nsen, [tuɣa aten] [ayt n] Israil, [uca uřa] d ikehhanen d Ilawiyyen d imsexxaren n Zzawect Tameqqrant.
1CH 9:3 Zeg warrawen n Yahuda u zeg warrawen n Binyamin u zeg warrawen n Ifrayim u zeg warrawen n Manassa zedɣen [ina] di Urcalim:
1CH 9:4 Ɛutay, mmis n Ɛammihud, mmis n Ɛumri, mmis n Imri, mmis n Bani. [Netta tuɣa] zeg warrawen n Fariṣ, mmis n Yahuda.
1CH 9:5 Zeg Aciluni[yyen]: Ɛasaya, amenzu ak-d warrawen nnes,
1CH 9:6 u zeg warrawen n Zaraḥ: Yaɛuyil [waha]. Aytmatsen [tuɣa aten] di setta mya u-tesɛin.
1CH 9:7 Zeg warrawen n Binyamin: Sallu, mmis n Macullam, mmis n Huduya, mmis n Hasnuwa,
1CH 9:8 d Yibniya, mmis n Yaruḥam; u Ila, mmis n Ɛuzzi, mmis n Mikri; u Macullam, mmis n Cafaṭya, mmis n Raɛuyil, mmis n Yibniya.
1CH 9:9 Aytmatsen, [ttwasettfen] ɛlaḥsab jjadira nsen, [tuɣa aten di] tesɛa-mya u-setta u-xemsin [n yeryazen]. Marra iryazen-a [tuɣa aten] d izeǧifen x ibabaten n řaǧat nsen.
1CH 9:10 Zeg ikehhanen: Yadaɛya, Yahuyarib d Yakin;
1CH 9:11 d Ɛazarya, mmis n Ḥilqiya, mmis n Macullam, mmis n Ṣaduq, mmis n Marayut, mmis n Axiṭub, řḥakem n Taddart n AREBBI;
1CH 9:12 d Ɛadaya, mmis n Yaruḥam, mmis n Facḥur, mmis n Malkiya; u Maɛsay, mmis n Ɛadiyil, mmis n Yaḥzira, mmis n Macullam, mmis n Macillimit, mmis n Immir.
1CH 9:13 Aytmatsen [inni tuɣa iqqnen ɣar] izeǧifen n tudrin n ibabaten nsen, [tuɣa aten deg] ařef u-sebɛa-mya u-settin n ayt n bu-teɣruḍt imeḥḍen, [inni iggin] řxedmet n tsexxart di Taddart n AREBBI.
1CH 9:14 Zeg Ilawiyyen: Camɛiya, mmis n Ḥacub, mmis n Ɛazriqam, mmis n Ḥacabya, zeg warrawen n Marari,
1CH 9:15 d Baqbaqar d Ḥarac d Jalal d Matanya, mmis n Mixa, mmis n Zikri, mmis n Asaf;
1CH 9:16 d Ɛubaya, mmis n Camɛiya, mmis n Jalal, mmis n Yadutun; d Baraxya, mmis n Asa, mmis n Ilqana, wenni izeddɣen di ředcur n Inaṭufatiyyen.
1CH 9:17 Iɛessasen n tewwart [tuɣa aten d] Callum, Ɛaqqub, Ṭalmun d Aximan d tawmat nsen. Callum [tuɣa-t d] azeǧif.
1CH 9:18 Ař řexxu [bedden nitni] ɣar Tewwart n Ujeǧid di manis i dd-tneqqar tfuct. Nitni d iɛessasen n tewwart ɣar řemrageḥ n řɛeskar n ayt n Lawi.
1CH 9:19 Callum, mmis n Quri, mmis n Abiyasaf, mmis n Quraḥ, d aytmas, [inni tuɣa iqqnen] ɣar taddart n babas, ixs ad yini Iquraḥiyyen, [tuɣa aten] x řxedmet n tsexxart. Nitni tuɣa-ten d iɛessasen ɣar tnebdatin n Uqiḍun, am mammec tuɣa řejdud nsen d iɛessasen n wadaf ɣar řmargeḥ n řɛeskar n SIDI.
1CH 9:20 Finaḥas, mmis n Aliɛazar, [tuɣa-t] zic d řḥakem nsen. SIDI [tuɣa] akides.
1CH 9:21 Zakariyya, mmis n Macalmiya, [tuɣa-t d] aɛessas n tewwart ɣar wadaf n Uqiḍun n Umsagar.
1CH 9:22 Marra inni ittwafarzen am yiɛessasen n tewwart ɣar wadafen, [tuɣa aten di] mitayen u-tenɛac [n yeryazen]. Nitni ttwazemmemen [di lista n jjadira] di ředcur nsen. Dawud d Camwil, amwařaw, ssmetnen ten di řfusina i d asen dd-ittwawekkřen.
1CH 9:23 Nitni tuɣa ttɛessan ak-d warrawen nsen ɣar tewwura n Taddart n SIDI, ɣar Taddart n Uqiḍun.
1CH 9:24 Iɛessasen n tewwura [tuɣa bedden] ɣar arebɛa [n iɣezdisen] n usemmiḍ: ɣar ccarq, ɣar řɣarb, ɣar ccamal, ɣar ljanub.
1CH 9:25 Tuɣa x aytmatsen, [inni tuɣa izeddɣen] di ředcur nsen, ad dd-asen deg wass wiss sebɛa, ḥima [ad sexxaren řmijař n ict n ssimana] di řwawqat ittwaggen, [jmiɛ] akidsen,
1CH 9:26 maɣar di řxedmet i d asen-dd ittwawekkřen tuɣa nitni d arebɛa n iɛessasen imezwura x tewwura. Nitni, ixs ad yini Ilawiyyen, ttwařeqqmen x ixxamen u x txubay n Taddart n AREBBI.
1CH 9:27 Di ǧiřet ssensen deg wenneḍ n Taddart n AREBBI, maɣar tuɣa ttwakellfen s tɛessast d warzam [n tewwura] kuř ṣṣbeḥ.
1CH 9:28 [Ca] zzaysen [ttwaggen] x dduzanat n tsexxart, maɣar nitni ḥessben [ten] umi ten ssidfen u umi ten ssuffɣen.
1CH 9:29 [Ca nneɣni] zzaysen ttwaggen x dduzanat u x marra řeqcuɛ iqeddsen u x waren azdad d binu d zzect d jjawi d řeɛṭur.
1CH 9:30 Imsewjjaden n txeǧeḍt ittfuḥen ak-d řeɛṭur [tuɣa aten] zeg warrawen n ikehhanen.
1CH 9:31 Mattitya, [ijjen] zeg ayt n Lawi, [tuɣa] d amenzu n Callum, Aquraḥi. Ittwawekkeř as maḥend ad issewjed min ittxeṣṣa ad ssengwen.
1CH 9:32 Zeg warrawen n Iqahatiyyen, zeg aytmatsen, [tuɣa ca] ttwařeqqmen x weɣrum n wescan, ḥima ad t ssarsen [di ṭṭabřa] kuř ass n ssebt.
1CH 9:33 Nitni [tuɣa aten] uřa d imedyazen, izeǧifen n ibabaten [n řaǧat] n Ilawiyyen, inni ittwanfekken [zi řexdayem nneɣni] minzi tuɣa xasen ḥima ad ceɣřen ak-d řxedmet-a ass d ǧiřet.
1CH 9:34 Ina [tuɣa aten d] izeǧifen n ibabaten [n řaǧat] n Ilawiyyen, [ttwasettfen] ɛlaḥsab jjadira nsen, izeǧifen [i iǧan]. Nitni tuɣa zeddɣen di Urcalim.
1CH 9:35 Di Jibɛun zedɣen Yaɛiyil, babas n Jibɛun, u isem n temɣart nnes tuɣa-t Maɛka.
1CH 9:36 Mmis amenzu [tuɣa] Ɛabdun. [Tuɣa zeddɣen din ɛawed] Ṣur, Qis, Nir, Nadab,
1CH 9:37 Jadur, Axiyu, Zakariyya d Miqlut.
1CH 9:38 Miqlut ijja-dd Cimɛa. Nitni tuɣa zeddɣen ajemmaḍ n aytmatsen di Urcalim, [jmiɛ] ak-d aytmatsen [inneɣni].
1CH 9:39 Nir ijja-dd Qis, Qis ijja-dd Cawul u Cawul ijja-dd Yunatan, Malkicuɛa, Abinadab d Icbaɛal.
1CH 9:40 Mmis n Yunatan [tuɣa] Marib-Baɛal, u Marib-Baɛal ijja-dd Mixa.
1CH 9:41 Arrawen n Mixa [tuɣa aten d] Fitun, Malak d Taḥriɛa.
1CH 9:42 Aḥaz ijja-dd Yaɛra, u Yaɛra ijja-dd Ɛalmat, Ɛazmawet d Zimri, u Zimri ijja-dd Muṣa,
1CH 9:43 u Muṣa ijja-dd Binɛa. Mmis [tuɣa] Rafaya, mmis Ilɛasa [d] mmis nnes Aṣil.
1CH 9:44 Aṣil tuɣa ɣares setta n warrawen u ina d ismawen nsen: Ɛazriqam d Bukra d Ismaɛil d Caɛarya d Ɛubadya d Ḥanan. Ina [tuɣa aten d] arrawen n Aṣil.
1CH 10:1 Mmenɣen Ifilisṭiniyyen ak-d Israil. Iryaz[en] n Israil arewřen zzat i wudem n Ifilisṭiniyyen uca wḍan d imettan x temmurt n idurar n Jilbuɛa.
1CH 10:2 Ifilisṭiniyyen ḍfaren Cawul d arrawen nnes břa qeṭṭu. Ifilisṭiniyyen nɣin Yunatan, Abinadab d Malkicuɛa, arrawen n Cawul.
1CH 10:3 Tuɣa amenɣi ak-d Cawul iwɛar. Imjebbaden n řqews ufin t u netta tuɣa iggʷed aṭṭas zeg imjebbaden n řqews.
1CH 10:4 Inna Cawul i uḥemmař n řesnaḥ nnes: “Suffeɣ-dd ssif nnec, snuqqeb ayi zzayes! Niɣ ad dd-asen inni war ittwaxetnen, ad zzayi stehzan.” [Maca] aḥemmař nnes n řesnaḥ war ixs [ad tt igg], maɣar tuɣa iggʷed aṭṭas. [Xenni] iksi Cawul ssif uca isseɣḍeř ixef nnes xas.
1CH 10:5 [Umi] iẓra uḥemmař n řesnaḥ, aqa Cawul immut, iwḍa řa d netta x ssif nnes uca immut.
1CH 10:6 Immut Cawul ak-d třata n warrawen nnes uca [ammu] temmut qaɛ taddart nnes.
1CH 10:7 [Umi] ẓrin marra yeryazen n Israil, inni tuɣa di řewḍa n teɣzurt, belli iryazen n Israil arewřen u Cawul d warrawen nnes ttwanɣen, semḥen nitni di tneddam nsen uca arewřen. [Řexdenni] usin-dd Ifilisṭiniyyen uca dewřen zeddɣen din.
1CH 10:8 Tiwecca nnes umi dd-usin Ifilisṭiniyyen ḥima ad keccḍen inni ittwanɣen, imsar, aqa ufin Cawul d warrawen nnes, inni tuɣa iwḍan x wedrar n Jilbuɛa.
1CH 10:9 Nitni keccḍen t uca iwyen azeǧif nnes d řesnaḥ nnes uca ssekken ten di temmurt n Ifilisṭiniyyen, ḥima ad ssiwḍen řexbar aṣebḥan ɣar řexyařat n l’aṣnam nsen u ɣar řgens.
1CH 10:10 Nitni ssarsen řesnaḥ n Cawul di taddart n arebbi nsen u aceqquf n uzeǧif nnes semmaren t ɣar řḥiḍ n Bayt-Can.
1CH 10:11 Umi sřan marra [imezdaɣ n] Yabic min ggin Ifilisṭiniyyen ak-d Cawul,
1CH 10:12 kkaren marra iryazen imeḥḍen, ksin řxecbet n Cawul d řxecbat n warrawen nnes uca iwyen tent ɣar Yabic. Nitni neḍřen iɣsan nsen sadu i tcejjart n yigg di Yabic uca ẓummen sebɛa n wussan.
1CH 10:13 Cawul immut di ssibbet n řeɣdar nnes i zi tuɣa iɣeddar SIDI, di ssibbet n wawař n SIDI i war dayes iṭṭif netta, u umi yarzu ccwar ɣar wenni issawařen ak-d imettan,
1CH 10:14 war isseqsi SIDI. S uyenni inɣa i-t [SIDI] uca issmuṭṭiy tagelda i Dawud, mmis n Yassa.
1CH 11:1 Marra Israil yusa-dd ɣar Dawud ɣar Ḥabrun, nnan: “Xzar, neccin d iɣsan d weysum nnec.
1CH 11:2 Ɛad umi tuɣa Cawul d ajeǧid xaneɣ, aqa d cek i dd-issuffɣen Israil [ɣar umenɣi] uca tjebded t-i-dd ad dd-idweř. Ɛawed inna ac SIDI, AREBBI nnec: ‘Cek ad tarewsed řgens inu Israil u cek ad tiřid d řḥakem x Israil.’”
1CH 11:3 [Xenni] usin-dd marra imɣaren n Israil ɣar ujeǧid di Ḥabrun uca igga ujeǧid Dawud ijj n řɛahd akidsen di Ḥabrun zzat i wudem n SIDI. Nitni dehnen Dawud d ajeǧid x Israil ɛlaḥsab awař n SIDI s uqemmum n Camwil.
1CH 11:4 Dawud iffeɣ ak-d marra Israil ɣar Urcalim, aqa-t d Yabus. Dinni [tuɣa zeddɣen] ayt n Yabus, imezdaɣ n temmurt.
1CH 11:5 Imezdaɣ n Yabus nnan i Dawud: “Cek war da tᵉttidfed ca.” [Maca] Dawud iṭṭef lburj n Ṣihyun, aqa-t d tandint n Dawud.
1CH 11:6 [Maɣar] Dawud inna: “Kuř ijj wenni i ɣa iwten ayt n Yabus d amezwaru, ad idweř d azeǧif n ikumandaren. Uca Yuwab, mmis n Saraya, igeɛɛed d amezwaru, [s uyenni] idweř netta d azeǧif.
1CH 11:7 Tuɣa Dawud izeddeɣ di lqelɛa. X uya qqaren as [i lqelɛa] tandint n Dawud.
1CH 11:8 Netta ibna tandint i d as dd-innḍen, zi lqelɛa u ssenni iquwwar as-dd. Iɛdeř Yuɛab min iqqimen n tendint.
1CH 11:9 Idweř Dawud yarenni di řemɣaret, maɣar SIDI n řɛeskarat tuɣa-t akides.
1CH 11:10 Ina d izeǧifen n ayt n bu-teɣruḍt n Dawud inni issjjehden akides tagelda nnes di marra Israil, ḥima ad t ggen d ajeǧid x Israil ɛlaḥsab awař n SIDI.
1CH 11:11 Ta d lista n lɛadad n ayt n bu-teɣruḍt n Dawud: Yacubɛam, mmis n Hakmuni, azeǧif n třatin. Netta iḥenneḍ s lansa nnes x teřt-mya [n yeryazen] nni issnuqqeb deg ijj n umur.
1CH 11:12 Awarni as [yusa-dd] Aliɛazar, mmis n Dudu, Axuxi. Netta tuɣa d ijj zi třata n ayt n bu-teɣruḍt.
1CH 11:13 Netta tuɣa-t ak-d Dawud di Fas-Dammim. Ifilisṭiniyyen nnyarwen din i umenɣi. Ijj n wezyen n yeyyar tuɣa iccur s imendi umi yarweř řgens zeg Ifilisṭiniyyen.
1CH 11:14 Nitni bedden di řwest n wezyen n yeyyar nni, fekken t, uca ɣeřben x Ifilisṭiniyyen. [Ammu] i yarra SIDI d asenjem d ameqqran.
1CH 11:15 Třata zi třatin n izeǧifen hwan ař taṣḍart, [usin-dd] ɣar Dawud deg ifri n Abdullam. Řɛeskar n Ifilisṭiniyyen tuɣa iwta iqiḍan nnes di teɣzurt n Irafawiyyen.
1CH 11:16 Dawud [tuɣa-t] di lqelɛa u [tuɣa] din ijj n řɛeskar n uḥewwes n Ifilisṭiniyyen di Bayt-Laḥm.
1CH 11:17 Dawud iřqef i-t ufadi, inna: “Wi i d ayi dd ɣa yawyen aman zi tařa n Bayt-Laḥm nni [iǧan] ɣar tewwart [n tendint]?”
1CH 11:18 [Xenni] cuqen třata nni řmargeḥ n řɛeskar n Ifilisṭiniyyen, uymen-dd aman zi tařa n Bayt-Laḥm, tenni [iǧan] ɣar tewwart [n tendint]. Ksin ten akidsen uca iwḍen ɣar Dawud. Netta yugi ad ten isu, maca izeǧeɛ i-ten zzat i SIDI.
1CH 11:19 Netta inna: “Aya iggʷej xafi, [a] AREBBI inu, aqa necc ad ggeɣ man aya. Ma ad sweɣ idammen n yeryazen s řeɛmar nsen [daysen], maɣar nitni sebbřen tudart nsen simant nsen?” U netta war ixs ad ten isu. D man aya i ggin třata n ayt n bu-teɣruḍt [nni].
1CH 11:20 Abicay, mmis n Yuwab, tuɣa d azeǧif n třata [nni]. Netta iḥenneḍ lansa nnes x teřt-mya [n yeryazen], issnuqqeb [i-ten]. Netta ɣares ijj n yisem [ittwacennɛen] jar třata [nni].
1CH 11:21 Jar třata[-ya] tuɣa [Abicay] d wenni ittwacennɛen tnayen n imuren, u netta tuɣa d řqebṭan i nitni. [Maca] netta war yiwiḍ uřa am třata imezwura.
1CH 11:22 [Xenni] Banaya, mmis n Yahuyadaɛ, mmis n ijj n weryaz imeḥḍen, timegga nnes mɣarent. Netta zi Qabḍiyil. Iɣřeb x tnayen n iyraden jehden zi Mu’ab. Ɛawed tuɣa ihwa [ict n twařa], iɣřeb x ijj n weyrad di řwesṭ n ijj n wanu deg ijj n wass umi iwta wedfeř.
1CH 11:23 Netta iɣřeb uřa x yijj n weryaz d Amiṣri, s yijj tiddi n xemsa n iɣaǧen. Amiṣri tuɣa ɣares lansa deg ufus [nnes] [tegga] am yijj n weɛmud n ukeccuḍ n uxeyyeḍ. Ihwa ɣares s weɛmud, ikkes as lansa zeg ufus n Umiṣri uca inɣa i-t s lansa nnes.
1CH 11:24 D man aya i igga Banaya, mmis n Yahuyadaɛ. S uya ɣares iǧa isem [icneɛ] jar třata n ayt n bu-teɣruḍt.
1CH 11:25 Netta tuɣa d wenni ittwacennɛen aṭṭas zi třatin, maca war yiweḍ ař třata [imezwura]. Dawud igga i-t jar imtiqqan nnes.
1CH 11:26 Ayt bu-teɣruḍt imeḥḍen [i iqqimen] [tuɣa aten]: Ɛasa’il, umas n Yuwab, Ilḥanan, mmis n Dudu, zi Bayt-Laḥm,
1CH 11:27 Cammut, Aharudi, Ḥaliṣ, Alfaluni,
1CH 11:28 Ɛira, mmis n Ɛiqqic, Atiqquɛi, Abiɛazar, Aɛanatuti,
1CH 11:29 Sibbikay, Aḥucati, Ɛilay, Axuxi,
1CH 11:30 Maharay, Anaṭufati, Xalid, mmis n Baɛna, Anaṭufati,
1CH 11:31 Ittay, mmis n Ribay, zi Jibɛa, zeg warrawen n Binyamin, Banaya, zi Firɛatun,
1CH 11:32 Huray zi teɣzarin n Jaɛac, Abiyil, Aɛarabati,
1CH 11:33 Ɛazmawet, Abaḥrumi, Ilyaḥba, Acaɛalbuni,
1CH 11:34 arrawen n Hacim, Ajazuni, Yunatan, mmis n Cajay, Aharari,
1CH 11:35 Axiyam, mmis n Sakar, Aharari, Ilifal, mmis n Ur,
1CH 11:36 Ḥafir, Amakirati, Axiya, Afaluni,
1CH 11:37 Ḥaṣru, Akarmali, Naɛray, mmis n Izbay,
1CH 11:38 Yuwil, umas n Natan, Mibḥar, mmis n Hajri,
1CH 11:39 Ṣaliq, Aɛammuni, Naḥray, Aba’iruti, - aḥemmař n řesnaḥ n Yuwab, mmis n Ṣaruya,
1CH 11:40 Ɛira, Ayitri, Jarib, Ayitri,
1CH 11:41 Uriya, Aḥitti, Zabad, mmis n Aḥlay,
1CH 11:42 Adina, mmis n Ciza, zi teqbič n Rubin, [wenni] d azeǧif n ayt n Rubin, u sennej nnes [ɛad] třatin [n yeryazen],
1CH 11:43 Ḥanan, mmis n Maɛka, d Yucafaṭ, Amatni,
1CH 11:44 Ɛuzziya Aɛactaruti, Camaɛ d Yaɛiyil, arrawen n Ḥutam, Aɛaruɛiri,
1CH 11:45 Yadiɛil, mmis n Cimri, Yuḥa, umas, Atiṣi,
1CH 11:46 Iliyil Amaḥwim, Yaribay d Yucuwya, arrawen n Ilnaɛam, d Yitma Amu’abi,
1CH 11:47 Iliyil, Ɛubid d Yaɛsiyil zi Maṣubaya.
1CH 12:1 Ina i dd-yusin ɣar Dawud ɣar Ṣiqlaɣ, umi tuɣa ittxeṣṣa ɛad ad iqqim [Dawud] itteggʷej x wudem n Cawul, mmis n Qic. Nitni [tuɣa tteqqen i] ayt n bu-teɣruḍt inni iwcin afus [i Dawud] deg umenɣi.
1CH 12:2 Nitni tuɣa ḥezmen s řeqwas u zemmaren [ad ḥejjaren] s yeẓra u ad wten fřitcat s řqews s ufus afusi u s ufus azeřmaḍ. Nitni tuɣa aten zeg aytmas n Cawul, zi Binyamin.
1CH 12:3 Axiɛazar [tuɣa] d azeǧif nsen, [xenni] Yuwac, [nitni s tnayen idsen] d arrawen n Camaɛa, zi Jibɛa, [xenni] Yazu’il d Falaṭ, [nitni s tnayen idsen d] arrawen n Ɛazmawet, u Baraxya d Yahu, zi Ɛanatut,
1CH 12:4 u Yacmaɛya, zi Jibɛun, [wenni tuɣa] d ijj n bu-teɣruḍt jar třatin u [tuɣa] x třatin,
1CH 12:5 uřa d Irmiya, Yaḥziyil, Yuḥanan d Yuzabad, Ajadiri,
1CH 12:6 Ilɛuzay, Yarimut, Baɛliya, Camarya, Cafaṭya, Aḥarufi,
1CH 12:7 Ilqana, Yacci-Yah, Ɛazriyil, Yuɛazar d Yacubɛam, [nitni d] Iquraḥiyyen,
1CH 12:8 u [ɣar uneggar] Yuɛila d Zabadya, [nitni s tnayen idsen d] arrawen n Yaruḥam zi Jadur.
1CH 12:9 Zeg ayt n Jad aqa din inni immsebḍan ixef nsen [ḥima ad ẓwan] ɣar Dawud, di lqelɛa di řexřa. Ayt n bu-teɣruḍt imeḥḍen, iɛeskariyyen [wejden] i umenɣi, ttwaḥezmen s tseddariyin [n uɛeskari] timeqqranin u s iḥricen. Udmawen nsen am wudmawen n weyraden u nitni uyuren s tazřa amecnaw iɣayḍen n wezɣar x idurar.
1CH 12:10 Ɛazar tuɣa-t d azeǧif, Ɛubadya d wiss tnayen, Iliyab d wiss třata,
1CH 12:11 Micmanna d wiss arebɛa, Irmiya d wiss xemsa,
1CH 12:12 Ɛattay d wiss setta, Iliyil d wiss sebɛa,
1CH 12:13 Yuḥanan d wiss tmenya, Ilzabad d wiss tesɛa,
1CH 12:14 Irmiya d wiss ɛecra, Maxbanay d wiss ḥiṭac.
1CH 12:15 Ina tuɣa aten zeg warrawen n Jad, imeqqranen n řɛeskar. Ameẓyan ḥesben t am mya [n yeryazen] u ameqqran am ařef.
1CH 12:16 Ina d inni iẓwan L’Urdun deg uyur amezwaru, umi isfi [L’Urdun] barra marra timuwwa nnes u nitni uẓẓřen x marra imezdaɣ n řewḍat n teɣzurt [i iǧan] ɣar ccarq d řɣarb.
1CH 12:17 Uřa zeg warrawen n Binyamin u zeg warrawen n Yahuda usin-dd [yeryazen] ɣar Dawud ɣar lqelɛa n wedrar.
1CH 12:18 Dawud iffeɣ-dd ɣarsen ḥima ad ten iřqa, uca iṭṭef deg wawař, inna asen: “Mařa kenniw tusim-dd ɣari ḥima ad ayi tewcem afus, xenni necc ad iřiɣ s wuř d ijj akidwem, [maca] mařa [kenniw tusim-dd] ḥima ad ayi tsellmem i iɣrimen inu, waxxa war [din teǧi] řexcunet ɣar ifassen inu, [xenni] iři ad t iẓar AREBBI n řejdud nneɣ u ad kenniw ixeǧes!”
1CH 12:19 Iwḍa-dd Arruḥ am warruḍ x Ɛamasay, azeǧif n třatin, netta inna: “Neccin akidek, Dawud, u neccin akidek, mmis n Yassa. Řehna, řehna [ad] kidek [yiři] u řehna [ad yiři] ak-d yinni d ac iwcin afus, maɣar AREBBI nnec iwca ac afus.” [Xenni] issidef i-ten Dawud u igga i-ten d izeǧifen x terbiɛt n řɛeskar.
1CH 12:20 Uřa zi Manassa [tuɣa din] inni iɛdun ɣar Dawud, umi dd-iffeɣ ak-d Ifilisṭiniyyen ɣar umenɣi ak-d Cawul. [Ifilisṭiniyyen maca] war d asen jjin ad wcen afus, minzi řbacat [n tneddam] n Ifilisṭiniyyen ssekken t, nnan: “[Zeɛma] netta izemmar ad iɛdu s izeǧifen nneɣ [deg ufus nnes] ɣar Cawul, sides.”
1CH 12:21 Umi dd-iɛqeb ɣar Ṣiqlaɣ, ɛdun [ina] ɣares zeg [ayt n] Manassa: Ɛadnaḥ, Yuzabad, Yadiɛil, Mixayil, Yuzabad, Ilihu d Ṣilltay, řqebṭanat x řuruf n Manassa.
1CH 12:22 Nitni wcin afus i Dawud ḥima ad igewwed tirbiɛin [n řɛeskar], maɣar nitni marra tuɣa aten d ayt n bu-teɣruḍt imeḥḍen u nitni tuɣa aten d ikumandaren n řɛeskar.
1CH 12:23 Maɣar di řweqt nni usin-dd [yeryazen] ɣar Dawud zeg wass ař ass ḥima ad as wcen afus, ařami [dewřen] d řɛeskar d ameqqran, am řɛeskar n AREBBI.
1CH 12:24 Wa d řqedd n izeǧifen nni ittwaḥesben n yinni i tuɣa isswejden i umenɣi, inni dd-yusin ɣar Dawud di Ḥabrun maḥend ad ɣares sseɛdun tagelda n Cawul, am mammec t yumur SIDI:
1CH 12:25 Zeg warrawen n Yahuda [tuɣa řqedd] n yinni yarbun tiseddariyin [n uɛeskari] timeqqranin d iḥricen setta-ařaf u-temn-mya [n yeryazen]. Nitni tuɣa wejden i umenɣi.
1CH 12:26 Zeg warrawen n Cimɛun [tuɣa řqedd] n ayt n bu-teɣruḍt imeḥḍen i řɛeskar sebɛa-ařaf u-mya [n yeryazen].
1CH 12:27 Zeg warrawen n Lawi arebɛa-ařaf u-setta-mya [n yeryazen].
1CH 12:28 Yahuyadaɛ tuɣa d řḥakem i [warrawen n] Harun. Netta yiwi akides teřt-ařaf u-sebɛa-mya [n yeryazen].
1CH 12:29 Ṣaduq [tuɣa] d aḥudri, bu-teɣruḍt imeḥḍen. [Zi] taddart n babas [tuɣa din] tnayen u-ɛicrin n řqebṭanat.
1CH 12:30 Zeg warrawen n Binyamin, aytmas n Cawul, [tuɣa din] teřt-ařaf [n yeryazen], minzi azyen ameqqran zzaysen tuɣa ḥeṭṭan taddart n Cawul.
1CH 12:31 Zeg warrawen n Ifrayim [tuɣa din] ɛicrin-ařef u-tmenya-mya [n yeryazen], ayt n bu-teɣruḍt imeḥḍen, iryazen s yisem di taddart n ibabaten nsen.
1CH 12:32 Zeg wezyen n teqbič n Manassa [tuɣa din] tmenṭac-ařef [n yeryazen], inni tuɣa ttwařaɣan s yismawen nsen maḥend ad dd-asen ad ggen Dawud d ajeǧid.
1CH 12:33 Zeg warrawen n Issakar, inni ɣarsen řefahmet n řmijařat n řweqt ḥima ad ssnen min tuɣa x Israil ad igg, [tuɣa] řqebṭanat nsen mitayen [n yeryazen], u marra aytmatsen [tuɣa aten] sadu afus nsen.
1CH 12:34 Zeg warrawen n Zabulun, [zeg yinni] dd-iffɣen ak-d řɛeskar s marra řesnaḥ nsen, [tuɣa din] xemsin-ařef [n yeryazen]. [Nitni tuɣa sswejden] ḥima ad settfen ixef nsen deg useddi s wuř imun nican.
1CH 12:35 Zeg warrawen n Naftali [tuɣa din] ařef n řqebṭanat. Tuɣa-ten di sebɛa u-třatin-ařef [n yeryazen] inni yarbun taseddart [n uɛeskari] tameqqrant d lansa,
1CH 12:36 Zeg warrawen n Dan [tuɣa din] tmenya u-ɛicrin ařef u-setta-mya [n yeryazen], wejden i umenɣi.
1CH 12:37 Zeg warrawen n Acir ffɣen-dd arebɛa-ařaf [n yeryazen] ak-d řɛeskar ḥima ad ssbedden ixef nsen deg useddi.
1CH 12:38 Zeg ujemmaḍ n L’Urdun, zeg warrawen n Rubin u zeg warrawen n Jad u zeg wezyen n teqbič n Manassa [tuɣa din] mya u-ɛicrin-ařef [n yeryazen] ak-d marra řesnaḥ i umenɣi.
1CH 12:39 Marra iɛeskariyyen-a usin-dd ɣar Ḥabrun, ttwasettfen deg iseddiyyen s wuř imun, ḥima ad ggen Dawud d ajeǧid x marra Israil. Uřa d min iqqimen n [ayt n] Israil tuɣa aten s wuř d ijj ḥima ad ggen Dawud d ajeǧid.
1CH 12:40 Nitni qqimen třata n wussan dinni ɣar Dawud, ccin swin, maɣar aytmatsen tuɣa bedden akidsen.
1CH 12:41 Uřa d yinni yudsen ař Issakar d Zabulun d Naftali usin-dd, iwyen-dd weɣrum x iɣyař, x iřeɣman, x isarḍan u x ifunasen, [s] řeɛweč [am] farina d iɣrumen n tazart d iɣrumen n zzbib d binu d zzect d ifunasen d wuǧi s ufeyyeḍ, maɣar [tuɣa din] řefraḥet di Israil.
1CH 13:1 Dawud imcawar ak-d imeqqranen x wařef d x mya u ak-d mkuř řḥakem.
1CH 13:2 Dawud inna i marra agraw [n řgens] n Israil: “Mařa yarḍa i kenniw uřa i SIDI, AREBBI nneɣ, ejj aneɣ ad nessekk deɣya [ireqqasen] ɣar aytmatneɣ nni iqqimen di marra timmura n Israil u ɣar ikehhanen d Ilawiyyen nni izeddɣen akidsen di tneddam ak-d ddmani nsent n tarewsa, ḥima nitni ad ɣarneɣ nnyarwen.
1CH 13:3 Uca ejj aneɣ ad ɣarneɣ dd-narr Ttabut n AREBBI, maɣar deg wussan n Cawul war kides neřhi.
1CH 13:4 Marra agraw [n řgens] inna belli ad ggen ammu, maɣar d man aya d ict n tmesřact d taṣebḥant di tiṭṭawin n marra řgens.
1CH 13:5 Dawud issmun marra Israil, zeg [yeɣzar n] Ciḥur ɣar Miṣra ař mani ɣa tiwḍed ɣar Ḥamat, ḥima ad ssgeɛɛden Ttabut n AREBBI zi Qaryat-Yaɛarim.
1CH 13:6 [Xenni] iffeɣ Dawud ak-d marra Israil ɣar Baɛla, ɣar Qaryat-Yaɛarim wenni [iǧan] di Yahuda ḥima ad ssgeɛɛden Ttabut n AREBBI ssenni. [Ttabut] n SIDI wenni ittɣiman [jar] ikiruben mani ittwařaɣa x Yisem [nnes].
1CH 13:7 Nitni iwyen-dd Ttabut n AREBBI x ijj n ukarru n jdid zi taddart n Abinadab. Ɛuzza d Axiyu nedhen akarru.
1CH 13:8 Dawud d marra Israil ttiraren lmusiqa s marra jjehd nsen zzat i wudem n AREBBI s yezřan d řgambriyat d lharpat d ibendiren d teǧunin n wuzzař d řebwaq.
1CH 13:9 [Umi] dd-iwḍen nitni ɣar unedrar n Kidun, isswiẓẓeḍ Ɛuzza afus nnes, ḥima ad iṭṭef Ttabut minzi nderfen ifunasen.
1CH 13:10 [Xas uca] yarɣa weɣḍab n SIDI x Ɛuzza uca iwta i-t maɣar wanita isswiẓẓeḍ afus nnes ɣar Ttabut uca immut din zzat i wudem n AREBBI.
1CH 13:11 Yiweḍ ssem ɣar wuř n Dawud, aqa SIDI isɛar ammu x Ɛuzza u igga as i wemcan nni Fariṣ-Ɛuzza ař ass-a.
1CH 13:12 Deg wass nni teřqef Dawud tiggʷudi zi AREBBI, inna: “Mammec i ɣa ggeɣ ad ɣari dd-awyeɣ Ttabut n AREBBI?”
1CH 13:13 [X uya] Dawud war ijji ad ɣares dd-awyen Ttabut di tendint n Dawud, [maca] ijja i-tt ad taggʷej ɣar taddart n Ɛubid-Idum, Ajitti.
1CH 13:14 Tekka Ttabut n AREBBI třata n iyuren di taddart nnes ɣar [aytbab n] taddart n Ɛubid-Idum, u ibarek SIDI taddart n Ɛubid-Idum d marra min ɣares iǧan.
1CH 14:1 Ḥiram, ajeǧid n Ṣur, issekk ireqqasen ɣar Dawud [ak-d] tcejjura n tengelt, d ineqqacen n weẓru n řḥiḍ d ineqqacen n ukeccuḍ. Nitni ssbedden as ict n taddart.
1CH 14:2 Dawud issen, aqa SIDI tuɣa igga i-t d ajeǧid x Israil, maɣar issgeɛɛed [SIDI] tagelda nnes aṭṭas di ṭṭweɛ n řgens nnes Israil.
1CH 14:3 Dawud iksi ɛad timɣarin nneɣnit di Urcalim u Dawud yarni ijja-dd ɛad arrawen d tḥenjirin nneɣni.
1CH 14:4 Ina d ismawen n warrawen i ɣares-dd [ittwarwen] di Urcalim: Cammuɛ, Cubab, Natan, Suliman,
1CH 14:5 Ibḥar, Ilicuɛ, Ilfalaṭ,
1CH 14:6 Nujah, Nafaj, Yafiɛ,
1CH 14:7 Ilicamaɛ, Baɛalyadaɛ d Ilifalaṭ.
1CH 14:8 [Umi] sřin Ifilisṭiniyyen, aqa dehnen Dawud d ajeǧid x Israil, geɛɛden marra Ifilisṭiniyyen ḥima ad arzun x Dawud. Dawud isřa [i man aya] uca iffeɣ maḥend ad kidsen imsagar.
1CH 14:9 Usin-dd Ifilisṭiniyyen uca bezzɛen ixef nsen di teɣzurt n Irafawiyyen.
1CH 14:10 [Xenni] isseqsa Dawud AREBBI, inna: “Ma ad geɛɛdeɣ ḍidd i Ifilisṭiniyyen? Ma ad ten tegged deg ufus inu?” Inna as SIDI: “Geɛɛed, Necc ad ten ggeɣ deg ufus nnec!”
1CH 14:11 Nitni geɛɛden ɣar Baɛl-Faraṣim. Dinni iwta Dawud Ifilisṭiniyyen, inna: “S ufus inu icuq AREBBI di řɛedyan inu am waman arẓin [ijj n řḥiḍ].” X uya ggin as i wemcan nni Baɛl-Faraṣim.
1CH 14:12 Ifilisṭiniyyen jjin irebbiten nsen dinni, uca yumur Dawud maḥend ad ten sscemḍen s tmessi.
1CH 14:13 Ifilisṭiniyyen geɛɛden ɛawed uca bezzɛen ixef nsen di řewḍa n teɣzurt.
1CH 14:14 Dawud isseqsa AREBBI u AREBBI inna as: “War ttgiɛɛid ca awarni asen, maca nneḍ asen-dd, ad ɣarsen dd-tased zeg uɣezdis n tcejjura n umetti.
1CH 14:15 Xmi ɣa tesřed i tecři n iṣuraf di tqiccat n tcejjura n umetti, xenni ad teffɣed ɣar umenɣi, maɣar [xenni] ad ac yizwar AREBBI zzat i wudem nnec, ḥima ad iwwet řɛeskar n Ifilisṭiniyyen.”
1CH 14:16 Dawud igga am mammec d as yumur AREBBI, u nitni wtin řɛeskar n Ifilisṭiniyyen zi Jibɛun ař Jazar.
1CH 14:17 Ammu i iffeɣ isem n Dawud di marra timmura, uca SIDI issiweḍ tiggʷudi zzayes x marra řegnus.
1CH 15:1 Dawud igga i yixef nnes tudrin di tendint n Dawud u netta igga [ɛawed] ijj n wemcan i Ttabut n AREBBI uca issbedd as ijj n uqiḍun.
1CH 15:2 [Xenni] inna Dawud: “War iɛeddeř aqa uřa d ijjen ad yarbu Ttabut n AREBBI, mɣir Ilawiyyen waha, maɣar SIDI ifarz i-ten ḥima ad arbun Ttabut n AREBBI u ḥima ad as sexxaren i řebda.”
1CH 15:3 Dawud issmun-dd marra Israil ɣar Urcalim ḥima ad ssgeɛɛden Ttabut n SIDI ɣar wemcan nnes nni tuɣa d as igga.
1CH 15:4 Dawud issmun arrawen n Harun d Ilawiyyen.
1CH 15:5 Zeg warrawen n Qahat [tuɣa] Uriyil d ameqqran [nsen]. Aytmas [tuɣa aten di] mya u-ɛicrin.
1CH 15:6 Zeg warrawen n Marari [tuɣa] Ɛasaya d ameqqran [nsen]. Aytmas [tuɣa aten di] mitayen u-ɛicrin.
1CH 15:7 Zeg warrawen n Jarcum [tuɣa] Yuwil d ameqqran [nsen]. Aytmas [tuɣa aten di] mya u-třatin.
1CH 15:8 Zeg warrawen n Iliṣafan [tuɣa] Camɛiya d ameqqran [nsen]. Aytmas [tuɣa aten di] mitayen.
1CH 15:9 Zeg warrawen n Ḥabrun [tuɣa] Iliyil d ameqqran [nsen]. Aytmas [tuɣa aten di] tmenyin.
1CH 15:10 Zeg warrawen n Ɛuzziyil [tuɣa] Ɛamminadab d ameqqran [nsen]. Aytmas [tuɣa aten di] mya u-tenɛac [n yeryazen].
1CH 15:11 Dawud iřaɣa i ikehhanen Ṣaduq d Abyatar, uřa i Ilawiyyen Uriyil, Ɛasaya, Yuwil, Camɛiya, Iliyil d Ɛamminab.
1CH 15:12 Netta inna asen: “Kenniw d izeǧifen n ibabaten [n řaǧat] n Ilawiyyen. Sqeddsem ixef nwem, kenniw d aytmatwem, ḥima ad tessgeɛɛdem Ttabut n SIDI, AREBBI n Israil [ɣar wemcan] nni d as sswejdeɣ.
1CH 15:13 Minzi kenniw war teggim aya twařa tamezwarut, aqa SIDI, AREBBI nneɣ, isɛar xaneɣ, minzi war xas narzu ɛlaḥsab lfariḍa.
1CH 15:14 Ikehhanen d Ilawiyyen ssqeddsen ixef nsen ḥima ad ssgeɛɛden Ttabut n SIDI, AREBBI n Israil.
1CH 15:15 Ayt n Lawi arbun Ttabut n AREBBI ak-d iɛumad n trebbut x tɣarḍin nsen, am mammec [t] yumur Musa ɛlaḥsab awař n SIDI.
1CH 15:16 Dawud inna i imeqqranen n Ilawiyyen, aqa ad ssbedden aytmatsen, imedyazen ak-d dduzan n ǧɣa, ak-d lharpat, ak-d řgambriyat u ak-d taǧunin n wuzzař, maḥend ad ittwaseř řḥess issefraḥen ijhed.
1CH 15:17 Nitni ssbedden Hayman, mmis n Yuwil, u zeg aytmas: Asaf, mmis n Baraxya, u zeg ayt n Marari, umatsen, Itan, mmis n Qucaya,
1CH 15:18 u akidsen aytmatsen di dduq [n tɛessast] wiss tnayen: Zakariyya, Bin, Yaɛziyil, Camiramut, Yaḥiyil, Ɛunni, Iliyab, Banaya, Maɛasya, Mattitya, Ilifalya, Maqniya, Ɛubid-Idum d Yaɛiyil, [nitni tuɣa aten] d iɛessasen n tewwart.
1CH 15:19 Imedyazen tuɣa aten d Hayman d Asaf d Itan ak-d teǧunin n nnḥas, ḥima ad [tent] jjen ad ddendunen,
1CH 15:20 u Zakariyya, Ɛuzziyil, Camiramut, Yaḥiyil, Ɛunni, Iliyab, Maɛasya d Banaya ak-d lharpat ittwarriglan ɣar sennej,
1CH 15:21 d Mattitya, Ilifalya, Maqniya, Ɛubid-Idum, Yaɛiyil d Ɛazazya ak-d řgambriyat di řmeftaḥ wiss tmenya, ḥima ad ssuyuren [izřan].
1CH 15:22 Kananya, ameqqran n Ilawiyyen, tuɣa-t x tarebbut [n Ttabut]. Netta isseřmed asen mammec tuɣa ittxeṣṣa ad arbun, maɣar netta issen [as].
1CH 15:23 Baraxya d Ilqana tuɣa aten d iɛessasen n tewwart ɣar Ttabut.
1CH 15:24 Ikehhanen Cabanya, Yahucafaṭ, Natanayil, Ɛamasay, Zakariyya, Banaja d Iliɛazar suḍen di řebwaq zzat i Ttabut n AREBBI u Ɛubid-Idum d Yaḥiya tuɣa aten d iɛessasen n tewwart ɣar Ttabut.
1CH 15:25 [Ammu] i imsar, aqa Dawud d imɣaren n Israil d imeqqranen x wařef ṭṭfen abrid ḥima ad ssgeɛɛden Ttabut n Řɛahd n SIDI s řefraḥet zi taddart n Ɛubid-Idum.
1CH 15:26 [Řami] arbun Ilawiyyen Ttabut n Řɛahd n SIDI am d asen iwca AREBBI [a]fus, imsar aqa nitni qeddmen sebɛa n ifunasen imeẓyanen d sebɛa n icarriyyen d taɣarṣt.
1CH 15:27 Dawud tuɣa yarḍ ijj n useřham n řeqṭen azdad, uřa marra Ilawiyyen, inni yarbun Ttabut d yinni tuɣa ittɣennajen, d Kananya, ameḥḍayi x yinni ittɣennajen. Dawud yarḍ ijj n upalṭu [n ukehhan] n řeqṭen.
1CH 15:28 Ammu i issgeɛɛed marra Israil Ttabut n Řɛahd n SIDI s iɣuyyan n řefraḥet u s řḥess n usuḍi deg uyicc n icarri u di řebwaq u s řḥess n taǧunin n wuzzař, u nitni tuɣa ttiraren s lharpat d řgambriyat.
1CH 15:29 Řami dd-tiweḍ Ttabut n Řɛahd n SIDI ɣar tendint n Dawud, imsar, aqa Mixal, yeǧis n Cawul, texzar zi řkazi, teẓra mammec ineggez u mammec iceṭṭeḥ ujeǧid Dawud, uca tesseḥqar i-t deg wuř nnes.
1CH 16:1 Nitni ssidfen Ttabut n AREBBI ɣar daxeř uca ssarsen tt di řwesṭ n Uqiḍun nni tuɣa d as dd-icedd Dawud, uca qeddmen nitni tiɣarṣa n wecmaḍ d tiɣarṣa n řehna zzat i wudem n AREBBI.
1CH 16:2 [Umi] ikemmeř Dawud asgeɛɛed n tɣarṣt n wecmaḍ d tɣarṣa n řehna, ibarek netta řgens deg Yisem n SIDI.
1CH 16:3 Netta ibḍa i marra di Israil, i yeryazen d temɣarin, i kuř ijj, ijj n wengur n weɣrum, ijj n uceǧiq n weysum n ufunas d ijj n wareqqiɛ n zzbib.
1CH 16:4 Netta igga ca n Ilawiyyen d imsexxaren i Ttabut n SIDI, ḥima ad ssɛeqřen u ad qadan u ad ssemɣaren SIDI, AREBBI n Israil.
1CH 16:5 Asaf [tuɣa-t d] azeǧif d Zakariyya [tuɣa-t d] wiss tnayen awarni as [u xenni] Yaɛiyil, Camiramut, Yaḥiyil, Mattitya, Iliyab, Banaya, Ɛubid-Idum d Yaɛiyil ak-dduzanat am lharpat d řgambriyat, uca Asaf igga ad as sřen s teǧunin n wuzzař.
1CH 16:6 Ikehhanen Banaya d Yaḥziyil [uyuren] s řebwaq zzat i Ttabut n Řɛahd n AREBBI.
1CH 16:7 Deg wass nni igga Dawud i twařa tamezwarut x Asaf d aytmas maḥend ad ssemɣaren SIDI.
1CH 16:8 “Qadam SIDI, řaɣam x Yisem nnes, barrḥem s tmegga nnes jar řegnus.
1CH 16:9 Ɣennjem as, zehhdem i Netta, siwřem x marra lmuɛjizat nnes.
1CH 16:10 Cennɛem s Yisem nnes amqeddes, ḥima uř n yinni yarezzun SIDI, ad ifarḥ.
1CH 16:11 Seqsam x SIDI d jjehd nnes, arzum udem nnes řebda.
1CH 16:12 Ɛeqřem x řeɛjayeb nnes i igga, x řeɛřamet nnes u x řeḥkamat n uqemmum nnes.
1CH 16:13 Zzariɛet n Israil, amsexxar nnes, iḥenjiren n Yaɛqub, inni zzayes ittwafarzen!
1CH 16:14 Netta d SIDI, AREBBI nneɣ. Řeḥkamat nnes i dd-ittasen x marra tammurt.
1CH 16:15 Ɛeqřem x Řɛahd nnes i řebda, awař nni iweṣṣa i ařef n jjiřat,
1CH 16:16 Řɛahd i igga ak-d Ibrahim, issemten i-t s tjaǧit nnes i Isḥaq.
1CH 16:17 Netta igga i-t d ict n tewṣeyyet i Yaɛqub, i Israil [igga i-t] d ijj n Řɛahd i řebda,
1CH 16:18 umi inna: ‘Ad ac wceɣ tammurt n Kenɛan, tasɣart i d awem dd-ikkaren!’,
1CH 16:19 umi kenniw tuɣa d ijj n wuru n yeryazen, s drust waha, d ibarraniyyen di temmurt.
1CH 16:20 Telɛen zi řgens ɣar řgens nneɣni, zeg ict n tgeldit ɣar ijj n řgens nneɣni.
1CH 16:21 Netta war ijji uřa d ijj ad ten iḥṣar, u Netta iɛaqeb ijeǧiden di ṭṭweɛ nsen.
1CH 16:22 ‘War ttḥadam ca imedhan inu, war tteggem řɣar deg inabiyyen inu!’
1CH 16:23 Ɣennjem i SIDI, marra tammurt, barrḥem i usenjem nnes ass x wass.
1CH 16:24 Ḥajam aɛuǧi nnes jar řegnus, řeɛjayeb nnes jar marra řegnus.
1CH 16:25 Maɣar SIDI d ameqqran, issdaḥeǧ asemɣar aṭṭas, Netta d amaggʷed mahu marra irebbiten.
1CH 16:26 Minzi marra irebbiten n řegnus aqa aten d l’aṣnam, maca SIDI igga ijenwan.
1CH 16:27 Tissiqt d řɛezz aqa aten zzat i wudem nnes, jjehd d řefraḥet deg wemcan nnes.
1CH 16:28 Wcem i SIDI, a tiqebbař n řegnus, wcem i SIDI aɛuǧi d jjehd.
1CH 16:29 Wcem i SIDI aɛuǧi n Yisem nnes, awyem tawhibt uca asem-dd zzat i wudem nnes, bendqem i SIDI deg ucuwwaḍ n Zzawect Iqeddsen.
1CH 16:30 Arjijem zzat i wudem nnes, a marra tammurt! Nican, řexxu ddunect tbedd temten, war ttenhezzi ɛad.
1CH 16:31 Ejj ajenna ad ifarḥ u tammurt ad tfarḥ, ad inin jar řegnus: SIDI iḥekkem.
1CH 16:32 Ejj ad izhar řebḥar d uɛemmar nnes, ejj ad isřiwřew yeyyar s řefraḥet, s marra min dayes.
1CH 16:33 Xenni ad sřiwřiwent marra ticejjura n wezɣar zzat i wudem n SIDI, maɣar Netta ad dd-yas, ḥima ad isegged tammurt.
1CH 16:34 Qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda.
1CH 16:35 Inim: Senjem aneɣ, a AREBBI n usenjem nneɣ, ndeh aneɣ nmun, fekk aneɣ zi řegnus, ḥima ad nqada Isem iqeddsen nnek u ad Cek nṣebbeḥ s izřan n uṣebbeḥ.
1CH 16:36 Ad ittwabarek SIDI, AREBBI n Israil, zi řebda ař řebda!” U marra řgens inna: “Amin!” uca imdeḥ SIDI.
1CH 16:37 Netta igga din zzat i wudem n Ttabut n SIDI, i Asaf d yaytmas, ḥima ad sexxaren řebda zzat i wudem n Ttabut, [ḥima ad ggen] kuř ass min yurin i wass nni.
1CH 16:38 Ɛubid-Idum ak-d aytmatsen, [tuɣa aten jmiɛ] tmenya u-settin [n yeryazen]. Ɛubid-Idum, mmis n Yaditun, d Ḥusa [tuɣa aten d] iɛessasen n tiwwura,
1CH 16:39 uca akehhan Ṣaduq d yaytmas, ikehhanen, [tuɣa ttsexxaren] zzat i Tzeddiɣt n SIDI x řgeɛɛdet nni [iǧan] ɣar Jibɛun,
1CH 16:40 ḥima ad awyen tiɣarṣa n wecmaḍ břa [a]qeṭṭu i SIDI x uɛalṭar n wecmaḍ, ɣar tuffut u ɣar tmeddit, am mammec marra min yuran di Ccariɛa n SIDI, tenni igga x Israil.
1CH 16:41 Ɣarsen [tuɣa] Hayman d Yadutun ak-d inneɣni inni ittwafarzen u ittwaggen s yismawen [nsen], ḥima ad qadan SIDI: ‘Maɣar tamexsiwt nnes icewwaren [tᵉttɣima] i řebda!’
1CH 16:42 Tuɣa ɣar Hayman d Yadutun [d wenneɣni] řebwaq d taǧunin n wuzzař, maḥend ad ggen ad asen sřen [yewdan], uřa d dduzanat n lmusiqa [inneɣni] [i usemɣar] n AREBBI. Arrawen n Yadutun [tuɣa bedden] ɣar tewwart [n wadaf].
1CH 16:43 [Xenni] yuyur marra řgens, kuř ijj ɣar taddart nnes. Uřa d Dawud iɛqeb ɣar taddart nnes ḥima ad ibarek taddart nnes.
1CH 17:1 Umi izdeɣ Dawud di taddart nnes, inna Dawud i unabi Natan: “Xzar, necc zeddɣeɣ deg ict n taddart n ukeccuḍ n [tcejjart n] tengelt, [maca] Ttabut n Řɛahd n SIDI aqa-tt sadu řkettan [n Uqiḍun].”
1CH 17:2 Natan yarra-dd x Dawud: “Egg marra min ɣarek deg wuř nnec, maɣar AREBBI akidek.”
1CH 17:3 Di ǧiřet nni imsar aqa yusa-dd wawař n AREBBI ɣar Natan, inna:
1CH 17:4 “Uyur, ini i umsexxar inu Dawud: ‘Ammu i iqqar SIDI: War d ayi tbennid Taddart i Necc, ḥima ad dayes zedɣeɣ,
1CH 17:5 maɣar zeg wass umi dd-ssgeɛɛdeɣ Israil zi Miṣra, Necc war zdiɣeɣ [ɛemmarṣ] deg ict n taddart. Maca Necc tuɣa ggureɣ zeg uqiḍun ɣar uqiḍun, zi tzeddiɣt ɣar tzeddiɣt.
1CH 17:6 Mani ma uyureɣ ak-d marra Israil, ma Necc ssiwřeɣ [ɛemmarṣ uřa s] ijj n wawař ak-d ijjen zi řquḍat n Israil, inni tuɣa ggiɣ ad arewsen řgens inu Israil, nniɣ: Mayemmi kenniw war d ayi tbennim ca taddart s ukeccuḍ n [tcejjart n] tengelt?’
1CH 17:7 Xenni řexxu, ammu i ɣa tinid i umsexxar inu, i Dawud: ‘Ammu i iqqar SIDI n řɛeskarat ijehden: Necc iwyeɣ-dd cek zi řkuri, zi ḍeffar n wuǧi, maḥend ad tdewřed d řḥakem x řgens inu Israil.
1CH 17:8 Mani ma tuyured, tuɣa ayi akidek u Necc teḥḥiɣ marra řɛedyan zzat i tiṭṭawin nnec u Necc ggiɣ ac ijj n yisem am yisem n imeqqranen x temmurt.
1CH 17:9 Necc neyyceɣ ijj n wemcan i řgens inu uca ẓẓuɣ t [din], maḥend ad izdeɣ deg wemcan [nnes], war ittwassnexřiɛ ɛad u war t ḥeṣṣaren ɛad ayt n řmuɛṣiyyet am zic,
1CH 17:10 zeg wussan umi Necc ggiɣ řquḍat x řgens inu Israil. Necc sswaḍɛeɣ marra řɛedyan nnec u ssargbeɣ cek belli SIDI ad ac ibna ict n taddart.
1CH 17:11 X minni i ɣa qefřen wussan nnec u ad tegged ad tareyyḥed jar řejdud nnec, ad imsar, Necc ad ssekkareɣ mmic awarni ac, wenni i ɣa iffɣen zeg warrawen nnec, u Necc ad ssmetneɣ tageldit nnes.
1CH 17:12 Netta ad ayi ibna ict n Taddart u Necc ad ssbeddeɣ řɛarc nnes i řebda.
1CH 17:13 Necc ad iřiɣ d Babas i netta u netta ad ayi yiři d Mmi u Necc war xas ssḥeyyideɣ ca tamexsiwt inu icewwaren am mammec tt sḥeyydeɣ x wenni tuɣa d ac izwaren.
1CH 17:14 Necc ad t ssmetneɣ di Taddart inu u di Tgeldit inu i řebda u řɛarc nnes ad ibedd imten i řebda.’”
1CH 17:15 Issiweř Natan ak-d Dawud nican am mammec marra awařen-a u am mammec marra řewḥiy-a.
1CH 17:16 [Xenni] yudef ujeǧid Dawud uca iqqim zzat i wudem n SIDI, inna: “Min ɛniɣ necc, SIDI AREBBI, u min teɛna taddart inu aqa Cek tnedhed ayi-dd ař danita?
1CH 17:17 Di tiṭṭawin nnec tuɣa man aya drus [waha], [a] AREBBI, u [řexxu] tessiwřed [ɛad] x taddart n umsexxar nnec deg ijj n yimar iggʷej u txezzared dayi am yijj n ufiřu [n warrawen] n bnadem i dd-ittawyen ɣar sennej, [a] SIDI AREBBI!
1CH 17:18 Min d ac i ɣa yini Dawud ɛad ktar x ccenɛet i tessecned i umsexxar nnec? Aqa Cek tessned amsexxar nnec!
1CH 17:19 [A] SIDI, aqa teggid marra řemɣaret-a di ṭṭweɛ n umsexxar nnec u ɛlaḥsab uř nnec, ḥima ad tessargbed [ammu] marra timesřayin-a timeqqranin.
1CH 17:20 [A] SIDI, uřa d ijj war iǧi am Cek. War din AREBBI mɣir Cek s marra min nesřa s imezzuɣen nneɣ.
1CH 17:21 Man wen [i iǧan] am řgens nnec Israil, ayenni n řgens i iǧan x temmurt i ɣar iraḥ AREBBI ḥima ad t ifdi i Yixef nnes d řgens, ḥima ad igg i Yixef nnes ijj n Yisem s tmegga timeqqranin d issiggʷden, u ḥima ad yaẓẓeř x řegnus zzat i wudem n řgens nnec, wenni tefdid zi Miṣra?
1CH 17:22 Cek teggid řgens nnec Israil d ijj n řgens i Yixef nnec i řebda. Cek, [a] SIDI, aqa Cek tdewřed d AREBBI i nitni.
1CH 17:23 Xenni řexxu, [a] SIDI AREBBI, ejj awař nni tessiwřed x umsexxar nnec u x taddart nnes ad ibedd i řebda u egg am mammec tessiwřed.
1CH 17:24 Ejj Isem nnec ad ittwassemɣar i řebda umi ɣa inin: SIDI n řɛeskarat ijehden, AREBBI n Israil, aqa-t d AREBBI x Israil, uca iři ad tᵉttwassemten taddart n umsexxar nnec Dawud zzat i wudem nnec.
1CH 17:25 Maɣar Cek, AREBBI inu, tessargbed deg imezzuɣen n umsexxar nnec aqa Cek ad as tebnid ict n taddart. X uya tusa-dd i umsexxar nnec deg wuř, ḥima ad iẓẓaǧ zzat i wudem nnec.
1CH 17:26 Xenni řexxu, [a] SIDI, Cek d AREBBI nni u Cek tessiwřed s [marra] tcuni-ya x umsexxar nnec.
1CH 17:27 Xenni řexxu, aqa yarḍa i Cek ad tbarked taddart n umsexxar nnec, ḥima ad tiři zzat i wudem nnec i řebda. Minzi Cek, [a] SIDI, tbarked tt uca ad tᵉttwabarek i řebda.”
1CH 18:1 Awarni aya imsar, aqa Dawud iɣřeb x Ifilisṭiniyyen uca yarra i-ten sadu nnes. Netta ikkes Jat d tneddam i ɣares dd-iqqnen zeg ufus n Ifilisṭiniyyen.
1CH 18:2 Iɣřeb uřa x [ayt n] Mu’ab ařami [ayt n] Mu’ab dewřen d imsexxaren i Dawud, inni ittxeṣṣan ad wcen tarzifin.
1CH 18:3 Dawud iɣřeb [ɛawed] x Hadad-Ɛazar, ajeǧid n Ṣuba, ař Ḥamat, umi tuɣa dd-iffeɣ wanita ḥima ad issemtem řeḥkamet nnes ɣar yeɣzar n Lfuraṭ.
1CH 18:4 Dawud ikkes zzayes ařef n ikarruten d sebɛa-ařaf n imnayen d ɛicrin-ařef n yeryazen x iḍaren u Dawud iqess iẓewran n iḍaren n marra [iysan n] ikarruten uca ijja zzaysen mya n [iysan n] ikarruten [waha].
1CH 18:5 Yusa-dd Aram zi Dimacq, ḥima ad iwc afus i Hadar-Ɛazar, ajeǧid n Ṣuba, [maca] Dawud iɣřeb x tnayen u-ɛicrin-ařaf n yeryazen n Aram.
1CH 18:6 Dawud igga řɛeskarat n uḥewwes jar ayt n Aram n Dimacq, u ayt n Aram dewřen d imsexxaren n Dawud inni ittxeṣṣan ad [as] wcen tarzifin [d ljizya]. SIDI igga ttasiɛ i Dawud mani ma iruḥ wanita.
1CH 18:7 Dawud yiwi tiseddariyin [n uɛeskari] iqesḥen i ttwaggent s wureɣ, tinni tuɣa [iǧan] n imsexxaren n Hadad-Ɛazar u yiwyi tent ɣar Urcalim.
1CH 18:8 Dawud iksi aṭṭas n nnḥas zi Ṭabḥat d Xun, tineddam n Hadad-Ɛazar. Zzayes igga Suliman tarimant tameqqrant n nnḥas d ipilaren d řeqcuɛ n nnḥas.
1CH 18:9 [Umi] Tuɛi, ajeǧid n Ḥamat, isřa aqa Dawud iɣřeb x marra řɛeskar n Hadad-Ɛazar, ajeǧid n Ṣuba,
1CH 18:10 issekk netta mmis Haduram ɣar ujeǧid Dawud ḥima ad isseqsa x umeddur nnes u ḥima ad as ibarek, minzi [Dawud] immneɣ ak-d Hadad-Ɛazar uca iɣřeb xas - maɣar Hadad-Ɛazar tuɣa i Tuɛi d ijj n weryaz yarezzu amenɣi [řebda] - u [netta yiwi akides] ɛřam kuř řeqcuɛ n wureɣ d nnuqart d nnḥas.
1CH 18:11 Ajeǧid Dawud issqeddes i-ten i SIDI, [jmiɛ] ak-d nnuqart d wureɣ i d yiwi zi marra řegnus, zi Idum, zi Mu’ab, n ayt n Ɛammun, n Ifilisṭiniyyen u n [ayt n] Ɛamaliq.
1CH 18:12 Abicay, mmis n Ṣarawya, iɣřeb x Idum di teɣzurt n Tameǧaḥt, tmenṭac-ařef [n yeryazen].
1CH 18:13 Netta igga řɛeskarat n uḥewwes di Idum ařami marra Idumiyyen dewřen d imsexxaren i Dawud, u SIDI igga ttasiɛ i Dawud mani ma iffeɣ netta.
1CH 18:14 Dawud iḥkem x marra Israil u igga s řḥeqq d tsegda i marra řgens nnes.
1CH 18:15 Yuwab, mmis n Ṣaruya, [tuɣa-t] x řɛeskar u Yahucafaṭ, mmis n Axilud, [tuɣa-t d] amarir n umezruy.
1CH 18:16 Ṣaduq, mmis n Axiṭub, d Abimalik, mmis n Abyatar, tuɣa aten d ikehhanen, u Cawca tuɣa-t d amarir.
1CH 18:17 Banaya, mmis n Yahuyadaɛ, [tuɣa-t x] iɛessasen n arrimet u x ireqqasen n tazřa. Arrawen n Dawud [tuɣa aten] d imezwura ɣar ufus n ujeǧid.
1CH 19:1 Awarni aya imsar, aqa Naḥac, ajeǧid n ayt n Ɛammun, immut. Mmis idweř d ajeǧid deg wemcan nnes.
1CH 19:2 [Xenni] inna Dawud: “Necc xseɣ ad ssecneɣ tamexsiwt icewwaren i Ḥanun, mmis n Naḥac, am mammec d ayi isscen babas tamexsiwt icewwaren.” Dawud issekk ireqqasen, ḥima ad t iɛezza x [řmewt n] babas, uca iwḍen imsexxaren n Dawud ɣar temmurt n ayt n Ɛammun.
1CH 19:3 [Xenni] nnan řḥukkam n ayt n Ɛammun i sidi nsen Ḥanun: “Ma [ixs] Dawud ad iweqqar babac [s tidett] di tiṭṭawin nnec, minzi issekk-dd inni cek i ɣa iɛezzan? Ma war dd-issekk Dawud imsexxaren nnes ɣarek, ḥima ad arzun di temmurt maḥend ad [tt] ssenqeřben u ad [tt] bergagen?”
1CH 19:4 [Xenni] iṭṭef Ḥanun imsexxaren n Dawud, iḥeff asen azyen zi tmart, iqess asen azyen n warruḍ ař ḍeffar uca issekk i-ten.
1CH 19:5 Nitni ṭṭfen [abrid] uca ḥajan [ireqqasen] x yeryazen-a i Dawud. S uyenni d asen issekk, minzi nitni tuɣa ttseḍḥan aṭṭas. Inna ujeǧid: “Qqimem di Ariḥa ař d i ɣa temɣar tmart nwem, xenni ad dd-tdewřem.”
1CH 19:6 [Umi] ẓrin ayt n Ɛammun belli nitni tuɣa ssarzgen ixef nsen ɣar Dawud, issekk Hanun d ayt n Ɛammun ařef talint n nnuqart, ḥima ad cran i yixef nsen ikarruten d imnayen zi Aram-Nahrayn, [aqa-tt d Misuputamya], zi Aram-Maɛka u zi Ṣuba.
1CH 19:7 Nitni cran i yixef nsen tnayen u-třatin-ařef n ikarruten [n umenɣi] u [cran ɛawed] ajeǧid n Maɛka d řgens nnes. Nitni usin-dd uca wtin iqiḍan nsen zzat i wudem n [tendint n] Maydaba. [Uřa d] ayt n Ɛammun nnyarwen zi tneddam nsen uca ffɣen ɣar umenɣi.
1CH 19:8 [Umi] isřa Dawud aya, issekk Yuwab s marra řɛeskar nnes, ayt n bu-teɣruḍt.
1CH 19:9 Ffɣen-dd ayt n Ɛammun uca sedden ixef nsen i umenɣi ɣar wadaf n tendint, am ijeǧiden nni dd-usin, [tuɣa aten] s weḥḥedsen deg iyyar.
1CH 19:10 [Umi] iẓra Yuwab, aqa amenɣi řa zeg urendad uřa zi ḍeffar n uɣembub nnes, ixḍar zi marra inni ittwafarzen [di řɛeskar] n Israil uca issbedd i-ten [i umenɣi] ajemmaḍ n ayt n Aram.
1CH 19:11 Min iqqimen n řgens igga i-ten sadu i ufus n umas Abicay u nitni ssbedden ixef nsen ajemmaḍ n ayt n Ɛammun.
1CH 19:12 Inna netta: “Mařa Aram ijhed xafi, xenni as-dd, ewc ayi afus! Mařa ayt n Ɛammun jehden xak, xenni ad dd-aseɣ ad cek fekkeɣ.
1CH 19:13 Iři d aryaz u ejj aneɣ ad niři nemḥeḍ di ṭṭweɛ n řgens nneɣ u di ṭṭweɛ n tneddam n AREBBI. Ad igg SIDI min iǧan mliḥ di tiṭṭawin nnes.”
1CH 19:14 [Xenni] ibda Yuwab d řgens i ɣares iǧan ad immneɣ ak-d ayt n Aram uca ina ṭṭfen di tarewřa zzat i wudem nsen.
1CH 19:15 [Umi] ẓrin ayt n Ɛammun, aqa ayt n Aram arewřen, ṭṭfen uřa d nitni di tarewřa zzat i wudem n umas Abicay uca ɛeqben ɣar tendint. [Xenni] yiweḍ Yuwab [ɣar] Urcalim.
1CH 19:16 [Umi] iẓra Aram aqa nitni ttwawten zzat i wudem n Israil, ssekken nitni ireqqasen uca ggin ad ffɣen ayt n Aram inni [tuɣa izeddɣen] x ujemmaḍ n iɣzar [n Lfuraṭ], u Cubak, akumandar n řɛeskar n Hadad-Ɛazar yuyur zzat i uɣembub nsen.
1CH 19:17 [Umi] nnan aya i Dawud, issmun netta marra Israil, iẓwa L’Urdun, yusa-dd ɣarsen uca isedd ixef nnes i umenɣi. [Umi] isedd Dawud ixef nnes i umenɣi ak-d ayt n Aram, mmenɣen nitni akides.
1CH 19:18 Ayt n Aram arewřen zzat i wudem n Israil uca iqḍa Dawud x sebɛa-ařaf n [yenni ineddhen] ikarruten [n umenɣi] u x arebɛin-ařef n yeraz[en] x iḍaren zeg ayt n Aram. [Ɛawed] inɣa netta Cubak, akumandar n řɛeskar.
1CH 19:19 [Umi] ẓrin marra imsexxaren n Hadad-Ɛazar, aqa ttwarnan zzat i wudem n ayt n Israil, ggin nitni řehna ak-d Israil uca sexxaren as. War dd-yusi di řeɛqeř ɣar ayt n Aram ɛad ad fekken ayt n Ɛammun ict n twařa nneɣnit.
1CH 20:1 Ɣar uqeṭṭu n useggʷas [n jdid], di řweqt i dd itteffɣen ijeǧiden [ɣar umenɣi], imsar aqa Yuwab igewwed jjehd n řɛeskar. Yareddeǧ tammurt n ayt n Ɛammun uca inneḍ i Rabba, iḥṣar i-tt, [umi] iqqim Dawud di Urcalim. Yuwab iɣřeb x Rabba uca iteḥḥa i-tt.
1CH 20:2 Dawud ikkes ttaj n ujeǧid x uzeǧif nnes, u netta yufa řewzen nnes d ict n talint n wureɣ. Tuɣa xas tayaqutin iɣřan. Ssarsen ttaj nni x uzeǧif n Dawud. Netta yiwi-dd [ɛawed] takeccaḍt d tameqqrant aṭṭas zi tendint.
1CH 20:3 Řgens nni [iǧan] di [tendint] issuffeɣ i-t uca ihjem xasen s řmencarat d iyařzimen n wuzzař d ccwaqar n wuzzař. Ammu i igga Dawud ak-d marra tineddam n ayt n Ɛammun. [Xenni] iɛqeb Dawud d marra řgens ɣar Urcalim.
1CH 20:4 Awarni as imsar, aqa ikkar ɛawed umenɣi ak-d Ifilisṭiniyyen di Jazar. Řexdenni iɣřeb Sabkay, Aḥucayi, x Saffay, wenni d ijj zeg warrawen n Rafa, uca ttwasswaḍɛen nitni.
1CH 20:5 Tuɣa din ɛawed amenɣi ak-d Ifilisṭiniyyen. Ilḥanan, mmis n Yaɛir, iɣřeb x Laḥmi, umas n Juliyat, zi Jat. Akeccuḍ n lansa nnes igga am yijj n weɛmud n ukeccuḍ n uxeyyeḍ.
1CH 20:6 Uca ikkar ɛawed umenɣi di Jat. Tuɣa din ijj n weryaz d azirar s setta n iḍewḍan [deg ifassen nnes] u setta [n tfednin deg iḍaren nnes], [marra] řqedd nsen arebɛa u-ɛicrin. Uřa d netta ittwaxřeq-dd i Rafa.
1CH 20:7 Netta istehza zi Israil, maca Yunatan, mmis n Cimɛa, umas n Dawud, iɣřeb xas.
1CH 20:8 Ina d inni ittwaxeřqen-dd i Rafa di Jat u nitni wḍan s ufus n Dawud u s ufus n imsexxaren nnes.
1CH 21:1 [Xenni] ikkar-dd ijj n weɣrim x Israil uca iɣarr Dawud ḥima ad iḥseb Israil.
1CH 21:2 Dawud inna i Yuwab u i řḥukkam n řgens: “Uyurem, ḥessbem Israil zi Bi’r-Sebɛa ař Dan uca awyem ayi-dd [mecḥař], maḥend ad ssneɣ mecḥař idsen.”
1CH 21:3 [Xenni] inna Yuwab: “Iři ad yarni SIDI di řgens nnes am iǧa řexxu ɛad mya n tseqqar. Ma war ǧin marra, [a] sidi inu ajeǧid, d imsexxaren n sidi inu? Mayemmi [i zzayi] ittmeẓri sidi inu man aya? Mayemmi ɣa issarbu Israil amarwas x yixef nnes?”
1CH 21:4 [Maca] awař n ujeǧid ijhed x Yuwab u Yuwab iffeɣ. Ikka marra Israil uca iɛqeb-dd ɣar Urcalim.
1CH 21:5 Yuwab iwca i Dawud řqedd n řeḥsab n řgens am ikmeř. Marra Israil [dayes] milyun u-mya-ařef n yeryazen inni izemmaren x ssif u Yahuda [dayes] arebɛa-mya u-sebɛin-ařef n yeryazen nni izemmaren x ssif.
1CH 21:6 [Maca ayt n] Lawi d Binyamin war ten iḥsib ca, maɣar awař n ujeǧid tuɣa d aɛiffi i Yuwab.
1CH 21:7 Tamesřact-a tuɣa d taɛeffant di tiṭṭawin n AREBBI uca Netta iřqef Israil s ict n jjriḥect.
1CH 21:8 [Xenni] inna Dawud i AREBBI: “Necc xḍiɣ [xak] aṭṭas, s minzi necc ggiɣ aya. Xenni řexxu, kkes řmuɛṣiyyet x umsexxar nnec, minzi necc ggiɣ s tubbuheřya aṭṭas.”
1CH 21:9 Issiweř SIDI ɣar Jad, amwařaw n Dawud, inna:
1CH 21:10 “Uyur, siweř ɣar Dawud, ini: ‘Ammu i iqqar SIDI: Ad ac ssarseɣ třata n tmesřayin. Ixḍar ict [zzaysent] i cek. Ad ac tt ggeɣ.’”
1CH 21:11 Jad yusa-dd ɣar Dawud, inna as: ‘Ammu i iqqar SIDI: ‘Ixḍar cek:
1CH 21:12 třata n iseggʷusa n řaẓ, niɣ třata n iyuren i di i ɣa tᵉttwahellked zzat i wudem n yinni cek iḥṣaren u ssif n řɛedyan nnec ad cek iḍfar, niɣ třata n wussan n ssif n SIDI, aqa-t d ṭṭaɛun di temmurt u lmalak n SIDI ad iḍeyyeɛ marra tammurt n Israil. Xenni řexxu, xzar, mammec ɣa yarreɣ x wenni d ayi dd-issekken.’”
1CH 21:13 [Xenni] inna Dawud i Jad: “Necc ttwaḥṣareɣ aṭṭas, [maca] ejj ayi ad wḍiɣ deg ufus n SIDI, maɣar arreḥmet nnes d tameqqrant aṭṭas, war ttegg ad wḍiɣ deg ufus n bnadem.”
1CH 21:14 Uca issiweḍ SIDI ṭṭaɛun x Israil uca wḍan sebɛin-ařef n yeryazen zi Israil.
1CH 21:15 Issekk AREBBI lmalak ɣar Urcalim ḥima ad t iḍeyyeɛ. Umi ibda netta ad tt iḍeyyeɛ, iẓra i-tt SIDI uca indem x tuɛeffna, inna i lmalak n uḍeyyeɛ: “Cfa, sehwa řexxu afus nnec!” Tuɣa lmalak n SIDI ibedd ɣar unedrar n Uyabusi Urnan.
1CH 21:16 [Umi] issgeɛɛed Dawud tiṭṭawin nnes, iẓra lmalak n SIDI ibedd jar temmurt d ujenna am iṭṭef ufus nnes ssif, isswiẓẓeḍ i-t x Urcalim. [Xenni] iwḍa Dawud d imeqqranen n řgens s uɣembub nsen [ɣar temmurt] am tuɣa řeḥḥfen s txuncay [n wecḍan].
1CH 21:17 Uca inna Dawud i AREBBI: “Ma war iǧi d necc i innan aqa ittxeṣṣa ad ḥesben řgens? Wah, d necc i tuɣa ixḍan d necc i iggin řmuɛṣiyyet aṭṭas, maca uǧi-ya, min ggint? [A] SIDI, AREBBI inu, ejj ad yiři ufus nnec i tecti ɣari u ɣar taddart n baba, war iǧi maca ɣar řgens nnec.”
1CH 21:18 [Xenni] inna lmalak n SIDI i Jad, ad yini i Dawud belli ittxeṣṣa i Dawud ad igeɛɛed ḥima ad issbedd ijj n uɛalṭar i SIDI x unedrar n Uyabusi Arnan.
1CH 21:19 Uca Dawud igeɛɛed ɛlaḥsab awař n Jad nni issiweř s Yisem n SIDI.
1CH 21:20 Uca inneqřeb-dd Arnan, iẓra lmalak. Arebɛa n warrawen nnes i tuɣa ɣares [iǧan], nnuffaren. Urnan tuɣa issarwat irden.
1CH 21:21 Yiweḍ Dawud ɣar Arnan uca issgeɛɛed Arnan tiṭṭawin, iẓra Dawud. [Xenni] iffeɣ-dd zeg unedrar uca ibendeq zzat i Dawud s uɣembub nnes ɣar temmurt.
1CH 21:22 Inna Dawud i Arnan: “Ewc ayi andrar, ḥima ad xas bniɣ ijj n uɛalṭar i SIDI. Ewc ayi [amcan] s ttaman nnes imun, ḥima ad tbedd ticti-ya di řgens.”
1CH 21:23 Arnan inna i Dawud: “Ksi t i cek uca ad yegg sidi inu ajeǧid min iǧan d lemliḥ di tiṭṭawin nnes. Xzar, ad wceɣ ifunasen-a am tɣarṣa n wecmaḍ, u tiřwiḥin itteḥřuǧuḍen i usarwet d ukeccuḍ [i tmessi] d irden, ad ten wceɣ i tewhibt [n řɣiǧet]. Necc ad wceɣ aya marra.”
1CH 21:24 [Maca] inna ujeǧid Dawud i Arnan: “Lla, necc xseɣ nican ad t sɣeɣ s ttaman nnes ikmeř, minzi min iǧan nnec war t kessiɣ i SIDI, [ḥima] [ammu i] ɣa wehhbeɣ taɣarṣt n wecmaḍ i SIDI břa ad tt xeǧṣeɣ.”
1CH 21:25 Ammu i iwca Dawud i Arnan i wemcan nni ijj n řewzen n setta-mya ciqlu n wureɣ.
1CH 21:26 Dawud issbedd dinni ijj n uɛalṭar i SIDI uca yiwi xas tiɣarṣa n wecmaḍ d tewhibin [n řɣiǧet]. Netta iřaɣa i SIDI u wanita yarra-dd xas s tmessi zeg ujenna x uɛalṭar n wecmaḍ.
1CH 21:27 Inna SIDI i lmalak maḥend d yarr ssif deg ufurru n weɣřaf nnes.
1CH 21:28 Di řweqt nni, umi iẓra Dawud aqa SIDI yarra-dd xas x unedrar n Uyabusi Arnan, yiwi [din] tiɣarṣa.
1CH 21:29 Di řweqt nni tuɣa Tazeddiɣt n SIDI, tenni tuɣa igga Musa di řexřa, d uɛalṭar i tɣarṣa n wecmaḍ x řgeɛɛdet n Jibɛun.
1CH 21:30 Dawud [maca] war izemmar ad din yuyur ḥima ad yarzu x AREBBI, maɣar tuɣa teřqef i-t tiggʷudi zi ssif n lmalak n SIDI.
1CH 22:1 Inna Dawud: “Da [i ɣa tbedd] Taddart n SIDI AREBBI, u da [i ɣa yiři] uɛalṭar n tɣarṣa n wecmaḍ i Israil.”
1CH 22:2 Yumur Dawud ad ssmunen ibarraniyyen nni iǧan di temmurt n Israil, u netta igga isuydayen ḥima ad ssuydan iẓra i řebni n Taddart n AREBBI.
1CH 22:3 Dawud issewjed aṭṭas n wuzzař i řewtadat i tewwura n wadaf u i tḥenya n uɛarreḍ uřa d waṭṭas n nnḥas, [ařami] war izemmar ad ittwawzen řqedd nnes,
1CH 22:4 uřa d akeccuḍ n tengelt, s ijj n řqedd war izemmar ad ittwaḥseb, minzi ayt n Ṣidun d ayt n Ṣur ssiwḍen aṭṭas n ukeccuḍ n [tcejjart n] tengelt ɣar Dawud.
1CH 22:5 Dawud inna: “Mmi Suliman [ɛad] d aḥudri arhef. Taddart i ɣa bnan i SIDI ad tiři d tameqqrant d issɛuǧen ḥima Isem [nnes] d řɛezz nnes ad idweř ɣar marra timmura. Necc ad as sswejdeɣ.” Ammu i issewjed Dawud aṭṭas qbeř i řmewt nnes.
1CH 22:6 [Xenni] iřaɣa netta i mmis Suliman uca yumur i-t ḥima ad ibna ict n Taddart i SIDI, AREBBI n Israil.
1CH 22:7 Inna Dawud i Suliman: “Mmi, necc simant inu tuɣa-t deg wuř inu, ḥima ad bniɣ ict n Taddart i Yisem n SIDI, AREBBI inu.
1CH 22:8 [Maca] yusa-dd ɣari wawař n SIDI, inna: ‘Cek tessizzřed aṭṭas n idammen u teggid imenɣan iqesḥen. Cek war tbennid i Yisem inu Taddart, maɣar cek tessizzřed zzat i wudem inu aṭṭas n idammen x temmurt.
1CH 22:9 Xzar, mmic wenni i d ac ɣa dd-ittwarwen, ad yiři d ijj n weryaz n řḥudnet, maɣar Necc ad as wceɣ řhudnet zi marra řɛedyan nnes i d as dd-innḍen, maɣar isem nnes ad yiři Suliman u deg wussan nnes ad wceɣ řehna d řhudnet i Israil.
1CH 22:10 Netta ad ibna ict n Taddart i Yisem inu u netta ad yiři i Necc d mmis u Necc ad as iřiɣ d Babas u Necc ad ssmetneɣ řɛarc n tgelda nnes x Israil i řebda.’
1CH 22:11 Xenni řexxu, [a] mmi, SIDI ad yiři akidek u cek ad tfeřḥed u ad tebnid Taddart n SIDI, AREBBI nnec, am mammec tuɣa xak issiweř.
1CH 22:12 Iři ad ac iwc SIDI řeɛqeř d řefhamet uřa d usuyar x Israil ḥima ad teḥḍid Ccariɛa n SIDI, AREBBI nnec.
1CH 22:13 Xenni ad tiřid tfeřḥed, xmi ɣa teḥḍid ḥima ad ggen tiweṣṣa d lfarayiḍ, tinni yumur SIDI s Musa i Israil. Iři d aryaz u iři tmeḥḍed, war tteggʷed ca u war tefciř!
1CH 22:14 Xzar-dd, di řeḥṣaret inu sswejdeɣ ɣar ufus i Taddart n SIDI myat-ařef talint n wureɣ d wařef x wařef talint n nnuqart uřa d nnḥas d wuzzař, ařami war zemmaren ad weznen. Iwyeɣ uřa d akeccuḍ d yeẓra. U cek ad xas tarenyed ɛad.
1CH 22:15 Cek ɣarek [ɛawed] aṭṭas [n yeryazen] ḥima ad ggen řxedmet, isuydayen d řemɛuǧam i [uneqqac n] weẓru d ukeccuḍ d ɛřam kuř [iwdan] nni ɣar teǧa řefhamet di ɛřam kuř řxedmet.
1CH 22:16 Ureɣ d nnuqart d nnḥas d wuzzař anect war izemmar ad t ḥesben. Kkar, egg i-t uca SIDI ad kidek yiři.”
1CH 22:17 Dawud yumur [ɛawed] i marra řḥukkam n Israil, maḥend ad wcen afus i mmis Suliman, inna:
1CH 22:18 “Ma war iǧi SIDI, AREBBI nwem, akidwem u [ma war] d awem iwci řhudnet ɣar marra iɣezdisen nwem? Maɣar Netta igga marra imezdaɣ n temmurt deg ufus inu uca tᵉttwagg temmurt sadu ufus [inu] zzat i wudem n SIDI u zzat i wudem n marra řgens.
1CH 22:19 [Xenni] řexxu, wcem uř d řeɛmar [nwem] ḥima ad tarzum x SIDI, AREBBI nwem, uca kkarem, ad tebnam Zzawect Iqeddsen n SIDI AREBBI ḥima Ttabut n Řɛahd n SIDI d marra řeqcuɛ iqeddsen n AREBBI zemmaren ad ttwassidfen di Taddart i ɣa ittwabnan i Yisem n SIDI.”
1CH 23:1 [Umi] tuɣa Dawud iwsar u ijjiwen ussan, igga netta mmis Suliman d ajeǧid x Israil.
1CH 23:2 Netta issmun-dd marra řḥukkam n Israil uřa d ikehhanen d Ilawiyyen.
1CH 23:3 Ttwaḥesben Ilawiyyen zi třatin n iseggʷusa d sennej. [Tuɣa] řqedd nsen azeǧif azeǧif tmenya u-třatin-ařef n yeryazen.
1CH 23:4 Zzaysen [tuɣa din] arebɛa u-ɛicrin-ařef n yinni ittwaggen d imseyyaren x řxedmet di Taddart n SIDI uca [aqa din ɛad] setta-ařaf n imeḥḍayen d řquḍat,
1CH 23:5 arebɛa-ařaf n iɛessasen n tewwart d arebɛa-ařaf n imedyazen i iẓran n uṣebbaḥ i SIDI, ak-d dduzanat [n lmusiqa] nni ggiɣ necc, [inna Dawud], ḥima ad ssemɣaren [SIDI] s yezřan n uṣebbaḥ.
1CH 23:6 Dawud ibḍa ten di terbiɛin, [am ttwasettfen nitni] ɛlaḥsab arrawen n Lawi: Jarcun, Qahat d Marari.
1CH 23:7 Zeg Ijarcuniyyen [tuɣa aten d] Laɛdan d Cimɛi.
1CH 23:8 Arrawen n Laɛdan [tuɣa aten d] azeǧif Yaḥiyil, Zitam d Yuwil, třata [n yeryazen].
1CH 23:9 Arrawen n Cimɛi [tuɣa aten d] Calumit, Ḥaziyil d Haran, třata [n yeryazen]. Ina [tuɣa aten d] izeǧifen x ibabaten [n řaǧat] n Laɛdan.
1CH 23:10 Arrawen n Cimɛi [tuɣa aten d] Yaḥat, Zayna, Yaɛuc d Bariɛa. Ina [tuɣa aten d] arrawen n Cimɛi.
1CH 23:11 Yaḥat tuɣa-t d azeǧif u Ziza d wiss tnayen, [maca] Yaɛuc d Bariɛa war tuɣi ɣarsen arrawen aṭṭas. Ɣar řeḥsab ttwaḥesben nitni d icten taddart n ibabaten.
1CH 23:12 Arrawen n Qahat [tuɣa aten d] Ɛamram, Yiṣhar, Ḥabrun d Ɛuzziyil, arebɛa [n yeryazen].
1CH 23:13 Arrawen n Ɛamram [tuɣa aten d] Harun d Musa. Ittwaɛzeř Harun ḥima ad ittwaqeddes d amqeddes qaɛ, netta d arrawen nnes, i řebda, ḥima ad issbexxar zzat i wudem n SIDI, ḥima ad as isexxar u ḥima ad ibarek s Yisem nnes i řebda.
1CH 23:14 Arrawen n Musa, aryaz n AREBBI, ttwařaɣan jar teqbič n Lawi.
1CH 23:15 Arrawen n Musa [tuɣa aten d] Jarcum d Iliɛazar.
1CH 23:16 [Zeg] warrawen n Jarcun [tuɣa] Cabuwil d azeǧif.
1CH 23:17 Mmis n Iliɛazar [tuɣa] d azeǧif Raḥabya. War tuɣi ɣares ɣar Iliɛazar arrawen nneɣni. Arrawen n Raḥabya [maca] [tuɣa aten] deg waṭṭas.
1CH 23:18 [Zeg] warrawen n Yiṣhar [tuɣa] Calumit d azeǧif.
1CH 23:19 [Zeg] warrawen n Ḥabrun [tuɣa] Yariya d azeǧif, Amarya wiss tnayen, Yaḥziyil wiss ṭrata d Yaqmaɛam wiss arebɛa.
1CH 23:20 [Zeg] warrawen n Ɛuzziyil [tuɣa] Mixa d azeǧif, u Yacci-Yah wiss tnayen.
1CH 23:21 Arrawen n Marari [tuɣa aten d] Maḥli d Muci. Tarwa n Maḥli [tuɣa aten d] Aliɛazar d Qis.
1CH 23:22 Aliɛazar immut u netta war ɣares tuɣi bu warrawen maca yessis [wah]. Arrawen n Qis, aytmatsen, iwyen tent [d tamɣart].
1CH 23:23 Arrawen n Muci [tuɣa aten d] Maḥli d Ɛadir d Yarimut, třata [n yeryazen].
1CH 23:24 Ina [tuɣa aten] d arrawen n Lawi, [ttwasettfen] ɛlaḥsab tudrin n ibabaten nsen, ɛlaḥsab izeǧifen n řaǧat, inni [ittwazemmen] ɣar řeḥsab nsen s řqedd n ismawen nsen azeǧif azeǧif, inni iggin tasexxart i Taddart n SIDI, zi ɛicrin iseggʷusa sennej.
1CH 23:25 Maɣar Dawud tuɣa inna: “SIDI, AREBBI n Israil, iwca řhudnet i řgens nnes u Netta ad izdeɣ di Urcalim i řebda.”
1CH 23:26 [Netta inna] ɛawed x Ilawiyyen: “Nitni war ḥdijen ɛad ad arbun Tazeddiɣt d marra řeqcuɛ nni dd ittasen ak-d tsexxart.”
1CH 23:27 Minzi ɛlaḥsab awařen ineggura n Dawud, [tuɣa] řqedd n warrawen n Lawi d inni [iǧan] zi ɛicrin iseggʷusa sennej.
1CH 23:28 Nitni bedden ak-d warrawen n Harun di tsexxart di Taddart n SIDI, [ɣar uḥeṭṭu] x řemraḥat, x ixxamen n řexzen, x usizdeg n marra řeqcuɛ iqeddsen, x řxedmet n tsexxart di Taddart n AREBBI,
1CH 23:29 x [usewjed n] aɣrum n wescan, x waren azdad i tewhibt [n řɣiǧet], x teřfaf břa antun, x wexdim u x [mammec ggʷin] arecti u x marra řqedd d řeqyas.
1CH 23:30 Tuɣa ittxeṣṣa ad bedden [wejden] di kuř tuffut ḥima ad ṣebbḥen u ad ssemɣaren SIDI, uřa ɣar tmeddit,
1CH 23:31 uřa řami dd-yiwyen marra tiɣarṣa n wecmaḍ i SIDI, deg wussan n ssebt, deg wussan n uyur n jdid u di řeɛyudat ittwaggen, ɛlaḥsab řqedd i yeǧa di lfariḍa i d as ittřiqan, břa [a]qeṭṭu zzat i wudem n SIDI.
1CH 23:32 Ittxeṣṣa asen ad ḥḍan taweqqaft nsen i Uqiḍun n Umsagar d tweqqaft nsen i Zzawect Iqeddsen d tweqqaft [nsen] ɣar uɣezdis n warrawen n Harun, aytmatsen, ɣar tsexxart n Taddart n SIDI.
1CH 24:1 Tirbiɛin n warrawen n Harun. Arrawen n Harun [tuɣa aten d] Nadab, Abihu, Aliɛazar d Itamar.
1CH 24:2 Nadab d Abihu mmuten zzat i wudem n babatsen. War ɣarsen bu warrawen. Aliɛazar d Itamar tuɣa ttsexxaren am yikehhanen.
1CH 24:3 [Jmiɛ] ak-d Ṣaduq zeg warrawen n Aliɛazar u ak-d Aximalik zeg warrawen n Itamar ibḍa i-ten Dawud ɛlaḥsab taweqqaft nsen i tsexxart nsen.
1CH 24:4 Ufin aqa ɣar warrawen n Aliɛazar aṭṭas n izeǧifen x [izeǧifen] [nni iǧan] ɣar warrawen n Itamar. Bḍan ten [amenni]: jar warrawen n Iliɛazar [tuɣa din] seṭṭac n izeǧifen i tudrin n ibabaten [nsen] u jar warrawen n Itamar [tuɣa din] tmenya [n izeǧifen] i tudrin n ibabaten nsen.
1CH 24:5 Nitni bḍan ten s tqedduḥt, am yina am yinni, maɣar imeqqranen n Zzawect Iqeddsen, imeqqranen n AREBBI, [tuɣa aten] zeg warrawen n Aliɛazar u zeg warrawen n Itamar.
1CH 24:6 Camɛiya, mmis n Natanyil, [wenni tuɣa] d amarir zi [teqbič] n Lawi, izemmen i-ten zzat i wudem n ujeǧid d řḥukkam d ukehhan Ṣaduq, d Aximalik, mmis n Abyatar, u zzat i wudem n izeǧifen n řaǧat jar ikehhanen u jar Ilawiyyen. Ggin [taqedduḥt] i yijj n řaǧ n Aliɛazar, [xenni] i [yijj n řaǧ] n Itamar.
1CH 24:7 Taqedduḥt tamezwarut tekkar as-dd i Yahuyarib, wiss tnayen i Yadaɛya,
1CH 24:8 wiss třata i Ḥarim, wiss arebɛa i Saɛurim,
1CH 24:9 wiss xemsa i Malkiya, wiss setta i Miyamin,
1CH 24:10 wiss sebɛa i Haqquṣ, wiss tmenya i Abiya,
1CH 24:11 wiss tesɛa i Yecuɛa, wiss ɛecra i Cakanya,
1CH 24:12 wiss ḥitac i Ilyacib, wiss tenɛac i Yaqim,
1CH 24:13 wiss třeṭṭac i Ḥuffa, wiss arbeɛṭac i Yacabad,
1CH 24:14 wiss xemmesṭac i Bilja, wiss seṭṭac i Immir,
1CH 24:15 wiss sbeɛṭac i Ḥizir, wiss tmenṭac i Ḥafṣiṣ,
1CH 24:16 wiss tseɛṭac i Faqaḥya, wiss ɛicrin i Yaḥazqiyil,
1CH 24:17 wiss waḥit u-ɛicrin i Yaxin, wiss tnayen u-ɛicrin i Jamul,
1CH 24:18 wiss třata u-ɛicrin i Dalaya, wiss arebɛa u-ɛicrin i Maɛazya.
1CH 24:19 Ina tuɣa xasen taweqqaft maḥend ad adfen ɣar Taddart n SIDI ɛlaḥsab [asettef n] tsexxart nsen am mammec lfariḍa [i dd-yusin] s ufus n babatsen Harun am mammec d as yumur SIDI, AREBBI n Israil.
1CH 24:20 Zi jjihet [n usettef] n min iqqimen n warrawen n Lawi: Cubayil [tuɣa d azeǧif] i warrawen n Ɛamram, Yaḥadya [tuɣa d azeǧif] i warrawen n Cubayil.
1CH 24:21 X Raḥabya: x warrawen n Raḥabya [tuɣa] Yacci-Yah d azeǧif.
1CH 24:22 X [warrawen] n Yiṣhar [tuɣa] Calumit [d azeǧif]. X warrawen n Calumit [tuɣa] Yahat [d azeǧif].
1CH 24:23 U [x] warrawen [n Ḥabrun] [tuɣa] Yariya [d azeǧif], Amarya [tuɣa-t] d wiss tnayen, Yaḥziyil d wiss třata, Yaqmaɛam dd wiss arebɛa.
1CH 24:24 [X] warrawen n Ɛuzziyil [tuɣa] Mixa [d azeǧif]. X warrawen n Mixa [tuɣa] Camir [d azeǧif].
1CH 24:25 Umas n Mixa [tuɣa] d Yacci-Yah. X warrawen n Yacci-Yah [tuɣa] Zakariyya [d azeǧif].
1CH 24:26 Arrawen n Marari [tuɣa aten d] Maḥli d Muci. X warrawen n Yaɛazya [tuɣa] Banu [d azeǧif].
1CH 24:27 Arrawen n Marari s Yaɛazya [tuɣa aten d] Banu d Cuham d Zakkur d Ɛibri.
1CH 24:28 I Maḥli [tuɣa] Aliɛazar [d mmis]. Wanita tuɣa war ɣares bu warrawen.
1CH 24:29 X Qis: arrawen n Qis: [mɣir] Yarḥamyil.
1CH 24:30 Arrawen n Muci [tuɣa aten d] Maḥli, Ɛadir d Yarimut. Ina [tuɣa aten d] arrawen n Lawi, [ttwasettfen] ɛlaḥsab řaǧat n ibabaten nsen.
1CH 24:31 Uřa d nitni nḍaren tiqedduḥin am yaytmatsen, arrawen n Harun, zzat i wudem n ujeǧid Dawud d Ṣaduq d Aximalik d izeǧifen x ibabaten [n řaǧat] n ikehhanen u x Ilawiyyen, am yibabaten [nni iǧan] d azeǧif am umatsen d amaẓuẓ.
1CH 25:1 Zeg warrawen n Asaf d Hayman d Yadutun iɛzeř Dawud ak-d ikumandaren n řɛeskar [iryazen] i tsexxart nni ittnebban s řgambriyat d lharpat d taǧunin n wuzzař. Řqedd n yeryazen i iggin řxedmet n tsexxart nsen [tuɣa-t d wa]:
1CH 25:2 I warrawen n Asaf: Zakkur, Yusuf, Natanya d Acriyil, [nitni d] arrawen n Asaf. Tuɣa-ten sadu ufus n Asaf. Netta tuɣa ittnebba x iceyyaren n ujeǧid.
1CH 25:3 I Yadutun: arrawen n Yadutun [tuɣa aten d] Jadalya, Ṣari, Icaɛya, Ḥacabya d Mattitya, setta [n warrawen]. Tuɣa-ten sadu ufus n babatsen Yadutun, wenni tuɣa ittnebban [am ittirar] x řgambri, am ittqada d issemɣara SIDI.
1CH 25:4 I Himan: arrawen n Hayman [tuɣa aten d] Buqqiya, Mattanya, Ɛuzziyil, Cabuwil, Yarimut, Ḥananya, Ḥanani, Iliyata, Jiddalti, Rumamti-Ɛazar, Yucbaqaca, Malluti, Hutir [d] Maḥziyut.
1CH 25:5 Nitni marra [tuɣa aten d] arrawen n Hayman, amwařaw n ujeǧid s řefhamet n wawařen n AREBBI, ḥima ad ssgeɛɛden icc [nnes], [minzi i uya] yarzef AREBBI i Hayman arbeɛṭac n warrawen d třata n tḥenjirin.
1CH 25:6 Marra ina [tuɣa aten] sadu ufus n babatsen, [n] Asaf, Yadutun d Hayman, maḥend ad ɣennjen izřan di Taddart n SIDI s taǧunin n wuzzař d lharpat d řgambriyat i tsexxart di Taddart n AREBBI sadu ufus n ujeǧid.
1CH 25:7 Řqedd nsen, [jmiɛ] ak-d aytmatsen, inni tuɣa ittwassřemden deg izřan i SIDI, [řqedd n] marra inni ɣarsen tizemmar [di man aya], tuɣa-t mitayen u-tmenya u-tmanyin.
1CH 25:8 Nitni nḍaren tiqedduḥin i tɛessast, am umeẓyan am umeqqran, am umseřmad am umeḥḍar.
1CH 25:9 Taqedduḥt tamezwarut tekkar as-dd i Yusuf. Wiss tnayen i Jadalya. Netta d aytmas d warrawen nnes, tenɛac [n yeryazen].
1CH 25:10 Wiss třata [tekkar as-dd] i Zakkur, [netta ak-d] warrawen nnes d aytmas, tenɛac [n yeryazen].
1CH 25:11 Wiss arebɛa [tekkar as-dd] i Yaṣri, [netta ak-d] warrawen nnes d aytmas, tenɛac [n yeryazen].
1CH 25:12 Wiss xemsa [tekkar as-dd] i Natanya, [netta ak-d] warrawen nnes d aytmas, tenɛac [n yeryazen].
1CH 25:13 Wiss setta [tekkar as-dd] i Buqqiya, [netta ak-d] warrawen nnes d aytmas, tenɛac [n yeryazen].
1CH 25:14 Wiss sebɛa [tekkar as-dd] i Yacaryila, [netta ak-d] warrawen nnes d aytmas, tenɛac [n yeryazen].
1CH 25:15 Wiss tmenya [tekkar as-dd] i Icaɛya, [netta ak-d] warrawen nnes d aytmas, tenɛac [n yeryazen].
1CH 25:16 Wiss tesɛa [tekkar as-dd] i Mattanya, [netta ak-d] warrawen nnes d aytmas, tenɛac [n yeryazen].
1CH 25:17 Wiss ɛecra [tekkar as-dd] i Cimɛi, [netta ak-d] warrawen nnes d aytmas, tenɛac [n yeryazen].
1CH 25:18 Wiss ḥiṭac [tekkar as-dd] i Ɛazaryil, [netta ak-d] warrawen nnes d aytmas, tenɛac [n yeryazen].
1CH 25:19 Wiss tenɛac [tekkar as-dd] i Hacabya, [netta ak-d] warrawen nnes d aytmas, tenɛac [n yeryazen].
1CH 25:20 Wiss třeṭṭac [tekkar as-dd] i Cubayil, [netta ak-d] warrawen nnes d aytmas, tenɛac [n yeryazen].
1CH 25:21 Wiss arbeɛṭac [tekkar as-dd] i Mattitya. [netta ak-d] warrawen nnes d aytmas, tenɛac [n yeryazen].
1CH 25:22 Wiss xemmesṭac [tekkar as-dd] i Yarimut, [netta ak-d] warrawen nnes d aytmas, tenɛac [n yeryazen].
1CH 25:23 Wiss seṭṭac [tekkar as-dd] i Ḥanan-Yah, [netta ak-d] warrawen nnes d aytmas, tenɛac [n yeryazen].
1CH 25:24 Wiss sbeɛṭac [tekkar as-dd] i Yacbaqaca, [netta ak-d] warrawen nnes d aytmas, tenɛac [n yeryazen].
1CH 25:25 Wis tmenṭac [tekkar as-dd] i Ḥanani, [netta ak-d] warrawen nnes d aytmas, tenɛac [n yeryazen].
1CH 25:26 Wiss tseɛṭac [tekkar as-dd] i Malluti, [netta ak-d] warrawen nnes d aytmas, tenɛac [n yeryazen].
1CH 25:27 Wiss ɛicrin [tekkar as-dd] i Iliyata, [netta ak-d] warrawen nnes d aytmas, tenɛac [n yeryazen].
1CH 25:28 Wiss waḥit u-ɛicrin [tekkar as-dd] i Hutir, [netta ak-d] warrawen nnes d aytmas, tenɛac [n yeryazen].
1CH 25:29 Wiss tnayen u-ɛicrin [tekkar as-dd] i Jiddalti, [netta ak-d] warrawen nnes d aytmas, tenɛac [n yeryazen].
1CH 25:30 Wiss třata u-ɛicrin [tekkar as-dd] i Maḥziyut, [netta ak-d] warrawen nnes d aytmas, tenɛac [n yeryazen].
1CH 25:31 Wiss arebɛa u-ɛicrin [tekkar as-dd] i Rumamti-Ɛazar, [netta ak-d] warrawen nnes d aytmas, tenɛac [n yeryazen].
1CH 26:1 Tirbiɛin n iɛessasen n tewwura: N Iquraḥiyyen: Macalamya, mmis n Quri, zeg warrawen n A[biya]saf.
1CH 26:2 Macalamya tuɣa ɣares warrawen: Zakariyya [tuɣa-t d] amenzu, Yadiɛil wiss tnayen, Zabadya wiss třata, Yatniyil wiss arebɛa,
1CH 26:3 Ɛilam wiss xemsa, Yuḥanan wiss setta, Ilyuɛinay wiss sebɛa.
1CH 26:4 Uřa Ɛubid-Idum tuɣa ɣares warrawen: Camɛiya [tuɣa-t d] amenzu, Yahuzabad wiss tnayen, Yuwax wiss třata, Sakar wiss arebɛa, Natanayil wiss xemsa,
1CH 26:5 Ɛamiyil wiss setta, Issakar wiss sebɛa, Faɛaltay wiss tmenya, maɣar ibarek i-t AREBBI.
1CH 26:6 Uřa i mmis Camɛiya ttwaxeřqen as-dd warrawen. [Nitni tuɣa aten d] řḥukkam di taddart n babatsen, minzi nitni [tuɣa aten d] ayt n bu-teɣruḍt imeḥḍen.
1CH 26:7 Arrawen n Camɛiya [tuɣa aten]: Ɛutni, Rafayil, Ɛubid, Ilzabad [ak-d] aytmas, iryazen imeḥḍen: Ilihu d Camakya.
1CH 26:8 Ina marra [tuɣa aten] zeg warrawen n Ɛubid-Idum, nitni d warrawen nsen d wawmaten nsen, iryazen imeḥḍen, [ccuren] s jjehd i tsexxart nsen, tnayen u-settin [n yeryazen] n Ɛubid-Idum.
1CH 26:9 Macalamya [tuɣa] ɣares warrawen d wawmaten, iryazen imeḥḍen, tmenṭac [n yeryazen].
1CH 26:10 Ḥusa, zeg warrawen n Marari, [tuɣa] ɣares warrawen-a: Cimri [tuɣa] d azeǧif, waxxa netta war iǧi d amenzu, [maca] babas igga i-t d azeǧif.
1CH 26:11 Ḥilqiya [tuɣa-t d] wiss tnayen, Tabalya wiss třata, Zakariyya wiss arebɛa. Marra arrawen d wawmaten n Ḥusa [tuɣa aten di] třeṭṭac [n yeryazen].
1CH 26:12 X terbiɛin-a n iɛessasen n tewwura, x izeǧifen n ayt n bu-teɣruḍt, tuɣa ccɣeř n tsexxart di Taddart n SIDI, jmiɛ ak-d aytmatsen.
1CH 26:13 Nitni nḍaren taqedduḥt, am umeẓyan am umeqqran, i tudrin n ibabaten nsen, i tewwart u i tewwart [nneɣni].
1CH 26:14 Taqedduḥt i [tɛessast n] ccarq tekkar as-dd i Calamya. Uřa i mmis Zakariyya, wenni d amcawar s řeɛqeř, tewḍa [as-dd] taqedduḥt u taqedduḥt nnes tekkar [as-dd] i ccamal.
1CH 26:15 I Ɛubid-Idum [tekkar as-dd tqedduḥt] i ljanub u i warrawen nnes i taddart n ixxamen n řexzen.
1CH 26:16 I Cuffim d Ḥusa [tekkar asen-dd tqedduḥt] i lɣarb, ak-d tewwart n Calakat ɣar webrid ameqqran igeɛɛden [ɣar Zzawect Tameqqrant]. Ijj n uɛessas [tuɣa ibedd] ɣar [ijj n] uɛessas [nneɣni].
1CH 26:17 Ɣar manis i dd-tneqqar tfuct [bedden] setta n Ilawiyyen u ɣar ccamal [bedden din] kuř ass arebɛa. Ɣar ljanub [ɛawed] kuř ass arebɛa u ɣar ixxamen n řexzen tnayen [u ɛawed] tnayen.
1CH 26:18 Ɣar řebni n uɣezdis n lɣarb [n Zzawect Tameqqrant] arebɛa ɣar webrid ameqqran u tnayen ɣar řebni n uɣezdis.
1CH 26:19 Tina [tuɣa] d tirbiɛin n iɛessasen n tewwura zeg warrawen n Quraḥ u zeg warrawen n Marari.
1CH 26:20 Aytmatsen Ilawiyyen tuɣa aten x ixxamen n txubay n Taddart n AREBBI u x ixxamen n txubay n tewhibin ittwaqeddsen.
1CH 26:21 Arrawen n Laɛdan, arrawen n Ujarcuni [nni tuɣa] ɣar Laɛdan, [ixs ad yini] izeǧifen n ibabaten [n řaǧat] n Laɛdan, Ajarcuni: Jaḥiyili [waha].
1CH 26:22 Iḥenjiren n Yaḥyili [tuɣa aten d] Zitam d Yuwil, umas. Nitni [tuɣa aten] x ixxamen n txubay n Taddart n SIDI.
1CH 26:23 N Ɛamramiyyen, d Iyiṣhariyyen, d Iḥabruniyyen, d Iɛaziyiliyyen
1CH 26:24 [tuɣa] Cabuwil, mmis n Jarcum, mmis n Musa, d ameḥḍayi x ixxamen n txubay.
1CH 26:25 Aytmas [zi jjadira] n Iliɛazar [tuɣa aten d] mmis Raḥabya, mmis Icaɛya, mmis Yuram, mmis Zikri [d] mmis Calumit.
1CH 26:26 Calumit wanita d aytmas [tuɣa aten] x ixxamen n txubay n tewhibin ittwaqeddsen, tinni issqeddes i-tent ujeǧid Dawud ak-d izeǧifen x ibabaten [n řaǧat] u ak-d imeqqranen x wařef d x mya, u ak-d ikumandaren n řɛeskar.
1CH 26:27 Nitni tuɣa ssqeddsen [tiwhibin nni] zi garrat u zi tkeccaḍt, ḥima ad zzaysent ɛedřen Taddart n SIDI.
1CH 26:28 [Ɛawed] marra min tuɣa issqeddes i-t umwařaw Camwil, d Cawul, mmis n Qis, d Abnir, mmis n Nir, d Yuwab, mmis n Ṣaraya. Marra min tuɣa ittwaqeddsen [tuɣa] sadu afus n Calumit d aytmas.
1CH 26:29 Zeg Iyiṣhariyyen [tuɣa] Kananya d warrawen nnes xeddmen am imeḥḍayen d řquḍat barra di [temmurt n] Israil.
1CH 26:30 Zeg Iḥabruniyyen [tuɣa] taweqqaft x Israil ɣar Ḥacabya d aytmas, iryazen imeḥḍen, ařef u-sebɛa-mya [n yeryazen], x ujemmaḍ n L’Urdun ɣar lɣarb, [tuɣa aten] x marra řxedmet i SIDI u x tsexxart i ujeǧid.
1CH 26:31 I Iḥabruniyyen [tuɣa] Yariya d azeǧif, i Iḥabruniyyen, i jjiřat nnes, jar ibabaten [n řaǧat]. Deg useggʷas wiss arebɛin n tgelda n Dawud ttwarzun u ttwafen ayt n bu-teɣruḍt imeḥḍen di Yaɛzir di Jilɛad.
1CH 26:32 Aytmas [tuɣa aten d] iryazen imeḥḍen, ařfayen u-sebɛa-mya n izeǧifen x ibabaten [n řaǧat]. Ajeǧid Dawud igga ten x ayt n Rubin, x ayt n Jad u x wezyen n teqbič n Manassa, x marra timesřayin n AREBBI u [x marra] timesřayin n ujeǧid.
1CH 27:1 Ina d ayt n Israil ak-d řqedd nsen, izeǧifen x ibabaten [n řaǧat], uřa d imeqqranen x wařef u x mya ak-d imeḥḍayen nsen, inni tuɣa ittsexxaren i ujeǧid di marra timesřayin n terbiɛin, [am] zi jjihet n man wen i dd-ittasen, [am] zi jjihet n man wen ittraḥen, u [man aya] zeg uyur ař uyur [nneɣni] di marra iyuren n useggʷas. Ict n terbiɛt [dayes] arebɛa u-ɛicrin-ařef [n yeryazen].
1CH 27:2 Yasubɛam, mmis n Zabdiyil, [tuɣa] x terbiɛt tamezwarut i uyur wiss amezwaru. Tarbiɛt nnes [dayes] arebɛa u-ɛicrin-ařef [n yeryazen].
1CH 27:3 [Netta tuɣa] zeg warrawen n Fariṣ. [Netta] d akumandar ameqqran x marra ikumandaren n řɛeskarat deg uyur amezwaru.
1CH 27:4 Duday, Axuxi, [tuɣa] x terbiɛt n uyur wiss tnayen. Miqlut d ameḥḍay n terbiɛt nnes. Tarbiɛt nnes [dayes] arebɛa u-ɛicrin-ařef [n yeryazen].
1CH 27:5 Banaya, mmis n Yahuyadaɛ, akehhan ameqqran tuɣa d akumandar wiss třata n řɛeskar i uyur wiss třata. Tarbiɛt nnes [dayes] arebɛa u-ɛicrin-ařef [n yeryazen].
1CH 27:6 Banaya wa [tuɣa] d bu-teɣruḍt n třatin u netta [tuɣa] x třatin. Mmis Ɛammizabad [tuɣa] x terbiɛt nnes.
1CH 27:7 Ɛasa’il, mmis n Yuwab, d wiss arebɛa i uyur wiss arebɛa u mmis Zabadya [tuɣa] awarni as. Tarbiɛt nnes [dayes] arebɛa u-ɛicrin-ařef [n yeryazen].
1CH 27:8 Camḥut, Ayazraḥi, akumandar, [tuɣa] x [terbiɛt] wiss xemsa i uyur wiss xemsa. Tarbiɛt nnes [dayes] arebɛa u-ɛicrin-ařef [n yeryazen].
1CH 27:9 Ɛira, mmis n Ɛiqqis, Atiqquɛi, [tuɣa] d wiss setta i uyur wiss setta. Tarbiɛt nnes [dayes] arebɛa u-ɛicrin-ařef [n yeryazen].
1CH 27:10 Ḥaliṣ, Afalituni, zeg warrawen n Ifrayim, [tuɣa] d wiss sebɛa i uyur wiss sebɛa. Tarbiɛt nnes [dayes] arebɛa u-ɛicrin-ařef [n yeryazen].
1CH 27:11 Sibkay, Aḥucati, n Izaraḥiyyen, [tuɣa] d wiss tmenya i uyur wiss tmenya. Tarbiɛt nnes [dayes] arebɛa u-ɛicrin-ařef [n yeryazen].
1CH 27:12 Abiɛazar, Aɛanatuti, n ayt n Binyamin, [tuɣa] d wiss tesɛa i uyur wiss tesɛa. Tarbiɛt nnes [dayes] arebɛa u-ɛicrin-ařef [n yeryazen].
1CH 27:13 Maharay, Anaṭufati, i Izaraḥiyyen, [tuɣa] d wiss ɛecra i uyur wiss ɛecra. Tarbiɛt nnes [dayes] arebɛa u-ɛicrin-ařef [n yeryazen].
1CH 27:14 Banaya, Afarɛatuni, zeg warrawen n Ifrayim, [tuɣa] d wiss ḥiṭac i uyur wiss ḥiṭac. Tarbiɛt nnes [dayes] arebɛa u-ɛicrin-ařef [n yeryazen].
1CH 27:15 Xalday, Anaṭufati, [i dd-iqqarṣen] zi Ɛutniyil, [tuɣa] d wiss tenɛac i uyur tenɛac. Tarbiɛt nnes [dayes] arebɛa u-ɛicrin-ařef [n yeryazen].
1CH 27:16 [Ina bedden] x tqebbař n Israil: I Irubiniyyen [tuɣa] Iliɛazar, mmis n Zikri, d řḥakem. I Icamɛuniyyen: Cafaṭya, mmis n Maɛka.
1CH 27:17 I Lawi: Ḥacabya, mmis n Qamuwil. I Harun: Ṣaduq.
1CH 27:18 I Yahuda: Ilihu, zeg aytmas n Dawud. I Issakar: Ɛumri, mmis n Mixayil.
1CH 27:19 I Zabulun: Yicmaɛya, mmis n Ɛubadya. I Naftali: Yarimut, mmis n Ɛazaryil.
1CH 27:20 I warrawen n Ifrayim: Ḥuciɛa, mmis n Ɛazarya. I wezyen n teqbič n Manassa: Yuwil, mmis n Fadaya.
1CH 27:21 I wezyen n teqbič n Manassa di Jilɛad: Jaddu, mmis n Zakariyya. I Binyamin: Yaɛisiyil, mmis n Abnir.
1CH 27:22 I Dan: Ɛazaryil, mmis n Yaruḥam. Ina tuɣa d řḥukkam n tqebbař n Israil.
1CH 27:23 Dawud war iksi ca řqedd n yinni ɣar iǧa ɛicrin n iseggʷusa d swadday, maɣar SIDI tuɣa inna aqa Netta ad yarr Israil deg waṭṭas am yitran n ujenna.
1CH 27:24 Yuwab, mmis n Ṣaruya, tuɣa ibda ad iḥseb [řgens], maca war t ikemmeř umi dd-yusa uduqqez d ameqqran n weɣḍab x Israil. S uyenni war ittwagg řqedd deg wedlis n imezruyen n ujeǧid Dawud.
1CH 27:25 Ɛazmawet, mmis n Ɛadiyil, [tuɣa] x ixxamen n txubay n ujeǧid. Yunatan, mmis n Ɛuzziya, [tuɣa] x ixxamen n txubay n temmurt, di tneddam, di dcurat u di lburjat.
1CH 27:26 Ɛazri, mmis n Kalub, [tuɣa iṭṭef acbar] x mammec ggin řxedmet deg iyyar ḥima ad carzen acař.
1CH 27:27 Cimɛi, Aramati, [tuɣa iṭṭef acbar] x imarjaɛen n uḍiř. Zabdi, Acifmi, [tuɣa] x zzad n binu [nni iǧan] deg imarjaɛen n uḍiř.
1CH 27:28 Baɛl-Ḥanan, Ajadiri, [tuɣa iṭṭef acbar] x iḥwicen n zzitun u x izemmuren nni [iǧan] di Temmurt Iwaṭan. Yuwac [tuɣa] x zzad n zzect.
1CH 27:29 Ciṭray, Acaruni, [tuɣa iṭṭef acbar] x ifunasen d tfunasin, inni ihedda di řewḍa n Carun. Cafat, mmis n Ɛalay, [tuɣa] x ifunasen d tfunasin di řewḍat n teɣzurt.
1CH 27:30 Ubil, Asmaɛili, [tuɣa iṭṭef acbar] x iřeɣman. Yaḥadya, Amirunuti, [tuɣa] x tiɣyař.
1CH 27:31 Yaziz, Ahajri, [tuɣa iṭṭef acbar] x wuǧi. Nitni marra tuɣa aten d imeḥḍayen x wagřa nni [iǧan] n ujeǧid Dawud.
1CH 27:32 Yunatan, ɛemmis n Dawud, [tuɣa] d amcawar, ijj n bnadem d amiɣis. Netta tuɣa ɛawed d amarir. Yaḥiyil, mmis n Ḥakmuni, [tuɣa] ɣar warrawen n ujeǧid, [yarebba i-ten].
1CH 27:33 Axitufil [tuɣa] d amcawar n ujeǧid, u Ḥucay, Ayarki, [tuɣa] d ameddukkeř n ujeǧid.
1CH 27:34 Yahuyadaɛ, mmis n Banaya, d Abyatar [tuɣa aten] awarni i Axitufil. Yu’ab [tuɣa-t d] akumandar n řɛeskar n ujeǧid.
1CH 28:1 Dawud issmun di Urcalim marra imeqqranen n Israil: imeqqranen n tqebbař d imeqqranen n terbiɛin d imsexxaren n ujeǧid d imeqqranen x wařef d imeqqranen x mya d imeqqranen [i iǧan] x marra agřa d řkesbet n řmař n ujeǧid d warrawen nnes, [jmiɛ] ak-d imsexxaren icennɛen d ayt n bu-teɣruḍt, [wah,] kuř bu-teɣruḍt imeḥḍen.
1CH 28:2 Ikkar ujeǧid Dawud, inna: “Sřem-dd ɣari, aytma d řgens inu! Necc simant inu tuɣa-t ɣari deg wuř inu ḥima ad bniɣ ict n Taddart n arraḥet i Ttabut n Řɛahd n SIDI u i tnebdat n iḍaren n AREBBI nneɣ. [X uyenni] sswejdeɣ i řebni.
1CH 28:3 Maca AREBBI inna ayi: ‘Cek war tbennid i Yisem inu Taddart, maɣar cek d ijj n weryaz n imenɣan u tessizřed aṭṭas n idammen.’
1CH 28:4 SIDI, AREBBI n Israil, ifarz ayi zi marra taddart n baba, ḥima ad dewřeɣ d ajeǧid x Israil i řebda, minzi Netta ifarz Yahuda ḥima ad yiři d řḥakem, uca [xenni] taddart n baba zi taddart n Yahuda, uca jar warrawen n baba yarḍa dayi ařami igga ayi d ajeǧid x marra Israil.
1CH 28:5 Zi jar marra arrawen inu - maɣar SIDI iwca ayi aṭṭas n warrawen - ifarz Netta mmi Suliman, ḥima ad iqqim x řɛarc n tgelda n SIDI x Israil.
1CH 28:6 Netta inna ayi: ‘Mmic Suliman ad ibna Taddart inu d řemraḥat inu, maɣar netta i farzeɣ d mmi u Necc ad as iřiɣ d babas.
1CH 28:7 Necc ad ssmetneɣ tageldit nnes i řebda mařa netta ad iḍfar tiweṣṣa d lfarayiḍ inu s jjehd, am mammec teǧa ass-a.’
1CH 28:8 Xenni řexxu, [ad awem ɛeřmeɣ] zzat i tiṭṭawin n marra Israil, agraw [n řgens] n SIDI, u deg imezzuɣen n AREBBI nneɣ, ḥima ad teḥḍam u ad tarzum marra tiweṣṣa n SIDI, AREBBI nwem, maḥend ad teqqimem tᵉttᵉṭṭfem tammurt taṣebḥant tanita d řwart, uca ad tt tejjem d řwart i řebda i warrawen nwem awarni awem.
1CH 28:9 U cek, mmi Suliman, ssen AREBBI n babac u sexxar as s wuř imun d s řeɛmar iwejden minzi SIDI ittbeqqec marra uřawen uca ifehhem marra min dd-ittasen ɣar ixarriṣen [n uzeǧif nneɣ]. Mařa cek tarzud xas, Netta ad zzayek ittwaf, maca mařa tsemḥed dayes, ad cek inḍar i řebda.
1CH 28:10 Xzar řexxu, minzi SIDI ifarz i cek ḥima ad as tebnid ict n Taddart d Zzawect Iqeddsen. Iři d aryaz uca egg i-t!”
1CH 28:11 Dawud iwca i mmis Suliman amedya n wesqif n wadaf, n řebniyat nnes, d ixxamen n txubay d tɣurfatin nnes, d ixxamen nnes n daxeř, d wexxam i tqebbart n weṣřaḥ,
1CH 28:12 uřa d ijj n umedya n marra min ɣares-dd yusa s Arruḥ x řemraḥat n Taddart n SIDI, x marra ixxamen i d as dd-innḍen, x marra ixxamen n txubay n Taddart n AREBBI u x ixxamen n txubay n tewhibin ittwaqeddsen,
1CH 28:13 x terbiɛin n ikehhanen d Ilawiyyen, x marra řxedmet i tsexxart di Taddart n SIDI u x marra řeqcuɛ i tsexxart di Taddart n SIDI.
1CH 28:14 X wureɣ, aqa iwca řewzen n wureɣ i marra řeqcuɛ n tsexxart, uřa i řeqcuɛ n nnuqart [iwca] řewzen [nsen], i marra řeqcuɛ i kuř tasexxart.
1CH 28:15 [Iwca uřa] řewzen i řeqnadeř n wureɣ d řefnarat nsen n wureɣ, řewzen n kuř řqendiř ak-d řefnarat nnes [weḥḥdes], uřa [řewzen] i řeqnadeř n nnuqart, řewzen i yijj n řqendiř ak-d řefnarat nnes [weḥḥdes], am mammec dd-yusa ak-d tsexxart n kuř řqendiř.
1CH 28:16 [Ɛawed] řewzen n wureɣ i ṭṭabřat i x bezzɛen aɣrum, i kuř ṭṭabřa [řewzen nnes weḥḥdes], uřa d [řewzen n] nnuqart i ṭṭabřat n nnuqart,
1CH 28:17 uřa d ureɣ iṣfan i furcayat, i ṭṭawyat i urucci, i ifenjařen n wureɣ ak-d řewzen n kuř afenjař [weḥḥdes], i ifenjařen n nnuqart ak-d řewzen i kuř afenjař [weḥḥdes],
1CH 28:18 i uɛalṭar n řebxur ak-d řewzen [nnes] s wureɣ iqqur, uřa [ammu ɛawed řewzen n] wureɣ i umedya n ukarru [n ijenwan] n ikiruben inni ibezzɛen [wafriwen nsen] uca dřin Ttabut n Řɛahd n SIDI.
1CH 28:19 Man aya marra, [inna Dawud], ittwassefhem ayi s tira zeg ufus n SIDI, marra řexdayem [i dd ittasen ak-d] umedya n řebni, aqa yurant di tira-ya.
1CH 28:20 Xenni inna Dawud i mmis Suliman: “Iři d aryaz, iři tmeḥḍed u egg i-t! War tteggʷed ca u war arexxu, maɣar SIDI AREBBI, AREBBI inu, ad yiři akidek. Netta war dayek isemmeḥ niɣ cek ittejji ař akemmeř n marra řxedmet i tsexxart di Taddart n SIDI.
1CH 28:21 Xzar, aqa din tirbiɛin n ikehhanen d Ilawiyyen i marra tasexxart di Taddart n AREBBI u i marra řxedmet [aqa din] ɣarek marra inni i ɣar teǧa di řxadar nsen [ḥima ad tt ggen] s tiɣit i kuř řxedmet. Uřa d řḥukkam d marra řgens [bedden akidek,] ḥima [ad ggen] marra awařen nnec.”
1CH 29:1 Uca inna ujeǧid Dawud i marra agraw [n řgens]: “Mmi Suliman d ayenni wenni ifarz i-t AREBBI. Netta [ɛad] d aḥudri d arexfen uca řxedmet d tameqqrant, maɣar war iǧi řeqṣar i yijj n bnadem, maca i SIDI AREBBI.
1CH 29:2 S marra tizemmar inu sswejdeɣ i Taddart n AREBBI inu ureɣ i [řeqcuɛ] n wureɣ, nnuqart i [řeqcuɛ] n nnuqart, nnḥas i [řeqcuɛ] n nnḥas, uzzař i [řeqcuɛ] n wuzzař, akeccuḍ i [řeqcuɛ] n ukeccuḍ, d iẓra n uniks d iẓra ibarcanen yareqqen uřa d iẓra ittwassqareqcen maḥend ad ttwaggen di tcuyar, uřa [ɛad] ɛřam kuř iẓra iɣřan [nneɣni], uca [xenni] aṭṭas n iẓra n řmarmur d acemřař.
1CH 29:3 Zi tayri inu i Taddart n AREBBI inu, ad arzfeɣ zeg wagřa inu ɛad ureɣ d nnuqart tiwa i min sswejdeɣ i Taddart n Zzawect Iqeddsen,
1CH 29:4 [ɛad] teřt-ařaf talint n wureɣ zeg wureɣ n Ufir d sebɛa-ařaf talint n nnuqart iṣfan maḥend ad zzaysen ḥenncen řeḥyuḍ n ixxamen.
1CH 29:5 Ureɣ i [řeqcuɛ n] wureɣ, nnuqart i [řeqcuɛ n] nnuqart, i marra řxedmet [i ɣa tᵉttwagg] s ufus n iḥrayfiyyen. Man wen [xenni] iṭṭewwɛen ass-a maḥend ad iwc i SIDI?”
1CH 29:6 [Xas uca] iwyen imeqqranen x ibabaten [n řaǧat] d imeqqranen n tqebbař n Israil d imeqqranen x wařef u x mya tiwhibin nsen s řxaḍar, [jmiɛ] ak-d imeqqranen x řxedmet n ujeǧid.
1CH 29:7 Nitni arzfen i tsexxart n Taddart n AREBBI xemsa-ařaf talint n wureɣ d ɛecra-ařaf n draxmat d ɛecra-ařaf talint n nnuqart d tmenṭac-ařef talint n nnḥas d myat-ařef talint n wuzzař.
1CH 29:8 Wenni ɣar ufin iẓra [iɣřan], iwca i-ten i wexxam n txubay n Taddart n SIDI wenni tuɣa sadu ufus n Yaḥiyil, Ajarcuni.
1CH 29:9 Ifarḥ řgens s tewhibin nsen [i immewcen] s řxaḍar, maɣar nitni wcin zeg wuř imun qaɛ s řxaḍar i SIDI, uca ifarḥ ujeǧid Dawud řefraḥet d tameqqrant aṭṭas.
1CH 29:10 Dawud ibarek SIDI zzat i tiṭṭawin n marra agraw [n řgens], inna: “Ad tᵉttwabarked Cek, [a] SIDI, AREBBI n babatneɣ Israil, zi řebda ař řebda!
1CH 29:11 I Cek, [a] SIDI, řemɣaret d ṣṣulṭa d řɛezz d min ittduman i řebda d lɛaḍama, minzi marra min iǧan deg ujenna u x temmurt aqa-t Nnec. Zzayek, [a] SIDI, [i teǧa] tageldit, [zzayek Cek,] Wenni issgeɛɛden Ixef nnec d Azeǧif tiwa marra.
1CH 29:12 Agřa d ccan zzat i wudem nnec u Cek tṣeǧḍed x marra [min iǧan]. Aqa-t jjehd d ṣṣulṭa deg ufus nnec, aqa-t deg ufus nnec [ḥima ad tewced] řemɣaret d jjehd i marra.
1CH 29:13 Xenni řexxu, AREBBI nneɣ, neccin nettqada Cek u nettṣebbeḥ deg Yisem n řɛezz nnec.
1CH 29:14 Maɣar min ɛniɣ necc d min iɛna řgens inu, aqa neccin ɣarneɣ tizemmar ad newc ammu s řxaḍar? Maɣar zzayek dd-ittas marra u min i d ac newca, [newca i-t] zeg ufus nnec.
1CH 29:15 Maɣar neccin mɣir d ibarraniyyen d imeɛzab zzat i wudem nnec, am řejdud nneɣ. Ussan nneɣ x temmurt am tiři u řayas war din iǧi.
1CH 29:16 [A] SIDI, AREBBI nneɣ, zeg ufus nnec [yusa-dd] marra afeyyeḍ-a i nessewjed, ḥima ad nebna ict n Taddart i Cek, i Yisem nnec iqeddsen. Marra aya d Nnec.
1CH 29:17 Necc ssneɣ, [a] AREBBI inu, aqa Cek tqeǧbed uř u aqa itteɛjib ac useggem. Necc, di řeṣfayet n wuř inu, wciɣ marra aya s řxaḍar, u řexxu aqa uřa d řgens nnec i da iǧan - iwa ẓriɣ t s řefraḥet - iwca ac [tiwhibin] s řxaḍar.
1CH 29:18 [A] SIDI, AREBBI n řejdud nneɣ, [n] Ibrahim d Isḥaq d Israil, ḥḍa [xenni] i řebda aqa aya ad yejj ṭṭabeɛ x ixariṣṣen deg wuř n řgens nnec u ndeh uř nsen ɣarek!
1CH 29:19 Ewc uřa i mmi Suliman ijj n wuř imun qaɛ, maḥend ad iḥḍa řumurat nnec d cchadet nnec d tiweṣṣa nnec, maḥend ad yegg marra u maḥend ad ibna řeqṣar-a [n Zzawect Tameqqrant] i x sswejdeɣ necc.”
1CH 29:20 [Xenni] inna Dawud i marra agraw [n řgens]: “Barkem, SIDI, AREBBI nwem!” [Xenni] ibarek marra agraw [n řgens] SIDI, AREBBI n řejdud nsen. Nitni uḍaren, bendqen i SIDI u i ujeǧid.
1CH 29:21 Tiwecca nnes iwyen nitni tiɣarṣa i SIDI. Nitni iwyen ařef n ifunasen imeẓyanen d ařef n icarriyyen d ařef n izmaren ak-d marra tiwhibin nsen n useyyeb d tɣarṣa n wecmaḍ i SIDI u [xenni] aṭṭas n tɣarṣa i marra Israil.
1CH 29:22 Deg wass nni ccin u swin nitni s řefraḥet tameqqrant zzat i wudem n SIDI u ggin Suliman, mmis n Dawud, d ajeǧid i twařa wiss tnayen u dehnen [t] d řḥakem zzat i SIDI, u Ṣaduq [dehnen t] d akehhan.
1CH 29:23 Suliman iqqim x řɛarc n SIDI am ujeǧid deg wemcan n babas Dawud. Netta ifřeḥ u marra Israil isřa as.
1CH 29:24 Marra řḥukkam d ayt n bu-teɣruḍt uřa d marra arrawen n ujeǧid Dawud, wtin deg ufus ad qqimen sadu [afus n] ujeǧid Suliman.
1CH 29:25 Yarra SIDI Suliman ad idweř d ameqqran ař ṭṭarf zzat i tiṭṭawin n Israil. Netta iwca as aweqqar igellden i tuɣa war iǧi uřa ɣar ijj n ujeǧid x Israil qbeř nnes.
1CH 29:26 [Ammu] i iḥkem Dawud, mmis n Yassa, x marra Israil.
1CH 29:27 Ussan nni tuɣa iḥkem x Israil, aqa aten arebɛin n iseggʷusa. Netta iḥkem di Ḥabrun sebɛa n iseggʷusa u di Urcalim třata u-třatin n iseggʷusa.
1CH 29:28 Netta immut umi icab mliḥ, ijjiwen ussan, agřa d uɛuǧi. Mmis Suliman idweř d ajeǧid deg wemcan nnes.
1CH 29:29 Imezruyen n ujeǧid Dawud, imezwura d ineggura, aqa ttwazemmemen deg wedlis n imezruyen n umwařaw Camwil u deg wedlis n imezruyen n unabi Natan u deg wedlis n imezruyen n umwařaw Jad,
1CH 29:30 s marra [min yuran] x tgeldit nnes u x ṣṣulṭa nnes u x řmijařat n řweqt i xas dd-ikkin uřa x Israil u x marra tigeldiwin n temmura.
2CH 1:1 Suliman, mmis n Dawud, ittwaḍmen di tgelda nnes, minzi SIDI, AREBBI nnes, tuɣa-t akides uca yarni di řemɣaret nnes ař ṭṭarf.
2CH 1:2 Suliman issiweř ak-d marra Israil, ak-d imeqqranen x wařef u x mya, ak-d řquḍat u ak-d marra řḥukkam n marra Israil, izeǧifen x ibabaten [n řaǧat].
2CH 1:3 Nitni ṭṭfen abrid, Suliman d marra agraw [n řgens] akides, ɣar řgeɛɛdet nni [iǧan] ɣar Jibɛun, minzi dinni i tuɣa Aqiḍun n Umsagar n AREBBI i igga Musa, amsexxar n SIDI, di řexřa.
2CH 1:4 Maca Dawud yiwi Ttabut n AREBBI zi Qaryat-Yaɛarim [ɣar wemcan] i dd as issewjed Dawud, minzi netta iwta ijj n uqiḍun i [Ttabut] di Urcalim.
2CH 1:5 Aɛalṭar n nnḥas nni igga Baṣaliyil, mmis n Uri, mmis n Ḥur, [tuɣa] din [di Jibɛun] zzat i Uqiḍun n Umsagar n SIDI. Suliman yuyur din [jmiɛ] ak-d marra agraw [n řgens]
2CH 1:6 uca iqeddem din Suliman, zzat i wudem n SIDI, ict n tɣarṣt x uɛalṭar n nnḥas nni [iǧan] ɣar Uqiḍun n Umsagar. Netta iqeddem xas ařef n tɣarṣa n wecmaḍ.
2CH 1:7 Di ǧiřet nni, iban-dd AREBBI i Suliman, inna as: “Ttar min [texsed] ad ac [t] wceɣ!”
2CH 1:8 Suliman inna i AREBBI: “Cek tessecned i baba Dawud tamexsiwt [nnec] icewwaren u teggid ayi d ajeǧid deg wemcan nnes.
2CH 1:9 [Xenni] řexxu, [a] SIDI AREBBI, ejj ad iffeɣ wawař nnec i tessiwřed ak-d baba Dawud s tidett, minzi teggid ayi d ajeǧid x ijj n řgens iwseɛ am tɛejjajt n temmurt.
2CH 1:10 Ewc ayi řexxu tiɣit d tussna, ḥima ad ffɣeɣ u ad dd-dewřeɣ zzat i wudem n řgens-a [am řḥakem nsen], minzi wi izemmaren ad iḥkem x řgens-a ameqqran s řḥeqq?”
2CH 1:11 [Xenni] inna AREBBI i Suliman: “Minzi aya ɣarek deg wuř u minzi cek war tᵉttared agřa, řeksibet niɣ ccan niɣ tudart n yinni i cek icarrhen, u war tᵉttared tudart tazirart, maca minzi tᵉttared tiɣit d tussna ḥima ad tgewwded řgens inu s řḥeqq, i wenni umi xef ggiɣ cek d ajeǧid,
2CH 1:12 aqa temmewc ac [řexxu] tiɣit d tussna, u ad ac wceɣ ɛawed agřa d řeksibet d ccan am mammec war [ten] iṭṭif uřa d ijj n ujeǧid qbeř nnec u war [ten] ttᵉṭṭifen [ɛad ammu] awarni ac.
2CH 1:13 Zi řgeɛɛdet [i x ttnuman ttwehhben tiɣarṣa], [řgeɛɛdet] nni [iǧan] di Jibɛun arendad n Uqiḍun n Umsagar, yiweḍ-dd Suliman [ɣar] Urcalim uca iḥkem x Israil.
2CH 1:14 Suliman issmun ikarruten d imnayen. Netta tuɣa ɣares ařef u-arebɛa-mya n ikarruten d tenɛac-ařef n imnayen uca yiwyi ten ɣar tneddam n ikarruten u ɣar ujeǧid di Urcalim.
2CH 1:15 Ajeǧid igga nnuqart di Urcalim anect n yeẓra [nni tuɣa din iǧan] uca igga ticejjura n tengelt anect izemmuren nni [tuɣa din iǧan] di Temmurt Iwaṭan s waṭṭas.
2CH 1:16 Iwyen-dd iysan i Suliman zi Miṣra, zi Qiwi. Isebbaben n ujeǧid iwyen ten s yijj n ttaman [imetnen] zi Qiwi.
2CH 1:17 Iwyen-dd ijj n ukarru uca ssuffɣen t-i-dd zi Miṣra s [ijj n ttaman n] setta-mya [ciqlu] n nnuqart u ijj n uyis s mya u-xemsin [ciqlu]. Ammu i ssuffɣen ten s ufus nsen i marra ijeǧiden n Iḥittiyyen u i ijeǧiden n Aram.
2CH 1:18 Suliman yumur, ḥima ad tᵉttwabna ict n Taddart i Yisem n SIDI d ict n taddart i tgelda nnes.
2CH 2:1 Suliman iḥseb sebɛin-ařef n yeryazen i trebbut n řehmeř d tmenyin-ařef n yeryazen ḥima ad xeddmen am yisuydayen x idurar uřa d třata-ařaf u setta-mya n yinni xasen [iǧan] d iweqqafen.
2CH 2:2 Xenni issekk Suliman [ijj n ureqqas] ɣar Ḥiram, ajeǧid n Ṣur, inna: “[Egg akidi] am mammec teggid ak-d baba Dawud, tessekked ɣares akeccuḍ n [tcejjart n] tengelt maḥend ad ibna taddart i yixef nnes ḥima ad dayes izdeɣ.
2CH 2:3 Xzar, necc xseɣ ad bniɣ ict n Taddart i Yisem n SIDI, AREBBI inu, ḥima ad as tt ssqeddseɣ, ḥima ad ssbexxareɣ [din] řebxur ittfuḥen zzat i wudem nnes, u ḥima ad [din] ssarseɣ řebda [aɣrum n wescan] u ḥima [ad din qeddmeɣ] tiɣarṣa n wecmaḍ, ɣar tuffut u ɣar tmeddit, deg wussan n ssebt, deg wussan n uyur n jdid u di řeɛyudat ittwaggen n SIDI, AREBBI nneɣ. D man aya [ittwagg] x Israil i řebda.
2CH 2:4 Taddart i ɣa bniɣ, ad tiři d tameqqrant, maɣar AREBBI nneɣ d ameqqran x marra irebbiten.
2CH 2:5 Man wen i ɣar teǧa tzemmar ad as ibna ict n Taddart? Aqa ajenna, [wah,] ajenna n ijenwan, war izemmar ad t iksi! U min ɛniɣ necc, aqa necc ad as bniɣ ict n Taddart mɣir ḥima ad as ssbexxareɣ zzat i wudem nnes?
2CH 2:6 [Xenni] řexxu, sekk ayi-dd ijj n weryaz i izemmar ad ixdem s wureɣ d nnuqart d nnḥas d wuzzař uřa s [ufiřu] adeḥmi d uzeggʷaɣ iḥedqen d udehmani, ijj n weryaz i issen ad igg inqacen, [wah, sekk i-t jmiɛ] ak-d imiɣisen nni ɣari di Yahuda u di Urcalim, inni dd-yiwi baba Dawud.
2CH 2:7 Siweḍ ayi-dd uřa d akeccuḍ [n tcejjart] n tengelt d umerzi d ukeccuḍ [n tcejjart] n ṣandel azeggʷaɣ, minzi necc ssneɣ, aqa imsexxaren nnec ttḥakan deg unezdam n tcejjura n Lubnan, u xzar, imsexxaren inu [ad wcen afus] i imsexxaren nnec,
2CH 2:8 maḥend ad ayi sswejden marra akeccuḍ [nni], maɣar Taddart nni i ɣa bniɣ, ad tiři d tameqqrant d řeɛjeb.
2CH 2:9 Xzar, necc ad wceɣ i imsexxaren nnec, zeɛma i inezdamen nni izeddmen ticejjura, ɛicrin-ařef [n řqedd] n ukuru n yirden d ɛicrin-ařef [n řqedd n] ukuru n imendi d ɛicrin-ařef [n řqedd] n ubatu n binu d ɛicrin-ařef [n řqedd] n ubatu n zzect.”
2CH 2:10 Ḥiram, ajeǧid n Ṣur, yarra-dd s tira uca issekk [tabrat-a] ɣar Suliman: “Maɣar SIDI ittexs řgens nnes, igga cek d ajeǧid xasen.”
2CH 2:11 Uca [xenni] inna Ḥiram: “Ad ittwabarek SIDI, AREBBI n Israil, wenni iggin ajenna d temmurt, aqa Netta iwca i Dawud ijj n uḥenjir d amiɣis, [wenni] ɣar teǧa řefhamet d řeɛqeř, wenni i ɣa ibnan ict n Taddart i SIDI uřa d ict n taddart i tgelda nnes!
2CH 2:12 [Xenni] řexxu ad ssekkeɣ ijj n weryaz d amiɣis zi baba Ḥiram, wenni ɣar teǧa tussna d řefhamet,
2CH 2:13 mmis n ict n temɣart zeg yessis n Dan. Babas d ijj n weryaz zi Ṣur wenni ɣar iǧa tussna ḥima ad ixdem s wureɣ, nnuqart, nnḥas, uzzař u s weẓru d ukeccuḍ, s [ufiřu] arjuwani d udehmani, s řeqṭen azdad u s [ufiřu] azeggʷaɣ iḥedqen, ḥima ad inqec ɛřam kuř ineqqacen, u ḥima ad yarcem ɛřam kuř ireqqamen nni d as immewcen, [u man aya jmiɛ] ak-d imiɣisen nnec d imiɣisen n babac Dawud.
2CH 2:14 [Xenni] řexxu, ad issekk sidi inu irden d imendi d zzect d binu, min xef tuɣa issawař, ɣar imsexxaren nnes.
2CH 2:15 Neccin ad nezdem ticejjura n Lubnan anect i d ac ittxeṣṣan uca ad ac tent i-dd-nawi x tɣarruba n tḥenya x řebḥar ɣar Yafa, u cek s yixef nnec ad tent tessgeɛɛded [ssenni] ɣar Urcalim.”
2CH 2:16 Suliman iḥseb marra iryazen ibarraniyyen nni [iǧan] di temmurt n Israil, awarni i řeḥsab umi ten iḥseb babas Dawud. Ufin [aqa din] mya u-třata u-xemsin-ařef u-setta mya [n yeryazen].
2CH 2:17 Sebɛin-ařef zzaysen igga i-ten d imsexxaren i trebbut n řehmeř u tmenyin-ařef d isuydayen x idurar d setta u-třatin-mya [igga] i-ten d iweqqafen ḥima ad ggen řgens ad ixdem.
2CH 3:1 Suliman ibda řebni n Taddart n SIDI di Urcalim x wedrar n Muriya, mani dd-iban [SIDI] i babas Dawud [u] mani issewjed Dawud ijj n wemcan x unedrar n Uyabusi Urnan.
2CH 3:2 Netta ibda řebni deg uyur wiss tnayen, deg wass wiss tnayen deg useggʷas wiss arebɛa n tgelda nnes.
2CH 3:3 Wanita d dsas [i issars] Suliman i řebni n Taddart n AREBBI: tuzzeggart [nnes] deg iɣaǧen ɛlaḥsab řeqyas amezwaru [tuɣa-tt] settin n iɣaǧen, d tiru [nnes] [tuɣa-t] ɛicrin n iɣaǧen.
2CH 3:4 Asqif n wadaf, nni [tuɣa iǧan] ɣar zzat n tuzzeggart [n Taddart], [tuɣa-t] dayes ɛicrin n iɣaǧen [umi t ɛebbaren] ɣar zzat n tiru n Taddart, u řuɛřa [nnes] tuɣa-t dayes mya u-ɛicrin n iɣaǧen. Tuɣa idřa [wesqif n wadaf] ɣar daxeř s wureɣ iṣfan.
2CH 3:5 Taddart tameqqrant igga as taẓeqqa s ukeccuḍ n [tcejjart n] umerzi uca yarni xas wureɣ iṣfan u izewweq i-t s tcejjura n tini d ssnaseř [izewwqen].
2CH 3:6 Ɛawed izewweq netta Taddart s yiẓra iɣřan. Ureɣ tuɣa d ureɣ zi Farawayim.
2CH 3:7 Ammu i idřa netta Taddart, tiḥenya, tinebdatin, řeḥyuḍ nnes d tewwura nnes s wureɣ, uca inqec ikiruben di řeḥyuḍ.
2CH 3:8 Netta igga uřa d axxam n Weqdas x Uqeddas. Tuzzeggart nnes dayes ɛicrin n iɣaǧen [umi t ɛebbaren] ɣar zzat n tiru n Taddart. Uřa d tiru nnes [tuɣa-t dayes] ɛicrin n iɣaǧen. Netta idřa [řeḥyuḍ ɣar daxeř n] wexxam s setta-mya talint n wureɣ iṣfan.
2CH 3:9 Řewzen n imesmaren isekkwa xemsin ciqlu n wureɣ. Idřa uřa d tiɣurfatin n sennej s wureɣ.
2CH 3:10 Deg wexxam n Weqdas x Uqeddas igga tnayen n ikiruben, [am] řxedmet n wenqac, u iřeḥḥef i-ten s wureɣ.
2CH 3:11 Afriwen n ikiruben [jmiɛ] [ɛebbaren] ɛicrin n iɣaǧen di tuzzeggart. Afriw amezwaru [iɛebbar] xemsa n iɣaǧen n tuzzeggart, ittakkʷaḍ řḥiḍ n Taddart, uca afriw nneɣni n xemsa n iɣaǧen ittakkwaḍ afriw n ukirub nneɣni.
2CH 3:12 Afriw n ukirub nneɣni [iɛebbar uřa d] xemsa n iɣaǧen, ittakkwaḍ řḥiḍ n Taddart. Afriw nneɣni n xemsa n iɣaǧen iřeqqef afriw n ukirub nneɣni.
2CH 3:13 Afriwen n ikiruben-a ttwabezzɛen ɛicrin n iɣaǧen u nitni bedden x iḍaren nsen d iɣembab nsen [ssewḍen] ɣar daxeř.
2CH 3:14 Netta igga uřa d ařeḥḥaf s [řeqṭen] adeḥmi d arjuwani d azeggʷaɣ iḥedqen u s řeqṭen azdad, uca igga xas ikiruben.
2CH 3:15 Ɣar zzat n Taddart igga netta tnayen n ipilaren s ict n tuzuggart n xemsa u-třatin n iɣaǧen. Ttajj x tqiccat nnes [tuɣa-t] xemsa n iɣaǧen.
2CH 3:16 Netta igga uřa d ssnaseř [izewwqen] am tinni deg Wexxam n Daxeř [n Zzawect] uca igga i-tent x tqiccatin n ipilaren. Igga uřa d mya n iremmamen uca icedd i-ten ɣar ssnaseř [izewwqen].
2CH 3:17 Netta issbedd ipilaren ɣar zzat n Zzawect Tameqqrant, ijjen x yefus u ijjen x uzeřmaḍ. Wenni ɣar yefus igga as Yaxin u wenni x uzeřmaḍ igga as Buɛaz.
2CH 4:1 Netta igga uřa d aɛalṭar n nnḥas. Tuzzeggart nnes [tuɣa-tt] ɛicrin n iɣaǧen u řuɛřa nnes ɛecra n iɣaǧen.
2CH 4:2 Xenni igga netta tarimant ifesyen. [Tuɣa řeɛbar nnes] ɛecra n iɣaǧen zi ṭṭarf ař ṭṭarf [nneɣni], [tuɣa-tt d] taquract. Tiddi nnes [tuɣa-tt] xemsa n iɣaǧen u ict n ufiřu n řeɛbar n třatin n iɣaǧen inneḍ as-dd.
2CH 4:3 Sadu nnes beddent řexyařat n ifunasen, aqa nnḍent as-dd qaɛ. [Nnuwarat i war dd-ffiɣent ɛad] tuɣa i d as dd-innḍen qaɛ, ɛecra di kuř ijj n uɣiř, tuɣa qqnent ak-d wayawya am quwwarent i trimant [di] tnayen n iseddiyyen. [Nnuwarat i war dd-ffiɣent ɛad] tuɣa ttwafesyent d ijjen [ak-d trimant].
2CH 4:4 Tarimant tbedd x tenɛac n ifunasen. Třata zzaysen arrin udem nsen ɣar ccamal, třata zzaysen arrin udem nsen ɣar řɣarb, třata zzaysen arrin udem nsen ɣar ljanub u třata zzaysen arrin udem nsen ɣar ccarq. Tarimant [tarsa] xasen u marra zzɛenquqat nsen dewřent ɣar daxeř.
2CH 4:5 Tuɣa [tarimant] tegdar ijj n cbar n ufus u tma nnes tuɣa am mammec tteggen tma n ijj n ufenjař, [am] tnewwact n ict n tlillect. Teksi twawit nnes teřt-ařaf n ibatuten.
2CH 4:6 Igga netta ɛecra n tbanyutin uca igga xemsa [zzaysent] x yefus u xemsa [zzaysent] x uzeřmaḍ, ḥima ad daysent ssirden iziynat ittwasswejden i tɣarṣt n wecmaḍ, ssirden [tent] daysent. [Maca] tarimant tuɣa-tt i ikehhanen, maḥend ad dayes ssirden ixef nsen.
2CH 4:7 Netta igga ɛecra n řeqnadeř n wureɣ ɛlaḥsab lfariḍa u netta issbedd i-ten di Zzawect Tameqqrant, xemsa x yefus u xemsa x uzeřmaḍ.
2CH 4:8 Netta igga ɛecra n tzewḍiwin uca igga i-tent di Zzawect Tameqqrant, xemsa x yefus u xemsa x uzeřmaḍ. Igga uřa d mya n ṭṭawyat i urucci n wureɣ.
2CH 4:9 Netta igga řemraḥ iḥṣaren i ikehhanen d řemraḥ ameqqran ak-d tewwura i řemraḥ, uca iřeḥḥef tiwwura nsen s nnḥas.
2CH 4:10 Tarimant igga i-tt x uɣezdis afusi ɣar zzat, ɣar uɣezdis n ccarq, jjihet n ljanub.
2CH 4:11 Ḥiram igga uřa d tiydurin d iɣenjajen d ṭṭawyat i urucci. Ammu i ikemmeř Ḥuram cɣeř i řeqcuɛ i igga i ujeǧid Suliman i Taddart n AREBBI.
2CH 4:12 [Igga] tnayen n ipilaren d iquraren, d ttijan [i iǧan] x uzeǧif n tnayen n ipilaren, d tnayen n tracciwin ḥima ad [zzaysent] dřen tnayen n iquraren n ttijan [i iǧan] x uzeǧif n ipilaren,
2CH 4:13 uřa d arebɛa-mya n iremmamen i tnayen n tracciwin: tnayen n iseddiyyen i kuř tracca ḥima ad [zzaysen] dřen tnayen n iquraren n ttijan nni [iǧan] tiwa sennej x wudem n ipilaren.
2CH 4:14 Igga tikarrutin u x tkarrutin igga tibanyutin [i usird].
2CH 4:15 [Igga uřa d] tarimant d icten, uřa d tenɛac n ifunasen sadu nnes.
2CH 4:16 Igga Ḥiram [ak-d] babas uřa d teydurin d iɣenjajen d furcayat d marra řeqcuɛ nnes, i ujeǧid Suliman, i Taddart n SIDI, zi nnḥas ittwassuydan.
2CH 4:17 Ajeǧid ikebb i-ten deg udewwar n L’Urdun, di třaxt igdaren jar Sukkut d Ṣaradata.
2CH 4:18 Suliman igga marra řeqcuɛ-a x ubarru ameqqran, ařami war beqqcen ca [ɛad] di řewzen n nnḥas.
2CH 4:19 Suliman igga marra řeqcuɛ i Taddart n AREBBI: aɛalṭar n wureɣ, tizewḍiwin min xef [ittwammars] weɣrum n wescan,
2CH 4:20 řeqnadeř ak-d řefnarat nsen nni ittxeṣṣan ad arɣen ɛlaḥsab lfariḍa zzat i [Wexxam n] Daxeř [n Zzawect], [marra] zeg wureɣ izedgen.
2CH 4:21 [Igga ɛawed] nnuwwar, řefnarat d tjeqqaḍin [n teftič], [marra] zeg wureɣ. Tuɣa-t d wureɣ qaɛ.
2CH 4:22 Uřa d tijeqqaḍin, ṭṭawyat i urucci, tiɣenjayin d tqedduḥin n jjawi [tuɣa atent] zeg wureɣ izedgen. Adaf n Taddart, tiwwura n daxeř zzat i Weqdas x Uqeddas d tewwura n Taddart n Zzawect Tameqqrant, [tuɣa atent] zeg wureɣ.
2CH 5:1 Ammu i tᵉttwakemmeř marra řxedmet i igga Suliman i Taddart n SIDI. Uca issidef Suliman marra řeqcuɛ iqeddsen n babas Dawud: nnuqart d wureɣ d marra řeqcuɛ, uca issars [man aya marra] deg ixxamen n txubay n Taddart n AREBBI.
2CH 5:2 Xenni issmun Suliman imeqqranen n Israil, marra izeǧifen n tqebbař d řḥukkam n [tudrin n] ibabaten n ayt n Israil. Netta issmun i-ten di Urcalim ḥima ad ssgeɛɛden Ttabut n Řɛahd n SIDI zi tendint n Dawud, tenni d Ṣihyun.
2CH 5:3 Marra iryazen n Israil munen-dd ɣar ujeǧid ɣar řɛid. Tuɣa-tt deg uyur wiss sebɛa.
2CH 5:4 Marra imeqqranen n Israil usin-dd uca ssgeɛɛden Ilawiyyen Ttabut.
2CH 5:5 Ssgeɛɛden Ttabut n SIDI ak-d Uqiḍun n Umsagar uřa d marra řeqcuɛ iqeddsen i tuɣa din iǧan deg Uqiḍun. Ssgeɛɛden aya ikehhanen d Ilawiyyen.
2CH 5:6 Marra tamesmunt n Israil, tenni tuɣa ɣares imunen, tuɣa tbedd ak-d ujeǧid Suliman zzat i Ttabut. Nitni wehhben uǧi d ifunasen d tfunasin nni iǧan břa řeḥsab, war zemmaren ad ten qeddaren di ssibbet n ubarru nsen.
2CH 5:7 Iwyen ikehhanen Ttabut n Řɛahd n SIDI ɣar wemcan nnes, ɣar [Wexxam n] Daxeř [n Zzawect] n Taddart, deg Weqdas x Uqeddas, ař sadu wafriwen n ikiruben.
2CH 5:8 Ikiruben bezzɛen tnayen n wafriwen nsen x wemcan n Ttabut uca [ammu i] dřin ikiruben Ttabut d iɛumad nnes [i tarebbut] zi sennej.
2CH 5:9 Awarni aya ssřeḥmen iɛumad [n tarebbut], maḥend ad banent texfawin n iɛumad, inni dd-iffɣen zi Ttabut, ɣar uɣezdis n zzat n [Wexxam n] Daxeř [n Zzawect], [maca] war dd-ttbinint zi barra. [Ttabut] aqa-tt din ař ass-a.
2CH 5:10 Tuɣa war iǧi ca di Ttabut, mɣir tnayen n teřwiḥin i dayes issars Musa ɣar Hurib, řami igga SIDI Řɛahd ak-d ayt n Israil umi dd-ffɣen zi Miṣra.
2CH 5:11 Ařami dd-ffɣen ikehhanen zeg Uqeddas - maɣar marra ikehhanen nni tuɣa zemmaren ad afen, tuɣa ssqeddsen ixef nsen břa ma ad wcen taynit i terbiɛin nsen -
2CH 5:12 [am] tuɣa Ilawiyyen - [ixs ad yini] marra imedyazen: inni ɣar Asaf d yinni ɣar Hayman d yinni ɣar Yadutun, d yinni n iḥenjiren nsen d yinni n aytmatsen - yarḍen řeqṭen azdad, uca bedden s taǧunin n wuzzař d lharpat d řgambriyat ɣar uɣezdis n ccarq n uɛalṭar u tuɣa akidsen ɛřaḥař mya u-ɛicrin n ikehhanen i ittsuḍen di řebwaq.
2CH 5:13 Suḍen nitni di řɣayṭa u ɣennjen am yijj [n weryaz], ḥima ad ittwaseř řḥess d ijjen am ssemɣaran u ttqadan nitni SIDI. Nitni ssgeɛɛden tmijja [nsen ɣar ujenna] s řebwaq d taǧunin n wuzzař d dduzanat n ǧɣa nneɣni, ssemɣaran SIDI: ‘Maɣar Netta iṣbeḥ, maɣar tamexsiwt nnes icewwaren tᵉttɣima i řebda!’ [Xenni] imsar aqa Taddart, Taddart n SIDI, tᵉttwaccur s useynu,
2CH 5:14 uca ikehhanen war zemmaren ad qqimen bedden maḥend ad sexxaren di ssibbet n useynu, minzi aɛuǧi n SIDI tuɣa iccur Taddart n AREBBI.
2CH 6:1 Xenni inna Suliman: “SIDI inna aqa Netta ad izdeɣ deg yijj n useynu ibbumbes.
2CH 6:2 [S tidett] necc bniɣ ict n Taddart, ict n Tzeddiɣt i Cek, ijj n wemcan imten ḥima ad [din] tzedɣed i řebda.”
2CH 6:3 Issneqřeb ujeǧid aɣembub nnes uca ibarek marra agraw [n řgens] n Israil umi marra agraw [n řgens] n Israil tuɣa ibedd.
2CH 6:4 Netta inna: “Ad ittwabarek SIDI, AREBBI n Israil, wenni issiwřen s uqemmum nnes ɣar baba Dawud d [wenni] [t] ikemmřen s ufus nnes umi inna:
2CH 6:5 ‘Zeg wass i di nedheɣ řgens inu Israil zi Miṣra, war ixḍareɣ uřa d ict n tendint zi marra tiqebbař n Israil ḥima ad [dinni] bniɣ Taddart ḥima ad [din] yiři Isem inu, u war ixḍareɣ aryaz ḥima ad yiři d řḥakem x řgens inu Israil,
2CH 6:6 [maca řexxu] ixdareɣ Urcalim, ḥima ad [din] yiři Isem inu, u Necc ixḍareɣ Dawud, ḥima ad yiři [d řḥakem] x řgens inu Israil.’
2CH 6:7 Tuɣa deg wuř n baba Dawud maḥend ad ibna Taddart i Yisem n SIDI, AREBBI n Israil.
2CH 6:8 [Maca] SIDI inna i baba Dawud: ‘Umi teggid deg wuř nnec ḥima ad tebnid Taddart i Yisem inu, aqa mliḥ umi teggid man aya deg wuř nnec.
2CH 6:9 Maca war iǧi d cek i ɣa ibnan Taddart nni, maca mmic i dd-iffɣen zi tejɛinna nnec d netta i ɣa ibnan Taddart i Yisem inu.’
2CH 6:10 SIDI issemten awař nnes nni issiweř, maɣar necc dewřeɣ beddeɣ deg wemcan n baba Dawud u qqimeɣ x řɛarc n Israil, am mammec tuɣa issiweř SIDI, u necc bniɣ Taddart i Yisem n SIDI, AREBBI n Israil.
2CH 6:11 Necc ssarseɣ dinni Ttabut wenni di iǧa Řɛahd n SIDI i igga Netta ak-d ayt n Israil.”
2CH 6:12 Netta ibedd zzat i uɛalṭar n SIDI, arendad n marra agraw [n řgens] n Israil, uca netta iksi ifassen nnes ɣar ujenna.
2CH 6:13 Minzi Suliman tuɣa igga ict n tenhirt n nnḥas u igga i-tt di řwesṭ n řemraḥ. Tuɣa dayes xemsa n iɣaǧen n tuzzeggart, xemsa n iɣaǧen n tiru d třata n iɣaǧen n tiddi. Netta ibedd xas, ibendeq x ifadden nnes qibač i tiṭṭawin n marra agraw [n řgens] n Israil uca iksi ifassen nnes ɣar ujenna, inna:
2CH 6:14 “[A] SIDI, AREBBI n Israil, deg ujenna sennej u x temmurt swadday war iǧi uřa d ijj n AREBBI am Cek, wenni iḥḍan Řɛahd d tmexsiwt icewwaren i imsexxaren nnec nni igguren zzat i wudem nnec s marra uř nsen,
2CH 6:15 wenni iḥḍan i umsexxar nnec, baba Dawud, x min xef akides tessiwřed, minzi s uqemmum nnec i tessiwřed u s ufus nnec i t tkemmřed, am [teǧa] ass-a.
2CH 6:16 [Xenni] řexxu, SIDI, AREBBI n Israil, ḥḍa di ṭṭweɛ n umsexxar nnec, baba Dawud, x min xef kides tessiwřed umi tennid: ‘War ittwaqess zzayek uřa d ijj n weryaz zi zzat i wudem inu wenni iqqimen x řɛarc n Israil, min ɣa kken arrawen nnec ḥeṭṭan ad uyuren abrid nsen ɛlaḥsab Ccariɛa am mammec tuyured cek zzat i wudem inu.’
2CH 6:17 Xenni řexxu, [a] AREBBI n Israil, egg ad dewřen d tidett awařen nni tessiwřed ak-d umsexxar nnec, ak-d Dawud.”
2CH 6:18 “Maɣar ma s tidett ad izdeɣ AREBBI x temmurt? Xzar ajenna, [wah,] ajenna n ijenwan war izemmar ad Cek iksi, mecḥař s drus [xenni] Taddart-a i ssbeddeɣ necc!
2CH 6:19 Meyyeř ɣar tẓaǧit n umsexxar nnec u ɣar uḥeccem nnes, [a] SIDI, AREBBI inu, ḥima ad tesřed ɣar uřaɣi u ɣar tẓaǧit nni iẓẓuǧ umsexxar nnec zzat i wudem nnec.
2CH 6:20 Ejj tiṭṭawin nnec ad ttwarzment ass d ǧiřet tiwa i Taddart-a, tiwa i wemcan-a min xef tessiwřed aqa Isem nnec ad ittwassemten din, ḥima ad tesřed ɣar tẓaǧit i iẓẓuǧ umsexxar nnec deg wemcan-a.
2CH 6:21 Seř i uḥeccem n umsexxar nnec u n řgens nnec Israil, i tutra i ttẓaǧan nitni deg wemcan-a u seř Cek [xenni] zi Tzeddiɣt nnec, zeg ujenna, [wah,] seř u ɣfar.”
2CH 6:22 “Mařa ixḍa ijj ak-d jjar nnes u tᵉttwagg xas ict n tjaǧit, ḥima ad tt ijjuǧ u wanita yusa-dd uca ijjuǧ zzat i uɛalṭar nnec di Taddart-a,
2CH 6:23 seř Cek [xenni] deg ujenna u kkar u ḥkem x imsexxaren nnec, [ḥima] ad ittwaɛaqeb uɛeffan, ejj abrid nnes ad ihwa x uzeǧif nnes u egg s tsegda i umsegged u ewc i-t ɛlaḥsab tasegda nnes.”
2CH 6:24 “Mařa řgens nnec Israil ittwaɣřeb zzat i wudem n řeɛdu, minzi nitni xḍan akidek u nitni ad ɣarek dd-dewřen uca ad neɛmen s Yisem nnec u ad ẓẓaǧen ad ḥeccmen zzat i wudem nnec di Taddart-a,
2CH 6:25 seř Cek [xenni] zeg ujenna u ɣfar ddenb n řgens nnec Israil uca ndeh i-ten ad dd-dewřen ɣar temmurt nni i d asen tewcid u i řejdud nsen.”
2CH 6:26 “Mařa ajenna ittwabelleɛ ařami war din ittiři wenẓar, minzi nitni xḍan akidek, u nitni ad ẓẓaǧen am arrin azeǧif ɣar wemcan-a, ad neɛmen s Yisem nnec u ad dd-dewřen zi ddnub nsen umi ten teḥṣared Cek,
2CH 6:27 seř-dd Cek [xenni] deg ujenna u ɣfar asen ddenb n imsexxaren nnec u n řgens nnec Israil, minzi Cek tessřemded asen abrid aṣebḥan nni ittxeṣṣa ad kken, u ewc Cek [xenni] anẓar i temmurt nni tewcid d řwart i řgens nnec.”
2CH 6:28 “Mařa din řaẓ di temmurt, [niɣ] ṭṭaɛun, [niɣ] ittwassecmeḍ [imendi zeg usemmiḍ], [niɣ mařa din] jjriḥect n wefsu [niɣ] tamuɣri [tenni] iṣarrḍen, [niɣ] mařa iḥṣar i-t řeɛdu [ɣar] tewwura nnes, [niɣ] teřqef i-t mammec ma tegga ca n jjriḥect [niɣ] ca n řeḥřac,
2CH 6:29 [seř Cek xenni] min ma i ɣa iẓẓuǧ ijj n bnadem zi marra řgens nnec Israil u min ma i ɣa ittar, [am] ssnen nitni kuř ijj jjriḥect nsen d řeḥriq nsen, u netta iksi [xenni] ifassen nnes ɣar Taddart-a.
2CH 6:30 [Wah] seř Cek [xenni] zeg ujenna, zeg wemcan imten mani tzeddɣed, u ɣfar u ewc kuř ijj ɛlaḥsab tibridin nnes, am mammec Cek tessned uř nnes, maɣar Cek waha i issnen uř n bnadem,
2CH 6:31 ḥima ad Cek ggʷeden u ad uyuren di tebridin nnec marra ussan i ɣa kken ddaren x wudem n temmurt nni tewcid i řejdud nneɣ.”
2CH 6:32 “Uřa mařa netta d abarrani, wenni war [iǧin] zi řgens nnec, maca ad dd-yas di ṭṭweɛ n Yisem nnec zeg ict n temmurt tiggʷej di ṭṭweɛ n Yisem nnec ameqqran d ufus nnec ijehden d uɣiř nnec isswiẓẓḍen, [xenni mařa] dd-yusin nitni, uca ad ẓẓaǧen am arrin azeǧif ɣar Taddart-a,
2CH 6:33 seř Cek [xenni] zeg ujenna, zeg wemcan imten mani tzeddɣed, u egg ɛlaḥsab marra min xef ɣarek i ɣa iřaɣa ubarrani, ḥima marra řegnus n ddunect ad ssnen Isem nnec, ḥima nitni ad cek ggʷeden, am řgens nnec Israil, u ad ssnen aqa Isem nnec ittwabarreḥ tiwa i Taddart-a i bniɣ.”
2CH 6:34 “Mařa řgens iffeɣ ɣar umenɣi ak-d řɛedyan nnes deg webrid i x i ten tessekked, u nitni ad ẓẓaǧen i Cek [am] arrin azeǧif ɣar tendint-a i tixḍared Cek, u ɣar Taddart i bniɣ i Yisem nnec,
2CH 6:35 seř Cek [xenni] zeg ujenna i tẓaǧit nsen u i uḥeccem nsen uca aɣ asen tasɣart.”
2CH 6:36 “Mařa nitni xḍan akidek - maɣar war iǧi uřa d ijj n bnadem i war ixeṭṭin - u Cek tesɛared xasen, ad ten tsellmed zzat i wudem n řeɛdu uca nitni ad ten nedhen d imeḥbas ɣar temmurt n řeɛdu, tiggʷej niɣ tudes [i teǧa],
2CH 6:37 u [mařa] [xenni] ad tuben deg wuř nsen di temmurt mani ttwaḥebbsen, [wah,] ad tuben u ad xak dd-řaɣan di temmurt n tḥebbast nsen, ad inin: neccin nexḍa u negga min war iseggden, aqa negga tuɛeffna!,
2CH 6:38 [wah,] ad ɣarek dd-dewřen s marra uř nsen u s marra řeɛmar nsen di temmurt n řɛedyan nsen mani ttwaḥebbsen uca ad ɣarek ẓẓaǧen [am] arrin azeǧif ɣar temmurt nni tewcid i řejdud nsen, ɣar tendint-a i tixḍared Cek u ɣar Taddart-a i bniɣ i Yisem nnec,
2CH 6:39 seř Cek [xenni] zeg ujenna, amcan imten mani tzeddɣed, i tẓaǧit nsen u i uḥeccem nsen uca aɣ asen tasɣart. Ɣfar [xenni] řgens nnec min zi xak xḍan.”
2CH 6:40 “[Xenni] řexxu, AREBBI inu, ejj tiṭṭawin nnec ad iřint arzment d imezzuɣen nnec ad iřin ḥḍan i tẓaǧit deg wemcan-a.
2CH 6:41 [Xenni] řexxu, [a] SIDI AREBBI, [adef] ɣar arraḥet nnec, Cek d Ttabut n jjehd nnec. Ejj ad iřin ikehhanen nnec, [a] SIDI AREBBI, arḍen s usenjem, uca iři ad farḥen imtiqqan nnec s řxar.
2CH 6:42 [A] SIDI AREBBI, war tarri aɣembub n umedhun nnec, idar di tmegga n tmexsiwt icewwaren n umsexxar nnec Dawud.”
2CH 7:1 Umi ikemmeř Suliman taẓaǧit [nnes], tehwa-dd tmessi zeg ujenna tecca taɣarṣt n wecmaḍ uřa d tɣarṣa [inneɣni], uca iccur uɛuǧi n SIDI Taddart.
2CH 7:2 Ikehhanen war zemmaren ad adfen ɣar Taddart n SIDI, minzi aɛuǧi n SIDI tuɣa iccur Taddart n SIDI.
2CH 7:3 [Umi] ẓrin marra ayt n Israil belli tehwa-dd tmessi nni, uřa d aɛuǧi n SIDI iban-dd tiwa n Taddart, uḍaren nitni s uɣembub nsen ɣar temmurt x tisi n zzellij, bendqen, qadan SIDI: “Maɣar Netta iṣbeḥ u tamexsiwt nnes icewwaren [tᵉttɣima] i řebda”.
2CH 7:4 Ajeǧid, u marra Israil akides, wehhben tiɣarṣa zzat i wudem n SIDI.
2CH 7:5 Ajeǧid Suliman iwehheb tnayen u-ɛicrin-ařef n ifunasen d tfunasin d mya u-ɛicrin ařef n wuǧi d taɣarṣt n řehna. Ammu i ideccen ujeǧid d marra ayt n Israil Taddart n AREBBI.
2CH 7:6 Ikehhanen [tuɣa bedden] ɣar tsexxart nsen uca Ilawiyyen [bedden] ak-d dduzan n ǧɣa n SIDI, inni igga ujeǧid Dawud ḥima ad qadan SIDI - ‘Maɣar tamexsiwt nnes icewwaren [tᵉttɣima] i řebda!’ - s [izřan n] uṣebbeḥ n Dawud deg ufus nsen, u arendad nsen suḍen ikehhanen di řebwaq, am tuɣa ibedd marra Israil.
2CH 7:7 Suliman issqeddes řwesṭ n řemraḥ n zzat, wenni [iǧan] zzat i Taddart n SIDI, minzi yiwi din tiɣarṣa n wecmaḍ d tadunt n tewhibin [n řɣiǧet], maɣar aɛalṭar n nnḥas nni igga Suliman tuɣa war izemmar ad iksi taɣarṣt n wecmaḍ d tewhibt [n řɣiǧet] d tadunt.
2CH 7:8 Di řweqt nni iɛeyyed Suliman Řɛid i yijj n řmijar n sebɛa n wussan d marra Israil akides, ijj n wegraw [n řgens] d ameqqran, zi mani ɣa tiwḍed ɣar Ḥamat ař Taɣzart n Miṣra.
2CH 7:9 Deg wass wiss tmenya ggin ijj n umuni ifarzen, minzi di sebɛa n wussan ggin nitni adeccen n uɛalṭar uca uřa d Řɛid [awarni man aya] ɣares [ɛawed] ijj n řmijar n sebɛa n wussan.
2CH 7:10 Deg wass wiss třata u-ɛicrin n uyur wiss sebɛa yarxu netta i řgens ad raḥen ɣar iqiḍan nsen s wuř ifarḥen u s řxaḍar s marra řxar i igga SIDI i umsexxar nnes Dawud d Suliman u i řgens nnes Israil.
2CH 7:11 [Ammu i] ikemmeř Suliman řebni n Taddart n SIDI d taddart n ujeǧid. Marra min tuɣa deg wuř n Suliman ḥima ad t igg di Taddart n SIDI u di taddart nnes, aqa ifřeḥ [ad igg] aya.
2CH 7:12 SIDI iban-dd i Suliman di ǧiřet, inna as: “Necc sřiɣ i tẓaǧit nnec u farzeɣ amcan-a i Yixef inu ḥima ad yiři d Taddart [i tewhibt n] tɣarṣt.
2CH 7:13 Xmi ɣa bellɛeɣ ajenna maḥend war iccit wenẓar [ɛad], niɣ mařa umureɣ tamuɣri iřeḥḥfen maḥend ad tecc temmurt niɣ xmi dd-ssekkeɣ ṭṭaɛun jar řgens inu,
2CH 7:14 uca řgens inu x min xef ittwařaɣa Isem inu ad issehwa ixef nnes, ad iẓẓaǧ, u nitni ad arzun udem inu u ad tuben zi tebridin nsen tiɛeffanin, [xenni] Necc ad ɣarsen sřeɣ zeg ujenna, ad asen ɣfareɣ u ad ssgenfiɣ tammurt nsen.
2CH 7:15 [Xenni] řexxu, tiṭṭawin inu ad iřint arzment d imezzuɣen inu ad ḥḍan x tẓaǧit zeg wemcan-a,
2CH 7:16 maɣar řexxu ixḍareɣ Taddart-a u ssqeddseɣ tt ḥima ad ssmetneɣ din Isem inu i řebda u tiṭṭawin inu d wuř inu [ad] din [iřin] marra ussan.
2CH 7:17 Mařa cek tuyured zzat i wudem inu am mammec tuɣa iggur babac Dawud, u ad tegged am mammec marra i d ac umureɣ uca ad teḥḍid tiweṣṣa inu d lfarayiḍ inu,
2CH 7:18 [xenni] ad ssmetneɣ řɛarc n tgeldit nnec am mammec Řɛahd i ggiɣ ak-d babac Dawud, nniɣ: ‘War d ac ittxeṣṣa uřa d ijj n weryaz nni iḥekkmen di Israil!’
2CH 7:19 Maca mařa kenniw tḥeyydem zi tweṣṣa inu d řumurat inu nni wciɣ zzat i wudem nwem, uca ad tuyurem ad tɛebdem i irebbiten nneɣni, ad asen tbendqem,
2CH 7:20 xenni ad qḍiɣ x Israil zi temmurt nni d asen wciɣ, uca Taddart-a, i ssqeddseɣ i Yisem inu, ad tt nḍareɣ zeg wudem inu u Israil ad idweř d umedya [uřa d řqecɛet] n ubehdeř itteqqsen jar marra řegnus.
2CH 7:21 U x Taddart-a tenni yuɛřan qaɛ, marra wi xas i ɣa ikken, ad itebhet, ad yini: ‘Mayemmi igga SIDI ammu di temmurt-a u di Taddart-a?’
2CH 7:22 Ad inin: ‘Minzi nitni semḥen di SIDI, AREBBI n řejdud nsen, wenni ten dd-issuffɣen zi temmurt n Miṣra, u minzi nitni cebbaren di irebbiten nneɣni u Israil yuyur ad asen isjed u ad ten iɛbed, x uya isseɣḍeř Netta marra řɣar-a xasen.’”
2CH 8:1 Awarni ɛicrin n iseggʷusa i di ibna Suliman tnayen n tudrin, Taddart n SIDI u taddart n ujeǧid, imsar,
2CH 8:2 aqa Suliman ibna [ɛawed] tineddam i d as iwca Ḥiram uca issezdeɣ din ayt n Israil.
2CH 8:3 Awarni as iffeɣ Suliman ɣar Ḥamat-Ṣuba uca iṭṭef i-tt.
2CH 8:4 Netta ibna Tadmur di řexřa. Ibna [ɛawed] marra tineddam n řexzen di Ḥamat.
2CH 8:5 Netta ibna uřa d Bayt-Ḥurun n nnej d Bayt-Ḥurun n wadday, tneddam ifaryen s řeḥyuḍ d tewwura d iɛumad i ubelleɛ,
2CH 8:6 uřa d Baɛlat d marra tineddam n řexzen nni [iǧan] ɣar Suliman, d marra tineddam n ikarruten d marra tineddam n imnayen u [xenni] marra min issitem Suliman ad tt ibna di Urcalim u di Lubnan u di marra tammurt n řeḥkam nnes.
2CH 8:7 X marra řgens i iqqimen - [x řgens] n Iḥittiyyen, n Imuriyyen, n Ifiriziyyen, n Iḥiwiyyen u n Iyabusiyyen, inni war [iǧin] ca zeg ayt n Israil,
2CH 8:8 u x warrawen nsen nni iqqimen awarni asen di temmurt, inni war ttwaqḍan s ufus n ayt n Israil - igga xasen Suliman ddquřat qesḥent ař ass-a.
2CH 8:9 [Maca] zeg ayt n Israil war iggi Suliman d isemɣan i řexdayem nnes, minzi nitni tuɣa aten d iɛeskariyyen d imeqqranen x ineɣrafen nnes [zi řɛeskar], d imeqqranen n ikarruten nnes d imnayen nnes.
2CH 8:10 Ina d imeḥḍayen imeqqranen nni tuɣa ɣar ujeǧid n Suliman, mitayen u-xemsin [n yeryazen] nni tuɣa ittḍebbaren x řgens.
2CH 8:11 Suliman issgeɛɛed yeǧis n firɛun zi tendint n Dawud ɣar taddart i tuɣa i d as ibna, minzi inna: “Tamɣart inu war tzeddiɣ ca di taddart n Dawud, ajeǧid n Israil, minzi imucan mani dd-tusa Ttabut n SIDI, aqa aten qeddsen.
2CH 8:12 Xenni issgeɛɛed Suliman tiɣarṣa n wecmaḍ i SIDI x uɛalṭar n SIDI nni tuɣa ibna zzat i wesqif n wadaf [n Zzawect Tameqqrant],
2CH 8:13 ɛlaḥsab lfariḍa i kuř ass i tewhibt n tɣarṣa, am mammec [teqqar] tewṣeyyet n Musa i wussan n ssebt, i wussan n uyur n jdid u i třata řeɛyudat i ittwaggen i kuř aseggʷas: di Řɛid n Weɣrum břa Antun, di Řɛid n Ssimanat u di Řɛid n Iɛuccuten.
2CH 8:14 Am mammec dd-tusa lfariḍa n babas Dawud issbedd [ɛawed] tirbiɛin n ikehhanen i řxedmet nsen, d [terbiɛin] n Ilawiyyen i tsexxart nsen, ḥima ad ssemɣaren [di Zzawect Tameqqrant] u ad sexxaren i ikehhanen ɛlaḥsab awař [n lfariḍa] i kuř ass, uca [issbedd uřa] d iɛessasen n tewwart di terbiɛin nsen ɣar kuř tawwart, minzi ammu i yeǧa řumur n Dawud, aryaz n AREBBI.
2CH 8:15 Nitni war ḥeyyden ca řa deg ict n jjihet x řumur n ujeǧid i ikehhanen d Ilawiyyen, war iǧi uřa zi jjihet n ixxamen n txubay.
2CH 8:16 [Ammu] i tᵉttwasseqfeř marra řxedmet n Suliman zeg wass [n usarsi n] dsas n Taddart n SIDI ař akemmeř nnes, [wah ammu] i tᵉttwakemmeř Taddart n SIDI.
2CH 8:17 [Xenni] iruḥ Suliman ɣar Ɛiṣyun-Jabir u ɣar Aylat, ɣar tma n řebḥar, di temmurt n Idum.
2CH 8:18 S ufus n imsexxaren nnes issekk Ḥiram ɣares iɣarruba, uca imsexxaren nni issnen řebḥar, u nedhen ak-d imsexxaren n Suliman ɣar Ufir uca iwyen-dd ssenni arebɛa-mya u xemsin talint n wureɣ uca usin-dd [zzayes] ɣar ujeǧid Suliman.
2CH 9:1 Tajeǧidt n Caba tesřa x ccennɛet n Suliman uca, ḥima ad tqeǧeb Suliman s tḥuja n twafit, tusa-dd ɣar Urcalim s ijj n ukaravan s ddqeř [n wagřa] aṭṭas, s iřeɣman nni yarebbun řeɛṭur d waṭṭas n wureɣ d iẓra iɣřan u nettat tusa-dd ɣar Suliman uca tessiweř akides x marra min ɣares deg wuř.
2CH 9:2 Suliman icarḥ marra awařen nnes. War din uřa d ijj n wawař [s řemɛani] innuffaren i Suliman ařami war izemmar ad as t icarreḥ.
2CH 9:3 [Řami] teẓra tjeǧidt n Caba tiɣit n Suliman d taddart i ibna,
2CH 9:4 d macca x ṭṭabřa nnes, d mammec qqimen imsexxaren nnes, d mammec bedden ixeddamen nnes, d warruḍ nsen d iwarraden nnes d warruḍ nsen d mammec igeɛɛed am dd-igeɛɛed ɣar Taddart n SIDI, war iqqim dayes [ɛřaḥař] buḥbeř [ɛad].
2CH 9:5 Nettat tenna i ujeǧid: “Awař nni sřiɣ di temmurt inu x wawařen nnec u x tiɣit nnec, nican d tidett.
2CH 9:6 Necc war umineɣ ca s wawařen nni, ařami dd-usiɣ danita u [xenni] tiṭṭawin inu ẓrint aya. Xzar, azyen n tiɣit nnec tameqqrant war d ayi ittwanna. Aqa cek sennej x řexbar i [xak] sřiɣ.
2CH 9:7 Sseɛd n yeryazen nnec, sseɛd n imsexxaren nnec, inni ibedden zzat i wudem nnec řebda u ittesřan ɣar tiɣit nnec!
2CH 9:8 Ad ittwabarek SIDI, AREBBI nnec, wenni umi dd-tusid x řxaḍar ḥima ad cek yegg d ajeǧid i SIDI, AREBBI nnec, x řɛarc nnes. Minzi AREBBI ittexs aṭṭas ad yejj Israil ad teqqim i řebda, s uya igga cek d ajeǧid xasen i řebda, maḥend ad tegged řḥeqq d tsegda.”
2CH 9:9 Nettat tewca i ujeǧid mya u-ɛicrin talint n wureɣ d waṭṭas n řebzer d iẓra iɣřan. Řebzer am wanita i tewca tjeǧidt n Caba i ujeǧid Suliman, ɛemmarṣ war iǧi [ɛad].
2CH 9:10 Imsexxaren n Ḥiram i dd iwyen ureɣ zeg Ufir ak-d imsexxaren n Suliman, iwyen ɛawed akeccuḍ n [tcejjart n] ṣandal azeggʷaɣ d yeẓra iɣřan.
2CH 9:11 Ajeǧid igga zeg ukeccuḍ nni n [tcejjart n] ṣandel azeggʷaɣ ddrujat timeqqranin i Taddart n SIDI u i taddart n ujeǧid, uřa d řgambriyat d lharpat i imedyazen. Am man aya war t ẓrin ɛemmarṣ qbeř di temmurt n Yahuda.
2CH 9:12 Ajeǧid Suliman iwca i tjeǧidt n Caba marra min tuɣa dayes d meẓri, min ma tᵉttar, [wah, ktar zi] min dd ttiwi ɣar ujeǧid. [Xenni] tenneqřeb u teɛqeb ɣar temmurt nnes, nettat d imsexxaren nnes.
2CH 9:13 Řqedd n wureɣ i ittadfen ɣar Suliman deg ijj n useggʷas tuɣa setta-mya u-setta u-settin talint n wureɣ,
2CH 9:14 nhřa arbeḥ zeg iryazen imsewwqen i dd-ittennḍen [di temmurt] u zi tsebbabt n isebbaben, u nhřa arbeḥ n wureɣ d nnuqart i Suliman zeg marra ijeǧiden n temmurt n Ɛarabiyya u zi lwulat n temmurt.
2CH 9:15 Ajeǧid Suliman igga [ɛawed] mitayen n tseddariyin [n uɛeskari] timeqqranin s wureɣ ittwaddzen. X ict n tseddart ttwaggen setta-mya [ciqlu] n wureɣ.
2CH 9:16 [Yarni igga netta] teřt-mya n tseddariyin [n uɛeskari] s wureɣ ittwaddzen. Ttwaggent teřt-mya [cciqlu] n wureɣ deg ict n tseddart. Ajeǧid issars i-tent di Taddart n Wezɣar n Lubnan.
2CH 9:17 Ajeǧid igga ɛawed ijj n řɛarc ameqqran n řɛaj uca iɣeřf i-t s wureɣ iṣfan.
2CH 9:18 Řɛarc wanita ɣares setta n tareffidin u tᵉttwacedd ict n tneddabt n wureɣ i yiḍaren i řɛarc. Ɣar tnayen n iɣezdisen n řkursi tuɣa ǧan iɣaǧen u tnayen n wayraden tuɣa bedden zzat i iɣaǧen [n řɛarc].
2CH 9:19 Tenɛac n wayraden bedden ɣar tnayen n iɣezdisen x setta n tareffidin. Am netta war ittwagg [ɛad] uřa deg ict n tgeldit.
2CH 9:20 Marra iɣarrafen n tissit n Suliman [tuɣa aten] n wureɣ u marra řeqcuɛ n Taddart n Wezɣar n Lubnan [tuɣa aten] s wureɣ izedgen, war din nnuqart [dayes], [maɣar] deg wussan n Suliman tuɣa ḥessben tt d walu.
2CH 9:21 Maɣar ajeǧid tuɣa ɣares iɣarruba nni inedhen ɣar Tarcic ak-d imsexxaren n Ḥiram. Ict n twařa di třata n iseggʷusa usin-dd iɣarruba zi Tarcic, iwyen-dd ureɣ d nnuqart, řɛaj d ibaɣusen d iṭawsen.
2CH 9:22 Ajeǧid Suliman iɛdu marra ijeǧiden n ddunect deg wagřa d tiɣit.
2CH 9:23 Marra ijeǧiden n ddunect arzun [ad ẓaren] udem n Suliman, maḥend ad sřen ɣar tiɣit nnes i tuɣa issars AREBBI deg wuř nnes.
2CH 9:24 Nitni usin-dd aseggʷas awarni i umas, kuř ijj s tarzeft nnes, [s] řeqcuɛ n nnuqart, řeqcuɛ n wureɣ, arruḍ, řesnaḥ, řeɛṭur, iysan d isardan.
2CH 9:25 Suliman tuɣa ɣares arebɛa-ařaf n řkurit i iysan d ikarruten u i tenɛac-ařef n imnayen. Igga i-ten di tneddam n ikarruten u ɣar ujeǧid di Urcalim.
2CH 9:26 Netta iḥkem x marra ijeǧiden zeg iɣzar [Lfuraṭ] ař tammurt n Ifilisṭiniyyen u ař aymir n Miṣra.
2CH 9:27 Ajeǧid igga nnuqart di Urcalim am yeẓra u [ticejjura n] tengelt igga [i-ten] am yizemmuren nni [iǧan] aṭṭas di Temmurt Iwaṭan.
2CH 9:28 Iwyen-dd iysan i Suliman zi Miṣra u zi marra timmura.
2CH 9:29 Min iqqimen n imezruyen n Suliman, imezwura d ineggura, ma man aya [marra] war ittwazemmem ca deg wedlis n imezruyen n unabi Natan u di nnubuwa n Axiya Axiluni u deg iweḥḥan n umwařaw Yaɛdu x Yarubɛam, mmis n Nabaṭ?
2CH 9:30 Suliman iḥkem di Urcalim arebɛin n iseggʷusa x marra Israil.
2CH 9:31 Suliman igga ad yareyyeḥ jar řejdud nnes uca neḍřen t di tendint n babas Dawud. Mmis Raḥabɛam idweř d ajeǧid deg wemcan nnes.
2CH 10:1 Raḥabɛam yuyur ɣar Cakim, maɣar marra Israil tuɣa yusa-dd ɣar Cakim, ḥima ad t ggen d ajeǧid.
2CH 10:2 Umi isřa Yarubɛam, mmis n Nabaṭ, x man aya, umi t tuɣa ɛad di Miṣra - zeɛma netta tuɣa yarweř zeg wudem n ujeǧid Suliman - imsar [as] aqa iɛqeb-dd.
2CH 10:3 Ssekken-dd [ɣares], jjin ad xas řaɣan. Yusa-d Yarubɛam ak-d marra tamesmunt n Israil, ssiwřen nitni ak-d Raḥabɛam, nnan:
2CH 10:4 “Babac igga xaneɣ ijj n uzayřu iqseḥ. Xenni řexxu, sarxu řxedmet iqesḥen n babac uřa d azayřu ideqřen i xaneɣ igga, [xenni] ad cek nexdem.”
2CH 10:5 Netta inna asen: “Uyurem u ɛeqbem awarni i třata n wussan.” Uca yuyur řgens.
2CH 10:6 Imcawar ujeǧid Raḥabɛam ak-d imeqqranen nni tuɣa ibedden zzat i wudem n babas Suliman umi tuɣa ɛad iddar, inna: “S minzi i d ayi tweṣṣam ad dd-arreɣ x řgens-a?”
2CH 10:7 Nitni ssiwřen akides, nnan: “Mařa cek teggid s tcuni ak-d řgens-a, ad kidsen tegged ɣar řxaḍar nsen uca ad kidsen tessiwřed s wawařen icnan, [xenni] ad dewřen d imsexxaren nnec marra min iqqimen n ussan.”
2CH 10:8 [Maca] netta inḍar ccwar i d as tuɣa wcin imeqqranen uca imcawar ak-d iḥudriyyen nni tuɣa akides imɣaren u bedden řexxu zzat i wudem nnes.
2CH 10:9 Netta isseqsa i-ten: “S minzi i d aneɣ tweṣṣam ad narr x wawař n řgens, minzi sswiřen akidi, nnan: ‘Sarxu azayřu i xaneɣ igga babac.’”
2CH 10:10 Iḥudriyyen nni tuɣa mɣaren akides, ssiwřen akides, nnan: “Ammu i dd ɣa tarred x řgens i kidek issiwřen u nnan: ‘Babac issedqeř azayřu nneɣ, maca [řexxu] cek sarxu t xaneɣ!’, [wah,] ammu i kidsen i ɣa tessiwřed: ‘[Aḍaḍ] ameẓyan inu ad yiři d ameqqran x tejɛinna n baba.
2CH 10:11 Mařa baba iqqen awem ijj n uzayřu iqseḥ, [xenni] necc ad t ssdeqřeɣ [ɛad]. Mařa baba yarebbi kenniw s urekkuḍ, necc ad kenniw arebbiɣ s iɣarḍmiwen.’”
2CH 10:12 Deg wass wiss třata yusa-dd Yarubɛam ak-d marra řgens ɣar Raḥabɛam, am mammec tuɣa issiweř ujeǧid, tuɣa inna: “Ɛeqbem-dd ɣari awarni i třata n wussan!”
2CH 10:13 Ajeǧid yarra-dd x řgens s ijj n webrid iqesḥen, maɣar ajeǧid Raḥabɛam ismeḥ di ccwar n imeqqranen.
2CH 10:14 Issiweř akidsen ɛlaḥsab ccwar n iḥudriyyen, inna: “Necc ad ssdeqřeɣ ɛad azayřu nwem. Baba yarebbi kenniw s urekkuḍ, necc ad kenniw arebbiɣ s iɣarḍmiwen.”
2CH 10:15 Ajeǧid war isři ca ɣar řgens, maɣar aneqřeb-a tuɣa yusa-dd zi AREBBI, ḥima ad issemten SIDI awař i tuɣa issiweř s uqemmum n Axiya, Aciluni, ak-d Yarubɛam, mmis n Nabaṭ.
2CH 10:16 [Umi] iẓra marra Israil aqa ajeǧid war ɣarsen dd-isři ca, yarra-dd řgens x ujeǧid, inna: “Man tasɣart i ɣarneɣ ak-d Dawud? Neccin war ɣarneɣ bu tesɣart ak-d mmis n Yassa. Marra [kenniw,] uyurem ɣar iqiḍan nwem, [a] Israil! Řha řexxu ak-d taddart nnec, Dawud!” Uca marra Israil yuyur ɣar iqiḍan nsen.
2CH 10:17 Tuɣa Raḥabɛam d ajeǧid x ayt n Israil nni tuɣa izeddɣen di tneddam n Yahuda.
2CH 10:18 Ajeǧid Raḥabɛam issekk [ɣarsen] Aduram, wenni [iǧan] x ljizya, u ayt n Israil arjmen t s yeẓra ařami immut. Ajeǧid Raḥabɛam inya deɣya x ukarru, ḥima ad yarweř ɣar Urcalim.
2CH 10:19 [Ammu i] iɣewweɣ Israil x taddart n Dawud ař ass-a.
2CH 11:1 Raḥabɛam yusa-dd ɣar Urcalim uca issmun marra taddart n Yahuda d Binyamin, mya u-tmenyin-ařef [n iryazen] ittwafarzen, ttwadarrben x umenɣi, ḥima ad mmenɣen ak-d taddart n Israil, ḥima ad dd-arren tageldit ɣar Raḥubɛam.
2CH 11:2 [Xenni] yusa-dd wawař n AREBBI ɣar Camɛiya, aryaz n AREBBI, inna:
2CH 11:3 “Siweř ak-d Raḥabɛam, mmis n Suliman, ajeǧid n Yahuda, u ak-d marra Israil di [temmurt n] Yahuda d Binyamin, uca ini:
2CH 11:4 ‘Ammu i iqqar SIDI: War ttgeɛɛadem ca u war ttmenɣim ca ak-d aytmatwem. Ittxeṣṣa ad iɛqeb [kuř ijj n] weryaz ɣar taddart nnes, maɣar d man aya i imsaren zi ɣari.’” Nitni sřan ɣar wawař n SIDI uca ɛeqben, war uyuren ca ɣar Yarubɛam.
2CH 11:5 Raḥabɛam izdeɣ di Urcalim uca igga tineddam di Yahuda ad dewřent faryent.
2CH 11:6 Ibna Bayt-Laḥam, Ɛiṭam, Taquɛa,
2CH 11:7 Bayt-Ṣur, Suku, Ɛadullam,
2CH 11:8 Jat, Marica, Zif,
2CH 11:9 Adurayim, Laxis, Ɛaziqa,
2CH 11:10 Ṣurɛa, Ayyalun d Ḥabrun nni [iǧan] di Yahuda d Binyamin. Aqa-tent d tneddam ifaryen.
2CH 11:11 Issejhed lqelɛat u igga xasen řḥukkam u ixzen [daysent] macca, zzect d binu.
2CH 11:12 [Issars] tiseddariyin [n uɛeskari] timeqqranin d iḥricen di kuř tendint uca issejhed i-tent ař ṭṭarf. [Ammu i] tuɣa Yahuda d Binyamin [deg ufus] nnes.
2CH 11:13 Ikehhanen d Ilawiyyen nni [iǧan] di marra Israil, qqnen ɣares zi marra jjwayeh nsen.
2CH 11:14 Minzi Ilawiyyen jjin ddmani nsen d wagřa nsen uca usin-dd ɣar Yahuda d Urcalim, maɣar Yarubɛam d iḥenjiren nnes mmenḍaren ten zi tukehhant n SIDI.
2CH 11:15 [Xenni] yařeqqem Yarubɛam ikehhanen i yixef nnes i řegɛudi, i [řexyařat n] imuyan [ijennen] u i [řexyařat n] iɛejmiyyen nni tuɣa igga.
2CH 11:16 Awarni asen usin-dd [ɛawed] zi marra tiqebbař n Israil inni iwcin ixef nsen s wuř ḥima ad arzun SIDI, AREBBI n Israil, ḥima ad wehhben tiɣarṣa i SIDI, AREBBI n řejdud nsen.
2CH 11:17 [Ammu] ssjehden tageldit n Yahuda u ssmetnen Raḥabɛam, mmis n Suliman, třata n iseggʷusa. Maɣar nitni uyuren třata n iseggʷusa deg webrid n Dawud d Suliman.
2CH 11:18 Raḥabɛam yiwi Maḥlat, yeǧis n Yarimut, mmis n Dawud, uřa d Abiḥayil, yeǧis n Iliyab, mmis n Yassa, d tamɣart i yixef nnes.
2CH 11:19 Nettat turuw as-dd iḥenjiren[-a]: Yaɛuc, Camarya d Zaham.
2CH 11:20 Awarni as yiwi Maɛka, yeǧis n Abcalum [d tamɣart]. Nettat turuw as-dd Abiya, Ɛattay, Ziza d Calumit.
2CH 11:21 Raḥabɛam tuɣa ittexs Maɛka, yeǧis n Abcalum, aṭṭas x temɣarin nnes nneɣnit d x tiyya nnes. Aqa yiwi Raḥabɛam tmenṭac n temɣarin d settin n tiyya. Netta yejj-dd tmenya u-ɛicrin n iḥenjiren d settin n yessis.
2CH 11:22 Raḥabɛam igga Abiya, mmis n Maɛka, d azeǧif, ḥima ad yiři d řḥakem jar aytmas, ḥima ad t yarr d ajeǧid.
2CH 11:23 [Raḥabɛam] igga s řeɛqeř uca ibḍa marra iḥenjiren nnes x marra timmura n Yahuda d Binyamin u di marra tineddam ifaryen. Netta iwca asen macca s waṭṭas u yarzu asen ijj n ubarru n temɣarin.
2CH 12:1 Umi tuɣa Raḥabɛam issemten tagelda [deg ufus nnes] u tuɣa ijhed, iwḍa netta zi Ccariɛa n SIDI, netta uřa d marra Israil akides.
2CH 12:2 Deg useggʷas wiss xemsa n ujeǧid Raḥabɛam, imsar - minzi nitni tuɣa ɣewwɣen x SIDI - aqa Cicak, ajeǧid n Miṣra, igeɛɛed ḍidd Urcalim
2CH 12:3 s mitayen-ařef n ikarruten [n řɛeskar], settin-ařaf n imnayen d ijj n řgens war izemmar ad ittwaḥseb ca i dd-yusin akides zi Miṣra: Ilibiyyen, Isukkiyyen d Ikuciyyen.
2CH 12:4 Netta iṭṭef tineddam ifaryen n Yahuda uca yusa-dd ɣar Urcalim.
2CH 12:5 Xenni yusa-dd unabi Camɛiya ɣar Raḥabɛam u ɣar řḥukkam n Yahuda, inni tuɣa imunen di Urcalim di ssibbet n Cicak, inna asen: “Ammu i iqqar SIDI: ‘Minzi kenniw tḥeyydem xafi, x uya ḥeyydeɣ uřa d Necc xawem, jjiɣ kenniw deg ufus n Cicak.’”
2CH 12:6 [Xenni] ssehwan řḥukkam n Israil d ujeǧid ixef nsen, nnan: “SIDI d amsegged!”
2CH 12:7 Umi iẓra SIDI, aqa nitni ssehwan ixef nsen, iffeɣ wawař n SIDI ɣar Camɛiya, inna: “Nitni ssehwan ixef nsen. Necc war ten teḥḥiɣ ca, maca ad asen dd-awyeɣ asenjem deɣya, maḥend asɛar inu s ufus n Cicak war ittwaziǧiɛ ca x Urcalim,
2CH 12:8 maca ad dewřen d imsexxaren nnes, ḥima ad ssnen [řfarq jar] tasexxart i Necc d tsexxart i tgeldiwin n temmura.”
2CH 12:9 Uca Cicak, ajeǧid n Miṣra, igeɛɛed ḍidd i Urcalim u yiwi marra tixubay n Taddart n SIDI d txubay n taddart n ujeǧid. Netta yiwi [akis] marra, uřa d tiseddariyyin [n uɛeskari] n wureɣ i tuɣa igga Suliman.
2CH 12:10 Deg wemcan nsent igga ujeǧid Raḥabɛam tiseddariyin [n uɛeskari] n nnḥas. Igga i-tent deg ifassen n imeqqranen x ireqqasen n tazřa nni tuɣa ittɛessan ɣar wadaf n taddart n ujeǧid.
2CH 12:11 Meřmi ma i ɣa yadef ujeǧid ɣar Taddart n SIDI, imsar, aqa ireqqasen n tazřa usin-dd, arebbun tent u iwyen tent xenni ɛawed ɣar wexxam n ireqqasen n tazřa.
2CH 12:12 Umi isswaḍeɛ Řaḥabɛam ixef nnes, ijja weɣḍab n SIDI xas, ařami war t iḍeyyeɛ marra. Tuɣa din ɛad di Yahuda timesřayin ṣebḥent.
2CH 12:13 Ajeǧid Raḥabɛam issejhed ixef nnes uca iqqim iḥekkem. Raḥabɛam [tuɣa] ɣares waḥit u-rebɛin n iseggʷusa umi idweř netta d ajeǧid. Netta iḥkem sbeɛṭac n iseggʷusa di Urcalim, di tendint i ixḍar SIDI zi jar marra tiqebbař n Israil ḥima ad din issemten Isem nnes. Yemmas qqaren as Niɛma, [tenni d] Taɛammunit.
2CH 12:14 Igga min iǧan d aɛeffan, maɣar war issewjed uř nnes maḥend ad yarzu x SIDI.
2CH 12:15 Imezruyen n Raḥabɛam, imezwura d ineggura, uřa d imenɣan jar Raḥabɛam d Yarubɛam di marra ussan, ma nitni war ttwazemmemen ca deg wawařen n unabi Camɛiya d umwařaw Ɛiddu di ṭṭweɛ n listat n jjadira?
2CH 12:16 Raḥabɛam igga ad yareyyeḥ jar řejdud nnes. Netta ittwanḍeř jar řejdud nnes di tendint n Dawud. Mmis Abiya idweř d ajeǧid deg wemcan nnes.
2CH 13:1 Deg useggʷas wiss tmenṭac n ujeǧid Yarubɛam, mmis n Nabaṭ, idweř Abiya d ajeǧid x Yahuda.
2CH 13:2 Netta iḥkem třata n iseggʷusa di Urcalim. Yemmas qqaren as Mixa-Yahu, yeǧis n Uriyil zi Jibɛa. Tuɣa [din] umenɣi jar Abiya d Yarubɛam.
2CH 13:3 Abiya issekkar amenɣi s ijj n řɛeskar n ayt n bu-teɣruḍt imeḥḍen, arebɛa-myat-ařef n yeryazen ittwafarzen, uca Yarubɛam igga aseddi s temn-myat-ařef n yeryazen ittwafarzen, ayt n bu-teɣruḍt imeḥḍen.
2CH 13:4 Ibedd Abiya x tqiccat n wedrar n Ṣamarayim nni [iǧan] x idurar n Ifrayim, inna: “Sřem ɣari, Yarubɛam d marra Israil!
2CH 13:5 Ma war tessinem ca aqa SIDI, AREBBI n Israil, iwca tagelda x Israil s yijj n řɛahd n tmeǧaḥt i Dawud u i iḥenjiren nnes i řebda?
2CH 13:6 [Maca] Yarubɛam, mmis n Nabaṭ, amsexxar n Suliman, mmis n Dawud, ikkar uca iɣewweɣ x sidis nnes.
2CH 13:7 Iryazen ixwan, ayt i war isekkwin, usin-dd ɣares uca ssjehden ixef nsen ḍidd i Raḥabɛam, mmis n Suliman, umi Raḥabɛam tuɣa ɛad d ameẓyan d aḥnin n wuř u war izemmar akidsen imqudda.
2CH 13:8 Uca řexxu, ittɣiř awem ad tiřim tjehdem x tgeldit n SIDI, tenni [iǧan] deg ifassen n iḥenjiren n Dawud. Waxxa, kenniw s yijj n řɣaci ameqqran i teǧam, maca ɣarwem iɛejmiyyen n wureɣ nni igga Yarubɛam d irebbiten i kenniw.
2CH 13:9 Ma war tenḍarem kenniw ikehhanen n SIDI, arraw n Harun d warraw n Lawi, u teggim i yixef nwem ikehhanen am mammec [tt tteggen] řegnus di [marra] timmura? Marra wenni dd-yusin s yijj n ufunas, ameẓyan n tfunast, u s sebɛa n icarriyyen i ixsen ad ittwagg d akehhan, aqa idweř d akehhan n yinni war iǧin ca d irebbiten.
2CH 13:10 Maca xaneɣ, aqa SIDI d AREBBI nneɣ, u neccin war xas nḥeyyed ca, u ikehhanen nni isexxaren i SIDI, aqa aten d arraw n Harun, u Ilawiyyen [bedden akidsen] di řxedmet.
2CH 13:11 Kuř ṣṣbeḥ d tmeddit ssbexxaran tiɣarṣa n wecmaḍ i SIDI. Uca [ḥḍan] ɛawed x řebxur ittfuḥen d usettef n weɣrum n wescan x tzewḍa tezdeg u x řqendiř n wureɣ u x řefnarat, ḥima ad tent ssarɣen kuř tameddit, maɣar neccin nxezzar ɣar tsexxart n SIDI, AREBBI nneɣ, maca kenniw tḥeyydem xas.
2CH 13:12 Xzarem, AREBBI aqa-t akidneɣ ɣar zzatneɣ, u ɣarneɣ uřa d ikehhanen nnes ak-d řebwaq i usuḍi s wesruddeḥ, maḥend ad daysen suḍen s wesruddeḥ. [A] ayt n Israil, war ttmenɣam ca ak-d SIDI, AREBBI n řejdud nwem, maɣar kenniw war tfřiḥim ca.”
2CH 13:13 [Maca] Yarubɛam ijja [ict n tesɣart n yeryazen nnes] ad ggen ict n ddura maḥend ad ggen taxceft ɣar ḍeffar nsen. Nitni tuɣa aten zzat i wudem n Yahuda, u ɣar ḍeffar [n yeryazen n Yahuda] tuɣa din řfex.
2CH 13:14 [Umi] nqeřben [ayt n] Yahuda, ẓrin, aqa amenɣi tuɣa-t zi zzat d zi ḍeffar. Nitni sɣuyen ɣar SIDI uca suḍen ikehhanen di řebwaq.
2CH 13:15 Iryazen n Yahuda ssgeɛɛden deg iɣuyyan n umenɣi u řami ssgeɛɛden iryazen n Yahuda deg iɣuyyan, imsar, aqa AREBBI iwta Yarubɛam d marra Israil zzat i tiṭṭawin n Abiya d Yahuda.
2CH 13:16 Arrawen n Israil arewřen zzat i wudem n Yahuda uca AREBBI igga i-ten deg ufus nsen.
2CH 13:17 Abiya ak-d řgens nnes, wtin ten s ict n tecti d tameqqrant, minzi wḍan [zzaysen] xemsa-myat-ařef n yeryazen ittwafarzen zi Israil.
2CH 13:18 [Ammu] i dewřen ayt n Israil nnbehtřen di řweqt nni, maca ayt n Yahuda dewřen jehden, minzi ttecřen x SIDI, AREBBI n řejdud nsen.
2CH 13:19 Abiya iḍfar Yarubɛam uca iṭṭef zzayes tineddam Bayt-Il ak-d tneddam i ɣares dd-iqqnen, Yacana ak-d dcurat nnes d Ifrun ak-d tneddam i ɣares dd-iqqnen.
2CH 13:20 War teqqim ɛad jjehd ɣar Yarubɛam deg wussan n Abiya. Ɣar uneggar iwta i-t SIDI, ařami immut.
2CH 13:21 Abiya [maca] idweř yarenni di jjehd. Netta yiwi arbeɛṭac n temɣarin i yixef nnes u ijja-dd tnayen u-ɛicrin n warrawen d seṭṭac n yessis.
2CH 13:22 Min iqqimen n imezruyen n Abiya, am tebridin nnes am wawařen nnes, aqa man aya [marra] ittwazemmem deg wedlis n tɣuri n unabi Ɛiddu.
2CH 13:23 Abiya igga ad yareyyeḥ jar řejdud nnes uca neḍřen t di tendint n Dawud, uca mmis Asa idweř d ajeǧid deg wemcan nnes. Deg wussan nnes tuɣa din ɛecra n iseggʷusa n řhudnet di temmurt.
2CH 14:1 Asa igga [min iǧan] nican di tiṭṭawin n SIDI, AREBBI nnes.
2CH 14:2 Netta ikkes iɛalṭaren n [irebbiten] iɣriben d řegɛudi uca yarẓa imayḍuten [iqeddsen] uca ihdem tirebbin n cwarti.
2CH 14:3 Netta inna i Yahuda, ad arzun SIDI, AREBBI n řejdud nsen uca ad ḍfaren Ccariɛa d tewṣeyyet.
2CH 14:4 Netta ikkes [ɛawed] řegɛudi d ipilaren n arebbi n tfuct zi marra tineddam n Yahuda. Tageldit tuɣa ɣares řhudnet sadu netta.
2CH 14:5 Ibna tineddam ifaryen di Yahuda maɣar tammurt tuɣa dayes řhudnet. War tuɣi din amenɣi akides deg iseggʷusa nni, minzi SIDI iwca as řhudnet.
2CH 14:6 Netta inna i Yahuda: “Ejj aneɣ ad nebna tineddam-a uca ad tent nessar s řeḥyuḍ d lburjat d tewwura d iɛumad i ubelleɛ, maɣar tammurt ɛad zzatneɣ [s řhudnet], minzi neccin narzu x SIDI, AREBBI nneɣ, narzu xas u Netta iwca aneɣ řhudnet.” U nitni bnan uca feřḥen.
2CH 14:7 Asa tuɣa ɣares ijj n řɛeskar n teřt-myat-ařef [n yeryazen] zi Yahuda, inni iksin taseddart [n uɛeskari] tameqqrant d lansa, mitayen u-tmenyin-ařef [n yeryazen] zi Binyamin, inni yarebbun taseddart [n uɛeskari] u zemmaren x řqews. Nitni marra tuɣa aten d ayt n bu-teɣruḍt imeḥḍen.
2CH 14:8 Iffeɣ Akuci, qqaren as Zaraḥ [i umenɣi] akidsen s yijj n řɛeskar n ijj n melyun [n yeryazen] d teřt-mya n ikarruten. Netta yusa-dd ař Marica.
2CH 14:9 Iffeɣ Asa i umsagar akides uca sedden nitni ixef nsen i umenɣi di teɣzurt n Ṣafata ɣar Marica.
2CH 14:10 Asa iřaɣa ɣar SIDI, AREBBI nnes, inna: “[A] SIDI, aya isheř xak ḥima ad tadfed jar [yenni deg] waṭṭas d [yenni] war ɣar iǧi jjehd. Ɛawen aneɣ, [a] SIDI, AREBBI nneɣ, maɣar nettceř xak u nusa-dd qibač i řɣaci-ya s Yisem nnec. [A] SIDI, Cek d AREBBI nneɣ, war ttejji uřa d ijj n weryaz ad akidek immɛařa.”
2CH 14:11 Uca SIDI iwta ayt n Kuc zzat i wudem n Asa d Yahuda, uca arewřen [ayt n] Kuc.
2CH 14:12 Asa d řgens i tuɣa akides, ḍfaren ten ař Jarar. Wḍan aṭṭas zeg [ayt n] Kuc ařami war zemmaren ad bedden ɛad, minzi nitni ttwaɣeřben zzat i wudem n SIDI d řɛeskar nnes. Nitni ṭṭfen ict n tkeccaḍt d tameqqrant.
2CH 14:13 Nitni wtin marra tineddam i dd-innḍen i Jarar, maɣar arrehbet n SIDI [tewḍa-dd] xasent. Nitni keccḍen marra tineddam, maɣar tuɣa tban-dd daysent aṭṭas n tkeccaḍt.
2CH 14:14 Nitni hedmen uřa d iqiḍan n řmař uca ṭṭfen uǧi d iřeɣman. [Xenni] ɛeqben ɣar Urcalim.
2CH 15:1 [Xenni] yusa-dd Arruḥ n AREBBI x Ɛazarya, mmis n Ɛudid.
2CH 15:2 Netta yuyur ibedd zzat i Asa, inna as: “Seř-dd ɣari, Asa d marra [ayt n] Yahuda d Binyamin! SIDI aqa-t akidwem u kenniw akides. Mařa tarezzum xas, Netta ad kenniw yarr ad t tafem, maca mařa kenniw tḥeyydem xas, ad xawem iḥeyyed uřa d Netta.
2CH 15:3 Aṭṭas n wussan i iqqim Israil břa AREBBI n tidett u břa ijj n ukehhan issɣaran u břa Ccariɛa.
2CH 15:4 Mařa dewřen-dd nitni ɣar SIDI, AREBBI n Israil, di řeḥṣaret u arzun xas, ijja i-ten ad t afen.
2CH 15:5 Deg wussan nni war din tuɣi řehna i wenni dd-iffɣen u i wenni yareggʷḥen, maɣar aqa din aṭṭas n řeḥweř jar marra imezdaɣ n temmura.
2CH 15:6 [Ijj n] řgens ittwaɛfes zeg ijj n řgens [nneɣni], u ict n tendint zeg ict n tendint [nneɣnit], maɣar AREBBI issiggʷed i-ten s kuř řeḥṣařet.
2CH 15:7 Kenniw [maca] iřim d iryazen, war ttejjim ad arxun ifassen nwem, maɣar aqa din řmunet i řxedmet nwem.”
2CH 15:8 Umi Asa isřa awařen-a d nnubuwa n unabi Ɛudid, issejhed ixef nnes uca issbeɛɛed nnɛawat n l’aṣnam zi marra tammurt n Yahuda d Binyamin u zi marra tineddam nni tuɣa iṭṭef x idurar n Ifrayim uca iɛdeř aɛalṭar n SIDI, wenni [iǧan] zzat i wesqif n wadaf [i Zzawect Tameqqrant] n SIDI.
2CH 15:9 Issmun marra Yahuda d Binyamin, uřa d ibarraniyyen zeg Ifrayim, Manassa u Cimɛun, maɣar aṭṭas zi Israil ɛdun ɣares, umi nitni ẓrin, aqa SIDI, AREBBI nnes, tuɣa-t akides.
2CH 15:10 Nitni munen di Urcalim deg uyur wiss třata, deg useggʷas wiss xemmesṭac n tgelda n Asa.
2CH 15:11 Deg wass nni wehhben nitni sebɛa-mya n ifunasen d tfunasin d sebɛa-ařaf n wuǧi d tɣarṣt i SIDI zi tkeccaḍt i kidsen iwyen.
2CH 15:12 Nitni udfen ɣar ijj n Řɛahd maḥend ad arzun SIDI, AREBBI n řejdud nsen, s marra uř nsen u s marra řeɛmar nsen.
2CH 15:13 Marra wenni war yarezzun x SIDI, AREBBI n Israil, ittxeṣṣa ad ittwaneɣ, am umeẓyan am umeqqran, am weryaz am temɣart.
2CH 15:14 Nitni jjuǧen i SIDI s tmijja tejhed u s usřewřiw, ɣar wesruddeḥ n řebwaq d waccawen n icarri.
2CH 15:15 Marra Yahuda tfarḥ x tjaǧit, maɣar nitni ggin tt s marra uř nsen umi nitni arzun xas s marra arḍa nsen, u Netta ijja i-ten ad t afen uca SIDI iwca asen řhudnet zi marra iɣezdisen nsen.
2CH 15:16 Issḥeyyed Asa uřa d ḥennas Maɛka zi jjehd nnes, maɣar nettat tuɣa tegga ict n jjɛifect n řexyař i trebbit n cwarti. Asa iceqqar jjɛifect nnes, iřbez i-tt uca isscemḍ i-tt ɣar teɣzart n Qidrun.
2CH 15:17 War ttwaḥeyydent řegɛudi, maca uř n Asa tuɣa icḍar [nican i SIDI], marra ussan [n tudart] nnes.
2CH 15:18 Tiwhibin iqeddsen n babas d min tuɣa issqeddes netta [s yixef nnes] yiwyi-t di Taddart n AREBBI, uřa d tiwhibin nnes iqeddsen: nnuqart d wureɣ d řeqcuɛ [nneɣni].
2CH 15:19 War din iqqim [ɛad] umenɣi ař aseggʷas wiss xemsa u-třatin n tgelda n Asa.
2CH 16:1 Deg useggʷas wiss setta u-třatin n tgelda n Asa, iffeɣ Baca, ajeǧid n Israil, [i umenɣi] ak-d Yahuda. Ibna Rama, ḥima war ittejji uřa d ijj ad iffeɣ ɣar barra niɣ ad dd-iɛqeb ɣar Asa, ajeǧid n Yahuda.
2CH 16:2 [Xenni] iksi Asa marra nnuqart d wureɣ zeg ixxamen n txubay zi Taddart n SIDI u zi taddart n ujeǧid uca issekk [marra] aya ɣar Binhadad, ajeǧid n Aram, wenni tuɣa izeddɣen di Dimacq, inna:
2CH 16:3 “[Aqa din] ijj n řɛahd jar ayi d cek, jar baba d babac. Xzar, necc ad ac dd-ssekkeɣ nnuqart d wureɣ. Ruḥ cek, fsiy řɛahd nnec ak-d Baɛca, ajeǧid n Israil, maḥend netta ad igeɛɛed ad xafi iggʷej.”
2CH 16:4 Binhadad isřa ɣar ujeǧid Asa u issekk ikumandaren n řɛeskar nni ɣares [iǧan] ɣar tneddam n Israil. Nitni ɣeřben x Ɛiyun d Dan d Abal-Mayim uřa x marra tineddam n řexzen n Naftali.
2CH 16:5 Umi isřa Baɛca man aya, imsar, aqa netta issbedd řebni n Rama uca ismeḥ di řxedmet nnes.
2CH 16:6 [Xenni] yiwi ujeǧid Asa marra [ayt n] Yahuda u nitni ksen iẓra n Rama uřa d tiḥenya nnes i zi tuɣa tt ibna Baɛca, uca ibna zzayes Jabɛa d Miṣfa.
2CH 16:7 Deg wussan nni yusa-dd umwařaw Ḥanani ɣar Asa, ajeǧid n Yahuda, inna as: “Minzi tᵉttecřed x ujeǧid n Aram u war iǧi x SIDI, AREBBI nnec, x uya yarweř řɛeskar n ujeǧid n Aram zeg ufus nnec.
2CH 16:8 Ma war tuɣi uřa d [ayt n] Kuc d [ayt n] Libiya s yijj n řɛeskar ameqqran ak-d waṭṭas n ikarruten d imnayen? Maca minzi tᵉttecřed x SIDI, iwca i-ten Netta deg ufus nnec,
2CH 16:9 maɣar tḥewwment tiṭṭawin n SIDI x tammurt am tekmeř, ḥima ad ibedd s jjehd ak-d yinni iǧan s wuř imun [akides]. Di man aya teggid tubbuheřya, maɣar zi řexxu d tsawent ad [din] iřin imenɣan akidek.”
2CH 16:10 Asa ihaj x umwařaw uca ijja ad t ggen deg ukeccuḍ di řeḥbes, maɣar [ammu i] d as tuɣa isxeḍ x uya. Di řweqt nni d ict iḥṣar Asa [ca] zi řgens.
2CH 16:11 Xzar, imezruyen n Asa, imezwura d ineggura, xzar, aqa ttwazemmemen deg wedlis n ijeǧiden n Yahuda d Israil.
2CH 16:12 Deg useggʷas wiss tesɛa u-třatin n tgelda nnes ihřec Asa zeg iḍaren. [Maca] di tqiccet n řehřac nnes uřa řami tuɣa ihřec, war yarzu ca x SIDI, maca x imesgenfan [waha].
2CH 16:13 Asa igga ad yareyyeḥ jar řejdud nnes. Immut deg useggʷas wiss waḥit u-rebɛin zi řeḥkamet nnes.
2CH 16:14 Neḍřen t deg wenḍeř i tuɣa igga i yixef nnes di tendint n Dawud uca ssarsen t x qama i tuɣa tɛemmar s řeɛṭur d marra min iǧan d ddarbat [ifarzen] zi min ixeǧḍen s ufus n uḥrayfi. Nitni qqden as timessi d tameqqrant aṭṭas.
2CH 17:1 Mmis Yahucafaṭ idweř d ajeǧid deg wemcan nnes u netta issejhed ixef nnes ḍidd i Israil.
2CH 17:2 Netta yiwi řɛeskar ɣar marra tineddam ifaryen n Yahuda u igga řɛeskarat [n uḥewwes] di temmurt n Yahuda u di tneddam n Ifrayim, tinni i tuɣa iṭṭef babas Asa.
2CH 17:3 SIDI tuɣa-t ak-d Yahucafaṭ, maɣar netta iḍfar ibriden imezwura n babas Dawud, war yarzu ca x ‘Ibaɛlen’,
2CH 17:4 maca [yarzu] x AREBBI n babas uca yuyur di tweṣṣa nnes, war iggi am [t igga] Israil.
2CH 17:5 SIDI issemten tagelda [tenni] deg ufus nnes, u marra Yahuda yiwi tarzifin i Yahucafaṭ. Idweř ɣares aṭṭas n wagřa d ccan.
2CH 17:6 Uř nnes ittwassemḥeḍ deg ibriden n SIDI u netta ikkes uřa d řegɛudi d trebbin n cwarti zi Yahuda.
2CH 17:7 Deg useggʷas wiss třata n řeḥkamet nnes issekk [ict n tebrat] i řḥukkam nnes, i Bin-Ḥayil, Ɛubadya, Zakariyya, Nataniyil d Mixa-Yahu, ḥima ad ssɣaren di tneddam n Yahuda.
2CH 17:8 [Ruḥen] akidsen Ilawiyyen Camɛiya, Natanya, Zabadya, Ɛasa’il, Camiramut, Yunatan, Tubiya d Ṭub-Aduniya, [marra nitni d] Ilawiyyen, uca uřa d ikehhanen Alicamaɛ d Yahuram [ruḥen] akidsen.
2CH 17:9 Nitni ssɣaren di Yahuda u tuɣa ɣarsen adlis ittwannḍen n Ccariɛa n SIDI. Kkin marra tineddam n Yahuda uca ssɣaren řgens.
2CH 17:10 Tusa-dd arrehbet n SIDI x marra tigeldiwin n temmura i-dd-innḍen i Yahuda, ařami war ssekkarent amenɣi ak-d Yahucafaṭ.
2CH 17:11 Zeg Ifilisṭiniyyen iwyen tarzifin d nnuqart am ljizya i Yahucafaṭ. Uřa d Aɛraben ssekken as uǧi: sebɛa-ařaf u-sebɛa-mya n icarriyyen d sebɛa-ařaf u-sebɛa-mya n imuyan.
2CH 17:12 Ammu i idweř Yahucafaṭ yarni di řemɣaret ař ṭṭarf uca ibna lqelɛat d tneddam n řexzen di Yahuda.
2CH 17:13 Tuɣa ɣares aṭṭas n řxedmet di tneddam n Yahuda, uřa d iɛeskariyyen, ayt n bu-teɣruḍt imeḥḍen, di Urcalim.
2CH 17:14 D wanita d řqedd nsen ɛlaḥsab tudrin n ibabaten nsen. Di Yahuda [aqa ina] d řqebṭanat x řuřuf: ameqqran Adna u akides teřt-myat-ařef n ayt n bu-teɣruḍt imeḥḍen.
2CH 17:15 Ɣar uɣezdis nnes řqebṭan Yahunatan, akides mitayen u-tmanyin-ařef [n yeryazen].
2CH 17:16 Ɣar uɣezdis nnes [ameqqran] Ɛamasya, mmis n Zikri, wenni tuɣa isebbřen ixef nnes s řxaḍar, u akides mitayen-ařef n ayt n bu-teɣruḍt imeḥḍen.
2CH 17:17 Zi Binyamin [tuɣa] Aliyadaɛ, ijj n bu-teɣruḍt imeḥḍen, [d ameqqran nsen], u akides mitayen-ařef [n yeryazen] s řqews d tseddart [n uɛeskari] i umenɣi.
2CH 17:18 Ɣar uɣezdis nnes [ameqqran] Yahuzabad u akides mya u-tmanyin-ařef [n yeryazen], [marra] ḥezzmen i umenɣi.
2CH 17:19 Ina tuɣa ttsexxaren i ujeǧid, břa inni i tuɣa igga ujeǧid x tneddam ifaryen di marra Yahuda.
2CH 18:1 Yahucafaṭ ɣares agřa d ccan s ufeyyeḍ, u netta igga ad idweř d aḍeggʷař ak-d Axab.
2CH 18:2 Awarni ca n iseggʷusa ihwa-dd ɣar Axab, ɣar Samarya. Axab iɣarṣ i waṭṭas n wuǧi d ifunasen i řgens i tuɣa akides iǧan uca iɣwa t ad iffeɣ [ɣar umenɣi] ɣar Ramut-Jilɛad.
2CH 18:3 Axab, ajeǧid n Israil, inna i Yahucafaṭ, ajeǧid n Yahuda: “Zeɛma ad kidi teffɣed ɣar Ramut di Jilɛad?” Inna Yahucafaṭ i ujeǧid n Israil: “Necc [ad iřiɣ] am cek, řgens inu am řgens nnec u neccin ad kidek [neffeɣ] ɣar umenɣi.”
2CH 18:4 Inna Yahucafaṭ [ɛawed] i ujeǧid n Israil: “Seqsa ɛafak ass-a x wawař n SIDI.”
2CH 18:5 [Xenni] issmun ujeǧid n Israil inabiyyen, arebɛa-mya n yeryazen, inna asen: “Ma ad ffɣeɣ ɣar umenɣi ɣar Ramut di Jilɛad niɣ ad ggeɣ bnaqes?” Nnan: “Geɛɛed, maɣar AREBBI ad ten iwc deg ufus n ujeǧid.”
2CH 18:6 [Maca] Yahucafaṭ inna: “Ma war da ca ɛad anabi n SIDI, maḥend ad [nzemmar] ad t nesseqsa?”
2CH 18:7 [Xenni] inna ujeǧid n Israil i Yahucafaṭ: “Aqa da ɛad ijj n weryaz zzayes i nzemmar ad nesseqsa SIDI. Maca necc carheɣ t, maɣar netta war d ayi ittnebba ɛemmarṣ s min iṣebḥen, maca mɣir s [min iǧan] d aɛeffan. Aqa d Mixa-Yahu, mmis n Yimla.” Inna Yahucafaṭ “War ttejji ajeǧid ad issiweř amenni!”
2CH 18:8 [Xenni] iřaɣa-dd ujeǧid n Israil i yijj n umsexxar amcenneɛ, inna: “Deɣya awi-dd Mixa-Yahu, mmis n Yimla.”
2CH 18:9 Ajeǧid n Israil d Yahucafaṭ, ajeǧid n Yahuda, qqimen [din], kuř ijj x řɛarc nnes, yarḍen arruḍ n ijeǧiden, [qqimen] x unedrar ɣar wadaf n tewwart [n tendint] n Samarya u marra inabiyyen tuɣa ttnebban zzat i wudem nsen.
2CH 18:10 Ṣidqiya, mmis n Kanɛana, tuɣa igga i yixef nnes accawen n wuzzař, inna: “Ammu i iqqar SIDI: ‘S yina i ɣa tessnuqqbed ayt n Aram ař ten ɣa teqḍiḍ marra.’”
2CH 18:11 Marra inabiyyen tuɣa ttnebban kifkif, nnan: “Geɛɛed ɣar Ramut di Jilɛad, ad tiřid tfeřḥed, minzi SIDI ad ten iwc deg ufus n ujeǧid.”
2CH 18:12 Areqqas nni tuɣa iṭṭfen [abrid] ḥima ad iřaɣa i Mixa-Yahu, issiweř akides, inna: “Xzar xenni, awařen n inabiyyen [axmi dd-ffɣen] zeg ijj n uqemmum s řxir ɣar ujeǧid. Ttzawgeɣ ad iřin wawařen nnec am wawařen nsen, ini min iṣebḥen.”
2CH 18:13 [Maca] Mixa-Yahu inna: “S tidett am iddar SIDI, min d ayi ɣa yini AREBBI, ad t iniɣ.”
2CH 18:14 [Umi] dd-yusa netta ɣar ujeǧid, inna as ujeǧid: “Mixa, ma ad neffeɣ neccin ɣar Ramut di Jilɛad niɣ ad negg bnaqes?” Inna as netta: “Gaɛɛdem, ad tiřim tfeřḥem, minzi nitni ad ttwaggen deg ufus nwem.”
2CH 18:15 Inna as ujeǧid: “Mecḥař n twařawin i d ayi ittxeṣṣa ad ac ssjaǧeɣ, war d ayi tennid mɣir tidett s Yisem n SIDI?”
2CH 18:16 [Xenni] inna wanita: “Necc ẓriɣ marra Israil ttwabezzɛen x idurar am wuǧi i war ɣar iǧi Umeksaw. Iqqar SIDI: ‘Ina war ɣarsen bu isiditen, ejj [kuř] aryaz ad dd-idweř ɣar taddart nnes di řehna.’”
2CH 18:17 [Xenni] inna ujeǧid n Israil i Yahucafaṭ: “Ma war d ac nniɣ: ‘Netta war xafi ittnebba ca di min iṣebḥen, [maca] mɣir s [min iǧan] d aɛeffan’?”
2CH 18:18 [Xas uca] inna wanita [ɛawed]: “S uya seř i wawař n SIDI. Aqa ẓriɣ SIDI iqqim x řɛarc nnes u marra řɛeskar n ujenna ibedd x yefus nnes d uzeřmaḍ nnes,
2CH 18:19 uca SIDI inna: ‘Man wen i ɣa iɣwan Axab, ajeǧid n Israil, ḥima ad igeɛɛed, ad iwḍa di Ramut di Jilɛad?’ Wa inna ammu u win inna ammu.
2CH 18:20 [Xenni] iffeɣ-dd ijj n arruḥ, ibedd-dd zzat i wudem n SIDI, inna: ‘Necc ad t ɣwiɣ.’ Isseqsa t SIDI: ‘S min zi?’
2CH 18:21 Netta inna: ‘Necc ad dd-ffɣeɣ u ad dewřeɣ d ijj n buḥbeř issxarriqen deg uqemmum n marra inabiyyen nnes.’ U Netta inna: ‘Ad tawḍed maḥend ad t teɣwid. Ffeɣ, egg amenni!’
2CH 18:22 [Xenni] řexxu, xzar, SIDI iwca ijj n buḥbeř issxarriqen deg ufus n inabiyyen nnec u SIDI ibarreḥ xak s min iǧan d aɛeffan.”
2CH 18:23 [Xenni] iqarreb-dd Ṣidqiya, mmis n Kanɛana, ɣar Mixa-Yahu, iwwet i-t ɣar uɣesmir, inna: “X man abrid tuɣa izemmar ad zzayi iɛdu Arruḥ n SIDI ḥima ad kidek issiweř?”
2CH 18:24 Inna Mixa-Yahu: “Xzar, ad t tẓared deg wass nni di ɣa temhafed zeg [ijj n] wexxam ɣar wexxam nneɣni ḥima ad tessnuffared ixef nnec.”
2CH 18:25 Ajeǧid n Israil inna: “Ṭṭfem Mixa-Yahu, nedhem ɛawed t ɣar Amun, ameqqran n tendint, u ɣar Yuwac, mmis n ujeǧid,
2CH 18:26 ad tinim: ‘Ammu i iqqar ujeǧid: Nḍarem wa di řeḥbes u seccem t s weɣrum n řeḥṣaret u s waman n řeḥṣaret ař ɣa dewřeɣ di řehna.’”
2CH 18:27 [Xas uca] inna Mixa-Yahu: “Mařa tɛeqbed-dd [ca n wass] di řehna, xenni SIDI war xafi issiweř!” Uca inna [ɛawed]: “Sřem-dd a řegnus, marra [kenniw]!”
2CH 18:28 Awarni as iffeɣ-dd ujeǧid n Israil ak-d Yahucafaṭ, ajeǧid n Yahuda, ɣar Ramut di Jilɛad.
2CH 18:29 Inna ujeǧid n Israil i Yahucafaṭ: “Necc ad beddřeɣ arruḍ, [xenni] ad dd-ffɣeɣ ɣar umenɣi. [Maca] cek [tzemmared] ad tyarḍed arruḍ nnec!” Ajeǧid n Israil igga arruḍ war iǧi nnes uca ffɣen-dd ɣar umenɣi.
2CH 18:30 Ajeǧid n Aram tuɣa yumur imeqqranen n ikarruten [n umenɣi] nni ɣares [iǧan], inna: “Ittxeṣṣa awem war tᵉttmenɣim ca ak-d umeqqran niɣ ak-d umeẓyan, mɣir ak-d ujeǧid n Israil!”
2CH 18:31 Umi imeqqranen n ikarruten [n umenɣi] ẓrin Yahucafaṭ, imsar, aqa nitni nnan: “Aqa d wa, ajeǧid n Israil!” Nitni nnḍen as ḥima akides mmenɣen, maca Yahucafaṭ isɣuy, uca SIDI iwca as afus u AREBBI issḥeyyed i-ten xas.
2CH 18:32 Umi ẓrin imeqqranen n ikarruten [n umenɣi], aqa netta tuɣa war iǧi d ajeǧid n Israil, imsar, aqa dewřen-dd x webrid nsen, war t areddfen ɛad.
2CH 18:33 [Xenni] iɛeyyen ijj n weryaz řqews s řbař nnes d acemřař uca iřqef [fřitca] ajeǧid n Israil jar wawaḍ n iɣaǧen n warruḍ nnes n wuzzař. [Řexdenni] inna wanita i wenni ineddhen akarru: “Qřeb afus nnec, suffeɣ ayi-dd zi řɛeskar, maɣar aqa yezmeɣ.”
2CH 18:34 Deg wass nni idweř umenɣi iwɛar aṭṭas. Iqqim ujeǧid n Israil ibedd deg ukarru ař tameddit [deg umenɣi] ak-d ayt n Aram, immut ɣar řweqt n uɣeǧay n tfuct.
2CH 19:1 Iɛqeb-dd Yahucafaṭ, ajeǧid n Yahuda, ɣar taddart nnes di Urcalim di řehna.
2CH 19:2 Yahu, mmis n Ḥanani, amwařaw, iffeɣ-dd ɣares ḥima ad t iřqa, inna i ujeǧid Yahucafaṭ: “Ma cek teggid twiza i uɛeffan u ad texsed inni iɛiffen SIDI? Ammu i xak dd-yusa uduqqez n weɣḍab zi zzat n wudem n SIDI.
2CH 19:3 Waxxa amenni ittwaf dayek min iṣebḥen, maɣar tekksed tirebbin n cwarti zi temmurt uca tesswejded uř nnec i tarezzut x AREBBI.”
2CH 19:4 Yahucafaṭ iqqim izeddeɣ di Urcalim uca iffeɣ ɛawed jar řgens, zi Bi’r-Sebɛa ɣar idurar n Ifrayim, uca yarra i-ten ad dd-dewřen ɣar SIDI, AREBBI n řejdud nsen.
2CH 19:5 Netta yařeqqem řquḍat di temmurt, di marra tineddam ifaryen n Yahuda, zi tendint ař tandint.
2CH 19:6 Netta inna i řquḍat: “Xzarem min ɣa teggem, maɣar war tḥekkmem i iwdan, maca i SIDI u Netta aqa iḥḍar akidwem deg weḥkam.
2CH 19:7 [Xenni] řexxu, ad xawem tiři tiggʷudi n SIDI. Ḥḍam u ggem t, maɣar ɣar SIDI, AREBBI nneɣ, war iǧi řɣecc, Netta war ittegg s wudmawen u war ikessi tirzifin.”
2CH 19:8 Umi dd-ɛeqben ɣar Urcalim, igga Yahucafaṭ di Urcalim ɛawed [ca] n Ilawiyyen d ikehhanen d izeǧifen n [tudrin n] ibabaten n Israil i udebbar n řeḥkam n SIDI u i ddɛawi.
2CH 19:9 Netta yumur i-ten, inna: “Ggem s tiggʷudi n SIDI, s řaman u s yijj n wuř [nican] imun.
2CH 19:10 Ɣar kuř ddeɛwet i d awem i d ɣa yawyen aytmatwem nni izeddɣen di tneddam nsen, jar idammen d idammen u jar Ccariɛa d řumur d tweṣṣa d lfarayiḍ, ittxeṣṣa ad asen tɛeřmem, maḥend war xawem ssarebbun ddenb zzat i SIDI, ařami xawem dd ɣa iwḍa uduqqez d ameqqran n weɣḍab u x aytmatwem. Ggem amenni, ařami war tᵉssarebbum ddenb x yixef nwem.
2CH 19:11 Xzarem, Amarya d akehhan ameqqran i xawem iǧan di marra ddeɛwet n SIDI, u Zabadya, mmis n Ismaɛil, řḥakem x taddart n Yahuda, aqa-t x kuř ddeɛwet n ujeǧid. Uřa d imeḥḍayen, Ilawiyyen, [aqa aten din] zzat i wudem nwem. Iřim d iryazen u ggem [t], uca SIDI ad yiři ak-d wenni iṣeřḥen.”
2CH 20:1 Awarni uya imsar, aqa ayt n Mu’ab d ayt n Ɛammun, d [inneɣni] akidsen zeg Imaɛuniyyen usin-dd maḥend ad mmenɣen ak-d Yahucafaṭ.
2CH 20:2 Usin-dd [ireqqasen], ɛawden i Yahucafaṭ, nnan: “Aqa aṭṭas n řɣaci usin-dd ḥima ad kidek mmenɣen zeg ujemmaḍin n řebḥar, zi Aram. Xzar, nitni di Ḥaṣṣun-Tamar, ixs ad yini Ɛayn-Jadi.”
2CH 20:3 Yahucafaṭ iggʷed uca inḍar tiṭṭawin nnes ɣar SIDI. Netta ijja ad barrḥen s uẓummi di marra Yahuda.
2CH 20:4 Ssmunen [ayt n] Yahuda maḥend ad arzun twiza n SIDI. Nitni usin-dd uřa zi marra tineddam n Yahuda, ḥima ad arzun x SIDI.
2CH 20:5 Ibedd Yahucafaṭ deg wegraw [n řgens] n Yahuda d Urcalim, di Taddart n SIDI, zzat i řemraḥ n jdid, inna:
2CH 20:6 “[A] SIDI, AREBBI n řejdud nneɣ, ma Cek war teǧid ca d AREBBI n ijenwan d Řḥakem x marra tigeldiwin n řegnus? Deg ufus nnec [immars] jjehd d tzemmar, ařami war izemmar uřa d ijj ad iqqim ibedd zzatek.
2CH 20:7 [A], AREBBI nneɣ, ma war tuẓẓiřed ca x imezdaɣ n temmurt-a zzat i wudem n řgens nnec Israil uca tewcid [tammurt] i řebda i zzariɛet n Ibrahim, [ameddukkeř] nnec iɛizzen?
2CH 20:8 Nitni qqimen zeddɣen dayes uca bnan dayes ict n Zzawect Iqeddsen i Cek, i Yisem nnec, uca nnan:
2CH 20:9 ‘Mařa iřqef aneɣ ca n řɣar, [axmi] ssif n řeḥkam niɣ ṭṭaɛun niɣ řaẓ, xenni ad nbedd zzat i Taddart-a u zzat i wudem nnec, maɣar Isem nnec aqa-t di Taddart-a. Ad xak dd-nřaɣa zi řeḥṣaret nneɣ uca [xenni] Cek ad [ɣarneɣ] tesřed u ad [aneɣ] tessnejmed.
2CH 20:10 Uca řexxu, xzar, ayt n Ɛammun d [ayt n] Mu’ab d yinni zeg idurar n Saɛir - inni i umi war tejjid ca ayt n Israil ad ɣarsen dd-adfen [ɣar temmurt nsen], umi dd-usin zi temmurt n Miṣra, minzi kkin asen-dd [zeg webrid nneɣni] u war ten areddǧen,
2CH 20:11 xzarem, nitni xsen ad aneɣ xeǧṣen uca usin-dd ḥima ad aneɣ ssuffɣen zi tesɣart nnec i d aneɣ tewcid d řwart.
2CH 20:12 [A], AREBBI nneɣ, ma Cek war xasen tḥekkmed ca? Maɣar neccin war xasen nzemmar x řɣaci-ya ameqqran wanita i ɣarneɣ dd-iffɣen u war nessin min ɣa negg, maca [aqa narra-dd] tiṭṭawin nneɣ ɣarek.”
2CH 20:13 Marra [ayt n] Yahuda bedden zzat i wudem n SIDI, uřa d iḥenjiren imeẓyanin nsen d temɣarin nsen d iḥenjiren nsen.
2CH 20:14 Uca ihwa-dd Arruḥ n SIDI [din] di řwest n wegraw [n řgens] x Yaḥziyil, mmis n Zakariyya, mmis n Banaya, mmis n Yaɛiyil, mmis n Ulawi Mattanya, zeg iḥenjiren n Asaf.
2CH 20:15 Netta inna: “Sřem-dd ɣari, marra [ayt n] Yahuda uřa d kenniw, imezdaɣ n Urcalim, u cek, [a,] ajeǧid Yahucafaṭ! Ammu i d awem iqqar SIDI: ‘War tteggʷdem ca, war ttnexřiɛem ca zi řɣaci-ya ameqqran wanita, minzi amenɣi war iǧi s ufus nneɣ, maca s ufus n AREBBI.
2CH 20:16 Hwam ɣarsen tiwecca. Xzar, nitni ad geɛɛden zi tsawent n Ṣiṣ, u kenniw ad xasen txeccem ɣar uneggar n teɣzurt zzat i řexřa n Yaruwil.
2CH 20:17 Kenniw [maca] war tᵉttmenɣim ca. Kkarem, [qqimem] tbeddem u xzarem, asenjem n SIDI [ad yiři] akidwem, [a] Yahuda d Urcalim! War tteggʷdem ca u war ttnexřiɛem. Tiwecca ffɣem i umsagar akidsen, minzi SIDI aqa-t akidwem.’”
2CH 20:18 [Xenni] yuḍar Yahucafaṭ s uɣembub nnes ɣar temmurt, u marra [ayt n] Yahuda d marra imezdaɣ n Urcalim wḍan [x temmurt] zzat i wudem n SIDI ḥima ad bendqen i SIDI.
2CH 20:19 Kkaren Ilawiyyen zeg ayt n Quhat u zeg ayt n Quraḥ ḥima ad ssɛuǧan SIDI, AREBBI n Israil, s ict n tmijja tejhed aṭṭas.
2CH 20:20 Tiwecca zic kkaren uca ffɣen ɣar řexřa n Taquɛa. Ɣar wuffuɣ nsen ibedd-dd Yahucafaṭ [din], inna: “Sřem-dd ɣari, [a] Yahuda, d kenniw, imezdaɣ n Urcalim. Amnem di SIDI, AREBBI nwem, [xenni] ad tiřim di řaman. Amnem zi inabiyyen, [xenni] ad tfeřḥem.”
2CH 20:21 Netta imcawar ak-d řgens uca issbedd imedyazen zzat i SIDI d yinni d as i ɣa iṣebbḥen acewwaḍ n Umqeddas, am ɣa yuyuren zzat i wudem n [yeryazen] i iḥezzmen s řesnaḥ, ad inin: “Qadam SIDI, maɣar tamexsiwt nnes icewwaren [tᵉttɣima] i řebda!”
2CH 20:22 Di řweqt řami bdan nitni s usřiwřew d uṣebbeḥ, igga SIDI řefxux x ayt n Ɛammun d Mu’ab u x [yenni] i tuɣa dd-iffɣen ḍidd i Yahuda zeg idurar n Saɛir, uca ttwaɣellben nitni.
2CH 20:23 Ayt n Ɛammun d [ayt n] Mu’ab kkaren x imezdaɣ n idurar n Saɛir, ḥima ad ten sshellken u ad ten areddǧen. Umi qḍan nitni x imezdaɣ n Saɛir, sshellken ijj wenneɣni.
2CH 20:24 [Umi] dd-yiwiḍ Yahuda ɣar ṣṣumɛet n uḥeṭṭu di řexřa, nḍaren tamuɣři nsen awani asen x řɣaci, u xzar, [ẓrin] mɣir řxecbat tuɣa wḍant x temmurt, uřa d ijj war injim.
2CH 20:25 Yahucafaṭ d řgens nnes usin-dd ḥima ad ṭṭfen takeccaḍt nsen uca ufin ɣarsen aṭṭas n sseřɛet d řxecbat d řeqcuɛ iɣřan uca kksen [ɛřam kuř zzayes] i yixef nsen, ařami war zemmaren ad t arbun. Ttkeccaḍen třata n wussan, maɣar [tuɣa] din aṭṭas.
2CH 20:26 Deg wass wiss arebɛa munen nitni di řewḍa n Teɣzurt n Lbaraka, minzi din barken SIDI. X uya ggin as i wemcan nni: taɣzurt n Lbaraka, ɣar i řexxu.
2CH 20:27 Awarni uya dewřen-dd marra iryazen n Yahuda d Urcalim. Yuyur Yahucafaṭ ɣar zzat, ḥima ad ɛeqben ɣar Urcalim [ccuren] s řefraḥet, maɣar SIDI tuɣa issfarḥ i-ten x řɛedyan nsen.
2CH 20:28 Am [ttiraren s] lharpat d řgambriyat d řebwaq usin-dd ɣar Urcalim, ɣar Taddart n SIDI.
2CH 20:29 Tuɣa tiggʷudi n AREBBI teřqef marra tigeldiwin n temmura umi sřint, aqa SIDI immneɣ ak-d řɛedyan n Israil.
2CH 20:30 Tufa tgeldit n Yahucafaṭ řhudnet uca AREBBI nnes iwca as řehna zi marra iɣezdisen.
2CH 20:31 Ammu i iḥkem Yahucafaṭ x Yahuda. [Tuɣa] ɣares xemsa u-třatin n iseggʷusa, umi idweř d ajeǧid. Netta iḥkem xemsa u-ɛicrin n iseggʷusa di Urcalim. Yemmas qqaren as Ɛazuba, yeǧis n Cilḥi.
2CH 20:32 Netta iḍfar ibriden n babas Asa, war xasen iḥeyyed ca u netta igga min iǧan nican di tiṭṭawin n SIDI.
2CH 20:33 Mɣir řegɛudi war ttwakksent, maɣar řgens war tuɣi ɛad yarra uř nnes ɣar AREBBI n řejdud nsen.
2CH 20:34 Min iqqimen n imezruyen n Yahucafaṭ, imezwura d ineggura, xzar, aqa man aya [marra] ittwazemmem deg wedlis n imezruyen n Yahu, mmis n Ḥanani, inni igga ad ttwazemmemen deg wedlis n ijeǧiden n Israil.
2CH 20:35 Awarni uya igga Yahucafaṭ ijj n řɛahd ak-d Axazya, ajeǧid n Israil, wenni iggin tuɛeffna aṭṭas di [marra min] tuɣa igga.
2CH 20:36 Netta iqqen akides ijj n řɛahd, ḥima ad ggen iɣarruba nni i ɣa ineddhen ɣar Tarcic. Nitni bnan iɣarruba [nni] di Ɛiṣyun-Jabar.
2CH 20:37 [Maca] Aliɛazar, mmis n Dudawahu zi Marica, ittnebba x Yahucafaṭ, inna: “Minzi teqqned ijj n řɛahd ak-d Axaziya, aqa SIDI yarẓa řexdayem nnec.” [Ammu] imsar aqa ttwarẓen iɣarruba ařami war zemmaren ad nedhen ɣar Tarcic.
2CH 21:1 Yahucafaṭ igga ad yareyyeḥ jar řejdud nnes. Netta ittwanḍeř jar řejdud nnes di tendint n Dawud. Mmis Yahuram idweř d ajeǧid deg wemcan nnes.
2CH 21:2 Aytmas, iḥenjiren n Yahucafaṭ [tuɣa aten d] Ɛazarya, Yaḥiyil, Zakariyya, Ɛazaryahu, Mixayil d Cafaṭya. Ina marra [tuɣa aten d] iḥenjiren n Yahucafaṭ, ajeǧid n Israil.
2CH 21:3 Babatsen iwca asen aṭṭas n terzifin n nnuqart d wureɣ d řeqcuɛ iɣřan uřa d tineddam ifaryen di Yahuda, maca tageldit iwca i-tt i Yahuram, maɣar wanita [tuɣa] d amenzu.
2CH 21:4 [Umi] ikkar-dd Yahuram x tgeldit n babas uca imneɛ di tizemmar nnes, inɣa marra aytmas s ssif, uřa d ca n řḥukkam n Israil.
2CH 21:5 Yahuram [tuɣa ɣares] tnayen u-třatin n iseggʷusa umi idweř d ajeǧid. Netta iḥkem tmenya n iseggʷusa di Urcalim.
2CH 21:6 Netta yuyur deg webrid n ijeǧiden n Israil, am mammec tuɣa tegga taddart n Axab, maɣar yeǧis n Axab tedweř d tamɣart nnes. Netta igga min iǧan d aɛeffan di tiṭṭawin n SIDI.
2CH 21:7 [Maca] SIDI war ixs ad yareddeǧ Dawud di ṭṭweɛ n Řɛahd i igga ak-d Dawud, uca uřa umi [d as] tuɣa inna, aqa ad as iwc řebda ijj n řefnar zzat i tiṭṭawin nnes, i netta u i iḥenjiren nnes.
2CH 21:8 Deg wussan nnes ixtutteř Idum s uɣewweɣ zi sadu ifassen n Yahuda, uca ggin ijj n ujeǧid x yixef nsen.
2CH 21:9 Iɛdu Yahuram ak-d marra imeqqranen nnes d marra ikarruten nnes [n umenɣi]. Aqa ikkar s ǧiřet u iɣřeb x ayt n Idum inni tuɣa i d as dd-innḍen, i netta u i imeqqranen n ikarruten [n umenɣi].
2CH 21:10 [Waxxa amenni] xtuttřen [ayt n] Idum s uɣewweɣ zi jar ifassen n Yahuda, ař ass-a. Di řweqt nni beɛda iɣewweɣ uřa d Libna, maɣar tuɣa Yahuda iḥeyyed x SIDI, AREBBI n řejdud nnes.
2CH 21:11 Igga Yahuram uřa d řegɛudi x idurar n Yahuda. Netta yarra imezdaɣ n Urcalim ad ssfesden ixef nsen [s irebbiten nneɣni], [wah,] tuɣa iɛarn Yahuda ɣar man aya.
2CH 21:12 Tiweḍ-dd ɣares ict n tebrat n unabi Iliya, teqqar: “Ammu i iqqar SIDI, AREBBI n babac Dawud: ‘Maɣar war tuyured x ibriden n babac Yahucafaṭ u x ibriden n Asa, ajeǧid n Yahuda,
2CH 21:13 maca tuyured x ibriden n ijeǧiden n Israil, uca tarrid Yahuda d imezdaɣ n Urcalim ad ssfesden ixef nsen [s irebbiten nneɣni], deg webrid n farq-cɣeř n taddart n Axab, u minzi cek tenɣid uřa d aytmac zi taddart n babac, inni tuɣa icnan xak,
2CH 21:14 xzar, [x uyenni] SIDI ad cek iřqef s ict n tecti d tameqqrant jar řgens nnec d iḥenjiren nnec d temɣarin nnec d marra agřa nnec.
2CH 21:15 Cek simant nnec ad tewḍid deg ijj n řehřac n tekrict iqesḥen, ař dd ɣa teffeɣ [ɛad] tekrict nnec ɣar barra zi ssibbet n řehřac i ittduman.’”
2CH 21:16 SIDI issehweř x Yahuram arruḥ n Ifilisṭiniyyen d Weɛraben, inni izedɣen x uɣezdis n [ayt n] Kuc.
2CH 21:17 Nitni geɛɛden ɣar Yahuda, udfen ɣar tammurt u ksin marra agřa nni [iǧan] di taddart n ujeǧid, uřa d iḥenjiren nnes d temɣarin nnes, ařami war d as iqqim mɣir Yahuyaḥaz, amaẓuẓ n iḥenjiren nnes.
2CH 21:18 Awarni aya iwta i-t SIDI s yijj n řehřac war izemmar ad [zzayes] iggenfa.
2CH 21:19 Umi [tuɣa netta ihřec ammu] ass iḍfar umas, uca teɛdu řweqt ařami ɛdun tnayen n iseggʷusa, imsar, aqa takrict nnes teffeɣ-dd ɣar barra, u netta immut s řeḥřiq d ameqqran. Řgens nnes war d as issarɣ ca tmessi am [ggin] timessi i řejdud nnes.
2CH 21:20 Netta [tuɣa] ɣares tnayen u-třatin n iseggʷusa umi idweř d ajeǧid. Netta iḥkem tmenya n iseggʷusa di Urcalim. Netta ifna, war xas indeb ḥed. Neḍřen t di tendint n Dawud, [maca] war iǧi deg imeḍřan n ijeǧiden.
2CH 22:1 Imezdaɣ n Urcalim ggin Axazya, mmis amaẓuẓ, d ajeǧid deg wemcan nnes, maɣar marra aytmas imeqqranen tuɣa ttwanɣen zeg ict n bandiyya i tuɣa dd-tudef ak-d Weɛraben ɣar řmargeḥ n řɛeskar. [Ammu i] idweř Axazya, mmis n Yahuram, d ajeǧid n Yahuda.
2CH 22:2 Axazya [tuɣa] ɣares tnayen u-ɛicrin n iseggʷusa, umi idweř d ajeǧid. Netta iḥkem ijj n useggʷas di Urcalim. Yemmas qqaren as Ɛatalya, yeǧis n Ɛumri.
2CH 22:3 Netta yuyur deg ibriden n taddart n Axab, maɣar yemmas d tamcawart nnes di [marra] tuɛeffna i igga.
2CH 22:4 Netta igga min iǧan d aɛeffan di tiṭṭawin n SIDI, am taddart n Axab, maɣar awarni i řmewt n babas tuɣa [inni n taddart n Axab] d imcawaren nnes ařami ikka x uzeǧif.
2CH 22:5 Netta iḍfar ccwar nsen uca iffeɣ ak-d Yuram, mmis n Axab, ajeǧid n Israil, i umenɣi ak-d Ḥazayil, ajeǧid n Aram, ɣar Ramut di Jilɛad uca ayt n Aram ɣeřben x Yuram.
2CH 22:6 [Xenni] yareggʷeḥ maḥend ad yarzu di Yazraɛil agenfu zeg iyezzimen nni i d as tuɣa ggin [ayt n] Aram umi immneɣ di Ramut ak-d ujeǧid nsen, Ḥazayil, ajeǧid n Aram. Ihwa-dd Ɛazarya, mmis n Yahuram, ajeǧid n Yahuda, [ɣar din], ḥima ad issijj x Yuram, mmis n Axab, di Yazraɛil, umi tuɣa ihřec.
2CH 22:7 Areddeǧ n Axazya tuɣa zi AREBBI umi dd-yusa ɣar Yuram. Umi dd-yiweḍ [din], iffeɣ ak-d Yuram ɣar Yahu, mmis n Nimci, wenni tuɣa idhen SIDI, maḥend ad iqḍa x taddart n Axab.
2CH 22:8 Umi iqḍa Yahu řḥukm x taddart n Axab, imsar, aqa yufa řḥukkam n Yahuda d iḥenjiren n aytmas n Axazya, [inni] i tuɣa ittsexxaren i Axazya, uca inɣa i-ten.
2CH 22:9 [Xenni] yarzu x Axazya. Nitni ṭṭfen t am tuɣa innuffar di Samarya uca iwyen t ɣar Yahu. Nɣin t u neḍřen t, minzi nnan: “Netta d mmis n Yahucafaṭ, wenni yarezzun x SIDI s marra uř nnes.” [Ammu] war iqqim i taddart n Axazya uřa d ijj wenni di iǧa jjehd ḥima ad iḥkem am ujeǧid.
2CH 22:10 [Umi] Ɛatalya, yemmas n Axazya teẓra, aqa mmis immut, tekkar, tᵉteḥḥa marra tarwa n ujeǧid n taddart n Yahuda.
2CH 22:11 [Maca] Yahuciba, yeǧis n ujeǧid, teksi Yuwac, mmis n Axazya, uca texḍef i-t zi jar iḥenjiren n ujeǧid nni ittwanɣen, uca tessidef i-t ak-d tenni t issuṭuḍen deg wexxam n tassut. [Ammu] i tegga Yahuciba, yeǧis n ujeǧid Yahuram, tamɣart n ukehhan Yahuyadaɛ - maɣar nettat d učmas n Axazya - tessnuffar i-t i Ɛatalya u tanita war t tenɣi ca.
2CH 22:12 Setta n iseggʷusa iqqim innuffar ɣarsen di Taddart n AREBBI u tuɣa Ɛatalya tḥekkem x temmurt.
2CH 23:1 Deg useggʷas wiss sebɛa issejhed Yahuyadaɛ ixef nnes uca igga ijj n řɛahd [jmiɛ] ak-d imeqqranen x mya, Ɛazarya, mmis n Yeruham d Ismaɛil, mmis n Yuḥanan, d Ɛazarya, mmis n Ɛubid, d Maɛasiya, mmis n Ɛadaya, d Ilicafaṭ, mmis n Zikri.
2CH 23:2 Nitni kkin x [temmurt] n Yahuda, ssmunen Ilawiyyen zi tneddam n Yahuda uřa d izeǧifen [n tudrin] n ibabaten n Israil uca usin-dd ɣar Urcalim.
2CH 23:3 Marra agraw [n řgens] igga ijj n řɛahd ak-d ujeǧid di Taddart n AREBBI u netta inna asen: “Xzar, mmis n ujeǧid ad idweř d ajeǧid, am mammec i t inna SIDI x iḥenjiren n Dawud!”
2CH 23:4 Yumur i-ten, inna: “D man aya i ɣa teggem: ict n ttuřut nwem, inni n ikehhanen d Ilawiyyen i ɣa yadfen deg [wass n] ssebt, ad ɛessen ɣar tewwura.
2CH 23:5 Ict n ttuřut [ad tbedd] ɣar taddart n ujeǧid u ict n ttuřut ɣar Tewwart n Dsas u marra řgens [ad ibedd] di řemraḥat n Taddart n SIDI.
2CH 23:6 Uřa d ijj war ittidef ɣar Taddart n SIDI, mɣir ikehhanen d [ayt n] Lawi nni ittsexxaren, ad adfen, maɣar nitni d imqeddasen u marra řgens ad iḥḍa min ittxeṣṣan ad ittwaḥḍa i SIDI.
2CH 23:7 Ayt n Lawi ad quwwaren i ujeǧid, [kuř] aryaz s řesnaḥ nnes deg ufus nnes, u wenni i ɣa yarzun ad yadef ɣar Taddart ad ittwaneɣ. Kenniw ad teqqimen ak-d ujeǧid ɣar twasit nnes u ɣar wuffuɣ nnes.
2CH 23:8 Ayt n Lawi d marra Yahuda ggin am mammec marra min [i d asen] yumur ukehhan Yahuyadaɛ, uca iwyen kuř ijj [zzaysen] iryazen nnes nni yudfen di ssebt, uřa d yinni dd-iffɣen di ssebt, maɣar akehhan Yahuyadaɛ war iwci řeɛwacar i terbiɛin.
2CH 23:9 Akehhan Yahuyadaɛ iwca i imeqqranen x mya lansat d tseddariyin [n uɛeskari] iqesḥen i tuɣa iǧan n ujeǧid Dawud, tinni [tuɣa iǧan] di Taddart n AREBBI.
2CH 23:10 Issbedd řgens, kuř ijj [s] lansa nnes deg ufus, zeg uɣezdis afusi n Taddart ař aɣezdis azeřmaḍ n Taddart, ɣar uɛalṭar u ɣar Taddart, [ammu i] dd-quwwaren nitni i ujeǧid.
2CH 23:11 Nitni ssuffɣen-dd mmis n ujeǧid ɣar barra uca ggin as ttaj [n weɛzař] uca wcin as Cchadet. [Ammu] i t ggin d ajeǧid, uca Yahuyadaɛ d iḥenjiren nnes dehnen t, nnan: “Tudart i ujeǧid!”
2CH 23:12 [Umi] tesřa Ɛatalya řḥess n řgens i dd-yusin ttazzřen ɣar din uca ssemɣaren ajeǧid, tudef-dd ɣar řgens di Taddart n SIDI.
2CH 23:13 Teẓra, u xzar, ajeǧid ibedd ɣar upilar ɣar wadaf, u imeqqranen d [inni ittsuḍen di] řebwaq [bedden] ɣar ujeǧid. Marra řgens n temmurt ifraḥ u isuḍ di řebwaq. [Uřa d] imedyazen ak-d dduzanat n lmusiqa inni issnen mammec ɣa ṣebbḥen [bedden din]. [Xenni] tcarreg Ɛatalya arruḍ nnes uca tesɣuy: “Tamenziwt, tamenziwt!”
2CH 23:14 [Maca] yumur ukehhan Yahuyadaɛ i imeqqranen n mya, inni i tuɣa iǧan x řɛeskar, inna asen: “Suffɣem tt-i-dd jar iseddiyyen [n řɛeskar] ɣar barra uca nɣem s ssif wi tt ɣa iḍfaren.” Maɣar akehhan tuɣa inna: “War tt neqqem di Taddart n SIDI!”
2CH 23:15 Nitni ssarsen xas ifassen uca [umi] iwḍen ɣar wadaf n Tewwart n Iysan [ɣar] taddart n ujeǧid, nɣin tt dinni.
2CH 23:16 Igga Yahuyadaɛ ijj n řɛahd jar as-dd d marra řgens d ujeǧid, ḥima ad iřin d ijj n řgens i SIDI.
2CH 23:17 [Xas uca] yudef marra řgens ɣar zzawect n Baɛal u hedmen tt. Iɛalṭaren nnes d řexyařat nnes arẓin ten qaɛ. U nitni nɣin Mattan, akehhan n Baɛal, zzat i iɛalṭaren.
2CH 23:18 Igga Yahuyadaɛ tasexxart di Taddart n SIDI deg ufus n ikehhanen n [ayt n] Lawi nni tuɣa ibḍa Dawud [di terbiɛin] i Taddart n SIDI, ḥima ad qeddmen tiɣarṣa n wecmaḍ n SIDI am mammec tura di Ccariɛa n Musa, s řefraḥet d izřan, am t iweṣṣa Dawud.
2CH 23:19 Netta issbedd iɛessasen x tewwura n Taddart n SIDI, maḥend uřa d ijj mammec ma igga mařa ixmej, war din ittidef ca.
2CH 23:20 Netta yiwi imeqqranen x mya, d ayt n jjehd, d ayt n bu-ṣṣulṭa jar řgens d marra řgens n temmurt uca issehwa ajeǧid zi Taddart n SIDI, u nitni udfen ɣar taddart n ujeǧid zi Tewwart Yuɛřan uca ssɣimen ajeǧid x řɛarc n tgeldit.
2CH 23:21 Marra řgens n temmurt ifarḥ u tandint tedweř tarsa, awarni umi nɣin Ɛatalya s ssif.
2CH 24:1 Yuwac [tuɣa] ɣares sebɛa n iseggʷusa umi idweř d ajeǧid. Netta iḥkem arebɛin n iseggʷusa di Urcalim. Yemmas qqaren as Ḍibya zi Bi’r-Sebɛa.
2CH 24:2 Yuwac igga min iǧan nican di tiṭṭawin n SIDI, marra ussan i tuɣa akehhan Yahuyadaɛ iddar.
2CH 24:3 Yahuyadaɛ yiwi as tnayen n temɣarin u netta ijja-dd iḥenjiren d tḥenjirin.
2CH 24:4 Awarni uya tuɣa inwa Yuwac s wuř, ḥima ad iɛdeř Taddart n SIDI.
2CH 24:5 Issmun ikehhanen d Ilawiyyen, inna asen: “Kkem x tneddam n Yahuda u yarwem ijj n řqedd n nnuqart di kuř aseggʷas zi marra Israil, ḥima ad tɛedřem Taddart n AREBBI. Bdam deɣya s uya!” [Maca] Ilawiyyen war qeǧqen ca.
2CH 24:6 Ajeǧid iřaɣa i uzeǧif Yahuyadaɛ, inna as: “Mayemmi war tesseqsid Ilawiyyen x mammec dd-iffeɣ wesmuni zi Yahuda d Urcalim n tewhibt n usgeɛɛed n Musa, amsexxar n SIDI, uřa n wegraw n Israil di ṭṭweɛ n Uqiḍun n Cchadet?
2CH 24:7 Aqa iḥenjiren n Ɛatalya taɛeffant arẓin Taddart n AREBBI uca ssmuṭṭiyen marra řeqcuɛ iqeddsen n Taddart n SIDI ɣar ‘Ibaɛlen’.”
2CH 24:8 Ajeǧid yumur, ḥima ad ggen ict n tṣenduqt u nitni ssarsen tt barra ɣar tewwart n Taddart n SIDI.
2CH 24:9 Xenni řaɣan di Yahuda d Urcalim, ḥima ad yarwen i SIDI tawhibt n usgeɛɛed nni igga Musa, amsexxar n AREBBI, x Israil di řexřa.
2CH 24:10 Marra imeqqranen d marra řgens tuɣa farḥen u nitni iwyen-dd [tiwhibin] uca nḍaren tent di tṣenduqt ařami teccur.
2CH 24:11 Di řweqt umi dd-ssidfen tasenduqt x řumur n ujeǧid s ufus n Ilawiyyen uca ẓrin aqa [dayes] aṭṭas n nnuqart, imsar, aqa yusa-dd umarir n ujeǧid d uweqqaf n ukehhan ameqqran uca ssexwan nitni tasenduqt, ssgeɛɛden tt u iwyen tt [ɛawed] ɣar wemcan nnes. Ammu i ggin nitni ass iḍfar umas uca ssmunen-dd aṭṭas n nnuqart.
2CH 24:12 Ajeǧid d Yahuyadaɛ wcin aya [xenni] i imḍebbaren n řxedmet di ṭṭweɛ n Taddart n SIDI. Nitni cran isuydayen d ineqqacen n ukeccuḍ, ḥima ad ɛedřen Taddart n SIDI, uřa d imziřen n wuzzař d nnḥas, ḥima [uřa d nitni] ad ɛedřen Taddart n SIDI.
2CH 24:13 Ixeddamen tuɣa xeddmen řebda u sadu ufus nsen tuyur řxedmet nican ɣar zzat. Nitni arrin Taddart n AREBBI am mammec tt tuɣa amezwaru u arnin di řemten nnes.
2CH 24:14 Řami kemmřen nitni [řxedmet], iwyen min iqqimen n nnuqart zzat i wudem n ujeǧid u zzat i Yahuyadaɛ uca igga zzayes řeqcuɛ i Taddart n SIDI, řeqcuɛ i tsexxart u i tewhibin n wecmaḍ, tiɣenjayin d řeqcuɛ n wureɣ d nnuqart. Marra ussan nni [ikka] Yahuyadaɛ [iddar], ttawyen řebda tiɣarṣa n wecmaḍ i Taddart n SIDI.
2CH 24:15 Yahuyadaɛ iwsar u uzan ɣares wussan [n tudart], uca immut. Netta tuɣa ɣares mya u-třatin n iseggʷusa umi immut.
2CH 24:16 Neḍřen t jar ijeǧiden di tendint n Dawud, maɣar tuɣa igga min iǧan nican di Israil, am i AREBBI, am i Taddart nnes.
2CH 24:17 Awarni i řmewt n Yahuyadaɛ usin-dd řḥukkam n Yahuda uca bendqen i ujeǧid, uca isřa ɣarsen ujeǧid.
2CH 24:18 Nitni semḥen di Taddart n SIDI, AREBBI n řejdud nsen, uca sexxaren i trebbin n cwarti d řexyařat n l’aṣnam. [Xenni] idweř uduqqez d ameqqran [n weɣḍab] x Yahuda u x Urcalim di ssibbet n řmuɛṣiyyet nsen.
2CH 24:19 Netta issekk jar asen inabiyyen, ḥima ad ten yarra ad ɛeqben ɣar SIDI. Nitni cehden xasen, maca war d asen sřin ca.
2CH 24:20 Arruḥ n AREBBI ihwa-dd x Zakariyya, mmis n ukehhan Yahuyadaɛ. Netta ibedd x ijj n ddruj zzat i řgens, inna asen: “Ammu i iqqar AREBBI: ‘Mayemmi tᵉttɛeddam x řumurat n SIDI? [Ammu] war tᵉttefřiḥem ca. Minzi tḥeyydem x SIDI, ad xawem iḥeyyed Netta.’”
2CH 24:21 Nitni ggin xas ict n tmeɛmuč u ḥejjaren t x řumur n ujeǧid di řemraḥ n Taddart n SIDI.
2CH 24:22 Ajeǧid Yuwac war ixarreṣ di tmexsiwt icewwaren, tenni i d as tuɣa isscen Yahuyadaɛ, babas [n Zakariyya], uca [Yuwac] inɣa mmis [n Yahuyadaɛ]. Umi immut, inna Zekariya: “SIDI ad t iẓar, ad yarzu [ad t ixřef]!”
2CH 24:23 Ɣar uneqřeb n useggʷas, imsar, aqa issgeɛɛed řɛeskar n Aram x Yuwac. Nitni usin-dd ɣar Yahuda d Urcalim u sshellken zi řgens marra řḥukkam n řgens uca ssekken marra takeccaḍt nsen ɣar ujeǧid n Dimacq.
2CH 24:24 Waxxa tuɣa řɛeskar n Aram drus n yeryazen waha, aqa SIDI igga asen ijj n řɛeskar d ameqqran deg ufus nsen, umi nitni ḥeyyden x SIDI, AREBBI n řejdud nsen. Nitni ggin řeḥkamat x Yuwac.
2CH 24:25 Umi xas ffɣen nitni, aqa jjin t ihřec aṭṭas. Ggin xas imsexxaren nnes ict n tmeɛmuč di ssibbet n idammen i issizzeř Yuwac jar iḥenjiren n ukehhan Yahuyadaɛ. Nɣin t am iǧa di tassut nnes. Neḍřen t di tendint n Dawud, maca war t nḍiřen ca di tmeḍřin n ijeǧiden.
2CH 24:26 Ina d inni i xas iggin ict n tmeɛmuč: Zabad, mmis n Cimɛa, Taɛammunect, u Yahuzabad, mmis n Cimrit, Tamu’abect.
2CH 24:27 X iḥenjiren nnes u x řqedd n min i xas ggin [inabiyyen] u x dsas n Taddart n AREBBI, xzar, aqa [man aya marra] yura di tira n wedlis n ijeǧiden. Mmis Amaṣya idweř d ajeǧid deg wemcan nnes.
2CH 25:1 Amaṣya [tuɣa] ɣares xemsa u-ɛicrin n iseggʷusa umi idweř d ajeǧid. Netta iḥkem tesɛa u-ɛicrin n iseggʷusa di Urcalim. Yemmas qqaren as Yahuɛaddan, [tuɣa-tt] zi Urcalim.
2CH 25:2 Netta igga min iǧan nican di tiṭṭawin n SIDI, maca war iǧi s wuř imun [qaɛ].
2CH 25:3 Umi issemten tagelda nnes, imsar, aqa inɣa imsexxaren nnes, inni i tuɣa inɣin babas ajeǧid.
2CH 25:4 Maca iḥenjiren n iqettařen war ten inɣi ca, am mammec [t] yura deg wedlis ittwannḍen n Ccariɛa n Musa i di iweṣṣa SIDI, inna: “Ibabaten war ttwaneqqen di ssibbet n iḥenjiren [nsen] u iḥenjiren war ttwaneqqen di ssibbet n ibabaten [nsen], maɣar kuř ijj ad ittwaneɣ x ddnub [n yixef] nnes.”
2CH 25:5 Amaṣya issmun [ayt n] Yahuda uca issbedd i-ten ɛlaḥsab řaǧat n ibabaten, ak-d imeqqranen x wařef u ak-d imeqqranen x mya i Yahuda d Binyamin marra. Netta isedd i-ten zi ɛicrin iseggʷusa sennej uca yufa jar asen teřt-myat-ařef [n yeryazen] ttwafarzen, ḥima ad ffɣen ak-d řɛeskar, inni ittwadarrben x uḥric d tseddart [n uɛeskari] tameqqrant.
2CH 25:6 Netta icra myat-ařef n ayt n bu-teɣruḍt imeḥḍen zi Israil s mya talint n nnuqart.
2CH 25:7 [Xenni] yusa-dd ɣares ijj n weryaz n AREBBI, inna: “[A], ajeǧid, war ttejji řɛeskar n Israil akidek itteffeɣ, maɣar SIDI war iǧi ak-d Israil, ak-d marra arrawen [nni] n Ifrayim.
2CH 25:8 [Maca] mařa texsed ad traḥed [ɛad] ffeɣ, egg i-t, [iwa] iři d aryaz deg umenɣi. AREBBI ad cek issneqřeb zzat i wudem n řeɛdu, maɣar AREBBI ɣares tizemmar maḥend ad iɛawen u ad issneqřeb.”
2CH 25:9 Amaṣya inna i weryaz n AREBBI: “Maca min ɣa imsaren s mya talint i wciɣ i terbiɛin n [řɛeskar n] Israil?” Aryaz n AREBBI inna: “SIDI ɣares ktar zi man aya ḥima ad ac t iwc.”
2CH 25:10 Uca iɛzeř Amaṣya tirbiɛin [n řɛeskar] i tuɣa ɣares dd-yusin zi Ifrayim, ijja i-tent ad areggʷeḥent ɣar wemcan nsen. [Xenni] iřqef i-ten uxeyyeq ameqqran x Yahuda uca ɛeqben s tefqeḥt d ufugem ɣar wemcan nsen.
2CH 25:11 Amaṣya igga taryast, indeh řgens nnes. Iffeɣ ɣar teɣzurt n Tmeǧaḥt, inɣa ɛecra-ařaf [n yeryazen] zeg ayt n Saɛir.
2CH 25:12 [Ɛawed] ḥebbsen ayt n Yahuda ɛecra-ařaf [n yeryazen] am ddaren, uca iwyen ten ɣar tqiccat n jjarf uca ɛarnen ten ssenni ɣar swadday ařami ftuttyen marra.
2CH 25:13 [Maca] iryazen n terbiɛin n řɛeskar nni tuɣa ijja Amaṣya ad ɛeqben ařami war kidsen dd-tteffɣen ɣar umenɣi, hejmen x tneddam n Yahuda, zi Samarya ař Bayt-Ḥurun, uca nɣin zzaysen teřt-ařaf [n yeryazen] uca ḥewwsen takeccaḍt tameqqrant aṭṭas.
2CH 25:14 Awarni řeɣřeb x ayt n Idum, řami dd-iɛqeb Amaṣya, yiwi netta irebbiten n ayt n Saɛir uca issbedd i-ten zzates uca ibendeq zzatsen uca issbexxar asen.
2CH 25:15 Uca yarɣa weɣḍab n SIDI x Amaṣya, uca issekk ijj n unabi ɣares. Wanita inna as: “Mayemmi tarzud irebbiten n řgens [nni], inni i tuɣa war izemmaren ad fekken řgens nsen zeg ufus nnec?”
2CH 25:16 Umi netta issiweř [ammu], imsar, aqa inna as: “Ma ggin cek d amcawar n ujeǧid? Bedd, mayemmi i cek i ɣa wten?” [Xenni] ibedd unabi, inna: “[Řexxu] ssneɣ, aqa SIDI iɛzem ḥima ad cek yareddeǧ, minzi teggid aya u war tesřid ɣar ccwar inu.”
2CH 25:17 Amaṣya, ajeǧid n Yahuda, imcawar. Issekk [ireqqaṣen] ɣar Yuwac, mmis n Yahuyaḥaz, mmis n Yahu, ajeǧid n Israil, inna: “As-dd, ejj aneɣ ad nemmeřqa [i umenɣi].”
2CH 25:18 [Maca] Yuwac, ajeǧid n Israil, issekk [ijj n ureqqaṣ] ɣar Amaṣya, ajeǧid n Yahuda, inna as: “Cbarq ak-d isennanen [i iɣemmyen] x [idurar n] Lubnan, issekk [ict n tebrat] ɣar tengelt x [idurar n] Lubnan, inna: ‘Ewc yeǧic d tamɣart i mmi!’ [Maca] ijj n řweḥc i [din yuyuren] x [idurar n] Lubnan, ikka uca iɛfes x cbarq ak-d isennanen.
2CH 25:19 Teqqared [ak-d ixef nnec]: ‘Xzar, aqa ɣeřbeɣ x Idum!’, u [řexxu] tudef nnfaxet ɣar wuř nnec ḥima ad tarzud x ccan ktar. Qqim di taddart nnec, [minzi] mayemmi ɣa tɣeḍřed ixef nnec di řɣar u ad tewḍid, cek d Yahuda akidek?”
2CH 25:20 [Maca] Amaṣya war ixs ad iseř, maɣar man aya yusa-dd zi AREBBI maḥend ad ten iwc deg ufus [nsen], minzi nitni arzun irebbiten n Idum.
2CH 25:21 [Xenni] igeɛɛed Yuwac, ajeǧid n Israil. Netta d Amaṣya, ajeǧid n Yahuda, mmeřqan [i umenɣi] ɣar Bayt-Cams, i iǧan di Yahuda.
2CH 25:22 Yahuda ittwaɣřeb zzat i wudem n Israil uca nitni arewřen, kuř ijj ɣar uqiḍun nnes.
2CH 25:23 Yaḥuyaḥaz, ajeǧid n Israil, iṭṭef Amaṣya, ajeǧid n Yahuda, mmis n Yuwac, mmis n Yahuyaḥaz di Bayt-Cams uca yiwyi i-t ɣar Urcalim. [Dinni] igga ict n tazzit di řḥiḍ n Urcalim, zi Tewwart n Ifrayim ař Tewwart n Teɣmart, x ijj n webrid n arebɛa-mya n iɣaǧen.
2CH 25:24 Yiwi marra ureɣ d nnuqart d marra řeqcuɛ i ittwafen di Taddart n AREBBI u deg ixxamen n txubay n taddart n ujeǧid [uřa d] imerhanen, uca iɛqeb ɣar Samarya.
2CH 25:25 Amaṣya, mmis n Yuwac, ajeǧid n Yahuda, iddar [ɛad] xemmesṭac n iseggʷusa awarni i řmewt n Yuwac, mmis n Yahuyaḥaz, ajeǧid n Israil.
2CH 25:26 Min iqqimen n imezruyen n Amaṣya, imezwura d ineggura, ma man aya [marra] war ittwazemmem ca deg wedlis n ijeǧiden n Yahuda d Israil?
2CH 25:27 Zeg wami iḥeyyed Amaṣya x SIDI, ggin xas ict n tmeɛmuč di Urcalim, maca netta yarweř ɣar Laxic. [Xenni] ssekken [iryazen] awarni as uca nɣin t dinni.
2CH 25:28 Iwyen t-i-dd x yeysan uca neḍřen t jar řejdud nnes di tendint n Yahuda.
2CH 26:1 [Xas uca] yiwi marra řgens n Yahuda Ɛuzziya, wenni tuɣa ɣar iǧa seṭṭac n iseggʷusa, ggin t d ajeǧid deg wemcan n babas Amaṣya.
2CH 26:2 Netta ibna Ilat u yarra i-t [deg ufus] n Yahuda, awarni řami igga ujeǧid ad yareyyeḥ jar řejdud nnes.
2CH 26:3 Ɛuzziya [tuɣa] ɣares seṭṭac n iseggʷusa umi idweř d ajeǧid. Netta iḥkem tnayen u-xemsin n iseggʷusa di Urcalim. Yemmas qqaren as Yakulya zi Urcalim.
2CH 26:4 Netta igga min iǧan nican di tiṭṭawin n SIDI, igga nican am mammec tuɣa igga babas Amaṣya.
2CH 26:5 Netta tuɣa yarezzu x AREBBI deg wussan n Zakariyya, wenni tuɣa i d as isseřmad maḥend ad iggʷed AREBBI, uca issehwen AREBBI abrid nnes deg wussan i di tuɣa yarezzu x SIDI.
2CH 26:6 Netta iffeɣ uca immneɣ ak-d Ifilisṭiniyyen uca igga ict n tazzit di řḥiḍ n Jat u di řḥiḍ n Yabna d řḥiḍ n Acdud. Netta ibna tineddam ɣar Acdud u di [temmurt n] Ifilisṭiniyyen.
2CH 26:7 AREBBI ibedd akides ḍidd i Ifilisṭiniyyen u ḍidd i Weɛraben, inni izeddɣen di Jur-Baɛl, u ḍidd i Imaɛuniyyen.
2CH 26:8 Wcin ayt n Ɛammun ljizya i Ɛuzziya uca idweř yisem nnes ittwassen ař wadaf n Miṣra, maɣar netta tuɣa idweř ijhed aṭṭas.
2CH 26:9 Di Urcalim issbedd Ɛuzziya ṣṣumɛat ɣar Tewwart n Teɣmart u ɣar Tewwart n Teɣzurt u ɣar Tɣemmurt uca issemten i-tent.
2CH 26:10 Netta ibna [ɛawed] ṣṣumɛat di řexřa uca iɣza aṭṭas n wanuten, maɣar ɣares řebhayem aṭṭas di Temmurt Iwaṭan u di řwaṭa [yuɛřan]. Tuɣa ɣares ifeǧaḥen d ayt n tzayart deg idurar uřa deg iyyaren iɛarṣen, maɣar netta tuɣa ittexs tafeǧaḥt.
2CH 26:11 Ɛuzziya tuɣa ɣares [ɛawed] ijj n řɛeskar n iɛeskariyyen imdarrben, tteffɣen ɣar umenɣi di terbiɛin, ɛlaḥsab lɛadad i tuɣa ittwasedd zzaysen s ufus n umarir Yaɛiyil d uweqqaf Maɛasiya, s řumur n Ḥananya, ijj zi řḥukkam n ujeǧid.
2CH 26:12 Řqedd imun n izeǧifen x [řaǧat n] ibabaten, n ayt n bu-teɣruḍt imeḥḍen, [tuɣa] ařfayen u-setta-mya [n yeryazen].
2CH 26:13 Sadu afus nsen [tuɣa] din ijj n řɛeskar n teřt-mya u-sebɛa-ařaf u-xemsa-mya [n yeryazen], iɛeskariyyen imdarrben s jjehd [iccuren] i umenɣi, ḥima ad wcen afus i ujeǧid ḍidd i řeɛdu.
2CH 26:14 Ɛuzziya issewjed asen tiseddariyin [n uɛeskari] d iḥricen d lkaskat x uzeǧif d warruḍ n wuzzař d řeqwas d iẓra n yiǧiy, i marra řɛeskar.
2CH 26:15 Di Urcalim igga dduzanat ittwassuffɣen zeg imsuffɣen imiɣisen ḥima ad tent ggen x ṣṣumɛat u x tɣemmura ḥima ad zzaysent wten fřitcat u ad ḥejjaren iẓra imeqqranen. Ammu i idweř isem nnes icneɛ ɣar řaggʷaj, maɣar i netta umi tᵉttwagg twiza s řeɛjeb, ařami idweř yarni di jjehd.
2CH 26:16 Maca umi idweř ijhed, issgeɛɛed ixef nnes deg wuř nnes ařami issiweḍ [ixef nnes] ɣar wareyyeb u iɣdar SIDI, AREBBI nnes, maɣar yudef ɣar Zzawect Tameqqrant n SIDI, ḥima ad issbexxar x uɛalṭar n řebxur.
2CH 26:17 Akehhan Ɛazarya yuyur awarni as, u uyuren akides ikehhanen n SIDI d Ilawiyyen, tmenyin n yeryazen imeḥḍen.
2CH 26:18 Nitni qaṭɛen i ujeǧid Ɛuzziya, nnan as: “War cek icuwwar, Ɛuzziya, maḥend ad tawyed řebxur i SIDI, mɣir i ikehhanen, arraw n Harun, inni ittwaqeddsen i tewhibt n řebxur. Ffeɣ zi Zzawect Iqeddsen, maɣar teɣdared u man aya war d ac dd-ittiwi ccan zzat i SIDI, AREBBI nnec.”
2CH 26:19 [Xenni] isɛar Ɛuzziya am iṭṭef řebxur i tewhibt n řebxur deg ufus nnes. Am isɛar [ammu] x ikehhanen, iffeɣ as dd-řbarṣ di tenyart nnes, zzat i tiṭṭawin n ikehhanen di Taddart n SIDI, ɣar uɛalṭar n řebxur.
2CH 26:20 [Umi] inneqřeb ukehhan ameqqran Ɛazarya d marra ikehhanen ɣares, aqa da, dayes řbarṣ di tenyart nnes. Nitni ḥsaren t deɣya ad ssenni yaggʷej, uřa d netta simant nnes iqeǧeq ad iffeɣ, minzi SIDI tuɣa iwta i-t.
2CH 26:21 Tuɣa ajeǧid Ɛuzziya ihřec s řbarṣ ař ass n řmewt nnes. Netta iqqim izeddeɣ deg ict n taddart tᵉttwaɛzeř, maɣar netta tuɣa ittwaqess zi Taddart n SIDI. Mmis Yutam tuɣa [ittwařeqqem] x tzeddiɣt [n ujeǧid] u iḥekkem x řgens n temmurt.
2CH 26:22 Imezruyen iqqimen n Ɛuzziya, imezwura d ineggura, aqa izemm i-ten unabi Icaɛya, mmis n Amuṣ.
2CH 26:23 Ɛuzziya igga ad yareyyeḥ jar řejdud nnes. Neḍřen t jar řejdud nnes deg iyyar n wenḍeř n ijeǧiden, maɣar nnan: “Aqa dayes řbarṣ!” Mmis Yutam idweř d ajeǧid deg wemcan nnes.
2CH 27:1 Yutam [tuɣa] ɣares xemsa u-ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim. Yemmas qqaren as Yaruca, yeǧis n Ṣaduq.
2CH 27:2 Netta igga min iǧan nican di tiṭṭawin n SIDI, nican am mammec t igga babas Ɛuzziya, maca netta war yudif ca ɣar Zzawect Tameqqrant n SIDI. Řgens [maca] tuɣa [ɛad] ifsed ixef nnes aṭṭas.
2CH 27:3 Netta ibna Tawwart Yuɛřan n Taddart n SIDI. Uřa ɣar řḥiḍ n Ɛufil ibna aṭṭas.
2CH 27:4 Ibna tineddam di Temmurt n Idurar n Yahuda u deg izeɣran ibna lqelɛat d ṣṣumɛat.
2CH 27:5 Netta immneɣ ak-d ayt n Ɛammun u iɣřeb xasen, ařami ayt n Ɛammun ssiwḍen ɣares deg useggʷas nni [ɛad] mya talint n nnuqart d ɛecra-ařaf n ikuruten n irden d ɛecra-ařaf ikuruten n imendi. Uřa deg useggʷas wiss tnayen d wiss třata ssiwḍen ayt n Ɛammun ɣares man aya ɛawed.
2CH 27:6 [Ammu i] idweř Yutam ijhed, maɣar issewjed ibriden nnes zzat i wudem n SIDI, AREBBI nnes.
2CH 27:7 Imezruyen iqqimen n Yutam, d marra imenɣan i immneɣ d marra ibriden nnes, aqa ttwazemmemen deg wedlis n imezruyen n ijeǧiden n Yahuda.
2CH 27:8 [Tuɣa] ɣares xemsa u-ɛicrin n iseggʷusa umi idweř d ajeǧid. Netta iḥkem seṭṭac n iseggʷusa di Urcalim.
2CH 27:9 Yutam igga ad yareyyeḥ jar řejdud nnes. Netta ittwanḍeř di tendint n Dawud. Mmis Aḥaz idweř d ajeǧid deg wemcan nnes.
2CH 28:1 Aḥaz [tuɣa] ɣares ɛicrin n iseggʷusa, umi idweř d ajeǧid. Netta iḥkem seṭṭac n iseggʷusa di Urcalim. Netta war iggi min iǧan nican di tiṭṭawin n SIDI, AREBBI nnes, am mammec [igga] babas Dawud.
2CH 28:2 Netta yuyur deg ibriden n ijeǧiden n Israil. Ɛawed igga řexyařat ifesyen i ‘Ibaɛlen’.
2CH 28:3 Netta tuɣa ittawi-dd řebxur di teɣzurt n Bin-Hinnum u issecmeḍ iḥenjiren nnes di tmessi. Netta igga ɛlaḥsab jjɛayef nni ggin marra řegnus i xef yuẓẓeř SIDI zzat i wudem n ayt n Israil.
2CH 28:4 Netta yiwyi-dd tiɣarṣa d tewhibin n řebxur x řegɛudi u x tewririn u sadu marra azɣar aziza.
2CH 28:5 SIDI, AREBBI nnes, iwca i-t deg ifassen n ujeǧid n Aram. Nitni wtin t u ḥebbsen zzayes ijj n ubarru imɣar u iwyen ten ɣar Dimacq. Immewc Aḥaz deg ifassen n ujeǧid n Israil, wenni d as iwtin s ict n tecti d tameqqrant.
2CH 28:6 Faqaḥ, mmis n Ramalyahu, inɣa mya u-ɛicrin-ařef [n yeryazen] deg ijj n wass di Yahuda, marra nitni d ayt n umenɣi, minzi nitni ḥeyyden x SIDI, AREBBI n řejdud nsen.
2CH 28:7 Zikri, ijj n bu-teɣruḍt zi Ifrayim, inɣa Maɛasiya, mmis n ujeǧid, d Ɛazriqam, ameḥḍay n Taddart, d Ilqana, wenni d wiss tnayen awarni i ujeǧid.
2CH 28:8 Nedhen ayt n Israil zeg aytmatsen mitayen-ařef n temɣarin d iḥenjiren d tḥenjirin di tmeḥbast u ṭṭfen zzaysen ict n tkeccaḍt d tameqqrant. Iwyen takeccaḍt [nni] ɣar Samarya.
2CH 28:9 Dinni iǧa ijj n unabi n SIDI, qqaren as Ɛudid. Wanita iffeɣ, imsagar ak-d řɛeskar i dd-iɛeqben ɣar Samarya, inna asen: “Xzarem, minzi s wesɛar n SIDI, AREBBI n řejdud nwem, x Yahuda, igga i-ten deg ufus nwem u kenniw tenɣim ten s ijj n wesxeḍ yiweḍ ař ajenna.
2CH 28:10 U řexxu ittɣiř awem ad teggem ayt n Yahuda d Urcalim sadu ufus nwem am yisemɣan d tiyya. Ma war kenniw iḍfar xenni umarwas ɣar SIDI, AREBBI nwem?
2CH 28:11 Sřem-dd řexxu ɣari u arrem imeḥbas nni tḥebbsem zeg aytmatwem, maɣar řḥaduq n weɣḍab n SIDI [i dd-yusa] xawem.”
2CH 28:12 [Xenni] ssbedden yeryazen-a zeg izeǧifen n iḥenjiren n Ifrayim [ixef nsen] zzat i yinni dd-yareggʷeḥen zi řɛeskar: Ɛazarya, mmis n Yuḥanan, Baraxya, mmis n Macillimut, Ḥizqiya, mmis n Callum, d Ɛamasa, mmis n Hidlay.
2CH 28:13 Nitni nnan asen: “War tzemmarem ad tessidfem imeḥbas danita, [maɣar] nitni ad xaneɣ dd-arenyen amarwas zzat i SIDI. Ma ittɣiř awem [nzemmar] ad narni [ɛad] di ddnub nneɣ d umarwas nneɣ, waxxa [ɛad] ɣarneɣ aṭṭas n imerwusa u řḥaduq n weɣḍab [n AREBBI] aqa-t x Israil?”
2CH 28:14 [Xenni] semḥen yeryazen iḥezzmen s řesnaḥ deg imeḥbas d tkeccaḍt zzat i imeqqranen d marra agraw [n řgens].
2CH 28:15 Iryazen, inni ittwasemman qbeř s ismawen nsen, kkaren uca thellan deg imeḥbas. Nitni ssyarḍen marra inni tuɣa iǧan d iɛaryanen s [warruḍ zi] tkeccaḍt, ssyarḍen ten s warruḍ d tsiřa u wcin asen ad ccen, ad swen. [Ɛawed] dehnen ten uca ssɣimen inni i tuɣa gguren ttenqarḍen x yeɣyař u [ammu] iwyen ten ɣar aytmatsen ɣar Ariḥa, Tandint n Tcejjura n Tini. Awarni man aya ɛeqben nitni simant nsen ɣar Samarya.
2CH 28:16 Di řweqt nni issekk Aḥaz [ireqqasen] ɣar ijeǧiden n Accur, ḥima ad as wcen afus.
2CH 28:17 Uřa d ayt n Idum usin-dd. Nitni wtin Yahuda u nedhen [ten] di tmeḥbast.
2CH 28:18 Ifilisṭiniyyen hejmen x tneddam n Temmurt Iwaṭan d ljanub n Yahuda uca ṭṭfen Bayt-Cams, Ayyalun, Jadirut, Suku d tneddam i ɣares dd-iqqnen, Timnah d tneddam i ɣares dd-iqqnen d Jimzu d tneddam i ɣares dd-iqqnen uca zedɣen dinni.
2CH 28:19 Maɣar SIDI issehwa Yahuda di ssibbet n Aḥaz, ajeǧid n Yahuda, minzi netta iffucceḥ di Yahuda, iɣdar SIDI.
2CH 28:20 Tiɣlat-Filnasir, ajeǧid n Accur, yusa-dd ɣares. Netta igga xas bezzez u war t issejhed.
2CH 28:21 Maɣar [ɛad mařa] Aḥaz iksi [agřa] zi Taddart n SIDI u zi taddart n ujeǧid u zi řḥukkam, iwca aya i ujeǧid n Accur, aqa man aya war d as ineffiɛ ca.
2CH 28:22 Di řweqt i di ittwaḥṣar, yarni ujeǧid Aḥaz ɛad di řɣedran nnes zzat i SIDI.
2CH 28:23 Netta iqeddem tiɣarṣa i irebbiten n Dimacq, inni xas iɣeřben, inna: “Maɣar irebbiten n ijeǧiden n Aram wcin asen afus, necc ad asen wehhbeɣ, ḥima ad ayi wcen afus ɛawed.” [Maca] nitni dewřen d ssibbet n uweṭṭu nnes u n marra Israil.
2CH 28:24 Aḥaz issmun řeqcuɛ zi Taddart n AREBBI uca yarẓa řeqcuɛ n Taddart n AREBBI di iwetwiten uca ibelleɛ tiwwura n Taddart n SIDI. Netta igga iɛalṭaren i yixef nnes di kuř taɣmart n Urcalim.
2CH 28:25 Igga uřa d řegɛudi di kuř tandint n Yahuda, ḥima ad awyen řebxur i irebbiten nneɣni. [Ammu i] isɛar netta SIDI, AREBBI n řejdud nnes.
2CH 28:26 Imezruyen iqqimen d marra ibriden nnes, imezwura d ineggura, xzar, aqa ttwazemmemen deg wedlis n ijeǧiden n Yahuda d Israil.
2CH 28:27 Aḥaz igga ad yareyyeḥ jar řejdud nnes. Neḍřen t di tendint, di Urcalim, maca war t ssarsen ca deg imeḍřan n ijeǧiden n Israil. Mmis Ḥizqiya idweř d ajeǧid deg wemcan nnes.
2CH 29:1 Ḥizqiya idweř d ajeǧid umi [tuɣa] ɣares xemsa u-ɛicrin n iseggʷusa. Netta iḥkem tesɛa u-ɛicrin n iseggʷusa di Urcalim. Yemmas qqaren as Abiya, yeǧis n Zakariyya.
2CH 29:2 Netta igga min iǧan nican di tiṭṭawin n SIDI, nican am mammec t igga babas Dawud.
2CH 29:3 Deg useggʷas amezwaru n řeḥkamet nnes, deg uyur amezwaru, yarzem tiwwura n Taddart n SIDI uca iɛdeř i-tent.
2CH 29:4 Issidef ikehhanen d Ilawiyyen uca issmun i-ten x wazzay ɣar uɣezdis n ccarq.
2CH 29:5 Inna asen: “Sřem-dd ɣari, [a] Ilawiyyen. Sqeddsem ixef nwem uřa d Taddart n SIDI, AREBBI n řejdud nwem, u kksem marra min ixemjen zi Zzawect Iqeddsen.
2CH 29:6 Maɣar řejdud nneɣ tuɣa aten d iɣeddaren u ggin min iǧan d aɛeffan di tiṭṭawin n SIDI, AREBBI nneɣ. Nitni ḥeyyden xas, nnqeřben udmawen nsen zi Tzeddiɣt n SIDI uca arrin s weɛrur ɣar [SIDI].
2CH 29:7 Ɛad uřa d tiwwura n wesqif n wadaf [n Zzawect] bellɛen tent, ssxesyen řefnarat, war ssarɣen řebxur u war ssgiɛɛden [ɛad] taɣarṣt n wecmaḍ i AREBBI n Israil di Zzawect Iqeddsen.
2CH 29:8 S uya yusa-dd uduqqez ameqqran [n weɣḍab] n SIDI x Yahuda d Urcalim, uca Netta yarra i-ten d ict n řqecɛet n unexřiɛ d usiggʷed d tseḍḥact am mammec tᵉttwařam kenniw s tiṭṭawin nwem.
2CH 29:9 Xzarem, řejdud nneɣ wḍan s ssif u iḥenjiren nneɣ, tiḥenjirin nneɣ d temɣarin nneɣ aqa aten di řeḥbes x uya.
2CH 29:10 Řexxu aqa-tt ɣari deg wuř inu maḥend ad ggeɣ ijj n řɛahd ak-d SIDI, AREBBI n Israil, ḥima řḥaduq n weɣḍab nnes ad xaneɣ ibeɛɛed.
2CH 29:11 [A] arrawen inu, war arexxum, minzi SIDI ifarz i kenniw, aqa ad tbeddem zzat i wudem nnes, ḥima ad as tsexxarem u ḥima kenniw ad as tiřim d imsexxaren nnes u ad [as] tqeddmem řebxur.”
2CH 29:12 [Xenni] kkaren Ilawiyyen: Maḥat, mmis n Ɛamasay, d Yuwil, mmis n Ɛazarya, zeg iḥenjiren n Quḥat. Zeg warrawen n Marari, Qis, mmis n Ɛabdi, d Ɛazarya, mmis n Yahlayil. Zeg warrawen n Jarcun, Yuwax, mmis n Zimma, d Ɛidan, mmis n Yuwax.
2CH 29:13 Zeg warrawen n Iliṣafan, Cimri d Yaɛiyil, u zeg warrawen n Asaf, Zakariyya d Mattanya.
2CH 29:14 Zeg warrawen n Hayman, Yaḥiyil d Cimɛi, u zeg warrawen n Yadutun, Camɛiya d Ɛuzziyil.
2CH 29:15 Nitni ssmunen aytmatsen uca ssqeddsen ixef nsen ɛlaḥsab řumur n ujeǧid wenni iɛemmden x wawařen n SIDI, ḥima ad ssizedgen Taddart n SIDI.
2CH 29:16 Udfen ikehhanen ɣar Taddart n SIDI, ḥima ad tt ssizedgen uca ssuffɣen marra řexmej i ufin di Zzawect Tameqqrant n SIDI ɣar řemraḥ n Taddart n SIDI, uca Ilawiyyen ksin t, ḥima ad t awyen ɣar barra, ɣar teɣzart n Qidrun.
2CH 29:17 Deg [wass] amezwaru n uyur amezwaru bdan ad ssqeddsen [Taddart] uca deg was wiss tmenya n uyur iwḍen nitni ɣar wesqif n wadaf [n Zzawect] n SIDI. [Ammu i] ssqeddsen Taddart n SIDI di tmenya n wussan. Deg wass wiss seṭṭac n uyur amezwaru tuɣa kemmřen [řxedmet].
2CH 29:18 Nitni udfen ɣar ujeǧid Ḥizqiya, nnan: “Neccin nessizdeg marra Taddart n SIDI, aɛalṭar n wecmaḍ ak-d marra dduzanat nnes d tzewḍa s weɣrum n wescan ak-d marra dduzanat nnes.
2CH 29:19 Marra řeqcuɛ i inḍar ujeǧid Aḥaz zi řeɣdar nnes deg wussan n tgelda nnes, neɛdeř i-ten u nessqeddes i-ten. Aqa aten zzat i uɛalṭar n SIDI.”
2CH 29:20 [Xenni] ikkar ujeǧid Ḥizqiya zic uca issmun imeqqranen n tendint uca igeɛɛed ɣar Taddart n SIDI.
2CH 29:21 Nitni iwyen-dd sebɛa n ifunasen imeẓyanen, sebɛa n icarriyyen, sebɛa n izmaren d sebɛa n imuyan n iɣayḍen, maḥend [ad iřin] d taɣarṣt n ddenb i tgeldit, řa i Zzawect Iqeddsen uřa i Yahuda, uca netta inna i warrawen n Harun, ikehhanen, ḥima ad ten qeddmen x uɛalṭar n SIDI.
2CH 29:22 Ɣarṣen i ifunasen uca sseřqan ikehhanen i idammen uca ruccen ten x uɛalṭar. Nitni ɣarṣen uřa i icarriyyen uca zeǧɛen idammen x uɛalṭar. Ɣarṣen uřa i izmaren uca zeǧɛen idammen x uɛalṭar.
2CH 29:23 Nitni iwyen-dd imuyan i tɣarṣt n ddenb zzat i wudem n ujeǧid d wegraw [n řgens], uca ssarsen xasen ifassen nsen.
2CH 29:24 Ikehhanen ɣarṣen asen u s idammen nsen ssizedgen aɛalṭar zi ddenb, ḥima ad ggen aṣřaḥ i marra Israil, maɣar ajeǧid tuɣa igga taɣarṣt n wecmaḍ d tɣarṣt n ddenb [nni] i marra Israil.
2CH 29:25 Netta issbedd Ilawiyyen di Taddart n SIDI s taǧunin n wuzzař d řgambriyat d lharpat, ɛlaḥsab řumur n Dawud d Jad, amwařaw n ujeǧid, d unabi Natan, minzi řumur-a tuɣa i dd-yusa zi SIDI s uqemmum n inabiyyen.
2CH 29:26 Ayt n Lawi bedden [din] ak-d dduzanat [n lmusiqa] n Dawud u ikehhanen ak-d řebwaq.
2CH 29:27 [Xenni] yumur Ḥizqiya ad awyen taɣarṣt n wecmaḍ x uɛalṭar. Di tsaɛɛet i di tebda tɣarṣt n wecmaḍ, ibda uřa d azehhed i SIDI s řebwaq u s dduzanat [n lmusiqa] n Dawud, ajeǧid n Israil.
2CH 29:28 Marra agraw [n řgens] ibendeq, am ttɣennajen u ttsuḍan di řebwaq. Man aya marra ikka ařami tᵉttwakemmeř tɣarṣt n wecmaḍ.
2CH 29:29 [Umi] ikemmeř usiweḍ n tɣarṣt n wecmaḍ, iwḍa ujeǧid x ifadden nnes d marra inni tuɣa ɣares iǧan, uca bendqen.
2CH 29:30 Awarni uya inna ujeǧid Ḥizqiya d řḥukkam i Ilawiyyen, ad ssɛuǧan SIDI s wawařen n Dawud u n umwařaw Asaf. Ssɛuǧan [ɛad] s řefraḥet, [xenni] uḍaren uca bendqen.
2CH 29:31 Ḥizqiya yarra-dd, inna: “Řexxu kenniw tᵉttwařeqqmem [d ikehhanen] i SIDI. Asettiw-dd uca awyem-dd tiɣarṣa d tewhibin n uqadi i Taddart n SIDI.” [Xas uca] yiwi-dd wegraw [n řgens] tiɣarṣa d tewhibin n uqadi, u marra inni i ɣar tt tuɣa di řxadar nsen, iwyen-dd tiɣarṣa n wecmaḍ.
2CH 29:32 Řqedd n tɣarṣa n wecmaḍ i dd-yiwi wegraw [n řgens], aqa-t di sebɛin n ifunasen d mya n icarriyyen d mitayen n izmaren. Nitni marra ttwawyen-dd d taɣarṣt n wecmaḍ i SIDI.
2CH 29:33 Tiwhibin iqeddsen aqa atent di setta-mya n ifunasen d teřt-ařaf n wuǧi.
2CH 29:34 Maca aqa din drus n ikehhanen, u nitni war zemmaren ad ssarxun tiřmect n marra tiɣarṣa n wecmaḍ. S uya ɛawnen ten aytmatsen Ilawiyyen, ařami kemmřen řxedmet u ařami ikehhanen nneɣni tuɣa ssqeddsen ixef nsen, minzi Ilawiyyen tuɣa seggden deg wuř ktar zeg ikehhanen ḥima ad ssqeddsen ixef nsen.
2CH 29:35 Tuɣa din ɛawed aṭṭas n tɣarṣa n wecmaḍ ak-d tadunt n tewhibin n řehna d tewhibin n useyyeb i tɣarṣa n wecmaḍ. [Ammu] i tᵉttwaɛdeř tsexxart n Taddart n SIDI.
2CH 29:36 Ḥizqiya d marra řgens farḥen x min tuɣa issewjed AREBBI i řgens, maɣar tamesřact tᵉttwagg břa ma ad as ggen řeḥsab.
2CH 30:1 [Awarni uya] issekk Ḥizqiya [ireqqasen] ɣar marra Israil d Yahuda u yura tibratin i Ifrayim d Manassa, ḥima ad dd-asen ɣar Taddart n SIDI di Urcalim ad ggen [Řɛid n Tɣarṣt n] Useɛdu i SIDI, AREBBI n Israil.
2CH 30:2 Maɣar imcawar ujeǧid ak-d řḥukkam nnes d marra agraw [n řgens] di Urcalim, ḥima ad ggen [Řɛid n Tɣarṣt n] Useɛdu deg uyur wiss tnayen,
2CH 30:3 maɣar nitni war zemmaren ad t ggen di řweqt [nnes ittwaggen], minzi aṭṭas n ikehhanen war ttwaqeddsen ca am dd-ittřiq, u řgens war tuɣi imun [ɛad] di Urcalim.
2CH 30:4 Tamesřact-a tuɣa-tt nican di tiṭṭawin n ujeǧid u di tiṭṭawin n marra agraw [n řgens].
2CH 30:5 Nitni ggin, ad barrḥen di marra Israil zi Dan ař Bi’r-Sebɛa, ḥima ad dd-asen ad ggen [Řɛid n Tɣarṣt n] Useɛdu i SIDI, AREBBI n Israil, di Urcalim, maɣar war tt ggin aṭṭas [n řweqt] am mammec tuɣa tura.
2CH 30:6 Ireqqasen n tazřa kkin s tebratin n ujeǧid d řḥukkam nnes deg ufus x marra Israil d Yahuda, u [barrḥen] am mammec t yumur ujeǧid, nnan: “Kenniw, ayt n Israil, dewřem-dd ɣar SIDI, AREBBI n Ibrahim, Isḥaq d Israil, [xenni] Netta ad dd-idweř ɣar yinni innejmen zeg ufus n ujeǧid n Accur, ɣar yinni i ɣarwem iqqimen.
2CH 30:7 War ttiřim am řejdud nwem d aytmatwem, inni iɣdaren SIDI, AREBBI n řejdud nsen, ařami ten isellem Netta ɣar unexřiɛ, am mammec tᵉttwařam [s yixef nwem].
2CH 30:8 War sseqsaḥem řexxu irawen nwem, iřim am řejdud nwem. Wcem afus i SIDI u asem-dd ɣar Zzawect nnes Iqeddsen tenni issqeddes Netta i řebda. Sexxarem i SIDI, AREBBI nwem, [xenni] ad xawem iḥeyyed řḥaduq n weɣḍab nnes.
2CH 30:9 Mařa kenniw tdewřem-dd ɣar SIDI, ad afen aytmatwem d iḥenjiren nwem arreḥmet zzat i wudem n yinni i-ten iḥebbsen ařami ɣa dd-dewřen ɣar temmurt-a. Maɣar SIDI, AREBBI nwem, d bab n uḥinni d arreḥmet u Netta war xawem issḥeyyid ca udem mařa kenniw tdewřem-dd ɣares.”
2CH 30:10 [Ammu] i uyuren ireqqasen n tazřa zi tendint ɣar tendint, [kkin] x temmurt n Ifrayim d Manassa ař Zabulun, maca [iwdan] ḥeccen xasen u kkwaren ten [iwdan].
2CH 30:11 Maca ca n yeryazen zi Acir, Manassa d Zabulun sswaḍɛen ixef nsen uca usin-dd ɣar Urcalim.
2CH 30:12 Uřa di Yahuda indeh ufus n SIDI uca igga ad ḍfaren řumur n ujeǧid u n řḥukkam ɛlaḥsab awař n SIDI, s wuř d ijjen.
2CH 30:13 Munen waṭṭas [n yewdan zi] řgens di Urcalim, ḥima ad ɛeyyden Řɛid n Weɣrum břa Antun deg uyur wiss tnayen. [Ammu i tuɣa din] ijj n wegraw [n řgens] d ameqqran aṭṭas.
2CH 30:14 Nitni kkaren u kksen iɛalṭaren nni [iǧan] di Urcalim. Kksen uřa d marra iɛalṭaren n řebxur uca nḍaren ten di teɣzart n Qidrun.
2CH 30:15 Deg wass wiss arbeɛṭac n uyur wiss tnayen ɣarṣen nitni i [Tɣarṣt n] Useɛdu. Ikehhanen d Ilawiyyen iwḍen ad seḍḥan u bdan ad ssqeddsen ixef nsen uca iwyen tiɣarṣa n wecmaḍ ɣar Taddart n SIDI.
2CH 30:16 Nitni bedden deg wemcan nsen am mammec i teggur ɣarsen ɛlaḥsab Ccariɛa n Musa, aryaz n AREBBI. Ikehhanen zeǧɛen idammen [nni ksin] zeg ifassen n Ilawiyyen.
2CH 30:17 Minzi aṭṭas deg wegraw [n řgens] tuɣa war ssqeddsen ixef nsen. S uya ttwaggen Ilawiyyen x tɣarṣt n izmaren n [Tɣarṣt n] Useɛdu i marra inni war izdigen, ḥima ad ten ssqeddsen i SIDI.
2CH 30:18 Maɣar azyen ameqqran n řgens, [zzaysen] aṭṭas zi Ifrayim d Manassa d Issakar d Zabulun, tuɣa war ssizedgen ixef nsen. Nitni ccin [Taɣarṣt n] Useɛdu war iǧi am mammec tura. Maca Ḥizqiya iẓẓuǧ i nitni, inna: “SIDI icna, iři Netta ad igg aṣřaḥ i nitni,
2CH 30:19 [x] kuř ijj wenni inwan ad yarzu s marra uř nnes x AREBBI, SIDI, AREBBI n řejdud nnes, waxxa war iǧi s usizdeg [i ittřiqen] i Zzawect Iqeddsen.”
2CH 30:20 Isřa SIDI ɣař Ḥizqiya uca issgenfa řgens.
2CH 30:21 [Ammu] i ɛeyyden ayt n Israil, inni tuɣa innyarwen di Urcalim, sebɛa n wussan n Řɛid n Weɣrum břa Antun s řefraḥet tameqqrant. Ayt n Lawi d ikehhanen ssɛuǧan SIDI ass x wass s jjehd n dduzanat [n lmusiqa] [i uɛuǧi] n SIDI.
2CH 30:22 Issiweř Ḥizqiya ɣar wuř n marra Ilawiyyen inni ɣar teǧa řefhamet icnan n tussna n SIDI. Ccin sebɛa n wussan zi tɣarṣa di řweqt ittwaggen [n řɛid], [am] tuɣa iwyen tiwhibin n řehna u qadan SIDI, AREBBI n řejdud nsen.
2CH 30:23 [Umi] imcawar wegraw [n řgens] marra maḥend ad t ggen ict n twařa nneɣnit i sebɛa n wussan, arnin nitni [ɛad] sebɛa n wussan [ccuren] s řefraḥet,
2CH 30:24 maɣar Ḥizqiya, ajeǧid n Yahuda, tuɣa iwca ařef n ifunasen imeẓyanen d sebɛa-ařaf n wuǧi uca řḥukkam tuɣa wcin ařef n ifunasen imeẓyanen d ɛecra-ařaf n wuǧi. Ijj n ubarru n ikehhanen tuɣa ssqeddsen [ixef nsen zzaysen].
2CH 30:25 Ifarḥ marra wegraw [n řgens] n Yahuda, uřa d ikehhanen d Ilawiyyen d marra agraw [n řgens] n yinni dd-yusin zi Israil, uřa d ibarraniyyen nni dd-yusin zi Israil d yinni izeddɣen di [temmurt n] Yahuda.
2CH 30:26 Tuɣa din řefraḥet d tameqqrant di Urcalim, maɣar zeg wussan n Suliman, mmis n Dawud, ajeǧid n Israil, tuɣa war imsar am uya di Urcalim.
2CH 30:27 [Xenni] bedden ikehhanen n Ilawiyyen uca barken řgens. Tmijja nsen tᵉttwaseř, maɣar taẓaǧit nsen tudef ɣar Tzeddiɣt Tamqeddest nnes deg ujenna.
2CH 31:1 Awarni řami kemmřen s man aya marra, ffɣen-dd marra ayt n Israil nni tuɣa din iǧan ɣar tneddam n Yahuda u arẓin imayḍuten [iqeddsen], hedmen tirebbin n cwarti uca kksen řegɛudi d iɛalṭaren zi marra Yahuda d Binyamin. [Ammu i ggin uřa] di Ifrayim d Manassa ařami tt kemmřen. [Awarni uya] ɛeqben marra ayt n Israil, kuř ijj ɣar wagřa nnes, [marra nitni] ɣar tneddam nsen.
2CH 31:2 Ḥizqiya issbedd tirbiɛin n ikehhanen d Ilawiyyen ɛlaḥṣab tirbiɛin nsen, kuř ijj ɛlaḥsab tasexxart nnes: ikehhanen d Ilawiyyen i tɣarṣt n wecmaḍ u i tewhibin n řehna, ḥima ad sexxaren, ad qadan u ad ssɛuǧan di tewwura n řemrageḥ n řɛeskar n SIDI.
2CH 31:3 [Netta iwca] uřa d tawhibt n ujeǧid zeg wagřa nnes i tɣarṣa n wecmaḍ, i tɣarṣa n wecmaḍ ɣar tuffut u ɣar tmeddit, uřa d tiɣarṣa n wecmaḍ i wussan n ssebt, i uyuren imaynuten u i řeɛyudat ittwaggen, am mammec tura di Ccariɛa n SIDI.
2CH 31:4 Netta inna i řgens, i imezdaɣ n Urcalim, ad wehhben tasɣart n ikehhanen d Ilawiyyen, ḥima ina [zemmaren] ad iřin jehden di tɣuri n Ccariɛa n SIDI.
2CH 31:5 [Umi] dd-iffeɣ wawař nni, iwyen-dd ayt n Israil s ufeyyeḍ [zeg] usuffeɣ amezwaru n imendi, n binu n jdid d zzect d tamment u zi marra řɣiǧet n yeyyar. Iwyen uřa d řeɛcur zi marra s ufeyyeḍ.
2CH 31:6 Tarwa n Israil d Yahuda, inni izedɣen di tneddam n Yahuda, iwyen uřa d řeɛcur zeg ifunasen u zeg wuǧi uřa d řeɛcur n tewhibin iqeddsen nni tuɣa ssqeddsen i SIDI, AREBBI nsen, uca wcin [ten], ggin [zzaysen] iɛurrac.
2CH 31:7 Deg uyur wiss třata bdan nitni ad [zzaysen] ggen iɛurrac zi tisi u deg uyur wiss sebɛa kemmřen tt.
2CH 31:8 [Umi] Ḥizqiya d řḥukkam usin-dd u ẓrin iɛurrac nni, barken SIDI d řgens nnes Israil.
2CH 31:9 Isseqsa Ḥizqiya ikehhanen d Ilawiyyen x iɛurrac nni.
2CH 31:10 Ɛazarya, akehhan ameqqran zi taddart n Ṣaduq yarra-dd xas, inna: “Zeg wami dd-nekkar ad nawi tawhibt n usgeɛɛed ɣar Taddart n SIDI, aqa ɣarneɣ min ɣa necc ař tyawant uca ɛad iqqim aṭṭas iceṭṭ, maɣar SIDI ibarek řgens nnes, ařami iqqim řqedd-a n waṭṭas iceṭṭ.”
2CH 31:11 [Xenni] inna Ḥizqiya, ad sswejden ixxamen n Taddart n SIDI, u nitni sswejden ten.
2CH 31:12 Nitni ssidfen tawhibt n usgeɛɛed d řeɛcur d tewhibin iqeddsen din s řaman. Kunanya, Alawi, ameḥḍay, d umas Cimɛi, wenni d wiss tnayen, tuɣa aten x man aya [marra].
2CH 31:13 Yaḥiyil, Ɛazazya, Naḥat, Ɛasa’il, Yarimut, Yuzabad, Iliyil, Yismaxya, Maḥat, Banaya [tuɣa aten d] iweqqafen sadu ufus n Kunanya d Cimɛi, umas, x řumur n ujeǧid Ḥizqiya u n Ɛazarya, ameḥḍay n Taddart n AREBBI.
2CH 31:14 Quri, mmis n Yimna, Alawi, aɛessas n tewwart ɣar uɣezdis n ccarq, [ittwagg] x tewhibin n řxaḍar n AREBBI, ḥima ad ibḍa tawhibt n usgeɛɛed n SIDI d tewhibin iqeddsen qaɛ.
2CH 31:15 Ɛadan, Minyamin, Yecuɛa, Camɛiya, Amarya d Cakunya bedden s řmanet ɣar uɣezdis nnes ɛlaḥṣab tirbiɛin nsen, ḥima ad wezzɛen di tneddam n ikehhanen i aytmatsen, am i imeqqranen, am i imeẓyanen,
2CH 31:16 maca [war iǧi] i yinni ittwazemmemen di lista n jjadira n yeryazen i ɣar iǧa třata n iseggʷusa sennej, aqa marra inni dd-yusin ɣar Taddart n SIDI i řxedmet n kuř ass i wass nni, i řxedmet nsen di tsexxart nsen, ɛlaḥsab tirbiɛin nsen.
2CH 31:17 Azemmen di lista n jjadira n ikehhanen [tuɣa-t] ɛlaḥṣab tudrin n ibabaten nsen, [maca] [azemmem] n Ilawiyyen zi ɛicrin n iseggʷusa sennej, [tuɣa-t] ɛlaḥsab tasexxart nsen, ɛlaḥsab tirbiɛin nsen.
2CH 31:18 [Nitni wezzɛen] i yinni ittwazemmemen di lista n jjadira ak-d marra tarwa nsen d temɣarin nsen d iḥenjiren nsen d tḥenjirin nsen zi marra agraw [n řgens], maɣar nitni ggin s řaman umi ssqeddsen ixef nsen s tidett.
2CH 31:19 Jar warrawen n Harun, ikehhanen, deg iyyaren n ddmani n tneddam nsen, di kuř tandint, [tuɣa din] iryazen nni ittwazemmemen s ismawen [nsen] ḥima ad wcen tasɣart i marra awtem jar ikehhanen u i marra inni ittwazemmemen di lista n jjadira jar Ilawiyyen.
2CH 31:20 [Ammu] i igga Ḥizqiya di marra Yahuda. Netta igga min iǧan icnan d iseggden d nican zzat i wudem n SIDI, AREBBI nnes.
2CH 31:21 Marra řxedmet i ibda di ṭṭweɛ n tsexxart n Taddart n AREBBI u di ṭṭweɛ n Ccariɛa d tewṣeyyet ḥima ad yarzu [ammu] AREBBI, igga i-tt s marra uř nnes uca ifřeḥ.
2CH 32:1 Awarni temsarin-a d wescan-a n řaman, yusa-dd Sanḥarib, ajeǧid n Accur. Netta yudef ɣar Yahuda uca inneḍ i tneddam ifaryen, ittɣiř as ad tent iṭṭef i yixef nnes.
2CH 32:2 Iẓra Ḥizqiya, aqa Sanḥarib yusa-dd uca inwa ad iḥjem x Urcalim.
2CH 32:3 Netta imcawar ak-d řḥukkam nnes d ayt n bu-teɣruḍt nnes, maḥend ad netyen tařawin n waman barra i tendint, u nitni wcin as afus.
2CH 32:4 Iwyen-dd aṭṭas zi řgens uca netyen marra tařawin uřa d teɣzart i d ittazzřen di řwesṭ n temmurt, nnan: “Mayemmi i dd ɣa yasen ijeǧiden n Accur uca ad afen aṭṭas n waman?”
2CH 32:5 Netta issejhed [tandint], iɛdeř marra řḥiḍ i tuɣa ittwarẓen d iwetwiten uca yarra i-t ad igeɛɛed ař ṣṣumɛat. U ɣar barra [iɛdeř ɛad] ijj n řḥiḍ nneɣni. Netta issejhed lqelɛa n tendint n Dawud uca igga aṭṭas n lansat d tseddariyin [n uɛeskari].
2CH 32:6 Netta igga ikumandaren n řɛeskarat x řgens uca issmun i-ten ɣares deg wazzay n tewwart n tendint uca issiweř ařami daysen igga uř, inna:
2CH 32:7 “Iřim d iryazen u iřim tmeḥḍem, war ttnexřiɛem zzat i wudem n ujeǧid n Accur uřa zzat i wudem n marra řɣaci nni ɣares iǧan, maɣar [Wenni] ɣarneɣ aqa-t deg waṭṭas x wenni ɣares.
2CH 32:8 Ɣares ijj n uɣiř n weysum [n bnadem], [maca] ɣarneɣ SIDI, AREBBI nneɣ, ḥima ad aneɣ iwc afus u ḥima ad immneɣ amenɣi nneɣ.” Uca řgens ittecceř x wawařen n Ḥizqiya, ajeǧid n Yahuda.
2CH 32:9 Awarni man aya issekk Sanḥarib, ajeǧid n Accur, imsexxaren nnes ɣar Urcalim, am tuɣa netta zzat i Laxic d marra řḥukkam nnes akides. [Issekk i-ten] ɣar Ḥizqiya, ajeǧid n Yahuda, u ɣar marra [řgens n] Yahuda nni [iǧan] di Urcalim, inna:
2CH 32:10 “Ammu i inna Sanḥarib, ajeǧid n Accur: ‘Min xef tᵉttecřem kenniw, zeɛma kenniw [tzemmarem] ad teqqimem di Urcalim am tᵉttwaḥṣarem?
2CH 32:11 Ma war yarezzu Ḥizqiya ad kenniw iɣwa, ḥima ad kenniw isellem i řmewt zi řaẓ d ufadi xmi iqqar: SIDI, AREBBI nneɣ, ad aneɣ ifekk zeg ufus n ujeǧid n Accur!?
2CH 32:12 Ma war ikkis Ḥizqiya nni uřa d řegɛudi nnes d iɛalṭaren nnes, u [ma war] issiweř netta ak-d Yahuda d Urcalim, inna: Mɣir i yijj n uɛalṭar ad tbendqem u ad xas tawyem řebxur!?
2CH 32:13 Ma war tessinem kenniw min ggiɣ necc d řejdud inu s marra řegnus n temmura? Ma fekken irebbiten n řegnus n temmura nni tammurt nsen zeg ufus inu?
2CH 32:14 Man wen zi jar marra irebbiten n řegnus nni x qḍan řejdud inu, tuɣa izemmar ad issenjem řgens nnes zeg ufus inu, ařami AREBBI nwem izemmar ad kenniw ifekk zeg ufus inu?
2CH 32:15 [Xenni] řexxu, war ttejjim Ḥizqiya ad kenniw icmet u [war t ttejim] ad kenniw issɣekkwi ammu. War tᵉttiqqam ca, maɣar uřa d ijj n arebbi zi man ma řgens niɣ tageldit tuɣa izemmar ad ifekk řgens nnes zeg ufus inu niɣ zeg ufus n řejdud inu. Mecḥař qell ɛad AREBBI nwem ad kenniw ifekk zeg ufus inu!’”
2CH 32:16 Uca imsexxaren nnes ssiwřen ɛad ktar ḍidd i SIDI AREBBI u ḍidd i umsexxar nnes Ḥizqiya.
2CH 32:17 Netta yura ɛawed tibratin ḥima ad isseḥqar SIDI, AREBBI n Israil, u ḥima ad xas issiweř daysent, uca inna: “Am mammec irebbiten n řegnus n temmura, inni war izemmaren ad fekken řgens nsen zeg ufus inu, ammu war izemmar AREBBI n Ḥizqiya ad issenjem řgens nnes zeg ufus inu!”
2CH 32:18 Nitni sɣuyen s jjehd s yiřes n Tyahudect ɣar řgens n Urcalim nni [ibedden] x řḥiḍ ḥima ad ten ssiggʷiden u ad ten ssxarewḍen, maḥend zemmaren ad ṭṭfen tandint.
2CH 32:19 Nitni ssiwřen x AREBBI n Urcalim am x irebbiten n řegnus n [marra] tammurt, inni [iǧan] mɣir řxedmet n iwdan waha.
2CH 32:20 Ajeǧid Ḥizqiya d unabi Icaɛya, mmis n Amuṣ, ẓẓuǧen x man aya, řaɣan ɣar ujenna.
2CH 32:21 Uca issekk-dd SIDI ijj n lmalak, wenni iqḍan x marra ayt n bu-teɣruḍt imeḥḍen d řḥukkam d imeqqranen di řmargeḥ n řɛeskar n ujeǧid n Accur. [Xenni] idweř-dd netta ɣar temmurt nnes s řeḥya x uɣembub. Umi dd-yusa ɣar taddart n arebbi nnes, aqa inni dd-iffɣen zi arrimet nnes, nɣin t s ssif.
2CH 32:22 Ammu i issenjem SIDI Ḥizqiya d imezdaɣ n Urcalim zeg ufus n Sanḥarib, ajeǧid n Accur, u zeg ufus n marra. Netta tuɣa issareyyeḥ i-ten ɣar marra iɣezdisen nsen.
2CH 32:23 Aṭṭas i dd yiwyen tiwhibin ɣar SIDI di Urcalim, uřa d řeqcuɛ iɣřan ɣar Ḥizqiya, ajeǧid n Yahuda. Ssenni tuɣa ɣares řewqar d ameqqran di tiṭṭawin n marra řegnus.
2CH 32:24 Deg wussan nni idweř Ḥizqiya ihřec s ijj n řeḥřac ineqqen ařami tuɣa iggur ad immet. Iẓẓuǧ ɣar SIDI u wanita issiweř-dd ɣares uca iwca as-dd ict n řeɛřamet.
2CH 32:25 [Maca] Ḥizqiya war iggi ɛlaḥsab tcuni i d as ittwassecnen, maɣar uř nnes idweř dayes nnfaxet. [X uya] yusa-dd ijj n uduqqez d ameqqran n weɣḍab xas, x Yahuda u x Urcalim.
2CH 32:26 Ḥizqiya [maca] isswaḍeɛ ixef nnes di ssibbet n nnfaxet n wuř nnes, am netta am yimezdaɣ n Urcalim, ařami aduqqez d ameqqran n weɣḍab n SIDI war xasen dd-yusi deg wussan n Ḥizqiya.
2CH 32:27 Ḥizqiya tuɣa ɣares agřa d ccan s waṭṭas. Netta igga i ixef nnes ixxamen n txubay i nnuqart, i wureɣ, i yeẓra iɣřan, i řeɛṭur, i tseddariyin [n uɛeskari] u i marra min iǧan d řeqcuɛ iɣřan.
2CH 32:28 [Igga uřa d] tixubay i řɣiǧet n imendi, i binu n jdid d zzect, uřa d řkurit i marra řmař d řeɛraṣi ifaryen i tḥimriwin.
2CH 32:29 Netta igga tineddam i yixef nnes u tuɣa ɣares aṭṭas n wuǧi d ifunasen d tfunasin, maɣar AREBBI tuɣa iwca as ijj n wagřa imɣar aṭṭas.
2CH 32:30 Ḥizqiya wanita tuɣa ɛawed ibelleɛ uffuɣ n waman n [teɣzart n] Jiḥun [i iǧan] sennej qaɛ. Netta yarra aman nican ɣar wadday ɣar řɣarb n tendint n Dawud, maɣar Ḥizqiya tuɣa ifřeḥ di marra min igga.
2CH 32:31 [Maca] zi ssibbet n imendubiyyen n řḥukkam n Babil inni ɣares dd-ittwassekken, ḥima ad sseqsan x řeɛřamet imɣaren tenni tuɣa di temmurt, aqa ijja i-t AREBBI, ḥima ad t iqeǧeb, ḥima ad issen marra [min iǧan] deg wuř nnes.
2CH 32:32 Imezruyen iqqimen n Ḥizqiya d tmexsiwt nnes icewwaren, xzar, aqa man aya [marra] ittwazemmem di řewḥiy n unabi Icaɛya, mmis n Amuṣ, u deg wedlis n ijeǧiden n Yahuda d Israil.
2CH 32:33 Ḥizqiya igga ad yareyyeḥ jar řejdud nnes. Neḍřen t [deg wenḍeř] yuɛřan qaɛ n imeḍřan n warrawen n Dawud. Marra Yahuda d imezdaɣ n Urcalim ssecnen as řewqar ɣar řmewt nnes. Mmis Manassa idweř d ajeǧid deg wemcan nnes.
2CH 33:1 Manassa [tuɣa] ɣares tenɛac n iseggʷusa umi idweř d ajeǧid. Netta iḥkem xemsa u-xemsin n iseggʷusa di Urcalim.
2CH 33:2 Netta igga min iǧan d aɛeffan di tiṭṭawin n SIDI, am jjɛayef n řegnus nni tuɣa issuffeɣ SIDI zi zzat n wudem n ayt n Israil zi řwart nsen.
2CH 33:3 Netta ibda ad iɛdeř řegɛudi nni tuɣa ihdem babas Ḥizqiya. Netta issbedd iɛalṭaren i ‘Ibaɛlen’ uca igga tirebbin n cwarti uca ibendeq zzat i marra řɛeskar n ujenna uca iɛbed asen.
2CH 33:4 Issbedd ɛawed iɛalṭaren di Taddart n SIDI i x inna SIDI: “Di Urcalim [ad ssmetneɣ] Isem inu i řebda.”
2CH 33:5 Netta ibna [ɛawed] iɛalṭaren i marra řɛeskar n ujenna di tnayen n řemraḥat n Taddart n SIDI.
2CH 33:6 Netta ijja ad kken iḥenjiren nnes di tmessi di Teɣzurt n mmis n Hinnum, igga s tbezgiwt d tgezzant d tseḥḥart, u yiwi-dd inni issawařen ak-d imettan d igezzanen. Igga aṭṭas min iǧan d aɛeffan di tiṭṭawin n SIDI maḥend ad t isɛar.
2CH 33:7 Issbedd ijj n řexyař ineqcen nni igga di Taddart n AREBBI, i x tuɣa inna AREBBI i Dawud u i mmis Suliman: “Di Taddart-a u di Urcalim, tenni farzeɣ zi marra tiqebbař n Israil, ad ssmetneɣ Isem inu i řebda.
2CH 33:8 Necc war ttejjiɣ aḍar n Israil ad ittwakkes ɛad zi temmurt nni uriɣ i řejdud nwem, mařa nitni mɣir ad ḥḍan marra min i d asen umureɣ maḥend ad t ggen, ɛlaḥsab marra Ccariɛa d marra tiweṣṣa d marra lfarayiḍ [nni d asen immewcen] s ufus n Musa.”
2CH 33:9 Manassa ijja Yahuda d imezdaɣ n Urcalim ad weddaren, ařami ggin d aɛeffan x řegnus i x tuɣa iqḍa SIDI zzat i wudem n ayt n Israil.
2CH 33:10 [Iwa,] SIDI tuɣa issiweř i Manassa u i řgens nnes, maca nitni war d as wcin ca taynit.
2CH 33:11 SIDI issekk ɣarsen ikumandaren n řɛeskar n ujeǧid n Accur. Nitni ḥebbsen Manassa s tsennarin, carfen t s tnayen n ssnaseř n nnḥas uca jjin t ad yuyur [ammu] ɣar Babil.
2CH 33:12 Umi t iḥṣar Netta ammu, izaweg wanita zzat i wudem n SIDI, AREBBI nnes, u isswaḍeɛ ixef nnes ař ṭṭarf zzat i wudem n AREBBI n řejdud nnes.
2CH 33:13 Iẓẓuǧ ɣares uca Netta ijja ad issarḍa Ixef nnes zzayes s tẓaǧit yuǧɣen nnes u yarra i-t-i-dd ɣar Urcalim. [Xenni] issen Manassa, aqa SIDI d AREBBI.
2CH 33:14 Awarni uya ibna řḥiḍ n barra i tendint n Dawud, ɣar uɣezdis n řɣarb n Jiḥun di teɣzurt, u [ibna i-t] ař Tawwart n Iseřman, iquwwar [řḥiḍ] uřa d Ɛufil uca issgeɛɛed [Manassi] řḥiḍ aṭṭas. Igga uřa d ikumandaren n řɛeskar di marra tineddam ifaryen n Yahuda.
2CH 33:15 Netta ikkes irebbiten iɣriben d řexyař n ṣṣanam zi Taddart n SIDI uřa d marra iɛalṭaren nni tuɣa ibna x wedrar n Taddart n SIDI di Urcalim, uca immenḍar i-ten barra i tendint.
2CH 33:16 Netta igga [ɛawed] aɛalṭar n SIDI uca iqeddem xas tiwhibin n řehna d tewhibin n uqadi uca inna i [ayt n] Yahuda ad ɛebden SIDI, AREBBI n Israil.
2CH 33:17 Maca řgens yarni ɛad yiwi tiɣarṣa x řegɛudi, maca mɣir i SIDI, AREBBI nsen, waha.
2CH 33:18 Imezruyyen iqqimen n Manassa d tẓaǧit nnes ɣar AREBBI nnes uřa d awařen n imwařawen nni ɣares issiwřen deg Yisem n SIDI, AREBBI n Israil, xzar, man aya [marra ittwazemmem] deg wedlis n imezruyen n ijeǧiden n Israil.
2CH 33:19 Taẓaǧit nnes d mammec ijja [AREBBI] ad ittwasseṣřeḥ Ixef nnes s tẓaǧit yuǧɣen nnes, uřa d marra ddnub nnes d řeɣdar nnes d imucan mani ibna řegɛudi u issbedd tirebbin n cwarti d řexyařat ineqcen qbeř ma ittwasswaḍeɛ, xzar, man aya [marra] ittwazemmem deg wawařen n imwařawen.
2CH 33:20 Manassa igga ad yareyyeḥ jar řejdud nnes. Neḍřen t di taddart nnes. Mmis Amun idweř d ajeǧid deg wemcan nnes.
2CH 33:21 Amun [tuɣa] ɣares tnayen u-ɛicrin n iseggʷusa umi idweř d ajeǧid. Netta iḥkem tnayen n iseggʷusa di Urcalim.
2CH 33:22 Netta igga min iǧan d aɛeffan di tiṭṭawin n SIDI, [nican] am mammec t igga babas Manassa. Amun iqeddem tiɣarṣa i marra řexyařat ineqcen i tuɣa igga babas Manassa uca isexxar asen.
2CH 33:23 Netta war isswaḍeɛ ixef nnes zzat i wudem n SIDI, am mammec isswaḍeɛ babas Manassa ixef nnes, maca Amun wanita yarni [waha] deg umarwas.
2CH 33:24 Imsexxaren nnes ggin xas ict n tmeɛmuč uca nɣin t di taddart nnes.
2CH 33:25 Řgens n temmurt [maca] nɣin marra inni tuɣa iggin tameɛmuč x ujeǧid Amun. Řgens n temmurt ggin mmis Yuciya d ajeǧid deg wemcan nnes.
2CH 34:1 Yuciya [tuɣa] ɣares tmenya n iseggʷusa umi idweř d ajeǧid. Netta iḥkem waḥit u-třatin n iseggʷusa di Urcalim.
2CH 34:2 Netta igga min iǧan nican di tiṭṭawin n SIDI. Netta yuyur deg ibriden n babas Dawud, war iffiɣ [x webrid] [řa ɣar] yefus uřa [ɣar] uzeřmaḍ.
2CH 34:3 Deg useggʷas wiss tmenya n řeḥkamet nnes, umi t tuɣa ɛad d aḥudri, ibda ad yarzu x AREBBI n babas Dawud. Deg useggʷas wiss tenɛac ibda ad issizdeg Yahuda d Urcalim zi řegɛudi, zi trebbin n cwarti u zi řexyařat ineqcen d řexyařat ifesyen.
2CH 34:4 Zzat i tiṭṭawin nnes hedmen iɛalṭaren n ‘Ibaɛlen’, uca izdem netta ipilaren n arebbi n tfuct nni xasen dd-ibanen sennej. Tirebbin n cwarti d řexyařat ineqcen d řexyařat ifesyen yarẓa i-ten di iwetwiten uca iddez i-ten u taɛejjajt nsen yareyyec i-tt x imeḍřan n yinni tuɣa d asen dd-yiwyen taɣarṣt.
2CH 34:5 Issarɣ iɣsan n ikehhanen x iɛalṭaren nsen. [Ammu] i issizdeg Yahuda d Urcalim.
2CH 34:6 Uřa ɣar tneddam n Manassa d Ifrayim d Cimɛun, [wah,] ař Naftali, ɣar marra iɣezdisen n imucan nsen ittwareddǧen,
2CH 34:7 ihdem iɛalṭaren. Netta iřbez tirebbin n cwarti d řexyařat ineqcen, iddez i-tent, uca izdem [ɛawed] marra ipilaren n arebbi n tfuct di marra Israil. Awarni uya iɛqeb-dd ɣar Urcalim.
2CH 34:8 Deg useggʷas wiss tmenṭac n řeḥkamet nnes, awarni řami issizdeg tammurt d Taddart, issekk netta Cafan, mmis n Aṣalya, d Maɛasiya, ameqqran n tendint, d Yuwax, mmis n Yahuyaḥaz, amarir n umezruy, ḥima ad ɛedřen Taddart n SIDI, AREBBI nnes.
2CH 34:9 Nitni usin-dd ɣar Ḥilqiya, arrays n ikehhanen, u wcin as nnuqart i dd-ittwawyen di Taddart n AREBBI, d tenni dd-yarwen Ilawiyyen nni tuɣa iɛessen ɣar wadaf, zeg ufus n Manassa d Ifrayim, zi marra min iqqimen n Israil, zi marra Yahuda d Binyamin u zi marra imezdaɣ n Urcalim.
2CH 34:10 Nitni wcin tt deg ufus n yinni tuɣa iggin řxedmet, inni [iǧan] x Taddart n SIDI, uca ina wcin tt i yinni iggin řxedmet di Taddart n SIDI, maḥend ad ɛedřen u ad ssjehden Taddart.
2CH 34:11 Nitni wcin tt i iḥrayfiyyen u i imaṣṣuten i tmesɣiwt n tṣuḍar ittwassuydan u [i tmesɣiwt] n ukeccuḍ i tḥenya n uɛarreḍ, maḥend ad ggen tiɣurfin i tudrin, tinni ijjin ijeǧiden n Yahuda ad arxun.
2CH 34:12 Iryazen xedmen s řaman. Yaḥat d Ɛubadya, Ilawiyyen zeg iḥenjiren n Marari, tuɣa aten d iweqqafen xasen, uřa d Zakariyya d Macullam zeg iḥenjiren n Quḥat, ḥima ad seyyaren. Ilawiyyen, marra tuɣa ttḥakan di dduzanat n lmusiqa,
2CH 34:13 [tuɣa aten ɛawed] x yinni yarebbun řeḥmeř. Nitni d imseyyaren i marra inni tuɣa ixeddmen di řexdayem ifarzen. [Ttwařeqqmen] zeg Ilawiyyen uřa d imariren d imeḥḍayen d iɛessasen n tewwura.
2CH 34:14 [Umi] ksin [tmenyat n] nnuqart nni tuɣa dd-iwyen di Taddart n SIDI, yufa ukehhan Ḥilqiya adlis ittwannḍen n Ccariɛa n SIDI, [i tuɣa d asen immewcen] x ufus n Musa.
2CH 34:15 Ḥilqiya iṭṭef deg wawař, inna i umarir Cafan: “Necc ufiɣ adlis ittwannḍen n Ccariɛa di Taddart n SIDI.” Uca iwca Ḥilkiya adlis i Cafan.
2CH 34:16 Cafan yiwi adlis ɣar ujeǧid. Netta ixebbar ajeǧid, inna: “Marra min umuren i imsexxaren nnec, aqa tteggen t.
2CH 34:17 Nitni ssfarrɣen [temnyat n] nnuqart i ufin di Taddart n SIDI uca wcin tent deg ufus n iweqqafen u n yinni itteggen řxedmet.”
2CH 34:18 [Xenni] iḥaja umarir Cafan i ujeǧid [ammu], inna: “Akehhan Ḥilqiya iwca ayi ijj n wedlis!” Cafan iɣra zzayes x ujeǧid.
2CH 34:19 Umi isřa ujeǧid awařen n Ccariɛa, imsar, icarreg netta arruḍ nnes.
2CH 34:20 Yumur ujeǧid i Ḥilqiya u i Axiqam, mmis n Cafan, u i Ɛabdun, mmis n Mixa, u i umarir Cafan i Ɛasaya, amsexxar n ujeǧid, inna:
2CH 34:21 “Uyurem, seqsam SIDI di ṭṭweɛ inu u di ṭṭweɛ n min iqqimen di Israil u di Yahuda x wawařen n wedlis i ittwafen. Maɣar asɛar n SIDI nni xaneɣ ittwazeǧɛen, aqa-t d ameqqran, minzi řejdud nneɣ war ḥḍin ca awař n SIDI, ḥima ad ggen am mammec marra min yurin deg wedlis ittwannḍen.”
2CH 34:22 [Xenni] yuyur Ḥilqiya ak-d yinni [ittwassekken] zeg ujeǧid ɣar tnabit Xulda, tamɣart n Callum, mmis n Tuqahat, mmis n Ḥasra, wenni ibedden x řehri n warruḍ. Nettat tezdeɣ deg wezyen nneɣni n Urcalim uca ssiwřen akides x man aya.
2CH 34:23 Nettat tenna asen: “Ammu i iqqar SIDI, AREBBI n Israil: ‘Inim i weryaz nni kenniw ɣari dd-issekken:
2CH 34:24 ‘Ammu i iqqar SIDI: Xzar Necc ad ssiwḍeɣ tuɛeffna x wemcan-a u x imezdaɣ nnes, marra nnɛaři i yurin deg wedlis nni zzayes ittwaɣaren zzat i wudem n ujeǧid n Yahuda,
2CH 34:25 maɣar nitni ḥeyyden xafi u iwyen tiwhibin n řebxur i irebbiten nneɣni ařami d ayi sɛaren s marra řexdayem n ifassen nsen. Asɛar inu ad ittwazeǧeɛ x wemcan-a u war ixessi.
2CH 34:26 [Maca] i ujeǧid n Yahuda, wenni kenniw dd-issekken da, ḥima ad tesseqsam SIDI, ad as tinim: ‘Ammu i iqqar SIDI, AREBBI n Israil: X wawařen nni tesřid:
2CH 34:27 Maɣar idweř wuř nnec yarḍeb u tesswaḍɛed ixef nnec zzat i wudem n AREBBI umi tesřid i wawařen nnes x wemcan-a u x imezdaɣ nnes, u umi tesswaḍɛed ixef nnec uca tcarrged arruḍ nnec u trud zzat i wudem inu, s uya sřiɣ Necc ɛawed ɣarek, iqqar SIDI.
2CH 34:28 Xzar, ad cek ssmuneɣ ɣar řejdud nnec u ad tᵉttwassarsed deg wenḍeř nnec s řehna u tiṭṭawin nnec war ttwiřint ca marra tuɛeffna nni ɣa ssiwḍeɣ x wemcan-a u x imezdaɣ nnes.’” Nitni ɛawden awař-a i ujeǧid.
2CH 34:29 [Xenni] issekk ujeǧid [ireqqasen] uca issmun marra imeqqranen n Yahuda d Urcalim.
2CH 34:30 Igeɛɛed ujeǧid ɣar Taddart n SIDI ak-d marra iryazen n Yahuda d imezdaɣ n Urcalim, ak-d ikehhanen d Ilawiyyen u ak-d marra řgens, zeg umeqqran ař ameẓyan, u ɣrin xasen marra awařen n wedlis n Řɛahd nni tuɣa ittwafen di Taddart n SIDI.
2CH 34:31 Ajeǧid ibedd deg wemcan nnes uca iqqen Řɛahd zzat i wudem n SIDI, ḥima ad iḍfar SIDI u ḥima ad iḥḍa řumurat nnes d cchadat nnes d tweṣṣa nnes s marra wuř nnes u s marra řeɛmar nnes u ḥima ad igg awařen n Řɛahd-a i yurin deg wedlis-a.
2CH 34:32 Netta ijja marra inni iǧan di Urcalim d Binyamin, ad kkaren [ḥima ad t ssmetnen] uca imezdaɣ n Urcalim ggin ɛlaḥsab Řɛahd n AREBBI, AREBBI n řejdud nsen.
2CH 34:33 Ikkes Yuciya marra jjɛayef [n ṣṣanam] zi temmura n ayt n Israil u yarra marra inni [izedɣen] di Israil ttsexxaren i tsexxart n SIDI, AREBBI nsen. Marra ussan [n tudart] nnes war ḥeyyden ca zeg weḍfar n SIDI, AREBBI n řejdud nsen.
2CH 35:1 [Xenni] igga Yuciya [Řɛid n Tɣarṣt n] Useɛdu i SIDI di Urcalim. Ɣarṣen i [Tɣarṣt n] Useɛdu deg wass wiss arbeɛṭac n uyur amezwaru.
2CH 35:2 Netta issbedd ikehhanen ɣar imucan n tɛessast nsen uca igga daysen uř ɣar řxedmet di Taddart n SIDI.
2CH 35:3 Inna i Ilawiyyen, inni isseřmaden marra Israil, inni tuɣa iqeddsen i SIDI: “Sarsem Ttabut iqeddsen di Taddart nni ibna Suliman, mmis n Dawud, ajeǧid n Israil. War d awem ittxeṣṣa [ɛad] ad tarbum ddqeř x tɣarḍin nwem. Sexxarem řexxu i SIDI, AREBBI nwem, u i řgens nnes Israil.
2CH 35:4 Swejdem ixef nwem, [am tᵉttwasettfem] ɛlaḥsab tudrin n ibabaten nwem, ɛlaḥsab tirbiɛin nwem, am mammec tt yura Dawud, ajeǧid n Israil, u am mammec tt yura mmis Suliman.
2CH 35:5 Sbeddem ixef nwem di Zzawect Iqeddsen, [am tᵉttwasettfem kenniw] ɛlaḥsab tirbiɛin n řaǧat n ibabaten, zzat i tawmat nwem, ayt n řgens, [am tᵉttwasettfem] ɛlaḥsab asettef n řaǧat n jjed n Ilawiyyen.
2CH 35:6 Ɣarṣem i [Tɣarṣt n] Useɛdu u sqeddsem ixef nwem. Swejdem tt i aytmatwem, maḥend ad ggen ɛlaḥsab awař n SIDI [i immewcen] s tsexxart n Musa.”
2CH 35:7 Iwca Yuciya uǧi, izmaren d imuyan imeẓyanen i tarwa n řgens. Marra aya tuɣa i [Tɣarṣt n] Useɛdu i marra inni din iǧan. Tuɣa řqedd nsen třatin-ařef, u [xenni ɛawed] teřt-ařaf n ifunasen d tfunasin. Marra aya i dd-yusin zeg wagřa n ujeǧid.
2CH 35:8 Wcin řḥukkam nnes ict n tewhibt n usgeɛɛed am tewhibt s řxaḍar i řgens, i ikehhanen u i Ilawiyyen. Ḥilqiya, Zakariyya d Yaḥiyil, imeḥḍayen n Taddart n AREBBI, wcin i ikehhanen i [Tɣarṣa n] Useɛdu ařfayen u-setta-mya zeg wuǧi u [sennej man aya ɛad] teřt-mya n ifunasen d tfunasin.
2CH 35:9 Kunanya, Camɛiya d Nataniyil, aytmas, d Ḥacabya, Yaɛiyil d Yuzabad, imeqqranen n Ilawiyyen, wcin i Ilawiyyen i [Tɣarṣa n] Useɛdu xemsa-ařaf zeg wuǧi u [xenni] xemsa-mya n ifunasen d tfunasin.
2CH 35:10 [Ammu i] sswejden i řxedmet. Ikehhanen tuɣa bedden deg wemcan nsen u Ilawiyyen di terbiɛin nsen, ɛlaḥsab řumur n ujeǧid.
2CH 35:11 Nitni ɣarṣen i [Tɣarṣt n] Useɛdu uca ikehhanen zeǧɛen idammen zeg ifassen nsen, u kksen Ilawiyyen [zzaysent] iřmawen.
2CH 35:12 Nitni ḥuzen [iziynat i] tɣarṣt n wecmaḍ ḥima ad asen [tent] wcen, i řefruɛ n řaǧat n ibabaten, i warrawen n řgens, ḥima ad tent wehhben d taɣarṣt i SIDI, am mammec tura deg wedlis n Musa uca ammu [i iggin] ak-d ifunasen d tfunasin.
2CH 35:13 Xenni cenfen [Taɣarṣt n] Useɛdu tiwa i tmessi am mammec teǧa di lqaɛida. Iziynat iqeddsen nneɣni cenfen ten di marmitat d iṭenjiren d tiqsiřin uca iwyen [tent] deɣya ɣar marra řgens.
2CH 35:14 Awarni aya sswejden uřa i yixef nsen u i ikehhanen, maɣar ikehhanen, arrawen n Harun, tuɣa řhan ak-d uwehheb n tɣarṣa n wecmaḍ d tadunt ař ǧiřet. [Awarni aya] sswejden Ilawiyyen i yixef nsen u i ikehhanen, arrawen n Harun.
2CH 35:15 Imedyazen, iḥenjiren n Asaf, [tuɣa bedden] deg wemcan nsen, ɛlaḥsab řumur n Dawud, Asaf, Hayman d Yadutun, amwařaw n ujeǧid, uca iɛessasen n tewwura [bedden] ɣar kuř tawwart. Tuɣa war ittxeṣṣi ad jjen řxedmet nsen, maɣar aytmatsen, Ilawiyyen, sswejden asen [Taɣarṣt n Useɛdu].
2CH 35:16 Marra tasexxart n SIDI teɛdeř [mliḥ] deg wass nni i uḥeṭṭu [n Řɛid] n [Tɣarṣt n] Useɛdu u i uwehheb n tɣarṣa n wecmaḍ x uɛalṭar n SIDI ɛlaḥsab řumur n ujeǧid Yuciya.
2CH 35:17 Ayt n Israil, inni [din] iǧan, sswejden i [Tɣarṣt n] Useɛdu deg wass nni, u sebɛa n wussan [ggin nitni] Řɛid n Weɣrum břa Antun.
2CH 35:18 War din tuɣi di Israil bu [Řɛid n Tɣarṣt n] Useɛdu am wa zeg wussan n unabi Camwil. Uřa d ijjen zeg ijeǧiden n Israil war iggi [Řɛid n Tɣarṣt n] Useɛdu am mammec t igga Yuciya ak-d ikehhanen d Ilawiyyen u ak-d marra Yahuda d Israil, nni [din] iǧan, u ak-d imezdaɣ n Urcalim.
2CH 35:19 Deg useggʷas wiss tmenṭac n tgelda n Yuciya ittwagg [Řɛid n Tɣarṣt n] Useɛdu wanita.
2CH 35:20 Awarni marra aya, umi ikemmeř Yuciya Taddart, iffeɣ-dd Naxu, ajeǧid n Miṣra, ɣar Lfuraṭ ḥima ad immneɣ ak-d Karkamic. Uca Yuciya iffeɣ-dd i umsagar akides.
2CH 35:21 Naxu issekk-dd ɣares ireqqasen, inna: “Min din jar ayi-dd d cek, [a] ajeǧid n Yahuda? War iǧi ɣarek i dd ffɣeɣ ass-a, maca ɣar ict n taddart [nneɣni] tenni ittmenɣan akidi. Inna ayi AREBBI ittxeṣṣa ayi ad qeǧqeɣ. S uya ḥeyyed x AREBBI, wenni akidi iǧan, niɣ ad cek yareddeǧ.”
2CH 35:22 [Maca] Yuciya war issneqřeb aɣembub nnes zzayes, maca igga ixef nnes war iǧi d netta ḥima akides immneɣ, u netta war isři ɣar wawařen n Naxu [inni dd yusin] zeg uqemmum n AREBBI, maca yusa-dd ɣar umenɣi di teɣzurt n Majiddu.
2CH 35:23 Maca imjebbaden n řqews řeqfen ajeǧid Yuciya. [Xenni] inna ujeǧid i imsexxaren nnes: “Nedhem ayi ssenni, maɣar yezmeɣ aṭṭas!”
2CH 35:24 Imsexxaren nnes ksin t deg ukarru uca nedhen t deg ijj n ukarru nneɣni nni ɣares iǧa, uca iwyen t ɣar Urcalim. Immut [dinni] uca neḍřen t deg imeḍřan n řejdud nnes. Marra Yahuda d Urcalim ceḍnen x Yuciya.
2CH 35:25 Igga Irmiya ict n yezři n wecḍan x Yuciya. Ař ass-a marra imedyazen d tmedyazin ssawařen x Yuciya deg izřan nsen n wecḍan, minzi nitni ggin tt d ict n tewṣeyyet di Israil. Xzar, aqa-ten ttwazemmemen deg Izřan s Igejduren.
2CH 35:26 Imezruyen i iqqimen n Yuciya d tmexsiwt nnes icewwaren ɛlaḥsab min yurin di Ccariɛa n SIDI,
2CH 35:27 [wah,] imezruyen nnes, imezwura d ineggura, aqa ttwazemmemen deg wedlis n ijeǧiden n Israil d Yahuda.
2CH 36:1 Ksin řgens n temmurt Yahuyaḥaz, mmis n Yuciya, uca ggin t d ajeǧid di Urcalim deg wemcan n babas.
2CH 36:2 Yahuyaḥaz [tuɣa] ɣares třata u-ɛicrin n iseggʷusa, umi idweř d ajeǧid. Netta iḥkem třata n iyuren di Urcalim.
2CH 36:3 Ajeǧid n Miṣra ikkes i-t [d ajeǧid] zi Urcalim uca igga i temmurt ijj n multa n mya talint n nnuqart d ict n talint n wureɣ.
2CH 36:4 Ajeǧid n Miṣra igga umas Alyaqim d ajeǧid x Yahuda d Urcalim. Netta ibeddeř isem nnes ɣar Yahuyaqim. [Maca] umas Yahuyaḥaz iṭṭef i-t Naxu uca yiwyi i-t ɣar Miṣra.
2CH 36:5 Yahuyaqim [tuɣa] ɣares xemsa u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Netta igga min iǧan d aɛeffan di tiṭṭawin n SIDI, AREBBI nnes.
2CH 36:6 Nabuxadnaṣṣar, ajeǧid n Babil, iffeɣ [i umenɣi] akides uca icarf i-t s tnayen n ssnaseř n nnuqart, ḥima ad t yawi ɣar Babil.
2CH 36:7 Yiwi Nabuxadnaṣṣar uřa d [ijj n wezyen] n řeqcuɛ zi Taddart n SIDI ɣar Babil uca issars i-ten di zzawect nnes di Babil.
2CH 36:8 Imezruyen iqqimen n Yahuyaqim d jjɛayef i igga u min ittwafen ḍidd nnes, xzar, [marra] aya ittwazemmem deg wedlis n ijeǧiden n Israil d Yahuda. Mmis Yahuyakin idweř d ajeǧid deg wemcan nnes.
2CH 36:9 Yahuyakin [tuɣa] ɣares tmenṭac n iseggʷusa umi idweř d ajeǧid. Netta iḥkem třata n iyuren d ɛecra n wussan di Urcalim. Netta igga min iǧan d aɛeffan di tiṭṭawin n SIDI.
2CH 36:10 Ɣar ubeddeř n useggʷas ijja ujeǧid Nabuxadnaṣṣar ad t yawi ɣar Babil s řeqcuɛ iɣřan zi Taddart n SIDI. Netta igga umas Ṣidqiya d ajeǧid x Yahuda d Urcalim.
2CH 36:11 Ṣidqiya tuɣa ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim.
2CH 36:12 Igga min iǧan d aɛeffan di tiṭṭawin n SIDI, AREBBI nnes, war isswaḍeɛ ixef nnes zzat i wudem n unabi Irmiya [wenni issiwřen] x řumur n SIDI.
2CH 36:13 Uřa d netta iɣewweɣ x ujeǧid Nabuxadnaṣṣar, wenni t ijjin ad ijjaǧ ɣar AREBBI. Netta issemḥeḍ iri nnes uca isseqseḥ uř nnes maḥend war dd-iddikkʷiř ɣar SIDI, AREBBI n Israil.
2CH 36:14 U marra imeqqranen n ikehhanen uřa d řgens ruḥen, aggʷejen aṭṭas di řeɣdar nsen, [ggin] am mammec marra jjɛayef n řegnus. Nitni ssxemjen Taddart n SIDI tenni tuɣa issqeddes di Urcalim.
2CH 36:15 SIDI, AREBBI n řejdud nsen issekk-dd ɣarsen [inehharen] s ufus n ireqqasen nnes, řexxu niɣ řexmin, maɣar Netta tuɣa izziǧiz as řgens nnes d Tzeddiɣt nnes.
2CH 36:16 Maca nitni stehzan zeg ireqqasen n AREBBI u sseḥqaren awařen nnes. Nitni ggin taḍṣa x inabiyyen nnes, ařami isɛar SIDI x řgens nnes u war iqqim ɛad usgenfu.
2CH 36:17 Netta igga ajeǧid n Ikaldaniyyen ad ɣarsen dd-iffeɣ, wenni inɣin iḥudriyyen nsen s ssif di Taddart n Zzawect nsen Iqeddsen. Netta war issɛizz x iḥudriyyen niɣ x teɛzariyyin uřa x iwessura d imeccaybuten. AREBBI iwca i-ten marra deg ufus nnes.
2CH 36:18 Marra řeqcuɛ n Taddart n AREBBI, [řeqcuɛ] imeqqranen d imeẓyanen, uřa d txubay n Taddart n SIDI d txubay n ujeǧid d řḥukkam nnes, aqa marra aya yiwyi i-t ɣar Babil.
2CH 36:19 Nitni sscemḍen Taddart n AREBBI, hedmen řḥiḍ n Urcalim uca qqden marra řeqṣur nnes s tmessi u areddǧen marra řeqcuɛ iɣřan aṭṭas zzayes.
2CH 36:20 Wi iqqimen zi ssif indeh i-ten ɣar lmenfa ɣar Babil, uca dewřen nitni d imsexxaren i netta u i iḥenjiren nnes ař řeḥkamet n tgeldit n Lfurs,
2CH 36:21 - ḥima ad ittwasseqfeř wawař n SIDI [i issiweř] s uqemmum n Irmiya - ařami teksi tammurt [iseggʷusa nnes] n ssebt. Marra ussan n wareddeǧ tuɣa tammurt tareyyeḥ, ařami kemmřen sebɛin n iseggʷusa.
2CH 36:22 [Maca] deg useggʷas amezwaru n ujeǧid Kurac, ajeǧid n Lfurs - ḥima ad ittwakemmeř wawař n SIDI s uqemmum n Irmiya - issekkar-dd SIDI buḥbeř n Kurac, ajeǧid n Lfurs, uca ijja wanita ad dd-iffeɣ ijj n ubarreḥ di marra tageldit nnes, uřa di tira, maḥend ad yini:
2CH 36:23 “Ammu i iqqar Kurac, ajeǧid n Lfurs: ‘SIDI, AREBBI n ijenwan, iwca ayi marra tigeldiwin n temmurt uca Netta igga xafi ad bniɣ ict n Taddart i Netta di Urcalim di Yahuda. Ejj ad igeɛɛed qaɛ man wen zzaywem zi marra řgens nnes! Ad yiři SIDI, AREBBI nnes, akides!’”
EZR 1:1 Deg useggʷas amezwaru n ujeǧid Kurac n Lfurs, ḥima ad ittwakemmeř wawař n SIDI zeg uqemmum n Irmiya, issekkar SIDI buḥbeř n Kurac ajeǧid n Lfurs maḥend ad ittwabarreḥ di marra tageldit nnes s uqemmum d tira:
EZR 1:2 “Ammu i iqqar Kurac, ajeǧid n Lfurs: ‘SIDI, AREBBI n ijenwan, iwca ayi marra tigeldiwin n temmurt uca netta igga xafi, ad as bniɣ ict n Taddart di Urcalim, tenni [iǧan] di Yahuda.
EZR 1:3 Man wen zzaywem zi řgens nnes, ad yiři AREBBI akides, ejj i-t ad igeɛɛed ɣar Urcalim, tenni [iǧan] di Yahuda, ad ibna Taddart n SIDI, AREBBI n Israil. Aqa-t d AREBBI wenni [izeddɣen] di Urcalim.
EZR 1:4 Qaɛ wenni iqqimen ɛad di [ca n wemcan] n marra imucan mani izeddeɣ d abarrani, ad kkaren iryazen n wemcan nnes ad as wcen afus s nnuqart d wureɣ, s wagřa d řmař, [u man aya] sennej i tewhibt immewcen s řxaḍar i Taddart n AREBB di Urcalim.’”
EZR 1:5 [Xenni] kkaren izeǧifen x ibabaten [n řaǧat] n Yahuda d Binyamin uřa d ikehhanen d Ilawiyyen u marra inni umi issfaq AREBBI buḥbeř, maḥend ad geɛɛden ḥima ad bnan Taddart n SIDI wenni [izeddɣen] di Urcalim.
EZR 1:6 Marra inni d asen dd-innḍen wcin asen afus s řeqcuɛ n nnuqart, s wureɣ, s wagřa, s řmař u s řeqcuɛ iɣřan, břa min immewcen s řxaḍar.
EZR 1:7 Ajeǧid Kurac issuffeɣ řeqcuɛ n Taddart n SIDI, tinni tuɣa iksi Nabuxadnaṣṣar zi Urcalim uca igga i-tent di taddart n arebbi nnes.
EZR 1:8 Kurac, ajeǧid n Lfurs, issuffeɣ i-tent ɣar barra s ufus n Mitradat, bab n txubay, wenni tent iwcin s řeḥsab i Cicbaṣṣar, řḥakem n Yahuda.
EZR 1:9 Wa tuɣa d řqedd nsen: třatin n ṭṭbaṣa n wureɣ, ařef n ṭṭbaṣa n nnuqart, tesɛa u-ɛicrin n řemwas,
EZR 1:10 třatin n ifenjařen n wureɣ, arebɛa-mya u-ɛecra n ifenjařen inneɣni n nnuqart d wařef n řeqcuɛ nneɣnit.
EZR 1:11 Marra řeqcuɛ n wureɣ d nnuqart tuɣa iwḍen xemsa-ařaf u-arebɛa-mya. Marra aya yiwyi t Cicbaṣṣar akides, [jmiɛ] ak-d ayt n lmenfa inni ittwanedhen zi Babil ɣar Urcalim.
EZR 2:1 Ina d ayt n lɛamala nni dd-igeɛɛden zi tmeḥbast - imenfiyyen nni dd-iwyi Nabuxadnaṣṣar, ajeǧid n Babil, di lmenfa ɣar Babil - uca ɛeqben ɣar Urcalim d Yahuda, kuř ijj ɣar tendint nnes,
EZR 2:2 [uca] usin-dd ak-d Zarubbabil, Yahucaɛ, Nahamya, Saraya, Raɛlaya, Murdaxai, Bilcan, Misfar, Biɣway, Raḥum d Baɛna. Wa d řqedd n yeryazen n řgens n Israil.
EZR 2:3 Ayt n n Farɛuc, ařfayen u-mya u-tnayen u-sebɛin [n yeryazen].
EZR 2:4 Ayt n Cafaṭya, teřt-mya u-tnayen u-sebɛin [n yeryazen].
EZR 2:5 Ayt n Araḥ, sebɛa-mya u-xemsa u-sebɛin [n yeryazen].
EZR 2:6 Iḥenjiren n Fahat-Mu’ab, zeg iḥenjiren n Yecuɛa [d] Yu’ab, ařfayen u temnem-mya u-tenɛac [n yeryazen].
EZR 2:7 Ayt n Ɛilam, ařef u-mitayn u-arebɛa u-xemsin [n yeryazen].
EZR 2:8 Ayt n Zattu, tesɛa-mya u-xemsa u-rebɛin [n yeryazen].
EZR 2:9 Ayt n Zakkay, sebɛa-mya u-settin [n yeryazen].
EZR 2:10 Ayt n Bani, setta-mya u-tnayen u-rebɛin [n yeryazen].
EZR 2:11 Ayt n Babay, setta-mya u-třata u-ɛicrin [n yeryazen].
EZR 2:12 Ayt n Ɛarjad, ařef u-mitayn u-tnayen u-ɛicrin [n yeryazen].
EZR 2:13 Ayt n Aduniqam, setta-mya u-setta u-settin [n yeryazen].
EZR 2:14 Ayt n Biɣway, ařfayen u-setta u-xemsin [n yeryazen].
EZR 2:15 Ayt n Ɛadin, arebɛa-mya u-arebɛa u-xemsin [n yeryazen].
EZR 2:16 Ayt n Aṭir, zi Ḥizqiya, tmenya u-tesɛin [n yeryazen].
EZR 2:17 Ayt n Biṣay, teřt-mya u-třata u-ɛicrin [n yeryazen].
EZR 2:18 Ayt n Yura, mya u-tenɛac [n yeryazen].
EZR 2:19 Ayt n Ḥacum, mitayen u-třata u-ɛicrin [n yeryazen].
EZR 2:20 Ayt n Jibbar, xemsa u-tesɛin [n yeryazen].
EZR 2:21 Ayt n Bayt-Laḥm, mya u-třata u-ɛicrin [n yeryazen].
EZR 2:22 Iryazen ni Naṭufa, setta u-xemsin [n yeryazen].
EZR 2:23 Iryazen n Ɛanatut, mya u-tmenya u-ɛicrin [n yeryazen].
EZR 2:24 Arrawen n Ɛazmawet, tnayen u-rebɛin [n yeryazen].
EZR 2:25 Ayt n Qaryat-Ɛarim, Kafira d Biɛrut, sebɛa-mya u-třata u-rebɛin [n yeryazen].
EZR 2:26 Ayt n Rama d Jabaɛ, setta-mya u-waḥed u-ɛicrin [n yeryazen].
EZR 2:27 Iryazen n Mixmas, mya u-tnayen u-ɛicrin [n yeryazen].
EZR 2:28 Iryazen n Bayt-Il d Ɛay, mitayen u-třata u-ɛicrin [n yeryazen].
EZR 2:29 Ayt n Nabu, tnayen u-xemsin [n yeryazen].
EZR 2:30 Ayt n Maɣbic, mya u-setta u-xemsin [n yeryazen].
EZR 2:31 Ayt n [ijj n] Ɛilam nneɣni, ařef u-mitayn u-arebɛa u-xemsin [n yeryazen].
EZR 2:32 Ayt n Ḥarim, teřt-mya u-ɛicrin [n yeryazen].
EZR 2:33 Ayt n Lud, Ḥadid d Unu, sebɛa-mya u-xemsa u-ɛicrin [n yeryazen].
EZR 2:34 Ayt n Ariḥa, teřt-mya u-xemsa u-rebɛin [n yeryazen].
EZR 2:35 Ayt n Sana’a, teřt-ařaf u-setta-mya u-třatin [n yeryazen].
EZR 2:36 Ikehhanen. Ayt n Yadaɛya, zi taddart n Yecuɛa, tesɛa-mya u-třata u-sebɛin [n yeryazen].
EZR 2:37 Ayt n Immir, ařef u-tnayen u-xemsin [n yeryazen].
EZR 2:38 Ayt n Facḥur, ařef u-mitayn u-sebɛa u-rebɛin [n yeryazen].
EZR 2:39 Ayt n Ḥarim, ařef u-sbeɛṭac [n yeryazen].
EZR 2:40 Ilawiyyen. Ayt n Yecuɛa, ayt n Qadmiyil, zeg ayt n Hudawya, arebɛa u-sebɛin [n yeryazen].
EZR 2:41 Imedyazen. Ayt n Asaf, mya u-tmenya u-ɛicrin [n yeryazen].
EZR 2:42 Ayt n iɛessasen n tewwura. Ayt n Callum, ayt n Aṭir, ayt n Ṭalmun, ayt n Ɛaqqub, ayt n Ḥaṭiṭa, ayt n Cubay, aqa aten [jmiɛ] mya u-tesɛa u-třatin [n yeryazen].
EZR 2:43 Imsexxaren n Zzawect Tameqqrant. Ayt n Ṣiḥa, ayt n Ḥasufa, ayt n Ṭabaɛut,
EZR 2:44 ayt n Qiruc, ayt n Siɛaha, ayt n Fadun,
EZR 2:45 ayt n Labana, ayt n Ḥajaba, ayt n Ɛaqqub,
EZR 2:46 ayt n Ḥajab, ayt n Camlay, ayt n Ḥanan,
EZR 2:47 ayt n Jadil, ayt n Ḥajar, ayt n Ra’aya,
EZR 2:48 ayt n Raṣin, ayt n Naqquda, ayt n Jazzam,
EZR 2:49 ayt n Ɛuzza, ayt n Fasiḥ, ayt n Bisay,
EZR 2:50 ayt n Asna, ayt n Maɛunim, ayt n Nafusim,
EZR 2:51 ayt n Baqbuq, ayt n Ḥaqufa, ayt n Ḥarḥur,
EZR 2:52 ayt n Baṣlut, ayt n Maḥida, ayt n Ḥarca,
EZR 2:53 ayt n Barqus, ayt n Sisara, ayt n Tamaḥ,
EZR 2:54 ayt n Nasiḥ, ayt n Ḥaṭifa.
EZR 2:55 Ayt n imsexxaren n Suliman. Ayt n Suṭay, ayt n Sufarat, ayt n Faruda,
EZR 2:56 ayt n Yaɛala, ayt n Darqun, ayt n Jiddil,
EZR 2:57 ayt n Cafaṭya, ayt n Ḥaṭṭil, ayt n Fuxarat-ha-Ḍabayim d ayt n Ami.
EZR 2:58 Marra imsexxaren n Zzawect Tameqqrant d iḥenjiren n imsexxaren n Suliman, aqa aten [jmiɛ] teřt-mya u-tnayen u-tesɛin [n yeryazen].
EZR 2:59 Ina d inni dd-igeɛɛden zi Tal-Milaḥ, Tal-Ḥarca, Karub, Addan d Immir, [maca] war zemmaren ad ssecnen zi jjihet n taddart n řejdud nsen niɣ zi jjihet n zzariɛet nsen, aqa nitni [qarsen-dd] zi Israil:
EZR 2:60 ayt n Dalaja, ayt n Ṭubiyya, ayt n Naquda, setta-mya u-tnayen u-xemsin [n yeryazen].
EZR 2:61 Uca zeg ayt n ikehhanen: ayt n Ḥabaya, ayt n Haqquṣ, ayt n Barzillay, [aqa zzaysen inni] iwyen ict n temɣart zi yessis n Ujilɛadi Barzillay u ttwařaɣan s yisem nnes.
EZR 2:62 Nitni arzun x tewriqt n uzemmem nsen [deg wedlis n taṣiřet], maca war tt ufin. S uyenni ttwassuffɣen nitni zi tukehhant.
EZR 2:63 Lwali ameqqran inna asen, war ttᵉtten zi tmesřayin iqeddsen qaɛ ař ɣa ikkar ijj n ukehhan ak-d Urim d Tummim.
EZR 2:64 Marra agraw [n řgens] [tuɣa di] tnayen u-rebɛin-ařef u-teřt-mya u-settin [n yeryazen],
EZR 2:65 nhřa isemɣan d tiyya nsen. Ina tuɣa aten marra sebɛa-ařaf u-teřt-mya u-sebɛa u-třatin uca ɣarsen mitayen n imedyazen d tmedyazin.
EZR 2:66 Iysan nsen [tuɣa aten di] sebɛa-mya u-setta u-třatin, u isardan nsen [tuɣa aten di] mitayen u-xemsa u-rebɛin.
EZR 2:67 Iřeɣman nsen [tuɣa aten di] arebɛa-mya u-xemsa u-třatin [u] iɣyař nsen [tuɣa aten di] sebɛa-mya u-ɛicrin.
EZR 2:68 Umi dd-yusin ɣar Taddart n SIDI di Urcalim, wcin ca n izeǧifen x ibabaten [n řaǧat] s řxaḍar i Taddart n AREBBI ḥima ad tt ssbedden deg wemcan nnes.
EZR 2:69 Nitni wcin i ssenduq n txubay i řxedmet anect n wagřa nsen waḥit u-settin-ařef n draxmat n wureɣ d xemsa-ařaf n minayat n nnuqart d mya n tcamirat i ikehhanen.
EZR 2:70 Ikehhanen d Ilawiyyen d ca zi řgens d imedyazen d iɛessasen n tewwart d imsexxaren n Zzawect Tameqqrant ggin ad zedɣen di tneddam nsen u uřa d marra Israil [igga ad izdeɣ] di tneddam nnes.
EZR 3:1 [Umi] dd-yiweḍ uyur wiss sebɛa u ayt n Israil tuɣa aten di tneddam, issmun řgens am yijj n weryaz di Urcalim.
EZR 3:2 Ikkar Yahucaɛ, mmis n Yuṣadaq, ak-d aytmas, ikehhanen, d Zarubbabil, mmis n Caɛaltiyil, ak-d aytmas, uca bnan aɛalṭar n AREBBI n Israil, ḥima ad xas qeddmen tiɣarṣa n wecmaḍ am mammec tura di Ccariɛa n Musa, aryaz n AREBBI.
EZR 3:3 Nitni ssbedden aɛalṭar x dsusa nnes [mani t tuɣa d amezwaru], waxxa tewḍa-dd xasen tiggʷudi zi řegnus n temmura, uca qeddmen xas tiɣarṣa n wecmaḍ i SIDI, tiɣarṣa n wecmaḍ i tuffut u i tmeddit.
EZR 3:4 Nitni ɛeyyden [ɛawed] Řɛid n Iɛuccuten, am mammec t yura, uca [qeddmen] tiɣarṣa n wecmaḍ, ass iḍfar umas. [Tuɣa] řqedd [nsent] i yijj n wass [ɛlaḥsab min ittwaggen] i wass nni.
EZR 3:5 Awarni as [qeddmen nitni] taɣarṣt n wecmaḍ n řebda, [tiɣarṣa] i wussan n uyur n jdid u i marra řeɛyudat ittwaggen n SIDI inni tuɣa ittwaqeddsen, u [ɛawed tiɣarṣa n] kuř ijj wenni iṭṭewɛen ḥima ad iqeddem ict n tewhibt s řxaḍar i SIDI.
EZR 3:6 Zeg wass amezwaru n uyur wiss sebɛa bdan nitni ad qeddmen tiɣarṣa n wecmaḍ i SIDI, maca dsas n Zzawect Tameqqrant n SIDI war ittwagg [ɛad].
EZR 3:7 Wcin nnuqart i imaṣṣuten u i yinni ineqqcen akeccuḍ, uca i [ayt n] Sidun u i [ayt n] Ṣur [wcin nitni] macca d tissit d zzect, maḥend ad awyen akeccuḍ n tneglin n Lubnan ɣar řebḥar ɣar Yafa ɛlaḥsab ttesriḥ i d asen iwca Kurac, ajeǧid n Lfurs.
EZR 3:8 Deg useggʷas wiss tnayen awarni wawaḍ nsen ɣar Taddart n AREBBI di Urcalim, deg uyur wiss tnayen, bdan Zarubbabil, mmis n Caɛaltiyil, d Yahucaɛ, mmis n Yuṣadaq, d aytmas nsen i iqqimen, ikehhanen d Ilawiyyen d marra inni dd-yusin zi tmeḥbast ɣar Urcalim, [di řxedmet]. Nitni ggin Ilawiyyen zi ɛicřin iseggʷusa sennej maḥend ad ṭṭfen acbar x řxedmet n Taddart n SIDI.
EZR 3:9 Uca ikkar Yecuɛa d iḥenjiren nnes d aytmas, ak-d Qadmyil d iḥenjiren nnes, ayt n Yahuda, am yijj n weryaz maḥend ad ṭṭfen acbar x yinni iggin řxedmet di Taddart n AREBBI, [u ɛawed] iḥenjiren n Ḥinadad ak-d iḥenjiren nsen d aytmatsen Ilawiyyen.
EZR 3:10 [Umi] tuɣa ibennayen ssrusan dsas i Zzawect Tameqqrant n SIDI, ssbedden nitni ikehhanen s warruḍ nsen ak-d řebwaq, uřa d Ilawiyyen, ayt n Asaf, s teǧunin n wuzzař, ḥima ad ssemɣaren SIDI am mammec tuɣa i d asen isscen ufus n Dawud, ajeǧid n Israil.
EZR 3:11 Nitni ɣennjen s nnubtat i SIDI s usemɣar d uqadi, aqa Netta iṣbeḥ minzi tamexsiwt nnes icewwaren x Israil tᵉttɣima i řebda. U marra řgens isɣuy s yijj n usřiwřew imɣar i usemɣar n SIDI maɣar dsas i Taddart n SIDI tuɣa immars.
EZR 3:12 Aṭṭas n ikehhanen d Ilawiyyen d izeǧifen x ibabaten [n řaǧat], iwessura inni iẓrin Taddart tamezwarut, run s tmijja ijehden umi ittwagg dsas n Taddart-a zzat i tiṭṭawin nsen, [maca uřa d] aṭṭas arenyen di tmijja [nsen] s usřiwřew u s řefraḥet,
EZR 3:13 ařami war izemmar řgens ad meyyzen jar řḥess n usřiwřew d řḥess n iɣuyyan s imeṭṭawen n řgens, minzi řgens isɣuy s yijj n usřiwřew imɣar ařami ittwaseř řḥess zi řaggʷaj.
EZR 4:1 [Umi] sřen iɣrimen n Yahuda d Binyamin, aqa ayt n lmenfa tuɣa bennan Zzawect Tameqqrant i SIDI, AREBBI n Israil,
EZR 4:2 usin-dd nitni ɣar Zarubbabil d izeǧifen x ibabaten [n řaǧat] uca nnan asen: “Ejj aneɣ ad nebna [jmiɛ] akidwem, minzi uřa d neccin narezzu AREBBI, am kenniw, maɣar neccin tuɣa nqeddem tiɣarṣi zeg wussan n Asarḥaddun, ajeǧid n Accur, wenni d aneɣ da issgeɛɛden.”
EZR 4:3 Maca Zarubbabil d Yahucaɛ d izeǧifen iqqimen jar ibabaten n Israil, nnan asen: “War [iǧi] i kenniw d neccin maḥend ad nebna [jmiɛ] ict n Taddart i AREBBI nneɣ. Neccin weḥḥdneɣ ad tt nebna i SIDI, AREBBI n Israil, am mammec i d aneɣ yumur ujeǧid Kurac, ajeǧid n Lfurs.”
EZR 4:4 Uca imsar, aqa řgens n temmurt ssarxun ifassen n řgens n Yahuda uca ssiggʷiden ten x řebni.
EZR 4:5 Cran imcawaren ḍidd nsen, maḥend ad ssbeṭṭřen anway nsen, u [aya ikka] marra ussan n Kurac, ajeǧid n Lfurs, ař tagelda n Dariyus, ajeǧid n Lfurs.
EZR 4:6 Umi tuɣa Aḥacwiruc d ajeǧid, ɣar beddu n tgelda nnes, uran nitni ijj n ucetci ḍidd i imezdaɣ n Yahuda d Urcalim.
EZR 4:7 Deg wussan n Artaḥcasta yura Biclam [ak-d] Mitradat [d] Ṭabayil d iɛciren nnes inneɣni, i ujeǧid Artaḥcasta, ajeǧid n Lfurs. Tuɣa tabrat tura s tira n [iřes n] Tramit u tuɣa tarjmen tt [ɛawed] ɣar Tramit.
EZR 4:8 Raḥum, amsuffeɣ n řeḥkamat, d umarir Cimcay urin ict n tebrat i ujeǧid Artaḥcasta ḍidd i Urcalim, tenni [dayes yura] ammu:
EZR 4:9 “Raḥum, amsuffeɣ n řeḥkamat, d umarir Cimcay d inni iqqimen zeg iqrinen nsen di řxedmet, řquḍat, imxazniyyen, ayt n ccenɛet d ayt n Lfurs d ayt n Irix d Babilun d Cucan, aqa aten d Iɛilamiyyen,
EZR 4:10 d ccuɛub nneɣni, inni iwyi ten Asnaffar ameqqran amcenneɛ ɣar lmenfa u issezdeɣ i-ten di tendint n Samarya u di jjihet iqqimen x ujemmaḍ n iɣzar [n Lfuraṭ] ... uca ɛad.”
EZR 4:11 Ta d tiřemt n tebrat i dd-ssekken nitni i ujeǧid Artaḥcasta: “Imsexxaren nnec, iryazen nni [iǧan] x ujemmaḍ n iɣzar [n Lfuraṭ] ... uca ɛad.”
EZR 4:12 “Iři ad issen ujeǧid aqa Udayen i dd-igeɛɛden zi ɣarek, aqa iwḍen-dd ɣarneɣ ɣar Urcalim uca nitni aqa bennan tandint nni iɣewwɣen taɛeffant, aqa ttkemmařen řeḥyuḍ u ɛeddřen dsusa.
EZR 4:13 [Xenni] řexxu, ittxeṣṣa ad issen ujeǧid, mařa tandint nni ad tᵉttwassbedd twařa nneɣni u řeḥyuḍ ad ttwakemmřen, aqa nettat war tᵉttic ljizya řa d řeɛcur uřa d ḍḍariba n webrid uca [ammu i] ɣa issexsar arbeḥ n ijeǧiden.
EZR 4:14 [Xenni] řexxu, umi neccin nettmeǧaḥ macca nneɣ s tmeǧaḥt n řeqṣar u war d aneɣ dd-tusi mařa neccin nxezzar umi ittwassbehdeř ujeǧid, x uyenni nessekk-dd tabrat-a uca nessargeb aya i ujeǧid,
EZR 4:15 ḥima ad arzun deg wedlis n imezruyen n řejdud nwem uca ad tafed deg wedlis n imezruyen uca ad [zzayes] tessned aqa tandint-a d ict n tendint iɣewwɣen, tiwi-dd arrẓiyyet i ijeǧiden u i lɛamalat u zeg wecḥař uya ssekkaran dayes aɣewweɣ. S uyenni tᵉttwahdem tendint-a.
EZR 4:16 Neccin nessargeb ajeǧid, aqa, mařa ad tᵉttwabna tendint-a [ɛawed] uca ad ttwakemmřen řeḥyuḍ nnes, xenni war ɣarek ttᵉttiři ca teṣɣart [ɛad] x ujemmaḍ n iɣzar [n Lfuraṭ].”
EZR 4:17 Issekk ujeǧid tamwarrit i Raḥum, amsuffeɣ n řeḥkamat, u i umarir Cimcay d inni iqqimen zeg iqrinen nsen di řxedmet inni izeddɣen di Samarya, u uřa i yinni iqqimen [zeddɣen] x ujemmaḍ n iɣzar [n Lfuraṭ]: “Řehna! ... uca ɛad.”
EZR 4:18 “Tabrat i d aneɣ dd-tessekkem, aqa tᵉttwaɣar xafi nican.
EZR 4:19 Uca [awarni řami] umureɣ [aya], tᵉttwagg ict n tarezzut uca ufin aqa tandint-a tɣewweɣ x ijeǧiden zeg wecḥař uya uca ssekkaren dayes [řebda] aɣewweɣ d řeḥweř.
EZR 4:20 Ɛawed tuɣa [din] ijeǧiden imeqqranen x Urcalim, inni tuɣa iḥekkmen di marra [jjwayeh] x ujemmaḍ n iɣzar [n Lfuraṭ] ařami tᵉttwaxeǧeṣ asen ljizya d řeɛcur d ḍḍariba n webrid.
EZR 4:21 Iwa, řexxu umurem ad ssbeddem iryazen-a. Tandint war tbenni twařa nneɣnit ař ɣa ittwassuffeɣ zzayi řumur [i uya].
EZR 4:22 Ɣarwem aqa ad tarxum zi tmesřact-a. Mayemmi ɣa temɣar druct [ɛad] i txessart n ijeǧiden?”
EZR 4:23 Řami tᵉttwaɣar tebrat n ujeǧid Artaḥcasta i Raḥum d Cimcay, amarir, d iqrinen nsen di řxedmet, uyuren ina s tazřa ɣar Urcalim, ɣar Wudayen uca ssbedden ten [zi řxedmet nsen] s uɣiř u s řxuncet.
EZR 4:24 Xenni tbedd řxedmet i Taddart n Arebbi wenni izeddɣen di Urcalim uca iqqim ibedd ař aseggʷas wiss tnayen n tgelda n Dariyus, ajeǧid n Lfurs.
EZR 5:1 [Xenni] nebban inabiyyen, inabiyyen Ḥaggay d Zakariyya, mmis n Ɛidu, i Wudayen nni [iǧan] di Yahuda d Urcalim. [Nabben] ɣarsen s Yisem n Arebbi n Israil nni xasen [ittwařaɣa].
EZR 5:2 Xas uca ikkar Zarubbabil, mmis n Caɛaltiyil, d Yahucaɛ, mmis n Yuṣadaq, uca nitni bdan ad bnan Taddart n Arebbi di Urcalim [ɛawed], uca inabiyyen n Arebbi, inni akidsen ibedden, [tuɣa aten din] akidsen.
EZR 5:3 Di řweqt nni yusa-dd Tatnay, lwali n [weqlim] x ujemmaḍ n iɣzar [n Lfuraṭ], ak-d Catar-Buznay u ɣarsen iqrinen nsen di řxedmet. Nitni nnan asen ammu: “Man wen i kenniw yumuren, maḥend ad tebnam Taddart-a u [maḥend] ad tkemmřem řḥiḍ-a?”
EZR 5:4 Xenni nenna asen ismawen n yeryazen i tuɣa ibennan řebni-ya.
EZR 5:5 [Maca] tiṭṭ n Arebbi nsen tuɣa-tt x imɣaren n Wudayen uca nitni ggin war ten ssbeddan [zi řxedmet] ař ɣa taweḍ tmesřact ɣar Dariyus uca awarni aya ad ṭṭfen tabrat x man aya.
EZR 5:6 Tiřemt n tebrat nni issekk Tatnay, lwali [n temmurt] x ujemmaḍ n iɣzar [n Lfuraṭ], ak-d Catar-Buznay d iqrinen nnes di řxedmet, iqrinen nni [iǧan] x ujemmaḍ n iɣzar [n Lfuraṭ], ɣar ujeǧid Dariyus.
EZR 5:7 Nitni ssekken as-dd ict n tebrat tura dayes ammu: “Ad yiři i ujeǧid Dariyus řehna zi marra iɣezdisen!”
EZR 5:8 “Ittxeṣsa ad issen ujeǧid, aqa neccin nuyur ɣar lɛamala n Yahuda, ɣar Taddart n Arebbi ameqqran. Aqa tᵉttwabenna [Taddart nni] s iẓra imeqqranen i ittxeṣṣan ad ttwannḍen [ɣar wemcan nsen], u ittwattegg ukeccuḍ di řeḥyuḍ. Tteggen nitni řxedmet-a s cḍaret uca teggur mliḥ jar ifassen nsen.
EZR 5:9 Neccin nesseqsa imɣaren-a u nenna [asen] ammu: ‘Man wen i d awem iwcin řumur maḥend ad tessbeddem taddart-a u ad tkemmřem řḥiḍ-a?’
EZR 5:10 Nesseqsa ten uřa x ismawen nsen ḥima ad ac ten-i-dd-nini, ařami niweḍ ad nzemmem ismawen n yeryazen nni iǧan ɣar uzeǧif nsen.
EZR 5:11 Nitni arrin aneɣ-dd, nnan ammu: ‘Neccin d imsexxaren n Arebbi n ijenwan d temmurt u nebna taddart tenni tᵉttwabna danita aṭṭas n iseggʷusa zeg wami. Ijj n ujeǧid d ameqqran n Israil ibna tt u ikemmeř i-tt.
EZR 5:12 Maca awarni řami ssɛaren řejdud nneɣ Arebbi n ijenwan, aqa iwca i-ten deg ufus n Nabuxadnaṣṣar, ajeǧid n Babil, Axaldiwi, wenni ihedmen Taddart-a u indeh řgens ɣar lmenfa ɣar Babil.
EZR 5:13 Maca deg useggʷas amezwaru n Kurac, ajeǧid n Babil, yumur Kurac ad ssbedden Taddart-a n Arebbi [twařat nneɣni].
EZR 5:14 Uřa d řeqcuɛ n wureɣ d nnuqart zi Taddart n Arebbi, tinni ikkes Nabuxadnaṣṣar zi Zzawect Tameqqrant di Urcalim, issidef i-tent ɣar zzawect n Babil, aqa issuffeɣ i-tent Kurac zi zzawect di Babil u iwca [i-tent] i [ijj n weryaz] qqaren as Cicbaṣṣar, wenni tuɣa igga d lwali.
EZR 5:15 Netta inna as: Ksi řeqcuɛ-a, ruḥ, ggem ten di Zzawect Tameqqrant di Urcalim. Ittxeṣṣa ad tᵉttwabna Taddart n Arebbi deg wemcan nnes [n zic].
EZR 5:16 Xas uca yusa-dd Cicbaṣṣar wanita, uca issars dsusa i Taddart n Arebbi di Urcalim u ssenni ař řexxu aqa bennan [tt], [maca] war tᵉttwakemmeř [ɛad].’
EZR 5:17 Xenni řexxu, mařa yarḍa i ujeǧid, ejj ad arzun deg wexxam n txubay n ujeǧid di Babil, ma s tidett immewc řumur zi ɣar ujeǧid Kurac ḥima ad tᵉttwabna Taddart-a n Arebbi di Urcalim twařa nneɣni uca ad aneɣ dd-ittwassekk [xenni] lqarar n ujeǧid.”
EZR 6:1 Xenni issuffeɣ ujeǧid Dariyus řumur uca arzun di taddart n idlisen ittwannḍen, mani ttwaxemmřent txubay din di Babil.
EZR 6:2 [Xenni] ittwaf di Aḥmata ijj n wedlis ittwannḍen di lqelɛa tenni [iǧan] di lɛamala n Midya u dayes tuɣa tira-ya n řidaret:
EZR 6:3 “Deg useggʷas amezwaru n ujeǧid Kurac, issuffeɣ Kurac řumur-a: ‘[X] Taddart n Arebbi di Urcalim. Aqa ittxeṣṣa ad tᵉttwabna Taddart nni [twařa nneɣnit] deg wemcan mani qeddmen tiɣarṣa u [ittxeṣṣa] ad ttwaɛeddřen dsusa nnes. Řuɛřa nnes [ad tiři] settin n iɣaǧen, tiru nnes settin n iɣaǧen,
EZR 6:4 s třata n řesdud n tṣuḍar timeqqranin d ijj n ssedd n tefřawt d jdid. Min din ixeṣṣen ad zzayes tᵉttwakellef zi taddart n ujeǧid.
EZR 6:5 Uřa d řeqcuɛ n wureɣ d nnuqart n Taddart n Arebbi, tinni ikkes Nabuxadnaṣṣar zi Zzawect Tameqqrant nni [iǧan] di Urcalim u iwyi tent ɣar Babil, ad ttwarrent. man aya [marra] ad dd-idweř ɣar Zzawect Tameqqrant di Urcalim, ɣar wemcan nnes. Ittxeṣṣa ad temmarsed marra man aya di Taddart n Arebbi.’
EZR 6:6 S uya, Tatnay, lwali n [temmurt] x ujemmaḍ n iɣzar [n Lfuraṭ], Catar-Buznay d iqqrinen nnes di řxedmet, iqqrinen nni [iǧan] x ujemmaḍ n iɣzar [n Lfuraṭ], aggʷejem ssenni!
EZR 6:7 Jjem řxedmet di ṭṭweɛ n Taddart-a n Arebbi, [ḥima] lwali n Wudayen ak-d imɣaren n Wudayen ad bnan Taddart-a n Arebbi twařa nneɣnit deg wemcan nnes.
EZR 6:8 Ɛawed ittwassuffeɣ-dd zzayi řumur x min ittxeṣṣa ad teggem i imɣaren n Wudayen-a maḥend ad tᵉttwabna Taddart-a n Arebbi [twařat nneɣni]. Zeg wagřa n ujeǧid, zi ljizya [n temmurt] x ujemmaḍ n iɣzar [n Lfuraṭ], ad ittwaxeǧeṣ s cḍaret min ittxeṣṣen iryazen-a maḥend war tᵉttbeddi ca [řxedmet].
EZR 6:9 U min ittxeṣṣen zeg ifunasen imeẓyanen d icarriyyen d izmaren d tɣarṣi n wecmaḍ i Arebbi n ijenwan, u min ittxeṣṣen zeg irden d tmeǧaḥt d binu d zzect ɛlaḥsab awař n ikehhanen i iǧan di Urcalim, ad asen immewc zeg wass ɣar wass, ḥima war ittxeṣṣi uřa d walu,
EZR 6:10 ḥima ad qeddmen ict n řefwaḥet ittfuḥen i Arebbi n ijenwan uca ad ẓẓaǧen di ṭṭweɛ n tudart n ujeǧid d iḥenjiren nnes.
EZR 6:11 ittwassuffeɣ-dd zzayi řumur ḥima kuř ijjen wenni i ɣa ibeddřen tawṣeyyet-a, ad ittwakkes ijj n weɛmud zi taddart nnes ad t ssbedden, ad xas ittwayeř netta uca di ssibbet-a ad tedweř taddart nnes d ict n tzubact n řeɣbar.
EZR 6:12 Ejj ad ihdem Arebbi, wenni din issezdɣen Isem nnes, kuř ajeǧid d kuř řgens nni i ɣa isswiẓẓḍen afus nnes maḥend ad ibeddeř niɣ ad yareddeǧ Taddart n Arebbi nni [iǧan] di Urcalim. Necc Dariyus, d wenni iwcin řumur. Ejj ad ittwagg man aya s cḍaret.”
EZR 6:13 Xenni Tatnay, lwali [n temmurt] x ujemmaḍ n iɣzar [n Lfuraṭ], ak-d Catar-Buznay d iqrinen nnes di řxedmet ggin s cḍaret ɛlaḥsab [řumur] i tuɣa dd-issekk ujeǧid Dariyus.
EZR 6:14 Bnan imɣaren n Wudayen u nitni arnin mliḥ [di řebni] umi tuɣa ittnebba Ḥaggay d Zakariyya, mmis n Ɛiddu. Nitni bnan u kemmřen tt ɛlaḥsab řumur n Arebbi n Israil u ɛlaḥsab řumur n Kurac d Dariyus d Artaḥcasta, ajeǧid n Lfurs.
EZR 6:15 Uca [ammu] tᵉttwakemmeř Taddart deg wass wiss třata n uyur Adar, aqa-t d aseggʷas wiss setta n tgelda n ujeǧid Dariyus.
EZR 6:16 Ayt n Israil, ikehhanen d Ilawiyyen d ayt n lmenfa i iqqimen, deccnen Taddart-a n Arebbi s řefraḥet.
EZR 6:17 I udeccen n Taddart n Arebbi iwyen nitni mya n ifunasen, mitayen n icarriyyen d arebɛa-mya n izmaren [d taɣarṣt], u i taɣarṣt n ddenb tenɛac n imuyan i marra Israil ɛlaḥsab řqedd n tqebbař n Israil.
EZR 6:18 Nitni ssbedden ikehhanen s terbiɛin nsen u Ilawiyyen di terbiɛin nsen i tsexxart i Arebbi nni [iǧan] di Urcalim, ɛlaḥsab tawṣeyyet n wedlis n Musa.
EZR 6:19 Deg [wass] wiss arbeɛṭac n uyur amezwaru sswejden ayt n lmenfa i [Tɣarṣt n] Useɛdu.
EZR 6:20 Minzi ikehhanen d Ilawiyyen ggin ad ssizdgen ixef nsen am yijj n weryaz. Tuɣa-ten marra d imezdagen u nitni ɣarṣen [Taɣarṣt n] Useɛdu i marra ayt n lmenfa u i aytmatsen ikehhanen u i yixef nsen.
EZR 6:21 Ayt n Israil, inni dd-iɛeqben zi lmenfa, ccin zzayes, uřa d kuř ijjen wenni tuɣa issarxun ixef nnes zi řexmej n řegnus n temmurt [uca] [yusa-dd] ɣarsen ḥima ad yarzu SIDI, AREBBI n Israil.
EZR 6:22 Sebɛa n wussan ɛeyyden nitni Řɛid n Weɣrum břa Antun, minzi SIDI tuɣa issefraḥ i-ten uca issmeyyeř uř n ujeǧid n Accur ɣarsen maḥend ad issejhed ifassen nsen ɣar řxedmet n Taddart n AREBBI, AREBBI n Israil.
EZR 7:1 Awarni man aya, řami tuɣa d tagelda n Artaḥcasta, ajeǧid n Lfurs, aqa [din] Ɛizra, mmis n Saraya, mmis n Ɛazarya, mmis n Ḥilqiya,
EZR 7:2 mmis n Callum, mmis n Ṣaduq, mmis n Axiṭub,
EZR 7:3 mmis n Amarya, mmis n Ɛazarya, mmis n Marayut,
EZR 7:4 mmis n Zaraḥ-Yah, mmis n Ɛuzi, mmis n Buqqi,
EZR 7:5 mmis n Abicuɛa, mmis n Finḥas, mmis n Aliɛazar, mmis n Harun, arrays n ikehhanen.
EZR 7:6 Ɛizra wanita igeɛɛed-dd zi Babil. Netta tuɣa d ijj n umseřmad d amiɣis n Ccariɛa n Musa tenni tuɣa i d iwca SIDI, Arebbi n Israil, uca ajeǧid iwca as marra x tutra nnes minzi afus n SIDI, AREBBI nnes, tuɣa-t xas.
EZR 7:7 Deg useggʷas wiss sebɛa n ujeǧid Artaḥcasta geɛɛden akides ɣar Urcalim [ijj n řqedd] n ayt n Israil d ikehhanen d Ilawiyyen d imedyazen d iɛessasen n tewwura d imsexxaren n Zzawect Tameqqrant.
EZR 7:8 Deg uyur wiss xemsa n useggʷas wiss sebɛa n ujeǧid yiweḍ Ɛizra ɣar Urcalim.
EZR 7:9 Deg [wass] amezwaru n uyur amezwaru [tuɣa-t d] beddu n wuffuɣ zi Babil uca deg umezwaru n uyur wiss xemsa yiweḍ ɣar Urcalim, minzi tuɣa afus iṣebḥen n AREBBI xas,
EZR 7:10 maɣar Ɛizra igga deg wuř nnes ad yarzu di Ccariɛa n SIDI u ad tt igg u ad isseřmed tiweṣṣa d lfarayiḍ di Israil.
EZR 7:11 Ta d tiřemt n tebrat i iwca ujeǧid Artaḥcasta ak-d Ɛizra, akehhan d umseřmad n tira [iqeddsen], [wenni d] amseřmad deg wawařen n řumurat n SIDI d tweṣṣa nnes i Israil:
EZR 7:12 “Artaḥcasta, ajeǧid n ijeǧiden, i Ɛizra, akehhan d umseřmad n Ccariɛa n Arebbi n ijenwan, řehna imun! ... uca ɛad.”
EZR 7:13 “Ittwassuffeɣ-dd zzayi řumur ḥima kuř ijj di tgeldit inu zi řgens n Israil u zeg ikehhanen d Ilawiyyen, wenni s yixef nnes ixs ad yuyur ɣar Urcalim, ad kidek yuyur.
EZR 7:14 Aqa cek tᵉttwassekked s ufus n ujeǧid d sebɛa n imcawaren nnes ḥima ad tbeqqced di mammec teǧa řḥař di Yahuda u di Urcalim, ɛlaḥsab Ccariɛa n Arebbi tenni [iǧan] deg ifassen nnec.
EZR 7:15 [Tᵉttwasekked ɛawed] ḥima ad din tawyed nnuqart d wureɣ nni tuɣa iwca ujeǧid d imcawaren nnes s řxaḍar i Arebbi n Israil, wenni ɣar teǧa Tzeddiɣt di Urcalim,
EZR 7:16 u [ɛawed] marra nnuqart d wureɣ i ɣa tafed di marra lɛamala n Babil, ak-d tewhibin n uṭewweɛ n řgens d ikehhanen, [zeg] inni i ɣa iwcen s uṭewweɛ i Taddart n Arebbi nsen tenni [iǧan] di Urcalim,
EZR 7:17 ḥima xenni ad tesɣed s nnuqart-a s cḍaret ifunasen, icarriyyen, izmaren ak-d tewhibin nnes [n řɣiǧet] d tewhibin n useyyeb ḥima ad tent tqeddmed x uɛalṭar n Taddart n Arebbi nnec, tenni [iǧan] di Urcalim.
EZR 7:18 S min ɣa iqqimen n nnuqart d wureɣ ggem zzayes min tᵉttwařid cek d aytmac mliḥ, ɛlaḥsab řxaḍar n Arebbi nwem.
EZR 7:19 Uca řeqcuɛ i d ac immewcen i tsexxart di Taddart n Arebbi, seɛdu ten [ɣar din] zzat Arebbi n Urcalim.
EZR 7:20 Min ɣa ixeṣṣen ɛad ktar i Taddart n Arebbi nnec, min ɣa yiři xak ad t txeǧṣed, ewc i-t zeg wexxam n txubay n ujeǧid.
EZR 7:21 Necc, ajeǧid Artaḥcasta, ssuffeɣ-dd řumur i marra imeḥḍayen x txubay [di temmurt] x ujemmaḍ n iɣzar [n Lfuraṭ], maḥend ad immewc s cḍaret marra min zzaywem ɣa ittar ukehhan Ɛizra, amseřmad n Ccariɛa n Arebbi n ijenwan,
EZR 7:22 ař mya talint n nnuqart, ař mya ikuruten n irden, ař mya ibatuten n binu u ař mya ibatuten n zzect, uca [i] tmeǧaḥt [war din] bu tewṣeyyet.
EZR 7:23 Marra min [iǧan] zi řumur n Arebbi n ijenwan, ad ittwagg s cḍaret i Taddart n Arebbi n ijenwan, minzi mayemmi i dd ɣa yas weɣḍab x tgeldit n ujeǧid d iḥenjiren nnes?
EZR 7:24 Zi jjihet n marra ikehhanen d Ilawiyyen, d imeɣnujen d iɛessasen n tewwura d imsexxaren n Zzawect Tameqqrant d imsexxaren n Taddart n Arebbi wanita, aqa ad kenniw nxebbar, war izemmar ad xasen ittwagg řeɛcur, řa d ljizya uřa d ḍḍariba n webrid.
EZR 7:25 Maca cek, Ɛizra, s tiɣit i d ac immewcen zi Arebbi nnec, řeqqem imḍebbaren d řquḍat nni i ɣa iḥekmen x marra řgens nni iǧan [di temmurt] x ujemmaḍ n iɣzar [n Lfuraṭ], i marra inni issnen izerfan n Arebbi. Uca i yinni war ten issinen, ittxeṣṣa ad ten dd-tessargbed.
EZR 7:26 Kuř ijjen wenni war iḍfaren Ccariɛa n Arebbi nwem d uzerf n ujeǧid, ittxeṣṣa ad ittwaḥkem s cḍaret, ma s řmewt niɣ s lmenfa niɣ s multa n wagřa niɣ s řeḥbes.”
EZR 7:27 Asemɣar i SIDI, Arebbi n řejdud nneɣ, wenni iggin aya ammu deg wuř n ujeǧid ḥima ad yarni acenneɛ di Taddart n SIDI nni [iǧan] di Urcalim.
EZR 7:28 Aqa Netta isscen ayi tamexsiwt nnes icewwaren zzat i wudem n ujeǧid d imcawaren nnes d marra řḥukkam ijehden n ujeǧid! Uca umi xafi tuɣa afus n SIDI, AREBBI inu, ggiɣ uř u ssmuneɣ izeǧifen n Israil ḥima ad kidi geɛɛden.
EZR 8:1 Ina d izeǧifen x ibabaten [n řaǧat], ak-d lista n jjadira nsen, inni akidi dd igeɛɛden zi Babil umi tuɣa teǧa tgelda n ujeǧid Artaḥcasta.
EZR 8:2 Zeg ayt n Finḥas: Jarcum, zeg ayt n Itamar: Daniyal, zeg ayt n Dawud: Ḥaṭṭuc.
EZR 8:3 Zeg ayt n Cakanya, zeg ayt n Faruc: Zakariyya u akides ttwazemmemen mya u-xemsin n yeryazen ak-d jjadira nsen.
EZR 8:4 Zeg ayt n Faḥat-Mu’ab: Ilyuɛinay, mmis n Zaraḥ-Yah, u akides mitayen n yeryazen.
EZR 8:5 Zeg ayt n Cakanya, mmis n Yaḥziyil, u akides teřt-mya n yeryazen.
EZR 8:6 Zeg ayt n Ɛadin: Ɛabid, mmis n Yunatan, u akides xemsin n yeryazen.
EZR 8:7 Zeg ayt n Ɛilam: Icaɛya, mmis n Ɛatalya, u akides sebɛin n yeryazen.
EZR 8:8 Zeg ayt n Cafaṭya: Zabadya, mmis n Mixayil, u akides tmenyin n yeryazen.
EZR 8:9 Zeg ayt n Yuwab: Ɛubadya, mmis n Yaḥiyil, u akides mitayen u-tmentac n yeryazen.
EZR 8:10 Zeg ayt n Bani: Calumit, mmis n Yucafya, u akides mya u-settin n yeryazen.
EZR 8:11 Zeg ayt n Babay: Zakariyya, mmis n Babay, u akides tmenya u-ɛicrin n yeryazen.
EZR 8:12 Zeg ayt n Ɛajad: Yuḥanan, mmis n Haqqaṭan, u akides mya u-ɛecra n yeryazen.
EZR 8:13 Zeg ayt n Aduniqam, ineggura, d ina d ismawen [nsen]: Ilifalaṭ, Yaɛiyil d Camɛiya u akidsen settin n yeryazen.
EZR 8:14 Zeg ayt n Biɣway: Ɛutay d Zabbud u akides sebɛin n yeryazen.
EZR 8:15 Necc ssmuneɣ ten ɣar iɣzar nni ittekken x Ahawa. Dinni newta iqiḍan nneɣ třata n wussan u necc ḥekkareɣ i řgens d ikehhanen u war ufiɣ uřa d ijjen zeg Ilawiyyen.
EZR 8:16 [Xenni] ssekkeɣ ɣar Aliɛazar, Ariyil, Camɛiya, Il-Natan, Yarib, Alnatan, Natan, Zakariyya u ɣar Macullam, [inni d] izeǧifen, u ɣar Yuyarib d Il-Natan, [iryazen] ɣarsen řefhamet.
EZR 8:17 Umureɣ ten x Ɛiddu, azeǧif deg wemcan [umi qqaren] Kasifya, uca ggiɣ asen awařen deg uqemmum nsen, ḥima ad ten inin i Ɛiddu, i učmas u i imsexxaren n Zzawect Tameqqrant deg wemcan [umi qqaren] Kasifya, maḥend ad aneɣ dd-awyen imsexxaren i Taddart n AREBBI nneɣ.
EZR 8:18 Umi tuɣa xaneɣ afus iṣebḥen n AREBBI, ssekken aneɣ-dd ijj n weryaz s řefhamet, ijjen zeg iḥenjiren n Maḥli, mmis n Lawi, mmis n Israil, u [wanita] d Carabya, ak-d iḥenjiren nnes d aytmas, [marra idsen] tmenṭac [n yeryazen],
EZR 8:19 u [ɛawed] Ḥacabya u akides Icaɛya zeg ayt n Marari, ak-d aytmas d iḥenjiren nsen, ɛicrin [n yeryazen].
EZR 8:20 U zeg imsexxaren n Zzawect Tameqqrant nni iwcin Dawud d řḥukkam i Ilawiyyen maḥend ad asen sexxaren, aqa aten mitayen u-ɛicrin n imsexxaren n Zzawect Tameqqrant inni marra ttwařaɣan s ismawen nsen.
EZR 8:21 [Xenni] řaɣiɣ dinni ɣar iɣzar n Ahawa s yijj n uẓummi, maḥend ad nessaḍar ixef nneɣ zzat i wudem n AREBBI nneɣ, maḥend ad zzayes nettar ticři d tamimunt i neccin u i tarwa nneɣ imeẓyanen u i wagřa nneɣ,
EZR 8:22 maɣar ttsedḥiɣ ad ttareɣ ijj n řɛeskar zi ɣar ujeǧid maḥend ad aneɣ tɛawen deg webrid ḍidd i řeɛdu, minzi tuɣa nessawař deg ujeǧid, nenna: “Afus n AREBBI aqa-t d aṣebḥan x marra inni t yarezzun, maca jjehd nnes d weɣḍab nnes [ad dd-asen] x marra inni i xas ittaggʷejen.”
EZR 8:23 Iwa neccin nẓumm u nettar aya zi AREBBI nneɣ u netta istajeb aneɣ i tẓaǧit yuǧɣen nneɣ.
EZR 8:24 [Xenni] farzeɣ tenɛac [n yeryazen] zeg imeqqranen n ikehhanen: Carabya d Ḥacabya u akidsen ɛecra n aytmatsen.
EZR 8:25 Wezneɣ zzatsen nnuqart d wureɣ d řeqcuɛ, aqa aya d tawhibt n usgeɛɛed i Taddart n AREBBI nneɣ, tenni issgeɛɛed ujeǧid ak-d imcawaren nnes d řḥukkam nnes d marra inni [din] ittwafen zi Israil.
EZR 8:26 Wezneɣ u ggiɣ asen deg ifassen nsen setta-mya u-xemsin talint n nnuqart u mya n řeqcuɛ n nnuqart [iweznen] mya talint u mya talint n wureɣ
EZR 8:27 u ɛicrin n ifenjařen n wureɣ sekkʷan ařef draxmat uřa d tnayen n řeqcuɛ n nnḥas, icellel, icna, iɣřa am wureɣ.
EZR 8:28 Nniɣ asen: “Kenniw d imqeddasen zzat i SIDI u řeqcuɛ-a aqa qeddsen [i ǧan], uřa d nnuqart-a d wureɣ-a, aqa aya d tawhibt s řxaḍar i SIDI, AREBBI n řejdud nwem.
EZR 8:29 Ɛessem u ḥḍam aya ař t ɣa tweznem zzat i wudem n imeqqranen n ikehhanen d Ilawiyyen d imeqqranen n [řaǧat n] ibabaten n Israil di Urcalim, deg ixxamen n Taddart n SIDI.”
EZR 8:30 [Xenni] ṭṭfen ikehhanen d Ilawiyyen řewzen n nnuqart d wureɣ d řeqcuɛ ḥima ad awyen [aya marra] ɣar Urcalim ɣar Taddart n AREBBI nneɣ.
EZR 8:31 Deg wass wiss tenɛac n uyur amezwaru nekkes iqiḍan nneɣ maḥend ad nuyur ɣar Urcalim. Tuɣa afus n AREBBI xaneɣ uca ifekk aneɣ zeg ufus n řeɛdu u [zeg ufus] n yinni [i d aneɣ] iggin řfex deg webrid.
EZR 8:32 Uca niweḍ ɣar Urcalim u neqqim dinni třata n wussan.
EZR 8:33 Deg wass wiss arebɛa ittwawzen nnuqart d wureɣ d řeqcuɛ di Taddart n AREBBI nneɣ uca newca aya i ukehhan Marimut, mmis n Uriya, uca Aliɛazar, mmis n Finḥas, [tuɣa-t] akides uřa d Yuzabad, mmis n Yecuɛa, d Nuɛadya, mmis n Bannuy, nitni s tnayen d Ilawiyyen.
EZR 8:34 [D man aya imsar] ɛlaḥsab řqedd d řewzen n marra aya u marra řewzen ittwawzen di řweqt nni d ijjen.
EZR 8:35 Ayt n lmenfa inni dd-iɛeqben zi tmeḥbast, ssgeɛɛden i AREBBI n Israil tiɣarṣa n wecmaḍ: tenɛac n ifunasen imeẓyanen i marra Israil, setta u-tesɛin n icarriyyen u sebɛa u-sebɛin n izmaren, u i tɣarṣt n ddenb tenɛac n imuyan, marra aya d taɣarṣt n wecmaḍ i SIDI.
EZR 8:36 Nitni wcin tiweṣṣa n ujeǧid i ijeǧiden [i iǧan] sadu ujeǧid u i lwulat [di temmurt] x ujemmaḍ n iɣzar [n Lfuraṭ] u nitni wcin afus i řgens u [i tsexxart di] Taddart n AREBBI.
EZR 9:1 Awarni řami ittwakemmeř man aya [marra], usin-dd ɣari řḥukkam, nnan: “Řgens n Israil d ikehhanen d Ilawiyyen war qqimen ttwamsebḍan x řegnus n temmura-ya, [maɣar] jjɛayef nsen am tinni n ayt n Kenɛan d Iḥittiyyen d Ifiriziyyen d Iyabusiyyen d ayt n Ɛammun d ayt n Mu’ab d Imiṣriyyen d Imuriyyen.
EZR 9:2 Nitni iwyen zeg yessitsen [timɣarin] i yixef nsen u i iḥenjiren nsen ařami ṣuren zzariɛet d tamqeddast s řegnus n temmura-ya, wah, afus n řḥukkam d imḍebbaren tuɣa-t d amezwaru di řeɣdar-a.”
EZR 9:3 Umi sřiɣ aya, carrgeɣ arruḍ inu d useřham inu, qeřɛeɣ-dd acuwwaf n uzeǧif u n tmart uca qqimeɣ jeɛɛareɣ.
EZR 9:4 [Xenni] munen-dd xafi marra, inni ittarjijen zi AREBBI n Israil, di ssibbet n řeɣdar n ayt n lmenfa, maca necc qqimeɣ jeɛɛareɣ ař [řweqt n] tewhibt n tmeddit.
EZR 9:5 Ɣar tewhibt n tmeddit kkareɣ zeg uswaḍeɛ inu s warruḍ inu d useřham inu [icarrgen] uca uḍareɣ x ifadden u sswiẓẓḍeɣ ifassen inu ɣar SIDI, AREBBI inu.
EZR 9:6 Nniɣ: “AREBBI inu, necc sedḥiɣ u ttwassbehdřeɣ ař war zɛimeɣ ad ɣarek dd-ssgeɛɛdeɣ udem inu, a AREBBI inu, minzi řmuɛṣiyyet nneɣ temɣar aneɣ x uzeǧif u amarwas nneɣ imɣar ař ajenna.
EZR 9:7 Zeg wussan n řejdud nneɣ ař ass-a [aqa aneɣ] deg umarwas d ameqqran u x řmuɛṣiyyet nneɣ nemmewc neccin d ijeǧiden nneɣ d ikehhanen nneɣ deg ifassen n ijeǧiden n temmura, [aqa nemmewc] i ssif, i tmeḥbast, i ukecceḍ u i řefḍiḥet x wudmawen nneɣ, am mammec [i teǧa] ass-a.
EZR 9:8 Řexxu tuɣa din ict n tzeḥziḥt d tameẓyant n arḍa n SIDI, AREBBI nneɣ, ḥima ad aneɣ yejj ca n yinni innejmen u ḥima ad aneɣ iwc ijj n řewted di Zzawect Tameqqrant nnes Iqeddsen u tfawt i tiṭṭawin nneɣ, [a] AREBBI nneɣ, u ḥima ad aneɣ dd-yarr nnefs cwayt di tesmuɣi nneɣ.
EZR 9:9 Aqa neccin d isemɣan, maca di tesmuɣi nneɣ war dayneɣ ismiḥ AREBBI nneɣ, maca Netta idřa aneɣ s tmexsiwt nnes icewwaren zzat i wudem n ijeǧiden n Lfurs maḥend ad aneɣ dd-yarr nnefs i usbeddi n Taddart n AREBBI [twařat nneɣni], i weɛdař n řxirbat u ḥima ad aneɣ iwc ijj n wemcan ittwannḍen s řḥiḍ di Yahuda u di Urcalim.”
EZR 9:10 “Uca řexxu, min ɣa nini awarni uya ɛad, [a] AREBBI nneɣ, minzi nesmeḥ di řumurat nnec,
EZR 9:11 tinni tumured s tsexxart n imsexxaren nnec, inabiyyen, inni innan: ‘Tammurt tenni i ɣa tadfem maḥend ad tt tᵉṭṭfem d řwart, d ict n temmurt tᵉttwassexmej s řexmej n řegnus n temmura, s jjɛayef nsen i zi tt ccuren zi ṭṭarf ař ṭṭarf nneɣni s texmuji nsen’,
EZR 9:12 [d inni iqqaren uřa ɛad] řexxu: ‘War tticem tiḥenjirin nwem d timɣarin i iḥenjiren nsen, uřa d tiḥenjirin nsen war tent ttiwyem i iḥenjiren nwem uca war arezzum x řaman nsen niɣ řxar nsen i řebda, ḥima ad tdewřem tjehdem u ad teccem mummu [n řɣiǧet] n temmurt u ad tt tewcem d řwart i řebda i iḥenjiren nwem.’”
EZR 9:13 “Uca awarni marra min i d aneɣ imsaren di ssibbet n tmegga nneɣ tiɛeffanin d umarwas nneɣ ameqqran, [a] AREBBI nneɣ, aqa Cek war d aneɣ txeǧṣed ca mɣir drus waha ařami war nettwahellek ca s řmuɛṣiyyet nneɣ u tewcid aneɣ [ɛad] ina inni innejmen am tt teǧa [řexxu].
EZR 9:14 Ma nzemmar řexxu ad narẓ twařa nneɣnit tiweṣṣa nnec u ad negg ad nedweř d iḍeggʷařen ak-d řegnus nni [iggin] jjɛayef-a? Ma [xenni] Cek war xaneɣ tseɛɛared ařami xaneɣ i ɣa teqḍid ař mani war ittɣimi ijj n řbaqi uřa d wenni innejmen?
EZR 9:15 [A] SIDI, AREBBI n Israil, Cek d amsegged, minzi neccin d inni iqqimen nnejmen am [teǧa] ass-a. Aqa neccin s umarwas [i neǧa] zzat i wudem nnec, minzi uřa d ijjen war izemmar ad ibedd zzat i wudem nnec di ssibbet-a.”
EZR 10:1 Umi iẓẓuǧ Ɛizra ammu, inɛem, iru uca iwḍa [x ifadden] zzat i Taddart n AREBBI, aqa issmun-dd xas řɣaci d ameqqran aṭṭas n yeryazen d temɣarin d iḥenjiren n Israil, minzi řgens iru s imeṭṭawen imeqqranen.
EZR 10:2 [Xenni] Cakanya, mmis n Yaḥiyil, ijjen zeg ayt n Ɛilam, iṭṭef deg wawař, inna i Ɛizra: “Neccin aqa neɣdar AREBBI nneɣ uca neccin niwi timɣarin tibarraniyyin zi řegnus n temmurt, nessezdeɣ i-tent akidneɣ. Xenni řexxu, aqa din [ɛad] řayas i Israil di man aya.
EZR 10:3 Ejj aneɣ ad negg ijj n řɛahd ak-d AREBBI ḥima ad naẓẓeř x marra timɣarin d min zzaysent dd-ixeřqen, ɛlaḥsab acawar n Sidi inu u n yinni ittarjijen i řumur n AREBBI, uca [xenni] ad ittwagg ɛlaḥsab Ccariɛa.
EZR 10:4 Kkar, minzi tamesřact[-a] aqa-tt x [weɛrur] nnec u neccin akidek nbedd. Iři d aryaz, egg [i-tt]!”
EZR 10:5 [Xenni] ikkar Ɛizra uca ijja imeqqranen n ikehhanen d Ilawiyyen d marra Israil ad jjaǧen ad ggen ɛlaḥsab awař-a uca nitni jjuǧen.
EZR 10:6 [Xenni] ikkar Ɛizra [iffeɣ] [zi] zzat i wudem n Taddart n AREBBI, yudef ɣar wexxam n Yuḥanan, mmis n Ilyasib. [Umi] yudef [dinni], war icci aɣrum war iswi aman, maɣar icḍen x řeɣdar n ayt n lmenfa.
EZR 10:7 Uca ggin ijj n ubarreḥ di Yahuda d Urcalim i marra ayt n lmenfa maḥend ad munen di Urcalim.
EZR 10:8 Qaɛ wenni war dd-yusin di [řmijar n] třata n wussan, am mammec [iǧa] deg ucawar n řḥukkam d iwessura, marra agřa nnes ad as ittwaḥarrem u netta simant nnes ad ittwammsebḍa x wegraw [n řgens] n ayt n lmenfa
EZR 10:9 Di třata n wussan nnjarwen marra iryazen n Yahuda d Binyamin di Urcalim. Tuɣa deg wass wiss ɛicrin n uyur wiss tesɛa. Marra řgens iqqim deg wazzay n Taddart n AREBBI, ttarjijen zi tmesřact[-a] uřa zeg wenẓar i dd-iwettan s waṭṭas.
EZR 10:10 Ikkar ukehhan Ɛizra, inna asen: “Kenniw teɣdarem u tiwyem timɣarin tibarraniyyin [zi řegnus] tesszedɣem tent akidwem [u ammu i] teggim tarnim deg umarwas n Israil.
EZR 10:11 Xenni řexxu, qadam SIDI, AREBBI n řejdud nwem, u ggem min ixs Netta uca mmsebḍam x řegnus n temmurt uřa x temɣarin tibarraniyyin.”
EZR 10:12 Marra agraw [n řgens] yarra-dd xas s jjhed: “Aqa-t x [weɛrur] nneɣ maḥend ad negg ɛlaḥsab awařen nnec!
EZR 10:13 Maca aqa [din] aṭṭas n iwdan u aqa d řweqt n wenẓar. War ɣarsen bu jjehd maḥend ad [qqimen] bedden barra uřa d man aya war iǧi d ict n řxedmet n ijj niɣ tnayen n wussan, minzi aṭṭas zzayneɣ ɛeddan di tmesřact-a.
EZR 10:14 Ejj ad bedden řḥukkam nneɣ di ṭṭweɛ n marra agraw [n řgens] uca ad dd-asen deg wussan ittwaggen marra inni di tneddam yiwyen ɣarsen timɣarin tibarraniyyin, sszedɣen tent di tudrin nsen, uca [jmiɛ akidsen] uřa d iwessura n kuř tandint d řquḍat nnes, ař xaneɣ ɣa ibeɛɛed řḥaduq n weɣḍab n AREBBI nneɣ.”
EZR 10:15 Mɣir Yunatan, mmis Ɛasa’il, d Yaḥazya, mmis n Tiqwa, tuɣa ttɛekksen x man aya u Macullam d Cabatay, Alawi, wcin asen afus.
EZR 10:16 [Maca] iryazen nni iɛeqben zi lmenfa ggin [t] ammu. [Xenni] ittwafarz ukehhan Ɛizra [d] yeryazen [inni] d izeǧifen x ibabaten n řaǧat n ibabaten nsen. Nitni marra ttwařaɣan s yisem nsen uca qqimen deg wass amezwaru n uyur wiss ɛecra, ḥima ad arzun di tmesřact[-a].
EZR 10:17 Deg wass amezwaru n uyur amezwaru kemmřen nitni [tarezzut] di marra iryazen nni iggin ad sszedɣen akidsen timɣarin tibarraniyyin.
EZR 10:18 Ittwaf belli inni zeg ayt n ikehhanen inni isszedɣen ɣar ixef nsen temɣarin tibarraniyyin, aqa aten zeg ayt n Yahucaɛ, mmis n Yuṣadaq, u zeg aytmas, Maɛasiya d Aliɛazar d Yarib d Jadalya.
EZR 10:19 Nitni wtin x ufus ad ssekken timɣarin nsen, u umi daysen amarwas, [ad awyen] ijjen zeg wuǧi i umarwas nsen.
EZR 10:20 Zeg iḥenjiren n Immir: Ḥanani d Zabadya.
EZR 10:21 Zeg iḥenjiren n Ḥarim: Maɛasiya, Iliya, Camɛiya, Yaḥiyil d Ɛuzziya.
EZR 10:22 Zeg iḥenjiren n Facḥur: Ilyuɛinay, Maɛasiya, Ismaɛil, Natanayil, Yuzabad d Alɛasa.
EZR 10:23 Zi Ilawiyyen: Juzabad, Cimɛi, Qalaya, [wa d Qaliṭa], d Fatḥya, Yahuda d Aliɛazar.
EZR 10:24 Zeg imedyazen: Alyasib. Zeg iɛessasen n tewwura: Callum, Ṭalam d Uri.
EZR 10:25 Zi Israil: zeg ayt n Farɛuc: Ramya, Jiziya, Malkiya, Miyamin, Aliɛazar, Malkiya d Banaya.
EZR 10:26 Zeg ayt n Ɛilam: Mattanya, Zakariyya, Yaḥiyil, Ɛabdi, Yarimut d Iliya.
EZR 10:27 Zeg ayt n Zattu: Ilyuɛinay, Ilyacib, Mattanya, Yarimut, Zabad d Ɛaziza.
EZR 10:28 Zeg ayt n Babay: Yuḥanan, Ḥananya, Zabbay d Ɛatlay.
EZR 10:29 Zeg ayt n Bani: Macullam, Mallux, Ɛadaya, Yacub, Ca’al d Yaramut.
EZR 10:30 Zeg ayt n Faḥat-Mu’ab: Ɛadna, Kalal, Banaya, Maɛasiya, Mattanya, Baṣaliyil, Binnuy d Manassa.
EZR 10:31 Zeg ayt n Ḥarim: Aliɛazar, Yacci-Yah, Malkiya, Camɛiya, Cimɛun,
EZR 10:32 Binyamin, Mallux d Camarya.
EZR 10:33 Zeg ayt n Ḥacum: Mattanay, Mattatta, Zabad, Ilifalaṭ, Yarimay, Manassa, Cimɛi.
EZR 10:34 Zeg ayt n Bani: Maɛaday, Ɛamram d Uwyil,
EZR 10:35 Banaya, Badya, Kaluhi,
EZR 10:36 Wanya, Marimut, Ilyacib,
EZR 10:37 Mattanya, Mattnay, Yaɛsu,
EZR 10:38 Bani, Binnuy, Cimɛi,
EZR 10:39 Calmaya, Natan, Ɛadaya,
EZR 10:40 Maknadbay, Cacay, Caray,
EZR 10:41 Ɛazaryil, Calamya, Camarya,
EZR 10:42 Callum, Amarya, Yusuf.
EZR 10:43 Zeg ayt n Nabu: Yaɛiyil, Mattitya, Zabad, Zabina, Yaddu, Yuwil d Banaya.
EZR 10:44 Marra ina tuɣa iwyen timɣarin tibarraniyyin uca ca zzaysen tuɣa ɣarsen timɣarin urwent-i-dd iḥenjiren. *
NEH 1:1 Awařen n Naḥamya, mmis n Ḥakalya. Imsar deg uyur n Kisluw, deg useggʷas wiss ɛicrin, umi d ayi tuɣa di řeqṣar di Cucan,
NEH 1:2 aqa yusa-dd Ḥanani, ijjen zeg aytma, [jmiɛ] ak-d ca n yeryazen zi Yahuda, uca sseqsiɣ ten x Wudayen nni innejmen, inni iqqimen zi tmeḥbast, u x Urcalim.
NEH 1:3 Nitni nnan ayi: “Inni iqqimen, inni din iqqimen di lɛamala zi tmeḥbast, aqa aten di řeɣben d ameqqran u di řefḍiḥet u řḥiḍ n Urcalim ittwarẓ u tiwwura nnes ttwasscemḍent.”
NEH 1:4 Umi sřiɣ awařen-a, imsar, aqa qqimeɣ [ɣar temmurt], ruɣ u ceḍneɣ ca n wussan, ẓummeɣ u ẓuǧeɣ zzat i wudem n AREBBI n ijenwan.
NEH 1:5 Nniɣ: “A SIDI, AREBBI n ijenwan, Cek d Arebbi d ameqqran issaggʷaden, wenni iṭṭfen di Řɛahd d tmexsiwt icewwaren di ṭṭweɛ n yinni Cek ittexsen u n yinni iṭṭfen di tweṣṣa nnec,
NEH 1:6 ejj ad yiři umezzuɣ nnec iften u tiṭṭawin nnec arzment, ḥima ad tesřed i tẓaǧit n umsexxar nnec nni ẓuǧeɣ ass-a zzat i wudem nnec, ass d ǧiřet, di ṭṭweɛ n ayt n Israil, imsexxaren nnec. Neɛmeɣ [ɛawed] s ddnub n ayt n Israil i zi xak xḍan. Necc d taddart n baba, aqa nexḍa [akidek].
NEH 1:7 Negga akidek s waṭṭas n řeɣdar u war neṭṭif ca di řumurat d tweṣṣa d lfarayiḍ i zi tumured i umsexxar nnec Musa.
NEH 1:8 Idar awař i tumured i umsexxar nnec Musa umi tennid: “Mařa kenniw d iɣeddaren, aqa ad kenniw sszeǧɛeɣ jar řegnus,
NEH 1:9 [maca mařa] tdewřem-dd ɣari, ad ṭṭfem di řumurat inu u ad tent teggem, waxxa din zzaywem inni x yuẓẓřen ɣar ṭṭarf aneggar n ujenna, Necc ad ten ssmuneɣ ssenni, ad ten awyeɣ ɣar wemcan i ixḍareɣ Necc ḥima ad dinni ssezdɣeɣ Isem inu.
NEH 1:10 Nitni [wah,] d imsexxaren nnec d řgens nnec nni tfekked s jjehd nnec ameqqran u s ufus nnec ijehden.
NEH 1:11 A, Sidi inu, ejj ad iften umezzuɣ nnec ɣar tẓaǧit n umsexxar nnec u ɣar tẓaǧit n imsexxaren nni ittexsen ad tteggʷeden zeg Yisem nnec. Ejj amsexxar nnec ad yaweḍ ass-a u ewc as arreḥmet zzat i wudem n weryaz-a.” Necc tuɣa ayi d awarrad n ujeǧid.
NEH 2:1 Deg uyur n Nisan, deg useggʷas wiss ɛicrin n ujeǧid Artaḥcasta, [umi] tuɣa din binu zzat i wudem nnes, imsar, aqa ksiɣ binu uca wciɣ t i ujeǧid. Ɛemmarṣ war nzemmeɣ zzat i wudem nnes.
NEH 2:2 [Xenni] inna ayi ujeǧid: “Mayemmi inzemm wudem nnec, u cek war teḥřiced ca? Aqa man aya war iǧi mɣir d ijj n řḥař n wuř ibarrcnen.” [Xenni] dewřeɣ nnxeřɛeɣ aṭṭas.
NEH 2:3 Nniɣ i ujeǧid: “Tudart i ujeǧid i řebda. Mammec war ittiři wudem inu inzemm, aqa tandint, amcan n imeḍřan n řejdud inu, d řxarbet d tewwura nnes tecca i-tent tmessi?”
NEH 2:4 Inna ayi ujeǧid: “Man [xenni] min tᵉttared cek?” [Xenni] ẓuǧeɣ i AREBBI n ijenwan
NEH 2:5 uca nniɣ i ujeǧid: “Mařa tusa as-dd i ujeǧid x řxaḍar u yufa amsexxar nnec arḍa zzat i wudem nnec, sekk ayi-dd xenni ɣar Yahuda, ɣar tendint n imeḍřan n řejdud inu, ḥima ad tt bniɣ ɛawed.”
NEH 2:6 [Xas uca] inna ayi ujeǧid, umi teqqim tjeǧidt x uɣezdis nnes: “Mecḥař i ɣa tekk twaḥit nnec u meřmi i dd ɣa tɛeqbed?” Umi d as nniɣ [řqedd n] ijj n řmijař, ittɣiř as man aya mliḥ i ujeǧid, uca issekk ayi [dinni].
NEH 2:7 Arniɣ nniɣ as i ujeǧid: “Mařa tusa as-dd i ujeǧid x řxaḍar, [xenni] ad ayi mmewcent tebratin i lwulat [n temmurt] x ujemmaḍ n iɣzar [n Lfuraṭ], maḥend ad ayi yarzmen tawwart maḥend ad awḍeɣ ɣar Yahuda,
NEH 2:8 uřa d ict n tebrat i Asaf, aɛessas n weftis n ujeǧid nni iǧan am jjennet, ḥima ad ayi yewc akeccuḍ ḥima ad [zzayes] negg tiḥenya i tzeqqa sennej i tewwura n řeqṣar nni [iǧan] zzat i Taddart, u i řḥiḍ n tendint, u i taddart mani ɣa zedɣeɣ.” Uca iwca ayi tent ujeǧid minzi afus aṣebḥan n AREBBI tuɣa t xafi.
NEH 2:9 [Xenni] iwḍeɣ ɣar lwulat [di temmurt] x ujemmaḍ n iɣzar [n Lfuraṭ] u wciɣ asen tibratin n ujeǧid. Ajeǧid issekk akidi uřa d imeqqranen n řɛeskar d imnayen n iysan.
NEH 2:10 [Umi] Sanballaṭ zi Ḥurun, d Tubiya, amsexxar Aɛammuni, sřin aya, tuɣa aya ɣarsen d ict n tmesřact d taɛeffant aṭṭas, aqa yusa-dd ijj bnadem ḥima ad yarzu řxar i ayt n Israil.
NEH 2:11 Ammu usiɣ-dd ɣar Urcalim uca dinni qqimeɣ třata n wussan.
NEH 2:12 [Xenni] kkareɣ di ǧiřet, necc d ca n yeryazen akidi, uca necc tuɣa war ssargbeɣ uřa d ijj n bnadem x min tuɣa d ayi igga SIDI deg wuř ḥima ad t ggeɣ i Urcalim, uca war kidi ksiɣ řmař mɣir řmař min xef i nyiɣ.
NEH 2:13 Ffɣeɣ s ǧiřet zi Tewwart n Teɣzurt ař udem n Tařa n Řhaycet u [ssenni] ɣar Tewwart n Řeɣbar. Necc xemmeɣ řeḥyuḍ ittwarẓin n Urcalim i zi tiwwura nnes tecca i-tent tmessi.
NEH 2:14 Necc nedheɣ [xenni] ɣar Tewwart n Tařa u ɣar Uyeřmam n ujeǧid, [maca] war [tuɣi] din ttasiɛ i řmař sadu inu ḥima ad arniɣ ɣar zzat.
NEH 2:15 [Xenni] geɛɛdeɣ s ǧiřet x tseǧya uca xemmeɣ řḥiḍ uca ɛeqbeɣ-dd, uca udfeɣ ɛawed ɣar Tewwart n Teɣzurt. [Ammu] i-dd-ɛeqbeɣ.
NEH 2:16 War ssinen imḍebbaren mani tuɣa ruḥeɣ d min tuɣa xseɣ ad ggeɣ. Maɣar ař din war ssargbeɣ uřa d ict n řḥajjet i Wudayen d ikehhanen d tarwa n taṣiřet d imḍebbaren uřa i inneɣni inni iqqimen i řxedmet.
NEH 2:17 [Xenni] nniɣ asen: “Kenniw tᵉttwařam řeɣben i di neǧa, aqa Urcalim tᵉttwaredeǧ u tiwwura nnes tecca i-tent tmessi. Asem-dd, ad nebna řḥiḍ n Urcalim, ḥima war nettwasseḥqar ɛad ktar.”
NEH 2:18 Necc ḥajiɣ asen mammec afus n SIDI inu tuɣa d aṣebḥan xafi uřa d awařen i d ayi inna ujeǧid. [Xenni] nnan: “Neccin ad nekkar ad nebna.” Uca nitni ssjehden ifassen nsen i [řxedmet-a] taṣebḥant
NEH 2:19 [Umi] sřin t Sanballaṭ, zi Ḥurun, d Ṭubiya, amsexxar zeg ayt n Ɛammun, d Weɛrab Jacam, ssthezzan zzayneɣ u sseḥqaren aneɣ. Nitni nnan: “Manawya min i da tᵉtteggem? Ma texsem ad tɣewwɣem x ujeǧid?”
NEH 2:20 Necc arriɣ-dd xasen, nniɣ asen: “AREBBI n ijenwan ad aneɣ iwc afus, u neccin, imsexxaren nnes, ad nekkar ad nebna. Kenniw [maca] war ɣarwem bu tesɣart uřa d řḥeqq niɣ řidaret di Urcalim.”
NEH 3:1 Arrays n ikehhanen, Ilyacib, ikkar, uřa d aytmas, ikehhanen, uca nitni ɛeddřen bnan Tawwart n Wuǧi, qeddsen tt uca ssbedden dayes tiwwura nnes. Nitni qeddsen uřa ticti ař Lburj n Mya u ař Lburj n Ḥananiyil.
NEH 3:2 Ɣar uɣezdis nnes bnan yeryazen n Ariḥa uca ɣar uɣezdis nnes ibna Zakkur, mmis n Imri.
NEH 3:3 Tawwart n Wesřem bnan tt ayt n Sana’a. Nitni arekkben tiḥenya n tzeqqa u ssbedden dayes tiwwura nnes ak-d zzekrunat nnes d iɛumad nnes i ubelleɛ.
NEH 3:4 X uɣezdis nsen ibna Marimut, mmis n Uri-Yah, mmis n Haqquṣ, u ɣar uɣezdis nsen tuɣa iɛeddeř Macullam, mmis n Baraxya, mmis n Macizabyil u ɣar uɣezdis nsen iɛeddeř Ṣaduq, mmis n Baɛna.
NEH 3:5 Ɣar uɣezdis nsen tuɣa ɛeddřen imezdaɣ n Taqquɛa, maca inni ɣar teǧa ṣṣulṭa jar asen war sseqwisen ca iri i řxedmet n SIDI nsen.
NEH 3:6 Iɛeddeř Yuyadaɛ, mmis n Fasiḥ, ak-d Macullam, mmis n Basudya, Tawwart Taqdimt. Nitni arekkben tiḥenya n tzeqqa u ssbedden dayes tiwwura nnes ak-d zzekrunat nnes d iɛumad nnes i ubelleɛ.
NEH 3:7 Ɣar uɣezdis nsen tuɣa iɛeddeř Malaṭya zi Jibɛun, d Yadun, Amiyarunuti, d yeryazen zi Jibɛun u zi Miṣfa ař mani tuɣa taddart n řkursi n lwali [n temmurt] aɣirin i iɣzar [n Lfuraṭ].
NEH 3:8 Ɣar uɣezdis nnes tuɣa iɛeddeř Ɛuzziyil, mmis n Ḥarhaya, ijjen zeg iḥeddaden n wureɣ, u ɣar uɣezdis nnes iɛeddeř Ḥananya, mmis n ijj zeg inni isswejden řeɛṭuř. Nitni jjin Urcalim ař řḥiḍ d miriw [am t tuɣa].
NEH 3:9 Ɣar uɣezdis nsen tuɣa iɛeddeř Rafaya, mmis n Ḥur, ameqqran x wezyen n udewwar n Urcalim.
NEH 3:10 Ɣar uɣezdis nsen tuɣa iɛeddeř Yadaɛa, mmis n Ḥarumaf, ajemmaḍ n taddart nnes. U ɣar uɣezdis nnes tuɣa iɛeddeř Ḥattuc, mmis n Ḥacabniya.
NEH 3:11 Malkiya, mmis n Ḥarim d Ḥaccub, mmis n Faḥat-Mu’ab ɛedřen tasɣart wiss tnayen uřa d Lburj n Tefqunt.
NEH 3:12 Ɣar uɣezdis nnes tuɣa iɛeddeř Callum, mmis n Luḥic, ameqqran x wezyen nneɣni n udewwar n Urcalim, netta d yessis.
NEH 3:13 Ḥanun d imezdaɣ n Zanuḥ ɛedřen Tawwart n Teɣzurt. Nitni arekkben tiḥenya u ssbedden dayes tiwwura nnes ak-d zzekrunat nnes d iɛumad nnes i ubelleɛ uca [ɛedřen ɛawed] ařef n iɣaǧen n řḥiḍ ař Tewwart n Řeɣbar.
NEH 3:14 Malkiya, mmis n Rakab, ameqqran n udewwar n Bayt-Karim, tuɣa iɛeddeř Tawwart n Řeɣbar. Netta yarekkeb tiḥenya u issbedd dayes tiwwura nnes ak-d zzekrunat nnes d iɛumad nnes i ubelleɛ.
NEH 3:15 Callum, mmis n Kulhuz, ameqqran n udewwar Miṣfa, tuɣa iɛeddeř Tawwart n Tařa. Ibna i-tt u nitni arekkben tiḥenya n tzeqqa uca ssbedden dayes tiwwura nnes ak-d zzekrunat nnes d iɛumad nnes i ubelleɛ. [Netta iɛdeř ɛawed] řḥiḍ zeg uyeřmam n Cilaḥ ɣar weḥwic n ujeǧid ař ddruj nni ihekkwan zi tendint n Dawud ɣar swadday.
NEH 3:16 Awarni as tuɣa iɛeddeř Naḥamya, mmis n Ɛazbuq, ameqqran n wezyen n udewwar n Bayt-Ṣur, ař ajemmaḍ i imeḍřan n Dawud u ař jjubb ittwaggen u ař Taddart n Ayt bu-teɣruḍt.
NEH 3:17 Awarni as tuɣa ɛeddřen Ilawiyyen. Raḥum, mmis n Bani, [u] ɣar uɣezdis nnes Ḥacabya, ameqqran n wezyen n udewwar n Qaɛila, deg udewwar nnes.
NEH 3:18 Awarni as tuɣa ɛeddřen aytmatsen, Baway, mmis n Ḥinadad, ameqqran x wezyen nneɣni n udewwar n Qaɛila.
NEH 3:19 Ɣar uɣezdis nnes tuɣa Ɛazir, mmis n Yecuɛa, ameqqran n Miṣfa, iɛeddeř ict n ṭṭarf nneɣni ajemmaḍ i tsawent ɣar [taddart n] řesnaḥ, ɣar mani idewwar [řḥiḍ].
NEH 3:20 Awarni as tuɣa Barux, mmis n Zabbay, iɛeddeř s cḍaret ijj n ṭṭarf nneɣni, zi mani ɣa idewwar [řḥiḍ] ař tewwart n taddart n Ilyacib, arrays n ikehhanen.
NEH 3:21 Awarni as tuɣa Marimut, mmis n Uriya, mmis n Haqquṣ, iɛeddeř ijj n ṭṭarf nneɣni, zi tewwart n taddart n Ilyacib ař aneggaru n taddart n Ilyacib.
NEH 3:22 Awarni as tuɣa ɛeddřen ikehhanen. Nitni d iryazen zeg udewwar [n L’Urdun].
NEH 3:23 Awarni asen tuɣa iɛeddeř Binyamin d Ḥaccub, ajemmaḍ i taddart nsen. Awarni asen tuɣa iɛeddeř Ɛazarya, mmis n Maɛasiya, mmis n Ɛananiya, zzat i taddart nnes.
NEH 3:24 Awarni as tuɣa Binnuy, mmis n Ḥinadad, iɛeddeř ijj n ṭṭarf nneɣni, zi taddart n Ɛazarya ař mani ɣa idewwar [řḥiḍ] ař taɣmart.
NEH 3:25 Falal, mmis n Uzay, [tuɣa iɛeddeř] ajemmaḍ mani ɣa idewwar [řḥiḍ] d [ujemmaḍ n] lburj yuɛřan wenni irefɛen x tzeddiɣt n sennej n ujeǧid, tenni ɣar zzat n řemraḥ n řeḥbes. Awarni as [tuɣa iɛeddeř] Fadaya, mmis n Farɛuc.
NEH 3:26 Imsexxaren n Zzawect Tameqqrant, inni tuɣa zeddɣen di Ɛufil, [tuɣa ɛeddřen] ajemmaḍ i Tewwart n Waman ɣar ccarq u [ɣar] lburj issewcen ɣar barra.
NEH 3:27 Awarni as tuɣa imezdaɣ n Taqquɛa ɛeddřen ijj n ṭṭarf nneɣni ajemmaḍ i lburj ameqqran issewcen ɣar barra ař řḥiḍ n Ɛufil.
NEH 3:28 Tuɣa ikehhanen ɛeddřen Tawwart n Iysan, kuř ijj ajemmaḍ i taddart nnes.
NEH 3:29 Awarni asen tuɣa iɛeddeř Ṣaduq, mmis n Immir, ajemmaḍ i taddart nnes. U awarni as tuɣa iɛeddeř Camɛiya, mmis n Cakanya, aɛessas n Tewwart n Ccarq.
NEH 3:30 Awarni as tuɣa Ḥananya, mmis n Calamya, d Ḥanun, mmis n Ṣalaf wiss setta, ɛeddřen ijj n ṭṭarf nneɣni. Awarni as tuɣa iɛeddeř Macullam, mmis n Baraxya, ajemmaḍ i texxamt nnes.
NEH 3:31 Awarni as tuɣa iɛeddeř Malkiya, mmis n ijj n wemziř n wureɣ, ař taddart n imsexxaren n Zzawect Tameqqrant d isebbaben, ajemmaḍ i Tewwart n Řeḥsab u ař axxam n sennej ɣar teɣmart.
NEH 3:32 Jar wexxam n sennej ɣar teɣmart d Tewwart n Wuǧi, tuɣa ɛeddřen imziřen n wureɣ d isebbaben.
NEH 3:33 Umi Sanballaṭ isřa, aqa nbenna řḥiḍ, imsar aqa ihaj, isɛar aṭṭas uca issbehdeř Udayen.
NEH 3:34 Tuɣa issawař jar aytmas d řɛeskar n Samarya, inna: “Min tteggen Wudayen-a iḍeɛfen? Ma ad ten nejj? Ma ad qedmmen tiɣarṣa? Ma ad [t] kemmřen deg ijj n wass? Ma ad ssekkaren [ɛawed] iẓra zi arwinat inni ittwacemḍen?”
NEH 3:35 [Tuɣa] Ṭubiya, zeg ayt n Ɛammun, akides, inna: “Ɛad mařa bnan t ɛawed, xmi ɣa iffeɣ ijj n wecɛeb [waha], xenni ad ihdem řḥiḍ nsen n weẓru.”
NEH 3:36 “Seř, a AREBBI nneɣ, mammec i nedweř nettwasseḥqar uca arr aseḥqar nsen x uzeǧif nsen uca sellem i-ten d takeccaḍt ɣar ict n temmurt n uḥebbes.
NEH 3:37 War sduriy řmuɛṣiyyet nsen u war ttejji ad ittwamḥa ddnub nsen zzat i wudem nnec, minzi nitni sɛaren Cek qibač i ibennayen.”
NEH 3:38 Nebna řḥiḍ, ařami idweř řḥiḍ iqqen ař azyen, minzi řgens igga uř nsen ad t ggen. *
NEH 4:1 Umi [maca] Sanballaṭ d Ṭubiya d Weɛraben d ayt n Ɛammun d Icdudiyyen sřan, aqa aɛdař n řeḥyuḍ n Urcalim ittraḥ ɣar zzat, tizzeyyin bdant ad qqnent, imsar, aqa xeyyqen aṭṭas.
NEH 4:2 Nitni marra ggin tameɛmuč maḥend ad dd-asen ad mmenɣen ak-d Urcalim, ad dinni ssekkaren řeḥweř.
NEH 4:3 Neccin [maca] nẓuǧ ɣar AREBBI nneɣ u di ssibbet nsen nessbedd ict n tɛessast xasen ass d ǧiřet.
NEH 4:4 [Xenni] inna Yahuda: “Jjhed n yinni yarebbun yuḥeř, maɣar din aṭṭas n řxarbet. War nzemmar x řebni n řḥiḍ.”
NEH 4:5 Iɣrimen nneɣ aqa nnan: “Nitni war tticin u war ttwiřin walu ař dd ɣa nas di řwesṭ nsen u ad ten neneɣ. [Ammu] i ɣa nessbedd řxedmet.
NEH 4:6 Řami dd-usin Wudayen, inni ɣarsen izeddɣen, nnan aneɣ ɛecra n twařawin: “Ittxeṣṣa kenniw ad ɣarneɣ dd-tɛeqbem!”,
NEH 4:7 ssbeddeɣ necc řgens awarni i řḥiḍ ɣar imucan iwaṭan u ɣar tseqqar ifruren, ɛlaḥsab řaǧat nsen, ak-d řesyuf nsen d iḥricen nsen d řeqwas nsen.
NEH 4:8 Xzareɣ, [xenni] kkareɣ, nniɣ i tarwa n taṣiřet u i imḍebbaren u i min iqqimen n řgens: “War zzaysen tteggʷedem ca! Sidi inu d ameqqran u issaggʷad. Fekkarem dayes, mmenɣem i aytmatwem, iḥenjiren nwem d tḥenjirin nwem d temɣarin nwem d tudrin nwem.”
NEH 4:9 Umi sřan řɛedyan nneɣ, aqa [neccin] nargeb xas u aqa AREBBI ibḍeř anway nsen, imsar xenni neccin marra idneɣ neɛqeb ɣar řḥiḍ, kuř ijj ɣar wemcan [nnes].
NEH 4:10 Zeg wass nni imsar, aqa azyen n imsexxaren inu tuɣa xeddmen u azyen nneɣni zzaysen ṭṭfen iḥricen d tseddariyin [n uɛeskari] d řeqwas d warruḍ n wuzzař, uca řḥukkam [bedden] awarni i kuř taddart n Yahuda.
NEH 4:11 Inni tuɣa ittbennan řḥiḍ uca yarebbun ddquřat uca ssarebbun tent, xeddmen s yijj n ufus u s [ufus] nneɣni ṭṭfen lansa.
NEH 4:12 [Marra] inni tuɣa ibennan aqa ɣarsen ssif iqqen x tejɛinna nnes am tuɣa ibenna. Wenni ittsuḍen deg uyicc n icarri, tuɣa-t akidi.
NEH 4:13 Nniɣ i tarwa n taṣiřet u i imḍebbaren u i min iqqimen n řgens: “Řxedmet temɣar u teyru. Neccin nettwabezzeɛ x řḥiḍ, ijjen iggʷej x wenneɣni.
NEH 4:14 Deg wemcan mani ɣa tesřem asuḍi deg uyicc n icarri, munem-dd dinni xaneɣ. AREBBI nneɣ ad immneɣ di ṭṭweɛ nneɣ.
NEH 4:15 Ammu i nexdem uca azyen zzaysen ṭṭfen iḥricen zi tuffut ař dd ɣa ffɣen itran.
NEH 4:16 Di řweqt nni nniɣ i řgens: “Kuř ijj ad issens daxeř di Urcalim ak-d umsexxar nnes uca ammu i ɣarneɣ i ɣa yiřin d iɛessasen di ǧiřet u deg wass [ad iřin i] řxedmet.”
NEH 4:17 Uřa d ijj zzayneɣ war ikkis arruḍ, war iǧi necc řa d aytma řa d imsexxaren inu uřa d yeryazen n tɛessast. Kuř ijj [iruḥ ɣar] waman ak-d lansa nnes.
NEH 5:1 Ikkar ijj n uɣuyyi imɣar n řgens u n temɣarin nsen, [cetcan nitni] x aytmatsent, Udayen.
NEH 5:2 Aqa din inni innan: “Iḥenjiren nneɣ d tḥenjirin nneɣ d neccin d aṭṭas. Ittxeṣṣa ad nseɣ imendi ḥima ad necc ad neddar.”
NEH 5:3 Inneɣni nnan: “Neccin narhen iyyaren nneɣ d imarjaɛen nneɣ n uḍiř d tudrin nneɣ d aḍman, ḥima ad nawi řḥebb [n yirden] deg [wussan n] řaẓ.”
NEH 5:4 [Inneɣni] nnan: “Neccin narḍeř nnuqart i ljizya i ujeǧid x iyyaren nneɣ u x imarjaɛen nneɣ n uḍiř.”
NEH 5:5 “Xenni řexxu, aysum nneɣ d aysum n aytmatneɣ, iḥenjiren nneɣ am iḥenjiren nsen, u xzar, iḥenjiren nneɣ d tḥenjirin nneɣ ittxeṣṣa aneɣ ad ten narr d isemɣan. Aqa din zi yessitneɣ tinni idewřen am tseɣmin, uca afus nneɣ war izemmar [ad igg ca] u iyyaren nneɣ d imarjaɛen nneɣ n uḍiř aqa deg ufus n inneɣni.”
NEH 5:6 Umi sřiɣ iɣuyyan nsen d wawařen-a, dewřeɣ xeyyqeɣ aṭṭas.
NEH 5:7 Necc xarrṣeɣ deg wuř inu u [xenni] cetciɣ x tarwa n taṣiřet u x imḍebbaren, nniɣ asen: “Kuř ijj zzaywem dayes řɛib umi igga amarwas deg umas.” Necc ggiɣ ijj n wegraw d ameqqran ḍidd nsen.
NEH 5:8 Necc nniɣ asen: “Neccin nesɣa aytmatneɣ, Udayen, inni tuɣa ittwazzenzen i řegnus, ɛlaḥsab tizemmar nneɣ. Ma texsem ad tezzenzem [ɛawed] tawmatwem u ttwammesɣen nitni zzayneɣ [ɛawed]?” Uca sseɣden war ufin min ɣa inin.
NEH 5:9 [Xas uca] nniɣ: “Min tᵉtteggem kenniw, war iǧi nican. Ma war ittxeṣṣi ad tuyurem zzat i AREBBI nneɣ s uweqqar zi ssibbet n useḥqar n řegnus, řɛedyan nneɣ?
NEH 5:10 Uřa d necc, aytma d imsexxaren inu, aqa narḍer asen nnuqart d imendi. Jjem aneɣ ad nesmeḥ maca deg umarwas-a.
NEH 5:11 Arrem asen ass-a iyyaren nsen, imarjaɛen nsen n uḍiř, řeɛraṣit nsen n zzitun d tudrin nsen uca semḥen asen di tasɣart wiss mya n nnuqart d imendi d binu n jdid d zzect nni i zzaysen tᵉttᵉttarem [ɛad].”
NEH 5:12 [Xas uca] nnan: “Ad asen t narr marra u war zzaysen t nᵉttettar [ɛad]. Neccin ad negg, am mammec tennid cek.” Uca řaɣiɣ i ikehhanen u jjiɣ ten ad jjaǧen, aqa nitni ad ggen ɛlaḥsab awař-a.
NEH 5:13 Xenni zzerzeɣ weḥsin n warruḍ inu, nniɣ: “Ammu i ɣa izzerz AREBBI kuř aryaz nni war iṭṭifen deg wawař-a, zi taddart nnes u zeg wagřa nnes, [wah,] iři ad t zzerzen ařami i ɣa ixwa.” Agraw [n řgens] marra inna: “Amin!” Nitni ssemɣaren SIDI d řgens i iggin ɛlaḥsab awař-a.
NEH 5:14 Uřa d necc d yaytma war necci ca macca n ijj n lwali zeg wass nni di i d ayi igga d lwali nsen di temmurt n Yahuda, zeg useggʷas wiss ɛicrin ař aseggʷas wiss tnayen u-třatin n ujeǧid Artaḥcasta, [teqqar] tenɛac n iseggʷusa.
NEH 5:15 Lwulat nni din iǧan qbeř i necc, tuɣa ggin ddqeř x řgens u tuɣa ksin zzayes aɣrum d binu u ɛawed arebɛin ciqlu n nnuqart. Uřa d imsexxaren nsen seǧḍen x řgens. Necc maca war ggiɣ aya zi tiggʷudi n AREBBI.
NEH 5:16 Aqa wciɣ jjehd inu i řxedmet ɣar řḥiḍ u neccin war nesɣi ca aḥwic u marra imsexxaren munen din x řxedmet.
NEH 5:17 Ɣar ṭṭabřa inu [qqimen] mya u-xemsin n yeryazen zeg Wudayen u zeg imḍebbaren uřa d inni i ɣarneɣ dd-yusin zi řegnus i d aneɣ dd-innḍen.
NEH 5:18 Min ittwasswejden ayi i yijj n wass, aqa d ijj n ufunas, setta n texsiwin ittwafarzen zeg wuǧi uřa d ijḍaḍ, u di kuř ɛecra n wussan ɛřam kuř binu s ufeyyeḍ. S marra aya war ttareɣ macca n lwali, maɣar tasexxart tessedqeř aṭṭas x řgens-a.
NEH 5:19 Idar ayi s řxar, [a] AREBBI inu, s marra min ggiɣ i řgens-a.
NEH 6:1 Umi xebbaren i Sanballaṭ d Ṭubiya d Weɛrab Jacam d řɛedyan nneɣni, aqa necc bniɣ řḥiḍ ɛawed u war tuɣi dayes teqqim tazzit [ɛad], aqa zeɛma necc tuɣa ayi ɛad war arekkbeɣ tiwwura, [xenni] imsar,
NEH 6:2 aqa Sanballaṭ d Jacam ssekken-dd ɣari [řexbar], nnan: “As-dd, ad nemmẓar di dcurat di řewḍa n Unu.” Nitni maca tuɣa nwan ad ggen taɛeffant akidi.
NEH 6:3 Necc ssekkeɣ ɣarsen ireqqasen ad inin: “Necc xeddmeɣ řexxu di řxedmet d tameqqrant, x uya war zemmareɣ ad dd-aseɣ. Mayemmi ɣa tbedd řxedmet-a mařa jjiɣ tt, hwiɣ-dd ɣarwem?”
NEH 6:4 Nitni ssekken ayi-dd tabrat-a arebɛa n twařawin u necc arriɣ-dd xasen [řebda] s webrid d ijjen.
NEH 6:5 [Xenni] issekk-dd ɣari Sanballaṭ řexbar-a i twařa wiss xemsa. Amsexxar nnes [tuɣa ɣares] ict n tebrat tarzmen s ufus nnes,
NEH 6:6 yura dayes: “Aqa idweř ittwassen jar řegnus u Jacmu iqqar: ‘Cek d Wudayen texsem ad tɣewwɣem. X uya tessbeddem řḥiḍ!’, u cek texsed ad tdewřed d ajeǧid nsen x řeḥsab awařen-a.”
NEH 6:7 Cek ɛawed tařeqmed inabiyyen, maḥend ad xak dd-barrḥen di Urcalim, ad inin: ‘Netta d ajeǧid di Yahuda!’ Awařen-a ad awḍen maca i ujeǧid. S uya as-dd řexxu, ad nemcawar.”
NEH 6:8 Necc [maca] ssekkeɣ as [tabrat] maḥend ad as iniɣ: “Timesřayin-a i tennid, war ǧint ca d tidett, maca cek teggid tent deg wuř nnec.”
NEH 6:9 Minzi nitni marra xsen ad aneɣ ssiggʷden, nnan: “Nitni ad kksen ifassen nsen zi řxedmet, maḥend war tt tteggen.” Xenni řexxu, sejhed ifassen inu!
NEH 6:10 Necc udfeɣ ɣar taddart n Camɛiya, mmis n Dalaya, mmis n Mahiṭab’il. Netta tuɣa ibelleɛ x ixef nnes dinni, inna: “Ejj aneɣ ad nmun di Taddart n AREBBI, di řwesṭ n Zzawect, ad nbelleɛ tiwwura n Zzawect Tameqqrant, maɣar ad dd-asen nitni, ḥima ad cek nɣen, [wah,] ad dd-asen di ǧiřet ḥima ad cek nɣen.”
NEH 6:11 [Maca] necc nniɣ: “Ma necc d ijj n weryaz i tarewřa? Ma ijjen am necc ad yadef ɣar Zzawect Tameqqrant uca ad iqqim iddar? War tt ttadfeɣ.”
NEH 6:12 [Minzi] argbeɣ u ẓriɣ, aqa war iǧi d AREBBI i tuɣa t-i-dd-issekken, maca netta issiweř ak-d nnubuwa-ya xafi, minzi Ṭubiya d Sanballaṭ tuɣa cran t.
NEH 6:13 Tuɣa cran t, maḥend ad ggʷedeɣ ad ggeɣ amenni uca ad xḍiɣ, maḥend ad ɣarsen yiři ca i zi dayi i ɣa ggen isem d aɛeffan, ḥima ad ayi ɛeyyaren.
NEH 6:14 [A] SIDI inu, idar i Ṭubiya d Sanballaṭ, min ggin, uřa d tanabit Nuɛadya d inabiyyen nneɣni inni tuɣa yarezzun ad ayi ssiggʷden.
NEH 6:15 Ittwakemmeř řḥiḍ awarni i tnayen u-xemsin n wussan, deg [wass] wiss xemsa u-ɛicrin n [uyur n] Ilul.
NEH 6:16 Umi sřin marra řɛedyan nneɣ man aya, uca uřa d marra řegnus i d aneɣ dd-innḍen ẓrin t, dewřen nitni d imuqřiřen di tiṭṭawin n yixef nsen, ucin aqa d AREBBI i tuɣa iggin řxedmet-a.
NEH 6:17 Deg wussan nni urin tarwa n taṣiřet n Yahuda aṭṭas n tebratin, sekken tent i Ṭubiya uca aqa din uřa d tinni iffɣen zi Ṭubiya ɣarsen.
NEH 6:18 Maɣar aṭṭas di Yahuda tuɣa jjuǧen as, maɣar netta tuɣa d aḍeggʷař n Caxanya, mmis n Araḥ, u mmis [nnes] Yuḥanan tuɣa yiwi yeǧis n Macullam, mmis n Baraxya, d tamɣart.
NEH 6:19 Ɛawed ssiwřen zzat i wudem inu x tmegga nnes tiṣebḥanin u ssiwḍen awařen inu ɣares. U Ṭubiya tuɣa i d ayi dd-issekkan tibratin ḥima ad ayi issiggʷed.
NEH 7:1 Umi ittwassbedd řḥiḍ ɛawed u ggiɣ tiwwura ad ttwarekkbent, aqa řeqqmeɣ iɛessasen n tewwura d imedyazen d Ilawiyyen.
NEH 7:2 Necc umureɣ i uma Ḥanani u i Ḥananya, ameqqran n lqelɛa di Urcalim, minzi netta d ijj n weryaz d amtiqqi, itteggʷed AREBBI ktar x waṭṭas [inneɣni].
NEH 7:3 Necc nniɣ asen: “War ttnurziment tewwura n Urcalim ař ɣa tezweɣ tfuct uca jjem ad bellɛen tiwwura u ad arren izekrunen umi nitni bedden ɛad [i tɛessast]. Ittxeṣṣa ad ggen iɛessasen zeg imezdaɣ n Urcalim, kuř ijj deg wemcan n tɛessast nnes u kuř ijj qibač i taddart nnes.
NEH 7:4 Tuɣa tandint tennejbed u temɣar, [maca] tuɣa dayes řgens drus u tudrin tuɣa war bnint [ɛad].
NEH 7:5 Igga AREBBI deg wuř inu ad řaɣiɣ i tarwa n taṣiřet d imḍebbaren ḥima ad yiři ijj n uzemmem n [řgens] uca ufiɣ lista n jjadira n yinni dd-igeɛɛden d amezwaru, ufiɣ yura dayes [man aya]:
NEH 7:6 “Aqa d ina d ayt n lɛamala nni dd-igeɛɛden zi tmeḥbast - imenfiyyen nni dd-iwyi Nabuxadnaṣṣar, ajeǧid n Babil, di lmenfa - uca ɛeqben ɣar Urcalim d Yahuda, kuř ijj ɣar tendint nnes,
NEH 7:7 inni dd-yusin ak-d Zarubbabil, Yahucaɛ, Naḥamya, Ɛazarya, Raɛamya, Naḥamani, Murdaxay, Bilcan, Misfarat, Biɣway, Naḥum d Baɛna. Wa d řqedd n yeryazen n řgens n Israil.
NEH 7:8 Ayt n Farɛuc: ařfayen u-mya u-tnayen u-sebɛin [n yeryazen].
NEH 7:9 Ayt n Cafaṭya: teřt-mya u-tnayen u-sebɛin [n yeryazen].
NEH 7:10 Ayt n Araḥ: setta-mya u-tnayen u-xemsin [n yeryazen].
NEH 7:11 Ayt n Fahat-Mu’ab, zeg ayt n Yecuɛa d Yuwab: ařfayen u-tmenya-mya u-tmenya-ɛecra [n yeryazen].
NEH 7:12 Ayt n Ɛilam: ařef u-mitayn u-arebɛa u-xemsin [n yeryazen].
NEH 7:13 Ayt n Zattu: temn-mya u-xemsa u-rebɛin [n yeryazen].
NEH 7:14 Ayt n Zakkay: sebɛa-mya u-settin [n yeryazen].
NEH 7:15 Ayt n Binnay: setta-mya u-tmenya u-rebɛin [n yeryazen].
NEH 7:16 Ayt n Babay: setta-mya u-tmenya u-ɛicrin [n yeryazen].
NEH 7:17 Ayt n Ɛarjad: ařfayen u-ṭert-mya u-tnayen u-ɛicrin [n yeryazen].
NEH 7:18 Ayt n Aduniqam: setta-mya u-sebɛa u-settin [n yeryazen].
NEH 7:19 Ayt n Biɣway: ařfayen u-sebɛa u-settin [n yeryazen].
NEH 7:20 Ayt n Ɛadin: setta-mya u-xemsa u-xemsin [n yeryazen].
NEH 7:21 Ayt n Aṭir zi Ḥizqiya: tmenya u-tesɛin [n yeryazen].
NEH 7:22 Ayt n Ḥacum: teřt-mya u-tmenya u-ɛicrin [n yeryazen].
NEH 7:23 Ayt n Biṣay: teřt-mya u-arebɛa u-ɛicrin [n yeryazen].
NEH 7:24 Ayt n Ḥarif: mya u-tenɛac [n yeryazen].
NEH 7:25 Ayt n Jibɛun: xemsa u-tesɛin [n yeryazen].
NEH 7:26 Iryazen n Bayt-Laḥm d Naṭufa: mya u-tmenya u-tmanyin [n yeryazen].
NEH 7:27 Iryazen n Ɛanatut: mya u-tmenya u-ɛicrin [n yeryazen].
NEH 7:28 Iryazen n Bayt-Ɛazmut: tnayen u-rebɛin [n yeryazen].
NEH 7:29 Iryazen n Qaryat-Yaɛarim, Kafira d Biɛrut: sebɛa-mya u-třata u-rebɛin [n yeryazen].
NEH 7:30 Iryazen n Rama d Jabaɛ: setta-mya u-waḥed u-ɛicrin [n yeryazen].
NEH 7:31 Iryazen n Mixmas: mya u-tnayen u-ɛicrin [n yeryazen].
NEH 7:32 Iryazen n Bayt-Il d Ɛay: mya u-třata u-ɛicrin [n yeryazen].
NEH 7:33 Iryazen n Nabu nneɣni: tnayen u-xemsin [n yeryazen].
NEH 7:34 Ayt n ijj n Ɛilam nneɣni, ařef u-mitayn u-arebɛa u-xemsin [n yeryazen].
NEH 7:35 Ayt n Ḥarim: teřt-mya u-ɛicrin [n yeryazen].
NEH 7:36 Ayt n Ariḥa: teřt-mya u-xemsa u-rebɛin [n yeryazen].
NEH 7:37 Ayt n Lud, Ḥadid d Unu: sebɛa-mya u-waḥed u-ɛicrin [n yeryazen].
NEH 7:38 Ayt n Sana’a: teřt-ařaf u-tesɛa-mya u-třatin [n yeryazen].
NEH 7:39 Ikehhanen. Ayt n Yadaɛya, zi taddart n Yecuɛa: tesɛa-mya u-třata u-sebɛin [n yeryazen].
NEH 7:40 Ayt n Immir: ařef u-tnayen u-xemsin [n yeryazen].
NEH 7:41 Ayt n Facḥur: ařef u-mitayn u-sebɛa u-rebɛin [n yeryazen].
NEH 7:42 Ayt n Ḥarim: ařef u-sbeɛṭac [n yeryazen].
NEH 7:43 Ilawiyyen. Ayt n Yecuɛa, ayt n Qadmiyil, zeg ayt n Huduwya: arebɛa u-sebɛin [n yeryazen].
NEH 7:44 Imedyazen. Ayt n Asaf: mya u-tmenya u-rebɛin [n yeryazen].
NEH 7:45 Ayt n iɛessasen n tewwura. Ayt n Callum, ayt n Aṭir, ayt n Ṭalmun, ayt n Ɛaqqub, ayt n Ḥaṭiṭa, ayt n Cubay, aqa aten [jmiɛ]: mya u-tmenya u-třatin [n yeryazen].
NEH 7:46 Imsexxaren n Zzawect Tameqqrant. Ayt n Ṣiḥa, ayt n Ḥasufa, ayt n Ṭabaɛut,
NEH 7:47 ayt n Qiruc, ayt n Ciɛa, ayt n Fadun,
NEH 7:48 ayt n Labana, ayt n Ḥajaba, ayt n Salmay,
NEH 7:49 ayt n Ḥanan, ayt n Jadil, ayt n Ḥajar,
NEH 7:50 ayt n Ra’aya, ayt n Raṣin, ayt n Naqquda,
NEH 7:51 ayt n Jazzam, ayt n Ɛazza, ayt n Fasiḥ,
NEH 7:52 ayt n Bisay, ayt n Maɛunim, ayt n Naficasim,
NEH 7:53 ayt n Baqbuq, ayt n Ḥaqufa, ayt n Ḥarḥur,
NEH 7:54 ayt n Baṣlit, ayt n Maḥida, ayt n Ḥarca,
NEH 7:55 ayt n Barqus, ayt n Sisara, ayt n Tamaḥ,
NEH 7:56 ayt n Naṣiḥ, ayt n Ḥaṭifa,
NEH 7:57 Ayt n imsexxaren n Suliman. Ayt n Suṭay, ayt n Sufarat, ayt n Farida,
NEH 7:58 ayt n Yaɛla, ayt n Darqun, ayt n Jiddil,
NEH 7:59 ayt n Cafaṭya, ayt n Ḥattil, ayt n Fuxarat-ha-Ḍabayim d ayt n Amun.
NEH 7:60 Marra imsexxaren n Zzawect Tameqqrant d ayt n imsexxaren n Suliman, aqa aten [jmiɛ] teřt-mya u-tnayen u-tesɛin [n yeryazen].
NEH 7:61 Ina d inni igeɛɛden zi Tal-Milḥ, Tal-Ḥarca, Karub, Addan d Immir, [maca] nitni war zemmaren ad ssecnen zi jjihet n taddart n řejdud nsen niɣ zi jjihet n zzariɛet nsen, aqa nitni [ffɣen] zi Israil:
NEH 7:62 ayt n Dalaya, ayt n Ṭubiya, ayt n Naqquda: setta-mya u-tnayen u-rebɛin [n yeryazen].
NEH 7:63 Uca zeg ikehhanen: ayt n Ḥabaya, ayt n Haqquṣ, ayt n Barzillay, [aqa zzaysen wenni] iwyen ict n temɣart zi yessis n Ujilɛadi Barzillay u ittwařaɣa s yisem nsen.
NEH 7:64 Nitni arzun x tewriqt n uzemmem nsen [di lista n jjadira], maca war tt ufin. S uyenni ttwassuffɣen nitni zi tukehhant.
NEH 7:65 Lwali ameqqran inna asen, war ttᵉtten zi tmesřayin iqeddsen qaɛ ař ɣa ikkar ijj n ukehhan ak-d Urim d Tummim.
NEH 7:66 Marra agraw [n řgens] [tuɣa di] tnayen u-rebɛin-ařef u-teřt-mya u-settin [n yeryazen],
NEH 7:67 nhřa isemɣan nsen d tiyya nsen, [maɣar] ina tuɣa aten marra sebɛa-ařaf u-teřt-mya u-sebɛa u-třatin, uca ɣarsen mitayen u-xemsa u-rebɛin n imedyazen d tmedyazin.
NEH 7:68 Iřeɣman nsen [tuɣa aten di] arebɛa-mya u-xemsa u-třatin [u] iɣyař nsen [tuɣa aten di] setta-ařaf u-sebɛa-mya u-ɛicrin.
NEH 7:69 Ca zeg izeǧifen x ibabaten [n řaǧat] wcin i řxedmet. Lwali ameqqran iwca i ssenduq n txubay [n řxedmet] ařef n draxmat n wureɣ d xemsin n ṭṭawyat i urucci d xemsa-mya u-třatin n tcamirat i ikehhanen.
NEH 7:70 Ca nneɣni zeg izeǧifen x ibabaten [n řaǧat] wcin i ssenduq n txubay i řxedmet ɛicrin-ařef n draxmat n wureɣ d ařfayen n minayat n nnuqart.
NEH 7:71 Uca min iqqimen zi řgens iwca ɛicrin-ařef n draxmat n wureɣ d ařfayen n minayat n nnuqart d sebɛa u-settin n tcamirat i ikehhanen.
NEH 7:72 Ikehhanen d Ilawiyyen d iɛessasen n tewwart d imedyazen d ca zi řgens d imsexxaren n Zzawect Tameqqrant uřa d marra Israil, [marra nitni] ggin ad zedɣen di tneddam nsen.
NEH 8:1 [Umi] ibda uyur wiss sebɛa uca tuɣa ayt n Israil di tneddam nsen, imun marra řgens am yijj n weryaz deg wazzay n Tewwart n Waman, nnan i Ɛizra, amseřmed n Ccariɛa, ad yawi adlis n Ccariɛa n Musa, tenni yumur SIDI i Israil.
NEH 8:2 Deg wass amezwaru n uyur wiss sebɛa yiwi-dd ukehhan Ɛizra Ccariɛa zzat i wudem n wegraw [n řgens] wenni [iǧan] zeg yeryazen d temɣarin d marra inni izemmaren ad as fehmem xmi i d as i ɣa sřen.
NEH 8:3 Netta iɣra zzayes ɣar wudem n wazzay [i iǧan] zzat i Tewwart n Waman, zi tuffut ař azyen n wass, i yeryazen d temɣarin d inni izemmaren ad as fehmem. Tuɣa imezzuɣen n marra řgens ɣar wedlis ittwannḍen n Ccariɛa.
NEH 8:4 Uca Ɛizra, amseřmad n idlisen, ibedd x ijj n ddruj n ukeccuḍ nni ggin nitni i uya, u x uɣezdis nnes afusi bedden Mattitya d Camaɛ d Ɛanaya d Uriya d Ḥilqiya d Maɛasiya u x uzeřmaḍ nnes [bedden] Fadaya d Micayil d Malkiya d Ḥacum d Ḥacbaddana, Zakariyya d Macullam.
NEH 8:5 Yarzem Ɛizra adlis zzat i tiṭṭawin n marra řgens, maɣar ibedd sennej i marra řgens uca umi t yarzem, ikkar-dd řgens marra.
NEH 8:6 Ɛizra issemɣar SIDI, AREBBI d ameqqran, uca řgens yarra-dd s ifassen nsen ɣar ujenna: “Amin, amin!” Uca nitni yuḍaren, bendqen i SIDI s uɣembub [nsen] ɣar temmurt.
NEH 8:7 Ssřemden Yecuɛa, Bani, Carabya, Yamin, Ɛaqqub, Cabbatay, Hudiya, Maɛasiya, Qaliṭa, Ɛazarya, Yuzabad, Ḥanan, Falaya d Ilawiyyen řgens di Ccariɛa u řgens [iqqim] deg wemcan nnes.
NEH 8:8 Ɣrin nitni zeg wedlis ittwannḍen, zi Ccariɛa n AREBBI, carrḥen u ssecnen řmeɛna i daysen uca ammu i ssfehmen min ittwaɣrin.
NEH 8:9 Uca Naḥamya, wenni d lwali ameqqran, d ukehhan Ɛizra, amseřmad, d Ilawiyyen inni issřemden řgens, nnan i marra řgens: “Ass-a d amqeddes i SIDI, AREBBI nwem. War ccatem agejdur, war ttrum.” Minzi marra řgens tuɣa iru umi sřan awařen n Ccariɛa.
NEH 8:10 Inna asen [ɛawed]: “Uyurem u teccem [macca isswejden] s waṭṭas n zzect, sswem binu amiẓid uca wcem macca i wenni war d as sswejden walu, maɣar ass-a d ijj n wass d amqeddes i Siditneɣ. War sḥissifem, maɣar řefraḥet n SIDI d lqelɛa nwem.
NEH 8:11 Ilawiyyen ssfewwjen marra řgens, nnan: “Sqarem, maɣar ass-a d amqeddes [i iǧa]. War sḥissifem ca!”
NEH 8:12 [Xenni] yuyur marra řgens ḥima ad ccen ad swen u ad ṣedqen u ḥima ad farḥen s waṭṭas, minzi nitni fehmen i wawařen i d asen ittwannan.
NEH 8:13 Tiwecca nnes munen izeǧifen x ibabaten [n řaǧat] n marra řgens d ikehhanen d Ilawiyyen ɣar Ɛizra, amseřmad n idlisen, ḥima ad arzun řefhamet deg wawařen n Ccariɛa.
NEH 8:14 Nitni ufin belli tura di Ccariɛa, aqa SIDI yumur s tsexxart n Musa, ittxeṣṣa i ayt n Israil ad zedɣen deg iɛuccuten di Řɛid deg uyur wiss sebɛa,
NEH 8:15 u ittxeṣṣa asen ad zzayes barrḥen uca ad sseɛdun ijj n uřaɣi di marra tineddam nsen uřa di Urcalim ḥima ad inin: “Fɣem ɣar idurar u awyem-dd ifetwan n tcejjura n zzitun d ifetwan n izemmuren d ifetwan n tariḥant d ifetwan n tcejjart n tini d ifetwan n marra ticejjura ɣarsent tifray, maḥend ad zzaysen teggem iɛuccuten, am mammec [tt] tura.”
NEH 8:16 [Xenni] iffeɣ-dd řgens ɣar barra, iwyen-dd [ifetwan] uca ggin i yixef nsen iɛuccuten, kuř ijj x tzeqqa nnes u di řemraḥat nsen u di řemraḥat n Taddart n AREBBI u deg wazzay n Tewwart n Waman u deg wazzay n Tewwart n Ifrayim.
NEH 8:17 Marra agraw [n řgens] n yinni dd-iɛeqben zi tmeḥbast, ggin iɛuccuten u zeddɣen deg iɛuccuten minzi ayt n Israil war ggin aya zeg wussan n Yacuwa, mmis n Nun, ař ass-a uca řefraḥet tuɣa-tt d tameqqrant aṭṭas.
NEH 8:18 Ass iḍfar umas ittwaɣra [xasen] zeg wedlis ittwannḍen n Ccariɛa n AREBBI, zeg wass amezwaru ař ass aneggaru. Ammu i ɛeyyden řmijař n sebɛa n wussan u deg wass wiss tmenya [tuɣa din] ijj n umuni ifarzen am mammec i teǧa di lfariḍa.
NEH 9:1 Deg wass wiss arebɛa u-ɛicrin n uyur-a munen ayt n Israil s uẓummi u [řeḥḥfen] deg warruḍ n txuncay [n wecḍan] u s tɛejjajt [x uzeǧif].
NEH 9:2 Bḍan zzariɛet n Israil ixef nsen zi marra ibarraniyyen, uca am qqimen kkaren, neɛmen zi ddnub nsen d řmuɛṣiyyet n řejdud nsen.
NEH 9:3 [Xas uca] dewřen bedden deg wemcan nsen [ɛawed] uca ɣrin asen ict n terbaɛt n wass zeg wedlis ittwannḍen n Ccariɛa n SIDI, AREBBI nsen, uca ict n terbaɛt nneɣni neɛmen nitni [s ddnub nsen] uca sejden i SIDI, AREBBI nsen.
NEH 9:4 X ddruj n Ilawiyyen ibedd Yecuɛa d Bani, Qadmiyil, Cabanya, Bunni, Carabya, Bani d Kanani, řaɣan s tmijja ijehden ɣar SIDI, AREBBI nsen.
NEH 9:5 Uca Ilawiyyen, Yecuɛa, Qadmiyil, Bani, Ḥacabniya, Carabya, Hudiya, Cabanya [d] Fataḥya, nnan: “Kkarem, tbarkem SIDI, AREBBI nwem, zi řebda ař řebda! Iři ad ittwabarek Isem n uɛuǧi nnec, wenni yuɛřan x marra lbaraka d usemɣar!”
NEH 9:6 “Cek d SIDI, mɣir Cek. Cek teggid ajenna uřa d ajenna n ijenwan d marra tizemmar nsen, tammurt d marra min xas [iǧan], řebḥur d marra min dayes [iǧan] u Cek tewcid asen tudart uca řɛeskarat n ujenna ttbendaqent i Cek.
NEH 9:7 Cek d SIDI, AREBBI, wenni ifarzen Abram. Cek tessuffɣed t-i-dd zi Ur n Ikaldaniyyen uca teggid as Ibrahim.
NEH 9:8 Cek tufid uř nnes dayes řaman zzat i wudem nnec u teggid akides Řɛahd belli Cek ad tewced i zzariɛet nnes tammurt n ayt n Kenɛan, n Iḥittiyyen, n Imuriyyen, n Ifariziyyen, n Iyabusiyyen u n Ijirjasiyyen, uca teggid ɛlaḥsab awařen nnec, minzi Cek d amsegged i teǧid.
NEH 9:9 Cek teẓriḍ tamara n řejdud nneɣ di Miṣra u tesřid iɣuyyan nsen zi ɣar Řebḥar n Telga.
NEH 9:10 Cek teggid řeɛřamat d lmuɛjizat ɣar firɛun u ɣar marra imsexxaren nnes u jar řgens n temmurt, minzi Cek tessned, aqa nitni ggin ḍidd nsen s tuffet uca Cek teggid i yixef nnec ijj n Isem, am [teǧa] ass-a.
NEH 9:11 Cek tebḍid řebḥar zzat i wudem nsen ařami nitni ɛdun x [temmurt] yuẓɣen di řwesṭ n řebḥar, uca inni xasen ittaẓẓřen tenḍared ten di řaǧaɣ am yijj n weẓru deg waman ijehden.
NEH 9:12 Zeg ijj n uqellij n useynu tgewwded ten s wass u s yijj n uqellij n tmessi s ǧiřet, ḥima ad asen tewced tafawt x webrid i x i ɣa uyuren.
NEH 9:13 Cek tehwid-dd x wedrar n Sina u tessiwřed akidsen zeg ujenna uca tewcid asen lfarayiḍ iseggden d izerfan i di iǧa řaman d tweṣṣa d řumurat iṣebḥen.
NEH 9:14 Tessecned asen ssebt nnec iqeddsen uca teggid xasen řumurat d tweṣṣa d Ccariɛa s tsexxart n Musa, amsexxar nnec.
NEH 9:15 Cek tewcid asen aɣrum zeg ujenna i řaẓ nsen uca tessuffɣed asen-dd aman zi teṣḍart i ufadi nsen uca tennid asen ad adfen ɣar temmurt, tenni i tessgeɛɛded afus nnec [ḥima ad tejjaǧed] ad ten tt-i-dd-tewced, ḥima ad tt ṭṭfen d řwart.”
NEH 9:16 “Aqa nitni ak-d řejdud nneɣ ggin s tuffet d tɣennant u war sřin ca ɣar řumurat nnec.
NEH 9:17 Nitni ugin ad ɣares sřen, war fekkaren di lmuɛjizat nnec i ɣarsen teggid u nitni ɣennan u deg uɣewweɣ nsen ggin ijj d uzeǧif [x yixef nsen] ḥima ad ɛeqben ɣar tesmuɣi nsen. [Maca] Cek d ijj n Arebbi iɣeffaren, dayek řxaḍar d arreḥmet, ɣarek ttasiɛ n řxaḍar d tamexsiwt icewwaren s waṭṭas, u Cek war daysen tesmiḥed ca.
NEH 9:18 Ɛad, umi ggin nitni ijj n uɛejmi ifesyen i yixef nsen, nnan: ‘Wa d arebbi nnec i cek i dd-issuffɣen zi Miṣra’, uca ceqqfen aṭṭas,
NEH 9:19 aqa Cek di arreḥmet nnec tameqqrant war ten tejjid ca di řexřa. Aqellij n useynu [i iǧan] ḥima ad ten igewwed s wass, war xasen iggʷij ca, uřa d aqellij n tmessi [i iǧan] ḥima ad asen iwc tafawt deg webrid i x i ɣa uyuren, war xasen iggʷij ca s ǧiřet.
NEH 9:20 Cek tewcid Arruḥ nnec aṣebḥan, ḥima ad ten isseřmed, u Cek war d asen tekkised ca ‘manna’ nnek zeg uqemmum nsen uca tewcid asen aman i ufadi nsen.
NEH 9:21 Arebɛin n iseggʷusa cek tᵉtthellid daysen di řexřa. War ɣarsen ittxiṣṣa uřa d ca n řḥajjet, arruḍ nsen war yarci ca uca iḍaren nsen war uffen.
NEH 9:22 Cek tewcid asen marra tigeldiwin d řegnus uca tebḍid asen ten d tasɣart s ijj n weymir. Nitni ṭṭfen tammurt n Siḥun d řwart, aqa-tt d tammurt n ujeǧid n Ḥacbun, d temmurt n Ɛuj, ajeǧid n Bacan.
NEH 9:23 Cek tarrid iḥenjiren nsen aṭṭas am yitran deg ujenna u tessidfed ten ɣar temmurt i x tuɣa tennid i řejdud nsen, ad ɣares dd-adfen ḥima ad tt ṭṭfen d řwart.
NEH 9:24 Yudef ɣares warraw uca ṭṭfen tt d řwart u zzat i wudem nsen aqa teggid imezdaɣ n temmurt sadu afus nsen, uřa d ijeǧiden nsen d řegnus n temmurt, ḥima ad zzaysen ggen min i d asen ittɣiř mliḥ.
NEH 9:25 Nitni ḥewwsen tineddam ifaryen d ict n temmurt isseɣmayen u nitni ṭṭfen ɛawed tudrin d řwart ccurent s marra řxar, anuten ittwaɣzen, imarjaɛen n uḍiř d řeɛraṣit n zzitun d tcejjura n fruta s ufeyyeḍ, uca nitni ccin, jjiwnen, dewřen ṣeḥḥen uca arrin-dd meẓri s tcuni nnec tameqqrant.
NEH 9:26 [Maca nitni] dewřen war ṭṭiɛen uca ɣewwɣen xak uca nḍaren Ccariɛa nnec u nɣin inabiyyen nnec inni tuɣa icehhden jar asen maḥend ad ten dd-arren ɣarek. Aqa ceqqfen dayek s yijj n uceqqef imɣar.
NEH 9:27 S uya tarrid ten deg ufus n iɣrimen nsen inni i ten iḥṣaren, [maca] mařa řaɣan-dd xak di řweqt n řeḥṣaret nsen, [xenni] tesřid ɣarsen zeg ujenna uca di arreḥmet nnec tameqqrant tewcid asen imsenjamen nni i ten ifekken zeg ufus n iɣrimen nsen.
NEH 9:28 Mařa ufin řhudnet, ggin ɛawed řɣar zzat i wudem nnec uca teggid ten deg ufus n řɛedyan nsen uca nitni seǧḍen xasen. Umi tuben, řaɣan-dd xak, aqa tesřid asen zeg ujenna u [ammu i] tfekked i-ten s arreḥmet nnec aṭṭas n twařawin.
NEH 9:29 Cek tcehded ḍidd nsen ḥima ad dd-ɛeqben ɣar Ccariɛa nnec, maca nitni ggin s tuffet u war sřin ca ɣar tweṣṣa nnec. Aqa xḍan zi jjihet n lfarayiḍ nnec, umi bnadem wenni i zzaysen i ɣa yegg ad zzaysent iddar, uca nitni arrin-dd ɣarsen aɛrur, tuɣa ssqesḥen iri nsen, war ɣarek dd-sřin.
NEH 9:30 Aṭṭas n iseggʷusa tḥemmřed akidsen, tcehded ḍidd i nsen s Arruḥ nnec, s tsexxart n inabiyyen, maca nitni war sřin. [S uyenni] tewcid ten deg ufus n řegnus n temmura.
NEH 9:31 [Maca] di arreḥmet nnec tameqqrant war ten taredǧed ca u war daysen tesmiḥed ca, maɣar cek d ijj n Arebbi d aḥnin d arḥim.
NEH 9:32 “Xenni řexxu, AREBBI nneɣ, aqa Cek, Arebbi d ameqqran, izemmaren, issaggʷaden, wenni ittᵉṭṭfen di Řɛahd u di tmexsiwt icewwaren, war ḥesseb ca drus marra řeɣben i xaneɣ dd-ikkin, x ijeǧiden nneɣ, x řḥukkam nneɣ u x ikehhanen nneɣ u x inabiyyen nneɣ u x řejdud nneɣ u x marra řgens nneɣ zeg wussan n ijeǧiden n Accur ař ass-a.
NEH 9:33 [Tuɣa] Cek d amsegged di marra min xaneɣ ikkin, maɣar Cek teggid aneɣ s řaman, [maca] neccin negga s řeqjaḥet.
NEH 9:34 Ijeǧiden nneɣ, řḥukkam nneɣ, ikehhanen nneɣ d řejdud nneɣ war ḍeffaren Ccariɛa nnec uca war sřin ɣar řumurat nnec uřa ɣar cchadat nnec nni tcehded ḍidd i nsen.
NEH 9:35 S tgeldit nsen u s řxar nsen aṭṭas i d asen tewcid u s temmurt tameqqrant isseɣmayen i d asen tewcid, war Cek sexxaren ca uca war tuben zi tmegga nsen tiɛeffanin.
NEH 9:36 Xzar ass-a aqa neccin d imsemɣan u tammurt i tewcid i řejdud nneɣ maḥend ad zzayes necc řɣiǧet d řxar, xzar aqa neccin d imsemɣan i dayes [neǧa].
NEH 9:37 Řɣiǧet tameqqrant nnes [ad traḥ] ɣar ijeǧiden, inni i xaneɣ teggid di ssibbet n ddnub nneɣ, uca nitni ttṣeǧaḍen x arrayem nneɣ u x řmař nneɣ am mammec d asen ittɣiř mliḥ, u neccin aqa aneɣ di řeḥṣaret d tameqqrant.”
NEH 10:1 “X qaɛ man aya ad negg ijj n řɛahd imten uca ad t nzemmem di tira uca řḥukkam nneɣ, Ilawiyyen nneɣ d ikehhanen nneɣ ad xas ggen acemmiɛ.”
NEH 10:2 Inni xas iggin acemmiɛ d ina: Naḥamya, wenni d lwali ameqqran, mmis n Ḥakalya, d Ṣidqiya,
NEH 10:3 Saraya, Ɛazarya, Irmiya,
NEH 10:4 Facḥur, Amarya, Malkiya,
NEH 10:5 Ḥattuc, Cabanya, Mallux,
NEH 10:6 Ḥarim, Marimut, Ɛubadya,
NEH 10:7 Daniyal, Jinnitun, Barux,
NEH 10:8 Macullam, Abiya, Miyamin,
NEH 10:9 Maɛazya, Biljay d Camɛiya. Ina tuɣa aten d ikehhanen.
NEH 10:10 Uca Ilawiyyen: Yecuɛa, mmis n Azanya, d Binnay. Zeg ayt n Ḥinadad, Qadmiyil.
NEH 10:11 Uřa d aytmatsen: Cabanya, Hudiya, Qaliṭa, Qalaya, Ḥanan,
NEH 10:12 Mixa, Raḥub, Ḥacabya,
NEH 10:13 Zakkur, Carabya, Cabanya,
NEH 10:14 Hudiya, Bani d Baninu.
NEH 10:15 Izeǧifen n řgens: Farɛuc, Faḥat-Mu’ab, Ɛilam, Zattu, Bani,
NEH 10:16 Bunni, Ɛazjad, Bibay,
NEH 10:17 Aduniya, Biɣway, Ɛadin,
NEH 10:18 Aṭir, Ḥizqiya, Ɛazzur,
NEH 10:19 Hudiya, Ḥacum, Biṣay,
NEH 10:20 Ḥarif, Ɛanatut, Nibay,
NEH 10:21 Majfiɛac, Macullam, Ḥazir,
NEH 10:22 Macizabyil, Ṣaduq, Yadduɛ,
NEH 10:23 Falaṭya, Ḥanan, Ɛanaya,
NEH 10:24 Huciɛa, Ḥananya, Ḥacub,
NEH 10:25 Halluḥic, Filja, Cubiq,
NEH 10:26 Raḥum, Ḥacabna, Maɛasiya,
NEH 10:27 Axiya, Ḥanan, Ɛanan,
NEH 10:28 Mallux, Ḥarim d Baɛna.
NEH 10:29 Inni iqqimen zi řgens, ikehhanen, Ilawiyyen, iɛessasen n tewwura, imedyazen, imsexxaren n Zzawect Tameqqrant d marra inni d iɛezzřen ixef nsen x řegnus n temmura ɣar Ccariɛa n AREBBI, timɣarin nsen, iḥenjiren nsen d yessitsen, kuř ijj wenni ɣar teǧa tussna d řefhamet,
NEH 10:30 nitni [marra] řeṣqen ɣar aytmatsen, ayt n bu-ṣṣulṭa nsen, uca ccarcen di nneɛřet d tjaǧit maḥend ad ddaren ɛlaḥsab Ccariɛa n AREBBI, tenni immewcen x ufus n Musa, amsexxar n AREBBI, uca [mahend] ad ḥḍan marra řumurat n SIDI, Siditneɣ, uca ad ṭṭfen di lfarayiḍ nnes d tweṣṣa nnes.
NEH 10:31 [Ɛawed negga xaneɣ] maḥend war nettic yessitneɣ i řegnus n temmurt u war nettiwi yessitsen i iḥenjiren nneɣ [d tamɣart].
NEH 10:32 Uca mařa řegnus n temmurt usin-dd deg wass n ssebt, iwyen ṣṣeřɛet d ɛřam kuř imendi ḥima ad zzenzen aya, aqa neccin di ssebt niɣ deg ijj n wass iqeddsen nneɣni war xasen nettiwi walu. Uca [ammu ɛawed negga xaneɣ], aqa neccin ad nejj [tammurt] deg useggʷas wiss sebɛa u war nkessi arriba zeg uřa d yijjen.
NEH 10:33 Negga xaneɣ řumurat maḥend ad newc ict n ttuřut n ciqlu deg useggʷas i tsexxart n Taddart n AREBBI nneɣ,
NEH 10:34 i weɣrum n wescan u i tewhibt [n řɣiǧet] n řebda u i tɣarṣt n wecmaḍ n řebda deg wussan n ssebt u deg wussan n uyur n jdid, i řeɛyudat ittwaggen, i tmesřayin iqeddsen u i tɣarṣa n ddenb maḥend ad [zzaysent] ittwagg aṣřaḥ x Israil u x marra tasexxart n Taddart n AREBBI nneɣ.
NEH 10:35 Neccin, ikehhanen, Ilawiyyen d řgens, [am nᵉttwasettef] ɛlaḥsab řaǧat n ibabaten nneɣ, ggin taqedduḥt i tewhibt n ukeccuḍ tenni tuɣa ittxeṣṣa ad tᵉttwassidef ɣar Taddart n AREBBI nneɣ deg wussan ittwaggen, aseggʷas awarni i useggʷas, maḥend ad tᵉttwassecmeḍ x uɛalṭar n SIDI, AREBBI nneɣ, am mammec i tura di Ccariɛa.
NEH 10:36 Uca [negga xaneɣ ɛawed] maḥend ad nawi tamenzut n temmurt nneɣ d tmenzut n řɣiǧet n marra ticejjura ɣar Taddart n SIDI, aseggʷas x umas,
NEH 10:37 uřa d imenza n iḥenjiren nneɣ d řebhayem nneɣ am mammec i tura di Ccariɛa, uca ad nawi imenza n ifunasen nneɣ d wuǧi nneɣ di Taddart n AREBBI, ɣar ikehhanen nni ittsexxaren di Taddart n AREBBI.
NEH 10:38 Uca [negga xaneɣ ɛawed] maḥend ad nettawi tamezwarut [n min ittwaggen] zeg warecti nneɣ u zi tewhibin n usgeɛɛed nneɣ u zi fruta n marra ticejjura u zi binu n jdid d zzect ɣar ikehhanen deg ixxamen [i řexzen] n Taddart n AREBBI nneɣ, uřa d řeɛcur n temmurt nneɣ ɣar Ilawiyyen. Uca Ilawiyyen [simant nsen] ad ṭṭfen řeɛcur di marra tineddam mani tuɣa nxeddem neccin x temmurt,
NEH 10:39 uca ad yiři ukehhan, ijj n mmis n Harun, ɣar Ilawiyyen xmi ɣa ṭṭfenIlawiyyen řeɛcur. Uca Ilawiyyen [simant nsen] ad awyen ict n teɛcart n řeɛcur ɣar Taddart n AREBBI, ɣar ixxamen n taddart n txubay,
NEH 10:40 minzi ayt n Israil d ayt n Lawi ad awyen tawhibt n usgeɛɛed n řḥebb [n yirden], řa n binu n jdid uřa n zzect deg ixxamen [i řexzen]. Maɣar řeqcuɛ n Zzawect Iqeddsen aqa aten din, uřa d ikehhanen nni ittsexxaren d iɛessasen n tewwura d imedyazen. Ittxeṣṣa aneɣ war nsemmeḥ ca di Taddart n AREBBI nneɣ.
NEH 11:1 Řḥukkam n řgens qqimen zeddɣen di Urcalim, [umi] řgens iqqimen igga taqedduḥt maḥend ijj zi ɛecra ad izdeɣ di Urcalim, tandint iqeddsen, u tesɛa di tneddam nneɣni.
NEH 11:2 Ibarek řgens marra iryazen nni iqeddmen ixef nsen s řxaḍar maḥend ad zedɣen di Urcalim.
NEH 11:3 Ina d izeǧifen n lɛamala, inni tuɣa izeddɣen di Urcalim. Tuɣa zeddɣen [ayt n] Israil, ikehhanen d Ilawiyyen d imsexxaren n Zzawect Tameqqrant d ayt n isemɣan n Suliman di tneddam n Yahuda, kuř ijj deg wagřa nnes, di tneddam nsen.
NEH 11:4 Di Urcalim tuɣa zeddɣen ca zeg ayt n Yahuda u zeg ayt n Binyamin. Zeg ayt n Yahuda: Ɛataya, mmis n Ɛuzziya, mmis n Zakariyya, mmis n Amarya, mmis n Cafaṭya, mmis n Mahalal-Il, zeg ayt n Fariṣ,
NEH 11:5 uřa d Maɛasiya, mmis n Barux, mmis n Kulḥuza, mmis n Ḥazaya, mmis n Ɛadaya, mmis n Yuyarib, mmis n Zakariyya, mmis n Uciluni.
NEH 11:6 Marra ayt n Fariṣ inni izeddɣen di Urcalim, [aqa aten] arebɛa-mya u-tmenya u-settin n iɛeskariyyen.
NEH 11:7 Ina d ayt n Binyamin: Sallu, mmis n Macullam, mmis n Yuɛid, mmis n Fadaya, mmis n Qulaya, mmis n Maɛasiya, mmis n Itiyil, mmis n Icaɛya
NEH 11:8 u awarni as Jabbay, Sallay: tesɛa-mya u-tmenya u-ɛicrin [n yeryazen].
NEH 11:9 Tuɣa Yuwil, mmis n Zikri, d aweqqaf xasen u Yahuda, mmis n Hasnuwa tuɣa d [ameḥḍay] wiss tnayen x tendint.
NEH 11:10 Zeg ikehhanen: Yadaɛya, mmis n Yuyarib, Yakin,
NEH 11:11 Saraya, mmis n Ḥilqiya, mmis n Macullam, mmis n Ṣaduq, mmis n Marayut, mmis n Axiṭub, ameḥḍay n Taddart n AREBBI,
NEH 11:12 uca aytmatsen, inni ixeddmen di Taddart, [marra idsen] temn-mya u-tnayen u-ɛicrin [n yeryazen]. [Xenni] Ɛadaya, mmis n Yaruḥam, mmis n Falalya, mmis n Amṣi, mmis n Zakariyya, mmis n Facḥur, mmis n Malkiya,
NEH 11:13 d aytmas, izeǧifen n řaǧat, marra idsen mitayen u-tnayen u-rebɛin [n yeryazen]. [Xenni] Amcisay, mmis n Ɛazaryil, mmis n Axzay, mmis n Maclimut, mmis n Immir
NEH 11:14 d aytmatsen, ayt n bu-teɣruḍt imeḥḍen, marra idsen mya u-tmenya u-ɛicrin [n yeryazen]. Tuɣa Zabdiyil, mmis n Hajdulim, d aweqqaf xasen.
NEH 11:15 Zeg Ilawiyyen: Camɛiya, mmis n Ḥaccub, mmis n Ɛazriqam, mmis n Ḥacabya, mmis n Bunni.
NEH 11:16 Cabbatay d Yuzabad, aqa nitni bedden ak-d řxedmet di barra n Taddart n AREBBI. Nitni zeg izeǧifen n Ilawiyyen.
NEH 11:17 Uca [xenni] Mattanya, mmis n Mixa, mmis n Zabdi, mmis n Asaf, azeǧif i yarezmen taẓaǧit s ict n tẓaǧit n uqadi, d Baqbuqya wenni tuɣa d wiss tnayen zeg aytmas, u Ɛabda, mmis n Cammuɛa, mmis n Jalal, mmis n Yadatun.
NEH 11:18 Marra Ilawiyyen i iǧan di tendint iqeddsen, [marra idsen]: mitayen u-arebɛa u-tmanin.
NEH 11:19 Iɛessasen n tewwura: Ɛaqqub, Ṭalmun ak-d aytmatsen, inni iṭṭfen aḥeṭṭu di tewwura [n tendint], [marra idsen] mya u-tnayen u-sebɛin.
NEH 11:20 Inni iqqimen n ayt Israil, ikehhanen d Ilawiyyen, zedɣen di tneddam n Yahuda, kuř ijj di tesɣart nnes.
NEH 11:21 Imsexxaren n Zzawect Tameqqrant zedɣen di Ɛufil. Tuɣa Ṣiḥa d Jicfa x imsexxaren n Zzawect Tameqqrant.
NEH 11:22 Tuɣa Ɛuzzi, mmis n Bani, mmis n Ḥacabya, mmis n Mattanya, mmis n Mixa d aweqqaf n Ilawiyyen di Urcalim. Zeg ayt n Asaf tuɣa imedyazen x řxedmet di Taddart n AREBBI.
NEH 11:23 Maɣar tuɣa din xasen ict n tewṣeyyet n ujeǧid u x imedyazen [tuɣa din] ijj n weqqan, kuř ass ict n tewṣeyyet [i ittřiqen] i wass nni.
NEH 11:24 Tuɣa Faṭaḥya, mmis n Macizabyil, zeg ayt n Zaraḥ, mmis n Yahuda, d afus afusi n ujeǧid di marra min iřeqqfen řgens.
NEH 11:25 Di dcurat ɣar iyyaren nsen tuɣa din ca zeg ayt n Yahuda inni tuɣa izeddɣen di Qaryat-Arebɛa d tneddam i ɣares dd-iqqnen u di Dibbun d tneddam i ɣares dd-iqqnen u di Yaqabṣiyil d tneddam i ɣares dd-iqqnen
NEH 11:26 u di Yecuɛa u di Mulada u di Bayt-Falaṭ
NEH 11:27 u di Haṣar-Cuɛal u di Bi’r-Sebɛa d tneddam i ɣares dd-iqqnen,
NEH 11:28 u di Ṣiqlaɣ u di Makuna d tneddam i ɣares dd-iqqnen
NEH 11:29 u di Ɛayn-Rimmun u di Ṣarɛa u di Yarmut,
NEH 11:30 Zanuḥa, Adullam d tneddam i ɣares dd-iqqnen, Laxic d iyyaren nnes, Ɛaziqqa d tneddam i ɣares dd-iqqnen. Nitni wtin iqiḍan nsen zi Bi’r-Sebɛa ař taɣzurt n Hinnum.
NEH 11:31 Tuɣa ayt n Binyamin zeddɣen zi Jabaɛ di Mixmas d Ɛaya d Bayt-Il d tneddam i ɣarsen dd-iqqnen,
NEH 11:32 Ɛanatut, Nub, Ɛananya,
NEH 11:33 Haṣur, Rama, Jittayim,
NEH 11:34 Ḥadid, Ṣabuɛim, Naballaṭ,
NEH 11:35 Lud d Unu [d] Teɣzurt n Teɣzurt n Iḥrayfiyyen.
NEH 11:36 Zeg Ilawiyyen [zedɣen din] terbiḥin zi Yahuda ɣar Binyamin.
NEH 12:1 Ina d ikehhanen d Ilawiyyen inni dd-igeɛɛden ak-d Zarubabbil, mmis n Caɛaltiyil, d Yahucaɛ: Saraya, Irmiya, Ɛizra,
NEH 12:2 Amarya, Mallux, Ḥaṭṭuc,
NEH 12:3 Cakanya, Raḥum, Marimut,
NEH 12:4 Ɛiddu, Jinnituy, Abiya,
NEH 12:5 Miyamin, Maɛadya, Bilja,
NEH 12:6 Camɛiya, Yuyarib, Yadaɛya,
NEH 12:7 Sallu, Ɛamuq, Ḥilqiya d Yadɛaya. Ina d izeǧifen n ikehhanen d aytmas deg wussan n Yahucaɛ.
NEH 12:8 Uca Ilawiyyen [d ina]: Yecuɛa, Binnuy, Qadmiyil, Carabya, Yahuda d Mattanya, [wenni] iǧan x izřan n uqadi, [jmiɛ] ak-d aytmas.
NEH 12:9 Baqbuqya d Ɛunni, aytmatsen, tuɣa ḥeṭṭan arendad nsen.
NEH 12:10 Yecuɛa ijja-dd Yuyaqim, u Yuyaqim ijja-dd Ilyacib, u Ilyacib ijja-dd Yuyadaɛ,
NEH 12:11 u Yuyadaɛ ijja-dd Yunatan, u Yunatan ijja-dd Yadduɛ.
NEH 12:12 Deg wussan n Yuyaqim tuɣa d izeǧifen-a n [řaǧat n] ibabaten d ikehhanen: i [řaǧat n] Saraya: Maraya, i [řaǧat n] Irmiya: Ḥananya,
NEH 12:13 i [řaǧat n] Ɛizra: Macullam, i [řaǧat n] Amarya: Yuḥanan,
NEH 12:14 i [řaǧat n] Maliku: Yunatan, i [řaǧat n] Cabinya: Yusuf,
NEH 12:15 i [řaǧat n] Ḥarim: Ɛadna, i [řaǧat n] Marayut: Ḥilqay,
NEH 12:16 i [řaǧat n] Ɛiddu: Zakariyya, i [řaǧat n] Jinnitun: Macullam,
NEH 12:17 i [řaǧat n] Abiya: Zikri, i [řaǧat n] Minyamin d Muɛadya: Filṭay,
NEH 12:18 i [řaǧat n] Bilja: Cammuɛa, i [řaǧat n] Camɛiya: Yunatan,
NEH 12:19 i [řaǧat n] Yuyarib: Mattanay, i [řaǧat n] Ɛuzzi: Yadaɛya,
NEH 12:20 i [řaǧat n] Sallay: Qallay, i [řaǧat n] Ɛamuq: Ɛabir,
NEH 12:21 i [řaǧat n] Ḥilqiya: Ḥacabya u i [řaǧat n] Yadaɛya: Natanayil.
NEH 12:22 Deg wussan n Ilyasib, Yuyadaɛ, Yuḥanan d Yadduɛ, ttwazemmemen izeǧifen x ibabaten [n řaǧat] n Ilawiyyen uřa d ikehhanen ař tagelda n Dariyus, Afarsi.
NEH 12:23 Ttwazemmemen ayt n Lawi, izeǧifen x ibabaten [n řaǧat], deg wedlis n imezruyen ař ussan n Yuḥanan, mmis n Ilyacib.
NEH 12:24 Izeǧifen n Ilawiyyen tuɣa Ḥacabya, Carabya d Yecuɛa, mmis n Qadmiyil, u aytmatsen [bedden] ajemmaḍin nsen ḥima ad ssemɣaren u ad qadan, am mammec tuɣa teǧa tewṣeyyet n Dawud, aryaz n AREBBI. Ijj tuɣa iḥeṭṭan arendad n wenneɣni i tuɣa iḥeṭṭan.
NEH 12:25 Tuɣa Mattanya, Baqbuqya, Ɛubadya, Macullam, Ṭalmum d Ɛaqqub iɛessasen n tewwart inni iɛessen x ixxamen n řexzen n tewwura [n tendint].
NEH 12:26 Ina tuɣa aten deg wussan n Yuyaqim, mmis n Yahucaɛ mmis n Yuṣadaq, uřa deg wussan n Naḥamya, lwali, u n ukehhan Ɛizra, amseřmed n idlisen.
NEH 12:27 Ɣar udeccen n řḥiḍ n Urcalim arzun nitni x Ilawiyyen di marra imucan nsen maḥend ad ten awyen ɣar Urcalim ḥima nitni ad ssqefřen adeccen, ad ggen řefraḥet s uqadi u s yezřan, s teǧunin n wuzzař, s lharpat d řgambriyat.
NEH 12:28 Nitni ssmunen x ayt n imedyazen zeg udewwar n Urcalim u zi dcurat n Unaṭufati,
NEH 12:29 u zi Bayt-Jiljal uřa zeg iyyaren n Jiba d Ɛazmawet, minzi imedyazen bnan i yixef nsen dcurat i dd-innḍen i Urcalim.
NEH 12:30 Ssizedgen ikehhanen d Ilawiyyen ixef nsen uca awarni i uya ssizedgen nitni uřa d řgens d tewwura d řḥiḍ.
NEH 12:31 [Xenni] ggiɣ řḥukkam n Yahuda ad nyen x řḥiḍ u ssbeddeɣ tnayen n terbiɛin n uɣennej i uqadi. Tuyur ict [n terbiɛt] ɣar yefus sennej x řḥiḍ ɣar Tewwart n Řeɣbar.
NEH 12:32 Yareddef i-tt Hucaɛya s yijj n wezyen n řḥukkam n Yahuda,
NEH 12:33 Ɛazarya, Ɛizra, Macullam,
NEH 12:34 Yahuda, Binyamin, Camɛiya d Irmiya,
NEH 12:35 u zeg ayt n ikehhanen inni ɣarsen řebwaq: Zakariyya, mmis n Yunatan, mmis n Camɛiya, mmis n Mattanya, mmis n Mixa-Yah, mmis n Zakkur, mmis n Asaf,
NEH 12:36 d aytmas Camɛiya d Ɛazaryil, Milalay, Jilalay, Maɛay, Natanayil d Yahuda, Ḥanani ak-dduzan n řmusiqa n Dawud, aryaz n AREBBI, uca zzat i wudem nsen tuɣa iggur Ɛizra, amseřmed n idlisen.
NEH 12:37 Ɣar Tewwart n Tařa uca [xenni nican] qibač nsen nyen ddrujjat n tendint n Dawud mani dd-igeɛɛed řḥiḍ, ttekken x taddart n Dawud ař Tawwart n Waman, ɣar ccarq.
NEH 12:38 Tarbiḥt n uqadi wiss tnayen tuyur ɣar jjihet nneɣnit uca necc areddfeɣ tt ak-d wezyen [nneɣni] n řgens, [nekka] x řḥiḍ ɣar uɣezdis n Lburj n Tefqunt ař řḥiḍ amiriw,
NEH 12:39 uca xenni [nekka] x Tewwart n Ifrayim u x Tewwart Taqdimt u x Tewwart n Iseřman d Lburj n Ḥananiyil d Lburj n Mya ař Tawwart n Wuǧi uca nitni qqimen bedden ɣar Tewwart n Řeḥbes.
NEH 12:40 [Xenni] beddent tnayen n terbiḥin n uqadi di Taddart n AREBBI, uřa d necc ak-d wezyen n imḍebbaren akidi.
NEH 12:41 [Uřa] d ikehhanen Alyaqim, Maɛasiya, Minyamin, Mixa-Yah, Ilyuɛinay, Zakariyya, Ḥananya, inni ɣarsen řebwaq,
NEH 12:42 uca [xenni] Maɛasiya d Camɛiya d Aliɛazar d Ɛuzzi d Yuḥanan d Malkiya d Ɛilam d Ɛazar. Imedyazen ggin ad ttwasřen u tuɣa Yizraḥa d aweqqaf.
NEH 12:43 Deg wass nni wehhben nitni aṭṭas n tɣarṣa d timeqqranin. Marra farḥen, maɣar AREBBI igga asen ict n řefraḥet d tameqqrant. Farḥen uřa d timɣarin d iḥenjiren imeẓyanen ařami řefraḥet [n řɛid] n Urcalim tuɣa ttesřan as zi řaggʷaj.
NEH 12:44 Deg wussan nni ggin iryazen ad iřin x ixxamen [i iǧan] i txubay, i tewhibin n usgeɛɛed, i usuffuɣ tamezwarut [n ṣṣabet] u i řeɛcur, ḥima ad daysent yarwen tiseqqar i dd-ikkaren i ikehhanen d Ilawiyyen zeg iyyaren n tneddam ɛlaḥsab Ccariɛa, maɣar farḥen [ayt n] Yahuda zeg ikehhanen d Ilawiyyen nni i din ibedden
NEH 12:45 u ḥḍan x tsexxart n AREBBI nsen u x tsexxart n usizdeg, [jmiɛ] ak-d imedyazen d iɛessasen n tewwura, ɛlaḥsab tawṣeyyet n Dawud d mmis Suliman.
NEH 12:46 Maɣar zic, deg wussan n Dawud d Adaf, [tuɣa] din ijj n izeǧifen n imedyazen i izřan n uṣebbeḥ uřa i uqadi i AREBBI.
NEH 12:47 [S uya] iwca marra Israil di marra ussan n Zarubbabil u deg wussan n Naḥamya tiseqqar n imedyazen d iɛessasen n tewwura, kuř tasɣart n ijj n wass deg wass nnes, uca ssqeddsen tt i Ilawiyyen uca Ilawiyyen ssqeddsen tt i warraw n Harun.
NEH 13:1 Deg wass nni ɣrin deg imezzuɣen n řgens zeg wedlis n Musa uca ittwaf aqa tura dayes belli ijj n Uɛammuni d ijj n Umu’abiy ɛemmarṣ war zemmaren ad adfen ɣar wegraw [n řgens] n AREBBI i řebda,
NEH 13:2 maɣar nitni war ffiɣen ɣar ayt n Israil s weɣrum d waman, [maca] cran Bilɛam ḍidd nsen maḥend ad ten inɛeř uca [xenni] yarra AREBBI nneɣ nneɛřet d lbaraka.
NEH 13:3 Umi sřin Ccariɛa-aya, imsar, aqa bḍan x Israil marra inni ixeǧḍen zi taṣiřet.
NEH 13:4 Qbeř issewjed Ilyacib, akehhan, wenni tuɣa x ixxamen [i řexzen] n Taddart n AREBBI nneɣ, d wenni i itteɛnan i Ṭubiya,
NEH 13:5 ijj n wexxam d ameqqran i [Tubiya] mani tuɣa [xemmřen] qbeř tawhibt [n řɣiǧet], jjawi d řeqcuɛ, řeɛcur n řḥebb [n yirden], d binu n jdid d zzect nni ttwaggen i Ilawiyyen, i imedyazen u i iɛessasen n tewwura, uřa d tɣarṣt n usgeɛɛed n ikehhanen.
NEH 13:6 Di marra man aya war d ayi tuɣi ca di Urcalim, maɣar deg useggʷas wiss tnayen u-třatin n Artaḥcasta, ajeǧid n Babil, tuɣa ɛeqbeɣ ɣar ujeǧid. Awarni [ijj n řmijař n] wussan ttareɣ zeg ujeǧid ttesriḥ [maḥend ad dd-ɛeqbeɣ].
NEH 13:7 [Umi] iwḍeɣ ɣar Urcalim, iban-dd ayi řɣar nni igga Ilyacib di ṭṭweɛ n Ṭubiya umi d as issewjed ijj n wexxam di řemraḥat n Taddart n AREBBI.
NEH 13:8 Tuɣa aya d ict n tmesřact d taɛeffant aṭṭas di tiṭṭawin inu uca nḍareɣ marra řeqcuɛ n Ṭubiya zeg wexxam ɣar barra.
NEH 13:9 Nniɣ aqa ittxeṣṣa asen ad ssizedgen ixxamen. [Awarni as] arriɣ daysen řeqcuɛ n Taddart n AREBBI, uřa d tawhibt [n řɣiǧet] d jjawi.
NEH 13:10 Ttwassargbeɣ [ɛawed], aqa tiseqqar [i dd-ittasen] i Ilawiyyen war d asen mmewcent ařami Ilawiyyen d imedyazen nni iggin řxedmet, arewřen, kuř ijj ɣar yeyyar nnes.
NEH 13:11 Mmcubbceɣ ak-d imḍebbaren, nniɣ: “Mayemmi tᵉttwasmeḥ Taddart n AREBBI?” U necc ssmuneɣ ten uca arreɣ ten-i-dd deg wemcan nsen.
NEH 13:12 [Xenni] yiwi-dd marra Yahuda řeɛcur n řḥebb [n yirden] řa n binu n jdid uřa n zzect deg ixxamen n txubay.
NEH 13:13 Ggiɣ imeqqranen x ixxamen n txubay: akehhan Calamya d umarir Ṣaduq d Fadaya zeg Ilawiyyen uca ggiɣ asen ɣar uɣezdis Ḥanan, mmis n Zakkur, mmis n Mattanya, maɣar tuɣa ttwaḥesben d imtiqqan. Nitni xasen maḥend ad bḍan aya i aytmatsen.
NEH 13:14 Idar ayi i man aya, [a] AREBBI inu, u war tmeḥḥid tamexsiwt inu icewwaren nni ssecneɣ i Taddart n AREBBI inu u i tsexxart i dayes [iǧan].
NEH 13:15 Deg wussan nni ẓriɣ aqa din di Yahuda inni ittcuqan di tsirt deg [wass n] ssebt uřa d inni dd-iwyen icuwwafen n imendi, arbun ten x yeɣyař, uřa d binu, aḍiř, tazart d ɛřam kuř řeḥmuř nni iwyen deg wass n ssebt di Urcalim. Necc ɛeřmeɣ ten deg wass [nni] umi tuɣa zznuzan macca deg wass n ssebt.
NEH 13:16 Tuɣa ayt n Ṣur zeddɣen dinni, iwyen-dd iseřman d marra sseřɛet, zznuzan aya di ssebt i ayt n Yahuda u di Urcalim.
NEH 13:17 Ɛeyyareɣ tarwa n taṣiřet n Yahuda, nniɣ asen: “Man tuɛeffna i tᵉtteggem i zi tessɛiǧtem ass n ssebt!
NEH 13:18 Ma war ggin řejdud nwem amenni uca [xenni] ma war dd-issiweḍ AREBBI nneɣ marra řɣar-a xaneɣ u x tendint-a? U kenniw tarennim [ɛad] di řḥaduq [n weɣḍab nnes] x Israil umi tessɛiǧtem ssebt.”
NEH 13:19 Uca imsar xmi dd ɣa tewḍa taǧest di tewwura n Urcalim, qbeř ma ad dd-yaweḍ ssebt, aqa nniɣ ad ttwabellɛent tewwura uca arniɣ nniɣ ad tent arzmen awarni i ssebt waha. Uca ssbeddeɣ imsexxaren inu ɣar tewwura, maḥend war ssidifen uřa d ijj n řeḥmeř deg wass n ssebt.
NEH 13:20 Uca ammu issensen isebbaben d imzenzan n ɛřam kuř sseřɛet [ɛad] ict niɣ tnayen n twařawin barra zzat i [řeḥyuḍ n] Urcalim.
NEH 13:21 Uca cehdeɣ xasen, nniɣ asen: “Mayemmi tᵉttnusam kenniw x uɣezdis n řḥiḍ? Mařa kenniw teggim t twařa nneɣnit, ad xawem wteɣ afus.” Ssenni war dd-usin ɛad di ssebt.
NEH 13:22 Nniɣ [ɛawed] i Ilawiyyen ad ssizdegen ixef nsen, ad bedden d iɛessasen ɣar tewwura [n tendint], maḥend ad qeddsen ass n ssebt. Uřa i uya idar ayi, AREBBI inu, u ḥinn xafi ɛlaḥsab řemɣaret n tmexsiwt nnec icewwaren.
NEH 13:23 Deg wussan nni ẓriɣ ɛawed Udayen nni iwyen timɣarin n Acdud d Ɛammun d Mu’ab uca ssezdɣen tent ɣarsen.
NEH 13:24 Azyen n iḥenjiren nsen ssawařen s iřes n Acdud, war zemmaren ad ssiwřen iřes n Tyahudect, maca kuř ijj [tuɣa issawař] ɛlaḥsab iřes n kuř řgens.
NEH 13:25 Ɛeyyareɣ ten u neɛřeɣ ten u wtiɣ [ca n] yeryazen zzaysen, qeřɛeɣ acuwwaf nsen u jjiɣ ten ad jjaǧen ɣar AREBBI: “Ɣarwem ad tewcem tiḥenjirin nwem i iḥenjiren nsen u ɣarwem ad tawyem tiḥenjirin nsen i iḥenjiren nwem niɣ i ixef nwem [d tamɣart]!”
NEH 13:26 Ma war ixḍi Suliman, ajeǧid n Israil, di tmesřact-a? D man aya tuɣa umi war din iǧi d ajeǧid am netta jar waṭṭas n řegnus uca tuɣa ittexs i-t AREBBI u AREBBI igga i-t d ajeǧid x marra Israil? [Waxxa amenni] ɣarrent t temɣarin tibarraniyyin maḥend ad ixḍa uřa d netta.
NEH 13:27 Ma xenni ad ɣarwem nseř [ɛad ktar] umi tᵉtteggem marra řɣar-a ameqqran u tɣeddarem AREBBI uca tiwyem timɣarin tibarraniyyin maḥend ad kidwem zeddɣent?
NEH 13:28 Ijjen zeg iḥenjiren n Yuyadaɛ, mmis n Ilyacib, arrays n ikehhanen tuɣa d aḍeggʷař n Sanballaṭ zi Ḥurun. S uya uẓẓřeɣ xas zi ɣari
NEH 13:29 Idar asen, a AREBBI inu, minzi nitni ssxemjen tukehhant, [řxedmet n ikehhanen], d řɛahd n tukehhant u n Ilawiyyen.
NEH 13:30 U necc ssizedgeɣ ten zi marra min tuɣa d řɣib, uca areccḥeɣ aḥeṭṭu n ikehhanen u n Ilawiyyen, kuř ijj di tsexxart nnes.
NEH 13:31 [Ammu i ggiɣ] uřa i tewhibt n ukeccuḍ, di řweqt nnes ittwaggen, u i tmenzut [n ṣṣabet]. Idar ayi, [a] AREBBI inu, i řxar.
EST 1:1 Imsar deg wussan n Aḥacwiruc - netta d Aḥacwiruc wenni tuɣa iḥekkmen zi temmurt n Řhend ař tammurt n Kuc x mya u-sebɛa u-ɛicrin n lɛamalat -
EST 1:2 [wah,] deg wussan nni, umi iqqim ujeǧid Aḥacwiruc x řɛarc n tgeldit nnes di řeqṣar n Cucan,
EST 1:3 deg useggʷas wiss třata n řeḥkam nnes, [aqa] igga ict n zzardet i marra řḥukkam d imsexxaren nnes. Tuɣa [ikumandaren n] řɛeskar n [temmurt n] Lfurs d Maday uřa d tarwa n taṣiřet d řḥukkam n lɛamalat [ttmunan] zzat i wudem nnes,
EST 1:4 umi isscen agřa n uɛuǧi n tgeldit nnes d ccan d řemřaḥet n lɛaḍama nnes deg waṭṭas n wussan, aqa di mya u-tmanyin n wussan.
EST 1:5 [Umi] ɛdun wussan nni, [xenni] tuɣa issewjad ujeǧid ict n zzardet i marra řgens nni tuɣa [din] di lqelɛa n Cucan, zeg umeqqran ař ameẓyan, sebɛa n wussan, deg wazzay n weḥwic n řeqṣar n ujeǧid.
EST 1:6 Aqa din [arwaqat] d icemřařen d izizawen d idehmanen mmuden s ifiřan n řeqṭen azdad d [ufiřu] arjuwani ggin tent ɣar iqeḍban n nnuqart u ɣar ipilaren n řmarmur. Řemṭarbat n wureɣ d nnuqart [mmarsent] x tisi n zzellij dayes [aẓru] aziza am smaraxt d [weẓru] d acemřař d [weẓru] am tyaqut d [weẓru] d abarcan.
EST 1:7 Temmewc tsessi di řeqcuɛ n wureɣ u tuɣa marra řeqcuɛ mmsebḍan, ta war tarwis ta, u tuɣa [din] binu igellden s waṭṭas, anect i tuɣa izemmar ufus n ujeǧid [ad t iwc].
EST 1:8 Tuɣa swin ɛlaḥsab řumur, war iǧi s uɣiř, minzi ammu i iweṣṣa ujeǧid i marra imeqqranen n taddart nnes, maḥend ad ggen řxaḍar i marra.
EST 1:9 Tegga tjeǧidt Wacti uřa d ict n zzardet i temɣarin di taddart igellden n ujeǧid Aḥacwiruc.
EST 1:10 Deg wass wiss sebɛa, umi idweř wuř n ujeǧid ifarḥ s binu, inna i Mahuman, Bizta, Ḥarbuna, Biɣta d Abaɣta, Zitar d Karkas, aqa nitni d sebɛa n imsexxaren icennɛen i tuɣa isexxaren zzat i wudem n ujeǧid Aḥacwiruc,
EST 1:11 ḥima ad awyen tajeǧidt Wacti zzat i wudem n ujeǧid s ttaj igellden, maḥend ad isscen aẓri nnes i řegnus u i řḥukkam, minzi nettat tuɣa dayes aẓri.
EST 1:12 [Maca] tajeǧidt Wacti tugi ad dd-tas ɛlaḥsab awař n ujeǧid [nni d as dd-yusa] s ufus n imsexxaren icennɛen. Iffugem ujeǧid aṭṭas uca ikkar dayes wesɛar nnes.
EST 1:13 [Xenni] inna ujeǧid i imiɣisen inni ifehhmen řmijařat n řweqt - minzi ammu i tuɣa tᵉttwagg tmesřact n ujeǧid zzat i yinni issnen azerf u řeḥkam -
EST 1:14 [i] Karcana, Citar, Admata, Tarcic, Maras, Marsana d Mamukan, sebɛa n řḥukkam n Lfurs d Maday, [inni] d asen iɛeddeř maḥend ad ẓaren udem n ujeǧid u ksin imucan imezwura di tgeldit:
EST 1:15 “Min d aneɣ ittxeṣṣa ad negg ak-d tjeǧidt Wacti ɛlaḥsab řqanun, minzi nettat war teggi awař n ujeǧid Aḥacwiruc i dd-issekk s ufus n imsexxaren nnes icennɛen?”
EST 1:16 [Xenni] inna Mamukan zzat i wudem n ujeǧid d řḥukkam: “Tajeǧidt Wacti war teggi ca řɛib deg ujeǧid d řḥukkam waha, maca uřa di marra řḥukkam d marra řegnus di marra lɛamalat n ujeǧid Aḥacwiruc.
EST 1:17 Minzi min tegga tjeǧidt ad iffeɣ ɣar marra temɣarin uca ad yarr iryazen nsent ad ttwasseḥqaren jar tiṭṭawin nsent xmi qqarent: ‘Ajeǧid Aḥacwiruc inna ad ssekken ɣar tjeǧidt Wacti maḥend ad dd-tas zzat i wudem nnes, maca nettat war dd-tusi ca.’
EST 1:18 [Uřa] d timɣarin n řḥukkam n Lfurs d Maday, tinni isřan i temwarrit n tjeǧidt, ad inint aya ass-a i marra řḥukkam n ujeǧid uca ammu i din ɣa yiři useḥqar d uduqqez n weɣḍab aṭṭas.
EST 1:19 Mařa iɛjeb as řḥař i ujeǧid, ejj i-t [xenni] ad issuffeɣ ijj n řumur, ad t izemmem di řqawanin n ayt n Lfurs d Maday, maḥend war t ttɛeddan, u war ittejji ad dd-tas tajeǧidt Wacti [ɛad] zzat i wudem n ujeǧid Aḥacwiruc uca ejj ajeǧid ad iwc tagelda nnes i ḥed nneɣni, ad tiři ḥsen zzayes.
EST 1:20 [Xmi] i ɣa ittwaseř řumur n ujeǧid nni i ɣa yegg di marra tageldit nnes, [tenni] d tameqqrant, [xenni] ad dewřent marra timɣarin ad weqqarent iryazen nsent, zeg umeẓyan ař ameqqran.”
EST 1:21 Tuɣa awař-a d lemliḥ di tiṭṭawin n ujeǧid d řḥukkam uca igga ujeǧid ɛlaḥsab awař n Mamukan.
EST 1:22 Issekk tibratin ɣar marra lɛamalat n ujeǧid - i kuř lɛamala s tira nnes u i kuř řgens s yiřes nnes - ḥima kuř aryaz ad yiři d řḥakem x taddart nnes uca ad issiweř s yiřes n řgens nnes.
EST 2:1 Awarni man aya, umi yarsa wesɛar n ujeǧid, idweř ittxemmam deg Wacti d min tegga u di min xas ittwaggen n řeḥkam.
EST 2:2 [Xenni] nnan imsexxaren iḥuḍriyyen n ujeǧid i tuɣa i d as ittsexxaren: “Ejj ad arzun tibřiɣin i ujeǧid, tiɛezriyyin i di iǧa weẓri.
EST 2:3 Ejj ajeǧid ad igg iweqqafen x marra lɛamalat n tgeldit nnes, ad ssmunen marra tibřiɣin tiɛezřiyin nni di iǧa weẓri, ɣar lqelɛa n Cucan, ɣar taddart n temɣarin, sadu i tɛessast n Hijay, amsexxar amcenneɛ n ujeǧid wenni d aɛessas x temɣarin u ad asent wcen timesřayin i uthelli n weẓri.
EST 2:4 Tabřiɣt i ɣa iɛejben i ujeǧid ad tiři d tajeǧidt deg wemcan n Wacti.” Tuɣa awař-a d lemliḥ di tiṭṭawin n ujeǧid uca netta igga ammu.
EST 2:5 Tuɣa [din] ijj n weryaz d Uday di lqelɛa n Cucan, qqaren as Murdaxay, mmis n Ya’ir, mmis n Cimɛi, mmis n Kis, ijj n weryaz zeg [ayt n] Binyamin.
EST 2:6 Netta ittwandeh zi Urcalim ak-d ayt n lmenfa nni dd-iwyen ak-d Yakunya, ajeǧid n Yahuda, inni umi indeh Nabuxadnaṣṣar, ajeǧid n Babil, di lmenfa.
EST 2:7 D netta wenni tuɣa isseymen Hadassa, ixs ad yini Istir, yeǧis n ɛemmis, minzi war ɣares tuɣi [ɛad] babas niɣ yemmas. Nettat tuɣa d ict n tebřiɣt s ijj n waddud icuwwar u dayes aẓri. [Awarni umi] immut babas d yemmas, iksi tt Murdaxay, igga i-tt d yeǧis.
EST 2:8 Ařami ittwassen wawař n ujeǧid d řqanun nnes uca ttwassmunent aṭṭas n tebřiɣin di lqelɛa n Cucan sadu i tɛessast n Hijay, imsar belli sseɛdun Istir ɛawed ɣar taddart n ujeǧid, [tedweř] sadu tɛessast n Hijay, aɛessas n temɣarin.
EST 2:9 Teɛjeb as tabřiɣt u nettat tusa as-dd x řxaḍar di tiṭṭawin nnes. Netta iqeǧeq ḥima ad as iwc timesřayin i uthelli n weẓri d macca nnes, [u ḥima ad as iwc] uřa d sebɛa n temsexxarin timeẓyanin ittwaxḍaren zi taddart n ujeǧid, uca issmuṭṭiy i-tent ɣar wemcan icnan qaɛ di taddart n temɣarin.
EST 2:10 Istir war txebbar ca řgens nnes niɣ jjadira nnes, minzi Murdaxay iweṣṣa tt maḥend war t teqqar ca.
EST 2:11 Tuɣa Murdaxay iggur kuř ass zzat i řemřah i iǧan zzat i taddart n temɣarin maḥend ad issen mammec teǧa Istir d min d as ɣa imsaren.
EST 2:12 Tabřiɣt awarni tenneɣni tas as-dd nnubet ḥima ad tadef ɣar ujeǧid Aḥacwiruc, awarni tenɛac n uyuren [n uzeyyen] am mammec teǧa tewṣeyyet i temɣarin, minzi ammu i ttwakemmřen wussan n uthelli n weẓri: setta n uyuren s zzect n mirru d setta n iyuren s řeɛṭur ittfuḥen d fumadat i temɣarin.
EST 2:13 [Ammu] dd-tusa [kuř ict n] tebřiɣt ɣar ujeǧid: marra min tᵉttar, immewc as maḥend ad zzayes teffeɣ zi taddart n temɣarin ɣar taddart n ujeǧid.
EST 2:14 Ɣar tmeddit tudef ɣar daxeř u ɣar tuffut teɛqeb-dd ɣar taddart wiss tnayen n temɣarin sadu uḥeṭṭu n Caɛacɣaz, amsexxar amcenneɛ n ujeǧid, aɛessas n tiyya. War dd-teɛqeb ɣar ujeǧid, mɣir mařa teɛjeb as i ujeǧid uca tᵉttwařaɣa s yisem nnes.
EST 2:15 Řami dd-tiweḍ nnubet n Istir, yeǧis n Abiḥayil, ɛemmis n Murdaxay, wenni tt yarrin d yeǧis, war tᵉttar walu mɣir min inna Hijay, amsexxar amcenneɛ n ujeǧid, aɛessas n temɣarin. U Istir tusa-dd x řxaḍar i marra wi tt iẓrin.
EST 2:16 Ammu i iwyen Istir ɣar ujeǧid Aḥacwiruc, ɣar taddart nnes igellden, deg uyur wiss ɛecra, aqa-t d uyur n Ṭibit, deg useggʷas wiss sebɛa n tgelda nnes.
EST 2:17 Ajeǧid tuɣa ittexs Istir x marra timɣarin [nneɣni] uca nettat tufa arḍa d řeḥnunect zzat i wudem nnes ktar x marra tiɛzuray nneɣni. Issars ttaj igellden x uzeǧif nnes uca yarra i-tt d tajeǧidt deg wemcan n Wacti.
EST 2:18 Igga ujeǧid ict n zzardet tameqqrant i marra řḥukkam nnes d imsexxaren nnes, zzardet n Istir. Igga řehna di marra lɛamalat u iwca arriɣaluten ɛlaḥsab tizemmar n ujeǧid.
EST 2:19 Xmi ttwassmunent tiɛzuray ɛawed, iqqim Murdaxay ɣar tewwart n ujeǧid.
EST 2:20 Istir war txebbar ca i jjadira nnes niɣ i řgens nnes, am mammec d as yumur Murdaxay, minzi Istir tuɣa teggur ɛlaḥsab řumur n Murdaxay am mammec tuɣa tᵉttegg umi tuɣa ɣares tᵉttwarebba.
EST 2:21 Deg wussan nni, am iqqim Murdaxay di tewwart n ujeǧid, tuɣa Biɣtan d Tarac, tnayen n imsexxaren icennɛen n ujeǧid zeg iɛessasen n tewwart, ttfuggmen aṭṭas u tuɣa arezzun ad sswiẓẓḍen afus ɣar ujeǧid Aḥacwiruc.
EST 2:22 Tamesřact-a tedweř tᵉttwassen ɣar Murdaxay uca netta ixebbar [i-tt] i tjeǧidt Istir, uca Istir tenna man aya i ujeǧid s yisem n Murdaxay.
EST 2:23 Arzun di tmesřact nni uca ufin man aya d tidett. Uyřen ten s tnayen x teḥnact uca uran t deg wedlis n imezruyen zzat i wudem n ujeǧid.
EST 3:1 Awarni man aya ikkar ujeǧid Aḥacwiruc, igga ccan d ameqqran di Haman, mmis n Hammadata, Ajaji, uca issgeɛɛed i-t uca yarra řkursi nnes sennej i marra řḥukkam nni ɣares iǧan.
EST 3:2 Marra imsexxaren n ujeǧid nni tuɣa ɣar tewwart n ujeǧid, uḍaren, qewsen zzat i Haman, minzi ammu i [t] yumur ujeǧid. Maca Murdaxay war iwḍi x ifadden nnes u war ibendiq.
EST 3:3 Nnan imsexxaren n ujeǧid i iǧan di tewwart n ujeǧid i Murdaxay: “Mayemmi tɛeddid x řumur n ujeǧid?”
EST 3:4 Umi xas nnan aya zeg wass ɣar wass u netta war d asen isři ca, imsar aqa nitni xebbaren [aya] i Haman ḥima ad ẓaren ma ad qqimen bedden awařen n Murdaxay [i zi iwwet x yixef nnes], minzi issargeb i-ten belli aqa netta d Uday.
EST 3:5 [Řami] iẓra Haman belli Murdaxay war yiwḍi x ifadden nnes u war d as ibendiq, isɛar Haman s waṭṭas.
EST 3:6 [Maca] ittɣiř as aya d aseḥqar maḥend ad isswiẓẓeḍ afus nnes ɣar Murdaxay waha, minzi ssiwřen akides x řgens n Murdaxay. S uya yarezzu Haman ad ihellek marra Udayen nni [iǧan] di marra tageldit n Aḥacwiruc, řgens n Murdaxay.
EST 3:7 Deg uyur amezwaru, wenni d ayur n Nisan, deg useggʷas wiss tenɛac n ujeǧid Aḥacwiruc, ggin nitni ‘Pur’, ixs. ad yini ‘taqedduḥt’, zzat i wudem n Haman, i kuř ass u i kuř ayur, ař dd-iwḍa tqedduḥt x uyur wiss tenɛac, wenni d ayur n Adar.
EST 3:8 [Minzi] inna Haman i ujeǧid Aḥacwiruc: “Aqa din ijj n řgens imṭarrec u ittwabḍa jar řegnus di marra lɛamalat n tgeldit nnec. Izerfan nsen farrqen x marra řegnus u nitni war ṭṭifen ca deg izerfan n ujeǧid. S uyenni war d as iɛeddeř i ujeǧid ad ten yejj [ammu].
EST 3:9 Mařa tusa as-dd i ujeǧid s řxaḍar, [xenni] ad arin [ijj n řumur,] ḥima ad ten areddǧen, [xenni] necc ad ggeɣ ad sswezneɣ ijj n řqedd n ɛecra-ařaf talint n nnuqart, ad ggeɣ aya deg ifassen n yinni i ɣa iḥḍan řxedmet, maḥend ad t ssidfen deg ixxamen n txubay n ujeǧid.”
EST 3:10 Ikkes ujeǧid taxadent n ucemmiɛ i zi yareccem zeg [uḍaḍ n] ufus nnes uca iwca i-tt i Haman, mmis n Hammadata, Ajaji, řeɛdu n Wudayen.
EST 3:11 Inna ujeǧid i Haman: “Nnuqart jjiɣ ac tt, uřa d řgens, ḥima ad zzayes tegged min twarid d lemliḥ di tiṭṭawin nnec.”
EST 3:12 Deg uyur amezwaru, deg wass nnes wiss třeṭṭac, mřaɣan imariren n ujeǧid, uran marra ɛlaḥsab řumur n Haman i ijeǧiden [i iǧan] sadu ujeǧid u i lwulat nni [iǧan] x kuř lɛamala u i řḥukkam n kuř řgens. Nitni uran i kuř lɛamala s tira nnes u i kuř řgens s iřes nnes. Tuɣa [tabrat] tura s yisem n ujeǧid, u tᵉttwacemmeɛ s txadent n ucemmiɛ n ujeǧid.
EST 3:13 Ssekken tibratin ak-d ireqqasen n tazřa ɣar marra lɛamalat n ujeǧid, [ḥima] ad teḥḥan, ad nɣen u ad hellken marra Udayen, am umeẓyan am umeqqran, iḥenjiren imeẓyanen d temɣarin, deg wass d ijjen, deg wass wiss třeṭṭac n uyur wiss tenɛac, wenni d ayur n Adar, u [xenni] ad keccḍen marra min ɣarsen d takeccaḍt.
EST 3:14 Tuɣa ittxeṣṣa ad ssuffɣen min iǧan di tira am yijj n uzerf, zeg ict n lɛamala ař tenneɣni s bṭayṭay i marra řegnus, ḥima ad iřin ḥezzmen i uya deg wass nni.
EST 3:15 Ffɣen ireqqasen n tazřa, ttwacejjɛen s uzeyyar s wawař n ujeǧid, uca ittwassuffeɣ uzerf [ɛawed] di lqelɛa n Cucan. Tuɣa ajeǧid d Hamam qqimen sessen, maca tandint n Cucan tuɣa-tt tehweř.
EST 4:1 [Umi] yargeb Murdaxay x marra min ittwaggen, icarreg tcamir nnes, yarḍ ict n txancet [issuyes] iɣɣeḍ [x uzeǧif nnes] uca iẓwa di řwesṭ n tendint, tuɣa issɣuyyu ict n tɣuyyit tejhed tarzeg.
EST 4:2 Yiweḍ-dd ař tawwart n ujeǧid, minzi war iɛeddeř i uřa d ijj maḥend ad yadef ɣar tewwart n ujeǧid am yarḍ txancet [n wecḍan].
EST 4:3 Di kuř lɛamala d kuř tandint mani yiweḍ řumur n ujeǧid, iřqef Udayen ijj n wecḍan d ameqqran d uẓummi d imeṭṭawen d iɣuyyan, uca qqimen aṭṭas zzaysen ẓẓřen di txancet n wecḍan d yiɣɣeḍ.
EST 4:4 Timsexxarin timeẓyanin n Istir d imsexxaren nnes icennɛen usin-dd maḥend ad tt xebbaren s uya uca teḥzen tjeǧidt aṭṭas. Tessekk tcamirat i Murdaxay maḥend ad tent yarḍ, ad ikkes taxancet nnes [n wecḍan], maca netta war tent iqbiř.
EST 4:5 [Xenni] třaɣa Istir i Hatax, ijj zeg imsexxaren icennɛen n ujeǧid, wenni tuɣa i d as igga ujeǧid d amsexxar, uca tumur i-t x Murdaxay maḥend ad tessen min t yuɣin d mayemmi igga ammu.
EST 4:6 Iffeɣ Hattax ɣar Murdaxay, ɣar wazzay [i iǧan] zzat i tewwart n ujeǧid,
EST 4:7 uca Murdaxay iɛawed as marra min d as imsaren d cḥař n nnuqart i iwaɛed Haman ad t iwzen i ixxamen n txubay n ujeǧid di ṭṭweɛ n ureddeǧ n Wudayen.
EST 4:8 Netta iwca as ict n tiřemt n tira n uzerf i ittwassuffɣen di Cucan maḥend ad ten areddǧen, ḥima ad tt isscen i Istir u ad as yini u ad as yumur maḥend ad traḥ ɣar ujeǧid ad as tzawg u maḥend ad as tᵉttar zzat i wudem nnes di ṭṭweɛ n řgens nnes.
EST 4:9 Yudef Hatax uca iɛawed awařen n Murdaxay i Istir.
EST 4:10 Tessiweř Istir i Hatax uca tumur i-t [ad yini] i Murdaxay:
EST 4:11 “Marra imsexxaren n ujeǧid d marra řgens di lɛamalat n ujeǧid ssnen mliḥ belli marra wi ɣa yadfen ɣar ujeǧid deg wazzay n zzat, am war dd-ittwařaɣa, d aryaz niɣ d tamɣart [i iǧa], aqa [din] xas ijj n řeḥkam waha, d řmewt, mɣir mařa ajeǧid isswiẓẓeḍ as azeǧaḍ [nnes] n wureɣ, ḥima ad iqqim iddar. Třatin n wussan-a i iɛdun war xafi dd-iřaɣa ḥed maḥend ad dd-aseɣ ɣar ujeǧid.”
EST 4:12 Ɛawden nitni awařen n Istir i Murdaxay.
EST 4:13 [Xenni] inna Murdaxay, ad inin i Istir ɛawed: “War txemmam, aqa cem tzemmared ad tarewřed di taddart n ujeǧid, ktar x marra Wudayen nneɣni.
EST 4:14 Minzi mařa cem tesseɣded s tidett di řweqt-a, ad din tiři řefsaset d usellek i Wudayen zeg webrid nneɣni, maca cem d taddart n babam ad ttwareddǧen. Wi issnen ma teksid aweqqar igellden ɣar ict n řweqt am tanita?”
EST 4:15 [Xenni] inna Istir, ittxeṣṣa ad dd-arren x Murdaxay:
EST 4:16 “Uyur, smun marra Udayen i izeddɣen di Cucan uca ẓummem ayi i necc, war tᵉttem, war tsessem třata n wussan, ǧiřet d wass. Uřa d necc d temsexxarin inu timeẓyanin ad ẓumment ammu, uca xenni ad adfeɣ ɣar ujeǧid min war icuwwar ɛlaḥsab azerf. Mařa fniɣ, [xenni] fniɣ!”
EST 4:17 [Xenni] iffeɣ Murdaxay uca igga am mammec marra min x i d as tumur Istir.
EST 5:1 Deg wass wiss třata, imsar, aqa Istir tyarḍ arruḍ igellden uca truḥ tekkar deg wazzay n daxeř n taddart n ujeǧid, nican qibač i ujemmaḍ n taddart n ujeǧid. Tuɣa ajeǧid iqqim x řɛarc nnes di taddart igellden arendad n tewwart n taddart.
EST 5:2 [Umi] iẓra ujeǧid tajeǧidt Istir tbedd deg wazzay, imsar, aqa tufa arḍa di tiṭṭawin nnes, ařami isseřqa ujeǧid azeǧaḍ [nnes] n wureɣ i tuɣa ɣares deg ufus nnes i Istir uca tqarreb-dd Istir, tḥada tixeft n uzeǧaḍ.
EST 5:3 [Xenni] inna as ujeǧid: “Min cem yuɣin, [a] tajeǧidt Istir, niɣ min teɛna tutra nnem? Ad am temmewc, waxxa teǧa d azyen n tgeldit!”
EST 5:4 Tenna Istir: “Mařa tusa as-dd i ujeǧid s řxaḍar, aqa netta ad dd-yas ass-a ak-d Haman ɣar zzardet i d as sswejdeɣ.”
EST 5:5 [Xenni] inna ujeǧid: “Arrem Haman ad iqeǧeq ad igg am mammec tenna Istir.” [Řami] dd-yusa ujeǧid ak-d Haman ɣar zzardet nni i tessewjed Istir,
EST 5:6 inna ujeǧid i Istir umi swin binu: “Min dayem [iǧan] d meẓri? Ad am immewc. Min [iǧan] d tutra nnem? Ad ɣarem tiři waxxa d azyen n tgeldit.”
EST 5:7 [Xenni] tarra-dd xas Istir, tenna: “Wa d meẓri inu d tutra inu:
EST 5:8 Mařa [xenni] necc ufiɣ arḍa di tiṭṭawin n ujeǧid u mařa tusa as-dd i ujeǧid s řxaḍar ḥima ad issiweḍ meẓri inu d tutra inu, aqa ad dd-yas ujeǧid ak-d Haman ɣar zzardet inu nni d as i ɣa sswejdeɣ, [xenni] tiwecca ad ggeɣ ɛlaḥsab awař n ujeǧid.”
EST 5:9 Iffeɣ Haman deg wass nni, ifarḥ u tuɣa-t x řxadar nnes aṭṭas, maca umi iẓra Haman Murdaxay iqqim di tewwart n ujeǧid, war ikkar, war ɣares inhezz, [xenni] isɛar Haman s waṭṭas.
EST 5:10 Maca Haman itebbet simant nnes u [umi] yiweḍ ɣar taddart, ijja ad dd-asen imeddukkař nnes d Zarac, tamɣart nnes.
EST 5:11 Issiweř Haman akidsen x uɛuǧi n wagřa nnes u x iḥramen nnes i ɣares iǧan s waṭṭas u x marra min zi i d as icenneɛ ujeǧid u d mammec i-t issgeɛɛed sennej i řḥukkam d imsexxaren n ujeǧid.
EST 5:12 Ɛawed inna Haman: “Uřa d tajeǧidt Istir war tejji ḥed ad dd-yas ak-d ujeǧid ɣar zzardet i tessewjed, mɣir necc, uca aḥeqqa uřa d tiwecca ttwaɛarḍeɣ [jmiɛ] ak-d ujeǧid.
EST 5:13 Maca man aya marra war d ayi icqi min ɣa kkeɣ ttwařiɣ Murdaxay, Uday, iqqim di tewwart n ujeǧid.”
EST 5:14 [Xenni] tenna Zarac, tamɣart nnes, jmiɛ ak-d imeddukkař nnes: “Ejj ad ssbedden ict n tḥenact [mani t ɣa ayřen], ad yiři řuɛřa nnes xemsin n iɣiřen uca ɣar ṣṣbeḥ ad tinid i ujeǧid, ḥima ad ɣares ayřen Murdaxay u [xenni] ad tuyured s řefraḥet ɣar zzardet ak-d ujeǧid.” Ittɣiř as i Haman aqa man aya d ijj n ccwar icna uca ssbedden taḥnact n wayař.
EST 6:1 Di ǧiřet nni simant nnes tuɣa yugi ad ikk iḍeṣ x ujeǧid uca inna ad as dd-awyen adlis n řidaret n imezruyen uca ɣrin zzaysen zzat i wudem n ujeǧid.
EST 6:2 Ittwaf uran [dayes], aqa Murdaxay ixebbar x Biɣtana d Tarac, tnayen n imsexxaren icennɛen n ujeǧid, zeg iɛessasen n tewwart, inni tuɣa yarezzun ad wten afus n ujeǧid Aḥacwiruc.
EST 6:3 [Xenni] inna ujeǧid: “Man ccan d řemɣaret i ittwaggen i Murdaxay x man aya?” Imsexxaren iḥuḍriyyen n ujeǧid nni tuɣa i d as ittsexxaren, nnan: “War d as ittwagg walu di ṭṭweɛ nnes!”
EST 6:4 [Xenni] inna ujeǧid: “Wi [din] barra deg wazzay?” Haman tuɣa ɛad mammec dd-ittadef ɣar wazzay n taddart n ujeǧid [i iǧan] ɣar barra qaɛ ḥima ad yini i ujeǧid ḥima ad yayeř Murdaxay ɣar tḥenact n wayař, tenni i d as issewjed.
EST 6:5 Imsexxaren n ujeǧid nnan as: “Aqa d Haman i da ibedden deg wazzay.” [Xenni] inna ujeǧid: “Ejj i-t ad yadef!”
EST 6:6 [Xmi] yudef Haman, inna as ujeǧid: “Min ɣa ittwaggen ak-d weryaz i umi ixs ujeǧid ad t icenneɛ?” Ixemmem Haman deg wuř nnes: “Man wen ixs ujeǧid ad icenneɛ ktar zzayi?”
EST 6:7 S uyenni yarra-dd Haman x ujeǧid: “Aryaz i ixs ujeǧid ad t icenneɛ,
EST 6:8 ad as immewc tcamir igellden i zi innum ujeǧid ad yarḍ uřa d ayis i xef innum ujeǧid ad iniy uca ad ssarsen ijj n ttaj igellden x uzeǧif nnes.
EST 6:9 Ad ggen tcamir d uyis deg ufus n ijj zi řḥukkam n ujeǧid, [ijjen] zi tarwa n taṣiřet, uca ad zzayes ssyarḍen aryaz nni i ixs ujeǧid ad icenneɛ uca ad t ssnedhen x uyis deg wazzay n tendint, uca ad barrḥen: ‘Ammu i ɣa ittwagg ak-d weryaz, wenni ixs ujeǧid ad t icenneɛ!’”
EST 6:10 [Xenni] inna ujeǧid i Haman: “Qeǧeq, ksi tcamir d uyis am mammec tennid uca egg amenni ak-d Murdaxay wenni iqqimen di tewwart n ujeǧid u war ttejji uřa d ijj n wawař ad iwḍa zi marra min tessiwřed.”
EST 6:11 Iksi Haman tcamir d uyis uca issyarḍ Murdaxay s tcamir u issnedh i-t x wazzay n tendint uca issekkar abarreḥ qibač nnes: “Ammu i ɣa ittwagg ak-d weryaz wenni umi ixs ujeǧid ad as icenneɛ!’”
EST 6:12 [Awarni aya] iɛqeb Murdaxay ɛawed ɣar tewwart n ujeǧid, maca Haman yuyur deɣya ɣar taddart, iḥzen u tuɣa azeǧif nnes iřeḥḥef.
EST 6:13 Iɛawed Haman i Zarac, tamɣart nnes, u i marra imeddukkař nnes marra min i d as imsaren. [Xenni] nnan as imiɣisen nnes d Zarac, tamɣart nnes: “Mařa Murdaxay, wenni zzat i wudem nnes tebdid ad tewḍid, zi zzariɛet n Wudayen i yeǧa, war d as tzemmared, maca s tidett ad tewḍid zzat i wudem nnes.”
EST 6:14 Umi nitni ssiwřen ɛad akides, usin-dd imsexxaren icennɛen d ujeǧid uca qeǧqen ad awyen Haman ɣar zzardet nni tessewjed Istir.
EST 7:1 [Umi] dd-yiweḍ ujeǧid ak-d Haman ḥima ad swen ak-d tjeǧidt Istir,
EST 7:2 inna ujeǧid, ɛawed deg wass wiss tnayen, ak-d tissit n binu i Istir: “Min dayem iǧan d meẓri, [a] tajeǧidt Istir! Ad am immewc. D min [iǧan] d tutra nnem? Ad ɣarem tiři waxxa d azyen n tgeldit.”
EST 7:3 [Xenni] tarra-dd xas tjeǧidt Istir, tenna: “Mařa [xenni] ufiɣ arḍa di tiṭṭawin nnec, [a] ajeǧid, u mařa tusa as-dd i ujeǧid s řxaḍar, ejj ad ayi wcen tudart inu x meẓri inu u řgens inu x tutra inu.
EST 7:4 Maɣar neccin nemmenz, necc d řgens inu, maḥend ad nettwareddeǧ u ad nettwateḥḥa. Mařa nemmenz am yisemɣan d tiyya, necc ad ssusmeɣ, minzi x uya řeḥṣaret war tᵉttiři anect ařami icuwwar ad ṣeddɛeɣ ajeǧid.”
EST 7:5 [Xenni] issiweř ujeǧid Aḥacwiruc, inna i tjeǧidt Istir: “Min iɛna netta u mani iǧa wenni ɣar iǧa wuř iccur maḥend ad igg ammu?”
EST 7:6 Tenna as Istir: “Aryaz [nni] i d aneɣ iḥṣaren d řeɛdu [nneɣ], aqa d wa d Haman aɛeffan!” [Xenni] innexřeɛ Haman zzat i wudem n ujeǧid d tjeǧidt.
EST 7:7 Ikkar ujeǧid s wesɛar, ijja tissit n binu uca yuyur ɣar weḥwic n řeqṣar. Haman iqqim ibedd maḥend ad iḥeccem tajeǧidt Istir di ṭṭweɛ n tudart nnes, maɣar yuca ak-d ujeǧid aqa iɛewweř ad as igg řɣar.
EST 7:8 [Ařami] dd-idweř ijeǧid zeg weḥwic n řeqṣar ɣar taddart mani teǧa ṭṭabřa n binu, yufa Haman iwḍa x řemṭarbat i x tuɣa tezzeř Istir. [Xenni] inna ujeǧid: “Řexxu aqa ihekkweř uřa d tajeǧidt ɣari di taddart!” Qaɛ war dd-iffiɣ wawař zeg uqemmun n ujeǧid, ařami tuɣa [imsexxaren] řeḥḥfen as i Haman x uɣembub.
EST 7:9 Ḥarbuna, ijj zeg imsexxaren icennɛen, inni tuɣa ibedden zzat i wudem n ujeǧid, inna: “Aqa din taḥnact [n wayař], tenni i tuɣa igga Haman i Murdaxay wenni tuɣa issiweř mliḥ deg ujeǧid, tbedd ɣar taddart n Haman u řuɛřa nnes xemsin n iɣiřen.” [Xenni] inna ujeǧid: “Ayřem ɣares Haman!”
EST 7:10 Uyřen Haman ɣar teḥnact i tuɣa igga netta simant nnes i Murdaxay uca yarsa wesɛar n ujeǧid.
EST 8:1 Deg wass nni ajeǧid iwca as i tjeǧidt Istir taddart n Haman, řeɛdu n Wudayen, uca yusa-dd Murdaxay zzat i wudem n ujeǧid, minzi Istir txebbar s minzi [d as dd-ittas] i nettat.
EST 8:2 Ikkes-dd ujeǧid taxadent nnes n ucemmiɛ, tenni tuɣa dd-ikkes zi Haman uca iwca as-tt i Murdaxay, u Istir tegga Murdaxay x taddart n Haman.
EST 8:3 Tessiweř Istir twařa nneɣni ak-d ujeǧid, tewḍa as ɣar iḍaren, tᵉtru u tḥeccem i-t maḥend ad issiggʷej taɛeffant n Haman, Ajaji, uřa d tameɛmuč i tuɣa ixarreṣ ḍidd i Wudayen.
EST 8:4 Isswiẓẓeḍ ujeǧid i Istir azeǧaḍ [nnes] n wureɣ. [Xenni] Istir tekkar, tbedd zzat i wudem n ujeǧid,
EST 8:5 tenna: “Mařa mliḥ i ujeǧid u necc ufiɣ řxaḍar zzat i wudem nnes u mařa tseggem tmesřact-a zzat i wudem n ujeǧid u necc udfeɣ as di řxaḍar di tiṭṭawin nnes, ejj ad arin [ca] ḥima ad ttwabeḍřent tebratin nni di teǧa tmeɛmuč n Haman, mmis n Hammadata, Ajaji, tinni i yura i uhellek n Wudayen di marra lɛamalat n ujeǧid.
EST 8:6 Maɣar mammec zemmarey ad xzareɣ řɣar i ɣa iřeqfen řgens inu? U mammec zemmareɣ ad xzareɣ ahellek n jjadira inu?”
EST 8:7 [Xenni] inna ujeǧid Aḥacwiruc i tjeǧidt Istir u i Wuday Murdaxay: “Xzar, wciɣ taddart n Haman i Istir u netta s yixef nnes uyřeɣ t ɣar tḥenact, minzi isswiẓẓed afus nnes ɣar Wudayen.
EST 8:8 Ad tarim kenniw [simant nwem] s yisem n ujeǧid min iǧan icna di tiṭṭawin nwem di ṭṭweɛ n Wudayen. Cemmɛem t s txadent n ujeǧid, minzi tira i yuran s yisem n ujeǧid u cemmɛem tent s txadent n ucemmiɛ n ujeǧid, war izemmar ḥed ad tent ibḍeř.”
EST 8:9 [Xenni] ttwařaɣan imariren n ujeǧid, deg wass nni, deg uyur wiss třata, wenni umi [qqaren as] ayur n Siwan, deg [wass] wiss třata u-ɛicrin zzayes, uca uran am mammec marra min yumur Murdaxay, [aqa uran] t i Wudayen, i ijeǧiden [i iǧan] sadu i ujeǧid u i lwulat u i řḥukkam n lɛamalat, zi Řhend ař Kuc, mya u-sebɛa u-ɛicrin n lɛamalat, [i] kuř lɛamala s tira nnes u [i] kuř řgens s yiřes nnes u [ɛawed] i Wudayen s tira nsen u s yiřes nsen.
EST 8:10 Ittwari s yisem n ujeǧid Aḥacwiruc u tᵉttwacemmeɛ [tebrat] s txadent n ucemmiɛ n ujeǧid uca ssekken tibratin nni ak-d ireqqasen n tazřa x yeysan, nyin x yeysan n tazřa igellden n jjadira icnan qaɛ.
EST 8:11 [Di tebratin nni] iwca ujeǧid [ttesriḥ] i Wudayen maḥend ad munen di kuř tandint i di ǧan, ad kkaren di ṭṭweɛ n tudart nsen, ḥima ad areddǧen, ad nɣen u ad teḥḥan kuř řɛeskar zi řgens d lɛamala nni ten i ɣa iḥṣaren, uřa d iḥenjiren imeẓyanen d temɣarin, u ḥima ad ṭṭfen min zzaysen,
EST 8:12 [d man aya] deg wass d ijjen di marra lɛamalat n ujeǧid Aḥacwiruc, deg [wass] wiss třeṭṭac n uyur wiss tenɛac, aqa-t d ayur n Adar.
EST 8:13 Tuɣa ittxeṣṣa ad tᵉttwassuffeɣ ict n tiřemt n tira-ya am uzerf di marra lɛamalat maḥend ad ittwassargeb i marra řegnus, aqa Udayen ad iřin ḥezzmen deg wass nni ḥima ad ntaqmen zi řɛedyan nsen.
EST 8:14 Ireqqasen n tazřa, inni yenyin x yeysan n tazřa igellden, ffɣen deɣya, ttwacejjɛen s uzeyyar s wawař n ujeǧid. Ittwassuffeɣ uzerf ɛawed di lqelɛa n Cucan.
EST 8:15 Xas uca iffeɣ-dd Murdaxay zzat i wudem n ujeǧid deg useřham igellden [n ufiřu] adehmani d ucemřař u s ijj n ttaj d ameqqran n wureɣ d useřham n řeqṭen azdad d ufiřu arjuwani, uca tandint n Cucan negzen dayes iwdan s řefraḥet.
EST 8:16 Udayen tuɣa ɣarsen tfawt d řefraḥet, d warcuq d ccan.
EST 8:17 Di kuř lɛamala u di kuř tandint mani ma dd-yiweḍ wawař n ujeǧid d uzerf nnes, tuɣa din řefraḥet d warcuq jar Wudayen d zzrud d wussan iṣebḥen u waṭṭas zi řegnus n temmurt dewřen d Udayen, minzi tewḍa-dd xasen tiggʷudi zeg Wudayen.
EST 9:1 Deg uyur wiss tenɛac, wenni d ayur n Adar, deg wass wiss třeṭṭac zeg uyur nni, umi dd-tiweḍ [řweqt] i di tuɣa ad ggen awař n ujeǧid d uzerf nnes, deg wass i di tuɣa ttrajan řɛedyan n Wudayen ad xasen mmenḍaren, tuɣa řḥař s řɛeks, maɣar Udayen mmenḍaren x yinni ten icarhen.
EST 9:2 Ssmunen Udayen di tneddam nsen di marra lɛamalat n ujeǧid Aḥacwiruc, maḥend ad wten inni tuɣa ittexsen ad daysen ggen řɣar, uca uřa d ijj izemmar ad iqqim ibedd zzatsen, minzi marra řegnus tuɣa fecřen s tiggʷudi zeg Wudayen.
EST 9:3 Marra řḥukkam n lɛamalat d ijeǧiden [i iǧan] sadu ujeǧid d lwulat d imsexxaren n ujeǧid wcin afus i Wudayen, minzi tiggʷudi n Murdaxay tewḍa xasen,
EST 9:4 minzi Murdaxay tuɣa ɣares ccan di taddart n ujeǧid uca řexbar nnes iffeɣ ɣar marra lɛamalat, minzi aryaz Murdaxay tuɣa ṣṣulṭa nnes tarenni ɛad.
EST 9:5 Ɣeřben Wudayen marra řɛedyan nsen am ten ccaten s ssif, s wenɣay d uhellek. Ggin ak-d yinni ten icarrhen am mammec xsen nitni.
EST 9:6 Di lqelɛa n Cucan nɣin u hellken Udayen xemsa-mya n yeryazen.
EST 9:7 [Uřa d] Farcandata d Dalfun d Acfat
EST 9:8 d Furata d Adalya d Aridata
EST 9:9 d Farmacta d Arisay d Ariday d Wayzata,
EST 9:10 ɛecra n iḥenjiren n Haman, mmis n Hamadat, řeɛdu n Wudayen, nɣin ten, maca war sswiẓẓḍen ca ifassen nsen ɣar tkeccaḍt.
EST 9:11 Deg wass nni d ijj iwyen-dd qedda n imettan zzat i wudem n ujeǧid di lqelɛa n Cucan.
EST 9:12 Inna ujeǧid i tjeǧidt Istir: “Di lqelɛa n Cucan Udayen nɣin u hellken xemsa-mya n yeryazen uřa d ɛecra n iḥenjiren n Haman. Min ɣa yiři ggin [ɛad] di lɛamalat nneɣni n ujeǧid? Min din [ɛad] ɣarem d asitem? Ad am immewc! Min tessitimed? Ad ɣarem yiři!”
EST 9:13 [Xenni] tenna Istir: “Mařa mliḥ i ujeǧid, ejj ad immewc ttesriḥ i Wudayen [i iǧan] di Cucan uřa d tiwecca maḥend ad ggen ɛlaḥsab azerf n wass-a, uca ejj ad ayřen ɛecra n iḥenjiren n Haman ɣar teḥnact.”
EST 9:14 [Xenni] inna ujeǧid maḥend ad ggen amenni. [Řexdenni] ittwassuffeɣ-dd ijj n uzerf di Cucan uca uyřen ɛecra n iḥenjiren n Haman.
EST 9:15 Udayen nni [iǧan] di Cucan, munen ɛawed deg wass wiss arbeɛṭac n uyur n Adar uca nɣin teřt-myat n yeryazen, maca war sswiẓẓḍen ca ifassen nsen ɣar tkeccaḍt.
EST 9:16 Munen ɛawed Wudayen nneɣni di lɛamalat n ujeǧid ḥima ad kkaren di ṭṭweɛ n tudart nsen u ḥima ad ṭṭfen řehna zi ɣar řɛedyan nsen. Nɣin xemsa u-sebɛin-ařef n yeryazen jar inni ten icarrhen, maca war sswiẓẓḍen ca ifassen nsen ɣar tkeccaḍt.
EST 9:17 Man aya imsar deg wass wiss třeṭṭac n uyur n Adar u deg [wass] wiss arbeɛṭac zzayes areyyḥen uca ggin t d ijj n wass n zzardet d řefraḥet.
EST 9:18 Udayen nni [iǧan] di Cucan, munen deg [wass] wiss třeṭṭac [n uyur] uřa deg [wass] wiss arbeɛṭac uca nitni areyyḥen deg wass wiss xemmesṭac uca ggin t d ijj n wass n zzardet d řefraḥet.
EST 9:19 X uya Udayen, inni [iǧan] di řkampu, inni izeddɣen deg tneddam břa řeḥyuḍ, ggin ass wiss arbeɛṭac n uyur n Adar d ijj n wass n řefraḥet d zzardet d řxar, [ass] i di ssekkan arriɣalut ijj i wenneɣni.
EST 9:20 Izemmem Murdaxay imezruyen-a uca issekk tibratin i marra Udayen nni [iǧan] di marra lɛamalat n ujeǧid Aḥacwiruc, i yinni [iǧan] yudsen d inni [iǧan] iggʷejen,
EST 9:21 maḥend ad ten arren ad ḥḍan ass wiss arbeɛṭac n uyur n Adar uřa d wass wiss xemmesṭac [zzayes] zeg useggʷas ař aseggʷas [nneɣni]
EST 9:22 - ɛlaḥsab ussan i di ṭṭfen Udayen arraḥet zi řɛedyan nsen, u [ɛlaḥsab] ayur nni tuɣa [i d asen] ibeddřen zi řeḥzen ɣar refraḥet u zeg wecḍan ɣar wass aṣebḥan - ḥima ad ten arren d ussan n zzardet d řefraḥet u [ḥima] kuř ijj ad issekk aɣiralut i wenneɣni u [ḥima] ad wcen i imezřaḍ.
EST 9:23 Qebřen Wudayen min bdan ad ḍfaren [ɛad] u min d asen yuran [s ufus] n Murdaxay,
EST 9:24 minzi Haman, mmis n Hamadata, Ajaji, řeɛdu n marra Udayen, tuɣa ittxarreṣ ijj n wenway ḍidd i Wudayen maḥend ad ten ihellek, u netta tuɣa inḍar ‘Pur’, aqa-t d taqedduḥt, ḥima ad ten yareddeǧ u ad ten ihellek.
EST 9:25 [Maca] umi dd-tusa [Istir] zzat i wudem n ujeǧid, yumur netta s tira maḥend ad yarr x uzeǧif nnes anway-a d aɛeffan, tenni tuɣa ixarreṣ ḍidd i Wudayen, uca uyřen t, netta d iḥenjiren nnes, ɣar teḥnact.
EST 9:26 X uya řaɣan ussan-a ‘Purim’, zeg isem n ‘Pur’. X uya, zi ssibbet n wawařen n tebrat-a u [zi ssibbet n] min ẓrin s yixef nsen zi man aya u [zi ssibbet n] min d as imsaren,
EST 9:27 kkaren ad ḥḍan ussan-a uca qebřen Wudayen i yixef nsen u i zzariɛet nsen u i marra inni ɣarsen dd-iqqnen, maḥend war ssɛeddun ca ad ḥḍan tnayen n wussan-a am mammec yura u ɛlaḥsab řweqt i ɣarsen ittwaggen i kuř aseggʷas,
EST 9:28 uca ad idaren u ad ḥḍan ussan-a di kuř jjiř, di kuř řaǧ, di kuř lɛamala u di kuř tandint u war ssɛeddun ca ussan-a n Purim jar Wudayen u war ittᵉttwagg uneggar ɣar řidaret nsen s zzariɛet nsen.
EST 9:29 Tura tjeǧidt Istir, yeǧis n Abiḥayil, [ict n twařa nneɣni jmiɛ] ak-d Wuday Murdaxay, s marra tizemmar [nsen], ḥima ad ggen asecni di tebrat-a wiss tnayen x [tmesřact n] Purim.
EST 9:30 Issekk tibratin i marra Udayen di mya u-sebɛa u-ɛicrin n lɛamalat n tgeldit n Aḥacwiruc, [jmiɛ] ak-d wawařen n řehna d řaman,
EST 9:31 ḥima ad neyycen ussan-a n Purim di řweqt nsen ittwaggen, am mammec d asen yumur Wuday Murdaxay, [jmiɛ] ak-d tjeǧidt Istir, u am mammec ggin x yixef nsen u x zzariɛet nsen, [ak-d] řumurat x uẓummi d uweṭṭu nsen n ugejdur.
EST 9:32 X řumur n Istir bedden wawařen-a x [Řɛid n] Purim uca man aya ittwara deg ijj n wedlis.
EST 10:1 Igga ujeǧid Aḥacwiruc ḍḍariba x [yinni sadu nnes] di temmurt u di tegzirin n řebḥar.
EST 10:2 Marra min igga [Murdaxay] n jjehd d tzemmar uřa d abarreḥ x řemɣaret n Murdaxay, wenni d as iwcin ujeǧid ijj n ccan imɣar, ma war ten urin deg wedlis n imezruyen n ijeǧiden n Maday d Lfurs?
EST 10:3 Minzi tuɣa Murdaxay d wenni wiss tnayen awarni i ujeǧid Aḥacwiruc, uca tuɣa-t d ameqqran jar Wudayen u aṭṭas zeg aytmas arḍan zzaysen u netta tuɣa yarezzu min iǧan ḥsen i řgens nnes u tuɣa issawař s řxar x marra inni n řgens nnes.
JOB 1:1 Tuɣa din ijj n weryaz di temmurt n Ɛuṣ qqaren as Ayub. Aryaz-a tuɣa ikmeř d amsegged, itteggʷed zi AREBBI u ittḥeyyad x min iǧan d aɛeffan.
JOB 1:2 Ttwarwen as-dd sebɛa n iḥenjiren d třata n tḥenjirin.
JOB 1:3 Taḥimart n řmař nnes dayes sebɛa-ařaf n wuǧi u teřt-ařaf n iřeɣman d xemsa-mya n tyuyawin n iyenduzen d xemsa-mya n teɣyař, [arni ɣares] abarru n isemɣan. Aryaz-a tuɣa d ameqqran x marra arraw n ccarq.
JOB 1:4 Iḥenjiren nnes nnumen tteggen ijj n umensi, kuř ijj [zzaysen] [s nnubet nnes] deg wass nnes di taddart nnes. Ssekken, ɛarḍen uřa x třata n suyᵉtmatsen ad kidsen ccent u ad kidsen swent.
JOB 1:5 Řami ɛdun wussan n zzardet awarni nnḍen [zi taddart ɣar taddart nneɣni], issekk Ayub ḥima ad ten issqeddes. Zic ɣar tuffut ikkar uca yiwi din tiɣarṣi n wecmaḍ anect lɛadad n marra [arrawen nnes]. Maɣar Ayub inna: “Ad taɣ xḍan arrawen inu u ḥeyyden x AREBBI deg wuř nsen.” Ammu i igga Ayub řebda.
JOB 1:6 Deg ijj n wass usin-dd arraw n AREBBI ḥima ad bedden zzat i SIDI, uca yusa-dd uřa d cciṭan di řwesṭ nsen.
JOB 1:7 Inna SIDI i cciṭan: “Manis i dd-tusid cek?” Yarra-dd cciṭan x SIDI, inna: “Usiɣ-dd zeg wetlaɛ x temmurt, kkiɣ tt marra.”
JOB 1:8 Inna SIDI i cciṭan: “Ma teḥḍid amsexxar inu Ayub? Am netta war iǧi x temmurt: d aryaz ikmeř, iggur nican, itteggʷed AREBBI u ittḥeyyad x min iǧan d aɛeffan!”
JOB 1:9 Yarra-dd cciṭan x SIDI, inna: “Ma amenni waha itteggʷed Ayub AREBBI?
JOB 1:10 Ma war iǧi d Cek, wenni iggin ijj n useřqi i netta d taddart nnes d marra min ɣares? Aqa tbarked timegga n ifassen nnes uca řmař nnes imɣar aṭṭas di temmurt.
JOB 1:11 Swiẓẓeḍ mɣir afus nnec [ɣares], ḥada marra min iǧan nnes, ma [xenni] s tidett ad ibeɛɛed x wudem nnec?”
JOB 1:12 [Xenni] inna SIDI i cciṭan: “Xzar, marra min ɣares aqa-t deg ufus nnec. Mɣir war d as swiẓẓiḍ afus nnec waha!” [Xas uca] yuyur cciṭan zi zzat n wudem n SIDI.
JOB 1:13 Deg wass min di tuɣa iḥenjiren nnes d yessis ttᵉtten u sessen binu di taddart n umatsen amenzu, imsar,
JOB 1:14 aqa yusa-dd ijj n ureqqas ɣar Ayub, inna: “Ifunasen tuɣa carrzen u tiɣyař heddant x uɣezdis nsen.
JOB 1:15 [Xenni] hejmen ayt n Caba, ksin ten uca nɣin iḥudriyyen s řeqḍeɛ n ssif. Mɣir necc waha inejmen, ḥima ad ac t ɛawdeɣ.”
JOB 1:16 Umi tuɣa wa ɛad issawař, yusa-dd ijj nneɣni, inna: “Timessi n AREBBI tewḍa-dd zeg ujenna uca tarɣa deg wuǧi d iḥudriyyen uca tecca i-ten. Mɣir necc waha inejmen, ḥima ad ac t ɛawdeɣ.”
JOB 1:17 Umi tuɣa wa ɛad issawař, yusa-dd ijj nneɣni, inna: “Ayt n Ikaldaniyyen ssbedden třata n bandiyyat, hejmen x iřeɣman, ksin ten uca nɣin iḥudriyyen s řeqḍeɛ n ssif. Mɣir necc waha inejmen, ḥima ad ac t ɛawdeɣ.”
JOB 1:18 Umi tuɣa wa ɛad issawař, yusa-dd ijj nneɣni, inna: “Iḥenjiren nnec d yessic ccin u swin binu di taddart n umatsen amenzu.
JOB 1:19 Uca xzar, yusa-dd ijj n usemmiḍ iwɛar x tiwa n řexřa, iřqef arebɛa n tɣemmura n taddart uca tewḍa [taddart] x iḥudriyyen d tḥudriyyin uca mmuten nitni. Mɣir necc waha inejmen, ḥima ad ac t ɛawdeɣ.”
JOB 1:20 [Xenni] ikkar Ayub, icarreg aseřham nnes, iḥeff azeǧif nnes, iwḍa x temmurt uca ibendeq,
JOB 1:21 inna: “D aɛaryan i dd-usiɣ zeg uɛeddis n yemma u d aɛaryan i din i ɣa dewřeɣ. SIDI iwca, SIDI ikkes, ad ittwabarek Isem n SIDI.”
JOB 1:22 Di man aya marra war ixḍi Ayub ca u war inni min war iɛeddřen x AREBBI.
JOB 2:1 Deg ijj n wass usin-dd arraw n AREBBI, ḥima ad bedden zzat i SIDI, uca yusa-dd uřa d cciṭan di řwesṭ nsen maḥend ad issbedd ixef nnes zzat i SIDI.
JOB 2:2 Inna SIDI i cciṭan: “Manis i dd-tusid cek? Cciṭan yarra-dd x SIDI, inna: “Usiɣ-dd zeg wetlaɛ x temmurt, kkiɣ tt marra.”
JOB 2:3 Inna SIDI i cciṭan: “Ma teḥḍid amsexxar inu Ayub? Am netta war iǧi x temmurt: d aryaz ikmeř, iggur nican, itteggʷed AREBBI u ittḥeyyad x min iǧan d aɛeffan! Ɛad yarni itteṭṭef di řeṣfayet nnes, x minni cek d ayi tɛarrned ḥima ad t ṣarḍeɣ x walu.”
JOB 2:4 Yarra-dd cciṭan x SIDI, inna: “Tiřmect s teřmect, [wah,] marra min ɣares ɣar bnadem, ad t iwc i tudart nnes.
JOB 2:5 Swiẓẓeḍ mɣir afus nnec [ɣares] uca ḥada iɣsan nnes d weysum nnes, ma [xenni] netta s tidett war dayek ittceqqaf deg wudem nnec?”
JOB 2:6 [Xenni] inna SIDI i cciṭan: “Xzar, netta deg ufus nnec, maca ejj i-t ad iddar!”
JOB 2:7 [Xas uca] yuyur cciṭan zi zzat n wudem n SIDI uca iwta Ayub s tḥebba tiɛeffanin, zi třeqqa n iḍaren nnes ař tqiccet n uceqquf [n uzeǧif] nnes.
JOB 2:8 Netta iksi aceǧiq n tqedduḥt, ḥima ad zzayes iḥekk ixef nnes, uca iqqim di řwesṭ n yiɣɣeḍ.
JOB 2:9 Tenna as temɣart nnes: “Ma ɛad tᵉtteṭṭfed di řeṣfayet nnec? Ini as i AREBBI: ‘D wenni netta!’, uca mmet!”
JOB 2:10 Netta maca inna as: “Am mammec ssawařent temɣarin tibuhařiyyin tessawařed uřa d cem am yicten zzaysent. Ma neccin nkessi řxar zi AREBBI, [maca] war nkessi xenni uřa d řɣar?” S marra man aya Ayub war ixḍi ca s iyencicen nnes.
JOB 2:11 Sřin třata n imeddukkař n Ayub marra min xas ikkin d řɣar u nitni usin-dd kuř ijj zi temmurt nnes: Ilifaz zi Tayman, Bildad zi Cuḥa u Ṣufar zi Naɛmat. Ggin ad din uyuren, ḥima ad kides ssḥissfen u ḥima ad dayes ggen uř.
JOB 2:12 Zi řaggʷaj ssgeɛɛden tamuɣři nsen, maca war tt ɛqiřen ca. Nitni ssgeɛɛden tmijja nsen uca run. Kuř ijj icarreg aseřham nnes uca ssuysen iɣɣeḍ ɣar ujenna tiwa i izeǧifen nsen.
JOB 2:13 Qqimen ɣares x temmurt, sebɛa n wussan d sebɛa n ǧiyaři. Uřa d ijjen war issiweř uřa d ijj n wawař ɣares, maɣar ẓrin, aqa řeḥriq nnes tuɣa d ameqqran aṭṭas.
JOB 3:1 Awarni man aya yarzem Ayub aqemmum nnes, inɛeř ass [n wexřaq] nnes.
JOB 3:2 Ayub iṭṭef deg wawař, inna:
JOB 3:3 Ad ifna ass i di dd-ttwaxeřqeɣ, uřa d ǧiřet i di nnan: ‘Ijj n weryaz ittwaksi.’
JOB 3:4 Ejj ass nni ad idweř d taǧest, ɛemmarṣ war xas ittsseqsi Arebbi zeg ujenna, u war xas tᵉttceɛciɛ tfawt n uziř [ɛad].
JOB 3:5 Iři taǧest d tiři n řmewt ad xas arzunt, ejj iseynuten ad zedɣen tiwa nnes. Iři ad xas wḍant tkebbasin s uziř!
JOB 3:6 Ad tekkes tkebbast yuǧɣen ǧiřet nni, ejj [ǧiřet nni] war tfarreḥ jar wussan n useggʷas, ejj i-tt war dd-tᵉttis di řeḥsab n iyuren.
JOB 3:7 Xzar, ejj ǧiřet nni ɛemmarṣ war dd-tᵉttiruw, war dayes ittidef usřiwřew.
JOB 3:8 Ejj inni issfeṭṭḥen ass, ad t neɛřen, inni ittḥakan ad ssekkaren ‘Liviyatan’.
JOB 3:9 Ejj ad ttwakebbsen itran n tuffut nnes, ejj i-t ad iraja tafawt, řami war din teǧi. Ejj abřiwen n tfawt n řefjar war tt ẓarren!
JOB 3:10 Maɣar netta war ibelleɛ tiwwura n uɛeddis [n yemma], war iffar řeɣben zzat i tiṭṭawin inu.
JOB 3:11 Mayemmi war mmuteɣ řami d ayi tuɣa deg uɛeddis [n yemma], mayemmi war ssuffɣeɣ buḥbeř, řami dd-ffɣeɣ zeg uɛeddis [n yemma]?
JOB 3:12 Mayemmi d ayi rajan ifadden u mayemmi ibbac, ḥima ad [daysen] ṭṭeḍeɣ?
JOB 3:13 Xenni iři ad zzřeɣ řexxu, ad ssqareɣ. Iři ad ṭṭṣeɣ. Xenni balak ad ɣari tiři řhudnet
JOB 3:14 [jmiɛ] ak-d ijeǧiden d imcawaren n temmurt, inni ibnan i yixef nsen arrwinat ixřan,
JOB 3:15 niɣ [jmiɛ] ak-d řḥukkam nni ɣar iǧa wureɣ, inni iccuren tudrin nsen s nnuqart,
JOB 3:16 niɣ necc war ttiřiɣ [ɛad] am yijj n weɣray [n temɣart] ssnuffaren t, amecnaw iseyman nni ɛemmarṣ war iẓrin tafawt.
JOB 3:17 Dinni ssbedden iɛeffanen zi ṣṣdeɛ, dinni ttareyyaḥen inni umi ifna jjehd nsen.
JOB 3:18 Dinni ttareyyaḥen imeḥbas [munen], war qqimen ttesřan [ɛad] i tmijja n imzeyyaren [n isemɣan].
JOB 3:19 Aqa din ameẓyan d umeqqran, ismeɣ innufseř din zi bab nnes.
JOB 3:20 Mayemmi temmewc tfawt i řmeskin, u tudart i yinni umi ittwassarzeg řeɛmar nsen,
JOB 3:21 [i yinni] ittmeẓren di řmewt, maca war tt ufin, inni iɣezzan x [řmewt] ktar x řeknuz innufaren,
JOB 3:22 inni ifarrḥen aṭṭas ařami dewřen neggzen, u ttɣebban meẓri xmi ttafen anḍeř?
JOB 3:23 [Mayemmi temmewc tfawt] i weryaz wenni umi ittwassnuffar webrid nnes, [i weryaz] wenni xef ibelleɛ Arebbi zi marra iɣezdisen?
JOB 3:24 Minzi deg wemcan n weɣrum inu ittas-dd uweḥweḥ inu, iɣuyyan inu ttwazeǧɛen am waman.
JOB 3:25 Minzi tuɣa ttnexřaɛeɣ u amenni dd-iffeɣ min zi tuɣa tteggʷedeɣ, wḍiɣ dayes.
JOB 3:26 War ɣari řhudnet, war arsiɣ ca u war ttareyyiḥeɣ. Aqa usin-dd imxumbar.
JOB 4:1 [Xenni] yarra-dd Ilifaz, wenni dd-yusin zi Tayman, inna:
JOB 4:2 Mařa [ḥed] yarzu maḥend ad kik issiweř, ma war tᵉttwaceḍned qaɛ [s man aya]? [Maca] man wen izemmaren ad issbedd řhard [nnes]?
JOB 4:3 Xzar, tessɣared aṭṭas [n iwdan] u ifassen yarxun tessmeḥḍed i-ten.
JOB 4:4 Wenni inqarḍen, tessbedded i-t s wawař nnec, u ifadden ifecřen tewcid asen jjehd [ɛawed].
JOB 4:5 Maca řexxu imsar aya i cek, tᵉttwaceḍned qaɛ, [řexxu] iřqef i cek aya uca tarejfed.
JOB 4:6 Ma war teǧi tiggʷudi [zi Arebbi] d řaman nnec u řeṣfayet n ibriden nnec d řayas nnec?
JOB 4:7 Xemm maca! Man wen ittwahellken am iǧa d amezdag u mani ttwateḥḥan inni igguren nican?
JOB 4:8 Ẓriɣ aqa inni icarrzen ddeǧ d yinni izarrɛen řeɣben, ad t mjaren [ɛawed].
JOB 4:9 Ad hellken zeg usuḍi n nnefs n Arebbi, ad fnan s usuḍi zeg wenzaren nnes.
JOB 4:10 Zzhir n weyrad d tmijja n yizem ameẓyan [ad ttwassbedden] u tiɣmas n wayraden imeẓyanen ad ttwarẓant.
JOB 4:11 Ad ihellek wayrad, minzi war yufi zzardet, tarwa n tayradt ad ttwabezzɛen.
JOB 4:12 Di tnuffra yiweḍ ayi-dd ijj n wawař, amezzuɣ inu iṭṭef zzayes řeḥmis,
JOB 4:13 [am tuɣa ɣarrqeɣ] deg ixarriṣen issiggʷiden zeg iweḥḥan n ǧiřet, řami dd-iwḍa yiḍeṣ yuǧɣen x iwdan.
JOB 4:14 Teřqef ayi tiggʷudi d tarjijit, marra iɣsan inu nnxeřɛen.
JOB 4:15 Ijj n buḥbeř iḥrara x uɣembub inu, issbedd acuwwaf di arrimet inu.
JOB 4:16 Netta ibedd, [maca] war ɛqiřeɣ x tefras nnes. Ijj n waddud [ibedd] zzat i tiṭṭawin inu. [Xenni] sřiɣ i tmijja tᵉttemtim, teqqar:
JOB 4:17 ‘Ma [izemmar] ijj n bnadem ad yiři isegged x Arebbi? Ma [izemmar] ijj n weryaz ad yiři iṣfa x Wenni t iggin?’
JOB 4:18 Xzar, war ittciři uřa x imsexxaren nnes, igga řɛib [́ɛad] ak-d lmalakat nnes umi weddarent.
JOB 4:19 Mahu inni izeddɣen di tudrin n ucař, inni ɣar teǧa tɛejjajt d dsas nsen. Aqa ad ttwařebzen amezwar x tcinda.
JOB 4:20 Zi tuffut n ṣṣbeḥ ař tameddit ad ttwafartken. Břa i iwca [bnadem] taynit [i man aya], ad fnan i řebda.
JOB 4:21 Ma war dd-tᵉttwaqřeɛ ɣarsen tesɣunt n uqiḍun nsen [n arrimet]? Ad mmten, [maca] war iǧi di tiɣit.
JOB 5:1 Řaɣa maca! Ma din ca n yijjen i xak dd ɣa yarren? Ɣar man zeg imqeddasen i ɣa tsewḍed?
JOB 5:2 Minzi axeyyeq ineqq abuhaři, u tusmi tneqq aqubbani.
JOB 5:3 Ẓriɣ ijj n ubuhaři iḍřeq i weẓwar, [maca] x ict n řɣefřet tuɣa ittxeṣṣa ad neɛřeɣ tazeddiɣt nnes.
JOB 5:4 Iggʷejen iḥenjiren nnes x usenjem, ttwaddzen ɣar tewwart [n tendint] uca war tuɣi din wi ten i ɣa ifekken,
JOB 5:5 [umi] icca umehyuf ṣṣabet nnes - [wah, wanita] issuffeɣ i-t-i-dd [ɛad] zeg isennanen - u isarḍ uxewwan agřa nsen.
JOB 5:6 Maɣar war iǧi zi tɛejjajt i zi dd-ittekk řɣar u zi temmurt war dd-tɣemmi tamara,
JOB 5:7 maca bnadem d wenni dd-ittwaxeřqen i tamara, am geɛɛdent tceɛɛařin n tmessi maḥend ad ḍwint.
JOB 5:8 Mři ufiɣ ad arzuɣ ɣar Arebbi, ad ssiwḍeɣ tamesřact inu ɣar AREBBI,
JOB 5:9 wenni itteggen timesřayin timeqqranin, war din wi tent i ɣa ifehmen, [ittegg] lmuɛjizat i war izemmar ad ttwaḥesbent.
JOB 5:10 Issakkʷaḍ anẓar x wudem n temmurt, uca issekka aman x wudem n iyyaren,
JOB 5:11 ḥima ad issgeɛɛed imwaḍɛen, uca inni iceḍnen ad ten ssuɛřan ɣar řaman.
JOB 5:12 Netta issbeṭṭeř ixarriṣen n iḥraymiyyen, [ařami] ifassen nsen war zemmaren ad ggen walu.
JOB 5:13 Imiɣisen imenneɛ i-ten di teḥraymect nsen, ittwassbeṭṭeř ccwar n iḥraymiyyen.
JOB 5:14 Deg uziř mmsagaren ak-d taǧest uca di ṭṭḥa n uziř ttfafan am ttfafan [di] ǧiřet.
JOB 5:15 Netta issenjam zi ssif [i dd-itteffɣen] zeg uqemmum nsen, uřa d amezřuḍ zeg ufus n wenni ijehden.
JOB 5:16 Ammu i yeǧa řayas i umezřuḍ uca ddeǧ ad ibelleɛ aqemmum nnes.
JOB 5:17 Xzar, sseɛd n weryaz wenni iseggem Arebbi. [S uya] war tesseḥqiri ca ttarbiyyet n Umzemmar x kuřci!
JOB 5:18 Maɣar Netta issyezzim ayi s ijj n uyezzim itteqqsen uca [xenni] ittcedda, iccat uca [xenni] ifassen nnes ssgenfan.
JOB 5:19 Di setta n řeḥṣarat ad cek ifekk, di tenni wiss sebɛa war cek iřeqqef řɣar.
JOB 5:20 Di řaẓ ad cek issenjem zi řmewt, deg umenɣi zi tiyyita n ssif.
JOB 5:21 Ad tiřid di řaman zzat i urekkuḍ n yiřes, war tᵉtteggʷeded ca zeg wareddeǧ mařa yusa-dd.
JOB 5:22 X wareddeǧ d řaẓ tzemmared ad tḍeḥced, zi řewḥuc n řexřa n temmurt war tᵉtteggʷeded,
JOB 5:23 maɣar tqeḍɛed řɛahd ak-d iẓra n yeyyar, [xenni] řewḥuc n řexřa ad kidek ddaren di řehna.
JOB 5:24 Ad targbed aqa řehna d aqiḍun nnec, ad tbeqqced tazeddiɣt nnec, ad tafed war cek ittxeṣṣi walu.
JOB 5:25 Cek ad tessned aqa arraw nnec aṭṭas, u ddurryet nnec am wefsu [aziza] n temmurt.
JOB 5:26 Ad tadfed ɣar wenḍeř di tewsar, am mammec ssgeɛɛden ijj n uɛurric n tqebbiḍin n imendi [ɣar unedrar] di řḥař nnes.
JOB 5:27 Xzar, man aya, aqa neccin narzu dayes, ammu i teǧa! Seř ɣares, ssen i-t deg yixef nnec!
JOB 6:1 Yarra-dd Ayub, inna:
JOB 6:2 A, mři weznen řhemm inu, mři jjin ad igeɛɛed x řmizan s tnayen n ṭṭawyat uřa d řeɣben inu akides imun!
JOB 6:3 Maɣar řexxu aqa-t idqeř x yejdi n řebḥur, x uya [tteffɣen] wawařen inu nhřa axemmem.
JOB 6:4 Maɣar [nnuɣent] dayi fřitcat n Umzemmar x kuřci, ařami buḥbeř inu isess arrhaj nsent. Inexřiɛen zi Arebbi kkaren-dd akidi.
JOB 6:5 Ma issḥundrut weɣyuř n řexřa ɣar arbiɛ aziza? Niɣ issmuhrut ufunas ɣar heddu nnes?
JOB 6:6 Macca břa aředdi ma ad tt yecc [bnadem] břa tameǧaḥt? Niɣ aqa din aředdi di řmeḥḥ acemřař n tmeǧač?
JOB 6:7 Min yugi řeɛmar inu ad t iḥada, [řexxu] aya marra i necc am macca iɣummen.
JOB 6:8 Mři dd ɣa yas min ttareɣ iwa, iwca Arebbi min sittimeɣ.
JOB 6:9 Mři tuɣa ixs SIDI maḥend ad ayi iřbez, maḥend ad issarxu afus nnes u maḥend ad ayi iqess.
JOB 6:10 Man aya ad ayi yiři ɛad d afewwej, ad ayi inɛec di řeḥriq nni war [xafi] issɛizzi ca, maɣar war nkareɣ ca awařen n Umqeddas.
JOB 6:11 Min iɛna jjehd inu, aqa zemmareɣ ad rajiɣ [ɛad]? Niɣ min iɛna uneggaru inu, wenni x ttexseɣ ad zzugarteɣ tudart inu [ɛad]?
JOB 6:12 Ma jjehd inu am jjehd n iẓra? Ma aysum inu am nnḥas?
JOB 6:13 Ma war ǧiɣ qaɛ břa twiza s yixef inu, ma war xafi ittwakkes ufekki qaɛ?
JOB 6:14 Wenni umi iqḍeɛ řayas [ittxeṣṣa as] tamexsiwt icuwwaren zeg umeddukkeř nnes, mařa lla, [izemmar] ad yejj tiggʷudi zeg Umzemmar x kuřci.
JOB 6:15 Aytma banen-dd d iɣeddaren am tɣezrin [deg idurar], am tassut n tɣezrin nni iɛeddun deɣya,
JOB 6:16 [am tiɣezrin] tinni ittbarrecnen s wejris, nni di issnuffar wedfeř [ixef nnes].
JOB 6:17 Deg wussan nni di dewřent ḥṣarent, beddent, xmi ḥemmant, ttaẓɣent, imḥa wemcan nsent.
JOB 6:18 Ibriden n tecři nsen farɣen, geɛɛden di řeɛwin uca weddaren.
JOB 6:19 Imsebriden zi Tayma qqimen ttmeẓrin daysent, ikaravanen zi Caba ttrajan tent.
JOB 6:20 Nitni ttwacemten deg utecři nni ɣarsen. Usin-dd ɣar tɣezrin [deg idurar] uca barrqen.
JOB 6:21 S tidett, řexxu tdewřem d walu, teẓrim arẓiyyet inu uca tᵉggʷedem.
JOB 6:22 Ma nniɣ: ‘Awyem ayi-dd [ca]!’ niɣ: ‘Wcem ayi tirzifin zeg wagřa nwem!’
JOB 6:23 niɣ: ‘Fekk ayi zeg ufus n wenni iḥeṣṣaren!’ niɣ: ‘Fdi ayi zeg ufus n ayt n bu-řexcunet!’
JOB 6:24 Sɣar ayi, [xenni] ad sseɣdeɣ, scen ayi min di weddareɣ!
JOB 6:25 Mammec jehhden wawařen yecnan, [maca] min xef awebbex nwem?
JOB 6:26 Ma tᵉttxarrṣem deg wawařen, maḥend ad [ayi] tᵉttwebbxem [zzaysen]? Ma [xenni] awařen n wenni umi qeḍɛen řayas am řeɛwin i kenniw?
JOB 6:27 Ɛad x yijj n unibu ayujiř ad xas tenḍarem taqedduḥt u ɛad x yijj n umeddukkeř nwem ad xas teggem tameɛmuč.
JOB 6:28 Xenni řexxu, mařa texsem, ḥḍam xafi mliḥ, necc war xawem ssxarriqeɣ deg uɣembub [nwem].
JOB 6:29 Qeǧbem [ayi], war iɛeddeř ad [dayi] yiři ddeǧ. Qeǧbem [ayi] ɛawed, tasegda inu tbedd ɛad [nican].
JOB 6:30 Ma aqa din řɣecc x yiřes inu? Ma war ittředdi waneɣ inu x min war iḥřin?
JOB 7:1 Ma war [din] iǧi umenɣi ittxeṣṣa ad t immneɣ bnadem x temmurt, ma war ǧin wussan nnes am wussan n ucewwař?
JOB 7:2 Am mammec ittmeẓri imseɣ ɣar tiři, ammu ittraja ucewwař řmunet,
JOB 7:3 S uya dewřen iyuren ccuren s ubarreq d tasɣart inu u ǧyaři ccurent s tamara bḍan ayi tent.
JOB 7:4 Xmi ttezzřeɣ ttᵉṭṭṣeɣ, qqareɣ ‘Meřmi zemmareɣ ad kkareɣ, [meřmi] i ɣa teɛdu ǧiřet?’ Jjiwneɣ s řeḥweř ař d yeffu řḥař.
JOB 7:5 Arrimet inu tyarḍ deg ikeccawen u di teqcurin n ucař, tiřmect inu tqeṭṭa u tᵉttgeyyeḥ.
JOB 7:6 Deɣya x umekkuk n uxeyyaḍ ɛeddun wussan inu, ɛeddun břa řayas.
JOB 7:7 Ɛqeř, aqa tudart inu d asuḍi n nnefs [waha] u tiṭṭ inu war tẓarr ɛemmarṣ ɛad min iṣebḥen.
JOB 7:8 Tiṭṭ n wenni d ayi ittwařan, war d ayi tẓarr ɛad. Tiṭṭawin nnec ad xafi iřint, [maca] nnec war da ttiřiɣ ɛad.
JOB 7:9 [Am mammec] ittdurruq useynu, iɛeddu, ammu i ɣa ihwa di řaxart, war [zzayes] dd-ittgeɛɛid ɛad.
JOB 7:10 Ɛemmarṣ war dd-ittɛiqqib ɣar taddart nnes, ɛemmarṣ war xas itteɛqiř wemcan nnes.
JOB 7:11 Ammu i war tteqqneɣ aqemmum inu, ad ssiwřeɣ di řeḥṣaret n buḥbeř inu, ad cetciɣ di tarzugi n řeɛmar inu.
JOB 7:12 Ma necc d řebḥar niɣ d řhaycet, aqa Cek tessbedded xafi aɛessas?
JOB 7:13 Mařa nniɣ necc: ‘Tassut ad ayi tɛezza, qama inu ad xafi tessehwen acetci inu!’,
JOB 7:14 ammu id ayi tᵉttɣezzid s tirjiwin u s iweḥḥan tessaggʷaded ayi,
JOB 7:15 ařami idweř řeɛmar inu ittixḍar ajeyyef, [ittixḍar] řmewt x yeysan inu.
JOB 7:16 Necc ttɛiffiɣ [man aya], war ttexseɣ ad ddareɣ i řebda. Arxu zzayi, maɣar ussan inu [am] asuḍi n nnefs [waha].
JOB 7:17 Min iɛna bnadem aqa Cek tḥessbed t d ameqqran [ammu], aqa teřhid akides s wuř nnec?
JOB 7:18 Aqa Cek tarezzfed ɣares qaɛ [a]teffu, tqeǧbed i-t qaɛ tazeḥziht?
JOB 7:19 Mecḥař ɛad war zzayi tᵉttekksed [tiṭṭawin], war d ayi tarexxud ḥima ad ssɣeřyeɣ ikuffan inu?
JOB 7:20 Ma xḍiɣ? Min d ac i ɣa ggeɣ i Cek, [i Cek] [a-y-]aɛessas n bnadem? Mayemmi d ayi tessbedded d taḥjurt zzatek, u dewřeɣ d ddqeř i yixef inu?
JOB 7:21 Mayemmi war [d ayi] tɣeffared axeṭṭu inu, u war tɛeddud x řmuɛṣiyyet inu? Maɣar deɣya ad zzřeɣ di tɛejjajt u Cek ad xafi tarzud, [maca] war ttiřiɣ [ɛad].
JOB 8:1 [Xas uca] yarra-dd Bildad, wenni dd-yusin zi Cuḥa, inna:
JOB 8:2 Mecḥař i ɣa tekked tessawařed ammu, ad iřin wawařen n uqemmum nnec [amecnaw] asemmiḍ n tharyaḍt.
JOB 8:3 Ma ad issfarɣ Arebbi tasɣart, niɣ ad issfarɣ Umzemmar x kuřci tasegda?
JOB 8:4 Mařa akides xḍan iḥenjiren nnec, aqa issekk i-ten deg ufus n uxeṭṭu nsen.
JOB 8:5 Mařa cek tarezzud Arebbi s jjehd, tᵉttzawged aḥinni ɣar Umzemmar x kuřci,
JOB 8:6 mařa teǧid d amezdag u tseggmed, xenni ad ac iwca taynit nican, ad iɛdeř tazeddiɣt nnec i cek.
JOB 8:7 [Waxxa] tamezwarut nnec ad tiři d tuqřič, taneggarut nnec ad tiři temɣar aṭṭas.
JOB 8:8 Wah, seqsa xenni ɣar jjiř iɛdun, ḥekkar di řejdud nsen.
JOB 8:9 Maɣar neccin n iḍennaḍ [waha], war nessin walu, maɣar ussan nneɣ x temmurt am tiři.
JOB 8:10 Ma war cek sseřmiden nitni, ma war ɣarek ssiwiřen, ma war dd-ssuffuɣen awařen zeg wuř nsen?
JOB 8:11 Ma iɣemmi uɣanim n papirus břa ssebxet, ma imeqqar uɣanim ɣar tma n iɣzar břa aman?
JOB 8:12 Xmi ittnewwar, war imjar ɛad, ittaẓeɣ qbeř marra arbiɛ nneɣni.
JOB 8:13 Ammu i ǧan imesraq n marra inni ittun Arebbi, řayas n umnafeq ad ifna.
JOB 8:14 Min xef iɛemmed, ad ittwaqḍeɛ, min xef ittcař, ad dd-iban d axmař n qundɛa.
JOB 8:15 Ad isenned x taddart nnes, [maca] war tᵉttbeddi, ad dayes icebbar, [maca] war tᵉttɣimi tbedd.
JOB 8:16 Netta d aziza di tfawt n tfuct, řefruɛ nnes imeẓyanen ttbezzaɛen x weḥwic nnes.
JOB 8:17 Iẓewran nnes mmuden ixef nsen x ijj n uɛurric n yeẓra, ittarja ict n taddart n yeẓra [i yixef nnes].
JOB 8:18 [Mařa] Netta iqeǧeɛ i-t zeg wemcan nnes, ad t inkar [wemcan] nni, [ad yini]: ‘Ɛemmarṣ war cek ẓriɣ!’
JOB 8:19 Xzar, ta teǧa d řefraḥet n webrid [n tudart] nnes u inneɣni ad ɣemyen zeg ucař.
JOB 8:20 Xzar, Arebbi war ineṭṭar wenni ikemřen [maca] war ittic [a]fus i iɛeffanen.
JOB 8:21 Ɛad ad iccur aqemmum nnec s tḍeḥḥact, u iyencicen nnec s usřiwřew.
JOB 8:22 Imecrah nnec ad yarḍen řefḍiḥet u aqiḍun n iɛeffanen war ittiři ɛad.
JOB 9:1 Yarra-dd Ayub, inna:
JOB 9:2 Ssneɣ nican, aqa ammu i teǧa, maɣar mammec ɣa yiři bnadem d amsegged ɣar Arebbi?
JOB 9:3 Mařa Netta ixs akides imcarreɛ, iři netta war izemmar ad xas dd-yarr uřa d ict n twařa x wařef n twařawin.
JOB 9:4 Netta d amiɣis n wuř d bu-tzemmar ijehden, man wen izemmaren ad isseqseḥ ixef nnes ḍidd nnes uca ad iqqim iddar di řaman?
JOB 9:5 Netta d wenni issmuṭṭuyen idurar am war tt tticin [iwdan], d wenni ten issneqřaben deg weɣḍab nnes,
JOB 9:6 Netta d wenni issenhezzan tammurt zeg wemcan nnes, d wenni iggin ipilaren nnes ad arjijen,
JOB 9:7 Netta d wenni ittamaren tafuct ařami war dd-tenqir, d wenni ittcemmaɛen itran!
JOB 9:8 Netta s Yixef nnes waha ittbezzaɛ ijenwan, Netta iṣurruf tiwa n tɛurar [n řemwaj] n waman.
JOB 9:9 Netta d wenni iggin [awraf n itran] n Ddub [Ameqqran] d Uryun, [agraw n] Sebɛa n Itran d Ixammen n Ljanub,
JOB 9:10 Netta d wenni iggin timesřayin timeqqranin, - war izemmar [bnadem] ad tent ifhem - uřa d řeɛjayeb břa řeḥsab.
JOB 9:11 Xzar, Netta iɛeddu xafi, war t ẓarreɣ, iẓekkwa, necc war kides ttaciɣ.
JOB 9:12 Xzar, mařa ixḍef Netta, man wen i t ɣa imenɛen? Man wen izemmaren ad as yini: ‘Min din tᵉttegged Cek?’
JOB 9:13 Arebbi war ittarri aɣḍab nnes ad dd-idweř, sadu nnes uḍaren imɛawanen n ‘Rahab’.
JOB 9:14 Mammec i ɣa ggeɣ ad xas dd-arreɣ, mammec i ɣa farzeɣ awařen inu [mliḥ] zzates?
JOB 9:15 Waxxa necc d amsegged, war zemmareɣ ad xas dd-arreɣ, [maca] ad zawgeɣ Řqaḍi inu maḥend ad xafi iḥinn,
JOB 9:16 Mařa xafi dd-yarr řami řaɣiɣ, war ttɣiřeɣ aqa Netta ad iseř ɣar tmijja inu.
JOB 9:17 Aqa Netta iřebbez ayi s ict n tḥaryaḍt u yarenni deg iyezzimen inu baṭeř.
JOB 9:18 Netta war d ayi ittejji ad arreɣ nnefs, maca issjawan ayi s tarzugi.
JOB 9:19 Mařa teqqim [tmesřact] di jjehd, aqa Netta ijhed qaɛ, mařa di ccreɛ, [iqqar]: ‘Wi d ayi ɣa iɛarḍen?’
JOB 9:20 Waxxa necc d amsegged, [ɛad] aqemmum inu ad xafi iḥkem, waxxa necc břa řɛib, [ɛad] Netta ad ayi iɛeyyeb.
JOB 9:21 Waxxa necc břa řɛib [i ǧiɣ], war ssineɣ řeɛmar inu [nican], tudart inu ḥessbeɣ tt d walu.
JOB 9:22 X uya i ɣa iniɣ: ‘Qaɛ d ict! Am wenni iǧan břa řɛib am wenni iǧan d aɛeffan, Netta ad ten iqḍa s tnayen idsen!’
JOB 9:23 Mařa arekkuḍ ineqq deg ict n tecti, [xenni] Netta istehezza zi řeqḍeɛ n řayas i imezdagen.
JOB 9:24 Tammurt ad temmewc deg ufus n uɛeffan. Iɣembab n řquḍat nnes ittřeḥḥef asen. Mařa war [t iggi] Netta, man wen xenni?
JOB 9:25 Deɣya x wenni ittazzřen aqa ttqeǧiqen wussan inu, arewřen ɣar din, war twiřin řxar.
JOB 9:26 Kkin am tɣarruba n uɣanim, am ugider iḥewwmen x zzardet.
JOB 9:27 Mařa nniɣ: ‘Ad ttuɣ acetci inu, ad beddřeɣ aɣembub [iceḍnen] inu, ad ssfirnineɣ!’,
JOB 9:28 [ammu i] tteggʷedeɣ zi marra řeḥriq inu. Necc ssneɣ Cek war zzayi tᵉttbarrid.
JOB 9:29 Necc d aɛeffan, mayemmi ssḥissifeɣ i walu?
JOB 9:30 Mařa ssirdeɣ s waman n wedfeř, ad ssizedgeɣ ifassen inu s llixiya,
JOB 9:31 [ɛad] ad ayi tnetyed deg weḥfur yarṣuden, ař d ayi ɣa iɛiff warruḍ inu.
JOB 9:32 Maɣar Netta war iǧi d bnadem am necc, wenni xef zemmareɣ ad dd-arreɣ, xmi nettaweḍ ɣar taddart n ccreɛ ak-d wayawya.
JOB 9:33 War [din] iǧi řɛadeř jar aneɣ, wenni izemmaren ad issars afus nnes xaneɣ s tnayen idneɣ.
JOB 9:34 Ejj i-t ad xafi iksi aɛmud nnes, war d ayi issnexřiɛ [ɛad] uhuddi nnes,
JOB 9:35 [xenni] ad ssiwřeɣ nhřa ad zzayes ggʷedeɣ, maɣar necc war ǧiɣ ammu i yixef inu.
JOB 10:1 Ittɛiffi řeɛmar inu zi tudart inu, ad barrḥeɣ acetci inu ammu waha břa amnaɛ, ad ssiwřeɣ ɣar tarzugi n řeɛmar inu.
JOB 10:2 Necc ad iniɣ i Arebbi: ‘War d ayi ttegg d aɛeffan, scen ayi, mayemmi akidi tᵉttmenɣid.
JOB 10:3 Ma ɣarek řefḍeř aqa Cek tḥeṣṣared [ayi], aqa tneṭṭareḍ řxedmet n ifassen nnec, [am] tᵉttegged tafawt x ixarriṣen n iɛeffanen?
JOB 10:4 Ma ɣarek tiṭṭawin n bnadem, ma tᵉttwařid Cek am mammec ttwařan iwdan?
JOB 10:5 Ma ussan nnec am wussan n bnadem? Ma iseggʷusa nnec am yiseggʷusa n weryaz,
JOB 10:6 aqa Cek tarezzud [ammu] x řmuɛṣiyyet inu, tᵉttbeqqced di ddnub inu?
JOB 10:7 Waxxa Cek tessned aqa necc war ǧiɣ d aɛeffan, war din wenni i ɣa ifekken zeg ufus nnec.
JOB 10:8 Ifassen nnec xeřqen ayi, ggin ayi, aqa ttennḍen ayi, uca [řexxu] Cek tṣarḍed ayi.
JOB 10:9 Ɛqeř aqa Cek teggid ayi am tarrist, u ɣar tɛejjact texsed ad ayi tarred.
JOB 10:10 Ma war d ayi tzeǧɛed am uɣi, am kisu tejjid ayi ad ccreɣ?
JOB 10:11 S teřmect d weysum tessyarḍed ayi, s iɣsan d iẓewran temmuded ayi.
JOB 10:12 Tudart d tmexsiwt icuwwaren tewcid ayi tent, aḥeṭṭu nnec iḥḍa buḥbeř inu.
JOB 10:13 Txemmřed aya deg wuř nnec, necc ssneɣ belli aya tuɣa-t ɣarek di řbař.
JOB 10:14 Mařa xḍiɣ, Cek ad ayi teḥḍid, war d ayi tᵉttbarrid zi řmuɛṣiyyet inu.
JOB 10:15 Mařa ggiɣ řɣar, uct xafi! Mařa necc d amsegged [i ǧiɣ], war zemmareɣ ad ssgeɛɛdeɣ azeǧif inu. Jjiwneɣ s řefḍiḥet, ttaciɣ ak-d řemḥayen inu.
JOB 10:16 Mařa ssgeɛɛdeɣ ixef inu, ad ayi tneymared am wayrad izehharen, [řebda] tᵉttneqřabed xafi s řɣefřet.
JOB 10:17 Meɛlik ufiɣ ad xafi tessbedded [řebda] icehhaden nneɣni, ad tarnid ɛad deg weɣḍab nnec xafi, iɛessasen i ixeǧfen [ijj i wenneɣni] řebda, [wah,] ad ɣari [tnedhed] ijj n řɛeskar.
JOB 10:18 Mayemmi d ayi tejjid ad dd-ffɣeɣ zeg uɛeddis n yemma? Mři ssuffɣeɣ buḥbeř, war d ayi tẓar uřa d ict n tiṭṭ!’
JOB 10:19 Meɛlik ufiɣ axmi war iřiɣ ɛemmarṣ, mmeksiɣ ɣar wenḍeř zeg uɛeddis [n yemma].
JOB 10:20 Ma war ǧin wussan [n tudart] inu udrusen? Mři d ayi ijja, ad xafi inneqřeb maḥend ad farheɣ cwayt [ɛawed],
JOB 10:21 qbeř i ɣa uyureɣ - war dikkwiřeɣ [ɛad] - ɣar temmurt n taǧest d tiři n řmewt,
JOB 10:22 [ɣar] temmurt d tabarcant am tmeddit, [am] tiři n řmewt, war [din] ittbin walu, mani tegga tfawt am tmeddit.
JOB 11:1 [Xenni] yarra-dd Ṣufar, wenni dd-yusin zi Naɛma, inna:
JOB 11:2 Ma ad qqimen waṭṭas n wawařen břa tamwarrit, u ma ad ɣares yiři i yijj n bu-uqemmum řḥeqq [řebda]?
JOB 11:3 Ma izemmar řhard nnec ad issɣed iwdan, [ařami] [tzemmared] ad testehzid břa cek i ɣa isseḥcem uřa d ijj?
JOB 11:4 Cek tennid: ‘Teṣfa tɣuri inu, aqa ayi d amezdag di tiṭṭawin nnec!’
JOB 11:5 Uh, mři Arebbi [Simant nnes] issawař, mři yarezzem iyencicen nnes qibač nnec.
JOB 11:6 Mři Netta d ac i ɣa isscen timesřayin ixemmřen n tiɣit, maɣar nitenti sekkwant ddubel i ufekki. Ssen, aqa Arebbi ad ittu aṭṭas n řmuɛṣiyyet nnec di tizi nnec.
JOB 11:7 Ma tzemmared ad tbeqqced di mummu n Arebbi? Ma tzemmared ad tadfed ɣar řekmaret n Umzemmar x kuřci?
JOB 11:8 [Aqa-ten] di řuɛřat n ujenna! Min texsed ad tegged [ɛad]? [Tiɣit] tuǧeɣ x řaxart! Min tzemmared ad [zzayes] tessned?
JOB 11:9 Řeɛbar nnes yuɛřa aṭṭas x temmurt, tiru nnes [teɛdu aṭṭas] x tmiriwt n řebḥar.
JOB 11:10 Mařa iɛdu Netta, ibelleɛ [x ca n yijjen] uca iřaɣa [as] i ddeɛwet, man wen i t ɣa issbedden?
JOB 11:11 Maɣar Netta issen iɣeccacen, ittwařa řɣecc břa ma t iḥḍa.
JOB 11:12 [Maca mařa] abuhaři [izemmar] ad yaf řefhamet, [xenni] aɣyuř n řexřa [izemmar] ad idweř d bnadem.
JOB 11:13 Mařa cek tɛedřed uř nnec, [xenni] bezzeɛ ifassen nnec ɣares.
JOB 11:14 Mařa irṣeq řɣecc ɣar ufus nnec, saggʷej i-t, war ttejji ddeǧ ad izdeɣ di tqidunin nnec,
JOB 11:15 maɣar xenni tzemmared ad tessgeɛɛded udem nnec břa řɛib, ad tbedded nican, war tteggʷeded ca.
JOB 11:16 Maɣar ad tᵉttud řeɣben nnec, [ɛemmarṣ war] dayes tᵉttxemmimed [ɛad] am [ɛemmarṣ war tᵉttxemmimed ɛad] ɣar waman iɛdun.
JOB 11:17 Abrid n tudart nnec ad yarɣ tiwa x ṭṭḥa n uziř, waxxa din taǧest, ad tiři am teffut.
JOB 11:18 Ad tacid ixef nnec di řaman, minzi aqa din řayas, ad texzared [deg wenneḍ], ad tᵉṭṭṣed di řhudnet.
JOB 11:19 Ad tezzřed nhřa [cek] issnexřeɛ uřa d ijj, uca aṭṭas i cek i ɣa zawgen zzat i wudem nnec.
JOB 11:20 [Maca] tiṭṭawin n iɛeffanen ad ddarɣřent, qaɛ tarewřa ad asen tweddar, ad meẓren ad deřqen i buḥbeř.
JOB 12:1 Yarra-dd Ayub, inna:
JOB 12:2 D tidett, kenniw d ijj n ddarb n řgens, aqa tiɣit ad temmet akidwem!
JOB 12:3 Necc ɣari řeɛqeř am kenniw, necc war weṭṭiɣ deg umquddi akidwem. Wi war issinen [marra] aya?
JOB 12:4 Necc am wenni iǧan i tseḍḥac i umeddukkeř nnes, [necc] d wenni tuɣa ittřaɣan ɣar Arebbi uca [xenni] Netta isřa ɣari, [necc] d amsegged d nican, aqa dewřeɣ d řqecɛet n tseḍḥact.
JOB 12:5 ‘Řḥegra d tasɣart n wenni ittwarẓan!’, ammu i ittxarraṣen yinni umi ittɣiř aqa aten di řaman, [ittɣiř asen] aya ittraja inni ittneqraḍen deg iḍaren [nsen].
JOB 12:6 Iqiḍan n imteḥḥayyen arsan, u inni iseɛɛaren Arebbi ɣarsen aṭṭas n řaman. [Maca] wi izemmaren ad yawi Arebbi s ufus nnes?
JOB 12:7 Seqsa xenni řmař, ad ac [t] ssřemden, ijḍaḍ n ujenna ad cek [t] ḥajan.
JOB 12:8 Niɣ xezzareɣ mliḥ ɣar temmurt, nettat ad cek tessɣar, uřa d iseřman n řebḥar ad ac [t] ɛawden.
JOB 12:9 Man wen war issinen marra aya, aqa afus n SIDI i t iggin?
JOB 12:10 Netta d wenni deg ufus nnes iǧa řeɛmar n marra min iddaren, uřa d buḥbeř n kuř arrimet n bnadem.
JOB 12:11 Ma war ittqeǧib umezzuɣ awařen, am ittqasa waneɣ macca?
JOB 12:12 Ɣar iwessura [i teǧa] tiɣit u di tudart tazirart [teǧa] řefhamet?
JOB 12:13 Netta ɣares [i teǧa] tiɣit d jjehd [s tidett], Netta ɣares [i yeǧa] ccwar d řefhamet [nican].
JOB 12:14 Xzar, [mařa] Netta iheddem, war ibenni uřa d ijj [ɛawed], mařa Netta ibelleɛ x ca n yijjen, war d as yarezzem ɛad.
JOB 12:15 Xzar, mařa Netta issbedd aman, ad aẓɣen nitni, mařa yarxu asen, ad ssenqeřben tammurt.
JOB 12:16 Netta ɣares jjehd d ufekki, nnes d wenni iweddaren uřa d wenni issweddaren.
JOB 12:17 Netta ittejja iryazen n ccwar gguren s řeḥfa, řquḍat ittarra i-ten d ibuhařiyyen.
JOB 12:18 Aziyyar n ijeǧiden issbeṭṭeř i-t u [xenni] Netta ittcedda i-ten s ijj n webyas zi tejɛinna nsen.
JOB 12:19 Netta ineddeh ikehhanen s řeḥfa, ayt n jjehd iɣeṭṭer i-ten.
JOB 12:20 Ittekkes awař i iryazen ittwaqeǧben, i iwessura ittekkes asen řefhamet.
JOB 12:21 Aseḥqar ittzeǧaɛ i-t x tarwa n taṣiřet, i ayt n bu-řexcunet issarexxu asen abyas.
JOB 12:22 Imucan yuǧɣen n taǧest ittɛarra xasen, d tiři n řmewt issuffuɣ i-tt ɣar tfawt.
JOB 12:23 Řegnus issemɣar i-ten uca iɣeṭṭer i-ten, Netta ittbezzaɛ řegnus uca ineddeḥ i-ten.
JOB 12:24 Ittekkes řefhamet i izeǧifen n řgens x temmurt, ijja i-ten ttᵉtliɛen di řexřa mani war [ǧin] ibrid[en].
JOB 12:25 Nitni ttemhafan da d diha di taǧest, mani war teǧi tfawt, Netta ittejja i-ten ad mmhafan am yimescar[en].
JOB 13:1 Xzar, qaɛ man aya teẓra i-t tiṭṭ inu, isřa i-t umezzuɣ inu, ifhem as mliḥ.
JOB 13:2 Min tessnem kenniw, ssneɣ t uřa d necc, war weṭṭiɣ ca deg usemquddi akidwem.
JOB 13:3 Maca necc xseɣ ad ssiwřeɣ ɣar Umzemmar x kuřci, meẓreɣ ad wteɣ [tamesřact inu] zzat i Arebbi.
JOB 13:4 Maca kenniw tessuffuɣem ixarriqen, marra kenniw d iḍbiben ixwan.
JOB 13:5 Ax, mři tesseɣdem kenniw marra! Aya ad tiři d tiɣit i kenniw.
JOB 13:6 Sřem xenni mammec ɣa wteɣ x yixef inu, ḥekkarem x umcarraɛ n iyencicen inu!
JOB 13:7 Ma texsem ad tinim řɣecc i řefḍeř n Arebbi, [ma texsem] ad tessiwřem ixarriqen di tizi nnes?
JOB 13:8 Ma tzemmarem ad tewtem tamesřact di ṭṭweɛ nnes? Ma [texsem] ad tcarrɛem i Arebbi?
JOB 13:9 Ma mliḥ i kenniw, mařa Netta ad kenniw iqeǧeb? Ma texsem ad zzayes testehzam am mammec stᵉhezzan [iwdan] zeg ijj n bnadem?
JOB 13:10 Netta ad kenniw iwebbex, mařa kenniw tᵉtteggem s wudmawen s tnuffra.
JOB 13:11 Ma war kenniw issnexřiɛ uɛuǧi nnes, ma war dd xawem tweṭṭi tiggʷudi zzayes?
JOB 13:12 Awařen nwem i řidaret aqa aten d řemtuř n walu, řegɛudi nwem d řegɛudi n ubeǧaɛ.
JOB 13:13 Seɣdem zzati, maḥend ad ssiwřeɣ, ejj ad xafi dd-yas min [i dd ɣa yas].
JOB 13:14 Mayemmi ɣa ṭṭfeɣ aysum [n arrimet] inu jar teɣmas inu, [mayemmi i] ɣa ṭṭfeɣ tudart inu deg ufus inu?
JOB 13:15 Xzar, Netta ixs ad ayi ineɣ, necc ad t rajiɣ, [maca] ad wteɣ x ibriden inu zzates.
JOB 13:16 D wa i d ayi ɣa idweř d asenjem inu, maca amnafeq war dd-ittis zzat i uɣembub nnes.
JOB 13:17 Sřem mliḥ ɣar řhard inu, s imezzuɣen [yarezmen] ɣar ucarreḥ inu.
JOB 13:18 Xzar, necc iwyeɣ ddeɛwet s usettef, ssneɣ ad ttwaseggdeɣ.
JOB 13:19 Man wen [izemmaren] ad kidi imcarrɛen? Xenni ad seɣdeɣ deɣya, ad ssuffɣeɣ buḥbeř.
JOB 13:20 Mɣir war d ayi ttegg tnayen n řeḥwayej, xenni war zzayek ttnuffariɣ:
JOB 13:21 afus nnec siggʷej i-t xafi, war d ayi snexřiɛ s uhuddi nnec!
JOB 13:22 Řaɣa [Cek], necc ad [xak] dd-arreɣ, niɣ necc ad ssiwřeɣ u Cek ad xafi dd-tarred!
JOB 13:23 Mecḥař xafi n řmuɛṣiyyet d ddenb? Scen ayi axeṭṭu inu d ddenb inu.
JOB 13:24 Mayemmi tessnuffared aɣembub nnec, tḥessbed ayi d řeɛdu nnec?
JOB 13:25 Ma texsed ad tessenxeřɛed tafarct i iɛarren usemmiḍ ssa ɣar da, ma texsed ad teḍfared iɣeǧ yuẓɣen?
JOB 13:26 Maɣar tᵉttarid xafi timesřayin timarzagin, tbeṭṭid ayi ddnub n temẓi inu.
JOB 13:27 Tessrusid iḍaren inu deg ukeccuḍ, Cek tḥeṭṭid marra imesraq inu. Tḥeṭṭid tiřeqqa n iḍaren inu,
JOB 13:28 n wenni iggin am ukeccuḍ, ccin t ikeccawen, [xenni] yarecca, am warruḍ icca i-t tcinda.
JOB 14:1 Bnadem i dd-ittwaxeřqen zi temɣart, aqa ussan [n tudart] nnes udrusen u netta iccur s řeḥweř.
JOB 14:2 Netta iɣemmi am tnewwact, xenni ittwaqḍeɛ. Ittrakkwař am tiři, war ittɣimi.
JOB 14:3 Waxxa amenni tarezmed tiwa nnes tiṭṭawin nnec, tᵉttawyed ayi-dd di ddeɛwet akidek.
JOB 14:4 Man wen izemmaren ad issuffeɣ ijj n umezdag zeg umexmuj? Uřa d ijj!
JOB 14:5 Mara ussan nnes urin, řqedd n iyuren nnes [aqa ittwassen] ɣarek uca teggid as řeḥdud nnes nni war d as iɛeddeř ad ten iɛdu,
JOB 14:6 neqřeb [xenni] xas maḥend ad yareyyeḥ, ařami izemmar ad yarr meẓri am yijj n ucewwař deg wass nnes.
JOB 14:7 Maɣar i tcejjart aqa din ɛad řayas! Mařa tᵉttwaqess, ad tessuffeɣ ɛawed [řefruɛ], řefruɛ nnes war ttbeddin zeg uɣemmi.
JOB 14:8 Waxxa iwsar weẓwar nnes di temmurt, immut jjdeɛ nnes deg ucař,
JOB 14:9 ad teɣmi tcejjart [ɛawed] xmi ɣa taca ak-d waman, ad tessuffeɣ [ɛawed] řefruɛ am ict n tcejjart ẓẓun tt beḥřa.
JOB 14:10 [Maca mařa] immut ijj n weryaz, ifenna, [mařa] iffeɣ as buḥbeř i bnadem, mani iǧa xenni?
JOB 14:11 Aman tteffɣen-dd zi řebḥar, iɣzar ittaẓeɣ u ixekkwa.
JOB 14:12 Izzeř bnadem din, war ittekkar ɛad. Ař war ttiřin ɛad ijenwan, war d ttfiqin, war ttwassekkaren zeg iḍeṣ nsen.
JOB 14:13 Ax, mři d ayi ɣa tarred ɣar řaxart, ad ayi tessnuffared ař ɣa iḥeyyed weɣḍab nnec, mři d ayi turid ijj n řmijař imten, [ḥima] ad ayi tidared [ɛawed]!
JOB 14:14 Mařa ijj n weryaz immut, ma ad dd-idweř ɣar tudart? [Xenni] ad qqimeɣ ttrajiɣ marra ussan n umenɣi inu, ař dd-yusa ufekki inu.
JOB 14:15 Mařa [xenni] Cek třaɣid, necc ad Cek dd-arreɣ uca Cek ad temmeẓřed ɣar řxedmet n ifassen nnec.
JOB 14:16 Maca řexxu tḥessbed iṣuraf inu, war tmennɛed [lɣaḍab nnec] x ddnub inu.
JOB 14:17 Axeṭṭu inu ittwacemmeɛ di tcemmust, ɣar řmuɛṣiyyet inu tarnid [dayes] ktar.
JOB 14:18 Wah, adrar iweṭṭan, ifessi, jarf iḥruǧed zeg wemcan nnes,
JOB 14:19 aman tteddzen iẓra, iɣezran nnes ttekksen acař n temmurt, ammu i tareddǧed řayas n bnadem.
JOB 14:20 Cek tarennid dayes i řebda, [xenni] yuyur. Tᵉttbeddařed udem nnes uca tessekked i-t.
JOB 14:21 [Mařa] iḥenjiren nnes ṭṭfen ccan, netta war t issin, [mařa] ten deǧen, war kidsen ittici.
JOB 14:22 Maca arrimet nnes tᵉttnezbar di ṭṭweɛ n yixef nnes [waha], u řeɛmar nnes ittecḍin di ṭṭweɛ nnes.
JOB 15:1 [Xenni] yarra-dd Ilifaz, wenni dd-yusin zi Tayman, inna:
JOB 15:2 Ma ittarra-dd ijj n umiɣis s tussna ixwan? Ma ad iccur aɛeddis nnes s usemmiḍ i dd-ittasen zi manis dd-tneqqar tfuct?
JOB 15:3 Ma ittcarraɛ s řharي war ineffɛen, s wawařen nni war ittakkwaḍen?
JOB 15:4 Cek tarẓid tiggʷudi [n Arebbi], tekksed taẓaǧit zzat i wudem n Arebbi.
JOB 15:5 Maɣar aqemmum nnec issargeb řmuɛṣiyyet nnec, aqa itteɛjib ac řhard s tḥraymect s yiřes [nnec].
JOB 15:6 Aqemmum nnec ad cek iḥkem, war iǧi necc, iyencicen nnec ad xak cehden.
JOB 15:7 Ma cek d bnadem d amezwaru nni dd-ittwaxeřqen? Niɣ tᵉttwarwed qbeř tiwririn?
JOB 15:8 Ma tessḥessed i wegraw n imcawaren imtiqqan n Arebbi, ma tjebbded tiɣit ɣarek?
JOB 15:9 Min tessned cek, neccin war t nessin? Min tfehhmed cek, aqa inqeṣ ɣarneɣ?
JOB 15:10 Uřa jar aneɣ d amcaybu d uwessar, nitni d imɣaren deg wussan x babac.
JOB 15:11 Ma asfewwej n Arebbi drus ɣarek, niɣ ijj n wawař ssiwřen t akidek s terɣeɣ?
JOB 15:12 Mayemmi cek issetlaɛ wuř nnec, mayemmi qeǧɛent tiṭṭawin nnec,
JOB 15:13 aqa tessneqřabed buḥbeř nnec x Arebbi, [ařami] tessuffuɣed [marra] awařen nni zeg uqemmum nnec?
JOB 15:14 Min iɛna bnadem aqa netta ad yiři d amezdag, [min iɛna] wenni dd-ittwaxeřqen zi temɣart, aqa netta ad yiři d amsegged?
JOB 15:15 Xzar, imqeddasen nnes war xasen ittciř, uřa d ijenwan war ǧin ṣfan di tiṭṭawin nnes!
JOB 15:16 Ahtat ɛad ijj n nnɛi n bnadem d bu-ufessad, wenni isessen min war iḥřin am waman!
JOB 15:17 Necc xseɣ ad ac [t] ssecneɣ, seř-dd ɣari, [xenni] ad ɛawdeɣ min ẓriɣ,
JOB 15:18 min ɛawden imiɣisen, am war ffaren [ca] n řejdud nsen.
JOB 15:19 I nitni waha umi temmewc temmurt, uřa d ijj n řbarrani war xas iɛdu.
JOB 15:20 Marra ussan i iddar uɛeffan, imarret ixef nnes, řqedd n iseggʷusa i ittwaxemmřen i bu-řexcunet, aqa inuffar xas.
JOB 15:21 [Yudef-dd] řḥess n iɣuyyan issnexřaɛen ɣar imezzuɣen nnes. [Ɛad di řweqt n] řehna ad xas iwḍa umteḥḥay.
JOB 15:22 Netta war ittriji ad dd-iɛqeb zi taǧest, [maca] aqa netta ittwagg i ssif.
JOB 15:23 Netta ittemhafa da d diha x weɣrum. ‘[A,] mani [i yeǧa]?’ Netta issen aqa ittraja i-t wass d abarcan deɣya.
JOB 15:24 Ḍḍiqet d řeḥṣaret ssaggʷadent netta, arnint i-t am yijj n ujeǧid iwjed i umenɣi.
JOB 15:25 Maɣar ɣar Arebbi isswiẓẓaḍ netta afus nnes, ak-d Umzemmar x kuřci imenneɛ [taɣennant] tameqqrant.
JOB 15:26 S yiri imeḥḍen ittazzeř ɣares, [innufrar] ɣar ḍeffar n tseddariyin nsen [n uɛeskari] s ibuṭunen igdaren.
JOB 15:27 Maɣar iřeḥḥef i uɣembub nnes s tadunt, igga tadunt i tejɛinna nnes.
JOB 15:28 Izeddeɣ di tneddam ittwahedmen, [di] tudrin war daysent izeddeɣ [ɛad] uřa d ijj, tinni yuran maḥend ad dewřent d řxirbat.
JOB 15:29 Netta war iddikkwiř d bu-wagřa, agřa nnes war ittɣimi, mařa min dd-ikseb war yarenni x temmurt.
JOB 15:30 Netta war inejjem i taǧest, aceɛɛař [n tmessi] ad yecc řefruɛ nnes, ad ifna s řeɛwin n uqemmum nnes.
JOB 15:31 Ejj i-t war ittciři x řɣecc, maɣar [xenni] i ɣa tiři uřa d řmunet nnes d řɣecc.
JOB 15:32 Mařa war dd-yusi [ɛad] wass nnes, ad ittwakemmeř [ɛad], maɣar taseṭṭa n tini nnes war tzeyziw.
JOB 15:33 Ad isseɣḍeř aḍiř war issnedyen nnes am yict n tzayart, ad immenḍar nnuwar nnes am tzitunt.
JOB 15:34 Maɣar abarru n imnafqen aqa-t břa řɣiǧet u timessi tᵉttett iqiḍan [i iccuren] s řɣecc.
JOB 15:35 Aqa aten s ddeyset zi tamara, tturwen řɣecc, řexdeɛ aqa-t deg uɛeddis nsen.
JOB 16:1 [Xas uca] yarra-dd Ayub, inna:
JOB 16:2 Manawya sřiɣ as aṭṭas, kenniw marra idwem tessbeṭṭřem ayi afewwej.
JOB 16:3 Ma ad qḍan wawařen ixwan? Niɣ min cek iɛarrnen [ɛad] ad dd-tarred awař?
JOB 16:4 Uřa d necc [zemmareɣ] ad ssiwřeɣ am kenniw, mařa aqa kenniw deg wemcan inu. Iři ad mudeɣ awařen xawem u ad xawem hezzeɣ azeǧif inu.
JOB 16:5 Ad kenniw ssmeḥḍeɣ s uqemmum inu u afewwej n iyencicen inu ad awem yawi řefsaset.
JOB 16:6 Mařa ssiwřeɣ, war xafi ittejji řeḥřiq inu u mařa sseɣdeɣ, ma ad xafi iḥeyyed?
JOB 16:7 Řexxu issiḥeř ayi Netta, tessarjfed Cek marra tawacunt inu.
JOB 16:8 Cek tessduruyed ayi s teqcurt [n teřmect], tenni d tacehhadt xafi, uca tekkar xafi [arrimet] inu tamusriwt, tᵉttcetca zzayi deg uɣembub inu.
JOB 16:9 Aɣḍab nnes imezzeq, iḍeffar ayi-dd. Netta ittɣezza ɣari tiɣmas. Aɣrim inu issqeṭṭaɛ-dd ɣari tiṭṭawin.
JOB 16:10 Nitni ttcarragen aqemmum nsen xafi, ccaten ayi s řḥegra ɣar uqabsi, ttekkaren xafi ttmunen.
JOB 16:11 Isellem ayi Arebbi i yijj n mmis n řmuɛṣiyyet, iɛarren ayi deg ufus n iɛeffanen.
JOB 16:12 Tuɣa ayi di řhudnet, maca Netta yarẓa ayi, icebbar ayi deg ijiman, iřbez ayi. Issbedd ayi d taḥjurt i Yixef nnes.
JOB 16:13 Imjebbaden [nnes] [n řqews] nnḍen ayi-dd, Netta issnuqqub ayi tiẓẓař břa ahaweř, ittzeǧaɛ ɣar temmurt iẓi inu,
JOB 16:14 yareẓẓa ayi tareẓẓit awarni i treẓẓit nneɣni, iɛref-dd xafi am bu-teɣruḍt.
JOB 16:15 Xeyyḍeɣ taxancet [n wecḍan] i teřmect inu, icc inu sswessxeɣ di tɛejjact.
JOB 16:16 Aɣembub inu izweɣ zeg imeṭṭawen, tiři n řmewt aqa-tt x wabřiwen inu,
JOB 16:17 waxxa war yarsi lɛunf x ifassen inu u taẓaǧit inu teṣfa.
JOB 16:18 [Uh] tammurt, war ddař idammen inu, war ttejji iɣuyyan inu ad afen amcan [i arraḥet]!
JOB 16:19 Xzar, uřa d řexxu, Acehhad inu deg ujenna, Amcafeɛ inu x řegɛudi.
JOB 16:20 Imeddukkař inu d yinni zzayi isthezzan, [maca] tᵉttru tiṭṭ inu ɣar Arebbi.
JOB 16:21 Ejj-i-t ad iwwet ddeɛwet x weryaz ɣar Arebbi, am ijj n mmis n bnadem x umeddukkeř nnes.
JOB 16:22 Maɣar drus n iseggʷusa i-dd ɣa yasen [ɛad], qbeř i ɣa uyureɣ abrid war zzayes ttɛiqqibeɣ.
JOB 17:1 Buḥbeř inu yarjef, ussan inu [ineggura] xesyen, [mɣir] imeḍřan d ayi iqqimen.
JOB 17:2 S tidett, inni istehzan aqa aten ɣari, u tiṭṭ inu tessɛeddu ǧiřet jar ixarriṣen nsen imarzagen!
JOB 17:3 Egg Ixef nnec d aḍman i necc [din] ɣarek. Man wen [xenni] i ɣa iwten [afus nnes] deg ufus inu [i man aya]?
JOB 17:4 Maɣar Cek tekksed [marra] řefhamet x wuř nsen, x uya Cek war ten tessɛuǧid ca.
JOB 17:5 Wi ɣa iɣdaren imeddukkař nnes di ṭṭweɛ n tkeccaḍt, tiṭṭawin n iḥenjiren nnes ad nɛedment.
JOB 17:6 Netta igga ayi d lmatal jar řegnus, ařami dewřeɣ am yijjen ssusufen as x uɣembub.
JOB 17:7 S uya i teɛmec tiṭṭ inu zeg wecḍan, marra iɣezdisen inu aqa aten am tiři.
JOB 17:8 Inni igguren nican ttnexřaɛen zi man aya, amezdag ittneqřab x umnafeq.
JOB 17:9 Amsegged imenneɛ deg webrid nnes, wenni ɣar iǧa ifassen imezdagen, yarenni di jjhed.
JOB 17:10 Maca marra kenniw, dewřem-dd, asettiw-dd da, maɣar war ufiɣ uřa d ijj n umiɣis jar awem.
JOB 17:11 Ɛdun wussan inu, ttwaqeḍɛen inwayen inu, marra meẓri n wuř inu.
JOB 17:12 Ǧiřet tteggen tt d ass, [qqaren:] aqa tafawt tᵉttades-dd xmi dd ɣa tewḍa taǧest.
JOB 17:13 Mařa ssitmeɣ [ɛad], [ssitimeɣ] aqa řaxart ad tiři d taddart inu, ad bezzɛeɣ tassut inu di taǧest.
JOB 17:14 Ɣar [weḥfur n] turṣuḍi řaɣiɣ: ‘Cek d baba!’, ɣar ikecca: ‘Yemma!’ d: ‘Učma!’
JOB 17:15 Mani iǧa xenni řayas inu? Řayas inu, man wen [izemmaren] ad t iẓar?
JOB 17:16 Ad hwan ɣar ṭṭrufa n řaxart, xmi i ɣa naf nmun arraḥet deg ucař.
JOB 18:1 [Xas uca] yarra-dd Bildad, wenni dd-yusin zi Cuḥa, inna:
JOB 18:2 Ař meřmi [ɛad tarezzum] ad tᵉṭṭfem [ijj n bnadem] x wawařen nnes? Mařa tfehmem, [xenni] awarni i uya ad nessiweř.
JOB 18:3 Mayemmi d aneɣ ittwagg am řmař u nettwaḥṣar di buḥbeř di tiṭṭawin nwem?
JOB 18:4 [Cek, a yaryaz] wenni ittmezzqen ixef nnes deg uxeyyeq nnes! Ma ad jjen temmurt [di ssibbet nnec], ad ittwassmuṭṭi jjarf zeg wemcan nnes [di ssibbet nnec]?
JOB 18:5 Wah, tafawt n iɛeffanen ad texsi, aceɛɛař n tmessi n [uɛeffan] war ittegg tafawt [ɛemmarṣ ɛad].
JOB 18:6 Tafawt di tqidunt nnes ad tebbarcen, řefnar nnes tiwa nnes ad t ssxesyen.
JOB 18:7 Ttarjijen iṣuraf nnes ijehden, ccwar [n yixef] nnes ad t iɣḍeř.
JOB 18:8 Maɣar s iḍaren nnes ad innaɣ deg uṣennaj, ad yuyur x tracca, mmuden tt i tneymart.
JOB 18:9 Taxceft ad t temneɛ zeg unirz, řfex ad dayes tᵉṭṭef.
JOB 18:10 Tennuffar tesɣunt [n řfex] di temmurt, řfex aqa-tt x webrid.
JOB 18:11 Ssiggʷeden t inexřiɛen zi marra iɣezdisen, ḍeffaren t ɣar iḍaren nnes.
JOB 18:12 Ittwaḥṣar dayes jjehd nnes, aḍeyyeɛ ittraja i-t ɣar uɣezdis nnes.
JOB 18:13 [Arẓiyyet] ad tecc [marra] iɣezdisen n arrimet nnes, iɣezdisen [n arrimet nnes] ad ten yecc ijj n řeḥřac ineqqen.
JOB 18:14 Minxef tuɣa ittceř, ittwaqřeɛ zi tqiḍunt nnes. Tneddeh i-t arẓiyyet ɣar ujeǧid n inexřiɛen.
JOB 18:15 Iwdan nni war ǧin d yinni nnes, zeddɣen deg uqiḍun nnes, řecbariyyet tᵉttwazuzzar x tzeddiɣt nnes.
JOB 18:16 Sadu netta ttaẓɣen iẓewran nnes, zi sennej ttwaqessen řefruɛ nnes.
JOB 18:17 Řidaret nnes ad tᵉttwakkes zi temmurt, war d as ittɣimi [ɛad] isem deg webriden.
JOB 18:18 Ad t ɛarnen zi tfawt ɣar taǧest, ad sstewwjen zi ddunect.
JOB 18:19 War ɣares ittiři warraw niɣ jjadira di řgens nnes, war ittɣimi uřa d ijj ad iddar di tzeddiɣin nnes.
JOB 18:20 X wass nnes ad arjijen inni izeddɣen ɣar mani tɣeǧi tfuct, inni izeddɣen ɣar manis i dd-tneqqar tfuct ad ten tᵉṭṭef tiggʷudi.
JOB 18:21 Wah, ammu i tᵉttemsar i tzeddiɣin n imeqjaḥen, wa d amcan n yinni war issinen Arebbi.
JOB 19:1 Yarra-dd Ayub, inna:
JOB 19:2 Mecḥař ɛad i ɣa tekkem tceḍnem řeɛmar inu, ad ayi třebzem s wawařen?
JOB 19:3 [Řexxu] ɛad wiss ɛecra n twařawin ttekkwarem ayi, war tᵉttseḍḥim umi d ayi dd-tɣeṭṭřem awař.
JOB 19:4 Mařa s tidett weddareɣ, ad iqqim uweddar inu i ixef inu.
JOB 19:5 Mařa s tidett texsem ad xafi tessgeɛɛdem ixef nwem s cciki, ad ayi tessqenɛem s řefḍiḥet inu,
JOB 19:6 snem xenni, aqa Arebbi inneqřeb xafi, uca inneḍ ayi-dd s tracca nnes.
JOB 19:7 Xzar, sɣuyyuɣ: ‘Řexcunet!’, maca war xafi dd-yarri uřa d ijj, ttřaɣiɣ i twiza, maca řḥeqq war [din] iǧi.
JOB 19:8 Abrid inu iqqen i-t, ařami war zemmareɣ ad ɛduɣ, taǧest issu tt x imesraq inu.
JOB 19:9 Řɛezz inu ikecceḍ i-t zzayi, u ttaj i iǧan x uzeǧif inu ikkes i-t.
JOB 19:10 Netta yareddeǧ ayi zi marra iɣezdisen, ad ttwahellkeɣ! Iqřeɛ řayas inu am yict n tcejjart.
JOB 19:11 Aɣḍab nnes yarɣa dayi, Netta iḥesseb ayi am [ijj zeg] iɣrimen nnes.
JOB 19:12 Munent ffɣent-dd bandiyyat nnes, sswejdent-i-dd abrid nsent ɣari uca quwwarent i tqiḍunt inu.
JOB 19:13 Aytma issiggʷej i-ten xafi, inni d ayi issnen dewřen d midden xafi.
JOB 19:14 Inni d ayi itteɛnan jjin ayi, inni d ayi issnen ttun ayi.
JOB 19:15 Imsexxaren n taddart inu d tiyya inu ḥessben ayi d řbarrani, necc d aɣrib jar tiṭṭawin nsen.
JOB 19:16 Řaɣiɣ i umsexxar inu, [maca] war xafi dd-yarri, tuɣa ittxeṣṣa ad t ḥeccmeɣ s uqemmum inu.
JOB 19:17 Řeɛwin n temwarrit n nnefs inu issɛiff tamɣart inu, arṣuḍeɣ i aytma.
JOB 19:18 Ɛad iḥramen imeẓyanen sseḥqaren ayi. Mařa kkareɣ beddeɣ, ttemɛarran xafi s wawařen nsen.
JOB 19:19 Marra immeddukkař inu iɛizzen carrhen ayi, inni ttexseɣ, nnqeřben xafi.
JOB 19:20 Ɣar teřmect d weysum inu řessqen iɣsan inu. Necc nejmeɣ ak-d tiřmect n teɣmas inu [waha].
JOB 19:21 Ḥinnem xafi, ḥinnem xafi, [a] kenniw, imeddukkař inu! Maɣar afus n Arebbi iřqef ayi.
JOB 19:22 Mayemmi d ayi tḍaffarem am tt ittegg Arebbi, u mayemmi war ttjiwinem aysum inu?
JOB 19:23 Mři uran awařen inu, mři ttwazemmemen deg ijj n wedlis!
JOB 19:24 Mři ttwaneqcen s pluma n wuzzař u s řexfif di jjarf i řebda.
JOB 19:25 Necc ssneɣ: ‘Amefdi inu iddar u Netta ad dd-ikkar d Aneggar x ucař.’
JOB 19:26 U awarni řami i ɣa tᵉttwařbez teřmect inu ammu, ad ẓareɣ Arebbi zi arrimet inu.
JOB 19:27 Ad t ẓareɣ zzati, tiṭṭawin inu ad t ẓarent, war iǧi midden. Ɣares i ttmeẓrent tiẓẓař inu ɣar daxeř inu.
JOB 19:28 Waxxa amenni kenniw ad tinim: ‘Mammec i nzemmar ad t neḍfar?’ [maɣar] aẓwar n tmesřact ittwaf dayi.
JOB 19:29 Ggʷedem zi ssif, maɣar s ssif [ad dd-yas] wesɛar x ddnub ineqqen, maḥend ad tessnem aqa [ad yiři] řḥukm.
JOB 20:1 [Xenni] yarra-dd Ṣufar, wenni dd-yusin zi Naɛma, inna:
JOB 20:2 Ixarriṣen inu ttɣiman dekkwařen-dd ɣari zi ssibbet n uqeǧeq [i war ittbeddin] di [řbař] inu.
JOB 20:3 Sřiɣ ijj n uwebbex i d ayi issbehdařen, [maca] buḥbeř ad xafi dd-yarr s řefhamet inu.
JOB 20:4 [Iwa] tessned aya, aqa-t din zeg wecḥař uya, zeg wami ittwassars bnadem x temmurt,
JOB 20:5 aqa asřiwřew n iɛeffanen ittekk drus [waha], řefraḥet n umnafeq [mɣir] ict n tzeḥziḥt.
JOB 20:6 Waxxa tᵉttgeɛɛad nnfaxet nnes ař ijenwan, waxxa ittḥada azeǧif nnes ař iseynuten,
JOB 20:7 am mammec isufɣan nnes ad qḍan i řebda, ad iqḍa uřa d netta i řebda. Inni t iẓrin, ad inin: ‘Mani iǧa netta?’
JOB 20:8 Am ict n tirja ad iḍuw, ařami war ittwif [ɛad], ad ittwassetleɛ am ijj n řewḥiy n ǧiřet.
JOB 20:9 Tiṭṭ i t iẓrin war [t] tẓarr ɛawed, u amcan nnes war t iẓarr [ɛemmarṣ].
JOB 20:10 Iḥenjiren nnes ad ssjiwnen imezřaḍ, [ammu] i dd ɣa yarren ifassen nnes agřa nnes.
JOB 20:11 Ixsan nnes iccuren s temẓi, ad zzřen akides deg ucař.
JOB 20:12 Mařa řɣar deg uqemmum nnes d [a]miẓid, mařa issnuffar i-t sadu iřes nnes,
JOB 20:13 mařa iḥḍa i-t, war ixs ad xas iḥeyyed, [maca] imenneɛ i-t deg waneɣ nnes,
JOB 20:14 [xenni] ad tbeddeř macca nnes deg uɛeddis nnes, di daxeř nnes ad tedweř d arrhaj n trefsiwin.
JOB 20:15 Iṣarḍ agřa, [maca] ad t-i-dd-iɛuqq [ɛawed]. Ad t-i-dd-inḍar Arebbi ɣar barra zeg uɛeddis nnes.
JOB 20:16 Arrhaj n trefsiwin ad t iṭṭeḍ, iřes n ufiɣar ad t ineɣ.
JOB 20:17 War iẓarr iɣezran, tiɣezratin d taryawin [ittazzřen] s tamment d uɣi.
JOB 20:18 Ad dd-yarr řefḍeř n umarret nnes, war t isseɣřay, war ineggez s řefraḥet zi ssibbet n wagřa i dd-ikseb,
JOB 20:19 maɣar ideǧ imezřaḍ, ijja i-ten břa twiza, yucar taddart nni war issbedd,
JOB 20:20 maɣar war issin řhudnet di daxeř nnes, [s uya] war inejjem s [marra] min di tuɣa immeẓri.
JOB 20:21 War ittceṭṭi walu i umerɛiq nnes, x uya war ittɣimi zzhar nnes ibedd.
JOB 20:22 Mařa ɣares afeyyeḍ imun, ad ittwaḥsar, ad xas yiři [u]fus n kuř řmeskin.
JOB 20:23 Aya ad yiři ḥima ad iccur aɛeddis nnes, [wah, AREBBI] ad xas issekk řḥaduq n weɣḍab nnes, ad t yarr ad xas iwwet [am wenẓar] [uca ad t yarr ad icukk] di arrimet nnes.
JOB 20:24 Waxxa ad yarweř zi řesnaḥ n wuzzař, ad t issnuqqeb řqews n nnḥas.
JOB 20:25 Ijebbed [ijjen zzayes fřitca], aqa teffeɣ-dd zi arrimet nnes, řmacam yareqqen [itteffeɣ-dd] zeg iẓi nnes, [wah] inexřiɛen ad xas kken.
JOB 20:26 Taǧest tekmeř tᵉttḥama ɣar txubay nnes inuffaren, timessi war tt issiɣ uřa d ijj, ad t tecc, ad tarr meẓri ak-d yinni iceṭṭen di tqiḍunt nnes.
JOB 20:27 Ajenna ad iɛarra řmuɛṣiyyet nnes, tammurt ad xas tɣewweɣ.
JOB 20:28 Řɣiǧet n taddart nnes ad traḥ, ad tazzeř deg wass n weɣḍab nnes.
JOB 20:29 Wa d min i dd-ikkaren i iɛeffanen zi AREBBI, tasɣart i d as inna Arebbi.
JOB 21:1 [Xenni] yarra-dd Ayub, inna:
JOB 21:2 Sřem mliḥ i wawařen inu, ḥima ad awem iřin i usfewwej.
JOB 21:3 Ksim ayi, [xenni] ad ssiwřeɣ, u awarni řami ssiwřeɣ, tzemmarem ad tɛeffarem.
JOB 21:4 Ma acetci inu x ijj n bnadem? Niɣ mayemmi war d ayi dd-ikkar ad yiři buḥbeř inu břa ttasiɛ n řxaḍar?
JOB 21:5 Qeřbem-dd ɣari uca jɛarem, sarsem afus x uqemmum.
JOB 21:6 [Mařa] xemmeɣ [waha] deg uya, ttnexřiɛeɣ u tmenneɛ tarjijit arrimet inu.
JOB 21:7 Mayemmi ttɣiman iɛeffanen ddaren, [mayemmi] ddakkwařen iwessura, ttmarnin ɛad di jjehd nsen?
JOB 21:8 Tarwa nsen ttɣiman bedden zzat i uɣembub nsen, aqa aten ɣarsen, u [iḥenjiren] iɣedduten nsen zzat i tiṭṭawin nsen.
JOB 21:9 Tudrin nsen aqa atent di řehna nhřa anexřiɛ, aɛmud n Arebbi war ten iccit.
JOB 21:10 Afunas nnes ittarra u war ixeṭṭi, tafunast nnes tᵉttaru, ɛemmarṣ war tɣeṭṭeř aɛeddis.
JOB 21:11 Ttejjan imeẓyanen nsen gguren am yict n tḥimart, iḥenjiren nsen [ttejjan ten] neggzen.
JOB 21:12 Nitni ssgeɛɛaden [tmijja nsen] ɣar ubendir d řgambri, farrḥen ɣar tmijja n temja.
JOB 21:13 Ssɛeddun ussan nsen di zzhar, [maca] hekkwan ɣar řaxart deg wermac n wabřiwen.
JOB 21:14 Qqaren i Arebbi: ‘Ḥeyyed xaneɣ, maɣar war d aneɣ iɛjib ad nessen ibriden nnec.
JOB 21:15 Man wen iǧan d Amzemmar x kuřci maḥend ad as nsexxar? Man lfayda i ɣarneɣ mařa nziyyar xas [s tẓaǧit nneɣ]?’
JOB 21:16 Xzar, zzhar nsen war iǧi deg ufus nsen. Ccwar n iɛeffanen iggʷej xafi.
JOB 21:17 Mecḥař n twařawin txessi [xenni] i iɛeffanen tfawt [nsen], uca iřeqqef i-ten uḍeyyeɛ, [mecḥař n twařawin] ibeṭṭa Netta [xasen řeḥřiq] deg weɣḍab nnes,
JOB 21:18 [ařami] i ɣa dewřen am uřum zzat i usemmiḍ, am iɣeǧ texḍef i-t tḥaryaḍt?
JOB 21:19 [Ma teqqarem]: ‘Arebbi ittxemmeř [lɛiqab] [i] řmuɛṣiyyet nnes i iḥenjiren nnes!’ Ejj i-t ad as tt ixeǧeṣ ař ɣa yaca netta [simant nnes]!
JOB 21:20 Ejj tiṭṭawin nnes ad ẓarent ahellek nnes, [ejj i-t] ad isu [s yixef nnec] zeg wesɛar n Umzemmar x kuřci.
JOB 21:21 Maɣar mammec i ɣa yarḍa ɛad di [aytbab n] taddart nnes awarni [i řmewt] nnes, mařa tᵉttwagg [ɛad] qedda n iyuren nnes?
JOB 21:22 Ma zemmaren ad ssřemden tussna i Arebbi, Wenni iḥekkmen x yinni iǧan deg ujenna yuɛřan?
JOB 21:23 Aqa din ijjen immut di zzhar imun, am [iddar ɛad] qaɛ di řehna u di řhudnet.
JOB 21:24 [am] ɛemmaren řemdawed nnes s uɣi u ittwabezzeg waduf n yeɣsan nnes.
JOB 21:25 Wenneɣni immut s řeɛmar d amarzag, war dd-yiwi řiqqi i walu n řxar.
JOB 21:26 Munen zzřen nitni deg ucař u ikeccawen dřin ten.
JOB 21:27 Xzar, ssneɣ ixarriṣen nwem, uřa d timeɛmač nni zi d ayi tdeřmem,
JOB 21:28 xmi teqqarem: ‘Mani teǧa taddart n umcenneɛ [ittmeẓrin di ṣṣulṭa], mani teǧa tqiḍunt [s tzeddiɣin], tazeddiɣt n uɛeffan?’
JOB 21:29 Ma ɛemmarṣ war tesseqsim imsebriden? Aqa iceyyaren nsen ittqarran war tzemmarem ad ten tenkarem:
JOB 21:30 maɣar aɛeffan ad ittwaḥḍa deg wass n arẓiyyet, deg wass n uduqqez [n ufugem] ad ttwawyen nitni [di řaman].
JOB 21:31 Man wen i t ɣa issecnen abrid nnes deg uɣembub nnes? Mařa igga [ca n tuɛeffna], wi [t] i ɣa ixeǧṣen?
JOB 21:32 Netta maca ad ittwaksi ɣar wenḍeř nnes [d ameqqran] u ɣar tewrirt n wenḍeř nnes ittɛess netta [s yixef nnes].
JOB 21:33 Ttɛejiben as ibursa n teɣzurt, ḍeffaren t marra iwdan u inni d as ittizwaren, war zemmaren ad ten ḥesben.
JOB 21:34 Mammec texsem ad ayi tɛezzam s [wawařen] ixwan? Zi temwarrit nwem war ittɣimi [walu] mɣir řeɣḍar [waha].
JOB 22:1 [Xenni] yarra-dd Ilifaz, wenni dd-yusin zi Tayman, inna:
JOB 22:2 Ma izemmar bnadem ad infeɛ Arebbi? Wenni iggin s řeɛqeř ineffeɛ [mɣir] i yixef nnes.
JOB 22:3 Ma aqa-t d lfayda i Umzemmar x kuřci aqa cek tseggded, niɣ d řefḍeř mařa cek teggured deg ibriden nnec s řeṣfayet?
JOB 22:4 Ma iwti i cek zi ssibbet n tiggʷudi nnec [zzayes], niɣ ad yadef akidek ɣar taddart n ccreɛ?
JOB 22:5 Ma war teǧi tuɛeffna nnec d tameqqrant, u řmuɛṣiyyat nnec [ma war ǧint] nhřa asbeddi?
JOB 22:6 Maɣar tḥewwsed ddiyyet zeg aytmac baṭeř, tekksed arruḍ i yinni s drus n werruḍ waha.
JOB 22:7 Wenni yuḥřen war d as tewcid ad isu, wenni iǧuzen tqeḍɛed as aɣrum.
JOB 22:8 [Maca] mařa din aryaz s uɣiř ijhed, [xenni] tammurt aqa-tt i wanita, ad dayes izdeɣ ca n weryaz n ccan.
JOB 22:9 Tijjař tsekked tent s ifassen xwan, iɣaǧen n uyujiř ttwařebzen.
JOB 22:10 X uya nnḍent ac řefxux, uca tewḍad-dd xak tiggʷudi.
JOB 22:11 Niɣ war tᵉttwiřid taǧest, d řḥemřet n waman nni cek yedřin?
JOB 22:12 Ma war iǧi Arebbi yuɛřa deg ujenna? Xzar itran [nni iǧan] sennej qaɛ, mammec ɛuǧen!
JOB 22:13 [Maca] teqqared: ‘Min issen Arebbi? Ma izemmar ad iḥkem [nican] zeg useynu ibbumbsen?
JOB 22:14 Iseynuten d ařeḥḥef i Netta ařami war ittwiři, u x řqubbet n ujenna iggur Netta.’
JOB 22:15 Ma texsed ad teḍfareḍ amesruq n wecḥař uya, amesruq nni kkin yeryazen [iccuren] s řmuɛṣiyyet,
JOB 22:16 inni ittwakksen am war dd-yiwiḍ [ɛad] řmijař nsen, [umi] tfeyyeḍ řḥemřet dsas nsen,
JOB 22:17 inni innan i Arebbi: ‘Aggʷej xaneɣ!’ Min izemmar Umzemmar x kuřci ad yegg [ɛad] i nitni?
JOB 22:18 Iwa, waxxa Netta iccur tudrin nsen s řxar! Ccwar n iɛeffanen iggʷej xafi.
JOB 22:19 Ẓrin tt imseggaden uca farḥen, amezdag istehza zzaysen.
JOB 22:20 ‘Aɣrim nneɣ ittwakeḥḥeḍ u min zzaysen iqqimen tecca i-t tmessi.’
JOB 22:21 Qqen ɣares, ad ɣarek tiři řhudnet, S uya ad ɣarek dd-yas min iṣebḥen.
JOB 22:22 Ksi xenni taɣuri zeg uqemmum nnes, egg awařen nnes deg wuř nnec.
JOB 22:23 Mařa tdewřed-dd ɣar Umzemmar x kuřci, ad tᵉttwassbedded. Siggʷej min war iseggden x tqiḍunin nnec.
JOB 22:24 Sars ureɣ iqquren deg ucař, ureɣ zi Ufir jar iẓra n tɣezratin.
JOB 22:25 [xenni] Amzemmar x kuřci ad yiři [amecnaw] ureɣ iqquren nnec, [amecnaw] idurar yuɛřan n nnuqart i cek!
JOB 22:26 Maɣar xenni ad tfarḥeḍ zeg Umzemmar x kuřci, ad tessgeɛɛded aɣembub nnec ɣar Arebbi.
JOB 22:27 Ad as tᵉttared s tẓaǧit yuǧɣen u Netta ad ac iseř, u cek ad tkemmřed lwuɛud nnec.
JOB 22:28 Mařa tekksed awař, xenni ad ac dd-teffeɣ [tmesřact], u tafawt ad tareɣ deg ibriden nnec.
JOB 22:29 Mařa ssehwan nitni ijjen, ad tinid: ‘Sgeɛɛed [azeǧif nnec]!’, Netta ad issenjem wenni isshekkwan tiṭṭawin nnes.
JOB 22:30 Netta ad issenjem wenni war iǧin břa řɛib, minzi netta ad injem s tezdugi n ifassen nnec!
JOB 23:1 Yarra-dd Ayub, inna:
JOB 23:2 Uřa d ass-a acetci inu d aɣennan, issedqeř afus inu x uneffes inu.
JOB 23:3 Mři ssneɣ, mani zemmareɣ ad t afeɣ, maḥend ad awḍeɣ ɣar tzeddiɣt nnes.
JOB 23:4 [Xenni] ad bezzɛeɣ zzates ddeɛwet, ad ccureɣ aqemmum inu s wawařen i ucarreɛ.
JOB 23:5 Ad ssneɣ awařen i xafi dd ɣa yarr, ad fehmeɣ min i d ayi ɣa yini.
JOB 23:6 Ma ittxeṣṣa as ad imcarreɛ akidi s jjhed ameqqran? Lla, ejj i-t ad ayi iwc [taynit waha].
JOB 23:7 Dinni ad kides imcarreɛ wenni icnan u [ammu] necc ad nnufsřeɣ i řebda zi Řqaḍi inu.
JOB 23:8 [Maca] xzar, mařa uyureɣ ɣar ccarq, [ammu] war din iǧi Netta, u mařa [uyureɣ] ɣar řɣarb, [ammu] war d as ttḥekkareɣ.
JOB 23:9 Mařa ɣares cɣeř di ccamal, war t ttwiřiɣ, [mařa] inneqřeb-dd ɣar ljanub, war t ẓarreɣ.
JOB 23:10 Maca Netta issen abrid i ggureɣ, ittqeǧeb ayi, ad ffɣeɣ am wureɣ.
JOB 23:11 Imneɛ uḍar inu di jjurrat nnes, abrid nnes ḍfareɣ t, war zzayes ffiɣeɣ.
JOB 23:12 Tawṣiyyet zeg uqemmum nnes war zzayes arxuɣ. Awařen n uqemmum nnes xemmřeɣ ten, mahu min xef ttwaweṣṣiɣ.
JOB 23:13 [Maca] mařa Netta ḍidd n ca n yijjen, man wen i t ɣa imenɛen zi man aya? Min ixs řeɛmar nnes, ad t yegg.
JOB 23:14 Maɣar Netta isseqfař min i d ayi yura, u aqa din aṭṭas n tmesřayin am tina ɣares [di řbař].
JOB 23:15 X uya ttnexřaɛeɣ zzat i uɣembub nnes, aqa fehmeɣ tt mliḥ, u tteggʷedeɣ zzayes.
JOB 23:16 [Maɣar] Arebbi issefciř uř inu, Amzemmar x kuřci issnexřaɛ ayi.
JOB 23:17 Maɣar war ttnexřiɛeɣ zi taǧest, uřa zeg wudem inu nni ittřeḥḥef s tubbarcent.
JOB 24:1 Mayemmi war ttwassnuffarent řmijařat [n uxeǧeṣ] s ufus n wenni iǧan d Amzemmar x kuřci, [mayemmi] war ttwiřin inni t issnen ussan nnes [n nneqmet]?
JOB 24:2 Nitni ssmuṭṭuyen řehdud, ttacaren taḥimart uca arekkwsen tt.
JOB 24:3 Aɣyuř n iyujiřen ssaggʷajen t, ttḥewwsen afunas n tajjač.
JOB 24:4 Nitni ɛarrnen imezřaḍ zeg webrid. Inni ittwaḥṣaren di temmurt ttnuffaren jmiɛ.
JOB 24:5 Xzar, aqa aten am yiɣyař n řexřa. Tteffɣen ɣar řxedmet nsen, arezzun taneymart. Řexřa iwca as macca i iḥenjiren nsen.
JOB 24:6 Deg iyyar ḥettcen řeḥtic nnes, řeqqḍen deg umarjeɛ n uḍiř n iɛeffanen.
JOB 24:7 Ssɛeddun ǧiřet d iɛaryanen, nhřa arruḍ, war ɣarsen bu dduri di teṣmeḍ.
JOB 24:8 Zeg wenẓar iccaten zeg idurar ttuffen, ttcebbaren di jjarf maɣar war ɣarsen adurri.
JOB 24:9 Zeg iffan n [yemmatsen] ttekksen ayujiř, uca ttᵉṭṭfen aḍman zeg umezřuḍ.
JOB 24:10 Gguren d iɛaryanen, nhřa arruḍ, am ǧuẓen arebbun icuwwafen [n imendi].
JOB 24:11 Jar řeḥyuḍ ttɛessaren zzect, ɛeffsen x tsirt n uḍir, maca ttɣiman ffuden.
JOB 24:12 Zi tendint itteffeɣ-dd řḥess n useɣnef n yeryazen, řeɛmar n yinni issuffɣen buḥbeř isɣuyyu deg ujenna. [Waxxa amenni] Arebbi war iḥeṭṭi min war iḥřin.
JOB 24:13 Inneɣni d imɣewwɣen x tfawt, war ssinen ibriden nnes, war ttɣimin di tibridin nnes.
JOB 24:14 Qbeř [dd-tusa] tfawt, ittekkar uqettař, ineqq řmeskin d umezřuḍ u di ǧiřet igga am uxewwan.
JOB 24:15 Tiṭṭ n uzennay tḥeṭṭa taǧest. Iqqar: ‘Uřa d ict n tiṭṭ war d ayi tḥeṭṭi!’ Iřeḥḥef i uɣembub nnes.
JOB 24:16 Di taǧest ttadfen ɣar tudrin. S wass ttnuffaren, war ssinen walu x tfawt.
JOB 24:17 Maɣar tuffut [tban] asen-dd am tiři n řmewt, maɣar ssnen inexřiɛen n tiři n řmewt.
JOB 24:18 Netta d afsus [am ukuffu] x wudem n waman i yeǧa. Tettwanɛeř tesɣart nsen x temmurt. War itteṭṭef [ɛad] abrid ɣar imarjaɛen n uḍiř.
JOB 24:19 Řaẓaɣ d řeḥmu qeṭṭan x waman n wedfeř, [ammu i tᵉttekkes] řaxart uřa d inni ixḍan.
JOB 24:20 Aɛeddis n yemmas ad t ittu, ikeccawen ad zzayes arren meẓri. Ɛemmarṣ war t ttidaren [ɛad]. Ittwarẓ řɣecc am [ict n tfrewt n] ukeccuḍ,
JOB 24:21 [ammu uřa d] wenni itteggen řɣar di temɣart břa tarwa, di tenni war ittirwen, uřa d wenni itteggen min war iḥřin ak-d tajjač.
JOB 24:22 S jjehd nnes issbedda inni ɣar teǧa ṣṣulṭa. Ibedd wanita, [maca] war issin nican aqa tudart nnes di řaman.
JOB 24:23 Netta iwca as řaman, [ařami] ɣares dd-tudef ttiqqet, [ɛad] tiṭṭawin nnes aqa atent x webrid nsen.
JOB 24:24 Ttwassuɛřan i yijj n řḥař d aquḍaḍ, xenni war ǧin [ɛad]. Ad hwan, ad ttwakksen am marra [iwdan], am ixfawen n uɣedduy [n yirden] ad ttwaqessen.
JOB 24:25 Ma war iǧi amenni? Man wen i d ayi ɣa iṭṭfen ixarriqen, [man wen i ɣa] issebḍeř řhard inu?
JOB 25:1 [Xas uca] yarra-dd Bildad, i dd-yusin zi Cuḥa, inna:
JOB 25:2 Ṣṣulṭa d jjehd issaggʷaden aqa aten ɣares, Netta ittegg řehna di řuɛřa nnes.
JOB 25:3 Ma izemmar ad ḥesben mecḥař i ɣares n řɛeskar? X man war tᵉttgeɛɛed tfawt nnes?
JOB 25:4 Mammec [xenni] [izemmar] bnadem ad yiři d amsegged zzat i Arebbi, mammec izemmar wenni dd-ittwarwen zi temɣart ad yiři d amezdag?
JOB 25:5 Xzar, ɛad taziri simant nnes war tᵉttwesseg s řeṣfayet, itran war ṣfin di tiṭṭawin nnes.
JOB 25:6 Ahta ɛad bnadem, [wenni] d awekki, u mmis n bnadem, [wenni] d akeccaw.
JOB 26:1 [Xas uca] yarra-dd Ayub, inna:
JOB 26:2 Mammec teggid tewcid afus i wenni war ɣar iǧi jjehd, [mammec] tbedded ɣar uɣiř n wenni war ɣar teǧi tzemmar!
JOB 26:3 Zeɛma aqa tewcid aweṣṣi isebḥen i wenni war ɣar teǧi tiɣit, [mammec] i tessargbed aṭṭas [n twařawin] mummu [n tmesřact]!
JOB 26:4 I umi tɛawded [řexxu] awařen nnec? Man nnefs dd-iffɣen zzayek?
JOB 26:5 Řexyařat [n imettan] fessyen sadu waman d imezdaɣ nsen.
JOB 26:6 D aɛaryan tezzeř zzates řaxart, war [din] teǧi tqebbart i [tesraft n] uhellek.
JOB 26:7 Ibezzeɛ [ajenna] di ccamal tiwa řxawi n [wudem n waman], yuyeř tammurt ɣar walu.
JOB 26:8 Netta ittcedda aman deg iseynuten nnes, [maca] war ittareẓẓi aseynu swadday.
JOB 26:9 Issdurruy udem n řɛarc nnes, ittbezzaɛ xas aseynu nnes.
JOB 26:10 Yarcem taquract x wudem n waman, ař tma n tfawt ak-d taǧest.
JOB 26:11 Ipilaren n ujenna ttarjijin, ttnexřaɛen zeg uweddeb nnes.
JOB 26:12 S jjehd nnes isshaj řebḥar, s řefhamet nnes iřbez Rahab.
JOB 26:13 S Arruḥ nnes ittissiq ujenna [am wudem n tenni war ittřeḥḥifen], afus nnes issnuqqeb afiɣar itteḥřuǧuḍen s tazřa.
JOB 26:14 Xzar, man aya [waha] ixef n ibriden nnes, nesřa [mɣir] taḥessect n [ca n] wawařen zzayes. Wi izemmaren [xenni] ad issen ajjaj n jjhed nnes?
JOB 27:1 Yarni issgeɛɛed Ayub řhard n lmatal nnes, inna:
JOB 27:2 S tidett am iddar Arebbi nni i d ayi ikksen tasɣart inu, Amzemmar x kuřci nni issarzagen řeɛmar inu,
JOB 27:3 min ɣa yekk nnefs ɛad dayi u arruḥ n Arebbi [ɛad] deg wenzaren inu,
JOB 27:4 war qqaren iyencicen inu řɣecc u iřes inu war iqqar ixarriqen!
JOB 27:5 Iggʷej xafi ad ggeɣ kenniw di tseyyarest n tidett. Ař ɣa ssuffɣeɣ buḥbeř inu, war ttejjiɣ ad xafi kksen asegged inu.
JOB 27:6 Ad ṭṭfeɣ di tsegda inu, war zzayes arexxuɣ ca. Uř inu war d as yarexxu uřa x ijjen zeg wussan inu.
JOB 27:7 Mři dd-iban řeɛdu inu d aɛeffan, wenni akidi ittmenɣan d mmis n řmuɛṣiyyet.
JOB 27:8 Maɣar man řayas n umnafeq, xmi ɣa tᵉttwaqḍeɛ [tudart nnes], xmi zzayes i ɣa iqřeɛ Arebbi řeɛmar nnes?
JOB 27:9 Ma ad iseř Arebbi i iɣuyyan nnes, xmi xas dd ɣa iwḍa řḥeṣran?
JOB 27:10 Ma ad ifarḥ ɣar Umzemmar x kuřci? Ma ad iřaɣa x Arebbi meřmi ma?
JOB 27:11 Necc ad awem ssřemdeɣ x ufus n Arebbi, min iɛewweř Umzemmar x kuřci, war t ssnuffareɣ.
JOB 27:12 Xzar, kenniw marra idwem teẓrim [t]. Mayemmi tarennyem tessuffuɣem min ibeṭṭřen [teqqarem]:
JOB 27:13 “Ta d tasɣart n bnadem aɛeffan ɣar SIDI, tasɣart n ayt n bu-řexcunet nni i ɣa ṭṭfen zeg Umzemmar x kuřci:
JOB 27:14 Xmi ɣa mmarenyen iḥenjiren nnes, i ssif umi urin. Iɣedduten nnes war ttyawanen aɣrum,
JOB 27:15 wi zzayes i ɣa yarewřen ad ttwaneḍřen s ṭṭaɛun, tijjař nnes war ttrunt ca.
JOB 27:16 Waxxa ijarruw nnuqart anect n ucař, u issewjad arruḍ anect n ucař,
JOB 27:17 [iwa, waxxa] ad t issewjed, amsegged ad zzayes yarḍ uca amezdag ad ibḍa nnuqart.
JOB 27:18 Ad ibna taddart nnes am tcinda, amecnaw tanwalt i issbedda uɛessas [i yixef nnes].
JOB 27:19 Ad [dayes] iṭṭeṣ d bu-wagřa, [maca] war yarenni deg wagřa nnes. Mařa yarzem tiṭṭawin nnes, war din ittɣimi [ɛad] walu.
JOB 27:20 Inexřiɛen ad xas arenyen am [iɣezran n] waman, taḥaryaḍt ad t-i-dd-teqḍeɛ s ǧiřet.
JOB 27:21 Asemmiḍ zi ccarq ad t iksi, iwa dinni ittraḥ, ad t-i-dd-iqřeɛ zeg wemcan nnes.
JOB 27:22 [Arebbi] ad issiweḍ marra aya x uzeǧif nnes, war xas issɛizzi ca. Ad yarweř deɣya zi [tecti n] ufus nnes.
JOB 27:23 [Iwdan] ad xas wwten deg ifassen nsen [am zzayes sthezzan] uca ad xas ṣeffaren zeg wemcan [n tzeddiɣt] nnes.”
JOB 28:1 S tidett, aqa din amcan mani tᵉttwaf nnuqart, uřa din amcan i wureɣ mani t ssizdigen.
JOB 28:2 Uzzař ttawyen t-i-dd zeg ucař u zeg weẓru ssfessyen nnḥas.
JOB 28:3 Igga [bnadem] qeṭṭu i taǧest, netta yarezzu di mkuř amcan mani ma, [x] weẓru [i dd-itteffɣen] zi tubbarcent d tiři n řmewt.
JOB 28:4 Yarzem ijj n wexjiḍ břa i ɣa yiři ḥed [akides]. Ttwattun zeg iḍaren [n yinni sennej nsen], uyřen ttraḥen tasen-dd břa i ɣa yarra asen-dd ḥed řbař.
JOB 28:5 Itteffeɣ-dd weɣrum zi temmurt, [am] swadday nnes [marra] axmi s tmessi inneqřeb.
JOB 28:6 Iẓra nnes d amcan mani ttafen ṣaffir, dayes i teǧa uřa d taɛejjact n wureɣ.
JOB 28:7 Ajḍiḍ ittkeccaḍen war issin amesruq i ɣares iǧan, tiṭṭ n ujḍid amessɣuy amuqḍiɛ n tiṭṭawin ɛemmarṣ war t teḥḍi.
JOB 28:8 Iyraden imeẓyanen ineffxen war dayes uyuren, uřa d ayrad izehharen war t ittcuqi.
JOB 28:9 [Maca bnadem] isarreḥ afus nnes ɣar sseǧaḥ iqesḥen, issneqřab idurar kuřci.
JOB 28:10 Di řejruf iqqaz iɣezran, tiṭṭ nnes tᵉttwařa marra min iɣřan.
JOB 28:11 Iḥewweq i iɣezran ařami [aman] war qqimen tteffɣen-dd, min [dayes] inuffaren ittawyi t-i-dd ɣar tfawt.
JOB 28:12 Tiɣit [maca], mani tᵉttwaf? U mani teǧa tzeddiɣt n řefhamet?
JOB 28:13 Bnadem war issin řqimet nnes, war tᵉttwif [tiɣit] di temmurt n yinni iddaren.
JOB 28:14 [Aman] ihewřen qqaren: ‘Dayneɣ war teǧi ca!’, řebḥar iqqar: ‘Ɣari war da teǧi ca!’
JOB 28:15 War izemmar ad immewc wureɣ iqquren deg wemcan nnes, ssum nnes war zemmaren ad t weznen s nnuqart.
JOB 28:16 War zemmaren ad weznen [ssum nnes] s wureɣ iɣřan zi Ufir, s weẓru n uniks iɣřan d ṣaffir aziza.
JOB 28:17 War zemmaren ad mmquddan řqimet nnes ak-d wureɣ niɣ kristal, niɣ ad tt beddřen s ict n řqecɛet n wureɣ ittwaṣeffan.
JOB 28:18 War tteɛqiřen [ɛad] x tyaqutin d weẓru n ukristal, maɣar twafit n tiɣit tuɛɛřa x [twafit] n řmarjan.
JOB 28:19 Řeɛqiq azeggwaɣ zi Kuc war dayes yarwis, war tzemmar ad tᵉttwawzen [tiɣit] s wureɣ iṣfan iɣřan.
JOB 28:20 Manis dd-tusa [xenni] tiɣit u mani teǧa tzeddiɣt n řefhamet?
JOB 28:21 Aqa-tt tnuffar x tiṭṭawin n marra min iddaren, tᵉttwařeḥḥef x ijḍaḍ n ujenna.
JOB 28:22 Ahellek d řmewt qqaren: ‘S imezzuɣen nneɣ nesřa xas řexbar!’
JOB 28:23 AREBBI ifehhem abrid nnes, Netta issen tazeddiɣt nnes,
JOB 28:24 maɣar ittwařa ař tineggura n temmurt, iẓarr marra min iǧan sadu ijenwan.
JOB 28:25 Umi igga i usemmiḍ jjehd nnes, [umi] iɛbar řeɛbar n waman,
JOB 28:26 umi igga i wenẓar qeṭṭu, ijj n webrid i wassam n wajjajen,
JOB 28:27 xenni iẓra i-tt, issargeb i-tt, uca issbedd i-tt deg wemcan nnes uca ibeqqec dayes,
JOB 28:28 uca inna i bnadem: ‘Xzar, tiggʷudi zi Sidi d tiɣit, abeɛɛed x min iǧan d aɛeffan, d řefhamet.’
JOB 29:1 Uca yarni issgeɛɛed Ayub řhard n lmatal nnes, inna:
JOB 29:2 Mři ǧiɣ am deg uyenni n iyuren iɛdun aṭṭas zeg wami, am deg uyenni n wussan řami d ayi tuɣa iḥeṭṭa Arebbi,
JOB 29:3 řami igga řefnar nnes ad yareɣ x uzeǧif inu, u tuɣa ggureɣ di taǧest s tfawt nnes.
JOB 29:4 [Mři] ǧiɣ am deg wussan n temẓi inu, umi amuni di řaman ak-d Arebbi tuɣa ibedd x tqiḍunt inu,
JOB 29:5 umi Amzemmar x kuřci tuɣa-t ɛad akidi, u iḥenjiren inu [ɛad] nnḍen ayi-dd,
JOB 29:6 umi iṣuraf inu tuɣa ɛummen di trussi, u taṣḍart tuɣa tᵉttzeǧaɛ zzati tiɣezratin n zzect!
JOB 29:7 Umi dd-ffɣeɣ ɣar tewwart n tendint, jjiɣ ssbedden ayi řkursi inu deg wazzay,
JOB 29:8 nnufaren iḥudriyyen řami d ayi ẓrin, u imeccaybuten kkaren, qqimen bedden.
JOB 29:9 Řḥukkam menɛen awařen nsen u ssarsen afus x uqemmum nsen.
JOB 29:10 Tmijja n řḥukkam tesqar, iřseq iřes nsen ɣar waneɣ nsen.
JOB 29:11 Mařa isřa ayi umezzuɣ, issemɣar ayi, mařa teẓra ayi tiṭṭ, teched x řxaḍar inu.
JOB 29:12 Maɣar ssnejmeɣ řmeskin nni isɣuyen, ayujiř nni war ɣares tuɣi wenni t i ɣa iɛawnen.
JOB 29:13 Řxaḍar n wenni tuɣa ɛřayen ad ihellek, tusa-dd xafi, uř n tajjač ggiɣ t isřiwřew s řefraḥet.
JOB 29:14 Yarḍeɣ tasegda u [tasegda] tessyarḍ ayi. Tuɣa ccreɛ inu am useřham u am areẓẓet.
JOB 29:15 Tuɣa ayi d tiṭṭawin i idarɣařen, uřa d iḍaren i iqiḍaren.
JOB 29:16 Tuɣa ayi d babatsen i imezřaḍ, uca ddeɛwet n wenni war ssineɣ, beqqceɣ tt.
JOB 29:17 Arẓiɣ tiɣmas n teɣmart n wenni iggin min war iseggden uca kkseɣ zzardet i teɣmas nnes.
JOB 29:18 Nniɣ: ‘Ad ssuffɣeɣ buḥbeř inu x řɛucc inu, ad ddareɣ tudart tazirart am ujḍid n funiks.’
JOB 29:19 Iẓewran inu bezzɛeɣ ten ař aman u di ǧiřet iqqim nnda x řefruɛ inu.
JOB 29:20 Tuɣa řɛezz inu iqqim akidi [řebda], řqews inu isheř deg ufus inu [řebda].
JOB 29:21 Sřin-dd ɣari, rajan, sqaren di ṭṭweɛ n ccwar inu.
JOB 29:22 Awarni wawař inu war ssiwřen twařa nneɣni, awařen inu udumen xasen.
JOB 29:23 Nitni rajan ayi am [rajan] anẓar, arzmen aqemmum nsen am t arezmen ɣar wenẓar n tefsut.
JOB 29:24 [Mařa] sfarnineɣ ɣarsen, war zemmaren [ɛad] ad ttiqqen, [maca] tafawt n uɣembub inu war zmiren ad kides mmɛařan.
JOB 29:25 Ixḍareɣ asen abrid, beddeɣ asen ɣar uzeǧif, zedɣeɣ am ujeǧid jar řɛeskar, am wenni ittɛezzan inni iceḍnen.
JOB 30:1 Řexxu maca tuɣa ḍeḥḥcen xafi iḥudriyyen nni iǧan d imeẓyanen xafi deg wussan, inni babatsen war ɣari sekkwin maḥend ad ten ggeɣ ɣar yiṭan i iǧan x wuǧi inu.
JOB 30:2 Min ɣa ggeɣ [xenni] s jjehd n ifassen nsen? Aqa ifna [jjehd nsen] zi ssibbet n tewsar.
JOB 30:3 Zi řqiǧet u zi řaẓ dewřen isriwen, ttmeɣzazen di řwaṭa yuẓɣen di tubbarcent [teccur] s ureddeǧ d urebbej.
JOB 30:4 Nitni řeqqḍen řebzar ameǧaḥ jar cbarq, iẓewran n uzezzu d aɣrum nsen.
JOB 30:5 Uẓẓřen xasen zi tmunet [n iwdan], kkwaren ten am yixewwanen,
JOB 30:6 ḥima ad zedɣen di teɣzurin issaggʷaden, deg ifran n ucař u di řejruf.
JOB 30:7 Sɣuyyun jar cbarq, sadu tizeggwarin ssmunan.
JOB 30:8 Tarwa n ibuhařiyyen d tarwa břa isem, d inni uẓẓřen xasen zi temmurt s uzeǧaḍ.
JOB 30:9 Řexxu maca aqa ayi deg izři nsen n tẓawart, dewřeɣ asen i řhard.
JOB 30:10 Carrhen ayi, ttaggʷajen xafi, war ttseḍḥin ca maḥend ad ssusfen x uɣembub inu.
JOB 30:11 Maɣar Netta issefsi asɣun [n tqiḍunt] inu uca issehwa ayi. Nitni nḍaren ssrimet [nsen] zzati.
JOB 30:12 Ɣar uɣezdis afusi [inu] kkaren-dd xafi iɣeddiwen n tarrawt, ɛarrnen iḍaren inu, ssgeɛɛaden xafi imesraq n arẓiyyet nsen.
JOB 30:13 Abrid inu arẓin t, arennyen tamara x tamara inu waxxa nitni simant nsen war ɣarsen iǧi wi d asen ɣa iwcen afus.
JOB 30:14 Axmi dd-ttasen zeg ijj n unuqqib d miriw, ttakkwaḍen am řemwaj yareddǧen.
JOB 30:15 Ttwakebben-dd xafi inexřiɛen, am usemmiḍ ḍeffaren nitni ccan inu, iḍwa zzhar inu am yijj n useynu.
JOB 30:16 [S uya] ifessi řexxu řeɛmar inu dayi, ussan n řeɣben mennɛen ayi.
JOB 30:17 Di ǧiřet issnuqqub ayi iɣsan inu i dayi iǧan, řeḥriq i d ayi ittɣezzan war yaressi.
JOB 30:18 Ittwabeddeř warrud inu s jjehd [nnes] ameqqran ařami war xafi tteɛqiřen [ɛad]. Icarf ayi am tma i innḍen i warzem n yiri deg warruḍ.
JOB 30:19 Inḍar ayi deg ubeǧaɛ, dewřeɣ am ucař d yiɣɣeḍ.
JOB 30:20 Sɣuyyuɣ ɣarek, [maca] Cek war xafi dd-tᵉttarrid, necc beddeɣ da uca Cek tᵉqqimed tḥeṭṭid dayi.
JOB 30:21 Cek tdewřed ayi am yijj n bu-řexcunet, tᵉttdarraced xafi s ufus nnec ijehden.
JOB 30:22 Cek tessgeɛɛaded ayi u tneddhed ayi deg usemmiḍ, tessefraɣed [qaɛ] addud inu.
JOB 30:23 Maɣar necc ssneɣ aqa Cek ad ayi tnedhed ɣar řmewt, ɣar taddart mani ttmunen marra inni iddaren.
JOB 30:24 Ma war ineṭṭar [bnadem] afus [nnes] mařa iwḍa [ḥed], ma war isɣuyyu walu qaɛ ɣar arẓiyyet [nnes]?
JOB 30:25 Ma war ruɣ x wenni tuɣa ɣar iǧa wussan n tamara, ma war icḍin buḥbeř inu x umezřuḍ?
JOB 30:26 Umi ssitmeɣ ɣar min iṣebḥen, aqa yusa-dd min iǧan d aɛeffan, umi rajiɣ tafawt, tusa-dd taǧest.
JOB 30:27 Adan inu ttnennan, war arsin, iwḍen-dd wussan n tamara ɣari.
JOB 30:28 Necc ad uyureɣ deg wecḍan, břa řehmu [n tfuct]. Ad kkareɣ deg wegraw [n řgens] uca ad qqimeɣ sɣuyyuɣ deg ujenna.
JOB 30:29 I wuccanen n řexřa dewřeɣ d umatsen zzaysen, i yessis n nnɛamet d amɛacar.
JOB 30:30 Tiřmect inu tedweř xafi d akarkuc abarcan, zi tmessi cemmḍen iɣsan inu.
JOB 30:31 Tedweř [tirart n] řgambri inu i wecḍan, tamja inu i řḥess n imeṭṭawen.
JOB 31:1 Necc ggiɣ řɛahd ak-d tiṭṭawin inu, mammec i ɣa xzareɣ [xenni] di teɛzarect?
JOB 31:2 Maɣar min [iǧan xenni] tasɣart n Arebbi zi sennej, niɣ tasɣart n řwart n Umzemmar x kuřci zeg [ijenwan] yuɛřan?
JOB 31:3 Ma war iǧi aḍeyyeɛ ikkar-dd i uɛeffan, arẓiyyet i yinni itteggen řmuɛṣiyyet?
JOB 31:4 Ma war ittwiři Netta ibriden inu, ma war iḥesseb Netta řqedd n marra iṣuraf inu?
JOB 31:5 Mařa tuɣa uyureɣ di řexdeɛ, niɣ iqeǧeq uḍar inu ɣar řɣecc,
JOB 31:6 ejj SIDI ad ayi iwzen [xenni] di řmizanat iseggden, [ařami] i ɣa issen Arebbi řeṣfayet inu.
JOB 31:7 Mařa iṣuraf inu ffɣen zeg webrid, uř inu iḍfar tiṭṭawin inu uca [xenni] iřṣeq řɛib deg ifassen inu,
JOB 31:8 [xenni] ad zarɛeɣ necc, [maca] ijjen nneɣni ad icc, u min ɣari dd-iɣemmayen ad ittwaqřeɛ!
JOB 31:9 Mařa uř inu ittwaɣwa ɣar ict n temɣart, niɣ tuɣa ttḥamiɣ ɣar tewwart n wajjar inu,
JOB 31:10 ejj [xenni] tamɣart inu ad teḥri [imendi] i yijjen nneɣni, [jjem] inneɣni ad xas aḍaren.
JOB 31:11 Maɣar aya d řefḍiḥet, d ict n ljarima [i xas i ɣa wten] řquḍat.
JOB 31:12 Maɣar aya d timessi tᵉttett ař ahellek, tqeǧeɛ marra řɣiǧet inu.
JOB 31:13 Mařa ssḥeqqareɣ řḥeqq n ismeɣ inu d tayya inu, řami tuɣa ttemcubbucen akidi,
JOB 31:14 min i ɣa ggeɣ [xenni] mařa SIDI ikkar, mařa Netta iqeǧeb ayi, min xas dd ɣa yarreɣ [xenni]?
JOB 31:15 Wenni d ayi iggin deg uɛeddis n yemma, ma war t iggi uřa d netta? Ma war iǧi d Ijj wenni d aneɣ dd-ixeřqen deg uɛeddis n yemmatneɣ?
JOB 31:16 Mařa qemmḥeɣ ameẓri n imezřaḍ niɣ ssruɣ tiṭṭawin n tajjač,
JOB 31:17 mařa necc mɣir cciɣ ařeqquz n weɣrum inu, am war zzayes icci uyujiř,
JOB 31:18 - maɣar zi temẓi iyma netta ɣari am iyma ɣar babas, zeg uɛeddis n yemma nedheɣ tt -
JOB 31:19 mařa ẓriɣ ijjen ittwahellek minzi war ɣares iǧi warruḍ, niɣ minzi war din iǧi dduri i umezřuḍ,
JOB 31:20 mařa [ɛemmarṣ] war d ayi barkent tejɛinnatin nnes, minzi igga ad issiḥma ixef nnes s waǧas [n tḍuft] n izmaren inu,
JOB 31:21 mařa afus inu ihudd x uyujiř, minzi ẓriɣ aqa din twiza i necc ɣar tewwart [n tendint],
JOB 31:22 ejj [xenni] ad ayi tewḍa teɣruḍt inu zeg ijiman, ad ayi yarẓ uɣiř inu zeg yiɣes!
JOB 31:23 Maɣar ad xafi dd-iwḍa unexřiɛ ameqqran, ict n řmuṣibet zi ɣar Arebbi, war zemmareɣ ad ggeɣ walu zzat i Uɛuǧi nnes.
JOB 31:24 Mařa ggiɣ ureɣ d atecři inu, niɣ nniɣ i wureɣ iɣřan aṭṭas: ‘Cek d řaman inu!’,
JOB 31:25 mařa farḥeɣ umi imɣar wagřa inu, umi afus inu iṭṭef aṭṭas [d agřa],
JOB 31:26 mařa ẓriɣ tafawt [n tfuct] xmi tᵉttwesseg, niɣ taziri xmi teggur di tissiqt [nnes],
JOB 31:27 uca ittwaɣwa wuř inu s tnuffra, uca aqemmum inu, issudem i-t ufus inu,
JOB 31:28 [xenni] iři uřa d man aya d řmuɛṣiyyet ad tt wcen i řquḍat, maɣar [xenni] ad nkareɣ Arebbi nni iǧan sennej.
JOB 31:29 Mařa farḥeɣ i arẓiyyet n wenni d ayi icarrhen, farḥeɣ umi t iřqef řɣar!
JOB 31:30 Necc [maca] war jjiɣ aneɣ inu ad ixḍa, umi kkwareɣ řeɛmar nnes s nneɛřet!
JOB 31:31 Mařa iryazen nni iǧan deg uqiḍun inu war qqaren: ‘Man wen war ittwassjiwnen zeg yinni iksin zeg weysum nnes?’
JOB 31:32 Uřa d ijj n řbarrani war issens [di barra] x webrid, [maɣar] i umsebrid arzmeɣ tiwwura inu.
JOB 31:33 Mařa necc, am Adam, dřiɣ axeṭṭu inu, umi ssnuffareɣ řmuɛṣiyyet inu deg weḥsin inu,
JOB 31:34 minzi ggʷedeɣ zi řɣaci ameqqran, niɣ issnexřeɛ ayi useḥqar n řwacun inu, ařami qqimeɣ sseɣdeɣ, war ffiɣeɣ [ɛad] zi tewwart [ɣar barra] ...
JOB 31:35 Mři ɣari ijjen wenni d ayi ɣa isřen. Xzar, acemmiɛ inu - Amzemmar x kuřci ad xafi dd-yarr - uřa d adlis ittwannḍen nni t yura weryaz nni kidi ittemcubbucen.
JOB 31:36 Meɛlik ufiɣ ma war t arebbuɣ x tɣarḍt inu, ad t qqneɣ [i uzeǧif inu] am yijj n ttaj.
JOB 31:37 Iwa, ad as iniɣ řqedd n iṣuraf inu, ad ɣares dd-qarrbeɣ am yijj n řḥakem.
JOB 31:38 Mařa řeɛraṣi inu isɣuy xafi, iɛeyyaden nnes ad run ak-d wayawya [marra],
JOB 31:39 mařa cciɣ ṣṣabet nnes nhřa axeǧeṣ, niɣ ggiɣ řeɛmar n ixemmasen nnes iḍřeq i buḥbeř,
JOB 31:40 ejj [xenni] ad iɣmi cbarq ak-d isennanen deg wemcan n yirden, uřa d řeɛcub yarṣuden deg wemcan n imendi. Aqa da i qḍan wawařen n Ayub.
JOB 32:1 [Xenni] ssbedden třata n yeryazen nni maḥend ad dd-arren x Ayub, minzi tuɣa d amsegged jar tiṭṭawin [n yixef] nnes.
JOB 32:2 [Xas uca] yarɣa lɣaḍab n Ilihu, mmis n Baraxyil, zi [temmurt n] Buz, zi řaǧ n Ram. Yarɣa lɣaḍab nnes x Ayub minzi igga wanita ixef nnes d amsegged x AREBBI.
JOB 32:3 Yarɣa lɣaḍab nnes uřa x třata n imeddukkař nnes, maɣar nitni, [waxxa] war ufin min zi [xas] i dd ɣa yarren, arrin řɛib di Ayub.
JOB 32:4 Ilihu [maca] tuɣa iraja s wawařen qibač i Ayub, minzi nitni tuɣa mɣaren xas.
JOB 32:5 [Umi] iẓra Ilihu, aqa třata n yeryazen nni war ufin min zi dd ɣa yarren [ɛad], yarɣa uxeyyeq nnes.
JOB 32:6 Uca iṭṭef Ilihu, mmis n Baraxil, zi Buz, deg wawař, inna: Necc d ameẓyan deg iseggʷusa u kenniw d imeccaybuten. X uya rajiɣ u bburrneɣ maḥend ad awem ssecneɣ tussna inu.
JOB 32:7 Necc nniɣ: ‘Ejj [inni imɣaren deg] wussan ad ssiwřen, [ejj] řqedd ameqqran n iseggʷusa [n umeccaybu] ad issargeb tiɣit.’
JOB 32:8 S tidett, buḥbeř izdeɣ di bnadem, asuḍi n nnefs n Umzemmar x kuřci ittic asen řefhamet.
JOB 32:9 Inni imɣaren deg iseggʷusa war daysen teǧi tiɣit, iwessura war fehhmen i ccreɛ.
JOB 32:10 S uya qqareɣ: ‘Sřem-dd ɣari, [xenni] uřa d necc ad ssecneɣ tussna inu.’
JOB 32:11 Xzar, rajiɣ awařen nwem, ssḥesseɣ ɣar řefhamet nwem, am tuɣa tarezzum x wawařen [iseggmen].
JOB 32:12 Necc ḥḍiɣ kenniw mliḥ, aqa da, uřa d ijjen tuɣa izemmar ad isseqneɛ Ayub, uřa d ijjen zzaywem war izemmar ad dd-yarr x wawařen nnes.
JOB 32:13 [S uya] war qqarem: ‘Neccin nufa tiɣit! Arebbi izemmar ad t inḍar, war iǧi bnadem.’
JOB 32:14 War ǧin wawařen nnes xafi u s wawařen nwem war xas dd-arriɣ.
JOB 32:15 Ttwarnan nitni, war dd-ttarrin ɛad, awařen ttwakksen zzaysen.
JOB 32:16 Řajiɣ, [maca] war ssiwřen, maɣar ssbedden [awař], war dd-ttarrin ɛad.
JOB 32:17 Uřa d necc xseɣ ad dd-arreɣ di nnubet inu, uřa d necc ad ssecneɣ tussna inu.
JOB 32:18 Maɣar ccureɣ s wawařen, iḥessar ayi buḥbeř di daxeř inu.
JOB 32:19 Xzar, aɛeddis inu ittegg am [tziyyat n] binu war yarzimen [ɛad], am txuncay n yiřem n jdid, aqa ittegg axmi i ɣa idduqqez.
JOB 32:20 Ad ssiwřeɣ, ḥima ad fsuseɣ, ad arzmeɣ iyencicen inu, ad dd-arreɣ.
JOB 32:21 War tteggiɣ s wudmawen ak-d uřa d ijj, war ssiwřeɣ uřa ak-d ijj n bnadem s wawařen imiẓiden.
JOB 32:22 Maɣar war zemmareɣ ad ggeɣ s wawařen imiziḍen, maɣar [xenni] ad ayi ikkes Wenni i d ayi iggin.
JOB 33:1 Seř řexxu ɣar řhard inu, Ayub, ewc amezzuɣ i wawařen inu marra.
JOB 33:2 Xzar, arzmeɣ aqemmum inu, issawař yiřes inu sadu waneɣ inu.
JOB 33:3 Tteffɣen wawařen inu zi řeṣfayet n wuř inu, tussna teqqur ad xas harrden iyencicen inu.
JOB 33:4 Arruḥ n Arebbi igga ayi, asuḍi n nnefs n Umzemmar x kuřci iwca ayi tudart.
JOB 33:5 Mařa tzemmared, arr-dd xafi. Sars ayi [tamesřact], bedd [zzati]!
JOB 33:6 Xzar, necc am cek zzat i Arebbi, uřa d necc ttwaggeɣ zeg ubeǧaɛ.
JOB 33:7 Xzar, ahuddi inu war cek issiggʷid ca, war xak ttzeyyareɣ ca aṭṭas.
JOB 33:8 S tidett, aqa tennid [t] deg imezzuɣen inu, sřiɣ i řḥess n wawařen[-a]:
JOB 33:9 ‘Necc d amezdag, břa ddenb, d afurri [i ǧiɣ], war dayi ca n řmuɛṣiyyet.
JOB 33:10 Xzar, Netta yarezzu ssibbet ḥima ad zzayi icetca, iḥesseb ayi d řeɛdu nnes.
JOB 33:11 Iḍaren inu iqqen i-ten ɣar ukeccuḍ, iḥeṭṭa marra imesraq inu.’
JOB 33:12 Xzar, ad ac iniɣ, war teǧid ca d amsegged deg uya, maɣar Arebbi d ameqqran x bnadem.
JOB 33:13 Min xef kides tᵉttemɛarrid? Aqa Netta war ittegg řeḥsab i marra timegga nnes!
JOB 33:14 Maɣar Arebbi issawař ict n twařa, [wah,] tnayen n twařawin, [maca] bnadem war iḥeṭṭi:
JOB 33:15 di tirja, s ijj n řewḥiy di ǧiřet, xmi dd-iweṭṭa yiḍeṣ yuǧɣen x iwdan, deg unudem di řectu.
JOB 33:16 [Xenni] yarezzem Netta amezzuɣ n iwdan, ittcemmeɛ [s ucemmiɛ nnes] x uweddeb nsen,
JOB 33:17 ḥima ad issḥeyyed bnadem x tmeggit nnes [taɛeffant], ḥima ad issbedd nnfaxet x weryaz.
JOB 33:18 Netta imenneɛ řeɛmar nnes zi turṣuḍi, tudart nnes zeg uhellek s lansa.
JOB 33:19 Ijeyyeḥ i-t řeḥriq di qama nnes uřa d amenɣi řebda deg iɣsan nnes.
JOB 33:20 Tudart nnes tarra i-t ittɛiffa aɣrum u řeɛmar nnes [yarra i-t ittɛiffa] macca iṣebḥen aṭṭas.
JOB 33:21 Iqeṭṭa weysum nnes zeg wudem [nnes], ixsan nnes nni war ttwaẓrin [ɛemmarṣ], aqa ttbanen řexxu.
JOB 33:22 Ittqarrab řeɛmar nnes ɣar turṣuḍi, tudart nnes ɣar ijarrayen n řmewt.
JOB 33:23 Mařa xenni din ijj n lmalak ibedd as-dd ɣar uɣezdis, ijj n Řɛadeř, ijjen zeg wařef, ḥima ad isscen i bnadem tasegda nnes,
JOB 33:24 [xenni] ad xas iḥinn, ad yini: ‘Fekk i-t, ařami netta war ihekkwi ɣar turṣuḍi [deg wenḍeř], aqa Necc ufiɣ aṣřaḥ [xas]!’
JOB 33:25 Xenni ad tneɛneɛ arrimet nnes ktar zi ṭṭri n temẓi, ad dd-idweř ɣar wussan n temẓi nnes.
JOB 33:26 Netta ad ittar Arebbi s tutra yuǧɣen u Netta ad xas yarḍa, ařami wanita ad iẓar udem nnes deg usřiwřew [n řefraḥet], u [ammu] i ɣa yarr Netta i bnadem tasegda nnes.
JOB 33:27 Ad iɣennej i yewdan, ad yini: ‘Necc xḍiɣ, ssfarɣeɣ min iseggden, [maca] Netta war zzayi [tt] yexřif.
JOB 33:28 Ifekk Arebbi řeɛmar inu zi turṣuḍi [deg wenḍeř], tudart inu txezzar [ammu d wammu] di tfawt.’
JOB 33:29 Xzar, marra aya ittegg i-t Arebbi, tnayen niɣ třata n twařawin ak-d weryaz,
JOB 33:30 ḥima ad isseɛqeb řeɛmar nnes zi turṣuḍi [deg wenḍeř], [ḥima] ad t yarr yareqq s tfawt n tudart.
JOB 33:31 Ḥḍa, Ayub! Seř-dd ɣari! Sqar, xenni necc ad ssiwřeɣ.
JOB 33:32 Mařa ɣarek awařen [wejden], arr-dd [xafi], siweř, maɣar ɣari s řxaḍar ad xak barriɣ.
JOB 33:33 Mařa lla, seř-dd ɣari! Sqar, u ad ac ssɣareɣ tiɣit.
JOB 34:1 Iṭṭef Ilihu [ɛawed] deg wawař, inna:
JOB 34:2 Sřem-dd ɣar wawařen inu, [a] imiɣisen, wcem ayi amezzuɣ, [a kenniw], ayt n tussna.
JOB 34:3 Maɣar amezzuɣ inebbec deg wawařen, [am mammec] ittqasa waneɣ macca.
JOB 34:4 Jjem aneɣ ad nixḍar jar aneɣ min iǧan nican, jjem aneɣ ad nessen jar aneɣ min iǧan d aṣebḥan.
JOB 34:5 Maɣar Ayub inna: ‘Necc d amsegged, Arebbi ikkes ayi tasɣart inu!
JOB 34:6 Waxxa ɣari řḥeqq, [ɛad] ttɣimeɣ ttbaneɣ am yijj n bu-ixarriqen! [Ayezzim n] fřitca i dayi iǧa, war izemmar ad ittwassgenfa am war din iǧi uɛeddi.’
JOB 34:7 Man wen iǧan d aryaz am Ayub, wenni isessen astehzi am waman?
JOB 34:8 Netta iggur deg webrid am ittɛacar inni itteggen řmuɛṣiyyet, iggur ak-d iryazen iɛeffanen.
JOB 34:9 Maɣar inna: ‘War ineffeɛ walu i bnadem, mařa netta d amarḍi ɣar AREBBI.’
JOB 34:10 S uya sřem-dd ɣari, [kenniw] iryazen i di teǧa řefhamet: ‘Iggʷej x Arebbi maḥend ad yegg tuɛeffna, uřa x Umzemmar x kuřci maḥend ad yegg min ifarɣen.’
JOB 34:11 Maɣar Netta ixřef zi bnadem ɛlaḥsab timegga nnes, u am mammec iǧa webrid n weryaz, [ammu] i d as ɣa yarr ad t yaf.
JOB 34:12 S tidett, ɛemmarṣ war ittegg Arebbi tuɛeffna, Amzemmar x kuřci war issfarriɣ ccreɛ.
JOB 34:13 Man wen t iwekkřen x temmurt, man wen issarsen marra ddunect?
JOB 34:14 Mařa Netta ad xas issneqřeb uř nnes, mařa ad ɣares dd-yawi ɛawed buḥbeř nnes d nnefs nnes,
JOB 34:15 marra bnadem d řmař ad ssuffɣen buḥbeř u bnadem ad iɛqeb ɣar ucař.
JOB 34:16 Mařa dayek řefhamet, seř [xenni] i man aya, ewc amezzuɣ nnec i řḥess n wawařen inu.
JOB 34:17 Ma izemmar wenni icarrhen řḥeqq ad iḥkem, niɣ texsed cek ad tedɛid x wenni iǧan d Amsegged d ameqqran?
JOB 34:18 Ma ad inin i ujeǧid: ‘[Cek] war tsekkʷid walu!’ u i tarwa n taṣiřet: ‘[Kenniw] d iɛeffanen’?
JOB 34:19 [Mammec xenni] i Wenni war issizwiřin řḥukkam u war ittriḥ ak-d bu-wagřa x umezřuḍ, maɣar marra nitni d řxedmet n ifassen nnes.
JOB 34:20 Mmuten deg wermac n wabřiwen, deg wezyen n ǧiřet. Ttwanhezzen nitni, řgens [nni], uca hellken. Wenni ɣar teǧa ṣṣulṭa ittwaɛarren ɣar uɣezdis, břa [ma iḥada i-t] ufus [n bnadem].
JOB 34:21 Maɣar tiṭṭawin nnes xezzarent ɣar ibriden n mkuř ijj, Netta ittwařa mliḥ marra iṣuraf nsen.
JOB 34:22 War teǧi tubbarcent u war teǧi tiři n řmewt, mani zemmaren ad nnuffaren inni itteggen řɣar.
JOB 34:23 War d as ittxeṣṣi ad ixzar di bnadem aṭṭas n řweqt, qbeř i dd ɣa yadef ɣar ddeɛwet zzat i uɣembub n Arebbi.
JOB 34:24 Iřebbez jjwaḥeř břa aseqsi uca igga inneɣni deg wemcan nsen.
JOB 34:25 Maɣar Netta issen timegga nsen, issneqřab i-ten di ǧiřet uca ttwařebzen.
JOB 34:26 Iccat i-ten jar iɛeffanen, deg ijj wemcan mani ttbeddan [iwdan] ttwařan,
JOB 34:27 minzi nitni ḥeyyden xas, war ttḥekkiren marra ibriden nnes,
JOB 34:28 maḥend ad xas issiweḍ tɣuyyit n imezřaḍ, u maḥend ad istajeb i iɣuyyan n řmusakin.
JOB 34:29 Mařa Netta yiwi-dd řhudnet, man wen dayes i ɣa iggin řɛib? Mařa issnuffar aɣembub nnes, wi t ɣa iẓaren? [Iḥekkem] řa x řgens am x bnadem,
JOB 34:30 ḥima war iḥekkem uřa d ijj n bnadem i itteggen s tnayen n wudmawen, u ḥima war ttiřint [ɛad] txecifin i řgens.
JOB 34:31 Mři inna [bnadem nni] i Arebbi ‘Ssgeɛɛdeɣ ixef inu, war ttɛiwideɣ ad ggeɣ řɣar.
JOB 34:32 Min war ttwiřiɣ, sɣar ayi t Cek! Mařa ggiɣ min war iseggden, war t tteggeɣ ɛad.’
JOB 34:33 Ma ittxeṣṣa ad ixřef Netta am mammec t texsed cek? Aqa tesseḥqared [t]! Aqa texsed ad tixḍared s yixef nnec, necc [maca] lla! Mařa [ittɣiř ac] aqa tessned tt, ini tt!
JOB 34:34 Iryazen s řefhamet ad ayi inin, am [qaɛ] aryaz amiɣis ittesřa-dd ɣari,
JOB 34:35 aqa Ayub war issiweř s tussna, aqa awařen nnes břa řefhamet [i yeǧan].
JOB 34:36 Iwa, ejj Ayub ad ittwaqeǧeb ař aneggar, minzi ittarra-dd am iryazen [ccuren s] řmuɛṣiyyet.
JOB 34:37 Maɣar i ddenb nnes yarenni [ɛad] aɛeddi, jar aneɣ iccat camxa s ifassen u ttmarenyen wawařen nnes ḍidd i Arebbi.
JOB 35:1 Yarra-dd Ilihu, inna:
JOB 35:2 Ma ittɣiř ac aya nican, aqa teqqared: ‘Tasegda inu ktar x tenni n Arebbi’?
JOB 35:3 Maɣar tennid: ‘Man řefḍeř ɣarek? Min d ayi dd ɣa ikkaren aqa necc war tteggeɣ ddnub?’
JOB 35:4 Ad xak dd-arreɣ, uřa x imeddukkař nnec [akidek].
JOB 35:5 Xzar ajenna, u xzar, ḥekkar iseynuten tiwa nnec qaɛ!
JOB 35:6 Mařa texḍid, min i d as tᵉttegged s man aya? Mařa iɛeddiyen nnec d aṭṭas, min zzayes i d as i ɣa tawyed?
JOB 35:7 Mařa cek d amsegged, min i d as tᵉtticed [s uya], niɣ min itteṭṭef Netta zeg ufus nnec?
JOB 35:8 Aqa tuɛeffna nnec [třeqqef] aryaz am cek [waha], u tasegda nnec [tᵉttiři] di ṭṭweɛ n ijj n mmis n bnadem [waha].
JOB 35:9 Sɣuyyun zeg waṭṭas n řeḥṣarat, ttřaɣan ɣar twiza zi ssibbet n uɣiř n ayt n bu-ṣṣulṭa.
JOB 35:10 [Maca] uřa d ijjen iqqar: ‘Mani iǧa Arebbi, wenni d ayi iggin, wenni itticen izřan n uṣebbeḥ di ǧiřet,
JOB 35:11 wenni d aneɣ isseřmaden s řmař n temmurt, d wenni d aneɣ itteggen d imiɣisen s ijḍaḍ n ujenna?’
JOB 35:12 Dinni sɣuyyun nitni, [maca] Netta war dd-ittarri, zi ssibbet n nnfaxet n iɛeffanen.
JOB 35:13 S tidett, Arebbi war ittesři ɣar [iɣuyyan] ibeṭṭřen, Amzemmar x kuřci war [kides] iřehhi.
JOB 35:14 Waxxa cek teqqared, aqa cek war t tᵉttwiřid, tᵉttɣima tmesřact [ɛad] zzat i wudem nnes. Raja t xenni.
JOB 35:15 Mařa řexxu axeyyeq nnes war iccit ɛad, ma [xenni] Netta war issin x uɛeddi imɣar?
JOB 35:16 Ayub icarreg aqemmum nnes baṭeř, ittegg awařen imeqqranen nhřa tussna.
JOB 36:1 Yarni Ilihu [deg wawař], inna:
JOB 36:2 Ṣbar cwayt akidi, [xenni] necc ad ac ssecneɣ, aqa din ɛad řesbab [ktar] di ṭṭweɛ n [tmesřact n] Arebbi.
JOB 36:3 Necc ad dd-awyeɣ tussna inu zi řaggʷaj, ad neɛmeɣ tasegda n wenni d ayi dd-ixeřqen.
JOB 36:4 Maɣar s tidett, awařen inu war ǧin d ixarriqen, aqa [da] zzatek wenni d bu-tussna s tidett.
JOB 36:5 Xzar, Arebbi imɣar aṭṭas, [maca] war isseḥqiri [ḥed], imɣar jjhed n řefhamet [nnes].
JOB 36:6 Aɛeffan war t ittejji ad iddar, [maca] i imezřaḍ ittaɣ asen tasɣart [nsen].
JOB 36:7 Netta war issḥeyyid tiṭṭawin nnes x umsegged, [maca] issɣimi ten i řebda x řɛarc ak-d ijeǧiden, [uca ammu] i ɣa ttwassuɛřan.
JOB 36:8 Mařa ttwawten nitni di řegyuḍ, ttwaḥebbsen di ssnaseř n řeɣben,
JOB 36:9 [xenni] isscen asen timegga nsen d iɛeddiyen nsen, aqa mɣaren aṭṭas.
JOB 36:10 Yarezzem amezzuɣ nsen i uwebbex, iqqar asen ad dd-dewřen zi řmuɛṣiyyet [nsen].
JOB 36:11 Mařa sřin u sexxaren as, ad ssqefřen deg wefřaḥ ussan nsen u di zzhar iseggʷusa nsen.
JOB 36:12 [Maca] mařa war sřin, ad ttwahellken s lansa, ad ssuffɣen buḥbeř am war ɣarsen teǧi bu tussna.
JOB 36:13 Nitni inni issniɛmiřen deg wuř [nsen], ttsettafen aɣḍab, war tᵉttaren aɛawen mařa Netta icarf i-ten.
JOB 36:14 Řeɛmar nsen ad immet umi nitni [ɛad] di temẓi, [maɣar] ddaren jar imetleyyen.
JOB 36:15 Ad ifekk amezřuḍ di řeɣben nnes, di ddeǧ ad yarzem amezzuɣ nsen.
JOB 36:16 Ammu i ɣa iɛarren uřa d cek zeg wuḍuf n řeḥṣaret, ɣar ttasiɛ mani war ittiři ɛad unedqef, mani i ɣa tiři ṭṭabřa nnec teccur [s macca] i dayes tadunt.
JOB 36:17 [Maca] cek tennuɣed di ccreɛ ak-d uɛeffan, [maca] ddeɛwet d tenfuč ttasent-i-dd ak-d wayawaya.
JOB 36:18 Ḥḍa aqa asɛar war cek ittɣarri i ustehzi u řqedd n ddeyyet war cek issuffuɣ zeg webrid.
JOB 36:19 Ma iɣuyyan nnec ad cek ssaren zi řeḥṣaret, niɣ marra min tᵉttegged s marra tizemmar nnec?
JOB 36:20 War ttmeẓri di ǧiřet, xmi ɣa ttwakksen řegnus zeg wemcan nsen.
JOB 36:21 Ḥḍa ixef nnec, war ggur x uɣezdis mani ittwaff řɣecc, aqa cek ad tixdared aya x waḍar.
JOB 36:22 Xzar, Arebbi issɛuǧa s jjehd nnes, man wen iǧan d Amseřmad am Netta?
JOB 36:23 Man wen i d as isscanen abrid? Niɣ man wen i d as innan: ‘Cek teggid řɣecc’?
JOB 36:24 Ɛqeř ad tessɛuǧid řxedmet [n ifassen] nnes, [řxedmet nnes] i zi ttɣennajen iwdan.
JOB 36:25 Kuř bnadem ittwařa tt, zi řaggʷaj ttwařan [tt] iwdan.
JOB 36:26 Xzar, Arebbi d ameqqran, war nzemmar ad as nefhem, řqedd n iseggʷusa nnes war nzemmar ad [dayes] narzu.
JOB 36:27 Maɣar Netta ijebbed tuddimin n waman, tinni dd-ittwakksen zi tayyut [xenni] dewřent d anẓar,
JOB 36:28 [anẓar] nni zi ttnesnisin iseynuten, [anẓar] nni dd iweṭṭan s ufeyyeḍ x iwdan.
JOB 36:29 Man wen ittḥakan [ɛemmarṣ] deg ubezzeɛ n iseynuten, uřa d řḥess isseggwaden zi Texzant nnes?
JOB 36:30 Xzar, ittbezzeɛ tafawt nnes tiwa n Yixef nnes, ittřeḥḥaf [zzayes] ṭṭřufa yuǧɣen qaɛ n řebḥar.
JOB 36:31 Maɣar s uya ittcarreɛ řegnus. Itticc macca s waṭṭas.
JOB 36:32 Ittcurra ifassen nnes s tfawt, iweṣṣa tt ad teřqef tandayt.
JOB 36:33 Aḍarḍeḥ [n wassamen] ittbarreḥ zzayes, uřa d taḥimart [tᵉttbarreḥ] aqa Netta ad dd-yas.
JOB 37:1 Wah, s uya ittarjij wuř inu, ineṭṭu zeg wemcan nnes.
JOB 37:2 Sřem mliḥ i zzhir n tmijja nnes, i wejdab [n wajjaj] i dd-ittekken zeg uqemmum nnes.
JOB 37:3 Issekk i-t sadu marra ajenna, uca [issekk] tafawt nnes ař ineggura n temmurt.
JOB 37:4 Awarni as izehhar s tmijja [ijehden], ihemhem s tmijja n lɛaḍama nnes u war imenneɛ [assamen], mařa tᵉttwaseř tmijja nnes.
JOB 37:5 Arebbi iddardiḥ s tmijja nnes s tebridt n řeɛjeb, ittegg řeḥwayej timeqqranin, neccin war asent nfehhem.
JOB 37:6 Maɣar iqqar i wedfeř: ‘Wḍa ɣar temmurt!’, uca [xenni] ad dd-yas wenẓar, anẓar iccaten s iɣezran nnes ijehden.
JOB 37:7 Netta ittcemmeɛ afus n mkuř bnadem, ḥima marra iwdan ad ssnen, aqa d řexdayem nnes.
JOB 37:8 Řewḥuc ttnuffaren di řemrageḥ u ttɣiman deg ifran nsen.
JOB 37:9 Tettas-dd tḥaryaḍt z eg wexxam nnes n daxeř u ak-d usemmiḍ n ccamal [tᵉttas-dd] uřa d tesmeḍ.
JOB 37:10 S usuḍi n nnefs [nnes] ittawi-dd Arebbi ajris, jemden waṭṭas n waman.
JOB 37:11 Wah, ittɛemmar iseynuten s tuffet, ittbezzeɛ aseynu n tfawt nnes.
JOB 37:12 Wanita ittraḥ ittas-dd, mammec t ineddeh Netta, ḥima ad ggen marra min i d asen yumur x wudem n temmurt, x temmurt.
JOB 37:13 Ad taf ad t tẓared am yijj n weɛmud, niɣ am i [řefḍeř] n temmurt, niɣ am [wescan n] tmexsa icuwwaren.
JOB 37:14 Ewc amezzuɣ i man aya, [a] Ayub, bedd, [sqar], u ḥḍa x řeɛjayeb n Arebbi.
JOB 37:15 Ma tessned mammec i xasen iḍebbar Arebbi, mammec issruɣa tfawt n useynu nnes?
JOB 37:16 Ma tessned mammec tteḥraran iseynuten, [ma tessned] řeɛjayeb n wenni ɣar teǧa tussna tmun.
JOB 37:17 Cek, wenni umi iḥemma warruḍ, mařa Netta issarsa tammurt s arriḥ n ljanub,
JOB 37:18 ma tbezzɛed akides řqubbet n ujenna, tenni [din] ibedden am yict n tisit ifesyen?
JOB 37:19 Sargeb aneɣ cek min i d as ɣa nini, maɣar neccin war [nzemmar] ad nfessar walu mliḥ zzates zi ssibbet n taǧest.
JOB 37:20 Ma ad as hajan, aqa ssiwřeɣ [ammu]? Mařa ca n yijjen ad [tt] yini, ad ittwaṣarḍ nican.
JOB 37:21 Řexxu war ittwiři [bnadem] tafawt, tenni yareqqen deg iseynuten, [maca] mařa iɛdu usuḍi n usemmiḍ, aqa ifarreḍ i-ten.
JOB 37:22 Zi ccamal ittas-dd wureɣ, tissiqt issaggʷaden [tarsa] x Arebbi.
JOB 37:23 Amzemmar x kuřci, wenni war nzemmar ad t naf, wenni d ameqqran di jjehd, Netta war ittdeǧi řḥeqq d tsegda ifeyyḍen.
JOB 37:24 S uya tteggʷeden zzayes iwdan, Netta war ixezzar ɣar yinni [iḥessben ixef nsen] d imiɣisen.
JOB 38:1 Awarni as yarra-dd SIDI x Ayub zi tḥaryaḍt, inna:
JOB 38:2 Man wen issbarrcnen acawar, s wawařen břa tussna?
JOB 38:3 Byes [xenni] tijɛinnatin nnec am weryaz. Necc xseɣ ad cek sseqsiɣ u cek, arr-dd xafi!
JOB 38:4 Mani cek tuɣa umi ggiɣ Necc dsas n tammurt? Ini t mařa ɣarek řefhamet [s tidett].
JOB 38:5 Man wen iggin řeɛbar nnes, [wah,] cek tessned tt, [ma war iǧi amenni]? Man wen xas imeḥḍen afiřu n řeɛbar?
JOB 38:6 Min xef hwan dsusa nnes, niɣ man wen issarsen aẓru n teɣmart nnes,
JOB 38:7 umi itran n ṣṣbeh ɣennjen [jmiɛ] s řefraḥet, umi sřiwřewen marra arrawen n AREBBI?
JOB 38:8 Man wen ibellɛen řebḥar s tewwura, umi dd-idduqqez uca iffeɣ-dd zeg uɛeddis n yemmas,
JOB 38:9 umi d as ggiɣ iseynuten d arruḍ nnes, ijj n useynu ibbumbes d amendiř maḥend ad dayes t ssehnunnḍeɣ,
JOB 38:10 umi d as arẓiɣ afray inu [am ijj n weḥfur yuǧɣen], u umi d as ggiɣ aɛmud i ubelleɛ d tewwura,
JOB 38:11 nniɣ: ‘Ař da i dd ɣa tased, war ɛeddu. Danita ad tᵉttwassbedd nnfaxet n řemwaj nnec.’
JOB 38:12 Ma tumured cek [ateffu n] ṣṣbeḥ deg wussan nnec? Ma tesscaned i tfawt n řefjar amcan nnes,
JOB 38:13 maḥend ad tᵉṭṭef afriwen n temmurt, ařami ad zzayes zzerzen iɛeffanen?
JOB 38:14 Ad tedweř [temmurt] am tarrist [sadu] ṭṭabeɛ, [marra timesřayin] ad [xas] ttwassbeddent [ɛawed] am mammec i teǧa ijj n warruḍ.
JOB 38:15 Iɛeffanen ad asen tᵉttwakkes tfawt nsen u aɣiř ittwassgeɛɛden ad ittwarẓ.
JOB 38:16 Ma tiwḍed ɣar řɛunṣarat n řebḥar, ma tuyured [ɛemmarṣ] x wudem n [temmurt] n [waman] ihewřen?
JOB 38:17 Ma ttwaɛarrant tewwura n řmewt i cek, ma teẓrid tiwwura n tiři n řmewt?
JOB 38:18 Ma tᵉttawi-dd řefhamet nnec ař ineggura n temmurt? Ini t mařa tessned aya marra.
JOB 38:19 Mani iǧa webrid ɣar tzeddiɣt n tfawt? U taǧest, mani teǧa tzeddiɣt nnes,
JOB 38:20 ḥima ad tzemmared ad tt tnedhed ɣar wemcan nnes, u ad tessned mliḥ imesraq ɣar taddart nnes?
JOB 38:21 Cek aqa tessned man aya [niɣ], minzi cek tuɣa txeřqed, [niɣ lla?] U [ma war iǧi] řqedd n wussan nnec d aṭṭas?
JOB 38:22 Ma tudfed ɣar ixxamen n řexzen n wedfeř, [ma] teẓrid řehrit n tebruri,
JOB 38:23 nni x ceṭṭareɣ i řweqt n řeḥṣaret, i wass n garra d umenɣi?
JOB 38:24 Mani iǧa webrid ittbeṭṭan tifawt, uřa d [abrid] i zi ittwabezzeɛ usemmiḍ n ccarq x temmurt?
JOB 38:25 Man wen ifeǧeq řmizab i řḥemřet n wenẓar, uřa d abrid i wassam n wajjajen
JOB 38:26 ḥima ad issekk anẓar x temmurt nni di war [izdiɣ] ḥed, x řexřa i war di [izdiɣ] uřa d ijj,
JOB 38:27 ḥima ad issarwa jjwayeh ixřan u ittwaxřan u ḥima ad isseɣmi arbiɛ d ṭṭri?
JOB 38:28 Ma anẓar ɣares ca n babas, niɣ man wen i dd-ittejjan tuddimin n nnda?
JOB 38:29 Zi man aɛeddis i zi dd-iffeɣ wejris, u nnda ijersen n ujenna, wi i-t-i-dd-yurwen?
JOB 38:30 Ddakkwařen waman am weẓru uca ijars wudem n [waman] ihewřen.
JOB 38:31 Ma tzemmared ad tcedded Agraw n Sebɛa n Yetran, niɣ tfessyed ssnaseř [n yetran] n Uriyun?
JOB 38:32 Ma tzemmared ad dd-tessuffɣed itran n Zudyak ɣar řḥař nsen, uřa d Ddub [Ameqqran] ak-d tarwa nnes?
JOB 38:33 Ma tessned izerfan n ujenna, niɣ tzemmared ad tḍebbared x uqarri nsen di temmurt?
JOB 38:34 Ma tzemmared ad tessgeɛɛded ɣar iseynuten tmijja nnec, ařami cek i ɣa tdeř ict n řḥemřet n waman?
JOB 38:35 Ma tzemmared ad tessekked assamen maḥend ad qeǧqen, ad ac inin: ‘Aqa-neɣ da’?
JOB 38:36 Man wen issarsen tiɣit di daxeř [n bnadem]? Niɣ man wen iwcin řefhamet i řeɛqeř?
JOB 38:37 Man wen ifarrzen iseynuten s řeɛqeř, iɣarrafen [n waman] n ujenna wi ten ittzeǧaɛen,
JOB 38:38 ařami ittwafsiy ucař, idweř d abeǧaɛ, uca řesqen ibursa n temmurt?
JOB 38:39 Ma tzemmared ad tᵉṭṭfed zzardet i tayradt, niɣ ad tesseřhud řaẓ n wayraden imeẓyanen,
JOB 38:40 řami nuffaren deg ifran nsen, u ttḥaman zi řemrageḥ nsen?
JOB 38:41 Man wen issewjaden i ubaɣeř macca nnes, xmi sɣuyyun imeẓyanen nnes ɣar Arebbi, xmi ttemhafan nhřa macca?
JOB 39:1 Ma tessned meřmi ttarwent tɣaydin n tṣuḍar? Ma tḥeṭṭid tirwa n tudadin?
JOB 39:2 Ma tzemmared ad tḥesbed iyuren n tkessit nsent, ma tessned řḥař n tirwa nsent?
JOB 39:3 Nitenti tteqwisent, ttarwent imeẓyanen nsent, řewjeɛ n tarut nsent ssuffuɣen ten.
JOB 39:4 Meḥḍen imeẓyanen nsent, meqqaren di řexřa, tteffɣen ɣar barra u war ɣarsent ttɛiqqiben.
JOB 39:5 Man wen yarxun i weɣyuř n řexřa u tisarrifin n weɣyuř n řexřa, man wen tent ifesyen?
JOB 39:6 Necc wciɣ as tanezruft d taddart, řewḍa ameǧaḥ d tizeddiɣin nnes.
JOB 39:7 Netta iḍeḥḥec x řɣaci inhewřen n tendint, war ittesři iɣuyyan n yinni izeyyaren [isemɣan].
JOB 39:8 Jjwayeh n idurar d ddmani nnes n tarewsa, yarezzu [daysen] x qaɛ min iǧan d aziza.
JOB 39:9 Ma ad ixs iɣayḍ n řexřa ak-d waccawen d iziraren ad xak isexxar? Ma ad issens ɣar řmedwed nnec?
JOB 39:10 Ma tzemmared ad tmenɛed iɣayḍ n řexřa ak-d waccawen d iziraren s wesɣun nnes ɣar uɛeyyed [n wecraz]? Ma ad icarz tiysarin awarni ac?
JOB 39:11 Ma tᵉttcařed xas, minzi netta ijhed aṭṭas, ma ad as tejjid řxedmet nnec?
JOB 39:12 Ma ad xas tᵉttecřed ad [ɣarek] dd-yarr zzariɛet nnec, ad tt yawi ɣar unedrar nnec?
JOB 39:13 Afriwen n nnɛamet ccaten s řxaḍar. Maca ma aqa-ten d afriwen d warric idařfen n ubellarj?
JOB 39:14 Maɣar tᵉttejja timeǧařin nnes deg ucař n temmurt, tᵉttejja i-tent tteḥmant deg ijdi.
JOB 39:15 Tᵉttᵉttu aqa ijj n uḍar izemmar ad tent iřbez, aqa řewḥuc n řexřa zemmaren ad xasent ɛefsen.
JOB 39:16 Nettat tqesseḥ deg imeẓyanen nnes axmi war ǧin nnes. Baṭeř i tᵉttegg tizemmar nnes, maɣar nettat war tkessi s wemnus,
JOB 39:17 maɣar Arebbi ijja i-tt ad tᵉttu tiɣit, war d as iwci bu tesɣart di řefhamet.
JOB 39:18 [Maca] mařa teksi deg uḍar nnes, tessgeɛɛad ixef nnes, tḍeḥḥec x uyis d wenni xas inyin.
JOB 39:19 Ma tzemmared ad tewced jjehd i uyis? Ma tzemmared ad tessyarḍed ijiman nnes s ssbib?
JOB 39:20 Ma tzemmared ad t yarr ineṭṭu am uburxes? Řɛezz n usneḥneḥ nnes issaggʷad aṭṭas.
JOB 39:21 Xebbcen [iysan] s iḍaren nsen [am ttrajan] di řewḍa n teɣzurt, ifarḥ [uyis] s jjehd nnes, itteffeɣ, maḥend ad immeřqa ak-d řesnaḥ.
JOB 39:22 Iḍeḥḥec x marra min issaggʷaden, war ittnexřiɛ zi walu, war iddikkwiř ɣar ḍeffar zi ssif.
JOB 39:23 Ittqarqub weqrab n fřitcat sennej nnes, lansa d fřitca ttissiqen.
JOB 39:24 S ddriz [n tceḍyin] d zzɛamet iṣarreḍ tammurt, war izemmar ad ittwassbedd ɣar usuḍi n uyicc n icarri.
JOB 39:25 Ɣar tmijja n usuḍi deg uyicc n icarri issneḥniḥ: ‘Heheh!’ Ittaca ak-d umenɣi zi řaggʷaj, zzga n řḥukkam d iɣuyyan n umenɣi.
JOB 39:26 Ma iṭṭaw řbaz zi řefhamet nnec, aqa ittbezzaɛ afriwen nnes ɣar ljanub?
JOB 39:27 Ma issgeɛɛad ugidar ixef nnes sennej qaɛ s řumur nnec, ittegg řɛucc nnes di řuɛřa?
JOB 39:28 Izeddeɣ u issnusa x jjarf, x ucenqub n jjarf, aqa-t d lburj [nnes].
JOB 39:29 Ssenni iḥeṭṭa zzardet, tiṭṭawin nnes xezzarent i-tt-dd zi řaggʷaj.
JOB 39:30 Imeẓyanen nnes sekkfen idammen u mani ǧan inni ittwanɣen, aqa-t din [i yeǧa].
JOB 40:1 Yarni yarra-dd SIDI x Ayub, inna:
JOB 40:2 Ma ixs wenni ittemcarraɛen ak-d Umzemmar x kuřci ad [t] iseggem? Ejj wenni ixsen ad idɛa Arebbi, ad dd-yarr!
JOB 40:3 [Xenni] yarra-dd Ayub x SIDI, inna:
JOB 40:4 Xzar, necc drus, min zemmareɣ ad xak dd-arreɣ? Necc ad ggeɣ afus inu x uqemmum inu.
JOB 40:5 Aqa ssiwřeɣ ict n twařa, [maca] war dd-ttarriɣ [ɛad]. twařa wiss tnayen war [d as] arenniɣ!
JOB 40:6 [Xas uca] yarni yarra-dd SIDI x Ayub zi tḥaryaḍt, inna:
JOB 40:7 Byes [xenni] tijɛinnatin nnec am weryaz. Necc xseɣ ad cek sseqsiɣ u cek, arr-dd xafi!
JOB 40:8 Ma texsed s tidett ad tarẓed řḥukm inu? Ma texsed ad ɣari dd-tarred řɛib, maḥend ad tbaned cek d amsegged?
JOB 40:9 Ma ɣarek aɣiř am Arebbi? Ma tzemmared ad teddardḥed am wajjaj s tmijja [nnec]?
JOB 40:10 Qqen xenni ixef nnec s lɛaḍama d uɛuǧi, arḍ s tissiqt d řɛezz.
JOB 40:11 Ejj aduqqez n ufugem nnec ad izeǧeɛ, xzar ɣar kuř bu nnfaxet, uca sehwa i-t!
JOB 40:12 Xzar mliḥ ɣar mkuř bu-nnfaxet, sehwa i-t, řbez iɛeffanen deg wemcan nsen.
JOB 40:13 Ffar i-ten marra am munen deg ucař, cfen iɣembab nsen di tnuffra [sadu tammurt].
JOB 40:14 Xenni uřa d Necc ad cek ssemɣareɣ, minzi afus nnec afusi issenjem i cek.
JOB 40:15 Xzar maca Řweḥc, [‘Bᵉhimut’], wenni ggiɣ am mammec cek ggiɣ. Ittett arbiɛ am ufunas.
JOB 40:16 Xzar jjehd nnes di tejɛinnatin nnes, řɛezz nnes deg iẓewran nnes n uɛeddis!
JOB 40:17 Mařa ixs, ad igg akennas nnes am tcejjart n tengelt, iẓewran n tmeṣṣaḍin nnes meḥḍen mmuden.
JOB 40:18 Ixsan nnes tteggen am yiqudas n nnḥas, am barrat n wuzzař iḍaren d iɣaǧen nnes.
JOB 40:19 Netta d amezwaru n ibriden n Arebbi. Wenni t yeggin, iwca as ssif nnes.
JOB 40:20 Iwa, idurar ttawyen as-dd arbiɛ, marra řewḥuc n yeyyar ttiraren dinni.
JOB 40:21 Ibbuzzeř sadu i tcejjura itteggen tiři, deg udurri n uɣanim, di ssebxet.
JOB 40:22 Ad xas dduryent tcejjura i itticen tiři, kuř ict s tiři nnes, tinemrač n tɣezratin ttennḍent as-dd.
JOB 40:23 Xzar, mařa ihaj yeɣzar, war ittarjiji, ittɣima yarsa mařa řḥemřet n L’Urdun tudef as-dd ɣar uqemmum.
JOB 40:24 Ma izemmar [bnadem] ad t iṭṭef [am ixezzar netta nican] di tiṭṭawin nnes, ad as issnuqqeb tinzart s tesɣunin?
JOB 40:25 Ma tzemmared ad tjebded ‘Liviyatan’ s tsennart n weymar, niɣ ad tessehwid iřes nnes deg ufiřu [n weymar]?
JOB 40:26 Ma tzemmared ad as tegged taxadent n uɣanim di tenzart nnes, niɣ ad tessnuqqbed aɣesmir nnes s uɣanču?
JOB 40:27 Ma ad zzayek ittar aḥinni? Ma ad issiweř akidek s wawařen imiziḍen?
JOB 40:28 Ma ad yegg akidek řɛahd? Ma tzemmared ad t teksid d ismeɣ i řebda?
JOB 40:29 Ma tzemmared akides tᵉttirared am ak-d ijj n ujḍiḍ, niɣ ad t teqqned i teḥramin nnec?
JOB 40:30 Ma zemmaren ineymaren ad dayes sebbeben? Ma zemmaren ad t bḍan jar ayt n Kenɛan?
JOB 40:31 Ma tzemmared ad tejjud tiřmect nnes s fřitcat, niɣ s lansa n iseřman azeǧif nnes?
JOB 40:32 Sars xas afus nnec, xemm ɣar umenɣi, war t tteggid ɛemmarṣ ɛad.
JOB 41:1 Xzar, [qaɛ] araji ad ifceř, mɣir tamuɣři nnes tesseɛgaz [bnadem].
JOB 41:2 War iǧi uřa d ijjen ammu d azeɛɛam ařami t i ɣa ihweř, man wen [xenni] izemmaren ad iqqim ibedd zzat i uɣembub inu?
JOB 41:3 Man wen i d ayi iwcin [ca] d amezwaru, ařami d ayi ittxeṣṣa ad ɣares t-i-dd-arreɣ? Marra min iǧan sadu ijenwan inu!
JOB 41:4 Necc war ttesqariɣ x iḍaren nnes, x řemɣaret n jjehd [nnes] u x ucuwwar n waddud nnes.
JOB 41:5 Man wen izeɛɛmen ad iqejjeɛ taqcurt n warruḍ nnes, man wen izeɛɛmen ad dd-iqarreb ɣar tyuya n řesdud n teɣmas n iɣesmar nnes?
JOB 41:6 Man wen izemmaren ad yarzem tiwwura ɣar uɣembub nnes? Min innḍen i teɣmas nnes mɣir d anexřiɛ.
JOB 41:7 Řesdud n tseddariyin x weɛrur nnes cennɛen, [kuř ijj zzaysen] ittwabelleɛ s ṭṭabeɛ iqqnen nican.
JOB 41:8 Ijjen iqqnen [nican] ɣar ijj n nneɣni, war izemmar ad din dd-yadef arriḥ jar asen.
JOB 41:9 Řessqen deg wayawya, udfen deg ixef nsen maḥend war temmsebḍin.
JOB 41:10 Mařa iɛḍes, tᵉttceɛciɛ tfawt, tiṭṭawin nnes ggint am wabřiwen n tfawt n řefjar.
JOB 41:11 Zeg ujeqmim nnes tteffɣen-dd iṣefḍawen, tifeṭṭutin n tmessi dduqquzent [zzayes].
JOB 41:12 Ddexxan ittfewwar zeg ixubac n wenzaren nnes, am zeg ijj n uṭenjir ittnennan s uɣanim idduxxunen.
JOB 41:13 Twarrit n nnefs nnes tᵉssekkara timessi di řefḥem, zeg uḥerqum nnes itteffeɣ-dd uḥaduq n tmessi.
JOB 41:14 Jjehd izdeɣ deg ijiman nnes, ɣar zzat nnes ineṭṭu unexřiɛ.
JOB 41:15 Ṭṭrufa n weysum [n uɛeddis] nnes mmřesqen, am xasen fesyen, war zemmaren ad ttwanhezzen.
JOB 41:16 Uř nnes iqseḥ am weẓru, iqseḥ am teṣḍart n swadday n tsirt.
JOB 41:17 Xmi issgeɛɛad ixef nnes, ttnexřaɛen inni ijehden, zeg uqezzeb xeṭṭan di tendayt.
JOB 41:18 Mařa iřqef i-t ca n yijjen s ssif, war ittiři, [war iǧi s] uḥric, řa s lansa uřa s fřitca.
JOB 41:19 Uzzař ɣares am uřum, nnḥas am ukeccuḍ yarcan.
JOB 41:20 Fřitca n řqews war t tesstewwej, iẓra n iǧiy ddakkwařen zzates d aqecqac.
JOB 41:21 Idebbuzen iḥesseb i-ten am uqecqac, iḍeḥḥec x uzebzeb n uḥric.
JOB 41:22 Ɣar wadday n [uɛeddis nnes] aqa din iceqfan iqeḍɛen, ittjarra řemwas iqeḍɛen nni [am teřwiḥt itteḥřuǧuḍen i usarwet] tiwa n ubeǧaɛ.
JOB 41:23 Igga řaǧaɣ ad isstextex am teydart, ittegg řebḥar am umeqraj itthajan.
JOB 41:24 Ittejja awarni as jjurret tareqq d amesraq, [aman] ihewřen ttbanen am ucuwwaf n umeccaybu.
JOB 41:25 War din iǧi uřa d ijj x temmurt yarwes dayes, ittwagg ḥima ɛemmarṣ war itteggʷed.
JOB 41:26 Inḍar tiṭṭawin nnes x marra wi yuɛřan, aqa-t d ajeǧid x marra iyraden imeẓyanen ineffxen.
JOB 42:1 Ayub yarra-dd x SIDI, inna:
JOB 42:2 “Necc ssneɣ aqa Cek tzemmared i kuřci war issbeṭṭiř uřa d ijj n wenway nnec.
JOB 42:3 [Cek teqqared:] ‘Man wen issbarrcnen břa tussna ccwar [n Arebbi]?’ S uya ssiwřeɣ x min war fhimeɣ, x tmesřayin nni di ttbehteɣ aṭṭas, war tent ssineɣ.”
JOB 42:4 “Seř maca uca ad ssiwřeɣ, xseɣ ad Cek sseqsiɣ uca [xenni] Cek ad ayi [xas] tessargbed.
JOB 42:5 S umezzuɣ xak i sřiɣ [waha], maca řexxu tiṭṭ inu teẓri Cek.
JOB 42:6 X uya ttɛiffiɣ ixef inu uca ndemmeɣ, qqimeɣ di tɛejjajt d yiɣɣeḍ.”
JOB 42:7 Awarni řami tuɣa issiwiř SIDI awařen-a ak-d Ayub, inna SIDI i Ilifaz zi Tayman: “Lɣaḍab inu yarɣa xak u x tnayen n imeddukkař nnec, maɣar kenniw war xafi tessiwřem ca nican am mammec xafi issiweř umsexxar inu Ayub.
JOB 42:8 Xenni řexxu, ksim kenniw sebɛa n ifunasen imeẓyanen d sebɛa n icarriyyen, uca uyurem ɣar umsexxar inu Ayub uca qeddmem ten d taɣarṣt n wecmaḍ i yixef nwem. Jjem amsexxar inu Ayub ad xawem iẓẓaǧ. Maɣar Necc ad ssgeɛɛdeɣ aɣembub nnes [i westajeb], ḥima war tteggeɣ akidwem am tubbuheřya nwem, minzi kenniw war xafi tessiwiřem nican am mammec xafi issiwiř umsexxar inu Ayub.”
JOB 42:9 [Xenni] iffeɣ Ilifaz zi Tayman, Bildad zi Cuḥa d Ṣufar zi Naɛmat uca ggin nitni am mammec d asen inna SIDI. SIDI issgeɛɛed aɣembub n Ayub [i ustajeb n tẓaǧit nnes].
JOB 42:10 Awarni řami tuɣa ittẓaǧa Ayub di ṭṭweɛ n imeddukkař nnes, inneqřeb SIDI tameḥbast n Ayub i di iǧa netta [zi ssibbet n řehřac nnes], uca yarni SIDI di marra agřa n Ayub tnayen n tseqqar.
JOB 42:11 Usin-dd ɣares marra aytmas d marra suyᵉtmas d marra inni t issnen zic. Nitni ccin akides aɣrum di taddart nnes uca ssecnen as aziǧez nsen uca ɛezzan t x marra řɣar xas dd-iɣḍeř SIDI. Iwca as kuř ijjen zzaysen ijj n řewzen n nnuqart uřa d ict n txadent n wureɣ.
JOB 42:12 Ibarek SIDI taneggarut n Ayub ktar zi tmezwarut nnes, maɣar tuɣa ɣares arebɛa-ařaf n wuǧi d setta-ařaf n iřeɣman d wařef n ifunasen n teɣnact d wařef n teɣyař.
JOB 42:13 Tuɣa ɣares sebɛa n iḥenjiren d třata n yessis.
JOB 42:14 Tamezwarut igga as Yamima, wiss tnayen qqaren as Qaṣiɛa d wiss třata qqaren as Qarn-Haffuk.
JOB 42:15 War ufin di marra tammurt tiḥramin cnant am yessis n Ayub. Babatsent iwca asent tasɣart jar aytmatsent.
JOB 42:16 Ayub iddar awarni i uya mya u-rebɛin n iseggʷusa. Netta iẓra iḥenjiren nnes d iḥenjiren n iḥenjiren nnes [ɣares ař] jjiř wiss arebɛa.
JOB 42:17 Ayub immut awarni řami iwsar aṭṭas u tuɣa ijjiwen ussan [n tudart nnes].
PSA 1:1 Sseɛd n weryaz, wenni war igguren di ccwar n iɛeffanen, d wenni war ibedden deg webrid n imednab, d wenni war iqqimen x řkursi n imestehzayen,
PSA 1:2 maca řefraḥet nnes aqa-tt di Ccariɛa n SIDI u ittxarreṣ di Ccariɛa nnes ass d ǧiřet.
PSA 1:3 Ad yiři am yict n tcejjart i ittwaẓẓun ɣar tɣezratin n waman, tenni itticen řɣiǧet nnes di řweqt nnes, afar nnes war ittiẓeɣ. Marra min ittegg, ad yiři.
PSA 1:4 War [ttiřin] iɛeffanen ammu, minzi [nitni] am icarfa ittawi-y-i-t usemmiḍ.
PSA 1:5 X uya iɛeffanen war ttbeddin ca deg wass n řeḥsab, uřa d imednab di tmesmunt n imseggaden.
PSA 1:6 Minzi SIDI issen abrid n imseggaden, [maca] abrid n iɛeffanen ad ifna.
PSA 2:1 Mayemmi tthajen řegnus, ttxarriṣen ccuɛub di řbaṭer?
PSA 2:2 Kkaren ijeǧiden n temmurt, ayt n bu-ṣṣulṭa mcawaren ḍidd i SIDI u ḍidd i Lmasiḥ nnes:
PSA 2:3 ‘Ejj aneɣ ad nqess iceddiyyen nsen, ad xaneɣ nessbeɛɛed tiseɣwin nsen!’
PSA 2:4 Wenni izeddɣen deg ujenna iḍeḥḥec, Sidi inu ad zzaysen isstehza.
PSA 2:5 Xenni ad kidsen issiweř s weɣḍab nnes, s řḥaduq n weɣḍab nnes ad ten issiggʷed.
PSA 2:6 “Necc aqa dehneɣ Ajeǧid inu, x Ṣihyun, adrar inu iqeddsen!”
PSA 2:7 Necc ad barrḥeɣ tikkest n wawař! SIDI inna ayi: “Cek d Mmi, ass-a jjiɣ-dd Cek!
PSA 2:8 Ttar zzayi u Necc ad ac wceɣ řegnus d řwart, tineggura n temmurt ad ɣarek iřint d agřa i Cek.
PSA 2:9 Ad ten třebzed s yijj n weqḍib n wuzzař, ad ten tarẓid d tareẓẓit am yijj n uɣarraf n třaxt.”
PSA 2:10 Řexxu [xenni], a ijeǧiden, iřim d ifehhamen, tebbtem ixef nwem, a řquḍat n temmurt!
PSA 2:11 Sexxarem i SIDI s teggʷudi, farḥem s tarjijet.
PSA 2:12 Sudmem Mmis, ḥima Netta war iseɛɛar u ad tᵉttwahellkem deg webrid, waxxa ittwassarɣ weɣḍab nnes mɣir drus waha. Sseɛd nsen i yinni ɣares yarekkwařen.
PSA 3:1 [Azehhed n Dawud, umi yarweř zeg wudem n mmis Abcalum.]
PSA 3:2 [A] SIDI, inni d ayi iḥeṣṣaren aqa kettaren, aṭṭas aqa aten ḍidd inu.
PSA 3:3 Aṭṭas aqa qqaren x řeɛmar inu: “I netta war din [iǧi] usenjem ɣar AREBBI!” Silah.
PSA 3:4 [Aḥeqqa] Cek, [a] SIDI, d taseddart n useřqi i necc, aɛuǧi inu, Cek d wenni issgeɛɛden azeǧif inu.
PSA 3:5 S tmijja inu řaɣiɣ i SIDI, uca Netta yarra-dd xafi zeg wedrar nnes iqeddsen. Silah.
PSA 3:6 Senndeɣ uca ikka xafi yiḍeṣ, faqeɣ-dd, minzi SIDI ittɛawen ayi.
PSA 3:7 War tteggʷideɣ zi ɛecra n řuřuf n řgens, inni d ayi dd-innḍen, ssbeddan ixef nsen x iɣezdisen inu.
PSA 3:8 Kkar, a SIDI, senjem ayi, [a] AREBBI inu, minzi Cek tewtid marra řɛedyan inu ɣar uɣesmir, aqa teddzed tiɣmas n iɛeffanen.
PSA 3:9 Asenjem aqa-t n SIDI, lbaraka nnec aqa-tt x řgens nnec. Silah.
PSA 4:1 [I umeqqran n imeɣnajen. Ak-d uzenzun x ifiřan. Azehhed n Dawud.]
PSA 4:2 Arr-dd xafi xmi dd ttřaɣiɣ, [a] AREBBI n tsegda inu! Di řeḥṣaret aqa Cek teggid ayi ttasiɛ. Ḥinn xafi u seř-dd ɣar tẓaǧit inu!
PSA 4:3 Tarwa n [yijj n] weryaz, ař meřmi i ɣa yiři uɛuǧi inu d řɛar? Ař meřmi ɣa texsem řbaṭeř, ad tarzum x ixarriqen? Silah.
PSA 4:4 Snem [xenni], aqa SIDI iḥuzz ijj n umeddukkeř amtiqqi i yixef nnes. SIDI ad ayi iseř xmi d as i ɣa řaɣiɣ.
PSA 4:5 Arjijem, [maca] war xeṭṭim. Siwřem deg wuř nwem di řectu nwem uca susmem. Silah.
PSA 4:6 Qeddmem tiɣarṣa n tsegda, ttecřem x SIDI.
PSA 4:7 Aṭṭas qqaren: “Wi d aneɣ i ɣa issecnen řxar?” Ejj ad xaneɣ dd-tenqar tfawt n wudem nnec, [a] SIDI!
PSA 4:8 Cek tessidfed řefraḥet ɣar wuř inu, ktar [x řefraḥet] i [din] iǧan di řweqt umi tuɣa feyyḍen imendi nsen d binu nsen n jdid.
PSA 4:9 Di řehna ad zzřeɣ u ad ṭṭṣeɣ, minzi mɣir Cek, a SIDI, ad ayi tesszedɣed di řaman.
PSA 5:1 [I umeqqran n imeɣnajen. Ak-d temja. Azehhed n Dawud.]
PSA 5:2 [A] SIDI, seř i min ɣa iniɣ, fehmet i unixses inu.
PSA 5:3 Ḥekkar i tmijja n tutra inu, [a] Ajeǧid inu d AREBBI inu, aqa i Cek umi ttẓaǧiɣ.
PSA 5:4 Ɣar tuffut, [a] SIDI, tesřid Cek i tmijja inu, ɣar tuffut nnqeřbeɣ-dd ɣarek, uca qqimeɣ ttrajiɣ Cek.
PSA 5:5 Cek war teǧid ca d Arebbi nni ittexsen tuɛeffna, bnadem aɛeffan war ɣarek ittif aɣimi.
PSA 5:6 Ibuḥařiyyen war ttɣimin ttbeddan zzat i tiṭṭawin nnec, Cek tcarrhed marra inni itteggen řɣar.
PSA 5:7 Ad thellked ayt n bu-ixarriqen, SIDI ittɛiffa aryaz n idammen d řɣecc.
PSA 5:8 Maca s řemɣaret n tmexsiwt nnec icewwaren ad adfeɣ ɣar Taddart nnec, ad sejdeɣ ɣar Zzawect nnec Tameqqrant s tiggʷudi zzayek.
PSA 5:9 [A] SIDI, suyur ayi x webrid n tsegda nnec, di ṭṭweɛ n yinni i d ayi iḥeṣṣaren, seggem abrid nnec zzat i wudem inu.
PSA 5:10 Minzi deg uqemmum nsen war din bu řaman, jjuf nsen d axeyyeb, tmijja nsen d anḍeř yarezmen, arebbun txancet s yiřes nsen.
PSA 5:11 Xřef zzaysen, [a] AREBBI, ejj i-ten ad wḍan s řecwar [n yixef] nsen, aẓẓeř xasen di ssibbet n waṭṭas n ixeṭṭan nsen, minzi nitni ɣewwɣen xak.
PSA 5:12 Marra inni ɣarek yarekkwařen ad farḥen, ad sřiweřwen i řebda. Cek tfaryed xasen! Aqa inni ittexsen Isem nnec ad negzen s řefraḥet [i ɣarsen] dayek.
PSA 5:13 Minzi Cek, [a] SIDI, ad tbarked amseggad, ad as tquwwared s uḥinni am s tseddart n useřqi tameqqrant.
PSA 6:1 [I umeqqran n imeɣnajen. Ak-d uzenzun x ufiřu wiss tmenya. Azehhed n Dawud.]
PSA 6:2 [A] SIDI, war d ayi ttweddab deg weɣḍab nnec, war d ayi ttarebbi ca deg wesɛar nnec!
PSA 6:3 Ḥinn xafi, [a] SIDI, maɣar necc aqa arxuɣ. Sgenfa ayi, [a] SIDI, maɣar iɣsan inu ttarjijin!
PSA 6:4 Wah, řeɛmar inu yarjef aṭṭas, u Cek, [a] SIDI, ař meřmi?
PSA 6:5 Dweř-dd, [a] SIDI, fekk řeɛmar inu, senjem ayi di ṭṭweɛ n tmexsiwt nnec icewwaren.
PSA 6:6 Minzi di řmewt war dinni bu řidaret nnec. Wi Cek i ɣa iqadan di řaxart?
PSA 6:7 Necc uḥřeɣ s inixsisen inu. Ǧiřet tekmeř ssuffeɣ qama inu, uřa d tassut inu tᵉṭṭebṭeb qaɛ s imeṭṭawen.
PSA 6:8 Tiṭṭ inu teɣři s wecḍan, jjehd nnes iruḥ zi marra inni d ayi iḥeṣṣaren.
PSA 6:9 Aggʷejem xafi, marra inni itteggen řmuɛṣiyyet, minzi SIDI isřa i tmijja n imeṭṭawen inu.
PSA 6:10 SIDI isřa i tutra inu, SIDI ad iqbeř taẓaǧit inu.
PSA 6:11 Marra řɛedyan inu ad ten teřqef řefḍiḥet d unexřiɛ, ad dd-dewřen ɣar ḍeffar, ak-d wermac n wabřiwen ad seḍḥan.
PSA 7:1 [Izři n Dawud deg waṭṭas n tmijjiwin, izři nni iɣennej i SIDI di ssibbet n wawařen n Kuc, wenni iǧan zeg ayt n Binyamin.]
PSA 7:2 [A] SIDI, AREBBI inu, aqa ɣarek arekkwařeɣ! Senjem ayi zi marra inni xafi ittaẓẓřen uca fekk ayi,
PSA 7:3 maḥend netta war d ayi izeɛɛef am weyrad, ad ayi imezzeq, [řami] war din wi ɣa ifekken!
PSA 7:4 [A] SIDI, AREBBI inu, mařa necc ggiɣ man aya, mařa din ca n řɣecc iřṣeq deg ifassen inu,
PSA 7:5 mařa necc xeřfeɣ wenni akidi iddaren di řehna s řɣar, - [maca s řɛeks] wenni d ayi iḥeṣṣaren x walu, jjiɣ t ad yuyur -
PSA 7:6 ejj [xenni] ad yaẓẓeř řeɛdu x řeɛmar inu, ad ayi iɛdu, ad iɛfes x tudart inu di temmurt, [ejj i-t] ad issezdeɣ aɛuǧi inu di tɛejjajt! Silah.
PSA 7:7 Kkar-dd, [a] SIDI, deg weɣḍab nnec, suɛřa Ixef nnec x uduqqez n yinni d ayi iḥeṣṣaren, faq di ṭṭweɛ inu, aqa teggid tumured řḥeqq.
PSA 7:8 Agraw n řegnus ad ac dd-inneḍ, [xenni] dweř tiwa nsen ɣar sennej.
PSA 7:9 SIDI ad iḥakem řegnus. Aɣ ayi tasɣart, [a] SIDI, ɛlaḥsab tasegda inu, ɛlaḥsab řekmaret i dayi.
PSA 7:10 Sbedd tuɛeffna n iɛeffanen, semten amsegged, [Cek,] wenni iqeǧben uřawen d tiẓẓař, [a] AREBBI iseggden!
PSA 7:11 Taseddart inu i useřqi ɣar AREBBI, Amsenjem n imseggmen n wuřawen.
PSA 7:12 AREBBI d ijj n řqaḍi iseggden, Arebbi nni isexxḍen kuř ass.
PSA 7:13 Mařa netta war dd-iɛqib, ad isseqḍeɛ Netta ssif nnes, ad imḥeḍ řqews nnes uca ad [xas] ineyyec.
PSA 7:14 Igga xas řesnaḥ ineqqen, ad yarr fřitcat nnes d iṣefḍawen yareqqen.
PSA 7:15 Xzar, aqa wḍan-dd xas řewjeɛ n tarut n řmuɛṣiyyet, iksi ddeyset n tamara uca ad yaru ixarriqen.
PSA 7:16 Iqqaz ijj n weḥfur uca issuǧeɣ i-t, maca d netta [s yixef nnes] i iwḍan deg [weḥfur n] turṣuḍi i igga.
PSA 7:17 Tamara nnes ad dd-tedweř x uzeǧif nnes, řexcunet nnes ad dd-tehwa x uceqquf nnes.
PSA 7:18 Ad qadiɣ SIDI ɛlaḥsab tasegda nnes, ad zehhdeɣ i Yisem n SIDI, Amɛuǧi x kuřci.
PSA 8:1 [I umeqqran n imeɣnajen. S teɣnint n Ujtti, weryaz zi Jat. Azehhed n Dawud.]
PSA 8:2 [A] SIDI, Arebbi nneɣ, mammec ijhed Yisem nnec x marra tammurt, [Cek] d wenni iggin lɛaḍama nnec sennej i ijenwan.
PSA 8:3 Zeg uqemmum n iḥenjiren d iseyman, teggid dsas ijhed zi ssibbet n yinni Cek iḥeṣṣaren, ḥima ad tbellɛed abrid x řeɛdu u x wenni yarezzun ad ixřef.
PSA 8:4 Mařa twařiɣ ajenna, řxedmet n iḍewḍan nnec, taziri d yetran, inni teggid,
PSA 8:5 min iɛna [xenni] bnadem, aqa Cek txarrṣed dayes, mmis n bnadem, aqa Cek txezzared ɣares?
PSA 8:6 Cek tarrid t mɣir cwayt waha qell i AREBBI, tewcid as ttaj n uɛuǧi d řɛezz.
PSA 8:7 Cek tarrid t ad iḥkem x tmegga n ifassen nnec, tessarsed marra swadday i iḍaren nnes:
PSA 8:8 uǧi d ifunasen, marra ina, uřa d řmař n yeyyar,
PSA 8:9 ijḍaḍ n ujenna d iseřman n řebḥar, [marra] min ittcuqan ibriden n řebḥur.
PSA 8:10 [A] SIDI, Siditneɣ, mammec ijhed Yisem nnec di marra tammurt!
PSA 9:1 [I umeqqran n imeɣnajen. S teɣnint n ‘Řmewt n mmis’. Azehhed n Dawud.]
PSA 9:2 Alif. Ad qadiɣ SIDI s marra uř inu, ad barrḥeɣ marra lmuɛjizat nnec.
PSA 9:3 Ad zzayek farḥeɣ ad zzayek sřiwřiweɣ. Necc ad zehhdeɣ i Yisem nnec, [a] Cek, Amɛuǧi x kuřci!
PSA 9:4 Bit. Umi řɛedyan inu dewřen ɣar ḍeffar, wḍan u ɣeřyen zzat i wudem nnec.
PSA 9:5 Maɣar Cek twennid ayi tasɣart inu u tbellɛed ddeɛwet inu, teqqimed x řɛarc, [a Cek,] d řqaḍi amsegged.
PSA 9:6 Gimel. Cek twebbxed řegnus, thellked aɛeffan, temḥid isem nsen i řebda qaɛ.
PSA 9:7 Hi. Řeɛdu, aqa nitni ttwaqḍan, aqa aten d řxirbat i řebda. Tɣeḍřed iɣrimen nsen, řidaret nsen tefna.
PSA 9:8 Waw. SIDI ittɣima i řebda, aqa issbedd řɛarc nnes i řeḥkam.
PSA 9:9 Netta ad icarreɛ ddunect s tsegda, ad iḥkem ccuɛub s řḥeqq.
PSA 9:10 SIDI d lburj yuɛřan i wenni iḥṣaren, ijj n lburj yuɛřan di řweqt n řeḥṣaret.
PSA 9:11 Inni issnen Isem nnec, ad xak ttecřen, maɣar inni xak yarezzun, war daysen tsemmḥed, [a] SIDI.
PSA 9:12 Zayin. Zehhdem i SIDI, wenni izeddɣen di Ṣihyun, barrḥem s tmegga nnes jar řegnus.
PSA 9:13 Minzi Netta yarezzu x usizzeř n idammen, ittxarraṣ daysen. War ittu ca iɣuyyan n yinni ittwaḥeṣṣaren.
PSA 9:14 Xit. Ḥinn xafi, [a] SIDI, xzar ɣar řeɣben inu i dd-yusin zeg inni d ayi icarrhen, Cek d wenni d ayi ɣa issgeɛɛden zi tewwura n řmewt,
PSA 9:15 ḥima ad barrḥeɣ s marra ccan nnec, di tewwura n yeǧis n Ṣihyun. Necc farrḥeɣ x usenjem nnec.
PSA 9:16 Tit. Řegnus wḍan deg [weḥfur n] turṣuḍi i ggin nitni [s yixef nsen], iḍaren nsen ttwacedden di tracca nni ssnuffaren nitni [s yixef nsen],.
PSA 9:17 SIDI igga Ixef nnes ad t ssnen, Netta yuɣa tasɣart. Aɛeffan innuɣ di tmegga n ifassen nnes. Ejj ifiřan ad ddendnen. Silah.
PSA 9:18 Yud. Iɛeffanen ad dd-dewřen ɣar řaxart, marra řegnus nni ittun AREBBI.
PSA 9:19 Maca amezřuḍ war ittwattu i řebda, war ittwaqeṭṭeɛ řayas n yinni ittwaḥṣaren i řebda.
PSA 9:20 Quf. Kkar, [a] SIDI, ḥima war iddikkwiř bnadem ijhed ktar. Ejj řegnus ad ttwacarrɛen zzat i wudem nnec.
PSA 9:21 Siggʷed i-ten, [a] SIDI, ejj řegnus ad ssnen aqa aten d iwdan! Silah.
PSA 10:1 [Min iqqimen n Uzehhed 9] Lamid. [A] SIDI, mayemmi teqqimed tiggʷejed [ammu]? Mayemmi tessnuffared Ixef nnec di řweqt n řeḥṣaret?
PSA 10:2 S nnfaxet iḍeffar uɛeffan řmeskin. Ad ttwaṭṭfen s tmeɛmač i di ttxarrṣen.
PSA 10:3 Maɣar aɛeffan issɛuǧa ixef nnes ɣar meẓri n řeɛmar nnes, ittbarek aḍemmaɛ, ittceqqaf di SIDI.
PSA 10:4 Aɛeffan am wenni issgeɛɛaden tinzart nnes ɣar ujenna, war ittbeqqec, [iqqar]. “War din AREBBI”, man aya d marra min di izemmar ad ittxarreṣ.
PSA 10:5 Marra ibriden nnes tteffɣen as mliḥ kuř twařa. Řehkamat nnec ttuɛřant xas. Ittzawar marra inni t iḥeṣṣaren.
PSA 10:6 Netta iqqar deg wuř nnes: “War ttenhezziɣ, zi jjiř ař jjiř war d ayi iřeqqef uřa d ijj n řɣar.”
PSA 10:7 Aqemmum nnes iccur s nneɛřet d ixarriqen d ddeǧ. Sadu yiřes nnes [aqa din] tamara d řmuɛṣiyyet.
PSA 10:8 Netta ittɣima ɣar wecbar di dcurat, deg imucan innuffaren ineqq inni war iggin s ca. Tiṭṭawin nnes mmenḍarent x řmeskin.
PSA 10:9 Iřbet deg wemcan innufaren am weyrad deg udurri n uɛiccu nnes. Netta ittḥekkar ḥima ad yacar řmeskin. Ittacar řmeskin umi t ijebbed di tracca nnes.
PSA 10:10 Netta ihekkwa-dd ɣar wadday, ittaḍar, [aqa] řmeskin iweṭṭa jar [waccaren] nnes ijehden.
PSA 10:11 Iqqar deg wuř nnes: “Arebbi ittu, Netta issnuffar udem nnes, ɛemmarṣ ad t iẓar.”
PSA 10:12 Quf. Kkar, [a] SIDI, Arebbi, sgeɛɛed afus nnec, war ttᵉttu řmusakin.
PSA 10:13 Mayemmi ittceqqaf uɛeffan di AREBBI, [mayemmi] iqqar deg wuř nnes: “Cek war tᵉttbeqqaced!”?
PSA 10:14 Rix. Aqa Cek teẓrid, minzi Cek tᵉttwařid tamara d wecḍan, maḥend ad [ten] tessarsed deg ufus nnec. Řmeskin ittarr-dd ɣarek s uzeǧif. Cek d amɛawen n uyujiř.
PSA 10:15 Cin. Arẓ aɣiř n uɛeffan, xřef řɣar zeg wenni itteggen tuɛeffna, [ař] war tᵉttifed walu [ɛad].
PSA 10:16 SIDI d Ajeǧid i řebda qaɛ. Ttwateḥḥan řegnus zi temmurt nnes.
PSA 10:17 Taf. [A] SIDI, Cek tesřid i meẓri n imwaḍɛen, ad tessjehded uřawen nsen, ad ɣarsen tmeyyřed amezzuɣ nnec,
PSA 10:18 ḥima ad taɣed tasɣart i uyujiř u i wenni ittwaḥeṣṣaren, maḥend uřa d ijj n bnadem x temmurt war ittɣimi issaggʷad [ɛad uřa d ijj].
PSA 11:1 [I umeqqran n imeɣnajen. N Dawud.] Ɣar SIDI arekkwařeɣ. Mammec teqqarem i řeɛmar inu: “Ḍwu ɣar wedrar nwem, [a] ijḍaḍ!”
PSA 11:2 Maɣar xzar, iɛeffanen aqa meḥḥḍen řqews, ssrusan fřitcat nsen ɣar ufiřu, ḥima ad wten di taǧest deg inni umi isegged wuř.
PSA 11:3 Wah, dsusa n ddunect ttwareddǧen! Min [izemmar xenni] ad yegg umsegged?
PSA 11:4 SIDI [izeddeɣ] di Zzawect nnes Tameqqrant iqeddsen, řɛarc n SIDI aqa-t deg ijenwan. Tiṭṭawin nnes ttwařant, řxezrat nnes arezzunt di tarwa n bnadem.
PSA 11:5 SIDI ittbeqqec amsegged, [maca] řeɛmar nnes ittɛiffa aɛeffan d wenni ittexsen lɛunf.
PSA 11:6 Netta ad iwwet iɛeffanen s ijj n wenẓar n řefxux, timessi d řecbariyyet d tḥaryaḍt tameqqrant [ad iřint] d tasɣart n řkas nsen.
PSA 11:7 Minzi SIDI d amsegged, ittexs timegga iseggden. Inni igguren nican ad ẓaren udem nnes.
PSA 12:1 [I umeqqran n imeɣnajen. X ufiřu wiss tmenya. Azehhed n Dawud.]
PSA 12:2 Senjem, [a] SIDI, minzi ameddukkeř amtiqqi war iqqim ɛad, maɣar war din [ɛad] imtiqqan jar tarwa n bnadem.
PSA 12:3 Nitni ssawařen jar asen s ixarriqen, s iyencicen ccuren s wawařen imiziḍen, aqa ssawařen s tnayen n iɣembab.
PSA 12:4 Ejj SIDI ad iqḍeɛ marra iyencicen ccuren s wawařen imiziḍen, uřa d iřes s wawařen n ukebbar,
PSA 12:5 inni iqqaren: “S yiřes nneɣ ad ɣarneɣ yiři uqarru imɣar, iyencicen aqa aten nneɣ! Man wen [iǧan] xaneɣ d sidi?”
PSA 12:6 “Di ssibbet n wareddeǧ n řmusakin, uřa di ssibbet n iɣuyyan n imezřaḍ ad kkareɣ řexxu Necc”, inna SIDI, “Wenni x tuɣa idduqez netta, Necc ad t awyeɣ di řaman.”
PSA 12:7 Tiwařin n SIDI aqa atent d tiwařin ṣfant, ttwassizdgent [am] nnuqart deg ijj n řkas i ufesyi deg ucař, ttwaṣeffant sebɛa n twařawin.
PSA 12:8 Cek, [a] SIDI, ad ten teḥḍid, ad aneɣ tessared zi jjiř-a, i řebda qaɛ.
PSA 12:9 Iɛeffanen gguren ttennḍen mani ma xmi ɣa ikkar ddeǧ jar tarwa n bnadem.
PSA 13:1 [I umeqqran n imeɣnajen. Azehhed n Dawud.]
PSA 13:2 Mecḥař ɛad, [a] SIDI, i d ayi ɣa tᵉttud? Ař mecḥař ɛad i xafi i ɣa tessnuffared udem nnec?
PSA 13:3 Mechař i iqqimen ad ggeɣ ɛad řehmum di řeɛmar inu, acḍan deg wuř inu mkuř ass? Ař meřmi ɣa issɛuǧa řeɛdu inu ixef nnes xafi?
PSA 13:4 Xzar-dd, arr-dd xafi, [a] SIDI, AREBBI inu! Egg tfawt ɣar tiṭṭawin inu, ḥima war ttᵉṭṭṣeɣ iḍeṣ n řmewt,
PSA 13:5 ḥima řeɛdu inu war iqqar: “Necc ɣellbeɣ xas!”, [ḥima] wenni d ayi iḥeṣṣaren war ifarreḥ mařa farɣeɣ.
PSA 13:6 Necc ttecřeɣ x tmexsiwt nnec icewwaren. Uř inu ad ifarḥ x usenjem nnec. Necc ad ɣennjeɣ i SIDI, maɣar Netta igga dayi řxir.
PSA 14:1 [I umeqqran n imeɣnajen. N Dawud.] Abuhaři inna deg wuř nnes: “War din bu AREBBI!” Nitni ttareddǧen, tteggen timesřayin iḍexsen, war din uřa d ijj ittegg min icnan.
PSA 14:2 SIDI ixezzar-dd zeg ujenna ɣar tarwa n bnadem, ḥima ad iẓar, ma din ḥed dayes řefhamet, ijj wenni yarezzun AREBBI.
PSA 14:3 Marra ffɣen zeg webrid, [aqa aten jmiɛ] dewřen d iɛeffanen, war din uřa d ijj ittegg řxar, uřa d ijj.
PSA 14:4 Marra inni itteggen řmuɛṣiyyet ma war ɣarsen bu tussna, inni ittᵉtten řgens inu axmi ttᵉtten aɣrum? Nitni war ttřaɣan x SIDI.
PSA 14:5 Aqa tewḍa-dd xasen din iggʷudi temɣar, maɣar AREBBI aqa-t ak-d jjiř n imseggaden.
PSA 14:6 Kenniw tnefḍem array n řmusakin, maca SIDI d amcan nnes n tarewřa.
PSA 14:7 Man wen zi Ṣihyun i ɣa yiwyen asenjem n Israil! Xmi dd ɣa yarr SIDI imeḥbas n řgens nnes, ad yarceq Yaɛqub, ad ifarḥ Israil.
PSA 15:1 [Azehhed n Dawud.] [A] SIDI, man wen i ɣa iqqimen deg Uqiḍun nnec? Man wen i ɣa izedɣen x wedrar nnec iqeddsen?
PSA 15:2 Wenni igguren di řekmařet n tudart nnes wenni itteggen tasegda, [wenni] issawařen tidett deg wuř nnes.
PSA 15:3 Wenni war ittceqqafen s yiřes nnes, [wenni] war itteggen řɣar i imɛacaren nnes, u war ittzawar ajjar nnes.
PSA 15:4 Wenni immenḍaren [zi Arebbi] aqa ittwasseḥqar di tiṭṭawin nnes, [maca] inni itteggʷeden SIDI, ittweqqar i-ten. Mařa ijjuǧ netta i txessart nnes, war [t] ittbeddiř.
PSA 15:5 Wenni war itticen [tamenyat n] nnuqart nnes s arriba, wenni war itteṭṭfen arrecwet ḍidd n yinni war iggin s ca. Wenni itteggen man aya, war ifarreɣ i řebda.
PSA 16:1 [Tira ineqcen. N Dawud.] Ḥḍa xafi, [a] Arebbi, maɣar necc arekkwařeɣ ɣarek.
PSA 16:2 [Řeɛmar inu] tenna i SIDI: “Cek d Sidi inu, [Cek] d řxar inu, war din min xak yuɛřan!”
PSA 16:3 X imqeddasen i [izeddɣen] x temmurt, nitni d ayt n jjehd zi [ssibbet n] marra arḍa inu i daysen [iǧan].
PSA 16:4 Tamara n yinni iḍeffaren [ammu] deɣya ijj n [arebbi] nneɣni ad ttwaktarent. Necc war ttfarriɣeɣ tawhibt nsen n useyyeb n idammen, war ttidareɣ ismawen nsen x iyencicen inu.
PSA 16:5 SIDI d tasɣart inu d řkas inu. Cek tᵉṭṭfed taqedduḥt inu deg ufus nnec.
PSA 16:6 Ifiřan [n řeɛbar] kkaren ayi-dd deg imucan iṣebḥen, wah, tasɣart [inu] [aqa] tusa-dd xafi mliḥ.
PSA 16:7 Ad barkeɣ SIDI, wenni d ayi ineṣḥen. Uřa s ǧiřet ssřemdent ayi tiẓẓař inu.
PSA 16:8 Tteggeɣ SIDI řebda jar tiṭṭawin inu. Umi Netta [iǧa] x ufus afusi inu, necc war ttefcireɣ.
PSA 16:9 S uya ifarreḥ uř inu, ittarciq řeɛmar inu. Wah, [uřa d] ddat inu ad iddar s řaman.
PSA 16:10 Maɣar Cek war tsemmḥed ca di řeɛmar inu di řaxart, war tᵉttarrid amtiqqi nnec ad ikiccu.
PSA 16:11 Cek ad ayi tessecned abrid n tudart, tyawant zi řefraḥet aqa-t zzat i wudem nnec, nniɛmat aqa atent deg ufus nnec i řebda.
PSA 17:1 [Taẓaǧit n Dawud.] [A] SIDI, seř ɣar tsegda, egg řbař i uɣuyyi inu, ewc amezzuɣ xmi ttẓaǧiɣ s iyencicen war zzaysen dd-ittekk ca řɣecc.
PSA 17:2 Ejj řḥeqq inu ad iffeɣ zi zzat i wudem nnec, ejj tiṭṭawin nnec ad xezzarent ɣar min iǧan iseggden.
PSA 17:3 Cek tqeǧbed uř inu, tarzud [dayes] s ǧiřet. Tjarrbed ayi, [maca] war tufid walu. [Mařa] nwiɣ ad xarrṣeɣ di ca war iḥři, war itteffiɣ zeg iyenciden inu.
PSA 17:4 X min tteggen iwdan, aqa necc ḥḍiɣ ixef inu zi tebridin n ayt n bu-řexcunet, ɛlaḥsab awař zeg iyencicen nnec.
PSA 17:5 Egg iṣuraf inu di jjurrat [n iḍaren] nnec, [ḥima] war farrɣen iḍaren inu.
PSA 17:6 Necc řaɣiɣ xak, minzi Cek ad xafi dd-tarred, [a] Arebbi, ewc ayi amezzuɣ, seř i min ɣa iniɣ.
PSA 17:7 Scen řeɛjayeb n tmexsiwt nnec icewwaren, Cek d wenni issenjamen inni ɣarek yarekkwařen, [Cek d wenni ten issenjamen] zeg yinni ittɣewwɣen s ufus nnec afusi.
PSA 17:8 Ḥḍa ayi am mummu n tiṭṭ nnec, snuffar ayi di tiři n wafriwen nnec
PSA 17:9 zeg iɛeffanen inni ixsen ad dayi ḥṣaren, inni d řɛedyan n řeɛmar inu, inni d ayi ittquwwaren.
PSA 17:10 Nitni bellɛen [uř nsen] s tadunt nsen, s uqemmum nsen ssawařen s nnfaxet.
PSA 17:11 Řexxu quwwaren ɛad i iṣuraf nneɣ, tiṭṭawin nsen mmuqqřent maḥend ad [ayi] nḍaren ɣar temmurt.
PSA 17:12 Netta yarwes deg weyrad nni imeẓẓren maḥend ad imezzeq [taymart nnes], deg ijj n weyrad d ameẓyan i iqqimen deg imucan innuffaren.
PSA 17:13 Kkar, [a] SIDI, ruḥ msagar akides, ɣḍeř-i-t ɣar temmurt. Fekk řeɛmar inu s ssif nnec zeg uɛeffan,
PSA 17:14 s ufus nnec zeg iryazen, [a] SIDI, zeg iryazen n ddunect-a nni ɣarsen tudart-a d tasɣart [nsen], inni zi tᵉttɛemmared aɛeddis nsen s řeknuz inuffaren, [uřa d] iḥenjiren [nsen] ttwayawanen, ttejjan min iceṭṭen i tarwa nsen.
PSA 17:15 Necc ad ẓareɣ udem nnec di tsegda, ad dewřeɣ jjiwneɣ s waddud nnec xmi dd ɣa faqeɣ.
PSA 18:1 [I umeqqran n imeɣnajen. N umsexxar n SIDI.] [N Dawud, wenni issiwřen awařen n yezři-ya i SIDI,] [deg wass umi t ifekk SIDI] [zeg ufus n marra řɛedyan nnes] [u zeg ufus n Cawul.]
PSA 18:2 Netta inna: “Necc ttexseɣ Cek, [a] SIDI, jjehd inu [d Cek].
PSA 18:3 SIDI d Tasḍart inu d lburj inu d amfekki inu, Arebbi inu, Taṣḍart inu, necc ɣares arekkwařeɣ. [Cek] d taseddart inu n useřqi d yicc n usenjem inu, lburj inu yuɛřan.
PSA 18:4 Necc řaɣiɣ-dd x SIDI, wenni isdaheǧen asemɣar, u necc aqa ttwassnejmeɣ zi řɛedyan inu.
PSA 18:5 Iseɣwan n řmewt nnḍen ayi-dd, ssiggʷedent ayi řḥemřat n waman ihajen.
PSA 18:6 Iseɣwan n řaxart carfen ayi, tixecfin n řmewt ḥṣarent ayi.
PSA 18:7 Di řeḥṣaret inu řaɣiɣ-dd x SIDI, x AREBBI inu i x dd-řaɣiɣ. Zi Zzawect nnes Tameqqrant isřa Netta i tmijja inu, iɣuyyan inu [udfen] ɣar imezzuɣen nnes.
PSA 18:8 [Xenni] tenhezz u tarjij temmurt, dsusa n idurar ttraḥen-dd ttasen-dd u nhezzen, maɣar ittwassarɣ [weɣḍab nnes].
PSA 18:9 Igeɛɛed ddexxan zeg wenzaren nnes, timessi zeg uqemmum nnes tṣarḍ, ittwassarɣ zzayes řefḥem.
PSA 18:10 Netta ijja ajenna ad yaḍar uca [xenni] ihwa-dd Netta, [aqa din] ijj n useynu ibbumbes sadu iḍaren nnes.
PSA 18:11 Indeh x ijj n ukirub, [wah,] iḍwa, Netta iḥewwem x wafriwen n usemmiḍ.
PSA 18:12 Netta igga taǧest am yijj n useřqi x yixef nnes, aɛiccu nnes aqa-t deg wenneḍ nnes, aman ibbubbsen, iseynuten ibbarecnen.
PSA 18:13 Zi tissiqt qibač nnes ttekken iseynuten nnes, [ak-d] tebruri d řefḥem itteḥduduqen.
PSA 18:14 SIDi igga ajjaj ad idduqqez deg ijenwan, Amɛuǧi x kuřci igga tmijja nnes ttnefrara: tabruri d řefḥem itteḥduduqen.
PSA 18:15 Netta issekk fřitcat [n řqews nnes] uca ibezzeɛ i-ten, [izzaryeḍ] assamen uca issiggʷed i-ten.
PSA 18:16 Tisiwin n iɣezran dewřent ttbanent, dsusa n ddunect dewřen ɛarran zeg uweddeb nnec, [a] SIDI, zeg usuḍi n řeɛwin zeg wenzaren nnec.
PSA 18:17 Zi sennej isswiẓẓeḍ-dd [afus nnes], yiwi ayi, ijbed ayi-dd zeg waman mɣaren.
PSA 18:18 Netta ifekk ayi-dd zi řeɛdu inu ijehden, zeg inni d ayi icarrhen, minzi nitni tuɣa jehhden xafi.
PSA 18:19 Nitni ḥṣaren ayi deg wass n arẓiyyet inu, maca SIDI tuɣa d amɛemmed inu.
PSA 18:20 Netta indeh ayi ɣar ttasiɛ uca issenjem ayi, maɣar Netta tuɣa issɛizza ayi.
PSA 18:21 SIDI ixřef ayi ɛlaḥsab tasegda inu, ɛlaḥsab tazdugi n ifassen inu ixeǧeṣ ayi.
PSA 18:22 Maɣar necc ḥḍiɣ ibriden n SIDI, war ḥeyydeɣ ca x AREBBI inu s uxeyyeb.
PSA 18:23 Maɣar marra lfarayiḍ nnes [tuɣa] jar [tiṭṭawin] inu, war ḥeyyideɣ ca x tweṣṣa nnes.
PSA 18:24 Aqa-yi kemmřeɣ nican akides, ḥḍiɣ ixef inu zi řmuɛṣiyyet inu.
PSA 18:25 SIDI ixřef ayi anect n tsegda inu, anect n tazdugi n ifassen inu zzat i tiṭṭawin nnes.
PSA 18:26 I umeddukkeř amtiqqi i teǧid Cek d ameddukkeř amtiqqi, i bu-teɣruḍt ikemmřen i teǧid Cek tkemmřed.
PSA 18:27 I wenni ittwassizedgen aqa Cek d amezdag, ak-d wenni ifarɣen, aqa tᵉttmuɣzřed.
PSA 18:28 Cek tessnejmed řgens ittwaḥṣaren, [maca] tiṭṭawin ɛeffarent ad tent tessehwid.
PSA 18:29 Minzi Cek d řefnar inu, [a] SIDI! AREBBI inu ittegg tafawt di taǧest inu.
PSA 18:30 Minzi akidek ad azzřeɣ x ict n bandiyya, ak-d AREBBI inu ad negzeɣ x ijj n řḥiḍ.
PSA 18:31 Abrid n Arebbi ikmeř, min iqqar SIDI ittwaṣeffa [di tmessi]. Netta d aseřqi i marra inni ɣares yarekkwařen.
PSA 18:32 Maɣar man wen i iǧan d Arebbi, mɣir SIDI, u man wen i iǧan d taṣḍart, mɣir AREBBI nneɣ?
PSA 18:33 Arebbi wenni d ayi ittbeysen s jjhed, wenni d ayi itticen abrid inu ikmeř.
PSA 18:34 Netta igga iḍaren inu am yinni n tudadin, Netta yarra ayi ad beddeɣ x řegɛudi inu.
PSA 18:35 Isseřmed ifassen inu i umenɣi, iɣaǧen inu maḥend ad meḥḍen ijj n řqews n nnḥas.
PSA 18:36 Tewcid ayi taseddart n useřqi n usenjem nnec, afus nnec afusi d asenned inu, awaḍeɛ nnec tessemɣared ayi.
PSA 18:37 Aqa teggid ttasiɛ i iṣurif[en] inu sadu inu, ticeɛbin inu war meyyřent.
PSA 18:38 Necc ḍfareɣ řɛedyan inu u ḥarteɣ xasen, war ttɛiqibeɣ ař ten qḍiɣ.
PSA 18:39 Necc areddǧeɣ ten, [ařami] war zemmaren ad kkaren ɛawed. Nitni wḍan-dd sadu iḍaren inu.
PSA 18:40 Cek tbeysed ayi s jjehd i umenɣi, tarrid-dd inni ɣari dd-ikkaren ad aḍaren sadu inu.
PSA 18:41 Cek tewcid ayi timejjart n řɛedyan inu, n yinni d ayi icarrhen, u necc areddǧeɣ ten.
PSA 18:42 Nitni řaɣan, [maca] war din tuɣi amsenjem, [řaɣan] x SIDI, maca Netta war xasen dd-yarri.
PSA 18:43 Necc weddareɣ ten am tɛejjajt zzat i usemmiḍ, am ubeǧaɛ x ibriden farḍeɣ zzaysen.
PSA 18:44 Cek tfekked ayi zeg imcubbcen n řgens, teggid ayi d azeǧif n řegnus, ijj n weydud war t ssineɣ, ad ayi isexxar.
PSA 18:45 Mɣir řami d ayi isřa umezzuɣ [nsen] waha, sřin-dd ɣari. Ibarraniyyen ssniɛmiřen ssubuḍen ayi.
PSA 18:46 Fecřen ibarraniyyen, [waxxa] nnḍen asen-dd lbarajat nsen.
PSA 18:47 Tudart i SIDI! Ad tᵉttwabarek Teṣḍart inu. Ad ittwassgeɛɛed AREBBI n usenjem inu.
PSA 18:48 Arebbi wenni xafi ittentaqamen wenni d ayi itteggen řegnus sadu ufus inu,
PSA 18:49 wenni d ayi ittfekkan zeg [ufus n] řɛedyan inu, [wah], Cek tessgeɛɛaded ayi tiwa n yinni d ayi ittḍaddan, Cek tessenjamed ayi zeg weryaz n řexcunet.
PSA 18:50 X uya, SIDI, xseɣ ad Cek qadiɣ, ad zehhdeɣ Isem nnec.
PSA 18:51 Netta igga isenjimen n ujeǧid nnes mɣaren, isscen tamexsiwt nnes icewwaren i umedhun nnes, i Dawud u i zzariɛet nnes i řebda.
PSA 19:1 [I umeqqran n imeɣnajen. Azehhed n Dawud.]
PSA 19:2 Ijenwan ttbarrḥen s uɛuǧi n Arebbi, řqubbet tessawař x řxedmet n ifassen nnes.
PSA 19:3 Ass issazzař awařen i wass, ǧiřet tesscan tussna ɣar ǧiřet.
PSA 19:4 War iǧi d řhard u war ǧin ca d awařen, tmijja nsen war d as ittesři ḥed.
PSA 19:5 Řumurat nsen ffɣent x temmurt marra, awařen nsen [ffɣen] ař ṭṭarf n ddunect. Netta igga diha ijj n uqiḍun i tfuct,
PSA 19:6 am muřay nni dd-issijjen zeg wexxam n řemřac, isřiwřew am yijj n bu-teryast, ḥima ad iksi di ticři nnes.
PSA 19:7 Iffeɣ-dd zeg ijj n ṭṭarf n ujenna, uca yuyur ař ṭṭarf nnes nneɣni, war tᵉttnuffar uřa d ict n řḥajet i řḥaduq nnes.
PSA 19:8 Aqa tekmeř Ccariɛa n SIDI, tiwi-dd agenfu i buḥbeř. Cchadat n SIDI daysent řaman, tticcent tiɣit i uḥafi.
PSA 19:9 Řumurat n SIDI seggdent, ssfarrḥent uř. Tawṣiyyet n SIDI teṣfa, tesscana tafawt i tiṭṭawin.
PSA 19:10 Tiggʷudi zi SIDI teṣfa, teqqim tbedd i řebda. Řeḥkamat n SIDI d tidett, aqa atent d řḥeqq marra.
PSA 19:11 Nitenti jebbdent meẓri ktar x wureɣ, [wah], ktar zeg wureɣ ittwaṣeffan, aqa atent d timiẓidin x tamment niɣ x tamment n teɣraṣt.
PSA 19:12 Uřa d amsexxar nnec ittwawebbex zzaysent, deg uḥeṭṭu nsent [tᵉttnuffar] dayes řmunet tameqqrant.
PSA 19:13 Aweddar, wi zzayes yucin? Sizdeg ayi zi [min] war ittbinen.
PSA 19:14 Ḥḍa amsexxar nnec ɛawed zeg uɛeffar, ḥima war xafi ittṣeǧiḍ, [ḥima] ad iřiɣ d amezdag zeg uxeṭṭu imɣaren.
PSA 19:15 Ad dd-asen wawařen n uqemmum inu d ixariṣṣen n wuř inu, x řxaḍar nnec, [a] SIDI, [a] Taṣḍart inu d Amefdi inu!
PSA 20:1 [I umeqqran n imeɣnajen. Azehhed n Dawud.]
PSA 20:2 Ad xak dd-yarr SIDI deg wass n řeḥṣaret, ad cek issizdeɣ Isem n AREBBI n Yaɛqub [deg wemcan] yuɛřan ifaryen.
PSA 20:3 Ad ac iwc afus zi Zzawect Iqeddsen, ad cek dd-iɛawen zi Ṣihyun.
PSA 20:4 Ad cek yidar di tewhibin [n řɣiǧet] nnec, ad tiři tɣarṣt n wecmaḍ nnec am tadunt i Netta. Silah.
PSA 20:5 Ad ac iwc ɛlaḥsab [min immeẓri] wuř nnec, ejj i-t ad ikemmeř marra inwayen nnec.
PSA 20:6 Neccin ad nesřiwřew x usenjem s ufus nnec, ad nessuɛřa ibanduten deg Yisem n AREBBI nneɣ. Ad issjiwen SIDI marra meẓri nnec.
PSA 20:7 Řexxu ssneɣ, aqa SIDI ad yawi asenjem i umedhun nnes. Netta ad t-i-dd-yarr zeg ijenwan n Zzawect nnes Iqeddsen, s tmegga timeqqranin n usenjem s ufus afusi nnes.
PSA 20:8 Ina ttxarraṣen deg ikarruten u ina deg iysan, maca neccin ad nxarreṣ deg Isem n SIDI, AREBBI nneɣ.
PSA 20:9 Nitni uḍaren uca wḍan, neccin nekkar u neqqim nbedd.
PSA 20:10 [A] SIDI, awi-dd asenjem! Ejj ad aneɣ dd-yarr ujeǧid deg wass i di nřaɣa.
PSA 21:1 [I umeqqran n imeɣnajen. Azehhed n Dawud.]
PSA 21:2 [A] SIDI, ajeǧid ifarḥ s jjehd nnec, mammec ifarḥ aṭṭas s usenjem nnec!
PSA 21:3 Tewcid as meẓri n wuř nnes, Cek war tugid ca azaweg n iyencicen nnes. Silah.
PSA 21:4 Maɣar Cek tusid-dd i umsagar akides s lbarakat [ccurent s] řxar, teqqned as ttaj n wureɣ ittwaṣeffan x uzeǧif nnes.
PSA 21:5 Ittar ac tudart, tewcid as tt, tuzzeggart n wussan i řebda qaɛ.
PSA 21:6 Imɣar uɛuǧi nnes s usenjem nnec, tesszehhjed t s tissiqt d řɛezz.
PSA 21:7 Minzi Cek tarrid i-t d lbaraka tameqqrant i řebda, Cek teccured t s řefraḥet ɣar wudem nnec.
PSA 21:8 Maɣar ajeǧid ittcař x SIDI, war ittefriɣ s tmexsiwt icewwaren n Umɛuǧi x kuřci.
PSA 21:9 Afus nnec ad yaf marra řɛedyan nnec, afus afusi nnec ad yaf marra inni Cek icarrhen.
PSA 21:10 Cek ad ten tarrid am tefqunt icemmḍen di řweqt n weḍḥar nnec, SIDI ad ten isarḍ s weɣḍab nnes, timessi ad ten tecc.
PSA 21:11 Ad temḥid řɣiǧet nsen zi temmurt, zzariɛet nsen zi tarwa n bnadem.
PSA 21:12 Maɣar nitni nedyen ac řɣar, ggin ict n tmeɛmuč, maca war zemmaren walu.
PSA 21:13 Maɣar Cek ad ten tegged jar tiṭṭawin, s ifiřan [n řqews] nnec ad tneyyced x wudmawen nsen.
PSA 21:14 Sgeɛɛed ixef nnec, [a] SIDI, s jjhed nnec! Ejj aneɣ ad nɣennej u ad nzehhed i tzemmar nnec.
PSA 22:1 [I umeqqran n imeɣnajen, s teɣnint n ‘Tudadt n tuffut’. Azehhed n Dawud.]
PSA 22:2 Arebbi inu, Arebbi inu, mayemmi i d ayi tejjid? Zi řaggʷaj [i teǧid] zeg usenjem inu, zeg wawařen i sɣuyyuɣ [am weyrad].
PSA 22:3 [A] AREBBI inu, řaɣiɣ deg wass, [maca] Cek war xafi dd-tarrid ca, s ǧiřet, [maca] necc war [ufiɣ] arraḥet.
PSA 22:4 Cek d amqeddes [i teǧid], tzeddɣed [di řwesṭ n] izřan n uṣebbeḥ n Israil.
PSA 22:5 Ttecřen xak řejdud nneɣ, tuɣa ttecřen u Cek tarrid ten ad nejmen.
PSA 22:6 Nitni sɣuyen-dd ɣarek uca ttwassnejmen, tuɣa ttecřen xak u war nnḥecmen ca.
PSA 22:7 Necc d ict n tkecca, war iǧi d aryaz, [necc d] řḥegra n bnadem ttwasseḥqareɣ jar řgens.
PSA 22:8 Marra inni d ayi iẓrin, sthezzan zzayi, arezzmen iyencicen [nsen], ssenhezzan azeǧif.
PSA 22:9 [Qqaren]: “Seɛdu t x SIDI, ejj Wanita ad t ifekk, ad t issenjem, maɣar Netta yarḍa xas.”
PSA 22:10 Cek tjebbded ayi-dd zeg uɛeddis n yemma, Cek tarrid ayi di řaman x wabbucen n yemma.
PSA 22:11 Zi řemrawet ttwammenḍareɣ xak, zeg uɛeddis n yemma aqa Cek d Arebbi inu.
PSA 22:12 War ttɣimi bu ɣar řaggʷaj zzayi, maɣar řeḥṣaret tudes u war din ca amɛawan.
PSA 22:13 Aṭṭas n ifunasen nnḍen ayi-dd, [ifunasen] ijehden zi Bacan quwwaren ayi-dd,
PSA 22:14 arzmen-dd ɣari aqemmum nsen amecnaw ijj n weyrad ittmezzaqen, izehharen.
PSA 22:15 Necc ttwafarrɣeɣ am waman u marra iɣsan inu ttwammsebḍan. Uř inu am ccmeɛ, aqa ifsi daxeř inu.
PSA 22:16 Jjehd inu yuẓeɣ am yijj n uceǧiq n ict n tqedduḥt, iřes inu iřṣeq ɣar waneɣ inu. Cek tessarsed ayi di tɛejjajt n řmewt.
PSA 22:17 Maɣar iṭan nnḍen ayi-dd, ict n bandiyya n tarwa n řeḥram quwwaren ayi-dd, aqa am weyrad ifassen d iḍaren inu.
PSA 22:18 Zemmareɣ ad ḥesbeɣ marra iɣsan inu. Nitni ttwařan ayi, xezzaren-dd ɣari.
PSA 22:19 Nitni bḍan arruḍ inu jar asen, uca nḍaren taqedduḥt x řeɛbayet inu.
PSA 22:20 Cek, [a] SIDI, war [ttiři] ɣar řaggʷaj, [a] jjehd inu, as-dd deɣya ḥima ad ayi tɛawned.
PSA 22:21 Fekk řeɛmar inu zi ssif, ayenni zeg uqeṭṭes n weqzin.
PSA 22:22 Fekk ayi zeg uqemmum n weyrad, [fekk ayi] zeg waccawen d iziraren n iɣayḍ n řexřa! Aqa Cek tesřid ayi.
PSA 22:23 Ad barrḥeɣ Isem nnec i wawmaten inu, ad xak ṣebḥeɣ di řwesṭ n wegraw n řgens.
PSA 22:24 Kenniw, inni itteggʷden SIDI, semɣarem t, [a kenniw,] marra zzariɛet n Yaɛqub, sɛuǧem t u weqqarem t, [a kenniw,] marra zzariɛet n Israil!
PSA 22:25 Maɣar war isseḥqir ca řeḥṣaret n wenni ittwaḥṣaren, war tt iɛiff ca, war xas issnuffar ca udem nnes, [maca] Netta isřa as mařa iřaɣa as-dd.
PSA 22:26 Zzayek ad dd-yas uqadi inu deg ijj n wegraw [n řgens] ameqqran, ad kemmřeɣ lwuɛud inu zzat i yinni zzayes itteggʷeden.
PSA 22:27 Imwaḍɛen ad ccen u ad jjiwnen, inni arezzun x SIDI ad as ṣebbḥen, uřawen nsen ad ddaren i řebda.
PSA 22:28 Marra tineggura n temmurt ad t idarent, ad dd-dewřent ɣar SIDI, marra řaǧat n řegnus ad sejdent zzat i wudem nnec,
PSA 22:29 minzi tageldit i SIDI [i teǧa], Netta iḥekkem jar řegnus.
PSA 22:30 Marra inni iṣeḥḥen di temmurt ad ccen, ad sejden, marra inni dd-ihekkwan di tɛejjajt ad sejden zzat i wudem nnes, [kuř ijjen] i war izemmaren ad iḥḍa řeɛmar nnes.
PSA 22:31 Zzariɛet ad as tsexxar, ad tᵉttwazemm d arraw i Sidi inu.
PSA 22:32 Ad dd-asen, ad barrḥen tasegda nnes i yijj n řgens i ɣa dd-ittwaxeřqen, maɣar Netta aqa igga i-tt.
PSA 23:1 [Azehhed n Dawud.] SIDI d Ameksaw inu, war xafi ittekk ca zzɛaf.
PSA 23:2 Netta issareyyaḥ ayi di ddmani n tarewsa izizawen, ineddeh ayi ɣar waman yarsan.
PSA 23:3 Netta issfaqa řeɛmar inu, ineddeh ayi di řatarat n tsegda di ṭṭweɛ n Yisem nnes.
PSA 23:4 Waxxa ggureɣ di teɣzurt n tiři n řmewt, war tteggʷdeɣ zi řɣar, maɣar Cek akidi. Aɛekkaz nnec d taɣɣarct nnec ssfewwajen xafi.
PSA 23:5 Tessewjaded ṭṭabřa inu zzat i wudem n yinni d ayi iḥeṣṣaren. Tdehhned azeǧif inu s zzect, řkas inu ifeyyeḍ.
PSA 23:6 Iwa, řxir d tmexsiwt icewwaren ad ayi ḍfaren, marra ussan n tudart inu, necc ad zedɣeɣ di Taddart n SIDI, ař aneggar n wussan.
PSA 24:1 [Azehhed n Dawud.] [A. Azehhed umi ttgeɛɛden ɣar wedrar n Ṣihyun] [Marra imeɣnajen n řɣaci ittɛeyyden:] I SIDI teǧa temmurt d uɛemmar nnes, ddunect d imezdaɣ nnes.
PSA 24:2 Maɣar Netta issars dsas nnes x řebḥur, issemten i-t x sseḥřat.
PSA 24:3 [Tmijja:] Wi izemmaren ad igeɛɛed adrar n SIDI, wi izemmaren ad ibedd deg wemcan nnes iqeddsen?
PSA 24:4 [Tmijja nneɣni:] Wenni ɣar iǧa ifassen imezdagen d wuř iṣfa, wenni war dd-ittarri řeɛmar nnes x řɣecc, war ittjjaǧa ẓur!
PSA 24:5 [Marra imeɣnajen:] Netta ad iksi lbaraka zi SIDI, uřa d tasegda zi AREBBI n usenjem nnes.
PSA 24:6 D wa d jjiř n yinni xas yarezzun, inni yarezzun x wudem nnec, aqa-t d Yaɛqub. Silah.
PSA 24:7 [B. Azehhed umi udfen ɣar tendint n Ṣihyun] [Marra imeɣnajen n řɣaci ittɛeyyden:] Sgeɛɛdent izeǧifen nwem, [a] tiwwura, sgeɛɛdent ixef nkent, [a] tiwwura n řebda, [ḥima] ad yadef Ujeǧid n uɛuǧi!
PSA 24:8 [Tmijja zi tewwurt n tendint:] Man wen i iǧan d Ajeǧid n uɛuǧi wanita? [Marra imeɣnajen:] D SIDI, ijhed ijebbar, SIDI aqa-t d ajebbar deg umenɣi.
PSA 24:9 Sgeɛɛdent izeǧifen nkent, [a] tiwwura, sgeɛɛdent ixef nkent, [a] tiwwura n řebda, [ḥima] ad yadef ujeǧid n uɛuǧi!
PSA 24:10 [Tmijja zi tewwart n tendint:] Min iɛna Netta, Ajeǧid-a n uɛuǧi? [Marra imeɣnajen:] SIDI n řɛeskarat d Netta d Ajeǧid n uɛuǧi. Silah.
PSA 25:1 [Azehhed n Dawud.] Alif. [A] SIDI, ɣarek i dd-ssgeɛɛadeɣ řeɛmar inu.
PSA 25:2 Bit. [A] AREBBI inu, necc ttecřeɣ xak. Ejj ayi war ttseḍḥiɣ, ejj řɛedyan inu war xafi ttesřiwřiwen s řefraḥet.
PSA 25:3 Gimel. Wah, marra inni Cek ittrajan war ttseḍḥin. Inni iggin s řeɣdar břa ssibbet, ad seḍḥen.
PSA 25:4 Dalit. [A] SIDI, scen ayi ibriden nnec, sɣar ayi imesraq nnec.
PSA 25:5 Hi. Ndeh ayi di tidett nnec u sɣar ayi, minzi Cek d AREBBI n usenjem inu, necc ssitimeɣ dayek ass marra.
PSA 25:6 Zayin. Ɛqeř, [a] SIDI, x arreḥmet nnec, x tmegga n tmexsiwt nnec icewwaren, maɣar aqa atent [ǧant] zi řebda.
PSA 25:7 Xit. War ttidar ca ddnub n temẓi inu uřa d ixeṭṭan inu. Xemm [maca] ɣari di tmexsiwt nnec icewwaren, di ṭṭweɛ n tcuni nnec, [a] SIDI.
PSA 25:8 Tit. SIDI iṣbeḥ, icna, x uya ad issɣar abrid i imednab.
PSA 25:9 Yud. Netta ad igewwed imhinen s řḥeqq, Netta ad isseřmed abrid nnes i imhinen.
PSA 25:10 Kaf. Marra imesraq n SIDI aqa aten d tamexsiwt icewwaren d řaman, i yinni iḥeṭṭan Řɛahd nnes d ccahadat nnes.
PSA 25:11 Lamid. Di ṭṭweɛ n Yisem nnec, [a] SIDI, ɣfar řmuɛṣiyyet inu, maɣar aqa-tt d aṭṭas.
PSA 25:12 Mim. Man wen d aryaz i itteggʷeden SIDI? Netta ad as isseřmed abrid i ittxeṣṣa ad ixḍar.
PSA 25:13 Nun. Řeɛmar nnes ad issens di řxir, tarwa nnes ad twart tammurt.
PSA 25:14 Samix. Řaman i din n SIDI i yinni zzayes itteggʷeden, Řɛahd nnes aqa-t din maḥend ad asen t issargeb.
PSA 25:15 Ɛayin. Tiṭṭawin inu řebda di SIDI, minzi Netta ad ifekk iḍaren inu zi tracca.
PSA 25:16 Pi. Arr-dd ɣari s wudem nnec, ḥinn xafi, maɣar necc aqa ayi weḥḥdi u di řeɣben.
PSA 25:17 Tsadi. Řeḥṣarat n wuř inu aqa mmarnint. Suffeɣ ayi zi ddiqat i d ayi.
PSA 25:18 Rix. Xzar-dd ɣar řeɣben inu d warber inu, ksi xafi marra ddnub inu.
PSA 25:19 Rix. Xzar ɣar řɛedyan inu, minzi ttwakettaren, nitni carrhen ayi s yijj n wecrah iqesḥen.
PSA 25:20 Cin. Ḥḍa x řeɛmar inu u fekk ayi! War d ayi ttejji ca ad seḍḥiɣ, minzi ɣarek i ɣa arekkwařeɣ.
PSA 25:21 Taf. Ad teḥḍa ayi řekmaret d řeṣfayet, maɣar ssitimeɣ dayek.
PSA 25:22 [A] AREBBI, fdi Israil zi marra řeḥṣarat nnes.
PSA 26:1 [Azehhed n Dawud.] Aɣ ayi tasɣart inu, [a] SIDI, maɣar necc ggureɣ di řeṣfayet inu. Necc ttecřeɣ x SIDI, war ttefriɣeɣ ca.
PSA 26:2 Qeǧeb ayi, [a] SIDI, jarreb ayi, seṣfa tiẓẓař inu d wuř inu.
PSA 26:3 Minzi tamexsiwt nnec icewwaren aqa-tt zzat i tiṭṭawin inu, necc ggureɣ di tidett nnec.
PSA 26:4 Necc war ttɣimiɣ ak-d iryazen war isekkwin, war ttmuneɣ ak-d yinni icemmten.
PSA 26:5 Necc carrheɣ agraw n tarwa n řehram, war ttɣimiɣ ak-d iɛeffanen.
PSA 26:6 Necc ssirideɣ ifassen inu am war dayi řɛib, ttennḍeɣ i uɛalṭar nnec, [řmedbeḥ nnec n wecmaḍ], [a] SIDI,
PSA 26:7 maḥend ad ssgeɛɛdeɣ tmijja teccur s uqadi, maḥend ad barrḥeɣ s marra lmuɛjizat nnec.
PSA 26:8 [A] SIDI, necc ttexseɣ Tazeddiɣt n Taddart nnec, uřa d amcan n Tzeddiɣt n uɛuǧi nnec.
PSA 26:9 War smuna řeɛmar inu ak-d imednab, uřa d tudart inu ɣar iryazen [i issazzařen] idammen.
PSA 26:10 inni ɣar iǧa ifassen nsen [ccuren s] tuɛeffna, afus nsen afusi [iccur] s řɣecc.
PSA 26:11 Necc ggureɣ di řeṣfayet inu, fdi ayi u ḥinn xafi.
PSA 26:12 Aḍar inu ibedd x temmurt iwaṭan. Necc ad barkeɣ SIDI di tmesmunin.
PSA 27:1 [Azehhed n Dawud.] SIDI d tafawt inu d usenjem inu, wi zi ɣa ggʷedeɣ? SIDI d lqelɛa ijehden i tudart inu, wi zi ɣa nnxeřɛeɣ [ɛad]?
PSA 27:2 Umi ɣari dd-qarrben iɛeffanen ḥima ad ccen ddat inu, inni d ayi iḥeṣṣaren d řɛedyan inu, nnqarḍen nitni, wḍan [ɣar temmurt].
PSA 27:3 Waxxa ad xafi iḥjem ijj n řɛeskar, uř inu war itteggʷed ca. Waxxa ad xafi ikkar umenɣi, [ɛad] necc ttɣimiɣ ttecřeɣ.
PSA 27:4 Ict n řḥajjet ttareɣ zi SIDI, ta ad xas arzuɣ: min ɣa kkeɣ ddareɣ ad qqimeɣ ad zedɣeɣ di Taddart n SIDI, ḥima ad ẓareɣ řeḍrafet n SIDI, ḥima ad beqceɣ di Zzawect nnes Tameqqrant.
PSA 27:5 Maɣar Netta issdurruy ayi deg uɛucci nnes deg wass n řɣar. Netta issřeqqa ayi deg useřqi n Uqiḍun nnes, Netta issgeɛɛad ayi x ict n teṣḍart.
PSA 27:6 Řexxu ad ittwassgeɛɛed uzeǧif inu x řɛedyan inu inni d ayi dd-innḍen, ɣar wesruddeḥ [di řbuq] ad awyeɣ tiɣarṣa ɣar Uqiḍun nnes, ad ɣennjeɣ, [wah,] ad zehhdeɣ i SIDI.
PSA 27:7 Seř ɣar tmijja inu, [a] SIDI, xmi ɣa řaɣiɣ, ḥinn xafi u arr-dd xafi.
PSA 27:8 Zzayek i issawař wuř inu: “Arzu x wudem inu!” Necc arezzuɣ x wudem nnec, [a] SIDI.
PSA 27:9 War zzayi tteffar udem nnec, war ttxiyyab amsexxar nnec deg weɣḍab. Tuɣa Cek d amɛawen inu. War d ayi ttsemḥed u war d ayi ttejji, [a] AREBBI n usenjem inu.
PSA 27:10 Maɣar baba d yemma aqa semḥen dayi, [maca] SIDI ad ayi iksi [ɣares].
PSA 27:11 Scen ayi abrid nnec, [a] SIDI, ndeh ayi ɣar webrid iseggmen, di ssibbet n yinni d ayi iḥeṣṣaren.
PSA 27:12 War d ayi ttsellem ɣar [meẓri] [deg] řeɛmar n yinni d ayi iḥeṣṣaren, maɣar řechud issxarriqen kkaren xafi, inni [i xafi] ittsuḍen s řexcunet.
PSA 27:13 [Uh], mařa necc zeɛma war umineɣ ad ẓareɣ řxar n SIDI di temmurt n yinni iddaren!
PSA 27:14 Raja SIDI, raja i-t, iři d aryaz, Netta ad dayek yegg uř, [wah] raja SIDI.
PSA 28:1 [N Dawud.] I Cek umi řaɣiɣ, [a] SIDI, aqa Cek d Taṣḍart inu. War ttegg ca Ixef nnec war ɣari tᵉttesřid, ařami, s wesqar nnec zzati, war ttarekkwiseɣ ak-d yinni dd-ihekkwan deg wenḍeř.
PSA 28:2 Seř i tmijja n tutra inu, xmi xak ttřaɣiɣ, xmi kessiɣ ifassen inu ɣar Wexxam [n Daxeř] n Zzawect nnec Iqeddsen.
PSA 28:3 War d ayi ttjarri ak-d iɛeffanen, ak-d yinni itteggen řmuɛṣiyyet, inni issawařen x řehna ak-d jjiran nsen, am ɣarsen iǧa řɣar deg wuř nsen.
PSA 28:4 Xeǧeṣ asen ɛlaḥsab min tteggen, ɛlaḥsab tuɛeffna n tmegga nsen. Xeǧeṣ asen ɛlaḥsab řxedmet n ifassen nsen, ewc asen řmunet nsen i isdaheǧen,
PSA 28:5 minzi nitni war xezzaren ɣar řefɛayeř n SIDI, uřa ɣar řxedmet n ifassen nnes. Netta ad ten iɣḍeř, war ten ibenni ca.
PSA 28:6 Ad ittwabarek SIDI, maɣar Netta isřa i tmijja n tutra inu.
PSA 28:7 SIDI d řɛezz inu d taseddart inu n useřqi, uř inu ittceř xas uca ttwaɛawneɣ. Uř inu ineggez s řefraḥet, s yezři inu ad t qadiɣ.
PSA 28:8 SIDI d jjehd nsen, Netta d lburj ijehden n isenjimen i umedhun nnes.
PSA 28:9 Senjem řgens nnec, barek tasɣart nnec, arwes i-ten u arbu ten i řebda qaɛ.
PSA 29:1 [Azehhed n Dawud.] Wcem i SIDI, arraw n irebbiten, wcem i SIDI aɛuǧi d tzemmar.
PSA 29:2 Wcem i SIDI aɛuǧi n Yisem nnes, bendqem zzat i SIDI di řɛezz n Zzawect iqeddsen.
PSA 29:3 Tmijja n SIDI [teddarḍeḥ] tiwa i waman, Arebbi n uɛuǧi isshemhem, SIDI, x waman aṭṭas.
PSA 29:4 Tmijja n SIDI [teccur s] jjehd, tmijja n SIDI [teccur s] řɛezz.
PSA 29:5 Tmijja n SIDI tᵉttareẓẓa [ticejjura n] tneglin, SIDI ittareẓẓa tineglin n Lubnan.
PSA 29:6 Yarra i-ten ad negzen am uɛejmi, [adrar n] Lubnan d [wedrar n] Siryun, am umeẓyan n iɣayḍ n řexřa ak-d waccawen d iziraren.
PSA 29:7 Tmijja n SIDI tneqqec iceɛɛařen n tmessi.
PSA 29:8 Tmijja n SIDI tarra řexřa ittarjiji, SIDI yarra řexřa n Qadac ittarjiji.
PSA 29:9 Tmijja n SIDI tarra tudadin ttarwent, Netta ittɛarra izeɣran, [maca] di Zzawect nnes Tameqqrant marra tessawař x uɛuǧi nnes.
PSA 29:10 SIDI tuɣa ittɣima [am řqaḍi] ɣar sseḥřet n waman, SIDI ittɣima [am] Ujeǧid i řebda.
PSA 29:11 SIDI ad iwc jjehd i řgens nnes, SIDI ad ibarek řgens nnes s řehna.
PSA 30:1 [Azehhed. Izři i udeccen n taddart. N Dawud.]
PSA 30:2 Necc ad Cek ssuɛřiɣ, [a] SIDI, maɣar Cek tessgeɛɛded ayi, war tejjid ca řɛedyan inu ad farḥen x weɛrur inu.
PSA 30:3 [A] SIDI, AREBBI inu, necc řaɣiɣ ac, uca Cek tessgenfid ayi.
PSA 30:4 [A] SIDI, cek tessuɛřid řeɛmar inu zi řaxart, tarrid ayi-dd ɣar tudart jar yinni dd-ihekkwan deg weḥfur.
PSA 30:5 Zehhdem i SIDI, [a kenniw,] imtiqqan nnes, qadam, ɛeqřem x tqeddast nnes.
PSA 30:6 Maɣar aɣḍab nnes [ittekk] drus [waha], maca arḍa nnes ittɣima [marra] tudart. Di tmeddit aqa din imeṭṭawen ař ǧiřet, [maca] ɣar tuffut aqa din asřiwřew.
PSA 30:7 Deg ufřaḥ inu nniɣ necc: “War ttfariɣeɣ ca i řebda!”
PSA 30:8 [A] SIDI, di řxaḍar nnec tessmetned adrar inu s umetten ijehden, [maca] umi třeḥḥfed udem nnec, dewřeɣ tteggʷedeɣ.
PSA 30:9 Necc řaɣiɣ ac-dd, [a] SIDI, ttareɣ arḍa zi Sidi inu.
PSA 30:10 Man řefḍeř n idammen inu, n uhekkwu inu ɣar turṣuḍi [deg wenḍeř]? Ma ad Cek tqada tɛejjajt? Ma ad tbarreḥ s řaman nnec?
PSA 30:11 Seř-dd ɣari, [a] SIDI, ḥinn xafi, [a] SIDI, iři d amɛawen inu.
PSA 30:12 Cek aqa tarrid tɣuyyit inu [n wecḍan] d ccḍiḥ s nnubtat, tessarxud taxancet inu [n wecḍan], tessbeysed ayi s řefraḥet,
PSA 30:13 ḥima aɛuǧi [inu] ad ac izehhed u war ittsusum. [A] SIDI, AREBBI inu, necc ad Cek qadiɣ i řebda.
PSA 31:1 [I umeqqran n imeɣnajen. Azehhed n Dawud.]
PSA 31:2 Necc arekkwařeɣ ɣarek, [a] SIDI, war ttejji ad seḍḥiɣ i řebda, fekk ayi s tsegda nnec.
PSA 31:3 Ewc ayi amezzuɣ nnec, fekk ayi deɣya. Iři d Taṣḍart ijehden i necc, ijj n lburj ḥima ad ayi tessnejmed.
PSA 31:4 Maɣar Cek d Taṣḍart inu d lburj inu. Ndeh ayi, thilla dayi di ṭṭweɛ n Yisem nnec.
PSA 31:5 Fekk ayi zi tracca nni xafi ggin s tnuffra, maɣar Cek d jjehd inu.
PSA 31:6 Deg ufus nnec i ggiɣ buḥbeř inu. Cek tefdid ayi, [a] SIDI, Arebbi, d amtiqqi [i teǧid].
PSA 31:7 Necc carrheɣ inni ittceɣřen ixef nsen s [řexyařat] ibeṭṭřen. Necc ttecřeɣ x SIDI.
PSA 31:8 Necc ad arecqeɣ u ad farḥeɣ zi tmexsiwt nnec icewwaren, minzi Cek tᵉttwařid řeɣben inu [u] tareggbed x řeḥṣarat inu,
PSA 31:9 [minzi] war d ayi tarrid ɣar ufus n řeɛdu inu, [maca] teggid ayi ttasiɛ ɣar iḍaren inu.
PSA 31:10 Ḥinn xafi, [a] SIDI, maɣar ttwaḥeṣṣareɣ, tiṭṭ inu d řeɛmar inu d tekrict inu aqa fecřen.
PSA 31:11 Maɣar tudart inu tkemmeř s wecḍan, iseggʷusa inu s uzehhar. Jjhed inu iheyyef zi řmuɛṣiyyet inu, ixsan inu aqa arcan.
PSA 31:12 I marra inni d ayi iḥeṣṣaren dewřeɣ d astehzi, i jjiran inu [qaɛ] aṭṭas, i yinni d ayi issnen [dewřeɣ] d ijjen i issnexřiɛen. Inni d ayi ittwařin deg webrid, ttrakkwařen zzayi.
PSA 31:13 Ttun ayi s wuř am yijj n umettin, dewřeɣ am yiceqfan n weqdiḥ,
PSA 31:14 maɣar sřiɣ aqa aṭṭas ceqqfen [dayek], assiggʷed tuɣa ittenneḍ ayi-dd umi xafi ggin tameɛmuč. Tuɣa arezzun ad kksen tudart inu.
PSA 31:15 [Maca] necc ttecřeɣ xak, [a] SIDI, qqareɣ: ‘Cek d AREBBI inu!’
PSA 31:16 Řweqt inu aqa-tt deg ufus nnec. Fekk ayi zeg ufus n řɛedyan inu u zeg inni d ayi iḍeffaren,
PSA 31:17 Ejj udem nnec ad yarɣ x umsexxar nnec, senjem ayi s tmexsiwt nnec icewwaren.
PSA 31:18 [A] SIDI, war ttejji ad dewřeɣ ttseḍḥiɣ, maɣar xak i ttřaɣiɣ. Arr iɛeffanen ad dewřen ttseḍḥan, arr i-ten ad ssusmen di řaxart.
PSA 31:19 Ejj ad sqaren iyencicen issxarriqen, inni issawařen s nnfaxet ḍidd i umsegged, s uɛeffar d useḥqar.
PSA 31:20 Mecḥař imeqqar řxar nnec i txemmřed i yinni Cek itteggʷeden, nni tesswejded i yinni ɣarek yarekkwařen zi tarwa n bnadem!
PSA 31:21 Cek tessdurruyed i-ten s uřeḥḥaf n wudem nnec, zi nnfaxet n bnadem. Cek tessnuffared i-ten di texzant, zeg umcubbec n iyencicen.
PSA 31:22 Ad ittwabarek SIDI, maɣar Netta yarra ayi-dd tamexsiwt nnes icewwaren d řeɛjeb, deg ict n tendint ifaryen.
PSA 31:23 Necc deɣya nniɣ: “Necc ttwaqesseɣ zi zzat i tiṭṭawin nnec!’ Maca ɛad Cek tesřid i tmijja inu, umi dd xak řaɣiɣ.
PSA 31:24 Sɛizzem SIDI, marra imtiqqan nnes, maɣar SIDI iḥeṭṭa x yinni ittamnen, u wenni itteggen s nnfaxet, ittxeǧeṣ i-t s aṭṭas.
PSA 31:25 Iřim d iryazen u Netta ad daywem yegg uř, [wah], marra inni ittrajan SIDI.
PSA 32:1 [N Dawud. Axemmi.] Sseɛd n wenni umi tᵉttwaɣfar tɛeddit nnes, wenni umi dřin x ddnub nnes.
PSA 32:2 Sseɛd n weryaz wenni umi war iḥeṣṣeb SIDI řmuɛṣiyyet nnes, wenni ɣar iǧa buḥbeř war dayes bu řɣecc.
PSA 32:3 Umi sqareɣ, arcan iɣsan inu, s uzehhar inu, ass marra.
PSA 32:4 Maɣar ass d ǧiřet issedqeř ayi ufus nnec, idammen n tudart inu dewřen [am] řaẓaɣ n unebdu. Silah.
PSA 32:5 Ssaregbeɣ ac ddenb inu, war ssduryeɣ řmuɛṣiyyet inu. Necc nniɣ: “Ad neɛmeɣ x ixeṭṭan inu ɣar SIDI!”, [xenni] Cek teɣfared ayi řmuɛṣiyyet n ddenb inu. Silah.
PSA 32:6 S uyenni marra amtiqqi ad ac isjed di řweqt umi ɣa tejjed [bnadem] ad Cek yufa. Xmi din ict n sseḥřet n waman aṭṭas, war t třeqqef qaɛ.
PSA 32:7 Cek d amcan n udurri i necc, tessared ayi zi řeḥṣaret, tquwwared ayi s iɣuyyan n řefraḥet n ufekki. Silah.
PSA 32:8 Necc ad cek wceɣ řefhamet uca ad ac ssřemdeɣ abrid ittxeṣṣa ad dayes tuyured. Necc ad cek weṣṣiɣ, ad xak tiři tiṭṭ inu.
PSA 32:9 War ttiři am uyis, am usardun břa řeɛqeř, nni ittxeṣṣa ad ten qemmɛen s ssrimet d weryam, niɣ war izemmar ad ɣarek dd-iqarreb.
PSA 32:10 Aṭṭas [ǧant] tamara n uɛeffan, [maca] wenni ittcařen x SIDI, ad as iquwwar Netta s tmexsiwt nnes icewwaren.
PSA 32:11 Farḥem di SIDI, arecqem, [a] imseggaden, sřiweřwem, [a] marra inni ɣar iǧa wuř iseggmen!
PSA 33:1 Sřiweřwem i SIDI, [a] imseggaden, aṣebbaḥ d ict n telwizt i yinni iseggmen.
PSA 33:2 Qadam SIDI s řgambri, zehhdem as s lɛud u s lharpa ak-d ɛecra n ifiřan.
PSA 33:3 Ɣennjem as s yijj n yezři amaynu, irarem mliḥ s wesruddeḥ [n řbuq].
PSA 33:4 Minzi awař n SIDI iseggem, marra min ittegg, [ittegg i-t] s řaman.
PSA 33:5 Netta ittexs tasegda d řḥeqq. Tammurt teccur s tmexsiwt icewwaren n SIDI.
PSA 33:6 Zeg wawař n SIDI ttwaggen ijenwan, zi Arruḥ n uqemmum nnes [ttwaggent] marra řɛeskarat nsen.
PSA 33:7 Netta issmun aman n řebḥar am yijj n weɣbar. Netta ixemmeř [aman] ihewřen deg ixxamen n řexzen.
PSA 33:8 Ad teggʷed marra tammurt zi SIDI, ad zzayes ggʷeden marra imezdaɣ n ddunect.
PSA 33:9 Maɣar Netta issawař uca aqa-t din, Netta ittamar uca ad yiři ibedd din.
PSA 33:10 SIDI ittareẓẓa ccwar n řegnus, issebḍeř ixarriṣen n řegnus.
PSA 33:11 Ccwar n SIDI ad iqqim ibedd i řebda, ixarriṣen n wuř nnes zi jjiř ař jjiř.
PSA 33:12 Sseɛd n řgens i ɣar iǧa AREBBI nnes d SIDI, řgens nni ixḍar i-t Netta d tasɣart i Yixef nnes.
PSA 33:13 SIDI ixezzar-dd zeg ujenna, ittwařa marra tarwa n bnadem.
PSA 33:14 Zi tzeddiɣt nnes imetnen ixezzar ɣar marra imezdaɣ n temmurt.
PSA 33:15 Netta weḥḥdes d wenni ikewwnen uř nsen, Netta iḥekkar i marra timegga nsen.
PSA 33:16 Ajeǧid war ittwassenjam s yijj n řɛeskar d ameqqran, bu-teɣruḍt war ittwafekki s jjehd aṭṭas.
PSA 33:17 Aqa d axarriq [belli] ayis ad dd-yawi asenjem, [ɛad] s jjehd nnes ameqqran war dd-ittenfekki.
PSA 33:18 Xzar, tiṭṭ n SIDI x yinni zzayes itteggʷeden, x yinni ittrajan tamexsiwt nnes icewwaren,
PSA 33:19 ḥima ad ifekk řeɛmar nsen zi řmewt, ḥima ad ten yejj qqimen ddaren di řaẓ.
PSA 33:20 Řeɛmar nneɣ ittraja SIDI, aqa Netta d aɛawen nneɣ d taseddart nneɣ i useřqi.
PSA 33:21 Maɣar zzayes ifarreḥ wuř nneɣ, minzi nettcař x Yisem nnes iqeddsen.
PSA 33:22 Ad xaneɣ tarsa tmexsiwt nnec icewwaren, [a] SIDI, am mammec i Cek nettraja.
PSA 34:1 [N Dawud, umi issniɛmiř, igga ixef nnes d abuhaři zzat i wudem n Abimilik,] [wenni i xas yuẓẓřen ařami yuyur netta.]
PSA 34:2 Alif. Necc xseɣ ad barkeɣ i SIDI řebda, aṣebbiḥ nnes ad yiři deg uqemmum inu břa qeṭṭu.
PSA 34:3 Bit. Řeɛmar inu ad iṣebbeḥ i SIDI. Imhinen ad as sřen u ad farḥen.
PSA 34:4 Gimel. Semɣarem akidi SIDI, ejj aneɣ ad nessuɛřa Isem nnes jmiɛ.
PSA 34:5 Dalit. Necc arzuɣ x SIDI u Netta yarra-dd xafi, ifekk ayi zi marra innexřiɛen inu.
PSA 34:6 Hi. Nitni xezzaren ɣares uca ceɛceɛen, iɣembab nsen war ddikkwiřen zewɣen s useḍḥi ɛemmarṣ.
PSA 34:7 Zayin. Řmeskin-a [danita] iřaɣa u SIDI isřa [ɣares], ifekk i-t zi marra řeḥṣarat nnes.
PSA 34:8 Xit. lmalak n SIDI iquwwar s řmargeḥ nnes x yinni t itteggʷeden, Netta ifekk i-ten.
PSA 34:9 Tit. Qasem uca xzarem, aqa SIDI icna. Sseɛd n weryaz wenni ɣares yarekkwařen.
PSA 34:10 Yud. Ggʷedem SIDI, [a kenniw,] imqeddasen nnes, maɣar inni t itteggʷeden war ten ittxeṣṣi walu.
PSA 34:11 Kaf. Iyraden imeẓyanen tteḥwajen, daysen řaẓ, [maca] inni yarezzun x SIDI, war ten ittxeṣṣi walu zi marra [min iǧan] d řxar.
PSA 34:12 Lamid. Asem-dd, [a, kenniw] iḥenjiren, sřem-dd ɣari! Necc ad awem ssřemdeɣ tiggʷudi n SIDI.
PSA 34:13 Mim. Man wen i iǧan d aryaz wenni di iǧa meẓri di tudart, wenni ittexsen ussan [n tudart nnes] ḥima ad iẓar řxar?
PSA 34:14 Nun. Mneɛ iřes nnec zi řɣar, uřa d iyencicen nnec zeg wawař n řɣecc.
PSA 34:15 Samix. Ḥeyyed x tuɛeffna u egg řxar, arzu x řehna u ḍfar i-t.
PSA 34:16 Ɛayin. Tiṭṭawin n SIDI x imseggaden, imezzuɣen nnes meyyřen ɣar iɣuyyan nsen.
PSA 34:17 Pi. Udem n SIDI ḍidd i yinni itteggen řɣar, ḥima ad ikkes řidaret daysen zi temmurt.
PSA 34:18 Tsadi. Nitni řaɣan u SIDI isřa [ɣarsen], Netta ifekk i-ten zi marra řeḥṣarat nsen.
PSA 34:19 Quf. SIDI yudes i marra inni umi ittwarẓ wuř nsen, issenjam inni umi ittwařbez buḥbeř nsen.
PSA 34:20 Rix. Aṭṭas [iǧan] ifeqqusen n imseggaden, [maca] SIDI ifekk i-ten zzaysen marra.
PSA 34:21 Cin. Netta iḥeṭṭa iɣsan nnes marra, uřa d ijj zzaysen war ittareẓẓi.
PSA 34:22 Taf. Aqa řɣar ad ineɣ aɛeffan, inni icarrhen amsegged ad ttwaɛaqben.
PSA 34:23 SIDI ad ifdi řeɛmar n imsexxaren nnes, marra inni ɣares yarekkwařen, war ttwaɛaqben.
PSA 35:1 [N Dawud.] Mcubbec, [a] SIDI, ak-d yinni akidi ittemcubbucen, mneɣ ak-d yinni kidi ittmenɣan.
PSA 35:2 Ṭṭef taseddart n useřqi d tseddart tameqqrant, uca kkar, ewc ayi afus.
PSA 35:3 Jbed-dd lansa, qqen [abrid] i umsagar ak-d yinni dd ayi iḍaffaren, ini i řeɛmar inu: “Asenjem nnec aqa d Necc!”
PSA 35:4 Arr inni yarezzun x řeɛmar inu ad ttwaxarewḍen u ad ttwafeḍḥen, ejj inni ittxarriṣen di řɣar xafi ad ttwaɛarrnen ɣar ḍeffar, ejj i-ten ad dewřen ttseḍḥan.
PSA 35:5 Ejj i-ten ad dewřen am yicarfa deg usemmiḍ, ejj lmalak n SIDI ad ten iɛarn.
PSA 35:6 Ejj ad idweř webrid nsen d taǧest, ad yiři itteḥřuǧuḍ, uca ejj lmalak n SIDI ad ten iḍfar.
PSA 35:7 Maɣar břa ssibbet ssnuffaren xafi [aḥfur n] turṣuḍi d tracca nsen, břa ssibbet ɣzin t i řeɛmar inu.
PSA 35:8 Ejj areddeǧ ad xas dd-yas břa ma issen, ejj tracca nnes nni issnuffar ad t tᵉṭṭef simant nnes, ejj i-t ad [dayes] dd-iwḍa simant nnes, [s ijj n uweṭṭu] i t i ɣa yareddǧen.
PSA 35:9 Řeɛmar inu ad ifarḥ zi SIDI, ad yarceq deg usenjem nnes.
PSA 35:10 Ad inin marra iɣsan inu: “[A] SIDI, man wen [iǧan] am Cek! Cek d wenni ittfekkan řmeskin zeg wenni xas ijehhden, řmeskin d umezřuḍ zeg inni d asen ikeccḍen.”
PSA 35:11 Icehhaden iqṭaṭɛiyyen kkaren. Min war ssineɣ, ttseqsan ayi.
PSA 35:12 Arrin ayi-dd řɣar di řxar, [ggin dayi] řeḥwej n yinni xafi iɛizzen.
PSA 35:13 Necc [maca] arḍeɣ ict n txancet [n wecḍan], řami tuɣa heǧcen nitni, ggiɣ ad iẓumm řeɛmar inu, uca taẓaǧit inu [tᵉttɣima] tᵉddekkwař-dd ɣari di daxeř inu.
PSA 35:14 Axmi t tuɣa d ameddukkeř inu niɣ d uma, ammu i tuɣa ggureɣ, am ca n ijj iceṭṭ x yemmas, ammu tuɣa ayi ggureɣ ɣennseɣ [deg warruḍ] d abarcan.
PSA 35:15 [Maca] xmi ttqejdiḥeɣ, farrḥen nitni, ttmunen ak-d wayawya. Ttmunen ḍidd inu inni n wadday, břa ma ad [t] ssneɣ. Ceqqfen dayi, war ssusmen.
PSA 35:16 Am inni iɣeṭṭṣen [bnadem] i yijj n uřeqquz n weɣrum, [ammu] ɣezzan-dd ɣari tiɣmas.
PSA 35:17 [A] Sidi inu, ař mecḥař i ɣa tekked txezzared [waha]? Senjem ayi zeg wareddeǧ nsen i iggin, ayenni inu zeg weyraden imeẓyanen.
PSA 35:18 Necc ad Cek qadiɣ deg yijj n wegraw [n řgens] d ameqqran, ad Cek ṣebbḥeɣ jar ijj n řgens imɣar aṭṭas.
PSA 35:19 Inni iǧan d řɛedyan inu di řbaṭer, war ten ttejji ad xafi farḥen, inni d ayi icarrhen, war ten ttejji ad xafi mmseɣmazen břa ssibbet.
PSA 35:20 Maɣar nitni war ssiwiřen ca x řehna, maca ttxarriṣen deg inwayen [ccuren] s řɣecc ḍidd inni yarezzun řhudnet di temmurt.
PSA 35:21 Nitni arezzmen aqemmum nsen qaɛ, qqaren: “Ha, ha, tiṭṭ nneɣ simant nnes teẓra i-tt!”
PSA 35:22 [A] SIDI, Cek teẓrid tt, war ttesqara, Sidi inu, war xafi tteggʷij ca.
PSA 35:23 Faq, kkar di ṭṭweɛ n řḥeqq inu, [a] AREBBI inu d Sidi inu, di ṭṭweɛ n ddeɛwet inu.
PSA 35:24 Ḥkem xafi s řḥeqq ɛlaḥsab tasegda nnec, [a] SIDI, AREBBI inu, war ten ttejji ad xafi farḥen.
PSA 35:25 War [ten] ttejji ad inin deg wuř nsen: “Ha, aqa aneɣ mliḥ!”, war ten ttejji ad inin: “Aqa nsarḍ i-t!”
PSA 35:26 Ejj inni ifarrḥen x arẓiyyet inu, ad ttwaxarewḍen u ad ssnuffaren ixef nsen jmiɛ, ejj inni iggin ixef nsen mɣaren zzati, ad yarḍen s useḍḥi d řefḍiḥet.
PSA 35:27 Ejj inni yarḍan di tsegda ad sřiweřwen u ad farḥen, ejj i-ten ad inin: “D ameqqran i yeǧa SIDI wenni yarḍan di řehna n umsexxar nnes.”
PSA 35:28 [Xenni] iřes inu ad ibarreḥ tasegda nnec d uṣebbeḥ nnec ass marra.
PSA 36:1 [I umeqqran n imeɣnajen. Zeg umsexxar n SIDI. N Dawud.]
PSA 36:2 Issawař uxeṭṭu n uɛeffan daxeř deg wuř inu: “War ɣares tiggʷudi n AREBBI zzat i tiṭṭawin nnes.”
PSA 36:3 Minzi [axeṭṭu-ya] issḥinnab i-t di tiṭṭawin nnes, aqa yufa řmuɛṣiyyet nnes [tarra i-t-i-dd] ɣar wecrah.
PSA 36:4 Awařen n uqemmum nnes aqa aten d řɣecc d wecmat, netta issbedd ḥima ad yarzu řefhamet ḥima ad igg řxar.
PSA 36:5 Ittxemmem di řɣecc di qama nnes, iggur ad ibedd deg ijj n webrid war iṣebḥen. Řɣar war t ittmenḍir.
PSA 36:6 [A] SIDI, tamexsiwt nnec icewwaren [tᵉttakkwaḍ] ař daxeř n ijenwan, řaman nnec ař iseynuten.
PSA 36:7 Tasegda nnec [tegga] am yidurar n Arebbi, řeḥkamat nnec am [waman] ihewřen. SIDI issenjam bnadem d řmař.
PSA 36:8 Mecḥař tiɣřa tmexsiwt nnec icewwaren, [a] AREBBI! [S uyenni] arekkwařen ɣarek tarwa n bnadem, ɣar tiři n wafriwen nnec.
PSA 36:9 Ttwasjawnen s ufeyyeḍ s tadunt n Taddart nnec, iɣzar s nnɛami nnec tewced [asen] maḥend ad [zzayes] swen.
PSA 36:10 Maɣar ɣarek i iǧa řɛunṣar n tudart, di tfawt nnec aqa nettwařa tafawt.
PSA 36:11 Swiẓẓeḍ tamexsiwt nnec icewwaren x yinni i Cek issnen, tasegda nnec x yinni i ɣar iǧa wuř iseggmen.
PSA 36:12 War ttejji ad xafi dd-yas uḍar n ayt n bu-nnfaxet, war ttejji afus n iɛeffanen ad ayi dd-yarr ad tellɛeɣ mani ma.
PSA 36:13 Aqa din i wḍan, inni itteggen řmuɛṣiyyet, ttwaɣeḍřen ɣar temmurt, war zemmaren ɛad ad kkaren ɛawed.
PSA 37:1 [N Dawud.] Alif. War tᵉttwareqq [tefqeḥt nnec] x iɛeffanen, war ttasem x yinni itteggen řɣecc.
PSA 37:2 Maɣar ad wḍan deɣya am arbiɛ, am arbiɛ aziza ad sřawen.
PSA 37:3 Bit. Ttceř x SIDI u egg řxar, zdeɣ di temmurt u iři d amtiqqi.
PSA 37:4 Arr meẓri di SIDI, u Netta ad cek iwc min di ittmeẓri wuř nnec.
PSA 37:5 Gimel. Arr ticři nnec ɣar SIDI, ttcař xas u Netta ad [tt] igg.
PSA 37:6 Netta ad isseḍhar tasegda nnec am tfawt, řḥeqq nnec am yiceɛciɛen n tfuct di ṭṭḥa n uziř.
PSA 37:7 Dalit. Susem zzat i SIDI u raja t. War ttejji [tafqeḥt nnec] ad tasem x wenni ifeřhen deg webrid nnes, x weryaz nni itteggen taḥraymect.
PSA 37:8 Hi. Ejj aɣḍab nnec ad yarsa u ejj asɛar nnec ad iraḥ. War ttejji [tafqeḥt nnec] ad tᵉttwassareɣ. [Man aya ad yawi] mɣir tuɛeffna waha.
PSA 37:9 Maɣar iɛeffanen ad ttwateḥḥan, [maca] inni issitimen x SIDI ad warten tammurt.
PSA 37:10 Waw. Mɣir cwayt waha uca aɛeffan war ittɣimi [ɛad]. Ad tḥekkared mliḥ wemcan nnes, [maca] war din ittiři [ɛad].
PSA 37:11 Imhinen ad warten tammurt, ad arren meẓri di řehna ameqqran.
PSA 37:12 Zayin. Aɛeffan ittxarreṣ di tmeɛmač tiḥraymiyyin ḍidd i umsegged, ittɣezza xas tiɣmas.
PSA 37:13 Sidi inu iḍeḥḥec xas, maɣar ittwařa aqa ass nnes ad dd-yas.
PSA 37:14 Xit. Iɛeffanen jebden-dd ssif u meḥḍen řqews, ḥima ad ɣeḍřen řmeskin d umezřuḍ, ḥima ad ɣarṣen i yinni igguren deg webrid nsen nican.
PSA 37:15 Ssif nsen ad ten iřqef deg wuř nsen, řeqwas nsen ad ttwarẓen.
PSA 37:16 Tit. Drus i ɣares ɣar umsegged, ḥsen zeg ufeyyeḍ n waṭṭas n iɛeffanen.
PSA 37:17 Maɣař iɣaǧen n iɛeffanen ad ttwarẓen, [maca] SIDI ad isenned imseggaden.
PSA 37:18 Yud. SIDI issen ussan n yinni igguren nican, tasɣart nsen ad teqqim i řebda.
PSA 37:19 War ttwaqemmiḥen di řweqt taɛeffant, deg wussan n řaẓ ad ttwassjiwnen.
PSA 37:20 Kaf. Maɣar iɛeffanen ad fnan, řɛedyan n SIDI ad weddaren, ad ttwaqḍan am wenni iǧan iɣřan qaɛ zeg izmaren iqebbuzen, ad ḍwen di tayyut.
PSA 37:21 Lamid. Aɛeffan yareṭṭeř, war ittarri [amarwas], maca amsegged ittḥinn, ittic.
PSA 37:22 Maɣar inni zzayes ittwabarken ad warten tammurt, [maca] inni zzayes ittwaneɛřen, ad ttwateḥḥan.
PSA 37:23 Mim. Iṣuraf n weryaz ijehden ttwassmettnen zi SIDI, Netta yareṭṭa x webrid nnes.
PSA 37:24 Mařa iwḍa, war ittmenḍar, maɣar SIDI iwca as afus nnes.
PSA 37:25 Nun. Necc tuɣa ayi d ameẓyan, [řexxu] wsareɣ, [maca] ɛemmarṣ war ẓriɣ amsegged ittwajj, niɣ tarwa nnes arezzun x weɣrum.
PSA 37:26 Ass ikmeř ittḥinna u yařeṭṭeř [i imezřaḍ], zzariɛet nnes ad tiři i lbaraka.
PSA 37:27 Samix. Ḥeyyed x řɣar u egg řxar, [xenni] ad ɣarek tiři tzeddiɣt i řebda qaɛ.
PSA 37:28 Maɣar SIDI ittexs řḥeqq, war isemmeḥ deg imtiqqan nnes. Ɛayin. Ad ttwaḥḍan i řebda qaɛ, maca zzariɛet n iɛeffanen ad tᵉttwateḥḥa.
PSA 37:29 Imseggaden ad warten tammurt, ad dayes zedɣen i řebda.
PSA 37:30 Pi. Aqemmum n umsegged ittbarreḥ s tiɣit, iřes nnes issawař s řḥeqq.
PSA 37:31 Ccariɛa n AREBBI nnes deg wuř nnes, iṣuraf nnes war ttefriɣen.
PSA 37:32 Tsadi. Aɛeffan iřebbet i umsegged, yarezzu ad t ineɣ,
PSA 37:33 [maca] SIDI war zzayes yarexxu afus nnes, war xas iḥkem xmi t ɣa iḥakem.
PSA 37:34 Quf. Sitim x SIDI u ṭṭef deg webrid nnes. Netta ad cek issgeɛɛed ḥima ad twarted tammurt. Ad tẓared aqa iɛeffanen ad ttwateḥḥan.
PSA 37:35 Rix. Necc ẓriɣ ijj n uɛeffan d bu-řexcunet, imeqqar am tcejjart n tengelt tazizawt.
PSA 37:36 Aqa iɛdu, uca xzar, war t tuɣi ca ɛad din. Arzuɣ xas, maca idweř war iǧi [ɛad].
PSA 37:37 Cin. Ḥḍa x wenni iǧan ikmeř u xezzar ɣar wenni igguren nican, maɣar aneggar n weryaz nni ad yiři d řehna.
PSA 37:38 Inni ittɛeddan ad ttwareddǧen jmiɛ, min iqqimen n iɛeffanen ad ittwateḥḥa.
PSA 37:39 Taf. Asenjem n imseggaden [ad dd-yas] zi SIDI, aqa Netta d arewřa nsen di řweqt n řeḥṣaret.
PSA 37:40 SIDI ad asen iwc afus u ad ten ifekk. Netta ad ten ifekk zeg iɛeffanen u ad ten issenjem, maɣar nitni arekkwařen ɣares.
PSA 38:1 [Azehhed n Dawud. I řidaret.]
PSA 38:2 [A] SIDI, war d ayi ttɛaqab deg uduqqez n weɣḍab nnec, war d ayi ttweddab s wesɛar nnec.
PSA 38:3 Maɣar fřitcat n řqews nnec udfent dayi, afus nnec ittzeyyar xafi.
PSA 38:4 War [din] iqqim min iǧan ikemmřen di arrimet inu zeg wesxeḍ nnec, war iqqim min iṣeḥḥen deg iɣsan inu zi ssibbet n ddenb inu.
PSA 38:5 Maɣar řmuɛṣiyyat inu geɛɛdent ayi ɣar uzeǧif inu, deqqřent xafi am yijj n ddqeř imɣar aṭṭas.
PSA 38:6 Iyezzimen inu daysen arriḥet, geyyḥen s tubbuheřya inu.
PSA 38:7 Dewřeɣ qewseɣ, dewřeɣ ɣenseɣ ař ṭṭarf. Ass marra ggureɣ deg [warruḍ n wecḍan d] abarcan.
PSA 38:8 Maɣar ttaciɣ tijɛinnatin inu arɣint s tmessi marra, war din iqqim min iǧan ikemmřen di arrimet inu.
PSA 38:9 Necc jemmdeɣ u ttwaɣeḍřeɣ qaɛ, sɣuyyuɣ s zzhir n wuř inu.
PSA 38:10 [A] Sidi inu, marra min di ɣari meẓri aqa-t zzatek, aweɛɛeḍ inu war zzayek ittnuffar.
PSA 38:11 Uř inu iddendun, marra jjehd iffeɣ ayi, uřa d tafawt [teffeɣ] zi tiṭṭawin inu, [wah] uřa d nitenti war ɣari beddent [ɛad].
PSA 38:12 Imɛizzen inu d imeddukkař inu bedden arendad [inu ɣar] jjriḥect inu, uřa d inni i d ayi yudsen ttaggʷejen xafi.
PSA 38:13 Inni yarezzun ad kksen tudart inu, nedyen ayi řefxux, inni yarezzun ad ayi ggen řɣar, ssawařen am mmeẓren ad areddǧen, nitni ceřɣen s řɣecc ass marra.
PSA 38:14 [Maca] necc tteggeɣ ixef inu axmi d adehcur, am weynaw nni war yarezzmen aqemmum nnes.
PSA 38:15 Necc am weryaz war ittesřin, wenni war ɣar iǧi twarrit zeg uqemmum nnes.
PSA 38:16 Maɣar ttrajiɣ Cek, [a] SIDI, Cek ad dd-tarrid, [a] Sidi inu, [a] AREBBI inu!
PSA 38:17 Maɣar nniɣ: “Ejj i-ten war xafi farrḥen, xmi ɣa farɣen iḍaren inu, ejj i-ten war ssemɣaran ixef nsen xafi.
PSA 38:18 Maɣar necc aqa ad nqarḍeɣ, řeḥriq inu aqa-t řebda zzati.
PSA 38:19 Maɣar ssargbeɣ ac řmuɛṣiyyet inu, aqa ttwaḥeṣṣareɣ zi ddenb inu.
PSA 38:20 Řɛedyan inu ddaren, aqa aten s jjehd, aṭṭas [ǧan] inni d ayi icarrhen břa ssibbet.
PSA 38:21 Inni ittarran řxar s řɣar ssbedden ixef nsen ḍidd inu, umi necc arezzuɣ x min iṣebḥen.
PSA 38:22 War dayi semmeḥ, [a] SIDI, AREBBI inu, war xafi ttaggʷej.
PSA 38:23 Deɣyet ḥima ad ayi tewcid afus, [a] Sidi inu, asenjem inu.
PSA 39:1 [I umeqqran n imeɣnajen. I Yadutun. Azehhed n Dawud.]
PSA 39:2 Nniɣ: “Necc ad kkareɣ ad ḥḍiɣ ibriden inu zi ddenb n yiřes inu, ad ṭṭfeɣ aḥeṭṭu ɣar uqemmum inu s ict n tecmant, min ɣa yekk uɛeffan zzati.”
PSA 39:3 Necc dewřeɣ am weynaw, [řeḥḥfeɣ ixef inu s] useɣd, bekmeɣ uřa x řxar, [maca] řeḥriq inu tuɣa yarenni.
PSA 39:4 Uř inu idweř iḥemma di daxeř inu, tᵉttwassareɣ ict n tmessi ɣar unixses inu. [Xenni] ssiwřeɣ s yiřes inu:
PSA 39:5 “[A] SIDI, scen ayi aneggar inu, man iǧa řqedd n wussan inu, ḥima ad ssneɣ mammec arexfeɣ.
PSA 39:6 Xzar, Cek tarrid ussan inu am yicbaren n ufus, řmijař n tudart inu zzat i Cek axmi d walu. Kuř bnadem, mammec ma ibedd imten, nican am yict n tayyut.” Silah.
PSA 39:7 Iwa, bnadem iggur am yijj n řexyař, wah, [am] ict n tayyut [ammu i] ittraḥ ittas-dd. Netta issmun, war issin man wen t i ɣa iksin [ɣares].
PSA 39:8 U řexxu, min ɣa ssitmeɣ, [a] Sidi inu? Aqa necc ttrajiɣ Cek!
PSA 39:9 Fekk ayi zi marra ixeṭṭan inu, war d ayi ttegg ca d tiseḍḥac i ubuḥaři.
PSA 39:10 Necc dewřeɣ am weynaw, war arezzmeɣ aqemmum inu, maɣar d Cek i iggin aya.
PSA 39:11 Ksi zzayi jjriḥect nnec, aqa fenniɣ s uṭeffu iḥeṣṣaren n ufus nnec.
PSA 39:12 [Mařa] tseggded ca n weryaz s tiyyita di ssibbet n řmuɛṣiyyet nnes, [xenni] tessfesyed acewwar n waddud nnes am tcinda. Iwa kuř bnadem [ad ifna] [am yict n] tayyut. Silah.
PSA 39:13 Seř i tẓaǧit inu, [a] SIDI, sḥess i uɣuyyi inu. War ttebkim ɣar imeṭṭawen inu, maɣar aqa ayi d abarrani, d amɛezzeb ɣarek, am marra řejdud inu.
PSA 39:14 Sḥeyyed xafi maḥend ad ceɛceɛeɣ [ɛad s řefraḥet], qbeř ad raḥeɣ u war [da] ttiřiɣ ɛad.
PSA 40:1 [I umeqqran n imeɣnajen. N Dawud. Azehhed.]
PSA 40:2 Ssitimeɣ qaɛ x SIDI. Netta yarra-dd ɣari s uzeǧif, issḥess ɣar uɣuyyi inu.
PSA 40:3 Netta issgeɛɛed ayi-dd zeg ijj n wanu ineqqen, zeg ubeǧaɛ d ubaryuḍ, Netta issars iḍaren inu x teṣḍart, issemten iṣuraf inu.
PSA 40:4 Netta igga ayi ijj n yezři d amaynu deg uqemmum inu, ijj n izři n uṣebbeḥ i AREBBI. Aṭṭas ad t ẓaren, ad tecřen x SIDI.
PSA 40:5 Sseɛd n weryaz wenni ittecřen x SIDI, wenni war ittmeyyřen ɣar ayt n bu-nnfaxet, uřa ɣar yinni iweddaren ɣar uxarriq.
PSA 40:6 Aṭṭas, [a] SIDI, AREBBI inu, d lmuɛjizat nni teggid, uřa d min tenwid xaneɣ. Uřa d ijj izemmar ad iɛbar ixef nnes akidek. Necc ad tent hajiɣ, ad zzaysent ssiwřeɣ. Aqa nitenti deg waṭṭas, war zemmarent ad ttwaḥesbent.
PSA 40:7 War texsed taɣarṣt d tewhibt [n řɣiǧet]. Cek tarzmed imezzuɣen inu. Taɣarṣt n wecmaḍ d tɣarṣt n ddenb war tent tᵉttared.
PSA 40:8 Xenni nniɣ: “Xzar, Necc ad dd-aseɣ, deg wedlis ittwannḍen yura xafi.
PSA 40:9 Necc ɣari meẓri, [a] AREBBI, ḥima ad ggeɣ min texsed Cek. Ccariɛa nnec aqa-tt di daxeř inu.”
PSA 40:10 Necc ttbarrḥeɣ řexbar aṣebḥan n tsegda [nnec] deg wegraw [n řgens] ameqqran. Xzar, war tteqqneɣ iyencicen inu, [a] SIDI, Cek tessned t.
PSA 40:11 War ttxemmřeɣ tasegda nnec daxeř deg wuř inu, ssawařeɣ x tidett nnec u x usenjem nnec. Tamexsiwt nnec icewwaren d řaman i dayek war ten ssnuffareɣ deg wegraw [n řgens] ameqqran.
PSA 40:12 Cek, [a] SIDI, war xafi tessbeddid arreḥmet nnec. Ejj tamexsiwt nnec icewwaren d řaman i dayek ad ayi ḥḍant řebda.
PSA 40:13 Maɣar war izemmar ad ittwaḥeṣṣeb řɣar i d ayi iquwwaren, řmuɛṣiyyat inu ttmenɛent ayi-dd, dewřeɣ war ttwiřiɣ ɛad [s man aya]. Aqa-tent d aṭṭas x ucuwwaf n uzeǧif inu, uř inu ittefciř.
PSA 40:14 [A] SIDI, ad ac yarḍa ḥima ad ayi tfekked, [a] SIDI, deɣyat ḥima ad ayi tewced afus.
PSA 40:15 Ejj inni yarezzun řeɛmar inu ḥima ad t teḥḥan ad ttwaxarweḍen, ad ssnufaren ixef nsen [jmiɛ], ejj inni ifarrḥen deg uɛeddeb inu ad dewřen ɣar ḍeffar u ad ttwassbehdřen.
PSA 40:16 Ejj i-ten ad ttwareddǧen am uxeǧeṣ i řefḍiḥet nsen [i iggin], inni din iqqaren: “Ha, ha!”
PSA 40:17 Ejj marra inni xak yarezzun, ad arren meẓri, ad zzayek farḥen. Ejj inni ittexsen asenjem nnec ad inin řebda: “SIDI d ameqqran!”
PSA 40:18 Necc di řeɣben u zeřḍeɣ, [maca] Sidi inu iɛqeř xafi. Cek d wenni d ayi iwcin afus d wenni d ayi issnejmen. [A] AREBBI inu, war ttɛeṭṭař ca.
PSA 41:1 [I umeqqran n imeɣnajen. Azehhed n Dawud.]
PSA 41:2 Sseɛd n wenni ifehhmen i umarxu. SIDI ad t ifekk deg wass n řɣar.
PSA 41:3 SIDI ggur ad t iḥḍa, ad t yejj ad iddar, netta ad yarr meẓri di temmurt. War t ttsellam ca ɣar [min din iǧan] [di] řeɛmar n řɛedyan nnes.
PSA 41:4 SIDI ad kides ibedd di tassut n řehřac. Cek tᵉttbeddřed marra řectu nnes umi iheǧec.
PSA 41:5 Necc nniɣ: “[A] SIDI, ḥinn xafi, sgenfa řeɛmar inu, maɣar xḍiɣ akidek.”
PSA 41:6 Řɛedyan inu ssawařen xafi s řɣar: “Meřmi i ɣa immet u ad ittwakkes isem nnes?”
PSA 41:7 Mařa yusa-dd [ḥed] maḥend ad [ayi] iẓar, issawař di řbaṭeř. Uř nnes issmun ɣares řɣecc, [xenni] itteffeɣ ɣar barra, issawař.
PSA 41:8 Marra inni d ayi icarrhen ttemtamen xafi jmiɛ, aqa aten ttxarriṣen dayi, maḥend [ad] ayi [ggen] řɣar.
PSA 41:9 Iřqef i-t actab abarcan u wenni dd-iwḍan [ammu], war dd-ittekkar ɛad.
PSA 41:10 Uřa d aryaz wi ak-d ddareɣ di řehna, wenni di ttiqqeɣ, wenni iccen aɣrum inu, aqa issemɣar xafi anirz nnes.
PSA 41:11 [Maca] Cek, [a] SIDI, ḥinn xafi, snekkar ayi-dd, [xenni] necc ad ten xeǧṣeɣ.
PSA 41:12 S man aya ad ssneɣ aqa usiɣ ac-dd x řxaḍar, maḥend řeɛdu inu war xafi ittduqqez s usřiwřew.
PSA 41:13 U xafi, aqa Cek tticed ayi afus [s wawař nnek] x řekmaret inu, tessbedded ayi zzat i wudem nnec i řebda.
PSA 41:14 Ad ittwabarek SIDI, AREBBI n Israil, zi řebda ař i řebda! Amin, [wah,] amin!
PSA 42:1 [I umeqqran n imeɣnajen. Axemmi n ayt n Quraḥ.]
PSA 42:2 Am iɣayḍ n wezɣar ittmeẓri ɣar tɣezratin n waman, ammu uřa d uř inu ittmeẓri ɣarek, [a] AREBBI.
PSA 42:3 Řeɛmar inu ittfada ɣar AREBBI, ɣar Arebbi iddaren. Meřmi i ɣa adfeɣ, ad baneɣ zzat i wudem n AREBBI?
PSA 42:4 Imeṭṭawen inu tuɣa aten d aɣrum inu ass d ǧiřet, umi d ayi qqaren ass imun: “Mani iǧa AREBBI nnec?”
PSA 42:5 Necc ttidareɣ di man aya u ssfarrɣeɣ řeɛmar inu dayi, maɣar necc ttnumeɣ ggeɛɛdeɣ deg ijj n uhimur iqqen, am ggureɣ akidsen ɣar Taddart n AREBBI, s řḥess n usřiwřew d uqadi, ijj n řɣaci ittɛeyyden.
PSA 42:6 [A] řeɛmar inu, mayemmi tqenḍed ammu, thekkweřed dayi? Raja AREBBI, maɣar ad qqimeɣ ad t qadiɣ ɛad x isenjamen [i dd-itteffɣen] [zi zzat] n wudem nnes.
PSA 42:7 [A] AREBBI, řeɛmar inu iqneḍ ammu dayi. X uya ttidareɣ Cek zi temmurt n L’Urdun, zeg [idurar n] Hirmun, zeg idurar n Miṣɛara.
PSA 42:8 Řḥemřet tᵉttřaɣa i řḥemřet nneɣni ɣar zzhir n icercuren nnec, marra řemhamed nnec d řemwaj nnec kkin xafi.
PSA 42:9 Ejj SIDI ad iweṣṣa tamexsiwt nnes icewwaren s wass, [uca] ad ɣari yiři yijj n izři di ǧiřet, aqa-t d tẓaǧit i Arebbi n tudart inu.
PSA 42:10 Necc ad iniɣ i Arebbi: “Taṣḍart inu [d Cek], mayemmi d ayi tᵉttud? Mayemmi ggureɣ [deg werruḍ] d abarcan zi ssibbet n ddeǧ n řeɛdu?”
PSA 42:11 Inni d ayi iḥeṣṣaren ssbehttřen ayi s ict n tajjut ineqqen deg iɣsan inu, umi d ayi qqaren: “Mani iǧa AREBBI nnec?”
PSA 42:12 [A] řeɛmar inu, mayemmi tqenḍed ammu, thekkweřed dayi? Raja AREBBI, maɣar ad t qadiɣ ɛad x isenjamen [i dd-itteffɣen] [zi zzat] n wudem inu, u [zi zzat n] AREBBI inu.
PSA 43:1 [Min iqqimen n Uzehhed 42] Aɣ ayi tasɣart, [a] AREBBI, ndeh ddeɛwet inu. Fekk ayi zeg ijj n řgens war dayes bu tmexsiwt, zeg weryaz n teḥraymect d ddeǧ.
PSA 43:2 Aqa Cek d AREBBI n jjehd inu, mayemmi [xenni] d ayi tenḍared? Mayemmi ggureɣ [deg werruḍ] d abarcan zi ssibbet n ddeǧ n řeɛdu?”
PSA 43:3 Sekk-dd tafawt nnec d tidett nnec, maḥend ad ayi gewwdent, ad ayi nedhent ɣar wedrar nnec iqeddsen u ɣar tzeddiɣin nnec,
PSA 43:4 [ařami] i ɣa dd-aseɣ ɣar uɛalṭar, [řmedbeḥ n wecmaḍ] n AREBBI, ɣar Arebbi n řefraḥet, [wenni d] arceq inu. Necc ad Cek qadiɣ s řgambri, [a] AREBBI, AREBBI inu!
PSA 43:5 [A] řeɛmar inu, mayemmi tqenḍed ammu, thekkweřed dayi? Raja AREBBI, maɣar ad t qadiɣ ɛad x isenjamen [i dd-itteffɣen] [zi zzat] n wudem inu, u [zi zzat n] AREBBI inu.
PSA 44:1 [I umeqqran n imeɣnajen. Zeg ayt n Quraḥ. Axemmi.]
PSA 44:2 [A] AREBBI, neccin nesřa tt s imezzuɣen nneɣ, řejdud nneɣ ḥajan aneɣ tt: Cek teggid ict n tmeggit deg wussan nsen, deg wussan n wecḥař uya.
PSA 44:3 S ufus nnec aqa tessuffɣed řegnus zi tesɣart [nsen], [xenni] teẓẓud ten [dayes]. Cek teggid řɣar di ccuɛub, tbezzɛed ten.
PSA 44:4 Nitni maca war warten tammurt s ssif, aɣiř nsen war d asen dd-yiwi asenjem, [maca] afus nnec afusi, aɣiř nnec d tfawt n wudem nnec, minzi nitni ufin arḍa [di tiṭṭawin nnec].
PSA 44:5 Aqa Cek d Ajeǧid inu, [a] AREBBI! Ewc [ɛad řexxu] řumur i isenjamen n Yaɛqub.
PSA 44:6 Akidek ad neɣḍeř inni d aneɣ iḥeṣṣaren, s Yisem nnec ad neɛfes x yinni xaneɣ ittemɛařan.
PSA 44:7 Maɣar war ttecřeɣ x řqews inu, ssif inu war d ayi issenjam.
PSA 44:8 Maɣar Cek tessenjamed aneɣ zeg inni d aneɣ iḥeṣṣaren, tessbehdiřed inni d aneɣ icarrhen.
PSA 44:9 Nṣebbeḥ i AREBBI ass marra, ad nqada Isem nnec i řebda. Silah.
PSA 44:10 Maca řexxu tenḍared aneɣ, tessbehdařed aneɣ, Cek war tᵉtteffiɣed ca ak-d řɛeskarat nneɣ [ɣar umenɣi].
PSA 44:11 Cek tejjid aneɣ nettrakkwař zzat i wenni d aneɣ iḥeṣṣaren, inni d aneɣ icarrhen ttkeccḍen [min ttexsen] i yixef nsen.
PSA 44:12 Cek tewcid aneɣ am wuǧi i macca, tezzuzared aneɣ jar řegnus.
PSA 44:13 Cek tezznuzid řgens nnec s walu, deg uzzenzi nsen war ɣarek bu řefḍeř.
PSA 44:14 Cek tᵉttegged aneɣ d řḥegra i wajjaren nneɣ, d astehzi d ubehdeř ɣar yinni d aneɣ-dd ittennḍen.
PSA 44:15 Cek tᵉttegged aneɣ d amedya jar řegnus, [tᵉttegged] ad xaneɣ hezzen azeǧif jar ccuɛub.
PSA 44:16 Ass marra řɛar inu aqa-t zzati [jar tiṭṭawin inu], řeḥya idřa aɣembub inu,
PSA 44:17 zi tmijja n yinni isseḥqarran, ttceqqafen, zi ssibbet n řeɛdu u n wenni yarezzun antaqem.
PSA 44:18 Aya marra ikka xaneɣ, [maca] war Cek nettu, war nɣecc ca di Řɛahd nnec.
PSA 44:19 Uř nneɣ war idwiř ɣar ḍeffar, iṣuraf nneɣ war dd-ffiɣen ca zeg umesruq nnec,
PSA 44:20 waxxa Cek třebzed aneɣ deg wemcan n wuccanen n řexřa, tedřid aneɣ s tiři n řmewt.
PSA 44:21 Mři tuɣa nettu Isem n AREBBI nneɣ, nesswiẓẓeḍ ifassen nneɣ ɣar yijj n arebbi d aɣrib,
PSA 44:22 ma iři AREBBI war yarezzu di man aya? Aqa Netta yareggeb x min innuffaren deg wuř.
PSA 44:23 Maɣar di ṭṭweɛ nnec neqqen aneɣ kuř ass, aqa ḥessben aneɣ am wuǧi n tɣarṣt.
PSA 44:24 Faq, mayemmi tᵉṭṭṣed, Sidi inu? Faq, war d aneɣ neṭṭar i řebda!
PSA 44:25 Mayemmi ɣa teffared udem nnec, ad tᵉttud řeɣben d ddeǧ nneɣ?
PSA 44:26 Maɣar řeɛmar nneɣ ittaḍar ɣar tɛejjajt, aɛeddis nneɣ iřeṣṣeq di temmurt.
PSA 44:27 Kkar, ewc aneɣ afus, fdi xaneɣ di ṭṭweɛ n tmexsiwt nnec icewwaren.
PSA 45:1 [I umeqqran n imeɣnajen. S teɣnint n ‘Tlillicin’.] [Zeg ayt n Quraḥ. Axemmi. Izři n tayri.]
PSA 45:2 Zeg wuř inu idduqqez-dd ijj n wawař d aṣebḥan, qqareɣ i Ujeǧid min sswejdeɣ, iřes inu d řeqřem n ijj n umarir imeḥḍen.
PSA 45:3 “Cek tecnid x marra tarwa n bnadem, řxaḍar ittwazeǧeɛ x iyencicen nnec, x uya ibarek i Cek AREBBI i řebda.
PSA 45:4 Byes ssif x tmessaḍt nnec, [a] bu-teɣruḍt, tissiqt nnec d řɛezz nnec.
PSA 45:5 [Wah], řɛezz nnec! Iři tfeřḥed, ndeh di ṭṭweɛ n tidett, [ḍidd i] řeḥṣaret n tsegda. Afus nnec afusi ad Cek isseřmed timesřayin ssaggʷadent.
PSA 45:6 Fřitcat nnec qeḍɛent, - [wah,] řegnus ad wḍan sadu [ufus] nnec - cuqent uř n řɛedyan n Ujeǧid.
PSA 45:7 Řkursi nnec igellden, [a] AREBBI, aqa-t i řebda qaɛ. Azeǧaḍ n Tgeldit nnec d ijj n uzeǧaḍ n tsegda.
PSA 45:8 Cek tᵉttexsed tasegda u tcarrhed řɣar. X uya i Cek idhen, [a] AREBBI, AREBBI nnec s zzect n řefraḥet tiwa i iɛciren nnec.
PSA 45:9 Marra řeɛbayat nnec am mirru d wecfiř d řqarfa, zi řeqṣur n řɛaj ssfarraḥen Cek s uzenzun x ifiřan [n řgambri],
PSA 45:10 yessis n ujeǧid aqa-tent jar tinewjiwin nnec iweqqaren, tasřit n Ujeǧid tbedd ac x ufusi, s [werruḍ zeg] wureɣ iɣřan qaɛ zi Ufir.
PSA 45:11 Seř, [a] yeǧi, xzar, ewc amezzuɣ nnem! Ttu řgens nnem d taddart n babam!
PSA 45:12 [Xenni] Ajeǧid ad immeẓri deg waẓri nnem, maɣar Netta d Sidi nnem! Bendeq zzates!
PSA 45:13 Yeǧis n Ṣur s ict n tarzeft, [wah,] ayt n bu-wagřa n ijj n řgens ad arzun ad xam arḍan.
PSA 45:14 Yeǧis n Ujeǧid aqa-tt d aɛuǧi marra daxeř, arruḍ nnes d ijj n umudi [zeg ufiřu] n wureɣ.
PSA 45:15 Ad tᵉttwandeh ɣar Ujeǧid deg warruḍ s tintat ifarzen. Tiɛzariyyin tinni tt iḍeffaran, aqa atent d timeddukkař nnes nni dd ɣarek ttwawyent.
PSA 45:16 Aqa ttwawyent s řefraḥet d warceq, [ammu] i ɣa adfent ɣar řeqṣar n Ujeǧid.
PSA 45:17 Tarwa nnec ad iřin deg wemcan n řejdud nnec, Cek ad ten tegged d řḥukkam di marra tammurt.
PSA 45:18 Necc ad idareɣ Isem nnec di kuř jjiř d [kuř] jjiř [awarni as]. X uya, ad Cek qadan marra řegnus i řebda qaɛ.”
PSA 46:1 [I umeqqran n imeɣnajen. Zeg ayt n Quraḥ.] [S lharpat ittwarriglan ɣar sennej. Izři.]
PSA 46:2 AREBBI d amcan n tarewřa d jjehd i neccin. Aqa iban-dd ittic afus aṭṭas di řeḥṣarat.
PSA 46:3 X uya war nᵉtteggʷed ca, waxxa ad tbeddeř tammurt, ad wḍan idurar deg wuř n řebḥur,
PSA 46:4 ad hajant řḥemřat nnes, ad ggent akuffu, ad nhezzen idurar s unneqřeb nnes! Silah.
PSA 46:5 Tiɣezratin n iɣzar ad ssfarrḥent tandint n AREBBI, Zzawect Iqeddsen n Tzeddiɣin n Umɛuǧi x kuřci.
PSA 46:6 AREBBI aqa-t di řwest nnes, war tᵉttenhezza, AREBBI ad as iwc afus xmi dd ɣa tessij tuffut.
PSA 46:7 Řegnus muzzaren, tigeldiwin nhezzent. Netta igga tmijja nnes ad tᵉttwaseř, tammurt aqa tefsi.
PSA 46:8 SIDI n řɛeskarat aqa-t akidneɣ, AREBBI n Yaɛqub d lburj nneɣ yuɛřan. Silah.
PSA 46:9 Asem-dd, xzarem timegga n SIDI, Netta i iggin anexřiɛ x temmurt.
PSA 46:10 Netta issbedda imenɣan ař aneggar n temmurt, Netta ad yarẓ řqews, iccat lansa di iwetwiten, ikarruten issecmaḍ i-ten s tmessi.
PSA 46:11 Sbedd, snem illa aqa Necc d AREBBI. Necc ad ttwassgeɛɛdeɣ jar řegnus, Necc ad ttwassgeɛɛdeɣ x temmurt.
PSA 46:12 SIDI n řɛeskarat aqa-t akidneɣ, AREBBI n Yaɛqub d lburj yuɛřan i neccin. Silah.
PSA 47:1 [I umeqqran n imeɣnajen. Zeg ayt n Quraḥ. Azehhed.]
PSA 47:2 [A] marra řegnus, wtem deg ifassen, duqqzem s usřiwřew zzat i AREBBI.
PSA 47:3 Maɣar SIDI, Amɛuǧi x kuřci, aqa issaggʷad, Netta d ijj n ujeǧid d ameqqran x marra tammurt.
PSA 47:4 Netta issaḍara aneɣ řegnus, Netta [yarra] ccuɛub sadu iḍaren nneɣ.
PSA 47:5 Netta ifarrez tasɣart nneɣ i neccin, [tenni d] afeyyec n Yaɛqub wenni tuɣa ittexs. Silah.
PSA 47:6 AREBBI yuři sennej s usřiwřew, SIDI, ɣar tmijja n usuḍi deg uyicc n icarri.
PSA 47:7 Zehhdem i AREBBI, zehhdem! Zehhdem i Ujeǧid, zehhdem!
PSA 47:8 Maɣar AREBBI d Ajeǧid x marra tammurt. Zehhdem [aya] i uxemmi dayes.
PSA 47:9 AREBBI iḥekkem x řegnus, AREBBI ittɣima x řɛarc nnes iqeddsen.
PSA 47:10 Tarwa n taṣiřet n řegnus ttwassmunen ak-d řgens n AREBBI n Ibrahim, maɣar tiseddariyyen i useřqi n temmurt i AREBBI. Netta aqa ittwassɛuǧa qaɛ.
PSA 48:1 [Izři, azehhed zeg ayt n Quraḥ.]
PSA 48:2 SIDI d ameqqran, isdaḥeǧa ad ittwassemɣar aṭṭas, di tendint n AREBBI nneɣ, x wedrar nnes iqeddsen.
PSA 48:3 Řuɛřa [nnes] d řemřaḥet, adrar n Ṣihyun aqa-t d řefraḥet i marra tammurt, ɣar uɣezdis n ccamal n tendint n Ujeǧid d ameqqran.
PSA 48:4 AREBBI aqa-t di řeqṣur nnes, Netta ittwassen am yijj n lburj yuɛřan.
PSA 48:5 Maɣar xzar, ijeǧiden munen, aqa ffɣen jmiɛ.
PSA 48:6 [Řami t] ẓrin, tbehten, aqa nnjerfan uca arewřen deɣya.
PSA 48:7 Dinni tᵉṭṭef i-ten tarjijit, am řeḥriq n ict n [temɣart] tᵉttaru.
PSA 48:8 S usemmiḍ zi ccarq tᵉttareẓẓid iɣarruba n Tarcic.
PSA 48:9 Am mammec tuɣa tt nesřa, ammu i tt netwařa di tendint n SIDI n řɛeskarat, di tendint n AREBBI nneɣ. AREBBI ad tt issemten i řebda. Silah.
PSA 48:10 [A] AREBBI, nidar tamexsiwt nnec icewwaren, di řwesṭ n Zzawect nnec Tameqqrant.
PSA 48:11 Am Isem nnec, [a] AREBBI, ammu ittakkwaḍ uřa d ccan nnec ař tineggura n temmurt. Afus nnec afusi iccur s tsegda.
PSA 48:12 Ejj adrar n Ṣihyun ad ifarḥ, jjem yessis n Yahuda ad arecqent zi ssibbet n řeḥkamat nnec.
PSA 48:13 Kkem x Ṣihyun, nnḍem as-dd, ḥesbem ṣṣumɛat nnes!
PSA 48:14 Ggem uř nwem x řḥiḍ nnes ijehden, xzarem mliḥ di řeqṣur nnes, ḥima ad tt ttɛawded i jjiř i dd ɣa yasen.
PSA 48:15 Maɣar AREBBI wanita d AREBBI nneɣ [i] řebda qaɛ. Netta ad aneɣ indeh ɣar ujemmaḍ n řmewt.
PSA 49:1 [I umeqqran n imeɣnajen. Zeg ayt n Quraḥ. Azehhed.]
PSA 49:2 Sřem [i] uya, marra řegnus, sḥessem marra, [a] imezdaɣ n ddunect,
PSA 49:3 am tarwa n Adam, am tarwa n ijj n weryaz, aytbab n wagřa d imezřaḍ jmiɛ ak-d wayawya!
PSA 49:4 Aqemmum inu issawař tiɣit, ixarriṣen n wuř inu [ccuren] s řefhamet.
PSA 49:5 Necc ad wceɣ amezzuɣ inu i wawař iweznen, ad ssargbeɣ tḥajit inu n twafit ɣar [tirart n] řgambri.
PSA 49:6 Mayemmi ɣa ggʷedeɣ deg wussan iɛeffanen, xmi dd ayi tᵉttenneḍ řmuɛṣiyyet n yinni d ayi dd-iḍeffaren di tiri inu.
PSA 49:7 [Aqa din] inni ittcařen x řeksibet nsen, ttfeyycen s wagřa nsen ameqqran,
PSA 49:8 [maca] uřa d ijj n tawmat war izemmar ad ifdi yijj n weryaz, war izemmar ad ixeǧeṣ ddeyyet n yixef nnes i AREBBI.
PSA 49:9 Ttaman n weṣřaḥ n řeɛmar nsen tiɣřa aṭṭas, war dd-tᵉttis i řebda,
PSA 49:10 ḥima netta ad iddar i řebda, ɛemmarṣ war ittkiccu.
PSA 49:11 Maɣar ittwařa imiɣisen mmuten, [uřa d] abuhaři d uqeffuḥ ad ttwaqessen s tnayen, ad jjen řeksibet nsen i inneɣni awarni asen.
PSA 49:12 Axarreṣ n wuř nsen aqa tudrin nsen [ad qqiment] i řebda, tizeddiɣin nsen zi jjiř ař jjiř. [Waxxa] uřa d timmura ggin asent ismawen nsen.
PSA 49:13 Bnadem i ɣar iǧa ccan, war ittɣimi ca, netta am řebhimet ifennan.
PSA 49:14 Wa d abrid i ɣarsen, min xef ttsennaden, uca inni ten iḍeffaren ad jjiwnen s uqemmum nsen. Silah.
PSA 49:15 Am wuǧi ssareyyḥen nitni ixef nsen di řaxart, řmewt ad ten tarwes. Imseggaden ad xasen ḥekmen x ṣṣbeḥ, addud nsen [ad idweř] i řɣecc di řaxart, [ttwassuffɣen nitni] zi tzeddiɣt nsen.
PSA 49:16 Maca AREBBI ad ifdi řeɛmar inu zeg ufus n řaxart, maɣar Netta ad ayi yawi [akis]. Silah.
PSA 49:17 War tteggʷed ca mařa ca n weryaz idweř d bu-wagřa, xmi i ɣa yarni ucuwwar n taddart nnes,
PSA 49:18 maɣar di řmewt nnes war kides ikessi ca marra aya, acuwwar nnes war ihekkwi akides awarni as.
PSA 49:19 Waxxa ibarek řeɛmar nnes di tudart nnes, waxxa nitni ad cek ssemɣaren maɣar teggid min iṣebḥen i yixef nnec,
PSA 49:20 aqa ad dd-yaweḍ [řeɛmar] nnes ɣar jjiř n řejdud nnes, [nni] war ẓarren tafawt i řebda.
PSA 49:21 Bnadem i ɣar iǧa ccan, [maca] war ifehhem, netta am řebhimet ifennan.
PSA 50:1 [Ijj n uzehhed n Asaf. Arebbi x marra irebbiten,] [SIDI issawař. Netta ittřaɣa i temmurt] [zi mani dd-tenqar tfuct ař mani teɣři.]
PSA 50:2 Zi Ṣihyun, aẓri ikemmřen, ittban AREBBI ittissiq.
PSA 50:3 AREBBI nneɣ ad dd-yas, war isseɣd ca. Timessi zzates ad tecc, taḥaryaḍt i d as dd-ittennḍen ad tsuḍ aṭṭas.
PSA 50:4 Netta ad iřaɣa i ijenwan sennej, i temmurt ḥima ad iḥkem x řgens nnes:
PSA 50:5 “Smunem-dd ɣari imtiqqan inu, inni kidi itteggen řɛahd s tɣarṣt.”
PSA 50:6 Ijenwan ttbarrḥen tasegda nnes, maɣar AREBBI s Yixef nnes aqa-t d řqaḍi. Silah.
PSA 50:7 “Seř, [a] řgens inu, u Necc ad ssiwřeɣ, Israil, Necc ad cehdeɣ ḍidd nnec: Aqa Necc, AREBBI, d AREBBI nnec!
PSA 50:8 War iǧi x tɣarṣa nnec ad cek webbxeɣ, maɣar tiɣarṣa nnec aqa atent řebda zzati.
PSA 50:9 War kessiɣ ca afunas ameẓyan zi taddart nnec, uřa d iɣayḍen zi teqwirin nnec.
PSA 50:10 Maɣar marra imuddar n wezɣar, aqa inu, řmař x wařef idurar.
PSA 50:11 Necc ssneɣ marra ijḍaḍ n idurar, [marra] min ittenhezzan deg iyyar, aqa-t Inu.
PSA 50:12 Mři tuɣa dayi řaẓ, ma war d ac t qqareɣ, maɣar inu ddunect d uɛemmar nnes.
PSA 50:13 Ma ad cceɣ [xenni] aysum n [ifunasen] ijehden, niɣ idammen n iɣayḍen?
PSA 50:14 Awi-dd i AREBBI tawhibt n uqadi, kemmeř lwuɛud nnec i Umɛuǧi x kuřci.
PSA 50:15 Řaɣa ayi-dd deg wass n řeḥṣaret, [xenni] ad cek ssnejmeɣ uca cek ad ayi tegged ccan.”
PSA 50:16 [Maca] i uɛeffan iqqar AREBBI: “Mayemmi tbarrḥed tiweṣṣa inu, [mayemmi i] teggid Řɛahd inu deg uqemmum nnec,
PSA 50:17 [umi] tcarrhed ttarbiyyet inu u tenḍared awařen inu awarni ac.
PSA 50:18 Mařa teẓriḍ ijj n uxewwan, ammu i teggured akides, tᵉttṣurid ak-d yinni izennan.
PSA 50:19 Aqemmum nnec tᵉttarrid i-t i řɣar, iřes nnec ittxarreṣ deg wecmat.
PSA 50:20 Tettɣimid [dinni,] tessawařed x umac, tessefdaḥeḍ zi mmis n yemmas.
PSA 50:21 Aya tᵉttegged u Necc sseɣdiɣ. Ttɣiř ac, aqa ayi am cek. Necc ad cek webbxeɣ, ad ssarseɣ [ddnub nnec] zzat i tiṭṭawin nnec.
PSA 50:22 Fhem aya [xenni], [a cek] i ittun Arebbi, ḥima war [cek] tmezzqeɣ [am] war din ittiři ufekki.”
PSA 50:23 Wenni dd-ittawyen taɣarṣt n uqadi, ittegg ayi ccan u issewjad abrid, ḥima ad as ssecneɣ asenjem n AREBBI.
PSA 51:1 [I umeqqran n imeɣnajen. Azehhed n Dawud.]
PSA 51:2 [Ařami i ɣares dd-yusa unabi Natan, awarni řami yudef Dawud x Bat-Cabaɛ.]
PSA 51:3 Ḥinn xafi, [a] AREBBI, ɛlaḥsab tamexsiwt nnec icewwaren. Mseḥ ixeṭṭan inu ɛlaḥsab afeyyeḍ n arreḥmet nnec.
PSA 51:4 Ssird řmuɛṣiyyet inu zzayi marra, sizdeg ayi zi ddenb inu,
PSA 51:5 maɣar necc ssneɣ ixeṭṭan inu, ddenb inu řebda ibedd ayi-dd ɣar tiṭṭawin.
PSA 51:6 Akidek, [akidek] waha i xḍiɣ, ggiɣ min iǧan d aɛeffan jar tiṭṭawin nnec, ařami Cek tseggded deg wawařen nnec, teṣfid di řeḥkamat nnec.
PSA 51:7 Xzar, ttwaxeřqeɣ-dd di ddnub, di ddnub teksi ayi yemma.
PSA 51:8 Xzar, Cek tᵉttexsed tidett di daxeř, di tnuffra tesscaned ayi tiɣit.
PSA 51:9 Ksi xafi ddnub s tɛelǧet, xenni ad dewřeɣ qqureɣ, sird ayi, [xenni] ad dewřeɣ d acemřař x wedfeř.
PSA 51:10 Arr ayi ad sřeɣ arcuq d řefraḥet, ḥima iɣsan nni třebzed Cek, ad ceḍhen s řefraḥet.
PSA 51:11 Snuffar udem nnec zzat i ddnub inu, mseḥ i marra řmuɛṣiyyet inu.
PSA 51:12 Xřeq-dd dayi uř izdig, [a] AREBBI, jedded di daxeř inu ijj n arruḥ imetnen.
PSA 51:13 War d ayi neṭṭar zeg wudem nnec, war zzayi ttekkes Arruḥ Iqeddsen nnec.
PSA 51:14 Ewc ayi ɛawed řefraḥet n usenjem nnec, uřa d ijj n buḥbeř amseɛɛaf i kidi ɣa ibedden.
PSA 51:15 [Xenni] ad ssɣareɣ ibriden nnec i yinni [xak] iɛeddan, [ḥima] ad ɣarek dd-ɛeqben imednab.
PSA 51:16 Fekk ayi zeg umarwas n idammen, [a] AREBBI, AREBBI n usenjem inu, [xenni] ad isřewřiw iřes inu x tsegda nnec.
PSA 51:17 Arzem ayi iyencicen inu, [a] Sidi inu, [xenni] ad ibarreḥ uqemmum inu s ccan nnec,
PSA 51:18 maɣar war d ak tecqi tɣarṣt, iři wciɣ ac tt, taɣarṣt n wecmaḍ war d ac dd-tᵉttis x řxaḍar.
PSA 51:19 Tiɣarṣa n AREBBI aqa atent d ijj n buḥbeř yareẓ, ijj n wuř iddez war t tesseḥqarid, [a] AREBBI!
PSA 51:20 Egg řxar i Ṣihyun ɛlaḥsab arḍa nnec, bna řeḥyuḍ n Urcalim!
PSA 51:21 Xenni ad tarḍid di tɣarṣa n řmuɛṣiyyet, di tɣarṣt n wecmaḍ ikemmřen. [Xenni] ad qeddmen ifunasen imeẓyanen x uɛalṭar nnec,
PSA 52:1 [I umeqqran n imeɣnajen. Axemmi n Dawud.]
PSA 52:2 [Řami dd-yusa Duwaɛ, zi Idum,] [ixebbar Cawul, inna as:] [“Aqa Dawud yusa-dd ɣar taddart n Aximalik.”]
PSA 52:3 Mammec tfeyyced zi tɛeffant, [a] jjiheř? Tamexsiwt icewwaren n Arebbi [tᵉttekk] ass imun.
PSA 52:4 Iřes nnec ittxarreṣ di řɣar, am mammec řmus iqeḍɛen i uḥeffi yiwyi druct s řɣefřet.
PSA 52:5 Cek tᵉttexsed taɛeffant aṭṭas x tṣebḥant, řhard s ixarriqen ktar x řhard n tsegda. Silah.
PSA 52:6 Cek tᵉttexsed awařen ittakkʷaren, uřa d iřes [iccur] s wecmat.
PSA 52:7 Maca Arebbi ad cek yareddeǧ i řebda, Netta ad cek iṭṭef, ad cek ikkes zi tzeddiɣt. Netta ad cek iqřeɛ zeg iẓewran nnec zi temmurt n yinni iddaren. Silah.
PSA 52:8 Imseggaden ad t ẓaren ad ggʷeden. Ad xas ḍeḥcen, [ad inin]:
PSA 52:9 “Xzar aryaz ijehden wenni umi war iggi AREBBI jjehd nnes, maca tuɣa ittceř x wagřa nnes ameqqran. Tuɣa idweř ijhed s ṭṭbiɛet nnes iɣeccen.”
PSA 52:10 Necc ad iřiɣ am yict n tzitunt tazeyzawt di Taddart n AREBBI. I řebda qaɛ i ɣa ttiqqeɣ di tmexsiwt icewwaren n AREBBI.
PSA 52:11 Necc ad Cek qadiɣ i řebda qaɛ, maɣar Cek teggid [t]. Ad ssitimeɣ deg Yisem nnec, maɣar Netta d aṣebḥan i imtiqqan nnec.
PSA 53:1 [I umeqqran n imeɣnajen. S teɣnint n ‘Izři n wecḍan’.] [Axemmi n Dawud.]
PSA 53:2 Abuhaři inna deg wuř nnes: “War din bu AREBBI!” Nitni ttareddǧen, tteggen min iǧan d nnɛi n řɣecc, war din uřa d ijj ittegg min icnan.
PSA 53:3 AREBBI ixezzar-dd zeg ujenna ɣar tarwa n bnadem, ḥima ad iẓar ma din ḥed ɣares řefhamet, ijjen i yarezzun AREBBI.
PSA 53:4 Marra ffɣen zeg webrid, [aqa aten jmiɛ] dewřen d iɛeffanen, war din uřa d ijj ittegg řxar, uřa d ijj.
PSA 53:5 Inni itteggen řmuɛṣiyyet ma war ɣarsen tussna, inni ittᵉtten řgens inu axmi ttᵉtten aɣrum? Nitni war ttřaɣan x AREBBI.
PSA 53:6 Aqa din i xasen tewḍa tiggʷudi imɣaren, umi war din [min zi] i ɣa ggʷeden, maɣar AREBBI iṭarrec iɣsan n wenni xak ihejjmen. Cek tessbehdřed i-ten, minzi AREBBI inḍar i-ten.
PSA 53:7 Ah, iři asenjem ameqqran n Israil ad dd-yas [deɣya] zi Ṣihyun! Xmi dd ɣa inneqřeb AREBBI tameḥbast n řgens nnes, ad yarceq Yaɛqub, ad ifarḥ Israil.
PSA 54:1 [I umeqqran n imeɣnajen. Ak-d uzenzun x ifiřan. Axemmi n Dawud.]
PSA 54:2 [Řami dd-usin Izifiyyen, nnan as i Cawul: “Ma war issnuffar Dawud ixef nnes ɣarneɣ?”]
PSA 54:3 Senjem ayi, [a] AREBBI, s Yisem nnec, aɣ ayi tasɣart s tzemmar nnec ijehden.
PSA 54:4 [A] AREBBI, seř i tẓaǧit inu, sḥess i wawařen n uqemmum inu.
PSA 54:5 Maɣar ibarraniyyen kkaren akidi, ayt n bu-řexcunet arezzun ad ayi nɣen. War tteggen ca AREBBI zzat i tiṭṭawin nsen. Silah.
PSA 54:6 Xzar, AREBBI d amɛawen inu. Sidi inu aqa-t jar yinni d ayi isennden.
PSA 54:7 Netta ad ixeǧeṣ řɣar i yinni d ayi iḥeṣṣaren. Qḍa xasen di řaman nnec.
PSA 54:8 S řxaḍar ad ac dd-awyeɣ tiɣarṣa, ad qadiɣ Isem nnec, [a] SIDI, maɣar [Netta] d aṣebḥan,
PSA 54:9 maɣar Netta ifekk ayi zi marra řeḥṣaret, uca yarra ayi-dd ad xezzareɣ x řɛedyan inu swadday.
PSA 55:1 [I umeqqran n imeɣnajen.] [Ak-d uzenzun x ifiřan.] [Axemmi n Dawud.]
PSA 55:2 [A] AREBBI, seř i tẓaǧit inu, war ssnuffara ca Ixef nnec zzat i tutra inu.
PSA 55:3 Ḥḍa ayi u arr-dd xafi. Necc ttraḥeɣ ttaseɣ-dd ɣar zzat d ḍeffar, am ttcetciɣ u ssɣunfiɣ,
PSA 55:4 zi ssibbet n řḥess n řeɛdu, zeg uhuddi n uɛeffan. Maɣar nitni hejmen-dd xafi s řmuɛṣiyyet, ḍeffaren ayi s uxeyyeq.
PSA 55:5 Uř inu ittfarfir dayi daxeř, inexřiɛen n řmewt wḍan-dd xafi.
PSA 55:6 Tiggʷudi d tarjijit ttᵉṭṭfent ayi, uřa d arjef iḥeṣṣar ayi.
PSA 55:7 Necc nniɣ: “Mři d ayi wcin afriwen am tedbirt, [xenni] iři ḍwiɣ, ad zedɣeɣ di ca n wemcan [nneɣni].”
PSA 55:8 Xzar, ad arewřeɣ ɣar řaggʷaj qaɛ, ad ssenseɣ di řexřa. Silah.
PSA 55:9 Ad deɣyeɣ ɣar wemcan n ufekki, ḥima ad ttwafekkeɣ zeg usemmiḍ, zi tḥaryaḍt.
PSA 55:10 Ṣarḍ i-ten, [a] Sidi inu, sebḍa iřes nsen, minzi ttwařiɣ lɛunf d umenɣi di tendint.
PSA 55:11 Ass d ǧiřet quwwaren nitni i řeḥyuḍ nnes. Ɣar daxeř n tendint [aqa din] řeɣben d tamara,
PSA 55:12 řɣecc aqa-t daxeř nnes, azzay nnes war zzayes ittḥeyyid ca ddeǧ d wecmat.
PSA 55:13 Maɣar war iǧi d řeɛdu wenni d ayi isseḥqaran, [minzi] aya zemmareɣ ad t ksiɣ. [War iǧi] uřa d wenni d ayi icarrhen d wenni issemɣaran ixef nnes [s wawař] xafi, [minzi] zzayes zemmareɣ ad nnuffareɣ!
PSA 55:14 [Maca] aqa d cek, [a] bnadem, cek d aqrin inu, ameddukkeř inu d jjar inu!
PSA 55:15 Neccin inni igguren d lemliḥ ak-d wayawya di ttiqqet, neggur ɣar Taddart n AREBBI deg uhimur.
PSA 55:16 Ad xasen tewḍa řmewt [ařami] i ɣa hwan am ddaren di řaxart, maɣar aqa din řɣar di tzeddiɣin nsen, deg wuřawen nsen.
PSA 55:17 Necc, [wah,] necc ad řaɣiɣ x AREBBI, SIDI ad ayi issenjem.
PSA 55:18 Ɣar tmeddit, ɣar tuffut u s uziř ad cetciɣ, ad ssɣunfeɣ u Netta ad iseř i tmijja inu.
PSA 55:19 Netta igga aṣřaḥ x řeɛmar inu s řehna zeg inni ɣari dd-iqarrben [i wehjam], minzi aqa-ten deg waṭṭas ḍidd inu.
PSA 55:20 Arebbi ad iseř, ad ten dd-issehwa. Netta ittɣima [x řɛarc] zeg wecḥař uya. Silah. Aqa nitni war ttbeddiřen, war tteggʷeden ca AREBBI.
PSA 55:21 Netta ineṭṭar afus deg inni ak-d wi [igga] řehna, netta issexsar řɛahd nnes.
PSA 55:22 Aqemmum nnes yarḍeb ḥsen zi trussi, maca deg wuř nnes itturja amenɣi. Awařen nnes d iřeqqaɣen x zzect, [maca] aqa aten [am] řesyuf ttwajebden.
PSA 55:23 Nḍar amnus nnec x SIDI u Netta ad dayek itthilla. Ɛemmarṣ war ittejji amsegged ad ifarɣ.
PSA 55:24 Cek [maca], [a] AREBBI, ad ten tessehwid deg weḥfur n turṣuḍi. Iryazen n idammen d řɣecc war ttkemmřen azyen n wussan nsen. [Maca] necc ttecřeɣ xak.
PSA 56:1 [I umeqqran n imeɣnajen. S teɣnint n ‘Ict n tedbirt ibekkmem deg imucan iggʷejen’.] [N Dawud. Tira ineqcen,] [řami t ṭṭfen Ifilisṭiniyyen di Jat.]
PSA 56:2 Ḥinn xafi, [a] AREBBI, maɣar ijj n bnadem yarezzu ad ayi isarḍ, iḥeṣṣar ayi umjahed ass marra.
PSA 56:3 Inni d ayi iḥeṣṣaren xsen ad ayi ṣarḍen ass marra, maɣar inni kidi ittmenɣan s nnfaxet, aqa aten deg waṭṭas!
PSA 56:4 Deg wass i di i ɣa ggʷedeɣ, ad xak ttecřeɣ,
PSA 56:5 x AREBBI, wenni umi ɣa ṣebḥeɣ awař nnes, x AREBBI i ttecřeɣ, war tteggʷideɣ ca, [maɣar] min zemmaren ad ayi ggen midden?
PSA 56:6 Nitni qeǧben awařen inu ass ikmeř, marra tnawi nsen aqa aten xafi d řɣar.
PSA 56:7 Nitni munen, nuffaren, nitni ḥeṭṭan inarziwen inu, xmi arezzun [ad nɣen] řeɛmar inu.
PSA 56:8 Ma zemmaren ad arewřen waxxa ggin řɣecc? Sehwa řegnus deg weɣḍab nnec, [a] AREBBI!
PSA 56:9 Cek tḥessbed [ussan n] weṭlaɛ inu. Egg imeṭṭawen inu di tzeyyat n waman nnec, - ma war ǧin deg wedlis nnec? -
PSA 56:10 xenni ad dewřen řɛedyan inu ɣar ḍeffar, deg wass umi ɣa řaɣiɣ. Necc ssneɣ aya: AREBBI aqa-t akidi.
PSA 56:11 X AREBBI, wenni umi ɣa ssemɣareɣ awař nnes, x SIDI, wenni umi ɣa ssemɣareɣ awař nnes,
PSA 56:12 x AREBBI i xef ttecřeɣ, war tteggʷideɣ ca, [maɣar] min izemmar bnadem ad ayi yegg?
PSA 56:13 Xafi, [a] AREBBI, arsin lwuɛud i Cek [ittwaggen]. Ad [ten] kemmřeɣ i Cek s uqadi.
PSA 56:14 Maɣar Cek tfekked řeɛmar inu zi řmewt! Ma [war teḥḍid] iḍaren inu zeg uneqraḍ, ḥima ad uyureɣ zzat i wudem n AREBBI di Tfawt n Tudart?
PSA 57:1 [I umeqqran n imeɣnajen. ‘War t ttareddeǧ!’ N Dawud.] [Tira ineqcen. Umi yarweř zi Cawul deg ifri.]
PSA 57:2 Ḥinn xafi, [a] AREBBI, ḥinn xafi, maɣar řeɛmar inu yarekkwař-dd ɣarek. Necc ufiɣ adurri di tiři n wafriwen nnec, ař ɣa ɛdunt řmuṣibat.
PSA 57:3 Necc ad řaɣiɣ ɣar AREBBI, Amɛuǧi x kuřci, ɣar Arebbi wenni d ayi ɣa inedhen ɣar uneggar [iṣebḥen].
PSA 57:4 Netta ad dd-issekk asenjem inu zeg ujenna, ad issbehdeř wenni ixsen ad ayi isarḍ. Silah. AREBBI ad issekk tamexsiwt nnes icewwaren d řaman nnes.
PSA 57:5 Řeɛmar inu aqa-t jar iyraden, zzřeɣ jar iṣefḍawen yareqqen, tarwa n bnadem, inni tiɣmas nsen [am] lansat d fřitcat [n řqews], iřes nsen am yijj n ssif iqḍeɛ.
PSA 57:6 [A] AREBBI, sgeɛɛed Ixef nnec tiwa i ijenwan, [arr] aɛuǧi nnec sennej i marra tammurt.
PSA 57:7 Nitni ggin tracca i iṣuraf inu, řeɛmar inu tuɣa iɣnes. Nitni ɣzin ayi aḥfur, [maca] wḍan dayes simant nsen. Silah.
PSA 57:8 [A] AREBBI, uř inu yarekken, uř inu yarekken. Aqa necc ad ɣennjeɣ ad zehhdeɣ.
PSA 57:9 Faq, aɛuǧi inu! Faq, lharpa d řgambri! Necc ttexseɣ ad ssfaqeɣ tafawt n řefjar.
PSA 57:10 Necc ad Cek qadiɣ jar řegnus, [a] Sidi inu, ad zehhdeɣ jar ccuɛub i Cek.
PSA 57:11 Maɣar tamexsiwt nnec icewwaren [tᵉttakkwaḍ] ař ijenwan, řaman nnec ař iseynuten.
PSA 57:12 [A] AREBBI, sgeɛɛed Ixef nnec tiwa i ijenwan, [arr] aɛuǧi nnec sennej i marra tammurt.
PSA 58:1 [I umeqqran n imeɣnajen. ‘War t ttareddeǧ!’] [N Dawud. Tira ineqcen.]
PSA 58:2 Ma tessawařem s tidett tasegda deg useɣdi? Ma tḥekkmem tarwa n bnadem s řḥeqq?
PSA 58:3 Lla, [maca] deg wuř [nwem] tᵉtteggem řɣecc, x temmurt twezznem lɛunf n ifassen nwem.
PSA 58:4 Zeg [wami ǧan di] řemřawet ffɣen iɛeffanen zeg webrid, zeg uɛeddis n yemmatsen weddaren ayt n bu-ixarriqen.
PSA 58:5 Aqa daysen ssem am semm n ufiɣar. Nitni am yict n třefsa tadehcurt, tenni iqqnen amezzuɣ nnes,
PSA 58:6 tenni war ittesřin ɣar tmijja n iɛezzamen, [uřa ɣar tmijja] n useḥḥar nni ittḥakan aṭṭas di tseḥḥart.
PSA 58:7 [A] AREBBI, arẓ asen tiɣmas deg uqemmum nsen, arẓ tiɣmas n teɣmart n iyraden imeẓyanen, [a] SIDI!
PSA 58:8 Ejj i-ten ad fesyen am waman, ařami ad ffɣen. Mařa imeḥḥeḍ [řqews] s fřitcat nnes, ejj i-ten war qḍiɛen.
PSA 58:9 Ejj i-t ad ifna am ubucceř irizzen. Ejj i-ten war ẓarren tfuct, am weṭṭu n uɛeddis n tmeṭṭut.
PSA 58:10 Qbeř i ɣa acant marmitat nwem ak-d [řeḥmu n] cbarq ak-d isennanen, ad dayes isuḍ ařami ad yaẓẓeř x [weysum] d aziza niɣ [x weysum] itteḥduduqen.
PSA 58:11 Amsegged ad ifarḥ xmi ɣa iẓar antaqem. Netta ad issird iḍaren nnes deg idammen n iɛeffanen.
PSA 58:12 Ad yini bnadem: “Wah, aqa din řɣiǧet i umsegged, aqa din ijj n AREBBI nni iḥekkmen di temmurt.”
PSA 59:1 [I umeqqran n imeɣnajen. ‘War t ttareddeǧ!’] [N Dawud. Tira ineqcen.] [Umi Cawul ijja ad ḥḍan taddart n Dawud ḥima ad t nɣen.]
PSA 59:2 Fekk ayi zi řɛedyan inu, [a] AREBBI, sgeɛɛed ayi sennej ɣar uḥeṭṭu zeg inni xafi ittekkaren.
PSA 59:3 Fekk ayi zeg inni itteggen řɣecc, senjem ayi zeg iryazen n idammen.
PSA 59:4 Aqa, xzar, nitni ggin ijj n řfex i řeɛmar inu, ayt n bu-ṣṣulṭa munen xafi. War din axeṭṭu uřa d ddenb ɣari, [a] SIDI!
PSA 59:5 [Waxxa] war ggiɣ ljarima, aqa nitni [zeɛma] usin-dd ttazzřen-dd ɣari u sswejjaden ixef nsen. Faq, as-dd ɣar umsagar akidi u xzar.
PSA 59:6 Cek, [a] SIDI, AREBBI n řɛeskarat, AREBBI n Israil, faq ḥima ad třeqfed marra řegnus. War ttḥinni x uřa d ijj zi marra iɣeddaren inni itteggen řɣecc. Silah.
PSA 59:7 Aqa ttɛeqben ɣar tmeddit, ttzun am weqzin, ttennḍen i tendint.
PSA 59:8 Xzar, s uqemmum nsen ssusufen [qaɛ], řesyuf nsen aqa aten x iyencicen nsen, minzi man wen i ɣa isřen?
PSA 59:9 Cek [maca], [a] SIDI, ad xasen tḍeḥced, Cek ad tḥecced x marra řegnus.
PSA 59:10 [A] jjehd nnes, necc ad t rajiɣ, maɣar AREBBI d lburj inu yuɛřan.
PSA 59:11 Tamexsiwt icewwaren n AREBBI inu ad ayi tizwar, AREBBI ad ayi yarr ad ẓareɣ inni d ayi iḥeṣṣaren.
PSA 59:12 War ten neqq ca, maḥend řgens inu war t ittettu. Ejj i-ten ad weddaren s jjehd nnec, menḍar i-ten swadday, [maɣar Cek d] taseddart nneɣ i useřqi, [a] Sidi inu.
PSA 59:13 [X] ddnub n uqemmum nsen, [x] wawařen i dd-itteffɣen zeg iyencicen nsen, [x uya] ejj i-ten ad ttwaḥebbsen di nnfaxet nsen, uřa x nneɛřet u x uxarriq nni xef ttḥarden.
PSA 59:14 Keḥḥeḍ i-ten deg wesɛar [nnec], keḥḥeḍ i-ten ařami war ǧin [ɛad], arr i-ten ad ssnen, aqa AREBBI d řḥakem di Yaɛqub, ař tineggura n temmurt. Silah.
PSA 59:15 Aqa ad ɛeqben ɣar tmeddit, ttzun am weqzin u ttennḍen i tendint.
PSA 59:16 Ejj i-ten ttemhafan da d diha x macca, ejj i-ten [xenni] ad qqimen ssnusan, mařa war jjiwnen,
PSA 59:17 Necc ad ɣennjeɣ x jjhed nnec, ɣar teffut ad sřiwřeweɣ x tmexsiwt nnec icewwaren, maɣar tuɣa Cek d ijj n lburj yuɛřan i necc, d amcan n tarewřa deg wass n řeḥṣaret inu.
PSA 59:18 Jjehd inu, necc ad zehhdeɣ i Cek, maɣar Cek AREBBI d lburj inu yuɛřan, AREBBI n tmexsiwt inu icewwaren.
PSA 60:1 [I umeqqran n imeɣnajen. S teɣnint n ‘Talillect d acehhad’.] [Tira ineqcen n Dawud i useřmed.]
PSA 60:2 [X řami tuɣa ittmenɣa ak-d imezdaɣ n Aram-Nahrayn, aqa-tt d Misuputamya,] [u ak-d ayt n Aram zi Ṣuba, umi dd-idweř Yuwab,] [iwta ayt n Idum di teɣzurt n Tmeǧaḥt, ɛecra ařaf n yeryazen.]
PSA 60:3 [A] AREBBI, Cek tenḍareḍ aneɣ, tarẓid aneɣ. Tuɣa tesɛared [aṭṭas]! Sbedd aneɣ ɛawed!
PSA 60:4 Cek tessenhezzed tammurt, tfeǧqed tt. Sgenfa tireẓẓa nnes, maɣar aqa tᵉttenhezza.
PSA 60:5 Cek tessecned [Ixef nnec] i řgens nnec s řeqsaḥet. Cek tewcid aneɣ ad nsu ccrab issdewwaxen.
PSA 60:6 Inni Cek itteggʷeden, teggid asen taɛeǧant i ɣar ttrakkwařen zi [fřitcat n] řqews. Silah.
PSA 60:7 Ḥima imɛizzen nnec ad ttwafekken, awi asenjem s ufus afusi nnec u arr-dd xaneɣ.
PSA 60:8 AREBBI tuɣa issawař di Zzawect nnes Iqeddsen, s uyenni ad negzeɣ s řefraḥet. Necc ad bḍiɣ Cakim, ad ɛebbareɣ taɣzurt n Sukkut.
PSA 60:9 Jilɛad inu, Manassa inu, Ifrayim d aseřqi ijehden n uzeǧif inu, Yahuda d amgewwed inu.
PSA 60:10 Mu’ab d ssarij inu i usird, x Idum ad nḍareɣ sandaliyat inu, necc ad dduqzeɣ s usřiwřew x [temmurt n] Filicit.
PSA 60:11 Wi d ayi i ɣa inedhen [di] tendint ifaryen? Wi d ayi ɣa igewwden ɣar Idum?
PSA 60:12 Ma war d aneɣ tenḍared, [a,] AREBBI, u ak-d řɛeskarat nneɣ ma war akidsen dd-teffiɣed [ɛad], [a] AREBBI?
PSA 60:13 Ewc aneɣ afus [ḥima ad aneɣ tessnejmed] zi řeḥṣaret, [maɣar] asenjem [s ufus n] yijj n bnadem aqa-t baṭeř.
PSA 60:14 Ak-d AREBBI ad negg s wemḥad, Netta ad iɛfes x yinni d aneɣ iḥeṣṣaren.
PSA 61:1 [I umeqqran n imeɣnajen. Ak-d uzenzun x ifiřan. N Dawud.]
PSA 61:2 [A] AREBBI, seř i uřaɣi inu, seř mliḥ i tẓaǧit inu.
PSA 61:3 Zi ṭṭarf aneggar n temmurt ttřaɣiɣ xak, xmi ittefciř wuř inu. Ndeh ayi x ijj n jjarf yuɛřan xafi.
PSA 61:4 Maɣar Cek d amcan n tarewřa i necc, d lburj ijehden ḍidd i řeɛdu.
PSA 61:5 Necc ad qqimeɣ deg Uqiḍun nnec i řebda, ad arewřeɣ sadu udurri n wafriwen nnec. Silah.
PSA 61:6 Maɣar Cek, [a] AREBBI, tesřid ɣar lwuɛud inu. Cek tewcid [ayi] tasɣart n yinni itteggʷeden Isem nnec.
PSA 61:7 Arni [ɛad] ussan x wussan n ujeǧid, ejj ad aredfen iseggʷusa nnes ijj i wenneɣni am jjiř iḍfar umas.
PSA 61:8 Netta ad iqqim zzat i wudem n AREBBI i řebda. Ad xas teḥḍa tamexsiwt icewwaren d řaman.
PSA 61:9 Xenni ad zehhdeɣ i Yisem nnec i řebda, ḥima ad kemmřeɣ lwuɛud inu, ass [awarni] umas.
PSA 62:1 [I umeqqran n imeɣnajen. Sadu ufus n Yadutun. N Dawud.]
PSA 62:2 Wah, řeɛmar inu yaressa, ittraja AREBBI waha, aqa zzayes [dd-ittas] usenjem inu.
PSA 62:3 Wah, Netta d taṣḍart inu d usenjem inu, lburj inu yuɛřan, war ttᵉfriɣeɣ aṭṭas.
PSA 62:4 Mecḥař [ɛad] i ɣa tekkem thejjmem x weryaz? [Mecḥař ɛad] aqa třehham maḥend ad t teɣḍřem, am ijj n řḥiḍ iweṭṭa, am yijj n weɣbar ittwaɣḍeř?
PSA 62:5 Wah, nitni ttemcawaren waha ḥima ad t-i-dd-ɣeḍřen zeg wemcan nnes yuɛřan. Nitni areṭṭan s ixarriqen. Ttbarken s uqemmum nsen, [maca] deg wuř nsen neɛɛřen. Silah.
PSA 62:6 Wah, raja i AREBBI, [a] řeɛmar inu, minzi zzayes řayas inu.
PSA 62:7 Wah, Netta d taṣḍart inu d usenjem inu, lburj inu yuɛřan, war ttefriɣeɣ ca.
PSA 62:8 Asenjem inu d uɛuǧi inu aqa aten di AREBBI, [Netta d] Taṣḍart inu ijehden, amcan inu n tarewřa aqa-t di AREBBI.
PSA 62:9 Tiqqem řebda dayes, [a] řgens! Zeǧɛem uř nwem zzat i wudem nnes. AREBBI d amcan nneɣ n tarewřa. Silah.
PSA 62:10 Wah, tarwa n Adam aqa aten d řeɛwin, tarwa n weryaz aqa daysen axarriq. Ad geɛɛden di řmizan s tnayen n ṭṭawyat, aqa aten jmiɛ [fsusen] x řeɛwin.
PSA 62:11 War ttecřem x ddeǧ, war ttejjim ad kenniw jebbden [zeg webrid] s ukkarḍa. Mařa agřa imeqqar, war xas ssrusam uř nwem.
PSA 62:12 AREBBI issiweř ict n twařa, sřiɣ tnayen n twařawin, aqa: “Jjehd zi AREBBI”.
PSA 62:13 Tamexsiwt icewwaren i Cek, [a] Sidi inu! Minzi Cek ad txeǧṣed kuř ijj ɛlaḥsab min igga.
PSA 63:1 [Azehhed n Dawud, ařami t tuɣa di řexřa n Yahuda.]
PSA 63:2 [A] AREBBI, Cek d Arebbi inu! Ɣar tuffut arezzuɣ xak, řeɛmar inu ittfada ɣarek, aysum inu ittmeẓri dayek, deg ict n temmurt yuẓɣen ittfadan břa aman.
PSA 63:3 Ammu i dayek xezzareɣ di Zzawect Iqeddsen, ḥima ad ẓareɣ jjehd nnec d uɛuǧi nnec.
PSA 63:4 Maɣar tamexsiwt nnec icewwaren teḥřa x tudart, s uyenni ad Cek ṣebbḥen iyencicen inu.
PSA 63:5 Ammu i d ac ɣa barkeɣ di tudart inu, ad ssgeɛɛdeɣ ifassen inu deg Yisem nnec.
PSA 63:6 Řeɛmar inu ad ijjiwen am zi tadunt d min imesřen, s iyencicen isřiwřewen ad [Cek] iṣebbeḥ uqemmum inu,
PSA 63:7 mařa ttxarrṣeɣ dayek di tassut, ttxemmameɣ dayek ɣar uḍufen n wecbar n ǧiřet.
PSA 63:8 Minzi tuɣa Cek d amɛawen inu, di tiři n wafriwen nnec ad sřiwřeweɣ.
PSA 63:9 Řeɛmař inu iřeṣṣeq dayek awarni ac, afus nnec afusi ittᵉṭṭef dayi.
PSA 63:10 Inni ittexsen ad areddǧen řeɛmar inu, ad iwḍen ɣar imucan yuǧɣen qaɛ sadu temmurt.
PSA 63:11 Nitni ad ttwasellmen i tzemmar n ssif, ad dewřen d takeccaḍt i iceɛbawen.
PSA 63:12 Maca ajeǧid ad ifarḥ zi AREBBI. Kuř ijj zeg inni i ɣares i ɣa ittjaǧan ad ifeyyec, minzi aqemmum n yinni issawařen s ixarriqen ad ittwabelleɛ.
PSA 64:1 [I umeqqran n imeɣnajen. Azehhed n Dawud.]
PSA 64:2 Seř, [a] AREBBI, i tmijja inu xmi ttcetciɣ, ḥḍa tudart inu zeg usiggʷed n řeɛdu.
PSA 64:3 Sdurri ayi zi tmeɛmuč n iɛeffanen, zi řɣaci n yinni itteggen řmuɛṣiyyet,
PSA 64:4 inni isseqḍaɛen iřes nsen am yijj n ssif, qarrṣen awař yarezgen am fřitca [n řqews] nsen,
PSA 64:5 ḥima ad wten [s řqews] x wenni ikemmřen zeg imucan inuffaren. Deɣya ad xas neyycen, [iwa] war din minzi i ɣa ggʷeden.
PSA 64:6 Nitni ḥezzmen maḥend ad ggen min war iḥřin, ssawařen s tnuffra maḥend ad nedyen tixcifin. Qqaren: “Wi ten i ɣa iẓaren!”
PSA 64:7 Nitni ttxarrṣen di [marra min iǧan d] aɛeffan: “Aqa newjed, ict n tmeɛmuč n teḥraymect!” Aqa min iǧan daxeř deg weryaz u deg wuř nnes aqa yuǧeɣ.
PSA 64:8 AREBBI ad ten iwwet s fřitca [n řqews], deɣya ad banen jjrayeḥ nsen.
PSA 64:9 Iřes nsen ad ten yarr ad nqarḍen deg ixef nsen, kuř ijj, zeg inni ten ittwařan, ad yarweř.
PSA 64:10 [Xenni] ad ggʷeden marra iwdan, ad barrḥen timegga n AREBBI uca ad xzaren mliḥ di min dd ittegg.
PSA 64:11 Amsegged ad ifarḥ di SIDI u ad ɣares dd-yarweř, marra inni umi isegged wuř ad farḥen.
PSA 65:1 [I umeqqran n imeɣnajen. Azehhed n Dawud. Izři.]
PSA 65:2 Aṣebbeḥ ittraja i Cek di řhudnet, [a,] AREBBI, di Ṣihyun, [ittxeṣṣa] ad ittwakemmeř lwaɛd i Cek.
PSA 65:3 Cek tesřid i tẓaǧit, marra ddat ad ɣarek dd-yas.
PSA 65:4 Řmuɛṣiyyet tuɣa tejhed xafi, [maca] Cek tᵉttegged aṣřaḥ x ixeṭṭan nneɣ.
PSA 65:5 Sseɛd n wenni i tfarrzed Cek u tessqarrbed t-i-dd [ɣarek], ḥima ad izdeɣ di řemraḥat nnec. Neccin ad nejjiwen s řxar n Taddart nnec, s tqeddast n Zzawect nnec Tameqqrant.
PSA 65:6 Cek ad xaneɣ dd-tarred di tsegda s tmegga issaggʷaden, [a] AREBBI n usenjem nneɣ. Aqa [Cek] d řaman n marra tineggura n temmurt, n řebḥur iggʷejen qaɛ.
PSA 65:7 [Cek] d wenni issrusan idurar s jjhed nnes, Cek tbekksed s jjehd.
PSA 65:8 [Cek] d wenni ittarran řehweř n řebḥur yaressa, řehweř n řemwaj zzhir n ccuɛub.
PSA 65:9 Inni izeddɣen ɣar tneggura [n temmurt] tteggʷeden zi řeɛřamat nnec, aqa Cek tᵉttarrid řefjar n tuffut d weṭṭu n tmeddit ad sřiweřwen.
PSA 65:10 Cek tarezzfed tammurt, tᵉttarrid [tiɣezratin] ad tt cuqent, aqa Cek tᵉttarrid tt-i-dd s řxir aṭṭas. Iɣzar n AREBBI [nni tt ittcuqa] aqa ittcur s waman. Cek tessewjaded imendi nsen, maɣar i uya i teggid tammurt.
PSA 65:11 Cek tᵉttsawed mseqqem řatarat n wecraz, tesshekkʷid ibuda nnes. Tessarḍabed tammurt s inecnacen, tᵉttbarked aɣemmuy nnes.
PSA 65:12 Cek tᵉttegged ttaj i useggʷas n řxar nnec, řatarat nnec ttudument s tadunt.
PSA 65:13 Aqa ttudument x ddmani n řexřa, tiwririn bekksent s řefraḥet.
PSA 65:14 Ddmani n tarewsa ssunt s wuǧi, tiɣzurin dřint s imendi. Nitni dduqquzen s usřiwřew, [wah], ttɣennajen.
PSA 66:1 [I umeqqran n imeɣnajen. Izři. Azehhed.] Duqqzem s usřiwřew i AREBBI, [wah,] marra tammurt!
PSA 66:2 Zehhdem i uɛuǧi n Yisem nnes, ssɛuǧa [i-t] i usemɣar nnes.
PSA 66:3 Inim i AREBBI: “Mammec ssaggʷadent tmegga nnec!” Zi řemɣaret n jjhed nnec ad [xak] ssniɛmiřen řɛedyan nnec ad aḍaren i Cek.
PSA 66:4 Marra tammurt, [wah marra] ad ac sejden u ad zehhden, ad zehhden i Yisem nnec. Silah.
PSA 66:5 Asem-dd, xzarem timegga n AREBBI. Min igga zzat i tarwa n bnadem aqa issaggʷad.
PSA 66:6 Netta yarra řebḥar d řbar. Nitni ẓwan iɣzar x iḍaren. Dinni i zzayes nfarreḥ.
PSA 66:7 S jjehd nnes iḥekkem i řebda. Tiṭṭawin nnes ttɛessent x řegnus. Ɣarwem ad mmɛařan inni ittɣewwɣen. Silah.
PSA 66:8 Barkem AREBBI nneɣ, [kenniw a] řegnus, ggem ad ittwaseř řḥess n uṣebbeḥ nnes.
PSA 66:9 [Netta] d wenni d aneɣ itticen tudart, d wenni war ijjin aḍar nneɣ ad ifarɣ.
PSA 66:10 Minzi Cek, [a] AREBBI, tqeǧbed aneɣ, Cek tessizedged aneɣ axmi ssizdagen nnuqart.
PSA 66:11 Cek tnedhed aneɣ di tracca [n řfex]. Tessarsed xaneɣ ijj n ddqeř x tejɛinna nneɣ.
PSA 66:12 Cek tejjid iwdan ad nyen x izeǧifen nneɣ, aqa nedweř di tmessi d waman, [maca] Cek tessuffɣed aneɣ s ijj n řqedd ifeyyeḍ.
PSA 66:13 Necc ad dd-adfeɣ ɣar Taddart nnec s tɣarṣa n wecmaḍ, ad ac xeǧṣeɣ lwuɛud inu,
PSA 66:14 [lwuɛud] nni zzaysen neṭqen iyencicen inu, nni [zzaysen] issiweř uqemmum inu, řami tuɣa ayi di řeḥṣaret.
PSA 66:15 Tiɣarṣa n wecmaḍ n řmar iṣeḥḥen ad ac tent-i-dd-awyeɣ ak-d řebxur n icarriyyen. Necc ad [ac] sswejdeɣ ifunasen d iɣayḍen. Silah.
PSA 66:16 Marra kenniw i itteggʷden AREBBI, assettiw-dd, sřem, necc xseɣ ad awem ɛawdeɣ min i d ayi igga di řeɛmar inu.
PSA 66:17 [Ɛad] iřaɣa xas uqemmum inu, [xenni] aqa Netta ittwassemɣar sadu yiřes inu.
PSA 66:18 Mři tuɣa nwiɣ řmuɛṣiyyet deg wuř inu, [xenni] aqa Sidi inu war d ayi ittesři ca.
PSA 66:19 AREBBI [maca] aqa isřa ayi, aqa Netta iwca taynit i tmijja n tẓaǧit inu.
PSA 66:20 Ad ittwabarek AREBBI wenni war inḍaren taẓaǧit inu, war d ayi ikkis tamexsiwt nnes icewwaren.
PSA 67:1 [I umeqqran n imeɣnajen. Ak-d uzenzun x ifiřan. Azehhed. Izři.]
PSA 67:2 Ad xaneɣ iḥinn AREBBI. Netta ittejja udem nnes ad xaneɣ yarɣ - Silah -
PSA 67:3 maḥend ad ssnen abrid nnec x temmurt, [ad ssnen] asenjem nnec jar marra řegnus!
PSA 67:4 Řegnus ad Cek qadan, [a] AREBBI, marra řegnus ad Cek qadan.
PSA 67:5 Řegnus ad farḥen, ad sřiweřwen, maɣar Cek ad tḥekmed x řegnus nican, Cek ad tessuyured ccuɛub x temmurt - Silah -
PSA 67:6 řegnus ad Cek qadan, [a] AREBBI, marra řegnus ad Cek qadan.
PSA 67:7 Tammurt tᵉttic řɣiǧet nnes. AREBBI, AREBBI nneɣ, ad aneɣ ibarek.
PSA 67:8 AREBBI ad aneɣ ibarek u marra tineggura n temmurt ad zzayes ggʷedent.
PSA 68:1 [I umeqqran n imeɣnajen. N Dawud. Azehhed. Izři.]
PSA 68:2 AREBBI ad ikkar, řɛedyan nnes ad ttwareyycen, inni t icarrhen ad arewřen zzat i wudem nnes.
PSA 68:3 Cek ad ten tessiggʷejed am ddexxan [iṭṭaw], am ccmeɛ ifessi di tmessi, [ammu] i ɣa fnan iɛeffanen zzat i wudem n AREBBI.
PSA 68:4 Imseggaden ad farḥen, ad sřiwřiwen s řefraḥet zzat i wudem n AREBBI u ad ɣebban řefraḥet.
PSA 68:5 Ɣennjem i AREBBI, zehhdem i Yisem nnes, ggem ijj n webrid yuɛřan i wenni ineddhen di řewḍa. SIDi d Isem nnes. Negzem s řefraḥet zzat i wudem nnes.
PSA 68:6 Babatsen n iyujiřen d Řqaḍi n tijjař, [ammu i yeǧa] AREBBI di Tzeddiɣt nnes iqeddsen,
PSA 68:7 [ammu i yeǧa] AREBBI wenni isszeddaɣen inni weḥḥedsen deg ict n twacunt, wenni issuffuɣen imeḥbas s ufřaḥ, maca imɣewwaɣen ad zedɣen deg ict n temmurt ittwasscemḍen [zi tfuct].
PSA 68:8 [A] AREBBI, ařami tizzared zzat i wudem n řgens nnec, ařami tuɣa teggured di tnezruft - Silah -
PSA 68:9 tenhezz temmurt uca ucruren ijenwan, zzat i wudem n AREBBI, uřa d adrar n Sina [inhezz] zzat i wudem n AREBBI, AREBBI n Israil.
PSA 68:10 [Ak-d] wenẓar ifsusen trucced [tammurt], [a,] AREBBI, [xmi] i ɣa isřaw řwart nnec, tewcid as Cek [ɛawed] jjehd.
PSA 68:11 Taḥimart nnec tuɣa tzeddeɣ dayes. S tcuni nnec tesswejded tt i řmeskin, [a] AREBBI!
PSA 68:12 Sidi inu iwca awař, timɣarin nni dd-ittawyen řexbar aṣebḥan [ttkewwnent] ijj n ubarru ameqqran n treqqasin.
PSA 68:13 Ijeǧiden n řɛeskarat ttrakkwařen, aqa ttrakkwařen, u tenni iqqimen di taddart, tbeṭṭa takeccaḍt.
PSA 68:14 Ma kenniw war tebbuzzřem jar tnayen n taryiwin, [am wedbir jar] wafriwen [nnes] i ittwařeḥḥfen s nnuqart, [jar] arric nnes s wureɣ aziza ittissiqen,
PSA 68:15 Řami Amzemmar x kuřci issareyyec ijeǧiden di temmurt, iccat wedfeř x Ṣalmun.
PSA 68:16 Adrar n AREBBI! Adrar n Bacan! Adrar n Bacan d ijj n wedrar s tqiccitin [aṭṭas].
PSA 68:17 Mayemmi txezzarem ammu s wasam, [kenniw a] idurar s marra tiqiccitin [nwem], ɣar wedrar i imeẓri i-t AREBBI d tazeddiɣt i Yixef nnes? [Wah, nican] SIDI ad din izdeɣ i řebda.
PSA 68:18 Ikarruten n AREBBI aqa aten d ɛecrayat n řuřuf d ɛecrayat n řuřuf, uřa d ařef u ɛawed [ařef]. Sidi inu aqa-t jar asen, [adrar n] Sina [aqa ittwařeḥḥef] s tqeddast.
PSA 68:19 Cek tuřyed ɣar sennej, tnedhed imeḥbas di tmeḥbast, Cek tmenɛed tarzifin zeg iwdan, [iwa ɛad] zeg imɣewwɣen, ḥima SIDi, AREBBI, ad izdeɣ [dinni].
PSA 68:20 Ad ittwabarek Sidi inu. Ass x wass yarebbu i neccin ddquřat. Arebbi nni d asenjem nneɣ - Silah -
PSA 68:21 Arebbi nni d ijj n Arebbi n isenjamen i neccin. Aqa din ifekkiten zi řmewt ɣar SIDI, Sidi inu.
PSA 68:22 S tidett, AREBBI, ad iřbez azeǧif n řɛedyan nnes, aceqquf s ucuwwaf n wenni iqqimen ittenneḍ s imerwusa [n ddnub] nnes.
PSA 68:23 Sidi inu inna: “Necc ad [kenniw] dd-arreɣ zi Bacan, ad [kenniw] dd-arreɣ zi řaǧaɣ n řebḥar,
PSA 68:24 ḥima ad tḥarrced s uḍar nnec deg idammen, [uca uřa d] iřes n yiṭan nnec [ad iṭṭef] tasɣart nnes zi řɛedyan.”
PSA 68:25 Nitni ẓrin ibriden nnec mammec ten tuyured, [a] AREBBI, ibriden n Arebbi inu, Ajeǧid inu, [řeḥḥfen] di tqeddast.
PSA 68:26 Imeɣnajen tuɣa gguren ɣar zzat, inni iccaten x ifiřan awarni asen, tiɛzariyyin, tinni ittiraren x ibendiřen nsent di řwesṭ.
PSA 68:27 Barkem AREBBI di tmesmunin, [a] SIDI, zi řɛunṣar n Israil.
PSA 68:28 Aqa din Binyamin ameẓyan, wenni xasen ittṣeǧaḍen, [xenni] řḥukkam n Yahuda ak-d ubarru n iɛciren nsen, [uřa d] řḥukkam n Zabulun [d] řḥukkam n Naftali.
PSA 68:29 AREBBI nnec iweṣṣa [maḥend ad as immewc] jjehd nnec. [A,] AREBBI, sejhed min teggid di ṭṭweɛ nneɣ,
PSA 68:30 zi Zzawect nnec Tameqqrant, sennej i Urcalim. Ijeǧiden ad ac iwyen tarzifin.
PSA 68:31 Siggʷed řweḥc nni [deg] uɣanim, abarru n [ifunasen] ijehden ak-d iɛejmiyyen n řegnus, ařami igga ixef nnes am ittwařbez, [am] nnuqart iddez. Netta izeǧeɛ řegnus nni tuɣa ttmeẓren deg umenɣi.
PSA 68:32 Ad dd-asen imcennɛen zi Miṣra, Kuc ad isswiẓẓeḍ ifassen nnes ɣar AREBBI s tezřa.
PSA 68:33 [A] tigeldiwin n temmurt, ɣennjent i AREBBI, zehhdent i Sidi inu. Silah.
PSA 68:34 Netta d wenni ineddhen deg ujenna x [marra] ijenwan zeg wecḥař uya. Xzar, aqa Netta igga ijj n řḥess ijehden s tmijja nnes.
PSA 68:35 Wcem jjehd i AREBBI! Lɛaḍama nnes aqa-tt tiwa i Israil u jjehd nnes aqa-t deg iseynuten.
PSA 68:36 [A,] AREBBI, mammec tessiggʷeded zi Tizawiyyin nnec Iqeddsen, [a] Arebbi n Israil, [Cek] d wenni itticen jjehd d tzemmar i řgens. Ad ittwabarek AREBBI. *
PSA 69:1 [I umeqqran n imeɣnajen. S teɣnint n ‘Tlillicin’. N Dawud.]
PSA 69:2 Senjem ayi, [a] AREBBI, maɣar aman iwḍen ayi ɣar řeɛmar [inu].
PSA 69:3 Necc ɣebbiɣ deg ubaryuḍ yuǧeɣ, war [din] mani ɣa beddeɣ. Aqa-yi deg waman yuǧɣen u řḥemřet tᵉttazzeř xafi.
PSA 69:4 Necc uḥřeɣ s iɣuyyan, tmijja inu tebbuybeḥ, tiṭṭawin inu qḍant zeg uraji x AREBBI inu.
PSA 69:5 Inni d ayi icarrhen x walu ttwessɛen x ucuwwaf [i iǧan] x uzeǧif inu. Inni yarezzun ad ayi areddǧen, řɛedyan inu i [xafi] issxarriqen, dewřen jehhden. Min war ucareɣ, ittxeṣṣa ayi ad tt-i-dd-arreɣ [ɛad].
PSA 69:6 [A] AREBBI, Cek tessned tubbuheřya inu, imerwusa [n ddnub] inu war xak ffaren.
PSA 69:7 Ejj inni xak issitimen, war ttseḍḥin, [a] Sidi inu, SIDI n řɛeskarat, ejj inni xak yarezzun, war zzayi ttwafeṭṭḥen, [a] AREBBI n Israil.
PSA 69:8 Maɣar di ṭṭweɛ nnec i kessiɣ aseḥqar, aseḍḥi iřeḥḥef i uɣembub inu.
PSA 69:9 Dewřeɣ d aɣrib ɣar aytma, i iḥenjiren n yemma [dewřeɣ] d abarrani.
PSA 69:10 Maɣar tusmi [iqeddsen] i Taddart nnec tecca ayi, aseḥqar n yinni Cek isseḥqaran iwḍa-dd xafi.
PSA 69:11 Necc ruɣ ɣar uẓummi n řeɛmar inu, [maca] aya yiwi ayi-dd ɛřam kuř aseḥqar.
PSA 69:12 Necc yarḍeɣ ict n txancet [n wecḍan], [maca] dewřeɣ asen d ijj n lmatal.
PSA 69:13 Inni iqqimen ɣar tewwart [n tendint] ssawařen xafi, uřa d izřan n yinni isessen ccrab.
PSA 69:14 Necc maca ttᵉttareɣ ɣarek, [a] SIDI! [Aqa din] ijj n řḥař n arḍa, [a] AREBBI, s řemɣaret n tmexsiwt nnec icewwaren. Arr-dd xafi s usenjem nnec i dd-iffɣen zi řmanet nnec.
PSA 69:15 Jbed ayi-dd zeg ubaryuḍ, ejj ayi war ttɣebbiɣ, [ḥima] ad ttwafekkeɣ zeg inni d ayi icarrhen u zeg waman yuǧɣen.
PSA 69:16 War ttejji ad ayi tawi řḥemřet, [war ttejji] řaǧaɣ ad ayi isarḍ, ad xafi ibelleɛ wanu aqemmum nnes.
PSA 69:17 Arr xafi, [a] SIDI, maɣar tamexsiwt nnec icewwaren teṣbeḥ. Qřeb ɣari ɛlaḥṣab arreḥmet nnec ifeyyḍen.
PSA 69:18 War tteffar ca udem nnec x umsexxar nnec, maɣar ttwaḥṣareɣ. Arr-dd xafi daweḥda.
PSA 69:19 Ades ayi-dd ɣar řeɛmar inu, fekk i-t. Seṣřeḥ ayi di ssibbet n řɛedyan inu.
PSA 69:20 Cek tessned řɛar inu d useḍḥi inu d řefḍiḥet inu, aqa marra inni d ayi iḥeṣṣaren [bedden] zzatek.
PSA 69:21 Aseḥqar yarẓ ayi uř u necc qenḍeɣ aṭṭas. Rajiɣ aziǧez, maca walu, necc [rajiɣ] inni d ayi ɣa iɛezzan, maca war ufiɣ [uřa d ijjen].
PSA 69:22 Nitni ggin ssem di macca inu, i ufadi inu ggin ayi ad sweɣ řxeǧ.
PSA 69:23 Ejj ṭṭabřa nsen ad tedweř d řfex, uřa d taxceft i yinni akidsen ibedden.
PSA 69:24 Sdarɣeř tiṭṭawin nsen, ḥima war ttwiřin [ɛad], arr tijɛinnatin nsen ad ttenhezzant řebda.
PSA 69:25 Zeǧeɛ xasen asxeḍ nnec, ejj řḥaduq n weɣḍab nnec ad ten iřqef.
PSA 69:26 Ejj řmargeḥ n tzeddiɣt nsen ad idweř d řxarbet, maḥend war [dayes] izeddeɣ [ɛad] uřa d ijjen.
PSA 69:27 Maɣar nitni darracen x weryaz nni tuɣa tewtid Cek, s řhard nsen arnin i řeḥriq n yinni zzayek ittwařeqqfen.
PSA 69:28 Arr ddenb x ddenb nsen, war ten ttejji ad dd-adfen ɣar tsegda nnec.
PSA 69:29 Ejj i-ten ad ttwamḥan zeg Wedlis [ittwanḍen] n Tudart, ařami war ttwazemmamen ca ɣar imseggaden.
PSA 69:30 [Maca] necc aqa ayi di řeɣben u ttnezbareɣ. Iři ad ayi issgeɛɛed sennej usenjem nnec, [a] AREBBI.
PSA 69:31 Necc ad ṣebbḥeɣ Isem n AREBBI s yijj n yezři, s uqadi ad [as] ssemɣareɣ.
PSA 69:32 Aya ad yarḍa SIDI ktar zeg ijj n ufunas, zeg ijj n ufunas ameẓyan s waccawen d tecḍect immsebḍan.
PSA 69:33 Imhinen nni tt iẓrin, ad farḥen, [u] inni yarezzun x AREBBI, aqa uř nwem ad iddar.
PSA 69:34 Maɣar SIDI ittesřa ɣar imezřaḍ, war isseḥqiri ca imeḥbas nnes.
PSA 69:35 Ejj ijenwan d temmurt ad t ssemɣaren, řebḥur d marra min daysen ittenhezzan.
PSA 69:36 Maɣar AREBBI ad issenjem Ṣihyun, ad ibna [ɛawed] tineddam n Yahuda, uca nitni ad din zedɣen, ad tt ṭṭfen d řwart.
PSA 69:37 Zzariɛet n imsexxaren nnes ad tt tᵉṭṭef d tasɣart, inni ittexsen Isem nnes ad dayes zedɣen.
PSA 70:1 [I umeqqran n imeɣnajen. N Dawud. I řidaret.]
PSA 70:2 [A] AREBBI, deɣyat ḥima ad ayi tfekked, ḥima ad ayi tɛawned, [a] SIDI.
PSA 70:3 Ejj inni yarezzun řeɛmar inu ad ttwaxarewḍen u ad ssnuffaren ixef nsen, ejj inni yareṭṭan x řɣar i dayi iřeqqfen, ad dewřen ɣar ḍeffar u ad ttwassbehdřen.
PSA 70:4 Ejj i-ten ad ɛeqben zi ssibbet n ubehdeř, inni din iqqaren: “Ha, ha!”
PSA 70:5 Ejj marra inni xak yarezzun, ad arcqen, ad zzayek farḥen. Ejj inni ittexsen asenjem nnec, ad inin řebda: “AREBBI d ameqqran!”
PSA 70:6 [Maca] necc di řeɣben u zeřḍeɣ, [a] AREBBI, deɣyat ɣari. Cek d twiza inu d amsenjem inu, [a] SIDI, war ttɛeṭṭař ca!
PSA 71:1 Arekkwařeɣ ɣarek, [a] SIDI, ejj ayi ɛemmarṣ war ttseḍḥiɣ i řebda.
PSA 71:2 Fekk ayi s tsegda nnec u arxu ayi. Arr-dd ɣari amezzuɣ nnec u senjem ayi.
PSA 71:3 Iři d ict n teṣḍart i tzeddiɣt i necc, ḥima ad ɣares dd-aseɣ řebda. Cek tweṣṣid ḥima ad ttwassnejmeɣ, maɣar Cek d Tasḍart inu d lburj inu.
PSA 71:4 AREBBI inu, senjem ayi zeg ufus n uɛeffan, zeg ufus n mmis n řmuɛṣiyyet u zi bu-ɣezzu.
PSA 71:5 Maɣar Cek d řayas inu, Sidi inu, SIDI, [Cek] d atecři inu zi temẓi inu.
PSA 71:6 Zeg uɛeddis [n yemma], tuɣa ayi ɛemmdeɣ xak. Zeg uɛeddis n yemma, aqa Cek d Wenni d ayi iḥuzen, necc ṣebḥeɣ Cek řebda.
PSA 71:7 I waṭṭas necc am yict n řeɛřamet [n řeɛjeb], [maca] Cek d amcan inu ijhed i tarewřa.
PSA 71:8 Ejj aqemmum inu ad iccur s uṣebbeḥ nnec, ass imun s ccan nnec.
PSA 71:9 War xafi ttmenḍar deg wussan n tewsar inu, war d ayi semmeḥ mařa jjehd inu iruḥ.
PSA 71:10 Maɣar řɛedyan inu ssawařen xafi, inni yarezzun řeɛmar inu, mcawaren xafi jmiɛ.
PSA 71:11 Nitni qqaren: “AREBBI ismeḥ dayes. Ḍfarem t u menɛem t, maɣar war din wenni i ɣa ifekken.
PSA 71:12 [A] AREBBI, war ttɣimi tiggʷejed xafi, [a] AREBBI inu, ewc ayi deɣya afus.
PSA 71:13 Ejj iɣrimen n tudart inu ad ttwaseḍḥan u ad ttwaccen, ejj inni yarezzun ad ayi ggen řɣar ad ttwadřen s useḥqar d řefḍiḥet.
PSA 71:14 Necc maca ad qqimeɣ ttrajiɣ [Cek] řebda, u ad arniɣ [ɛad] ɣar uṣebbeḥ nnec.
PSA 71:15 Aqemmum inu ad ibarreḥ s tsegda nnec, asenjem nnec, ass imun, maɣar war ssineɣ řqedd nnes.
PSA 71:16 Necc ad dd-aseɣ s tmegga timeqqranin n Sidi inu, SIDI, ad idareɣ tasegda nnec, mɣir tenni Nnec waha.
PSA 71:17 [A] AREBBI, Cek tuɣa tesseřmaded ayi zi temẓi inu, u necc ař ass-a ttbarrḥeɣ s lmuɛjizat nnec.
PSA 71:18 [A] AREBBI, war d ayi semmeḥ ca, waxxa wsareɣ cabeɣ, ař ɣa ḥajiɣ i jjiř-a x [tmegga n] ufus nnec uřa x tmegga nnec timeqqranin, i marra min i dd ɣa yasen.
PSA 71:19 [A] AREBBI, tasegda nnec tiweḍ ař sennej [qaɛ], maɣar Cek teggid timegga timeqqranin, [a] AREBBI, man wen iǧan am Cek!
PSA 71:20 Aqa Cek tejjid tekka xafi aṭṭas n řeḥṣarat d řɣar, [maca waxxa amenni] Cek ad ayi tesseddared ɛawed, Cek ad ayi tessuffɣed zeg [waman] ihewřen n temmurt.
PSA 71:21 Cek ad tarrid řemɣaret inu ad temɣar, ad ayi dd-tennḍed s ufewwej nnec.
PSA 71:22 Ad Cek qadiɣ [ɛawed] s lharpa, [x] řaman nnec, [a] AREBBI, ad Cek zehhdeɣ s řgambri, [a] Amqeddas n Israil.
PSA 71:23 Iyencicen inu ad sřiwřewen, aqa ad zehhdeɣ i Cek, uřa d řeɛmar inu nni tefdid Cek.
PSA 71:24 Uřa d iřes inu ad iḥaja x tsegda nnec ass marra, maɣar inni yarezzun ad ayi ggen řɣar, seḍḥan, iwa, ttwafeḍḥen.
PSA 72:1 [N Suliman.] [A] AREBBI, ewc i ujeǧid [maḥend] ad iḥkem ɛlaḥsab řḥeqq nnec, u [ewc] tasegda nnec i mmis n ujeǧid.
PSA 72:2 [Xenni] netta ad iḥakem řgens nnec s tsegda, řmusakin nnec s řḥeqq.
PSA 72:3 Idurar ad iwyen řehna i řgens, [uřa d] tiwririn tasegda.
PSA 72:4 Netta ad yaɣ tesɣart n řmusakin n řgens, ad issenjem tarwa n imezřaḍ, uca ad iřbez wenni [ten] iḥeṣṣaren.
PSA 72:5 Nitni ad zzayek ggʷeden min ɣa tekk tfuct [teǧa], u taziri [ad tesscen] udem [nnes], zi jjiř ař jjiř.
PSA 72:6 Netta ad dd-ihwa x iyyar awarni i weḥtac, am tinecnacin i issarḍaben tammurt.
PSA 72:7 Deg wussan nnes ad innuwar umsegged, ad din yiři řehna ifeyyḍen ař ɣa tafed taziri war teǧi ɛad.
PSA 72:8 Netta ad iḥkem zi řebḥar ař řebḥar, zeg iɣzar [n Lfuraṭ] ař tineggura n temmurt.
PSA 72:9 Imezdaɣ n řexřa ad qqunjeřen zzates, [maca] řɛedyan nnes ad řesḥen ucař.
PSA 72:10 Ijeǧiden n Tarcic ad dd-iwyen ict n tewhibt, ijeǧiden n Caba d Seba ad dd-qarrben tarzefin.
PSA 72:11 Marra ijeǧiden ad as aḍaren, marra řegnus ad as ɛebden.
PSA 72:12 Maɣar netta ad ifekk amezřuḍ, wenni [ɣares] ittřaɣan, uřa d řmeskin d wenni war ɣares amɛawen.
PSA 72:13 Netta ad iɛteq amarxu d umezřuḍ, netta ad issenjem řeɛmar n imezřaḍ.
PSA 72:14 Netta ad ifekk řeɛmar nsen zi ddeǧ d lɛunf, idammen nsen ad sekkwan aṭṭas di tiṭṭawin nnes.
PSA 72:15 Netta ad iddar! U ad as immewc wureɣ zi Caba. U [nitni] ad ẓẓaǧen řebda di ṭṭweɛ nnes, ass marra ad t barken.
PSA 72:16 Ad yiři ijj n ufeyyeḍ n imendi di temmurt x tqiccat n idurar, řɣiǧet nnes ad tenhezz am [tcejjura n] Lubnan, u inni zi tendint ad nnuwaren am aɣemmuy [aziza] di temmurt.
PSA 72:17 Isem nnes ad iqqim i řebda, iři ad innuwar isem nnes zzat i wudem n tfuct. Ad dayes ttwabarken nitni, marra řegnus ad t ssemɣaren.
PSA 72:18 Ad ittwabarek SIDI AREBBI, AREBBI n Israil. Netta ittegg lmuɛjizat, Netta waha.
PSA 72:19 Ad ittwabarek Isem n uɛuǧi nnes i řebda. Ad tᵉttwaccur marra tammurt s uɛuǧi nnes. Amin, [wah,] amin.
PSA 72:20 Tiẓiǧatin n Dawud, mmis n Yassa, aqa kemmřent.
PSA 73:1 [Azehhed n Asaf.] Wah, AREBBI d aṣebḥan i Israil, i yinni s wuř iṣfan.
PSA 73:2 Necc maca, ɛřaḥař tuɣa iḍaren inu ffɣen [zeg webrid], war iqqim walu ad ḥřuǧḍen iṣuraf inu.
PSA 73:3 Maɣar tuɣa usmeɣ zeg ibuhařiyyen, [řami] ẓriɣ aqa iɛeffanen mliḥ i ǧan.
PSA 73:4 Maɣar war din bu iseɣwan ɣar řmewt nsen, ṣṣulṭa nsen aqa ibedd nican.
PSA 73:5 Nitni war carrcen di tamara n iwdan, war ttwařeqqfen [s řmuṣibat] am [wezyen nneɣni n] bnadem.
PSA 73:6 S uya tᵉttayeř asen-dd nnfaxet am tseddect ɣar yiri nsen uca iřeḥḥef asen lɛunf am yijj n warruḍ.
PSA 73:7 Tiṭṭawin nsen ttwaffɣent zi tadunt, nitni ɛeddun řexyařat n wuř [nsen].
PSA 73:8 Nitni stehzan [s bṭayṭay] ssawařen x řɣar, x ddeǧ, aqa ssawařen zi sennej.
PSA 73:9 Nitni arezzmen uqemmum nsen x ujenna, řhard nsen iggur x temmurt.
PSA 73:10 S uya inneqřeb [ddab] nsen n řgens ɣar da, aman ifeyyḍen ttsekkafen ten nitni.
PSA 73:11 Qqaren: “Mammec i ɣa issen Arebbi?” “Mammec i ɣa igg Umɛuǧi x kuřci ad issen?”
PSA 73:12 Xzar, aqa aten d iɛeffanen! [Ɛad] ddaren řebda di řhudnet, ssewsiɛen agřa nsen.
PSA 73:13 S tidett, amenni waha ssizedgeɣ uř inu u ssirdeɣ ifassen inu di tazdugi.
PSA 73:14 Ass am imun necc tiyyita dayi, kuř ṣṣbeḥ tᵉttwarebbiɣ.
PSA 73:15 Mařa nniɣ: “Uřa d necc ad ssiwřeɣ ammu!”, xzar, iři ɣdareɣ jjiř n iḥenjiren nnec.
PSA 73:16 Ittřiɣ ayi [zemmareɣ] ad fehmeɣ aya, [maca] di tiṭṭawin inu ittawi-dd [mɣir] tamara ibeṭṭřen,
PSA 73:17 ařami udfeɣ ɣar Tzawiyyin Iqeddsen n Arebbi, uca ḥekkareɣ i tneggarut nsen.
PSA 73:18 Wah, Cek tessrusid ten x imucan itteḥruǧuḍen, Cek tɣeṭṭřed ten d řxirbat.
PSA 73:19 Mammec dewřen d [ict n řqecɛet n] unexřiɛ deg ict n tecti, ttwamḥan u ttwaqḍan s iceřwawen issaggʷaden.
PSA 73:20 Am tarjit ɣar ufaqi, [a] Sidi inu, [ammu] i ɣa tesseḥqared [abeyyen n] řexyař nsen xmi dd ɣa tfaqed.
PSA 73:21 Řami ittwassarzeg uř inu [di řweqt nni], ittejju ayi [řeḥriq] di tiẓẓař inu.
PSA 73:22 Necc tuɣa ayi d aqeffuḥ, tuɣa ayi ɣarek am yijj n řweḥc břa řeɛqeř.
PSA 73:23 [Ɛad maca] řebda aqa ayi ɣarek, Cek tᵉṭṭfed ayi zeg ufus afusi inu.
PSA 73:24 Cek ad ayi tgewwded s ccwar nnec u awarni man aya ad ayi teksid ɣar uɛuǧi nnec.
PSA 73:25 Man wen i ɣari deg ujenna ḥaca Cek? Akidek war tzemmar ad ayi tarḍa uřa d ict n tmesřact di temmurt.
PSA 73:26 Mařa arrimet d wuř inu semmḥen dayi, [xenni] AREBBI d Taṣḍart n wuř inu d tasɣart inu i řebda.
PSA 73:27 Maɣar xzar, inni zzayek itteggʷejen ad fnan. Cek ad tkeḥḥeḍed kuř ijj wenni xak ittḥeyyaden umi i ɣa issefsed ixef nnes,
PSA 73:28 Necc maca, řdaset i AREBBI d mliḥ i necc. Necc ggiɣ Sidi inu, SIDI, d amcan inu n tarewřa, ḥima ad barrḥeɣ marra timegga nnec.
PSA 74:1 [Axemmi n Asaf.] Mayemmi, [a] AREBBI, tenḍared i řebda? Mayemmi ɣa yarɣ weɣḍab nnec x wuǧi n ddmani n tarewsa nnec?
PSA 74:2 Xemmem di tmesmunt nnec nni tuɣa tkesbed zeg wecḥař uya, taqbič n tesɣart n řwart nnec tenni tefdid, adrar n Ṣihyun wenni x tuɣa tzeddɣed.
PSA 74:3 Sgeɛɛed iṣuraf nnec ɣar min yareddǧen i řebda. Řeɛdu yarra marra d řxarbet di Zzawect Iqeddsen.
PSA 74:4 Inni tuɣa Cek iḥeṣṣaren ssbuɛruten di řwest n wemcan nnec n umsagar, ssbeddan řeɛřamat nsen d řeɛřamat.
PSA 74:5 Aqa netta idweř ittwassen am [yijjen] issgeɛɛad ccwaqar di cbarq iqqnen,
PSA 74:6 u xenni arẓin [marra] inqacen nnes jmiɛ, s ccaqur d ifḍisen.
PSA 74:7 Nitni qqeden timessi i Tzawiyyin nnec Iqeddsen, aqa ɛarran Tazeddiɣt n Yisem nnec ař tammurt.
PSA 74:8 Nitni nnan deg wuř nsen: “Ejj aneɣ ad tent nareddeǧ marra!” [Ammu i] ssarɣen nitni marra imucan n umsagar n Arebbi di temmurt.
PSA 74:9 Řeɛřamat nneɣ war tent nettwiři [ɛad], war din uřa d ijj n unabi [ɛad], uca uřa d ijj jar aneɣ issen ař meřmi [ɛad].
PSA 74:10 Ař meřmi, [a] AREBBI, ad [zzayek] istehza wenni iḥeṣṣaren? Ma ad iceqqef řeɛdu i řebda deg Yisem nnec?
PSA 74:11 Mayemmi i tᵉttegged ad dayneɣ ismeḥ afus nnec, afus nnec afusi? [Suffuɣ i-t] zeg weḥsin [n upartessu] nnec, qḍa [xasen].
PSA 74:12 Zeg wecḥař uya aqa AREBBI d Ajeǧid inu. Netta d wenni i dd-ittawyen isenjamen di řwest n temmurt.
PSA 74:13 S tzemmar nnec tfetqed řebḥar, izeǧifen n řhaycat teddzed i-ten x waman.
PSA 74:14 Cek třebzed izeǧifen n ‘Liviyatan’, tewcid i-t d macca i řewḥuc n řexřa.
PSA 74:15 Cek tfeǧqed řɛunṣar d teɣzart, Cek tessiẓɣed iɣezran ittazzřen břa qeṭṭu.
PSA 74:16 Ass nnec, nnec uřa d ǧiřet, Cek teggid din tafawt d tfuct.
PSA 74:17 Cek tessmetned marra iymiren n temmurt, anebdu d tgerst aqa teggid asen tifras [nsen].
PSA 74:18 Ɛqeř x man aya: řeɛdu isseḥqar SIDI, ijj n řgens abuhaři iceqqef deg Yisem nnec.
PSA 74:19 War ttic řeɛmar n tejlilleḥt nnec i řewḥuc, war tᵉttu i řebda tudart n řmusakin nnec.
PSA 74:20 Xzar ɣar Řɛahd, maɣar [deg] imucan n ṭṭřam di temmurt aqa daysen tudrin ɛemmarent s lɛunf.
PSA 74:21 War ttejji wenni ittwaḥeṣṣaren ad dd-iɛqeb s useḍḥi, ejj řmeskin d umezřaḍ ad ṣebbḥen Isem nnec.
PSA 74:22 Kkar bedd, [a] AREBBI, belleɛ ddeɛwet nnec, xemm mammec Cek isseḥqaran ibuhařiyyen ass imun.
PSA 74:23 War ttᵉttu ca aɣuyyi n iɣrimen nnec, asbuɛar n yinni i xak iɣewwɣen ittgeɛɛad ɣar ujenna břa [a]qeṭṭu.
PSA 75:1 [I umeqqran n imeɣnajen. ‘War ttareddeǧ!’ Azehhed n Asaf. Izři.]
PSA 75:2 Neccin nettqada Cek, [a] AREBBI, nettqada! Aqa Isem nnec yudes, aqa lmuɛjizat nnec ssawařen [x man aya].
PSA 75:3 Maɣar Necc ad xḍareɣ řḥař ittwaggen, ad ggeɣ ccreɛ s řḥeqq.
PSA 75:4 Tammurt ak-d marra imezdaɣ nnes tefsiy, maca Necc ssmettneɣ ipilaren nnes. Silah.
PSA 75:5 Necc nniɣ i ibuhařiyyen: “War tteggʷedem ca!”, i iɛeffanen: “War ssgeɛɛadem icc [nwem]!
PSA 75:6 War ssgeɛɛadem icc nwem [ammu] sennej, war ssawařem s nnfaxet!”
PSA 75:7 Maɣar asgeɛɛed war dd-ittas zi ccarq, niɣ zi řɣarb uřa zi řexřa.
PSA 75:8 Maɣar AREBBI d řqaḍi. Netta issᵉhekkʷa ijjen u issgeɛɛad wenneɣni.
PSA 75:9 Maɣar aqa [din] ijj n řkas deg ufus n SIDI, binu ittegg kuffu, ittwaxeǧaḍ marra. Netta ittkebba zzayes. Marra iɛeffanen n temmurt ad ẓemmen uřa d řexmira nnes umi [zzayes] i ɣa swen.
PSA 75:10 Necc ad [t] barrḥeɣ i řebda qaɛ, ad zehhdeɣ i AREBBI n Yaɛqub.
PSA 75:11 Necc ad zedmeɣ marra accawen n iɛeffanen, accawen n imseggaden ad ttwassgeɛɛden.
PSA 76:1 [I umeqqran n imeɣnajen. Ak-d uzenzun x ifiřan.] [Azehhed n Asaf, izři.]
PSA 76:2 AREBBI ittwassen di Yahuda, Isem nnes d ameqqran di Israil.
PSA 76:3 Aɛucci nnes aqa-t di Calim, Tazeddiɣt nnes di Ṣihyun.
PSA 76:4 Dinni yarẓa fřitcat yareqqen n řqews, taseddart n useřqi d ssif uřa d amenɣi. Silah.
PSA 76:5 Tessaggʷaded u tjehded i teǧid x idurar nni immeẓren di tkeccaḍt.
PSA 76:6 Inni izeɛɛamen ttwakeccḍen. Nitni nnudmen, ṭṭṣen, uřa d ijj zeg iryazen imeḥḍen war izemmar ad immɛařa.
PSA 76:7 S uweddeb nnec, [a] AREBBI n Yaɛqub, iɣarq ukarru d uyis deg yiḍeṣ.
PSA 76:8 Cek, [wah,] Cek tessaggʷaded, wi izemmaren ad iqqim ibedd zzat i wudem nnec, xmi dd ɣa ikkar weɣḍab nnec?
PSA 76:9 Zeg ujenna teggid ad ittwaseř řḥukm. Teṭṭef teggʷudi tammurt uca tesseɣd,
PSA 76:10 umi ikkar AREBBI maḥend ad icarreɛ, ḥima ad ifekk marra imhinen n temmurt. Silah.
PSA 76:11 Maɣar afugem n iwdan ad yawi aqadi i Cek, min iqqimen [ɛad] n wesɛar ad t tmenɛed.
PSA 76:12 Wcem lwuɛud u ggem zzaysen zzat i SIDI, AREBBI nwem. Ejj marra inni d as dd-innḍen ad awyen ṣṣdaqi i Wenni ittxeṣṣa ad zzayes ggʷeden,
PSA 76:13 wenni imennɛen i řḥukkam buḥbeřat nsen, wenni zzayes tteggʷden ijeǧiden n temmurt.
PSA 77:1 [I umeqqran n imeɣnajen. Sadu ufus n Yadutun.] [Azehhed n Asaf.]
PSA 77:2 [Necc ssgeɛɛdeɣ] tmijja inu ɣar AREBBI uca řaɣiɣ, [ssgeɛɛdeɣ] tmijja inu ɣar AREBBI, Netta ad ayi iseř.
PSA 77:3 Deg wass n řeḥṣaret inu arzuɣ Sidi inu. S ǧiřet sswiẓẓḍeɣ afus inu břa ma ad as arxuɣ, řeɛmar inu yugi ad ittwaɛezza.
PSA 77:4 Umi tuɣa ttidareɣ AREBBI, [xenni] ttzehhareɣ, ttxemmameɣ, [uca] yarxu buḥbeř inu. Silah.
PSA 77:5 Cek tarred tiṭṭawin inu ad qqiment faqent, nnhewřeɣ, war ssiwřeɣ.
PSA 77:6 Necc ttxemmameɣ deg wussan n wecḥař uya, deg iseggʷusa n zzmanat [iɛdun].
PSA 77:7 Necc ttidareɣ deg uzenzun x ifiřan inu s ǧiřet, xmi ttxemmameɣ deg wuř inu u buḥbeř inu yarezzu:
PSA 77:8 Ma ad [aneɣ] inḍar Sidi inu i řebda, war [xafi] ittḥinni ɛad?
PSA 77:9 Ma tbedd tmexsiwt nnes icewwaren i řebda? Ma ittwabḍeř wawař i iǧan zi jjiř i jjiř nneɣni [awarni as]?
PSA 77:10 Ma ittu Arebbi aḥinni nnes? Ma deg weɣḍab nnes ibelleɛ arreḥmet nnes?” Silah.
PSA 77:11 Nniɣ: “Wa d řeɛdab inu, aqa d iseggʷusa zeg ufus n Umɛuǧi x kuřci.”
PSA 77:12 Necc ad idareɣ timegga n SIDi, ad ɛeqřeɣ x lmuɛjizat nnec n zic.
PSA 77:13 Necc ad xemmameɣ di marra řexdayem nnec, ad ttxarraṣeɣ di marra min teggid.
PSA 77:14 [A] AREBBI, abrid nnec aqa deg Uqeddas [i yeǧa]! Man wen [i yeǧan] d arebbi ameqqran am AREBBI?
PSA 77:15 Cek d Arebbi nni itteggen lmuɛjizat, Cek tessecned tizemmar nnec jar řegnus.
PSA 77:16 Cek tefdid řgens nnec s uɣiř nnec, tarwa n Yaɛqub d Yusuf. Silah.
PSA 77:17 Aman ẓrin Cek, [a] AREBBI, aman ẓrin Cek uca arjijen, [wah,] [aman] ihewřen nnhewřen.
PSA 77:18 Iseynuten ideqqřen farrɣen-dd aman nsen, ibarruten n iseynuten ssgeɛɛden tmijja nsen, u fřitcat n řqews nnec ḍwint da d diha.
PSA 77:19 Tmijja nnec tegga am wajjaj di tḥaryaḍt, assamen ggin tafawt x ddunect, tammurt tenhezz tarjij. `
PSA 77:20 Abrid nnec [icuq] di řebḥar, amesraq nnec deg waman imeqqranen, [maca] iṣuraf [n iḍaren] nnec war binen [ɛad].
PSA 77:21 Cek tnedhed řgens nnec am [ict n tḥimart] n wuǧi, s ufus n Musa d Harun.
PSA 78:1 [Axemmi n Asaf.] [A] řgens inu, ewc amezzuɣ i Ccariɛa inu! Meyyřem amezzuɣ nwem ɣar wawařen n uqemmum inu.
PSA 78:2 Necc ad arzmeɣ aqemmun inu s wawař iweznen, ad barrḥeɣ řemɛani innuffaren zeg wecḥař uya,
PSA 78:3 [timesřayin] nni nesřa u nessen, nni d aneɣ ḥajan řejdud nneɣ.
PSA 78:4 War ten nᵉtteffar zeg iḥenjiren nsen, zi jjiř i dd ɣa yasen. Ad nbarreḥ s tmegga iṣebbḥen n SIDI, s tmegga nnes ijehden d lmuɛjizat nnes nni tuɣa igga.
PSA 78:5 Maɣar Netta igga ict n cchadet di Yaɛqub, issars ict n Ccariɛa di Israil, nni tuɣa yumur i řejdud nneɣ, maḥend ad tt ssɣaren i iḥenjiren nsen,
PSA 78:6 maḥend jjiř i dd ɣa yasen ad issen, iḥenjiren nni dd ɣa ittwaxeřqen [awarni asen], u [xenni] uřa d nitni ad kkaren ad tt sseɛdun i iḥenjiren nsen,
PSA 78:7 [maḥend] nitni ad ssarsen řaman nsen x AREBBI, war ttᵉttun ca timegga n Arebbi, [maca] ad ḥḍan tiweṣṣa nnes,
PSA 78:8 war ttiřin am řejdud nsen, ijj n jjiř aɣennan d iɣewwɣen, ijj n jjiř s wuř war imten u s arruḥ iɣdaren Arebbi.
PSA 78:9 Ayt n Ifrayim, imjebbaden n řqews, ɛeqben deg wass n umenɣi.
PSA 78:10 War ḥḍan Řɛahd ak-d AREBBI, ugin ad uyuren di Ccariɛa nnes.
PSA 78:11 Ttun timegga nnes d lmuɛjizat, tinni i d asen isscen.
PSA 78:12 Zzat i [tiṭṭawin n] řejdud nsen igga Netta ict n lmuɛjiza, di temmurt n Miṣra, deg iyyar n Ṣuɛan.
PSA 78:13 Netta ibḍa řebḥar uca isseẓwa ten zzayes, ijja aman ad bedden am weɣbar.
PSA 78:14 Netta issqebbeḍ i-ten s wass s useynu, s ǧiřet marra s tfawt n tmessi.
PSA 78:15 Netta ibḍa řejruf di řexřa, iwca i řgens ad isu s ufeyyeḍ amecnaw zeg [waman] ihewřen.
PSA 78:16 Netta ijja řɛunṣarat ad feyyḍent zi sseǧaḥ, Netta ijja aman ad hwan am yiɣezran.
PSA 78:17 Maca nitni arnin di ddnub nsen xas, ɣewwɣen x Umɛuǧi x kuřci [umi tuɣa aten] di tnezruft yuẓɣen.
PSA 78:18 Nitni jarrben Arebbi deg wuř nsen umi ttaren macca ɣar [meẓri n] řeɛmar nsen.
PSA 78:19 Ssiwřen ḍidd i AREBBI, nnan: “Ma izemmar Arebbi ad issewjed ṭṭabřa di řexřa?
PSA 78:20 Xzar, Netta iwta di teṣḍart, [ařami] dd-uzzřen [zzayes] waman d iɣezran. Ma izemmar Netta ad iwc aɣrum niɣ issewjed aysum i řgens nnes?”
PSA 78:21 S uya isřa SIDI uca iffugem. Timessi tarɣa ḍidd i Yaɛqub, ikkar-dd weɣḍab nnes ḍidd i Israil,
PSA 78:22 maɣar war uminem ca di AREBBI, war ttciřin deg usenjem nnes.
PSA 78:23 Netta yumur iseynuten sennej u yarzem tiwwura n ujenna.
PSA 78:24 Ifarreɣ-dd xasen ‘manna’ maḥend ad ccen, iwca asen imendi zeg ujenna.
PSA 78:25 Marra ccin aɣrum n yinni daysen řɛezz. Issekk asen macca nsen ɣar webrid ařami jjiwnen.
PSA 78:26 Netta igga asemmiḍ n manis dd-tneqqar tfuct ad ikkar deg ujenna, s tzemmar nnes issekk-dd asemmiḍ n ljanub.
PSA 78:27 Ijja aysum ad xasen dd-iwḍa am [wenẓar n] tɛejjajt, ijḍaḍ s wafriwen am yijdi n řebḥur.
PSA 78:28 Netta ijja i-ten ad wḍan di řwest n řmargeḥ n řɛeskar, ɣar marra iɣezdisen n tzeddiɣin nsen.
PSA 78:29 Nitni ccin u jjiwnen qaɛ, ksin min di tuɣa ḍemɛen.
PSA 78:30 Nitni tuɣa ɛad war ttwafekken zeg weḍmaɛ nsen, macca tuɣa ɛad deg uqemmum nsen,
PSA 78:31 [umi] xasen ikkar weɣḍab n AREBBI. Netta inɣa inni iǧan d iqebbuzen qaɛ jar asen, yarra-dd iḥudriyyen n Israil ad aḍaren [ɣar tɛejjajt n temmurt].
PSA 78:32 [Maca] qaɛ amenni arnin ggin ddnub, war uminen di lmuɛjizat nnes.
PSA 78:33 Netta ijja ussan nsen ad ɛdun am yijj n řefwar, iseggʷusa nsen am yict n řɛurret.
PSA 78:34 Xmi ten i ɣa ineɣ, arzun x Arebbi, dewřen-dd ɣares, arzun xas s cḍaret.
PSA 78:35 Nitni ɛeqřen aqa AREBBI d Taṣḍart nsen, Arebbi, Amɛuǧi x kuřci, d Amefdi nsen.
PSA 78:36 Maca nitni ssniɛmiřen zzates s uqemmum nsen, s yiřes nsen ssxarriqen xas.
PSA 78:37 War tuɣi uř nsen imten akides, war uyuren s řmanet ak-d Řɛahd nnes.
PSA 78:38 Netta [maca] tuɣa yareḥḥem [daysen] u isseṣřeḥ x řmuɛṣiyyet nneɣ, war yareddeǧ, maca aṭṭas n twařawin ijja zeg weɣḍab nnes u war iggi marra asɛar nnes ad ikkar.
PSA 78:39 Netta iɛqeř aqa nitni mɣir d aysum waha, d ijj n usemmiḍ iɛeddu war dd-ittɛiqqib.
PSA 78:40 Mecḥař n twařawin sɛaren t di řexřa, ggin as řeḥriq di tnezruft!
PSA 78:41 Twařa awarni tenneɣnit qeǧben Arebbi, ggin řeḥriq i Umqeddas n Israil.
PSA 78:42 War xarrṣen ca ɛad deg ufus nnes, deg wass nni řami ten ifda [zeg ufus] n wenni i-ten iḥṣaren,
PSA 78:43 ařami igga řeɛřamat di Miṣra, uřa d lmuɛjizat nnes deg iyyar n Ṣuɛan,
PSA 78:44 [ařami] igga iɣezran nsen ad dewřen d idammen, uřa d marra řɛunṣarat nsen, ḥima nitni war zemmaren ad [zzaysen] swen ɛad.
PSA 78:45 Issekk jar asen ijj n weyřaf n ibeɛɛac i ten iccen, uřa d iqarqriwen nni ten iteḥḥan.
PSA 78:46 Netta iwca řɣiǧet nsen i tmuɣri iṣarrḍen, uřa d ṣṣabet nsen i tmuɣri.
PSA 78:47 Inɣa tazayart nsen s tebrurri, uřa d izemmuren nsen s tkeḍfin.
PSA 78:48 Netta ijja řmař nsen i ubruri, tiḥimriwin nsen i wassamen.
PSA 78:49 Netta issekk řḥaduq n weɣḍab nnes jar asen, amuzzar d tefqeḥt d řḥeṣran, umi dd-issekk lmalakat s jjrayeḥ.
PSA 78:50 Netta iseggem ijj n umesraq i weɣḍab nnes, war issɛizz x řeɛmar nsen zi řmewt, isseɛdu řmař nsen i ṭṭaɛun.
PSA 78:51 Netta inɣa marra imenza di Miṣra, imenza n yeryazen daysen teryast deg iqiḍan n Ḥam.
PSA 78:52 Igga řgens nnes ad issgeɛɛed am wuǧi, issqebbeḍ i-ten am yict n tḥimart di řexřa.
PSA 78:53 Indeh i-ten di řaman, war ggʷiden walu, maɣar řebḥar idřa řɛedyan nsen.
PSA 78:54 Iwyi ten ɣar temmurt nnes iqeddsen, ɣar wedrar-a nni d ikseb ufus afusi nnes.
PSA 78:55 Issuffeɣ řegnus zzat i wudem nsen, igga ad asen dd-tekkar tesɣart nsen s ufiřu [n řeɛbar], uca issezdeɣ tiqebbař n Israil deg iqiḍan nsen.
PSA 78:56 [Maca] nitni qeǧben t, sɛaren AREBBI, Amɛuǧi x kuřci, war hḍin cchadat nnes.
PSA 78:57 Nitni dewřen ɣar ḍeffar, ggin s řeɣdar am řejdud nsen. Nitni weddaren am yict n fřitca n řqews i iteffɣen s řexdeɛ.
PSA 78:58 Sɛaren t s řegɛudi nsen [i x wehhben tiɣarṣa], arrin t ad yasem s řexyařat nsen ineqcen
PSA 78:59 AREBBI isřa man aya uca ittwassarɣ weɣḍab nnes, idweř iɛiff aṭṭas zi Israil.
PSA 78:60 Netta ijja Tazeddiɣt nnes di Cilu, Aqiḍun mani tuɣa izeddeɣ jar iwdan.
PSA 78:61 Netta yarra jjehd nnes ɣar tmeḥbast, uřa d talwizt nnes ɣar ufus n wenni t iḥeṣṣaren.
PSA 78:62 Netta isellem řgens nnes i ssif, yarɣa weɣḍab nnes x tesɣart nnes.
PSA 78:63 Timessi tecca iḥudriyyen nsen, tiɛzariyyin nsen war xasent dd-iwyen iɣennijen.
PSA 78:64 Ikehhanen nsen wḍan s ssif u tijjař nsen war runt ca.
PSA 78:65 [Xenni] ifaq-dd Sidi inu am ca n ijj i tuɣa iṭṭṣen, am yijj n bu-teɣruḍt nni isɣuyyu zi binu.
PSA 78:66 Netta iwta inni t iḥeṣṣaren ɣar ḍeffar, igga daysen řefḍiḥet i řebda.
PSA 78:67 Aqiḍun n Yusuf inḍar i-t, taqbič n Ifrayim war tt ifarz.
PSA 78:68 Ifarz taqbič n Yahuda, adrar n Ṣihyun wenni tuɣa ittexs.
PSA 78:69 Ibna Zzawect nnes Iqeddsen am [ijenwan] yuɛřan, am temmurt nni issemten i řebda.
PSA 78:70 Ifarz amsexxar nnes Dawud, iksi t zi řkurit n wuǧi.
PSA 78:71 Ijja i-t ad dd-yas zi ɣar ḍeffar n wuǧi, maḥend ad yarwes Yaɛqub, řgens nnes, uřa d Israil, řwart nnes.
PSA 78:72 Netta yarwes i-ten ɛlaḥsab řeṣfayet n wuř nnes, igewwed i-ten s ufus izemmaren.
PSA 79:1 [Azehhed n Asaf.] [A] AREBBI, řegnus udfen ɣar řwart nnec. Nitni ssxemjen Zzawect nnec Tameqqrant iqeddsen, arrin Urcalim d řxirbat.
PSA 79:2 Řxecbat n imsexxaren nnec wcin tent d macca i ijḍaḍ n ujenna, aysum n imtiqqan nnec i řewḥuc n temmurt.
PSA 79:3 Idammen nsen zeǧɛen ten am waman ɣar marra iɣezdisen n Urcalim, uřa d ijj war [ten] inḍiř.
PSA 79:4 Nedweř d řefdiḥet i jjiran nneɣ, d ustehzi d useḥqar i marra inni d aneɣ dd-innḍen.
PSA 79:5 Ar meřmi, [a] SIDI? Ma [xenni] ad teqqimed tseɛɛared i řebda? [Ma] ad tareɣ tusmi nnec [iqeddsen] am tmessi [i řebda]?
PSA 79:6 Farreɣ asɛar nnec x řegnus i war Cek issinen, x tigeldiwin nni war ittřiɣin x Yisem nnec.
PSA 79:7 Maɣar nitni ccin Yaɛqub, areddǧen Tazeddiɣt nnes.
PSA 79:8 War xaneɣ ɛeqqeř ɛlaḥsab řmuɛṣiyyet nneɣ n zic. Qeǧeq, ejj arreḥmet nnec ad kidneɣ temsagar, maɣar neḍɛef aṭṭas.
PSA 79:9 Ewc aneɣ afus nnec, [a] AREBBI, di ṭṭweɛ n uɛuǧi n Yisem nnec, fekk aneɣ u seṣřeḥ x ddnub nneɣ di ṭṭweɛ n Yisem nnec.
PSA 79:10 Mayemmi ɣa inin řegnus: “Mani iǧa AREBBI nsen?” Ejj antaqem n idammen ittwassizřen n řgens nnec ad idweř ittwassen jar řegnus jar tiṭṭawin nneɣ.
PSA 79:11 Ejj azehhar n umeḥbus ad dd-yas zzat i wudem nnec, ḥḍa iḥenjiren n řmewt ɛlaḥsab řemɣaret n uɣiř nnec.
PSA 79:12 Arr asen i jjiran nneɣ abehdeř nsen sebɛa n tseqqar ɣar weḥsin nsen, [abehdeř nsen] i zi cek feḍḥen, [a] Sidi inu.
PSA 79:13 Neccin d řgens nnec d wuǧi n ddmani n tarewsa nnec. Nettqada Cek i řebda, zi jjiř ař jjiř. Neccin ad nbarreḥ ccan nnec.
PSA 80:1 [I umeqqran n imeɣnajen.] [S teɣnint n ‘Tlillicin’.] [Cchadet n Asaf. Azehhed.]
PSA 80:2 Seř, [a] Ameksaw n Israil, Cek d wenni yarekkwesen Yusuf am wuǧi, Cek d wenni ittɣiman x ikiruben, ban-dd di tissiqt!
PSA 80:3 Sekkar jjehd ameqqran nnec zzat i wudem n Ifrayim d Binyamin d Manassa, as-dd ḥima ad aneɣ tfekked.
PSA 80:4 [A] AREBBI, arr aneɣ-dd, ejj udem nnec ad [xaneɣ] yarɣ, [xenni] ad nettwafekk.
PSA 80:5 [A] SIDI, AREBBI n řɛeskarat, mecḥař i ɣa tekked tᵉttxeyyaqed ɣar tẓaǧit n řgens nnec?
PSA 80:6 Cek tessecced ten s weɣrum n imeṭṭawen, tarrid ten ad swen imeṭṭawen s ijj n řmijař ittwaggen.
PSA 80:7 Cek teggid aneɣ d [ict n tcamma n] imcubbecen i jjiran nneɣ, řɛedyan nneɣ stᵉhezzan [zzayneɣ] jar asen.
PSA 80:8 Arr aneɣ-dd, [a] AREBBI n řɛeskarat, ejj udem nnec ad [xaneɣ] yarɣ, [xenni] ad nettwafekk.
PSA 80:9 Cek tqeřɛed ict n tzayart zi Miṣra, tuẓẓřed x řegnus, uca teẓẓud-i-tt [din].
PSA 80:10 Cek tesswejded as [amcan] u tarrid tt-i-dd ad tewwet iẓewran, tɛemmar [tzayart] marra tammurt.
PSA 80:11 Ttwassduryen idurar s tiři nnes, ticejjura n tengelt n Arebbi s řefruɛ nnes.
PSA 80:12 Tegga tiseḍwin nnes ad awḍent ař řebḥar, ifetwan nnes iziyzawen ař iɣzar [n Lfuraṭ].
PSA 80:13 Mayemmi tɣeḍřeḍ iɣebrawen nnes, ařami marra inni dd-ittekken x webrid řeqqḍen tt?
PSA 80:14 Iřef zeg wezɣar iqřeb [tazayart], [marra] min intenhezzan deg iyyar, aqa ihda i-tt.
PSA 80:15 [A] AREBBI n řɛeskarat, dweř-dd [ɣarneɣ], sijj-dd zeg ujenna, u xzar, arzef tazayart-a,
PSA 80:16 tthilla di tzayart tenni iẓẓu ufus nnec afusi, di mmic nni tessjehded i Yixef nnec.
PSA 80:17 Aqa tᵉttwassecmeḍ s tmessi, tᵉttwaqḍeɛ. Zeg useggʷed n wudem nnec ad weddaren.
PSA 80:18 Ejj afus nnec ad yiři ak-d weryaz n ufus nnec afusi, ak-d mmis n bnadem wenni tessjehded i Yixef nnec.
PSA 80:19 [Xenni] war xak nḥeyyed ca. Ejj aneɣ ad neddar, [xenni] ad nřaɣa x Yisem nnec.
PSA 80:20 [A] SIDI, AREBBI n řɛeskarat, arr aneɣ-dd, ejj udem nnec ad [xaneɣ] yarɣ, [xenni] ad nettwafekk.
PSA 81:1 [I umeqqran n imeɣnajen.] [S teɣnint n Ujitti, aryaz zi Jat.] [N Asaf.]
PSA 81:2 Sřiwřem i AREBBI, jjehd nneɣ, duqqzem s usřiwřew i AREBBI n Yaɛqub.
PSA 81:3 Sgeɛɛdem ict n yezři n uṣebbeḥ, awi abendir, řgambri miẓid d lharpa.
PSA 81:4 Suḍem deg uyicc n icarri ɣar ubeddi n uyur, ɣar tziri iqefřen, ɣar wass n řɛid nneɣ.
PSA 81:5 Maɣar ta d tawṣeyyet i Israil, ict n lfariḍa n AREBBI n Yaɛqub.
PSA 81:6 Igga i-tt d cchadet di Yusuf, řami dd-iffeɣ ḍidd i temmurt n Miṣra. Aqa sřiɣ ijj n yiřes war d as fehmeɣ.
PSA 81:7 Taɣruḍt nnes fekkeɣ tt zi ddqeř, ifassen nnes arxun zi tsuǧet [i tuɣa yarebbu].
PSA 81:8 Cek třaɣid di řeḥṣaret u Necc fekkeɣ cek [zzayes]. Necc arriɣ-dd xak am ttnuffareɣ deg wajjaj, ɣar waman n Mariba qeǧbeɣ cek. Silah.
PSA 81:9 Seř, řgens inu, [xenni] Necc ad cehdeɣ di řwesṭ nnec, [a] Israil, mařa [xenni] tuɣa texsed ad ɣari dd-tesřed.
PSA 81:10 War ɣarek ittiři ijj n arebbi d aɣrib, war sᵉjed uřa i yijj n arebbi i war tessined.
PSA 81:11 Necc d SIDI, AREBBI nnec, wenni cek dd-issuffɣen zi Miṣra. Arzem aqemmun nnec u Necc ad t ccureɣ.
PSA 81:12 Maca řgens inu war isři ca ɣar tmijja inu, Israil war d ayi ixs.
PSA 81:13 [S uyenni] jjiɣ ten i wuř nsen iqesḥen, [ařami] i ɣa uyuren di řecwar [n uzeǧif] nsen.
PSA 81:14 Mři dd-isřa ɣari řgens inu, mři Israil ixs ad yuyur deg ibriden inu!
PSA 81:15 [Xenni] mammec deɣya iři qḍiɣ x řɛedyan nsen, arriɣ afus inu ḍidd i yinni ten iḥeṣṣaren.
PSA 81:16 Inni icarrhen SIDI ad ɣares dd-dewřen ttmuruden deǧen, řweqt [n uxeǧeṣ] nsen ad yiři i řebda.
PSA 81:17 Iři aqa iwca as macca zi lemliḥ n yirden, [wah], iři s tamment zi jjarf aqa Necc ssjjiwneɣ cek.
PSA 82:1 [Azehhed n Asaf.] AREBBI ibedd di tmesmunt n Arebbi. Netta iḥekkem s řḥeqq di řwest n irebbiten.
PSA 82:2 Mecḥař i ɣa tekkem tḥekkmem s řɣecc, ad tessgeɛɛdem udem n iɛeffanen? Silah.
PSA 82:3 Ḥekmem s řḥeqq x umarxu u x uyujiř, aɣem tasɣart i wenni ittwaḥeṣṣaren u i umezřuḍ.
PSA 82:4 Fekkem amarxu d umezřuḍ, fekk i-t zeg ufus n iɛeffanen.
PSA 82:5 Nitni war ttessnen u war fehhmen, gguren ttennḍen di taǧest, marra dsusa n temmurt ttenhezzan.
PSA 82:6 Necc nniɣ: “Kenniw d irebbiten, kenniw marra d iḥenjiren n Umɛuǧi x kuřci!”
PSA 82:7 Ɛad ad temtem am [kuř] bnadem, ad tewḍam am kuř ijjen zi řḥukkam.
PSA 82:8 Kkar, [a] AREBBI, ḥkem x temmurt, minzi Cek ad tᵉṭṭfed tasɣart nnec zi marra řegnus.
PSA 83:1 [Izři. Azehhed n Asaf.]
PSA 83:2 [A] AREBBI, war sseɣd, war ttegg Ixef nnec d adehcur, war seqqar ca, [a] Arebbi.
PSA 83:3 Maɣar xzar, řɛedyan nnec ttarruǧuden, inni Cek icarrhen ssgeɛɛden azeǧif.
PSA 83:4 Ttxarrṣen deg ict n tmeɛmuč di tnuffar ḍidd i řgens nnec, ttemcawaren x yinni ittwaḥḍan zzayek.
PSA 83:5 Qqaren: “Asem-dd, ejj aneɣ ad ten nteḥḥa am řgens, [ařami] war ittidar ɛad deg yisem n Israil.”
PSA 83:6 Maɣar ttemcawaren s wuř d ijj, aqa tteggen ijj n řɛahd ḍidd i Cek:
PSA 83:7 iqiḍan n Idum d ayt n Ismaɛil, Mu’ab d ayt n Hajar,
PSA 83:8 Jabal d Ɛammun d Ɛamaliq, Filicit d imezdaɣ n Ṣur.
PSA 83:9 Uřa d Accur immarni ɣarsen. Nitni tuɣa aten d afus ijhed i ayt n Luṭ. Silah.
PSA 83:10 Egg asen am Midyan d Sisara, am Yabin ɣar yeɣzar n Qicun.
PSA 83:11 Nitni ttwateḥḥan ɣar Ɛayn-Dur, dewřen d řeɣbar x temmurt.
PSA 83:12 Egg i-ten ak-d tarwa n taṣiřet nsen am Ɣurab d Di’b, marra ayt n jjehd nsen am Zabaḥ d Ṣalmunnaɛ,
PSA 83:13 inni iqqaren: “Ejj aneɣ ad neṭṭef tizeddiɣin n AREBBI i yixef nneɣ d řwart.”
PSA 83:14 [A] AREBBI inu, egg i-ten am yijj n uqellij ittennḍen [di řeɛwin], am uřum zzat i wudem n usemmiḍ.
PSA 83:15 Am tmessi tessreqqa azɣar, am uceɛɛař ittett idurar,
PSA 83:16 aẓẓeř ammu xasen s usemmiḍ nnec, snexřeɛ i-ten s tḥaryaḍt nnec.
PSA 83:17 Řeḥḥef udem nsen s řeḥya, maḥend nitni, [a] SIDI, ad arzun x Yisem nnec.
PSA 83:18 Ejj i-ten ad barrqen u ad arejfen i řebda, ejj i-ten ad seḍḥan uca ad ttwahellken,
PSA 83:19 ḥima ad ssnen, aqa Cek waha i ɣar iǧa Yisem ‘SIDI’, Amɛuǧi x marra tammurt.
PSA 84:1 [I umeqqran n imeɣnajen.] [S teɣnint n Ujitti, aryaz zi Jat.] [Zeg ayt n Quraḥ. Azehhed.]
PSA 84:2 Mammec ttɛizzent tzeddiɣin nnec, [a] SIDI n řɛeskarat!
PSA 84:3 Řeɛmar inu dayes meẓri, [wah,] ifenna [s uweḥḥec] x řemraḥat n SIDI, uř inu d ddat inu sřiwřiwen i Arebbi iddaren.
PSA 84:4 Uřa d ẓẓawec ittaf ɛad ict n taddart, u tafarǧest tufa ijj n řɛucc i yixef nnes i di tessrussa issḍawen nnes, [ɣar] iɛalṭaren nnec, [a] SIDI n řɛeskarat, Ajeǧid inu d AREBBI inu!
PSA 84:5 Sseɛd nsen n yinni izeddɣen di Taddart nnec, aqa aten ttṣebbaḥen i Cek břa qeṭṭu. Silah.
PSA 84:6 Sseɛd n iwdan inni [ittafen] jjehd nsen dayek, [inni iḥeṭṭan] ibriden igeɛɛden [ɣar Zzawect nnec Tameqqrant] deg wuř nsen.
PSA 84:7 Xmi ttcuqan deg ijj n řewḍa n teɣzurt n tcejjura n umettin, arrin t d řɛunṣar. Uřa d anẓar amezwaru ad [ten] issduriy s lbarakat.
PSA 84:8 Nitni gguren zi jjehd ař jjehd, ad dd-banen ɣar AREBBI di Ṣihyun.
PSA 84:9 [A] SIDI, AREBBI n řɛeskarat, seř i tẓaǧit inu, sḥess, [a] AREBBI n Yaɛqub! Silah.
PSA 84:10 [A] AREBBI, [Cek d] taseddart nneɣ n useřqi, aqa xzar ɣar wudem n umedhun nnec!
PSA 84:11 Maɣar ijj n wass di řemraḥat nnec iḥřa x wařef [n wussan nneɣni]. Meɛlik ufiɣ ad beddeɣ x tnebdat n Taddart n AREBBI inu, uřa d atlaɛ deg iqiḍan n tuɛeffna.
PSA 84:12 Maɣar SIDI AREBBI d tafuct d tseddart i useřqi, SIDI ad iwc aḥinni d uɛuǧi. Netta war issɛizzi řxar deg inni igguren s řekmaret.
PSA 84:13 [A] SIDI n řɛeskarat, sseɛd n bnadem nni dayek ittiqqan.
PSA 85:1 [I umeqqran n imeɣnajen.] [Zeg ayt n Quraḥ. Azehhed.]
PSA 85:2 Cek tarḍid x temmurt, [a] SIDI, tessenqeřbed tameḥbast n Yaɛqub.
PSA 85:3 Tekksed řmuɛṣiyyet x řgens nnec, tedřid marra ddnub nnes. Silah.
PSA 85:4 Cek tmenɛed marra afugem, tesstewwjed řḥaduq n weɣḍab nnec.
PSA 85:5 Arr aneɣ, [a] AREBBI n usenjem nneɣ, ttu aɣḍab nnec xaneɣ.
PSA 85:6 Ma texsed ad xaneɣ tesɛared i řebda? Ma ad tegged aɣḍab nnec ad iqqim zi jjiř ař jjiř?
PSA 85:7 Ma war d aneɣ tejjid ad neddar ɛawed, ḥima ad ac ifarḥ řgens nnec?
PSA 85:8 Scen aneɣ-dd tamexsiwt nnec icewwaren, [a] SIDI, ewc aneɣ asenjem nnec.
PSA 85:9 Necc xseɣ ad sřeɣ min ɣa issiweř Arebbi, SIDI, maɣar Netta ad issiweř ak-d řgens nnes u ak-d imtiqqan nnes x řehna. Ɣarwem, mařa nitni ad dd-dewřen ttcařan [x yixef nsen].
PSA 85:10 Nican, aqa yudes-dd usenjem nnes i yinni zzayes itteggʷeden, ḥima aɛuǧi [nnes] ad izdeɣ di temmurt nneɣ.
PSA 85:11 Tamexsiwt icewwaren d řaman ad mmsagaren, tasegda d řehna ad mmsudumen.
PSA 85:12 Tidett ad teɣmi zi temmurt, tasegda ad tessijj ɣar swadday zeg ujenna.
PSA 85:13 SIDI ad iwc uřa d min iṣebḥen, tammurt nneɣ ad tewc řɣiǧet nnes.
PSA 85:14 Tasegda ad as tizwar zzat i wudem nnes, ad teḥḍa jjurret n iṣuraf nnes.
PSA 86:1 [Taẓaǧit n Dawud.] [A] SIDI, arr amezzuɣ nnec [ɣari], seř ayi, maɣar necc di řeɣben u zeřḍeɣ.
PSA 86:2 Ḥḍa x řeɛmar inu, maɣar necc d amtiqqi, [a] AREBBI inu, senjem amsexxar nnec, wenni xak ittcařan.
PSA 86:3 Ḥinn xafi, [a] Sidi inu, maɣar ttřaɣiɣ xak ass am imun.
PSA 86:4 Sfarḥ řeɛmar n umsexxar nnec, maɣar i Cek, [a] Sidi inu, ssgeɛɛadeɣ řeɛmar inu.
PSA 86:5 Maɣar Cek, [a] Sidi inu, d aṣebḥan u d amsameḥ, ɣarek tamexsiwt icewwaren i marra inni ɣarek ittřaɣan.
PSA 86:6 [A] SIDI, seř i tẓaǧit inu, ḥekkar i tmijja n tutra inu.
PSA 86:7 Deg wass n řeḥṣaret inu ttřaɣiɣ-dd ɣarek, maɣar Cek ad xafi dd-tarred.
PSA 86:8 Jar irebbiten war iǧi uřa d ijjen am Cek, [a] Sidi inu, war din min yarwesen di tmegga nni teggid.
PSA 86:9 Marra řegnus i teggid, ad dd-asen, ad sejden zzat i wudem nnec, [a] Sidi inu, ad ssɛuǧen Isem nnec.
PSA 86:10 Maɣar Cek d ameqqran u Cek d wenni itteggen lmuɛjizat, Cek weḥḥdek d AREBBI [i teǧid].
PSA 86:11 Scen ayi abrid nnec, [a] SIDI, [ḥima] ad uyureɣ di tidett nnec, smun uř inu maḥend ad ggʷedeɣ Isem nnec.
PSA 86:12 [A] Sidi inu, AREBBI inu, xseɣ ad Cek qadiɣ s marra wuř inu, ad cennɛeɣ Isem nnec i řebda qaɛ.
PSA 86:13 Maɣar tamexsiwt nnec icewwaren temɣar xafi, Cek tfekked řeɛmar inu zi řaǧaɣ n řaxart.
PSA 86:14 [A] AREBBI, imɛeffaren kkaren-dd akidi, ict n bandiyya n ayt n bu-řexcunet arezzun ad [nɣen] řeɛmar inu. Cek war ɣarsen teǧid qibač i tiṭṭawin nsen.
PSA 86:15 [Maca] Cek, [a] Sidi inu, d Arebbi d arḥim d uḥnin, ɣarek ttasiɛ n řxaḍar uřa d tamexsiwt icewwaren d řaman mɣaren.
PSA 86:16 Xzar-dd ɣari u ḥinn xafi, egg jjehd nnec deg umsexxar nnec, uca senjem mmis n tayya nnec.
PSA 86:17 Egg ict n řeɛřamet di ṭṭweɛ inu, ḥima inni d ayi icarrhen ad t ẓaren ad seḍḥan, maɣar Cek, [a] SIDI, tewcid ayi afus u tessfewwjed xafi.
PSA 87:1 [Azehhed, izři n ayt n Quraḥ.] Dsas nnes [aqa-t] x idurar iqeddsen.
PSA 87:2 SIDI ittexs tiwwura n Ṣihyun aṭṭas x marra tizeddɣin n Yaɛqub.
PSA 87:3 Timesřayin yuɛřan qqaren xam, [a] tandint n AREBBI. Silah.
PSA 87:4 Necc ad barrḥeɣ Rahab d Babil ɣar yinni i d ayi issnen. Xzar, Filicit d wenni zi Ṣuri ak-d Ukuci ... ‘Wanita ittwaxeřqed-dd din!’
PSA 87:5 Maca x Ṣihyun ad inin: ‘[Ina] marra ttwaxeřqen-dd dayes!’, Amɛuǧi x kuřci ad tt issemten.
PSA 87:6 SIDI ad izemmem di lista n řegnus: ‘Wanita ixřeq-dd din’. Silah.
PSA 87:7 Nitni ttɣennajen am ceṭṭḥen: ‘Tařawin inu marra dayem!’
PSA 88:1 [Izři, azehhed n ayt n Quraḥ.] [I umeqqran n imeɣnajen,] [s teɣnint n ‘Izři n wecḍan’ ɣar řeḥṣarat.] [Axemmi n Hayman, Azraḥi.]
PSA 88:2 [A] SIDI, AREBBI n usenjem inu, deg wass i di dd ɣa sɣuyeɣ ɣarek s ǧiřet,
PSA 88:3 ejj [xenni] ad dd-tas tẓaǧit inu zzatek, ewc amezzuɣ nnec i uřaɣi inu.
PSA 88:4 Maɣar řeɛmar inu ijjiwen s řmuṣibat, tudart inu tudes-dd řaxart.
PSA 88:5 Necc ttwaḥessabeɣ am yinni dd-ihekkwan deg weḥfur [n wenḍeř], am ijj n weryaz umi war dayes jjhed [ɛad].
PSA 88:6 Aqa ttwaḥuzeɣ jar imettan, am yinni ittwanɣen inni izzřen deg wenḍeř, inni war ten tᵉttidared [ɛad], ttwaqeḍɛen nitni zeg ufus nnec.
PSA 88:7 Cek teggid ayi deg wenḍeř yuǧɣen qaɛ, di taǧest, di řaǧaɣ.
PSA 88:8 Asɛar nnec idqeř xafi aṭṭas, s marra řemwaj [n wesɛar] nnec tessdeǧed ayi. Silah.
PSA 88:9 Imqarraben inu tessiggʷejed i-ten xafi, tarrid ayi d nnɛi i nitni. Ittwabelleɛ xafi, war zemmareɣ ad dd-ffɣeɣ.
PSA 88:10 Tiṭṭ inu teɛmec s řeɣben. [A] SIDI, ass marra ttřaɣiɣ ɣarek, necc sswiẓẓḍeɣ ifassen inu ɣarek.
PSA 88:11 Ma ad tegged ict n lmuɛjiza deg imettan? Niɣ ad dd-kkaren řexyařat [n imettan], ma ad Cek qadan? Silah.
PSA 88:12 Ma ad barrḥen s tmexsiwt nnec icewwaren deg wenḍeř, s řaman nnec di [tesraft n] uhellek?
PSA 88:13 Ma ad ttwassnent lmuɛjizat nnec di taǧest, tasegda nnec di temmurt n tattut?
PSA 88:14 [A] SIDI, necc ttřaɣiɣ Cek, taẓaǧit inu tᵉttas-dd zzatek ɣar uteffu.
PSA 88:15 Mayemmi, [a] SIDI, tneṭṭared řeɛmar inu, [mayemmi] tᵉssnuffared udem nnec zzayi?
PSA 88:16 Zi temẓi inu necc di řeɣben u ggureɣ ɣar unuri, ksiɣ isnexriɛen nnec [ḍidd inu], ttwaḥṣareɣ [zzaysen].
PSA 88:17 Tettekk xafi řḥaduq n weɣḍab nnec, itteḥḥa ayi useggʷid nnec.
PSA 88:18 Ass marra ittenneḍ ayi-dd am waman, ittquwwar ayi-dd marra.
PSA 88:19 Amɛizz inu d umeddukkeř inu tessiggʷejed i-ten xafi, inni d ayi issnen inu [aqa aten ttwařeḥḥfen] s taǧest.
PSA 89:1 [Axemmi n Itan, Azraḥi.]
PSA 89:2 Ad ɣennjeɣ x tmegga n tmexsiwt icewwaren n SIDI i řebda, ad barrḥeɣ řaman nnec s uqemmum inu zi jjiř ař jjiř.
PSA 89:3 Maɣar nniɣ: “Tamexsiwt icewwaren tᵉttwabna i řebda, aqa tḍemned řaman nnec deg ijenwan.”
PSA 89:4 “Necc ggiɣ ijj n Řɛahd ak-d wenni zzayi ittwafarzen, jjuǧeɣ i umsexxar inu Dawud:
PSA 89:5 ‘Necc ad ḍemneɣ zzariɛet nnec i řebda u ad bniɣ řɛarc nnec zi jjiř ař jjiř.’” Silah.
PSA 89:6 Ijenwan ttqadan [Cek] x lmuɛjiza[t] nnec, [a] SIDI, deg wegraw n imqeddasen [ttqadan Cek] x řaman nnec.
PSA 89:7 Maɣar man wen deg iseynuten [izemmar] ad ittwaqedd ak-d SIDI, [man wen i iǧan] jar warrawen n irebbiten [izemmar] ad imqudda ak-d SIDI?
PSA 89:8 Arebbi iwɛar aṭṭas deg wegraw n imqeddasen, marra inni d as dd-innḍen tteggʷeden zzayes.
PSA 89:9 [A] SIDI, AREBBI n řɛeskarat, man wen ɣar iǧa tizemmar am Cek, [a] SIDi! Řaman nnec ittenneḍ i Cek.
PSA 89:10 Cek tḥekkmed x nnfaxet n řebḥar. Xmi dd-ttnekkaren řemwaj nnes, aqa Cek taressid i-ten.
PSA 89:11 Aqa třebzed Rahab am yijjen wenni issnuqqben, tzeǧɛed řɛedyan nnec s uɣiř nnec ijehden.
PSA 89:12 Nnec d ijenwan, nnec uřa d tammurt. Ddunit d uɛemmar nnes teggid asen dsas.
PSA 89:13 Cek txeřqed-dd ccamal d ljanub, Tabur d Hirmun sřiwřiwen s Yisem nnec.
PSA 89:14 Aqa ɣarek aɣiř i di [teggid] taryast, afus nnec ijhed, afus afusi nnec ittwassgeɛɛad.
PSA 89:15 Tasegda d řḥeqq aqa aten d dsas n řɛarc nnec, tamexsiwt icewwaren d řaman ittizwaren zzat i wudem nnec.
PSA 89:16 Sseɛd n řgens i issnen [ad meyyzen] asuḍi s wesruddeḥ [n řbuq], [a] SIDI, nitni ad uyuren di tfawt n wudem nnec.
PSA 89:17 Nitni ad farḥen ass marra s Yisem nnec uca ad dd-ttwassgeɛɛden s tsegda nnec,
PSA 89:18 maɣar Cek d řemřaḥet n jjehd nsen, icc nneɣ ad ittwassgeɛɛed s řxaḍar nnec.
PSA 89:19 Taseddart nneɣ n useřqi n SIDI, ajeǧid nneɣ aqa-t n Umqeddas n Israil.
PSA 89:20 Ict n twařa tuɣa tessiwřed di řewḥiy x Umtiqqi nnec, tennid: “S [ufus n] ijj n bu-teɣruḍt ggiɣ twiza, ijj wenni ittwafarzen zi řgens ssgeɛɛdeɣ-t.
PSA 89:21 Necc ufiɣ Dawud, amsexxar inu, dehneɣ t s zzect iqeddsen,
PSA 89:22 maḥend afus inu ad yiři imten akides, [wah] aɣiř inu ad t issemḥed.
PSA 89:23 Řeɛdu war t issaggʷad, mmis n řmuɛṣiyyet war t iḥeṣṣar.
PSA 89:24 Inni t iḥeṣṣaren ad ten řebzeɣ zzat i wudem nnes, inni t icarrhen ad ten wteɣ.
PSA 89:25 Řaman inu d tmexsiwt inu icewwaren, aqa aten akides [i ɣa yiřin], ad ittwassgeɛɛed yicc nnes s Yisem inu.
PSA 89:26 Ad ssarseɣ afus nnes x řebḥar, afus nnes afusi x iɣezran.
PSA 89:27 Netta ad xafi dd-iřaɣa: ‘Aqa Cek d Baba inu, Arebbi inu, d Taṣḍart n usenjem inu!’
PSA 89:28 Necc ad t ggeɣ d amenzu [inu], Amɛuǧi x ijeǧiden n temmurt.
PSA 89:29 I řebda ad ḥḍiɣ tamexsiwt inu icewwaren zzates, u Řɛahd inu ad ɣares iqqim s řmanet.
PSA 89:30 Ad ẓẓuɣ zzariɛet nnes i řebda, řɛarc nnes min ɣa kken ussan n ujenna ǧan.
PSA 89:31 Mařa iḥenjiren nnes ḥeyyden x Ccariɛa inu, war gguren ak-d lfarayiḍ inu,
PSA 89:32 mařa ssfesden tiweṣṣa inu, war ḥeṭṭin řumurat inu,
PSA 89:33 [xenni] ad xeǧṣeɣ aɛeddu nsen s weɛmud, řmuɛṣiyyet nsen s teyyita.
PSA 89:34 [Maca] war xasen ttekkseɣ tamexsiwt inu icewwaren, war nekkareɣ řmanet inu.
PSA 89:35 War ttɣeṣṣabeɣ Řɛahd inu, min dd-iffɣen zeg iyencicen inu, war t ttbeddiřeɣ.
PSA 89:36 Necc jjuǧeɣ ict n twařa ɣar tqeddast inu: ’War ssxarriqeɣ ɛemmarṣ x Dawud!’
PSA 89:37 Zzariɛet nnes ad teqqim i řebda, u řɛarc nnes [ad din ibedd] zzati am tfuct.
PSA 89:38 Netta ad iqqim ibedd i řebda am tziri u acehhad deg iseynu[ten] aqa-t d amtiqqi.” Silah.
PSA 89:39 [Maca] Cek tɛarrned t ɣar uɣezdis, tenḍared t, Cek tfuggmed x umedhun nnec.
PSA 89:40 Cek tenḍared Řɛahd ak-d umsexxar nnec, tfesded ttaj [n weɛzař] nnes [s ubeǧaɛ] n temmurt.
PSA 89:41 Tɣeḍřed marra řeḥyud nnes, thedmed tineddam nsen ifaryen.
PSA 89:42 Marra inni dd-ikkin abrid keccḍen t, netta idweř d aseḥqar i jjiran nnes.
PSA 89:43 Cek tessgeɛɛded afus afusi n yinni t iḥeṣṣaren, tessfarrḥed marra řɛedyan nnes.
PSA 89:44 Cek tessenqeřbed řeqḍeɛ n ssif nnes, Cek tejjid t war ittɣimi ibedd deg umenɣi.
PSA 89:45 Cek tessbedded aẓri nnes, řkursi nnes igellden tenḍared t ɣar temmurt.
PSA 89:46 Cek tessemẓid as ussan n temẓi nnes, tedřid t s řefḍiḥet. Silah.
PSA 89:47 Ař meřmi ɛad, [a] SIDI, ad tessnuffared Ixef nnec břa qeṭṭu, ad yarɣ wesɛar nnec am tmessi?
PSA 89:48 Ɛqeř x řmijař n tudart inu! Mayemmi dd-txeřqed marra arraw n bnadem amenni baṭeř?
PSA 89:49 Man aryaz ijehden war ittwiři řmewt, [man aryaz] i ɣa ifekken řeɛmar nnes zeg ufus n řaxart? Silah.
PSA 89:50 [A] Sidi inu, mani ǧant tmegga n tmexsiwt nnec n zic, tinni x tuɣa tejjuǧed i Dawud s řmanet nnec?
PSA 89:51 [A] Sidi inu, ɛqeř x useḥqar n imsexxaren nnec, nni arebbuɣ deg weḥsin inu zeg ubarru n marra řegnus,
PSA 89:52 i zi d ayi sseḥqaran řɛedyan nnec, [a] SIDI, i zi sseḥqaran iṣuraf n umedhun nnec.
PSA 89:53 Ad ittwabarek SIDI i řebda qaɛ! Amin, [wah,] amin!
PSA 90:1 [Taẓaǧit n Musa, aryaz n AREBBI.] [A] Sidi inu, Cek tuɣa d Tazeddiɣt nneɣ zi jjiř ař jjiř.
PSA 90:2 Qbeř ma ad iřin idurar, qbeř ma ad dd-tessuffɣed tammurt d ddunect, [wah] aqa Cek d Arebbi zi řebda ař řebda.
PSA 90:3 Cek tejjid bnadem ad iɛqeb ɣar tɛejjajt. Teqqared: “Ɛeqbettiw-dd tarwa n bnadem!”
PSA 90:4 Maɣar ařef n iseggʷusa di tiṭṭawin nnec am wass n iḍennaḍ nni iɛdun, uřa am yict n [nnubet n] tɛessast di ǧiřet.
PSA 90:5 Cek tfarḍed ten, aqa aten am yiḍeṣ. Ɣar tuffut ggin am arbiɛ iyemman.
PSA 90:6 Ɣar tuffut ittzᵉyziw [arrbiɛ] uca iyemma, ɣar tmeddit ittwamjar, ittaẓeɣ.
PSA 90:7 Maɣar neccin nefna s weɣḍab nnec, nennexřeɛ zeg wesɛar nnec.
PSA 90:8 Cek teggid řmuɛṣiyyet nneɣ qibač nnec, ddnub nneɣ innuffaren di tfawt n wudem nnec.
PSA 90:9 Maɣar marra ussan nneɣ ad ɛdun deg ufugem nnec isseggʷaden, nesseɛdu iseggʷusa nneɣ am yijj n usuḍi.
PSA 90:10 Ussan n tudart nneɣ ttekken sebɛin n iseggʷusa, niɣ, meřmi i ɣa niři nejhed, aqa tmanyin n iseggʷusa. Min dayes d aɛuǧi, [ittaru-dd] tamara d řweḥran, deɣya tᵉttekk tɛeddu u neṭṭaw ɣar din.
PSA 90:11 Man wen issnen řqesḥan n weɣḍab nnec, [u man wen issnen] tiggʷudi zzayek [am dd-ittřiq] ak-d aduqqez nnec [n ufugem]?
PSA 90:12 Seřmed aneɣ ad nḥesseb ussan nneɣ, ḥima ad dd-nawi uř [iccuren s] tiɣit.
PSA 90:13 Dweř-dd, [a] SIDI, ař meřmi? Ḥinn x imsexxaren nnec.
PSA 90:14 Sjjiwen aneɣ ɣar [u]teffu s tmexsiwt nnec icewwaren, [xenni] ad nesřiwřew, ad nfarḥ marra ussan nneɣ.
PSA 90:15 Sfarḥ aneɣ anect n wussan i d aneɣ teḥṣared, [anect n] iseggʷusa i di neẓra řɣar.
PSA 90:16 Scen řxedmet nnec i imsexxaren nnec, řɛezz nnec x iḥenjiren nsen.
PSA 90:17 Ad xaneɣ tehwa řeḍrafet n Sidi, AREBBI nneɣ, ḍmen Cek řxedmet n ifassen nneɣ, [wah], řxedmet n ifassen nneɣ ḍmen i-tt.
PSA 91:1 [Tmijja tamezwarut:] Wenni izeddɣen deg udurri n Umɛuǧi x kuřci, aqa netta ad issens di tiři n Umzemmar x kuřci.
PSA 91:2 [Tmijja wiss tnayen:] Ad iniɣ i SIDI: [Cek] d amcan inu n tarewřa d lburj inu, AREBBI inu, Wenni x ttecřeɣ!
PSA 91:3 [Tmijja tamezwarut:] Maɣar Netta ad cek ifekk zi řfex n ineymaren n ijḍaḍ, zi ṭṭaɛun yareddǧen.
PSA 91:4 S arric nnes ad cek ideř, sadu wafriwen nnes ad tafed adurri. Řmanet nnes d taseddart tameqqrant d arruḍ n wuzzař.
PSA 91:5 War tᵉtteggʷeded ca zeg unexřiɛ n ǧiřet, zi fřitca n řqews i [din] iṭṭawen s wass,
PSA 91:6 uřa zi ṭṭaɛun i dd-ittennḍen di taǧest, zi lhalak i yareddǧen s uziř.
PSA 91:7 Waxxa ad wḍan ařef ɣar uɣezdis nnec u ɛecra ařef ɣar afus afusi nnec, [ɛad] war cek dd-ittikkʷiḍ.
PSA 91:8 Ad twařid aya s tiṭṭawin nnec waha, ad tẓared mammec ɣa ittwaxřef zeg iɛeffanen.
PSA 91:9 [Tmijja wiss tnayen:] Maɣar [xak]: ‘Cek [a] SIDI, aqa Cek d amcan inu n tarewřa!’ [Tmijja tamezwarut] Aqa cek teggid Amɛuǧi x kuřci d tazeddiɣt i yixef nnec,
PSA 91:10 war dayek tneṭṭeḥ tuɛeffna, uřa d ict n jjriḥect war dd-tqarrab ca ɣar uqiḍun nnec,
PSA 91:11 maɣar Netta ad xak yumur lmalakat nnes, maḥend ad cek ḥḍant di marra ibriden nnec.
PSA 91:12 Ad cek ksin x ifassen nsent, ḥima aḍar nnec war ineggeḥ aẓru.
PSA 91:13 Ad tɛefsed x weyrad izehharen u x třefsa, ad tɛejned x weyrad ameẓyan d řhaycet [n řebḥar].
PSA 91:14 [Tmijja wiss třata zi Arebbi:] Umi dd-iqqen netta ɣari, Necc ad t ssnejmeɣ. Necc ad t ssgeɛɛdeɣ, maɣar netta issen Isem inu.
PSA 91:15 Netta ad ayi iřaɣa u Necc ad xas dd-arreɣ. Di řeḥṣaret aqa ayi ɣares. Necc ad t fekkeɣ, ad as ssɛuǧeɣ.
PSA 91:16 Necc ad t ssjjiwneɣ ak-d tuzzeggart n wussan, Necc ad as ssecneɣ asenjem inu.
PSA 92:1 [Azehhid. Ijj n izři i wass n ssebt.]
PSA 92:2 Mammec iṣbeḥ maḥend ad nqada SIDI, ad nzehhed i Yisem nnec, [a] Amɛuǧi x kuřci,
PSA 92:3 maḥend ad nbarreḥ s tmexsiwt nnec icewwaren ɣar tuffut, řaman nnec di ǧyaři,
PSA 92:4 [di lharpa] s ɛecra n ifiřan u di lharpa, s [tirart x] ifiřan n řgambri.
PSA 92:5 Maɣar Cek tessfarḥed ayi, [a] SIDI, s tmegga nnec, necc ad sřiweřweɣ x řefɛayeř n ifassen nnec.
PSA 92:6 Mammec mɣarent tmegga nnec, [a] SIDI, mammec uǧɣen ixarriṣen nnec!
PSA 92:7 Ijj n uqeffuḥ war ɣares min ɣa iɛawed, ijj n ubuhaři war ifehhem man aya.
PSA 92:8 Mařa iɛeffanen ɣemmyen am arbiɛ, u marra inni itteggen řmuɛṣiyyet ttnewwaren, [aqa aya ad issiweḍ] ateḥḥi nsen i řebda qaɛ.
PSA 92:9 Cek d Amɛuǧi x kuřci i řebda, [a] SIDI!
PSA 92:10 Maɣar xzar, řɛedyan nnec, SIDI, řɛedyan nnec ad fnan, marra inni itteggen řɣecc ad ttwazeǧɛen.
PSA 92:11 Cek ad tessgeɛɛded accaw inu am wenni n iɣayḍ n řexřa ak-d waccawen d iziraren, ttwadehneɣ s zzect n ṭri.
PSA 92:12 Tiṭṭ inu ad tẓar inni xafi ittcekkmen, imezzuɣen inu ad sřen i iɣrimen inu inni xafi dd-ikkaren.
PSA 92:13 Amsegged ad inewwar am tcejjart n tini, ad iɣmi am tcejjart n tengelt x [idurar n] Lubnan,
PSA 92:14 inni ittwaẓẓun di Taddart n SIDI, ad nnuwaren di řemraḥat n AREBBI nneɣ.
PSA 92:15 Nitni ad wcen řɣiǧet di tewsar, ad qqimen ṣeḥḥen d ṭri.
PSA 92:16 maḥend ad barrḥen, belli SIDI aqa-t nican. Netta d Taṣḍart inu u war dayes bu řɣecc.
PSA 93:1 SIDI iḥekkem, Netta yarḍ s lɛaḍama, SIDI yarḍ s jjehd am s yijj n uḥezzam. Wah, ddunect tbedd temten, war tᵉttenhezzi ca.
PSA 93:2 Řkursi igellden nnec imten zi mecḥař uya, Cek teǧid zi řebda.
PSA 93:3 Iɣezran ssgeɛɛden, [a] SIDI, iɣezran ssgeɛɛden tmijja nsen. Iɣezran ad ssgeɛɛden [řḥess n] zzhir nsen.
PSA 93:4 SIDI di řuɛřa ijhed x zzhir n waṭṭas n waman ijehden u x uhaji n řebḥar.
PSA 93:5 Cchadat nnec aqa daysent řaman. Taqeddast tzehhej i Taddart nnec, [a] SIDI, ař marra ussan.
PSA 94:1 [A] Arebbi n untaqem, [a] SIDI, Arebbi n untaqem, ban-dd di tissiqt!
PSA 94:2 [A,] Řqaḍi n temmurt, sgeɛɛed Ixef nnec, arr tasɣart i imɛeffaren am min ssdaḥeǧen nitni.
PSA 94:3 Mecḥař i ɣa kken ɛad iɛeffanen, [a] SIDI, mecḥař i ɣa kken neggzen iɛeffanen s řefraḥet,
PSA 94:4 ad qqimen ssawařen awařen iqesḥen, [mecḥař] i ɣa qqimen marra inni itteggen řmuɛṣiyyet ad ssemɣaren ixef nsen?
PSA 94:5 [A] SIDI, nitni řebbzen řgens nnec, ḥeṣṣaren tasɣart n řwart nnec.
PSA 94:6 Nitni neqqen tajjač d ubarrani, ɣarrṣen i iyujiřen.
PSA 94:7 Nitni qqaren: “SIDi war tt ittwiři, AREBBI n Yaɛqub war d as ittḥekkar.”
PSA 94:8 Fetnem kenniw iqeffuḥen di řgens, [jmiɛ] ak-d ibuhařiyyen, meřmi i ɣa tdewřem tfehhmem?
PSA 94:9 Ma war ittesři wenni iẓẓun amezzuɣ? Ma war iẓarr wenni iggin tiṭṭ?
PSA 94:10 Ma war ittɛaqeb wenni ittwebbxen řegnus, wenni isseřmaden tussna i bnadem?
PSA 94:11 SIDI yareggeb x ixarriṣen n iwdan, aqa aten am yijj n usuḍi waha.
PSA 94:12 Sseɛd n weryaz nni tᵉttwebbxed, [a] SIDi, wenni tesseřmaded zi Ccariɛa nnec,
PSA 94:13 ḥima ad t tessareyyeḥed zeg wussan iɛeffnen, ař ɣa ḥfaren aḥfur n turṣuḍi i uɛeffan.
PSA 94:14 Maɣar SIDI war ineṭṭar řgens nnes, war isemmeḥ di tesɣart nnes.
PSA 94:15 Maɣar řḥukm ad dd-idweř ɣar tsegda, marra inni ɣarsen uř iseggmen ad tt-i-dd-ḍeffaren.
PSA 94:16 Man wen kidi i ɣa ibedden ḍidd i iɛeffanen? Man wen xafi i ɣa iwten ḍidd i yinni itteggen řɣecc?
PSA 94:17 Mři war iǧi SIDI d twiza inu, iři izdeɣ řeɛmar inu ɛřaḥař deg wesɣaḍ.
PSA 94:18 Mařa nniɣ: ‘Aḍar inu ittefriɣ!’, [xenni] tᵉṭṭef ayi tmexsiwt nnec icewwaren, [a] SIDI!
PSA 94:19 Mařa mmarnin dayi ixarriṣen ař ṭṭarf, tuɣa řeɛmar inu ittarr meẓri deg usfewwej nnec.
PSA 94:20 Ma [texsed] ad kidek issmun řkursi n uhellek, wenni issiwḍen řeɣben x [dsas] n tewṣeyyet?
PSA 94:21 Nitni ḥeṣṣaren řeɛmar n umseggad, cehhden x idammen imezdagen s řɣar.
PSA 94:22 SIDI tuɣa ayi d ijj n lburj yuɛřan, AREBBI inu d Taṣḍart n tarewřa inu.
PSA 94:23 Netta ad xasen isseɛqeb řmuɛṣiyyet nsen, am tteggen řɣar nsen ad ten iteḥḥa. SIDI, AREBBI nneɣ, ad ten iteḥḥa.
PSA 95:1 Asem-dd, ejj aneɣ ad nesřiwřew zzat i SIDI, ejj aneɣ ad nduqqez s usřiwřew i Teṣḍart n usenjem nneɣ.
PSA 95:2 Ejj aneɣ ad nades ɣar wudem nnes s uqadi, ejj aneɣ ad as nᵉsřiwřew s izehhiden.
PSA 95:3 Maɣar SIDI [d] ijj Arebbi d ameqqran, ijj n Ujeǧid d ameqqran sennej i marra irebbiten.
PSA 95:4 Deg ufus nnes [ǧan] imucan yuǧɣen qaɛ n temmurt, uřa d tiqiccatin n idurar [aqa atent] nnes.
PSA 95:5 Nnes řebḥar, maɣar ixřeq i-t-i-dd, u ifassen nnes ggin uřa d řbar.
PSA 95:6 Asem-dd, ejj aneɣ ad [as] nbendeq, ad nesjed, ejj aneɣ ad nesjed x ifadden zzat i SIDI, wenni d aneɣ iggin,
PSA 95:7 maɣar Netta d AREBBI nneɣ u neccin d řgens n tarewsa nnes, uřa d uǧi n ufus nnes. Mařa ass-a tseǧem ɣar tmijja nnes,
PSA 95:8 war sseqsiḥem ca uř nwem, am di Mariba, am deg wass n Massa di řexřa,
PSA 95:9 mani tuɣa d ayi ttjarrben řejdud nwem, qeǧben ayi, waxxa tuɣa ẓrin řxedmet inu.
PSA 95:10 Arebɛin n iseggʷusa tuɣa ttɛiffeɣ jjiř-a, nniɣ: “Aqa-ten d ijj n řgens s wuř iweddaren, war ssinen ibriden inu.”
PSA 95:11 S uyenni Necc jjuǧeɣ deg weɣḍab inu: “Nitni war dd-ttidfen ɛemmarṣ di arraḥet inu!”
PSA 96:1 Ɣennjem i SIDI ijj n yezři amaynu, ɣennjem i SIDI, marra tammurt!
PSA 96:2 Ɣennjem i SIDI, barkem Isem nnes, beccarem i usenjem nnes ass x wass.
PSA 96:3 Barrḥem aɛuǧi nnes jar řegnus, řeɛjayeb nnes jar marra řegnus.
PSA 96:4 Maɣar SIDI d ameqqran, issdaḥeǧ asemɣar aṭṭas, Netta d amsaggʷed mahu marra irebbiten.
PSA 96:5 Minzi marra irebbiten n řegnus aqa aten d l’aṣnam, [maca] SIDI igga ijenwan.
PSA 96:6 Tissiqt d řɛezz [ǧan] zzat i wudem nnes, jjehd d waẓri aqa aten di Zzawect nnes Iqeddsen.
PSA 96:7 Wcem i SIDI, [a,] tiqebbař n řegnus, wcem i SIDI aɛuǧi d jjehd.
PSA 96:8 Wcem i SIDI aɛuǧi n Yisem nnes, awyem-dd tawhibt, asem-dd ɣar řemraḥat nnes,
PSA 96:9 bendeq zzat i SIDI s ucewwar iqeddsen, arjijem zzat i wudem nnes, [a] marra tammurt!
PSA 96:10 Inim jar řegnus: “SIDI iḥekkem!” Nican, [řexxu] ddunect tbedd temten, war ttenhezzi [ɛad]. Netta ad iḥkem řegnus s řḥeqq.
PSA 96:11 Ejj ijenwan ad farḥen u tammurt ad tarceq, ejj ad izhar řebḥar d uɛemmar nnes,
PSA 96:12 ejj ad isřiwřiw yeyyar s řefraḥet s marra min dayes, xenni ad sřiwřiwent marra tcejjura n wezɣar
PSA 96:13 zzat i wudem n SIDI, maɣar Netta ad dd-yas, maɣar Netta ad dd-yas ḥima ad icarreɛ tammurt. Netta ad icarreɛ ddunect s tsegda u řegnus s řḥeqq nnes.
PSA 97:1 SIDI iḥekkem, ejj tammurt ad tfarḥ, ad arecqent marra tegzirin.
PSA 97:2 Quwwaren as iseynuten d yijj n useynu ibbumbes, tasegda d řḥeqq aqa aten d dsas n řɛarc nnes.
PSA 97:3 Timessi teggur as zzat n wudem nnes, tqedd iɣrimen nnes i d as dd-ittennḍen.
PSA 97:4 Assamen nnes ssřaqqan ddunect, tammurt tẓarr i-tt, tenhezza.
PSA 97:5 Idurar fessyen am ccmeɛ zzat i wudem n SIDI, zzat i wudem n Sidi n marra tammurt.
PSA 97:6 Ijenwan ttbarrḥen tasegda nnes, marra řegnus ttwařan aɛuǧi nnes.
PSA 97:7 Ejj ad seḍḥan marra inni ɛebbden i [řexyařat] ineqcen n ukeccuḍ, marra inni ittcennɛen di l’aṣnam. Bendqem zzates, kenniw, marra irebbiten!
PSA 97:8 Ṣihyun isřa, ifarḥ, yessis n Yahuda arecqent, zi ssibbet n řeḥkamat nnec, [a] SIDI.
PSA 97:9 Maɣar Cek, [a] SIDI, d Amɛuǧi x marra tammurt, Cek d wenni yuɛřan qaɛ x marra irebbiten.
PSA 97:10 Kenniw i ittexsen SIDI, carhem řɣar. Netta iḥeṭṭa x řeɛmur n imtiqqan nnes, Netta ittfekka i-ten zeg ufus n iɛeffanen.
PSA 97:11 Tafawt tᵉttwazarɛ i umsegged, řefraḥet i yinni ɣar iǧa uř iseggmen.
PSA 97:12 [Kenniw] imseggaden, farḥem zi SIDI, qadam xmi tᵉttidarem taqeddast nnes.
PSA 98:1 [Azehhid.] Ɣennjem i SIDI ijj n yezři n jdid, maɣar Netta igga lmuɛjizat. Afus nnes afusi d uɣiř nnes iqeddsen ssnejmen t.
PSA 98:2 SIDI isscen asenjem nnes, issargeb tasegda nnes zzat i tiṭṭawin n řegnus.
PSA 98:3 Netta iɛqeř x tmexsiwt nnes icewwaren, x řaman nnes i taddart n Israil. Marra tineggura n temmurt ẓrint asenjem s [ufus n] n AREBBI nneɣ.
PSA 98:4 Duqqzem s usřiwřew i SIDI, marra tammurt, sɣuyyem, sřiweřwem, zehhdem.
PSA 98:5 Zehhdem i SIDI s řgambri, s řgambri u s tmijja n yezři,
PSA 98:6 s řebwaq d řḥess n usuḍi deg uyicc n icarri. Duqqzem s usřiwřew zzat i wudem n ujeǧid, SIDI.
PSA 98:7 Ejj ad izhar řebḥar d marra aɛemmar nnes, ddunect d yinni dayes izeddɣen.
PSA 98:8 Ejj iɣezran ad wten camxa s ifassen, idurar ad ssřiwřewen [jmiɛ]
PSA 98:9 zzat i wudem n SIDI, maɣar Netta ad dd-yas ḥima ad iḥkem tammurt. Netta ad iḥkem tammurt s tsegda, řegnus s řḥeqq.
PSA 99:1 SIDI iḥekkem, ejj ad arjijen řegnus. Netta iqqim [x] ikiruben, tammurt tebda ad tenhezz.
PSA 99:2 SIDI d ameqqran di Ṣihyun, Netta yuɛřa aṭṭas x marra řegnus.
PSA 99:3 Ejj i-ten ad qadan Isem nnec ameqqran issaggʷaden, [ad inin]: “Aqa Netta d amqeddas!”
PSA 99:4 Jjehd n ujeǧid aqa netta ittexs řḥeqq. Cek teggid amcan imten i tsegda, teggid řḥeqq d tsegda di Yaɛqub.
PSA 99:5 Sɛuǧem SIDI, AREBBI nneɣ, bendqem zzat i tnebdat n iḍaren nnes. Aqa Netta d amqeddes!
PSA 99:6 Musa d Harun [tuɣa aten] zeg ikehhanen nnes, Camwil [tuɣa] zeg inni iřaɣan Isem nnes. Nitni řaɣan ɣar SIDI uca Netta isřa asen.
PSA 99:7 Issiweř akidsen zeg uqellij n useynu. Nitni ḥḍan cchadat nnes, uřa d tiweṣṣa nnes nni d asen iwca.
PSA 99:8 [A] SIDI, AREBBI nneɣ, Cek tesřid asen. Cek d ijj n Arebbi iɣeffaren, [maca] uřa d umtaqem x tmegga nsen.
PSA 99:9 Sɛuǧem SIDI, AREBBI nneɣ, bendqem [as] zzat i wedrar nnes iqeddsen, maɣar SIDI, AREBBI nneɣ, d amqeddes [i iǧa].
PSA 100:1 [Izři n uqadi.] Ejj ad tᵉdduqqez marra tammurt s usřiwřew i SIDI.
PSA 100:2 Sexxarem i SIDI s řefraḥet, asem-dd zzat i wudem nnes s usřiwřew.
PSA 100:3 Snem, aqa SIDI d AREBBI [i yeǧa]. Netta ixřeq aneɣ-dd u neccin nnes [i neǧa], řgens nnes d wuǧi n tarewsa nnes.
PSA 100:4 Adfem tiwwura nnes s uqadi, řemraḥat nnes s izřan n uṣebbeḥ, qadam t, barkem Isem nnes.
PSA 100:5 Maɣar SIDI d aṣebḥan, tamexsiwt nnes icewwaren [tᵉttɣima] i řebda, řaman nnes zi jjiř ař jjiř.
PSA 101:1 [Azehhed n Dawud.] Necc ad ɣennjeɣ x tmexsiwt icewwaren d řḥeqq, ad zehhdeɣ i Cek, [a] SIDI!
PSA 101:2 Necc ad ggeɣ s řeɛqeř ɛlaḥsab ijj n webrid ikemmřen. Meřmi ɣari i dd ɣa tased? Necc ad uyureɣ s wuř nican di řwesṭ n taddart inu,
PSA 101:3 Necc war neṭṭareɣ tiṭṭawin inu di min ifeḍḥen. Necc carrheɣ min tteggen inni xak iḥeyyden [man aya] war d ayi iřeṣṣeq.
PSA 101:4 Uř ittefriɣen ittxeṣṣa ad xafi yaggʷej, war xseɣ ad ssneɣ min war iḥřin.
PSA 101:5 Wenni iceqqfen deg jjar nnes s tnuffra, ad t teḥḥiɣ. Wenni ittkebbaren s tiṭṭawin nnes d wenni ittɛeffaren s wuř nnes, war t kessiɣ.
PSA 101:6 Tiṭṭawin inu [arezzunt] x imtiqqan di temmurt, ḥima nitni ad ɣari qqimen. Wenni igguren deg ijj n webrid ikemmřen, ad ayi isexxar.
PSA 101:7 Wenni itteggen řɣecc, war ittɣimi di taddart inu, uřa d bu-ixarriqen war ittwaḍmen zzat i tiṭṭawin inu.
PSA 101:8 Kuř ṣṣbeḥ ad teḥḥiɣ marra iɛeffanen zi temmurt, ḥima [ammu i] ɣa mḥiɣ marra inni itteggen řmuɛṣiyyet zi tendint n SIDI.
PSA 102:1 [Taẓaǧit n ijj n řmesksin mařa manayenni d aṭṭas xas,] [uca xenni ittfarreɣ imunas nnes zzat i SIDI.]
PSA 102:2 [A] SIDI, seř ɣar tẓaǧit inu, ejj aɣuyyi inu ad ɣarek dd-yaweḍ.
PSA 102:3 War tteffar udem nnec xafi deg wass i di ttwaḥṣareɣ. Arr-dd ɣari amezzuɣ nnec deg wass i di řaɣiɣ, seř-dd [xenni] ɣari deɣya.
PSA 102:4 Minzi ussan inu ɛdun am ddexxan, ixsan inu am tefqunt icemḍen.
PSA 102:5 Uř inu ittisřaw u yuẓeɣ am arbiɛ, ařami ttuɣ ad cceɣ aɣrum inu.
PSA 102:6 Zi ssibbet n uzehhar yuǧɣen inu, řeṣqen iɣsan inu ɣar teřmect inu.
PSA 102:7 Necc am yijj bu-uɛuqqi n ujḍiḍ di řexřa, dewřeɣ am yijj n muka jar řxirbat.
PSA 102:8 Ttɣimeɣ faqeɣ s řeftanet, dewřeɣ am yijj n wejḍiḍ i iqqimen weḥḥdes x tzeqqa.
PSA 102:9 Řɛedyan inu ttekkwaren ayi ass marra. Inni xafi ittɛeddan, neɛɛřen am qqaren isem inu.
PSA 102:10 Maɣar ttᵉtteɣ iɣɣeḍ am weɣrum u xeǧḍeɣ tisessit inu s imeṭṭawen [inu]
PSA 102:11 zi ssibbet n wesxeḍ nnec d uduqqez n weɣḍab nnec, maɣar Cek tessgeɛɛded ayi u tenḍared ayi [ɛawed] ɣar temmurt.
PSA 102:12 Ussan inu am yict n tiři izzuggarten, u necc taẓɣeɣ am tuga.
PSA 102:13 [Maca] Cek, [a] SIDI, ad teqqimed [x řkursi nnek] i řebda, zi jjiř ař jjiř ad dayek xarrṣen.
PSA 102:14 Cek ad tekkared ad tarḥmed x Ṣihyun, maɣar aqa d řweqt maḥend ad xas tḥinned, minzi řweqt ittwaggen aqa tiweḍ-dd.
PSA 102:15 Maɣar iẓra nnes usin-dd x řxaḍar n imsexxaren nnec u nitni ksin s wesḥissef di tɛejjajt nsen.
PSA 102:16 Řegnus ad ggʷeden Isem n SIDI, marra ijeǧiden n temmurt [ad ggʷeden] aɛuǧi nnec.
PSA 102:17 Xmi ɣa ibna SIDI Ṣihyun [twařat nneɣnit], ad dd-iban deg uɛuǧi nnes.
PSA 102:18 Ad iřha ak-d tẓaǧit n umezřuḍ, war isseḥqara ca taẓaǧit nsen.
PSA 102:19 Man aya ittwari i jjiř i dd ɣa yasen, řgens nni dd ɣa ittwaxeřqen, ad iṣebbeḥ i SIDi,
PSA 102:20 maɣar Netta aqa issijj-dd zi Zzawect nnes Iqeddsen yuɛřan, zeg ujenna ixzar-dd SIDI ɣar temmurt swadday
PSA 102:21 ḥima ad iseř aweɛɛeḍ n umeḥbus, ḥima ad yarxu i yinni [iǧan d] tarwa n řmewt,
PSA 102:22 maḥend ad barrḥen s Yisem n SIDI di Ṣihyun, d ccenɛet nnes di Urcalim,
PSA 102:23 xmi dinni i ɣa ttwassmunen řegnus, [jmiɛ] ak-d tgeldiwin, ḥima ad sexxaren i SIDI.
PSA 102:24 Netta issarxu jjehd inu ak-d webrid, Netta issemẓi deg wussan inu.
PSA 102:25 Necc nniɣ: ‘War d ayi kessi deg wezyen n wussan [n tudart] inu, [a] Arebbi, aqa iseggʷusa nnec [ttɣiman] zi jjiř ař jjiř.
PSA 102:26 Zeg wecḥař uya teggid dsas i temmurt, ijenwan d řxedmet n ifassen nnec.
PSA 102:27 Ina ad fnan, maca Cek ad tdumed. Nitni marra ad arcan am warruḍ, Cek ad ten tbeddřed am yict n řeɛbayet, [ammu i] ɣa ttwabeddřen.
PSA 102:28 Cek [maca] d Cek, iseggʷusa nnec war qeṭṭin ɛemmarṣ.’
PSA 102:29 Iḥenjiren n imsexxaren nnec ad [din] zedɣen u tarwa nsen ad ttwassmetnen zzat i wudem nnec.
PSA 103:1 [N Dawud.] Barek SIDI, [a] řeɛmar inu, d marra min dayi Isem nnes iqeddsen.
PSA 103:2 Barek SIDI, [a] řeɛmar inu, war ttᵉttu ɛemmarṣ marra timegga nnes iṣebḥen.
PSA 103:3 [Netta] d wenni d ac iɣeffaren marra ddnub nnec, wenni issgenfan marra řehřacat nnec,
PSA 103:4 wenni ifdin tudart nnec zi turṣuḍi, wenni xak iggin ttaj n tmexsiwt icewwaren d arreḥmet,
PSA 103:5 wenni issjjawanen aqemmum nnec s min iṣebḥen, wenni ittarran temẓi nnec am ugider.
PSA 103:6 SIDI ittegg tasegda d řḥeqq i marra inni ittwaḥeṣṣaren.
PSA 103:7 Netta isscen i Musa ibriden nnes, i ayt n Israil timegga nnes.
PSA 103:8 SIDI d arḥim d aḥnin, ɣares ttasiɛ n řxaḍar, iccur s tmexsiwt icewwaren.
PSA 103:9 Netta war ittemcubbuc i řebda, war ittɣimi [ittxeyyiq] i řebda.
PSA 103:10 Netta war d aneɣ ittegg ɛlaḥsab ddnub nneɣ u war zzayneɣ ixeǧef ɛlaḥsab řmuɛṣiyyet nneɣ,
PSA 103:11 maɣar am ujenna yuɛřan x temmurt, ammu i temɣar tmexsiwt nnes icewwaren tiwa marra inni t itteggʷeden.
PSA 103:12 Am iggʷej ccarq x řɣarb, ammu i issiggʷej Netta ixeṭṭan nneɣ xaneɣ.
PSA 103:13 Am mammec iḥinn babatsen x iḥenjiren nnes, ammu i ittḥinn SIDI x yinni t itteggʷeden.
PSA 103:14 Maɣar Netta issen mammec nettwagg, iɛqeř aqa neccin d acař.
PSA 103:15 Ussan n bnadem amecnaw tuga, netta ittnuwar am tnuwwact n yeyyar.
PSA 103:16 Mařa ikka-dd xas usemmiḍ, war teqqim u amcan mani tuɣa tbedd, war xas issin ɛad.
PSA 103:17 [Maca] tamexsiwt icewwaren n SIDI tᵉttɣima zi řebda ař řebda tiwa yinni t itteggʷeden, u tasegda nnes [tᵉttɣima] i warraw n warraw,
PSA 103:18 i marra inni iḥeṭṭan Řɛahd nnes u iɛeqqřen x řumurat nnes, maḥend ad zzaysen tteggen.
PSA 103:19 SIDI issbedd řɛarc nnes deg ujenna, Tagelda nnes tḥekkem x marra [min iǧan].
PSA 103:20 Barkent SIDI, [kennint], lmalakat nnes, ayt n bu-teɣruḍt imeḥḍen inni itteggen awař nnes, inni ittesřan i tmijja n wawař nnes.
PSA 103:21 Barkent SIDI, marra řɛeskarat nnes, [kenniw,] imsexxaren nnes, inni itteggen min d as yarecqen!
PSA 103:22 Barkem SIDI, [a] marra min ittwaggen [s ufus nnes], di mani ma i teǧa řeḥkamet nnes. Barek SIDI, [a] řeɛmar inu.
PSA 104:1 Barek SIDI, [a] řeɛmar inu! [A] SIDI, AREBBI inu, mammec d ameqqran Cek! Cek tyarḍed s lɛaḍama d řɛezz.
PSA 104:2 Netta iřeḥḥef Ixef nnes s tfawt am s ijj n upartessu, Netta ittbezzeɛ ajenna am tjartiřt n uqiḍun.
PSA 104:3 [Aqa Netta] d wenni issarsen tiḥenya n wesqef sadu ixxamen nnes x waman, d wenni iggin iseynuten d akarru nnes, d wenni igguren x wafriwen n usemmiḍ,
PSA 104:4 d wenni iggin lmalakat nnes am yisemmiḍen u imsexxaren nnes d ict n tmessi itteḥduduqen.
PSA 104:5 Netta issbedd tammurt x dsusa nnes, war tᵉttenhezzi ɛemmarṣ i řebda.
PSA 104:6 Cek třeḥḥfed as s [waman] ihewřen am s yijj n warruḍ, aman bedden tiwa i idurar.
PSA 104:7 Nitni arewřen zeg usiggʷed nnec, qeǧqen ad ffɣen zi tmijja n wajjaj nnec.
PSA 104:8 Ttwassgeɛɛden idurar, hekkwant teysarin deg wemcan i d asen teggid.
PSA 104:9 Cek teggid aymir i waman nni war ɛeddun, war dd-dekkwiřen maḥend ad dřen tammurt.
PSA 104:10 [Cek] d wenni ineddhen tařawin di teɣzurin, aqa ttazzřent din jar idurar.
PSA 104:11 Aqa warrdent marra řmař n yeyyar, iɣyař n řexřa ttekksen afadi nsen zzaysent.
PSA 104:12 Ijḍaḍ n ujenna zeddɣen ɣar temmawin nsen, zi jar řefruɛ tᵉttekk-dd tmijja nsen.
PSA 104:13 [Netta aqa] d wenni ittessun idurar zeg ixxamen nnes deg ujenna, tammurt tᵉttyawan zi řɣiǧet [i dd-iffɣen] zi min teggid Cek.
PSA 104:14 Netta igga arbiɛ iɣemmi i řmar, uřa d aɣemmuy di ṭṭweɛ n bnadem. [Igga i-tt] maḥend ad dd-yawi aɣrum zi temmurt
PSA 104:15 u binu nni issfarraḥen uř n bnadem., ařami iɣembab ad [zzayes] wessgen mahu zi zzect, uřa d aɣrum nni issejhed uř n bnadem.
PSA 104:16 Ticejjura n SIDI ttyawanent, ticejjura n tengelt n Lubnan nni iẓẓu Netta,
PSA 104:17 mani tteggen ijḍaḍ řɛucc nsen, [mani] i teǧa taddart n ubellarj di tcejjura n umerzi.
PSA 104:18 Idurar yuɛřan aqa aten i iɣayḍen n tṣuḍar, řejruf d amcan n tarewřa i ikawkawen n teṣḍart.
PSA 104:19 Netta igga taziri d řeɛbar i řewqat ittwaggen, tafuct tessen meřmi i ɣa teɣři.
PSA 104:20 Cek tessekkid-dd taǧest u tewḍa-dd ǧiřet [i di] ttextutyen marra řewḥuc n wezɣar.
PSA 104:21 Ayraden imeẓyanen zehharen x zzardet, arezzun x macca nsen zi Arebbi.
PSA 104:22 Mařa teffeɣ-dd [xenni] tfuct, ttecruruden ɣar řmargeḥ, ttɣemmaren deg ifran nsen.
PSA 104:23 [Xenni] itteffeɣ bnadem ɣar řxedmet nnes, ɣar tewwuri nnes ař tameddit.
PSA 104:24 Mammec aṭṭas i teggid, [a] SIDI, s tiɣit i teggid marra timesřayin, tammurt tᵉttwaccur s wagřa nnec.
PSA 104:25 Aqa din řebḥar imɣar, yiriw ɣar marra iɣezdisen nnes, mani issfuffey marra s imuddaren imeqqranen d imeẓyanen, břa řeḥsab,
PSA 104:26 mani gguren iɣarruba, [uřa d] ‘Liviyatan’ nni teggid ḥima ad dayes ittirar.
PSA 104:27 Nitni marra ttrajan Cek, ad asen tewced macca nsen di řweqt nnes.
PSA 104:28 [Mařa] tewcid asen, yarrwen nitni, [mařa] tarzmed afus nnec, ddakkwařen jjiwnen s řxar.
PSA 104:29 [Mařa] teffared udem nnec, aqa ttnexřaɛen, [mařa] tkessid asen nnefs, ad ssuffɣen buḥbeř uca ad dd-dewřen ɣar ucař nsen.
PSA 104:30 [Mařa] tessekked-dd Arruḥ nnec, [xenni] ttwaxeřqen-dd nitni, ad tarrid aɣembub n temmurt d amaynu.
PSA 104:31 Aɛuǧi n SIDI ad yiři i řebda, SIDI ad ifarḥ i marra min igga.
PSA 104:32 [Mařa] Netta ixezzar di temmurt, tᵉttarjiji, [mařa] iḥada idurar, ad duxxnen.
PSA 104:33 Necc xseɣ ad ɣennjeɣ i SIDI min ɣa kkeɣ ddareɣ, ad zehhdeɣ i AREBBI inu min [da] i ɣa kkeɣ ǧiɣ.
PSA 104:34 Axemmem inu ad dd-yas x řxaḍar nnes, ad farḥeɣ di SIDI.
PSA 104:35 Imednab ad ttwateḥḥan qaɛ zi temmurt, iɛeffanen war ttiřin ɛad. Barek SIDI, [a] řeɛmar inu. Hallilu-Yah!
PSA 105:1 Qadam SIDI, řaɣam x Yisem nnes, barrḥem s tmegga nnes jar řegnus.
PSA 105:2 Ɣennjem as, zehhdem i Netta, siwřem x marra lmuɛjizat nnes.
PSA 105:3 Cennɛem ixef nnec s Yisem nnes iqeddsen, ḥima uř n yinni yarezzun SIDI, ad ifarḥ.
PSA 105:4 Seqsam x SIDI d jjehd nnes, arzum udem nnes řebda.
PSA 105:5 Ɛeqřem x lmuɛjizat nnes i igga, x řeɛřamet nnes u x řeḥkamat n uqemmum nnes.
PSA 105:6 Zzariɛet n Ibrahim, amsexxar nnes, ayt n Yaɛqub, inni zzayes ittwafarzen!
PSA 105:7 Netta d SIDI, AREBBI nneɣ. Řeḥkamat nnes [i dd-ittasen] x temmurt marra.
PSA 105:8 Ɛeqřem x Řɛahd nnes i řebda, awař nni iweṣṣa i wařef n jjiřat,
PSA 105:9 i igga ak-d Ibrahim, u [issemten i-t s] tjaǧit nnes i Isḥaq.
PSA 105:10 Netta igga i-t d tawṣeyyet i Yaɛqub, i Israil [igga i-t] d Řɛahd i řebda,
PSA 105:11 umi inna: “Ad ac wceɣ tammurt n Kenɛan, afiřu [n řeɛbar] n tesɣart nwem!”
PSA 105:12 umi tuɣa kenniw deg ijj n wuru n yeryazen, s drus [waha], u am yibarraniyyen [i teǧim] dayes.
PSA 105:13 Nitni telɛen zi řgens ɣar řgens [nneɣni], zeg ict n tgeldit ɣar ijj n řgens nneɣni.
PSA 105:14 War ijji uřa d ijj n bnadem ad ten isseḥṣar, iɛaqeb ijeǧiden di ṭṭweɛ nsen.
PSA 105:15 War ttḥadam ca imedhunen inu, war tteggem řɣar deg inabiyyen inu.
PSA 105:16 [Xenni] iřaɣa-dd i řaẓ ɣar temmurt. Yarẓa asen marra řeɛweč n weɣrum.
PSA 105:17 Issekk-dd ijj n weryaz ɣar zzat, Yusuf immenz d ismeɣ.
PSA 105:18 Carfen iḍaren nnes deg iceddiyyen, řeɛmar nnes ittwaḥṣar deg wuzzař.
PSA 105:19 Ař řweqt nni di ittwasseqfeř wawař nnes iṣeffa as řhard n SIDI.
PSA 105:20 Issekk ujeǧid [ijj] ḥima ad as issarxu, řḥakem n řegnus iḍřeq i-t.
PSA 105:21 Netta igga i-t d bab x taddart nnes, uřa d řḥakem x marra min ɣares.
PSA 105:22 ḥima ad ɣares icedd řḥukkam u [ḥima] ad isseřmed tiɣit i imɣaren nnes.
PSA 105:23 [Awarni aya] yusa-dd Israil ɣar Miṣra, iqqim Yaɛqub am ubarrani di temmurt n Ḥam.
PSA 105:24 Netta igga řɣiǧet di řgens nnes aṭṭas, yarra i-t ijhed x yinni t iḥeṣṣaren.
PSA 105:25 Netta yarra uř nsen inneqřeb, ařami dewřen carrhen řgens nnes, dewřen ɣeddaren imsexxaren nnes.
PSA 105:26 [Xenni] issekk-dd Musa, amsexxar nnes, d Harun wenni ifarz i-t Netta.
PSA 105:27 Nitni ggin řeɛřamat nsen ifarzen jar asen, u [ggin] lmuɛjizat di temmurt n Ḥam.
PSA 105:28 Netta issekk-dd taǧest uca tedweř marra d taǧest. Nitni war ɣewwɣen ca x wawařen nnes.
PSA 105:29 Netta yarra aman nsen d idammen u inɣa iseřman nsen.
PSA 105:30 Netta yarra tammurt nsen tseffay s iqarqriwen, ař daxeř deg ixxamen n ijeǧiden nsen.
PSA 105:31 Netta issiweř uca yusa-dd weyřaf n ibeɛɛac, nnamus [wḍan-dd] x temmurt nsen marra.
PSA 105:32 Netta yarra anẓar nsen d abrurri, [issekk-dd] timessi d iceɛɛařen x temmurt nsen.
PSA 105:33 Netta iwta tazayart nsen d wartu nsen, yarẓa ticejjura di temmurt nsen.
PSA 105:34 Netta issiweř, [xenni] tusa-dd tmuɣri, uřa d bu-weřsaḥ, aqa aten břa řeḥsab.
PSA 105:35 Nitni ccin marra afsu di temmurt nsen, ccin řɣiǧet n temmurt nsen.
PSA 105:36 Netta inɣa marra imenza di temmurt nsen, imenza n marra taryast nsen.
PSA 105:37 Netta issuffeɣ i-ten-dd s nnuqart d wureɣ, war din tuɣi uřa d ijj di tqebbař nsen i inderfen.
PSA 105:38 Miṣra tfarḥ s wuffuɣ nsen, maɣar tewḍa xasen tiggʷudi temɣar.
PSA 105:39 Netta ibezzeɛ aseynu am yijj n arwaq u tmessi ḥima ad tewc tafawt s ǧiřet.
PSA 105:40 Nitni ẓẓuǧen u Netta yarra ad dd-asen ijḍaḍ, qqaren as ‘tsalwa’, issjjiwen i-ten s weɣrum n ujenna.
PSA 105:41 Netta yarzem taṣḍart, aman duqqzen-dd zzayes, uzzřen x řaẓaɣ [u dewřen] am yeɣzar.
PSA 105:42 Maɣar Netta iɛqeř x wawař nnes iqeddsen, x umsexxar nnes Ibrahim.
PSA 105:43 Netta issuffeɣ-dd řgens nnes s řefraḥet, inni zzayes ittwafarzen s usřiwřew.
PSA 105:44 Netta iwca asen timmura n řegnus, nitni warten tamara n ccuɛub,
PSA 105:45 ḥima ad ṭṭfen di tweṣṣa nnes, ad ḥḍan izerfan nnes. Hallilu-Yah.
PSA 106:1 Hallilu-Yah, qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda.
PSA 106:2 Wi izemmaren ad iḥaja timegga timeqqranin n SIDI, ad ibarreḥ marra ccan nnes?
PSA 106:3 Sseɛd nsen i yinni iḥḍan řḥeqq, [sseɛd nnes] i wenni itteggen řebda tasegda.
PSA 106:4 Ɛqeř xafi, [a] SIDI, s arḍa ɣar řgens nnec, ɛahed ayi s usenjem nnec,
PSA 106:5 maḥend ad ẓareɣ řxar i yinni zzayek ittwafarzen, maḥend ad farḥeɣ s řefraḥet n řgens nnec, maḥend ad farḥeɣ s yixef inu [jmiɛ] ak-d tesɣart nnec.
PSA 106:6 Neccin nexḍa, [jmiɛ] ak-d řejdud nneɣ, negga řɣecc, negga tuɛeffna.
PSA 106:7 Řejdud nneɣ di Miṣra war fhimen i lmuɛjizat nnec, war xarrṣen deg ufeyyeḍ n tmegga n tmexsiwt nnec icewwaren, maca ɣewwɣen ɣar řebḥar, ɣar Řebḥar n Telga.
PSA 106:8 [Maca] Netta issenjem i-ten di ṭṭweɛ n Yisem nnes, ḥima ad tᵉttwassen řemɣaret nnes.
PSA 106:9 Netta iwebbex Řebḥar n Telga ařami idweř yuẓeɣ, uca ijja i-ten ad kken [x wudem n temmurt] [jar] [waman] ihewřen axmi [di] řexřa.
PSA 106:10 Netta ifekk i-ten zeg ufus n yinni [i-ten] icarrhen, ifekk i-ten zeg ufus n řeɛdu.
PSA 106:11 Aman dřin inni ten iḥeṣṣaren, war iqqim uřa d ijjen zzaysen.
PSA 106:12 Nitni ttecřen x wawařen nnes, ṣebbḥen as s yijj n yezři n uṣebbeḥ.
PSA 106:13 [Maca] ttun deɣya timegga nnes, war xsen ad rajan [ɛad] ccwar nnes.
PSA 106:14 Nitni dewřen ttmeɣɣřen aṭṭas di řexřa, qeǧben Arebbi di tnezruft.
PSA 106:15 [Xenni] iwca asen min ttaren, [maca] issemẓi [řqedd n] řeɛmur nsen.
PSA 106:16 Nitni dewřen usmen zi Musa di řmargeḥ n řɛeskar, uřa zi Harun, amqeddes n SIDI.
PSA 106:17 Tammurt tennurzem, tṣarḍ Datan, uca tentiy abarru n Abiram.
PSA 106:18 Timessi tebda tecmeḍ jar ubarru nsen, ijj n uceɛɛař n tmessi iqqed iɛeffanen [nni].
PSA 106:19 Nitni ggin ijj n uɛejmi ɣar Ḥurib, bendqen i yijj n řexyař ifesyen.
PSA 106:20 Nitni beddřen aɛuǧi n SIDI ak-d řexyař n ijj n ufunas i ittetten arbiɛ.
PSA 106:21 Ttun Arebbi, Amsenjem nsen, wenni tuɣa iggin timegga timeqqranin di Miṣra,
PSA 106:22 lmuɛjizat di temmurt n Ḥam, timegga ssaggʷadent ɣar Řebḥar n Telga.
PSA 106:23 Inna aqa ad ten ikeḥḥeḍ, mři war iǧi d Musa, wenni zzayes ittwafarzen, ikkar-dd di txenduqt zzat i wudem nnes di ṭṭweɛ nsen, maḥend ad issbeɛɛed asɛar nnes i zi ixs ad ten yareddeǧ.
PSA 106:24 Nitni kksen taqcurt x temmurt iɛizzen, war tecřen ca x wawař nnes.
PSA 106:25 Nitni ndeqmen deg iqiḍan nsen, war sřin ɣar tmijja n SIDI.
PSA 106:26 Netta issgeɛɛed afus nnes xasen, [ijjuǧ] ad ten isseɣḍeř di řexřa,
PSA 106:27 maḥend ad isseɣḍeř tarwa nsen jar řegnus, maḥend ad ten izeǧeɛ di temmura.
PSA 106:28 Nitni ssřeḥmen ixef nsen ɣar Baɛal-Faɣur, ccin tiɣarṣa i imettan.
PSA 106:29 Sɛaren t s tmegga nsen, ařami dd xasen tewḍa jjriḥect.
PSA 106:30 [Xenni] ikkar-dd Finaḥas, yusa-dd jar asen, u ammu i tᵉttwassbedd jjriḥect.
PSA 106:31 Aya ittwaḥseb as-dd d tasegda, zi jjiř ař jjiř i řebda.
PSA 106:32 Nitni sɛaren afugem nnes ɣar waman n Mariba, ařami igga Musa řɣar di ssibbet nsen,
PSA 106:33 maɣar ssarezgen řeɛmar nnes, ɣares ařami iffeɣ wawař war iḍbiɛen zeg iyencicen nnes.
PSA 106:34 Nitni war teḥḥan řegnus ɛlaḥsab min d asen yumur SIDI.
PSA 106:35 [Maca] ṣṣuren ixef nsen ak-d řegnus řemden [ad ggen] min ggin nitni.
PSA 106:36 Nitni tuɣa ttsexxaren i řexyařat n l’aṣnam nsen, inni d asen idewřen d řfex.
PSA 106:37 Nitni iwyen iḥenjiren nsen d tḥenjirin nsen d taɣarṣt i ccwaṭen.
PSA 106:38 Nitni ssizzřen idammen imezdagen, idammen n iḥenjiren nsen d tḥenjirin nsen, nni iwyen d taɣarṣt i řexyařat n l’aṣnam n Kenɛan, ařami tedweř temmurt tefsed s idammen.
PSA 106:39 Nitni dewřen xemjen zi tmegga nsen, ssfesden ixef nsen s řexdayem nsen.
PSA 106:40 Yarɣa weɣḍab n SIDI x řgens nnes u Netta iɛiff tasɣart nnes.
PSA 106:41 Netta isellem i-ten ɣar ifassen n řegnus u inni ten icarrhen dewřen ttseǧaḍen xasen.
PSA 106:42 Ḥṣaren ten řɛedyan nsen, nitni ttwasswaḍɛen sadu afus nsen.
PSA 106:43 Aṭṭas n twařawin tuɣa ittfekka i-ten, [maca] nitni ssarezgen xas s tɣennant nsen, ttwassmeẓyen s řmuɛṣiyyet nsen.
PSA 106:44 [Waxxa amenni] Netta ixzar [ɛad] ɣarsen umi ten tuɣa di řeḥṣaret, umi isřa tɣuyyit nsen.
PSA 106:45 Yidar Řɛahd nnes di ṭṭweɛ nsen u indem zi ssibbet n tmexsiwt nnes icewwaren.
PSA 106:46 Isscen asen arreḥmet [nnes] zzat i wudem n marra inni ten iḥebbsen.
PSA 106:47 Senjem aneɣ, [a] SIDI, AREBBI, ndeh aneɣ nmun zi řegnus, ḥima ad nqada Isem amqeddas nnec, ad Cek nṣebbeḥ s yezřan n usemɣar.
PSA 106:48 Ad ittwabarek SIDI, AREBBI n Israil, zi řebda ař řebda!” Ejj marra řgens ad yini: ‘Amin! Hallilu-Yah!’
PSA 107:1 Qadam SIDI, maɣar Netta iṣbeḥ, maɣar tamexsiwt nnes icewwaren [tᵉttɣima] i řebda.
PSA 107:2 Ejj inni ittwafekken n SIDI ad ssiwřen ammu, inni ifekk zeg ufus n yinni [ten] iḥeṣṣaren,
PSA 107:3 inni issmun zi temmura, zi ccarq, zi řɣarb, zi ccamal u zi řebḥar.
PSA 107:4 [Tuɣa din] inni iweddaren di řexřa, abrid [nsen] ikka x tnezruft, war ufin tandint maḥend ad dayes zedɣen.
PSA 107:5 Daysen řaẓ d ufadi, řeɛmar nsen ifceř daysen.
PSA 107:6 [Xenni] sɣuyen ɣar SIDI di řeḥṣaret nsen, [u] Netta ifekk i-ten zi tiggʷudi nsen.
PSA 107:7 Netta indeh i-ten deg ijj n webrid isegged, maḥend ad uyuren ɣar ict n tendint ḥima ad [dayes] zedɣen.
PSA 107:8 Ejj i-ten ad qadan SIDI x tmexsiwt nnes icewwaren, x lmuɛjizat nnes i tarwa n bnadem.
PSA 107:9 Maɣar Netta issjjiwen řeɛmar iffuden, řeɛmar iǧuẓen iccur i-t s řxar.
PSA 107:10 [Tuɣa din] inni iqqimen di taǧest d tiři n řmewt, s iceddiyen n ddeǧ d wuzzař,
PSA 107:11 maɣar ɣewwɣen ak-d wawařen n Arebbi, war sřin ɣar ccwar n Umɛuǧi x kuřci.
PSA 107:12 Netta isseqneɛ uř nsen s tamara, nnderfen, war ufin wi ɣa iwcen afus.
PSA 107:13 [Xenni] řaɣan i SIDI di řeḥṣaret nsen u Netta issenjem i-ten zi tiggʷudi nsen,
PSA 107:14 Netta issuffeɣ i-ten zi taǧest u zi tiři n řmewt, yarẓa iceddiyen nsen.
PSA 107:15 Ejj i-ten ad qadan SIDI x tmexsiwt nnes icewwaren, x lmuɛjizat nnes i tarwa n bnadem.
PSA 107:16 Maɣar Netta yarẓa tiwwura n nnḥas, icarreg zzekrunat n wuzzař.
PSA 107:17 [Tuɣa din] ibuhařiyyen inni ittwaɣezzan zi ssibbet n uxeṭṭu nsen d řmuɛṣiyyet nsen.
PSA 107:18 Iɛiff řeɛmar nsen zi marra macca, iwḍen ař tewwura n řmewt.
PSA 107:19 [Xenni] řaɣan i SIDI di řeḥṣaret nsen u Netta issenjem i-ten zi tiggʷudi nsen.
PSA 107:20 Netta issekk awař nnes, issgenfa i-ten u issenjem i-ten zeg iḥufar nsen.
PSA 107:21 Ejj i-ten ad qadan SIDI x tmexsiwt nnes icewwaren, x lmuɛjizat nnes i tarwa n bnadem.
PSA 107:22 Ejj i-ten ad awyen tiwhibin n uqadi, ad barrḥen timegga nnes s usřiwřew.
PSA 107:23 [Tuɣa din] inni ihekkwan ɣar řebḥar s iɣarruba, inni ixeddmen x waman iwesɛen.
PSA 107:24 Ẓrin min igga SIDI, uřa d lmuɛjizat nnes di řaǧaɣ [n řebḥar].
PSA 107:25 Mařa Netta issiweř, ikkar-dd ijj n usemmiḍ nni issgeɛɛden řemwaj nnes.
PSA 107:26 Geɛɛden ɣar ujenna uca hwan ɣar tisi n [waman] ihewřen. Ifsi řeɛmar nsen zi tiggʷudi.
PSA 107:27 Meyyřen, meyyřem zi ssa ɣar da am umescar, iweddar asen marra řeɛqeř nsen.
PSA 107:28 [Xenni] řaɣan i SIDI di řeḥṣaret nsen [u] Netta issuffeɣ i-ten-dd zi tiggʷudi nsen.
PSA 107:29 Netta yarra asemmiḍ ad yarsa, ařami dewřen řemwaj sseɣḍen.
PSA 107:30 Nitni farḥen umi arsin [řemwaj] u [umi] Netta indeh i-ten ɣar řmuyyi i ɣares tuɣa ttmeẓriyen.
PSA 107:31 Ejj i-ten ad qadan SIDI x tmexsiwt nnes icewwaren, x lmuɛjizat nnes i tarwa n bnadem,
PSA 107:32 ejj i-ten ad t ssɛuǧen deg wegraw n řgens, ad t cennɛen di řḥeřqet n imɣaren.
PSA 107:33 Netta yarra iɣezran d řexřa, řɛunṣarat [yarra i-tent] d tammurt iffuden,
PSA 107:34 tammurt i itticen řɣiǧet [yarra i-tt] d tameǧaḥt, zi ssibbet n tuɛeffna n yinni dayes izeddɣen.
PSA 107:35 Netta yarra řexřa d ayeřmam n waman, tammurt yuẓɣen d řɛunṣarat.
PSA 107:36 Dinni i issezdeɣ inni iǧuẓen uca [din] ssbedden [nitni] ict n tendint maḥend ad [dayes] zedɣen.
PSA 107:37 Nitni zarrɛen deg iyyaren, tteẓẓun tizayarin deg imarjaɛen, tinni dd-ittawyen igumma d řɣiǧet [nsen].
PSA 107:38 Netta ibarek i-ten, [ařami] dewřen deg waṭṭas, agřa n řmař nsen war ittwassemẓi.
PSA 107:39 [Xenni] maca dakkwařen di drus [ɛawed], hekkwan ɣar řaǧaɣ zi ssibbet n řeḥṣaret d řeɣben d wecḍan.
PSA 107:40 Netta ittkebba aseḥqar x tarwa n taṣiřet, ijja i-ten ttᵉtliɛen di řexřa mani war [ǧin] ibriden.
PSA 107:41 Issgeɛɛed-dd amezřuḍ zi řeɣben uca yarra řaǧat am tḥimarin n wuǧi.
PSA 107:42 Inni igguren nican ttwařan uca farrḥen, [maca] marra [ayt n] řmuɛṣiyyet tteqqnen aqemmum [nsen].
PSA 107:43 Wenni d amiɣis, ejj i-t ad iḥḍa, ejj i-ten ad ssnen nican timegga n tmexsiwt n SIDI.
PSA 108:1 [Izři. Azehhed n Dawud.]
PSA 108:2 [A] AREBBI, uř inu iɛewweř, ad ɣennjeɣ ad zehhdeɣ, [wah] uřa d aɛuǧi inu.
PSA 108:3 Faq, lharpa d řgambri! Necc xseɣ ad ssfaqeɣ tafawt n řefjar.
PSA 108:4 Necc ad Cek qadiɣ jar řegnus, [a] SIDI, ad ak zehhdeɣ jar ccuɛub.
PSA 108:5 Maɣar tamexsiwt nnec icewwaren [tᵉttakkwaḍ] tiwa i ijenwan, řaman nnec ař iseynuten.
PSA 108:6 [A] AREBBI, sgeɛɛed ixef nnec tiwa i ijenwan, [arr] aɛuǧi nnec x marra tammurt,
PSA 108:7 ḥima imɛizzen nnec ad ttwanejmen, awi asenjem s ufus afusi nnec u arr-dd xaneɣ [awař].
PSA 108:8 AREBBI tuɣa issawař di Zzawect nnes Iqeddsen, s uyenni i ɣa negzeɣ s řefraḥet. Necc ad bḍiɣ Cakim, ad ɛebbareɣ taysart n Sukkut.
PSA 108:9 Jilɛad inu, Manassa inu, Ifrayim d aseřqi ijehden n uzeǧif inu, Yahuda d amgewwed inu.
PSA 108:10 Maca Mu’ab d ssarij inu n usird, x Idum ad nḍareɣ sandaliyat inu, x [temmurt n] Filicit ad duqqzeɣ s usřiwřew.
PSA 108:11 Wi d ayi ɣa inedhen [ɣar] tendint ifaryen? Wi d ayi ɣa igewwden ɣar Idum?
PSA 108:12 Ma war d aneɣ tenḍared, [a] AREBBI, u ak-d řɛeskarat nneɣ ma [zeɛma] war dd-teffiɣed [ɛad] akidsen, [a] AREBBI?
PSA 108:13 Ewc aneɣ afus [ḥima ad aneɣ tessnejmed] zi řeḥṣaret, [maɣar] asenjem [s ufus n] yijj n bnadem aqa ibḍeř.
PSA 108:14 Ak-d AREBBI ad negg s wemḥaḍ u Netta ad iɛfes x yinni d aneɣ iḥeṣṣaren.
PSA 109:1 [I umeqqran n imeɣnajen. Azehhed n Dawud.] [A] AREBBI n uṣebbeḥ inu, war sɣidi!
PSA 109:2 Maɣar aqemmum n ijj n uɛeffan, aqa aqemmum [iccur s] ixarriqen innurzem xafi. Nitni ssawařen akidi s yijj n yiřes issxarriqen.
PSA 109:3 Nnḍen ayi-dd s wawařen iccuren s wecrah, ttmenɣan akidi x walu.
PSA 109:4 I twarrit x tmexsiwt inu, ccetcan nitni zzayi u necc kessiɣ s řmeɛruf.
PSA 109:5 Nitni xeǧṣen ayi řxar s řɣar, tamexsiwt inu s wecrah.
PSA 109:6 Egg xas ijj n uɛeffan, ejj ijj n cciṭan ad ibedd ɣar uɣezdis nnes.
PSA 109:7 Mařa xas carrɛen, ad iffeɣ am uqṭaṭɛi uca ejj taẓaǧit nnes ad tiři d ddenb.
PSA 109:8 Ad dewřen ussan nnes udrusen, ejj wenneɣni ad iṭṭef řfusina nnes.
PSA 109:9 Ad dewřen iḥenjiren nnes d iyujiřen, tamɣart nnes d tajjač.
PSA 109:10 Ad tellɛen iḥenjiren nnes da d diha, ad ttaren, ad arzun x macca ɣar řaggʷaj n řxirbat [n tzeddiɣin] nsen.
PSA 109:11 Ad ittar bu-umarwas marra min ɣares, ad keccḍen ibarraniyyen [řɣiǧet n] warber nnes.
PSA 109:12 War ɣares ittiři uřa d ijjen wenni d as i ɣa iggin s tmexsiwt icewwaren, ejj uřa d ijj ad iḥinn x iyujiřen nnes.
PSA 109:13 Ad ttwateḥḥan tarwa nnes awarni as, ad ittwamḥa isem nsen di jjiř i dd ɣa yasen.
PSA 109:14 Ad yidar SIDI řmuɛṣiyyet n řejdud nnes, ɛemmarṣ war imeḥḥi ddenb n yemmas.
PSA 109:15 Iři ad bedden řebda qibač i SIDI, ejj i-t ad ikkes řidaret nsen x temmurt.
PSA 109:16 Maɣar netta war iɛqiř ḥima ad yegg s tmexsiwt icewwaren, [maca] imarret řmeskin d umezřuḍ, uřa d wenni umi ittwarẓ wuř, ḥima ad t ineɣ.
PSA 109:17 Netta tuɣa ittexs nneɛřet, [xenni] ejj i-tt ad xas tewḍa, u umi war ifarḥ s lbaraka, ejj i-tt ad xas tiggʷej.
PSA 109:18 Umi yarḍ nneɛřet am warruḍ nnes, ejj i-tt ad tadef [xenni] am waman ɣar daxeř nnes, am zzect deg iɣsan nnes.
PSA 109:19 Ejj ad tiři [nneɛřet nni] am warruḍ i di ittřeḥḥef, am webyas i ibekkes řebda.
PSA 109:20 Ta d řmunet n SIDI i iɣrimen inu, i yinni issawařen řɣar x řeɛmar inu.
PSA 109:21 [Maca] Cek, [a] SIDI, Sidi inu, egg dayi [am mammec texsed] di ṭṭweɛ n Yisem nnec, maɣar tamexsiwt nnec icewwaren d taṣebḥant, fekk ayi.
PSA 109:22 Maɣar necc di řeɣben u zeřḍeɣ, uř inu ittwassnuqqeb ɣar daxeř [deg idmaren inu].
PSA 109:23 Am ict n tiři izzuggarten qeṭṭiɣ, zzruzan ayi am yict n tmurɣi.
PSA 109:24 Ifadden inu ttarjijin s uẓummi, arrimet inu d tamusriwt, ittxeṣṣa i-tt tadunt.
PSA 109:25 Necc dewřeɣ asen d [ict n řqecɛet n] useḥqar. Mařa ẓrin ayi, ssenhezzan azeǧif nsen.
PSA 109:26 Ewc ayi afus, [a] SIDI, AREBBI inu, senjem ayi ɛlaḥṣab tamexsiwt nnec icewwaren,
PSA 109:27 ḥima ad ssnen aqa d man aya d afus nnec, aqa Cek i iggin man aya, [a] SIDI.
PSA 109:28 Nitni d yinni ineɛɛřen, maca Cek ad tbarked, mařa ttɣewwɣen, ad dewřen ttseḍḥan [maca] amsexxar nnec ad ifarḥ.
PSA 109:29 Ejj iɣrimen inu ad yarḍen s řefḍiḥet, ad řeḥḥfen deg useḍḥi am deg ijj n useřham.
PSA 109:30 Zeg wuř inu ad qadiɣ SIDI s uqemmum inu, ad t ssemɣareɣ jar waṭṭas.
PSA 109:31 Maɣar Netta ad ibedd ak-d umezřuḍ ɣar ufus nnes afusi, ḥima ad [t] issenjem zeg inni iḥekkmen x řeɛmar nnes.
PSA 110:1 [Azehhed n Dawud.] SIDI issawař ak-d Sidi inu: Qim ɣar ufus afusi inu, ař dd-ssarseɣ řɛedyan nnec d tanebdat sadu iḍaren nnec.
PSA 110:2 SIDI ad issekk azeǧaḍ n ṣṣulṭa nnec zi Ṣihyun, Cek ad tṣellṭed di řwesṭ n řɛedyan nnec.
PSA 110:3 Řgens nnec ad yiři d amseɛɛaf deg wass n ṣṣulṭa nnec, ad dd-yas di tissiqt iqeddsen zi řemřawřet n tuffut, [ammu i ɣa yiři] i Cek nnda n yinni ɛad mammec d ac dd-ittwaxeřqen.
PSA 110:4 SIDI ijjuǧ, ɛemmarṣ ad xas indem: “Cek d Akehhan i řebda, ɛlaḥsab ṣṣifet n Malkiṣadiq!”, [ixs ad yini ‘Ajeǧid d Amsegged’].
PSA 110:5 Sidi aqa-t ɣar ufus afusi nnec. Netta ad iřbez ijeǧiden deg wass n weɣḍab nnes.
PSA 110:6 Netta ad iḥakem x řegnus, aqa da [tammurt] teccur s řxecbat, ad iřbez azeǧif x ict n temmurt tameqqrant.
PSA 110:7 Ak-d webrid ad isu zi teɣzart, x uya ad issgeɛɛed azeǧif nnes.
PSA 111:1 Hallilu-Yah! Alif. Ad qadeɣ SIDI s marra uř inu, Bit. di řaman n wegraw n yinni igguren nican, [di] tmesmunt.
PSA 111:2 Gimel. Řefɛayeř n SIDI d imeqqranen, Dalit. aqa twarezzun zi marra inni zzaysen ifarrḥen.
PSA 111:3 Hi. Netta igga s lɛaḍama d řɛezz, Waw. tasegda nnes tᵉttɣima i řebda.
PSA 111:4 Zayin. Netta igga ijj n [řɛid] [i] řidaret n lmuɛjizat nnes. Xit. SIDI d aḥnin d arḥim.
PSA 111:5 Tit. Netta iwca macca i yinni t itteggʷeden, Yud. ittidar Řɛahd nnes i řebda.
PSA 111:6 Kaf. Netta isscen i řgens nnes timegga nnes ijehden, Lamid. ḥima ad asen iwc tasɣart n řegnus.
PSA 111:7 Mim. Řefɛayeř n ifassen nnes d tidett d řḥeqq, Nun. marra tiweṣṣa nnes daysent řaman,
PSA 111:8 Samix. aqa aten bedden i řebda, Ɛayin. ttwaggen di tidett u s řeṣfayet.
PSA 111:9 Pi. Netta issewjed ttaman n weṣřaḥ i řgens nnes, Tsadi. igga Řɛahd nnes i řebda. Quf. Isem nnes d amqeddas d isseggʷaden.
PSA 111:10 Rix. Tiggʷudi n SIDI d beddu n tiɣit. Cin. Marra inni itteggen amenni, aqa ɣarsen řeɛqeř d lemliḥ. Taf. Ccan nnes ittɣima i řebda.
PSA 112:1 Hallilu-Yah! Alif. Sseɛd n weryaz nni itteggʷeden SIDI, Bit. wenni ifarrḥen aṭṭas x tweṣṣa nnes.
PSA 112:2 Gimel. Tarwa nnes ad iřin jehhden di temmurt, Dalit. jjiř n yinni igguren nican ad ittwabarek.
PSA 112:3 Hi. Řxir d wagřa ad ccuren taddart nnes, Waw. tasegda nnes tᵉttɣima i řebda.
PSA 112:4 Zayin. I yinni igguren nican [ad asen] teɣři tfawt di taǧest. Xit. [Netta] d aḥnin d arḥim d umsegged.
PSA 112:5 Tit. Aryaz nni ittḥinna u yareṭṭeř, [ad yiři] mliḥ, Yud. aqa iɛeddeř timesřayin nnes nican.
PSA 112:6 Kaf. Maɣar netta war ittɣimi ittenhezza i řebda. Lamid. Ad [din] tiři řidaret deg umsegged i řebda.
PSA 112:7 Mim. Netta war itteggʷed zi nnab i war iḥřin, Nun. Uř nnes imten, ittcař x SIDI.
PSA 112:8 Samix. Uř nnes imten, war itteggʷed, Ɛayin. ař ɣa ixzar ɣar yinni t-i-dd iḥeṣṣaren.
PSA 112:9 Pi. Izuzzar, ittic i imezřaḍ. Tsadi. Tasegda nnes tᵉttɣima i řebda, Quf. icc nnes ad ittwassuɛřa s ccan.
PSA 112:10 Rix. Ad t iẓar uɛeffan, ad iffugem. Cin. Netta ad iɣezz s teɣmas, [xenni] ad ifsi. Taf. Meẓri n iɛeffanen ad ibḍeř.
PSA 113:1 Hallilu-Yah, sɛuǧem, [kenniw] imsexxaren n SIDI, sɛuǧem Isem n SIDI!
PSA 113:2 Ad ittwabarek Isem n SIDI, zi řexxu ař řebda.
PSA 113:3 Zi manis dd-tneqqar tfuct ař manis tɣeǧi tfuct, ad ittwassɛuǧa Isem n SIDI.
PSA 113:4 SIDI yuɛřa x marra řegnus, tiwa i ijenwan d aɛuǧi nnes.
PSA 113:5 Man wen iǧan am SIDI, AREBBI nneɣ, wenni izeddɣen di řuɛřa qaɛ,
PSA 113:6 wenni yuḍaren maḥend ad iẓar deg ijenwan u x temmurt!
PSA 113:7 Wenni dd-issnekkaran amuqřiř zi tɛejjajt, issgeɛɛed amezřuḍ zeg wefraḍ
PSA 113:8 maḥend ad [t] issɣim ak-d tarwa n taṣiřet, ak-d tarwa n taṣiřet n řgens nnes.
PSA 113:9 Wenni issezdaɣen tenni war ittirwen di taddart, [am] ict n yemmatsen n iḥenjiren tfarḥ. Hallilu-Yah.
PSA 114:1 Ařami iffeɣ Israil zi Miṣra, taddart n Yaɛqub zeg ijj n řgens s yiřes n midden,
PSA 114:2 idweř Yahuda d Zzawect nnes Iqeddsen, Israil d [tammurt n] řeḥkamet nnes.
PSA 114:3 Řebḥar iẓra i-t uca yarweř, L’Urdun inneqřeb ɣar ḍeffar.
PSA 114:4 Idurar negzen am yicarriyyen, tiwririn am yizmaren.
PSA 114:5 Min cek yuɣin, [a] řebḥar, ařami trekkwařed, [a cek] L’Urdun, ařami tenqeřbed ɣar ḍeffar?
PSA 114:6 [A] idurar, [min kenniw yuɣin] ařami tneggzem am yicarriyyen, tiwririn am yizmaren?
PSA 114:7 [A] tammurt arjiji zzat i wudem n Sidi, zzat i wudem n Arebbi n Yaɛqub,
PSA 114:8 wenni yarrin taṣḍart d řḥemřet n waman, sseǧaḥ d řɛunṣarat n waman.
PSA 115:1 War iǧi i neccin, [a] SIDI, war iǧi i neccin, maɣar i Yisem nnec ad yiři uɛuǧi, di ssibbet n tmexsiwt nnec icewwaren d řaman nnec.
PSA 115:2 Mayemmi ɣa qqaren řegnus: ‘Mani iǧa xenni AREBBI nsen?’
PSA 115:3 AREBBI nneɣ aqa-t deg ujenna, igga marra min d as yarḍan.
PSA 115:4 Řexyařat nsen n l’aṣnam aqa atent s nnuqart d wureɣ, řxedmet n ifassen n iwdan.
PSA 115:5 Ɣarsen aqemmum, [maca] war ssiwiřent, ɣarsent tiṭṭawin, [maca] war ttwiřint,
PSA 115:6 Ɣarsent imezzuɣen, [maca] war ttesřint, ɣarsent wanzaren, [maca] war ttcemmint.
PSA 115:7 Ifassen nsen war zemmaren ad cebbaren, iḍaren nsen war zemmaren ad uyuren. Nitni war ssuffuɣen řḥess zi tmijja nsen.
PSA 115:8 Ejj inni tent iggin ad daysent arewsen, kuř ijj zeg inni xasent ittecřen.
PSA 115:9 Israil, tceř x SIDI. Netta d twiza nsen d taseddart nsen i useřqi.
PSA 115:10 Taddart n Harun, tceř x SIDI. Netta d twiza nsen d taseddart nsen i useřqi.
PSA 115:11 [Marra kenniw] inni itteggʷeden SIDI, tecřem x SIDI. Netta d twiza nsen d taseddart nsen i useřqi.
PSA 115:12 SIDI iɛqeř xaneɣ, Netta ad ibarek. Ad ibarek taddart n Israil, ad ibarek taddart n Harun.
PSA 115:13 Netta ad ibarek inni itteggʷeden zi SIDI, imeẓyanen [jmiɛ] ak-d imeqqranen.
PSA 115:14 SIDI ad awem issmarni [tarwa], i kenniw uřa i injiren nwem.
PSA 115:15 Kenniw tᵉttwabarkem zi SIDI, wenni iggin ijenwan d temmurt.
PSA 115:16 Ijenwan, [wah,] ijenwan n SIDI, [maca] tammurt iwca i-tt i tarwa n bnadem.
PSA 115:17 Imettan war zemmaren ad ssemɣaren SIDi, uřa d inni dd-ihwan deg ususem.
PSA 115:18 Neccin ad nbarek SIDi, zi řexxu ař i řebda. Hallilu-Yah!
PSA 116:1 Necc ttexseɣ, maɣar SIDI isřa i tmijja inu, i tutra inu,
PSA 116:2 maɣar Netta iwca ayi ameẓẓuɣ nnes. Ad as řaɣiɣ marra ussan [n tudart inu].
PSA 116:3 Iseɣwan n řmewt nnḍen ayi-dd, tewḍa-dd xafi tiggʷuda n řaxart. Necc ufiɣ aqa ayi ttwaḥṣareɣ u ceḍneɣ.
PSA 116:4 Řaɣiɣ x Yisem n SIDI, nniɣ: “[A] SIDI, fekk řeɛmar inu!”
PSA 116:5 SIDI d aḥnin d amsegged, AREBBI nneɣ dayes řeḥnunect.
PSA 116:6 SIDI iḥeṭṭa uřawen n iḥafiyyen. Necc tuɣa ayi [am] uneɛḍab, [maca] Netta issenjem ayi.
PSA 116:7 Hna ɛawed, [a] řeɛmar inu, maɣar SIDI igga ac min iṣebḥen.
PSA 116:8 Maɣar Cek teḥḍid řeɛmar inu zi řmewt, tiṭṭawin inu zeg imeṭṭawen, aḍar inu zeg uneqraḍ.
PSA 116:9 Ad uyureɣ zzat i wudem n SIDI, di temmura n yinni iddaren.
PSA 116:10 Necc umneɣ, s uyenni nniɣ: “Necc ttwaḥṣareɣ aṭṭas!”
PSA 116:11 Di tiggʷudi inu nniɣ: “Marra iwdan d ayt n bu-ixarriqen!”
PSA 116:12 Mammec i ɣa xeǧṣeɣ SIDI x marra řxar i d ayi igga?
PSA 116:13 Ad ssgeɛɛdeɣ řkas n usenjem ameqqran, ad řaɣiɣ x Yisem n SIDI.
PSA 116:14 Necc ad kemmřeɣ lwuɛud inu i SIDI, qibač i marra řgens nnes.
PSA 116:15 Aqa iɣřa di tiṭṭawin n SIDI řmewt n imtiqqan nnes.
PSA 116:16 A SIDI, aqa necc d amsexxar nnec, nnec d amsexxar nnec, mmis n tayya nnec. Cek tessarxud xafi iceddiyen inu.
PSA 116:17 Necc ad Cek dd-awyeɣ tawhibt n uqadi, ad řaɣiɣ x Yisem n SIDI.
PSA 116:18 Necc ad ssqefřeɣ lwuɛud inu i SIDI, qibač i marra řgens nnes.
PSA 116:19 di řemraḥat n Taddart n SIDI, di řwesṭ nnem, [a] Urcalim! Hallilu-Yah.
PSA 117:1 Sɛuǧem SIDI, marra řegnus, ṣebḥem t, marra ccuɛub!
PSA 117:2 Maɣar tamexsiwt nnes icewwaren d tameqqrant tiwa nneɣ, řaman n SIDI ittɣima i řebda, Hallilu-Yah!
PSA 118:1 [Ɣar beddu ...] Qadam SIDI, maɣar Netta d aṣebḥan, maɣar tamexsiwt nnes icewwaren tᵉttɣima i řebda.
PSA 118:2 Ejj Israil ad yini: “Tamexsiwt nnes icewwaren tᵉttɣima i řebda.”
PSA 118:3 Ejj taddart n Harun ad tini “Tamexsiwt nnes icewwaren tᵉttɣima i řebda.”
PSA 118:4 Ejj inni itteggʷeden SIDI ad inin: “Tamexsiwt nnes icewwaren tᵉttɣima i řebda.”
PSA 118:5 [Deg webrid ...] Di řeḥṣaret řaɣiɣ ɣar SIDi. SIDi yarra-dd xafi, [iwca ayi] ttasiɛ.
PSA 118:6 SIDI aqa-t akidi, war tteggʷedeɣ ca, [maɣar] min izemmar bnadem ad ayi igg?
PSA 118:7 SIDI aqa-t akidi jar yinni d ayi iwcin afus. Necc ad xezzareɣ [ɣar swadday] x yinni d ayi icarrhen.
PSA 118:8 Iḥřa ad arewřeɣ ɣar SIDI x utecři x bnadem.
PSA 118:9 Iḥřa ad arewřeɣ ɣar SIDI x utecři x tarwa n taṣiřet.
PSA 118:10 Marra řegnus nnḍen ayi-dd, necc ɣeḍřeɣ ten s Yisem n SIDI.
PSA 118:11 Nnḍen ayi-dd, [wah,] quwwaren ayi. Necc ɣeḍřeɣ ten s Yisem n SIDI.
PSA 118:12 Nitni nnḍen ayi am tzizwa, aqa am tmessi n isennanen xesyen. Necc ɣeḍřeɣ ten s Yisem n SIDI.
PSA 118:13 Cek tɛarned ayi s řeqsaḥet ařami ɛřaḥař wḍiɣ, maca SIDI iwca ayi afus.
PSA 118:14 SIDi d jjehd inu d azehhed [inu], Netta idweř ayi d asenjem.
PSA 118:15 Deg iqiḍan n imseggaden [ittwaseř] řḥess n usřiwřew d usenjem. Afus afusi n SIDI igga s jjehd.
PSA 118:16 Afus afusi n SIDI ittwassgeɛɛed, afus afusi n SIDI igga s wemḥaḍ.
PSA 118:17 Necc war ttmettiɣ ca, ad ddareɣ, ad barrḥeɣ timegga n SIDi.
PSA 118:18 SIDi iwebbex ayi aṭṭas, [maca] war d ayi iwci i řmewt.
PSA 118:19 [Ɣar wadaf ...] Arzmem ayi tiwwura n tsegda, ad zzaysent adfeɣ, ad qadiɣ SIDi.
PSA 118:20 [Inni yareḥḥben zeg yinni ittadfen qqaren ...] Ta d tawwart n SIDI, imseggaden ad zzayes adfen.
PSA 118:21 Necc ad ac qadiɣ umi d ayi tesřid, tdewřed ayi d asenjem.
PSA 118:22 Aẓru i war xsen ibennayen, idweř d ixef n teɣmart.
PSA 118:23 Wa yusa-dd zi SIDI u man aya d řeɛjeb di tiṭṭawin nneɣ.
PSA 118:24 Wa d ass i igga SIDI, ejj aneɣ ad narceq u ad dayes nfarḥ.
PSA 118:25 A SIDI, awi-dd asenjem, a SIDI, awi-dd afřaḥ.
PSA 118:26 Lbaraka i wenni dd ɣa yasen s Yisem n SIDI! Neccin ad kenniw nbarek zi Taddart n SIDI.
PSA 118:27 Arebbi d SIDI nni d aneɣ iggin tafawt. Qnem [taɣarṣt n] řɛid s iseɣwan ɣar waccawen n uɛalṭar, [řmedbeḥ n wecmaḍ].
PSA 118:28 [Inni ittadfen qqaren ...] Cek d Arebbi inu, s uya ad Cek qadiɣ, [a] AREBBI inu, ad Cek ssɛuǧeɣ.
PSA 118:29 [Marra jmiɛ ...] Qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda.
PSA 119:1 Alif. Sseɛd nsen i yinni ikemmřen abrid [n tudart] nsen břa řɛib, inni igguren x webrid n Ccariɛa n SIDI.
PSA 119:2 Sseɛd nsen i yinni iḥeṭṭan cchadat nnes, inni xas yarezzun s marra uř nsen.
PSA 119:3 Nitni war tteggen řɣecc, maca gguren deg ibriden nnes.
PSA 119:4 [A] SIDI, cek tumared maḥend bnadem ad iḥḍa tiweṣṣa nnec nican.
PSA 119:5 Mři qaɛ ibriden inu ttwaseggden, maḥend ad ḥḍiɣ tiweṣṣa nnec,
PSA 119:6 [xenni] ɛemmarṣ ad seḍḥiɣ mařa xezzareɣ ɣar marra tiweṣṣa nnec.
PSA 119:7 S wuř iqqur ad Cek qadiɣ, mařa necc řemdeɣ řeḥkamat nnec iseggden.
PSA 119:8 Ad ḥḍiɣ tiweṣṣa nnec! War dayi semmeḥ [marra]!
PSA 119:9 Bit. Mammec i ɣa issizdeg ijj n uḥudri abrid nnes? S wemnaɛ nnes deg wawař nnec.
PSA 119:10 Necc arezzuɣ xak s wuř inu marra, war d ayi ttejji ad ffɣeɣ x řumurat nnec.
PSA 119:11 Min teqqared Cek, xemmřeɣ t deg wuř inu, maḥend war kidek xeṭṭiɣ.
PSA 119:12 Tᵉttwabarked Cek, [a] SIDI, seřmed ayi tiweṣṣa nnec.
PSA 119:13 S iyencicen inu barrḥeɣ marra lfarayiḍ n uqemmum nnec.
PSA 119:14 Aqa farḥeɣ s webrid n cchadat nnec, am s marra min iǧan iɣřa.
PSA 119:15 Ad xarrṣeɣ di řumurat nnec, ad xezzareɣ ɣar imesraq nnec.
PSA 119:16 Necc ttarreɣ meẓři di tiweṣṣa nnec, awař nnec war t ttᵉttuɣ.
PSA 119:17 Gimel. Egg tcuni i umsexxar nnec, maḥend ad ddareɣ u ad ḥḍiɣ awař nnec.
PSA 119:18 Arzem ayi tiṭṭawin inu, ḥima ad ẓareɣ lmuɛjizat n Ccariɛa nnec.
PSA 119:19 Necc aqa ayi d abarrani x temmurt, war xafi teffar řumurat nnec.
PSA 119:20 Řeɛmar inu ittwafna s uweḥḥec ɣar lfarayiḍ nnec, řebda.
PSA 119:21 Cek tɛaqbed imɛeffaren ittwaneɛřen, inni itteffɣen x řumurat nnec.
PSA 119:22 Ksi xafi řefḍiḥet d useḥqar, maɣar ḥḍiɣ cchadat nnec.
PSA 119:23 Uřa d řḥukkam qqimen, ssawařen ak-d wayawya xafi, [maca] amsexxar nnec ittxarreṣ di tweṣṣa nnec.
PSA 119:24 Cchadat nnec d meẓri inu, aqa atent d imcawaren inu.
PSA 119:25 Dalit. Řeɛmar inu iřṣeq ɣar tɛejjajt, arr-dd dayi tudart ɛlaḥsab awař nnec.
PSA 119:26 Necc neɛmeɣ i Cek x ibriden inu u Cek testajbed ayi. Seřmed ayi tiweṣṣa nnec.
PSA 119:27 Arr ayi ad fehmeɣ abrid n řumurat nnec, ad xarrṣeɣ di lmuɛjizat nnec.
PSA 119:28 Řeɛmar inu ifsi s wecḍan, seggem ayi ɣar [webrid n] wawař nnec.
PSA 119:29 Siggʷej ayi x webrid n ixarriqen, ḥinn xafi s Ccariɛa nnec.
PSA 119:30 Necc ixḍareɣ abrid n tidett, ssarseɣ lfarayiḍ nnec [zzati].
PSA 119:31 Necc cebbareɣ di cchadat nnec, [a] SIDI, war d ayi ttejji ad seḍḥiɣ.
PSA 119:32 Necc ad azzřeɣ abrid n řumurat nnec, maɣar Cek teggid ttasiɛ i wuř inu.
PSA 119:33 Hi. [A] SIDI! seřmed ayi abrid n tweṣṣa nnec, [xenni] necc ad dayes ṭṭfeɣ ař aneggar.
PSA 119:34 Ewc ayi řefhamet, [xenni] ad ḥḍiɣ Ccariɛa nnec u ad dayes ṭṭfeɣ s wuř inu marra.
PSA 119:35 Ndeh ayi x webrid n řumurat nnec, minzi farrḥeɣ zzayes.
PSA 119:36 Arr uř inu ɣar cchadat nnec, war iǧi ɣar ṭṭmeɛ n arbeḥ.
PSA 119:37 Sheyyeḍ tiṭṭawin inu x řbaṭeř, arr-dd dayi tudart s ibriden nnec.
PSA 119:38 Ḍmen min tennid i umsexxar nnec, wenni Cek itteggʷden.
PSA 119:39 Sḥeyyed xafi řefḍiḥet i zi tteggʷedeɣ, maɣar lfarayiḍ nnec cnant.
PSA 119:40 Xzar, ttweḥḥceɣ řumurat nnec, arr ayi ddareɣ s tsegda nnec.
PSA 119:41 Waw. Ejj ad ɣari dd-tas tmexsiwt nnec icewwaren, [a] SIDI, asenjem nnec [aqa-t] am mammec i tennid Cek.
PSA 119:42 ḥima zemmareɣ ad arreɣ x wenni zzayi issbehdařen, maɣar ttecřeɣ x wawař nnec.
PSA 119:43 War ttekkes awař n tidett qaɛ zeg uqemmum inu, maɣar ttrajiɣ lfarayiḍ nnec.
PSA 119:44 Necc ad ḥḍiɣ Ccariɛa nnec břa qeṭṭu, i řebda qaɛ.
PSA 119:45 Necc ggureɣ di ttasiɛ, maɣar arzuɣ x řumurat nnec.
PSA 119:46 Ad ssiwřeɣ x cchadat nnec zzat i ijeǧiden, war [zzatsen] ttseḍḥiɣ ca.
PSA 119:47 Ad arreɣ meẓri di řumurat nnec, tinni i ttexseɣ.
PSA 119:48 Ad sgeɛɛdeɣ ifassen inu qibař i řumurat nnec, tinni i ttexseɣ, ad xarrṣeɣ di tweṣṣa nnec.
PSA 119:49 Zayin. Ɛqeř x wawař [i tennid] i umsexxar nnec, min xef tuyřed asitem inu.
PSA 119:50 D wa d afewwej inu di řeɣben inu, maɣar lwaɛd nnec yarra-dd dayi tudart.
PSA 119:51 Imɛeffaren stehzan zzayi ař ṭṭarf, [maca] necc war ḥeyyideɣ ca x Ccariɛa nnec.
PSA 119:52 Necc xarrṣeɣ di lfarayiḍ nnec n řebda, [a] SIDI, [xenni] aqa ttwafewwjeɣ.
PSA 119:53 Tafqeḥt tᵉṭṭef ayi di ssibbet n iɛeffanen, inni isemmḥen di Ccariɛa nnec.
PSA 119:54 Tiweṣṣa nnec tuɣa atent d izřan inu di taddart n tbarranect inu.
PSA 119:55 Di ǧiřet tuɣa ttxarrṣeɣ deg Yisem nnec, [a] SIDI, u ḥḍiɣ Ccariɛa nnec.
PSA 119:56 Ammu i d ayi imsar, maɣar ḥḍiɣ řumurat nnec.
PSA 119:57 Xit. SIDI d tasɣart inu, necc nniɣ ad ḥḍiɣ awařen nnec.
PSA 119:58 Ḥeccmeɣ [zzat] i wudem nnec s marra wuř inu, ḥinn xafi am mammec i [d ayi] tennid.
PSA 119:59 Necc xarrṣeɣ deg ibriden inu, ad ssɛeqbeɣ [iṣuraf n] iḍaren inu ɣar cchadat nnec.
PSA 119:60 Necc qeǧqeɣ, war ɛeṭṭařeɣ ca, ḥima ad ḥḍiɣ řumurat nnec.
PSA 119:61 Iseɣwan n iɛeffanen carrfen ayi, [maca] war ttᵉttuɣ Ccariɛa nnec.
PSA 119:62 Ɣar wezyen n ǧiřet ttnekkareɣ, ḥima ad Cek qadiɣ x lfarayiḍ nnec iseggden.
PSA 119:63 Necc d aɛcir n marra inni Cek itteggʷeden, n yinni iḥeṭṭan řumurat nnec.
PSA 119:64 Zi tmexsiwt nnec icewwaren teccur temmurt marra, [a] SIDI, seřmed ayi tiweṣṣa nnec.
PSA 119:65 Tit. Cek teggid s tcuni i umsexxar nnec, [a] SIDI, ɛlaḥsab awař nnec.
PSA 119:66 Seřmed ayi maḥend ad meyyzeɣ u ad ssneɣ mliḥ, minzi ttecřeɣ x řumurat nnec.
PSA 119:67 Qbeř ma ttwaḥṣareɣ, weddareɣ, [maca] řexxu ḥeṭṭiɣ min teqqared Cek.
PSA 119:68 Cek d aṣebḥan, tᵉttegged min iṣebḥen, seřmed ayi tiweṣṣa nnec.
PSA 119:69 Imɛeffaren arexxun-dd xafi ixarriqen, [maca] necc ḥeṭṭiɣ řumurat nnec s marra uř inu.
PSA 119:70 Uř nsen war ittacan am tadunt, [maca] necc, aqa Ccariɛa nnec ttafeɣ dayes meẓri.
PSA 119:71 Tuɣa i necc mliḥ umi ttwaḥṣareɣ, maɣar ammu i řemdeɣ tiweṣṣa nnec.
PSA 119:72 Ccariɛa zeg uqemmum nnec ɣari iḥřa aṭṭas x wařaf n [uqiyyat] n wureɣ niɣ n nnuqart.
PSA 119:73 Yud. Ifassen nnec ggin ayi, kewwnen ayi. Ewc ayi řeɛqeř, maḥend ad řemdeɣ řumurat nnec.
PSA 119:74 Inni Cek itteggʷeden ad ayi ẓaren uca ad farḥen, maɣar ttrajiɣ awař nnec.
PSA 119:75 Necc ssneɣ, [a] SIDI, aqa seggdent řeḥkamat nnec, u aqa Cek teḥṣared ayi s řaman.
PSA 119:76 Ejj ad tiři tmexsiwt nnec icewwaren d afewwej i necc, am mammec i tennid i umsexxar nnec.
PSA 119:77 Ad xafi dd-tas arreḥmet nnec, maḥend ad ddareɣ, maɣar Ccariɛa nnec dayes meẓri inu.
PSA 119:78 Ejj ad seḍḥan imɛeffaren, maɣar s ixarriqen ssfarrɣen ayi [ṣṣifet inu], [maca] necc txemmameɣ di řumurat nnec.
PSA 119:79 Ejj ad ɣari dd-dewřen inni Cek itteggʷeden, inni issnen cchadat nnec.
PSA 119:80 Ejj ad yiři uř inu imun ɣar tweṣṣa nnec, ḥima war ttseḍḥiɣ ca.
PSA 119:81 Kaf. Řeɛmar inu isxef [zi meẓri] ɣar usenjem nnec, aqa ttrajiɣ awař nnec.
PSA 119:82 Tiṭṭawin inu deqqřent [zi meẓri] ɣar min teqqared Cek, umi nniɣ: ‘Meřmi i xafi i ɣa tessfewwjed?’
PSA 119:83 Maɣar dewřeɣ am yict n txancet n yiřem [tuyeř] di ddexxan, [maca] tiweṣṣa nnec war tent ttuɣ.
PSA 119:84 Mecḥař n wussan [ɛad] [i iqqimen] i umsexxar nnec? Meřmi i ɣa tcarrɛed inni d ayi iḍeffaren?
PSA 119:85 Imɛeffaren ɣzan ayi iḥufar, min war dd-yusin ak-d Ccariɛa nnec.
PSA 119:86 Marra řumurat nnec d tidett. Nitni ttdarracen ayi s ixarriqen, ewc ayi afus!
PSA 119:87 Ɛřaḥař iři aqa teḥḥan ayi zi temmurt, [maca] necc war ḥeyydeɣ x řumurat nnec.
PSA 119:88 Arr-dd dayi tudart ɛlaḥsab tamexsiwt nnec icewwaren, [xenni] ad ḥḍiɣ cchadet [i dd-iffɣen] zeg uqemmum nnec.
PSA 119:89 Lamid. [A] SIDI, awař nnec ittɣima i řebda imten deg ujenna.
PSA 119:90 Tamexsiwt nnec icewwaren [tiweḍ] zi jjiř ař jjiř. Cek teggid tammurt ad tbedd temten u [ammu i] ɣa teqqim tbedd.
PSA 119:91 Ɛlaḥsab lfarayiḍ nnec ad qqimen bedden, maɣar marra nitni d imsexxaren nnec.
PSA 119:92 Meɛlik war teǧi Ccariɛa nnec d meẓri inu, iři ttwahellkeɣ di řeḥṣaret inu.
PSA 119:93 Ɛemmarṣ ad ttuɣ řumurat nnec i řebda, maɣar zzaysent tarrid ayi-dd tudart.
PSA 119:94 Necc aqa ayi i Cek, senjem ayi, minzi arzuɣ x řumurat nnec.
PSA 119:95 Iɛeffanen rajan ayi ḥima ad ayi teḥḥan, [maca] necc xezzareɣ ɣar cchadat nnec.
PSA 119:96 Necc ẓriɣ aqa marra min teǧa řekmaret ɣares aneggar, [maca] řumur nnec ɣares ttasiɛ aṭṭas.
PSA 119:97 Mim. Mammec i xafi tɛizz Ccariɛa nnec, ass ikmeř ttxarrṣeɣ dayes.
PSA 119:98 S řumurat nnec tarrid ayi d amiɣis x řɛedyan inu, maɣar aqa aten ɣari i řebda.
PSA 119:99 Necc ɣari řeɛqeř ktar x marra imseřmaden inu, maɣar ttxarrṣeɣ deg ibriden nnec.
PSA 119:100 Necc ɣari řefhamet ktar x iwessura, maɣar ḥḍiɣ řumurat nnec.
PSA 119:101 Menɛeɣ iḍaren inu zi qaɛ ibriden iɛeffanen, ḥima ad ḥḍiɣ awař nnec.
PSA 119:102 Necc war ḥeyydeɣ ca x lfarayiḍ nnec, maɣar Cek d wenni d ayi issɣaren.
PSA 119:103 Mammec i ɣa yiři d miẓid min teqqared Cek i waneɣ inu, x tamment i uqemmum inu!
PSA 119:104 Zi řumurat nnec ttarriɣ-dd řeɛqeř, x uya carrheɣ kuř amesruq n ixarriqen.
PSA 119:105 Nun. Awař nnec d řefnar i uḍar inu d tafawt i umesruq inu.
PSA 119:106 Necc jjuǧeɣ u ad [t] ggeɣ, aqa ad ḥḍiɣ marra lfarayiḍ nnec iseggden.
PSA 119:107 Necc ttwaḥṣareɣ aṭṭas, [a] SIDI, arr-dd dayi tudart ɛlaḥsab awař nnec.
PSA 119:108 Ttzawgeɣ, ksi s arḍa tiwhibin n řxaḍar zeg uqemmum inu, [a] SIDI, u seřmed ayi lfarayiḍ nnec.
PSA 119:109 Tudart inu aqa-t řebda di lxaṭer, [maca] ɛemmarṣ ad ttuɣ Ccariɛa nnec.
PSA 119:110 Iɛeffanen ggin ayi ijj n řfex, [maca] necc war ffɣeɣ ca x řumurat nnec.
PSA 119:111 Cchadat nnec d tasɣart inu i řebda, maɣar nitenti ssfarrḥent uř inu.
PSA 119:112 Ḥezzmeɣ uř inu maḥend ad ggeɣ ɛlaḥsab tiweṣṣa nnec, i řebda, ař aneggar.
PSA 119:113 Samix. Ayt n tnayen n iɣembab carrheɣ ten, [maca] ttexseɣ Ccariɛa nnec.
PSA 119:114 Cek d adurri inu d taseddart n useřqi inu, necc ttrajiɣ awař nnec.
PSA 119:115 Beɛɛdem xafi, [a] iɛeffanen, ḥima ad ḥḍiɣ řumurat n AREBBI inu.
PSA 119:116 Senned ayi ɛlaḥsab lwaɛd nnec, maḥend ad ddareɣ u war ttseḍḥiɣ di řayas inu.
PSA 119:117 Ɛemmed ayi, [xenni] ad ttwassnejmeɣ, u ad arreɣ meẓri di tweṣṣa nnec řebda.
PSA 119:118 Marra inni ittaggʷejen x tweṣṣa nnec, sseḥqareɣ ten, maɣar řɣecc nsen [mɣir] d ixarriqen.
PSA 119:119 Am kuffu tmeḥḥid marra iɛeffanen zi temmurt, s uya ttexseɣ cchadat nnec.
PSA 119:120 Zi tiggʷudi zzayek teccirruw arrimet inu, [ammu i] ggʷedeɣ zi řeḥkamat nnec.
PSA 119:121 Ɛayin. Necc ggiɣ řḥeqq d tsegda, war d ayi ttsellem i [řmargeḥ n] yinni d ayi iḥeṣṣaren.
PSA 119:122 Egg řɛarbun di ṭṭweɛ n umsexxar nnec, war ttejji imɛeffaren ad ayi ḥṣaren.
PSA 119:123 Tiṭṭawin inu deqqřent [zi meẓri] ɣar usenjem nnec, ɣar lwaɛd n tsegda nnec.
PSA 119:124 Egg s tmexsiwt nnec icewwaren ak-d umsexxar nnec, seřmed ayi tiweṣṣa nnec.
PSA 119:125 Necc d amsexxar nnec, ewc ayi řeɛqeř, maḥend ad ssneɣ cchadat nnec.
PSA 119:126 Aqa yiweḍ as-dd řḥař i SIDI, ḥima ad ibedd x iḍaren nnes, [maɣar] nitni arẓin Ccariɛa nnec.
PSA 119:127 Minzi ttexseɣ tiweṣṣa nnec x wureɣ, [wah] aṭṭas x wureɣ ittwaṣeffan,
PSA 119:128 x uya ḥesbeɣ marra řumurat [nnec] di kuř [tamesřact] nican, [maca] carheɣ kuř amesruq n ixarriqen.
PSA 119:129 Pi. Cchadat nnec d lmuɛjizat, x uya iḥeṭṭa tent wuř inu.
PSA 119:130 Anurzem n wawařen nnec isscan tafawt, i iḥafiyyen ittic asen řeɛqeř.
PSA 119:131 Arzmeɣ aqemmum inu aṭṭas u ssaḥrateɣ zi meẓri ɣar řumurat nnec.
PSA 119:132 Arr udem [nnec] ɣari u ḥinn xafi, am mammec dd-tekkar i yinni ittexsen Isem nnec.
PSA 119:133 Semten iṣuraf inu am mammec i d ayi tennid, war ttejji ad xafi iḥkem řɣecc walu.
PSA 119:134 Fekk ayi zi řeḥṣaret n iwdan, maḥend ad ḥḍiɣ řumurat nnec.
PSA 119:135 Ejj udem nnec ad yarɣ x umsexxar nnec, seřmed ayi tiweṣṣa nnec.
PSA 119:136 Tiɣezratin n waman hwant-i-dd zi tiṭṭawin inu, maɣar nitni war ḥeṭṭan Ccariɛa nnec.
PSA 119:137 Tsadi. Aqa Cek d amsegged, [a] SIDI, uřa d lfarayiḍ nnec seggdent.
PSA 119:138 Cek tumured tasegda n cchadat nnec, řmanet [nsen] d tameqqrant aṭṭas.
PSA 119:139 Tusmi inu [iqeddsen] inu tecca ayi, maɣar inni d ayi iḥeṣṣaren ttun awařen nnec.
PSA 119:140 Lwaɛd nnec iqqur aṭṭas, amsexxar nnec ittexs i-t.
PSA 119:141 Necc d amuqřiř u ttwasseḥqareɣ, [maca] war ttᵉttuɣ řumurat nnec.
PSA 119:142 Tasegda nnec d tasegda i řebda, Ccariɛa nnec d tidett.
PSA 119:143 Ddiqet d teggʷudi řeqqfent ayi, [maca] řumurat nnec daysent meẓri inu.
PSA 119:144 Tasegda n cchadat nnec i řebda i teǧa. Sefhem ayi [tent], [xenni] ad ddareɣ.
PSA 119:145 Quf. Řaɣiɣ s marra uř inu, arr-dd xafi, [a] SIDI, [xenni] ad ḥḍiɣ tiweṣṣa nnec.
PSA 119:146 Necc řaɣiɣ-dd xak, fekk ayi, [xenni] ad ḥḍiɣ marra cchadat nnec.
PSA 119:147 Qbeř tuffut tuɣa ttřaɣiɣ ḥima ad ayi dd-tewced afus, rajiɣ awař nnec.
PSA 119:148 Tiṭṭawin inu faqent qbeř řweqt n wuḍuf n wecbar, ḥima ad xarrṣeɣ deg wawařen nnes.
PSA 119:149 Seř-dd ɣar tmijja inu ɛlaḥsab tamexsiwt nnec icewwaren, [a] SIDI, arr-dd dayi tudart ɛlaḥsab lfarayiḍ nnec.
PSA 119:150 Inni yarezzun ad ggen řefḍayeḥ, udsen ayi, aqa nitni ttaggʷejen aṭṭas x Ccariɛa nnec.
PSA 119:151 Cek tudsed, [a] SIDI, marra řumurat nnec d tidett i ǧan.
PSA 119:152 [Uřa] d aṭṭas zeg wami tuɣa ssneɣ cchadat nnec, maɣar Cek teggid tent i řebda.
PSA 119:153 Rix. Xzar ɣar řeɣben inu u tessnejmed ayi, maɣar war ttuɣ Ccariɛa nnec.
PSA 119:154 Aɣ ayi tasɣart uca fekk ayi, arr-dd dayi tudart am mammec i d ayi tennid.
PSA 119:155 Iggʷej usenjem x iɛeffanen, maɣar war arezzun tiweṣṣa nnec.
PSA 119:156 [A] SIDI, arreḥmet nnec d aṭṭas, arr-dd dayi tudart ɛlaḥsab lfarayiḍ n nnec.
PSA 119:157 Inni d ayi ittdarracen d yinni d ayi iḥeṣṣaren aqa aten [s] waṭṭas, [maca] necc war ḥeyydeɣ ca x cchadat nnec.
PSA 119:158 Ẓriɣ inni d ayi iɣdaren uca ɛiffeɣ [ten], maɣar nitni war ṭṭifen deg wawař nnec.
PSA 119:159 Xzar, mammec ttexseɣ řumurat nnec, [a] SIDI, arr-dd dayi tudart ɛlaḥsab tamexsiwt nnec icewwaren.
PSA 119:160 Beddu n wawař nnec aqa-t d tidett, kuř řeḥkam iseggden zzayek aqa-t i řebda.
PSA 119:161 Cin. Řḥukkam darrcen xafi x walu, [maca] uř inu tuɣa itteggʷed zeg wawař nnec.
PSA 119:162 Necc farḥeɣ x lwaɛd nnec, amecnaw ijjen i ittaf ict n tkeccaḍt tameqqrant.
PSA 119:163 Necc carrheɣ axarriq u ɛiffeɣ t, [maca] ttexseɣ Ccariɛa nnec.
PSA 119:164 Sebɛa n twařawin deg wass ṣebḥeɣ Cek x řeḥkamat n tsegda nnec.
PSA 119:165 Inni ittexsen Ccariɛa nnec, aqa ɣarsen řehna tameqqrant, war din aẓru n uneqraḍ zzatsen.
PSA 119:166 [A] SIDI, ttrajiɣ asenjem nnec, u tteggeɣ ɛlaḥṣab tiweṣṣa nnec.
PSA 119:167 Řeɛmar inu iḥeṭṭa cchadat nnec, ttexseɣ tent aṭṭas.
PSA 119:168 Necc ḥeṭṭiɣ řumurat nnec d cchadat nnec, maɣar marra ibriden inu [arzmen] zzatek.
PSA 119:169 Taf. [A] SIDI, ejj ad ɣarek dd-yaweḍ uřaɣi inu zzat i wudem nnec, ewc ayi řeɛqeř ɛlaḥsab awař nnec.
PSA 119:170 Ejj ad dd-tas tutra inu ɣar wudem nnec, fekk ayi am mammec i d ayi tennid.
PSA 119:171 Iyencicen inu ad ucruren aṣebbeḥ am yijj n řɛunṣar, maɣar Cek tesseřmaded ayi tiweṣṣa nnec.
PSA 119:172 Iřes inu ad yarr min tennid Cek, maɣar marra řumurat nnec seggden.
PSA 119:173 Ejj afus nnec ad ayi igg twiza, maɣar ixḍareɣ řumurat nnec.
PSA 119:174 [A] SIDI, ttmeẓreɣ ɣar usenjem nnec, Ccariɛa nnec aqa dayes meẓri inu.
PSA 119:175 Ejj řeɛmar inu ad iddar, ad Cek iṣebbeḥ, ad ayi ɛawnent lfarayiḍ nnec.
PSA 119:176 Necc weddareɣ am yijj n uhuři iweddaren. Arzu x umsexxar nnec, maɣar war ttuɣ řumurat nnec.
PSA 120:1 [Izři n ugeɛɛed.] Necc řaɣiɣ ɣar SIDI di řeḥṣaret inu u Netta isřa ayi.
PSA 120:2 [A] SIDI, fekk řeɛmar inu zeg iyencicen issxarriqen, zeg iřes icemmten.
PSA 120:3 Min d ac i ɣa yewc, min d ac i ɣa yarni iřes nni icemmten?
PSA 120:4 Fřitcat n řqews qeḍɛent [zeg ufus] n ijj n umjahed, ak-d řefḥem n tcejjart n tagga.
PSA 120:5 Uct inu, aqa necc d abarrani di Macik, aqa zeddɣeɣ ɣar iqiḍan n Qidar!
PSA 120:6 Aṭṭas i izdeɣ řeɛmar inu ɣar yinni icarrhen řehna.
PSA 120:7 Necc d aheddan, maca xmi ɣa ssiwřeɣ, xenni arezzun amenɣi.
PSA 121:1 [Izři n ugeɛɛed.] Necc ssgeɛɛdeɣ tiṭṭawin inu ɣar idurar, manis dd ɣa tas twiza inu?
PSA 121:2 Twiza inu zi SIDI, wenni iggin ijenwan d temmurt.
PSA 121:3 Netta war ittejji aḍar nnec ad ifarɣ, wenni cek iḥeṭṭan war ittnudum.
PSA 121:4 Xzar, wenni iḥeṭṭan Israil war ittnudum u war itteṭṭeṣ.
PSA 121:5 SIDI d ameḥḍay nnec, SIDI d tiři nnec ɣar ufus afusi nnec.
PSA 121:6 Deg wass tafuct war cek teccit ca, uřa d taziri s ǧiřet.
PSA 121:7 SIDI ad cek iḥḍa zi marra řɣar, Netta ad iḥḍa řeɛmar nnec.
PSA 121:8 SIDI ad iḥḍa uffuɣ nnec d wadaf nnec, zi řexxu ař i řebda.
PSA 122:1 [Izři n ugeɛɛed. N Dawud.] Necc farrḥeɣ umi d ayi nnan: “Neccin ad nuyur ɣar Taddart n SIDI.
PSA 122:2 Iḍaren nneɣ bedden-dd ɣar tewwura nnec, [a] Urcalim!”
PSA 122:3 Urcalim tᵉttwabna am yict n tendint nni ittwacebbaren mliḥ ak-d yixef nnes.
PSA 122:4 Ɣar dinni ttgeɛɛadent tqebbař, tiqebbař n SIDi, [ɛlaḥsab] lfariḍa i Israil, ḥima ad qadan Isem n SIDI.
PSA 122:5 Maɣar dinni bedden řekrasi n ccreɛ řekrasi n taddart n Dawud.
PSA 122:6 Ttarem i řehna n Urcalim: “Aqa ad feřḥen inni cem ittexsen,
PSA 122:7 ḥima ad din yiři řehna ɣar řḥiḍ n zzat nnem, uřa d řhudnet di řeqṣur nnem.”
PSA 122:8 Di ṭṭweɛ n aytma d imeddukkař inu ad iniɣ: “Ad dayem yiři řehna!”
PSA 122:9 Di ṭṭweɛ n Taddart n SIDI, AREBBI nneɣ, ad ac arzuɣ x min icnan.
PSA 123:1 [Izři n ugeɛɛed.] Necc ssgeɛɛdeɣ tiṭṭawin inu ɣarek, Cek i iqqimen [x řkursi nnes] deg ujenna.
PSA 123:2 Xzar, am tiṭṭawin n isemɣan ɣar ufus n bab nsen, am tiṭṭawin n tayya ɣar ufus n lallas, ammu i [xezzarent] tiṭṭawin nneɣ ɣar SIDI, AREBBI nneɣ, ař xaneɣ i ɣa iḥinn.
PSA 123:3 Ḥinn xaneɣ, [a] SIDI, ḥinn xaneɣ, maɣar yuza ɣarneɣ useḥqar.
PSA 123:4 Řeɛmar nneɣ yuza ɣares aṭṭas zeg ustehzi n ayt n bu-nnfaxet, uřa zeg useḥqar n iɣebbanen.
PSA 124:1 [Izři n ugeɛɛed. N Dawud.] Mři SIDI war kidneɣ ibedd! Ini [t xenni ammu], [a] Israil,
PSA 124:2 mři SIDI war kidneɣ ibedd, umi akidneɣ dd-kkaren iwdan,
PSA 124:3 iři sarḍen aneɣ am neddar, umi yarɣa uxeyyeq nsen xaneɣ,
PSA 124:4 iři aman feyyḍen xaneɣ, iři ict n řḥemřet tekka x řeɛmar nneɣ,
PSA 124:5 iři aman iḥajen kkin x řeɛmar nneɣ.
PSA 124:6 Ad ittwabarek SIDI, wenni war dd aneɣ ittejjin d takeccaḍt i teɣmas nsen.
PSA 124:7 Řeɛmar nneɣ yarweř am wejḍiḍ zi řfex n unegmar. Řfex yareẓ u neccin nenfekk.
PSA 124:8 Twiza nneɣ tbedd deg Yisem n SIDI, wenni iggin ijenwan d temmurt.
PSA 125:1 [Izři n ugeɛɛed.] Inni ittecřen x SIDI, aqa aten am wedrar n Ṣihyun, wenni war ittenhezzin, [maca] ittɣima i řebda.
PSA 125:2 Am mammec idurar quwwaren i Urcalim, ammu iquwwar SIDI i řgens nnes, zi řexxu ař řebda.
PSA 125:3 Maɣar azeǧaḍ n řɣar war ittɣimi ittareyyeḥ x temmurt n imseggaden, ḥima imseggaden war sswiẓẓiḍen ifassen nsen ɣar řɣar.
PSA 125:4 Iři ad yegg SIDI tacuni deg iṣebḥanen, deg inni iseggden s wuř,
PSA 125:5 [maca] inni i ɣa iḥeyyden [zeg webrid] ɣar ibriden ifarɣen, ad ten issiggʷej SIDI [jmiɛ] ak-d yinni itteggen řɣecc. [Ad din yiři] řehna x Israil.
PSA 126:1 [Izři n ugeɛɛed.] Umi isseɛqeb SIDI inni dd-idewřen ɣar Ṣihyun, tuɣa aneɣ axmi yinni itturjan.
PSA 126:2 Tuɣa aqemmun nneɣ iccur s tḍeḥḥact, iřes nneɣ iccur s usřiwřew. Nnan jar řegnus: ‘SIDI igga daysen timesřayin timeqqranin!’
PSA 126:3 SIDI igga dayneɣ timesřayin timeqqranin, aqa neccin nfarḥ [zzayes].
PSA 126:4 [A] SIDI, qeǧeb tameḥbast nneɣ, am mammec [ttqeǧbent] tiɣezratin [Tammurt] n Ljanub.
PSA 126:5 Inni izarrɛen s imeṭṭawen, ad mjaren s usřiwřew.
PSA 126:6 Wenni yarebbun taxancet n zzariɛet, ittru xmi dd-iggur, [maca] xmi dd ɣa yas, ad dd-yas s usřiwřew, ad yarbu tiqebbiḍin [n imendi] nnes.
PSA 127:1 [Izři n ugeɛɛed. N Suliman.] Mři war ibenni SIDI taddart, ad ssiḥřen ibennayen ixef nsen baṭeř. Mři war iḥeṭṭi SIDI x tendint, aɛessas ad iɛess baṭeř.
PSA 127:2 Baṭeř aqa kenniw ad tekkarem zic, ad tᵉṭṭṣem tɛeḍřem, ad teccem aɣrum n řemḥayen, maɣar Netta ittic i-t i imɛizzen nnes deg yiḍeṣ.
PSA 127:3 Xzar, arrawen d tasɣart [i immewcen] zi SIDI, řɣiǧet n uɛeddis aqa-tt d řmunet.
PSA 127:4 Am mammec [jehdent] fřitcat n řqews deg ufus n weryaz, ammu i ǧan arrawen [zeg iseggʷusa] n temẓi.
PSA 127:5 Sseɛd n weryaz ijehden nni zzaysen iccur aqrab nnes n fřitcat n řqews. Nitni war ttseḍḥin ca umi ssawařen ak-d řɛedyan ɣar tewwart [n tendint].
PSA 128:1 [Izři n ugeɛɛed.] Sseɛd n kuř ijj wenni itteggʷeden SIDI, wenni igguren deg ibriden nnes.
PSA 128:2 Aqa ad tecced zeg warber n ifassen nnec, ad tiřid d amimun d lemliḥ.
PSA 128:3 Tamɣart nnec ad tiři am ict n tzayart i dd-ittawyen řɣiǧet di taddart nnec, arrawen nnec ad iřin am iɣemmuyen n zzitun quwwaren i ṭṭabřa nnec.
PSA 128:4 Ammu i ɣa ittwabarek weryaz ijehden nni itteggʷeden SIDI.
PSA 128:5 SIDI ad cek ibarek zi Ṣihyun, u ad tẓared aqa Urcalim ad tiři mliḥ, marra ussan n tudart nnec,
PSA 128:6 [wah,] ad tẓared iḥenjiren n iḥenjiren nnec. Řehna [ad yiři] x Israil.
PSA 129:1 [Izři n ugeɛɛed.] “Zi temẓi inu ḥṣaren ayi aṭṭas n twařawin!” Ini [t xenni ammu], [a] Israil,
PSA 129:2 zi temẓi inu ḥṣaren ayi aṭṭas n twařawin, maca war d ayi zemmaren.
PSA 129:3 Imcarrzen carzen x weɛrur inu, ggin řatarat n wecraz nsen d iziraren.
PSA 129:4 SIDI d amsegged. Netta iqḍeɛ iseɣwan n iɛeffanen.
PSA 129:5 Ejj marra inni icarrhen Ṣihyun, ad seḍḥan u ad ttwaɛarnen ɣar ḍeffar.
PSA 129:6 Ejj i-ten ad dewřen am arbiɛ x tzeɣwin i ittisřaw qbeř i-t ɣa qeřɛen,
PSA 129:7 war zzayes ittɛemmar wenni imejjaren afus nnes, uřa d wenni ittceddan icuwwafen [n imendi] aḥsin nnes,
PSA 129:8 u ḥima imsebriden war qqaren: “Lbaraka n SIDI aqa-tt akidwem!” “Neccin nbarek kenniw s Yisem n SIDI.”
PSA 130:1 [Izři n ugeɛɛed.] Zi řaǧaɣ řaɣiɣ-dd xak, [a] SIDI!
PSA 130:2 [A] Sidi inu, seř i tmijja inu, ejj imezzuɣen nnec ad fetnen x tmijja n tutra inu!
PSA 130:3 [A] SIDi, mařa teḥḍiḍ řmuɛṣiyyat mliḥ, [a] Sidi inu, man wen izemmaren ad iqqim ibedd.
PSA 130:4 Maca ɣarek asameḥ, maḥend ad zzayek ggʷeden.
PSA 130:5 Necc sitimeɣ di SIDI, řeɛmar inu [iccur s] usitem, ttrajiɣ awař nnes,
PSA 130:6 Řeɛmar inu [ittraja] Sidi inu, aṭṭas zeg iɛessasen [ttrajan] ɣar [u]teffu.
PSA 130:7 Ejj Israil ad iraja SIDI, maɣar tamexsiwt icewwaren aqa-tt ɣar SIDI, ɣares afekki iceṭṭ.
PSA 130:8 Netta ad issenjem Israil zi marra řmuɛṣiyyat nnes.
PSA 131:1 [Izři n ugeɛɛed. N Dawud.] [A] SIDI, uř inu war dayes bu nnfaxet, tiṭṭawin inu war daysent bu uneɛfar, war tteggeɣ ca timesřayin ujarent ayi niɣ d tinni d řeɛjeb i necc.
PSA 131:2 S tidett, ssareyyḥeɣ řeɛmar inu u ssesqareɣ t, am ijj n uniybu umi ittwassbedd wuṭṭuḍ ak-d yemmas, am ijj n uniybu umi ittwassbedd wuttuḍ ammu i iǧa řeɛmar inu dayi.
PSA 131:3 Ejj Israil ad iraja SIDI, zi řexxu ař řebda.
PSA 132:1 [Izři n ugeɛɛed.] [A] SIDI, idar Dawud, [idar] marra aweddeb nnes,
PSA 132:2 mammec ijjuǧ i SIDI, iwaɛd i Umzemmar n Yaɛqub:
PSA 132:3 “[Uct], mařa ad adfeɣ ɣar taqidunt n taddart inu, ad ḥebceɣ x qama n řectu inu,
PSA 132:4 ad semmḥeɣ yiḍeṣ i tiṭṭawin inu, uřa d anudem i wabřiwen inu,
PSA 132:5 qbeř i ɣa afeɣ amcan i SIDI, ict n Tzeddiɣt i SIDI, Amzemmar n Yaɛqub!”
PSA 132:6 Xzar, nesřa x [Ttabut] di Ifrata, nufa i-tt deg iyyaren n Yaɛar.
PSA 132:7 Ad nadef ɣar tzeddiɣin nnes, ad nesjed i tnebdat n iḍaren nnes.
PSA 132:8 Kkar, SIDI, [uyur] ɣar arraḥet nnec, Cek d Ttabut n jjehd nnec.
PSA 132:9 Ejj ikehhanen nnec ad yarḍen s tsegda, imtiqqan nnec ad sřiweřwen.
PSA 132:10 War dd-tarri udem n umedhun nnec di ṭṭweɛ n umsexxar nnec Dawud.
PSA 132:11 SIDI ijjuǧ i Dawud s řaman, ɛemmarṣ ad iḥeyyed Netta x tjaǧit nnes: “Zi řɣiǧet n uɛeddis nnec ad ssɣimeɣ [ijj] x řɛarc nnec.
PSA 132:12 Mařa iḥenjiren nnec ad ḥḍan Řɛahd inu d cchadat inu, tinni d asen i ɣa ssřemdeɣ, xenni uřa d iḥenjiren nsen ad qqimen x řkursi nnec i řebda.”
PSA 132:13 Maɣar SIDI ifarz Ṣihyun, imeẓri tt d tazeddiɣt i Yixef nnes.
PSA 132:14 “Wa d [amcan n] arrahet inu i řebda, da i xseɣ ad zedɣeɣ, Necc xseɣ t.
PSA 132:15 Ad barkeɣ nniɛmet n Ṣihyun, ad ssjiwneɣ imezřaḍ nnes s weɣrum.
PSA 132:16 Ad ssyarḍeɣ ikehhanen nnes s usenjem, imtiqqan nnes ad sřiweřwen s jjehd.
PSA 132:17 Dinni ad ssɣemmyeɣ ijj n uyicc i Dawud, ijj n řefnar i umedhun inu sswejdeɣ [t din].
PSA 132:18 Ad ssyarḍeɣ řɛedyan nnes s useḍḥi, maca ad xas innuwar ttaj [n weɛzař] nnes.”
PSA 133:1 [Izři n ugeɛɛed. N Dawud.] Xzar, mammec iṣbeḥ d mammec icna, mařa tawmat zeddɣen munen!
PSA 133:2 Aya am zzect icnan x uzeǧif, tenni dd-ihekkwan x tmart, x tmart n Harun, thekkwa-dd x tma n ufurri n warruḍ nnes.
PSA 133:3 Aya am nnda n [wedrar n] Hirmun, wenni dd-ihekkwan x idurar n Ṣihyun, maɣar dinni yumur SIDI lbaraka [nnes], tudart i řebda.
PSA 134:1 [Izři n ugeɛɛed.] Xzar, barkem SIDI, [a] kenniw imsexxaren n SIDI, inni ibedden di Taddart n SIDI di ǧiřet.
PSA 134:2 Sgeɛɛdem ifassen nwem ɣar Zzawect Iqeddsen u barkem SIDI.
PSA 134:3 Ad cek ibarek SIDI zi Ṣihyun, Netta d wenni iggin ijenwan d temmurt.
PSA 135:1 Hallilu-Yah! Ṣebbḥem Isem n SIDI, ṣebbḥem [xas], [a] imsexxaren n SIDI,
PSA 135:2 [kenniw] inni ibedden di Taddart n SIDI, di řemraḥat n Taddart n AREBBI nneɣ.
PSA 135:3 Hallilu-Yah, maɣar SIDI iṣbeḥ, zehhdem i Yisem nnes, maɣar Netta d řeḍrafet.
PSA 135:4 Maɣar SIDi ifarz Yaɛqub i Yixef nnes, Israil d agřa nnes.
PSA 135:5 Maɣar necc ssneɣ aqa SIDI d ameqqran, Siditneɣ [d ameqqran] x marra irebbiten.
PSA 135:6 Marra min d as itteɛjiben i SIDI, igga i-t, deg ijenwan u x temmurt, di řebḥur u deg [waman] ihewřen marra.
PSA 135:7 Netta issgeɛɛed iseynuten zi ṭṭrufa n temmurt, Netta ittegg assamen ak-d wenẓar, ittgewwad asemmiḍ zi řehrit nnes ɣar barra.
PSA 135:8 Netta iwta imenza n Miṣra, zeg iwdan ař řmar.
PSA 135:9 Netta issekk řeɛřamat d lmuɛjizat di řwesṭ nnec, [a] Miṣra, ɣar firɛun u ɣar marra imsexxaren nnes.
PSA 135:10 Netta iwta aṭṭas n řegnus u inɣa ijeǧiden ijehden.
PSA 135:11 Siḥun, ajeǧid n Imuriyyen, u Ɛuj, ajeǧid n Bacan, u marra tigeldiwin n Kenɛan.
PSA 135:12 Iwca asen tammurt d tasɣart, d tasɣart i Israil, řgens nnes.
PSA 135:13 [A] SIDI, Isem nnec ittɣima i řebda, axarreṣ dayek [ad yiři] zi jjiř ař jjiř.
PSA 135:14 Maɣar SIDI ad yarr tasɣart ɣar řgens nnes, Netta ad iḥinn x imsexxaren nnes.
PSA 135:15 Řexyařat n l’aṣnam n řegnus aqa atent s nnuqart d wureɣ, ttwaggent s ifassen n iwdan.
PSA 135:16 Nitenti ɣarsent ijj n uqemmum, [maca] war ssiwiřent, ɣarsen tiṭṭawin, [maca] war ttwiřint,
PSA 135:17 Nitenti ɣarsen timezzuɣen, [maca] war ttesřint, walu asuḍi [n nnefs] deg uqemmun nsen.
PSA 135:18 Ad dewřen inni tent iggin am nitenti, marra wi xasent ittcař.
PSA 135:19 [A] taddart n Israil, barkem SIDI, [a] taddart n Harun, barkem SIDI.
PSA 135:20 [A] taddart n Lawi, barkem SIDI! Ejj marra inni itteggʷeden SIDI, ad barken SIDI.
PSA 135:21 Ad ittwabarek SIDI zi Ṣihyun, Netta d wenni izeddɣen di Urcalim. Hallilu-Yah!
PSA 136:1 Qadam SIDI, maɣar Netta iṣbeḥ, maɣar tamexsiwt nnes icewwaren tᵉttɣima i řebda.
PSA 136:2 Qadam wenni d AREBBI x [marra] irebbiten, maɣar tamexsiwt nnes icewwaren tᵉttɣima i řebda.
PSA 136:3 Qadam wenni d Sidi x [marra] isiditen, maɣar tamexsiwt nnes icewwaren tᵉttɣima i řebda,
PSA 136:4 ... wenni itteggen lmuɛjizat timeqqranin, Netta waha, maɣar tamexsiwt nnes icewwaren tᵉttɣima i řebda,
PSA 136:5 ... wenni iggin ijenwan s řefhamet, maɣar tamexsiwt nnes icewwaren tᵉttɣima i řebda,
PSA 136:6 ... wenni iggin tammurt x waman, maɣar tamexsiwt nnes icewwaren tᵉttɣima i řebda.
PSA 136:7 ... wenni iggin tifawin timeqqranin, maɣar tamexsiwt nnes icewwaren tᵉttɣima i řebda,
PSA 136:8 tafuct ḥima ad teḥkem x wass, maɣar tamexsiwt nnes icewwaren tᵉttɣima i řebda,
PSA 136:9 taziri d itran ḥima ad ḥekmen x ǧiřet, maɣar tamexsiwt nnes icewwaren tᵉttɣima i řebda,
PSA 136:10 ... wenni iwtin Imiṣriyyen deg imenza nsen, maɣar tamexsiwt nnes icewwaren tᵉttɣima i řebda,
PSA 136:11 ... wenni dd-issuffɣen Israil zi řwest nsen, maɣar tamexsiwt nnes icewwaren tᵉttɣima i řebda,
PSA 136:12 s ufus ijehden d uɣiř ittwassgeɛɛden, maɣar tamexsiwt nnes icewwaren tᵉttɣima i řebda.
PSA 136:13 ... wenni ibḍan Řebḥar n Telga x tnayen, maɣar tamexsiwt nnes icewwaren tᵉttɣima i řebda,
PSA 136:14 uca isseẓwa Israil di řwest nnes, maɣar tamexsiwt nnes icewwaren tᵉttɣima i řebda.
PSA 136:15 uca inḍar Firɛun di Řebḥar n Telga ak-d řɛeskar nnes, maɣar tamexsiwt nnes icewwaren tᵉttɣima i řebda.
PSA 136:16 ... wenni inedhen řgens nnes [deg webrid] di řexřa, maɣar tamexsiwt nnes icewwaren tᵉttɣima i řebda.
PSA 136:17 ... wenni iwtin ijeǧiden imeqqranen, maɣar tamexsiwt nnes icewwaren tᵉttɣima i řebda,
PSA 136:18 uca inɣa ijeǧiden ijehden, maɣar tamexsiwt nnes icewwaren tᵉttɣima i řebda.
PSA 136:19 [Ɛqeř x] Siḥun, ajeǧid n Imuriyyen, maɣar tamexsiwt nnes icewwaren tᵉttɣima i řebda,
PSA 136:20 x Ɛuj, ajeǧid n Bacan, maɣar tamexsiwt nnes icewwaren tᵉttɣima i řebda.
PSA 136:21 Tammurt nsen iwca i-tt d tasɣart, maɣar tamexsiwt nnes icewwaren tᵉttɣima i řebda,
PSA 136:22 d tasɣart i umsexxar nnes Israil, maɣar tamexsiwt nnes icewwaren tᵉttɣima i řebda.
PSA 136:23 Idar aneɣ di ddeǧ nneɣ, maɣar tamexsiwt nnes icewwaren tᵉttɣima i řebda.
PSA 136:24 Netta ikkes aneɣ-dd zeg [ifassen] [n] yinni d aneɣ iḥṣaren, maɣar tamexsiwt nnes icewwaren tᵉttɣima i řebda.
PSA 136:25 Netta d wenni itticen macca i marra imuddaren, maɣar tamexsiwt nnes icewwaren tᵉttɣima i řebda.
PSA 136:26 Qadam Arebbi n ijenwan, maɣar tamexsiwt nnes icewwaren tᵉttɣima i řebda.
PSA 137:1 Ɣar iɣezran n Babil, dinni i tuɣa nettɣima, nru ɛawed xmi tuɣa nettidar Ṣihyun.
PSA 137:2 Nuyeř řgambriyat nneɣ ɣar iṣefṣafen [i iǧan] di řwest nnes.
PSA 137:3 Maɣar inni d aneɣ iḥebbsen ttaren zzayneɣ dinni [ad nɣennej] awařen n ijj n yezři, inni d aneɣ iḥeṣṣaren ttaren ca n řḥajjet issefraḥen. [Nitni nnan]: “Ɣennjem zeɛma [ijj zeg] izřan n Ṣihyun i neccin!”
PSA 137:4 Mammec nzemmar ad nɣennej ijj n yezři n SIDI di temmurt n midden?
PSA 137:5 Mařa necc ttuɣ cem, [a] Urcalim, ejj [xenni] ad ittu ufus afusi ixef nnes.
PSA 137:6 Ejj ad ayi iřṣeq iřes inu x waneɣ inu, mařa war cem ttidareɣ, mařa war ssɛuǧiɣ Urcalim x řefraḥet inu tameqqrant qaɛ.
PSA 137:7 [A] SIDI, ɛqeř x ayt n Idum, [deg] wass n Urcalim, inni iqqaren: “Ɛarram [tt], ɛarram [tt], ař dsas nnes!”
PSA 137:8 [A] yeǧis n Babil, [cem] tenni ittwassḥuzen i wareddeǧ, sseɛd n yinni d am i ɣa ixeǧṣen tameggit [iɛeffnen] i dayneɣ teggid.
PSA 137:9 Sseɛd n wenni i ɣa iṭṭfen iḥenjiren nwem imeẓyanen, ad ten iřbez x teṣḍart.
PSA 138:1 [N Dawud.] Ad Cek qadiɣ s marra uř inu, ad Cek zehhdeɣ zzat i irebbiten.
PSA 138:2 Ad bendqeɣ ɣar Zzawect nnec Tameqqrant iqeddsen, ad qadiɣ Isem nnec x tmexsiwt nnec icewwaren u x řaman nnec, maɣar Cek tessemɣared awař nnec x marra [min ittwafen ɛad] [deg] Yisem nnec.
PSA 138:3 Deg wass řami xak dd-řaɣiɣ, tarrid-dd xafi, Cek tewcid jjehd i řeɛmar inu.
PSA 138:4 Marra ijeǧiden n temmurt ad Cek qadan, [a] SIDI, xmi ttesřan awařen zeg uqemmum nnec.
PSA 138:5 Ad ɣennjen x ibriden n SIDI, maɣar aɛuǧi n SIDI d ameqqran.
PSA 138:6 Maɣar waxxa ittwassuɛřa SIDI aṭṭas, [ɛad] ixezzar-dd ɣar umwaḍeɛ, [maca] bu-nnfaxet issen i-t zi řaggʷaj.
PSA 138:7 Mařa uyureɣ di řwesṭ n řeḥṣaret, ad ayi dd-tᵉttarred ɣar tudart. Cek tesswiẓẓḍed afus nnec ḍidd i weɣḍab n řɛedyan inu, afus nnec afusi issenjem ayi.
PSA 138:8 SIDI ad t ikemmeř i necc. [A] SIDI, tamexsiwt nnec icewwaren tᵉttɣima i řebda, řefɛayeř n ifassen nnec war ten tarexxud.
PSA 139:1 [I umeqqran n imeɣnajen. N Dawud. Azehhed.] [A] SIDI, Cek tbeqqced ayi u tessned ayi.
PSA 139:2 Cek tessned aɣimi inu d ubeddi inu, zi řaggʷaj tfehhmed ixarriṣen inu.
PSA 139:3 Xmi ggureɣ u xmi ṭṭṣeɣ tarezzud dayi, aqa Cek tessned marra ibriden inu.
PSA 139:4 Minzi war din uřa d ijj n wawař x yiřes inu, u xzar, Cek a SIDI, tessned t kuřci.
PSA 139:5 Cek tḥeṣṣared ayi zi ḍeffar u zi zzat, tessarsed xafi tařeqqa n ufus nnec.
PSA 139:6 Tussna-ya d atebhet i necc, tuɛřa xafi, war zemmareɣ ad tt awḍeɣ.
PSA 139:7 Ɣar mani [zemmareɣ] ad raḥeɣ zi Arruḥ nnec, ɣar mani ɣa arewřeɣ zeg wudem nnec?
PSA 139:8 Mařa geɛɛdeɣ ɣar ujenna, aqa Cek dinni, [mařa] ggiɣ řaxart d tassut inu, xzar, aqa Cek uřa dinni,
PSA 139:9 [Mařa] ksiɣ afriwen [am tfawt n] řefjar, ad zedɣeɣ ɣar uneggar qaɛ n řebḥar,
PSA 139:10 [xenni] uřa dinni ad ayi indeh ufus nnec, [afus nnec] afusi ad ayi iṭṭef.
PSA 139:11 Mařa nniɣ: “Iwa taǧest, wḍa-dd xafi, [xenni] ǧiřet d tfawt i d ayi iquwwaren.
PSA 139:12 I Cek taǧest war teǧi d ṭṭřam, [i Cek] ǧiřet tᵉttegg tfawt am uziř, [i Cek] taǧest [aqa-tt] am tfawt.
PSA 139:13 [Wah,] Cek txeřqed-dd tiẓẓař inu, tmuded ayi deg uɛeddis n yemma.
PSA 139:14 Qadiɣ Cek umi dd-ttwaxeřqeɣ zeg ict n tebridt n řeɛjeb d tameqqrant. Timegga nnec d lmuɛjizat, řeɛmar inu tessen t [mliḥ] qaɛ.
PSA 139:15 Ixsan inu tuɣa war xak nnuffaren, umi ttwaggeɣ s tnuffra, ttwamudeɣ [am ijj n uburḍa] di řaǧaɣ n temmurt.
PSA 139:16 Tiṭṭawin nnec ẓrint abeddu inu iḍefṣen. Deg wedlis nnec ittwannḍen aqa marra yuran, aqa ussan i tuɣa ttwaggen, jar asen [uřa d ass] amezwaru [n ubeddu inu].
PSA 139:17 Mammec ɣari ttɛizzan ixarriṣen nnec, [a] Arebbi, mammec imɣar ubarru nsen!
PSA 139:18 Mařa xseɣ ad ten ḥesbeɣ, aqa aten ktar aṭṭas zeg yejdi, [u] xmi faqeɣ, aqa ayi ɛad akidek.
PSA 139:19 [A] Arebbi, meɛlik i ɣa tenɣed aɛeffan, [meɛlik] i ɣa tejjed iryazen i issazzařen idammen ad xafi aggʷejjen,
PSA 139:20 inni xak issawařen s tḥraymect, řɛedyan nnec inni ineṭṭqen [Isem nnec] di řbaṭeř.
PSA 139:21 [A] SIDI, ma war carrheɣ inni Cek icarrhen, u ma war ttɛiffeɣ inni akidek ittemɛařan?
PSA 139:22 Necc carrheɣ ten s ijj n wecrah ikmeř, aqa nitni dewřen ayi d řɛedyan.
PSA 139:23 Arzu xafi, [a] Arebbi, ssen uř inu, qeǧeb ayi u ssen ixarriṣen inu.
PSA 139:24 Xzar-dd, ma aqa ayi di ca n webrid n řeqjaḥet u ndeh ayi ɣar webrid n řebda.
PSA 140:1 [I umeqqran n imeɣnajen. Azehhed n Dawud.]
PSA 140:2 Fekk ayi zi bnadem d aɛeffan, [a] SIDI, ḥḍa ayi zeg weryaz n lɛunf,
PSA 140:3 zeg yinni ittxarraṣen deg wuř [nsen] di řɣar, [u] ssekkaren imenɣan di marra ussan.
PSA 140:4 Nitni ssqeḍɛen iřsawen nsen am yijj n ufiɣar, ssem iḥma aqa-t sadu iyencicen nsen. Silah.
PSA 140:5 Ḥḍa xafi, [a] SIDI, zeg ifassen n iɛeffanen, ḥḍa ayi zeg iryazen n lɛunf, inni yarezzun ad ayi ɣeḍřen ɣar temmurt.
PSA 140:6 Ayt n bu-nnfaxet ssnuffaren xafi ijj n řfex, ttbezzaɛen tiseɣwin am yict n tracca ɣar uɣezdis n umesraq, aqa tteggen ayi tixefcin. Silah.
PSA 140:7 Necc nniɣ i SIDI: “Cek d Arebbi inu!” Seř, [a] SIDI, ɣar tmijja n tutra inu.
PSA 140:8 [A] SIDI, Sidi inu, jjehd n usenjem inu, deř azeǧif inu deg wass n [řḥess] n řesnaḥ.
PSA 140:9 [A] SIDI, war ttejji aɛeffan ad yarr meẓri. War ttegg ttasiɛ i wenway nnes iɛeffnen, ařami ɣa ssɛuǧen ixef nsen. Silah.
PSA 140:10 [X] uzeǧif n [marra] inni d ayi dd-innḍen, iři ad ten ideř uceqqef n iyencicen nsen,
PSA 140:11 ejj ad xasen kebben řefḥem, [iři] Netta ad ten iɣḍer di tmessi, di řḥemřat yuǧɣen, ḥima war ttekkaren ɛad.
PSA 140:12 Ejj aryaz [i iceqqfen] s yiřes war ittɣimi ibedd x temmurt, ejj ad iɛarn řɣar deɣya aryaz bu-řexcunet.
PSA 140:13 Necc ssneɣ, aqa SIDI ad isseqfeř ddeɛwet n řmusakin, řḥeqq n imezřaḍ.
PSA 140:14 S tidett, imseggaden ad qadan Isem nnec, inni igguren nican ad qqimen zzat i wudem nnec.
PSA 141:1 [Azehhed n Dawud.] [A] SIDI, necc ttřaɣiɣ ɣarek, deɣyat ɣari, seř ɣar tmijja inu xmi dd xak i ɣa ttřaɣiɣ.
PSA 141:2 Iři ad tbedd tẓaǧit inu am řebxur [ittfuḥen] zzat i wudem nnec, uřa d asgeɛɛed n ifassen inu am tewhibt n tmeddit.
PSA 141:3 [A] SIDI, egg ijj n uɛessas ɣar uqemmum inu, ḥḍa tawwart n iyencicen inu.
PSA 141:4 Egg aqa uř inu war ittnejbid ɣar ict n tmesřact d taɛeffant, maḥend ad ggeɣ timegga s řɣecc ak-d iryazen nni itteggen řmuɛṣiyyet, egg aqa necc war ttᵉtteɣ zi tazyuḍi nsen.
PSA 141:5 Ejj amsegged ad ayi iwwet, [maɣar aya] d tamexsiwt icewwaren, mařa netta ittsegged ayi, aya d zzect x uzeǧif inu, ad tt iqbeř uzeǧif inu. [Wah], uřa ammu ad tiři tẓaǧit inu ɛad ḍidd i tmegga nsen iɛeffnen.
PSA 141:6 Řquḍat nsen mmenḍaren swadday x uɣezdis n jjarf, aqa sřin belli awařen inu ḍarfen.
PSA 141:7 Axmi tᵉttwacarz u tennurzem temmurt, ammu i ttwazeǧɛen iɣsan nneɣ ɣar uqemmum n řaxart.
PSA 141:8 Maca tiṭṭawin inu xezzarent-i-dd ɣarek, [a] SIDI, Sidi inu, necc arekkwařeɣ ɣarek, war ttejji řeɛmar inu yarxef.
PSA 141:9 Siggʷej ayi i wemnaɛ n řfex i d ayi medyen, zi texcifin n yinni itteggen řmuɛṣiyyet.
PSA 141:10 Iři iɛeffanen ad wḍan marra di traccawin nsen, min ɣa kkeɣ ɛedduɣ.
PSA 142:1 [Axemmi n Dawud.] [Taẓaǧit umi t tuɣa deg yefri.]
PSA 142:2 S tmijja inu sɣuyeɣ ɣar SIDI, s tmijja inu ḥeccmeɣ SIDI.
PSA 142:3 Necc ttzeǧaɛeɣ ifeqquṣen inu zzat i wudem nnes, ssargbeɣ [as] řeḥṣaret inu zzat i wudem nnes.
PSA 142:4 Mařa buḥbeř inu idqeř xafi aṭṭas, Cek tessned amesruq inu. Nitni ssnuffaren ayi ijj n řfex deg webrid nni di ɣa uyureɣ.
PSA 142:5 Sweḍ ɣar ufusi, u xzar, war din tuɣi ḥed i d ayi ɣa iwcen taynit, ittwakkes ayi qaɛ mani ɣa arewřeɣ, war din tuɣi uřa d ijj i ɣa isseqsan x řeɛmar inu.
PSA 142:6 Necc sɣuyyuɣ-dd ɣarek, [a] SIDI. Qqareɣ: “Cek d amcan inu n tarewřa, tasɣart inu di temmurt n yinni iddaren.
PSA 142:7 Ḥḍa x uɣuyyi inu, maɣar fniɣ qaɛ. Fekk ayi zeg inni d ayi iḍeffaren, maɣar nitni jehden xafi.
PSA 142:8 Suffeɣ řeɛmar inu zi řeḥbes maḥend ad qadiɣ Isem nnec. Imseggaden ad ayi dd-nnḍen, maɣar Cek tᵉttegged dayi s tcuni.”
PSA 143:1 [Azehhed n Dawud.] [A] SIDI, seř i tẓaǧit inu, sḥess i tutra inu. Arr-dd xafi ɛlaḥsab tidett nnec, ɛlaḥsab tasegda nnec.
PSA 143:2 War ttegg ccreɛ ak-d umsexxar nnec, maɣar uřa d ijj zeg inni iddaren ad yiři d amsegged zzat i wudem nnec.
PSA 143:3 Minzi řeɛdu ittdarrac řeɛmar inu, iɛeffes x tudart inu ɣar temmurt, isszeddeɣ ayi deg imucan n ṭṭřam, am yinni immuten zi mecḥař uya.
PSA 143:4 Buḥbeř inu ittefciř xafi, uř inu yarewweɛ di daxeř inu.
PSA 143:5 Necc ttɛeqřeɣ x wussan iɛdun, ttxemmameɣ di marra timegga nnec, ttxarrṣeɣ di řefɛayeř n ifassen nnec.
PSA 143:6 Necc ttbezzɛeɣ ifassen inu ɣarek, řeɛmar inu aqa-t zzatek am ict n temmurt iffuden. Silah.
PSA 143:7 Arr-dd xafi deɣya, [a] SIDI, buḥbeř inu ittefciř, war ssnuffara udem nnec zzayi, maḥend war ddikkwiřeɣ am yinni dd-ihekkwan deg weḥfur [n wenḍeř].
PSA 143:8 Ejj ayi ad sřeɣ i tmexsiwt nnec icewwaren ɣar teffut, maɣar ttecřeɣ xak. Scen ayi abrid i ɣa uyureɣ, maɣar ssgeɛɛdeɣ řeɛmar inu ɣarek.
PSA 143:9 [A] SIDI, kkes ayi i řɛedyan inu, ɣarek i ɣa arewřeɣ.
PSA 143:10 Seřmed ayi ad ggeɣ [min iǧan] i arḍa nnec, maɣar Cek d AREBBI inu. Ejj Arruḥ nnec iṣebḥen ad ayi indeh deg ict n temmurt iwaṭan.
PSA 143:11 [A] SIDI, arr-dd dayi tudart di ṭṭweɛ n Yisem nnec. S tsegda nnec, suffeɣ řeɛmar inu zi řeḥṣaret,
PSA 143:12 areddeǧ řɛedyan inu di tmexsiwt nnec icewwaren, qḍa x marra inni d ayi iḥeṣṣaren, maɣar necc d umsexxar nnec.
PSA 144:1 [N Dawud.] Ad ittwabarek SIDI, Taṣḍart inu, wenni isseřmaden ifassen inu i umenɣi, iḍewḍan inu i řḥarb.
PSA 144:2 [Cek i d ayi teǧid] d ameddukkeř inu i dayes tamexsiwt icewwaren, uřa d lburj inu, lburj inu yuɛřan d amsenjem inu, taseddart inu i useřqi, d wenni ɣar arekkwařeɣ, d wenni d ayi isswaḍḍɛen řgens inu.
PSA 144:3 [A] SIDI, min iɛna bnadem, aqa Cek texsed ad t tessned? Mmis n bnadem, aqa Cek tᵉttxarriṣed dayes?
PSA 144:4 Bnadem amecnaw řefwar, ussan nnes ad ɛdun am tiři.
PSA 144:5 Meyyeř ijenwan nnec, [a] SIDI, hwa-dd. Ḥada idurar, [xenni] ad ggen ddexxan.
PSA 144:6 Ẓaryeḍ assamen u zeǧeɛ i-ten, sekk fřitcat nnec u sxarweḍ i-ten.
PSA 144:7 Swiẓẓeḍ ifassen nnec zi sennej, suffeɣ ayi-dd u fekk ayi zi [řḥemřat n] waman timeqqranin, zeg ufus n ibarraniyyen,
PSA 144:8 maɣar aqemmum nsen iqqar ixarriqen, afus nsen afusi d ijj n ufus [iccur] s řɣecc.
PSA 144:9 [A] AREBBI, ad ac ɣennjeɣ ijj n yezři d n jdid i Cek, s lharpa u [s lɛud] s ɛecra n ifiřan ad ac zehhdeɣ.
PSA 144:10 Cek d wenni issawaḍen asenjem i ijejǧiden, d wenni ifekken amsexxar nnes Dawud zi ssif aɛeffan,
PSA 144:11 suffeɣ ayi-dd u fekk ayi zeg ufus n tarwa n ubarrani, zeg wenni ɣar iǧa uqemmum i iqqaren mɣir ixarriqen, u zeg wenni ɣar iǧa ufus afusi [iccur] s řɣecc.
PSA 144:12 Meɛlik iḥenjiren nneɣ ad iřin am yiɣeddiwen, inni imɣaren [ɛad] di temẓi nsen, yessitneɣ am tɣemmar i ggin s ukeccuḍ [s ɛřam kuř arcamen], ggin tent i yict n zzawect iqeddsen.
PSA 144:13 [Ad ccuren] řehrit nneɣ, ad wcen zzad awarni zzad, ad yarni wuǧi nneɣ s řuřuf n tseqqar, s ɛecra n řuřuf n tseqqar di ddmani n tarewsa nneɣ.
PSA 144:14 Ad ḥemřen imwan nneɣ mliḥ, war ittiři ɛad uhjam niɣ d uffuɣ [i umenɣi] uřa d iɣuyyan deg wazzayen nneɣ.
PSA 144:15 Sseɛd n řgens nni iǧan amya. Sseɛd n řgens nni zi AREBBI nsen d SIDI.
PSA 145:1 [Izři n uṣebbeḥ n Dawud.] Alif. [A], AREBBI inu, Ajeǧid, necc ad Cek ssɛuǧeɣ, ad barkeɣ Isem nnec i řebda qaɛ.
PSA 145:2 Bit. Kuř ass ad Cek barkeɣ, ad ssemɣareɣ Isem nnec i řebda qaɛ.
PSA 145:3 Gimel. SIDI d ameqqran, issdiheǧ asemɣar aṭṭas, řemɣaret nnes war dayes bu tarezzut.
PSA 145:4 Dalit. Jjiř awarni jjiř ad issemɣar řexdayem nnec, ad barrḥen s tmegga nnec timeqqranin.
PSA 145:5 Hi. Necc ad ssiwřeɣ x tissiqt n uɛuǧi n lɛaḍama nnec, x řexbar n lmuɛjizat nnec.
PSA 145:6 Waw. Nitni ad ssiwřen x jjhed n tmegga nnec issaggʷaden, necc ad barrḥeɣ s řemɣaret nnec.
PSA 145:7 Zayin. Řidaret n tcuni nnec ifeyyḍen ad tt ggen [d ijj n řɛunṣar ittcurcur], ad sřiwřiwen i tsegda nnec.
PSA 145:8 Xit. SIDI d arḥim d aḥnin, ɣares ttasiɛ n řxaḍar d waṭṭas n tmexsiwt icewwaren.
PSA 145:9 Tit. SIDI d aṣebḥan i marra, arreḥmet nnes aqa-tt tiwa marra timegga nnes.
PSA 145:10 Yud. Marra timegga nnec, [a] SIDI, ad Cek qadint, imtiqqan nnec ad Cek barken.
PSA 145:11 Kaf. Nitni ad ssiwřen x uɛuǧi n Tgeldit nnec, ad ssiwřen x timegga nnec timeqqranin,
PSA 145:12 Lamid. ḥima ad barrḥen s tmegga nnes timeqqranin i tarwa n bnadem, s uɛuǧi n lɛaḍama n Tgeldit nnes.
PSA 145:13 Mim. Tageldit nnec d ict n Tgeldit i řebda, řeḥkamet nnec [ad tiři] x kuř jjiř.
PSA 145:14 Samix. SIDI ittsenned marra inni iwḍan, ittseggem marra inni iqwisen.
PSA 145:15 Ɛayin. Marra tiṭṭawin ttrajant Cek, Cek tᵉtticed asen macca di řweqt nnes [ittwaggen].
PSA 145:16 Pi. Cek tarezzmed afus nnec, tessyawaned marra min iddaren [ak-d] min ixs řxaḍar [nsen].
PSA 145:17 Tsadi. SIDI aqa-t nican di marra ibriden nnes, ittegg s tmexsiwt icewwaren di marra timegga nnes.
PSA 145:18 Quf. SIDI yudes i marra inni xas ittřaɣan, marra inni xas ittřaɣan di tidett.
PSA 145:19 Rix. Netta igga s řxaḍar i marra inni t itteggʷden, ittesřa iɣuyyan nsen u issenjam i-ten.
PSA 145:20 Cin. SIDI iḥeṭṭa x marra inni t ittexsen, [maca] marra iɛeffanen itteḥḥa i-ten.
PSA 145:21 Taf. Aqemmum inu ad issiweř x uṣebbeḥ n SIDI, marra ddat ad ibarek Isem nnes iqeddsen, i řebda qaɛ.
PSA 146:1 Hallilu-Yah. [A] řeɛmar inu, ṣebbeḥ i SIDI.
PSA 146:2 Necc ad ṣebbḥeɣ i SIDI min ɣa kkeɣ ddareɣ, ad zehhdeɣ i AREBBI inu min [da] ɣa kkeɣ ɛad.
PSA 146:3 War tceř x tarwa n taṣiřet, x mmis n bnadem, wenni umi war ɣar iǧi bu usenjem.
PSA 146:4 Iffeɣ buḥbeř nnes, idweř ɣar temmurt. Deg wass nni simant nnes ad qḍan inwayen nnes.
PSA 146:5 Sseɛd n wenni ɣar iǧa Arebbi n Yaɛqub d amɛawen, wenni ittrajan SIDI, AREBBI nnes,
PSA 146:6 wenni iggin ijenwan d temmurt, řebḥar d marra min dayes, wenni dayes řaman i řebda,
PSA 146:7 wenni ittaɣen tasɣart i yinni ittwaḥeṣṣaren, wenni itticen aɣrum i yinni iǧuẓen. SIDI yarexxu i imeḥbas.
PSA 146:8 SIDI yarezzem i idarɣařen tiṭṭawin, issbedda inni igguren itteqwisen, SIDI ittexs imseggaden.
PSA 146:9 SIDI iḥeṭṭa ibarraniyyen, ittic afus i uyujiř d tijjař, [maca] abrid n iɛeffanen ad t issfarɣ.
PSA 146:10 SIDI ad iḥkem i řebda, AREBBI nnec, [a] Ṣihyun, [iḥekkem] zi jjiř ař jjiř. Hallilu-Yah.
PSA 147:1 Hallilu-Yah, maɣar azehhed i AREBBI nneɣ d aṣebḥan, minzi ittas-dd akides ad as nṣebbeḥ.
PSA 147:2 SIDI ibenna Urcalim, issmun immeneɛraq n Israil.
PSA 147:3 Netta issgenfa inni ɣarsen uř yarẓen, ittcedda iyezzimen nsen itteqsen.
PSA 147:4 Iḥesseb qedda n itran, ittřaɣa ten marra s yisem.
PSA 147:5 Siditneɣ d ameqqran u jjehd nnes imɣar. Řeɛqeř nnes war ɣares bu řeɛbar.
PSA 147:6 SIDI ittsenned imwaḍɛen, isshekkwa iɛeffanen ař tammurt.
PSA 147:7 Qadam SIDI s uɣennej, zehhdem i AREBBI nneɣ s řgambri.
PSA 147:8 [Netta] d wenni iddařen ajenna s iseynuten, d wenni issewjaden anẓar i temmurt, d wenni issɣemmayen arbiɛ x idurar.
PSA 147:9 d wenni itticen i řmař macca nnes, uřa i tarwa n ibaɣřiwen xmi ɣa sɣuyen.
PSA 147:10 Netta war yareṭṭi s jjehd n uyis, iḍaren n weryaz war d as tteɛjiben.
PSA 147:11 Yareṭṭa as i SIDI inni t itteggʷeden, inni issitmen di tmexsiwt nnes icewwaren.
PSA 147:12 [A] Urcalim, ṣebbeḥ i SIDI, [a] Ṣihyun, ṣebbeḥ i AREBBI nnem.
PSA 147:13 Maɣar Netta issemḥed zzekrunat n tewwura nnec, ibarek iḥenjiren nnec di řwest nnec,
PSA 147:14 Netta iwca řehna i iymiren nnec, issjiwen i cek s min iṣebḥen qaɛ n yirden.
PSA 147:15 Netta issekka tiwařin nnes ɣar temmurt, awař nnes ittazzeř aṭṭas.
PSA 147:16 Ittic adfeř am tḍuft, izzuzara nnda igersen am yiɣɣeḍ.
PSA 147:17 Issekka adfeř nnes d ibquqen, wi izemmaren ad iqqim ibedd zzat i tesmuḍi nnes?
PSA 147:18 Issekka awař nnes uca ittarra i-ten ad fesyen, Netta ittejja asemmiḍ nnes ittsuḍ, xenni ttucruren waman.
PSA 147:19 Netta ibarreḥ i Yaɛqub awařen nnes, i Israil tiweṣṣa nnes d lfarayiḍ nnes.
PSA 147:20 Uřa i yijj n řgens nneɣni war d as iggi ammu, nitni war ssinen ca lfarayiḍ nnes. Hallilu-Yah!
PSA 148:1 Hallilu-Yah! Ṣebbḥem i SIDI zeg ijenwan, ṣebbḥem t di řuɛřa.
PSA 148:2 Ṣebbḥem t, marra lmalakat nnes! Ṣebbḥem t, marra řɛeskarat nnes!
PSA 148:3 Ṣebbḥent t, tafuct d tziri! Ṣebbḥem t, marra itran yareqqen!
PSA 148:4 Ṣebbḥet, ajenna x ijenwan, uřa d aman nni [iǧan] tiwa i ujenna.
PSA 148:5 Ejj i-ten ad ṣebbḥen Isem n SIDI, maɣar Netta yumur u [ammu] ttwaxeřqen-dd.
PSA 148:6 Netta idekken i-ten [din] i řebda, iwca [asen] ict n tewṣeyyet i war zemmaren ad tt ɛeddan [ɛemmarṣ].
PSA 148:7 Ṣebbḥem i SIDI, zi temmurt, [kenniw] řhaycat n řebḥar d marra [aman] ihewřen,
PSA 148:8 timessi d tebrurri d wedfeř d ddexxan, asemmiḍ n tḥaryaḍt nni itteggen awař nnes,
PSA 148:9 idurar d marra tiwriririn, ticejjura n fruta d marra ticejjura n tengelt,
PSA 148:10 řewḥuc n řexřa d marra řmar, imuddaren ittbuɛen d ijḍaḍ s wafriwen [nsen],
PSA 148:11 [kenniw] ijeǧiden n temmurt d marra ccuɛub, [kenniw] řḥukkam d marra řquḍat x temmurt,
PSA 148:12 ibřiɣen uřa d tiɛzariyyin, iwessura [jmiɛ] ak-d imeẓyanen!
PSA 148:13 Ejj i-ten ad ṣebbḥen Isem n SIDI, maɣar Isem nnes waha yuɛřan qaɛ, tissiqt nnes [tařeqq] x temmurt d ijenwan.
PSA 148:14 Netta issgeɛɛed icc n řgens nnes, aṣebbeḥ n marra imtiqqan nnes, n ayt n Israil, n řgens i dd as yudsen. Hallilu-Yah!
PSA 149:1 Hallilu-Yah! Ɣennjem ijj n yezři n jdid i SIDI, sɛuǧem t deg wegraw n imtiqqan nnes.
PSA 149:2 Ad ifarḥ Israil zeg wenni t iggin, ad arcqen iḥenjiren n Ṣihyun s Ujeǧid nsen.
PSA 149:3 Ad ṣebbḥen nitni Isem nnes s ccḍiḥ s nnubtat, ad as zehhden s ubendir d řgambri,
PSA 149:4 maɣar SIDI yarḍa x řgens nnes, ad yawi ccan i imwaḍɛen s wenjam.
PSA 149:5 Ad sřiweřwen imtiqqan s uweqqar yuǧɣen, ejj i-ten ad sɣuyen s řefraḥet zeg imucan nsen n arraḥet.
PSA 149:6 Izřan n uɛuǧi i AREBBI deg uqemmum nsen ijj n ssif iqḍeɛ s tnayen n wudmawen deg ufus nsen,
PSA 149:7 ḥima ad ntaqmen zi řegnus, [ḥima] ad ɛaqben ccuɛub,
PSA 149:8 ḥima ad carfen ijeǧiden nsen s ssnaseř, ayt n taṣiřet nsen s ssnaseř n wuzzař,
PSA 149:9 ḥima ad xasen ggen řḥukm yuran. D man aya ad tiři d lɛaḍama n marra imtiqqan nnes. Hallilu-Yah.
PSA 150:1 Hallilu-Yah, ṣebbḥem AREBBI di Zzawect nnes Iqeddsen, ṣebbḥem t di řkubbet n jjehd nnes!
PSA 150:2 Ṣebbḥem t x tmegga nnes timeqqranin, ṣebbḥem t x řemɣaret nnes tameqqrant!
PSA 150:3 Ṣebbḥem s tmijja n usuḍi deg uyicc n icarri, ṣebbḥem s lharpa d řgambri!
PSA 150:4 Ṣebbḥem t s ubendir d ccḍiḥ s nnubtat, ṣebbḥem t s [tirart] n ifiřan d temja!
PSA 150:5 Ṣebbḥem as s řḥess ifsusen n teǧunin n wuzzař, ṣebbḥem as s řḥess yuɛřan n teǧunin n wuzzař!
PSA 150:6 Marra min ittarran nnefs, ṣebbeḥ i SIDi. Hallilu-Yah!
PRO 1:1 Awařen iweznen n Suliman, mmis n Dawud, ajeǧid n Israil,
PRO 1:2 ḥima ad issen [bnadem] tiɣit d ttarbiyyet, ḥima ad ifhem awařen [ccuren s] řefhamet,
PRO 1:3 ḥima ad iqbeř ttarbiyyet d řeɛqeř, tasegda d řḥeqq d řeṣfayet,
PRO 1:4 ḥima ad iwc asfarz i iḥafiyyen, tussna d uḥadur i uḥudri.
PRO 1:5 Ejj amiɣis ad iseř u ad yarni di řefhamet nnes, ejj wenni ifehhmen ad ikseb řeqnaɛet,
PRO 1:6 ḥima ad ifhem awař iweznen d lmatal, awařen n imiɣisen d řemɛani innufaren nsen.
PRO 1:7 Tiggʷudi n SIDI d beddu n tussna, [maca] ibuhařiyyen sseḥqaran tiɣit d ttarbiyyet.
PRO 1:8 Seř, a mmi, ɣar ttarbiyyet n babac, war ttagi ca taɣuri n yemmac,
PRO 1:9 maɣar nitenti [ad iřint] d ttaj icna x uzeǧif nnec, d tseddyin [izewwqen] i yiri nnec.
PRO 1:10 [A] mmi, mařa xsen imednab ad cek ɣwan, war d asen ttegg ca array.
PRO 1:11 Mařa nitni qqaren: “Uyur akidneɣ, ejj ad nḥama i [usizzeř n] idammen, ejj aneɣ ad negg ijj n řfex i umezdag, břa ssibbet,
PRO 1:12 ejj aneɣ ad ten nṣarḍ am ddaren, am mammec [tṣareḍ] řaxart, am kemřem, am mammec imsar ak-d yinni ihekkwan deg weḥfur [n wenḍeř].
PRO 1:13 Ad naf ɛřamkur řeḥwayej yiɣřan aṭṭas, tudrin nneɣ ad tent neccur s tkeccaḍt.
PRO 1:14 Cek ad tenḍared taqedduḥt nnec jar aneɣ, ad ɣarneɣ [tiři] marra ict n tecyart.”
PRO 1:15 [A] mmi, war kidsen ggur deg webrid, siggʷej aḍar nnec x umesruq nsen,
PRO 1:16 maɣar iḍaren nsen ttazzřen ɣar řɣar, u nitni ttqeǧiqen maḥend ad ssizzřen idammen.
PRO 1:17 Maɣar s řbaṭeř ad tᵉttwabezzeɛ tracca, zzat i tiṭṭawin n marra min ɣar iǧa wafriwen,
PRO 1:18 [maɣar] nitni ttḥaman idammen [n yixef] nsen, tteggen řfex i řeɛmur [n yixef] nsen.
PRO 1:19 Ammu i iǧan ibriden n kuř ijj wenni ittazzřen ɣar arbeḥ, aqa aya itteṭṭef řeɛmar n sidis.
PRO 1:20 Tiɣit tᵉttřaɣa s jjhed [diha] barra, tessgeɛɛed tmijja nnes deg wazzayen.
PRO 1:21 Ɣar umezwar n imucan i daysen řharaj, tᵉttbarraḥ nettat, ɣar wadafen n tewwura n tendint tessawař awařen nnes.
PRO 1:22 “Ař meřmi ɣa qqimen iḥafiyyen ttexsen taqubbanect, [ař meřmi] d asen i ɣa iɛjeb uḥecci i imestehzayen, u [ař meřmi] ɣa carhen ibuhařiyyen tussna?
PRO 1:23 Dewřem ɣar uwebbex inu! Xzarem, necc ad xawem ssfarrɣeɣ arruḥ inu, awařen inu ad awem ten ɛeřmeɣ.”
PRO 1:24 “Aqa zeɛma řaɣiɣ u kenniw war texsem, sswiẓẓḍeɣ necc afus inu, [maca] uřa d ijj war d as iḥekkar.
PRO 1:25 Tenḍarem ccwar inu, awebbex inu war t teqbiřem.
PRO 1:26 [S uyenni] uřa d necc ad ḍeḥceɣ x uḍeyyeɛ nwem, necc ad [zzaywem] stehzeɣ xmi dd ɣa yas unexřiɛ nwem,
PRO 1:27 xmi dd ɣa yas unexřiɛ nwem am yijj n ureddeǧ, aḍeyyeɛ nwem am yict n tḥaryaḍt, xmi xawem dd ɣa tewḍa řeḥṣaret d teggʷudi.
PRO 1:28 Xenni ad xafi dd-řaɣan, maca necc war dd-ttarriɣ, ad xafi arzun, [maca] war d ayi ttifen,
PRO 1:29 minzi nitni carhen tussna, u war ixḍaren [ad ṭṭfen di] tiggʷudi n SIDI.
PRO 1:30 Nitni war xsen ca řecwar inu, marra awebbex inu nḍaren t.
PRO 1:31 Nitni ad ccen zi řɣiǧet n webrid nsen, u ad jjiwnen s ixarriṣen n yixef nsen,
PRO 1:32 minzi uffuɣ n iḥafeyyen [x webrid] ad ten ineɣ, u afřaḥ n ibuhařiyyen ad ten isshellek.
PRO 1:33 Wi ɣari i ɣa isřen, ad izdeɣ di řaman, ad yiři di řehna břa anexřiɛ n tuɛeffna.”
PRO 2:1 Mmi inu, mařa tqebřed awařen inu u ad teḥḍid tiweṣṣa inu ɣarek,
PRO 2:2 maḥend amezzuɣ nnec ad iwc taynit i tiɣit [uca] uř nnec ad imeyyeř ɣar řefhamet,
PRO 2:3 [wah,] mařa tᵉttřaɣid-dd x řeɛqeř, ad tessxedmed tmijja nnec maḥend [ad tafed] řefhamet,
PRO 2:4 mařa tarezzud xas am [tarezzud] x nnuqart, [mařa] xas tarezzud am x txubay innuffaren,
PRO 2:5 xenni ad tfehmed i tiggʷudi n SIDI, u ad tafed tussna n AREBBI.
PRO 2:6 Maɣar SIDI ittic tiɣit, zeg uqemmum nnes tᵉtteffeɣ-dd tussna d řefhamet.
PRO 2:7 I yinni igguren nican issewjed asen twiza, i yinni igguren di řekmaret [aqa-t] d taseddart i useřqi,
PRO 2:8 ḥima ad qqimen ttᵉṭṭfen deg imesraq n řḥeqq, u Netta ad issar abrid n yinni daysen řaman zzates.
PRO 2:9 Xenni i ɣa tfehmed tasegda d řḥeqq, uřa d řeṣfayet, kuř řatar iṣebḥen [maḥend ad t teḍfared].
PRO 2:10 Maɣar tiɣit ad tadef ɣar wuř nnec, u tussna ad tarḍa x řeɛmar nnec.
PRO 2:11 Aḥadur ad xak iḥḍa, řefhamet ad xak tessar:
PRO 2:12 ... maḥend ad cek tfekk zeg webrid n uɛeffan, zeg weryaz nni iqeǧben awař nnes,
PRO 2:13 zeg inni isemḥen deg imesraq iseggmen, maḥend ad uyuren ibriden n ṭṭřam,
PRO 2:14 inni ifarrḥen maḥend ad ggen řɣar, [u] ssřiwřiwen x řexdaɛat n řɣar,
PRO 2:15 zeg yinni farɣen imesraq nsen d yinni imeyyřen ssa d ssa di řatarat [n yixef] nsen,
PRO 2:16 ... maḥend ad cek tfekk zi temɣart tbarranect, zi temɣart zi barra i ittɣarran s wawařen nnes,
PRO 2:17 tenni isemḥen deg umeddukkeř n temẓi nnes, u tᵉttu řɛahd n AREBBI nnes.
PRO 2:18 Minzi thekkwa ɣar řmewt [jmiɛ] ak-d taddart nnes, u řatarat nnes [hekkwant] ɣar řexyařat [n imettan].
PRO 2:19 Marra inni ɣares ɣa yadfen, war dd-ttɛiqqiben ɛemmarṣ, war ttakkwaḍen ɛemmarṣ ɣar imesraq n tudart.
PRO 2:20 ... [wah,] ḥima ad tuyured abrid n iṣebḥanen, u ad tᵉṭṭfed deg imesraq n imseggaden,
PRO 2:21 maɣar inni igguren nican ad zedɣen di temmurt, u inni igguren s řekmaret ad dayes qqimen.
PRO 2:22 [Maca] iɛeffanen ad ttwaqeḍɛen zi temmurt, iɣeddaren ad zzayes ttwaqeřɛen.
PRO 3:1 Mmi inu, war ttᵉttu [taɣuri] inu n Ccariɛa, ejj uř nnec ad iḥḍa tiweṣṣa inu,
PRO 3:2 maɣar nitenti ad ac dd-iwyent aṭṭas n wussan, uřa d iseggʷusa n tudart d řehna.
PRO 3:3 Tamexsiwt icewwaren d řaman war ten tejjid ad zzayek ffɣen, qqen i-ten ɣar yiri nnec, ari ten x teřwiḥt n wuř nnec,
PRO 3:4 [xenni] ad tafed arḍa d řefhamet iṣebḥen di tiṭṭawin n AREBBI u n bnadem.
PRO 3:5 Tiqq di SIDI s wuř nnec kuřci, war ttcařa x řefhamet [n yixef] nnec.
PRO 3:6 Ssen i-t di marra ibriden nnec, [xenni] Netta ad iseggem imesraq nnec.
PRO 3:7 War ttegg ixef nnec d amiɣis. Ggʷed SIDI u beɛɛed x min iǧan d aɛeffan.
PRO 3:8 Aya ad yiři d agenfu i iẓewran [n tudart] nnec, d wenɛac i iɣsan nnec.
PRO 3:9 Weqqar SIDI s wagřa nnec, s tmezwarut n marra ṣṣabet nnec.
PRO 3:10 [Xenni] ad ttwaccuren řehrit nnec s ufeyyeḍ, u tisirin nnec [n uḍiř] ad dduqqzen s binu n jdid.
PRO 3:11 Mmi inu, war neṭṭar ttarbiyyet n SIDI, war ttarra aɛrur x uwebbex nnes,
PRO 3:12 maɣar wenni issɛizza SIDI, ad t iɛaqeb ɛawed, am ittegg babas ak-d mmis wenni x yarḍa.
PRO 3:13 Sseɛd n bnadem nni ittafen tiɣit, uřa d bnadem nni ittkessaben řefhamet,
PRO 3:14 maɣar min tᵉttawi nettat, teḥřa x tsebbabt di nnuqart, u řɣiǧet nnes [teḥřa] x wureɣ ittissiqen.
PRO 3:15 Nettat tiɣřa x řmarjan, u marra min di [tzemmared] ad temmeẓred, war izemmar akides ittemqudda.
PRO 3:16 Tuzzeggart n wussan [ɣares] deg ufus nnes, agřa d ccan aqa aten x uzeřmaḍ nnes.
PRO 3:17 Ibriden nnes d ibriden n řeḍrafet, u marra imesraq nnes aqa aten d řehna.
PRO 3:18 Nettat d tacejjart n tudart i yinni ɣares iřesqen, kuř ijjen wenni dayes itteṭṭfen, ad yiři d amesɛud.
PRO 3:19 SIDI igga dsas n temmurt s tiɣit nnes, s řefhamet nnes igga ijenwan.
PRO 3:20 Zi tussna nnes dduqqzen-dd [waman] ihewřen, ttnecnicen-dd iseynuten nnda.
PRO 3:21 Mmi inu, war tent tejjid ad ffɣent zi tiṭṭawin nnec, ḥḍa aftan d uḥaḍur,
PRO 3:22 [maɣar] ad iřin d tudart i řeɛmar nnec uřa d arḍa i yiri nnec.
PRO 3:23 Xenni ad tuyured abrid nnec di řaman, war tᵉttneqriḍed deg uḍar nnec.
PRO 3:24 Mařa truḥed ad tezzřed, war tennxeřɛid, u [xmi] i ɣa tezzřed, ad yiẓid yiḍeṣ nnec.
PRO 3:25 War tteggʷed zeg unexřiɛ n deɣya uřa zeg wareyyeb s [ufus] n iɛeffanen xmi dd ɣa yas.
PRO 3:26 Maɣar SIDI ad ac yiři d asenned nnec, Netta ad iḥḍa afus nnec zi tsarrift.
PRO 3:27 War qeṭṭeɛ řxar x bab nnes, mařa aqa-t deg ufus nnec maḥend ad tegged [řxar].
PRO 3:28 War qqar i jjar nnec: ‘Ruḥ uca ɛqeb-dd, tiwecca ad [ac tt] wceɣ!’, mařa [tamesřact] aqa-tt akidek.
PRO 3:29 War nekkwi řɣar ak-d jjar nnec, umi akidek izeddeɣ di řaman.
PRO 3:30 War temcubbuc ak-d ijj n bnadem břa ssibbet, mařa netta war d ac iggi řɣar.
PRO 3:31 War ttasem zeg ijj n bu-řexcunet, ḥḍa maḥend war tᵉttixḍared uřa [d ijj] zi marra ibriden nnes.
PRO 3:32 maɣar wenni itteffɣen zeg webrid, aqa-t d nnɛi i SIDI, [maca] [Netta ittegg] řaman nnes deg inni igguren nican.
PRO 3:33 Nneɛřet n SIDI [aqa-tt] x taddart n uɛeffan, [maca] tazeddiɣt n imseggaden ad tt ibarek.
PRO 3:34 Mařa d imestehzayen, ad [zzaysen] isstehza Netta, [maca mařa] d inni ittwaḥṣaren, ad [asen] iscen arḍa nnes.
PRO 3:35 Imiɣisen ad warten ccan, [maca] ibuhařiyyen ad ssarbun řefḍiḥet x yixef nsen.
PRO 4:1 Sřem, kenniw iḥenjiren, ɣar ttarbiyyet n baba[twem], ḥekkarem mliḥ maḥend ad teksim tussna s řefhamet,
PRO 4:2 maɣar necc ad awem wceɣ taɣuri iṣebḥen, war semmḥem di tɣuri inu.
PRO 4:3 Maɣar necc tuɣa ayi d mmis i baba, areqqaɣ d ayenni n [mmis] zzat i wudem n yemma.
PRO 4:4 Netta isseřmed ayi, inna ayi: “Ejj uř nnec ad iṭṭef deg wawařen inu, ḥḍa tiweṣṣa inu, [xenni] ad teddared!”
PRO 4:5 Jbed-dd ɣarek tiɣit, jbed-dd ɣarek řeɛqeř, war tᵉttu u war tḥeyyid x wawařen n uqemmum inu.
PRO 4:6 War semmeḥ [di tiɣit], [xenni] nettat ad cek teḥḍa, sɛizz i-tt u nettat ad cek tessar.
PRO 4:7 Beddu n tiɣit d uḍuf n tiɣit, ṭṭef řefhamet s marra min ɣarek.
PRO 4:8 Sgeɛɛed i-tt-i-dd, xenni nettat ad cek tessgeɛɛed, nettat ad ac tegg ccan mařa tdarrɛed as.
PRO 4:9 Nettat ad ac tewc ijj n ttaj tecna x uzeǧif nnec, ad ac tewc ijj n ttaj izewwqen.
PRO 4:10 Seř, [a] mmi, u ksi awařen inu, [xenni] ad mmarnin iseggʷusa n tudart nnec.
PRO 4:11 Ssřemdeɣ ac abrid n tiɣit, nedheɣ cek di řatarat iseggmen.
PRO 4:12 Mařa tuyured, aṣurif nnec war ittneḥṣṣar, mařa tazzřed, war ttneqriḍed.
PRO 4:13 Cebbar di ttarbiyyet, war [xas] temmsebḍa, ḥḍa tt, maɣar nettat d tudart nnec.
PRO 4:14 War ggur x umesruq n iɛeffanen, war ttidif abrid n yinni itteggen řɣar,
PRO 4:15 ḥeyyed xas, war xas ggur, ffeɣ zzayes u ad tekked xas.
PRO 4:16 Maɣar nitni war ttᵉṭṭṣen am war [zemmaren] ad ggen tuɛeffna, ittraḥ asen iḍeṣ nsen mařa war ssneqriḍen ḥed [ɛad],
PRO 4:17 maɣar nitni ttᵉtten aɣrum n řɣecc, u nitni sessen binu zi tmegga n řexcunet.
PRO 4:18 Amesruq n imseggaden am tfawt ittissiqen n teffut, tenni tarenni deg useqseq ař imɣar wass qaɛ.
PRO 4:19 Abrid n iɛeffanen am taǧest, nitni war ssinen min di i ɣa nqarḍen.
PRO 4:20 Mmi inu, ewc taynit i wawařen inu, ewc amezzuɣ nnec i wawařen inu,
PRO 4:21 war ten ttejji ad ɣefřen zi tiṭṭawin nnec, xemmeř i-ten daxeř deg wuř nnec,
PRO 4:22 maɣar nitni d tudart i yinni ten i ɣa yafen, uřa d agenfu i arrimet nsen marra.
PRO 4:23 Ḥḍa uř nnec x marra min izemmar ad ittwaḥḍa, maɣar zzayes ffɣen iẓewran n tudart.
PRO 4:24 Kkes ixarriqen n uqemmum nnec, sbeɛɛed xak afaryeḍ n iyencicen nnec.
PRO 4:25 Ejj tiṭṭawin nnec ad xzarent ɣar zzat, [ejj] abřiwen nnec ad xzaren ɣar [min iǧan] arendad nnec.
PRO 4:26 Waṭa řatar n uḍar nnec, ejj ad iřin marra ibriden nnec sarrḥen.
PRO 4:27 War farreɣ [ɣar] yefus uřa [ɣar] uzeřmaḍ, sbeɛɛed aḍar nnec zi tuɛeffna.
PRO 5:1 Mmi inu, ewc taynit i tiɣit inu, ewc amezzuɣ i řefhamet inu,
PRO 5:2 maḥend ad tewced ḥaḍur, u iyencicen nnec ad ḥḍan x tussna.
PRO 5:3 Minzi iyencicen n temɣart tabarranit ttudumen s tamment n teɣraṣt, aneɣ nnes d ařeqqaɣ x zzect,
PRO 5:4 maca ɣar uneggar [aqa-tt] d tamerzagt am cciḥ, teqḍeɛ am yijj n ssif s [tnayen n] wudmawen.
PRO 5:5 Iḍaren nnes ttawyen ɣar řmewt, iṣuraf nnes neddhen ɣar řaxart.
PRO 5:6 Ařami war tᵉṭṭifed [ɛemmarṣ] abrid n tudart, ggurent řatarat [n iḍaren] nnes ssa d ssa břa ma tessned cek.
PRO 5:7 Xenni řexxu, [a] iḥenjiren, sřem-dd ɣari, war tḥeyyadem ca x wawařen n uqemmum inu.
PRO 5:8 Siggʷej abrid nnec xas, war ttades tawwart n taddart nnes,
PRO 5:9 ḥima war tᵉtticed ccan nnec i inneɣni, iseggʷusa nnec i wenni itteqsiḥen aṭṭas,
PRO 5:10 ḥima ibarraniyyen war ttjawanen deg wagřa nnec, u marra [řɣiǧet n] umarret nnec war dd-tᵉttis di taddart n wenni war ittwissnen,
PRO 5:11 u ad tzehhared ɣar uneggar, xmi ɣa tᵉttwacc arrimet nnec d weysum nnec,
PRO 5:12 ad tinid: “Mammec ggiɣ necc carheɣ ttarbiyyet, [mammec] inḍar uř inu awebbex?
PRO 5:13 [Mammec] war sřiɣ ɣar tmijja n yinni d ayi idarrben, war wciɣ amezzuɣ inu i imseřmaden inu?
PRO 5:14 Ɛřaḥař tuɣa ufiɣ ixef inu di ɛřam kuř řɣar, di řwesṭ n wegraw [n řgens] u n tmesmunt!”
PRO 5:15 Suw aman zeg wanu nnec, uřa d aman issizzřen zi řaǧaɣ n řɛunṣar nnec.
PRO 5:16 Iři ad ssefyen waman [n řɛunṣar] nnec barra, [am] tɣezratin n waman x ibriden.
PRO 5:17 Ejj i-ten ad iřin i cek weḥḥdek, war iǧi i ibarraniyyen i din zzatek.
PRO 5:18 Ad ittwabarek řɛunṣar nnec, farḥ i temɣart [zeg wussan] n temẓi nnec.
PRO 5:19 Tudadt iɛizzen uřa d tiɣeydet n wezɣar icewwaren [nettat]! Ejj ibbac nnes ad cek ssyiwyen di marra ussan, sellem ixef nnec řebda ɣar tayri nnes!
PRO 5:20 Mayemmi, [a] mmi, ad cek teɣwa temɣart tabarranect, ad tdarrɛed i weḥsin n temɣart war tessined?
PRO 5:21 Maɣar ibriden n bnadem aqa aten [din] zzat i tiṭṭawin n SIDI, Netta yarzu di marra imesraq nnes.
PRO 5:22 Řmuɛsiyyet [n yixef] nnes ad tḥebbes aɛeffan, s iseɣwan n ddnub nnes ad ittwacedd.
PRO 5:23 Netta ad immet umi war din tuɣi ttarbiyyet, ad iweddar s tubbuheřya nnes tameqqrant.
PRO 6:1 Mmi inu, mařa tdewřed d amarhun i jjar nnec, tewcid ticti nnec n ufus i yijj n ubarrani,
PRO 6:2 [mařa] tdewřed teqqned zeg wawařen n uqemmum nnec, tᵉttwaḥebbsed zeg wawařen n uqemmum nnec,
PRO 6:3 [xenni] egg ta, [a] mmi, u fekk ixef nnec, maɣar tdewřed ɣar ufus n jjar nnec: uyur, bendeq [xas] u zeyyar x wenni cek yudsen.
PRO 6:4 War ttic ca iḍeṣ i tiṭṭawin nnec, uřa d anudem i wabřiwen nnec.
PRO 6:5 Fekk ixef nnec zeg ufus [nnes] am tɣeyḍet n weɣzar, am yijj n wejḍiḍ zeg ufus n unegmar.
PRO 6:6 Uyur ɣar tkeḍfet, [cek, a] ameɛguz, xzar mammec tuyur nettat u dweř d amiɣis.
PRO 6:7 Waxxa nettat war ɣares bu umgewwed, niɣ aweqqaf niɣ řḥakem,
PRO 6:8 [ɛad] tessewjad aɣrum nnes deg unebdu, teyru macca nnes di řweqt n tmeyra.
PRO 6:9 Ař meřmi ɣa teqqimed tezzřed, [cek, a] ameɛguz? Meřmi ɣa tekkared zeg iḍeṣ nnec?
PRO 6:10 Arni cwayt n yiḍeṣ, arni cwayt n uwarrec, arni cwayt n ubuzzeř s ifassen imunen,
PRO 6:11 [aqa da] ad xak dd-iwḍa zzeřḍ am yijj n uxewwan, řeɣben nnec am yijj n weryaz i ɣar iǧa řesnaḥ.
PRO 6:12 Bnadem i war isekkwin, aryaz n řɣecc, iggur s ijj n uqemmum iccuren s min iɛewjen.
PRO 6:13 Iɣemmez s tiṭṭawin nnes, issawař s iḍaren nnes, ittceyyar s iḍewḍan nnes.
PRO 6:14 Uř nnes [iccur] s řexdaɛat, inekkwa řebda řɣar, ittsebbab imenɣiyyen.
PRO 6:15 X uya deɣya ad dd-yas uḍeyyeɛ nnes, deg ict n tecti ad ittwarẓ am war din ittiři ugenfu.
PRO 6:16 Setta [n tmesřayin]-a icarreh i-tent SIDI, [wah] sebɛa aqa atent d nnɛi i řeɛmar nnes:
PRO 6:17 tiṭṭawin n nnfaxet, ijj n yiřes issxarriqen, uřa d ifassen issazzařen idammen imezdagen,
PRO 6:18 uř inekkwan timeɛmač iɣeccen, iḍaren nni ittqeǧiqen maḥend ad azzřen ɣar min iǧan d aɛeffan,
PRO 6:19 acehhad issxarriqen nni dd-ideǧqen i ixarriqen, uřa wenni ittsebbaben imenɣiyyen jar tawmat.
PRO 6:20 [A] mmi, ḥḍa tawṣeyyet n babac, u war menḍar taɣuri n yemmac.
PRO 6:21 Qqen i-tent řebda x wuř nnec, cedd i-tent ɣar yiri nnec.
PRO 6:22 Mařa teggured, aya ad cek igewwed, mařa tezzred, aya ad cek iḥḍa, mařa tfaqed aqa man aya ad kidek issiweř.
PRO 6:23 Minzi tawṣeyyet d řefnar d tɣuri d tfawt, iwebbax n ttarbiyyet aqa aten d abrid n tudart
PRO 6:24 nni cek i ɣa iḥḍan zi temɣart taɛeffant, zi řehrud izewwqen n yiřes n temɣart zi barra.
PRO 6:25 War ɛecceq ca aẓri nnes deg wuř nnec, ḥḍa war cek teḥṣir s wabřiwen nnes,
PRO 6:26 minzi zi ssibbet n ict n temɣart n farq-ccɣeř, [bnadem ad iksi] [mɣir] ict n txebbazt n weɣrum, [wah,] tamɣart n ijj n weryaz nneɣni aqa tarezzu řeɛmar iɣřan.
PRO 6:27 Ma izemmar ḥed ad yarbu timessi deg weḥsin n warruḍ nnes, břa ma ad yarɣ warruḍ nnes?
PRO 6:28 Ma izemmar ḥed ad yuyur x řefḥem [itteḥduduqen], břa ma ad cemḍen iḍaren nnes?
PRO 6:29 Ammu [uřa d] wenni i ɣa yadfen ɣar temɣart n jjar nnes, [wah] kuř ijjen wenni tt i ɣa ihadan, war ittwiḥsib d amezdag.
PRO 6:30 Aceffar war t ssḥeqqaren mařa yucar, ḥima ad issyiwen řeɛmar nnes mařa dayes řaẓ.
PRO 6:31 [Maca] mařa ittwaf, ammu xas i ɣa ixeǧeṣ sebɛa n tseqqar. Ittxeṣṣa as ad iwc marra min ɣares di taddart.
PRO 6:32 [Maca] wenni itteggen zzina ak-d ict n temɣart, war ɣares bu wuř imten. Wenni itteggen aya, ittareddeǧ řeɛmar nnes.
PRO 6:33 Druct d řefḍiḥet ad ten yaf, řeḥya nnes war imeḥḥi ca.
PRO 6:34 Maɣar tusmi [tᵉttawi-dd] asɛar n weryaz, netta war ittessen aḥinni deg wass n wentaqem.
PRO 6:35 War iḥesseb ddeyyet i weṣřeḥ, war tt iqebbeř, ad yugi, waxxa tessemɣarid di terzeft ɛad s waṭṭas.
PRO 7:1 Mmi inu, ḥḍa awařen inu, xemmeř tiweṣṣa inu ɣarek.
PRO 7:2 Ḥḍa tiweṣṣa inu u cek ad teqqimed teddared, [ḥḍa] taɣuri inu am mummu n tiṭṭ nnec.
PRO 7:3 Qqen i-tent ɣar iḍewḍan nnec, ari tent x teřwiḥt n wuř nnec.
PRO 7:4 Ini i tiɣit: ‘Cem d učma!’, u semma řefhamet: ‘Ameddukkeř [inu]!’,
PRO 7:5 maḥend [nitenti] ad cek ḥḍant zi temɣart tabarranect, zi temɣart zi barra i cek ittɣarran s wawařen nnes.
PRO 7:6 Maɣar zi řkazi n taddart inu, jar ccebbac [n řkazi] sewḍeɣ ɣar wadday,
PRO 7:7 sewḍeɣ ɣar iḥafiyyen [inni war ittḥikin], jar iḥenjiren [n bnadem] ḥekkareɣ ijj n uḥudri s wuř war imten.
PRO 7:8 Netta iẓwa abrid ɣar teɣmart nnes, u iṭṭef abrid ɣar taddart nnes.
PRO 7:9 Ɣar tbambast, ɣar tmeddit n wass, di řaǧaɣ n ǧiřet d tubbarcent,
PRO 7:10 xzar, [aqa] ict n temɣart tusa-dd i umsagar akides, deg warruḍ n temɣart n farq-ccɣeř u s teḥraymect n wuř.
PRO 7:11 Nettat textix u tɣewweɣ, iḍaren nnes war qqimen ɛad di taddart.
PRO 7:12 Ict n twařa di barra, [xenni] ɛawed deg wazzayen, ɣar marra tiɣemmar [n ibriden] tᵉttḥama.
PRO 7:13 Nettat tᵉṭṭef i-t u tessudem i-t, teqjar udem nnes, tenna as:
PRO 7:14 “Tuɣa xafi [maḥend ad wceɣ] tiwhibin n řehna. Ass-a ssqefřeɣ lwuɛud inu.
PRO 7:15 X uya i dd-ffɣeɣ maḥend ad cek mmsagareɣ, maḥend ad xak arzuɣ u [ammu i cek] ufiɣ.
PRO 7:16 Necc ssuɣ maltat x qama inu, řizarat izewwqen zi řeqten azdad zi Miṣra.
PRO 7:17 Necc rucceɣ tassut inu [s] mirru d wecfiř d řqarfa.
PRO 7:18 As-dd, ejj aneɣ ad nejjiwen asḥinneb ař tuffut, ejj aneɣ ad narr meẓri di řirart n tayri.
PRO 7:19 Maɣar aryaz war iǧi di taddart, netta [isafar] iggʷej aṭṭas.
PRO 7:20 Iksi ict n tkemmust [n tmenyat] n nnuqart akides, ad yareggʷeḥ ɣar wass n tziri iqefřen.”
PRO 7:21 [Ammu] i t tᵉṭṭef s waṭṭas n řhard nnes, teɣwa i-t s řehrud nnes izewwqen n iyencicen nnes.
PRO 7:22 Deɣya netta yardef i-tt, am yijj n ufunas igguren ɣar řgurnet, am ict n ssnesřet [x iḍaren] [n wenni igguren] ɣar umarret n ubuhaři
PRO 7:23 - ařami dd as tcarreg fřitca tsa - am yijj n wejḍiḍ iḍwin deg ijj n wenday, u war issin aqa wanita ittwagg ḍidd i tudart nnes.
PRO 7:24 [Xenni] řexxu, [a] iḥenjiren, sřem-dd ɣari, u sřem ɣar wawařen n uqemmum inu.
PRO 7:25 Ejj uř nnec war ittweddir deg ibriden nnes, war ttmeyyiř ɣar imesraq nnes.
PRO 7:26 Maɣar deg waṭṭas ittwayezmen inni teɣḍer, imɣar waṭṭas [lɛadad n] marra inni tenɣa.
PRO 7:27 Taddart nnes [teccur] [s] ibriden ɣar řaxart nni ihekkwan ɣar ixxamen n daxeř n řmewt.
PRO 8:1 Ma war tᵉttřiɣi tiɣit u war tesgiɛɛid řefhamet tmijja nnes?
PRO 8:2 X tqiccat n řegɛudi x webrid, mani ttemseřqan imesraq tbedd Nettat d abeddi.
PRO 8:3 Ɣar uɣezdis n tewwura, ɣar wadaf n tendint, mani ɣa tadfed x tewwura, tᵉttřaɣa s jjehd:
PRO 8:4 “I kenniw, [a] iryazen, ttřaɣiɣ, tmijja inu [tᵉtteffeɣ] ɣar tarwa n bnadem.
PRO 8:5 [Kenniw] iḥafiyyen, fehmem [xenni] min iǧan d aftan, [kenniw] ibuhařiyyen, fehmem [s] wuř [nwem].
PRO 8:6 Sřem, minzi ad ssiwřeɣ awařen i dd-ijebbden řeften, anurzem n iyencicen inu [jebbed-dd] timesřayin iseggden,
PRO 8:7 maɣar aneɣ inu ad yini tidett s nneyyet, řhard iɛeffnen aqa-t d nnɛi i iyencicen inu.
PRO 8:8 Marra awařen n uqemmum inu [tteffɣen-dd] zi tsegda, war daysen uřa d ict n řḥajjet ixnunnesen niɣ ifarɣen.
PRO 8:9 Aqa aten marra ṣfan i wenni di teǧa řefhamet, uřa s řeqyas i yinni [ixsen] ad afen tussna.
PRO 8:10 Ksim ttarbiyyet inu, war iǧi nnuqart, uřa tussna ktar x wureɣ iqquren,
PRO 8:11 maɣar tiɣit ḥsen zi řmarjan, marra min di izemmar [bnadem] ad imeẓri, war [izemmar] ad dayes yarwes.
PRO 8:12 Necc, tiɣit, zeddɣeɣ ɣar weftan, ttafeɣ tussna s uḥadur.
PRO 8:13 Tiggʷudi n SIDI d acrah n řɣar, nnfaxet, tacennaɛt d umesruq aɛeffan, necc carrheɣ uřa d aqemmum [iccur s] řexdaɛat.
PRO 8:14 Ɣari acawar d twiza, necc d řefhamet, ɣari jjehd.
PRO 8:15 Zzayi ḥekkmen ijeǧiden, [zzayi] ttareysen ayt n jjehd s tsegda.
PRO 8:16 Zzayi ḥekkmen řḥukkam d tarwa n taṣiřet, marra řquḍat n temmurt.
PRO 8:17 Necc ttexseɣ marra inni d ayi ittexsen, d yinni xafi yarezzun zic, ad ayi afen.
PRO 8:18 Agřa d ccan aqa aten ɣari, agřa iqqimen d tsegda.
PRO 8:19 Fruta inu tecna x wureɣ ittissiqen, [wah] x wureɣ azdad, řɣiǧet inu teɛdu nnuqart iqquren.
PRO 8:20 Necc ggureɣ x umesruq n tsegda, di řwesṭ n imesraq n řḥeqq,
PRO 8:21 ḥima ad arreɣ inni d ayi ittexsen ad ṭṭfen ict n tesɣart d řwart, necc ad ccureɣ ixxamen n txubay nsen.
PRO 8:22 SIDI igga ayi d amezwaru n webrid nnes, [ɛad] qbeř amezwaru n tmegga nnes zeg wecḥař uya.
PRO 8:23 Zi řebda ittwazeǧeɛ xafi [jjehd], zeg umezwaru, zi řweqt n umezwaru i di tᵉttwagg temmurt,
PRO 8:24 umi war din tuɣi ɛad [aman] ihewřen, necc ttwaxeřqeɣ-dd, umi war din tuɣi ɛad řɛunṣarat ccurent s waman.
PRO 8:25 Qbeř ma ad ttwaggen idurar, qbeř [ma ad iřint] tewririn, tuɣa xeřqeɣ-dd necc.
PRO 8:26 Netta tuɣa ɛad war dd-ixřiq tammurt d iyyaren, uřa d tamezwarut n tɛejjajt n ddunect.
PRO 8:27 Umi Netta igga ijenwan, tuɣa ayi din, umi Netta yarcem ict n tqurarect x wudem n [waman] ihewřen.
PRO 8:28 Umi Netta igga iseynuten sennej, umi ttwajehdent řɛunṣarat n [waman] ihewřen,
PRO 8:29 umi Netta igga i řebḥar aymir nnes, maḥend aman war dd-ɛeddun řumur nnes, umi Netta iɛbar dsusa n temmurt,
PRO 8:30 tuɣa ayi d amudrus iɛizzen ɣar uɣezdis nnes. Necc tuɣa ayi marra d tarrit n meẓri ass x wass, ttirareɣ zzat i wudem nnes řebda,
PRO 8:31 ttirareɣ di marra tammurt nnes, am tuɣa tarrit n meẓri inu ak-d tarwa n bnadem.
PRO 8:32 [Xenni] řexxu, [a] iḥenjiren [inu], sřem-dd ɣari! Sseɛd n yinni iḥeṭṭan ibriden inu.
PRO 8:33 Sřem ɣar ttarbiyyet u dewřem d imiɣisen, war neṭṭarem [ttarbiyyet].
PRO 8:34 Sseɛd n bnadem nni ɣari isřan, wenni iṭṭfen acbar ɣar tewwura inu zeg wass ař wass, iḥetta x tɣemmar n tewwura inu,
PRO 8:35 maɣar wenni d ayi yufin, ad yaf tudart, u ad iṭṭef arḍa n SIDI.
PRO 8:36 Wenni i d ayi ixḍan, iyezzem řeɛmar nnes, marra inni d ayi icarrhen, ttexsen řmewt.
PRO 9:1 Tiɣit tebna taddart nnes, tegga tessuyda ipilaren nnes, [aqa aten di] sebɛa.
PRO 9:2 Nettat tɣarṣ i řmař nnes, txeǧeḍ binu nnes. Ɛawed tessu ṭṭabřa nnes.
PRO 9:3 Nettat tessekk timsexxarin nnes timeẓyanin. X tqiccatin n řegɛudi n tendint tᵉttřaɣa:
PRO 9:4 “Wenni iǧan d aḥafi, ejj i-t ad dd-yas danita!” Nettat teqqar i yinni war ɣar iǧi ca wuř imten:
PRO 9:5 “Asem-dd, ccem zeg weɣrum inu, swem zi binu nni d awem dd-xeǧḍeɣ.
PRO 9:6 Jjem taqubbanect, uca ddarem, ḍfarem abrid n řefhamet.”
PRO 9:7 “Wenni ittwebbxen amestehziy, issarebbu řefḍiḥet i yixef nnes, wenni ittɛaqaben aɛeffan, aqa [netta yarebbu] abeqqiḍ n řefḍiḥet nnes.
PRO 9:8 War ttɛeyyab amestehziy ḥima netta war cek icarreh, ɛeyyeb [a]miɣis, xenni netta ad cek ixs.
PRO 9:9 Ewc i umiɣis, [xenni] ad idweř d miɣis ktar, sɣar tussna i umsegged, [xenni] netta ad ifhem ktar.”
PRO 9:10 Tiggʷudi n SIDI d beddu n tiɣit, tussna n Umqeddas d Ameqqran d beddu n řefhamet.
PRO 9:11 Maɣar zzayi ad ktaren wussan nnec, iseggʷusa n tudart ad ttwarnin i cek.
PRO 9:12 Mařa cek d miɣis, [xenni] ad tiřid d miɣis i yixef nnec, u mařa testehezzid, ad tarbud aya simant nnec.”
PRO 9:13 Tamɣart tabuhařect tᵉttbuhřuy, [nettat] d taqubbanit, war tessen walu.
PRO 9:14 Nettat tᵉttɣima ɣar tewwart n taddart nnes, x ijj n kursi, [x] řegɛudi n tendint
PRO 9:15 ḥima ad třaɣa x inni iɛeddun, inni igguren nican imesraq nsen, [tenna]:
PRO 9:16 “Wenni iǧan d aḥafi, ejj i-t ad dd-yas danita!” Nettat teqqar i yinni war ɣar iǧi ca wuř imten:
PRO 9:17 “Aman ittwacaren d imiẓiden, aɣrum innuffaren aqa icna.”
PRO 9:18 Netta war issin aqa din řexyařat, aqa inewjiwen nnes deg waǧaɣ n řaxart [i iǧan].
PRO 10:1 Awařen iweznen n Suliman Ijj n mmis d amiɣis issfarraḥ babas, [maca] ijj n ubuhaři n mmis d wenni d amnus [ameqqran] n yemmas.
PRO 10:2 Tixubay n tuɛeffna war nneffɛent, [maca] tasegda tᵉttfekka zi řmewt.
PRO 10:3 SIDI war ittejji řeɛmar n imseggaden ad iḥeyyef, [maca] meẓri n iɛeffanen iɛarren i-t ɣar řaggʷaj.
PRO 10:4 Wi ixeddmen s ufus yarxun, ittawi-dd zzeřḍ, [maca] afus n yinni ittceṭṭaren ittawi-dd agřa.
PRO 10:5 Wenni iyarrwen deg unebdu d ijj n mmis ifehhmen, [maca] wenni itteṭṭṣen di tmeyra d ijj n mmis n řefḍiḥet.
PRO 10:6 Lbarakat [aressant] x uzeǧif n imseggaden, [maca] lɛunf issdurruy aqemmum n iɛeffanen.
PRO 10:7 Řidaret i umsegged [ad dd-yawi] lbaraka, [maca] isem n iɛeffanen ad yarṣuḍ.
PRO 10:8 Wenni d amiɣis deg wuř, ad iqbeř tiweṣṣa, [maca] wenni [issawařen] tubbuheřya s iyencicen nnes, ad iwḍa.
PRO 10:9 Wenni igguren di řeṣfayet, iggur di řaman, [maca] wenni [igguren] ibriden ifarɣen, ad ittwassen.
PRO 10:10 Wenni ittɣemmazen s tiṭṭawin, ittegg řeḥriq, wenni [issawařen] tubbuheřya s iyencicen nnes, ad iwḍa.
PRO 10:11 Aqemmum n umsegged d tařa n tudart, [maca] lɛunf issdurruy aqemmum n iɛeffanen.
PRO 10:12 Acrah tessekkara-dd imcubbecen, [maca] tayri tessdurruy marra ixeṭṭan.
PRO 10:13 X iyencicen n wenni ɣar iǧa řefhamet tᵉttwaf tiɣit, [maca] aɛmud i wenni war ɣar iǧi bu řeɛqeř.
PRO 10:14 Imiɣisen ttxemmaren tussna, [maca] aqemmum n ubuhaři ittades ɣar uhellek.
PRO 10:15 I bu-wagřa min iǧan nnes d tandint ijehden nnes, lebla n imezřaḍ d ahellek nsen.
PRO 10:16 Řɣiǧet n umsegged aqa-tt i tudart, řmunet n uɛeffan i ddenb.
PRO 10:17 Wenni iḥeṭṭan ttarbiyyet, [aqa-t x] webrid n tudart, [maca] wenni isemmḥen deg uwebbex, ad iweddar.
PRO 10:18 Wi itteffaren acrahi, ɣares iyencicen ssxarriqen, wi ittceqqafen aqa-t d abuhaři.
PRO 10:19 Ɣar waṭṭas n wawařen war iqqim uxeṭṭu ineqqeṣ, [maca] wenni imennɛen iyencicen nnes, aqa [ittegg] s řeɛqeř.
PRO 10:20 Nnuqart iqquren d iřes n umsegged, uř n iɛeffanen war isekkwin.
PRO 10:21 Iyencicen n imseggaden sseccan aṭṭas, [maca] ibuhařiyyen mmuten umi war ɣarsen bu wuř imten.
PRO 10:22 Lbaraka n SIDI tᵉttawi-dd agřa, arber [n bnadem] war dayes yarenni walu.
PRO 10:23 I ubuhaři tameggit n řefḍihet am yict n řuraret, [maca] i weryaz n řefhamet [adebbar] s tiɣit [am man aya].
PRO 10:24 Min zi itteggʷed uɛeffan ad t iřqef, [maca] asitem n imseggaden ad yiři.
PRO 10:25 Mařa teɛdu-dd tḥaryaḍt, aɛeffan war ittɣimi, [maca] amsegged ad iqqim imten i řebda.
PRO 10:26 Am binu asemmam i teɣmas d ddexxan i tiṭṭawin, ammu i igga umeɛguz i yinni t issekken.
PRO 10:27 Tiggʷudi n SIDI tarenni deg ussan [i tudart], [maca] iseggʷusa n iɛeffanen ttwassquḍḍeḍen.
PRO 10:28 Tarajit n imseggaden d řefraḥet, [maca] řayas n iɛeffanen ggur ad ifna.
PRO 10:29 Abrid n SIDI d lburj [ijehden] i wenni igguren nican, [maca] d ahellek i yinni itteggen řɣecc.
PRO 10:30 Amsegged ɛemmarṣ ad inhezz i řebda, [maca] iɛeffanen war zeddɣen di temmurt.
PRO 10:31 Aqemmum n umsegged ittawi-dd tiɣit s waṭṭas, [maca] ijj n yiřes iɛemmar s řexdaɛat ad ittwaqess.
PRO 10:32 Iyencicen n umsegged ssnen min yarḍan, [maca] aqemmum n uɛeffan [issen] řexdaɛat waha.
PRO 11:1 Řmizan aɣeccac d nnɛi i SIDI, [maca] aẓru n řewzen nican ittaf arḍa nnes.
PRO 11:2 Mařa tusa-dd nnfaxet, tusa-dd uřa d řefḍiḥet, [maca] ɣar imwaḍɛen [teǧa] tiɣit.
PRO 11:3 Řeṣfayet n inni igguren nican tneddeh i-ten, [maca] taḥraymect n iɣeddaren taředdeǧ i-ten.
PRO 11:4 Agřa war ineffeɛ ɣar wass n uduqqez [n ufugem], [maca] tasegda tᵉttfekka zi řmewt.
PRO 11:5 Tasegda n wenni igguren nican ittarra abrid nnes nican, [maca] aɛeffan iweṭṭa s tuɛeffna nnes.
PRO 11:6 Tasegda n inni igguren nican ad ten tfekk, [maca] iɣeddaren ad ttwacarfen deg umeẓri [nsen].
PRO 11:7 Mařa immut bnadem aɛeffan, ifna řayas nnes, uřa d min ttrajan [yeryazen] daysen teryast ad ifna.
PRO 11:8 Amsegged ad dd-ittwafekk zi řeḥṣaret, uca [xenni] aɛeffan ad dd-yas deg wemcan nnes.
PRO 11:9 Amnafeq ittareddeǧ jjar nnes s uqemmum nnes, [maca] imseggaden ad ttwafekken s tussna.
PRO 11:10 Tandint tᵉttesřiwřiw mařa imseggaden aqa aten mliḥ, u mařa ttwahellken iɛeffanen, aqa din asřiwřew.
PRO 11:11 Tᵉttwassgeɛɛed tendint s lbaraka n inni igguren nican, [maca] s uqemmum n iɛeffanen ad tᵉttwahdem.
PRO 11:12 Wenni war ɣar iǧi ca wuř imten, isseḥqara jjar nnes, [maca] aryaz wenni ɣar iǧa řefhamet ittesqar.
PRO 11:13 Wenni igguren da d diha s texbarjit, ittɛarra min innuffaren, [maca] wenni [i di iǧa] arruḥ dayes řaman, aqa issnuffara tamesřact.
PRO 11:14 Mařa war din adebbar, iweṭṭa řgens, [maca] ad yiři usenjem s řemɣaret n umcawar.
PRO 11:15 Wenni iḍemmnen řbarrani, war dd as tᵉtteffeɣ ca mliḥ, [maca] wenni icarrhen inni itteggen ticti x ufus, aqa-t di řaman.
PRO 11:16 Tamɣart tᵉttaf arḍa, tᵉṭṭef di řɛezz [nnes], [maca] ayt n bu-řexcunet ttᵉṭṭfen deg wagřa.
PRO 11:17 Bnadem s tmexsiwt icewwaren ittegg řxar i řeɛmar nnes, [maca] aqessaḥ ittɣezza aysum [n yixef] nnes.
PRO 11:18 Aɛeffan imejjar řɣiǧet n řɣecc, [maca] wenni izarrɛen tasegda, [imejjar] ict n řmunet imetnen.
PRO 11:19 Tasegda nican [tᵉttawi ɣar] tudart, wenni yareddfen řɣar, [yarezzu] řmewt nnes.
PRO 11:20 Inni ɣarsen uř ifarɣen aqa aten d nnɛi i SIDI, [maca] inni igguren nican Netta yareṭṭa daysen.
PRO 11:21 S tidett, aɛeffan war ittɣimi břa řexřaṣ, [maca] tarwa n imseggaden ad ttwassnejmen.
PRO 11:22 [Amecnaw] ict n txadent n wureɣ di tinzar n yiřef, [ammu i teǧa] ict n temɣart tecna war di iǧa umeyyez.
PRO 11:23 Meẓri n imseggaden mɣir ɣar min iṣebḥen, [maca] řayas n iɛeffanen aqa-t nhřa řeɛbar.
PRO 11:24 Aqa din [ijjen] wenni ibeṭṭan s wecrim, [waxxa amenni] ittwarni as ɛad ktar, u aqa din [ijjen] wenni imennɛen [ktar] x min icuwwaren, waxxa man aya [ineddeh] ɣar zzeřḍ.
PRO 11:25 Řeɛmar nni ittbarken ad ittwassjiwen, u wenni itticen aman, ad as immewc waman i netta simant nnes.
PRO 11:26 Wenni ittxemmařen imendi, ineɛɛeř i-t cceɛb, [maca] lbaraka ad tiři x uzeǧif n wenni iznuzan [imendi].
PRO 11:27 Wenni ittceṭṭaren di ṭṭweɛ n min iṣebḥen, yarezzu min yarḍan, [maca] wenni ittḥaman řɣar, ad t iřqef.
PRO 11:28 Wenni ittcařen x wagřa nnes, ad iwḍa, [maca] imseggaden ttneɛniɛen am ifetwan izizawen.
PRO 11:29 Wenni ihekkwřen [aytbab n] taddart nnes, ad iwart asemmiḍ, u abuhaři [ad yiři] d amsexxar n wenni di iǧa wuř amiɣis.
PRO 11:30 Řɣiǧet n umseggad d ict n tcejjart n tudart, wenni yarebbḥen řeɛmur aqa-t d amiɣis.
PRO 11:31 Xzar, aqa ad ittwaxeǧeṣ umsegged di temmurt, [xenni] mahu aɛeffan d umednub.
PRO 12:1 Wenni ittexsen ttarbiyyet, ittexs tussna, [maca] wenni icarrhen awebbex aqa netta d aqeffuḥ.
PRO 12:2 Bnadem d aṣebḥan ittaf arḍa n SIDI, [maca] aryaz inekkwan taḥraymect ad t ibarreḥ d bu-umarwas.
PRO 12:3 Bnadem war izemmar ad iqqim ibedd umi ittegg řɣar, [maca] aẓwar n imseggaden war izemmar ad inhezz.
PRO 12:4 Tamɣart imeḥḍen d ttaj n weryaz nnes, [maca] tenni t yarrin ittseḍḥa, [d tenni] am wareṣṣuḍ deg iɣsan nnes.
PRO 12:5 Ixemmimen n imseggaden d řḥeqq, ixarriṣen n iɛeffanen d řɣecc [marra].
PRO 12:6 Awařen n iɛeffanen řebten deg idammen, [maca] aqemmum n yinni igguren nican ad ten issenjem.
PRO 12:7 Iɛeffanen ttneqřaben u war ǧin ɛad, [maca] taddart n imseggaden ad teqqim tbedd.
PRO 12:8 Ittwassemɣar bnadem ɛlaḥsab řqedd n řeɛqeř nnes, [maca] wenni di iǧa wuř ifarɣen, ad ittwasseḥqar.
PRO 12:9 Iḥřa wenni war iḥessben x ixef nnes aṭṭas, [maca] ɣares ijj n umsexxar, x wenni ittcennɛen s ixef nnes, [maca] aɣrum war ɣares yeǧi.
PRO 12:10 Amsegged issen řeɛmar n řebhimet nnes, [maca] arreḥmat n uɛeffan qesḥent.
PRO 12:11 Wenni icarrzen tammurt nnes, ad ijjawen s weɣrum, [maca] wenni yareddfen min iǧan ixwan, war ɣares ca wuř imten.
PRO 12:12 Aɛeffan ittexs [min iǧan di] tracca n yinni itteggen řɣar, [maca] aẓwar n imseggaden ittɣima ittic.
PRO 12:13 Deg uxeṭṭu n iyencicen [dayes] ijj n řfex d aɛeffan, [maca] amsegged ad injem zi řeḥṣaret.
PRO 12:14 Zi řɣiǧet n uqemmum [nnes] ittwassjiwen bnadem s řxir, min dd-ttawyen ifassen n bnadem ad ɣares dd-idweř.
PRO 12:15 Abrid n ubuhaři nican di tiṭṭawin nnes, [maca] wenni ittesřan i ccwar, aqa netta d amiɣis.
PRO 12:16 Abuhaři isscana řhemm nnes deg wass d ijj, [maca] wenni ifettnen, ittdařa řeḥya nnes.
PRO 12:17 Wenni dd-ineṭṭqen tidett, isscana tasegda, [maca] acehhad issxarriqen [isscana] acmat.
PRO 12:18 Aqa din wenni ittharwaḍen am tejjut n ssif, [maca] iřes n imiɣisen ittawi-dd agenfu.
PRO 12:19 Iyencicen [iccuren s] tidett ad ttwaḍmen i řebda, [maca] iřes issxarriqen [mɣir] i yijj n umur waha.
PRO 12:20 Acmat aqa-t deg wuř n yinni inekkwan tuɛeffna, [maca] i yinni inessḥen řehna, [aqa din] řefraḥet.
PRO 12:21 Amsegged war t iřeqqef řɣecc, [maca] iɛeffanen ad ttwaccuren s řɣar.
PRO 12:22 Iyencicen isxarriqen d nnɛi i SIDI, [maca] inni ittemṣurrufen s řaman yarḍan as.
PRO 12:23 Bnadem ifetnen issdurruy tussna nnes, [maca] uř n ibuhařiyyen isɣuyyu s tubbuheřya di řexřa.
PRO 12:24 Afus n wenni imeḥḍen ad iḥkem, [maca] řeɛgez ineddeh ɣar tesmuɣi.
PRO 12:25 Amnus deg wuř n bnadem isshekkwa i-t, [maca] awař iṣebḥen issfarraḥ i-t.
PRO 12:26 Amseggad isscana abrid i jjar nnes, [maca] abrid n uɛeffan yarra i-ten ad weddaren.
PRO 12:27 Ameɛguz war iḍeffar ca aneymar nnes. [maca] agřa iɣřan n iwdan aqa d amḥaḍ.
PRO 12:28 Deg umesruq n tsegda [teǧa] tudart, abrid n řatar nnes war dayes bu řmewt.
PRO 13:1 Ijj n mmis d amiɣis [d ṣṣifet n] uwebbex n babas, [maca] amestehziy war ittesři ɣar utextix.
PRO 13:2 Zi řɣiǧet n wawařen nnes ad yecc bnadem řxar, [maca] řeɛmar n iɣeddaren [ad yecc] lɛunf.
PRO 13:3 Wenni yessaren aqemmum nnes, iḥeṭṭa řeɛmar nnes, [maca] wenni yarezzmen iyencicen nnes aṭṭas, [ittraja] t uhellek.
PRO 13:4 Řeɛmar n umeɛguz yarjef, [waxxa aya] war ineffeɛ di walu, [maca] řeɛmar n yinni ittceṭṭaren ad ittwassjiwnen.
PRO 13:5 Awařen n ixarriqen icarreh i-ten umsegged, [maca] aɛeffan issarzag ixef nnes u issfeṭṭaḥ [inneɣni].
PRO 13:6 Tasegda tḥeṭṭa wenni igguren abrid [nnes] nican, [maca] tuɛeffna ad t isshellek amednub.
PRO 13:7 Aqa din inni ittarran ixef nsen d bu-wagřa, [waxxa] war ɣarsen walu, u aqa din inni ittarran ixef nsen d imezřaḍ, [waxxa] ɣarsen aṭṭas.
PRO 13:8 Ddeyyet i řeɛmar n ca n yijjen d agřa nnes, [maca] amezřuḍ war ittesři ca uřa d ijj n uhuddi.
PRO 13:9 Tafawt n imseggaden ad tarɣ s řefraḥet, [maca] řefnar n iɛeffanen ad ixsi.
PRO 13:10 Zi tnefsect ittas-dd mɣir umenɣi, [maca] inni ikessin acawar, ɣarsen tiɣit.
PRO 13:11 Agřa n deɣya, ad yiři drus, [maca] wenni iyarrwen s ufus, ad yarbeḥ.
PRO 13:12 Řayas yuyřen issɛiǧa uř, [maca] twarrit n meẓri iccuren, aqa tt d tacejjart n tudart.
PRO 13:13 Wenni isseḥqaran awař, ad zzayes ittwaqqen, [maca] wenni itteggʷeden tawṣeyyet, ad ittwaxeǧeṣ.
PRO 13:14 Taɣuri n umiɣis d řɛunṣar n tudart, maḥend ad yařweř [bnadem] i texcifin n řmewt.
PRO 13:15 Řeɛqeř iṣebḥen ittawi-dd arḍa, [maca] abrid n iɣeddaren aqa iqseḥ aṭṭas.
PRO 13:16 Kuř ijjen wenni ifettnen, ixeddem s tussna, [maca] abuhaři ittbezzaɛ taɣyuři [nnes].
PRO 13:17 Amsexxar aɛeffan iweṭṭa di řɣar, [maca] amsexxar d amtiqqi [ittawi-dd] agenfu.
PRO 13:18 Zzřeḍ d řefḍiḥet aqa aten i wenni yugin ttarbiyyet, [maca] wenni iksin awebbex [ɣar wuř nnes], ad ittwaweqqar.
PRO 13:19 Ijj n usitem iccuren d amiẓid i řeɛmar, [maca] i ibuhařiyyen d nnɛi maḥend ad ḥeyyden x řɣar.
PRO 13:20 Wenni igguren ak-d imiɣisen, ad idweř d amiɣis, [maca] wenni ittemṣurrufen ak-d ibuhařiyyen, ad t iřqef ddeǧ.
PRO 13:21 Řɣar ad iḍfar imednab, [maca] amsegged ad t xeǧḍen s řxar.
PRO 13:22 Wenni iṣebḥen ittejja tasɣart i wayyawen nnes, [maca] agřa n ayt-bu-ddnub ittwaxemmeř i umsegged.
PRO 13:23 Arber n imezřaḍ ittawi-dd macca s waṭṭas, [maca] aqa din inni ittwahellken řami [din] anqas n řḥeqq.
PRO 13:24 Wenni imennɛen aɛmud nnes, icarh mmis, [maca] wenni t ittexsen, ittekkar akides ittwebbex i-t di řweqt.
PRO 13:25 Amsegged ad icc ař ɣa ijjawen řeɛmar nnes, [maca] aɛeddis n iɛeffanen ad iqqim itteḥwaja [řebda].
PRO 14:1 Tiɣit n temɣarin tbenna taddart nnes, [maca] tubbuheřya theddem i-tt s ifassen nnes.
PRO 14:2 Wenni igguren di řeṣfayet nnes, itteggʷed SIDI, [maca] wenni itteffɣen zeg ibriden nnes, isseḥqara i-t.
PRO 14:3 Deg uqemmum n ubuhaři [aqa din] řmecɛeḍ i nnfaxet [nnes], [maca] iyencicen n imiɣisen ḥeṭṭan ten.
PRO 14:4 Mani war ǧin ifunasen, ittɣima řmedwed ixwa [maca] s jjehd n ufunas aqa din ṣṣabet temɣar.
PRO 14:5 Acehhad d tidett war issxarriq ca, [maca] acehhad issxarriqen ittsuḍ ixarriqen.
PRO 14:6 I umestehziy war din tiɣit xmi tt yarezzu, [maca] i ufehham ihwen [xas], [maḥend ad yaf] tussna.
PRO 14:7 Aggʷej x weryaz abuhaři, [maɣar] cek war [ɣares] tᵉttifed ca iyencicen [i issawařen] tussna.
PRO 14:8 Tiɣit n wenni ifettnen aqa-tt d řefhamet n webrid [n yixef] nnes, [maca] tubbuheřya n ibuhařiyyen d acmat.
PRO 14:9 Ibuhařiyyen stehzan s [weɛdař] n umarwas, [maca] jar inni igguren nican ittwaf řxaḍar.
PRO 14:10 Uř issen tarzugi nnes, řbarrani war izemmar ad yaca s řefraḥet nnes.
PRO 14:11 Taddart n iɛeffanen ad tᵉttwareddeǧ, [maca] taqiḍunt n inni igguren nican ad tᵉnnewwar.
PRO 14:12 Ad taɣ ittɣiř as i ca n yijjen aqa abrid nican, [maca] aneggar nnes [mɣir] ibriden [ittawyen] ɣar řmewt.
PRO 14:13 Waxxa ɣar weḍḥac uř ittegg řeḥriq, [wah], aneggaru n řefraḥet tᵉttakkwaḍ-dd acḍan.
PRO 14:14 Wenni ɣar iǧa wuř iffɣen zeg webrid, ad ittwassjiwen s ibriden nnes, u aryaz aṣebḥan s yixef nnes.
PRO 14:15 Wenni iǧan d aḥafi, ittamen di kuř awař, [maca] wenni ifettnen iḥeṭṭa aṣurif nnes.
PRO 14:16 Amiɣis itteggʷed u ittḥeyyad x řɣar, [maca] abuhaři iseɛɛar, umi ittɣiř as aqa-t di řaman.
PRO 14:17 Wenni ittxeyyaqen deɣya, ad igg tubbuheřya, u aryaz inekkwan taḥraymect, ad ittwacarh.
PRO 14:18 Iḥafiyyen ad warten tubbuheřya, [maca] inni ifettnen, ad asen qqnen s ijj n ttaj n tussna.
PRO 14:19 Iɣeccacen ad aḍaren zzat i wudem n iṣebḥanen, iɛeffanen [ad aḍaren] zzat i tewwura n imseggaden.
PRO 14:20 Amezřuḍ icarreh i-t [ɛad] umeddukkeř nnes, [maca] aṭṭas d inni ittexsen ayt n bu-wagřa.
PRO 14:21 Wenni isseḥqaran jjar nnes, ittegg ddnub, [maca] sseɛd n wenni ittḥinnan x inni ittwaḥṣaren.
PRO 14:22 Inni dd-ixeǧqen řɣar, ma war ttweddarin nitni? Tamexsiwt icewwaren d řaman aqa ɣar yinni ittxarraṣen di min iṣebḥen.
PRO 14:23 Di marra řweḥřan n warber dayes řefḍeř, [maca] řhard n iyencicen ineddeh ɣar weḥwaj waha.
PRO 14:24 Ttaj n imiɣisen d agřa nsen, tubbuheřya n ibuhařiyyen d tubbuheřya [waha].
PRO 14:25 Acehhad amtiqqi issenjam řeɛmur, [maca] wenni yarexxun i ixarriqen, icemmet.
PRO 14:26 Di tiggʷudi n SIDI [dayes] ttiqet ijehden, Netta ad yiři d amcan n tarewřa i iḥenjiren nnes.
PRO 14:27 Tiggʷudi n SIDI d řɛunṣar n tudart, i usenjem zeg iceddiyen n řmewt.
PRO 14:28 Deg waṭṭas n řgens [ixemmeř] ucewwar n ujeǧid, [maca] di tikkest n cceɛb [ixemmeř] uhellek n řḥakem.
PRO 14:29 Wenni ɣar iǧa ttasiɛ n řxaḍar, ɣares řefhamet temɣar, [maca] wenni di iǧa buḥbeř iḥṣaren issekkar tubbuheřya.
PRO 14:30 Uř iṣṣeḥ, aqa d tudart i arrimet, [maca] tusmi d areṣṣuḍ n yeɣsan.
PRO 14:31 Wenni iḥeṣṣaren ameḥdaj, isseḥqara wenni t i-dd-ixeřqen, [maca] wenni ittḥinnan x umezřuḍ, ittcenneɛ i-t.
PRO 14:32 Aɛeffan ittaẓẓeř x yixef nnes s řɣar nnes i ittegg, [maca] amsegged ɣares mani i ɣa yarweř [ɛad] di řmewt nnes.
PRO 14:33 Tiɣit tarsa deg wuř n ifehhamen, [maca] min iǧan daxeř deg ibuhariyyen ad ittwassnen.
PRO 14:34 Tasegda tessɛuǧa řgens, [maca] řefḍiḥet n ccuɛub d ddnub.
PRO 14:35 Řxaḍar n ujeǧid yarsa x umsexxar ifehhmen [maca] wenni ifeṭṭḥen iřeqqef i-t uduqqez nnes [n ufugem].
PRO 15:1 Twarrit ifsusen tessesmaḍ axeyyeq, [maca] awař itteqqsen issekkara-dd axeyyeq.
PRO 15:2 Iřes n imiɣisen ijebbed tussna ɣar zzat, [maca] aqemmum n ibuhařiyyen ittazzeř s tubbuheřya.
PRO 15:3 Tiṭṭawin n SIDI di kuř amcan, ttḥekkarent i iṣebḥanen d iɛeffanen.
PRO 15:4 Iřes nni issgenfan d tacejjart n tudart, [maca] arrhaj nnes ittareẓẓa buḥbeř.
PRO 15:5 Abuhaři ineṭṭar ttarbiyyet n babas, [maca] wenni ittḥekkaran i uwebbex, aqa iften.
PRO 15:6 Di taddart n umseggad dayes řkenz imɣar, [maca] di min dd-ittawi uɛeffan dayes tamara.
PRO 15:7 Iyencicen n imiɣisen ttbezzaɛen tussna, [maca] uř n ibuhařiyyen war iǧi nican.
PRO 15:8 Taɣarṣt i ittqeddamen iɛeffanen d nnɛi i SIDI, [maca] taẓaǧit n inni igguren nican aqa-tt i Netta d arḍa.
PRO 15:9 Abrid n uɛeffan d nnɛi i SIDI, [maca] wenni iḍeffaran tasegda, ittexs i-t Netta.
PRO 15:10 Ttarbiyyet iqesḥen třeqqef wenni isemḥen deg webrid, u wenni icarrhen awebbex, ad immet.
PRO 15:11 Řaxart d [tesraft n] uhellek [aqa din arezmen] zzat i SIDI, mecḥař ɛad wuřawen n tarwa n bnadem?
PRO 15:12 Amestehziy war ittexs wenni t i ɣa iwebbxen, war ittriḥ ca ɣar imiɣisen.
PRO 15:13 Uř ifarḥen ittegg udem icnan, [maca] amnus deg wuř isekkef buḥbeř.
PRO 15:14 Uř ifehhmen yarezzu tussna, [maca] aqemmum n ibuhařiyyen issecca ixef nnes s tubbuheřya.
PRO 15:15 I yinni ittwaḥṣaren marra ussan nsen aqa iɛeffnen, [maca] uř ifarḥen [am] ict n zzardet war iqeṭṭin.
PRO 15:16 Iḥřa drus ak-d teggʷudi n SIDI, x ijj n řkenz d ameqqran s řeḥweř.
PRO 15:17 Iḥřa ijj n ṭṭebṣi n řxuḍart mani [tḥekkem] tayri, x ijj n uyenduz iṣeḥḥen ak-d wecrah.
PRO 15:18 Aryaz ittarrujduden issekkara imenɣiyyen, [maca] wenni ɣar iǧa ttasiɛ n řxaḍar issexsay amenɣi.
PRO 15:19 Abrid n umeɛguz am cbarq ak-d isennanen, [maca] amesruq n yinni igguren nican aqa ittwassgeɛɛed.
PRO 15:20 Mmis amiɣis issfarreḥ babas, [maca] bnadem abuhaři isseḥqara yemmas.
PRO 15:21 Tubbuheřya aqa-tt d řefraḥet i wenni war ɣar iǧi bu wuř imten, [maca] ijj n weryaz n řefhamet iggur nican.
PRO 15:22 Inwayen feccřen mařa war din iǧi ccwar, [maca] s waṭṭas n imcawaren ad yiři [wenway].
PRO 15:23 Aryaz ɣares řefraḥet di temwarrit iṣebḥen zeg uqemmum nnes. Mecḥař iṣbeḥ wawař di řweqt nnes!
PRO 15:24 Abrid n tudart [ineddeh] ɣar sennej i ufehham, maḥend netta ad iḥeyyed x řaxart swadday.
PRO 15:25 Taddart n bu-nnfaxet ad tt iqřeɛ SIDI, [maca] aymir [n yeyyar] n tajjač issemtan i-t Netta.
PRO 15:26 Ixemmimen n uɛeffan d nnɛi i SIDI, [maca] awařen icewwaren d imezdagen.
PRO 15:27 Wenni yarezzun x arbeḥ iɣeṭṭeř taddart nnes di arrẓiyyet, [maca] wenni icarrhen tarzifin, ad iddar.
PRO 15:28 Uř n imseggaden ittxarraṣ maḥend ad dd-yarr, [maca] aqemmum n iɛeffanen ittfeyyeḍ s řɣar.
PRO 15:29 Iggʷej SIDI x iɛeffanen, [maca] taẓaǧit n imseggaden ittesřa as.
PRO 15:30 Tafawt [di] tiṭṭawin tessfarreḥ uř, řexbar aṣebḥan issyuma iɣsan.
PRO 15:31 Amezzuɣ ittesřan ɣar uwebbex i tudart, ad issens di řwesṭ n imiɣisen.
PRO 15:32 Wenni ineṭṭaren ttarbiyyet, isseḥqara ixef nnes, [maca] wenni ittesřan ɣar uwebbex, issyawan uř [nnes].
PRO 15:33 Tiggʷudi n SIDI d ttarbiyyet ɣar tiɣit, u awaḍeɛ ittizwar i ccan.
PRO 16:1 Bnadem ɣares ixarriṣen deg wuř [nnes], [maca] tamwarrit n yiřes [tᵉttas-dd] zi SIDI.
PRO 16:2 Marra ibriden n weryaz ṣfan di tiṭṭawin nnes, [maca] SIDI ittqeǧab buḥbeřat.
PRO 16:3 Sars řexdayem nnec i SIDI, [xenni] ad ttwassmettnen inwayen nnec.
PRO 16:4 SIDI ixřeq-dd marra i lɣaraḍ nnes, ɛad uřa d aɛeffan [igga i-t] i wass n řɣar.
PRO 16:5 Kuř amɛeffar d nnɛi i SIDI, afus xas, netta war ittᵉttwabarri [ɛemmarṣ].
PRO 16:6 S tmexsiwt icewwaren d řaman ad ittwasseṣřeḥ x řɣecc, u s tiggʷudi n SIDI ittḥeyyad weryaz x řɣar.
PRO 16:7 Mařa usin-dd ibriden n ijj n weryaz x řxaḍar n SIDI, ad yarr Netta uřa d řɛedyan nnes ad kides ggen řehna.
PRO 16:8 Iḥra drus ak-d tsegda x waṭṭas n řɣiǧet břa řḥeqq.
PRO 16:9 Uř n bnadem ittxarreṣ abrid nnes, [maca] SIDI ineddeh iṣuraf nnes.
PRO 16:10 Řḥukm břa adwař x iyencicen n ujeǧid, aqemmum nnes war ixeṭṭi deg weḥkam.
PRO 16:11 Řmizan [nican] d ṭṭawyat n řmizan nican aqa aten n SIDI, marra iẓra n řewzen di tecyart d řxedmet nnes.
PRO 16:12 D nnɛi i ijeǧiden xmi ɣa ggen řɣar, maɣar řɛarc ittwassemten zi tsegda.
PRO 16:13 Iyencicen [i iccuren] s tsegda tteɛjiben i ujeǧid, u wenni issawařen nican, ittexs i-t netta.
PRO 16:14 Asɛar n ujeǧid [am] lmalakat n řmewt, [maca] aryaz amiɣis izemmar ad ɣares tt i-dd yarr.
PRO 16:15 Di tfawt n wudem [ittissiqen] n ujeǧid [teǧa] tudart, arḍa nnes am useynu n wenẓar di tefsut.
PRO 16:16 Aqa teḥřa tarezzut n tiɣit x wureɣ ittissiqen, u [mecḥař ktar] ad tiři twafit n řefhamet sennej x [twafit n] nnuqart.
PRO 16:17 Abrid n yinni igguren nican ittḥeyyad x řɣar. Wenni iḥeṭṭan abrid nnes, iḥeṭṭa řeɛmar nnes.
PRO 16:18 Tanefsect tᵉttizwar-dd i arẓẓiyyet, u nnfaxet tᵉttas-dd qbeř i uweṭṭu.
PRO 16:19 Iḥřa aqnaɛ n buḥbeř ak-d inni ittwaḥṣaren, x ubeṭṭu n tkeccaḍt ak-d ayt-nnfaxet.
PRO 16:20 Wenni ittxarraṣen mliḥ di ca n tmesřact, ad yaf řxar, sseɛd n wenni ittcařan x SIDI.
PRO 16:21 Wenni ɣar iǧa wuř d amiɣis, ad t semman bu-weftan, u taẓyudi [n řhard] n iyencicen tarenni di řefhamet.
PRO 16:22 Řeɛqeř d řɛunṣar n tudart i bab nnes, [maca] ttarbiyyet i ibuhařiyyen d tubbuheřya [waha].
PRO 16:23 Uř n umiɣis ittarra aqemmum nnes ifehhem, zeg iyencicen nnes ad fehmen ktar.
PRO 16:24 Awařen icewwaren [ggin am] tamment n teɣrast, [aqa aten] d imiẓiden i řeɛmar d ugenfu i yeɣsan.
PRO 16:25 Ad taɣ ittɣiř as i ca n yijjen aqa abrid nnes nican, [maca] aneggar nnes [mɣir] ibriden [ittawyen] ɣar řmewt.
PRO 16:26 Řaẓ n ucewwař ixeddem as i netta, maɣar aqemmum nnes ineddeh i-t.
PRO 16:27 Aryaz i war isekkwin iɣezza řɣar, x iyencicen nnes am yict n tmessi ittceɛɛařen.
PRO 16:28 Aryaz [iccuren] s řexdaɛat issekkara amenɣi, u axbarji ittawi-dd [ɛad] abeṭṭu ak-d umeddukkeř iṣebḥen aṭṭas.
PRO 16:29 Aryaz bu-řexcunet ittɣarra jjar nnes, ineddeh i-t ɣar ijj n webrid i war iǧin mliḥ.
PRO 16:30 Netta itteqqen tiṭṭawin nnes maḥend ad ixarreṣ marra ddarbat n řexdaɛet, ittkemmec iyencicen nnes, [aqa da] igga řɣar.
PRO 16:31 Acuwwaf icaben d ijj n ttaj izewwqen, tzemmared ad tt tafed x webrid n tsegda.
PRO 16:32 Iḥřa bu-ttasiɛ n řxaḍar x ijj n weryaz ijehden u wenni ittebbaten buḥbeř nnes [iḥřa] x wenni iḥewwsen ict n tendint.
PRO 16:33 Taqedduḥt temmenḍar deg weḥsin, [maca] mkuř array ittas-dd zi SIDI.
PRO 17:1 Iḥřa ijj n uzeɛɛif n weɣrum yuẓɣen ak-d řehna, x ict n taddart teccur s tɣarṣa, dayes amenɣi.
PRO 17:2 Ijj n yismeɣ ifetnen ad iḍebbar x ijj n mmis nni ittawyen ɣar řefḍiḥet, di řwesṭ n yaytmas ad ibḍa netta řwart.
PRO 17:3 Aṭenjir n usefsi i nnuqart u afarran i wureɣ, [maca] SIDI ittjarrab uřawen.
PRO 17:4 Aɛeffan ixezzar ɣar iyencicen iɛeffanen, bu-ixarriqen ittic amezzuɣ i yiřes iccuren s řɣecc.
PRO 17:5 Wenni ittḥeccen x umezřuḍ, issfeṭṭeḥ wenni t-i-dd-ixeřqen, wenni ifarrḥen x arẓiyyet, war ittwiḥsib d amezdag.
PRO 17:6 Ttaj n iwessura d ayyawen, talwizt n iḥenjiren d ibabaten nsen.
PRO 17:7 Ayencic n ccan war dd-ittis ak-d ubuhaři, [xenni] ɛessak ɛad ayencic issxarriqen ak-d umcenneɛ.
PRO 17:8 Tarzeft n arrecwet d ijj n weẓru izewwqen di tiṭṭawin n bab nnes, mani ma yarra s uzeǧif, ittefřiḥ.
PRO 17:9 Wenni issdurruyen axeṭṭu, yarezzu tayri, [maca] wenni ittɛawaden ict n řḥajjet zi jdid, ibeṭṭa imeddukkař icnan.
PRO 17:10 Ittqarra utextex x ufehham aṭṭas x mya n teyyita x yijj n ubuhaři.
PRO 17:11 Amɣewweɣ yarezzu mɣir x řɣar, [x uya] ad ɣares dd-ittwassekk ijj n umsexxar iqesḥen ḍidd nnes.
PRO 17:12 Ejj ad immeřqa ca n ddub i umi ttwacaren tarwa ak-d ca n yijjen, [maca] war iǧi abuhaři di tubbuheřya nnes.
PRO 17:13 Wenni ittxeǧaṣen min iṣebḥen s řɣar, war tᵉttḥeyyid arẓiyyet x taddart nnes.
PRO 17:14 Beddu n umenɣi [amecnaw] arzam n řḥemřet n waman. Ejj amenɣi ad yars qbeř i ɣa idduqqez.
PRO 17:15 Wenni ittbarran aɛeffan u wenni ittbarraḥen aqa amsegged d aɛeffan, aqa nitni s tnayen idsen d nnɛi i SIDI.
PRO 17:16 Mayemmi din i ɣa iřint tmenyat deg ufus n ubuhaři maḥend ad iseɣ tiɣit, am war ɣares uř [i man aya]?
PRO 17:17 Ameddukkeř [d tidett] ittexs řebda, u tawmat tᵉttwaxřeq-dd i řeḥṣaret.
PRO 17:18 Bnadem nni war ɣar iǧi wuř imten, iccat afus, ittegg ixef nnes d aḍman i jjar nnes.
PRO 17:19 Wenni ittexsen axeṭṭu, ittexs amcubbec, wenni itteggen tawwart nnes tgeɛɛed, yarezzu tareẓẓit.
PRO 17:20 Wenni ɣar iǧa uř ifarɣ, war ittif min iṣebḥen, wenni ifarrɣen s iyencicen nnes, ad iwḍa di arẓiyyet.
PRO 17:21 Wenni dd-yurwen ijj n ubuhaři, [ittawi-dd] acḍan i yixef nnes, babas n ubuhaři war izemmar ad ifarḥ.
PRO 17:22 Uř ifarḥen ijebbed agenfu, [maca] buḥbeř iceḍnen issaẓaɣ iɣsan.
PRO 17:23 Aɛeffan ad dd-iksi tarzeft [n arrecwet] zeg weḥsin, ḥima ad issfarɣ imesraq n řḥeqq.
PRO 17:24 Afehham [ittegg] tiɣit zzat i tmuɣři nnes, [maca] tiṭṭawin n ubuhaři [ttawyent] ař ṭṭarf n temmurt.
PRO 17:25 Ijj n mmis abuhaři d řeɛdab i babas, d ijj n řeḥřiq amerzag i wenni t-i-dd yurwen.
PRO 17:26 Aweddeb n umsegged war iǧi nican, [am uřa d] tiyyita i ayt n ṭṭasiřet di ssibbet n řeṣfayet [nsen].
PRO 17:27 Wenni ɣar teǧa tussna, imenneɛ awařen nnes, aryaz afehham [dayes] buḥbeř nnes yarsa.
PRO 17:28 Uřa abuhaři issɣaden, ad ittwaḥseb d amiɣis, wenni ibellɛen iyencicen nnes [ad ittwaḥseb] d afettan.
PRO 18:1 Wenni iɛezzřen ixef nnes, yarezzu x meẓri nnes, netta idduqquz x marra min izemmaren ad yiři d adebbar.
PRO 18:2 Abuhaři war d as tᵉtteɛjib řefhamet, [itteɛjib as] mɣir aɛarri n wuř nnes.
PRO 18:3 Xmi dd-ittadef uɛeffan, ittas-dd uřa d aseḥqar, u ak-d řefḍiḥet ittas-dd řɛar.
PRO 18:4 Awařen zeg uqemmum n weryaz [am] waman yuǧɣen, řɛunṣar n tiɣit d [ict n] tiɣzart ittazzřen.
PRO 18:5 War iǧi ca mliḥ ad tessɛizzed aɛeffan, maḥend ad tessḥeyyded amsegged di ccreɛ.
PRO 18:6 Iyencicen n ubuhaři neddhen [t] ɣar umcebbec, aqemmum nnes ittřaɣa-dd i weɛmud.
PRO 18:7 Aqemmum n ubuhaři d ahellek nnes, iyencicen nnes d řfex i řeɛmar nnes.
PRO 18:8 Awařen n ixbarjiyyen am ḥalawit, hekkwant deg ixxamen n daxeř n uɛeddis.
PRO 18:9 Wenni iǧan d amarxu di řxedmet nnes, aqa t d umas n bab n uředdeǧ.
PRO 18:10 Isem n SIDI d ijj n lburj imten, amsegged ittazzeř ɣar dinni, uca ittwassakkwaḍ ař din di řaman.
PRO 18:11 Agřa n bu-wagřa d tandint nnes ijehden, [tanita] am yijj n řḥiḍ yuɛřan qaɛ di řbař nnes.
PRO 18:12 Qbeř ma i ɣa ittwarẓ, ittgeɛɛad wuř n bnadem, [maca] awaḍeɛ ittizwař as i ccan.
PRO 18:13 Wenni dd-ittarran awař qbeř i ɣa iseř, d man aya d tubbuheřya d řefḍiḥet i netta.
PRO 18:14 Buḥbeř n weryaz ittsenned i-t ɣar řehřac nnes, [maca] buḥbeř ittwarẓen, wi izemmaren ad t iksi?
PRO 18:15 Uř n ufehham yarezzu tussna, amezzuɣ n umiɣis yarezzu tussna.
PRO 18:16 Tarzeft n bnadem tarezzem as tiwwura, tneddeh i-t zzat i wudem n imeqqranen.
PRO 18:17 Wenni d amezwaru di ddeɛwet nnes ittban d amsegged, [maca xenni] ad dd-yas jjar nnes uca ittnecceb di tmesřact.
PRO 18:18 Taqedduḥt ittejjan imenɣan ttbeddan, tbeṭṭa jar inni ɣar teǧa ṣṣulṭa.
PRO 18:19 Ijj n uma nni umi di ggin řɛib, [ittwaṭṭef ktar] x ict n tendint ijehden, imenɣan ggin am zzekrun n řeqṣar.
PRO 18:20 Zi řɣiǧet n uqemmum n ijj n weryaz ittyawan uɛeddis nnes, ad ijjawen zi ṣṣabet n iyencicen nnes.
PRO 18:21 Řmewt d tudart deg ufus n yiřes, kuř ijjen wenni ten ittexsen, ad yecc rɣiǧet nsen.
PRO 18:22 Wenni yufin tamɣart, yufa min iṣebḥen, u netta iṭṭef arḍa n SIDI.
PRO 18:23 S uḥeccem issawař umezřuḍ, bu-wagřa ittarra-dd s řeqsaḥet.
PRO 18:24 Aryaz nni ɣar ǧan imeddukkař [aṭṭas], ad iwḍa di tamara, [maca] ca n imuren ameddukkeř ittexs [i cek] ktar zi tawmat.
PRO 19:1 Iḥřa ijj n umezřuḍ igguren di řeṣfayet nnes, x wenni ɣar iǧan iyencicen farɣen, u aqa t d abuhaři [i yeǧa].
PRO 19:2 Břa tussna uřa d řeɛmar war iǧi ca mliḥ, wenni ittqeǧqen s iḍaren [nnes], ad ixḍa.
PRO 19:3 Tubbuheřya n bnadem issfarraɣ abrid nnes, u [xenni] uř nnes ad isɛar x SIDI.
PRO 19:4 Agřa ittawi-dd aṭṭas n imeddukkař, [maca] amezřuḍ isemmeḥ dayes umeddukkeř nnes.
PRO 19:5 Acehhad issxarriqen war ittwaḥesseb ca d amezdag, wenni dd-yarexxun i ixarriqen, war inejjem.
PRO 19:6 Aṭṭas ttzawgen zzat i wudem n umcenneɛ, kuř ijj ittexs ad yiři d ameddukkeř n weryaz i ɣar iǧa terzifin.
PRO 19:7 Marra aytmas n umezřuḍ carrhen t, mecḥař ttiggʷejjen xas imeddukkař nnes! Netta iḍeffar awařen nni war isekkwin walu.
PRO 19:8 Wenni iṭṭfen uř [amiɣis], ittexs řeɛmar nnes, wenni iḥeṭṭan řefhamet, ad yaf min icnan.
PRO 19:9 Ijj n ucehhad issxarriqen war ittwaḥesseb ca d amezdag, wenni yarexxun i ixarriqen, ad ittwahellek.
PRO 19:10 Afeyyec war dd-yusi x ubuhaři, mammec ɛad x umsexxar maḥend ad iselleṭ x řḥukkam.
PRO 19:11 Řeɛqeř n bnadem ittarra i-t ad igg s ttasiɛ n řxaḍar tusa-dd xas maḥend ad imeyyek x [u]xeṭṭu nnes.
PRO 19:12 Asxeḍ n ujeǧid am zzhir n weyrad di temẓi nnes, [maca] arḍa nnes am nnda x arbiɛ.
PRO 19:13 Mmis abuhaři d arẓiyyet i babas, amcubbec n temɣart igga am tuddimt [n tzeqqa] war iqeṭṭin.
PRO 19:14 Taddart d wagřa aqa aten d řwart n řejdud [maca] ict n temɣart ifehhmen aqa-tt n SIDI.
PRO 19:15 Řeɛgez yarra [bnadem] ad iwḍa deg iḍeṣ yuǧɣen, u řeɛmar [iccur] s řɣecc ad iǧaẓ.
PRO 19:16 Wenni iḥeṭṭan tawṣeyyet, iḥeṭṭa řeɛmar nnes, wenni war iḥeṭṭin ibriden nnes, ad immet.
PRO 19:17 Wenni ittḥinnan x umezřuḍ, yareṭṭeř i SIDI. Netta ad as ixeǧeṣ řxedmet nnes.
PRO 19:18 Webbex mmic, mařa ɛad din ca n řayas, [maca] war t neqq ca, war ttejji ca ad iksi aya řeɛmar nnec.
PRO 19:19 Wenni isɛaren aṭṭas, ad ittwaxeǧeṣ [i manayenni], maɣar mařa texsed ad t tmenɛed, xenni ad dayes tarenyed [waha].
PRO 19:20 Seř cek ɣar ucawar uca qbeř ttarbiyyet, maḥend ad tdewřed d amiɣis ɣar uneggar.
PRO 19:21 Aqa din aṭṭas n ixemmimen deg wuř n weryaz, [maca] ccwar n SIDI ittɣima ibedd.
PRO 19:22 Tamexsiwt icewwaren n bnadem d řeḍrafet nnes, [ammu i iǧa] ijj n umezřuḍ ḥsen x ijj n bu-ixarriqen.
PRO 19:23 Tiggʷudi n SIDI tneddeh ɣar tudart, maɣar itteṭṭeṣ ijjiwen, war ɣares dd-ittas ca min war iḥřin.
PRO 19:24 Ameɛguz issnuffar afus nnes di ṭṭebṣi, war t-i-dd-ittarri [ɛawed] ɣar uqemmum nnes.
PRO 19:25 Wwet amestehziy, ammu i ɣa iften wenni war ɣares bu řefhamet, u ɛaqeb afehham, [xenni] ad ikseb řefhamet.
PRO 19:26 Wenni itteggen ɣezzu di babas niɣ wenni issuffuɣen yemmas, aqa d mmis n řefḍiḥet nni yarran [bnadem] ad iseḍḥa.
PRO 19:27 Sbedd-dd, a mmi, maḥend ad tesřed ɣar uwebbex, mařa texsed ad tḥeyyded x wawařen iccuren s tussna.
PRO 19:28 Ijj n ucehhad i war isekkwin iɣeṭṭeř zi řḥeqq, uca aqemmum n iɛeffanen iṣarreḍ řɣecc.
PRO 19:29 Imestehzayen tᵉttraja aten řeḥkamet, u tiyitta deg weɛrur i ibuhařiyyen.
PRO 20:1 Binu d ijj n umestehziy, ccrab d bu-ssḍeɛ, kuř ijjen wenni zzayes i ɣa iweddaren, [ɛemmarṣ] war iddikkwiř d amiɣis.
PRO 20:2 Ahuddi n ujeǧid am zzhir n wayrad: wenni t isseɛaren, ixeṭṭa ak-d řeɛmar nnes.
PRO 20:3 Asmaḥ deg umcubbec aqa d ccan i weryaz, [maca] kuř abuhaři ad idduqqez.
PRO 20:4 Zi řweqt n řexrif war icarrez umeɛguz, [xenni] ad ittar di řweqt n tmeyra, [maca] war ittif walu.
PRO 20:5 Ixarriṣen deg wuř n bnadem aman yuǧɣen, [maca] ijj n weryaz s řefhamet issen ad ten yayem.
PRO 20:6 Aṭṭas n iwdan ttřaɣan x ca n ijjen ‘ameddukkeř nsen d amtiqqi’, [maca] aryaz d amtiqqi, man wen t i ɣa yafen?
PRO 20:7 Amsegged iggur di řeṣfayet nnes, sseɛd n iḥenjiren nnes [i ittejja] awarni as.
PRO 20:8 Ijj n ujeǧid nni ittɣiman x řkursi n ccreɛ, ittṣeffa marra řɣar s tiṭṭawin nnes.
PRO 20:9 Wi izemmaren ad yini: “Necc ssizedgeɣ uř inu, necc izdigeɣ zi ddnub inu!”?
PRO 20:10 Ijj n řewzen d ijj n řewzen nneɣni, ijj n ifa d ijj n ifa nneɣni, aqa aten s tnayen idsen d nnɛi i SIDI.
PRO 20:11 Aḥudri isscana di tmegga nnes, ma řxedmet nnes teṣfa niɣ aqa nican [i teǧa].
PRO 20:12 Amezzuɣ ittesřan d tiṭṭ ittwařan, SIDI igga i-ten s tnayen idsen.
PRO 20:13 War ttexs iḍeṣ maḥend war teddikkwiřed d amezřuḍ, arzem tiṭṭawin nnec, syiwen ixef nnec s weɣrum.
PRO 20:14 ‘War iḥři, war iḥři!’, iqqar umsewweq, [maca] mařa yuyur, [ammu i] ittcenneɛ ixef nnes.
PRO 20:15 Ureɣ iǧa, uřa d aṭṭas n řmarjan, [maca] iyencicen [ccuren] s tussna d ict n řqecɛet iɣřan aṭṭas.
PRO 20:16 Mařa ijjen iddakkwař d aḍman i yijj n ubarrani, [xenni] ksi arruḍ nnes u ksi t d ddiyyet i yinni war ittwassnen.
PRO 20:17 D amiẓid i bnadem aɣrum [nni iṭṭef s] ixarriqen, awarni as ad iccur uqemmum nnes s iqayasen.
PRO 20:18 Ixemmimen ttekmiřen s ucawar, x uyenni ndeh amenɣi s udebbar.
PRO 20:19 Wenni igguren da d diha s texbarjit, ittɛarra min innuffaren, war tsebbeb ak-d wenni issḥinniben s iyencicen nnes iṣebhen.
PRO 20:20 Wenni i ɣa ineɛřen x babas d yemmas, řefnar nnes ad ittwassexsi di taǧest tabarcant.
PRO 20:21 Mařa tasɣart tᵉttwakseb deɣya s tazřa deg umezwaru, war dd-tiweḍ d lbaraka ɣar uneggar.
PRO 20:22 War qqar: “Necc ad xeřfeɣ řɣar!” [maca] tceř x SIDI u Netta ad cek issenjem.
PRO 20:23 Ijj n řewzen d ijj n řewzen nneɣni, aqa aten d nnɛi i SIDI, řmizanat iɣeccen war ǧin ca mliḥ.
PRO 20:24 Iṣuraf n ijj n weryaz aqa aten n SIDI, [xenni] mammec ɣa yegg bnadem ad issen abrid nnes?
PRO 20:25 Aqa-t d řfex i bnadem i ɣa iřaɣan s uqeǧeq ‘amqeddes’, u [ɛad] awarni lwuɛud nnes [i igga] ad ixarreṣ.
PRO 20:26 Ijj n ujeǧid amiɣis ittṣeffa iɛeffanen, ittejja tajarrart [n teřwiḥt itteḥřuǧuḍen i usarwet] ad xasen iɛqeb.
PRO 20:27 Twarrit n nnefs n buḥbeř n bnadem d řefnar n SIDI nni yarezzun di daxeř n ixxamen n uɛeddis.
PRO 20:28 Tamexsiwt icewwaren d řaman ḥeṭṭan ajeǧid, u řɛarc nnes issejhed i-t s tmexsiwt icewwaren.
PRO 20:29 Talwizt n iḥudriyyen d jjehd nsen, u lɛaḍama n iwessura d acuwwaf icaben.
PRO 20:30 Iyezzimen ittazzřen s idammen ssizdigen [bnadem] zi řɣar, u tiyyita [ṣeffant] uřa d takrict.
PRO 21:1 Uř n ujeǧid am tɣezratin n waman deg ufus n SIDI. Netta ineddeh i-t, mani ma ixs Netta.
PRO 21:2 Marra ibriden n bnadem nican di tiṭṭawin nnes, [maca] SIDI ittqeǧab uřawen.
PRO 21:3 Timegga n tsegda d řḥeqq, d tina i SIDI ḥsen zi [tewhibt n] tɣarṣt.
PRO 21:4 Nnfaxet n tiṭṭawin d uř aɛeffar, arber n iɛeffanen d ddenb.
PRO 21:5 Ixemmimen n wenni imeḥḍen [ttawyen] mɣir ɣar ufeyyeḍ, [maca] marra wenni ittqeǧiqen aṭṭas [ittawi] ɣar řeḥwej waha.
PRO 21:6 Asmuni n wagřa s yiřes issxarriqen, [ammu i teǧa] twarrit n nnefs iɛeddun deɣya n yinni yarezzun řmewt.
PRO 21:7 Lɛunf n iɛeffanen ittjarra i-ten, maɣar ttagin ad ggen min iseggmen.
PRO 21:8 Abrid n bu-umarwas ittefriɣ, [maca] amezdag ittegg min iǧan nican.
PRO 21:9 Iḥřa ad tzedɣed deg ict teɣmart n tzeqqa, x [tzeddiɣt] ak-d ict n temɣart ittemcubbucen deg ict n taddart tcarc.
PRO 21:10 Řeɛmar n iɛeffanen ittmeẓri di řɣar, amqarreb nnes war ɣares ittif arḍa di tiṭṭawin nnes.
PRO 21:11 Mařa ittwaxeǧeṣ umestehziy, iddakkwař wenni war ɣares bu řefhamet d amiɣis, mařa ssřemden amiɣis, ikessi netta tussna.
PRO 21:12 [Ijj n] Umsegged ittbeqqec mliḥ taddart n uɛeffan, iɣeṭṭeř iɛeffanen di arẓiyyet.
PRO 21:13 Wenni ittbellaɛen amezzuɣ nnes ɣar iɣuyyan n umezřuḍ, uřa d netta ad isɣuy [maca] war xas dd-ttarran.
PRO 21:14 Ṣṣedqet di tnuffra teṣřeḥḥu weɣḍab, tarzeft [immewcen] deg weḥsin [n warruḍ] [teṣřeḥḥu] axeyyeq imɣaren.
PRO 21:15 Aqa d řefraḥet i umsegged maḥend ad igg min [iǧan] nican, [maca] d aceřwaw i yinni itteggen řɣecc.
PRO 21:16 Bnadem nni itteffɣen zeg webrid n řeɛqeř, ad yareyyeḥ deg wegraw n řexyařat [n imettan].
PRO 21:17 Wenni ittexsen afarraj, ad iḥwaj, wenni ittexsen binu d zzect, war iddikkwiř d bu wagřa.
PRO 21:18 Aɛeffan d ddeyyet i imseggaden, u aɣeddar ad dd-yiři deg wemcan n yinni igguren nican.
PRO 21:19 Iḥřa ad tzedɣed di temmurt ixřan, x [tazeddiɣt] ak-d ict n temɣart ittemcubbucen u itteqqsen.
PRO 21:20 Ijj n řkenz ittwaḥwajen d zzect aqa aten di tzeddiɣt n imiɣisen, [maca] bnadem abuhaři iṣarreḍ i-t.
PRO 21:21 Wenni yarezzun x tsegda d tmexsiwt icewwaren, ittaf tudart d tsegda d ccan.
PRO 21:22 Amiɣis ittgeɛɛad x tendint n ayt n bu-teɣřuḍt, iɣeṭṭeř jjehd n ttiqet nsen di temmurt.
PRO 21:23 Wenni iḥeṭṭan aqemmum d yiřes nnes, iḥeṭṭa řeɛmar nnes zi řeḥṣarat.
PRO 21:24 Wenni d bu-nnfaxet iffuccḥen ttřaɣan as ‘amestehziy’, netta ittegg s nnfaxet břa řeqyas.
PRO 21:25 Ccehwet n umeɛguz tneqq i-t, maɣar ifassen nnes ugin ad xedmen.
PRO 21:26 Ass imun ittcehha timesřayin n ucehhi, [maca] amsegged ad iwc, war ittɣimi ittᵉṭṭef [di ca i yixef nnes].
PRO 21:27 Taɣarṣt n uɛeffan d nnɛi, mahu mařa nitni ad tt awyen s unekkwi iɣeccen.
PRO 21:28 Acehhad issxarriqen ad ittwahellek, [maca] aryaz nni ittesřan, ad issiweř [tidett] řebda.
PRO 21:29 Aryaz aɛeffan issejhed ixef nnes ak-d wudem nnes, [maca] wenni igguren nican issemten ibriden nnes.
PRO 21:30 War teǧi tiɣit uřa d řefhamet, war din iǧi bu ucawar qibač i SIDI.
PRO 21:31 Ayis ad as ḥezzmen i wass n umenɣi, [maca] řeɣřeb ɣar SIDI.
PRO 22:1 Isem aṣebḥan iḥřa x waṭṭas n wagřa, aḥinni iḥřa x nnuqart d wureɣ.
PRO 22:2 Bu-wagřa d umezřuḍ ttemsagaren, SIDI i-ten iggin marra.
PRO 22:3 [Bnadem] ifettnen ittwařa řɣar uca ittnuffar, [maca] iḥafiyyen arennin gguren uca ad ttwaɛaqaben.
PRO 22:4 Řmunet i uwaḍeɛ d tiggʷudi n SIDI, d agřa d ccan d tudart.
PRO 22:5 Isennanen d řefxux aqa aten x webrid n wenni ifarɣen, wenni iḥeṭṭan řeɛmar nnes, ittɣima ɣar řaggʷaj nsen.
PRO 22:6 Darreb aḥudri ɛlaḥsab řeqyas n webrid nnes, waxxa netta iwsar, war xas ittḥeyyid ca.
PRO 22:7 Bu-wagřa ittṣeǧaḍ x imezřaḍ, bu-umarwas d ismeɣ n wenni d as yareṭṭřen.
PRO 22:8 Wenni izarrɛen řɣecc, ad imjar řeɣben, aɛmud n uduqqez nnes [n ufugem] ad ifna.
PRO 22:9 Wenni ɣar iǧa řxezrat ṣebḥent, ad ittwabarek, minzi netta ittic i imezřaḍ zeg weɣrum nnes.
PRO 22:10 Aẓẓeř x umestehziy, ad iffeɣ řhemm, aqa ibedd umḥarwaḍ d řefḍiḥet.
PRO 22:11 Wenni ittexsen řeṣfayet n wuř, wenni ɣar iǧa iyencicen [iccuren] s arḍa, ajeǧid ad yiři d ameddukkeř nnes.
PRO 22:12 Tiṭṭawin n SIDI ḥeṭṭant x tussna, [maca] awařen n uɣeddar ad ten ibḍeř.
PRO 22:13 Ameɛguz iqqar: “Aqa din ijj n wayrad di barra! Ad taɣ balak ad ttwanɣeɣ di řwesṭ n wazzayen!”
PRO 22:14 Aqemmum n temɣarin tibarraniyyin d ict n tesraft yuǧɣen, wenni x iffugem SIDI, ad dayes iwḍa.
PRO 22:15 Tubbuheřya [tᵉttɣima] třesseq deg wuř n uḥudri, aɛmud n uwebbex ad tt issuffeɣ zzayes.
PRO 22:16 Wenni iḥeṣṣaren amarxu, ad yarni di řemɣaret nnes, wenni itticen i bu-wagřa, ad iḥwaj [waha].
PRO 22:17 Ewc amezzuɣ nnec, uca seř ɣar wawařen n imiɣisen, arr uř nnec ɣar tussna inu.
PRO 22:18 Maɣar aqa mliḥ mařa txemmřed ten di daxeř nnec, [mařa] ad ten tesswejded jmiɛ x iyencicen nnec.
PRO 22:19 Maḥend ad yiři utecři nnec x SIDI, ad ac ten ssecneɣ řexxu, wah i cek.
PRO 22:20 Ma zeɛma war d ac uriɣ awařen ifarzen aṭṭas, [ccuren] s ccwar d tussna,
PRO 22:21 ḥima ad ac ssecneɣ řemten n wawařen n tidett, maḥend tzemmared ad dd-tarred s řaman x wenni cek dd-issekken.
PRO 22:22 War ttkeccaḍ amarxu maɣar netta d amarxu, war řebbez řmeskin ɣar tewwart,
PRO 22:23 maɣar SIDI ad asen yaɣ tasɣart nsen, Netta ad ikecceḍ řeɛmar n yinni i-ten ittkeccaḍen.
PRO 22:24 War ttemddukkuř ak-d aryaz ittarrujduden, war ttidef ɣar bab n wesɛar,
PRO 22:25 maḥend cek war tᵉttnimid ca ak-d imesraq nnes, ad tegged řfex i řeɛmar nnec.
PRO 22:26 War ttadef jar inni itticen awař s tmewciwt n ifassen, jar inni iǧan d aḍman i imarwusa.
PRO 22:27 Mařa war ɣarek min zi ɣa txeǧṣed, mayemmi ijebbed qama nnec zi sadu nnec?
PRO 22:28 War smuṭṭuy aymir n wecḥař uya, wenni ggin řejdud nnec.
PRO 22:29 Ma teẓrid ijj n weryaz imeḥḍen di řḥirfa nnes? Ad t ssbedden zzat i wudem n ijeǧiden, war iǧi ad ibedd zzat i wudem n midden war di iǧi řaman.
PRO 23:1 Mařa teqqimed ɣar ijj n řḥakem, maḥend ad tecced [akides], ḥḍa mliḥ min [iǧan] zzatek.
PRO 23:2 Egg ijj n řmus x yiři nnec, mařa cek d ijj n bu-řemɣaret n uɛeddis.
PRO 23:3 War ttegg meẓri di macca nnes icnan, maɣar aqa-t d macca n tuxxuna.
PRO 23:4 War ssiḥiř ixef nnec ḥima ad tdewřed d bu-wagřa, sarxu deg nneyyet nnec.
PRO 23:5 Mařa ṭṭawent tiṭṭawin ɣares, aqa war din [agřa] ɛad! Maɣar ad igg afriwen i yixef nnes, ad iḍwa ɣar ujenna am yijj n ugider.
PRO 23:6 War ttᵉtt aɣrum n wenni di teǧa tiṭṭ taɛeffant, war meẓri di macca nnes icnan.
PRO 23:7 Maɣar am mammec [t] ittxarraṣ, ammu [i t ittegg] netta. Iqqar: “Ecc, teswed!”, [maca] uř nnes war akidek iǧi.
PRO 23:8 Azeɛɛif i teccid, ad t-i-dd-tɛuqqed, awařen iṣebḥen nnec tḍeyyɛed ten.
PRO 23:9 War siweř deg umezzuɣ n ijj n ubuhaři, maɣar netta ad isseḥqar awařen n weftan nnec.
PRO 23:10 War smuṭṭuy aymir n wecḥař uya, war ttadef deg iyyaren n iyujiřen,
PRO 23:11 maɣar Amefdi nsen d ameqqran, Netta ad dd-yaɣ tasɣart nsen zzayek.
PRO 23:12 Arr uř nnec ɣar uwebbex, imezzuɣen nnec ɣar wawařen n tussna.
PRO 23:13 War ttᵉṭṭef ttarbiyyet x uḥudri, waxxa teccated t s weɛmud, war ittmetti.
PRO 23:14 Cek ad t tewted s weɛmud, u ad tessnejmed řeɛmar nnes zi řaxart.
PRO 23:15 Mmi inu, mařa uř nnec d amiɣis, ad ifarḥ uřa d uř inu akides.
PRO 23:16 Tiẓẓař inu ad negzent s řefraḥet, mařa iyencicen nnec ssiwřen min iǧan iseggden.
PRO 23:17 Ejj uř nnec war ittisim zeg imednab, maca [ejj i-t ad yarr azeǧif] ɣar tiggʷudi n SIDI ass imun!
PRO 23:18 Maɣar xenni aqa din tiwecca, u řayas nnec war ittareẓẓi.
PRO 23:19 Seř-dd cek, a mmi, iři d amiɣis, ndeh uř nnec ɣar webrid.
PRO 23:20 War ttɣimi ɣar iskarjiyyen, uřa ɣar inni ilehhfen deg weysum,
PRO 23:21 maɣar askarjiy d amelhuf ad dewřen d imezřaḍ, u anudem issyiriḍ deg iḥřucen.
PRO 23:22 Seř-dd cek ɣar babac wenni cek i dd-ijjin, u war sseḥqiri yemmac mařa tewsar.
PRO 23:23 Seɣ-dd tidett, war [tt] teznuza ca, [ammu] uřa d tiɣit d uwebbex d řefhamet.
PRO 23:24 Babas n umsegged ad ifarḥ s waṭṭas, wenni dd-ijjin ijj [mmis] d amiɣis, ad as ifarḥ.
PRO 23:25 Ejj ad ifarḥ babac uřa d yemmac, ejj tenni cek i dd-yurwen ad tfarḥ.
PRO 23:26 Ewc ayi uř nnec, a mmi, ejj tiṭṭawin nnec ad afent arḍa deg ibriden inu.
PRO 23:27 Maɣar tamɣart farq-ccɣeř d ict n tesraft yuǧɣen, u tamɣart zi barra d ijj n řɛunṣar iḥsar.
PRO 23:28 Wah, nettat tᵉttḥama am yijj n uxewwan, nettat tarenni deg iɣeddaren jar iwdan.
PRO 23:29 Wi i ɣar iǧa wecḍan? Wi i ɣar iǧa zzeřḍ? Wi i ɣar iǧa umcubbec? Wi i ɣar iǧa ucetci? Wi i ɣar iǧan iyezzimen břa ssibbet? Wi i ɣar ǧant tiṭṭawin bbarewyent?
PRO 23:30 Ɣar inni ittɣiman ɣar binu ař tameddit, ɣar yinni dd-yusin ḥima ad qqasen binu ixeǧḍen.
PRO 23:31 War xezzar ɣar binu, xmi ittezwiɣ, ittřiqřiq di řkas u netta ihwen [i tissit].
PRO 23:32 Ɣar uneggar ittɣima izeɛɛef am yijj n ufiɣar, ittrucca ssem am třefsa.
PRO 23:33 Tiṭṭawin nnec ad twařant timɣarin tibarraniyyin, u uř nnec ad issiweř s uxarweḍ.
PRO 23:34 Cek ad tiřid am yijjen i itteṭṭṣen di řwesṭ n řebḥar, am ijjen i itteṭṭṣen di tqiccat n teḥnact [n uɣarrabu]
PRO 23:35 [ad tinid:] “Wtin ayi, [maca] war yezmeɣ, dexmen ayi, [maca] war uciɣ ak-d walu. Meřmi i dd ɣa faqeɣ? Necc ad arzuɣ ɛawed [ɣar binu]!”
PRO 24:1 War ttasem. zeg iryazen iɛeffanen, war arezzu ca tmunet akidsen.
PRO 24:2 Maɣar uř nsen itteqqer ɣar ureddeǧ, awařen n iyencicen nsen [i dd-ittwayen ɣar] arẓiyyet.
PRO 24:3 Taddart tᵉttwabna s tiɣit, tᵉttwassemten s řefhamet,
PRO 24:4 s tussna ttwaɛemmaren ixxamen n daxeř, s marra agřa iɣřan d wagřa iřiqqen.
PRO 24:5 Aryaz amiɣis ijhed, aryaz n tussna yarenni di jjehd nnes,
PRO 24:6 maɣar ittxeṣṣa ad ittwandeh umenɣi s udebbar, u s řemɣaret n umcawar ad yiři usenjem.
PRO 24:7 Tiɣit tuɛřa x ubuhaři, netta war yarezzem aqemmun nnes di tewwart [n tendint].
PRO 24:8 Wenni ittxarriṣen di řɣar, ad as řaɣan arrays n bu-teḥřaymect.
PRO 24:9 Řemwayař n uxarreṣ n ubuhaři d ddenb, u amestehziy d nnɛi i bnadem.
PRO 24:10 Mařa tarxud zeg ixef nnec deg wass n řeḥṣaret, ammu uřa d jjhed nnec ad tᵉttwaḥṣar.
PRO 24:11 Senjem inni ittwaṭṭfen maḥend ad ttwanɣen, inni ten ittawyen ɣar mani ten i ɣa nɣen, sbedd i-ten!
PRO 24:12 Mařa cek ad tinid: “Xzar, aqa war nessin walu x man aya!”, ma wenni iwezznen uřawen, war t issargib? Wenni iḥeṭṭan řeɛmar nnec, issen i-t! Netta ad ixeǧeṣ bnadem ɛlaḥsab řxedmet nnes.
PRO 24:13 Ecc tamment, a mmi, maɣar nettat teṣbeḥ, tamment n teɣrast aqa d tmiẓidt i waneɣ nnec.
PRO 24:14 Ammu i teǧa tussna n tiɣit i řeɛmar nnec. Mařa tufid tt, [xenni] teǧa tiwecca, řayas nnec war ittwaqeṭṭeɛ ca.
PRO 24:15 [A] aɛeffan, war tᵉttḥama x tzeddiɣt n umsegged, war heddem amcan n wareyyeḥ nnes!
PRO 24:16 Maɣar amsegged ad iwḍa sebɛa n twařawin, ad dd-ikkar ɛawed, [maca] iɛeffanen ad nnqarḍen s řɣar.
PRO 24:17 War farreḥ i [u]weṭṭu n řeɛdu nnec, mařa netta inqarḍ, ejj uř nnec war ifarreḥ,
PRO 24:18 maḥend SIDI war t iẓarr u man aya ad yiři d řɛib di tiṭṭawin nnes, [ařami] Netta ad xas issḥeyyed aɣḍab nnes.
PRO 24:19 War ttxeyyiq aṭṭas x wenni itteggen řɣar, war ttasem zeg iɛeffanen,
PRO 24:20 maɣar aqa wenni itteggen řɣar war ɣares tiwecca, řefnar n iɛeffanen ad ittwassexsi.
PRO 24:21 [A] mmi, ggʷed SIDI d ujeǧid, war ttxeǧeḍ ca ixef nnec ak-d yinni ixsen ad nqeřben [kuřci],
PRO 24:22 maɣar ad dd-yas uḍeyyeɛ nsen deg ijj n umur, wi issnen aneggaru aɛeffan n iseggʷusa nsen?
PRO 24:23 Uřa d yina d awařen iweznen n imiɣisen. Asfarz n wudmawen di ddeɛwet war iǧi ca mliḥ.
PRO 24:24 Wenni iqqaren i uɛeffan: “Cek d amsegged!”, wanita ad t neɛřen řegnus, ad t carhen ccuɛub.
PRO 24:25 [Maca] inni ten i ɣa iḥakmen, ad iřin mliḥ, lbaraka s [marra] řxar ad ɣarsen dd-tas.
PRO 24:26 [Am ijjen] wenni issudumen iyencicen, [ammu i yeǧa] wenni dd-ittarran s wawařen iseggmen.
PRO 24:27 Sewjed řxedmet nnec barra, kemmeř i-tt i yixef nnec deg iyyar, uca bna taddart nnec awarni man aya!
PRO 24:28 War ttiři d acehhad břa ssibbet x jjar nnec. Ma [iɛeddeř] ad tɣarred s iyencicen nnec?
PRO 24:29 War qqar: “Am mammec i d ayi igga, ammu i dd-as ɣa ggeɣ uřa d necc!”, [maɣar] Necc ad dd-xeřfeɣ zi kuř ijjen ɛlaḥsab řxedmet nnes.
PRO 24:30 Necc kkeɣ x yeyyar n ijj n umeɛguz, x umarjeɛ n uḍiř n ijj n bnadem s wuř nnes war imtinen.
PRO 24:31 Xzar, tgeɛɛed-dd xas marra teyzit, tedřa tzeggʷart udem n temmurt nnes, aqa řḥiḍ nnes n weẓru ittwahdem.
PRO 24:32 [Řami] tt ẓriɣ, ksiɣ tt ɣar wuř inu, ẓriɣ tt uca ksiɣ tt am yijj n uwebbex.
PRO 24:33 “Ejj ayi ad ṭṭṣeɣ cwayt drust, cwayt drust n unudem, cwayt drust n ubuzzeř s ifassen ḍefṣen,
PRO 24:34 [dinni] dd ɣa yas zzeřḍ nnec, uřa d řeɣben nnec am yijj n weryaz s řesnaḥ.”
PRO 25:1 Uřa d ina d awařen iweznen n Suliman nni ittɛawaden urin ten iryazen n Ḥizqiya, ajeǧid n Yahuda.
PRO 25:2 Aqa d ccan n AREBBI maḥend ad issar ict n tmesřact, [maca] ccan n ijeǧiden d abeqqec deg ict n tmesřact.
PRO 25:3 Řuɛřa n ujenna d řaǧaɣ n temmurt, d wuř n ijeǧiden war ǧin i ubeqqec.
PRO 25:4 Kkes kuffu zi nnuqart, ad dd-teffeɣ ict n řqecɛet i wemziř.
PRO 25:5 Sbeɛɛed iɛeffanen zi zzat n wudem n ujeǧid, [xenni] ad ittwassemten řɛarc nnes s tsegda.
PRO 25:6 War tfeyyec zzat i wudem n ujeǧid, war ttbeddi mani ttbeddan imeqqranen.
PRO 25:7 Maɣar iḥřa ad ac inin: “Geɛɛed-dd da!”, uřa ma ad cek ssehwan zzat i wudem n ijj n umcenneɛ nni ẓrint tiṭṭawin nnec.
PRO 25:8 War ttqeǧiq ad tedɛid, maɣar min texsed ad tegged ɣar uneggar nnes, mařa jjar nnec ad cek issefḍeḥ?
PRO 25:9 Carreɛ ak-d jjar nnec, [maca] war ssuffuɣ ssirr n wenneɣni,
PRO 25:10 ḥima wenni d as ittesřan war cek issḥeccem ca, maɣar [řexdenni] war izemmar ad tᵉttwassbeɛɛed řefḍiḥet nnec [ɛad].
PRO 25:11 [Am] tteffaḥin n wureɣ x ṭṭbasa n nnuqart, [ammu ǧan] wawařen ssiwřen ten s řeqyas nnes.
PRO 25:12 [Am] ict n txadent n wureɣ u [am] ict n tseddect n wureɣ iɣřan qaɛ, [ammu i iǧa] uwebbex amiɣis ɣar umezzuɣ ittesřan.
PRO 25:13 Am wedfeř asemmaḍ deg ijj n wass n tmeyra, [ammu i] iǧa umsexxar dayes řaman i wenni t issekkan, [maɣar] issfaqa řeɛmar n bab nnes.
PRO 25:14 [Am] iseynuten d usemmiḍ břa anẓar, [ammu] aryaz nni ittɛeffar deg ict n terzeft war isekkwin.
PRO 25:15 S ttasiɛ n řxaḍar ittwasseqneɛ řḥakem, ijj n yiřes amiẓid ittareẓẓa iɣsan.
PRO 25:16 [Mařa] tufid tamment, ecc min teḥwajed waha, niɣ ad taff teccid ktar zi min teḥwajed, u balak ad tt-i-dd tɛuqqed.
PRO 25:17 War ssrusa aḍar nnec aṭṭas di taddart n jjar nnec, niɣ ad cek ijjiwen u ad cek iɛiff.
PRO 25:18 [Am] wefḍis d ssif d fřitca iqeḍɛen, [ammu i iǧa] weryaz nni icehhden s ẓur x jjar nnes.
PRO 25:19 [Am] tiɣmest yarẓen u [am] uḍar inqraḍen, [ammu] i iǧa utecři x wenni war di iǧi ttiqet deg wass n řeḥṣaret.
PRO 25:20 [Am] wenni ittekksen apartessu nnes deg ijj n wass ismeḍ u [am] řxeǧ i tteggen x niṭrun, [ammu i iǧa] wenni ittɣennajen izřan zzat i yijjen s wuř icḍen.
PRO 25:21 Mařa iǧuẓ wenni cek icarrhen, [xenni] ewc as aɣrum, mařa iffud, ewc as ad isu,
PRO 25:22 maɣar ammu i tyarrwed řefḥem [itteḥduduqen] x uzeǧif nnes, u SIDI ad cek ixeǧeṣ.
PRO 25:23 Asemmiḍ zi ccamal ittawi-dd anẓar, iřes aɣeddar [ittawi-dd] udmawen ixeyyqen.
PRO 25:24 Iḥřa ad tzedɣed deg ict teɣmart n tzeqqa, uřa x [tazeddiɣt] ak-d ict n temɣart ittemcubbucen deg ict n taddart tcarc.
PRO 25:25 [Am] waman iṣemmaḍen i yijj n řeɛmar yuḥeř, [ammu i iǧa] řexbar aṣebḥan zeg ict n temmurt tiggʷej.
PRO 25:26 [Am] ijj n řɛunṣar ittwafesden u [am] ijj n wanu ɣeccen t, [ammu i iǧa] umsegged ittzeɛziɛen zzat i wudem n iɛeffanen.
PRO 25:27 Macca n waṭṭas n tamment war iǧi ca mliḥ, [maca] tarezzut di tmesřayin yewɛaren d ccan.
PRO 25:28 [Am] ict n tendint ihedmen břa řḥiḍ, [ammu i iǧa] ijj n weryaz war itteṭṭef buḥbeř nnes.
PRO 26:1 [Am] wedfeř deg unebdu u [am] wenẓar di tmeyra, [ammu] war dd-ittis ccan ak-d ubuhaři.
PRO 26:2 Am ẓẓawec ittfarfaren, am tfařǧest iṭṭawen [ssa d ssa], ammu i tegga ict n nneɛřet břa ssibbet, nettat war třeqqef.
PRO 26:3 Arekkuḍ i uyis, sřimet i weɣyuř, u aɛmud i weɛrur n ibuhařiyyen.
PRO 26:4 War dd-ttarri x ubuhaři anect tubbuheřya nnes, maḥend uřa d cek war dayes tarekkwesed.
PRO 26:5 Arr-dd x ubuhaři ɛlaḥsab tubbuheřya nnes, maḥend war ittɣiř netta d amiɣis di tiṭṭawin nnes.
PRO 26:6 [Am] wenni ittqessen iḍaren n yixef nnes u [am] wenni isessen lɛunf, [ammu i yeǧa] wenni issekkan tibratin s ufus n ijj n ubuhaři.
PRO 26:7 Timessaḍin n uneɛḍab arehfent, [ammu i yeǧa] uřa d awař iweznen deg uqemmum n ibuhařiyyen.
PRO 26:8 Am wenni ittceddan aẓru iɣřan deg iǧiy, ammu i iǧa wenni itteggen ccan i ubuhaři.
PRO 26:9 [Am] ict n tiwent n tzeggʷart dd-iggeɛɛden deg ufus n uskarji, [ammu i iǧa] lmatal deg uqemmum n ibuhařiyyen.
PRO 26:10 Aṭṭas izemmar ad dd-issuffeɣ marra [zeg yixef nnes], [maca] řmunet n ubuhaři d wenni t ɣa icran, ad xsaren.
PRO 26:11 Am ijj n weqzin iɛeqben ɣar min iɛuqq, [ammu i] ittɛawad ijj n ubuhaři tubbuheřya nnes.
PRO 26:12 Ma teẓriḍ [ɛemmarṣ] ijj n weryaz i itteggen ixef nnes d amiɣis? Aqa din řayas aṭṭas i yijj n ubuhaři uřa xas.
PRO 26:13 Ameɛguz iqqar: “[Aqa din] ijj n wayrad izehharen deg webrid, ijj n weyrad [yuyur] deg wazzayen!”
PRO 26:14 [Am] tewwart tᵉttunnuḍ i teɣmart nnes, [ammu i ittunuḍ] uřa d ameɛguz di qama nnes.
PRO 26:15 Ameɛguz issnuffar afus nnes di ṭṭebṣi, aqa netta yarxu maḥend ad t issiweḍ ɣar uqemmum nnes.
PRO 26:16 Ameɛguz ittwařa ixef nnes d amiɣis, zi sebɛa [iryazen] nni [izemmaren] ad dd-arren s řefhamet.
PRO 26:17 [Am] wenni ittcebbaren deg imezzuɣen n weqzin, [ammu i yeǧa] wenni ittadfen deg umcubbec nni war iǧi nnes.
PRO 26:18 Am ijj n umejnun nni iccaten iṣefḍawen d fřitcat d [ssem] ineqqen,
PRO 26:19 ammu [i iǧa] weryaz nni icemten jjar nnes, uca iqqar: “Aqa ttqessareɣ waha, niɣ lla!”
PRO 26:20 Mařa war iǧi ukeccuḍ, ad texsi tmessi, u mařa war [din] iǧi uxbarji, yaressa umcubbec.
PRO 26:21 [Am iǧa] řefḥem i řefḥem itteḥduduqen d ukeccuḍ i tmessi, [ammu i] yeǧa ijj n weryaz ittemcubbucen, maḥend ad dd-isnekkar amenɣi.
PRO 26:22 Awařen n uxbarjiy am ḥalawit, tinni hekkwant deg ixxamen n daxeř n uɛeddis.
PRO 26:23 [Am] kuffu n nnuqart x uceǧiq n třaxt, [ammu i ǧan] iyencicen imiziḍen n yijjen s wuř d aɛeffan.
PRO 26:24 Wenni di iǧa wecrah, issnuffara [i-t] s yiřes nnes [maca] deg wuř nnes ittxarreṣ di řɣecc.
PRO 26:25 Mařa netta ittḥeccem s tmijja nnes, war t ttiqqi ca, maɣar sebɛa n nnɛawat [aqa din] deg wuř nnes.
PRO 26:26 Uřa mařa iřeḥḥef wecrah nnes deg wecmat, tuɛeffna nnes ad tᵉttwaɛarra deg wegraw [n řgens].
PRO 26:27 Wenni iɣzin [ijj n weḥfur n] turṣuḍi, ad dayes iwḍa simant nnes u taṣḍart ad dd-tedweř ɣar wenni tt isseqnunnuyen.
PRO 26:28 Iřes issxarriqen icarreh wenni ittareddǧen, ijj n uqemmum ařeqqaɣ [s teḥraymect] ittawi-dd řxarbet.
PRO 27:1 War ttfeyyec zeg wass n tiwecca, maɣar war tessined ca min dd ɣa yawi wass.
PRO 27:2 Ejj ijj n ubarrani ad cek icenneɛ, war iǧi aqemmum nnec, ijj n midden, war iǧi iyencicen nnec.
PRO 27:3 Aẓru idqeř, ijdi iwezzen, [maca] afugem n ubuhaři idqeř xasen s tnayen idsen.
PRO 27:4 Asɛar d uduqqez n weɣḍab aqa aten qesḥen, [maca] man wen izemmaren ad iqqim ibedd ɣar tusmi?
PRO 27:5 Teḥřa ttarbiyyet s bṭayṭay x tayri innuffaren.
PRO 27:6 Iyezzimen n wenni [cek] ittexsen aqa d [řeɛřamat n] řaman, [maca] isudimen n yinni [cek] icarrhen aqa d aṭṭas.
PRO 27:7 Wenni ijjiwnen, iɛejjen x tamment n teɣraṣt, [maca] i wenni iǧuẓen marra min yarezgen d amiẓid.
PRO 27:8 Am ijj n wejḍiḍ iṭṭaw, [iggʷed] zi řɛucc nnes, ammu [i iǧa] weryaz nni i ɣa iṭellɛen barra x wemcan nnes.
PRO 27:9 Zzect d řebxur ssfarraḥen uř, [ammu ɛawed] tamseɛɛaft icnan n ijj n umeddukkeř zi ccwar n wuř.
PRO 27:10 War semmeḥ deg umeddukkeř nnec, uřa deg umeddukkeř n babac, war ttidef ca ɣar taddart n umac deg wass n arẓiyyet nnec. Iḥřa ijj n wajjar yudes x ijj n tewmat yiggʷej.
PRO 27:11 Iři d amiɣis, [a] mmi, u sfarḥ uř inu, maḥend zemmareɣ ad dd-arreɣ x wenni d ayi ɣa isseḥqaren.
PRO 27:12 Wenni ifettnen ittwařa řɣar uca issnuffara ixef nnes, [maca] iḥafiyyen arennin gguren uca ittxeṣṣa ad ttwaɛaqaben.
PRO 27:13 Ksi arruḍ nnes, maɣar iddakkwař d aḍman i yijj n ubarrani, ksi t d ddiyyet i yict n temɣart zi barra.
PRO 27:14 Wenni ittbarken ameddukkeř nnes zic ɣar tuffut s tmijja ijehden, aqa man aya ad as ittwaḥseb d nneɛřet.
PRO 27:15 [Amecnaw] tuddimt war ittbeddin deg wass n wenẓar ijehden, [ammu i teǧa] temɣart ittemcubbucen.
PRO 27:16 Wenni ittexsen ad as ibelleɛ, [aqa-t am wenni] ittexsen ad iqala i usemmiḍ, u afus nnes afusi ad iṭṭef zzect [itteḥruǧuḍen].
PRO 27:17 [Am] wenni isseqḍaɛen uzzař s wuzzař, [ammu i] isseqḍaɛ weryaz timegga n wenni t yudsen.
PRO 27:18 Wenni iḥeṭṭan x ijj n wartu, ad icc řɣiǧet nnes, wenni iḥeṭṭan bab nnes, ad ittwacenneɛ.
PRO 27:19 Am dd-ittban uɣembub deg uɣembub deg waman, ammu dd-ittban wuř n bnadem x bnadem ɛawed.
PRO 27:20 [Am] řaxart d ushellek war ttyiwinen, [ammu] uřa d tiṭṭawin n iwdan war ttiwḍent ad jjiwnent.
PRO 27:21 Aṭenjir n usefsi i nnuqart d ufarran i wureɣ, [ammu i iǧa uřa d] aryaz am mammec t ttmeddaḥen.
PRO 27:22 Mařa teddzed abuhaři s wezduz di řmehraz jar řḥebb n imendi, tubbuheřya nnes war xas tḥeyyid.
PRO 27:23 Ḥḍa maḥend ad tessned mammec dd-ittban wuǧi nnec, wejjeh uř nnec ɣar tḥimriwin.
PRO 27:24 Maɣar řeksibet war tᵉttɣimi i řebda, niɣ ma ad iqqim ttaj [n weɛzař] zi jjiř ař jjiř nneɣni?
PRO 27:25 Mařa iruḥ arbiɛ uca iban-dd uɣemmuy [aziza], ittwaḥtec afsu x idurar,
PRO 27:26 [xenni ad iřin] izmaren i warruḍ nnec, uřa d iɣayḍen i tmesɣiwt n yijj n yeyyar.
PRO 27:27 uca ad ɣarek yiři min teḥwajed n uɣi n tɣayṭin i macca nnec, [ad yiři d] macca i taddart nnec, uřa d řeɛweč i temsexxarin nnec timeẓyanin.
PRO 28:1 Iɛeffanen ttrakkwařen waxxa war [dinni] wi [i-ten] iḍaffaren, [maca] imseggaden daysen taryast am n ijj n wayrad.
PRO 28:2 Zi ssibbet n uɛeddi n temmurt [aqa din] aṭṭas n řḥukkam nnes, [maca] s ijj n bnadem s řeɛqeř d tussna, ad teqqim ṣṣulṭa [tbedd] i yijj n řweqt d azirar.
PRO 28:3 Aryaz amezřuḍ nni ittzeyyaren x imarxa, [am] wenẓar ittawyen marra, [ař] war ittɣimi ɛad weɣrum.
PRO 28:4 Inni ittejjan Ccariɛa ssemɣaran aɛeffan, [maca] inni iḥeṭṭan Ccariɛa ttmenɣan akidsen.
PRO 28:5 Iryazen iɛeffanen war fehhmen řḥeqq, [maca] inni yarezzun SIDI, fehhmen i kuřci.
PRO 28:6 Iḥřa umezřuḍ nni igguren iṣfa, x wenni igguren ifarɣ di tnayen n ibriden, [waxxa] netta ɣares agřa.
PRO 28:7 Wenni iḥeṭṭan Ccariɛa, d ijj n mmis ifehhem, [maca] wenni d ameddukkeř n imelhaf, yarra babas ad iseḍḥa.
PRO 28:8 Wenni issemɣaran agřa nnes s arriba d warbeḥ, issmuna aya i wenni ittḥinnan x imezřaḍ.
PRO 28:9 Wenni issḥeyyaden amezzuɣ nnes zeg useǧi n Ccariɛa, [ɛad] taẓaǧit nnes d nnɛi.
PRO 28:10 Wenni ittarran inni igguren nican ad weddaren x ijj n webrid aɛeffan, netta simant nnes ad iwḍa di tesraft nnes, [maca] inni i di teǧa řekmaret ad warten min iṣebḥen.
PRO 28:11 Bu-wagřa ittegg ixef nnes d amiɣis di tiṭṭawin nnes, [maca] ijj n umezřuḍ nni di teǧa řefhamet, yargeb xas.
PRO 28:12 Mařa ad sřiwřiwen imseggaden s řefraḥet, aqa din aɛuǧi ameqqran, [maca] mařa kkaren-dd iɛeffanen, ad issnuffar bnadem [ixef nnes].
PRO 28:13 Wenni iddařen ixeṭṭan nnes, war ittefřiḥ, [maca] wenni zzaysen ineɛɛmen u ittḥeyyad xasen, ad yaf arreḥmet.
PRO 28:14 Sseɛd n bnadem nni ittweqqaren břa abeddi, [maca] wenni isseqsaḥen uř nnes, ad iwḍa di řɣar.
PRO 28:15 [Am] ijj n weyrad ittarrujduden, [am] ijj n ddub [ittřaẓan] ittazzřen zi ssa ɣar diha, [ammu i iǧa] ijj n řḥakem aɛeffan x ijj n řgens amezřuḍ.
PRO 28:16 Řḥakem nni břa řefhamet, [aqa-t d řḥakem x] waṭṭas n werbaḥ s ubeɛɛej, [maca] wenni icarrhen arbeḥ, ad izzuggart ussan nnes.
PRO 28:17 Ijj n bnadem ittwaḥṣaren umi issizzeř idammen n ca n yijjen, ad yarweř ɣar weḥfur n wenḍeř [n yixef nnes]. War ttejji ḥed ad t issbedd!
PRO 28:18 Wenni igguren [abrid nnes] di řeṣfayet, ad injem, [maca] wenni igguren ifarɣ di tnayen n ibriden, war ittɛeṭṭar ad iwḍa.
PRO 28:19 Wenni icarrzen tammurt nnes, ad ijjawen s weɣrum, [maca] wenni iḍeffaren aryaz ixwan, ad ijjawen zzeřḍ.
PRO 28:20 Aryaz i di iǧa řaman aṭṭas [ad iksi] aṭṭas n lbarakat, [maca] wenni ittqeǧiqen ḥima ad igg agřa, war ittwiḥsib d amezdag.
PRO 28:21 Asfarz n wudmawen war icni ca, [maɣar] i yijj n uřeqquz n weɣrum [izemmar] ca n weryaz ad ixḍa.
PRO 28:22 Aryaz s tiṭṭ taɛeffant ittqeǧiq ɣar wagřa, [maca] netta war issin aqa řexses ad ɣares dd-yas.
PRO 28:23 Wenni ittɛaqaben ijj n bnadem, aqa ɣar uneggar ad yaf arḍa ktar x wenni isscanan taẓyuḍi s yiřes nnes.
PRO 28:24 Wenni ittkeccaḍen babas niɣ yemmas uca iqqar: “War iǧi d ddenb!”, aqa-t d acric n ijj n bu-řaxart.
PRO 28:25 Wenni di iǧa nnfaxet, issekkara-dd amcubbec, [maca] wenni ittcařan x SIDI, ad idweř labas xas.
PRO 28:26 Wenni ittcařan x wuř nnes, aqa d abuhaři, [maca] wenni igguren [abrid nnes] di tiɣit, ad injem.
PRO 28:27 Wenni itticen i imezřaḍ, war dayes ittiři bu řeɣben, [maca] wenni itteqqnen tiṭṭawin nnes, ad ittwanɛeř aṭṭas.
PRO 28:28 Mařa kkaren-dd iɛeffanen, [xenni] ittnuffar bnadem, [maca] mařa ttwahellken nitni, ad mmarenyen imseggaden.
PRO 29:1 Aryaz, wenni isseqsḥen yiri [nnes] awarni řami t ɛaqben aṭṭas n twařawin, ad yarẓ deg ijj n umur, [xenni] war din iǧi [ɛad] ugenfu.
PRO 29:2 Mařa dewřen imseggaden s ṣṣulṭa, [xenni] ifarreḥ řgens, [maca] mařa iḥekkem uɛeffan, iweɛɛeḍ řgens.
PRO 29:3 Bnadem ittexsen tiɣit, issfarraḥ babas, [maca] wenni ittmunan ak-d temɣarin n farq-ccɣeř, yareddeǧ agřa [nnes].
PRO 29:4 Ajeǧid issbedda tammurt s řḥeqq, [maca] aryaz nni issgeɛɛaden ḍḍariba aṭṭas n twařawin, iheddem i-tt.
PRO 29:5 Aryaz nni isswaṭan jjar nnes, ittbezzaɛ ict n tracca i iḍaren nnes.
PRO 29:6 Deg uɛeddi n ijj n weryaz aɛeffan [innuffar dayes] ijj n řfex, [maca] amsegged ittesřiwřew u ifarreḥ.
PRO 29:7 Amsegged issen ddeɛwet n imarxa, aɛeffan war ifehhem walu di tussna.
PRO 29:8 Imestehzayyen ssekkaran aɣewweɣ di tendint, [maca] imiɣisen ssneqřaben aɣḍab.
PRO 29:9 [Mařa] amiɣis iksi-dd tanfuč i yijj n ubuhaři, [xenni] netta ggur ad ixeyyeq wanita u ad iḍḥec, [maca] war din řhudnet.
PRO 29:10 Iryazen umi itteɛjib idammen carrhen wenni ikemmřen, [maca] inni igguren nican xezzaren ɣar řeɛmar nnes.
PRO 29:11 Abuhaři iḍeǧeq i marra buḥbeř nnes, [maca] amiɣis ittqemmeɛ i-t.
PRO 29:12 Řḥakem nni itticen taynit i řhard n ixarriqqen, zzayes ad iřin marra imsexxaren nnes d iɛeffanen.
PRO 29:13 Amezřuḍ d weryaz ittwaḥsaren řebda, msagaren, SIDI issnewwar tiṭṭawin nsen s tnayen idsen.
PRO 29:14 Ajeǧid nni itticen s tidett tasɣart i imarxa di ccreɛ, řkursi nnes ad iqqim ibedd i řebda.
PRO 29:15 Aɛmud d uwebbex tticen tiɣit, [maca] aḥenjir jjin t i yixef nnes, yarra yemmas ad tseḍḥa.
PRO 29:16 Mařa dewřen iɛeffanen jehden, [xenni] yarenni uxeṭṭu, [maca] imseggaden ad ẓaren weṭṭu nsen.
PRO 29:17 Arebba mmic u netta ad cek issareyyeḥ, netta ad iwc [lbarakat] timiẓidin i řeɛmar nnec.
PRO 29:18 Mařa war din řewḥiy, ittfuccuḥ řgens, sseɛd n wenni iḥeṭṭan Ccariɛa.
PRO 29:19 Ijj n ismeɣ war ittejji ad t arrebban s wawařen, maɣar waxxa netta ifehhem xak, war xak dd-ittarri ca.
PRO 29:20 Ma cek [ɛemmarṣ] war teẓrid ijj n weryaz ittqeǧiq s wawařen nnes? Aqa din řayas ktar i ubuhaři uřa xas.
PRO 29:21 [Mařa] ijjen issubeḍ ismeɣ nnes zi temẓi, ad idweř ɣar uneggar war t ittqidi.
PRO 29:22 Aryaz ittarrujduden issekkara-dd amcubbec, u bab n wesɛar [ittegg] aṭṭas n ixeṭṭan.
PRO 29:23 Nnfaxet n bnadem ad t isswaḍeɛ, [maca] amwaḍeɛ n buḥbeř ad as ittwagg ccan.
PRO 29:24 Wenni ibeṭṭan ak-d uxewwan, icarreh ixef nnes, [maɣar] netta ittesřa i nneɛřet, [maca] war t iqqar ca.
PRO 29:25 Tiggʷudi zeg iwdan tneddeh ɣar řfex, [maca] wenni ittcařan x SIDI, ad ittwassgeɛɛed di řaman.
PRO 29:26 Aṭṭas arezzun udem n řḥakem, [waxxa] tasɣart n kuř ijj tᵉttas-dd zi SIDI.
PRO 29:27 Aryaz aɣeccac d nnɛi i imseggaden, [maca] wenni igguren nican deg webrid nnes, aqa-t d nnɛi i uɛeffan.
PRO 30:1 Awařen n Ajur, mmis n Yaki, zi teqbič n Massa. Necc arbeřeɣ, [a] Arebbi, necc arbeřeɣ, [a] Arebbi, u kemmřeɣ.
PRO 30:2 Maɣar necc d aqeffuḥ, war iǧi d bnadem, řefhamet n bnadem war ɣari teǧi.
PRO 30:3 Necc war řmideɣ tiɣit, maḥend ad ɣari tiři tussna n Umqeddas Ameqqran.
PRO 30:4 Wi igeɛɛden ɣar ujenna uca ihwa-dd? Man wen iyarrwen asemmiḍ deg ifassen nnes? Wi issennḍen aman deg warruḍ? Wi yarekknen marra tineggura n temmurt? Man Isem nnes u man Isem n Mmis? Cek tessned t, ma war iǧi amenni?
PRO 30:5 Kuř awař n Arebbi ittwaṣeffa, aqa Netta d adurri i yinni ɣares dd-yarekkwařen.
PRO 30:6 War arenni ɣar wawařen nnes, ḥima Netta war cek ittwebbex, u ad tbaned-dd cek d bu-ixarriqen.
PRO 30:7 Necc ttareɣ ac tnayen n tmesřayin, war xafi tent qeṭṭeɛ qbeř i ɣa mmteɣ.
PRO 30:8 Siggʷej xafi min ibeḍřen d řhard ixarriqen, war d ayi ttic zzeřḍ uřa d wagřa, carreg ayi tasɣart inu i d ayi dd-ittasen zeg weɣrum,
PRO 30:9 mařa lla, xmi ɣa jjiwneɣ, ad taɣ ad Cek nkareɣ, ad iniɣ ‘Wi iǧan SIDI?’, niɣ xenni, mařa zeřḍeɣ, ad acareɣ, u ad ggeɣ řɛib deg Yisem n AREBBI inu.
PRO 30:10 War ceqqef deg ijj n umsexxar ɣar sidis nnes, ḥima netta war cek ineɛɛeř u [xenni] cek ad dayek yiři řɛib.
PRO 30:11 [Aqa din] ijj n jjiř i ineɛɛřen babas, u war ittbarek yemmas,
PRO 30:12 ijj n jjiř [i yeǧan] d amezdag di tiṭṭawin nnes, [maca] war ittwasird zi řexmej nnes,
PRO 30:13 ijj n jjiř s řxezrat inefxen, s wabřiwen nnes igeɛɛden,
PRO 30:14 ijj n jjiř s teɣmas am řesyuf d teɣmas n teɣmart am řemwas, ḥima ad ṣarḍen inni ittwaḥṣaren zi temmurt d imezřaḍ zeg iwdan.
PRO 30:15 Tadda ɣares tnayen n yessis: ‘Ewc!’ ‘Ewc!’ Aqa din třata nni ɛemmarṣ ad jjiwnen. Arebɛa ɛemmarṣ ad inin: “Cfa!”
PRO 30:16 Řaxart d řemřawet ibellɛen, tammurt i war ijjiwnen ɛemmarṣ zeg waman, uřa d tmessi war qqarent ɛemmarṣ: “Cfa!”
PRO 30:17 Tiṭṭ i isstehzan zi babas, u tesseḥqar ṭṭaɛet i yemmas, ad tt qeřɛen ibaɣřiwen ɣar teɣzart, u imeẓyanen n ugider ad tt ccen.
PRO 30:18 Třata-ya [n tmesřayin] ɛdunt ayi s řeɛjeb, arebɛa war tent ssineɣ:
PRO 30:19 abrid n ugider deg ujenna, abrid n ufiɣar x teṣḍart, abrid n uɣarrabu deg wuř n řebḥar, u abrid n weryaz ak-d teɛzarect.
PRO 30:20 Ammu i ittegg abrid n ict n temɣart izennan: nettat tᵉttett, tessirid aqemmum nnes, teqqar: “Necc war ggiɣ walu d řɣecc!”
PRO 30:21 Sadu třata [n tmesřayin-a] tenhezz temmurt, sadu arebɛa i war tzemmar ad tarbu:
PRO 30:22 sadu ijj n umsexxar mařa netta idweř d ajeǧid, sadu ijj n ubuhaři mařa netta ijjiwen aɣrum,
PRO 30:23 sadu ict n temɣart tᵉttwasseḥqar mařa nettat tᵉttwassemřec, u sadu ict n tayya mařa tᵉṭṭef řwart n lallas.
PRO 30:24 Arebɛa-ya d imeẓyanen qaɛ x temmurt, [ɛad] nitni d imiɣisen qaɛ:
PRO 30:25 Tikeḍfin war ǧint d řgens ijehden, [maca ɛad] nitenti ssewjadent macca nsen deg unebdu.
PRO 30:26 Ikawkawen n teṣḍart d ijj n řgens nhřa jjhed, [maca] nitni bennan tazeddiɣt nsen di teṣḍart.
PRO 30:27 Tamuɣri war ɣares bu ajeǧid, [waxxa amenni] iffeɣ s usettef marra.
PRO 30:28 Azermummi tzemmared ad t tᵉṭṭfed s tnayen n ifassen, [ɛad aqa-t] netta di řeqṣur n ijeǧiden.
PRO 30:29 Třata-ya ṣṣurufen s řɛezz, arebɛa gguren s tecři tecneɛ:
PRO 30:30 Ayrad, bu-teɣruḍt jar řmar, wenni war ittwexxiren zzat i ḥed,
PRO 30:31 ijj n [uɣiřas] s tejɛinnatin nnes beysent, niɣ ijj n umyan, u ijj n ujeǧid nni ɣar iǧa uřaɣi n umenɣi.
PRO 30:32 Mařa cek teggid s tubbuheřya umi tessgeɛɛded ixef nnec, niɣ txemmemed di teḥraymect: sars [a]fus x uqemmum!
PRO 30:33 Maɣar asendu n uɣi ittawi-dd trussi, u asendu n wenzaren ittawi-dd idammen, u asendu n uxeyyeq, ittawi-dd amcubbec.
PRO 31:1 Awařen n Lamuyil, ajeǧid n teqbič n Massa, i zi t tɛeřmed yemmas.
PRO 31:2 Min [din], [a] mmi, min [din], [a] mmi n weḥsin inu, min [i ɣa tegged], [a] mmi n lwuɛud inu?
PRO 31:3 War ttic tizemmar nnec i temɣarin, uřa ibriden nnec i tinni itthellaken ijeǧiden.
PRO 31:4 War dd-tusi i ijeǧiden, [a] Lamuyil, war dd-tusi i ijeǧiden maḥend ad swen binu, uřa i ayt n jjehd maḥend ad meẓren di ccrab.
PRO 31:5 Niɣ ad isuw u ad ittu lfariḍa, u ad issfarɣ tanfuč n marra imxeyyben.
PRO 31:6 Ewc ccrab i yinni i ɣa ittwahellken, uřa d binu i yinni d imerzagen di řeɛmar nsen.
PRO 31:7 Ejj i-t ad isuw u ad ittu zzeřḍ nnes, [ejj i-t] war ttxarraṣ di tamara nnes ɛad.
PRO 31:8 Arzem aqemmum nnec i iziynan, i ddeɛwet n marra inni ittwajjen.
PRO 31:9 Arzem aqemmum nnec, ḥkem s řḥukm nican, uca aɣ tasɣart i umezřuḍ.
PRO 31:10 Alif. Man wen i ɣa yafen ict n temɣart imeḥḍen? Ttaman nnes iɛdu marra řmarjan.
PRO 31:11 Bit. Xas i ittcařa wuř n weryaz nnes, war d as ittxeṣṣi řefḍeř.
PRO 31:12 Gimel. Nettat tᵉttegg as min iṣebḥen, war iǧi řɣar, marra ussan n tudart nnes.
PRO 31:13 Dalit. Nettat tarezzu taḍuft d tiffest, u txeddem s ifassen nnes imeḥḍen.
PRO 31:14 Hi. Nettat tegga am tɣarruba n usebbab, zi řaggʷaj tᵉttawi-dd macca nnes.
PRO 31:15 Waw. Nettat tᵉttnakkar umi ɛad teǧa ǧiřet, tᵉttic macca i taddart nnes, u tasɣart [nsent] i temsexxarin nnec timeẓyanin.
PRO 31:16 Zayin. Nettat tᵉttxarraṣ deg iyyar u tᵉtteṭṭef i-t, zi řɣiǧet n ifassen nnes teẓẓu tizayarin deg umarjeɛ.
PRO 31:17 Xit. Nettat tbekkes tijɛinnatin nnes s jjehd, u tessemḥaḍ iɣaǧen nnes.
PRO 31:18 Tit. Nettat tḥekkar i řefḍeř n tsebbabt nnes, řefnar nnes war ixessi di ǧiřet.
PRO 31:19 Yud. Nettat tesswiẓẓeḍ ifassen nnes ɣar trukka, u ifassen nnes ṭṭfen amekkuk n uxeyyaḍ.
PRO 31:20 Kaf. Nettat tarezzem afus nnes i umeḥdaj, tesswaẓẓaḍ ifassen nnes i umezřuḍ.
PRO 31:21 Lamid. Nettat war tᵉtteggʷed zi taddart nnes di ssibbet n wedfeř, maɣar marra taddart nnes ɣares arruḍ arjuwani.
PRO 31:22 Mim. Nettat tegga i yixef nnes tisuntawin n zwaq, arruḍ nnes [s] řeqṭen azdad d [ufiřu] arjuwani.
PRO 31:23 Nun. Aryaz nnes ittwassen di tewwura, xmi ittɣima ak-d imɣaren n temmurt.
PRO 31:24 Samix. Nettat tᵉttegg arruḍ n řeqṭen uca tezznuza [i-t], nettat tezznuza ibuyas i usebbab zi Kenɛan.
PRO 31:25 Ɛayin. Jjehd d řɛezz d arruḍ nnes, nettat tḍeḥḥec [tesfarnin] x wass i dd ɣa yasen.
PRO 31:26 Pi. Nettat tarezzem aqemmum nnes s tiɣit, [aqa din] taɣuri s tmexsiwt icewwaren x yiřes nnes.
PRO 31:27 Tsadi. Nettat tḥeṭṭa x min ittemmsaran di taddart, aɣrum n řeɛgez war tᵉttett.
PRO 31:28 Quf. Iḥenjiren nnes ttekkaren, ssemɣaran tt s řefraḥet, uřa d aryaz nnes ittmeddeḥ i-tt.
PRO 31:29 Rix. Aṭṭas n tyessit ggint timegga jehdent, [maca] cem teɛdud-dd ten marra.
PRO 31:30 Cin. Řebhut tcemmet u aẓri ittɣecca [maca] tamɣart nni itteggʷden SIDI, ittxeṣṣa ad tt ssemɣaren.
PRO 31:31 Taf. Wcem as zi řɣiǧet n ifassen nnes, jjem timegga nnes ad as ṣebbḥent ɣar tewwura.
ECC 1:1 Awařen n Umbarreḥ, mmis n Dawud, ajeǧid di Urcalim.
ECC 1:2 D ibeṭṭařen qaɛ, iqqar Umbarreḥ, d ibeṭṭařen qaɛ, aqa kuřci di řbaṭeř.
ECC 1:3 Man řefḍeř i iǧan ɣar bnadem di marra arber i zi ittmarret sadu tfuct?
ECC 1:4 Jjiř iggur, ijj n jjiř [nneɣni] ittas-dd, [maca] tammurt ad teqqim tbedd i řebda.
ECC 1:5 Tneqqar-dd tfuct u tɣeǧi tfuct [ɛawed], [xenni] ad dd-tedweř deɣya ɣar manis i dd-tneqqar.
ECC 1:6 Iggur [usemmiḍ] ɣar ljanub u ittenneḍ [ɛawed] ɣar ccamal. Am iggur ittenneḍ, ittenneḍ usemmiḍ, uca ittɣima usemmiḍ iddakkwař-dd ɣar uduwwar nnes.
ECC 1:7 Marra iɣezran ttkebban di řebḥar, [maca] war ittccuri řebḥar. Ɣar manis dd-ttazzřen iɣezran, dinni ttɣimen ttazzřen [ɛawed].
ECC 1:8 Marra timesřayin ssaḥařent [břa qeṭṭu], uřa d ijjen war izemmar ad xas yini ca. Ɛemmarṣ tiṭṭ ad tejjawen zeg weẓri uca amezzuɣ ɛemmarṣ ad ijjawen zeg utesři.
ECC 1:9 Min tuɣa iǧan ad yiři, min ittwaggen ad ittwagg [ɛawed]. War [din] iǧi jdid sadu tfuct.
ECC 1:10 Ma aqa din ca n řḥajjet qqaren xas: “Xzar, man aya d jdid!”?, aqa-tt din di zzmanat nni tuɣa iǧan qbeř i neccin.
ECC 1:11 War din ǧin d ixarriṣen x yinni tuɣa d imezwura, uca uřa x yinni i ɣa yiřin d ineggura, war xasen ttiřin ixarriṣen ɣar yinni dd ɣa yasen awarni asen [ɛad].
ECC 1:12 Necc, Ambarreḥ, tuɣa ayi d ajeǧid x Israil, di Urcalim.
ECC 1:13 Necc tuɣa kkseɣ deg wuř inu ad arzuɣ u ad beqqceɣ s tiɣit di marra min imsaren sadu ujenna. Man aya d ijj n ccɣeř iwɛar, iwca i-t AREBBI i tarwa n bnadem ḥima ad dayes řhan.
ECC 1:14 Necc ẓriɣ marra timegga i ittwaggen sadu tfuct, u xzar, marra aya tuɣa-t di řbaṭeř d weḍfar n usemmiḍ.
ECC 1:15 Min ifarɣen war izemmar ad ittwaseggem, u min ittxeṣṣan war izemmar ad ittwaḥseb.
ECC 1:16 Necc nniɣ deg wuř inu: “Xzar, necc ssemɣareɣ tiɣit inu uca arniɣ dayes, mahu marra inni tuɣa izeddɣen di Urcalim qbeř inu. Uř inu iẓra aṭṭas n tiɣit d tussna.
ECC 1:17 Necc ggiɣ uř inu, maḥend ad dd-awyeɣ tiɣit, [maḥend] ad ssneɣ tubbuheřya d jjheř. Necc ufiɣ uřa d man aya aqa d aḍfar n usemmiḍ.
ECC 1:18 Maɣar deg waṭṭas n tiɣit, dayes aṭṭas n řhemm, u wenni yarennin di tussna, yarenni deg wemnus.
ECC 2:1 Necc nniɣ deg wuř inu: “As-dd, ad cek qeǧbeɣ s řefraḥet. Xzar ɣar min icnan!” Ufiɣ uřa d man aya aqa-t di řbaṭeř.
ECC 2:2 I tadeḥḥact nniɣ necc: “D tabuhařit [cem]!”, u i řefraḥet: “Min dd ɣa tawi amenni?”
ECC 2:3 Necc arzuɣ deg wuř inu umi ssareccaqeɣ arrimet inu s binu - di řweqt mani uř inu iqqim ittᵉṭṭef [sřayem n tudart inu] s tiɣit - u umi qqimeɣ řessqeɣ di tubbuheřya[-ya], ařami ad ẓareɣ min iǧan ḥsen qaɛ i tarwa n bnadem, maḥend ad t ggen sadu ujenna am ḥessben s řmeqřub řqedd n wussan n tudart nsen.
ECC 2:4 Necc arniɣ di řemɣaret n min ggiɣ. Necc ssbeddeɣ i yixef inu tudrin, ẓẓuɣ tizayarin deg imarjaɛen i yixef inu.
ECC 2:5 Necc ggiɣ iḥwicen d iftisen am yinni n jjennet uca ẓẓuɣ daysen ɛřam kuř ticejjura n fruta.
ECC 2:6 Necc ggiɣ iyeřmamen ccuren s waman ḥima ad zzaysen ssesweɣ azɣar, maḥend ad ssuffyent tcejjura.
ECC 2:7 Necc sɣiɣ isemɣan d tiyya, uca dewřen ɣari imsexxaren ittwarwen di taddart [inu]. Tuɣa ɣari uřa d ict n tḥimart d tameqqrant n ifunasen d wuǧi, aṭṭas x marra inni tuɣa iǧan di Urcalim qbeř xafi.
ECC 2:8 Necc ssmuneɣ i yixef inu uřa d nnuqart d wureɣ d řeknuz n ijeǧiden u zi lɛamalat. Necc ḍebbareɣ-dd i yixef inu imeɣnujen d tmeɣnujin uřa d min di meẓren tarwa n bnadem: tamɣart d temɣarin.
ECC 2:9 Necc arniɣ di řemɣaret inu uca arniɣ-dd aṭṭas, mahu marra inni iǧan qbeř i necc di Urcalim, [maca] tiɣit teqqim tbedd akidi.
ECC 2:10 Marra min iǧan d meẓri di tiṭṭawin inu, war d asent qḍiɛeɣ. War menɛeɣ i wuř inu uřa d ict n řḥajjet, maɣar uř inu ifarḥ zi ssibbet n marra tamara inu: ta d tasɣart n marra amarret inu.
ECC 2:11 [Xas uca] ggiɣ udem inu ɣar marra timegga inu, min ggin ifassen inu, u ɣar umarret nni ggiɣ am d ayi tuɣa ttmarrateɣ maḥend ad ggeɣ [marra aya]. Xzar, [ufiɣ] man aya marra aqa-t di řbaṭeř d weḍfar n usemmiḍ uca war [dayes] iǧi bu řefḍeř sadu tafuct.
ECC 2:12 Necc ggiɣ udem inu maḥend ad ẓareɣ tiɣit, uřa d tubbuheřya d taɣyuři, maɣar min iɛna bnadem nni dd ɣa iḍfaren ajeǧid nni yareccḥen aṭṭas zeg wami?
ECC 2:13 Necc ẓriɣ aqa tiɣit teɛdu x tubbuheřya, am teɛdu tfawt x taǧest.
ECC 2:14 Amiɣis ɣares tiṭṭawin deg uzeǧif nnes, [maca] abuhaři iggur di taǧest. [Xenni] ufiɣ aqa třeqqef i-ten marra tira d ict.
ECC 2:15 [Xenni] nniɣ deg wuř inu: “Mařa teřqef abuhaři, ad teřqef uřa d necc. Mayemmi ɣa meyyzeɣ s tiɣit?” [Uca] nniɣ deg wuř inu: “Uřa d man aya aqa-t di řbaṭeř.”
ECC 2:16 Maɣar i řebda war ittiři řɛeqřan x umiɣis uřa x ubuhaři. Deg wussan i dd ɣa yasen ad ittwattu marra. Ma war immut umiɣis am ubuhaři?
ECC 2:17 Uca bdiɣ ad carheɣ tudart, maɣar min ittwaggen sadu tafuct, tewḍa-dd xafi [mɣir] d tamara, maɣar man aya marra aqa-t di řbaṭeř d weḍfar n usemmiḍ.
ECC 2:18 Bdiɣ ɛawed ad carheɣ amarret inu i zi marrteɣ sadu tafuct, maḥend ad t jjeɣ i yijj n bnadem nni i ɣa yiřin awarni ayi.
ECC 2:19 Wi issnen ma netta ad yiři d amiɣis niɣ d abuhaři? Aqa ggur ad iṣelleṭ x marra amarret inu i zi marrteɣ u i zi tuɣa ǧiɣ d amiɣis sadu tfuct. Aqa uřa d man aya aqa-t di řbaṭeř.
ECC 2:20 [Řexdenni] nnqeřbeɣ ḥima ad ggeɣ uř inu ad iqneḍ x marra amarret inu i zi tuɣa marrteɣ sadu tfuct.
ECC 2:21 Maɣar [waxxa] aqa din ijj n bnadem i umi dd-yusa amarret nnes ak-d tiɣit d tussna d tzemmar, [ɛad] ittxeṣṣa ac ad t iwc i yijj n bnadem i war imarrten i man aya. Uřa d man aya aqa-t di řbaṭeř d ict n tuɛeffna d tameqqrant.
ECC 2:22 Maɣar man řefḍeř ɣar bnadem zi marra amarret nnes u zi tarezzut n wuř nnes i zi ittmarrat sadu tfuct?
ECC 2:23 Maɣar marra ussan nnes mɣir d amnus u ccɣeř nnes [yiwiḍ] řhemm. Ɛad di ǧiřet war yareyyeḥ wuř nnes. Uřa d man aya aqa-t di řbaṭeř.
ECC 2:24 War din iǧi d lemliḥ i bnadem x macca d tseswit uřa x umi iɣebba řeɛmar nnes ɣar [marra] amarret nnes. Necc ẓriɣ aqa uřa d man aya [yusa-dd] zeg ufus n AREBBI.
ECC 2:25 Maɣar man wen izemmaren ad yecc niɣ man wen izemmaren ad yawi ařiqqi barra i Necc?
ECC 2:26 Maɣar Netta ittic tiɣit d tussna d řefraḥet i bnadem nni icnan zzat i wudem nnes. [Maca] i umednub ittic as ccɣeř maḥend ad iyarw u ad issmun, ḥima ad t iwc [xenni] i wenni iǧan icnan zzat i wudem n AREBBI. Uřa d man aya aqa-t di řbaṭeř d weḍfar n usemmiḍ.
ECC 3:1 Marra ɣares řmijař nnes u aqa din [ɛawed] tasaɛɛet [ittwaggen] i kuř anway sadu ajenna.
ECC 3:2 Aqa din ict n tsaɛɛet n tarwa d ict n tsaɛɛet n řmewt, ict n tsaɛɛet n taẓẓut d ict n tsaɛɛet n weqřaɛ n min itwaẓẓun,
ECC 3:3 ict n tsaɛɛet n tmenɣiwt d ict n tsaɛɛet n usgenfi, ict n tsaɛɛet n wehdam d ict n tsaɛɛet n řebni,
ECC 3:4 ict n tsaɛɛet n imeṭṭawen d ict n tsaɛɛet n tḍeḥḥact, ict n tsaɛɛet n wecḍan d ict n tsaɛɛet n ccḍiḥ,
ECC 3:5 ict n tsaɛɛet n uḥejjar n weẓru d ict n tsaɛɛet n wejraw n weẓru, ict n tsaɛɛet n udarreɛ d ict n tsaɛɛet n řaggʷaj x udarreɛ,
ECC 3:6 ict n tsaɛɛet n tarezzut d ict n tsaɛɛet n uweddar, ict n tsaɛɛet n uxemmer d ict n tsaɛɛet n wenḍar,
ECC 3:7 ict n tsaɛɛet n ucarreg d ict n tsaɛɛet n uxeyyeḍ, ict n tsaɛɛet n useɣdi d ict n tsaɛɛet n řhard,
ECC 3:8 ict n tsaɛɛet n tayri d ict n tsaɛɛet n wecrah, ict n tsaɛɛet n garra d ict n tsaɛɛet n řehna.
ECC 3:9 Man tizi ɣar wenni ixeddmen x min xef yarebber?
ECC 3:10 Necc ẓriɣ ccɣeř nni iwca AREBBI i tarwa n bnadem maḥend ad zzayes ssiḥřen ixef nsen.
ECC 3:11 Netta igga marra d aṣebḥan di řweqt nnes. Igga uřa d řweqt n řebda deg wuř nsen, břa ma izemmar bnadem ad iḥaka di tmegga nni igga AREBBI zeg umezwaru ař aneggaru.
ECC 3:12 Necc ufiɣ war ɣarsen iǧi min iḥřan x minni farrḥen [iwdan] niɣ ad arren meẓri meřmi nitni [ɛad] di tudart nsen,
ECC 3:13 u ɛawed aqa kuř bnadem ad icc, ad isu uca ad yarr meẓri di min iṣebḥen di marra amarret nnes. Aya d ict n tarzeft n AREBBI.
ECC 3:14 Necc ssneɣ aqa marra min ittegg AREBBI, ad yiři i řebda. War izemmar ad ɣares ittmarni walu u war zzayes ittwassenqis walu. AREBBI igga [i-t] maḥend ad ggʷeden zzat i wudem nnes.
ECC 3:15 Min iǧan, tuɣa iǧa qbeř uca min i ɣa yiřin, tuɣa iǧa [qbeř]. AREBBI yarezzu x min iɛdun [ɛad].
ECC 3:16 Aqa ẓriɣ sadu tfuct ɛawed amcan n řḥeqq: aqa iselleṭ din řɣecc, [uca ẓriɣ] uřa d amcan n tsegda: aqa [iselleṭ] din řɣar.
ECC 3:17 Necc nniɣ deg wuř inu: “AREBBI ad iḥkem amsegged d uɛeffan, maɣar dinni ict n tsaɛɛet i kuř anway u i qaɛ řxedmet.”
ECC 3:18 Necc nniɣ deg wuř inu: “Aqa di ṭṭweɛ n tarwa n bnadem, aqa AREBBI ad ten issifef u nitni ad twařan aqa nitni am řmař, nitni s yixef nsen.”
ECC 3:19 Maɣar x tira n tarwa n bnadem u x tira n řmař: nitni ɣarsen tira d ict. Am mammec immut wa, immut uřa d wenneɣni, marra idsen ɣarsen d twarrit n nnefs d ijj. War din iǧi řefḍeř i bnadem x řmař, maɣar marra aqa-t di řbaṭeř.
ECC 3:20 Marra idsen gguren ɣar ijj n wemcan, marra nitni zeg ucař uca ad dd-dewřen ɣar ucař.
ECC 3:21 Wi issnen, ma buḥbeř n tarwa n bnadem ad igeɛɛed ɣar sennej u buḥbeř n řmař ad dd-ihwa ɣar temmurt?
ECC 3:22 Ammu i ttwařiɣ, war iǧi min iḥřan x minni ifarreḥ bnadem di tmegga nnes, maɣar man aya d tasɣart nnes, minzi man wen izemmaren ad t yarr ař ɣa iẓar min ɣa yiřin awarni as?
ECC 4:1 Ẓriɣ ɛawed marra ddeǧ i ittwaggen sadu tfuct. Xzar, aqa da imeṭṭawen n yinni ittwadeǧen, [maca] war ɣarsen bu umfewwej. Iffeɣ-dd lɛunf zeg ufus n yinni ten ittedǧan, [maca] war ɣarsen bu umfewwej.
ECC 4:2 [Xenni] ṣebbḥeɣ imettinen nni immuten ɛad [aṭṭas zeg wami], zeg inni iddaren, inni ɛad iddaren.
ECC 4:3 [Maca] iḥřan xasen s tnayen idsen nni d wenni war iǧin ɛad, d wenni war iẓrin [ɛad] timegga tiɛeffanin nni ittwaggent sadu tfuct.
ECC 4:4 Uca necc ẓriɣ marra amarret d marra tizemmar di řxedmet, aqa-t mɣir d amɛanad n ijj ak-d wenneɣni. Uřa d man aya aqa-t di řbaṭeř d weḍfar n usemmiḍ.
ECC 4:5 Abuhaři iḍfes ifassen nnes uca ittett aysum [n ixef] nnes.
ECC 4:6 Iḥřa ijj n wuru [n ufus] iccur s řhudnet uřa tnayen n ifassen ccuren s umarret d weḍfar n usemmiḍ.
ECC 4:7 Ɛawed ẓriɣ [ca] min iǧan di řbaṭeř sadu tfuct.
ECC 4:8 Aqa [din] ijjen [aqa t ḥafi] u war din wenni d wiss tnayen i ibedden ɣares. Uřa war ɣares iǧi uḥenjir u war ɣares umas. War iǧi uneggar ɣar marra amarret nnes, uřa war tᵉttyiwinent tiṭṭawin nnes zeg wagřa. “I umi tteggeɣ tamara u ssekkiɣ tt di řeɛmar inu zi tcuni?” Uřa d man aya di řbaṭeř d ijj n ccɣeř iwɛar i yeǧa.
ECC 4:9 Tnayen ḥsen zeg ijjen waha, maɣar nitni ɣarsen řmunet d lemliḥ deg umarret nsen.
ECC 4:10 Maɣar mařa nitni wḍan, ad issnekkar ijjen zeg umɛacar nnes ɛawed. [Maca] axeyyeb i wenni iǧan weḥḥdes mařa netta iwḍa, minzi war din ittiři ḥed, maḥend ad t issnekkar ad ibedd.
ECC 4:11 Ɛawed mařa tnayen ṭṭsen munen, ad ɣarsen yiři řeḥmu, [maca] mammec ɣa igg ijjen weḥḥdes ad iḥma?
ECC 4:12 Mařa din ijjen yarna x ijjen i iǧan weḥḥdes, [maca] tnayen ad ɣares bedden [jmiɛ]. Ijj n wesɣun imuden x třata war iqeṭṭu deɣya.
ECC 4:13 Iḥra ijj n uḥudri d amezřuḍ d amiɣis zeg ijj n ujeǧid iwsar d abuhaři i war ifehhmen ɛad i weɛřam.
ECC 4:14 Maɣar ad dd-iffeɣ zi řeḥbes maḥend ad idweř d ajeǧid waxxa netta ittwaxřeq-dd d amezřuḍ di tgeldit nnes.
ECC 4:15 Necc ẓriɣ marra inni iddaren i igguren sadu tfuct, [jmiɛ] ak-d uḥudri, wenni d wiss tnayen nni i ɣa ibedden deg wemcan nnes.
ECC 4:16 War din aneggar ɣar řgens nni am ikmeř nni zi izwar netta [am yixef]. [Waxxa amenni] uřa d inni dd ɣa yasen awarni as, war zzayes farrḥen. Uřa d man aya aqa-t di řbaṭeř d weḍfar n usemmiḍ.
ECC 4:17 Ḥḍa aṣurif nnec mařa cek teggured ɣar Taddart n AREBBI. Aqarreb ḥima ad tesḥessed, ḥsen zeg uwehheb n tɣarṣt s [ufus n] ibuhařiyyen, maɣar nitni war ssinen aqa nitni tteggen tuɛeffna.
ECC 5:1 War tqeǧiq s uqemmum nnec u ḥḍa aqa uř nnec war ittemḥizwar ad inṭeq awař zzat i AREBBI. Maɣar AREBBI deg ujenna, [maca] cek di temmurt. X uya ejj ad iřin wawařen nnec udrusen.
ECC 5:2 Maɣar am tarjit tᵉttas-dd s waṭṭas n řehhu, ammu uřa d řhard n ubuhaři s waṭṭas n wawařen.
ECC 5:3 Mařa cek teggid i AREBBI ict n tjaǧit, war ttraja ca [xenni] maḥend ad tt tkemmřed, maɣar war d as tteɛjiben ibuhařiyyen. Min twaɛded, ittxeṣṣa ad t ttkemmřed.
ECC 5:4 Ihřa mařa war twaɛded x mařa cek twaɛded, [maca] war tkemmřed.
ECC 5:5 War ttejji aqa aqemmum nnec ad yarr arrimet nnec ad texḍa u war teqqar zzat i wudem n lmalak, aqa man aya d aweddar waha. Mayemmi ɣa iffugem AREBBI x min teqqared u ad yareddeǧ řxedmet n ifassen nnec?
ECC 5:6 Maɣar deg waṭṭas n tirja, aqa daysent min iǧan di řbaṭeř, ammu uřa deg waṭṭas n wawařen. S uya: Ggʷed AREBBI!
ECC 5:7 Mařa cek tḥekkared řeḥṣaret n imezřaḍ uřa d amnaɛ n řḥeqq d tsegda di lɛamala, war ttarjif ca aqa [man aya] yusa-dd [asen] s řxaḍar, maɣar x yijj n umeqqran aqa din wenni d ameqqran [xas] uca xasen bedden inni d imeqqranen [ɛad].
ECC 5:8 Ijj n ujeǧid ittceṭṭaren i temmurt [n tfeǧaḥt], aqa netta d řefḍeř i temmurt di marra iɣezdisen.
ECC 5:9 Wenni ittexsen tmenyat, war ittjiwin ɛemmarṣ tmenyat, u wenni ittexsen agřa, ɛemmarṣ [war ittjiwin] řmunet [nnes]. Uřa d man aya aqa-t di řbaṭeř.
ECC 5:10 Mani ittmarni wagřa, ammu ttmarnin uřa d inni t i ɣa iccen. Man řefḍeř i ɣa iqqimen i aytbab nnes mɣir tiṭṭawin nsen zemmarent ad xzarent [aya]?
ECC 5:11 Iḍeṣ n uxeddam d miẓid, ma netta ɣares drus niɣ aṭṭas n macca, [maca] i bu-wagřa afeyyeḍ nnes war t ittejji ad iṭṭeṣ.
ECC 5:12 Aqa din ijj n řɣar i ẓriɣ sadu tfuct, [ijj n řɣar] ittegg am řehřac: agřa ittɛess xas bab nnes i druct i ixef nnes.
ECC 5:13 Ifna [zeɛma] wagřa nnes s ict n temsart d taɛeffant uca netta tuɣa yejj-dd mmis, [xenni] war ɣares iqqim walu [ɛad] deg ufus nnes.
ECC 5:14 Am mammec dd-iffeɣ netta zeg uɛeddis n yemmas, [ammu i ɣa] iɛqeb d aɛaryan. Ad yuyur am mammec i dd-yusa. S [marra] amarret nnes i zi imarret, war [izemmar] ad [kides] iksi uřa d ict řḥajjet deg ufus nnes.
ECC 5:15 Uřa d ta d ict n tmesřact d taɛeffant: nican mammec i dd-yusa netta, ad yuyur. Man řefḍeř nnes [xenni] i wenni imarrten i usemmiḍ [waha]?
ECC 5:16 Ɛawed ittɣima ittett di taǧest marra ussan nnes am kemřen. Ittwamarret [s] řeḥřac nnes d uduqqez nnes n weɣḍab.
ECC 5:17 Xzar, min ttwařiɣ d man aya: aqa d lemliḥ u icna aqa [ijj] ad icc, ad isu u ad iẓar marra řxar i marra amarret nnes i umi ittmarrat [bnadem] sadu tafuct di řqedd n wussan n tudart i d as dd-yarzef AREBBI, maɣar ta d tasɣart nnes.
ECC 5:18 Ɛawed kuř bnadem i umi iwca AREBBI agřa d txubay u i umi iwca tizemmar maḥend ad zzayes icc u ad zzayes yarbu tasɣart nnes u ad zzayes ifarḥ ɣar umarret nnes, aqa-tt d tarzeft n AREBBI.
ECC 5:19 Maɣar netta war ittidar [ɛad] aṭṭas deg wussan n tudart nnes, minzi AREBBI isřa as umi [d as] iwca řefraḥet deg wuř nnes.
ECC 6:1 Aqa din ijj n řɣar nni ẓriɣ sadu tfuct nni imsaren aṭṭas jar iwdan:
ECC 6:2 ijjen yarzef as AREBBI agřa d txubay d ccan. Aqa war ittxeṣṣi walu i řeɛmar nnes zi marra min dayes d meẓri, [maca] AREBBI war t ijji ad zzayes icc, [maɣar] ijj n ubarrani ad t icc. Aqa uřa d man aya di řbaṭeř d ijj n řɣar d aɛeffan.
ECC 6:3 Mařa ijj n weryaz yejj-dd mya n iḥenjiren u iddar aṭṭas n iseggʷusa, ařami dewřen wussan n tudart nnes deg waṭṭas, [maca] řeɛmar nnes war ijjiwen ca s řxar u war ittwif wenḍeř i netta, necc ad iniɣ: ijj n weɣray icna as x netta.
ECC 6:4 Maɣar yusa-dd di řbaṭeř uca iffeɣ di taǧest u s taǧest ittwařeḥḥef isem nnes.
ECC 6:5 Netta ɛawed war iẓri tafuct u war tt issin. [Ammu] ɣar [weɣray-a] řhudnet ktar x [weryaz] nni,
ECC 6:6 waxxa netta iddar ařfayen n iseggʷusa, [maca] břa ma ad iẓar řxar! Ma war igguren kuř ijj ɣar wemcan d ijj?
ECC 6:7 Marra amarret n bnadem i uqemmum nnes, waxxa amenni ɛemmarṣ war ittccuri řeɛmar nnes.
ECC 6:8 Maɣar man řefḍeř i umiɣis x ubuhaři? [Man řefḍeř i] umezřuḍ nni issnen ad yuyur qibač i yinni iddaren?
ECC 6:9 Iḥřa ad teẓrid min iǧan zzat i tiṭṭawin x wetlaɛ n řeɛmar. Uřa d man aya di řbaṭeř d weḍfar n usemmiḍ.
ECC 6:10 Min ma iǧa ca n ijjen, aqa isem nnes ittwařaɣa qbeř, u tuɣa ittwassen min ɣa yiři bnadem: netta war izemmar ad imcubbec ak-d Wenni xas ijehden.
ECC 6:11 Maɣar aqa din aṭṭas n wawařen nni yarennyen di min iǧan di řbaṭeř. Man řefḍeř [n uya] i bnadem?
ECC 6:12 Maɣar wi izemmaren ad issen min iḥřan i bnadem di tudart [nnes] di řweqt n řqedd n wussan n tudart [nnes] ifennan nni issɛeddu am tiři? Maɣar wi izemmaren ad isscen i bnadem min ɣa imsaren awarni as sadu tfuct?
ECC 7:1 Isem iṣbeḥ iḥřa x zzect iṣebḥen, ass n řmewt [iḥřa] x wass n tarwa.
ECC 7:2 Teḥřa twaḥit ɣar taddart n wecḍan x twaḥit ɣar taddart [mani ttqeddamen] ict n zzardet, [minzi din] iǧa qeṭṭu n bnadem marra, u wenni iddaren ittegg i-tt deg wuř nnes.
ECC 7:3 Iḥřa wecḍan x tdeḥḥact, maɣar s ijj n uɣembub iceḍnen iddakkʷař wuř ḥsen.
ECC 7:4 Uř n imiɣisen [aqa-t] di taddart n wecḍan, [maca] uř n ibuhařiyyen [aqa-t] di taddart n řefraḥet.
ECC 7:5 Iḥřa ad tesřed ɣar uwebbex zeg imiɣisen x wesḥessi i yezři n ibuhařiyyen.
ECC 7:6 Maɣar am utartek n isennanen sadu umeqraj, ammu i tegga tḍeḥḥact n ubuhaři. Uřa d man aya aqa-t di řbaṭeř.
ECC 7:7 Maɣar řeḥṣaret ad tessbuhři amiɣis, u tarzeft [n arrecwet] tessexsara uř.
ECC 7:8 Aneggaru n tmesřact teḥřa x umezwaru nnes. Wenni ɣar iǧa ttasiɛ n řxaḍar aṭṭas iḥřa x umɛeffar.
ECC 7:9 War sexxeḍ deɣya di buḥbeř nnec, maɣar deg weḥsin n ibuhařiyyen izeddeɣ uxeyyeq.
ECC 7:10 War teqqar: “Min tuɣa [din], aqa ussan n zic iḥřan x mammec ǧan wussan-a?” Maɣar aseqsi-ya war [izemmar ad iffeɣ] zi tiɣit.
ECC 7:11 Tiɣit i dd-ittasen ak-d tesɣart tecna, u [tiɣit] aqa d řefḍeř i yinni ittwařan tafuct.
ECC 7:12 Maɣar am mammec tiɣit teǧa d taseddart [i useřqi], [ammu] uřa d tmenyat aqa atent d taseddart [i useřqi]. Řefḍeř n tussna aqa tiɣit tᵉttic tudart i aytbab nnes.
ECC 7:13 Xzar min igga AREBBI, maɣar wi izemmaren ad iseggem min issfarɣ Netta?
ECC 7:14 Arr meẓri s řxar deg wass n wefřaḥ, [maca] deg wass n arẓiyyet, xzar [xenni], maɣar AREBBI igga wa uřa d ta, ḥima bnadem war izemmar ad yaf awarni as walu.
ECC 7:15 Marra aya i ẓriɣ deg wussan [n tudart inu] ifennan. Aqa din amsegged nni ittwahellken di tsegda nnes uca aqa din aɛeffan nni isszuggarten [ussan nnes] di marra tuɛeffna nnes.
ECC 7:16 War ttegg ixef nnec d amsegged aṭṭas, u war ttegg ixef nnec d amiɣis aṭṭas. Mayemmi ɣa tareddǧed ixef nnec?
ECC 7:17 War ttiři d aɛeffan aṭṭas u war ttiři ɛawed d abuhaři aṭṭas. Mayemmi ɣa temmted mařa war dd-yiwiḍ ɛad řmijař nnec?
ECC 7:18 Mliḥ mařa cek tcebbared di ta, [am] war yarexxu ufus nnec di tin, maɣar wenni itteggʷeden AREBBI, ad ittwafekk zi marra aya.
ECC 7:19 Tiɣit tessejhed amiɣis [x] ɛecra n ayt n bu-ṣṣulṭa nni iǧan deg ict n tendint.
ECC 7:20 Wah nican, war iǧi uřa d ijj n bnadem d amsegged x temmurt, [uřa d ijj] ittegg řxar u war ixeṭṭi ca.
ECC 7:21 War ttic taynit nnec i marra awařen nni qqaren iwdan, ḥima ɛemmarṣ war tᵉttesřid aqa amsexxar nnec ad cek inɛeř.
ECC 7:22 Maɣar uř nnec yuca aṭṭas n twařawin, aqa uřa d cek tneɛřed inneɣni.
ECC 7:23 Marra aya beqqceɣ t s tiɣit. Necc nniɣ: “Xseɣ ad kesbeɣ tiɣit!”, [maca] tiɣit teqqim ayi ɣar řaggʷaj.
ECC 7:24 [Maɣar] min iggʷejen d min yuǧɣen, [wah,] yuǧɣen, man wen izemmaren ad t yaf?
ECC 7:25 Nnqeřbeɣ, uřa d uř inu [akidi], maḥend ad afeɣ tussna, maḥend ad beqqceɣ, ad arzuɣ tiɣit d wenway [i dayes], maḥend ad ssneɣ [s tidett] aqa řɣar d taɣyuři u taɣyuři [dayes] aṭemmes aṭṭas.
ECC 7:26 Ufiɣ min iǧan d amerzag x řmewt: tamɣart [tenni iǧan am] traccawin u uř nnes [amecnaw] řefxux [ineqqen] u ifassen nnes [amecnaw] iceddiyyen. Wenni yarḍan zzat i wudem n AREBBI, izemmar ad zzayes infekk, [maca] amednub ad zzayes imxumber.
ECC 7:27 Xzar, aya i ufiɣ, iqqar Umbarreḥ, [umi arenyeɣ] ict [n řḥajjet] i yicten [nneɣni] maḥend [ammu i] ɣa yafeɣ řḥasuř [nnes]:
ECC 7:28 min tuɣa yarezzu řeɛmar inu ɛad, [maca] war t ufiɣ. [Wah] ufiɣ ijj n weryaz deg wařef, [maca] ict n temɣart war tt ufiɣ jar marra yina.
ECC 7:29 Xzar, ict waha i ufiɣ, aqa AREBBI igga bnadem nican, [maca] nitni arzun deg waṭṭas n yebriden iḥraymeyyen.
ECC 8:1 Wi iǧan am umiɣis u wi issnen ad ifekk ict n tmesřact? Tiɣit n bnadem tᵉttarra aɣembub nnes ittnewwar uca tbeddeř [tifras] n řeqseḥ n uɣembub nnes.
ECC 8:2 Necc [qqareɣ]: “Ḥḍa aḍebbar n ujeǧid!” u [man aya] di ssibbet n tjaǧit n AREBBI.
ECC 8:3 War ttiggʷij s tazřa x wudem nnes, war ttegg azeǧif nnec di tmesřact taɛeffant, maɣar netta igga marra min xef yarḍa.
ECC 8:4 Awař n ujeǧid dayes ṣṣulṭa temɣar. Man wen izemmaren ad as yini: “Min tᵉttegged cek?”
ECC 8:5 Wenni iḥeṭṭan tawṣeyyet, war t iřeqqef [walu n] min iǧan d aɛeffan. Uř n umiɣis issen řḥař d řḥukm.
ECC 8:6 Maɣar i kuř anway ijj n řḥař d ijj n řḥukm, maɣar tuɛeffna n bnadem tessedqař i-t.
ECC 8:7 Maɣar netta war issin min ɣa imsaren, maɣar man wen i d as t i ɣa isscnen mammec ɣa yiři aya?
ECC 8:8 War [din] iǧi uřa d ijj n bnadem izemmar x usuḍi n usemmiḍ ařami izemmar ad xas ibelleɛ. War [din] iǧi uřa d ijj ɣares ṣṣulṭa x wass n řmewt, u war [din] iǧi uřa d ijj izemmar ad iksi ttesriḥ deg umenɣi, u tuɛeffna war tejji ad nejmen aytbab nnes.
ECC 8:9 Marra aya ẓriɣ t, umi ssenqeřbeɣ uř inu ɣar marra min ittwaggen sadu tfuct, di řweqt řami iṣelleṭ bnadem x bnadem nneɣni i druct nnes.
ECC 8:10 Ammu i ẓriɣ iɛeffanen nni tuɣa ittwaneḍřen, udfen [ɣar wenḍeř], [umi] yinni iggin min iǧan nican ffɣen zeg wemcan amqeddas, ttwattun di tendint. Uřa d man aya di řbaṭeř.
ECC 8:11 Maɣar řḥukm x tɛeffant war ittwagg deɣya, x uya iccur wuř n tarwa n bnadem maḥend ad ggen min iǧan d aɛeffan.
ECC 8:12 Waxxa amednub ittegg taɛeffant mya n twařawin u iddar aṭṭas, waxxa amenni ssneɣ aqa inni itteggʷeden AREBBI ad feřḥen, inni zzayes itteggʷeden.
ECC 8:13 Aɛeffan [maca] war ittiři mliḥ u war ɣares tᵉttiři tudart d tazirart. Netta ad yiři am tiři, maɣar war itteggʷed AREBBI.
ECC 8:14 Aqa din ca min ittwaggen x temmurt nni iǧan di řbaṭeř: aqa din imseggaden ittemmsar asen axmi tteggen am yiɛeffanen, u aqa din iɛeffanen ittemsar asen axmi tteggen tasegda. Necc nniɣ: uřa d man aya di řbaṭeř.
ECC 8:15 S uyenni i ttṣebbaḥeɣ řefraḥet, maɣar war din iǧi i bnadem min iǧan ḥsen [di tudart nnes] sadu tfuct mɣir mařa netta ittett, isess u ifarreḥ. Iři aya ad t iɛacar deg umarret nnes di marra ussan n tudart nnes i d as yarzef AREBBI sadu tfuct.
ECC 8:16 Umi tuɣa ggiɣ uř inu maḥend ad ssneɣ tiɣit u maḥend ad xzareɣ man tasebbabt i igguren x temmurt - maɣar am s wass am s ǧiřet bnadem war ittic ca arraḥet i tiṭṭawin nnes -
ECC 8:17 ẓriɣ marra min igga AREBBI, aqa bnadem war izemmar ad yaf min ittwaggen, [ixs ad yini] min ittwaggen sadu tfuct. Maɣar mammec i ɣa imarret bnadem am yarezzu, war ittif walu. Waxxa amiɣis ad yini belli netta issen, netta war izemmar maca ad t yaf.
ECC 9:1 Maɣar necc ggiɣ marra aya ɣar wuř inu, maḥend ad arzuɣ di marra aya, aqa imseggaden d imiɣisen d tmegga nsen deg ufus n AREBBI. Tayri d wecrah war ten issin bnadem, aqa marra iǧa zzates.
ECC 9:2 Marra [iǧa] am mammec [iǧa] ɣar marra: tira d ict třeqqef amsegged d uɛeffan, am uṣebḥan d umezdag am umexmuj, wenni iqeddmen taɣarṣt d wenni war iqeddmen taɣarṣt, aṣebḥan d umednub, wenni ittjjaǧan d wenni itteggʷeden maḥend ad ijjaǧ.
ECC 9:3 Man aya d ijj n řɣar ɣar marra min imsaren sadu tfuct, aqa marra [iwdan] iřqef i-ten tira d ict, uca uřa uř n tarwa n bnadem iccur s řɣar, u aqa din aṭemmes deg wuř nsen di řweqt n tudart nsen, u awarni i uya [ad uyuren nitni] ɣar imettinen.
ECC 9:4 Maɣar i wenni iqqnen i marra inni iddaren aqa din asitem, minzi řḥař i weqzin iddaren ḥsen zi [řḥař] i weyrad immuten.
ECC 9:5 Maɣar inni iddaren ssnen, aqa nitni ad mmten, [maca] imettan war ssinen walu qaɛ. Nitni war ttᵉṭṭfen walu zi řmunet, maɣar řidaret xafsen tᵉttwattu.
ECC 9:6 Aqa tayri nsen d wecrah nsen d tusmi nsen fnan. I řebda war ɣarsen bu tesɣart ɛad di marra min ittemsaren sadu tfuct.
ECC 9:7 Uyur [xenni], iwa ecc s řefraḥet aɣrum nnec, su s wuř ifarḥen binu nnec, maɣar iɛjeb as i AREBBI timegga nnec aṭṭas zeg wami.
ECC 9:8 Ejj ad yiři arruḍ nnec d acemřař řebda u ɛemmarṣ war ittxeṣṣi zzect x uzeǧif nnec.
ECC 9:9 Barreɛ x tudart ak-d temɣart nni tᵉttexsed, marra ussan n tudart nnec ifennan nni d as iwca AREBBI sadu tfuct, mařa ussan n lḥaḍar nnec ifennan danita, maɣar ta d tasɣart nnec di tudart-a u ɣar umarret i zi tmarrted sadu tfuct.
ECC 9:10 Marra min ɣa yaf ufus nnec maḥend ad t yegg, egg i-t ɛlaḥsab jjehd nnec, maɣar war iǧi di řaxart mani ɣa tuyured min ɣa tegged, niɣ axarreṣ niɣ tussna uřa d tiɣit.
ECC 9:11 Ɛawed ẓriɣ sadu tfuct aqa ayt n bu-tazřa war ɣeǧben [řebda] di ḥamat, niɣ ayt n bu-teɣruḍt [řebda] deg umenɣi, u imiɣisen war ɣarsen iǧi weɣrum [řebda] u yinni s řeɛqeř war ɣarsen iǧi wagřa [řebda], uřa d inni s řefhamet war ɣarsen iǧi arḍa [řebda], maɣar řḥař d tira řeqqfen uřa d marra nitni.
ECC 9:12 Maɣar bnadem war issin řmijař nnes, am yiseřman inḥeṣren di tracca n arẓiyyet, u am yijḍaḍ innḥeṣren di řfex. Ammu uřa d tarwa n bnadem ttwaṭṭfen di řfex deg ict n řweqt d taɛeffant, xmi xasen dd-tweṭṭa [tracca] deɣya.
ECC 9:13 Uřa d man aya bdiɣ ad dayes ẓriɣ tiɣit sadu tfuct, tusa ayi-dd d tameqqrant aṭṭas.
ECC 9:14 Tuɣa din ict n tendint d tameẓyant dayes drus n yewdan [waha]. Iffeɣ xas ijj n ujeǧid d ameqqran, iḥewwes i-tt, u issbedd xas lbarajat timeqqranin.
ECC 9:15 Ittwaff dayes ijj n weryaz d amezřuḍ d amiɣis wenni ifekken tandint s tiɣit nnes, [maca] uřa d ijj n bnadem iɛqeř [ɛad ɛemmarṣ] x weryaz nni.
ECC 9:16 [Xenni] nniɣ necc: “Tiɣit teḥřa x jjhed!”, waxxa tᵉttwasseḥqar tiɣit n umezřuḍ u awařen nnes war tᵉttwasřen.
ECC 9:17 Awařen n imiɣisen nni ɣar ttesřan [iwdan] di řhudnet, ḥsen zeg uɣuyyi n řḥakem jar ibuhařiyyen.
ECC 9:18 Tiɣit teḥřa x řesnaḥ n umenɣi, [maca] ijj n umednub [waha] iheddem aṭṭas.
ECC 10:1 Izan ineqqen ttarran zzect n wedhan n uɛeṭṭar ad tarṣuḍ u ad tesmem. Drus n tubbuheřya twezzen aṭṭas x tiɣit d ccan.
ECC 10:2 Uř n umiɣis aqa-t [i netta] afus nnes afusi, [maca] uř n ubuhaři [i wanita] afus nnes azeřmaḍ.
ECC 10:3 Uřa deg webrid min xef iggur ubuhaři, uř nnes war imtin, iqqar i marra aqa netta d abuhaři.
ECC 10:4 Mařa xak ixeyyeq buḥbeř n bu-jjehd, war tteggʷij x wemcan nnec, maɣar man aya d ddwa, yaressa ddnub imeqqranen.
ECC 10:5 Aqa din ijj n řɣar nneɣni nni ẓriɣ sadu tfuct, aqa-t d ijj n uweddar i dd-iffɣen zeg ijj n bu-ṣṣulṭa:
ECC 10:6 asgeɛɛad aṭṭas n tubbuheřya, [am] ttɣiman ayt n bu-wagřa swadday.
ECC 10:7 Necc ẓriɣ imsexxaren nyin x yeysan uřa d řḥukkam nni igguren am yimsexxaren [x iḍaren nsen] x temmurt.
ECC 10:8 Wenni itteqqazen aḥfur, ad dayes iwḍa [s yixef nnes], wenni issnuqqben řḥiḍ, izemmar ad as iqqes ufiɣar.
ECC 10:9 Wenni ikksen iẓra, ad [zzaysen] iyzem [ixef nnes], wenni ittfettqen akeccuḍ, ad yiři di lxaṭar.
ECC 10:10 Mařa uzzař [n ccaqur] idweř iḥfa u [bab nnes] war t isseqḍeɛ, xenni ittxeṣṣa as jjhed ktar, [maca] tiɣit tecna aṭṭas ḥima ad ifřeḥ bnadem.
ECC 10:11 Mařa izɛef ufiɣar qbeř aɛezzem, war din řefḍeř i uɛezzam.
ECC 10:12 Awařen zeg uqemmum n umiɣis daysen arḍa, [maca] iyencicen n ubuhaři ṣarḍen t simant nnes.
ECC 10:13 Beddu n wawařen zeg uqemmum nnes d tubbuheřya u aneggaru n min dd-iffɣen zeg uqemmum nnes d aṭemmes aɛeffan.
ECC 10:14 Abuhaři ittkettar řhard aṭṭas, maca bnadem war issin min ɣa imsaren, u min ɣa imsaren awarni as, wi d as t i ɣa iɛawden?
ECC 10:15 Amarret n ibuhařiyyen ittarra i-ten uḥřen, maɣar nitni war ssinen mammec ɣa yuyuren ɣar tendint.
ECC 10:16 Uct xam, [a] tammurt, mařa ajeǧid nnem d aḥenjir [ɛad], u řḥukkam nnem ɣar teffut ttᵉtten!
ECC 10:17 Sseɛd nnem, [a] tammurt, mařa ajeǧid nnem d mmis n tarwa n taṣiřet, u řḥukkam nnem ttᵉtten ɣar řweqt ittwaggen, maḥend ad ttwameḥden, war iǧi maḥend ad skaren.
ECC 10:18 S řeɛgez i hekkwant tiḥenya u s ifassen yarehfen ad tudum taddart.
ECC 10:19 [Bnadem] ittegg aɣrum maḥend ad iḍḥec, binu issfarraḥ inni iddaren u tmenyat neffɛent i marra min iǧan.
ECC 10:20 War neɛɛeř ajeǧid [ɛad] di řbař nnec, deg wexxam n yiḍeṣ war neɛɛeř bu-wagřa, maɣar ijḍaḍ n ujenna zemmaren ad ssuyuren řḥess [n wawařen nnec] u [ammu marra] wi ɣar ǧan wafriwen izemmar ad isseɛdu awař.
ECC 11:1 Sekk aɣrum nnec tiwa i waman, maɣar awarni i aṭṭas n wussan ad t tafed [ɛawed].
ECC 11:2 Bḍa t di sebɛa niɣ ɛad di tmenya, maɣar cek war tessined man řɣar i ɣa yiřin di temmurt.
ECC 11:3 Mařa ccuren iseynuten, ttzeǧaɛen anẓar x temmurt. Ma tacejjart tewḍa ɣar ljanub niɣ ɣar ccamal, deg wemcan mani tewḍa, tᵉttɣima din [tezzeř].
ECC 11:4 Wenni ixezzaren řebda ɣar usemmiḍ, war ittiwiḍ ad izarɛ, wenni iḥeṭṭan řebda iseynuten, war ittiwiḍ ad imjar.
ECC 11:5 Am mammec cek war tessined abrid n usemmiḍ, ammu [i war tessined uřa] mammec ttwaggen iɣsan deg uɛeddis n temɣart s ddeyset. Ammu i war tessined uřa d tmegga n AREBBI wenni itteggen marra [min iǧan].
ECC 11:6 Zarɛ zzariɛet nnec ɣar tuffut u war ttekkes afus nnec ɣar tmeddit, maɣar cek war tessined min i ɣa ifřeḥ, ta niɣ ta, niɣ ɛad s tnayen idsent ad iřint ṣebḥent.
ECC 11:7 Tafawt d tmiẓidt uca mliḥ i tiṭṭawin ad ẓarent tfuct.
ECC 11:8 Wah, mařa aryaz iddar aṭṭas n iseggʷusa, ejj i-t ad ifarḥ di marra [iseggʷusa nni], u ejj i-t ad iɛqeř [ɛawed], aqa ussan ibarcanen ad iřin deg waṭṭas. Marra min i d ɣa yasen [ɛad], aqa-t di řbaṭeř.
ECC 11:9 Farḥ, [a cek] aḥudri, di temẓi nnec, sfarḥ uř nnec deg wussan n temẓi nnec. Uyur deg ibriden n wuř nnec u di min ttwařant tiṭṭawin nnec, maca ssen aqa SIDI ad cek issekk x marra aya i ccreɛ.
ECC 11:10 Siggʷej řhemm x wuř nnec u sḥeyyed řɣar x arrimet nnec, maɣar temẓi d řweqt s ucuwwaf abarcan [n temẓi] aqa aten di řbaṭeř.
ECC 12:1 Idar Wenni cek dd-ixeřqen deg wussan n temẓi nnec, qbeř i dd ɣa yawḍen wussan n řɣar i zi ɣa tinid: “War daysen ufiɣ řefraḥet!”,
ECC 12:2 qbeř ad tᵉttwabarcen tfuct d tfawt d tziri d itran uca ad dd-ɛeqben iseynuten awarni i wenẓar,
ECC 12:3 ɣar wass min di iɛessasen n taddart ad arjijen, iryazen ijehden ad qewsen, tinni iḥarryen tasirt ad ssbeddent [tawwuri nsent], minzi nitenti qqiment drus idsent, uca [timɣarin] nni dd-issajjan zi řkwazi, ad ttwařeḥḥfent s taǧest,
ECC 12:4 u tnayen n tewwura ɣar zzenqqet ad ttwabellɛent, xmi ddriz n tsirt ad isseɣd uca řḥess n ujḍiḍ ad t issiggwed deg yiḍes u marra yessis n uɣennij ad dewřent qewsent,
ECC 12:5 u [bnadem] ad iggʷed zi marra min iǧan yuɛřan, uca ad din iřint [ɛřam kuř řeḥwayej] inexřiɛen deg webrid, u tacejjart n ǧewz ad tnewwar u aburxes ad idweř d tamara u tanewwact n ‘ukebbas’ war d as dd-yusi ɛad ɣar řbař - maɣar bnadem iggur ɣar taddart nnes n řebda u inni iceṭṭnen ad raḥen ad dd-tasen deg ibriden -
ECC 12:6 qbeř i ɣa tᵉttwarxu tesɣunt n nnuqart, ad tᵉttwarẓ ṭṭawyyet n wureɣ, ad innefrar weqbuc ɣar tařa uca ad teqḍu tjarrart deg wanu,
ECC 12:7 uca ucař ad dd-iɛqeb ɣar temmurt am mammec t-tuɣa, u buḥbeř ad dd-iɛqeb ɣar AREBBI, wenni t iwcin.
ECC 12:8 D ibeṭṭařen qaɛ, iqqar Umbarreḥ, aqa kuřci di řbaṭeř.
ECC 12:9 Sennej i uya, minzi Ambarreḥ tuɣa-t d amiɣis, isseřmed ɛawed tussna i řgens, tuɣa ittbařu, ittbeqqac mliḥ, uca iɛdeř aṭṭas n wawařen iweznen.
ECC 12:10 Yarzu Umbarreḥ maḥend ad yaf awařen iɛedřen, u min yura, aqa-t nican, awařen n tidett.
ECC 12:11 Awařen n imiɣisen am yisennanen u amecnaw imesmiren ittwassidfen, i zzaysen i-dd-ttasent aṭṭas n tmesřayin, aqa-ten mmewcen zeg uyenni n Umeksaw.
ECC 12:12 Sennej i marra aya, [a] mmi, ḥḍa ixef nnec: war din aqeṭṭu n tira n waṭṭas n idlisen u aṭṭas n tɣuri tessaḥař arrimet.
ECC 12:13 Awař aneggaru n marra min tesřid, aqa t d wa: “Ggʷed AREBBI u ḥḍa tiweṣṣa nnes!”, maɣar man aya [i yurin] i kuř ijj n bnadem.
ECC 12:14 Maɣar SIDI ad yawi kuř tameggit zzat i taddart n ccreɛ x marra min innuffaren, ma tuɣa iṣbeḥ niɣ tuɣa war iḥři.
SOL 1:1 Izři x izřan nni [iǧan] n Suliman.
SOL 1:2 “Ejj i-t ad ayi issudem s isudimen n uqemmum nnes, minzi usḥinneb nnec ḥsen zi binu.
SOL 1:3 Řefwaḥet n zzect nnec tecna, isem nnec am zzect izeǧɛen, x uya ttexsent cek teɛzariyyin.
SOL 1:4 Jbed ayi awarni ac, neccin ad nazzeř awarni ac! Ajeǧid indeh ayi deg ixammen nnes. Ejj aneɣ ad narceq u ad zzayek nfarḥ, ad neɛqeř x usḥinneb nnec ktar x min ɣa neɛqeř x binu. Nican ttexsent cek.”
SOL 1:5 “D tabarcant necc, u ṣebḥeɣ, [a] yessis n Urcalim, am tqiḍunin n Qidar, am řizarat n Suliman.
SOL 1:6 War d ayi xezzarent [ammu], minzi necc bbarcneɣ, minzi tessecmeḍ ayi tfuct, iḥenjiren n yemma tuɣa xeyyqen xafi, ggin ayi ad ḥḍiɣ imarjaɛen n uḍiř. Amarjeɛ n yixef inu war t ḥḍiɣ ca.”
SOL 1:7 “Cek, wenni ittexs buḥbeř inu, ini ayi, mani tarekkwesed, mani tessareyyaḥed [taḥimart] ɣar ṭḥa n uziř, minzi i umi ɣa iřiɣ am tenni iḥejben ɣar tḥimriwin n imɛacaren nnec?”
SOL 1:8 “Mařa cem war t tessined, [cem] tenni icnan qaɛ jar temɣarin, xenni ffeɣ, ḍfar řatar n wuǧi, arwes tiɣaḍtin nnem mani zeddɣen imeksawen.”
SOL 1:9 “Ssemquddiɣ cem ak-d řɛewda inu zzat ikarruten n firɛun, [a] tameddukkeč inu.
SOL 1:10 Mecḥař ṣebḥen imeggizen nnem jar tseddyin, iri nnem jar ifiřan s tyaqutin.
SOL 1:11 Ad am negg tiseddyin n wureɣ, ak-d tneqqiḍin n nnuqart.”
SOL 1:12 “Min ɣa yekk ujeǧid [iqqim] ɣar ṭṭabřa nnes taqurarit, itticc ṣṣenbel inu řefwaḥet nnes.
SOL 1:13 Llif inu ittegg ayi am tecyart n mirru, tenni issensen jar idmaren inu.
SOL 1:14 Llif inu i necc am tqebbiḍt n newwac n řḥenni, deg imarjaɛen n uḍiř n Ɛayn-Jadi.”
SOL 1:15 “Xzar, tecnid cem, tameddukkeč inu! Xzar, cem tecnid, tiṭṭawin nnem d idbiren.”
SOL 1:16 “Xzar, cek tecnid, [a] llif inu, wah, tḍarfed, tuzzizewt d tassut nneɣ,
SOL 1:17 Tiḥenya n tudrin nneɣ d tineglin, tiḥenya n tzeqqa aqa atent d ticejjura n umerzi.”
SOL 2:1 “Necc d tanewwact n Carun war zzayes wḍant tifray ɛemmarṣ, d talillect n teysarin.”
SOL 2:2 “Am tlillect jar tzeggʷart, ammu i teǧa tameddukkeč inu jar tyeǧitin.”
SOL 2:3 “Am tcejjart n tteffaḥt jar tcejjura n wezɣar, ammu i yeǧa llif inu jar warrawen. Necc aqa ayi mmeẓreɣ ad qqimeɣ di tiři nnes. řɣiǧet nnes d miẓid i waneɣ inu.
SOL 2:4 Netta indeh ayi di taddart n binu, u tayri d taɛeǧant nnes xafi.
SOL 2:5 Sjehdem ayi s tɣaryiṭatin n zzbib, sbarrdem ayi s tteffaḥin, maɣar necc heřceɣ s tayri.
SOL 2:6 Azeřmaḍ nnes sadu uzeǧif inu, afusi nnes idarreɛ ayi-dd.
SOL 2:7 Necc ad kennint ssjaǧaɣ, [a] yessis n Urcalim, ɣar tɣayḍin n wezɣar u ɣar tudadin deg iyyar[en], aqa kennint war hekkwřent tayri, war tt-i-dd-ssekkarant ař tᵉttexs simant nnes.”
SOL 2:8 “Tmijja n llif inu! Aqa da, ittas-dd, ineṭṭu x idurar, ineggez x tewririn!
SOL 2:9 Llif inu [yarwes] deg iɣayḍ n wezɣar, niɣ deg ijj n umeẓyan n wudaden. Aqa-t da, ibedd awarni i řḥiḍ nneɣ, ixezzar zi řekwazi, ittceyyeɛ zi ccebbac.”
SOL 2:10 “Llif inu ittarra-dd, inna ayi: ‘Kkar, bedd, [a] tameddukkeč inu, aẓri inu, as-dd!
SOL 2:11 Maɣar aqa da, tagerst teɛdu, iksi wenẓar, aqa iruḥ.
SOL 2:12 Banen-dd inuwwaren di temmurt, řḥař n wenziz aqa-t da, u tmijja n tjlilleḥt nesřa i-tt [ɛawed] di temmurt nneɣ.
SOL 2:13 Artu n tazart ittxemmař řbacur nnes, tizayarin ittnewwaren arxun i řefwaḥ. Kkar, bedd, tameddukkeč inu, aẓri inu, as-dd!’”
SOL 2:14 “Tadbirt inu deg imucan n udurri di řejruf, tnuffar di tsawent [n wedrar]. Ejj ayi ad ẓareɣ aɣembub nnem, ad sřeɣ i tmijja nnem, maɣar d tmiẓidt [i teǧa] tmijja nnem, iṣbeḥ uɣembub nnem.”
SOL 2:15 “Ṭṭfem aneɣ-dd iceɛbawen, iceɛbawen imeẓyanen, inni ittarytaren [aneɣ] imarjaɛen n uḍiř, maɣar tizayarin deg imarjaɛen nneɣ ttnewwarent [ɛad].
SOL 2:16 Llif inu aqa-t inu u necc nnes, necc n wenni yarekkwsen jar tlillicin
SOL 2:17 ař i ɣa ismeḍ wass u ad arewřent tiřiwin. Nneḍ-dd, [a] llif inu, iři am yijj n iɣayḍ n wezɣar niɣ am yijj n umeẓyan n wudaden x idurar [i ittwaqeḍɛen] s teysarin.”
SOL 3:1 “Arzuɣ xas di ǧyaři [am ǧiɣ] x tassut inu, [arzuɣ x] wenni ittexs řeɛmar inu. Necc arzuɣ xas, [maca necc] war t ufiɣ.
SOL 3:2 [Necc nniɣ]: ‘Ad kkareɣ, ad suḥeɣ di tendint, deg ibriden u x wazzayen. Necc ad xas arzuɣ, [ad arzuɣ] [x] wenni ittexs řeɛmar inu.’ Necc arzuɣ xas, [maca] war t ufiɣ.
SOL 3:3 Ufin ayi iɛessasen am ttennḍen di tendint. Necc nniɣ: ‘Ma teẓrim kenniw wenni ittexsen řeɛmar inu?’
SOL 3:4 Řami tuɣa ɛad war xasen ɛduɣ, ufiɣ t, wenni ittexsen řeɛmar inu. Necc ṭṭfeɣ t, war zzayes arexxuɣ ařami t-i-dd-iwyeɣ ɣar taddart n yemma, deg wexxam n daxeř n tenni i dd ayi yurwen.
SOL 3:5 Necc ad kennint ssjaǧaɣ, [a] yessis n Urcalim, ɣar tɣayḍin n wezɣar u ɣar tudadin deg iyyar[en], aqa kennint war hekkwřent tayri, war tt-i-dd-ssekkarant ař tᵉttexs simant nnes.”
SOL 3:6 “Min teɛna tenni i dd-igeɛɛden zi řexřa, am iqellijen n ddexxan, deg ijj n useynu n mirru d jjawi, n marra řebzar ittfuḥen n usebbab?
SOL 3:7 Xzar, řectu [n trebbut] n Suliman, ttennḍen as-dd settin n ayt n bu-teɣruḍt, zeg ayt n bu-teɣruḍt n Israil,
SOL 3:8 marra inni itteṭṭfen ssif, inni iřemmden amenɣi, kuř ijj s ssif nnes ɣar tmeṣṣaḍt nnes zi ssibbet n min issaggʷaden di ǧiřet.
SOL 3:9 Ajeǧid Suliman igga i yixef nnes ijj n řectu i trebbut s ukeccuḍ n Lubnan.
SOL 3:10 Iɛumad [ɣar teɣmart] igga i-ten s nnuqart, aɛemmed n weɛrur n wureɣ uca aɣimi nnes n arjuwani. Daxeř nnes yarḍen t s tayri n yessis n Urcalim.”
SOL 3:11 “Ffɣent u xzarent, [kennint] yessis n Ṣihyun, [aqa da] ajeǧid Suliman ak-d ttaj i zi t tgelled yemmas deg wass n wurar nnes, deg wass n řefraḥet [yuẓɣen] deg wuř nnes.”
SOL 4:1 “Xzar, tecnid cem, tameddukkeč inu, cem tecnid. Awarni lltam nnem tiṭṭawin nnem d tidbirin. Acuwwaf nnem am tḥimart n iɣayḍen i dd-ihekkwan zeg idurar n Jilɛad.
SOL 4:2 Tiɣmas nnem ggint am tḥimart n wuǧi řsin tent, inni dd-ittgeɛɛaden zeg wemcan n uṣebben, marra [tixeswin] urwent tacniwin, war teqqim ict nbřa iḥenjiren.
SOL 4:3 Iyencicen nnem am ufiřu azeggʷaɣ iḥedqen, iṣbeḥ uqemmum nnem. Lḥenkat nnem am tremmant ibḍan sadu lltam nnem.
SOL 4:4 Iri nnem am ṣṣumɛet n Dawud, bnan tt am tesfifin [n tseddyin]. Ařef n tseddariyin [n uɛeskari] uyřent ɣares, marra am tseddariyin [iqesḥen iquraren] n ayt n bu-teɣruḍt.
SOL 4:5 Idmaren nnem ggin am tnayen n iɣayḍen imeẓyanen, am wacniwen n tɣayḍet n wezɣar, ttheddan di tlillicin.
SOL 4:6 Ař i ɣa ismeḍ wass u ad arewřent tiřiwin, ad uyureɣ ɣar wedrar n umirru, ɣar tewrirt n jjawi.
SOL 4:7 Cem marra d aẓri, tameddukkeč inu, war dayem uřa d ijj n řɛib.
SOL 4:8 [As-dd] akidi zeg [idurar n] Lubnan, [a] tasřit inu, as-dd akidi zeg [idurar n] Lubnan, ṣwed-dd zi tqiccet n Amana, zi tqiccet n Canir d Hirmun, zi ɣar řmarageḥ n wayraden, zeg idurar n iɣiřasen.
SOL 4:9 Tucared ayi uř, [a] učma, [a] tasřit [inu], [wah] tucared ayi uř, s ict n [řxezrat n] tiṭṭawin nnem, s ict n tseddect n yiri nnem.
SOL 4:10 Mammec tecna usḥinneb nnem, [a] učma, [a] tasřit [inu], mecḥař teṣbeḥ usḥinneb nnem x binu, řefwaḥet n zzect nnem x marra řeɛṭur.
SOL 4:11 Zeg iyencicen nnem, [a] tasřit [inu], tᵉttudum tamment n teɣraṣt, tamment d uɣi sadu iřes nnem, u řefwaḥet n warruḍ nnem am řefwaḥet [n idurar n] Lubnan.
SOL 4:12 [A] učma, [a] tasřit [inu], cem d taḥwict ibellɛen, d tařa iqqnen, d řɛunṣar icemmɛen.
SOL 4:13 Řefruɛ i zzayem issneṭṭiyen d jennet n tremmanin, s řɣiǧet iṣebḥen aṭṭas, nnewwac n řḥenni d ṣṣenbel,
SOL 4:14 ṣṣenbel d zzɛefran, s uɣanim uḥemmum ittfuḥen ak-d řqarfa, ɛřam kuř ticejjura n jjawi, mirru d wecfiř, ak-d marra řeɛṭur iṣebḥen qaɛ.
SOL 4:15 [A] tařa n iḥwicen, anu n waman iddaren, inni dd-ittazzřen zeg [idurar n] Lubnan.”
SOL 4:16 “Kkar, [a] asemmiḍ n nnej, as-dd, [a] asemmiḍ n swadday, suḍ x weḥwic inu, ejj [řefwaḥet n] řeɛṭur nnes ad tuyur. Ejj llif inu ad dd-yas ɣar weḥwic nnes, ad icc zi řɣiǧet nnes iṣebḥen!”
SOL 5:1 “Necc usiɣ-dd ɣar weḥwic inu, [a] učma, [a] tasřit inu, řeqḍeɣ mirru inu ak-d balsam. inu, cciɣ aɣrum n tzizwa ak-d tamment inu, swiɣ binu inu d uɣi inu. Imeddukkař, eccem, swem, scarem, [a] imɛizzen!”
SOL 5:2 “Necc ṭṭseɣ, maca uř inu ifaq. [Aqa da] tmijja n llif inu, wenni issqarqben: ‘Arzem ayi, [a] učma, tameddukkeč inu, tadbirt inu, [a] kuřci inu, maɣar azeǧif inu iccur s nnda, imuzaren inu [ccuren] s tuddimin n ǧiřet!’
SOL 5:3 Aqa kkseɣ arruḍ inu, mammec i t ɣa yarḍeɣ ɛawed? Iḍaren ssirdeɣ ten, ma ad ten ssxemjeɣ ɛawed?
SOL 5:4 Llif inu issekk-dd afus nnes zeg unuqqib n tewwart, uca inhezz wuř inu zzayes.
SOL 5:5 Necc beddeɣ ḥima ad arzmeɣ i llif inu, ifassen inu udumen s mirru, [zeg] iḍewḍan inu issizzeř mirru x ifassen n zzekrun.
SOL 5:6 Necc arzmeɣ i llif inu, [maca] llif inu tuɣa yuyur, iɛdu. Iffeɣ řeɛmar inu umi tuɣa issawař! Necc arzuɣ xas, [maca] war t ufiɣ. Necc řaɣiɣ as, netta war xafi dd-yarri.
SOL 5:7 Ufin ayi iɛessasen ɣar wenneḍ nsen di tendint, nitni wtin ayi, yezmen ayi, aqendur inu kksen ayi t iɛessasen n řeḥyuḍ.”
SOL 5:8 “Necc ad kennint ssjaǧaɣ, [a] yessis n Urcalim, mařa kennint tufint llif inu, min d as ɣa tinint? Aqa tesseḥřec ayi tayri.”
SOL 5:9 “Min ɣares ɣar llif nnem ktar x llif [nneɣni], [a] cem i di iǧa waẓri qaɛ zi temɣarin? Min ɣares ɣar llif nnem ktar x inneɣni, aqa cem ammu i d aneɣ tᵉssjaǧad?”
SOL 5:10 “Llif inu d acemřař [ittissiqen] d azeggʷaɣ [am idammen], [ittban] am ubandu sennej x ɛecra n řuřuf.
SOL 5:11 Azeǧif nnes d ureɣ iqqur iṣfan, imuzaren n ucuwwaf nnes d tiwririn itteggen am řemwaj, d ibarcanen am yibaɣřiwen.
SOL 5:12 Tiṭṭawin nnes ggint am tedbirin ɣar tseǧyawin n waman, ɛumment deg uɣi, qqiment di tcuyar nsen [am iẓra iɣřan].
SOL 5:13 Imeggizen nnes ggin am yiḥwicen n řeɛṭur, [ccuren s] řeɛcub ittfuḥen, iyencicen nnes am tlillicin, ttudumen s mirru ifesyen.
SOL 5:14 Iɣaǧen nnes am yiqeḍban n wureɣ, ɛemmarent s [iẓra n] texrisulit, aɛeddis nnes igga am řɛaj ittissiqen, řeḥḥfen t s tyaqutin n ṣaffir.
SOL 5:15 Imesḍan nnes d ipilaren n řmarmur, x dsusa n wureɣ ittwaṣeffan. Iban-dd netta am Lubnan, ittwafarz am [tcejjart n] tengelt.
SOL 5:16 Aneɣ nnes iccur s taẓyudi, marra i ɣares icuwwar. Wa d llif inu, wa d ameddukkeř inu, [a kennint] yessis n Urcalim!”
SOL 6:1 “Mani yuyur llif nnem, [a] cem icnan qaɛ x temɣarin? Mani yarra s uzeǧif llif nnem? Neccin nexs ad xas narzu akidem!”
SOL 6:2 “Llif inu ihwa ɣar uḥwic nnes, ɣar tbuda s řeɛṭur, ḥima ad yarwes deg iḥwicen, ḥima ad issmun tilillicin.
SOL 6:3 Necc zeg llif inu, u llif inu aqa-t inu, netta d wenni yarekkwsen jar tlillicin.”
SOL 6:4 “Cem tṣebḥed, [a] tameddukkeč inu, amecnaw Tirṣa, tecnid am Urcalim, tessaggʷaded am yiseddiyyen n řɛeskar s ibanduten [nsen].
SOL 6:5 Kkes tiṭṭawin zzayi, maɣar nitenti ɣeḍřent ayi ifadden aṭṭas. Acuwwaf nnem am tḥimart n iɣayḍen i dd-ihekkʷan zeg [idurar n] Jilɛad.
SOL 6:6 Tiɣmas nnem ggint am tḥimart n wuǧi, i dd-ittgeɛɛaden zeg wemcan n uṣebben. Marra [tixeswin] urwent tacniwt, war teqqim ict nbřa iḥenjiren.
SOL 6:7 Lḥenkat nnem am tremmant ibḍan awarni i lltam nnem.
SOL 6:8 Aqa din settin n tjeǧidin d tmenyin n tiyya, uřa d tiɛzariyyin břa řeḥsab.
SOL 6:9 Weḥḥdes nettat, tadbirt inu, tenni ikemmřen inu, ayenni n yessis n yemmas, nettat d tenni ifarzen ɣar tenni i d as dd-yurwen. Mařa zřint tt tyessit, ad tt ssɛuǧant, tijeǧidin d tiyya ad tt ssemɣarent.”
SOL 6:10 “Min teɛna tenni dd-issijjen am tfawt n řefjar, tecna am tziri iqefřen, teṣfa am tfuct yareqqen, tessaggʷad am yiseddiyyen n řɛeskar s ibanduten?”
SOL 6:11 “Necc ḥwiɣ ɣar teḥwict n tcejjura n teɣyact ḥima ad ẓareɣ aɣemmuy ibedden di teɣzurt, ḥima ad ẓareɣ ma tazayart tessuffeɣ-dd, ma ticejjura n aremman ttnewwarent.
SOL 6:12 Tuɣa war dd-arriɣ taynit aqa ggiɣ ixef inu deg ikarruten n řgens inu igellden.”
SOL 7:1 “Ɛqeb-dd, ɛqeb-dd, [a] Culamit! Ɛqeb-dd, ɛqeb-dd, maḥend ad dayem nexzar.” “Min texsem ad tẓarem di Culamit?” “[Nettat] am ccḍiḥ s nnubtat n tnayen n řɛeskarat.”
SOL 7:2 “Mecḥař cnan iṣuraf nnem di ṣandaliyyat [nnem], [a, cem] yessis n ijj n umcenneɛ! Aḥnunni n tmeṣṣaḍt nnem am tseddyin iɣřan [ttraḥent ttasent-dd], ṣṣenɛet n ifassen n ufennan.
SOL 7:3 Taɛebbuḍt nnem am tsarijt teḥnunni, mani war ittxeṣṣi binu ixeǧḍen. Aɛeddis nnem d akemmic n irden, nnḍent as-dd tlillicin.
SOL 7:4 Idmaren nnem [ggin] am tnayen n iɣayḍen imeẓyanen, am wacniwen n tɣayḍet n wezɣar.
SOL 7:5 Iri nnem igga am ṣṣumɛet n řɛaj, tiṭṭawin nnem am yiyeřmamen n Ḥacbun, ɣar tewwart n Bat-Rabbim, tinzart nnem am ṣṣumɛet n Lubnan i issajjan ɣar Dimacq.
SOL 7:6 Tiwa nnem [igga] azeǧif nnem am Karmil, acuwwaf n uzeǧif nnem d arjuwani, ajeǧid ittwaḥbes deg imuzaren nnem.”
SOL 7:7 “Mecḥař tecnid cem, u mecḥař tṣebḥed, [a] tayri, di [kuřci] min izemmar bnadem ad yarr meẓri!”
SOL 7:8 “Tiddi nnem tarwes di tcejjart n tini, idmaren nnem deg izekkunen n uḍiř.
SOL 7:9 Necc nniɣ: ‘Ad nyeɣ x tcejjart n tini, ad ṭṭfeɣ di řefruɛ nnes.’ Idmaren nnem [ad iřin] am izenkak n uḍiř ɣar tzayart, řefwaḥet n wenzaren nnem am tteffaḥin,
SOL 7:10 aneɣ nnem am binu iṣebḥen aṭṭas ...”, “... wenni ittraḥen nican ɣar llif inu, wenni ittarran iyencicen n yinni iṭṭṣen ad nhezzen.”
SOL 7:11 “Necc n llif inu, ɣari dd-ittas meẓri nnes.
SOL 7:12 As-dd, llif inu, ejj aneɣ ad nuyur ɣar yeyyar, ad nessens di ředcur.
SOL 7:13 Ejj aneɣ ad nekkar zic ḥima ad nuyur ɣar imarjaɛen n uḍiř, ejj aneɣ ad nẓar, ma tazayart [aqa] tessuffuɣ, ma nnuwwar nnes nnurzmen, ma ticejjura n aremman newwarent. Dinni i d ac ɣa wceɣ asḥinneb inu.
SOL 7:14 Ttiffaḥin n tayri arxunt i řefwaḥ u tiwa n tewwura nneɣ aqa din frutat icewwaren, tinni n ṭṭri d tinni ittwaxemmřen. [A] llif inu, xemmřeɣ tent i cek!”
SOL 8:1 “Ax, meɛlik qaɛ cek d uma, tᵉṭṭeḍed di tbibbicin n yemma. Mařa ufiɣ cek di barra, ad cek ssudmeɣ, břa ma d ayi sseḥqaran.
SOL 8:2 Iři ad cek nedheɣ, ad cek awyeɣ ɣar taddart n yemma, cek ad ayi tessřemded [din]. Ad ac wceɣ binu ittfuḥen s řeɛṭur ad teswed, aẓemmi n [tcejjart] inu [n] waremman.
SOL 8:3 Azeřmaḍ nnes sadu uzeǧif inu, afusi nnes idarreɛ ayi-dd.
SOL 8:4 Necc ad kennint ssjaǧaɣ, [a] yessis n Urcalim: Mayemmi ɣa thewřent tayri niɣ ad tt-i-dd-tessekkarent, qbeř ma tᵉttexs nettat?”
SOL 8:5 “Min teɛna nni [din] ittgeɛɛaden zi řexřa, tᵉttɛemmed x llif nnes?” “Sadu [tcejjart] n tteffaḥt arreɣ meẓri nnem, mani cem dd-tejja yemmam s řeḥriq n tarwa, mani cem dd-tejja tenni cem dd-yurwen.”
SOL 8:6 “Sars ayi am ṭṭabeɛ x wuř nnec, am ṭṭabeɛ x uɣiř nnec, maɣar tayri tejhed am řmewt, tusmi teqseḥ am řaxart, tifeṭṭutin nnes d tifeṭṭutin n tmessi, [aqa atent] am uceɛɛař n SIDi.
SOL 8:7 Aṭṭas n waman war zemmaren ad ssxesyen tayri, uřa d iɣezran war tt ttiwyen. Waxxa iwca ijjen i tayri marra agřa n taddart nnes, ad t sseḥqaren d aseḥqar.”
SOL 8:8 “Neccin ɣarneɣ ict n učmatneɣ tameẓyant, ɛad war d as dd-ffiɣen idmaren. Min ɣa negg i učmatneɣ deg wass i di xas i ɣa ssiwřen?”
SOL 8:9 “Mařa nettat d řḥiḍ, ad xas nessbedd acbar [am ijj n ttaj] n nnuqart. Mařa nettat d tawwart, ad tt neqqen s tfeřwin n ukeccuḍ n tengelt.”
SOL 8:10 “Necc d řḥiḍ u idmaren inu am lburjat. Xenni dewřeɣ necc di tiṭṭawin nnes am tenni yufin řeḥna.”
SOL 8:11 “Suliman tuɣa ɣares ijj n umarjeɛ n uḍiř di Baɛl-Hamun. Iwca amarjeɛ nni i iɛessasen. I řɣiǧet nnes qaɛ ijj yiwi-dd ařef n řewzen n nnuqart.”
SOL 8:12 “Aḥwic n uḍiř inu, aqa-t zzat i tiṭṭawin inu. Ařef n řewzen n nnuqart aqa aten i cek, [a] Suliman, u ařfayen i iɛessasen n řɣiǧet zzayes.”
SOL 8:13 “[A cem] tenni izeddɣen deg iḥwicen, iɛciren [nnem] ttesřan [s imezzuɣen nsen] i tmijja nnem, [qqaren:] ‘Ejj ayi ad tt sřeɣ!”
SOL 8:14 “Deɣya, [a] llif inu, egg am yiɣayḍ n wezɣar niɣ am umeẓyan n udaden, x idurar [iccuren] s řeɛcub ittfuḥen.”
ISA 1:1 Řewḥiy n Icaɛya, mmis n Amuṣ, nni iẓra x Yahuda d Urcalim, deg wussan n Ɛuzziya, Yutam, Aḥaz d Ḥizqiya, ijeǧiden n Yahuda.
ISA 1:2 “Sřem, [a] ijenwan, uca sseɣd, [a] tammurt, minzi SIDI issawař: ‘Necc sseymeɣ iḥenjiren u ssemɣareɣ ten, [maca] nitni ɣewwɣen xafi.
ISA 1:3 Afunas issen bab nnes d usnus řmedwed n sidi nnes, [maca] Israil war ɣares bu tussna, řgens inu war dayes teǧi řefhamet.
ISA 1:4 Uct x řgens i ixḍan, řgens [i x iǧa] ddqeř n řmuɛṣiyyet, zzariɛet n iɛeffanen, tarwa n usnexřiɛ. Nitni jjin SIDI, sseḥqaren Amqeddas n Israil, arrin [as-dd] s weɛrur.
ISA 1:5 Mani tᵉttexsem ad tᵉttwawtem ɛad, [umi] kenniw teqqimem tᵉttɣewwaɣem. Azeǧif marra ihřec, uř marra yuheř aṭṭas.
ISA 1:6 Zi třeqqa n uḍar ař azeǧif war dayes tᵉttifed min iṣebḥen! Mɣir iyezzimen, ṭṭeɛbayar d iyezzimen yarezmen, war ten hennḍen, war ten ssyarḍen, war ten ssareḍben s zzect.
ISA 1:7 Tammurt nwem texřa, tineddam nwem sscemḍen tent s tmessi, tammurt nwem ṣṣarden tt ibarraniyyen zzat i tiṭṭawin nwem, aqa-tt d řxirbet axmi ssenqeřben tt ibarraniyyen.
ISA 1:8 Yeǧis n Ṣihyun teqqim ɣar ḍeffar am yict n tɛiccut deg umarjeɛ n uḍiř, am texxant [n uɛessas] deg iyyar n řexyar, am tendint ittwaḥṣaren.
ISA 1:9 Mři SIDI n řɛeskarat war d aneɣ ijji drus min yarewřen, iři nedweř am Sadum, iři negga am Ɛamurra.’”
ISA 1:10 “Sřem i wawař n SIDI, [a] řḥukkam n Sadum! Wcem amezzuɣ i Ccariɛa n AREBBI, [a] řgens n Ɛamurra!
ISA 1:11 Min ɣa ggeɣ s tɣarṣi nwem, iqqar SIDI. Necc jjiwneɣ zi tɣarṣa n wecmaḍ n icarriyyen u zi tadunt n řmař iṣeḥḥen. Idammen n ifunasen imeẓyanen d yezmaren d iɣayḍen war d ayi tteɛjiben.
ISA 1:12 Xmi dd-tᵉttasem ḥima ad tbanem zzat i wudem inu, wi kenniw iɛarḍen i uya, maḥend ad tɛefsem x řemraḥat inu?
ISA 1:13 War d ayi dd-tawyem ɛad tawhibt ibeḍřen. Řebxur ɣari d nnɛi. Ussan n iyuren n jdid d wussan n ssebt d uřaɣi i tmesmunin iqeddsen war zemmareɣ ad ḥemřeɣ [marra] aya, aqa-t d řmuɛṣiyyet, [ɛad uřa] d amuni ifarzen.
ISA 1:14 Řeɛmar inu icarreh ussan n uyur n jdid nwem d řeɛyudat nwem ittwaggen. Aqa aten dewřen ɣari d řeḥmeř, Necc uḥřeɣ ad ten arbuɣ.
ISA 1:15 Xmi tᵉttsarraḥem ifassen nwem, ttřeḥḥfeɣ i tiṭṭawin inu zzaywem. Ɛad mařa kenniw tarnim di tẓaǧit, Necc war tt ttesřiɣ, maɣar ifassen nwem ɛemmaren s idammen.
ISA 1:16 Sirdem, sizdegem ixef nwem, ssiggʷejem tuɛeffna n tmegga nwem zi zzat n tiṭṭawin inu. Sbeddem zi řɣar i tᵉtteggem.
ISA 1:17 Řemdem ad teggem min iṣebḥen, arzum x řḥeqq, wcem afus i wenni iḥsaren, ggem tasɣart i uyujiř, wtem x tajjač.”
ISA 1:18 “Asettiw-dd u ejj aneɣ ad nᵉttemḥakem ak-d wayawya!, iqqar SIDI. Waxxa ddnub nnec d izeggʷaɣen am uzeggʷaɣ iḥedqen, ad dewřen d icemřaren am wedfeř, waxxa d izeggʷaɣen am uzeggʷaɣ yuǧɣen, ad dewřen d icemřařen am tḍuft.
ISA 1:19 Mařa kenniw tɛewwřem, u ad tesřem, [xenni] ad teccem min iṣebḥen n temmurt,
ISA 1:20 maca mařa kenniw tugim uca ad tɣewwɣem, ad kenniw yecc ssif, maɣar aqemmum n SIDI aqa issiweř!”
ISA 1:21 “Mammec tedweř tendint nni dayes řaman d tamɣart n farq-ccɣeř! Nettat tuɣa teccur s řḥeqq, tasegda tuɣa tᵉttnusa dayes, maca řexxu iqettařen.
ISA 1:22 Nnuqart nnem tedweř d kuffu, binu nnem ṣṣuren t ak-d waman.
ISA 1:23 Řḥukkam nnem ttɣewwɣen, aqa ggin ixewwanen d imeddukkař nsen, marra ttexsen tirzifin uca arezzun x arrecwet. Nitni war ttiɣen i uyujiř tasɣart nnes, ddeɛwet n tijjař war ten tᵉttikkwiḍ.”
ISA 1:24 “S uya iqqar Sidi, SIDI n řɛeskarat, Amzemmar n Israil: ‘Uct [xawem]! Necc ad ssfewwjeɣ ixef inu s iɣrimen inu, Necc ad xeřfeɣ ixef inu zi řɛedyan inu.
ISA 1:25 Necc ad wteɣ afus inu xawem, ad kenniw ṣeffiɣ ak-d llixiyya uca marra řexfif nnem ad t weddareɣ.
ISA 1:26 Necc ad [am] wceɣ ɛawed řquḍat nnem am ɣar umezwaru, d ayt n ccwar nnem am ɣar umezwaru. Awarni aya ad am řaɣan: ‘Tandint n tsegda!’ d ‘Tendint dayes řaman!’
ISA 1:27 Ṣihyun ad tᵉttwassenjem s řḥeqq d yinni zzayes ittuben [ad ttwassenjmen] s tsegda,
ISA 1:28 [maca] imɣewwɣen d imednab ad ttwarẓen jmiɛ, uca inni i ɣa iḥeyyden x SIDI, ad ttwaqḍan.
ISA 1:29 Nitni ad seḍḥan zi ssibbet n tcejjura n l’aṣnam nni di temmeẓrem uca kenniw ad tseḍḥam zi ssibbet n iḥwicen nni tixḍarem kenniw.
ISA 1:30 Maɣar kenniw ad tiřim am tcejjart n yigg i zi afar nnes isřaw, u am weḥwic i war ɣar ǧin waman.
ISA 1:31 Ad idweř wenni ijehden d ijj n ufiřu n tiffest u řxedmet nnes d ict n tfeṭṭut, ad arɣen s tnayen idsen munen uca war din iǧi uřa d ijj wi ɣa issxesyen.’”
ISA 2:1 Awař nni iẓra Icaɛya, mmis n Amuṣ, x Yahuda d Urcalim.
ISA 2:2 “Deg uneggar n wussan ad yiři wedrar n Taddart n SIDI ibedd imten x [wedrar] ameqqran qaɛ n idurar. Netta ad iɛdu marra tiwririn uca ad ɣares dd-azzřen marra řegnus.
ISA 2:3 Aṭṭas n řegnus ad ṭṭfen abrid [dinni], ad inin: ‘Asem-dd, ejj aneɣ ad ngeɛɛed ɣar wedrar n SIDI, ɣar Taddart n AREBBI n Yaɛqub, ḥima Netta ad aneɣ isseřmed ibriden nnes u neccin ad nuyur di tebridin nnes!’, maɣar zi Ṣihyun ad dd-teffeɣ Ccariɛa u awař n SIDI zi Urcalim.
ISA 2:4 Netta ad iḥkem jar ccuɛub u ad iḥakem x waṭṭas n řegnus. Nitni ad ggen řesyuf nsen d dduzan u fřitcat nsen d řemwas i wezbar. War issgeɛɛad [ijj n] řgens [ɛad] ssif x [ijj n] řgens [nneɣni] u war darriben ɛad i umenɣi.
ISA 2:5 [A] taddart n Yaɛqub, araḥ-dd ejj aneɣ ad nuyur di tfawt n SIDI.”
ISA 2:6 “Maɣar Cek tenḍared řgens nnec, taddart n Yaɛqub, minzi nitni ccuren s uqarri zi [temmura n] ccarq uca ceɣřen ixef nsen s tbezgiwt am [řgens n] Ifilisṭiniyyen, uca wtin ifassen ak-d tarwa n ibarraniyyen.
ISA 2:7 Tammurt nsen teccur s nnuqart d wureɣ u war din aneggar ɣar txubay nsen. Tammurt nsen teccur s yeysan u war din aneggar ɣar [ubarru n] ikarruten nsen.
ISA 2:8 Tammurt nsen teccur s l’aṣnam, nitni bendqen zzat i řxedmet n ifassen nsen, i min ggin iḍewḍan nsen.
ISA 2:9 [Ammu] i ɣa iɣnes bnadem uca ad issehwa [kuř] ijj n weryaz ixef nnes. War d asen ttsamaḥ!”
ISA 2:10 “Adef ɣar řejruf, nuffar deg ucař zi ssibbet n usnexřiɛ n SIDI u zi ssibbet n řɛezz n lɛaḍama nnes!
ISA 2:11 Tiṭṭawin inefxen n iwdan ad dd-ttwassehwant u acenneɛ n yeryazen ad ihwa. Ad ittwassɛuǧa SIDI waha deg wass nni.
ISA 2:12 Maɣar ass i SIDI ad dd-yas x kuř bu-nnfaxet d umɛeffar u x kuř ijj wenni issɛuǧan ixef nnes, ḥima ad dd-ittwassehwa.
ISA 2:13 X marra ticejjura n tengelt yuɛřan d ittwassgeɛɛden [n wedrar] n Lubnan, x marra ticejjura n řbeǧuḍ n Bacan,
ISA 2:14 x marra idurar iɛeffaren, x marra tiwririn yuɛřan,
ISA 2:15 x kuř lburj yuɛřan, x kuř řḥiḍ n lqelɛa,
ISA 2:16 x marra iɣarruba n Tarcic u x marra řeqcuɛ iɣřan.
ISA 2:17 Nnfaxet n bnadem ad tessehwa u iryazen iɛeffaren ad ttwassehwan. Ad ittwassɛuǧa SIDI waha deg wass nni.
ISA 2:18 L’aṣnam ad ttwabeḍřen marra.
ISA 2:19 [Xenni] ad dd-adfen deg ifran n řejruf d iḥfrawen n temmurt zi ssibbet n usnexřiɛ n SIDI u zi ssibbet n uɛuǧi n lɛaḍama nnes, xmi Netta ad dd-ikkar ḥima ad issnexřeɛ tammurt.
ISA 2:20 Deg wass nni ad inḍar bnadem l’aṣnam nnes n nnuqart d l’aṣnam nnes n wureɣ, inni ggin i yixef nsen ḥima ad asen bendqen, [ařami i ɣa yiřin] i ijarbuɛen d řweḍwaḍat,
ISA 2:21 maḥend ad dd-adfen di tezziyin n řejruf u deg ifran deg weẓru zi tiggʷudi n SIDI u zi ssibbet n řɛezz n lɛaḍama nnes, xmi dd ɣa ikkar ḥima ad issnexřeɛ tammurt.”
ISA 2:22 “Ḥeyydem x bnadem, wenni deg wenzaren nnes iǧa mɣir nnefs, minzi min iɛna netta qaɛ ad xas neḥseb?”
ISA 3:1 “Maɣar xzar, Sidi, SIDI n řɛeskarat, ad ikkes x Urcalim d Yahuda qaɛ aɛekkaz d qaɛ taɣɣarct, qaɛ tamewciwt s ufus n weɣrum d qaɛ tamewciwt s ufus n waman,
ISA 3:2 bu-teɣruḍt d uɛeskari, řqaḍi d unabi, agezzan d umɣar,
ISA 3:3 ameqqran x xemsin d bu-ccan, amcawar, bu-ṣṣenɛet d wenni ɣar iǧa řefhamet n tḥessect n uɛezzem.
ISA 3:4 Necc ad xasen ggeɣ iḥuḍriyyen d řḥukkam nsen u nitni ad xasen sellṭen am mammec ttexsen nitni.
ISA 3:5 Xenni di řgens ad ḥsaren ijj i wenneɣni, aryaz i weryaz [nneɣni], kuř ijj i jjar nnes. Nitni ad hekkweřen ijj i wenneɣni, aḥudri i uwessar, wenni ittwasseḥqaren i wenni ittwacennɛen.
ISA 3:6 Xmi ɣa icebbar ca n yijjen umas di taddart n babas, [ad yini]: ‘Cek ɣarek [ɛad] ijj n upartessu, ittxeṣṣa ad tiřid d amgewwed xaneɣ. Arr řxarbet-a sadu afus nnec!’,
ISA 3:7 [xenni] ad yagi netta deg wass nni, ad yini: ‘Necc war zemmareɣ ad iřiɣ d amesgenfu. War din bu weɣrum u war din bu warruḍ di taddart inu. War d ayi teggem d amgewwed n řgens!’
ISA 3:8 Maɣar tennedref [tendint n] Urcalim u tewḍa Yahuda, minzi iřes nsen d tmegga nsen aqa aten ḍidd i SIDI maḥend ad sɛaren tiṭṭawin n uɛuǧi nnes.
ISA 3:9 Tifras n iɣembab nsen cehhdent xasen. Am Sadum ssawařen nitni s bṭayṭay x ddnub nsen, war ten ssnuffaren. Uct x řeɛmar nsen, maɣar nitni tteggen řɣar deg yixef nsen.”
ISA 3:10 “Inim i umsegged aqa ad yiři mliḥ, aqa ad ccen [s yixef nsen] řɣiǧet n tmegga nsen.
ISA 3:11 Uct x uɛeffan. Uct xas, maɣar ad t xeǧṣen ɛlaḥsab [min ggin] ifassen nnes.
ISA 3:12 Inni ideǧen řgens inu aqa aten d iḥenjiren, uca timɣarin ttṣellṭent xas. [A] řgens inu, inni cek ineddhen, aqa ttɣarran cek, uca řatar n tbridin nnec messḥen t.”
ISA 3:13 “SIDI iwjed ḥima ad icarreɛ, Netta ibedd ḥima ad icarreɛ řegnus.
ISA 3:14 SIDI ad dd-yarfeɛ ddeɛwet ak-d imɣaren n řgens u ak-d řḥukkam nnes, maɣar kenniw tesscemḍem amarjeɛ n uḍiř u min tucarem i imezřaḍ aqa-t di tudrin nwem.
ISA 3:15 Min kenniw yuɣin, aqa třebbzem řgens inu u tᵉtteffẓem iɣembab n imezřaḍ?, iqqar Sidi inu, SIDI n řɛeskarat.”
ISA 3:16 [Ammu] i iqqar SIDI: “Minzi yessis n Ṣihyun daysent nnfaxet, ggurent s irawen geɛɛden, s řexzrat ttɣarrant, am ttraḥent u ttqezqizent s iṣuraf maḥend ad ssṭenṭunent ixeřxařen n iḍaren nsent,
ISA 3:17 ad yarr Sidi inu jdam x taceqquft n uzeǧif n yessis n Ṣihyun uca ad iɛarra SIDI řɛar nsent.”
ISA 3:18 “Deg wass nni ad asent ikkes Sidi inu [marra] řehzuṭ [nsent]: ixeřxařen x iḍaren nsent d řizarat [ttwaceddent] x tenyart d tezriwin timeẓyanin
ISA 3:19 d texrazin di ṣṣifet n tuddimin d timeqyasin d lltamat
ISA 3:20 d iḥewwaqen izewwqen i uzeǧif d ixerxařen d tḥezzamin d tziyyatin ittfuḥen d řeḥruz
ISA 3:21 d txadin n ufus d texrazin n tenzarin
ISA 3:22 d warruḍ n weydud d řizarat d tsebnay d iqurab
ISA 3:23 d tisitin d werruḍ n řeqṭen azdad d tcuccay d funarat n uzeǧif.
ISA 3:24 Deg wemcan [n řefwaḥet] n balsam ad tiři arriḥet, deg wemcam n tḥezzamt [ad yiři] wesɣun, deg wemcan n tcenkukin icuwwaren [ad yiři] uzeǧif aqeccar, deg wemcan n werruḍ iwseɛ [ad tiři] txancet [n wecḍan] u deg wemcan n weẓri d uɛeǧem n wecmaḍ [x teřmect].
ISA 3:25 Iryazen nnem ad wḍan s ssif u ayt n bu-teɣruḍt nnem deg umenɣi.
ISA 3:26 Tiwwura nnes ad cetcant u ad ceḍnent uca nettat ad teqqim x temmurt s ifassen xwan.”
ISA 4:1 “Deg wass nni ad cebbarent sebɛa n temɣarin deg ijj n weryaz, ad qqarent: ‘Neccin ad necc aɣrum nneɣ u ad nessyarḍ ixef nneɣ, ejj aneɣ ad neksi isem nnec waha, ksi řefḍiḥet xaneɣ.’”
ISA 4:2 “Deg wass nni ad idweř UƔEDDU n SIDI d telwizt icewwaren, u řɣiǧet n temmurt d řɛezz d ucewwar i min innejmen n Israil.
ISA 4:3 Min iqqimen n Ṣihyun d wenni iqqimen di Urcalim ɛad, ad asen inin: ‘D amqeddas!’, kuř ijj di Urcalim wenni ittwazemmemen i tudart.
ISA 4:4 Xmi ɣa issird Sidi řexmej n yessis n Ṣihyun u ad isrir zi řwest n Urcalim idammen s Arruḥ n řeḥkam u s Arruḥ icemmḍen,
ISA 4:5 xenni ad igg SIDI deg uziř ijj n useynu x marra Tazeddiɣt x wedrar n Ṣihyun u x tmesmunin nnes u s ǧiřet ddexxan d tissiqt n tmessi ittceɛciɛen, maɣar tiwa marra min iɛuǧen [ad tiři] tqidunt i udurri n tesřit.
ISA 4:6 Ad yiři uɛiccu i tiři s uziř zi řeḥmu u i wemcan n tarewřa d udurri zi řḥemřet d wenẓar.”
ISA 5:1 “Ttexseɣ ad ɣennjeɣ [izři] i llif inu, izři n llif inu x [umarjeɛ] nnes n uḍiř: ‘Llif inu ɣares ijj n umarjeɛ n uḍiř x ijj n wedrar i dd-ittwassgeɛɛden am ijj n yicc n ijj n mmis dehnen t s zzect.
ISA 5:2 Netta inqec i-t u iṣeffa i-t zeg iẓra, iẓẓu t s tzayarin icennɛen. Netta issbedd ijj n lburj di řwesṭ nnes. Inqec dayes tasirt n uḍiř. Xenni tuɣa issitim, aḥwic n tzayart ad dd-yawi aḍiř, maca netta yiwi-dd aḍiř asemmam.’”
ISA 5:3 “[Xenni] řexxu, [a] imezdaɣ n Urcalim d [kenniw] iryazen n Yahuda, ḥekmem jar ayi d umarjeɛ inu n uḍiř!
ISA 5:4 Min zemmareɣ Necc ɛad ad ggeɣ i umarjeɛ inu n uḍiř nni war d as ggiɣ ɛad? Mayemmi ssitimeɣ aqa ad dd-yawi aḍiř mliḥ, [umi] dd yiwi mɣir aḍiř asemmam?
ISA 5:5 [Xenni] řexxu, Necc xseɣ ad awem ssecneɣ min ɣa ggeɣ ak-d umarjeɛ inu n uḍiř: Necc ad kkseɣ afray nnes i t iḥḍan, ḥima ad t řeqḍen qaɛ, ad ggeɣ ict n tazzit di řḥiḍ ař xas i ɣa ɛefsen.
ISA 5:6 Ad t ggeɣ d řexřa, war t zebbaren niɣ ad t carzen, [maca] tazeggʷart d isennanen ad dinni ɣemyen u Necc ad umureɣ iseynuten maḥend war d as tticen anẓar.
ISA 5:7 Maɣar amarjeɛ n uḍiř n SIDI n řɛeskarat d taddart n Israil u iryazen n Yahuda d taɣeddut min xef yarḍa. Iraja řḥeqq, [maca] xzar, tuɛeffna, [iraja] tasegda, [maca] xzar, tɣuyyit.”
ISA 5:8 “Uct x yinni ittseddan taddart ɣar taddart u arennyen iyyar ɣar yeyyar, ař tafed war da iǧi wemcan ɛad u kenniw waha i izeddɣen di řwesṭ n temmurt!
ISA 5:9 Inna ayi SIDI n řɛeskarat deg imezzuɣen inu: ‘S tidett, aṭṭas n tudrin ad dewřent d řxirbet issaggʷaden, [tudrin] timeqqranin d tinni icnan war daysent izeddeɣ ɛad uřa d ijj.’
ISA 5:10 Minzi ɛecra n ifeddanen n umarjeɛ n uḍiř ad awyen mɣir ijj n ubatu, u ijj n uḥumir n zzarriɛet ad yawi mɣir ijj n ifa [n řḥebb n irden].”
ISA 5:11 “Uct x yinni ikkaren zic, arezzun x ccrab u ttɣiman [wsewsen] ař tbambast, [ař] ten isseḥma binu!
ISA 5:12 Řgambri d lharpa d ubendir d temja d binu aqa aten ɣar zzradi nsen, [maca] min ittegg SIDI war ɣares xezzaren, tameggit n ifassen nnes, war tt ttwiřin.
ISA 5:13 S uya ad ittwandeh řgens inu di lmenfa, minzi war ɣares teǧi tussna. Tarwa n taṣiřet n řgens ad heyyfen, ad yaẓeɣ ubarru nsen s ufadi.
ISA 5:14 S uya i ɣa tarzem řaxart aṭṭas tmijja nnes, ad yarzem aqemmum nnes nhřa řeqyas, maḥend ad dayes ihwa řɛezz nnes d ubarru nnes d ddriz nnes d [marra] inni dayes ineggzen [ammu] s řefraḥet.
ISA 5:15 [Xenni] ad ixnes bnadem uca [kuř] aryaz ad ittwassehwa, uca tiṭṭawin n ayt n bu-nnfaxet ad dewřent xezzarent ɣar swadday.
ISA 5:16 [Maca] SIDI n řɛeskarat ad ittwassɛuǧa s řḥeqq u Arebbi d amqeddas ad uttwaqeddes s tsegda.
ISA 5:17 Ad hedden dinni izmaren am [ttheddan] x tkessawt nsen, uca ibarraniyyen ad ccen řexrabi n ayt n bu-wagřa.”
ISA 5:18 “Uct x yinni [ɣarsen] dd-ijebbden řmuɛṣiyyet s tesɣunin n řɣecc uřa d ddenb s iseɣwan [iqebbuzen] n ukarru n iɛejmiyyen,
ISA 5:19 inni iqqaren: ‘Ejj i-t ad yazzeř, ejj i-t ad t igg deɣya ḥima ad t nẓar, uca ccwar n Umqeddes n Israil ejj i-t ad ixecc, ad dd-yas, ḥima ad t nessen!’”
ISA 5:20 “Uct x yenni, min war iḥřin qqaren as iṣbeḥ u min iṣebḥen war iḥři, inni itteggen taǧest d tfawt u tafawt d taǧest, inni itteggen min yarzigen d miẓid u min iziḍen d amarzag.”
ISA 5:21 “Uct x yinni umi ittɣiř asen aqa aten d imiɣisen i yixef nsen, u [uct x yinni iḥessben] ixef nsen d ifehhamen!”
ISA 5:22 “Uct x yinni iǧan d ayt n bu-teɣruḍt ɣar tsessit n binu u [x] yeryazen imeḥḍen ɣar weḥray n ccrab,
ISA 5:23 inni ittsarraḥen i uɛeffan s terzeft [iɣeccen], [maca] kksen tasɣart i imseggaden.”
ISA 5:24 “S uya i ɣa ixsar weẓwar nsen u tanewwact nsen ad tᵉḍuw am tɛejjajt, am mammec ittett iřes n tmessi iɣeǧ u am mammec ihekkwa wurum s uceɛɛař, maɣar nitni nḍaren Ccariɛa n SIDI n řɛeskarat u sseḥqaran zeg wawařen n Umqeddas n Israil.
ISA 5:25 X uya yarɣa weɣḍab n SIDI x řgens nnes uca iksi xas afus nnes. Aqa iwta i-t ařami arjijen idurar u řxecbat nsen meddent x imesraq am wefraḍ. S marra aya war yarexxu weɣḍab nnes, maca afus nnes iqqim isarreḥ.
ISA 5:26 Maɣar ad issgeɛɛed taɛeǧant i řegnus nni iǧan di řaggʷaj, u zeg uneggaru n temmurt ad t iṣeffar ɣares. Xzar, ittas-dd deɣya s tezřa.
ISA 5:27 War ɣares yuḥiř uřa d ijj, uřa d ijjen inqarḍ, uřa d ijjen innudem niɣ iṭṭeṣ, uřa ɣar ijjen war ifsi abyas x tejɛinna nnes niɣ iqeṭṭes as ijj n ufiřu n sandaliyat nnes.
ISA 5:28 Fřitcat nnes qeḍɛent u marra řeqwas nnes ttwameḥḥḍen. Ticeḍyin n yeysan nnes banent qesḥent am uqayas, tijarrarin nnes am tḥaryaḍt.
ISA 5:29 Zzhir nnes am [zzhir n] teyradt u [netta] ittzehhar am yiyraden imeẓyanen. Ad yarruǧed, ad iṭṭef taymart nnes uca ad [tt] ijarr u war ittiři wi t ɣa ifekken.
ISA 5:30 Deg wass nni ad izehhar ḍidd [řgens] am zzhir n řebḥar. Ad xezzaren ɣar temmurt, aqa-tt [mɣir d] taǧest d řeḥṣaret, uca tafawt ad tebbarcen s iseynuten ibbarecnen.”
ISA 6:1 Deg useggʷas n řmewt n ujeǧid Ɛuzziya ẓriɣ SIDI iqqim x řɛarc yuɛřan ittwassgeɛɛden uca afray n warruḍ nnes ittcur Zzawect Tameqqrant.
ISA 6:2 Tiwa nnes bedden isarafiyyen, [lmalakat nni ittbanen am daysen timessi], ɣarsen setta n wafriwen. Qaɛ ijj ɣares setta n wafriwen. S tnayen [n wafriwen] iřeḥḥef aɣembub nnes, s tnayen iřeḥḥef iḍaren nnes u s tnayen tuɣa iṭṭaw.
ISA 6:3 Iřaɣa ijj x wenneɣni, inna: “Amqeddas, Amqeddas, Amqeddas d SIDI n řɛeskarat. Marra tammurt teccur s uɛuǧi nnes!”,
ISA 6:4 ařami nhezzen dsusa n tnebdatin n tewwart s tmijja n wenni iřaɣan uca Taddart teccur s ddexxan.
ISA 6:5 [Xenni] nniɣ necc: “Uct xafi, maɣar ad hellkeɣ, maɣar necc d aryaz bu-iyencicen xemjen u zeddɣeɣ jar řgens n ayt n bu-iyencicen xemjen, [waxxa amenni] tiṭṭawin inu ẓrint Ajeǧid, SIDI n řɛeskarat.”
ISA 6:6 Iḍwa-dd ijj zeg isarafiyyen ɣari. Yarbu řefḥem itteḥduduqen deg ufus nnes nni tuɣa iksi s tjeqqaḍt zeg uɛalṭar.
ISA 6:7 Netta iḥada zzayes aqemmum inu, inna: “Xzar, iḥada [řefhem itteḥduduqen] wanita iyencicen nnec. Temmeksi řmuɛṣiyyet nnec u ittwasseṣřeḥ i ddenb nnec.”
ISA 6:8 Awarni uya sřiɣ i tmijja n Sidi inu, teqqar: “Man wen i ɣa ssekkeɣ u wi ɣa yuyuren maḥend ad izwar i Neccin?” [Xas uca] nniɣ: “Xzar, aqa ayi da, sekk ayi!”
ISA 6:9 [Xenni] inna: “Uyur uca tinid i řgens-a: ‘Waxxa ad tesřem s teynit, war [t] tfehhmem!’, uca: ‘Waxxa teẓrim mliḥ, war [t] tessinem!’
ISA 6:10 Seqseḥ uř n řgens-a, uca belleɛ as imezzuɣen nnes, seřseq as tiṭṭawin maḥend s tiṭṭawin nnes war ittwiři u s imezzuɣen nnes war ittesři u s wuř nnes war ittessen, ařami war iddikkwiř uca ad ittwassgenfa.”
ISA 6:11 [Xenni] nniɣ: “Ař meřmi, [a] Sidi inu?” Netta yarra-dd: “Ař i ɣa ttwaxarrbent tneddam, war [daysent] ittɣimi ɛad umezduɣ, uřa d tudrin, war [daysent] ittɣimi ɛad bnadem, uca ad tiři temmurt tareddeǧ.
ISA 6:12 Maɣar SIDI ad issbeɛɛed iwdan ɣar řaggʷaj, uca ad tiři temmurt texwa aṭṭas.
ISA 6:13 [Maca] ad dayes teqqim ɛad ict n teɛcart, [maca] uřa d man aya ad tᵉttwacc, [maca] am mammec ɣar tcejjart n yigg u ɣar tcejjart n řbeǧuḍ awarni řami tent i ɣa zedmen, ad iqqim ɛad jjdeɛ, [ammu] i ɣa yiři jjdeɛ nnes d zzariɛet tamqeddest.”
ISA 7:1 Deg wussan n Aḥaz, mmis n Yutam, mmis n Ɛuzziya, ajeǧid n Yahuda, igeɛɛed Raṣin, ajeǧid n Aram, ak-d Faqaḥ, mmis n Ramalyahu, ajeǧid n Israil, ɣar Urcalim maḥend ad immneɣ akides. [Maca] netta war izemmar ad xas iɣelleb.
ISA 7:2 [Umi] ḥajan i taddart n Dawud, nnan: “Aqa ihwa Aram x Ifrayim!”, yarjij wuř n ujeǧid d wuř n řgens nnes, am mammec ttarjijint tcejjura n wezɣar s usemmiḍ.
ISA 7:3 Inna SIDI i Icaɛya: “Ffeɣ i umsagar ak-d Aḥaz, cek d mmic Ca’ar-Yacub, ɣar uneggar n uqadus n waman n uyeřman n sennej, wenni [iǧan] ɣar webrid yuɛran ɣar Weḥwic n Uṣebban.
ISA 7:4 Ini as: ‘Ḥḍa, ars, war tteggʷed ca u war ttejji uř nnec ad yarxu x tnayen n isefḍawen n ukeccuḍ idduxxunen, x uxeyyeq yarɣin n Raṣin d Aram, u n mmis n Ramalyahu,
ISA 7:5 umi ixarreṣ Aram di řɣar xak, [jmiɛ] ak-d Ifrayim u ak-d mmis n Ramalyahu, inna:
ISA 7:6 ‘Ejj aneɣ ad ngeɛɛed x [temmurt n] Yahuda uca ad as nessiggʷed uca ad tt nebḍa jar aneɣ u [xenni] ad negg dinni mmis n Ṭabyil d ajeǧid.’
ISA 7:7 Ammu i iqqar Sidi inu, SIDI: ‘Aya war ittiři, aya war ittemmsar ca!’
ISA 7:8 Maɣar azeǧif n Aram d Dimacq u azeǧif n Dimacq d Raṣin - waxxa ammenni iqqim ɛad mɣir xemsa u-settin n iseggʷusa xenni ad yarẓ Ifrayim ař war ittiři [ɛad] d řgens -
ISA 7:9 uca azeǧif n Ifrayim d Samarya u azeǧif n Samarya d mmis n Ramalyahu. Mařa war tuminem, war tᵉttɣimam ad tbeddem.”
ISA 7:10 Yarni SIDI [ɛad] deg wawař ak-d Aḥaz, inna:
ISA 7:11 “Ttar ict n řeɛřamet i yixef nnec zi SIDI, AREBBI nnec, ttar i-tt swadday di raǧaɣ niɣ ttar i-tt dinni sennej di řuɛřa.”
ISA 7:12 [Maca] Aḥaz inna: “Necc war tt ttᵉttareɣ ca u war ttqeǧabeɣ SIDI.”
ISA 7:13 [Xenni] inna netta: “Sřem, [kenniw] [a] taddart n Dawud, ma war kenniw iqedd ad tessiḥřem iwdan, aqa kenniw tessiḥřem [ɛawed] uřa AREBBI inu?
ISA 7:14 S uya ad awem iwc Sidi inu simant nnes řeɛřamet. Xzar, taɛzarect ad teysi ddeyset, ad taru Mmis, ad as tegg ‘Ɛimmanu-Il’, [ixs ad yini ‘SIDI aqa-t akidneɣ’].
ISA 7:15 Netta ad icc trussi d tamment ař ɣa iften ad inḍar min war iḥřin u ad ixḍar min iṣebḥen.
ISA 7:16 Maɣar qbeř i ɣa issen uḥenjir ad inḍar min war iḥřin u ad ixḍar min iṣebḥen, ad texřa temmurt nni n tnayen n ijeǧiden i zi cek tᵉṭṭfed tiggʷudi.
ISA 7:17 Ad issiweḍ SIDI xak u x řgens nnec u x taddart n babac s ufus n ujeǧid n Accur ussan am mammec war dd-usin zeg wass nni di immsebḍa Ifrayim x Yahuda.”
ISA 7:18 “Deg wass nni ad imsar, aqa SIDI ad iṣeffar iẓan [i iǧan] ɣar ineggura n iɣezran n Miṣra uřa d tzizwa [i iǧan] di temmurt n Accur.
ISA 7:19 Ad dd-asen uca ad arsen marra di teɣzurin u di tezziyin n řejruf u x marra řḥarrac u x marra iyeřmamen n řwarud.”
ISA 7:20 “Deg wass nni ad awem iřs Sidi inu s ijj n řmuss i d icra x ujemmaḍ n iɣzar [n Lfuraṭ], s [ufus n] ujeǧid n Accur, [acuwwaf n] uzeǧif d ucuwwaf x iḍaren uřa d tmart.”
ISA 7:21 “Deg wass nni aryaz ad yarebba ict n tɛejmit n ifunasen d tnayen n wuǧi.
ISA 7:22 S tyawant n uɣi i ɣa wcent, ad yecc trussi. Trussi d tamment ad yecc marra wi ɣa iqqimen di temmurt.”
ISA 7:23 “Deg wass nni ad yiři kuř amcam i xef bedden ařef n tzayarin i isekkwan ařef n řewzan n nnuqart, i isennanen d tzeggʷart.
ISA 7:24 Ad uyuren ɣar din s fřitca d řqews, maɣar marra tammurt ad tiři teccur s isennanen d tzeggʷart.
ISA 7:25 Uřa x marra tisawnin nni carrzen s uřizim, war din dd-ttasen [ɛad] zi ssibbet n tiggʷudi zeg isennanen d tzeggʷart. [Tammurt nni] ad tiři ḥima ad arren ɣar dinni ifunasen u ḥima ad [xas] ɛefsen wuǧi.”
ISA 8:1 Inna ayi SIDI: “Ksi tařwiḥt tameqqrant, tarid xas s řeqřem n bnadem [ařami zemmaren ad t ɣaren]: ‘Zzardet s tazřa, takeccaḍt deɣya!’”
ISA 8:2 Řechud imtiqqan iwyeɣ-ten d acehhad i yixef inu: akehhan Uriya d Zakariyya, mmis n Yabraxya.
ISA 8:3 Tuɣa udfeɣ x tnabit u teksi s ddeyset, turuw-dd ijj n uḥenjir. Uca inna ayi SIDI: “Egg as: ‘Mahar-Calal, Xac-Baz!’, [ixs ad yini: ‘Zzardet s tazřa, takeccaḍt deɣya!’]
ISA 8:4 Maɣar qbeř ma ad iřmed uḥenjir ad yini: ‘Baba!’, niɣ: ‘Yemma!’, ad kksen agřa n Dimacq d zzardet n Samarya zzat i wudem n ujeǧid n Accur.”
ISA 8:5 Yarni SIDI deg wawař akidi, inna:
ISA 8:6 “Minzi řgens-a isseḥqar aman yarsan ittazzřen n Ciluha, s uya ifarḥ Raṣin d mmis n Ramalyahu.
ISA 8:7 S uya, xzar, Sidi inu ad yarr aman yewɛaren d imeqqranen n iɣzar [n Lfuraṭ] ad xasen ḥemřen, [ixs ad yini] ajeǧid n Accur d marra aɛuǧi nnes. Ad igeɛɛed zi marra taryiwin nnes u ad dd-issfiy tiwa n marra timuwwa nnes.
ISA 8:8 Ad yadef ɣar Yahuda, ad tt issɣarq uca ad yarni ad ɣares dd-yazzeř ař dd-as i ɣa yaweḍ ař yiři. Xmi ɣa isswiẓẓeḍ afriwen nnes ad dřen tiru n temmurt nnec! [A Ɛimmanu-Il], Arebbi aqa-t akideneɣ.”
ISA 8:9 “Hajam, [a kenniw] řegnus, [maca ɛad] ad tᵉttwařebzem! Ejj marra jjwayeh iggʷejen n ddunect ad wcen imezzuɣen nsen: waxxa tḥezzmem ixef nwem, ad tᵉttwařebzem, waxxa tḥezzmem ixef nwem, ad tᵉttwařebzem!
ISA 8:10 Mcawarem, [maca] amcawar nwem ad ifceř! Inim ijj n wawař, war ittiři, maɣar Arebbi aqa-t akidneɣ, [‘Ɛimmanu-Il’].”
ISA 8:11 Maɣar ammu i d ayi inna SIDI, umi xafi ijhed ufus nnes u iɛřem ayi ḥima war ggureɣ x webrid n řgens-a, inna:
ISA 8:12 “War qqarem ‘Tameɛmuč!’ i marra umi iqqar řgens-a ‘Tameɛmuč!’ War tteggʷedem u war ttnexřiɛem!
ISA 8:13 SIDI n řɛeskarat ad t tessqeddsem, ad zzayes teggʷedem u ad zzayes tennxeřɛem.
ISA 8:14 Netta ad yiři d Zzawect Iqeddsen, d aẓru n unedraf uřa d taṣḍart n uneqraḍ i tnayen n tudrin n Israil, d řfex d tracca i imezdaɣ n Urcalim.
ISA 8:15 Aṭṭas jar asen ad nnqarḍen, ad wḍan, ad ttwarẓen, ad dewřen ɣar řfex uca ad nnaɣen.”
ISA 8:16 “Cfen Cchadet, cemmeɛ Ccariɛa jar imeḥḍaren inu!”
ISA 8:17 “Necc ad rajiɣ SIDI, wenni iřeḥḥfen i uɣembub nnes zzat i taddart n Yaɛqub, xas i ɣa tecřeɣ.
ISA 8:18 Xzar, necc d iḥenjiren nni d ayi iwca SIDI, aqa aneɣ neǧa i řeɛřamat d lmuɛjizat di Israil zi ssibbet n SIDI n řɛeskarat nni izeddɣen x wedrar n Ṣihyun.”
ISA 8:19 “Mařa nnan awem: ‘Seqsam inni issawařan ak-d imettan d igezzanen, inni ittweswisen u ittwecwicen!’, [xenni ini:] ‘Ma war dd-yusi i yijj n řgens ad isseqsa Arebbi nnes? Ma [iɛeddeř ad sseqsan] imettan di ṭṭweɛ n yinni iddaren?’”
ISA 8:20 “[Dewřem] ɣar Ccariɛa u ɣar Cchadet! Mařa war uyuren ɛlaḥsab awař-a, war ɣarsen tᵉttiři tfawt n řefjar.”
ISA 8:21 “Ad inneḍ [řgens] da d diha [di temmurt], icḍen u iǧuz, uca mařa iǧuz uca ixeyyeq, ad inɛeř [řgens] ajeǧid nnes d AREBBI nnes. Ma ad xzaren ɣar ujenna,
ISA 8:22 niɣ ɣar temmurt, [aqa da mɣir] řeḥṣaret d ṭṭřam, ṭṭřam issaggʷad. Ittwassuffeɣ [řgens] ɣar tubbarcent.”
ISA 8:23 “Maca war ittɣimi ṭṭřam issaggʷad mani teǧa řeḥṣaret [řexxu]. Zic yiwi-dd Netta aseḥqar ɣar temmurt n Zabulun u ɣar temmurt n Naftali, ammu i ɣa yawi di řweqt i dd ɣa yasen ccan x webrid n řebḥar, x ujemmaḍ n L’Urdun, ɣar Ljalil n řegnus.”
ISA 9:1 “Řgens i iddaren di taǧest, ad iẓar tafawt tameqqrant. Tiwa nni izeddɣen di temmurt n tiři n řmewt ad tareɣ tfawt.
ISA 9:2 Cek ad temmarnid di řgens u ad tessemɣared řefraḥet. Nitni ad farḥen zzat i wudem nnec am mammec farḥen ɣar tmeyra, am mammec arecgen xmi beṭṭan takeccaḍt ...
ISA 9:3 maɣar [a]zayřu n ddqeř nnes d weɛmud x teɣruḍt nnes d uzeǧaḍ n uweqqaf nnes, aqa tarẓid ten am deg wass n Midyan,
ISA 9:4 maɣar kuř řbuṭa nni yudfen deg uzehhar n umenɣi u kuř apartessu nni marɣen deg idammen, ad ittwassarɣ, ad yiři d macca i tmessi,
ISA 9:5 maɣar ittwaru aneɣ-dd Uḥenjir, immewc aneɣ Mmis uca řeḥkamet tᵉttwassars x teɣruḍt nnes u ttřaɣan as Isem nnes: Řeɛjeb, Amcawar, Arebbi Ijehden, Babas n Řebda, Řḥakem n Řehna.
ISA 9:6 I řemɣaret n řeḥkamet [nnes] u i řehna [nnes] war ittiři qeṭṭu x řɛarc n Dawud u x tgeldit nnes, ḥima ad tᵉttwaḍmen u ad tᵉttwassejhed s řḥeqq d tsegda, zi řexxu ař i řebda. Acḍar n SIDI n řɛeskarat ad igg aya.”
ISA 9:7 “Sidi inu issekk awař ḍidd i Yaɛqub uca iwḍa di Israil.
ISA 9:8 Marra řgens ad [t] issen, Ifrayim d imezdaɣ n Samarya nni iqqaren s nnfaxet u s wuř [iccuren] s ukebbar:
ISA 9:9 ‘[Reḥyuḍ n] llajur wḍan, [maca] ad [ten] nebna [ɛawed] s tṣuḍar ittwassuydan. Urtan n řexřa ttwazedmen, [maca] ad neẓẓu ticejjura n tengelt deg wemcan nsen!’
ISA 9:10 Ad xas issekkar SIDI iɣrimen n Raṣin u Netta ad issehweř řɛedyan nnes [xas].
ISA 9:11 Aram zi ccarq u Ifilisṭiniyyen zi ḍeffar, ařami nitni ad ṣarḍen Israil qaɛ. S marra aya war yarexxu weɣḍab nnes, maca afus nnes iqqim isarreḥ,
ISA 9:12 [maɣar] řgens war dd-idikkwiř ɣar wenni t iwtin u nitni war arezzun SIDI n řɛeskarat.”
ISA 9:13 “Ad iqess SIDI zi Israil azeǧif d ukennas, taseṭṭa n tini d uɣanim, deg ijj n wass.
ISA 9:14 Awessar d wenni umi ɣa yiři ccan, aqa aten d azeǧif, uca anabi nni isseřmaden ixarriqen, netta d akennas.
ISA 9:15 [Maɣar] imgewwaden n řgens-a d imɣekkʷayen u inni zzaysen ittwanedhen ad ttwaṣarḍen.
ISA 9:16 X uya war ifarreḥ Sidi inu x iḥudriyyen nsen, u war yareḥḥem x iyujiřen d tejjař nsen, maɣar marra nitni d imnafqen d iɛeffanen u kuř aqemmum issawař tubbuheřya. S marra aya war yarexxu weɣḍab nnes, maca afus nnes iqqim isarreḥ.”
ISA 9:17 “Maɣar tuɛeffna tareqq am tmessi, tᵉttett isennanen d tzeggʷart, tessreqqa ixeccaben n wezɣar, [ařami] ttgeɛɛaden di ddexxan.
ISA 9:18 S uduqqez [n ufugem] n SIDI n řɛeskarat ad issqusbar tammurt uca řgens ad yiři d macca n tmessi. Uřa d ijjen war ittḥiwiř x wenneɣni.
ISA 9:19 [Waxxa] bnadem inehhec ɣar yefus, ad iqqim iǧuz. [Waxxa] ittett ɣar uzeřmaḍ, war ttyiwinen nitni. Kuř ijj ad isarḍ aysum n uɣiř nnes.
ISA 9:20 Manassa [ad isarḍ] Ifrayim u Ifrayim [ad isarḍ] Manassa uca tnayen idsen munen ad iřin ḍidd i Yahuda. S marra aya war yarexxu weɣḍab nnes, maca afus nnes iqqim isarreḥ.”
ISA 10:1 “Uct x yinni issuffuɣen řumurat iɣeccen, inni ittarin tiweṣṣa ittḍeǧen
ISA 10:2 ḥima ad ssḥeyyden imezřaḍ x tesɣart [nsen] u ḥima ad acaren tasɣart n yinni ittwaḥṣaren n řgens inu, ařami ɣa dewřent tijjař d takeccaḍt nsen u iyujiřen d taymart.
ISA 10:3 [Maca] min texsem ad teggem deg wass n uxeǧeṣ u ɣar ureddeǧ nni dd ɣa yasen zi řaggʷaj? Wi ɣar i ɣa tarewřem ḥima ad tafem twiza u mani ɣa tejjem aɛuǧi nwem?
ISA 10:4 War [din] min ɣa ggen mɣir ad uḍaren [x ifadden] waha jar imeḥbas u ad wḍan jar inni ittwanɣen. S marra aya war yarexxu weɣḍab nnes, maca afus nnes iqqim isarreḥ.”
ISA 10:5 “Uct x Accur, azeǧaḍ n weɣḍab inu, aqa asxeḍ inu d aɛmud deg ifassen nsen!
ISA 10:6 Ad t ssekkeɣ ɣar řgens [iccuren] s nnifaq u Necc ad t umureɣ x řgens i x idduqqez ufugem inu, maḥend ad acaren tukkarḍa u maḥend ad t keccḍen qaɛ u ad t ɛarran i uneɛfas am tɛejjajt x imesraq.
ISA 10:7 Maca netta s yixef nnes war d as ittɣiř ammu u uř nnes ittxarreṣ mammec nneɣni, maɣar netta ɣares deg wuř mɣir řekḥeḍ u maḥend ad iqḍa x řegnus, war iǧi drus.
ISA 10:8 Maɣar iqqar: ‘Ma war ǧin řḥukkam inu d ijeǧiden marra?
ISA 10:9 Ma war [imsar] i Kalnu amecnaw [min imsaren] i Karkamic? Ma war [imsar] i Ḥamat amecnaw [min imsaren] i Arfad? Ma war [imsar] i Samarya am [min imsaren] i Dimacq?
ISA 10:10 Am mammec afus inu iṭṭef tigeldawin n l’aṣnam nni zi ɛdunt řexyařat nsen ineqcen řexyařat n Urcalim d Samarya,
ISA 10:11 ma war tteggeɣ ammu [ɛawed], am mammec i t ggiɣ ak-d Samarya d l’aṣnam nnes, uřa ak-d Urcalim d řexyařat nnes n l’aṣnam?’”
ISA 10:12 “[Maca] xmi ɣa ikemmeř Sidi marra řxedmet nnes x wedrar n Ṣihyun u di Urcalim, [xenni] ad xeǧṣeɣ Necc řɣiǧet n ukebbar deg wuř n ujeǧid n Accur uřa d aɛeffar yuffen di tiṭṭawin nnes,
ISA 10:13 maɣar netta inna: ‘Aya ggiɣ t s ufus inu ijehden u s tiɣit inu, maɣar necc ɣari řeɛqeř. Iymiren n řegnus kkseɣ ten, u řeɛwayeḍ nsen keccḍeɣ ten, u am jjiheř ɣeḍřeɣ řḥukkam [nsen].
ISA 10:14 Am řɛucc, [ammu] yufa ufus inu agřa n řegnus, jarweɣ marra tammurt am mammec jarwen timeǧařin immenḍaren. Uřa d ijj war issenhezzi afriwen, war din wenni yarezmen ajeqmim niɣ ijaw.’
ISA 10:15 Ma ittfeyyec ccaqur qibač i wenni zzayes ittceqqaren? Niɣ ittneffex řmencar zzat i wenni zzayes ittqessen? [Aya iři] axmi aɛmud ittḥenneḍ [aryaz] nni t issgeɛɛden, niɣ axmi aɛmud issgeɛɛed [bab nnes] nni war iǧin d akeccuḍ.”
ISA 10:16 S uya ad issekk Sidi inu, SIDI n řɛeskarat, bu-deǧis jar iryazen nsen iqebbuzen u Netta ad issireɣ timessi sadu aɛuǧi n Accur am yijj n řḥaduq n tmessi.
ISA 10:17 Tafawt n Israil ad tedweř d timessi u Amqeddes nnes d aceɛɛař nni i ɣa icemḍen u ad tecc isennanen d tzeggʷart nnes deg ijj n wass waha.
ISA 10:18 Netta ad yecc aɛuǧi n wezɣar nnes u n řɛirst iṣebḥen nnes s [marra] řeɛmar d weysum [i daysen], uca ad yiři [uɛuǧi nnes] am yijj n umeḥřuc ittraḥen iɣeǧi.
ISA 10:19 Min iqqimen n tcejjura n wezɣar nnes ad yiři drus waha, ijj n uḥudri izemmar ad ten iḥseb.”
ISA 10:20 “Deg wass nni ad yiři min iqqimen n Israil d inni inejmen zi taddart n Yaɛqub war ttɛemmiden ɛad x wenni ten iccaten, maca ad iɛemmed [Israil] x SIDI, Amqeddas n Israil, s řaman iccur.
ISA 10:21 Min iqqimen ad dd-idweř, min iqqimen n Yaɛqub [ad dd-idweř] ɣar Arebbi ijehden.
ISA 10:22 [A] Israil, waxxa řgens nnec ammu iwseɛ am yiǧi n řebḥar, ad [zzaysen] dd-idweř mɣir min iceṭṭen. Akeḥḥeḍ bayen, tasegda tewseɛ.
ISA 10:23 Maɣar Sidi inu, SIDI n řɛeskarat, ad iqḍa [x man aya] uca ad igg min yuran di marra tammurt.”
ISA 10:24 “S uya, ammu i iqqar Sidi inu, SIDI n řɛeskarat: ‘[A] řgens inu nni izeddɣen di Ṣihyun, war tteggʷed ca zi Accur xmi cek iccat s uzeǧaḍ uca issgeɛɛed xak aɛmud, am mammec imsar di Miṣra.
ISA 10:25 Maɣar ɛad mɣir cwayt, [xenni] ad ikemmeř [mkuř] wesxeḍ nni uca ad yiři weɣḍab inu x ureddeǧ nsen.
ISA 10:26 Maɣar SIDI n řɛeskarat ad iḥenneḍ tiwa nnes arekkuḍ, am mammec iwta Midyan ɣar teṣḍart n Ɣurab. Taɣɣarct nnes ad tiři [tesswiẓẓaḍ] tiwa i řebḥar u Netta ad tt issgeɛɛed am mammec t igga di Miṣra.
ISA 10:27 Deg wass nni ad iwḍa řeḥmeř n Accur x teɣruḍt nnec u taɣnact nnes x yiri nnec. Azayřu ad ittwabeṭṭeř s ijiman nni iṣeḥḥen.”
ISA 10:28 “Ad dd-yas ɣar Ɛayyat, iɛdu x Mijrun, issars dduzan nnes di Mixmac.
ISA 10:29 Nitni ɛeddun x webrid n uẓekkwu x idurar, ad ssensen di Jabaɛ. Rama tᵉttarjiji, tarweř Jibɛa n Cawul.
ISA 10:30 Sɣuyy s tmijja ijehden, [a] yeǧis n Jallim! Arr řbař, Layca, [a cem] Ɛanatut, meskina!
ISA 10:31 [Tandint n] Madmina tarweř, imezdaɣ n Jibim ffɣen maḥend ad afen řaman.
ISA 10:32 Ass-a ɛad ad ibedd di Nub. Netta ad iksi afus nnes [issaggʷad] ɣar wedrar n yeǧis n Ṣihyun, ɣar tewrirt n Urcalim.”
ISA 10:33 “Xzar, Sidi, SIDI n řɛeskarat, ad iqess řefruɛ s uɣiř. Inni s tiddi yuɛřan ad ttwazedmen, uca inni issgeɛɛden ixef nsen ad ttwassehwan.
ISA 10:34 Cbarq n wezɣar ad ittwaqřeɛ s wuzzař uca Lubnan ad iwḍa s ufus n Umzemmar.”
ISA 11:1 “Ad dd-teffeɣ Tseṭṭa zi jjdeɛ n Yassa u Taɣeddut zeg iẓewran nnes ad dd-tawi řɣiǧet.
ISA 11:2 Ad xas yarsa Arruḥ n SIDI, Arruḥ n tiɣit d řeɛqeř, Arruḥ n ccwar d jjehd, Arruḥ n tussna d tiggʷudi zi SIDI.
ISA 11:3 Arḍa nnes ad yiři di tiggʷudi n SIDI. War icarreɛ ɛlaḥsab min ttwařant tiṭṭawin nnes, war iḥekkem ɛlaḥsab min ttesřan imezzuɣen nnes.
ISA 11:4 Ad icarreɛ imuqřiřen s tsegda u ad iḥkem imwaḍɛen n temmurt s řḥeqq, [maca] tammurt ad tt iwwet s uzeǧaḍ n uqemmum nnes u s usuḍi n uqemmum nnes ad ineɣ aɛeffan.
ISA 11:5 Tasegda ad tiři d abyas n tejɛinnatin nnes u tidett d abyas x tmeṣṣaḍin nnes.
ISA 11:6 Ad izdeɣ wuccen ɣar izmar, aɣiras ad ijen ɣar iɣayḍ ameẓyan. Aɛejmi d wayrad ameẓyan d řmař iṣeḥḥen [ad iřin] munen uca aḥenjir ameẓyan ad ten indeh.
ISA 11:7 Tafunast d ddub ad hdan [jmiɛ], uca imeẓyanen nsen ad jnen ɣar wayawya uca ayrad ad yecc řum am ufunas.
ISA 11:8 Aḥḍiḍ ad yarr mezři zzat i wexbuc n třefsa u anibu i kksen zeg uṭṭuḍ, ad isswiẓẓeḍ afus nnes ɣar warzam n tfawt [n weḥfur] n ufiɣar.
ISA 11:9 War tteggen řɣar u war tteggen areddeǧ x wedrar inu iqeddsen marra, maɣar tammurt teccur s tussna n SIDI am mammec dřen waman tisi n řebḥar.
ISA 11:10 Deg wass nni ad ibedd Weẓwar n Yassa am tɛeǧant i weyduden. Ɣares ad sseqsan řegnus uca amcan n arraḥet nnes ad yiři icewwar.”
ISA 11:11 “Deg wass nni ad issgeɛɛed Sidi inu afus nnes ict n twařa nneɣnit, ḥima ad isellek min iqqimen n řgens nnes zi Accur, Miṣra, Fatrus, Kuc, Ɛilam, Cinɛar d Ḥamat u zi tegzirin n řebḥar.
ISA 11:12 Netta ad issbedd taɛeǧant i řegnus u ad ijarw ɛawed imenneɛraq n Israil, ḥima ad issmun inni ittwazeǧɛen zi Yahuda zi arebɛa n tɣemmura n temmurt.
ISA 11:13 [Xenni] ad iggʷej wasam n Ifrayim u inni iḥeṣṣaren Yahuda ad ttwaqeḍɛen. Ifrayim war ittisem ɛad zi Yahuda u Yahuda war iḥeṣṣar ɛad Ifrayim.
ISA 11:14 Ad ffɣen ɣar řɣarb axmi ṭṭawen x tɣarḍin n Ifilisṭiniyyen uca munen ad keccḍen ayt n ccarq. Ad sswiẓẓḍen ifassen nsen ɣar Idum d Mu’ab uca ayt n Ɛammun ad asen ṭṭaɛen.
ISA 11:15 Ad iḥarrem SIDI iřes n řebḥar n Miṣra uca Netta ad issgeɛɛed afus nnes x yeɣzar [n Lfuraṭ] s uḥaduq n Arruḥ nnes u ad t iwwet ař ɣa idweř sebɛa n tɣezratin, uca ad yarr aqa zemmaren ad kken x webrid s sandaliyat.
ISA 11:16 Ad [din] yiři webrid iseggmen i min iqqimen n řgens nnes nni i ɣa iceṭṭen zi Accur, am mammec tuɣa iǧa [webrid] i Israil umi dd-igeɛɛed zi Miṣra.”
ISA 12:1 “Deg wass nni ad tinid: ‘Necc ttqadiɣ Cek, [a] SIDI, aqa tuɣa Cek txeyyqed xafi, [maca] aɣḍab nnec inneqřeb u Cek tessfewwajed xafi.
ISA 12:2 Xzar, Arebbi d asenjem inu, necc ad [xas] ttecřeɣ, ɛemmarṣ ad ggʷedeɣ, maɣar SIDi inu, SIDI, aqa-t d jjehd d uzehhid inu, Netta idweř ayi d asenjem.’
ISA 12:3 Kenniw ad taymem aman s řefraḥet zi tařawin n usenjem.”
ISA 12:4 “Deg wass nni ad tinim: ‘Qadam i SIDI, řaɣam Isem nnes, secnem timegga nnes jar řegnus, barrḥem aqa Isem nnes iɛuǧa!
ISA 12:5 Zehhdem i SIDI, maɣar Netta igga timesřayin timeqqranin. Ejj aya ad ittwassen di marra tammurt.
ISA 12:6 Sřiwřew u ɣennej, [a cem] tenni izeddɣen di Ṣihyun, minzi d ameqqran Amqeddas n Israil di řwesṭ nnem.’”
ISA 13:1 Řḥukm issaggʷaden x Babil nni iẓra Icaɛya, mmis n Amuṣ.
ISA 13:2 “Sgeɛɛdem taɛeǧant x wedrar aqeccar, sɣuyyem ɣarsen, ceyyarem s ufus aqa ad adfen zi tewwura n tarwa n taṣiřet!”
ISA 13:3 “Necc umureɣ imqeddasen inu, Necc řaɣiɣ x ayt n bu-teɣruḍt inu di ssibbet n weɣḍab inu, inni ineggzen s řefraḥet x lɛaḍama inu.”
ISA 13:4 “Aqa zzhir n ijj n ubarru [ameqqran] x idurar, am n ijj n řgens imɣar, řḥess n ddriz n tgeldawin, n řegnus usin-dd munen. SIDI n řɛeskarat isedd řɛeskar [nnes].
ISA 13:5 Ad dd-asen zi temmurt tiggʷej, zi ṭṭarf n ujenna, SIDI d řeqcuɛ n wesxeḍ nnes, ḥima ad xarrben marra tammurt.”
ISA 13:6 “Sɣuyyem, maɣar ass n SIDI yudes-dd, ad dd-yas am ureddeǧ zeg Umzemmar x kuřci.
ISA 13:7 X uya dewřen marra ifassen fecřen u wuř n kuř bnadem ifessi.
ISA 13:8 Nitni nnxeřɛen, iřeqqef i-ten weɣnas d řewjeɛ n tarut, ttnezbaren am temɣart ittarun. Kuř ijj ixezzar ɣar wenneɣni, iɣembab nsen [ggin] am yiceɛɛařen [n tmessi].”
ISA 13:9 “Xzar, ass n SIDI ad dd-yas, [s] řeqsaḥet iwɛaren u [s] řḥaduq n weɣḍab [nnes], ḥima ad yarr tammurt d wareddeǧ u ḥima ad zzayes imḥa imednab.
ISA 13:10 Maɣar itran n ujenna d iwrafen n itran war ttejjin ɛad tafawt nsen ad tarɣ, tafuct ad tebbarcen xmi dd ɣa tenqar, uca taziri war ttejji ɛad tafawt nnes ad tceɛceɛ.
ISA 13:11 [Maɣar] ad xeǧṣeɣ i ddunect tuɛeffna nnes u i iɛeffanen řmuɛṣiyyet nsen u Necc ad ssbeddeɣ nnfaxet n imɛeffaren u ad ssehwiɣ nnfaxet n ayt n bu-řexcunet.
ISA 13:12 Ad arreɣ aryaz ad yiři iɣřa x wureɣ azdad, uřa d bnadem x wureɣ iɣřan zi Ufir.
ISA 13:13 X uya ad ssarjijeɣ ijenwan uca ad tenhezz temmurt zeg wemcan nnes zeg uduqqez [n ufugem] n SIDI n řɛeskarat u zeg wass n řḥaduq n weɣḍab nnes.”
ISA 13:14 “Am tɣayḍet n wezɣar injerfen, am wuǧi war ɣares dd-iksi uřa d ijj, [ammu] i ɣa nnqeřben nitni kuř ijj ɣar řgens nnes u kuř ijj ad yarweř ɣar temmurt nnes.
ISA 13:15 Qaɛ wenni i ɣa ittwafen, ad xas cuqen, u qaɛ wenni i ɣa ṭṭfen, ad iwḍa s ssif.
ISA 13:16 Zzat i tiṭṭawin nsen ad ttwaddzen iḥenjiren nsen, ad ttwakeccḍent tudrin nsen u timɣarin nsen ad ttwassnuqqbent.”
ISA 13:17 “Xzar, Necc ad xasen ssḥarrceɣ Imadiyyen, nitni war d asen tecqi nnuqart u ɣarsen nitni ureɣ war isekkwi.
ISA 13:18 Řeqwas nsen ad xarrgen iḥudriyyen, war areḥḥmen ca x řɣiǧet n uɛeddis, u tiṭṭ nsen war tᵉttziǧiz i iḥenjiren.
ISA 13:19 [Tandint n] Babil, talwizt jar tgeldatin, [tenni] d řɛezz d usemɣar n Ikaldaniyyen, ad tedweř am mammec řami tuɣa AREBBI issneqřeb Sadum d Ɛamurra.
ISA 13:20 I řebda war ittɣimi din uřa d ijj, war [dayes] zeddɣen ɛad zi jjiř ař jjiř. Aɛrab war dinni iccit aqiḍun nnes [ɛad] u imeksawen war ttejjin ad tareyyeḥ din [tḥimart nsen] ɛemmarṣ.
ISA 13:21 Řewḥuc n řexřa ad zzřen dinni u tizeddiɣin nsen ad ccurent s mukat, yessis n nnɛamet ad zedɣent dinni uca imuyan [ijennen] ad dinni negzen.
ISA 13:22 Ad ssmiɛɛiwen ifisen ijj ɣar wenneɣni di lqelɛat ittwajjen [n Babil] uřa d uccanen n řexřa di řeqṣur n řehzuṭ. Řweqt nnes ad dd-taweḍ deɣya u ussan nnes war ttzuggarten ca.”
ISA 14:1 “Maɣar SIDI ad iḥinn x Yaɛqub uca ad ifarz Israil ɛad. Netta ad asen iwc řhudnet di temmurt nsen. Abarrani ad kidsen imun u nitni ad dewřen ɣar taddart n Yaɛqub.
ISA 14:2 Řegnus ad ten awyen u ad [ten] ssidfen ɣar wemcan nsen. Taddart n Israil ad ten tᵉṭṭef d tasɣart di temmurt n SIDI, am yisemɣan d tiyya. Ad ḥebbsen inni ten iḥebbsen, uca ad ḥekmen x inni ten iḥeṣṣaren.”
ISA 14:3 “Deg wass i d ac i ɣa issareyyeḥ SIDI zi řeḥriq nnec, zeg unexřiɛ nnec u zi tsexxart nnec iqesḥen i zi ggin ad [asen] tsexxared,
ISA 14:4 ad tessgeɛɛded amettiř-a x ujeǧid n Babil, ad tinid: ‘Mammec issbedd wenni iḥeṣṣaren zi [řeḥṣaret] nnes, [mammec] tᵉttwaqḍa řeqsaḥet?’
ISA 14:5 Yarẓa SIDI aɛmud n iɛeffanen, azeǧaḍ n ayt n bu-ṣṣulṭa,
ISA 14:6 wenni iwtin řegnus deg ijj n uduqqez [n ufugem] s tiyyita břa qeṭṭu, wenni tuɣa iḥekkmen x řegnus s weɣḍab, iḍaffar [i-ten] břa aziǧez.
ISA 14:7 Marra tammurt tarsa, tesqar. [Xenni] duqquzen s řefraḥet.
ISA 14:8 Uřa d ticejjura n umerzi farrḥent zzayek u ticejjura n tengelt n [idurar n] Lubnan [qqarent]: ‘Zeg wami cek tmedded ɣar temmurt, war da dd-ittis uřa d ijjen ɛad ḥima ad aneɣ yarẓ!’”
ISA 14:9 “Řaxart swadday ad tenhezz di ṭṭweɛ nnec, maḥend ad ffɣen nitni ɣar umsagar akidek xmi dd ɣa tased. Di ṭṭweɛ nnec ad tessfaq řexyařat [n imettan], marra řḥukkam n temmurt, ad tegg marra ijeǧiden n temmurt ad kkaren zi řekrasi nsen igellden.
ISA 14:10 Nitni marra ad ṭṭfen deg wawař, ad ac inin: ‘Uřa d cek tdewřed tarehfed, am neccin, [řexxu] cek tarewsed dayneɣ!’
ISA 14:11 Aqa tmenḍar nnfaxet nnec di řaxart, řḥess n lharpat nnec. Sadu nnec ttwabezzɛen iwekkiwen [am řemtaḥ], u ikeccawen d malta nnec.
ISA 14:12 Mammec [teggid] tewḍid-dd zeg ujenna, [cek,] [a yitri n řefjar] ittseqsiqen, mmis n tuffut n řḥař! Mammec tᵉttwarẓed ɣar temmurt, [cek] amarniw n řegnus!
ISA 14:13 Tennid deg wuř nnec: ‘Necc ad geɛɛdeɣ ɣar ujenna, ad ssbeddeɣ řɛarc inu tiwa i yetran n Arebbi, ad qqimeɣ x wedrar n umuni ɣar ṭṭrufa n ccamal qaɛ.
ISA 14:14 Necc ad geɛɛdeɣ tiwa n tqiccatin n iseynuten, ad arwseɣ deg Umɛuǧi x kuřci!’
ISA 14:15 Lla, ad cek dd-ssehwan di řaxart, di řaǧaɣ qaɛ n wanu!
ISA 14:16 Inni cek i ɣa iẓaren, ad dayek jɛaren, ad fehmen [uca ad inin]: ‘Ma wa d aryaz nni issarjijen tammurt, wenni ijjin tigeldin ad nhezzent,
ISA 14:17 wenni yarrin tammurt d řexřa uca yareddeǧ tineddam nnes, wenni war yarxun i imeḥbas nnes ad arekkʷeḥen?’
ISA 14:18 Marra ijeǧiden n řegnus, marra nitni zzřen [din] di ccan, kuř ijj di taddart nnes.
ISA 14:19 [Maca] cek tmenḍared, ssiggʷejen cek x wenḍeř nnec, [am] ict n nnɛi n tɣeddut [mmenḍaren tt], ssduryen tt s imettan ittwassnuqqben s ssif, inni dd ɣa ihwan ɣar iẓra n tesraft [n wenḍeř], am řxecbet i x ɛefsen.
ISA 14:20 War temmarsed deg wenḍeř d ijjen akidsen, maɣar txarrbed tammurt nnec uca tenɣid řgens nnec. Zzariɛet n iɛeffanen ɛemmarṣ war tt ittidaren i řebda.
ISA 14:21 Swejdem ṭṭabřa n tɣarṣt i iḥenjiren nnes x řmuɛṣiyyet n ibabaten nsen, maḥend nitni ɛemmarṣ war ttbeddin [ɛad], ad warten tammurt uca ad ccuren udem n temmurt s tneddam.
ISA 14:22 Necc ad xasen kkareɣ, [ammu] i issawař SIDI n řɛeskarat, Necc ad teḥḥiɣ zi Babil [kuř] isem d [marra] min iqqimen, am mmis uřa d mmis n mmis, ammu i iqqar SIDI.
ISA 14:23 Necc ad arreɣ [Babil] d tasɣart n twuct n ǧiřet uřa d iyeřmamen. Ad ten mḥiɣ s tmedwast n ureddeǧ, [ammu] i iqqar SIDI n řɛeskarat.”
ISA 14:24 SIDI n řɛeskarat ijjuǧ, inna “S tidett, am mammec Necc i tt xarrṣeɣ, ammu i ɣa imsar, am mammec Necc i tt uriɣ, ammu i dd ɣa yas.
ISA 14:25 Aqa Necc ad arẓeɣ Accur di temmurt inu u ad xas ɛefseɣ x idurar inu, ḥima [a]zayřu nnes ad zzaysen ittwaksi u řeḥmeř nnes ad iwḍa x tɣarḍin nsen.
ISA 14:26 Wa d acawar nni ittwaggen x marra tammurt u wa d afus i isswiẓẓḍen i marra řegnus.
ISA 14:27 Maɣar SIDI n řɛeskarat ixarreṣ aya, man wen izemmaren ad t ibḍeř? Aqa afus nnes isswiẓẓaḍ i-t, man wen izemmaren ad t yarr [ɣar uɣezdis]?”
ISA 14:28 Deg useggʷas n řmewt n Aḥaz, yusa-dd řḥukm issaggʷaden wanita:
ISA 14:29 “War farreḥ, [a cem,] marra [tammurt n] Filicit, aqa akeccuḍ nni cem iwtin, ittwarẓ, maɣar zeg weẓwar n ufiɣar ad dd-iffeɣ urefsiw amesmum u řɣiǧet nnes ad tiři d řḥaycet icemḍen iṭṭawen.
ISA 14:30 Imenza n imuqřiřen ad hdan [s řhudnet] uca imezřaḍ ad zzřen di řaman, [maca] ad nɣeɣ aẓwar nnem s řaẓ uca [arefsiw] ad ineɣ min zzayem iqqimen.”
ISA 14:31 “Ru, [a] tawwart, sɣuyy, [a] tandint, aqa fecřen marra [imezdaɣ n] Filicit! Maɣar zi ccamal ad dd-yas ddexxan uca uřa d ijjen ad yaggʷej zeg iseddiyyen nnes n řɛeskar.”
ISA 14:32 “Min i dd ɣa yarren x ireqqasen n řgens?” “Aqa SIDI igga [dsas] n Ṣihyun ḥima řmusakin n řgens nnes ad ɣares arewřen!”
ISA 15:1 Řḥukm issaggʷaden x Mu’ab. “Di ǧiřet ittwahdem Ar-Mu’ab, idweř issusem, wah, di ǧiřet ittwahdem Qir-Mu’ab, idweř issusem!
ISA 15:2 Geɛɛden ɣar Bayit d Dibun, ɣar řegɛudi ḥima ad run. [Dinni] ad iru Mu’ab x Nabu d Maydaba. Qaɛ azeǧif nsen iřsa d aqeccar, marra timira ttwaḥeffent.
ISA 15:3 Beysen s txuncay [n wecḍan] deg izniqen nsen, aqa [din] mɣir tɣuyyit x tzeɣwin nsen u deg wazzayen nsen, imeṭṭawen weṭṭan-dd [x uɣembub].
ISA 15:4 Ḥacbun isɣuyyu, uřa d Aliɛala. Ttesřan i tmijja nsen ař Yahaṣ. X uya sɣuyyun [uřa d] iryazen n Mu’ab nni ɣar iǧa řesnaḥ, buḥbeř [n mkuř aryaz] ifceř dayes.”
ISA 15:5 “Uř inu isɣuyyu x Mu’ab. Imarwařen nnes iwḍen ař [tandint n] Ṣuɣar, [tenni iǧan am] taɛejmit n třata n iseggʷusa. Am ttrun ttgeɛɛaden tasawent n Luḥit, [wah,] deg webrid ɣar Ḥurunayim ssgaɛɛaden nitni taɣuyyit n txessart.
ISA 15:6 Wah, aman n Nimrim ad dewřen imucan xřan, [wah,] arbiɛ isřaw, aɣemmuy n arbiɛ iqḍa, war ittiři ɛad uɣemmuy aziza.
ISA 15:7 X uya ad arbun min iceṭṭen d min [ɛad] ɣarsen, ɣar ujemmaḍ n iɣzar n Iṣefṣafen.
ISA 15:8 Wah, ad dd-teffeɣ tɣuyyit n ucetci di temmurt n Mu’ab, aweɛɛeḍ nnes [ad dd-iffeɣ] ař Ajlayim, aɣuyyi s imeṭṭawen ař Bi’r-Ilim.
ISA 15:9 Ɛad ccuren waman n Dimun s idammen, waxxa Necc ad arenyeɣ x Dibun ɛad ktar: ayrad [ad dd-yas] x yinni dd-yarewřen zi Mu’ab, x min iqqimen di temmurt.”
ISA 16:1 “‘Sekkem [ddmani ccuren s] izmaren n řḥakem n temmurt, zi Salaɛ ɣar řexřa, ɣar wedrar n yeǧis n Ṣihyun!’
ISA 16:2 Am ijḍaḍ yarewřen, ittwasseḍwen zi řɛucc, ammu i ɣa ggent yessis n Mu’ab ɣar imucan n uẓekkwu n [yeɣzar] n Arnun.
ISA 16:3 ‘Awyem [xenni] ccwar, ksim awař, ggem tiři nnem am ǧiřet deg uziř, snuffar imetlaɛ, war znuzi inni yarewřen!’
ISA 16:4 ‘Jjem inni zzayi x yuẓẓřen ad ɣarem qqimen, [a] [tammurt n] Mu’ab! Iři d adurri i nitni zzat i wudem n umteḥḥay!’” “Řeḥṣaret [maca] ad tbedd, ateḥḥi ad iqḍa, inni iɛeffsen x temmurt ad mweddaren zi temmurt.
ISA 16:5 Řkursi igellden ad ittwacedd s tmexsiwt icuwwaren u Netta ad xas iqqim di tidett deg Uqiḍun n Dawud, Netta d wenni iḥekkmen d wenni yarezzun řḥeqq uca issefřeḥ tasegda.”
ISA 16:6 “Neccin nesřa x nnfaxet n [temmurt n] Mu’ab, aqa nettat d taɛeffart ař ṭṭarf. Taɛeffart nnes d nnfaxet nnes d zzɛamet nnes, aqa [marra] řhard nnes ixwan war iǧi ca nican.
ISA 16:7 S uya i ɣa tru [temmurt n] Mu’ab x Mu’ab, marra nitni ad run, ad sɣuyen x zzbib n Qir-Ḥarisat, nitni dewřen ttwaɣeřben qaɛ.
ISA 16:8 Maɣar isřawent tzayarin deg imarjaɛen n uḍiř n Ḥacbun. Tiseḍwin n ḍḍiřect n Sibma arennyent řḥukkam n řegnus. Tiseḍwin yiwḍent ař Yaɛzir, suḥent di řexřa, bezzɛent, aqa ẓwant řebḥar.
ISA 16:9 X uya ttruɣ [x] ḍḍiřect n Sibma, am mammec ruɣ x Yaɛzir. Ssuɣ cem s imeṭṭawen inu, [a, tineddam n] Ḥacbun d Aliɛala, minzi ruḥen iɣuyyan n usřiwřew zi tini nnem n unebdu u zeg weřqaḍ nnem.
ISA 16:10 Tḥeyyed řefraḥet d zzhu zeg iyyar[en] isseɣmayen n tfeǧaḥt, war ttɣennijen u war sřiwřiwen [ɛad] deg imarjaɛen n uḍiř. Wenni yareffsen war yareffes [ɛad] aḍiř di tsiřt [n uḍiř]. Ssbeddeɣ Necc řeɛyudat n usřiwřew.
ISA 16:11 X uya sɣuyyunt tekricin inu am yijj n řgambri x Mu’ab, u daxeř inu x Kir-Ḥaris.
ISA 16:12 Xmi i ɣa yaḥeř Mu’ab x řgeɛɛdet [mani ttqeddamen tiwhibin nnes] uca ad yadef ɣar zzawect nnes iqeddsen ḥima ad iẓẓaǧ, [xenni] ad ẓaren aqa Mu’ab war izemmar ad igg walu.”
ISA 16:13 Wa d awař i issiweř SIDI x Mu’ab.
ISA 16:14 [Uca] řexxu issawař SIDI, iqqar: “Di třata n iseggʷusa ɛlaḥsab iseggʷusa n ucewwař, ad idweř uɛuǧi n Mu’ab ittwasseḥqar ak-d marra abarru nni ameqqran. Min [zzayes] i ɣa iqqimen, ad yiři drus qaɛ, war iǧi aṭṭas.”
ISA 17:1 Řḥukm issaggʷaden x Dimacq. “Aqa da, Dimacq war tᵉttiři ɛad d tandint, ad tedweř d řxarbet ittwahedmen.
ISA 17:2 Tineddam n Ɛaruɛir ad dewřent xřant, ad iřint i tḥimriwin. Tina ad dinni zzřent uca uřa d ijjen war tent issfeɛfiɛ.
ISA 17:3 Ad tᵉttwaqḍa x lqelɛa zi Ifrayim uřa x tageldit zi Dimacq u x min iqqimen n Aram. Nitni ad asen imsar am mammec imsar i uɛuǧi n ayt n Israil, [ammu i] iqqar SIDI n řɛeskarat.”
ISA 17:4 “Deg wass nni ad isřaw uɛuǧi n Yaɛqub uca ad tedweř tadunt n arrimet nnes teqqiǧet.
ISA 17:5 Ad yiři axmi ittqebbeḍ wenni imejjaren imendi ibedden uca imejjar uɣiř nnes tidrin, ad yiři axmi ijj iřeqqeḍ tidrin di teɣzurt n Irafawiyyen.
ISA 17:6 Ad iqqim [mɣir] ijj n uceṭṭi i weřqaḍ, am ɣar wezwaḍ n izemmuren, tnayen niɣ třata [n tzitunin] ɣar tqiccet n taseṭṭa sennej, uca arebɛa niɣ xemsa ɣar tiseḍwin iɣemmayen aṭṭas, [ammu i] iqqar SIDI, AREBBI n Israil.”
ISA 17:7 “Deg wass nni ad ixzar bnadem x wenni t iggin u tiṭṭawin nnes ad ẓaren Amqeddas n Israil.
ISA 17:8 War ittwaři iɛalṭaren, řxedmet n ifassen nnes, uřa d min iggin iḍewḍan nnes war t iẓẓar, tirebbin n cwarti lla uřa d ipilaren n arebbi n tfuct lla.”
ISA 17:9 “Deg wass nni ad iřint tneddam nnes ifaryen am wemcan ixřa deg wezɣar u taqiccet n wedrar nni jjin zzat i tiṭṭawin n ayt n Israil, ad yiři d amcan ittwareddǧen.
ISA 17:10 Maɣar cek tᵉttud AREBBI n usenjem nnec, war teɛqiřed x Teṣḍart nnec ijehden. X uya tᵉtteẓẓud aɣemmuy iḍarfen uca tzarrɛed tiɣeddutin tibarraniyyin.
ISA 17:11 Deg wass nni di tent teẓẓuḍ, ad tent tfaryed, u ɣar uteffu tejjid zzariɛet nnem ad tessfuffi: [d man aya] d tamejra iɛurrcen deg wass n řeḥřac nnec d řeḥriq war ittgenfin.”
ISA 17:12 “Uct x ubarru n řegnus nni izehharen am zehharen řebḥur, uřa [uct x] ddriz n ccuɛub nni [iggin] am řeḥweř n waman imeqqranen inhewřen!
ISA 17:13 Ad hewřen ccuɛub am řeḥweř n waman imeqqranen, [maca] Netta ad ten yarebba u nitni ad arewřen ɣar řaggʷaj. Ad ittwaɛarn [ubarru n řegnus] am uřum x idurar [ittwaɛarnen] zeg usemmiḍ, am [useynu n tɛejjajt] tenneḍ as-dd tḥaryaḍt.
ISA 17:14 Ɣar řweqt n tmeddit, xzar, anexřiɛ! Qbeř ma ad iṣbeḥ řḥař, war iǧi netta ɛad. Ta d tasɣart n yinni d aneɣ ikeccḍen, zzhar n yinni d aneɣ yucaren.”
ISA 18:1 “Uct x temmurt n řḥess n wafriwen, tenni ɣar urendad iɣezran n [temmurt n] Kuc,
ISA 18:2 tenni issekken imsekkan [nnes] x řebḥar, di tɣarrabutin n uɣanim tiwa i waman. Uyurem, [a kenniw] ireqqasen ifsusen, ɣar ijj n řgens izzuggarten u ittwessgen [n teřmect], ɣar ijj n řgens nni zi ggʷeden zeg wami iǧa u zi ssa tsawent, ɣar řgens nni ittamaran řebda u iɛeffes, wenni zi qeḍɛen iɣezran tammurt nnes.
ISA 18:3 [A kenniw] marra imezdaɣ n ddunect d yinni izeddɣen x temmurt xmi ɣa ssgeɛɛden taɛeǧant x idurar, [xenni] ad [t] tẓarem, u xmi ɣa suḍen deg uyicc n icarri, ad [t] tesřem!”
ISA 18:4 “Maɣar ammu i d ɣari inna SIDI: ‘Necc ad ḥḍiɣ di řhudnet x řɛarc inu, am řehmu yareqqen ɣar ṭṭḥa [n uziř], am useynu [iccuren s] nnḍa ɣar řehmu n ṣṣabet.’
ISA 18:5 Maɣar qbeř ṣṣabet, xmi ɣa ikemmeř nnuwwar, tedweř tnewwart d aḍiř inenna, ad izbar Netta izbiren s ijeqqaḍen n wezbar, ad ikkes arbiben, ad ten iqḍu.
ISA 18:6 Nitni marra ad ttwajjen i ijḍaḍ ittkeccaḍen x idurar u i řewḥuc n temmurt. Deg unebdu ad xasen arsen ijḍaḍ ittkeccaḍen u di řmecta ad xasen arsen řewḥuc n řexra.
ISA 18:7 Di řweqt nni ad awyen ict n tarzeft i SIDI n řɛeskarat: ijj n řgens izzuggarten d ittwessgen [n teřmect] - u [man aya] zeg ijj n řgens imeggʷed zzayes zeg wami iǧa d tsawent, zeg ijj n řgens nni ittamaren řebda u iɛeffes, nni zi qeḍɛen iɣezran tammurt nnes - ɣar wemcan n Yisem n SIDI n řɛeskarat: ɣar wedrar n Ṣihyun.”
ISA 19:1 Řḥukm x Miṣra. “Xzar, SIDI innya x ict n tseynut ittazzřen. Netta yudef ɣar Miṣra uca l’aṣnam ad arjijen zzat i wudem nnes u ayt n Miṣra ad asen ifceř wuř deg idmaren nsen.
ISA 19:2 Maɣar ad ssḥarrceɣ Imiṣriyyen x Imiṣriyyen, maḥend kuř ijj ad immneɣ ak-d umas, u kuř ijj ak-d wajjar nnes, tandint ak-d tendint, tageldit ak-d tgeldit.
ISA 19:3 Buhbeř n Imiṣriyyen ad yarjef daysen u Necc ad fesxeɣ ixarriṣen nsen. [Xenni] ad sseqsan l’aṣnam nsen d yinni ittɛezzmen uřa d yinni issawařen ak-d imettan d igezzanen.
ISA 19:4 Ad ggeɣ Imiṣriyyen deg ufus n aytbab iqesḥen uca ajeǧid iwɛaren ad xasen iḥkem, [ammu i] iqqar Sidi, SIDI n řɛeskarat.
ISA 19:5 Aman di řebḥar ad aẓɣen u iɣzar ad idweř d ijdi, ad yaẓeɣ.
ISA 19:6 Iɣezran ad arxun i arriḥet yursuḍen u iɣezran n Miṣra ad arsen uca ad aẓɣen, aɣanim d telga ad isřawen.
ISA 19:7 Ddmani n tarewsa ɣar Nil, ɣar uqemmum n iɣzar [n Nil], uřa d marra tammurt ɣar iɣezran mani zarrɛen, ad aẓɣen, ad ttwakksen, war ttiřin ɛad.
ISA 19:8 Ibeḥriyyen n iseřman ad ceḍnen u marra inni inḍaren tasennart nsen deg iɣzar [n Nil], u inni ibezzɛen tracca n udellaɛ x waman, ad isřawen [zeg wecḍan].
ISA 19:9 Inni ixeddmen tiffest azdad meccḍen ad seḍḥan, uřa d idarrazen n řkettan d acemřař.
ISA 19:10 Ad ttwaddzen ipilaren n temmurt, marra inni ixeddmen di ṭṭweɛ n řmunet icḍen as řeɛmar.”
ISA 19:11 “Wah, řḥukkam n Ṣuɛan d ibuhařiyyen, ccwar n imcawaren imiɣisen n firɛun idweř ibbuhři. Mammec tzeɛɛmem ad teqqarem [ɛad] i firɛun: ‘Necc d mmis n imiɣisen, mmis n ijeǧiden n wecḥař uya?’
ISA 19:12 Mani ǧan xenni imiɣisen nnec? Ejj i-ten ad ac ssargben u ad [cek] ssecnen min ixarreṣ SIDI n řɛeskarat ḍidd i Miṣra!
ISA 19:13 Řḥukkam n Ṣuɛan dewřen d ibuhařiyyen, ttwacemten řḥukkam n Nuf. Ad ssweddaren Miṣra, [aqa] inni d iẓra n teɣmart n tqebbař nnes.”
ISA 19:14 “SIDI ikebb di Miṣra buḥbeř issdewwaxen di řwesṭ nnes. Nitni ssweddaren Miṣra di marra min igga, am umeskar iweddar di tɛuqqit nnes.
ISA 19:15 War ittiři [ɛad] i Miṣřa min ɣa yegg, min izemmar ad [t] igg uzeǧif niɣ akennas, taseṭṭa niɣ aɣanim.”
ISA 19:16 “Deg wass nni ad iřin Imiṣriyyem am temɣarin. Ad arjijen, ad nnxeřɛen zi ssibbet n wenhezzi [issaggʷaden] n ufus n SIDI n řɛeskarat, i zi ɣarsen i ɣa inhezz ssa d ssa.
ISA 19:17 Tammurt n Yahuda ad tedweř d amedya n unexřiɛ i Imiṣriyyen. Marra wenni t ittidaren, ad innexřeɛ zi ssibbet n uxarreṣ n SIDI n řɛeskarat nni xasen ixarreṣ.”
ISA 19:18 “Deg wass nni ad din iřint xemsa n tneddam di temmurt n Miṣra, ad [din] ssiwřen [iwdan] iřes n Kenɛan uca ad jjaǧen ɣar SIDI n řɛeskarat. Ict n zzaysent ad as qqaren ‘Ir-ha-Heres!’, [‘Tandint n wareddeǧ’].
ISA 19:19 Deg wass nni ad [din] yiři ijj n uɛalṭar di řwesṭ n temmurt n Miṣra u ijj n umayḍu [iqeddsen] ɣar weymir nnes.
ISA 19:20 Aya ad yiři d řeɛřamet d cchadet i SIDI n řɛeskarat di temmurt n Miṣra: xmi ɣa řaɣan i SIDI zi ssibbet n yinni ten iḥeṣṣaren, Netta ad ɣarsen issekk Amsenjem d ameqqran, u wanita ad ten ifekk.
ISA 19:21 Ad idweř SIDI ittwassen ɣar Imiṣriyyen uca Imiṣriyyen ad ssnen SIDI deg wass nni. Nitni ad as sexxaren s tɣarṣt d tewhibt [n řɣiǧet] uca ad wcen awař i SIDI u ad t kemmřen.
ISA 19:22 Ad iwwet SIDI Imiṣriyyen s tiyyita, Netta ad [ten] iwwet u ad [ten] issgenfa. Nitni ad dd-dewřen ɣar SIDI u Netta ad yejj ixef nnes ad ittwasseṣřeḥ s tẓaǧit yuǧɣen nsen u ad ten issgenfa.”
ISA 19:23 “Deg wass nni ad [din] yiři webrid ameqqran zi Miṣra ař Accur. Ayt n Accur ad dd-asen di Miṣra uca Imiṣriyyen di Accur. Ad [as] ɛebden Imiṣriyyen [i Netta] [jmiɛ] ak-d ayt n Accur.”
ISA 19:24 “Deg wass nni ad yiři Israil d wiss třata ak-d Miṣra d Accur, d lbaraka di řwesṭ n temmurt.
ISA 19:25 Maɣar SIDI n řɛeskarat ad ten ibarek, ad yini: ‘Iři ad ittwabarek řgens inu Miṣra, u řxedmet n ifassen inu Accur, uřa d tasɣart inu Israil!’”
ISA 20:1 Deg useggʷas nni di dd-yusa ukumandar n řɛeskar ɣar Acdud, umi t issekk Sarjun, ajeǧid n Accur, u immneɣ netta ak-d Acdud uca iṭṭef i-t,
ISA 20:2 di řweqt nni tuɣa issawař SIDI, s uqemmum n Icaɛya, mmis n Amuṣ, inna: “Uyur, sars arruḍ n txancet [n wecḍan] nni x tejɛinna nnec u kkes sandaliyat nnec x iḍaren nnec!” Igga i-t [Icaɛya], iggur d aɛaryan u s řeḥfa x iḍaren nnes.
ISA 20:3 [Řexdenni] inna SIDI: “Am mammec iggur umsexxar inu Icaɛya [řexxu ɛad] třata n iseggʷusa d aɛaryan u s řeḥfa da d diha, am řeɛřamet u am yijj n řeɛjeb i Miṣra u i Kuc,
ISA 20:4 ammu i ɣa indeh ujeǧid n Accur imeḥbas n Miṣra d imenfiyyen n Kuc, ameẓyan d umeqqran, aɛaryan d uḥefyan n iḍaren, uřa s ddabub iɛarran, [aqa] d řefḍiḥet i Miṣra.
ISA 20:5 [Xenni] ad ggʷeden u ad seḍḥan zi ssibbet n ayt n Kuc i ɣar tuɣa xezzaren d ca, u zi ssibbet n Imiṣriyyen, afeyyec nsen.
ISA 20:6 Imezdaɣ n temmurt-a x tma n řebḥar ad inin deg wass nni: ‘Xzar, ammu i imsar i wenni ɣar nxezzar d ca, d wenni ɣar narweř ḥima ad narzu twiza, ḥima ad nettwafekk zi zzat n wudem n ujeǧid n Accur. Mammec [xenni] nzemmar ad nenjem [řexxu]?’”
ISA 21:1 Řḥukm issaggʷaden x řexřa n řebḥar. “Am mammec ttazzřent tḥaryaḍin di [Temmurt n] Ljanub, [ammu i] ɣa iffeɣ netta zi řexřa, zi temmurt issaggʷaden.
ISA 21:2 Tusa-dd ɣari ijj n řewḥiy iqseḥ: ‘Aɣeddar ittegg s řeɣdaret u amteḥḥay ad iteḥḥa. Geɛɛed-dd, [a] Ɛilam, ḥṣar, [a] Maday!’ Necc ad ssbeddeɣ marra azehhar nnes.
ISA 21:3 X uya tteksent dayi tejɛinnatin inu, u ṭṭfen ayi řewjeɛ n tarut am řewjeɛ n ict n temɣart ittarwen. Necc ttnezbareɣ xmi [d as] ttesřiɣ, nnxeřɛeɣ umi t ttwařiɣ.
ISA 21:4 Uř inu innejref, aqarqeb [nnes] issenhezza dayi tiggʷudi. Tbambast n tmeddit nni wehhceɣ aṭṭas, igga ayi tt d řɛurret.”
ISA 21:5 “Srusa-dd ṭṭabřa, sbedd aɛessas, ecc, su!” “Kkarem, [a] řḥukkam, dehnem taseddart [n useřqi]!”
ISA 21:6 Maɣar ammu i d ayi inna Sidi: “Uyur, egg ijj n uɛessas, ejj i-t ad ixebbar min ittwařa!”
ISA 21:7 Aqa iẓra iryazen nni inyin x yeysan, tyuya n imnayen ak-d tyuya nneɣni, ijj n ukaravan n yeɣyař d ijj n ukaravan n iřeɣman. Tuɣa iḥeṭṭa mliḥ, mliḥ aṭṭas.
ISA 21:8 [Xenni] iřaɣa wenni tt iẓrin: “[A] Sidi inu, deg wass ttbeddiɣ břa qeṭṭu x wecbar n tɛessast u kuř ǧiřet ttɛesseɣ.
ISA 21:9 Xzar, diha usin-dd iryazen nni inyin x yeysan, tyuya n imnayen ak-d tyuya nneɣni!” [Ɛawed] iṭṭef netta deg wawař, inna: “Tewḍa [tendint n] Babil, tewḍa, d marra řexyařat ineqcen n irebbiten nnes iřbez i-ten x temmurt!”
ISA 21:10 [A] asarwat inu, [a] mmis n unedrar inu! Min sřiɣ zi SIDI n řɛeskarat, AREBBI n Israil, xebbareɣ kenniw xas.
ISA 21:11 Řḥukm issaggʷaden x Duma. “Zi Saɛir řaɣan ayi-dd: ‘Aɛessas, mecḥař [ɛad] ɣa tekk ǧiřet? Aɛessas, mecḥař [ɛad] ɣa tekk ǧiřet?’
ISA 21:12 Inna uɛessas: ‘Yusa-dd uteffu n řḥař, uřa d ǧiřet [tusa-dd]. Mařa kenniw texsem ad tesseqsam, seqsam! Dewřem-dd, asem-dd!’”
ISA 21:13 Řḥukm issaggʷaden di tmeddit. “Deg wezɣar di [temmurt n] Weɛraben ad tessensem, [a kenniw], ikaravanen n ayt n Dadan!
ISA 21:14 Uyurem ɣar wumsagar ak-d wenni iffuden ḥima ad as tawyem aman! Imezdaɣ n temmurt n Tayma ffɣen-dd ɣar umsagar ak-d umarwař s weɣrum.
ISA 21:15 Maɣar nitni arewřen zi řesyuf, zi ssif i dd-ittwajebden, zi řqews ittwameḥden u zi řeɣben n umenɣi.
ISA 21:16 Maɣar ammu i d ayi inna Sidi inu: ‘Ɛad deg ijj n useggʷas, ɛlaḥsab iseggʷusa n ucewwař, [xenni] ad iqḍa marra x uɛuǧi n Qidar!
ISA 21:17 Řqedd n ayt n bu-řqews iqqimen, ayt n bu-teɣřudṭ n Qidar, ad yiři drus waha, maɣar SIDI, AREBBI n Israil d wenni innan [aya].’”
ISA 22:1 Řḥukm issaggʷaden x Teɣzurt n Řewḥiy. “Min cem yuɣin ařami tgeɛɛded cem ak-d marra [iwdan] x tzeɣwin?
ISA 22:2 [A] cem, tenni iccuren s ddriz, [a cem] tandint izruddḥen, tandint ineggzen s řefraḥet: inni dayem ittwanɣen, war ttwanɣen s ssif u war mmten deg umenɣi.
ISA 22:3 Marra imgewwaden nnem munen arewřen, [maca] ttwaḥebbsen nhřa uřa d ict n tecti n řqews, marra inni dayem ufin, ttwacarfen, waxxa arewřen ɣar řaggʷaj.”
ISA 22:4 “X uya qqareɣ: ‘Saggʷejem xafi řxezrat, ejj ayi ad ruɣ s imeṭṭawen imerzagen. War d ayi ḥeṣṣarem ḥima ad ayi tɛezzam x wareddeǧ n yeǧis n řgens inu!’
ISA 22:5 Maɣar d ijj n wass n wezruddeḥ d uɛfas d uxarweḍ i dd-issekk Sidi inu, SIDI n řɛeskarat, di Teɣzurt n Řewḥiy, [ijj n wass] n weɣdař n řḥiḍ u n iɣuyyan i x dd-ttarran idurar.
ISA 22:6 Maɣar Ɛilam iṭṭef aqrab nnes s fřitcat, [jmiɛ] ak-d ukarru n umenɣi u ak-d aryaz [nni t ineddhen] d yinni inyin x yeysan, u Qir iɛarra taseddart [n uɛeskari].
ISA 22:7 Ad imsar aqa řemxeyyer n teysarin nnec ad ttwaccuren s ikarruten [n umenɣi] u imnayen ad sedden ixef nsen [i umenɣi] [arendad n] tewwart [n tendint].
ISA 22:8 Ad ikkes Netta arruḍ x Yahuda. Deg wass nni ad texzared ɣar řesnaḥ [i iǧan] di Taddart n Wezɣar.
ISA 22:9 Ad tẓarem tizzeyyin di tendint n Dawud, minzi aqa atent deg waṭṭas. Ad tessmunem aman n uyeřmam n wadday.
ISA 22:10 Ad tḥesbem tudrin n Urcalim uca ad thedmem tudrin ḥima ad tessjehdem řḥiḍ.
ISA 22:11 Ad teggem ijj n uyeřmam jar řeḥyuḍ, ḥima ad tessmunem aman n uyeřman aqdim, [maca] war txezzarem ɣar wenni t iggin, u war tḥeṭṭim wenni t iṣennɛen zeg wecḥař uya.”
ISA 22:12 “Deg wass nni ad iřaɣa Sidi inu, SIDI n řɛeskarat, maḥend ad trum, ad tesɣuyem, ad tḥeffem azeǧif u maḥend ad tyarḍem taxancet [n wecḍan].
ISA 22:13 [Maca] xzar, [řexxu aqa din] arcaq d řefraḥet, neqqen ifunasen, ɣarṣen i wuǧi, ttᵉtten aysum u sessen binu, [am qqaren:] ‘Ejj aneɣ ad necc, ad nsu, maɣar tiwecca ad nemmet!’
ISA 22:14 [Maca] SIDI n řɛeskarat issargeb ayi [x uya] deg imezzuɣen inu, [inna:] ‘Řmuɛṣiyyet-a war ittwasseṣřeḥ i kenniw ař ɣa temmtem!’, [ammu i] iqqar Sidi inu, SIDI n řɛeskarat.”
ISA 22:15 “Ammu i iqqar Sidi inu, SIDI n řɛeskarat: ‘Uyur, adef ɣar wewkiř nni, ɣar Cibna, řemqeddem n tzeddiɣt [n ujeǧid], [uca ini]:
ISA 22:16 Min ɣarek [iǧan] danita, niɣ man wen ɣarek [iǧan] danita, aqa cek tneqced da ijj n wenḍeř i yixef nnec? [Iwa] ineqqec anḍeř nnes sennej, ineqqec i yixef nnes ict n tzeddiɣt di jjarf!
ISA 22:17 Xzar, SIDI ad zzayek iḥejjar s ijj n uḥejjar imɣar, Netta ad cek iṭṭef s ijj n wuḍuf iqseḥ.
ISA 22:18 Netta ad cek isseḥnunneḍ qaɛ ařami [tdewřed] d taqurart, ict n tcamma nni tt i ɣa nḍaren ɣar ict n temmurt temɣar. Dinni i ɣa temmted u dinni i ɣa iřin xenni ikarruten nnec icuwwaren, [a cek] řefḍiḥet n taddart n bab nnec!
ISA 22:19 Necc ad cek dd-ssuffɣeɣ zi řfusina nnec, [wah,] Netta ad cek dd-iqřeɛ zeg wemcan nnec.’”
ISA 22:20 “Deg wass nni ad řaɣiɣ i umsexxar inu Alyaqim, mmis n Ḥilqiya.
ISA 22:21 Necc ad as ssyarḍeɣ arruḍ nnec u Necc ad as beyseɣ abyas nnec u ad wceɣ tizemmar nnec deg ufus nnes. Netta ad yiři d babatsen i imezdaɣ n Urcalim d taddart n Yahuda.
ISA 22:22 Necc ad as ssarseɣ řmeftaḥ n taddart n Dawud x teɣruḍt nnes. [Mařa] netta ad yarzem, war izemmar uřa d ijj ad ibelleɛ, [mařa] netta ibelleɛ, war izemmar uřa d ijj ad yarzem.
ISA 22:23 Necc ad t wteɣ am řewted deg ijj n wemcan imten u netta ad yiři d řɛarc n uɛuǧi i taddart n babas.
ISA 22:24 Ad xas ayřen marra aɛuǧi n taddart n babas, iɣedduyen imeẓyanin d tɣeddutin, zi marra tiqcuɛin timeẓyanin, zi ṭṭbaṣi ař marra tiqnucin.
ISA 22:25 Deg wass nni ad ittwakkes řewted i ittwawten deg wemcan imetnen, iqqar SIDI n řɛeskarat. Ad ittwaqḍeɛ u [xenni] ad iwḍa uca ddqeř i tuɣa ɣares yuyřen, ad ittwaqess, maɣar [ammu i] inna SIDI.”
ISA 23:1 Řḥukm issaggʷaden x Ṣur. “‘Rum, [a] iɣarruba n Tarcic, maɣar tehdem [tendint n Ṣur] umi war teqqim taddart uřa d řmuyyi.’ Wah, [ammu i] d asen ittwassargeb zi temmurt n ayt n Kittim.
ISA 23:2 ‘Susmem, [a kenniw] imezdaɣ n tegzirt! Isebbaben n Ṣidun inni iẓekkwan řebḥar [s iɣarruba nsen], aqa ccuren cem [s sseřɛet]!’
ISA 23:3 Zzariɛet n Sixur, ṣṣabet n iɣzar [n Nil], tedweř d řmunet nnes. [Ammu i] tedweř [tendint n Ṣur] d řmarsi n řegnus.”
ISA 23:4 “‘Seḍḥa, [a cem] Ṣidun!’ Maɣar řebḥar iqqar, lburj n řebḥar iqqar: ‘War dayi tuɣi řewjeɛ n tarut u necc war uriweɣ. Necc war ssɣimiɣ iḥudriyyen u war arebbiɣ tiɛzuray.’
ISA 23:5 Xmi ɣa yaweḍ řexbar ɣar Miṣra, [xenni] ad nezbaren nitni s řeḥriq xmi ɣa sřen i řexbar x Ṣur.”
ISA 23:6 “‘Ẓwam ɣar Tarcic, sɣuyyem, [kenniw] imezdaɣ n tegzirt!’
ISA 23:7 Ma wa [d actab] nwem, [a] [tandint] ineggzen s řefraḥet, tenni zi ř’aṣeř nnes [iǧan] zeg wussan n wecḥař uya? Iṣuraf nnes ad tt arbun ɣar řaggʷaj ḥima ad [din] teqqim am tbarranect.
ISA 23:8 Wi ixarrṣen man aya di řbař nnes ḍidd i Ṣur, [tandint] nni ibeṭṭan ttijan, aqa zeɛma isebbaben [nnes] d řḥukkam, ittijariyyen [nnes] d imcennɛen n temmurt?
ISA 23:9 SIDI n řɛeskarat aqa ɣares di řbař nnes ḥima ad issɛiǧet nnfaxet n marra [min iǧan d] talwizt, ḥima ad yarẓ řɛezz n marra imcennɛen n temmurt.”
ISA 23:10 “‘Sesfiy tammurt nnem am yeɣzar [n Nil], [a cem] yeǧis n Tarcic! War cem tmenneɛ uřa d ict n řḥajjet ɛad!’
ISA 23:11 Netta isswiẓẓeḍ afus nnes x řebḥar, netta issenhezz tigeldiwin. SIDI yumur ḍidd i Kenɛan maḥend ad areddǧen lburjat nnes.
ISA 23:12 Netta inna: ‘Ɛemmarṣ ɛad ad tiřid tfarḥed, tᵉttwassɛiǧted, [a] taɛzarect, yeǧis n Ṣidun! [Ruḥ] ɣar ayt n Kittim, kkar, ẓwa. Uřa dinni war tᵉṭṭifed řehna.’
ISA 23:13 Xzar, tammurt n Ikaldaniyyen, řgens-a i tuɣa war iǧin, aqa ineyyec Accur [d tammurt] i řewḥuc n řexřa - [maɣar] nitni ssgeɛɛden lburjat nsen i wehjam, ssɛarran řeqṣur nnes - aqa řgens-a yarra i-tt d řxirbet.
ISA 23:14 Rum, [kenniw] iɣarruba n Tarcic, maɣar lburj nwem ittwahdem.”
ISA 23:15 “Deg wass nni ad imsar, aqa Ṣur ad tᵉttwattu [řqedd n] sebɛin n iseggʷusa, am [řqedd n] wussan n ijj n ujeǧid. Ɣar uneggar n sebɛin n iseggʷusa [nni] ad imsar i Ṣur am mammec d as qqaren deg izři n temɣart n farq-ccɣeř:
ISA 23:16 ‘Ksi řgambri, uyur uca nneḍ di tendint, [a cem,] tamɣart n farq-ccɣeř ittwattun! Irar ijj n ǧɣa mliḥ uca ɣennej aṭṭas, maḥend ad xam ɛeqřen!’
ISA 23:17 Awarni sebɛin n iseggʷusa SIDI ad yarzef Ṣur [ɛawed] uca nettat ad dd-tedweř ɣar řmunet nnes n farq-ccɣeř uca ad tessefsed ixef nnes s marra tigeldawin n ddunect nni iǧan x wudem n temmurt.
ISA 23:18 [Maca] tasebbabt nnes d řmunet nnes n farq-ccɣeř ad iřint qeddsent i SIDI. War tᵉttwaxemmeř [deg ixxamen n txubay] u war tᵉttwaxezzen, maɣar sseřɛet nnes ad tiři i yinni izeddɣen zzat i wudem n SIDI, ḥima ad ccen ař i ɣa jjiwnen uca ḥima ad yarḍen arruḍ icuwwaren.”
ISA 24:1 “Xzar, SIDI ad issexwa tammurt, ad tt issxarreb, ad iqeǧeb udem nnes uca ad ibezzeɛ imezdaɣ nnes.
ISA 24:2 Am mammec iǧa řgens, ammu [i ɣa yiři] uřa d akehhan, am umsexxar uřa d sidi nnes, am tayya uřa d llalas, am umsewweq uřa d amzenzi, am areṭṭař uřa d wenni [zzayes] iksin arḍař, am bab n umarwas uřa d bu-umarwas nnes.
ISA 24:3 Ad ssexwan tammurt marra, ad [tt] keccḍen qaɛ, maɣar SIDI inna awař-a!”
ISA 24:4 “Tammurt tecḍen, tisřaw, ddunect teftuttes, tisřaw. Imcennɛen n řgens n temmurt teftuttusen.
ISA 24:5 Tammurt tᵉttwassɛiǧet zeg imezdaɣ nnes, maɣar nitni ttɛeddan x izerfan, ttbeddařen tiweṣṣa, ttareẓẓan Řɛahd n řebda.
ISA 24:6 X uya tᵉttett nneɛřet tammurt u yinni xas izeddɣen aqa daysen řɛib. S uyenni ad ttwasscemḍen imezdaɣ n temmurt, ad ceṭṭen drus n iwdan waha.”
ISA 24:7 “Binu n jdid icḍen, tazayart teftuttes, marra inni tuɣa ifarḥen deg wuř, zehharen.
ISA 24:8 Ṣafi ticti issfarraḥen n ibendiren, ddriz n yinni ineggzen s řefraḥet, ṣafi [tinext] issfarraḥen n řgambri.
ISA 24:9 War sessen binu [ɛad] di řweqt n uɣennej, ccrab ad yiři d amerzag i yinni [t] isessen.
ISA 24:10 Tandint ittwajjen d řxarbet, marra tudrin bellɛent i wadaf.
ISA 24:11 Deg imesraq ttweɛɛḍen iwdan x binu, marra řefraḥet tweddar, asřiwřew iffeɣ zi tammurt.
ISA 24:12 Min iqqimen n tendint d řxirbet issaggʷaden [waha], u tawwart tᵉttwařbez.
ISA 24:13 Ammu i ɣa tiři [tendint] din di řwest n temmurt, jar řegnus. Ad tiři am ɣar wezwaḍ n uzemmur, am ɣar weřqaḍ [n uḍiř] xmi ɣa teɛdu ṣṣabet.”
ISA 24:14 “Nitni ad ssgeɛɛden tmijja nsen, ad sřiwřewen. Umi SIDI iɛuǧen aṭṭas, ad ssɣuyen nitni s řefraḥet zi mani tɣeǧi tfuct.
ISA 24:15 X uya, sɛuǧem xenni SIDI di temmura n tfawt, [sɛuǧem] Isem n SIDI, AREBBI n Israil, di tegzirin n řebḥar!
ISA 24:16 Zi tmuwwa qaɛ n temmurt nᵉttesřa i izřan, i uɛuǧi n Umsegged!” [Xenni] nniɣ: Necc fenniɣ, fenniɣ, uct xafi! Imkeccaḍen ttkeccaḍen, u imkeccaḍen ttkeccaḍen min ma [xsen] ad keccḍen.
ISA 24:17 Tiggʷudi d tesraft d řfex [ad] xak [iřin], [a] amezduɣ n temmurt!
ISA 24:18 Wenni i ɣa yarewřen zi ddriz issaggʷaden, ad iwḍa di tesraft, d wenni i ɣa igeɛɛden zi tesraft, ad innaɣ di řfex, maɣar tiburjatin di řuɛřa ad nnurzment, dsusa n temmurt ad nhezzen.
ISA 24:19 Tammurt ad tcarreg qaɛ, ad tfeǧeq temmurt d ifeǧaqen, ad tenhezz temmurt aṭṭas.
ISA 24:20 Ad tmeyyeř temmurt ssa ɣar da am yijjen iscar, ad temraywa am yijj n uɛcuc i tmensiwt. Iɛeddiyen nnes ad xas ziyyaren aṭṭas, uca nettat ad tewḍa, war tzemmar ad tekkar ɛad.”
ISA 24:21 “Deg wass nni ad ixřef SIDI x řɛeskar n řuɛřa di řuɛřa, uřa x ijeǧiden nni [iǧan] x wudem n temmurt [ad zzaysen ixřef] x wudem n temmurt.
ISA 24:22 Ad ttwassmunen am yimeḥbas deg ict n tesraft u ad ttwaḥebdsen di řeḥbes u awarni i waṭṭas n wussan ad ɣarsen arzfen.
ISA 24:23 Taziri ad tezweɣ s useḍḥi u tafuct tseḍḥa xmi ɣa yiři SIDI n řɛeskarat d Ajeǧid x wedrar n Ṣihyun u di Urcalim, uca zzat i imɣaren nnes [ad dinni yiři] uɛuǧi.”
ISA 25:1 “A SIDI, Cek d AREBBI inu, necc ad Cek ssɛuǧeɣ, ad ṣebbḥeɣ Isem nnec, maɣar Cek teggid řeɛjeb, aṭṭas n ccwar nnec zeg wecḥař uya, aqa-t d tidett u dayes řaman.
ISA 25:2 Cek tarrid tandint d aɛurric n yeẓra, tandint ittwassjehden d řxirbet, řeqṣar n ibarraniyyen di tandint, war t ssbeddin ɛemmarṣ ɛawed.
ISA 25:3 X uya ad Cek issɛuǧa ijj n řgens ijhed, tandint n řegnus iqesḥen aṭṭas ad zzayek teggʷed.
ISA 25:4 Maɣar tuɣa Cek d lqelɛa i umarxu, d lqelɛa i umezřuḍ xmi ittneḥṣar, Cek d adurri i wenẓar iccaten, uřa d tiři di řeḥmu minzi lḥaraj n ayt n bu-řexcunect aqa-t am wenẓar iccaten x řḥiḍ.
ISA 25:5 Am řeḥmu deg ijj n wemcan yuẓeɣ, ammu i ɣa tesseɣded lḥaraj n ibarraniyyen, am tiři n useynu tessesmiḍ řehmu, ammu i ɣa ittwasseɣd izři n ayt n bu-řexcunect.”
ISA 25:6 “SIDI n řɛeskarat ad issewjed x wedrar-a ict n zzardet s macca teccur s tadunt x wedrar-a i marra regnus, ict n zzardet s binu iṣebḥen qaɛ, s ict n macca teccur s tadunt d waduf, s binu iṣebḥen iṣfan.
ISA 25:7 Netta ad ibeṭṭeř x wedrar-a ařeḥḥaf i zi ttřeḥḥafen marra řegnus uřa d dduri i zi ttwassdurruyen marra řegnus.
ISA 25:8 Netta ad isarḍ řmewt i řebda uca Sidi inu, SIDI, ad imseḥ imeṭṭawen zi marra iɣembab, ad ikkes řefḍiḥet n řgens nnes zi marra tammurt, maɣar ammu i inna SIDI.”
ISA 25:9 “Deg wass nni ad inin: ‘Aqa da, Wa d AREBBI nneɣ, xas i negga asitem nneɣ u Netta ad aneɣ issenjem. Wa d SIDI nni x negga asitem nneɣ, ad nesřiwřew, ad nfarḥ x usenjem nnes!’
ISA 25:10 Maɣar afus n SIDI ad yars x wedrar-a, maca Mu’ab ad ittwaddez di temmurt nnes, am mammec ittwaddez uřum, ad idweř d tazubact.
ISA 25:11 Mu’ab ad dayes ibezzeɛ s ifassen nnes, am ufettaḥ deg weftaḥ. AREBBI ad issaḍar nnfaxet nnes jmiɛ ak-d marra min izemmar ad igg s teḥraymect n ifassen nnes.
ISA 25:12 Netta ad ihdem lburj n iɣebřawen nnec yuɛřan, ad ten issehwa, ad ten immenḍar ɣar temmurt, deg ucař.”
ISA 26:1 Deg wass nni ad ɣennjen izři-ya di temmurt n Yahuda: “Neccin ɣarneɣ ict n tendint ijehden, Netta issbedd ‘Asenjem’ d řeḥyuḍ d řeqwarat.
ISA 26:2 Arzmem tiwwura, maḥend řgens amsegged ad dd-yadef, řgens nni iḥeṭṭan řaman i SIDI řebda.
ISA 26:3 S řbař imten am t iǧa, Cek tḥeṭṭid t di řehna, wah di řehna, maɣar řgens ittcařa xak.”
ISA 26:4 “Tecřem x SIDI i řebda, maɣar di SIDi, SIDI, i teǧa d Taṣḍart n zzmanat.
ISA 26:5 Maɣar Netta ittarra ad aḍaren inni izeddɣen dinni di řuɛřa, tandint yuɛřan ad tt issehwa, ad tt issehwa ař tammurt, ad tt iɛarn deg ucař.
ISA 26:6 Ad xas iɛfes uḍar, iḍaren n wenni ittwaḥṣaren, řatarat n iḍaren n imezřaḍ.”
ISA 26:7 “Abrid n umsegged iwaṭa, nican i iǧa řatar n umsegged, Cek tᵉttseggamed t.
ISA 26:8 Uřa deg webrid n řeḥkamat nnec, a SIDI, tuɣa nessitim ac, řeɛmar nneɣ immeẓri deg Yisem nnec u di řidaret nnec.
ISA 26:9 Tuɣa řeɛmar inu ittweḥḥac i Cek di ǧiřet, uřa d buḥbeř inu dayi, tuɣa yarezzu xak s jjehd. Maɣar mařa řeḥkamat nnec usint-i-dd x temmurt, ad řemden imezdaɣ n temmurt tasegda.”
ISA 26:10 “Mařa isscen bnadem aḥinni i uɛeffan, wanita war iřemmed tasegda, maca ad yegg řɣar di temmurt iccuren s tsegda, u war iẓarr aɛuǧi n SIDI.”
ISA 26:11 “A SIDI, afus nnec ittwassgeɛɛad, maca nitni war t ttwiřin. Waxxa amenni ad t ẓaren ɛad, maca ad seḍḥan zeg wasam nnec i řgens nnec, wah, timessi ad tecc iɣrimen nnec.
ISA 26:12 A SIDI, řḥukm nnec xaneɣ ad yiři d řehna, maɣar Cek tkemmřed marra timegga nneɣ di ṭṭweɛ nneɣ.
ISA 26:13 A SIDI, AREBBI nneɣ, isiditen nneɣni seǧḍen xaneɣ. Zzayek Cek weḥḥdek aqa nettidar Isem nnec.
ISA 26:14 Imettan war tteddaren ɛawed, řexyařat war ttnekkaran. S uya txeřfed asen s řɣar uca teqḍid ten. Cek tekksed marra řɛeqran xasen.
ISA 26:15 A SIDI, Cek tarnid di řgens-a, Cek tarnid di řgens-a, tᵉttwassɛuǧed dayes, aqa tesswesɛed marra iymiren n temmurt.”
ISA 26:16 “A SIDI, di řeḥṣaret arzun xak, zeǧɛen tiẓaǧitin nsen s tḥessect, umi xasen dd-tusa tarbiyyet nnec.
ISA 26:17 Am mammec tᵉttnezbar ict n temɣart s ddeyset, tenni igguren ad taru aḥenjir nnes u tesɣuyyu s řewjeɛ n tarut nnes, ammu i d aneɣ tuɣa neccin, a SIDI, zzat i tiṭṭawin nnec.
ISA 26:18 Tuɣa neccin axmi neksi s ddeyset, imneɛ aneɣ řeḥriq n tarwa, tuɣa neccin axmi nuru asemmiḍ. War dd-niwi asenjem i temmurt, u imezdaɣ n ddunect war dd-ttwaxeřqen.”
ISA 26:19 “Imettan nnec ad ddaren! Řxecbat inu ad beddent! Faqem, uca sřiweřwem kenniw, inni izeddɣen deg ucař! Aqa nnda n tfawin am nnda nnec, uca tammurt ad taru řexyařat n imettan.”
ISA 26:20 “Uyur, a řgens inu, adef ɣar ixxamen nnec n daxeř, belleɛ tiwwura awarni ac. Snuffar ixef nnec řqedd n ict n tzeḥziḥt ař dd iɛdu wesxeḍ.
ISA 26:21 Maɣar xzar, SIDI ad iffeɣ zeg wemcan nnes maḥend ad ixřef i imezdaɣ n temmurt řmuɛṣiyyet nsen, uca tammurt ad tɛarra idammen i xas ittwassizřen, war txemmiř ɛad inni xas ittwanɣen.”
ISA 27:1 “Deg wass nni ad ixřef SIDI zi ‘Liviyatan’, afiɣar itteḥruǧuḍen s tazřa, s ssif nnes iqseḥ, imɣar d ijhed, [wah ad ixřef] zi ‘Liviyatan’, afiɣar itteḥruruden, uca ad ineɣ řhaycet nni iǧan di řebḥar.”
ISA 27:2 “Deg wass nni [ad din yiři] ... ijj n umarjeɛ n uḍiř s binu icnan. Ɣennjem xas s nnubtat.
ISA 27:3 Necc, SIDI, ad tt iḥḍa, ad tt ssbezzgeɣ, ḥima war tt ijarreḥ ḥed, Necc ad xas ɛesseɣ s wass d ǧiřet.
ISA 27:4 Tafqeḥt war dayi teǧi qaɛ, maca mařa ca n yijjen izɛem ad issars zzati tazeggʷart d isennanen, Necc ad kidsen mmenɣeɣ, ad ten ssarɣeɣ munen,
ISA 27:5 illa mařa iṭṭef bnadem di jjehd inu, uca ad yegg řehna akidi, wah ad yegg řehna akidi!”
ISA 27:6 “Deg [wussan] i dd ɣa yasen ad iwwet Yaɛqub aẓwar, Israil ad innuwar, ad iyma, u nitni ad ccuren tammurt s řɣiǧet.”
ISA 27:7 “Ma iwta i-t Netta, am mammec wenni iwtin, iwta i-t? Ma ittwaneɣ netta, am mammec ttwanɣen inni zzayes ittwanɣen?
ISA 27:8 Cek tarebbid tt s řeqyas řami tt tenḍared, Netta issuzzar [i-tt] s usemmiḍ nnes iqesḥen, deg ijj n wass n usemmiḍ zi manis i dd-tneqqar tfuct.
ISA 27:9 S uya ad ittwagg aṣřaḥ x řmuɛṣiyyet n Yaɛqub s man aya uca ad yiři aya d řɣiǧet tekmeř zeg uḥeyyed x ddnub nnes: aqa netta ad yarr marra iẓra n iɛalṭaren d iẓra n jjar ttwařebzen u war din ttbeddint [ɛad] trebbin n cwarti d ipilaren n arebbi n tfuct.”
ISA 27:10 “Maɣar tandint ittwassjehden [ad tedweř] ḥafi, am yict n tzeddiɣt ittwajjen, ixřan am řexřa. Dinni ad ihda uɛejmi, ad din ijna, ad icc tiseḍwin nnes.
ISA 27:11 Xmi ɣa yaẓɣen řefruɛ nnes, ad ttwaqeḍɛen. Ad dd-asent temɣarin, ad ten ssarɣent, [maɣar] war iǧi d ijj n řgens dayes řefhamet. X uya wenni t iggin, war d asen izziǧiz, u wenni t ikewwnen, war d as yareṭṭa.”
ISA 27:12 “Deg wass nni ad izweḍ SIDI tidrin zi mani iǧa yeɣzar [n Lfuraṭ] ař Teɣzart n Miṣra. [Maca kenniw] ad ttwařeqḍem, ijjen awarni i wenneɣni, [a] ayt n Israil.
ISA 27:13 Deg wass nni ad suḍen deg uyicc ameqqran n icarri. [Xenni] ad dd-asen inni isswejden ad hellken di Accur uřa d yinni ittwaɛarrnen ɣar temmurt n Miṣra. Nitni ad sejden i SIDI deg wedrar iqeddsen di Urcalim.”
ISA 28:1 “Uct x ttaj uɛeffar n imescaren n Ifrayim, aqa talwizt nnes icuwwaren [amecnaw] tanewwact isřawen x tqiccet n teɣzurt iṣebḥen n yinni x yeɣřeb binu.
ISA 28:2 Xzar, Sidi inu ɣares [ijjen] ijhed u iwɛar am tecti n tebruri, am tḥaryaḍt i ittawyen ṭṭaɛun d uxarreb. Am řḥemřat n waman imɣaren issfayen ad inḍar Netta [ttaj nni] s ufus [nnes] ɣar temmurt.
ISA 28:3 Ttaj aɛeffar n imescaren n Ifrayim ad t ɛefsen s iḍaren.
ISA 28:4 Tanewwact isřawen n telwizt nnes icuwwaren x tqiccet n teɣzurt isseɣmayen, ad tiři am tbacurt tiweḍ qbeř anebdu, tenni wenni ixezzaren da d diha iẓra i-tt uca isseɣři i-tt [deɣya] umi tuɣa [ɛad] deg ufus nnes.”
ISA 28:5 “Deg wass nni ad yiři SIDI n řɛeskarat d tajj n ucuwwaḍ d ttaj icewwaren i min iqqimen n řgens nnes,
ISA 28:6 d arruḥ n řḥukm i wenni iqqimen [x řkursi] i řḥukm, uřa d [arruḥ n] taryast i ayt n bu-teɣruḍt i yinni ittarran amenɣi ɣar tewwart [n tendint].”
ISA 28:7 “Ɛad ina ttemmraywan s binu, uca ttwarenyen zi ccrab. Ittemraywa ukehhan d unabi s ccrab. Ttwaṣarḍen s binu, ttwarenyen zi ccrab, ttemraywan ɣar iweḥḥan nsen, ttenhezzan da d diha umi ḥekkmen ɣar ucarreɛ.
ISA 28:8 Maɣar marra ṭṭabřat ɛemmarent s trarit ixemjen, uřa d ijj n wemcan [war iqqim d amezdag].
ISA 28:9 ‘I umi ixs netta ad issɣar tussna, i umi ixs ad isscen areqqas? [I] yinni umi ittwakkes asen uɣi, [i] yinni umi ikksen abbuc?
ISA 28:10 Maɣar aqa da, řumur x řumur, řumur x řumur, lfariḍa x lfariḍa, lfariḍa x lfariḍa, da drust, diha drust.’”
ISA 28:11 “S uya ad issiweř ak-d řgens-a s iyencicen iṭṭewṭiwen u s ijj n yiřes nneɣni,
ISA 28:12 Netta d wenni tuɣa i d asen inna: ‘Wa d arraḥet, wcem arraḥet i wenni yuḥřen!’, uca: ‘Wa d řmargeḥ!’, [maca] nitni war xsen ca ad sřen.
ISA 28:13 Ad asen yiři wawař n SIDI: ‘Řumur x řumur, řumur x řumur, lfariḍa x lfariḍa, lfariḍa x lfariḍa, da drust, diha drust!’, maḥend nitni, am uyuren, ad wḍan ɣar ḍeffar, ad ttwarẓen, ad dewřen di řfex u ad ttwaḥebbsen.”
ISA 28:14 “S uya, sřem i wawař n SIDI, [a kenniw] imestehzayen, inni ɣar iǧa ṣṣulṭa x řgens-a nni iǧan di Urcalim!
ISA 28:15 Minzi teqqarem: ‘Neccin negga řɛahd ak-d řmewt u negga ict n ḍḍmana ak-d řaxart. Xmi ɣa iɛdu urekkuḍ ifarcen, war ɣarneɣ dd-yiwiḍ, maɣar negga axarriq axmi mani ɣar i ɣa narweř u ad nennuffar awarni i řɣecc!’
ISA 28:16 S uya, ammu i iqqar Sidi inu, SIDI: ‘Xzar, Necc ad ssarseɣ ijj n weẓru di Ṣihyun, aẓru iqeǧben, aẓru n teɣmart iɣřan, dsas imten. Wenni yumnen war ittrikwiř.’
ISA 28:17 Ad ssarseɣ řḥeqq d ufiřu n řeɛbar uca tasegda d plumu. Tebrurri ad teḥḥa amcan n tarewřa iccuren s ixarriqen uca aman ad dd-ssefyen amcan [nnes] n udduri.
ISA 28:18 Řɛahd nwem ak-d řmewt ad ittwamḥa, ḍḍmana nwem ak-d řaxart war tᵉttɣimi tbedd. Xmi ɣa iɛdu urekkuḍ ifarcen, ad zzayes tᵉttwaɛefsem kenniw.
ISA 28:19 Meřmi ma iɛdu, ad kenniw yawi [akides], maɣar ad teɛdu tufut awarni i tufut, s wass d ǧiret. Uca afehham n ureqqas ad yawi mɣir asnexřiɛ.
ISA 28:20 Maɣar qama ad iquḍeḍ ařami war izemmar [bnadem] ad ibbuzzer uca taɛřawt ad tiři teḥṣar ařami [bnadem] war izemmar ad dayes yadef.
ISA 28:21 Maɣar SIDI ad ikkar am x wedrar n Faraṣim, ad ihaj am di teɣzurt n Jibɛun, maḥend ad yegg ccɣeř nnes: ‘Ccɣeř nnes ad yiři d aɣrib!’, uca maḥend ad yegg řxedmet nnes: ‘Řxedmet nnes ad tiři taɣribt!’
ISA 28:22 U řexxu, war ssehqara, ḥima ssnaseř nwem war tent ttzeyyaren ɛad ktar, maɣar sřiɣ zi Sidi inu, SIDI n řɛeskarat aqa ikkes deg wawař ad yareddeǧ imun marra tammurt.”
ISA 28:23 “Sḥessem u sřem i tmijja inu, ḥḍam u sřem ɣar wawařen inu!
ISA 28:24 Ma icarrez umcarrez ass imun, ḥima ad izarɛ? Ma [řebda] ittfeǧeḥ u ineqqec iyyar nnes?
ISA 28:25 Ma war iǧi ammu, mařa netta iwaṭa udem [n yeyyar], issuyus ssanuǧ uca [zzariɛet n] řcemmun ibezzeɛ i-tt, igga irden di řeṣfuf d imendi di ikwadrunen uca karṣana igga i-t ɣar tmawwin nnes?
ISA 28:26 Idarreb i-t AREBBI nnes mammec ittxeṣṣa ad ixdem nican, isseřmed i-t.
ISA 28:27 Minzi war ssarwaten ssanuǧ s teřwiḥt itteḥřuǧuḍen i usarwet u war ssekkin tajarrart n ukarru tiwa n řcemmun, maca zekkwḍen ssanuǧ s weɛmud d řcemmun s uqeṭṭab.
ISA 28:28 Ma ḥarryen imendi [ɣar usarwet]? Lla, [bnadem] war t issarwit i řebda, war [xas] ineddeh tijarrarin n ukarru d yeysan nnes i řebda: war t iḥarri.
ISA 28:29 Uřa d man aya iffeɣ-dd zi SIDI n řɛeskarat. Ccwar nnes d řeɛjeb, aqa Netta imɣar deg usuyar.”
ISA 29:1 “Uct x Ariyil, Ariyil, tandint n řmargeḥ n řɛeskar n Dawud. Arnim [ɛad] ijj n useggʷas ɣar useggʷas[-a], jjem řeɛyudat [n useggʷas] ad ɛdunt,
ISA 29:2 [xenni] ad ḥṣareɣ Ariyil, uca ad [din] yiři uweḥweḥ d wecḍan u nettat ad tiři i Necc am Ariyil.
ISA 29:3 Ad am qewwareɣ u ad cem ḥṣareɣ s ijj n řɛeskar i uḥeṭṭu uca ad xam ssbeddeɣ lbarajat.
ISA 29:4 Ad tᵉttwassehwid, ad tessiwřed zi temmurt uca awařen nnem ad ten tremremd zi tɛejjajt. Tmijja nnem ad teffeɣ zi temmurt am [tmijja] n wenni issawařan ak-d imettan uca awařen nnem [ad iřin] am ucewcew [waha] zeg ucař.
ISA 29:5 Abarru n iɣrimen nnem ad yiři am tɛejjajt tazdadt, uca abarru n ayt n bu-řexcunet am uřum iɛeddun, ittawy i-t usemmiḍ. Ad imsar deg wermac n wabřiwen, deg ict n tecti!
ISA 29:6 SIDI n řɛeskarat ad ɣarek innewju s wajjaj d wenhezzi n temmurt, [s] řḥess ijehden n tmijja [nnes], [s] usemmiḍ n tḥaryaḍt u [s] uceɛɛař n tmessi ittetten.
ISA 29:7 Am tarjit, ijj n řewḥiy di ǧiřet, ammu i ɣa yiři ubarru n marra řegnus nni i ɣa immenɣen ak-d Ariyil, [wah,] marra inni i ɣa immenɣen akides u ak-d lburj nnes d inni tt i ɣa iḥṣaren [ad iřin ammu].
ISA 29:8 Ad yiři am yijjen yurja umi dayes yeǧa řaẓ. Xzar, netta ittett, [xenni maca] ad dd-ifaq, yufa aqa řeɛmar nnes war ijjiwen [ɛad]. Niɣ [ad yiři] amecnaw ijjen yurja am iffud, u xzar, netta isess, [xenni maca] ad dd-ifaq, yufa aqa netta ifna, uca řeɛmar nnes ittmeẓri [ɛad ad isu]. Ammu i ɣa tiři [tmesřact] i marra řegnus nni i ɣa immenɣen ak-d wedrar n Ṣihyun.”
ISA 29:9 “Jɛarem u tbehtem, smesḥem tiṭṭawin nwem [ař i ɣa] tiřim d idarɣařen! Nitni scaren, [maca] war iǧi zi binu, ttemraywan, [maca] war iǧi zi ccrab.
ISA 29:10 Maɣar SIDI izeǧeɛ xawem buḥbeř n yiḍeṣ yuǧɣen. Ibelleɛ tiṭṭawin nwem, inabiyyen, uca izeǧifen nwem, imwařawen [n tmeẓriwin], iřeḥḥef i-ten.
ISA 29:11 Ammu i d awem idweř řewḥiy n marra aya am wawařen n ijj n wedlis ittwannḍen nni immewcen i wenni issnen tiɣri, qqaren: ‘Ɣar i-t-i-d xafi!’, uca [xenni] ad yarr: ‘Necc war zemmareɣ [ad t ɣareɣ], maɣar icemmeɛ.’
ISA 29:12 Niɣ immewc wedlis i wenni war issnen ad iɣar, [umi] qqaren: ‘Ɣar i-t-i-d xafi!’, uca [xenni] ad yarr netta: ‘Necc war ssineɣ ad ɣareɣ.’”
ISA 29:13 “Inna ayi Sidi inu: ‘Minzi řgens-a yudes ayi-dd mɣir s wawařen waha u [minzi nitni] tteggen ayi ccan s iyencicen nsen, [am] iggʷej xafi uř nsen, u minzi aweqqar i zi d ayi weqqaren [itteffeɣ] zi tweṣṣa nni řemden zeg iwdan [waha],
ISA 29:14 s uya, xzar, Necc arenniɣ ad ggeɣ di řgens-a s řeɛjeb, s řeɛjeb d ustebhet. Tiɣit n imiɣisen ad tefna u řefhamet n ifehhamen ad tweddar.”
ISA 29:15 Uct x yinni issnuffaran zzat i SIDI, inni issdurruyen axarriṣ nsen, uca tteggen timegga nsen di ṭṭřam, [umi] qqaren: ‘Wi d aneɣ iẓrin d wi d aneɣ issnen?’
ISA 29:16 Kenniw tessenqeřbem [tamesřact]! Axmi zeɛma izemmar ad ittwaḥseb bu-třaxt am třaxt, ařami min ittwaggen ad yini x wenni t iggin: ‘Netta war d ayi iggi!’, uca řqecɛet n třaxt ad tini x uqeddar nnes: ‘Netta war ittḥiki walu!’”
ISA 29:17 “Ma war iǧi drus i iqqimen ař ɣa idweř Lubnan d řɛarset iṣebḥen u ad tᵉttwaḥseb řɛarset iṣebḥen d azɣar?
ISA 29:18 Deg wass nni ad sřen idehcuren awařen n wedlis-a ittwannḍen, uca ad twařant tiṭṭawin n iḍarɣařen zi taǧest u zi ṭṭřam.
ISA 29:19 Ad arnin imwaḍɛen di řefraḥet di SIDI, uca ad farḥen imezřaḍ jar iwdan deg Umqeddas n Israil.
ISA 29:20 Maɣar bu-řexcunet ad iqḍa, wenni isthezan ad ifna, u marra inni yarezzun řɣecc ad nnqeḍɛen,
ISA 29:21 inni itteggen řɛib di bnadem zi ssibbet n ijj n wawař [waha], inni issrusan řefxux i yinni ideffɛen řḥeqq di tewwart [n tendint], uřa d inni iɛarrnen amsegged ɣar uɣezdis x walu.”
ISA 29:22 “S uya, ammu i iqqar SIDI, wenni ifekken Ibrahim, i taddart n Yaɛqub: ‘Yaɛqub war ittseḍḥi [ɛad] uca aɣembub nnes war ittewriɣ [ɛad].
ISA 29:23 Maɣar xmi ɣa iẓar netta tarwa nnes, inni d řxedmet n ifassen inu, di řwesṭ nnes, ad ssqeddsen nitni Isem inu, ad ssqeddsen Amqeddas n Yaɛqub u ad ggʷeden AREBBI n Israil.
ISA 29:24 Inni iweddaren di buḥbeř ad ɣarsen tiři tussna n řefhamet, uca inni ittnedqamen, ad arzmen tawwart ad řemden.’”
ISA 30:1 “[Ammu i] iqqar SIDI: ‘Uct x iḥenjiren nni iɣewwɣen maḥend ad ssuffɣen ccwar, [maca] war iǧi zzayi, maḥend ad ggen ijj n řɛahd, [maca] war iǧi [zi] Arruḥ inu, ḥima ad ssɛurrcen ddenb x ddenb,
ISA 30:2 inni igguren maḥend ad hwan ɣar Miṣra nhřa ma ad ayi sseqsan, ḥima ad afen aseřqi ɣar jjehd n firɛun u maḥend ad arewřen ɣar tiři n Miṣra.
ISA 30:3 [Maca] jjehd n firɛun ad kenniw yarr tᵉttseḍḥam uca adurri di yiři n Miṣra ad kenniw ifḍeḥ.
ISA 30:4 Maɣar řḥukkam nnes ǧan di Ṣuɛan uca imsekkan nnes iwḍen ɣar Ḥanis.
ISA 30:5 Nitni marra ad ttwassbarrqen zi řgens nni war d asen ineffɛen ca, war itticen afus uřa d walu n řefḍeř, maca ad ten yawi ɣar řefḍiḥet d řhegra.”
ISA 30:6 Řḥukm issaggʷaden x řmař n Temmurt n Ljanub. “Deg ict n temmurt n řeḥṣaret d ddeǧ, mani zzayes dd-usin tayradt d weyrad d ufiɣar d řḥaycet icemḍen iṭṭawen, arebbun-dd nitni agřa nsen x weɛrur n isnusen d řeknuz nsen x teɛrurin n iřeɣman ɣar ijj n řgens war ten ineffeɛ di ca.
ISA 30:7 [Maɣar] Miṣra ad iwc afus baṭeř u i walu. S uya řaɣiɣ [Miṣra] wanita: ‘Rahab, [bu-teɣruḍt ameqqran], teqqim waha!’”
ISA 30:8 “[Xenni] řexxu, as-dd, ari t zzat i tiṭṭawin nsen x teřwiḥt, xebc i-t deg ict n tebrat ittwannḍen, [maḥend] ad tiři tᵉttwaḥḍa ař ass i dd ɣa yasen, i řebda n řebdat.
ISA 30:9 Maɣar nitni d řgens iɣewwɣen, ayt n bu-ixarriqen, iḥenjiren nni war ixsen ad sřen i Ccariɛa n SIDI,
ISA 30:10 inni iqqaren i imwařawen: ‘War ttwiřim walu!’, u i yinni ixezzaren iweḥḥan: ‘War ttwiřim iweḥḥan nni iǧan d tidett. Siwřem akidneɣ min dd issḥinniben, [mři] d aneɣ tᵉttwařam min iɣeccen!
ISA 30:11 Ḥeyydem zeg webrid, ffɣem zeg webrid, jjem Amqeddas n Israil ad xaneɣ yiggʷej!’”
ISA 30:12 “S uya, ammu i iqqar Umqeddas n Israil: ‘Minzi kenniw tenḍarem awař-a, tᵉttecřem x ddeǧ u x min iffɣen [zeg webrid], [wah,] tᵉtteggem řaman nwem di man aya,
ISA 30:13 s uya ad tiři řmuɛṣiyyet-a i kenniw am tazzit [di řḥiḍ] i ɣa iwḍan, nni iḍehharen di řḥiḍ yuɛřan, aqa tareẓẓit nnes ad dd-tas deɣya, deg ict n tecti.
ISA 30:14 Ad t yarẓ am ittwarẓ ijj n uɣarraf n bu-třaxt nhřa aḥinni. Jar marra ifetwiten nnes war ittwaf [́́́ɛad] uřa d ijj n uceqquf ɛad i zi dd ɣa yawyen timessi zi řmejmar niɣ ad aymen aman zi jjub.’”
ISA 30:15 “Maɣar ammu i iqqar Sidi inu, SIDI, Amqeddas n Israil: ‘S ttubet d řhudnet ad ɣarwem yiři usenjem, di trusi d řaman ad ɣarwem yiři jjehd, maca kenniw war texsem.’
ISA 30:16 Kenniw teqqarem: ‘Lla, x yeysan nexs ad narweř!’ X uya [s uɣiř] ad tarewřem. Uca [teqqarem ɛawed]: ‘X iysan n ḥamat nexs ad nniy [i tarewřat]!’ X uya ad qeǧqen uřa d imseḍfaren nwem!
ISA 30:17 Ijj n řuřuf ad yarweř i uheddi n yijj [n weryaz]. I uheddi n xemsa ad tarewřem marra ař ɣa teqqimem am tsenyant n ucenyal x tqiccet n wedrar, am tɛeǧant x tewrirt.”
ISA 30:18 “S uya ad raja SIDI maḥend ad awem isscen aḥinni nnes, s uyenni ad igeɛɛed sennej ařami i ɣa yarḥem kenniw [awarni man aya], maɣar SIDI d AREBBI n řḥeqq. Sseɛd n marra inni t ittrajan.
ISA 30:19 Maɣar řgens ad izdeɣ di Ṣihyun, di Urcalim. Cek war tᵉttrud ɛemmarṣ ɛad, Netta ad xak iḥinn, mařa isřa i tmijja nnec tᵉttřaɣa, ad xak dd-yarr.
ISA 30:20 Sidi inu ad awem iwc aɣrum di řeḥṣaret uřa d aman di řeɣben, imesɣaren nnec war ittnuffaren [ɛad], [maca] tiṭṭawin nnec ad ẓarent imesɣaren nnec.
ISA 30:21 Imezzuɣen nnec ad sřen i wawař zi ɣar ḍeffar nnec i iqqaren: ‘Aqa abrid, uyurem dayes. War tteffɣem yefus uřa d azeřmaḍ.’
ISA 30:22 Ad tḥesbem icellelen i ittwaggen s nnuqart nnec n řexyařat nnec ineqcen uřa d ařeḥḥef n wureɣ n řexyařat nnec ifesyen d texmuji. Ad ten tenḍared am warruḍ tessexmej i-t [temɣart i x ǧan] idammen, ad tinid: ‘Ɣar barra!’”
ISA 30:23 “[Xenni] ad iwc Netta anẓar i zzariɛet nnec i tzarɛed deg iyyar uřa d aɣrum d ṣṣabet n temmurt nnec. Deg wass nni ad tehda tḥimart nnec x ddmani isarrḥen.
ISA 30:24 Iyenduzen d yeɣyař imeẓyanen, inni icarrzen tammurt, ad ccen řeɛřef iredd i zuzzaren s ǧuḥ d tezzart.
ISA 30:25 X kuř adrar u x kuř tawrirt igeɛɛden ad iřint tiɣezratin d tmizabin ccuren s waman, deg wass n tɣarṣt tameqqrant, xmi ɣa wḍan ṣṣumɛat.
ISA 30:26 Tafawt n tziri ad tiři am tfawt n tfuct uca tafawt n tfuct ad tiři tejhed sebɛa n tseqqar x tfawt n sebɛa n wussan, deg wass i di i ɣa icfen SIDI tareẓẓit n řgens nnes uca ad issgenfa ayezzim n tecti i iwta Netta.”
ISA 30:27 “Xzar, ittas-dd Isem n SIDI zi řaggʷaj, yareqq weɣḍab nnes u asiggʷed imɣar, ccuren iyencicen nnes s wesxeḍ u iřes nnes igga am tmessi ittetten.
ISA 30:28 Asuḍi n nnefs nnes am yeɣzar issefyen, ittakkwaḍen ař iri, maḥend ad izzuzar řegnus s tazzart n ureddeǧ, u maḥend ad yegg i řegnus sřimet n uɣarri x iɣesmaren nsen.”
ISA 30:29 “Ad ɣarwem yiři ijj n izři, am di ǧiřet nni di issewjed bnadem ixef nnes i řɛid, uřa d řefraḥet deg wuř am ɣar ijjen igguren umi iẓemmar di temja maḥend ad dd-yas ɣar wedrar n SIDI, ɣar Teṣḍart n Israil.
ISA 30:30 SIDI ad yejj ad sřen i tmijja nnes yuɛřan uca ad isscen mammec ɣa ihwa uɣiř nnes ak-d wesxeḍ n weɣḍab d tmessi itteḥduduqen ittetten, aduqqez n wenẓar d řḥař n wenẓar d ibquqen n tebruri.
ISA 30:31 Maɣar Accur ad yarjij s tmijja n SIDI xmi [t] ɣa iwwet Netta s weɛmud nnes.
ISA 30:32 Qaɛ twařa iɛeddu xas weɛmud n usegged, [aɛmud] nni xas issars SIDI, [aqa] d man aya ad yiři ɣar [tinext n] ibendiren d [snitrat n] řgambriyyat, [maɣar] Netta akidsen immneɣ s iɣaǧen ittenhezzan.
ISA 30:33 Maɣar zeg wecḥař uya iwjed [wemcan i] nnɛi nni, iwjed uřa i ujeǧid. Igga i-t yuǧeɣ d umiriw. Aqellij nnes n tmessi d ukeccuḍ d ameqqran. Twarrit n nnefs n SIDI ad t iqedd am yeɣzar n řecbariyyet.”
ISA 31:1 “Uct x yinni dd-ihwan ɣar Miṣra ḥima ad afen twiza, inni ittecřen x yeysan u tteggen řaman deg ikarruten, minzi nitni deg waṭṭas, uřa x yinni inyin x yeysan, minzi nitni jjehden, [axmi] war xezzaren ɣar Umqeddas n Israil u war arezzun SIDI.”
ISA 31:2 “[Maca] uřa d Netta d amiɣis, Netta ggur ad yejj řɣar ad dd-yas. War ittdikkwiř deg wawař nnes, ad ikkar ḍidd i taddart n iɛeffanen u ḍidd i twiza n yinni itteggen řmuɛṣiyyet.
ISA 31:3 [Maɣar] Imiṣriyyen d iwdan, war ǧin d Arebbi, uca iysan nsen d aysum, war iǧi d arruḥ. Ad isarreḥ SIDI afus nnes [ař] i ɣa inqarḍ wenni iwcin afus, uca [xenni] ad iwḍa uřa d wenni dayes iwcin afus. [Ammu] i ɣa qḍan nitni marra idsen.”
ISA 31:4 “Maɣar ammu i d ayi inna SIDI: ‘Am mammec ittarrujdud wayrad niɣ wayrad ameẓyan x zzardet nnes xmi xas dd-ttřaɣan ijj n ubarru n imeksawen, břa ma ad innexřeɛ zi tmijja nsen u war ixennes zeg ubarru nsen, ammu i ɣa ihwa uřa d SIDI n řɛeskarat ḥima ad immneɣ x wedrar n Ṣihyun u x tewrirt nnes.
ISA 31:5 Am yijḍaḍ ittfarfiren [sennej i řɛucc nsen], ammu i ɣa isseřqa SIDI n řɛeskarat x Urcalim. Ad tt issar, ad tt issenjem, ad [xas] yekk uca ad tt issenjem.”
ISA 31:6 “Dewřem-dd ɣar wenni x ḥeyyden ayt n Israil s waṭṭas.
ISA 31:7 Maɣar deg wass nni ad immenḍar kuř ijj l’aṣnam nnes n nnuqart d l’aṣnam nnes n wureɣ, inni yeggin ifassen nwem i yixef nwem, [i] ddenb.
ISA 31:8 Accur ad iwḍa s ssif, war iǧi [ssif] n ijj n weryaz. Ad t yecc ssif, war iǧi n ijj n bnadem. Ad yarweř Accur zzat i ssif uca iḥudriyyen nnes ad dewřen ɣar tesmuɣi.
ISA 31:9 Taṣḍart nnes ad teggʷej s tiggʷudi uca řḥukkam nnes ad arewřen zi tɛeǧant!’, [ammu i] iqqar SIDI, wenni ɣar teǧa tmessi di Ṣihyun uřa d tafqunt di Urcalim.”
ISA 32:1 “Xzar, ijj n ujeǧid ad iḥkem di tsegda u řḥukkam ad ḥekmen s řḥeqq.
ISA 32:2 Aryaz nni ad yiři am yijj n udurri zeg wenẓar, am tseddart issřeqqan zi tḥaryaḍt, am tɣezratin n waman di temmurt yuẓɣen, am tiři n ijj n jjarf ideqřen di temmurt ittfadan.
ISA 32:3 Tiṭṭawin n yinni ittwařan war ttbelliɛent [ɛad], u imezzuɣen n yinni ittesřan ad ssḥessen [ɛawed],
ISA 32:4 uř n imqeǧqen ad yiři iḥeṭṭa [ɛawed] maḥend ad yaf tussna, u iřes n yinni isstewtiwen izemmar ad issiweř ɛawed s řfarz.
ISA 32:5 Abuhaři war d as ttřiɣin [ɛad] ‘Amcenneɛ!’, uca wenni icemmten war d as qqaren [ɛad] ‘Mmis n řxir!’
ISA 32:6 Maɣar abuhaři issawař tubbuheřya u uř nnes ittegg řmuɛṣiyyet umi netta ittegg afucceḥ u ittceqqef di SIDI, u umi ittejji řeɛmar n wenni iǧuẓen ad iqqim ixwa, d wenni iffuden war t ittejji ad isu.
ISA 32:7 Taḥraymect n ucemmat tɛeffen. Netta ittxarreṣ di řefḍiḥet ḥima ad iɣḍeř inni ittwaḥṣaren s wawařen ixarriqen, [waxxa] amezřuḍ iccat x řḥeqq [nnes].
ISA 32:8 [Maca] amcenneɛ ad ixarreṣ deg inwayen icennɛen, ad ikkar di ṭṭweɛ n min icennɛen.”
ISA 32:9 “Kkarent, [kennint] timɣarin war di iǧi wemnus, sřent i tmijja inu, [a kennint] tiḥenjirin ittcařen x simant nkent, sřent ɣar wawař inu!
ISA 32:10 Awarni wussan niɣ aseggʷas, [xenni] ad tarjijent, [a] kennint i ittcařen x yixef nkent, maɣar ad teqḍa ṣṣabet n uḍiř, war ittiři weřqaḍ ɛad.
ISA 32:11 Qefqfent, [a kennint] nbřa amnus, arjijent, [kennint] tinni ittcařent x yixef nkent, kksent arruḍ, ɛarynent, [xenni] beysent tijɛinnatin nkent [s warruḍ n wecḍan].”
ISA 32:12 “Ad wtent nitenti deg idmaren s igejduren x iḥwicen iɛizzen, x tzayarin isseɣmayen.
ISA 32:13 Ad geɛɛden isennanen d tzeggʷart x temmurt n řgens inu, [wah,] x marra tudrin n řefraḥet di tendint ineggzen s usřewřiw.
ISA 32:14 Maɣar řeqṣar ad ittwajj, ddriz n tendint ad ibkem, [tawrirt n] ‘Ɛufil’ d lburj n tɛessast ad dewřen d ifran i řebda, d amcan n řefraḥet mani ttemzuɛbuḍen iɣyař n řexřa, d ddmani i tḥimriwin.
ISA 32:15 ař ɣa ittwafarreɣ xaneɣ Arruḥ zi sennej.” “[Xenni] ad idweř řexřa d řɛirst iṣebḥen u řɛirst iṣebḥen ad tᵉttwaḥseb d azɣar.
ISA 32:16 Řḥeqq ad izdeɣ di řexřa uca tasegda ad teqqim deg iyyar isseɣmayen.
ISA 32:17 Min dd-ittawyen tasegda ad yiři d řehna uca řɣiǧet n tsegda ad tiři d řhudnet d řaman i řebda.
ISA 32:18 Řgens inu ad izdeɣ deg wemcan n řehna, di tzeddiɣin daysent řaman u deg imucan daysen arraḥet.”
ISA 32:19 “Ad teccat tbrurri ař dd ɣa tessehwa azɣar uca tandint ad tehwa di řewḍa.”
ISA 32:20 “Sseɛd n kenniw inni izarrɛen ɣar marra tiɣezratin, inni [din] ineddhen iḍaren n ufunas d weɣyuř!”
ISA 33:1 “Uct xak, [a] amteḥḥay, [cek d] wenni [simant nnes] war ittwateḥḥi, [cek d] wenni ittkeccḍen, waxxa nitni war cek keccḍen. Mařa tkemmřed ateḥḥi nnec, ad tᵉttwateḥḥid [simant nnec], mařa tkemmřed takeccaḍt, ad tᵉttwakeccḍed [simant nnec].”
ISA 33:2 “[A] SIDI, ḥinn xaneɣ, aqa nessitim ac. Iři d aɣiř nsen [ijehden] di kuř ṣṣbeḥ, wah, di řweqt n řeḥsaret iři d asenjem nneɣ.”
ISA 33:3 “X řḥess n zzhir ad arewřen řegnus. Mařa Cek tessgeɛɛded Ixef nnec ad ttwazeǧɛen řegnus ɣar marra iɣezdisa.
ISA 33:4 [Xenni] ad tᵉttwakkes zzardet nwem, am tmurɣi iṣarrḍen ttekksent [ṣṣabet]. Am ttazzřent tmurɣi ssa d ssa, ammu i ttazzřen uřa d nitni ɣar zzardet.”
ISA 33:5 “Ittwassuɛřa SIDI maɣar Netta izeddeɣ qaɛ sennej. Netta iccur Ṣihyun s řḥeqq d tsegda.
ISA 33:6 Ad yiři řaman [xmi i ɣa yiřint] řmijařat n řweqt nnec, ijj n ubarru n isenjamen, tiɣit d tussna. Ad tiři tiggʷudi n SIDI d řkenz nnes.”
ISA 33:7 “Xzar, inni daysen taryast amecnaw ayrad sɣuyyun barra, [wah,] ireqqasen n řehna ttrun s imeṭṭawen imerzagen.
ISA 33:8 Ibriden iseggmen ttwajjen, wenni innumen ad yekk x umesruq, ismeḥ dayes. Aqa yarẓa řɛahd, isseḥqar tineddam, war iḥesseb bnadem.
ISA 33:9 Tecḍen u tisřaw temmurt. Lubnan iseḍḥa, yuẓeɣ. [Řewḍa isseɣmayen n] Carun tedweř d řexřa uca Bacan d Karmal ttseǧḍen [afar nsen].”
ISA 33:10 “Řexxu ad kkareɣ, řexxu ad ttwassgeɛɛdeɣ, řexxu ad ttwassɛuǧeɣ, iqqar SIDI.”
ISA 33:11 “Kenniw teksim ddeyset s uřum, ad tarwem iɣeǧ. Buḥbeř nwem d timessi i kenniw ɣa yeccen.
ISA 33:12 Řegnus ad dewřen am jjar ssarɣen t, am řḥarrac s isennanen ittwaqessen ad ten sscemḍen s tmessi.
ISA 33:13 Kenniw [i iǧan] di řaggʷaj, sřem min ggiɣ, uca kenniw di řadas, snem ṣṣulṭa inu!
ISA 33:14 Imednab di Ṣihyun tteggʷeden, imnafqen ttqefqafen, qqaren: ‘Man wen zzayneɣ izemmar ad izdeɣ di tmessi ittetten, man wen zzayneɣ izemmar ad izdeɣ di řḥaduq n řebda?’”
ISA 33:15 “Wenni igguren di tsegda u iqqar řḥeqq, wenni inḍaren arbeḥ s ubeɛɛej, wenni imennɛen ifassen nnes zeg wuḍuf n terzifin n arrecwet, wenni ittbellaɛen amezzuɣ nnes meɛlik yufa ad iseř x usizzeř n idammen, wenni itteqqnen tiṭṭawin nnes meɛlik yufa ad itwařa min iǧan d aɛeffan,
ISA 33:16 d wanita i ɣa izedɣen x řegɛudi. Lqelɛat di řejruf ad iřint lburj nnes yuɛřan, ad as immewc weɣrum nnes, aman nnes ad ttwaḍemnen.
ISA 33:17 Tiṭṭawin nnec ad twařant Ajeǧid deg weẓri nnes, nitenti ad ẓarent ict n temmurt dayes ttasiɛ aṭṭas.
ISA 33:18 Uř nnec ad iɛqeř x usnexřiɛ. Mani iǧa umarir? Mani iǧa wenni iweznen? Mani iǧa wenni isseṭṭen lburjat?
ISA 33:19 Cek war tẓarred ɛad řgens iqesḥen [nni], řgens s yiřes ideqřen ařami war izemmar ad as iseř [bnadem], [řgens] nni issṭewṭiwen s yiřes ařami war izemmar ad as ifhem [uřa d ijj].”
ISA 33:20 “Xzar ɣar Ṣihyun, tandint n umuniten nneɣ. Tiṭṭawin nnec ad ẓarent Urcalim, tazeddiɣt nni di iǧa řaman, Aqiḍun i war ssmuṭṭuyen, i zi řewtad nnes ɛemmarṣ ad ttwaqeřɛen uřa d imurar nnes war ttwaqeṭṭasen.
ISA 33:21 Maɣar dinni ad ɣarneɣ yiři SIDI s řɛezz. Aya ad yiři d amcan n iɣezran d tseǧyawin imiriwen. War xasen nedhen iɣarruba imeqqranen n řemqadef, uřa d ijj n uɣarrabu s řejwad ad [din] iɛdu.
ISA 33:22 Minzi SIDI d Řqaḍi nneɣ, SIDI d Amgewwad nneɣ, SIDI d Ajeǧid nneɣ. Netta ad aneɣ issenjem.”
ISA 33:23 “[Řexxu maca] arxun iseɣwan nnem, war mennɛen [ɛad] tisenyanin deg uḍar nnes, war ttbezzaɛen [ɛad] řbacc. [Maca] di řweqt nni ad tᵉttwabḍa zzardet tameqqrant, [ɛad] ineɛḍab ad keccḍen takeccaḍt.
ISA 33:24 Uřa d ijj n umezduɣ ad yini: ‘Necc heřceɣ!’, [maɣar] řgens i dayes izeddɣen, ad [as] ittwaɣfar řmuɛṣiyyet.”
ISA 34:1 “Qarrbem-dd, [a] řegnus, maḥend ad tesřem, [kenniw a,] ccuɛub, arrem-dd řbař! Seř, [a] tammurt d marra min dayes, ddunect d marra min zzayes dd-issfuffuyen.
ISA 34:2 Maɣar aduqqez [n weɣḍab] n SIDI [ad dd-yas] x marra řegnus u asɛar x marra řɛeskar nsen. Netta iḥarrem i-ten [i uteḥḥi], aqa igga i-ten i tɣarṣt.
ISA 34:3 Inni zzaysen ittwanɣen ad ten nḍaren, uca arriḥet n řxecbat nsen ad tgeɛɛed. Ad fesyen idurar s idammen nsen.
ISA 34:4 Marra řɛeskar n ujenna ad ifna uca ijenwan ad ttwannḍen am wedlis ittwannḍen u ad iwḍa marra řɛeskar nsen am wafar x tzayart u am mammec dd-tewḍa tazart zeg wartu.”
ISA 34:5 “Maɣar ssif inu ad ittwaẓar deg ijenwan. Xzar, ad dd-ihwa x Idum u x řgens nni ḥarrmeɣ qaɛ i řḥukm.
ISA 34:6 Ssif n SIDI iccur s idammen, idweř itteḥruǧuḍ s tadunt, s idammen n izmaren d iɣayḍen, s tadunt n tiẓẓař n icarriyyen, maɣar SIDI igga ijj n řɛid n tɣarṣt di Buṣra, d ict n tɣarṣt tameqqrant di temmurt n Idum.
ISA 34:7 Ad kidsen wḍan iɣayḍen n řexřa ak-d waccawen nsen d iziraren, uca uřa d ifunasen imeẓyanen [jmiɛ] ak-d [ifunasen] ijehden uca tammurt nsen ad tsu idammen u acař [n temmurt] ad ijjwen s tadunt.
ISA 34:8 Maɣar ad yiři ijj n wass n nneqmet i SIDI, ijj n useggʷas n uxeǧeṣ i ddeɛwet n Ṣihyun.
ISA 34:9 Tiɣzarin n Idum ad dewřent d tizeft u acař nnes ad idweř d řecbariyyet, [wah,] tammurt nnes ad tedweř d tizeft yareqqen.
ISA 34:10 War ttxessi [tmessi nnes] s ǧiřet uřa s wass, ddexxan nnes ad igeɛɛed i řebda. Zi jjiř ař jjiř ad tiři [temmurt] tᵉttwareddeǧ, i řebda n řebdat ɛemmarṣ war tt iẓwi uřa d ijj.
ISA 34:11 Bu-uɛuqqi d twuct n ǧiřet ad tt ṭṭfen d tasɣart, bu-usuḍi [n řmewt] d ubaɣeř ad dayes zedɣen. Netta ad xas imḥeḍ afiřu n řeɛbar n řexřa u ad issars plumu n řxawi.
ISA 34:12 Tarwa nnes n taṣiřet? War din teǧi bu tgelda ařami zzayes i ɣa barrḥen u marra řḥukkam nnes qḍan.
ISA 34:13 Di řeqṣur nnes ad igeɛɛed cbarq ak-d isennanen, irezzazen d tabɣa n usennan ad ɣemyen di lqelɛat nnes. Tammurt ad tedweř d tazeddiɣt i wuccanen n řexřa, d ijj n weḥwic i yessis n nnɛamet.
ISA 34:14 Řewḥuc n řexřa ad mmeřqan ak-d ifisen uca amyan [ijennen] ad iřaɣa i umɛacar nnes, wah, řweḥc n ǧiřet ad yareyyeḥ dinni, ad yaf aɣimi i yixef nnes.
ISA 34:15 Dinni ad tessars tfiɣart n fřitca řɛucc nnes, ad tessars timeǧařin, ad tent tessfruriy uca di tiři nnes ad thilla [deg imeẓyanen nnes], wah, dinni ad munen ijḍaḍ ittkeccaḍen.
ISA 34:16 Arzum deg wedlis n SIDI u ɣarem zzayes: ‘Uřa d ijj [zi řewḥuc-a] izemmar ad zzayes inqeṣ, uřa d ijj war yarezzu x weɛcir nnes!’, maɣar aqemmum inu yura i-t, uca Arruḥ nnes d wenni ten i ɣa issmunen.
ISA 34:17 Netta simant nnes inḍar taqedduḥt di ṭṭweɛ nsen, uca afus nnes ibḍa asen tammurt s ufiřu n řeɛbar. Nitni ad tt warten i řebda, zi jjiř ař jjiř ad dayes zedɣen.”
ISA 35:1 “Ad ifarḥ řexřa d temmurt yuẓɣen, ad tesřiwřew řewḍa, ad tnewwar am tnewwact war zzayes wḍant tifray ɛemmarṣ.
ISA 35:2 Ad tnewwar ad tcuwwar, [wah,] ad tesřewřiw [řewḍa] s řefraḥet d usřiwřew. Ad as immewc uɛuǧi n Lubnan, řɛezz n Karmil u [n řewḍa n] Carun. Nitni ad ẓaren aɛuǧi n SIDI, řɛezz n AREBBI nneɣ.”
ISA 35:3 “Smeḥḍem ifassen arxun u sjehdem ifadden ittemraywan.
ISA 35:4 Inim i yinni ɣar iǧa uř iggʷed: ‘Iřim d iryazen, war tteggʷedem! Xzarem, AREBBI nwem ad ixřef, ad dd-yas wexřaf n AREBBI, Netta ad dd-yas s Yixef nnes, ad kenniw issenjem.’
ISA 35:5 Xenni ad nnurzment tiṭṭawin n iḍarɣařen uca ad ttwarezmen imezzuɣen n iduhcar.
ISA 35:6 Xenni ad ingez uqidar am udad uca iřes n uzinun ad isřiwřew, maɣar ad dduqqzen waman di řexřa uřa d tiɣzarin di řewḍa.
ISA 35:7 Tammurt yuẓɣen ad tedweř d ssarij u tammurt iffuden d tařawin ittbeqbuqen. Di temmurt n wuccanen n řexřa, mani arreyḥen, ad yiři arbiɛ ak-d uɣanim d wezraf.”
ISA 35:8 “Ad din yiři ijj n webrid iseggmen, abrid nni i ɣa řaɣan ‘Abrid amqeddas!’. Uřa d ijj n umexmuj war xas iggur, [maca] ad yiři i nitni: man wen ma igguren x webrid-a, [ɛad] ibuhařiyyen war ttweddirin.
ISA 35:9 War dinni ittiři wayrad, [wah,] war xas ittgiɛɛid niɣ ad ittwaf din uřa d ijj n řweḥc ittcarreg, [maca] inni ittwafekken ad xas uyuren.
ISA 35:10 Inni ittwaṣeřḥen zi SIDI ad ɛeqben, ad dd-asen sřiwřiwen ɣar Ṣihyun. Řefraḥet n řebda [ad tarsa] x izeǧifen nsen. Afarrej d řefraḥet ad ɣarsen awḍen, acḍan d wesḥissef ad [zzaysen] arewřen.”
ISA 36:1 Deg useggʷas wiss arbeɛṭac n ujeǧid Ḥizqiya igeɛɛed Sanḥarib, ajeǧid n Accur, x marra tineddam ifaryen n Yahuda uca iḥewwes i-tent.
ISA 36:2 Isekk ujeǧid n Accur akumandar n řɛeskar zi Laxic ɣar Urcalim ɣar ujeǧid Ḥizqiya, ak-d ijj n řɛeskar d ameqqran aṭṭas. Netta ibedd ɣar uqadus n waman n uyeřmam n sennej, wenni [iǧan] ɣar webrid ameqqran ɣar Weḥwic n Uṣebban. *
ISA 36:3 [Xenni] iffeɣ ɣares Alyaqim, mmis n Ḥilqiya, řemqeddem n tzeddiɣt [n ujeǧid] ak-d umarir Cibna d Yuwax, mmis n Asaf, amarir n umezruy.
ISA 36:4 Inna asen ukumandar n řɛeskar: “Inim xenni i Ḥizqiya: Ammu i iqqar ujeǧid ameqqran, ajeǧid n Accur: ‘Man atecři wa i x tᵉttacřed?
ISA 36:5 Nniɣ ac, aqa-t d řhard n iyencicen waha. Deg umenɣi ittxeṣṣa ccwar d tzemmar. Man wen x tᵉttacřed řexxu, aqa cek tɣewwɣed xafi?
ISA 36:6 Xzar, tᵉttecřed x Miṣra, x uɣanim nni innḍefsen wenni ittejjun deg ufus nnes umi ḥed xas i ɣa iɛemmed, uca [xenni] issnuqqeb i-t. Ammu [i iǧa] firɛun, ajeǧid n Miṣra, i marra inni xas ittacřen.
ISA 36:7 Mařa kenniw ad d ayi tinim: Neccin nettaceř x SIDI, AREBBI nneɣ!, [xenni necc ad iniɣ:] Ma Netta war iǧi d wenni zi iḥeyyed Ḥizqiya řegɛudi d iɛalṭaren u [xenni] inna i Yahuda d Urcalim: Ad tbendqem zzat i uɛalṭar-a di Urcalim?’
ISA 36:8 Xenni řexxu, egg ijj n umḥarrem ak-d sidi inu, ajeǧid n Accur: ‘Necc ad ac wceɣ ařfayen n iysan mařa cek zeg uɣezdis nnec ad asen-dd tawyed imnayen.’
ISA 36:9 Mammec texsed cek ad tenqeřbed x wudem n lwali, wenni qaɛ d ameẓyan n imsexxaren n sidi inu, uca ad tᵉttecřed x Miṣra di ssibbet n ikarruten d imnayen?
ISA 36:10 [Xenni] řexxu, ma necc geɛɛdeɣ-dd ḍidd n wemcan-a ḥima ad t areddǧeɣ břa SIDI? SIDI ini ayi: ‘Geɛɛed ḍidd i temmurt-a, areddeǧ i-tt.’”
ISA 36:11 Uca inna Alyaqim, mmis n Ḥilqiya, ak-d Cibna d Yuwax i ukumandar n řɛeskar: “Siweř ɛafek s Tramit ak-d imsexxaren nnec, minzi nefhem as mliḥ. War kidneɣ ssiwiř s Tyahudect deg imezzuɣen n řgens [i iǧan] x řḥiḍ.”
ISA 36:12 [Maca] akumandar n řɛeskar inna: “Ma issekk ayi-dd sidi inu ɣar sidi nnec u ɣarek [waha] ḥima ad ssiwřeɣ awařen-a, war iǧi ɣar yeryazen nni iqqimen x řḥiḍ, [maḥend ad iniɣ] aqa aten [jmiɛ] akidwem ad ccen asuffeɣ nsen u ad swen ibeccicen nsen?”
ISA 36:13 Xenni ikkar ukumandar, iřaɣa s jjhed s Tyahudect, issiweř, inna: “Sřem i wawařen n ujeǧid ameqqran, ajeǧid n Accur!
ISA 36:14 Ammu i iqqar ujeǧid: ‘Ḥḍam war kenniw ittɣecci Ḥizqiya minzi netta war izemmar ad kenniw ifekk.
ISA 36:15 War ttejjim Ḥizqiya ad kenniw yarr ad tᵉtecřem x SIDI, ad tinim: SIDI ad aneɣ issenjem nican u war tᵉttmewci tendint deg ifassen n ujeǧid n Accur.
ISA 36:16 War ttesřim ca ɣar Ḥizqiya, maɣar ammu i iqqar ujeǧid n Accur: Ggem ayi array uca ffɣem-dd [zi tendint] ɣari, [xenni] izemmar kuř ijjen zzaywem ad icc zi tzayart nnes u kuř ijjen zeg wartu n tazart nnes u kuř ijjen ad isu aman zeg wanu nnes,
ISA 36:17 ař dd ɣa yaseɣ u ad kenniw awyeɣ ɣar ict n temmurt am temmurt nwem: ɣar ict n temmurt teccur s imendi d binu n jdid, ɣar ict n temmurt teccur s weɣrum u s imarjaɛen n uḍiř.
ISA 36:18 War ttejjim Ḥizqiya ad kenniw iɣarr xmi iqqar: SIDI ad aneɣ ifekk. Ma zemmaren [xenni] irebbiten n řegnus, kuř ijj [zzaysen], ad fekken tammurt nsen zeg ufus n ujeǧid n Accur?
ISA 36:19 Mani ǧan irebbiten n Ḥamat d Arfad? Mani ǧan irebbiten n Sfarwayim? Ma ssnejmen nitni xenni Samarya zeg ufus inu?
ISA 36:20 Man wen zi marra irebbiten n temmura-ya issenjem tammurt nnes zeg ufus inu ařami ɣa issenjem SIDI Urcalim zeg ufus inu?’”
ISA 36:21 [Maca] nitni sseɣden, war xas dd-arrin s uřa d ijj n wawař, maɣar řumur n ujeǧid tuɣa iqqar: “Kenniw war xas dd-tarrim ca!”
ISA 36:22 [Xenni] yusa-dd Alyaqim, mmis n Ḥilqiya, řemqeddem n tzeddiɣt [n ujeǧid], ak-d Cibna, amarir, d Yuwax, mmis n Asaf, amarir n umezruy, s warruḍ icarrgen ɣar Ḥizqiya. Nitni ḥajan as [marra] awařen n ukumandar n řɛeskar.
ISA 37:1 Umi isřa ujeǧid Ḥizqiya aya, icarreg arruḍ nnes, idřa ixef nnes s ict n txancet [n wecḍan] uca yudef ɣar Taddart n SIDI.
ISA 37:2 [Awarni as] issekk netta Alyaqim, řemqeddem n tzeddiɣt [n ujeǧid], d Cabna, amarir, d imɣaren n ikehhanen deg warruḍ n txuncay [n wecḍan] ɣar unabi Icaya, mmis n Amuṣ.
ISA 37:3 Nitni nnan as: “Ammu i iqqar Ḥizqiya: ‘Ass-a d ijj n wass n řeḥṣaret u n weɛqab u n ubehdeř, maɣar iḥenjiren iwḍen-dd ař arzam n uɛeddis [n yemmatsen], [maca] war din jjehd i twarut.
ISA 37:4 Ad taɣ SIDI, AREBBI nnec, isřa marra awařen n ukumandar n řɛeskar wenni dd-issekk sidis, ajeǧid n Accur, ḥima ad istehza zi AREBBI iddaren, u [ad taɣ] SIDI, AREBBI nnec, ad iɛaqeb awařen nni isřa. Sgeɛɛed [xenni] ict n tẓaǧit di ṭṭweɛ n řbaqi nni i ɣa ittwafen [ɛad].’”
ISA 37:5 [Ammu] iwḍen imsexxaren n ujeǧid Ḥizqiya ɣar Icaɛya.
ISA 37:6 Inna asen Icaɛya: “Ammu ittxeṣṣa ad tinim i siditwem: ‘Ammu i iqqar SIDI: War teggʷed ca zeg wawařen i tesřid, i zi i d ayi ceqqfen iḥudriyyen n ujeǧid n Accur.
ISA 37:7 Xzar, Necc ad dayes ggeɣ ijj n buḥbeř u netta ad iseř ijj n řexbar uca [xenni] ad iɛqeb ɣar temmurt nnes u Necc ad t nɣeɣ [din] di temmurt nnes s ssif.’”
ISA 37:8 [Xenni] iɛqeb-dd ukumandar n řɛeskar uca yufa ajeǧid n Accur ittmenɣa ak-d [tendint n] Libna, maɣar isřa aqa iqřeɛ iqiḍan nnes [iffeɣ] zi Laxic.
ISA 37:9 [Umi] isřa aqa nnan x Tirhaqa, ajeǧid n Kuc: “Xzar, iffeɣ-dd ḥima akidek immneɣ!”, [umi] isřa [aya], issekk [ɛawed] ireqqasen ɣar Ḥizqiya, inna:
ISA 37:10 “Ammu i ittxeṣṣa ad tessiwřem ak-d Ḥizqiya, ajeǧid n Yahuda, ad tinim: ‘War ttejji ad cek iɣwa AREBBI nnec wenni x tᵉttcařed am iqqar: Urcalim war tweṭṭi i ujeǧid n Accur deg ifassen!
ISA 37:11 Xzar, tesřid min ggin ijeǧiden n Accur ak-d marra timmura nneɣni, tinni ḥarrmen nitni i uteḥḥi. Ma ittɣiř ac ad tᵉttwassnejmed?
ISA 37:12 Ma fekken ten irebbiten n řegnus inni yareddǧen řejdud inu? Juzan d Ḥaran d Rṣif d ayt n Ɛadan, inni [tuɣa izeddɣen] di Talassar?
ISA 37:13 Mani iǧa ujeǧid n Ḥamat d ujeǧid n Arfad d ujeǧid n tendint n Sfarwayim uřa d [ajeǧid n] Hanaɛ d Ɛiwwa?’”
ISA 37:14 Ḥizqiya iksi tibratin zeg ufus n ireqqasen uca iɣri tent. [Xenni] igeɛɛed ɣar Taddart n SIDI uca ibezzeɛ i-tent Ḥizqiya zzat i wudem n SIDI.
ISA 37:15 Iẓẓuǧ Ḥizqiyai SIDI, inna:
ISA 37:16 “[A] SIDI n řɛeskarat, AREBBI n Israil, wenni ittɣiman [jar] ikiruben! Cek, [wah] Cek weḥḥdek d AREBBI n marra tigeldiwin n ddunect. Cek teggid ijenwan d temmurt.
ISA 37:17 Ewc amezzuɣ nnec, [a] SIDI, arzem tiṭṭawin nnec uca texzared! Seř marra awařen n Sanḥarib wenni dd-issekk netta ḥima ad iɛeyyeb AREBBI iddaren.
ISA 37:18 D tidett, [a] SIDI, ijeǧiden n Accur qḍan timmura nni, xarrben tammurt nsen
ISA 37:19 u nḍaren irebbiten nsen di tmessi, maɣar tuɣa war ǧin d irebbiten, maca d timegga n ufus n yewdan waha, zeg ukeccuḍ d weẓru, uca nitni qḍan ten.
ISA 37:20 Řexxu [maca], [a] SIDI, AREBBI nneɣ, senjem aneɣ zeg ufus nnes, maḥend marra tigeldiwin n ddunect ad ssnen, [a] SIDI, aqa Cek weḥḥdek d AREBBI.”
ISA 37:21 [Xenni] issekk Icaɛya, mmis n Amuṣ, [ijj n ureqqas] ɣar Ḥizqiya, inna: “Ammu i iqqar SIDI, AREBBI n Israil: ‘Necc sřiɣ s minzi teẓẓuǧed-dd ɣari x Sanḥarib, ajeǧid n Accur.
ISA 37:22 Wa d awař i xas inna SIDI: ‘Taɛzarct, yeǧis n Ṣihyun, tesseḥqar i cek, nettat testehza zzayek, yeǧis n Urcalim thezz azeǧif awarni ac.
ISA 37:23 Man wen tɛeyybed u di man wen tceqqfed, man wen ɣar tessgeɛɛded tmijja u x man wen i xef tessgeɛɛded s nnfaxet tiṭṭawin nnec? [Cek tᵉttɣennaned] x Umqeddas n Israil!
ISA 37:24 S uqemmum n imsexxaren nnec tedɛid Sidi inu, tennid: S ubarru n ikarruten inu geɛɛdeɣ idurar yuɛřan, iɣezdisen n Lubnan. Necc ad zedmeɣ ticejjura nnes n tengelt yuɛřan uřa d ticejjura nnes icnan qaɛ n imerza u necc ad dd-aseɣ ař taqiccat nnes yuɛřan qaɛ, ɣar wezɣar n umarjeɛ nnes n uḍiř.
ISA 37:25 Necc ɣziɣ [anuten] u swiɣ aman. S třeqqa n iḍaren inu ssiẓɣeɣ marra iɣezran n Miṣra!’”
ISA 37:26 “Ma war tesřid aqa [aṭṭas] zeg wami ggiɣ man aya uca wciɣ as udem deg wussan n mecḥař uya? Řexxu jjiɣ t ad dd-iffeɣ, aqa cek d wenni i ɣa yarren tineddam ifaryen d řxirbat.
ISA 37:27 Imezdaɣ nsen tuɣa arxun, arẓin, seḍḥan. Nitni tuɣa aten am wefsu deg iyyar, [am] uɣemmuy aziza, [am] uřum x tzeɣwin, [am] [imendi] icemḍen [s usemmiḍ] qbeř i ɣa iffeɣ.
ISA 37:28 [Maca] Necc ssneɣ aɣimi nnec d uffuɣ nnec d twasit nnec d uɣewweɣ nnec xafi.
ISA 37:29 Minzi cek tɣewwɣed xafi u tuffet nnec tiweḍ-dd ɣar imezzuɣen inu, ad ac dd-ssekkeɣ ict n tsennart deg wenzaren u [ad ggeɣ] ict n sřimet jar iyencicen nnec u Necc ad cek arreɣ x webrid i di dd-tusid da.”
ISA 37:30 “Ta ad ac tiři d řeɛřamet: deg useggʷas-a ad teccem min ɣa iɣemyen s yixef nnes u deg useggʷas wiss tnayen min zzayes ɣa iɣemyen ɛawed, maca deg useggʷas wiss třata ad tzarɛem u ad temjarem, ad teẓẓum tizayarin deg imarjaɛen uca ad teccem řɣiǧet nnes.
ISA 37:31 Maɣar min inejmen, min iqqimen zi taddart n Yahuda, ad iwwet ɛawed iẓewran ɣar swadday u sennej ad yawi řɣiǧet.
ISA 37:32 Maɣar zi Urcalim ad dd-iffeɣ min iqqimen u zeg wedrar n Ṣihyun ad iffeɣ min i ɣa innejmen, asam [iqeddsen] n SIDI n řɛeskarat ad tt igg.”
ISA 37:33 “S uya, ammu i iqqar SIDI x ujeǧid n Accur: ‘Netta war dd-ittidef ca ɣar tendint-a u war dayes iccit ca uřa d ict n fřitca u war ɣares dd-iqarreb ca s uřa d ict n tseddart [n uɛeskari] u war xas ittbeqqiḍ uřa d ijj n lbaraj i řeḥṣaret.
ISA 37:34 X webrid i x dd-yusa, ad dd-iɛqeb. War ittidif ca ɣar tendint-a, iqqar SIDI.
ISA 37:35 Necc ad sseřqiɣ x tendint-a ḥima ad tt ssnejmeɣ di ṭṭweɛ inu u di ṭṭweɛ n umsexxar inu Dawud.’”
ISA 37:36 Xenni iffeɣ lmalak n SIDI uca inɣa mya u-xemsa u-tmenyin-ařef [n yeryazen] di řmargeḥ n řɛeskar n Accur. Umi dd-kkaren nitni tiwecca nnes, xzar, aqa aten marra idsen d řxecbat.
ISA 37:37 Uca ifsi Sanḥarib, ajeǧid n Accur, iqiḍan nnes, iruḥ, iɛqeb [ɣar temmurt nnes]. Iqqim izeddeɣ di Ninwa.
ISA 37:38 Umi isjed [ijj n wass] di taddart n arebbi nnes Nisrux, imsar, aqa iḥenjiren nnes Adrammilik d Caraṣar nɣin t s ssif. Nitni arewřen ɣar temmurt n Ararat. Mmis Asarḥaddun idweř d ajeǧid deg wemcan nnes.
ISA 38:1 Deg wussan nni iḥřec Ḥizqiya s ijj n řeḥřac ineqqen. Yusa-dd ɣares unabi Icaɛya, mmis n Amuṣ, inna as: “Ammu i iqqar SIDI: ‘Ewc řumurat i taddart nnec, maɣar ad temmted, war tᵉttɣimid teddared [ɛad ktar].’”
ISA 38:2 [Xenni] inneqřeb Ḥizqiya s uɣembub nnes ɣar řḥiḍ uca iẓẓuǧ ɣar SIDI,
ISA 38:3 inna: “A, SIDI, ɛqeř aqa necc uyureɣ zzat i wudem nnec s řaman u s yijj n wuř ikemmřen u ggiɣ min iǧan nican di tiṭṭawin nnec.” Uca ibda Ḥizqiya ittru s jjhed.
ISA 38:4 Yusa-dd wawař n SIDI ɣar Icaɛya, inna:
ISA 38:5 “Uyur, ini i Ḥizqiya: ‘Ammu i iqqar SIDI, AREBBI n babac Dawud: Necc sřiɣ i tẓaǧit nnec u ẓriɣ imeṭṭawen nnec. Xzar, Necc ad arniɣ xemmesṭac n iseggʷusa i wussan n tudart nnec.
ISA 38:6 Necc ad cek ssnejmeɣ zeg ufus n ujeǧid n Accur, uřa d tandint. Necc ad sseřqiɣ x tendint-a.
ISA 38:7 Aya ad yiři d řeɛřamet n SIDI i cek, aqa SIDI ad igg awař-a nni inna.
ISA 38:8 Xzar, ad ssɛeqbeɣ tiři x treffidin n Aḥaz nni dd-ihwan x treffidin n ddruj n tfuct, ɛecra n treffidin.’” [Xenni] teɛqeb-dd tfuct ɛecra n treffidin x treffidin nni zi dd-tehwa.
ISA 38:9 Tira n Ḥizqiya, ajeǧid n Yahuda, řami tuɣa iḥřec uca iggenfa zi řehřac nnes.
ISA 38:10 “Necc nniɣ: ‘[Řexxu] deg wezyen n wussan [n tudart] inu ittxeṣṣa ad uyureɣ x tewwura n řaxart. Min iqqimen n iseggʷusa inu ttwakksen zzayi.’
ISA 38:11 Necc nniɣ: ‘War ẓarreɣ ɛad SIDi, SIDi, di temmurt n yinni iddaren, war ttwiřiɣ ɛad iwdan ak-d imezdaɣ n řaxart.’
ISA 38:12 Ticři [n tudart inu] ad tt [xafi] arẓen, ad zzayi tt kksen am [kksen] aqiḍun n umeksaw. Am bu-uzeṭṭa ḍefseɣ tudart inu. Ad ayi iqess zi ddebbuz n txeyyaḍt: Ad teqḍid [tudart inu] jar wass d ǧiřet!
ISA 38:13 Rajiɣ s ṣṣbar ař ateffu. Netta ad yarẓ marra iɣsan inu am wayrad: Ad teqḍid [tudart inu] jar uteffu d ǧiřet!
ISA 38:14 Ttjiwjiweɣ am tfařǧest ittennḍen am tᵉṭṭaw, ttgergureɣ am tedbirt. Ssgeɛɛdeɣ tiṭṭawin inu: ‘[A] Sidi inu, necc ttwaḥṣareɣ, iři d aḍman i necc!’
ISA 38:15 Min ɣa iniɣ? Min d ayi inna, aqa igga i-t. Marra iseggʷusa [n tudart] inu ad kkeɣ x tarzugi n řeɛmar inu.
ISA 38:16 ‘[A] Sidi inu, x man aya izemmar [bnadem] ad iddar uca sennej i marra aya aqa dayes tudart n buḥbeř inu, [maɣar] Cek ad ayi teggenfid u Cek ad ayi tarrid ad dewřeɣ ɣar tudart!
ISA 38:17 Xzar, tarzugi tuɣa tarzeg ayi i řehna. Cek třesqed ɣar řeɛmar inu aṭṭas [ařami d ayi teḥḍid] zeg [weḥfur n] turṣuḍi, maɣar tenḍared marra ddnub inu awarni i weɛrur nnec.
ISA 38:18 Maɣar řaxart war Cek tqada ca, řmewt war Cek issemɣar. Wi ɣa ihwan deg weḥfur, war ttrijin řaman nnec.
ISA 38:19 Wenni iddaren, [a] wenni iddaren, aqa netta ad Cek iqada. Babatsen ad isscen řaman nnec i iḥenjiren [nnes].’”
ISA 38:20 “SIDI [yusa-dd] ḥima ad ayi issenjem. Ad nurar s uzenzun x ifiřan inu marra ussan n tudart nneɣ di Taddart n SIDI.”
ISA 38:21 Aqa inna Icaɛya: “Ejj i-ten ad awyen ijj n weɣrum n tazart uca ad t řetfen x tḥebbuct, [xenni] ad iggenfa.”
ISA 38:22 Ḥizqiya aqa inna: “Man i ɣa tiři řeɛřamet aqa necc ad ssgeɛɛdeɣ [ɛawed] ɣar Taddart n SIDI?”
ISA 39:1 Di řweqt nni issekk Baradux-Baladan, mmis n Baladan, ajeǧid n Babil, tibratin d ict n tarzeft ɣar Ḥizqiya, maɣar tuɣa isřa aqa Ḥizqiya ihřec uca iggenfa.
ISA 39:2 Ifarḥ zzaysen Ḥizqiya uca isscen asen marra taddart n txubay nnes: nnuqart d wureɣ d řeɛṭur d zzect d řehri n řesnaḥ nnes d marra min ittwafen deg ixxamen nnes n txubay. War iqqim walu di taddart nnes u di marra řeḥkamet nnes nni war tuɣi d asen t isscen.
ISA 39:3 [Xenni] yusa-dd unabi Icaɛya ɣar ujeǧid Ḥizqiya, inna asen: “Min nnan iryazen nni u manis ɣarek dd-usin?” Ḥizqiya inna: “Nitni usin-dd zeg ict n temmurt tiggʷej, zi Babil.”
ISA 39:4 Netta inna: “Min ẓrin nitni di taddart nnec?” Ḥizqiya inna: “Nitni ẓrin marra min iǧan di taddart inu. War iqqim ca zi min iǧan deg ixxamen n txubay inu, war d asen t ssecneɣ.”
ISA 39:5 [Xenni] inna Icaɛya i Ḥizqiya: “Seř i wawař n SIDI n řɛeskarat:
ISA 39:6 ‘Xzar, ad dd-asen wussan meřmi marra min iǧan di taddart nnec uřa d min yarwen řejdud nnec ař ass-a, ad t awyen ɣar Babil. War ittɣimi walu, iqqar SIDI.
ISA 39:7 Ad awyen uřa zeg iḥenjiren nnec inni dd ɣa iffɣen zzayek, inni dd ɣa tejjed, ḥima ad iřin d imsexxaren imcennɛen di řeqṣar n ujeǧid n Babil.’”
ISA 39:8 Ḥizqiya inna i Icaɛya: “Awař n SIDI i d ayi tennid iṣbeḥ.” Netta inna ɛawed: “Mařa [xenni] deg wussan inu ad [din] yiři řehna d řaman!”
ISA 40:1 “Sfewwej, sfewwej řgens inu, [ammu i] iqqar AREBBI nwem!
ISA 40:2 Siwřem ɣar wuř n Urcalim uca barrḥem as aqa amenɣi nnes iqḍa, aqa řmuɛṣiyyet nnes teṣřeḥ, aqa teksi s uḍeffus zeg ufus n SIDI i marra ddnub nnes.
ISA 40:3 Tmijja n wenni isɣuyyun di řexřa: ‘Swejdem abrid i SIDI, sarrḥem di řexřa abrid i AREBBI nneɣ!’
ISA 40:4 Marra tiɣzurin ad ttwassgeɛɛdent, marra idurar d tewririn ad ttwassehwan. Min ifarɣen, ad idweř iseggem uca ijj n useddi n idurar ad idweř d řewḍa iwaṭan.
ISA 40:5 Ad ittwassargeb uɛuǧi n SIDI uca marra ddat ad tẓar aqa aqemmum n SIDI issiweř.”
ISA 40:6 “Tmijja tenna: ‘Barreḥ!’ U netta inna: ‘Min ɣa barrḥeɣ?’ ‘Marra ddat am arbiɛ d marra tamexsiwt nnes icewwaren am tnewwact deg iyyar.
ISA 40:7 Arbiɛ ittaẓeɣ, tanewwact tesřaw xmi xas ittsuḍ Arruḥ n SIDI. D tidett, řgens d arbiɛ.
ISA 40:8 Arbiɛ ittaẓeɣ, tanewwact tesřaw, maca awař n AREBBI nneɣ ittɣima i řebda.’”
ISA 40:9 “Geɛɛed x ijj n wedrar d ameqqran, [a] Ṣihyun, [a] cem tambeccart n řexbar aṣebḥan, sgeɛɛed tmijja nnem s jjehd, [a] Urcalim, [a] cem tambeccart n řexbar aṣebḥan, sgeɛɛed tmijja nnem, war teggʷed, ini i tneddam n Yahuda: ‘Xzar, AREBBI nkent!’
ISA 40:10 Xzar, ad dd-yas Sidi inu, SIDI, Netta ijhed uca aɣiř nnes ad iḥkem. Xzar, řmunet nnes ɣares uca axeǧeṣ nnes izwar as.
ISA 40:11 Ad yarwes taḥimart nnes am umeksaw, ad issmun izmaren ɣar uɣiř nnes uca ad ten yarbu deg weḥsin nnes. Ad indeh inni issuṭṭuḍen s řeɛqeř.”
ISA 40:12 “Man wen iɛbaren aman [n řebḥar] s wuru n ufus nnes u [man wen] iksin řeqyas n ijenwan s řeɛbar n ufus? U [man wen] iṭṭfen ucař n temmurt s ijj n řmud? Man wen iwezznen idurar s ijj n řbasku u tiwririn s řmizan?
ISA 40:13 Man wen ibeqqcen x Arruḥ n SIDI u [man wen] t issɣaren am umcawar nnes?
ISA 40:14 Wi t iseqsan Netta x ccwar d man wen i d as isscnen řefhamet u wi d as issřemden abrid n řḥeqq uca yarni as tussna? Wi d as issargben abrid iccuren s řefhamet?”
ISA 40:15 “Xzar, řegnus ttwaḥesben am yict n tuddint zeg ubuqař u am [cwayt n] tneɣda x řmizan. Aqa da, Netta issgeɛɛed tigzirin am tɛejjajt ifsusen.
ISA 40:16 Lubnan war ittqiddi i ukeccuḍ n tmessi uca řmař nnes war ttqiddin i tɣarṣt n wecmaḍ.
ISA 40:17 Marra řegnus aqa aten am war din ǧin qibač nnes uca iḥesseb i-ten d walu, d řeɛwin.
ISA 40:18 Wi ak-d i ɣa tessemquddem Arebbi niɣ man arwas i zi t ɣa txeřfem?”
ISA 40:19 “Aḥrayfi ittkebba řexyař ineqcen u amziř n wureɣ ittɣeǧef i-t s wureɣ u ifessi as tiseddyin n nnuqart.
ISA 40:20 Wenni iǧan d amezřuḍ i tewhibt n usgeɛɛed ad ixḍar ijj n ukeccuḍ war yarecci. Netta yarezzu ijj n bu-ṣṣenɛet maḥend ad igg řexyař ineqcen nni war ittenhezzin.”
ISA 40:21 “Ma war [tt] tessinem? Ma war [tt] ttesřim? Ma war [tt] tuɣi ɣarwem ittwassen zeg umezwaru? Ma war tuɣi tḥeṭṭam dsusa n temmurt?
ISA 40:22 Netta d wenni iqqimen x tqurart n tayyut i dd-innḍen i [marra] tammurt, [tammurt] mani imezdaɣ nnes [ttbanen-dd] am yiburexsen, Netta d wenni imeḥḥḍen ijenwan am arwaq, ittbezzeɛ i-ten am uqiḍun i wezdaɣ,
ISA 40:23 Netta d wenni ittarran ayt n jjehd d walu, u issexwa řquḍat n temmurt.
ISA 40:24 Ɛad cwayt waha ttwaẓẓun, ɛad cwayt waha ttwazarɛen, ɛad cwayt waha iwta jjdeɛ [n tcejjart] nsen aẓwar di temmurt, aqa isuḍ Netta xasen ařami uẓɣen uca taḥaryaḍt teksi ten am uřum.”
ISA 40:25 “Ak-d man wen texsem kenniw ad ayi tessemquddem, man wen i di arewseɣ?, iqqar Umqeddas.
ISA 40:26 Sgeɛɛdem tiṭṭawin nwem u xzarem, man wen iggin man aya? D Netta wenni issuffuɣen řɛeskar nsen marra, wenni d asen ittřaɣan marra s isem nsen s řemɣaret n jjehd [nnes] u s řɛezz [nnes] ijehden, war ibeṭṭeř uřa d ijj!”
ISA 40:27 “Mayemmi teqqared [xenni], [a] Yaɛqub, u tessawařed [ammu], [a] Israil: ‘Abrid inu innuffar x SIDI u tasɣart inu tᵉttekk x AREBBI inu?’
ISA 40:28 Ma war [tt] tessined? Ma war [tt] tesřid aqa AREBBI n řebda, SIDI, wenni dd-ixeřqen ṭṭrufa n temmurt, war ittiḥeř u war yarexxu? War izemmar [bnadem] ad ifhem řeɛqeř nnes.
ISA 40:29 Netta ittic jjehd i wenni yuḥřen u wenni war ɣar iǧi jjehd yarenni as jjehd s waṭṭas.
ISA 40:30 Iḥenjiren ttaḥřen u arexxun, ibřiɣen ttenqraḍen uca weṭṭan,
ISA 40:31 [maca] inni ittrajan SIDI, ttaymen jjehd n jdid. Nitni ttᵉṭṭfen afriwen am ugider, ttazzřen, [maca] war ttiḥřen, gguren [maca] war arexxun.”
ISA 41:1 “Seɣdem-dd zzati, [a] tigzirin x tma n řebḥar, uca jjem ccuɛub ad ṭṭfen jjehd n jdid, jjem ten ad dd-adsen, xenni ad ssiwřen, jjem aneɣ ad nqarreb ɣar řeḥkam marra nmun.
ISA 41:2 Man wen i dd-issfaqen zi manis d tneqqar tfuct ijjen wenni akides temsagar tsegda ɣar iḍaren nnes? [Man wen] isellmen řegnus deg ufus nnes uca igga i-t ad yareyyes x ijeǧiden? [Man wen] yarrin [řegnus] i ssif nnes am tɛejjajt, i řqews nnes am uřum nni di ittsuḍ usemmiḍ?
ISA 41:3 Netta iḍfar i-ten, ikemmeř ɣar zzat di řehna x webrid war [t] iḥidi ɛemmarṣ s iḍaren nnes.
ISA 41:4 Man wen isseqfeř uca igga aya? Netta, wenni zeg umezwaru ibarrḥen i jjiřat: ‘Necc, SIDI, d Amezwaru u ɣar ineggura Necc Necc.’
ISA 41:5 Tigzirin ẓrint [t], ggʷedent, ineggura n temmurt arjijen, nitni udsen-dd, iwḍen-dd.
ISA 41:6 Ijjen iwca afus i umeddukkeř nnes, inna i umas: ‘Iři d aryaz!’”
ISA 41:7 “Aṣnayɛi igga uř deg wemziř n wureɣ nni [t] isserɣen s wefḍis, wenni iwettin x ẓẓebra, am iqqar x mammec ssřesqen iziynan: ‘D lemliḥ!’. [Xenni] issemten [wemziř] i řexyař s imesmar, ařami war ittenhezzi.”
ISA 41:8 “[Maca] cek, [a] Israil, amsexxar inu, [a] Yaɛqub nni ixḍareɣ, zzariɛet n Ibrahim, ameddukkeř inu iɛizzen,
ISA 41:9 ṭṭfeɣ cek zeg ineggura n temmurt uca řaɣiɣ-dd xak zi ṭṭrufa nnes qaɛ, nniɣ ac: ‘Cek d amsexxar inu, ixḍareɣ cek, war cek nḍareɣ.’
ISA 41:10 War tteggʷed ca, maɣar Necc ǧiɣ akidek, war sḥissif, maɣar Necc d AREBBI nnec. Necc ad cek ssjehdeɣ, ad ac wceɣ afus, [wah,] Necc ad dayek menɛeɣ s ufusi iccur s tsegda inu.”
ISA 41:11 “Xzar, nitni ad seḍḥan, ad dewřen i řefḍiḥet, marra inni xak issḥemman. Iryazen nni akidek ittemcubbucen, ad dewřen d walu, ad ttwahellken.
ISA 41:12 Cek ad xasen tarzud, [maca] war ten tᵉttifed. Iryazen nni kidek ittemcubbucen ad dewřen d walu d řbaṭeř, [wah,] iryazen nni ittmenɣan akidek.
ISA 41:13 Maɣar Necc d SIDI, AREBBI nnec, wenni iṭṭfen afus afusi nnec d wenni d ac iqqaren: ‘War tteggʷed ca, Necc ad ac wceɣ afus!
ISA 41:14 War teggʷed ca, [a cek] akeccaw Yaɛqub, [a] yeryazen n Israil! Necc ad ac wceɣ afus, Amefdi nnec d Amqeddas n Israil!’, [ammu i] iqqar SIDI.
ISA 41:15 Xzar, Necc ggiɣ cem d tařwiḥt itteḥřuǧuḍen i usarwet d tamaynut, s teɣmas iqeḍɛen ɣar tnayen n iɣezdisen. Idurar ad ten tssarwted u ad ten teddzed u tiwririn ad tent tegged d řum.
ISA 41:16 Cek ad ten tezzuzared, ad ten yawi usemmiḍ, ad ten tareyyec tḥaryaḍt. Cek maca ad tesřiwřewed x SIDI, ad tcennɛed ixef nnec deg Umqeddas n Israil.”
ISA 41:17 “Inni ittwaḥṣaren d imezřaḍ arezzun x waman, [maca] walu da. Iřes nsen yuẓeɣ s ufadi. Necc, SIDI, ad asen sřeɣ, Necc, AREBBI n Israil, war daysen semmḥeɣ.
ISA 41:18 X tewririn tiqeccura ad jjeɣ iɣezran ad dduqqzen uřa d řɛunṣarat di řwesṭ n řewḍat. Necc ad arreɣ řexřa d ayeřmam n waman uřa d tammurt yuẓɣen d tinedwin.
ISA 41:19 Di řexřa ad ẓẓuɣ tacejjart n tengelt d tcejjart n ukasiya d tcejjart n tariḥant d uzemmur, di tnezruft ad ggeɣ tacejjart n umerzi d tcejjart n dulb d tayda ak-d wayawya,
ISA 41:20 ḥima ad ẓaren, ad neɛmen, ad argben, ad fehmen jmiɛ, aqa afus n SIDI igga aya, aqa Amqeddas n Israil ixřeq i-tt-i-dd.”
ISA 41:21 “Qeddmem ddeɛwet nwem [zzati], iqqar SIDI, awyem-dd burhanat nwem ijehden qaɛ, iqqar Ujeǧid n Yaɛqub.
ISA 41:22 Ejj i-ten ad awyen u ad aneɣ barrḥen min ɣa imsaren. Sargbem aneɣ x tmesřayin timezwura qaɛ, mammec ǧant, ḥima ad [tent] neksi ɣar wuř uca ad nessen aneggar nsent, niɣ ejj aneɣ ad nseř x tmesřayin i dd ɣa yasen [ɛad].
ISA 41:23 Barrḥem timesřayin i ɣa yiřin daweḥda ɛad, [maḥend] ad nessen aqa kenniw d irebbiten. Ggem ca d řxar niɣ d řɣar, [ḥima] ad nxezzar deg wayawya s řxezrat ibeqqcen, ad [tt] nẓar [jmiɛ].
ISA 41:24 Xzar, kenniw qell x walu u min tᵉtteggem war dayes bu nnfaɛ, wenni kenniw ixḍaren aqa-t d nnɛi.”
ISA 41:25 “Necc ad dd-ssekkareɣ [ijjen] zi ccamal u netta ad dd-iffeɣ zi manis dd-tneqqar tfuct, ad iřaɣa x Isem inu. Netta ad dd-yas am bu-třaxt nni iɛeffsen x ubeǧaɛ, ad iɛfes x ayt n jjehd am x tarrist.”
ISA 41:26 “Man wen [i-tt] ibarrḥen zeg umezwaru qaɛ, [ḥima] ad [tt] nessen, niɣ [xenni] man wen [i-tt] ibarrḥen qbeř, ḥima nzemmar ad nini: ‘Aqa netta dayes řaman!’ Maca war din wi [tt] ibarrḥen, [war din] wi d aneɣ ittarran ad nseř ca, uřa d ijj war isři awem tneṭqem s ca.
ISA 41:27 [Am] Umezwaru [nniɣ Necc] i Ṣihyun: ‘Aqa-ten da!’, u i Urcalim: ‘Necc ad awyeɣ ijj n ureqqas s řexbar aṣebḥan.’
ISA 41:28 Necc xzareɣ, [maca] war din tuɣi uřa d ijj! War [din] tuɣi uřa d ijj zzaysen wenni izemmaren ad iwc ccwar, [ařami] zemmareɣ ad sseqsiɣ u nitni ad xafi dd-arren.
ISA 41:29 Xzar, nitni marra di řbaṭeř, řexdayem nsen war daysen nnfaɛ, řexyařat ifesyen nsen d řeɛwin [waha] u xwant.”
ISA 42:1 “Xzar, Amsexxar inu Wenni ttɛawaneɣ, d Wenni farzeɣ, d Wenni dd-yusin x řxaḍar inu. Necc ssarseɣ xas Arruḥ inu. Netta ad issuffeɣ řeḥkam ɣar řegnus.
ISA 42:2 War isɣuyyu u war issgiɛɛid tmijja nnes u war ittarri tmijja nnes ad as sřen di barra.
ISA 42:3 Aɣanim inḍefsen war t ittareẓẓi ca u taftič n tiffest ittduxxunen war t issexsiy ca, [wah,] s tidett ad issuffeɣ tasegda.
ISA 42:4 Netta war ittiḥeř u war ittwareẓẓi ař dd-issbedd tasegda x temmurt u ɣar Ccariɛa nnes ad rajant tigzirin.”
ISA 42:5 “Ammu i iqqar Arebbi, SIDI, wenni iggin u ibezzɛen ijenwan, wenni iggin tammurt d min xas iɣemmyen, wenni itticen twarrit n nnefs i řgens i dayes izeddɣen, u buḥbeř i yinni igguren x [temmurt]:
ISA 42:6 ‘Necc, SIDI, řaɣiɣ ac di tsegda uca ad Cek menɛeɣ zeg ufus, ad Cek ḥḍiɣ uca ad Cek arreɣ d Řɛahd i řgens d tfawt i řegnus,
ISA 42:7 ḥima ad tarzmed tiṭṭawin idaɣařen, ad tessuffɣed imeḥbas zi řeḥbes u yinni iqqimen di taǧest zi taddart n tɛessast.
ISA 42:8 Necc d SIDI, wa d Isem inu, uca war tticeɣ ccan inu i wenneɣni u asemɣar inu war [t tticeɣ] i řexyařat ineqcen.
ISA 42:9 Xzar, timesřayin timezwura iwḍent uca timesřayin n jdid ad tent barrḥeɣ. Qbeř mma ad ffɣent, ad awem tent ssecneɣ.’”
ISA 42:10 “Ɣennjem izři n jdid i SIDI, asemɣar nnes zeg ineggura n temmurt, [kenniw] inni ineddhen řebḥar, d marra min dayes: [kennint a] tigzirin d imezdaɣ nsent.
ISA 42:11 Ad issgeɛɛed řexřa [tmijja nnes] uca uřa d tneddam nnes, [jmiɛ] ak-d ředcur nni di izeddeɣ Qidar. Ejj inni izeddɣen di řejruf ad sřiwřewen, [ejj i-ten] ad sɣuyen s řefraḥet x tqiccitin n idurar,
ISA 42:12 ejj i-ten ad ssɛuǧen SIDI, ad barrḥen ccan nnes x [marra] tigzirin.
ISA 42:13 SIDI ad dd-iffeɣ am bu-teɣruḍṭ, ad issekkar meẓri deg umenɣi am weryaz imeḥḍen, Netta ad isřiwřew, ad isɣuy i umenɣi, ad iḥṣar qaɛ řɛedyan nnes.”
ISA 42:14 “Necc tuɣa sseɣdeɣ zeg wecḥař uya, tuɣa sqareɣ, ttebbateɣ ixef inu. Ad sɣuyeɣ am yicten ittarun, ad [ten] areddǧeɣ u ad [ten] ṣarḍeɣ [jmiɛ].
ISA 42:15 Idurar d tewririn ad ten arreɣ d amessuci u ad jjeɣ aɣemmuy aziza nsen marra ad yaẓeɣ, iɣezran ad ten ggeɣ d tigzirin, uca ad ssiẓɣeɣ iyeřmamen.
ISA 42:16 Idarɣařen ad ten nedheɣ x ijj n webrid war t ssinen, ad ten jjeɣ ad uyuren x tbridin war tent argben. Ṭṭram zzat i tiṭṭawin nsen ad t ggeɣ d tfawt, min ifarɣen, ad t seggdeɣ. Tina d timesřayin i ɣa ggeɣ di ṭṭweɛ nsen u war daysen semḥeɣ.
ISA 42:17 Inni ittcařan x řexyařat ineqcen, inni iqqaren i řexyařat ifesyen: ‘Kenniw d irebbiten nneɣ!’, aqa nitni ad dewřen ɣar ḍeffar, ad seḍḥan aṭṭas.”
ISA 42:18 “Sřem, [kenniw] iduhcar! Idarɣařen, xzarem u wařam.
ISA 42:19 Man wen iǧan d adarɣař am umsexxar inu, d adehcur am ureqqas inu? Man wen iǧan d adarɣař am umtiqqi u d adarɣař am umsexxar n SIDI?
ISA 42:20 Aṭṭas i tᵉttwařid, [maca] war tucid walu, [iwa] netta yarzem imezzuɣen, [maca] war ittesři ca.
ISA 42:21 Tuɣa yarḍa SIDI di ṭṭweɛ n tsegda nnes [maḥend] ad issemɣar d issɛuǧa Ccariɛa.
ISA 42:22 [Maca řexxu] nitni d ijj n řgens acaren tt, keccḍen tt. Marra ttwacedden deg ifran, ttwaqqnen di řeḥbes. Nitni dewřen d taymart, [am] war din iǧi umsenjem, dewřen nitni i tkeccaḍt, [maca] uřa d ijj iqqar: ‘Arr i-t-i-dd!’
ISA 42:23 Man wen zzaywem ad iwc amezzuɣ i man aya? Man wen i ɣa iḥekkaren, [man wen] i ɣa iseř di ṭṭweɛ n min ɣa yiřin awarni man aya?
ISA 42:24 Man wen issiwḍen Yaɛqub am teymart d Israil i ixewwanen? Ma war tt iggi SIDI, wenni di nexḍa? [Maɣar] nitni war xsen ad uyuren x ibriden nnes, war xsen ad sřen ɣar Ccariɛa nnes.
ISA 42:25 S uyenni izeǧeɛ xas asɛar n weɣḍab nnes uřa d lɛunf n garra. Iqewwar as s iceɛɛařen, [maca] netta war d as iḥekkar, iqqed as timessi, [maca] netta war tt ikessi ɣar wuř nnes.”
ISA 43:1 “[Maca] řexxu, ammu i iqqar SIDI, wenni cek dd-ixeřqen, [a] Yaɛqub, d wenni d Amkewwan nnec, [a] Israil, war tteggʷed ca, maɣar Necc fekkeɣ cek, řaɣiɣ ac s yisem nnec, cek inu.
ISA 43:2 Mařa tcuqed deg waman, ad iřiɣ akidek, mařa deg iɣezran, war cek ttiwyen. Mařa teẓwid x tmessi, war tcemmḍed, uca aceɛɛař war cek issruɣa.
ISA 43:3 Maɣar Necc d SIDI, AREBBI nnec, Amqeddas n Israil, Amsenjem nnec. Necc wciɣ Miṣra d ddeyyet i cek, Kuc d Seba deg wemcan nnec.
ISA 43:4 Minzi tsekkwid aṭṭas di tiṭṭawin inu, aqa tᵉttwassɛuǧed u Necc ttexseɣ cek. Wciɣ iwdan deg wemcan nnec d ccuɛub deg wemcan n řeɛmar nnec.
ISA 43:5 War tteggʷed ca, maɣar Necc akidek. Ad awyeɣ iḥenjiren nnec zi mani dd-tneqqar tfuct, ad cek ssmuneɣ zi mani dd-tɣeǧi tfuct.
ISA 43:6 Necc ad iniɣ i ccamal: ‘Ewc!’ u i ljanub: ‘War ttᵉṭṭef!’, arekkʷeḥ iḥenjiren inu zi řaggʷaj, yessi zi tma n temmurt,
ISA 43:7 kuř ijjen wenni umi ttřaɣan s Yisem inu, wenni dd-xeřqeɣ i ccan inu, wenni kewwneɣ d wenni ggiɣ ɛawed.”
ISA 43:8 “Ejj ad iffeɣ řgens adarɣař, waxxa [ɣarsen] tiṭṭawin, uřa d iduhcaren, waxxa ɣarsen imezzuɣen.
ISA 43:9 Ejj ad ttwassmunen marra řegnus uca ejj ccuɛub ad nnjarwen! Man wen zzaysen izemmar ad ibarreḥ ta, d man wen izemmar ad aneɣ yini min tuɣa iǧan zic? Ejj i-ten ad awyen řechud nsen maḥend ad ttwaseggden, uca [ejj řechud] ad sřen, ad inin: ‘D tidett!’
ISA 43:10 Kenniw d řechud inu uřa d amsexxar inu nni farzeɣ, ḥima ad tessnem, ad dayi tamnem, ad tfehmem aqa Necc Necc. Qbeř Necc war ittwagg uřa d ijj n Arebbi uca awarni ayi war ittiři uřa d ijjen!, iqqar SIDI.
ISA 43:11 Necc, Necc d SIDI, u war iǧi Umsenjem mɣir Necc.
ISA 43:12 Necc barrḥeɣ u ssnejmeɣ u Necc iwyeɣ awem [t-i-dd] ɣar umejjun. Uřa d ijj n [arebbi] řbarrani war tuɣi jar awem. Kenniw d řechud aqa Necc d Arebbi, ammu i iqqar SIDI.
ISA 43:13 Uřa zeg wass-a, aqa Necc Necc uca uřa d ijj war izemmar ad issfekk zeg ufus inu! [Mařa] Necc xedmeɣ, man wen izemmaren ad t inneqřeb?”
ISA 43:14 “Ammu i iqqar SIDI, Amefdi nwem, Amqeddas n Israil: ‘Di ṭṭweɛ nwem ssekkeɣ [ijjen] ɣar Babil uca ad ten arreɣ ad arewřen, uca ad hwan marra Ikaldaniyyen deg iɣurraba nni zi tuɣa farrḥen [ammu qbeř].
ISA 43:15 Necc d SIDI, Amqeddas nwem, wenni dd-ixeřqen Israil, Ajeǧid nwem.’”
ISA 43:16 “Ammu i iqqar SIDI nni iggin abrid di řebḥar d tebridt deg waman ijehden,
ISA 43:17 wenni ijjin ikarruten d yeysan, řɛeskar d jjehd ad ffɣen - aqa da, zzřen munen, war ttnekkaren ɛemmarṣ, xesyen, qḍan am teftič n tiffest! -
ISA 43:18 [ammu i iqqar SIDI]: ‘War ttɛeqiřem [ɛad] x min tuɣa iǧan zic, war ttidarem [ɛad] min iɛdun.
ISA 43:19 Xzar, ad ggeɣ min iǧan n jdid, řexxu ad dd-iffeɣ. Ma war d as tḥekkarem ca? Wah, Necc ad ssarseɣ abrid di řexřa, iɣzaren di tnezruft.
ISA 43:20 Řmař n řexřa ad ayi ssɛuǧan, uccanen n řexřa d yessis n nnɛamet, maɣar Necc ad ggeɣ aman ad azzřen di řexřa uřa d iɣezran di tnezruft, ḥima ad ssesweɣ řgens inu, inni farzeɣ.
ISA 43:21 Řgens-a ggiɣ t i Necc, nitni ad barrḥen ccan inu.’”
ISA 43:22 “[Maca] cek war d ayi dd-třaɣid, [a] Yaɛqub, war tessiḥřed ixef nnec akidi, [a] Israil!
ISA 43:23 Cek war d ayi dd-tiwyed ijjen zeg wuǧi n tɣarṣa nnec n wecmaḍ, uca s tɣarṣi nnec war d ayi tcennɛed. Ɛemmarṣ war cek ḥṣareɣ ɣar tewhibt [n řɣiǧet] u war cek ssiḥřeɣ ɛemmarṣ s jjawi.
ISA 43:24 Cek war d ayi tesɣid aɣanim n uḥemmum ittfuḥen s tmenyat n nnuqart uca war d ayi tessjiwned s tadunt n tɣarṣa nnec, maca s ddnub nnec tarnid ayi-dd řxedmet, s řmuɛṣiyyat nnec tessiḥřed ayi.”
ISA 43:25 “Necc, d Necc, wenni i ɣa imesḥen iɛeddiyen nnec di ṭṭweɛ inu, Necc war ttidareɣ ɛad ddnub nnec.”
ISA 43:26 “Arr [i-ten] ɣar řbař inu, ejj aneɣ ad nemcarreɛ, wwet x yixef nnec maḥend ad dd-tawyed tasɣart nnec.
ISA 43:27 Babac amezwaru ixḍa u uřa d imseṣřaḥen nnec ɛdun xafi.
ISA 43:28 [Xenni] ssɛiǧteɣ imeqqranen n Zzawect Iqeddsen, u arriɣ Yaɛqub maḥend ad ittwaḥarrem [i uteḥḥi] uca jjiɣ Israil maḥend ad t ɛeyyben.”
ISA 44:1 “Řexxu [maca], seř, [a] amsexxar inu Yaɛqub, Israil nni farzeɣ!
ISA 44:2 Ammu i iqqar SIDI, Wenni cek iggin, Wenni cek iggin zeg uɛeddis [n yemmac], Wenni d ac iwcin afus: ‘War tteggʷed ca, [a] Yaɛqub, amsexxar inu, Yacurun nni farzeɣ!
ISA 44:3 Maɣar Necc ad seyyḥeɣ aman x min iffuden d tseǧyawin x min yuẓɣen. Necc ad zeǧɛeɣ Arruḥ inu x zzariɛet nnec uřa d lbaraka inu x tarwa nnec.
ISA 44:4 Nitni ad ɣemyen jar arbiɛ, am yiṣefṣafen ɣar tɣezratin n waman.
ISA 44:5 Ijjen ad yini: ‘[Necc] n SIDI!’ uca ijjen nneɣni ad iřaɣa ixef nnes s yisem n Yaɛqub, u [ɛawed] ijjen nneɣni ad yari s ufus nnes: ‘[Necc] n SIDI!’ uca ad ikenna ixef nnes s yisem [icennɛen] ‘Israil’.’”
ISA 44:6 “Ammu i iqqar SIDI, Ajeǧid n Israil, d Amefdi nnes, SIDI n řɛeskarat: ‘Necc d Amezwaru, Necc d Aneggaru, nhřa Necc war iǧi uřa d ijj n AREBBI nneɣni.
ISA 44:7 Man wen izemmaren ad ibarreḥ am Necc? Ejj i-t ad [t] yini u ad ayi t isscen zeg wass nni di ẓẓuɣ řgens n wecḥař uya. Ejj i-ten ad asen ɛawden timesřayin n tiwecca, min i dd ɣa yasen.
ISA 44:8 War ttnexřiɛem u war tteggʷdem. Ma war d awem t-i-dd-ssiwḍeɣ zeg [wakud n] zic ɣar imezzuɣen nwem u ma war ḥajiɣ t? Kenniw d řechud inu: Ma aqa din ijj n Arebbi nhřa Necc? War [din] iǧi uřa d ict n teṣḍart nneɣni, Necc war ssineɣ uřa d ijjen.’”
ISA 44:9 “Inni itteggen řexyařat ineqcen ixwan, u [řexyařat] nni ttexsen nitni war neffɛent deg walu. Nitni [s yixef nsen] d řechud nsent aqa war ttwiřint u war ssinent walu, ařami ɣa dewřen ttseḍḥan nitni.
ISA 44:10 Man wen itteggen ijj n arebbi u [man wen] ittkebban řexyař n l’aṣnam am war ɣares bu tizi zzayes?
ISA 44:11 Xzar, marra icricen nsen ad dewřen ttseḍḥan, maɣar ayt n bu-ṣṣenɛet [i ixeddmen s ukeccuḍ d weẓru] d iwdan waha. Ejj i-ten ad munen, ad kkaren, ad nnxeřɛen, nitni ad dewřen ttseḍḥan jmiɛ.
ISA 44:12 Amziř n wuzzař ɣares imeydi n wemziř, ixeddem ɣar řefḥem itteḥduduqen, ittqarres řexyař s ifḍisen [nnes]. Ixeddem i-t s uɣiř ijehden. Netta iǧuẓ ařami war ɣares iqqim bu jjhed ɛad. War isess aman ař ɣa yaḥeř aṭṭas.
ISA 44:13 Anejjar iɛebbar tafrewt s ufiřu nnes n řeɛbar, yareccem [řexyař ineqcen] s ukerraj, u inejjar i-t s řmus uca yareccem i-t s ddewara u igga i-t d ijj n řexyař n bnadem maḥend ad ittwassars deg ict n taddart.
ISA 44:14 Izeddem bnadem ticejjura n tengelt i yixef nnes, ikessi ict n [tcejjart n] ssidri niɣ n řbeǧuḍ, yarezzu i yixef nnes jar tcejjura n wezɣar. Itteẓẓu ict n tayda uca tmeqqar s wenẓar.
ISA 44:15 Ad tiři [tcejjart] d řefḥem i bnadem. Ikessi zzayes uca iẓɣařa ixef nnes ɣares. Ɛawed issraqqa timessi, issnenna zzayes aɣrum. Zi tcejjart ittegg [bnadem] ɛawed ijj n arebbi uca ittbendaq as, ittegg zzayes řexyař ineqcen uca isejjad as.
ISA 44:16 Ijj n wezyen [n ukeccuḍ] zzayes issecmaḍ i-t s tmessi, ak-d wezyen iqqimen ittett aysum. Icennef aysum uca ittyawan. Iẓɣařa ixef nnes, iqqar: ‘Ah, mammec ḥemmiɣ, necc ttaciɣ ak-d tmessi!’
ISA 44:17 Zi min iqqimen [n ukeccuḍ] ittegg ijj n arebbi, ijj n řexyař ineqcen. Isejjad as, ittbendaq zzates, ittẓaǧa ɣares, iqqar: ‘Senjem ayi, minzi cek d arebbi inu!’”
ISA 44:18 “War ssinen, war ttḥikin, maɣar tiṭṭawin nsen mesḥent umi war ttwiřin walu, uca uřawen nsen war tteftinen.
ISA 44:19 Uřa d ijj ittegg i-tt ɣar wuř nnes uca war din bu tussna uřa d řefhamet ḥima ad inin: ‘Ijj n wezyen zzayes sscemḍeɣ t di tmessi. Ssnenneɣ aɣrum x řefḥem nnes [itteḥduduqen] u cenfeɣ aysum u cciɣ t. Zi min iqqimen [n ukeccuḍ] ma ad zzayes ggeɣ jjɛifect [n ṣṣanam], ma ad sejdeɣ zzat i ukeccuḍ n tcejjart?’
ISA 44:20 Netta issecca ixef nnes s iɣɣeḍ, uř nnes ittwaɣarren iɣekkwa i-t. War izemmar ad issenjem řeɛmar nnes, ad yini: ‘Ma [xenni] war [din] iǧi řɣecc deg ufus afusi inu?’”
ISA 44:21 “Ɛqeř x man aya, [a] Yaɛqub, [a cek] Israil! Maɣar aqa cek d amsexxar inu, Necc kewwneɣ cek, cek d amsexxar inu, [a] Israil, war cek ttᵉttuɣ ca.
ISA 44:22 Necc messḥeɣ iɛeddiyen nnec am tayyut uřa d ddnub nnec am useynu. Dweř-dd ɣari, maɣar Necc fekkeɣ cek.”
ISA 44:23 “Ɣennjem s řefraḥet, [a] ijenwan, maɣar SIDI igga i-t. Sřiwřewet, [a] řaǧaɣ n temmurt, ksim deg iɣuyyan s řefraḥet, [a] idurar, sřiwřiwem, [a cek], azɣar d kuř tacejjart i dayes [iǧan]! Maɣar SIDI ifekk i Yaɛqub, issɛuǧa Ixef nnes di Israil.”
ISA 44:24 “Ammu i iqqar SIDI, Amefdi nnec, Wenni cek iggin zeg uɛeddis [n yemmac]: ‘Necc d SIDI wenni iggin marra, wenni ittbezzaɛen ajenna, Necc waha, Necc d wenni issarsen tammurt. Man wen [tuɣa xenni] akidi?
ISA 44:25 [Necc] d wenni ibeṭṭřen řeɛřamat n ayt n bu-ixarriqen uca ssbuhřiɣ igezzanen, d wenni isswexxaren imiɣisen u yarra tussna nsen d taɣyuři,
ISA 44:26 wenni issmetnen awař n umsexxar nnes u isseqfeř ccwar n ireqqasen nnes, wenni iqqaren i Urcalim: ‘Ad dayem iřin imezdaɣ ɛad!’ uca i [kuř ict zi] tneddam n Yahuda: ‘Cem ad tᵉttwassbedded ɛawed!’ uca ‘Necc ad ssbeddeɣ řxirbat nnes ɛawed!’,
ISA 44:27 wenni iqqaren i [waman] yuǧɣen: ‘Aẓɣem, Necc ad ssiẓɣeɣ iɣezran nwem!’,
ISA 44:28 wenni iqqaren i Kurac: ‘[Netta d] ameksaw inu, netta ad isseqfeř řxaḍar inu, umi ɣa inin i Urcalim: ‘Ad cem ɛedřen!’, u i Zzawect Tameqqrant: ‘Ad am ggen dsas!’”
ISA 45:1 “Ammu i iqqar SIDI i umedhun nnes, i Kurac, wenni zi ṭṭfeɣ afus nnes afusi maḥend ad as ssaḍareɣ řegnus zzat i wudem nnes: ‘Ad ssarxuɣ tiḥezzamin s řesnaḥ x tejɛinnatin n ijeǧiden, ḥima ad as arzmeɣ tiwwura, u řebniyyat n tewwura war ttwabelliɛent ca.
ISA 45:2 Necc ad ac izwareɣ, ad waṭiɣ min war ihewnen, ad arẓeɣ tiwwura n nnḥas u ad wtiɣ zzekrunat n wuzzař d iwetwiten.
ISA 45:3 Ad ac wceɣ řeknuz n taǧest, agřa innuffaren, ḥima ad tessned aqa Necc, SIDI, d wenni cek iřaɣan s yisem nnec, AREBBI n Israil.
ISA 45:4 Di ṭṭweɛ n umsexxar inu Yaɛqub, Israil wenni farzeɣ, řaɣiɣ ac s yisem nnec, wciɣ ac isem [n ccan], [waxxa] war d ayi tessined ca.
ISA 45:5 Necc d SIDI, war din iǧi wenneɣni, nhřa Necc war iǧi AREBBI. Ad ac ḥezzmeɣ abyas, waxxa war d ayi tessined ca,
ISA 45:6 maḥend ad ssnen zi mani dd-tneqqar tfuct ař mani tɣeǧi, aqa nhřa Necc war [din] iǧi uřa d ict n tmesřact, Necc d SIDI, war din iǧi nneɣni.
ISA 45:7 Necc tteggeɣ tafawt u xeǧqeɣ-dd taǧest, tteggeɣ řehna u xeǧqeɣ-dd řɣar, Necc, SIDI, d wenni itteggen marra aya.’”
ISA 45:8 “Udumem, [a kenniw] ijenwan, zi sennej, jjem iseynuten ad dd-farrɣen tasegda, ad tennurzem temmurt, uca [jjem ten] ad awyen asenjem i řɣiǧet u ejj tasegda ad teɣmi jmiɛ akides. Necc, SIDI, xeřqeɣ t.”
ISA 45:9 “Uct x wenni ittemcubbucen ak-d Wenni t iggin, ijj n uqedduḥ jar iqedduḥen nneɣni? Ma tzemmar třaxt ad tini i wenni t iggin: ‘Min teggid?’ Niɣ tzemmar řqecɛet nnec ad tini: ‘War ɣares bu ifassen’?
ISA 45:10 Uct x wenni iqqaren i baba[s]: ‘Min dd-tejjid?’ Niɣ i temɣart: ‘Min dd-turud?’”
ISA 45:11 “Ammu i iqqar SIDI, Amqeddas n Israil, d Wenni t iggin: ‘Seqsam ayi x tmesřayin i dd ittasen, ttecřem xafi ad ḥḍiɣ iḥenjiren inu uřa d řxedmet n ifassen inu.
ISA 45:12 Necc ggiɣ tammurt u xeřqeɣ-dd xas bnadem. [Wah] d Necc [i tt yeggin], ifassen inu bezzɛen ijenwan, u marra řɛeskarat nsen ttumureɣ tent.
ISA 45:13 Necc ssekkareɣ t di tsegda uca ad seggmeɣ marra ibriden nnes. Netta ad ibna tandint inu ɛawed uca ad issnufseř imeḥbas inu, war iǧi i ttaman u war iǧi i tarzeft!’ iqqar SIDI n řɛeskarat.”
ISA 45:14 “Ammu i iqqar SIDI: ‘Arber n Imiṣriyyen d ṣṣeřɛet n ayt n Kuc d Saba, iryazen imɣaren di tiddi, ad ɣarem dd-ẓwan uca ad iřin nnem. Nitni ad cem ḍfaren, ad ɣarem ɛdun di ssnaseř, ad am sejden, ad am sellmen ixef nsen, ad neɛmen: ‘S tidett, ɣarem i iǧa Arebbi, war din iǧi wenneɣni, uřa d ijj nneɣni mɣir AREBBI!’
ISA 45:15 D tidett, Cek d Arebbi inuffaren, AREBBI n Israil, Amsenjem.
ISA 45:16 Nitni marra ad seḍḥan, ad ttwafeḍḥen ɛawed. Imziřen n řexyařat n l’aṣnam ad ffɣen jmiɛ, nnfeḍhen.
ISA 45:17 Israil ad ittwassenjem s [ufus n] SIDI s ijj n usenjem ittduman. War tᵉttseḍḥim u war tᵉttnefḍiḥem i řebda qaɛ.’”
ISA 45:18 “Maɣar ammu i iqqar SIDI, wenni dd-ixeřqen ijenwan, Netta, AREBBI, d wenni ikewwnen tammurt uca ittegg i-tt, Netta, d wenni tt issmetnen. War tt-i-dd-ixřiq texwa, [maca] ikewwen i-tt maḥend ad xas zeddɣen: Necc d SIDI, war iǧi uřa d ijj nneɣni!”
ISA 45:19 “War ssiwřeɣ s tnuffra, di ca n wemcan ibarrecnen di temmurt. Necc war nniɣ i tarwa n Yaɛqub: Arzum ayi baṭeř! Necc d SIDI nni issawařen tasegda, d wenni ittbarrḥen min iǧan iseggmen.”
ISA 45:20 “Munem, asem-dd, qarrbem-dd munen, [a kenniw,] inni innejmen zi řegnus! Nitni war ssinen walu, inni yarebbun řexyařat ineqcen n ukeccuḍ uca ttɛebbden i yijj n arebbi nni war izemmaren ad issenjem.
ISA 45:21 Barrḥem, qarrbem-dd. Mcawarem di win jar awem: Man wen iggin ad sřen aya zeg wecḥař uya, man wen zzayes ibarrḥen zi meřmi? Ma war iǧi d Necc, SIDI? Nhřa Necc war iǧi uřa d ijj n AREBBI nneɣni, nhřa Necc war [din] iǧi Arebbi Amsegged d Umsenjem.
ISA 45:22 Qeřbem-dd ɣari u tejjem ixef nwem ad ttwassnejmem, [a kenniw,] marra [iwdan n] ṭṭrufa n temmurt, maɣar Necc d Arebbi u war [din] iǧi uřa d ijj n nneɣni.
ISA 45:23 Necc jjuǧeɣ ɣar Ixef inu, iffeɣ-dd ijj n wawař zeg uqemmum inu di tsegda uca [awař-a] war din iqqim wedwař: Aqa marra afud ad yaḍar zzati, marra iřes ad ɣari ijjaǧ!
ISA 45:24 Ad xafi qqaren: ‘Di SIDI waha teǧa tasegda ifeyyḍen d jjehd!’ Nitni ad ɣares dd-asen, [maca] marra inni xas ittfugmen, ad seḍḥan.
ISA 45:25 [Maca] marra zzariɛet n Israil, ad ttwaseggden nitni di SIDI uca ad [t] cennɛen.”
ISA 46:1 “[Ṣṣanam] Bil yuḍar, Nabu iqwes [ɣar temmurt], aqa řexyařat n l’aṣnam nsen [deqqřent] i řmař u i řebhayem. Min tuɣa tarebbum kenniw, [aqa řexxu] d řeḥmuř, ddqeř i [řmař] ifnan s řweḥřan.
ISA 46:2 Aqa qewsen am kemmřen, uḍaren, war zemmaren ad ssnejmen ddqeř, uca uřa d nitni simant nsen uyuren di tmeḥbast.”
ISA 46:3 “Sřem ɣari, [a] taddart n Yaɛqub, d marra min iqqimen n taddart n Israil, [kenniw,] inni ksiɣ zeg uɛeddis n yemmatwem, inni arbureɣ zeg wami tsemḥem deg uɛeddis n yemmatwem.
ISA 46:4 Ař tawsart [nwem] Necc Necc, ař ɣa tcabem, ad [kenniw] arbuɣ. Necc ggiɣ [t] u Necc ad [kenniw] ksiɣ, ad [kenniw] arbuɣ u ad [kenniw] ssnejmeɣ.”
ISA 46:5 “Ak-d man wen texsem ad ayi tessemquddam, u man wen texsem akidi tᵉssekkwim [maḥend] ad nemrawas?
ISA 46:6 Ttfarraɣen nitni ureɣ zi tecyart u wezznen nnuqart x řmizan. Ttxeǧṣen ijj n wemziř n wureɣ, [maḥend] netta ad zzayes igg ijj n arebbi. Sejjaden, wah, bendqen as.
ISA 46:7 Arebbun t x teɣruḍt, kessin t da d diha, xenni ssbeddan t deg wemcan nnes. Dinni ittɣima ibedd, war ittenhizzi ssenni. Wah, mařa ḥed iřaɣa as, war dd-ittarri, war t issenjam zi řeḥṣaret nnes.”
ISA 46:8 “Ɛeqřem x man aya, dewřem ɣar řbař nwem, ksim t ɣar wuř, [a kenniw] inni ittɛeddan!
ISA 46:9 Ɛeqřem x tmesřayin timezwura zeg wecḥař uya: aqa Necc d Arebbi: war din iǧi uřa d ijj n AREBBI nneɣni, uca uřa d ijj war iǧi am Necc,
ISA 46:10 wenni ibarrḥen zeg umezwar min ɣa yiři ɣar uneggar, uřa zeg wecḥař uya min war imsaren [ɛad], wenni iqqaren: ‘Axarreṣ inu yarcem, ad ggeɣ marra arḍa inu!’,
ISA 46:11 wenni iřaɣan ajḍiḍ ittkeccaḍen zi ccarq, aryaz n uxarreṣ nnes zi temmurt iggʷejen. [Wah], am mammec ssiwřeɣ, [ammu i] tt ɣa ggeɣ ad dd-yas, Necc sswejdeɣ tt, ad tt ggeɣ.”
ISA 46:12 “Sřem ɣari, [kenniw] ayt n bu-ṣṣulṭa, inni iggʷejen x tsegda!
ISA 46:13 Ad dd-ssqarrbeɣ tasegda inu, aqa war tᵉtteggʷij, war ittɛeṭṭiř usenjem inu. Ad awyeɣ asenjem di Ṣihyun, [ad wceɣ] aɛuǧi inu i Israil.”
ISA 47:1 “Hwa, qqim di tɛejjajt, [a cem,] taɛzarect, yeǧis n Babil! Qqim x temmurt, war [din] iǧi ɛad ijj n řɛarc, [a] yeǧis n Ikaldaniyyen! Maɣar war d am qqaren ɛad ‘Tamudrust’ niɣ ‘Llif’.
ISA 47:2 Ksi tasirt uca ḥriy awren! Kkes ařeḥḥaf nnem, sgeɛɛed abeḥrur nnem, ɛarra ifadden uca tcuqed deg iɣezran!
ISA 47:3 Řeḥya nnem ad ittwaɛarra, ad tᵉttwaẓar ɛad řefḍiḥet nnem. Ad xeřfeɣ u war ssɛizziɣ x uřa d ijj n bnadem.
ISA 47:4 Amefdi nneɣ, SIDI n řɛeskarat d Isem nnes, aqa-t d Amqeddas n Israil.”
ISA 47:5 “Qqim din uca sseɣd, ffeɣ [ɣar barra] di taǧest, [a] yeǧis n Ikaldaniyyen, maɣar war d am qqaren ɛad ‘Llalas n tgeldiwin’.
ISA 47:6 Necc ggiɣ aɣḍab inu ad idduqqez x řgens inu, ssɛiǧteɣ tasɣart inu uca ggiɣ ten deg ifassen nnem, [maca] cem war d asen tessecned arreḥmet. Ɛad i uwessar teqqned as taɣnact tedqeř.
ISA 47:7 Tennid: ‘Necc ad iřiɣ d llalas [n tgeldiwin] i řebda!’, mintra war teksid aya marra ɣar wuř, ɛemmarṣ war tidared qeṭṭu n uya [marra].”
ISA 47:8 “[Xenni] řexxu, seř i uya, [a cem,] [tamɣart] n meẓri, tenni [i din] iqqimen di řaman, tenni iqqaren deg wuř nnes: ‘D necc, war [din] teǧi uřa d ict nneɣnit! Ɛemmarṣ ad da qqimeɣ d tajjač, nhřa iḥenjiren war t ssineɣ!’
ISA 47:9 [Maca] tnayen-a ad xam wḍan deg ict n tecti, deg ijj n wass: nhřa iḥenjiren d tajjač ad tiřid! [Tnayen-a] ad xam wḍan zi ssibbet n waṭṭas n tgezzant nnem d ubarru n tseḥḥart nnem.
ISA 47:10 [Maɣar] tᵉttecřed x tuɛeffna nnem, [tennid]: ‘War d ayi ittwiři uřa d ijjen!’ Tiɣit nnem d tussna nnem arrint cem ad tarred s weɛrur [ɣari]. Deg wuř nnem tennid: ‘D necc, war [din] iǧi uřa d ijj n nneɣni!’
ISA 47:11 Ad xam dd-yas řɣar d ameqqran. Mammec ad dd-inqar, war tessined [qbeř]. Aweddar ad xam iwḍa ařami war tzemmared ad as tessḥeyded. Deɣya ad xam dd-tas tecti, břa ma ad xas targbed [qbeř].”
ISA 47:12 “Iwa, arzu ad teqqimed tbedded [din] ak-d tgezzant nnem u ak-d ubarru nnem n tseḥḥart nni zi tessiḥřed ixef nnem zi temẓi nnem. Balak tzemmared ad ɣarem tiři tizi zi man aya, niɣ balak tzemmared ad tessiggʷeded s uya!
ISA 47:13 Tessiḥřed ixef nnem ak-d waṭṭas n ixarriṣen nnem. Iwa, ad kkaren inni ittfekkan ajenna u ḥeṭṭan itran, inni ittkacafen min i dd ɣa yasen ɣar ubeddi n uyur, ejj i-ten ad cem ssnejmen zi min xam ɣa ikken ɣar zzat.
ISA 47:14 Xzar, nitni ad dewřen am uřum: ad ten tessecmeḍ tmessi, war zemmaren ad fekken řeɛmar nsen zeg ifassen n iceɛɛařen n tmessi. War ittiři řefḥem itteḥduduqen nni ɣar zɣařen, war iǧi uḥaduq nni ɣar zemmaren ad qqimen.
ISA 47:15 Ammu i ɣa iřin i cem inni umi tuɣa tessaḥařed ixef nnem, isebbaben nnem zi temẓi nnem. Kuř ijj ad yuyur deg webrid nnes, uřa d ijj war cem issenjim.”
ISA 48:1 “Sřem aya, [a kenniw] taddart n Yaɛqub, inni umi ttřaɣan s yisem n Israil, [inni] iffɣen zeg waman n Yahuda, inni ittjaǧan ɣar Yisem n SIDI u ttidaren AREBBI n Israil, [maca] war iǧi di tidett, u war iǧi di tsegda.
ISA 48:2 Nitni ttřaɣan ixef nsen ‘[Řgens] zi tendint tamqeddast!’ u ttcařen x AREBBI n Israil, aqa SIDI n řɛeskarat d Isem nnes.”
ISA 48:3 “Timesřayin timezwura ssargbeɣ xasent ɛad aṭṭas zeg wami, aqa ffɣent-i-dd zeg uqemmum inu uca barrḥeɣ zzaysent. Deɣya ggiɣ [tent] uca [xenni] usint-i-dd.
ISA 48:4 Minzi Necc ssneɣ, aqa cek tessqesḥed ixef nnec, aqa ijiman nnec am tbarrat n wuzzař u tanyart nnec [axmi dd-tekka zi] nnḥas,
ISA 48:5 ssargbeɣ [ac tent] ɛad aṭṭas zeg wami. Qbeř ma imsar, barrḥeɣ zzaysent maḥend cek war teqqared: ‘Ṣṣanam inu igga i-tent!’, [niɣ] ‘Řexyarat inu ineqcen!’ [niɣ:] ‘Řexyař inu ifesyen yumur i-tent!’
ISA 48:6 Cek tesřid xasent, xzar mliḥ ɣar marra aya. Ma war texsem ad zzaysent tbarrḥem? Zi řexxu ad ac barrḥeɣ timesřayin n jdid, timesřayin innuffaren nni war tessined.
ISA 48:7 Řexxu ttwaxeřqent-dd, war iǧi aṭṭas zeg wami. Qbeř ass-a war xasent tesřid maḥend war teqqared: ‘Xzar, ssneɣ tt meřmi!’
ISA 48:8 Wah, war xasent tesřid u ɛawed war tent tessined u ɛawed amezzuɣ nnec tuɣa war yarzim, maɣar Necc ssneɣ, aqa cek ad tegged s řeɣdaret aṭṭas uca ad ac řaɣan ‘Wenni ittɛeddan!’ [ɛad] zeg uɛeddis n yemmac.”
ISA 48:9 “Di ṭṭweɛ n Yisem inu ad ssɛeḍřeɣ aɣḍab inu, u [di ṭṭweɛ] n ccan inu ad tebbteɣ Ixef inu i řxar nnec, maḥend war cek meḥḥiɣ qaɛ.
ISA 48:10 Xzar, Necc sseṣfiɣ cek, [maca] war iǧi am nnuqart, qeǧbeɣ cek di tefqunt n usefṣi n řeɣben.
ISA 48:11 Di ṭṭweɛ inu, di ṭṭweɛ inu ad t ggeɣ, maɣar mammec i ɣa ittwaɛarra Isem inu? Aɛuǧi inu war t tticeɣ i uřa d ijjen nneɣni.”
ISA 48:12 “Seř-dd ɣari, [a] Yaɛqub, [cek, a] Israil, wenni umi řaɣiɣ! Necc Necc, Necc d Amezwaru uřa d Aneggaru.
ISA 48:13 Afus inu issars ɛawed dsusa n temmurt, uca afusi inu ibezzeɛ ijenwan. Mařa řaɣiɣ asen, ttbeddan nitni [dinni] jmiɛ.
ISA 48:14 Munem marra kenniw u sřem: Man wen jar asen ibarreḥ zi [marra] man aya? SIDI ittexs i-t, u wanita ad yegg ɛlaḥsab řxaḍar nnes ḍidd i Babil, aɣiř nnes ad yiři ḍidd i Ikaldaniyyen.
ISA 48:15 Aqa Necc, [wah,] Necc nniɣ t, u Necc řaɣiɣ as [ɛawed]. Ad ggeɣ ad dd-yas, uca netta ad ifřeḥ deg webrid nnes.
ISA 48:16 Qarrbem-dd ɣari, sřem aya: Zeg umezwaru Necc war ssiwřeɣ s tnuffra. Zeg wami marra aya imsar, aqa ayi Necc din! ‘U řexxu Sidi inu, SIDI, issekk ayi-dd, ak-d Arruḥ nnes.’”
ISA 48:17 “Ammu i iqqar SIDI, Amefdi nnec, Amqeddas n Israil: ‘Necc d SIDI, AREBBI nnec, wenni cek issřemden min ineffɛen, d wenni cek ineddhen deg webrid nni x i ɣa tuyured.
ISA 48:18 Ax, mři texzared [maca] ɣar tweṣṣa inu, [xenni] ad yaf řehna nnec ad yiři am yeɣzar u tasegda nnec am řemwaj n řebḥar,
ISA 48:19 zzariɛet nnec tuɣa-tt am yijdi, u [iḥenjiren nnec] nni dd-itteffɣen zi tejɛinna nnec am řḥebb i dd-yusin zzayes. Isem nnes war ittneqḍiɛ u war ittwateḥḥi zzat i wudem inu.’”
ISA 48:20 “Ffɣem zi Babil, arewřem zeg Ikaldaniyyen, barrḥem [as] s iɣuyyan n usřiwřew, maḥend ad sřen aya, suffɣem [řexbar] ař aneggar n ddunect, inim: ‘SIDI ifekk amsexxar nnes Yaɛqub!’
ISA 48:21 War xasen ikki ufadi umi ten dd-igewwed s imucan ittwaxarrben. Netta issuffeɣ asen-dd aman zi teṣḍart. Umi Netta ifeǧeq jjarf, dduqqzen-dd zzayes waman.”
ISA 48:22 “Iɛeffanen war ttifen řehna!, iqqar SIDI.”
ISA 49:1 “Sřem-dd ɣari, [a] tigzirin, sḥessem, [a] ccuɛub n řaggʷaj! SIDI iřaɣa ayi-dd zeg [wami d ayi tuɣa deg] uɛeddis n yemma, zeg [wami d ayi tuɣa ɛad di] řemřawet iřaɣa ayi-dd s Yisem inu.
ISA 49:2 Netta igga aqemmum inu d ssif iqeḍɛen, Netta issduriy ayi di tiři n ufus nnes. Netta igga ayi d fřitca s tixeft iqeḍɛen, igga ayi deg weqrab nnes n fřitcat.
ISA 49:3 Inna ayi: ‘Cek d Amsexxar inu Israil nni di ɣa ttwassɛuǧeɣ!’”
ISA 49:4 “[Maca] Necc nniɣ: ‘Necc arbreɣ x walu, ḍeyyɛeɣ jjehd inu di řxawi d řbaṭeř. S tidett, tasɣart inu ɣar SIDI u řmunet inu ɣar AREBBI inu.’”
ISA 49:5 “Uca řexxu iqqar SIDI, wenni d ayi iggin d Amsexxar zeg wami d ayi tuɣa deg uɛeddis n yemma maḥend ad ɣares dd-ssɛeqbeɣ Yaɛqub u maḥend ad ɣares ssmuneɣ Israil - [wah,] Necc ttwassɛuǧeɣ di tiṭṭawin n SIDI uca AREBBI inu d Jjehd inu! -
ISA 49:6 [wah,] Netta iqqar: ‘Drus, aqa cek ad tiřid d Amsexxar inu maḥend ad tessnekkared [ɛawed] tiqebbař n Yaɛqub u maḥend ad dd-tarred inni ittwaḥdan zi Israil. Necc ggiɣ Cek d Tafawt i řegnus, maḥend ad tiřid d asenjem inu ař uneggar n temmurt!’
ISA 49:7 Ammu i iqqar SIDI, Amefdi n Israil, Amqeddes nnes, i weryaz ittwasseḥqaren, i wenni d nnɛi n řgens, i Umsexxar n ayt n ṣṣulṭa: ‘Ijeǧiden ad [Cek] ẓaren u ad kkaren, řḥukkam ad aḍaren zzatek di ṭṭweɛ n SIDI, wenni d amtiqqi, Amqeddas n Israil, wenni Cek ifarzen!’”
ISA 49:8 “Ammu i iqqar SIDI: ‘Di řḥař n arḍa, sřiɣ ac, u deg wass n usenjem, wciɣ ac afus. Necc ad Cek ḥḍiɣ u ad Cek areccḥeɣ d Řɛahd n řgens, maḥend ad tessbedded tammurt, maḥend ad tᵉṭṭfed tiseqqar yareddǧen ɛawed d tasɣart,
ISA 49:9 maḥend ad tinid i imeḥbas: Ffɣem-dd!, i yinni [iǧan] di taǧest: Ḍharem-dd! Ad arewsen ɣar ibriden, x marra tiwririn iquccaren ad iřin ddmani nsen n tarewsa.
ISA 49:10 War xasen ittekk řaẓ uřa d afadi, řeḥmu d tfuct war ten teccit ca, maɣar wenni xasen ittḥinnan ad ten igewwed, ad ten indeh ɣar tařawin n waman.
ISA 49:11 Marra idurar inu ad ten ggeɣ d ibriden u ibriden inu iwaṭan ad ttwassuɛřan.
ISA 49:12 Xzar, ad dd-asen zi řaggʷaj. Xzar, ina [ad dd-asen] zi ccamal u zi řebḥar u inneɣni zi temmurt n Aswan.’”
ISA 49:13 “Sřiwřiwem, [a kenniw] ijenwan, farḥet, [a cem,] tammurt! Arrem idurar ad dduqqzen s usřiwřew, maɣar SIDI issfewwej x řgens nnes, Netta ad iḥinn x řmusakin nnes!”
ISA 49:14 “[Maca] Ṣihyun tenna: ‘SIDI ismeḥ dayi, Sidi inu ittu ayi.’
ISA 49:15 Ma tzemmar temɣart ad tᵉttu aseymi nnes, umi war tᵉttḥinni x mmis n uɛeddis nnes? Waxxa tᵉttu t, Necc war cem ttᵉttuɣ.
ISA 49:16 Xzar, Necc neqceɣ cem di tnayen n třeqqa n ifassen [inu], řeḥyuḍ nnem řebda ɣari zzat i tiṭṭawin.
ISA 49:17 Iḥenjiren nnem ad ɛeřfen, [maca] imteḥḥayen nnem u inni cem ixarrben ad xam uyuren.
ISA 49:18 Sgeɛɛed tamuɣři nnem uca xzar da d diha. Xzar, marra munen usin-dd ɣarem. S tidett am ddareɣ Necc, iqqar SIDI, ad tarḍed ixef nnem s marra ina am s řehzuṭ, uca ad zzaysen tzewwqed ixef nnem am [t tegga] tesřit.’
ISA 49:19 Maɣar řxirbat nnem d imucan nnem ittwareddǧen, [wah] tammurt nnem ittwateḥḥan ad tiři teḥṣar i imezdaɣ, uca inni ixsen ad cem ṣarḍen, ad iřin ɣar řaggʷaj.
ISA 49:20 Uřa d iḥenjiren nni zzayem ittwacaren, ad inin deg imezzuɣen nnem: ‘Amcan dayes řḥeṣran xafi, egg ayi amcan i necc, [maḥend] zemmareɣ ad [dayes] zedɣeɣ!’
ISA 49:21 Ad tinid deg wuř nnem: ‘Man wen i d ayi dd-yurwen marra iḥenjiren-a? Ucaren ayi iḥenjiren u war dd-ttirweɣ, ssuffɣen ayi-dd d ameḥbus uca nḍaren ayi-dd. Man wen i ten isseymen? Xzar, necc waha d tenni tuɣa iceṭṭen, manis dd-usin nitni?’”
ISA 49:22 “Ammu i iqqar Sidi inu, SIDI: ‘Xzar, ad ssgeɛɛdeɣ afus inu ɣar řegnus u ad ssbeddeɣ taɛeǧant inu i řegnus. [Xenni] ad awyen iḥenjiren nnem deg weḥsin nsen [ɣar danita] uca ad arbun yessim x tɣarḍin nsen.
ISA 49:23 Ijeǧiden ad cem ṣunen, tijeǧidin ad cem ssuṭṭdent. Ad aḍaren zzatek s uɣembub nsen ɣar temmurt, ad am řesḥen taɛejjact zeg iḍaren nnem. [Xenni] ad tessned aqa Necc d SIDI, uca inni xas i ɣa isitimen, war ttseḍḥin ca.’”
ISA 49:24 “Ma izemmar ijj ad ikkes x wenni ijehden zzardet? Ma izemmar ad yarweř wenni iǧan d ameḥbus n umsegged?
ISA 49:25 [Maca] ammu i iqqar SIDI: ‘Ad dd-ttwakksen imeḥbas zeg ufus n umzemmar uřa d takeccaḍṭ n uqehhar ad textutteř zi jar ifassen nnes. [Maɣar] wenni ixsen ad cem icarreɛ, Necc ad t carrɛeɣ, uca iḥenjiren nnem ad ten ssnejmeɣ.
ISA 49:26 I yinni cem iḥeṣṣaren ad asen wceɣ ad ccen aysum [n yixef] nsen u nitni ad scaren s idammen nsen am s binu ẓemmen t jdid, u marra iwdan ad ssnen aqa Necc, SIDI, d Amsenjam nnem d Amefdi nnem, Amzemmar n Yaɛqub.’”
ISA 50:1 “Ammu i iqqar SIDI: ‘Mani teǧa tebrat n waǧaf, tenni zi ssqebbḍeɣ yemmatwem? Niɣ i man wen zeg aytbab n wareṭṭar inu kenniw zzenzeɣ? Xzar, zi ssibbet n řmuɛṣiyyet nwem temmenzem u zi ssibbet n iɛeddiyen nwem temmenz yemmatwem.
ISA 50:2 Mayemmi dd-usiɣ, war din iǧi uřa d ijj, mayemmi i řaɣiɣ, war dd-yarri uřa d ijj? Ma afus inu d aquḍaḍ ařami war izemmar ad ifekk, ma war dayi iǧi jjhed, ḥima ad fekkeɣ? Xzar, s usiggʷed inu ad ssiẓreɣ řebḥar, ad ggeɣ iɣezran d řexřa uca ad aẓɣen [ařami] i ɣa yarṣuḍen iseřman nsen maɣar war [din] iǧi [ɛad] waman, uca ad mmten zeg ufadi.
ISA 50:3 Ad ssyarḍeɣ ajenna s tubbarcent, ad ten řeḥḥfeɣ s txancet [n wecḍan] am warruḍ [nsen].’”
ISA 50:4 “Sidi inu, SIDI, iwca ayi iřes n umeḥḍar, maḥend Necc ad ssneɣ mammec ɣa ssmeḥdeɣ wenni yuḥḥřen s ijj n wawař. Qaɛ tuffut Netta issfaqa ayi, issfaqa ayi amezzuɣ, maḥend Necc ad [ɣares] sřiɣ am umeḥḍar.
ISA 50:5 Sidi inu, SIDI, yarzem ayi amezzuɣ u Necc war ɣewwɣeɣ ca, war dd-ddwiřeɣ ɣar ḍeffar.
ISA 50:6 Necc wciɣ aɛrur inu i yinni d ayi iwtin, u iɣemmizen inu i yinni d ayi issnecfen [tmart]. Aɣembub inu war t ssnuffareɣ zzat i useḥqar d ususef.
ISA 50:7 [Maca] Sidi inu, SIDI, ad ayi iwc afus, x uya war qeṭṭiɣ di řefḍiḥet, x uya jjiɣ aɣembub inu iqseḥ am sseǧaḥ, [minzi] ssneɣ, aqa Necc war ttseḍḥiɣ ca.
ISA 50:8 Wenni d ayi ittseggden, aqa-t yudes. Man wen i ɣa izeɛmen ad kidi icarreɛ? Jjem aneɣ ad nbedd nmun! Man wen kidi ittemcarraɛen, ejj i-t ad ɣari dd-yas.
ISA 50:9 Xzar, Sidi inu, SIDI, ad ayi iwc afus. Man wen izemmaren ad ayi igg řɛib? Xzar, nitni marra am warruḍ idduysaren, ad ten tecc tcinda.”
ISA 50:10 “Man wen [i din] jar awem itteggʷed zi SIDI, man wen [jar awem] ittesřan i tmijja n Umsexxar nnes? Wenni igguren di taǧest d wenni umi war ɣar teǧi tafawt, ejj i-t ad ittceř x Yisem n SIDI, [ejj i-t] ad iɛemmed x AREBBI nnes.
ISA 50:11 Xzar, kenniw marra tessarɣem timessi, tbeysem ixef nwem s fřitcat i usecmaḍ. [Iwa,] uyurem [xenni] di tfawt n tmessi nwem u ɣar [tfawt n] fřitcat yareqqen nni tessarɣem. Aya ad xawem dd-yas zeg ufus inu, s řeḥriq ad tezzřem [dinni].”
ISA 51:1 “Sřem ɣari, [a kenniw] inni iḍaffaren tasegda, [kenniw] inni yarezzun SIDI! Xzarem ɣar teṣḍart manis tᵉttwaneqcem u ɣar wexbuc n wanu manis dd-tᵉttwaɣzem.
ISA 51:2 Xzarem ɣar Ibrahim, jedditwem, u ɣar Sara, tenni kenniw i dd-yurwen. Maɣar tuɣa-t [ɛad] ḥafi umi t řaɣiɣ, [maca] Necc barkeɣ t u arzfeɣ as aṭṭas n wara.
ISA 51:3 Maɣar SIDI ad issfewwej Ṣihyun, ad issfewwej marra řxirbat nnes uca ad tt yarr am [jjennet n] Ɛadn u řexřa nnes am weḥwic di jjennet n SIDI. Arcaq d řefraḥet ad dayes ten afen, aqadi d řḥess n izehhiden.”
ISA 51:4 “Sřem-dd ɣari, [a] cceɛb inu, u wcem ayi amezzuɣ, [a] řgens inu, maɣar ad zzayi teffeɣ Ccariɛa u Necc ad ḍemneɣ řḥeqq inu ař ɣa yiři [řḥeqq inu] d tafawt i řegnus.
ISA 51:5 Tasegda inu tudes-dd, asenjem inu itteffeɣ-dd u iɣaǧen inu ad carrɛen řegnus, ad ayi rajant tegzirin uca ad ssitment x uɣiř inu.”
ISA 51:6 “Sgeɛɛdem tiṭṭawin nwem ɣar ujenna, xzarem tammurt da swadday, maɣar ajenna ad iffarfar am ddexxan, tammurt ad tedduysar am warruḍ, uca ammu i ɣa mmten [uřa d] imezdaɣ nnes, [maca] asenjem inu ad iqqim i řebda, tasegda inu ɛemmarṣ war tt qeṭṭin.”
ISA 51:7 “Sřem-dd ɣari, [a kenniw] inni issnen tasegda, [a cek] řgens nni [yarebbun] Ccariɛa inu deg wuř. War tteggʷdem zi řḥegra n yewdan u war ten ttejjim ad cem arẓen s uɛeyyeb nsen!
ISA 51:8 Maɣar tacinda ad ten tecc am tᵉttett arruḍ, uca akiccu ad ten yecc am taḍuft, [maca] tasegda inu ad teqqim i řebda u asenjem inu zi jjiř ař jjiř.”
ISA 51:9 “Faq, faq, arḍ s jjhed, [a] aɣiř n SIDI! Faq am deg wussan n zic, am di jjiřat n zzmanat n wecḥar uya. Ma war iǧi d Cek, wenni iqessen Rahab, d wenni issnuqqben řhaycet?
ISA 51:10 Ma war iǧi d Cek wenni issiẓɣen řebḥar, aman n řḥemřet n [waman] imeqqranen innhewřen [Ma war iǧi d Cek] wenni yarrin abrid deg waman yuǧɣen n řebḥar, ařami zemmaren ad ẓwan inni ittwafekken?
ISA 51:11 Inni ifda i-ten SIDI ad dd-dewřen, ad dd-asen ɣar Ṣihyun s usřiwřew. Řefraḥet n řebda ad tiři x izeǧifen nsen, nitni ad sswiẓẓḍen [ifassen nsen] ɣar warcaq d řefraḥet, [am] i ɣa yarweř zzaysen wecḍan d wesḥissef.”
ISA 51:12 “D Necc, [wah,] d Necc wenni kenniw issfewwjen. Min [teɛnid] cek, aqa cek tᵉtteggʷeded zeg weryaz [ifennan], zi mmis n bnadem nni [iǧan am] arbiɛ,
ISA 51:13 tᵉttettud SIDI wenni cek iggin, wenni ibezzɛen ajenna d wenni issarsen dsusa n temmurt, aqa cek tᵉtteggʷeded řebda, ass ikmeř, zi ssibbet n wesɛar n wenni iḥeṣṣaren umi issewjad ixef nnes maḥend ad yareddeǧ? Mani iǧa [xenni] wesɛar n wenni iḥeṣṣaren?
ISA 51:14 Wenni icarrfen s ssnaseř am ittefriɣ ad ittwafekk daweḥda. War ittmetti deg weḥfur [n imeḥbas], war zzayes ineqqeṣ weɣrum.
ISA 51:15 [Maɣar] Necc d SIDI, AREBBI nnec, wenni issehwařen řebḥar ař ɣa hajan řemwaj nnes, SIDI n řɛeskarat d Isem nnes.
ISA 51:16 Tteggeɣ ac awařen inu deg uqemmum nnec u ssdurruyeɣ cek di tiři n ufus inu, maḥend ad ẓẓuɣ ajenna, ad ssarseɣ dsusa n temmurt u ad iniɣ i Ṣihyun: ‘Cek d řgens inu!’”
ISA 51:17 “Faq, faq, kkar-dd a Urcalim! Zeg ufus n SIDI teswid zi řkas n wesɛar nnes ameqqran. Teccid řexmira zi řkas nni issdewwaxen, [wah,] tẓemmed [tt].
ISA 51:18 War tt ittgewwid uřa d ijjen zi marra iḥenjiren nni dd-turuw, u zi marra iḥenjiren nni tessyem, war tt yeṭṭif uřa d ijj zeg ufus.
ISA 51:19 Tnayen [n tmesřayin]-a řeqfent cem, [maca] wi xam i ɣa iḥinnen? [Xzar,] axarreb d weřbez d řaẓ d ssif! Mammec cem i ɣa ssfewwjeɣ?
ISA 51:20 Wḍan iḥenjiren nnem, ɣacan, zzřen ɣar marra tiɣemmar n ibriden am tɣayḍin n wezɣar di tracca. Nitni jjiwnen s wesɛar n SIDI, s usiggʷed n AREBBI nnem.”
ISA 51:21 “S uya seř aya, [a cem] řmiskina, d tamescart, [maca] war iǧi s binu!
ISA 51:22 Ammu i iqqar Sidi nnem, SIDI, AREBBI nnem, wenni iccaten ddeɛwet x řgens nnes: ‘Xzar, Necc ad kkseɣ řkas issdewwaxen zeg ufus nnem, war tsessed ɛad ktar zi řexmira n řkas n wesɛar inu.
ISA 51:23 Necc ad t ggeɣ deg ufus n yinni dayem iɣezzan, inni innan i řeɛmar nnem: Saḍar ixef nnem [ɣar temmurt], neccin ad xam neẓwa! Ammu i teggid aɛrur nnem am mammec teǧid d tammurt, [uca] tuɣa cek d abrid di ṭṭweɛ n yinni xam iẓwan.’”
ISA 52:1 “Faq, faq, arḍ s jjehd [a,] Ṣihyun, arḍ s werruḍ nnem iccuwwaren, [a] Urcalim, tandint tamqeddast! Zi ssa tsawent war ɣarem t-i-dd-ittidif ɛad wenni war ittwaxetnen d umexmuj.
ISA 52:2 Zerz xam taɛejjact, kkar, qqim cem, [a] Urcalim! Arxu ssnaseř zeg yiri nnem, [a] tameḥbust, [a] yeǧis n Ṣihyun!
ISA 52:3 Maɣar ammu i iqqar SIDI: ‘Temmenzem s baṭeř, ad tᵉttwassfekkem [ɛawed] břa tmenyat!’
ISA 52:4 Maɣar ammu i iqqar Sidi inu, SIDI: ‘Zic ihwa řgens inu ɣar Miṣra maḥend ad dinni iqqim [am řbarrani], uca Accur iḥṣar i-t x walu!’”
ISA 52:5 “Uca řexxu, min ɣari ɛad xafi ad tt ggeɣ danita, iqqar SIDI, maɣar awyen řgens inu břa ssibbet uca inni xas ittṣellṭen ssɣuyyun, iqqar SIDI, ass marra ttɛeyyben deg Yisem inu.
ISA 52:6 S uya ad issen řgens inu Isem inu, s uya, aqa Necc Necc, wenni iqqaren deg wass nni: Necc aqa ayi da!”
ISA 52:7 “Mecḥař cnan x idurar iṣuraf n umbeccar nni ittbarrḥen s řehna, n umbeccar n [řexbar] aṣebḥan nni ittbarrḥen s usenjem, wenni iqqaren i Ṣihyun: ‘AREBBI nnem d Ajeǧid!’
ISA 52:8 [Sřem i] tmijja n iɛessasen nnem! Nitni ttsgeɛɛaden tmijja [nsen], ttesřiwřiwen munen, maɣar udem deg udem [akides] ad twařan mammec i dd ɣa isseɛqeb SIDI Ṣihyun.
ISA 52:9 Sɣuyyent s řefraḥet, sřiwřewent tmunent, [a] řxirbat n Urcalim, maɣar SIDI issfewwej řgens nnes, ifekk Urcalim.
ISA 52:10 Iɛarra SIDI aɣiř nnes amqeddes zzat i tiṭṭawin n marra řegnus u marra timawwin n temmurt ad ẓarent asenjem n AREBBI nneɣ.”
ISA 52:11 “Ruḥem, ruḥem, ffɣem-dd ssenni, war ttḥadam walu n min ixemjen, ffɣem ssenni zi řwesṭ nnes, sizedgem ixef nwem, [a kenniw] inni yarebbun řeqcuɛ n SIDI!
ISA 52:12 Maɣar kenniw war tᵉtteffɣem s tezřa, war tarekkwařem, maɣar SIDI ad yuyur zzat nwem u AREBBI n Israil ad yiři d aɣezdis nwem aneggar.”
ISA 53:1 “Xzar, Amsexxar inu ad yegg s řeɛqeř, ad ittwassɛuǧa u ad ittwassuɛřa, [wah,] ad ittwassɛuǧa ař ṭṭarf.
ISA 53:2 Am zzayek nnxeřɛen aṭṭas - ammu s waṭṭas ixsar udem nnes, war iǧi [ɛad] am n ijj n bnadem, u addud nnes, war iǧi [ɛad] am n tarwa n bnadem -
ISA 53:3 ammu i ɣa issengez Netta aṭṭas n řegnus, [wah, ɛad] ijeǧiden ad sseɣden, maɣar min war d asen barrḥen, ad t ẓaren, u min ɛemmarṣ war sřin, ad t fehmen.”
ISA 53:4 “Man wen yumnen di řexbar nneɣ u wi i umi d ittwasscen uɣiř n SIDI?
ISA 53:5 [Maɣar] am tseṭṭa imɣar Netta zzat i wudem nnes, am weẓwar zi temmurt yuẓɣen. Netta tuɣa war ɣares addud niɣ acewwar [xmi] t nẓar, war ɣares bu waẓri n řxeẓrat ařami dayes i ɣa nemmeẓri.
ISA 53:6 Tuɣa ittwasseḥqar, immenḍar zeg iwdan, aryaz n řeḥriq, issen řeḥřac, am yijjen i umi řeḥḥfen aɣembub, [ammu i] tuɣa ittwasseḥqar u neccin war t nḥessib walu.
ISA 53:7 S tidett, iksi xas řeḥřac nneɣ uca yarbu řeḥriq nneɣ, [maca] neccin nḥesb i-t am yijjen teřqef i-t lmuṣiba, am yijjen iɣḍeř i-t u iḥṣar i-t AREBBI.
ISA 53:8 [Maca] netta ittwassnuqqeb x iɛeddiyen nneɣ, x řmuɛṣiyyet nneɣ řebzen t. Temmars xas tecti nni d aneɣ dd-issakkwaḍen řehna, u s iyezzimen nnes idweř aneɣ d agenfi.
ISA 53:9 Marra neccin tuɣa nweddar am wuǧi, nedweř kuř ijj ɣar webrid nnes, [maca] SIDI yarra ad xas tewḍa řmuɛṣiyyet nneɣ marra.
ISA 53:10 Deǧen t, uca ijja [i-ten] ad t ssbehdřen. War yarzim aqemmum nnes. Am izmar nedhen t ɣar tɣarṣt, am texsi tegnu qibač i wenni tt iǧasen, ammu war yarzim Netta aqemmum nnes.
ISA 53:11 Immeksi-dd zi řeḥṣaret u zi řeḥkam. Man wen zi jjiř nnes tuɣa ixemm dayes, zeɛma ittwaqess zi temmurt n yinni iddaren, aqa xas ticti zi ssibbet n uɛeddi n řgens inu!
ISA 53:12 Immewc as wenḍeř ɣar iɛeffanen, [maca] ɣar ttujar tuɣa-t di řmewt nnes iqesḥen, waxxa netta ɛemmarṣ war iggi lɛunf u ɛemmarṣ war tuɣi řɣecc deg uqemmum nnes.
ISA 53:13 [Maca] tuɣa iǧa i arḍa n SIDI maḥend ad t iřbez, isseḥřec [i-t]. Řami řeɛmar nnes igga ixef nnes d taɣarṣt n umarwas [i ddnub nneɣ], ad iẓar Netta zzariɛet, ad isszuggar Netta ussan nnes uca arḍa n SIDI ad iqfeř s ufus nnes.
ISA 53:14 Di ssibbet n umarret n řeɛmar nnes ad t iẓar uca ad ijjiwen. S tussna nnes ad isegged Umsexxar inu, Amsegged, aṭṭas n yewdan, maɣar ad yarbu řmuɛṣiyyet nsen.
ISA 53:15 S uya ad as wceɣ tasɣart jar imeqqranen uca ak-d aytbab n ṣṣulṭa ad ibḍa takeccaḍt, minzi isebbeř tudart nnes i řmewt uca ittwaḥseb zeg inni ittɛeddan uca yarbu ddnub n waṭṭas uca ittar di ṭṭweɛ n yinni ittɛeddan.”
ISA 54:1 “Sriwřew, [cem] tenni war ittirwen ɛemmarṣ! Duqqez s usřiwřew, sɣuyy s řefraḥet, [a cem] tenni war issinen řewjeɛ n tarwa, maɣar tarwa n tenni di semḥen d aṭṭas x iḥenjiren n tenni ɣar iǧa weryaz, iqqar SIDI.
ISA 54:2 Egg ttasiɛ i iqiḍan nnem u ejj ad bezzɛen arwaqat n tzeddiɣin nnem aṭṭas, war [ten] menneɛ. Szuggar timurar nnem uca ziyyar řewtad!
ISA 54:3 Maɣar cem ad tiriwed ɣar yefus u ɣar uzeřmaḍ uca zzariɛet nnem ad tᵉṭṭef řegnus d tasɣart uca nitni ad sszedɣen tineddam yareddǧen.”
ISA 54:4 “War tteggʷed ca, maɣar war tseḍḥid u war ttwassbarrqed ca, maɣar war tᵉttwafeḍḥed. Ad tᵉttud řefḍiḥet n temẓi nnem, war tᵉtteɛqiřed x řeḥcumiyyet n iseggʷusa nnem am tajjač.
ISA 54:5 Maɣar aryaz nnem d wenni cem iggin, ‘SIDI n řɛeskarat’ d Isem nnes, uca Amqeddas n Israil d Amefdi nnem. Ad as řaɣan ‘AREBBI n marra tammurt’.
ISA 54:6 Maɣar SIDI iřaɣa xam am i yict n temɣart i di ismeḥ [weryaz nnes], i dayes acḍan deg buḥbeř nnes, u [am] temɣart n iseggʷusa n temẓi, waxxa tuɣa-tt temmenḍar, iqqar AREBBI nnem.
ISA 54:7 [Mɣir] tazeḥziḥt semḥeɣ dayem, [maca] s arreḥmet tameqqrant ad cem ssmuneɣ [ɣari].
ISA 54:8 Umi ggiɣ aduqqez n weɣḍab inu ad isfi, aqa ssnuffareɣ zzayem aɣembub inu i yict tzeḥziḥt [waha], [maca] s tmexsiwt icuwwaren n řebda ad ayi tezziǧzed, iqqar SIDI, Amefdi nnem.”
ISA 54:9 “Maɣar wa ad yiři i Necc [am] wussan n Nuḥ umi jjuǧeɣ aqa aman n Nuḥ ɛemmarṣ war ssfiyen tammurt. Ammu i jjuǧeɣ [řexxu], aqa ɛemmarṣ war tteggeɣ ad xam idduqqez weɣḍab inu u war cem ttɛiqibeɣ [ɛad].
ISA 54:10 Maɣar idurar ad dewřen ɣar uɣezdis u tiwririn ad nnhezzent, [maca] tamexsiwt inu icewwaren ɛemmarṣ ad xam tḥeyyed uca Řɛahd n řehna inu war ittenhezzi ɛemmarṣ, iqqar SIDI, wenni umi tezziǧzed.”
ISA 54:11 “[A, cem] tenni ittwaḥṣaren, tenni iqeṭṭeb usemmiḍ, tenni nhřa afewwej! Xzar, Necc ad quwwareɣ iẓra nnem [iɣřan] s [ict n tma] tabarcant uca ad ggeɣ dsas nnem x tyaqutin n ṣaffir.
ISA 54:12 Necc ad ggeɣ řekwaza nnem i tfuct zeg ukristal, uřa d tiwwura nnem n řeɛqaq izeggwaɣen d marra řeḥyuḍ nnem i d am innḍen zeg iẓra iɣřan.
ISA 54:13 Marra iḥenjiren nnem ad iřin d imeḥḍaren n SIDI uca řehna n iḥenjiren nnem ad yiři d ameqqran.
ISA 54:14 Cem ad tiřid tarekkned s tsegda. Ad tiřid tᵉttaggʷejed x řeḥṣaret, maɣar war [din] min zi ɣa teggʷeded, uřa x unexřiɛ, minzi war dd ɣarem ittikkwiḍ ca.
ISA 54:15 Xzar, ad ssmunen, [maca aya] war iǧi zzayi. Wi xam i ɣa issmunen, ad zzayem iwḍa.
ISA 54:16 Xzar, Necc xeřqeɣ-dd amziř wenni ittsuḍen tirjin n tmessi u issuffuɣ-dd ict n řqecɛet i řxedmet nnes. [Ammu] i dd-xeřqeɣ ɛawed amteḥḥay maḥend ad yareddeǧ.
ISA 54:17 Kuř řesnaḥ nni ittwaggen ḍidd nnem, war ittiweḍ, uca kuř iřes nni xam i dd ɣa igeɛɛden di ddeɛwet, ad t tḥekmed cem. Ta d tasɣart n imsexxaren n SIDI uca tasegda nsen teffeɣ-dd zzayi, [ammu i] iqqar SIDI.”
ISA 55:1 “A, marra inni iffuden, asem-dd ɣar waman, wenni war ɣar ǧint tenɛacin, asem-dd, sɣem, ccem, [wah,] asem-dd uca sɣem binu d uɣi, břa tinɛacin u břa ttaman.
ISA 55:2 Mayemmi twezznem nnuqart i min war iǧin d aɣrum u [mayemmi] tjehdem i min war ijjiwnen? Sřem-dd ɣari mliḥ, ccem min icnan uca ejj řeɛmar nwem ad iɣebba tadunt.
ISA 55:3 Wcem amezzuɣ uca asem-dd ɣari, sřem, [xenni] ad iddar řeɛmar nwem, [maɣar] Necc ad akidwem ggeɣ ijj n Řɛahd i řebda, timegga n tmexsiwt n řaman icewwaren n Dawud.
ISA 55:4 Xzar, ggiɣ t d acehhad i ccuɛub, d řḥakem, d bab n řumur i ccuɛub.
ISA 55:5 Xzar, ad třaɣid ijj n řgens i war tessined, u řgens i war cek issinen ad ɣarek dd-yas di ṭṭweɛ n SIDI, AREBBI nnec, u di ṭṭweɛ n Umqeddas n Israil, minzi Netta issɛuǧa cek.”
ISA 55:6 “Arzum x SIDI řami Netta ittejja ixef nnes ad ittwaf, řaɣam as řami dd-yudes Netta.
ISA 55:7 Ejj aɛeffan ad ismeḥ deg webrid nnes uca aryaz n řɣecc deg ixarriṣen nnes. Ejj i-t ad dd-idweř ɣar SIDI, [xenni] Netta ad as izziǧez, u ɣar AREBBI nneɣ, maɣar Netta iɣeffar aṭṭas n twařawin.
ISA 55:8 Maɣar ixariṣṣen inu war ǧin am yixariṣṣen nwem u ibriden inu war ǧin am yibriden nwem, iqqar SIDI.
ISA 55:9 Maɣar am mammec uɛřan ijenwan x temmurt, ammu i yuɛřan ibriden inu x ibriden nwem u ixarriṣen inu x ixarriṣen nwem.
ISA 55:10 Maɣar am mammec i dd-ihekkwa wenẓar d wedfeř zeg ujenna u war ɣares dd-iddikkwiř ca, maca issuffa tammurt d amezwaru uca ittarra i-tt ad tewc řɣiǧet, ad tawi aɣemmuy uca [awarni as] ittic zzariɛet i wenni iẓarrɛen d weɣrum i wenni ittetten,
ISA 55:11 ammu i ɣa yiři uřa d awař i dd-itteffɣen zeg uqemmum inu. War dd ɣari iddikkwiř ixwa, maca ad yegg min xseɣ u ad yaweḍ [marra] min ɣar t ssekkeɣ.”
ISA 55:12 “Maɣar ad teffɣem s řefraḥet uca ad kenniw ssqebbḍen di řehna. Idurar d tewririn ad dduqqzen s usřiwřew zzat i wudem nwem u marra ticejjura n yeyyar ad wtent camxa s ifassen.
ISA 55:13 Deg wemcan n usennan ad teɣmi [tcejjart n] umerzi, deg wemcan n tzeggʷart ad teɣmi tcejjart n tariḥant. Aya ad yiři i SIDI, i [ccan n] Yisem [nnes], i řeɛřamet n řebda i war imeḥḥin ɛemmarṣ.”
ISA 56:1 “Ammu i iqqar SIDI: ‘Ḥḍam řḥeqq uca ggem tasegda, minzi asenjem inu yudes-dd, ad dd-yas deɣya, uca tasegda inu [tiweḍ-dd] ḥima ad tᵉttwassargeb.
ISA 56:2 Sseɛd n weryaz nni itteggen ammu uřa d mmis n bnadem nni imennɛen di man aya, wenni iḥeṭṭan ass n ssebt ḥima war ittwassɛiǧit, d wenni iḥeṭṭan afus nnes ařami war ittegg zi marra min war iḥřin.
ISA 56:3 War ttejji abarrani wenni iqqnen ɣar SIDI ad yini: ‘SIDI iɛzeř ayi qaɛ x řgens nnes!’, uca war ttejji wenni umi ttwaddzen imeǧařen ad yini: ‘Xzar, necc d tacejjart yuẓɣen!’
ISA 56:4 Maɣar ammu i iqqar SIDI x [imsexxaren] inni umi ttwaddzen imeǧařen, inni iḥeṭṭan ussan inu n ssebt u ttixḍaren min iǧan i arḍa inu u ttᵉṭṭfen di Řɛahd inu:
ISA 56:5 Necc ad asen ggeɣ amcan di Taddart inu u jar řeḥyuḍ inu uca ad asen wceɣ isem ḥsen x [yisem] n iḥenjiren d tḥenjirin. Kuř ijjen zzaysen ad as wceɣ isem n řebda nni ɛemmarṣ war imeḥḥin.
ISA 56:6 Ibarraniyyen nni i ɣa iqqnen ɣar SIDI ḥima ad as sexxaren u ḥima ad xsen Isem n SIDI, ḥima ad iřin d imsexxaren nnes - marra inni iḥeṭṭan ass n ssebt ḥima war ittwassɛiǧit, uřa d inni imennɛen di Řɛahd inu -
ISA 56:7 ad ten awyeɣ [ɛawed] ɣar wedrar inu iqeddsen u ad ten ssefraḥeɣ di Taddart inu n tẓaǧit. Tiɣarṣa nsen n wecmaḍ d tɣarṣa nsen nneɣni ad iřint i arḍa inu x uɛalṭar inu, maɣar Taddart inu ad as řaɣan Taddart n tẓaǧit i marra řegnus.’”
ISA 56:8 “Sidi inu, SIDI, wenni d issmunan inni x yuẓẓřen n Israil, iqqar: ‘Necc ad ɣares dd-ssmuneɣ ktar x yinni dd-ittwassmunen ɣares [ɛad].’”
ISA 56:9 “Marra řewḥuc n řexřa, asem-dd i macca, [wah,] marra řmař n wezɣar!
ISA 56:10 Iɛessasen nnes ddarɣřen marra, war ssinen walu. Marra nitni d iṭan ibekmen, war zemmaren ad zun, ṭṭsen, zzřen, ttexsen anudem.
ISA 56:11 Iṭan-a arjfen ař ṭṭarf, war ssinen tayawant. Nitni d imeksawen war ifehhmen, kuř ijjen [zzaysen] iḍeffar abrid nnes, kuř ijj yarezzu tizi nnes, ɛad wenni d aneggar zzaysen.
ISA 56:12 [Qqaren]: ‘Asettiw-dd, ad dd-awyeɣ binu, ad nescar s ccrab. Am wass-a ammu i ɣa yiři uřa d tiwecca, [ad yiři ɛad] d ameqqran d icnan [xas]!’”
ISA 57:1 “Ittwahellek umsegged uca war din uřa d ijj wi t ittkessin ɣar wuř. Iryazen daysen tamexsiwt icewwaren mmeksin, břa ma iḥeṭṭa uřa d ijj aqa amsegged immeksi qbeř i dd ɣa yas [ass n] lmuṣiba.
ISA 57:2 Netta ad dd-yadef di řehna, ad arreyḥen nitni di qamat nsen [deg imeḍřan], [kuř ijj] wenni yuyuren abrid nnes iseggmen.”
ISA 57:3 “Qarrbem-dd da, [a kenniw] iḥenjiren n tbezgiwt, tarwa n yinni izennan u n temɣart n farq-ccɣeř!
ISA 57:4 Wi zi testehezzam ammu, wi x tcarragem aqemmum u wi ɣar tjebbdem iřes ɣar barra? Ma war teǧim d iḥenjiren n uɛeddi, tarwa n řɣecc?
ISA 57:5 [Kenniw] inni itthajen ɣar tcejjura n l’aṣnam, sadu kuř tacejjart tazizawt, [kenniw] inni iɣarrṣen i iḥenjiren imeẓyanen di teɣzurin, swadday di tezziyin n řejruf.
ISA 57:6 Tasɣart nnem ɣar iẓra iyuydan n teɣzurin. Aqa din tasɣart i d am dd-yekkaren. Uřa i nitni tzeǧɛed asen tawhibt n useyyeb, twehhbed tawhibt [n řɣiǧet]. Ma Necc ad qqimeɣ sqareɣ x man aya?”
ISA 57:7 “X wedrar yuɛřan d ittwassgeɛɛden tessud qama nnem. Uřa dinni tgeɛɛded ḥima ad twehhbed taɣarṣt.
ISA 57:8 Awarni tewwart d řeḍruf nnes [ɣar iɣezdisen nnes] teggid řeɛřamet nnem n řidaret, [‘mzuza nnem’], maɣar cem tenɛezřed xafi d taɛaryant u tgeɛɛded dinni sennej. Tɛedřed i yixef nnem qama d tmiriwt uca tɛahded ixef nnem ak-d ca zzaysen. Tettexsed tassut nsen, teẓrid taryast [nsen].
ISA 57:9 Ak-d zzect truḥed ɣar ujeǧid uca tarnid aṭṭas di řeɛṭur ittfuḥen nnem. Tessekked imsexxaren nnem ɣar řaggʷaj uca tesswaḍɛed ixef nnem ař řaxart.
ISA 57:10 Zi ssibbet n waṭṭas n imsagaren nnem tuḥřed, [maca] ɛemmarṣ war tennid: ‘War din iqqim řayas!’ Tufid jjehd n jdid i tudart. X uya war teḥřiced.
ISA 57:11 Man wen zi tessḥissfed u teggʷeded aqa cem tessxarrqed xafi u war d ayi tidared, war d ayi teggid ɣar wuř nnem? Ma war tuɣi Necc sseɣdeɣ zeg wecḥař uya, [ařami] cem war zzayi teggʷided ca [ɛad]?”
ISA 57:12 “Necc ad ɛawdeɣ x tsegda nnem d tmegga nnem: war cem neffɛen ca.
ISA 57:13 Xmi ɣa třaɣid, ejj xenni agraw nnem [i ɣarem tessmuned] ad cem ifekk. Asemmiḍ ad ten yawi marra, ijj n usuḍi ad ten iksi, [maca] wenni ɣari yarekkwařen, ad iwart tammurt d wedrar inu iqeddsen d tasɣart.”
ISA 57:14 “Ad yini: ‘Sgeɛɛdem, sgeɛɛdem [abrid], ksem min issenqraḍen zeg webrid n řgens inu!’
ISA 57:15 Maɣar ammu i iqqar wenni yuɛřan u wenni ittwassgeɛɛden, wenni izeddɣen di řebda, wenni umi qqaren aqa Amqeddas [i iǧa]: ‘Necc zeddɣeɣ di řuɛřa u deg weqdas u ɣar wenni umi ittwarẓ buḥbeř u ɣar umwaḍeɛ n buḥbeř, maḥend ad arreɣ buḥbeř n imwaḍɛen d wuř n inni ittwarẓin ɣar Tudart!’
ISA 57:16 Maɣar Necc war ttemcubbuceɣ i řebda u war tteggeɣ ad idduqqez weɣḍab inu břa qeṭṭu, minzi [xenni] iři ad yarxu [kuř] buḥbeř zi zzat n wudem inu, řeɛmur nni ggiɣ.”
ISA 57:17 “Necc ffugmeɣ x řmuɛṣiyyet n meẓri nnes deg warbeḥ uca wtiɣ [řgens]. Necc nnuffareɣ uca [xenni] idduqqez weɣḍab inu. [Maca] řgens yuyur, idweř ɣar webrid n wuř nnes.”
ISA 57:18 “Necc ẓriɣ ibriden nnes, ad t ssgenfiɣ, ad t ssqebbḍeɣ, ad as ssfewwjeɣ uca ad as wceɣ ifewwajen, i netta u i yinni iceḍnen nnes.
ISA 57:19 Necc ad dd-xeřqeɣ řɣiǧet n iyencicen nsen. ‘Řehna, řehna i yinni iggʷejen u i yinni yudsen’, iqqar SIDI.
ISA 57:20 Maca iɛeffanen ggin am řebḥar innhewřen i war izemmaren ad yarsa, uca aman nnes iwyen-dd abaryuḍ d ubeǧaɛ.
ISA 57:21 Iɛeffanen war ɣar iǧi řehna!, iqqar AREBBI inu.”
ISA 58:1 “Řaɣa s jjehd, war ttceṭṭar, ejj tmijja nnec ad tgeɛɛed am uyicc n icarri uca barreḥ i řgens inu iɛeddiyen nsen u i taddart n Yaɛqub ddnub nsen!
ISA 58:2 Nitni arezzun xafi ass x wass uca iɛjeb asen tussna n ibriden inu, amecnaw [ǧan d] řgens nni itteggen tasegda u war ittejji řḥeqq n AREBBI nnes. Nitni ttaren zzayi řeḥkamat iseggden, iɛjeb asen ad dd-qarrben ɣar AREBBI,
ISA 58:3 [maca nitni qqaren]: ‘Mayemmi nẓumm, uca Cek war t teẓrid? [Mayemmi] nessecḍan buḥbeř nneɣ [am] Cek war d as tḥekkared?’ Xzar, deg wass n uẓummi nwem, tarrim meẓri uca tzeyyarem aṭṭas marra ixeddamen nwem.
ISA 58:4 Xzar, aẓummi nwem yiwi kenniw ɣar umcubbec d umenɣi, ɣar tiyyita s řpuniyyet s řeqsaḥet. War ttẓummem am tᵉtteggem ass-a, maḥend ad tᵉttwaseř tmijja nwem di řuɛřa!
ISA 58:5 Ma wa d aẓummi nni ixḍareɣ Necc: ijj n wass nni di ɣa iɛeddeb bnadem řeɛmar nnes, wenni x i ɣa imeyyeř bnadem azeǧif nnes am uɣanim, u ad issars taxancet n wecḍan d yiɣɣeḍ am qama nnes? Ma teqqared i uya aẓummi, ma aya d ass i dd-yusin x řxaḍar i SIDI?”
ISA 58:6 “Ma war iǧi wa d aẓummi nni ixḍareɣ: afekki n iceddiyyen n řɣar, azeɛwaḍ n tesɣunin n zzayřet, anufseř i yinni ittwaḥṣaren, aqa ad tekksem qaɛ zzayřet?
ISA 58:7 Ma war iǧi [wa d aẓummi nni ixḍareɣ], aqa ad tebḍid aɣrum nnec ak-d wenni iǧuzen uca ad tessidfed řmusakin nni ittwadarrcen ɣar taddart? Mařa cek teẓrid aɛaryan, ad t tessyarḍed u war tessnufared ixef nnec zeg wenni iǧan zeg weysum nnec?
ISA 58:8 Xenni tafawt nnec ad dd-tenqar am tuffut n řḥař uca asgenfi nnec ad dd-yaweḍ deɣya, tasegda nnec ad ac tizwar uca aɛuǧi n SIDI ad yiři d aɣezdis nnec aneggaru.”
ISA 58:9 “Xenni ad třaɣid uca SIDI ad xak dd-yarr. Ad tesɣuyed ɣar twiza, [uca xenni] ad yini Netta: ‘Xzar, aqa ayi da!’ Mařa [nican] tekksed zzayret zi řwesṭ nnec, uřa d aceyyar s uḍaḍ d wawař aɛeffan,
ISA 58:10 uca ad tarzmed řeɛmar nnec i wenni iǧuẓen u ad tessjjiwned řeɛmar iceḍnen! [Xenni] ad dd-tenqar tfawt nnec di taǧest uca tubbarcent nnec ad tiři am ṭṭya n uziř.
ISA 58:11 SIDI ad cek ittgewwad řebda u Netta ad issjjiwen řeɛmar nnec di jjwayeh yuẓɣen uca ad issejhed iɣsan nnec. Ad tdewřed am weḥwic ittwassun u am řɛunṣar ittazzřen n waman i war ttɣarran aman nnes ɛemmarṣ.
ISA 58:12 Inni zzayek [dd-iffɣen] ad ɛawden asbeddi i řxirbat n wecḥař uya, ad ɛedřen dsusa n jjiřat iɛdun uca ad ac qqaren: ‘Wenni iɛeddřen tareẓẓitin, d wenni ittarran izubaq ad daysen uyuren!’”
ISA 58:13 “Mařa [xenni] tqeřbed aḍar nnec x [wass n] ssebt, x taggit min d ac itteɛjiben deg wass inu iqeddsen, uca ad třaɣid i [wass n] ssebt: ‘Ṭṭibet!’, i min iǧan iqeddsen i SIDI: ‘Aɛuǧi!’, uca ad tweqqared [ass n ssebt] am war tḍeffareḍ ibriden nnec, war tᵉtteggid min d ac itteɛjiben u war tessiwiřid [ɣar] tizi [nnec],
ISA 58:14 xenni ad tafed řefraḥet nnec di SIDI u Necc ad cek jjeɣ ad tnedhed tiwa i řegɛudi n temmurt. Ad cek ssecceɣ zi tesɣart n babac Yaɛqub, minzi aqemmum n SIDI issiweř.”
ISA 59:1 “Xzar, afus n SIDI war iǧi d aquḍaḍ ḥima ad issenjem, amezzuɣ nnes war idduhcar aqa Netta war ittesři,
ISA 59:2 maca řmuɛṣiyyet nwem d min ittemsebḍan jar awem d AREBBI nwem, uca ddnub nwem řeḥḥfen zzaywem aɣembub nnes, aqa Netta war [i d awem] ittesři.
ISA 59:3 Maɣar ttwassxemmjen ifassen nwem s idammen, iḍewḍan nwem s řmuɛṣiyyet, iyencicen nwem ssxarriqen, iřes nwem inṭeq s min war iḥrin.
ISA 59:4 Uřa d ijj issmuna s tsegda uca uřa d ijj ittwacarreɛ s řḥeqq. Marra nitni ttɛemmden x min iǧan baṭeř uca qqaren ixarriqen. Aqa kessin s ddeyset n tuɛeffna u ttarwen-dd řmuɛṣiyyet.
ISA 59:5 Ḥebḍen x tmeǧařin n třefsa u zeṭṭen axmař n qundɛa. Wenni iccen zi tmeǧařin nsen, ad immet, u xmi ittareẓẓa ijj icten, tᵉtteffeɣ-dd zzayes ict n tfiɣart.
ISA 59:6 Ixmaren nsen war dd-usin i werruḍ uca war zemmaren ad arḍen ixef nsen s min ggin [ifassen nsen]. Min ggin aqa d řexdayem n řmuɛṣiyyet uřa d řxedmet n řexcunet n ifassen nsen.
ISA 59:7 Iḍaren nsen ttazzřen ɣar řɣar u nitni ttqeǧiqen maḥend ad ssizzřen idammen imezdagen. Ixarriṣen nsen d ixarriṣen [ccuren] ak-d řmuɛṣiyyet, areddeǧ d ukehheḍ aqa aten x ibriden nsen iwaṭan.
ISA 59:8 Abrid n řehna war t ssinen u řatarat nsen war xasent walu n řḥeqq. Nitni ssfarraɣen izubaq nsen i yixef nsen, marra inni daysen igguren, war ssinen řehna.”
ISA 59:9 “X uya ittɣima řḥeqq iggʷej xaneɣ u tasegda war dd aneɣ dd-tᵉttikkwiḍ. Neccin nettraja tafawt, [maca] xzar, aqa din ṭṭřam, nraja tissiqt n tfawt, [maca] nuyur di taǧest.
ISA 59:10 Nettfafa am yiḍarɣařen ak-d řḥiḍ u nᵉttemhafa [ssa ɣar da], axmi war ɣarneɣ ǧint tiṭṭawin. Nweṭṭa di ṭṭḥa n uziř axmi di tbambast x yinni iddaren axmi x imettan.
ISA 59:11 Neccin nzehhar marra am ddubat u nettgergur am ttgergurent tedbirin, nettraja řḥeqq, [maca] war dd-yusi, [nettraja] asenjem, [maca] iggʷej xaneɣ.
ISA 59:12 Maɣar iɛeddiyen nneɣ aṭṭas qibač Cek u ddnub nneɣ cehhden xaneɣ, minzi iɛeddiyen nneɣ aqa aten ɣarneɣ u řmuɛṣiyyat nneɣ aqa nessen i-tent:
ISA 59:13 aɛeddi d uxarreq x SIDI, uca aḥeyyed zi AREBBI nneɣ, řhard x ddeǧ d uɣewweɣ, aḥaweř d usuffeɣ n ixarriqen zeg wuř.
ISA 59:14 Ittwexxar řḥeqq ɣar ḍeffar, uca tᵉttɣima tsegda ɣar řaggʷaj, maɣar tidett tennedref deg wazzay uca min iseggmen war izemmar ad dd-yadef.
ISA 59:15 Tbeṭṭeř tidett u wenni iḥeyyden x tuɛeffna idweř d takeccaḍt. Aya iẓra i-t SIDI uca tuɣa-t d aɛeffan di tiṭṭawin nnes aqa war din iǧi řḥeqq.
ISA 59:16 Iẓra aqa war din uřa d ijjen u Netta tuɣa ittebhet řami uřa d ijj iksi s řmeɛruf i uceffaɛ. [Xenni] yiwi uɣiř nnes d asenjem i Netta uca tasegda nnes tuɣa d aɛemmed nnes.
ISA 59:17 Issyarḍ Ixef nnes tasegda am warruḍ n wuzzař uca issars lkask n usenjem x uzeǧif nnes. Netta yarḍ arruḍ n wexřaf uca iřeḥḥef s tusmi [iqeddsen] am iřeḥḥef s useřham.
ISA 59:18 Am mammec sdahǧent tmegga [nsen], ammu i ɣa ixřef i iɣrimen nnes s wesɛar, i řɛedyan nnes min d asen dd-yusin. Tigzirin ad tent iwc řexřef nsent i isdaḥǧen.”
ISA 59:19 “[Xenni] ad ggʷeden zeg Yisem n SIDI zi manis tɣeǧi tfuct, uca aɛuǧi nnes zi manis dd-tneqqar tfuct. Maɣar ad dd-yas am yeɣzar iḥṣaren, asemmiḍ n SIDI ad t iɛarn.
ISA 59:20 Ad dd-yas Umefdi zi Ṣihyun, i yinni i ɣa ituben zeg iɛeddiyen [nsen] zi Yaɛqub, [ammu i] iqqar SIDI.”
ISA 59:21 “Wa d Řɛahd inu akidsen, iqqar SIDI. Arruḥ inu, wenni xak [iǧan], d wawařen inu nni ggiɣ deg uqemmum nnec, war xak ttḥeyyiden ca zeg uqemmum nnec, war iǧi zeg uqemmum n tarwa nnec uřa zeg uqemmun n tarwa n tarwa nnec, zi řexxu ař i řebda, iqqar SIDI.”
ISA 60:1 “Kkar, egg tfawt maɣar tafawt nnem tusa-dd u aɛuǧi n SIDI yareqq tiwa nnem.
ISA 60:2 Maɣar xzar, taǧest ad tdeř tammurt u aseynu ibbumbes [ad ideř] ccuɛub, [maca] tiwa nnem ad igeɛɛed SIDI u aɛuǧi nnes ad dd-iḍhar tiwa nnem.
ISA 60:3 Řegnus ad ɣarem dd-asen u ijeǧiden ɣar tissiqt n řefjar nnem.”
ISA 60:4 “Sgeɛɛed tiṭṭawin nnem, xzar da d diha, xzar, marra nitni munen, ttasen-dd ɣarem. Iḥenjiren nnem ad dd-asen zi řaggʷaj, yessim ttwaksint i-dd x tmeṣṣaḍin.
ISA 60:5 Xenni ad t tẓared u ad tsiqsiqed uca uř nnem ad inhezz s uweqqar u ad innurzem aṭṭas, maɣar agřa n řebḥar ad idweř ɣarem, afeyyec n řegnus ad ɣarem dd-yas.
ISA 60:6 Ijj n ubarru n iřeɣman ad cem ideř, iřeɣman imeẓyanen zi Midyan d Ɛiyfa. Marra ad dd-asen zi Caba. Ad awyen ureɣ d jjawi, uca ad beccaren s wawařen n ccan i SIDI.
ISA 60:7 Marra uǧi n Qidar ad ɣarem nnjarwen. Icarriyyen n Nabayut ad iřin i tsexxart nnem. Ad ten ssgeɛɛden s arḍa x uɛalṭar inu u Necc ad ssɛuǧeɣ Taddart n uɛuǧi inu s tidett.”
ISA 60:8 “Man ina inni dd-iṭṭawen ɣar dinni am yiseynuten, am tedbirin ɣar řekwaza nsent?
ISA 60:9 [Wah,] tigzirin ad ayi řajant, uca iɣarruba n Tarcic ad iřin d imezwura maḥend ad awyen iḥenjiren nnem zi řaggʷaj, ak-d nnuqart nsen d wureɣ nsen, i Yisem n SIDI, AREBBI nnem, i Umqeddas n Israil, minzi Netta issɛuǧa cem.
ISA 60:10 Ibarraniyyen ad bnan řeḥyuḍ nnem uca ijeǧiden ad am sexxaren, maɣar deg uduqqez n weɣḍab inu wtiɣ cem, [maca] di arḍa inu tezziǧed ayi.
ISA 60:11 Tiwwura nnem ad qqiment řebda arzment. Ass d ǧiřet war ttbelliɛent maḥend ad ɣarem ssidfen agřa n řegnus uca ad [din] ssqebbḍen uřa d ijeǧiden nsen nni dd-iwyen.
ISA 60:12 Maɣar řgens d tgeldit nni war ttexsen ad am sexxaren, ad hellken, uca řegnus [nni] ad ttwaredǧen qaɛ.”
ISA 60:13 “Acuwwar n Lubnan ad ɣarem dd-yas, tacejjart n umerzi, tacejjart n ddulb d tcejjart n tengelt munent, ḥima ad zewwqen amcan n Zzawect inu Iqeddsen, uca amcan n iḍaren inu ad t ssɛuǧeɣ.
ISA 60:14 Iḥenjiren n yinni tuɣa cem iḥeṣṣaren ad ɣarem dd-asen s uwaḍeɛ, ad aḍaren ɣar iḍaren nnem marra inni zzayem istehzan, uca ad am řaɣan: ‘Tandint n SIDI, Ṣihyun n Umqeddas n Israil’.”
ISA 60:15 “I umi, aqa cem tuɣa texřid d tᵉttwacarhed ařami uřa d ijj war d xam issijj, ad cem ggeɣ d řɛezz ittduman d [řɛunṣar n] řefraḥet zi jjiř ař jjiř.
ISA 60:16 Ad tᵉṭṭḍed aɣi n řegnus u ad tᵉṭṭḍed ɣar iffan n ijeǧiden. Ad tessned aqa Necc d SIDI, Amsenjam nnem d Amefdi nnem, Amzemmar n Yaɛqub.”
ISA 60:17 “Deg wemcan n nnḥas ad awyeɣ ureɣ, deg wemcan n wuzzař nnuqart, deg wemcan n ukeccuḍ nnḥas, deg wemcan n yeẓra uzzař. Necc ad ggeɣ řehna d iweqqafen nnem uřa d tasegda d imzeyyaren nnem.
ISA 60:18 War ssiwřen ɛad x lɛunf di temmurt nnem, uřa x wareddeǧ d uxarreb di jjwayeh nnem. Řeḥyuḍ nnem ad asen inin: ‘Asenjem!’, u i tewwura nnem: ‘Taṣebbiḥt!’.
ISA 60:19 War tᵉttiři ɛad tfuct d tafawt nnem deg uziř u taziri war d am tᵉttic ɛad tissiqt nnes, [maca] SIDI ad am yiři d tafawt n řebda, uca AREBBI nnem ad yiři d řehzuṭ nnem icnan qaɛ.
ISA 60:20 Tafuct nnem war tɣeǧi ɛad u taziri nnem war tneqqeṣ, maɣar SIDI ad yiři d tafawt nnem n řebda uca ussan n wecḍan nnem ad qḍan.
ISA 60:21 Řgens nnem aqa aten marra d imseggaden, nitni ad ṭṭfen tammurt d řwart i řebda: taɣeddut i ẓẓuɣ, řxedmet n ifassen inu, aqa-ten i řɛezz [inu]!
ISA 60:22 Ameẓyan qaɛ ad idweř d ařef u amuqřiř qaɛ ad idweř d řgens ijhed, Necc, SIDI, ad t-i-dd-nedheɣ deɣya xmi dd ɣa yaweḍ řḥař.”
ISA 61:1 “Arruḥ n Sidi, SIDI, xafi minzi idhen ayi SIDI inu maḥend ad awyeɣ řexbar aṣebḥan i imwaḍɛen. Netta issekk ayi-dd, maḥend ad cefneɣ inni umi ittwarẓ uř nsen, maḥend ad barrḥeɣ s třelli i imeḥbas d unufseř zi řeḥbes i yinni icarfen,
ISA 61:2 maḥend ad barrḥeɣ aseggʷas n arḍa i SIDI d wass n wexřaf n AREBBI nneɣ, maḥend ad ssfewwjeɣ marra inni iceḍnen,
ISA 61:3 maḥend ad ggeɣ i yinni iceḍnen di Ṣihyun aqa ad asen wcen řehzuṭ deg wemcan n yiɣɣeḍ, zzect n řefraḥet deg wemcan n wecḍan, arruḍ n usemɣar deg wemcan n buḥbeř ittwarẓen, ḥima ad asen řaɣan ‘Ticejjura n yigg n tsegda!’, tinni ittwaẓẓun zi SIDI, i řɛezz [nnes]!”
ISA 61:4 “Ad ssbedden řxirbat n wecḥař uya, ad ɛedřen řebniyyat ihedmen n [jjiřat] i d [aneɣ] izwaren, uca ad ssbedden ɛawed tineddam ixarrben nni tuɣa ihedmen zi jjiř ař jjiř [nneɣni].
ISA 61:5 Ibarraniyyen ad iřin wejden ḥima ad arewsen uǧi nwem, uca iɣriben ad iřin d ifeǧaḥen nwem d ayt n tzayart nwem.
ISA 61:6 [Maca] ad kenniw řaɣan ‘Ikehhanen n SIDI!’ uca ad awem inin ‘Imsexxaren n AREBBI nneɣ!’. Ad teccem agřa n řegnus uca ad tfeyycem s uɛuǧi nsen.
ISA 61:7 Deg wemcan n useḍḥi nwem, [ad din iřint] tnayen n tseqqar, u [deg wemcan n] řefḍiḥet, ad sřiwřewen nitni x tesɣart nsen. S uya ad ṭṭfen tnayen n tseqqar di temmurt nsen, řefraḥet ittduman ad ɣarsen tiři.
ISA 61:8 Maɣar Necc, SIDI, ttexseɣ řḥeqq, carrheɣ tukkarḍa s lɛunf. Necc ad asen wceɣ řmunet di řaman, ad kidsen qqneɣ ijj n Řɛahd ittduman.
ISA 61:9 Zzariɛet nsen ad tedweř tᵉttwassen jar řegnus uca tarwa nsen di řwesṭ n řegnus. Marra wi ten i ɣa iẓaren, ad qenɛen aqa ina d zzariɛet i ibarek SIDI.”
ISA 61:10 “Farḥeɣ aṭṭas di SIDI, řeɛmar inu ifarḥ di AREBBI inu minzi Netta issyarḍ ayi arruḍ n usenjem, u s useřham n tsegda i d ayi iřeḥḥef, am muřay i iqqnen areẓẓet n ukehhan u am tesřit nni isswejden ixef nnes s řehzuṭ nnes.
ISA 61:11 Maɣar am temmurt tᵉttejja aɣemmuy nnes ad dd-iffeɣ u am weḥwic issɣemmay min dayes izarrɛen, ammu i dd isseɣmay Sidi inu, SIDI, tasegda d ccan zzat [i tiṭṭawin] n marra řegnus.”
ISA 62:1 “Di ṭṭweɛ n Ṣihyun war zemmareɣ ad sseɣdeɣ, di ṭṭweɛ n Urcalim war ttesqiriɣ, ař dd ɣa tenqar tsegda nnes am tissiqt u asenjem nnes am wesfeḍ yareqqen.
ISA 62:2 Ad ẓaren řegnus tasegda nnem u marra ijeǧiden [ad ẓaren] aɛuǧi nnem. Ad am řaɣan s yijj n yisem n jdid nni d am i ɣa igga uqemmum n SIDI.
ISA 62:3 Ad tiřid d ttaj icewwaren deg ufus n SIDI uřa d areẓẓet igellden deg ufus n AREBBI nnem.
ISA 62:4 War d am qqaren ɛad ‘Tenni di semḥen!’ u war d as qqaren ɛad i temmurt nnem ‘Tammurt ixřan!’, maca ad am řaɣan ‘Řxaḍar inu!’, u tammurt nnem ‘Tanemřact!’, maɣar tusid-dd x řxaḍar n SIDI u tammurt nnem ad tᵉttwamřec.
ISA 62:5 Maɣar am uɛezri imřec taɛzarect, ammu i kidem ɣa meřcen iḥenjiren nnem, uca am muřay ifarreḥ i tesřit, [ammu] i d am ɣa ifarḥ AREBBI nnem.”
ISA 62:6 “[A] Urcalim, ssbeddeɣ iɛessasen x řeḥyuḍ nnem nni war ssɣidin řebda, deg wass d ǧiřet. [A] kenniw inni iɛeqqřen x SIDI, war ttareyyḥem!
ISA 62:7 War ttareyyḥem di ṭṭweɛ nnes, ař dd issbedd Urcalim uca igga i-tt d aṣebbeḥ x temmurt.
ISA 62:8 SIDI ijjuǧ ɣar ufus nnes afusi u ɣar uɣiř nnes ijehden: ‘Ɛemmarṣ ɛad ad wceɣ imendi nnem d macca i řɛedyan nnem, u ɛemmarṣ ɛad ad ssesweɣ ibarraniyyen binu nnem n jdid i x teksid tamara!
ISA 62:9 Maɣar wi t ɣa issmunen, ad zzayes ccen u ad ssemɣaren SIDI, u wi ɣa iřeqḍen aḍiř, ad zzayes swen di řemraḥat n Zzawect inu Iqeddsen.’”
ISA 62:10 “Ɛdum, ɛdum zi tewwura uca swejdem i řgens abrid. Sgeɛɛdem, sgeɛɛdem abrid iwaṭan, kksem iẓra, sgeɛɛdem taɛeǧant i řegnus!
ISA 62:11 Xzar, SIDI igga ad sřen ař ṭṭarf n temmurt. Inim i yeǧis n Ṣihyun: ‘Xzar, asenjem nnem yusa-dd, xzar, řmunet nnes ɣares uca řexřaṣ nnes ɣar zzates.’
ISA 62:12 Ad asen qqaren: ‘Řgens amqeddas, inni ittwafekken n SIDI!’, uca ad am qqaren: ‘Tenni x tuɣa arezzun!’ d ‘Tandint i war ittwajjen!’.”
ISA 63:1 “Min iɛna wenni dd-yusin zi Idum, zi Buṣra, deg warruḍ s uzzeggwaɣ yuǧřen, iɛuǧen deg warruḍ nnes, wenni igguren di jjehd nnes ameqqran?” “D Necc, wenni issawařen di tsegda, d wenni izemmaren ad issenjem!”
ISA 63:2 “Mayemmi arruḍ nnec d azeggwaɣ u [mayemmi] arruḍ nnec am werruḍ n wenni iɛeffsen x tsirt n uḍiř?”
ISA 63:3 “Necc weḥḥdi d wenni iɛefsen tasirt n binu u war din tuɣi uřa d ijj akidi zi řegnus. Ɛefseɣ xasen deg weɣḍab inu, řebzeɣ ten deg wesɛar inu. Idammen nsen ruccen x warruḍ inu, uca ssarṣuḍen marra arruḍ inu.
ISA 63:4 Maɣar ass n wexřaf aqa-t ɣari deg wuř, u yusa-dd useggʷas i yinni ittwafekken s ufus inu.”
ISA 63:5 “Necc xzareɣ [ammu d wammu], maca war [din] tuɣi uřa d ijj i d ayi iwcin afus. Necc tuɣa ttbehteɣ, minzi uřa d ijjen war kidi ibedd. [Ufiɣ] mɣir aɣiř inu i d ayi issnejmen uca asɛar inu tuɣa d aɛemmed inu.
ISA 63:6 Necc ɛefseɣ x řegnus deg weɣḍab inu, Necc ssᵉscareɣ ten deg wesɛar inu uca ggiɣ idammen nsen ttazzřen ɣar temmurt.”
ISA 63:7 “Necc xseɣ ad idareɣ timegga n tmexsiwt n SIDI, timegga iṣebḥen n SIDI, marra min i d aneɣ igga SIDI, uřa d řxir ameqqran i isscen i taddart n Israil ɛlaḥsab arreḥmet nnes d řemɣaret n tmexsiwt nnes icewwaren.
ISA 63:8 Netta inna: ‘Nitni d řgens inu, iḥenjiren nni war issxarriqen!” Uca Netta idweř d Amsenjem i nitni.
ISA 63:9 Di marra řeḥṣaret nsen tuɣa uřa d Netta ittwaḥṣar, uca lmalak n wudem nnes issenjem i-ten. Di tayri nnes d arḍa nnes ifekk i-ten. Netta issgeɛɛed i-ten uca yarbu ten di marra ussan n wecḥař uya.”
ISA 63:10 “Nitni [maca] ɣewwɣen uca ssceḍnen Arruḥ Iqeddsen nnes. [Xas uca] idweř asen d řeɛdu i nitni, immneɣ akidsen.
ISA 63:11 [Waxxa amenni] iɛqeř x wussan n zzmanat n wecḥař uya, x Musa d řgens nnes. Mani iǧa wenni d asen dd-issgeɛɛden zi řebḥar ak-d imeksawen n wuǧi nnes? Mani iǧa wenni iggin Arruḥ nnes Iqeddsen di řwesṭ nsen,
ISA 63:12 wenni iggin afus nnes ittseqsiqen aṭṭas ad yuyur ak-d Musa, wenni ibḍan aman zzat i tiṭṭawin nsen ḥima ad dd-yawi i Yixef nnes Isem i řebda,
ISA 63:13 wenni ten inedhen deg [waman] innhewřen? Am uyis di řexřa war nnqarḍen ca,
ISA 63:14 am řmař nni dd-ihekkwan di teɣzurt, [ammu] i issareyyeḥ i-ten Arruḥ n SIDI, ammu tnedhed řgens nnec maḥend ad dd-tawyed i Yixef nnec ijj n Isem ittseqsiqen aṭṭas.”
ISA 63:15 “Sijj zeg ujenna, u wařa zi Tzeddiɣt [nnec] [teccur s] tamqeddast nnec d tessiqt nnec! Mani teǧa tusmi nnec [iqeddsen] u [mani ǧant] tmegga nnec ijehden? Tessiggʷejed xafi řehnunect nnec d arreḥmet nnec.
ISA 63:16 Aqa Cek d Babatneɣ, maɣar Ibrahim war d aneɣ issin uca uřa d Israil war d aneɣ issin. Cek, [a] SIDI, d Babatneɣ, Amefdi nneɣ, Isem nnec aqa-t zi řebda.
ISA 63:17 [A] SIDI, mayemmi i d aneɣ tejjid nᵉtteffeɣ zeg ibriden nnec, mayemmi tesseqseḥed uř nneɣ ařami war Cek neggʷed? Dweř-dd di ṭṭweɛ n imsexxaren nnec, [di ṭṭweɛ n] tqebbař n tesɣart nnec.
ISA 63:18 Řgens nnec iṭṭef i-tt d řwart mɣir cwayt n řweqt. Iɣrimen nneɣ ɛefsen x Zzawect nnec Iqeddsen.
ISA 63:19 Aqa nedweř am yinni i war x tḥekmed zi zzmanat n wecḥař uya u i x war ittwařaɣa Isem nnec. Mři tcarrged ijenwan, ḥima ad dd-tehwid, ad arjijen idurar zzat i wudem nnec.”
ISA 64:1 “[Mři dd-tehwid,] am timessi tessareɣ tizgi u am tmessi tesstartar aman, maḥend ad ittwasscen Isem nnec i iɣrimen nnec, ḥima ad arjijen zzatek řegnus,
ISA 64:2 umi teggid timesřayin issaggʷaden i war tent nriji ɛemmarṣ. Mři dd-tehwid [ařami] arjijen idurar zzat i wudem nnec.”
ISA 64:3 “Zeg wecḥař uya ɛemmarṣ war [t] sřin, řa d amezzuɣ war [t] isři, uřa d tiṭṭ war [t] teẓri, aqa ijj n arebbi nneɣni nhřa Cek, wenni itteggen ca di ṭṭweɛ n yinni xas ittrajan.
ISA 64:4 Wenni ifarrḥen zi tsegda uca ad zzayes yegg, ad t teřqid Cek, inni xak itteɛqiřen deg ibriden nnec. Xzar, teffugmed, [minzi] neccin nexḍa. Negga i-t [ɛad] řebda, ma [xenni] ad nejmen?
ISA 64:5 Neccin marra am umexmuj, marra řmuɛṣiyyet nneɣ am warruḍ ixeǧḍen deg idammen, neccin marra am tfart nissřaw, uca řmuɛṣiyyet nneɣ tkessi aneɣ am usemmiḍ.
ISA 64:6 Uřa d ijj war ittřiɣi Isem nnec, [uřa d ijj] ittekkar ḥima ad dayek iṭṭef, maɣar Cek tessnuffared aɣembub nnec xaneɣ uca tejjid aneɣ ad nɣarq deg ufus n řmuɛṣiyyet nneɣ.
ISA 64:7 [Maca] řexxu, [a] SIDI, Cek d Babatneɣ, neccin d třaxt u Cek d bu-třaxt nneɣ, neccin marra d řxedmet n ifassen nnec.
ISA 64:8 [A] SIDI, war teggid ad idduqqez weɣḍab nnec ammu aṭṭas u war ttidar i řebda řmuɛṣiyyet. Aqa da, xzar, neccin marra d řgens nnec.
ISA 64:9 Tineddam nnec timqeddasin dewřent d řexřa, Ṣihyun tedweř d tanezruft, Urcalim d amcan ittwareddǧen.
ISA 64:10 Taddart nneɣ teccur s temqeddast d tissiqt, mani řejdud nneɣ ssemɣaren Cek, tᵉttwacmeḍ s tmessi u marra min xaneɣ iɛizzen, idweř d řxirbet.
ISA 64:11 Ma tzemmared ad tmenɛed Ixef nnec di qaɛ aya, [a] SIDI, ma tzemmared ad tesseɣded u ad aneɣ teḥṣared ammu aṭṭas?”
ISA 65:1 “Tuɣa ttbaneɣ asen-dd i yinni war xafi sseqsin, zemmaren ad ayi afen inni war xafi yarezzun. Necc nniɣ i řgens i war iřiɣin s Yisem inu: ‘Aqa ayi da, xzar, aqa ayi da!’
ISA 65:2 Ass marra sswiẓẓaḍeɣ ifassen inu ɣar řgens iɣewwɣen, wenni yuyuren deg ijj n webrid war iḥřin, x řeḥsab ixarriṣen nnes,
ISA 65:3 řgens nni d ayi iseɛɛaren řebda deg wudem inu, am qeddmen tiɣarṣa deh iḥwicen u bexxaren [tiwhibin] x llajur.
ISA 65:4 Nitni ttɣiman deg imeḍřan, u ttnusan deg ifran am ttᵉtten aysum n iřfan u ɣarsen ijj n nnɛi n arrwa di marmitat nsen.
ISA 65:5 Nitni qqaren: ‘Qqim mani teǧid, war d ayi dd-tades, maɣar necc d amqeddes zzayek!’ Aqa aten [am] ddexxan deg wenzaren inu, [am] tmessi yareqqen ass ikmeř.
ISA 65:6 Xzar, aya yura zzat i wudem inu, war ssɣidiɣ, maca ad xeřfeɣ, [wah,] ad xeřfeɣ [aya] deg weḥsin nsen:
ISA 65:7 řmuɛṣiyyat nwem d řmuɛṣiyyat n ibabaten nwem, inni wehhben řebxur x idurar u inni d ayi isseḥqaren x tewririn. Necc simant inu ad asen xeǧṣeɣ řmunet nsen i sdahǧen, [ammu i] iqqar SIDI.”
ISA 65:8 “Ammu i iqqar SIDI: ‘Am mammec umi ufin aẓemmi n uḍiř deg uzekkun uca qqaren: War t jarreḥ, maɣar dayes lbaraka!, ammu i ɣa ggeɣ di ṭṭweɛ n imsexxaren inu, ḥima war ten qeṭṭiɣ marra.
ISA 65:9 Necc ad dd-jjeɣ zzariɛet zi Yaɛqub u ad ssuffɣeɣ awrit n idurar inu zi Yahuda. Inni zzayi ittwafarzen ad tt ṭṭfen d tasɣart uca imsexxaren inu ad dinni zedɣen.
ISA 65:10 Řewḍa n Carun ad yiři d takessawt n wuǧi, u taɣzurt n Axur d amcan n arraḥet i ifunasen, i řgens inu wenni xafi yarezzun.”
ISA 65:11 “Kenniw maca inni isemḥen di SIDI, inni ittun adrar inu iqeddsen, inni isswejden ṭṭabřa i Jad u inni iccuren [aɣarraf s] binu ixeǧḍen i Mini,
ISA 65:12 Necc ad kenniw ḥesbeɣ i ssif. Kenniw ad taḍarem marra maḥend ad ttwaɣarṣem, umi Necc i d awem řaɣiɣ, [maca] kenniw war [xafi] dd-tarrim, [umi] Necc ɣarwem ssiwřeɣ, [maca] kenniw war [ɣari] tesřim, maca teggim min iǧan d aɛeffan di tiṭṭawin inu, u tixḍarem min war d ayi dd-yusin x řxaḍar.”
ISA 65:13 “S uya, ammu i iqqar Sidi inu, SIDI: ‘Xzar, imsexxaren inu ad ccen, [maca] kenniw ad tǧaẓem. Xzar, imsexxaren inu ad swen, [maca] kenniw ad teffadem. Xzar, imsexxaren inu ad farḥen, [maca] kenniw ad tseḍḥam.
ISA 65:14 Xzar, imsexxaren inu ad sřiwřewen s řefraḥet n wuř, [maca] kenniw ad tesɣuyem zi řeḥriq n wuř, ad tweɛɛḍem zi arẓiyyet n buḥbeř.
ISA 65:15 Ad tejjem isem nwem am nneɛřet i yinni zzayi ittwafarzen, uca Sidi inu, SIDI, ad kenniw ineɣ, [maca] imsexxaren nnes ad xasen iřaɣa s ijj n yisem nneɣni,
ISA 65:16 ařami wenni ixsen ad ibarek ixef nnes di temmurt, ad ibarek ixef nnes di AREBBI n tidett, u wenni ixsen ad ijjuǧ di temmurt, ad ijjuǧ ɣar AREBBI n tidett, maɣar řeḥṣarat n zic ad ttwattunt u ad ttwassnuffarent zzat i tiṭṭawin inu.’”
ISA 65:17 “Maɣar xzar, Necc ad ggeɣ ijenwan n jdid d temmurt n jdid. War tteɛqiřen ɛad x tmesřayin iɛdun, war dd-ttisent [ɛad] i uřa d ijj ɣar řbař.
ISA 65:18 Farḥem xenni u farrjem i řebda x min i dd ɣa xeřqeɣ, maɣar xzar, Necc ad dd-xeřqeɣ Urcalim d řefraḥet u řgens nnes d afarrej.
ISA 65:19 Necc ad sřiwřeweɣ x Urcalim, ad farḥeɣ zi řgens inu. Ɛemmarṣ ɛad ad dayes sřen i řḥess n imeṭṭawen niɣ n uɣuyyi.
ISA 65:20 Aḥḍiḍ i ɣa iddaren ca n wussan [waha], war ittiři ɛad, uřa d awessar nni war ittkemmiřen ussan nnes. Maɣar aḥuḍri ad immet xmi ɣares ɣa yiři mya n iseggʷusa, u amednub ad ittwanɛeř xmi ɣares ɣa yiři mya n iseggʷusa.
ISA 65:21 Nitni ad bnan tudrin ad daysent zedɣen, ad ẓẓun tizayarin deg imarjaɛen, ad ccen řɣiǧet nsen.
ISA 65:22 Nitni war bennin [maḥend] wenneɣni ad [dayes] izdeɣ, war tteẓẓun [maḥend] wenneɣni ad [zzayes] yecc, maɣar ussan n řgens inu ad iřin am wussan n tcejjart, u inni zzayi ittwafarzen ad awyen ariqqi zi řxedmet n ifassen nsen.
ISA 65:23 Nitni war xeddmen ɛad baṭeř, war ttirwen iḥenjiren i uceřwaw s řɣefřet, maɣar nitni d zzariɛet n yinni ittwabarken zi SIDI, uřa d tarrawt nsen akidsen.
ISA 65:24 Qbeř ma ad řaɣan, ad [xasen] dd-arreɣ, xwansu ɛad ssawařen, ad [asen] sřeɣ.
ISA 65:25 Uccen d izmar ad arewsen munen, ayrad ad icc řum am ufunas, uca afar ad yiři d macca i ufiɣar. War tteggen tuɛeffna u war ssekkaren řeqjaret x marra adrar inu iqeddsen, [ammu i] iqqar SIDI.”
ISA 66:1 “Ammu i iqqar SIDI: ‘Ajenna d řɛarc inu u tammurt d tanebdat i iḍaren inu. Mani [i ɣa tiři] xenni taddart nni texsem ad ayi tebnam u mani [i ɣa yiři] wemcan n arraḥet inu?
ISA 66:2 Marra aya igga i-t ufus inu d marra aya tuɣa iǧa ɛad, [ammu i] iqqar SIDI, [maca] Necc ad nḍareɣ tiṭṭawin inu x umezřuḍ, x wenni ittwarẓan buḥbeř nnes u x wenni ittarjijin zzat i wawař inu.’”
ISA 66:3 “Wenni iɣarṣen i ufunas, inɣa [uřa d] aryaz, u wenni yiwyen ijjen zeg wuǧi d ddbiḥet, yarẓa [ɛawed] iri i yiṭan, u wenni iqeddmen tawhibt [n řɣiǧet], [iqeddem] [uřa d] idammen n yiřef, u wenni issbexxaren jjawi, ibarek [uřa d] aɛbed n řexyařat. Nitni ixḍaren ibriden [i yixef nsen] uca řeɛmar nsen iɛjeb as nnɛawat nsen n l’aṣnam.
ISA 66:4 Ammu i ɣa areccḥeɣ uřa d Necc tiyyita nsen i nitni uca ad xasen awyeɣ min zi tteggʷeden, maɣar nitni war dd-arrin umi Necc d asen řaɣiɣ, [maɣar] nitni war sřin umi ɣarsen ssiwřeɣ, [maca] nitni ggin min iǧan d aɛeffan di tiṭṭawin inu uca ixḍaren min war dd-yusin x řxaḍar inu.”
ISA 66:5 “Sřem i wawař n SIDI, [a kenniw] inni ittarjijin zzat i wawař nnes: ‘Aytmatwem, inni kenniw icarrhen, inni kenniw inḍaren di ṭṭweɛ n Yisem inu uca qqaren: Iři ad ittwassɛuǧa SIDI, scen aneɣ řefraḥet nwem!, ad seḍḥan.
ISA 66:6 Ad dd-iffeɣ ddriz imɣar zi tendint, tmijja zi Zzawect Tameqqrant, tmijja n SIDI, wenni i ɣa ixeǧṣen řɛedyan nnes řmunet nsen i isdaheǧen.’”
ISA 66:7 “Qbeř i ɣa iṭṭef řeḥriq n tarwa [i temɣart Ṣihyun], aqa turuw-dd, qbeř i tt ɣa menɛen řewjeɛ n tarut, tegga [aḥenjir] d awtem ad injem.
ISA 66:8 Wi isřan aya? Man wen i iẓrin aya? Ma ad dd-texřeq ict n temmurt deg ijj n wass [waha]? Ma ad dd-ixřeq ijj n řgens deg ict n tecti [waha]? Maca usin as-dd i Ṣihyun řewjeɛ n tarut ɛad cwayt [waha], aqa turuw-dd iḥenjiren nnes.”
ISA 66:9 “Ma ad as arzmeɣ aɛeddis nhřa ma jjiɣ [tt] ad taru?, iqqar SIDI. Ma Necc wenni issarawen [timɣarin], ad [asent] bellɛeɣ [taɛeddist]?iqqar AREBBI nnem.”
ISA 66:10 “Farḥem ak-d Urcalim uca sřiwřiwem as, [a] marra kenniw inni tt ittexsen. Farḥem zzayes s usřiwřew, marra [kenniw] inni tuɣa xas iceḍnen,
ISA 66:11 ḥima ad tᵉṭṭḍem, ad tejjiwnem zeg ibbac nnes iccuren s ufewwej, ḥima ad teswem s tyawant u ad tarrem meẓri zi min iǧan d aṣebḥan qaɛ n uɛuǧi nnes!”
ISA 66:12 “Maɣar ammu i iqqar SIDI: ‘Xzar, Necc ad as ssizzřeɣ řehna am yeɣzar u aɛuǧi n řegnus am teɣzart iḥemřen, ḥima kenniw ad [zzayes] tᵉṭṭḍen. Ad kenniw arbun x tmeṣṣaḍin u ad xawem ssḥinnben x ifadden.
ISA 66:13 Am ijj n weryaz nni tessřehha as yemmas, ammu kenniw i ɣa sseřhuɣ, di Urcalim ad kenniw ssfewwjen.
ISA 66:14 Ad tẓarem aya, ad ifarḥ wuř nwem, u iɣsan nwem ad ttwaneɛcen am arbiɛ aziza. Ammu i ɣa ittwassen ufus n SIDI ɣar imsexxaren nnes, [maca] Netta ad isxeḍ x řɛedyan nnes.’”
ISA 66:15 “Minzi, xzar, ad dd-yas SIDI di tmessi, ikarruten nnes [ad ggen] am tḥaryaḍt, ḥima ad yejj aɣḍab nnes ad yarsa s ijj n uduqqez n wesɛar nnes u tafqeḥt nnes s iḥudaq n tmessi.
ISA 66:16 Maɣar SIDI ad iḥkem marra ddat s tmessi d ssif uca inni ɣa ittwanɣen zi SIDI ad iřin deg waṭṭas.
ISA 66:17 [Marra] inni issqeddsen u issizdigen ixef nsen deg iḥwicen awarni i yijjen, inni ittetten aysum n iřfan uřa d nnɛi [n řmař] d iɣardayen, aqa marra nitni ad ttwaqḍan!, [ammu i] iqqar SIDI.”
ISA 66:18 “Necc [ad xeǧṣeɣ] timegga nsen d ixarriṣen nsen, uca ad imsar ad ssmuneɣ marra řegnus d iřsawen u nitni ad dd-asen ad ẓaren aɛuǧi inu.
ISA 66:19 Necc ad ggeɣ ict n řeɛřamet jar asen uca ad ssekkeɣ inni zzaysen innejmen ɣar řegnus, ɣar Tarcic, Fuṭ d Lud, imjebbaden n řqews, ɣar Tubal d Yawan, ɣar tegzirin iggʷejen, tinni war isřin řexbar xafi u war iẓrin aɛuǧi inu. Nitni ad barrḥen aɛuǧi inu i řegnus,
ISA 66:20 ad awyen aytmatwem zi marra řegnus d tawhibt [n řɣiǧet] i SIDI: x yeysan d ikarruten, di řekrasi ittwarebbun, x isardan d iřeɣman n ict n tgeɛrurt, ɣar wedrar inu amqeddes, ɣar Urcalim, [ammu i] iqqar SIDI inu, am mammec ttawyen ayt n Israil tawhibt [n řɣiǧet] di tqedduḥt tezdig ɣar Taddart n SIDI.
ISA 66:21 Uřa zzaysen ad farzeɣ [ca maḥend ad iřin] d ikehhanen d Ilawiyyen, iqqar SIDI.
ISA 66:22 Maɣar am yijenwan n jdid d temmurt n jdid nni i ɣa ggeɣ ad bedden zzat i wudem inu, iqqar SIDI, ammu i ɣa [teqqim] tbedd uřa d zzariɛet nwem d isem nwem [zzat i wudem inu].
ISA 66:23 Ad imsar zi qaɛ abeddi n uyur ař qaɛ abeddi nneɣni u zeg wass n ssebt ař ass n ssebt nneɣni ad dd-asen marra iwdan maḥend ad bendqen zzat i wudem inu, [ammu i] iqqar SIDI.
ISA 66:24 Nitni ad ffɣen, ad ẓařen řxecbat n yeryazen nni xafi iɛeddan, maɣar akecca nsen ɛemmarṣ war ittmetti uřa d timessi nsen ɛemmarṣ war tᵉttxessi. Ad iřin d nnɛi i marra iwdan d řmař.”
JER 1:1 Awařen n Irmiya, mmis n Ḥilqiya, zeg ikehhanen nni [iǧan] di Ɛanatut, di temmurt n Binyamin,
JER 1:2 wenni ɣar dd-yusa wawař n SIDI deg wussan n ujeǧid Yuciya, mmis n Amun, ajeǧid n Yahuda, deg useggʷas wiss třeṭṭac n řeḥkamet nnes.
JER 1:3 Yusa-dd [wawař n SIDI] ɣares uřa deg wussan n Yahuyaqim, mmis n Yuciya, ajeǧid n Yahuda, ař mani ikemmeř useggʷas wiss ḥiṭac n Ṣidqiya, mmis n Yuciya, ajeǧid n Yahuda, ařami dd-iwyen Urcalim ɣar lmenfa deg uyur wiss xemsa.
JER 1:4 Yusa-dd ɣari wawař n SIDI, inna:
JER 1:5 “Qbeř ma ggiɣ cek d aseymi deg uɛeddis [n yemmac], tuɣa ssneɣ cek, u qbeř ma dd-teffɣed zi řemřawet, aqa ssqeddseɣ cek. Necc areccḥeɣ cek d anabi i řegnus.”
JER 1:6 [Xenni] nniɣ: “Ah, Sidi inu, SIDI! Xzar, necc war zemmareɣ ad ssiwřeɣ, necc [ɛad] d aḥudri.”
JER 1:7 [Maca] SIDI yarra-dd xafi: “War qqar: ‘Necc [ɛad] d aḥudri!’, maɣar mani ma cek i ɣa ssekkeɣ ad din traḥed, u marra min d ac ɣa umureɣ, ad [t] tinid.
JER 1:8 War zzaysen tteggʷed, maɣar Necc akidek, ḥima ad cek fekkeɣ!”, [ammu i] iqqar SIDI.
JER 1:9 Isswiẓẓeḍ SIDI afus nnes, iḥada aqemmum inu uca inna ayi SIDI: “Xzar, Necc ggiɣ ac awařen inu deg uqemmum nnec.
JER 1:10 Xzar, deg wass-a ad cek areccḥeɣ x řegnus u x tgeldawin, ḥima ad tqeřɛed u ad thedmed, ḥima ad tareddǧed u ḥima ad tɣeḍřed, ḥima ad tebnid u ad teẓẓud.”
JER 1:11 Yusa-dd ɣari wawař n SIDI, inna: “Min tᵉttwařid, Irmiya?” Necc arriɣ-dd: “Necc ttwařiɣ ict n tseṭṭa n ǧewz.”
JER 1:12 Inna ayi SIDI: “Cek teẓrid nican, maɣar Necc ttɛesseɣ x wawař inu ḥima ad t ggeɣ.”
JER 1:13 Yusa-dd ɣari wawař n SIDI i twařa wiss tnayen, inna: “Min tᵉttwařid?” Necc arriɣ-dd: “Ttwařiɣ taydart ittnennan, abuḍ nnes imeyyeř [ɣar da] zi ccamal.”
JER 1:14 [Xenni] inna ayi SIDI: “Zi ccamal i dd ɣa ihwa řɣar[-a] x marra imezdaɣ n temmurt.
JER 1:15 Maɣar, xzar, Necc ad řaɣiɣ x marra řaǧat n tgeldiwin n camal, [ammu i] iqqar SIDI, uca nitni ad dd-asen uca ad ssbedden řekrasi nsen ɣar wadaf n tewwura n Urcalim u ḍidd i marra řeḥyuḍ nnes i d as dd-innḍen u ḍidd i marra tineddam n Yahuda.
JER 1:16 Necc ad xasen neṭqeɣ marra řeḥkamat inu, x marra tuɛeffna nsen: aqa semḥen dayi uca bexxaren i irebbiten nneɣni uca sejden i min ggin ifassen nsen.
JER 1:17 Cek [xenni], ḥezzem tijɛinnatin nnec uca kkar, barreḥ asen marra min d ac ɣa umureɣ. War ttnexřiɛ zzaysen niɣ ad cek ssnexřɛeɣ zzat i tiṭṭawin nsen.
JER 1:18 Xzar, Necc ad cek ggeɣ d tandint ifaryen, d ijj n upilar n wuzzař d řeḥyuḍ n nnḥas ḍidd i marra tammurt: ḍidd i ijeǧiden n Yahuda, ḍidd i řḥukkam nnes, ḍidd i ikehhanen nnes u ḍidd i řgens n temmurt.
JER 1:19 Nitni ad kidek mmenɣen, [maca] war cek arennyen, maɣar Necc akidek, ḥima ad cek fekkeɣ, [ammu i] iqqar SIDI.”
JER 2:1 Yusa-dd ɣari wawař n SIDI, inna:
JER 2:2 “Uyur, barreḥ deg umezzuɣ n Urcalim, ini: ‘Ammu i iqqar SIDI: Necc ttxarraṣeɣ dayem, di tmexsiwt icewwaren n temẓi nnem, x tayri n wussan n tnexḍabt nnem, umi dd ayi dd-teḍfared di řexřa, di temmurt tamessucit.
JER 2:3 Israil tuɣa d amqeddes i SIDI, tamezwarut n ṣṣabet nnes. Marra wi zzayes iccen, iddakkwař dayes řɛib, iwḍa-dd xasen řɣar, [ammu i] iqqar SIDI.’”
JER 2:4 “Sřem i wawař n SIDI, kenniw zi taddart n Yaɛqub, d marra řaǧat n taddart n Israil.
JER 2:5 Ammu i iqqar SIDI: ‘Man řɣecc nni dayi ufin řejdud nwem ařami xafi ḥeyyḍen uca ḍfaren [l’aṣnam] ibeṭṭřen uca dewřen [simant nsen] di řbaṭeř,
JER 2:6 war sseqsin: Mani iǧa SIDI, wenni d aneɣ dd-issuffɣen zi Miṣra, wenni d aneɣ issecnen abrid di řexřa, x ict n temmurt n řexřa d ixendraq, x ict n temmurt n řaẓaɣ d tiři n řmewt, x ict n temmurt war xas iɛdu uřa d ijj u war dayes izdiɣ uřa d ijj n bnadem?
JER 2:7 Necc iwyeɣ kenniw ɣar ict n temmurt isseɣmayen ḥima ad zzayes teccem řɣiǧet d řxar. [Maca] umi [din] tiwḍem, tessxemjem tammurt inu u tarrim tasɣart inu d jjɛifect.
JER 2:8 Ikehhanen war sseqsin: Mani iǧa SIDI?, uca inni tuɣa iḥeṭṭan Ccariɛa war d ayi ssinen u imeksawen ɛeddun-dd xafi u inabiyyen ttnabben s Baɛal uca ḍfaren min war ineffɛen.
JER 2:9 S uya Necc ad arniɣ ad mcubbceɣ akidwem, uřa ak-d iḥenjiren n iḥenjiren nwem ad mcubbceɣ, [ammu i] iqqar SIDI.’”
JER 2:10 “Ẓwam ɣar tegzirin n ayt n Kittim, aqa sekkem [ireqqasen] ɣar Qidar, beytem uca xzarem mliḥ, ma imsar ɛemmarṣ am man aya!
JER 2:11 Ma ɛemmarṣ ibeddeř ca n řgens irebbiten nnes, [waxxa] war ǧin d irebbiten? Řgens inu maca iwca řɛezz nnes deg wemcan n min war ineffɛen.
JER 2:12 Iřim d ignawen x man aya, [kenniw a] ijenwan, ggʷedem, nxeřɛem ař ṭṭarf, [ammu i] iqqar SIDI.
JER 2:13 Maɣar řgens inu igga tnayen n řeɛyub: Necc, Řɛunṣar n waman iddaren, aqa semḥen dayes maḥend ad ɣzan anuten i yixef nsen, anuten s tazzect i ixwan zeg waman.
JER 2:14 Ma Israil d ismeɣ niɣ d ijj ittwaru [d ismeɣ] di taddart? Mayemmi idweř i zzardet [xenni]?
JER 2:15 Ssbuɛruten xas wayraden imeẓyanen, ggin ad sřen i tmijja nsen. Nitni arrin tammurt nnes d [ict n řqecɛet n] unexřiɛ tineddam nnes ttwasscemḍent ařami war iqqim izeddeɣ daysent uřa d ijj.
JER 2:16 Ɛad ḥeffen ayt n Nuf d Taḥfanis aceqquf n uzeǧif nnec.
JER 2:17 Ma war teggid ca manawya i yixef nnem, [minzi] cem tsemḥed di SIDI, AREBBI nnem am Netta indeḥ i cem deg webrid?”
JER 2:18 “Řexxu, min din jar am d jar webrid n Miṣra maḥend ad teswed [din] aman zi Cixur, [zeg iɣzar d abarcan]? Min jar am d jar webrid n Accur ařami [din] i ɣa teswed aman n iɣzar [n Lfuraṭ]?
JER 2:19 Tuɛeffna nnem ad cek tarebba u ibriden n uweddar nnem ad cem ɛaqben. Ssen u xzar, mammec war iḥři u mecḥař yarzeg aqa tsemḥed di SIDI, AREBBI nnem, u war zzayi tᵉtteggʷeded, [ammu i] iqqar Sidi inu, SIDI n řɛeskarat.”
JER 2:20 “Aṭṭas zeg wami tarẓid [a]zayřu nnem, tcarrged iceddiyyen nnem. Cem tennid: ‘War xseɣ ad ac sexxareɣ!’ Minzi x kuř řgeɛɛdet yuɛřan u sadu kuř tacejjart tazizawt tuḍared am temɣart n farq-ccɣeř.
JER 2:21 Necc maca tuɣa ẓẓuɣ cem d tazayart taḥurrit, d zzariɛet icnan aṭṭas. Mammec tdewřed ɣar tseḍwin n tzayart n řexřa tabarranect?
JER 2:22 Waxxa tessirded ixef nnem s llixiyya uca tarnid asray s ṣṣabun, [ɛad] ad teqqim řmuɛṣiyyet nnem zzat i wudem inu, [ammu i] iqqar Sidi inu, SIDI.”
JER 2:23 “Mammec tzemmared ad tinid: ‘Necc war ttwassxemjeɣ ca, necc war ḍfareɣ ca ‘Ibaɛlen!’ Xzar ɣar webrid nnem di teɣzurt, ɛqeř min teggid, cem d tařɣemt tefsus tᵉttazzeř, tenni ittemxarwaḍen deg ibriden nnes!
JER 2:24 Aqa-tt d taɣyuč n řexra, innumen di řexřa, tenni ittcemman arriḥ deg wenẓar nnes umi tḥaj. Wi tt i ɣa issbedden di nnecwet nnes? Qaɛ wi tt yarezzun war iḥdij ad issiḥeř ixef nnes, ad tt yaf deg uyur [n nnecwet] nnes.
JER 2:25 Ḥḍa war ittiři uḍar nnem břa tisiřa uřa tmijja nnem war tᵉttiẓeɣ s ufadi! Cem maca teqqared: ‘War xas nessiwiř, ɛemmarṣ! Maɣar necc ɛecqeɣ di midden, xseɣ ad uyureɣ awarni asen!’”
JER 2:26 “Am uxewwan inneḥṣeř iseḍḥa, ammu i ɣa seḍḥan inni n taddart n Israil, nitni d ijeǧiden nsen d řḥukkam nsen d ikehhanen nsen d inabiyyen nsen.
JER 2:27 Nitni qqaren i ukeccuḍ: ‘Cek d baba!’, u i weẓru: Cek tejjid ayi-dd!, maɣar nitni wcin ayi s weɛrur, war iǧi s uɣembub, [maca] di řeḥṣaret nsen qqaren: ‘Kkar, senjem aneɣ!’
JER 2:28 Mani ǧan řexxu irebbiten nnec, inni teggid i yixef nnec? Ejj i-ten ad dd-kkaren, mařa zemmaren ad cek fekken ɣar řweqt n řeḥṣaret nnec, maɣar irebbiten nwem am lɛadad n tneddam nnec, [a] Yahuda!”
JER 2:29 “Mayemmi akidi temcubbucem kenniw? Kenniw marra tᵉttɛeddam xafi, [ammu i] iqqar SIDI.
JER 2:30 X baṭeř i wtiɣ iḥenjiren nwem, war jjin ixef nsen ad areyyḍen. Ssif nwem icca inabiyyen nwem am wayrad iɣarrṣen.
JER 2:31 [A] kenniw, [a] jjiř [n yiḍa], ḥḍam awař n SIDI. Ma tuɣa ayi d řexřa i Israil, niɣ d tammurt n taǧest d tabarcant? Mayemmi [xenni] iqqar řgens inu: ‘Aqa neccin nennufṣeř zzayek, war i dd ɣarek neddikkwiř ɛad’?
JER 2:32 Ma ad tᵉttu teɛzarect talwizt nnes niɣ [ad tᵉttu] tesřit taḥezzamt nnes [izewwqen]? Waxxa amenni i d ayi ittu řgens inu aṭṭas n wussan břa řeḥsab.
JER 2:33 Mecḥař tessned mliḥ ad tarzud abrid n tayri? S uya i tessřemded di ibriden nnem timesřayin tiɛeffanin i yixef nnem.
JER 2:34 Uřa deg ubeḥrur n warruḍ nnem ufin idammen n řeɛmurat iḍeɛfen izdigen, inni war temniɛed umi ucaren [tudrin], [wah,] zi ssibbet n marra man aya [aqa imsar].
JER 2:35 Uca [ɛad] teqqared: ‘S tidett, necc d tamezdagt, aqa aɣḍab nnes iḥeyyed xafi!’ Xzar, Necc ad kim carrɛeɣ, minzi teqqared: ‘Necc war ggiɣ ddnub!’
JER 2:36 Mayemmi tᵉtteggʷjed aṭṭas uca tbeddřed [řebda] abrid nnem? Uřa [tammurt n] Miṣra ad cem tecmet, am mammec i d am tecmet Accur.
JER 2:37 Uřa ssenni ad teggʷejed s ifassen nnem x uzeǧif, maɣar SIDI inḍar marra inni x tᵉttecřed, ařami war ittiři aya uřa akidsen.”
JER 3:1 “Qqaren: ‘Xzar, ijj n weryaz iǧef i temɣart nnes u nettat tuyur xas, tedweř d tamɣart n ijj nneɣni, ma iɛeddeř ad ɣares dd-iɛqeb [xenni]? Ma war tefsed temmurt nni aṭṭas?’ Cem maca tegged ffarq-cɣeř nnem ak-d ijj n ubarru n imeddukkař, ma [xenni] tzemmared ad ɣari dd-tɛeqbed, [ammu i] iqqar SIDI.
JER 3:2 Sgeɛɛed tamuɣři nnem di řegɛudi [i xef wehhben tiɣarṣa], xzar, mani war cem xarḍen? Aqa tuyured ad teqqimed deg ibriden marra am yijj n Weɛrab di řexřa. [Ammu] i tessfesded tammurt s farq-ccɣeř nnem d řɣar nnem.
JER 3:3 S uya ittwamneɛ wenẓar uca war dd-iwti wenẓar ajuri. [Maca] cem tuɣa ɣarem tanyart teqjar n temɣart n farq-ccɣeř, war texsed ad tseḍḥid.
JER 3:4 Ma war tebdid mɣir i cwayt n řweqt waha ad ayi tᵉttřaɣad ‘Baba! Cek d Ameddukkeř inu zi temẓi inu!
JER 3:5 Ma [xenni] ad iqqim weɣḍab nnes ittbedda i řebda? Ma Netta ad t iḥḍa i řebda?’ Xzar, [ammu i] teqqared, [am] tᵉttegged mařa timesřayin nni tiɛeffanin u [tᵉttxarrṣed] aqa aya iɛeddeř [ad ittwagg.]”
JER 3:6 SIDI inna ayi deg wussan n Yuciya: “Ma teẓrid min tegga [temɣart] Israil ikfaren? Nettat tgeɛɛed kuř adrar yuɛřan, tezzeř sadu kuř tacejjart tazizawt uca tegga din am temɣart n farq-ccɣeř!
JER 3:7 Awarni řami tegga aya, nniɣ: ‘Ad dd-tedweř ɣari!’, maca nettat war dd-tedwiř ca. [Xenni] teẓri aya učmas iɣeddaren Yahuda.
JER 3:8 Ẓriɣ, umi d as ǧfeɣ zi ssibbet n marra min zi tezna [temɣart] Israil ikfaren u wciɣ as tabrat n waǧaf, aqa aya war issnexřiɛ učmas taɣeddart Yahuda, [maca] nettat tuyur, tessefsed ixef nnes uřa d nettat s farq-ccɣeř nnes.
JER 3:9 S farq-ccɣeř nnes ihewnen, tᵉttwassefsed temmurt, [maɣar] nettat tezna s weẓru d ukeccuḍ.
JER 3:10 Di marra aya war dd ɣari teɛqib učmas Yahuda taɣeddart s marra uř nnes, [maca] tessniɛmiř waha, [ammu i] iqqar SIDI.”
JER 3:11 [S uya] inna ayi SIDI: “[Tawečmat] Israil ikfaren, aqa tarra ixef nnes tban-dd tsegged ktar x [učmas] Yahuda taɣeddart.
JER 3:12 Uyur, řaɣa awařen-a ɣar ccamal, ini: ‘Dweř-dd, a cem temɣart Israil ikfaren!’, [ammu i] iqqar SIDI. Aɣembub inu war ittbarcin, maɣar Necc ccureɣ s tmexsiwt icewwaren, [ammu i] iqqar SIDI. Necc war ttiřiɣ ttfugmeɣ řebda.
JER 3:13 Maca nɛem s řmuɛṣiyyet nnem, aqa tɛeddid x SIDI, AREBBI nnem, uca teffɣed zeg webrid ɣar marra iɣezdisen ɣar ibarraniyyen, sadu kuř tacejjart tazizawt, [maca] kenniw war tesřim ca ɣar tmijja inu, [ammu i] iqqar SIDI.”
JER 3:14 “Dewřem-dd, a tarrawt ikfaren!, [ammu i] iqqar SIDI, maɣar Necc d aryaz nwem, Necc ad kenniw qebřeɣ [ɛawed], ijj zeg ict n tendint u tnayen zeg ijj n řaǧ, u Necc ad kenniw awyeɣ ɣar Ṣihyun.
JER 3:15 Necc ad awem wceɣ imeksawen i ixs wuř inu, inni kenniw i ɣa yarewsen s tussna d řeɛqeř.
JER 3:16 Xmi ɣa temmarenyem deg wussan nni, ad dd-tawyem řɣiǧet di temmurt, iqqar SIDI, ad tafed war qqaren [ɛad] ‘Ttabut n Řɛahd n SIDI!’ War dd asen tᵉttaři ɣar řbař, war tt ttidaren, war tt feqqden [ɛad] uca war tt ttsennaɛen.”
JER 3:17 “Di řweqt nni ad inin i Urcalim ‘Řkursi n SIDI!’, uca marra řegnus ad ɣares dd-nnyarwen di ṭṭweɛ n Yisem n SIDI, ɣar Urcalim, uca war ttɣimin gguren ca ɛlaḥsab řeqsaḥet n wuř nsen aɛeffan.
JER 3:18 Deg wussan nni ad tuyur taddart n Yahuda ɣar taddart n Israil uca nitenti ad ffɣent munent zi temmurt n ccamal ɣar temmurt nni wciɣ d tasɣart i řejdud nwem.”
JER 3:19 “Necc tuɣa nniɣ: ‘Mammec zemmareɣ ad kenniw arreɣ d iḥenjiren inu uca ad awem wceɣ tammurt iɛizzen, tasɣart [nni iǧan d] talwizt n řɛeskarat n řegnus?’ Necc nniɣ: ‘Kenniw ad ɣari řaɣan: Baba! uca war xafi tᵉttḥeyyidem [ɛad]!’
JER 3:20 S tidett, am temɣart teɣdar ameddukkeř nnes, ammu uřa d kenniw tiɣdarem ayi, [a] taddart n Israil, [ammu i] iqqar SIDI.”
JER 3:21 Ittwaseř ijj n řḥess x tewririn iqeccaren, anixses d tutra n ayt n Israil, minzi nitni uyuren ibriden farɣen uca SIDI, AREBBI nsen, ttun t.
JER 3:22 “Dewřem-dd, a tarrawt ikfaren!, Necc xseɣ ad ssgenfiɣ akfar nwem.” “Xzar, aqa aneɣ da, neccin nusa-dd ɣarek, maɣar Cek d SIDI, AREBBI nneɣ!
JER 3:23 Nican x walu [i ittraja bnadem] zi řegɛudi n [tewhibin] d ǧɣareɣ x idurar. Nican, di SIDI, AREBBI nneɣ, aqa iǧa usenjem n Israil.
JER 3:24 Řefḍiḥet tecca řxedmet n řejdud nneɣ zi temẓi nneɣ: uǧi nsen d ifunasen d tfunasin nsen, iḥenjiren nsen d tḥenjirin nsen.
JER 3:25 Neccin nezzeř di řefḍiḥet nneɣ uca řeḥya nneɣ tedřa aneɣ, maɣar neccin nexḍa ak-d SIDI, AREBBI nneɣ, neccin d řejdud nneɣ, zi temẓi nneɣ ař iḍa. Neccin war nesři ca ɣar tmijja n SIDI, AREBBI nneɣ.”
JER 4:1 “Mařa texsed ad dd-tɛeqbed, [a] Israil, [ammu i] iqqar SIDI, ɛqeb-dd ɣari, u mařa tekksed marra nnɛawat n l’aṣnam x wudem inu, war ttɣimi ca teddurid waha.
JER 4:2 Jaǧ s tidett, s řḥeqq u s tsegda, [ini]: ‘[S tidett] am iddar SIDI!’, [xenni] ad zzayes ttwabarken řegnus uca ad dayes ssɛuǧen ixef nsen.
JER 4:3 Maɣar ammu i iqqar SIDI i yeryazen n Yahuda u i Urcalim: ‘Carzem iyyar ixwan i yixef nwem, [maca] war zarrɛem deg isennanen.
JER 4:4 Xetnem ixef nwem i SIDI u ssiggʷejem řeɛdařeyyat n wuřawen nwem, kenniw iryazen n Yahuda d kenniw imezdaɣ n Urcalim, ḥima asɛar inu war ittareẓẓi am tmessi, ad icmeḍ břa ma izemmar uřa d ijj ad issexsi, zi ssibbet n tmegga nwem tiɛeffanin.’”
JER 4:5 “Barrḥem [tt] di Yahuda u jjem ad [as] sřen di Urcalim, inim: ‘Suḍem deg uyicc n icarri di temmurt!’, sɣuyyem s tmijja ijehden, inim: ‘Smunem, asem-dd ɣar tneddam ifaryen!’
JER 4:6 Sgeɛɛdem taɛeǧant i Ṣihyun, war ttɣimim tbeddem, maɣar Necc ad ssiwḍeɣ řɣar zi ccamal, lmuṣiba tameqqrant.
JER 4:7 Ayrad igeɛɛed-dd zi cbarq [n řmargeḥ] nnes, amteḥḥay n řegnus iruḥ deg webrid, iffeɣ-dd zeg wemcan nnes maḥend ad yarr tammurt nnem d [ict n řqecɛet n] unexřiɛ. Tineddam nnem ad ttwareddǧent ařami war [daysent] ittɣimi uřa d ijj n umezduɣ.
JER 4:8 S uyenni, arḍem tixuncay [n wecḍan], ceḍnem u weɛɛḍem, maɣar war xaneɣ iḥeyyed řḥaduq n weɣḍab n SIDI.”
JER 4:9 [Ammu i] iqqar SIDI: “Deg wass nni ad imsar, aqa uř n ujeǧid d uřawen n řḥukkam ad asen traḥ taryast, ikehhanen ad nnxeřɛen uca inabiyyen ad tbehten.”
JER 4:10 [Xenni] nniɣ: “Ax, Sidi inu, SIDI, s tidett, aqa Cek tcemted řgens-a d Urcalim umi tennid: ‘Ad ɣarwem yiři řehna!’ Xzar, ssif yudef-dd ɛad ɣar řeɛmar [nneɣ]!”
JER 4:11 “Deg wass nni ad inin i řgens-a u i Urcalim: ‘Asemmiḍ issecmaḍ zi tewririn tiqeccarin di řexřa aqa-t deg webrid ɣar yeǧis n řgens inu, war ittiři i uzuzzar niɣ i uṣeffi.
JER 4:12 Ad iffeɣ zi ɣari ijj n usemmiḍ ijhed x wanita. Řexxu Necc [simant inu] ad ten ḥekmeɣ.
JER 4:13 Xzar, igeɛɛed am yiseynuten uca ikarruten nnes ggin am tḥaryaḍt, iysan nnes ttizwaren i igidaren. Uct nneɣ, neccin nettwareddeǧ!’”
JER 4:14 “Sird uř nnem zi tuɛeffna, [a] Urcalim, maḥend ad tᵉttwassnejmed! Mecḥař ɛad i ɣa kken zeddɣen ixarriṣen iɛeffanen deg wuř nnem?
JER 4:15 Minzi tmijja tᵉttbarreḥ zi Dan uca tᵉttwaseř tecti tameqqrant [i-dd-ittqarraben] zeg idurar n Ifrayim.
JER 4:16 Barḥem [zzayes] di Yahuda u jjem ad as sřen di Urcalim, inim: ‘Inni i ɣa iḥṣaren aqa usin-dd zi temmurt tiggʷej, nitni ssgeɛɛaden tmijja nsen ḍidd i tneddam n Yahuda.’
JER 4:17 Nnḍen as-dd am yiɛessasen deg iyyaren, maɣar nettat tɣewweɣ xafi, [ammu i] iqqar SIDI.
JER 4:18 Tabridt nnem d tmegga nnem iwyen am-dd aya. Aqa-t d actab abarcan nnem, yarzeg, iřeqqef [i cem deg] wuř nnem.”
JER 4:19 “[Ɛawen ayi,] aɛeddis inu, aɛeddis inu, necc ttfarfireɣ s řewjeɛ, [a] iɣezdisen n wuř inu, uř inu ineggez, necc war zemmareɣ ad seɣdeɣ, maɣar asuḍi n uyicc n icarri yudef ɣar řeɛmar inu, [uct,] iɣuyyan [n umenɣi].
JER 4:20 ‘Ticti x tecti!’, [ammu i] sɣuyyun, minzi marra tammurt txarreb. Deɣya ttwahedmen iqiḍan inu, deg wermac n wabřiwen tjartiřin n uqiḍun inu!
JER 4:21 Ař meřmi [ɛad] ad twařiɣ taɛeǧant [n umenɣi] uca ad sřeɣ i usuḍi deg uyicc n icarri?
JER 4:22 Řgens inu d abuhaři, nitni war d ayi ssinen. Nitni d iḥenjiren břa řeɛqeř u war ɣarsen teǧi řefhamet. Nitni d imiɣisen maḥend ad ggen řɣar, [maca] war ssinen ad ggen min iṣebḥen.”
JER 4:23 “Necc ẓriɣ tammurt, xzar, tuɣa-tt d řexřa d řxawi u war [ufiɣ] tafawt deg ujenna.
JER 4:24 Necc ẓriɣ idurar, xzar, ttarjijin uca marra tiwririn ttenhezzant [ttraḥent d ttasent i-dd].
JER 4:25 Necc twařiɣ, xzar, war din [uřa d ijj n] bnadem, u marra ijḍaḍ n ujenna tuɣa ḍwin.
JER 4:26 Necc ẓriɣ, xzar, tammurt isseɣmayen tuɣa d řexřa u marra tineddam nnes ttwahedment di ssibbet n řḥaduq n weɣḍab n SIDI.”
JER 4:27 “Maɣar ammu i iqqar SIDI: ‘Marra tammurt-a ad tedweř d tammurt d řexřa, [maca] Necc war [tt] qeṭṭɛeɣ marra.
JER 4:28 S uya i ɣa tecḍen temmurt, ad bbarcnen ijenwan sennej, maɣar aqa Necc nniɣ t, Necc ggiɣ xas. Necc war ndimeɣ ca u Necc war ddikkwiřeɣ deg wawař.
JER 4:29 Zi ddriz n imnayen [n yeysan] d imjebbaden n řqews tarweř tendint marra. Nitni arezzun ad dd-adfen deg izeɣran uca ad geɛɛden x řejruf, tandint marra tᵉttwajj, war dayes iqqim uřa d ijj n umezduɣ.’”
JER 4:30 “Min ɣa tegged [xenni], [a cem] tandint tᵉttwareddeǧ? Waxxa ad tyarḍed [arruḍ d] azeggʷaɣ niɣ ad teqqned řehzuṭ n wureɣ niɣ ad tkeḥḥřed tessemɣarid tiṭṭawin nnem, aqa baṭeř ad tzewwqed ixef nnem. Imeɛcaqen ad cem ssḥeqqaren, ad arzun ad cem nɣen.
JER 4:31 Maɣar necc ttesřiɣ tmijja, axmi zi temɣart ittarwen, axmi zeg icten tḥeṣṣar di tarwa tamezwarut, tmijja n yeǧis n Ṣihyun, třeqqeḍ-dd nnefs, tesswaẓẓaḍ s ifassen nnes, [tesɣuyyu]: ‘Uct inu, maɣar řeɛmar inu ifna s yinni ixsen ad ayi nɣen!’”
JER 5:1 “Uyurem di dcurat n Urcalim, uca xzarem mliḥ. Iřim tfetnem u arzum deg wazzayen nnes, ma ad tafem ijjen, ma din ijj ittegg tasegda, ijjen wenni yarezzun tidett, [xenni] Necc ad as ɣfareɣ [i Urcalim].
JER 5:2 Nitni qqaren: ‘S tidett am iddar SIDI!’, [maca] waxxa amenni ttjaǧan ẓur.”
JER 5:3 “[A] SIDI, ma war [ḥeṭṭant] tiṭṭawin nnec x tidett? Cek tewtid ten, maca war ucin ak-d řeḥriq, Cek teqḍid ten, [maca] war xsen ad ttwarebban. Nitni ggin tanyart nsen iqesḥen x weẓru, nitni ugin ad dd-dewřen.
JER 5:4 Necc nniɣ: ‘Ah, nitni d řmusakin, tteggen tubbuheřya, minzi nitni war ssinen abrid n SIDI, tasegda n AREBBI nsen.
JER 5:5 Necc ad uyureɣ ɣar imeqqranen uca ad kidsen ssiwřeɣ, minzi nitni war ssinen ca abrid n SIDI, tasegda n AREBBI nsen.’ Nitni jmiɛ [maca] arẓin zzayřet, qeṭṭsen iseɣwan.
JER 5:6 X uya iwwet i-ten wayrad n tagant, imezzeq i-ten wuccen zi řewḍat, ittḥama uɣiřas tineddam nsen. Kuř ijj wenni dd ɣa iffɣen [zi tendint], ad t carrgen, maɣar iɛeddiyen nsen d aṭṭas u aḥeyyed nsen imɣar aṭṭas.”
JER 5:7 “Mammec [zemmareɣ] ad awem ɣfareɣ man aya? Iḥenjiren nnec semḥen dayi, ttjaǧan ɣar min war iǧi d AREBBI. [Řami] ten ssjiwneɣ, zennan nitni, ssmunen s ddḥas ɣar wexxam n temɣart n farq-ccɣeř.
JER 5:8 Nitni d ikidaren iɛeřfen itteliɛen. Kuř ijj issneḥniḥ ɣar temɣart n wenneɣni.
JER 5:9 Ma war ttɛiqibeɣ x man aya, [ammu i] iqqar SIDI, niɣ war ittentiqim řeɛmar inu zi řgens am wanita?”
JER 5:10 “Geɛɛdem x řeḥyuḍ nnes uca hedmem ten, [maca] war ten messḥem qaɛ zi temmurt. Qeřɛem izbiren nsen, maɣar nitni war [ǧin] ca n SIDI.
JER 5:11 Taddart n Israil d taddart n Yahuda [maca] ɣdaren ayi s waṭṭas, [ammu i] iqqar SIDI.
JER 5:12 Nitni nekkaren SIDI, qqaren: ‘Netta war [din] iǧi, war d aneɣ iřeqqef řɣar, war nettwiři ssif uřa d řaẓ.
JER 5:13 Inabiyyen ad dewřen am usemmiḍ uca war din iǧi wenni zzaysen issawařen. Ammu i d asen ɣa imsar.’”
JER 5:14 “S uya iqqar SIDI, AREBBI n řɛeskarat: ‘Minzi kenniw teqqarem awař-a, xzar, Necc ad ggeɣ awařen inu deg uqemmum nnec d timessi, řgens-a [ad t ggeɣ] d akeccuḍ, uca ad ten tecc [tmessi].
JER 5:15 Xzar, [a] taddart n Israil, Necc ad xawem ssiwḍeɣ ijj n řgens zi řaggʷaj, [ammu i] iqqar SIDI. Aqa-t d řgens iwɛar, řgens zeg wecḥař uya, řgens i zi war tessined cek awař nnes, u war tfehhmed min qqaren nitni.
JER 5:16 Azeɛbuř nnes [n fřitcat] [igga] am yijj n wenḍeř yarezmen, nitni marra d ayt n bu-teɣruḍt.
JER 5:17 Ad icc [řgens nni] ṣṣabet nnem d weɣrum nnem, ad icc iḥenjiren nnem d yessim, ad icc uǧi nnem d ifunasen d tfunasin nnem, ad icc tazayart nnem d wartu nnem, [uca] s ssif ad iwwet tineddam nnem ifaryen min xef tᵉttecřed.’”
JER 5:18 “[Maca] uřa deg wussan nni, [ammu i] iqqar SIDI, Necc war kenniw qeṭṭiɣ marra.
JER 5:19 Mařa xenni kenniw teqqarem: ‘Mayemmi d aneɣ igga SIDI, AREBBI nneɣ, marra aya?’, [xenni] ad asen tinid: ‘Am mammec kenniw dayi tsemḥem, tᵉttsexxarem i irebbiten [iɣriben] di temmurt nwem, ammu i ɣa tsexxarem i ibarraniyyen di temmurt war teǧi nwem.’”
JER 5:20 “Barrḥem aya i taddart n Yaɛqub, jjem ad [t] sřen di Yahuda, ini:
JER 5:21 ‘Sřem i waya, [a cek] řgens abuhaři, nehřa wuř! Ɣarwem tiṭṭawin, [maca] war ttwiřint, imezzuɣen, [maca] war ttesřin.
JER 5:22 Ma war d ayi tteggʷedem, [ammu i] iqqar SIDI. Ma war tᵉttexsem tᵉttarjijim zzat i wudem inu, [i Necc] wenni iggin i řebḥar ijdi d weymir, d ict n tewṣeyyet i řebda tenni war zemmaren ad ɛdun [řemwaj]. Aqa ttenhezzan řemwaj, [ɛad] war zemmaren, tthajan řemwaj, [ɛad] war tt ɛeddun.’
JER 5:23 [Maca] řgens-a ɣares uř iḥeyyden d iɣewwɣen. Nitni ḥeyyden [x webrid] uca ffɣen.
JER 5:24 Nitni war qqaren deg yixef nsen: ‘Ejj aneɣ ad neggʷed SIDI, AREBBI nneɣ nni itticen anẓar di řweqt nnes, anẓar n zic d wenẓar n řexmim, wenni iḥeṭṭan i neccin ssimanat ittwaggen n tmeyra.’
JER 5:25 Řmuɛṣiyyat nwem menɛent man aya u ddnub nwem ṭṭfen xawem min icnan.
JER 5:26 Maɣar ufin iɛeffanen di řgens inu. Nitni ttḥaman am yiyemmaren n yejḍaḍ. Ssbeddan ijj n řfex ineqqen, arezzun ad ṭṭfen iwdan.
JER 5:27 Am řeqfez iccur s ijḍaḍ, ammu tudrin nsen ccurent s řɣecc. X uya dewřen nitni d imeqqranen d ayt n bu-wagřa.
JER 5:28 Aqa nitni uffen s tadunt, aqa aten d iḥraymiyyen, [s tmegga nsen] ssɛeddun nitni timegga tiɛeffanin aṭṭas. War ḥekkmen s řḥeqq di ddeɛwet, uřa di ddeɛwet n uyujiř, waxxa amenni feřḥen nitni. Ɛawed war cciten x tesɣart n imezřaḍ.
JER 5:29 Ma war ttɛiqibeɣ x man aya, [ammu i] iqqar SIDI, ma war xeǧfeɣ Ixef inu zi řgens am wanita?”
JER 5:30 “Min ittenexřaɛen u min iǧan d nnɛi aqa imsar di temmurt.
JER 5:31 Inabiyyen ttnebban s ixarriqen uca ikehhanen ttṣeǧḍen sadu ufus nsen. Uca řgens inu ittexs i-t ammu. Min ɣa teggem xmi dd ɣa yaweḍ qeṭṭu?”
JER 6:1 “Siwḍem ixef nwem di řaman zi řwest n Urcalim, [a] ayt n Binyamin, uca suḍem deg uyicc n icarri di Taquɛa. Sgeɛɛdem acenyal [s ddexxan] zi Bayt-Ha-Karim, minzi issigʷad řɣar zi ccamal, lmuṣiba tameqqrant.
JER 6:2 Tamɣart icewwaren d ittwassubuḍen, yeǧis n Ṣihyun, ad tt sshellkeɣ.
JER 6:3 Imeksawen ad ɣares dd-asen ak-d tḥimriwin nsen, nitni ad as dd-qewwaren, ad wten iqiḍan [nsen] xas, kuř ijj ad yarwes di tesɣart nnes.
JER 6:4 [Ad inin] ‘Qeddsem amenɣi ḍidd nnes, kkarem, jjem aneɣ ad [ɣares] ngeɛɛed s uziř. Uct xaneɣ, maɣar ass ɛřayen iɛdu, minzi tiřiwin n tmeddit ttsarrḥent-i-dd.
JER 6:5 Kkarem, jjem aneɣ ad ngeɛɛed s ǧiřet, ad nehdem řeqṣur nnes!’
JER 6:6 Maɣar ammu i iqqar SIDI n řeskarat: Qessem ticejjura, sbeddem acbar i řeḥṣaret ḍidd i Urcalim. Ta d tandint i ɣa tᵉttwaɛaqeb, aqa ddeǧ di řwest nnes marra.
JER 6:7 Am wanu ittejja aman nnes ttbeqbuqen, ammu i tᵉttejja [Urcalim] ad ibeqbeq min war iḥřin. [Řḥess n] lɛunf d wareddeǧ ittwaseř dayem, řeḥřac d teyyita aqa-tent řebda zzat i tiṭṭawin inu.
JER 6:8 Ejj i cem ad tᵉttwawebbxed, [a] Urcalim, ḥima řeɛmar inu war xam tᵉttemsebḍi, ḥima war cem ttarriɣ d tammurt ittwareddǧen d tammurt ixřan zeg imezdaɣ.”
JER 6:9 “Ammu i iqqar SIDI n řɛeskarat: ‘Am tzayart ad řeqḍen min iqqimen n Israil s cḍaret. Arr afus nnec ɣar tseḍwin am wenni iřeqqḍen aḍiř.’
JER 6:10 Wi ɣar i ɣa ssiwřeɣ niɣ umi ɣa ɛeřmeɣ necc, [ḥima] ad sřen? Xzar, amezzuɣ nsen war ittwaxten, [ařami] war zemmaren ad sřen i walu. Aqa da, awař[en] n SIDI ttafen [ten] d aḥecci, war ten ḥdijen.”
JER 6:11 “S uyenni ccureɣ s wesɛar n SIDI, aqa uḥřeɣ ad t menɛeɣ. ‘Zeǧeɛ [asɛar nnec] [xenni] x iḥenjiren deg webrid uřa x umuni n iḥudriyyen, maɣar ɛad aryaz d temɣart ad ten ḥebbsen, ammu uřa d amɣar d uwessar.
JER 6:12 Tudrin nsen ad dewřent i inneɣni, jmiɛ ak-d iḥwicen, uřa d timɣarin, maɣar Necc ad swiẓẓḍeɣ s ufus inu ḍidd imezdaɣ n temmurt[-a], [ammu i] iqqar SIDI.
JER 6:13 Maɣar zeg umeẓyan ař ameqqran arezzun marra nitni tizi nsen, u zeg unabi ař akehhan marra tcemmet.
JER 6:14 Tareẓẓit n řgens inu xsen ad tt ssgenfan s řehwen, qqaren: ‘Řehna, řehna!’, maca war din iǧi řehna.
JER 6:15 Ma ad seḍḥan minzi tteggen jjɛifect? Nitni war ttseḍḥin ca, řeḥya war t ssinen. S uya nitni ad wḍan jar inni iweṭṭan. Ɣar řweqt nni ad zzaysen xeřfeɣ ad nnqarḍen!’, [ammu i] iqqar SIDI.”
JER 6:16 “Ammu i iqqar SIDI: ‘Beddem ɣar ibriden, uca ḥdam, seqsam x ibriden n wecḥař uya, mani iǧa webrid nican uca uyurem xas, [xenni] ad tafem arraḥet i řeɛmar nwem!’ Nitni [maca] qqaren: ‘Neccin war [xas] neggur!’
JER 6:17 Necc ggiɣ awem iɛessasen, nniɣ: ‘Sřem i usuḍi deg uyicc n icarri!’, [maca] nitni qqaren: ‘Neccin war [ɣares] nesḥessi ca!’
JER 6:18 S uya sřem, [a kenniw] řegnus, u [cem, a] tamesmunt!, ssen min ɣarsen i ɣa imsaren!
JER 6:19 Seř, [a] tammurt, xzar, Necc ad ssiwḍeɣ řɣar [d ameqqran] x řgens-a, řɣiǧet n inwayen nsen tiɛeffanin, maɣar nitni war xezzaren ca ɣar wawařen inu u nḍaren Ccariɛa inu.
JER 6:20 Mayemmi d ayi dd ɣa yawyen jjawi zi Caba d uɣanim uḥemmum ittfuḥen zi temmurt yiggʷejen? Tiɣarṣa n wecmaḍ nwem war d ayi dd-usint i řxaḍar u tiɣarṣa nwem war d ayi ɛjibent.
JER 6:21 S uya [ammu i] iqqar SIDI: ‘Xzar, Necc ad ggeɣ tiɛenkrifin i řgens-a uca nitni ad daysent nnqarḍen jmiɛ ak-d ibabaten d iḥenjiren, ak-d wajjar d umɛacar nnes, [ammu] i ɣa hellken.’”
JER 6:22 “Ammu i iqqar SIDI: ‘Xzar, ad dd-yas ijj n řgens zi ccamal, ijj n řgens ameqqran ad ittwařaɣa zeg ineggura n temmurt.
JER 6:23 Nitni ṭṭfen řqews d weḥric, [aqa-t d ijj n řgens] iwɛar, war arreḥmen. Ddriz nsen igga am zzhir n řebḥar uca nitni nyin x yeysan. Am weryaz n umenɣi ammu i issbedd netta ixef nnes ḍidd nnem, [a] yeǧis n Ṣihyun!”
JER 6:24 “Neccin nesřa xas řexbar, arxun aneɣ ifassen nneɣ, iřqef aneɣ unedqef, řeḥriq am n temɣart ittarwen.
JER 6:25 War tteffɣem ɣar barra ɣar yeyyar, war ggurem deg webrid, maɣar [aqa din] ssif n řeɛdu, tiggʷudi aqa-tt mani ma!
JER 6:26 [A] yeǧis n řgens inu, beyset ixef nnem s txancet [n wecḍan], zuzzar xam [iɣɣeḍ], ceḍnet am x uyenni n mmis nnem, sɣuyy s tɣuyyit tamerzagt, maɣar deɣya ad xaneɣ dd-yas umteḥḥay.”
JER 6:27 “Necc ggiɣ cek d ṣṣumɛet n tɛessast di řgens inu, d ict n lqelɛa, ḥima ad tessned abrid nsen, ad dayes tarzud.”
JER 6:28 “Nitni marra d inni iḥeyyden x webrid zi markat iwɛaren qaɛ, gguren ttennḍen di temmurt ttceqqafen, nitni am nnḥas d wuzzař, marra idsen d ayt n bu-imurḍas.
JER 6:29 Arrabuz icmeḍ, řexfif tecca t tmessi, [maca] di řbaṭeř issefsi ufessay ammu s wecḍar, iɛeffanen war zemmaren ad ttwafarzen.
JER 6:30 Qqaren as: ‘Nnuqart immenḍaren!’, maɣar inḍar i-ten SIDI.”
JER 7:1 Awař nni dd-iffɣen zi SIDI ɣar Irmiya, inna:
JER 7:2 “Bedd di tewwart n Taddart n SIDI uca řaɣa dinni awař-a, ini: ‘Sřem awař n SIDI, [a] Yahuda marra, kenniw inni ittadfen zi tewwura-ya ḥima ad tbendqem zzat i SIDI.
JER 7:3 Ammu i iqqar SIDI n řɛeskarat, AREBBI n Israil: Ɛedřem ibriden nnem d tmegga nwem, [xenni] Necc ad kenniw sszedɣeɣ deg wemcan-a.
JER 7:4 War ttcařem x wawařen n ixarriqen am teqqarem: Zzawect Tameqqrant n SIDI, Zzawect Tameqqrant n SIDI, Zzawect Tameqqrant n SIDI, aqa-tt d ta zeɛma!
JER 7:5 Maɣar [mɣir] mařa tɛedřem ibriden nwem d tmegga nwem nican, mařa s tidett tᵉtteggem s řḥeqq jar weryaz d umeddukkeř nnes,
JER 7:6 war ḥeṣṣarem abarrani, ayujiř d tajjač, u war ssizziřem idammen imezdagen deg wemcan-a u war ḍeffarem irebbiten nneɣni i uḍeyyeɛ nwem,
JER 7:7 [xenni] Necc ad kenniw sszedɣeɣ deg wemcan-a, di temmurt i wciɣ i řejdud nwem, zi řebda ař řebda.
JER 7:8 Xzar, kenniw tᵉttcařam x ixarriqen nni war ineffɛen di walu.
JER 7:9 Tᵉttacarem, tneqqem, tzennam, tᵉttjaǧam ẓur, tᵉttqeddamem tiwhibin n řebxur i Baɛl u tḍeffaram irebbiten nneɣni nni war tessinem,
JER 7:10 uca [xenni] ad dd-tasem tbeddem zzat i wudem inu di Taddart-a min xef ittwabarreḥ s Yisem inu, uca [xenni] tzeɛmem [ɛad] ad teqqarem: ‘Neccin nettwassenjem!’, uca [xenni] tᵉttɛawadem tᵉtteggem marra jjɛayef-a!
JER 7:11 Ma tedweř Taddart-a min xef ittwabarreḥ Isem inu d ifri n ixewwanen di tiṭṭawin nwem? Xzar, Necc ẓriɣ t mliḥ!’, [ammu i] iqqar SIDI.”
JER 7:12 “Waxxa, uyurem ɣar wemcan n Tzeddiɣt inu di Cilu mani tuɣa sszedɣeɣ Isem inu deg umezwaru. Xzarem min zzayes ggiɣ zi ssibbet n řɣar n řgens inu Israil.
JER 7:13 [Xenni] řexxu, minzi kenniw teggim marra timegga-ya, [ammu i] iqqar SIDI, u Necc ssiwřeɣ akidwem zeg umezwaru, [maca] kenniw war tesřim ca, u Necc řaɣiɣ-dd xawem, [maca] kenniw war dd-tarrim,
JER 7:14 [s uyenni] Necc ad ggeɣ ak-d Taddart-a min xef ittwabarreḥ Isem inu, min xef tᵉttcařam, u ak-d wemcan-a nni wciɣ i kenniw d řejdud nwem, am mammec ggiɣ ak-d Cilu.
JER 7:15 Necc ad kenniw nḍareɣ zi zzat n wudem inu, am mammec nḍareɣ marra aytmatwem, marra zzariɛet n Ifrayim.”
JER 7:16 “A cek, war ttẓaǧ i řgens-a u war sgeɛɛed [tmijja nnec] ḥima ad trud niɣ ad teẓẓaǧed u war ttɣimi tᵉttrud-dd ɣari, maɣar Necc war ɣarek dd-ttesřiɣ.
JER 7:17 Ma war tᵉttwiřid min tteggen nitni di tneddam n Yahuda u deg ibriden n Urcalim?
JER 7:18 Iḥenjiren ssmunam akeccuḍ, ibabaten [nsen] ssraqqan timessi, u timɣarin tteggwent arecti ḥima ad sswejdent tifḍiřin i tjeǧidt n ujenna u ḥima ad farrɣent tiwhibin n useyyeb zzat i irebbiten nneɣni maḥend ad ayi sɛaren.
JER 7:19 Ma sɛaren ayi, iqqar SIDI? Ma war t tteggen i yixef nsen i řefḍiḥet n simant nsen?
JER 7:20 S uya, [ammu i] iqqar Sidi inu, SIDI, xzar, ad ittwafarreɣ weɣḍab inu d wesɛar inu x wemcan-a: x iwdan, x imuddaren, x tcejjura deg iyyar u x řɣiǧet n wudem n temmurt. Ad yareqq [wah,] u war [izemmar] ad ittwassexsi.”
JER 7:21 “Ammu i iqqar SIDI n řɛeskarat, AREBBI n Israil: ‘Smunem tiɣarṣa n wecmaḍ nwem ak-d tɣarṣa nwem uca ccem aysum [nsent].
JER 7:22 Maɣar deg wass nni di ten ssuffɣeɣ zi temmurt n Miṣra, war ssiwřeɣ ak-d řejdud nwem maḥend ad asen weṣṣiɣ x tɣarṣa n wecmaḍ d tɣarṣi.
JER 7:23 Maca Necc umureɣ tamesřact-a umi nniɣ: ‘Sřem-dd ɣar tmijja inu, [xenni] Necc ad awem iřiɣ d AREBBI u kenniw ad ayi tiřim d řgens u ad tuyurem di abrid marra nni d awem i ɣa umureɣ maḥend ad tiřim mliḥ!’
JER 7:24 [Maca] nitni war sřin, war d ayi wcin umezzuɣ, nitni ḍfaren ixarriṣen d řeqsaḥet n wuř aɛeffan nsen, u nitni dewřen ɣar ḍeffar, war iǧi ɣar zzat.
JER 7:25 Zeg wass nni di ffɣen řejdud nwem zi Miṣra ař ass-a, ssekkeɣ-dd ɣarwem marra imsexxaren inu, inabiyyen, zeg wussan n wecḥař uya.
JER 7:26 Nitni war ɣari sřin u war d ayi wcin amezzuɣ. Nitni arnin di řeqsaḥet mahu řejdud nsen.
JER 7:27 Ad kidsen tessawařed marra awařen-a, [maca] nitni war d ak ttesřin ca. Cek ad asen třaɣid, [maca] war xak dd-ttarrin.
JER 7:28 S uya ini asen: ‘Wa d řgens i war ittesřin ɣar tmijja n SIDI, AREBBI nnes, u war ittejjin ixef nnes ad ittwawebbex. Aqa tidett tᵉttwareddeǧ u tᵉttwaqess zeg uqemmum nsen!’”
JER 7:29 “Ḥeff tajj nnec [n weɛzař] uca nḍar i-t, wwet s igejduren x řegɛudi [mani ttwehhbent ddbayeḥ], maɣar SIDI inḍar jjiř min xef idduqqez [ufugem nnes], uca ijja i-t.
JER 7:30 Maɣar iḥenjiren n Yahuda ggin min [iǧan] d aɛeffan di tiṭṭawin inu, [ammu i] iqqar SIDI. Nitni ssbedden nnɛawat nsen n l’aṣnam di Taddart min xef ittwařaɣa s Yisem inu maḥend ad tt ssxemmjen.
JER 7:31 Nitni ssbedden řegɛudi n Tufat [mani ttwehhbent ddbayeḥ,] [d tinni iǧan] di Teɣzurt n mmis n Hinnum, ḥima ad sscemḍen iḥenjiren d tḥenjirin nsen di tmessi, min ɛemmarṣ war d asen umureɣ d min ɛemmarṣ war d ayi dd-iddaren ɣar řbař.”
JER 7:32 “S uya, xzar, ad dd-asen wussan, [ammu i] iqqar SIDI, war d as ttřaɣan ɛad ‘Tufat’ niɣ ‘Taɣzurt n mmis n Hinnum’, maca ‘Taɣzurt n Wenɣay’, uca di Tufat ad neḍřen [imettan], minzi mani nneɣni war din amcan.
JER 7:33 Řxecbat n řgens-a ad dewřent d macca i ijḍaḍ n ujenna u i řmař n yeyyar uca uřa d ijj war ten issiggʷid.
JER 7:34 Zi tneddam n Yahuda u zeg ibriden n Urcalim ad ssbeddeɣ tmijja n usřiwřew d tmijja n řefraḥet, tmijja n muřay d tmijja n tesřit, maɣar tammurt ad tedweř d řxarbet.”
JER 8:1 “Di řweqt nni, [ammu i] iqqar SIDI, ad ssuffɣen iɣsan n ijeǧiden n Yahuda, iɣsan n řḥukkam nsen, iɣsan n ikehhanen nsen, iɣsan n inabiyyen nsen d yeɣsan n imezdaɣ n Urcalim zeg imeḍřan nsen.
JER 8:2 Ad bezzɛen [ixsan] i tfuct d tziri u i marra itran n ujenna, inni tuɣa ttexsen, inni umi tuɣa ɛebbden, inni tuɣa ḍeffaran d yinni tuɣa zzaysen arezzun ccwar d yinni umi tuɣa sejjaden. War ten dd-yarrwen, war ten neṭṭřen, [maca] ad iřin d řeɣbar x wudem n temmurt.
JER 8:3 Nitni ad xsen řmewt x tudart jar marra inni iqqimen zeg yinni iqqimen n teqbič n řgens-a taɛeffant, di marra imucan mani [ǧan] inni [ɛad] iqqimen, mani xasen uẓẓřeɣ, [ammu i] iqqar SIDI n řɛeskarat.”
JER 8:4 “Ini asen: ‘Ammu i iqqar SIDI: Ma ad wḍan ař ɣa qqimen war ttekkaran [ɛad]? Ma ad [xafi] ḥeyyden u war dd-ttɛiqqiben?
JER 8:5 Mayemmi iḥeyyed řgens-a, Urcalim [tanita], řebda [zzayi]? Nitni cebbaren deg wecmat, ugin ad ɣari dd-dewřen.
JER 8:6 Necc ssḥesseɣ, sřiɣ: min ssawařen, war t tteggen, uřa d ijjen war indim x řɣar nnes, ad yini: Min ggiɣ? Kuř ijj iqqim ittazzeř am uyis ittazzřen ɣar umenɣi.
JER 8:7 Uřa d abellarj deg ujenna issen řewqat ittwaggen nnes. Tajlilleḥt d tfařǧest nni iṭṭawen deg wenneḍ, ḥḍant řweqt n wuffuɣ nsent, řgens inu [maca] war issin řḥeqq n SIDI.
JER 8:8 Mammec teqqarem: Neccin d imiɣisen d Ccariɛa n SIDI aqa-tt akidneɣ! S tidett, xzar, řeqřem n ixarriqen n imariren igga [Ccariɛa] d axarriq.
JER 8:9 Imiɣisen ttseḍḥan, tteggʷeden uca ttwaḥebbsen. Xzar, nḍaren awař n SIDI, [xenni] mammec i teǧa tiɣit i ɣarsen?”
JER 8:10 “S uya ad wceɣ timɣarin nsen i inneɣni, iyyaren nsen i yinni i ɣa iḥewwsen [tammurt], maɣar zeg umeẓyan ař ameqqran arezzun marra nitni tizi nsen, zeg unabi ař akehhan marra tcemmet.
JER 8:11 Tareẓẓit n řgens inu xsen ad tt ssgenfan s řehwen am qqaren: ‘Řehna, řehna!’, maca war din iǧi řehna.
JER 8:12 Ma ad seḍḥan nitni, minzi tteggen jjɛifect? Nitni war ttseḍḥin ca, řeḥya war t ssinen. S uya ad wḍan jar inni iweṭṭan. Di řweqt meřmi zzaysen i ɣa xeřfeɣ ad nnqarḍen, [ammu i] iqqar SIDI.”
JER 8:13 “Necc ad ten řeqḍeɣ qaɛ, [ammu i] iqqar SIDI. War iqqim [ɛad] uḍiř ɣar tzayart u war teqqim [ɛad] tazart ɣar tcejjart n wartu, [ɛad] tifray wḍant. Necc ad ɣarsen awyeɣ inni xasen i ɣa iɛefsen.”
JER 8:14 “Mayemmi da narni deg uɣimi? Ittxeṣṣa aneɣ ad nmun, ad nadef ɣar tneddam ifaryen, uca ad din nesqar. Aqa SIDI, AREBBI nneɣ, yarra aneɣ ad nesqar uca iwca aneɣ aman ismumen, maɣar nexḍa x SIDI.
JER 8:15 Nessittim di řehna, [maca] war din min iṣebḥen, di řweqt n usgenfi, [maca] xzar, [mɣir] asnexřiɛ.
JER 8:16 Zi Dan ittwaseř usaḥart n yeysan nnes, zeg wesneḥneḥ n [yeysan] ijehden nnes tenhezza marra tammurt. Nitni ad dd-asen ad ccen tammurt d řɣiǧet nnes, tandint ak-d imezdaɣ nnes.
JER 8:17 Maɣar xzar, Necc ad ssekkeɣ jar awem ifiɣran, ifiɣran n arrhaj, akidsen war ineffeɛ uɛezzem. Ina ad kenniw zeɛfen, [ammu i] iqqar SIDI.”
JER 8:18 “Amḥad inu aqa idweř d acḍan, uř inu yuḥeř aṭṭas deg ixef inu.
JER 8:19 Xzar, řḥess n iɣuyyan n yeǧis n řgens inu zi temmurt tiggʷej: ‘Ma SIDI war iǧi di Ṣihyun, ma war dayes iǧi ujeǧid nnes?’” “Mayemmi d ayi sɛaren s řexyařat nsen ineqcen, s [l’aṣnam] ibeṭṭřen n ibarraniyyen?”
JER 8:20 “Teɛdu tmeyra, iffeɣ unebdu, [u] neccin ɛad war nenjim.
JER 8:21 Necc ttwarẓiɣ zi ssibbet n tareẓẓit n yessis n řgens inu. Necc arḍeɣ arruḍ d abarcan, icebbar dayi unexřiɛ.
JER 8:22 Ma war din iǧi balsam di Jilɛad? Ma war dinni iǧi umesgenfu? Mayemmi war inniḍ uyezzim n yeǧis n řgens inu?
JER 8:23 Ax, mři azeǧif inu d aman, tiṭṭ inu d řɛunṣar n imeṭṭawen, [xenni] aziř d ǧiřet iři ruɣ x yinni ittwanɣen n yeǧis n řgens inu.”
JER 9:1 “Ax, mři ɣari tazeddiɣt di řexřa i imsebriden, [xenni] iři semḥeɣ di řgens inu, uyureɣ, maɣar nitni marra d izennayen, amuni n iɣeddaren.
JER 9:2 Nitni ssqeḍɛen iřes nsen, řqews [iccur s] ixarriqen. Nitni war dwiřen d ayt n bu-teɣruḍt di temmurt s řmanet, maɣar nitni uyuren zi tɛeffant ɣar učmas umi war d ayi ssinen ca, [ammu i] iqqar SIDI.
JER 9:3 Ejj kuř ijj ad iḥḍa ixef nnes zeg umeddukkeř nnes, war ttciřem uřa x tawmat, maɣar kuř tawmat tᵉttegg mɣir acmat u kuř ameddukkeř ittenneḍ am ittceqqaf s řhard nnes.
JER 9:4 Kuř ijj ittɣarra ameddukkeř nnes, war qqaren ca tidett. Nitni sseřmaden i yiřes nsen ad issxarreq, nitni ssaḥařen ixef nsen s min war iseggden.
JER 9:5 Tazeddiɣt nnec tbedd di řwesṭ n wecmat. S wecmat [nsen] ɛewwřen ad ayi ssnen, [ammu i] iqqar SIDI.”
JER 9:6 “S uya, ammu i iqqar SIDI n řɛeskarat: ‘Xzar, Necc ad ten ssfesyeɣ u ad ten jarrbeɣ, maɣar mammec ɣa ggeɣ ad kkareɣ [xenni] ak-d yeǧis n řgens inu?
JER 9:7 Iřes nsen am fřitca n řqews ineqqen, aqa issawař s wecmat. S uqemmum nnes kuř ijj issawař x řehna ak-d umeddukkeř nnes, [maca] deg wuř nnes issewjad as ijj n řfex.
JER 9:8 Ma war zzaysen xeǧfeɣ zi man aya, [ammu i] iqqar SIDI. Ma war ixeǧef řeɛmar inu zi řgens am wa?”
JER 9:9 “Necc ad ruɣ, ad ssgeɛɛdeɣ tɣuyyit n uweḥweḥ x idurar d yezři n wecḍan x ddmani n tarewsa, maɣar ttwacemḍen ařami uřa d ijj war ssenni dd-ittekk u war ttesřin řḥess n tḥimriwin ɛad. Zeg ijḍaḍ n ujenna ař řmař [marra] arewřen, kkaren uyuren.”
JER 9:10 “Ad arreɣ Urcalim d izellijen n weẓru, d amcan n udurri i wuccanen n řexřa, uca tineddam n Yahuda ad tent ggeɣ d tammurt ittwareddǧen nni di war izeddeɣ uřa d ijj.”
JER 9:11 “Wi iǧan d aryaz amiɣis, aqa ad iḥaka deg uya, u wi ɣar issiweř uqemmum n SIDI? Ejj i-t ad [zzayes] ibarreḥ [xenni]! Mayemmi tᵉttwaxarreb tammurt, tᵉttwassecmeḍ am řexřa ařami uřa d ijj war tt ittcuqi?”
JER 9:12 “SIDI inna: ‘Řami arxun nitni zi Ccariɛa inu tenni d asen wciɣ zzat i uɣembub nsen, u war sřin ɣar tmijja inu u war tt ḍfaren,
JER 9:13 maca ḍfaren řeqsaḥet n wuř [n yixef] nsen uřa d ‘Ibaɛlen’ am mammec i d asen sseřmaden řejdud nsen,
JER 9:14 s uya, [ammu i] iqqar SIDI n řɛeskarat, AREBBI n Israil: Xzar, Necc ad wceɣ cciḥ i řgens-a ḥima ad t ccen uřa d aman n arrhaj ḥima ad ten swen.
JER 9:15 Necc ad ten zuzzareɣ jar řegnus nni war ssinen, war iǧi nitni uřa d řejdud nsen, u Necc ad xasen ssekkeɣ ssif ař ten qḍiɣ.’
JER 9:16 Ammu i iqqar SIDI n řɛeskarat: ‘Ḥḍam, řaɣam-dd i temɣarin i wecḍan maḥend ad dd-asent, uca jjem uřa d timɣarin timiɣisin ad dd-asent!’”
JER 9:17 “[Necc nniɣ, wah,] jjem tent ad deɣyant u ad ssgeɛɛdent tɣuyyit n wecḍan xaneɣ ař dd-azzřent tiṭṭawin nneɣ s imeṭṭawen u waman ad dd-hwan x wabřiwen.
JER 9:18 Maɣar tɣuyyit n wecḍan sřin as-dd zi Ṣihyun: ‘Ax, mammec nettwareddeǧ, neccin nseḍḥa aṭṭas maɣar tuɣa xaneɣ ad nekkar ad nesmeḥ di temmurt nneɣ, maɣar tizeddiɣin nneɣ hedmen tent.’
JER 9:19 Sřent xenni i wawař n SIDI, [a] timɣarin, ejj amezzuɣ nkent ad iksi awař zeg uqemmum nnes. Sřemdent yessitkent ad ceḍnent uca ad tᵉsseřmed kuř tamɣart ict n wezři n wecḍan i tmeddukkečt nnes.
JER 9:20 Minzi řmewt tgeɛɛed-dd zi řekwazi nneɣ, yudef-dd ɣar řeqṣur nneɣ maḥend ad iqḍeɛ iḥenjiren imeẓyanen zi zznaqi d iḥudriyyen zeg wazzayen.”
JER 9:21 “Siweř, [ammu i] iqqar SIDI: ‘Řxecbet n bnadem ad tewḍa am řeɣbar x yeyyar, u am tqebbiḍt n imendi awarni i wenni imejjaren nni war t i ɣa ijarwen uřa d ijj.”
JER 9:22 “Ammu i iqqar SIDI: ‘War ittfeyyic umiɣis s tiɣit [n yixef nnes] uřa d bu-teɣruḍt war ittfeyyic s jjhed nnes, bu-wagřa war ittfeyyic s wagřa nnes.
JER 9:23 Maca wenni ittfeyyacen, ejj i-t ad issemɣar, belli netta ɣares řefhamet u issen ayi, belli Necc d SIDI nni itteggen s tmexsiwt icewwaren d řḥeqq d tsegda di temmurt, maɣar timesřayin-a tteɛjibent ayi, [ammu i] iqqar SIDI.’”
JER 9:24 “Xzar, ad dd-asen wussan, [ammu i] iqqar SIDI, aqa Necc ad xeřfeɣ zi marra inni ixetnen, [maca waxxa amenni] ɣarsen [ɛad] řeɛdařyet,
JER 9:25 zi Miṣra d Yahuda d Idum d ayt n Ɛammun d Mu’ab d marra inni ittḥeffan [acuwwaf] ɣar ṭṭrufa, inni izeddɣen di řexřa, maɣar marra řegnus war ttwaxetnen, maca marra taddart n Israil aqa ɣarsen řeɛdařyet x wuř.”
JER 10:1 “Sřem awař i zi ɣarwem dd-issawař SIDI, [a] taddart n Israil!
JER 10:2 Ammu i iqqar SIDI: ‘War řemmdem abrid n řegnus i yixef nnem u war ttnexřiɛem zi řeɛřamat n ujenna, waxxa řegnus ttnexřaɛen zzaysent.
JER 10:3 Maɣar min ḥessben řegnus d řḥeqq aqa-t di řbaṭeř, minzi aqa aya d akeccuḍ nni dd-qessen zeg wezɣar, d řxedmet n ifassen n bu-ṣṣenɛet nni igga s imeydi n wemziř.
JER 10:4 Zewwqen tt s nnuqart d wureɣ, s imesmiren d ifḍisen ssmetnen tt [ařami] war teqqim tᵉttenxuxuř.
JER 10:5 Aqa atent am yict n tcejjart issawařen i [din] ibedden, [maca] war zemmaren ad ssiwřen, [ittxeṣṣa] ad tent arbun, minzi war zemmarent ad uyurent. War zzaysent teggʷedem ca, maɣar nitenti war zemmarent ad ggent min iɛeffnen, u [war zemmarent] ad ggent min iṣebḥen.’”
JER 10:6 “Uřa d ijj ma am Cek, [a] SIDI! Cek d ameqqran u Isem nnec d ameqqran s jjehd.
JER 10:7 Man wen war Cek itteggʷiden, [Cek], [a] Ajeǧid n řegnus? Minzi aya yusa-dd xak, maɣar jar marra imiɣisen n řegnus u di marra tageldit nsen uřa d ijj am Cek.”
JER 10:8 “Aqa-ten [jmiɛ] d ifɣar d ibuhařiyyen, [minzi] ttarbiyyet n [l’aṣnam] ibeṭṭřen [teffeɣ-dd] zeg ukeccuḍ [waha].
JER 10:9 Iwyen-dd nnuqart ittwabezzɛen zi Tarcic d wureɣ zi Ufaz, aqa-tt d řxedmet n uḥrayfi uřa n ifassen n wemziř n wureɣ. Arruḍ nsen [n ifiřan] idehmaniyyen d arjuwaniyyen, marra [řexyařat] ggin tent yeryazen inni ɣarsen tizemmar.”
JER 10:10 “SIDI AREBBI d Tidett, Netta d AREBBI iddaren, d Ajeǧid n řebda. Tammurt tᵉttenhezza s uduqqez n weɣḍab nnes uca řegnus war zemmaren [ad ksen] asxeḍ nnes.”
JER 10:11 “D man aya d asen i ɣa tinim: ‘Irebbiten nni war iggin ajenna uřa d tammurt, nitni ad ttwaqḍan zi temmurt d sadu ajenna.’”
JER 10:12 “[Maca] Netta igga tammurt s jjhed nnes, igga ddunect zi tiɣit u s řefhamet nnes ibezzeɛ ajenna.
JER 10:13 Řami ittejja tmijja nnes ad tt sřen, [xenni tegga] am ucarcur n waman deg ujenna. Iseynuten issgeɛɛad i-ten zeg ineggura n ddunect, ittegg assamen ak-d wenẓar u issekka-dd asemmiḍ zeg ixxamen nnes n txubay.”
JER 10:14 “Kuř bnadem d agarruḍ, břa tussna, kuř amziř n wureɣ ittseḍḥa zi ssibbet n řexyař ineqcen [i igga], maɣar řexyař nnes ifesyen d ixarriqen, war dayes [iǧi] buḥbeř.
JER 10:15 Aqa tent d [l’aṣnam] ibeṭṭřen, aqa atent d timesřayin n tseḍḥact. Di řweqt mani tent i ɣa ɛaqben, ad fnant.
JER 10:16 Tasɣart n Yaɛqub war teǧi am [tesɣart] nsent, minzi Netta d Wenni iggin marra, uca Israil d taqbič n tesɣart nnes, aqa SIDI n řɛeskarat d Isem nnes.”
JER 10:17 “Seggwej sseřɛet zi temmurt nnem, [a cem] tamɣart nni izeddɣen di lqelɛa!
JER 10:18 Maɣar ammu i iqqar SIDI: ‘Xzar, twařa-ya ad nḍareɣ imezdaɣ n temmurt ɣar řaggʷaj uca ad asen dd-awyeɣ di řeḥṣaret, ḥima ad ttwaṭṭfen!’
JER 10:19 Uct inu zi ssibbet n treẓẓit inu, ayezzim inu itteqqes ayi aṭṭas. Waxxa necc nniɣ: Aya d ijj n řehřac u necc ad t ksiɣ!
JER 10:20 Ittwaxarreb Uqiḍun inu, marra imurar [n uqiḍun] qeṭṭsen, iḥenjiren inu uyuren xafi u war da ǧin ɛad. War din wi ɣa issbedden Aqidun inu uca ad xas yayeř tijartiřin nnes.
JER 10:21 Maɣar imeksawen tuɣa qejḥen, SIDI war xas arzun. X uya war ttgeɛɛaden u marra [taḥimart n] ddmani nsen tᵉttwazuzzar.
JER 10:22 Řeḥweř d ameqqran, aqa da, ddriz zi temmurt di ccamal, ḥima ad areddǧen tineddam n Yahuda, [maḥend ad tt arren d tammurt n] tzeddiɣt i wuccanen n řexřa.”
JER 10:23 “Necc ssneɣ, [a] SIDI, aqa war dd-teqqim ɣar bnadem ad ixḍar abrid nnes, uřa i weryaz iggur, maḥend ad indeh iṣuraf nnes.
JER 10:24 Seggem ayi, SIDI, maca s řḥeqq, war iǧi deg weɣḍab nnec, ḥima war d ayi tarrid d walu.
JER 10:25 Zeǧeɛ asɛar nnec x řegnus nni war Cek issinen, u x tqebbař nni war ittřiɣin Isem nnec, minzi nitni ṣarḍen Yaɛqub, ṣarḍen t uca qḍan xas, hedmen amcan n tzeddiɣt nnes.”
JER 11:1 Awař nni dd-iffɣen zi SIDI ɣar Irmiya, inna:
JER 11:2 “Sřem i wawařen n Řɛahd-a uca siweř ak-d yeryazen n Yahuda u ak-d imezdaɣ n Urcalim,
JER 11:3 ini asen: ‘Ammu i iqqar SIDI, AREBBI n Israil: Ittwanɛeř weryaz nni war isřin i wawařen n Řɛahd-a,
JER 11:4 wenni weṣṣiɣ i řejdud nwem deg wass umi ten ssuffɣeɣ zi temmurt n Miṣra, zeg ufarran n wuzzař, [řami] nniɣ: Sřem i tmijja inu uca ggem am mammec i kenniw weṣṣiɣ marra, [xenni] ad ayi tiřim d řgens inu uca Necc ad awem iřiɣ d AREBBI nwem,
JER 11:5 ḥima ad menɛeɣ di tjaǧit nni jjuǧeɣ di ṭṭweɛ n řejdud nwem, maḥend ad asen wceɣ ict n temmurt ifeyyḍen s uɣi d tamment, am [teǧa] ass-a.’” [Xenni] necc arriɣ-dd, nniɣ: “Amin, SIDI!”
JER 11:6 Inna ayi SIDI: “Barreḥ s marra awařen-a di tneddam n Yahuda u di dcurat n Urcalim, ini: ‘Sřem i wawařen n Řɛahd-a, ggem zzaysen,
JER 11:7 maɣar Necc ɛeřmeɣ s jjehd i řejdud nwem deg wass umi ten ssuffɣeɣ zi temmurt n Miṣra, zeg umezwaru ař ass-a, [wah,] cehdeɣ nniɣ: Sřem ɣar tmijja inu’
JER 11:8 [Maca] nitni war sřin u war d ayi wcin amezzuɣ nsen, maca nitni ḍfaren marra idsen řeqsaḥet n wuř nsen aɛeffan. S uyenni ssiwḍeɣ xasen marra awařen n Řɛahd-a, inni x ten weṣṣiɣ maḥend ad zzaysen ggen, [maca] war zzaysen ggin.’”
JER 11:9 Inna ayi SIDI: “Aqa tᵉttwaɛarra ict n tmeɛmuč jar iryazen n Yahuda u jar imezdaɣ n Urcalim.
JER 11:10 Nitni dewřen-dd ɣar řmuɛṣiyyet n řejdud nsen nni yugin ad sřen ɣar wawařen inu. Nitni ruḥen ḍeffaran irebbiten nneɣni maḥend ad asen sexxaren. Taddart n Israil d taddart n Yahuda arẓin Řɛahd inu nni ggiɣ ak-d řejdud nsen.”
JER 11:11 “S uya, ammu i iqqar SIDI: ‘Xzar, Necc ad xasen nḍareɣ ijj n řɣar i zi war zemmaren ad nejmen. [Mařa] řaɣan ayi-dd [xenni], Necc war dd ɣarsen ttesřiɣ ca.
JER 11:12 [Xenni] ad ffɣen tineddam n Yahuda d imezdaɣ n Urcalim, ad řaɣan ɣar irebbiten i yinni umi qeddmen tiwhibin n řebxur, [maca] yina war zemmaren ad asen wcen afus di řweqt umi ten iřqef řɣar.
JER 11:13 Maɣar irebbiten nnec deg waṭṭas anect n tneddam nnec, [a] Yahuda, u iɛaltaren i tessbeddem i nnɛi [n ṣṣanam] nni deg waṭṭas anect n ibriden n Urcalim, iɛalṭaren maḥend ad xasen wehhben tiwhibin n řebxur i Baɛl.’”
JER 11:14 “Cek [xenni] war tᵉttar i řgens-a, war ttekkared ad asen trud niɣ ad asen tedɛid, maɣar Necc war ttesřiɣ di řweqt nni xafi dd ɣa řaɣan zi ssibbet n řɣar i ten iřeqfen.”
JER 11:15 “Min i teggid, [a] tamɛizt inu, di Taddart inu, umi teǧa řefḍiḥet nnes [d ta]: aqa aṭṭas ttaggʷejen xam ak-d weysum iqeddsen. Maɣar s tuɛeffna i teggid, ma tzemmared ad tnegzed s řefraḥet?
JER 11:16 ‘Tazitunt tazeyzawt, [a cem,] řemřaḥet, s řɣiǧet icnan di řewṣifet!’, [ammu i] tuɣa igga SIDI isem nnem, [maca] [řexxu] iqqed as timessi am ittwaseř řḥess n ijj n zzhir d ameqqran uca ttwarẓen řefruɛ nnes.
JER 11:17 SIDI n řɛeskarat, d wenni cem iẓẓun, igga xam ijj n řɣar zi ssibbet n řɣar i tegga taddart n Israil d taddart n Yahuda, [řɣar i] ggint i yixef nsent umi d ayi sɛarent s tewhibin n řebxur i Baɛl.”
JER 11:18 “SIDI isscen t ayi uca [řexxu] ssneɣ, řami tessecned ayi timegga nsen.
JER 11:19 Necc simant inu tuɣa ayi am yijj n yezmar aynaw n taddart, neddhen t i tɣarṣt, maɣar tuɣa war ssineɣ aqa nitni ggin ayi ijj n řfex [umi qqaren]: ‘Ejj aneɣ ad nḍeyyeɛ tacejjart ak-d řɣiǧet nnes u ad tt nteḥḥa zi temmurt n yinni iddaren maḥend isem nnes war t ttidaren ɛad.’”
JER 11:20 “SIDI n řɛeskarat, [a Cek] Řqaḍi iseggden nni ittjarraben tiẓẓař d wuř, scen ayi nneqmet nnec, maɣar necc sellmeɣ ddeɛwet inu deg ifassen nnec.”
JER 11:21 “S uya, ammu i iqqar SIDI x yeryazen n Ɛanatut, inni yarezzun řeɛmar nnec, qqaren: ‘War ttnab s Yisem n SIDI ařami war tmettid s ufus nneɣ.’
JER 11:22 S uya, [ammu] i iqqar SIDI n řɛeskarat: ‘Xzar, Necc ad ten xeǧṣeɣ: iḥudriyyen ad mmten s ssif, iḥenjiren d yessitsen ad mmten s řaẓ.
JER 11:23 War ittɣimi min iqqimen zzaysen, maɣar Necc ad xasen dd-ssiwḍeɣ ijj n řɣar d aɛeffan x yeryazen n Ɛanatut deg useggʷas nni di ten i ɣa xeǧṣeɣ.’”
JER 12:1 “Mařa ggiɣ ad carrɛeɣ akidek, [a] SIDI, Cek [ad tbaned] d amsegged. Qaɛ amenni ttexseɣ ad siwřeɣ akidek x ibriden n řḥeqq: Mayemmi abrid n iɛeffanen iseggem, [u] mayemmi iɣeddaren řebda di arraḥet?
JER 12:2 Cek teẓẓud ten u nitni wtin iẓewran, nitni ɣemyen-dd u iwyen-dd řɣiǧet. Cek aqa tudsed aqemmum nsen, maca tiggʷejed x tiẓẓař nsen.”
JER 12:3 “Cek, [a] SIDI, tessned ayi, tᵉttwarid ayi u tqeǧbed uř inu, [ma] aqa-t akidek. Jbed i-ten am wuǧi i tɣarṣt u ɛzeř i-ten i wass n wenɣay.
JER 12:4 Mecḥař ɛad i ɣa tekk temmurt tecḍen u afsu [aziza] ad yaẓeɣ deg iyyar marra? S tuɛeffna n yinni din izeddɣen ḍeyyɛen řmař d yejḍaḍ, maɣar nitni qqaren: ‘Netta war ittwiři aneggar nneɣ.”
JER 12:5 “Mařa tuzzřed ak-d inni ittazzřen x iḍaren, nitni ssaḥařen cek, mammec texsed ad tegged [xenni] ḥamat ak-d iysan? Mařa tᵉttacid aqa cek di řaman mɣir di temmurt n řehna, mammec ɣa tegged [xenni] di cbarq iqqnen n [yeɣzar n] L’Urdun?
JER 12:6 Maɣar uřa d aytmac d taddart n babac, uřa d nitni ɣeddaren cek, uřa d nitni sɣuyyun s jjhed awarni ac. War ten ttiqqem, waxxa ssawařen akidek mliḥ.”
JER 12:7 “Necc semḥeɣ di taddart inu, Necc nḍareɣ tasɣart inu. Tenni issɛizz řeɛmar inu sellmeɣ tt deg ufus n řɛedyan nnes.
JER 12:8 Tasɣart inu tedweř-dd akidi am yijj n wayrad deg wezɣar. Tessgeɛɛed-dd akidi tmijja nnes, x uya Necc dewřeɣ carrheɣ tt.
JER 12:9 Tasɣart inu i Necc [am] ujḍiḍ ibeqqḍen ittkeccaḍen. Ttennḍen as ijḍaḍ ikeccḍen. Kkarem, smunem-dd marra řmař n yeyyar, ejj i-ten ad dd-asen ḥima ad ccen!”
JER 12:10 “Imeksawen aṭṭas xarrben amarjeɛ inu n uḍiř, ɛefsen x yeyyar inu, aqa arrin iyyar iɛizzen inu d ijj n řexřa ixwa.
JER 12:11 Arrin [iyyar] d ict n temmurt ittwareddǧen, aqa ittwaxarreb [yeyyar], izzeř zzati icḍen. Marra tammurt txarreb minzi uřa d ijj war d as yecqi.
JER 12:12 X marra tiwririn iqeccaren di řexřa usin-dd imteḥḥayyen, maɣar ssif isarḍ zi ṭṭarf n temmurt ař ṭṭarf [nneɣni] n temmurt. War din iqqim řehna i marra ddat.
JER 12:13 Nitni zarɛen irden, [maca] mjaren isennanen, nitni uḥřen, maca břa nnfaɛ. Nitni ad seḍḥan x ṣṣabet nwem zi ssibbet n řḥaduq n weɣḍab n SIDI.”
JER 12:14 “Ammu i iqqar SIDI: Marra ajjaren inu iɛeffanen nni ittḥadan tasɣart inu i wciɣ i řgens inu Israil d tasɣart, xzar, Necc ad ten qeřɛeɣ zi temmurt, [maca] taddart n Yahuda ad tt qeřɛeɣ zi řwesṭ nsen.
JER 12:15 Awarni řami ten qeřɛeɣ, ad dd-dewřeɣ u ad xasen ḥinneɣ uca Necc ad ten arreɣ ad ɛeqben, kuř ijj ɣar tesɣart nnes u kuř ijj ɣar temmurt nnes.
JER 12:16 Xmi ɣa řemden s tidett ibriden n řgens inu maḥend ad jjaǧen ɣar Yisem inu: ‘S tidett am iddar SIDI!’, am mammec nitni ssřemden řgens inu maḥend ad jjaǧen ɣar Baɛl, [xenni] ad ttwassbedden nitni di řwesṭ n řgens inu.
JER 12:17 [Maca] mařa nitni war ttexsen ad sřen, [xenni] Necc ad qeřɛeɣ řgens nni uca ad ten areddǧeɣ, [ammu i] iqqar SIDI.”
JER 13:1 “Ammu i d ayi inna SIDI: ‘Uyur, seɣ i yixef nnec ijj n webyas n řeqṭen uca beys i-t x tejɛinnatin nnec, [maca] war t tejji ad yadef deg waman!’
JER 13:2 Necc sɣiɣ ijj n webyas ɛlaḥsab awař n SIDI uca beyseɣ t x tejɛinnatin inu.
JER 13:3 [Xenni] yusa-dd ɣari wawař n SIDI i twařa wiss tnayen, inna:
JER 13:4 ‘Ksi abyas i tesɣid, nni tbeysed x tejɛinnatin nnec uca kkar, uyur ɣar [yeɣẓar n] Lfuraṭ uca ffar i-t dinni di tazzect n jjarf.’
JER 13:5 Necc uyureɣ uca ffareɣ t ɣar Lfuraṭ, am mammec tuɣa d ayi yumur SIDI.”
JER 13:6 “Awarni i waṭṭas n wussan inna ayi SIDI: ‘Kkar, uyur ɣar Lfuraṭ uca ksi ssenni abyas nni d ac umureɣ maḥend ad t teffared dinni.’
JER 13:7 [Xenni] uyureɣ ɣar Lfuraṭ uca ɣziɣ u kkseɣ-dd abyas zeg wemcan mani t tuɣa ffareɣ. Xzar, abyas iḍeyyeɛ, war iǧi min umi ɣa infiɛ ɛad.
JER 13:8 [Xenni] yusa-dd ɣari wawař n SIDI, inna:
JER 13:9 ‘Ammu i iqqar SIDI: ‘Ammu i ɣa ssḍeyyɛeɣ nnfaxet n Yahuda uřa d nnfaxet tameqqrant n Urcalim.
JER 13:10 Řgens-a aɛeffan nni yugin ad iseř ɣar wawařen inu, nni iḍeffaren řeqsaḥet n wuř nnes uca yareddef irebbiten nneɣni maḥend ad ten iɛbed u ad asen ibendeq, [řgens-a] ad idweř am webyas-a i war ineffɛen i walu ɛad.
JER 13:11 Maɣar mammec iqqen webyas i tejɛinnatin n weryaz, ammu i arriɣ marra taddart n Israil d marra taddart n Yahuda ad ɣari qqnent, [ammu i] iqqar SIDI, maḥend ad iřint d řgens inu d Yisem inu d ccan inu d uɛuǧi inu, [maca] nitni war sřin ca.’”
JER 13:12 “Cek ad asen tinid awař-a: ‘Ammu i iqqar SIDI, AREBBI n Israil: Qaɛ aɣarraf ad ittwaccur s binu.’ [Xenni] ad ac inin nitni: ‘Ma [zeɛma] neccin war nessin simant nneɣ nican, aqa qaɛ aɣarraf ad ittwaccur s binu?’
JER 13:13 [Xenni] ad d asen tinid: ‘Ammu i iqqar SIDI: Xzar, Necc ad arreɣ ad scaren marra imezdaɣ n temmurt-a, ijeǧiden nni iqqimen x řɛarc n Dawud, ikehhanen, inabiyyen d marra imezdaɣ n Urcalim.
JER 13:14 Necc ad ten wteɣ d iwetwiten, ijj ak-d wenneɣni, ibabaten munen ak-d iḥenjiren, [ammu i] iqqar SIDI. Necc war ttḥinniɣ, war ssɛizziɣ u war areḥḥmeɣ maḥend war ten ttḍeyyiɛeɣ.’”
JER 13:15 “Sřem u wcem amezzuɣ, war ttnefxem, maɣar SIDI issiweř.
JER 13:16 Wcem ccan i SIDI, AREBBI nwem, qbeř i dd ɣa tas taǧest u qbeř i ɣa nqarḍen iḍaren nwem x idurar ibbubsen, [am] tᵉttrajam tafawt, [maca] Netta ad tt yarr d tiři n unuri uřa d aseynu ibbumbes.
JER 13:17 [Maca] mařa kenniw war tᵉttexsem ad tesřem, [xenni] ad iru řeɛmar inu di tnuffra x nnfaxet [nwem], ad iksi deg imeṭṭawen, uca ad dd-ssehwan imeṭṭawen zi tiṭṭawin inu, maɣar taḥimart n SIDI aqa tᵉttwandeh di tmeḥbast.”
JER 13:18 “Ini i ujeǧid d yemmas n ujeǧid: ‘Swaḍɛem ixef nwem, qqimem deg wemcan ihwa, maɣar ttaj nwem icuwwaren tewḍa awem-dd x uzeǧif.’
JER 13:19 Ttwabellɛent tneddam n [Temmurt n] Ljanub, uca uřa d ijj war tent yarezzem. Aqa ittwandeh marra [řgens n] Yahuda ittwandeh imun.
JER 13:20 Sgeɛɛdem tiṭṭawin nwem, u xzarem, man wen i dd-yusin zi ccamal! Mani teǧa tḥimart i d am immewcen, uǧi nnem icewwaren?
JER 13:21 Min ɣa tinid mařa Netta igga d azeǧif xam inni i tessřemded maḥend ad iřin d imeddukkař nnem iɛizzen? Ma war cem dd-mennɛen řewjeɛ am yict n temɣart ittarwen?”
JER 13:22 “Xmi ɣa tinid deg wuř nnem: ‘Mayemmi d ayi iřqef [marra] aya?’, [ssen aqa:] ‘X ubarru n řmuɛṣiyyet nnem ttwassgeɛɛdent xam timmawin [n warruḍ], ttwadeǧen inirzen nnem’.
JER 13:23 Ma izemmar ijj [n weryaz] zi [temmurt n] Kuc ad ibeddeř smex n teřmect nnes? Niɣ aɣiřas areqqiɛen nnes? Ma tzemmarem uřa d kenniw [xenni] ad tɛedřem, [kenniw] inni innumen tuɛeffna.
JER 13:24 S uyenni Necc ad ten zuzzareɣ am uřum nni iṭṭawen s usuḍi n usemmiḍ n řexřa.
JER 13:25 Wa ad yiři d zzhar nnem i d am dd-ikkaren zzayi, [ammu i] iqqar SIDI, minzi cem tᵉttud ayi u tᵉttecřed x ixarriqen.
JER 13:26 [Xenni] uřa d Necc ad ssgeɛɛdeɣ ibeḥruren [n warruḍ] nnem ař tiwa aɣembub nnem uca ad ẓaren řefḍiḥet nnem:
JER 13:27 zzina nnem d usneḥneḥ inezren nnem, farq-ccɣeř nnem infeḍḥen. X tewririn u deg iyyar ẓriɣ nnɛawat nnem n l’aṣnam. Uct xam, [a] Urcalim, ař meřmi war tᵉttwassizdiged ca ɛad [zzaysent]?”
JER 14:1 Awař n SIDI i dd-yusin ɣar Irmiya x řaẓaɣ ameqqran.
JER 14:2 “[Tammurt n] Yahuda tecḍen uca tiwwura nnes heyyfent. Qqimen nitni x temmurt [s werruḍ] d abarcan, uca tɣuyyit n ucetci n Urcalim tgeɛɛed ɣar ujenna.
JER 14:3 Ayt n jjehd sekken ixemmasen nsen imuqřiřen maḥend ad aymen aman. Řami dd-usin nitni ɣar wanuten n wenẓar, war daysen ufin aman. Nitni ɛeqben-dd s ibuqaren nsen xwan, seḍḥan, ucin s ubarreq uca řeḥḥfen i uzeǧif nsen,
JER 14:4 minzi tᵉttwacarreg temmurt, maɣar war din anẓar di temmurt. Ifeǧaḥen ttseḍḥan, ttřeḥḥafen i uzeǧif nsen.
JER 14:5 Wah, uřa d tudadt deg iyyar turuw-dd mmis, [maca xenni] tesmeḥ dayes, minzi war din iqqim arbiɛ ɛad.
JER 14:6 Iɣyař n řexřa bedden x tewririn iquccaren, ssɣatan ɣar řeɛwin am wuccanen n řexřa. Tiṭṭawin nsen xesyent maɣar war iqqim wefsu [aziza] ɛad.”
JER 14:7 “Waxxa cehhdent xaneɣ řmuɛṣiyyat nneɣ, [a] SIDI, egg i-t di ṭṭweɛ n Yisem nnec, maɣar aweddar nneɣ deg waṭṭas, aqa nexḍa akidek.
JER 14:8 [Cek] d řayas n Israil, [Cek] d Amsenjem nnes di řweqt n řeḥṣaret, mayemmi ɣa tiřid am yijj n ubarrani di temmurt, am yijj n umsebrid ittnusan ǧiřet waha?
JER 14:9 Mayemmi teǧid am yijj n weryaz iweddaren, am yijj n bu-teɣruḍt i war izemmaren ad ifekk? Aqa Cek di řwesṭ nneɣ, [a] SIDI, Isem nnec ittwabarreḥ xaneɣ, war dayneɣ semmeḥ!”
JER 14:10 “Ammu i iqqar SIDI x řgens-a: ‘Tuɣa iɛjeb asen ad telɛen, war ssɛizzen x iḍaren nsen. S uyenni SIDI war xasen yarḍa. Řexxu ad yidar Netta řmuɛṣiyyet nsen uca ad ixeǧeṣ ddnub nsen.’”
JER 14:11 Inna ayi SIDI: “War tᵉttar i řgens-a maḥend ad yiři mliḥ!
JER 14:12 Waxxa ẓummen, Necc war ttesřiɣ ca ɣar tɣuyyit nsen, [waxxa] nitni iwyen ict n tɣarṣt n wecmaḍ d ict n tewhibt [n řɣiǧet], Necc war xasen arḍiɣ ca, maɣar Necc ad ten qḍiɣ s ssif d řaẓ d ṭṭaɛun.”
JER 14:13 [Xenni] nniɣ necc: “Wayyaw, a Sidi inu, SIDI, xzar, inabiyyen qqaren asen: ‘Kenniw war tẓarrem ssif, war ittiři řaẓ, maɣar Necc ad awem wceɣ řehna d tidett deg wemcan-a’”
JER 14:14 Inna ayi SIDI: “Inabiyyen ttnebban s ixarriqen s Yisem inu. Necc war ten dd-ssekkeɣ, war ten umureɣ u war kidsen ssiwřeɣ. Nitni ttnabben ijj n řewḥiy war iǧin i kenniw, aɛezzem, min ibeḍřen d wecmat n wuř [n yixef] nsen.”
JER 14:15 S uya, ammu i iqqar SIDI: “X inabiyyen nni ittnebban s Yisem inu, waxxa Necc war ten dd-ssekkeɣ ca, uca qqaren: ‘War ittiři ssif uřa d řaẓ di temmurt-a!’, aqa inabiyyen nni ad ttwaqḍan s ssif d řaẓ.
JER 14:16 Řgens umi nebban, ad immenḍar deg ibriden n Urcalim zi ssibbet n řaẓ d ssif, uca war ittiři wi ten i ɣa ineḍřen: nitni, timɣarin nsen, iḥenjiren nsen d tḥenjirin nsen. Ammu d xasen i ɣa zeǧɛeɣ řɣar [n yixef] nsen.”
JER 14:17 “S uyenni ad asen tinid awař-a: ‘Imeṭṭawen ad dd-ssefyent zi tiṭṭawin inu ad dd-hwant, ǧiřet d wass, břa qeṭṭu!’ Maɣar tᵉttwarẓ teɛzarect, iǧis n řgens inu, s tareẓẓit d tameqqrant, s uyezzim itteqqes aṭṭas.
JER 14:18 Xmi ɣa ffɣeɣ, ɣar yeyyar, aqa da inni ittwassnuqqben s ssif, u xmi ɣa adfeɣ ɣar tendint, xzar, inni iheřcen s řaẓ! Wah, inabiyyen d ikehhanen tᵉttliɛen deg ict n temmurt i war ssinen.
JER 14:19 Ma tenḍared Cek Yahuda marra? Ma icarreh řeɛmar nnec Ṣihyun? Mayemmi d aneɣ tewtid ammu ařami war d aneɣ iqqim bu ugenfu? Sittimen ad yiři řehna, maca war din amcan i řxar, sittimen deg ijj n řweqt n ugenfi, [maca] xzar, [mɣir] asnexřiɛ.
JER 14:20 [A] SIDI, neccin war nessin řɣar nneɣ d řmuɛṣiyyet n řejdud nneɣ, maɣar neccin nexḍa akidek.
JER 14:21 War d aneɣ sseḥqara ca di ṭṭweɛ n Yisem nnec, war sseḥqara řɛarc n uɛuǧi nnec. Idar aneɣ, war tareẓẓa Řɛahd i kidneɣ teggid!
JER 14:22 Ma aqa din jar [l’aṣnam] ibeṭṭřen n řegnus [l’aṣnam] nni izemmaren ad wcen anẓar, niɣ ccaten ijenwan s wenẓar s simant nsen? Ma war iǧi d Cek, [a] SIDI, AREBBI nneɣ? S uyenni ad Cek nraja, maɣar Cek i itteggen marra aya.”
JER 15:1 Inna ayi SIDI: “Waxxa mařa ibedd Musa d Camwil zzat i wudem inu, ɛad war ittiři řeɛmar inu ak-d řgens-a. Siggʷej i-ten zi zzat n wudem inu, ejj i-ten ad uyuren.
JER 15:2 Xmi d ac i ɣa inin: ‘Mani ɣa nuyur?’, [xenni] ad asen tinid: ‘Ammu i iqqar SIDI: Wi [iǧan] i řmewt, ɣar řmewt, wi [iǧan] i ssif, ɣar ssif, wi [iǧan] i řaẓ, ɣar řaẓ u wi [iǧan] i řeḥbes, ɣar řeḥbes!’
JER 15:3 Ad ten xeǧṣeɣ s arebɛa n webriden, [ammu i] iqqar SIDI: s ssif ařami ɣa ttwanɣen, s yiṭan ařami [ten] jarren zeg webrid, s ijḍaḍ n ujenna d řewḥuc n temmurt ař ɣa ttwaṣarḍen u ad ttwareddǧen.
JER 15:4 Necc ad ten arreɣ d [ict n řqecɛet n] unexřiɛ i marra tigeldiwin n ddunect zi ssibbet n Manassa, mmis n Ḥizqiya, ajeǧid n Yahuda, d axřaf zi min igga di Urcalim.”
JER 15:5 “Maɣar man wen umi ɣa tezziǧed, [a] Urcalim? Wi d am i ɣa issḥissfen niɣ wi dd ɣa iffɣen zeg webrid maḥend ad xam isseqsa x umeddur nnem?
JER 15:6 Cem tsemḥed dayi, [ammu i] iqqar SIDI, tdewřed ɣar ḍeffar. S uyenni i ɣa sswiẓẓḍeɣ afus inu ḍidd nnem uca ad cem areddǧeɣ. Necc uḥreɣ s uḥinni xawem.”
JER 15:7 “Necc ad ten zuzzareɣ s ǧuḥ di tewwura n temmurt. Necc keccḍeɣ iḥenjiren zi řgens inu uca sshellkeɣ [ten]. Nitni war dd-dwiřen ca zeg ibriden nsen [iɛeffanen].
JER 15:8 Tijjař nsen ad iřint wesɛent x yejdi n řebḥurat. Di ṭṭya n wass ad xasen ssiwḍeɣ ijj n umteḥḥay, x yemmas d uḥudri. Deɣya ad xas wḍiɣ Necc s tiggʷudi d inexřiɛen.
JER 15:9 Tenni i dd-yurwen sebɛa n iḥenjiren, texsi. Nettat tedřeq i buḥbeř nnes, teɣři tfuct nnes am iǧa ɛad d wass. Nettat tᵉttseḍḥa uca tᵉtteṭṭef i-tt i-dd řefḍiḥet. Min iqqimen zzaysen ad t wceɣ i ssif zzat i wudem n řɛedyan nsen, [ammu i] iqqar SIDI.”
JER 15:10 “Uct xafi, yemma, aqa cem turwed ayi-dd: ijj n weryaz n umcubbec, ijj n weryaz n umenɣi i marra tammurt. Necc war d asent arḍřeɣ uca nitni war d ayi ttᵉttursen, waxxa amenni marra neɛɛřen ayi.”
JER 15:11 Inna SIDI: “[Ah], mařa Necc war teggeɣ s tcuni akidek, mařa Necc war ggiɣ ad cek iḥcem řeɛdu di řweqt n tecti taɛeffant u di řweqt n řeḥṣaret.”
JER 15:12 Ma izemmar bnadem ad yarẓ uzzař, uzzař i dd-yusin zi ccamal, niɣ nnḥas?
JER 15:13 Agřa nnec d řeknuz nnec ad ten wceɣ d takeccaḍt i řegnus, břa ttaman, zi ssibbet n marra ddnub nnec uca [aya] di marra tammurt nnec.
JER 15:14 Necc ad [cek] sseɛduɣ ak-d řeɛdu nnec ɣar ict n temmurt nni war tessined ca, maɣar s weɣḍab inu tarɣa tmessi nni i ɣa iqqimen tcemmeḍ ḍidd nwem.”
JER 15:15 “[A] SIDI, Cek tessned tt, idar ayi uca řha-dd akidi! Ntaqem ayi zeg yinni d ayi iḍeffaren! War d ayi ttekkes, minzi ɣarek ttasiɛ n řxaḍar aṭṭas. Ssen aqa necc ad xak ksiɣ řɛar di ṭṭweɛ nnec.
JER 15:16 Umi ttwafen wawařen nnec, cciɣ ten deɣya. Awař nnec tuɣa-t i necc d arcuq d řefraḥet i wuř inu maɣar ittwabarreḥ Isem nnec di tiwa inu, [a] SIDI, AREBBI n řɛeskarat.
JER 15:17 Necc war ttɣimiɣ ca deg wegraw n yinni istehzan, war neggzeɣ s řefraḥet. Zi ssibbet n ufus nnec ttɣimiɣ weḥḥdi, maɣar teccured ayi s wesxeḍ nnec.
JER 15:18 Mayemmi řeḥriq inu iddar řebda u mayemmi war izemmar uyezzim inu ɛemmarṣ ad iggenfa, ma netta yugi ad iggenfa? Ma s tidett aqa Cek am waman inhewřen inni war di iǧi řaman?”
JER 15:19 “S uya, ammu i iqqar SIDI: ‘Mařa cek tdewřed-dd, Necc ad cek arreɣ ad dd-tdewřed u ad tbedded zzat i wudem inu. Mařa tessiwřed min iɣřan deg wemcan n min war isekkwin walu, [xenni] ad tiřid am uqemmum inu. Ejj i-ten ad ɣarek dd-dewřen, maca cek war tzemmared ad ɣarsen dd-tdewřed.
JER 15:20 Maɣar Necc ad cek ggeɣ i řgens-a d řḥiḍ imetnen n nnḥas. Ad kidek mmenɣen, [maca] nitni war zemmaren ad cek arenyen, maɣar Necc akidek ḥima ad cek ssnejmeɣ u ḥima ad cek fekkeɣ, [ammu i] iqqar SIDI.
JER 15:21 Necc ad cek fekkeɣ zeg ufus n iɛeffanen u Necc ad cek fdiɣ zeg wemnaɛ n ayt n bu-řexcunet.”
JER 16:1 Yusa-dd ɣari wawař n SIDI, inna:
JER 16:2 “War ttawi tamɣart i yixef nnec u war ɣarek ttiřin iḥenjiren d tḥenjirin deg wemcan-a,
JER 16:3 maɣar ammu i iqqar SIDI x iḥenjiren d tḥenjirin i dd ɣa ittwurwen deg wemcan-a u x yemmatsen i ten dd-yurwen u x babatsen i ten dd-ijjin di temmurt-a:
JER 16:4 ‘Nitni ad mmten s ibriden iwɛaren aṭṭas, war xasen ceṭṭen u war ten neṭṭřen, nitni ad dewřen d řeɣbar i wudem n temmurt uca ad ttwaɣezzen s ssif d řaẓ, u řxecbat nsen ad dewřent d macca i ijḍaḍ n ujenna u i řewḥuc n řexřa.’”
JER 16:5 “Maɣar ammu i iqqar SIDI: ‘War ttadef ɣar ict n taddart n wecḍan u war ccat agejdur, war areḥḥem, maɣar Necc kkseɣ řehna inu x řgens-a, tamexsiwt inu icewwaren d arreḥmet, [ammu i] iqqar SIDI.’
JER 16:6 Imeqqranen d imeẓyanen ad mmten di temmurt-a. War ten neṭṭřen, war xasen ccaten agejdur, war xebbcen ixef nsen niɣ ad ssquccaren ixef nsen di ṭṭweɛ nsen.
JER 16:7 War d asen ittwarẓ weɣrum zi ssibbet n wecḍan ḥima ad ɛezzan ca n yijjen x ijj n umetti, u war d asen tticen ad swen zeg uɣarraf n uɛezzi x babas niɣ yemmas.
JER 16:8 War ttadef ɣar taddart mani tteggen zzardet maḥend ad teqqimed ɣarsen i macca d tsessit.
JER 16:9 Maɣar ammu i iqqar SIDI n řɛeskarat, AREBBI n Israil: Xzar, Necc ad ssbeddeɣ zzat i tiṭṭawin nwem deg wemcan-a tmijja n warcaq d tmijja n řefraḥet, tmijja n muřay d tmijja n tesřit.”
JER 16:10 “Xmi ɣa tbarrḥed marra awařen-a i řgens-a uca nitni ad sseqsan: ‘Mayemmi iqqar SIDI marra řɣar-a ameqqran xaneɣ u min [iǧan] d ljarima nneɣ u min iǧan d ddenb nneɣ i negga neccin ak-d SIDI, AREBBI nneɣ?’,
JER 16:11 [xenni] ad asen tinid: ‘Maɣar řejdud nwem semḥen dayi, [ammu i] iqqar SIDI, uca uyuren awarni i irebbiten nneɣni uca ɛebden u sejden asen, [maca] semḥen dayi u war ḥḍin Ccariɛa inu.
JER 16:12 U kenniw simant nwem teggim mahu x řejdud nwem, minzi xzar, kuř ijj zzaywem iḍaffar řeqsaḥet n wuř nnes aɛeffan, ařami kenniw war dd ɣari tesřim [qaɛ].
JER 16:13 S uyenni ad kenniw ḥejjareɣ ɣar barra zi temmurt-a ɣar ict n temmurt i war tessinem kenniw uřa d řejdud nwem, uca dinni i ɣa tɛebdem irebbiten nneɣni, ass d ǧiřet, minzi Necc war ɣarwem dd-ttarzifeɣ ɛad s ca n řxaḍar.’”
JER 16:14 “S uya, xzar, ad dd-asen wussan, [ammu i] iqqar SIDI, nni di war qqaren ɛad: ‘S tidett am iddar SIDI i dd issuffɣen ayt n Israil zi Miṣra!’
JER 16:15 maca: ‘S tidett am iddar SIDI wenni dd-issuffɣen ayt n Israil zi temmurt n ccamal u zi marra timmura mani xasen yuẓẓeř!’ Minzi Necc ad ten arreɣ ɣar temmurt nni wciɣ i řejdud nsen.
JER 16:16 Xzar, Necc ad ssekkeɣ aṭṭas n ineymaren n iseřman, [ammu i] iqqar SIDI, inni ten i ɣa ymaren, u xenni ad ssekkeɣ aṭṭas n ineymaren nni xasen i ɣa yaẓẓřen zi mkuř adrar u zi mkuř tawrirt u zeg ifeǧiqen jar řejruf.
JER 16:17 Maɣar tiṭṭawin inu ttwařant marra ibriden nsen, nitni war zemmaren ad zzayi nnuffaren uca řmuɛṣiyyet nsen war tzemmar ad tennuffar zzat i tiṭṭawin inu.
JER 16:18 Amezwar ad xeřfeɣ s uḍeffus [marra] řmuɛṣiyyet nsen d marra ddnub nsen, minzi nitni ssɛiǧten tammurt inu. Nitni ccuren tasɣart inu s řxecbat n nnɛawat n l’aṣnam nsen u s jjɛayef nsen.”
JER 16:19 “[A] SIDI, Cek d Jjehd inu d Lburj inu d amcan inu n tarewřa deg wass n řeḥṣaret. Ad ɣarek dd-asen řegnus zeg ineggura n ddunect, ad inin: ‘Tasɣart nni ṭṭfen řejdud nneɣ, [dayes mɣir] acmat d [aɛbed n l’aṣnam] ibeṭṭiřen, timesřayin i war ineffɛen.’
JER 16:20 Ma izemmar bnadem ad igg irebbiten i yixef nnes? Nitni war ǧin d irebbiten.
JER 16:21 S uya, xzar, twařa-ya Necc ad ten arreɣ ad cehden, ad ten arreɣ ad ssnen afus inu d jjehd inu, uca [xenni] ad ssnen belli Isem inu ‘SIDI’.”
JER 17:1 “Ittwaxbec ddenb n Yahuda s pluma n wuzzař, s txeft n ijj n umesmir di teřwiḥt n wuř nsen u deg waccawen n iɛalṭaren nnec.
JER 17:2 Am mammec ttidaren tarwa nsen, ttidaren nitni uřa d iɛalṭaren nsen d trebbin nsen n cwarti ɣar tcejjura tizizawin x tewririn yuɛřan.
JER 17:3 Adrar inu deg iyyar d wagřa nnec d marra řeknuz nnec ad ten wceɣ d takeccaḍt, uřa d řegɛudi nnec [mani tᵉttwehhbed ddbayeḥ], zi ssibbet n ddnub di marra tammurt nnec.
JER 17:4 [Xenni] ad tarxud zi tesɣart nnec nni d ac wciɣ u man aya zi ssibbet n [ddnub n] yixef nnec. Necc ad cek ggeɣ d ismeɣ n řɛedyan nnec deg ict n temmurt i war tessined ca, maɣar kenniw tarrim ict n tmessi ad tsareɣ weɣḍab inu nni i ɣa iqqimen icemmeḍ i řebda.”
JER 17:5 “Ammu i iqqar SIDI: ‘Ad ittwanɛeř weryaz nni ittcařen x bnadem uca igga ddat d uɣiř nnes [i xef ittɛemmed], u wenni uř nnes iḥeyyed x SIDI.
JER 17:6 S minzi ad yiři d řɛerɛar di řexřa, wenni war ittacan x minni dd ɣa yas min icnan, d wenni i ɣa iqqimen deg imucan ittwacemḍen s řeḥmu di řexřa, deg ict temmurt tameǧaḥt war izdiɣen.
JER 17:7 Ad ittwabarek weryaz nni ittcařen x SIDI d wenni iggin SIDI d řaman nnes.
JER 17:8 Ad yiři am tcejjart i ittwaẓẓun ɣar tiɣezratin n waman, tenni iwtin iẓewran nnes ɣar teɣzart. War tessin ca meřmi dd ɣa yas řehmu u tifray nnes ad qqiment d tiziyzawin. Deg ijj n useggʷas n řaẓaɣ war tᵉttisřiw ca uca war tᵉttbeddi ad teksi řɣiǧet nnes.’”
JER 17:9 “Uř d aɣeddar sennej x kuřci, war izemmar ad iggenfa, wi izemmaren ad t issen?
JER 17:10 Necc, SIDI, arezzuɣ deg wuř u ttjarrabeɣ tiẓẓař, ḥima ad xeǧṣeɣ kuř ijj ɛlaḥsab tibridin nnes, ɛlaḥsab řɣiǧet n tmegga nnes.
JER 17:11 Am ict n tsekkurt i issguṭṭyen x [tmeǧařin] nni war dd-turuw, ammu i iǧa wenni iggin agřa, [maca] war iǧi s řḥeqq. Di řwesṭ n wussan nnes ittxeṣṣa ad daysen ismeḥ u ɣar uneggaru nnes ad idweř d abuhaři.”
JER 17:12 “Ijj n řɛarc igdaren s uɛuǧi, yuɛřan aṭṭas zeg umezwaru, [ammu i yeǧa] amcan n Zzawect nneɣ Iqeddsen.
JER 17:13 [Cek] d Řayas n Israil, [a] SIDI, marra inni xak iḥeyyden, ad nfeḍḥen. Inni xafi iḥeyyden, ad twarin [ismawen nsen] deg ucař, maɣar nitni semḥen di SIDI, řɛunṣar n waman iddaren.
JER 17:14 Sgenfa ayi, SIDI, [xenni] ad ggenfiɣ, senjem ayi, [xenni] ad ttwassnejmeɣ, maɣar Cek d izři n uṣebbeḥ inu.
JER 17:15 Xzar, nitni qqaren ayi: ‘Mani iǧa wawař n SIDI? Ejj i-t ad dd-ixecc!’
JER 17:16 Necc ɛemmarṣ war ḥṣareɣ ixef inu maḥend ad iřiɣ d ameksaw awarni ac, war meẓriɣ ɣar wass n arẓiyyet. Cek tessned t: min i d ayi dd-yusin x iyencicen inu, iffeɣ-dd zzat i tiṭṭawin nnec.
JER 17:17 War d ayi snexřiɛ ca, Cek d adurri inu deg wass n řɣar.
JER 17:18 Ejj inni d ayi iḍaffaren ad nfeḍḥen, maca war d ayi ttejji ad nfeḍḥeɣ, ejj i-ten ad nxeřɛen, maca war d ayi ttejji ad nxeřɛeɣ. Siweḍ-dd xasen ass n řɣar uca arẓ i-ten s ict n tareẓẓit s weḍfas.”
JER 17:19 “Ammu i ɣari dd-issiweř SIDI: ‘Uyur uca bedd di tewwart n iḥenjiren n řgens, [tawwurt] i zi ttadfen ijeǧiden n Yahuda u i zi dd-tteffɣen nitnu, u [egg ammu uřa] di marra tiwwura n [tendint] Urcalim
JER 17:20 uca ini asen: Sřem i wawař n SIDI, kenniw ijeǧiden n Yahuda d marra Yahuda d marra imezdaɣ n Urcalim inni ittadfen zi tewwura-ya.’
JER 17:21 Ammu i iqqar SIDI: ‘Ḥḍam x ixef nwem ad tarbum řeḥmeř deg wass n ssebt u ad t tessidfem zi tewwura n Urcalim!
JER 17:22 Deg wass n ssebt war tessuffuɣem ca uřa d ijj n řeḥmeř zi tudrin nwem u war tᵉtteggem uřa d ict n řxedmet. Kenniw ad tessqeddsem ass n ssebt am mammec weṣṣiɣ babatwem.’
JER 17:23 [Maca] nitni war sřin ca u war d ayi wcin amezzuɣ nsen, nitni [maca] ɣennan ayi, maḥend war sřin u war ksin aweddeb.”
JER 17:24 “Mařa tesřim-dd ɣari mliḥ, [ammu i] iqqar SIDI, ad yiři řami war tessidfem řeḥmeř zi tewwura n tendint-a u řami i ɣa tessqeddsem ass n ssebt, war dayes tᵉtteggem uřa d ict n řxedmet,
JER 17:25 [xenni] ad adfen ijeǧiden d řḥukkam nni iqqimen x řɛarc n Dawud zi tewwura n tendint-a, am neddhen ikarruten d iysan, nitni d řḥukkam nsen, iryazen n Yahuda d imezdaɣ n Urcalim. [Xenni] tandint-a ad dayes qqimen zeddɣen imezdaɣ nnes i řebda.
JER 17:26 Nitni ad dd-asen zi tneddam n Yahuda u zi jjwayeh i dd-innḍen i Urcalim, u zi temmurt n Binyamin, u zi Temmurt Iwaṭan, zi Temmurt n Idurar u zi Ljanub, nitni ad awyen taɣarṣt n wecmaḍ d ṣṣedqet n tɣarṣt d tewhibt [n řɣiǧet] d jjawi uca ad awyen tawhibt n uqadi di Taddart n SIDI.
JER 17:27 [Maca] mařa kenniw war ɣari tᵉttesřim ḥima ad tessqeddsem ass n ssebt u ḥima ad tadfem zi tewwura n Urcalim s ijj n řeḥmeř deg wass n ssebt, [xenni] Necc ad ssarɣeɣ ict n tmessi di tewwura nnes nni i ɣa iccen řeqṣur n Urcalim u war ggur ɛemmarṣ ad texsi.”
JER 18:1 Awař nni dd-yusin zi SIDI ɣar Irmiya, inna:
JER 18:2 “Kkar, hwa ɣar taddart n bu-třaxt. Dinni i ɣa jjeɣ awařen inu ad ttwasřen.”
JER 18:3 [Xenni] hwiɣ ɣar taddart n bu-třaxt, uca xzar, ufiɣ t ixeddem ict n řqecɛet x iẓra [ittennḍen].
JER 18:4 Mařa ixsar uɣarraf nni tuɣa ittegg zi třaxt nni iǧan deg ufus n bu-třaxt, Netta igga zzayes ɛawed ijj n uɣarraf nneɣni, am mammec d as ittɣiř d lemliḥ i bu-třaxt maḥend ad t igg.
JER 18:5 [Xenni] yusa-dd ɣari wawař n SIDI, inna:
JER 18:6 “Ma war zemmareɣ Necc ad ggeɣ akidwem am bu-třaxt wanita, [a] taddart n Israil, [ammu i] iqqar SIDI. Xzar, am třaxt deg ufus n bu-třaxt, ammu i teǧam deg ufus inu, [a] taddart n Israil!
JER 18:7 Ict n twařa ad ssiwřeɣ x ijj n řgens u x ict n tgeldit aqa ad [t] qeřɛeɣ, ad [t] hedmeɣ u ad [t] teḥḥiɣ,
JER 18:8 [maca] mařa řgens nni ad dd-idweř zi tuɛeffna nnes i x ssiwřeɣ [akidsen], [xenni] ad nedmeɣ zi řɣar i tuɣa nwiɣ ad as t ggeɣ.
JER 18:9 Ict n twařa nneɣni ad ssiwřeɣ x ijj n řgens u x ict n tgeldit belli ad [t] ssbeddeɣ u ad [t] ẓẓuɣ,
JER 18:10 [maca] mařa ad yegg min iǧan d aɛeffan di tiṭṭawin inu umi war ttesřin ɣar tmijja inu, [xenni] ad nedmeɣ x min icnan i nniɣ ad kidsen t ggeɣ.
JER 18:11 Xenni řexxu, siweř ak-d iryazen n Yahuda u ak-d imezdaɣ n Urcalim, ini: ‘Ammu i iqqar SIDI: Xzar, Necc sswejdeɣ ijj n řɣar ḍidd nwem u Necc ttxarraṣeɣ deg ijj n wenway xawem. Dewřem-dd xenni, kuř ijj zeg webrid nnes aɛeffan, u ɛedřem ibriden nwem d tmegga nwem.’
JER 18:12 Maca nitni qqaren: ‘Řayas walu! Neccin ad neḍfar inwayen [n yixef] nneɣ uca ad negg kuř ijj ɛlaḥsab řeqsaḥet n wuř nnes!’”
JER 18:13 “S uya, ammu i iqqar SIDI: ‘Seqsam řegnus, man wen isřin [ɛemmarṣ] am wa? Taɛzarect Israil tegga ijj n nnɛi d ameqqran.
JER 18:14 Ma ad iḥeyyed ɛemmarṣ wedfeř n Lubnan zeg ict n teṣḍart deg iyyar? Ma ad aẓɣen [ɛemmarṣ] waman ittbuqbuqen, isemmaḍen ittazzřen?
JER 18:15 Maca waxxa amenni ittu ayi řgens inu. Nitni ttawyen tiwhibin n řebxur i [l’aṣnam] ibeṭṭřen inni ten ijjin ad nnqarḍen deg ibriden nsen, di jjurat n wecḥař uya, maḥend ad uyuren deg izubaq n ijj n webrid war iwiṭin,
JER 18:16 maḥend ad arren tammurt nsen d [ict n řqecɛet n] unexřiɛ d tseḍḥact i řebda. Qaɛ wenni ssenni i ɣa ikken, ad innexřeɛ, ad ihezz azeǧif nnes.
JER 18:17 Am usemmiḍ n manis i dd-tneqqar tfuct ad ten zuzzareɣ zzat i řeɛdu. Necc ad asen ssecneɣ aɛrur, war iǧi udem [inu], deg wass n uhellek nsen.’”
JER 18:18 “Nitni [maca] nnan: ‘Asem-dd, jjem aneɣ ad negg tameɛmuč x Irmiya, maɣar Ccariɛa ɛemmarṣ ad iqḍa ɣar ukehhan, ccwar ɣar umiɣis u awař ɣar unabi. Asem-dd, ejj aneɣ ad t newwet s [wawařen n] yiřes nneɣ uca ejj aneɣ war nettic taynit i uřa d ijj zeg wawařen i iqqar.’”
JER 18:19 “Ḥḍa ayi, [a] SIDI, u seř-dd ɣar tmijja n yinni akidi ittmenɣan.
JER 18:20 Ma [xenni] ad ittwaxřef min iṣebḥen s min war iḥřin? Maɣar nitni ɣzin ayi ict n tenḍeč! Idar mammec beddeɣ zzatek ḥima ad ssiwřeɣ di řxir nsen, ḥima ad xasen ḥeyydeɣ asɛar nnec.
JER 18:21 S uya, ewc iḥenjiren nsen i řaẓ uca sellem i-ten i tzemmar n ssif uca ejj timɣarin nsen ad asent acaren iḥenjiren, ad dewřent d tijjař, ejj iryazen nsent ad ttwanɣen u iḥuḍriyyen nsent ad mmten s ssif deg umenɣi.
JER 18:22 Ejj ad tᵉttwaseř tɣuyyit zi tudrin nsen, mařa Cek deɣya tɣeḍred-dd xasen ict n bandiyya umi ɣzin ict n tenḍeč ḥima ad ayi ṭṭfen, u ssarsen řefxux innuffaren i iḍaren inu.
JER 18:23 [A] SIDI, Cek tessned marra anway nsen maḥend ad ayi nɣen. War sduriy řmuɛṣiyyet nsen u war meḥḥi ddnub nsen zzat i wudem nnec, [maca] ejj i-ten ad wḍan zzatek. Egg asen [ammu] di řweqt n weɣḍab nnec.”
JER 19:1 Ammu i iqqar SIDI: “Uyur uca seɣ ijj n uɣarraf n třaxt uca awi [ca zeg] imɣaren n řgens u zeg imɣaren n ikehhanen [akidek].
JER 19:2 Ffeɣ ɣar barra ɣar Teɣzurt n mmis n Hinnum, tenni ɣar wadaf n Tewwart n Iceqfan, uca barreḥ dinni awařen nni i d ac ɣa iniɣ,
JER 19:3 ini: ‘Sřem i wawař n SIDI, [a] ijeǧiden n Yahuda d imezdaɣ n Urcalim! Ammu i iqqar SIDI n řɛeskarat, AREBBI n Israil: Xzar, Necc ad ssiwḍeɣ ict n tecti [tameqqrant] x wemcan-a, maḥend n marra nni tt ɣa isřen, ad ṭneṭnen imezzuɣen,
JER 19:4 maɣar nitni ḥeyyden xafi, arrin amcan-a [d ijj n wemcan] i ibarraniyyen uca qeddmen tiwhibin n řebxur i irebbiten nneɣni nni war ssinen, war iǧi nitni uřa d ibabaten nsen d ijeǧiden n Yahuda. Nitni ɛemmaren amcan-a s idammen n imezdagen.
JER 19:5 Minzi nitni ssbedden řegɛudi [mani ttwehhbent ddbayeḥ nsen] i Baɛl, ḥima ad sscemḍen iḥenjiren nsen s tmessi, am tɣarṣa n wecmaḍ i Baɛl, min war [d asen] umureɣ d min war [ɣarsen] ssiwřeɣ d min ɛemmarṣ war [t] ggiɣ deg wuř inu.’”
JER 19:6 “S uya, xzar, ad dd-asen wussan, [ammu i] iqqar SIDI, war daysen qqaren ɛad i wemcan-a ‘Tufat’ niɣ ‘Taɣzurt n mmis n Hinnum’, maca ‘Taɣzurt n Wenɣay’.
JER 19:7 Maɣar ad ssbeṭṭřeɣ inwayen n Yahuda d Urcalim deg wemcan-a u ad ten ɣeḍřeɣ zzat i wudem n řɛedyan nsen s ssif u s ufus n yinni yarezzun tudart nsen. Necc ad wceɣ řxecbat nsen d macca i ijḍaḍ n ujenna u i řmař n temmurt.
JER 19:8 Necc ad arreɣ tandint-a d [ict n řqecɛet n] unexřiɛ d tseḍḥac. Kuř ijj wenni xas dd ɣa ikken ad innexřeɛ u ad iṣeffar [s asrubi] x marra jjɛayef nnes.
JER 19:9 Necc ad asen ggeɣ ad ccen aysum n iḥenjiren nsen d weysum n yessitsen. Nitni ad ccen, kuř ijj aysum n jjar nnes, di [řweqt nni di] ɣa quwwaren i tendint, di řeḥṣaret i zi ten i ɣa ḥṣaren řɛedyan nsen d yinni yarezzun tudart nsen.”
JER 19:10 [Xenni] ittxeṣṣa ac ad tarẓed aɣarraf jar tiṭṭawin n yeryazen nni akidek yuyuren.
JER 19:11 Ittxeṣṣa ad asen tinid: “Ammu i iqqar SIDI n řɛeskarat: ‘Ammu i ɣa arẓeɣ řgens-a d tendint-a, am mammec ttareẓẓan ijj n uɣarraf n bu-třaxt nni war izemmaren ad t ɛedřen ɛad. Nitni ad ten neḍřen di Tufat umi war din iqqim wemcan mani ɣa neḍřen.
JER 19:12 Ammu i ɣa ggeɣ zeg wemcan-a u zeg imezdaɣ nnes, iqqar SIDI, ḥima ad arreɣ tandint-a am Tufat.
JER 19:13 Tudrin n Urcalim d tudrin n ijeǧiden n Yahuda ad dewřent xemjent am wemcan n Tufat, zi ssibbet n marra tudrin i zi x tzeɣwin nsent qeddmen nitni řebxur i marra řɛeskar n ujenna d tewhibin n useyyeb i irebbiten nneɣni.’”
JER 19:14 Umi dd-iɛqeb Irmiya zi Tufat, mani tuɣa t issekk SIDI maḥend ad inebba, yuyur di řemraḥ n zzat n Taddart n SIDI uca inna i řgens marra:
JER 19:15 “Ammu i iqqar SIDI n řɛeskarat, AREBBI n Israil: ‘Xzar, Necc ad ssiwḍeɣ x tendint-a u x marra tineddam nnes marra řɣar nni x ssiwřeɣ, minzi nitni menɛen taɣennant am ugin ad sřen ɣar wawařen inu.’”
JER 20:1 [Řami] Facḥur, mmis n Immir, akehhan nni ittwaggen d aweqqaf ameqqran x Taddart n SIDI, isřa i Irmiya ittnebba awařen-a,
JER 20:2 iwta Facḥur anabi Irmiya uca iḥebbes i-t deg ukeccuḍ nni iǧan deg wexxam n sennej n Tewwart Yuɛřan n Binyamin nni [iǧan] di Taddart n SIDI.
JER 20:3 Tiwecca nnes ijja Facḥur ad arxun i Irmiya zeg ukeccuḍ. [Xenni] inna as Irmiya: “War d ac iqqar SIDI Facḥur, maca Majur-Missabib.
JER 20:4 Maɣar ammu i iqqar SIDI: ‘Xzar, Necc ad cek ggeɣ d asnexřiɛ i yixef nnec u i marra inni cek ittexsen. Nitni ad wḍan s ssif n řɛedyan nsen, am t ttwařant tiṭṭawin nnec, u Necc ad wceɣ marra Yahuda deg ifassen n ujeǧid n Babil nni ten i ɣa inedhen di tmeḥbast ɣar Babil u ad ten ineɣ s ssif.
JER 20:5 Marra agřa n tendint-a ad ten sellmeɣ u marra min dayes iɣřan d marra tixuba n ijeǧiden n Yahuda ad ggeɣ aya [marra] deg ufus n řɛedyan nsen. Nitni ad ten acaren, ad ten ksin [akidsen] uca ad ten i-dd-awyen ɣar Babil.
JER 20:6 Cek, Facḥur, d marra ayt n taddart nnec, kenniw ad teffɣem d imeḥbas. Cek ad dd-tawḍed ɣar Babil uca ad temmted dinni uca ad ttwaneḍřed dinni, cek d marra imeddukkař nnec inni umi tnebbid s ixarriqen.’”
JER 20:7 “Cek tjebded ayi, [a] SIDI, uca necc ttwassqenɛeɣ. Cek tjehded xafi aṭṭas, tɣeřbed ayi. Ass marra ttɣiman deḥḥcen dayi, marra idsen stehzan zzayi.
JER 20:8 Maɣar meřmi ma ssiwřeɣ, sɣuyyuɣ ‘Řexcunect!’, řaɣiɣ ‘Anexřiɛ!’, maɣar awař n SIDI ittawi ayi-dd ass imun mɣir aseḥqar d ustehzi.
JER 20:9 Nniɣ: ‘Necc war t ttidareɣ [ɛad] u war ssiwiřeɣ [ɛad] s Yisem nnes!’, [xenni] idweř aya deg wuř inu am yict n tmessi yareqqen, tᵉttwaḥbes deg iɣsan inu. Necc ssaḥařeɣ ixef inu maḥend ad ṣbareɣ, maca war d as zemmareɣ.
JER 20:10 Maɣar sřiɣ aceqqef s řhard n waṭṭas: ‘Majur-Missasib’, [‘Asiggʷed zi marra iɣezdisen!’], ammu i qqaren. Uca xenni qqaren: ‘Sargeb aneɣ!, [xenni] neccin ad [zzayes] nbarreḥ!’ Kuř aryaz ak-d ddareɣ di řehna, ittraja ař ɣa nqarḍeɣ. [Qqaren:] ‘Ad taɣ nzemmar ad t neɣwa, xenni ad t neɣřeb uca ad zzayes nexřef.’”
JER 20:11 “SIDI ibedd akidi am yijj n bu-teɣruḍt d ameqqran, x uya i ɣa nnqarḍen inni d ayi iḍaffaren, war zemmaren ad ggen walu. Nitni ad seḍḥan s yixef nsen aṭṭas, minzi war ggin s řeɛqeř. Ad tiři d ict n řefḍiḥet i řebda i war ttᵉttun i řebda.
JER 20:12 [Cek], [a] SIDI n řɛeskarat, wenni ittqeǧaben amsegged, wenni ittwařan tiẓẓař d wuř, scen ayi nneqmet nnec xasen, maɣar necc ggiɣ ac taɣawsa inu deg ufus.”
JER 20:13 “Zehhdem i SIDI, semɣarem SIDI, maɣar Netta ifekk amezřuḍ zeg ufus n iɛeffanen.”
JER 20:14 “Aqa ittwanɛeř ass i di dd-ttwarweɣ! Ass i d ayi dd-turu yemma war ittiři ittwabarek.
JER 20:15 Ittwanɛeř weryaz nni dd-yiwyen řexbar aṣebḥan i baba, inna: ‘Aqa ittwaruw ac-dd uḥenjir!’ uca issfarḥ i-t [ammu] s waṭṭas.
JER 20:16 Ejj aryaz nni ad yiři am tneddam nni issneqřeb SIDI břa ma indem zi man aya. Ejj i-t ad iseř i iɣuyyan [n řeḥriq] ɣar teffut u iɣuyyan [n umenɣi] ɣar ṭṭya n wass,
JER 20:17 minzi Netta war d ayi inɣi deg uɛeddis n yemma. Ammu tedweř yemma d anḍeř inu uca iqqim uɛeddis nnes iksi s ddeyset i řebda!
JER 20:18 Mayemmi i dd-ffɣeɣ zeg uɛeddis? Ma ḥima ad ẓareɣ tamara d wecḍan [waha] u ḥima ad qḍiɣ ussan inu di řefḍiḥet?”
JER 21:1 Awař nni dd-iffɣen zi SIDI ɣar Irmiya, umi ajeǧid Ṣidqiya issekk ɣares Facḥur, mmis n ukehhan Malkiya, d Ṣafanya, mmis n ukehhan Maɛasiya, inna:
JER 21:2 “Seqsa maca SIDI xaneɣ, maɣar Nabuxadraṣṣar, ajeǧid n Babil, ittmenɣa akidneɣ. Ad taɣ SIDI ad dayneɣ igg ict n lmuɛjiza am mammec marra lmuɛjizat nnes, maḥend ad xaneɣ iḥeyyed [Nabuxadraṣṣar].”
JER 21:3 [Xenni] inna asen Irmiya: “Ammu i ɣa tinim i Ṣidqiya:
JER 21:4 ‘Ammu i iqqar SIDI, AREBBI n Israil: Xzar, Necc ad ssenqeřbeɣ deg ifassen nwem řesnaḥ i zi ttmenɣam ak-d ujeǧid n Babil d Ikaldaniyyen, inni d awem dd-innḍen barra i řḥiḍ, u Necc ad ten ssmuneɣ di řwesṭ n tendint-a.
JER 21:5 Necc simant inu ad kidwem menɣeɣ s ufus isswiẓẓḍen d uɣiř ijehden, s weɣḍab d wesɛar u s uduqqez ameqqran [n weɣḍab].
JER 21:6 Necc ad wteɣ imezdaɣ n tendint-a, am iwdan uřa d řmar: nitni ad mmten s ijj n ṭṭaɛun ameqqran.
JER 21:7 Awarni as, [ammu i] iqqar SIDI, Necc ad sseɛduɣ Ṣidqiya, ajeǧid n Yahuda, d imsexxaren nnes d řgens nnes nni iqqimen di tendint-a zi ṭṭaɛun, zi ssif u zi řaẓ, deg ufus n Nabuxadraṣṣar, ajeǧid n Babil, deg ufus n řɛedyan nsen u deg ufus n yinni yarezzun tudart nsen. Netta ad ten ineɣ s řeqḍeɛ n ssif u netta war ittḥinni, war issɛizzi u war yareḥḥem.’”
JER 21:8 “I řgens-a ad tinid: ‘Ammu i iqqar SIDI: Xzar, Necc ggiɣ awem abrid n tudart d webrid n řmewt.
JER 21:9 Wenni i ɣa iqqimen di tendint-a, ad ittwaneɣ s ssif, s řaẓ u s ṭṭaɛun, [maca] wenni zzayes i ɣa iffɣen uca ad iɛdu ɣar Ikaldaniyyen inni kenniw iḥeṣṣaren, ad iqqim iddar uca řeɛmar nnes ad as yiři am tkeccaḍt.
JER 21:10 Maɣar Necc arriɣ-dd s wudem inu ḍidd i wemcan-a, war iǧi i řxar, [ammu i] iqqar SIDI. Amcan-a ad ittwasseɛdu deg ufus n ujeǧid n Babil u netta ad as iqqed timessi.’”
JER 21:11 Zi jjihet n taddart n ujeǧid n Yahuda, sřem i wawař n SIDI:
JER 21:12 “[A] taddart n Dawud, ammu i iqqar SIDI: ‘Seggdem nican di teffut, fekkem wenni ittwakeccḍen zeg ufus n wenni iḥeṣṣaren, niɣ ad yarreẓ wesɛar inu am tmessi ařami war izemmar uřa d ijj ad tt issexsi ɛad zi ssibbet n tmegga nwem tiɛeffanin.
JER 21:13 Xzar, ad cem řeqfeɣ, [cem] tenni izeddɣen di teysart, [cem], [a] taṣḍart n řwaṭa, [ammu i] iqqar SIDI. Kenniw teqqarem: Man wen izemmaren ad ɣarneɣ dd-ihwa, man wen izemmaren ad dd-yadef ɣar tzeddiɣin nneɣ?
JER 21:14 Necc ad kenniw ɛaqbeɣ ɛlaḥsab řɣiǧet n tmegga nwem, [ammu i] iqqar SIDI. Necc ad ggeɣ timessi deg wezɣar nnes nni i ɣa iccen marra min d as dd-innḍen.’”
JER 22:1 “Ammu i iqqar SIDI: ‘Hwa ɣar taddart n ujeǧid n Yahuda, ini din awař-a,
JER 22:2 ad tinid: [A] ajeǧid n Yahuda, wenni iqqimen x řɛarc n Dawud, seř i wawař n SIDI, cek d imsexxaren nnec d řgens nnec i ittadfen zi tewwura-ya!
JER 22:3 Ammu i iqqar SIDI: Ggem řḥeqq d tsegda u ssnejmem min ittwakeccḍen zeg ufus n wenni iḥeṣṣaren. War ḥeṣṣarem, war ccatem řbarrani d uyujiř d tajjač. War ssizziřem idammen imezdagen di temmurt-a!
JER 22:4 Mařa kenniw ad teggem awař-a s tidett, [xenni] ad adfen ijeǧiden zi tewwura n tendint-a, inni i ɣa iqqimen ɣar Dawud x řɛarc nnes, inni i ɣa inedhen ikarruten d yeysan, [wah,] netta d imsexxaren nnes d řgens nnes.
JER 22:5 Mařa war tesřim ca ɣar wawařen-a, aqa jjuǧeɣ i Yixef inu, [ammu] iqqar SIDI, ad tedweř Taddart-a d řxirbet.’”
JER 22:6 “Maɣar ammu i iqqar SIDI x taddart n ujeǧid n Yahuda: ‘[Waxxa] cek tusid ayi x řxaḍar am Jilɛad u am tqiccet n Lubnan, d tidett ad cek tteggeɣ d řexřa, tineddam war izdiɣen.
JER 22:7 Necc ad ḥuzeɣ ḍidd nnec imteḥḥayyen, kuř ijj s řesnaḥ nnes [i wenɣay]. Nitni ad qessen ticejjura nnec n tengelt i icnan aṭṭas [s ccwaqar nsen] uca ad [tent] wcen i tmessi.
JER 22:8 [Xenni] ad dd-kken aṭṭas n řegnus x tendint-a, ad inin, kuř ijj i umqarrab nnes: Mayemmi SIDI igga ammu i tendint-a tameqqrant?
JER 22:9 Ad inin: Minzi nitni semḥen di Řɛahd n SIDI, AREBBI nsen, uca sejden i irebbiten nneɣni uca dewřen ɛebbden asen.’”
JER 22:10 “War ttrum x umettin u war xas ccatem agejdur. Rum x wenni yuyuren, maɣar netta ɛemmarṣ ad dd-iɛqeb, ɛemmarṣ ad iẓar ɛad tammurt nnes mani ixřeq.
JER 22:11 Maɣar ammu i iqqar SIDI x Callum, mmis n Yuciya, ajeǧid n Yahuda, wenni idewřen d ajeǧid deg wemcan n babas Yuciya, [Callum] wenni dd-iffɣen zeg wemcan-a: ‘Netta ɛemmarṣ ad dd-iɛqeb dinni ɛad.
JER 22:12 Maɣar deg wemcan mani t nedhen di tmeḥbast, [dinni] i ɣa immet, ɛemmarṣ ad iẓar tammurt-a ɛawed.’”
JER 22:13 “Axeyyeb i wenni i ɣa issbedden tazeddiɣt nnes s řmuɛṣiyyet, tiɣurfin nnes s řɣecc, wenni issxeddamen wenni t yudsen nehřa axeǧeṣ u war d as ittic řmunet nnes,
JER 22:14 wenni iqqaren: ‘Necc ad ssbeddeɣ i yixef inu ict n tzeddiɣt yuɛřan aṭṭas s tɣurfin iwesɛen.’ [Xenni] ad dayes igg tiburjatin uca ad tt iseqqef s ukeccuḍ n tcejjura n tengelt uca ad tt izewweq s tintat tizeggʷaɣin.
JER 22:15 Ma tḥekkmed am ujeǧid umi tᵉttemḥizwared zi ssibbet n tneglin? Babac ma war icci, ma war iswi u ma war iggi řḥeqq d tsegda? Netta tuɣa mliḥ xas xenni!
JER 22:16 Netta iḥkem tamesřact n wenni ittwaḥṣaren d umezřuḍ. Tuɣa mliḥ xas xenni. Ma aya war ixs ad yini aqa bnadem issen ayi?, [ammu i] iqqar SIDI.
JER 22:17 Maca tiṭṭawin nnec d wuř nnec aqa ten mɣir x tizi nnec waha, x idammen imezdagen maḥend ad ten tessizzřed, u x ddeǧ d ubeɛɛej, maḥend ad ten tegged.”
JER 22:18 “S uya, ammu i iqqar SIDI x Yahuyaqim, mmis n Yuciya, ajeǧid n Yahuda: ‘Nitni war xas ceṭṭnen: Ax, uma! niɣ: Ax, učma! Nitni war ceṭṭnen: Ax, sidi! niɣ: Ax, lɛaḍim!
JER 22:19 Ad neḍřen s wenḍař n ijj n weɣyuř. Ad t jarren u ad t nḍaren ɣar řaggʷaj, barra i tiwwura n Urcalim.’”
JER 22:20 “Geɛɛed x [idurar n] Lubnan, sɣuyy uca ejj tmijja nnem ad tᵉttwaseř di Bacan. Sɣuyy-dd ɛawed zi Abarim, maɣar marra inni cem ittexsen ttwarẓan.
JER 22:21 Necc ssiwřeɣ akidem řami cem tuɣa di řaman, cem maca tennid: ‘Necc war xseɣ ad sřeɣ!’ Ammu i t teggid zi temẓi nnem, maɣar cem tuɣa war tᵉttexsed ad tesřed i tmijja inu.
JER 22:22 Marra imeksawen ad ten yarwes usemmiḍ uca inni cem ittexsen ad uyuren di tmeḥbast. Xenni ad tseḍḥid uca ad tenfeḍḥed zi ssibbet n marra tuɛeffna nnem.
JER 22:23 Cem, [a] tenni izeddɣen x [idurar n] Lubnan, tenni iḥebḍen di tcejjura n tneglin, mammec i ɣa tzehhared xmi d am dd ɣa yasen řewjeɛ, řeḥriq am yicten tᵉttaru!”
JER 22:24 “[S tidett am] ddareɣ Necc, [ammu i] iqqar SIDI: ‘Waxxa, mařa Kun-Yahu, mmis n Yahuyaqim, ajeǧid n Yahuda, tuɣa d txadent n ucemmiɛ deg ufus inu, aqa ad cek kkseɣ ssenni.
JER 22:25 Necc ad cek wceɣ deg ufus n yinni yarezzun tudart nnec u deg ufus n wenni zi tᵉtteggʷeded, deg ufus n Nabuxadraṣṣar, ajeǧid n Babil, u deg ufus n Ikaldaniyyen.
JER 22:26 Cek d yemmac, ad kenniw nḍareɣ ɣar ict n temmurt nneɣnit mani war texřiqem, uca dinni ad tmetnem.
JER 22:27 War ttɛiqqibem ɛemmarṣ ɣar temmurt nni di temmeẓrem maḥend ad ɣares dd-tɛeqbem.’”
JER 22:28 “Ma Kun-Yahu aryaz-a d ijj n uɣarraf immenḍar, yarreẓ? Niɣ netta d ijj n uɣarraf war t ittexs ɛad uřa d ijj? Mayemmi t ḥejjaren, netta d zzariɛet nnes, nḍaren [ten] ɣar ict n temmurt war tt ssinen?
JER 22:29 [A] tammurt, tammurt, tammurt, seř i wawař n SIDI!
JER 22:30 Ammu i iqqar SIDI: ‘Zemm aryaz-a nhřa iḥenjiren, ijj n weryaz nni war ɣar iǧi zzhir deg wussan nnes. Maɣar uřa d ijj zeg warraw nnes ad ɣares yiři zzhir [ařami] i ɣa iqqim x řɛarc n Dawud, ad iḥkem ɛawed di [temmurt n] Yahuda.’”
JER 23:1 “Uct x imeksawen i ineqqen u zuzzaran uǧi n ddmani inu n tarewsa, [ammu i] iqqar SIDI.
JER 23:2 S uya ammu i iqqar SIDI, AREBBI n Israil, x imeksawen nni yarekkwsen řgens inu: ‘Kenniw tzuzzarem uǧi inu uca tuẓẓřem xasen. Kenniw war ten teḥḍim. Xzar, Necc ad xeřfeɣ zi tuɛeffna d tmegga nwem, [ammu i] iqqar SIDI.
JER 23:3 Necc ad ssmuneɣ min iqqimen n wuǧi inu zi marra timmura mani xasent uẓẓřeɣ. Necc ad tent arreɣ ɣar řkurit nsent, ad arwent, ad mmarnint.
JER 23:4 Necc ad asent ggeɣ imeksawen nni tent i ɣa yarewsen. Nitni war tteggʷdent ɛad u war ttnexřiɛent u war ttweddirint!’, [ammu i] iqqar SIDI.”
JER 23:5 “Xzar, ad dd-asen wussan, [ammu i] iqqar SIDI, aqa Necc ad ssekkareɣ i Dawud AƔEDDU n tsegda. Netta ad iḥkem am Ujeǧid, ad ifřeḥ uca ad igg řḥeqq d tsegda di temmurt.
JER 23:6 Deg wussan nnes ad ittwassenjem Yahuda uca Israil ad izdeɣ di řaman. Wa ad yiři d Isem i zi d as i ɣa řaɣan: SIDI, Tasegda nneɣ.”
JER 23:7 “S uya, xzar, ad dd-asen wussan, [ammu i] iqqar SIDI, war qqaren ɛad: ‘S tidett am iddar SIDI nni dd-issuffɣen ayt n Israil zi Miṣra!’,
JER 23:8 maca: ‘S tidett am iddar SIDI nni dd-isgeɛɛden zzariɛet n taddart n Israil, wenni ten dd-yarrin zi temmurt n ccamal u zi marra timmura manis xasen uẓẓřeɣ. Nitni ad zedɣen di temmurt nsen.’”
JER 23:9 X inabiyyen. “Uř inu ittwarẓ di daxeř inu, marra iɣsan inu ttarjijin. Necc dewřeɣ am yijj n umescur, am weryaz nni yarni binu, zi ssibbet n SIDI u zi ssibbet n wawařen nnes iqeddsen.
JER 23:10 Maɣar tammurt teccur s yinni izennan, maɣar tammurt tecḍen zi ssibbet n nneɛřet, ddmani n tarewsa di řexřa uẓɣent. Mani xsen ad awḍen aqa-t d aɛeffan, uřa d jjehd nsen war iǧi ca nican.
JER 23:11 Maɣar am unabi am ukehhan ttwafesden, ɛad di Taddart inu ttafeɣ tuɛeffna nsen, [ammu i] iqqar SIDI.
JER 23:12 S uya ad dd-asen idweř webrid nsen am yijj n řewḍa itteḥruǧuḍ di taǧest. Ad ttwaɛarrnen u nitni ad zzayes dd-wḍan, maɣar ad xasen dd-ssehwiɣ ict n tecti taɛeffant deg useggʷas i zzaysen i ɣa xeřfeɣ, [ammu i] iqqar SIDI.”
JER 23:13 “Aqa Necc ẓriɣ timesřayin isstebhaten ɣar inabiyyen n Samarya: nitni tuɣa ttnabben s Baɛl uca ttɣarran řgens inu.
JER 23:14 [Maca] ɣar inabiyyen n Urcalim ẓriɣ ijj n nnɛi d aɛeffan qaɛ: nitni zennan, uyuren am ssxarriqen uca ssjehden ifassen n iɛeffanen ařami uřa d ijj war dd-iɛqeb zeg webrid nnes aɛeffan. Mammec ttwařiɣ Necc, marra idsen am Sadum, uca imezdaɣ n Urcalim [i Necc] am Ɛamurra.
JER 23:15 S uya, ammu i iqqar SIDI n řɛeskarat, AREBBI n Israil: Xzar, Necc ad wceɣ cciḥ d macca i řgens-a uřa d aman n arrhaj maḥend ad ten swen, minzi zeg inabiyyen di Urcalim iffeɣ-dd uɣesseb [n Ccariɛa] ɣar marra tammurt.
JER 23:16 Ammu i iqqar SIDI n řɛeskarat: War ttesřim ca i wawařen n inabiyyen nni d awem ittnebban, [am] ssawařen akidwem baṭeř. Nitni ssawařen ijj n řewḥiy n wuř [n yixef] nsen, war [ssiwiřen] [řewḥiy] zeg uqemmum n SIDI.
JER 23:17 Řebda qqaren i yinni d ayi isseḥqaran: SIDI inna i-t, ad ɣarwem yiři řehna! U i kuř ijj wenni igguren di řeqsaḥet n wuř nnes, qqaren: War dd xawem ittemsar uřa d ijj n řɣar!
JER 23:18 Maɣar man wen [zzaysen] tuɣa ibedd di řḥeřqet n imcawaren n SIDI, iẓra awař nnes u isřa as? Wi issḥessen i wawař nnes uca isřa ɣares?
JER 23:19 Xzar, taḥaryaḍt n SIDI, iffeɣ-dd [zzayes] wesɛar, ict n tḥaryaḍt tezzebzib nni dd ɣa ihwan x uzeǧif n iɛeffanen.
JER 23:20 Aɣḍab n SIDI war dd-iddikkʷiř ca ař ɣa yiřin ixarriṣen n wuř nnes. Deg uneggar n wussan ad as tfehmem s řefhamet tekmeř.
JER 23:21 Necc war dd-ssekkiɣ ca inabiyyen nni, [waxxa amenni] gguren ttazzřen nitni. Necc war ɣarsen ssiwřeɣ ca, [waxxa amenni] bdan ad nebban deɣya [zeg yixef nsen].
JER 23:22 Mři tuɣa nitni bedden di řheřqet n imcawaren inu, iři arrin řgens inu ad iseř i wawařen inu u iři arrin ten ad dd-dewřen zeg webrid nsen aɛeffan u zi řɣar n tmegga nsen.”
JER 23:23 “Necc d ijj n AREBBI zi řadas, [ammu i] iqqar SIDI, war iǧi ijj n AREBBI zi řaggʷaj?
JER 23:24 Ma izemmar ca n yijjen ad innuffar deg imucan innuffaren, ařami Necc war t ẓarreɣ, iqqar SIDI. Ma war iǧi d Necc wenni iccuren ajenna d temmurt?, iqqar SIDI.
JER 23:25 Necc sřiɣ min qqaren inabiyyen nni ittnebban am ssxarriqen deg Yisem inu, qqaren: ‘Tuɣa ɣari ict n tirja, ict n tirja!’
JER 23:26 Ař meřmi [ɛad] ad iřint tirja deg wuř n inabiyyen nni ittnebban am ssxarriqen? Nitni d inabiyyen n wecmaṭ n wuř [n yixef] nsen,
JER 23:27 inni yarezzun ad arren řgens inu ad ittu Isem inu s tirja nsen nni tthajan ijj i wenneɣni, am mammec ibabaten nsen ttun Isem inu s Baɛl.
JER 23:28 Anabi nni ɣares ict n tirja, ejj i-t ad tt iḥaja, u [anabi] nni ɣar iǧa wawař inu, ejj i-t ad issiweř awař inu s tidett. Maɣar min dd-yiwyen řum ɣar imendi, iqqar SIDI.
JER 23:29 Ma war iǧi wawař inu am tmessi, iqqar SIDI, uca am yijj n wefḍis i iřebbzen taṣḍart?
JER 23:30 S uya, xzar, Necc ad řeqfeɣ inabiyyen nni, [ammu i] iqqar SIDI, inni ittacaren awařen inu ijj n wenneɣni.
JER 23:31 Xzar, Necc ad řeqfeɣ inabiyyen nni, iqqar SIDI, inni issxeddamen iřes nsen u ssawařen [zzayes ammu]: ‘Netta iqqar!’
JER 23:32 Xzar, Necc ad řeqfeɣ inni ittnebban s tirja ixarriqen, [ammu i] iqqar SIDI. Nitni ttḥajan tirja nni u [ammu i] ttɣarran řgens inu zeg ixarriqen nsen d řhard nsen ibeṭṭřen. Necc war ten dd-ssekkeɣ u war d asen wciɣ awař. Nitni war ǧin d nnfeɛ i řgens, [ammu i] iqqar SIDI.”
JER 23:33 “Xmi cek i ɣa isseqsa ijj n řgens niɣ ijj n unabi niɣ ijj n ukehhan, ad yini: ‘Min iɛna [xenni] řḥukm issaggʷaden n SIDI?’, xenni cek ad asen tinid: ‘Min iɛna [xenni] řḥukm issaggʷaden?’ ‘Ad kenniw nḍareɣ!’, [ammu i] iqqar SIDI.
JER 23:34 Anabi d ukehhan d řgens nni iqqaren [am stᵉhezzan]: ‘Řḥukm issaggʷaden n SIDI?’, aryaz nni d taddart nni ad zzayes xeřfeɣ.
JER 23:35 Ammu ittxeṣṣa ad tinim, kuř ijj i jjar nnes u kuř ijj i umas: ‘Mammec xak dd-yarra SIDI?’, u: ‘Min inna SIDI?’
JER 23:36 War tidarem ɛad řḥukm issaggʷaden n SIDI, maɣar řḥukm issaggʷaden n SIDI ad yiři min ɣa yini kuř ijj: aqa kenniw tessfarɣem awařen n AREBBI iddaren, SIDI n řɛeskarat, AREBBI nneɣ.
JER 23:37 Ammu i ɣa tinid i unabi: ‘Mammec xak dd-yarra SIDI?’, niɣ: ‘Min inna SIDI?’
JER 23:38 [Maca] umi teqqarem kenniw: ‘Řḥukm issaggʷaden n SIDI?’, s uya, ammu i iqqar SIDI, umi kenniw teqqarem awař-a: ‘Řḥukm issaggʷaden n SIDI?’, waxxa Necc ssekkeɣ-dd ɣarwem [ijjen] ḥima ad awem yini: ‘Kenniw war teqqarem ca: Řḥukm issaggʷaden n SIDI?’,
JER 23:39 s uya, xzar, Necc ad kenniw ttuɣ qaɛ. Necc ad kenniw nḍareɣ zi zzat i wudem inu ak-d tendint nwem nni d awem wciɣ i kenniw uřa i řejdud nwem.
JER 23:40 Necc ad xawem dd-ssehwiɣ řḥegra i řebda d řefḍiḥet i řebda nni war ittwattun ɛemmarṣ.”
JER 24:1 SIDI ijja ayi ad ẓareɣ man aya. Xzar, ttwassarsent tnayen n tsuǧatin n tazart qibač i Zzawect Tameqqrant n SIDI awarni i umi tuɣa Nabuxadraṣṣar, ajeǧid n Babil, indeh Yakunya, mmis n Yahuyaqim, ajeǧid n Yahuda, d řḥukkam n Yahuda ak-d iḥrayfiyyen d yemziřen zi Urcalim di lmenfa ɣar Babil.
JER 24:2 Deg ict n tsuǧet tuɣa [din] tazart iṣebḥen, am řbacur. Di tsuǧet nneɣnit tuɣa din tazart war teḥri aṭṭas, zeɛma war teḥri ařami war izemmar ad tᵉttwacc.
JER 24:3 Inna ayi SIDI: “Min tᵉttwařid cek, Irmiya?” Necc nniɣ: “Tazart. Tazart iṣebḥen teṣbeḥ aṭṭas, uca tenni war iḥřin aṭṭas, war teḥři ařami war tᵉttwicci.”
JER 24:4 [Xenni] yusa-dd ɣari wawař n SIDI, inna:
JER 24:5 “Ammu i iqqar SIDI, AREBBI n Israil: ‘Am tazart iṣebḥen ammu i ɣa ḥesbeɣ ṣebḥen inni ittwanedhen di tmeḥbast zi Yahuda, inni x uẓẓřeɣ zeg wemcan-a ɣar temmurt n Ikaldaniyyen.
JER 24:6 Necc ad xasen ssarseɣ tiṭṭawin inu s arḍa uca ad ten arreɣ ad ɛeqben ɣar temmurt-a. Necc ad ten ssbeddeɣ, war ten heddmeɣ, ad ten ẓẓuɣ, war ten qeǧɛeɣ.
JER 24:7 Necc ad asen wceɣ ijj n wuř maḥend ad ayi ssnen, belli aqa Necc d SIDI. Nitni ad iřin d řgens inu u Necc ad iřiɣ d AREBBI nsen, maɣar nitni ad ɣari dd-dewřen s wuř nsen imun.’”
JER 24:8 “Am tazart war iḥřin, tenni war teḥři aṭṭas ařami war tᵉttwicci, iqqar SIDI, ammu i ɣa arreɣ Ṣidqiya, ajeǧid n Yahuda, d řḥukkam nnes d min iqqimen zi Urcalim d yinni izeddɣen di temmurt n Miṣra.
JER 24:9 Necc ad ten arreɣ d [ict n řqecɛet n] unexřiɛ i marra tigeldiwin n ddunect, d řḥegra d ijj n umedya d [ict n řqecɛet n] ustehzi d ict n nneɛřet di marra imucan mani xasen i ɣa yaẓẓřeɣ.
JER 24:10 Necc ad ssekkeɣ jar asen ssif d řaẓ d ṭṭaɛun ař dd-ttwakksen marra zi temmurt i asen wciɣ, i nitni u i řejdud nsen.”
JER 25:1 Awař nni dd-yusin ɣar Irmiya x marra řgens n Yahuda, deg useggʷas wiss arebɛa n Yahuyaqim, mmis n Yuciya, ajeǧid n Yahuda. Tuɣa-t d aseggʷas amezwaru n Nabuxadraṣṣar, ajeǧid n Babil.
JER 25:2 Inna unabi Irmiya [awař-a] i marra řgens n Yahuda u i marra imezdaɣ n Urcalim, inna:
JER 25:3 “Zeg useggʷas wiss třeṭṭac n Yuciya, mmis n Amun, ajeǧid n Yahuda, ař ass-a, aqa i yijj n řmijjař n třata u-ɛicrin n iseggʷusa, yusa-dd ɣari wawař n SIDI u necc tuɣa ssawařeɣ akidwem, [wah,] zeg umezwaru tuɣa necc ssawařeɣ [akidwem], [maca] kenniw war tesřim ca.
JER 25:4 SIDI issekk-dd ɛawed marra imsexxaren nnes, inabiyyen, zeg umezwaru issekk i-ten-dd, [maca] kenniw war tesřim u war tewcim ca amezzuɣ nwem ḥima ad tesřem.
JER 25:5 Nitni nnan: ‘Dewřem-dd, kuř ijj zeg webrid nnes aɛeffan u zi tuɛeffna n tmegga nwem uca zedɣem di temmurt nni d awem iwca SIDI u i řejdud nwem zi řebda i řebda qaɛ.
JER 25:6 War ttraddafem irebbiten nneɣni ḥima ad asen tɛebdem u ad asen tbendqem. War d ayi seɛɛarem s tmegga n ifassen nwem, maḥend war d awem tteggeɣ řɣar.’
JER 25:7 Maca kenniw war ɣari tesřim ca, [ammu i] iqqar SIDI, ařami d ayi tesɛarem s tmegga n ifassen nwem, i txessart nwem.”
JER 25:8 “S uya, ammu i iqqar SIDI n řɛeskarat: ‘Minzi kenniw war tesřim ca ɣar wawařen inu,
JER 25:9 xzar, s uya ad ggeɣ ad awyeɣ marra řaǧat zi ccamal, [ammu i] iqqar SIDI, uřa d Nabuxadraṣṣar, ajeǧid n Babil, amsexxar inu. Necc ad ten ssiwḍeɣ x temmurt-a u x imezdaɣ nnes u x marra řegnus i d as dd-innḍen uca ad ten ḥarrmeɣ i uteḥḥi. Necc ad ten ggeɣ d [ict n řqecɛet n] unexřiɛ d tseḍḥact uřa d řxirbat i řebda.
JER 25:10 Necc ad zzaysen kkseɣ řḥess n řefraḥet d řḥess n warcaq, tmijja n muřay d tmijja n tesřit, ddriz n yeẓra n tsirt uřa d tfawt n řefnar.
JER 25:11 Tammurt-a marra ad tedweř d řxirbet uřa d [ict n řqecɛet n] unexřiɛ, u řegnus-a ad sexxaren ajeǧid n Babil, sebɛin n iseggʷusa.
JER 25:12 Xmi ɣa ɛdun sebɛin n iseggʷusa nni, xenni ad xeřfeɣ zeg ujeǧid n Babil d řgens nni x řmuɛṣiyyet nsen, [ammu i] iqqar SIDI, uřa x temmurt n Ikaldaniyyen. Necc ad tt arreɣ d ict n temmurt ittwareddǧen i řebda.
JER 25:13 Necc ad dd-ssehwiɣ x temmurt nni marra awařen inu nni xas nniɣ, marra min yurin deg wedlis ittwannḍen, min inebba Irmiya x marra řegnus.
JER 25:14 Maɣar uřa d nitni, [wah,] nitni, ad ɛebbden i waṭṭas n řegnus d ijeǧiden imeqqranen, uca [ammu] Necc ad zzaysen xeřfeɣ ɛlaḥsab timegga nsen u ɛlaḥsab řxedmet n ifassen nsen.’”
JER 25:15 “Maɣar ammu i d ayi inna SIDI, AREBBI n Israil: ‘Ksi řkas-a n binu n wesɛar zeg ufus inu u ewc i-t i marra řegnus mani cek i ɣa ssekkeɣ, ḥima ad swen,
JER 25:16 maḥend ad swen, ad meyyřen ssa ɣar da, ad dewřen ttbuhřuyen zi ssibbet n ssif nni dd ɣa ssekkeɣ jar asen.’”
JER 25:17 [Awarni uya] ksiɣ řkas zeg ufus n SIDI, wciɣ t i marra řegnus, mani i d ayi issekk SIDI:
JER 25:18 ... i Urcalim d tneddam n Yahuda, i ijeǧiden nnes d řḥukkam nnes, ḥima ad ten arreɣ d řxirbet, d [ict n řqecɛet n] unexřiɛ d tseḍḥact uřa d nneɛřet, am [teǧa] ass-a,
JER 25:19 ... i Fiřɛun, ajeǧid n Miṣra, i umsexxaren nnes, řḥukkam nnes u i marra řgens nnes,
JER 25:20 ... i ubarru n ɛřam kuř ibarraniyyen ... i ijeǧiden n temmurt n Ɛuṣ ... i marra ijeǧiden n temmurt n Ifilisṭiniyyen, i Acqalun, Ɣazza, Ɛaqrun u i marra min iqqimen zi Acdud,
JER 25:21 ... i Idum, Mu’ab d ayt n Ɛammun,
JER 25:22 ... i marra ijeǧiden n Ṣur, i marra ijeǧiden n Ṣidun u i ijeǧiden n tegzirin x ujemmaḍ n řebḥar,
JER 25:23 ... i Dadan, Tayma, Buz d marra inni ittḥeffan [acuwwaf] ɣar ṭṭrufa,
JER 25:24 ... i marra ijeǧiden n temmurt n Weɛraben u i marra ijeǧiden n ɛřam kuř ibarraniyyen nni izeddɣen di řexřa,
JER 25:25 ... i marra ijeǧiden n Zimri, u i marra ijeǧiden n Ɛilam u i marra ijeǧiden n Maday,
JER 25:26 ... i marra ijeǧiden n ccamal, inni yudsen d yinni iggʷejen, ijjen awarni i wenneɣni, ... i marra tigeldiwin n ddunect i iǧan x wudem n temmurt, uca awarni asen marra ad isu ujeǧid n Cicak, ixs ad yini Babil.
JER 25:27 “Ad asen tinid: ‘Ammu i iqqar SIDI n řɛeskarat, AREBBI n Israil: Swem, scarem, ɛuqqem, wḍam u war tekkarem ɛad zzat i ssif i dd ɣa ssekkeɣ jar awem.’
JER 25:28 Xmi ɣa agin ad ksin řkas zeg ufus nnec maḥend ad t swen, [xenni] ini asen: ‘Ammu i iqqar SIDI n řɛeskarat: Ad teswem s uɣiř!
JER 25:29 Maɣar xzar, di tendint i x ittwabarreḥ s Yisem inu, ad bdiɣ s řɣar. Ma ad daywem ggen am tteggen ak-d imezdagen? Kenniw war ttwaḥesben d imezdagen, maɣar ad řaɣiɣ i ssif ḍidd i marra imezdaɣ n temmurt, [ammu i] iqqar SIDI n řɛeskarat.’”
JER 25:30 “Ad xasen tnebbid marra awařen-a uca ad d asen tinid: ‘SIDI ad dd-izehhar zi sennej uca Netta ad issgeɛɛed tmijja nnes zi Tzeddiɣt nnes Iqeddsen. Netta ad izehhar x Tzeddiɣt nnes, ad iřaɣa am t tteggen inni yareffsen aḍiř, ḍidd i marra imezdaɣ n ddunect.
JER 25:31 Ad dd-yas ijj n řḥess issnexřiɛen ař tma n temmurt, minzi SIDI ɣares ict n ddeɛwet ak-d řegnus. Netta ad iḥkem x bnadem am ikmeř, ad iɛarren marra iɛeffanen ɣar ssif, [ammu i] iqqar SIDI.’
JER 25:32 Ammu i iqqar SIDI n řɛeskarat: ‘Xzar, ijj n řɣar tessuruf zi řgens ɣar řgens nneɣni, ict n tharyaḍt tewɛar tekkar-dd zi tmuwwa n temmurt.
JER 25:33 Deg wass nni ad iřin inni ittwassnuqqben [s ssif] x ict n tma n temmurt ař tma nneɣni. War xasen ttrun, war ten jarrwen u war ten neṭṭřen. Ad dewřen d řeɣbar x wudem n temmurt.
JER 25:34 Rum, [kenniw] imeksawen, sɣuyem. Zuzzarem [acař] x yixef nwem, [kenniw] inni ɣar iǧa jjehd x tḥimriwin n wuǧi, maɣar yiweḍ-dd řḥař n tɣarṣt nwem, u Necc ad kenniw zuzzareɣ u kenniw ad tefruryem am yijj n uɣarraf iɣřa.
JER 25:35 War tneffeɛ tarewřa i imeksawen uřa d wenjam n yinni ɣar iǧa jjehd x tḥimriwin n wuǧi.
JER 25:36 Sḥessem mammec sɣuyyun imeksawen s jjehd, [mammec] ttrun inni ɣar iǧa jjehd x tḥimriwin n wuǧi, minzi SIDI ittareddeǧ ddmani nsen n tarewsa.
JER 25:37 Maɣar ddmani n tarewsa ad dewřen ugnun zi ssibbet n řḥaduq n weɣḍab n SIDI.
JER 25:38 Am weyrad ameẓyan ijja Netta adurri nnes, maɣar tammurt nsen tedweř d [ict n řqecɛet n] unexřiɛ s řḥaduq [n ssif] n wenni iḥeṣṣaren, s řḥaduq n weɣḍab nnes.’”
JER 26:1 Deg umezwaru n tgelda n Yahuyaqim, mmis n Yuciya, ajeǧid n Yahuda, yusa-dd wawař-a zi SIDI, inna:
JER 26:2 “Ammu i iqqar SIDI: ‘Bedd di řemraḥ n zzat n Taddart n SIDI uca ini marra awařen-a nni zi cek weṣṣiɣ maḥend ad zzaysen tessiwřed i [imezdaɣ n] marra tineddam n Yahuda nni dd-yusin maḥend ad bendqen di Taddart n SIDI. War ttejji uřa d ijj n wawař war t teqqared.
JER 26:3 Ad taɣ ad sřen, ad dd-dewřen, kuř ijj zeg webrid aɛeffan nnes, uca ad nedmeɣ x řɣar nni nwiɣ ad daysen t ggeɣ zi ssibbet n tuɛeffna n tmegga nsen.
JER 26:4 Ini asen: ‘Ammu i iqqar SIDI: Mařa kenniw war tᵉttexsem ad ɣari tesřem maḥend ad tuyurem ɛlaḥsab Ccariɛa inu nni d awem ggiɣ deg ufus,
JER 26:5 [u maḥend] ad tesřem ɣar wawařen n imsexxaren inu, inabiyyen nni d awem dd-ssekkeɣ zeg umezwaru, waxxa kenniw war [d asen] tesřim,
JER 26:6 xenni ad ggeɣ ak-d Taddart-a am ggiɣ ak-d Cilu, uca ad arreɣ tandint d nneɛřet i marra řegnus di temmurt.’”
JER 26:7 Ikehhanen d inabiyyen d marra řgens sřin mammec issiweř Irmiya awařen-a di Taddart n SIDI.
JER 26:8 Umi ikemmeř Irmiya awař x marra min tuɣa i d as iweṣṣa SIDI maḥend ad t inna i marra řgens, ṭṭfen t ikehhanen d inabiyyen d marra řgens uca nnan: “Ittxeṣṣa ad temmted!
JER 26:9 Mayemmi tnebbid s Yisem n SIDI, tennid: ‘Taddart-a ad tedweř am Cilu u tandint-a ad tᵉttwareddeǧ ařami war dayes izeddeɣ uřa d ijjen?’” Marra řgens imun x Irmiya di Taddart n SIDI.
JER 26:10 Umi sřin řḥukkam n Yahuda awařen-a, ffɣen-dd zi taddart n ujeǧid geɛɛden ɣar Taddart n SIDI, qqimen ɣar wadaf n tewwart n jdid n Taddart n SIDI.
JER 26:11 [Xenni] ssiwřen ikehhanen d inabiyyen ak-d řḥukkam u ak-d marra řgens, nnan: “Aryaz-a isdaheǧ řmewt, am mammec tt tesřam s imezzuɣen nwem.”
JER 26:12 [Xenni] issiweř Irmiya ak-d marra řḥukkam u ak-d marra řgens, inna: “SIDI issekk ayi-dd ḥima ad nebbiɣ marra awařen i tesřim ḍidd i Taddart-a u ḍidd i tendint-a.
JER 26:13 [Xenni] řexxu, ɛedřem ibriden nwem d tmegga nwem uca ṣřem i tmijja n SIDI, AREBBI nwem, [xenni] ad indem SIDI zi marra řɣar i xawem inna.
JER 26:14 [Maca] necc, xzar, aqa ayi deg ufus nwem, ggem zzayi mammec i d awem ittɣiř d lemliḥ d nican di tiṭṭawin nwem.
JER 26:15 Snem [maca] nican, mařa kenniw tenɣim ayi, ad dd-tawyem idammen imezdagen x yixef nwem u x tendint-a u x imezdaɣ nnes, minzi s tidett, SIDI issekk ayi-dd ɣarwem maḥend ad awem iniɣ marra awařen-a deg imezzuɣen nwem.”
JER 26:16 Řḥukkam d marra řgens nnan i ikehhanen u i inabiyyen: “Aryaz-a war issdiḥeǧ řmewt, maɣar netta issawař akidneɣ s Yisem n SIDI, AREBBI nneɣ.”
JER 26:17 Ca n iryazen zeg imɣaren n temmurt kkaren, bedden. Nitni ssiwřen ɣar marra agraw n řgens, nnan:
JER 26:18 “Mixa zi Muracit tuɣa ittnabba deg wussan n Ḥizqiya, ajeǧid n Yahuda, uca issiweř ɣar marra řgens n Yahuda, inna: ‘Ammu i iqqar SIDI n řɛeskarat: Ṣihyun ad tᵉttwacarz am yijj n yeyyar u [tandint n] Urcalim ad tedweř d řxarbet u adrar n Taddart-a [ad idweř] d řegɛudi [mani ɣa wehhben tiwhibin] deg wezɣar.’
JER 26:19 Ma inɣa i-t Ḥizqiya, ajeǧid n Yahuda, d marra Yahuda? Ma war iggʷid netta SIDI u iksi s řmeɛruf řebda i SIDI ařami indem SIDI x řɣar i xasen iqqar? Neccin ad negg ijj n řɛib d ameqqran i yixef nneɣ.”
JER 26:20 Tuɣa din ɛad ijj n weryaz [nneɣni] wenni tuɣa ittnebban s Yisem n SIDI, Uriya, mmis n Camɛiya, zi Qaryat-Yaɛarim. Netta inebba ḍidd i tendint-a u ḍidd i temmurt-a ɛlaḥsab marra awařen nni inna Irmiya.
JER 26:21 [Xmi] isřa ujeǧid Yahuyaqim [jmiɛ] ak-d marra řḥukkam awařen nnes, ixs ujeǧid ad t ineɣ. Isřa Uriya aya, iggʷed, yarweř u yiweḍ ɣar Miṣra.
JER 26:22 Ajeǧid Yahuyaqim [maca] issekk iryazen ɣar Miṣra: Il-Natan, mmis n Ɛakbur ak-d ca n iryazen. Issekk i-ten ɣar Miṣra.
JER 26:23 Nitni iwyen-dd Uriya zi Miṣra uca nedhen t ɣar ujeǧid Yahuyaqim u wanita inɣa i-t s ssif. Netta inḍar řxecbet nnes deg imeḍřan n tarwa n řgens.
JER 26:24 [Maca] afus n Axiqam, mmis n Cafan, tuɣa-t ak-d Irmiya maḥend war t tticen deg ifassen n řgens maḥend ad t nɣen.
JER 27:1 Deg umezwar n tgelda n Yahuyaqim, mmis n Yuciya, ajeǧid n Yahuda, yusa-dd wawař-a ɣar Irmiya, inna:
JER 27:2 “Ammu i d ayi inna SIDI: ‘Egg i yixef nnec iseɣwan d izayřuten, u ssars i-ten x yiri nnec
JER 27:3 uca sekk i-ten i ujeǧid n Idum, i ujeǧid n Mu’ab, i ujeǧid n ayt n Ɛammun, i ujeǧid n Ṣur u i ujeǧid n Ṣidun, s ufus n imsexxaren inni dd-yusin ɣar Urcalim ɣar Ṣidqiya, ajeǧid n Yahuda.
JER 27:4 Umur asen ad inin i isiditen nsen: Ammu i iqqar SIDI n řɛeskarat, AREBBI n Israil, ammu i ittxeṣṣa ad tinim i isiditen nwem:
JER 27:5 S jjehd inu ameqqran d ufus inu isswiẓẓaden ggiɣ tammurt d bnadem d řebhayem nni iǧan x wudem n temmurt uca Necc ad ten wceɣ i wenni isdaheǧen di tiṭṭawin inu.
JER 27:6 [Xenni] řexxu, Necc ggiɣ marra timmura-ya deg ufus n Nabuxadnaṣṣar, ajeǧid n Babil, amsexxar inu. Wciɣ as uřa d řmař n yeyyar, maḥend ad xas sexxaren.
JER 27:7 Marra řegnus ad as sexxaren uřa i mmis d mmis n mmis ařami i dd ɣa yas řḥař i temmurt nnes. [Xenni] aṭṭas n řegnus d ijeǧiden imeqqranen ad ggen ad zzayes ttwasexxaren.
JER 27:8 Řgens d tgeldit i war ixs ad as isexxar i Nabuxadnaṣṣar, ajeǧid n Babil, uca war ixs ad issehwa iři nnes swadday i uzayřu n ujeǧid n Babil, aqa Necc ad xeřfeɣ zi řgens nni s ssif d řaẓ d ṭṭaɛun, [ammu i] iqqar SIDI, ař ten i ɣa qḍiɣ s ufus nnes.
JER 27:9 Kenniw [xenni], war ttesřim i inabiyyen nwem d igezzanen nwem d ayt n bu-tirja nwem d ibezgawen nwem d iseḥḥaren nwem nni ɣarwem issawařen, qqaren: Kenniw war tsexxaram ca i ujeǧid n Babil!,
JER 27:10 maɣar nitni ttnebban s ixarriqen maḥend ad kenniw ssiggʷejen x temmurt nwem, ařami Necc ad xawen aẓẓřeɣ uca kenniw ad tᵉttwahellkem.
JER 27:11 [Maca] řgens nni i ɣa issaḍaren iři nnes swadday i uzayřu n ujeǧid n Babil uca ad as issexxar, aqa řgens nni ad t jjeɣ ad iqqim di temmurt nnes, uca ad tt icarz u ad dayes izdeɣ!’, [ammu i] iqqar SIDI.”
JER 27:12 [Xenni] ssiwřeɣ ɣar Ṣidqiya, ajeǧid n Yahuda, ɛlaḥsab marra awařen-a, nniɣ: “Ggem iřawen nwem swadday i uzayřu n ujeǧid n Babil u sexxarem as u i řgens nnes, [xenni] ad teqqimem teddarem.
JER 27:13 Mayemmi ɣa tᵉttwanɣem, cek d řgens nnec, s ssif d řaẓ d ṭṭaɛun, am mammec issiweř SIDI x řgens i war ixsen ad isexxar i ujeǧid n Babil.
JER 27:14 War ttesřim i wawařen n inabiyyen, inni ɣarwem issawařen, qqaren: ‘Kenniw war tᵉttsexxarem ca i ujeǧid n Babil!’, maɣar nitni ttnebban awem s ixarriqen,
JER 27:15 minzi Necc war ten dd-ssekkeɣ, [ammu i] iqqar SIDI, u nitni ttnebban s ixarriqen s Yisem inu maḥend ad kenniw aẓẓřeɣ u kenniw ad tᵉttwahellkem, kenniw d inabiyyen nni d awem ittnabben,”
JER 27:16 Ssiwřeɣ uřa ak-d ikehhanen u ak-d marra řgens, nniɣ: “Ammu i iqqar SIDI: ‘War tesřim ɣar wawařen n inabiyyen nwem i iqqaren: Xzar, řeqcuɛ zi Taddart n SIDI ad ttwarren deɣya zi Babil!, maɣar nitni ttnebban i kenniw s ixarriqen.
JER 27:17 War ɣarsen ttesřim ca, [maca] sexxarem i ujeǧid n Babil, [xenni] ad teqqimem teddarem. Mayemmi ɣa tedweř tendint-a d ict n řxirbet?
JER 27:18 Mři nitni d inabiyyen, u awař n SIDI iǧa [s tidett] ɣarsen, ejj i-ten ad ttaren i SIDI n řɛeskarat, aqa řeqcuɛ i iqqimen ɛad di Taddart n SIDI u di taddart n ujeǧid n Yahuda di Urcalim war ttriḥen ɣar Babil.
JER 27:19 Maɣar ammu i iqqar SIDI n řɛeskarat x ipilaren, x řebḥar n nnḥas, x tkarrutin u x marra řeqcuɛ nneɣni i iqqimen di tendint-a,
JER 27:20 inni war kides iksi Nabuxadnaṣṣar, ajeǧid n Babil, umi indeh Yakunya, mmis n Yahuyaqim, ajeǧid n Yahuda, zi Urcalim ɣar Babil ak-d marra tarwa n taṣiřet n Yahuda d Urcalim,
JER 27:21 [wah,] ammu i iqqar SIDI n řɛeskarat, AREBBI n Israil, x řeqcuɛ i iqqimen di Taddart n SIDI u di taddart n ujeǧid n Yahuda u di Urcalim:
JER 27:22 Ɣar Babil ad mmeksin u ad qqimen dinni ař ass i ɣarsen dd ɣa arzfeɣ, [ammu i] iqqar SIDI. [Xenni] ad ten ssuffɣeɣ u ad ten dd-arreɣ ɣar wemcan-a.’”
JER 28:1 Deg useggʷas nni, deg umezwaru n tgelda n ujeǧid Ṣidqiya, ajeǧid n Yahuda, deg useggʷas wiss arebɛa, deg uyur wiss xemsa, issiweř akidi Ḥananya, mmis n Ɛazur, anabi zi Jibɛun, di Taddart n SIDI zzat i tiṭṭawin n ikehhanen d řgens imun, inna:
JER 28:2 “Ammu i iqqar SIDI n řɛeskarat, AREBBI n Israil, iqqar: ‘Necc ad arẓeɣ azayřu n ujeǧid n Babil.
JER 28:3 Ɛad tnayen n iseggʷusa [xenni] Necc ad dd-arreɣ ɣar temmurt-a marra řeqcuɛ n Taddart n SIDI, inni iksi Nabuxadnaṣṣar, ajeǧid n Babil, zeg wemcan-a uca yiwy-i-ten ɣar Babil.
JER 28:4 Necc ad ssɛeqbeɣ Yakunya, mmis n Yahuyaqim, d marra imenfiyyen zi Yahuda i dd-yiwḍen ɣar Babil, ɣar wemcan-a, [ammu i] iqqar SIDI, minzi Necc ad arẓeɣ azayřu n ujeǧid n Babil.’”
JER 28:5 [Xenni] inna unabi Irmiya i unabi Ḥananya - zzat i tiṭṭawin n ikehhanen u zzat i tiṭṭawin n řgens imun, inni ibedden di Taddart n SIDI -
JER 28:6 [wah ammu i] inna Irmiya: “Amin, ammu i ɣa yegg SIDI! Iři ad isseqfeř SIDI awařen nnec i tnebbid ařami ɣa yarr řeqcuɛ n Taddart n SIDI d marra inni ittwanedhen di lmenfa zi Babil ɣar wemcan-a!
JER 28:7 Seř [maca] i wawař-a i zi ssawařeɣ deg imezzuɣen nwem u deg imezzuɣen n řgens imun:
JER 28:8 ‘Inabiyyen nni tuɣa [din] iǧan qbeř inu d kenniw zeg wecḥař uya, nebban ḍidd i waṭṭas n temmura u ḍidd i waṭṭas n tgelditin x garra, x iceřwawen u x ṭṭaɛun.
JER 28:9 [Maca] anabi nni ittnabben x sřam, mařa awař n unabi nni ad dd-iffeɣ, [xenni] ad yiři ittwassen [s tidett] aqa SIDI issekk-dd anabi nni.’”
JER 28:10 [Xenni] iksi unabi Ḥananya azayřu n yiri n unabi Irmiya, yarẓ i-t.
JER 28:11 Uca issiweř Ḥananya zzat i tiṭṭawin n marra řgens, inna: “Ammu i iqqar SIDI: ‘Qbeř i ɣa ɛdun tnayen n iseggʷusa kemmřen ad arẓeɣ azayřu n Nabuxadnaṣṣar, ajeǧid n Babil, [i iǧan] x yiřawen n marra řegnus.” Uca Irmiya yuyur abrid nnes.
JER 28:12 [Xenni] yusa-dd wawař n SIDI ɣar Irmiya awarni i umi yarẓa unabi Ḥananya azayřu x yiřawen n unabi Irmiya, inna:
JER 28:13 “Uyur, siweř ak-d Ḥananya, ini: ‘Ammu i iqqar SIDI: Izayřuten n ukeccuḍ tarẓid ten, [maca] teggid izayřuten n wuzzař deg wemcan nsen.’
JER 28:14 Maɣar ammu i iqqar SIDI n řɛeskarat, AREBBI n Israil: ‘Ijj n uzayřu n wuzzař ssarseɣ t x yiřawen n marra řegnus, maḥend ad sexxaren i Nabuxadnaṣṣar, ajeǧid n Babil. Nitni ad as sexxaren. Uřa d řmař wciɣ ten deg ufus nnes.’”
JER 28:15 [Xas uca] inna unabi Irmiya i unabi Ḥananya: “Seř, Ḥananya, SIDI war cek dd issekk ca u cek tɣarred řgens-a ad ittceř x ixarriqen.
JER 28:16 S uya, ammu i iqqar SIDI, xzar, Necc ad cek nḍareɣ. [Ɛad] deg useggʷas-a ad temmted minzi tessiwřed x uḥeyyed n SIDI.”
JER 28:17 Immut unabi Ḥananya deg useggʷas nni, deg uyur wiss sebɛa.
JER 29:1 Ina d awařen n tebrat i dd-issekk unabi Irmiya zi Urcalim i imɣaren [n řgens] i iqqimen jar ayt n lmenfa i ikehhanen d inabiyyen u i marra řgens nni tuɣa indeh Nabuxadnaṣṣar zi Urcalim di lmenfa ɣar Babil,
JER 29:2 awarni i umi iffeɣ ujeǧid Yakunya d yemmas n ujeǧid, řa imsexxaren icennɛen, řa řḥukkam n Yahuda d Urcalim, řa řemɛuǧam uřa d imziřen zi Urcalim.
JER 29:3 [Issekk Irmiya tabrat nni] s ufus n Alɛasa, mmis n Cafan, d Jamarya, mmis n Ḥilqiya, inni issekk Ṣidqiya, ajeǧid n Yahuda, ɣar Babil ɣar Nabuxadnaṣṣar, ajeǧid n Babil. [Tabrat] tenna:
JER 29:4 “Ammu i iqqar SIDI n řɛeskarat, AREBBI n Israil, i marra ayt n lmenfa nni dd-iwyeɣ zi Urcalim ɣar Babil:
JER 29:5 ‘Sgeɛɛdem tudrin uca zedɣem daysent, ẓẓum iḥwicen uca ccem řɣiǧet nsen,
JER 29:6 awyem timɣarin uca jjem-dd iḥenjiren d tḥenjirin, awyem i iḥenjiren nwem timɣarin uca wcem tḥenjirin nwem i yeryazen, maḥend ad urwent iḥenjiren d tḥenjirin. Ḥḍam ad dinni temmarnim, war tneqqṣem,
JER 29:7 arzum řehna i tendint mani kenniw i ɣa nedheɣ u ttarem i man aya i SIDI, maɣar di řehna nnes i iǧa řehna nwem.’
JER 29:8 Maɣar ammu i iqqar SIDI n řɛeskarat, AREBBI n Israil: ‘War ttejjim ad kenniw cemten inabiyyen d igezzanen nni iǧan di řwesṭ nwem u war ttesřim ca ɣar ayt n bu-tirja i kenniw ittejjan ad tarjam,
JER 29:9 maɣar nitni ttnebban ixarriqen s Yisem inu. Necc war ten dd-sekkeɣ ca, [ammu i] iqqar SIDI.’
JER 29:10 Minzi ammu i iqqar SIDI: ‘Xmi ɣa qefřen sebɛin n iseggʷusa di Babil, xenni ad kenniw arzfeɣ uca ad awem kemmřeɣ awař inu aṣebḥan umi kenniw ɣa arreɣ ɣar temmurt-a.
JER 29:11 Maɣar Necc ssneɣ man ixarriṣen i ɣari xawem, [ammu i] iqqar SIDI, ixarriṣen n řehna, war iǧi n řɣar, ḥima ad awem wceɣ imar d řayas.
JER 29:12 [Mařa] kenniw ad ayi třaɣam, ad ɣari teẓẓaǧem, Necc ad ɣarwem sřeɣ.
JER 29:13 Ad xafi tarzum uca ad ayi tafem mařa kenniw tarzum xafi s marra wuř nwem.
JER 29:14 Ad zzaywem ttwafeɣ, [ammu i] iqqar SIDI, ad ssenqeřbeɣ tameḥbast nwem uca ad kenniw ssmuneɣ zi marra řegnus u zi marra imucan mani xawem uẓẓřeɣ, [ammu i] iqqar SIDI, u Necc ad kenniw arreɣ ɣar wemcan i zi kenniw nedheɣ di lmenfa.’”
JER 29:15 “[Maca] minzi tennam: ‘SIDI issnekkar aneɣ-dd inabiyyen di Babil!’,
JER 29:16 x uya, ammu i iqqar SIDI x ujeǧid, wenni iqqimen x řɛarc n Dawud, u x marra řgens i izeddɣen di tendint-a, aytmatwem inni war akidwem yuyuren di lmenfa,
JER 29:17 [wah,] ammu i iqqar SIDI n řɛeskarat: “Xzar, Necc ad ssekkeɣ jar asen ssif d řaẓ d ṭṭaɛun uca ad ten jjeɣ am tazart ixsaren, tenni war iḥřin maḥend ad zzayes ccen.
JER 29:18 Necc ad ten ḍfareɣ s ssif d řaẓ d ṭṭaɛun u Necc ad ten arreɣ d [ict n řqecɛet n] unexřiɛ i marra tigeldiwin n ddunect, ad tiřid d [ict n řqecɛet n] wexzi d usiggʷed d tseḍḥact d řḥegra jar marra řegnus mani ten i ɣa ssuffɣeɣ.
JER 29:19 minzi nitni war sřin ɣar wawařen inu, [ammu i] iqqar SIDI, umi ɣarsen dd-ssekkeɣ imsexxaren inu, inabiyyen. Ɛad zeg umezwaru ssekkeɣ ten, maca kenniw war tesřim ca, [ammu i] iqqar SIDI.”
JER 29:20 “Kenniw [maca], sřem i wawař n SIDI, marra kenniw inni ittwanedhen di lmenfa, inni ssekkeɣ zi Urcalim ɣar Babil.
JER 29:21 Ammu i iqqar SIDI n řɛeskarat, AREBBI n Israil, x Axab, mmis n Qulaya, u x Ṣidqiya, mmis n Maɛasiya, inni d awem ittnebban deg Yisem inu s ixarriqen: ‘Xzar, Necc ad ten ggeɣ deg ufus n Nabuxadraṣṣar, ajeǧid n Babil, u netta ad ten ineɣ zzat i tiṭṭawin nwem.
JER 29:22 Marra ayt n lmenfa zi Yahuda nni [iǧan] di Babil ad zzaysen kksen ict n nneɛřet, ad inin: SIDI ad cek yegg am Ṣidqiya d Aḥab nni icnef ujeǧid n Babil s tmessi!,
JER 29:23 minzi nitni ggin ict n tubbuheřya di Israil: nitni znan ak-d temɣarin n wi ten yudsen u barrḥen s Yisem inu awařen n ixarriqen i tuɣa war d asen nniɣ. Necc d wenni issnen d wenni icehden [x man aya]!’, [ammu i] iqqar SIDI.”
JER 29:24 I Camɛiya zi Naḥlam, ittxeṣṣa ad kides tessiwřed ad as tinid [ammu]:
JER 29:25 “Ammu i iqqar SIDI n řɛeskarat, AREBBI n Israil, iqqar: ‘Minzi s isem nnec i-dd-tessekked tibratin i marra řgens di Urcalim u i ukehhan Ṣafanya, mmis n Maɛasiya, u i marra ikehhanen, yura daysen:
JER 29:26 SIDI igga cek d akehhan deg wemcan n ukehhan Yahuyadaɛ, maḥend ad din iřin iweqqafen di Taddart n SIDI x kuř ijj ubuhaři nni itteggen ixef nnes d anabi. Ad t teqqned x ukeccuḍ ak-d řgid x yiri [nnes].
JER 29:27 Xenni řexxu, mayemmi war tɛaqbed Irmiya zi Ɛanatut, wenni xawem ittarran ixef nnes d anabi?
JER 29:28 Maɣar netta issekk-dd [ict n tebrat] i neccin di Babil mani iqqar: Aṭṭas i ɣa iqqimen! Sbeddem tudrin u zedɣem daysent, ẓẓum iḥwicen u ad tawyem řiqqi i řɣiǧet nsen!”
JER 29:29 Tuɣa iqqar ukehhan Ṣafanya tabrat-a deg imezzuɣen n unabi Irmiya.
JER 29:30 [Xenni] yusa-dd wawař n SIDI ɣar Irmiya, inna:
JER 29:31 “Sqad areqqas-a i marra ayt n lmenfa: ‘Ammu i iqqar SIDI x Cimɛiya zi Naḥlam: Minzi Camɛiya tuɣa ittnabb awem, waxxa Necc war t-i-dd ssekkeɣ, uca yarra kenniw ad tᵉttiqqem deg ixarriqen!’,
JER 29:32 s uya, ammu i iqqar SIDI: ‘Xzar, Necc ad xeřfeɣ i Camɛiya zi Naḥlam u zi tarwa nnes. Uřa d ijjen zeg inni nnes war ittɣimi izdeɣ di řwesṭ n řgens-a u netta war iẓarr řxir i ɣa ggeɣ i řgens inu, [ammu i] iqqar SIDI, minzi s řhard nnes igga ad ḥeyyden x SIDI.’”
JER 30:1 Awař nni dd-yusin zi SIDI i Irmiya, inna:
JER 30:2 “Ammu i iqqar SIDI, AREBBI n Israil, iqqar: ‘Ari marra awařen nni d ac nniɣ deg ijj n wedlis.
JER 30:3 Maɣar xzar, ad dd-asen wussan, [ammu i] iqqar SIDI, ad qeřbeɣ tameḥbast n řgens inu, Israil d Yahuda, [ammu i] iqqar SIDI. Necc ad ten arreɣ ɣar temmurt i wciɣ i řejdud nsen u nitni ad tt ṭṭfen d tasɣart.’”
JER 30:4 Ina d awařen i zi issiweř SIDI x Israil d Yahuda:
JER 30:5 “Maɣar ammu i iqqar SIDI: ‘Nesřa řḥess issiggʷaden, [ijj n řḥess] issnexřiɛen, war iǧi [n] řehna.
JER 30:6 Seqsam u xzarem, ma izemmar weryaz ad yaruw? Mayemmi i ttwařiɣ marra iryazen s ifassen x tejɛinna nsen am yict n temɣart tᵉttaru, u qaɛ aɣembub idweř iwarɣ am řxecbet?
JER 30:7 Uct, maɣar d ameqqran ass nni, war iǧi uřa d ijjen am netta. Ict n řweqt n řeḥṣaret i Yaɛqub, [maca] netta ad zzayes ittwassenjem.
JER 30:8 Deg wass nni ad imsar, [ammu i] iqqar SIDI n řɛeskarat, ad arẓeɣ azayřu x yiřawen nnec. Ibarraniyyen war t ttejjin ad xasen isexxar [ɛad am yismeɣ],
JER 30:9 Nitni ad sexxaren i SIDI, AREBBI nsen, uřa i ujeǧid nsen Dawud wenni dd ɣa ssekkareɣ di ṭṭweɛ nsen.’”
JER 30:10 “War teggʷed, [a] cek amsexxar inu Yaɛqub, [ammu i] iqqar SIDI, war tefciř ca, [a] Israil, maɣar xzar, Necc ad cek ssnejmeɣ zi timmura iggʷejen uřa d zzariɛet nnec zi tmeḥbast nsen. Ad yareggʷeḥ Yaɛqub, ad ɣares tiři řhudnet, ad iddar di řaman uca uřa d ijj war t issnexřiɛ.
JER 30:11 Maɣar Necc akidek, [ammu i] iqqar SIDI, ḥima ad cek ssnejmeɣ, maɣar Necc ad qḍiɣ marra řegnus nni ɣar cek zuzzareɣ, maca ɛemmarṣ war cek qeṭṭiɣ, [maca] ad cek arebbiɣ s řeɛbar iseggden u war cek heṣṣbeɣ d amezdag.”
JER 30:12 “Maɣar ammu i iqqar SIDI: ‘Tareẓẓit nnem war tzemmar ad teggenfa, ayezzim nnem itteqqes.
JER 30:13 Uřa d ijj war xam issɛizz ař i cem i ɣa icfen, war ɣarem ca ddawat ḥima ad tent tegged x tḥebbuct nnem.
JER 30:14 Marra inni tuɣa i cem ittexsen ttun cem, war xam ttseqsin, maɣar am mammec iccat řeɛdu ammu i cem wtiɣ, am yijjen i yarebban s řeqsaḥet, zi ssibbet n řmuɛṣiyyet nnem imɣaren, [maɣar] ddnub nnem wesɛen aṭṭas.
JER 30:15 Mayemmi tesɣuyyud [ammu] x treẓẓit nnem, x řeḥriq nnem i war izemmaren ad iggenfa? Zi ssibbet n řmuɛṣiyyet nnem imɣaren, [maɣar] ddnub nnem wesɛen aṭṭas, Necc ggiɣ dayem man aya.
JER 30:16 S uya, marra inni cem itteffzen, ad ttwaccen [simant nsen], uca marra iɣrimen nnem ad uyuren di tmeḥbast, u inni cem ikeccḍen, ad ttwakeccḍen u marra inni cem yucaren, ad ten wceɣ d tukkarḍa.
JER 30:17 Maɣar Necc ad cem cefneɣ u ad cem ssgenfiɣ zeg iyezzimen nnem nni i dayem wtin nitni, [ammu i] iqqar SIDI, minzi nitni řaɣan am ‘Tamenḍart!’, qqaren: Aqa-tt d Ṣihyun, war xas ittseqsi uřa d ijj!’”
JER 30:18 “Ammu i iqqar SIDI: ‘Xzar, ad ssenqeřbeɣ tameḥbast n iqiḍan n Yaɛqub uca ad areḥmeɣ x tzeddiɣin nsen. Ad bnan tandint ɛawed x řxirbat nnes uca řeqṣar ad dd-idweř ɣar wemcan nnes iṣeḥḥ.
JER 30:19 Ad zzaysen iffeɣ [ijj n izři n] uqadi d ict n tmijja n yewdan ifarrḥen. Necc ad ten arreɣ deg waṭṭas, nitni war dikkwiřen drus, u Necc ad asen ggeɣ řɛezz u nitni war ttwasseḥqirin [ɛad].
JER 30:20 Iḥenjiren nnes ad iřin am yinni zeg wecḥař uya uca tamesmunt nnes ad tiři zzat i wudem inu u Necc ad xeřfeɣ zeg inni i-ten iḥṣaren.
JER 30:21 Amzemmar nnes ad zzayes yiři u Řḥakem nnes ad zzayes iffeɣ u Necc ad t-i-dd-ssqarrbeɣ u Netta ad ayi dd-yades, maɣar man Wen iǧan d aḍman s wuř nnes maḥend ad ɣari dd-yades?’, [ammu i] iqqar SIDI.”
JER 30:22 “Kenniw ad ayi tiřim d řgens inu d Necc ad iřiɣ d AREBBI nwem.”
JER 30:23 “Xzar, taḥaryaḍt n SIDI, iffeɣ-dd [zzayes] wesɛar, [am] tḥaryaḍt tezzebzib nni i ɣa ihwan x uzeǧif n iɛeffanen.
JER 30:24 Řḥaduq n weɣḍab n SIDI war ittbeddi ca ař d igga ixarriṣen n wuř nnes uca ikemmeř i-ten. Deg uneggar n wussan ad as tfehmem.”
JER 31:1 “Di řweqt nni, [ammu i] iqqar SIDI, ad iřiɣ d AREBBI i marra řaǧat n Israil u nitni ad iřin d řgens inu.”
JER 31:2 “Ammu i iqqar SIDI: ‘Řgens n yinni inejmen zi ssif, yufa arḍa di řexřa, ejj ayi ad raḥeɣ Necc maḥend ad t ssareyyḥeɣ, [wah, maḥend ad ssareyyḥeɣ] Israil!’”
JER 31:3 “Zi řaggʷaj iban ayi-dd SIDI!” ... “Necc tuɣa ttexseɣ cem s tayri n řebda, x uya cem dd-jebdeɣ s tmexsiwt icewwaren.
JER 31:4 Necc ad cem bniɣ ɛawed, ad tᵉttwabnid ɛawed, [a cem] Israil taɛzarect. Cem ad tzewwqed ixef nnem ɛawed s ibendiren, ad teffɣed s ccḍiḥ s nnubtat n yinni ifarrḥen.
JER 31:5 Ad teẓẓud tizayarin deg imarjaɛen x idurar n Samarya: inni itteẓẓun ad tent ẓẓun u řɣiǧet ad zzayes arren meẓri.
JER 31:6 Maɣar ad dd-yas wass nni di ad řaɣan iɛessasen x idurar n Ifrayim: ‘Kkarem, ejj aneɣ ad ngeɛɛed ɣar Ṣihyun, ɣar SIDI, AREBBI nneɣ!’”
JER 31:7 “Maɣar ammu i iqqar SIDI: ‘Ɣennjem s řefraḥet i Yaɛqub, sřiwřiwem i uzeǧif n řegnus, barrḥem, semɣarem t, inim: [A] SIDI, senjem řgens nnec, min iqqimen zi Israil.
JER 31:8 Xzar, Necc ad ten arreɣ ad dd-asen zi temmurt n ccamal u Necc ad ten ssmuneɣ zeg ineggura n temmurt. Aqa din jar asen idarɣařen d ineɛḍaben, tinni iǧan s ddeyset d tinni ittarwen. Ad ɛeqben ɣar da s ijj n wegraw [n řgens] ameqqran.
JER 31:9 Ad dd-asen ttrun, ad ten gewwdeɣ am kessin s řmeɛruf. Ad ten ssnedheɣ ɣar teɣzarin n waman, x ijj n webrid iseggmen mani war ttneqriḍen, maɣar Necc d Babas i Israil u Ifrayim d mmi amenzu.’”
JER 31:10 “Sřem i wawař n SIDI, [a] kenniw řegnus, barrḥem t x tegzirin nni iggʷejen aṭṭas, inim: ‘D wenni tuɣa izzuzaren Israil, ad t issmun ɛawed u ad t yarwes am mammec yarekkwes umeksaw taḥimart nnes.
JER 31:11 Maɣar SIDI aqa ifdi Yaɛqub uca ifekk i-t zeg ufus n wenni xas ijehden.’
JER 31:12 Nitni ad dd-asen u ad sřiwřewen x řgeɛɛdet n Ṣihyun uca ad azzřen ɣar řxar n SIDI, ɣar imendi, ɣar binu n jdid, ɣar zzect, ɣar izmaren u ɣar ifunasen d tfunasin. Řeɛmar nsen ad yiři am řeɛraṣi ittwassun uca ɛemmarṣ [ɛad] ad iřin ceḍnen.
JER 31:13 Xenni ad tfarḥ teɛzarect ɣar ccḍiḥ s nnubtat, uřa d iḥudriyyen d iwessura, [nitni marra] munen, minzi Necc ad arreɣ acḍan nsen d arcuq, ad ten ɛezziɣ, ad ten ssfarḥeɣ awarni wecḍan nsen.
JER 31:14 Necc ad ssjiwneɣ řeɛmar n ikehhanen s tadunt [n tɣarṣa] uca ad idweř řgens inu ijjiwen s řxar inu, [ammu i] iqqar SIDI.”
JER 31:15 “Ammu i iqqar SIDI: ‘Tᵉttwaseř ict n tmijja di Rama, aweɛɛed d imeṭṭawen imarzagen: Raḥil tᵉttru x tarwa nnes u war tᵉttexs ad tᵉttwaɛezza x iḥenjiren nnes, maɣar nitni war ǧin [ɛad].’
JER 31:16 Ammu i iqqar SIDI: ‘Ṭṭef tmijja nnem i unixses u tiṭṭawin nnem i imeṭṭawen, maɣar aqa teǧa řmunet i warber nnem, [ammu i] iqqar SIDI, maɣar nitni ad dd-ɛeqben zi temmurt n řeɛdu.
JER 31:17 Aqa din řayas i tarwa nnem, [ammu i] iqqar SIDI, maɣar iḥenjiren [nnem] ad dd-dewřen ɣar temmurt nsen.’”
JER 31:18 “Necc sřiɣ mliḥ mammec dd-ittcetca Ifrayim, inna: ‘Cek tarebbid ayi u necc ttwarebbiɣ am yijj n uɛejmi war ittḍawaɛen. Arr ayi, [deɣya] necc xseɣ ad dd-dewřeɣ, maɣar Cek d SIDI, AREBBI inu.
JER 31:19 Maɣar awarni řami dd-dewřeɣ, tubeɣ, u awarni řami dewřeɣ ssneɣ, wtiɣ ixef inu x tmeṣṣaḍin. Necc seḍḥiɣ, nfeḍḥeɣ, maɣar necc arbuɣ řefḍiḥet n temẓi inu.’
JER 31:20 Ma war iǧi Ifrayim d mmi iɣřan ɣari d aḥenjir inu iɛizzen? Maɣar kuř ict n twařa ssiwřeɣ ɣares [s ufus n inabiyyen], qqimeɣ ttidareɣ t. X uya iccat jjuf inu dayi. Nican Necc ad xas arreḥmeɣ, [ammu i] iqqar SIDI.”
JER 31:21 “Sbedd iquǧay [i wescan n webrid], sars iẓra [n jjurrat n webrid], egg uř nnem x webrid iseggmen, x webrid nni di teggured. Dweř, [a] taɛzarect Israil, dweř ɣar tneddam nnem.
JER 31:22 Ař meřmi ɛad texsed ad teqqimed tᵉttliɛed, [a cem,] yeǧis i [xafi] iḥeyyden? Maɣar SIDI igga ict n řḥajjet n jdid di temmurt: Tamɣart ad tᵉtthilla [marra] i weryaz.”
JER 31:23 “Ammu i iqqar SIDI n řɛeskarat, AREBBI n Israil: ‘Ad ssiwřen awař-a ɛawed di temmurt n Yahuda u di tneddam nnes xmi ɣa ssenqeřbeɣ tameḥbast nsen: Ad cem ibarek SIDI, [a] Tazeddiɣt n tsegda, [a] adrar iqeddsen!
JER 31:24 Yahuda d marra tineddam nnes ad dayes zeddɣent jmiɛ, ifeǧaḥen d yinni ittetliɛen ak-d tḥimart.
JER 31:25 Maɣar Necc ssessuɣ řeɛmar yuḥřen uca ssjiwneɣ kuř řeɛmar iḥzen.’”
JER 31:26 Awarni aya faqeɣ-dd uca uciɣ mecḥar yiziḍ yiḍeṣ inu.
JER 31:27 “Xzar, ad dd-asen wussan, [ammu i] iqqar SIDI, ad zarɛeɣ taddart n Israil d taddart n Yahuda s zzarriɛet n iwdan d řmař.
JER 31:28 Am mammec xasen ɛesseɣ ḥima ad qeřɛeɣ, ad hedmeɣ, ad arẓeɣ, ad areddǧeɣ u ad ggeɣ řɣar, ammu i xasen i ɣa ɛesseɣ ḥima ad ssbeddeɣ u ḥima ad ẓẓuɣ, [ammu i] iqqar SIDI.
JER 31:29 Deg wussan nni war ttɣimin ad inin ɛad: ‘Ibabaten ccin aḍiř asemmam uca dewřent teɣmas n iḥenjiren ḥfant.’
JER 31:30 Maca kuř ijj ad immet zi ssibbet n řmuɛṣiyyet [n yixef] nnes. Zi mkuř bnadem nni i ɣa iccen aḍir asemmam, ad as dewřent teɣmas ḥfant.”
JER 31:31 “Xzar, ad dd-asen wussan, [ammu i] iqqar SIDI, nni di ɣa ggeɣ ijj n Řɛahd n Jdid ak-d taddart n Israil u ak-d taddart n Yahuda,
JER 31:32 war iǧi am mammec Řɛahd i ggiɣ ak-d řejdud nsen umi ten ṭṭfeɣ zeg ufus, ḥima ad ten nedheɣ zi temmurt n Miṣra, Řɛahd inu nni arẓin, waxxa zeɛma Necc dewřeɣ d Aryaz nsen, [ammu i] iqqar SIDI.
JER 31:33 Maɣar wa ad yiři d Řɛahd nni i ɣa ggeɣ awarni i wussan nni ak-d taddart n Israil, [ammu i] iqqar SIDI: Necc ad ggeɣ Ccariɛa inu deg wuř nsen uca ad tt ariɣ deg wuř nsen. Necc ad iřiɣ d SIDI i nitni u nitni ad iřin d řgens i Necc.
JER 31:34 Uřa d ijjen war isseřmid [ɛad] jjar nnes niɣ umas, am qqaren: ‘Ssen SIDI!’, maɣar nitni marra ad ayi ssnen, am umeẓyan am umeqqran jar asen, [ammu i] iqqar SIDI, maɣar Necc ad asen ɣfareɣ i řmuɛṣiyyet nsen u war ttidareɣ [ɛad] ddnub nsen.”
JER 31:35 “Ammu i iqqar SIDI, wenni iggin tfuct i tfawt deg wass, [wenni yumuren] taziri d itran i tfawt di ǧiřet, wenni issehwařen řebḥar ařami dd-duqquzent řemwaj nnes, aqa SIDI n řɛeskarat d Isem nnes:
JER 31:36 ‘Mařa lfarayiḍ-a ad dd-wḍant zeg wudem inu, iqqar SIDI, [xenni] ad ibedd uřa d zzariɛet n Israil ad tiři d ijj n řgens zzat i wudem inu, marra ussan.’
JER 31:37 Ammu i iqqar SIDI: ‘Mařa ttwaɛbaren ijenwan sennej u [mařa] zemmaren ad arzun sadu dsusa n temmurt, [xenni] uřa d Necc ad nḍareɣ zzariɛet n Israil zi ssibbet n marra min ggin, [ammu i] iqqar SIDI.’”
JER 31:38 “Xzar, [ammu i] iqqar SIDI, ad dd-asen wussan nni di ɣa bnan tandint [ɛawed] i SIDI, zi Ṣṣumɛet n Ḥananiyil ař Tewwart n Teɣmart,
JER 31:39 uca ad iffeɣ ufiřu n řeqyas ɛad ktar, nican ɣar zzat ɣar tewrirt n Jarib uca [xenni] ad imeyyeř ɣar Juɛa.
JER 31:40 Marra taysart s řxecbat immuten u s yiɣɣeḍ d marra iyyaren ař teɣzart n Qidrun ař teɣmart n Tewwart n Yeysan ɣar ccarq, marra aya ad yiři d amqeddas i SIDI. Ɛemmarṣ ad tᵉttwaqřeɛ u ad tᵉttwahdem uřa d ict n řḥajjet ɛad i řebda.”
JER 32:1 Awař nni dd-iffɣen zi SIDI ɣar Irmiya deg useggʷas wiss ɛecra n Ṣidqiya, ajeǧid n Yahuda. Aseggʷas-a tuɣa d aseggʷas wiss tmenṭac n Nabuxadraṣṣar.
JER 32:2 Deg wussan nni tuɣa řɛeskar n ujeǧid n Babil iḥeṣṣar-dd Urcalim uca anabi Irmiya tuɣa ittwaḥebbes di řemraḥ n řeḥbes nni tuɣa di taddart n ujeǧid n Yahuda.
JER 32:3 Maɣar tuɣa iḥebbes i-t Ṣidqiya, ajeǧid n Yahuda, am d as inna: “Mayemmi tᵉttnabbed, teqqared: ‘Ammu i iqqar SIDI: Xzar, Necc ad ggeɣ tandint-a deg ufus n ujeǧid n Babil u netta ad tt tᵉṭṭef.
JER 32:4 Ṣidqiya, ajeǧid n Yahuda, war inejjem zeg ufus n Ikaldaniyyen, maca ad immewc deg ufus n ujeǧid n Babil. Netta ad kides issiweř zeg uqemmum ɣar uqemmum u netta ad t iẓar tiṭṭ di tiṭṭ.
JER 32:5 Netta ad yawi Ṣidqiya ɣar Babil u netta ad dinni iqqim, ař ɣares i ɣa raḥeɣ, [ammu i] iqqar SIDI. Waxxa kenniw ad temmenɣem ak-d Ikaldaniyyen, war ttikkwiḍem ca.’”
JER 32:6 Irmiya inna: “Yusa-dd ɣari wawař n SIDI, inna:
JER 32:7 ‘Xzar, Ḥanam’il, mmis n ɛemmic Callum, ad ɣarek dd-yas uca ad yini: Seɣ i yixef nnec iyyar inu di Ɛanatut, maɣar cek ɣarek řḥeqq n řefdiyyet maḥend ad t tesɣid.’”
JER 32:8 [Xenni] yusa-dd ɣari Ḥanam’il, mmis n ɛemmi, ɛlaḥsab awař n SIDI, di řemraḥ n řeḥbes, inna ayi: “Seɣ xenni iyyar inu di Ɛanatut, di temmurt n Binyamin, maɣar cek ɣarek řḥeqq ad t twarted uca ɣarek [řḥeqq] n usufeɣ maḥend ad t tefdid, ad t tesɣed.” Řexdenni ssneɣ illa awař-a yusa-dd zi SIDI.
JER 32:9 [Ammu i] sɣiɣ iyyar nni [iǧan] di Ɛanatut x Ḥanam’il, mmis n ɛemmi, uca wezneɣ as nnuqart: sbeɛṭac ciqlu n nnuqart.
JER 32:10 Necc weqqɛeɣ x tabrat, cemmɛeɣ tt uca jjiɣ cchud ad tt ssmetnen uca wezneɣ nnuqart di řmizan.
JER 32:11 Ksiɣ tabrat ittwannḍen n tmesɣiwt, tenni tuɣa ittwacemmɛen, [ittwari dayes] mammec ittwagg řɛahd u [min ǧant] lfarayiḍ, uřa tabrat yarezmen
JER 32:12 uca wciɣ tabrat ittwanḍen n tmesɣiwt i Barux, mmis n Niri-Yah, mmis n Maḥsiya, zzat i tiṭṭawin n Ḥanam’il, mmis n ɛemmi, u zzat i tiṭṭawin n řechud nni tuɣa iweqqɛen tabrat ittwannḍen n tmesɣiwt zzat i tiṭṭawin n marra Wudayen nni iqqimen di řemraḥ n řeḥbes.
JER 32:13 Necc umureɣ Barux zzat i tiṭṭawin nsen, nniɣ:
JER 32:14 “Ammu i iqqar SIDI n řɛeskarat, AREBBI n Israil: ‘Ksi tibratin-a, tabrat ittwannḍen n tmesɣiwt, am tenni icemmɛen am tanita, tenni yarezmen, uca ssars i-tent deg ict n řqecɛet n třaxt, maḥend ad qqiment aṭṭas n wussan ḥḍant!’
JER 32:15 Maɣar ammu i iqqar SIDI n řɛeskarat, AREBBI n Israil: ‘Ad ttwasɣen ɛawed tudrin d iyyaren d imarjaɛen n uḍiř di temmurt-a.’”
JER 32:16 Awarni umi tuɣa wciɣ tabrat n tmesɣiwt i Barux, mmis n Niri-Yah, ẓẓuǧeɣ s řaǧaɣ ɣar SIDI, nniɣ:
JER 32:17 “Ax, Sidi inu, SIDI, xzar, Cek teggid ijenwan d tammurt s jjhed nnec ameqqran u s uɣiř nnec isswiẓẓḍen. War xak iwɛar walu.
JER 32:18 [Cek] d wenni iggin tamexsiwt icewwaren i řuřuf uca txeǧṣed řmuɛṣiyyet n ibabaten deg weḥsin n iḥenjiren nsen awarni asen, [a] Cek Arebbi d ameqqran d ajebbar, wenni umi qqaren: SIDI n řɛeskarat.
JER 32:19 Cek d ameqqran n ccwar u tejhed di tmegga, maɣar tiṭṭawin nnec ttɛessent x marra ibriden n tarwa n bnadem, ḥima ad txeǧṣeḍ kuř ijj ɛlaḥsab ibriden nnes u ɛlaḥsab řɣiǧet n tmegga nnes.
JER 32:20 Cek teggid řeɛřamat d lmujizat di Miṣra, ař ass-a, am deg Israil am deg iwdan nneɣni. Teggid ijj n Yisem i Yixef nnec, am mammec [i teǧa] ass-a.
JER 32:21 Cek tessuffɣed-dd řgens nnec Israil zi temmurt n Miṣra s řeɛřamat d lmuɛjizat, s ijj n ufus ijehden d ijj n uɣiř isswiẓẓaḍen, [umi tessekkared] ict n teggʷudi tameqqrant [jar řegnus].
JER 32:22 Cek tewcid asen tammurt-a, tenni tejjuǧed i řejdud nsen maḥend ad asen tt tewced, ict n temmurt ifeyyḍen s uɣi d tamment.
JER 32:23 Nitni udfen-dd ɣares uca ṭṭfen tt d tasɣart, [maca] nitni war sřin i tmijja nnec u war uyuren deg [webrid n] Ccariɛa nnec u war ggin ɛlaḥṣab marra minzi ten tweṣṣid. [S uya] i ten iřqef marra řɣar-a.
JER 32:24 Xzar, icbaren i řeḥṣaret! Nitni iwḍen-dd ař tandint maḥend ad tt ṭṭfen, uca tandint temmewc deg ufus n Ikaldaniyyen nni akides ittmenɣan, zi ssibbet n ssif d řaẓ d ṭṭaɛun. Min tessiwřed aqa yiweḍ-dd. Xzar, tᵉttwarid [t] simant nnec.
JER 32:25 [Waxxa amenni] tennid ayi, [a] Sidi inu, SIDI: Seɣ i yixef nnec iyyar nni s nnuqart uca ejj řechud ad tt ssmetnen, [řami] temmewc tendint deg ufus n Ikaldaniyyen.”
JER 32:26 [Xenni] yusa-dd wawař n SIDI ɣar Irmiya, inna:
JER 32:27 “Xzar, Necc d SIDI, AREBBI n marra nni ɣarsen arrimet [n weysum]. Ma iwɛar xafi ca?’
JER 32:28 S uya, ammu i iqqar SIDI: ‘Necc ad ggeɣ tandint-a deg ufus n Ikaldaniyyen u deg ufus n Nabuxadraṣṣar, ajeǧid n Babil, u netta ad tt iṭṭef.
JER 32:29 Ikaldaniyyen, inni ittmenɣan ak-d tendint-a, ad ɣares dd-adfen, ad qedden tandint s tmessi uca ad tt sscemḍen ak-d tudrin nni x tzeɣwin nsent i zi qeddmen tiwhibin n řebxur i Baɛl uca seyyben tiwhibin n useyyeb i irebbiten nneɣni ḥima ad ayi sɛaren.
JER 32:30 Maɣar ayt n Israil d ayt n Yahuda zi temẓi nsen tteggen mɣir min iǧan d aɛeffan di tiṭṭawin inu. Ayt n Israil sɛaren ayi s řxedmet n ifassen nsen!’, iqqar SIDI.
JER 32:31 ‘Maɣar tandint tuɣa tt i Necc [d ssibbet] n weɣḍab d wesɛar zeg wass nni di tᵉttwabna ař ass-a, ařami tt ɣa nḍareɣ x wudem inu
JER 32:32 zi ssibbet n marra řɣar n ayt n Israil d ayt n Yahuda maḥend ad ayi sɛaren, nitni d ijeǧiden nsen d řḥukkam nsen d ikehhanen nsen d inabiyyen nsen d iryazen n Yahuda d imezdaɣ n Urcalim.
JER 32:33 Nitni wcin ayi-dd s weɛrur, war iǧi s uɣembub, [waxxa] Necc ssřemdeɣ ten, [ɛad] zeg umezwaru ssɣareɣ ten, [maca] nitni war xsen ad sřen maḥend ad ṭṭfen ttarbiyyet.
JER 32:34 Nitni ssbedden nnɛawat nsen n l’aṣnam di Taddart i xef ittwabarreḥ Isem inu maḥend ad tt ssxemjen.
JER 32:35 Nitni ssbedden řegɛudi n Baɛl [mani i d as ttwehhben ddbayeḥ nsen] di teɣzurt n mmis n Hinnum maḥend ad sseɛdun iḥenjiren nsen d tḥenjirin nsent i Mulak di tmessi, min war d asen umureɣ ɛemmarṣ u min war d ayi dd-iddaren di řbař inu, aqa ad ggen nnɛi am wa ařami ɛarnen Yahuda ɣar ddnub.’”
JER 32:36 “S uya, řexxu, ammu i iqqar SIDI, AREBBI n Israil, x tendint-a i x teqqarem: ‘Aqa temmewc deg ufus n ujeǧid n Babil, s ssif, s řaẓ u s ṭṭaɛun!’:
JER 32:37 Xzar, Necc ad ten ssmuneɣ zi marra timmura mani xasen uẓẓřeɣ deg weɣḍab inu u deg wesɛar inu u deg uduqqez n weɣḍab inu, u Necc ad ten arreɣ ɣar wemcan-a u ad ten sszedɣeɣ di řaman.
JER 32:38 Nitni ad iřin d řgens inu u Necc ad iřiɣ d AREBBI nsen.
JER 32:39 Necc ad asen wceɣ uř d ijj uřa d webrid d ijj ḥima ad ayi ggʷeden marra ussan i tizi nsen u i tizi n iḥenjiren nsen awarni asen.
JER 32:40 Necc akidsen ggeɣ ijj n Řɛahd ittduman, aqa war ttḥeyyideɣ zi awarni asen, ḥima ad asen ggeɣ min iṣebḥen, u Necc ad asen ssarseɣ tiggʷudi zzayi deg wuř nsen, maḥend war xafi ttḥeyyiden [ɛad].
JER 32:41 Necc ad zzaysen farḥeɣ maḥend ad daysen tthilliɣ u zi řmanet inu ad ten ẓẓuɣ di temmurt-a s marra uř inu u s marra řeɛmar inu.’”
JER 32:42 “Maɣar ammu i iqqar SIDI: ‘Am mammec i dd iwyeɣ x řgens-a tuɛeffna-ya tameqqrant, ammu i xasen i ɣa ssiwḍeɣ marra taṣebḥant i xasen nniɣ.
JER 32:43 Ad sɣen [ɛawed] iyyaren di temmurt-a i xef teqqarem kenniw: ‘Aqa-tt d ict temmurt ittwareddǧen nhřa bnadem d řmar, temmewc deg ufus n Ikaldaniyyen.’
JER 32:44 Ad sɣen [ɛawed] iyyaren s [ttmenyat n] nnuqart, ad weqqɛen u ad cemmɛen tibratin n tmesɣiwt, ad awyen řechud ḥima ad ssmetnen [tamesɣiwt] di temmurt n Binyamin, di jjwayeh n Urcalim, di tneddam n Yahuda, di tneddam n Temmurt n Idurar, di tneddam n Temmurt Iwaṭan u di tneddam n [Temmurt n] Ljanub, maɣar Necc ad ssenqeřbeɣ tameḥbast nsen, [ammu i] iqqar SIDI.’”
JER 33:1 Yusa-dd wawař n SIDI ɣar Irmiya i twařa wiss tnayen, umi tuɣa ɛad ittwabelleɛ xas di řemraḥ n řeḥbes, inna:
JER 33:2 “Ammu i iqqar SIDI, wenni t iggin, SIDI, wenni tt yarecmen ařami tt ɣa ibedd d ubeddi, aqa SIDI d Isem nnes:
JER 33:3 ‘Řaɣa ayi-dd uca ad xak dd-arreɣ u ad ac ssecneɣ timesřayin timeqqranin d innufaren, war tent tessined.
JER 33:4 Maɣar ammu i iqqar SIDI, AREBBI n Israil, x tudrin n tendint-a u x tudrin n ijeǧiden n Yahuda nni ittwahedmen, [maḥend ad iřint i udurri] ḍidd n wecbaren n řeḥṣaret u ḍidd n ssif:
JER 33:5 Inni dd-yusin ḥima ad mmenɣen ak-d Ikaldaniyyen, [aqa usin-dd] ḥima ad ɛemmaren [tudrin nni] s řxecbat n iwdan nni nɣiɣ deg weɣḍab inu u deg wesɛar inu, minzi ssdurryeɣ udem inu x tendint-a zi ssibbet n marra tuɛeffna nsen!
JER 33:6 [Maca] xzar, Necc ad as-tt-i-dd-awyeɣ aɛdař d ugenfu, Necc ad ten ssgenfiɣ uca ad xasen ɛarriɣ ijj [n řɛunṣar] ifeyyḍen s řehna d tidett.
JER 33:7 Necc ad ssenqeřbeɣ tameḥbast n Yahuda d tmeḥbast n Israil, u ad ten bniɣ am deg umezwaru.
JER 33:8 Necc ad ten ssizedgeɣ zi marra řmuɛṣiyyet nsen i zi kidi xḍan. Ad ɣfareɣ marra řmuɛṣiyyat nsen i zi xḍan akidi uca ɛeddan xafi.
JER 33:9 Ad tiři [tendint n Urcalim] i Necc d isem issefraḥen d usemɣar d ccan ɣar marra řegnus n ddunect nni i ɣa isřan řxar nni d asen i ɣa ggeɣ. Nitni ad ggʷeden u ad arjijen x marra řxar u x marra řehna nni d as i ɣa ggeɣ.’”
JER 33:10 “Ammu i iqqar SIDI: Deg wemcan-a i x teqqarem kenniw: ‘Aqa-t d řxirbet ařami war iqqim uřa d ijj n bnadem niɣ d řmař!’, [wah,] di tneddam n Yahuda u deg ibriden n Urcalim, tinni ittwareddǧen ařami war iqqim uřa d ijj n bnadem niɣ d amezduɣ niɣ d řmař, ad ittwaseř [ɛad]
JER 33:11 tmijja n warcaq d tmijja n řefraḥet, tmijja n muřay d tmijja n tesřit, tmijja n yinni iqqaren: Qadam SIDI n řɛeskarat, maɣar SIDI iṣbeḥ, maɣar tamexsiwt nnes icewwaren tᵉttɣima i řebda!, tmijja n yinni i dd-ittawyen aqadi di Taddart n SIDI, maɣar Necc ad ssenqeřbeɣ tameḥbast n temmurt, [ad tiři] am deg umezwaru, iqqar SIDI.’”
JER 33:12 “Ammu i iqqar SIDI n řɛeskarat: ‘Deg wemcan-a i ittwareddǧen ařami war iqqim [ɛad] uřa d ijj n bnadem niɣ d řmař, [wah,] di marra tineddam nnes ad iřint ɛawed ddmani n tarewsa i imeksawen nni i ɣa issareyyḥen uǧi.
JER 33:13 Di Temmurt n Idurar, di tneddam n Temmurt Iwaṭan, di tneddam n Temmurt n Ljanub, di temmurt n Binyamin, deg imucan i d as dd-innḍen i Urcalim u di tneddam n Yahuda ad ɛdun wuǧi ɛawed sadu ifassen n yinni i ten iḥessben!’, [ammu] i iqqar SIDI.”
JER 33:14 “Xzar, ad dd-asen wussan, [ammu i] iqqar SIDI, ad ssqefřeɣ awař aṣebḥan nni ssiwřeɣ i taddart n Israil d taddart n Yahuda.
JER 33:15 Deg wussan nni u di řweqt nni ad ssɣemyeɣ i Dawud AƔEDDU n tsegda. Netta ad yegg řḥeqq d tsegda di temmurt.
JER 33:16 Deg wussan nni ad ittwassenjem Yahuda uca Urcalim ad tezdeɣ di řaman, ad as ggen [i Urcalim] isem wanita: ‘SIDI d Tasegda nneɣ.’”
JER 33:17 “Maɣar ammu i iqqar SIDI: ‘Ɛemmarṣ ad inqeṣ i Dawud ijj n weryaz nni iqqimen x řɛarc n taddart n Israil,
JER 33:18 uca uřa d ikehhanen Ilawiyyen war d asen ineqqeṣ ɛemmarṣ ijj n weryaz nni i ɣa iqeddmen taɣarṣt n wecmaḍ zzat i wudem inu niɣ ad issbexxar tawhibt [n řɣiǧet] niɣ ad issewjed ict n tɣarṣt, marra ussan.’”
JER 33:19 Yusa-dd wawař n SIDI ɣar Irmiya, inna:
JER 33:20 “Ammu i iqqar SIDI: ‘Mařa izemmar ad tarẓmem řɛahd inu s wass d řɛahd inu s ǧiřet ař ass d ǧiřet war ttiřin ɛad di řweqt nsen ittwaggen,
JER 33:21 [xenni] iři ad ittwarẓ uřa d Řɛahd inu ak-d umsexxar inu Dawud, ařami war ɣares ittiři ɛad mmis nni i ɣa iḥekmen x řɛarc nnes, u ak-d ikehhanen zeg ayt n Lawi, imsexxaren inu.
JER 33:22 Am mammec war izemmar ad ittwaḥseb řɛeskar n ujenna u uřa d ijdi n řebḥar war izemmar ad ittwaɛbar, ammu s waṭṭas i ɣa ggeɣ tarwa n umsexxar inu Dawud u [n] Ilawiyyen nni d ayi ittsexxaren.’”
JER 33:23 Yusa-dd wawař n SIDI ɣar Irmiya, inna:
JER 33:24 “Ma war teẓrid mammec issawař řgens-a, qqaren: ‘Tnayen n řaǧat nni ifarz SIDI, aqa inḍar i-tent’? Aqa nitni stehzan zi řgens inu ařami war iǧi ɛad d řgens i nitni.”
JER 33:25 “Ammu i iqqar SIDI: ‘Mařa Řɛahd inu s wass d ǧiřet war ittiři [ɛad], war ttɣimiɣ tteggeɣ lfarayiḍ n ijenwan d temmurt,
JER 33:26 ad nḍareɣ uřa d tarwa n Yaɛqub d [tarwa] n Dawud ařami war tteggeɣ [ɛad] zi zzariɛet nnes inni ɣa iḥekmen x tarwa n Ibrahim d Isḥaq d Yaɛqub, maɣar Necc ad ssenqeřbeɣ tameḥbast nsen u Necc ad xasen ḥinneɣ.’”
JER 34:1 Awař i dd-iffɣen zi SIDI ɣar Irmiya - umi Nabuxadraṣṣar, ajeǧid n Babil, d marra řɛeskar nnes d marra tigeldiwin n ddunect i iǧan sadu fus nnes d marra řegnus tuɣa ttmenɣan ak-d Urcalim u ak-d marra tineddam nnes - i innan:
JER 34:2 “Ammu i iqqar SIDI, AREBBI n Israil: ‘Uyur uca siweř ak-d Ṣidqiya, ajeǧid n Yahuda, ini as: Ammu i iqqar SIDI, xzar, Necc ad wceɣ tandint-a deg ufus n ujeǧid n Babil u netta ad as iqqed timessi.
JER 34:3 Uřa d cek s yixef nnec war tnejjmed i ufus nnes, maca ad cek ṭṭfen u ad cek wcen deg ufus nnes. Tiṭṭ di tiṭṭ ad tẓared ajeǧid n Babil uca ad kides tessiwřed zeg uqemmum ɣar uqemmum uca ad dd-tawḍed ař Babil.
JER 34:4 Seř maca i wawař n SIDI, Ṣidqiya, ajeǧid n Yahuda. Ammu i xak iqqar SIDI: ‘Cek war tᵉttwanɣed ca s ssif.
JER 34:5 Ad temmted di řehna uca am mammec ssarɣen timessiyat i řejdud nnec, ijeǧiden n zic nni tuɣa iǧan qbeř i cek, ad ssarɣen ɛawed d timessiyat i cek uca ad xak wten agejdur, ad inin: Ax, sidi!’, maɣar Necc ssiwřeɣ awař[-a], [ammu i] iqqar SIDI.’”
JER 34:6 Issiweř unabi Irmiya marra awařen-a i Ṣidqiya, ajeǧid n Yahuda, di Urcalim,
JER 34:7 [umi] tuɣa řɛeskar n ujeǧid n Babil ittmenɣa ak-d Urcalim u ak-d marra tineddam n Yahuda nni iqqimen, ak-d Laxic d Ɛaziqa, maɣar tina tuɣa ɛad qqiment jar tneddam n Yahuda, minzi tuɣa atent d tineddam ifaryen.
JER 34:8 Awař nni dd-iffɣen zi SIDI ɣar Irmiya, awarni ma iqqen ujeǧid Ṣidqiya ijj n řɛahd ak-d marra řgens nni iǧan di Urcalim, maḥend ad barrḥen s ijj n usarreḥ jar asen,
JER 34:9 maḥend kuř ijjen ad yarxu i ismeɣ nnes u i tayya nnes, i Uɛibrani u i Tɛibranect, ařami war ittɣimi jar asen uřa d ijjen [wenni iǧan] d ismeɣ ɣar ijj n weryaz zi Yahuda, ɣar umas.
JER 34:10 Marra řḥukkam d marra řgens nni iqqnen řɛahd, sřin aqa [kuř] aryaz ad yarxu i ismeɣ nnes u [kuř] aryaz ad yarxu i tayya nnes ḥima war ittɣimi ɣarsen uřa d ijj n ismeɣ. Nitni wcin amezzuɣ [i man aya] uca ssekken ten.
JER 34:11 [Maca awarni as] beddřen, arrin-dd isemɣan d tiyya inni umi tuɣa arxun, ḥṣaren ten ɛawed maḥend ad iřin [ɛawed] d imsemɣan d tiyya.
JER 34:12 [Xenni] yusa-dd wawař n SIDI ɣar Irmiya, inna:
JER 34:13 “Ammu i iqqar SIDI, AREBBI n Israil: ‘Necc ggiɣ ijj n Řɛahd ak-d řejdud nwem deg wass nni di ten dd-ssuffɣeɣ zi Miṣra, zi taddart n tesmuɣi, nniɣ:
JER 34:14 Awarni řami ɛdun sebɛa n iseggʷusa ittxeṣṣa kuř ijj ad issekk umas Aɛibrani nni d ac izzenzen ixef nnes uca tuɣa ixeddem i cek setta n iseggʷusa. Ittxeṣṣa ad as tarxud [ad yuyur] di třelli! [Maca] řejdud nwem war ɣari dd-sřin u war [d ayi] wcin ca amezzuɣ.
JER 34:15 Waxxa kenniw tdewřem-dd, teggim min iǧan nican di tiṭṭawin inu am ibarreḥ kuř ijj s usarxu i jjar nnes uca teggim ijj n řɛahd zzat i wudem inu di Taddart min xef ittwabarreḥ Isem inu,
JER 34:16 kenniw [maca] tennqeřbem ɛawed uca tessɛiǧtem Isem inu. Kuř ijj yarra-dd ismeɣ nnes u kuř ijj yarra-dd tayya nnes nni umi tuɣa tarxum maḥend ad uyuren nitni mani xsen, uca kenniw teḥṣarem ten ɛawed maḥend ad awem iřin d imsemɣan d tiyya.’”
JER 34:17 “S uya, ammu i iqqar SIDI: ‘Kenniw war ɣari tesřim maḥend kuř ijj ad ibarreḥ s usarxu i umas u kuř ijj i jjar nnes. Xzar, ammu Necc ad awem barrḥeɣ s usarxu, [ammu i] iqqar SIDI, [maḥend ad kenniw sellmeɣ] i ssif, i ṭṭaɛun u i řaẓ. Necc ad kenniw ggeɣ d [ict n řqecɛet n] unexřiɛ i marra tigeldiwin n ddunect.
JER 34:18 Necc ad arreɣ iryazen nni iɛdun x řɛahd inu, inni war iṭṭifen deg wawařen n řɛahd nni ggin zzat i wudem inu, [am] uɛejmi nni bḍan x tnayen d wenni jar izeynat nnes cuqen nitni:
JER 34:19 řḥukkam n Yahuda d řḥukkam n Urcalim, imsexxaren icennɛen, ikehhanen d marra řgens n temmurt, inni icuqen [marra] jar iziynat n uɛejmi.
JER 34:20 Necc ad ten wceɣ deg ufus n řɛedyan nsen u deg ufus n yinni yarezzun ad ten nɣen uca řxecbat nsen ad iřint d macca i ijḍaḍ n ujenna u i řmař n temmurt.
JER 34:21 Uřa d Ṣidqiya, ajeǧid n Yahuda, d řḥukkam nnes ad ten ggeɣ deg ufus n řɛedyan nsen, deg ufus n yinni yarezzun tudart nsen, deg ufus n řɛeskar n ujeǧid n Babil nni xawem iffɣen [řexxu].
JER 34:22 Xzar, Necc ad umureɣ, [ammu i] iqqar SIDI, u Necc ad ten dd-arreɣ ɣar tendint-a u nitni ad kides mmenɣen, ad tt ṭṭfen uca ad as qqden timessi. Necc ad arreɣ tineddam n Yahuda d ict n temmurt ittwareddǧen, war dayes ittɣimi uřa d ijj n umezduɣ [ɛad].’”
JER 35:1 Awař n SIDI i dd-yusin ɣar Irmiya deg wussan n Yahuyaqim, mmis n Yuciya, ajeǧid n Yahuda, inna:
JER 35:2 “Uyur ɣar taddart n ayt n Rikab uca siweř akidsen u awyi ten ɣar Taddart n SIDI, deg ijj zeg ixxamen [nnes], u ewc asen binu ḥima ad swen.”
JER 35:3 [Xenni] iwyeɣ-dd Yazanya[hu], mmis n Irmiya, mmis n Ḥabṣiniya, [jmiɛ] ak-d marra aytmas d marra iḥenjiren nnes d marra taddart n ayt n Rikab.
JER 35:4 Iwyeɣ ten ɣar Taddart n SIDI, deg wexxam n ayt n Ḥanan, mmis n Yajdalya, aryaz n AREBBI, [axxam] nni [iǧan] zzat i wexxam n řḥukkam, tiwa i wexxam n Maɛasiya, mmis n Callum, aɛessas n tewwart.
JER 35:5 Necc ssarseɣ iɣarrafen ccuren s binu d řkisan zzat i wudem n ayt n Rikab uca nniɣ asen: ‘Swem binu!’
JER 35:6 [Maca] nitni nnan: ‘Neccin war nsess ca binu, maɣar babatneɣ Yunadab, mmis n Rikab, iweṣṣa aneɣ, inna: Kenniw ɛemmarṣ war ttsessem binu, kenniw d iḥenjiren nwem, ař i řebda.
JER 35:7 War iɛeddeř ad tebnam taddart niɣ ad tzarɛem zzariɛet niɣ ad teẓẓum tazayart deg umarjeɛ niɣ ad ɣarwem yiři umarjeɛ n uḍiř, [maca] min ɣa tekkem teddarem ad tzedɣem deg iqiḍan, maḥend ad teddarem ussan aṭṭas di temmurt mani i ɣa tzedɣem am yibarraniyyen.
JER 35:8 Neccin nesřa ɣar babatneɣ Yunadab, mmis n Rikab, di marra min zi i d aneɣ iweṣṣa, maḥend war nsess binu marra tudart nneɣ, neccin d temɣarin nneɣ d iḥenjiren nneɣ d yessitneɣ,
JER 35:9 u maḥend war nbenni tudrin d tazeddiɣt i yixef nneɣ. War ɣarneɣ bu umarjeɛ n uḍiř niɣ iyyar niɣ zzariɛet,
JER 35:10 uca neccin tuɣa nzeddeɣ deg iqiḍan. [Ammu] i nesřa u negga ɛlaḥṣab marra min zi i d aneɣ iweṣṣa babatneɣ Yunadab.
JER 35:11 Umi [maca] Nabuxadnaṣṣar, ajeǧid n Babil, igeɛɛed x temmurt-a, imsar, aqa nenna: Asem-dd, ad nraḥ ɣar Urcalim zi ssibbet n řɛeskar n Ikaldaniyyen u zi ssibbet n řɛeskar n Aram! [S uyenni i] nzeddeɣ di Urcalim.’”
JER 35:12 [Xenni] yusa-dd wawař n SIDI ɣar Irmiya, inna:
JER 35:13 “Ammu i iqqar SIDI n řɛeskarat, AREBBI n Israil: Uyur, ini i yeryazen n Yahuda u i imezdaɣ n Urcalim: ‘Ma war tᵉttexsem ad teksim ttarbiyyet s utesři i wawařen inu?’, iqqar SIDI.
JER 35:14 Awařen n Yunadab, mmis n Rikab, inni yumur i iḥenjiren nsen ḥima war sessen binu, aqa ḍfaren ten-dd, maɣar ař ass-a war swin ca, minzi nitni sřin ɣar tewṣeyyet n babatsen, [maca] Necc ssiwřeɣ akidwem, [wah ɛad] zeg umezwaru ssiwřeɣ akidwem, [maca] kenniw war ɣari dd-tesřim ca.
JER 35:15 Necc ssekkeɣ-dd ɣarwem marra imsexxaren inu, inabiyyen. Ɛad zic sekkeɣ ten ḥima ad inin: Dewřem-dd xenni, kuř ijj zeg webrid nnes aɛeffan u ggem řexdayem tiṣebḥanin u war traddafem irebbiten nneɣni maḥend ad asen tsexxarem, xenni tzemmarem ad teqqimem [tzedɣem] di temmurt i d awem wciɣ u i řejdud nwem. Kenniw maca war tewcim amezzuɣ u war ɣari tesřim.
JER 35:16 Iḥenjiren n Yunadab, mmis n Rikab, ssqefřen tawṣeyyet n babatsen nni ten yumur, [maca] řgens-a war ɣari isři ca.”
JER 35:17 “S uya, ammu i iqqar SIDI, AREBBI n řɛeskarat, AREBBI n Israil: Xzar, Necc ad awyeɣ x Yahuda u x marra imezdaɣ n Urcalim marra řɣar nni d asen nniɣ, minzi ssiwřeɣ akidsen maca nitni war sřin ca, uca řaɣiɣ asen maca nitni war dd-arrin ca.”
JER 35:18 Inna Irmiya i taddart n ayt n Rikab: “Ammu i iqqar SIDI n řɛeskarat, AREBBI n Israil: ‘Umi tesřim ɣar tewṣeyyet n babatwem Yunadab uca teḥḍam marra tiweṣṣa nnes u teggim ɛlaḥsab marra min d awem yumur,
JER 35:19 x uya, ammu i iqqar SIDI n řɛeskarat, AREBBI n Israil: Marra ussan war ittxeṣṣi ɛemmarṣ i Yunadab, mmis n Rikab, ijj n weryaz nni ittbeddan zzat i wudem inu!’”
JER 36:1 Deg useggʷas wiss arebɛa n Yahuyaqim, mmis n Yuciya, ajeǧid n Yahuda, imsar aqa yusa-dd wawař n SIDI wanita ɣar Irmiya, inna:
JER 36:2 “Ksi ijj n wedlis ittwanḍen uca ari xas marra awařen i ɣarek ssiwřeɣ x Israil u x Yahuda u x marra řegnus, zeg wass i dd ɣarek ssiwřeɣ, zeg wussan n Yuciya ař ass-a.
JER 36:3 Ad taɣ ad sřen inni n taddart n Yahuda x marra řɣar nni xseɣ ad asen ggeɣ maḥend ad dd-dewřen ad tuben, kuř ijj zeg webrid nnes aɛeffan, u Necc ad asen ɣfareɣ řmuɛṣiyyet nsen d ddnub nsen.”
JER 36:4 [Xenni] iřaɣa-dd Irmiya x Barux, mmis n Niri-Yah, uca yura Barux zeg uqemmum n Irmiya marra awařen n SIDI nni d as inna deg ijj n wedlis ittwannḍen.
JER 36:5 Yumur Irmiya i Barux, inna: “Necc ttwassbeddeɣ, war zemmareɣ ad dd-adfeɣ ɣar Taddart n SIDI.
JER 36:6 Adef-dd cek ɣar daxeř uca ɣar awařen n SIDI zeg wedlis ittwanḍen nni turid zeg uqemmum inu deg imezzuɣen n řgens di Taddart n SIDI deg wass n uẓummi. Ittxeṣṣa ad ten tɣared deg imezzuɣen n marra [ayt n] Yahuda, inni dd-yusin zi marra tineddam nsen.
JER 36:7 Ad taɣ ad yaf tutra nsen arḍa zzat i wudem n SIDI u ad dd-dewřen ad tuben nitni, kuř ijj zeg webrid nnes aɛeffan, maɣar d ameqqran i yeǧa weɣḍab d wesɛar i x tuɣa issiweř SIDI i řgens-a.”
JER 36:8 Barux, mmis n Niri-Yah, igga marra am mammec t yumur unabi Irmiya, uca iɣra-dd awařen n SIDI [i řgens] zeg wedlis [ittwannḍen] di Taddart n SIDI.
JER 36:9 Deg useggʷas wiss xemsa n Yahuyaqim, mmis n Yuciya, ajeǧid n Yahuda, deg uyur wiss tesɛa barrḥen s ijj n uẓummi zzat i wudem n SIDI i marra řgens di Urcalim u i marra řgens nni dd-yusin di Urcalim zi tneddam n Yahuda.
JER 36:10 Iɣra-dd Barux awařen n Irmiya di Taddart n SIDI x imezzuɣen n marra řgens zeg wedlis [ittwannḍen], deg wexxam n Jamarya, mmis n Cafan, amarir, di řemraḥ n sennej, ɣar wadaf n tewwart n jdid n Taddart n SIDI.
JER 36:11 [Umi] Mixa-Yahu, mmis n Jamarya, mmis n Cafan, isřa i marra awařen n SIDI zeg wedlis [ittwannḍen],
JER 36:12 ihwa-dd netta ɣar taddart n ujeǧid, ɣar wexxam n umarir. Xzar, qqimen din marra řḥukkam: Alicamaɛ, amarir, Dalaya, mmis n Camɛiya, Il-Natan, mmis n Ɛakbur, Jamarya, mmis n Cafan, Ṣidqiya, mmis n Ḥananya, u marra řḥukkam.
JER 36:13 Mixa-Yahu iɛawed asen marra awařen nni tuɣa isřa umi dd-iɣra Barux zeg wedlis [ittwanḍen] deg imezzuɣen n řgens.
JER 36:14 [Xenni] ssekken-dd marra řḥukkam Yahudi, mmis n Natanya, mmis n Calamya, mmis n Kuci, ɣar Barux, nnan: “Adlis ittwanḍen manis dd-teɣrid x řgens, ksi t deg ufus nnec uca as-dd!” [Řexdenni] iksi Barux, mmis n Niri-Yah, adlis ittwannḍen nni uca yudef-dd ɣarsen.
JER 36:15 Nitni nnan as: “Qqim, tɣared adlis ittwannḍen xaneɣ!” [Xenni] iɣra t Barux xasen.
JER 36:16 Umi sřin nitni marra awařen [nni], xzaren deg wayawya ggʷeden uca nnan i Barux: “Nican ad nɛawed marra awařen-a i ujeǧid.”
JER 36:17 Nitni sseqsan Barux, nnan: “Ini aneɣ maca, mammec turid marra awařen-a zeg uqemmum nnes?”
JER 36:18 Yarra-dd xasen Barux: “S uqemmum nnes i xafi iɣra marra awařen-a u necc uriɣ ten s ssmex deg wedlis[-a] [ittwannḍen].”
JER 36:19 [Xas uca] nnan řḥukkam i Barux: “Uyur, ffar ixef nnec, cek uřa d Irmiya! Uřa d ijj war ittessen mani teǧam.”
JER 36:20 Udfen nitni ɣar ujeǧid di řemraḥ, [maca] nitni tuɣa xemmřen adlis ittwannḍen deg wexxam n Ilicamaɛ, amarir, u nitni ḥajan marra awařen-a ɣar imezzuɣen n ujeǧid.
JER 36:21 [Xenni] issekk ujeǧid Yahudi maḥend ad dd-yawi adlis ittwannḍen. Wanita yiwi t i-dd zeg wexxam n Alicamaɛ, amarir, uca iɣra i-t-i-dd Yahudi deg imejjan n ujeǧid u deg imejjan n marra řḥukkam nni dd-ibedden ɣar ujeǧid.
JER 36:22 Tuɣa iqqim ujeǧid di taddart n tagarst, tuɣa d ayur wiss tesɛa. Zzates tareqq [dinni] tmessi x tmejmart.
JER 36:23 Řami iɣra Yahudi třata niɣ arebɛa n iḍewḍan, iqess i-ten ujeǧid s řmuss n umarir uca inḍar i-ten di tmessi x řmejmar, ařami tuɣa timessi x řmejmar tecca marra adlis.
JER 36:24 Ajeǧid d marra imsexxaren nnes inni isřin i wawařen-a marra, war nnxeřɛen u war carrgen arruḍ nsen.
JER 36:25 Ttaren Il-Natan d Dalaya d Jamarya i ujeǧid aṭṭas ḥima war issecmiḍ [adlis] ittwannḍen, [maca] netta war ɣarsen isři.
JER 36:26 [Ɛad] yumur ujeǧid i Yarḥamiyil, mmis n ujeǧid, i Saraya, mmis n Ɛazrayil, u i Calamya, mmis n Ɛabdiyil, ḥima ad ṭṭfen amarir Barux d unabi Irmiya d imeḥbas. [Maca] SIDI issnuffar i-ten.
JER 36:27 Yusa-dd wawař n SIDI ɣar Irmiya, awarni řami issecmeḍ ujeǧid adlis ittwannḍen d wawařen nni yura Barux, [inni dd-iffɣen] zeg uqemmum n Irmiya, inna:
JER 36:28 “Ksi ɛawed ijj n wedlis ittwannḍen nneɣni u ari xas marra awařen imezwura, inni tuɣa deg wedlis amezwaru i issecmeḍ Yahuyaqim, ajeǧid n Yahuda,
JER 36:29 uca ini i Yahuyaqim, ajeǧid n Yahuda: ‘Ammu i iqqar SIDI: Cek tesscemḍed adlis-a ittwannḍen, tennid: Mayemmi dayes turid, tennid: Ajeǧid n Babil ad dd-yas, ad ixarreb tammurt uca ad zzayes imḥa bnadem d řmař?’
JER 36:30 ‘S uya, ammu i iqqar SIDI x Yahuyaqim, ajeǧid n Yahuda: War ɣares ittiři wenni i ɣa iqqimen x řɛarc n Dawud uca řxecbet nnes ad temmenḍar i řeḥmu n uziř u i tesmeḍ n ǧiřet.
JER 36:31 Necc ad zzayes xeřfeɣ řmuɛṣiyyet nsen, uřa zi tarwa nnes uřa zeg imsexxaren nnes. Necc ad ssɣeḍřeɣ xasen, x imezdaɣ n Urcalim u x iryazen n Yahuda, marra řɣar i d asen nniɣ, [waxxa] nitni war xsen ad sřen.’”
JER 36:32 Iksi Irmiya ijj n wedlis nneɣni ittwannḍen uca iwca i-t i umarir Barux, mmis n Niri-Yah. Wanita yura xas, zeg uqemmum n Irmiya, marra awařen n wedlis [ittwannḍen] nni tuɣa Yahuyaqim, ajeǧid n Yahuda, issecmeḍ s tmessi uca ttwarnin ɛad ɣarsen waṭṭas n wawařen nneɣni i ten yudsen.
JER 37:1 Idweř Ṣidqiya, mmis n Yuciya, d ajeǧid deg wemcan n Kun-Yahu, mmis n Yahuyaqim, wenni tuɣa igga Nabuxadraṣṣar, ajeǧid n Babil, d ajeǧid x temmurt n Yahuda.
JER 37:2 Wanita war isři ca ɣar wawařen n SIDI nni issiweř Netta s ufus n unabi Irmiya, war iǧi wanita uřa d imsexxaren nnes uřa d řgens n temmurt.
JER 37:3 [Waxxa amenni] issekk ujeǧid Ṣidqiya Yahuxal, mmis n Calamya, d Ṣafanya, mmis n Maɛasiya, ɣar unabi Irmiya maḥend ad as inin: “Ẓaǧ xaneɣ ɣar SIDI, AREBBI nneɣ!”
JER 37:4 Irmiya tuɣa ɛad izemmar ad yadef u ad iffeɣ di řwesṭ n řgens u nitni tuɣa ɛad war t nḍaren di řḥebs.
JER 37:5 Iffeɣ-dd řɛeskar n firɛun zi Miṣra uca umi sřin Ikaldaniyyen nni tuɣa iḥeṣṣaren Urcalim x man aya, aggʷejen x Urcalim.
JER 37:6 Xenni yusa-dd wawař n SIDI ɣar unabi Irmiya, inna:
JER 37:7 “Ammu i iqqar SIDI, AREBBI n Israil: ‘Ammu i ɣa tinim i ujeǧid n Yahuda, wenni kenniw ɣari dd-issekken ḥima ad ayi tesseqsam: Xzar, řɛeskar n firɛun nni dd-iffɣen maḥend ad awem iwc afus, ad dd-iɛqeb ɣar temmurt nnes, ɣar Miṣra!
JER 37:8 Ad dd-dewřen Ikaldaniyyen, ad mmenɣen ak-d tendint-a uca ad tt ṭṭfen, ad as qqden timessi.’
JER 37:9 Ammu i iqqar SIDI: ‘War cemmtem ixef nwem xmi ɣa tinim: Ikaldaniyyen ad xaneɣ aggʷejen, ad uyuren!, minzi nitni war gguren.
JER 37:10 Ɛad mařa kenniw tɣeřbem marra řɛeskar n Ikaldaniyyen inni akidwem ittmenɣan, uca ad zzaysen qqimen mɣir iryazen iyezmen aṭṭas, aqa nitni ad kkaren, kuř ijj deg uqiḍun nnes, uca ad qqden timessi i tendint-a.’”
JER 37:11 Imsar umi dd-issgeɛɛed řɛeskar n Ikaldaniyyen zi Urcalim zi ssibbet n řɛeskar n firɛun,
JER 37:12 iffeɣ Irmiya zi Urcalim maḥend ad iraḥ ɣar temmurt n Binyamin ḥima ad dinni iṭṭef ict n tesɣart di řwesṭ n řgens nnes.
JER 37:13 [Řami t tuɣa] di tewwart n Binyamin, tuɣa din akumandar n tɛessast, qqaren as Yariyya, mmis n Calamya, mmis n Ḥananya. Netta iṭṭef anabi Irmiya, inna: “Cek texsed ad tarewřed ɣar Ikaldaniyyen!”
JER 37:14 Yarra-dd [xas] Irmiya: “Man aya mɣir d axarriq! Necc war xseɣ ca ad arewřeɣ ɣar Ikaldaniyyen!” [Maca] netta war ɣares isři ca uca iṭṭef Yariyya Irmiya uca yiwyi t ɣar řḥukkam [n řgens].
JER 37:15 Ffugmen řḥukkam aṭṭas x Irmiya, wtin t uca ggin t di řeḥbes, di taddart n umarir Yunatan, maɣar tanita tuɣa arrin tt d taddart n tɛessast.
JER 37:16 Ammu dd-iwḍa Irmiya deg weḥfur n imeḥbas u deg ixxamen n řeḥbes. Dinni iqqim Irmiya aṭṭas n wussan.
JER 37:17 Issekk ujeǧid Ṣidqiya ijjen maḥend ad t-i-dd-awyen uca isseqsa t ujeǧid s tnuffra di tzeddiɣt nnes, inna: “Ma aqa din [zeɛma] ca n wawař n SIDI?” Inna [as] Irmiya: “Aqa-t din!” [Xenni] inna: “Cek ad tewḍid deg ufus n ujeǧid n Babil.”
JER 37:18 [Řexdenni] inna Irmiya i ujeǧid Ṣidqiya: “Man řɛib i dayek ggiɣ niɣ deg imsexxaren nnec niɣ di řgens-a ařami kenniw d ayi tenḍarem di řeḥbes?
JER 37:19 Mani ǧan [řexxu] inabiyyen nwem nni tuɣa ittnabben i kenniw, qqaren: Ajeǧid n Babil war dd-ittis ḍidd nwem u ḍidd i temmurt-a!
JER 37:20 [Xenni] řexxu, seř maca, [a] sidi inu ajeǧid! Iři ad taf tutra inu d arḍa zzat i wudem nnec! War ttejji ad ayi arren ɣar taddart n umarir Yunatan ḥima war dinni ttmettiɣ.”
JER 37:21 [Xenni] yumur ujeǧid Ṣidqiya ad ḥḍan x Irmiya di řemraḥ n řeḥbes uca wcin as kuř ass ijj n wengur n weɣrum zi Zzenqet n Ixbayziyyen ařami iqḍa weɣrum zi tendint. [Ammu i] iqqim Irmiya di řemraḥ n řeḥbes.
JER 38:1 [Řami] Cafaṭya, mmis n Mattan, d Jadalya, mmis n Facḥur, d Yuxal, mmis n Calamya, d Facḥur, mmis n Malkiya, sřin i wawařen nni issiweř Irmiya ɣar marra řgens, umi wanita inna:
JER 38:2 “Ammu i iqqar SIDI: ‘Wenni i ɣa iqqimen di tendint-a, ad ittwaneɣ s ssif, s řaẓ u s ṭṭaɛun, [maca] wenni i ɣa iffɣen ɣar Ikaldaniyyen, ad iqqim iddar. Netta ad yawi akides buḥbeř nnes am tkeccaḍt, ad iqqim iddar!’.
JER 38:3 Ammu i iqqar SIDI: ‘Tandint-a ad temmewc deg ufus n řɛeskar n ujeǧid n Babil u netta ad tt iṭṭef!’”,
JER 38:4 [řexdenni] nnan řḥukkam i ujeǧid: “Ittxeṣṣa ad ittwaneɣ weryaz-a, minzi ammu i issefcař ifassen n iɛeskariyyen nni [ɛad] iqqimen di tendint-a uřa d ifassen n marra řgens umi ɣarsen issawař awařen-a, maɣar aryaz-a war yarezzu ca řehna i tendint-a, maca yarezzu řɣar.”
JER 38:5 Inna ujeǧid Ṣidqiya: “Xzar, netta aqa-t deg ufus nnem, maɣar ajeǧid war izemmar ad awem igg walu.”
JER 38:6 Ṭṭfen nitni Irmiya uca nḍaren t deg wanu n mmis n ujeǧid Malkiya, wenni [iǧan] di řemraḥ n řeḥbes. Seyyben Irmiya s iseɣwan swadday. Tuɣa war din bu waman deg wanu, maca mɣir abaryuḍ uca iɣḍes Irmiya deg ubaryuḍ.
JER 38:7 [Umi] isřa Ɛabd-Malik, Akuci, ijj n umsexxar amcenneɛ di taddart n ujeǧid, aqa nḍaren Irmiya deg wanu, uca iqqim ujeǧid ɣar tewwart n Binyamin,
JER 38:8 iffeɣ Ɛabd-Malik zi taddart n ujeǧid uca issiweř ak-d ujeǧid, inna:
JER 38:9 “[A] sidi inu ajeǧid, iryazen-a ggin min war iḥřin di marra min ggin i unabi Irmiya, wenni nḍaren nitni deg wanu. Tuɣa izemmar ad dinni immet s řaẓ, maɣar [ɛad] walu aɣrum di tendint.”
JER 38:10 [Xenni] yumur ujeǧid Ɛabd-Malik Akuci [zi temmurt n Kuc], inna: “Ksi ssenni třatin n yeryazen sadu ufus nnec uca sgeɛɛed anabi Irmiya zeg wanu qbeř i ɣa immet.”
JER 38:11 Ɛabd-Malik iksi iryazen [nni] sadu ufus nnes uca yudef ɣar taddart n ujeǧid ař wadday n wexxam n txubay. Ssenni iksi ikettanen iqdimen d warruḍ iqqarṣen uca issehwa i-ten-dd s iseɣwan ɣar Irmiya deg wanu.
JER 38:12 [Xenni] inna Ɛabd-Malik Akuci i Irmiya: “Egg ikettanen iqdimen d warruḍ iqqarṣen sadu tiddiɣin n iɣaǧen nnec uca egg iseɣwan swadday!” Uca ammu i tt igga Irmiya.
JER 38:13 Jebden-dd nitni Irmiya s iseɣwan uca ssgeɛɛden t-i-dd zeg wanu. [Maca] Irmiya iqqim di řemraḥ n řeḥbes.
JER 38:14 [Xenni] issekk ajeǧid Ṣidqiya [ca n imsexxaren nnes], ijja ad as dd-awyen anabi Irmiya ɣar wadaf wiss třata ɣar Taddart n SIDI. Inna ujeǧid i Irmiya: “Necc xseɣ ad cek sseqsiɣ x ict n řḥajjet, war xafi tt tteffar walu.”
JER 38:15 Yarra-dd Irmiya x Ṣidqiya: “Mařa necc ssargbeɣ cek, ma war d ayi tneqqed zeɛma? U mařa wciɣ ac ijj n array, cek war ɣari tᵉttesřid!”
JER 38:16 [Xas uca] ijjuǧ ujeǧid Ṣidqiya i Irmiya s tnuffra inna: “S tidett am iddar SIDI wenni d aneɣ iwcin tudart-a: ‘[Uct xafi], mařa necc nɣiɣ cek niɣ mařa wciɣ cek deg ifassen n yeryazen nni yarezzun tudart nnec!’”
JER 38:17 Inna Irmiya i Ṣidqiya: “Ammu i iqqar SIDI, AREBBI n řɛeskarat, AREBBI n Israil: ‘Mařa cek ad teffɣed s tidett ɣar řḥukkam n ujeǧid n Babil, ad teqqimed ad teddared, uca tandint-a war tᵉttwassecmaḍ s tmessi, cek ad teqqimed ad teddared, [wah] cek d taddart nnec.
JER 38:18 [Maca] mařa war teffiɣed ca ɣar řḥukkam n ujeǧid n Babil, [xenni] ad temmewc tendint-a deg ufus n Ikaldaniyyen. Nitni ad tt sscemḍen s tmessi u cek war tnejjmed zeg ifassen nsen.’”
JER 38:19 Ajeǧid Ṣidqiya inna i Irmiya: “Necc tteggʷedeɣ zeg Wudayen nni yeɛdun ɣar Ikaldaniyyen, ařami nitni war d ayi ssɛeddun ɣar ufus nsen u war zzayi tteggen min xsen.”
JER 38:20 Inna [as] Irmiya: “Nitni war cek sellmen ca. Seř maca ɣar tmijja n SIDI, ɣar řḥařḍ inu, [xenni] ad tiřid mliḥ u ad teqqimed ad teddared.
JER 38:21 [Maca] mařa tugid ad teffɣed, [xenni] d wa d awař nni d ayi isscen SIDI:
JER 38:22 ‘Xzar, marra timɣarin nni tuɣa iqqimen di taddart n ujeǧid n Yahuda, ad ttwanedhent ɣar řḥukkam n ujeǧid n Babil. Xzar, nitenti ad inint: Iryazen nni ak-d tuɣa teddared di řehna, aqa ɣdaren cek u zemmaren xak, nnuɣen iḍaren nnec deg ubaryuḍ, [uca nitni s yixef nsen] dewřen ɣar ḍeffar!
JER 38:23 Marra timɣarin nnec d iḥenjiren nnec ad ttwanedhen ɣar Ikaldaniyyen, uca uřa d cek simant nnec war tnejjmed zeg ufus nsen, minzi ad tᵉttwaṭṭfed zeg ujeǧid n Babil u tandint-a ad tᵉttwassecmeḍ s tmessi.’”
JER 38:24 [Xenni] Ṣidqiya inna i Irmiya: “Ittxeṣṣa uřa d ijj war ittessen awařen-a, [ammu] war tmmetid.
JER 38:25 Mařa řḥukkam sřin aqa necc ssiwřeɣ akidek, ad ɣarek dd-asen, ad ac inin: ‘Ini aneɣ min tennid i ujeǧid! War xaneɣ teffar [walu], niɣ aqa ad cek nenneɣ: Min xas kidek issiweř ujeǧid?’
JER 38:26 [xenni] ittxeṣṣa ad asen tinid: ‘Necc wḍiɣ s řqedd inu zzat i wudem n ujeǧid ḥima war ittejji ad ayi arren ɣar taddart n Yunatan maḥend ad dinni mmteɣ.’”
JER 38:27 [Řami] dd-usin marra řḥukkam ɣar Irmiya, iḥaja ten marra awařen-a inni tuɣa yumur ujeǧid. [Xas uca] jjin t maɣar uřa d ijj war isři tamesřact simant nnes.
JER 38:28 [Ammu i] iqqim Irmiya di řemraḥ n řeḥbes ař ass nni di tᵉttwaṭṭef Urcalim, [wah,] netta tuɣa-t ɛad din umi tᵉttwaṭṭef Urcalim.
JER 39:1 Deg useggʷas wiss tesɛa n Ṣidqiya, ajeǧid n Yahuda, deg uyur wiss ɛecra, yusa-dd Nabuxadraṣṣar, ajeǧid n Babil, ak-d marra řɛeskar nnes ɣar Urcalim uca nnḍen as-dd.
JER 39:2 Deg useggʷas wiss ḥiṭac n Ṣidqiya, deg uyur wiss arebɛa, deg wass wiss tesɛa n uyur, wtin ibuxxac di [řḥiḍ n] tendint.
JER 39:3 [Xas uca] udfen marra řḥukkam n ujeǧid n Babil uca qqimen di tewwart n wammas: Narjal-Caraṣar, Camjar-Nabu, Sarsaxim, azeǧif n imsexxaren n taddart n ujeǧid, Narjal-Carṣar, azeǧif n ayt n bu-tseḥḥart, uřa d marra řḥukkam inneɣni n ujeǧid n Babil.
JER 39:4 Řami Ṣidqiya, ajeǧid n Yahuda, d marra iɛeskariyyen nnes ẓrin ten, arewřen nitni, ffɣen zi tendint s ǧiřet x webrid ɣar weḥwic n ujeǧid. Nitni kkin zi tewwart jar tnayen n řeḥyuḍ uca netta iṭṭef abrid ɣar Řewḍa.
JER 39:5 Ḍfaren ten řɛeskar n Ikaldaniyyen, ḥarten x Ṣidqiya di řewḍat n Ariḥa. Nitni ṭṭfen t d ameḥbus uca iwyen t ɣar Nabuxadraṣṣar, ajeǧid n Babil, ɣar Ribla di temmurt n Ḥamat, u wanita iḥkem xas.
JER 39:6 Ijja ujeǧid n Babil ad ɣarṣen iḥenjiren n Ṣidqiya zzat i tiṭṭawin nnes di Ribla. Uřa d marra tarwa n taṣiřet n Yahuda iɣarṣ asen ujeǧid n Babil.
JER 39:7 Issdarɣeř netta tiṭṭawin n Ṣidqiya uca iqqen i-t s tnayen n ssnaseř n nnḥas maḥend ad t yawi ɣar Babil.
JER 39:8 Sscemḍen Ikaldaniyyen taddart n ujeǧid d tudrin n řgens s tmessi uca ařẓin řeḥyuḍ n Urcalim.
JER 39:9 Min iceṭṭen zi řgens nni ittwajjen di tendint, [ixs ad yini] [marra] inni tuɣa iɛdun ɣar ujeǧid n Babil d min iceṭṭen zi řgens, indeh i-ten Nabuzaradan, řqebṭan n iɛessasen n arrimet, di lmenfa.
JER 39:10 Zeg imezřaḍ n řgens nni war ɣar iǧi walu, ijja Nebuzaradan, řqebṭan n iɛessasen n arrimet, ijj n wezyen di temmurt n Yahuda. Iwca asen deg wass nni imarjaɛen n uḍiř d iyyaren.
JER 39:11 Nabuxadraṣṣar, ajeǧid n Babil, tuɣa yumur Nebuzaradan, řqebṭan n iɛessasen n arrimet, x Irmiya, inna:
JER 39:12 “Awyi t-i-dd, ḥḍa xas. War dayes ttegg uřa d ijj n řɣar, [maca] egg akides am mammec i d ac ɣa yini.”
JER 39:13 [Xenni] issekk Nebuzaradan, řqebṭan n iɛessasen n arrimet, [ca n ireqqasen], [netta jmiɛ] ak-d Nebucazban, ameqqran n imsexxaren n ujeǧid, d Narjal-Caraṣar, azeǧif n ayt n tseḥḥart, u ak-d marra ikumandaren n ujeǧid n Babil.
JER 39:14 Jjin ten ad awyen Irmiya zi řemraḥ n řeḥbes, sellmen t deg ufus n Jadalya, mmis n Axiqam, mmis n Cafan, maḥend ad t-i-dd-awyen ɣar taddart nnes. [Ammu i] iqqim izeddeɣ jar řgens.
JER 39:15 Yusa-dd wawař n SIDI ɣar Irmiya umi tuɣa ittwaḥṣar di řemraḥ n řeḥbes, inna:
JER 39:16 “Ruḥ, siweř ak-d Ɛabd-Malik, Akuci, ini: ‘Ammu i iqqar SIDI n řɛeskarat, AREBBI n Israil: Xzar, Necc ad ssiwḍeɣ awařen inu ɣar tendint-a, i řɣar war iǧi i řxar, ad dd-ffɣen [wawařen inu] deg wass nni zzat i tiṭṭawin nnec.
JER 39:17 [Maca] ad cek ssnejmeɣ deg wass nni, [ammu i] iqqar SIDI, u cek war tᵉttmewcid ca deg ifassen n yeryazen i zi teggʷeded.
JER 39:18 Maɣar Necc ad cek ssnejmeɣ. War ccaten s ssif. Ad tiři tudart nnec d takeccaḍt nnec, maɣar cek tᵉttecřed xafi, [ammu i] iqqar SIDI.’”
JER 40:1 Awař i dd-yusin zi SIDI ɣar Irmiya awarni řami t-i-dd-yiwi Nebuzaradan, řqebṭan n iɛessasen n arrimet, zi Rama. Umi t-i-dd-iwyen, ittwacarf netta s ssnaseř di řwesṭ n imenfiyyen zi Urcalim d Yahuda, inni ittwaneddhen d imenfiyyen ɣar Babil.
JER 40:2 Řqebṭan n iɛessasen n arrimet i dd-yiwi Irmiya, inna as: “SIDI, AREBBI nnec, tuɣa ittbarreḥ s řɣar-a x wemcan-a
JER 40:3 uca yarra [i-t] SIDI ad dd-yas uca Netta igga s min tuɣa inna, maɣar kenniw texḍam ak-d SIDI u war tesřim ca ɣar tmijja nnes. S uyenni kenniw iřqef man aya.
JER 40:4 Řexxu [maca], xzar, ad fesyeɣ ass-a ssnaseř nni x ifassen nnec. Mařa d lemliḥ di tiṭṭawin nnec ad kidi dd-tased ɣar Babil, [xenni] as-dd, u necc ad cek ksiɣ. Maca mařa d aɛeffan di tiṭṭawin nnec maḥend ad kidi tuyured ɣar Babil, ejj i-t xenni. Xzar, marra tammurt zzatek. Cek tzemmared ad tuyured ɣar ijj n wemcan i d ac ittɣiř d mliḥ d nican di tiṭṭawin nnec!”
JER 40:5 Umi tuɣa [ɛad] war dd-iɛqib, [yarni inna]: “Dweř-dd ɣar Jadalya, mmis n Axiqam, mmis n Cafan, wenni igga ujeǧid n Babil x tneddam n Yahuda uca qqim ɣares jar řgens, niɣ uyur mani tᵉttwarid mliḥ di tiṭṭawin nnec maḥend ad traḥed.” [Xas uca] iwca as řqebṭan n iɛessasen n arrimet řeɛweč [i umuddu] d ict n tarzeft uca ijja i-t ad yuyur.
JER 40:6 Yuyur Irmiya ɣar Jadalya, mmis n Axiqam, ɣar Miṣfat. Iqqim ittnusa ɣares di řwesṭ n řgens nni tuɣa iqqimen [ɛad] di temmurt.
JER 40:7 [Řami] marra ikumandaren n řɛeskarat nni [iǧan] deg iyyaren, nitni d iryazen nsen, sřin aqa ajeǧid n Babil igga Jadalya, mmis n Axiqam, x temmurt u igga i-t x yeryazen d temɣarin d iḥenjiren, x imezřaḍ qaɛ n temmurt u x [marra] inni tuɣa war ittwanedhen ɣar Babil,
JER 40:8 usin-dd nitni ɣar Jadalya di Miṣfat: Ismaɛil, mmis n Natanya, Yuḥanan d Yunatan, iḥenjiren n Qariḥa, Saraya, mmis n Tanḥumat, [arni xas] iḥenjiren n Ɛifa, Anṭufati, d Yazanya, mmis n Umaɛki, [marra] nitni ak-d yeryazen nsen.
JER 40:9 Jadalya, mmis n Axiqam, mmis n Cafan, ijjuǧ asen u i yeryazen nsen, inna: “War tteggʷdem maḥend ad tsexxarem i Ikaldaniyyen. Qqimem di temmurt uca sexxarem i ujeǧid n Babil, [xenni] ad tiřim mliḥ.
JER 40:10 Uca necc, xzar, necc zeddɣeɣ di Miṣfat maḥend ad beddeɣ [d amendub di ṭṭweɛ nwem] zzat i wudem n Ikaldaniyyen nni ɣarneɣ i dd ɣa yasen. Ittxeṣṣa kenniw ad tessmunem binu d tini n unebdu d zzect, uca ggem aya deg iqdiḥen nwem uca zedɣem di tneddam nni tᵉṭṭfem.”
JER 40:11 Uřa d marra Udayen nni [iǧan] di Mu’ab u jar ayt n Ɛammun u di Idum u di marra timmura [inneɣni], sřin aqa ajeǧid n Babil [ijja] min iqqimen [n imezdaɣ] di Yahuda u igga xasen Jadalya, mmis n Axiqam, mmis n Cafan.
JER 40:12 [S uyenni] dd-ɛeqben marra Wudayen zi marra imucan mani xasen uẓẓřen uca iwḍen ɣar temmurt n Yahuda ɣar Jadalya ɣar Miṣfat. Nitni ssmunen aṭṭas n binu d tini n unebdu.
JER 40:13 [Uřa d] Yuḥanan, mmis n Qariḥa, d marra ikumandaren n řɛeskarat nni tuɣa deg iyyaren usin-dd ɣar Jadalya ɣar Miṣfat.
JER 40:14 Nitni nnan as: “Ma tessned cek, aqa Baɛlis, ajeǧid n ayt n Ɛammun, issekk-dd Ismaɛil, mmis n Natanya, ḥima ad cek ineɣ?” Jadalya, mmis n Axiqam, [maca] war ten yumin.
JER 40:15 Yuḥanan, mmis n Qariḥa, [maca] issiweř ak-d Jadalya s tnuffra di Miṣfat, inna: “Ejj ayi ad din řaḥeɣ u ad nɣeɣ Ismayil, mmis n Natanya. War t issin uřa d ijj. Mayemmi ɣa ineɣ ḥed u marra ayt n Yahuda i dd-xak imunen ad ttwasszuzzaren d min iqqimen zi Yahuda ad iweddar?”
JER 40:16 [Maca] Jadalya, mmis n Axiqam, inna i Yuḥanan, mmis n Qariḥa: “War ttegg aya, maɣar min teqqared cek x Ismaɛil d ixarriqen [waha].”
JER 41:1 Imsar deg uyur wiss sebɛa aqa yusa-dd Ismaɛil, mmis n Natanya, mmis n Ilicamaɛ, wenni d ijj zi řwacun n ujeǧid, [jmiɛ] ak-d imeqqranen n ujeǧid u akides [ɛad] ɛecra n yeryazen, ɣar Jadalya, mmis n Axiqam, ɣar Miṣfat. Nitni munen ttᵉtten din di Miṣfat.
JER 41:2 [Xenni] ikkar Ismaɛil, mmis n Natanya, [jmiɛ ak-d] ɛecra n yeryazen nni tuɣa ɣares iǧan uca wtin Jadalya, mmis n Axiqam, mmis n Cafan, s ssif, uca ammu i inɣa [Ismaɛil] wenni tuɣa igga ujeǧid n Babil x temmurt.
JER 41:3 Inɣa Ismaɛil uřa d marra Udayen i ɣares, ixs ad yini inni tuɣa ɣar Jadalya di Miṣfat, uřa d Ikaldaniyyen nni ittwafen din, iɛeskariyyen.
JER 41:4 Deg wass wiss tnayen awarni řami inɣa Jadalya, am uřa d ijj war yargib [ɛad],
JER 41:5 usin-dd iryazen zi Cakim, Cilu d Samarya, tmenyin n yeryazen, s timira ḥeffent d werruḍ icarreg d ixebbicen. Nitni [iwyen-dd] deg ifassen nsen ict n tewhibt [n řɣiǧet] d jjawi maḥend ad tt awyen ɣar Taddart n SIDI.
JER 41:6 Uca iffeɣ ɣarsen Ismaɛil, mmis n Natanya, zi Miṣfat i umsagar akidsen, iru am iggur. Umi ten immeřqa, inna: “Asem-dd ɣar Jadalya, mmis n Axiqam!”
JER 41:7 Umi dd-iwḍen nitni ɣar řwesṭ n tendint, iɣarṣ asen Ismaɛil, mmis n Natanya. Netta d yeryazen i kides [iǧan,] nḍaren ten di řwesṭ n wanu.
JER 41:8 [Maca] ttwafen ɛecra n yeryazen jar asen inni innan i Ismaɛil: “War d aneɣ neqq ca, maɣar deg iyyar neccin ɣarneɣ řeɛweč ixemmřen n irden, imendi, zzect d tamment.” [Xenni] iḥta xasen, war ten inɣi di řwesṭ n aytmas.
JER 41:9 Anu nni di inḍar Ismaɛil marra arrimat n yeryazen nni inɣa ɣar uɣezdis n Jadalya, tuɣa d wenni igga ujeǧid Asa zi ssibbet n Baɛca, ajeǧid n Israil. Ismaɛil, mmis n Natanya, iccur i-t s yinni ittwanɣen.
JER 41:10 Indeh Ismaɛil marra min iqqimen [ɛad] zi řgens [i iǧan] di Miṣfat, d imeḥbas, aqa yessis n ujeǧid d marra řgens nni tuɣa iqqimen [ɛad] di Miṣfat, inni x tuɣa igga Nebuzaradan, řqebṭan n iɛessasen n arrimet, Jadalya, mmis n Axiqam. Ismaɛil, mmis n Natanya indeh i-ten d imeḥbas uca yuyur ḥima ad iɛdu [x L’Urdun] ɣar [temmurt n] ayt n Ɛammun.
JER 41:11 [Umi] Yuḥanan, mmis n Qariha, d marra ikumandaren n řɛeskarat nni tuɣa ɣares iǧan, sřin s marra řɣar i tuɣa igga Ismaɛil, mmis n Natanya,
JER 41:12 iwyen nitni marra iryazen uca ṭṭfen [abrid] ḥima ad mmenɣen ak-d Ismaɛil, mmis n Natanya. Nitni ufin t ɣar uyeřmam ameqqran ɣar Jibɛun.
JER 41:13 Řami marra řgens i tuɣa ak-d Ismaɛil, inṭeḥ Yuḥanan, mmis n Qariḥa, d marra ikumandaren n řɛeskar nni ɣares, farḥen aṭṭas.
JER 41:14 Marra řgens nni tuɣa indeh Ismaɛil d ameḥbus zi Miṣfat, qeřben, dewřen-dd uca ɛdun ɣar Yuḥanan, mmis n Qariḥa.
JER 41:15 Ismaɛil [maca], mmis n Natanya, yarweř zi zzat n wudem n Yuḥanan ak-d tmenya n yeryazen uca yuyur ɣar ayt n Ɛammun.
JER 41:16 [Xenni] iksi Yuḥanan, mmis n Qariyaḥ, [netta jmiɛ] ak-d marra ikumandaren n řɛeskarat nni ɣares [iǧan], marra min iqqimen ɣar ḍeffar n řgens i yiwi netta zi Ismaɛil, mmis n Natanya, zi Miṣfat, awarni řami inɣa wanita Jadalya, mmis n Axiqam: [aqa] iryazen ijehden, iɛeskariyyen, timɣarin, iḥenjiren imeẓyanen d imsexxaren icennɛen nni dd-isseɛqeb netta zi Jibɛun.
JER 41:17 Nitni uyuren [deg webrid] uca qqimen deg wemcan n arraḥet n Kimhan nni ɣar Bayt-Laḥm, maḥend ad ssenni ɛdun ařami ɣa udfen nitni ɣar Miṣra.
JER 41:18 [Nitni arewřen] zi zzat n wudem n Ikaldaniyyen, maɣar ggʷeden zzaysen, maɣar Ismaɛil, mmis n Natanya, inɣa Jadalya, mmis n Axiqam, wenni igga ujeǧid n Babil [d řbaca] x temmurt.
JER 42:1 [Xenni] qarrben-dd marra ikumandaren n řɛeskar, Yuḥanan, mmis n Qariyaḥ, d Yazanya, mmis n Hucaɛya, d marra řgens, zeg umeẓyan ař ameqqran.
JER 42:2 Nitni nnan i unabi Irmya: “Iři ad yaf tutra nneɣ arḍa zzat i wudem nnec. Ttar aneɣ ɣar SIDI, AREBBI nnec, di ṭṭweɛ n marra min iqqimen, minzi neccin neqqim [ɛad] s drus zeg waṭṭas, am mammec tzemmared ad tᵉtwarid s tiṭṭawin nnec umi ɣarneɣ txezzared.
JER 42:3 Iři SIDI, AREBBI nnec, ad aneɣ isscen man abrid i ɣa neḍfar d min ɣa negg.”
JER 42:4 Inna asen unabi Irmiya: “Necc sřiɣ t. Xzar, necc ad ttareɣ di ṭṭweɛ nwem ɣar SIDI, AREBBI nwem, ɛlaḥsab awařen nwem. Necc ad awem iniɣ marra awař nni zi dd xawem i ɣa yarr SIDI, war zzaywem ssnuffareɣ uřa d ijj n wawař.”
JER 42:5 Nitni nnan i Irmiya: “SIDI ad yiři d Ccahed d amtiqqi d aṣdiq jar aneɣ, mařa war nᵉttegg ɛlaḥsab kuř awař nni kidek ɣarneɣ dd ɣa issekk SIDI, AREBBI nnec!
JER 42:6 D aṣebḥan niɣ d aɛeffan, ad nseř ɣar tmijja n SIDI, AREBBI nneɣ, i umi cek i ɣa nessekk maḥend ad niři mliḥ xmi ɣa nseř ɣar tmijja n SIDI, AREBBI nneɣ.”
JER 42:7 Awarni řami ɛdun ɛecra n wussan, imsar aqa iffeɣ wawař n SIDI ɣar Irmiya.
JER 42:8 [Xas uca] iřaɣa netta x Yuḥanan, mmis n Qariyaḥ, u x marra ikumandaren n řɛeskar nni tuɣa ɣares [iǧan], uřa x marra řgens, zeg umeẓyan ař ameqqran.
JER 42:9 Inna asen: “Ammu i iqqar SIDI, AREBBI n Israil, ɣar wenni d ayi tessekkem, ḥima ad as ssiwḍeɣ tutra nwem zzat i wudem nnes:
JER 42:10 ‘Mařa kenniw teqqimem tzeddɣem di temmurt-a, ammu kenniw i ɣa ssbeddeɣ u war kenniw heddmeɣ, ad kenniw ẓẓuɣ u war kenniw qeřɛeɣ, maɣar Necc neddmeɣ x řɣar i daywem ggiɣ.
JER 42:11 War tteggʷdem ca zeg ujeǧid n Babil, wenni zi tᵉtteggʷedem. War zzayes tteggʷdem, [ammu i] iqqar SIDI. Maɣar Necc akidwem ḥima ad kenniw ssnejmeɣ u ad kenniw fekkeɣ zeg ufus nnes.
JER 42:12 Necc ad kenniw areḥmeɣ maḥend netta ad kenniw yarḥem u ad kenniw yarr ad tdewřem ɣar temmurt nwem.
JER 42:13 [Maca] mařa kenniw teqqarem: Neccin war nettɣimi ca di temmurt-a, u [mařa kenniw] war tᵉttesřim ca ɣar tmijja n SIDI, AREBBI nwem,
JER 42:14 ad tinim: Lla, nexs ad nuyur ɣar Miṣra mani war nẓarr amenɣi u war nᵉttesři i usuḍi deg uyicc n icarri u war nettřiẓi aɣrum. Aqa dinni i nexs ad neqqim!’,
JER 42:15 xenni sřem řexxu ɣar wawař n SIDI, kenniw min iqqimen n Yahuda. Ammu i iqqar SIDI n řɛeskarat, AREBBI n Israil: ‘Mařa kenniw tɛemmdem ad tuyurem ɣar Miṣra uca ad dd-tawḍem ḥima ad din tzedɣem am yibarraniyyen,
JER 42:16 [xenni] ssif i zi tᵉtteggʷedem ad kenniw iřqef dinni di Miṣra u řaẓ i zi tᵉtteggʷedem ad kenniw dd-iḍfar dinni di Miṣra u ad dinni temmtem.
JER 42:17 Xenni marra iryazen nni ixsen ad uyuren ɣar Miṣra ḥima ad din zedɣen am yibarraniyyen ad mmten s ssif d řaẓ d ṭṭaɛun. War zzaysen inejjem niɣ ittarekkwař uřa d ijjen zi řɣar i xasen dd ɣa ɣeḍřeɣ.’
JER 42:18 Maɣar ammu i iqqar SIDI, AREBBI n Israil: ‘Am mammec aɣḍab inu d wesɛar inu ttwazeǧɛen x imezdaɣ n Urcalim, ammu i ɣa ittwazeǧeɛ uřa d asɛar inu xawem mařa tiwḍem ɣar Miṣra. Kenniw ad tdewřem d [řqecɛet n] wexzi d unexřiɛ d tseḍḥact, uřa d nneɛřet d řḥegra. Amcan-a ɛemmarṣ ad tt tẓarem ɛad.’
JER 42:19 SIDI issiweř ɣarwem, [a] min iqqimen n Yahuda! War ttidfem ɣar Miṣra. Snem mliḥ aqa necc ɛeřmeɣ awem ass-a.
JER 42:20 Maɣar kenniw tɣeccem x yixef nwem. Kenniw simant nwem tessekkem ayi-dd ɣar SIDI, AREBBI nwem, tennam: ‘Ẓaǧ aneɣ ɣar SIDI, AREBBI nneɣ. Ini aneɣ marra min ɣa yiři ad yini SIDI, AREBBI nneɣ, uca neccin ad t negg!’
JER 42:21 Ass-a nniɣ awem, [maca] kenniw war tesřim ca ɣar tmijja n SIDI, AREBBI nwem, ɣar marra s min zi i d ayi ɣarwem dd-issekk.
JER 42:22 [Xenni] řexxu, snem mliḥ aqa ad temmtem s ssif d řaẓ d ṭṭaɛun deg wemcan mani texsem ad tuyurem ḥima ad dinni teqqimem am yibarraniyyen.”
JER 43:1 Imsar umi ikemmeř Irmiya řhard nnes i marra řgens s marra awařen n SIDI, AREBBI nsen, s min zi tuɣa SIDI, AREBBI nsen, issekk i-t-i-dd ɣarsen,
JER 43:2 aqa issiweř Ɛazarya, mmis n Hucaɛya, u nnan [ɛawed] Yuḥanan, mmis n Qariyaḥ, d marra yeryazen imɛeffaren i Irmiya: “Cek tessxarriqed. SIDI, AREBBI nneɣ, war cek dd-isekk maḥend ad tinid: ‘War iɛeddeř ad traḥem ɣar Miṣra maḥend ad dinni teqqimem am yibarraniyyen!’
JER 43:3 Maca Barux, mmis n Niri-Yah, i cek i dd-iḥarrcen xaneɣ, ḥima ad aneɣ tsellmed ɣar ifassen n Ikaldaniyyen, maḥend ad aneɣ nɣen u ad aneɣ nedhen di lmenfa ɣar Babil.”
JER 43:4 [Ammu] war isři Yuḥanan, mmis n Qariyaḥ, d marra ikumandaren n řɛeskar uřa d marra řgens ɣar tmijja n SIDI, maḥend ad qqimen di temmurt n Yahuda.
JER 43:5 Yuḥanan, mmis n Qariyaḥ, d marra ikumandaren n řɛeskar ksin marra min iqqimen n Yahuda, inni tuɣa dd-idewřen zi marra řegnus ɣar mani xasen uẓẓřen, ḥima ad qqimen di temmurt n Yahuda:
JER 43:6 iryazen ijehden d temɣarin d iḥenjiren imeẓyanen d yessis n ujeǧid d marra řeɛmar nni tuɣa ijja Nebuzaradan, řqebṭan n iɛessasen n arrimet, ɣar Jadalya, mmis n Axiqam, mmis n Cafan, uřa d anabi Irmiya d Barux, mmis n Niri-Yah.
JER 43:7 Nitni usin-dd ɣar temmurt n Miṣra, minzi nitni war sřin ca ɣar tmijja n SIDI uca usin-dd ař Taḥfanis.
JER 43:8 [Xenni] yusa-dd wawař n SIDI ɣar Irmiya di Taḥfanḥis, inna:
JER 43:9 “Ksi iẓra imeqqranen deg ufus nnec uca nuffar i-ten deg ubeǧaɛ n tisi n luṣa ɣar wadaf n taddart n firɛun di Taḥfanis. [Egg i-t] zzat i tiṭṭawin n yeryazen n Yahuda,
JER 43:10 ini asen: ‘Ammu i iqqar SIDI n řɛeskarat, AREBBI n Israil: Xzar, Necc ad awyeɣ Nabuxadraṣṣar, ajeǧid n Babil, amsexxar inu, uca ad ggeɣ řɛarc nnes x yeẓra-ya nni nuffareɣ [dinni], uca netta ad iwwet aqiḍun nnes igellden tiwa nsen.
JER 43:11 Netta ad dd-yas uca ad iwwet tammurt n Miṣra: wenni [iǧan] i řmewt, s řmewt, d wenni [iǧan] i tmeḥbast, i uḥebbes, d wenni [iǧan] i ssif, s ssif.
JER 43:12 Netta ad ssareɣ ict n tmessi deg ixxamen n l’aṣnam n Miṣra, ad sscemḍeɣ ixammen nni u ad awyeɣ l’aṣnam d imeḥbas. Netta ad yarḍ tammurt n Miṣra am umeksaw yarḍ arruḍ nnes uca netta ad zzayes dd-iffeɣ di řehna.
JER 43:13 Netta ad yarẓ imayḍuten nsen [iqeddsen], nni [iǧan] di temmurt n Miṣra, uca ad issecmeḍ ixxamen n l’aṣnam n Miṣra s tmessi.’”
JER 44:1 Awař nni dd-iffɣen ɣar Irmiya i marra Udayen nni tuɣa izeddɣen di temmurt n Miṣra, inni tuɣa izeddɣen di Majdal d Taḥfanḥis d Nuf u di temmurt n Fatrus, i innan:
JER 44:2 “Ammu i iqqar SIDI n řɛeskarat, AREBBI n Israil: ‘Kenniw simant nwem teẓrim řɣar i ggiɣ x Urcalim u x marra tineddam n Yahuda, uca xzar, řexxu dewřent nitenti d řxirbet, war daysent izeddeɣ ɛad uřa d ijj,
JER 44:3 zi ssibbet n řɣar i ggin umi d ayi sɛaren ařami wehhben řebxur maḥend ad [zzayes] ɛebden i irebbiten nneɣni inni war ssinen nitni, řa d kenniw uřa d řejdud nwem.
JER 44:4 Necc ssekkeɣ-dd ɣarwem marra imsexxaren inu, inabiyyen, ɛad zeg umezwaru ssekkeɣ ten ḥima ad inin: War tteggem nnɛi-ya nni carrheɣ Necc [aṭṭas].
JER 44:5 Nitni [maca] war sřin u war d ayi wcin amezzuɣ nsen umi dd-dewřen nedmen zi řɣar nsen, umi war wehhben [ɛad ktar] tiwhibin nsen n řebxur i irebbiten nneɣni.
JER 44:6 [S uya] i farɣeɣ asɛar inu d weɣḍab inu x tneddam n Yahuda u x ibriden n Urcalim, [ařami] dewřent d řxirbet, ttwaredǧent am [teǧa] ass-a.’”
JER 44:7 “[Xenni] řexxu, ammu i iqqar SIDI n řɛeskarat, AREBBI n Israil: ‘Mayemmi tᵉtteggem řɣar am wanita x tudart nwem ařami tqeṭṭam x weryaz d temɣart, aḥenjir d useymi zi řwesṭ n Yahuda ařami war xawem iceṭṭ min iqqimen?
JER 44:8 Mayemmi i d ayi tseɛɛarem s řxedmet n ifassen nwem, umi tessbexxaram řebxur i irebbiten nneɣni zi temmurt n Miṣra mani ɣar dd-tiwḍem řexxu ḥima ad dinni tzedɣem am yibarraniyyen, ařami ɣa tqeḍɛem ixef nwem [ammu] u ḥima ad tdewřem d [ict n řqecɛet n] wexzi d řḥegra jar marra řegnus n temmurt?
JER 44:9 Ma tᵉttum kenniw qaɛ řɣar i ggin řejdud nwem d řɣar i ggin ijeǧiden n Yahuda d řɣar i ggint temɣarin nsen uřa d řɣar i teggim kenniw simant nwem d řɣar i ggint temɣarin nwem di temmurt n Yahuda u deg ibriden n Urcalim?
JER 44:10 Ař ass-a i di neǧa ɛad war ttwarrẓen [deg wuř], war zzayi tteggʷden u war ḍeffaran Ccariɛa inu d tweṣṣa inu nni kenniw wciɣ zzat i wudem nwem u zzat i wudem n řejdud nwem.’”
JER 44:11 “S uya, ammu i iqqar SIDI n řɛeskarat, AREBBI n Israil: ‘Xzar, Necc ad arreɣ udem inu i řɣar xawem u ḥima ad qḍiɣ marra Yahuda.
JER 44:12 Necc ad kkseɣ min iqqimen n Yahuda, inni iɛemmden ad uyuren ɣar temmurt n Miṣra ḥima ad dinni zedɣen am yibarraniyyen. Nitni ad ttwahellken marra, ad wḍan di temmurt n Miṣra. Nitni ad ttwahellken s ssif d řaẓ, am umeẓyan am umeqqran. Nitni ad mmten s ssif d řaẓ uca ad dewřen d [ict n řqecɛet n] wexzi d unexřiɛ d nneɛřet d řḥegra.
JER 44:13 Necc ad xeřfeɣ zeg inni izeddɣen di temmurt n Miṣra am mammec tuɣa xeřfeɣ zi Urcalim, s ssif, s řaẓ u s ṭṭaɛun.
JER 44:14 Zi min iqqimen n Yahuda, zeg inni iwḍen ɣar temmurt n Miṣra, ḥima ad dinni zedɣen am yibarraniyyen, war inejjim niɣ ittarekkwař uřa d ijj, ḥima ad dd-iɛqeb ɣar temmurt n Yahuda mani ttexsen ad dd-ɛeqben maḥend ad din zedɣen. War dd-tteɛqiben ca, mɣir [ca] inni inejmen.’”
JER 44:15 [Xenni] arrin-dd x Irmiya marra iryazen, inni issnen aqa timɣarin nsen wehhbent řebxur i irebbiten inneɣni, uřa d marra timɣarin i din ibedden, ijj n ubarru d ameqqran, marra řgens nni tuɣa izeddɣen di temmurt n Miṣra, di Fatrus, nnan:
JER 44:16 “X wawař i kidneɣ tessiwřed deg Yisem n SIDI, war ɣarek nᵉttesři ca.
JER 44:17 Maɣar kuř awař i dd-iffɣen zeg uqemmum nneɣ ad t negg umi ɣa nessbexxar i tjeǧidt n ujenna u umi d as i ɣa nseyyeb tiwhibin n useyyeb am mammec tuɣa negga, neccin d řejdud nneɣ uřa d ijeǧiden nneɣ d řḥukkam nneɣ, di tneddam n Yahuda u deg ibriden n Urcalim, [umi] tuɣa nejjiwen neccin s weɣrum u tuɣa aneɣ mliḥ, tuɣa war din tarjijat zi ḥed.
JER 44:18 Zeg wami maca nessbedd nettwehheb řebxur i tjeǧidt n ujenna u zeg useyyeb n tewhibin i nettat, aqa neḥwaj u nefna neccin s ssif d řaẓ.
JER 44:19 Mařa neccin nessbexxar i tjeǧidt n ujenna, nseyyeb as tiwhibin n useyyeb, ma nhřa [argab d řxaḍar n] yeryazen nneɣ negga as tifḍirin i ṣṣedqet nni dayes yarwesen u nseyyeb as tiwhibin n useyyeb?”
JER 44:20 [Xenni] issiweř Irmiya ɣar marra řgens, ɣar iryazen d temɣarin, ɣar marra řgens nni tuɣa i dd xas yarrin [ammu], inna:
JER 44:21 “Tiwhibin n řebxur nni tessbexxarem di tneddam n Yahuda u x ibriden n Urcalim, kenniw d řejdud nwem, ijeǧiden nwem d řḥukkam nwem d řgens n temmurt, ma war tent idar SIDI niɣ war dd-usint ɣar řbař nnes?
JER 44:22 SIDI war iqqim [ɛad] iṣebbar awem x tmegga nwem tiɛeffanin, x jjɛayef i teggim. S uyenni tedweř temmurt nwem d řxarbet d ict n temmurt ixřan uřa d [ict n řqecɛet n] unexřiɛ d nneɛřet ařami war din izeddeɣ [ɛad] uřa d ijj, am [teǧa] ass-a.
JER 44:23 Minzi kenniw tiwyem-dd řebxur u texḍam ak-d SIDI u war tesřim ca ɣar tmijja n SIDI u war tuyurem di Ccariɛa nnes, di tweṣṣa nnes u di cchadat nnes, x uya i kenniw iřqef řɣar-a, am [teǧa] ass-a.”
JER 44:24 [Xenni] inna Irmiya i marra řgens u i marra timɣarin: “Sřem i wawař n SIDI, marra Yahuda nni iǧan di temmurt n Miṣra.
JER 44:25 Ammu i iqqar SIDI n řɛeskarat, AREBBI n Israil, iqqar: ‘X kenniw u x temɣarin nwem, aqa tennam [t] s uqemmum nwem u s ifassen nwem teggim [t], tennam: Amewci n wawař i negga, ad t nkemmeř nican ḥima ad nqeddem tiwhibin n řebxur i tjeǧidt n ujenna u ḥima ad nseyyeb tiwhibin n useyyeb. [Xenni] kemmřem nican lwuɛud i twaɛdem u ggem s tidett min tuɣa twaɛdem.’”
JER 44:26 “S uya sřem i wawař n SIDI, marra Yahuda i izeddɣen di Miṣra: ‘Xzar, Necc jjuǧeɣ s Yisem inu ameqqran, iqqar SIDI, war ittwařaɣa s Yisem inu [ɛad] zi ca n weryaz mammec ma igga zi Yahuda di marra tammurt n Miṣra, ad yini: S tidett am iddar Sidi inu, SIDI!
JER 44:27 Xzar, Necc ad xasen ɛesseɣ i řɣar, war iǧi i řxar. Marra iryazen n Yahuda nni iǧan di temmurt n Miṣra, ad hellken s ssif d řaẓ ař ɣa ttwakksen.
JER 44:28 [Maca] inni yarewřen zi ssif, ad dd-dewřen zi temmurt n Miṣra ɣar temmurt n Yahuda, [mɣir] ijj n wuru n yeryazen. Marra min iqqimen n Yahuda i dd-iwḍen ɣar temmurt n Miṣra ḥima ad din zedɣen am yibarraniyyen, ad ssnen awař n man wen i ɣa iqqim ibedd, wenni inu niɣ wenni nsen.
JER 44:29 Man aya ad awem tiři d řeɛřamet, [ammu i] iqqar SIDI, aqa Necc ad kenniw ɛaqbeɣ deg wemcan-a ḥima ad tessnem aqa awařen inu xawem ad xawem iřin i řɣar.
JER 44:30 [Man aya ad yiři d řeɛřamet], ammu i iqqar SIDI: Xzar, Necc ad ssiwḍeɣ firɛun Ḥufraɛ, ajeǧid n Miṣra, ɣar ufus n řɛedyan nnes u ɣar ufus n yinni yarezzun tudart nnes, am mammec ssiwḍeɣ Ṣidqiya, ajeǧid n Yahuda, ɣar ufus n Nabuxadraṣṣar, ajeǧid n Babil, řeɛdu nnes wenni tuɣa yarezzun tudart nnes.’”
JER 45:1 Awař nni issawař unabi Irmiya i Barux, mmis n Niri-Yah, umi yura wanita awařen zeg uqemmum n Irmiya deg ijj n wedlis ittwannḍen, deg useggʷas wiss arebɛa n Yahuyaqim, mmis n Yuciya, ajeǧid n Yahuda. Inna:
JER 45:2 “Ammu i iqqar SIDI, AREBBI n Israil, xak, [a] Barux!
JER 45:3 Cek tennid: ‘Axeyyeb i necc, maɣar SIDI yarenni ɛad acḍan x řeḥriq inu. Necc uḥřeɣ s wezhar, war ufiɣ arraḥet!’
JER 45:4 Ittxeṣṣa ad as tinid: ‘Ammu i iqqar SIDI: Xzar, min ssbeddeɣ, ad t ɣeḍřeɣ, u min ẓẓuɣ, ad t qeřɛeɣ, [wah,] marra tammurt-a.
JER 45:5 Ma texsed cek ad tarzud x tmesřayin timeqqranin i yixef nnec? War tent tarezzud ca, maɣar xzar, Necc ad ssiwḍeɣ ijj n řɣar x marra ddat, [ammu i] iqqar SIDI, [maca] ad ac wceɣ řeɛmar nnec d takeccaḍt di marra imucan mani ɣa traḥed.’”
JER 46:1 Awař n SIDI nni dd-yusin ɣar unabi Irmiya x řegnus.
JER 46:2 X Miṣra Ḍidd n řɛeskar n firɛun Naxu, ajeǧid n Miṣra, wenni din ɣar yeɣzar n Lfuraṭ, ɣar Karkamic, wenni yarna Nabuxadraṣṣar, ajeǧid n Babil, deg useggʷas wiss arebɛa n Yahuyaqim, mmis n Yuciya, ajeǧid n Yahuda.
JER 46:3 “Swejdem taseddart [n uɛeskari] d tseddart [nnes] tameqqrant uca sgeɛɛdem ɣar umenɣi!
JER 46:4 Ḥezzmen i iysan, nyem xasem, [a] imnayen n yeysan! Sbeddem ixef nwem s lkaskat [x izeǧifen nwem]. Sqeḍɛem fřitcat uca ḥezzmem s warruḍ n wuzzař!
JER 46:5 Mayemmi ttwařiɣ Necc aqa nitni nnxeřɛen ařami dewřen ɣar ḍeffar? Ɛad ayt n bu-teɣruḍt nsen ttwarẓen, menɛen di tarewřa uca war i-dd-nnqeřben ɣar ḍeffar. Aqa din asnexřiɛ di marra iɣezdisen, [ammu i] iqqar SIDI.
JER 46:6 Ejj wenni ifsusen s iḍaren war ittarekkwař uřa d bu-teɣruḍt war inejjem: nnqarḍen, wḍan di ccamal, ɣar tma n iɣzar n Lfuraṭ.”
JER 46:7 “Man wen i din dd-igeɛɛden am waman [n Miṣra], aman nnes zehharen am yiɣezran?
JER 46:8 Miṣra tgeɛɛed-dd am waman, aman nnes zehharen am yiɣezran, teqqar: ‘Necc ad geɛɛdeɣ, ad dřeɣ tammurt, ad qḍiɣ x tendint d yinni dayes izeddɣen.
JER 46:9 Geɛɛdem, [a] iysan, muzzarem, [kenniw, a] ikarruten n umenɣi! Jjem ayt n bu-teɣruḍt ad ffɣen: ayt n Kuc, ayt n Fuṭ inni yarebbun taseddart [n uɛeskari] d ayt n Lud inni itteṭṭfen řqews uca meḥḥḍen t.
JER 46:10 Ass-a d ijj n wass i Sidi inu, SIDI n řɛeskarat, ijj n wass n wexřaf maḥend ad ixřef i yixef nnes zeg iɣrimen nnes. Ad yecc ssif, ad ijjawen uca ad iscar s idammen nsen, maɣar aqa din ict n tɣarṣt i Sidi inu, SIDI n řɛeskarat, di temmurt n ccamal ɣar yeɣzar n Lfuraṭ.
JER 46:11 Geɛɛdem ɣar Jilɛad, awyem-d balsam, [a cem] taɛzarect, iǧis n Miṣra!. Baṭeř tarennid di ddwawat aṭṭas, [maɣar] war ɣarem bu ddawat ḥima ad tent tegged [x uyezzim].
JER 46:12 Sřin řegnus x řefḍiḥet nnem uca teccur temmurt zeg iɣuyyan [n řeḥřiq] nnem, maɣar bu-teɣruḍt imqarqeb ak-d bu-teɣruḍṭ nneɣni, munen wḍan s tnayen.”
JER 46:13 Awař nni issiweř SIDI ɣar unabi Irmiya x twasit n Nabuxadraṣṣar, ajeǧid n Babil, ḥima ad iwwet tammurt n Miṣra.
JER 46:14 “Barrḥem [t] di Miṣra u jjem ad as sřen di Majdal, jjem ad as sřen di Nuf d Taḥfanḥis. Inim: ‘Bedd abeddi, wjed!’, maɣar ssif icca [marra] iɣezdisen i d ac dd-innḍen.
JER 46:15 Mayemmi ttwamḥan ayt n bu-ṣṣulṭa nnec? War izemmar netta ad iqqim ibedd, minzi SIDI iɛarren i-t.
JER 46:16 Netta yarra aṭṭas ad nqarḍen, [wah,] aryaz iwḍa x wenneɣni, uca nitni nnan: ‘Kkarem, jjem aneɣ ad nedweř ɣar řgens nneɣ u ɣar temmurt mani nexřeq zi ssibbet n ssif iwɛaren.’
JER 46:17 Din i řaɣan nitni: ‘Aqa firɛun, ajeǧid n Miṣra, ittwareddeǧ, aqa ijja řweqt ittwaggen ad teɛdu.’”
JER 46:18 “S tidett am ddareɣ Necc, [ammu i] iqqar Ujeǧid, SIDI n řɛeskarat d Isem nnes: ‘Netta ad dd-yas, am [wedrar n] Tabur jar idurar u am [wedrar n] Karmil ɣar řebḥar!
JER 46:19 Smun řeḥwayej nnem i lmenfa, [a cem] tamezduɣt, iǧis n Miṣra, maɣar [tammurt n] Nuf ad tedweř d [ict n řqecɛet n] unexřiɛ uca ad tᵉttwareddeǧ, ařami war din iqqim uřa d ijj izeddeɣ.
JER 46:20 [Tammurt n] Miṣra d ict n taɛejmit tecna, [maca] ad ɣares dd-yas ijj n yarezzi d adarɣař, ad dd-yas zi ccamal.
JER 46:21 Uřa d icewwařen nnes di řwesṭ nnes ggin am yiɛejmiyyen iṣeḥḥen, [maca] uřa d nitni ɛeqben-dd, nitni arewřen jmiɛ, war qqimen bedden, maɣar ass n uḍeyyeɛ nsen ad xasen dd-yas, tasaɛɛet n wexřaf nsen.
JER 46:22 Tmijja nnes tegga am řḥess n ufiɣar iḥrarran, maɣar ad din uyuren ak-d ijj n řɛeskar u ad ɣares dd-asen s ccwaqar am yinezdamen n ukeccuḍ.
JER 46:23 Nitni ad qessen azɣar nnes, [ammu i] iqqar SIDI, maɣar [řɛeskar] war izemmar ad ittwaḥseb, minzi nitni aqa aten deg waṭṭas x iburexsen, war zemmaren ad ttwaḥesben.
JER 46:24 Tseḍḥa yeǧis n Miṣra, aqa tᵉttwagg deg ufus n ijj n řgens zi ccamal.’”
JER 46:25 “SIDI n řɛeskarat, AREBBI n Israil, inna: ‘Xzar, Necc ad ɛaqbeɣ Amun zi [temmurt n] Nu, d firɛun d Miṣra, irebbiten nnes d ijeǧiden nnes, [wah,] firɛun d yinni xas ittcařen.
JER 46:26 Necc ad ten wceɣ deg ufus n yinni yarezzun tudart nsen řa deg ufus n Nabuxadraṣṣar, ajeǧid n Babil, uřa deg ufus n imsexxaren nnes. [Awarni i uya] ad tedweř temmurt s imezdaɣ ɛawed am deg wussan n zic, [ammu i] iqqar SIDI.’”
JER 46:27 “War teggʷed, [a] cek amsexxar inu Yaɛqub, war tefciř ca, [a] Israil, maɣar xzar, Necc ad cek ssnejmeɣ zi timmura iggʷejen uřa d zzariɛet nnec zi tmeḥbast nsen. Ad yareggʷeḥ Yaɛqub, ad ɣares tiři řhudnet, ad iddar di řaman uca uřa d ijj war t issnexřiɛ.
JER 46:28 War tteggʷed, [a] cek amsexxar inu Yaɛqub, [ammu i] iqqar SIDI, maɣar Necc akidek, minzi Necc ad qḍiɣ x marra řegnus nni mani kenniw ssiggʷejeɣ, [maca] ɛemmarṣ war xak qeṭṭiɣ, [maca] ad cek webbxeɣ s řeɛbar iseggden u war cek heṣṣbeɣ d amezdag.’”
JER 47:1 Awař n SIDI nni dd-yusin ɣar unabi Irmiya, [awař i iwejjhen] ḍidd i Ifilisṭiniyyen qbeř ma iwta firɛun Ɣazza.
JER 47:2 “Ammu i iqqar SIDI: ‘Xzar, aman geɛɛden zi ccamal, ad dewřen d ict n teɣzart tessfay. Ad ḥemřen x temmurt u x marra min dayes iǧan, tandint d imezdaɣ nnes. Ad sɣuyen iwdan u marra imezdaɣ n temmurt ad ceḍnen aṭṭas
JER 47:3 zi ssibbet n wezbar n tecti n tceḍyin n [yeysan] ijehden, zi ssibbet n ddriz n ikarruten [n umenɣi] d uqarqeb n tjarrarin. [Ɛad] ibabaten war ḥekkaren ca i iḥenjiren [nsen] maɣar ifassen nsen dewřen arehfen
JER 47:4 zi ssibbet n wass i dd ɣa yasen ḥima ad ttwateḥḥan marra ayt n Ifilisṭiniyyen, ḥima ad ittwakkes zi Ṣur d Ṣidun kuř bu-twiza i yarewřen, maɣar SIDI ad iteḥḥa Ifilisṭiniyyen, min iqqimen n tegzirt n Kaftur.
JER 47:5 Tusa-dd tqeccart x Ɣazza, tesseɣd [temmurt n] Acqalun [jmiɛ] ak-d min iqqimen n řewḍa n teɣzurt nsen. Ař meřmi ɣa teqqimed ɛad txebbced ixef nnem?
JER 47:6 Uct [xak, a] ssif n SIDI, ař meřmi i ɣa teqqimed ɛad nehřa arraḥet? Dweř-dd ɣar furru n weɣřaf nnec, qqim war tenhezza!
JER 47:7 Mammec i ɣa teqqimed tarsid? Aqa SIDI yumur ssif ḍidd i Acqalun u ḍidd i tma n řebḥar, i manayenni i ittwagg.’”
JER 48:1 X Mu’ab “Ammu i iqqar SIDI n řɛeskarat, AREBBI n Israil: ‘Uct x Nabu, maɣar aqa [tandint] tᵉttwaxarreb, [tandint n] Qaryatayim tᵉṭṭef i-tt řeḥya, aqa tᵉttwaṭṭef. Lburj yuɛřan tᵉṭṭef i-tt řehya u tᵉttenhezza.
JER 48:2 Řɛezz n [temmurt n] Mu’ab war iǧi [ɛad]. Di Ḥacbun xarrṣen di řɣar ḍidd nnes, nnan: Ejj aneɣ ad tt nekkes zi jar řegnus. Uřa d cek, Madmin, ad cek ssbekmen, ssif ggur ad cek iḍfar.
JER 48:3 [Teffeɣ] ict n tɣuyyit [n řeḥriq] zi Ḥurunayim: Axarreb d lmuṣiba d tameqqrant!
JER 48:4 [Tammurt n] Mu’ab tᵉttwarẓ, iḥenjiren nnes imeẓyanen ggin ad tᵉttwaseř tɣuyyit tejhed.
JER 48:5 Wah, am ittru ittgeɛɛad netta tsawent n Luḥit, maɣar ɣar uhekkwu ɣar Ḥurunayim sřin aduqqez n iɣuyyan n txessart.
JER 48:6 Arewřem, snejmem tudart nwem, dewřem am yijj n uxeccab di tnezruft.
JER 48:7 Minzi cem tᵉttecřed x tmegga nnem d řeknuz nnem, uřa d cem ad tᵉttwaṭṭfed. Kamuc ad yuyur di lmenfa, ikehhanen nnes [jmiɛ] ak-d řḥukkam nnes.
JER 48:8 Amteḥḥay ad dd-yas ɣar kuř tandint uca uřa d ict n tendint war tzemmar ad tenjem. Ad tᵉttwabḍeř řewḍa n teɣzurt uca řwaṭa ad tᵉttwaxarreb, am mammec t inna SIDI.’”
JER 48:9 “Wcem afriwen i Mu’ab, maɣar nitni ad ffɣen s tazřa uca tineddam nnes ad dewřent d [ict n řqecɛet n] unexřiɛ, mani war ittɣimi izeddeɣ [ɛad] uřa d ijj.
JER 48:10 Ittwanɛeř wenni yarxun di tsexxart n SIDI, ittwanɛeř wenni issbedden ssif nnes x [usizzeř n] idammen.
JER 48:11 Tuɣa Mu’ab di řaman zi temẓi nnes, yarsa [am binu] x řexmira nnes, war t farrɣen zeg uqdiḥ ɣar uqdiḥ [nneɣni] u ɛemmarṣ war iffiɣ ɣar lmenfa. X uya iqqim as uředdi nnes d řefwaḥ nnes war ibeddeř.
JER 48:12 S uya, xzar, ad dd-asen wussan, iqqar SIDI, ad ɣares dd-ssekkeɣ inni i ɣa ifarrɣen iqdiḥen uca nitni ad t farrɣen. Nitni ad ssexwan řeqcuɛ nnes u ad arẓen iɣarrafen nnes.
JER 48:13 Mu’ab ad innefḍeḥ zi ssibbet n Kamuc, am mammec tennefḍeḥ taddart n Israil zi ssibbet n Bayt-Il, i xef tuɣa ttᵉtcřen nitni.
JER 48:14 Mammec tzemmarem ad tinim: ‘Neccin d ayt n bu-teɣruḍt, iryazen imeḥḍen, [iwejden] i umenɣi?’
JER 48:15 Mu’ab ittwaxarreb uca igeɛɛed [řeɛdu] ɣar tneddam nnes. Acewwar n iḥudriyyen nnes hwan-dd ɣar tɣarṣt, [ammu i] iqqar Ujeǧid, Isem nnes SIDI n řɛeskarat.”
JER 48:16 “Aḍeyyeɛ n Mu’ab yudes-dd aṭṭas u řɣar nnes yiweḍ-dd deɣya.
JER 48:17 Cetcam xas, marra kenniw i d as dd-innḍen u marra inni issnen isem nnes. Inim: ‘Mammec igga yarreẓ uzeǧaḍ [n ṣṣulṭa] ijehden, taseṭṭa nni iṣebḥen aṭṭas?’
JER 48:18 Hwa-dd zeg wemcan nnem yuɛřan, qqim deg [ict n jjihet n] ufadi, cem tenni [din] izeddɣen, yeǧis n Dibun, maɣar amteḥḥay n Mu’ab ihejjem-dd xam, aqa yareddeǧ lqelɛat nnem.
JER 48:19 Beddet ɣar webrid uca xzaret, cem tenni izeddɣen di Ɛaruɛir! Seqsat aryaz nni yarewřen, tamɣart nni inejmen, ini: ‘Min imsaren?’
JER 48:20 Innefḍeḥ Mu’ab, minzi ittwařbez. Cetca, sɣuyy, ejj ad ssnen di Arnun aqa Mu’ab ittwaxarreb.
JER 48:21 Yiweḍ-dd řḥukm x řwaṭa, x Ḥulun, x Yaḥṣa, x Mayfaɛat,
JER 48:22 x Dibun, x Nabu, x Bayt-Dablatayim,
JER 48:23 x Qaryatayim, x Bayt-Jamul, x Bayt-Maɛun,
JER 48:24 x Qaryut u x Buṣra, u x marra tineddam n temmurt n Mu’ab, tinni iggʷejen d tinni yudsen.
JER 48:25 Ittwaqḍeɛ yicc n Mu’ab, yareẓ uɣiř nnes, iqqar SIDI.”
JER 48:26 “Scarem t maɣar netta tuɣa ittɛeffar ḍidd i SIDI s wawařen n ukebbar. Ad iwḍa Mu’ab deg iɛuqqan n yixef nnes uca ad idweř simant nnes i tseḍḥact.
JER 48:27 Niɣ ma war tuɣi Israil i tseḍḥact i cek? Ma ṭṭfen t zeɛma jar iceffaren aqa cek tᵉttɛeyyabed t am tessenhezzid azeǧif meřmi ma iwḍa ac-dd x yiřes?
JER 48:28 Ffɣem zi tneddam, zedɣem di řejruf, [kenniw] imezdaɣ n Mu’ab! Ggem am tedbirt i iggin řɛucc x ujemmaḍ n uqemmum n yefri ittfan.
JER 48:29 Neccin nesřa x nnfaxet n Mu’ab, dayes nnfaxet aṭṭas: nnfaxet nnes, aɛeffar nnes d wuř nnes ittuɛřan.”
JER 48:30 “Necc ssneɣ zzɛamet nnes, iqqar SIDI, uřa d řɣecc n řhard nnes. Nitni war tteggen min qqaren.
JER 48:31 X uya i ɣa wteɣ agejdur x Mu’ab, x marra Mu’ab ad sɣuyeɣ, ad zehharen x iryazen n Qir-Ḥaris.
JER 48:32 S imeṭṭawen aṭṭas x imeṭṭawen n Yaɛzir ad xam ruɣ, [a] cem tzayart n Sibma. Řefruɛ nnem ɛdun řebḥar, iwḍen-dd ař řebḥar n Jaɛzir. Yusa-dd [maca] umteḥḥay ihjem x tini nnem n unebdu uřa x řɣiǧet nnem n uḍiř.
JER 48:33 Truḥ řefraḥet d wercaq zi temmurt isseɣ̮mayen, zi temmurt n Mu’ab, minzi ssbeddeɣ binu zi teysirin n uḍiř. War ttɣimin ad ddzen ɛad aḍiř s usřiwřew. Asřiwřew? Cfa usřiwřew.
JER 48:34 Zi ssibbet n tɣuyyit n Ḥacbun ař Aliɛala, ař Yahaṣ, [wah, nitni] tteggen ad sřen tmijja nsen zi Ṣuɛar ař Ḥurunayim, taɛejmit [nni] n třata n iseggʷusa. Maɣar ɛad aman n Nimrim ad dewřen d iyermamen ittwaxarrben.
JER 48:35 Wenni iqeddmen taɣarṣt di řegɛudi d wenni ittawyen tiwhibin n řebxur i irebbiten nnes, ad t arreɣ ad ibedd [zi man aya] di Mu’ab, [ammu i] iqqar SIDI.”
JER 48:36 “X uya ittɛeffar wuř inu x Mu’ab am temja, uř inu ittɛeffar x yeryazen n Qir-Ḥaris am yict n temja, minzi afeyyeḍ nni ikseb, aqa iweddar.
JER 48:37 Qaɛ izeǧifen d iqeccura u qaɛ timira ttwaqeḍɛent, di marra ifassen nsen [aqa] iqessiten [n wecḍan] u i tejɛinna nsen [aqa] taxancet [n wecḍan].
JER 48:38 X marra tizeɣwin n Mu’ab u x marra wazzayen nnes, [wah,] mani ma [aqa din] tɣuyyit n wecḍan, maɣar Necc arẓiɣ Mu’ab am yict n řqecɛet war dayes bu arḍa [ɛad], [ammu i] iqqar SIDI.
JER 48:39 Mammec ittwawwet Mu’ab, mammec ssɣuyyun nitni. Mammec [i d asen d] yarra Mu’ab s weɛrur s useḍḥi! Mu’ab idweř d ict n řqecɛet n ustehzi d ijj n umedya n usnexřiɛ i marra inni d as dd-innḍen.”
JER 48:40 “Maɣar ammu i iqqar SIDI: ‘Xzar, am yijj n ugider ad iḥewwem netta uca ad ibezzeɛ afriwen nnes tiwa n Mu’ab.
JER 48:41 Qaryut ṭṭfen t uca ɣeřben x lqelɛat [deg idurar]. Deg wass nni ad yiři wuř n ayt n bu-teɣruḍt n Mu’ab am wuř n ict n temɣart ittarun.
JER 48:42 Mu’ab ad ittwareddeǧ ařami war ittiři [ɛad] d řgens maɣar issemɣar ixef nnes x SIDI.
JER 48:43 Tiggʷudi d wenday d řfex ad xak iřin, [a] cek wenni izeddɣen di Mu’ab, [ammu i] iqqar SIDI.
JER 48:44 Wenni i ɣa yarewřen zi tiggʷudi, ad iwḍa di tesraft, u wenni dd ɣa igeɛɛden zi tesraft, ad innaɣ di řfex, maɣar Necc ad awyeɣ x Mu’ab aseggʷas n wexřaf nnes, iqqar SIDI.’”
JER 48:45 “Di tiři n Ḥacbun qqimen imarwařen ttbeddan břa jjehd, maɣar timessi teffeɣ-dd zi Ḥacbun, ijj n uhaduq zi Siḥun, uca wanita icca lḥenkat n [uzeǧif] Mu’ab d aceqquf n marra ayt n bu-řexcunet.
JER 48:46 Uct xak, Mu’ab, aqa ixsar řgens n Kamuc, maɣar iḥenjiren nnec ttwanedhen di tmeḥbast uca uřa d yessic ttwaḥebbsen.
JER 48:47 Deg uneggar n wussan ad ssenqeřbeɣ tameḥbast n Mu’ab!’, [ammu i] iqqar SIDI.” Ař danita [iǧa wawař i yurin x] řḥukm x Mu’ab.
JER 49:1 X ayt n Ɛammun “Ammu i iqqar SIDI: ‘Ma Israil war ɣares bu iḥenjiren? Ma war ɣares bu awrit? Mayemmi [xenni] iṭṭef ujeǧid nwem [tammurt n] Jad d řwart i yixef nnes u mayemmi izeddeɣ řgens nnes di tneddam [n Jad]?
JER 49:2 S uya, xzar, ussan ad dd-asen, ammu i iqqar SIDI, ad jjeɣ ad ttwasřen iɣuyyan [n umenɣi] x [tendint n] Rabba n ayt n Ɛammun. Ad tedweř [tendint] d ict n řgeɛɛdet n řxarbet u tineddam i ɣares dd-iqqnen ad tent qqden s tmessi. Israil ad iwart [ɛawed] min zzayes kksen d řwart, [ammu i] iqqar SIDI.
JER 49:3 Ru, [a] Ḥacbun, maɣar [tandint n] Ɛay tᵉttwareddeǧ, sɣuyyent, [a kennint] yessis n Rabba, ḥezzment s txuncay [n wecḍan], ceḍnent uca uyurent ɣar da d diha ɣar uɣezdis n icbaren, maɣar ajeǧid nwem, [Milkum], ad ittwandeh di lmenfa, ikehhanen nnes ak-d řḥukkam nnes.’”
JER 49:4 “Mecḥař tᵉttfeyyced s řewḍat n teɣzurin nnem, s ufeyyeḍ n řewḍa nnem n teɣzurt, [a cem] yeǧis ikfaren, tenni ittcařan x wagřa nnes, [teqqar:] ‘Wi dd ɣari i ɣa iqarrben?’
JER 49:5 Xzar, ad xam dd-ɣeḍreɣ tiggʷudi zi marra iɣezdisen nnem, [ammu i] iqqar Sidi inu, SIDI n řɛeskarat. Kenniw ad tᵉttwaɛarrnem, kuř ijj nican ɣar zzat, uca war din uřa d ijjen wenni i ɣa issmunen inni yarewřen.
JER 49:6 [Maca] awarni as ad ssenqeřbeɣ tameḥbast n ayt n Ɛammun, [ammu i] iqqar SIDI.”
JER 49:7 X Idum “Ammu i iqqar SIDI n řɛeskarat: ‘Ma war teǧi ɛad tiɣit di Tiyman? Ma ibḍeř ccwar n imiɣisen? Ma tḍeyyeɛ tiɣit nsen?
JER 49:8 Arewřem, dewřem, ffarem deg imucan yuǧɣen, [kenniw] imezdaɣ n Dadan, maɣar Necc ad xas awyeɣ aḍeyyeɛ n Ɛisu, řweqt nni di ad t ɛaqbeɣ.
JER 49:9 Mařa usin-dd ɣarek imeřqaḍ n uḍiř, ma [xenni] war ttejjin ca awarni asen? Mařa [usin-dd] ixewwanen s ǧiřet, ma xenni war ttḍeyyiɛen ař ɣa jjiwnen?
JER 49:10 Necc maca qeccareɣ [tammurt n] Ɛisu, ɛarriɣ x imucan nnes innuffaren ařami war izemmar [ɛad] ad innuffar. Tarwa nnes ttwareddǧen, uřa d aytmas d jjiran nnes, aqa netta war iǧi ɛad.
JER 49:11 Ejj iyujiřen nnec, Necc ad ten ḥḍiɣ ad qqimen ddaren, tijjař nnec ejj i-tent ad xafi ttecřent.’
JER 49:12 Maɣar ammu i iqqar SIDI: ‘Xzar, inni war t issdiheǧen ad swen zi řkas, ad zzayes swen. U cek [wenni t issdaheǧen], ma ad tᵉttwabarrid? War tᵉttwabarrid ca ɛemmarṣ, ad zzayes teswed s uɣiř!
JER 49:13 Maɣar Necc jjuǧeɣ ɣar ixef inu, [ammu i] iqqar SIDI, aqa Buṣra ad idweř d [ict n řqecɛet n] unexřiɛ d řḥegra, uřa d ict n řxirbet d nneɛřet, uca marra tineddam nnes ad dewřent d řxirbat i řebda.’”
JER 49:14 “Necc sřiɣ ijj n řexbar zi SIDI, aqa ittwassekk-dd ijj n ureqqas jar řegnus ḥima ad yini: ‘Smunem, sgeɛɛdem xas, kkarem ɣar umenɣi!’
JER 49:15 Minzi xzar, Necc ssemẓiyeɣ cek jar řegnus, tᵉttwasseḥqared jar iwdan.
JER 49:16 Řeḥkamet nnec issaggʷaden tɣarr i cek uřa d zzɛamet n wuř nnec, [a cek] wenni izeddɣen deg ifeǧiqen n řejruf, wenni ittcebbaren di tqiccet n tewririn! Waxxa teggid řɛucc nnec sennej qaɛ am t ittegg ugider, Necc ad cek dd-ɣeḍřeɣ ssenni, iqqar SIDI.
JER 49:17 Idum ad idweř d [ict n řqecɛet n] unexřiɛ. Kuř ijj wenni dd as i ɣa ikken, ad innexřeɛ u ad iṣeffar [s wesrubi] x marra jjɛayef nnes.
JER 49:18 Am ɣar uneqřeb n Sadum d Ɛamurra d dcurat nnes yudsen, iqqar SIDI, war dinni izeddeɣ [ɛad] uřa d ijj u war dayes ittɣimi [ɛad] uřa d ijj n mmis n bnadem [d abarrani].
JER 49:19 Xzar, am yijj n wayrad ad dd-igeɛɛed zi cbarq iqqnen n L’Urdun ḍidd i tzeddiɣt ijehden, xenni deg wermac n wabřiwen ad t arreɣ ad azzeř ssenni, u wenni umi farzeɣ, ad xas t areccḥeɣ. Maɣar man wen iǧan am Necc, man wen xafi i ɣa iřaɣan i ddeɛwet? Man wen d ameksaw wenni i ɣa iqqimen zzati ibedd?
JER 49:20 S uya, sřem i ucawar n SIDI nni iqḍeɛ x Idum, u [sřem] i inwayen nni ixarreṣ x imezdaɣ n Tayman: ‘S tidett, inni imeẓyanen aṭṭas zeg wuǧi ad ten jarren, s tidett, tazeddiɣt nsen ad tᵉttwassnexřeɛ!’
JER 49:21 Tammurt tᵉttenhezza s řḥess n uweṭṭu nsen, s tɣuyyit i zi ɣa ittwaseř řḥess nnes ař Řebḥar n Telga.
JER 49:22 Xzar, ittgeɛɛad am yijj n ugider [ɣar ujenna], itteḥrara, ittbezzaɛ afriwen nnes tiwa n Buṣra. Deg wass nni ad yiři wuř n ayt n bu-teɣruḍt n Idum am wuř n ict n temɣart s řeḥriq n tarwa.”
JER 49:23 X Dimacq “Ḥamat d Arfad seḍḥan, maɣar nitni sřin i wareqqas d aɛeffan, fecřen. Ɣar řebḥar tᵉttwaf řeḥṣaret, bnadem war izemmar ad yarsa [din].
JER 49:24 Tarxu [tendint] n Dimacq, tenneqřeb, maḥend ad tᵉṭṭef di tarewřa. Imneɛ i-tt uqdiddes. Řeḥṣaret d řewjeɛ am n ict temɣart ittarwen ṭṭfen tt.
JER 49:25 Tandint icennɛen, ma war teggi am tenni ittwajjen, tandint n řefraḥet inu?
JER 49:26 S uya ad wḍan iḥudriyyen nnes deg wazzayen u marra iɛeskariyyen ad ttwaseɣden deg wass nni, [ammu i] iqqar SIDI n řɛeskarat.
JER 49:27 Necc ad ssarɣeɣ timessi di řḥiḍ n Dimacq, ad tecc řeqṣur n Binhadad.”
JER 49:28 X Weɛraben X Qidar d tgelditin n Ḥaṣur nni iɣřeb Nabuxadraṣṣar, ajeǧid n Babil. “Ammu i iqqar SIDI: ‘Kkarem uca hejmem x Qidar uca areddǧem ayt n ccarq.
JER 49:29 Nitni ad asen kksen iqiḍan nsen d wuǧi nsen, tijartiřin n uqiḍan nsen d marra řqecc nsen. Uca uřa d iřeɣman nsen ad ten awyen akidsen. Ad xasen sɣuyen: Asiggʷed mani ma!
JER 49:30 Arewřem, beɛɛdem, ffarem deg imucan yuǧɣen, [kenniw] imezdaɣ n Ḥaṣur, [ammu i] iqqar SIDI, maɣar Nabuxadraṣṣar, ajeǧid n Babil, iqḍeɛ xawem acawar uca ixarreṣ deg ijj n wenway xawem.
JER 49:31 Kkarem, geɛɛdem x ijj n řgens nni izeddɣen di řhudnet u di řaman, [ammu i] iqqar SIDI, [ijj n řgens] war ɣares bu tewwura uřa d zzenkrun, wenni izeddɣen weḥḥdes.
JER 49:32 Iřeɣman nsen ad ttwaḥewwsen uca abarru n tḥimriwin nsen n řmař ad ttwacarent u Necc ad ten zuzzareɣ ɣar marra iɣezdisen n usemmiḍ, [marra] inni ittḥeffan [acuwwaf] ɣar ṭṭrufa, . Necc ad xasen dd-awyeɣ aḍeyyeɛ zi marra iɣezdisen, [ammu i] iqqar SIDI.
JER 49:33 Haṣur ad idweř d tazeddiɣt i wuccanen n řexřa, ict n temmurt ittwareddǧen i řebda. War dayes izeddeɣ [ɛad] uřa d ijjen uca uřa d ijj n mmis n bnadem ad din iqqim [ɛad] am ubarrani.’”
JER 49:34 X Ɛilam Awař n SIDI i unabi Irmiya x Ɛilam, deg umezwaru n tgelda n Ṣidqiya, ajeǧid n Yahuda, inna:
JER 49:35 “Ammu i iqqar SIDI n řɛeskarat: ‘Xzar, Necc ad arẓeɣ řqews n Ɛilam, amezwaru n tzemmar nsen n ayt n bu-teɣruḍt.
JER 49:36 Necc ad dd-ssehwiɣ x Ɛilam arebɛa n isemmiḍen zi arebɛa n tɣemmura n ujenna u ɣar marra tiɣemmura n isemmiḍen ad ten zuzzareɣ. War ittiři bu řgens mani war dd-ttisen inni x uẓẓřen zi Ɛilam.
JER 49:37 Necc ad ssnexřɛeɣ [ayt n] Ɛilam zzat i řɛedyan nsen u zzat i yinni yarezzun tudart nsen. Necc ad dd-ɣeḍřeɣ řɣar xasen, řḥaduq n weɣḍab inu, [ammu i] iqqar SIDI. Necc ad asen sseḍfareɣ ssif ař ten teḥḥiɣ.
JER 49:38 Necc ad ssbeddeɣ řɛarc inu di Ɛilam uca ad teḥḥiɣ ajeǧid d řḥukkam ssenni, [ammu i] iqqar SIDI.
JER 49:39 Deg uneggar n wussan ad ssenqeřbeɣ tameḥbast n Ɛilam [ammu i] iqqar SIDI.’”
JER 50:1 Awař nni issiweř SIDI x Babil, x temmurt n Ikaldaniyyen, s ufus n unabi Irmiya.
JER 50:2 “Barrḥem jar řegnus, jjem ad as sřen, sgeɛɛdem taɛeǧant, jjem ad as sřem, war [tt] snuffaram. Inim: ‘[Tandint n] Babil tᵉttwaṭṭef, Bil iseḍḥa, Marudax aqa yarẓa, řexyařat nnes n l’aṣnam ttwabarqen, imeyḍa n [l’aṣnam nnes] ttwařebzen!’
JER 50:3 Maɣar ihjem-dd xas ijj n řgens zi ccamal, ad yarr tammurt nnes d [ict n řqecɛet n] unexřiɛ, war dayes izeddeɣ ɛad uřa d ijj, zi bnadem ař řmař arewřen, ffɣen.”
JER 50:4 “Deg wussan nni u di řweqt nni, [ammu i] iqqar SIDI, ad dd-asen ayt n Israil munen ak-d ayt n Yahuda. Ad uyuren am ttrun, ad arzun x SIDI, AREBBI nsen.
JER 50:5 X Ṣihyun ad sseqsan, aqa ɣar dinni i nḍaren tiṭṭawin nsen. Nitni ad dd-asen uca ad dd-mmarenyen ɣar SIDI s ijj n Řɛahd ittduman nni war ittwattun.
JER 50:6 Tuɣa řgens inu d uǧi iweddaren, imeksawen nsen ssuffɣen tent x webrid x idurar ikfaren. Nitni uyurent zeg wedrar ař tewrirt, ttunt amcan n arraḥet nsent.
JER 50:7 Marra wi tent yufin, ccin tent uca iɣrimen nsent nnan: ‘Neccin war d aneɣ ittars ḥed, maɣar nitenti xḍant ak-d SIDI, ak-d tzeddiɣt n tsegda, ak-d řayas n řejdud nsent [ḍidd i] SIDI.’
JER 50:8 Arwřem zi Babil, ffɣem zi temmurt n Ikaldaniyyen, iřim am yiɣayḍen ittizwaren i wuǧi!”
JER 50:9 “Maɣar xzar, Necc simant inu ad dd-ssḥarrceɣ x Babil ijj n ubarru n řegnus imeqqranen zi temmurt n ccamal. Nitni ad ssbedden ixef nsen ḍidd nnes. Ssenni ad tᵉttwaṭṭef [tandint n Babil]. Fřitcat nsen am ayt n bu-teɣřuḍt imeḥḍen, uřa d ict zzaysent ɛemmarṣ war dd-tɛiqqib texwa.
JER 50:10 [Tammurt n] Ikaldaniyyen ad tedweř d takeccaḍt, marra inni tt i ɣa ikeccḍen, ad jjiwnen, [ammu i] iqqar SIDI.
JER 50:11 Minzi kenniw tfarḥem, aqa tneggzem s řefraḥet, [a kenniw] inni ikeccḍen tasɣart inu. Kenniw tnedwem am tɛejmiyyin di ddemnet u tessneḥniḥem am [yeysan] ijehden.
JER 50:12 Tseḍḥa yemmatwem, tenni kenniw i dd-yurwen, aqa iřqef i-tt useḥcem. Xzar, nettat d taneggarut n řegnus: [mɣir] d řexřa d řekḥeḍ d tanezruft.
JER 50:13 Zi ssibbet n uduqqez n weɣḍab n SIDI ad teqqim [tendint n Babil] war tᵉttwazeddeɣ [ɛad], ad tedweř d ict n temmurt ittwareddǧen. Marra wi ɣa iɛdun x Babil ad innexřeɛ, ad iṣeffar [s uɛeyyeb] x marra jjɛayef nnes.”
JER 50:14 “Seddem ixef nwem i umenɣi ak-d Babil ɣar marra iɣezdisen nnes, marra inni imeḥḍen řqews, maɣar nettat texḍa ak-d SIDI.
JER 50:15 Sɣuyyem xas zi marra iɣezdisen. Aqa nettat tsellem ixef nnes. Wḍan lburjat nnes, hedmen řeḥyuḍ nnes, maɣar wa d nneqmet n SIDI. Xeřfem zzayes, ggem zzayes am mammec i tegga nettat.
JER 50:16 Kksem azarraɛ zi Babil d wenni iṭṭfen amjar di řweqt n tmejra! Zi ssibbet n ssif iqesḥen ad ɛeqben nitni, kuř ijj ɣar řgens nnes, uca ad arewřen, kuř ijj ɣar temmurt nnes.”
JER 50:17 “Israil [am] ijjen zeg wuǧi i xef uẓẓřen, tenni x ɛerfen wayraden. Ɣar umezwar isarḍ i-tt ujeǧid n Accur, ɣar uneggar iddez as Nabuxadraṣṣar, ajeǧid n Babil, iɣsan nnes.
JER 50:18 S uya, ammu i iqqar SIDI n řɛeskarat, AREBBI n Israil: ‘Xzar, Necc ad xeřfeɣ zeg ujeǧid n Babil d temmurt nnes, am mammec xeřfeɣ zeg ujeǧid n Accur.
JER 50:19 Israil [maca] ad t-i-dd-arreɣ ɣar tzeddiɣt nnes u netta ad yarwes x Karmal d Bacan, ad tejjawen řeɛmar nnes di temmurt n idurar n Ifrayim d Jilɛad.’”
JER 50:20 “Deg wussan nni u di řweqt nni, iqqar SIDI, ad arzun x řɛib n Israil, [maca] war ittiři, u x ddnub n Yahuda, [maca] war ten ttifen, minzi inni i dd ɣa arreɣ ad qqimen, Necc ad asen ɣfareɣ.
JER 50:21 Geɛɛed ḍidd i temmurt n Maratayim, [‘tammurt n Uɣewweɣ Tnayen n Tseqqar’], u ḍidd i imezdaɣ n Faqud, [‘tandint n Wexřef’]. Areddeǧ u ḥarrem awarni asen marra [i uteḥḥi], [ammu] i iqqar SIDI, u egg ɛlaḥsab marra minzi cek umureɣ.”
JER 50:22 “[Aqa da, ittwaseř] lharaj n umenɣi di temmurt, ict n lmuṣiba tameqqrant.
JER 50:23 Mammec ittwaqess u ittwarẓ wefḍis n marra ddunect! Mammec idweř Babil d [ict n řqecɛet n] unexřiɛ jar řegnus!
JER 50:24 Necc ggiɣ am, [a, tandint n] Babil, ijj n řfex uca tejjid ixef nnem ad cem ggen di řeḥbes, waxxa war tucid. Ufin d ṭṭfen uřa d cem, maɣar cem tuɣa tᵉttemɛarrid ak-d SIDI.
JER 50:25 SIDI yarzem axxam nnes n txubay uca issuffeɣ-dd dduzan n wesxeḍ nnes, maɣar ta d ict n řxedmet i Sidi inu, SIDI n řɛeskarat, di temmurt n Ikaldaniyyen.
JER 50:26 Azzřem ɣares zi ṭṭarf [n temmurt], arzmem řexzayen nnes, nḍarem marra x iɛurricen yuɛřan uca ḥarrmem ten [i uteḥḥi], ḥḍam mliḥ maḥend war zzayes ittɣimi walu.
JER 50:27 Nɣem marra ifunasen nnes imeẓyanen s ssif, sehwam ten-dd ɣar tɣarṣt. Uct xasen, maɣar ass nsen yiweḍ-dd, tasaɛɛet n uɛaqeb nsen!
JER 50:28 [Aqa da] ijj n řḥess n imarwařen u n yinni inejmen zi temmurt n Babil maḥend ad barrḥen axřaf n SIDI, AREBBI nneɣ, di Ṣihyun, axřaf di ṭṭweɛ n Zzawect nnes Tameqqrant.”
JER 50:29 “Řaɣam i ayt n řqews ɣar Babil, marra inni ijebbden řqews! Ḥṣarem tandint zi marra iɣezdisen, ḥḍam maḥend uřa d ijjen ad injem. Xeřfem tt ɛlaḥsab timegga nnes, ggem zzayes ɛlaḥsab marra min tegga, maɣar nettat tuɣa teffucceḥ ak-d SIDI, ak-d Umqeddes n Israil.
JER 50:30 S uya ad wḍan iḥudriyyen nnes deg wazzayen d marra iɛeskariyyen nnes ad ttwassusmen deg wass nni, [ammu i] iqqar SIDI n řɛeskarat.
JER 50:31 Xzar, Necc ad ɣarem kkareɣ, [a cem] tenni iffuccḥen, [ammu i] iqqar Sidi inu, SIDI n řɛeskarat, minzi ass nnem yiweḍ-dd, tsaɛɛet nni di cem i ɣa xeǧṣeɣ.
JER 50:32 Xenni wenni iffuccḥen ad inqarḍ, ad iwḍa, uca uřa d ijj war t issbeddi. Necc ad qqdeɣ timessi di tneddam nnes nni i ɣa iccen marra min d asent-i-dd innḍen.”
JER 50:33 “Ammu i iqqar SIDI n řɛeskarat: ‘Ttwaḥṣaren ayt n Israil [jmiɛ] ak-d ayt n Yahuda. Marra inni ten iḥebbsen, ṭṭfen ten, ugin ad jjen ad asen arxun.
JER 50:34 [Maca] Amefdi nsen ijhed, SIDI n řɛeskarat d Isem nnes. Netta ggur ad iwwet x ddeɛwet nsen ḥima ad igg řhudnet i temmurt u ḥima ad issarjij imezdaɣ n Babil.’”
JER 50:35 “Ssif x Ikaldaniyyen, iqqar SIDI, u x imezdaɣ n Babil, x řḥukkam nnes u x imiɣisen nnes.
JER 50:36 Ssif x ayt n bu-ixarriqen maḥend ad dewřen d ibuhařiyyen, ssif x ayt n bu-teɣruḍt nnes maḥend ad ttwarẓen.
JER 50:37 Ssif x yeysan nnes u x ikarruten nnes u x ubarru n ɛřam kuř ibarraniyyen [nni iǧan] di řwesṭ nnes, maḥend ad dewřen am temɣarin. Ssif x řeknuz nnes maḥend ad ttwacaren.
JER 50:38 Řekḥeḍ x waman nnes maḥend ad aẓɣen, maɣar d ict n temmurt teccur s řexyařat ineqcen uca nitni dewřen d ibuhařiyyen zi nnɛawat n l’aṣnam.
JER 50:39 S uya ad [din] zedɣen řewḥuc n řexřa ak-d yifisen uca uřa d yessis n nnɛamet ad zedɣent din. I řebda war ittɣimi din uřa d ijj u war [dayes] zeddɣen ɛad zi jjiř ař jjiř.
JER 50:40 Am mammec tuɣa issneqřeb AREBBI Sadum d Ɛamurra d dcurat nnes yudsen, [ammu] war dinni izeddeɣ [ɛad] uřa d ijj u war dayes ittɣimi [ɛad] uřa d ijj n mmis n bnadem [d abarrani], [ammu i] iqqar SIDI.”
JER 50:41 “Xzar, ijj n řgens ad dd-yas zi ccamal, ijj n řgens d ameqqran, uca aṭṭas n ijeǧiden ad ttwaɛarren ad faqen zi tɣemmura n temmurt.
JER 50:42 Nitni mennɛen di řqews d fřitca. Nitni ttewɛaren, war arreḥemen. Tmijja nsen am zzhir n řebḥar, nitni nnayen x yeysan. Aqa ttḥezzamen ɣar umenɣi akidem, [a] yeǧis n Babil!
JER 50:43 Isřa ujeǧid n Babil řexbar xasen uca dewřen as ifassen ṭṭsen. Teṭṭef i-t i-dd tiggʷudi, [uřa d] řeḥriq am n ict n temɣart ittarwen.
JER 50:44 Xzar, am yijj n wayrad ad dd-igeɛɛed zi cbarq iqqnen n L’Urdun, [ammu i ɣa igeɛɛed] ḍidd i tzeddiɣt ijehden, maɣar deg wermac n wabřiwen ad ten arreɣ ad azzřen ssenni, u wenni umi farzeɣ, ad xas t areccḥeɣ. Maɣar man wen iǧan am Necc, man wen xafi i dd ɣa iřaɣan i ddeɛwet? Man wen d ameksaw wenni i ɣa iqqimen zzati ibedd?
JER 50:45 S uya, sřem i ucawar n SIDI nni iqḍeɛ x Babil u [sřem] i inwayen nnes nni ixarreṣ x temmurt n Ikaldaniyyen: ‘S tidett, inni imeẓyanen aṭṭas zeg wuǧi ad ten jarren, s tidett, tazeddiɣt nsen ad tᵉttwassnexřeɛ!’
JER 50:46 Tammurt tᵉttenhezza zi řḥess n uṭeffu n Babil uca aɣuyyi nnes ittwaseř ɣar řegnus.”
JER 51:1 “Ammu i iqqar SIDI: ‘Xzar, Necc ad dd-ssekkareɣ ijj n buḥbeř n wareddeǧ x Babil u x yinni din izeddɣen deg wuř n iɣrimen inu.
JER 51:2 Necc ad ssekkeɣ ibarraniyyen ɣar Babil, ad tt zuzzaren uca ad farḍen tammurt nnes, minzi deg wass n řɣar ad bedden arendad nnes ɣar marra iɣezdisen.
JER 51:3 Ejj amjebbad n řqews ad imḥeḍ řqews nnes ḍidd n wenni imeḥḍen [řqews] u ḍidd n wenni issgeɛɛaden ixef nnes deg werruḍ nnes n wuzzař. War ttḥiwiřem x iḥudriyyen nnes, ḥarrmem marra řɛeskar nnes [i uteḥḥi].
JER 51:4 Inni ittwanɣen wḍan di temmurt n Ikaldaniyyen, u inni ittwassxarrqen aqa aten x ibriden nnes.’”
JER 51:5 “Maɣar Israil d Yahuda war ttwajjen d tajjač zi AREBBI nsen, zi SIDI n řɛeskarat, minzi tammurt n [Ikaldaniyyen] teccur s umarwas ɣar Umqeddas n Israil.”
JER 51:6 “Arewřem zi Babil, ejj ad issenjem kuř ijj tudart nnes, war ttejjim ad ttwassbekkmem [i řebda] s řmuɛṣiyyet nnes, maɣar ta d řweqt n wexřaf n SIDI, Netta ad zzayes ixřef min tesdaheǧ.”
JER 51:7 “Babil tuɣa-tt d ijj n řkas n wureɣ deg ufus n SIDI, iscar marra tammurt. Zi binu nnes swin marra řegnus, x uya iffeɣ řeɛqeř i řegnus.
JER 51:8 Deɣya tewḍa [tendint n] Babil u tᵉttwahdem. Wtem xas agejdur, awyem as-dd balsam i řeḥriq nnes, ad taɣ ad tᵉttwassgenfa.”
JER 51:9 “Neccin nexs ad nawi agenfu i Babil, maca war ɣares agenfu. Jjem [tandint nni], u ejj kuř ijj zzayneɣ ad iraḥ ɣar temmurt nnes, maɣar řḥukm xas yiweḍ ař ajenna, igeɛɛed ař iseynuten.”
JER 51:10 “SIDI issiweḍ-dd řmuɛṣiyyet nneɣ [ɣar tfawt]. Asem-dd, ejj aneɣ ad nɛawed di Ṣihyun min igga SIDI, AREBBI nneɣ.”
JER 51:11 “Sqeḍɛem fřitcat, ṭṭfem tiseddariyin [n uɛeskari]. SIDI issekkar-dd buḥbeř n ijeǧiden n Maday, minzi Netta iɛewweř ad ihdem Babil, maɣar wa d axřaf n SIDI, axřaf i Zzawect nnes Tameqqrant.
JER 51:12 Sgeɛɛdem taɛeǧant x řeḥyuḍ n Babil, zeyyarem taɛessast, sbeddem iɛessasen, ggem řefxux, maɣar ɛlaḥsab aɛewweř n SIDI, ammu i ɣa yegg [marra] min inna x imezdaɣ n Babil.
JER 51:13 Cem, a tenni izeddɣen ɣar mani wesɛen waman, tenni ɣar iǧa waṭṭas n wagřa, qeṭṭu nnem yiweḍ-dd, aqa iccur řqedd n ṭṭmeɛ nnem.
JER 51:14 Ijjuǧ SIDI n řɛeskarat ɣar yixef nnes: Waxxa Necc ccureɣ cem s iwdan am tmurɣi, ɛad ad xam dd-řaɣan s ict n tɣuyyit n usřiwřew!”
JER 51:15 “Netta igga tammurt s jjhed nnes, igga ddunect zi tiɣit nnes u ibezzeɛ ajenna s řefhamet nnes.
JER 51:16 Řami ittejja tmijja nnes ad tt sřen, [xenni tegga] am ucarcur n waman deg ujenna. Iseynuten issgeɛɛad i-ten zeg ineggura n ddunect, ittegg assamen ak-d wenẓar uca issekka-dd asemmiḍ zeg ixxamen nnes n txubay.
JER 51:17 Kuř bnadem d agarruḍ, břa tussna, kuř amziř n wureɣ ittseḍḥa zi ssibbet n řexyař [i igga], maɣar řexyař nnes ifesyen d ixarriqen, war dayes [iǧi] buḥbeř.
JER 51:18 Aqa-tent d [l’aṣnam] ibeṭṭřen, aqa atent d řeqcuɛ n tseḍḥact! Di řweqt n wexřaf nsent, ad fnant.”
JER 51:19 “Tasɣart n Yaɛqub war teǧi am [tesɣart] nsent, minzi Netta d wenni iggin marra, uca Israil d taqbič n tesɣart nnes, aqa SIDI n řɛeskarat d Isem nnes.”
JER 51:20 “Cek teggid ayi am yijj n ccaqur, řesnaḥ inu i umenɣi. Zzayek i ɣa řebzeɣ řegnus, zzayek i ɣa ɣeḍřeɣ tigeldiwin.
JER 51:21 Zzayek i ɣa řebzeɣ ayis d wenni xas inyin u zzayek i ɣa řebzeɣ akarru n umenɣi d wenni t ineddhen,
JER 51:22 zzayek i ɣa řebzeɣ aryaz d temɣart, zzayek i ɣa řebzeɣ awessar d uḥuḍri u zzayek i ɣa řebzeɣ abřiɣ d tebřiɣt,
JER 51:23 zzayek i ɣa řebzeɣ ameksaw d tḥimart nnes, zzayek i ɣa řebzeɣ afeǧaḥ d zzayřet nnes [ak-d iyenduzen], u zzayek i ɣa řebzeɣ lwulat d imseyyaren [n temmurt],
JER 51:24 [maca] zzat i tiṭṭawin nwem ad xeřfeɣ Necc zi Babil u zi marra imezdaɣ n [temmurt n] Ikaldaniyyen x marra řɣar i ggin di Ṣihyun, [ammu i] iqqar SIDI.”
JER 51:25 “Xzar, Necc ad kidek dd-řhiɣ, [cek] adrar n Wareddeǧ, iqqar SIDI, cek d wenni yareddǧen marra tammurt. Necc ad xak dd-swiẓẓḍeɣ afus inu u ad cek sseqnunnyeɣ zi řejruf u ad cek ggeɣ d adrar icemmḍen.
JER 51:26 Ɛemmarṣ war zzayek ttawyen [ɛad] aẓru i weẓru n teɣmart uřa d aẓru i dsusa, maɣar ad tdewřed i řxirbat i řebda, iqqar SIDI.”
JER 51:27 “Sgeɛɛdem taɛeǧant di temmurt, suḍem deg uyicc n icarri jar řegnus, farzem řegnus ḍidd nnes, řaɣam ḍidd nnes i tgeldiwin n Araraṭ, Minni d Ackanaz, ggem ijj n řɛeskar ḍidd nnes, jjem iysan ad ffɣen am [ijj n weyřaf n tmuɣri] iṣarrḍen iqesḥen.
JER 51:28 Farzem řegnus ḍidd nnes, ijeǧiden n Maday ak-d lwulat nnes d marra imseyyaren nnes, marra tammurt [i x teǧa] ṣṣulṭa nnes.
JER 51:29 [Xenni] ad tenhezz temmurt uca ad tfarɣ s řeḥriq, minzi inwayen n SIDI bedden nican maḥend ad arren tammurt n Babil d [ict n řqecɛet n] unexřiɛ, war dayes izeddeɣ [ɛad] uřa d ijj.
JER 51:30 Ayt n bu-teɣruḍt n Babil semḥen deg umenɣi, qqimen di lqelɛat nsen. Tefceř tzemmar nsen, nitni dewřen d timɣarin. Nitni qqden i tzeddiɣin nsen uca iɛumad nsen i ubelleɛ ttwarẓen.
JER 51:31 Amsazzař [nni] x umsazzař [nneɣni] ittazzeř-dd, areqqas [nni] x ureqqas [nneɣni], ḥima ad ḥajan i ujeǧid n Babil, aqa tandint nnes tᵉttwaṭṭef zi marra iɣezdisen,
JER 51:32 aqa imucan n uẓekkwu ttwamenɛen, iyyaren n uɣanim ttwacemḍen s tmessi uca iɛeskariyyen ttwanhezzen.
JER 51:33 Maɣar ammu i iqqar SIDI n řɛeskarat, AREBBI n Israil: Yeǧis n Babil tegga am unedrar, aqa tiweḍ-dd řweqt ḥima ad xas ɛefsen. Ɛad drus [i iqqimen], [xenni] tiweḍ-dd řweqt n tmejra i nettat.”
JER 51:34 “Nabuxadraṣṣar, ajeǧid n Babil, icca ayi, iřbez ayi, igga ayi d ijj n weqdiḥ ixwan, isarḍ ayi am řhaycet, iɛemmar aɛeddis nnes s řeḥzut inu uca yuẓẓeř xafi.
JER 51:35 [Ejj ad dd-yas] x Babil lɛunf i d ayi iggin u deg yinni [i iǧan d] ddat inu, [ammu i] teqqar tenni izeddɣen di Ṣihyun. ‘[Ejj ad dd-asen] idammen inu x imezdaɣ n [temmurt n] Ikaldaniyyen [ammu i] teqqar Urcalim.”
JER 51:36 “S uya, ammu i iqqar SIDI: ‘Necc simant inu ttedɛiɣ ddɛawi nnem u ad zzayem xeřfeɣ. Necc ad ssiẓɣeɣ řebḥar nnes u ad jjeɣ tařa nnes ad taẓeɣ.
JER 51:37 Babil ad tedweř [mɣir] d řxirbat, ict n tzeddiɣt n wuccanen n řexřa, [ict n řqecɛet n] unexřiɛ d usemẓi maḥend war [dayes ittɣimi] izeddeɣ [ɛad] uřa d ijjen.’”
JER 51:38 “Marra idsen ad zehharen am wayraden, ad ssmiɛɛriwen am wayraden imeẓyanen.
JER 51:39 Xmi ɣa yiřin ḥman, ad ssarseɣ zzatsen tasessit nsen. Necc ad ten ssᵉscareɣ ař ɣa dewwxen uca ad ṭṭṣen iḍeṣ n řebda, ɛemmarṣ ad faqen [ɛad], [ammu i] iqqar SIDI.
JER 51:40 Necc ad ten dd-ssehwiɣ am yizemrawen ɣar tɣarṣt, am yicarriyyen ak-d iɣayḍen.
JER 51:41 Mammec ittwaṭṭef Cicak u [mammec] ittwaṭṭef řɛezz n marra tammurt! Mammec tedweř [tendint n] Babil d [ict n řqecɛet n] unexřiɛ jar řegnus!
JER 51:42 Igeɛɛed-dd řebḥar x [tendint n] Babil, s ubarru n řemwaj nnes tᵉttwadeř nettat.
JER 51:43 Tineddam nnes dewřent d [ict n řqecɛet n] unexřiɛ, [tammurt tedweř d] tammurt yuẓɣen d tnezruft d ict n temmurt mani war izeddeɣ [ɛad] uřa d ijj u mani war ittcuqi uřa d ijj n mmis n bnadem.
JER 51:44 Necc ad xeřfeɣ zi Bil di Babil, ad kkseɣ zi tmijja nnes min tuɣa isarḍ. Řegnus war ɣares ttazzřen ɛad. Ɛad řḥiḍ n Babil ad iwḍa.”
JER 51:45 “Ffeɣ zzayes, [a] řgens inu, ejj kuř ijj ad issenjem tudart nnes zi řḥaduq n weɣḍab n SIDI.
JER 51:46 Mařa lla xenni ad ḍeɛfen wuřawen nwem uca ad ggʷeden zi řexbar nni i ɣa sřen di temmurt, maɣar ijj n řexbar ad ittwaseř deg ijj n useggʷas uca awarni i yijj n useggʷas [nneɣni] ad dd-yas ijj n řexbar [nneɣni]. Ad din yiři lɛunf di temmurt, [ijj n] řḥakem ad dd-ikkar x ijj n řḥakem [nneɣni].”
JER 51:47 “S uyenni xzar, ad dd-asen wussan nni di ɣa xeřfeɣ zi Babil zi ssibbet n řexyařat ineqcen uca marra tammurt nnes ad tennefḍeḥ u marra inni ittwanɣen ad wḍan di řwesṭ nnes.
JER 51:48 Ajenna d temmurt d marra min daysen ad sřiweřwen x Babil. Maɣar ad ɣares dd-asen imteḥḥayyen zi ccamal, [ammu i] iqqar SIDI.
JER 51:49 Am mammec tuɣa Babil d ssibbet n uweṭṭu n yinni ittwanɣen n Israil, [ammu] i ɣa wḍan marra inni ittwanɣen zi marra tammurt ɣar [tendint n] Babil.”
JER 51:50 “[Kenniw], inni inejmen i ssif, ffɣem, war sbeddam ixef nwem! Xemmem-dd zi řaggʷaj di SIDI u jjem Urcalim ad dd-tas ɣar řbař nwem.
JER 51:51 Neccin nseḍḥa, maɣar nesřa x useḥqar, tezweɣ n řeḥya tedřa aɣembub nneɣ, maɣar ibarraniyyen geɛɛden x Tzawiyyin Iqeddsen n Taddart n SIDI.”
JER 51:52 “S uya xzar, ad dd-asen wussan, [ammu i] iqqar SIDI, Necc ad xeřfeɣ zi řexyařat nnes ineqcen uca di marra tammurt nnes ad ttwazbaren inni ittwanɣen.
JER 51:53 Waxxa mařa [tandint n] Babil tgeɛɛed ař ajenna, waxxa tegga lbaraj nnes ijehden yuɛřan ař mani war yiwiḍ uřa d ijj, waxxa amenni ad ɣares dd-asen imteḥḥayen zzayi, [ammu i] iqqar SIDI.”
JER 51:54 “[Iffeɣ-dd] řḥess n tɣuyyit tameqqrant zi Babil, [amecnaw] n ict n lmuṣiba d tameqqrant zi temmurt n Ikaldaniyyen.
JER 51:55 Maɣar SIDI igga ad ixarreb Babil u ad iqḍa x ddriz nnes ameqqran, minzi řemwaj nsen ad zehharen am waman imeqqranen, ddriz n uzehhar nsen ad ittwaseř.
JER 51:56 Minzi ad xas dd-asen imteḥḥayen, x Babil, uca ttwaḥebbsen ayt n bu-teɣruḍt nnes, řeqwas nsen ad ttwarẓen, maɣar SIDI aqa-t d Arebbi n wexřaf, ad [zzayes] ixřef nican.”
JER 51:57 “Ad ssᵉscareɣ řḥukkam nnes d imiɣisen nnes d lwulat nnes d imseyyaren nnes d ayt n bu-teɣruḍt nnes uca nitni ad ɣeḍṣen deg yiḍeṣ n řebda u ɛemmarṣ ad faqen, [ammu i] iqqar Ujeǧid, SIDI n řɛeskarat d Isem nnes.”
JER 51:58 Ammu i iqqar SIDI n řɛeskarat: “Ad arren řeḥyuḍ imiriwen n Babil ad seḍḥan aṭṭas uca tiwwura nnes yuɛřan ad [tent] qedden s tmessi. Řegnus ad aḥřen baṭeř u ccuɛub ssiḥřen ixef nsen di ṭṭweɛ n tmessi.”
JER 51:59 Awař nni yumur unabi Irmiya i Saraya, mmis n Niri-Yah, mmis n Maḥsiyya, umi wanita yuyur zi Ṣidqiya, ajeǧid n Yahuda, ɣar Babil, deg useggʷas wiss arebɛa n řeḥkamet nnes. Tuɣa Saraya d řḥakem x řmargeḥ n řɛeskar.
JER 51:60 Irmiya yura marra řɣar i dd ɣa yasen x Babil deg ijj n wedlis ittwannḍen, marra awařen nni ittwarin x Babil.
JER 51:61 [Xenni] inna Irmiya i Saraya: “Xmi dd ɣa tased ɣar Babil, xzar mammec ɣa tegged ad tbarrḥed s marra awařen-a,
JER 51:62 ad tinid: ‘[A] SIDI, Cek simant nnec teqqared x wemcan-a belli ad [zzayes] tekksed imezdaɣ, maḥend war dayes izeddeɣ [ɛad] uřa d ijj, řa bnadem uřa d řmař, u belli [amcan-a] ad yiři d ict n temmurt ittwareddǧen!’
JER 51:63 Xmi i ɣa tkemmřed zeg uɣari n wedlis ittwannḍen, ad ɣares teqqned ijj n weẓru, ad t tenḍared di řwesṭ n [yeɣzar n] Lfuraṭ.
JER 51:64 ad tinid: ‘Ammu i ɣa tɣebba [tendint n] Babil u war tgiɛɛid [ɛad] zi ssibbet n řɣar i xas dd-ssehwiɣ. Nitni ad sřawen.’” Ař da i yiwḍen wawařen n Irmiya.
JER 52:1 Ṣidqiya [tuɣa] ɣares waḥit u-ɛicrin n iseggʷusa umi idweř d ajeǧid. Netta iḥkem ḥiṭac n iseggʷusa di Urcalim. Yemmas qqaren as Ḥamutal, yeǧis n Irmiya zi Libna.
JER 52:2 Netta igga min iǧan d aɛeffan di tiṭṭawin n SIDI, nican am mammec t igga Yahuyaqim.
JER 52:3 Maɣar axeyyeq n SIDI tuɣa yarsa x Urcalim d Yahuda, ařami ten inḍar zi zzat n wudem nnes. [Xenni] tuɣa Ṣidqiya iɣewweɣ x ujeǧid n Babil.
JER 52:4 Deg useggʷas wiss tesɛa n řeḥkamet nnes, deg wass wiss ɛecra n uyur wiss ɛecra, iffeɣ-dd Nabuxadraṣṣar, ajeǧid n Babil, s marra řɛeskar nnes ɣar Urcalim, Nitni nnḍen as-dd uca qewwaren as s jjehd ɣar marra iɣezdisen nnes.
JER 52:5 Ammu i tᵉttwaḥsar tendint ař aseggʷas wiss ḥiṭac n ujeǧid Ṣidqiya.
JER 52:6 Deg uyur wiss arebɛa, deg wass wiss tesɛa n uyur, řami idweř řaẓ imeqqar di tendint uca řgens n temmurt war ɣares iqqim bu weɣrum [ɛad],
JER 52:7 aqa tᵉttwarẓ tendint u marra iɛeskariyyen arewřen, ffɣen s ǧiřet x webrid n tewwart [i iǧan] jar tnayen n řeḥyuḍ nni [iǧan] ɣar weḥwic n ujeǧid, [umi] Ikaldaniyyen tuɣa quwwaren i tendint. Uca ajeǧid yuyur x webrid n Řewḍa.
JER 52:8 Řɛeskar n Ikaldaniyyen iḍfar ajeǧid uca nitni ḥarten x Ṣidqiya di řwaṭat n Ariḥa. Marra řɛeskar nnes ttwassebḍan xas.
JER 52:9 Nitni ṭṭfen ajeǧid uca iwyen t ɣar Nabuxadraṣṣar, ajeǧid n Babil, ɣar Ribla di temmurt n Ḥamat uca wanita iḥkem xas.
JER 52:10 Ajeǧid n Babil inɣa iḥenjiren n Ṣidqiya zzat i ṭṭitawin nnes. Uřa d marra řḥukkam n Yahuda inɣa i-ten di Ribla.
JER 52:11 Issdarɣeř tiṭṭawin n Ṣidqiya uca iqqen i-t s tnayen n ssnaseř n nnḥas. [Ammu] i t yiwi ujeǧid n Babil ɣar Babil uca igga i-t di řeḥbes ař ass umi immut.
JER 52:12 Deg uyur wiss xemsa, deg wass wiss ɛecra n uyur - tuɣa aseggʷas d aseggʷas wiss tseɛṭac n ujeǧid Nabuxadraṣṣar, ajeǧid n Babil - xmi dd-yusa Nabuzaradan, řqebṭan n iɛessasen n arrimet wenni tuɣa isexxar zzat i wudem n ujeǧid n Babil, ɣar Urcalim,
JER 52:13 issarɣ netta Taddart n SIDI d taddart n ujeǧid d marra tudrin n Urcalim d marra tudrin n imcennɛen issarɣ i-tent [ɛawed] s tmessi.
JER 52:14 Marra řɛeskar n Ikaldaniyyen, inni dd-yusin ak-d řqebṭan n iɛessasen n arrimet, aqa arẓin marra řeḥyuḍ n Urcalim i d as dd-innḍen.
JER 52:15 Imezřaḍ qaɛ n řgens d min iceṭṭen n řgens nni ittwajjen di tendint d inni iffɣen ɣar ujeǧid n Babil uca dewřen ɣares uřa d min iceṭṭen n řɣaci, indeh i-ten Nebuzaradan, řqebṭan n iɛessasen n arrimet, di lmenfa.
JER 52:16 [Maca] zeg imezřaḍ n temmurt ijja Nebuzaradan, řqebṭan n iɛessasen n arrimet, ijj n drus am yimeřqaḍ n tzayart u am yifeǧaḥen.
JER 52:17 [Uca] arẓin Ikaldaniyyen ipilaren n nnḥas di Taddart n SIDI, tikarrutin d trimant n nnḥas [i tuɣa iǧan] di Taddart n SIDI uca ksin marra nnḥas akidsen ɣar Babil.
JER 52:18 Uřa d tiydurin d iɣenjayen d tjeqqaḍin d ṭṭawyat i urucci d tɣenjayin d marra řeqcuɛ n nnḥas i zi ttsexxaren, ksin ten.
JER 52:19 Ammu i iksi řqebṭan n iɛessasen n arrimet ṭṭbaṣa d ṭṭawyat i urucci d teydurin d řeqnadeř d tɣenjayin d řkisan, [marra] min tuɣa iǧan n wureɣ qaɛ niɣ n nnuqart qaɛ.
JER 52:20 [X] tnayen n ipilaren d trimant d tenɛac n ifunasen n nnḥas nni tuɣa [iǧan] sadu nnes uřa x tkarrutin nni igga ujeǧid i Taddart n SIDI: aqa nnḥas n marra řeqcuɛ-a war zemmaren ad weznen [marra aya].
JER 52:21 [X] ipilaren: tuɣa řuɛřa n ijj n upilar dayes tmenṭac n iɣaǧen uca ijj n ufiřu n [řeɛbar] n tenɛac n iɣaǧen izemmar ad as inneḍ. Tuɣa řgedran nnes dayes arebɛa n iḍewḍan uca [ɣar daxeř] tuɣa-t ixwa.
JER 52:22 Ttaj sennej nnes [tuɣa-t] n nnḥas. Řuɛřa n ijj n ttaj tuɣa xemsa n iɣaǧen u x ttaj [tuɣa xas] tracca d tremmamin i d as dd-innḍen. Tuɣa marra n nnḥas. Am tuɣa wanita, ammu tuɣa uřa d apilar nneɣni d tremmanin nnes.
JER 52:23 Tiremmanin tuɣa atent di setta u-tesɛin ɣar marra iɣezdisen n usemmiḍ. Marra tiremmanin tuɣa atent di mya x tracca i d as dd-innḍen.
JER 52:24 Řqebṭan n iɛessasen n arrimet yiwi-dd akides uřa d akehhan ameqqran Saraya, akehhan wiss tnayen Ṣafanya d třata n iɛessasen n tewwart.
JER 52:25 Zi tendint iksi netta ijj n umsexxar amcenneɛ wenni tuɣa x iɛeskariyyen, řa d sebɛa n yeryazen nni izemmaren ad ẓaren udem n ujeǧid d yinni ittwafen di tendint, řa d amarir n ukumandar n řɛeskar nni tuɣa izemmen řgens n temmurt i umenɣi, uřa d settin n yeryazen zi řgens n temmurt nni ittwafen di řwest n tendint.
JER 52:26 Nebuzaradan, řqebṭan n iɛessasen n arrimet, iṭṭef i-ten uca yiwi ten ɣar ujeǧid n Babil, ɣar Ribla.
JER 52:27 Ajeǧid n Babil iwta i-ten uca inɣa i-ten di Ribla, di temmurt n Ḥamat. [Ammu i] ittwandeh Yahuda zi temmurt nnes ɣar lmenfa.
JER 52:28 Wa d řgens nni indeh Nabuxadraṣṣar di lmenfa: deg useggʷas wiss sebɛa [indeh] teřt-ařaf u-třata u-ɛicrin n ayt n Yahuda.
JER 52:29 deg useggʷas wiss tmenṭac n Nabuxadraṣṣar, yiwi temnem-mya u-tnayen u-třatin n iwdan zi Urcalim.
JER 52:30 deg useggʷas wiss třata u-ɛicrin n Nabuxadraṣṣar indeh Nebuzaradan, řqebṭan n iɛessasen n arrimet, sebɛa-mya u-xemsa u-rebɛin n ayt n Yahuda ɣar lmenfa. Marra [jmiɛ] tuɣa aten di arebɛa-ařaf u-setta-mya n iwdan.
JER 52:31 Deg useggʷas wiss sebɛa u-třatin n tmeḥbast n Yahuyakin, ajeǧid n Yahuda, deg uyur wiss tenɛac, deg wass wiss xemsa u-ɛicrin n uyur, issgeɛɛed Awil-Marudax, ajeǧid n Babil, deg useggʷas amezwaru n tgelda nnes, azeǧif n Yahuyakin, ajeǧid n Yahuda, uca issuffeɣ i-t-i-dd zi řeḥbes.
JER 52:32 Netta iɛdeř akides, iwca as řkursi nnes tiwa i řekrasi n ijeǧiden nneɣni inni tuɣa ɣares di Babil.
JER 52:33 Issars Yahuyakin arruḍ nnes n řeḥbes uca idweř ittett ɣares, min ikka iddar.
JER 52:34 X řmeɛteq nnes: řebda immewc as řmeɛteq nnes s ufus n ujeǧid n Babil, kuř ass min dd-ikkaren n wass nni ař ass n řmewt nnes, min ikka iddar.
LAM 1:1 Alif. Mammec teqqim [diha] tendint weḥḥdes! Tuɣa řebda teccur s řɣaci, tedweř am yict n tajjač, tuɣa-tt d tameqqrant jar řegnus, iǧis n ujeǧid jar lɛamalat, tedweř ɣar tesmuɣi.
LAM 1:2 Bit. Tᵉttru imeṭṭawen imerzagen s ǧiřet, imeṭṭawen nnes x imeggizen nnes. War ɣares wi tt ɣa iɛezzan zi marra inni tt ittexsen, marra imeddukkař nnes ɣdaren-tt, dewřen as d řɛedyan.
LAM 1:3 Gimel. Tᵉttwaḥebbes [temmurt n] Yahuda zi ssibbet n řeɣben, u zi ssibbet n řqedd n txemmast nnes iqesḥen. Tᵉttɣima jar řegnus, war tufi arraḥet, marra inni tt iḍaffaren ḥarrten xas di řwesṭ n řeḥṣarat nnes.
LAM 1:4 Dalit. Ibriden ɣar Ṣihyun ceḍnen, minzi uřa d ijj war iggur [ɛad] ɣar řɛid. Marra tiwwura nnes xřant, ikehhanen nnes zehharen, tiɛzariyyin nnes ceḍnent, uca nettat simant nnes teccur s tarzugi.
LAM 1:5 Hi. Iɣrimen nnes dewřen ḥekkmen [xas], řɛedyan nnes farrḥen, maɣar SIDI issecḍen i-tt zi ssibbet n řqedd n řmuɛṣiyyet nnes. Iḥenjiren nnes imeẓyanen uyuren di tmeḥbast zzat i tiṭṭawin n iɣrimen nsen.
LAM 1:6 Waw. Acewwar n yeǧis n Ṣihyun ingez zzayes, marra řḥukkam nnes ggin am udaden inni war ittifen ddemnet n tarewsa. Gguren nitni břa jjehd zzat i tiṭṭawin n wenni ten iḍaffaren.
LAM 1:7 Zayin. Deg wussan n řeɣben nnes u deg waṭṭas n wetlaɛ nnes ad teɛqeř Urcalim x marra min dayes iɣřan, min ɣares tuɣa zic. Řami iwḍa řgens nnes s ufus n weɣrim, tuɣa war din wi d as i ɣa iwcen afus. Iɣrimen nnes ẓrin tt, stehzan zeg ureddeǧ nnes.
LAM 1:8 Xit. Urcalim tuɣa txeṭṭa aṭṭas. X uya tedweř am yict n temɣart deg [wussan n] weɛzař nnes. Marra inni tuɣa tt ittweqqaren, sseḥqaran tt, minzi ẓrin řeḥya nnes. Uřa nettat simant nnes tzehhar, tedweř ɣar ḍeffar.
LAM 1:9 Tit. Taxmuji nnes [teřṣeq] ɣar tmuwwa [n ubeḥrur] nnes, aneggaru nnes war dayes txemm. Aqa tehwa-dd ɣar řaǧaɣ s ijj n webrid isstebhten, uřa d ijj war tt iɛezzi. Xzar maca řeɣben inu, [a] SIDI, maɣar řeɛdu issmeqqar ixef nnes.
LAM 1:10 Yud. Aɣrim isswiẓẓeḍ afus nnes ɣar marra min dayes iɣřan. Iwa teẓra nettat mammec udfen řegnus ɣar Zzawect nnes Iqeddsen, [řegnus] min xef tumured, war iɛeddeř ad dd-adfen ɣar wegraw [n řgens] nnec.
LAM 1:11 Kaf. Qaɛ imezdaɣ nnes zehharen, arezzun aɣrum. Nitni wcin řeqcuɛ iɣřan nsen di ṭṭweɛ n macca, maḥend ad dd-arren asefsi ɣar řeɛmar nsen. Xzar, [a] SIDI, wařa mammec dewřeɣ ttwasseḥqareɣ.
LAM 1:12 Lamid. Ma war daywem icqi, kenniw inni iɛeddun x webrid? Wařam u xzarem, ma [din] ca n řeḥriq am řeḥriq i d ayi ittwaggen, i zi d ayi issxeyyeq SIDI, deg wass n řḥaduq n weɣḍab nnes.
LAM 1:13 Mim. Zi sennej i dd-issekk Netta timessi deg iɣsan inu, tcebbar daysen. Netta inḍar-dd tracca ɣar iḍaren inu, yarra ayi ad dewřeɣ ɣar ḍeffar, aqa yareddeǧ ayi, issehřec [ayi] ass am ikmeř.
LAM 1:14 Nun. Ittwacedd uzayřu n iɛediyyen inu s ufus nnes, aqa ttwamuden, geɛɛden-dd x yiri inu. Netta yarra jjehd inu ad ifceř. Iwca ayi Sidi inu deg ifassen nsen, necc war zemmareɣ ad beddeɣ [ɛad].
LAM 1:15 Samix. Inḍar Sidi inu marra ayt n bu-ṣṣulṭa inu di řwest inu, am mammec ibarreḥ s ijj n umuni ifarzen ḍidd inu, maḥend ad yarẓ iḥudriyyen inu, Sidi inu aqa iɛfes di tsirt n uḍiř, n teɛzarect, n yeǧis n Yahuda.
LAM 1:16 Ɛayin. S man aya ttruɣ, [a] tiṭṭ inu, [a] tiṭṭ inu issazzařen imeṭṭawen, minzi amesfewwej nni izemmaren ad dd-yarr řeɛmar inu, iggʷej xafi. Ttwateḥḥan iḥenjiren inu, minzi řeɛdu ijhed [xasen].
LAM 1:17 Pi. Tesswiẓẓeḍ Ṣihyun ifassen nnes, [maca] nettat war ɣares wi tt ɣa issfewwjen. Yumur SIDI x Yaɛqub, aqa iɣrimen nnes ad as dd-nnḍen. Urcalim tedweř jar asen am yict n temɣart [deg wussan n] weɛzař nnes.
LAM 1:18 Tsadi. SIDI d amsegged, maɣar necc tuɣa ɣewwɣeɣ x řumurat nnes. Sřem xenni, marra řegnus, xzarem ɣar řehřiq inu. Tiɛzariyyin inu d iḥudriyyen inu uyuren di tmeḥbast.
LAM 1:19 Quf. Necc řaɣiɣ x yinni d ayi ittexsen, maca nitni cemten ayi. Ikehhanen inu d imɣaren inu ḍeřqen i buḥbeř di tendint, umi tuɣa arezzun macca i yixef nsen, ḥima ad ssmeḥḍen řeɛmar nsen.
LAM 1:20 Rix. Xzar, [a] SIDI, maɣar necc di řeḥṣaret, takrict inu tenneḥweř, uř inu inneqřeb-dd zi daxeř inu, maɣar tuɣa ɣewwɣeɣ aṭṭas. Di barra i d ayi yucar ssif iḥenjiren inu, daxeř [iḥekkem] řmewt.
LAM 1:21 Cin. Sřin mammec zehhareɣ, [maca] necc war ɣari uřa d ijj n umesfewwej, marra řɛedyan inu sřin x arẓiyyet inu. Farḥen aqa Cek i tt iggin. Xmi dd ɣa tessiwḍed ass i zi dd-tɛeřmed, [xenni] ad iřin am mammec ǧiɣ necc.
LAM 1:22 Taf. Ejj ad dd-yas marra řɣar nsen zzatek, egg zzaysen am mammec zzayi teggid zi ssibbet n marra iɛeddiyen inu, minzi izehharen inu d aṭṭas, uř inu yuḥeř aṭṭas.
LAM 2:1 Alif. Mammec idřa Sidi inu yeǧis n Ṣihyun s iseynuten [ibarcanen]? Aqa aɛuǧi n Israil inḍar i-t zeg ujenna ɣar temmurt, Netta war ixarreṣ di tnebdat n iḍaren nnes deg wass n weɣḍab nnes.
LAM 2:2 Bit. Iqḍa Sidi inu x marra tizeddaɣ n Yaɛqub, war tent ijji ad nejment. Deg uduqqez nnes [n ufugem] ihdem lqelɛat n yeǧis n Yahuda, ibeqqeḍ i-tent x temmurt, issɛarra tageldit d řḥukkam nnes.
LAM 2:3 Gimel. Di řḥaduq n weɣḍab nnes iqess qaɛ icc n Israil. Yarra afus afusi nnes ɣar ḍeffar zzat i řeɛdu, u Netta yarɣa ḍidd i Yaɛqub am tmessi itteḥduduqen, tᵉttett marra min i d as dd-innḍen.
LAM 2:4 Dalit. Netta imḥeḍ řqews nnes am řeɛdu, issgeɛɛed afusi nnes am řeɛdu, wenni iwtin marra min temmeẓri tiṭṭ. Deg Uqiḍun n yeǧis n Ṣihyun ifarreɣ asɛar nnes am tmessi.
LAM 2:5 Hi. Sidi inu idweř am řeɛdu, iṣarḍ Israil, iṣarḍ marra řeqṣur nnes, ihdem lqelɛat nnes, u yarni [ɛad] deg wecḍan d iɣuyyan ɣar yeǧis n Yahuda.
LAM 2:6 Waw. Netta iqřeɛ s lɛunf aɛiccu nnes, am ijj n weḥwic. Yareyyeb amcan n umsagar. Issettu SIDI di Ṣihyun ass n řɛid d ass n ssebt, u deg wesxeḍ nnes inḍar ajeǧid d ukehhan.
LAM 2:7 Zayin. Idweř Sidi inu icarreh aɛalṭar nnes, inḍar Zzawect Iqeddsen nnes, iwca řeḥyuḍ n yexxamen n řeqṣar deg ufus n řeɛdu. Nitni ggin ad sřen i tmijja nsen di Taddart n SIDI, am deg ijj n wass n řɛid.
LAM 2:8 Xit. SIDI ixarreṣ ad ihdem řḥiḍ n yeǧis n Ṣihyun, isarreḥ [xas] fiřu n řeɛbar, war dd-ijbid ɣares afus nnes zeg uṣarḍ. Ijja acbar n zzat d řḥiḍ ad ceḍnen, aqa ttwaɣeḍřen [jmiɛ] ɣar temmurt.
LAM 2:9 Tit. Tiwwura nnes ɣarqent deg ucař, iɛumad nnes n ubelleɛ yareddeǧ i-ten, yarẓa i-ten. Ajeǧid nnes d řḥukkam nnes [aqa aten] jar řegnus, war din [bu useřmed n] Ccariɛa, inabiyyen nnes war ttᵉṭṭifen ca řewḥiy n SIDI.
LAM 2:10 Yud. Imɣaren n yeǧis n Ṣihyun qqimen x temmurt, bekmen, zuzzaran ucař x uzeǧif nsen, beysen ixef nsen s txuncay [n wecḍan]. Tiɛzariyyin n Urcalim ssaḍarent azeǧif nsent ɣar temmurt.
LAM 2:11 Kaf. Tiṭṭawin inu uhřent zeg imeṭṭawen, takrict inu tᵉttenhezza, tᵉttwazeǧeɛ tsa inu x temmurt, x treẓẓit n yeǧis n řgens inu, minzi aḥenjir d useymi ttɣacan x wazzayen n tendint.
LAM 2:12 Lamid. Nitni qqaren i yemmatsen: “Mani iǧa [ɛad] imendi d binu?”, xmi weṭṭan x wazzayen n tendint am yinni ittwanɣen, xmi ttwakksen zi tudart nsen x ifadden n yemmatsen.
LAM 2:13 Mim. Min d am i ɣa iniɣ, min ɣar cem i ɣa ssemquddiɣ, [a] yeǧis n Urcalim? Min ɣar cem i ɣa ssemquddiɣ, ařami cem i ɣa ssfewwjeɣ, [a cem] taɛzarect, yeǧis n Ṣihyun, maɣar tareẓẓit nnem d tameqqrant am řebḥar, wi izemmaren ad cem issgenfa?
LAM 2:14 Nun. Inabiyyen nnem ẓrin [iweḥḥan] ixarriqen d ibuḥařiyyen, war ssɛarran ca x řmuɛṣiyyet nnem ařami i ɣa ssenqeřben tameḥbast nnem. Di ṭṭweɛ nnem ẓrin nitni [mɣir] řeḥkamat ixarriqen d tḥuja n uɣarri.
LAM 2:15 Samix. Marra inni [xam] dd-ittekken ccaten deg ifassen [s unexřiɛ] zi ssibbet nnem. Nitni ttṣeffaren u ssenhezzan azeǧif nsen x yeǧis n Urcalim, qqaren: ‘Ma d ta d tandint nni umi nnan: “Ma war iǧi aẓri nnes ikmeř, d [řɛunṣar] n řefraḥet i marra ddunect!”?
LAM 2:16 Pi Marra řɛedyan nnem arezmen-dd ɣarwem iqemmumen nsen, ttṣeffaren u ttɣezzan tiɣmas, qqaren: “Neccin nṣarḍ i-tt. Wa d ass i tuɣa nettraja, řexxu nufa i-t, nettwařa i-t!”
LAM 2:17 Ɛayin. Igga SIDI min ixarreṣ, ikemmeř awař nnes wenni yumur zi mecḥař uya. Ihdem i [cem], war [xam] iḥiweř. Řeɛdu ijja i-t ifarḥ zzayem, issgeɛɛed icc n iɣrimen nnem.
LAM 2:18 Tsadi. Uř nsen isɣuyyu ɣar Sidi inu, “[A] řḥiḍ n yeǧis n Ṣihyun, ejj ad azzřen imeṭṭawen [nnem] am teɣzart, ass d ǧiřet břa ma ad neqṣen, war ttejji mummu n tiṭṭawin nnem ad ibedd!”
LAM 2:19 Quf. Kkar, sɣuyy di ǧiřet, ɣar umezwaru n tɛessast n ǧiřet, zeǧeɛ uř nnem am waman zzat i wudem n Sidi inu. Sgeɛɛed ɣares ifassen nnem i tudart n iḥenjiren nnem imeẓyanin, inni iwḍan ɣar temmurt s řaẓ, ɣar tɣemmar n marra ibriden.
LAM 2:20 Rix. Xzar, [a] SIDI, wařa [mliḥ] umi teggid man aya? Ma ittxeṣṣa [xenni] ad ccent temɣarin řɣiǧet n uɛeddis nsent, iḥenjiren nsent i di tthillant nitenti? Ma ittxeṣṣa ad ittwaneɣ unabi d ukehhan di Zzawect Iqeddsen n Sidi?
LAM 2:21 Cin. Iḥudriyyen d iwessura buzzřen x temmurt deg ibriden. Tiɛzariyyin inu d iḥudriyyen inu wḍan s ssif. Tenɣid [ten] deg wass n weɣḍab nnec, tɣarṣeḍ [asen], war [xasen] tḥiwřed ca.
LAM 2:22 Taf. Tɛarrned-dd ɣari min issaggʷaden zi marra iɣezdisen, am mammec ibarreḥ s ijj n umuni ifarzen. War inejjim niɣ ittarekkwař uřa d ijj deg wass n weɣḍab n SIDI. Inni i di tthilliɣ u arebbiɣ iqḍa i-ten řeɛdu inu.
LAM 3:1 Alif. Necc d aryaz nni iẓrin řeɣben s weɛmud n uduqqez nnes [n ufugem].
LAM 3:2 Alif. Netta indeh ayi uca ijja ayi ad uyureɣ di taǧest, war iǧi di tfawt.
LAM 3:3 Alif. S tidett, Netta yarra řebda afus nnes ḍidd inu, ass ikmeř.
LAM 3:4 Bit. Netta iḍeyyeɛ aysum inu d teřmect inu, yarẓa iɣsan inu.
LAM 3:5 Bit. Netta bna ict n řebniyyet xafi u iquwwar ayi s arrhaj d tamara.
LAM 3:6 Bit. Di ṭṭřam ijja ayi zeddɣeɣ, am imettan n waṭṭas zeg wami.
LAM 3:7 Gimel. Netta ibelleɛ ayi jar řeḥyuḍ, war zemmareɣ ad nejmeɣ. Issedqeř xafi ssnaseř inu n nnḥas.
LAM 3:8 Gimel. Ɛad meřmi ttřaɣiɣ u sɣuyyuɣ, Netta iqqim ibkem ɣar tẓaǧit inu.
LAM 3:9 Gimel. S tṣuḍar injaren ibelleɛ xafi abrid, issfarɣ imesraq inu.
LAM 3:10 Dalit. Tuɣa Netta i necc [am] ddub ittḥaman, [am] wayrad deg imucan innufaren.
LAM 3:11 Dalit. Netta yuẓẓeř xafi zeg webrid, imezzeq ayi, war d ayi ijji ca.
LAM 3:12 Dalit. Netta issemḥeḍ řqews nnes uca ijja ayi ad iřiɣ d awaḍ i fřitca [nnes].
LAM 3:13 Hi. Fřitcat zeg weqrab nnes ijja i-tent ad adfent di tiẓẓař inu.
LAM 3:14 Hi. Dewřeɣ d taseḍhact i marra řgens inu, d izři nsen n uzawar ass imun.
LAM 3:15 Hi. Netta issjjiwen ayi s tarzugi, issessu ayi s cciḥ.
LAM 3:16 Waw. Tiɣmas inu ijja i-tent zeɛɛfent deg uqayas ařami arẓint, idřa ayi s yiɣɣed.
LAM 3:17 Waw. Cek tessiggʷejed řeɛmar inu x řehna, necc ttuɣ [marra] tcuni.
LAM 3:18 Waw. Necc nniɣ: “Jjehd inu iqḍa, uřa d asitem inu di SIDI.”
LAM 3:19 Zayin. Ɛqeř x řeɣben inu d tmeḥbast inu, x cciḥ d arrhaj.
LAM 3:20 Zayin. Řeɛmar inu ittxarreṣ nican di man aya, aqa icḍen dayi.
LAM 3:21 Zayin. Aya xseɣ ad t arreɣ ɣar wuř, x uya ad qqimeɣ ssitimeɣ ɛad.
LAM 3:22 Xit. S tmegga n tmexsiwt n SIDI, aqa war nettwahellek ca, minzi arreḥmet nnes [ɛemmarṣ] war tᵉttbeddi.
LAM 3:23 Xit. Aqa-tt d jdid kuř ṣṣbeḥ, řaman nnec d ameqqran.
LAM 3:24 Xit. Tasɣart inu d SIDI, [ammu i] iqqar řeɛmar inu, x uya ttɣimiɣ ssitimeɣ dayes.
LAM 3:25 Tit. Iṣbeḥ SIDI i yinni dayes issitimen, i řeɛmar nni xas yarezzun.
LAM 3:26 Tit. Aqa mliḥ araji s usitem ɣar zzat, [araji] di řhudnet ɣar usenjem zi SIDI.
LAM 3:27 Tit. Mliḥ i weryaz ad yarbu azayřu di temẓi nnes.
LAM 3:28 Yud. Ejj i-t ad iqqim ḥafi, ad isseɣd, maɣar SIDI igga i-tt xas.
LAM 3:29 Yud. Ejj i-t ad igg aqemmum nnes di tɛejjajt, [ad yini:] “Ad taɣ iǧa řayas!”
LAM 3:30 Yud. Ejj i-t ad iwc ameggiz i wenni t iccaten, ejj i-t ad ittwajjiwen s useḥqar.
LAM 3:31 Kaf. Minzi Sidi inu war ineṭṭar [ḥed] i řebda,
LAM 3:32 Kaf. maca mařa Netta issecḍen [ḥed], ad [xas] iḥinn ɛawed ɛlaḥsab řemɣaret n tmexsiwt nnes icuwwaren,
LAM 3:33 Kaf. maɣar Netta war iḥeṣṣar niɣ issecḍin tarwa n weryaz s wuř.
LAM 3:34 Lamid. Xmi ɣa řebzen sadu iḍaren marra imeḥbas n temmurt,
LAM 3:35 Lamid. xmi ɣa ḥarrfen tasɣart n weryaz zzat i wudem n Umɛuǧi x kuřci,
LAM 3:36 Lamid. xmi ɣa qeřben ddeɛwet n bnadem, ma zeɛma Sidi inu war ittwiři [man aya]?
LAM 3:37 Mim. Man wen i iqqaren [ca n řḥajjet] uca [xenni] temsar, [mařa] war tt yumur Sidi inu?
LAM 3:38 Mim. Ma war dd-ittis zeg uqemmum n Umɛuǧi x kuřci [marra] min war iḥřin uřa d [marra] min iṣebḥen?
LAM 3:39 Mim. Mammec ittcetca bnadem iddaren [ɛad]? [Ejj] weryaz [ad icetca] zi ssibbet n ddnub nnes.
LAM 3:40 Nun. Ejj aneɣ ad nexzar ibriden nneɣ, ad daysen narzu, ejj aneɣ ad dd-nedweř ɣar SIDI.
LAM 3:41 Nun. Ejj aneɣ ad nessgeɛɛed ak-d ifassen nneɣ uřa d wuřawen nneɣ, ɣar Arebbi deg ujenna.
LAM 3:42 Nun. Neccin nɛedda u nɣewweɣ, cek war teɣfared ca i [uya].
LAM 3:43 Samix. Cek třeḥḥfed aneɣ s weɣḍab, teḍfareḍ aneɣ, tenɣid, war [xaneɣ] tḥiwřed ca.
LAM 3:44 Samix. Třeḥḥfed ixef nnec deg useynu, maḥend ad taf taẓaǧit war tzemmar ad teɛdu.
LAM 3:45 Samix. Cek tarrid-dd aneɣ d taxmuji d wefraḍ di řwesṭ n řegnus.
LAM 3:46 Pi. Marra řɛedyan nneɣ arzmen-dd ɣarneɣ aqemmum nsen.
LAM 3:47 Pi. Tiggʷuda d řfex dewřen [d azyen] zzayneɣ, axarreb d arẓiyyet.
LAM 3:48 Pi. Zi tiṭṭawin inu ttazzřent imeṭṭawen x tareẓẓit n yeǧis n řgens inu.
LAM 3:49 Ɛayin. Tiṭṭ inu teqqim tᵉttazzeř [s imeṭṭawen], war tᵉttareyyiḥ, war tessbeddi,
LAM 3:50 Ɛayin. ař d i ɣa issijj SIDI zeg ujenna, uca ad ittwařa.
LAM 3:51 Ɛayin. Tiṭṭ inu tᵉttegg ayi řeḥriq di řeɛmar inu, zi ssibbet n marra yessis n tendint inu.
LAM 3:52 Tsadi. Areddfen ayi-dd řɛedyan inu břa qeṭṭu, am yijj n wejḍiḍ, [maca] břa ssibbet.
LAM 3:53 Tsadi. Nitni ssbekmen tudart inu deg wanu, uca nḍaren aẓru xafi.
LAM 3:54 Tsadi. Aman ḥemřen-dd x uzeǧif inu, nniɣ: “Aqa war qqimeɣ ǧiɣ!”
LAM 3:55 Quf. [A] SIDI, necc řaɣiɣ x Yisem nnec, zi řaǧaɣ n wanu.
LAM 3:56 Quf. Cek tesřid i tmijja inu, war tteqqen amezzuɣ nnec zzat i uzehhar inu, zzat i iɣuyyan inu!
LAM 3:57 Quf. Cek tusid-dd ɣari deg wass i d ac dd-řaɣiɣ, tennid: “War tteggʷed ca!”
LAM 3:58 Rix. Cek, [a] Sidi inu, tarefɛed ddɛawi x řeɛmar inu, Cek tfekked tudart inu.
LAM 3:59 Rix. [A] SIDI, teẓrid ddeǧ i dayi iggin, aɣ ayi tasɣart inu.
LAM 3:60 Rix. Cek teẓrid marra axřaf nsen, marra min nwan ḍidd inu.
LAM 3:61 Cin. Cek tesřid řḥegra nsen, [a] SIDI, marra min nwan ḍidd inu,
LAM 3:62 Cin. [awařen nni dd-itteffɣen] [zi jar] iyencicen n yinni xafi ikkaren, uřa d řemwayař nsen n uxarreṣ xafi ass imun.
LAM 3:63 Cin. Xzar ɣar uɣimi d ubeddi nsen, necc d izři nsen n ustehzi.
LAM 3:64 Taf. [A] SIDI, xeǧeṣ i-ten řmunet nsen i isdaheǧen, ɛlaḥsab timegga n ifassen nsen.
LAM 3:65 Taf. Sdaɣreř uřawen nsen, ejj nneɛřet nnec ad dd-xasen-[tewḍa].
LAM 3:66 Taf. Ḍfar [i-ten] deg weɣḍab [nnec], qḍa xasen zi sadu ujenna n SIDI.
LAM 4:1 Alif. Mammec igga ibbarcen wureɣ ammu, [mammec] ibeddeř wureɣ icna qaɛ [ammu]! Mammec ttwabezzɛen iẓra n Zzawect Iqeddsen x tɣemmura n ibriden!
LAM 4:2 Bit. Iḥenjiren iɣřan n Ṣihyun ttwaḥesben am wureɣ iqquren. Mammec d asen tteggen [řexxu] am yiɣarrafen n třaxt, [am] řxedmet n bu-třaxt!
LAM 4:3 Gimel. Ɛad tuccanin n řexřa i dd-issuffɣen tibbicin, ssuṭṭuḍent imeẓyanen nsent, [maca] yeǧis n řgens inu tedweř tewɛar, am nnɛamat di řexřa.
LAM 4:4 Dalit. Iřes n weḥḍiḍ iřṣeq ɣar waneɣ nnes s ufadi, iḥenjiren imeẓyanen tᵉttaren aɣrum, [maca] uřa d ijjen war d asen t yebḍi.
LAM 4:5 Hi. Inni tuɣa ittetten [zic] macca iředden, ɣacan deg ibriden, inni ittwasseymen [deg warruḍ] azeggʷaɣ iḥedqen, ḥennḍen řexxu di řeɣbar.
LAM 4:6 Waw. Řmuɛṣiyyet n yeǧis n řgens inu d tameqqrant x ddnub n [tendint n] Sadum, tenni inqeřben deg ijj n umur, břa ttsaxxur n ifassen.
LAM 4:7 Zayin. Tuɣa tarwa n taṣiřet nnes ṣfan x wedfeř, d icemřařen x uɣi, arrimat nsen zewɣen x řmarjan, addud nsen [yareqq] am ṣaffir aziza.
LAM 4:8 Xit. [Řexxu] ibeddeř waddud nsen, idweř d abarcan x taǧest, war ttwaɛqiřen deg ibriden [ɛad]. Tiřmect nsen teřṣeq x yeɣsan nsen, tuẓeɣ, tedweř am ukeccuḍ.
LAM 4:9 Tit. Iḥřa inni ittwanɣen s ssif, x yinni ittwanɣen s řaẓ, maɣar nitni ad fesyen, ttwařeqfen s [wenqas n] ṣṣabet n yeyyar.
LAM 4:10 Yud. Ifassen n temɣarin [nni tuɣa] ittḥinnan [qbeř], ssnennan i iḥenjiren nsen. Nitni dewřen asent d macca, zi ssibbet n treẓẓit n yeǧis n řgens inu.
LAM 4:11 Kaf. SIDI yarxu i wesɛar nnes, issfarreɣ řḥaduq n weɣḍab nnes. Netta issarɣ timessi di Ṣihyun, [timessi] tenni iccen dsusa nnes.
LAM 4:12 Lamid. Ɛemmarṣ war tᵉttɣiř i ijeǧiden n temmurt d imezdaɣ n ddunect, aqa aɣrim d řeɛdu ad dd-adfen ɣar tewwura n Urcalim.
LAM 4:13 Mim. D man aya di ssibbet n ddnub n inabiyyen nnes, [di ssibbet] n řmuɛṣiyyet n ikehhanen nnes, inni issizzřen idammen n imseggaden di řwesṭ nnes.
LAM 4:14 Nun. Tettliɛen amecnaw idarɣařen deg ibriden, mesřen s idammen, ařami war izemmar uřa d ijjen ad iḥada arruḍ nsen.
LAM 4:15 Samix. “Aggʷejem, [aqa idammen] xemjen!”, řaɣan asen: “Aggʷejem, aggʷejem, war t ttḥadam!” Uca xenni arewřen, qqimen weddaren. Ittwanna jar řegnus: “War iɛeddeř ad qqimen [din] ɛad ktar [am ibarraniyyen]!”
LAM 4:16 Pi. Aɣembub n SIDI yareyyec i-ten, War iqqim ad daysen ixzar ɛad. Tuɣa war ɣarsen aweqqar i ikehhanen, iwessura war d asen ssecnen aḥinni.
LAM 4:17 Ɛayin. Řebda ttefciřent tiṭṭawin nneɣ, umi xzarent ɣar twiza. Tuɣa-t baṭeř! Ɣar marra axezzar nneɣ nettraja ijj n řgens i war izemmaren ad issenjem.
LAM 4:18 Tsadi. Nitni ḥṣaren aneɣ, ařami war neqqim nzemmar ad nuyur x wazzayen nneɣ. Qeṭṭu nneɣ tuɣa yiweḍ-dd, ussan nneɣ qḍan, wah, qeṭṭu nneɣ yusa-dd.
LAM 4:19 Quf. Inni d aneɣ iḍeffaren tuɣa fsusen x igidaren deg ujenna. Nitni uẓẓřen xaneɣ x idurar, ggin aneɣ ijj n řfex di řexřa.
LAM 4:20 Rix. Nnefs n wenzaren nneɣ, lmasiḥ n SIDI, ittwaḥebbes di iḥufar nsen, wenni x nenna: “Ad neddar jar řegnus di tiři nnes!”
LAM 4:21 Cin. Sřiwřew u farḥ, [a] yeǧis n Idum, tenni izeddɣen di temmurt n Ɛuṣ! [Maca] uřa d cem ad ɣarem dd-yas řkas, cem ad zzayes tescared, ad tᵉttwaɛarrid.
LAM 4:22 Taf. Ɣar řmuɛṣiyyet nnem ad yiři uneggar, [a] yeǧis n Ṣihyun! Netta war i cem ittḥewwis ɛad. [Maca] Netta ad zzayem ixeǧeṣ řmuɛṣiyyet nnem, [a] yeǧis n Idum! Netta ad iɛarra x ddnub nnem.
LAM 5:1 Ɛqeř, [a] SIDI, x min i d aneɣ imsaren, xzar-dd u wařa řḥegra nneɣ.
LAM 5:2 Tewḍa tesɣart n řwart nneɣ i ibarraniyyen, uřa d tudrin nneɣ ruḥent tt ɣar midden.
LAM 5:3 Neccin nedweř d iyujiřen břa babatneɣ, tiyemmatin nneɣ dewřent am tijjař.
LAM 5:4 Aman nneɣ nsess i-ten s tmenyat, akeccuḍ nneɣ nettxeǧaṣ xas.
LAM 5:5 Ḍeffaren aneɣ x yiri nneɣ, neccin nemmut s řweḥřan, [maca] war d aneɣ jjin arraḥet.
LAM 5:6 Aqa nsarreḥ afus ɣar Miṣra, ɣar Accur, maḥend ad nejjiwen aɣrum.
LAM 5:7 Ibabaten nneɣ xḍan, war ǧin ɛad. U neccin narebbu řmuɛṣiyyet nsen.
LAM 5:8 Imsexxaren ddebbaran xaneɣ, uřa d ijj war d aneɣ issenfekki zeg ifassen nsen.
LAM 5:9 Neccin nsebbeř tudart nneɣ maḥend ad dd-nawi aɣrum nneɣ, zi ssibbet n ssif di řexřa.
LAM 5:10 Tiřmect nneɣ tᵉtteḥduduq am tefqunt, zi řḥaduq n tmessi n řaẓ.
LAM 5:11 Ssxargen timɣarin di Ṣihyun, uřa d tiɛzariyyin di tneddam n Yahuda.
LAM 5:12 Řḥukkam yuyřen ten s ifassen n yixef nsen, iwessura war ten weqqaren [ɛad].
LAM 5:13 Iryazen ijehden qaɛ arebbun [iẓra n] tsirt, u iḥudriyyen ttneqraḍen sadu [řeḥmeř n] ukeccuḍ.
LAM 5:14 Imɣaren ssbedden aɣimi di tewwura n tendint, iḥudriyyen [ssbedden] zeg uzenzun nsen [x ifiřan].
LAM 5:15 Tweddar řefraḥet n wuř nneɣ, ccḍiḥ nneɣ s nnubtat idweř d acḍan.
LAM 5:16 Iwḍa aneɣ tajj x uzeǧif nneɣ. Uct xaneɣ, maɣar neccin nexḍa.
LAM 5:17 S uyenni ihřec wuř nneɣ aṭṭas, s uyenni bbarecnent tiṭṭawin nneɣ,
LAM 5:18 zi ssibbet n wedrar n Ṣihyun nni ittwaxarrben, mani ttawyen ttarran iceɛbawen.
LAM 5:19 Cek, [a] SIDI, ad teqqimed i řebda, řkursi igellden nnec aqa-t zi jjiř ař jjiř.
LAM 5:20 Mayemmi texsed Cek ad aneɣ tᵉttud i řebda? Mayemmi i dayneɣ tsemḥed qaɛ anect uya n wussan?
LAM 5:21 [A] SIDI, arr aneɣ-dd ɣarek, [xenni] ad ɣarek dd-nedweř. Arr aneɣ-dd ussan nneɣ d jdid am zic.
LAM 5:22 Maɣar ma s tidett tenḍared aneɣ kuřci? Ma teffugmed xaneɣ ammu qaɛ?
EZE 1:1 Deg useggʷas wiss třatin, deg uyur wiss arebɛa, deg wass wiss xemsa n uyur, umi d ayi tuɣa di řwesṭ n ayt n lmenfa ɣar yeɣzar n Xabur, imsar belli arezmen ijenwan uca ẓriɣ iweḥḥan n AREBBI.
EZE 1:2 Deg wass wiss xemsa n uyur - tuɣa d aseggʷas wiss xemsa n lmenfa n ujeǧid Yuyakin -
EZE 1:3 yusa-dd wawař n SIDI nican ɣar Ḥizqiyal, mmis n Buzi, akehhan, di temmurt n Ikaldaniyyen, ɣar yeɣzar n Xabur. Tuɣa din xas afus n SIDI.
EZE 1:4 Ẓriɣ, uca xzar, yusa-dd usemmiḍ n tḥaryaḍt zi ccamal, ijj n useynu d ameqqran, d ict n tmessi tᵉttceɛɛeř, inneḍ as-dd [i useynu] ijj n uwesseg. Zi řwesṭ nnes iban-dd [ca] am wuzzař ittwessgen, zi řwesṭ n tmessi.
EZE 1:5 Zi řwesṭ nnes [tban-dd] ṣṣifet n arebɛa n imuddaren. Ammu dd-ḍharen yina: tuɣa [marra] ɣarsen ṣṣifet n bnadem.
EZE 1:6 Kuř ijj ɣares arebɛa n wudmawen u kuř ijj ɣares arebɛa n wafriwen.
EZE 1:7 Iḍaren nsen tuɣa aten nican u tiřeqqa n iḍaren nsen am třeqqa n iḍaren n uɛejmi uca ttissiqent [třeqqat n iḍaren nsen] am wudem n nnḥas ittwassuydan.
EZE 1:8 Sadu afriwen nsen ɣar arebɛa n iɣezdisen nsen [ɣarsen] ifassen n bnadem. Arebɛa [n imuddaren] ɣarsen udmawen d wafriwen.
EZE 1:9 Tuɣa afriwen nsen munen ijj ak-d wenneɣni. Nitni war nnqeřben ca xmi gguren. Gguren nitni, kuř ijj [zzaysen iggur] nican ɣar zzat.
EZE 1:10 Arwas n wudmawen nsen [tuɣa am] wudem n bnadem u ɣar uɣezdis afusi n arebɛa [n imuddaren nni] [am] wudem n weyrad u ɣar uɣezdis azeřmaḍ n arebɛa [n imuddaren nni] [am] wudem n ufunas uca arebɛa [n imuddaren nni] ɣarsen ɛawed udem n ugider.
EZE 1:11 Udmawen nsen d wafriwen nsen ttwamsebḍan ɣar tiwa. Tnayen [n wafriwen] n kuř ijjen ttmunan ak-d wenneɣni, u tnayen dřin arrimat nsen.
EZE 1:12 Nitni uyuren, kuř ijj nican ɣar zzat. Mani ma tuɣa ixs Arruḥ ad yuyur, gguren nitni. Nitni war ttneqřiben ca xmi gguren.
EZE 1:13 X warwas n imuddaren [nni]: aqa banen-dd am řefḥem itteḥduduqen icemmḍen, am yiṣefḍawen. Tuɣa [timessi] tᵉttraḥ tᵉttas-dd jar imuddaren uca timessi tᵉttissiq u zi tmessi tteffɣen-dd wassamen.
EZE 1:14 Imuddaren tuɣa ttazzřen, dekkwařen-dd, ittban am wassamen.
EZE 1:15 [Řami] ẓriɣ imuddaren [nni], xzar ict n tjarrart [tbedd] x temmurt zzat i imuddaren, ɣar [kuř ijj zi] arebɛa n wudmawen.
EZE 1:16 Tajarrarin d twaggit nsen banent-i-dd am texrisulit u ɣarsen ṣṣifet d ict ɣar arebɛa [n imuddaren]. Mammec dd-ḍharent u mammec ttwaggent tuɣa axmi ict n tjarrart [tuɣa nican] di tjarrart [nneɣni].
EZE 1:17 Xmi gguren, gguren ɣar arebɛa n iɣezdisen nsen. Nitni war ttneqřiben ca xmi gguren.
EZE 1:18 Yantat nsen tuɣa aten uɛřant u ssagʷadent u yantat nsen ccurent s tiṭṭawin i d asent-i-dd innḍen, ɣar arebɛa [n imuddaren nni].
EZE 1:19 Xmi gguren imuddaren, ggurent uřa d tjarrarin nni ɣar zzat nsen akidsen, u xmi ttwassgeɛɛden imuddaren zi temmurt, ttwassgeɛɛdent uřa d tijarrarin.
EZE 1:20 Ař mani ixs Arruḥ ad yuyur, din gguren nitni, mani ixs Arruḥ ad iraḥ, uca tijarrarin ɣar zzat nsen ttwassgeɛɛdent, maɣar Arruḥ n imuddaren tuɣa di tjarrarin.
EZE 1:21 Xmi gguren nitni, ggurent uřa d nitenti, u xmi ttbeddan nitni, beddent uřa d nitenti u xmi ttwassgeɛɛden nitni, ttwassgeɛɛdent uřa d tijarrarin akidsen, maɣar Arruḥ n imuddaren tuɣa di tjarrarin.
EZE 1:22 Sennej i izeǧifen n umuddar tuɣa din min yarewsen deg ict n řqubbet, tban-dd am [yict n řqubbet] issaggʷaden n wejris nni ittwabezzɛen sennej i izeǧifen nsen.
EZE 1:23 Sadu řqubbet tuɣa afriwen nsen seggmen, sswiẓẓaḍen ijj ɣar wenneɣni. Kuř ijj ɣares tnayen maḥend ad zzaysen issduriy ixef nnes ɣar uɣezdis-s, uca kuř ijj ɣares [ɛawed] tnayen [nneɣni] maḥend ad zzaysen issduriy ixef nnes ɣar uɣezdis nni, [tuɣa d man aya i] arrimat nsen.
EZE 1:24 Xmi gguren, sřiɣ i řḥess n wafriwen nsen am zzhir n řebḥar, am tmijja n Umzemmar x kuřci, aqa řḥess d ameqqran am řḥess n řɛeskar. Řami bedden, ssehwan afriwen nsen.
EZE 1:25 Tuɣa din ict n tmijja sennej i řqubbet nni tuɣa sennej i izeǧifen nsen. Řami [xenni] bedden nitni, ssehwan afriwen nsen.
EZE 1:26 Sennej i řqubbet nni tuɣa x izeǧifen nsen iban-dd [ca] am yijj n řɛarc s wudem n weẓru n ṣaffir aziza u sennej qaɛ x min ittbanen am řɛarc, [iqqim] xas sennej min ittbanen am ṣṣifet n bnadem.
EZE 1:27 Uca ẓriɣ [aqa ṣsifet] tᵉttban am wuzzař ittwessgen, tban-dd am tmessi ɣar daxeř nnes u deg wenneḍ nnes. Zi tejɛinnatin nnes ař sennej u zi min yarwesen di tejɛinnatin nnes ař wadday, ẓriɣ [wenni] dd-ittbanen am tmessi uca inneḍ as-dd ijj n uwesseg.
EZE 1:28 Am mammec dd-tᵉttban tesřit n wenẓar deg iseynuten deg ijj n wass n wenẓar ijehden, ammu tuɣa ccuf n uwesseg nni i d [as] dd-innḍen. Wanita d udem n waddud n uɛuǧi n SIDI. [Řami] [t] ẓriɣ, wḍiɣ s uɣembub inu [ɣar temmurt] uca sřiɣ tmijja nni [kidi] issawařen.
EZE 2:1 Inna ayi: “[A] mmis n bnadem, kkar x iḍaren nnec uca Necc ad kik ssiwřeɣ.”
EZE 2:2 Řami akidi issiweř, yudef-dd dayi Arruḥ uca issekkar-dd ayi x iḍaren inu u necc sřiɣ i tmijja n Wenni kidi issawařen.
EZE 2:3 Netta inna ayi: “[A] mmis n bnadem, Necc sekkeɣ cek ɣar ayt n Israil, ɣar řegnus iɣewwɣen, inni xafi iɣewwɣen. Nitni d řejdud nsen ɛeddan xafi ař ass-a.
EZE 2:4 Nitni d arraw n wudem iqesḥen d wuř izelgen. Necc sekkeɣ cek ɣarsen, ittxeṣṣa ac ad asen tinid: ‘Ammu i iqqar Sidi inu, SIDI!’
EZE 2:5 Ma ad [ac] sřen niɣ ad semḥen di man aya, minzi nitni d ict n taddart iɣewwɣen, nitni ad ssnen belli tuɣa anabi di řwesṭ nsen.
EZE 2:6 Uca cek, [a] mmis n bnadem, war zzaysen tteggʷed u war tteggʷed uřa zeg wawařen nsen. Waxxa aqa din ɣarek tizeggʷura d isennanen u waxxa zeddɣent ɣarek tɣarḍmiwin, war tteggʷed ca zeg wawařen nsen u war zzaysen ttnexřiɛ, minzi nitni d ict n taddart iɣewwɣen.
EZE 2:7 Ad kidsen tessiwřed s wawařen inu, ma ad sřen niɣ ad semḥen di man aya, minzi nitni aqa ttɣewwɣen.
EZE 2:8 [Maca] cek, [a] mmis n bnadem, seř min d ac ɣa iniɣ, war ttɣewwiɣ am taddart nni iɣewwɣen. Arzem aqemmum nnec nican uca ecc min d ac ɣa wceɣ.”
EZE 2:9 Uca ẓriɣ, xzar, ijj n ufus isswiẓẓeḍ-dd ɣari, u xzar, dayes ijj n wedlis ittwannḍen.
EZE 2:10 Netta ibezzeɛ i-t zzati. Tuɣa yura zi sennej d wadday uca ttwarin dayes izřan n wecḍan d usqinnef d uweḥweḥ n tamara.
EZE 3:1 Netta inna ayi: “[A] mmis n bnadem, min tᵉttwařid [danita], ecc i-t! Ecc adlis-a ittwannḍen uca uyur, siweř ak-d taddart n Israil.”
EZE 3:2 Necc arzmeɣ aqemmum inu u Netta issecc ayi adlis nni ittwannḍen.
EZE 3:3 Inna ayi: “[A] mmis n bnadem, ɛřef aɛeddis nnec, ccur takrict nnec s wedlis ittwannḍen nni i d ac ɣa wceɣ.” [Xenni] cciɣ u tuɣa-t d [a]miẓid deg uqemmum inu am tamment.
EZE 3:4 [Xenni] inna ayi: “[A] mmis n bnadem, uyur, adef ɣar taddart n Israil uca siweř awařen inu akidsen.
EZE 3:5 Minzi war dd-tᵉttwassekked ca ɣar ijj n řgens s ijj n yiřes iwɛar u s ijj n wawař iqseḥ, maca ɣar taddart n Israil,
EZE 3:6 war iǧi ɣar řegnus aṭṭas s ijj n yiřes iwɛar niɣ s ijj n wawař iqseḥ, i zi war tzemmared ad tfehmed awařen nsen. Mařa sekkeɣ cek ɣarsen nitni, s tidett ad ac sřen.
EZE 3:7 [Maca] taddart n Israil war ixs ad ɣarek iseř, minzi war xsen ad dd-sřen ɣari, minzi marra taddart n Israil, aqa nitni [ɣarsen] azeǧif iqseḥ u [ɣarsen] uř yezleg.
EZE 3:8 Xzar, Necc ggiɣ udem nnec iqseḥ am wudmawen nsen, u tanyart nnec ggiɣ tt teqseḥ am tenyarin nsen.
EZE 3:9 Necc ggiɣ tanyart nnec am yijj n umesmir i iǧan iqesḥen x ict n txedmect n weẓru. War zzaysen tteggʷed ca u war ttnexřiɛ ca zeg wudmawen nsen, minzi nitni d ict n taddart iɣewwɣen.”
EZE 3:10 Netta inna ayi: “[A] mmis n bnadem, ḥḍa marra awařen inu nni i ɣa ssiwřeɣ akidek deg wuř nnec uca seř ɣarsen s imezzuɣen nnec.
EZE 3:11 Uyur, adef ɣar ayt n lmenfa ɣar tarwa n řgens nnec uca siweř akidsen, ini asen: ‘Ammu i iqqar SIDI inu, SIDI!’, ma ad sřen niɣ ad semḥen di man aya.”
EZE 3:12 [Xenni] issgeɛɛed ayi Arruḥ uca sřiɣ awarni ayi ict n tmijja teddardiḥ aṭṭas, teqqar: “Ad ittwabarek uɛuǧi n SIDI zeg wemcan [n tzeddiɣt] nnes!”
EZE 3:13 Sřiɣ i řḥess n wafriwen n imuddaren nni iřeqqfen ijj i wenneɣni uřa i řḥess n tjarrarin zzat nsen u i řḥess n ijj n udardiḥ imɣar.
EZE 3:14 [Xenni] issgeɛɛed ayi Arruḥ uca iksi ayi. Necc uyureɣ, d amarzag, itteḥduduq buḥbeř inu [dayi] u afus n SIDI tuɣa idqeř xafi.
EZE 3:15 [Ammu i] dd-usiɣ ɣar ayt n lmenfa di Tal-Aviv, inni izeddɣen ɣar yeɣzar n Xabur. Necc qqimeɣ din mani tuɣa zeddɣen, [wah,] qqimeɣ din sebɛa n wussan ttbehteɣ řami d ayi tuɣa jar asen.
EZE 3:16 Imsar awarni řami ɛdun sebɛa n wussan, aqa yusa-dd ɣari wawař n SIDI. Inna:
EZE 3:17 “[A] mmis n bnadem, Necc ggiɣ cek d aɛessas x taddart n Israil. Xmi ɣa tesřed i yijj n wawař zeg uqemmum inu, ittxeṣṣa cek ad asen tɛeřmed zzayi.
EZE 3:18 Xmi ɣa iniɣ i uɛeffan ‘S tidett ad temmted!’ uca cek war d as teɛřimed ca u war tessiwřed ḥima ad tɛeřmed aɛeffan di ssibbet n webrid nnes aɛeffan maḥend ad t teḥḍid ḥima ad iqqim ad iddar, [xenni] ad immet uɛeffan nni di řɣecc nnes, maca idammen nnes ad ten ttareɣ zeg ufus nnec.
EZE 3:19 Maca mařa tɛeřmed i uɛeffan u netta war ibeɛɛed ca x tuɛeffna nnes u x webrid nnes iɛeffnen, [xenni] netta ad immet di řmuɛṣiyyet nnes, [maca] řeɛmar nnec ad injem.”
EZE 3:20 “Mařa amsegged ibeɛɛed x tsegda nnes uca igga řmuɛṣiyyet xmi ɣa ssarseɣ ict n ssibbet zzates ařami ɣa ixḍa, [xenni] ad immet. Minzi cek war d as teɛřimed, ad immet di ddenb nnes uca timegga iseggden i yegga war daysent idaren [ɛad]. [Maca] idammen nnes ad ten ttareɣ zeg ifassen nnec.
EZE 3:21 [Maca] mařa tɛeřmed i umsegged, ḥima war ixeṭṭi umsegged u netta war ixḍi, [xenni] ad iqqim iddar s tidett minzi tuɣa ittwaɛřem, u cek tfekked řeɛmar nnec.”
EZE 3:22 Yusa-dd din ufus n SIDI xafi uca inna ayi: “Kkar, ffeɣ ɣar řewḍa [n teɣzurt], ad kidek ssiwřeɣ dinni.”
EZE 3:23 Kkareɣ uca ffɣeɣ ɣar řewḍa [n teɣzurt], xzar, aɛuǧi n SIDI tuɣa ittbedda dinni am uɛuǧi i ẓriɣ ɣar yeɣzar n Xabur uca wḍiɣ x uɣembub inu [ɣar temmurt].
EZE 3:24 [Xenni] yudef dayi Arruḥ uca issekkar ayi x iḍaren inu uca issiweř akidi. Netta inna ayi: “Uyur, belleɛ ixef nnec daxeř di taddart nnec.
EZE 3:25 U cek, [a] mmis n bnadem, xzar, ad ac ggen iseɣwan u ad cek carfen zzaysen. War tᵉtteffeɣ ca ḥima ad tadfed jar asen.
EZE 3:26 Ad ssřesqeɣ iřes nnec ɣar waneɣ nnec. Ad tdewřed d azinun uca war tᵉttiřid d aryaz jar asen wenni ten i ɣa iwebbxen, minzi nitni d ict n taddart tɣewweɣ.
EZE 3:27 [Maca] Necc, xmi kik i ɣa ssiwřeɣ, ad arzmeɣ aqemmum nnec [ɛawed] uca ad asen tinid: ‘Ammu i iqqar Sidi inu, SIDI! Wi ittesřan, ad iseř, uca wi isemmḥen di man aya, [waxxa] ad dayes ismeḥ!’, minzi nitni d ict n taddart tɣewweɣ.”
EZE 4:1 “Cek, [a] mmis n bnadem, ksi ict n luṣa n třaxt uca sars i-tt zzat i wudem nnec uca arcem xas tandint n Urcalim.
EZE 4:2 Qewwar as uca bna xas ijj n lbaraj uca egg xas acbar, egg xas řemrageḥ n řɛeskar uca wwet xas deg wenneḍ nnes řeqcuɛ n wedham.
EZE 4:3 Uca cek, ksi ict n marmita n wuzzař uca egg i-tt am yijj n řḥiḍ n wuzzař jar cek d tendint. Arr udem nnec xas maḥend ad tᵉttwaḥṣar u cek ad tt teḥṣared: man aya ad tiři d řeɛřamet i taddart n Israil.
EZE 4:4 Uca cek, ad tezzřed x uɣezdis nnec azeřmaḍ uca ad xas tegged řmuɛṣiyyet n taddart n Israil. Anect n ussan nni di xasen i ɣa tezzřed, ad tarbud řmuɛṣiyyet nsen.
EZE 4:5 Maɣar Necc ad xak ggeɣ [lɛadad n] iseggʷusa n řmuɛṣiyyet nsen am lɛadad n wussan: teřt-mya u-tesɛin n wussan ad tarbud řmuɛṣiyyet n taddart n Israil.
EZE 4:6 [Xmi] i ɣa tkemmřed [ussan nni], ad tezzřed ɛawed x uɣezdis nnec afusi uca ad tarbud řmuɛṣiyyet n taddart n Yahuda, arebɛin n wussan. Ijj n wass i yijj n useggʷas, am mammec i d ac umureɣ.
EZE 4:7 Ad teqqimed tᵉttarred udem nnec ɣar řeḥṣaret n Urcalim uca ad tɛarrid aɣiř nnec, ad tnebbid ḍidd nnes.
EZE 4:8 Xzar, Necc ad xak ggeɣ tisɣunin ařami war tzemmared ad tennqeřbed zeg ijj n uɣezdis ɣar uɣezdis nneɣni ař ɣa tkemmřed ussan n řeḥṣaret nnec.”
EZE 4:9 “Ksi irden, imendi, ibawen, řeɛdes, tafsawt d karṣana uca egg i-ten di tebqect uca egg zzaysen aɣrum i yixef nnec. Ad tecced aya am mecḥař lɛadad n wussan nni i ɣa tezzřed x uɣezdis nnec, teřt-mya u-tesɛin n wussan.
EZE 4:10 Macca nni i ɣa tecced ad tᵉttwawzen: ɛicrin ciqlu i yijj n wass. Ad tt tecced di tsaɛɛetin ittwaggen.
EZE 4:11 Ad teswed aman s řeɛbar: ict n tsittut zeg ijj n uhinu. Ad tt teswed zi řweqt ař řweqt [nneɣni].
EZE 4:12 Ad tecced ict n txebbazt n imendi uca ad tt tᵉssenggʷed zzat i tiṭṭawin nsen x iẓẓan i dd-iffɣen zi bnadem.”
EZE 4:13 Inna SIDI: “Ammu i ɣa ccen ayt n Israil aɣrum nsen ixemjen jar řegnus mani ten ɣar i ɣa ssuffɣeɣ.”
EZE 4:14 [Xenni] nniɣ: “[A,] Sidi inu, SIDI, xzar, řeɛmar inu war ittwassexmej ɛemmarṣ [s macca war iḥřin]. Zi temẓi inu ař řexxu necc war cciɣ řxecbet niɣ min imezzqen u ɛemmarṣ war yudif weysum n jjɛifect ɣar uqemmum inu.”
EZE 4:15 Uca Netta inna ayi: “Xzar, ad ac wciɣ řeɣbar n ifunasen deg wemcan n ubarruḍ n bnadem. Sewjed xas aɣrum nnec.”
EZE 4:16 [Xenni] inna ayi: “Cek, [a] mmis n bnadem, xzar, ad arẓeɣ řeɛweč n weɣrum di Urcalim uca nitni ad ccen aɣrum s řewzen s unexřiɛ uca s arjef ad swen aman s řeɛbar,
EZE 4:17 minzi ad asen ittxeṣṣa weɣrum d waman. Nitni ad xzaren ayawya s arjef uca ad dewřen arṣuḍen di řmuɛṣiyyet nsen.”
EZE 5:1 “Uca cek, [a] mmis n bnadem, ksi ijj n řmus iqḍeɛ, ksi ijj řmus n uḥeffaf uca sekk i-t x uzeǧif nnec u x tmart nnec. [Xenni] ad teksid ijj n řmizan uca [acuwwaf] ad ten tebḍid.
EZE 5:2 Ict n ttuřut ad tt tesscemḍed di řwesṭ n tendint awarni řami i ɣa kemmřen wussan n řeḥṣaret [uca] ad teksid ict n ttuřut [nneɣni], ad tewted s ssif nnec deg wenneḍ nnes uca ict n ttuřut [nneɣni] ad tt tzuzzared deg usemmiḍ u Necc ad jebdeɣ ssif awarni as.
EZE 5:3 Ssenni ad teksid cwayt n iẓeṭṭan uca ad ten tcedded deg ibeḥruren [n upartessu] nnec.
EZE 5:4 Ad zzayes teksid ɛad cwayt n iẓeṭṭan uca ad ten tenḍared di řwest n tmessi uca ad ten tesscemḍed s tmessi. Ssenni ad teffeɣ tmessi x marra taddart n Israil.”
EZE 5:5 “Ammu i iqqar Sidi inu, SIDI: Ta d Urcalim i ẓẓuɣ di řwesṭ n řegnus, ak-d temmura i d as dd-innḍen.
EZE 5:6 [Maca] nettat tɣewweɣ x lfarayiḍ inu mahu řegnus, uřa x tweṣṣa inu mahu timmura i d as dd-innḍen, minzi nitni nḍaren lfarayiḍ inu u tiweṣṣa inu war tent ḍfaren.”
EZE 5:7 “S uya, ammu i iqqar Sidi inu, SIDI: ‘Minzi kenniw teggim mahu řegnus i d awem dd-innḍen, war tuyurem di tweṣṣa inu u war teggim lfarayiḍ inu, ɛad war teggim ɛlaḥsab lfarayiḍ n řegnus i d awem dd-innḍen’,
EZE 5:8 s uya, ammu i iqqar Sidi inu, SIDI: ‘Xzar, uřa d Necc ad xam qeřbeɣ u ad ggeɣ řeḥkamat di řwesṭ nnem zzat i tiṭṭawin n řegnus.
EZE 5:9 Ad zzayem ggeɣ am mammec ɛemmarṣ war ggiɣ u war tteggeɣ ɛemmarṣ ɛad zi ssa d tsawent, zi ssibbet n marra jjɛayef nnem.
EZE 5:10 S uya ibabaten ad ccen arraw di řwesṭ nnem uca arraw ad ccen ibabaten nsen. Necc ad am ggeɣ řeḥkamat u marra min zzayem iqqimen ad t zuzzareɣ ɣar marra tiɣemmura n usemmiḍ.’”
EZE 5:11 “S uya, s tidett am ddareɣ Necc, [ammu i] iqqar Sidi inu, SIDI: [S tidett], uřa d Necc ad qeḍɛeɣ, war zziǧizeɣ, war areḥḥmeɣ, umi tessxemjed Zzawect inu Iqeddsen s marra nnɛawat nnem n l’aṣnam u s marra jjɛayef nnem!
EZE 5:12 Ict n ttuřut [n imezdaɣ] nnem ad temmet s ṭṭaɛun u s řaẓ di řwesṭ nnem, uca ict n ttuřut [nneɣni] ad tewḍa s ssif deg wenneḍ nnem, u [ɛad] ict n ttuřut ad tt zuzzareɣ ɣar marra tiɣemmura n usemmiḍ u awarni asen ad dd-jebdeɣ ssif.
EZE 5:13 Aɣḍab inu ad ijjiwen ař uneggar uca ad xasen ssarseɣ asɛar inu. [Ammu] i ɣa ssfewwjeɣ ixef inu u nitni ad ssnen, aqa Necc, SIDI, ssiwřeɣ di tusmi inu [iqeddsen], xmi ɣa kemmřeɣ asɛar inu xasen.
EZE 5:14 Ad cem arreɣ d řxirbet d ict n řqecɛet n ustehzi jar řegnus i d am dd-innḍen, zzat i tiṭṭawin n kuř ijj nni i ɣa iɛdun.
EZE 5:15 Ad tedweř [Urcalim] i ustehzi d řḥegra, i [umedya n] useqseḥ d usiggʷed i řegnus i d as dd-innḍen, xmi d as i ɣa qḍeɣ řeḥkamat s weɣḍab u s wesɛar u s tiyitta iḥman. Necc, SIDI, aqa ssiwřeɣ!
EZE 5:16 Xmi ten ɣa wteɣ s fřitcat n řaẓ nni dd ɣa yawyen areddeǧ, tinni ɣa wteɣ ḥima ad kenniw sshellkeɣ, [xenni] ad xawem arniɣ řaẓ u ad arẓeɣ řeɛweč n weɣrum [nwem].
EZE 5:17 Ad xawem sekkeɣ řaẓ d řewḥuc iwɛaren nni i ɣa ikksen tarwa nnem. Ṭṭaɛun d usizzeř n idammen ad kken xam u Necc ad xam ssekkeɣ ssif. Necc, SIDI, aqa ssiwřeɣ!”
EZE 6:1 Yusa-dd ɣari wawař n SIDI, inna:
EZE 6:2 “[A] mmis n bnadem, arr udem nnec ɣar idurar n Israil uca nabb xasen
EZE 6:3 uca ini: ‘[A] idurar n Israil, sřem i wawař n Sidi inu, SIDI! Ammu i iqqar Sidi inu, SIDI, i idurar u i tewririn, i tɣezratin u i teɣzurtin: Xzar, Necc ad xawem ssekkeɣ ssif uca řegɛudi nwem [mani tᵉttwehhabem ddbayeḥ nwem] ad tent areddǧeɣ.
EZE 6:4 Ad ttwaredǧen iɛalṭaren nwem u ipilaren n arebbi n tfuct nwem ad ttwarẓen u Necc ad nḍareɣ inni ittwassnuqben zzat i wudem n imeyḍa n [l’aṣnam nwem].
EZE 6:5 Ad ggeɣ řxecbat n ayt n Israil zzat i imeyḍa n [l’aṣnam nsen] uca ad zuzzareɣ iɣsan nwem ɣar min dd-innḍen i iɛalṭaren nwem.
EZE 6:6 Di marra imucan mani tzeddɣem ad ttwareddǧent tneddam uca řegɛudi ad tent jjen, ařami iɛalṭaren nwem ad iřin d řxarbet d ttwajjen, uca imeyḍa n [l’aṣnam nwem] ad ttwarẓen u ipilaren nwem n arebbi n tfuct ad ttwaqessen u timegga nwem ad ttwamḥant.
EZE 6:7 Inni ittwanɣen ad [din] iřin di řwesṭ nwem, uca [ammu] i ɣa tessnem aqa Necc d SIDI.’”
EZE 6:8 “Ad ggeɣ aqa inni ittwassnejmen zi ssif jar řegnus ad qqimen ddaren umi kenniw ɣa zuzzareɣ x temmura.
EZE 6:9 Inni ittwanejmen ad xafi ɛeqřen jar regnus mani ttwaneddhen d imeḥbas, minzi Necc arẓiɣ uř nsen nni xafi ittaggʷejen, iccuren s farq-ccɣeř uca uřa d tiṭṭawin nsen nni iḍfaren awarni i imeyḍa n [l’aṣnam nsen] ccurent s farq-ccɣeř. Nitni ad ɛiffen ixef nsen zi ssibbet n tmegga iɛeffnen nni ggin s marra jjaɛayef nsen.
EZE 6:10 Nitni ad ssnen belli Necc d SIDI. Necc war nniɣ amenni waha aqa Necc ad daysen ggeɣ řɣar-a.”
EZE 6:11 “Ammu i iqqar Sidi inu, SIDI: Wwet s ufus nnec uca darrec s uḍar nnec uca ini: ‘Ay!’ x marra nnɛawat tiɛeffanin n taddart n Israil, maɣar nitni ad wḍan s ssif, s řaẓ u s ṭṭaɛun!
EZE 6:12 Wi iǧan yiggʷej ad immet s ṭṭaɛun u wi iǧan yudes ad iwḍa s ssif u wi iqqimen u aqa ittwaḥṣar ad immet s řaẓ, [ammu] ad daysen kemmřeɣ asɛar inu.
EZE 6:13 Ittxeṣṣa ad tessnem belli Necc d SIDI, xmi inni zzaysen ittwanɣen ad [din] iřin jar imeyḍa n [l’aṣnam nsen] deg wenneḍ n iɛalṭaren nsen x kuř tawrirt tuɛřa, x marra tiqqicatin n idurar, sadu kuř tacejjart tazizawt u sadu kuř tacejjart n yigg s waṭṭas n tefray, [deg] wemcan mani nnumen ssewjaden ict n řefwaḥet ittfuḥen i marra imeyḍa n [l’aṣnam nsen].
EZE 6:14 Ad sswiẓẓḍeɣ afus inu ḍidd nsen uca ad ggeɣ tammurt d ict n temmurt ittwareddǧen, ict n temmurt ittwareddǧen mahu řexřa n Dabla, di marra imucan mani zeddɣen. Uca nitni ad ssnen belli Necc d SIDI.”
EZE 7:1 Yusa-dd ɣari wawař n SIDI, inna:
EZE 7:2 “Cek, [a] mmis n bnadem, ammu i iqqar Sidi inu, SIDI, i temmurt n Israil: ‘Aneggar, yusa-dd uneggar x arebɛa n iɣezdisen n temmurt.
EZE 7:3 Řexxu yusa-dd xam uneggar nnem, minzi ad ɣarem dd-sekkeɣ aɣḍab inu u ad xam ḥekmeɣ am yibriden nnem uca ad xam ggeɣ marra jjɛayef nnem.
EZE 7:4 War d am zziǧizent tiṭṭawin inu u war areḥḥmeɣ, minzi ad arreɣ ibriden nnem x uzeǧif nnem u jjɛayef nnem ad cem řeqfent di řwesṭ nnem. Ammu i ɣa tessnem belli Necc d SIDI.’
EZE 7:5 Ammu i iqqar Sidi inu, SIDI: ‘Ijj n řɣar, ijj n řɣar ifarzen, aqa ad dd-yas.
EZE 7:6 Yusa-dd uneggar, aneggar yusa-dd, ifaq-dd ḍidd nnem, aqa ad dd-yas!
EZE 7:7 Tusa-dd ɣarek tqedduḥt, a amezduɣ n temmurt, tasaɛɛet tusa-dd, ass n uxarweḍ iqarreb-dd u war din asřiwřew zeg idurar.
EZE 7:8 Řexxu deɣya ad xam zeǧɛeɣ asɛar inu uca ad dayem kemmřeɣ aɣḍab inu. Ad xam ḥekmeɣ anect n ibriden nnem uca ad xam ssiwḍeɣ marra jjɛayef nnem.
EZE 7:9 War zziǧizeɣ u war areḥḥmeɣ. Ad ɣarem dd-arreɣ min tessdaheǧed, u jjɛayef nnem ad iřint di řwesṭ nnem u kenniw ad tessnem belli aqa Necc d SIDI wenni kenniw iccaten.’
EZE 7:10 ‘Xzar, ass, xzar, aqa da tiweḍ-dd tqedduḥt, teqḍa tqedduḥt, tnewwar taɣɣarct, tessendi nnfaxet.
EZE 7:11 Igeɛɛed lɛunf am uzeǧaḍ n řɣar. War zzaysen iqqim uřa d ijj, walu n řɣaci nsen inhewřen, walu n ddriz nsen u walu n usemɣar ad ɣarsen iqqim ɛad.
EZE 7:12 Tusa-dd tsaɛɛet, ixecced wass. Ejj wenni isɣin war ifarreḥ u ejj wenni izznuzan war ittecḍin, minzi řḥaduq n weɣḍab aqa-t x marra řɣaci nnes inhewřen.
EZE 7:13 Minzi wenni izznuzan war dd-iddikkwiř ɣar min immenzen, waxxa nitni qqimen ddaren, minzi war ibeṭṭiř řewḥiy x marra řɣaci inhewřen n temmurt, uca uřa d ijj war izemmar s řmuɛṣiyyet nnes ad iqqim ittᵉṭṭef di tudart nnes.
EZE 7:14 Nitni suḍen s jjehd di řbuq uca sswejden marra řeḥwayej, maca uřa d ijj war itteffeɣ ɣar umenɣi, minzi řḥaduq n weɣḍab inu aqa-t x marra řɣaci inhewřen n temmurt.’
EZE 7:15 ‘Zi barra ssif u zi daxeř ṭṭaɛun d řaẓ. Wi iǧan deg iyyar ad immet s ssif, wi iǧan di tendint ad t yecc řaẓ d ṭṭaɛun.
EZE 7:16 Wi zzaysen yarewřen, wah ad nejmen, maca ad iřin x idurar am idbiren zi teɣzurin, ad nnezbaren marra, kuř ijj x řmuɛṣiyyet nnes.
EZE 7:17 Marra ifassen ad heyyfen, u marra ifadden ad dewřen d aman.’
EZE 7:18 ‘Ad beysen s txuncay n wecḍan, arjef ad ten issduriy x marra udmawen ad yiři řeḥya u x marra izeǧifen nsen tuqeccart.
EZE 7:19 Ad nḍaren nnuqart nsen deg ibriden u ureɣ nsen ad yiři am ca n řḥajjet texmej. Nnuqart nsen d wureɣ nsen war zemmaren ad ten fekken deg wass n uduqqez n ufugem n SIDI. War zemmaren ad zzaysen ssjiwnen řeɛmar nsen niɣ ad zzaysen ccuren takrict nsen, minzi aya tuɣa d ssibbet n uneqraḍ i dd-yiwyen řmuɛṣiyyet nsen.
EZE 7:20 Aẓri n telwizt igga i-t d lɛaḍama yuɛřan, maca nitni ggin dayes řexyařat n nnɛawat nsen n l’aṣnam u řexyařat n jjɛayef nsen. X uya arriɣ talwizt d taxmuji i nitni.
EZE 7:21 Necc ad tt wceɣ d tucceffra deg ufus n ibarraniyyen uca ad tt wceɣ d takeccaḍt i iɛeffanen n temmurt, uca nitni ad ssɛiǧten talwizt.
EZE 7:22 Necc ad xas ssenqeřbeɣ udem inu u nitni ad ssɛiǧten tazeddiɣt inu innufaren, maɣar iceffaren ad din adfen uca ad ssɛiǧten marra.’
EZE 7:23 ‘Sewjed ssnesřet, minzi tammurt teccur s usizzeř n idammen u tandint teccur s lɛunf.
EZE 7:24 Necc ad awyeɣ řegnus iɛeffanen qaɛ, u nitni ad ṭṭfen tudrin nsen, ad ssbedden nnfaxet n ayt n jjehd, uca ad ttwassɛiǧtent Tzawiyyin nsen Iqeddsen.
EZE 7:25 Ad dd-yas unexřiɛ d ameqqran. Nitni ad arzun řehna, maca war ittiři.
EZE 7:26 Aqa ad dd-yas uceřwaw awarni i uceřwaw, ad yiři řhard awarni i řhard. Nitni ad arzun řewḥiy n unabi, waxxa teqḍa Ccariɛa n ukehhan d ccwar n imɣaren
EZE 7:27 Ajeǧid ad icḍen, řḥakem ad yarḍ anexřiɛ u ifassen n řgens ad qarrmen s tiggʷudi. Necc ad zzaysen ggeɣ am webrid nsen u Necc ad xasen ḥekmeɣ am lfarayiḍ nsen. Ammu i ɣa ssnen aqa Necc d SIDI.’”
EZE 8:1 Deg useggʷas wiss setta, deg uyur wiss setta, deg wass wiss xemsa n uyur, [umi] tuɣa qqimeɣ di tudart inu u imɣaren n Yahuda tuɣa qqimen zzat i wudem inu, [xenni] imsar aqa iwḍa-dd xafi din ufus n Sidi inu, SIDI.
EZE 8:2 Necc ẓriɣ, uca xzar, tuɣa din wenni ṣsifet nnes yarwesen deg wudem n tmessi. Zi tejɛinnatin nnes ɣar wadday aqa iban-dd am tmessi u zi tejɛinnatin nnes ař sennej [tuɣa] axmi teẓrid tissiqt, tban-dd am wuzzař ittwessgen.
EZE 8:3 Isswiẓẓeḍ-dd min yarwesen deg ijj n ufus uca Netta iṭṭef ayi-dd ɣar ict n tzarezt n uzeǧif inu, uca Arruḥ issgeɛɛed ayi jar ujenna d temmurt, indeh ayi di iweḥḥan n AREBBI ɣar Urcalim, ɣar wadaf [n tewwart] n řemraḥ n daxeř nni ixezzaren ɣar ccamal, mani iǧa řkursi n řexyař n l’aṣnam n tusmi nni issekkaran tusmi.
EZE 8:4 U xzar, din i iǧa uɛuǧi n AREBBI n Israil, ittban-dd am mammec [t] ẓriɣ di řewḍa n teɣzurt.
EZE 8:5 Netta inna ayi: “[A] mmis n bnadem, sgeɛɛed řexxu tamuɣři nnec ɣar ccamal!” Uca ssgeɛɛdeɣ tamuɣři inu jjihet n ccamal, u xzar, ibedd [din] řexyař nni n ṣṣanam n tusmi ɣar ccamal n Tewwart n Uɛalṭar deg wadaf.
EZE 8:6 [Xas uca] inna ayi: “[A] mmis n bnadem, ma tᵉttwařid min tteggen nitni, jjɛayef timeqqranin nni tᵉttegg taddart n Israil danita, ařami ittxeṣṣa ad aggʷejeɣ x Zzawect inu Iqeddsen. Ad tẓared ɛad jjɛayef timeqqranin [x tina].”
EZE 8:7 Netta yiwyi ayi ɣar wadaf n řemraḥ. [Umi] ẓriɣ, xzar, aqa din ijj n weḥfur di řḥiḍ.
EZE 8:8 Netta inna ayi: “[A] mmis n bnadem, ɣaz xenni řḥiḍ.” Necc ɣziɣ řḥiḍ uca xzar, aqa din ijj n wadaf.
EZE 8:9 [Xenni] inna ayi: “Adef, uca xzar jjɛayef timeqqranin nni tteggen danita.”
EZE 8:10 Udfeɣ uca ẓriɣ, xzar, aqa din ɛřam kuř ineqqacen n imuddaren ittbuɛen, n řmař amengus u n marra imeyḍa [n l’aṣnam] n taddart n Israil ttwaneqcen di řḥid deg wenneḍ.
EZE 8:11 Aqa sebɛin n yeryazen zeg imɣaren n taddart n Israil, ak-d Yazanyahu, mmis n Cafan, di řwest nsen, bedden zzatsen u kuř ijj s řmejmar nnes n řebxur deg ufus nnes uca tuři tejnewt teccur s arriḥet n řebxur.
EZE 8:12 [Xenni] inna ayi: “[A] mmis n bnadem, ma teẓrid min tteggen imɣaren n Israil di taǧest, kuř ijj deg wexxam n řexyař nnes ineqcen, maɣar qqaren: SIDI war d aneɣ iẓri, SIDI yejja tammurt.”
EZE 8:13 Netta inna ayi: “Ad tẓared ɛad jjɛayef timeqqranin [x tina] nni tteggen nitni.”
EZE 8:14 [Xenni] indeh ayi ɣar wadaf n tewwart n Taddart n SIDI, wenni iǧan ɣar ccamal, u xzar, qqiment din temɣarin ttrunt di Tammuz.
EZE 8:15 Netta inna ayi: “[A] mmis n bnadem, ma teẓrid aya! Ad tẓared ɛad jjɛayef mɣarent x tina.”
EZE 8:16 Uca yiwyi ayi ɣar řemraḥ n daxeř n Taddart n SIDI, uca xzar, ɣar tewwart n Zzawect n SIDI, jar wesqif d uɛalṭar, aqa din ɛřaḥař xemsa u-ɛicrin n yeryazen. Iɛurar nsen dewřen ɣar Zzawect n SIDI u udmawen nsen ɣar ccarq, uca nitni sejden ɣar ccarq i tfuct.
EZE 8:17 [Xenni] inna ayi: “[A] mmis n bnadem, ma teẓrid aya? Ma aqa drust i taddart n Yahuda maḥend ad ggen jjɛayef-a timeqqranin nni tteggen danita? Maɣar nitni ccuren tammurt s lɛunf uca qqimen dewřen-dd ɣari ḥima ad ayi sɛaren. Xzar, tteggen [ɛad] taseṭṭa [ittwaqeḍɛen] ɣar wenzaren nsen!
EZE 8:18 [Xenni] uřa d Necc ad ggeɣ s wesɛar. War dayi izziǧiz ḥed u war areḥḥmeɣ. Waxxa nitni sɣuyyun s tmijja ijehden deg imezzuɣen inu, Necc war dd ɣarsen ttesřiɣ.”
EZE 9:1 [Xenni] iřaɣa deg imezzuɣen inu s tmijja tejhed, inna: “Ejj imeḥḍayen n tendint ad dd-qarrben, kuř ijj s řesnaḥ nnes n ureddeǧ deg ufus nnes.”
EZE 9:2 Uca xzar, setta n yeryazen usin-dd zeg webrid zi Tewwart Yuɛřan nni ixezzaren ɣar ccamal u kuř ijj ɣares řesnaḥ nnes i uteḥḥi deg ufus nnes. Di řwesṭ nsen tuɣa din ijj n weryaz, tuɣa yarḍ řeqṭen, yiwi tadwat n umarir ɣar webyas nnes. Udfen nitni uca ggin ad bedden ɣar uɛalṭar n nnḥas.
EZE 9:3 Aɛuǧi n AREBBI n Israil issgeɛɛed ixef nnes zi sennej n ukirub nni x iǧan, yuyur ɣar tnebdat n Taddart uca Netta iřaɣa-dd i weryaz nni yarḍen řeqṭen d wenni [yiwyen] tadwat n umarir ɣar webyas nnes.
EZE 9:4 Inna as SIDI: “Cuqq di řwesṭ n tendint, di řwesṭ n Urcalim, uca egg kruz [d řeɛřamet] x tenyarin n yeryazen nni ittnixsisen d ttweɛɛḍen x ssibbet n marra jjɛayef nni ittwaggen di řwesṭ nnes.”
EZE 9:5 Umi sřiɣ, inna i inneɣni: “Cuqqem di tendint awarni as, nɣem, war zziǧizem u war areḥḥmem!
EZE 9:6 Nɣem iwessura, iḥuḍriyyen, tiɛezriyin, iḥenjiren d temɣarin ař ɣa ttwahellken qaɛ, maca war tthadam uřa d ijj xas kruc [d řeɛřamet]. Bdam zi Zzawect inu Iqeddsen.” Uca nitni bdan zeg iwessura nni iǧan zzat i Taddart.
EZE 9:7 Uca Netta inna asen: “Sxemjem Taddart uca ccurem řemraḥat s [řxecbat n] yinni ittwanɣen. Ffɣem!” Ffɣen nitni uca nɣin [iwdan] di tendint.
EZE 9:8 Řami ten nɣin uca qqimeɣ necc, imsar aqa necc wḍiɣ x uɣembub inu [ɣar temmurt] uca nniɣ: “Ax, Sidi inu, SIDI, ma ad tareddǧed řexxu min iqqimen n Israil umi ɣa tzeǧɛed asɛar nnec x Urcalim?”
EZE 9:9 [Xenni] inna ayi: “Řmuɛṣiyyet n taddart n Israil d Yahuda temɣar aṭṭas u tammurt teccur s idammen u tendint teccur s usfarɣ n řḥeqq, minzi nitni qqaren: ‘SIDI ismeḥ di temmurt uca SIDI war iẓarr!’
EZE 9:10 [S uya] uřa d Necc ad ggeɣ ammu. Tiṭṭ inu war tsemmeḥ u Necc war ttḥinniɣ. Necc ad ssenqeřbeɣ abrid nsen x uzeǧif nsen.”
EZE 9:11 Uca xzar, aryaz nni yarḍen řeqṭen, wenni dd-yiwyen ɣar webyas nnes tadwat [n umarir], aqa yarra-dd řexbar, inna: “Ggiɣ am mammec i d ayi tumured.”
EZE 10:1 [Awarni aya] ẓriɣ, xzar, sennej i řqubbet, sennej i uzeǧif n ikiruben, [tuɣa din ca] am weẓru n ṣaffir, min dd-ittbanen am wudem n min yarwesen deg ijj n řɛarc, [u] sennej i nitni iḍhar-dd Netta.
EZE 10:2 Uca issiweř ak-d weryaz nni yarḍen arrud n řeqṭen, inna: “Adef-dd ɣar daxeř jar tjarrarin ittennḍen, ař sadu i ikiruben, uca ccur ifassen nnec s řefḥem itteḥduduqen zi jar ikiruben uca zeǧeɛ i-t x tendint!” Uca yudef-dd [jar asent] zzat i tiṭṭawin inu.
EZE 10:3 Ikiruben tuɣa bedden ɣar uɣezdis afusi n Taddart umi dd-yadef weryaz ɣar daxeř uca aseynu iccur řemraḥ n daxeř.
EZE 10:4 Aɛuǧi n SIDI issgeɛɛed ixef nnes zi sennej n uxirub, [iɛdu] x tnebdat n tewwart n Taddart uca tᵉttwaccur Taddart s useynu u řemraḥ n zzat tuɣa iccur s tessiqt n uɛuǧi n SIDI.
EZE 10:5 Drizz n wafriwen ittwaseř-dd ař daxeř di řemraḥ n barra, am tmijja n Arebbi, Amzemmar x kuřci, xmi issawař.
EZE 10:6 Imsar awarni řami yumur Netta i weryaz nni yarḍen řeqṭen, inna: “Ksi timessi zi jar tjarrarin ittenḍen, zi jar ikiruben!”, aqa wanita yudef-dd uca ibedd zzat i tjarrart ittenḍen.
EZE 10:7 [Xenni] isswiẓẓeḍ ijj n ukirub afus nnes zi jar ikiruben ɣar tmessi nni tuɣa jar asen, iksi zzayes uca issars i-tt deg ifassen n wenni yarḍen řeqṭen. Wanita iksi tt uca iffeɣ.
EZE 10:8 Sadu wafriwen n ikiruben ittwaẓar ca am ṣṣifet n ufus n bnadem.
EZE 10:9 [Xenni] ẓriɣ, xzar, aqa din arebɛa n tjarrarin ɣar uɣezdis n ikiruben, ict n tjarrart ɣar uɣezdis n ijj n ukirub. Udem n tjarrarin am wudem n weẓru n texrisulit.
EZE 10:10 X mammec dd-ḍharen, aqa arebɛa ɣarsen ṣṣifet d icten, axmi ict n tjarrart [tᵉttřiq nican] di řwesṭ n tjarrart [nneɣni].
EZE 10:11 Xmi gguren, gguren ɣar arebɛa n iɣezdisen [nsen]. Nitni war ttneqřiben ca xmi gguren, minzi amcan mani tarra [tjarrart] n zzat azeǧif nnes, aqa ḍfaren tt-i-dd. Nitni war nnqeřben ca xmi gguren.
EZE 10:12 Marra arrimet nsen: iɛurar nsen, ifassen nsen d wafriwen nsen, uca uřa d tijarrarin nsen ccuren s tiṭṭawin deg wenneḍ nsen ɣar [marra] arebɛa [imuddaren] nni, [wah ɛad] tijarrarin nsen.
EZE 10:13 Sřiɣ [ict n tmijja] aqa tᵉttřaɣa asent i tjarrarin: ‘Tajarrart n ddewran!’
EZE 10:14 Kuř ijj ɣares arebɛa n wudmawen: udem amezwaru [tuɣa] d udem n ukirub, u udem wiss tnayen d udem n bnadem, u [udem] wiss třata d udem n weyrad, u [udem] wiss arebɛa d udem n ugider.
EZE 10:15 Ssgeɛɛden ikiruben ixef nsen. Wa d simant n umuddar i ẓriɣ ɣar yeɣzar n Xabur.
EZE 10:16 Umi uyuren ikiruben, uyurent uřa d tijarrarin ɣar uɣezdis nsen, umi ssgeɛɛden ikiruben afriwen nsen maḥend ad ssgeɛɛden ixef nsen zi temmurt, war qnunnyent tjarrarin nni ařami aggʷejent x uɣezdis nsen.
EZE 10:17 Umi bedden nitni, beddent uřa d nitenti, umi ssgeɛɛden nitni ixef nsen, ssgeɛɛdent uřa d nitenti ixef nsent, minzi buḥbeř n imuddaren [tuɣa-t] daysent.
EZE 10:18 [Xenni] iffeɣ uɛuǧi n SIDI zi sennej n tnebdat n Taddart uca ibedd sennej i ikiruben.
EZE 10:19 Ikiruben ssgeɛɛden afriwen nsen uca, umi dd-ffɣen, ssgeɛɛden ixef nsen zi temmurt zzat i tiṭṭawin inu uca uřa d tijarrarin ɣar uɣezdis nsen. Nitni qqimen bedden ɣar wadaf n Tewwart n Ccarq n Taddart n SIDI uca aɛuǧi n AREBBI [tuɣa-t] xasen zi sennej.
EZE 10:20 Wa d amuddar i ẓriɣ sadu AREBBI n Israil ɣar yeɣzar n Xabur. [Xenni] ssneɣ belli tuɣa aten d ikiruben.
EZE 10:21 Kuř ijj ɣares arebɛa n wudmawen u kuř ijj ɣares arebɛa n wafriwen u sadu afriwen nsen aqa din min yarwesen deg ifassen n iwdan.
EZE 10:22 Udmawen nsen am wudmawen nni ẓriɣ ɣar yeɣzar n Xabur, mammec dd-banen [wudmawen nni], uřa d nitni s yixef nsen. Nitni gguren kuř ijj nican ɣar zzat nnes.
EZE 11:1 [Xenni] issgeɛɛed ayi Arruḥ [ɛawed] uca indeh ayi ɣar Tewwart n Ccarq n Taddart n SIDI nni iǧan ɣar ccarq, u xzar, ɣar wadaf n tewwart [aqa din] xemsa u-ɛicrin n yeryazen u di řwesṭ nsen ẓriɣ Yazanya[hu], mmis n Ɛazur, u Falaṭya, mmis n Banaya, řḥukkam n řgens.
EZE 11:2 Netta inna ayi: “[A] mmis n bnadem, ina d iryazen nni ittxarriṣen di ddeǧ, tticen ccwar aɛeffan di tendint-a,
EZE 11:3 qqaren: ‘War bennam ɛad tudrin deg wussan-a! Tanita d marmita uca neccin d aysum!’”
EZE 11:4 “S uya nabb xasen, nabb, [cek], [a] mmis n bnadem!”
EZE 11:5 [Xenni] iwḍa-dd Arruḥ n SIDI xafi uca Netta inna ayi: “Ini: ‘Ammu i iqqar SIDI! Ammu i tessiwřem kenniw, [a] taddart n Israil, maɣar Necc ssneɣ řeḥwayej nni ittgeɛɛaden ɣar buḥbeř nwem.
EZE 11:6 Tarnim [řxecbat n] yinni ittwanɣen nwem di tendint-a uca teccurem ibriden nnes s [řxecbat n] yinni ittwanɣen!’”
EZE 11:7 “S uya, ammu i iqqar Sidi inu, SIDI: ‘Inni zzaywem ittwanɣen, inni tessarsem di řwesṭ nnes, aqa aten d aysum u nettat d marmita, [maca] Necc ad kenniw ssuffɣeɣ zi řwesṭ nnes.
EZE 11:8 Ssif tᵉtteggʷdem, d ssif ad xawem dd-ssekkeɣ, iqqar Sidi inu, SIDI.
EZE 11:9 Necc ad kenniw nedheɣ zi řwest nnes uca ad wceɣ kenniw deg ufus n ibarraniyyen uca ad ggeɣ řeḥkamat jar awem.
EZE 11:10 S ssif ad tewḍam. Di temmurt n Israil ad xawem ḥekmeɣ uca ad tessnem belli Necc d SIDI.
EZE 11:11 Tandint-a war d awem tᵉttiři d marmita u kenniw war dayes tᵉttiřim d aysum. Necc ad xawem ḥekmeɣ di temmurt n Israil.
EZE 11:12 Kenniw ad tessnem belli Necc d SIDI, minzi war tuyurem di tweṣṣa inu u war teggim ɛlaḥsab lfarayiḍ inu, [maca] teggim am mammec lfarayiḍ n řegnus i d awem dd-ittennḍen.’”
EZE 11:13 Řami tuɣa ttnabbiɣ, imsar aqa Falaṭya, mmis n Banaya, immut. [Xenni] wḍiɣ ɣar temmurt s uɣembub inu uca řaɣiɣ s tmijja ijehden, nniɣ: “A, Sidi inu, SIDI, ma ad teqḍid min iqqimen zi Israil?”
EZE 11:14 [Xenni] yusa-dd ɣari wawař n SIDI, inna:
EZE 11:15 “[A] mmis n bnadem, aqa d aytmac, aytmac, iryazen nni [iǧan] d imefdiyyen nwem d marra taddart n Israil, aqa-ten marra d inni i d asen nnan imezdaɣ n Urcalim: ‘Aggʷejem x SIDI, tammurt-a temmewc aneɣ d tasɣart!’”
EZE 11:16 “S uya ini: ‘Ammu i iqqar Sidi inu, SIDI: Waxxa Necc ssiggʷejeɣ ten jar řegnus, waxxa Necc bezzɛeɣ ten x temmura, s marra aya ad asen iřiɣ [ɛad] cwayt d Zzawect Iqeddsen di temmura mani ɣa yawḍen.’”
EZE 11:17 “S uya ini: ‘Ammu i iqqar Sidi inu, SIDI: Necc ggur ad kenniw ssmuneɣ zi řegnus, ad kenniw ssmuneɣ zi temmura mani ɣa tᵉttwabezzɛem u Necc ad awem wceɣ tammurt n Israil.
EZE 11:18 Nitni ad din awḍen u ad zzayes kksen marra nnɛawat nnes n l’aṣnam d marra jjɛayef nnes.
EZE 11:19 Necc ad asen wceɣ ijj n wuř d ijj n buḥbeř n jdid di daxeř nwem. Ad kkseɣ uř n weẓru zi arrimet nsen u ad asen wceɣ uř n weysum,
EZE 11:20 ḥima ad uyuren di tweṣṣa inu u ad ḥḍan lfarayiḍ inu u ad [zzaysent] ggen. Ad iřin d řgens inu u Necc ad iřiɣ d AREBBI nsen.
EZE 11:21 [Maca] [inni] uř [nsen] ad iḍfar uř n nnɛawat nsen n l’aṣnam d jjɛayef nsen, Necc ad ggeɣ ibriden nsen x uzeǧif nsen, [ammu i] iqqar Sidi inu, SIDI.’”
EZE 11:22 [Xenni] ssgeɛɛden ikiruben afriwen nsen u tijarrarin [tuɣa] zzatsen uca aɛuǧi n AREBBI n Israil [tuɣa-t] xasen sennej nsen.
EZE 11:23 [Xas uca] igeɛɛed uɛuǧi n SIDI zi řwesṭ n tendint uca [iqqim] ittbedda x wedrar nni [iǧan] ɣar ccarq n tendint.
EZE 11:24 [Xenni] issgeɛɛed ayi-dd Arruḥ uca yiwi ayi deg ijj n řewḥiy s Arruḥ n AREBBI ɣar [temmurt] n Ikaldaniyyen ɣar ayt n lmenfa. [Awarni man aya] igeɛɛed zzayi řewḥiy i ẓriɣ,
EZE 11:25 u nniɣ i ayt n lmenfa marra min tuɣa d ayi isscen SIDI.
EZE 12:1 Yusa-dd ɣari wawař n SIDI, inna:
EZE 12:2 “[A] mmis n bnadem, cek tzeddɣed deg ict n taddart iɣewwɣen, maɣar nitni ɣarsen tiṭṭawin maḥend ad ttwařan, [maca] war ttwiřin, uřa d imejjanen maḥend ad sřen, [maca] war ttesřin, minzi nitni d ict n taddart iɣewwɣen.
EZE 12:3 Cek, [a] mmis n bnadem, sewjed řeḥwayej i lmenfa uca uyur di lmenfa zzat i tiṭṭawin nsen. Ad tuyured di lmenfa zzat i tiṭṭawin nsen zeg wemcan nnec ɣar ijj n wemcan nneɣni. Ad taɣ ad neɛmen aqa aten d ict n taddart iɣewwɣen.
EZE 12:4 Ad tessuffɣed řeḥwayec nnec deg uziř zzat i tiṭṭawin nsen am řeḥwayec i lmenfa, ad teffɣed di tmeddit zzat i tiṭṭawin nsen, amecnaw [iwdan] inni igguren di lmenfa.
EZE 12:5 Egg anuqqib di řḥiḍ zzat i tiṭṭawin nsen uca suffeɣ [marra aya] zzayes.
EZE 12:6 Zzat i tiṭṭawin nsen ad tawyed [aya] x tɣarḍin nnec, di tbambast ad tessuffɣed [aya]. Ad teffared udem nnec, [ařami] war tẓarred tammurt, minzi ggiɣ cek d řeɛřamet n řeɛjeb i taddart n Israil.”
EZE 12:7 Necc ggiɣ am mammec i d ayi iweṣṣa. S uziř ssuffɣeɣ řeḥwayec inu am řeḥwayec i lmenfa. Ɣar tmeddit ɣziɣ s ufus inu x řḥiḍ u di ǧiřet ssuffɣeɣ [marra] ɣar barra uca iwyeɣ t x tɣarḍin [inu] zzat i tiṭṭawin nsen.
EZE 12:8 Yusa-dd ɣari wawař n SIDI x tuffut, inna:
EZE 12:9 “[A] mmis n bnadem, ma war d ac tenna taddart n Israil, taddart iɣewwɣen [nni]: ‘Min tᵉttegged?’
EZE 12:10 Ini asen: ‘Ammu i iqqar Sidi inu, SIDI! Řḥukm issaggʷaden wanita [ad yiři x] řḥakem di Urcalim u x marra taddart n Israil, inni izeddɣen jar asen.’
EZE 12:11 Ini: ‘Necc d řeɛřamet n řeɛjeb i kenniw. Am mammec ggiɣ necc, ammu i ɣa ggen daysen, ad ttwanedhen di lmenfa, di tmeḥbast.
EZE 12:12 Řḥakem nni [iǧan] di řwesṭ nsen, ad yarbu [řeḥwayec] x teɣruḍt nnes di ǧiřet uca ad iffeɣ. Nitni ad ɣzan x řḥiḍ maḥend ad zzayes t ssuffɣen. Netta ad ideř aɣembub nnes ařami ɣa iqqim war izemmar ad iẓar [ɛad] tammurt s tiṭṭ[awin] [nnes].
EZE 12:13 Necc ad xasen bezzɛeɣ tracca inu ařami ɣa idweř d ameḥbus di řfex inu uca ad t awyeɣ ɣar Babil, [ɣar] temmurt n Ikaldaniyyen. Netta [maca] war tt iẓarr, [maca waxxa amenni] ad din immet.
EZE 12:14 Marra inni d as dd-innḍen maḥend ad t ɛawnen d marra bandiyyat n řɛeskar nnes, ad ten bezzɛeɣ i marra tiɣemmura n usemmiḍ uca ad jebdeɣ ssif awarni asen.
EZE 12:15 [Ammu i] ɣa ssnen belli Necc d SIDI, xmi ten ɣa bezzɛeɣ jar řegnus uca ad ten zuzzareɣ di temmura.
EZE 12:16 Maca ad zzaysen jjeɣ ca n yeryazen [inni inejmen] zi ssif, zi řaẓ u zi ṭṭaɛun, ḥima ad ɛawden i řegnus mani ɣa yawḍen, x marra jjɛayef nsen nni ggin. [Xenni] ad ssnen belli Necc d SIDI.’”
EZE 12:17 Yusa-dd ɣari wawař n SIDI, inna:
EZE 12:18 “[A] mmis n bnadem, ad tecced aɣrum nnec s tarjiji uca ad teswed aman nnec s warjef d wecḍan.
EZE 12:19 Ad tinid i řgens n temmurt: ‘Ammu i iqqar Sidi inu, SIDI, x imezdaɣ n Urcalim [i yeǧan] x wudem n temmurt n Israil: Nitni ad ccen aɣrum nsen s wecḍan u ad swen aman nsen s wejɛar, minzi marra aɛemmar nnes ad ittwakkes zi temmurt zi ssibbet n lɛunf n marra inni dayes izeddɣen.
EZE 12:20 Tineddam izeddɣen ad dewřent d řxirbet uca tammurt ad tᵉttwareddeǧ. Ad tessnem belli Necc d SIDI.’”
EZE 12:21 Yusa-dd ɣari wawař n SIDI, inna:
EZE 12:22 “[A] mmis n bnadem, man amedya nni ɣarwem din di temmurt n Israil, umi teqqarem: ‘Ɛeddun wussan uca war dd-iffiɣ ura d ijj n řewḥiy’?”
EZE 12:23 “S uya ini asen: ‘Ammu i iqqar Sidi inu, SIDI: Necc ad ssbeddeɣ amedya-ya, ařami ɣa qqimen war qqaren ɛad man aya am umedya di Israil.’” “S uya siweř akidsen [ammu]: ‘Aqa iwḍen-dd ussan [nni], uca uřa d aseqfeř n kuř řewḥiy!’
EZE 12:24 Minzi war ittiři ɛad řewḥiy war iǧin uřa d tagezzant s wawařen imiziḍen di taddart n Israil.
EZE 12:25 Minzi Necc, SIDI, ad ssiwřeɣ. Awař i ɣa ssiwřeɣ, ad yiři, war ittɛeṭṭař ɛad, minzi deg wussan nwem, [a] taddart iɣewwɣen, ad ssiwřeɣ ijj n wawař uca ad t ggeɣ, iqqar Sidi inu, SIDI.”
EZE 12:26 Yusa-dd ɣari wawař n SIDI, inna:
EZE 12:27 “[A] mmis n bnadem, xzar, inni n taddart n Israil, inni iqqaren: ‘Řewḥiy nni ittwařa aqa-t i [yijj n řweqt awarni] i waṭṭas n wussan, ittnabba x [wussan n] zzmanat iggʷejen aṭṭas.’”
EZE 12:28 “S uya ini asen: ‘Ammu i iqqar Sidi inu, SIDI: War ittɛeṭṭař ɛad uřa d ijj zeg wawařen inu. Awař i nniɣ, ad yiři, [ammu i] iqqar Sidi inu, SIDI.’”
EZE 13:1 Yusa-dd ɣari wawař n SIDI, inna:
EZE 13:2 “[A] mmis n bnadem, nabb ḍidd i inabiyyen n Israil inni ittnebban, uca ini i yinni ittnebban ɣar [meẓri] n wuř nsen: ‘Srem i wawař n SIDI!
EZE 13:3 Ammu i iqqar Sidi inu, SIDI: Uct x inabiyyen ibuḥařiyyen nni igguren awarni i buḥbeř n yixef nsen u awarni min war ẓrin!
EZE 13:4 [A] Israil, inabiyyen nwem dewřen am yiceɛbawen jar řxirbat.
EZE 13:5 War tuřyem ɣar tizzeyyin [di řeḥyuḍ n tendint] niɣ tebnam řḥiḍ i taddart n Israil, ḥima ad teqqimem tᵉttbeddam deg umenɣi deg wass n SIDI.
EZE 13:6 Nitni ttwařin min war iǧin, uca [ssawařen] tagezzant issxarriqen, aqa inni iqqaren: SIDI iqqar!, waxxa SIDI war ten issekk ca, [ɛad] sittimen belli awař ad iffeɣ.
EZE 13:7 Ma kenniw war teẓrim [xenni] iweḥḥan war iǧin, niɣ war tessiwiřem kenniw tagezzant issxarriqen umi teqqarem: SIDI iqqar!, [waxxa] Necc war ssiwiřeɣ ca?’”
EZE 13:8 “S uya, ammu i iqqar Sidi inu, SIDI: ‘Minzi tessawařem řbaṭeř u tᵉttwařam [iweḥḥan] issxarriqen, s uya, xzar, Necc aqa ayi xawem, iqqar Sidi inu, SIDI.
EZE 13:9 Ad yiři ufus inu ḍidd i inabiyyen nni ittwařan řbaṭeř u ttgezzanen s ixarriqen. Nitni war ttɣimin ca deg wegraw n řgens inu u war ttwazemmimen ca di lista n taddart n Israil u war dd-ttasen x wudem n temmurt n Israil. Kenniw ad tessnem belli Necc, Sidi, d SIDI.’”
EZE 13:10 “Minzi, [wah,] minzi nitni ttɣarran řgens inu, qqaren: ‘Řehna!’ am war iǧi řehna, [ammu] i ɣa ibna [řgens] ijj n řḥiḍ ittenhezzan. Uca xzarem, [xenni] ttřeḥḥafen as [ɛawed] s jjar.
EZE 13:11 Ini i yinni ittřeḥḥafen [řḥiḍ] s jjar, belli ad iwḍa. Ad dd-yas wenẓar ijehden uca kenniw, [a] ibquqen imeqqranen n tebruri, ad tewḍam, uca isemmiḍen n tḥaryaḍt ad dd-ffɣen s jjehd.
EZE 13:12 Uca xzar, xmi iwḍa řḥiḍ, ma war d awem qqaren: ‘Mani iǧa jjar i zi d as třeḥḥfem?’”
EZE 13:13 “S uya, ammu i iqqar Sidi inu, SIDI: ‘Deg wesɛar inu ad t arẓeɣ s isemmiḍen n tḥaryaḍt u s weɣḍab inu ad yiři wenẓar ijehden aṭṭas u s wesɛar inu [ad wḍan] ibquqen imeqqranen n tebruri ařami ɣa iqḍa.
EZE 13:14 [Ammu] i ɣa ɣeḍřeɣ řḥiḍ nni třeḥḥfem s jjar ifesyen u Necc ad t mmenḍareɣ ɣar temmurt ařami ɣa ittwaɛarra dsas nnes. Ad tewḍa tendint u kenniw ad tᵉttwahellkem di řwesṭ nnes uca ad tessnem belli Necc d SIDI.
EZE 13:15 Ad nḍareɣ asɛar inu x řḥiḍ u x yinni t idřin s jjar uca ad awem iniɣ: War din iǧi [ɛad] řḥiḍ uřa d yinni d as iřeḥḥfen,
EZE 13:16 inabiyyen n Israil nni inebban x Urcalim uca twařin ijj n řewḥiy n řehna i nettat am war iǧi řehna!’, [ammu i] iqqar Sidi inu, SIDI.”
EZE 13:17 “Cek, [a] mmis n bnadem, arr udem nnec ɣar yessis n řgens nnec, tinni ittnebban zeg wuř n yixef nsent, u nebba xasent,
EZE 13:18 ini: ‘Ammu i iqqar Sidi inu, SIDI: Uct [x temɣarin] nni ittxeyyaḍen řecfen x marra řemfaṣeř n ifassen inu uca tteggent iřeḥḥaf x uzeǧif n umeqqran d umeẓyan maḥend ad gmarent řeɛmur! Ma texsent ad tegmarent řeɛmur n řgens inu u ad teḥḍant tudart n yixef nkent?
EZE 13:19 Ma texsent ad ayi tessfesdent ɣar řgens inu di ṭṭweɛ n ca n wurawen n imendi d ca n iřeqqwaz n weɣrum, maḥend ad tenɣent řeɛmur, nni war iɛeddeř ad mmten u maḥend ad teḥḍant tudart n řeɛmur nni war iɛeddeř ad qqimen ddaren, s ixarriqen nkent ɣar řgens inu nni issḥessan ɣar uxarriq?’”
EZE 13:20 “S uya, ammu i iqqar Sidi inu, SIDI: ‘Xzar, ad arreɣ řecfen nkent i zi tyemmarent din, ad ḍwen ak-d řeɛmur. Ad ten qeřɛeɣ zeg iɣaǧen nkent uca ad deřqeɣ i řeɛmur i tyemmarent, [ad ggeɣ] řeɛmur ad ḍwen.
EZE 13:21 Ad carrgeɣ iřeḥḥafen nkent uca ad ssnejmeɣ řgens inu zeg ifassen nkent ařami nitni war ttiřin ɛad d takeccaḍt deg ifassen nkent. [Xenni] kennint ad tessnent belli Necc d SIDI,
EZE 13:22 minzi kennint tessxeyyqent uř n umsegged s ixarriqen, umi Necc simant inu war dayes ggiɣ řeḥriq u minzi kennint tessjehdent ifassen n iɛeffanen ařami aɛeffan war dd-idwiř zeg webrid nnes aɛeffan maḥend ad iqqim iddar.”
EZE 13:23 “S uya war tẓarrem ɛad [iweḥḥan] war iǧin u war tᵉtteggem ɛad s tgezzant. Necc ad ssnejmeɣ řgens inu zeg ufus nwem u kenniw ad tessnem belli Necc d SIDI.”
EZE 14:1 Usin-dd ɣari yeryazen zeg imɣaren n Israil uca qqimen zzati.
EZE 14:2 [Xenni] yusa-dd ɣari wawař n SIDI, inna:
EZE 14:3 “[A] mmis n bnadem, iryazen-a ssgeɛɛden imeyḍa [n l’aṣnam nsen] deg wuř nsen uca ggin taɛenkrift i dd-yiwyen řmuɛṣiyyet nsen nican zzat i yixef nsen. Ma Necc ad ten jjeɣ ɛad ad ttaren ccwar zzayi?”
EZE 14:4 “S uya, cek, siweř akidsen uca ini asen: ‘Ammu i iqqar Sidi inu, SIDI: Kuř aryaz zi taddart n Israil nni issgeɛɛden imeyḍa n l’aṣnam deg wuř nnes uca igga taɛenkrift i dd-yiwyen řmuɛṣiyyet nnes nican zzat i wudem nnes uca [xenni] ad dd-yas ɣar unabi, Necc, SIDI, ad xas dd-yarr, mařa ittas-dd, anect [řqedd n] ubarru n imeyḍa nnes n l’aṣnam,
EZE 14:5 ḥima ammu i ɣa řeqfeɣ taddart n Israil deg wuř nsen, maɣar aggʷejen xafi marra zi ssibbet n imeyḍa nsen n l’aṣnam.’”
EZE 14:6 “S uya, ini i taddart n Israil: ‘Ammu i iqqar Sidi inu, SIDI: Dewřem-dd uca qeřbem x imeyḍa nwem n l’aṣnam uca arrem iɣembab nwem x marra jjɛayef nwem.’
EZE 14:7 Minzi i kuř aryaz zi taddart n Israil u zi ibarrani[yyen] nni izeddɣen di Israil - wenni i ɣa yaggʷejen zi ḍeffar inu u ittejja ad dd-adfen imeyḍa n l’aṣnam ɣar wuř nnes uca igga taɛenkrift i dd-ittawyen řmuɛṣiyyet nnes nican zzat i wudem nnes uca [xenni] ad dd-yas ɣar unabi, maḥend ad yarzu zzayes ccwar - aqa Necc d SIDI ad xas dd-arreɣ.
EZE 14:8 Necc ad arreɣ udem inu ḍidd i weryaz nni uca ad t ssjɛareɣ ařami [i ɣa idweř] d ict n řeɛřamet d ijj n umedya. Necc ad t qeḍɛeɣ zi řwesṭ n řgens inu u kenniw ad tessnem aqa Necc d SIDI.’”
EZE 14:9 “‘Xmi ijj n unabi ijja ixef nnes ad as ɣarren uca issiweř ijj n wawař, [xenni] Necc, SIDI, ad ɣarreɣ anabi nni uca ad sswiẓẓḍeɣ afus inu ḍidd nnes uca ad t teḥḥiɣ zi řwest n řgens inu n Israil.
EZE 14:10 Nitni ad arbun řmuɛṣiyyet nsen. Anect n řmuɛṣiyyet n yinni yarezzun ccwar, ammu i ɣa tiři řmuɛṣiyyet n unabi [nni],
EZE 14:11 ḥima taddart n Israil war tᵉttweddar [ɛad] zi ḍeffar inu u nitni war ssxemmajen [ɛad] ixef nsen s marra ixeṭṭan nsen. [Xenni] ad ayi iřin d řgens u Necc ad iřiɣ d AREBBI nsen!’, [ammu i] iqqar Sidi inu, SIDI.”
EZE 14:12 Yusa-dd ɣari wawař n SIDI, inna:
EZE 14:13 “[A] mmis n bnadem, mařa texḍa ict n temmurt akidi am tᵉttegg s řɣedran ameqqran, [xenni] Necc ad sswiẓẓḍeɣ afus inu ḍidd nnes. Ad arẓeɣ řeɛweč n weɣrum nnes u ad ssekkeɣ dayes řaẓ u ammu i ɣa teḥḥiɣ am bnadem am řmař.
EZE 14:14 Mařa tuɣa aten di řwest nnes třata n yeryazen-a, Nuḥ d Daniyil d Ayub, ad fekken nitni mɣir řeɛmar [n yixef nsen] s tsegda nsen, [ammu i] iqqar Sidi inu, SIDI.”
EZE 14:15 “Mařa ggiɣ ad ẓwan imuddaren n řexřa x temmurt uca ad zzayes keccḍen iḥenjiren, ařami tedweř d ict n temmurt ittwareddǧen, ařami war yeǧi wi ssenni i ɣa yeɛdun zi ssibbet n řewḥuc iwɛaren,
EZE 14:16 [waxxa tuɣa] třata n yeryazen nni di řwesṭ nnes, s tidett am ddareɣ Necc, issawař Sidi inu, SIDI, war zemmaren nitni ad fekken iḥenjiren niɣ tiḥenjirin, ad fekken mɣir ixef nsen, [maca] tammurt ad tedweř d ict n temmurt ittwareddǧen.”
EZE 14:17 “Niɣ ad ssiwḍeɣ ssif x temmurt nni, ad iniɣ: ‘Ssif, ekk x temmurt!’, ařami zzayes i ɣa qeḍɛeɣ bnadem d řmař,
EZE 14:18 s tidett am ddareɣ Necc, iqqar Sidi inu, SIDI, waxxa [tuɣa] třata n yeryazen nni di řwesṭ nnes, war zemmaren nitni ad fekken iḥenjiren niɣ tiḥenjirin, ad fekken mɣir ixef nsen.”
EZE 14:19 “Niɣ ad ssekkeɣ ṭṭaɛun ɣar temmurt nni uca ad ssfarɣeɣ asɛar inu [ixeǧḍen] s idammen ařami zzayes i ɣa qeḍɛeɣ bnadem d řmař,
EZE 14:20 [s tidett am] ddareɣ Necc, iqqar Sidi inu, SIDI, [waxxa tuɣa] Nuḥ d Daniyal d Ayub di řwesṭ nnes, war zemmaren nitni ad fekken iḥenjiren niɣ tiḥenjirin, ad fekken mɣir ixef nsen s tsegda nsen.”
EZE 14:21 “Minzi ammu i iqqar Sidi inu, SIDI: Mahu xmi ɣa ssekkeɣ ḍidd i Urcalim arebɛa n řeḥkamat inu iqesḥen [marra]: ssif d řaẓ d řmař n řexřa d ṭṭaɛun, maḥend ad zzayes qeḍɛeɣ bnadem d řmař!
EZE 14:22 Uca xzar, ad dayes qqimen [ɛad] inni innejmen u nitni ad ttwanedhen barra, [am] iḥenjiren [am] tḥenjirin. Xzar, ad ɣarwem dd-ffɣen uca kenniw ad tẓarem abrid nsen d řexdayem nsen uca kenniw ad ttwassfewwjem x řɣar nni ssiwḍeɣ x Urcalim, [wah,] x marra min xas ssiwḍeɣ.
EZE 14:23 Nitni ad kenniw ssfewwjen xmi ɣa tẓarem abrid nsen d řexdayem nsen uca kenniw ad tessnem belli marra min dayes ggiɣ, war t ggiɣ břa ssibbet, [ammu i] iqqar Sidi inu, SIDI.”
EZE 15:1 Yusa-dd ɣari wawař n SIDI, inna:
EZE 15:2 “[A] mmis n bnadem, min iɛna ukeccuḍ n tzayart ktar zeg ukeccuḍ [nneɣni], [ktar zeg] ukeccuḍ nni din [iǧan] jar tcejjura n wezɣar?
EZE 15:3 Ma izemmar [bnadem] ad zzayes iksi akeccuḍ maḥend ad zzayes igg ict n řqecɛet ineffɛen i řxedmet? Ma ittwakksi zzayes ict n řewted ḥima ad dayes tayřed ca n řqecɛet?
EZE 15:4 Xzar, ad immewc d macca i tmessi. Timessi ad tecc tnayen n ṭṭrufa nnes u aɣezdis n řwest ittwacemḍ. Ma ad iṣřeḥ [ukeccuḍ nni ɛad] i yict n řqecɛet i řxedmet?
EZE 15:5 Xzar, umi tuɣa [ɛad] imun, war zzayes tᵉttwagg ict n řqecɛet i řxedmet. Mecḥař qell ɛad umi t tecca timessi, icmeḍ [ukeccuḍ]. Ma ad zzayes ggen ɛad ca n řqecɛet i řxedmet?”
EZE 15:6 “S uya, ammu i iqqar Sidi inu, SIDI: ‘Mammec i wciɣ akeccuḍ n tzayart jar ukeccuḍ n wezɣar i timessi, ḥima ad ittwacc, ammu i ɣa sellmeɣ uřa d imezdaɣ n Urcalim [i tmessi]!
EZE 15:7 Maɣar Necc ad arreɣ udem inu ḍidd nsen. [Xmi] i ɣa xsen ad dd-ffɣen zi tmessi, ad ten tessecmeḍ tmessi u kenniw ad tessnem belli Necc d SIDI, umi ggiɣ udem inu ḍidd nsen.
EZE 15:8 Ad arreɣ tammurt d ict n temmurt ittwareddǧen, minzi nitni ɣdaren ayi s ict řeɣdaret iqesḥen, [ammu i] iqqar Sidi inu, SIDI.’”
EZE 16:1 Yusa-dd ɣari wawař n SIDI, inna:
EZE 16:2 “[A] mmis n bnadem, scen i Urcalim jjɛayef nnes,
EZE 16:3 uca ini: ‘Ammu i iqqar Sidi inu, SIDI, i Urcalim: X ř’aṣeř nnem d wexřaq nnem aqa cem zi temmurt n ayt n Kenɛan. Tuɣa babam d Amuri u yemmam d Taḥittit.
EZE 16:4 [Ɣar] třařit nnem, deg wass nni di dd-tᵉttwaxeřqed, war d am qessen taɛebbut niɣ ssirden cem s waman, ḥima ad cem ssizdegen. War cem meǧḥen s tmeǧaḥt niɣ cem ssennḍen s teḥřucin.
EZE 16:5 Tuɣa war txezzar i cem uřa d ict n tiṭṭ, ḥima ad am yegg ca zi ddegga, ḥima ad am tezziǧez, [maca] temmenḍared x wudem n yeyyar s řḥegra n řeɛmar nnem deg wass nni di dd-tᵉttwaxeřqed.’”
EZE 16:6 “[Umi] ẓwiɣ zzatek, ẓriɣ cem tᵉttneqřabed deg idammen nnem. Necc nniɣ am umi cem tuɣa deg idammen nnem: ‘Ddar!’, [wah,] Necc nniɣ am umi tuɣa cem deg idammen nnem: ‘Ddar!’
EZE 16:7 Arniɣ dayek ařami tfeyyḍed am uɣemmuy n yeyyar. Cem teymid, temɣared uca tiwḍed ad tiřid tecnid aṭṭas. Idmaren nnem jemden u ucuwwaf nnem imɣar, [maca] tuɣa cem d taɛaryant d taqeddidt.
EZE 16:8 [Umi] ẓwiɣ zzatem, ẓriɣ cem uca xzar, ussan nnem [iwḍen], ussan n tayri. Necc sswiẓẓḍeɣ afriw[en] inu xam uca dřiɣ tuɛɛaryent nnem. Jjuǧeɣ ict n tjaǧit di ṭṭweɛ nnem uca udfeɣ ɣar Řɛahd akidem, [ammu i] iqqar Sidi inu, SIDI, uca [ammu i] tdewřed inu.
EZE 16:9 Ssirdeɣ cem s waman uca sřiřeɣ idammen nnem zzayem uca dehneɣ cem s zzect.
EZE 16:10 Necc ssyarḍeɣ cem s warruḍ n uburḍa s tintat ifarzen uca ssɣuneɣ cem s tsiřa n teřmect n ddenfiř uca ssbeyseɣ cem s řeqṭen azdad uca dřiɣ cem s řehrir.
EZE 16:11 Qqneɣ cem s řehzuṭ uca ggiɣ am tmeqyasin ɣar ifassen nnem d ict n tseddect deg yiri nnem.
EZE 16:12 Ggiɣ taxadent di tinzart nnem d texrazin deg imejjan nnem d ttaj icnan x uzeǧif nnem.
EZE 16:13 [Ammu i] tᵉttwazehhjed s wureɣ d nnuqart uca arruḍ nnem tuɣa-t s řeqten azdad d řehrir d uburḍar s tintat ifarzen. Cem tuɣa teccid aren azdad d tamment d zzect. Tuɣa cem tecnid aṭṭas uca tfeřḥed ařami tdewřed tessdahjed tagelda.
EZE 16:14 Iffeɣ zzayek ijj n yisem jar řegnus zi ssibbet n waẓri nnem, minzi tuɣa aẓri nnem nican zeg ucewwar inu i xam ssarseɣ, [ammu i] iqqar Sidi inu, SIDI.”
EZE 16:15 “[Maca] tᵉttiqqed deg weẓri [n yixef] nnem uca tessefsed ixef nem [am tᵉttiqqed] deg yisem nnem uca tfarrɣed farq-ccɣeř nnem x marra wi yeɛdun: i wanita tuɣa aẓri nnem.
EZE 16:16 Teksid ca zeg warruḍ nnem, teggid řegɛudi s tintat aṭṭas i yixef nnem uca tesseffsᵉded ixef nnem din. Am man aya ɛemmarṣ war imsar u ɛemmarṣ war ittiři ɛad.
EZE 16:17 Teksid řehzuṭ n wureɣ inu d nnuqart inu nni d ac wciɣ uca teggid zi man aya řexyařat n yeryazen i yixef nnem uca tessefsᵉded ixef nnem zzaysen.
EZE 16:18 Teksid arruḍ n uburḍar s tintat ifarzen uca třeḥḥfed asen [zzayes] uca tessarsed zzect inu d řebxur inu zzatsen.
EZE 16:19 Aɣrum inu nni d am wciɣ, waren azdad d zzect d tamment i zi cem ssecceɣ, aqa tessarsed aya d arriḥet ittfuḥen zzatsen, [ammu i] imsar, iqqar Sidi inu, SIDI.
EZE 16:20 Iḥenjiren nnem d yessim nni dd-turwed i Necc, aqa teksid ten uca tqeddmed ten d macca i nitni. Ma [xenni] farq-ccɣeř nnem d drust waha,
EZE 16:21 ařami tɣarṣed i iḥenjiren inu uca tezzenzed ten umi ten tessekked x tmessi?
EZE 16:22 Ɣar marra jjɛayef nnem d farq-ccɣeř nnem war tidared deg wussan n temẓi nnem umi tuɣa cem d taɛaryant, tᵉttwaɛarrid [u] tᵉttneqřabed deg idammen nnem.
EZE 16:23 Awarni marra řɣar i teggid - ay, ayehhat xam, iqqar Sidi inu, SIDI - imsar
EZE 16:24 aqa cek tebnid i yixef nnem ict n řgeɛɛdet uca teggid i yixef nnem di marra azzay ict n řgeɛɛdet [ḥima ad din wehhben tiɣarṣa].
EZE 16:25 Di marra azeǧif n webrid tebnid řegɛudi i yixef nnem. Tjeyyḥed aẓri nnem s ijj n nnɛi n webrid uca tesswiẓẓḍed iḍaren nnem i kuř ijj wi yeɛdun uca tarnid aṭṭas di farq-ccɣeř nnem.
EZE 16:26 Tessfesded ixef nnem uřa s ayt n Miṣra, jjiran nnem nni iqqbubbuzen s weysum [nsen]. Tarnid ammu aṭṭas di farq-ccɣeř nnem maḥend ad ayi tesɛared.
EZE 16:27 Xzar, xenni Necc sswiẓẓḍeɣ afus inu ḍidd nnem uca ssneqṣeɣ tasɣart nnem i d am dd-ittasen uca sellmeɣ cem ɣar meẓri n yinni cem icarrhen, [ɣar] yessis n Ifilisṭiniyyen, tinni ttseḍḥant zeg webrid nnem ifeḍḥen.
EZE 16:28 Tessefsᵉded ixef nnem ak-d ayt n Accur, umi war tejjiwned. Tessefsᵉded ixef nnem akidsen, [maca] war tufid ajiwen.
EZE 16:29 Tarnid aṭṭas di farq-ccɣeř nnem ař di temmurt n isebbaben, [tammurt n] Ikaldaniyyen, uca uřa s uya war tejjiwned.
EZE 16:30 Mecḥař ihřec wuř nnem, [ammu i] iqqar Sidi inu, SIDI, aqa teggid marra aya, řxedmet n ict n temɣart n farq-ccɣeř iɣewwɣen,
EZE 16:31 umi tebnid ict n řgeɛɛdet ɣar uzeǧif n kuř abrid, teggid ict n řgeɛɛdet [i tewhibt n tɣarṣa] di kuř azzay, břa ma teǧid [d tidett] d tamɣart n farq-ccɣeř umi tesseḥqared řexřaṣ [nnem n farq-ccɣeř].
EZE 16:32 [A cem,] tamɣart izennan, tenni itteṭṭfen ibarraniyyen deg wemcan n weryaz nnes.
EZE 16:33 I marra timɣarin n farq-ccɣeř wcin asent řmunet, [maca] cem tewcid timewca i marra inni cem ittexsen uca [ammu i] ten tesseɣwid s farq-ccɣeř nnem, maḥend ad ɣarem dd-asen zi marra iɣezdisen.
EZE 16:34 Ammu, s farq-ccɣeř nnem, ad kidem imsar řɛeks n min imsaren i temɣarin [nneɣni], minzi war cem ḍeffaren ca maḥend ad zzayem ggen s farq-ccɣeř [nsen]. Mařa cem tewcid asen řexřaṣ n temɣart n farq-ccɣeř, war tᵉṭṭfed ca řexřaṣ n temɣart n farq-ccɣeř, [xenni] aqa cem tdewřed d řɛeks zzaysen.”
EZE 16:35 “S uya, [a] tamɣart n farq-ccɣeř, seř i wawař n SIDI.
EZE 16:36 Ammu i iqqar Sidi inu, SIDI: ‘Minzi tessfarrɣed nnḥas nnem [ittwařeḥḥfen s ddra] u tessɛarrid řeḥya nnem s farq-ccɣeř nnem ak-d yinni i cem ittexsen u ak-d marra imeyḍa nnem n l’aṣnam n jjɛayef nnem, u umi d asen tewcid idammen n iḥenjiren nnem,
EZE 16:37 xzar, s uya ad ssmuneɣ marra inni tuɣa cem ittexsen nni tuɣa i d am itteɛjiben u marra inni texsed [jmiɛ] ak-d marra inni tcarhed. Necc ad ten dd-ssmuneɣ xam zi marra iɣezdisen uca ad ssɛarriɣ řeḥya nnem, [ař] i ɣa ẓaren marra řeḥya nnem.
EZE 16:38 Necc ad xam carrɛeɣ ɛlaḥsab lfarayiḍ i tinni izennan d tinni issizzřen idammen uca ad cem sellmeɣ ɣar [ijj n usizzeř n] idammen i dd-iffɣen zeg wesɛar d tusmi.
EZE 16:39 Necc ad wceɣ cem deg ufus nsen uca nitni ad arẓen řgeɛɛdet nnem uca ad areddǧen řegɛudi nnem uca ad am kksen arruḍ nnem, ad awyen řehzuṭ nnem uca ad cem jjen d taɛaryant d taqeddidt.
EZE 16:40 Awarni aya ad xam ssiwḍen ijj n wegraw [d ameqqran] uca ad cem arejmen uca ad cem qessen s řesyuf nsen.
EZE 16:41 Nitni ad sscemḍen tudrin nnem s tmessi uca ad xam dd-ssehwan řeḥkamat zzat i tiṭṭawin n waṭṭas n temɣarin. Necc ad ggeɣ ad tessbedded zi farq-ccɣeř nnem, war tbeṭṭid ɛad řexřaṣ n farq-ccɣeř.
EZE 16:42 [Ammu] i ɣa ssarseɣ asɛar inu xam uca tusmi inu [iqeddsen] ad xam tbeɛɛed u Necc ad dewřeɣ areyyḥeɣ, war ttɛessibeɣ ɛad.
EZE 16:43 Minzi war tidared deg wussan n temẓi nnem, umi d ayi tesɛared s marra aya, aqa da Necc ɛawed ad awyeɣ abrid nnem x yixef nnem, [ammu i] iqqar Sidi inu, SIDI. Ɛemmarṣ ad ggeɣ řefḍiḥet sennej i marra jjɛayef nnem [umi Necc war cem ttɛiqibeɣ ca].’”
EZE 16:44 “Xzar, marra wenni issawařen s wawařen iweznen, ad xam issawař awař-a, ad yini: ‘Am yemmas, am yeǧis!’
EZE 16:45 Aqa cem d yeǧis n yemmam nni iɛiffen aryaz nnes d iḥenjiren nnes u cem d učmas n suyᵉtmam nni iɛiffen zeg yeryazen nsent d iḥenjiren nsent. Tuɣa yemmam d Taḥittit u babam d Amuri.
EZE 16:46 Učmam tameqqrant aqa-tt Samarya, nettat d yessis nnes zeddɣen ɣar uẓermaḍ nnem, u učmam tenni d tameẓyant zzayem, tzeddeɣ ɣar yefus nnem, aqa-tt d Sadum d yessis.
EZE 16:47 Cem war teggured deg ibriden nsent u war teggid am jjɛayef nsent. [Maca] axmi mammec ddegga tuɣa drust [waha], tfesded marra ibriden nnem ktar zzaysent.
EZE 16:48 S tidett am ddareɣ Necc, [ammu i] iqqar Sidi inu, SIDI: Aqa Sadum, učmam ak-d yessis, ɛemmarṣ war teggi am teggid cem d yessim.
EZE 16:49 Xzar, ta d řmuɛṣiyyet n učmam Sadum: nnfaxet, tyawant n weɣrum d ict n tudart di řhudnet břa amnus, [ammu i] iǧa umeddur nnes u n yessis, [maca] afus n wenni ittwaḥṣaren u n umezřuḍ war d as tessejhed.
EZE 16:50 Nitenti nnefxent uca ggint jjɛifect zzat i wudem inu. Umi ẓriɣ aya, nḍareɣ tent.
EZE 16:51 [Maca] Samarya war txeṭṭi uřa deg wezyen n ddnub nnem uca cem teggid jjɛayef ktar zzayes. S marra jjɛayef i teggid, tarred suyᵉtmam banent seggdent.
EZE 16:52 [Xenni] cem ɛawed, ksi řefḍiḥet nnem, minzi tewtid x suyᵉtmam. Umi teggid ddnub d jjɛifect ktar zzaysent, banent nitenti seggdent xam. Seḍḥa u ksi řefḍiḥet nnem, minzi tarrid suyᵉtmam banent seggdent.
EZE 16:53 Xmi ɣa beṭṭřeɣ tameḥbast nsent, tameḥbast n Sadum d yessis, uřa d tameḥbast n Samarya d yessis, [xenni] ad beṭṭřeɣ [ɛawed] tameḥbast nnem di řwesṭ nsent,
EZE 16:54 ḥima ad teksid řefḍiḥet nnem uca ad tseḍḥid zi marra min teggid, řami cem tent tessfewwjed.
EZE 16:55 Mařa suyᵉtmam, Sadum d yessis, ad dd-dewřent ɣar umeddur nsent amezwaru, uca uřa d Samarya d yessis ad dd-dewřent ɣar umeddur nsent amezwaru, [xenni] ad dd-tdewřed uřa d cem d yessmam ɣar umeddur nkent amezwaru.
EZE 16:56 Deg wass n nnfaxet nnem war ittwaseř ca zeg uqemmum nnem x [min imsaren i] učmam Sadum,
EZE 16:57 qbeř ma iɛarra tuɛeffna nnem, am mammec [i imsar] di řweqt n řḥegra s ufus n yessis n Aram d marra inni d as dd-innḍen, yessis n Ifilisṭiniyyen nni cem isseḥqaren ɣar marra iɣezdisen nnem.
EZE 16:58 Řefḍayeḥ nnem d jjɛayef nnem ad tent teksid!, [ammu i] iqqar SIDI.”
EZE 16:59 “Minzi ammu i iqqar Sidi inu, SIDI: ‘Necc ad zzayem ggeɣ am mammec teggid cem umi tesseḥqared tajaǧit s treẓẓit n Řɛahd.
EZE 16:60 [Maca ɛad] ad ɛeqřeɣ x Řɛahd inu akidem deg wussan n temẓi nnem uca ad ggeɣ ijj n Řɛahd i řebda i cem.
EZE 16:61 Xenni ad tidared deg ibriden nnem uca ad tseḍḥid xmi ɣa tawyed suyᵉtmam nni mɣarent zzayem, [jmiɛ] ak-d tinni timaẓuẓin xam. Necc ad am tent wciɣ d yessim, [maca] war iǧi s webrid n řɛahd nnem.
EZE 16:62 [Maca] Necc ad ggeɣ Řɛahd inu akidem uca ad tessned, aqa Necc d SIDI,
EZE 16:63 ḥima ad tidared dayes uca ad tseḍḥid uca war tarezzmed ɛemmarṣ ɛad aqemmum nnem zi ssibbet n řefḍiḥet nnem, xmi ɣa ggeɣ aṣřaḥ i cem x marra min teggid!, [ammu i] iqqar Sidi inu, SIDI.’”
EZE 17:1 Yusa-dd ɣari wawař n SIDI, inna:
EZE 17:2 “[A] mmis n bnadem, ɛawed ict n ṭḥajit n twafit u ewc ijj n umedya i taddart n Israil
EZE 17:3 uca ini: ‘Ammu i iqqar Sidi inu, SIDI! Agider d ameqqran s wafriwen arezmen, daysen řewtad iziraren ccuren s warric d tintat ifarzen, yusa-dd ɣar idurar n Lubnan uca ikkes tuccent n tcejjart n tengelt.
EZE 17:4 Azeǧif n řefruɛ nnes issendayen ikkes i-t, uca yiwyi t ɣar ict n temmurt n ttijara uca issars i-t deg ict n tendint n isebbaben.
EZE 17:5 Iksi zi zzariɛet n temmurt uca igga i-tt deg ijj n yeyyar icna i wezraɛ. Iksi tt, iẓẓu tt am tcejjart n uṣefṣaf ɣar waman aṭṭas.
EZE 17:6 Teɣmi-dd zzariɛet uca tedweř d tazayart s řefruɛ wessɛen ak-d trunku d aquḍaḍ nni zi dewřent tseḍwin ɣar ugider, am tuɣa iẓewran nnes qqimen sadu nnes. Ammu i tedweř d ict n tzayart nni issuffɣen tiseḍwin uca tegga ad ssendyen ifetwan.
EZE 17:7 Tuɣa ɛawed ijj n ugider ameqqran nneɣni s wafriwen imɣaren d waṭṭas n arric uca xzar, tazayart tarra iẓewran nnes ɣares uca tesswiẓẓeḍ tiseḍwin nnes ɣares zeg iyyar mani tᵉttwaẓẓu ḥima agider ad as issessu.
EZE 17:8 Tuɣa tᵉttwaẓẓu deg ijj n yeyyar isbeḥ zzat i waman aṭṭas ḥima ad tessuffeɣ tiseḍwin uca ad tewc řɣiǧet, ḥima ad tedweř d tazayart teccur.’
EZE 17:9 Ini [xenni]: ‘Ammu i iqqar Sidi inu, SIDI: Ma ad iffeɣ man aya mliḥ? Ma war ittekkes ugider ameqqran iẓewran nnes uca ad iqḍeɛ řɣiǧet nnes ařami i ɣa taẓeɣ? Wah ad taẓeɣ s marra tifray nni ɣares iɣemmyen, war ittwaḥdij ɛad uɣiř ijehden niɣ řɣaci aṭṭas ḥima ad tt ssgeɛɛden zeg iẓewran nnes.
EZE 17:10 Xzar, waxxa ẓẓun tt, maca ma xenni ad tefřeḥ? Ma war tᵉttiẓeɣ xmi tt ɣa iřqef usemmiḍ n řɣarb? Wah, ad taẓeɣ x iɛurar n řeɛraṣi mani dd-tɣemmi.’”
EZE 17:11 Yusa-dd ɣari wawař n SIDI, inna:
EZE 17:12 “Ini řexxu i taddart iɣewwɣen: ‘Ma war tessinem min ɛnant tmesřayin-a?’ Ini: ‘Xzar, ajeǧid n Babil yusa-dd ɣar Urcalim uca iṭṭef ajeǧid nnes d řḥukkam nnes uca yiwyi ten ɣares di Babil.
EZE 17:13 Iṭṭef [ɛawed ijjen] zi zzariɛet igellden uca igga akides ijj n řɛahd uca yarra i-t ad iwc tajaǧit u ayt n jjehd di temmurt, aqa ikkes i-ten,
EZE 17:14 ḥima ad tiři tgeldit twaḍeɛ u war tessgiɛɛid ixef nnes u ḥima ad teḥḍa řɛahd nnes, ad teqqim tᵉttbedda.
EZE 17:15 [Maca] netta iɣewweɣ xas, issekk ireqqasen nnes ɣar Miṣra, maḥend ad as wcen iysan d [ijj n ubarru n] řgens. Ma ad iffeɣ aya mliḥ? Ma izemmar ad yarweř wenni iggin aya? Ma izemmar wenni yarẓin řɛahd ad yarweř?’”
EZE 17:16 “S tidett am ddareɣ Necc, iqqar Sidi inu, SIDI: ‘Deg wemcan [mani izeddeɣ] ujeǧid nni t iggin d ajeǧid, wenni zi isseḥqar netta tajaǧit [i d as ijjuǧ], d wenni zi yarẓ řɛahd [i kides igga], [aqa din] ɣares, di řwest n Babil, ad immet!
EZE 17:17 War izemmar firɛun s ijj n řɛeskar ameqqran d ijj n wegraw imɣar ad yegg uřa d ict n řḥajjet di ṭṭweɛ nnes deg umenɣi, xmi ɣa ssgeɛɛden ijj n řḥiḍ uca xmi ɣa bnan ijj n wecbar maḥend ad nɣen aṭṭas n iwdan.
EZE 17:18 Aqa isseḥqar tajaǧit umi yarẓa řɛahd i x iwca afus nnes. [Minzi] netta igga marra man aya, war ittrakkwař.’”
EZE 17:19 “S uya, ammu i iqqar Sidi inu, SIDI: ‘S tidett am ddareɣ Necc, tajaǧit i d ayi [ijjuǧ] uca [xenni] isseḥqar i-tt, uřa d řɛahd i kidi igga uca [xenni] yarẓa i-t, ad ten-i-dd arreɣ x uzeǧif nnes!
EZE 17:20 Ad xas bezzɛeɣ tracca inu maḥend ad yiři icarf di řfex inu. Ad t awyeɣ ɣar Babil uca ad xas carrɛeɣ din zi ssibbet n řeɣdaret nnes i zi d ayi iɣdar.
EZE 17:21 Marra inni zzayes yarewřen [jmiɛ] ak-d marra řɛeskar nnes, ad wḍan s ssif, uca inni iqqimen ad ttwazeǧɛen ɣar marra tiɣemmura n usemmiḍ. [Xenni] kenniw ad tessnem belli Necc, SIDI, ssiwřeɣ.’”
EZE 17:22 “Ammu i iqqar Sidi inu, SIDI: ‘Necc ad kkseɣ [ijj n ufetwi n] tuccent n tcejjart n tengelt yuɛřan uca ad t ẓẓuɣ. Zeg uzeǧif ak-d tseḍwin nnes ad qeřɛeɣ ict n tseṭṭa tarhef uca ad tt ẓẓuɣ x ijj n wedrar yuɛřan.
EZE 17:23 Ad tt ẓẓuɣ x wedrar yuɛřan qaɛ di Israil. Tanita ad tawi tiseḍwin uca ad tarr řɣiǧet, ad tedweř d tacejjart n tengelt ijehden. Ɛřam kuř ijḍaḍ s ɛřam kuř afriwen ad zedɣen sadu nnes, [wah,] di tiři nnes ad zedɣen nitni,
EZE 17:24 uca ad ssnen marra ticejjura n yeyyar, aqa Necc, SIDI, ssehwiɣ tacejjart yuɛřan uca ssgeɛɛdeɣ tacejjart taquḍaḍt u ssiẓɣeɣ tacejjart tazeyzat uca arriɣ tacejjart yuẓɣen ad tnewwar. Necc, SIDI, ssiwřeɣ uca ad t ggeɣ.’”
EZE 18:1 Yusa-dd ɣari wawař n SIDI, inna:
EZE 18:2 “Min kenniw yuɣin ařami i ɣa tiwyem awař-a ɣar wudem n temmurt n Israil uca teqqarem: ‘Ibabaten ccin aḍiř asemmaɣ uca tiɣmas n warraw dewřent ḥarecwent’?
EZE 18:3 S tidett am ddareɣ Necc, [ammu i] iqqar Sidi inu, SIDI: ‘[Uct xawem] mařa ɛemmarṣ ɛad ad tawyem awař-a di Israil!
EZE 18:4 Xzar, marra řeɛmur inu, am řeɛmar n babas uřa d řeɛmar n mmis inu. Řeɛmar nni ixḍan, ad immet.’”
EZE 18:5 “Mařa ca n yijjen d amsegged [i yeǧa], ittegg řḥeqq d min iseggden:
EZE 18:6 war ittett [ddbayeḥ] x idurar, war issgiɛɛid tiṭṭawin nnes ɣar imeyḍa [n l’aṣnam] n taddart n Israil, war issexmij tamɣart n jjar nnes u war dd-ittqarrib ɣar temɣart nni iɛezzřen [umi xas idammen],
EZE 18:7 war iḥeṣṣar uřa d ijj, ittarra-dd ddiyyet i bu-amarwas, war ittkeccaḍ, wenni iǧuẓen ittic as weɣrum nnes u wenni d aɛaryan issdduri i-t s warruḍ,
EZE 18:8 netta war yareṭṭeř s arriba niɣ ad iksi arbeḥ, afus nnes itteggʷej x min war iseggden, netta iḥekkem nican jar weryaz d ijj n weryaz [nneɣni],
EZE 18:9 iggur di tweṣṣa inu uca iḥeṭṭa lfarayiḍ inu umi ɣa yegg s řaman, [xenni] aqa netta d amsegged, ad iddar s tidett!’, [ammu i] iqqar Sidi inu, SIDI.
EZE 18:10 Mařa yejj-dd mmis d aceffar, wenni issizzařen idammen d wenni itteggen icten zi tmesřayin-a,
EZE 18:11 [waxxa] netta [s yixef nnes am babas] war ittegg timesřayin-a, [maca] mmis wanita ittett [tiwhibin] x idurar, issexmej tamɣart n jjar nnes,
EZE 18:12 iḥeṣṣar řmeskin d umezřuḍ, ittkeccaḍ, war dd-yarri ddiyyet, issgeɛɛad tiṭṭawin nnes ɣar imeyḍa n l’aṣnam, ittegg ict n jjɛifect,
EZE 18:13 yareṭṭeř s arriba, ittᵉṭṭef arbeḥ, ma [xenni] ad iqqim [mmis] wanita iddar? War ittɣimi iddar umi igga marra jjɛayef nni. Ad ittwaneɣ nican, idammen nnes ad xas iřin.”
EZE 18:14 “Xzar, [mařa] ad dd-yejj mmis nni ittwařa marra ddnub nni ittegg babas uca ixezzar [waha] [am] netta [s yixef nnes] war ittegg timesřayin nni,
EZE 18:15 [ixs ad yini] war ittett x idurar, war issgiɛɛid tiṭṭawin nnes ɣar imeyḍa [n l’aṣnam] n taddart n Israil, war issexmij tamɣart n jjar nnes,
EZE 18:16 war iḥeṣṣar uřa d ijj, war imenneɛ ddiyyet, war ittkeccaḍ, ittic aɣrum nnes i wenni iǧuẓen, issdurruy i uɛaryan s warruḍ,
EZE 18:17 ittaggʷej s ufus nnes x umezřuḍ, war ikessi arriba d warbeḥ, ittegg s tsegda uca iḥeṭṭa tiweṣṣa inu, aqa mmis wanita war ittmetti zi ssibbet n řmuɛṣiyyet n babas, ad iddar s tidett.
EZE 18:18 Babas ad immet di řmuɛṣiyyet nnes, x umi igga bezzez [x iwdan] s řexcunet, ikecceḍ agřa uca igga min war iḥřin di řwesṭ n řgens nnes.”
EZE 18:19 “[Maca] kenniw teqqarem: ‘Mayemmi mmis war ikessi řmuɛṣiyyet n babas? [Minzi] mmis tuɣa ittegg řḥeqq d tsegda uca iḥḍa marra tiweṣṣa inu uca igga i-tent, netta ad iqqim iddar s tidett.
EZE 18:20 Řeɛmar nni ixḍan, ad immet. Mmis war ikessi ca řmuɛṣiyyet n babas uca babas war ikessi ca řmuɛṣiyyet n mmis. Tasegda n umsegged ad tiři x yixef nnes u tuɛeffna n uɛeffan ad tiři x yixef nnes.
EZE 18:21 [Maca] mařa aɛeffan idweř-dd zi ddnub nni igga, ad iḥḍa marra tiweṣṣa inu uca ad yegg řḥeqq d tsegda, [xenni] ad iqqim iddar s tidett, war ittmetti ca.
EZE 18:22 Marra iɛeddiyen nnes nni igga, war d as ttwaḥessben ca. S tsegda nnes nni igga, ad iddar.
EZE 18:23 Ma ad arḍiɣ s tidett řmewt n iɛeffanen?’, iqqar Sidi inu, SIDI. ‘Ma netta war [ittɣimi] iddar xmi dd ɣa idweř?
EZE 18:24 [Maca] mařa amsegged iḥeyyed x tsegda nnes uca ad igg ddeǧ ɛlaḥsab marra jjɛayef nni ittegg uɛeffan, ad igg [amenni] uřa d netta, ma [xenni] ad iqqim iddar? War tᵉttwaɛqiř [ɛad] marra tasegda nni igga. S řeɣdaret nnes i zi iɣdar u s ddnub nnes i zi iddenb, s yina ad immet.’”
EZE 18:25 “Teqqarem [ɛawed]: ‘Abrid n Sidi war iǧi ca nican!’. Sřem, [a] taddart n Israil, ma abrid inu war iǧi nican? Ma war ǧin [s tidett] aqa ibriden nwem war seggmen?
EZE 18:26 Mařa iḥeyyed umsegged x tsegda nnes uca ittegg ddeǧ u s man aya ad immet, [xenni] ad immet di ddeǧ nnes nni igga.
EZE 18:27 [Maca] mařa idweř-dd uɛeffan zi tmegga nnes tiɛeffanin nni igga uca ad igg řḥeqq d tsegda, [xenni] ad yarr řeɛmar nnes ad iqqim iddar.
EZE 18:28 Idweř ittwařa uca idweř-dd zi marra iɛeddiyen nnes nni igga. Ad iddar s tidett, war ittmetti ca.
EZE 18:29 Inni zi taddart n Israil yarennan qqaren: ‘Abrid n Sidi war iseggem!’ Ma ibriden inu war seggmen, [a] taddart n Israil? [D tidett] ma war ǧin ibriden nwem war seggmen?”
EZE 18:30 “S uya Necc ad xawem carrɛeɣ, [a] taddart n Israil, kuř ijj anect ibriden nnes, iqqar Sidi inu, SIDI. Ɛeqbem, dewřem-dd zi marra iɛeddiyen nwem, [xenni] war tᵉttiři řmuɛṣiyyet nwem d taɛenkrift i dd-yiwyen řmuɛṣiyyet i kenniw.
EZE 18:31 Nḍarem řmuɛṣiyyet nwem i zi tɛeddam. Ggem uř [nwem] d amaynu u buḥbeř [nwem] d amaynu. Maɣar i ɣa temmtem, [a] taddart n Israil?
EZE 18:32 Minzi Necc war arḍiɣ di řmewt n wenni ittxeṣṣa ad immut, [ammu i] iqqar Sidi inu, SIDI, dewřem-dd uca ddarem.”
EZE 19:1 “Cek [xenni], sgeɛɛed ijj n yeẓri n wecḍan x řḥukkam n Israil
EZE 19:2 uca ini: ‘Mammec tuɣa tezzeř yemmatwem am teyradt tezzeř jar teyradin! Tessyem imeẓyanen nnes jar wayraden imeẓyanen!
EZE 19:3 Nettat tesyem ijj zeg imeẓyanen nnes. Wanita idweř d ayrad ameẓyan, iřmed ad icarreg taymart nnes, ɛad iwdan icca i-ten.
EZE 19:4 Řami sřin řegnus man aya, ḥebbsen t deg weḥfur n turṣuḍi nsen, uca iwyen t s tsennarin deg wenzar nnes ɣar temmurt n Miṣra.’
EZE 19:5 ‘Umi teẓra aqa řayas nnes iruḥ, ibḍeř, xenni teksi ijjen zeg imeẓyanen nnes, uca igga i-t d ayrad ameẓyan.
EZE 19:6 Wanita tuɣa iggur jar wayraden, uca idweř d ayrad d ameẓyan, iřmed ad icarreg taymart nnes, ɛad iwdan icca i-ten.
EZE 19:7 Netta iɣṣeb tijjař nsen, yareddeǧ tineddam nsen, ařami tsusem temmurt d marra min dayes zi ssibbet n řḥess n uzehhar nnes.
EZE 19:8 Xenni ssbedden xas řegnus zi temmura i d as dd-innḍen uca bezzɛen xas tracca nsen, ṭṭfen t deg weḥfur nsen n turṣuḍi.
EZE 19:9 Nitni bellɛen xas deg ijj n řeqfez s tsennarin deg wenzaren nnes, ḥima ad t awyen ɣar ujeǧid n Babil. Nitni iwyen t di lqelɛat, ařami war ittwaseř ɛad tmijja nnes x idurar n Israil.’
EZE 19:10 ‘Tuɣa yemmac am tzayart di řweqt n arraḥet nnec, tᵉttwaẓẓu ɣar waman aṭṭas. Tuɣa s řɣiǧet u s waṭṭas n tseḍwin, zi ssibbet n waṭṭas n waman.
EZE 19:11 Tuɣa ɣares tiseḍwin ijehden am izeǧaḍ n řḥukkam. Trunku n yijjen zzayes igeɛɛed jar iseynuten, uca s řuɛřa nnes ittwaẓar nican, s waṭṭas n řefruɛ nnes.
EZE 19:12 Maca tazayart tᵉttwaqřeɛ s ijj n uduqqez n wesɛar, temmenḍar ɣar temmurt, uca asemmiḍ zi ccarq yuẓeɣ řɣiǧet nnes. Arẓen uca uẓɣen řefruɛ nnes ijehden, timessi tecca i-ten.
EZE 19:13 Řexxu ẓẓun t di  řexřa, deg ict n temmurt yuẓɣen d iffuden.
EZE 19:14 Teffeɣ-dd tmessi zeg ict n tseṭṭa zi jar tzermin nnes, tecca řɣiǧet nnes, ařami war ɣares teqqim ɛad tseṭṭa ijehden uřa d azeǧaḍ maḥend ad iḥkem.’” Wa d ijj n yeẓri n wecḍan uca ad idweř d ijj n yeẓri n wecḍan [s tidett].
EZE 20:1 Deg useggʷas wiss sebɛa, deg uyur wiss xemsa, deg wass wiss ɛecra n uyur imsar belli usin-dd iryazen zeg imɣaren n Israil, maḥend ad sseqsan SIDI, uca qqimen zzati.
EZE 20:2 Yusa-dd ɣari wawař n SIDI, inna:
EZE 20:3 “[A] mmis n bnadem, siweř ak-d imɣaren n Israil, uca ini asen: ‘Ammu i iqqar Sidi inu, SIDI: Ma tusim-dd maḥend ad ayi tesseqsam? S tidett am ddareɣ Necc, war kenniw ttejjiɣ ad kidi temcawaren, [ammu i] iqqar Sidi inu, SIDI.
EZE 20:4 ‘Ma texsed ad xasen tḥekmed, ma texsed ad [xasen] tḥekmed, [a] mmis n bnadem? Scen asen jjɛayef n řejdud nsen
EZE 20:5 uca ini asen: Ammu i iqqar Sidi inu, SIDI: Deg wass nni di ixḍareɣ Israil, ssgeɛɛdeɣ Necc afus inu, [jjuǧeɣ] i zzariɛet n taddart n Yaɛqub uca ssecneɣ ixef nnes ɣarsen di temmurt n Miṣra. Necc ssgeɛɛdeɣ afus inu di ṭṭweɛ nsen, nniɣ: Necc d SIDI, AREBBI nwem.
EZE 20:6 Deg wass nni ssgeɛɛdeɣ asen afus inu [jjuǧeɣ,] maḥend ad ten ssuffɣeɣ zi temmurt n Miṣra ɣar temmurt nni ixḍareɣ Necc i nitni, [tammurt] ifeyyḍen s uɣi d tamment, aqa-tt d talwizt n marra timmura.
EZE 20:7 Nniɣ asen: Ejj kuř ijj ad immenḍar nnɛawat nnes n l’aṣnam zzat i tiṭṭawin nnes, ittxeṣṣa war ssxemmijen nitni ixef nwem s imeyḍa n l’aṣnam n Miṣra, Necc d SIDI, AREBBI nwem.’”
EZE 20:8 “[Maca] nitni ɣewwɣen xafi uca war xisen ad ɣari dd-sřen. War nḍaren nnɛawat nsen n l’aṣnam zzat i tiṭṭawin nsen [u] war jjin imeyḍa nsen n l’aṣnam [nni dd-iwyen] zi Miṣra. [Xenni] nniɣ ad xasen zeǧɛeɣ asɛar inu maḥend ad xasen kemmřeɣ lɣaḍab inu di řwesṭ n temmurt n Miṣra.
EZE 20:9 Necc ggiɣ t di ṭṭweɛ n Yisem inu ařami wanita war ittwassefsad zzat i tiṭṭawin n řegnus nni tuɣa zeddɣen jar asen, i umi secneɣ ixef inu zzat i tiṭṭawin nsen xmi ten ssuffɣeɣ zi temmurt n Miṣra.
EZE 20:10 Ssuffɣeɣ ten-dd zi temmurt n Miṣra uca nedheɣ ten ɣar řexřa.
EZE 20:11 Wciɣ asen tiweṣṣa inu uca ssargbeɣ ten x lfarayiḍ inu i zi ɣa iddar bnadem nni zzaysent i ɣa yegg.
EZE 20:12 Wciɣ asen ɛawed ussan inu n ssebt maḥend ad iřin d řeɛřamet jar ayi d nitni, ḥima ad ssnen, aqa Necc d SIDI wenni ten issqeddsen.
EZE 20:13 [Maca] taddart n Israil tɣewweɣ xafi di řexřa. Nitni war uyuren ca ɛlaḥsab tiweṣṣa inu uca mmenḍaren lfarayiḍ inu i zi ɣa iddar bnaden nni tent iggin uca nitni ssɛiǧten ussan n ssebt inu ařami nniɣ tuɣa xseɣ ad xasen farrɣeɣ asɛar inu di řexřa ḥima ad xasen qḍiɣ.
EZE 20:14 [Maca] Necc ggiɣ t di ṭṭweɛ n Yisem inu, ḥima wanita war ittwassɛiǧit ca zzat i tiṭṭawin n řegnus nni tuɣa ittwařin umi ssuffɣeɣ [taddart n Israil] zi [Miṣra].
EZE 20:15 Necc ssgeɛɛdeɣ afus inu ḍidd nsen di řexřa [uca jjuǧeɣ] aqa war ten ttawyeɣ ɣar temmurt nni d asen wciɣ, tammurt ifeyyḍen s uɣi d tamment, tenni yeǧan d talwizt n marra timmura,
EZE 20:16 minzi nitni nḍaren lfarayiḍ inu, war uyuren di tweṣṣa inu u ssɛiǧten ussan inu n ssebt, maɣar uř nsen iḍfar imeyḍa nsen n l’aṣnam.
EZE 20:17 [Maca] semḥeɣ asen di tiṭṭawin inu ařami Necc war ten areddǧeɣ u war xasen qḍiɣ di řexřa.”
EZE 20:18 “Necc nniɣ i iḥenjiren nsen di řexřa: ‘War ggurem di tweṣṣa n řejdud nwem, war ttᵉṭṭfem di lfarayiḍ nsen u war ssxemmijem ixef nwem s imeyḍa nsen n l’aṣnam.
EZE 20:19 Necc d SIDI, AREBBI nwem! Uyurem di tweṣṣa inu u ḥḍam lfarayiḍ inu uca ggem zzaysent.
EZE 20:20 Sqeddsem ussan inu n ssebt, [maḥend] ad iřin d řeɛřamet jar ayi d kenniw, ḥima ad tessnem belli Necc d SIDI, AREBBI nwem.’
EZE 20:21 [Maca] ɛad arraw [nsen] ɣewwɣen xafi: War gguren di tweṣṣa inu u war ḥḍin lfarayiḍ inu maḥend ad daysent uyuren, min zi bnadem nni tent itteggen ad zzaysent iddar. Nitni ssɛiǧten ussan inu n ssebt [ařami] nniɣ, ad xasen farrɣeɣ asɛar inu, maḥend ad asen kemmřeɣ [ammu] aɣḍab inu di řexřa.
EZE 20:22 Necc arriɣ-dd afus inu [i tuɣa isswiẓẓḍen ḍidd nsen]. Ggiɣ t di ṭṭweɛ n Yisem inu, ḥima war ittwassexmij [Isem inu] zzat i tiṭṭawin n řegnus, [maɣar] zzat i tiṭṭawin nsen ssuffɣeɣ ten-dd zi Miṣra.
EZE 20:23 [Ɛawed] ssgeɛɛdeɣ afus inu di řexřa, [jjuǧeɣ] ad ten bezzɛeɣ jar řegnus u ad ten zuzzareɣ di temmura,
EZE 20:24 minzi war gguren di lfarayiḍ inu, [maca] nḍaren tiweṣṣa inu u ssɛiǧten ussan inu n ssebt, u [minzi] tiṭṭawin nsen ḍeffarent awarni i imeyḍa n l’aṣnam n řejdud nsen.
EZE 20:25 [Xenni] Necc wciɣ asen tiweṣṣa war iḥřin d lfarayiḍ i zi war zemmaren nitni ad ddaren.
EZE 20:26 Necc ssxemjeɣ ten s tewhibin nsen umi nitni arrin marra min yarezmen řemřawet [d amezwaru] ad yekk timessi, [ggiɣ tt] ḥima ad ten teḥḥiɣ ařami ɣa ssnen aqa Necc d SIDI.”
EZE 20:27 “S uya, [a] mmis n bnadem, siweř ak-d taddart n Israil, ini asen: ‘Ammu i iqqar Sidi inu, SIDI: Uřa s man aya tuɣa řejdud nwem ttceqqafen dayi umi tuɣa dayi ɣeddaren aṭṭas.
EZE 20:28 [Řami] ten ssidfeɣ di temmurt tenni x ssgeɛɛdeɣ afus inu maḥend ad ten tt wceɣ, xezzaren nitni ɣar kuř tawrirt yuɛřan u ɣar wezɣar imcubbcen uca iwyen din tiɣarṣa nsen u qeddmen din tiwhibin nsen [i d ayi] sɛarent, u qqedmen din arriḥet nsen ittfuḥen u seyyben din tiwhibin nsen n useyyeb.
EZE 20:29 [Xenni] nniɣ asen: ‘Man řgeɛɛdet nni ɣar ɣa traḥem? Isem nnes ‘Bamah’, [ixs ad yini ‘Řgeɛɛdet’], ař ass-a.’”
EZE 20:30 “S uya, ini i taddart n Israil: ‘Ammu i iqqar Sidi inu, SIDI: Ma [war] tessxemmijem kenniw ixef nwem x simant n webrid n řejdud nwem u [war] tessefsidem uřa d kenniw ixef nwem am tḍeffaram nnɛawat nsen n l’aṣnam?
EZE 20:31 Am tessgeɛɛadem tiwhibin nwem, tessekkam iḥenjiren nwem x tmessi u tessxemmajem ixef nwem s imeyḍa nwem n l’aṣnam ař ass-a? Ma Necc [xenni] ad kenniw jjeɣ ad ayi tesseqsam, [a] taddart n Israil? S tidett am ddareɣ Necc, iqqar Sidi inu, SIDI, Necc war ttijjiɣ kenniw ad ayi tesseqsam!
EZE 20:32 Min dd-igeɛɛden di buḥbeř nwem, war ittiři, min teqqarem kenniw: Neccin ad niři am řegnus u am řaǧat n temmura umi ɣa neɛbed [ṣṣanam] n ukeccuḍ d weẓru.
EZE 20:33 S tidett am ddareɣ Necc, iqqar Sidi inu, SIDI: Necc ad xawem ṣellṭeɣ s ufus ijehden u s uɣiř isswiẓẓḍen u s ufarreɣ n wesɛar [inu]!
EZE 20:34 Maɣar Necc ad kenniw ssuffɣeɣ zi řegnus uca ad kenniw ssmuneɣ zi temmura mani di tᵉttwabezzɛem kenniw, s ufus ijehden d uɣiř isswiẓẓaḍen u s ufarreɣ n wesɛar [inu].
EZE 20:35 Ad kenniw awyeɣ ɣar řexřa n řegnus, uca din ad kenniw carrɛeɣ, udem d udem.
EZE 20:36 Am mammec ḥekmeɣ x řejdud nwem di řexřa n temmurt n Miṣra, ammu i xawem ɣa ḥekmeɣ, iqqar Sidi inu, SIDI.
EZE 20:37 Ad kenniw ssekkeɣ sadu uzeǧad [n umeksaw] uca ad kenniw ssidfeɣ di ttarbiyyet n Řɛahd.
EZE 20:38 Necc ad zzaywem zuzzareɣ̮ imɣewwaɣen d yinni xafi ittɛeddan. Necc ad ten ssuffɣeɣ zi temmurt n řɣubbiyet nsen mani zeddɣen am yibarraniyyen, [maca] war dd-ttikkwiḍen ca ɣar temmurt n Israil. [Ammu] i ɣa tessnem belli Necc d SIDI.’”
EZE 20:39 “Uca kenniw, [a] taddart n Israil, ammu i iqqar Sidi inu, SIDI, ejj kuř ijj ad yuyur ɣar imeyḍa nnes n l’aṣnam. [Maca] awarni as ad ɣari tesřem s tidett. [Xenni] war tᵉssexsaram ɛad Isem inu s tewhibin nwem d imeyḍa nwem n l’aṣnam.
EZE 20:40 Minzi x wedrar inu iqeddsen, x wedrar yuɛřan n Israil, [ammu i] iqqar Sidi inu, SIDI, din ad ayi tsexxar qaɛ taddart n Israil, marra nitni. Din ad xasen arḍiɣ uca din ad ttareɣ tiwhibin nwem n usgeɛɛed uřa d tmenzut n min ɣa tessgeɛɛdem zi marra tiwhibin nwem iqeddsen.
EZE 20:41 Necc ad xawem arḍiɣ zi ssibbet n arriḥet ittfuḥen xmi kenniw ɣa ssuffɣeɣ zi řegnus u ad kenniw ssmuneɣ zi temmura mani kenniw zuzzareɣ uca ad ttwaqeddseɣ zzaywem zzat i-t tiṭṭawin n řegnus
EZE 20:42 uca ad tessnem belli Necc d SIDI, řami kenniw dd-iwyeɣ ɛawed ɣar temmurt n Israil, ɣar temmurt x tenni umi sswiẓẓḍeɣ afus inu, [jjuǧeɣ] ad tt wceɣ i řejdud nwem.
EZE 20:43 Din ad tidarem ibriden nwem d marra timegga nwem nni zi tessxemjen ixef nwem uca kenniw ad tcarhem ixef nwem zi ssibbet n marra timegga nwem iɛeffnen i teggim.
EZE 20:44 Kenniw ad tessnem belli Necc d SIDI, řami ggiɣ akidwem di ṭṭweɛ n Yisem inu [uca] war iǧi ɛlaḥsab ibriden nwem iɛeffnen, [u war iǧi] ɛlaḥsab timegga nwem iɣeccen, [a] taddart n Israil!’, [ammu i] iqqar Sidi inu, SIDI.”
EZE 21:1 Yusa-dd ɣari wawař n SIDI, inna:
EZE 21:2 “[A] mmis n bnadem, egg udem nnec ɣar ljanub, ejj [awařen nnec] ad udumen jjihet n ljanub uca nabb ḍidd i wezɣar n yeyyar di [Temmurt n] Ljanub.
EZE 21:3 Ini i wezɣar n [Temmurt n] Ljanub: ‘Seř i wawař n SIDI: Ammu i iqqar Sidi inu, SIDI: Xzar, Necc ad ssarɣeɣ dayem ict n tmessi, tenni i ɣa iccen kuř tacejjart tazizawt u kuř tacejjart yuẓɣen. Aceɛɛař n řɛabuq war ittwaxessi u s uya ad ttwacemḍen marra iɣembab zi ljanub ař ccamal
EZE 21:4 uca marra iwdan d řmař ad ẓaren aqa Necc, SIDI, d wenni issarɣen [timessi]. War tᵉttwaxessi ca.’
EZE 21:5 Nniɣ necc: ‘A, Sidi inu, SIDI, ɛad nitni qqaren xafi: ‘Ma war issiweř netta s tḥuja n twafit [waha]?’!”
EZE 21:6 Yusa-dd ɣari wawař n SIDI, inna:
EZE 21:7 “[A] mmis n bnadem, egg udem nnec ɣar Urcalim, ejj [awařen nnec] ad udumen ḍidd i tzawiyyin Iqeddsen uca nabb ḍidd i temmurt n Israil.
EZE 21:8 Ini i temmurt n Israil: ‘Ammu i iqqar Sidi inu, SIDI: Xzar, aqa ɣarem, Necc ad dd-jebdeɣ ssif inu zeg ufurru n weɣřaf nnes uca ad qeḍɛeɣ am umsegged am uɛeffan.
EZE 21:9 Minzi ad qeḍɛeɣ am umsegged am uɛeffan zi řwesṭ nnem, s uya ad dd-iffeɣ ssif inu zeg ufurru n weɣřaf nnes, ḍidd i marra [inni ɣarsen arrimet n] weysum, zi ljanub ař ccamal,
EZE 21:10 uca marra [inni ɣarsen arrimet n] weysum ad ssnen, belli Necc, SIDI, jebdeɣ ssif inu zeg ufurru n weɣřaf. Ɛemmarṣ war [ɣares] dd-iddikkwiř.’”
EZE 21:11 “[Maca] cek, [a] mmis n bnadem, sɣunfa, sɣunfa zzat i tiṭṭawin nsen s tejɛinnatin ttwarẓent d tarzugi.
EZE 21:12 Ad imsar xmi d ac i ɣa inin: ‘Maɣar tessɣunfid [ammu]?’, aqa cek ad tinid: ‘Zi ssibbet n min sřiɣ, maɣar ad dd-yas uca kuř uř ad ifsi u marra ifassen ad heyyfen u marra buḥbeř ad yarxu u marra ifadden ad ardben am waman. Xzar, ad dd-yas uca ad yiři, [ammu i] iqqar Sidi inu, SIDI.’”
EZE 21:13 Yusa-dd ɣari wawař n SIDI, inna:
EZE 21:14 “[A] mmis n bnadem, nabb uca ini: ‘Ammu i iqqar Sidi inu, SIDI!’ Uca ini: ‘Ssif, ssif, aqa ittwasseqḍeɛ u ittwassuyda.
EZE 21:15 Ittwasseqḍeɛ maḥend ad iɣarṣ tiɣarṣa, ittwassuyda maḥend ad ilellec.’ Niɣ ittxeṣṣa i neccin ad nfarreḥ, ad nini: ‘Azeǧaḍ n řeḥkamet n mmi isseḥqar kuř akeccuḍ nneɣni?’
EZE 21:16 ‘Immewc maḥend ad ittwassuyda, maḥend ad t ṭṭfen deg ufus. Ssif ittwaqḍeɛ u ittwassuyda, maḥend ad ittwagg deg ufus n uqettař.
EZE 21:17 Sɣuyy uca trud, a mmis n bnadem, maɣar ad yiři x řgens inu, ad yiři x marra řḥukkam n Israil. Aqa mmewcen i ssif munen ak-d řgens inu. S uya, wwet x tmeṣṣaḍt nnec.’
EZE 21:18 ‘Wah, ssif ittwaqeǧeb. Maca mana, mařa azeǧaḍ nni isseḥqaren marra akeccuḍ war dd-ittiři ɛad?’, [ammu i] iqqar Sidi inu, SIDI.
EZE 21:19 ‘Cek, a mmis n bnadem, nabb, uca wwet ifassen ijj deg wenneɣni, maɣar ssif ad iwwet tnayen, wah, třata n imuren. Aqa-t d ssif n yinni ittwanɣen, ssif n umeqqran nni ittwaneɣ, ssif nni ɣarsen ittadfen,
EZE 21:20 ḥima xenni uř ad ifsi uca ad mmarenyent tɛenkrifin. Řeqḍeɛ n ssif ggiɣ t x marra tiwwura nsen. Ay, aqa ssif iwjed maḥend ad ilellec, aqa ittwajebb-dd zeg ufurru n weɣřaf maḥend ad iɣarṣ.
EZE 21:21 Smun jjehd nnec, qess ɣar ufusi, bedd, qess ɣar uzeřmaḍ, arr řeqḍeɛ nnec mani ma texsed.’
EZE 21:22 ‘Uřa d Necc ad wteɣ ifassen inu ijj deg wenneɣni uca ad ssareyyḥeɣ asɛar inu. Necc, SIDI, aqa ssiwřeɣ.’”
EZE 21:23 Yusa-dd ɣari wawař n SIDI, inna:
EZE 21:24 “Cek, [a] mmis n bnadem, egg tnayen n ibriden zi mani dd ɣa yas ssif n ujeǧid n Babil. Zeg ict n temmurt ad ffɣen nitni s tnayen idsen. Nqec ijj n uciyyar ɣar [u]beṭṭu n webrid, nqec [i-t] ɣar [u]beṭṭu n webrid ɣar tendint.
EZE 21:25 Ad tneyyced abrid s manis dd ɣa yas ssif ɣar Rabba n ayt n Ɛammun u ɣar Yahuda ař daxeř di tendint ittwassjehden: Urcalim.
EZE 21:26 Minzi ajeǧid n Babil ad ibedd ɣar mani farqen ibriden, ɣar [u]beddu n tnayen n ibriden nni maḥend ad iɛezzem. Ad izzerz fřitcat n řqewṣ, ad isseqsa řexyařat n l’aṣnam, ad ixzar tsa.
EZE 21:27 Deg ufus nnes ufusi yusa-dd wectab n ‘Urcalim!’, maḥend ad [din] yegg řeqcuɛ n wedham, maḥend ad yarzem aqemmum [nnes] s iɣuyyan n wenɣi, maḥend ad issgeɛɛed tmijja [nnes] s iɣuyyan [n umenɣi], maḥend ad igg řeqcuɛ n wedham ḍidd i tewwura, maḥend ad yegg acbar, maḥend ad igg lbarajat.
EZE 21:28 Maca man aya ad ɣarsen yiři am ugezzen iɣeccen di tiṭṭawin nsen, [maɣar nitni] aqa ɣarsen tijaǧatin imetnen, [maca] Netta ad isseɛqeř x řmuɛṣiyyet nsen, maḥend ad ttwaṭṭfen [nitni].”
EZE 21:29 “S uya, ammu i iqqar Sidi inu SIDI: ‘Minzi tesseɛqiřem x řmuɛṣiyyet nwem umi iɛeddiyen nwem ttbanen nican, xmi ttwaẓarren ddnub nwem s marra min tᵉtteggem, [wah,] minzi tsseɛqiřem [x řmuɛṣiyyet nwem], [s uya] ad kenniw ṭṭfen s ufus.’
EZE 21:30 U cek, aɛeffan iyezzmen i řmewt, [cek,] [a] řḥakem n Israil, wenni ass nnes ad dd-yas di řweqt n řeḥsab aneggaru n řmuɛṣiyyet,
EZE 21:31 ammu i [d ac] iqqar Sidi inu, SIDI: ‘Kkes areẓẓet nni, kkes ttaj nni. [Ammu] war ittiři ɛad. Min issehwan, ad ittwassuɛřa, u min issuɛřan, ad dd-ittwassehwa.
EZE 21:32 Ad arreɣ aya d řxarbet, d řxarbet, [wah,] ad t arreɣ d řxarbet. [Maca] [marra] aya war ittɣimi ɛad, [mɣir] ař dd ɣa yas wenni ɣar iǧan řḥeqq uca Necc ad as t wceɣ.’”
EZE 21:33 “U cek, [a] mmis n bnadem, nabb uca ini: ‘Ammu i iqqar Sidi inu, SIDI, x ayt n Ɛammun u x useḥqar nsen!’ Ini: ‘Ssif, ssif ittwajebd-dd, ittwassuyda maḥend ad yecc, maḥend ad ilellec, ...
EZE 21:34 - waxxa nitni ttwařan i cek ijj n řewḥiy war iǧin, waxxa nitni ttgezznen i cek ijj n ugezzen issxarriqen - ... aqa ssif ittwajebd-dd maḥend ad cek yarr ɣar irawen n iɛeffanen ittwassnuqqben nni zi dd-yusa wass nsen di řweqt n řeḥsab aneggaru n řmuɛṣiyyet.
EZE 21:35 Arr ssif ɣar ufurru n weɣřaf nnes. Deg wemcan mani dd-tᵉttwaxeřqed, di temmurt n ř’aṣeř nnec ad cek ḥekmeɣ.
EZE 21:36 Ad xak zeǧɛeɣ wesxeḍ inu. S tmessi n uduqqez inu n ufugem ad xak suḍeɣ uca ad cek ggeɣ deg ufus n ayt n bu-ɣezzu nni issnen ad deǧen.
EZE 21:37 Ad tiřid d macca i tmessi, idammen nnec ad ten ssizzřen di řwesṭ n temmurt. War tᵉttiři qaɛ řidaret dayek, maɣar Necc, SIDI, aqa ssiwřeɣ.’”
EZE 22:1 Yusa-dd ɣari wawař n SIDI, inna:
EZE 22:2 “Cek, [a] mmis n bnadem, ma texsed ad tḥekmed, ma texsed ad tḥekmed x Tendint n idammen? Scen as [xenni] jjɛayef nnes,
EZE 22:3 ini: ‘Ammu i iqqar Sidi inu, SIDI: [Cem], [a] tandint, tenni issizzřen idammen di řwesṭ nnes, ařami dd-tiweḍ řweqt nnes, [a] tandint, tenni iggin imeyḍa n l’aṣnam x yixef nnes maḥend ad zzaysen tessexmej ixef nnes!
EZE 22:4 S idammen nni tessizzřed, tdewřed s umarwas u s imeyḍa nnem n l’aṣnam nni teggid, aqa tessxemjed ixef nnem, tessiwḍed ussan nnem uca trehhged ař iseggʷusa nnem. X uya wciɣ cem i řegnus i useḥqar u i temmura i ustehzi.
EZE 22:5 Inni yudsen d yinni iggʷejen ad zzayem stehzan: [’Cem, a] tamexmujt n yisem, [cem, tenni] iccuren s uṣeddeɛ!
EZE 22:6 Xzar, řḥukkam n Israil tuɣa aten dayem, kuř ijj x řeḥsab jjehd nnes, maḥend ad sizzřen idammen.
EZE 22:7 Sseḥqaren babatsen d yemmatsen dayem, ggin s uɣiř ak-d ubarrani di řwesṭ nnem, ḥṣaren ayujiř d tajjač i dayem.
EZE 22:8 Min iǧan iqeddsen i Necc, aqa tesseḥqared t, uca ussan n ssebt inu tessɛiǧted i-ten.
EZE 22:9 Imceqqafen tuɣa aten dayem maḥend ad ssizřen idammen. Nitni qqimen ccin x idurar nni [dinni] ɣarem, aqa ggin řefḍiḥet di řwesṭ nnem.
EZE 22:10 Nitni ssɛarran řɛar n babam nni din ɣarem, u tenni tuɣa texmej umi xas idammen, aqa ɣeṣben tt dayem.
EZE 22:11 Ijjen igga nnɛi ak-d tmeṭṭut n wajjar nnes, uca ijjen nneɣni issexmej tamɣart n mmis, [ittegg] řefḍiḥet [akides], uca [ɛawed] ijjen nneɣni iɣṣeb učmas, yeǧis n babas, [din] ɣarem.
EZE 22:12 Aqa ṭṭfen din ɣarem arrecwet, maḥend ad ssizzřen idammen, teksid arriba d arbeḥ uca tbeɛɛjed ajjar nnec s uɣiř, maca tᵉttud ayi!’, [ammu i] iqqar Sidi inu, SIDI.”
EZE 22:13 “Xzar, wtiɣ ifassen inu ijj deg wenneɣni zi ssibbet n ubeɛɛej i teggid u zi ssibbet n idammen nni issizzřen di řwesṭ nnem.
EZE 22:14 Ma ad iqqim uř nnem imten? Ma ad iřin ifassen nnem jehden deg wussan nni di ɣa ggeɣ [min iǧan] ḍidd nnem. Necc, SIDI, aqa ssiwřeɣ uca ad t ggeɣ.
EZE 22:15 Ad cem zuzzareɣ jar řegnus, ad cem bezzɛeɣ x temmura, u ad kemmřeɣ taxmuji nnem qaɛ.
EZE 22:16 [Ammu] i ɣa tᵉttwassɛiǧted zeg yixef nnem zzat i tiṭṭawin n řegnus u cem ad tessned belli Necc d SIDI.”
EZE 22:17 Yusa-dd ɣari wawař n SIDI, inna:
EZE 22:18 “[A] mmis n bnadem, inni n taddart n Israil dewřen ayi am kuffu. Marra nitni dewřen d nnḥas d istanyu d wuzzař d řexfif di řwesṭ n tefqunt, aqa aten dewřen kuffu n nnuqart.”
EZE 22:19 “S uya, ammu i iqqar Sidi inu, SIDI, minzi marra kenniw tdewřem am kuffu, s uya, xzar, Necc ad kenniw ssmuneɣ di Urcalim.
EZE 22:20 Axmi yarwen nnḥas d istanyu d wuzzař d řexfif di tefqunt, ḥima ad xasen ceɛɛřen timessi maḥend ad ssfesyen man aya [marra], ammu i [kenniw] ɣa ssmuneɣ deg weɣḍab inu u deg wesɛar inu. Ad kenniw ssarseɣ dinni uca ad kenniw ssfesyeɣ.
EZE 22:21 Necc ad kenniw ssmuneɣ uca ad xawem suḍeɣ s tmessi n uduqqez inu [n ufugem] ařami kenniw ad tᵉttwafesyem di řwesṭ nnes.
EZE 22:22 Axmi ssfesyen nnuqart di tefqunt, ammu i ɣa tᵉttwassfesyem kenniw dayes uca ad tessnem aqa Necc, SIDI, ssfarɣeɣ xawem asɛar inu.”
EZE 22:23 Yusa-dd ɣari wawař n SIDI, inna:
EZE 22:24 “[A] mmis n bnadem, ini i [temmurt]: ‘Cem d ict n temmurt i war ittwassizdigen, [ict n temmurt] i war ittwasuffen s wenẓar ijehden deg wass n wesxeḍ.
EZE 22:25 Aqa din ict n tmeɛmuč n inabiyyen [nnes] di řwesṭ nnes. Am weyrad izehharen isarḍ taymart nnes, [ammu i] ccin nitni řeɛmur. Kksen [min iǧan d] taxabect d min iɣřan. Nitni arnin tijjař nnes di řwesṭ nnes.
EZE 22:26 Ikehhanen nsen ssɛiǧiten Ccariɛa inu uca ssxemmajen timesřayin inu iqeddsen. Nitni war farrzen ca jar min iqeddsen d min ittwassɛiǧten, war sscanan ca lfarq jar min ixemjen d min izdigen uca ttbellaɛen uřa d tiṭṭawin nsen i wussan inu n ssebt uca [ammu] ttwassɛiǧiteɣ di řwesṭ nsen.
EZE 22:27 Řḥukkam nnes di řwesṭ nnes ggin am wuccanen nni icarrgen taymart maḥend ad ssizzřen idammen u maḥend ad areddǧen řeɛmur, ḥima ad ṭṭfen arbeḥ war iḥřin.
EZE 22:28 Inabiyyen nnes dřin ten s jjiř yuẓɣen. Nitni ttwařan iweḥḥan war iǧin uca ssawařen ɣarsen s tgezzant issxarriqen. Nitni qqaren: Ammu i iqqar Sidi inu, SIDI!, [am] SIDI tuɣa war ini walu.
EZE 22:29 Řgens n temmurt igga bezzez [x iwdan] s řexcunet, keccḍen takeccaḍt, ḥeṣṣaren řmeskin d umezřuḍ, uca deǧen abarrani břa ma [ɣarsen yiři] řḥeqq.
EZE 22:30 Arzuɣ jar asen ijj n weryaz nni i ɣa issbedden ijj n řḥiḍ uca ad ibedd di tazzit di ṭṭweɛ n temmurt ařami war tt ttaredǧeɣ, maca war t ufiɣ.
EZE 22:31 [Xas uca] ssfarɣeɣ xasen asxeḍ inu. S tmessi n uduqqez inu [n ufugem] qḍiɣ xasen, abrid nsen arriɣ t x uzeǧif nsen!’, [ammu i] iqqar Sidi inu, SIDI.’”
EZE 23:1 Yusa-dd ɣari wawař n SIDI, inna:
EZE 23:2 “[A] mmis n bnadem, tuɣa [din] tnayen n temɣarin, yessis n ict n temɣart.
EZE 23:3 Nitenti ssfesdent ixef nsen di Miṣra, di temẓi nsent ssfesdent ixef nsent. Din tuɣa ɛebzent deg idmaren nsent uca din ḥadan ibbac nsent iɛuzryen.
EZE 23:4 Ismawen nsent tuɣa Uhula, tameqqrant nsent, d učmas Uhuliba. Nitenti dewřent inu uca urwent iḥenjiren d tḥenjirin. Ina d ismawen nsent: Samarya d Uhula, u Urcalim d Uhuliba.
EZE 23:5 Uhula tessefsed ixef nnes ɣari u teɛceq inni tt ittexsen, ayt n Accur, jjiran [nnes],
EZE 23:6 [iryazen] nni arḍen arruḍ adeḥmi, lwulat d imḍebbaren, marra iḥudriyyen icennɛen, imnayen nni yenyin s uyis.
EZE 23:7 S farq-ccɣeř nnes tewca ixef nnes i nitni, ɣar řemxeyyar n ayt n Accur, ɣar marra nitni uca nettat tᵉttwassexmej s marra wi tᵉttexs, s marra imeyḍa nsen n ṣṣanam.
EZE 23:8 Nettat war tejji farq-ccɣeř nnes ak-d Imiṣriyyen, minzi di temẓi nnes ṭṭsen akides uca ḥadan ibbac nnes iɛuzryen uca ssfarrɣen xas farq-ccɣeř nsen.”
EZE 23:9 “S uya wciɣ tt deg ufus n yinni tuɣa tt ittexsen, deg ufus n ayt n Accur i tuɣa teɛceq.
EZE 23:10 Nitni ssɛarran řɛar nnes uca kksen iḥenjiren nnes d tḥenjirin nnes uca nɣin tt s ssif. Tedweř as ijj n yisem war icniɛ jar temɣarin uca nitni ssiwḍen xas řeḥkamat.”
EZE 23:11 “[Umi] teẓra man aya učmas, Uhuliba, aqa tarni ɛad deg weɛceq nnes uca tarni uřa di farq-ccɣeř nnes ktar x farq-ccɣeř n učmas.
EZE 23:12 Nettat teɛceq ayt n Accur, lwulat d imḍebbaren, jjiran nni yarḍen arruḍ d lemliḥ qaɛ, imnayen nni yenyin x yeysan, marra iḥudriyyen icennɛen.
EZE 23:13 Ẓriɣ aqa nettat tessexmej ixef nnes. Nitenti s tnayen idsent uyurent abrid d ijjen.
EZE 23:14 [maca] nettat tarni [ɛad] di farq-ccɣeř nnes. [Umi] teẓra iryazen, ḥenncen ten x řḥiḍ, tṣawar n yeryazen, arcamen di tintat tizeggʷaɣin,
EZE 23:15 beysen s webyas ɣar tejɛinnatin nsen, s ireẓẓat s tintat ifarqen x izeǧifen nsen, marra ɣarsen ccuf am yineɣrafen [n řɛeskar], arewsen di ayt n Babil, [iryazen] zi [temmurt n] Ikaldaniyyen, tammurt mani xeřqen.
EZE 23:16 Ammu i tedweř nettat tᵉttexs i-ten umi tiṭṭawin nnes ẓrint [ten] uca nettat tessekk ɣarsen ireqqasen, ɣar [temmurt n] Ikaldaniyyen.
EZE 23:17 Usin-dd ɣares ayt n Babil maḥend ad ṭṭṣen akides di qama n tmexsa uca ssxemjen tt s farq-ccɣeř nsen uca nettat tessexmej ixef nnes zzaysen. [Xenni] iggʷej xasen řeɛmar nnes.
EZE 23:18 Tessefsed nettat ixef nnes s bṭayṭay uca tessɛarra řɛar nnes. [Xenni] iggʷej xas řeɛmar inu am mammec tuɣa iggʷej řeɛmar inu uřa x učmas.
EZE 23:19 Tessefsed ixef nnes aṭṭas umi teɛqeř x wussan n temẓi nnes řami tuɣa tessefsed ixef nnes di temmurt n Miṣra.
EZE 23:20 Nettat teɛceq inni tt ittexsen, inni aysum nsen am weysum n iɣyař u inni adɛaq nsen am wedɛaq n iysan.
EZE 23:21 Aqa teɛqeb-dd ɣar řefḍihet n temẓi nnem, ařami Imiṣriyyen ḥadan idmaren nnem n temẓi.”
EZE 23:22 “S uya, Uhuliba, ammu i iqqar Sidi inu, SIDI: ‘Xzar, Necc ad xam ssekkareɣ inni cem ittexsen i x tuɣa iggʷej řeɛmar nnem uca ad ggeɣ ad xam dd-asen zeg wenneḍ nnem:
EZE 23:23 tarwa n Babil d marra Ikaldaniyyen, imeḥḍayen d imcennɛen d tarwa n taṣiřet u marra ayt n Accur akidsen, iḥudriyyen ijebbden meẓri, lwulat, marra nitni d imḍebbaren, ineɣrafen [n řɛeskar] d yeryazen s yisem, aqa marra nitni d imnayen inni yenyin x yeysan.
EZE 23:24 Nitni ad xam dd-usin s ikarruten i umenɣi ak-d tjarrarin iqarqben u s ijj n wegraw n řegnus, s tseddariyin [n uɛeskari] timeqqranin d tseddariyin timeẓyanin, uřa s lkask x uzeǧif. Nitni ad ssbedden ixef nsen deg wenneḍ nnem u Necc ad asen wceɣ ddeɛwet u nitni ad cem ḥekmen ɛlaḥsab ccariɛa nsen.
EZE 23:25 Necc ad ggeɣ tusmi inu [iqeddsen] ḍidd i cem uca nitni ad zzayem ggen s wesɛar. Nitni ad qqsen tinzarin nnem d tiṭṭawin nnem uca min zzayem iqqimen ad iwḍa s ssif. Nitni ad kksen iḥenjiren nnem d yessim nnem uca min iqqimen ad ittwacc s tmessi.
EZE 23:26 Ad kksen arruḍ nnem uca ad kksen řehzuṭ nnem.
EZE 23:27 [Ammu] i ɣa ssbeddeɣ řefḍiḥet nnem uřa d farq-ccɣeř nnem zi temmurt n Miṣra uca war ɣarsen tessgiɛɛded ɛad tiṭṭawin nnem u war tidared ɛad Miṣra.’
EZE 23:28 Minzi ammu i iqqar Sidi inu, SIDI: ‘Xzar, Necc ad cem ggeɣ deg ufus n yinni cem icarrhen, deg ufus n yinni i x tuɣa iggʷej řeɛmar nnem.
EZE 23:29 Ad zzayem ggen am wecrah nsen u ad kksen marra i umi tarbred uca ad cem jjen awarni asen tᵉttwaɛarrid d tuɛaryant ařami ittwaɛarra řɛar n farq-ccɣeř nnem uřa d řefḍihet nnem d farq-ccɣeř nnem.
EZE 23:30 Ad zzayem ggen aya minzi teḍfared řegnus am iggur bnadem awarni i temɣart n farq-ccɣeř u minzi tessxemjed ixef nnem s imeyḍa n ṣṣanam nsen.
EZE 23:31 Tuyured deg webrid n učmam, uca ad am wceɣ řkas nnes deg ufus nnem.’”
EZE 23:32 “Ammu i iqqar Sidi inu, SIDI: ‘Ad teswed řkas n učmam wenni yuǧɣen u iwesɛen, ařami řqedd nnes ad yarr řɛedyan ad zzayem dehcen s řḥegra u ad zzayem stehzan.
EZE 23:33 Ad teccured s wescar d wecḍan. Řkas n učmam Samarya d ijj n řkas n unexřiɛ d wareddeǧ.
EZE 23:34 Ad t teswed uca ad t tẓemmed, ad tɣezzed cquf nnes uca ad tqebced zzayes idmaren nnem, minzi Necc nniɣ t!’, ammu i iqqar Sidi inu, SIDI.
EZE 23:35 ‘S uya, ammu i iqqar Sidi inu, SIDI: ‘Umi dayi tᵉttud uca temmenḍared ayi awarni i weɛrur nnem, s uya ittxeṣṣa cem ad tarbud s yixef nnem uřa d řefḍiḥet nnem d farq-ccɣeř nnem.’”
EZE 23:36 Inna ayi SIDI: “[A] mmis n bnadem, ma texsed ad tcarrɛed Uhula d Uhuliba? Ini asent [xenni] jjɛayef nsent.
EZE 23:37 Minzi zennant uca idammen řeṣqen ɣar ifassen nsent u zennant ak-d imeyḍa n l’aṣnam nsent. Sennej i uya arrint iḥenjiren nsent, inni urwent i Necc, ad ẓwan timessi d macca i imeyḍa n l’aṣnam nsent.
EZE 23:38 Marra aya ggint dayi: deg wass nni ssxemjent nitenti Zzawect inu Iqeddsen uca ssɛiǧtent ussan inu n ssebt.
EZE 23:39 Minzi umi ɣarṣen i tarwa nsent i imeyḍa nsent n l’aṣnam, usint-i-dd deg wass nni simant nnes di Zzawect inu Iqeddsen maḥend ad tt ssɛiǧtent. Xzar, ammu i ggint di řwesṭ n Taddart inu.
EZE 23:40 Ɛad ssekkent x yeryazen i dd-yusin zi řaggʷaj. Ssekken areqqas ɣarsen, u xzar, usin-dd nitni, inni i x tessirded ixef nnem, i x tkulared tiṭṭawin nnem uca thezṭed s telwizt.
EZE 23:41 Teqqimed x ijj n řectu yecna, tuɣa zzates ṭṭabřa isswejden i x tessarsed řebxur inu d zzect inu.
EZE 23:42 [Řami] issusem řḥess n řɣaci inhewřen [nni din] ɣares, ttwanedhen iskarjiyyen zi řexřa ɣar yeryazen nni [iǧan] zi řɣaci n iwdan, uca nitni ggin timeqyasin ɣar ifassen nsent uřa d ijj n tajj izewwqen x izeǧifen nsent.
EZE 23:43 [Xenni] nniɣ Necc: Aqa aten zennan ak-d ict n temɣart n farq-ccɣeř dduysaren. Řexxu farq-ccɣeř nnes simant nnes ad issefsed ixef nnes uca nettat [tuyur akides dayes].
EZE 23:44 Nitni udfen xas am udfen x ict n temɣart n farq-ccɣeř. Ammu udfen x Uhula u x Uhuliba, timɣarin nni ittwafeḍḥen.
EZE 23:45 Iryazen iseggden ad tent ḥekmen ɛlaḥsab řḥeqq n tinni izennan u ɛlaḥsab řḥeqq n tinni issizzařen idammen, minzi nitenti d timɣarin izennan uca idammen řeṣqen ɣar ifassen nsent.”
EZE 23:46 “Minzi ammu i iqqar Sidi inu, SIDI: ‘Necc ad xasent ssekkareɣ ijj n wegraw uca ad tent arreɣ d [ict n řqecɛet n] unexřiɛ d takeccaḍt.
EZE 23:47 Agraw n řgens ad tent yarjem uca ad tent qeḍɛen s řesyuf. Iḥenjiren nsent d tḥenjirin nsent ad ten nɣen uca ad sscemḍen tudrin nsent s tmessi.
EZE 23:48 [Ammu] i ɣa ssbeddeɣ řefḍayeḥ nsent di temmurt ařami ɣa ttwaɛeřment marra timɣarin uca war tteggent ɛad am řefḍayeḥ nsent.
EZE 23:49 [Ammu i] xakent ɣa ggen řefḍiḥet nkent uca ad tarbunt ddnub n [weɛbed n] imeyḍa nkent n l’aṣnam uca ad tessnent, aqa Necc Sidi d SIDI!’”
EZE 24:1 Yusa-dd ɣari wawař n SIDI deg useggʷas wiss tesɛa, deg uyur wiss ɛecra, deg wass wiss ɛecra n uyur, inna:
EZE 24:2 “[A] mmis n bnadem, ari i yixef nnec isem n ass-a, [isem n] ass n yiḍa. Deg wass-a nnit ad iḥṣar ujeǧid n Babil Urcalim.
EZE 24:3 Siweř ijj n umedya i taddart iɣewwɣen nni, ini asen: ‘Ammu i iqqar Sidi inu, SIDI: Egg ict n teydurt, egg i-tt uca kebb dayes aman.
EZE 24:4 Egg dayes tifettutin n weysum, marra tifettutin icnan, tameṣṣaḍt d teɣruḍt, ɛemmar i-tt s yeɣsan d lemliḥ qaɛ.
EZE 24:5 Ksi lemliḥ n wuǧi uca arr uřa d akeccuḍ sadu nsen. Ejj ad sehden marra mliḥ ařami ɛad iɣsan nnes ad dayes ttwanennan.’”
EZE 24:6 “S uya, [ammu i] iqqar Sidi inu, SIDI: ‘Uct x tendint n idammen! taydurt i zi řexmej nnes ɛad dayes, tenni zi war yekkis řexmej nnes! Kkes zzayes tafettut awarni i tfettut nneɣni břa ad xas teggid taqedduḥt.
EZE 24:7 Minzi idammen nnes aqa di řwest nnes, tessizeř i-ten x ict n teṣḍart taqeccart. War ten tessizziř x temmurt maḥend ad ten teddiř s ucař.
EZE 24:8 Ḥima ad ittwassekkar wesɛar, ḥima ad yiři wenqam, ggiɣ idammen i tessizzeř nettat x teṣḍart taqeccart, ḥima war ddařen idammen nnes.’”
EZE 24:9 “S uya, ammu i iqqar Sidi inu, SIDI: ‘Uct x tendint n idammen! Necc s Yixef inu ad ggeɣ aqellij n ukeccuḍ i uceɛɛař n tmessi imɣar!
EZE 24:10 Arni akeccuḍ, ejj timessi ad tareɣ aṭṭas, cennef aysum mliḥ uca ejj axeǧeḍ n řebẓar ad ittexttex mliḥ uca ejj iɣsan ad cemḍen.
EZE 24:11 Arr xenni taydurt ixwan ɛawed x řefḥem nnes itteḥduduqen, ḥima ad iḥma ad icmeḍ ddra nnes n nnḥas uca ad tefsi zzayes texmuji i dayes iǧan u xenni ad ittwaqḍi řexmej.
EZE 24:12 Marra amarret aqa-t di baṭeř. Řexmej nnes ifeyyḍen war dd-iffiɣ zzayes. Arr řexmej nni di tmessi!
EZE 24:13 Di texmuji nnem [teǧi] řefḍiḥet nnem, minzi Necc tuɣa xseɣ ad cem ssizedgeɣ uca xenni war tᵉttwassizdiged. X uya war tᵉttwassizdiged zi řexmej nnem ař xam i ɣa ssiwḍeɣ asɛar inu.
EZE 24:14 Necc, SIDI, ssiwřeɣ. Ad iffeɣ u Necc ad t ggeɣ. War semḥeɣ deg imerwusa u war zziǧzeɣ u war ndimeɣ. Ad xam ḥekmen ibriden nnem d tmegga nnem!’, ammu i iqqar Sidi inu, SIDI.”
EZE 24:15 Yusa-dd ɣari wawař n SIDI, inna:
EZE 24:16 “[A] mmis n bnadem, xzar, s ict n tecti Necc ad kesseɣ meẓri nnec zzat i tiṭṭawin nnec. War ttᵉttru, war ttejji ad uzzřen imeṭṭawen nnec.
EZE 24:17 Sɣuyy deg uhedden, war ceṭṭen x umettin. Qqen areẓẓet nnec xak uca egg tisiřa nnec deg iḍaren nnec, u war ttřeḥḥif acřaɣem ɣar uyencic niɣ ad tecced aɣrum nni dd ɣa yawyen iwdan [i wecḍan].”
EZE 24:18 Ɣar tuffut ssiwřeɣ i řgens u ɣar tmeddit temmut tmeṭṭut inu u di twecca ggiɣ am mammec i d ayi ittwaweṣṣa.
EZE 24:19 Inna ayi řgens: “Ma war texsed ad aneɣ tessecned min ɛnant tmesřayin-a, mayemmi i tegged ammu?”
EZE 24:20 Necc nniɣ asen: “Yusa-dd ɣari wawař n SIDI, inna:
EZE 24:21 ‘Ini i taddart n Israil: Ammu i iqqar Sidi inu, SIDI! Xzar, Necc ad ssɛiǧteɣ Zzawect inu Iqeddsen [tenni d] aɛuǧi n jjehd nwem d umeẓri n tiṭṭawin nwem d řehzuṭ i řeɛmar nwem, uřa d iḥenjiren nwem d tḥenjirin nwem nni tejjim din ad wḍan s ssif.
EZE 24:22 [Xenni] ad teggem am mammec ggiɣ Necc. War tᵉttřeḥḥifem acřaɣem ɣar uyencic uca aɣrum [i dd-yiwyen] iryazen, war [t] tᵉttettem.
EZE 24:23 Areẓẓat nwem ad iřint x izeǧifen nwem u sandaliyat nwem deg iḍaren nwem. War tceṭṭnem u war tᵉttrum. Ad tᵉteḥḥam di řmuɛṣiyyet nwem uca ad tweḥweḥem ijjen x wenneɣni.
EZE 24:24 Ammu i ɣa yiři Ḥizqiyal d řeɛřamet n řeɛjeb i kenniw. Ad teggem nican am mammec igga netta. Xmi dd ɣa yas ddegga, ad tessnem, belli Necc Sidi, d SIDI.’”
EZE 24:25 “Uca cek, [a] mmis n bnadem, ma war ittiři aqa deg wass i zzaysen i ɣa kesseɣ lburj nsen, řefraḥet x telwizt nsen, uřa d meẓri n tiṭṭawin nsen d iḥenjiren d tḥenjirin nsen nni yarebbun nitni deg wuř,
EZE 24:26 aqa deg wass nni simant nnes ad ɣarek dd-yas ijjen wenni yarewřen maḥend ad yegg tnayen n imezzuɣen nnec ad sřen [uya].
EZE 24:27 Deg wass nni ad yarzem uqemmum nnec ak-d [uqemmum] n wenni yarewřen uca ad tessiwřed, war tᵉttiřid ɛad d aynaw. Cek ad asen tiřid d řeɛřamet n řeɛjeb uca nitni ad ssnen belli Necc d SIDI.”
EZE 25:1 Yusa-dd ɣari wawař n SIDI, inna:
EZE 25:2 “[A] mmis n bnadem, arr udem nnec ɣar ayt n Ɛammun uca nabb xasen.
EZE 25:3 Ini i ayt n Ɛammun: ‘Sřem i wawař n Sidi inu, SIDI! Ammu i iqqar Sidi inu, SIDI: Umi tennid ‘Ya, ayuz!’ x Zzawect inu Iqeddsen umi tt ssɛiǧten, u x temmurt n Israil umi tt areddǧen, uřa x taddart n Yahuda řami ten iwyen ɣar lmenfa,
EZE 25:4 s uya, xzar, Necc ad wceɣ cem [a, tammurt n Ɛammun] d tasɣart i yinni dd-yusin zi ccarq uca nitni ad ggen řemrageḥ nsen dayem uca ad arren tizeddiɣin nsen dayem. Nitni ad ccen řɣiǧet nnem uca ad swen aceffay nnem.
EZE 25:5 Necc ad ggeɣ Rabba d amcan n arraḥet i iřeɣman uca [tammurt n] ayt n Ɛammun d ddmani n wareyyeḥ i wuǧi uca kenniw ad tessnem belli Necc d SIDI.’
EZE 25:6 Minzi ammu i iqqar Sidi inu, SIDI: ‘Umi tewtid ifassen nnec ijj deg wenneɣni [s řefraḥet], tedzed s uḍar u tfarḥed s marra nnfaxet nnec di řeɛmar x temmurt n Israil,
EZE 25:7 s uya, xzar, Necc ad sswiẓẓḍeɣ afus inu ḍḍid nnec uca ad cek arreɣ d takeccaḍt i řegnus u ad cek qeḍɛeɣ zi jar řegnus uca ad cek teḥḥiɣ zi temmura. Ad cek areddǧeɣ uca ad tessned aqa Necc d SIDI.’”
EZE 25:8 “Ammu i iqqar Sidi inu, SIDI: ‘Umi Mu’ab d Saɛir qqaren: Xzar, taddart n Yahuda [teǧa] am marra řegnus!,
EZE 25:9 s uya, xzar, Necc ad arzmeɣ aɣezdis n zzat n Mu’ab, zi tneddam, zi tneddam nnes nni [iǧan] ɣar ṭṭarf qaɛ [n temmurt nnes], tinni d talwizt n temmurt: Bayt-Yacimut, Baɛl-Maɛun d Qaryatayim.
EZE 25:10 Necc ad tent wceɣ d tasɣart i ayt n ccarq [jmiɛ] ak-d [temmurt n] ayt n Ɛammun, ḥima war tᵉttiři [ɛad] řidaret deg ayt n Ɛammun jar řegnus.
EZE 25:11 Ad ssiwḍeɣ řeḥkamat x Mu’ab u nitni ad ssnen, belli Necc d SIDI.’”
EZE 25:12 “Ammu i iqqar Sidi inu, SIDI: ‘Umi Idum igga s nneqmet waha ḍidd i taddart n Yahuda uca umi idweř daysen řɛib aṭṭas umi zzaysen neqmen,
EZE 25:13 s uya, ammu i iqqar Sidi inu, SIDI, ad sswiẓẓḍeɣ afus inu ḍidd i Idum uca ad zzayes qeḍɛeɣ bnadem d řmař uca ad t ggeɣ d řxirbet zi Tayman, uca ad wḍan s ssif ař Dadan.
EZE 25:14 Necc ad ssiwḍeɣ nneqmet inu x Idum s ufus n řgens inu Israil. U nitni ad ggen ak-d Idum ɛlaḥsab aɣḍab inu u ɛlaḥsab asɛar inu, ad ssnen nneqmet inu!’, iqqar Sidi inu, SIDI.”
EZE 25:15 “Ammu i iqqar Sidi inu, SIDI: ‘Umi Ifilisṭiniyyen ggin s nneqmet u neqmen s nnfaxet n wuř umi areddǧen nitni zi řeɛdawet ittduman,
EZE 25:16 s uya, ammu i iqqar SIDI inu, SIDI: Xzar, Necc ad sswiẓẓḍeɣ afus inu ḍidd i Ifilisṭiniyyen uca ad qeḍɛeɣ Ikaritiyyen uca ad areddǧeɣ min iqqimen x tma n řebḥar.
EZE 25:17 Nneqmat timeqqranin s leɛqayeb iqesḥen ad daysen ggeɣ u nitni ad ssnen belli Necc d SIDI, xmi ɣa kemmřeɣ nneqmet inu daysen.’”
EZE 26:1 Deg useggʷas wiss ḥiṭɛac, deg wass amezwaru n uyur imsar belli yusa-dd ɣari wawař n SIDI, inna:
EZE 26:2 “[A] mmis n bnadem, umi tenna [tendint n] Ṣur x Urcalim: ‘Ya ayuz, aqa tᵉttwareẓẓa, tawwart n řegnus tᵉttwarzem ɣari. Ad ɣari yiři [wagřa] aṭṭas, umi nettat tᵉttwareddeǧ [řexxu]!’,
EZE 26:3 s uya, ammu i iqqar Sidi inu, SIDI: ‘Xzar, Necc ǧiɣ ḍidd nnec, [a] Ṣur! Ad xam ssekkareɣ aṭṭas n řegnus, am mammex issgeɛɛed řebḥar řemwaj nnes.
EZE 26:4 Nitni ad areddǧen řehyuḍ n [tendint n] Ṣur uca ad arẓen ṣṣumɛat nnes u Necc ad xas kkseɣ acař nnes uca ad tt arreɣ d taṣḍart taqeccart.
EZE 26:5 Ad [din] tiři di řwest n řebḥar, maḥend ad xas bezzɛen tiracciwin i tneymart n iseřman, minzi Necc nniɣ [t], ammu i iqqar Sidi inu, SIDI, u nettat ad tiři d takeccaḍt i řegnus.
EZE 26:6 Yessis nni [iǧan] deg iyyar [x řbarr], ad ttwanɣent s ssif u nitni ad ssnen belli Necc d SIDI.’”
EZE 26:7 “Minzi ammu i iqqar Sidi inu, SIDI: ‘Xzar, zi ccamal ad ssiwḍeɣ Nabuxadraṣṣar, ajeǧid n Babil, ajeǧid n ijeǧiden, x Ṣur ak-d iysan d ikarruten, ak-d imnayen u ak-d ijj n wegraw d ijj n řgens ameqqran.
EZE 26:8 Ad ineɣ s ssif yessim nni yeǧan deg iyyar, ad issbedd řqammat ḍidd nnem, ad ibna ijj n wecbar ḍidd nnem u ad issbedd ḍidd nnem ict n tesqift [ttwaggen tt s] tseddariyin timeqqranin.
EZE 26:9 Netta ad igg icarriyyen n wedham ḍidd i řeḥyuḍ nnem uca ad issḥeyyed ssumɛat nnem s řesyuf nnes.
EZE 26:10 Ad am ideř řeɛjaj n ubarru n yeysan nnes, s zzhir n imnayen d uqarqeb n tjarrarin d [ddriz n] ikarruten ad arjijen řeḥyuḍ nnem xmi ɣa yadef x tewwura nnem am dd-udfen x ict n tendint tᵉttwahdem.
EZE 26:11 S icucca n yeysan nnes ad iɛfes x ibriden nnem marra, ad ineɣ řgens nnem s ssif uca ipilaren nnem ijehden [iqeddsen] ad wḍan ɣar temmurt.
EZE 26:12 Nitni ad acaren agřa nnem ad keccḍen tasebbabt nnem, ad areddǧen řeḥyuḍ nnem, ad ɣeḍřen tudrin nnem iɛizzen. Iẓra nnem d tḥenya n ukeccud nnem d řeɛjaj nnem ad ten mmenḍaren deg waman.
EZE 26:13 [Ammu] i ɣa ssesqareɣ ddriz n iẓřan nnem uca řḥess n řgambriyat nnem war ittwaseř ɛad.
EZE 26:14 Ad cem arreɣ d taṣḍart taqeccart i wefsar n tracciwin i tneymart n iseřman. Ɛemmarṣ ad tᵉttwabnid [ɛawed], minzi Necc, SIDI, nniɣ t!, [ammu i] iqqar Sidi inu, SIDI.’”
EZE 26:15 “Ammu i iqqar Sidi inu, SIDI i [tegzirt n] Ṣur: ‘Ma war ttarjijint tegzirin s řḥess n uweṭṭu nnem, xmi ssbuɛruren inni ittwayezzmen i řmewt, xmi ɣa temsar ict n tecti ineqqen di řwest nnem?
EZE 26:16 Marra řḥukkam n řebḥar ad dd-hwan zi řekrasi nsen igellden uca ad ɣeḍřen iḥacen nsen, ad kksen arruḍ nsen iburḍaren s tintat ifarzen. Ad řeḥḥfen s řɛurret, ad qqimen x temmurt uca ad arjijen di kuř řweqt uca ad xam nxeřɛen.
EZE 26:17 Ad xam ssiřyen ijj n wezři n wecḍan, ad am inin: Mammec tᵉttwateḥḥid, a cem, tenni i di zedɣen inni dd-iffɣen zi řebḥar, a cem tandint icennɛen, tenni ijehden aṭṭas di řebḥar, cem, a Ṣur d imezdaɣ nnes, tenni itteggen arjef jar asen di marra inni dayes izedɣen.
EZE 26:18 Řexxu ad arjijent tegzirin deg wass n uweṭṭu nnem, wah tigzirin di řebḥar ad nnxeřɛent s uneggar nnec.’”
EZE 26:19 “Minzi ammu i iqqar Sidi inu, SIDI: ‘Xmi Necc ad cem yarreɣ d tandint ittwaredǧen am tneddam nni war izdiɣen, xmi xam i ɣa ssiwḍeɣ [aman] ihewřen uca [xmi] aṭṭas n waman ad cem dřen,
EZE 26:20 [xenni] ad cem dd-ssehwiɣ ak-d yinni dd-ihwan deg weḥfur [n wenḍeř], ɣar řgens n řweqt n zic. Ad cek ssarseɣ di řaǧaɣ n temmurt, di řxirbat n řweqt n zic, ɣar inni dd-ihwan deg [weḥfur n] wenḍeř, ḥima war dayem ttiřin imezdaɣ ɛad. [Maca] di temmurt n yinni iddaren ad wceɣ řɛezz.
EZE 26:21 Ad cem arreɣ d ijj n umedya n warjef uca war tᵉttiřid [ɛad]. Ad xam arzun uca war tᵉttwifid ɛemmarṣ i řebda!’, [ammu i] iqqar SIDI inu SIDI.”
EZE 27:1 Yusa-dd ɣari wawař n SIDI, inna:
EZE 27:2 “Cek, [a] mmis n bnadem, sgeɛɛed ijj n weẓri n wecḍan, x Ṣur.
EZE 27:3 Ini i Ṣur, [tandint] i din izeddɣen ɣar tewwura n řebḥar, [tandint] nni ittsebbaben ak-d řegnus [nni izeddɣen] di tegzirin aṭṭas: ‘Ammu i iqqar Sidi inu, SIDI: A Ṣur, cem teqqared: Necc aqa ayi nican deg waẓri!’
EZE 27:4 Iseɣwan n uyeřzim nnem aqa aten deg wuř n řebḥur, inni cem ibnan aqa ggin aẓri nnem nican.
EZE 27:5 Marra tiřwiḥin n tfeřwin n tɣarruba nnem ggin tent i cem di tnayen zi tcejjura n umerzi, iwyen ticejjura n tengelt zi Lubnan, maḥend ad am ggen tiḥenya i řbaccat.
EZE 27:6 Zi tcejjura n řbeǧuḍ n Bacan ggin řemqadef nnem, řbankuwat nnem i iqeddafen aqa atent zi řɛaj ittwagg deg ukeccud n tengelt, iwyen t zi tegzirin n ayt n Kittim.
EZE 27:7 Řbacc nnem tuɣa-t s řeqṭen azdad zi Miṣra, xeyyḍen t s waṭṭas n tintat. Řbacc tuɣa i cem d taɛeǧant, tasqift n uqiḍun nnem tuɣa-tt zeg ufiřu udehmani d arjuwani zi tegzirin n Ilica.
EZE 27:8 Imezdaɣ n Ṣidun u n Arwad tuɣa aten d iqeddafen nnem. Imiɣisen nnem, a Ṣur, nni dayem iǧan, tuɣa aten d ineddahen nnem.
EZE 27:9 Iwessura n Jubayl d imiɣisen nnes tuɣa aten dayem, ɛeddřen marra tizza nnem. Marra tiɣarruba n řebḥar d ibeḥriyyen nsen usin-dd ɣarem ḥima ad kidem sebb[e]ben.
EZE 27:10 Ayt n Lfurṣ, n Lud u n Fuṭ tuɣa aten di řɛeskar nnem, iryazen iɛeskariyyen. Uyřen dayem taseddart [nsen] d lkask [nsen] uca wcin am řɛezz.
EZE 27:11 Ayt n Arwad d řɛeskar nnem tuɣa aten x řeḥyuḍ nnem uca Igammadiyyen, [ayt n bu-teryast nnem], [bedden] x ssumɛat nnem. Tiseddariyyen nsen iqesḥen n useřqi i tuɣa uyřent deg wenneḍ x řeḥyuḍ, arnint deg waẓri nnem aṭṭas.
EZE 27:12 Tarcis tuɣa tᵉttsebbab akidem i ssibbet n ufeyyeḍ n ɛřam kuř igeřwan. Nitni wcin am nnuqart, uzzař, astanyu d řexfif di ṭṭweɛ [n sseřɛet] nni [d asen] tezzenzed.
EZE 27:13 Yawan d Tubal d Macix tuɣa aten d isebbaben nnem. Nitni wcin am řeɛmur n iwdan d řeqcuɛ n nnḥas di ṭṭweɛ n sseřɛet nnem.
EZE 27:14 Zi taddart [n ijeǧiden] n Tujarma wcin am yiysan d imnayen d iserdan di ṭṭweɛ [n sseřɛet] nni [d asen] tezzenzed.
EZE 27:15 Arraw n Dadan tuɣa aten d isebbaben di ṭṭweɛ nnem. Aṭṭas n tegzirin tuɣa xsent ad ṭṭfent sseřɛet zeg ufus nnem. Tiɣmas timeqqranin n řfiř d ukeccuḍ n webnus arrint am tent-i-dd d arriɣaluten.
EZE 27:16 Aram tuɣa ittsebbab akidem x waṭṭas n řeqcuɛ i tṣennɛed. Nitni wcin am karbunkel d ajurwani d lburḍa s tintat ifarzen d řeqṭen azdad d řmarjan d řeɛqaq izeggwaɣen di ṭṭweɛ n sseřɛet nni [d asen tqeddmed].
EZE 27:17 Yahuda d temmurt n Israil tuɣa ttsebbaben akidem. Nitni wcin am yimendi zi Minnit uřa d ḥalawit, tamment, zzect d balsam di ṭṭweɛ n sseřɛet nnem.
EZE 27:18 Dimacq tuɣa ittsebbab akidem deg waṭṭas n řeqcuɛ i tṣennɛed, x marra igeřwan nnem, s binu n Xilbun d tḍuft tacemřařt.
EZE 27:19 Di ṭṭweɛ n [sseřɛet] nni [d asen] tezzenzed, wcin am Wadan d Yawan uzzař n wemziř d qassiya d uɣanim aḥemmum ittfuḥen zi Uzal.
EZE 27:20 Dadan tuɣa ittsebbab akidem s werruḍ n tbardiwin i uneddah.
EZE 27:21 Iɛraben [di řwaṭat] d marra řḥukkam n Qidar tuɣa ttsebbaben akidem. Deg izemrawen d icarriyyen d iɣayḍen tuɣa ttsebbaben akidem.
EZE 27:22 Isebbaben n Caba d yinni n Raɛma tuɣa aten d isebbaben nnem. Nitni wcin řemxeyyer n řeɛṭur d ɛřam kuř iẓra iɣřan d wureɣ di ṭṭweɛ n sseřɛat nni d asen tqeddmed.
EZE 27:23 Ḥaran d Kinna d Ɛadan, isebbaben n Caba, Accur [d] Kilmad, tuɣa ttsebbaben akidem.
EZE 27:24 Nitni tuɣa ttsebbaben akidem deg řeɛbayat icennɛen d iseřhamen ideḥmiyyen d lburḍat tiqarqacin u di řkettan iɣřan s [ifiřan n] tintat ifarzen nni [iǧan] jar sseřɛet nnem s tesɣunin ijehden ittwamuden.
EZE 27:25 Iɣarruba n Tarcic tuɣa aten d ikaravanen nnem d sseřɛet nnem. Tuɣa cem dinni, teccured u tdeqřed aṭṭas deg wuř n řebḥur.
EZE 27:26 Iqeddafen nnem iwyen cem ɣar waman yuɛřan, asemmiḍ zi ccarq yarẓa cem deg wuř n řebḥur.
EZE 27:27 Igeřwan nnem d sseřɛet nni tezzenzed d tsebbabt nnem, ibeḥriyyen nnem d ineddahen nnem d yinni iɛeddřen tireẓẓa nnem, d isebbaben nni ittsebbaben akidem, d marra iɛeskariyyen inni akidem u ak-d marra agraw di řwesṭ nnem, ad wḍan marra deg wuř n řebḥur deg wass n uweṭṭu nnem.
EZE 27:28 Zi řḥess n tɣuyyit n ineddahen nnem ad arjijen dcurat nnem.
EZE 27:29 Ad hwan zi tɣarruba marra inni iṭṭfen timeqdafin, marra ibeḥriyyen d marra ineddahen nnem. Nitni ad bedden x temmurt,
EZE 27:30 uca ad ssgeɛɛden tmijja nsen, ad sɣuyen s imeṭṭawen imarzagen, ad nḍaren acař x izeǧifen nsen, ad zuzzaren iɣɣeḍ x yixef nsen,
EZE 27:31 uca ad ḥeffen ixef nsen zi ssibbet nnem. Nitni ad beysen s txuncay n wecḍan uca ad xam run s řeɛmar iccur s tarzugi u ad ssgeɛɛden ict n tɣuyyit tamerzagt.
EZE 27:32 Am ttweḥwiḥen ad xam ssgeɛɛden ijj n izři n wecḍan, uca ad xam wten agejdur, ad inin: Man wen iǧan am Ṣur, am tendint ittwahedmen di řwesṭ n řebḥar?
EZE 27:33 Řami dd-iwyen sseřɛet nnem zeg [ujemmaḍ n] řebḥur, tuɣa tessjiwned aṭṭas n řegnus. S waṭṭas n igeřwan nnem d tsebbabt nnem tarrid ijeǧiden n temmurt d ttwajaren.
EZE 27:34 Di tsaɛɛet nni di tᵉttwarẓed s řebḥur, di řmehmud n waman, tuɣa tewḍa tsebbabt nnem marra u marra agraw i ɣarem di řebḥar.
EZE 27:35 Marra imezdaɣ n tegzirin ttbehten u ijeǧiden nsen ttarjifen, ttnexřaɛen udmawen nsen.
EZE 27:36 Isebbaben jar řegnus ad xam ṣeffaren, aqa tdewřed d ijj n umedya i warjef, uca war tᵉttiřid ɛad i řebda.’”
EZE 28:1 Yusa-dd ɣari wawař n SIDI, inna:
EZE 28:2 “[A] mmis n bnadem, ini i řḥakem n Ṣur: ‘Ammu i iqqar Sidi inu, SIDI: Minzi tessgeɛɛded uř nnec, tennid: Necc d arebbi, necc ttɣimiɣ x řkursi n arebbi di řwesṭ n řebḥur!, waxxa cek d bnadem, war teǧid d arebbi, aqa teggid uř nnec [xenni] am wuř n AREBBI.
EZE 28:3 Xzar, cek d amiɣis x Daniyil, war din [iǧi] uřa d ijj n ssirr xak innuffaren.
EZE 28:4 S tiɣit nnec d řefhamet nnec aqa tessmuned i yixef nnec igeřwan [mɣaren] u teggid ureɣ d nnuqart deg ixxamen nnec n txubay.
EZE 28:5 S tiɣit nnec imɣaren ɣar tsebbabt nnec, tarnid deg igeřwan nnec uca di ssibbet n igeřwan nnec [mɣaren,] issgeɛɛed wuř nnec ixef nnes.’
EZE 28:6 S uya, [ammu i] iqqar Sidi inu, SIDI: ‘Umi teggid uř nnec am wuř n AREBBI,
EZE 28:7 s uya, xzar, Necc ad xak dd-awyeɣ ibarraniyyen, řegnus iqesḥen aṭṭas. Nitni ad dd-jebden řesyuf nsen ḍidd i weẓri n tiɣit nnec uca ad ssfesden tissiqt nnec.
EZE 28:8 Nitni ad cek ssehwan ɣar [weḥfur n] turṣuḍi uca ad temmted řmewt n yinni ittwassnuqqben deg wuř n řebḥur.
EZE 28:9 Ma tzeɛmed s tidett ad tinid zzat i wudem n yinni cek i ɣa inɣen: ‘Necc d AREBBI’? Aqa cek d bnadem, war iǧi d arebbi deg ufus n yinni i cek i ɣa ideǧen.
EZE 28:10 Ad temmted s ufus n ibarraniyyen am yinni war ittwaxetnen, maɣar Necc nniɣ [t]!, [ammu i] iqqar Sidi inu, SIDI.’”
EZE 28:11 Yusa-dd ɣari wawař n SIDI, inna:
EZE 28:12 “[A] mmis n bnadem, sgeɛɛed ijj n yezři n wecḍan x ujeǧid n Ṣur uca ini as: ‘Ammu i iqqar Sidi inu, SIDI: A cek, wenni d řxatem n řebni ifarzen, teccured s tiɣit u tkemmřed deg weẓri!
EZE 28:13 Tuɣa cek di Ɛadn, di jjennet n AREBBI. Tuɣa dřin cek s ɛřam kuř iẓra iɣřan, s řeɛqaq, tyaqut d dyamanti, s texrisulit, uniks d yaspis, s ṣaffir aziza, karbunkel, smaraxt d wureɣ. Řxedmet n ibendiren nnec d ubarru n temɣarin nnec tuɣa dayek, deg wass nni di dd-tᵉttwaxeřqed tuɣa wejdent.
EZE 28:14 Tuɣa cek d ijj n ukirub d amedhun issdurruyen, ammu i ggiɣ cek din. Tuɣa cek x wedrar iqeddsen n AREBBI, teggured di řwesṭ n iẓra itteḥduduqen.
EZE 28:15 Tuɣa cek tkemmřed deg ibriden nnec, zeg wass nni di dd-tᵉttwaxeřqed, ař dayek tᵉttwaf řmuɛṣiyyet.
EZE 28:16 S řemɣaret n tsebbabt nnec, iccur daxeř nnec s řexcunet uca xenni texḍiḍ. S uya ad cek ssiggʷejeɣ x wedrar n arebbi, ad cek mḥiɣ zi řwesṭ n iẓra itteḥduduqen, a cek akirub issdurruyen!
EZE 28:17 Uř nnec issgeɛɛed ixef nnes s waẓri nnec, aqa tessɛiǧted tiɣit nnec di ṭṭweɛ n tissiqt nnec iɛeffaren. Necc nḍareɣ cek x temmurt uca ggiɣ cek zzat i wudem n ijeǧiden, ařami zemmaren ad ɣarek xzaren s řḥegra.
EZE 28:18 Zi ssibbet n waṭṭas n řmuɛṣiyyet nnec d řɣecc n tsebbabt nnec, aqa tɣesbed tizawiyyin nnec iqeddsen. S uyenni arriɣ timessi teffeɣ-dd zi řwesṭ nnec, tenni cek iccen, uca arriɣ cek d iɣɣeḍ x temmurt zzat i tiṭṭawin n marra inni cek ittwařan.
EZE 28:19 Marra inni cek issnen jar řegnus, arejfen zzayek. Tdewřed d ijj n umedya n warjef u war tᵉttiřid ɛad i řebda.’”
EZE 28:20 Yusa-dd ɣari wawař n SIDI, inna:
EZE 28:21 “[A] mmis n bnadem, arr udem nnec ɣar Ṣidun uca nabb ḍidd nnes,
EZE 28:22 uca ini: ‘Ammu i iqqar Sidi inu, SIDI: Xzar, Necc aqa ayi ḍidd nnem, [a] tandint n Ṣidun! Necc ad ttwassɛuǧeɣ di řwest nnec. Uca nitni ad ssnen belli Necc d SIDI xmi i ɣa ggeɣ řeḥkamat di [Ṣidun] uca ad dayes ttwaqeddseɣ.
EZE 28:23 Ad ssekkeɣ ṭṭaɛun di řwesṭ nnes uřa d idammen deg ibriden nnes u wenni ittwanɣen ad iwḍa di řwesṭ nnes s ssif nni xas [i ɣa yiřin] zeg wenneḍ nnes. [Xenni] ad ssnen, belli Necc d SIDI,
EZE 28:24 uca ɛemmarṣ ɛad ad yiři i taddart n Israil asennan iqebcen niɣ tazeggʷart itteqqsen zeg inni d asen dd-innḍen, inni ten isseḥqaran. Nitni ad ssnen belli Necc d Sidi, d SIDI [i ǧiɣ].’”
EZE 28:25 “Ammu i iqqar SIDI inu, SIDI: ‘Xmi ɣa ssmuneɣ taddart n Israil zi řegnus nni mani ttwabezzɛen nitni uca Necc ssecneɣ ixef inu d Amqeddes daysen zzat i tiṭṭawin n řegnus, [xenni] ad zedɣen di temmurt nni wciɣ i umsexxar inu Yaɛqub.
EZE 28:26 Nitni ad zedɣen di řaman uca ad bnan tudrin, ad ggen imarjaɛen n uḍiř u ad daysen ẓẓun tizayarin, [wah,] nitni ad [din] zedɣen di řaman awarni řami ggiɣ řeḥkamat x marra inni ten ikeccḍen zi [temmura] i d asen dd-innḍen. [Xenni] ad ssnen belli Necc d SIDI, AREBBI nsen.’”
EZE 29:1 Yusa-dd ɣari wawař n SIDI deg useggʷas wiss ɛecra, deg uyur wiss ɛecra, deg wass wiss tenɛac n uyur, inna:
EZE 29:2 “[A] mmis n bnadem, arr udem nnec ɣar firɛun, ajeǧid n Miṣra uca nabb xas u x marra [tammurt n] Miṣra.
EZE 29:3 Siweř, ini: ‘Ammu i iqqar Sidi inu, SIDI: Xzar, Necc ḍidd nnec, a firɛun, ajeǧid n Miṣra, cek d řhaycet tameqqrant nni izzřen di řwesṭ n iɣezran nnes, tenni iqqaren: Iɣzar inu, necc ggiɣ t i yixef inu!
EZE 29:4 Necc ad ggeɣ tisennarin deg uɣesmar nnec, ad ssřesqeɣ iseřman n iɣezran nnec ɣar teqcurin nnec. Ad cek dd-jebdeɣ zi řwesṭ n iɣezran nnec uca marra iseřman n iɣezran nnec ad řesqen ɣar teqcurin nnec.
EZE 29:5 Necc ad cek nḍareɣ barra di řexřa, cek d marra iseřman n iɣezran nnec. X wudem n yeyyar ad tewḍid. War din wenni cek i ɣa yawyen niɣ cek i ɣa iṭṭfen. Necc ad cek wceɣ d macca i řewḥuc n temmurt u i ijḍaḍ n ujenna.
EZE 29:6 Marra imezdaɣ n Miṣra ad ssnen belli Necc d SIDI, maɣar nitni tuɣa aten d azeǧaḍ n uɣanim i x tuɣa tsenned taddart n Israil.
EZE 29:7 Mařa nitni ksin cek s ufus nnec, tfeǧqed uca tessnuqqbed ɣarsen taɣruḍt nsen marra, u mařa xak ssenden, tarẓid uca tessarjijed tijɛinnatin nsen marra.’”
EZE 29:8 “S uya, ammu i iqqar Sidi inu, SIDI: ‘Xzar, Necc ad xak sseɛduɣ ssif uca ad qesseɣ zzayek bnadem d řmař.
EZE 29:9 Tammurt n Miṣra ad tedweř i ureddeǧ u i řxirbet uca nitni ad ssnen belli Necc d SIDI, minzi netta inna: ‘Iɣzar inu u necc ggiɣ [t]!’”
EZE 29:10 “S uya, xzar, Necc xak u x iɣezran nnec u Necc ad ggeɣ tammurt n Miṣra d řexrabi, [wah,] d ict n řxirbet n wareddeǧ zi Majdal ař Aswan, ař aymir n [temmurt n] Kuc.
EZE 29:11 Uřa d ijj n bnadem war zzayes iẓekkwi x uḍar u uřa d ijj n uḍar n řmař ad xas iẓwa. War dayek ttiřin imezḍaɣ i yijj n řmijar n arebɛin n iseggʷusa.
EZE 29:12 [Minzi] Necc ad ggeɣ tammurt n Miṣřa d areddeǧ di řwesṭ n temmura ttwaredǧent uca tineddam ad iřint d areddeǧ di řwesṭ n tneddam [nneɣni] nni idewřen d řxirbat, [řmijar n] arebɛin n iseggʷusa, u Necc ad ssuyseɣ Imiṣriyyen jar řegnus uca ad ten bezzɛeɣ x temmura.”
EZE 29:13 “Maca ammu i iqqar Sidi inu, SIDI: ‘Awarni řami i ɣa ɛdun arebɛin n iseggʷusa Necc ad ssmuneɣ Imiṣriyyen zi řegnus nni mani tuɣa ttwabezzɛen.
EZE 29:14 Necc ad beddřeɣ tameḥbast n Imiṣriyyen uca ad ten ssɛeqbeɣ di temmurt n Fatrus, di temmurt i zzayes dd-iffɣen, uca dinni ad iřin d ict n tgeldit tameɛnanuct.
EZE 29:15 Tageldit nsen ad tiři d tameɛnanuct zi tgeldatin nneɣni u war tessgeɛɛad ixef nnes ɛad x řegnus, minzi Necc ad ten ssmeẓyeɣ ařami war ttṣellṭen ɛad x řegnus.
EZE 29:16 War tᵉttiři ɛad i taddart n Israil d atecři nni ten i ɣa issidar řmuɛṣiyyet, řami dewřen ɣarsen, ḍeffaren ten. Nitni ad ssnen belli Necc d Sidi, d SIDI [i ǧiɣ].’”
EZE 29:17 Deg useggʷas wiss sebɛa u-ɛicrin, deg uyur wiss amezwaru, deg wass amezwaru n uyur imsar belli yusa-dd ɣari wawař n SIDI, inna:
EZE 29:18 “[A] mmis n bnadem, Nabuxadraṣṣar, ajeǧid n Babil, yarra řɛeskar nnes ad yegg ict n řxedmet tameqqrant ḍidd i Ṣur. Marra azeǧif iqqim d aqeccar u marra taɣřuḍt tarkec, [maca] war ɣares tuɣi řexřaṣ zi [tendint n] Ṣur, i netta u i řɛeskar nnes x řxedmet i yegga ḍidd nnes.
EZE 29:19 S uya, ammu i iqqar Sidi inu, SIDI: ‘Xzar, Necc ad wceɣ tammurt n Miṣra i Nabuxadraṣṣar, ajeǧid n Babil. Netta ad [zzayes] dd-yawi afeyyeḍ n wagřa nnes uca ad ikecceḍ takeccaḍt nnes uca ad ikkes tukkarḍa. Aya ad yiři d řexřaṣ nnes i řɛeskar nnes.
EZE 29:20 X řxedmet nni yegga ḍidd [Ṣur] wciɣ as tammurt n Miṣra d řexřaṣ, minzi nitni ggin tt di ṭṭweɛ inu, [ammu i] iqqar Sidi inu, SIDI.
EZE 29:21 Deg wass nni ad arreɣ icc n Israil ad dd-iffeɣ uca ad arzmeɣ aqemmum nnec di řwesṭ nsen. [Xenni] ad ssnen belli Necc d SIDI.’”
EZE 30:1 Yusa-dd ɣari wawař n SIDI, inna:
EZE 30:2 “[A] mmis n bnadem, nabb uca ini: ‘Ammu i iqqar Sidi inu, SIDI: Rum! Ayyehhat x wass nni!
EZE 30:3 Minzi yudes i yeǧa wass nni, yudes i yeǧa wass i SIDI, ass n iseynuten. Ad yiři d tasaɛɛet n řegnus.
EZE 30:4 Ad dd-yas ssif di Miṣra. Ad yiři warjef ameqqran di temmurt n Kuc, xmi ɣa wḍan inni ittwassnuqqben di Miṣra, minzi ad awyen afeyyeḍ n wagřa nnes, ad areddǧen dsusa nnes.
EZE 30:5 Kuc d Fuṭ d Lud d ɛřam kuř ibarraniyyen, d Kub d ayt n temmurt n Řɛahd ad kisen wḍan s ssif.’”
EZE 30:6 “Ammu i iqqar SIDI: ‘Inni ittcařen x Miṣra ad wḍan u nnfaxet n ṣṣulṭa nnes ad tɣarq. Zi Majdal ař Aswan ad wḍan s ssif di temmurt!’, ammu i iqqar Sidi inu, SIDI.
EZE 30:7 ‘Nitni ad ttwaredǧen di řwesṭ n temmura ittwaredǧent u tineddam nnes ad iřint di řwesṭ n tneddam nneɣni ittwaxarrben.
EZE 30:8 Xenni ad ssnen belli Necc d SIDI, xmi ɣa ssarɣeɣ timessi di Miṣra uca marra inni tt ittɛawanen ad ttwarẓen.
EZE 30:9 Deg wass nni ad ffɣen ireqqasen s tɣarruba zi zzat n wudem inu, maḥend ad ssiggʷeden Kuc wenni umi ittɣiř aqa netta di řaman. Ad daysen yiři warjef ameqqran, amecnaw deg wass nni n Miṣra, maɣar xzar, ad dd-yas!’”
EZE 30:10 “Ammu i iqqar Sidi inu, SIDI: ‘Necc ad ssbeddeɣ řɣaci inhewřen n Miṣra s ufus n Nabuxadraṣṣar, ajeǧid n Babil.
EZE 30:11 Netta d řgens nnes akides, imsaggʷaden qaɛ n řegnus ad dd-asen ḥima ad teḥḥan tammurt. Nitni ad ssuffɣen řesyuf nsen ḍidd i Miṣra uca ad ccuren tammurt s yinni ittwassnuqqben.
EZE 30:12 Necc ad ssiẓɣeɣ iɣezran uca ad zzenzeɣ tammurt i iɛeffanen u Necc ad areddǧeɣ tammurt d marra min dayes s ufus n ibarraniyyen. Necc, SIDI, wenni innan aya.’”
EZE 30:13 “Ammu i iqqar Sidi inu, SIDI: ‘Necc ad areddǧeɣ imeyḍa n l’aṣnam uca ad qḍiɣ x l’aṣnam zi Nuf. War ittɣimi ɛad uřa d ijj n řḥakem zi Miṣra. Necc ad ssidfeɣ řɛurret di temmurt n Miṣra.
EZE 30:14 Necc ad areddǧeɣ Fatrus u ad ssarɣeɣ Ṣuɛan u ad awyeɣ řeḥkamat inu di Nu.
EZE 30:15 Necc ad ssfarɣeɣ asɛar inu x Sin, lburj n Miṣra, ad qeḍɛeɣ řɣaci inhewřen n Nu.
EZE 30:16 Necc ad ssidfeɣ timessi ɣar Miṣra, Sin ad tefsi s řeḥriq, tammurt n Nu ad tᵉttwafeǧeq u Nuf ad tiři di řeḥṣaret kuř ass.
EZE 30:17 Iḥudriyyen zi Awan d Fibista ad wḍan s ssif u timɣarin ad uyurent di tmeḥbast.
EZE 30:18 Ass ad ittbarcen di Taḥfaḥis xmi ɣa yarẓeɣ Necc azayřu n Miṣra, u ad as ssbeddeɣ nnfaxet n jjehd nnes dinni. Ijj n useynu ad tt issdurri uca yessis ad uyurent di tmeḥbast.
EZE 30:19 Necc ad ssiwḍeɣ řeḥkamat x Misřa u nitni ad ssnen belli Necc d SIDI.’”
EZE 30:20 Deg useggʷas wiss ḥiṭac, deg uyur amezwaru, deg wass wiss sebɛa n uyur imsar belli yusa-dd ɣari wawař n SIDI, inna:
EZE 30:21 “‘[A] mmis n bnadem, Necc arẓiɣ aɣiř n firɛun, ajeǧid n Miṣra. Xzar, war t ijebbar uřa d ijjen maḥend ad ittwassgenfa, war t ttennḍen s bindat ařami zzaysent t ɣa ssjehden, ḥima ad iṭṭef ssif [ɛawed]!’
EZE 30:22 S uya, ammu i iqqar Sidi inu, SIDI: ‘Xzar, Necc x firɛun, ajeǧid n Miṣřa, u Necc ad arẓeɣ iɣaǧen nnes, [am uɣiř] ijehden [ɛad] am wenni ittwarẓin. Necc ad arreɣ ssif nnes ad iwḍa zeg ufus nnes.
EZE 30:23 Necc ad zuzzareɣ Imiṣriyyen jar řegnus u ad ten bezzɛeɣ x temmura.
EZE 30:24 Necc ad ssjehdeɣ iɣaǧen n ujeǧid n Babil uca ad wceɣ ssif inu deg ufus nnes, [maca] iɣaǧen n firɛun ad ten arẓeɣ, [ařami] i ɣa isɣuy am isɣuyyu wenni issnuqben.
EZE 30:25 [Wah] Necc ad ssjehdeɣ iɣaǧen n ujeǧid n Babil, [maca] iɣaǧen n firɛun ad wḍan. [Xenni] ad ssnen belli Necc d SIDI, xmi ɣa ggeɣ ssif inu deg ufus n ujeǧid n Babil u netta ad t isswiẓẓeḍ x temmurt n Miṣra.
EZE 30:26 Necc ad zuzzareɣ Imiṣriyyen jar řegnus, ad ten bezzɛeɣ x temmura. [Ammu] i ɣa ssnen belli Necc d SIDI.’”
EZE 31:1 Deg useggʷas wiss ḥiṭac, deg uyur wiss třata, deg wass amezwaru n uyur imsar belli yusa-dd ɣari wawař n SIDI, inna:
EZE 31:2 “[A] mmis n bnadem, ini i firɛun, ajeǧid n Miṣra, u i marra řɣaci nnes inhewřen: ‘Wi akidek imquddan s marra řemɣaret nnec?
EZE 31:3 Xzar, tuɣa Accur d tacejjart n tengelt x idurar n Lubnan ak-d tseḍwin icnan d tifray i itticen tiři mliḥ u ak-d tiddi d azirar yuɛřan, ařami tuccent nnes tiweḍ-dd ař iseynuten.
EZE 31:4 Aman arrin tt ad iyma, aman ihewřen ssgeɛɛden tt aṭṭas. Iɣezran n waman nnes ssizzřen deg wenneḍ n tebhirt nnes uca aman ihewřen arrin iɣezran nnes ad raḥen ɣar marra ticejjura n yeyyar.
EZE 31:5 X uya ittwassuɛřa tiddi nnes x marra ticejjura n yeyyar, u tiseḍwin nnes dewřent s waṭṭas u ifetwan nnes zzuggarten s waman ifeyyḍen, xmi tuɣa tessɣemmi.
EZE 31:6 Marra ijḍaḍ n ujenna ggin řɛucc nsen di tseḍwin nnes, marra řmař n yeyyar ferxen sadu ifetwan nnes u marra řegnus mɣaren tuɣa ttɣiman di tiři nnes.
EZE 31:7 Tuɣa-tt tecna s řemɣaret nnes u s tuzzeggart n tseḍwin nnes, maɣar aẓwar nnes tuɣa-t ak-d waṭṭas n waman.
EZE 31:8 Ticejjura n tengelt di jjennet n AREBBI war xas ɛdunt, ticejjura n umerzi war sekkwint tseḍwin nnes uca ticejjura n dulb war sekkwint ifetwan nnes. Uřa d ict n tcejjart di jjennet n AREBBI tarwes dayes deg waẓri nnes.
EZE 31:9 Ggiɣ tt tecna ak-d waṭṭas n tseḍwin nnes, ařami zzayes usment marra ticejjura n Ɛadn, tinni tuɣa di jjennet n AREBBI.’”
EZE 31:10 “S uya, ammu i iqqar Sidi inu, SIDI: ‘Umi tessgeɛɛded ixef nnem s tiddi nnem, wah nettat tegga tuccent nnes jar iseynuten u uř nnes issgeɛɛed ixef nnes zi ssibbet n řuɛřa nnes,
EZE 31:11 s uyenni wciɣ tt deg ufus n wenni d amzemmar qaɛ jar řegnus, wenni iggin s tidett am dd-ittřiqen ak-d tuɛeffna nnes, uca ammu i uẓẓřeɣ xas.
EZE 31:12 Zedmen tt ibarraniyyen, řegnus iqesḥen aṭṭas, zedmen t uca jjin tt. Tiseḍwin nnes wḍant x idurar u di marra tiɣzurtin, ifetwan nnes ttwarẓen di marra tiɣezratin n temmurt u marra řegnus n temmurt hwan-dd zi sadu tiři nnes uca jjin tt.
EZE 31:13 Marra ijḍaḍ n ujenna zedɣen x ukeccuḍ nnes nni iwḍan uca marra řmař n yeyyar tuɣa aten x ifetwan nnes.
EZE 31:14 Necc ggiɣ tt, ḥima marra ticejjura war dikkwiřent ɛad ttneffxent s tiddi nsent uca ad ggent tuccent nsen deg iseynuten, u marra ticejjura nni iswin aman s ufeyyeḍ, war ttbeddint ɛad s yixef nsent di nnfaxet nsent, maɣar nitenti marra ttwamewcent i řmewt, ɣar řaǧaɣ n temmurt, di řwesṭ n tarwa n bnadem, ak-d inni ihekkwan deg weḥfur n wenḍeř.’”
EZE 31:15 “Ammu i iqqar Sidi inu, SIDI: ‘Deg wass nni di tehwa ɣar řaxart, ggiɣ ijj wecḍan. Di ṭṭweɛ nnes dřiɣ aman ihewřen uca ssbeddeɣ iɣezran nnes uca fecřen waman imɣaren. Di ṭṭweɛ nnes ssbarrecneɣ idurar n Lubnan uca marra ticejjura n yeyyar ceḍnent xas.
EZE 31:16 S ddriz n uweṭṭu nnes ssarjijeɣ řegnus, umi tt ssehwiɣ ɣar řaxart ak-d inni ihekkwan deg weḥfur n wenḍeř. Marra ticejjura n Ɛadn, tinni iɛizzen aṭṭas d tinni icnan qaɛ zi Lubnan, tinni iswin aṭṭas n waman marra, aqa ttwassfewwjent s man aya di řaǧaɣ n temmurt.
EZE 31:17 Uřa d nitenti hwant akides ɣar řaxart, ɣar inni ittwanɣen s ssif, inni tuɣa aɣiř nnes ijehden, inni tuɣa iqqimen di tiři nnes di řwest n řegnus.
EZE 31:18 Ak wi tsawid ammu di řɛezz d řemɣaret jar tcejjura n Ɛadn? Waxxa amenni ad tᵉttwassehwid ak-d tcejjura n Ɛadn ař raǧaɣ n temmurt. Ad tbuzzřed di řwest n yinni war ittwaxetnen, ak-d inni ittwanɣen s ssif. Uca ad inin: Wa d firɛun d marra řɣaci nnes inhewřen!’, ammu i iqqar Sidi inu, SIDI.”
EZE 32:1 Deg useggʷas wiss tenɛac, deg uyur wiss tenɛac, deg wass amezwaru n uyur imsar belli yusa-dd ɣari wawař n SIDI, inna:
EZE 32:2 “[A] mmis n bnadem, sgeɛɛed ijj n yezři n wecḍan x firɛun, ajeǧid n Miṣra, uca ini as: ‘Tuɣa cek am weyrad d ameẓyan jar řegnus u tuɣa cek am řhaycet di řebḥur. Tɣeḍřed ixef nnec deg iɣezran, tessenhezzed aman s iḍaren nnec uca tessefsad iɣezran nsen.’
EZE 32:3 Ammu i iqqar Sidi inu, SIDI: ‘Necc ad xak sswiẓẓḍeɣ tracca inu, s yijj n wegraw n řegnus aṭṭas. Nitni ad cek ssiřyen ak-d tracca inu.
EZE 32:4 Necc ad cek jjeɣ di temmurt, ad cek nḍareɣ x wudem n yeyyar. Ad xak sszedɣeɣ marra ijḍaḍ n ujenna uca ad zzayek ssjiwneɣ imuddaren zi marra tammurt.
EZE 32:5 Ad ggeɣ weysum nnec x idurar uca ad ccureɣ tiɣzurin s řegɛudi n warrayem nnec.
EZE 32:6 Necc ad ssesweɣ tammurt ař idurar, s ufeyyeḍ n idammen nnec, uca tiɣezratin ad ccurent zzayek.’
EZE 32:7 ‘Necc ad ssduryeɣ ajenna xmi cek ɣa ssxesyeɣ. Ad ssbarrecneɣ itran nnes, ad ssduryeɣ tafuct s iseynuten, uca taziri war ttejji ɛad ad tarɣa tfawt nnes.
EZE 32:8 Marra tifawin yareqqen deg ujenna ad tent ssbarrecneɣ di ṭṭweɛ nnec uca ad ssekkeɣ taǧest x temmurt nnec!’, ammu i iqqar Sidi inu, SIDI.
EZE 32:9 ‘Necc ad ɣezziɣ uř n waṭṭas n řegnus, umi i ɣa yawyeɣ řexbar n treẓẓit nnec ɣar řegnus, ɣar temmura i war tent tessined ca.
EZE 32:10 Necc ad ssnexřɛeɣ aṭṭas n řegnus di ssibbet nnec u acuwwaf n ijeǧiden nsen ad geɛɛden zeg warjef di ṭṭweɛ nnec, xmi ɣa ssenhezzeɣ ssif inu ssa d ssa zzat i wudmawen nsen. Nitni ad arjijen řebda, kuř ijj di ssibbet n tudart nnes, deg wass n uweṭṭu nnec.’
EZE 32:11 Minzi ammu i iqqar Sidi inu, SIDI: ‘Ssif n ujeǧid n Babil ad xak yemmars.
EZE 32:12 S řesyuf n ayt n bu-teɣruḍt ad ɣeḍřeɣ řɣaci nnec inhewřen. Aqa-ten řegnus iqesḥen aṭṭas marra, nitni ad qḍan x nnfaxet n Miṣra uca marra řɣaci nnes inhewřen ad ittwateḥḥa.
EZE 32:13 Necc ad qḍiɣ x imuddaren nnes inni iǧan ɣar waṭṭas n waman, uřa d ijj n uḍar n bnadem ad ten issarwi ɛawed uca uřa d ict n tecḍect n řmař ad ten tessarwi ɛad.’
EZE 32:14 ‘Xenni ad ssehwiɣ aman nsen ařami i ɣa ṣfan u Necc ad ggeɣ iɣezran nsen ad ssizzřen am zzect!’ [... ammu] i iqqar Sidi inu, SIDI ...
EZE 32:15 ‘... Ařami ggiɣ tammurt n Miṣra d areddeǧ uca ad tiři temmurt tᵉttwareddeǧ, teḥfa zi marra min dayes, ařami wteɣ marra inni dayes izeddɣen, xenni ad ssnen belli Necc d SIDI.’”
EZE 32:16 “Wa d izři n wecḍan uca ad t ɣennjen am yezři n wecḍan, yessitsent n temmura ad t ɣennjent am yezři n wecḍan, ad t ɣennjent am yezři n wecḍan x Miṣra u x marra řɣaci nnes inhewřen!, [ammu i] iqqar Sidi inu, SIDI.”
EZE 32:17 Deg useggʷas wiss tenɛac, deg uyur wiss tenɛac, deg wass wiss xemmesṭac n uyur imsar belli yusa-dd ɣari wawař n SIDI, inna:
EZE 32:18 “A mmis n bnadem, wwet agejdur x řɣaci inhewřen n Miṣra. Ejj i-t ad ihwa, Miṣra ak-d yessis n řegnus ijehden, di řaǧaɣ n temmurt, ak-d yinni ihwan deg weḥfur n wenḍeř.
EZE 32:19 Ma cek iɛizzen x man mma? Hwa, ejj ad cek ssarsen ak-d yinni war ittwaxetnen.
EZE 32:20 Ad wḍan di řwesṭ n yinni ittwanɣen s ssif. Aqa immewc ssif. Jarr Miṣra zeg webrid ak-d marra řɣaci nnes inhewřen.
EZE 32:21 Inni ɣar teǧa ṣṣulṭa aṭṭas zeg ayt n bu-teɣruḍt ad ssiwřen akides u ak-d yinni t iɛawanen zi řwesṭ n řaxart. Hwan nitni, aqa zzřen dinni, inni war ittwaxetnen, inni ittwanɣen s ssif.’
EZE 32:22 ‘Diha iǧa Accur ak-d marra agraw nnes, nnḍen as-dd imeḍřan nnes. Marra nitni ttwanɣen, wḍan s ssif.
EZE 32:23 Imeḍřan nnes aqa aten di tɣemmar n weḥfur n wenḍeř u agraw nnes aqa-t deg wenneḍ n wenḍeř nnes. Marra nitni ttwassnuqqben, wḍan s ssif, inni tuɣa issaggʷaden di temmurt n yinni iddaren.’
EZE 32:24 ‘Diha Ɛilam d marra řɣaci nnes inhewřen deg wenneḍ n wenḍeř nnes. Marra nitni ttwassnuqqben, wḍan s ssif, hwan břa axtan di řaǧaɣ n temmurt, inni tuɣa issaggʷaden di temmurt n yinni iddaren. Nitni iwyen řefḍiḥet nsen akidsen, ak-d yinni ihekkwan deg weḥfur n wenḍeř.
EZE 32:25 Ggin as ijj n wemcan n arraḥet di řwest n yinni ittwanɣen, ɣar marra řɣaci nnes inhewřen. Imeḍřan nnes nnḍen as-dd. Marra nitni war ittwaxetnen, wḍan s ssif, minzi tuɣa ssaggʷaden iwdan di temmurt n yinni iddaren. Nitni iwyen řefḍiḥet nsen akidsen, jmiɛ ak-d yinni ihekkwan deg weḥfur n wenḍeř. Aqa netta ittwassars di řwest n yinni ittwanɣen.’
EZE 32:26 Diha Macix-Tubal d marra řɣaci nnes inhewřen. Nnḍen as-dd imeḍřan nnes. Marra nitni war ttwaxetnen, ttwassnuqqben s ssif, maɣar nitni tuɣa ssaggʷaden iwdan di temmurt n yinni iddaren.
EZE 32:27 Inni iwḍan zeg yinni war ittwaxetnen war zziřen ak-d ayt n bu-teɣruḍt nni ihwan ɣar řaxart ak-d řesnaḥ nsen n umenɣi. Mmarsen řesyuf nsen sadu izeǧifen nsen uca řmuɛṣiyyet nsen aqa-tt x yeysan nsen, waxxa tuɣa nitni d tiggʷudi i ayt n bu-teɣruḍt di temmurt n yinni iddaren.
EZE 32:28 Uřa d cek ad tiřid tarẓed di řwesṭ n yinni war ittwaxetnen uca ad tezzřed ak-d yinni ittwassnuqben s ssif.’
EZE 32:29 ‘Diha Idum, ijeǧiden nnes d marra řḥukkam nnes, inni i din ittwaggen s marra ṣṣulta nsen ak-d yinni ittwassnuqqben s ssif. Zzřen dinni ak-d yinni war ittwaxetnen u ak-d yinni ihwan deg weḥfur n wenḍeř.’
EZE 32:30 ‘Diha ayt n bu-ṣṣulṭa zi ccmal, marra nitni, u marra ayt n Ṣidun, inni ihwan ak-d yinni ittwanɣen. Aqa ttseḍḥan dinni, waxxa tuɣa ssaggʷaden iwdan s teryast nsen n ayt n bu-teɣruḍt. Aqa zzřen dinni břa axtan ak-d yinni ittwanɣen s ssif uca arebbun řefḍiḥet nsen ak-d yinni ihwan deg weḥfur n wenḍeř.’
EZE 32:31 ‘Firɛun ad ten iẓar uca ad ittwassfewwej zi marra řɣaci nnes inhewřen, inni ittwassnuqqben s ssif, Firɛun d marra řɛeskar nnes,’ [ammu i] iqqar Sidi inu, SIDI,
EZE 32:32 ‘minzi Necc jjiɣ t ad issiggʷed inni di temmurt n yinni iddaren. Netta ad immars di řwesṭ n yinni war ittwaxetnen, ɣar yinni ittwassnuqqben s ssif, Firɛun d marra řɣaci nnes inhewřen,’ [ammu i] iqqar Sidi inu, SIDI.”
EZE 33:1 Yusa-dd ɣari wawař n SIDI, inna:
EZE 33:2 “[A] mmis n bnadem, siweř ak-d tarwa n řgens nnec, ini asen: ‘Xmi ɣa [y]awyeɣ ssif x temmurt uca řgens n temmurt ad iksi ijj n weryaz zi ṭṭrufa nnes uca ad t ggen d aɛessas i yixef nsen
EZE 33:3 uca wanita itwařa yusa-dd ssif x temmurt, [xenni] ittsuḍ deg uyicc n icarri uca iɛeǧem i řgens,
EZE 33:4 uca aqa din ijjen isřa i usuḍi deg uyicc n icarri, [maca] war ijji ixef nnes ad zzayes ittwaɛřem uca yusa-dd ssif, ikkes i-t, [xenni] idammen nnes ad iřin x uzeǧif nnes.
EZE 33:5 Netta isřa i řḥess n usuḍi deg uyicc n icarri, [maca] war ijji ixef nnes ad ittwaɛřem, idammen nnes aqa aten xas, [maca] řeɛmar n wenni ijjin ixef nnes ad ittwaɛřem, ad injem.
EZE 33:6 Maca mařa aɛessas itwařa ssif yusa-dd uca war isuḍ deg uyicc n icarri, [ařami] war ittwaɛřem řgens uca ssif yusa-dd, ikkes ijj n řeɛmar jar asen, [xenni] aqa netta immeksi zi ssibbet n řmuɛṣiyyet [n yixef] nnes, [maca] Necc ad ttareɣ idammen nnes zeg ufus n uɛessas.’”
EZE 33:7 “Cek, [a] mmis n bnadem, Necc ggiɣ cek d aɛessas x taddart n Israil. Ad tesřed ijj n wawař zeg uqemmum inu uca ad asen tɛeřmed zzayi.
EZE 33:8 Umi Necc nniɣ i uɛeffan: ‘[A] aɛeffan, cek ad temmted řmewt!’, u cek war tessiwiřed maḥend ad tɛeřmed i uɛeffan x webrid nnes [iweddaren], [xenni] ad immet uɛeffan [nni] s řmuɛṣiyyet nnes, [maca] Necc ad ttareɣ idammen nnes zeg ufus nnec.
EZE 33:9 [Maca] mařa cek tɛeřmed i uɛeffan x webrid nnes, maḥend ad as iḥeyyed uca netta war iḥeyyed x webrid nnes, [xenni] netta ad immet s řmuɛṣiyyet nnes, [maca] cek tessnejmed řeɛmar nnec.”
EZE 33:10 “Cek, [a] mmis n bnadem, ini i taddart n Israil: ‘[Ammu i] tessawařem, teqqarem: ‘Iɛeddiyyen nneɣ d ddnub nneɣ [aqa aten] xaneɣ uca nhellek daysen, [xenni] mammec ɣa [neqqim] neddar?’
EZE 33:11 Ini asen: ‘[S tidett am] ddareɣ Necc, iqqar Sidi inu, SIDI, ɛemmarṣ war areṭṭiɣ x řmewt n uɛeffan, maca ad arḍeɣ aɛeffan xmi ɣa itub zeg webrid nnes uca ad iddar. Tubem, tubem zeg webriden nwem iɛeffnen, maɣar mayemmi ɣa temmted, [a] taddart n Israil?’”
EZE 33:12 “Cek, [a] mmis n bnadem, ini i tarwa n řgens nnec: ‘Tasegda n umsegged war t issnejjim deg wass nni di ɣa ixḍa uca tuɛeffna n uɛeffan war zzayes i ɣa inqareḍ deg wass nni di ɣa itub zi tuɛeffna nnes. Amsegged war izemmar ad iqqim iddar s tsegda nnes deg wass nni di ɣa ixḍa.
EZE 33:13 Umi nniɣ Necc i umsegged, aqa netta ad iddar s tidett, [maca] netta ittiqq di tsegda nnes uca igga řmuɛṣiyyet, [xenni] war tᵉttiři ɛad řidaret di tsegda nnes, maca di řɣecc nnes nni igga, aqa ad dayes immet.
EZE 33:14 Mařa Necc nniɣ i uɛeffan: Řmewt i ɣa temmted!, uca netta itub x ddenb nnes uca ad igg řḥeqq d tsegda,
EZE 33:15 - aqa aɛeffan ad isseɛqeb ddiyyet nnes, ad ixeǧeṣ min ittwacaren, ad yuyur di tweṣṣa n tudart břa ma ad igg řɣecc - [xenni] ad iddar s tidett, war ittmetti ca.
EZE 33:16 Marra ddnub nni igga, war dd as ttwaḥessben ca. Igga řḥeqq d tsegda, ad iddar s tidett.’”
EZE 33:17 “Tarwa n řgens nnec qqaren: ‘Abrid n Sidi inu war iǧi ca nican!’, umi abrid n simant nsen war iǧi ca nican.
EZE 33:18 Mařa amsegged iḥeyyed x tsegda nnes uca ittegg řɣecc, [xenni] ad dayes immet,
EZE 33:19 uca xmi ɣa itub uɛeffan x tuɛeffna nnes uca ad igg řḥeqq d tsegda, [xenni] ad zzayes iddar.
EZE 33:20 [Ɛad] teqqarem: ‘Abrid n Sidi war iǧi ca nican!’ Necc ad xawem ḥekmeɣ, [a] taddart n Israil, kuř ijj am yibriden nnes.”
EZE 33:21 Deg useggʷas wiss tenɛac n lmenfa nneɣ, deg uyur wiss ɛecra, deg wass wiss xemsa n uyur imsar belli yusa-dd ɣari ijj n umarwař zi Urcalim, inna: “Tandint tᵉttwaɣelleb!”
EZE 33:22 Ɣar ǧiřet tuɣa afus n SIDI xafi, qbeř dd ɣa yas umarwař u Netta yarzem ayi aqemmum umi dd-yusa umarwař ɣari di ṣṣbeḥ. Tuɣa aqemmum inu ittwarzem uca war ttiřiɣ ɛad d aynaw.
EZE 33:23 Yusa-dd ɣari wawař n SIDI, inna:
EZE 33:24 “[A] mmis n bnadem, imezdaɣ n řxirbat-a di temmurt n Israil ssawařen, qqaren: ‘Ibrahim tuɣa-t d ijj uca iwart tammurt-a. Neccin [řexxu] deg waṭṭas, temmewc aneɣ temmurt d tasɣart!’
EZE 33:25 S uya, ini asen: Ammu i iqqar Sidi inu, SIDI: Kenniw tᵉttetem [aysum] ak-d idammen uca tessgeɛɛadem tiṭṭawin nwem ɣar imeyḍa n [l’aṣnam nwem] uca tessizzařem idammen. Ma iɛeddeř ad tᵉṭṭfem kenniw tammurt d řwart?
EZE 33:26 Tettbeddam x ssif nwem, tᵉtteggem jjɛifect u kuř aryaz issxemmaj tamɣart n jjar nnes. Ma iɛeddeř ad tᵉṭṭfem kenniw tammurt d řwart?’
EZE 33:27 Ammu i d asen ɣa tinid: ‘Ammu i iqqar Sidi inu, SIDI: [S tidett am] ddareɣ Necc, aqa inni iǧan x řxirbat ad wḍan s ssif, u wenni iǧan x wudem n yeyyar ad t wceɣ i řewḥuc n řexřa maḥend ad t ṣarḍen uca inni iǧan di lqelɛat u deg ifran ad mmten s ṭṭaɛun!
EZE 33:28 [Maɣar] Necc ad arreɣ tammurt d areddeǧ d ijj n umedya n warjef uca nnfaxet n ṣṣulṭa nnes ad tᵉttwassbedd. Idurar n Israil ad ttwareddǧen ařami war din wi xasen i ɣa iẓwan.
EZE 33:29 [Xenni] ad ssnen belli Necc d SIDI, xmi ɣa arreɣ tammurt d areddeǧ d ijj n umedya n warjef zi ssibbet n jjɛayef nsen nni ggin.’”
EZE 33:30 “Cek, [a] mmis n bnadem, ayt n řgens nnec ssawařen xak ɣar řeḥyuḍ u ɣar wadaf n tudrin. Ijj issawař ak-d wenneɣni, kuř ijj ak-d umas, uca iqqar: ‘Asem-dd xenni uca sřem man awař i dd iffeɣ [zeg uqemmum] n SIDI!’
EZE 33:31 Nitni ad ɣarek dd-asen am mammec i dd-yusa [ijj n ubarru n] řgens, ad qqimen zzatek am řgens inu uca ad sřen i wawařen nnec, maca war zzaysen tteggen, maɣar s uqemmum nsen ssniɛmiřen tayri, maca uř nsen iggur awarni i řefḍeř n [yixef] nsen.
EZE 33:32 Uca xzar, aqa cek ɣarsen am wenni ittɣennajen izřan s tmijja teṣbeḥ, [amecnaw] wenni izemmaren ad igga [lmusiqa] mliḥ. Nitni ad sřen ɣar wawařen nnec, [maca] war zzaysen tteggen.
EZE 33:33 [Maca] řami ad dd-yas aya - xzar, ad dd-yas! - [xenni] ad ssnen belli tuɣa ijj n unabi di řwesṭ nsen.”
EZE 34:1 Yusa-dd ɣari wawař n SIDI, inna:
EZE 34:2 “[A] mmis n bnadem, nabb ḍidd i imeksawen n Israil uca ini asen: ‘Ammu i iqqar Sidi inu, SIDI! Uct x imeksawen n Israil nni yarekkwesen ixef nsen! Ma war ittxeṣṣi i imeksawen ad arewsen uǧi?
EZE 34:3 Kenniw tᵉttettem tadunt uca tarrḍem taḍuft, tɣarrṣem i řmař imessřen mliḥ, [maca] war tarekkwisem uǧi.
EZE 34:4 War tessmeɛzem min iheyyfen, war tᵉttessgenfim min iḥeřcen, min ittwarẓin war t tceffnem, min iweddaren war t tᵉttarrim u min ixsaren war xas tarezzum, [maca] s uqabu d ufus iqesḥen tḥekkmem xasen.
EZE 34:5 [Ammu i] ttwazuzzaren, minzi war din tuɣi bu umeksaw. Nitni dewřen d teymart n řewḥuc n barra nni iǧan di řexřa uca [ammu i] ttwabezzɛen.
EZE 34:6 Uyuren weddaren uǧi inu x marra idurar u x kuř tawrirt yuɛřan, uǧi inu ttwabezzɛen x marra tammurt. War din wi [xasen] i ɣa isseqsan uca war din wi [xasen] yarezzun.’”
EZE 34:7 “S uya, [a] imeksawen, sřem i wawař n SIDI:
EZE 34:8 ‘[S tidett am] ddareɣ Necc, [ammu i] iqqar Sidi inu, SIDI, ma war [ttiřiɣ] Necc [xasen]? Minzi uǧi inu dewřen d taymart u uǧi inu dewřen d macca i řewḥuc n řexřa, umi war din iǧi umeksaw u minzi imeksawen inu war ttseqsan ca x wuǧi inu u umi imeksawen inu arewsen ixef nsen, war iǧi uǧi inu!’”
EZE 34:9 “S uya, [a] imeksawen, sřem i wawař n SIDI!
EZE 34:10 Ammu i iqqar Sidi inu, SIDI: ‘Xzar, Necc aqa ayi ḍidd i imeksawen [nni]! Necc ad ttareɣ uǧi inu zeg ufus nsen uca ad ten ssbeddeɣ zeg warwas n wuǧi, ařami imeksawen war yarekkwesen ɛad ixef nsen. Necc ad ssnejmeɣ uǧi inu zeg uqemmum nsen, ařami war d asen ttiřin ɛad d macca.’
EZE 34:11 Minzi ammu i iqqar Sidi inu, SIDI: ‘Xzar, Necc ad sseqsiɣ x wuǧi inu u ad xasen arzuɣ.
EZE 34:12 Am umeksaw ad issmun taḥimart nnes deg wass nni di yeǧa di řwest n wuǧi nnes ibezzɛen, amenni i ɣa [y]arzuɣ Necc x wuǧi inu. Necc ad ten ssnejmeɣ zi marra imucan mani ttwabezzɛen, deg wass n iseynuten d taǧest.
EZE 34:13 Necc ad ten ssuffɣeɣ zi řegnus, ad ten ssmuneɣ zi temmura uca ad ten awyeɣ ɣar temmurt nsen. Necc ad ten arewseɣ x idurar n Israil, ɣar tɣezratin u di marra imucan i ittřiqen i tzeddiɣt di temmurt.
EZE 34:14 Necc ad ten arewseɣ x ict n ddemnet n tarewsa d taṣebḥant. X idurar yuɛřan n Israil ad yiři řmedweř n tarewsa nsen. Dinni ad areyyḥen deg ict n ddemnet n tarewsa taṣebḥant u ad arewsen deg ict n ddemnet n tarewsa d lemliḥ aṭṭas, x idurar n Israil.
EZE 34:15 Necc ad arewseɣ uǧi inu uca ad ten ssareyyḥeɣ!’, [ammu i] iqqar Sidi inu, SIDI.
EZE 34:16 ‘Necc ad arzuɣ min ixsaren uca min iweddaren ad t arreɣ u min ittwarẓin ad t cefneɣ u min iheřcen ad t ssjehdeɣ, [maca] min imessřen d min ijehden ad t areddǧeɣ. Necc ad ten arewseɣ s řḥeqq.
EZE 34:17 U kenniw, [a] uǧi inu, ammu i iqqar Sidi inu, SIDI, xzar, Necc ad ḥekmeɣ jar ijjen zeg wuǧi d wuǧi nneɣni, jar icarriyyen d iɣayḍen.
EZE 34:18 Ma drust awem umi teccim ddemnet n tarewsa inu d taṣebḥant? Ma texsem [xenni ɛawed] ad tɛefsem x min iqqimen i tarewsa s iḍaren nwem? Ma texsem ad teswem aman iṣfan uca [xenni] ad tessarwyen min iqqimen s iḍaren nwem?
EZE 34:19 Ma ittxeṣṣa [xenni] i wuǧi inu ad ccen min xef ɛefsen iḍaren nwem u ad swen min ssarwyen iḍaren nwem?’”
EZE 34:20 “S uya ammu i d asen iqqar Sidi inu, SIDI: ‘Xzar, Necc ad carrɛeɣ jar wuǧi imessřen d wuǧi ikkucḍen,
EZE 34:21 minzi marra uǧi iḍeɛfen tɛarnem i-ten s uɣezdis u s teɣruḍt u tessqarbem ten s waccawen nwem, ařami ten tbezzɛem di barra.
EZE 34:22 Necc ad ssnejmeɣ uǧi inu ařami war ttiřin ɛad i teymart u Necc ad carrɛeɣ jar ijjen zeg wuǧi d wuǧi nneɣni.
EZE 34:23 Necc ad xasen ssekkareɣ ijj n Umeksaw nni ten i ɣa yarewsen: Amsexxar inu Dawud. Netta ad ten yarwes u Netta ad asen yiři d Ameksaw.
EZE 34:24 Necc, SIDI, ad asen iřiɣ d AREBBI u Amsexxar inu Dawud ad yiři d Řḥakem di řwesṭ nsen, Necc, SIDI, aqa nniɣ t.
EZE 34:25 Necc ad ggeɣ ijj n Řɛahd n řehna akidsen uca ad kkseɣ řewḥuc iwɛaren zi temmurt. Nitni ad zedɣen di řexřa s řaman uca ad ṭṭṣen deg izeɣran.
EZE 34:26 Ad ggeɣ min innḍen i wedrar inu d lbaraka u Necc ad dd-ssehwiɣ anẓar di řweqt nnes. Ad din yiři wenẓar aṭṭas s lbaraka.
EZE 34:27 Ticejjura n yeyyar ad wcent řɣiǧet nsent uca tammurt ad tewc ṣṣabet nnes uca nitni ad zedɣen di řaman di temmurt nsen. [Xenni] ad ssnen belli Necc d SIDI, xmi ɣa arẓeɣ imqeǧaden n zzayřet nsen uca ad ten qeřɛeɣ zeg ufus n yinni ten ijjin ad asen sexxaren.
EZE 34:28 War ttiřin ɛad d takeccaḍt i řegnus uca řewḥuc n temmurt war ten ṣarrḍen ɛad, [maca] nitni ad zedɣen di řaman u war ten issnexřiɛ uřa d ijj.
EZE 34:29 Necc ad asen ssduqqzeɣ ijj n uɣemmuy, ad yiři i yijj n yisem [icennɛen]. [Xenni] war ttmeksin ɛad s řaẓ zi temmurt uca war arebbun ɛad řḥegra n řegnus.
EZE 34:30 [Xenni] ad ssnen belli Necc, SIDI AREBBI nsen, aqa ayi kidsen, uca nitni d řgens inu, taddart n Israil!, [ammu i] iqqar Sidi inu, SIDI.
EZE 34:31 Kenniw, [a] uǧi inu, uǧi n řmedweř inu n tarewsa, kenniw d bnadem, [maca] Necc d AREBBI nwem, [ammu i] iqqar Sidi inu, SIDI.’”
EZE 35:1 Yusa-dd ɣari wawař n SIDI, inna:
EZE 35:2 “[A] mmis n bnadem, arr udem nnec ɣar idurar n Saɛir u nabb xas,
EZE 35:3 [wah,] ini as: ‘Ammu i iqqar Sidi inu, SIDI! Xzar, Necc [ad] ɣarek [dd-aseɣ], [a,] idurar n Saɛir uca ad sswiẓẓḍeɣ afus inu ḍidd nnec uca ad cek arreɣ d tareddeǧt d řexřa.
EZE 35:4 Necc ad arreɣ tineddam nnec d řxarbet u cek ad tdewřed d tareddeǧt u cek ad tessned belli Necc d SIDI,
EZE 35:5 minzi ɣarek řeɛdawat ittduman u [minzi] tsellmed ayt n Israil i tzemmar n ssif di řweqt n uḍeyyeɛ nsen, di řweqt n lḥisab aneggar x řmuɛṣiyyet.’”
EZE 35:6 “S uya, [s tidett am] ddareɣ Necc, iqqar Sidi inu, SIDI: ‘Necc ad cek arreɣ d idammen [qaɛ] u idammen ad cek ḍfaren. [Wah] umi war tcarhed ca asizzeř n idammen, ad cek ḍfaren idammen.
EZE 35:7 Necc ad arreɣ idurar n Saɛir d tareddeǧt d řxarbet. Necc ad zzayes qesseɣ wi iɛeddun d wi dd-idekkwařen.
EZE 35:8 Necc ad ccureɣ idurar nnes s yinni ittwanɣen, tiwririn nnec d teɣzurtin nnec, [wah,] inni ittwanɣen s ssif ad wḍan di marra tiɣezratin nnec.
EZE 35:9 Necc ad cek ggeɣ d tireddeǧin i řebda u tineddam nnec ɛemmarṣ war daysent ttwifen [ɛad] imezdaɣ u kenniw ad tessnem belli Necc d SIDI,
EZE 35:10 minzi tennid: Tnayen n řegnus nni d tnayen n temmura nni ad iřint inu u neccin ad tent ṭṭfen d řwart!, [am] SIDI aqa-t din.’”
EZE 35:11 “S uya, [s tidett am] ddareɣ Necc, iqqar Sidi inu, SIDI: ‘Necc ad ac ggeɣ anect n weɣḍab nnec u anect n tusmi nnec nni tuɣa ɣarek deg wecrah nnec zzaysen, [maca] nitni ad ayi ssnen xmi xak ɣa ḥekmeɣ.
EZE 35:12 Ad tessned, belli Necc, SIDI, sřiɣ i marra aceqqaf nnec nni tessiwřed ḍidd i idurar n Israil, tennid: Aqa twareddǧen, mmewcen aneɣ d macca.
EZE 35:13 [Ammu i] xafi tqeřbem s uqemmum nwem iccur s ukebbar uca tarnim tfarrɣem awařen nwem xafi aṭṭas. Necc sřiɣ t.’
EZE 35:14 Ammu i iqqar Sidi inu, SIDI: ‘Am tfarreḥ marra tammurt, Necc ad cek arreɣ d ict n temmurt ittwareddǧen.
EZE 35:15 Am mammec tfarḥed s tesɣart n taddart n Israil, minzi aqa tᵉttwareddeǧ, Necc ad kik ggeɣ ammu, [a kenniw,] idurar n Saɛir, [cem] marra [tammurt] n Idum, ad tiřid d tareddeǧt! Uca nitni ad ssnen, belli Necc d SIDI.’”
EZE 36:1 “Cek, [a] mmis n bnadem, nabb i idurar n Israil, ini: ‘Idurar n Israil, sřem i wawař n SIDI!
EZE 36:2 Ammu i iqqar Sidi inu, SIDI: Minzi řeɛdu inna xawem: Iya, aqa řegɛudi n řebda dewřent aneɣ d tasɣart! ...
EZE 36:3 ... s uya nabb, ini: Ammu i iqqar Sidi inu, SIDI: Minzi areddǧen u ṣarḍen kenniw zi marra iɣezdisen, ḥima ad tdewřem d tasɣart n min iqqimen n řegnus u [minzi] tᵉttwassekkaren xawem awařen uca tdewřem i uceqqaf jar řgens,
EZE 36:4 ... s uya, idurar n Israil, sřem i wawař n Sidi inu, SIDI! Ammu i iqqar Sidi inu, SIDI, i idurar d tewririn, i tɣezratin d řwaṭat, i řxirbat ttwareddǧent u i tneddam i ijjin, tinni idewřen i tkeccaḍt d řḥegra i min iqqimen n řegnus nni dd awem dd-innḍen,
EZE 36:5 ... s uya, ammu i iqqar Sidi inu, SIDI: S tidett, aqa di tmessi n tusmi inu [iqeddsen] ssiwřeɣ ḍidd i min iqqimen n řegnus u ḍidd i marra [tammurt] n Idum, inni iwcin tammurt inu d tasɣart i yixef nsen, s řefraḥet n wuř marra, s řeɛmar [iccuren] s useḥqar, maḥend ddmani n tarewsa ad asen iřint d takeccaḍt!
EZE 36:6 ... s uya, nabb ḍidd i temmurt n Israil uca ini i idurar d tewririn u i tɣezratin d řwaṭat: Ammu i iqqar Sidi inu, SIDI, xzar, Necc siwřeɣ di tusmi inu [iqeddsen] u deg wesɛar inu, minzi kenniw aqa tarbum řḥegra n řegnus.
EZE 36:7 ... s uya, ammu i iqqar Sidi inu, SIDI, Necc ssgeɛɛdeɣ afus inu, [ẓuǧeɣ]: S tidett, řegnus i d awem dd-innḍen ad arbun řḥegra s yixef nsen!
EZE 36:8 [Maca] kenniw, idurar n Israil, ad tewcem [ɛawed] řefruɛ nwem uca ad dd-tawyem řɣiǧet nwem i řgens inu Israil, minzi ɛřaḥař ad dd-asen.
EZE 36:9 Maɣar xzar, Necc [ad iřiɣ] akidwem uca Necc ad ɣarwem nqeřbeɣ u kenniw, [a idurar], ad xawem carzen [ɛawed] u ad xawem zarrɛen.
EZE 36:10 Necc ad arniɣ iwdan xawem, marra taddart n Israil, [wah,] marra nettat, uca ad sszedɣen tineddam u ad bnan řxirbat [ɛawed].
EZE 36:11 Ad xawem arniɣ iwdan d řmař u nitni ad arnin deg yixef nsen u ad dd-jjen řɣiǧet u Necc ad kenniw sszedɣeɣ [din] ɛawed, am deg wussan n wecḥař uya, [wah,] Necc ad arreɣ řḥař ḥsen x umezwar nwem u kenniw ad tessnem belli Necc d SIDI.
EZE 36:12 Ad jjeɣ iwdan ad xawem uyuren: řgens inu Israil. Nitni ad cek ṭṭfen d řwart, [a řgens inu], u kenniw, [a idurar n Israil,] ad asen tiřim d řwart, u kenniw war tᵉttkeccaḍem ɛad arraw [nsen].
EZE 36:13 Ammu i iqqar Sidi inu, SIDI: Minzi qqaren awem: Cem tᵉtted iwdan u cem d [ict n temmurt] i ittkeccaḍen arraw n řgens nnem! ...
EZE 36:14 ... s uya war tecced ɛad iwdan u war tessneqraḍed ɛad řgens nnem!, [ammu i] iqqar Sidi inu, SIDI.
EZE 36:15 Necc ad ggeɣ ɛemmarṣ ad tᵉttwaseř ɛad řḥegra n řegnus xam u war tkessid ɛad astehzi n řegnus u war tessneqraḍed ɛad řgens nnem!, [ammu i] iqqar Sidi inu, SIDI.’”
EZE 36:16 Yusa-dd ɣari wawař n SIDI, inna:
EZE 36:17 “[A] mmis n bnadem, [umi] tuɣa taddart n Israil tzeddeɣ di temmurt nnes, aqa ssxemmjen tt s webrid nsen d tmegga nsen. Abrid nsen tuɣa-t am řexmej n temɣart i x ǧan idammen [deg wussan n] weɛzař [nnes].
EZE 36:18 Necc ssfarrɣeɣ xasen asɛar inu zi ssibbet n idammen nni ssizzřen x temmurt u zi ssibbet n imeyḍa n [l’aṣnam nsem] i zi tt ssxemjen.
EZE 36:19 Nexx ssbezzɛeɣ ten jar řegnus u nitni ttwassuysen di temmura. Necc ḥekmeɣ xasen ɛlaḥsab tuyurt nsen u ɛlaḥsab řexdayem nsen.
EZE 36:20 [Umi] iwḍen ɣar řegnus mani tuɣa uyuren, ssfeḍḥen Isem iqeddsen inu, minzi ittwanna xasen: ‘Ina d řgens n SIDI, [maca] tuɣa ittxeṣṣa ad ffɣen zi temmurt nnes.’
EZE 36:21 Maca Necc ssɛizzeɣ ten di ṭṭweɛ n Yisem inu iqeddsen nni tessefḍeḥ taddart n Israil jar řegnus mani tuɣa uyuren nitni ...
EZE 36:22 ... s uya, ini i taddart n Israil: Ammu i iqqar Sidi inu, SIDI: War tt tteggeɣ di ṭṭweɛ nwem, [a] taddart n Israil, maca di ṭṭweɛ n Yisem inu iqeddsen nni tessfeḍḥem kenniw jar řegnus mani tuɣa tuyurem.
EZE 36:23 Maɣar ad ssqeddseɣ Isem inu imɣaren nni tessfeḍḥem di řwest nsen, uca řegnus ad ssnen aqa Necc d SIDI, [ammu i] iqqar Sidi inu, SIDI, xmi ɣa ttwaqeddseɣ daywem zzat i tiṭṭawin nsen.
EZE 36:24 Minzi ad kenniw ksiɣ zi řegnus, ad kenniw ssmuneɣ zi marra timmura uca ad kenniw awyeɣ ɣar temmurt nwem.
EZE 36:25 Ad xawem zeǧɛeɣ aman izdigen uca ad ttwassizdegem. Necc ad kenniw ssizdegeɣ zi marra řexmujat nwem u zi marra imeyḍa nwem [n l’aṣnam].
EZE 36:26 Ad awem wceɣ uř n jdid u ad ggeɣ buḥbeř amaynu di daxeř nwem uca ad kkseɣ zi arrimet nwem uř n weẓru uca ad awem wceɣ uř n weysum.
EZE 36:27 Ad ggeɣ Arruḥ inu di daxeř nwem u ad arreɣ kenniw ad teggem tiweṣṣa inu u ad teḥḍam lfarayiḍ inu u ad zzaysent teggem.
EZE 36:28 Ad tzedɣem di temmurt nni wciɣ i řejdud nwem, uca kenniw ad tiřim d řgens inu uca Necc ad iřiɣ d AREBBI nwem.
EZE 36:29 Necc ad kenniw ssnejmeɣ zi marra řexmujat nwem. Ad řaɣiɣ i imendi uca ad dayes arniɣ aṭṭas u war d awem tticeɣ řaẓ.
EZE 36:30 Ad arniɣ [amenni] řɣiǧet n tcejjura u n yeyyar, ḥima war xawem tekk ɛad řḥegra n řaẓ jar řegnus.
EZE 36:31 [Xenni] ad tidarem deg ibriden nwem iɛeffnen d tmegga nwem war iṣebḥen u kenniw ad tɛiffem zeg yixef nwem u zi jjɛayef nwem.
EZE 36:32 [Maca] war tt tteggeɣ di ṭṭweɛ nwem, [ammu i] iqqar Sidi inu, SIDI, snem tt mliḥ! Seḍḥam u ssnem řefḍiḥet n ibriden nwem, [a] taddart n Israil.”
EZE 36:33 “Ammu i iqqar Sidi inu, SIDI: ‘Deg wass nni ad ssizedgeɣ marra řmuɛṣiyyat nwem, ad sszedɣeɣ tineddam [ɛawed] uca ad bniɣ [ɛawed] řxirbat.
EZE 36:34 Tammurt ittwareddǧen ad tᵉttwacarz deg wemcan i ɣa tiři tᵉttwareddeǧ zzat i tiṭṭawin n marra inni tt iẓekkwan.
EZE 36:35 Ad inin: Tammurt nni tuɣa tᵉttwareddeǧ, tedweř am jjennet n Ɛadn u tineddam ttwaxarrabent d ttwareddǧent d ttwahedment, aqa ttwassjehdent u zeddɣen daysent imezdaɣ [ɛawed].
EZE 36:36 [Xenni] ad ssnen řegnus nni iqqimen deg wenneḍ nwem, aqa Necc, SIDI, ad bniɣ min ittwahedmen [ɛawed] u ad ẓẓuɣ x min ittwareddǧen. Necc, SIDI, ssiwřeɣ u Necc ad t ggeɣ.’”
EZE 36:37 “Ammu i iqqar Sidi inu, SIDI: ‘Ad ayi tᵉttar taddart n Israil uřa d man aya ḥima ad asen t ggeɣ. Necc ad daysen arniɣ [iwdan], [ařami ad din iřin] anect n iwdan am wuǧi.
EZE 36:38 Anect iǧan n wuǧi iqeddsen am wuǧi i ccuren [tandint n] Urcalim di řeɛyudat nnes ittwaggen, ammu i ɣa iřint tneddam ittwareddǧen ccurent s wuǧi d iwdan u nitni ad ssnen aqa Necc d SIDI.’”
EZE 37:1 Tuɣa ufus n SIDI xafi uca SIDI issuffeɣ ayi-dd di Arruḥ uca issars ayi di řwesṭ n řewḍa nni tuɣa yeccuren s iɣsan.
EZE 37:2 Netta indeh ayi deg wenneḍ nnes, u xzar, aqa din aṭṭas s waṭṭas [n iɣsan] x wudem n řewḍa, u xzar, aqa aten uẓɣen aṭṭas.
EZE 37:3 Netta inna ayi: “[A] mmis n bnadem, ma ad ddaren iɣsan-a [ɛawed]?” Nniɣ necc: “[A] Sidi inu, SIDI, Cek tessned [t]!”
EZE 37:4 [Xenni] inna ayi: “Nabb x yeɣsan-a, ini asen: ‘[A] iɣsan uẓɣen, sřem i wawař n SIDI.
EZE 37:5 Ammu i iqqar Sidi inu, SIDI, i iɣsan-a: Xzar, Necc ad daywem ssidfeɣ buḥbeř uca ad teddarem [ɛawed].
EZE 37:6 Ad xawem ggeɣ iẓewran u ad xawem ssgeɛɛdeɣ aysum uca ad kenniw dřeɣ s iřem uca ad daywem ggeɣ buḥbeř, ad teddarem [ɛawed]. [Xenni] ad tessnem belli Necc d SIDI.’”
EZE 37:7 [Řami] tuɣa ttnabbeɣ am mammec d ayi ittwaweṣṣa, uca tuɣa [din] ijj n řḥess řami tuɣa ttnabbeɣ, u xzar, [aqa da] ict n tarjijit uca iɣsan munen, [kuř] iɣes ak-d iɣes nnes.
EZE 37:8 Ẓřiɣ, u xzar, aqa dewřen xasen-dd iẓewran u yuři xasen weysum u Netta idřa i-ten s yiřem sennej nsen, [maca] war daysen tuɣi [ɛad] buḥbeř.
EZE 37:9 Netta inna ayi: “Nabb i Arruḥ, nabb, [a] mmis n bnadem, uca ini i Arruḥ: ‘Ammu i iqqar Sidi inu, SIDI: As-dd zi arebɛa n tɣemmura n usemmiḍ, [a] Arruḥ, u suḍ deg ina inni ittwanɣen, [ḥima] ad ddaren.’”
EZE 37:10 [Xenni] nabbeɣ am mammec i d ayi ittwaweṣṣa. Uca yudef Arruḥ daysen uca ddaren [ɛawed] uca [kkaren] bedden x iḍaren nsen, [aqa] d ijj n řɛeskar d ameqqran aṭṭas s waṭṭas.
EZE 37:11 [Xenni] inna ayi: “[A] mmis n bnadem, iɣsan-a [aqa aten] marra taddart n Israil. Xzar, nitni qqaren: ‘iɣsan nneɣ uẓɣen uca řayas nneɣ iweddar u neccin nettwaqḍeɛ!’
EZE 37:12 S uya, nabb, ini asen: ‘Ammu i iqqar Sidi inu, SIDI: Xzar, Necc ad arzmeɣ imeḍřan nwem, ad kenniw ssgeɛɛdeɣ zeg imeḍřan nwem, [a] řgens inu, u Necc ad kenniw awyeɣ x wudem n temmurt n Israil.
EZE 37:13 Kenniw ad tessnem, belli Necc d SIDI, umi arzmeɣ imeḍřan nwem uca ssuffɣeɣ-dd kenniw zeg imeḍřan nwem, [a] řgens inu.
EZE 37:14 Necc ad ggeɣ Arruḥ inu daywem [di daxeř nwem] u kenniw ad teddarem [ɛawed] u Necc ad kenniw ssarseɣ x wudem n temmurt nwem u kenniw ad tessnem belli Necc, SIDI, ssiwřeɣ uca ggiɣ [t], [ammu i] iqqar SIDI.’”
EZE 37:15 Yusa-dd ɣari wawař n SIDI, inna:
EZE 37:16 “Cek, [a] mmis n bnadem, ksi ijj n uzeǧaḍ [n ukeccuḍ] uca ari dayes: ‘I Yahuda u i arraw n Israil, imɛacaren nnes!’ Ksi awarni as azeǧaḍ nneɣni uca ari dayes: ‘I Yusuf, azeǧad n Ifrayim, u [i] marra taddart n Israil, imeddukkař nnes!’
EZE 37:17 Smun ten xenni ijj ak-d wenneɣni, [egg zzaysen] ijj n uzeǧaḍ i cek. Ad dewřen d ijj deg ufus nnec.
EZE 37:18 Xmi kik i ɣa issiwřen tarwa n řgens nnec, ad inin: ‘Ma war texsed ad aneɣ tessecned min ixs ad inint tmesřayin-a i cek?’,
EZE 37:19 ini asen: ‘Ammu i iqqar Sidi inu, SIDI: Xzar, Necc ad ksiɣ azeǧaḍ n Yusuf, wenni iǧan deg ufus n Ifrayim, [azeǧaḍ] n tqebbař n Israil, imɛacaren nnes, uca ad ten ssmuneɣ ak-d uzeǧaḍ n Yahuda uca ad ten ggeɣ d ijj n uzeǧaḍ uca ad dewřen d ijj deg ufus inu.’
EZE 37:20 Izeǧaḍen zeg ukeccuḍ i x turid, [ad iřin] deg ufus nnec zzat i tiṭṭawin nsen.
EZE 37:21 [Xenni] ini asen: ‘Ammu i iqqar Sidi inu, SIDI: Xzar, Necc ad ṭṭfeɣ ayt n Israil zi řwest n řegnus mani ɣar uyuren uca ad ten ssmuneɣ zeg wenneḍ uca ad ten awyeɣ ɣar wudem n temmurt nsen.
EZE 37:22 Necc ad ten ggeɣ d ijj n řgens di temmurt, x idurar n Israil, d ijj n Ujeǧid ad yiři i marra idsen d Ajeǧid uca ɛemmarṣ ɛad ad iřin i tnayen n řegnus u ɛemmarṣ ɛad ad ttwabḍan di tnayen n tgeldiwin.
EZE 37:23 War ssxemmajen ɛad ixef nsen s imeyḍa nsen n l’aṣnam, s nnɛawat nsen n l’aṣnam u s řmuɛṣiyyat nsen. Necc ad ten ssnejmeɣ zi marra tineddam nsen i di xḍin nitni u Necc ad ten ssizedgeɣ. [Xenni] nitni ad ayi iřin d řgens u Necc ad asen iřiɣ d AREBBI.
EZE 37:24 Amsexxar inu Dawud ad xasen yiři d ajeǧid uca ad din yiři ijj n Umeksaw i marra nitni. Nitni ad ḍfaren lfarayiḍ inu uca ad ḥḍan tiweṣṣa inu, ad zzaysent ggen.
EZE 37:25 Ad zedɣen di temmurt nni wciɣ i umsexxar inu Yaɛqub, i di tuɣa zeddɣen řejdud nwem, [wah,] nitni ad dayes zedɣen i řebda, nitni d iḥenjiren nsen d iḥenjiren n iḥenjiren nsen, uca Amsexxar inu Dawud ad yiři d Řḥakem nsen i řebda.
EZE 37:26 Necc ad kidsen qeḍɛeɣ ijj n Řɛahd n řehna, ad yiři d Řɛahd i řebda. Necc ad ten barkeɣ u ad daysen arniɣ aṭṭas u Necc ad ggeɣ Zzawect inu Iqeddsen di řwesṭ nsen i řebda.
EZE 37:27 Ad ɣarsen tiři Tzeddiɣt inu u Necc ad iřiɣ d AREBBI nsen u nitni ad iřin d řgens inu,
EZE 37:28 uca ad ssnen řegnus, belli Necc d SIDI nni issqeddsen Israil xmi ɣa tiři Zzawect inu Iqeddsen di řwesṭ nsen i řebda.’”
EZE 38:1 Yusa-dd ɣari wawař n SIDI, inna:
EZE 38:2 “[A] mmis n bnadem, arr udem nnec ɣar [Ha]juj [zi] temmurt n Majuj, řḥakem n Ruc, Macik d Tubal, uca nabb ḍidd nnes,
EZE 38:3 ini: ‘Ammu i iqqar Sidi inu, SIDI: Xzar, Necc aqa ayi ḍidd nnec, [a] [Ha]juj, řḥakem n Ruc, Macik d Tubal.
EZE 38:4 Necc ad cek qemmɛeɣ u ad ggeɣ tisennarin deg iqabsiwen nnec uca ad cek ssuffɣeɣ, cek d marra řɛeskar nnec, iysan d imnayen, marra arḍen arruḍ mliḥ aṭṭas, ijj n wegraw d ameqqran aṭṭas, s tseddart tameqqrant d tseddart tameẓyant [n uɛeskari], marra nitni ɣarsen tizemmar deg umenɣi s ssif.
EZE 38:5 Ayt n Lfurs, n Kuc u n Fuṭ akidsen, marra idsen s tseddart [n uɛeskari] d lkask [n uɛeskari],
EZE 38:6 Jumar ak-d marra řɛeskar nnes, d taddart n Tujarma zi ṭṭrufa n ccamal qaɛ ak-d marra řɛeskar nnes, [wah,] aṭṭas n řegnus [ad dd-asen] akidek.
EZE 38:7 Iři twejded u sewjed ixef nnec, cek d marra agraw nnec nni tessmuned ɣarek, u iři d ameḥḍay nsen.
EZE 38:8 Awarni waṭṭas n wussan ad tᵉttwařaɣid, awarni řami ɛdun aṭṭas n iseggʷusa ad dd-tased ɣar temmurt nni ittwaɛedřen zi ssif, [ɣar ijj n řgens] i ittwassmunen zi řegnus x idurar n Israil nni tuɣa d řxirbet i yijj n řweqt d azirar, [ɣar ijj n řgens] nni ittwassuffɣen zi řegnus, u marra nitni zeddɣen [dinni] di řaman.
EZE 38:9 [Xenni] ad tgeɛɛded am tḥaryaḍt, am useynu maḥend ad tedřed tammurt, cek d marra řɛeskar nnec uřa d aṭṭas n řegnus nni kik [iǧan].’”
EZE 38:10 “Ammu i iqqar Sidi inu, SIDI: ‘Deg wass nni ad imsar, aqa ad adfen ixarriṣen deg wuř nnec u cek ad txarrṣed di tmeɛmuč taɛeffant.
EZE 38:11 Ad tinid: Ad geɛɛdeɣ ɣar ict n temmurt s tneddam břa řeḥyuḍ, ad dd-aseɣ ɣar [yenni din] iddaren di řehna u [ɣar yinni din] izeddɣen di řaman, inni din izeddɣen marra břa řḥiḍ u břa zzekrunat niɣ tiwwura,
EZE 38:12 maḥend ad keccḍeɣ u ad acareɣ agřa! [Wah,] maḥend ad tarred afus nnec x řxirbat nni di zeddɣen [ɛawed iwdan], x yijj n řgens nni ittwassmunen zi řegnus, wenni ikesben řmař d wagřa, wenni izeddɣen x tɛebbuḍt n temmurt.
EZE 38:13 Caba d Dadan d ttujar n Tarcic d marra ayraden imeẓyanin nsen ad ac inin: Ma dd-tusid maḥend ad tᵉṭṭfed takeccaḍt? Ma tessmuned agraw nnec maḥend ad tkeccḍed, ḥima ad teksid nnuqart d wureɣ, ḥima ad tᵉṭṭfed řmař d wagřa, ḥima ad tacared takeccaḍt tameqqrant?’”
EZE 38:14 “S uya, nabb, [a] mmis n bnadem, uca ini i [Ha]juj ‘Ammu i iqqar Sidi inu, SIDI: Deg wass nni, xmi ɣa izdeɣ řgens inu Israil di řaman, ma cek war tessined [min ittxeṣṣa ad t tegged]?
EZE 38:15 Ad dd-tased zeg wemcan nnec, zi ṭṭrufa n ccamal qaɛ, cek d waṭṭas n řegnus akidek. Marra nitni d imnayen s iysan, ijj n wegraw d ameqqran d yijj n řɛeskar ijehden.
EZE 38:16 Ad tgeɛɛded ḍidd i řgens inu Israil, am yijj n useynu, maḥend ad tedřed tammurt. Ad yiři deg uneggar n wussan. Necc ad cek ssiwḍeɣ x temmurt inu, ḥima řegnus ad ayi ssnen, xmi zzayek i ɣa ttwaqeddseɣ zzat i tiṭṭawin nsen, [a] [Ha]juj!’
EZE 38:17 Ammu i iqqar Sidi inu, SIDI: ‘Ma aqa cek d wenni x ssiwřeɣ deg wussan n zic, s ufus n imsexxaren inu, inabiyyen n Israil nni tuɣa ittnabben deg wussan nni, [řmijař n] waṭṭas n iseggʷusa, belli Necc ad cek ssiwḍeɣ ḍidd nsen?
EZE 38:18 Deg wass nni, deg wass i di dd ɣa yas [Ha]juj ḍidd i temmurt n Israil, [ammu i] iqqar Sidi inu, SIDI, aqa ad yaři wesɛar inu deg wenzaren inu.
EZE 38:19 Di tusmi inu [iqeddsen], di tmessi n uduqqez inu [n ufugem] nniɣ: [S tidett, am ddareɣ Necc], mařa deg wass nni war ittiři ijj n wenhezzi n temmurt ameqqran di temmurt n Israil,
EZE 38:20 [ařami] iseřman n řebḥar d ijḍaḍ n ujenna d řmař n yeyyar d marra řmař nni ittbuɛen x temmurt d marra iwdan nni [iǧan] x wudem n temmurt ad arjijen, u idurar ad ttwamenḍaren u řejruf iɛuǧen ad hruran d marra řeḥyuḍ ad wḍan.
EZE 38:21 Necc ad dd-řaɣiɣ x ssif ḍidd nnes x marra idurar inu, [ammu i] iqqar Sidi inu, SIDI. Ssif n kuř ijj ad yiři x umas.
EZE 38:22 Necc ad xas ḥekmeɣ s ṭṭaɛun u s idammen uca ad xas ggeɣ u x řɛeskar nnes u x waṭṭas n řegnus nni kides i ɣa yiřin, anẓar ijehden d ibquqen imeqqranen n tebruri d tmessi d řecbariyyet.
EZE 38:23 Necc ad ssecneɣ Ixef inu d ameqqran d amqeddas u ad ttwassneɣ zzat i tiṭṭawin n řegnus. Nitni ad ssnen belli Necc d SIDI.’”
EZE 39:1 “[Xenni] řexxu, [a] mmis n bnadem, nabb ḍidd i [Ha]juj uca ini: ‘Ammu i iqqar Sidi inu, SIDI: Xzar, aqa ayi xak, [a, cek] [Ha]juj, řḥakem n Ruc, Macik d Tubal.
EZE 39:2 Necc ad cek ssɛeqbeɣ u ad dayek ggeɣ tisennarin u ad cek ssgeɛɛdeɣ zi ṭṭrufa n ccamal uca ad cek gewwdeɣ x idurar n Israil.
EZE 39:3 Ad wteɣ řqews zeg ufus nnec azeřmaḍ uca ad ɣeḍřeɣ fřitcat nnec zeg ufus nnec afusi.
EZE 39:4 Ad tewḍid x idurar n Israil, cek d marra řɛeskar nnec d řegnus nni [iǧan] akidek. Necc wciɣ cek d macca i ɛřam kuř ijḍaḍ ittkeccaḍen u i řmař n řexřa.
EZE 39:5 X wudem n yeyyar ad tewḍid, minzi Necc nniɣ t, [ammu i] iqqar Sidi inu, SIDI.
EZE 39:6 Necc ad ssekkeɣ timessi x Majuj u x inni izeddɣen s řeḥna di tegzirin u nitni ad ssnen belli Necc d SIDI.
EZE 39:7 Necc ad ssbaneɣ Isem inu iqeddsen di řwest n řgens Israil u Necc war ttejjiɣ ɛad ad ssxemjen Isem inu iqeddsen. Řegnus ad ssnen belli Necc d SIDI, Amqeddas di Israil.
EZE 39:8 Xzar, ad dd-yas u ad imsar!, [ammu i] iqqar Sidi inu, SIDI. Wa d ass nni x ssiwřeɣ.’”
EZE 39:9 “Imezdaɣ n tneddam n Israil ad ffɣen uca ad ssarɣen timessi ad sscemḍen [marra] řesnaḥ: am tseddariyin timeẓyanin am tseddariyin timeqqranin uřa d řqews d fřitcat d iɛumad i yifassen d iḥricen. Sebɛa n iseggʷusa ad zzaysen ssarɣen timessi.
EZE 39:10 War dd-ttiwyen akeccuḍ zeg iyyar u war ttqessin tafřawt zeg izeɣran, [minzi] ssarɣen timessi s řesnah uca ad keccḍen inni ten ikeccḍen uca ad acaren i yinni d asen yucaren!’, [ammu i] iqqar Sidi inu, SIDI.”
EZE 39:11 “Deg wass nni ad imsar, aqa Necc ad sswejdeɣ din amcan i [Ha]juj ijj n wenḍeř di Israil, Řewḍa n yinni iẓekkwan, ɣar ccarq n řebḥar, u tanita ad tbelleɛ [abrid] i yinni [ixsen] ad ẓekkwan. Din i ɣa neḍřen [Ha]juj d marra řɣaci nnes inhewřen u ad xas řaɣan: Řewḍa n Řɣaci Inhewřen n [Ha]juj.
EZE 39:12 Taddart n Israil ad ten tenḍeř, maḥend ad ssizdegen temmurt, [řmijař n] sebɛa n iyuren.
EZE 39:13 Marra řgens n temmurt ad [ten] neḍřen uca aya ad asen yiři i ccan, deg wass i di ɣa ttwassɛuǧeɣ!’, [ammu i] iqqar Sidi inu, SIDI.
EZE 39:14 ‘Ad farzen ɛawed iryazen maḥend ad ẓwan nitni tammurt břa qeṭṭu maḥend ad neḍřen inni xas ikkin, inni tuɣa iqqimen buzzřen x wudem n temmurt, ḥima ad ssizedgen [tammurt]. Awarni sebɛa n iyuren ad qeǧben nitni.
EZE 39:15 Inni i d asen ittxeṣṣa ad ẓwan tammurt ad tt ẓwan u xmi ittwařa ḥed ijj n yiɣes n bnadem, ad yegg ɣares ict n řmarka ař t ɣa neḍřen inni ineṭṭařen di Řewḍa n Řɣaci Inhewřen n [Ha]juj.
EZE 39:16 Ɛawed [ad yiři] isem n ict n tendint ‘Řɣaci Inhewřen’. Nitni ad sizedgen tammurt.’”
EZE 39:17 “Cek, [a] mmis n bnadem, ammu i iqqar Sidi inu, SIDI: ‘Ini i marra řmarkat n ijḍaḍ u i marra řmař n yeyyar: Munem-dd [da], asem-dd, seddem ixef nwem zeg wenneḍ ɣar tɣarṣt inu nni ɣarṣeɣ i kenniw, taɣarṣt tameqqrant x idurar n Israil, uca ad teccem aysum, ad teswem idammen.
EZE 39:18 Ad teccem aysum n ayt n bu-řexcunet u ad teswem idammen n řḥukkam n ddunect, n icarriyyen d izmaren d iɣayḍen d ifunasen imeẓyanen, aqa aten marra dewsen di Basan.
EZE 39:19 Ad teccem tadunt ař ɣa tejjiwnem uca ad teswem idammen ař ɣa tescarem zi tɣarṣt inu i ɣarṣeɣ i kenniw.
EZE 39:20 Kenniw ad tejjiwnem ɣar ṭṭabřa inu s iysan d imnayen, s ayt n bu-teɣruḍt u s marra iɛeskariyyen, [ammu i] iqqar Sidi inu, SIDI.
EZE 39:21 Ad ggeɣ aɛuǧi inu jar řegnus uca marra řegnus ad ẓaren řḥukm inu nni ggiɣ, uřa d afus nni jar asen ssarseɣ.
EZE 39:22 Taddart n Israil ad tessen, aqa Necc, SIDI, d AREBBI nsen, zeg wass nni u zi ssa tsawent.
EZE 39:23 Ad ssnen řegnus aqa inni n taddart n Israil ttwanedhen di lmenfa zi ssibbet n řmuɛṣiyyet nsen, minzi ɣeddaren ayi uca Necc ffareɣ xasen udem inu uca wciɣ ten deg ufus n iɣrimen nsen u [xenni] wḍan marra s ssif.
EZE 39:24 Necc ggiɣ asen am mammec taxmuji nsen u am mammec řmuɛṣiyyet nsen u Necc ffareɣ zzaysen udem inu.’”
EZE 39:25 “S uya, ammu i iqqar Sidi inu, SIDI: ‘Řexxu ad ssɛeqbeɣ imeḥbas n Yaɛqub, ad ḥinneɣ x marra taddart n Israil. Ad usmeɣ di ṭṭweɛ n Yisem inu iqeddsen.
EZE 39:26 Nitni ad arbun řefḍiḥet nsen d marra řmuɛṣiyyet nsen i zi d ayi ɣḍaren xmi nitni ɛad zedɣen di řaman di temmurt nsen u war iǧi wi ten i ɣa issiggʷeden.
EZE 39:27 Xmi ten i ɣa ssɛeqbeɣ zi řegnus u ad ten ssmuneɣ zi temmura n řɛedyan nsen u Necc ad ttwaqeddseɣ zzaysen zzat i tiṭṭawin n waṭṭas n řegnus,
EZE 39:28 [xenni] ad ssnen belli Necc d SIDI, AREBBI nsen, minzi Necc nedheɣ ten d imeḥbas jar řegnus u Necc ssmuneɣ ten [ɛawed] di temmurt nsen, war [din] jjiɣ uřa d ijjen zzaysen.
EZE 39:29 Necc war xasen tteffareɣ ɛad udem inu, xmi aqa ssfarrɣeɣ Arruḥ inu x taddart n Israil!’, [ammu i] iqqar Sidi inu, SIDI.”
EZE 40:1 Deg useggʷas wiss xemsa u-ɛicrin n lmenfa nneɣ, ɣar umezwar n useggʷas, deg wass wiss ɛecra n uyur, deg useggʷas wiss arbeɛṭac awarni ma wtin tandint, deg wass nni nnit, tuɣa afus n SIDI xafi uca indeh ayi din.
EZE 40:2 Di iweḥḥan n AREBBI indeh ayi ɣar temmurt n Israil uca issars ayi x ijj n wedrar yuɛřan mixef tuɣa ca n řebni am yict n tendint ɣar uɣezdis n ljanub nnes.
EZE 40:3 Yiwyi ayi din, u xzar, ijj n weryaz. Ṣṣifet nnes am ṣṣifet n nnḥas u deg ufus nnes ijj n ufiřu n řeqṭen d ijj n uɣanim n řeɛbar. Netta tuɣa ibedd ɣar tewwart.
EZE 40:4 Issiweř akidi weryaz [nni]: “[A] mmis n bnadem, xzar s tiṭṭawin nnec, seř s imezzuɣen nnec uca sars uř nnec i marra nni i d ac ɣa ssecneɣ, maɣar tᵉttwassqebded ɣar da ḥima ad ac t ssecneɣ. Marra min twařid, ini t i taddart n Israil!”
EZE 40:5 Xzar, ɣar barra n Taddart tuɣa din ijj n weɣbar nni tuɣa i d as dd-innḍen kuřci. Deg ufus n weryaz tuɣa d ijj n uɣanim n řeɛbar n setta n iɣaǧen, [kuř ijjen zzaysen d] ijj n uɣiř d ijj n cbar n ufus. Netta iɛbar tiru n řḥiḍ nni, aqa-t d ijj n uɣanim, u řuɛřa [nnes] uřa d ijj n uɣanim.
EZE 40:6 [Xenni] yusa-dd ař řebni n tewwart nni ixezzaren ɣar ccarq uca igeɛɛed x ddruj nnes, uca iɛbar tanebdat n tewwart, tiru nnes anect n ijj n uɣanim u tiru n tnebdat nneɣni uřa d ijj n uɣamin.
EZE 40:7 Tuzeggart n ict n texxamt [n tewwart] d ijj n uɣanim u tiru nnes uřa d ijj n uɣanim. Jar texxamin [n tewwart] [tuɣa din] xemsa n iɣaǧen u tanebdat [n řebni] n tewwart ɣar uɣezdis n wesqif n [řebni n] tewwart ɣar uɣezdis n Taddart, [aqa-tt] d ijj n uɣanim.
EZE 40:8 Netta iɛbar asqif [n řebni] n tewwart ɣar daxeř, aqa-t d ijj n uɣanim.
EZE 40:9 Iɛbar asqif n řebni n tewwart, aqa-t di tmenya n iɣaǧen, uca řeḍruf n řḥiḍ nnes [tuɣa aten] di tnayen n iɣaǧen. Asqif n [n řebni] n tewwart tuɣa ɣar uɣezdis n Taddart.
EZE 40:10 Zi jjihet n texxamin n tewwart ɣar uɣezdis n ccarq [n řebni n tewwart], aqa din třata [zzaysent] ɣar uɣezdis-a u třata [zzaysent] ɣar uɣezdis nneɣni. Aqa atent ɣarsent d ijj n řeɛbar. Řeḍruf n řḥid [ɣarsen] d řeɛbar d ijjen ɣar uɣezdis-a u ɣar uɣezdis nneɣni.
EZE 40:11 Iɛbar tiru n wadaf [n řebni] n tewwart, aqa-t di ɛecra n iɣaǧen, uřa d tuzzeggart [n řebni] n tewwart, aqa-tt di třeṭṭac n iɣaǧen.
EZE 40:12 Ttasiɛ zzat i texxamin n tewwart [tuɣa] ijj n uɣiř [ɣar uɣezdis-a] uca ɣar uɣezdis nneɣni [tuɣa] ttasiɛ uřa d ijj n uɣiř. Ict n texxamt ɣares setta n iɣaǧen ɣar ijj n uɣezdis d setta iɣaǧen ɣar ijj n uɣezdis nneɣni.
EZE 40:13 Iɛbar [ɛawed] [řebni n] tewwart zi tzeqqa n ict n texxamt ař tazeqqa n wenneɣni. Tiru [nnes tuɣa-t] di xemsa u-ɛicrin n iɣaǧen, adaf arendad n wadaf [nneɣni].
EZE 40:14 Igga [uřa d řeɛbar] ɣar řeḍruf n řḥiḍ: settin n iɣaǧen, uca řemraḥ ikka x ṭṭarf n řḥiḍ, inneḍ as-dd [řemraḥ] i [řebni n] tewwart marra.
EZE 40:15 Zi zzat n tewwart n wadaf ař zzat n wesqif n tewwart n daxeř, [aqa din] xemsin n iɣaǧen.
EZE 40:16 [Tuɣa] řekwazi ḥṣaren ɣar texxamin n tewwart u ɣar řeḍruf n řḥiḍ ɣar uɣezdis n daxeř [n řebni] n tewwart deg wenneḍ, uřa di řeḥyuḍ n barra u tuɣa řekwazi deg wenneḍ xezzaren ɣar daxeř u x [kuř ijj zi] řeḍruf n řḥiḍ tᵉttafed din ticejjura n tini.
EZE 40:17 Indeh ayi-dd ɣar řemraḥ n barra, uca xzar, [aqa din] ixxamen d ict n tisi n zzellij ittwaggen deg wenneḍ n řemraḥ. [Tuɣa din] třatin n ixxamen ɣar tisi n zzellij [nni].
EZE 40:18 Tisi n zzellij [tuɣa-tt] ɣar uɣezdis n [řebniyyat n] tewwart, teqqen nican i tuzzeggart n [řebniyyat n] tewwart. Tanita tuɣa-tt d tisi n zzellij i iǧan wadday.
EZE 40:19 Netta iɛbar tiru zi zzat [n řebni] n tewwart i iǧan ɣar wadday [n řemraḥ] ař řemraḥ n daxeř ɣar uɣezdis nnes n barra, mya n iɣaǧen. [Ammu i iɛbar] ccarq d ccamal [n řemraḥ].
EZE 40:20 Zi [řebni n] tewwart nni ixezzaren ɣar ccamal, ɣar řemraḥ n barra, iɛbar tuzzeggart nnes d tiru nnes.
EZE 40:21 Tuɣa třata n texxamin nnes ɣar uɣezdis-a d třata ɣar uɣezdis nneɣni, d řeḍruf nnes n řḥiḍ uřa d řeḥyuḍ nnes n barra ɣarsen d řeɛbar d ijjen am [řebni n] tewwart tamezwarut. Tuzzuggart tuɣa-tt xemsin n iɣaǧen d tiru nnes tuɣa-tt xemsa u-ɛicrin n iɣaǧen.
EZE 40:22 Řekwazi nnes d řeḥyuḍ nnes n barra uřa d ticejjura nnes n tini tuɣa ɣarsen řeɛbar d ijjen am [řebni n] tewwart nni ixezzaren ɣar ccarq. Ttgeɛɛaden ɣares x [ijj n ddruj ak-d] sebɛa n treffidin uca řeḥyuḍ nnes n barra tuɣa aten ɣar uɣezdis n zzat.
EZE 40:23 [Řebni n] tewwart n řemraḥ n daxeř tuɣa-tt zzat [n řebni] n tewwart n ccamal d tenni n ccarq. Zeg řebni n tewwart [n barra] ař řebni n tewwart [n daxeř] iɛbar mya n iɣaǧen.
EZE 40:24 [Xenni] indeh ayi ɣar uɣezdis n ljanub, u xzar, tuɣa din ijj n [řebni n] tewwart nni ixezzaren ɣar ljanub. Iɛbar řeḍruf n řḥiḍ d řeḥyuḍ nnes n barra [uca] řeɛburat nsen tuɣa aten d ijj.
EZE 40:25 [Řebni n] tewwart ɣares řekwazi uca uřa d řeḥyuḍ n barra daysen řekwazi am wenneɣni. Tuzzuggart [nnes] tuɣa-tt di xemsin n iɣaǧen u tiru [nnes] di xemsa u-ɛicrin n iɣaǧen.
EZE 40:26 Drujj dayes sebɛa n treffidin u řeḥyuḍ nnes n barra [tuɣa aten] ɣar zzat. Tuɣa ɣares ticejjura n tinni x řeḍruf n řḥiḍ, icten ɣar ijj n uɣezdis u icten ɣar uɣezdis [nneɣni].
EZE 40:27 [Tuɣa din ɛawed] ict n [řebni n] tewwart ɣar řemraḥ n daxeř nni ixezzaren ɣar ljanub. Iɛbar zeg ict n [řebni n] tewwart ař [řebni n] tewwart [nneɣni] ɣar uɣezdis n ljanub: mya n iɣaǧen.
EZE 40:28 [Xenni] yiwi ayi ɣar [řebni n] tewwart n ljanub ɣar řemraḥ n daxeř. Iɛbar [řebni n] tewwart n ljanub, [tuɣa] řeɛburat nnes d ijjen.
EZE 40:29 Ixxamen nnes d řeḍruf nnes n řḥiḍ uřa d řeḥyuḍ nnes n barra [ɣarsen] d řeɛburat d ijjen. [Řebni n tewwart] tuɣa ɣares řekwazi uca uřa d řeḥyuḍ nnes n barra ɣarsen [řekwazi d ijjen am tinni]. Tuzzuggart [nnes] [tuɣa-tt] di xemsin n iɣaǧen u tiru [nnes] di xemsa u-ɛicrin n iɣaǧen.
EZE 40:30 Nnḍen as-dd řeḥyuḍ n barra. Tuzzuggart [nnes] tuɣa-t di xemsa u-ɛicrin n iɣaǧen u tiru [nnes] di xemsa n iɣaǧen.
EZE 40:31 Tuɣa řeḥyuḍ nnes n barra ɣar řemraḥ n barra. [Tuɣa din] ticejjura n tini x řeḍruf n řḥiḍ u ddruj nnes dayes tmenya n treffidin.
EZE 40:32 [Xenni] yiwi ayi ɣar řemraḥ n daxeř, ɣar uɣezdis n ccarq. Iɛbar [řebni n] tewwart n ljanub, [tuɣa] řeɛburat nnes d ijjen.
EZE 40:33 Tixxamin nnes d řeḍruf nnes n řḥiḍ uřa d řeḥyuḍ nnes n barra [ɣarsen] d řeɛburat d ijjen. [Řebni n tewwart] tuɣa ɣares řekwazi uca uřa ɣar řeḥyuḍ nnes n barra i dd asen innḍen marra. Tuzzuggart [nnes] [tuɣa-tt] di xemsin n iɣaǧen u tiru [nnes] di xemsa u-ɛicrin n iɣaǧen.
EZE 40:34 Řeḥyuḍ nnes n barra [tuɣa aten] ɣar řemraḥ n barra. [Tuɣa din] ticejjura n tini x řeḍruf n řḥiḍ nnes, [am] ɣar uɣezdis[-a] [uřa] ɣar uɣezdis [nneɣni], u ddruj nnes dayes tmenya n treffidin.
EZE 40:35 [Xenni] yiwi ayi ɣar [řebni n] tewwart n ccamal uca iɛbar [xenni] řeɛburat d ijjen.
EZE 40:36 Tixxamin nnes n tewwart d řeḍruf nnes n řḥid d řeḥyuḍ nnes n barra ɣarsen řekwazi deg wenneḍ nsen. Tuzzuggart [nnes] [tuɣa] di xemsin n iɣaǧen uca tiru [nnes] di xemsa u-ɛicrin n iɣaǧen.
EZE 40:37 Řeḍruf nnes n řḥiḍ [tuɣa aten] ɣar řemraḥ n barra. [Tuɣa din] ticejjura n tini ɣar uɣezdis[-a] u ɣar uɣezdis [nneɣni] x řeḍruf nnes. Ddruj nnes [dayes] tmenya n treffidin.
EZE 40:38 [Tuɣa din] ijj n wexxam s ict n tewwart ɣar řeḍruf n řeḥyuḍ n [řebniyyat] n tewwart, ad din ssirden taɣarṣt n wecmaḍ.
EZE 40:39 Di daxeř n wesqif [n řebni] n tewwart tuɣa din tnayen n ṭṭabřat ɣar uɣezdis[-a] u tnayen n ṭṭabřat ɣar uɣezdis [nneɣni] ḥima ad xasent ɣarṣen taɣarṣt n wecmaḍ d tɣarṣt n ddenb d tɣarṣt n umarwas.
EZE 40:40 Barra ɣar ijj n uɣezdis n zzat ɣar mani geɛɛden ɣar wadaf [n řebni] n tewwart n ccamal [tuɣa din] tnayen n ṭṭabřat, u ɣar uɣezdis n zzat nneɣni ɣar wesqif [n řebni] n tewwart [tuɣa din] ɛawed tnayen n ṭṭabřat.
EZE 40:41 [Ammu tuɣa din] arebɛa n ṭṭabřat ɣar [ijj n] uɣezdis u arebɛa n ṭṭabřat ɣar uɣezdis [nneɣni] ɣar iɣezdis[en] [n řebni] n tewwart, aqa din tmenya n ṭṭabřat i min xef zemmaren ad ɣarṣen.
EZE 40:42 [Tuɣa din] arebɛa n ṭṭabřat zi tṣuḍar ittwaneqcen ɣar ddruj [n řebni n tewwart]. Tuzzuggart [n ṭṭabřa] [tuɣa-tt] d ijj n uɣiř d wezyen u tiru [nnes] d ijj n uɣiř d wezyen u řuɛřa [nnes] d ijj n uɣiř. Mmarsen xas řeqcuɛ i zi ɣarrṣen taɣarṣt n wecmaḍ d tewhibt n tɣarṣt.
EZE 40:43 Taryiwin n ijj n cbar n ufus ttwaggent deg wenneḍ ɣar daxeř [n wesqif n řebni n tewwart], u [tuɣa ittxeṣṣa ad mmarsen] aysum i tewhibt n tɣarṣt x ṭṭabřat [i din iǧan].
EZE 40:44 Ɣar barra [n řebni] n tewwart n daxeř [tuɣa din] tixxamin n imeɣnajen di řemraḥ n daxeř nni [iǧan] ɣar uɣezdis n zzat [n řebni] n tewwart n ccamal. Udem nnes ɣar zzat tuɣa ixezzar ɣar ljanub. Tawwart nni ɣar uɣezdis [n řebni] n tewwart n ccarq [tuɣa] txezzar ɣar ccamal.
EZE 40:45 Netta issiweř akidi: “Taxxamt-a nni zi ixezzar wudem nnes ɣar ljanub, aqa-tt i ikehhanen nni iḥeṭṭan x tsexxart n Taddart.
EZE 40:46 Taxxamt nni txezzar wudem nnes ɣar ccamal, aqa-tt i ikehhanen nni iḥeṭṭan x tsexxart n uɛalṭar. Nitni d ayt n Ṣaduq nni ɣa dd-iqarrben ɣar SIDI zeg ayt n Lawi, maḥend ad as sexxaren.”
EZE 40:47 Iɛbar řemraḥ: tuzzeggart [nnes] mya n iɣaǧen u tiru nnes mya n iɣaǧen, ijj n ukwadrun. Aɛaltar tuɣa-t zzat n Taddart.
EZE 40:48 [Xenni] yiwi ayi ɣar wesqif n Taddart uca iɛbar řeḍruf n řḥiḍ n wesqif, xemsa n iɣaǧen ɣar [ijj n] uɣezdis u xemsa n iɣaǧen ɣar uɣezdis [nneɣni], uřa d tiru n tewwart, třata n iɣaǧen ɣar [ijj n] uɣezdis u třata n iɣaǧen ɣar uɣezdis [nneɣni].
EZE 40:49 Tuzzuggart n wesqif tuɣa-tt ɛicrin n iɣaǧen u tiru nnes ḥiṭac n iɣaǧen, d man aya ɣar [uɣezdis n] treffidin [n ddruj] i zi zemmaren ad geɛɛden. [Tuɣa din] ɛawed ipilaren ɣar řeḍruf n řḥiḍ, ijj ɣar uɣezdis[-a] u ijj ɣar uɣezdis [nneɣni]. *
EZE 41:1 Netta yiwi ayi ɣar [Wexxam] n Zzawect Tameqqrant uca iɛbar řeḍruf n řḥiḍ. Tuɣa-ten setta n iɣaǧen ɣar uɣezdis[-a] u setta n iɣaǧen ɣar uɣezdis [nneɣni], x tiru n Uqiḍun. *
EZE 41:2 Tiru n wadaf tuɣa-tt ɛecra n iɣaǧen uca udmawen n řeḥyuḍ ɣar uɣezdis n wadaf [tuɣa aten] xemsa n iɣaǧen ɣar uɣezdis[-a] u xemsa n iɣaǧen ɣar uɣezdis [nneɣni]. Iɛbar tuzzeggart nnes: arebɛin n iɣaǧen, uca tiru nnes: ɛicrin n iɣaǧen.
EZE 41:3 Yudef-dd ɣar daxeř uca iɛbar řḥiḍ nni ɣar ṭṭarf n wadaf [n Wexxam n Daxeř]: tnayen n iɣaǧen uca tewwart [tuɣa-tt] setta n iɣaǧen uca tiru n wadaf sebɛa n iɣaǧen.
EZE 41:4 Iɛbar tuzzeggart [n Wexxam n Daxeř]: ɛicrin n iɣaǧen, uca tiru [nnes]: ɛicrin n iɣaǧen ɣar zzat [n Wexxam] n Zzawect Tameqqrant. [Xenni] inna ayi: “Wa d Aqdas x Uqeddas!”
EZE 41:5 Iɛbar řḥiḍ n Taddart: setta n iɣaǧen, uca tiru n kuř axxam n uɣezdis [tuɣa-t] di arebɛa n iɣaǧen deg wenneḍ n Taddart marra.
EZE 41:6 tixxamin n uɣezdis [tuɣa atent] taxxamt zzat i texxamt [nneɣni], třata [di řuɛřa], uca [amenni] třatin n twařawin ict n texxamt. Uca [tixxamin nni] iwḍent ař řḥiḍ n Taddart nni [din iǧan] i texxamin i d as dd-innḍen, maḥend ad iqeddem asenned [i tḥenya n texxamin]. War iɛeddeř ad awḍent [tḥenya] ař daxeř di řḥiḍ n Taddart.
EZE 41:7 Ɣar sennej deg wenneḍ immarni di ttasiɛ nni [iǧan] ɣar ixxamen n uɣezdis x kuř ṭṭebqet Maɣar x kuř ṭṭebqet n taddart inneḍ-dd ijj n ukulwar i Taddart marra. X uya tedweř Taddart dayes ttasiɛ ktar sennej u ammu i izemmar [bnadem] ad dd-igeɛɛed zeg wadday ɣar ṭṭebqet sennej s ṭṭebqet n řwesṭ.
EZE 41:8 Ẓriɣ ict n řgeɛɛdet i d as dd-innḍen i Taddart marra, aqa-tt d dsusa n ixxamen n uɣezdis: ijj n uɣanim [n řeɛbar] ikemmřen, setta n iɣaǧen ař mani iwḍen [ɣar tisi].
EZE 41:9 Tiru n řḥiḍ nni [igga] aɣezdis n barra n řebni ak-d ixxamen n uɣezdis, [tuɣa-tt] xemsa n iɣaǧen, uca [ammu uřa d] ttasiɛ yarezmen i iqqimen ɣar Taddart [ak-d] ixxamen n uɣezdis, [ttasiɛ] i dd-yusin-dd ak-d Taddart.
EZE 41:10 Uca [min iqqimen ɛad] aqa d ijj n ttasiɛ jar ixxamen [di řemřaḥ ɣar ccamal d yinni ɣar ljanub] n ɛicrin n iɣaǧen, deg wenneḍ n Taddart, deg wenneḍ nnes marra.
EZE 41:11 [Teffeɣ] tewwart n řebni n ixxamen n uɣezdis ɣar ttasiɛ yarezmen i iqqimen, ict n tewwart [teffeɣ] ɣar ccamal uca tawwart nneɣni [teffeɣ] ɣar ljanub. Tiru n ttasiɛ iqqimen [tuɣa-tt] di xemsa n iɣaǧen deg wenneḍ nnes marra.
EZE 41:12 Řebni ɣar wudem n řemraḥ ittwaɛezřen ɣar řɣarb tuɣa ɣares ict n tiru n sebɛin n iɣaǧen uca řḥiḍ n řebni tuɣa-t di xemsa n iɣaǧen deg wenneḍ nnes marra, uca tuzzeggart nnes [tuɣa-tt] di tesɛin n iɣaǧen.
EZE 41:13 Netta iɛbar tuzzeggart n Taddart: mya n iɣaǧen. Řemraḥ ittwaɛezřen d řebni [i dayes iǧan] ak-d řeḥyuḍ nnes, aqa [ɣarsen] tuzzeggart d ict: mya n iɣaǧen.
EZE 41:14 [Am] tiru n wudem n Taddart ɣar uɣezdis [nnes n ḍeffar] [am] řemraḥ ittwaɛezřen ɣar uɣezdis nnes n ccarq [tuɣa] mya n iɣaǧen.
EZE 41:15 Iɛbar [uřa d] tuzzeggart n řebni nni tuɣa ɣar zzat n řemraḥ ittwaɛezřen ař ḍeffar nnes. Ikulwaren nnes ɣar uɣezdis[-a] u ɣar uɣezdis [nneɣni] tuɣa aten di mya n uɣiř. Daxeř n Zzawect Tameqqrant, isqifen ɣar řemraḥ n zzat,
EZE 41:16 tinebdatin d řekwazi iḥṣaren d řebniyyat s ikulwaren i d as dd-innḍen i třata [n řefwaqi nsent] zzat i tnebdatin [n tewwura], [marra] aya tuɣa ittwassduri [s teřwiḥin n] ukeccud, [zi] temmurt ař řekwazi uca řekwazi [simant nsen] tuɣa ttwassduryen.
EZE 41:17 X [wudem i iǧan] sennej i wadaf, [am] x wudem n daxeř [am] x wudem n barra n Taddart u x marra řḥiḍ ɣar daxeř u ɣar barra [tuɣa din] tiřwiḥin [n ukeccuḍ].
EZE 41:18 Tuɣa ttwaggen xasen ikiruben d tcejjura n tini. Aqa din ict n tcejjart n tini jar ijj n ukirub d ijj n ukirub [nneɣni] uca kuř akirub ɣares tnayen n wudmawen:
EZE 41:19 udem n bnadem nni ixezzaren ɣar tcejjart n tini ɣar ijj n uɣezdis d wudem n wayrad ameẓyan ixezzaren ɣar tcejjart n tini ɣar uɣezdis [nneɣni]. [Ammu i] ten ggin deg wenneḍ n marra Taddart.
EZE 41:20 Zi temmurt ař sennej n tewwart ttwaggen ikiruben d tcejjura n tini uca ɛawed x řḥiḍ n Zzawect Tameqqrant.
EZE 41:21 Řeḍruf ɣar uɣezdis n tewwart n Zzawect Tameqqrant ggin ijj n ukwadrun uca ccuf n Uqeddas iḍhar-dd am ccuf [n Zzawect].
EZE 41:22 Aɛalṭar tuɣa-t n ukeccuḍ u řuɛřa nnes tuɣa-t třata n iɣaǧen u řebni sadu nnes tnayen n iɣaǧen di řuɛřa nnes. Ɣares tiɣemmura uca řebni sadu nnes d iɣezdisen nnes [tuɣa aten] zeg ukeccuḍ. Netta issiweř akidi: “Ta d tazewḍa nni [iǧan] zzat i wudem n SIDI.”
EZE 41:23 Zzawect Tameqqrant d Weqdas ɣarsen tnayen n tewwura.
EZE 41:24 Tuɣa ɣar tiwwura, [ɣar kuř icten zzaysent,] tnayen n teřwiḥin am wafriwen, tnayen n teřwiḥin nni zemmaren ad nuqqaren, tnayen i yict n tewwart u tnayen i [tewwart] nneɣni.
EZE 41:25 Di tewwura n Zzawect Tameqqrant ttwaggen ikiruben d tcejjura n tini nni ittwaggen am yinni x řeḥyuḍ. Tuɣa din tasqift n ukeccuḍ ɣar wudem n wesqif ɣar barra.
EZE 41:26 [Tuɣa din] řekwazi ḥsaren d tcejjura n tini ɣar uɣezdis[-a] u ɣar uɣezdis [nneɣni], ɣar tnayen n iɣezdisen n wesqif, [ɣar] ixxamen i iǧan ɣar uɣezdis n Taddart u ɣar tesqifin. *
EZE 42:1 Netta issuffeɣ ayi-dd barra ɣar řemraḥ n barra nni [iǧan] ɣar ccamal. Netta indeh ayi ɣar [řebni n] ixxam[en] nni iǧan ɣar uɣezdis n řemraḥ ittwaɛezřen u ɣar uɣezdis n řebni [n Zzawect Tameqqrant], ɣar uɣezdis n ccamal,
EZE 42:2 ɣar uɣezdis [nnes] d azirar n mya n iɣaǧen, [ɣar] wadaf n ccamal, [maca] tiru [nnes tuɣa] di xemsin n iɣaǧen.
EZE 42:3 Tuɣa řebni zzat i [ttasiɛ yarezmen n] ɛicrin [n iɣaǧen] n řemraḥ n daxeř u zzat i zzellij n řemraḥ n barra. Ijj n ukulwar [ak-d ixxamen nnes] tuɣa [isenned] x ukulwar nneɣni, uca aqa din třata n ṭṭebqat.
EZE 42:4 Zzat n ixxamen [tuɣa din] ijj n ukulwar ɣar daxeř s ict n tiru n ɛecra n iɣaǧen, ict n tebridt [n mya] n iɣaǧen, uca tiwwura n wadaf nsen [tuɣa atent] ɣar ccamal.
EZE 42:5 Ixxamen n sennej [tuɣa aten] ḥṣaren, maɣar ikulwaren kksen [ktar ttasiɛ] zzaysen x [yexxamen n] wadday u [x yexxamen] ɣar řwest n řebni.
EZE 42:6 Minzi [tuɣa aten] di třata [n řefwaqi], maca war ɣarsen ipilaren am yipilaren n řemraḥat. X uya tuɣa aten ixammen nni ḥsaren ktar x yinni n wadday d yinni di řwesṭ [am ɣarsen txezzared] zi temmurt.
EZE 42:7 Řḥiḍ nni tuɣa ɣar barra qibač i yexxamen, [řḥiḍ] nni iǧan ɣar uɣezdis n řemraḥ n barra, i dd-ittekken zzat i yexxamen, [tuɣa ɣares] tuzzeggart n xemsin n iɣaǧen.
EZE 42:8 Minzi tuzzeggart n [marra] ixxamen nni [iǧan] ɣar řemraḥ n barra, tuɣa-tt di xemsin n iɣaǧen. [Maca] xzar, ɣar uɣezdis n Zzawect Tameqqrant tuɣa-tt di mya n iɣaǧen.
EZE 42:9 Swadday n ixxamen-a [teggur] tebridt zi ccarq xmi dd ɣarsen tiwḍed zi řemraḥ n barra.
EZE 42:10 Ɣar tiru n řḥiḍ n řemraḥ ɣar ccarq, [řḥiḍ] zzat i řemraḥ ittwaɛezřen u ɣar uɣezdis n řebni, [tuɣa din ɛawed řebniyyat n] ixxamen,
EZE 42:11 uca akulwar i dd-ittekken zzatsen [tuɣa] am tenni n ixxamen nni [iǧan] ɣar uɣezdis n ccamal, anect tuzzeggart anect tiru u marra uffuɣen nnes tuɣa aten am ṣṣenɛat d wadafen nnes [ɣar uɣezdis n ixammen ɣar ccamal].
EZE 42:12 Am mammec [din] adafen ɣar texxamin tinni iwejjhen ɣar ljanub, [amenni i din] iǧa uřa d ijj n wadaf ɣar beddu n tebridt, tabridt nni itteffɣen zi zzat i řḥid n řemraḥ ittwaɛezřen uca tᵉttakkwaḍ ɣar webrid i x dd ɣa yas bnadem zi ccarq ɣar řemraḥ ittwaɛezřen.
EZE 42:13 [Xenni] inna ayi: “Ixxamen nni iǧan ɣar ccamal u ixxamen nni iǧan ɣar ljanub, inni iǧan ɣar zzat n řemraḥ ittwaɛezřen, aqa aten d ixxamen iqeddsen mani ikehhanen, inni i ɣa dd-iqarrben ɣar SIDI, ad ccen tiwhibin iqeddsen aṭṭas. Din ittxeṣṣa ad sarsen nitni tiwhibin iqeddsen aṭṭas: tawhibt [n řɣiǧet] d tewhibt n ddenb d tewhibt n umarwas, minzi amcan iqeddes qaɛ.
EZE 42:14 Xmi ɣa udfen ikehhanen, war iɛeddeř ad uyuren zi Zzawect Iqeddsen ɣar řemraḥ n barra. Ad ssarsen arruḍ nsen n tsexxart, maɣar wanita d amqeddes. Ad arḍen arruḍ nneɣni uca [xenni] ad dd-qarrben ɣar [řemraḥ] nni iǧan i řgens.” *
EZE 42:15 Umi ikemmeř netta řeɛbar n min iǧan daxeř n Taddart, issuffuɣ ayi-dd zeg webrid n tewwart nni ixezzaren ɣar ccarq uca iksi řeɛbar n jjihet iqeddsen deg wenneḍ marra.
EZE 42:16 Iɛbar aɣezdis n ccarq s uɣanim n řeɛbar: xemsa-mya n iɣunam s uɣanim n řeɛbar deg wenneḍ.
EZE 42:17 Iɛbar aɣezdis n ccamal, xemsa-mya n iɣunam s uɣanim n řeɛbar deg wenneḍ.
EZE 42:18 Iɛbar aɣezdis n ljanub, xemsa-mya n iɣunam s uɣanim n řeɛbar.
EZE 42:19 Inuqqar ɣar uɣezdis n lɣarb uca iɛbar xemsa-mya n iɣunam s uɣanim n řeɛbar.
EZE 42:20 Netta iɛbar [řebni n Zzawect Tameqqrant] ɣar arebɛa n tɣemmura [nnes]. [Tuɣa] ɣares deg wenneḍ nnes ijj n řḥiḍ s ict n tuzzeggart n xemsa-mya [n iɣunam n řeɛbar] d ict n tiru n xemsa-mya [n iɣunam n řeɛbar] maḥend ad ifarz jar min [iǧan] iqeddsen d min war [iǧin] iqeddsen.
EZE 43:1 [Xenni] indeh ayi ɣar tewwart, [ɣar] tewwart nni ixezzaren ɣar ccarq.
EZE 43:2 Xzar, yusa-dd uɛuǧi n AREBBI n Israil zi jjihet n ccarq uca tmijja nnes tuɣa-tt am řhess n waman aṭṭas uca tammurt tceɛceɛ s uɛuǧi nnes.
EZE 43:3 Udem n řewḥiy i ẓriɣ tuɣa am řewḥiy i ẓriɣ umi dd-usiɣ ḥima ad areddǧeɣ tandint. Aqa d iweḥḥan am řewḥiy i ẓriɣ ɣar yeɣzar n Xabur, uca wḍiɣ s wudem inu [ɣar temmurt].
EZE 43:4 Aɛuǧi n SIDI yudef ɣar Taddart s tewwart nni ixezzaren ɣar ccarq.
EZE 43:5 [Xenni] issgeɛɛed ayi-dd Arruḥ uca issidef ayi ɣar řemraḥ n daxeř, uca xzar, aɛuǧi n SIDI iccur Taddart.
EZE 43:6 Uca sřiɣ [ict n tmijja] tessawař akidi zi daxeř n Taddart uca aryaz ibedd ɣar uɣezdis inu.
EZE 43:7 Netta inna ayi: “[A] mmis n bnadem, wa d amcan n řɛarc inu u amcan n třeqqa n iḍaren inu, mani ɣa zedɣeɣ di řwesṭ n ayt n Israil i řebda. Uca nitni, taddart n Israil, nitni uřa d ijeǧiden nsen, war ssxemmajen ɛad Isem inu iqeddsen s farq-ccɣeř nsen u s řxecbat n [l’aṣnam n] ijeǧiden nsen x řegɛudi nsen [mani ttqeddamen tiwhibin nsen]
EZE 43:8 am ggin tanebdat nsen zzat i tnebdat inu, d ṭṭarf n tewwart nsen ɣar ṭṭarf [n tewwart] inu, [iqqim] mɣir ijj n weɣbar jar ayi-dd d nitni. [Ammu i] ssexmejen Isem inu iqeddsen s jjɛayef nsen nni ggin, ařami cciɣ ten deg weɣḍab inu.
EZE 43:9 Nitni ad xafi ssiggʷejen farq-ccɣeř nsen d řxecbat n [l’aṣnam n] ijeǧiden nsen, maḥend ad zemmareɣ ad zedɣeɣ di řwest nsen i řebda.
EZE 43:10 Cek, [a] mmis n bnadem, barreḥ s Taddart-a i taddart n Israil ḥima ad seḍḥan zi ssibbet n řmuɛṣiyyat nsen uca ejj i-ten ad ɛbaren ccekl nnes.
EZE 43:11 Mařa seḍḥan zi marra min ggin, scen asen [xenni] ccekl n Taddart d tisars nnes, uffuɣen nnes d adafen nnes d marra ccekl nnes d marra lfarayiḍ nnes, [wah,] marra ickalen nnes d marra tiweṣṣa nnes uca ari [marra] man aya zzat i tiṭṭawin nsen, ḥima xenni ad ḥḍan marra ccekl nnes d marra lfarayiḍ nnes, uca ad zzaysen ggen.”
EZE 43:12 “Ta d ccariɛa n Taddart: x tqiccat n wedrar ad yiři wemcan nnes deg wenneḍ nnes iqeddsen qaɛ. Ta d ccariɛa n Taddart.”
EZE 43:13 “Ina d řeɛburat n uɛalṭar s iɣaǧen: ijj n uɣiř aqa-t d ijj n uɣiř d ijj cbar n ufus. Tarya nnes d ijj n uɣiř u tiru nnes d ijj n uɣiř. Tma nnes ɣar ṭṭarf nnes i d as dd-innḍen aqa d ijj n wezyen n uɣiř. Wa d dsas n uɛalṭar.
EZE 43:14 Zi tarya di temmurt ař tareffidet n wadday [n uɛalṭar]: tnayen n iɣaǧen, u tiru [nnes]: ijj n uɣiř, u zi treffidet n wadday [n uɛalṭar] ař tareffidet n sennej [n uɛalṭar]: arebɛa n iɣaǧen u tiru [nnes] ijj n uɣiř.
EZE 43:15 Řebni ɣar sennej, [adrar n Arebbi’,] [igga] arebɛa n iɣaǧen [di řuɛřa] u zeg ufurnu n uɛalṭar [geɛɛden-dd zzayes] arebɛa n waccawen sennej nnes.
EZE 43:16 Afurnu n uɛalṭar ɣares ict n tuzzeggart n tenɛac [n iɣaǧen] d ict n tiru n tenɛac [n iɣaǧen], ijj n ukwadrun s arebɛa n iɣezdisen [nnes].
EZE 43:17 Tareffidet nnes [sennej] ɣares ict n tuzzeggart n arbeɛṭac [n iɣaǧen] d ict n tiru n arbeɛṭac [n iɣaǧen] ɣar arebɛa n iɣezdisen nnes, u tma nnes i d as dd-innḍen aqa d azyen n uɣiř, uca tarya nnes d ijj n uɣiř deg wenneḍ nnes uca tareffidin n ddruj nnes xezzaren ɣar ccarq.” *
EZE 43:18 Netta inna ayi: “[A] mmis n bnadem, ammu i iqqar Sidi inu, SIDI: ‘Tina d lfarayiḍ inu i uɛalṭar deg wass i di t ɣa ggen, maḥend ad xas ssgeɛɛden taɣarṣt n tmessi u maḥend ad xas zeǧɛen idammen.’
EZE 43:19 [Ammu] i iqqar Sidi inu, SIDI: ‘Ad tewced ijj n ufunas, ameẓyan n ict n tfunast, d tawhibt n tɣarṣt n ddenb i ikehhanen zeg Ilawiyyen, i yinni dd-iqqarṣen zi Ṣaduq, inni ɣari dd-iqarrben maḥend ad ayi sexxaren.
EZE 43:20 Ad teksid zeg idammen nnes uca ad ten tegged ɣar arebɛa n waccawen [n uɛalṭar] u ɣar arebɛa n tɣemmura n treffidet u x tma nnes i d as dd-innḍen ɣar ṭṭarf nnes. Ittxeṣṣa ad zzayes tekksed ddenb nnes u ad t tṣeřḥed.
EZE 43:21 [Awarni as] ad teksid afunas nni ameẓyan n tɣarṣt n ddenb. Ittxeṣṣa asen ad t sscemḍen deg wemcan ittwaggen n Taddart barra i Zzawect Iqeddsen.
EZE 43:22 Deg wass wiss tnayen ad dd-tessqarrbed ijj n umyan zeg iɣayḍen icnan aṭṭas d taɣarṣt n ddenb. Ad zzayes kksen ddenb zeg uɛalṭar am mammec zzayes kksen ddenb s ufunas ameẓyan.
EZE 43:23 Xmi ɣa tkemmřed takessit n ddenb, ad dd-tessqarrbed ijj n ufunas, ameẓyan n tfunast icnan qaɛ, uřa d ijj n icarri icnan aṭṭas zeg wuǧi.
EZE 43:24 Ad ten dd-tessqarrbed zzat i wudem n SIDI uca ikehhanen ad xas ssuyusen tameǧaḥt u ad ten ssgeɛɛden am tɣarṣt n wecmaḍ i SIDI.
EZE 43:25 Sebɛa n wussan ad tesswejded di kuř ass ijj n umyan d taɣarṣt n ddenb. Ad sswejden [ɛawed] ijj n ufunas, ameẓyan n tfunast, uřa d ijj n icarri n wuǧi, ittxeṣṣa ad iřin cnan aṭṭas.
EZE 43:26 Sebɛa n wussan ad tegged aṣřaḥ i uɛalṭar uca ad t ssizedgen u ad t ssqeddsen.
EZE 43:27 Mařa kemmřen nitni ussan-a, [xenni] ad yiři deg wass wiss tmenya, belli ikehhanen ad sswejden tɣarṣa nwem n wecmaḍ d tewhibin nwem n uqadi x uɛalṭar u Necc ad xawem arḍiɣ!’, [ammu i] iqqar Sidi inu, SIDI.”
EZE 44:1 [Xenni] yarra ayi ɛawed ɣar tewwart n barra n Zzawect Iqeddsen nni ixezzaren ɣar ccarq. Tuɣa tbelleɛ.
EZE 44:2 Inna ayi SIDI: “Tawwart-a ad teqqim tbelleɛ, war tarzem ca uca uřa d ijj ad zzayes yadef. Minzi SIDI, AREBBI n Israil, yudef zzayes, x uya ad teqqim tbelleɛ.
EZE 44:3 Řḥakem [waha] i yeǧan d řḥakem, ad din iqqim ḥima ad yecc aɣrum zzat i wudem n SIDI. Ad yadef s ukulwar n wesqif [n řebni] n tewwart uca ad iffeɣ s ukulwar nnes.”
EZE 44:4 [Awarni as] indeh ayi [s] tewwart n ccamal ɣar zzat n Taddart. Xezzareɣ, uca xzar, aɛuǧi n SIDI iccur Taddart n SIDI. [Xenni] wḍiɣ s uɣembub inu [ɣar temmurt].
EZE 44:5 Inna ayi SIDI: “[A] mmis n bnadem, egg uř nnec, xzar s tiṭṭawin nnec uca seř s imezzuɣen nnec marra min d ac ɣa ssiwřeɣ x marra tiweṣṣa n Taddart n SIDI u x marra izerfan nnes. Egg uř nnec x [kuř ijjen] i ittadfen Taddart s marra uffuɣen n Zzawect Iqeddsen
EZE 44:6 uca ini i yinni ittɣewwɣen, i taddart n Israil: ‘Ammu i iqqar Sidi inu, SIDI: Cfa marra jjɛayef nwem, [a] taddart n Israil,
EZE 44:7 maɣar kenniw tessidfem ibarraniyyen, inni war ittwaxetnen n wuř u inni war ittwaxetnen n arrimet, maḥend ad iřin di Zzawect inu Iqeddsen u ad ssɛiǧten [ammu] Taddart inu, řami kenniw tiwyem aɣrum inu, [ixs ad yini] tadunt d idammen, u arẓin nitni Řɛahd inu sennej i marra jjɛayef [i teggim s yixef] nwem.
EZE 44:8 Kenniw war teḥḍim aḥeṭṭu x min [iǧan] iqeddsen i Necc uca teggim imeḥḍayen i yixef nwem maḥend ad ḥḍan x Zzawect inu Iqeddsen.”
EZE 44:9 “Ammu i iqqar Sidi inu, SIDI: ‘Uřa d ijj n řbarrani nni war ittwaxetnen uř nnes u war ittwaxetnen aysum nnes ad yadef ɣar Zzawect inu Iqeddsen. Ammu i ɣa yiři i kuř řbarrani nni iǧan di řwesṭ n ayt n Israil.
EZE 44:10 Ilawiyyen nni yaggʷejen xafi aṭṭas umi zzayi iweddar Israil, ffɣen zeg webrid, [uyuren] awarni imeyḍa nsen n l’aṣnam. Aqa nitni ad arbun řmuɛṣiyyet nsen.
EZE 44:11 Ad ḥḍan di Zzawect inu Iqeddsen ɣar [řebniyyat n] tewwart n Taddart uca ad sexxaren [ɛawed] di Taddart. Nitni ad ɣarṣen taɣarṣt n wecmaḍ d tɣarṣt i řgens uca ad bedden zzat i wudem n řgens maḥend ad asen sexxaren.
EZE 44:12 Umi tuɣa ttsexxaren zzat i wudem n imeyḍa nsen n l’aṣnam u umi ten tuɣa d ict n ssibbet i dd-yiwyen řmuɛṣiyyet i taddart n Israil, x uya aqa ssgeɛɛdeɣ Necc afus inu xasen u nitni ad arbun řmuɛṣiyyet nsen, [ammu i] iqqar Sidi inu, SIDI.
EZE 44:13 War iɛeddeř ad ɣari dd-qarrben maḥend ad ayi iřin d ikehhanen u maḥend ad dd-qarrben ɣar marra timesřayin iqeddsen inu, ɣar tmesřayin iqeddsen qaɛ. Nitni ad arbun řefdiḥet nsen d jjɛayef i ggin.
EZE 44:14 Ad ten ggeɣ maḥend ad ḥḍan x tsexxart di Taddart, x marra řxedmet nnes u x marra min ittxeṣṣa ad dayes ittwagg.’”
EZE 44:15 “[Maca] ikehhanen ilawiyyen, ayt n Ṣaduq, inni iḥḍan aḥeṭṭu n Zzawect inu Iqeddsen xmi xafi iggʷejen ayt n Israil, ad ɣari dd-qarrben maḥend ad ayi sexxaren. Nitni ad bedden zzat i wudem inu maḥend ad ɣari dd-awyen tadunt d idammen, [ammu i] iqqar Sidi inu, SIDI.
EZE 44:16 Nitni ad adfen ɣar Zzawect inu Iqeddsen uca ad dd-qarrben ɣar ṭṭabřa inu maḥend ad ayi sexxaren u ad ḥḍan tasexxart inu.
EZE 44:17 Ad yiři xmi ɣa yadfen ɣar [řebniyyat n] tewwart n řemraḥ n daxeř, ad arḍen arruḍ n řeqṭen. War iɛeddeř ad arḍen ca n taḍuft xmi ɣa sexxaren di [řebniyyat n] tewwart n řemraḥ n daxeř u ɣar daxeř nnes.
EZE 44:18 Areẓẓat n řeqṭen ad iřin x izeǧifen nsen u ssraweř n řeqṭen ad iřin x tejɛinnatin nsen, war beysen ca min zi ɣa ssuffɣen tidi.
EZE 44:19 Xmi ɣa ffɣen ɣar řemraḥ n barra, ɣar řemraḥ n barra ɣar řgens, [xenni] ad kksen arruḍ nsen i di sexxaren uca ad t ssarsen deg ixxamen iqeddsen. [Awarni as] ad arḍen arruḍ nneɣni, ḥima war ssqeddasen řgens s warrud nsen.
EZE 44:20 War ssquccaren azeǧif nsen u war ttejjin tijeṭṭayin [nsen] ad ayřent amenni [waha]. Nitni ad qessen [acuwwaf n] uzeǧif nsen mliḥ.
EZE 44:21 War iɛeddeř uřa i yijj n ukehhan ad isu binu, xmi ɣa yadef ɣar řemraḥ n daxeř.
EZE 44:22 War d asen iɛeddeř [i ikehhanen] maḥend ad awyen ict n tajjač niɣ ict n tnuřuft d tamɣart i yixef nsen. Iɛeddeř maḥend ad awyen mɣir tiɛzuray zi zzariɛet n taddart n Israil ict n tajjač tenni d tajjač n ijj n ukehhan.
EZE 44:23 Ad ssřemden řgens inu řfarq jar min [iǧan] iqeddsen d min war [iǧin] iqeddsen uca ad ten ssaregben řfarz jar min ixemjen d min izdigen.
EZE 44:24 Deg umcubbec ad kkaren ḥima ad carrɛen. Ad ten ḥakmen ɛlaḥsab lfarayiḍ inu. Nitni ad ḥḍan tiweṣṣa inu d lfarayiḍ inu di marra řeɛyudat inu ittwaggen uca ad ssqeddsen ussan inu n ssebt.
EZE 44:25 War iɛeddeř ad ireḥḥeg [ukehhan] ɣar ijj n bnadem immuten ařami ɣa issexmej ixef nnes. Iɛeddeř [waha] ad ssxemjen ixef nsen mɣir i babatsen niɣ i yemmatsen niɣ i mmitsen niɣ i yeǧitsen niɣ i umatsen niɣ i učmatsen nni war imřicen ɛemmarṣ.
EZE 44:26 Awarni usizdeg nnes ittxeṣṣa asen ad ḥessben sebɛa n wussan i netta.
EZE 44:27 Deg wass nni i ɣa yadef ɣar Uqeddas, ɣar řemraḥ n daxeř, maḥend ad isexxar deg Uqeddas, ittxeṣṣa as ad dd-issqarreb taɣarṣt n ddenb, [ammu i] iqqar Sidi inu, SIDI.”
EZE 44:28 “Wa ad yiři d řwart nsen: Necc d Řwart nsen. War d asen tᵉtticim uřa d ijj n wagřa [n temmurt] di Israil: Necc d Agřa nsen.
EZE 44:29 Iɛeddeř ad ccen tawhibt [n řɣiǧet] d tɣarṣt n ddenb d tɣarṣt n umarwas. Marra min ittwaḥarrmen di Israil ad asen yiři.
EZE 44:30 Mummu n tmenzut n marra u marra tawhibt n usgeɛɛed, zi marra tiwhibin nwem n usgeɛɛed, ad yiři i ikehhanen. Tamezwarut n warecti nwem ad tt tewced i ukehhan, ḥima ad tarsa lbaraka x taddart nnec.
EZE 44:31 Uřa d ict n řxecbet niɣ min ittwacarrgen n ijḍaḍ niɣ n řebḥayem, war iɛeddeř ad t ccen ikehhanen.”
EZE 45:1 “Xmi ɣa tebḍam tammurt d řwart [s tqedduḥt], ad twehhbem ict n tewhibt n usgeɛɛed i SIDI, ict n tesɣart iqeddsen zi temmurt: tuzzeggart nnes [ad tiři] xemsa u-ɛicrin-ařef [n iɣunam n řeɛbar] d tiru nnes ɛecra-ařaf [n iɣunam n řeɛbar]. Marra tammurt i d as dd-innḍen ad tiři tqeddes.
EZE 45:2 Xemsa-mya di xemsa-mya [n iɣunam n řeɛbar] ɣar arebɛa iɣezdisen nnes ad zzayes iřin i Zzawect Iqeddsen. Uca deg wenneḍ nnes xemsin n iɣaǧen ad iřin d ddmani n tarewsa.
EZE 45:3 S řeɛbar-a ad teɛbared di tuzzeggart xemsa u-ɛicrin-ařef u di tiru ɛecra-ařaf [n iɣunam n řeɛbar] u Zzawect Iqeddsen ad dayes tiři, [ixs ad yini] Aqdas x Uqeddas.
EZE 45:4 Ad tiři d ict n temmurt iqeddsen. Ad tiři i ikehhanen nni ittsexxaren di Zzawect Iqeddsen, inni dd-iqarrben maḥend ad sexxaren i SIDI. Ad tiři i nitni d amcan n tzeddiɣin [nsen] d ijj n wemcan iqeddsen i Zzawect Iqeddsen.
EZE 45:5 [Ict n temmurt] s ict n tuzzeggart n xemsa u-ɛicrin-ařef u s ict n tiru n ɛecra-ařaf [n iɣunam n řeɛbar] ad tiři i Ilawiyyen nni ittsexxaren di Taddart, [ad tiři] d řmulk i nitni, [s] ɛicrin n řebniyyat n ixxamen.
EZE 45:6 Ad tewcem [ict n temmurt] s ict n tiru n xemsa-ařaf u s ict n tuzzeggart n xemsa u-ɛicrin-ařef [n iɣunam n řeɛbar] d tammurt i tendint, zzat i [temmurt n] tewhibt iqeddsen n usgeɛɛed. Ad tiři i marra taddart n Israil.
EZE 45:7 Tasɣart [n temmurt] n řḥakem ad tiři ɣar ijj n uɣezdis uřa ɣar uɣezdis nneɣni n [temmurt n] tewhibt iqeddsen n usgeɛɛed u n tesɣart [n temmurt] n tendint, zzat i tewhibt iqeddsen n usgeɛɛed u zzat i tesɣart [n temmurt] n tendint, zeg uɣezdis n řɣarb ɣar řɣarb u zeg uɣezdis n ccarq ɣar ccarq. Tuzzuggart ad tiři nican zzat i uɣezdis n icten zi tseqqař n řwart, zeg weymir i iǧan ɣar řɣarb ař weymir i iǧan ɣar ccarq.
EZE 45:8 Tammurt ad tiři nnes, tasɣart nnes di Israil. U řḥukkam inu war ḥessaren ɛad řgens inu, [maca] ad wcen tammurt i taddart n Israil, i tqebbař nsen.”
EZE 45:9 “Ammu i iqqar Sidi inu, SIDI: ‘Cfa awem, [a kenniw,] řḥukkam n Israyil! Sbeɛɛed xawem lɛunf u ggem řḥeqq d tsegda uca kksem ibeɛɛaj nwem x řgens inu, [ammu i] iqqar Sidi inu, SIDI.
EZE 45:10 Ittxeṣṣa ad ɣarwem yiři ijj n řmizan nican d ijj n ifa nican d ijj n ubatu nican.
EZE 45:11 Ittxeṣṣa ad yiři [řeɛbar n] ifa d [řeɛbar n] ubatu d řeɛbar d ijj, ḥima ad yiři ubatu d ict zi tɛeccart n uḥumir, uca ict n tɛeccart n uḥumir [ad teswa] ifa. Řeqyas n řeɛbar nsen ad yiři zeg uḥumir.
EZE 45:12 Aciql aqa-t ɛicrin jira. Ɛicrin ciqlu, xemsa u-ɛecrin ciqlu, xemmesṭac ciqlu, ad awem yiři ijjen mina.’”
EZE 45:13 “Ta d tewhibt n usgeɛɛed nni i ɣa tessgeɛɛdem: ict n tsittut n ijj n ifa zeg ijj n uḥumir n yirden uca ad tewcem uřa d ict n tsittut n ijj n uḥumir n imendi.
EZE 45:14 X tewṣeyyet n zzect, [tawṣiyyet n] [řqedd n] ubatu n zzect: aqa ict n teɛcart n ubatu n ijj n ukuru, [akuru nni isekkwin] ijj n uḥumir n ɛecra ibatuten, minzi ɛecra ibatuten d ijj n uḥumir.
EZE 45:15 [Xenni] ijj [zeg wuǧi] x mitayen n wuǧi zi [ddmani n tarewsa n] temmurt n Israil i ifeyyḍen s waman, am tewhibt [n řɣiǧet] u am tɣarṣt n wecmaḍ u am tewhibt n řehna, maḥend ad tegged aṣřaḥ i nitni, [ammu i] iqqar Sidi inu, SIDI.
EZE 45:16 Marra řgens n temmurt, [marra] nitni ad carcen di tewhibt n usgeɛɛed i řḥakem di Israil.
EZE 45:17 Ad yiři x řḥakem maḥend [ad yegg] tiɣarṣa n wecmaḍ d tewhibt [n řɣiǧet] d tɣarṣt [n useyyeb] di řeɛyudat u deg wussan n uyur n jdid u x wussan n ssebt, [wah,] x marra ussan n řeɛyudat n taddart n Israil. Netta ad issewjed taɣarṣt n ddenb d tewhibt [n řɣiǧet] d tewhibt n wecmaḍ d tewhibin n řehna, maḥend ad igg aṣřaḥ i taddart n Israil.”
EZE 45:18 “Ammu i iqqar Sidi inu, SIDI: ‘Deg uyur amezwaru, deg wass amezwar n uyur, ad teksid ijj n ufunas icnan aṭṭas, ameẓyan n tfunast, uca ad zzayes tekksed ddenb zi Zzawect Iqeddsen.
EZE 45:19 Akehhan ad iksi zeg idammen n tɣarṣa n ddenb uca ad ten yegg x řeḍruf i iǧan ɣar uɣezdis n tewwura n Taddart, ɣar arebɛa n tɣemmura n treffidet n uɛalṭar u x řeḍruf n tewwart n řemraḥ n daxeř.
EZE 45:20 Ammu i ɣa tegged deg wass wiss sebɛa n uyur, di ṭṭweɛ n wenni iweddaren [deg webrid] u di ṭṭweɛ n uqubbani, ammu i ɣa teggem aṣřaḥ i Taddart.’”
EZE 45:21 “Deg [uyur] amezwaru, deg wass wiss arbeɛṭac n uyur ad tiři [Tɣarṣt n] Useɛdu i kenniw, ad yiři řɛid i yijj n řmijař n sebɛa n wussan, ad ccen aɣrum břa antun.
EZE 45:22 Deg wass nni ad issewjed řḥakem ijj n ufunas ameẓyan [am] tɣarṣṭ n ddenb i yixef nnes u i marra řgens n temmurt.
EZE 45:23 [Di] sebɛa n wussan n řɛid ad issewjed ict n tɣarṣt n wecmaḍ i SIDI: sebɛa n ifunasen imeẓyanen d sebɛa n icarriyyen icnan, [marra] sebɛa n wussan nni, uřa d ict n tɣarṣt n ddenb n ijj n umyan zeg iɣayḍen kuř ass.
EZE 45:24 Ad issewjed [ɛawed] tawhibt [n řɣiǧet]: ijj n ifa i yijj n ufunas ameẓyan u ijj n ifa i yijj n icarri u ijj n uhinu n zzect i yijj n ifa.
EZE 45:25 Deg [yuyur] wiss sebɛa, deg wass wiss xemmesṭac n uyur ittxeṣṣa as ad yegg [ammu] [marra] man aya di řɛid, sebɛa n wussan: am tɣarṣt n ddenb am tɣarṣt n wecmaḍ, am tewhibt [n řɣiǧet] am zzect.”
EZE 46:1 “Ammu i iqqar Sidi inu, SIDI: ‘Tawwart n řemraḥ n daxeř nni ixezzaren ɣar ccarq ad tiři tbelleɛ di setta n wussan n řxedmet. Deg wass n ssebt ad tennurzem uřa x wass n uyur n jdid ad tennurzem.
EZE 46:2 Ad dd-yadef řḥakem zi barra s ukulwar n wesqif [n řebni] n tewwart uca ad ibedd ɣar ṭṭarf [n řebni] n tewwart. Ikehhanen ad sswejden tiɣarṣa nnes n wecmaḍ d tɣarṣa nnes n tmessi u netta ad isjed x tnebdat n tewwart uca ad [zzayes] iffeɣ [ɛawed]. War ttbelliɛen tawwart ař tameddit.
EZE 46:3 Řgens n temmurt ad isjed zzat i wadaf [n řebni] n tewwart x wussan n ssebt u x wussan n uyur n jdid zzat i wudem n SIDI.
EZE 46:4 Taɣarṣt n wecmaḍ nni i ɣa dd-issqarreb řḥakem i SIDI deg wass n ssebt, ad tiři setta n izmaren icnan d ijj n icarri icna.
EZE 46:5 Tawhibt [n řɣiǧet] [ad tiři] ijj n ifa i yijj n icarri, u i izmaren [ad tiři] tewhibt [n rɣiǧet] min izemmar ufus nnes ad t yawi uca [xenni arni] ijj n uhinu n zzect i kuř ifa.
EZE 46:6 Deg wass n uyur n jdid: ijj n ufunas icnan aṭṭas, ameẓyan n tfunast, u setta n izmaren d ijj n icarri. Ittxeṣṣa ad iřin cnan aṭṭas.
EZE 46:7 Ad issewjed ijj n ifa i kuř afunas ameẓyan u ijj n ifa i kuř icarri d tawhibt [n řɣiǧet] u i izmaren anect izemmar ufus nnes ad t yawi, u [zi] zzect ittxeṣṣa ad issewjed ijj n uhinu i kuř ifa.’”
EZE 46:8 “Xmi ɣa yadef řḥakem, ad yadef zeg ukulwar n wesqif [n řebni] n tewwart uca ad iffeɣ zeg ukulwar nnes [ɛawed].
EZE 46:9 Xmi dd ɣa yas řgens n temmurt zzat i wudem n SIDI deg wussan ittwaggen n řeɛyudat, ittxeṣṣa wi ɣa yadfen zeg ukulwar [n řebni] n tewwart n ccamal maḥend ad [as] ibendeq, ad iffeɣ s ukulwar [n řebni] n tewwart n ljanub, u wi ɣa yadfen s ukulwar [n řebni] n tewwart n ljanub, ad iffeɣ s ukulwar [n řebni] n tewwart n ccamal. War iddikkwiř zi řebni n tewwart mani dd-yudef, maca ad dd-iffeɣ zi tenni yeǧan arendad nnes.
EZE 46:10 Řḥakem ad yadef di řwest nsen. Xmi ɣa yadfen u xmi dd ɣa ffɣen, ad dd-ffɣen [jmiɛ].”
EZE 46:11 “Di řeɛyudat u deg wussan ittwaggen n řɛid ad tiři tewhibt [n řɣiǧet] d ijj n ifa i kuř afunas ameẓyan u ijj n ifa i kuř icarri u i izmaren anect izemmar ufus nnes ad t yawi, uca [xenni arni] ijj n uhinu n zzect i kuř ifa.”
EZE 46:12 “Xmi ɣa issewjed řḥakem ict n tewhibt n řxaḍar, ict n tɣarṣt n wecmaḍ niɣ tiwhibin n řehna am tewhibt n řxaḍar i SIDI, [xenni] ad as arzmen tawwart nni ixezzaren ɣar ccarq. Netta ad issewjed taɣarṣt nnes n wecmaḍ d tewhibin nnes n řehna, am mammec tent issewjed deg wass n ssebt, u xmi ɣa iffeɣ ad bellɛen tawwart awarni řami iffeɣ netta.”
EZE 46:13 “Kuř ṣṣbeḥ ad tesswejded ijj n izmar n ijj n useggʷas icnan qaɛ am tewhibt n wecmaḍ i SIDI.
EZE 46:14 Ittxeṣṣa ad kides tesswejded di kuř ṣṣbeḥ ict n tsittut n ijj n ifa d ict n ttuřut n ijj n uhinu n zzect maḥend ad zzayes tessuffed aren azdad am tewhibt [n řɣiǧet] i SIDI. [Aqa] d tiweṣṣa ittduman, i řebda.
EZE 46:15 Nitni ad sswejden izmar d tewhibt [n řɣiǧet] d zzect di kuř tiwecca am tɣarṣt n tmessi n řebda.”
EZE 46:16 “Ammu i iqqar Sidi inu, SIDI: ‘Xmi ɣa iwc řḥakem ict n tarzeft i yijj zeg iḥenjiren nnes, [xenni] man aya ad tiři d řwart nnes. Ad tiři i iḥenjiren nnes, aqa-t d agřa nnes di řwart.
EZE 46:17 [Maca] mařa iwca zi řwart nnes ict n tarzeft i yijjen zeg imsexxaren nnes, [xenni] ad tiři nnes ař aseggʷas n třelli. [Xenni] ad dd-tedweř [tesɣart] ɣar řḥakem, minzi aqa-tt d řwart nnes, ad tiři i iḥenjiren nnes.
EZE 46:18 War iɛeddeř i řḥakem ad ikkes ca zi tesɣart n řgens ařami ɣa ikecceḍ agřa nsen. Netta ad isswart tasɣart i iḥenjiren nnes zeg wagřa nnes, ḥima war ittwazuzzar řgens inu, [umi] i ɣa ittwaqřeɛ kuř ijj zeg wagřa nnes.’”
EZE 46:19 [Xenni] indeh ayi am dd-ikka x tebridt nni ɣar uɣezdis [n řebni] n tewwart ař ixxamen iqeddsen n ikehhanen nni tuɣa iwařan ccamal. U xzar, aqa din ijj n wemcan ɣar ḍeffar n tnayen n iɣezdisen [nnes], ɣar řɣarb.
EZE 46:20 Netta inna ayi: “Wa d amcan mani ɣa ssenwen ikehhanen taɣarṣt n [tikkest n] umarwas d tɣarṣt n ddenb u mani ɣa ssenggwen tawhibt [n řɣiǧet], ḥima war tt ssuffɣen ca barra ɣar řemraḥ n barra, ařami i ɣa ssqeddsen řgens [ammu].”
EZE 46:21 [Xenni] issuffeɣ ayi barra ɣar řemraḥ n barra uca indeh ayi ɣar arebɛa n tɣemmura n řemraḥ. U xzar, di kuř taɣmart n řemraḥ aqa din ijj n řemraḥ [nneɣni], ijj n [wemcan ifarzen di] řemraḥ di [kuř] taɣmart n řemraḥ.
EZE 46:22 Di arebɛa n tɣemmura n řemraḥ n zzat [tuɣa din ixxamen am] řemraḥat iseqqfen s ict n tuzzeggart n arebɛin [n iɣaǧen] d ict n tiru n třatin [n iɣaǧen]. [Ixxamen deg] arebɛa n tɣemmura ɣarsen řeɛbar d ijj.
EZE 46:23 Deg wenneḍ n arebɛa [n ixammen] nni tuɣa din ict n tseddiyt i d asen-dd innḍen. Aqa ggin řmejmarat sadu i tseddyin i d as dd-innḍen.
EZE 46:24 Netta inna ayi: “Tina d kuzinat mani ɣa ssenggʷen imsexxaren n Taddart taɣarṣt n řgens.” *
EZE 47:1 [Awarni aya] yiwi ayi ɛawed ɣar wadaf n Taddart, u xzar, zi sadu tanebdat n Taddart tteffɣen waman ɣar ccarq, minzi aɣezdis n zzat n Taddart tuɣa-t ɣar ccarq u tuɣa ttazzřen hekkwan aman zi swadday n uɣezdis azeřmaḍ n Taddart, ɣar [uɣezdis n] ljanub n uɛalṭar.
EZE 47:2 Issuffeɣ ayi-dd zeg ukulwar [n řebni] n tewwart n ccamal uca indeh ayi ɣar tebridt nni ɣar barra, jjihet n tewwart n barra, [ɣar] ukulwar nni ixezzaren ɣar ccarq, u xzar, aman ttazzřen zi teɣmart n zzat afusi.
EZE 47:3 [Umi] dd-iffeɣ weryaz ɣar ccarq, tuɣa ɣares afiřu n řeɛbar deg ufus nnes uca iɛbar ařef n iɣaǧen. Isseẓwa ayi x waman uca aman [iwḍen] ař ticeɛbin.
EZE 47:4 Iɛbar [ɛawed] ařef [n iɣaǧen] uca isseẓwa ayi x waman uca aman iwḍen ař ifadden. [Ɛawed] iɛbar ařef [n iɣaǧen] uca isseẓwa ayi ɛad ktar uca aman iwḍen ař tijɛinnatin.
EZE 47:5 Iɛbar [twařat nneɣni] ařef [n iɣaǧen] uca [aman] dewřen d ijj n iɣzar war zmireɣ ad t ẓwiɣ [x iḍaren], maɣar aman geɛɛden ařami tuɣa ittxeṣṣa ad iɛumm bnadem, aqa-t d ijj n iɣzar i war izemmar ḥed ad t iẓwa [x iḍaren].
EZE 47:6 Netta inna ayi: “Ma teẓrid tt, [a] mmis n bnadem?” [Xenni] indeh ayi am ggureɣ nnec uca yarra ayi ɣar tma n iɣzar.
EZE 47:7 [Umi] dd-dewřeɣ necc, xzar, [beddent din] aṭṭas n tcejjura x tma n iɣzar, am ɣar tma-ya am ɣar tma nni.
EZE 47:8 [Xenni] inna ayi: “Aman-a ttazzřen ɣar jjihet n ccarq uca hekkwan ɣar Řewḍa uca ttakkwaḍen ɣar Řebḥar [Immuten]. [Xenni] ttazzřen di řebḥar uca ad ttwassggenfan aman [ɛawed].
EZE 47:9 Ad imsar, belli kuř řeɛmar i din ittenhezzan ad iddar, mani ma i dd ɣa [y]awḍen tnayen n iɣezran. Ad [din] iřin iseřman aṭṭas, minzi aman-a ttazzřen dinni uca ad ttwassgenfan [waman n řebḥar]. Mani ma i dd ɣa yas yeɣzar-a, ad din tiři tudart.
EZE 47:10 Ad imsar belli ad iřin iyemmaren n iseřman zi Ɛayn-Jadyi ař Ɛayn-Ɛiglayim. Ad din iřin imucan i ujeffaf n traccawin. Asřem nsen ad yiři ɛlaḥsab marka nnes, am wesřem n Řebḥar Ameqqran, aṭṭas s waṭṭas,
EZE 47:11 [maca] tindat nnes d iyeřmamen nnes war ttwaggenfan, ad qqimen meǧḥen.
EZE 47:12 Ɣar yeɣzar, x tma nnes, x tma-ya u x tma nni, ad iřin ɛřam kuř ticejjura, maḥend ad zzaysent ccen, tinni umi tafart nsent war tᵉttisřaw u řɣiǧet nsent war t qeṭṭi ca. Kuř ayur ad wcent řɣiǧet d ṭṭri, maɣar aman n [yeɣzar] ffɣen-dd zi Zzawect Iqeddsen. Řɣiǧet nsent ad tiři i macca d tafart nsent i ugenfu.”
EZE 47:13 “Ammu i iqqar Sidi inu, SIDI: ‘Wa [ad yiři] d aymir i x i ɣa tewcim tammurt d řwart i tenɛac n tqebbař n Israil. Yusuf ad iksi tnayen n tseqqar.
EZE 47:14 Kenniw ad tt twartem, ijj am wenneɣni, i uya ssgeɛɛdeɣ afus inu [uca jjuǧeɣ] ad tt wceɣ i řejdud nwem. Tammurt-a ad tiři d tasɣart nwem.
EZE 47:15 Wa [ad yiři] d aymir n temmurt: ɣar uɣezdis n ccamal, zi Řebḥar Ameqqran x webrid ɣar Ḥitlun ař dd-tusid ɣar Ṣadad,
EZE 47:16 [xenni ɣar] Ḥamat, Bayruta, Sibrayim nni yeǧa jar weymir [n temmurt n] Dimacq d weymir [n temmurt n] Ḥamat, [xenni ɣar] Ḥaṣr-Hatixun nni yeǧa ɣar weymir n Ḥawran.
EZE 47:17 Zi řebḥar ad dd-iffeɣ weymir ɣar Ḥasr-Ɛaynun, [x uɣezdis n] weymir n Dimacq uca [xenni] ɣar ccamal, ɣar ccamal u [x uɣezdis n] weymir n Ḥamat. Wa ad yiři d aɣezdis n ccamal.
EZE 47:18 Aɣezdis n ccarq [ittekk] zi jar Ḥawran d Dimacq u zi jar Jilɛad d temmurt n Israil [x] L’Urdun. Kenniw ad t tɛebbarem zeg weymir ař řebḥar n ccarq. Wa [ad yiři] d aɣezdis n ccarq.
EZE 47:19 Aɣezdis n ljanub, aqa-t ɣar ljanub zi Tamar ař aman n Maribut-Qadac [uca ittekk x] Teɣzurt n Teɣzart [n Miṣra] ař Řebḥar Ameqqran. Wa ad yiři d aɣezdis n ljanub ɣar ljanub.
EZE 47:20 Aɣezdis n řɣarb d Řebḥar Ameqqran, zeg weymir [nni iǧan ɣar ljanub] ař arendad n webrid ɣar Ḥamat, wa ad yiři d aɣezdis n lɣarb.’”
EZE 47:21 “Ad tebḍam tammurt-a jar awem ɛlaḥsab tiqebbař n Israil.
EZE 47:22 Kenniw ad tt jjen d řwart i kenniw u i ibarraniyyen di řwesṭ nwem, inni urwen iḥenjiren di řwesṭ nwem. Nitni ad awem iřin am yinni dd-ittwaxeřqen di temmurt jar ayt n Israil. Ad asen tiři tasɣart akidwem di řwesṭ n tqebbař n Israil.
EZE 47:23 Ɣar teqbič i ɣar ɣa izdeɣ am ubarrani, din ad as tewcem tasɣart nnes! [Ammu i] ɣa tiři, iqqar Sidi inu, SIDI.’”
EZE 48:1 “Ina d ismawen n tqebbař. Zi ṭṭarf n ccamal qaɛ, x webrid n Ḥitlun ařami ɣa tawḍed ɣar Ḥamat, Ḥaṣar-Ɛinan, tammurt n weymir n Dimacq, x uɣezdis n ccamal n Ḥamat umi xas tᵉttekked: ad as yiři am uɣezdis n ccarq am uɣezdis n řebḥar, ict [n tesɣart i] Dan.
EZE 48:2 X weymir n Dan, zeg uɣezdis n ccarq ař řebḥar: ict [n tesɣart i] Acir.
EZE 48:3 X weymir n Acir, zeg uɣezdis n ccarq ař řebḥar: ict [n tesɣart i] Naftali.
EZE 48:4 X weymir n Naftali, zeg uɣezdis n ccarq ař řebḥar: ict [n tesɣart i] Manassa.
EZE 48:5 X weymir n Manassa, zeg uɣezdis n ccarq ař řebḥar: ict [n tesɣart i] Ifrayim.
EZE 48:6 X weymir n Ifrayim, zeg uɣezdis n ccarq ař řebḥar: ict [n tesɣart i] Rubin.
EZE 48:7 X weymir n Rubin, zeg uɣezdis n ccarq ař řebḥar: ict [n tesɣart i] Yahuda.
EZE 48:8 X weymir n Yahuda, zeg uɣezdis n ccarq ař tma n řebḥar, [ad tiři] tewhibt n usgeɛɛed, tenni i ɣa twehhbem, s ict n tiru n xemsa u-ɛicrin-ařef [n iɣunam n řeɛbar] u s ict n tuzzeggart am [tuzzeggart n] icten zi tseqqar [inneɣni] zeg uɣezdis n ccarq ař tma n řebḥar. Zzawect Iqeddsen ad tiři di řwest nnes.
EZE 48:9 Tawhibt n usgeɛɛed i SIDI nni i ɣa tessgeɛɛdem, [ad tiři] s ict n tuzzeggart n xemsa u-ɛicrin-ařef [n iɣunam n řeɛbar] u s ict n tiru n ɛecra-ařaf [n iɣunam n řeɛbar].
EZE 48:10 Tawhibt iqeddsen n usgeɛɛed ad tiři i ina: I ikehhanen: ɣar ccamal xemsa u-ɛicrin-ařef [n iɣunam n řeɛbar], u ɣar řɣarb tiru [nnes] ɛecra-ařaf [n iɣunam n řeɛbar], u ɣar ccarq tiru [nnes] ɛecra-ařaf [n iɣunam n řeɛbar], u ɣar ljanub tuzzeggart [nnes] xemsa u-ɛicrin-ařef [n iɣunam n řeɛbar]. Zzawect Iqeddsen n SIDI ad tiři di řwest nnes.
EZE 48:11 [Ad tiři] temmurt-a iqeddsen i ikehhanen zeg ayt n Ṣaduq, inni iḥḍan aḥeṭṭu inu, inni war dd-iffɣen ca zeg webrid zi ssibbet n uweddar n ayt n Israil, am ffɣen uřa d ayt n Lawi.
EZE 48:12 Ad tiři d ict n tewhibt n usgeɛɛed i nitni zi tewhibt n temmurt, ad tiři tqeddes qaɛ, [ad tiři] x weymir n Ilawiyyen.
EZE 48:13 Ɣar weymir ak-d ikehhanen [ad ɣarsen tiři] i Ilawiyyen [ict n temmurt] s ict n tuzzeggart n xemsa u-ɛicrin ařef [n iɣunam n řeɛbar], s ict n tiru n ɛecra-ařaf [n iɣunam n řeɛbar]. Marra tuzzeggart [ad tiři] xemsa u-ɛicrin-ařef [n iɣunam n řeɛbar], u tiru nnes [ad tiři ɛawed] ɛecra-ařaf [n iɣunam n řeɛbar].
EZE 48:14 War iɛeddeř ad zzenzen uřa d ca zzayes, war iɛeddeř ad [tt] beddřen niɣ ad [tt] sseɛdun, [aqa-tt] d řemxeyyer n temmurt, minzi aqa-tt d tamqeddast qaɛ.
EZE 48:15 Xemsa-ařaf [n iɣunam n řeɛbar] nni i ɣa iqqimen ɣar tiru, ɣar zzat n xemsa u-ɛicrin-ařef [n iɣunam n řeɛbar], ad iřin i tudart n kuř ass di tendint, i tzeddiɣt u i ddmani n tarewsa. Ad tiři tendint di řwesṭ nnes.
EZE 48:16 Ina ad iřin d řeɛburat nnes: ɣar uɣezdis n ccamal xemsa u-rebɛin-mya [n iɣunam n řeɛbar], ɣar uɣezdis n ljanub xemsa u-rebɛin-mya [n iɣunam n řeɛbar], ɣar uɣezdis n ccarq xemsa u-rebɛin-mya [n iɣunam n řeɛbar], ɣar uɣezdis n řebḥar xemsa u-rebɛin-mya [n iɣunam n řeɛbar].
EZE 48:17 Ddmani n tarewsa n tendint: ɣar ccamal ad iřint mitayen u-xemsin [n iɣunam n řeɛbar], ɣar ljanub mitayen u-xemsin [n iɣunam n řeɛbar], ɣar ccarq mitayen u-xemsin [n iɣunam n řeɛbar], ɣar řɣarb mitayen u-xemsin [n iɣunam n řeɛbar].
EZE 48:18 Min iqqimen zi tuzzeggart ɣar zzat n tewhibt iqeddsen n usgeɛɛed, ɛecra-ařaf [n iɣunam n řeɛbar] ɣar ccarq d ɛecra-ařaf [n iɣunam n řeɛbar] ɣar uɣezdis n řɣarb, ad yiři zzat [n temmurt] n tewhibt iqeddsen n usgeɛɛed. Ṣṣabet nnes ad tiři d macca i imsexxaren n tendint.
EZE 48:19 Imsexxaren n tendint, aqa ad tt sexxaren zi marra tiqebbař n Israil.
EZE 48:20 Marra tawhibt n usgeɛɛed [ad tiři] xemsa u-ɛicrin-ařef x xemsa u-ɛicrin-ařef [n iɣunam n řeɛbar]. Ad ssgeɛɛden tawhibt n usgeɛɛed d ijj n ukwadrun ak-d tesɣart n tendint [i dayes].
EZE 48:21 Min iqqimen ad yiři i řḥakem, ɣar ijj n uɣezdis u ɣar uɣezdis nneɣni n tewhibt iqeddsen n usgeɛɛed u n tesɣart n tendint. [Min iǧan] ɣar uɣezdis n zzat n xemsa u-ɛicrin-ařef [n iɣunam n řeɛbar] n tewhibt n usgeɛɛed ař aymir n ccarq, u ɣar uɣezdis n řɣarb ɣar zzat n xemsa u-ɛicrin-ařef [n iɣunam n řeɛbar] ař aymir n řɣarb ɣar řebḥar, zzat i tseqqar nneɣni [n temmurt], [d man aya ad yiři] i řḥakem. Ad tiři d ict n tewhibt iqeddsen [n temmurt] nni i ɣa ssgeɛɛden, u Zzawect Iqeddsen n Taddart ad tiři di řwest nnes.
EZE 48:22 Zi [min iǧan d] tasɣart n Ilawiyyen u [zi min iǧan d] tasɣart n tendint nni [iǧan] di řwesṭ n min ɣa yiři i řḥakem, ad yiři [marra] min iǧan jar temmurt n Yahuda d temmurt n Binyamin, i řḥakem.
EZE 48:23 Min iqqimen n tqebbař zeg uɣezdis n ccarq ař řebḥar: ict [n tesɣart] i Binyamin.
EZE 48:24 X weymir n Binyamin, zeg uɣezdis n ccarq ař řebḥar: ict [n tesɣart i] Cimɛun.
EZE 48:25 X weymir n Cimɛun, zeg uɣezdis n ccarq ař řebḥar: ict [n tesɣart i] Issakar.
EZE 48:26 X weymir n Issakar, zeg uɣezdis n ccarq ař řebḥar: ict [n tesɣart i] Zabulun.
EZE 48:27 X weymir n Zabulun, zeg uɣezdis n ccarq ař řebḥar: ict [n tesɣart i] Jad.
EZE 48:28 X weymir n Jad, ɣar uɣezdis n ljanub di jjihet n ljanub, ad yiři weymir zi Tamar ař aman n Mariba-Qadac, [xenni ad yekk] x Teɣzart [n Miṣra] ař Řebḥar Ameqqran.
EZE 48:29 Ta d temmurt nni ittxeṣṣa kenniw ad tt tebḍam d tasɣart n řwart i tqebbař n Israil u tina d tiseqqar nsen, [ammu i] iqqar Sidi inu, SIDI.” *
EZE 48:30 “D yina i ɣa yiřin d uffuɣen n tendint: Ɣar ccamal [aqa din] xemsa u-rebɛin-mya n řeɛburat.
EZE 48:31 Tiwwura n tendint [ad ttwařaɣant] ɛlaḥsab ismawen n tqebbař n Israil: třata n tewwura [ad iřint] ɣar ccamal: icten n Rubin, icten n Yahuda, icten n Lawi.
EZE 48:32 Ɣar uɣezdis n ccarq [aqa din] xemsa u-rebɛin-mya n řeɛburat, [ak-d] třata n tewwura: icten n Yusuf, icten n Binyamin, icten n Dan.
EZE 48:33 Ɣar uɣezdis n ljanub [aqa din] xemsa u-rebɛin-mya n řeɛburat, [ak-d] třata n tewwura: icten n Cimɛun, icten n Issakar, icten n Zabulun.
EZE 48:34 Ɣar uɣezdis n řɣarb [aqa din] xemsa u-rebɛin-mya [n řeɛburat], [ak-d] třata n tewwura nsen: icten n Jad, icten n Acir, icten n Naftali.
EZE 48:35 [Řeɛbar] deg wenneḍ [n tendint] [aqa-t] di tmenṭac-ařef [n řeɛburat] u zeg wass [nni] ad yiři yisem n tendint d wa: ‘SIDI AQA-T DIN!’ ”
DAN 1:1 Deg useggʷas wiss třata n tgelda n ujeǧid Yahuyaqim, ajeǧid n Yahuda, yusa-dd Nabuxadnaṣṣar, ajeǧid n Babil, ɣar Urcalim uca inneḍ as-dd.
DAN 1:2 Sidi igga Yahuyaqim, ajeǧid n Yahuda, deg ufus nnes, uřa d ict n tesɣart n řeqcuɛ n Taddart n AREBBI. Netta yiwyi ten ɣar temmurt n Cinɛar, di taddart n arebbi nnes uca yiwyi ten ɣar wexxam n txubay n arebbi nnes.
DAN 1:3 Inna ujeǧid i Acfanaz, azeǧif n imsexxaren nnes icennɛen, aqa wanita ad yawi iḥudriyyen zeg ayt n Israil, zi zzariɛet n ujeǧid u zi tarwa n taṣiřet,
DAN 1:4 [iḥudriyyen] inni war di iǧi uřa d ijj n řɛib, [inni] d iṣebḥanen, ittwassřemden di marra tiɣit, ssnen tussna, ɣarsen řeɛqeř s řefhamet u ɣarsen tizemmar i tsexxart di řeqṣar n ujeǧid, ḥima ad asen ssřemden idlisen d yiřes n Ikaldaniyyen.
DAN 1:5 Ajeǧid igga asen ijj n lmaɛica di kuř ass zi macca n ujeǧid u zi binu n ṭṭabřa n tsessit nnes, u ḥima ad ten ssřemden třata n iseggʷusa. Ɣar uneggar n iseggʷusa nni ad sexxaren zzat i wudem n ujeǧid.
DAN 1:6 Zeg ayt n Yahuda tuɣa din jar asen Daniyal, Ḥananya, Micayil d Ɛazarya.
DAN 1:7 Ameqqran n imsexxaren icennɛen iwca asen ismawen nneɣni. Daniyal igga as Balṭacaṣṣar, Ḥananya Cadrax, Micayil Micax u Ɛazarya [igga as] Ɛabd-Naɣu.
DAN 1:8 Daniyal tuɣa igga uř nnes maḥend war issxemmij ixef nnes s macca d binu n ṭṭabřa n ujeǧid u ittar i umeqqran n imsexxaren icennɛen, ḥima war issxemmij ixef nnes [zzaysen].
DAN 1:9 AREBBI isscen i Daniyal tamexsiwt [nnes] icewwaren d arreḥmet [nnes] zzat i wudem n ameqqran n imsexxaren icennɛen.
DAN 1:10 Ameqqran n imsexxaren icennɛen inna i Daniyal: “Necc tteggʷedeɣ zi bab inu, ajeǧid, wenni i kenniw iweṣṣan x macca d tsessit, maɣar mayemmi ad iẓar iɣembab nwem zerryen x iḥudriyyen [nneɣni], iqrinen nwem? Kenniw ad tewcem azeǧif inu i ujeǧid!”
DAN 1:11 [Xenni] inna Daniyal i uweqqaf nni tuɣa igga umeqqran n imsexxaren icennɛen x Daniyal, Ḥananya, Micayil d Ɛazarya:
DAN 1:12 “Qeǧeb imsexxaren nnec ɛecra n wussan. Ejj ad aneɣ wcen zi min ittwazarɛen i macca uřa d waman ḥima ad nsu.
DAN 1:13 [Xenni] ejj ad aneɣ qeddmen zzat i wudem nnec mammec iǧa waddud nneɣ uřa d iḥudriyyen nni ittᵉtten zi macca n ujeǧid mammec iǧa waddud nsen u egg am mammec tᵉttwařid cek!”
DAN 1:14 Netta isřa asen uca iqeǧeb i-ten ɛecra n wussan.
DAN 1:15 Ɣar uneggar n ɛecra n wussan dewřen nitni ttbanen cnan u ṣebḥen x marra iḥudriyyen i iccen zi macca n ujeǧid.
DAN 1:16 [Xenni] imsar aqa aweqqaf ikkes asen macca nsen [igellden] d binu i ittxeṣṣa asen ad swen uca iwca asen zi min ittwazarɛen.
DAN 1:17 I arebɛa n iḥudriyyen-a iwca asen AREBBI tussna d řeɛqeř zi marra idlisen d tiɣit. Uca i Daniyal iwca as uřa d aḥekkar di marra řewḥiy d tirja.
DAN 1:18 Ɣar uneggar n wussan i x tuɣa inna ujeǧid aqa awarni asen ittxeṣṣa ad ten qeddmen [zzates], yiwyi i-ten umeqqran n imsexxaren icennɛen, inni umi ttwaddzen imeǧařen, zzat i wudem n Nabuxadnaṣṣar.
DAN 1:19 Issiweř ujeǧid akidsen u war ittwif uřa d ijjen jar asen am Daniyal, Ḥananya, Micayil d Ɛazarya u nitni dewřen ttsexxaren i ujeǧid.
DAN 1:20 Di kuř tamesřact i di tuɣa ittxeṣṣa tiɣit d řefhamet i x tuɣa ten ittseqsa ujeǧid, yufa aqa ɛdun marra tarwa n tseḥḥart d imesnawen n itran di tgeldit nnes s ɛecra n tseqqar.
DAN 1:21 Daniyal iqqim dinni ař aseggʷas amezwaru n ujeǧid Kurac.
DAN 2:1 Deg useggʷas wiss tnayen n tgelda n Nabuxadnaṣṣar yurja Nabuxadnaṣṣar tirja. Buḥbeř nnes inneḥweř uca iruḥ as yiḍeṣ.
DAN 2:2 [Xenni] inna ujeǧid ad řaɣan i tarwa n tseḥḥart d imesnawen n itran d iseḥḥaren d Ikaldaniyyen ḥima nitni ad as fessaren tirja nnes. Nitni usin-dd uca bedden zzat i wudem n ujeǧid.
DAN 2:3 Inna asen ujeǧid: “Necc ɣari ict n tarjit u buḥbeř inu inneḥweř, maḥend ad ssneɣ min texs ad tini tarjit.”
DAN 2:4 [Xenni] nnan Ikaldaniyyen i ujeǧid: Min yuran swadday aqa-t s yiřes n Tramit. [A] ajeǧid, ddar i řebda! Ini asen i imsexxaren nnec tarjit, [xenni] ad ak tt nfessar!”
DAN 2:5 Yarra-dd ujeǧid, inna i Ikaldaniyyen: “Aqa iffeɣ-dd řumur. Mařa kenniw war d ayi tessargbem x tarjit, ad tᵉttwaqessem d iwetwiten u tudrin nwem ad tent arren d tizubayyin.
DAN 2:6 Maca mařa tfessarem ayi kenniw tarjit d min texs ad tini, ad tᵉṭṭfem zzayi tarzefin d arriɣaluten d ccan ameqqran. S uyenni, seccnem ayi tarjit inu d řmeɛna nnes.”
DAN 2:7 Arrin-dd nitni xas twařa wiss tnayen, nnan: “Ejj ajeǧid ad iḥaja tarjit i imsexxaren nnes, [xenni] ad as newc afessar.”
DAN 2:8 Yarra-dd ujeǧid, inna: “Řexxu ssneɣ nican, aqa kenniw texsem ad tarebḥem řweqt, umi tᵉttwařam aqa iffeɣ-dd řumur zzayi.
DAN 2:9 Mařa war d ayi tessargbem x tarjit, ad kenniw iřqef řḥukm d ijj. Kenniw tekksem awař maḥend ad xafi tessxarrqem u ad ayi tɣeccem ař ɣa tbeddeř řweqt. S uyenni, ini ayi tarjit, xenni ad ssneɣ aqa tzemmarem ad ayi tewcem uřa d řmeɛna nnes.”
DAN 2:10 Arrin-dd Ikaldaniyyen qibač i ujeǧid, nnan: “War din uřa d ijj n bnadem di temmurt wenni izemmaren ad ifessar tamesřact-a i ujeǧid. S uyenni war din uřa d ijj n ujeǧid, mammec iǧa d ameqqran niɣ mecḥař ma ɣares d tizemmar, wenni ittaren tamesřact am tanita zi ca n useḥḥar niɣ amesnaw n itran niɣ Akaldaniy.
DAN 2:11 Minzi tamesřact i ittar ujeǧid tewɛar aṭṭas u war din uřa d ijj izemmar ad t issargeb, mɣir irebbiten nni war izeddɣen jar iwdan.”
DAN 2:12 S uyenni idweř ujeǧid ittḥaja u ittxeyyaq ktar, yumur ad nɣen marra imiɣisen di Babil.
DAN 2:13 Iffeɣ-dd řumur maḥend ad nɣen imiɣisen. Arzun uřa x Daniyal d imeddukkař nnes ḥima ad [ten] nɣen.
DAN 2:14 [Xenni] yarra-dd Daniyal s tiɣit d řeɛqeř ɣar Ariyux, řqebṭan n iɛessasen n arrimet n ujeǧid, wenni tuɣa iffɣen ḥima ad ineɣ imiɣisen n Babil.
DAN 2:15 Daniel iṭṭef deg wawař, inna i Ariyux, akumandar n ujeǧid: “Mayemmi igga ujeǧid řumuř ammu s tazřa?” Řexdenni issargeb Ariyux x tamesřact i Daniyal.
DAN 2:16 [Xas uca] yudef Daniyal uca ittar zeg ujeǧid, maḥend netta ad as iwc ijj n řmijař n řweqt, maḥend ad as iwc afessar.
DAN 2:17 Xenni yuyur Daniyal ɣar taddart nnes, iḥaja tamesřact i iɛciren nnes Ḥananya, Micayil d Ɛazarya,
DAN 2:18 ḥima ad ttaren arreḥmet zi Arebbi n ijenwan x ssirr-a ḥima Daniyal d iɛciren nnes war tᵉttwahelliken ca ak-d imiɣisen nneɣni n Babil.
DAN 2:19 Xas uca ittwassargeb-dd i Daniyal min tuɣa innuffaren deg ijj n řewḥiy s ǧiřet. Xenni ibarek Daniyal Arebbi n ijenwan.
DAN 2:20 Yarra-dd Daniyal, inna: “Ad ittwabarek Isem n Arebbi zi řebda ař řebda qaɛ, maɣar tiɣit d jjehd aqa aten nnes.
DAN 2:21 Maɣar Netta ittbeddař zzamanat d tsaɛɛetin. Netta ikkes ijeǧiden u yařeqqem ijeǧiden, Netta iwca tiɣit i imiɣisen u tussna i yinni ɣar iǧa řeɛqeř.
DAN 2:22 Netta issargeb timesřayin yuǧɣen innufaren, Netta issen min iǧan di taǧest, maɣar tafawt tzeddeɣ ɣares.
DAN 2:23 Cek, [a] Arebbi n řejdud inu, aqa ttqadiɣ u ttṣebbḥeɣ, minzi tewcid ayi tiɣit d jjehd, u umi tessargbed ayi řexxu min zzayek nettar, maɣar Cek tessargbed aneɣ x tamesřact n ujeǧid.”
DAN 2:24 S uyenni yuyur Daniyal ɣar Ariyux, wenni igga ujeǧid maḥend ad isshellek imiɣisen n Babil. Yuyur ɣares, issiweř akides ammu: “War neqq imiɣisen n Babil, maca ndeh ayi ɣar wudem n ujeǧid. Necc ad as ssecneɣ afessar i ujeǧid.”
DAN 2:25 Řexdenni indeh Ariyux Daniyal s tazřa ɣar ujeǧid uca issiweř akides ammu: “Necc ufiɣ ijj n weryaz jar imenfiyyen n Yahuda wenni d i ɣa issecnen afessar i cek, [a] ajeǧid!”
DAN 2:26 [Xenni] iṭṭef ujeǧid deg wawař, inna i Daniyal, wenni umi qqaren Balṭacaṣṣar: “Ma tzemmared ad ayi tessargbed x tarjit nni ẓriɣ d řmeɛna nnes?”
DAN 2:27 Yarra-dd Daniyal zzat i ujeǧid, inna: “Min innuffaren i ittar ujeǧid war zemmarem imiɣisen d imesnawen n itran d tarwa n tseḥḥart d igezzanen ad t ssaregben i ujeǧid.
DAN 2:28 Maca aqa din ijj n Arebbi deg ujenna wenni issargaben min innufaren. Netta issargeb i ujeǧid Nabuxadnaṣṣar min ɣa imsaren deg uneggar n wussan. Aqa ta d tarjit nnec d iweḥḥan nni dd-yusin deg uzeǧif nnec di tassut.
DAN 2:29 Cek, [a] ajeǧid, umi cek tuɣa di tassut usin ac-dd ixarriṣen [x min] i ɣa imsaren awarni aya u Wenni issargben min inuffaren, aqa isscen ac min ɣa imsaren.
DAN 2:30 Aqa ittwasscen ayi-dd min tuɣa innuffaren, war iǧi zi tiɣit nni dayi sennej i marra min iddaren, maca ḥima ad ittwassargeb ufessar i ujeǧid u ḥima ad tessned ixarriṣen n wuř nnec.”
DAN 2:31 “Cek, [a] ajeǧid, tuɣa txezzared u teẓrid ijj n řexyař d ameqqran. Řexyař-a tuɣa issiggʷed u tissiqt nnes teǧa ař ṭṭarf. Aqa ibedd zzatek u issiggʷed am t teẓrid.
DAN 2:32 Azeǧif n řexyař-a tuɣa d ureɣ iṣfan, idmaren nnes d iɣaǧen nnes d nnuqart, aɛeddis nnes d tijɛinna nnes d nnḥas,
DAN 2:33 timessaḍin nnes d uzzař, iḍaren nnes cwayt d uzzař u cwayt [zzaysen] d tarrist.
DAN 2:34 Aya i teẓrid, ařami ittwaceǧeq ijj n weẓru břa ifassen. Wanita iřqef řexyař nni ɣar iḍaren nnes n wuzzař ak-d tarrist, uca iřbez i-ten.
DAN 2:35 Xenni ittwařbez wuzzař d tarrist d nnḥas d nnuqart d wureɣ deg ict n tecti uca dewřen am uřum n inedraren deg unebdu, uca isuḍ daysen usemmiḍ, war zzaysen teqqim uřa d ict n jjuret. Maca aẓru nni iřeqfen řexyař, idweř d ijj n wedrar ameqqran, iɛemmar marra tammurt.
DAN 2:36 D ta d tarjit. Ad nɛawed min texs ad tini [řexxu] zzat i ujeǧid. *
DAN 2:37 Cek, [a] ajeǧid, [teǧid] d ajeǧid n ijeǧiden, maɣar Arebbi n ijenwan iwca ac tagelda d tzemmar d jjehd d ccan.
DAN 2:38 Mani ma zeddɣen tarwa n bnadem, igga imuddaren n řexřa d ijḍaḍ n ujenna deg ufus nnec u Netta igga cek d řḥakem x marra man aya. Aqa cek d azeǧif nni n wureɣ. *
DAN 2:39 Awarni ac ad dd-tas ict n tgeldit nneɣnit, tudrus x tenni nnec. Awarni as ad tiři ict n nneɣnit, tageldit wiss třata n nnḥas, tenni ad teḥkem x marra tammurt. *
DAN 2:40 Uca tageldit wiss arebɛa ad tiři tejhed am wuzzař, maɣar uzzař iřebbez u ibarri marra, u am mammec ittareẓẓa wuzzař marra, ammu i ɣa teřbez u tbarri marra. *
DAN 2:41 Umi teẓrid belli iḍaren d tfednin aqa cwayt zzaysen s tarrist n bu-třaxt u cwayt zzaysen s wuzzař, [ixs ad yini] aqa ad tiři d ict n tgeldit temsebḍa. Cwayt zzayes [waha] ad dayes tiři řeqsaḥet am wuzzař, maɣar teẓrid uzzař iṣṣur s tarrist n třaxt.
DAN 2:42 U [umi teẓrid] tifednin n iḍaren, aqa cwayt zzaysent s wuzzař u cwayt zzaysent s tarrist, [ixs ad yini] aqa tageldit nni cwayt zzayes ad dayes tiři řeqsaḥet u cwayt ad tiři tarxef.
DAN 2:43 U umi teẓriḍ aqa uzzař iṣṣur s tarrist n třaxt, [ixs ad yini] nitni ad ṣṣuren s zzariɛet n weryaz, maca war řessqen ca ijj ɣar wenneɣni, wa war iřesseq ak-d wa, am wuzzař war iřessqen ak-d třaxt.
DAN 2:44 Maca deg wussan n ijeǧiden nni ad issbedd Arebbi n ijenwan ict n tgeldit nni war tᵉttwaḍeyyiɛ i řebda u tagelda nnes war tᵉttriḥ ɛemmarṣ ɣar ijj n řgens nneɣni. Ad teřbez u ad tebḍeř marra tigeldiwin nni, maca nettat s yixef nnes at tiři i řebda qaɛ.
DAN 2:45 S uyenni teẓrid, ittwaceǧeq-dd ijj n weẓru zeg wedrar břa ifassen, wenni iřebzen uzzař d tarrist d nnuqart d nnḥas. Arebbi ameqqran aqa isscen i ujeǧid min ɣa imsaren awarni aya. Tarjit aqa tbedd u řmeɛna nnes d tidett.”
DAN 2:46 Xenni iwḍa ujeǧid Nabuxadnaṣṣar x uɣembub nnes [ɣar temmurt] uca isjed i Daniyal, iweṣṣa ad awyen ict n tewhibt d řebxur ittfuḥen am yict n tewhibt n useyyeb.
DAN 2:47 Yarra-dd ujeǧid x Daniyal, inna: “D tidett, aqa Arebbi nwem d Arebbi x [marra] irebbiten u Netta d Sidi x [marra] ijeǧiden uřa d wenni issargaben min innufaren, maɣar tiwḍed ad tkecfed aya i tuɣa innuffaren.”
DAN 2:48 Xas uca iwca ujeǧid i Daniyal asemɣar ameqqran u iwca as tirzifin timeqqranin. Igga i-t x marra lɛamala n Babil u igga i-t d arrays x imeḥḍayen nni tuɣa x marra imiɣisen n Babil.
DAN 2:49 U Daniyal iqeddem ict n tutra i ujeǧid u wanita igga Sadrax, Micax d Ɛabd-Naɣu d imḍebbaren x lɛamala n Babil, [maca] Daniyal [iqqim] ɣar řeqṣar n ujeǧid.
DAN 3:1 Ajeǧid Nabuxadnaṣṣar igga ijj n řexyař n wureɣ s yijj n řuɛřa n settin iɣaǧen d yijj n tiru n setta n iɣaǧen. Issbedd i-t di řwaṭa n Dura di lɛamala n Babil.
DAN 3:2 [Xenni] issekk ujeǧid Nabuxadnaṣṣar [ireqqasen] ḥima ad ssmunen ijeǧiden i iǧan sadu ujeǧid d imḍebbaren imeqqranen d lwulat, řquḍat imezwura [n tgeldit] d yinni x txubay d imesnawen n izerfan d imweḍḍfen n tudrin n ccreɛ d marra inni ɣar teǧa ṣṣulṭa di lɛamalat maḥend ad dd-asen ɣar udeccen n řexyař nni issbedd ujeǧid.
DAN 3:3 Xenni munen ijeǧiden nni iǧan sadu i ujeǧid d imḍebbaren imeqqranen d lwulat d řquḍat imezwura [n tgeldit] d yinni x txubay d imesnawen n izerfan d imweḍḍfen n tudrin n ccreɛ d marra inni ɣar teǧa ṣṣulṭa di lɛamalat i udeccen n řexyař nni issbedd ujeǧid Nabuxadnaṣṣar, u nitni bedden zzat i řexyař nni issbedd Nabuxadnaṣṣar.
DAN 3:4 Iřaɣa ijj n umbarreḥ s jjehd ... “[A] řegnus d ccuɛub d iřsawen, i kenniw i ɣa iřin awařen-a i ɣa iniɣ.
DAN 3:5 Di tsaɛɛet i di i ɣa tesřem řḥess n řbuq d tzammart d lɛud d lgambri d lharpa d temja d marra markat n ǧɣa, ittxeṣṣa ad tewḍam ad tsejdem i řexyař n wureɣ i issbedd ujeǧid Nabuxadnaṣṣar.
DAN 3:6 Wenni war iwḍin u war isjed ad ittwammenḍar di řwesṭ n tefqunt n tmessi itteḥduduqen di tsaɛɛet nni.”
DAN 3:7 S uyenni, di tsaɛɛet i di sřen marra řegnus i řḥess n řbuq d tzamart d lɛud d lgambri d lharpa d marra markat n dduzan n ǧɣa, wḍan marra řegnus d ccuɛub d iřsawen [ɣar temmurt] u sejden i řexyař n wureɣ nni issbedd ujeǧid Nabuxadnaṣṣar.
DAN 3:8 Di řweqt nni d icten qarrben-dd [ca n] Ikaldaniyyen di ssibbet-a, cetcan zeg Wudayen s bṭayṭay.
DAN 3:9 Nitni ṭṭfen deg wawař, nnan i ujeǧid Nabuxadnaṣṣar: “[A] ajeǧid, ddar i řebda!
DAN 3:10 Cek, [a] ajeǧid, tumured belli marra iwdan nni isřin i řḥess n řbuq d tzamart d lɛud d lgambri d lharpa d temja d marra markat n dduzan n ǧɣa, ad wḍan ad sejden i řexyař n wureɣ.
DAN 3:11 Wenni war iwḍin u isjed, ad immenḍar di řwesṭ n tefqunt n tmessi itteḥduduqen.
DAN 3:12 Aqa din iryazen Udayen, inni teggid x uḍebbar n lɛamala n Babil, aqa aten d Cadrax, Micax d Ɛabd-Naɣu. Iryazen-a war wcin taynit i [řumur] nnec, [a] ajeǧid. Arebbiten nnec war ten ttweqqaren u řexyař nnec war d as sejden.”
DAN 3:13 Xenni inna Nabuxadnaṣṣar deg uxeyyeq d tefqeḥt [nnes] aqa ad nedhen Cadrax, Micax d Ɛabd-Naɣu zzates. Xenni nedhen iryazen nni zzat i ujeǧid.
DAN 3:14 Nabuxadnaṣṣar iṭṭef deg wawař, inna asen: “Cadrax, Micax d Ɛabd-Naɣu ma s neɛmada zeɛma war tᵉttweqqarem irebbiten inu u war tsejjadem i řexyař i ssbeddeɣ?
DAN 3:15 Xenni řexxu, mařa kenniw, di tsaɛɛet i di i ɣa tesřem i řḥess n řbuq d tzamart d lɛud d lgambri d lharpa d temja d marra markat n dduzan n ǧɣa, twejdem maḥend ad tewḍam u ad tsejdem i řexyař i ssbeddeɣ necc, aqa mliḥ. Maca mařa war tsejdem, ad tᵉttwammenḍarem di tefqunt n tmessi itteḥduduqen di tsaɛɛet nni. U man arebbi i kenniw i ɣa ifekken zeg ifassen inu?
DAN 3:16 Arrin-dd Cadrax d Micax d Ɛabd-Naɣu, nnan i ujeǧid Nabuxadnaṣṣar: “War neḥdaj ad xak dd-narr di tmesřact-a.
DAN 3:17 Mařa xenni Arebbi nneɣ nni nsexxar, ɣares tizemmar ḥima ad aneɣ ifekk zi tefqunt n tmessi itteḥduduqen, [xenni] ad aneɣ ifekk zeg ufus nnec, [a] ajeǧid!
DAN 3:18 Mařa lla, ad tessned, [a] ajeǧid, aqa neccin war nettweqqar irebbiten nnec d řexyař i tessbedded cek, war d as nsejjed ca.”
DAN 3:19 Xenni isɛar ujeǧiḍ u tbeddeř ṣṣifet n wudem nnes zzat i Cadrax, Micax d Ɛabd-Naɣu. Netta iṭṭef deg wawař, inna ad arnin di tefqunt sebɛa n tseqqar am mammec numen tt ssareqqen,
DAN 3:20 u netta yumur iryazen inni d iryazen ijehden qaɛ zi řɛeskar nnes, ad carfen Cadrax d Micax d Ɛabd-Naɣu ḥima ad [ten] nḍaren [ammu] di tefqunt n tmessi itteḥduduqen.
DAN 3:21 Xenni ttwacarfen iryazen nni ak-d iseřhamen nsen d ssraweř nsen d tcuccay nsen d warruḍ nsen nneɣni uca nḍaren ten di řwesṭ n tefqunt n tmessi itteḥduduqen.
DAN 3:22 Minzi řumur n ujeǧid tuɣa iqseḥ aṭṭas u tafqunt teḥma ař ṭṭarf, nɣin iḥudaq n tmessi iryazen nni ssgeɛɛden Cadrax d Micax d Ɛabd-Naɣu,
DAN 3:23 uca třata n yeryazen nni, Cadrax, Micax d Ɛabd-Naɣu, wḍan ttwacarfen di řwesṭ n tefqunt n tmessi itteḥduduqen.
DAN 3:24 Xenni innexřeɛ ujeǧid Nabuxadnaṣṣar, ikkar deɣya, iṭṭef deg wawař, inna i imcawaren nnes: “Ma war nenḍar třata n yeryazen ittwacarfen di řwesṭ n tmessi?” Nitni arrin-dd, nnan i ujeǧid: “Nican, [a] ajeǧid”
DAN 3:25 Netta yarra-dd, inna: “Xzar, ttwařiɣ arebɛa n yeryazen gguren di řwest n tmessi u timessi war d asen teggi ca u wenni d wiss arebɛa yarwes deg ijj n mmis n irebbiten!”
DAN 3:26 Xenni iqarreb-dd Nabuxadnaṣṣar ɣar tewwart n tefqunt n tmessi itteḥduduqen, iṭṭef deg wawař, inna: “Kenniw, Cadrax, Micax, Ɛabd-Naɣu, kenniw imsexxaren n Arebbi Amɛuǧi x kuřci, ffɣem-dd u asem-dd da!” Xenni ffɣen-dd, Cadrax d Micax d Ɛabd-Naɣu zi řwesṭ n tmessi itteḥduduqen.
DAN 3:27 Xenni ssmunen ijeǧiden nni iǧan sadu i ujeǧid d imḍebbaren d imcawaren n ujeǧid uca ẓrin aqa iryazen nni war d asen imsar ca s tmessi u acuwwaf n uzeǧif nsen war icmiḍ ca u iseřhamen nsen war ttwařeqfen u war daysen uřa d ict [jjurret n] arriḥet n tmessi.
DAN 3:28 Xenni iṭṭef Nabuxadnaṣṣar deg wawař, inna: “Ad ittwabarek Arebbi n Cadrax, Micax d Ɛabd-Naɣu, wenni dd-issekken lmalak nnes u ifekk inni tuɣa xas ittecřen. Nitni beḍřen řumur n ujeǧid u sellmen arrimat nsen, maɣar war xsen ad weqqaren niɣ ad sejden uřa i yijj n arebbi mɣir i Arebbi nsen.
DAN 3:29 [X uyenni] iffeɣ-dd zzayi řumur maḥend kuř řgens d cceɛb d yiřes nni i ɣa iceqqfen deg Arebbi n Cadrax, Micax d Ɛabd-Naɣu, ad ittwaqess d iwetwiten u taddart nnes ad tedweř d ijj n uzubay, maɣar war din uřa d ijj n arebbi wenni izemmaren ad ifekk ammu.”
DAN 3:30 Xenni yarni asen ujeǧid di ccan i Cadrax, Micax d Ɛabd-Naɣu di lɛamala n Babil.
DAN 3:31 “Ajeǧid Nabuxadnaṣṣer, i marra řegnus d ccuɛub d iřsawen nni izeddɣen di marra tammurt: Ad yiři řehna nwem d ameqqran!
DAN 3:32 Iɛjeb ayi řḥař ḥima ad awem ssecneɣ řeɛřamat d lmuɛjizat nni d ayi igga Arebbi Amɛuǧi x kuřci.
DAN 3:33 Mammec mɣarent řeɛřamat nnes d mammec jehdent lmuɛjizat nnes! Tageldit nnes d ict n tgeldit i řebda d lmulk nnes zi jjiř ař jjiř.”
DAN 4:1 “Necc, Nabuxadnaṣṣar, tuɣa ayi di řaman di taddart inu u s ttisir di řeqṣar inu.
DAN 4:2 [Xenni] ẓriɣ ict n terjit, tessiggʷed ayi. Ssḥeyyaren ayi ixarriṣen nni ɣari di tassut, uřa d iweḥḥan deg uzeǧif inu.
DAN 4:3 S uyenni dd-iffeɣ zzayi řumur ḥima ad awyen zzati marra imiɣisen n Babil, maḥend nitni ad ayi ssargben afessar n terjit.
DAN 4:4 Řexdenni usin-dd tarwa n tseḥḥart d imesnawen n itran d Ikaldaniyyen d igezzanen u necc ɛawdeɣ asen tarjit, maca nitni war zemmaren ad ayi ssargben x ufessar nnes.
DAN 4:5 Ɣar uneggar yusa-dd ɣari Daniyal wenni umi qqaren Balṭacaṣṣar ɣar yisem n arebbi inu, di min di izeddeɣ buḥbeř n irebbiten imqeddasen u i netta umi ḥajiɣ tarjit uca nniɣ:
DAN 4:6 ‘Balṭacaṣṣar, [cek, a] arrays n tarwa n tseḥḥart, aqa ssneɣ belli buḥbeř n irebbiten imqeddasen i dayek izeddɣen, u war xak iwɛar uřa d ijj n ssir. Ini ayi iweḥḥan nni ẓriɣ d ufessar nnes.
DAN 4:7 Iweḥḥan nni ɣari deg uzeǧif inu řami d ayi tuɣa di tassut, aqa d tina: Necc ẓriɣ, u xzar, aqa din ict n tcejjart di řwest n temmurt, tuɣa tuɛřa aṭṭas.
DAN 4:8 Tacejjart temɣar tedweř tejhed u taqiccat nnes tiweḍ ɣar ujenna u tᵉttwaẓarr [tcejjart] deg uneggaru n temmurt marra.
DAN 4:9 Tifray nnes ṣebḥent u řɣiǧet nnes tuɣa-tt d aṭṭas u tuɣa dayes macca i marra. Imuddaren n řexřa ufin tiři sadu nnes u ijḍaḍ n ujenna zedɣen jar řefruɛ nnes u ittwassecc zzayes marra inni ɣarsen [ict n arrimet n] weysum.” ”
DAN 4:10 “Necc ẓriɣ iweḥḥan deg uzeǧif inu řami d ayi tuɣa di tassut, u xzar, ijj n uɛessas, ijj n umqeddas ihwa-dd zeg ujenna.
DAN 4:11 Iřaɣa-dd s jjehd, inna ammu: ‘Zdem tacejjart uca qessem řefruɛ nnes. Kksem zzayes tifray nnes u zeǧɛem řɣiǧet nnes [maḥend] imuddaren ad arewřen zi sadu nnes uřa d ijḍaḍ zi jar řefruɛ nnes,
DAN 4:12 maca ejj jjdeɛ [n tcejjart] s iẓewran nnes ad iqqim di temmurt u [ejj i-t ad iqqim] s ict n tsarrift n wuzzař d nnḥas jar arbiɛ aziza di řexřa, u ejj i-t ad issuff s nnda n ujenna u ad tiři tesɣart nnes ak-d řewḥuc jar cbarq n temmurt.
DAN 4:13 Ejj uř nnes ad ibeddeř maḥend war ittiři ɛad d uř n bnadem u ewc as uř n ijj n lḥayawan. [Ammu] xas i ɣa ɛdunt sebɛa n řmijařat n řweqt.
DAN 4:14 Tamesřact-a [tbedd] x řxaḍar n iɛessasen u tutra-ya aqa tusa-dd zeg imqeddasen, ḥima inni iddaren ad neɛmen aqa Amɛuǧi x kuřci ɣares tizemmar x tgelda n yewdan u ad tt iwc i wi ixs Netta, aqa igga xas uřa d wenni d amuqřiř qaɛ jar iwdan.’
DAN 4:15 Tarjit-a ẓriɣ tt necc, ajeǧid Nabuxadnaṣṣar. Cek, Balṭacaṣṣar, ini ayi afessar nnes, maɣar marra imiɣisen di tgeldit inu war zemmaren ad ayi wcen afessar nnes, maca cek wah [tzemmared], minzi buḥbeř n irebbiten imqeddasen izeddeɣ dayek.”
DAN 4:16 Xenni tuɣa Daniyal, wenni umi qqaren Balṭacaṣṣar, yarjef ict n řweqt uca ixariṣṣen nnes ssḥeyyaren t. Iṭṭef ujeǧid deg wawař uca inna: “Balṭacaṣṣar, ejj tarjit d ufessar nnes war cek ssḥeyyaren!” Yarra-dd Balṭacaṣṣar, inna: “Sidi inu, ejj tarjit ad tiři x yinni cek icarrhen u afessar nnes x yinni iǧan ḍidd nnec!
DAN 4:17 Tacejjart nni teẓrid, tenni idewřen temɣar u tejhed, tenni umi tiweḍ taqiccat nnes ař ajenna u tenni dd-ittbanen zi marra ddunect,
DAN 4:18 - s tefray nnes iṣebḥen d řɣiǧet nnes i tuɣa deg waṭṭas, i dayes ittwafen macca i marra, u swadday nnes zeddɣen marra imuddaren n řexřa, uřa d ijḍaḍ n ujenna zeddɣen jar řefruɛ nnes -
DAN 4:19 aqa d cek, [a] ajeǧid, cek wenni idewřen d ameqqran u tjehded, maɣar řemɣaret nnec temmarni ařami tiweḍ ař ajenna u lmulk nnec ař ṭṭarf n ddunect.
DAN 4:20 U řami iẓra ujeǧid, aqa ijj n uɛessas, ijj n umqeddas, ihwa-dd zeg ujenna, i innan: ‘Zdem tacejjart u ɣeḍřem i-tt, maca ejj jjdeɛ s iẓewran nnes deg ucař ak-d ict n tsarrift n wuzzař d nnḥas jar arbiɛ n řexřa u ejj i-t ad issuff s nnda n ujenna u ad tiři tesɣart nnes jar řewḥuc n řexřa ařami xas ɛdunt sebɛa n řmijařat n řweqt!’,
DAN 4:21 aqa ammu i yeǧa řmeɛna n [marra] man aya, [a] ajeǧid, u man aya d lqarar [i dd-iffɣen] zeg Umɛuǧi x kuřci, [ijj n lqarar] nni dd ɣa yas x sidi inu, ajeǧid.
DAN 4:22 Ad xak aẓẓřen zi řwest n iwdan u tazeddiɣt nnec ad tiři ak-d řmař n řexřa. Am řebhayem ad ak sseccen arbiɛ u nnda n ujenna ad cek issuff. [Ammu] i xak ɣa ɛdunt sebɛa n řmijařat n řweqt ař ɣa tneɛmed aqa Amɛuǧi x kuřci iḥekkem x tgelda n iwdan u ittic i-tt i wi ixs Netta.
DAN 4:23 Aqa nnan aqa ittxeṣṣa ad ittwajj jjdeɛ [n tcejjart] ak-d iẓewran nnes, [ixs ad yini], aqa tagelda nnec ad teqqim xmi ɣa tneɛmed aqa ṣṣulta ɣar ujenna i teǧa.
DAN 4:24 S uyenni, [a] ajeǧid, iři ad yiři ccwar inu i řxaḍar nnec. Arẓ ddnub nnec s tsegda u řmuɛṣiyyet nnec umi teggid s uḥinni i řmusakin. Ad taɣ ad tᵉttwazzuggar ttisir nnec.”
DAN 4:25 Qaɛ man aya iwḍa-dd xenni x ujeǧid Nabuxadnaṣṣar.
DAN 4:26 Awarni řami ɛdun tenɛac n iyuren, řami tuɣa iggur x [tzeqqa] n řeqṣar n Babil,
DAN 4:27 issiweř ujeǧid, inna: “Ma man aya war iǧi d Babil ameqqran nni bniɣ s jjehd n tzemmar inu d taddart i tgelda u i uɛuǧi n lɛaḍama inu!”
DAN 4:28 Ɛad tuɣa wawař-a deg uqemmum n ujeǧid uca teffeɣ-dd ict n tmijja zeg ujenna tenna: “[Ammu] i d ac qqaren, [a] ajeǧid Nabuxadnaṣṣar: Tagelda tᵉttwakkes zzayek!
DAN 4:29 Ad xak aẓẓřen zi řwesṭ n iwdan u tazeddiɣt nnec ad tiři ak-d řmař n řexřa. Am řebhayem ad cek sseccen arbiɛ u ad xak ɛdunt sebɛa n řmijařat n řweqt ař ɣa tneɛmed aqa ṣṣulṭa x tgelda n iwdan ɣar Umɛuǧi x kuřci u Netta iwca i-tt i wi ixs Netta.”
DAN 4:30 Di tsaɛɛet nni iqfeř wawař-a x Nabuxadnaṣṣar, minzi uẓẓřen xas zi řwest n iwdan. Tuɣa ittett arbiɛ am řebhayem u arrimet nnes issuff i-tt nnda n ujenna, ařami idweř ucuwwaf nnes d azirar am wafriwen n igidaren u accaren nnes am yinni n ijḍaḍ.
DAN 4:31 Awarni ɛdun wussan-a, ssgeɛɛdeɣ nnec, Nabuxadnaṣṣar tiṭṭawin inu ɣar ujenna uca idweř-dd ɣari řeɛqeř inu. Necc ṣebḥeɣ Amɛuǧi x kuřci u ssemɣareɣ u ssɛuǧeɣ wenni iddaren i řebda, maɣar ṣṣulṭa nnes d ict n ṣṣulṭa n řebda u Tageldit nnes [teqqim] zi jjiř ař jjiř.
DAN 4:32 Marra imezdaɣ n temmurt ttwaḥesben d walu u Netta igga am mammec ixs s řɛeskar n ujenna u s imezdaɣ n ddunect. War din iǧi uřa d ijj nni izemmaren ad imneɛ afus nnes niɣ ad as yini: Min tᵉttegged?!
DAN 4:33 Di tsaɛɛet nni idweř ayi-dd řeɛqeř. Uřa d aɛuǧi n tgelda inu d lɛaḍama inu d ucewwar inu dewřen-dd xafi. Imcawaren inu d ayt n jjehd inu arzun ɛawed xafi u ttwassmetneɣ di tgelda inu u ɛad immarni ayi deg uɛuǧi inu.
DAN 4:34 Řexxu necc, Nabuxadnaṣṣar, ssɛuǧeɣ u ssemɣareɣ Ajeǧid n ujenna, minzi marra řefɛayeř nnes d tidett u imesraq nnes d tasegda. Netta ɣares ṣṣulṭa maḥend ad isswaḍeɛ inni iddaren di nnfaxet.”
DAN 5:1 Ajeǧid Balcaṣṣar igga ijj n umensi d ameqqran i wařef n ayt n jjehd nnes u netta iswa binu zzat i wařef nni.
DAN 5:2 [Řami] iqqas Balcaṣṣar binu, yumar ad dd-awyen řeqcuɛ n wureɣ d nnuqart nni iksi babas Nabuxadnaṣṣar zi Zzawect Tameqqrant di Urcalim ḥima ad zzaysen isu ujeǧid d ayt n jjehd nnes d temɣarin nnes d tiyya nnes.
DAN 5:3 Xenni iwyen-dd řeqcuɛ n wureɣ nni dd-kksen zi Zzawect Tameqqrant di Urcalim, [zi] Taddart n Arebbi i tuɣa [qbeř] di Urcalim, uca iswa zzaysen ujeǧid d ayt n jjehd nnes d temɣarin nnes d tiyya nnes.
DAN 5:4 Nitni swin binu u ṣebbḥen i irebbiten n wureɣ d nnuqart d nnḥas d wuzzař d weẓru.
DAN 5:5 Di řweqt d ict ḍharen-dd iḍewḍan n ijj n ufus n bnadem nni tuɣa ittarin arendad i řqendiř x jjar n řḥiḍ n řeqṣar igellden, uca iẓra ujeǧid tasɣart n ufus nni tuɣa ittarin.
DAN 5:6 Xenni tbeddeř tinta [n wudem] n ujeǧid uca ixarriṣen nnes ssiggʷden t u tisɣunin n tmeṣṣaḍin nnes dewřent fesyent u ifadden nnes dduqzen ijj [arendad] i wenneɣni.
DAN 5:7 Ajeǧid iřaɣa s jjehd maḥend ad awyen zzates imesnawen n itran d Ikaldaniyyen d igezzanen u ajeǧid iṭṭef deg wawař, inna i imiɣisen n Babil: “Kuř aryaz i izemmaren ad iɣar tira-ya u ad ayi iwc řmeɛna nnes, ad as ssyarḍen [ijj n warruḍ] d adehmani, ak-d ict n tseddect n wureɣ x yiri nnes, u netta ad yiři d řḥakem wiss třata di tgeldit.”
DAN 5:8 Xenni udfen marra imiɣisen n ujeǧid, maca nitni war zemmaren ad ɣaren tira nni u řmeɛna nnes war zemmaren ad t ssargben.
DAN 5:9 Řexdenni innexřeɛ ujeǧid Balcaṣṣar u tissiqt n wudem nnes tbeddeř u ayt n jjehd nnes qqimen ḥeyyaren.
DAN 5:10 Di ssibbet n řhard n ujeǧid d ayt n jjehd nnes, tudef tjeǧidt ɣar taddart n umensi. Tessiweř tjeǧidt, tenna: “[A] ajeǧid, ddar i řebda! Ejj ixarriṣen nnec war cek ssnexřiɛen u ejj tissiqt [n wudem nnec] war tbeddiř.
DAN 5:11 Aqa din ijj n weryaz di tgeldit nnec i di iǧa buḥbeř n irebbiten imqeddasen. Minzi deg wussan n babac ufin dayes tafawt, řefhamet d tiɣit am tiɣit n irebbiten. S uyenni igga i-t ujeǧid Nabuxadnaṣṣar, babac, d arrays x tarwa n tseḥḥart d imesnawen n itran d Ikaldaniyyen d igezzanen, [wah,] babac, [a] ajeǧid,
DAN 5:12 minzi di Daniyal, i umi igga ujeǧid isem n Balṭacaṣṣar, aqa ittwaf dayes ijj n buḥbeř icna aṭṭas d tussna d řefhamet [maḥend] ad ifessar tirja u ad issen min innuffaren u ad ifekk ifeqqusen iwɛaren. Ejj ad řaɣan x Daniyal u netta ad issargeb řmeɛna nnes.”
DAN 5:13 Xenni iwyen-dd Daniyal zzat i ujeǧid. Ajeǧid iṭṭef deg wawař, inna i Daniyal: “Ma cek d Daniyal, ijj zeg ayt n imenfiyyen zi Yahuda nni yiwi ujeǧid, baba, [akides] zi Yahuda?
DAN 5:14 Necc sřiɣ xak, aqa buḥbeř n irebbiten izeddeɣ dayek, u tᵉttwaf dayek tafawt d řefhamet d tiɣit ař ṭṭarf.
DAN 5:15 Aqa nedhen zzati imiɣisen d imesnawen n itran ḥima ad ɣaren tira-ya u ad ssargben řmeɛna nnes, maca nitni war zemmaren ad ayi ssargben x řmeɛna n wawař-a.
DAN 5:16 Necc [maca] sřiɣ xak aqa cek tzemmared ad tfessared [aṭṭas n tmesřayin] u ad tfekked řemɛani iwɛaren. Xenni řexxu, mařa tzemmared ad tɣared tira-ya u ad ayi tessaregbed x řmeɛna nnes, ad cek ssyarḍen arruḍ adehmani, ak-d ict n tseddect n wureɣ x yiri nnec, u ad tiřid d řḥakem wiss třata di tgeldit inu.”
DAN 5:17 Řexdenni yarra-dd Daniyal, inna zzat i ujeǧid: “Tirzifin nnec ad ɣarek qqiment u ccan nnec ewc i-t i wenneɣni. Maca tira i ujeǧid ad tent ɣareɣ u ad t ssargbeɣ x řmeɛna.
DAN 5:18 Xak, [a] ajeǧid, aqa Arebbi, Amɛuǧi x kuřci, iwca i babac Nabuxadnaṣṣar tagelda uřa d řemɣaret d ccan d lɛaḍama.
DAN 5:19 Zi ssibbet n řemɣaret i d as iwca, dewřen marra řegnus d ccuɛub d iřsawen ttarjijen ttqefqifen zzates. Netta tuɣa ineqq wenni yexs, ittejja iddar wenni yexs, issgeɛɛed wenni yexs u issfeṭṭaḥ wenni yexs netta.
DAN 5:20 Maca umi ibda uř nnes ittnurfuɛ u buḥbeř nnes itteqsaḥ ařami tedweř [dayes] nnfaxet, ittwaɣḍeř zi řɛarc nnes u ittwakkes zzayes ccan nnes.
DAN 5:21 Ssuffɣen t-i-dd zi tarwa n bnadem u uř nnes idweř am [wuř] n imuddaren u netta tuɣa izeddeɣ ak-d yeɣyař n řexřa. Wcin as arbiɛ d macca am řebhayem u nnda n ujenna issuffa zzayes arrimet nnes ařami inɛem aqa Arebbi, Amɛuǧi x kuřci, d řḥakem x tgelda n iwdan u iwca i-tt i wenni yexs Netta.
DAN 5:22 U cek, mmis, Balcaṣṣar, waxxa tessned marra man aya, cek war tesswaḍɛed uř nnec.
DAN 5:23 Cek tessgeɛɛded ixef nnec ḍidd i Sidi n ujenna u řeqcuɛ zi Taddart nnes iwyen ten zzatek. U cek d ayt n ṣṣulta nnec d temɣarin nnec d tiyya nnec swin zzaysen, Cek tuɣa tᵉttṣebbaḥed i irebbiten n nnuqart d wureɣ d wuzzař d ukeccuḍ d weẓru, inni war ittwiřin, war ittesřin, war ssinen walu, [maca] Arebbi i ɣar iǧa twarrit n nnefs nnec deg ufus nnes u wenni ɣar iǧa marra ibriden nnec, war t tessɛuǧid ca.
DAN 5:24 Xenni issekk Netta iḍewḍan n ufus nni yurin tira-ya [x řḥiḍ].
DAN 5:25 Man aya d tira i yurin: ‘Mini, mini, tikil, ufarsin’.
DAN 5:26 Wa d řmeɛna n wawař-a. ‘Mini’, [ixs ad yini], Arebbi aqa iḥseb tagelda nnec u iqḍa i-tt.
DAN 5:27 ‘Tikil’, aqa cek tᵉttwawezned x řmizan u ufin cek tefsused.
DAN 5:28 ‘Faris’, tageldit nnec temmsebḍa u temmewc i ayt n Maday d ayt n Lfurs.”
DAN 5:29 Řexdenni yumar Balcaṣṣar ḥima ad ssyarḍen Daniyal arruḍ adehmani, ak-d ict n tsendect n wureɣ x yiri nnes, u ad xas barrḥen belli netta ad yiři d řḥakem wiss třata di tgeldit.
DAN 5:30 Di ǧiřet nni ittwaneɣ Balcaṣṣar, ajeǧid n Ikaldaniyyen.
DAN 6:1 Dariyus, Amaday, iksi tagelda umi tuɣa ɣares ɛřaḥař tnayen u-settin n iseggʷusa.
DAN 6:2 Yarḍa Dariyus ḥima ad yařeqqem mya u-ɛicrin n ijeǧiden sadu [ufus] nnes inni i ɣa iḥekkmen mani ma di kuř tgeldit.
DAN 6:3 [Netta igga] xasen třata n řḥukkam imeqqranen. Tuɣa Daniyal ijjen zzaysen. Tuɣa ittxeṣṣa i ijeǧiden nni iǧan sadu [ufus] n ujeǧid, ad asen ggen řeḥsab, ḥima ajeǧid war t třeqqef txessart.
DAN 6:4 Xenni tuɣa Daniyal iɛeddu řḥukkam imeqqranen nni d ijeǧiden nni iǧan sadu [ufus] n ujeǧid, minzi tuɣa dayes ijj n buḥbeř icna aṭṭas, u ajeǧid tuɣa ittxarreṣ, ḥima ad t yegg x marra tageldit.
DAN 6:5 Xenni arzun řḥukkam imeqqranen d ijeǧiden nni ict n ssibbet maḥend ad ttahmen Daniyal di tmesřact n tgeldit, maca nitni war ufin uřa d ict n ssibbet niɣ řɣecc, maɣar netta tuɣa d amtiqqi u war dayes ittwif řeɛgez niɣ [uřa d ict n jjuret] n tmesřayin tiɛeffanin.
DAN 6:6 Xenni nnan iryazen nni: “War nettif uřa d ict n ssibbet i ttuhmet x Daniyal-a, mɣir mařa nufa i-tt di tmesřact n Ccariɛa n Arebbi nnes.”
DAN 6:7 Řexdenni munen řḥukkam imeqqranen d ijeǧiden nni iǧan sadu [ufus] n ujeǧid, usin-dd hajan i ujeǧid, nnan as: “[A] ajeǧid Dariyus, ddar i řebda!
DAN 6:8 Mcawaren marra řḥukkam imeqqranen n tgeldit: imḍebbaren d ijeǧiden [nni iǧan] sadu i ujeǧid d imcawaren d lwulat, ḥima ajeǧid ad dd-issuffeɣ ijj n řumur d ijj n řeḥkam inehhan marra wenni i ɣa iqeddmen ict n tutra i yijj n arebbi niɣ i yijj n bnadem mɣir i cek, [a] ajeǧid, di řmijař n třatin n wussan, ad ittwammenḍar di tesraft n wayraden.
DAN 6:9 Xenni řexxu, [a] ajeǧid, sekkar řumur u weqqeɛ tira, ḥima war ittwabeṭṭeř [řumur] u war ifenni am mammec kuř řqanun n ayt n Maday d ayt n Lfurs.”
DAN 6:10 S uyenni yura ujeǧid Dariyus tira d řumur nni [s yisem nnes].
DAN 6:11 Umi issen Daniyal aqa tira-ya tᵉttwaweqqeɛ, yudef netta ɣar taddart nnes. Tuɣa tiburjatin n tɣurfet nnes arezment ɣar Urcalim. Netta isjed [din] x ifadden třata n twařawin deg wass, iẓẓuǧ u iqada Arebbi nnes am mammec tuɣa ittegg qbeř.
DAN 6:12 Řexdenni munen yeryazen nni s uhaji uca ufin Daniyal ittẓaǧa u ittzawag i Arebbi nnes.
DAN 6:13 Xenni udfen-dd [ɣares] u ssiwřen zzat [i wudem] n ujeǧid x řumur n ujeǧid: “Ma war tweqqɛed ca ijj n řumur belli kuř ijjen wenni, di řmijař n třatin n wussan, ɣa iqeddmen ict n tutra i yijj n arebbi niɣ i yijj n bnadem mɣir i cek, [a] ajeǧid, ad ittwammenḍar di tesraft n wayraden?” Yarra-dd ujeǧid, inna: “Tamesřact tbedd am yijj n řqanun n ayt n Maday d ayt n Lfurs nni war ifennin.”
DAN 6:14 Xenni arrin-dd, nnan zzat [i wudem n] ujeǧid: “Daniyal, ijjen zeg imenfiyyen zi Yahuda, aqa war cek ittweqqar, [a] ajeǧid, uřa d řumur nni tweqqɛed. Netta ittẓaǧa třata n twařawin deg wass.”
DAN 6:15 Umi isřa ujeǧid awař-a, ixeyyeq aṭṭas x yixef nnes uca igga x wuř nnes maḥend ad ifekk Daniyal. Ař aɣeǧay n tfuct igga tizemmar nnes maḥend ad t issenjem.
DAN 6:16 Xenni munen-dd yeryazen nni s uhaji ɣar ujeǧid, nnan i ujeǧid: “[A] ajeǧid, tessned aqa-t d ijj n řqanun n ayt n Maday d ayt n Lfurs [u] war izemmar ad ittwabeddeř uřa d ijj řumur niɣ d řeḥkam nni dd-iffɣen zeg ujeǧid.”
DAN 6:17 Xenni yumur ujeǧid ad nedhen Daniyal zzates u nḍaren t di tesraft n wayraden. Ajeǧid iṭṭef deg wawař, inna i Daniyal: “Arebbi nnec, wenni i tweqqared řebda, ad cek ifekk!”
DAN 6:18 Iwyen-dd ijj n weẓru uca ssarsen t x uqemmum n tesraft uca icemmeɛ i-t ujeǧid s txadent nnes uřa s txadent n ayt n jjehd nnes, ḥima war ittbeddiř array x Daniyal.
DAN 6:19 Xenni yuyur ujeǧid ɣar řeqṣar nnes. Isseɛdu ǧiřet nni deg uẓummi u war yejji ad as dd-awyen afarrej uca iḍwa zzayes yiḍeṣ.
DAN 6:20 Zic ɣar ṣṣbeḥ ɣar [wenqar] n tfawt, ikkar-dd ujeǧid, ittaẓẓeř ɣar tesraft n wayraden.
DAN 6:21 Umi dd-iqarreb ɣar tesraft, iřaɣa s tmijja tecḍen x Daniyal. Ajeǧid issiweř, inna i Daniyal: “[A] Daniyal, cek d amsexxar n Arebbi iddaren! Ma Arebbi nnec, wenni i tweqqared řebda, ma tuɣa izemmar ad cek ifekk zeg iyraden?”
DAN 6:22 Xenni issiweř Daniyal ak-d ujeǧid “[A] ajeǧid, ddar i řebda!
DAN 6:23 Arebbi inu issekk lmalak nnes u ibelleɛ aqemmum n wayraden. Tuɣa war zemmaren ad ayi iyzmen maɣar yufa ayi d amezdag zzates. Uřa akidek, [a] ajeǧid, war ggiɣ uřa d ict n ljarima!”
DAN 6:24 Xenni ifarḥ ujeǧid aṭṭas, yumur ad dd-awyen Daniyal zi tesraft. Awarni řami t iwyen zi tesraft war dayes ufin uřa d ict n jjriḥect, maɣar netta tuɣa ittceř x Arebbi nnes.
DAN 6:25 Řexdenni yumur ujeǧid ad awyen iryazen nni tuɣa ittahmen Daniyal. Nḍaren ten di tesraft n wayraden, nitni d iḥenjiren nsen d temɣarin nsen. Nitni tuɣa ɛad war iwiḍen ca ɣar tisi n tesraft umi ten ṭṭfen wayraden uca mezzqen marra iɣsan nsen.
DAN 6:26 Xenni yura ujeǧid Dariyus i marra řegnus d ccuɛub d iřsawen: “Ad yiři řehna nwem d ameqqran aṭṭas.
DAN 6:27 Aqa ssuffɣeɣ-dd ijj n řumur ḥima [imezdaɣ] di marra tageldit inu, tenni x ṣellṭeɣ, ad arjijen u ad qefqfen zzat i wudem n Arebbi n Daniyal maɣar Netta d Arebbi iddaren u Netta ad iqqim i řebda qaɛ u Tagelda nnes war zemmaren ad tt ḍarren u ṣṣulṭa nnes ad teqqim ař aneggaru.
DAN 6:28 Netta ifekk u issenjem u ittegg řeɛřamat d lmuɛjizat deg ujenna u x temmurt. D Netta i ifekken u issenjmen Daniyal zeg waccaren n wayraden.”
DAN 6:29 Daniyal wanita tuɣa ifřeḥ umi tuɣa tagelda deg ufus n Dariyus u deg ufus n Kurac, Afarsi.
DAN 7:1 Deg useggʷas amezwaru n Balcaṣṣar, ajeǧid n Babil, iẓra Daniyal ict n tarjit d iweḥḥan deg uzeǧif nnes umi t tuɣa di tassut. Xenni yura tarjit nni uca iḥaja zzayes timesřayin timezwura.
DAN 7:2 Issiweř Daniyal, inna: “Twařiɣ s ǧiřet ijj n řewḥiy, u xzar, aqa din arebɛa n isemmiḍen n ujenna sshewřen řebḥar ameqqran,
DAN 7:3 uca arebɛa n imuddaren imeqqranen, inni war yarewsen ca deg wayawya, geɛɛden-dd zi řebḥar.
DAN 7:4 [Tuɣa] amezwaru am weyrad, ɣares afriwen am ugider. Necc qqimeɣ xezzareɣ ařami ttwaqeřɛen wafriwen nnes. Ittwassgeɛɛed-dd zi temmurt uca ittwassars x iḍaren nnes am yijj n bnadem uca immewc as ijj n wuř n bnadem.
DAN 7:5 U xzar, ijjen nneɣni, wiss tnayen, yarwes di ddub u issgeɛɛed ixef nnes ɣar ijj n uɣezdis u deg uqemmum nnes jar teɣmas nnes aqa din třata n yeɣsan n tɣezdist [zeg idmaren], uca nnan as: ‘Kkar, ecc aṭṭas n weysum!’
DAN 7:6 Awarni as twařiɣ [ɛawed], u xzar, ijj nneɣni am uɣiřas. Ɣares x weɛrur nnes arebɛa n wafriwen n ijj n wejḍiḍ. Amuddar [nni] tuɣa ɣares arebɛa n izeǧifen uca temmewc as ṣṣulṭa.
DAN 7:7 Awarni as twařiɣ [ɛawed] deg iweḥḥan di ǧiřet, u xzar, amuddar wiss arebɛa issaggʷad u issnexřaɛ u ɣares aṭṭas n jjehd. Ɣares tiɣmas n wuzzař, icca, iřbez u min iqqimen iɛfes xas s iḍaren nnes. Tuɣa immsebḍa x imuddaren nneɣni nni tuɣa qbeř nnes u ɣares ɛecra n waccawen.
DAN 7:8 Necc ḥḍiɣ x waccawen, u xzar, ijj n waccaw d ameẓyan igeɛɛed jar asen u ttwaqeřɛen-dd třata n waccawen imezwura uca ttwakksen-dd zeg wemcan nsen. U xzar, deg waccaw nni tuɣa axmi dayes tiṭṭawin n bnadem d yijj n uqemmum iccur s řefḍayeḥ timeqqranin.
DAN 7:9 Necc qqimeɣ ttwařiɣ ařami mmarsen řekrasi igellden uca iqqim Uwessar n wussan. Arruḍ nnes d acemřař am wedfeř u acuwwaf nnes am taḍuft teṣfa. Řkursi igellden nnes d iḥudaq n tmessi d tjarrarin nnes am tmessi itteḥduduqen.
DAN 7:10 Iffeɣ-dd zzayes ijj n iɣzar n tmessi. Ařef [x] řuřuf tuɣa ttsexxaran as u ɛecra n řuřuf [x] ɛecra n řuřuf bedden zzates. Agraw n ccreɛ iṭṭef deg uɣimi uca nnurzmen idlisen.
DAN 7:11 Necc qqimeɣ xezzareɣ zi ssibbet n řḥess n wawařen imeqqranen nni issiweř yicc [nni]. Necc qqimeɣ xezzareɣ ařami ittwaneɣ umuddar u tᵉttwahellek arrimet nnes u ittwasellem i tmessi itteḥduduqen.
DAN 7:12 Uřa d imuddaren inneɣni tᵉttwakkes asen ṣṣulṭa nsen u immewc asen tazzuggart n tudart [nsen] ař ict n tsaɛɛet u ař ijj n řmijař [ittwaggen].
DAN 7:13 Necc qqimeɣ ttwařiɣ di iweḥḥan n ǧiřet, u xzar, yusa-dd ak-d iseynuten Wenni iggin am yijj n Mmis n bnadem, u Netta yuyur ɣar Uwessar n wussan uca ssqarrben t zzates.
DAN 7:14 Temmewc as ṣṣulṭa d ccan d tgelda, u marra řegnus d ccuɛub d iřsawen tuɣa ttsexxaren as. Ṣṣulṭa nnes d ict n ṣṣulṭa i řebda i war ifennin u tagelda nnes war izemmar ad tt ḍarren.
DAN 7:15 Necc, Daniyal, aqa ittwassḥissef buḥbeř inu daxeř di arrimet inu u iweḥḥan deg uzeǧif inu ssenxeřɛent ayi.
DAN 7:16 Necc uyureɣ ɣar yijjen zeg yinni din ibedden u sseqsiɣ t x min ixs ad yini man aya marra u netta issiweř-dd akidi, icarreḥ ayi timesřayin-a.
DAN 7:17 “Imuddaren-a imeqqranen, arebɛa nni, [aqa aten] arebɛa n ijeǧiden nni dd ɣa igeɛɛden zi temmurt.
DAN 7:18 [Awarni aya] imqeddasen n Umɛuǧi x kuřci ad ṭṭfen tagelda u tagelda ad ɣarsen tiři i řebda, [wah,] i řebda n řebdayat.”
DAN 7:19 Xenni xseɣ ad ssneɣ řmeɛna n umuddar wiss arebɛa, wenni tuɣa immsebḍa aṭṭas x marra inneɣni, issaggʷad břa řḥed. Aqa ɣares tiɣmas n wuzzař d waccaren n nnḥas, icca, iřbez u min iqqimen iɛfes xas s iḍaren nnes.
DAN 7:20 [Tuɣa xseɣ ad ssneɣ ɛawed řmeɛna n] waccawen x uzeǧif nnes u x wenneɣni i dd-igeɛɛden i umi dd-wḍan třata zzates, [ixs ad yin] x yicc nni ɣares tiṭṭawin d ijj n uqemmum [iccur s] wawařen imɣaren, d wenni iban-dd d ameqqran x [waccawen] nneɣni,
DAN 7:21 Necc ẓriɣ aqa icc nni ittmenɣa ak-d imqeddasen u iɣelleb xasen,
DAN 7:22 ařami dd-yusa Umɣar n wussan u yuɣa tasɣart i imqeddasen n Umɛuǧi x kuřci uca tusa-dd tsaɛɛet [ittwaggen] uca ṭṭfen imqeddasen tagelda.
DAN 7:23 Netta inna ammu: “Amuddar wiss arebɛa ad yiři d tageldit wiss arebɛa x temmurt nni i ɣa tiři temsebḍa x marra tigeldiwin [nneɣni]. Ad yecc tammurt marra, ad xas iɛfes u ad tt iřbez.
DAN 7:24 U x ɛecra n waccawen, aqa zi tgeldit nni ad kkaren ɛecra n ijeǧiden u awarni asen ad ikkar wenneɣni u wanita ad yiři immsebḍa x imezwura u netta ad ideǧ třata n ijeǧiden.
DAN 7:25 Netta ad ittɛeffar s wawařen nnes x Umɛuǧi n kuřci u ad yareddeǧ imqeddasen n Umɛuǧi x kuřci u ad yarzu maḥend ad ibeddeř zzmanat d Ccariɛa, u nitni ad mmewcen deg ufus nnes i yijj n řmijař n řweqt d řewqat d ijj wezyen n řmijař n řweqt.
DAN 7:26 Xenni ad iṭṭef wegraw n ccreɛ deg uɣimi, uca ad zzayes ttwakksen ṣṣulṭa nnes maḥend ad ittwareddeǧ u ad ittwateḥḥa am ikmeř.
DAN 7:27 Maca tagelda d ṣṣulṭa d řemɣaret n marra tigeldiwin sadu ujenna ad mmewcent i řgens n imqeddasen n Umɛuǧi x kuřci. Tageldit nnes d ict n Tgeldit i řebda u marra tigeldiwin ad t weqqaren u ad as ṭaɛen i Netta.”
DAN 7:28 Wanita d awař aneggaru. [Xafi] necc, necc Daniyal, aqa ixarriṣen inu ssenxeřɛen ayi u tissiqt truḥ zeg wudem inu, maca necc ḥḍiɣ awař nni deg wuř inu. Ař danita i tiweḍ tira s yiřes n Tramit.
DAN 8:1 Deg useggʷas wiss třata n tgelda n ujeǧid Balcaṣṣar, iban-ayi-dd ijj n řewḥiy, i necc Daniyal, awarni i [řewḥiy] amezwaru nni tuɣa i d ayi dd-ibanen.
DAN 8:2 Necc tuɣa ttwařiɣ deg ijj n řewḥiy u ẓriɣ tuɣa ayi di lburj n Cucan [nni iǧan] di lɛamala n Ɛilam. Necc ttwařiɣ di řewḥiy tuɣa ayi ɣar yeɣzar n Ulay.
DAN 8:3 Necc ssgeɛɛdeɣ tiṭṭawin inu, u xzar, ijj n icarri ibedd zzat i iɣzar. Tuɣa ɣares tnayen n waccawen u tnayen nni n waccawen tuɣa aten d iziraren. Tuɣa ijj n yicc [zzaysen] yuɛřa x wenneɣni u wenni yuɛřan igeɛɛed d aneggar.
DAN 8:4 Necc ẓriɣ aqa icarri iccat s waccawen nnes ɣar řɣarb u ɣar ccamal d ljanub. Uřa d ijj n umuddar izemmar ad ibedd zzates u war iǧi wi ɣa inejmen zeg ufus nnes. Netta igga min ixs u issemɣar ixef nnes.
DAN 8:5 Necc qqimeɣ ḥekkareɣ, u xzar, yusa-dd ijj n wemyan zi lɣarb x marra udem n temmurt, war iḥidi tammurt. Amyan-a ɣares ijj n ddeg n yicc jar tiṭṭawin nnes ɣares řqimet.
DAN 8:6 Netta yiweḍ-dd ɣar icarri nni i ɣar iǧa tnayen n waccawen, wenni ẓriɣ ibedd zzat i iɣzar. Iqarreb-dd ɣares s tezřa ak-d řeqsaḥet n jjehd nnes,
DAN 8:7 u ẓriɣ aqa yiweḍ ɣar uɣezdis n icarri u iccat dayes s teyyita qesḥent. Netta imqarqeb ak-d icarri u yarẓa as tnayen n waccawen nnes uca icarri tuɣa war ɣares jjeḥd ɛad maḥend ad iqqim ibedd. Inḍar i-t ɣar temmurt u yarfes i-t u tuɣa war din wi t ɣa ifekken zeg ufus nnes.
DAN 8:8 Amyan issemɣar ixef nnes ař ṭṭarf, [maca] ařami idweř ijhed, yarẓa yicc nni ameqqran uca xeřfen-dd deg wemcan nnes arebɛa n waccawen ittbanen ɣar jjwayeh n arebɛa n iɣezdisen n usemmiḍ n ujenna.
DAN 8:9 Zeg yijj zzaysen iffeɣ-dd ijj n yicc d ameɛnan uca idweř d ameqqran ař ṭṭarf, ɣar ljanub u ɣar ccarq u ɣar [Temmurt n] Telwizt.
DAN 8:10 Idweř imɣar [igeɛɛed] ař řɛeskar n ujenna uca inḍar-dd [ca] zi řɛeskar u zi yetran ɣar temmurt uca yarfes i-ten.
DAN 8:11 [Wah], issemɣar ixef nnes ařami dd-yiweḍ ɣar Řḥakem n řɛeskar. Wanita tᵉttwakkes zzayes [tewhibt] n řebda u immenḍar wemcan n Zzawect nnes Iqeddsen.
DAN 8:12 Ad ittwagg ijj n řɛeskar x tewhibt n řebda zi ssibbet n ijj n uɛeddi uca temmenḍar-dd tidett x temmurt u [marra min] igga, iffeɣ [as-dd].
DAN 8:13 [Awarni uya] sřiɣ i yijj n umqeddas issawař u inna ijj n umqeddas [nneɣni] i wenni tuɣa issawařen: “Ař meřmi ɣa yiři řewḥiy n tewhibt n řebda d nnɛi n řmuɛṣiyyet, aqa ad tᵉttwasellem Zzawect Iqeddsen d řɛeskar maḥend ad ttwarefsen?”
DAN 8:14 U netta inna ayi: “Ař ařfayen d teřt-mya n tmedditin d tuffutin, [xenni] Zzawect Iqeddsen ad tᵉttwassegged.”
DAN 8:15 Uca imsar, řami necc, Daniyal, ẓriɣ řewḥiy nni u arzuɣ ad ssneɣ řmeɛna nnes, xzar, aqa da ibedd zzati am waddud n ijj n Weryaz.
DAN 8:16 Uca sřiɣ tmijja n ijj n Bnadem jar [temmawin n iɣzar n] Ulay, iřaɣa, inna: “Jibril, fessar as řewḥiy!”
DAN 8:17 Uca yusa-dd ɣar uɣezdis inu mani tuɣa ttbeddiɣ u řami dd-yusa, nnxeřɛeɣ u wḍiɣ x uɣembub inu. [Xenni] inna ayi: “[A] mmis n bnadem, ssen aqa řewḥiy [iřeqqef] řweqt n uneggar.”
DAN 8:18 Řami tuɣa akidi issawař, hwiɣ s uɣembub inu ɣar temmurt deg yijj n yiḍeṣ yuǧeɣ. [Xenni] iḥada ayi, issbedd ayi [x iḍaren],
DAN 8:19 inna: “Xzar, ad ac ssecneɣ min ɣa imsaren ɣar uneggar n [řweqt-a] n wesxeḍ, maɣar aneggar ad yiři di řweqt ittwaggen.
DAN 8:20 Icarri nni teẓrid, aqa ɣares tnayen n waccawen. Ina d ijeǧiden n ayt n Maday d ayt n Lfurs.
DAN 8:21 Amyan nni s ucuwwaf, netta d ajeǧid n Yawan, [ixs ad yini n Lyunan] u icc ameqqran [i iǧan] jar tiṭṭawin nnes d ajeǧid amezwaru.
DAN 8:22 Icc nni ittwarẓ, xeřfen t arebɛa [nneɣni] deg wemcan nnes, [man aya ixs ad yini] zi řgens nnes ad kkarent arebɛa n tgeldiwin, [maca] war iǧi s jjhed nnes.
DAN 8:23 Deg uneggar n tgelda nsen, umi kemmřen inni ittɛeddan ař [řqedd] nsen, ad dd-ikkar ijj n ujeǧid s wudem iqseḥ u s řeɛqeř n teḥraymect.
DAN 8:24 Jjehd nnes ad imɣar, maca war iǧi zi jjehd [n yixef] nnes. Netta ad yareddeǧ s utebhet u marra min ɣa yegg ad dayes ifřeḥ. Netta ad yareddeǧ inni ɣar teǧa ṣṣulṭa, uřa d řgens n imqeddasen.
DAN 8:25 S teḥraymect nnes ad as injeḥ řɣecc nni deg ufus nnes u netta ad issemɣar ixef nnes deg wuř nnes u deg ict n tecti ad yareddeǧ aṭṭas u ad iɣewweɣ x Řḥakem n řḥukkam, [maca] břa ma ikka xas ufus ggur ad ittwarẓ.
DAN 8:26 Řewḥiy n tmedditin d teffutin i xef ssawařen, aqa-tt d tidett. U cek, cemmeɛ řewḥiy-a, maɣar aqa netta ad dd-yas [awarni i] waṭṭas n wussan.”
DAN 8:27 Necc, Daniyal, tuɣa ḍeɛfeɣ aṭṭas ca n wussan. [Xenni] kkareɣ-dd u ggiɣ [ɛawed] řxedmet n ujeǧid. Nnxeřɛeɣ aṭṭas zi řewḥiy-a, maca uřa d ijj war yuci.
DAN 9:1 Deg useggʷas amezwaru n Dariyus, mmis n Aḥacwirus, wenni zeg ayt n Maday, wenni idewřen d ajeǧid x tgeldit n Ikaldaniyyen,
DAN 9:2 deg useggʷas amezwaru n tgelda nnes iban-ayi-dd, i necc Daniyal, zeg idlisen, belli řqedd n iseggʷusa i x tuɣa issiweř wawař n SIDI i unabi Irmiya i ukemmeř n [řweqt n] řxirbat n Urcalim, tuɣa-t sebɛin n iseggʷusa.
DAN 9:3 Necc arriɣ aɣembub inu ɣar Sidi AREBBI, ḥima ad xas arzuɣ s tẓaǧit d uzaweg, s uẓummi deg txancet n wecḍan d yiɣɣeḍ.
DAN 9:4 Necc ẓẓuǧeɣ i SIDI, AREBBI inu, u neɛmeɣ [x ddnub nneɣ], nniɣ “A Sidi inu, Cek d Arebbi ameqqran d issiggʷiden, wenni iḥeṭṭan Řɛahd nnes d tmexsiwt nnes icewwaren i yinni t ittexsen u i yinni iḥeṭṭan tiweṣṣa nnes.
DAN 9:5 Neccin nexḍa u negga řmuɛṣiyyet d řɣar u nɣewweɣ am neffeɣ zi tiweṣṣa d lfarayiḍ nnec.
DAN 9:6 War nesři i imsexxaren nnec, inabiyyen, inni tuɣa issawařen deg Yisem nnec i ijeǧiden nneɣ d řḥukkam nneɣ d řejdud nneɣ uřa i marra  řgens n temmurt.
DAN 9:7 Cek, [a] Sidi inu, ɣarek tasegda, maca neccin ɣarneɣ řeḥya deg uɣembub, am [mammec teǧa] ass-a, ɣar iryazen n Yahuda d imezdaɣ n Urcalim d marra Israil, [ɣar] yinni yudsen d yinni iggʷejen di marra timmura mani xasen tuẓẓřed Cek di ssibbet n řeɣdar nsen i zi Cek ɣḍaren.
DAN 9:8 [A] SIDI, dayneɣ řeḥya [deg] uɣembub [nneɣ], aqa-t deg ijeǧiden nneɣ di řḥukkam nneɣ deg ibabaten nneɣ maɣar neccin nexḍa akidek.
DAN 9:9 Ɣar Sidi inu, AREBBI nneɣ, arreḥmet d weɣfar, waxxa neccin nɣewweɣ xas.
DAN 9:10 War nesři i tmijja n SIDI, AREBBI nneɣ, maḥend ad nuyur di lqawanin nnes nni i d aneɣ iwca s ufus n imsexxaren nnes, inabiyyen.
DAN 9:11 Marra Israil tuɣa ittɛedda x Ccariɛa nnec u itteffeɣ [zeg webrid] maḥend war ittesři i tmijja nnec. U [ammu i] xaneɣ tᵉttwazeǧeɛ nneɛřet i ittwaḍemnen s tjaǧit i ittwarin di Ccariɛa n Musa, amsexxar n AREBBI, minzi neccin nexḍa akides.
DAN 9:12 Netta igga awařen nnes ttbeddan, [awařen] nni issiweř akidneɣ u ak-d řquḍat nneɣ nni tuɣa i xaneɣ iḥekkmen, am dayneɣ igga ijj n řɣar d ameqqran i war imsaren ɛemmarṣ sadu ujenna, am mammec i ittwagg i Urcalim.
DAN 9:13 Am mammec tura di Ccariɛa n Musa, ammu yusa-dd xaneɣ marra řɣar nni. U neccin [xenni] war nzaweg ca zzat i wudem n SIDI, AREBBI nneɣ, maḥend ad nḥeyyed x řmuɛṣiyyet nneɣ u maḥend ad narzu ad nefhem tidett nnec.
DAN 9:14 SIDI iḥḍa řɣar uca issars i-t-i-dd xaneɣ, maɣar SIDI, AREBBI nneɣ d amsegged di marra řefɛayeř nnes nni igga umi war nesři ɣar tmijja nnes.
DAN 9:15 U řexxu, [a] SIDI, AREBBI nneɣ, wenni issuffɣen řgens nnec zi temmurt n Miṣra s yijj n ufus ijehden u wenni iggin i yixef nnes ijj n Yisem, am mammec iǧa ař ass-a. Neccin nexḍa u negga řɣar.
DAN 9:16 [A] Sidi inu, zi ssibbet n tsegda nnec, sḥeyyed aɣḍab nnec d wesɛar nnec x tendint nnec Urcalim, [x] wedrar nnec iqeddsen. Maɣar zi ssibbet n ddnub nneɣ d řmuɛṣiyyet n řejdud nneɣ tedweř Urcalim d řgens nnec d řɛar i marra inni d aneɣ dd-innḍen.
DAN 9:17 U řexxu, [a] AREBBI nneɣ, seř ɣar tẓaǧit n umsexxar nnec u ɣar uzaweg nnes, ejj udem nnec ad yegg tafawt di ṭṭweɛ nnec, [a] Sidi inu, x Zzawect nnec Iqeddsen, tenni idewřen d řxarbet.
DAN 9:18 Ewc amezzuɣ nnec, [a] AREBBI, seř. Arzem tiṭṭawin nnec u xzar řxirbat d tendint nni ittwařaɣan s Yisem nnec, minzi neccin war newḍi zzat i wudem nnec maḥend ad nzaweg x usdaheǧi n tsegda nneɣ, maca x usdaheǧi n arraḥmet nnec tameqqrant.
DAN 9:19 [A] Sidi inu, seř! [A] Sidi inu, ɣfar! [A] Sidi inu, ḥḍa uca egg, war tɛeṭṭař ca, di ṭṭweɛ n yixef nnec, [a] AREBBI inu, maɣar tandint nnec d řgens nnec ttwařaɣan s Yisem nnec.”
DAN 9:20 Am tuɣa ssawařeɣ ɛad u ttẓaǧiɣ u neɛɛmeɣ s ddnub inu d ddnub n řgens inu Israil u ttzeǧɛeɣ azaweg inu zzat i wudem n SIDI, AREBBI inu, di ṭṭweɛ n wedrar iqeddsen n AREBBI inu,
DAN 9:21 am tuɣa ssawařeɣ ɛad [ammu], ttẓaǧiɣ, yusa-dd weryaz Jibril nni ẓriɣ deg umezwaru di řewḥiy, iḍwa-dd zeg ujenna ɣari. Iḥada ayi ɣar řweqt n tewhibt n tmeddit.
DAN 9:22 Netta issefhem u issiweř akidi, inna: “Daniyal, necc ffɣeɣ-dd ɣar řweqt-a maḥend ad cek ssargbeɣ x řmeɛna.
DAN 9:23 Ɣar umezwaru n uzaweg nnec iffeɣ-dd yijj n wawař u necc usiɣ-dd ḥima ad ac t nniɣ, maɣar cek d ijj [n weryaz] iɛizzen aṭṭas. Fhem awař-a u arzu řefhamet di řewḥiy-a.
DAN 9:24 Ttwaggent sebɛin n ssimanat x řgens nnec u x tendint nnec iqeddsen, ḥima ad ittwassbedd uɛeddu u ad ittwacemmeɛ ddenb u ad tᵉttwaṣřeḥ i řmuɛṣiyyet u ḥima ad tᵉttwawi tsegda u ḥima ad ittwakemmeř řewḥiy d unabim u ḥima ad ittwadhen min iǧan Iqeddsen qaɛ.
DAN 9:25 Ssen u fhem, aqa zeg wami dd-iffeɣ wawař ḥima ad ɛedřen u ad bnan Urcalim ař amedhun, [min ixs ad yini lmasiḥ], řḥakem, aqa sebɛa n ssimanat, u tnayen u-settin n simanat ad teqqim [tendint] tᵉtwaɛedeř u ad tᵉttwabna [Urcalim] ɛawed ak-d wazzay d wureɣ iqquren, [ɛad di] řeḥṣaret n řewqat [yewɛaren].
DAN 9:26 Awarni tnayen u-settin n ssimanat nni ad ittwakkes umedhun u war ɣares ittiři walu. U tandint d Zzawect Iqeddsen ad ttwareddǧent s yijj n řgens n ijj n řḥakem wenni i dd ɣa yasen u taneggarut nnes ad tiři di sseḥřet uca ad din yiři umenɣi ař aneggar, areddeǧ nni aqa yura ad yiři.
DAN 9:27 Netta ad issedqeř řɛahd i waṭṭas i yijj n řmijař n ict n ssimana u deg wezyen n ssimana ad issbedd taɣarṣt d tewhibt n řɣiǧet u x wafriw n nnɛawat ad dd-yas ijj n umteḥḥay ař ɣa ittwafarreɣ řeḥkam i yurin x wenni ittwateḥḥan.
DAN 10:1 Deg useggʷas wiss třata n Kurac, ajeǧid n Lfurs, ittwassargeb ijj n wawař i Daniyal, wenni umi qqaren Balṭacaṣṣar, u awař nni tuɣa d tidett, [issiweř] x yijj n umenɣi ameqqran. Netta ifhem awař nni u tuɣa dayes řefhamet n řewḥiy.
DAN 10:2 Deg wussan nni tuɣa ayi, Daniyal, ceḍneɣ třata n ssimanat ass awarni umas.
DAN 10:3 Macca i d ayi ittřiqan, war t cciɣ, aysum d binu war dd-usin deg uqemmum inu. War dhineɣ ixef inu ařami ɛdunt třata n ssimanat kemmřent.
DAN 10:4 Deg wass wiss arebɛa u-ɛicrin n uyur amezwaru, tuɣa beddeɣ ɣar tma n iɣzar ameqqran wenni [umi qqaren] Dajla.
DAN 10:5 Necc ssggaɛdeɣ tamuɣři inu uca ẓriɣ, u xzar, tuɣa din ijj n Weryaz yarḍ řeqṭen azdad u ɣar tejɛinna nnes ibyes Netta s wureɣ iɣřan qaɛ zi Ufaz.
DAN 10:6 Arrimet nnes [tuɣa] am [weẓru n] texrisulit u udem nnes [yareqq] am wassamen u tiṭṭawin nnes [tuɣa] am yiṣefḍawen yareqqen u iɣaǧen d iḍaren nnes ttwessgen am nnḥas ittwassuydan u tmijja n wawařen nnes tuɣa-tt am zzhir n ijj n uhimur [ameqqran].
DAN 10:7 Mɣir necc, Daniyal, ẓriɣ řewḥiy, maca iryazen nni ɣari iǧan, war ẓrin ca řewḥiy, maca tewḍa-dd xasen ict n arrehbet d tameqqrant uca arewřen nitni maḥend ad nnuffaren.
DAN 10:8 Necc qqimeɣ weḥḥdi u ẓriɣ řewḥiy-a ameqqran wanita, u war dayi iqqim jjehd [ɛad]. Tissiqt n wudem inu tedweř d řɣecc u war mniɛɣ jjehd [ɛad].
DAN 10:9 Necc sřiɣ zzhir n wawařen nnes u řami sřiɣ zzhir n wawařen nnes, wḍiɣ x uɣembub inu s yijj n yiḍeṣ yuǧeɣ u aɣembub inu tuɣa yarra ɣar temmurt.
DAN 10:10 U xzar, ijj n ufus iḥada ayi u yarra ayi ttenhezzeɣ x ifadden d třeqqa n ifassen inu.
DAN 10:11 Netta inna ayi: “Daniyal, cek d aryaz iɛizzen aṭṭas, ḥḍa awařen nni i d ac ɣa iniɣ u kkar, bedd din, minzi řexxu ttwassekkeɣ-dd necc ɣarek.” Řami akidi issiweř s wawařen-a, kkareɣ-dd necc am ttarjijeɣ.
DAN 10:12 [Xenni] inna ayi: “War tteggʷed ca, [a] Daniyal, minzi zeg wass amezwaru i di tarrid uř nnec ɣar tiɣit u maḥend ad tesswaḍɛed ixef nnec zzat i wudem n AREBBI, aqa ttwasřen wawařen nnec uca usiɣ-dd di ṭṭweɛ n wawařen nnec.
DAN 10:13 Maca řḥakem n tgeldit n Lfurs tuɣa ikkar ḍidd inu waḥd u-ɛicrin n wussan. U xzar, Mixayil, ijjen zeg imezwura n řḥukkam, yusa-dd ḥima ad ayi iwc afus u necc qqimeɣ ttᵉṭṭfeɣ ṣṣulṭa dinni x ijeǧiden n Lfurs.
DAN 10:14 Řexxu usiɣ-dd necc, ḥima ad cek ssfehmeɣ min ɣa imsaren i řgens nnec deg uneggar n wussan, minzi řewḥiy [aqa-t] i wussan [nni].”
DAN 10:15 Řami tuɣa akidi issawař s wawařen-a, uḍareɣ s uɣembub inu ɣar temmurt, sseɣdeɣ.
DAN 10:16 U xzar, ijjen di ṣṣifet n tarwa n bnadem iḥada iyencicen inu. [Xenni] arzmeɣ aqemmum uca ssiwřeɣ, nniɣ i wenni ibedden zzati: “[A] Sidi inu, umi ẓriɣ řewḥiy, iṭṭef ayi am řewjeɛ n tarut, am war mniɛeɣ jjehd [ɛad].
DAN 10:17 Mammec i ɣa izemmar umsexxar n Sidi inu ad akidek issiweř, [a] Sidi? Aqa necc, war dayi iqqim jjehd niɣ twarrit n nnefs [ɛad].
DAN 10:18 [Xenni] iḥada ayi ɛawed. Netta yarwes deg yijj n bnadem u igga dayi jjehd.
DAN 10:19 Netta inna: “War tteggʷed ca, cek, [a] aryaz iɛizzen! Ad ɣarek yiři řehna, egg taryast, [wah,] egg taryast!” Umi Netta akidi issiweř [ammu], idweř-dd ɣari jjehd ɛawed u nniɣ: “Siweř, [a] Sidi inu, Cek teggid dayi jjehd.”
DAN 10:20 [Xenni] inna: “Tessned cek, mayemmi i ɣarek dd-usiɣ? Řexxu ad ɛeqbeɣ ḥima ad menɣeɣ ak-d řḥakem n Lfurs u xmi ɣa ffɣeɣ [i umenɣi], xenni ad dd-yas řḥakem n Lyunan.
DAN 10:21 Maca ad cek ssecneɣ min yurin deg wedlis n tidett, waxxa war din uřa d ijjen i xasen d ibedden akidi, mɣir řḥakem nwem, Mixayil.”
DAN 11:1 “Deg useggʷas amezwaru n Dariyus, Amaday, beddeɣ Necc akides maḥend ad t ssejehdeɣ u ad as ssendeɣ.
DAN 11:2 Řexxu ad ac iniɣ ijj n wawař d tidett! Xzar, ad kkaren ɛad třata n ijeǧiden di Lfurs uca wenni wiss arebɛa ad igg agřa ameqqran i yixef nnes, ktar x marra [inneɣni]. U awarni xmi ɣa iṭṭef tizemmar s wagřa nnes, ad issnekkar marra [midden nnes] ḍidd i tgeldit n Yawan.
DAN 11:3 [Xenni] ad ikkar ijj n ujeǧid ijhed wenni i ɣa iṣellṭen s ṣṣulṭa tameqqrant u netta ad igg min ixs netta.
DAN 11:4 Xmi ɣa ikkar, řexdenni ad tareẓ tgeldit nnes, ad tᵉttwamṣebḍa x arebɛa n tɣemmura n usemmiḍ n ujenna, maca war tᵉttiři [tgeldit] i tarwa nnes u war [ɣares] tᵉttiři ṣṣulṭa am tenni i zi tuɣa ittṣelleḍ netta, maɣar tageldit ad tᵉttwaqřeɛ u [ad tiři] i inneɣni war iǧi i yina.
DAN 11:5 [Xenni] ajeǧid n ljanub ad idweř ijhed, [maca] ijj zi řḥukkam nnes ad idweř ijhed xas u wanita ad iṣelleṭ s ṣṣulṭa tameqqrant x ṣṣulṭa nnes.
DAN 11:6 Awarni řami ɛdun ca n iseggʷusa, nitni ad ggen ijj n řɛahd u yeǧis n ujeǧid n ljanub ad dd-tas ɣar ujeǧid n ccamal maḥend ad tt tseggem, [maca] nettat war tzemmar ad teḥḍa jjehd n uɣiř nnes u netta war izemmar ad iqqim ibedd, u aɣiř nnes am nneɣni. Nettat ad tᵉttwasellem uřa d yinni tt iwyen d wenni i-tt-i-dd yurwen d wenni tt issjehden deg wussan nni.
DAN 11:7 Maca zeg ict n tɣeddut n iẓewran nnes ad ikkar [ijjen] deg wemcan nnes. Netta ad iffeɣ ḍidd i řɛeskar uca ad yadef lburj ijehden n ujeǧid n ccamal u ad daysen igg [min ixs] u ad dd-iban ijhed qaɛ.
DAN 11:8 Arebbiten nsen ak-d řexyařat nsen ifesyen d řeqcuɛ nsen iɣřan i ittwaggen s nnuqart d wureɣ ad ten yawi d tkeccaḍt ɣar Miṣra u [xenni] ad ibeɛɛed ca n iseggʷusa x ujeǧid n ccamal.
DAN 11:9 U netta ad yadef tageldit n ljanub u ad iɛqeb ɣar temmurt nnes.
DAN 11:10 Iḥenjiren nnes ad ḥezzmen i umenɣi u ad ssmunen ijj n ubarru n řɛeskar ameqqran u netta ad dd-yas u ad iɛemmar [tammurt] u ad xas iɛdu. U [awarni řami] dd-iɛqeb, ad ḥezzmen ɛawed i umenɣi [ad yadef] ař lburj nnes ijehden.
DAN 11:11 Uca ad immuzzar ujeǧid n ljanub uca iggur ad iffeɣ akides immneɣ ak-d ujeǧid n ccamal, wenni i ɣa issmunen ijj n ubarru ameqqran [n řɛeskar], [maca] abarru nni ad ittwasellem deg ufus nnes.
DAN 11:12 Mařa immeksi ubarru nni, [xenni] uř nnes ad issgeɛɛed ixef nnes u netta ad isseɣdeř ɛecra n řuřuf, [maca] netta war ittmarni di jjehd.
DAN 11:13 Ajeǧid n ccamal ad dd-idweř u ad issmun ijj n ubarru ameqqran ktar zeg umezwaru. Awarni řmijařat n řweqt d iseggʷusa ad dd-yas s yijj n řɛeskar ameqqran u s waṭṭas n řesnaḥ.
DAN 11:14 Deg wussan nni ad ɣewwɣen aṭṭas x ujeǧid n ljanub u ayt n bu-řexcunet n řgens nnec ad ssgeɛɛden ixef nsen ḥima ad ssqefřen ijj n řewḥiy, maca nitni ad wḍan.
DAN 11:15 [Xenni] ad dd-yas ujeǧid n ccamal, ad issbedd ijj n řḥiḍ i řeḥṣaret u ad iṭṭef ict n tendint ifaryen. Iɣaǧen n ljanub [ijehden] war zemmaren ad qqimen ttqawamen uřa d řgens n yinni zzayes ittwafarzen lla. War din ittiři jjehd ḥima ad qqimen ttbeddan.
DAN 11:16 Wenni dd-yusin ḍidd nnes, ad igg min ixs. Uřa d ijj war izemmar ad ibedd zzat i wudem nnes u netta ad ibedd di Temmurt n Telwizt u areddeǧ ad yiři s ufus nnes.
DAN 11:17 Netta ad yarzu ad issemten tizemmar nnes di marra tageldit nnes u ɣares imtawiyyen iseggden u ad [zzaysen] igg. Netta ad as iwc yeǧis n temɣarin ḥima ad yareddeǧ [tageldit nni], maca nettat war tᵉttbedda u war d as teffiɣ.
DAN 11:18 [Xenni] ad yarr aɣembub nnes ɣar tegzirin uca ad iṭṭef aṭṭas [zzaysent]. [Maca] ijj n ukumandar n řɛeskar ad issbedd řḥegra nnes xas, břa ma izemmar netta ad as ixeǧeṣ řḥegra nnes.
DAN 11:19 Netta ad yarr aɣembub nnes ɣar lburjat n temmurt nnes u [xenni] ad inqarḍ, ad iwḍa u war ittwiffi [ɛad].
DAN 11:20 Ad ikkar [ijjen] deg wemcan nnes wenni i ɣa isseɛdun ijjen x temmurt nni i ɣa issehwan aɛuǧi n tgeldit, [maca] wanita ad ittwarẓ di ca n wussan, war iǧi s imcubbecen uřa s umenɣi.
DAN 11:21 [Xenni] ad dd-ikkar ijj n [bnadem] aḥeggar deg wemcan nnes wenni war d as tticen lɛaḍama igellden. Netta ad dd-yas s řɣefřet u ad iṭṭef tageldit s teḥraymect [nnes].
DAN 11:22 Iɣaǧen [ijehden] nni ifeyyḍen [tammurt], ad ttwamḥan zzat i wudem inu u ad ttwarrẓen uřa d řḥakem n Řɛahd.
DAN 11:23 U zeg wami i ɣa ggen ijj n řɛeqd akides, ad igg s řɣecc. Ad issgeɛɛed u ad idweř izemmar [xasen] s drus n řgens [waha].
DAN 11:24 Ad yadef s řɣefřet di jjwayeh issɣemmayen n lɛamala uca ad igg min war ggin řejdud nnes niɣ řejdud n řejdud nnes: ad yacar u ad ikecceḍ u [marra] agřawen ad ten izeǧeɛ jar asen. Netta ggur ad ixarreṣ deg inwayen ḍidd i lqelɛat, ař ict n řweqt [ittwaggen].
DAN 11:25 S yijj n řɛeskar ameqqran ad yarr jjehd nnes d wuř nnes ḍidd i yijj n ujeǧid n ljanub uca ajeǧid n ljanub ad iffeɣ ɣar umenɣi s yijj n řɛeskar ameqqran ijhed, maca war izemmar ad ibedd, minzi ad xas ggen timeɛmač,
DAN 11:26 d yinni ittetten zi macca n ujeǧid, ad t arẓen u řɛeskar nnes ad ittwamḥa u aṭṭas ad ttwanɣen.
DAN 11:27 Uř n tnayen n ijeǧiden-a ad yiři isseggur ɣar řɣar u x ṭṭabřa d ict ad inin ixarriqen, [maca] man aya war ineffeɛ, maɣar aneggar [ittraja] ɛad ař řweqt ittwaggen.
DAN 11:28 S ubarru n wagřa ad yareggʷeḥ ɣar temmurt nnes u uř nnes ad yiři ḍidd i Řɛahd iqeddsen u netta ad igg [amenni] u [xenni] ad iɛqeb ɣar temmurt nnes.
DAN 11:29 Deg ict n řweqt ittwaggen ad dd-iɛqeb, ad iraḥ ɣar ljanub, maca twařa-ya taneggarut war tᵉttiři am twařa tamezwarut.
DAN 11:30 Maɣar iɣarruba n Kittim ad ɣares dd-asen u netta ad ittwassiggʷed, ad iɛqeb u [xenni] ad isxeḍ x Řɛahd iqeddsen u ad igg [amenni]. Xmi dd ɣa iɛqeb ad immsefhem ak-d yinni dd-iffɣen zi Řɛahd iqeddsen.
DAN 11:31 Ad [qqimen] bedden iɣaǧen [n řɛeskar] i zzayes, inni i ɣa iɣeṣben Zzawect Iqeddsen, lburj, uca ad kksen taɣarṣt n řebda u ad [din] ssbedden nnɛi n uxarreb.
DAN 11:32 Inni daysen nneyyet taɛeffant x Řɛahd, ad ten issuffeɣ [zeg webrid] s teḥraymect, [maca] řgens, aqa inni issnen AREBBI nsen, ggur ad iřin jehden u ad ggen.
DAN 11:33 Ifehhamen n řgens ad ssfetnen aṭṭas, uca aṭṭas ad nnqarḍen s ssif d iḥudaq [n tmessi] d tmeḥbast d ukecceḍ, [aṭṭas n] wussan.
DAN 11:34 Xmi ɣa nqarḍen, ad afen ict n twiza tameẓyant u aṭṭas ad ɣarsen dd-munen s teḥraymect.
DAN 11:35 Ca zeg ifehhamen ad nqarḍen maḥend ad ttwaṣeffan u ad ttwassizedgen u ad ttwaṣeffan ař řweqt n uneggar, maɣar [ad yiři] ař řweqt ittwaggen.
DAN 11:36 Ajeǧid ad igg min ixs netta u ad issgeɛɛed ixef nnes u ad issemɣar ixef nnes sennej x kuř arebbi u netta ad yini řeɛjeb n tmesřayin ḍidd i Arebbi x [marra] irebbiten. Netta ad ifřeḥ ař ɣa ittwakemmeř wesxeḍ marra, maɣar aqa yura uca ad yiři.
DAN 11:37 Netta war ggur ad t cqan irebbiten n řejdud nnes uřa d řeɣrizet n temɣarin. Netta war d as icqi uřa d ijj n arebbi, maca ad issemɣar ixef nnes sennej x marra.
DAN 11:38 Deg wemcan nnes ad iweqqar arebbi n lburjat. Ad iweqqar arebbi nni war ssinen ca řejdud nnes, s wureɣ d nnuqart d yeẓra iɣřan d řeqcuɛ iɣřan.
DAN 11:39 Netta ad igg ḍidd i lqelɛat s arebbi aɣrib. Wenni [t] ɣa iqebřen, ad iksi aṭṭas n ccan u ad iṣelleṭ x waṭṭas u netta ad xasen ibḍa tammurt d řmunet.
DAN 11:40 Di řweqt n uneggaru ad as izdem ujeǧid n ljanub [s waccawen nnes] u ajeǧid n ccamal ad xas idduqqez s ikarruten d imnayen d waṭṭas n iɣarruba u netta ad yadef timmura am řḥemřet uca [xenni] ad [xasen] iɛdu.
DAN 11:41 Netta ad yadef Tammurt n Telwizt u aṭṭas ad nnqarḍen, maca ina ad arewřen zeg ufus nnes: Idum d Mu’ab d umezwar n ayt n Ɛammun.
DAN 11:42 Netta ad isswiẓẓeḍ s ufus nnes ɣar temmura. Uřa d tammurt n Miṣra war tnejjem.
DAN 11:43 Netta ad iṣelleṭ x txubay n wureɣ d nnuqart d marra řeqcuɛ iɣřan n Miṣra. Ayt n Libya d ayt n Kuc ad t ḍfaren deg iṣuraf nnes.
DAN 11:44 [maca] řexburat zi ccarq u zi ccamal ad t ssnexřeɛen. [Xenni] ad iffeɣ s wesɛar ameqqran ḥima ad yareddeǧ aṭṭas u ḥima ad [ten] iteḥḥa.
DAN 11:45 Ad iwwet tixuzan nnes igellden jar řebḥur d wedrar n Telwizt Iqeddsen u netta ad yaweḍ ɣar uneggar nnes u war din ittif ḥed ad t iɛawen.”
DAN 12:1 “Di řweqt nni ad ikkar Mixayil, řḥakem ameqqran. wenni ibedden ak-d řgens nnec. Ad tiři d ict n řweqt n řeḥṣaret am war teǧi zeg wami iǧa ijj n řgens ař řweqt nni. U di řweqt nni ad ittwassenjem řgens nnec, kuř ijjen i ɣa ittwafen aqa urin t deg Wedlis.
DAN 12:2 Aṭṭas zeg yinni iṭṭṣen di tɛejjajt n temmurt ad faqen, ina i Tudart ittduman u inneɣni [ad faqen] i ubehdeř u i yijj n uɛiffi i řebda.
DAN 12:3 Inni ɣar teǧa řefhamet ad arɣen am mammec yareqq ujenna u inni tuɣa ineddhen aṭṭas ɣar tsegda, am yitran, i řebda qaɛ.
DAN 12:4 U cek, Daniyal, snuffar awařen-a u tcemmɛed adlis ař řweqt n uneggar. Aṭṭas ad arzun u tussna ad temɣar.”
DAN 12:5 U necc, Daniyal, ẓriɣ, u xzar, aqa din bedden tnayen nneɣni, ijj ɣar tma-ya n iɣzar u wenneɣni ɣar tma nneɣni n iɣzar.
DAN 12:6 U netta inna i Weryaz i tuɣa yarḍen řeqṭen azdad, wenni [ibedden] sennej i waman n iɣzar: “Mecḥař ɛad iqqimen ař aneggaru n řeɛjayeb-a?”
DAN 12:7 U sřiɣ Aryaz nni tuɣa yarḍen řeqṭen azdad, wenni [ibedden] sennej i waman n iɣzar, u Netta issgeɛɛed afus nnes afusi d ufus nnes azeřmaḍ u ijjuǧ ɣar wenni iddaren i řebda, belli xmi i ɣa ittwaqḍa ufartek n ufus n řgens iqeddsen awarni yijj n řmijař n řweqt d řewqat d wezyen n yijj n řmijař n řweqt, ad yiři uqeṭṭu n marra timesřayin-a.
DAN 12:8 Necc sřiɣ [t], maca war [d as] fhimeɣ u nniɣ: “[A] Sidi inu, min ɣa yiřin d aneggaru n aya?”
DAN 12:9 Netta inna: “Uyur, Daniyal, maɣar awařen-a ad qqimen bellɛen, cemmɛen ař řweqt n uneggar.
DAN 12:10 Aṭṭas i ɣa ittwassizedgen, ad dewřen d icemřařen u ad ttwaṣeffan, maca iɛeffanen ad ggen tuɛeffna u marra iɛeffanen war [d as] fehhmen, maca imiɣisen ad fehmen.
DAN 12:11 Zi řweqt i di tᵉttwakkes tɣarṣt n řebda u immars nnɛi n uxarreb [deg wemcan nnes], [aqa-t] ařef u-mitayn u-tesɛin n wussan.
DAN 12:12 Sseɛd n wenni ittrajan u ad yaweḍ ařef u-teřt-mya u-xemsa u-třatin n wussan.
DAN 12:13 U cek, uyur ař aneggar. Ad tareyyḥed u ad tekkared maḥend [ad teksid] taqedduḥt i d ac [dd-ikkaren] deg uneggar n wussan.”
HOS 1:1 Awař n SIDI i dd-yusin ɣar Ḥuciɛa, mmis n Biri, deg wussan n Ɛuzziya, Yutam, Aḥaz d Ḥizqiya, ijeǧiden n Yahuda, u deg wussan n Yarubɛam, mmis n Yuwac, ajeǧid n Israil.
HOS 1:2 Abeddu n wawař n SIDI s Huciɛa. SIDI inna i Huciɛa: “Ruḥ, awi ict n temɣart n farq-ccɣeř uřa d tarwa n farq-ccɣeř, maɣar s farq-ccɣeř [nnes] tezna temmurt [teffeɣ] zeg awarni i SIDI.”
HOS 1:3 Uca yuyur netta, yiwi Jumar, yeǧis n Diblayim, u nettat teksi s ddeyset, turuw as-dd ijj n mmis.
HOS 1:4 [Xenni] inna as SIDI: “Řaɣa as s yisem n ‘Yazraɛil’, maɣar cwayt n řweqt [waha] u [xenni] Necc ad xeǧṣeɣ idammen n Yazraɛil x taddart n Yahu u Necc ad qḍiɣ x tgelda n taddart n Israil.
HOS 1:5 Deg wass nni ad yiři, aqa Necc ad arẓeɣ řqews n Israil di řewḍa n teɣzurt n Yazraɛil.”
HOS 1:6 Uca teksi nettat ɛawed s ddeyset, turuw-dd yeǧis uca inna as [SIDI]: “Řaɣa as s yisem n Lu-Ruḥama, maɣar war arreḥḥmeɣ ɛad x taddart n Israil, war ttɣimiɣ semmḥeɣ asen.
HOS 1:7 [Maca] ad arreḥmeɣ x taddart n Yahuda u Necc ad ten ssnejmeɣ s [ufus n] SIDI, AREBBI nsen! Necc war ten ssenjmeɣ s řqews niɣ s ssif niɣ s iysan uřa s imnayen.”
HOS 1:8 [Ařami] tekkes uṭṭuḍ i Lu-Ruḥama, teksi [ɛawed] s ddeyset uca turuw-dd ijj n mmis.
HOS 1:9 Uca inna [SIDI]: “Řaɣa as s yisem n Lu-Ɛammi, maɣar kenniw war teǧim ɛad d řgens inu u Necc war ǧiɣ [ɛad da] i kenniw.”
HOS 2:1 “Ad yiři řqedd n ayt n Israil am yejdi n řebḥar i war izemmar ad ittwaɛbar u war izemmar ad ittwaḥseb, uca ad tafed mani d asen nnan: ‘Kenniw war teǧim d řgens inu!’, ad asen ittwanna: ‘Kenniw d iḥenjiren n Arebbi iddaren!’
HOS 2:2 Ayt n Yahuda d ayt n Israil ad ttwassmunen, ad ggen ijj n umɣar i yixef nsen u ad geɛɛden zi [marra] temmurt, maɣar ass n Yazraɛil ad yiři d ijj n wass d ameqqran.
HOS 2:3 Inim i wawmaten nwem: ‘Ɛemmi!’ u i suyᵉtmatwem ‘Ruḥama!’
HOS 2:4 “Dɛam ak-d yemmatwem, dɛam, maɣar nettat war teǧi d tamɣart inu u Necc war ǧiɣ d aryaz nnes. Ejj i-tt ad tekkes farq-ccɣeř nnes zeg uɣembub nnes uřa d zzina zi jar ibbac nnes.
HOS 2:5 Niɣ aqa ad as kkseɣ arruḍ ad tt jjeɣ d taɛaryant¸ ad tt ssarseɣ [diha] am deg wass amezwaru i di dd-texřeq, [wah,] ad tt arreɣ d ict n řexřa, ad tt arreɣ am yict n temmurt yuẓɣen uca ad tt jjeɣ ad temmet s ufadi.
HOS 2:6 Necc war arreḥmeɣ x iḥenjiren nnes, maɣar nitni d iḥenjiren [i dd-ixeřqen] zi farq-ccɣeř.
HOS 2:7 Maɣar yemmatsen aqa tefsed ixef nnes, [wah,] tenni tuɣa s ddeyset zzaysen, tegga řefḍiḥet, maɣar teqqar: ‘Ad ḍfareɣ inni d ayi iɛeccqen, inni d ayi itticen aɣrum inu d waman inu d taḍuft inu d tiffest inu d zzect inu d tsessit inu.’
HOS 2:8 S uya, aqa ad bellɛeɣ abrid nnem s cbarq ak-d isennanen u ad ssbeddeɣ aɣbar nnes, ḥima war tᵉttif [ɛad] imesraq nnes.
HOS 2:9 Nettat ad teḍfar inni tt iɛecqen, maca war xasen tḥarret. Nettat ad xasen tarzu, [maca] war ten tᵉttif. Xenni ad tini: ‘Necc ad ɛeqbeɣ, ad dewřeɣ ɣar weryaz inu amezwaru, maɣar deg wussan nni tuɣa ayi mliḥ x řexxu.’
HOS 2:10 Nettat war teɛqiř, aqa d Necc i tuɣa d as iwcin imendi d binu n jdid d zzect, u aqa d Necc i tuɣa d as iwcin nnuqart s waṭṭas, uca ureɣ [i d asen wciɣ] aqa ggin t ɣar Baɛl.
HOS 2:11 S uya i ɣa ɛeqbeɣ, ad kkseɣ imendi inu di řweqt n ṣṣabet uřa d binu inu n jdid di řweqt nnes ittwaggen u taḍuft inu d tiffest inu i zi teddař tuɛɛaryent nnes ad [tent] qeřɛeɣ [zzayes].
HOS 2:12 [Xenni] řexxu ad ɛarriɣ x řeḥya nnes zzat i tiṭṭawin n yinni tt ittexsen uca uřa d ijjen war izemmar ad tt ifekk zeg ifassen inu.
HOS 2:13 Necc ad ssbeddeɣ marra řefraḥet nnes, uraren nnes, ussan nnes n ubeddi n uyur uřa d ussan nnes n ssebt, [wah,] marra ussan nnes ittwaggen.
HOS 2:14 Ad areddǧeɣ tazayart nnes d [tcejjart n] wartu nnes i zi tenna: ‘Tina d řmunet i d ayi wcin yinni d ayi ittexsen.’ Ad tent arreɣ d ijj n wezɣar u řmař n yeyyar ad zzaysent ccen.
HOS 2:15 Necc ad tt wteɣ x ussan n ‘Ibaɛlen’, [ussan] i di tiwi-dd asen tiwhibin n řebxur u tegga taxrazt nnes d tseddect nnes, u teḍfar inni tt ittexsen, [maca] nettat tᵉttu ayi!”, [ammu i] iqqar SIDI.
HOS 2:16 “S uya, xzar, Necc ad tt ɣarreɣ, ad tt nedheɣ ɣar řexřa, u [din] ad ssiwřeɣ ak-d wuř nnes.
HOS 2:17 Ssenni ad as wceɣ imarjaɛen nnes n uḍiř u ad arreɣ taɣzurt n Axur d tawwart n řayas. Nettat ad dinni tɣennej am [tɣennej] deg wussan n temẓi nnes, am x wass umi dd-teffeɣ zi temmurt n Miṣra.
HOS 2:18 Deg wass nni iqqar SIDI, ad ayi třaɣid: ‘Aryaz inu!’, u war d ayi teqqared ɛad: ‘Baɛl inu!’
HOS 2:19 Ad as kkseɣ ismawen n ‘Ibaɛlen’ zeg uqemmum nnes. War ttfekkaren ɛad deg ismawen nsen.
HOS 2:20 Deg wass nni ad ggeɣ ijj n řɛahd di ṭṭweɛ nsen ak-d řewḥuc n řexřa, ak-d ijḍaḍ n ujenna u ak-d imuddaren nni ittbuɛen x wudem n temmurt. Ad kkseɣ řqews d ssif d umenɣi zi temmurt u ad ten ssarreyḥeɣ di řhudnet.
HOS 2:21 Necc ad cem xeḍbeɣ i řebda, [wah,] ad cem xeḍbeɣ s tsegda d řheqq, s tmexsiwt icewwaren d arreḥmet.
HOS 2:22 Necc ad cem xeḍbeɣ s řaman, u cem ad tessned SIDI.
HOS 2:23 Deg wass nni, iqqar SIDI, ad imsar aqa Necc ad sřeɣ ɣar ujenna u ajenna ad iseř ɣar temmurt
HOS 2:24 u tammurt ad tseř ɣar imendi uřa ɣar binu n jdid d zzect, u ina ad sřen ɣar Yazraɛil.
HOS 2:25 Necc ad tt zarɛeɣ i Necc di temmurt u Necc ad arreḥmeɣ x Lu-Ruḥama, u ad iniɣ i Lu-Ɛammi: ‘Cem d řgens inu i teǧid!’, u [řgens] ad yini: ‘AREBBI inu!’”
HOS 3:1 SIDI inna ayi: “Ruḥ ict n twařa nneɣni, exs tamɣart nni ittwassɛizzen zeg umeddukkeř [nnes], [maca] tezna, am mammec SIDI ittexs ayt n Israil, [maca] nitni xezzaren ɣar irebbiten nneɣni u ttexsen [ṣṣedqet] n weɣrum s zzbib.”
HOS 3:2 [S uyenni] sɣiɣ tt i necc s xemmesṭac n [uqiyyat n] nnuqart u s ijj n uḥumir ifeyyḍen n imendi.
HOS 3:3 Necc nniɣ as: “Cem ad ɣari teqqimed aṭṭas n wussan. War ttegg ca farq-ccɣeř u war ttiři n ijj n weryaz nneɣni, uca uřa d necc ad ggeɣ amenni akidsem.”
HOS 3:4 Maɣar ayt n Israil ad qqimen aṭṭas n wussan břa ajeǧid, břa řḥakem, břa taɣarṣt, břa amayḍu [iqeddsen], břa apalṭu [n ukehhan] d řexyařat n l’aṣnam.
HOS 3:5 Awarni as ad dd-dewřen ayt n Israil¸ ad arzun x SIDI, AREBBI nsen u x Dawud, ajeǧid nsen. Deg uneggar n wussan ad dd-asen ttarjijin ɣar SIDI d tcuni nnes.
HOS 4:1 “Sřem i wawař n SIDI, ayt n Israil, maɣar SIDI iksi tanfuč ḍidd i imezdaɣ n temmurt, minzi war din yeǧi řaman niɣ tamexsiwt icewwaren uřa d tussna n AREBBI di temmurt.
HOS 4:2 Tikkʷura d ixarriqen d umenɣi d tucceffra d zzina! Aqa aten dduqqzen, asizzeř n idammen awarni i usizzeř n idammen.
HOS 4:3 X uya tceṭṭen tammurt u kuř ijjen i dayes izeddɣen ittaẓeɣ: řewḥuc n yeyyar d yijḍaḍ n ujenna, [wah,] uřa d iseřman di řebḥar ttwakksen.
HOS 4:4 Maca uct x weryaz nni i d ɣa iksin tanfuč u uct x weryaz nni i ɣa icetcan. Řgens nnec axmi yinni ittemcubbcen ak-d ukehhan.
HOS 4:5 S uziř ad tenqarḍed u s ǧiřet ad inqarḍ ɛad anabi akidek, u yemmac ad tt sshellkeɣ.
HOS 4:6 Řgens inu idweř d aynaw, minzi aqa-t břa tussna. Umi cek tenḍared tussna, nḍareɣ cek maḥend war d ayi tsexxared [ɛad] am ukehhan. [Umi] cek tᵉttud Ccariɛa n AREBBI, uřa d Necc ad ttuɣ iḥenjiren nnec.
HOS 4:7 Mammec ma ktaren, arnin di ddnub akidi. Ad arreɣ ccan nsen d řefḍiḥet.
HOS 4:8 Nitni ttᵉtten zi ddnub n řgens inu u s wuř nsen ttarran meẓri i řmuɛṣiyyet nsen.
HOS 4:9 Am mammec [i iǧa] ukehhan, ammu i ɣa yiři uřa d řgens. Necc ad dayes xeřfeɣ ibriden nnes u timegga nnes ad as tent xeǧṣeɣ.
HOS 4:10 Nitni ad ccen, maca war tᵉttjjiwinen ca, nitni ad ssfesden ixef nsen, maca war ttmarenyen, minzi nitni semḥen deg uḥettu n [tsexxart i] SIDI.
HOS 4:11 Farq-ccɣeř d binu u binu n jdid aqa kksen uř [i bnadem].
HOS 4:12 Řgens inu ittseqsa [ṣṣanam nnes] n ukeccuḍ u taɣɣarct nnes ad as tewc řexbar, minzi buḥbeř n farq-ccɣeř iɣarra i-ten ařami ffɣen s farq-ccɣeř nsen zi sadu [aḥeṭṭu n] AREBBI nsen.
HOS 4:13 X tqiccat n idurar ttqeddamen tiɣarṣa u x tewriririn ttawyen tiwhibin n řebxur, sadu řbeǧuḍ d ṣṣefṣaf d tcejjart n yigg, minzi tiři nsen teṣbeḥ. X uya ssefsadent yessitwem ixef nsent u tisřatin nwem ttareẓẓant řemřac s zzina.
HOS 4:14 Maca Necc war ssiwiḍeɣ řḥukm x yessitwem umi ssfesdent ixef nsent uřa x tesřatin nwem umi ttareẓẓant řemřac s zzina. Aqa nitenti ḥuzent ixef nsent ak-d temɣarin n farq-ccɣeř u ttqeddament tiɣarṣa [jmiɛ] ak-d temɣarin n farq-ccɣeř n zzawect. Ad iwḍa řgens i war ɣar iǧi řeɛqeř.”
HOS 4:15 “Waxxa cek, Israil, tessefseded ixef nnec, war ttarri uřa d Yahuda d bu-umarwas. War dd-ttisim ɣar Jiljal, war ttgeɛɛadem ɣar Bayt-Awan u war ttjaǧam: ‘[S tidett am] iddar SIDI!’
HOS 4:16 Minzi Israil dayes taɣennant am yict n tfunast tɛarren. [Xenni] řexxu, ad ten yarwes SIDI am yijj n yezmar ameẓyan deg iyyar iwesɛen aṭṭas.
HOS 4:17 Ifrayim iqqen ixef nnes ak-d řexyařat n l’aṣnam, ejj i-t, ismeḥ dayes.
HOS 4:18 Tasessit nsen dayes ssem, tteggen farq-ccɣeř awarni i farq-ccɣeř, u imeḥḍayen nsen ttexsen mɣir řefḍiḥet waha.
HOS 4:19 Ict n tḥaryaḍt tessjebd i-tt s wafriwen nnes: aqa nitni ad dewřen ttseḍḥan zi tɣarṣi nsen.”
HOS 5:1 “Sřem aya, [kenniw] ikehhanen, ḥḍam [kenniw ayt n] taddart n Israil u wcem amezzuɣ, kenniw, [aytbab n] taddart n ujeǧid, maɣar tdewřem d ijj n řfex di Miṣfat d ict n tracca yarezmen x [wedrar n] Tabur.
HOS 5:2 Inni i dd-itteffɣen zeg webrid ssiǧɣen tasraft n wenɣay, maca Necc ad ten ɛaqbeɣ marra.
HOS 5:3 Necc ssneɣ Ifrayim u Israil war izemmar ad zzayi innuffar. Maɣar řexxu issefsed Ifrayim ixef nnes, Israil issexmej ixef nnes.
HOS 5:4 Timegga nsen tmennɛent i-ten ad dd-dewřen ɣar AREBBI, maɣar ijj n buḥbeř n farq-ccɣeř aqa-t di řwesṭ nsen uca war ssinen SIDI.
HOS 5:5 Aɛeffar n Israil ad xas idɛa s bṭayṭay. Israil d Ifrayim ad nqarḍen zi řmuɛṣiyyet nsen uřa d Yahuda ad kidsen inqarḍ.
HOS 5:6 Nitni ad aggʷejen ak-d wuǧi nsen d ifunasen d tfunasin nsen, ḥima ad arzun x SIDI, maca nitni war t ttifen. Netta aqa issnuffar ixef nnes xasen.
HOS 5:7 Nitni ɣdaren SIDI maɣar nitni jjin-dd tarwa n farq-ccɣeř. Řexxu ad ten yecc uyur amaynu ak-d tseqqař nsen n řwart.”
HOS 5:8 “Suḍem deg uyicc n icarri di Jibɛa, di řbuq di Rama, ad sɣuyen [imezdaɣ n] Bayt-Awan: ‘Awarni ac, a Binyamin!’
HOS 5:9 Ifrayim ad idweř d [ict n řqecɛet n] unexřiɛ deg wass n lɛiqab. Necc barrḥeɣ jar tqebbař n Israil min ittwagg ad imsar.
HOS 5:10 Řḥukkam n Yahuda tteggen am yinni issmuṭṭuyen iẓra n weymir. Necc ad xasen zeǧɛeɣ aduqqez inu [n ufugem] am waman.”
HOS 5:11 “Ifrayim ittwaḥṣar, řḥeqq ittwařbez, maɣar iɛjeb as maḥend ad iḍfar ict n tewṣeyyet [n řbaṭeř].
HOS 5:12 Necc am tcinda i Ifrayim u am ureṣṣuḍ i taddart n Yahuda.
HOS 5:13 [Umi] iẓra Ifrayim řehřac nnes u Yahuda tareḥsit nnes, yuyur Ifrayim ɣar Accur, issekk [ijj n ureqqas] ɣar ujeǧid Yarib. [Maca] wanita war izemmar ad kenniw issgenfa u war xawem ikessi tareḥsit nwem.
HOS 5:14 Maɣar Necc ad iřiɣ i Ifrayim am weyrad izehharen u am weyrad ameẓyan i taddart n Yahuda. Necc, [wah] Necc, ad mezzqeɣ u [xenni] ad uyureɣ, ad t awyeɣ uca war din wi ɣa ifekken.
HOS 5:15 Necc ad ffɣeɣ u [xenni] ad ɛeqbeɣ ɣar wemcan inu, ař ɣa neɛmen u ad arzun udem inu. Di řeḥṣaret nsen ad xafi arzun zic ɣar ṣṣbeḥ.”
HOS 6:1 “Asem-dd, ad dd-nedweř ɣar SIDI, maɣar Netta iqezzar, [maca] ad aneɣ issgenfa, Netta iwta, [maca] ad aneɣ icfen.
HOS 6:2 Awarni tnayen n wussan ad aneɣ yarr ɣar tudart, deg wass wiss třata ad aneɣ issnekkar u neccin ad neddar zzat i wudem nnes.
HOS 6:3 [Xenni] ad nessen, ad neḍfar maḥend ad nessen SIDI. Aḍhar nnes imten am tuffut n řefjar. Ad ɣarneɣ dd-yas am wenẓar, am wenẓar n arbiɛ nni issarḍaben tammurt.”
HOS 6:4 “Min akidek ɣa ggeɣ, [a] Ifrayim, min akidek ɣa ggeɣ, [a] Yahuda. Tamexsiwt nwem icewwaren tᵉttegg am useynu ɣar teffut u am nnda igeɛɛden uca [xenni] iqeṭṭa.
HOS 6:5 X uya Necc qesseɣ [ten] s [tmijja n] inabiyyen [am] s ijj n uyeřzim. Necc nɣiɣ ten s wawařen n uqemmum inu. Řeḥkamat xak [amecnaw] tfawt innufsřen.
HOS 6:6 Minzi ttexseɣ tamexsiwt icewwaren, war iǧi taɣarṣt, u tussna n SIDI [ttexseɣ tt] x tɣarṣa n wecmaḍ.”
HOS 6:7 “Nitni ɛeddan x Řɛahd am Adam. Dinni i d ayi ɣdaren.
HOS 6:8 Jilɛad d ict n tendint n yinni itteggen řmuɛṣiyyet, teccur s idammen.
HOS 6:9 Am yijj n bandiyya n ixewwanen i ittrajan ca n yijjen, ammu [i teǧa] terfiqt n ikehhanen. Nitni neqqen deg webrid i dd ittawyen ɣar Cakim, maɣar nitni tteggen řefḍayeḥ [waha].
HOS 6:10 Necc ttwařiɣ tamesřact tessnexřaɛ di taddart n Israil, xzar, farq-ccɣeř n Ifrayim, Israil tessexmej ixef nnes.”
HOS 6:11 “[Waxxa amenni], [a] Yahuda, aqa temmars ict n ṣṣabet i cek, xmi dd ɣa ssɛeqbeɣ imeḥbas n řgens inu.”
HOS 7:1 “Am ssgenfiɣ Israil, tᵉttwaɛarr řmuɛṣiyyet n Ifrayim d tuɛeffna n Samarya, maɣar nitni tteggen s řɣecc. Aceffar ittadef u ict n bandiyya tᵉttkeccaḍ di barra.
HOS 7:2 [Maca] war qqaren [ɛemmarṣ] deg wuř nsen, aqa Necc ad xarrṣeɣ di marra řɣar nsen. Xenni řexxu, nnḍent asen tmegga nsen, aqa atent zzat i wudem inu.
HOS 7:3 Nitni ssfraḥen ajeǧid s řɣar nsen u řḥukkam [ssfraḥen ten] s ixarriqen nsen.
HOS 7:4 Nitni marra d imzennayen, aqa aten am yijj n ufarran nni ittwasseḥman zeg uxebbaz. Wanita ad issbedd zeg ucemmuḍ awarni řami ggʷin arecti ař ismem [qaɛ].
HOS 7:5 Deg wass n ujeǧid nneɣ ssheřcen řḥukkam ixef nsen s řḥaduq n binu. Netta isswiẓẓeḍ afus nnes i yimestehzayen.
HOS 7:6 Xmi dd-ttqarraben, [yareqq] uř nsen am yijj n ufarran zi tḥraymect nsen. Itteṭṭeṣ uxebbaz nsen ǧiřet tekmeř. Ɣar ṣṣbeḥ yareqq [ufarran] am tmessi itteḥduduqen.
HOS 7:7 Nitni marra ḥemman am yijj n ufarran u nitni ttᵉtten řquḍat nsen. Marra ijeǧiden nsen ad wḍan, war din uřa d ijj jar asen i dd xafi ɣa iřaɣan.”
HOS 7:8 “Ifrayim ijja ixef nnes issur jar řegnus, Ifrayim d ict n tefḍiřt war tᵉttwassneqřeb ca.
HOS 7:9 Ibarraniyyen sarḍen jjehd nnes, war akides ittici. Uřa d acuwwaf nnes ittcab, war akides ittici.
HOS 7:10 Aɛeffar n Israil ad xas idɛa, [maɣar] nitni war ddikkwiřen ca ɣar SIDI, AREBBI nsen, u war t arzun ca di marra man aya.
HOS 7:11 Ifrayim igga am yict n tedbirt aḥafi, war dayes řefhamet. Nitni ttřaɣan x Miṣra, gguren ɣar Accur.
HOS 7:12 Xmi gguren nitni, ttbezzaɛeɣ Necc tracca inu xasen, ad ten dd-ssehwiɣ am yijḍaḍ n ujenna, ad ten webbxeɣ x řeḥsab n řexbar zi jjhet n tmesmunt nsen.
HOS 7:13 Uct xasen maɣar nitni arewřen zzayi. Akeḥḥeḍ xasen, maɣar nitni ɛeddan xafi. Necc ggiɣ ad ten fdiɣ, maca nitni nnan xafi ixarriqen.
HOS 7:14 Nitni war dd-sɣuyen ca ɣari s wuř nsen, xmi ṭṭṣen nitni x řectu nsen ttcetcan. Nitni ttmunan di ṭṭweɛ n imendi d binu n jdid, aqa ttɣennan xafi.
HOS 7:15 Necc darrbeɣ u ssjehdeɣ iɣaǧen nsen, [maca] nitni ttxarraṣen dayi di řɣar.
HOS 7:16 Nitni ttɛaqqaben, maca war iǧi ɣar Umɛuǧi x kuřci. Aqa aten am yijj n řqews ixeṭṭan, řḥukkam nsen weṭṭan zi ssif, zi semm ineqqen n yiřes nsen. S uyenni ad xasen ggen tiḍeḥḥac di temmurt n Miṣra.”
HOS 8:1 “Ggem icc n icarri [i usuḍi] ɣar uqemmum nnec. Am yijj n ugider [iṭṭaw netta] sennej i Taddart n SIDI, maɣar nitni ɛeddan x Řɛahd inu u ɣewwɣen x Ccariɛa inu.
HOS 8:2 Nitni ad xafi dd-řaɣan: ‘AREBBI inu, neccin, Israil, aqa nessen Cek!’
HOS 8:3 Israil inḍar min iṣebḥen, řeɛdu ad t iḍfar.
HOS 8:4 Nitni ggin [xasen] ijeǧiden, [maca] nitni war ǧin ca zzayi, nitni areccḥen řḥukkam, maca Necc war [tt] ssineɣ. Nitni ggin řexyařat n l’aṣnam i yixef nsen, s uyenni ad ittwaqess [řexyař nni].
HOS 8:5 Aɛejmi nnec d ijj n nnɛi, [a] Samarya! Aɣḍab inu yareqq qibač nsen. Ař meřmi ɣa qqimen nitni war zemmaren ad ksin tazdugi?
HOS 8:6 Maɣar [iffeɣ-dd řexyař n ṣṣanam] zi Israil, aqa ijj n bu-ṣṣenɛet igga i-t u wanita war iǧi d AREBBI. Wah, [ad idweř řexyař] d iwetwiten, aɛejmi n Samarya.
HOS 8:7 Maɣar nitni zarrɛen asemmiḍ u mejjaren taḥaryaḍt. War ttifen [tidrin] ɣar iɣedduyen, u zeg imendi ibedden war zzaysen tteggen ssmid, niɣ ad ittwagg, [maca] ad t ṣarḍen ibarraniyyen.”
HOS 8:8 “Aqa Israil ittwaṣarḍ. Řexxu dewřen am yict n řqecɛet jar řegnus, war dd-tusi x řxaḍar i ḥed.
HOS 8:9 Maɣar nitni geɛɛden ɣar Accur. Ijj n weɣyuř n řexřa ittɣima i yixef nnes waha, [maca inni n] Ifrayim ttxeǧaṣen i imḥibban [nsen].
HOS 8:10 Waxxa nitni zzenzen ixef nsen i řegnus, maca ggur řexxu ad ten yarweɣ. Nitni war zemmaren ad ggen mɣir drus waha zi ssibbet n zzeyyar n ujeǧid n řḥukkam.
HOS 8:11 Maɣar Ifrayim igga iɛalṭaren nnes d aṭṭas, ḥima ad [zzaysen] iddenb. Aqa dewřen d iɛalṭaren n ddenb i netta.
HOS 8:12 Necc uriɣ as aṭṭas n tmesřayin zi Ccariɛa inu, [maca] nitni ḥesben xasent am ca n řḥajjet d taɣribt.
HOS 8:13 Zi tɣarṣa n ṣṣdaqi inu, aqa nitni wehhben zzaysent aysum uca ttᵉtten zzayes, [maca] SIDI war zzaysen yareṭṭi. Řexxu ad ixarreṣ di řmuɛṣiyyet nsen u Netta ad ixeǧeṣ ddnub nsen. Ad dd-dewřen ɣar Miṣra.
HOS 8:14 Maɣar Israil ittu wenni t iggin, ibna tizawiyyin, uca Yahuda ikettar tineddam ifaryen, [maca] Necc ad ssekkeɣ ict n tmessi di tneddam nnes, ad tecc řeqṣur nnes.”
HOS 9:1 “War farreḥ ca ammu, Israil, ařami i ɣa tesřiwřiwed am řegnus. Maɣar tiggʷejed x AREBBI nnec am tessefseded ixef nnec. Tettexsed řmunet n ict n temɣart n farq-ccɣeř di marra inedrar n usarwet n imendi.
HOS 9:2 Andrar d tsirt n uḍiř war d asen sseccen ca u binu n jdid ad tt ixeyyeb.
HOS 9:3 Nitni war ttɣiman ca di temmurt n SIDI. Ifrayim ad dd-idweř ɣar Miṣra u nitni ad ccen min ixemjen di Accur.
HOS 9:4 Nitni war seyyben ca [tiwhibin n] binu i SIDI u tiɣarṣa nsen war xas areṭṭant. Ad asen iřint am weɣrum n yinni iceṭṭnen. Marra inni t iccen, ad dewřen xemjen, maɣar aɣrum nsen [ad yiři] i řeɛmar nsen, war dd-ittis di Taddart n SIDI.
HOS 9:5 Min ɣa teggem [xenni] deg ijj n wass [n řɛid] ittwaggen, deg wass n Řɛid n SIDI?
HOS 9:6 Maɣar, xzar, aqa nitni ttaggʷejen zi ssibbet n ureddeǧ. Miṣra ad ten issmun, Muf ad ten tenḍeř. Irezzazen ad meẓẓren di nnuqart nsen, cbarq ak-d isennanen ad iṭṭef amcan n iqiḍan nsen.
HOS 9:7 Aqa ussan n ujarreb usin-dd, aqa ussan n lɛiqab usin-dd. Nitni ad [tt] ssnen, [inni n] Israil. Anabi [am yijj n] abuhaři [i nitni], aryaz arruḥani [am yijj n] bu-jnun zeg waṭṭas n řmuɛṣiyyet nnec d waṭṭas n řeɛdawet nnec.
HOS 9:8 Aɛessas n Ifrayim [ittɛessas] ak-d [uɛawen n] AREBBI inu, [wah, netta,] anabi [ittaf] ijj n řfex n unegmar di marra ibriden nnes, řeɛdawet di Taddart n AREBBI nnes.
HOS 9:9 [Maɣar] aqa aten ɣarqen ař iři, am deg wussan nni n Jibɛa. Netta ad iɛqeř x řmuɛṣiyyet nsen u ad ixřef ddnub nsen.”
HOS 9:10 “Necc ufiɣ Israil am uḍiř di řexřa, ẓriɣ řejdud nwem am yimenza n wartu di temẓi nsen. Nitni [maca] udfen ɣar Baɛl-Faɣur uca wcin ixef nsen s řefḍiḥet [i netta] uca nitni dewřen d nnɛawat am wenni tuɣa ttexsen.
HOS 9:11 [X yinni n] Ifrayim, aqa aɛuǧi nsen ad iḍu am wejḍiḍ, [ad yaggʷej] x wexřaq u x uɛeddis [n yemmas] u x tkessit n tarwa.
HOS 9:12 Waxxa nitni ssyamen iḥenjiren nsen ař ɣa mɣaren, Necc ad ten arreɣ nhřa iḥenjiren ařami war din iqqim bnadem. Maɣar uřa i nitni [s tidett], uct, xmi xasen ɣa ḥeyydeɣ.
HOS 9:13 Axmi ẓriɣ Ṣur, ammu i ittwaẓẓu Ifrayim deg ict n jjihet arḍan. U řexxu [ittxeṣṣa i] Ifrayim ad isellem tarwa nnes i uqettař.
HOS 9:14 Ewc asen, [a] SIDI! Min i ɣa tewced? Ewc asen ijj n uɛeddis s weṭṭuw n iseyman d yebbac yuẓɣen.
HOS 9:15 Marra taɛeffant nsen [tɛarra] di Jiljal, maɣar dinni carheɣ ten x tɛeffant n tmegga nsen. Necc ad xasen aẓẓřeɣ zi Taddart inu. Ɛemmarṣ ɛad ad ten xseɣ [ɛad], marra řḥukkam nsen d imɣewwɣen.
HOS 9:16 Ifrayim ittwawwet, iẓewran nsen uẓɣen, war ttirwen ɛad. Waxxa nitni ttarwen, Necc ad nɣeɣ imɛizzan n uɛeddis nsen.
HOS 9:17 AREBBI inu ad ten inḍar, maɣar nitni war ɣares ttesřin, u nitni ad dewřen ttᵉtliɛen jar řegnus.”
HOS 10:1 “Israil d ict n tzayart tewseɛ, tenni i dd ittawyen řɣiǧet i yixef nnes. Mammec tuɣa řɣiǧet nnes temmarni, ammu i dd-mmarenyen uřa d iɛalṭaren nnes, mecḥař tecna temmurt nnes, ammu i ggin nitni uřa d imayḍuten [iqeddsen] cnan.
HOS 10:2 Uř nsen aqa ittwabḍa, řexxu aqa daysen řɛib. Netta ad yarẓ iɛalṭaren nsen, Netta ad ihdem imayḍuten nsen [iqeddsen]
HOS 10:3 Maɣar řexxu qqaren: ‘Neccin war ɣarneɣ bu ujeǧid, maɣar neccin war neggʷid ca SIDI, u [ɛad mařa tuɣa din] ajeǧid: ‘Min izemmar ad aneɣ igg?’
HOS 10:4 Ssawařen awařen [ixwan], ttjaǧan ẓur am tteggen ijj n řɛahd, uca řḥukm [idweř] ittgeɛɛed am yijj n řeɛceb amesmum di řexḍuḍ n iyyaren.
HOS 10:5 Imezdaɣ n Samarya ad nnxeřɛen zi ssibbet n uɛejmi n Bayt-Awan, maɣar řgens nnes ad xas icḍen, uca uřa d ikehhanen nnes ad xas ceḍnen, x uɛuǧi nnes, maɣar wanita ittwakkes zzayes.
HOS 10:6 Ad t awyen ɣar Accur d tarzeft i ujeǧid Yarib. Ifrayim ad igg řefḍiḥet i uzeǧif nnes u Israil ad iseḍḥa zi lqarar nnes.
HOS 10:7 Ittwassesqar ujeǧid n Samarya am ukuffu x wudem n waman.
HOS 10:8 Ad ttwahedment řegɛudi n Awan, aqa-tent d ddenb n Israil. Isennanen d tzeggʷart ad uɛřan x iɛalṭaren nsen u nitni ad inin i idurar: ‘Dřem aneɣ!’ u i tewririn: ‘Wḍant-i-dd xaneɣ!’
HOS 10:9 Zeg wussan n Jibɛa teggid ddnub, [a] Israil. Dinni qqimen nitni bedden, [iwa,] war ten iřeqqif řatar n umenɣi ak-d ayt n řmuɛṣiyyet di Jibɛa.
HOS 10:10 Aqa dayi meẓri ḥima ad ten carfeɣ u ad xasen ssmuneɣ řegnus xmi ten ɣa carfeɣ s tnayen n ixeṭṭan nsen.”
HOS 10:11 “Ifrayim d ict n tɛejmit ittwadarrben, tᵉttexs ad tessarwet. Necc ɛduɣ x tcuni n yiri nnes. Necc ad nedheɣ Ifrayim, Yahuda ad icarz, Yaɛqub ad inqec [temmurt] i yixef nnes.
HOS 10:12 Zarɛem tasegda i yixef nwem, mjarem tamexsiwt icewwaren maḥend ad [zzayes] tɛemmarem aqemmum nwem, carzem ijj n yeyyar ixwa i yixef nwem, minzi aqa-t d řḥař maḥend ad tarzum x SIDI, ař dd ɣa yas Netta u ad yarra tasegda ad xawem teccat am wenẓar.”
HOS 10:13 “Aqa kenniw tcarzem min war iḥřin, tṣeyyfem řmuɛṣiyyet, teccim řɣiǧet n uxarriq, maɣar cek tᵉtecřed x webrid [i tixḍared simant] nnec, x ubarru n ayt n bu-teɣruḍt nnec.
HOS 10:14 Ad ikkar ijj n ddriz n umenɣi ḍidd i řgens nnec u marra lqelɛat nnec ad ttwahedment am mammec ihdem Calman Bayt-Arbil deg wass n umenɣi, umi tᵉttwařbez ict n yemmas ak-d iḥenjiren [nnes].
HOS 10:15 Ammu i igga Bayt-Il akidwem zi ssibbet n tuɛeffna nwem yuǧɣen. Ɣar řefjar ad ittwaseɣḍ ujeǧid n Israil s ijj n useɣd qaɛ.”
HOS 11:1 “Ařami tuɣa Israil [ɛad] d aḥenjir, tuɣa ttexseɣ t u Necc řaɣiɣ-dd i mmi zi Miṣra.
HOS 11:2 [Uřa d inabiyyen inu] řaɣan xasen, [maca xenni] aggʷejen nitni [deɣya] x iɣembab nsen maḥend ad awyen tiɣarṣa i ‘Ibaɛlen’ d tewhibin n řebxur i řexyařat nsen ineqcen.
HOS 11:3 D Necc i tuɣa isseřmaden ticři i Ifrayim, [wah,] Netta iksi ten x iɣaǧen nnes, [maca] nitni war ssinen ca aqa Necc d wenni i ten issgenfan.
HOS 11:4 S tesɣunin n bnadem jebdeɣ ten-dd [ɣari], s tmurar n tmexsiwt, u Necc tuɣa i nitni am wenni dd-issgeɛɛaden zzayřet zeg iɣesmiren nsen, u Necc sswiẓẓḍeɣ as [ifassen inu] maḥend ad as wceɣ ad icc.”
HOS 11:5 “Netta war dd-ittarri s uzeǧif ɣar Miṣra. Accur, netta [ad yiři] d ajeǧid nnes, maɣar nitni ugin ad dd-dewřen.
HOS 11:6 Ssif ad inneḍ di tneddam nsen uca ad yareddeǧ iɛumad nnes [n ubelleɛ n tewwura] u ad ten yecc zi ssibbet n ixarriṣen [n yixef] nsen.
HOS 11:7 [Maɣar] řgens inu iqqim ittneqřab xafi. Nitni ttřaɣan jmiɛ ɣar sennej, [maca] Netta war ten issɛuǧi ca.”
HOS 11:8 “Mammec zemmareɣ Necc ad cek sellmeɣ, Ifrayim? [Mammec zemmareɣ Necc] ad cek sellmeɣ, Israil? [Mammec zemmareɣ Necc] ad cek sellmeɣ am Adama, ad cek ggeɣ [d amedya] am Ṣabuyim? Uř inu inneḥweř zzayi, aziǧez inu ittextux jmiɛ.
HOS 11:9 Necc war tejjiɣ ad arxuɣ řḥaduq n weɣḍab inu, Necc war dd-ddikkwiřeɣ ca maḥend ad areddǧeɣ Ifrayim, maɣar Necc d Arebbi u Necc war ǧiɣ d bnadem, Necc d Amqeddas di řwesṭ nnec, war dd-ttiseɣ ca s tmessi [n lɣaḍab inu].
HOS 11:10 Nitni ad gguren awarni i SIDI. Netta ad issmuhrut am yijj n weyrad, maɣar ad issmuhrut Netta uca iḥenjiren ad dd-asen ttarjijin zi tma n řebḥar.
HOS 11:11 Am ijḍaḍ ad dd-asen ttarjijin zi temmurt n Miṣra u am tedbirt zi temmurt n Accur u Necc ad ten sszedeɣ di tudrin nsen, iqqar SIDI.”
HOS 12:1 “Ifrayim ittenneḍ ayi s uxarriq u taddart n Israil s řɣecc, [maca] Yahuda ittetliɛ ɛad ak-d Arebbi u ak-d Umqeddas Ameqqran d amtiqqi.
HOS 12:2 Ifrayim d ijj n umeksaw yuyur awarni i usemmiḍ. Ass marra yarenni ixarriqen d ureddeǧ. Nitni ggin ijj n řɛahd ak-d Accur uca ttawyen zzect ɣar Miṣra.”
HOS 12:3 “SIDI ɣares ijj n umcubbec ak-d Yahuda u Netta ad igg s Yaɛqub ɛlaḥsab ibriden nnes, ad t ixeǧeṣ am mammec timegga nnes.
HOS 12:4 Deg uɛeddis n yemmas iṭṭef umas ɣar unirz u řami tuɣa [d aryaz] ijhed immɛařa ak-d AREBBI.
HOS 12:5 Netta tuɣa immneɣ ak-d lmalak uca iɣřeb. Iru, iḥeccem i-t. Yufa i-t di Bayt-Il u dinni issiweř Netta akidneɣ,
HOS 12:6 [wah,] SIDI, AREBBI n řɛeskarat, SIDI d Isem nnes i řidaret.
HOS 12:7 Dweř ɣar AREBBI nnec, ḥḍa tamexsiwt icewwaren d řḥeqq, u sitim řebda i AREBBI nnec.”
HOS 12:8 “Kenɛan ɣares ijj n řmizan iɣecc deg ufus nnes, itteɛjib as ad ibeɛɛej.
HOS 12:9 [Maca] Ifrayim iqqar: ‘Necc dewřeɣ d bu-wagřa, yarweɣ ict n řeksibet d tameqqrant i yixef inu. [Di] marra řxedmet inu war dayi ttifen ca řmuɛṣiyyet nni [iǧan] d ddenb.’”
HOS 12:10 “Necc d SIDI, AREBBI nnec, zeg [wami teffɣem kenniw zi] temmurt n Miṣra. Necc ad cek jjeɣ ad tzedɣed deg iqiḍan am deg wussan n tmesmunt [di řexřa].
HOS 12:11 Necc ad ssiwřeɣ ɣar inabiyyen u Necc ad arniɣ řewḥiy aṭṭas u s ufus n inabiyyen ad ssiwřeɣ s řemtuř.”
HOS 12:12 “Mařa [tuɣa] Jilɛad d řmuɛṣiyyet, [xenni] dewřen nitni xwan qaɛ di Jilɛad. Aqa qeddmen [din] ifunasen. Uřa d iɛalṭaren nsen dewřen d iɛurricen n iẓra di řexḍuḍ n iyyaren.
HOS 12:13 Yaɛqub yarweř ɣar jjwayeh n Aram u Israil tuɣa ittsexxar x yict n temɣart, u netta yarwes [taḥimart] di ṭṭweɛ n yict n temɣart,
HOS 12:14 [maca] s yijj n unabi issgeɛɛed SIDI Israil zi Miṣra u s yijj n unabi yarwes i-t.
HOS 12:15 Ifrayim tuɣa isɛar i-t aṭṭas. S uya ad yejj [SIDI] idammen nnes ad xas dd-asen u Sidi nnes ad as ixeǧeṣ řḥegra nnes.”
HOS 13:1 “Umi issiweř Ifrayim, [aqa din] tarjijet [s uweqqar]. Netta issgeɛɛed ixef nnes di Israil uca idweř d amednub zi ssibbet [n weɛbed nnes i] Baɛl, uca [xenni] immut.
HOS 13:2 Uca řexxu [ɛawed] arnin tteggen ddnub u ggin s nnuqart nsen ijj n řexyař ifesyen ɛlaḥsab řeɛqeř nsen, aqa-tent d řexyařat n l’aṣnam marra, řxedmet n umziř. Nitni qqaren xasen: ‘Ejj iwdan inni i ɣa iwehhben tiɣarṣa ad ssudumen iɛejmiyyen-a!’
HOS 13:3 S uya ad dewřen am yijj n useynu n ṣṣbeḥ u am nnda ɣar tuffut nni deɣya iɛeddun, am uřum iṭṭawen zeg unedrar u am ddexxan [itteffɣen] zi tburjet.”
HOS 13:4 “Necc d SIDI, AREBBI nnec, zeg [wami dd-teffɣem kenniw zi] temmurt n Miṣra. Cek war tᵉttessned bu arebbi nneɣni mɣir Necc u war din Amsenjem mɣir Necc.
HOS 13:5 Necc ssneɣ cek di řexřa, deg ict n temmurt n řeḥmu yareqqen.
HOS 13:6 Ařami [iwḍen] ɣar ddemnet nsen n tarewsa, dewřen jjiwnen. Ařami jjiwnen, innurfeɛ wuř nsen. X uya ttun ayi.
HOS 13:7 S uyenni Necc dewřeɣ i nitni am weyrad izehharen, am uɣiřas řebteɣ deg webrid.
HOS 13:8 Necc usiɣ-dd ɣarsen am yijj n ddub wenni umi ucaren tarwa nnes u Necc ařẓeɣ idmaren nsen u ṣarḍeɣ ten din am tizemt. Řewḥuc n řexřa mezzqen ten.”
HOS 13:9 “Man aya idweř d akeḥḥeḍ nnec, [a] Israil, aqa [tɛekksed] ayi, ḍidd i Wenni iǧan d amɛawen nnec.
HOS 13:10 Mani [iǧa xenni] ujeǧid nnec, d wenni izemmaren ad cek issenjem di marra tineddam nnec! U [mani ǧan] řquḍat nnec umi tennid: ‘Ewc ayi ijj n ujeǧid uřa d řḥukkam’?
HOS 13:11 S weɣḍab inu wciɣ ac ijj n ujeǧid u s uduqqez inu [n ufugem] kkseɣ ac t.
HOS 13:12 Řmuɛṣiyyet n Ifrayim tᵉttwaqebbeḍ [am deg ict n tqebbiḍṭ], ddnub nnes ttwaḥḍan.
HOS 13:13 Řeḥriq n tarwa ad ɣares dd-yas. Netta d ijj n uḥenjir [iqqim] břa tiɣit, maɣar netta war din ibedd di řweqt nnes [maḥend ad iffeɣ] xmi i ɣa tarzem [řemřawřet] ḥima [ad ffɣen] iḥenjiren.
HOS 13:14 “Zeg ufus n řaxart ad ten fdiɣ, ad ten fekkeɣ zi řmewt. [A] řmewt, mani ǧan [řeḥřacat n] ṭṭaɛun nnem, [a] řaxart, mani [teǧa] turṣuḍi nnem? [Ma] ad nedmeɣ [ɛad]? [Lla,] aya inuffar zzat i tiṭṭawin inu.
HOS 13:15 Waxxa ggur Ifrayim ad iwc řɣiǧet jar aytmas, [ɛad] ad dd-yas ijj n usemmiḍ zi ccarq, ijj n usemmiḍ n SIDI nni i-dd i ɣa ikkaren, - tařa nnes ggur ad taẓeɣ, anu nnes ggur ad iwḍa - ggur ad ikecceḍ usemmiḍ ict n txabect zi mkuř řeqcuɛ iɣřan.”
HOS 14:1 “Samarya ad tᵉṭṭef axeǧeṣ, minzi tɣewweɣ x AREBBI nnes. Ad wḍan s ssif. Iḥenjiren imeẓyanen nsen ad ttwařebzen u timɣarin nsen s ddeyset ad ttwacarrgent.
HOS 14:2 [A] Israil, dweř-dd ɣar SIDI, AREBBI nnec, maɣar tenderfed s řmuɛṣiyyet nnec.
HOS 14:3 Ksim awařen[-a] [n ttubet] akidwem u dewřem-dd ɣar SIDI. Inim as: Ksi [xaneɣ] řmuɛṣiyyet marra u qbeř [zzayneɣ] min icnan, [xenni] ad nawi [s tidett] ifunasen d taḍḥiyet [ɛlaḥsab řwuɛud] n iyencicen nneɣ.
HOS 14:4 Accur war d aneɣ issenjam, war neggur x yeysan u war neqqar i tmegga n ifassen nneɣ: ‘Arebbi nneɣ’, maɣar zzayek i ɣa ittwarḥem uyujiř.’”
HOS 14:5 “Necc ad ten ssgenfiɣ zi tɣennant nsen, ad ten ttexseɣ s řxaḍar, maɣar aɣḍab inu iḥeyyed xas.
HOS 14:6 Necc ad iřiɣ i Israil am nnda. Netta ad inuwwar am tnewwact n tellilict, ad iwwet [Israil] iẓewran nnes am [idurar n] Lubnan.
HOS 14:7 Řefruɛ nnes ad zzuggarten u aweqqar nnes ad yiři am uzemmur u řefwaḥ nnes am [řefwaḥ n tcejjura x idurar] n Lubnan.
HOS 14:8 Nitni ad dd-dewřen, ad qqimen di tiři nnes, ad sseddaren imendi, ad newwaren am tzayart. Řidaret nnes ad tiři axmi binu n Lubnan.
HOS 14:9 [A] Ifrayim ad yini: ‘Min ɣari ɛad ak-d řexyařat n l’aṣnam?’ Necc sřiɣ [as] u ad xas ssijjeɣ. Ad iřiɣ am yict n tcejjart n umerzi aziza, zzayi i tᵉttwaf řɣiǧet nnec.”
HOS 14:10 “Man wen iǧan d amiɣis d afehham di tmesřayin-a, man wen i ɣar teǧa řefhamet u man wen i tent issnen? Wah, ibriden n SIDI nican i yeǧan u imseggaden ad daysen uyuren, maca inni iɛeddan ad daysen nnderfen.”
JOE 1:1 Awař n SIDI i dd-yusin ɣar Yuwil, mmis n Fatu’il.
JOE 1:2 “Sřem aya, [a] iwessura, sḥessem, marra [kenniw] imezdaɣ n temmurt! Ma imsar uya [ɛemmarṣ] deg wussan nwem niɣ deg wussan n řejdud nwem?
JOE 1:3 Ḥajam iḥenjiren nwem x uya u [jjem] iḥenjiren nwem [ad t ḥajan] i iḥenjiren nsen u iḥenjiren nsen i jjiř i dd ɣa yasen.
JOE 1:4 Min ijja bu-weqḍeɛ, tecca i-t tmurɣi, min tejja tmurɣi, icca i-t bu-weřsaḥ, min ijja bu-weřsaḥ, icca i-t bu-uṣard.”
JOE 1:5 “Faqem, [kenniw] iskarjiyyen, trum, sɣuyyem, marra inni isessen binu, zi ssibbet n binu ẓemmen t jdid, maɣar ittwaqḍeɛ zeg uqemmum nwem.
JOE 1:6 Maɣar ijj n řgens igeɛɛed ḍidd i temmurt inu. Ɣares tizemmar u [řqedd nnes] břa řeḥsab. Tiɣmas nnes [am] teɣmas n wayraden u tiɣmas n teɣmart nnes [am] tinni n teyradt.
JOE 1:7 Aqa yarra tzayart inu d [ict n řqecɛet n] unexřiɛ u yarza wartu inu, yarra i-t qaɛ d aqeccar uca inḍar i-t, tiseḍwin nnes dewřent d ticemřařin.
JOE 1:8 Cetcat am yict n teɛzarect tenni ibeysen s ict n txancet [n wecḍan] x weryaz n temẓi nnes.
JOE 1:9 Tᵉttwaqḍeɛ tewhibt [n řɣiǧet] d tewhibt n useyyeb zi Taddart n SIDI. Ikehhanen, imsexxaren n SIDI, ceṭṭen.
JOE 1:10 Aqa ittwareddeǧ yiyyar, tecḍen temmurt, minzi imendi iḍeyyeɛ, yuẓeɣ binu n jdid, tejmed zzect.
JOE 1:11 Seḍḥam, kenniw ifeǧaḥen, sɣuyem, kenniw ayt n tzayart, x yirden d imendi, maɣar ṣṣabet n yiyyar tweddar.
JOE 1:12 Tazayart tuẓeɣ, artu n tazart isřaw, tacejjart n aremman, uřa d tini d tcejjart n tteffaḥt, [wah,] marra ticejjura n yiyyar sřawent, ɛad řefraḥet n tarwa n bnadem truḥ.”
JOE 1:13 “Beysem ixef nwem u wtem agejdur, [kenniw] ikehhanen! Syuyyem [kenniw] imsexxaren n uɛalṭar, asem-dd u tessensem di txuncay [n wecḍan], [kenniw] imsexxaren n AREBBI, maɣar tawhibt [n řɣiǧet] d tewhibt n useyyeb ttwakksent i Taddart n AREBBI nwem.
JOE 1:14 Ɛeřmem i yijj n uẓummi iqeddes, barrḥem s yijj n umuni ifarzen, smunem imɣaren d marra imezdaɣ n temmurt di Taddart n SIDI, AREBBI nwem, u řaɣam ɣar SIDI.”
JOE 1:15 “Wih, ass nni! Minzi yudes-dd wass n SIDI u ad dd-yas [ass nni] am yijj n ureddeǧ n Uzemmar x kuřci.
JOE 1:16 Ma war d aneɣ tᵉttwakkes macca jar tiṭṭawin nneɣ? Uřa d řefraḥet d arcuq zi Taddart n AREBBI nneɣ.
JOE 1:17 Iɛeqqayen n zzariɛet uẓɣen sadu ibursa, ixxamen n řexzen ttwareddǧen, řehrit hedmen, minzi imendi inẓeɣ.
JOE 1:18 Mammec issmuhrut řmar! Tiḥimriwin n ifunasen d tfunasin qqiment ḥayar, maɣar war ɣarsent bu ddemnet n tarewsa! Uřa d tiḥimriwin n wuǧi fnant.”
JOE 1:19 “Ɣarek i ttřaɣiɣ necc, [a] SIDI, minzi timessi tecca ddmani n řexřa u yijj n uceɛɛař aqa issecmeḍ marra ticejjura n yiyyar.”
JOE 1:20 Ura d řmař deg iyyar sekkʷḍen-dd ɣarek, minzi tɣezratin uẓɣent u timessi tecca ddmani n řexřa.”
JOE 2:1 “Suḍem deg uyicc n icarri di Ṣihyun, ṣudem dayes s jjehd x wedrar inu iqeddsen, jjem marra imezdaɣ n temmurt ad arjijen, maɣar yudes wass n SIDI, [wah,] aqa-t yudes.
JOE 2:2 Ijj n wass n taǧest d tubbarcent, ijj n wass n iseynuten u n yijj n useynu ibbumbes. Am tuffut n řḥař igguren x idurar ad dd-yas ijj n řgens d ameqqran u ijhed! Am wanita ɛemmarṣ war iǧi zi mecḥař uya u awarni as war ittiři ɛawed, deg iseggʷusa [awarni as] zi jjiř ař jjiř nneɣni.
JOE 2:3 Zzat i wudem nnes tᵉttett tmessi u awarni as icemmeḍ uceɛɛař. Zzates tammurt tegga am weḥwic n Ɛadn, [maca] awarni as aqa [din] ict n temmurt ittwareddǧen. War izemmar ad zzayes injem.
JOE 2:4 Ccuf nsen am ccuf n yiysan u nitni ttazzřen am yiysan n tazřa.
JOE 2:5 Am uqarqeb n ikarruten n umenɣi x tqiccitin n idurar, [ammu] neggzen nitni, am řḥess n uceɛɛař n tmessi ittetten iɣeǧ, am yijj n řgens ijehden isedden i umenɣi.
JOE 2:6 Zzat i wudem nsen ttarjijen řegnus, marra iɣembab dewřen d icemřařen.”
JOE 2:7 “Nitni ttazzřen am ayt n bu-teɣruḍt, am yiɛeskariyyen ttgeɛɛaden nitni řḥiḍ, kuř ijj iggur abrid nnes u nitni war dd-tteffɣen ca zeg umesruq nsen.
JOE 2:8 Uřa d ijjen war iɛarren wenneɣni, kuř bu-ṭeɣřuḍt [iggur] deg webrid nnes, u waxxa nitni wḍan s lansa, war ttemsbeɛɛiden
JOE 2:9 Nitni weṭṭan x tendint, ttazzřen x řḥiḍ, ttgeɛɛaden ɣar tudrin, ttadfen zi řekwaza am uxewwan.
JOE 2:10 Tᵉttarjiji temmurt zzat i wudem nsen, ijenwan ttenhezzan, tafuct d tziri bbarcnent u itran arrin tafawt nsen.
JOE 2:11 SIDI yarra tmijja nnes ad teffeɣ zzat i řɛeskar nnes, maɣar řɛeskar nnes d ameqqran aṭṭas, maɣar s ṣṣulṭa ittkemmař Netta awař nnes, maɣar ass n SIDI d ameqqran, issaggʷad aṭṭas. Wi izemmaren ad t iksi?”
JOE 2:12 “Uřa řexxu [ɛad] iqqar SIDI, ɛeqbem-dd ɣari s marra uř nwem, s uẓummi u s imeṭṭawen u s tɣuyyit n wecḍan.
JOE 2:13 Carrgem uř nwem, war iǧi arruḍ nwem, u dewřem-dd ɣar SIDI, AREBBI nwem, maɣar Netta d aḥnin d arḥim u ɣares ttasiɛ n řxaḍar d tmexsiwt tameqqrant icewwaren u Netta ineddem x řɣar.
JOE 2:14 Wi issnen aqa Netta ad dd-idweř ad indem u ad yejj ict n lbaraka. awarni as: ict n tewhibt [n řɣiǧet] u ict n tewbibt n useyyeb i SIDI, AREBBI nwem.”
JOE 2:15 “Suḍem deg uyicc n icarri di Ṣihyun, qeddsem ijj n uẓummi, barrḥem s yijj n umuni ifarz.
JOE 2:16 Smunem řgens, qeddsem agraw [n řgens], jarwem imɣaren, smunem iḥenjiren imeẓyanen uřa d iseyman nni ɛad itteṭṭḍen. Ejj muřay ad iffeɣ zeg wexxam nnes n daxeř d tesřit zeg uqiḍun nnes.
JOE 2:17 Jjem ikehhanen, imsexxaren n SIDI, ad run jar wesqif d uɛalṭar u jjem i-ten ad inin: ‘Sɛizz x řgens nnec, [a] SIDI, u war ttejji tasɣart nnec ad zzayes stehezzan u ad tt ggen d ijj n řmatal jar asen, [jar] řegnus. Mayemmi ɣa qqaren jar řegnus: Mani iǧa AREBBI nsen?’”
JOE 2:18 [Xenni] yusem SIDI x temmurt nnes u iḥinn x řgens nnes.
JOE 2:19 SIDI yarra-dd, inna i řgens nnes: “Xzar, Necc ssekkeɣ awem-dd imendi d binu n jdid d zzect, ḥima kenniw ad zzaysen tejjawnem, u Necc war kenniw tticeɣ ɛad i useḥqar jar řegnus.
JOE 2:20 Wenni [dd-yusin] zi ccamal ad t ssiggʷejeɣ xawem u ad t ssuffɣeɣ ɣar ict n temmurt yuẓɣen tᵉttwakeḥḥeḍ. Aɣembub nnes [ad t ssuffɣeɣ] ɣar řebḥar n ccarq u ḍeffar nnes ɣar řebḥar di ccarq. Ad tgeɛɛed arriḥet nnes, [wah,] ad tgeɛɛed arriḥet n terṣuḍi nnes, waxxa netta aqa igga timesřayin timeqqranin.”
JOE 2:21 “War tteggʷed, [a] tammurt, sřiwřew d tfarḥed, maɣar SIDI igga timesřayin timeqqranin.
JOE 2:22 War tteggʷedem ca, [a] řmař n yiyyar, maɣar ddmani n řexřa ad zzeyzun, ticejjura ad wcent řɣiǧet nsent, tazayart d wartu n tazart ad wcen řɣiǧet nsen.
JOE 2:23 Iḥenjiren n Ṣihyun, sřiwřewem u farḥem di SIDI, AREBBI nwem, maɣar Netta ad awem iwc Amseɣɣar n tsegda u Netta ad dd-issehwa anẓar i kenniw, anẓar n řexrif d wenẓar n arbiɛ ɣar umezwaru [n yimir].
JOE 2:24 Inedrar ad ccuren s imendi u tisarfin [n uḍiř] ad ssefyent s binu n jdid d zzect.
JOE 2:25 Necc ad awem xeřfeɣ iseggʷusa i ccint tmurɣi - bu-weřsaḥ d bu-uṣarḍ d bu-weqḍeɛ - řɛeskar inu ameqqran nni ssekkeɣ jar awem.
JOE 2:26 Kenniw ad teccem ař ɣa tfeyyḍem, ař ɣa tejjawnem u kenniw ad tṣebbḥem Isem n SIDI, AREBBI nwem, wenni akidwem iggin řeɛjeb, uca řgens inu ɛemmarṣ ad iseḍḥa ɛad.
JOE 2:27 Kenniw ad tessnem aqa Necc di řwest n Israil i ǧiɣ u d Necc d SIDI, AREBBI nwem, war [din] iǧi ḥed nneɣni u řgens inu war ittseḍḥa ɛemmarṣ i řebda.”
JOE 3:1 “Awarni uya ad imsar, aqa Necc ad zeǧɛeɣ Arruḥ inu x marra bnadem u iḥenjiren nwem d yessitwem ad nebban, iwessura nwem ad urjan tirja u iḥudriyyen nwem ad ẓaren iweḥḥan.
JOE 3:2 Deg wussan nni Necc ad farrɣeɣ Arruḥ inu uřa x isemɣan u x tiyya.
JOE 3:3 Necc ad ggeɣ lmuɛjizat deg ijenwan u x temmurt: idammen d tmessi d iqellijen n ddexxan.
JOE 3:4 Tafuct ad tedweř d taǧest, u taziri [ad tedweř] d idammen qbeř ma i dd ɣa yas wass ameqqran d issiggʷiden n SIDI.
JOE 3:5 Ad imsar aqa kuř ijj wenni i ɣa iřaɣan Isem n SIDI ad injem, maɣar x wedrar n Ṣihyun u di Urcalim ad yiři usenjem am mammec inna SIDI, u ɣar inni yarewřen i xef ɣa iřaɣa SIDI.”
JOE 4:1 “Maɣar, xzar, deg wussan nni u di řweqt nni, xmi ɣa ssenqeřbeɣ tameḥbast n Yahuda d Urcalim,
JOE 4:2 ad ssmuneɣ marra řegnus, ad ten nedheɣ ɣar Teɣzurt n Yahucafaṭ. Dinni ad akidsen mcarraɛeɣ minzi nitni zuzzaren řgens inu d tesɣart inu jar řegnus u [minzi] nitni bḍan tammurt inu.
JOE 4:3 Nitni ggin taqedduḥt x řgens inu u wcin ijj n weḥram [d ttexřiṣet] i temɣart n farq-ccɣeř u ict n teḥramt temmenz i binu, ḥima nitni zemmaren ad swen.
JOE 4:4 U ɛawed, min ɣarwem akidi, Ṣur d Ṣidun d marra jjwayeh n Filicit. Ma texsem ad ayi txeǧṣem min ggiɣ? Mařa texsem ad ayi txeǧṣem, Necc ad ssɛeqbeɣ deɣya u s tazřa min teggim x izeǧifen nwem,
JOE 4:5 minzi kenniw tekksim nnuqart d wureɣ inu u [minzi] kenniw tiwyem řeqcuɛ inu yiɣřan ɣar tzawiyyin nwem.
JOE 4:6 Kenniw tᵉzzenzem iḥenjiren n Yahuda d iḥenjiren n Urcalim i iḥenjiren n Yawan, ḥima ad ten tessiggʷejem x temmurt nsen.
JOE 4:7 Xzar, Necc ad ten ssekkareɣ zeg wemcan mani ten tezzenzem u ad ssɛeqbeɣ min teggim x izeǧifen nwem.
JOE 4:8 Ad zzenzeɣ iḥenjiren nwem d yessitwem deg ufus n iḥenjiren n Yahuda u yina ad ten zzenzen i Isaba’iyyen, ijj n řgens iggʷej aṭṭas, maɣar SIDI aqa issiweř.”
JOE 4:9 “Řaɣam aya jar řegnus, qeddsem amenɣi, sekkarem ayt n bu-teɣruḍt, jjem marra iɛeskariyyen ad dd-qarrben, ad geɛɛden [i umenɣi].
JOE 4:10 Ḥeddem dduzan nwem d řesyuf uřa d řemwas nwem n wezbar [ař ɣa dewřen] d fřitcat, ejj wenni iḍeɛfen ad yini: ‘Necc d bu-teɣruḍt!’
JOE 4:11 Azzřem u tasem-dd, [a] marra řegnus i dd-innḍen. Sneddeh ɣar dinni, [a] SIDI, ayt nnec n bu-teɣruḍt!
JOE 4:12 Jjem řegnus ad kkaren ad geɛɛden ɣar Teɣzurt n Yahucafaṭ. Maɣar dinni ad qqimeɣ Necc ḥima ad carrɛeɣ marra řegnus i-dd-innḍen.
JOE 4:13 Ggem amjar dayes, maɣar ṣṣabet tenngʷa, asem-dd, hwam, minzi tasirt n uḍiř teccur u ṣṣwarej n tsirt feyyḍen, maɣar taɛeffant nsen d tameqqrant.”
JOE 4:14 “Ibarruten, ibarruten di Teɣzurt n Teřwiḥt Itteḥruǧuḍen n Usarwet, maɣar ass n SIDI yudes, di Teɣzurt n Teřwiḥt Itteḥruǧuḍen i Usarwet.
JOE 4:15 Tafuct d tziri bbarcnent, itran arrin tafawt nsen.
JOE 4:16 SIDI ad izehhar zi Ṣihyun u ad yarr tmijja nnes ad ittwaseř zi Urcalim [ařami] ijenwan d temmurt ad arjijen, [maca] SIDI d adurri i řgens nnes d lburj i ayt n Israil.”
JOE 4:17 “Ad tessnem, aqa Necc d SIDI, AREBBI nwem, wenni izeddɣen x Ṣihyun, adrar inu iqeddsen u [tandint n] Urcalim ad tiři tqeddes. Ɛemmarṣ ad tt cuqen [ɛad] ibarraniyyen.”
JOE 4:18 “Deg wass nni ad imsar aqa idurar ad udmen s binu ẓemmen t jdid u tiwririn ad ssefyent s uɣi d marra tiɣezratin n Yahuda ad daysen ttazzřen waman u yict n tařa ad tedduqqez di Taddart n SIDI, ad tfeyyeḍ teɣzurt n Ciṭṭim.
JOE 4:19 Miṣra ad tedweř d ict n temmurt ittwareddǧen u Idum d ict n temmurt ixřan zi ssibbet n lɛunf [i ggin ḍidd i] ayt n Yahuda nni zi ssizzřen nitni idammen imezdagen di temmurt nsen.
JOE 4:20 [Tammurt n] Yahuda [maca] ad teqqim i řebda u Urcalim zi jjiř ař jjiř.
JOE 4:21 Necc ad ḥesbeɣ idammen nsen, inni tyɣa ḥessabeɣ war izdigen, d imezdagen. Uca SIDI ad izdeɣ di Ṣihyun.”
AMO 1:1 Awařen n Ɛamus, wenni tuɣa iǧan jar imeksawen n Taquɛa, [awařen] i iẓra x Israil, deg wussan n Ɛuzziya, ajeǧid n Yahuda, d Yarubɛam, mmis n Yuwac, ajeǧid n Israil, tnayen n iseggʷusa qbeř i wenhezzi n temmurt.
AMO 1:2 Netta inna: “SIDI ad izehhar zi Ṣihyun, ad issgeɛɛed tmijja nnes zi Urcalim. Ddmani n tarewsa ad ceḍnent u taqiccet n Karmil ad tisřaw.”
AMO 1:3 “Ammu i iqqar SIDI: X třata n ixeṭṭan [i igga] Dimacq, [ɛad mahu] x arebɛa, war t ssbeṭṭařeɣ, minzi nitni ssarwaten Jilɛad s teřwiḥin itteḥřuǧuḍen n wuzzař i usarwet.
AMO 1:4 Ad ssekkeɣ timessi di taddart n Ḥazayil, ad tecc řeqṣur n Binhadad.
AMO 1:5 Ad arẓeɣ zzekrun n Dimacq u ad mḥiɣ wenni izeddɣen zi Buqɛa-Awan, [zi řewḍa n wareddeǧ], d wenni zi taddart n meẓri i yarebbun azeǧaḍ, u řgens n Aram ad ittwandeh di tmeḥbast ɣar Qir!, inna SIDI.”
AMO 1:6 “Ammu i inna SIDI: X třata n ixeṭṭan [i igga] Ɣazza, [ɛad mahu] x arebɛa, war t ssbeṭṭařeɣ, minzi nitni iwyen [řgens inu] qaɛ di lmenfa, ḥima ad [t] sellmen i Idum.
AMO 1:7 Ad ssekkeɣ timessi daxeř di řeḥyuḍ n Ɣazza, ad tecc řeqṣur nnes.
AMO 1:8 Necc ad teḥḥiɣ amezduɣ zi Acdud u zi Acqalun wenni yarebbun azeǧaḍ u Necc ad ksiɣ afus inu ḍidd i Ɛaqrun u min iqqimen n ayt n Ifilisṭiniyyen ad ittwahellek, iqqar Sidi inu, SIDI.”
AMO 1:9 “Ammu i inna SIDI: X třata n ixeṭṭan [i igga] Ṣur, [ɛad mahu] x arebɛa, war t ssbeṭṭařeɣ, minzi nitni sellmen [řgens inu] qaɛ di lmenfa i Idum, war idaren řɛahd ak-d wawmaten nsen.
AMO 1:10 S uyenni ad ssekkeɣ timessi daxeř di řeḥyuḍ n Ṣur, ad tecc řeqṣur nnes.”
AMO 1:11 “Ammu i inna SIDI: X třata n ixeṭṭan [i igga] Idum, [ɛad mahu] x arebɛa, war t ssbeṭṭařeɣ, minzi netta iḍfar awmaten nnes s ssif u issɛiǧi arreḥmet nnes, u [minzi] aɣḍab nnes iqqim icarreg břa qeṭṭu, u [minzi] aheddi n uduqqez nnes [n ufugem] iqqim [issaggwad] řebda.
AMO 1:12 Necc ad ssekkeɣ timessi di Tayman, ad tecc řeqṣur n Buṣra.”
AMO 1:13 “Ammu i inna SIDI: X třata n ixeṭṭan [i iggin] ayt n Ɛammun, [ɛad mahu] x arebɛa, war t ssbeṭṭařeɣ, minzi nitni carrgen timɣarin s ddeyset zi Jilɛad, ḥima ad sswessɛen tammurt nsen.
AMO 1:14 Necc ad ssarɣeɣ ict n tmessi daxeř i řeḥyuḍ n Rabba, ad tecc řeqṣur nnes, ɣar iɣuyyan deg wass n umenɣi, am isuḍ usemmiḍ deg wass n tḥaryaḍt.
AMO 1:15 Ajeǧid nsen ad yuyur di lmenfa, netta ak-d řḥukkam nnes, inna SIDI.”
AMO 2:1 “Ammu i inna SIDI: X třata n ixeṭṭan [i igga] Mu’ab, [ɛad mahu] x arebɛa, war t ssbeṭṭařeɣ, minzi nitni sscemḍen iysan n ujeǧid n Idum ařami dewřen d jjir.
AMO 2:2 Necc ad ssekkeɣ timessi di Mu’ab, ad tecc řeqṣur n Qaryut. Mu’ab ad immet ɣar ddriz ameqqran, ɣar iɣuyyan [n umenɣi] [u] ɣar řḥess n usuḍi deg uyicc n icarri.
AMO 2:3 Necc ad teḥḥiɣ řqaḍi zi řwest nnes u ad nɣeɣ marra řḥukkam nnes akides, iqqar SIDI.”
AMO 2:4 “Ammu i inna SIDI: X třata n ixeṭṭan [i igga] Yahuda, [ɛad mahu] x arebɛa, war t ssbeṭṭařeɣ, minzi nitni war qbiřen Ccariɛa n SIDI u war ṭṭifen di tweṣṣa inu u [minzi] [irebbiten nsen] n ixarriqen, inni ḍfaren řejdud nsen, arrin ten weddaren,
AMO 2:5 Necc ad ssekkeɣ timessi di Yahuda, ad tecc řeqṣur n Urcalim.”
AMO 2:6 “Ammu i inna SIDI: X třata n ixeṭṭan [i igga] Isra’il, [ɛad mahu] x arebɛa, war t ssbeṭṭařeɣ, minzi nitni zzenzen amsegged s [tmenyat n] nnuqart u amezřuḍ i tyuya n sandaliyat.
AMO 2:7 Nitni tecḍiḍiḥen ɣar tɛejjajt x uzeǧif n imuqřiřen u nitni ttbellaɛen abrid n imwaḍɛen [břa ssibbet]. Aryaz d babas ruḥen ɣar teḥramt d ict, ḥima ad feḍḥen Isem inu iqeddsen.
AMO 2:8 Nitni sswaẓẓaḍen ixef nsen zzat mkuř aɛalṭar x warruḍ i dd-ittwarehnen u di taddart n arebbi nsen sessen binu [ssaɣen t s tmenyat] n yinni x ittwagg multa.
AMO 2:9 D Necc i tuɣa [din] teḥḥiɣ Imuriyyen zzat i uɣembub nsen, inni tuɣa yuɛřan am tneglin yuɛřan u jehhden am tcejjura n řbeǧuḍ. Necc teḥḥiɣ řɣiǧet nnes sennej u iẓewran nnes swadday.
AMO 2:10 D Necc i tuɣa kenniw i dd-issgeɛɛden zi Miṣra u arriɣ kenniw tuyurem arebɛin n iseggʷusa di řexřa, maḥend ad tᵉṭṭfem tammurt n Imuriyyen d řwart.
AMO 2:11 Zeg iḥenjiren nwem arriɣ zzaysen inabiyyen u zeg iḥudriyyen nwem [arriɣ zzaysen] inni tuɣa yarebbun ttaj [n ucuwwaf n lwaɛd]. Ma war iǧi amenni, [a] ayt n Israil?!, [ammu i] iqqar SIDI.
AMO 2:12 Kenniw [maca] tarrim inni tuɣa yarebbun ttaj [n weɛzař] ad swen binu u kenniw tweṣṣam inabiyyen, tennam: ‘Kenniw war ɣarwem bu ttesriḥ, ḥima ad tnebbam!’
AMO 2:13 Xzar, Necc ad awem ɛebbzeɣ swadday am yict n tkarrut teccur s tqebbiḍin [n imendi] tɛebbez [tijarrarin nnes di temmurt swadday].
AMO 2:14 Aqa ṣafi tarewřa i wenni ifsusen, u wenni ijehden war izemmar ad iḥḍa jjehd nnes u bu-teɣřuḍt war izemmar ad issenjem tudart nnes.
AMO 2:15 Wenni iṭṭfen di řqews, war [ittɣimi] ibedd, u wenni izemmaren x tazřa, war inejjem, u wenni ineddhen ayis, war izemmar ad issenjem řeɛmar nnes.
AMO 2:16 Wenni izeɛɛmen qaɛ jar ayt n bu-teɣruḍt ad yarweř d aɛaryan deg wass nni, [ammu i] iqqar SIDI.”
AMO 3:1 “Sřem awař-a i kidwem issawař SIDI, [a] ayt n Israil, ak-d kuř řaǧ nni ssgeɛɛdeɣ Necc zi temmurt n Miṣra, am qqareɣ:
AMO 3:2 ‘Zi marra řaǧat n ddunect ssneɣ mɣir kenniw. X uya ad kenniw ɛaqbeɣ x marra řmuɛṣiyyat nwem!
AMO 3:3 Ma ad uyuren tnayen ak-d wayawya, břa ma ttafqen?
AMO 3:4 Ma ad izehhar wayrad deg wezɣar řami war ɣares bu zzardet? Ma ayrad d ameẓyan ad yejj tmijja nnes ad tᵉttwaseř zeg yefri, am war imniɛ walu?
AMO 3:5 Ma ad inḍar wejḍiḍ di řfex x [wudem n] temmurt, mařa war din [dayes] macca i netta? Ma ad innurfeɛ řfex zi temmurt mařa texwa?
AMO 3:6 Mařa [ḥed] isuḍ deg uyicc n icarri di tendint, ma war ittarjiji řgens? Mařa imsar ijj n uceřwaw di tendint, ma war tt iggi SIDI?
AMO 3:7 Maɣar Sidi inu, SIDI, war ittegg uřa d ict n řḥajet břa ma ad issargeb ccwar nnes [innuffaren] i imsexxaren nnes, inabiyyen.
AMO 3:8 Ayrad izehhar, man wen war itteggʷden? Sidi inu, SIDI, aqa issiweř, man wen war ittnebba?’”
AMO 3:9 “Jjem ad ittwaseř aya di řeqṣur di Acdud u di řeqṣur n temmurt n Miṣra, ini: ‘Munem x idurar n Samarya u xzarem anehweř ameqqran di řwesṭ nnes u inni dayes ittwaḥṣaren!’
AMO 3:10 Nitni war ssinen mammec ɣa ggen min iseggden, iqqar SIDI, nitni inni iyarrwen lɛunf d tkeccaḍt di řeqṣur nsen.’
AMO 3:11 S uya, ammu i iqqar Sidi inu, SIDI: ‘Ijj n řeɛdu! Netta ittenneḍ i temmurt [marra]! Ad issehwa jjehd nnem zzayem u řeqṣur nnem ad ttwakeccḍen.’
AMO 3:12 Ammu i iqqar SIDI: ‘Am ifekk ijj n umeksaw tnayen n iḍaren niɣ ijj n yixef n umezzuɣ zeg uqemmum n wayrad, ammu i ɣa ttwassnejmen ayt n Israil, inni [i din] ittɣiman di Samarya x tma n qama u x yict n tzerbiyyet zi Dimacq ggin tt x yict n řemṭarbet.’”
AMO 3:13 “Sřem u cehdem di taddart n Yaɛqub, [ammu i] iqqar Sidi inu SIDI, AREBBI n řɛeskarat.
AMO 3:14 Minzi deg wass nni di ɣa xeřfeɣ ixeṭṭan n Israil, ad ssiwḍeɣ [ɛawed] axeǧeṣ x iɛalṭaren n Bayt-Il, [maɣar] ad ttwaqeḍɛen waccawen n uɛalṭar, ad wḍan ɣar temmurt.
AMO 3:15 Necc ad hedmeɣ tazeddiɣt n tgarst d tzeddiɣt n unebdu u tudrin n řɛaj ad ttwaqḍant, u aṭṭas n tudrin ad ttwaredǧent!’, [ammu i] iqqar SIDI.”
AMO 4:1 “Sřent, awař-a, [a] tifunasin n Bacan nni [iǧan] x wedrar n Samarya, tinni iḥeṣṣaren imuqřiřen, tinni iɛeffsen x imezřaḍ, tinni iqqaren i aytbab nsen: ‘Awyem-dd [ca] [ařami] i ɣa nessu!’
AMO 4:2 Sidi inu, SIDI, ijjuǧ s tqeddast nnes, aqa ad xakent dd-kken wussan, ad kennint kksen s iɣantcuten u min zzaykent iqqimen s tṣennarin n iseřman.
AMO 4:3 Kennint ad teffɣent zi tizzeyyin n řeḥyuḍ, kuř ict n temɣart nican ɣar zzat. Kennint ad ttwassekkent ɣar Harmun, [ammu i] iqqar SIDI.
AMO 4:4 [Iwa,] asem-dd ɣar Bayt-Il u ɛeddam, [asem-dd ɣar] Jiljal u arnim deg iɛeddiyen nwem. [Iwa,] awyem-dd tiɣarṣa nwem kuř ṣṣbeḥ d řeɛcur nwem ict n twařa di třata n wussan!
AMO 4:5 [Iwa,] sbexxar ict n tewhibt n uqadi s [weɣrum ak-d] wentun u řaɣam, [maḥend ad qeddmen] tiwhibin s řxaḍar, barrḥem zzayes, maɣar ammu i d awem itteɛjib, [a] ayt n Israil, [ammu i] iqqar Sidi inu, SIDI.”
AMO 4:6 “Ɛawed Necc jjiɣ awem tazdugi n teɣmas di marra tineddam nwem u tuqřič n weɣrum di marra imucan nwem [mani tzeddɣem]. Qaɛ amenni maca kenniw war dd-tedwiřem ɣari, iqqar SIDI.
AMO 4:7 Necc ssbeddeɣ xawem anẓar umi din [ɛad] třata n iyuren ař tmeyra u Necc ggiɣ ad iwwet wenẓar x ict n tendint, [maca] di tendint nneɣni war ggiɣ ad iwwet wenẓar. Ijj n yeyyar immewc as wenẓar u iyyar nneɣni i x war iwti wenẓar, inẓeɣ.
AMO 4:8 Tnayen, třata n tneddam uyurent ttenhezzant ɣar ict n tendint nneɣni, maḥend ad swent aman, [maca] nitenti war jjiwnent ca. Qaɛ amenni maca kenniw war dd-tedwiřem ɣari, iqqar SIDI.
AMO 4:9 Necc wtiɣ kenniw s [imendi] ittwasscemḍen [zeg usemmiḍ], s jjriḥect n wefsu. Aṭṭas n iḥwicen nwem d imarjaɛen nwem n uḍiř d wurtan nwem d tzitunin nwem aqa icca i-ten bu-weqḍeɛ. Qaɛ amenni maca kenniw war dd-tedwiřem ɣari, iqqar SIDI.
AMO 4:10 Necc ssekkeɣ-dd jar awem ṭṭaɛun, am mammec ggiɣ di Miṣra. Necc nɣiɣ iḥudriyen nwem s ssif, iysan nwem nedheɣ ten d takeccaḍṭ u arriɣ arriḥet n řɛeskarat nwem ad tgeɛɛed ař wenzaren nwem. Qaɛ amenni maca kenniw war dd-tedwiřem ɣari, iqqar SIDI.
AMO 4:11 Necc ssenqeřbeɣ kenniw am mammec tuɣa issneqřab AREBBI Sadum d Ɛamurra. Tuɣa kenniw am yijj n ukeccuḍ di tmessi nni dd-ittwaqeřɛen zeg [uḥaduq n] tmessi. Qaɛ amenni maca kenniw war dd-tedwiřem ɣari, iqqar SIDI.
AMO 4:12 S uya Necc ad ac ggeɣ aya, [a] Israil! Minzi Necc ad ac ggeɣ man aya, ḥezzem [ixef nnec], [a] Israil, maḥend ad temmeřqid ak-d AREBBI nnec.
AMO 4:13 Maɣar xzar, d Netta i ikewwnen idurar u ittejja-dd asemmiḍ u isscan min di ittxarreṣ, d wenni ittarran tuffut n řḥař d taǧest u iggur tiwa i řegɛudi n temmurt, aqa: SIDI, AREBBI n řɛeskarat d Isem nnes.”
AMO 5:1 “Sřem awař-a i xawem ssekkareɣ, ijj n yezři n ugejdur, [a] taddart n Israil.
AMO 5:2 “Aqa tewḍa teɛzarect Israil, war tᵉttekkar ɛad. Nettat temmenḍar ɣar temmurt nnes, war din uřa d ijj i tt ɣa issbedden.”
AMO 5:3 “Maɣar ammu i iqqar Sidi inu, SIDI: Tandint nni i ɣa iffɣen s wařef [n yeryazen], ad as tceṭṭ mya, u tenni i ɣa iffɣen s mya, ad as tceṭṭ ɛecra i taddart n Israil.
AMO 5:4 Maɣar ammu i iqqar SIDI ɣar taddart n Israil: Arzum xafi, xenni ad teddarem!”
AMO 5:5 War tarezzfem Bayt-Il, war dd-tᵉttisem ɣar Jiljal u war ɛeddum x Bi’r-Sebɛa, minzi s tidett Jiljal ad ittwandeh ɣar lmenfa u Bayt-Il ad tᵉttwabeṭṭeř.
AMO 5:6 Arzum x SIDI, xenni ad teddarem, ḥima Netta war ittidif ɣar taddart n Yusuf am yict n tmessi ittetten u war din ittiři uřa d ijj maḥend ad [tt] issexsi di ṭṭweɛ n Bayt-Il.”
AMO 5:7 “[Axeyyeb i] yinni ittarran řḥeqq ɣar cciḥ u inni isshekkʷan tasegda ɣar temmurt.
AMO 5:8 Netta d wenni iggin Ipliyaden d Uriyun d wenni ittarran tiři n řmewt d tuffut n řḥař, d wenni [ittarran] ass d ǧiřet, wenni ittřaɣan i waman n řebḥar u ifarreɣ i-ten tiwa i wudem n temmurt, aqa SIDI d Isem nnes!,
AMO 5:9 aqa Netta igga ad dd-yas wareddeǧ [am] wassam x wenni ijehden u [aqa yarra] areddeǧ ad dd-yas x lqelɛa.
AMO 5:10 [Maca] nitni carrhen wenni iddafaɛen x řḥeqq di tewwart [n tendint] u nitni ttɛiffan wenni issawařen nican.
AMO 5:11 S uya, minzi kenniw tɛeffsem x umuqřiř u tᵉttkessem zzayes řeɛcur n imendi: [waxxa] tebnam tudrin nwem s weẓru yuydan, war daysent tzeddɣem, [waxxa] teẓẓum tizayarin cnant deg imarjaɛen, war zzaysent tsessem binu.
AMO 5:12 Maɣar Necc ssneɣ aṭṭas n iɛeddiyen nwem u aqa ddnub nwem sseggʷaden: nitni ḥeṣṣaren amsegged, ttᵉṭṭfen tmenyat n řɣecc u ɛarrnen imezřaḍ ɣar barra di tewwart [n tendint].
AMO 5:13 S uya ad isseɣd umiɣis di řweqt nni, maɣar ad tiři d ict n řweqt d taɛeffant.”
AMO 5:14 “Arzum min iṣebḥen, war iǧi min iɛeffnen, xenni ad kidwem yiři SIDI, AREBBI n řɛeskarat, am mammec [t] teqqarem kenniw.
AMO 5:15 Carhem min iɛeffnen, texsem min iṣebḥen u smetnem řḥeqq di tewwart [n tendint]. Ad taɣ ad iḥinn SIDI, AREBBI n řɛeskarat x min iqqimen n Yusuf.”
AMO 5:16 S uya, ammu i iqqar SIDI, AREBBI n řɛeskarat, Sidi inu: Di marra azzayen ad tiři tɣuyyit n wecḍan u di marra zznaqi ad inin: ‘Ayyaw! Ayyaw!’, u nitni ad řaɣan x ufeǧaḥ, maḥend ad icḍen, u x yinni issnen izřan n wecḍan maḥend ad sɣuyen s wecḍan.
AMO 5:17 Di marra imarjaɛen n uḍiř [ad din tiři] tɣuyyit n wecḍan, maɣar Necc ad cuqeɣ di řwest nnec, iqqar SIDI.”
AMO 5:18 “Ayyaw i yinni ittmeẓren deg wass n SIDI! Min ɣarwem i ɣa yiři wass n SIDI? [Ad yiři] d taǧest, war ittiři d tafawt.
AMO 5:19 [Ad yiři] am ca n ijj i yarewřen zeg wayrad, xenni yusa-dd ɣares ddub, niɣ am ca n ijj i yudfen ɣar taddart, iɛemmed s ufus nnes x řḥiḍ, xenni izɛef i-t ijj n ufiɣar.
AMO 5:20 [Ma] war ittiři ass n SIDI d taǧest u war ittiři d tfawt? D ṭṭřam u war [teǧi] uřa d ict n jjurret n tfawt!”
AMO 5:21 “Necc carrheɣ, ɛiffeɣ uraren nwem u war ttexseɣ ad cemmeɣ imuniten nwem ifarzen.
AMO 5:22 Maɣar waxxa kenniw tiwyem ayi-d tiɣarṣa nwem n wecmaḍ d tewhibin nwem [n řɣiǧet], Necc war xasent areṭṭiɣ ca u Necc war xezzareɣ [walu] ɣar tewhibt n řehna n řmař iṣeḥḥen.
AMO 5:23 Siggʷej xafi ddriz n izřan nnec, war xseɣ ad sřeɣ řḥess n lharpat nnec.
AMO 5:24 Ejj řḥukm ad yazzeř am waman [ittazzřen] u tasegda am yijj n iɣzar ittazzřen řebda.”
AMO 5:25 “Ma tiwyem ayi-dd tiɣarṣa d tewhibt [n řɣiǧet] di řexřa arebɛin n iseggʷusa, [a] taddart n Israil?
AMO 5:26 Kenniw tarbum iqiḍan n ujeǧid nwem d uḍar [i xef tuɣa] ttbeddan řexyařat nwem [i] yetri n irebbiten nwem, inni teggim i yixef nwem.
AMO 5:27 Necc ad kenniw nedheɣ ɣar lmenfa, aɣirin i Dimacq, [ammu i] iqqar SIDI, AREBBI n řɛeskarat, aqa d wa d Isem nnes.”
AMO 6:1 “Uct x yinni war di yeǧi bu wemnus di Ṣihyun u x yinni umi ittɣiř aqa aten di řaman x wedrar n Samarya, imcennɛen n wenni d amezwaru jar řegnus, i ɣares dd-tᵉttas [marra] taddart n Israil.
AMO 6:2 Ɛdum ɣar Kalna u txezzarem [mammec teǧa]! Uyurem ssenni ɣar Ḥamat u hwam-dd ɣar Jat n Ifilisṭiniyyen. Ma nitni ḥsen zi tgeldawin-a niɣ tammurt nsen d tameqqrant x temmurt nwem?
AMO 6:3 [Kenniw], inni issbeɛɛden ass aɛeffan ɣar zzat nwem, [maca] tessqarrabem řkuřsi n lɛunf,
AMO 6:4 [kenniw], inni i [din] ittezzřen x qamat n řɛaj uca ttesṭiřen x řemṭarbat nwem u ttᵉtten izmaren n wuǧi uřa d iɛejmiyyen zi řwesṭ n řkuri,
AMO 6:5 inni i [din] iɣennjen amenni waha ɣar ǧɣa n lharpa, am dd-ssuffɣen [ɛřam kuř n] izřan s dduzan n lmusiqa, am mammec [t igga] Dawud,
AMO 6:6 inni isessen binu zi ṭṭawyat n urucci, inni idehhnen ixef nsen s řemxeyyar n zzect u war ttarran taynit i treẓẓit n Yusuf.
AMO 6:7 S uya ad uyuren nitni řexxu ɣar lmenfa ɣar uzeǧif n imenfiyyen. Aqa ittwaqḍa ddriz n uɣuyyi n yinni i [din] ittɣiman [ɣar ṭṭabřa]
AMO 6:8 Sidi inu, SIDI ijjuǧ s yixef nnes, [ammu i] iqqar SIDI, AREBBI n řɛeskarat: Necc ɛiffeɣ nnfaxet n Yaɛqub u carrheɣ řeqṣur nnes. S uyenni ad sellmeɣ tandint d marra min dayes.”
AMO 6:9 “Ad imsar řami qqimen ɛecra n iryazen di taddart d ict, [aqa] ad mmten nitni.
AMO 6:10 [Mařa] ɛemmis, wenni xas maḥend ad t isscemḍ, ad t iksi ḥima ad issuffeɣ řxecbet zi taddart, uca [xenni] ad yini i wenni [ɛad] ɣar daxeř di taddart: ‘Ma aqa din ɣarek ɛad ktar?’, uca ad yini wenneɣni: ‘Uřa d ijj!’, [xenni] ad yini netta: ‘Sqar, minzi ittxeṣṣa war nettidar Isem n SIDI.’”
AMO 6:11 “Maɣar xzar, SIDI ittamar, uca Netta ad iwwet taddart tameqqrant ař ɣa tedweř d řxarbet u taddart tameẓyant [ad tedweř] d iceǧiqen.
AMO 6:12 Ma ad tazzřen iysan x řejruf? Ma ad t carzen s ifunasen? Kenniw maca tarrim řḥeqq d arrhaj u řɣiǧet n tsegda tarrim tt d cciḥ.
AMO 6:13 [Kenniw] inni ifarrḥen zi min war iǧin, inni iqqaren: ‘Ma war neṭṭif accawen s jjehd nneɣ?’
AMO 6:14 Maɣar xzar, [a] taddart n Israil, Necc ad dd-ssekkareɣ ijj n řgens ḍidd nwem, [ammu i] iqqar SIDI, AREBBI n řɛeskarat. Nitni ad kenniw ḥṣaren zi manis dd-iwḍen [iwdan] ɣar Ḥamat ař taɣzart n Řewḍa.”
AMO 7:1 “Man aya isscen ayi [tt] Sidi inu, SIDI! Xzar, Netta igga iburexsen umi tuɣa arbiɛ aneggar ibedda ad issuffeɣ. Xzar, tuɣa-t d arbiɛ aneggar awarni ma ḥetcen [arbiɛ] i ujeǧid.
AMO 7:2 Imsar, umi kemmřen nitni zi macca n uɣemmuy aziza n temmurt, necc nniɣ: ‘[A] Sidi inu, SIDI, sameḥ maca! Mammec i ɣa yegg Yaɛqub ad iqqim ad ibedd, aqa netta d ameẓyan!’
AMO 7:3 [Xenni] indem SIDI x man aya. ‘War ittiři!’, inna SIDI.”
AMO 7:4 “Man aya isscen ayi [tt] Sidi inu, SIDI. Xzar, Sidi inu, SIDI, iřaɣa-dd maḥend ad din yiři lɛiqab s tmessi uca [timessi] tecca [aman] imeqqranen ihewřen ařami ad tecc [uřa d] tasɣart [n řwart].
AMO 7:5 Necc nniɣ: ‘[A] Sidi inu, SIDI, sbedd maca! Mammec i ɣa yegg Yaɛqub ad iqqim ad ibedd, aqa netta d ameẓyan!’
AMO 7:6 [Xenni] indem SIDI x man aya. ‘War ittiři!’, inna Sidi inu, SIDI!”
AMO 7:7 “Man aya isscen ayi [tt] Netta: Xzar, Sidi inu ibedd x yijj n řḥiḍ i ittwagg s plumu u yijj n plumu tuɣa deg ufus nnes.
AMO 7:8 Inna ayi SIDI: ‘Min tᵉttwarid cek, Ɛamus?’ Necc nniɣ: ‘Ijj n plumu!’ [Řexdenni] inna Sidi: ‘Xzar, Necc ad arreɣ plumu inu di řwesṭ n řgens n Israil. Necc war xas ɛedduɣ ɛad!
AMO 7:9 Řegɛudi n Isḥaq ad ttwareddǧent u tizawiyyin iqeddsen n Israil ad dewřent d řxarbet u Necc ad kkareɣ x taddart n Yarubɛam s ssif.’”
AMO 7:10 [Řexdenni] issekk Amaṣya, akehhan di Bayt-Il, [ijjen] ɣar Yarubɛam, ajeǧid n Israil, inna: “Ɛamus igga ijj n řɛahd ḍidd i cek di řwesṭ n taddart n Israil. Tammurt war tzemmar ad teksi awařen nnes.
AMO 7:11 Maɣar ammu i iqqar Ɛamus: ‘Yarubɛam ad ittwaneɣ s ssif u Israil ad ittwandeh ɣar lmenfa, ad t ssiggʷejen x wudem n temmurt nnes.’”
AMO 7:12 [Xenni] inna Amaṣya i Ɛamus: “[A] cek, amwařaw, ruḥ, arweř ɣar temmurt n Yahuda! Ecc dinni aɣrum u nabb dinni!
AMO 7:13 Di Bayt-Il [maca] war tzemmared ad tnebbid ɛad, minzi nettat d zzawect iqeddsen n ujeǧid u nettat d taddart n tageldit.”
AMO 7:14 Yarra-dd Ɛamus, inna i Amaṣya: “Necc war ǧiɣ d anabi u necc war ǧiɣ d mmis n unabi, maca necc tuɣa ayi d bu-řebhayem uřa d ijj n weryaz nni iřeqqḍen tazart taburect.
AMO 7:15 SIDI ikkes ayi zi ḍeffar n wuǧi u SIDI inna ayi: ‘Uyur, nabb i řgens inu Israil!’
AMO 7:16 [Xenni] řexxu, seř i wawař n SIDI, cek d wenni iqqaren: ‘War iɛeddeř ad tnebbid ḍidd i Israil u ad tessudmed [awař n SIDI] x taddart n Isḥaq!’
AMO 7:17 S uya, ammu i iqqar SIDI: Tamɣart nnec ad tessefsed ixef nnes s uɣiř di tendint u iḥenjiren nnec d yessic nnec ad wḍan s ssif u tammurt nnec ad tt bḍan s ufiřu n řeɛbar u cek ad temmted deg ict n temmurt texmej u s tidett Israil ad tᵉttwaṭṭef di lmenfa barra i temmurt nnes.”
AMO 8:1 “Man aya isscen ayi [tt] Sidi inu, SIDI: Xzar, ict n tsuǧet dayes tini n unebdu!
AMO 8:2 Netta inna: ‘Min tᵉttwařid cek a Ɛamus?’ Necc nniɣ: ‘Ict n tsuǧet dayes tini n unebdu!’ [Xenni] inna ayi SIDI: ‘Aqa yusa-dd qeṭṭu x řgens inu Israil. Necc war xas ɛedduɣ ɛad!
AMO 8:3 Deg wass nni ad dewřen izřan n řeqṣar d imeṭṭawen, iqqar Sidi inu, SIDI. Ad iřint aṭṭas n řxecbat di kuř amcan, tinni inḍar Netta. Seɣd!’”
AMO 8:4 “Sřem aya, kenniw inni iṣarrḍen amezřuḍ u teqḍam x řmusakin n temmurt,
AMO 8:5 am teqqarem: ‘Meřmi ɣa iɛdu uyur n jdid ařami [nzemmar] ad nezzenz řḥebb [n yirden]. U [meřmi ɣa iɛdu wass n] ssebt ařami [nzemmar] ad narzem tisrafin [n yirden], ḥima ad nessemẓi [řeɛbar n] ifa u ad nessemɣar ciqlu u ad necmet s řmizanat n řɣecc,
AMO 8:6 ařami nzemmar ad nseɣ imuqřiřen s [tenɛacin n] nnuqart uřa d amezřuḍ i tyuya n sandaliyat!’, u [am teqqarem]: ‘Ad nezzenz icarfa deg wemcan n imendi!’”
AMO 8:7 “SIDI ijjuǧ ɣar nnfaxet n Yaɛqub: ‘Ɛemmarṣ ad ttuɣ timegga nsen!
AMO 8:8 Ma war ttenhezzi temmurt s man aya u ma war ttiřin marra imezdaɣ nnes ceḍnen? Ma war tᵉttgeɛɛid [temmurt] tmun am yeɣzar, ad taři u ad dd-tehwa am yeɣzar n Miṣra?”
AMO 8:9 “Deg wass nni ad imsar, iqqar Sidi inu, SIDI, ad arreɣ tfuct ad teɣři deg wezyen n wass u ad ssbarecneɣ tammurt ɣar ṭḥa n wass.
AMO 8:10 Necc ad arreɣ fictat nwem d acḍan d marra izřan nwem d izřan n wecḍan u Necc ad ggeɣ ict n txancet [n wecḍan] x marra tbeysa u x kuř azeǧif ad ggeɣ tuqeccart. Ad awyeɣ acḍan [x temmurt] am [wecḍan] x uyenni n mmis, u [a]qeṭṭu nnes ad t ggeɣ am yijj n wass d amarzag.”
AMO 8:11 “Xzar, ad dd-asen wussan, iqqar Sidi inu, SIDI, aqa Necc ad ssekkeɣ řaẓ x temmurt, war iǧi řaẓ n weɣrum, war iǧi fad n waman, maca [ijj n ufadi] maḥend ad sřen i wawařen n SIDI.
AMO 8:12 [Xenni] ad ttelɛen zi řebḥar ɣar řebḥar u zi ccamal ɣar ccarq, ad uyuren zi ssa ɣar da maḥend ad arzun x wawař n SIDI, [maca] war t ttifen.
AMO 8:13 Deg wass nni ad ɣacant teɛzariyyin nni icnan qaɛ uřa d iḥudriyyen s ufadi,
AMO 8:14 inni ittjjaǧan ɣar umarwas n Samarya, qqaren: ‘S tidett am iddar arebbi nnec, [a] Dan, u am iddar webrid ɣar Bi’r-Sebɛa!’, ad wḍan, war ttekkaren ɛad!”
AMO 9:1 “Necc ẓriɣ Sidi inu ibedd ɣar uɛalṭar, inna: ‘Wwet x uzeǧif [n upilar], [ařami] i ɣa arjijent tnebdatin u arẓ i-tent d iwetwiten x uzeǧif nsen marra. Min zzaysen iqqimen, ad t nɣeɣ s ssif. War zzaysen ittrikkʷiř uřa d ijj n umarwař u uřa d ijj wenni inejjmen, ad ittwafekk.
AMO 9:2 Waxxa nitni ɣzin ařami [iwḍen ɣar] tmessi n řaxart, afus inu ad ten ssenni yawi, u waxxa nitni geɛɛaden ɣar ujenna, Necc ad ten dd ssenni ssehwiɣ,
AMO 9:3 waxxa nitni ssnuffaren ixef nsen x tqiccat n [wedrar n] Karmil, Necc ad arzuɣ u ad ten dd-awyeɣ ssenni. Waxxa nitni ssnuffaren ixef nsen zzat i tiṭṭawin inu x tisi n řebḥar, xenni Necc ad weṣṣiɣ afiɣar maḥend ad ten izɛef,
AMO 9:4 u waxxa nitni uyuren di tmeḥbast zzat i wudem n řɛedyan nsen, Necc ad weṣṣiɣ dinni ssif maḥend ad ten ineɣ. Necc ad xasen nḍareɣ tiṭṭ inu i řɣar, war iǧi i řxar.
AMO 9:5 Sidi inu, SIDI n řɛeskarat, Netta d wenni ittḥadan tammurt, [ařami] tenhezz u marra imezdaɣ nnes ceḍnen. Tᵉttgeɛɛed tmun am yeɣzar n Nil uca tᵉttaři thekkwi am yeɣzar n Miṣra.
AMO 9:6 Netta d wenni ibennan ixxamen nnes sennej deg ujenna u ittegg řqubbet nnes x temmurt, Netta d wenni ittřaɣan i waman n řebḥar uca ittfarreɣ i-ten x wudem n temmurt, SIDI d Isem nnes.
AMO 9:7 Ma kenniw war teǧim inu am ayt n Kuc, [a] ayt n Israil?, iqqar SIDI. Ma Necc war dd-ssuffɣeɣ Israil zi Miṣra u Ifilisṭiniyyen zi Kaftur u Aram zi Qir?
AMO 9:8 Xzarem, tiṭṭawin n Sidi inu, SIDI, aqa atent ḍidd i tgeldit tamednubt. Necc ad tt teḥḥiɣ zeg wudem n temmurt. Necc maca war tteḥḥiɣ marra taddart n Yaɛqub, iqqar SIDI.
AMO 9:9 Maɣar xzarem, Necc ad umureɣ u ad zzeřzeɣ taddart n Israil jar marra řegnus, am mammec zzeřzen zzariɛet deg ijj n bu-siyyar u war tweṭṭi uřa d ict n tḥebbuct ɣar temmurt.
AMO 9:10 Marra imednab n řgens inu ad ttwanɣen s ssif, inni iqqaren: ‘Řɣar war d aneɣ iřeqqef ca u war ɣarneɣ dd-ittqarrib ca zi marra iɣezdisen!’”
AMO 9:11 “Deg wass nni ad ssgeɛɛdeɣ ɛawed taxzant iweṭṭan n Dawud i iwḍan u Necc ad qqneɣ tizza nnes u min zzayes ittwahedmen, ad t arreɣ ɣar wemcan nnes u Necc ad t bniɣ [ɛawed] am deg wussan n wecḥař uya,
AMO 9:12 maḥend nitni ad warten min iqqimen zi Idum d marra řegnus i x ittwabarreḥ s Yisem inu, iqqar SIDI wenni itteggen marra aya.
AMO 9:13 Xzarem, ad dd-asen wussan, iqqar SIDI, aqa wenni icarrzen ad xas dd-iḥart wenni imejjaren, u wenni iřebbzen aḍiř s iḍaren [ad xas dd-iḥart] wenni isswiẓẓḍen [afus ak-d] zzariɛet, u idurar ad ttucruren s binu ẓemmen t jdid, u marra tiwririn ad ssefyent.
AMO 9:14 Necc ad ssenqeřbeɣ tameḥbast x řgens inu Israil u nitni ad bnan ɛawed tineddam i tuɣa ittwahedmen u ad daysent zeddɣen u nitni ad ggen imarjaɛen n uḍiř ad daysen ẓẓun tizayarin u ad zzaysent swen binu, ad ggen iḥwicen ad ccen řɣiǧet nnes.
AMO 9:15 Necc ad ten ẓẓuɣ di temmurt nsen u ɛemmarṣ ɛad ad ttwaqeřɛen zi temmurt nsen nni i d asen wciɣ, iqqar SIDI, AREBBI nnec.”
OBA 1:1 Řewḥiy n Ɛubadya. “Ammu i iqqar Sidi inu, SIDI, x Idum: ’Neccin nesřa ijj n řexbar zi SIDI, u ijj n umsekki ittwassekk ɣar řegnus: Kkar, jjem aneɣ ad xas nɣewweɣ, ad nemmneɣ ak-d [Idum]!’
OBA 1:2 Xzar, Necc ggiɣ cek d ameẓyan jar řegnus, cek tᵉttwasseḥqarad aṭṭas.
OBA 1:3 Nnfaxet n wuř nnec tecmet i cek, [cek] d wenni din izeddɣen deg imucan n udurri jar řejruf, di tzeddiɣt nnec yuɛřan, [cek] d wenni iqqaren deg wuř nnec: ‘Man wen d ayi ɣa iɣeḍřen ɣar temmurt?’
OBA 1:4 Mařa tessgeɛɛded ixef nnec am ugider, niɣ teggid řɛucc nnec jar itran, Necc ad cek dd ssenni ssehwiɣ, [ammu i] iqqar SIDI.”
OBA 1:5 “Mařa udfen-dd ɣarek iceffaren, [niɣ] ixewwanen s ǧiřet, - [a], mammec i ɣa tᵉttwaředdǧed [ař ṭṭarf] - Ma war ttacaren ař ɣarsen i ɣa yiři min ikfan? Mařa usin-dd ɣarek inni i ɣa iřeqḍen aḍiř, ma ad jjen ca min ittwařeqḍen [awarni asen]?
OBA 1:6 [A] mammec i ɣa arzun di Ɛisu, [mammec] i ɣa beqqcen [řeknuz] nnes nnufaren!
OBA 1:7 Marra iryazen nni [iggin] ijj n řɛahd akidek, ɛarnen cek ɣar weymir, [iryazen] nni tuɣa akidek iddaren di řehna, cemten cek, nitni zemmaren xak. Aɣrum zzayek ggin t d tareḥsit swadday nnec. ‘Aqa netta war dayes bu řefhamet.’
OBA 1:8 Ma war ittiři deg wass nni, iqqar SIDI, aqa Necc ad areddǧeɣ imiɣisen zi Idum, u řefhamet zeg idurar n Ɛisu?
OBA 1:9 Ayt n bu-teɣruḍt nnec ad ttwaḥṣaren zi tiggʷudi, [a] Tayman, ḥima kuř ijjen zeg idurar n Ɛisu ad ittwaqḍeɛ s wenɣay.”
OBA 1:10 “Zi ssibbet n lɛunf [x] umac Yaɛqub, ad cek tdeř řefḍiḥet, u ad tᵉttwakksed i řebda.
OBA 1:11 Deg wass i di tuɣa [xas] tbedded, deg wass i di ibarraniyyen iwyen-dd agřa nnes u udfen řbarrani ɣar tewwura nnes, u nḍaren taqedduḥt x Urcalim, tuɣa cek am yijjen zzaysen.
OBA 1:12 [Maca] war d ac iɛeddeř ad teqqimed txezzared deg wass n umac, deg wass n wectab nnes abarcan, war d ac iɛeddeř ad tfarḥed x iḥenjiren n Yahuda, deg wass n wareddeǧ nsen u war d ac iɛeddeř ad tarezmed aqemmum nnec aṭṭas deg wass n řeḥṣaret [nsen].
OBA 1:13 War iɛeddeř ad tadfed ɣar tewwart n řgens inu deg wass n uhellek nsen war d ac iɛeddeř ad teqqimed txezzared ɛawed deg wass n uḍeyyeɛ nsen u war d ac iɛeddeř ad teqqimed tesswiẓẓḍed [ifassen nnec] ɣar wagřa nnes deg wass n uḍeyyeɛ nnes,
OBA 1:14 war d ac iɛeddeř ad tbedded ɣar mani ttmeřqan ibriden, maḥend ad tᵉtteḥḥid inni inejmen u war d ac iɛeddeř ad tsellmed inni tuɣa yarewřen deg wass n řeḥṣaret.”
OBA 1:15 “Maɣar yudes-dd ass n SIDI x marra řegnus! Am teggid cek, ad zzayek ittwagg, axeǧeṣ nnec ad dd-idweř x uzeǧif nnec.
OBA 1:16 Maɣar am mammec teswim kenniw x wedrar inu iqeddsen, ammu ad swen marra řegnus řebda, [wah,] ad swen ad sekkfen, ad dewřen axmi ɛemmarṣ war tuɣa ǧan.
OBA 1:17 [Maca] x wedrar n Ṣihyun ad yiři min innejmen, u wanita ad yiři d amqeddes, u [inni n] taddart n Yaɛqub ad ṭṭfen tiseqqař [n řwart] nsen.
OBA 1:18 Taddart n Yaɛqub ad tiři d timessi, u taddart n Yusuf d aceɛɛař, uca taddart n Ɛisu ad tiři am yiɣeǧ u nitni ad asen sscemḍen u ad ten ccen, ařami war iqqim uřa d ijj iddar di taddart n Ɛisu, maɣar SIDI aqa issiweř.”
OBA 1:19 “Inni n [Temmurt n] Ljanub ad ṭṭfen idurar n Ɛisu d tasɣart, u yinni n Temmurt Iwaṭan ad ṭṭfen [tammurt n] Ifilisṭiniyyen d řwart [wah,] nitni ad ṭṭfen iyyar n Ifrayim d yeyyar n Samarya d řwart, u Binyamin [ad iṭṭef] Jilɛad [d řwart],
OBA 1:20 u imenfiyyen zi řɛeskar-a inni iǧan ɣar ayt n Israil [ad ṭṭfen tammurt n] ayt n Kenɛan [d řwart] ař Ṣarfat, u imenfiyyen zi Urcalim nni [iǧan] di Ṣafarad, ad ṭṭfen tineddam n [Temmurt n] Ljanub d řwart.
OBA 1:21 Imsellken ad geɛɛden adrar n Ṣihyun, ḥima ad ḥakmen adrar n Ɛisu, uca tagelda ad tiři n SIDI.”
JON 1:1 Awař n SIDI yusa-dd ɣar Yunus, mmis n Amittay, inna:
JON 1:2 “Kkar, ruḥ ɣar tendint n Ninwa tameqqrant uca barreḥ ḍidd nnes minzi tuɛeffna nsen tgeɛɛed [am ict n arriḥet yarṣuden] ař udem inu.”
JON 1:3 [Maca] Yunus ikkar ḥima ad yarweř zeg wudem n SIDI. Netta ihwa ɣar [tendint n] Yafa uca yufa [din] ict n tɣarrabut ad traḥ ɣar [tendint n] Tarcic. Netta ixeǧeṣ ttaman [n usafar] uca inya dayes maḥend ad iraḥ ɣar Tarcic, ixs ad iggʷej x wudem n SIDI.
JON 1:4 [Maca] SIDI issekk-dd asemmiḍ ijhed x řebḥar uca yarni idweř d taḥaryaḍt tameqqrant x řebḥar ařami ɛřaḥař tiweḍ ad tarẓ tɣarrabut.
JON 1:5 Ggʷeden ibeḥriyyen uca kuř aryaz isɣuy, ittar ɣar arebbi nnes uca nḍaren řeqcuɛ nni di tɣarrabut ɣar řebḥar ḥima ad xas ssneqṣen ddqeř. Tuɣa ihwa-dd Yunus maca ɣar uɣezdis aḍeffar n tɣarrabut, izzeř din uca iṭṭeṣ ijj n yiḍeṣ yuǧeɣ.
JON 1:6 Yusa-dd ɣares bab n tɣarrabut, inna as: “Min tᵉttegged, mayemmi dinni tᵉṭṭṣed? Kkar, řaɣa x AREBBI nnec, ad taɣ AREBBI nnec ad aneɣ ifekkar ḥima war nɣarreq ca.”
JON 1:7 Nnan yeryazen i wayawya: “As-dd, ejj aneɣ ad nḍar taqedduḥt, ḥima ad nessen wi d aneɣ iggin di nnɛi-ya.” Nitni nḍaren taqedduḥt uca tusa-dd tqedduḥt deg Yunus.
JON 1:8 [Xenni] nnan as: “Ini aneɣ, mayemmi d aneɣ teḥkem nnɛi-ya. Min teɛna řxedmet nnec? Manis dd-tusid? Min teɛna tammurt nnec u zi man řgens i ɣar teqqned?”
JON 1:9 Inna asen: “Necc d Aɛibrani uca ggʷedeɣ zi SIDI, AREBBI n ijenwan, wenni dd-ixeřqen řebḥar d řbar.”
JON 1:10 Iryazen [nni] ggʷeden aṭṭas, nnan as: “Min teggid?” Minzi tuɣa ssnen, netta yarweř-dd zeg wudem n SIDI, aqa tuɣa zeɛma issxebbar i-ten.
JON 1:11 Uca nnan as: “Min zzayek i ɣa negg, ḥima ad xaneɣ ihedden řebḥar?” Minzi řebḥar tuɣa ɛad yarenni deg uhaji.
JON 1:12 Inna asen: “Ksim ayi u nḍarem ayi di řebḥar ḥima ad xawem ihedden řebḥar, minzi ssneɣ aqa taḥaryaḍt-a tameqqrant i xawem dd-iwḍan di ssibbet inu.”
JON 1:13 [Maca] iryazen tuɣa qeddfen ɣar řbar, maca war d as zemmaren ca, minzi řebḥar tuɣa ɛad yarenni xasen aṭṭas s waṭṭas deg uhaji.
JON 1:14 [Xenni] řaɣan i SIDI, nnan: “A SIDI, war d aneɣ ttejji ca ad nettwahellek di ssibbet n řeɛmar n weryaz-a uca war d aneɣ tḥessibed x idammen imezdagen, minzi Cek, a SIDI, teggid min d ac yarḍan.”
JON 1:15 [Xas uca] ṭṭfen Yunus, nḍaren t di řebḥar. [Řexdenni] ibedd uhaji n řebḥar.
JON 1:16 Ggʷden iryazen [nni] aṭṭas zi SIDI uca ɣarṣen ict n tɣarṣt i SIDI uca waɛden lwuɛud.
JON 2:1 Issewjed SIDI ijj n wesřem ameqqran ḥima ad isseɣri Yunus uca Yunus ikka třata n wussan d třata n ǧiyaři deg uɛeddis n wesřem.
JON 2:2 Uca iẓẓuǧ Yunus i SIDI, AREBBI nnes, zeg uɛeddis n wesřem.
JON 2:3 inna: ”Zi řeḥṣaret inu řaɣiɣ i SIDI u Netta yarra-dd xafi. Zeg weḥwic n řaxart řaɣiɣ uca Cek tesřid i tmijja inu.
JON 2:4 Tuɣa tenḍared ayi di řaǧaɣ, deg wuř n řebḥur, tennḍen ayi-dd řemwaj. Marra zzhir nnec d řemwaj nnec kkin-dd xafi sennej.
JON 2:5 Nniɣ: ‘Necc ttwassuffɣeɣ zi zzat i wudem nnec. Ɛad ad twařiɣ ɛawed Zzawect nnec Tameqqrant Iqeddsen.’
JON 2:6 Ṭṭfen ayi waman ař mani iwḍen ɣar řeɛmar inu, aman ihewřen nnḍen ayi-dd, iřṣeq-dd arbiɛ n řebḥar deg uzeǧif inu.
JON 2:7 Hwiɣ ɣar ṭṭrufa yuǧɣen qaɛ n idurar, ttwabellɛen zzekrunat n temmurt xafi sennej i řebda, maca Cek tessgeɛɛded tudart inu zi turṣuḍi deg waman, a SIDI, AREBBI inu!
JON 2:8 Umi idewwex řeɛmar inu dayi, fekkareɣ di SIDI, u taẓaǧit inu tgeɛɛed ɣarek, di Zzawect nnec Tameqqrant Iqeddsen.
JON 2:9 Nitni ṭṭfen di l’aṣnam ibeṭṭřen d iɣeccen, semḥen di tmexsiwt nsen icewwaren.
JON 2:10 Maca necc ad Cek ḥemdeɣ s yict n tmijja teccur s uqadi. Min waɛdeɣ, ad t qefřeɣ. Asenjem zi SIDI.”
JON 2:11 Issiweř SIDI ak-d wesřem uca iɛuqq-dd Yunus di řbar.
JON 3:1 Yusa-dd wawař n SIDI ɣar Yunus i twařa wiss tnayen, inna:
JON 3:2 “Kkar, ruḥ ɣar tendint n Ninwa tameqqrant uca barreḥ asen tabarreḥt nni i d ac ɣa iniɣ.”
JON 3:3 Uca ikkar Yunus, iruḥ ɣar Ninwa ɛlaḥsab awař n SIDI. Tuɣa Ninwa d ict n tendint tameqqrant s waṭṭas, aqa [ittxeṣṣa] ticři n třata n wussan [i ucuqi].
JON 3:4 Yudef Yunus tandint ticři n ijj n wass uca ibarreḥ, inna: “Awarni arebɛin n wussan ad tᵉttwaneqřeb [tendint n] Ninwa.”
JON 3:5 Iryazen n Ninwa umnen di AREBBI uca barrḥen s yijj n uẓummi uca arḍen txuncay [n wecḍan], zeg umeqqran ař ameẓyan jar asen.
JON 3:6 Yiweḍ wawař uřa ɣar ujeǧid n Ninwa uca ikkar zi řkursi n řɛarc nnes, ikkes xas arruḍ nnes igellden, issduriy ixef nnes s yict n txancet [n wecḍan] uca iqqim x yiɣɣed.
JON 3:7 X řumur n ujeǧid [jmiɛ ak-d] ayt n ccurfa ggin ad barrḥen di Ninwa, nnan: “War ttejjim bnadem d řmař d ifunasen d tfunasin d wuǧi ad ccen ca, war ten ttejjim ad hdan uřa ad swen.
JON 3:8 Jjem ad yarḍ bnadem d řmař tixuncay [n wecḍan] uca jjem ten ad sɣuyen s jjehd ɣar AREBBI uca ad itub kuř ijj zeg webrid nnes aɛeffan u zi lɛunf [i yumsen] ɣar ifassen nnes.
JON 3:9 Ad taɣ ad indem AREBBI uca ad itub uca ad ibeɛɛed x řḥaduq n weɣḍab nnes ḥima war nettwathellik ca.”
JON 3:10 Uca iẓra AREBBI min ggin, aqa tuben x webrid nsen aɛeffan uca indem AREBBI x řɣar nni tuɣa inna ad kisen igg uca war t iggi ca.
JON 4:1 Man aya tuɣa d [ict n tmesřact] taɛeffant ař ṭṭarf i Yunus uca thaj tefqeḥt nnes.
JON 4:2 Iẓẓuǧ i SIDI, inna: “[A] SIDI, ma war nniɣ ammu umi d ayi tuɣa di temmurt inu? X uya nwiɣ ad tt jjeɣ umi ggiɣ ad arewřeɣ ɣar Tarcic minzi necc ssneɣ belli Cek d ijj n Arebbi d aḥnin d arḥim, ɣarek ttasiɛ n řxaḍar d tmexsiwt icewwaren tameqqrant uca tnedmed ad tegged řɣar.
JON 4:3 [Xenni] řexxu, [a] SIDI, kkes zzayi řeɛmar inu, minzi ittban ayi belli řmewt inu ḥsen zi tudart inu.”
JON 4:4 Inna SIDI: “Ma tecna umi txeyyqed ammu?”
JON 4:5 Iffeɣ Yunus zi tendint uca iruḥ iqqim di jjihet n ccarq n tendint mani igga i yixef nnes taseqqaft n ifetwan uca iqqim swadday nnes di tiři maḥend ad iẓar min ɣa imsaren i tendint.
JON 4:6 Tuɣa SIDI AREBBI issewjed ict n tcejjart n utebhet uca ijja-i-tt ad teyma tuɛřa x Yunus ḥima ad tiři d tiři x uzeǧif nnes u ḥima ad ikkes uxeyyeq nnes. Ifarḥ Yunus aṭṭas x tcejjart-a n řeɛjeb.
JON 4:7 Maca ɣar řefjar n twecca n wass i dd-iḍfaren issewjed AREBBI ict n tkecca nni tesseḥřec tacejjart n utebhet nni ařami tuẓeɣ.
JON 4:8 Ařami dd-tenqar tfuct, imsar belli AREBBI issekk ijj n usemmiḍ n ccarq iḥarren uca tewta tfuct azeǧif n Yunus ařami idewwex uca netta yarzu ad immet, inna: “Ittban ayi belli řmewt inu ḥsen zi tudart inu.”
JON 4:9 [Xenni] inna as AREBBI i Yunus: “Ma tecna umi txeyyqed ammu x tcejjart-a n utebhet?” Inna: “Aqa d ṣṣeḥ aqa xeyyqeɣ, ařami zemmareɣ ad mmteɣ!”
JON 4:10 Inna [as] SIDI: “Cek tezziǧez ac tcejjart n utebhet i umi war txedmed u i umi war tesseymed, d tenni dd-yusin deg ict n ǧiřet uca tᵉttwahellek deg ict n ǧiřet.
JON 4:11 Ma Necc war d ayi tezziǧez tendint n Ninwa tameqqrant tenni i di iǧa ktar zi mya u-ɛicrin-ařef n iwdan inni war issinen [řfarq] jar ufus nsen afusi d ufus nsen azeřmaḍ u sennej i uya [aqa din] aṭṭas n řebhayem?”
MIC 1:1 Awař n SIDI i dd-yusin ɣar Mixa, Amuracti, deg wussan n Yutam d Aḥaz d Ḥizqiya, ijeǧiden n Yahuda, [awař] i iẓra x Samarya d Urcalim.
MIC 1:2 “Sřem-dd, marra kenniw, [a] řegnus, iřim tfetnem, [a cem], tammurt d uɛemmar nnes! Sidi inu, SIDI, ad yiři d acehhad xawem, Sidi inu zi Zzawect nnes iqeddsen.
MIC 1:3 Maɣar xzarem, SIDI iffeɣ-dd zeg wemcan nnes [n tzeddiɣt], u Netta ad dd-ihwa u ad iṣurf x řegɛudi n temmurt.
MIC 1:4 Idurar ad fesyen sadu nnes, u tiɣzurin ad ttwabḍant, am ccmeɛ zzat i wudem n tmessi, am waman nni dd-ittwafarrɣen zi teysart.
MIC 1:5 Aya marra [ittemsar] zi ssibbet n uxeṭṭu n Yaɛqub, u zi ssibbet n ddnub n taddart n Israil. Min iǧan d xeṭṭu n Yaɛqub? Ma war [iǧi] d Samarya? U min ǧan d řegɛudi n Yahuda? Ma war [teǧi] d Urcalim?
MIC 1:6 Necc ad arreɣ Samarya d řxarbet deg iyyar, d amarjeɛ mani ɣa ẓẓun tazayart, u Necc ad nḍareɣ iẓra nnes di teɣzurt, u ad ɛarriɣ x dsusa nnes.
MIC 1:7 Marra řexyařat nnes ineqcen ad ttwaředǧent u marra řmunet nnes n farq-ccɣeř ad tt sscemḍen s tmessi, u marra řexyařat nnes ineqcen ad tent areddǧeɣ Necc, maɣar nettat tyarew i-tent zi řmunet n farq-ccɣeř, u nitenti ad dd-dewřent ɛawed d řmunet n farq-ccɣeř.”
MIC 1:8 “X uya ad ceḍneɣ u ad wteɣ agejdur, ad uyureɣ s řeḥfa d aɛaryan, ad ssmiɛweɣ am wuccanen n řexřa, u ad sɣuyeɣ am yessis n nnɛamet.
MIC 1:9 Maɣar iyezzimen nnes neqqen, maɣar [aya] yusa-dd ař Yahuda, iwesseɛ [řḥukm] ař tiwwura n řgens inu, ař Urcalim.
MIC 1:10 War ttbarrḥem ca man aya di Jat, war tᵉttrum, war xas nessiwiř. Di Bayt-Li’afra zuzzareɣ [a]cař x yixef inu.
MIC 1:11 Ɛdu, cem tenni izeddɣen di Cafir, d aɛaryan u s řeḥya. Tenni izeddɣen di Ṣanan war teffiɣ ca. Taɣuyyit n wecḍan n Bayt-Ha-Iṭṣil tekkes zzaywem abeddi nnes akidwem.
MIC 1:12 Maɣar tenni izeddɣen di Marut, tᵉtteqnunnuy ɣar marra tiɣemmura di ṭṭweɛ n řxar, [minzi] aqa ihwa-dd řɣar n SIDI, ař tawwart n Urcalim.
MIC 1:13 Ḥezzmem iysan n tazřa zzat i ukarru, [a cem], tenni izeddɣen di Laxic! Nettat d beṭṭu n ddenb n yeǧis n Ṣihyun, maɣar dayek ttwafen ixeṭṭan n Israil.
MIC 1:14 S uya ewc arriɣaluten n umsebḍi i Muracat-Jat! Tudrin n Akzib ad dewřent d řɣecc i ijeǧiden n Israil.
MIC 1:15 Ɛawed Necc ad am dd-awyeɣ awrit, [a cem] tenni izeddɣen di Marica! Aɛuǧi n Israil ad dd-yas ař ɣar Ɛadullam.
MIC 1:16 Egg ixef nnem d taqeccart u ḥeff i ixef nnem di ssibbet n iḥenjiren nnem iɛizzen. Arr taqeccart nnem d tameqqrant amecnaw agider, minzi ttwawyen zzayem ɣar tmeḥbast.”
MIC 2:1 “Uct x yinni ittxemmamen di řmuɛṣiyyet u [x yinni] ittxemmamen di řɣar di qamat nsen. Ɣar tuffut ad t ggen, maɣar afus nsen [dayes] aṭṭas n tzemmar.
MIC 2:2 Nitni mmeẓřen deg iyyaren uca ttkeccḍen ten ɛawed, uřa d tudrin, uca ttᵉṭṭfen tent. Ammu i ggin nitni s řexcunet i weryaz u i taddart nnes, [wah, i kuř] aryaz u i tesɣart nnes.”
MIC 2:3 “S uya, ammu i iqqar SIDI: Xzar, Necc twenniɣ ijj n řɣar x řaǧ-a, i zi war tzemmarem ad tjebdem irawen nwem, u [i zi] war tzemmaren ad tuyurem [ɛad] s uɛeffar, maɣar [ad tiři] d ict n řweqt taɛeffant.
MIC 2:4 Deg wass nni ad xawem ssgeɛɛden ijj n lmatal u ad ɣennjen ijj n yeẓri n wecḍan am ttcetcan, u ad inin: Neccin nettwareddeǧ qaɛ! Netta yarra tasɣart n řgens inu [ɣar wenneɣni.] Mammec tt iksi zzayi? Netta iwca iyyaren nneɣ i wenni dd-iffɣen zeg webrid!
MIC 2:5 S uya war ɣarek ittiři uřa d ijjen wenni i ɣa inḍaren afiřu [n řeqyas] ɛlaḥsab taqedduḥt deg wegraw [n řgens] n SIDI.”
MIC 2:6 “‘War ssuffuɣem awař [ammu] s ukuffu!’, [ammu] i ssawařen nitni am ssuffuɣen kuffu. ‘X man aya war zemmaren nitni ad ssuffɣen awař s ukuffu!’ [Ammu] i ɣa tiři řefḍiḥet war tᵉttwakkess!
MIC 2:7 [A kenniw,] taddart n Yaɛqub, ma izemmar ad ittwanna aya? ‘Ma ijja ca Arruḥ n SIDI war t iggi?’ niɣ: ‘Ma tina d timegga nnes?’ Ma war tteggen wawařen inu řxar i yinni igguren s tsegda?
MIC 2:8 [Maca ɛad] idennaḍ ikkar řgens inu am yijj n řeɛdu. Tqeřɛem arruḍ d upartessu zeg imsebriden iqefřen i war tt ittrijin, inni ittɛiffen umenɣi.
MIC 2:9 Kenniw tessuffuɣem timɣarin n řgens inu zi taddart nsent iɛizzen. Iḥenjiren nnes tekksem asen talwizt inu i řebda.
MIC 2:10 Kkarem u aggʷejem, minzi wa war iǧi d amcan n arraḥet! Maɣar aqa [tammurt] tᵉttwassexmej, ad tawi areddeǧ, [wah] ijj n nnɛi n ureddeǧ.
MIC 2:11 Mařa ca n ijj iḍeffar asemmiḍ, iqqar ixarriqen, [uca iqqar:] ‘Necc ad ac ssuffɣeɣ awařen s ukuffu di ṭṭweɛ n binu d ccrab!’ aqa netta igga [axmi netta d anabi] n řgens nni issuffuɣen awařen s ukuffu.”
MIC 2:12 “S tidett, [a] Yaɛqub, Necc ad cek ksiɣ [ɣari] qaɛ, nican Necc ad ssmuneɣ min iqqimen zi Israil. Ad ten ssmuneɣ am wuǧi n Buṣra, am ict n tḥimart di řwesṭ n trekkwast ad din yiři ijj n uɛurric n iwdan.
MIC 2:13 Amfeǧeq ad izwar zzat i wudem nsen, nitni ad feǧqen u ad ɛdun x tewwart, u ad zzayes dd-ffɣen. Ajeǧid nsen ad izwar zzat i uɣembub nsen, u SIDI ɣar uzeǧif nsen.”
MIC 3:1 “[Xenni] nniɣ necc: ‘Sřem, [a kenniw,] izeǧifen n Yaɛqub, u [kenniw], řḥukkam n taddart n Israil! Ma war ittxeṣṣi i kenniw ad tessnem tasɣart?
MIC 3:2 Nitni carrhen min icnan u ttexsen min iǧan d aɛeffan! Nitni kksen asen tiřmect uřa d aysum x iɣsan nsen.
MIC 3:3 [Wah,] aqa aten d yinni ittetten aysum n řgens inu uca kksen asen tiřmect uca ttareẓẓan iɣsan nsen. Nitni ttbezzaɛen ten am di marmita, am weysum deg uṭenjir.”
MIC 3:4 “Řexdenni ad sɣuyen ɣar SIDI, [maca] war xasen dd-ittarri. Ad xasen iffar udem nnes di řweqt nni, zi ssibbet n řɣar i iggin.”
MIC 3:5 “Ammu i iqqar SIDI i inabiyyen inni ittɣarran řgens inu, inni umi ɣarsen ɛad min di i ɣa izeɛfen s teɣmas nsen, ad řaɣan ‘Řehna!’, [maca] ḍidd n wenni war d asen ittegg walu deg uqemmum nsen, ad xas qeddsen ijj n umenɣi.
MIC 3:6 S uya ad xawem dd-tewḍa ǧiřet, břa řewḥiy, u [ad] xawem [dd-iwḍa] taǧest břa tagezzant. Ad teɣři tfuct x inabiyyen u ad ibbarcen wass tiwa nsen.
MIC 3:7 Imwařawen ad seḍḥan, u igezzanen ad dewřen zewɣwen s řeḥya, u nitni marra ad řeḥḥfen acřaɣem ɣar uyencic, minzi twarrit n AREBBI war dd-tᵉttis ca.
MIC 3:8 Maca necc ccureɣ s jjehd n Arruḥ n SIDI, u s řḥeqq d teryast, ḥima ad barrḥeɣ i Yaɛqub x uxeṭṭu nnes u i Israil x ddenb nnes.”
MIC 3:9 “Sřem xenni ɣar man aya, [a] izeǧifen n taddart n Yaɛqub u kenniw imeqqranen n taddart n Israil, inni icarrhen řḥeqq, u ssfarraɣen marra min iǧan iseggem,
MIC 3:10 inni ibennan Ṣihyun s idammen, u Urcalim s řɣecc.
MIC 3:11 Izeǧifen nnes ttḍebbaran ddɛawi i arrecwet, ikehhanen nnes sseřmaden s řmunet, u ikehhanen nnes ttgezzanen s tmenyat. Aqa nitni ttcařen x SIDI xmi qqaren: ‘Ma war iǧi SIDI di řwest nneɣ? War d aneɣ iřeqqef řɣar.’
MIC 3:12 S uya, aqa-tt zzaywem, aqa ad carzen Ṣihyun am yijj n yeyyar, ad tedweř [tendint n] Urcalim d ict n řxarbet, u adrar n Taddart d řegɛudi n wezɣar.”
MIC 4:1 “Deg uneggar n wussan ad imsar, aqa adrar n Taddart n SIDI ad ibedd imten x tqiccet n idurar. Ad yiři yuɛřa x tewririn, uca řegnus ad ɣares dd-azzřen.
MIC 4:2 Aṭṭas n řegnus ad geɛɛden, ad inin: “Jjem aneɣ ad ngeɛɛed ɣar wedrar n SIDI u ɣar Taddart n AREBBI n Yaɛqub, ḥima ad aneɣ isseřmed zeg ibriden nnes, ad nuyur neccin deg imesraq nnes, minzi zi Ṣihyun ad dd-teffeɣ Ccariɛa u awař n SIDI zi Urcalim.
MIC 4:3 Netta ad icarreɛ jar řegnus imɣaren u ad iseggem řegnus nni ɣar iǧa tizemmar timeqqranin, ɛad uřa d [řegnus] iggʷejen. Nitni ad ggen řesyuf nsen d dduzan u fřitcat nsen d řemwas n wezbar. War issgiɛɛid uřa d ijj n řgens ɛad ssif x wenneɣni, u nitni war řemmden [ɛad] amenɣi.
MIC 4:4 Nitni ad qqimen, kuř ijj sadu tzayart nnes u sadu wartu n tazart nnes, uca uřa d ijjen ad [ten] issnexřeɛ, maɣar aqemmum n SIDI n řɛeskarat aqa inna t.”
MIC 4:5 “Minzi marra řegnus ad uyuren, kuř ijj [zzaysen] deg yisem n arebbi nnes, maca neccin ad nuyur deg Yisem n SIDI, AREBBI nneɣ, i řebda qaɛ.”
MIC 4:6 “Deg wass nni, iqqar SIDI, Necc ad yarweɣ min iqejdḥen, u ad [ɣari] ssmuneɣ min x uzzřen, u wi di ggiɣ Necc řɣar.
MIC 4:7 Min iqejdḥen ad t ggeɣ d řbaqi, uřa min ittwaɛarrnen ɣar řaggʷaj, [ad t ggeɣ] d ijj n řgens s tzemmar d tameqqrant, uca SIDI ad xasen yiři d Ajeǧid x wedrar n Ṣihyun, zi řexxu ař řebda.
MIC 4:8 I cem, Migdal-Ɛidr, [a cem,] tawrirt n yeǧis n Ṣihyun! ad ɣarem dd-tas, [wah,] ad [ɣarem] dd-tas řeḥkamet tenni [i tuɣa iǧan] deg umezwaru, tageldit n yeǧis n Urcalim.”
MIC 4:9 “Řexxu [maca], mayemmi tesɣuyyud [ammu] s jjehd? Ma war ɣarem iǧi ujeǧid? Ma ittwahellek umcawar nnem, aqa iṭṭef i cem řeḥriq am n yict n temɣart ittarwen?
MIC 4:10 Ɣnes u tɛebbzed, [a cem,] yeǧis n Ṣihyun, am ict n temɣart ittarwen. Maɣar [waxxa] řexxu ad teffɣed zi tendint, ad tzedɣed deg iyyar, uca ad dd-tased ař Babil. [Maca] din ad tnejmed, dinni ad cem ifekk SIDI zeg ufus n řɛedyan nnem.”
MIC 4:11 Řexxu [maca] munen xak aṭṭas n řegnus. Nitni qqaren: ‘Nettat ad tᵉttwaɛarra!’ Tiṭṭawin nneɣ ad ẓarent Ṣihyun.
MIC 4:12 Nitni war ssinen inwayen n SIDI, u war fehhmen ca ccwar nnes! Maɣar Netta iksi ten [ɣares] am tqebbiḍin n imendi deg unedrar.”
MIC 4:13 “Kkar, tessarewted, [a cem,] yeǧis n Ṣihyun, maɣar Necc ad arreɣ yicc nnem d uzzař, u ad am ggeɣ ticeḍyin nnem zi nnḥas, u cem ad třebzed aṭṭas n řegnus u Necc ad ḥarrmeɣ takeccaḍt nsen marra i SIDI, uřa d agřa nsen i Sidi n marra tammurt.
MIC 4:14 [Xenni] řexxu, řeḥmem ijjen ɣar wenneɣni, [a cem] yeǧis n ict n bandiyya [n ixewwanen]! Netta iḥeṣṣar aneɣ. Nitni ad ccaten řqaḍi n Israil x uqabsi s ijj n weɛmud.”
MIC 5:1 “U cek, Bayt-Laḥm Ifrata, [waxxa] cek d ameẓyan ařami [war tzemmared] ad tiřid jar řuřuf n Yahuda, aqa zzayek i dd ɣa iffeɣ Netta i Necc, maḥend ad yiři d Řḥakem x Israil. Abani nnes aqa-t zi mecḥař uya, zeg wussan n řebda.
MIC 5:2 S uya Netta ad ten isellem ař řweqt nni, aqa tenni i ɣa yarwen, aqa turuw-dd. Xenni ad dd-idweř řbaqi n yaytmas, [jmiɛ] ak-d ayt n Israil.
MIC 5:3 Netta ad ibedd [dinni] uca ad yarwes di jjehd n SIDI, di řuɛřa n Yisem n SIDI, AREBBI nnes. Nitni ad zedɣen [dinni], maɣar Netta ad yiři d ameqqran ař ineggura n temmurt.
MIC 5:4 Wanita ad yiři d Řehna.” “Xmi dd ɣa yas Accur ɣar temmurt nneɣ, u xmi dd ɣa yadef ɣar řeqṣur nneɣ, xenni ad as nesseřqa sebɛa n imeksawen d tmenya n ayt n jjehd zi midden.
MIC 5:5 Nitni ad ḥḍan x temmurt n Accur s ssif u tammurt n Nimrud di tewwura nnes. [Ammu] Netta ad aneɣ issenjem zeg [ufus] n Accur, xmi dd ɣa yas wanita ɣar temmurt nneɣ u xmi dd ɣa yadef ɣar wudem n temmurt nneɣ.”
MIC 5:6 “Řbaqi n Yaɛqub ad yiři di řwesṭ n řegnus amecnaw nnda n SIDI, amecnaw tiddumin x wefsu [aziza,] wenni war ixezzaren ɣar uřa d ijj n weryaz u war ittrijin tarwa n bnadem.
MIC 5:7 Řbaqi n Yaɛqub ad yiři jar řegnus, di řwesṭ n řegnus, amecnaw ayrad jar řmař n yezɣar, amecnaw ayrad d ameẓyan jar tḥimriwin n wuǧi, wenni, xmi ɣa iɛdu, iɛeffes u ittcarrag uca war din uřa d ijj i ɣa ifekken.
MIC 5:8 Afus nnec ad yiři ittwassgeɛɛed sennej i yinni i cek iḥeṣṣaren, uca marra řɛedyan nnec ad ttwamḥan.”
MIC 5:9 “Ad imsar deg wass nni, [ammu i] iqqar SIDI, aqa Necc ad teḥḥiɣ iysan nnec zi řwesṭ nnec u ad sshellkeɣ ikarruten nnec.
MIC 5:10 Ad mḥiɣ tineddam zi temmurt nnec, ad hedmeɣ marra lqelɛat nnec.
MIC 5:11 Necc ad qeḍɛeɣ taseḥḥart nnec zeg ufus nnem u war ɣarek ttiřin ɛad ibezgawen.
MIC 5:12 Řexyařat nnem ineqcen d imayḍuten nnec [iqeddsen] ad [ten] mḥiɣ zi řwest nnec, ḥima war tᵉttbendaqed ɛad i řxedmet n ifassen nnec.
MIC 5:13 u tirebbin nnec n cwarti ad tent teḥḥiɣ zi řwesṭ nnec. [Maca] ad hedmeɣ řɛedyan nnec
MIC 5:14 uca ad ntaqmeɣ s weɣḍab u s wesɛar x řegnus nni war [ittexsen] ad sřen.”
MIC 6:1 “Sřem xenni min iqqar SIDI: Kkar, carreɛ zzat i wudem n idurar, u ejj tiwririn ad sřent i tmijja nnec!
MIC 6:2 Sřem, [a] idurar, i ddeɛwet n SIDI, [uřa d kenniw], dsusa imetnen n temmurt, minzi SIDI ɣares ict n ddeɛwet ak-d řgens nnes Netta iggur ɣar taddart n ccreɛ ak-d Israil.”
MIC 6:3 “[A] řgens inu, min d ac ggiɣ, u s manten i zi cek ssiḥřeɣ? Cehhed ḍidd inu!
MIC 6:4 Necc nedheɣ cek zi temmurt n Miṣra, zi taddart n tesmuɣi. Necc ssekkeɣ-dd Musa d Harun d Maryam zzat i uɣembub nnec.
MIC 6:5 [A] řgens inu, fekkar mliḥ di [řɣar] i [tuɣa] inekkʷa ad yegg Balak, ajeǧid n Mu’ab, u di min xas dd-yarra Bilɛam, mmis n Baɛur [u di min imsaren] zi Ciṭṭim ař Jiljal, ḥima ad tessned timegga iseggden n SIDI.”
MIC 6:6 “S min zi ɣa raḥeɣ ad mmeřqiɣ ak-d SIDI, ad aḍareɣ zzat i Arebbi yuɛřan? Ma ad raḥeɣ ad t mmeřqiɣ s tɣarṣa n wecmaḍ, niɣ s iɛejmiyyen n ijj n useggʷas?
MIC 6:7 Ma ad yarḍa SIDI s řuřuf n icarriyyen, s ɛecra n řuřuf n tɣezratin n zzect? Ma ad wceɣ amenzu inu i uxeṭṭu inu, řɣiǧet n uɛeddis inu i ddnub n řeɛmar inu?
MIC 6:8 Netta issargeb i cek, [a] bnadem, min icnan, u min zzayek ittettar SIDI, aqa ad tegged řxar, ad texsed tamexsiwt icewwaren, u ad tuyured ak-d AREBBI nnec s uwaḍeɛ!”
MIC 6:9 “Tmijja n SIDI tᵉttřaɣa i tendint. Isem nnec ittawi-dd ufekki. Sřem i weɛmud u ɣar wenni t-i-dd issekken!
MIC 6:10 Ma din ɛad řexzin ccuren s řɣar di taddart n uɛeffan uřa d ijj n nnɛi n [řmud n] ifa inqeṣ?
MIC 6:11 Ma izemmar ad iřiɣ d amezdag s řmizanat n řɣar, u s yict n tecyart [teccur] s řewznat iɣeccen?
MIC 6:12 Ayt bu-wagřa nnes aqa ccuren s lɛunf, uřa d imezdaɣ nnes qqaren ixarriqen u iřes nsen aqa ittɣecca deg uqemmum nsen.”
MIC 6:13 “Xenni Necc aqa jarḥeɣ cem s teyyita, aqa tᵉttwareddǧed zi ssibbet n ddnub nnem.
MIC 6:14 Ad tecced, [maca] war tᵉttjiwined, u ad dayem yiři řaẓ di daxeř nnem. Ad teffɣed, [maca] war tnejjmed, u min inejmen, ad t sseɛduɣ i ssif.
MIC 6:15 Ggur ad tzarɛed, [maca] war tmejjared, ad teddzed aẓemmur, [maca] war tdehhned ixef nnem s zzect [ad tẓemmed] uřa d binu n jdid [zeg uḍiř], [maca] war tᵉssessed binu.
MIC 6:16 [Maɣar] řgens iḥeṭṭan tiweṣṣa n Ɛumri u marra timegga [tiɛeffanin] n taddart n Axab, u kenniw tḍeffarem řecwar nsen, ařami cem i ɣa yarreɣ d [ict n řqecɛet n] unexřiɛ uřa d imezdaɣ nnes i usemẓi. [Ammu] i ɣa tarbum řḥegra n řgens inu.”
MIC 7:1 “Uct inu, maɣar aqa ayi ɣari amecnaw ɣar tmeyra n tini n unebdu, amecnaw ɣar twařa wiss tnayen n weřqaḍ n uḍiř: war din uřa d ijj n uzekkun n uḍiř i macca, war din iǧi uřa d ijj n řbacur qbeř řweqt i dayes meẓri řeɛmar inu.
MIC 7:2 Ameddukkař i dayes tamexsiwt icewwaren war iqqim di temmurt, uca war din uřa d ijj n uṣebḥan jar iwdan. Nitni marra ttḥaman x idammen, ijjen iyemmar wenneɣni s tracca.
MIC 7:3 Ifassen nsen wejden s tnayen maḥend ad ggen řɣar. Řḥakem ittar u řqaḍi [ittegg i-tt] di ṭṭweɛ n uxeǧeṣ, u wenni ameqqran issawař [ɛlaḥsab] meẓri [aɛeffan] n řeɛmar nnes u [ammu] i ssfarɣen nitni tamesřact.
MIC 7:4 Wenni zzaysen d aṣebḥan aṭṭas [aqa-t] am yijj n cbarq n isennanen, wenni d aṣdiq n wuř qaɛ [zzaysen] [aqa-t] mahu x ijj n wefray n cbarq ak-d isennanen. Ass n iɛessasen nnec, [ass n] uxeǧeṣ, yusa-dd. Řexxu ad nxeřɛen.”
MIC 7:5 “War tumined deg ijj n umeddukkeř, war tᵉttecřed x umeddukkeř [nnec] iɛizzen. Ḥḍa tiwwura n uqemmum nnec zi tenni iǧan ɣar weḥsin nnec.
MIC 7:6 Maɣar mmis isseḥqara babas, yeǧis tᵉttḍadda yemmas, tasřit x lallas, řɛedyan n ijj n weryaz aqa d aytbab n taddart nnes.”
MIC 7:7 “[Maca] necc ad xzareɣ ɣar SIDI, ad rajiɣ AREBBI n usenjem inu. AREBBI inu ad ɣari dd-iseř.”
MIC 7:8 “War d ayi sfarreḥ, [a cem] tamɣart nni d řeɛdu inu! Maɣar mařa wḍiɣ, ad kkareɣ ɛawed, mařa qqimeɣ di taǧest, ad yiři SIDI d tafawt i necc.
MIC 7:9 Necc ad ksiɣ asxeḍ n SIDI, minzi necc xḍiɣ akides, ař xafi i ɣa iwwet Netta x ddeɛwet inu u ad ayi yaɣ tasɣart inu. Netta ad ayi issuffeɣ ɣar tfawt, necc ad ẓareɣ tasegda nnes.
MIC 7:10 Tamɣart tenni d řeɛdu inu ad tẓar aya. Mři d as i ɣa tdeř řeḥya i tenni d ayi iqqaren: ‘Mani iǧa SIDI, AREBBI nnec?’ Tiṭṭawin inu ad ɣares xzarent! Řexxu ad tᵉttwaddez nettat, am ubeǧaɛ di zznaqi.”
MIC 7:11 “Deg wass i di i ɣa ibna Netta řeḥyuḍ nnec ɛawed, deg wass nni ad iraḥ řḥeqq ɣar řaggʷaj aṭṭas.
MIC 7:12 Deg wass nni ad dd-asen, zi Accur d tneddam n Miṣra, u zi Miṣra ař iɣzar [n Lfuraṭ], u zi řebḥar ař řebḥar u zeg wedrar ař wedrar [nneɣni.]
MIC 7:13 [Maca] ddunect ad tedweř ict n temmurt ittwareddǧen, zi ssibbet n imezdaɣ nnes, zi ssibbet n řɣiǧet n tmegga nsen.”
MIC 7:14 “Arwes řgens nnec s teɣɣarct nnec, uǧi n tesɣart nnec, tenni iǧan weḥḥdes deg wezɣar, di řwesṭ n Karmil. Ejj i-tent ad arewsen di Bacan d Jilɛad, am deg wussan n wecḥař uya.
MIC 7:15 Necc ad as sseccneɣ lmuɛjizat, am deg wussan řami dd-teffɣed zi temmurt n Miṣra.
MIC 7:16 Řegnus ad t twařin, ad seḍḥan zi ssibbet n marra tizemmar nsen, nitni ad ssarsen afus x uqemmum, imezzuɣen nsen ad dduhcaren.
MIC 7:17 Nitni ad řesḥen taɛejjajt am ufiɣar, ad dd-ffɣen zi lburjat nsen am imuddar n temmurt ittbuɛen. ad dd-asen ttarjijen ɣar SIDI, AREBBI nneɣ, u ad zzayek ggʷeden.”
MIC 7:18 “Man wen iǧan d Arebbi am Cek, wenni iɣeffaren řmuɛṣiyyet, wenni iɛeddun x uxeṭṭu n min iqqimen zi tesɣart nnes? Netta war imenneɛ i řebda deg weɣḍab nnes, maɣar yarḍa as tamexsiwt icewwaren.
MIC 7:19 Netta ad xaneɣ yarḥem ɛawed, Netta ad iɛfes x řmuɛṣiyyet nneɣ, [wah], Cek ad tenḍared marra ddnub nsen di řaǧaɣ n řebḥar.
MIC 7:20 Iři Cek ad tessecned řaman i Yaɛqub [u] tamexsiwt icewwaren i Ibrahim, am mammec tejjuǧed i řejdud nneɣ zeg wussan n mecḥař uya.”
NAH 1:1 Řḥukm issaggʷaden x Ninwa. Adlis n řewḥiy n Naḥum, Alquci.
NAH 1:2 Alif. - Arebbi ittasmen u SIDI intaqam, SIDI d aneqqam u Netta d bab n wesɛar. SIDI d aneqqam i řɛedyan nnes, Netta igga řɛedyan jar tiṭṭawin nnes.
NAH 1:3 SIDI ɣares ttasiɛ n řxaḍar u jjehd nnes imɣar u Netta war ittbarri ɛemmarṣ [wenni itteggen ddenb]. Bit. Abrid n SIDI di tḥaryaḍt u deg usemmiḍ, iseynuten aqa aten d taɛejjajt n iḍaren nnes.
NAH 1:4 Gimel. - Netta iwebbex řebḥar, ittarra i-t yuẓeɣ, marra iɣezran ittejja i-ten ttaẓɣen. Dalit. Bacan d Karmal sřawen, uřa d nnuwar n Lubnan isřaw.
NAH 1:5 Hi. - Idurar ttarjijin zzayes, u tiwririn fessyent, Waw. u tammurt tᵉttwassgeɛɛed-dd zzat i wudem nnes, uřa d marra wi xas izeddɣen!
NAH 1:6 Zayin. - Wi izemmaren ad iqqim ibedd zzat i wesxeḍ nnes, u wi izemmaren ad ikkar zzat i řḥaduq n weɣḍab nnes? Xit. Asɛar nnes ittwakebb-dd am tmessi u tiṣuḍar ttwaqeǧɛent-i-dd zzayes.
NAH 1:7 Tit. - Icna SIDI i ddurri deg wass n řeḥṣaret. Yud. Netta issen marra inni ɣares yarekkwařen.
NAH 1:8 Kaf. - [S] yict n řḥemřet ifeyyḍen ad yuqa amcan nnes u řɛedyan nnes ad ten iḍfar, [ař ɣa yadfen ɣar] taǧest.
NAH 1:9 Mim. - Min txarrṣem [xenni] x SIDI? Netta ad [t] iqḍa qaɛ. Aɣufi war dd-ittis martayen.
NAH 1:10 Aqa nitni ttwamuden ɛad am cbarq ak-d isennanen, u ɣellan am yimescaren, [ammu] i ɣa ttwaccen nitni qaɛ am uřum yuẓɣen.
NAH 1:11 Zzayek i dd-iffeɣ wenni ittxarrṣen di min war iḥřin x SIDI, amcawar i war isekkwin walu.
NAH 1:12 Ammu issawař SIDI: Waxxa nitni ttfeřḥen u [ǧan] deg waṭṭas, waxxa amenni nitni ad ttwaqessen u netta ad iɛdu. Waxxa necc ggiɣ xak aɣiř, [maca] necc war xak tteggeɣ aɣiř ɛad.
NAH 1:13 Řexxu ad arẓeɣ azayřu nnes [i] xak [immarsen], u Necc ad carrgeɣ tisɣunin nnec.
NAH 1:14 SIDI iweṣṣa xak, aqa war zzayek ittiři ɛad ḥed s yisem nnec. Necc ad qeḍɛeɣ řexyařat ineqcen d [řexyařat] ifesyen zi taddart nnec. Necc ad ggeɣ anḍeř nnec, maɣar ufiɣ cek tefsused.
NAH 2:1 Xzar, x idurar [ttazzřen] iḍaren n wenni dd-yiwyen řexbar aṣebḥan, wenni ixebbaren s řehna. Ɛeyyed řeɛyudat nnec, [a] Yahuda, seqfeř lwuɛud nnec, maɣar wenni yareddǧen war ittɣimi iẓekkwi xak ɛad, netta inneqḍeɛ marra.
NAH 2:2 Ijjen wenni yuẓẓřen [x iwdan] s lɛunf i dd-igeɛɛed xak! Ɛess x lburj, ḥḍa abrid, semḥeḍ tijɛinna nnec, arni di jjhed nnec!
NAH 2:3 S minzi SIDI ad dd-yarr řɛezz n Yaɛqub, [aqa-t d] řɛezz n Israil. Maɣar ikeccaḍen keccḍen ten, u nitni ɣeḍřen tizermin nsen.
NAH 2:4 Tcappat [n useřqi] n ayt n bu-teɣruḍt zewɣent, iryazen imeḥḍen [bedden] sswejden i umenɣi [s warruḍ] azeggʷaɣ iḥedqen, ɣar [tessiqt n] tmessi n wuzzař n ikarruten [n umenɣi], deg wass i di i ɣa issewjed ixef nnes u [ticejjura n] umerzi ad nnhezzen.
NAH 2:5 Ikarruten n umenɣi hajen deg ibriden, aqa ẓẓeɛwaḍen zi ssa ɣar da deg wazzayen, ttwaḍharen am yiṣefḍawen, nitni gemmaren da d diha am wassamen.
NAH 2:6 Netta ittxarreṣ deg ayt n jjehd, nitni [maca] ttneqraḍen am gguren nitni ttazzřen ɣar řḥiḍ nsen, [mani] ibedd ssqef [n uhjam] iwjed.
NAH 2:7 Tiwwura n iɣezran nnurezment, u řeqṣar ad ifsi.
NAH 2:8 Aqa tamesřact tbedd nican! Nettat ad tᵉttwaɛarra, ad tᵉttwassgeɛɛed, u tiyya nnes sɣuyyunt amecnaw abarri n tedbirin, [am] ccatent deg idmaren nsent.
NAH 2:9 Ninwa am yijj n uyeřmam n waman zeg wass i di iǧa. [Řexxu maca] arekkweřen nitni. Beddem! Beddem!, [ttřaɣan nitni], [maca] uřa d ijj war dd-ittneqřib.
NAH 2:10 Keccḍem nnuqart, keccḍem ureɣ! War din qeṭṭu i řeknuz, ɣar ucewwar n ɛřam kuř řeqcuɛ.
NAH 2:11 Texwa, tᵉttwakecceḍ u tᵉttwareddeǧ nettat, uř ifsi uca ifadden fecřen, ttekksent as tijɛinna marra u iɣembab nsen warɣen marra.
NAH 2:12 Mani iǧa řexxu řmargeḥ n wayraden, d řmedweř n wayraden imeẓyanen, mani yuyur weyrad, aqa-tt d tayradt ak-d weyrad ameẓyan [am] uřa d ijj issnexřeɛ i-ten?
NAH 2:13 [Mani iǧa řexxu] wayrad nni imezzqen min ḥdajen tarwa nnes u ijeyyef i tayradin nnes, d wenni iccuren ifran nnes s ukecceḍ, d imucan nnes n udurri zi min ittwacarrgen?
NAH 2:14 Xzar, [Necc ad iřiɣ] xak, [ammu i] iqqar SIDI n řɛeskarat, Necc ad arreɣ ikarruten nnec d ddexxan. Ad cceɣ ssif iyraden nnec imeẓyanen, u Necc ad qeḍɛeɣ takeccaḍt nnec zi temmurt u ɛemmarṣ ɛad ad tᵉttwaseř tmijja n ireqqasen nnec.
NAH 3:1 Uct x tendint n idammen! Aqa-tt d axarriq d lɛunf marra, tukkarḍa war tᵉttbeddi ca.
NAH 3:2 Řḥess n urekkuḍ, řḥess n uqarqeb n tjarrarin, iysan ittazzřen deg wenneḍ d ikarruten ineṭṭwen.
NAH 3:3 Amennay inya, ssif ittwesseg, fřitca [aqa-tt] am wassam. Aṭṭas d inni ittwanɣen u [aqa din] aɛurric n imettan, řxecbat war ɣarsent řḥed, [wah], ttenqraḍen di řxecbat nsen.
NAH 3:4 Zi ssibbet n waṭṭas n farq-ccɣeř n temɣart řmuḥesna, n lalla n tseḥḥart, tenni izznuzan řegnus s farq-ccɣeř nnes uřa d [marra] řaǧat s useḥḥar nnes,
NAH 3:5 xzar, [s uya ad xam iřiɣ], [ammu] iqqar SIDI n řɛeskarat, u Necc ad ssgeɛɛdeɣ timuwwa [n warruḍ nnem] tiwwa i uɣembub nnem, u Necc ad ssecneɣ i řegnus tuɛɛaryent nnem, u řefḍiḥet nnem i tgeldiwin.
NAH 3:6 Necc ad cem řeqfeɣ s nnɛawat, u ad cem ssfeḍḥeɣ u ad cem arreɣ i usfurrej.
NAH 3:7 Xenni ad imsar aqa man wen cem i ɣa iẓaren, ad zzayem yarweř, ad yini “[Tandint n] Ninwa txarreb! Wi zzayes i ɣa iceḍnen?” Mani d am i ɣa yarzuɣ inni cem i ɣa issfewwjen?
NAH 3:8 Ma cem ḥsen zi Nu-Amun nni ittɣiman ɣar iɣezran, am d as qewwaren waman, [ařami] řebḥar d acbar nnes n zzat, [aqa] řḥiḍ nnes igeɛɛed zi řebḥar.
NAH 3:9 Kuc tuɣa d ṣṣulṭa nnes, uřa d Misřa, war tuɣi ɣares aneggar. Fuṭ d ayt n Libiya tuɣa aten zeg imɛawnen nnec.
NAH 3:10 Uřa d nettat tuyur di lmenfa, di tmeḥbast. Uřa d iḥenjiren nnes ttwařebzen di tɣemmura n marra n tebridin, u x imcennɛen nnes nḍaren xasen taqedduḥt u marra imɣaren nnes ttwacarfen s ssnaseř.
NAH 3:11 Uřa d cem ad tescared ad tessnuffared ixef nnem. Ɛawed cem ad tarzud ijj n lburj [i udurri] zi řeɛdu nnem.
NAH 3:12 Marra lqelɛat nnem am wurtan ak-d řbacur. Mařa ttwanhezzen, ad wḍan deg uqemmum n wenni ixsen ad ten yecc.
NAH 3:13 Xzar, aqa d wa d řgens nnem, [aqa-t d] timɣarin. Ttnurzment tewwura n temmurt nnem qaɛ i řeɛdu, timessi ad tecc iɛumad nnem i ubelleɛ.
NAH 3:14 Ayem aman i yixef nnem i řeḥṣaret, semten lqelɛat nnem, bedd di třaxt, ɛefs di tarrist, seqseḥ iẓra ittwassuydan!
NAH 3:15 Timessi ad cem tecc din, ssif ad cem ineɣ, ad cem tecc am bu-weřsaḥ! Arni deg ixef nnem am bu-weřsaḥ, arni deg yixef nnem am tmurɣi.
NAH 3:16 Cek tessmarnid deg isebbaben nnem ktar zeg itran n ujenna. Bu-weřsaḥ ad issars tiřmect nnes uca ad iḍwa.
NAH 3:17 Tarwa n taṣiřet nnem am yijj n weyřaf n tmurɣi u řɛeskarat nnem am yixenfusen imeqqranen, inni yarsan di řeḥyuḍ deg yijj n wass d aṣemmaḍ. Řami dd-tenqar tfuct, ṭṭawen ssenni deɣya. War issin ḥed amcan nsen. Mani ruḥen nitni?
NAH 3:18 Imeksawen nnec ttnudumen, [aya,] ajeǧid n Accur, ayt n jjehd nnec ttᵉṭṭṣen, řgens nnec ad t zeǧɛen x idurar, uca uřa d ijjen war [ten] issmun ca.
NAH 3:19 War din asgenfi i tareẓẓit nnec, ittekkes ac uyezzim! Marra inni i xak isřin řexbar, ad ccaten deg ifassen zi ssibbet nnec, maɣar x man wen war iɛeddu ca řebda řɣar nnec?
HAB 1:1 Řḥukm issaggʷaden nni iẓra unabi Ḥabaqquq.
HAB 1:2 “[A] SIDI, ař meřmi i ɣa qqimeɣ ttřaɣiɣ u Cek war d ayi tᵉttesřid, ař meřmi i ɣa qqimeɣ ttřaɣiɣ ‘Lɛunf!’, u Cek war d ayi tessenjamed!
HAB 1:3 Mayemmi d ayi tessecned řmuɛṣiyyet, u tᵉttɣimid txezzared ɣar řeɣben? Maɣar areddeǧ d lɛunf aqa aten arendad inu, u imsar umcubbec, ikkar-dd uruddez.
HAB 1:4 X uya tedweř ccariɛa břa jjehd, u war dd-itteffeɣ ɛemmarṣ řḥeqq, maɣar aɛeffan ittenneḍ i umsegged. X uya i dd-itteffeɣ řḥeqq ifarɣ.
HAB 1:5 Xzarem jar řegnus, xzarem, innurzem uqemmum s utebhet, maɣar Necc ad ggeɣ ict n řxedmet deg wussan nwem i war tᵉttimnem mařa tt ḥajan.
HAB 1:6 Maɣar xzarem, Necc ssekkareɣ Ikaldaniyyen, řgens iqesḥen u imqeǧqen, wenni igguren di řewseɛ n temmurt, ḥima ad iṭṭef tizeddiɣin nni war iǧin nnes.
HAB 1:7 Issaggʷaden u issnexřaɛen iǧan! Řḥeqq nnes d uɛuǧi nnes tteffɣen-dd zzayes.
HAB 1:8 Iysan nnes fsusen x uɣiřas, nitni mmuzzaren mahu uccanen n ǧiřet, imnayen nnes ttrabaɛen. Imnayen nnes ttasen-dd zi řaggʷaj, nitni ṭṭawen am ugider nni ittqeǧqen maḥend ad yecc.
HAB 1:9 Aqa netta ittas-dd, amen ikmeř, i lɛunf, iɣembab nsen [xezzaren] ɣar zzat, u netta issmuna imeḥbas am yejdi.
HAB 1:10 Netta ittqeṣṣar x ijeǧiden u inni i ɣar teǧa ṣṣulṭa ittegg i-ten d taḍeḥḥact. [Wah,] netta iḍeḥḥec x kuř lqelɛa, minzi netta ittɛurrec ucař uca ad tent iṭṭef.
HAB 1:11 Xenni ad inneɛtar [am] usemmiḍ, ad iɛdu, ad idweř d amednub, [maɣar] jjehd nnes wanita d arebbi nnes.
HAB 1:12 Zi mecḥař uya ma Cek war teǧid d SIDI, AREBBI inu, Amqeddas inu? Neccin war nettmetti ca! [A] SIDI, Cek tarrid i-t i řḥukm, [a] Taṣḍart, Cek tfarzed t maḥend ad yiři i lɛiqab.
HAB 1:13 Cek d amezdag aṭṭas n tiṭṭawin ḥima ad twařant řɣar. Cek war tzemmared ad tṣewḍed di řmuɛṣiyyet. Mayemmi tṣewḍed [waha] deg yinni itteggen s řeɣdaret? [Mayemmi] i tesseɣḍed xmi iṣarreḍ uɛeffan i wenni i xas iseggden?
HAB 1:14 Cek teggid iwdan am yiseřman n řebḥar, am [immudar] nni ittbuɛen [x temmurt] i war ɣar iǧi řḥakem!
HAB 1:15 S tsennart issgeɛɛad i-ten-dd marra, iyarru i-ten s tracca nnes, uca issmun i-ten di tracca nnes n udellaɛ. X uya ifarreḥ u ittfaja.
HAB 1:16 X uya iwehheb tiɣarṣa i tracca nnes, uca ibexxar tiwhibin n řebxur i tracca n udellaɛ nnes. minzi zzaysent i tedweř tesɣart nnes temɣar, uřa d macca nnes aqa tředd.
HAB 1:17 Ma iɛeddeř ad iqqim issexwa tracca nnes x man aya, uca ad iqqim řebda ineqq řegnus břa ma ad yejj [ḥed]?
HAB 2:1 Necc ad beddeɣ deg wemcan n tɛessast inu u ad ssbeddeɣ ixef inu x ṣṣumɛet n tɛessast, ad ṣewḍeɣ maḥend ad ẓareɣ min i d ayi ɣa yini Netta, u min i dd ɣa yarreɣ x ucetci inu.
HAB 2:2 Yarra-dd xafi SIDI, inna: Ari řewḥiy ari t ifarz x teřwiḥin, maḥend wenni iɛeddun am dd-ittazzeř, izemmar ad t iɣar.
HAB 2:3 Maɣar řewḥiy [ittraja] ɛad ař řweqt nni yuran. Ittemḥizwar ɣar uqeṭṭu u war issxarriq ca. Mařa iqqim war dd-ittis, qqim raja t, maɣar ad dd-yas s tidett, war iɛeṭṭař.
HAB 2:4 Xzar, aqa ittuff, [wah,] řeɛmar nnes war iseggem dayes, maca amsegged s l’iman nnes ad iddar.
HAB 2:5 S tidett, binu aqa icemmet! [Binu aqa-t am] yijj n bu-nnfaxet wenni war ittareyyḥen, wenni issemɣaran řeɛmar nnes [ameřhaf] am řaxart. Netta war ittjjiwin am řmewt u iyru ɣares marra řegnus u issmun ɣares marra iyduden.
HAB 2:6 Ma war dd xas ttiwyen ijj n wawař iweznen uřa d ijj n yeẓri iccur s řemɛani innufaren, ad inin: Uct x wenni ijarrwen min war iǧin nnes! Ař meřmi [ɛad]? Uct x wenni issdeqqařen ixef nnes s werhan!
HAB 2:7 Ma war dd-ttekkaren s řɣefřet inni i cek ɣa izeɛfen, u ma war dd-ttfaqan ca inni cek ɣa yarren tᵉttarjijed, u ma war d asen tᵉttiřid d takeccaḍt nsen?
HAB 2:8 Maɣar cek tkeccḍed aṭṭas n řegnus, ad cek keccḍen marra řegnus iqqimen di ssibbet n idammen n iwdan d lɛunf [x] temmurt, u [x] tendint u [x] marra inni dayes izeddɣen.
HAB 2:9 Uct x wenni ikessben s řɣecc takeccaḍt i taddart nnes, maḥend ad ibna řɛucc nnes di řuɛřa, ḥima ad injem [ammu] zeg ufus n řɣar.
HAB 2:10 Cek tcawared řefḍiḥet i taddart nnec, ḥima ad teqḍid x řegnus, uca [ammu] i teggid ddenb di řeɛmar nnec.
HAB 2:11 Minzi aẓru isɣuyyu-dd zi řḥiḍ, u taḥnact tᵉttarra-dd [xas] zi jar tefřawt.
HAB 2:12 Uct x wenni ibennan [ict n] tendint s idammen uřa x wenni issrusan dsas [n yict n] tendint s řɣecc!
HAB 2:13 Xzar, ma war iǧi zi SIDI n řɛeskarat, aqa řegnus arebbren ixef nsen i tmessi, u ccuɛub ttaḥřen i walu?
HAB 2:14 Maɣar tammurt ad tᵉttwaccur s tussna n uɛuǧi n SIDI, am mammec ttdařen waman řebḥar.
HAB 2:15 Uct x wenni i ɣa isseswen jjar nnes, wenni ixeǧḍen [binu] s ssem nnec u [xenni] issᵉscar i-t, maḥend ad iẓar tuɛɛaryant nsen.
HAB 2:16 Ad tessjjiwned ixef nnec s řefḍiḥet deg wemcan n ccan. Su cek [řexxu] ɛawed, uca ejj axtan nnec war iǧin ittban. Řkas zeg ufus afusi n SIDI ad ɣarek dd-yas, uřa d řefdiḥet x uɛuǧi nnec.
HAB 2:17 Maɣar řɛunf i teggid ḍidd i Lubnan ad cek ideř uřa d areddeǧ n řmař i zi [ten] tessiggʷded, di ssibbet n idammen n iwdan d lɛunf [x] temmurt, u [x] tendint u [x] marra inni dayes izeddɣen.
HAB 2:18 Ma tizi n ijj n řexyař ineqcen, umi t inqec uneqqac [s yixef nnes], [man tizi n] yijj n řexyař ifesyen [umi aneqqac nnes] d ijj n umseřmed n ixarriqen, řami wenni t iggin ittceř x min igga, umi ittegg l’aṣnam ignawen?
HAB 2:19 Uct x wenni iqqaren i ukeccuḍ ‘Faq!’ u i weẓru ignawen: ‘Kkar!’. Ma [izemmar] ad isseřmed? Xzar, aqa řeḥḥfen t s wureɣ d nnuqart u war dayes qaɛ buḥbeř.
HAB 2:20 SIDI aqa-t di Zzawect nnes iqeddsen. Susem zzat i wudem nnes, marra tammurt!
HAB 3:1 Taẓaǧit n Ḥabaqquq, anabi, deg waṭṭas n tmijjiwin.
HAB 3:2 [A] SIDI, [umi] sřiɣ řexbar nnec, tuɣa tteggʷedeɣ. [A] SIDI, sneddar řxedmet nnec ɛawed di řwesṭ n iseggʷusa, seccen i-tt di řwesṭ n iseggʷusa, deg weɣḍab ɛqeř x řeḥnunect nnec.
HAB 3:3 Arebbi yusa-dd zi Tayman u Amqeddas zeg wedrar n Faran. Silah. Lɛaḍama nnes tedřa ijenwan u aṣebbeḥ nnes iccur tammurt.
HAB 3:4 Tuɣa din ict n tessiqt am tfawt, [ffɣent-i-dd] fřitcat n wassam zeg ufus nnes, aqa-tent ɣares, u daysent tnuffar tzemmar nnes.
HAB 3:5 Ṭṭaɛun ittizwar i wudem nnes, řḥaduq n tmessi iffeɣ-dd zeg iḍaren nnes.
HAB 3:6 Netta ikkar uca yarra tammurt tᵉttenhezza, Netta iẓra u igga ad arjijen řegnus! Idurar n zic ttwařebzen ařami dewřen d taɛejjajt, tiwririn zi mecḥař uya ɣensent! Ibriden ittduman i řebda aqa aten nnes.
HAB 3:7 Necc ẓriɣ iqiḍan n Kucan ttwaḥṣaren, tijartiřin n iqiḍan n temmurt n Midyan ittawi tent usemmiḍ s jjehd.
HAB 3:8 Ma yarɣa [weɣḍab] n SIDI x iɣezran? Ma tuɣa aɣḍab nnec ḍidd i iɣezran? Ma tuɣa aduqqez nnec [n ufugem] ḍidd i řebḥar, řami tnedhed x yeysan nnec, x ikarruten nnec n usenjem?
HAB 3:9 Řqews nnec ittwaɛarra marra, tijaǧitin i tessiwřed [tuɣa atent] d iɛumad necc [i useqsaḥ]. Silah. Tfeǧqed tammurt s iɣezran.
HAB 3:10 Řami Cek ẓrin idurar, iřqef i-ten řewjeɛ, řḥemřet n waman tuɣa tɛeddu, [aman] ihewřen arrin tmijja nsen tᵉttwaseř, geɛɛden ifassen nsen [ɣar ujenna].
HAB 3:11 Tafuct, [uřa] d uyur, qqimen bedden di tzeddiɣt nsen. Aqa ruḥen zi ssibbet n tfawt n fřitcat n řqews nnec, zi ssibbet n tissiqt n lansa nnec itteḥduduqen.
HAB 3:12 S wesxeḍ teṣṣurufed tiwa i temmurt, s weɣḍab nnec tɛefsed x řegnus.
HAB 3:13 Cek teffɣed i usenjem n řgens nnec, i usenjem n umedhun nnec. Aqa cek tqeǧɛed tazeqqa n taddart n uɛeffan, tɛarrid dsas ař iri. Silah.
HAB 3:14 Azeǧif n iɛeskariyyen nnes imezwura, aqa tessnuqqbed i-t s lansat nsen. Nitni usin-dd ɛeřfen-dd maḥend ad ayi zeǧɛen. Aqa d meẓri nsen mařa [zemmaren] ad ccen řmeskin s tnuffra.
HAB 3:15 Ak-d iysan nnec tᵉṭṭfed abrid di řebḥar, akuffu n waman imeqqranen.
HAB 3:16 [Řami] sřiɣ, yarjij uɛeddis inu. Umi [sřiɣ] řḥess [nni], arjijen iyencicen inu, axessar yudef ɣar iɣsan inu, u necc arjijeɣ deg wemcan inu. [Waxxa amenni] ad rajiɣ di řxaḍar x wass n řeḥṣaret, xmi ɣa issgeɛɛed x řgens, [u] ad aneɣ iḥṣar ak-d bandiyyat [nnes].
HAB 3:17 Waxxa war ittnuwwar wartu, u war din tᵉttiři [ɛad] řɣiǧet ɣar tzayart, [waxxa] řɣiǧet n zzitun ad tefceř uřa d iyyaren war ttɣimin tticen řmacuř, u ad ttwaqeḍɛen wuǧi zi řkuři u war ttiřin [ɛad] ifunasen d tfunasin di řkurit,
HAB 3:18 [ɛad amenni] necc ad sřiweřweɣ i SIDI, ad farḥeɣ zi AREBBI n usenjem inu.
HAB 3:19 SIDI, Sidi inu, [Netta] d jjhed inu. Netta ittegg iḍaren inu [fsusen] am yiḍaren n tudadin, Netta ittejja ayi ṣṣurufeɣ x řegɛudi. I umeqqran n imeɣnajen. Ak-d uzenzun inu x ifiřan.
ZEP 1:1 Awař n SIDI i dd-yusin i Ṣafanya, mmis n Kuci, mmis n Jadalya, mmis n Amarya, mmis n Ḥizqiya, deg wussan n Yuciya, mmis n Amun, ajeǧid n Yahuda.
ZEP 1:2 Necc ad kkseɣ qaɛ marra [min iǧan] zeg wudem n temmurt, [ammu i] iqqar SIDI.
ZEP 1:3 Ad kkseɣ bnadem d řmař, ad kkseɣ ijḍaḍ n ujenna d iseřman n řebḥar d tɛenkrifin ak-d iɛeffanen, [wah] Necc ad qḍiɣ bnadem x wudem n temmurt, [ammu] i iqqar SIDI.
ZEP 1:4 Necc ad sswiẓẓḍeɣ s ufus inu ḍidd i Yahuda u ḍidd i marra imezdaɣ n Urcalim. Necc ad teḥḥiɣ min iqqimen zi Baɛl zeg wemcan-a ak-d yisem n ikehhanen n l’aṣnam,
ZEP 1:5 d yinni isejden x tzeɣwin zzat i řɛeskar n ijenwan, u inni, am bendqen, jjuǧen ɣar SIDI, u [aqa] jjuǧen i Malkam,
ZEP 1:6 uřa d yinni dd-ittɛaqqaben zi ḍeffar n SIDI, u yinni war arezzun x SIDI u war xas ttsseqsin.
ZEP 1:7 Seɣd zzat i wudem n Sidi inu, SIDI, maɣar ass n SIDI yudes. SIDI aqa issewjed ict n tɣarṣt, Netta issqeddes imeɛraḍen nnes.
ZEP 1:8 Ad imsar deg wass n tɣarṣt n SIDI, aqa Necc ad ɛaqbeɣ řḥukkam d iḥenjiren n ujeǧid d marra inni yarrḍen arruḍ aɣrib.
ZEP 1:9 Deg wass nni ad ɛaqbeɣ marra inni ineggzen tanebdat, inni ittɛemmaren taddart n siditsen s lɛunf d řɣecc.
ZEP 1:10 Deg wass nni, iqqar SIDI, ad [din] yiři ijj n řḥess n iɣuyyan zi Tewwart n Iseřman, uřa d [řḥess n] yinni ittrun zi tendint n jdid d ict n tareẓẓit temɣar zi tewririn.
ZEP 1:11 Rum, imezdaɣ [n jjihet] n Umehraz, minzi marra isebbabben ttwaseɣḍen, marra inni iwezznen tmenyat ttwaqeḍɛen.
ZEP 1:12 Di řweqt nni ad beqqceɣ di Urcalim s řeqnadeř, u Necc ad ɛaqbeɣ iryazen inni ittwagdaren zi řatar nni iqqimen n binu, inni iqqaren deg wuř nsen: ‘SIDI war ittegg řxar u war ittegg řɣar!’
ZEP 1:13 Agřa nsen ad yiři i tkeccaḍt d tudrin nsen ad dewřent d řxarbet. Nitni ad bnan tudrin i yixef nsen, [maca] war daysent zeddɣen ca, nitni ad ẓẓun tizayarin, [maca] war sessen zi binu nnes.
ZEP 1:14 Ass ameqqran n SIDI yudes, aqa-t yudes, deɣya yusa-dd. Řḥess n wass n SIDI! Ad isɣuy bu-teɣruḍt din s yict n tɣuyyit tarzeg.
ZEP 1:15 Ass nni [ad yiři] d ass n uduqqez [n ufugem], d ass n řeḥṣaret d ḍḍiqa, d ass n uxarreb d wareddeǧ, d ass n ṭṭřam d taǧest, d ass n iseynuten d useynu ibbumbes,
ZEP 1:16 ijj n wass n usuḍi deg uyicc n icarri u n iɣuyyan [n umenɣi] ḍidd i tneddam ifaryen u ḍidd i ṣṣumɛat nni [iǧan] ɣar tɣemmura.
ZEP 1:17 Necc ad ḥṣareɣ iwdan u nitni ad uyuren am yidarɣařen, minzi nitni ggin ddenb x SIDI. Idammen nsen ad ttwazeǧɛen amecnaw tɛejjajt, d weysum nsen amecnaw ixxan.
ZEP 1:18 Uřa d nnuqart nsen d wureɣ nsen war zemmaren ad ten ssnejmen deg wass n uduqqez [n ufugem] n SIDI. Timessi n tusmi nnes [iqeddsen] ad tecc marra tammurt, maɣar deɣya Netta ad iqḍa marra imezdaɣ n temmurt.
ZEP 2:1 Sdewřem-dd ixef nwem ɣar řeɛqeř, dewřem-dd ɣar řeɛqeř, [a] řgens břa aseḍḥi,
ZEP 2:2 qbeř i ɣa iffeɣ řḥukm - ass am uřum iɛeddu - qbeř i xawem dd ɣa yas řḥaduq n weɣḍab n SIDI, qbeř i xawem dd ɣa yas wass n weɣḍab n SIDI.
ZEP 2:3 Arzum x SIDI, marra imwaḍɛen n temmurt, inni itteggen řḥeqq nnes! Arzum tasegda, arzum awaḍeɛ, ad taɣ ad tennuffarem kenniw deg wass n weɣḍab n SIDI.
ZEP 2:4 Maɣar Ɣazza ad tᵉttwajj, Acqalun [ad tedweř] d ict n temmurt ittwareddǧen, Acdud ad xas azzřen ɣar wezyen n wass, uca Ɛaqrun ad tᵉttwaqřeɛ.
ZEP 2:5 Uct x imezdaɣ n tma n řebḥar, řgens n Ikaritiyyen. Awař n SIDI ad xawem yiři, [a] Kenɛan, tammurt n Ifilisṭiniyyen! Necc ad kenniw hellkeɣ, war ittiři umezduɣ ɛad.
ZEP 2:6 [Tammurt nni x] tma n řebḥar ad tiři d ddmani n tarewsa, uřa d wanuten i imeksawen d řkurit [i wuǧi].
ZEP 2:7 Ad tiři temmurt i min iqqimen n taddart n Yahuda, ḥima ad dayes arewsen [tiḥimriwin nsen]. Di tudrin n Acqalun ad din arsen ɣar tmeddit, maɣar SIDI, AREBBI nsen, ad ɣarsen yarzef, u Netta issneqřeb tameḥbast nsen.
ZEP 2:8 Necc sřiɣ i useḥqar n Mu’ab d uceqqef n ayt n Ɛammun, i zi ssḥeqaren nitni řgens inu, u ssgeɛɛden ixef nsen aṭṭas ḍidd i temmurt nsen.
ZEP 2:9 S uya, s tidett am ddareɣ Necc, iqqar SIDI n řɛeskarat, AREBBI n Israil: Mu’ab ad tedweř am Sadum, u ayt n Mu’ab am Ɛamurra, zi ssibbet n uɣemmuy n tzeggʷart u zi ssibbet n wanu[ten] n tmeǧaḥt, ict n temmurt ittwareddǧen i řebda. Min iqqimen n řgens inu ad ten ikecceḍ u inni iqqimen n řgens inu ad ṭṭfen tasɣart nsen d řwart.
ZEP 2:10 Aya [ad] ten [iřqef] zi ssibbet n nnfaxet nsen, maɣar nitni tuɣa sseḥqaren u arzmen aqemmum nsen x řgens n SIDI n řɛeskarat.
ZEP 2:11 Issaggʷad ad ɣarsen iffeɣ SIDI, maɣar Netta ad iqḍa x marra irebbiten zi temmurt, u nitni ad as bendqen, kuř ijj zeg wemcan nnes, marra tigzirin n řegnus.
ZEP 2:12 Kenniw ɛawed, [a] ayt n Kuc, ttwassnuqqben nitni zi ssif inu.
ZEP 2:13 Netta ad isswiẓẓeḍ s ufus nnes ɣar ccamal, Netta ad yareddeǧ Accur, u ad yarr Ninwa d ict n temmurt ittwareddǧen, tuẓeɣ am řexřa.
ZEP 2:14 Di řwesṭ nnes ad geyyrent tḥimriwin, marra řmař nnes, aqa tteggen am yijj [ubarru n] n řgens. Uřa d bu-iɛuqqan, [wah] uřa d twuct n ǧiřet ad ssensen x izeǧifen n ipilaren nnes. Tmijja [nsen] ad tɣennej zi řkazi, areddeǧ ad yiři x tnebdat nnes, maɣar tafrewt n tengelt tᵉttwaɛarra.
ZEP 2:15 D ta d tandint isřiwřiwen, tenni iqqimen di řaman, tenni innan deg wuř nnes: ‘Necc [d tenni], war teǧi d tenneɣni!’ Mammec tedweř d [ict n řqecɛet n] unexřiɛ, ict n wemcan n arraḥet i řmař n řexřa! Marra inni xas ɣa ikken, ad [xasen] iṣeffar [u] s useḥqar ad issenhezz afus nnes.
ZEP 3:1 Uct xam, tenni iɣewwɣen d yarṣuḍen, tandint n ddeǧ!
ZEP 3:2 Nettat war tᵉttesři ɣar [uřa d ict n] tmijja, War tqebbeř aweddeb, nettat war tᵉttciř x SIDI, nettat war tᵉttqarrab ca ɣar AREBBI nnes.
ZEP 3:3 Řḥukkam nnes di řwesṭ nnes d ayraden ittarrujduden, řquḍat nnes d uccanen n ǧiřet, inni war ittejjin walu ař tuffut.
ZEP 3:4 Inabiyyen nnes daysen řefcuc, nitni d iryazen ixeddaɛen! Ikehhanen nnes ssfesden Zzawect Iqeddsen, nitni xalfen Ccariɛa.
ZEP 3:5 SIDI amsegged [aqa-t] di řwest nnes. Netta war ittegg ca min war iseggden. Kuř tuffut ittarra řḥeqq nnes ɣar tfawt, ɛemmarṣ war tneqqeṣ! [Maca] wenni itteggen min war iseggden, war issin ca aseḍḥi.
ZEP 3:6 Necc qḍiɣ řegnus, areddǧeɣ ṣṣumɛat nsen n tɣemmura. Necc xřiɣ i tbridin nnes, ařami uřa d ijjen war iqqim ɛad ittsara dinni. Tineddam nsen ttwareddǧent, war iqqim ḥed, uřa d ijj n umezduɣ.
ZEP 3:7 Necc nniɣ: Ittxeṣṣa cem ad ayi teggʷeded, ad teksid aweddeb!, ḥima war tᵉttwakkes Tzeddiɣt nnes, [s] marra min d as ɣa ggeɣ. S tidett, nitni ɣewwɣen zic, maḥend ad ssfeḍḥen timegga nsen ař ṭṭarf.
ZEP 3:8 S uya rajam ayi, iqqar SIDI, ass i di dd ɣa kkareɣ i tkeccaḍt. Minzi aya d řḥukm inu [iseggden] aqa ad jarweɣ řegnus, ad ssmuneɣ tigeldin, ḥima ad xasen ssfesyeɣ asxeḍ inu, marra řḥaduq n weɣḍab inu, maɣar s tmessi n tusmi inu [iqeddsen] ad tᵉttwacc marra tammurt.
ZEP 3:9 Minzi xenni Necc ad beddřeɣ [řḥard] n řegnus iyencicen imezdagen [ad ten wceɣ], ařami i ɣa řaɣan x Yisem n SIDI, ḥima ad t ɛebbden [am s] yict n teɣruḍt.
ZEP 3:10 Zeg ujemmaḍ n iɣezran n Kuc, inni xafi ittẓaǧan, yeǧis n immṭarrcen inu, ad [tt] awyen nitni [amecnaw] tewhibt inu.
ZEP 3:11 Deg wass nni war tseḍḥid ca [ɛad], x marra timegga i zi xafi tɣewwɣed, minzi ad kkseɣ zi řwesṭ nnem inni ittfeyycen di nnfaxet, u kenniw war tessgeɛɛadem ɛad ixef nwem x wedrar inu Iqeddsen.
ZEP 3:12 Necc ad jjeɣ di řwesṭ nnem ijj n řgens ittwaḥṣar, iẓeřḍ. Nitni ad arewřen ɣar Yisem n SIDI.
ZEP 3:13 Min iqqimen n Israil war ittegg min war iseggden, nitni war ssxarriqen ca, u deg uqemmum nsen war ittᵉttwifi yiřes issxarriqen, maca nitni ad heddan ad zzřen, u uřa d ijjen ad ten issnexřiɛ.
ZEP 3:14 Ɣennej, [a] yeǧis n Ṣihyun, sřiwřew, [a] Israil. Farḥ u tfaǧid s marra uř nnem, [a,] yeǧis n Urcalim!
ZEP 3:15 SIDI ikkes řeḥkamat nnem, Netta aqa imḥa řeɛdu nnem. Ajeǧid n Israil, SIDI, aqa-t di řwesṭ nnem! War tẓarred ɛad řɣar.
ZEP 3:16 Deg wass nni ad inin i Urcalim: War tteggʷed ca, Ṣihyun! War ttejji ifassen nnem ad arxun ɛemmarṣ [ɛad]!
ZEP 3:17 SIDI, AREBBI nnem, aqa-t di řwest nnem, Bu-teɣruḍt nni i dd ɣa yawyen asenjem Netta ad zzayem ifarḥ s waṭṭas, Netta ad iseɣḍ di tayri nnes, Netta ad xam isřiwřew s uɣennej.’
ZEP 3:18 Necc ad ssmuneɣ inni iceṭṭnen [umi war zemmaren ad carcen] [di] tmesmunt ittwaggen [i řɛid]. Aqa nitni zzayem! Ddqeř n řḥegra aqa-t xas.
ZEP 3:19 Xzar, Necc ad ceɣřeɣ ixef inu ak-d yinni cem iḥṣaren. Necc ad ssnejmeɣ iqejdaḥen u yinni ittwassuffɣen ad ten ssmuneɣ. Necc ad asen wceɣ řɛezz d yijj n isem icennɛen, di marra ddunect nni ten tuɣa issfeṭṭḥen.
ZEP 3:20 Di řweqt nni ad kenniw dd-arreɣ, u di řweqt nni ad kenniw ssmuneɣ, Necc ad awem wceɣ ijj n yisem [icennɛen] d řɛezz jar marra řegnus n ddunect, xmi i zzaywem ɣa ssenqeřbeɣ tameḥbast nwem zzat i tiṭṭawin nwem, inna SIDI.
HAG 1:1 Deg useggʷas wiss tnayen n ujeǧid Dariyus, deg uyur wiss setta, deg wass amezwaru n uyur, yusa-dd wawař n SIDI, s ufus n Ḥaggay, anabi, ɣar Zarubbabil, mmis n Ca’altiyal, lwali n Yahuda, u ɣar Yahucaɛ mmis n Yahuṣadaq, arrays n ikehhanen, inna:
HAG 1:2 “Ammu i issawař SIDI n řɛeskar, iqqar: Řgens-a iqqar: ‘Ɛad war dd-yiwiḍ řḥař, řḥař maḥend ad tᵉttwabna Taddart n SIDI ɛawed.’”
HAG 1:3 [Xenni] yusa-dd wawař n SIDI s ufus n unabi Ḥaggay, inna:
HAG 1:4 “Ma yiwed-dd řḥař ḥima kenniw ad tzedɣem di tudrin nwem ittwaseqqfen, [am] Taddart-a d řxarbet?
HAG 1:5 [Maca] řexxu inna SIDI n řɛeskarat: Ḥḍam mliḥ ibriden nwem [deg] wuřawen nwem ...
HAG 1:6 Kenniw tzarrɛem aṭṭas, tmejjarem drus. Kenniw tᵉttettem, war tᵉttjjiwinem, kenniw tsessem, [maca] war iǧi ařami i ɣa tescarem, kenniw tyarḍem arruḍ, [maca] war issḥemmi, u wenni d ɣa iṭṭfen řmunet, ad iṭṭef řmunet deg ict n tkemmust tᵉnnuqqeb.
HAG 1:7 Ammu i iqqar SIDI n řɛeskar: Ḥḍam mliḥ ibriden nwem [deg] wuřawen nwem.
HAG 1:8 Geɛɛdem adrar, awyem-dd akeccuḍ u bnam Taddart-a u Necc ad xas arḍiɣ u ad zzayes ttwassɛuǧeɣ, inna SIDI.
HAG 1:9 Kenniw tarrim taynit i waṭṭas [n řɣiǧet], [maca] xzarem, [aqa-t] mɣir drus u xmi t-i-dd-tᵉttawyem ɣar taddart, Necc ttsuḍeɣ xas. Mayemmi? [Ammu i] iqqar SIDI n řɛeskarat. Zi ssibbet n Taddart inu tenni [idewřen] d řxarbet, [am] kuř ijjen [zzaywem] ittazzeř x taddart [n yixef] nnes.
HAG 1:10 X uya mennɛen xawem ijenwan nnda u tammurt tmenneɛ [xawem] řɣiǧet nnes.
HAG 1:11 Necc řaɣiɣ-dd x řekḥeḍ i temmurt, x idurar, x imendi, x binu, x zzect, u x marra min i dd-tᵉttawi temmurt, uřa x iwdan u x řmař u x warber n ifassen.”
HAG 1:12 [Xenni] isřa Zarubbabil, mmis n Ca’altiyal, u [akides] Yahucaɛ, mmis n Yahuṣadaq, arrays n ikehhanen, u marra min iqqimen n řgens, ɣar tmijja n SIDI, AREBBI nsen, u ɣar wawařen n unabi Ḥaggay, am mammec i t issekk SIDI, AREBBI nsen. U nitni, řgens, ggʷeden zzat i wudem n SIDI.
HAG 1:13 Ibarreḥ Ḥaggay, amsexxar n SIDI, i řgens, inna: “Necc aqa ayi akidwem!” iqqar SIDI.
HAG 1:14 Uca issekkar SIDI buḥbeř n Zarubbabil, mmis n Ca’altiyal, lwali n Yahuda, uřa d buḥbeř n Yahucaɛ, mmis n Yahuṣadaq, arrays n ikehhanen, uřa d buḥbeř n marra min iqqimen zi řgens u nitni usin-dd u ggin řxedmet di Taddart n SIDI n řɛeskarat, AREBBI nsen.
HAG 1:15 deg wass wiss arebɛa u-ɛicrin n uyur, deg uyur wiss setta, deg useggʷas wiss tnayen n ujeǧid Dariyus.
HAG 2:1 Deg uyur wiss sebɛa, deg wass wiss waḥit u-ɛicrin n uyur, yusa-dd wawař n SIDI s ufus n Ḥaggay, inna:
HAG 2:2 “Siweř xenni ɣar Zarubbabil, mmis n Caɛaltiyil, lwali n Yahuda, u ɣar Yahucaɛ, mmis n Yahuṣadaq, arrays n ikehhanen, u ɣar min iqqimen zi řgens, ini:
HAG 2:3 Wi zzaywem iqqimen zeg inni iẓrin [ɛad] Taddart-a s uɛuǧi nnes amezwaru? D mammec i tt tᵉttwařam řexxu? Ma war teǧi jar tiṭṭawin nwem am walu?
HAG 2:4 Maca řexxu, mḥeḍ, [a] Zarubbabil, iqqar SIDI, mḥeḍ, [a] Yahucaɛ, mmis n Yahuṣadaq, arrays n ikehhanen, meḥḍem [kenniw] marra imezdaɣ n temmurt, iqqar SIDI. Kkarem ɣar řxedmet, maɣar Necc aqa ayi akidwem, [ammu i] iqqar SIDI n řɛeskarat.
HAG 2:5 Awař i zi ggiɣ ijj n Řɛahd akidwem, řami dd-teffɣem zi Miṣra, u Arruḥ inu, aqa aten [s tnayen idsen] bedden di řwesṭ nwem. War tteggʷedem ca!
HAG 2:6 Maɣar ammu i iqqar SIDI n řɛeskarat: Ɛad ict n twařa, [mɣir] drus n řḥař, Necc ad ssenhezzeɣ ijenwan d temmurt, řebḥar d řbarr.
HAG 2:7 Necc ad jjeɣ marra řegnus ad arjijen u ad dd-asen [s] min iɣřan aṭṭas zi marra řegnus u Necc ad ccureɣ Taddart-a [s] uɛuǧi!, [ammu i] iqqar SIDI n řɛeskarat.
HAG 2:8 Inu nnuqart u inu wureɣ, iqqar SIDI n řɛeskarat.
HAG 2:9 Aɛuǧi n Taddart-a taneggarut ad yiři d ameqqran x wenni n [Taddart] tamezwarut, iqqar SIDI n řɛeskarat, u Necc ad wceɣ řehna deg wemcan-a, [ammu i] iqqar SIDI n řɛeskarat.”
HAG 2:10 Deg wass wiss arebɛa u-ɛicrin n uyur wiss tesɛa, deg useggʷas wiss tnayen n Dariyus, yusa-dd wawař n SIDI s ufus n Ḥaggay, inna:
HAG 2:11 “Ammu i iqqar SIDI n řɛeskarat: Seqsam xenni ikehhanen [x] Ccariɛa, ini:
HAG 2:12 Xzar, ijjen iksi aysum iqeddsen deg ubeḥrur n warruḍ nnes u s ubeḥrur nnes iḥada aɣrum niɣ min iwennan niɣ binu niɣ zzect niɣ min ma ittemwaccan, ma man aya ad idweř iqeddes?” Uca arrin-dd ikehhanen, nnan “Lla!”
HAG 2:13 Uca inna Ḥaggay: “Mařa ijj idweř ixmej zeg ict n řxecbet, uca xenni iḥada ca zi marra man aya, ma man aya ad idweř [xenni] ixmej?” Arrin-dd [xas] ikehhanen, nnan: “Ad idweř ixmej!”
HAG 2:14 [Řexdenni] yarra-dd Ḥaggay, inna: “Ammu i yeǧa řgens-a u ammu i yeǧa řgens-a zzat i wudem inu, iqqar SIDI, u ammu i teǧa marra řxedmet n ifassen nsen u min qeddmen d ddbiḥet, aqa-tt ixmej.
HAG 2:15 [Maca] řexxu, zeg wass-a d tsawent ggem uřawen nwem [x man aya]: Qbeř ma ittwassars weẓřu x weẓru di Zzawect Tameqqrant n SIDI,
HAG 2:16 qbeř ma ad imsar uya, yusa-dd yijjen ɣar yijj n uɛurric n imendi n ɛicrin n řeqyas, ammu i tuɣa [din] mɣir ɛecra, [u] yusa-dd yijj ɣar yict n tsirt [n uḍiř], ḥima ad yayem xemsin n ibarmiřen, ammu tuɣa [din] mɣir ɛicrin.
HAG 2:17 Necc wtiɣ kenniw s [imendi] ittwasscemḍen [zeg usemmiḍ], s jjriḥect n wefsu u s tebrurri, [wtiɣ] marra řxedmet n ifassen nwem, [maca] kenniw war dd ɣari tedwiřem ca, [ammu i] iqqar SIDI.
HAG 2:18 Zeg wass-a d tsawent ggem uřawen nwem x man aya, zeg wass wiss arebɛa u-ɛicrin n uyur wiss tesɛa, zeg wass nni di ittwassars dsas n Zzawect Tameqqrant n SIDI, ggem uřawen nwem [x man aya],
HAG 2:19 ma aqa din zzarriɛet di tesraft? Tazayart d wartu n tazart d tcejjart n aremman d tcejjart n zzitun war dd-iwyen [ɛad] řɣiǧet! Zeg wass-a Necc ad barkeɣ!”
HAG 2:20 Deg wass wiss arebɛa u-ɛicrin yusa-dd wawař n SIDI i Ḥaggay i twařa wiss tnayen, inna:
HAG 2:21 “Siweř ɣar Zarubbabil, lwali n Yahuda, ini: Necc ad ssennhezzeɣ ijenwan d temmurt,
HAG 2:22 u Necc ad ssenqeřbeɣ řɛarc n tgeldin d tzemmar n tgeldin n řegnus, Necc ad ssenqeřbeɣ ikarruten [n umenɣi] s yinni i ten ineddhen uřa d yiysan ak-d imnayen nsen ad ttwaɣeḍřen, kuř ijj di ssif n wenneɣni.
HAG 2:23 Deg wass nni, iqqar SIDI n řɛeskarat, Necc ad cek ksiɣ, Zarubbabil, mmis n Ca’altiyal, amsexxar inu, iqqar SIDI, u Necc ad cek arreɣ d txadent n ucemmeɛ, maɣar Necc ixḍareɣ cek!, [ammu i] iqqar SIDI n řɛeskarat.”
ZEC 1:1 Deg uyur wiss tmenya, deg useggʷas wiss tmenya n Dariyus, yusa-dd wawař n SIDI ɣar Zakariyya, mmis n Baraxya, mmis n Ɛiddu, anabi, inna:
ZEC 1:2 “SIDI tuɣa iffugem aṭṭas x řejdud nwem.
ZEC 1:3 Ini asen: ‘Ammu i iqqar SIDI n řɛeskarat: Dweř-dd ɣari, [ammu i] iqqar SIDI n řɛeskarat, xenni Necc ad ɣarwem-dd dewřeɣ, iqqar SIDI n řɛeskarat.
ZEC 1:4 War ttiřim am řejdud nwem i yinni umi barrḥen inabiyyen n zic, nnan: ‘Ammu i iqqar SIDI n řɛeskarat, dewřem-dd xenni zeg ibriden nwem iɛeffnen u zi tmegga nwem iɛeffnen!’ Maca nitni war sřin ca u war d ayi wcin amezzuɣ, [ammu i] iqqar SIDI.
ZEC 1:5 Řejdud nwem, mani ǧan? U inabiyyen, ma ad ddaren i řebda?
ZEC 1:6 Maca awařen inu d tweṣṣa inu nni umureɣ i imsexxaren inu, inabiyyen, ma war řqifen řejdud nwem? Nitni dewřen-dd, nnan: Am mammec tuɣa SIDI n řɛeskarat inekkʷa ad yegg akidneɣ ɛlaḥsab ibriden nneɣ d tmegga nneɣ, ammu i igga Netta akidneɣ.’”
ZEC 1:7 Deg wass wiss arebɛa u-ɛicrin, deg uyur wiss ḥiṭac, wa d ayur n Cabaṭ, deg useggʷas wiss tnayen n Dariyus yusa-dd wawař n SIDI ɣar Zakariyya, mmis n Baraxya, mmis n Ɛiddu, anabi, ḥima ad [kis] issiweř.
ZEC 1:8 Necc ẓriɣ di ǧiřet, xzar, aqa ijj n weryaz x ijj n uyis d azeggʷaɣ. Netta tuɣa ibedd jar tcejjura n triḥant di řaǧaɣ u awarni as din iysan izeggʷaɣen d [yeysan] iqarqacen d [yeysan] icemřařen.
ZEC 1:9 Necc nniɣ: “Sidi inu, min ɛnan ina?” [Řexdenni] inna ayi lmalak nni kidi issawařen: “Necc ad ac ssecneɣ min ɛnan ina!”
ZEC 1:10 Aryaz nni ibedden jar tcejjura n triḥant, yarra-dd, inna: “Ina d inni dd-issekk SIDI ḥima ad suḥen x temmurt.”
ZEC 1:11 Nitni arrin-dd x lmalak n SIDI, wenni ibedden jar tcejjura n triḥant, nnan: “Neccin nsuḥ di temmurt, u xzar, marra tammurt teqqim, tarsa.”
ZEC 1:12 [Xenni] yarra-dd lmalak n SIDI, inna: “[A] SIDI n řɛeskarat, ař meřmi [ɛad] war tᵉttḥinnid x Urcalim u x tneddam n Yahuda nni x tuɣa tsexḍed sebɛin n iseggʷusa-ya?”
ZEC 1:13 SIDI yarra-dd x lmalak nni kidi issawařen [s] wawařen cnan, [s] wawařen n ufewwej.
ZEC 1:14 Lmalak nni kidi issawařen, inna ayi: “Barreḥ, ini: ‘Ammu i iqqar SIDI n řɛeskarat: Necc usmeɣ di ṭṭweɛ n Urcalim d Ṣihyun s wasam d ameqqran.
ZEC 1:15 S ijj n uduqqez ameqqran n weɣḍab inu ffugmeɣ x řegnus innefxen. Necc tuɣa ffugmeɣ mɣir cwayt n řweqt, maca nitni ruḥen arnin dayes.’
ZEC 1:16 S uya, ammu i iqqar SIDI: ‘Necc dewřeɣ-dd ɣar Urcalim s teḥnunect, Taddart inu ad tᵉttwabna dayes, ammu i iqqar SIDI n řɛeskarat, uca afiřu n řeɛbar ad ittwagg x Urcalim.’
ZEC 1:17 Arni barreḥ, ini: ‘Ammu i iqqar SIDI n řɛeskarat: Tineddam inu ad feyyḍent ɛawed s řxar, maɣar SIDI ad issfewwej Ṣihyun ɛawed u Netta ad ixḍar Urcalim ɛawed.’”
ZEC 2:1 Necc ssgeɛɛdeɣ tiṭṭawin inu uca ẓriɣ, u xzar [aqa din] arebɛa n waccawen.
ZEC 2:2 Necc nniɣ i lmalak nni kidi issawařen: “Min ɛnan ina?” Netta yarra-dd xafi: “Ina d arebɛa n waccawen nni izzuzaren Yahuda, Israil d Urcalim.”
ZEC 2:3 [Xenni] isscen ayi SIDI arebɛa n imziřen.
ZEC 2:4 [Řexdenni] necc nniɣ: “Min umi dd-usin nitni, min ɣa ggen?” Netta issiweř, inna: “Ina d accawen nni izzuzaren Yahuda, ařami war dd-issgeɛɛed [ɛad] uřa d ijj azeǧif nnes, maca ina usin-dd ḥima ad ten ssnexřɛen, ḥima ad nḍaren accawen n řegnus nni dd-issgeɛɛden icc ḍidd i temmurt n Yahuda ḥima ad tt zuzzaren.”
ZEC 2:5 Necc ssgeɛɛdeɣ tiṭṭawin inu, ẓriɣ, u xzar, aqa [din] ijj n weryaz s ufiřu n řeɛbar deg ufus nnes.
ZEC 2:6 Necc nniɣ: “Mani ɣa traḥed cek?” Netta yarra-dd “[Necc ad raḥeɣ] ḥima ad ɛbareɣ Urcalim maḥend ad ẓareɣ mecḥař [teǧa] tiru nnes u mecḥař [teǧa] tuzzeggart nnes.”
ZEC 2:7 U xzar, iffeɣ-dd lmalak nni kidi issawařen uca ijj n lmalak nneɣni iffeɣ-dd ḥima ad kides immeřqa,
ZEC 2:8 inna as: “Deɣyet, siweř ak-d uḥudri nni, ini: ‘Urcalim ad din tiři teccur s tneddam nurrzment břa řeḥyuḍ zi ssibbet n waṭṭas n iwdan d řmař i iǧan di řwesṭ nnes.
ZEC 2:9 Necc ad as iřiɣ d ijj n řḥiḍ n tmessi i d as-dd ittennḍen, iqqar SIDI, u di řwesṭ nnes ad as iřiɣ i uɛuǧi.
ZEC 2:10 Deɣyam, deɣyam, arewřem zi temmurt n ccamal, ammu i iqqar SIDI, maɣar Necc bḍiɣ kenniw am arebɛa n isemmiḍen n ujenna, ammu i iqqar SIDI.
ZEC 2:11 Deɣyat, Ṣihyun, fekket, cem d tenni izeddɣen ɣar yeǧis n Babil!’”
ZEC 2:12 “Maɣar ammu i iqqar SIDI n řɛeskarat: ‘Di ṭṭweɛ n uɛuǧi, issekk ayi-dd Netta ɣar řegnus nni zzaysen ttwakeccḍem, maɣar wenni kenniw i ɣa iḥadan, iḥada mummu n tiṭṭ inu.
ZEC 2:13 Maɣar xzar, Necc ssenhezzeɣ afus inu xasen, u nitni ad dewřen d takeccaḍt n imsexxaren nsen. Kenniw ad tessnem aqa issekk ayi-dd SIDI n řɛeskarat.
ZEC 2:14 Sřiwřew u farḥ, a yeǧis n Ṣihyun, maɣar xzar, Necc ad dd-aseɣ u ad zedɣeɣ di řwesṭ nnem, ammu i iqqar SIDI.’
ZEC 2:15 ‘Deg wass nni, ad qqnen waṭṭas n řegnus ɣar SIDI, u nitni ad iřin d řgens inu. Necc ad zedɣeɣ di řwest nnem u ad tessned, aqa SIDI n řɛeskarat issekk ayi-dd ɣarem.
ZEC 2:16 SIDI ad iṭṭef Yahuda d tasɣart nnes x temmurt iqeddsen. Netta ad ifarz Urcalim ɛad.
ZEC 2:17 Ejj marra ddat ad isseɣd zzat i wudem n SIDI, maɣar Netta ifaq-dd zi Tzeddiɣt nnes Iqeddsen.’”
ZEC 3:1 [Awarni as] isscen ayi Yahucaɛ, arrays n ikehhanen. Netta tuɣa ibedd zzat i wudem n lmalak n SIDI. Cciṭan ibedd-dd ɣar ufus afusi n Yacuɛa ḥima ad zzayes isscetca.
ZEC 3:2 SIDI inna i cciṭan: “Ad yiři ad cek iɛaqeb SIDI, [a] cciṭan! Ad cek iɛaqeb SIDI, wenni ifarzen Urcalim! Ma war iǧi [Yahucaɛ wanita] d ijj n ukeccuḍ qeřɛen t-dd zi tmessi?”
ZEC 3:3 Yahucaɛ tuɣa yarḍ arruḍ iwessxen am ibedd zzat i wudem n lmalak.
ZEC 3:4 [Xenni] iṭṭef Netta deg wawař uca issiweř ak-d yinni ibedden zzat i wudem nnes, inna: “Kksem as arruḍ iwessxen i wanita!” [Xenni] inna as: “Xzar, Necc kkseɣ zzayek řmuɛṣiyyet nnec u ad cek ssyarḍeɣ s ijj n warruḍ icuwwaren.”
ZEC 3:5 Necc nniɣ: “Ad as qqnen ict n areẓẓet tamezdagt x uzeǧif nnes!” U nitni qqnen as areẓẓet tamezdagt x uzeǧif nnes uca ssyarḍen as arruḍ [icuwwaren], am tuɣa lmalak n SIDI ibedd din
ZEC 3:6 [Xas uca] iched lmalak n SIDI i Yahucaɛ, inna:
ZEC 3:7 “Ammu i iqqar SIDI n řɛeskarat: ‘Mařa cek tuyured x ibriden inu, u mařa cek ad teḥḍid tasexxart inu, xenni ad tessuyured uřa d Taddart inu s řḥeqq u ad tiřid d ameḥḍay n řemraḥat inu, u Necc ad ac wceɣ ad tzemmared ad traḥed ad tadfed jar inni da ibedden.
ZEC 3:8 Xenni seř, Yahucaɛ, cek, arrays n ikehhanen, cek d imeddukkař nnec, inni iqqimen zzatek, maɣar nitni d ict n řeɛřamet n utebhet, maɣar xzar, Necc ad dd-awyeɣ Amsexxar inu, ‘AƔEDDU’.
ZEC 3:9 Maɣar xzar, aẓru, wenni din ssarseɣ zzat i Yahucaɛ, x weẓřu nni xezzarent sebɛa n tiṭṭawin. Xzar, Necc ad dayes neqceɣ taneqqact nnes, ammu i iqqar SIDI n řɛeskarat, u Necc ad kkseɣ řmuɛṣiyyet n temmurt-a deg ijj n wass!
ZEC 3:10 Deg wass nni, iqqar SIDI n řɛeskarat, ad tɛarḍem ijj i wenneɣni sadu tzayart u sadu wartu.’”
ZEC 4:1 Lmalak nni kidi issawařen, iɛqeb-dd uca issfaq ayi-dd am mammec dd-ssfaqan ijj n weryaz zeg yiḍeṣ nnes.
ZEC 4:2 Netta inna ayi: “Min teẓrid?” Necc nniɣ: “Necc ẓriɣ, u xzar, ijj n řqendiř n wureɣ marra, u [aqa din] ijj n ṭṭebṣi n zzect x uzeǧif nnes u xas sebɛa n řefnarat, sebɛa [sennej i] sebɛa n ibuḍen i řefnarat [i iǧan] x uzeǧif nnes
ZEC 4:3 u zzates [aqa din] tnayen n izemmuren, ijj ɣar uɣezdis afusi n ṭṭebṣi [n zzect] u ijj ɣar uzeřmaḍ nnes.”
ZEC 4:4 Necc arriɣ-dd u ssiwřeɣ ak-d lmalak nni kidi issawařen, nniɣ: “Sidi inu, min ɛnant tmesřayin-a?”
ZEC 4:5 Lmalak nni kidi issawařen, yarra-dd, inna ayi: “Ma war tessined cek, min ɛnant tmesřayin-a?” Necc nniɣ: “Lla, [a] sidi inu!”
ZEC 4:6 [Xenni] yarra-dd uca issiweř-dd akidi, inna: “Wa d awař n SIDI i Zarubbabil, [awař] nni iqqar: ‘War iǧi s jjehd uřa s lɛunf, maca ad yiři s Arruḥ inu!’, [ammu i] iqqar SIDI n řɛeskarat.
ZEC 4:7 Min teɛnid cek, [a] adrar ameqqran? Ad tdewřed d ict n řwaṭa zzat i wudem n Zarubbabil, maɣar netta ad dd-issuffeɣ aẓru n nnej s iɣuyyan ijehden: ‘Arḍa, arḍa ad ɣares yiři!’”
ZEC 4:8 Yusa-dd ɣari wawař n SIDI, inna:
ZEC 4:9 “Ifassen n Zarubbabil ssarsen dsas i Taddart-a, ifassen nnes ad tt kemmřen, maḥend ad tessnem aqa SIDI n řɛeskarat issekk ayi-dd ɣarwem.
ZEC 4:10 Maɣar man wen isseḥqaran ass n tmesřayin timeẓyanin? Sebɛa [n tiṭṭawin] nni ggur ad farḥen, xmi ɣa ẓaren aẓru n teɣmart deg ufus n Zarubbabil, aqa atent tiṭṭawin n SIDI nni ittekken marra tammurt.”
ZEC 4:11 Necc arreɣ-dd, nniɣ as: “Mana tnayen n izemmuren nni [din] ɣar uɣezdis afusi d uẓermaḍ n řqendiř?”
ZEC 4:12 Arniɣ ṭṭfeɣ deg wawař, nniɣ as: “Min ɛnan tnayen n řefruɛ n uzemmur [nni iǧan] sennej i tnayen n iqudas n wureɣ, d yinni ittfarraɣen [zzect s tinta nnes n] wureɣ [s tnayen n iqudas nni]?”
ZEC 4:13 Netta issawař-dd ɣari, inna: “Ma war tessined cek min ɛnan ina?” Necc nniɣ: “Lla, [a] sidi inu!”
ZEC 4:14 [Xenni] inna: “Ina d tnayen n iḥenjiren i ittwadehnen s zzect nni ibedden zzat i Sidi n marra tammurt.”
ZEC 5:1 Ssgeɛɛdeɣ tiṭṭawin inu twařa nneɣni uca ẓriɣ, u xzar, aqa [din] ijj n wedlis ittwannḍen iṭṭaw.
ZEC 5:2 Netta inna ayi: “Min tᵉttwařid cek?” Necc nniɣ: “Necc ttwařiɣ ijj n wedlis ittwannḍen iṭṭaw s yijj n tuzzeggart n ɛicrin n iɣaǧen d ict n tiru n ɛecra n iɣaǧen.”
ZEC 5:3 [Xenni] inna ayi: “Ta d nneɛřet nni i ɣa iffɣen x marra tammurt. Maɣar marra wenni i ɣa yacaren, ad ittwaqḍeɛ zi ssibbet n min yuran x uɣezdis-a u kuř ijj wenni i ɣa ijjaǧen ẓur ad ittwaqḍeɛ zi ssibbet n min yuran x uɣezdis nneɣni.
ZEC 5:4 Necc ad arreɣ nneɛřet ad dd-teffeɣ, [ammu i] iqqar SIDI n řɛeskarat, ḥima ad dd-tas di taddart n uceffar u di taddart n yinni ittjaǧan ẓur s Yisem inu. Nettat ad tessens di řwest n taddart nnes u nettat ad tt yecc s ukeccuḍ nnes d iẓra nnes.”
ZEC 5:5 Iffeɣ-dd lmalak nni kidi issawařen, inna ayi: “Sgeɛɛed tiṭṭawin nnec u xzar min [din] dd-ittbanen!”
ZEC 5:6 Necc nniɣ: “Manawya?” Netta inna: “Wa d řmud n ifa nni dd-ittbanen.” [Xenni] inna: “Ta d furma nsen x marra tammurt.”
ZEC 5:7 U xzar, aqa tᵉttwassgeɛɛed tqebbart n řexfif [d taqurarirt] u teqqim ict n temɣart di řwesṭ n ifa.
ZEC 5:8 Netta inna: “Ta d taɛeffant!” uca inḍar i-tt [ɛawed] deg ifa nni uca inḍar aẓru n řexfif x uqemmum nnes.
ZEC 5:9 Necc ssgeɛɛdeɣ tiṭṭawin inu uca ẓriɣ, u xzar tnayen n temɣarin usint-i-dd ɣar zzat u asemmiḍ iccur afriwen nsent. Nitenti tuɣa ɣarsent afriwen am wafriwen n ubellarj u nitenti ssgeɛɛdent ifa [nni] jar temmurt d ujenna.
ZEC 5:10 [Xenni] nniɣ i lmalak nni kidi issawařen: “Mani ɣa raḥent ak-d ifa-ya?”
ZEC 5:11 Netta inna ayi: “Maḥend ad as bnan ict n taddart di temmurt n Cinar. Mařa tᵉttwakemmeř, ad tᵉttwassbedd din deg wemcan nnes.”
ZEC 6:1 Necc ssgeɛɛdeɣ tiṭṭawin inu twařa nneɣni, u xzar, aqa arebɛa n ikarruten ffɣen-dd zi jar tnayen n idurar u idurar [nni] tuɣa d idurar n nnḥas.
ZEC 6:2 Ɣar ukarru amezwaru [tuɣa din] iysan d izeggʷaɣen, ɣar ukarru wiss tnayen iysan d ibarcanen,
ZEC 6:3 ɣar ukarru wiss třata iysan d icemřařen u ɣar ukarru wiss arebɛa iysan d iqarqacen, [aqa aten d iysan] jehden.
ZEC 6:4 Necc arriɣ-dd, nniɣ i lmalak nni kidi issawařen: “Min ɛnan ina, [a] sidi inu?”
ZEC 6:5 Yarra-dd lmalak, inna ayi: “Ina d arebɛa n isemmiḍen n ujenna nni dd-itteffɣen zi mani bedden zzat i SIDI n marra tammurt.
ZEC 6:6 Inni s iysan ibarcanen ad ffɣen ɣar temmurt n Ccamal u [iysan] icemřařen ad ten ḍeffaren, uca [iysan] iqarqacen ad ffɣen ɣar temmurt n Ljanub.”
ZEC 6:7 [Iysan] ijehden ffɣen, arzun ad ẓwan tammurt, [maɣar] Netta inna: “Ffɣem, ẓwam tammurt!” U nitni ẓwan temmurt.
ZEC 6:8 Netta iřaɣa ayi-dd, inna: “Xzar, [iysan] nni iffɣen ɣar temmurt n Ccamal, aqa ssareyyḥen Arruḥ inu di temmurt n Ccamal.”
ZEC 6:9 Yusa-dd ɣari wawař n SIDI, inna:
ZEC 6:10 “Ksi tiwhibin zeg ayt n lmenfa, zi Ḥalim, Ṭubiya d Yadaɛya u ruḥ dinni [uřa d] cek deg wass nni u adef ɣar taddart n Yuciya, mmis n Ṣafanya, [ɣar taddart] i ɣares dd-yusin zi Babil.
ZEC 6:11 Ksi nnuqart d wureɣ, egg [zzaysen] ttijan u sars [i-ten] x uzeǧif n Yahucaɛ, mmis n Yahuṣadaq, arrays n ikehhanen,
ZEC 6:12 u siweř akides, ini as: ‘Ammu i iqqar SIDI n řɛeskarat: Xzar, ijj n weryaz, ‘AƔEDDU’ d Isem nnes. Netta ad dd-iffeɣ zeg wemcan nnes u Netta ad ibna Zzawect Tameqqrant n SIDI.
ZEC 6:13 Netta ad ibna Zzawect Tameqqrant n SIDI u ad yarḍ lɛaḍama. Netta ad iqqim u ad iḥkem x řɛarc nnes u Netta ad yiři d akehhan x řɛarc nnes u ad yiři jar asen ccwar s řehna.’
ZEC 6:14 Ttijan ad iřin i Ḥalim, Ṭubiya, Yadaɛya d Ḥayn, mmis n Ṣafanya, d řidaret di Zzawect Tameqqrant n SIDI.
ZEC 6:15 Zi řaggʷaj ad dd-asen [iwdan] u nitni ad bnan Zzawect Tameqqrant n SIDI u kenniw ad tessnem aqa SIDI n řɛeskarat issekk ayi-dd ɣarwem. [Aya] ad imsar, mařa kenniw tᵉttesřam s tidett ɣar tmijja n SIDI, AREBBI nwem.”
ZEC 7:1 Imsar deg useggʷas wiss arebɛa n ujeǧid Dariyus, [řami] dd-yusa wawař n SIDI ɣar Zakariyya, deg wass wiss arebɛa n uyur wiss tesɛa, deg uyur n Kisluw,
ZEC 7:2 [aqa] issekk [řgens n] Bayt-Il Caraṣir d Rajam-Malik d yeryazen nnes maḥend ad ttaren arḍa zzat i wudem n SIDI,
ZEC 7:3 umi ssawařen ak-d ikehhanen, inni [iǧan] di Taddart n SIDI n řɛeskarat, u ak-d inabiyyen, qqaren: “Ma ad arniɣ deg uyur wiss xemsa ad ruɣ u ad ɛezřeɣ ixef inu am mammec t tteggeɣ řexxu ɛad aṭṭas n iseggʷusa?”
ZEC 7:4 Yusa-dd ɣari wawař n SIDI n řɛeskarat, inna:
ZEC 7:5 “Siweř ak-d marra řgens u ak-d ikehhanen, ini: Řami kenniw tẓummem u tewtim x idmaren nwem [zeg wecḍan], deg uyur wiss xemsa u deg uyur wiss sebɛa, u man aya řexxu ɛad aṭṭas n iseggʷusa, ma tẓummem kenniw [xenni] i Necc, [s tidett] i Necc?
ZEC 7:6 Řami teccim u řami teswim, ma war ticcim [i yixef nwem] u ma war tiswim [i yixef nwem]?
ZEC 7:7 Ma war tuɣi iřiq ad yiři zi ssibbet n wawařen i ijja SIDI ad ttwabarrḥen s ufus n inabiyyen n zic umi tuɣa teqqim Urcalim [ɛad] s imezdaɣ di řhudnet ak-d tneddam i d as dd-innḍen, u řami tuɣa [ɛad] imezdaɣ di [Tammurt n] Ljanub u di Temmurt Iwaṭan?”
ZEC 7:8 Yusa-dd wawař n SIDI ɣar Zakariyya, inna:
ZEC 7:9 “Ammu i iqqar SIDI n řɛeskarat, i iqqaren: ‘Ḥekmem s ijj n řḥukm iseggden u ggem s tmexsiwt icewwaren d arreḥmet ijj ak-d wenneɣni.
ZEC 7:10 War ḥeṣṣarem tajjač uřa d ayujiř niɣ řbarrani uřa d ameẓřuḍ, u war ttejjim uřa d ijj ad ixarreṣ di řɣar ḍidd i umas deg wuř nnes!’
ZEC 7:11 [Maca] nitni ugin ad wcen taynit u nitni ggin marra s řmeqřub u bellɛen imezzuɣen nsen, ḥima war ttesřin.
ZEC 7:12 Nitni ssqesḥen uř nsen am yijj n umesmir, maḥend war ttesřin Ccariɛa d wawařen nni dd-issekk SIDI n řɛeskarat s Arruḥ nnes s ufus n inabiyyen n zic, ařami dd-yusa ijj n uduqqez d ameqqran n weɣḍab n SIDI n řɛeskarat.
ZEC 7:13 Aqa imsar am mammec iřaɣa Netta [zic], [maca] nitni war sřin ca. S uyenni řaɣan [řexxu] nitni u Necc war ttesřiɣ ca, iqqar SIDI n řɛeskarat.
ZEC 7:14 Necc ad ten zuzzareɣ x marra řegnus nni tuɣa war ssinen u awarni asen ad tᵉttwaxarreb temmurt, uřa d ijj [ɛad] war [xas] iẓekkwi u uřa d ijj [ɛad] war dd-iddikkwiř. Nitni arrin tammurt iɛizzen d [ict n řqecɛet n] unexřiɛ.’”
ZEC 8:1 Yusa-dd ɣari wawař n SIDI n řɛeskarat, inna:
ZEC 8:2 “Ammu i iqqar SIDI n řɛeskarat: ‘S wasam d ameqqran usmeɣ zi Ṣihyun, s wesɛar tameqqrant usmeɣ di ṭṭweɛ nnes.’
ZEC 8:3 Ammu i iqqar SIDI: ‘Necc ɛeqbeɣ-dd ɣar Ṣihyun u ad zedɣeɣ di řwesṭ n Urcalim uca Urcalim ad as řaɣan ‘Tandint n tidett!’, u adrar n SIDI n řɛeskarat ad as inin ‘Adrar Iqeddsen!’
ZEC 8:4 Ammu i iqqar SIDI n řɛeskarat: ‘Ad iřin ɛawed iwessura d twessura deg wazzayen n Urcalim. [Kuř] aryaz ad ɣares tiři teɣɣarct nnes deg ufus nnes zi ssibbet n waṭṭas n wussan [i ɣa iddar].
ZEC 8:5 Azzayen n tendint ad dewřen ccuren s iḥenjiren d tḥenjirin i ittiraren deg wazzayen nnes.’
ZEC 8:6 Ammu i iqqar SIDI n řɛeskarat: ‘Maɣar d řeɛjeb qaɛ di tiṭṭawin n min iqqimen n řgens-a deg wussan nni, ma ad yiři aya uřa i Necc d řeɛjeb qaɛ?’, iqqar SIDI n řɛeskarat.
ZEC 8:7 Ammu i iqqar SIDI n řɛeskarat: ‘Xzarem, Necc ad ssnejmeɣ řgens inu zi temmurt n wenqar [n tfuct] u zi temmurt n uɣeǧi n tfuct,
ZEC 8:8 u Necc ad ten awyeɣ din ḥima ad zedɣen di Urcalim. Nitni ad iřin d řgens i Necc u Necc ad iřiɣ d AREBBI i nitni, di tidett u di tsegda.’
ZEC 8:9 Ammu i iqqar SIDI n řɛeskarat: ‘Meḥḍem ifassen nwem, kenniw inni isřin deg wussan-a awařen-a zeg uqemmum n inabiyyen nni [din iǧan] deg wass nni di ittwassars dsas n Taddart n SIDI n řɛeskarat, maḥend ad [xas] tᵉttwabna Zzawect Tameqqrant zi jdid.
ZEC 8:10 Maɣar qbeř i wussan nni war iqqim walu zi řmunet n bnadem u ict n řebhimet war dd-tᵉttawi walu u wenni dd-iffɣen d wenni dd-idewřen, war yiwi řaman zi ssibbet n řeɛdu, [maɣar] Necc ssekkareɣ [kuř] ijj x jjar nnes.
ZEC 8:11 [Řexxu] maca Necc war ttiřiɣ i min iqqimen n řgens-a am wussan imezwura, iqqar SIDI n řɛeskarat.
ZEC 8:12 Maɣar zzariɛet n řehna, tazayart, ad tewc řɣiǧet nnes u tammurt ad tewc ṣṣabet nnes u ajenna ad iwc nnda nnes u Necc ad wceɣ marra aya d tasɣart i min iqqimen n řgens-a.
ZEC 8:13 Ad imsar, aqa am mammec tuɣa kenniw d nneɛřet jar regnus, [kenniw, a] taddart n Yahuda d taddart n Israil, aqa Necc ad kenniw ssnejmeɣ u ad iřiɣ d lbaraka i kenniw. War tteggʷedem, meḥḍem ifassen nwem!’
ZEC 8:14 Maɣar ammu i iqqar SIDI n řɛeskarat: ‘Am mammec Necc xarrṣeɣ ad awem ggeɣ řɣar, řami d ayi ssfugmen řejdud nwem, ammu i iqqar SIDI n řɛeskarat, u Necc war ndimeɣ [zi man aya],
ZEC 8:15 ammu i dd-dewřeɣ Necc [řexxu] ad xarrṣeɣ deg wussan-a maḥend ad ggeɣ řxar di Urcalim u di taddart n Yahuda. War tteggʷedem ca!
ZEC 8:16 Tina d timesřayin i kenniw ittxeṣṣan ad tent teggem: Siwřem tidett kuř ijj ak-d jjar nnes, carrɛem di tewwura nwem s tidett u s yijj n řḥukm iřiqqen.
ZEC 8:17 War ttejjim ad ixarreṣ ijj n weryaz di řɣar x jjar nnes u war ttexsem tajaǧit ẓur, maɣar Necc carrheɣ marra aya!’, iqqar SIDI.”
ZEC 8:18 Yusa-dd ɣari wawař n SIDI n řɛeskarat, inna:
ZEC 8:19 “Ammu i iqqar SIDI n řɛeskarat: ‘Aẓummi n uyur wiss arebɛa u aẓummi [n uyur] wiss xemsa u aẓummi [n uyur] wiss sebɛa u aẓummi [n uyur] wiss ɛecra ad dewřen d řefraḥet u d warceq i taddart n Yahuda. Ad iřin d řeɛyudat cnan. Xsem tidett d řehna!’
ZEC 8:20 Ammu i iqqar SIDI n řɛeskarat: ‘Aqa řegnus uřa d imezdaɣ n waṭṭas n tneddam ad dd-asen ɛad [danita]!
ZEC 8:21 Imezdaɣ n ict [n tendint] ad raḥen ɣar imezdaɣ n ict [n tendint nneɣnit], ad inin: Jjem aneɣ ad neṭṭef abrid ḥima ad nettar [zzat i] wudem n SIDI u ḥima ad narzu SIDI n řɛeskarat. Uřa d necc ad raḥeɣ.
ZEC 8:22 Aṭṭas n iyduden d waṭṭas n řegnus ijehden ad dd-asen ḥima ad arzun x wudem n SIDI n řɛeskarat di Urcalim u ḥima ad ttaren arḍa zzat i wudem n SIDI.’
ZEC 8:23 Ammu i iqqar SIDI n řɛeskarat: ‘Deg wussan nni ad imsar, aqa ɛecra n yeryazen, zi marra tutlayin n řegnus ad ṭṭfen, [wah,] ad ṭṭfen abeḥřuř n ijj n weryaz d Uday, ad inin: ‘Neccin ad nraḥ akidwem, maɣar nesřa aqa AREBBI akidwem!’”
ZEC 9:1 Řḥukm issaggʷaden n wawař n SIDI x temmurt n Ḥadrax, řḥukm nni yarsan x Dimacq. “Maɣar SIDI iḥeṭṭa x bnadem u x marra tiqebbař n Israil,
ZEC 9:2 uřa x Ḥamat i-tt-dd-iřesqen, x Ṣur d Ṣidun, waxxa nitenti d timiɣisin aṭṭas.
ZEC 9:3 Tebna Ṣur ijj n lbaraj i yixef nnes u teyru nnuqart am tɛejjajt d wureɣ iqquren am ubeǧaɛ n imesraq.
ZEC 9:4 Xzar, Sidi inu ad tt iṭṭef, ad iwwet lbaraj nnes ɣar řebḥar, uca ad tt tecc tmessi.”
ZEC 9:5 “Ackelun ad tt tẓar, ad tedweř teggʷed, ammu uřa d Ɣazza, ad tarjij aṭṭas, uřa d Ɛaqrun, maɣar ad ifceř uraji nnes. Ad ittwateḥḥa ujeǧid zi Ɣazza u di tandint n Acqalun war dayes tzeddeɣ ɛad uřa d ijjen.
ZEC 9:6 Mmis n řeḥram ad izdeɣ di Acdud u Necc ad teḥḥiɣ nnfaxet n Ifilisṭiniyyen.
ZEC 9:7 Necc ad ksiɣ idammen zeg uqemmum nnes uřa d nnɛawat zi jar tiɣmas nnes u ammu i ɣa iqqim uřa d netta i AREBBI nneɣ. Netta ad yiři am yijj n wemɣar di Yahuda u Ɛaqrun am yijj n Uyabusi.
ZEC 9:8 Necc ad ggeɣ řmargeḥ inu deg wenneḍ n Taddart inu, ḍidd n wenni i ɣa iẓwan u ḍidd n wenni dd ɣa idewřen, ḥima wenni iḥeṣṣaren war xas iɛeddu ca ɛad, maɣar řexxu ẓřiɣ t s tiṭṭawin inu.”
ZEC 9:9 “Farḥ, a yeǧis n Ṣihyun, sřiwřew, a yeǧis n Urcalim! Xzar, Ajeǧid nnem yusa-dd ɣarem, Netta d amsegged u aqa yarḍ arruḍ n usenjem, Netta d amwaḍeɛ, inya x ijj n weɣyuř, x ijj n wezɛuq, asnus n ict n teɣyuč.
ZEC 9:10 Necc ad qḍiɣ ikarruten n umenɣi zi Ifrayim uřa d iysan zi Urcalim. Ad ittwaqřeɛ uřa d řqews n umenɣi. Netta ad ibarreḥ s řehna i regnus u ṣṣulṭa nnes ad tiři zi řebḥar ař řebḥar, zeg iɣzar n Lfuraṭ ař ineggura n temmurt.”
ZEC 9:11 “Wah uřa d cem, a yeǧis n Ṣihyun, zi ssibbet n idammen n Řɛahd nnem fekkeɣ-dd imeḥbas nnem zeg wanu yuẓɣen i war di ǧin waman.
ZEC 9:12 Ɛeqbem ɣar lburj nwem, kenniw imeḥbas inni ɣar iǧa řayas. Uřa d ass-a Necc ttbarrḥeɣ: Aqa Necc ad ɣarem dd-arreɣ tnayen n tseqqar,
ZEC 9:13 maɣar Necc ad meḥḍeɣ Yahuda am ijj n řqews u ad ggeɣ Ifrayim x řqews. Necc ad ssekkareɣ iḥenjiren nnem, a Ṣihyun, ḍidd i iḥenjiren nnec, a Yawan, u Necc ad cek arreɣ am ssif n ijj n bu-teɣruḍt.”
ZEC 9:14 “SIDI ad iban sennej nsen u fřitcat nnes ad iřint ttwessgent am wassam u Sidi inu, SIDI,ْ ad isuḍ deg uyicc n icarri, ad yuyur ak-d tḥaryaḍin n usemmiḍ n ljanub.
ZEC 9:15 SIDI n řɛeskarat ad ten issduriy. Nitni ad ccen, ad ddzen iẓra n iǧiy uca ad swen, ad ggen ddriz am ɣar binu u ad dewřen ccuren am ṭṭawya n urucci, am tɣemmar n uɛalṭar.
ZEC 9:16 SIDI, AREBBI nwem ad ten issenjem deg wass nni am wuǧi n řgens nnes, maɣar nitni amecnaw iẓra iɣřan x ijj n ttaj igellden ittissiqen x temmurt nnes.
ZEC 9:17 Maɣar mechař imɣar ad yiři řxar nnes u mechař imɣar ad yiři waẓři nnes! Imendi ad isseɣmi iḥudriyyen uřa binu n jdid tiɛzariyyin.”
ZEC 10:1 “Ttarem anẓar zi SIDI, di řweqt n wenẓar n tefsut. SIDI ittegg assamen, wah, Netta ad asen iwc ibuda n wenẓar, i kuř ijj n wefsu deg iyyar.
ZEC 10:2 Maɣar řexyařat n l’aṣnam ssawařen řɣecc, u igezzanen ttwařan ixarriqen u nitni ttɛawaden tirja icemmten, nitni ssfewwajen s řeɛwin. X uya i ttwassiggʷejen am wuǧi, ttwaḥṣaren, minzi ameksaw war din iǧi.”
ZEC 10:3 “X imeksawen yarɣa weɣḍab inu u Necc ad xeǧṣeɣ iɣayḍen, maɣar SIDI n řɛeskarat ad issijj x tḥimart nnes, x taddart n Yahuda, u Netta ad ten isedd am uyis nnes ittissiqen ɣar umenɣi.
ZEC 10:4 Zzayes aẓru n teɣmart, zzayes řewted, zzayes řqews n umenɣi, ad zzayes dd-ffɣen xenni marra imzeyyaren jmiɛ.
ZEC 10:5 Nitni marra ad dewřen am ayt n bu-teɣruḍt inni deg umenɣi ad ɛefsen x ubeǧaɛ di zznaqi. Wah, nitni ad mmenɣen, maɣar SIDI ad yiři akidsen, u nitni ad seḍḥan inni inyin x yeysan.
ZEC 10:6 Necc ad ssjehdeɣ taddart n Yahuda u ad ssnejmeɣ taddart n Yusuf u Necc ad asen wceɣ tazeddiɣt, maɣar Necc arreḥmeɣ daysen u nitni ad iřin axmi Necc war ten nḍareɣ, maɣar Necc d SIDI, AREBBI nsen, u Necc ad ɣarsen sřeɣ.”
ZEC 10:7 “Inni n Ifrayim ad iřin am yijj n bu-teɣruḍt u uř nsen ad ifarḥ am ɣar binu, u iḥenjiren nsen ad t ẓaren u ad farḥen, uř nsen ad ifarḥ di SIDI.
ZEC 10:8 Necc ad xasen ṣeffareɣ u ad ten ssmuneɣ, maɣar Necc fdiɣ ten, u nitni ad dd-dewřen deg waṭṭas, am mammec ten tuɣa deg waṭṭas.
ZEC 10:9 Necc ad ten zarɛeɣ jar řegnus u nitni ad ayi idaren di jjwayeh iggʷejjen. Xenni ad ddaren ak-d iḥenjiren nsen uca ad dd-dewřen.
ZEC 10:10 Necc ad ten jjeɣ ad dd-ɛeqben zi Misřa, ad ten dd-ssmuneɣ zi Accur u ad ten dd-awyeɣ ɣar temmurt n Jilɛad u ɣar Lubnan, maca aya war ten ittqeddi.
ZEC 10:11 Netta ad iẓwa řebḥar n řeḥṣaret nsen u ad iwwet řemwaj n řebḥar u marra imucan yuǧɣen n iɣzar n Nil ad aẓɣen. Nnfaxet n Accur ad tᵉttwasswaḍeɛ, u azeǧaḍ n Misřa ad ittwaweddar.
ZEC 10:12 Necc ad ten ssjehdeɣ di SIDI u nitni ad uyuren deg Yisem nnes!”, ammu i iqqar SIDI.
ZEC 11:1 “Arzem tiwwura nnec, a Lubnan, maḥend timessi ad tecc tineglin nnec.
ZEC 11:2 Ru, a tacejjart n umerzi, maɣar tangelt tewḍa, maɣar ticejjura nni ijehden ttwareddǧent! Rut, a ticejjura n řbeǧuḍ n Bacan, maɣar azɣar immcubbcen iwḍa.”
ZEC 11:3 “Sřem i řḥess n tɣuyyit n imeksawen, maɣar aɛuǧi nsen ittwareddeǧ, sřem i řḥess n uzehhar n weyraden imeẓyanen, maɣar řɛezz n L’Urdun ittwareddeǧ.”
ZEC 11:4 “Ammu i iqqar SIDI, AREBBI inu: ‘Arwes uǧi nni umi ɣa ɣarṣen,
ZEC 11:5 inni ten imellken neqqen ten břa ma ad ttwaɛaqben, inni [ten imellken] zzenzen ten, qqaren: Ad ittwabarek SIDI, aqa necc dewřeɣ ɣari agřa! Imeksawen nsen war d asen zziǧizen.’”
ZEC 11:6 “Xenni Necc war d ayi zziǧizen ɛad imezdaɣ n temmurt, iqqar SIDI. Xzar, Necc ad wceɣ i iwdan kuř ijj deg ufus n jjar nnes u deg ufus n ujeǧid nnes, u nitni ad ɛefsen x temmurt u Necc war [ten] ttfekkeɣ ca zeg ufus nsen.”
ZEC 11:7 “Necc arewseɣ uǧi tinni umi ɣa ɣarṣen, maɣar nitenti d uǧi ittwaḥsaren. Necc ksiɣ i Yixef inu tnayen n tᵉɣɣaryen. Ict ggiɣ as ‘Řxaḍar!’ u tenneɣni ggiɣ as ‘Taɣruḍt!’, u [ammu i] arwseɣ Necc uǧi.”
ZEC 11:8 “Deg ijj n uyur tteḥḥiɣ třata zeg imeksawen. Řeɛmar inu war izemmar ad ten tarbu [ɛad] uca uřa d řeɛmar nsen icarh ayi ɛawed.
ZEC 11:9 Necc nniɣ: Necc war kenniw arekkwseɣ! Min immuten, ejj [i-t] ad immet u min ihellken, ejj [i-t] ad ittwahellek, u jjem inni iqqimen ad ccen aysum ijj n wenneɣni.
ZEC 11:10 Necc ksiɣ taɣɣarct inu ‘Rxaḍar’, uca arẓiɣ tt maḥend ad arẓeɣ ammu řɛahd inu nni ggiɣ ak-d marra řegnus.
ZEC 11:11 Deg wass nni idweř [řɛahd] yarreẓ u ammu i ssnen wuǧi ittwaḥṣaren nni d ayi iḥeṭṭan, aqa aya tuɣa d ijj n wawař n SIDI.”
ZEC 11:12 “Necc nniɣ asen: ‘Mařa aya mliḥ di tiṭṭawin nwem, wcem ayi řmunet inu, u mařa lla, jjem t!’ [Xenni] weznen řmunet inu: třatin n [řweznat n] nnuqart.
ZEC 11:13 [Xenni] inna ayi SIDI: ‘Nḍar [řmunet] nni ɣar bu-třaxt, ttaman [nni] ‘iṣebḥen’ inni d ayi ggin ttaman!’ U necc ksiɣ třatin n řweznat n nnuqart uca nḍareɣ tent ɣar bu-třaxt di Taddart n SIDI.
ZEC 11:14 [Řexdenni] arẓiɣ Necc taɣɣarct inu nneɣni [tenni ggiɣ as] ‘Taɣruḍt’ maḥend ad arẓeɣ [ammu] tawmat jar Yahuda d Israil.”
ZEC 11:15 “SIDI inna ayi: ‘Ksi twařa nneɣnit dduzan n ijj n umeksaw abuhaři,
ZEC 11:16 maɣar Necc ad jjeɣ ad dd-ikkar ijj n umeksaw di temmurt: min iruḥen war yarezzu, min imṭarrcen war t yarezzu, min yarẓen war t issgenfi u min iqqimen ibedd, war t iḥeṭṭi netta. [Maca] netta ad yecc aysum n [řebhayem] iṣeḥḥen u ad asent ikkes ticeḍyin.’”
ZEC 11:17 “Uct x umeksaw i war isekkwin, wenni isemmḥen deg wuǧi! Ssif ad dd-iɛdu x uɣiř nnes u x tiṭṭ nnes tafusect. Aɣiř nnes ad yaẓeɣ marra, u tiṭṭ nnes tafusect ad teɛmec marra!”
ZEC 12:1 Řḥukm issaggʷaden n wawař n SIDI x Israil. SIDI issawař, Netta d wenni ittbezzaɛen ajenna u issrusa dsas n temmurt u issbedda arruḥ n bnadem di daxeř nnes:
ZEC 12:2 “Xzarem, Necc ad ggeɣ Urcalim d ṭṭebṣi n udewwex i marra řegnus i d as dd-innḍen uca ad dd-yas ṭṭebṣi nni uřa x Yahuda ɣar řeḥṣaret n Urcalim.
ZEC 12:3 Deg wass nni ad imsar aqa Necc ad arreɣ Urcalim d ijj n weẓru ideqřen i marra řegnus. Marra inni yarezzun ad t ssgeɛɛden, ad ssyezmen ixef nsen aṭṭas u marra řegnus n ddunect ad ttwassmunen ḍidd nnes.
ZEC 12:4 Deg wass nni, iqqar SIDI, ad wteɣ marra iysan s arjef d imnayen nnes s tubbuheřya, [maca] ad qqimeɣ arezzmeɣ tiṭṭawin inu x taddart n Yahuda, [xmi] i ɣa wteɣ marra iysan n řegnus s tuddarɣeč.
ZEC 12:5 Imgewwaden n Yahuda ad inin deg wuř nsen: ‘Imezdaɣ n Urcalim ad iřin d jjehd inu s [ufus n] SIDI n řɛeskarat, AREBBI nsen!’
ZEC 12:6 Deg wass nni ad ggeɣ imgewwaden n Yahuda am yijj n řmejmar n tmessi di taffa n ukeccuḍ u am yijj n weṣfeḍ jar tiqebbiḍin n imendi u nitni ad ffzen marra řegnus i d asen dd-innḍen, ɣar yefus u ɣar uzeřmaḍ, uca Urcalim ad teqqim ɛad deg wemcan nnes, di Urcalim.
ZEC 12:7 SIDI ad issenjem amezwar iqiḍan n Yahuda ḥima ccan n taddart n Dawud d ccan n imezdaɣ n Urcalim war iddikkwiř d ameqqran aṭṭas qibač i Yahuda.
ZEC 12:8 Deg wass nni ad issduriy SIDI imezdaɣ n Urcalim. Deg wass nni ad yiři wenni i ɣa innqarḍen jar asen am Dawud uca taddart n Dawud ad tiři am AREBBI, am lmalak n SIDI zzat i wudem nsen.
ZEC 12:9 Deg wass nni ad imsar, aqa Necc ad rekkzeɣ ad mḥiɣ marra řegnus i dd ɣa yasen [i řeḥṣaret] ɣar Urcalim.
ZEC 12:10 [Maca] ad farrɣeɣ Arruḥ n arḍa d tẓaǧitin x taddart n Dawud u x imezdaɣ n Urcalim u nitni ad ɣari dd-xzaren wenni di ssnuqqben. Nitni ad xas wten ayejdur am wtin agejdur x uyenni n mmis u ad xas ceḍnen s terzugi am wenni ittecḍinen x [řmewt n] mmis amenzu.
ZEC 12:11 Deg wass nni ad tiři tɣuyyit n wecḍan temɣar di Urcalim, am tɣuyyit n wecḍan n Hadad-Rimmun di teɣzurt n Majiddun.
ZEC 12:12 Tammurt ad tesɣuy zeg wecḍan, kuř řaǧ weḥḥdes. Řaǧ n taddart n Dawud weḥḥdes d temɣarin nsen weḥḥedsent, řaǧ n taddart n Natan weḥḥdes d temɣarin nsen weḥḥedsent.
ZEC 12:13 Řaǧ n taddart n Lawi weḥḥdes d temɣarin nsen weḥḥedsent, řaǧ n Cimɛi weḥḥdes d temɣarin nsen weḥḥedsent.
ZEC 12:14 Marra řaǧat nneɣni, kuř řaǧ weḥḥdes uřa d timɣarin weḥḥedsent.”
ZEC 13:1 “Deg wass nni ggur ad tedduqqez ict n tařa i taddart n Dawud uřa i imezdaɣ n Urcalim, ḍidd i ddenb u ḍidd i řexmej.
ZEC 13:2 Deg wass nni ad imsar, [ammu i] iqqar SIDI n řɛeskarat, Necc ad teḥḥiɣ ismawen n řexyařat n l’aṣnam zi temmurt, [ḥima] war xasen ɛeqqřen ɛad. Uřa d inabiyyen d buḥbeř amengus ad ten ssuffɣeɣ zi temmurt.
ZEC 13:3 Ad imsar, mařa ca n ijjen ad inebba, belli babas d yemmas inni t-i-dd ijjin, ad as inin: ‘Cek war ttɣimid teddared, maɣar cek tessiwřed ixarriqen deg isem n SIDI!’ Babas d yemmas inni t-i-dd ijjin, ad t ssnuqqben xmi ɣa inebba.
ZEC 13:4 Deg wass nni ad imsar aqa inabiyyen ad seḍḥan, kuř ijj x řewḥiy nnes [i itwařa] xmi tuɣa inebba. Nitni war ttiriḍen ca apartessu n ccɛar [n inabiyyen] maḥend ad ssxarrqen.
ZEC 13:5 Netta ad yini ‘Necc war ǧiɣ d anabi, necc d ijj n weryaz wenni ittfeǧḥen iyyar, minzi ikseb ayi ijjen zi temẓi inu.’
ZEC 13:6 Ad as inin: ‘Min ɛnan [xenni] iyezzimen-a deg ifassen nnec?’, ad yini netta: ‘Ammu i wtin ayi di taddart n imɛizzen inu.’”
ZEC 13:7 “Ssif, kkar x Umeksaw inu u x weryaz nni iǧan d amɛacar inu!, [ammu i] iqqar SIDI n řɛeskarat. Wwet Ameksaw inu uca [xenni] ad immsebḍa wuǧi, [maca] Necc ad arreɣ afus inu [ɛawed i useřqi] tiwwa imuqřiřen.”
ZEC 13:8 “Ad imsar di tammurt marra, iqqar SIDI, aqa tnayen n izeynat ad ttwaqeḍɛen u nitni ad ssuffɣen buḥbeř, [maca] azyen wiss třata ad dayes iqqim.
ZEC 13:9 Azyen wiss třata ad t nḍareɣ di tmessi, uca Necc ad ten ssᵉṣfiɣ am mammec sseṣfan nnuqart u Necc ad ten jarrbeɣ am mammec ttjarraben ureɣ. Nitni ad řaɣan s Yisem inu u Necc ad [asen] sřeɣ. Ad iniɣ: ‘Řgens inu!’ u nitni ad inin: ‘SIDI d AREBBI inu!’”
ZEC 14:1 “Xzaret, ad dd-yas ijj n wass i SIDI i di i ɣa tᵉttwabḍa tkeccaḍt nnem di řwesṭ nnem!
ZEC 14:2 Necc ad ssmuneɣ marra řegnus i umenɣi ak-d Urcalim. Tandint ad tᵉttwaṭṭef, tudrin ad ttwakeccḍent, timɣarin ad ttwassnuqqbent u azyen n tendint ad ittwandeh di lmenfa, [maca] min iqqimen n řgens war ggur ca ad ittwaqḍeɛ.
ZEC 14:3 SIDI ad iffeɣ u Netta ad immneɣ ak-d řegnus am deg wass n umenɣi, deg wass n ittmenɣa [řebda] deg wass n wehjam.
ZEC 14:4 Deg wass nni ad bedden iḍaren nnes x wedrar n Zzitun wenni qibač i Urcalim, ɣar ccarq. Adrar n Zzitun ad ittwafeǧeq di tnayen n iziynat, jjihet n ccarq u jjihet n řebḥar, [maḥend ad din tiři] ict n teɣzurt d tameqqrant. Azyen n wedrar ad imeyyeř ɣar ccamal u azyen nneɣni n wedrar ad imeyyeř ɣar ljanub.
ZEC 14:5 Uca kenniw ad tarewřem zi hekkwu n idurar inu, maɣar taɣzurt n idurar ad dd-taweḍ ař Aṣal u kenniw ad tarewřem am mammec tarewřem kenniw zeg wenhezzi n temmurt deg wussan n Ɛuzziya, ajeǧid n Yahuda, uca SIDI, AREBBI inu, ad dd-yas u marra imqeddasen akidek.
ZEC 14:6 Deg wass nni ggur ad imsar aqa war tᵉttiři tfawt, itran ittissiqen ad tᵉttwakemmcen.
ZEC 14:7 Ad yiři d ijj n wass ittwafarz, ad yiři ittwassen ɣar SIDI. War iǧi d ass uřa d ǧiřet. Ad imsar ɣar řweqt n uɛecci ad tiři tfawt.
ZEC 14:8 Deg wass nni ad imsar aqa aman iddaren ad dd-ffɣen zi Urcalim, azyen zzaysen ɣar řebḥar acarqi u azyen nneɣni ɣar řebḥar n řɣarbi. [Ammu] i ɣa yiři deg unebdu u di tgarst.
ZEC 14:9 SIDI ad yiři d ajeǧid x marra tammurt. Deg wass nni ad yiři Netta d ayenni n SIDI u Isem nnes d ayenni n Yisem.
ZEC 14:10 Marra tammurt ad tedweř am Řewḍa, zi Jabɛa ař Rimmun, ɣar [jjihet n] ljanub n Urcalim. [Tandint] ad tᵉttwassgeɛɛed u ad dayes zedɣen [iwdan] deg wemcan nnes, zi Tewwart n Binyamin ař amcan n Tewwart i din tuɣa zic, ař tawwart n Teɣmart, u zi lburj n Ḥananiyil ař tisarin n weḥray n ddiřect n ujeǧid.
ZEC 14:11 Nitni ad dayes zedɣen u war ittiři ɛad uřa d ijj n uḥarrem i uteḥḥi, minzi Urcalim ad yiři d amcan mani ɣa zeddɣen di řaman.
ZEC 14:12 Ta ad tiři d ticti i zi ɣa iwwet SIDI marra řegnus nni immenɣen ak-d Urcalim: Netta ad yarr arrimet n kuř [bnadem] ad ikkiccu am netta ɛad ibedd x iḍaren nnes u tiṭṭawin nnes ad kkiccwent deg ixubac nsen u iřes nnes ad ikkiccu deg uqemmum nnes.
ZEC 14:13 Deg wass nni ggur ad imsar aqa ijj n umxarweḍ d ameqqran zi SIDI ad idweř jar asen, ařami ɣa iṭṭef kuř ijj afus n jjar nnes u [xenni] afus n kuř ijjen ad inneqřeb ḍidd i ufus n jjar nnes.
ZEC 14:14 Ɛad ad immneɣ Yahuda di Urcalim uca ad ttwassmunen wagřa n marra řegnus i d as dd-innḍen: ureɣ d nnuqart d warruḍ aṭṭas s waṭṭas.
ZEC 14:15 Ammu i ɣa tiři [ɛawed] tecti n uyis d usardun d weřɣem d yeɣyař d marra řmař nni [iǧan] di řɛeskarat, aqa ticti-ya [ad ten teřqef].
ZEC 14:16 [Xenni] ad imsar aqa marra inni iqqimen zi marra řegnus nni dd-yusin ɣar Urcalim [i řeḥṣaret], ad geɛɛden zeg useggʷas ař aseggʷas, ḥima ad bendqen zzat i Ujeǧid, i SIDI n řɛeskarat u ḥima ad ɛeyyden Řɛid n Iɛuccuten.
ZEC 14:17 Ad imsar belli man wen zi řaǧat n temmurt war dd-ittgiɛɛid ca ɣar Urcalim ḥima ad ibendeq i ujeǧid, i SIDI n řɛeskarat, aqa war xas iweṭṭi ca wenẓar.
ZEC 14:18 Mařa řaǧ n Miṣra war dd-igeɛɛed u war dd-tusi ca, [xenni] war xasen [iccit] wenẓar. Ta ad tiři d ticti i zi ɣa iřqef SIDI řegnus nni war din ittgiɛɛiden ca ḥima ad ɛeyyden ficta n Řɛid n Iɛuccuten.
ZEC 14:19 Ta ggur ad tiři d ticti i ddnub n Miṣra uřa d ticti i marra řegnus, inni war din ittgeɛɛeden, ḥima ad ɛeyyden Řɛid n Iɛuccuten.
ZEC 14:20 Deg wass nni ggur ad yiři x tnaqusin n yeysan ‘D AMQEDDAS i SIDI!’ Ttnajar di Taddart n SIDI ad iřin am ṭṭawyat i urucci zzat i uɛalṭar.
ZEC 14:21 Marra ttnajar di Urcalim u di Yahuda ad iřin qeddsen i SIDI n řɛeskarat u marra inni i dd ɣa yasen ḥima ad qeddmen tiwhibin, ad zzaysent ksin u ad daysent ssnennan. Deg wass nni war [din] ittiři uřa d ijj n Ukenɛani di Taddart n SIDI n řɛeskarat.”
MAL 1:1 Řḥukm issaggʷaden. Awař n SIDI i Israil s ufus n Malaxi.
MAL 1:2 “Necc tuɣa ttexseɣ cek, iqqar SIDI, maca kenniw teqqarem: ‘Mani d aneɣ texsed?’ Ma war iǧi Ɛisu d umas n Yaɛqub, iqqar SIDI, u Necc ttexseɣ Yaɛqub,
MAL 1:3 [maca] carheɣ Ɛisu. Necc arriɣ idurar nnes d ict n temmurt ittwareddǧen uřa d tasɣart nnes i wuccanen n řexřa.
MAL 1:4 Waxxa Idum iqqar: ‘Neccin nettwareddeǧ, [maca] ad nebna řxirbat ɛawed!’, ammu i iqqar SIDI n řɛeskarat: Nitni ad bnan [ɛawed], [maca] Necc ad hedmeɣ u ad asen řaɣan ‘Tammurt n uɛeffan’, u [ɛawed]: ‘Řgens wenni x isexxeḍ SIDI i řebda!’
MAL 1:5 Tiṭṭawin nwem ad t ẓaren u kenniw ad tinim: ‘D ameqqran SIDI tiwa i temmurt n Israil!’”
MAL 1:6 “Mmis ittweqqar babas d umsexxar bab nnes. Mařa Necc aqa d Baba, mani iqqim [xenni] řewqar i Necc? Mařa Necc aqa d SIDI, mani teqqim tiggʷudi nni zzayi?, iqqar SIDI n řɛeskarat, i kenniw, [a] ikehhanen, inni isseḥqaren Isem inu. [Maca] kenniw teqqarem: ‘Min zi nesseḥqar neccin Isem nnec?’
MAL 1:7 Kenniw tᵉttawyem-dd aɣrum ixemjen x uɛalṭar inu, teqqarem: ‘Min zi i Cek nessxemmej?’ Min zi aqa kenniw teqqarem: ‘Tazewḍa n SIDI d tameḥqurt.’
MAL 1:8 Maɣar umi kenniw tᵉttawyem min iǧan d aḍarɣař i taɣarṣt, ma war iǧi aya d řɣar? U xmi ɣa tawyem kenniw min iǧan d aqejdaḥ niɣ min iheřcen, ma war iǧi aya d řɣar! Siweḍ aya ict n twařa ɣar lwali. Ma cek ad as dd-tased x řxaḍar niɣ netta ad yiři mliḥ akidek?, iqqar SIDI n řɛeskarat.”
MAL 1:9 “[Xenni] řexxu, arzum udem n Arebbi, [ḥima] Netta ad xaneɣ iḥinn. [Maca] man aya ittwagg zzaywem! Ma ad yiři s nneyyet tecna i yijj zzaywem?, iqqar SIDI n řɛeskarat.
MAL 1:10 Man wen zzaywem i ɣa ibellɛen [xenni] tiwwura, [ařami] nitni war ttesriqqin [ɛad] aɛalṭar inu baṭeř. Necc war daywem ttifeɣ arḍa, iqqar SIDI n řɛeskarat, u [uřa d] tawhibt [n řɣiǧet] zeg ufus nwem war dd-tᵉttis x řxaḍar inu.
MAL 1:11 Maɣar zi mani dd tneqqar tfuct ař mani tɣeǧi, ad yiři Yisem inu d ameqqran jar řegnus u di kuř amcan ad awyen tawhibt n řebxur i Yisem inu uřa d ict n tewhibt [n řɣiǧet], maɣar Isem inu d ameqqran jar řegnus, iqqar SIDI n řɛeskarat.
MAL 1:12 Maca kenniw tessɛiǧitem [Isem nni] am teqqarem: ‘Tazewḍa n Sidi inu texmej u řɣiǧet nnes, [ixs ad yini] macca nnes, d tameḥqurt!’
MAL 1:13 Kenniw teqqarem [ɛawed]: ‘Xzar, man[a] amnus- a!’, maca kenniw [simant nwem] tsuḍmem xas, iqqar SIDI n řɛeskarat. Kenniw tᵉttawyem-dd min ittwacaren, u min ittqejdḥen d min iheřcen tᵉttwayem-dd am tewhibt. Ma ad ayi iɛjeb man aya zeg ufus nwem?, iqqar SIDI.
MAL 1:14 Ittwanɛeř uɣeccac, wenni ɣar iǧa ijj n řmař d awtem di tḥimart nnes uca iwaɛd [i-t] u [xenni] iɣarṣ i yijj n řmař d aneɛḍub i Sidi! Maɣar Necc d ijj n Ujeǧid d ameqqran, iqqar SIDI n řɛeskarat, u Isem inu d ameqqran jar řegnus.”
MAL 2:1 “Řexxu, i kenniw [teǧa] tewṣiyyet-a, [a] ikehhanen.
MAL 2:2 Mařa kenniw war tesřim u war tt tkessim ɣar wuř, maḥend ad tcennɛem Isem inu, iqqar SIDI n řɛeskarat, [xenni] necc ad ssekkeɣ nneɛřet jar awem u ad neɛřeɣ lbarakat nwem, [wah,] aqa neɛřeɣ ten řexxu, minzi kenniw war tt tkessim ɣar wuř.
MAL 2:3 Xzar, Necc ad kenniw ɛaqbeɣ di zzariɛet u ad zuzzareɣ amessař x iɣembab nwem, amessař n řeɛyudat nwem, u s man aya ad kenniw awyen ssenni.
MAL 2:4 [Xenni] ad tessnem kenniw, aqa d Necc i ɣarwem dd-issekken tawṣeyyet-a, ḥima ad tiři d Řɛahd inu ak-d Lawi, iqqar SIDI n řɛeskarat.
MAL 2:5 Řɛahd inu akides tuɣa d tudart [u] d řehna. Necc wciɣ as ten ařami ɣa iggʷed netta u netta tuɣa itteggʷed zzayi u ittenexřaɛ zeg Yisem inu.
MAL 2:6 Ccariɛa n tidett tuɣa-tt deg uqemmum nnes u war ittwif min war iseggden x iyencicen nnes. Netta yuyur akidi di řehna u di řeṣfayet u yarra aṭṭas tuben zi řmuɛṣiyyet nsen.
MAL 2:7 Maɣar aqa ittxeṣṣa iyencicen n ukehhan ad ḥḍan tussna u zeg uqemmum nnes tᵉttwarezzu Ccariɛa, maɣar netta d amsekki n SIDI n řɛeskarat.”
MAL 2:8 “[Maca] kenniw [maca] tḥeyydem x webrid, tessenqarḍem aṭṭas zi tɣuri n Ccariɛa, tareddǧem Řɛahd n Lawi, iqqar SIDI n řɛeskarat.
MAL 2:9 Uřa d Necc arriɣ kenniw tᵉttwaɛiffem u war teǧim zzat i marra řgens, minzi kenniw war teḥḍim ibriden inu u tᵉtteggem s wudmawen di tmesřact n useřmed n Ccariɛa.”
MAL 2:10 “Ma neccin war ɣarneɣ marra mɣir ijj n Baba? Ma war d aneɣ dd-ixřeq mɣir ijj n Arebbi? Mayemmi xenni neccin nɣeddar ijj wenneɣni, ařami nessefsad Řɛahd n řejdud nneɣ?
MAL 2:11 Yahuda aqa iɣdar, tᵉttwagg ict n jjɛifect di Israil u di Urcalim, maɣar Yahuda issɛiǧet min iqeddsen n SIDI i ittexs Netta, maɣar Yahuda imřec yeǧis n ijj n arebbi d aɣrib.
MAL 2:12 SIDI ad iteḥḥa marra wi itteggen man aya zeg iqiḍan n Yaɛqub, wi ittřaɣan d wenni dd ittarran, [ɛad] uřa d wenni ittwehhben tawhibt [n řɣiǧet] i SIDI n řɛeskarat.”
MAL 2:13 “Tamesřact wiss tnayen i tᵉtteggem, aqa kenniw teddařem aɛalṭar n SIDI s imeṭṭawen, s tɣuyyit u s sqinfet, minzi war din [teǧi] ɛad teynit [zzayes] i tewhibt [n řɣiǧet] u war tt iqebbeř ɛad s arḍa zeg ufus nwem.
MAL 2:14 Kenniw teqqarem: ‘Mayemmi?’ Minzi SIDI tuɣa d ccahed jar cek d temɣart n temẓi nnec, tenni teɣdared cek, [waxxa] nettat d taɛcirt nnec uřa d tamɣart n řɛahd nnec.
MAL 2:15 Uřa d ijjen zeg wenni ɣar iǧa [ɛad] buḥbeř, war iggi man aya! U min tuɣa [igga] wanita? Wanita tuɣa yarezzu zzariɛet n AREBBI! S uya, ḥḍam [x] buḥbeř nwem u ejj i-t war iɣeddar tamɣart n ṭemzi nnec.
MAL 2:16 Maɣar: ‘[Netta iqqar], aqa icarh i-tt, [uca xenni:] Aǧaf!’, iqqar SIDI, AREBBI n Israil, ‘[Ammu i] iddař netta řɣecc s warruḍ nnes!’, inna SIDI n řɛeskarat. S uya ḥḍam x buḥbeř nwem, war ttɣeddarem ca!
MAL 2:17 Kenniw tessahařem SIDI s wawařen nwem. Kenniw teqqarem: ‘Min zi t nessahař neccin?’ Maɣar kenniw teqqarem: ‘Qaɛ wenni itteggen řɣar, iṣbeḥ di tiṭṭawin n SIDI u nitni usin as-dd x řxaḍar!’, niɣ: ‘Mani iǧa AREBBI n řḥukm?’”
MAL 3:1 “Xzar, Necc ad ssekkeɣ lmalak inu inu, wenni i ɣa isswejden abrid zzat i wudem inu. Deɣya ad dd-yas ɣar Zzawect Tameqqrant nnes, Sidi, wenni tarezzum kenniw, lmalak n Řɛahd, wenni [d awem] dd-ittasen x řxaḍar nwem. Xzar, Netta ad dd-yas!, inna SIDI n řɛeskarat.
MAL 3:2 [Maca] man wen i ɣa yarbun ass n twasit nnes u man wen i ɣa iqqimen ibedd, xmi i dd ɣa iban Netta? Maɣar Netta am tmessi n usefsay u am llixiyya n iɣessařen.
MAL 3:3 Netta ad iqqim, [am] wenni issefsiyyen u ittṣeffan nnuqart. Netta ad issizdig iḥenjiren n Lawi u ad ten iṣeffa am wureɣ u am nnuqart, u nitni ad wehhben ict n tewhibt [n řɣiǧet] di tsegda.
MAL 3:4 [Xenni] ad dd-tas tewhibt [n řɣiǧet] n Yahuda d Urcalim x řxaḍar n SIDI am deg wussan n zic, am deg iseggʷusa iɛdun.
MAL 3:5 Necc ad kenniw adseɣ, ḥima ad xawem ḥekmeɣ u ad cehdeɣ s tazřa x iseḥḥaren d imzennayen u x yinni ittjaǧan ẓur u x yinni iḥeṣṣaren řmunet n ucewwař, [u x yenni] iḥeṣṣaren tajjač d uyujiř u war zzayi tteggʷeden ca, iqqar SIDI n řɛeskarat.”
MAL 3:6 “Maɣar Necc, SIDI, war beddřeɣ ca u kenniw, ayt n Yaɛqub, war tefnam.
MAL 3:7 Zeg wussan n řejdud nwem kenniw tḥeyydem x tweṣṣa inu u kenniw war tent teḥḍim ca. Dewřem-dd ɣari, xenni ad dd ɣarwem dewřeɣ Necc, iqqar SIDI n řɛeskarat. Maca kenniw teqqarem: ‘S min zi i dd ɣa nedweř?’
MAL 3:8 Ma izemmar bnadem ad yacar AREBBI? Aqa kenniw tᵉttacarem ayi u teqqarem: ‘S min zi Cek nettacar?’ [Zi] řeɛcur d tewhibt n usgeɛɛed!
MAL 3:9 Kenniw tᵉttwaneɛřem s yict n nneɛřet, minzi kenniw tᵉttacarem ayi, [wah,] řgens marra.
MAL 3:10 Awyem-dd marra řeɛcur deg wexxam n řexzen, maḥend ad tiři macca di Taddart inu u qeǧbem ayi zzayes, iqqar SIDI n řɛeskarat, ma Necc [xenni] war d awem arezzmeɣ tiburjatin n ujenna u ad xawem zeǧɛeɣ lbaraka, ař din ɣa yiři ktar zi min ittwaḥdajen.
MAL 3:11 Aburxes ad t ssiggʷedeɣ di ṭṭweɛ nwem, maḥend netta war ittjeyyeḥ ṣṣabet n wudem n temmurt nwem u maḥend tazayart deg weḥwic war tᵉttawi řɣiǧet i war yiwiḍen, inna SIDI n řɛeskarat.
MAL 3:12 Marra řegnus ad inin: ‘D amimun i kenniw!’, maɣar kenniw ad tiřim d ict n temmurt yarḍan, iqqar SIDI n řɛeskarat.”
MAL 3:13 “Awařen nwem dewřen qesḥen xafi aṭṭas, iqqar SIDI n řɛeskarat. Kenniw teqqarem: ‘Min i xak neqqar neccin?’
MAL 3:14 Kenniw teqqarem: ‘Aqa baṭeř i nettsexxar i AREBBI, maɣar man řefḍeř i zi neḥḍa tasexxart nnes u aqa nuyur [deg werruḍ] abarcan zzat i wudem n SIDI n řɛeskarat?
MAL 3:15 Xenni řexxu, nḥesseb ayt nnfaxet d amimun. Ɛad inni itteggen taɛeffant, ttwabennan. Nitni ttjarraben [ɛad] AREBBI, [waxxa amenni] nejjmen.’
MAL 3:16 Xenni inni itteggʷeden SIDI mmsawařan [ammu]: ‘SIDI ittarra taynit u ittesřa. Ad ittwari ijj n wedlis n řidaret zzat i wudem nnes, di ṭṭweɛ n yinni itteggʷeden SIDI u ttidaren Isem nnes.’
MAL 3:17 Nitni ad iřin Nnec, iqqar SIDI n řɛeskarat, deg wass i ɣa ggeɣ u Necc ad ten ssɛizzeɣ am issɛizz ijj n weryaz mmis nni i d as ittsexxaren.
MAL 3:18 Xenni kenniw ad tẓarem ɛawed řfarq jar umsegged d wenni itteggen tuɛeffna, jar wenni ittsexxaren i AREBBI d wenni i war d as ittsexxaren.”
MAL 3:19 “Maɣar xzar, ass nni ad dd-yas, yareqq am tefqunt. [Xenni] marra ayt n nnfaxet d iɛeffanen ad iřin am uřum uca ass i dd ɣa yasen ad ten issareɣ, iqqar SIDI n řɛeskarat. [Ass nni] war ittejji weẓwar uřa d taseṭṭa.
MAL 3:20 I kenniw [maca], inni itteggʷeden Isem inu, ad dd-tenqar tfuct n tsegda u ad yiři ugenfu sadu wafriwen nnes u kenniw ad teffɣem u ad teggem ineggizen n řefraḥet am yiɛejmiyyen [i dd-yusin] zi řkuri.
MAL 3:21 Kenniw ad tɛefsem x iɛeffanen, minzi nitni ad dewřen d iɣɣeḍ sadu tisi n iḍaren nwem, deg wass nni i ɣa ggeɣ Necc, iqqar SIDI n řɛeskarat.”
MAL 3:22 Xemmem ɣar Ccariɛa n Musa, amsexxar inu, tenni i d as umureɣ deg [wedrar n] Hurib x marra Israil, tiweṣṣa d lfarayiḍ.
MAL 3:23 Xzar, Necc ad awem dd-ssekkeɣ anabi Iliya, qbeř dd ɣa yas wass ameqqran d issiggʷiden n SIDI.
MAL 3:24 Netta ad yarr uř n ibabaten ɣar iḥenjiren [nsen] d wuř n iḥenjiren ɣar ibabaten nsen, maḥend Necc war dd- ttiseɣ u ad ḥarrmeɣ tammurt qaɛ [i uteḥḥi].”
MAT 1:1 Adlis n umezruy n wexřaq n Yasuɛ Lmasiḥ, Mmis n Dawud, mmis n Ibrahim.
MAT 1:2 Ibrahim ijja-dd Isḥaq, Isḥaq ijja-dd Yaɛqub, Yaɛqub ijja-dd Yahuda d aytmas.
MAT 1:3 Yahuda ijja-dd Fariṣ d Zaraḥ ak-d Tamar, Fariṣ ijja-dd Ḥaṣrun, Ḥaṣrun ijja-dd Aram,
MAT 1:4 Aram ijja-dd Ɛamminadab, Ɛamminadab ijja-dd Naḥcun, Naḥcun ijja-dd Salmun,
MAT 1:5 Salmun ijja-dd Buɛaz zi Raḥab, Buɛaz ijja-dd Ɛubid ak-d Raɛut, Ɛubid ijja-dd Yassa,
MAT 1:6 Yassa ijja-dd Dawud, ajeǧid, uca Dawud ijja-dd Suliman ak-d temɣart n Uriya.
MAT 1:7 Suliman ijja-dd Raḥabɛam, Raḥabɛam ijja-dd Abiya, Abiya ijja-dd Asa,
MAT 1:8 Asa ijja-dd Yahucafaṭ, Yahucafaṭ ijja-dd Yuram, Yuram ijja-dd Ɛuzziya,
MAT 1:9 Ɛuzziya ijja-dd Yutam, Yutam ijja-dd Aḥaz, Aḥaz ijja-dd Ḥizqiya,
MAT 1:10 Ḥizqiya ijja-dd Manassa, Manassa ijja-dd Amun, Amun ijja-dd Yuciya,
MAT 1:11 Yuciya ijja-dd Yakunya d aytmas deg [wussan n] lmenfa n Babil.
MAT 1:12 Awarni i lmenfa di Babil, Yakunya ijja-dd Caɛaltiyil, Caɛaltiyil ijja-dd Zarubbabil.
MAT 1:13 Zarubbabil ijja-dd Abihud, Abihud ijja-dd Alyaqim, Alyaqim ijja-dd Ɛazur,
MAT 1:14 Ɛazur ijja-dd Ṣaduq, Ṣaduq ijja-dd Axim, Axim ijja-dd Aliyud,
MAT 1:15 Aliyud ijja-dd Aliɛazar, Aliɛazar ijja-dd Mattan, Mattan ijja-dd Yaɛqub,
MAT 1:16 Yaɛqub ijja-dd Yusuf, aryaz n Maryam, tenni i dd-ijjin Yasuɛ umi qqaren Lmasiḥ.
MAT 1:17 S uyenni marra arrawen zi Ibrahim ař Dawud iwḍen arbeɛṭac n warrawen. Zi Dawud ař lmenfa di Babil arbeɛtac n warrawen uca zi lmenfa di Babil ař Lmasiḥ arbeɛtac n warrawen.
MAT 1:18 Ammu i yemsar wexřaq n Yasuɛ Lmasiḥ. Umi yemmas Maryam tuɣa-tt d tanexḍebt n Yusuf, iḍhar-dd belli nettat teksi aɛeddis zi Arruḥ Iqeddsen qbeř i ɣa meřcen.
MAT 1:19 Umi aryaz nnes Yusuf tuɣa iggur nican, war ixs ca ad tt issbehdeř, tuɣa yarezzu ad as iǧef s tnuffra.
MAT 1:20 Am tuɣa ittxarraṣ di man aya, iḍhar as-dd lmalak n SIDI di tarjit, inna: “A Yusuf, a mmis n Dawud, war tteggʷed ad dd-tawyed Maryam d tamɣart nnec, minzi wenni i dayes dd-ixeřqen, aqa Netta zi Arruḥ Iqeddsen.”
MAT 1:21 Nettat ad dd-taruw Aḥenjir, nettat ad t tsemma Yasuɛ, minzi Netta ad issenjem řgens nnes zi ddnub nsen.”
MAT 1:22 Marra aya imsar, ḥima ad ittwakemmeř min inna SIDI s [uqemmum n] unabi, [umi inna]:
MAT 1:23 “Xẓar, taɛzarect ad teksi ddeyset, uca ad dd-taruw Aḥenjir, ad as ggen ‘Ɛimmanu-Il’ min ixs ad yini: ‘AREBBI nneɣ aqa-t akidneɣ.’”
MAT 1:24 Řami dd-ifaq Yusuf zeg iḍeṣ, igga am mammec tt yumur lmalak n SIDI, uca yiwyi-dd tamɣart nnes ɣares.
MAT 1:25 Uca netta war ɣares dd-iqarreb ca ařami dd-turuw Mmis amenzu, uca tsemma t ‘Yeccu’.
MAT 2:1 Řami dd-ixřeq Yasuɛ di Bayt-Laḥm di Yahudiyya deg wussan n ujeǧid Hirudus, usin-dd ca n imusnawen [n itran] zi manis d tneqqar tfuct ɣar Urcalim.
MAT 2:2 Nnan: “Mani iǧa wenni dd-ixeřqen d Ajeǧid n Wudayen? Aqa neẓra itri nnes di ccarq, nusa-dd ad as nesjed.”
MAT 2:3 [Řami] isřa ujeǧid Hirudus [man aya], inneḥweř netta d qaɛ Urcalim akides.
MAT 2:4 Issmun-dd zi řgens marra imeqqranen n ikehhanen d imseřmaden n idlisen uca isseqsa ten x mani ɣa ixřeq Lmasiḥ.
MAT 2:5 Nnan: “Di Bayt-Laḥm di Yahudiyya, minzi d man aya i yuran s ufus n unabi:
MAT 2:6 ‘Uřa d cem, Bayt-Laḥm di temmurt n Yahuda, cem war teǧid ca d tameẓyant jar ijeǧiden n Yahuda, minzi zzayem dd ɣa iffeɣ Ujeǧid wenni i ɣa yarewsen řgens inu, Israil.’”
MAT 2:7 Řexdenni iřaɣa Hirudus x imusnawen [n itran] s tnuffra uca yiweḍ ad zzaysen issen řweqt i di tuɣa d asen dd-iffeɣ itri.
MAT 2:8 [Xenni] issekk i-ten ɣar Bayt-Laḥm, inna: “Ruḥem dinni, tarzum mliḥ x Uḥenjir. Mařa tufim t, asem-dd, xebbarem ayi, ḥima uřa d necc ad dd-aseɣ, ad as sejdeɣ.”
MAT 2:9 Awarni řami sřin [i wawař] n ujeǧid, ruḥen uca xzar, itri i ẓrin di ccarq iggur zzatsen ařami dd-yiweḍ uca ibedd sennej i wemcan mani iǧa Uḥenjir.
MAT 2:10 Řami ẓrin itri, farḥen s řefraḥet tameqqrant aṭṭas.
MAT 2:11 Udfen ɣar taddart, ẓrin Aḥenjir ak-d Maryam, yemmas, wḍan ɣar temmurt uca sejden as. [Xenni] arezmen řeknuz nsen uca qeddmen as tirzifin: ureɣ, mirru d řefwaḥet n řebxur.
MAT 2:12 Umi d asen dd-iweḥḥa di tarjit ḥima war ttɛiqqiben ɣar Hirudus, ɛeqben ɣar temmurt nsen zeg ijj n webrid nneɣni.
MAT 2:13 Umi ruḥen, iḍhar-dd lmalak n SIDI ɣar Yusuf di tarjit, inna: “Kkar, awi-dd Aḥenjir d yemmas, arweř ɣar Miṣra u qqim din ař cek i ɣa xebbareɣ, minzi Hirudus yarezzu x Uḥenjir ḥima ad t isshellek.”
MAT 2:14 Uca ikkar-dd Yusuf, yiwi Aḥenjir d yemmas s ǧiřet uca yarweř ɣar Miṣra.
MAT 2:15 Iqqim dinni ařami immut Hirudus, ḥima ad ittwakemmeř min ittwannan zi SIDI zeg unabi i innan: “Řaɣiɣ-dd x Mmi [ḥima ad iffeɣ] zi Miṣra.”
MAT 2:16 Řami iẓra Hirudus belli imusnawen cemten t, ixeyyeq aṭṭas, uca issekk, inɣa marra iḥenjiren n Bayt-Laḥm d qaɛ jjwayeh i d as dd-yudsen, marra iḥenjiren zi tnayen n iseggʷusa swadday ɛlaḥsab řweqt i yiweḍ ad issen zeg imusnawen.
MAT 2:17 Řexdenni ittwakemmeř min ittwannan zeg unabi Irmiya, umi inna:
MAT 2:18 “Tmijja tᵉttwaseř di Rama, imeṭṭawen d tɣuyyit n wecḍan aṭṭas. Rahil tᵉttru x iḥenjiren nnes, war tᵉttexs ad tᵉttwaɛezza, minzi nitni war qqimen ɛad!”
MAT 2:19 Řami immut Hirudus, iḍhar-dd lmalak n SIDI di tarjit i Yusuf di Miṣra,
MAT 2:20 inna: “Kkar, awi-dd Aḥenjir d yemmas uca ruḥ ɣar temmurt n Israil, minzi inni tuɣa yarezzun ad nɣen Aḥenjir, aqa mmuten.”
MAT 2:21 [Řexdenni] ikkar, yiwi-dd Aḥenjir d yemmas uca yusa-dd ɣar temmurt n Israil.
MAT 2:22 Maca ařami isřa belli Arxilawus idweř d ajeǧid di Yahudiyya deg wemcan n babas Hirudus, iggʷed ad iraḥ dinni. [Xenni] iweḥḥa as-dd [Arebbi] di tarjit maḥend ad iraḥ ɣar jjwayeh n Ljalil.
MAT 2:23 [Řami] dd-yiweḍ, izdeɣ di tendint qqaren as Nnaṣira, ḥima ad ittwakemmeř min ittwannan zeg unabi i innan: “Ad t semman Nnaṣiri!”
MAT 3:1 Deg wussan nni yusa-dd Yuḥanna Amseɣḍaṣ, tuɣa ittbarreḥ di řexřa n Yahudiyya,
MAT 3:2 inna: “Tubem, minzi Tageldit n ijenwan. aqa tudes-dd.”
MAT 3:3 Minzi netta d wenni xef ittwannan zeg unabi Icaɛya [am inna]: “Tmijja i ittřaɣan di řexřa: ‘Swejdem abrid n SIDI, seggem imesraq nnes.’”
MAT 3:4 Yuḥanna wanita tuɣa yarreḍ [arruḍ n] taḍuft n iřeɣman, ibekkes ijj n webyas n yiřem. Uca macca nnes tuɣa d iburexsen d tamment taḥurrect.
MAT 3:5 Řexdenni teffeɣ-dd ɣares Urcalim d qaɛ Yahudiyya d marra jjwayeh i d as dd-innḍen i L’Urdun,
MAT 3:6 uca ttwassɣeḍṣen zzayes deg iɣzar n L’Urdun, neɛmen s ddnub nsen.
MAT 3:7 Řami iẓra aṭṭas n Ifarisiyyen d Iṣaduqiyyen ttasen-dd maḥend ad ttwassɣeḍṣen, inna asen: “A tarwa n ifiɣran, wi d awem imřen, aqa tzemmarem ad tarewřem zeg weɣḍab i dd ɣa yasen?
MAT 3:8 Ggem řɣiǧet i ɣa iřiqqen i ttubet.
MAT 3:9 War ttɣiřem ca ad tinim deg ixef nwem: ‘Ibrahim d jedditneɣ!’, minzi Necc ad awem iniɣ belli AREBBI izemmar ad issnekkar zeg iẓra-ya tarwa i Ibrahim.
MAT 3:10 Xzar, tacaqurt tᵉttwassars ɣar iẓewran n tcejjura. S uya kuř tacejjart i war itticen řɣiǧet tecna, ad tᵉttwaqess uca ad tewḍa di tmessi.
MAT 3:11 Necc ad kenniw ssɣeḍṣeɣ deg waman i ttubet, maca wenni i dd ɣa yasen awarni ayi, Netta ijhed xafi, necc war sdihiǧeɣ ad ksiɣ sandaliyat nnes. Aqa Netta ad kenniw isseɣḍeṣ di Arruḥ Iqeddsen d tmessi.
MAT 3:12 Tazzart nnes deg ufus nnes, ad izzuzar andrar nnes qaɛ, ad iyru irden ɣar řemrasi nnes, [maca] icarfa ad ten issecmeḍ s tmessi i war ixessyen.”
MAT 3:13 Řexdenni yusa-dd Yasuɛ zi Ljalil ɣar L’Urdun, ɣar Yuḥanna, ḥima ad ittwaseɣḍeṣ zzayes.
MAT 3:14 Maca Yuḥanna yugi as, inna: “Necc ḥdajeɣ ad ttwassɣeḍṣeɣ zzayek. Ma aqa d Cek i ɣari i dd ɣa yasen?”
MAT 3:15 Maca Yasuɛ yarra-dd, inna as: “Ewc řexxu ttesriḥ, minzi ammu i d aneɣ ittřiq ḥima ad nkemmeř marra tasegda.” Řexdenni isamḥ as.
MAT 3:16 [Awarni řami] ittwasseɣḍeṣ Yasuɛ, yuři-dd zeg waman deɣya, u ttwarzmen as ijenwan, uca iẓra Arruḥ n AREBBI ihwa-dd am tadbirt, tarsa xas.
MAT 3:17 Xzar, tusa-dd ict n tmijja zeg ijenwan, tenna: “D Wa d Mmi iɛizzen, dayes ufiɣ arḍa inu.”   *
MAT 4:1 Řexdenni ittwandeh Yasuɛ ɣar řexřa zi Arruḥ Iqeddsen, ḥima ad ittwajarreb zeg ibřis.
MAT 4:2 Awarni řami tuɣa iẓumm arebɛin n wussan d arebɛin n ǧyaři, yusa as-dd jjuɛ ɣar uneggar.
MAT 4:3 Yusa-dd ɣares umjarrab, inna as: “Mařa Cek d Mmis n AREBBI, ini i iẓra-ya ad dewřen d aɣrum!”
MAT 4:4 Yarra-dd xas inna: “Aqa tura: ‘Bnadem war iddar s weɣrum waha, maca zi kuř awař i dd-ittekken zeg uqemmum n AREBBI.’”
MAT 4:5 Řexdenni yiwyi t ibřis ɣar tendint iqeddsen uca issbedd i-t ɣar ṭṭarf n tzeqqa n Zzawect Tameqqrant,
MAT 4:6 inna as: “Mařa Cek d Mmis n AREBBI, iwa, nḍar Ixef nnec ɣar wadday, minzi aqa tura: ‘Ad yumur lmalakat nnes xak, ad Cek ksint x ifassen nsent, ḥima aḍar nnec war ineggeḥ ca aẓru.’”
MAT 4:7 Yasuɛ inna as: “Tura ɛawed: ‘War ttjarrab SIDI, AREBBI nnec!’”
MAT 4:8 Yiwyi t ɛawed ibřis ɣar wedrar yuɛřan aṭṭas, isscen as marra tigeldiwin n ddunect d uɛuǧi nsent,
MAT 4:9 inna as: “Ad ac wceɣ marra man aya, mařa tewḍid ayi ɣar iḍaren, ad ayi tsejded!”
MAT 4:10 Inna as Yasuɛ: “Ruḥ, [a] cciṭan, minzi tura: ‘SIDI, AREBBI nnec, umi ɣa tsejded u i Netta weḥḥdes umi ɣa tsexxared.’”
MAT 4:11 Řexdenni ijja i-t ibřis, u xzar, lmalakat usint-i-dd, tuɣa sexxarent as.
MAT 4:12 Řami isřa Yasuɛ belli Yuḥanna tuɣa ittwasellem, iruḥ ɣar Ljalil.
MAT 4:13 Ijja Nnaṣira uca yusa-dd ɣar Kafarnaḥum, tenni ɣar ṭṭarf n řebḥar, di temmurt n Zibulun d Naftali uca izdeɣ din
MAT 4:14 ḥima ad ittwakemmeř min ittwannan zeg unabi Icaɛya umi inna:
MAT 4:15 “Tammurt n Zibulun d temmurt n Naftali deg Webrid n Řebḥar, ɣar ujemmaḍ n L’Urdun, Ljalil n řegnus.
MAT 4:16 Řgens i iqqimen di taǧest iẓra Tafawt tameqqrant, u x yinni izedɣen di temmurt d tiři n řmewt, aqa tenqar-dd xasen Tfawt.”
MAT 4:17 Zi ssin ibda Yasuɛ ittbarreḥ, inna: “Tubem minzi Tageldit n ijenwan aqa tudes-dd.”
MAT 4:18 Řami tuɣa Netta iggur x tma n řebḥar n Ljalil, iẓra tnayen n wawmaten, Cimɛun umi qqaren Buṭrus, [isem wanita ixs ad yini ‘D Aẓru’], d Andrawus umas, tuɣa neṭṭaren traccawin di řebḥar minzi nitni d ineymaren n iseřman.
MAT 4:19 Inna asen Yasuɛ: “Ḍfarem ayi-dd, ad kenniw arreɣ d ineymaren n iwdan.”
MAT 4:20 Ssarsen deɣya tiracciwin nsen, ḍfaren t.
MAT 4:21 Řami yeɛdu ssenni, iẓra tnayen n wawmaten nneɣni, Yaɛqub mmis n Zabdi d umas Yuḥanna, tuɣa aten ak-d babatsen Zabdi deg uɣarrabu, ɛeddřen tiracciwin nsen uca Netta iřaɣa xasen.
MAT 4:22 Deɣya semḥen deg uɣarrabu u di babatsen, ḍfaren t.
MAT 4:23 Tuɣa Yasuɛ ittenneḍ di temmurt n Ljalil marra, isseřmad di temzidawin nsen, ittbarreḥ s Řexbar Aṣebḥan n Tgeldit uca issgenfa kuř řehřac d kuř řeɛyubat i iǧan di řgens.
MAT 4:24 Iffeɣ řexbar xas di Suriya marra, uca iwyen-dd ɣares marra imehřac inni ɣar iǧa ɛřam kuř řehřac řa d yinni daysen řeḥriq řa d inni daysen ccwaṭen řa d yinni ittbarkikkiḍen uřa d ineɛḍaben, uca issgenfa i-ten.
MAT 4:25 Ḍfaren t-i-dd aṭṭas n řɣaci zi Ljalil, zi Dikapulis, zi Urcalim, zi Yahudiyya u zeg ujemmaḍ n L’Urdun.
MAT 5:1 Řami iẓra Yasuɛ řɣaci, yuři ɣar wedrar, uca awarni řami din iqqim, usin-dd ɣares imeḥḍaren nnes.
MAT 5:2 Uca yarzem aqemmum nnes, isseřmed i-ten, inna:
MAT 5:3 Sseɛd n yinni arruḥ nsen izřeḍ, minzi Tageldit n ijenwan aqa-tt i nitni.
MAT 5:4 Sseɛd n yinni ittecḍinen, minzi nitni ad ttwaɛezzan.
MAT 5:5 Sseɛd n imwaḍɛen, minzi nitni ad warten tammurt.
MAT 5:6 Sseɛd n yinni ittřaẓan d yinni ittfaden ɣar tsegda, minzi nitni ad jjiwnen.
MAT 5:7 Sseɛd n yinni yareḥḥmen, minzi ad ɣarsen tiři arreḥmet.
MAT 5:8 Sseɛd n yinni i ɣar iǧa uř izdig, minzi nitni ad ẓaren AREBBI.
MAT 5:9 Sseɛd n yinni itteggen řehna, minzi nitni ad ttwasemman arrawen n AREBBI.
MAT 5:10 Sseɛd n yinni inneḥṣaren x ssibbet n tsegda, minzi Tageldit n ijenwan ad ɣarsen tiři.
MAT 5:11 Sseɛd i kenniw mařa ttɛayaren u ttdarracen xawem uca ad xawem inin ɛřam kuř awařen iɛeffanen x ssibbet inu, waxxa ssxarriqen.
MAT 5:12 Farḥem, sřiweřwem, minzi řmunet nwem d tameqqrant deg ijenwan, minzi ammu i tuɣa ttdarracen inabiyyen, inni qbeř nwem.”
MAT 5:13 “Kenniw d tameǧaḥt n temmurt. Maca mařa tameǧaḥt ixsar uředdi nnes, mammec ɣa negg ad tt narr d tameǧaḥt? War tneffeɛ ɛad i walu, ḥaca ad temmenḍar ɣar barra, ad xas ɛefsen iwdan.”
MAT 5:14 “Kenniw d tafawt n ddunect. Tandint i ittwabnan x wedrar, war tzemmar ad tᵉnnuffar.
MAT 5:15 War ssreqqin řefnar uca ad t ssarsen sadu řmud, maca ad t ssarsen x řmerfeɛ, [maḥend] ad yarɣ i marra inni iǧan di taddart.
MAT 5:16 Jjem tafawt nwem ad tarɣ i iwdan, ḥima ad ẓaren řexdayem nwem icnan, ad ssuɛřan Babatwem i iǧan deg ijenwan.”
MAT 5:17 “Aqa ad awem ittɣiř aqa usiɣ-dd ḥima ad ssbeṭṭřeɣ Ccariɛa niɣ Inabiyyen. Necc war dd-usiɣ ca ḥima ad ssbeṭṭřeɣ, maca ḥima ad kemmřeɣ.
MAT 5:18 S tidett, Necc ad awem iniɣ: Ař i ɣa iɛdu ujenna d temmurt, war ibeṭṭeř uřa d ijjen řḥarf niɣ d icten taneqqiṭ zi Ccariɛa ař ɣa yiři kuřci.
MAT 5:19 S uya wenni i ɣa issbeṭṭřen zi tweṣṣa-ya icten, waxxa d tameẓyant, uca isseřmad iwdan ammu, ad ittwasemma d ameẓyan di Tgeldit n ijenwan, maca wenni zzaysent iggin u isseřmad i-tent, netta ad ittwasemma d ameqqran di Tgeldit n ijenwan.
MAT 5:20 Minzi Necc ad awem iniɣ: Mařa tasegda nwem war tmeqqar ca x tenni n imseřmaden n idlisen d tenni n Ifarisiyyen, s tidett war tᵉttidfem ca ɣar Tgeldit n ijenwan!”
MAT 5:21 “Aqa tesřim belli ittwanna i řejdud: ‘War neqq!’, u: ‘Wenni ineqqen, ad ittwaḥaseb!’
MAT 5:22 Maca Necc ad awem iniɣ: Marra wenni ittxeyyaqen x umas břa ssibbet, nhřa ma ad xas ittwaḥakem, u marra wenni iqqaren i umas: ‘Ad xak ssusfeɣ!’, ad ittwaḥkem xas zzat i Jmaɛet [Tameqqrant], u wenni iqqaren: ‘[A] abuhaři!’ ad ittwaḥakem, ad yadef ɣar tmessi n jᵉhennama.
MAT 5:23 Mařa tqeddmed tawhibt nnec x uɛalṭar [min xef ssarsen tiɣarṣa d tewhibin], uca dinni tɛeqřed belli umac aqa-t ca xak,
MAT 5:24 ejj tawhibt nnec [din] zzat i uɛalṭar, ruḥ amezwaru, tṣeřḥed ak-d umac, xenni dweř-dd, uca ewc tawhibt nnec.
MAT 5:25 Iři twejded i weṣřaḥ ak-d weɣrim nnec umi cek ɛad akides deg webrid, ḥima aɣrim nnec war cek ittiwi ɣar řqaḍi, [xenni] řqaḍi ad cek yawi ɣar umxazni uca ad temmenḍared di řeḥbes.
MAT 5:26 S tidett, Necc ad ac iniɣ: War dd-teffɣed ssenni, ař ɣa txeǧṣed aṣuldi aneggaru.”
MAT 5:27 Aqa tesřim belli ittwanna: ‘War zenni ca!’,
MAT 5:28 [maca] Necc ad awem iniɣ, marra wenni i ɣa ixzaren ɣar temɣart s nnecwet, aqa izna deɣya akides deg wuř nnes.
MAT 5:29 Mařa tessenqarḍ cek tiṭṭ nnec tafusect, qess i-tt, nḍar i-tt xak. Iḥřa ac mařa iweddar ijj n ṭṭarf [n arrimet nnec] x uweṭṭu n arrimet nnec marra di jᵉhennama.
MAT 5:30 Mařa tessenqarḍ cek afus nnec afusi, qess i-t, nḍar i-t xak, minzi iḥřa ac mařa iweddar ijj n ṭṭarf [n arrimet nnec waha] x uweṭṭu n arrimet nnec marra di jᵉhennama.”
MAT 5:31 “Aqa ittwanna ɛawed: ‘Wenni i ɣa iǧfen i temɣart nnes, ad as iwc tabrat n waǧaf!’
MAT 5:32 Maca Necc ad awem iniɣ: Marra wenni i ɣa iǧfen i temɣart nnes, war iǧi zi ssibbet n farq-ccɣeř, ittarra i-tt ad tezna, uca wenni i ɣa imeřcen tenni umi iǧfen, aqa netta izna.”
MAT 5:33 “Aqa tesřim ɛawed belli ittwanna i řejdud: ‘War tejjaǧid ẓur, maca egg min tejjuǧed i SIDI!’
MAT 5:34 [Maca] Necc ad awem iniɣ: War tejjaǧam ɛemmarṣ, uřa ɣar ujenna minzi netta d řɛarc n AREBBI,
MAT 5:35 uřa ɣar temmurt, minzi nettat d tanebdat sadu iḍaren nnes, uřa ɣar [tendint n] Urcalim, minzi nettat d tandint n Ujeǧid d ameqqran,
MAT 5:36 uca war tejjaǧam uřa ɣar uzeǧif nnec, minzi war tzemmared ad tarred uřa d ijj n uẓeṭṭu [n ucuwwaf] d acemřař niɣ d abarcan.
MAT 5:37 Ad iqqim wawař nwem ‘Wah!’ d ‘Wah!’, ‘Lla!’ d ‘Lla!’. Mana ktar zi man aya, aqa netta zeg umɛeffan.”
MAT 5:38 “Aqa tesřim belli ittwanna: ‘Tiṭṭ s tiṭṭ d tiɣmest s teɣmest!’,
MAT 5:39 [Maca] Necc ad awem iniɣ, war tᵉttemɛařam ca ak-d ijj n uɛeffan, maca wenni i ɣa isseqqřen ameggiz nnec afusi, seřqa yas uřa d [ameggiz] nneɣni.
MAT 5:40 Mařa din ḥed ixs ad kik igg ccreɛ uca netta ad xak ikkes tcamir nnec, ejj i-t ad iksi uřa d ajeǧab.
MAT 5:41 Wenni xak iggin bezzez ḥima ad kides tuyured ijj n kilumitr, uyur akides tnayen.
MAT 5:42 Man wen d ac i ɣa ittaren ca n řḥajjet, ewc as tt, u wenni yarezzun ad xak yarḍeř, war d t ttarra amenni.”
MAT 5:43 “Aqa tesřim belli ittwanna: ‘Ad texsed jjar nnec, ad tcarhed řeɛdu nnec!’
MAT 5:44 Maca Necc ad awem iniɣ: Xsem řɛedyan nwem u barkem inni kenniw ineɛɛřen, ggem tcuni i yinni kenniw icarrhen, ẓaǧem i yinni kenniw ittawyen d imeḥbas d yinni xawem ittdarracen,
MAT 5:45 ḥima ad tiřim d tarwa n Babatwem i iǧan deg ijenwan, minzi Netta issneqqar tafuct nnes x iṣebḥanen d iɛeffanen, uca Netta yarexxu-dd i wenẓar, ḥima ad iwwet x imseggaden u x yinni war iseggden.
MAT 5:46 Minzi mařa texsem inni kenniw ittexsen, man arbeḥ i ɣarwem? Ma war tteggen ayt n ḍḍariba uřa ammu?
MAT 5:47 Mařa tseǧmem x wawmaten nwem waha, min i tᵉtteggem ktar [x wenneɣni]? Ma war tteggen ayt n ḍḍariba uřa ammu?
MAT 5:48 S uya iřim nican qaɛ am mammec uřa d Babatwem i iǧan deg ijenwan iǧa nican qaɛ.”
MAT 6:1 “Ḥḍam, war tṣeddaqem zzat i iwdan, ḥima ad kenniw ẓaren. Mařa amya, war ɣarwem ittiři bu řajar zi Babatwem i iǧan deg ijenwan.
MAT 6:2 Mařa tṣeddqed, war tt ttegg di řbuq am mammec t tteggen imnafqen di temzidawin u di zznaqi, ḥima ad ten cennɛen iwdan. S tidett Necc ad awem iniɣ, nitni aqa ufin řajar nsen zi beɛda.
MAT 6:3 [Maca] cek, xmi ɣa tṣeddqed, ittxeṣṣa afus nnec azeřmaḍ war issin min ittegg ufusi nnec,
MAT 6:4 ḥima ṣṣedqet nnec ad tiři s tnuffra uca Babac, wenni ittwařan di tnuffra, ad cek ixeǧeṣ s bṭayṭay.”
MAT 6:5 “Mařa teẓẓuǧed, war ttiři ca am yimnafqen inni umi iɛjeb asen řḥař ad ẓẓaǧen am bedden di temzidawin d tɣemmura n zznaqi ḥima ad ten ẓaren iwdan. S tidett Necc ad awem iniɣ, aqa nitni ufin řajar nsen zi beɛda.
MAT 6:6 Maca cek, mařa teẓẓuǧed, adef ɣar wexxam nnec, belleɛ tawwart, ẓẓaǧ i Babac wenni iǧan di tnuffra, uca Babac i ittwařan di tnuffra d Netta i cek i ɣa ixeǧṣen s bṭayṭay.
MAT 6:7 Mařa teẓẓuǧem war ttɛawadem i wawař am mammec ttẓaǧan lkuffar, minzi ittɣiř asen s wawařen [nsen] aṭṭas ad asen ittwaseř.
MAT 6:8 War ttiřim xenni am nitni, minzi Babatwem issen min teḥdajem qbeř d as i ɣa tᵉttarem ca.
MAT 6:9 Ammu i ɣa teẓẓaǧem kenniw: ‘A Babatneɣ i iǧan deg ijenwan, ad yiři Isem nnec ittwaqeddes,
MAT 6:10 ejj ad dd-tas Tgeldit nnec, ad yiři řxaḍar nnec am deg ujenna ammu ɛawed di temmurt.
MAT 6:11 Ewc aneɣ ass-a aɣrum i nehdaj.
MAT 6:12 Ɣfar aneɣ imarwusa nneɣ, am mammec nsameḥ ɛawed i yinni dd aneɣ ittursen,
MAT 6:13 u war d aneɣ sidif ca deg ujarreb, maca fekk aneɣ zeg umɛeffan. Minzi Tageldit d jjehd d uɛuǧi ad iřin i Cek i řebda qaɛ!’
MAT 6:14 Maɣar mařa kenniw tsamḥem i iwdan i iɛeddiyen nsen, uřa d Babatwem i iǧan deg ijenwan ad awem iɣfar.
MAT 6:15 Maca mařa kenniw war tᵉttsimiḥem i iwdan, aqa uřa d Babatwem war iɣeffar ca iɛeddiyen nwem.”
MAT 6:16 “Řami tẓummem, war tteggem aɣembub abarcan am yimnafqen, inni issneqřaben aɣembub nsen ḥima ad ten ẓaren iwdan belli aqa ẓummen. S tidett Necc ad awem iniɣ, aqa nitni ufin řajar nsen zi beɛda.
MAT 6:17 [Maca] cek, mařa tẓummed, dhen azeǧif nnec uca sired aɣembub nnec,
MAT 6:18 ḥima war tbinid ca i iwdan belli tᵉttẓummed, maca i Babac wenni iǧan di tnuffra, uca Babac i ittwařan di tnuffra, aqa Netta i cek i ɣa ixeǧṣen.”
MAT 6:19 “War smunam ca řeknuz i yixef nwem da di ddunect mani i ten ɣa tecc tcinda d ddra, u mani ɣa ssnuqqben ixewwanen, ad [ten] acaren,
MAT 6:20 [maca] smunem i yixef nwem řeknuz deg ujenna mani war ten tᵉttett ca tcinda d ddra, u mani war ssnuqquben ixewwanen, war [ten] ttacaren.
MAT 6:21 Minzi mani ɣa yiři řkenz nnec, aqa ad din yiři uřa d uř nnec.”
MAT 6:22 “Řefnar n arrimet netta d tiṭṭ. Mařa xenni tiṭṭ nnec aqa teṣfa, ad tiři arrimet nnec marra d tafawt.
MAT 6:23 Mara tiṭṭ nnec d taɛeffant, xenni ad tiři arrimet nnec marra d taǧest. Mařa tafawt tenni dayek d taǧest, mecḥař temɣar taǧest!
MAT 6:24 Uřa d ijj war izemmar ad ixdem i tnayen n isiditen, minzi [xenni] netta ad icarh ijjen, ad ixs wenneɣni, niɣ ad iweqqar ijjen, ad isseḥqar wenneɣni. Kenniw war tzemmarem ad tsexxarem i AREBBI d tenɛacin.”
MAT 6:25 “S uya Necc ad awem iniɣ: ‘War kessim amnus di tudart nwem, min ɣa teccem niɣ min ɣa teswem, uřa i arrimet nwem mammec tt i ɣa tessyarḍem. Xzarem, ma war teḥři tudart x macca niɣ arrimet x warruḍ?
MAT 6:26 Xzarem ɣar ijḍaḍ n ujenna, aqa nitni war zarrɛen, war mejjaren uca war ttxemmiřen di řemrasi. Waxxa amenni Babatwem i iǧan deg ijenwan i ten isseccan. Xzarem, ma kenniw war tessekkwim ca ktar aṭṭas xasen?
MAT 6:27 Man wen zzaywem izemmar s wemnus nnes ad yarni [mɣir] ijj n uɣiř di tuzzeggart nnes?
MAT 6:28 U mayemmi tkessim amnus i warruḍ? Xzarem mammec ɣemmyent tlillicin deg iyyar. Nitenti war xeddment, war ttqarḍcent,
MAT 6:29 [maca] Necc ad awem iniɣ, uřa d Suliman di marra aɛuǧi nnes war yarḍ ca am yijjen zzaysen.
MAT 6:30 Mařa AREBBI issyarḍ ammu arbiɛ n iyyar i iǧan ass-a uca tiwecca ad immenḍar di tefqunt, ma xenni war kenniw [issyirreḍ] aṭṭas ḥsen zzayes, [a] kenniw i di iǧa drus n l’iman?
MAT 6:31 S uya war kessim ca amnus, war qqarem: ‘Min ɣa necc?’, u: ‘Min ɣa nsu?’, niɣ: ‘Min ɣa nyarḍ?’
MAT 6:32 Maɣar řegnus n ddunect arezzun man aya marra, [maca] Babatwem i iǧan deg ijenwan issen aqa teḥdajem man aya marra.
MAT 6:33 Arzum amezwaru x Tgeldit n AREBBI d tsegda nnes, uca man aya marra ad ɣarwem immarni ɛawed.
MAT 6:34 S uya war kessim amnus i [min i ɣa yiři] tiwecca, minzi tiwecca ad teksi amnus i yixef nnes. Icfa i [kuř] ass tuɛeffna nnes.”
MAT 7:1 “War ḥekkmem, ḥima war tᵉttwaḥakamem,
MAT 7:2 minzi ɛlaḥsab řḥukm i zi ɣa tḥekmem, ad tᵉttwaḥakmem, u ɛlaḥsab řeɛbar i zi ɣa teɛbarem, ad tᵉttwaɛbarem ɛawed.
MAT 7:3 Mayemmi txezzared ɣar uxecciw di tiṭṭ n umac, [maca] war tḥekkared ca i teḥnact tenni di tiṭṭ nnec?
MAT 7:4 Xenni mammec ɣa tegged ad tinid i umac: ‘Ejj ayi ad ac dd-ssuffɣeɣ axecciw zi tiṭṭ nnec’, [uca] xzar, aqa cek ɣarek taḥnact di tiṭṭ nnec?
MAT 7:5 Cek, [a] amnafeq, suffeɣ-dd amezwaru taḥnact zi tiṭṭ nnec, xenni tzemmared ad texzared mliḥ ḥima ad tessuffɣed axecciw zi tiṭṭ n umac.
MAT 7:6 War tticem min iqeddsen i yiṭan, war neṭṭarem ca tiyaqutin nwem i iřfan, ḥima war xasent ɛeffsen s iḍaren nsen uca ad [ɣarwem] dd-nqeřben, ad kenniw mezzqen.”
MAT 7:7 “Ttarem, ad awem immewc, arzum, ad tafem, sqarqbem, ad awem ittwarzem.
MAT 7:8 Maɣar marra wenni i ɣa ittaren, ad iṭṭef u wenni i ɣa yarzun ad yaf, u wenni i ɣa issqarqben ad [as] ittwarzem.
MAT 7:9 Niɣ man bnadem jar awem, mařa mmis ittar as aɣrum, ad as iwc aẓru?
MAT 7:10 Niɣ mařa ittar as tasřemt, ad as iwc afiɣar?
MAT 7:11 Mařa kenniw, waxxa kenniw d iɛeffanen, aqa tessnem mammec ɣa tewcem min iṣebḥen i tarwa nwem, mecḥař ɛad Babatwem i iǧan deg ijenwan ad yewc min iṣebḥen i yinni d as i ɣa ittaren!
MAT 7:12 Qaɛ am mammec texsem ad awem ggen iwdan, ggem amya kenniw i nitni, minzi man aya d Ccariɛa d Inabiyyen.”
MAT 7:13 “Adfem zi tewwart iḥṣaren, minzi tawwart temɣar uřa d abrid i ittawyen ɣar uhellek d miriw, uca aṭṭas i zzayes ittadfen.
MAT 7:14 Mammec teḥṣar tewwart u mammec imẓi webrid i ittawyen ɣar tudart! Mɣir drus n yinni t ittafen.”
MAT 7:15 “Ḥḍam ixef nwem zeg inabiyyen issxarriqen i dd-ittasen ɣarwem s thiḍurt n izmaren, maca deg iɛeddisen nsen aqa nitni d uccanen itteṭṭfen.
MAT 7:16 Zi řɣiǧet nsen ad ten tessnem. Ma ad řeqḍen aḍiř zeg isennanen niɣ tazart zi tzeggʷart?
MAT 7:17 Ammu kuř tacejjart taṣebḥant tᵉttawi-dd řɣiǧet teṣbeḥ, uca tacejjart taɛeffant tᵉttawi-dd řɣiǧet taɛeffant.
MAT 7:18 Tacejjart taṣebḥant war tzemmar ad tewc řɣiǧet taɛeffant, uca tacejjart taɛeffant war tzemmar ad tewc řɣiǧet taṣebḥant.
MAT 7:19 Kuř tacejjart tenni war itticen řɣiǧet teṣbeḥ, ad tᵉttwaqess uca ad temmenḍar di tmessi.
MAT 7:20 S uyenni ad ten tessnem zi řɣiǧet nsen.”
MAT 7:21 “War iǧi ca kuř ijjen wenni d ayi ɣa inin: ‘A Sidi, a Sidi!’, ad yadef ɣar Tgeldit n ijenwan, maca d wenni itteggen min ixs Baba i iǧan deg ijenwan.
MAT 7:22 Aṭṭas i d ayi ɣa inin deg wass nni: ‘A Sidi, a Sidi, ma war nettnabb ca s Yisem nnec, ma war nuẓẓiř x ccwaṭen s Yisem nnec u s Yisem nnec ma war neggi aṭṭas n řeɛjayeb?’
MAT 7:23 Xenni Necc ad asen iniɣ nican: ‘Ɛemmarṣ war kenniw ssineɣ, beɛɛdem xafi, [a] kenniw inni itteggen řmuɛṣiyyet!’”
MAT 7:24 “S uya marra wenni ittesřan i wawařen inu, ittegg zzaysen, ad ittwamqudda ak-d ijj n bnadem d amiɣis wenni ibnan taddart nnes x sseǧaḥ.
MAT 7:25 Xenni iwta wenẓar, ḥemřen-dd iɣezran, suḍen-dd isemmiḍen uca řeqfen taddart nni, [maca] waxxa amenni war dd-tewḍi ca, minzi dsas nnes immars x sseǧaḥ.
MAT 7:26 [Maca] marra wenni ittesřan i wawařen inu, war zzaysen ittegg, ad yiři am yijj n bnadem d afɣuř i ibnan taddart nnes x ijdi.
MAT 7:27 Xenni iwta wenẓar, ḥemřen-dd iɣezran, suḍen-dd isemmiḍen, řeqfen taddart nni uca tewḍa, tuɣa aweṭṭu nnes d ameqqran.”
MAT 7:28 Awarni řami ikemmeř Yasuɛ awařen-a, aqa imsar belli řɣaci iqqim ittebhet s tɣuri nnes,
MAT 7:29 minzi tuɣa isseřmad i-ten amecnaw wenni ɣar teǧa ṣṣulṭa, war iǧi ca am yimseřmaden n idlisen d Ifarisiyyen.
MAT 8:1 Řami dd-ihwa zeg wedrar, ḍfaren t-i-dd aṭṭas n řɣaci.
MAT 8:2 Xzar, yusa-dd ɣares ijjen i di iǧa řbarṣ, isjed as, inna: “A Sidi, mařa texsed, tzemmared ad ayi tessizdeged!”
MAT 8:3 Yasuɛ isswiẓẓeḍ afus nnes uca iḥada t, inna: “Necc xseɣ, zdeg!” Uca ittwassizdeg zi řbarṣ nnes řexdenni.
MAT 8:4 [Xenni] inna as Yasuɛ: “Xzar, war tteqqar i ḥed, maca ruḥ, scen ixef nnec i ukehhan uca ewc taɣarṣt i Arebbi ɛlaḥsab min zzayes iweṣṣa Musa, aqa-tt d cchadet i nitni.”
MAT 8:5 Řami yudef Yasuɛ ɣar Kafarnaḥum, yusa-dd ɣares ijj n řqebṭan x mya, ittar zzayes [ammu],
MAT 8:6 inna: “A Sidi, amsexxar ameẓyan inu izzeř di taddart d aneɛḍab, aqa dayes řeḥriq aṭṭas!”
MAT 8:7 Inna as Yasuɛ: “Necc ad dd-aseɣ, ad t ssgenfiɣ!”
MAT 8:8 Uca řqebṭan x mya yarra-dd, inna: “A Sidi, necc war sdiheǧeɣ ad tadfed swadday i tzeqqa inu, maca ini ijj n wawař waha, xenni ad iggenfa umsexxar ameẓyan inu.
MAT 8:9 Minzi uřa d necc ɛawed d bnadem sadu ifassen uca ɣari iɛeskariyyen sadu ufus inu, qqareɣ i wa: ‘Ruḥ!’, xenni ad iraḥ, u i wenneɣni: ‘As-dd!’, xenni ad dd-yas, u i umsexxar inu [qqareɣ as]: ‘Egg man aya!’, uca ad t igg.”
MAT 8:10 Řami isřa Yasuɛ man aya, ittebhet, inna i yinni akides iǧan: “S tidett Necc ad awem iniɣ, war ufiɣ uřa di Israil l’iman am wanita.
MAT 8:11 Necc ad awem iniɣ, belli aṭṭas i dd ɣa yasen zi ccarq u zi řɣarb, ad qqimen [ɣar ṭṭabřa] ak-d Ibrahim d Isḥaq d Yaɛqub di Tgeldit n ijenwan,
MAT 8:12 [maca] tarwa n Tgeldit ad mmenḍaren barra ɣar ṭṭarf aneggaru n taǧest. Dinni ad iřin imeṭṭawen d uɣezzi n teɣmas.”
MAT 8:13 Yasuɛ inna i řqebṭan x mya: “Ruḥ, ad imsar am mammec tumned.” Uca iggenfa uḥenjir nnes di tsaɛɛet nni.
MAT 8:14 [Řexdenni] yusa-dd Yasuɛ ɣar taddart n Cimɛun, iẓra taḍekkwač nnes tezzeř, dayes timessi.
MAT 8:15 Iḥada afus nnes uca truḥ as tmessi, řexdenni tekkar, tsexxar xas.
MAT 8:16 Ɣar uɛecci iwyen-dd ɣares aṭṭas n imaryaḥen i daysen ccwaṭen. Issuffeɣ ccwaṭen nsen s yijj n wawař [waha], uca issgenfa marra imehřac,
MAT 8:17 ḥima ad ittwakemmeř min ittwannan zeg unabi Icaɛya: “Ad iksi řeḥriq nneɣ u ad yarbu řehřac nneɣ.”
MAT 8:18 Řami iẓra Yasuɛ řɣaci ameqqran i d as dd-innḍen, yumur [i-ten] ad ẓwan ɣar ujemmaḍ.
MAT 8:19 Uca yusa-dd ɣares ijj n umseřmad n idlisen, inna as: “[A] Amseřmad inu, ad Cek ḍfareɣ mani ma i ɣa traḥed!”
MAT 8:20 Inna as Yasuɛ: “Iceɛban ɣarsen ifran u ijḍaḍ n ujenna ɣarsen řeɛwacc, maca Mmis n bnadem war yufi ca mani ɣa isenned azeǧif nnes.”
MAT 8:21 Inna as ijjen nneɣni zeg imeḥḍaren nnes: “[A] Sidi, ejj ayi d amezwar ad uyureɣ ad neḍřeɣ baba!”
MAT 8:22 Inna as Yasuɛ: “Ḍfar ayi-dd, ejj imettinen ad neḍřen imettinen nsen!”
MAT 8:23 Řami inya di tɣarrabut, nyin imeḥḍaren nnes akides.
MAT 8:24 Uca xzar, tekkar-dd ict n tḥaryaḍt di řebḥar ař mani dřint řemwaj aɣarrabu, maca Yasuɛ tuɣa iṭṭeṣ.
MAT 8:25 Usin-dd ɣares imeḥḍaren nnes uca ssfaqen t-i-d, nnan as: “[A] Siditneɣ, senjem aneɣ, aqa ad nettwahellek!”
MAT 8:26 Inna asen: “Mayemmi tᵉtteggʷedem, [a] kenniw i di iǧa drus n l’iman?” Xenni ikkar, iwebbex asemmiḍ d řebḥar, uca tusa-dd řhudnet tameqqrant.
MAT 8:27 Tbehten iwdan, nnan: “Min iɛna wa umi isemmiḍen d řebḥar ttᵉṭṭaɛen as?”
MAT 8:28 Řami yiweḍ ɣar ujemmaḍ ɣar temmurt n Gadarinis, řqan t-i-dd tnayen n imaryaḥen, ffɣen-dd zeg imeḍřan, tuɣa mmuzzaren aṭṭas ař mani uřa d ijj war izemmar ad yekk abrid nni.
MAT 8:29 Sɣuyyen, nnan: “Min din jar aneɣ d Cek, a Yasuɛ, Mmis n AREBBI? Ma tusid-dd danita ḥima ad aneɣ tɛeddbed qbeř řweqt?”
MAT 8:30 Tuɣa din ict n tḥimart n iřfan tameqqrant tiggʷej xasen, thedda din.
MAT 8:31 Uca ccwaṭen ttaren zzayes, nnan: “Mařa tessuffɣed aneɣ, ejj aneɣ ad nadef ɣar tḥimart n yeřfan!”
MAT 8:32 Inna asen: “Ruḥem!” Řexdenni ffɣen-dd, udfen deg iřfan. Uca xzar, taḥimart n iřfan amen tmun teḥduddar zi teysart, uca iřfan wḍan di řebḥar, mmuten deg waman.
MAT 8:33 Arewřen imeksawen uca řami iwḍen ɣar tendint, xebbaren x kuřci min imsaren, uřa x imaryaḥen.
MAT 8:34 Uca xzar, ffɣen-dd aytbab n tendint marra i umsagar ak-d Yasuɛ. Umi t ẓrin, ttaren zzayes maḥend ad iffeɣ zi temmurt nsen.
MAT 9:1 [Awarni řami] inya deg uɣarrabu, iẓwa řebḥar, yiweḍ ɣar tendint nnes.
MAT 9:2 Uca iwyen as-dd ijj n uneɛḍab i tuɣa izzřen di tassut. [Řami] iẓra Yasuɛ l’iman nsen, inna i uneɛḍab: “Egg uř, [a] mmi, ddnub nnec ttwaɣfaren!”
MAT 9:3 Uca xzar, ca n imseřmaden n idlisen nnan deg yixef nsen: “Wanita ittceqqaf [di AREBBI].”
MAT 9:4 Yasuɛ, umi issen min di tuɣa ttfekkaren, inna asen: “Mayemmi tᵉttxemmamem di min war iḥřin deg wuřawen nwem?
MAT 9:5 Maɣar min ihewnen ad iniɣ i wanita: ‘Ddnub nnec ttwaɣfaren!’, niɣ ad iniɣ: ‘Kkar, uyur’?
MAT 9:6 Maca ḥima ad tessnem belli Mmis n bnadem ɣares ṣṣulṭa di temmurt ḥima ad iɣfar ddnub, ad iniɣ i uneɛḍab-a: “Kkar, ksi tassut nnec, tarekkweḥed ɣar taddart nnec!”
MAT 9:7 Xenni ikkar, iruḥ ɣar taddart nnes.
MAT 9:8 Řami iẓra řɣaci man aya, tbehten, ssɛuǧen AREBBI wenni iwcin ṣṣulṭa am tanita i iwdan.
MAT 9:9 Řami ssenni ikka Yasuɛ, iẓra aryaz wenni umi qqaren Matta, iqqim ɣar taddart n ḍḍariba. Inna as: “Ḍfar ayi-dd!” Uca ikkar, iḍfar i-t.
MAT 9:10 Řami qqimen nitni [ɣar ṭṭabřa] di taddart, usin-dd waṭṭas n ayt n ḍḍariba d imednab, qqimen [ɣar ṭṭabřa] ak-d Yasuɛ d imeḥḍaren nnes.
MAT 9:11 [Řami] ẓrin Ifarisiyyen man aya, nnan i imeḥḍaren nnes: “Mayemmi ittett Umseřmad nwem ak-d ayt n ḍḍariba d imednab?”
MAT 9:12 Umi isřa Yasuɛ [man aya], inna asen: “Inni iṣeḥḥen, war ḥdijen ca aḍbib, maca imehřac.
MAT 9:13 Ruḥem, ad třemdem min ixs ad yini [wawař-a]: ‘Xseɣ arreḥmet, war xseɣ ca taɣarṣt!’, minzi Necc war dd-usiɣ, ḥima ad řaɣiɣ x imseggaden, maca x imednab.”
MAT 9:14 Xenni usin-dd ɣares imeḥḍaren n Yuḥanna, nnan as: “Mayemmi nettẓumma neccin d Ifarisiyyen aṭṭas, maca imeḥḍaren nnec war ttẓummin ca?”
MAT 9:15 Yasuɛ inna asen: “Ma izemmar ad ceḍnen řeḥbab n umuřay umi amuřay ɛad akidsen? Ad dd-asen wussan ad xasen immeksi Umuřay, xenni ad ẓummen.
MAT 9:16 Uřa d ijj war ittegg taneqqič n tcuqqet n jdid x warruḍ aqdim, ḥima war tqeǧiɛ tneqqič zeg warruḍ uca ad iqqarṣ [warruḍ] ktar.
MAT 9:17 Uřa d binu n jdid war ittwagg ca di txuncay tibuřay, ḥima war dduqquzent txuncay, ad izeǧeɛ binu uca tixuncay ad ḍeyyɛent. Ittxeṣṣa ad tteggen binu n jdid di txuncay n jdid, ḥima ad ttwaxemmřen nitni s tnayen.”
MAT 9:18 Am tuɣa issawař akidsen x tmesřayin-a, yusa-dd ijj n umeqqran, isjed as, inna: “Řexxu yeǧi bḥřa temmut, maca as-dd, sars xas afus nnec uca ad teddar ɛawed.”
MAT 9:19 Yasuɛ ikkar, iḍfar i-t ak-d imeḥḍaren nnes.
MAT 9:20 Uca xzar, ict n temɣart, tuɣa ttazzřen zzayes idammen řmijař n tenɛac n iseggʷusa, tekka as-dd ɣar ḍeffar uca tḥada abeḥřuř n ujeǧab nnes,
MAT 9:21 minzi nettat tuɣa tenna deg ixef nnes: “Icfa mɣir ad ḥadiɣ ajeǧab nnes, ad ggenfiɣ!”
MAT 9:22 Maca inneqřeb-dd Yasuɛ, iẓra i-tt, inna: “Egg uř, a yeǧi, aqa l’iman nnem i cem issnejmen!” Uca tᵉttwassggenfa temɣart nni di tsaɛɛet nni.
MAT 9:23 [Xenni] yusa-dd Yasuɛ ɣar taddart n umeqqran, iẓra iɣeyyaḍen d řɣaci sɣuyyun.
MAT 9:24 Inna asen: “Ffɣem ssa! Taḥenjirt war temmut ca, aqa tᵉṭṭeṣ!” Nitni ḍeḥcen dayes.
MAT 9:25 Ařami issuffeɣ řɣaci, yudef ɣar daxeř uca iṭṭef i-tt zeg ufus nnes, xenni tekkar tḥenjirt.
MAT 9:26 Uca iffeɣ řexbar ɣar temmurt nni marra.
MAT 9:27 Řami ssenni ikka Yasuɛ, ḍfaren t tnayen n idarɣařen, ttřaɣan, qqaren: “Arḥem aneɣ, a Mmis n Dawud!”
MAT 9:28 Ařami yudef ɣar taddart, usin-dd ɣares idarɣařen nni. Yasuɛ inna asen: “Ma tumnem belli zemmareɣ ad ggeɣ man aya?” Nnan as: “Wah, [a] Siditneɣ!”
MAT 9:29 Řexdenni iḥada tiṭṭawin nsen, inna: “Ad ɣarwem yiři ɛlaḥsab l’iman nwem!”
MAT 9:30 Řexdenni ttwarezment tiṭṭawin nsen. [Xenni] iḥarrem i-ten Yasuɛ, inna: “Ɣarwem, war ssargabem ḥed!”
MAT 9:31 Maca nitni, ařami ruḥen, ssuffɣen xas řexbar di marra tammurt!
MAT 9:32 Řami dd-ffɣen nitni, iwyen as-dd ijj n weryaz aynaw, dayes ijj n cciṭan.
MAT 9:33 Řami [zzayes] iffeɣ cciṭan nni, issiweř weynaw. Tuɣa ittebhet řɣaci, nnan: “Ɛemmarṣ war neẓri am wanita di Israil!”
MAT 9:34 Maca Ifarisiyyen nnan: “S umeqqran n ccwaṭen issuffuɣ ccwaṭen!”
MAT 9:35 Yeccu tuɣa ittenneḍ x marra tineddam d dcurat, isseřmad i-ten di temzidawin nsen. Tuɣa ittbarreḥ s Řexbar Aṣebḥan n Tgeldit uca issgenfa marra řehřacat d řeɛyub n řgens.
MAT 9:36 Řami iẓra Yasuɛ řɣaci, iḥinn xasen, minzi uḥřen nnhewřen am wuǧi i war ɣar iǧi umeksaw.
MAT 9:37 Xenni inna i imeḥḍaren nnes: “Tameyra temɣar aṭṭas, maca aqa din drus n icewwařen.
MAT 9:38 S uyenni ttarem i Bab n tmeyra, ad dd-issekk icewwařen i tmeyra nnes.”
MAT 10:1 Iřaɣa Yasuɛ x tenɛac n imeḥḍaren nnes, iwca asen ṣṣulṭa ḥima ad ssuffɣen řaryaḥ imengas u ḥima ad ssgenfan marra řeɛyubat d řehřacat.
MAT 10:2 Ismawen n tenɛac n rrusul d yina: amezwaru nsen Cimɛun umi qqaren Buṭrus, [isem wanita ixs ad yini ‘Aẓru’,] d umas Andrawus, d Yaɛqub, mmis n Zabdi, d umas Yuḥanna,
MAT 10:3 d Filippus d Bar-Tulumawus, Tuma d Matta, wenni d bu-ḍḍariba, d Yaɛqub, mmis n Ḥalfa, d Labbawus, umi qqaren Tadday,
MAT 10:4 d Cimɛun, wenni d Amɛessab, d Yahuda Isxariyuṭi wenni t isellmen.
MAT 10:5 Yasuɛ issekk tenɛac-a, yumur i-ten, inna: “War ttruḥem ca x webrid n lkuffar, war ttadfem ca ɣar tendint n Isamariyyen,
MAT 10:6 maca ḥsen ad traḥem ɣar wuǧi iweddaren n taddart n Israil.
MAT 10:7 Xmi ɣa traḥem, barrḥem am teqqarem: ‘Tageldit n ijenwan aqa tiweḍ-dd!’
MAT 10:8 Sgenfam imehřac, sizdgem inni di iǧa řbarṣ, suffɣem ccwaṭen. Kenniw teksim břa ca, xenni wcem tt břa ca.
MAT 10:9 War kessim ca wureɣ uřa d nnuqart uřa d nnḥas deg ibuyas nwem,
MAT 10:10 war kessim ca ttesṭim i webrid řa d tnayen n tcamirat řa d sandaliyat uřa d taɣɣarct [nneɣni], minzi axeddam isdaheǧ macca nnes.
MAT 10:11 Man tandint niɣ dcar i ɣa tadfem, arzum wi dayes isdaheǧ, uca qqimem din ař d traḥem.
MAT 10:12 Mařa tudfem ɣar taddart, seǧmem x aytbab n taddart s řehna.
MAT 10:13 Mařa taddart tesdaheǧ, jjem xas řehna nwem, mařa war t tesdiheǧ, xenni řehna nwem ad ɣarwem dd-iɛqeb.
MAT 10:14 Mařa tufim ca n yijjen war kenniw iqebbeř u war ittesři i wawařen nwem, ffɣem zi taddart nni niɣ zi dcar nni, zzerzem taɛejjajt zeg iḍaren nwem.
MAT 10:15 S tidett, Necc ad awem iniɣ: Ad yiři řḥař i temmurt n Sadum d Ɛamurra ihwen zi tendint nni deg wass n lḥisab.”
MAT 10:16 “Xzarem, řexxu ad kenniw ssekkeɣ am uǧi di řwesṭ n wuccanen. Iřim tfettnem amecnaw ifiɣran u ɣeffřem amecnaw idbiren.
MAT 10:17 Maca ḥḍam ixef nwem zeg iwdan, minzi nitni ad kenniw sellmen i taddart n ccreɛ, ad kenniw hettken s urekkuḍ di temzidawin nsen.
MAT 10:18 Ad kenniw nedhen zzat i řḥukkam d zzat i ijeǧiden di ssibbet inu, ḥima ad tiřim d cchadet i nitni uřa i řegnus.
MAT 10:19 Mařa sellmen kenniw, war kessim ca s wemnus mammec d min ɣa tessiwřem, minzi ad awem immewc di tsaɛɛet nni min ittxeṣṣa ad tinim.
MAT 10:20 Maɣar war iǧi d kenniw inni issawařen, maca d Arruḥ n Babatwem d Netta i daywem issawařen.
MAT 10:21 Umas ad isellem umas ḥima ad itwaneɣ u babas mmis, uca ad kkaren tarwa d aɣezdis i lwalidin nsen, ad ten nɣen.
MAT 10:22 Ad kenniw carhen marra idsen x ssibbet n Yisem inu, maca wenni i ɣa iṣbaren ař aneggaru ad ittwassenjem.
MAT 10:23 Mařa darrcen xawem di tendint-a, arewřem ɣar tenneɣnit. S tidett, Necc ad awem iniɣ: kenniw war tᵉttekkem ca x marra tineddam n Israil ař dd ɣa yas Mmis n bnadem.”
MAT 10:24 “War iǧi umeḥḍar yuɛřa x umseřmad nnes, uřa d amsexxar x bab nnes.
MAT 10:25 Ikfa i umeḥḍar ad yiři am umseřmad nnes u amsexxar am bab nnes. Mařa řaɣan as i Bab n taddart ‘Bᵉɛalzabul’, [ixs ad yini ‘ibřis’], mecḥař [ɛad] i aytbab n taddart nnes!
MAT 10:26 War tteggʷedem ca zzaysen. Minzi war din min idřin ad iqqim war ittwaɛarri, uřa [war din] min inuffaren ad iqqim war ittwissen.”
MAT 10:27 “Min d awem qqareɣ di taǧest, inim t di tfawt, min tesřim, [qqaren t] deg imezzuɣen nwem, barrḥem zzayes x tzeɣwin.
MAT 10:28 War tteggʷedem ca zeg inni ineqqen arrimet, [maca] war zemmaren ad nɣen řeɛmar. Ggʷedem d amezwaru zeg Wenni izemmaren ad isshellek řeɛmar d arrimet di jᵉhennama.
MAT 10:29 Ma war ttmenzin tnayen n ẓẓawec s yijj n uṣuldi n nnḥas? Uřa d ijj zzaysen war dd-iweṭṭi ca x temmurt břa Babatwem,
MAT 10:30 maca uřa d iẓuṭṭan [n ucuwwaf] n uzeǧif nwem ttwaḥessben marra.
MAT 10:31 S uyenni war tteggʷedem ca, aqa kenniw teɛdum ẓẓawec aṭṭas.
MAT 10:32 S uya kuř ijjen wenni zzayi i ɣa icehden zzat i iwdan, uřa d Necc ad zzayes cehdeɣ zzat i Baba i iǧan deg ijenwan.
MAT 10:33 Maca wenni d ayi ɣa inkaren zzat i iwdan, uřa d Necc ad t nkareɣ zzat i Baba i iǧan deg ijenwan.”
MAT 10:34 “War ttɣiřem ca belli usiɣ-dd ḥima ad awyeɣ řehna i ddunect. Necc war dd-usiɣ ca ḥima ad awyeɣ řehna, maca ssif.
MAT 10:35 Usiɣ-dd ḥima ad bḍiɣ aryaz x babas, d yeǧis x yemmas, d tesřit x řallas.
MAT 10:36 Aytbab n taddart n bnadem ad iřin d řɛedyan [nnes].
MAT 10:37 Wenni ittexsen babas niɣ d yemmas xafi, war d ayi isdiheǧ ca, uca wenni ittexsen mmis niɣ d yeǧis xafi, war d ayi isdiheǧ ca.
MAT 10:38 Wenni war ikessin ṣṣalib nnes uca ad ayi dd-iḍfar, aqa netta war d ayi isdiheǧ ca.
MAT 10:39 Wenni i ɣa yafen tudart nnes ad tt ixsar, d wenni i ɣa ixsaren tudart nnes di ṭṭweɛ inu ad tt yaf.
MAT 10:40 Wenni kenniw i ɣa iqebřen, iqebbeř ayi, u wenni d ayi ɣa iqebřen, iqebbeř wenni d ayi dd-issekken.
MAT 10:41 Wenni i ɣa iqebřen anabi minzi netta d anabi, ad iṭṭef řmunet n unabi, d wenni i ɣa iqebřen amseggad s minzi netta d amseggad, ad iṭṭef řmunet n umseggad.
MAT 10:42 Wenni i ɣa iwcen i yijjen zeg ina imeẓyanen ijj n řkas n waman d asemmaḍ, mɣir minzi netta d ameḥḍar [inu], s tidett, Necc ad awem iniɣ, war d as tᵉttriḥ řmunet nnes [ɛemmarṣ].”
MAT 11:1 Awarni řami ikemmeř Yasuɛ řumur nnes i tenɛac n imeḥḍaren nnes, yuyur ssenni ḥima ad isseřmed u ad ibarreḥ di tneddam nsen.
MAT 11:2 Řami tuɣa Yuḥanna ittesřa di řeḥbes x řexdayem n Lmasiḥ, issekk ca zeg imeḥḍaren nnes.
MAT 11:3 Inna as: “Ma d Cek d wenni dd ɣa yasen niɣ [ittxeṣṣa] ad nraja ijjen nneɣni?”
MAT 11:4 Yarra-dd Yasuɛ, inna asen: “Ruḥem, tɛawdem i Yuḥanna min tesřam d min teẓrim!
MAT 11:5 Aqa idarɣařen ttwařan, ineɛḍaben gguren d yinni di iǧa řbarṣ ttwassizdigen, idehcar dewřen ttesřan, imettinen ttwassnekkaren-dd u Řexbar Aṣebḥan ittwabarraḥ i imezřaḍ.
MAT 11:6 Sseɛd n wenni war dayi ittendrifen.”
MAT 11:7 Řami uyuren ina, ibda Yasuɛ issawař ak-d řɣaci x Yuḥanna, inna: “Min ɣar dd-teffɣem ɣar řexřa maḥend ad t tẓarem? Ma ɣar ijj n uɣanim issenhezza t usemmiḍ?
MAT 11:8 Mařa lla, min ɣar dd-teffɣem ad t tẓarem? Ma ɣar ijj n bnadem s warruḍ yarḍeb? Xzar, inni yarrḍen arruḍ iɣřan yarḍeb, aqa aten di tudrin n ujeǧid.
MAT 11:9 Min ɣar dd-teffɣem [xenni] maḥend ad t tẓarem? Ijj n unabi? Wah, Necc ad awem iniɣ, aqa d ameqqran [ɛad] x unabi.
MAT 11:10 Maɣar aqa d wa d wenni i xef ittwari [wawař-a]: ‘Xẓar, ad dd-ssekkeɣ lmalak inu zzat i wudem nnec, wenni i ɣa isswejden abrid nnec zzatek.’
MAT 11:11 S tidett, Necc ad awem iniɣ, jar inni dd-ittwaxeřqen zi temɣarin, war dd-iffiɣ uřa d ijj d ameqqran x Yuḥanna Amseɣḍaṣ. Waxxa amenni ameẓyan di Tgeldit n ijenwan d ameqqran xas.
MAT 11:12 Zeg wussan n Yuḥanna Amseɣḍaṣ ař iḍa temmars Tgeldit n ijenwan i lɛunf, uca ayt n bu-řexcunet [arezzun] ttᵉṭṭfen tt.
MAT 11:13 Minzi marra inabiyyen d Ccariɛa tuɣa ttnabban ař dd-yas Yuḥanna.
MAT 11:14 Mařa texsem, qebřem aqa wanita d Iliya wenni tuɣa igga ad dd-yas.
MAT 11:15 Wenni ɣar iǧa imezzuɣen i useǧi ad iseř.”
MAT 11:16 “Wi ak-d i ɣa ssemquddeɣ jjiř-a? Aqa-t amecnaw iḥenjiren iqqimen di řeswaq ttřaɣan x imeddukkař nsen,
MAT 11:17 qqaren: ‘Aqa nɣennej i kenniw, kenniw war tecḍiḥem. Aqa newta awem agejdur, war tecḍinem.’
MAT 11:18 Maɣar yusa-dd Yuḥanna, war ittett, war isess, uca qqaren nitni: ‘Dayes ijj n cciṭan!’
MAT 11:19 Aqa Mmis n bnadem yusa-dd, ittᵉtt, isess, uca nitni qqaren: ‘Aqa din bnadem iřhef x macca d binu, Netta d ameddukkeř n ayt n ḍḍariba d imednab!’ [Maca] tiɣit tᵉttwasegged s řexdayem nnes.”
MAT 11:20 Řexdenni ibda ittwebbex tineddam i di igga aṭṭas n řeɛjayeb nnes, minzi nitenti war tubent ca.
MAT 11:21 “Uct xam, a Xurazin, uct xam, a Bayt-Ṣayda! Mři tuɣa ttwaggent di Ṣur d Ṣaydun řeɛjayeb ijehden tinni ittwaggen daykent, iři aqa tubent aṭṭas zeg wami s txancet n wecḍan d yiɣɣeḍ [x izeǧifen nsent].
MAT 11:22 Maca Necc ad awem iniɣ: Ad yiři řḥař [i tendint] n Ṣur d Ṣaydun ihwen zi řḥař nwem deg wass n lḥisab.
MAT 11:23 I cem, a [tandint n] Kafarnaḥum, tenni ittwassgeɛɛden ař ajenna? Ɣar řaxart i ɣar dd ɣa tehwid. Minzi mařa ttwaggent di Sadum řeɛjayeb ijehden i dayem ittwaggen, iři aqa teqqim ař ass n yiḍa.
MAT 11:24 Maca Necc ad am iniɣ, ad yiři řḥař i temmurt n Sadum ihwen zi [řḥař] nnem deg wass n lḥisab.”
MAT 11:25 Di řweqt nni ibda Yasuɛ ad yini: “Ḥemdeɣ Cek a Baba, Sidi n ujenna d temmurt, minzi tessnuffared aya x imiɣisen d imusnawen, [maca] tessaregbed aya i iḥenjiren.
MAT 11:26 Wah, [a] Baba, minzi d wa d arḍa i Cek.
MAT 11:27 Marra min iǧan immewc ayi-dd zi Baba, uca uřa d ijj war issin Mmis mɣir Babas, uca uřa d ijj war issin Babas mɣir Mmis u wi umi ixs Mmis ad t issargeb.”
MAT 11:28 “Asem-dd ɣari marra kenniw, inni yuḥřen d yinni yarbun ddqeř, uca Necc ad awem wceɣ arraḥet,
MAT 11:29 ksim-dd azayřu inu xawem, řemdem zzayi, [minzi] Necc d amhin d amwaḍeɛ n wuř uca ad tafem arraḥet i řeɛmur nwem.
MAT 11:30 Minzi azayřu d řeḥmeř inu fsusen.”
MAT 12:1 Di řweqt nni icuq Yasuɛ deg iyyaren n zzariɛet n imendi di ssebt. Tuɣa imeḥḍaren nnes ǧuẓen uca bdan řeqqḍen tidrin, ccin [zzaysent].
MAT 12:2 [Ařami] ten ẓrin Ifarisiyyen, nnan as: “Xzar imeḥḍaren nnec tteggen min war iɛeddřen di ssebt!”
MAT 12:3 Yarra-dd xasen: “Ma war teɣřim ca min igga Dawud umi iǧuẓ netta d yinni akides?
MAT 12:4 Mammec yudef ɣar Taddart n AREBBI, icca aɣrum [n wescan] zi Tzewḍa n SIDI i war iḥeǧřen macca nnes i netta uřa i yinni akides, maca mɣir i ikehhanen waha.
MAT 12:5 Niɣ war teɣrim ca di Ccariɛa belli ikehhanen inni iǧan di Zzawect Tameqqrant di ssebt, xeṭṭan di [tewṣiyyet n] ssebt, waxxa amenni war xasen ibin řɛib?
MAT 12:6 Necc ad awem iniɣ, wenni iǧan d ameqqran x Zzawect Tameqqrant, aqa-t danita!
MAT 12:7 Maca mařa tuɣa tfehmen min ixs ad yini: ‘Necc xseɣ arreḥmet, war iǧi d taɣarṣt!’, xenni ad tiři war tᵉttḥasabem ca x imezdagen,
MAT 12:8 minzi Mmis n bnadem d Bab n ssebt.”
MAT 12:9 Yasuɛ yuyur ssenni, yudef ɣar temzida nsen.
MAT 12:10 Tuɣa din ijj n weryaz, afus nnes iqucceḥ. Sseqsan t maḥend zemmaren ad zzayes cettcan, nnan: “Ma iɛeddeř usgenfi di ssebt?”
MAT 12:11 Inna asen: “Man bnadem i dinni jar awem wenni ɣar iǧa izmar i iwḍan di tesraft di ssebt, war t itteṭṭef, ḥima ad t-i-dd issuffeɣ?
MAT 12:12 Mecḥař iɛdu bnadem x izmar! S uyenni iɛeddeř ad ittwagg min iṣebḥen di ssebt.”
MAT 12:13 Řexdenni inna as i bnadem nni: “Swiẓẓeḍ afus nnec!” Isswiẓẓeḍ afus nnes uca idweř iggenfa am wenneɣni.
MAT 12:14 Ifarisiyyen ffɣen-dd ɣar barra, mcawaren xas, mammec ɣa ggen ad t nɣen.
MAT 12:15 Maca Yasuɛ issen [aya] uca yuyur ssenni. Iḍfar i-t-i-dd ijj n řɣaci d ameqqran, issgenfa i-ten marra.
MAT 12:16 Yumur i-ten s jjehd maḥend war xas ssuffuɣen řexbar,
MAT 12:17 ḥima ad ittwakemmeř wawař i innan unabi Icaɛya:
MAT 12:18 “Xzar, Amsexxar inu, wenni farrzeɣ, Amɛizz inu, wenni di ufiɣ arḍa inu. Ad xas ssarseɣ Arruḥ inu u Netta ad ibarreḥ s řḥukm i řegnus.
MAT 12:19 War ittemcubbuc, war isɣuyyu, uřa d ijj war ittesři tmijja nnes deg ibriden.
MAT 12:20 Aɣanim yarẓen war t yareẓẓi, uřa d taftič idduxxunen, war tt issxessi ař dd ɣa issuffeɣ řeḥkam i ɣa inedhen i uɣelleb,
MAT 12:21 uca ad ssitmen řegnus deg Yisem nnes.”
MAT 12:22 Řexdenni iwyen as-dd ijj n umeryaḥ, tuɣa-t d adarɣař d aynaw, uca Netta issgenfa i-t, ařami wenni tuɣa iǧan d aynaw d adarɣař idweř issawař u ittwařa.
MAT 12:23 Itebhet řɣaci marra, nnan: “Ma Wanita [xenni] war iǧi d Mmis n Dawud?”
MAT 12:24 Maca sřin Ifarisiyyen man aya, nnan: “Wanita issuffuɣ ccwaṭen mɣir s webrid n Bᵉɛalzabub, ameqqran n ccwaṭen.”
MAT 12:25 Maca Yasuɛ issen ixarriṣen nsen, inna asen: “Kuř tageldit ittemsebḍan x yixef nnes ad tᵉttwahellek, u kuř taddart niɣ tandint ittemsebḍan x yixef nnes war tᵉttɣimi ca.
MAT 12:26 Mařa aqa-t d cciṭan issuffuɣ cciṭan, aqa netta ittemsebḍa x yixef nnes, [xenni] mammec ɣa teqqim tgeldit nnes?
MAT 12:27 Mařa Necc ssuffuɣeɣ ccwaṭen s webrid n Bᵉɛalzabub, s min zi ten i ɣa ssuffɣen tarwa nwem? S uyenni nitni ad iřin d řquḍat xawem.
MAT 12:28 Maca mařa Necc ssuffuɣeɣ ccwaṭen s Arruḥ n AREBBI, aqa tudes awem-dd Tgeldit n AREBBI.
MAT 12:29 Niɣ mammec izemmar ḥed ad yadef ɣar taddart n wenni ijehden maḥend ad ikecceḍ řeqcuɛ nnes, mařa war icarf wenni ijehden amezwar? Xenni izemmar ad ikecceḍ taddart nnes.
MAT 12:30 Wenni war iǧin akidi, aqa-t ḍidd inu, wenni war kidi issmunan, aqa ittzeǧaɛ waha.
MAT 12:31 S uyenni ad awem iniɣ: marra ddnub d uceqqef ad ittwaɣfar i iwdan, maca aceqqef di Arruḥ war ittwaɣfar ca i iwdan.
MAT 12:32 Wenni i ɣa inin awař d aɛeffan x Mmis n bnadem ad as ittwaɣfar, maca wenni i ɣa inin awař d aɛeffan x Arruḥ Iqeddsen war d as ittwaɣfar ca, uřa di řweqt-a uřa di řweqt i dd ɣa yasen.
MAT 12:33 Ḥesbem tacejjart d taṣebḥant uřa d řɣiǧet nnes d taṣebḥant, niɣ ḥesbem tacejjart texsar uřa d řɣiǧet nnes texsar, minzi tacejjart tᵉttwassen zi řɣiǧet [nnes].”
MAT 12:34 “A tarwa n ifiɣran, mammec ɣa teggem ad tessiwřem x min iṣebḥen, waxxa kenniw d iɛeffanen, minzi zeg uɛemmar n wuř ad issiweř uqemmum.
MAT 12:35 Bnadem aṣebḥan issuffuɣ-dd min iṣebḥen zi řkenz aṣebḥan [n wuř nnes] uca bnadem aɛeffan [issuffuɣ-dd] zi řkenz aɛeffan nnes min iɛeffnen.
MAT 12:36 Maca Necc ad awem iniɣ, belli kuř awař ixwan ad zzayes ssiwřen iwdan, ad zzayes ttwaḥasben deg wass n lḥisab.
MAT 12:37 Minzi s wawařen nnec ad tᵉttwaseggded uca s wawařen nnec ad tᵉttwaḥasbed.”
MAT 12:38 Ca n imseřmaden n idlisen d Ifarisiyyen, arrin-dd xas: “[A] Amseɣɣar, neccin nexs ad nẓar ict n řeɛřamet zzayek.”
MAT 12:39 Maca Netta yarra-dd xasen: “Jjiř aɛeffan izennan ittettar ict n řeɛřamet, war d as ittmewci uřa d ict n řeɛřamet [mɣir] řeɛřamet n Yunus.
MAT 12:40 Minzi am mammec tuɣa Yunus třata n wussan jar ǧyaři d wussan deg uɛeddis n wesřem, ammu i ɣa yiři uřa d Mmis n bnadem deg wuř n temmurt třata n wussan jar ǧyaři d wussan.
MAT 12:41 Iryazen n Ninwa ad dd-kkaren deg [wass n] lḥisab ak-d jjiř-a, ad t ḥasben, minzi nitni tuben s tbarreḥt n Yunus, uca xzarem, aqa da Wenni iǧan d ameqqran x Yunus!
MAT 12:42 Tajeǧidt n ljanub ad tekkar deg [wass n] lḥisab ak-d jjiř-a, ad xas teḥkem minzi nettat tusa-dd zeg uneggaru n ddunect, ḥima ad tseř i tiɣit n Suliman, uca xzarem, aqa da Wenni iǧan d ameqqran x Suliman!”
MAT 12:43 “Ařami iffeɣ řaryaḥ amengus zi bnadem, ibda ittsara deg imucan war daysen bu waman, yarezzu arraḥet, war tt ittif.
MAT 12:44 Řexdenni ad yini: ‘Ad dewřeɣ ɣar taddart inu manis dd-ffɣeɣ!’ Uca iruḥ, yufa i-tt texwa, tfarḍ, tsettef.
MAT 12:45 Řexdenni yuyur uca yiwi akides sebɛa n řaryaḥ nneɣni, d iɛeffanen ktar zzayes, ad dd-adfen, ad raḥen ad zedɣen dayes, uca aneggaru n bnadem nni ad idweř mahu x umezwaru. Ammu i ɣa yiři [ɛawed] ak-d jjiř-a aɛeffan.”
MAT 12:46 Řami tuɣa ɛad issawař ak-d řɣaci, xzar, yemmas d aytmas bedden barra, arezzun ad kides ssiwřen.
MAT 12:47 Inna as ijjen: “Xzar, yemmac d aytmac bedden di barra, arezzun ad kidek ssiwřen.”
MAT 12:48 [Maca] Netta yarra-dd x wenni tuɣa d as t innan, inna: “Min teɛna yemma d min ɛnan aytma?”
MAT 12:49 [Xas uca] isswiẓẓeḍ s ufus nnes ɣar imeḥḍaren nnes, inna: “Xzar, yemma, xzar, aytma!
MAT 12:50 Minzi man wen itteggen min ixs Baba i iǧan deg ijenwan, aqa netta d uma d učma d yemma.”
MAT 13:1 Deg wass nni iffeɣ Yasuɛ zi taddart, iruḥ iqqim x tma n řebḥar.
MAT 13:2 Imun-dd xas ijj n uhimur n řɣaci, ařami yenya di uɣarrabu, iqqim dayes uca řɣaci marra bedden x tma n řebḥar.
MAT 13:3 Issiweř akidsen x waṭṭas n tmesřayin s imedya, inna: “Xzar, afeǧaḥ iffeɣ, ḥima ad izarɛ.
MAT 13:4 Am tuɣa izarreɛ, tewḍa ca n zzariɛet x tma n webrid, xeccen-dd ijḍaḍ, neqben tt.
MAT 13:5 Tewḍa ca nneɣni x weẓru mani tuɣa war iǧi ucař aṭṭas. Deɣya teɣmi-dd s minzi tammurt war tuǧiɣ.
MAT 13:6 Umi dd-tenqar tfuct, icmeḍ [uɣemmuy], uca isřaw minzi war ɣares tuɣi bu weẓwar.
MAT 13:7 Ca nneɣni tewḍa x isennanen. Mɣaren isennanen, jiyyfen tt.
MAT 13:8 Ca nneɣni tewḍa x temmurt taṣebḥant, tiwi-dd řɣiǧet, ca mya, ca nneɣni settin, ca nneɣni třatin n tseqqar.
MAT 13:9 Wenni ɣar iǧa imezzuɣen i useǧi, ejj i-t ad iseř.”
MAT 13:10 [Xas uca] usin-dd ɣares imeḥḍaren nnes, nnan as: “Mayemmi akidsen tessawařed s imedya?”
MAT 13:11 Netta yarra-dd, inna asen: “Minzi immewc awem ad tessnem ssirr n Tgeldit n ijenwan, nitni maca war d asen t immewc ca.
MAT 13:12 Minzi wenni ɣar iǧa ad as immewc uca ad ɣares yiři s waṭṭas, maca wenni war ɣar iǧi ca ad zzayes ittwakkes uřa d min ɣares.
MAT 13:13 S uyenni ssawařeɣ akidsen s imedya, ařami nitni ttwařan am war ttwiřin u ttesřan am war ttesřin, war fehhmen.
MAT 13:14 Daysen i ɣa ikemmeř wawař i inebba Icaɛya, inna: ‘S useǧi ad tesřem, [maca] war tfehhmen, s tmuɣři ad tẓarem, [maca] war tfettnem,
MAT 13:15 maɣar uř n řgens-a aqa iqbubbez, imezzuɣen nsen ḍeqřen deg useǧi u nitni aqa qqnen tiṭṭawin nsen, [maḥend] war ttwiřin s tiṭṭawin nsen, ad sřen s imezzuɣen nsen, ad fehmen s wuř nsen, ḥima ad tuben uca Necc ad ten ssgenfiɣ.’
MAT 13:16 Maca sseɛd n tiṭṭawin nwem umi ttwařant, sseɛd n imezzuɣen nwem umi ttesřan!
MAT 13:17 S tidett Necc ad awem iniɣ, aṭṭas n inabiyyen d imseggaden tuɣa xsen ad ẓaren min teẓrim, [maca] war t ẓrin, xsen ad sřen min tesřim, war t sřin.”
MAT 13:18 “[Xenni] kenniw, sřem i umedya n wenni izarrɛen.
MAT 13:19 Kuř ijjen wenni ittesřan i Wawař n Tgeldit uca war t ifhim, ad ɣares dd-yas umɛeffan, ad ixḍef min ittwazarɛen deg wuř nnes. Aqa d man aya min ittwazarɛen x tma n webrid.
MAT 13:20 Min ittwazarɛen x weẓru, aqa wa d wenni i ɣa iseǧen Awař, ad t iqbeř deɣya s řefraḥet,
MAT 13:21 maca war d as iwti ca weẓwar deg ixef nnes, ad iqqim drus waha. Xmi dd ɣa tas řmeḥnet niɣ amarret di ṭṭweɛ n Wawař ad innedref deɣya.
MAT 13:22 Min ittwazarɛen jar isennanen aqa wa d wenni ittesřan Awař, [maca] amnus n řweqt-a d uɣekkwi n wagřa ad jiyyfen Awař uca netta war dd-ittiwi ca řɣiǧet.
MAT 13:23 Min ittwazarɛen di temmurt taṣebḥant aqa wa d wenni ittesřan Awař uca ad t ifhem, ad yarbu u ad dd-yawi xenni řɣiǧet: ijjen ad yařu mya n tseqqar, wenneɣni settin uca wenneɣni třatin.”
MAT 13:24 Iwca asen ijj n umedya nneɣni, inna: “Tageldit n ijenwan am yijj n bnadem tuɣa izarreɛ zzariɛet taṣebḥant deg iyyar nnes.
MAT 13:25 Ařami tuɣa iwdan ṭṭṣen, yusa-dd řeɛdu nnes, izarɛ řḥayyar di řwesṭ n yirden uca yuyur.
MAT 13:26 Ařami dd-imɣar uɣemmuy uca yiwi-dd řɣiǧet, řexdenni iḍhar-dd řḥayyar ɛawed.
MAT 13:27 Xenni usin-dd imsexxaren n bab n taddart, nnan as: ‘A Siditneɣ, ma war tzarɛed ca zzariɛet taṣebḥant deg iyyar nnec? Manis i dd-yusa [xenni] řḥayyar-a i dayes iǧan?’
MAT 13:28 Inna asen: ‘Aqa řeɛdu igga man aya’. Nnan as imsexxaren: ‘Ma texsed ad nraḥ, ad t neyru?’
MAT 13:29 Maca netta inna: ‘Lla, ḥima xmi ɣa tyarrwem řḥayyar war kis tqeǧɛem uřa d irden.
MAT 13:30 Ejj i-ten ad mɣaren s tnayen ař tameyra. Di řweqt n tmeyra ad iniɣ i yinni imejjaren: ‘Yarwem amezwar řḥayyar, ceddem t di tqebbiṭin ḥima ad ittwassecmeḍ, maca irden, yarwem t di řmarsi inu.’”
MAT 13:31 Iwca asen [ɛawed] ijj n umedya nneɣni, inna: “Tageldit n ijenwan am yict n tḥebbuct n zzariɛet n uxerdel, yiwyi tt-i-dd ijj n weryaz, izarɛ i-tt deg iyyar nnes.
MAT 13:32 Waxxa nettat d tameẓyant qaɛ zi marra zzariɛet nneɣni, xmi tmeqqar, tᵉddekkwař d tameqqrant zi [marra] tibbi uca tdekkwař d tacejjart maḥend ad ɣares dd-asen yijḍaḍ n ujenna uca ad ggen řeɛwacc nsen x řefruɛ nnes.”
MAT 13:33 Iwca asen [ɛawed] ijj n umedya nneɣni, inna: “Tageldit n ijenwan am wentun, tiwyi t-i-dd ict n temɣart uca tessnuffar i-t di třata n řemdud n waren, ařami issmemm [warecti] qaɛ.”
MAT 13:34 Marra man aya issiweř zzayes Yasuɛ i řɣaci s imettiřen uca břa amedya war kisen issiweř ca,
MAT 13:35 ḥima ad ittwakemmeř min xef issiweř unabi i innan: “Ad arezmeɣ aqemmum inu s imedya, ad barrḥeɣ s min innufaren zeg wami ittwagg dsas n ddunect.”
MAT 13:36 Řami ismeḥ Yasuɛ di řɣaci ad uyuren, iruḥ ɣar taddart. Usin-dd ɣares imeḥḍaren nnes, qqaren: “Ini aneɣ min ixs ad yini umedya n řḥayyar d iyyar!”
MAT 13:37 Yarra-dd, inna asen: “Wenni izarrɛen zzariɛet taṣebḥant Netta d Mmis n bnadem.
MAT 13:38 Iyyar d ddunect uca zzariɛet taṣebḥant nettat d tarwa n Tgeldit uca řḥayyar netta d tarwa n umɛeffan.
MAT 13:39 Řeɛdu wenni t izarɛen, aqa netta d cciṭan, uca ṣṣabet, aqa nettat d qeṭṭu n ddunect u inni imejjaren, nitni d lmalakat.
MAT 13:40 Am mammec ssmunen řḥayyar uca sscemḍen t s tmessi, ammu i ɣa yiři ɣar qeṭṭu n ddunect-a.
MAT 13:41 Mmis n bnadem ad dd-issekk lmalakat nnes, ad ssḥeyydent zi Tgeldit nnes qaɛ tiɛenkřifin d marra iɛeffanen.
MAT 13:42 Ad ten nḍaren di řkuccet n tmessi mani ɣa yiřin imeṭṭawen d uɣezzi n teɣmas.
MAT 13:43 Xenni imseggaden ad arɣen am tfuct di Tgeldit n Babatsen. Wenni ɣar iǧa imezzuɣen i useǧi ad iseř.”
MAT 13:44 “Tageldit n ijenwan ɛawed am yijj n řkenz ittwassnuffaren deg iyyar, yufa i-t [ijj n] weryaz, issnuffar i-t uca di řefraḥet nnes yuyur, izzenz qaɛ min iǧan ɣares uca isɣa iyyar nni.”
MAT 13:45 “Tageldit n ijenwan ɛawed am yijj n usebbab i yarezzun tiyaqutin tiṣebḥanin.
MAT 13:46 Řami yufa ict n tyaqut tiɣřa aṭṭas, yuyur, izzenz marra min tuɣa ɣares, xenni isɣa i-tt.”
MAT 13:47 “Tageldit n ijenwan ɛawed am tracca mmenḍaren tt di řebḥar, teyru ɛřam kuř [asřem].
MAT 13:48 Xmi teccur, ssuffɣen tt-i-dd ibeḥriyyen ɣar tma n řebḥar, qqimen uca farzen [zzayes] min iṣebḥen di řeqcuɛ [nsen], maca min war iḥřin nḍaren t.
MAT 13:49 Ammu i ɣa tiři di qeṭṭu n ddunect. Ad dd-ffɣent lmalakat, ad farnent iɛeffanen zi řwesṭ n imseggaden.
MAT 13:50 Ad ten nḍarent di řkuccet n tmessi mani ɣa yiřin imeṭṭawen d uɣezzi n teɣmas.”
MAT 13:51 Inna asen Yasuɛ: “Ma tfehmem i marra man aya?” Nnan as: “Wah, a Siditneɣ!”
MAT 13:52 [Xenni] inna asen: “S uya kuř amseřmad n idlisen wenni idweř d ameḥḍar n Tgeldit n ijenwan, aqa igga am yijj n bab n taddart issuffuɣ zi řkenz nnes min iǧan d jdid u min iǧan d aqdim.”
MAT 13:53 Awarni řami ikemmeř Yasuɛ imedya-ya, yuyur ssenni.
MAT 13:54 Řami dd-yusa ɣar temmurt nnes, ikkar isseřmad i-ten di temzidawin nsen ařami qqimen tbehten, nnan: “Manis d as dd-tekka tiɣit-a d řeɛjayeb-a?
MAT 13:55 Ma war iǧi wa d mmis n unejjar? Ma war qqaren i yemmas Maryam, d aytmas ma war d asen qqaren Yaɛqub d Yasi d Cimɛun d Yahuda?
MAT 13:56 Ma war ǧint suyᵉtmas qaɛ ɣarneɣ? Manis d as dd-ikka man aya marra?”
MAT 13:57 Uca nderfen zzayes. Maca Yasuɛ inna asen: “Anabi ɛemmarṣ war iǧi břa ccan, mɣir di tendint nnes u di taddart nnes.”
MAT 13:58 Uca war iggi diha řeɛjayeb aṭṭas zi ssibbet n břa l’iman nsen.
MAT 14:1 Di řweqt nni isřa Hirudus, řḥakem x ijj n arbaɛ n temmurt, řexbar x Yasuɛ.
MAT 14:2 Inna i yimsexxaren nnes: “Wanita d Yuḥanna Amseɣḍaṣ. Aqa ittwassnekkar-dd zi taddart n imettinen, s uyenni ttwaggent zzayes řeɛjayeb nni.”
MAT 14:3 Minzi Hirudus tuɣa iṭṭef Yuḥanna, icarf i-t, igga i-t di řeḥbes zi ssibbet n Hirudiyya, tenni d tamɣart n Filippus, wenni d umas [n Hirudus],
MAT 14:4 minzi Yuḥanna tuɣa iqqar as: “War ɣarek bu ttesriḥ aqa tiwyed tt d tamɣart nnec.”
MAT 14:5 [S uya] tuɣa ixs ad t ineɣ, [maca] tuɣa iggʷed zi řɣaci, minzi nitni ḥesben t d anabi.
MAT 14:6 Maca řami dd-yiweḍ wass n wexřaq n Hirudus, tecḍeḥ yeǧis n Hirudiyya zzat i [inewjiwen i dinni] iqqimen, uca teɛjeb as i Hirudus.
MAT 14:7 S uyenni inna as s ict n tjaǧit ad as iwc marra min i ɣa tᵉttar [zzayes].
MAT 14:8 Uca nettat, am tt tuɣa tᵉttwaɛarren zeg yemmas, tenna: “Ewc ayi da x ṭṭebṣi azeǧif n Yuḥanna Amseɣḍaṣ!”
MAT 14:9 Icḍen ujeǧid, maca umi tuɣa ijjuǧ u x ssibbet n yinni akides iqqimen, yumur ad as immewc [uzeǧif].
MAT 14:10 Issekk ḥed [ɣares], ḥima ad iqess azeǧif i Yuḥanna di řeḥbes.
MAT 14:11 Iwyen-dd azeǧif nnes di ṭṭebṣi, immewc as i tḥenjirt uca nettat tiwyi-t i yemmas.
MAT 14:12 Usin-dd imeḥḍaren nnes, ksin řxecbet, neḍřen tt. Řexdenni ruḥen, xebbaren Yasuɛ.
MAT 14:13 Řami isřa Yasuɛ man aya, iffeɣ ssenni deg uɣarrabu ɣar ijj n wemcan ixřan, [tuɣa-t din] weḥḥdes. Isřa řɣaci x man aya, uca ḍfaren t x temmurt zi tneddam.
MAT 14:14 Umi dd-iffeɣ Yasuɛ zi tɣarrabut, iẓra aṭṭas n řɣaci uca iḥinn xasen, issgenfa imehřac nsen.
MAT 14:15 Řami dd-tiweḍ tmeddit, usin-dd ɣares imeḥḍaren nnes, nnan: “Aqa amcan-a ixřa u řweqt teɛdu. Zeɛma sqebbeḍ řɣaci, ḥima ad uyuren ɣar ředcur, ad sɣen min ɣa ccen i yixef nsen.”
MAT 14:16 Maca Yasuɛ inna asen: “Nhřa ma ruḥen, wcem asen kenniw min ɣa ccen.”
MAT 14:17 Nnan as: “War da walu mɣir xemsa n tecnifin d tnayen n iseřman.”
MAT 14:18 Inna: “Awyem ten-dd da ɣari.”
MAT 14:19 Xenni yumur řɣaci ad qqimen x arbiɛ. [Xenni] iṭṭef xemsa n tecnifin d tnayen nni n iseřman, ixzar ɣar ujenna, ibarek, yarẓa [i-tent] uca iwca ticnifin nni i imeḥḍaren u imeḥḍaren wcin [tent] i řɣaci.
MAT 14:20 Marra ccin, jjiwnen. Řexdenni ksin iřeqqwaz iceṭṭen: tuɣa din tenɛac n tsuǧatin ɛemmarent.
MAT 14:21 Inni ccin tuɣa aten di xemsa ařef n yeryazen, břa timɣarin d iḥenjiren.
MAT 14:22 Deɣya iziyyar Yasuɛ imeḥḍaren nnes ad nyen di tɣarrabut uca ad as izwaren ɣar ujemmaḍ, am issqebbeḍ Netta řɣaci.
MAT 14:23 [Awarni] řami issqebbeḍ řɣaci, igeɛɛed ɣar wedrar weḥḥdes, ḥima ad iẓẓaǧ. Řami dd-tiweḍ tmeddit, tuɣa iqqim din weḥḥdes.
MAT 14:24 Aɣarrabu tuɣa tiggʷej x temmurt ‘istadiyyen’ aṭṭas, uca tᵉttwaɛarn zi ssa ɣar diha s řemwaj, minzi asemmiḍ yusa asen-dd deg wudem.
MAT 14:25 Maca deg ḥeṭṭu wiss arebɛa n ǧiřet, yusa-dd ɣarsen Yasuɛ am iggur x waman [n řebḥar].
MAT 14:26 Umi t ẓrin imeḥḍaren iggur x waman [n řebḥar], nnxeřɛen, nnan: “Wa d řewḥiy aɣeddar!”, uca sɣuyen zi tiggʷudi.
MAT 14:27 Deɣya issiweř-dd ɣarsen Yasuɛ, inna: “Ggem uř, aqa d NECC, war tteggʷedem ca!”
MAT 14:28 Buṭrus yarra-dd xas, inna: “[A] Sidi, mařa d Cek, weṣṣa ayi ad ɣarek dd-aseɣ x waman.”
MAT 14:29 Inna as: “As-dd!” Uca ihwa-dd Buṭrus zeg uɣarrabu, yuyur x waman, ḥima ad dd-yaweḍ ɣar Yasuɛ.
MAT 14:30 Maca umi iẓra asemmiḍ ijhed, teřqef i-t tiggʷudi uca, am ibda iɣarreq, iřaɣa, inna: “[A] Sidi, senjem ayi!”
MAT 14:31 Deɣya isswiẓẓeḍ Siditneɣ afus nnes, iṭṭef dayes, inna as: “[A cek] wenni di iǧa drus n l’iman, mayemmi dayek yudef ccek?”
MAT 14:32 Awarni řami nyin deg uɣarrabu, yarsa usemmiḍ.
MAT 14:33 Inni iǧan deg uɣarrabu, usin-dd ɣares, sejden as, nnan: “S tidett, Cek d Mmis n AREBBI!”
MAT 14:34 Awarni řami ẓwan [řebḥar], iwḍen ɣar temmurt n Jinnisaret.
MAT 14:35 [Řami] t ɛeqřen yeryazen n temmurt nni, ssuffɣen řexbar di marra dcurat i d as dd-innḍen, iwyen-dd ɣares marra inni tuɣa iheřcen aṭṭas,
MAT 14:36 ttaren zzayes ad ten yejj ad ḥadan mɣir abeḥřuř n ujeǧab nnes, u [marra] inni t iḥadan, dewřen ggenfan.
MAT 15:1 Řexdenni usin-dd imseřmaden n idlisen d Ifarisiyyen zi Urcalim ɣar Yasuɛ, nnan:
MAT 15:2 “Mayemmi ttɛeddan imeḥḍaren nnec x tubbart n imɣaren [nneɣ]. Nitni war ssiriden ca ifassen nsen qbeř i ɣa ccen aɣrum!”
MAT 15:3 Yarra-dd Yasuɛ, inna asen: “Mayemmi kenniw ɛawed tᵉttɛeddam x tewṣeyyet n AREBBI zi ssibbet n tubbart nwem?
MAT 15:4 Minzi AREBBI tuɣa inna: ‘Weqqar babac d yemmac!’ u: ‘Wenni i ɣa ixzan babas niɣ yemmas, ittxeṣṣa as ad immet!’
MAT 15:5 Maca kenniw teqqarem: ‘Marra wi ɣa yinin i babas niɣ i yemmas: Marra min tzemmarem ad zzayi tnefɛem, aqa ggiɣ t d tawhibt [i Arebbi]! Ammu netta war iḥdij [ɛad] ad iweqqar babas niɣ yemmas [s marra man aya]!’
MAT 15:6 Ammu tbeṭṭřem awař n AREBBI di ṭṭweɛ n tubbart nwem.
MAT 15:7 [Kenniw, a] imnafqen! Icaɛya tuɣa ittnabba xawem s ṣṣeḥ, inna:
MAT 15:8 ‘Řgens-a ittcenneɛ ayi s iyencicen nsen, maca uř nsen iggʷej xafi.
MAT 15:9 Aqa nitni cennɛen ayi baṭeř, [minzi] nitni sseřmaden tiɣuriwin nni iǧan d tiweṣṣa n iwdan.’”
MAT 15:10 Řami d iřaɣa-dd x řɣaci ɣares, inna asen: “Sřem [mliḥ], fehmem!
MAT 15:11 War iǧi min ittadfen deg uqemmum issexmej bnadem, maca min i dd-itteffɣen zeg uqemmum d man aya i issexmajen bnadem.”
MAT 15:12 Řexdenni usin-dd ɣares imeḥḍaren nnes, nnan as: “Ma tessned belli Ifarisiyyen nderfen di man aya, řami t sřin?”
MAT 15:13 Maca Netta yarra-dd, inna asen: “Kuř aɣeddu, war t iẓẓu Baba, wenni iǧan deg ijenwan, ad ittwaqřeɛ.
MAT 15:14 Ejj i-ten! Nitni d idarɣařen neddhen idarɣařen. Mařa adarɣař ineddeh adarɣař, ad wḍan s tnayen idsen deg weḥfur.”
MAT 15:15 Yarra-dd Cimɛun Buṭrus, inna as: “[A] Sidi, fessar aneɣ amedya-ya!”
MAT 15:16 Maca Yasuɛ inna asen: “Ma kenniw ɛad břa řefhamet ař řexxu?
MAT 15:17 Ma war tefhimem ca belli marra min ɣa yadfen deg uqemmum, ad iraḥ ɣar uɛeddis uca ssenni ad ittwassuffeɣ barra i usizdeg?
MAT 15:18 Maca min i dd-itteffɣen zeg uqemmum ittas-dd zeg wuř, aqa d man aya i issxemmajen bnadem.
MAT 15:19 Minzi zeg wuř n iwdan i dd-tteffɣen ixarriṣen iɛeffanen, zzina, anɣay, farq-ccɣeř, tuceffra, cchadat s ẓur d uceqqef.
MAT 15:20 Aqa d man aya min issxemmajen bnadem, maca macca s ifassen war issirden war tessxemmij ca bnadem.”
MAT 15:21 Řexdenni iffeɣ-dd Yasuɛ ssenni, iruḥ ɣar jjwayeh n Ṣur d Ṣaydun.
MAT 15:22 U xzar, ict n temɣart zeg ayt n Kenɛan zi jjwayeh nni tesɣuy, tenna: “[A] Sidi, [a] Mmis n Dawud, arḥem ayi! Yeǧi aqa dayes cciṭan issnexřaɛen.”
MAT 15:23 Maca Netta war xas dd-yarri ca, uřa s yijj n wawař. Usin-dd ɣares imeḥḍaren nnes, ttaren zzayes, nnan: “Aẓẓeř xas, minzi nettat teḍfar aneɣ-dd s iɣuyyan.”
MAT 15:24 Netta yarra-dd, inna asen: “Necc ttwassekkeɣ-dd ɣar wuǧi iweddaren n taddart n Israil waha.”
MAT 15:25 Maca nettat tusa-dd, tesjed as, tenna: “A Sidi, ɛawen ayi!”
MAT 15:26 Maca Netta yarra-dd, inna: “War iɛeddeř ad immeksi weɣrum n iḥenjiren, maḥend ad immenḍar i yiṭan.”
MAT 15:27 Maca nettat tenna: “Wah, a Sidi, maɣar uřa d iṭan ttᵉtten iřeqqwaz i dd-iweṭṭan zi ṭṭabřa n siditsen uca [ttɣiman] ddaren.”
MAT 15:28 Řexdenni inna as Yasuɛ: “A tamɣart, l’iman nnem imɣar! Ad yiři am mammec řxaḍar nnem.” Uca yeǧis teggenfa di tsaɛɛet nni.
MAT 15:29 Uca yuyur Yasuɛ ssenni, yiweḍ-dd ɣar tma n řebḥar n Ljalil, igeɛɛed ɣar wedrar, iqqim dinni.
MAT 15:30 Yusa-dd ɣares ijj n ubarru ameqqran n řɣaci, iwyen-dd akidsen ineɛḍaben d idarɣařen d ignawen d iqejdaḥen d inneɣni aṭṭas, ssarsen ten ɣar iḍaren n Yasuɛ uca issgenfa ten,
MAT 15:31 ařami itebhet řɣaci, aqa ẓrin ignawen ssawařen, iqejdaḥen ggenfan, ineɛḍaben gguren, idarɣařen ttwařan, uca ssɛuǧen AREBBI n Israil.
MAT 15:32 Yasuɛ iřaɣa-dd x imeḥḍaren nnes, inna asen: “Ḥinneɣ x řɣaci minzi qqimen akidi třata n wussan, war ɣarsen min ɣa ccen. War xseɣ ca ad ten ssqebbḍeɣ ttẓuman, ḥima war tteḍɛifen ca deg webrid.”
MAT 15:33 Nnan as imeḥḍaren nnes: “Manis d ɣa nawi aɣrum di řexřa[-ya] i zi ɣa nessecc ijj n řɣaci d ameqqran am wanita?”
MAT 15:34 Inna asen Yasuɛ: “Mecḥař ɣarwem d aɣrum?” Nnan as: “Sebɛa [n tecnifin] d ca n iseřman imeẓyanen.”
MAT 15:35 [Xenni] yumur řɣaci, ḥima ad qqimen di temmurt.
MAT 15:36 Iksi sebɛa n tecnifin d iseřman [nni], iqada, yarẓa i-tent uca iwca i-tent i imeḥḍaren nnes uca imeḥḍaren wcin tent i iwdan.
MAT 15:37 Marra ccin, jjiwnen. Xenni yarwen-dd iřeqqwaz iceṭṭen: tuɣa din sebɛa n tsuǧatin ɛemmarent.
MAT 15:38 Inni tuɣa iccen aqa aten di arebɛa ařaf n yeryazen břa timɣarin d iḥenjiren.
MAT 15:39 Awarni řami issqebbeḍ řɣaci, inya deg uɣarrabu uca yiweḍ ɣar weymir [n jjwayeh] n Magdu.
MAT 16:1 Usin-dd ɣares Ifarisiyyen d Iṣaduqiyyen, sseqsan t ḥima ad t jarrben, maḥend ad asen isscen ca n řeɛřamet zeg ujenna.
MAT 16:2 Maca Netta yarra-dd, inna asen: “Ɣar tmeddit ad tinim: ‘Aqa řḥař iffeɣ!’, minzi ajenna d azeggʷaɣ.
MAT 16:3 U ɣar řefjar [ad tinim]: ‘Aqa ass-a ad isuḍ usemmiḍ!’, minzi ajenna d azeggʷaɣ ař abarcan. [A] imnafqen, kenniw tessnem ad tfarzem udem n ujenna, maca řeɛřamat n zzman-a war tzemmarem ad tent tfarzem.
MAT 16:4 Jjiř aɛeffan izennan yarezzu ict n řeɛřamet, [maca] war d as ittmewci uřa d ict n řeɛřamet mɣir řeɛřamet n Yunus, anabi!” [Xenni] ijja i-ten, iruḥ.
MAT 16:5 Řami dd-iwḍen imeḥḍaren nnes ɣar ujemmaḍ [n řebḥar], ttun ad kisen dd-awyen aɣrum.
MAT 16:6 Inna asen Yasuɛ: “Ḥḍam ixef nwem zeg wentun n Ifarisiyyen d Iṣaduqiyyen.”
MAT 16:7 Nitni mcawaren jar asen [x man aya], nnan: “Aqa [inna] man aya minzi war d niwi ca aɣrum!”
MAT 16:8 Yasuɛ, am tuɣa issen man aya, inna asen: “[A] kenniw i di iǧa drus n l’iman, mayemmi temcawarem jar awem aqa man aya iǧa umi war dd-tiwyem aɣrum?
MAT 16:9 Ma ɛad war tefhimem ca? Ma war teɛqiřem ca x xemsa n iřeqqwaz n weɣrum i xemsa-ařaf, u mecḥař n tsuǧatin i tyarwem?
MAT 16:10 Niɣ x sebɛa n iřeqqwaz n weɣrum i arebɛa ařaf, u mecḥař n tsuǧatin i tyarwem?
MAT 16:11 Ma ɛad war tefhimen ca belli Necc war kiwem ssiwřeɣ ca x weɣrum umi d awem nniɣ: ‘Ḥḍam ixef nwem zeg wentun n Ifarisiyyen d Iṣaduqiyyen’?”
MAT 16:12 Ssenni fehmen aqa Netta war d asen inni, maḥend ad ḥḍan ixef nsen zeg wentun n weɣrum, maca zi tɣuri n Ifarisiyyen d Iṣaduqiyyen.
MAT 16:13 Řami dd-yiweḍ Yasuɛ ɣar temmurt n Qayṣariya-Filippus, isseqsa imeḥḍaren nnes: “Min ɛniɣ Necc, Mmis n bnadem, ɛlaḥsab min qqaren iwdan?”
MAT 16:14 Nnan as: “Ca qqaren ‘D Yuḥanna Amseɣḍaṣ’, u wenneɣni: ‘D Iliya’, u wenneɣni ɛawed: ‘D Irmiya’ niɣ ‘D ijjen zeg inabiyyen’.”
MAT 16:15 Inna asen: “Maca kenniw, min xafi teqqarem?”
MAT 16:16 Yarra-dd xas Cimɛun Buṭrus, inna: “Cek d Lmasiḥ, Mmis n AREBBI iddaren.”
MAT 16:17 Yarra-dd xas Yasuɛ, inna as: “Sseɛd nnec, a Cimɛun, mmis n Yuna, minzi war iǧi d aysum niɣ d idammen i d ac imřen man aya, maca d Baba i iǧan deg ijenwan.
MAT 16:18 Ɛawed Necc ad ac iniɣ, aqa cek d ‘Buṭrus’, [d aẓru], u x weẓru-ya ad bniɣ tamesmunt inu uca tiwwura n řaxart war d as zemmarent.
MAT 16:19 D Necc ad ac wceɣ tisarutin n Tgeldit n ijenwan, u marra min ɣa tcedded di temmurt, ad yiři icedd deg ijenwan, u marra min ɣa tfesyed di temmurt, ad yiři ifsi deg ijenwan.”
MAT 16:20 Řexdenni yumur imeḥḍaren nnes, ḥima war xebbaren ḥed belli Netta d Lmasiḥ.
MAT 16:21 Ssenni ibda Yasuɛ ad isscen i imeḥḍaren nnes belli ittxeṣṣa as ad iraḥ ɣar Urcalim, ad iweddeb aṭṭas zeg imɣaren [n řgens] u zeg imeqqranen n ikehhanen d imseřmaden n idlisen, ad ittwaneɣ uca ad dd-ittwassnekkar deg wass wiss třata.
MAT 16:22 [Maca] Buṭrus yiwyi t weḥḥdes, ibda ittwebbex i-t, inna: “War ittiři, [a] Sidi! Man aya war d ac ittemsar ɛemmarṣ.”
MAT 16:23 Maca Netta inneqřeb, inna i Buṭrus: “Ffeɣ xafi, [a] cciṭan, cek d ict n tɛenkrift i Necc, minzi war cek icqi min iǧan n AREBBI, maca min iǧan n iwdan.”
MAT 16:24 Řexdenni inna Yasuɛ i imeḥḍaren nnes: “Mařa ca n ijjen ixs ad ayi iḍfar, ad inkar ixef nnes, ad iksi ṣṣalib nnes uca ad ayi iḍfar.
MAT 16:25 Minzi wenni ixsen ad issenjem tudart nnes, ad tt iweddar, [maca] wenni i ɣa iweddaren tudart nnes di ṭṭweɛ inu ad tt yaf.
MAT 16:26 Minzi man řefḍeř i ɣares ɣar bnadem mařa yarbeḥ ddunect marra, [maca] iřqef i-t druct di řeɛmar nnes? Niɣ min ɣa iwc bnadem i weṣřaḥ n řeɛmar nnes?
MAT 16:27 Minzi Mmis n bnadem ad dd-yas s uɛuǧi n Babas ak-d lmalakat nnes, uca xenni ad ixeǧeṣ kuř ijjen ɛlaḥsab min igga.
MAT 16:28 S tidett Necc ad awem iniɣ, aqa ca zeg ina i da ibedden, war ttqisin ca řmewt ař ɣa ẓaren Mmis n bnadem ittas-dd di Tgeldit nnes.”
MAT 17:1 Awarni setta n wussan Yasuɛ yiwi-dd Buṭrus d Yaɛqub d umas Yuḥanna akides, yiwyi i-ten weḥḥedsen ɣar ijj n wedrar yuɛřa.
MAT 17:2 Uca ittwabeddeř waddud n Yasuɛ qibač nsen: tuɣa aɣembub nnes ittceɛciɛ am tfuct, idweř warruḍ nnes d acemřař am tfawt.
MAT 17:3 Uřa d Musa d Iliya ḍharen asen-dd, ssawařen akides.
MAT 17:4 Buṭrus iṭṭef deg wawař, inna i Yasuɛ: “[A] Sidi, aqa mliḥ umi i da neǧa! Mařa texsed, ad newwet danita třata n iɛuccuten n tseṭṭa, ijjen i Cek, ijjen i Musa u ijjen i Iliya.”
MAT 17:5 Am tuɣa issawař ɛad, ikka-dd xasen ijj n useynu ittseqsiq, issduriy ten s tiři nnes uca ict n tmijja zeg ujenna tenna: “D wa d Mmi iɛizzen, dayes ufiɣ arḍa inu, sřem ɣares!”
MAT 17:6 Řami sřin imeḥḍaren man aya, wḍan x uɣembub nsen uca ggʷeden aṭṭas.
MAT 17:7 Yusa-dd ɣarsen Yasuɛ, iḥada ten, inna: “Kkarem, war tteggʷedem ca!”
MAT 17:8 Řami ssgeɛɛden tiṭṭawin nsen, war ẓrin ḥed mɣir Yasuɛ.
MAT 17:9 Am dd-hwan zeg wedrar, yumur i-ten Yasuɛ, inna asen: “War ssiwiřem x řewḥiy-a am ɣarwem iǧa ijj nneɣni ař dd ɣa ikkar Mmis n bnadem jar imettinen.”
MAT 17:10 Imeḥḍaren sseqsan t, nnan as: “Mayemmi qqaren imseřmaden n idlisen aqa Iliya ad dd-yas d amezwaru?”
MAT 17:11 Yarra-dd Yasuɛ, inna: “Iliya ad dd-yas d amezwaru, ḥima ad ittwakemmeř marra.
MAT 17:12 Maca Necc ad awem iniɣ, xzar, Iliya aqa yusa-dd, war zzayes steɛtarifen, maca ggin zzayes min xsen. Ammu uřa d Mmis n bnadem ad zzaysen iweddeb.”
MAT 17:13 Řexdenni fehmen imeḥḍaren, belli tuɣa issawař akidsen x Yuḥanna Amseɣḍaṣ.
MAT 17:14 Řami dd-usin ɣar řɣaci, yusa-dd ɣares ijj n bnadem, iwḍa [as] ɣar iḍaren, inna as:
MAT 17:15 “[A] Sidi, zziǧez i mmi, minzi aqa netta ittbarkikkiḍ, immarni xas řḥar, maɣar aṭṭas n twařawin iwḍa di tmessi u deg waman.
MAT 17:16 Iwyeɣ t ɣar imeḥḍaren nnec, [maca] nitni war zemmaren ad t ssgenfan.”
MAT 17:17 Yasuɛ yarra-dd, inna: “A jjiř i war yuminen d imufriɣen, mecḥař i ɣa qqimeɣ ɛad akidwem, mecḥař ɛad i ɣa qqimeɣ ṣbareɣ awem? Awyem t-i-dd ɣari!”
MAT 17:18 Xenni iwebbex i-t Yasuɛ uca iffeɣ zzayes cciṭan uca idweř uḥenjir iggenfa zi tsaɛɛet nni.
MAT 17:19 Řexdenni usin-dd imeḥḍaren weḥḥedsen ɣar Yasuɛ, nnan as: “Mayemmi neccin war nzemmar ad t nessgenfa?”
MAT 17:20 Inna asen Yasuɛ: “Zi ssibbet n břa l’iman nwem. S tidett ad awem iniɣ, mařa daywem l’iman anect n ict n tḥebbuct n zzariɛet n uxerdel, ad as tinim i wedrar-a: ‘Muṭṭi ssa!’, xenni ad immuṭṭi, uca war din ittiři [ɛad] uřa d ict n řḥajjet war d as tzemmarem [ɛad].
MAT 17:21 Maca ddarb-a war dd-itteffeɣ mɣir s tẓaǧit d uẓummi.”
MAT 17:22 Řami tuɣa ttsaran di Ljalil, inna asen Yasuɛ [i imeḥḍaren nnes]: “Mmis n bnadem ad immewc deg ifassen n iwdan.
MAT 17:23 Ad t nɣen uca ad dd-ittwassnekkar deg wass wiss třata.” [Xenni] ceḍnen aṭṭas.
MAT 17:24 Řami dd-usin ɣar Kafarnaḥum, qarrben-dd ayt n ḍḍariba, inni iṭṭfen tnayen n tepyasin n tnayen n ‘jjuzin’ n nnuqart i kuř uzeǧif [i ḍḍariba n Zzawect Tameqqrant], ɣar Buṭrus, nnan: “Amseřmad nwem, ma war ittxeǧiṣ tnayen n ‘jjuzin’ nnes [i Zzawect Tameqqrant]?” Inna: “Wah, [ad ten ixeǧes]!”
MAT 17:25 Ařami dd-yudef Buṭrus ɣar taddart, izwar as-dd Yasuɛ, inna: “Cimɛun, mammec twařid cek, wi zi ṭṭfen ijeǧiden n ddunect řeɛcur d tenɛacin i izemmen i kuř azeǧif? Ma zi tarwa nsen niɣ zeg ibarraniyyen?”
MAT 17:26 Inna as Cimɛun: “Zeg ibarraniyyen!” Inna as Yasuɛ: “S uya ǧan tarwa d iḥurriyyen!
MAT 17:27 Maca ḥima war ten nessendrif [ad ac umureɣ]: Ruḥ ɣar řebḥar, nḍar taṣennart uca arzem aqemmum i tesřemt tamezwarut i dd ɣa iffɣen uca ad tafed [ict n tepyist n uṣulḍi n] ‘ustatir’. Ksi tt uca ewc i-tt xafi u x yixef nnec.”
MAT 18:1 Di tsaɛɛet nni usin-dd imeḥḍaren ɣar Yasuɛ, nnan: “Man wen iǧan d ameqqran di Tgeldit n ijenwan?”
MAT 18:2 Yasuɛ iřaɣa-dd x ijj n uḥenjir ɣares, issbedd i-t di řwesṭ nsen,
MAT 18:3 inna: “S tidett Necc ad awem iniɣ: Mařa war ttubem u tdewřem am iḥenjiren, ɛemmarṣ ad tadfem ɣar Tgeldit n ijenwan.
MAT 18:4 S uya wenni i ɣa issmeẓyen ixef nnes am uḥenjir-a, aqa d wenni d ameqqran di Tgeldit n ijenwan,
MAT 18:5 u wenni i ɣa iqebřen ijj [n uḥenjir] i iǧan am uḥenjir-a s Yisem inu, iqebbeř ayi.
MAT 18:6 [Maca] kuř ijjen wenni i ɣa issenqarḍen ijjen zeg imeẓyanen-a i zzayi ittamnen, iḥřa as ad as tᵉttwagg ict n teṣḍart n tsirt tedqeř ɣar yiri nnes, ad ittwassɣareq di řaǧaɣ n řebḥar.
MAT 18:7 Uct x ddunect x ssibbet n tɛenkrifin. Iwa, ittxeṣṣa ad dd-asent tɛenkrifin, maca amcum n bnadem nni itteggen taɛenkrift.
MAT 18:8 Mařa issenqarḍ cek ufus nnec niɣ aḍar nnec, xenni qess i-t, nḍar i-t xak. Iḥřa ac ad tadfed ɣar Tudart d aqejdaḥ niɣ d ameɛḍuř x umenḍar s tnayen n ifassen niɣ s tnayen n iḍaren di tmessi i řebda.
MAT 18:9 Mařa tessenqarḍ cek tiṭṭ nnec, xenni qeřɛ i-tt, nḍar i-tt xak, iḥřa ac ad tadfed ɣar Tudart s ict n tiṭṭ x uweṭṭu di jᵉhennama iccuren s tmessi s tnayen n tiṭṭawin.
MAT 18:10 Ɣarwem ad tesseḥqarem ijjen zeg imeẓyanen-a. Minzi Necc ad awem iniɣ, aqa lmalakat nsen deg ijenwan aqa řebda ttwařant tifras n Baba i iǧan deg ijenwan.
MAT 18:11 Minzi Mmis n bnadem yusa-dd, ḥima ad issenjem min tuɣa iweddaren.
MAT 18:12 Mammec i d awem ittɣiř? Mařa din ca n bnadem ɣares mya n wuǧi uca ijjen zzaysen iweddar, ma xenni war ittejji tesɛa u-tesɛin deg idurar, ad iraḥ ad yarzu x wenni iweddaren?
MAT 18:13 U mařa yufa i-t, s tidett Necc ad awem iniɣ, ad zzayes ifarḥ ktar zi min ɣa ifarḥ zi tesɛa u-tesɛin inni war iweddaren.
MAT 18:14 Ammu uřa d Babatwem i iǧan deg ijenwan war ixs ad iweddar uřa d ijj zeg imeẓyanen-a.”
MAT 18:15 “Mařa ixḍa umac akidek, ruḥ ɣares, webbex i-t [mɣir] jar ac d jar as [waha]. Mařa isřa ɣarek, aqa tarbeḥed umac.
MAT 18:16 Mařa war ɣarek isři ca, awi akidek ca n ijjen nneɣni niɣ tnayen, ḥima x uqemmum n tnayen niɣ n třata n řechud ad ittwaḍmen wawař marra.
MAT 18:17 Mařa netta war ɣarsen isři, xenni ini tt i tmesmunt [n řmuminin], uca mařa war isři uřa ɣar tmesmunt, xenni ejj i-t ad ɣarwem yiři am yijj n bu-ḍḍariba niɣ am yijj n ukafriw.
MAT 18:18 S tidett Necc ad awem iniɣ: Marra min ɣa tceddem di temmurt, ad yiři icedd deg ujenna, uca marra min ɣa tfesyem di temmurt, ad yiři ifsi deg ujenna.
MAT 18:19 Ad awem iniɣ ɛawed, mařa tnayen n iwdan ad mmsetfaqen x temmurt x ca n řḥajjet i ɣa ttaren, aqa d man aya d asen i ɣa ittwagg zi Baba i iǧan deg ijenwan.
MAT 18:20 Minzi mani ɣa munen tnayen niɣ třata s Yisem inu, Necc ad din iřiɣ di řwesṭ nsen.”
MAT 18:21 Řexdenni yusa-dd ɣares Buṭrus, inna: “A Sidi, mecḥař n twařawin i ɣa ixḍa akidi uma, necc ad as samḥeɣ? Ma ař sebɛa n twařawin?”
MAT 18:22 Inna as Yasuɛ: “War d ac qqareɣ ca ař sebɛa, maca ař sebɛin di sebɛa n imuren d sebɛa [n imuren]!
MAT 18:23 S uya tᵉttawi-dd Tgeldit n ijenwan deg ijj n weryaz d ajeǧid i ixsen ad yegg řeḥsab ak-d imsexxaren nnes.
MAT 18:24 Umi ibda ad imseḥseb, iwyen-dd ɣares ijj n [bnadem] itturs as ɛecra-ařaf talint.
MAT 18:25 Am war tuɣi ɣares min zi ɣa yarr [amarwas], yumur bab nnes, ḥima ad ittwammenz, netta d temɣart nnes d tarwa nnes d marra min ɣares, ḥima ad ittwaxeǧeṣ [umarwas].
MAT 18:26 Iwḍa as umsexxar [nni ɣar iḍaren], isjed as, inna: ‘[A] sidi, ṣbar xafi, ad ac arreɣ marra.’
MAT 18:27 Aqa izziǧez as bab n umsexxar nni, iḍřeq as uca isamḥ as deg umarwas.
MAT 18:28 Řami dd-iffeɣ umsexxar nni, yufa ijjen zeg inni tuɣa d imsexxaren imɛacaren nnes u wanita itturs as mya dinar. Iṭṭef i-t, icebbar as deg yiri, inna as: ‘Xeǧeṣ ayi min d ac tturseɣ!’
MAT 18:29 Iwḍa yas umsexxar amɛacar nnes ɣar iḍaren nnes, iḥeccem i-t, inna: ‘Ṣbar xafi, ad ac arreɣ [marra]!’
MAT 18:30 Maca netta war ixs, iruḥ inḍar i-t di řeḥbes ař dd ɣa yarr amarwas.
MAT 18:31 Řami ẓřin imsexxaren imɛacaren nnes min imsaren, ceḍnen aṭṭas uca ruḥen, nnan tt i bab nsen.
MAT 18:32 Uca iřaɣa-dd xas sidis, inna as: ‘[A cek] amsexxar aɛeffan, marra min d ac tturseɣ, samḥeɣ ac, minzi tᵉttared ayi.
MAT 18:33 Ma war iǧi zeɛma uřa d cek xak ad ac izziǧez wenni d amsexxar amɛacar nnec am mammec i d ayi tezziǧed cek?’
MAT 18:34 Xenni ixeyyeq sidis, isseɛdu t deg ifassen n imɛaddeben ař ɣa ixeǧeṣ marra min dayes d amarwas.
MAT 18:35 Ammu i ɣa yegg Baba wenni iǧan deg ujenna i kenniw, mařa kenniw war tsimiḥem s wuř kuř ijjen zzaywem i umas ixeṭṭan nnes.”
MAT 19:1 Ařami ikemmeř Yasuɛ awařen-a, iffeɣ zi Ljalil, yiweḍ ɣar jjwayeh n [temmurt n] Yahudiyya, ɣar ujemmaḍ n [yeɣzar n] L’Urdun.
MAT 19:2 Aqa iḍfar i-t ijj n řɣaci d ameqqran, issgenfa i-ten dinni.
MAT 19:3 Usin-dd ɣares uřa d Ifarisiyyen, tuɣa arezzun ad t jarrben, nnan [as]: “Ma iḥeǧeř i weryaz ad iǧef i temɣart nnes zi mkuř sibbet?”
MAT 19:4 Yarra-dd, inna asen: “Ma war teɣrim ca belli wenni [ten] dd-ixeřqen zeg umezwaru, ixřeq i-ten-dd d awtem d tewtemt,
MAT 19:5 uca aqa inna: ‘S uyenni ad ismeḥ weryaz di babas d yemmas, ad iqqen ɣar temɣart nnes, uca tnayen idsen nni ad iřin d ict n ddat’?
MAT 19:6 S uya war ttiřin [ɛad] d tnayen, maca d ict n arrimet. S uyenni min issmun AREBBI, war t ibeṭṭi bnadem.”
MAT 19:7 Nnan as: “Mayemmi yumur Musa xenni, maḥend ad iwc tabrat n waǧaf, ḥima ad as iǧef?”
MAT 19:8 Inna asen: “Musa ijja kenniw ad teǧfem i temɣarin nwem zi ssibbet n řeqsaḥet n wuřawen nwem, maca war iǧi ammu zeg umezwaru.
MAT 19:9 Maca Necc ad awem iniɣ: Wenni i ɣa iǧfen i temɣart nnes, břa ma tezna nettat, uca ad yiwi icten nneɣni, aqa netta izenna, u wenni i ɣa iwyen tamɣart tenni i iǧfen, aqa uřa d netta izenna.”
MAT 19:10 Imeḥḍaren nnes nnan as: “Mařa ammu i teǧa tmesřact jar bnadem d temɣart nnes, xenni nhřa ma ad imřec.”
MAT 19:11 Maca Netta inna asen: “War iǧi marra zemmaren ad qebřen awař-a mɣir inni umi temmewc [ad t iqbeř].
MAT 19:12 Minzi aqa din inni ittwaqessen, minzi nitni d inni dd-ittwaxeřqen ammu zeg uɛeddis n yemmatsen, uca aqa din inni ittwaqessen, minzi nitni ttwaqessen zeg [ifassen n] iwdan, uca aqa din inni ittwaqessen, minzi nitni qessen ixef nsen di ṭṭweɛ n Tgeldit n ijenwan. Wenni izemmaren ad t iqbeř, ejj i-t ad t iqbeř.”
MAT 19:13 Řexdenni iwyen as-dd iḥenjiren imeẓyanen maḥend ad xasen issars afus nnes uca ad [asen] iksi s řmeɛruf, maca imeḥḍaren nnes webbxen ten.
MAT 19:14 Maca Yasuɛ inna asen: “Jjem iḥenjiren ad ɣari dd-asen, war ten mennɛem ca, minzi Tageldit n ijenwan i yinni am nitni.”
MAT 19:15 Issars xasen afus nnes uca iruḥ ssenni.
MAT 19:16 Uca xzar, iqarreb-dd ijjen, inna as: “[A] Amseɣɣar Aṣebḥan, min ɣa ggeɣ d aṣebḥan ḥima ad ɣari tiři Tudart ittduman?”
MAT 19:17 Inna as Yasuɛ: “Mayemmi d ayi třaɣid ‘Aṣebḥan’? War iǧi ḥed d aṣebḥan mɣir Ijjen, aqa-t d AREBBI. Maca mařa texsed ad tadfed ɣar Tudart, ṭṭef di tweṣṣa.”
MAT 19:18 Inna as: “Man tina?” Inna as Yasuɛ: “War neqq, war zenni, war tticar, war cehhed s ẓur,
MAT 19:19 weqqar babac d yemmac uca ad texsed jjar nnec am yixef nnec.”
MAT 19:20 Abřiɣ inna as: “Aqa ḍfareɣ timesřayin-a marra zi temẓi inu. Min d ayi ittxiṣṣen ɛad?”
MAT 19:21 Yasuɛ inna as: “Mařa texsed ad tiřid tkemmřed, ruḥ, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ijenwan. [Xenni] as-dd, ḍfar ayi-dd.”
MAT 19:22 Řami isřa webřiɣ awař-a, iruḥ icḍen, minzi tuɣa ɣares aṭṭas n wagřa.
MAT 19:23 [Xas uca] inna Yasuɛ i imeḥḍaren nnes: “S tidett, Necc ad awem iniɣ, aqa yewɛar x bab n wagřa ad yadef ɣar Tgeldit n ijenwan.
MAT 19:24 Uca Necc ad awem iniɣ ɛawed, aqa ihwen i weřɣem ad yekk zi tiṭṭ n tsineft x bu wagřa ad yadef ɣar Tgeldit n AREBBI.”
MAT 19:25 Umi tt sřin imeḥḍaren nnes, nnxeřɛen, nnan: “Wi izemmaren xenni ad iṭṭef Tudart ɛad?”
MAT 19:26 Am tuɣa daysen ixezzar Yasuɛ, inna asen: “Ɣar iwdan man aya war izemmar, maca ɣar AREBBI kuřci di tzemmar nnes!”
MAT 19:27 [Xenni] yarra-dd Buṭrus, inna as: “Xzar, aqa neccin nejja kuřci, neḍfar i Cek. Min ɣarneɣ i ɣa yiřin?”
MAT 19:28 Yasuɛ inna asen: “S tidett, Necc ad awem iniɣ, i kenniw inni d ayi dd-iḍfaren, aqa xmi ɣa tiři marra ddunect d jdid, xmi ɣa iqqim Mmis n bnadem x řɛarc n uɛuǧi nnes, aqa uřa d kenniw ad teqqimem x tenɛac n řekrasi igellden, ḥima ad tḥekmem x tenɛac n tqebbař n [ayt n] Israil.
MAT 19:29 Kuř ijjen wenni isemḥen di tudrin niɣ deg aytmas niɣ di suyᵉtmas niɣ di babas niɣ deg yemmas niɣ di temɣart nnes d tarwa nnes uřa deg yeyyaren di ṭṭweɛ n Yisem inu, ad iksi mya n tseqqar uca ad iwart Tudart ittduman.
MAT 19:30 Maca aṭṭas n yinni iǧan d imezwura ad iřin d ineggura, uca ineggura ad iřin d imezwura.”
MAT 20:1 “Minzi Tageldit n ijenwan am yijj n bab n taddart, iffeɣ ɣar ṣṣbeḥ zic, ḥima ad icra ixemmasen i umarjeɛ nnes n uḍiř.
MAT 20:2 Řami ikkes awař ak-d icewwařen s yijjen dinar i yijjen wass, issekk i-ten ɣar umarjeɛ nnes n uḍiř.
MAT 20:3 Řami dd-iffeɣ netta [ɛawed] di jjwayeh n tsaɛɛet wiss třata, [ixs ad yini ɣar tesɛa di ṣṣbeḥ], iẓra inneɣni bedden di řmewqef břa řxedmet.
MAT 20:4 Netta inna asen: ‘Ruḥem uřa d kenniw ɣar umarjeɛ [inu] n uḍiř, ad awem wceɣ min d awem dd-ikkaren!’, uca ruḥen.
MAT 20:5 Iffeɣ-dd ɛawed di jjwayeh n tsaɛɛet wiss setta d wiss tesɛa, uca igga amenni ɛawed.
MAT 20:6 Řami dd-iffeɣ di jjwayeh n tsaɛɛet wiss hiṭɛac, [ixs ad yini ɣar xemsa n tmeddit], yufa din [ɛawed] inneɣni bedden din břa řxedmet, inna asen: ‘Mayemmi tbeddem da ass ikmeř břa řxedmet?’
MAT 20:7 Nnan as: ‘Minzi war d aneɣ icri ḥed.’ Inna asen: ‘Ruḥem uřa d kenniw ɣar umarjeɛ [inu] n uḍiř, ad tᵉṭṭfem min d awem dd-ikkaren.’
MAT 20:8 Řami dd-tiweḍ tmeddit, inna bab n umarjeɛ n uḍiř i uweqqaf nnes: ‘Řaɣa-dd x ixemmasen, xeǧeṣ asen řmunet, sizwar zeg [inni dd-yusin d] ineggura uca ammu ař imezwura.’
MAT 20:9 Uca usin-dd inni [d icra] di jjwayeh n tsaɛɛet wiss ḥiṭac, uca kuř ijjen zzaysen iṭṭef ijjen dinar.
MAT 20:10 Řami dd-usin inni tuɣa d imezwura, ittɣiř asen ad ṭṭfen ktar, [maca] uřa d nitni ṭṭfen i kuř ijjen zzaysen ijj n dinar.
MAT 20:11 Řami t ṭṭfen, aqa xeyyqen x bab n taddart,
MAT 20:12 nnan: ‘Aqa ina d inni d ineggura xedmen ict n tsaɛɛet u cek tessemquded i-ten akidneɣ, neccin inni yarebbun ddqeř n wass d řeḥmu.’
MAT 20:13 Maca netta yarra-dd x ijjen zzaysen, inna: ‘[A] ameddukkeř inu, necc war cek ḍřimeɣ, ma war kidi tekkised awař x ijj n dinar?
MAT 20:14 Ṭṭef min iǧan nnec uca uyur. Necc xseɣ ad wceɣ i ina d inni d ineggura anect min d ac wciɣ.
MAT 20:15 Niɣ ma war ɣari bu řḥeqq maḥend ad ggeɣ min xseɣ ak-d min iǧan inu? Niɣ tiṭṭ nnec d taɛeffant, minzi necc d aṣebḥan?’
MAT 20:16 Ammu i ɣa dewřen ineggura d imezwura, uca imezwura ad dewřen d ineggura, minzi aṭṭas inni ittwařaɣan, maca drus inni ittwafarzen.”
MAT 20:17 Řami ikkar-dd Yasuɛ maḥend ad igeɛɛed ɣar Urcalim, yiwi tenɛac n imeḥḍaren nnes ɣar uɣezdis deg webrid, inna asen:
MAT 20:18 “Xzar, ad ngeɛɛed ɣar Urcalim, uca ad immewc Mmis n bnadem deg ifassen n imeqqranen n ikehhanen d imseřmaden n idlisen, u nitni ad xas ḥekmen s řmewt.
MAT 20:19 Ad t sellmen i řegnus maḥend ad zzayes stehzan, ad t hettken s urekkuḍ uca ad t ṣellben, [maca] deg wass wiss třata ad dd-ikkar.”
MAT 20:20 Řexdenni tusa-dd ɣares yemmas n tarwa n Zabdi ak-d iḥenjiren nnes, tesjed as, ḥima ad zzayes tᵉttar ca n řḥajjet.
MAT 20:21 Inna as Netta: “Min texsed?” Tenna as nettat: “Ini maḥend ad qqimen tnayen n iḥenjiren-a inu, ijjen ɣar ufusi nnec u wenneɣni ɣar uzeřmaḍ nnec, di Tgeldit nnec.”
MAT 20:22 Yasuɛ yarra-dd xasen, inna: “Kenniw war tessinem ca min tᵉttarem. Ma tzemmarem ad teswem řkas i ɣa sweɣ Necc, niɣ ad tᵉttwassɣeḍṣem s useɣḍeṣ i zi ɣa ttwassɣeḍṣeɣ Necc?” Nnan as: “Nzemmar!”
MAT 20:23 Netta inna asen: “Řkas inu ad t teswem u aseɣḍeṣ i zi ɣa ttwassɣeḍṣeɣ, ad zzayes tᵉttwassɣeḍṣem, maca aɣimi ɣar ufusi inu d uzeřmaḍ inu war iǧi i Necc, maḥend ad t wceɣ, maca [ad yiři] i yinni umi t issewjed Baba.”
MAT 20:24 Řami sřin ɛecra [n imeḥḍaren] nneɣni man aya, xeyyqen aṭṭas x tnayen n wawmaten.
MAT 20:25 Maca Yasuɛ iřaɣa-dd xasen ɣares, inna: “Kenniw aqa tessnem belli řḥukkam n řegnus ḥekkmen xasen uca uřa d imeqqranen nsen ttṣellaṭen xasen.
MAT 20:26 War ittiři ammu jar awem, maca s řmeqřub: wenni ixsen ad yiři d ameqqran jar awem, ad yiři d amsexxar nwem,
MAT 20:27 u wenni ixsen ad yiři d amezwaru jar awem, ad yiři d amsexxar nwem,
MAT 20:28 am mammec Mmis n bnadem war dd-yusi ḥima ad xas sexxaren, maca ḥima ad xasen isexxar uca ad iwc tudart nnes d aṣřaḥ i waṭṭas [n yewdan].”
MAT 20:29 Řami dd-iffeɣ Yasuɛ zi Ariḥa, iḍfar i-t-i-dd aṭṭas n řɣaci.
MAT 20:30 Xzar, aqa din tnayen n idarɣařen qqimen x ṭṭarf n webrid, řami sřin belli Yasuɛ ad iɛdu, řaɣan, nnan: “A Sidi, Mmis n Dawud, arḥem aneɣ!”
MAT 20:31 Maca řɣaci iziyyar xasen, ḥima ad sqaren. Maca nitni sɣuyen s jjehd ktar, nnan: “Arḥem aneɣ, [a] Siditneɣ, Mmis n Dawud!”
MAT 20:32 Xenni ibedd Yasuɛ, iřaɣa-dd xasen, inna: “Min texsem ad awem ggeɣ?”
MAT 20:33 Nnan as nitni: “[A] Siditneɣ, mařa texsed ad ttwarezment tiṭṭawin nneɣ.”
MAT 20:34 Yasuɛ iḥinn xasen, xenni iḥada tiṭṭawin nsen. Řexdenni dewřent tiṭṭawin nsen ttwařant, uca nitni ḍfaren t-i-dd.
MAT 21:1 Řami dd-qarrben ɣar Urcalim, iwḍen ɣar Bayt-Faji, ɣar uɣezdis n wedrar n Zzitun, issekk Yasuɛ tnayen n imeḥḍaren nnes, inna asen:
MAT 21:2 “Ruḥem ɣar dcar nni qibač nwem. Deɣya ad tafem ict n teɣyuč teqqen d ijj n wesnus akides. Fesyem asen, tawyem ten-dd ɣari.
MAT 21:3 Mařa inna awem ḥed ca, arrem xas ammu: ‘Aqa Siditneɣ iḥdaj i-ten. Netta ad ten dd-yarr deɣya.’”
MAT 21:4 Man aya qaɛ imsar, ḥima ad ittwakemmeř marra min ittwannan zeg unabi am inna:
MAT 21:5 “Inim i yeǧis n Ṣihyun: ‘Xzar, Ajeǧid nnem ad ɣarem dd-yas s uwaḍeɛ, yenya x weɣyuř d wesnus, aqa d mmis n teɣyuč.”
MAT 21:6 Ruḥen imeḥḍaren uca ggin am mammec ten yumur Yasuɛ.
MAT 21:7 Iwyen-dd aɣyuř d wesnus, sarsen arruḍ nsen x wesnus uca inya xas Yasuɛ.
MAT 21:8 Aṭṭas zi řɣaci ssun arruḍ nsen deg webrid u inneɣni qessen řefruɛ zi tcejjura, nḍaren ten deg webrid.
MAT 21:9 Uca abarru n řɣaci nni d as izwaren d yinni i-t-i-dd iḍfaren, tuɣa sɣuyyun, nnan: “Uṣanna i Mmis n Dawud! Lbaraka i Wenni dd-yusin s Yisem n SIDI. Uṣanna, di řuɛřa x řuɛřa n ijenwan.”
MAT 21:10 Řami yudef ɣar Urcalim, thaj tendint qaɛ, [iwdan] nnan: “Min iɛna Wa?”
MAT 21:11 Řɣaci inna: “D Wa d Anabi Yasuɛ zi Nnaṣira di Ljalil.”
MAT 21:12 Yudef Yasuɛ ɣar Zzawect Tameqqrant n AREBBI, issuffeɣ marra inni izznuzan d yinni issaɣen di Zzawect Tameqqrant uca iqřeb ṭṭwabeř n iṣarrafen [n tenɛacin] d řekrasi n yinni izznuzan idbiren.
MAT 21:13 Inna asen: “Aqa tura: ‘Taddart inu ad tᵉttwasemma ‘Taddart n tẓaǧit’, maca kenniw tarrim tt d ifri n iceffaren.’”
MAT 21:14 Iwyen-dd ɣares di Zzawect Tameqqrant idarɣařen d ineɛḍaben uca issgenfa ten.
MAT 21:15 Umi ẓrin imeqqranen n ikehhanen d imseřmaden n idlisen lmuɛjizat i yegga u aqa iḥenjiren ttřaɣan di Zzawect Tameqqrant, qqaren: “Uṣanna i Mmis n Dawud!”, xeyyqen aṭṭas,
MAT 21:16 nnan as: “Ma tesřid min qqaren yina?” Inna asen Yasuɛ: “Wah, ma war teɣrim ɛemmarṣ: ‘Zeg iqemmumen n iḥenjiren d iseyman tesswejded Cek ttesbiḥ’?”
MAT 21:17 Řexdenni ismeḥ daysen, iffeɣ barra i tendint ɣar Bayt-Ɛanya, insa din.
MAT 21:18 Ɣar ṣṣbeḥ zic řami dd-idweř ɣar tendint, tuɣa dayes řaẓ.
MAT 21:19 Iẓra ijj n wartu x webrid, iruḥ ɣares, war dayes yufi mɣir tifray waha. [Xenni] inna [i wartu]: “War zzayek tteffeɣ řɣiǧet ɛemmarṣ.” Řexdenni yuẓeɣ wartu deɣya.
MAT 21:20 Umi ẓrin imeḥḍaren man aya, tbehten, nnan: “Mammec igga wartu yuẓeɣ deɣya?”
MAT 21:21 Yasuɛ yarra-dd, inna asen: “S tidett Necc ad awem iniɣ: Mařa daywem l’iman u war tcekkim ca, aqa war tᵉtteggem min imsaren i wartu waha, maca ɛawed mařa tennam i wedrar-a: ‘Meksi, wḍa di řebḥar!’, ad yiři.
MAT 21:22 D qaɛ min ɣa tᵉttarem di tẓaǧit s l’iman, ad [t] tᵉṭṭfem.”
MAT 21:23 Řami yudef ɣar Zzawect Tameqqrant, usin-dd ɣares imeqqranen n ikehhanen d imɣaren n řgens am tuɣa isseřmad, nnan: “S man ṣṣulṭa i teggid timesřayin-a? Wi d ac iwcin ṣṣulṭa-ya?”
MAT 21:24 Yasuɛ yarra-dd, inna asen “Uřa d Necc ad kenniw sseqsiɣ ijj n useqsi u mařa tarrim-dd xafi uřa d Necc ad awem iniɣ s man ṣṣulṭa i tteggeɣ timesřayin-a.
MAT 21:25 Aseɣḍaṣ n Yuḥanna, manis netta? Zeg ujenna niɣ zeg iwdan?” Mcawaren nitni jar asen, nnan: “Mařa nenna: ‘Zeg ujenna!’, ad aneɣ ini: ‘Mayemmi war zzayes tuminem?’,
MAT 21:26 u mařa nenna: ‘Zeg iwdan!’, xenni dayneɣ tiggʷudi zi řɣaci, minzi marra ḥessben Yuḥanna d anabi.”
MAT 21:27 Arrin-dd, nnan: “War nessin.” Inna asen Netta: “Xenni uřa d Necc war d awem qqareɣ s man ṣṣulṭa i tteggeɣ man aya.”
MAT 21:28 “Min d awem ittɣiř kenniw? Ijj n weryaz tuɣa ɣares tnayen n iḥenjiren. Iřaɣa x umezwaru, inna: ‘[A] mmi, uyur, ass-a ad txedmed deg umarjeɛ n uḍiř!’
MAT 21:29 Netta yarra-dd, inna: ‘Necc war xseɣ ca!’, maca awarni man aya indem uca iruḥ din.
MAT 21:30 Uca yusa-dd netta ɣar wenni wiss tnayen, inna as amenni beɛda. Wanita yarra-dd xas: ‘Wah, a sidi!’, [maca] war iruḥ ca!
MAT 21:31 Man wen zzaysen i iggin řxaḍar i babas?” Nitni arrin-dd xas: “Wenni d amezwaru.” Yasuɛ inna asen: “S tidett, Necc ad awem iniɣ, aqa ayt n ḍḍariba d temɣarin n farq-ccɣeř ad awem izwaren ɣar Tgeldit n AREBBI.
MAT 21:32 Minzi Yuḥanna yusa-dd ɣarwem deg webrid n tsegda, kenniw war zzayes tuminem, maca ayt n ḍḍariba d temɣarin n farq-ccɣeř aqa nitni umnen zzayes. Řami teẓrim man aya, war tᵉtubem ca ɣar uneggaru, maḥend ad zzayes tamnem.”
MAT 21:33 “Sřem [ɛawed] i yijj n umedya nneɣni. Tuɣa din ijj n weryaz, bab n taddart, igga ijj n umarjeɛ n uḍiř, iẓẓu dayes tizayarin. Netta iquwwar as-dd s yijj n wefray, iɣza dayes tasirt n uḍiř uca ibna dayes ict n ṣṣumɛet. Xenni yarhen [amarjeɛ nni n uḍiř] i ca n ixemmasen uca isafar.
MAT 21:34 Umi dd-tiweḍ řweqt [n ṣṣabet] n řɣiǧet, issekk imsexxaren nnes ɣar ixemmasen [nni] ḥima ad dd-awyen řɣiǧet nnes.
MAT 21:35 Ixemmasen ṭṭfen imsexxaren nnes, wtin ijjen, nɣin nneɣni uca arejmen [ɛawed] ijjen nneɣni.
MAT 21:36 Ɛawed issekk imsexxaren nneɣni, ktar zeg umezwaru, uca ggin daysen ɛawed amenni.
MAT 21:37 Ɣar uneggar issekk asen-dd mmis, inna: ‘Nican ad weqqaren mmi’.
MAT 21:38 Maca řami ẓrin ixemmasen mmis, nnan jar asen: ‘Aqa d awrit, zidem, ad t neneɣ, ad as nekkes řwart i neccin.’
MAT 21:39 Ṭṭfen t, nḍaren t barra i umarjeɛ n uḍiř uca nɣin t.
MAT 21:40 Mařa yusa-dd bab n umarjeɛ nni, min ɣa yegg deg ixemmasen nni?”
MAT 21:41 Nnan as: “Ad yareddeǧ iɛeffanen nni qaɛ, uca ad iwc amarjeɛ n uḍiř i ixemmasen nneɣni inni d as i ɣa iwcen řɣiǧet di řweqt nnes.”
MAT 21:42 Yasuɛ inna asen: “Ma war teɣrim ɛemmarṣ deg idlisen: ‘Aẓru i iɛiffen ibennayen, aqa idweř d aẓru Azeǧif n teɣmart. Wa yusa-dd zi SIDI u man aya d řeɛjeb di tiṭṭawin nneɣ.’
MAT 21:43 S uyenni ad awem iniɣ, belli Tageldit n AREBBI ad awem tᵉttwakkes uca ad temmewc i yijj n řgens i ɣa iwcen řɣiǧet nnes.
MAT 21:44 Wi ɣa iwḍan x weẓru-ya, ad ittwařbez, u wi xef i ɣa iwḍa, ad t iřbez.”
MAT 21:45 Řami sřin imeqqranen n ikehhanen d Ifarisiyyen imedya nnes, fehmen belli issawař xasen.
MAT 21:46 Arezzun ad t ṭṭfen, [maca] ggʷeden zi řɣaci, minzi [řɣaci] tuɣa iḥesseb i-t d ijj n unabi.
MAT 22:1 Iṭṭef Yasuɛ ɛawed deg wawař uca issiweř akidsen ɛawed s imedya, inna:
MAT 22:2 “Tageldit n ijenwan am yijj n weryaz, ijj n ujeǧid, igga urar i mmis.
MAT 22:3 Issekk-dd imsexxaren nnes ḥima ad řaɣan x yinni ittwaɛarḍen ɣar wurar, [maca] ugin ad dd-asen.
MAT 22:4 Ɛawed issekk-dd imsexxaren nneɣni, inna: ‘Inim i yinni ittwaɛarḍen: Aqa sswejdeɣ awem amecři, ɣarṣeɣ i iyenduzen inu d řmař inu iṣeḥḥen, aqa marra iwjed, asem-dd ɣar wurar!’”
MAT 22:5 Nitni maca war wcin ca taynit i man aya, ruḥen, ijjen ɣar řeɛraṣi nnes u wenneɣni ɣar ttijara nnes.
MAT 22:6 Inni iqqimen ṭṭfen imsexxaren nnes, ɣezzan daysen uca nɣin [ten].
MAT 22:7 [Řami] isřa ujeǧid man aya, ixeyyeq aṭṭas, issekk-dd řɛeskar nnes uca yareyyeb iqettařen nni uca issecmeḍ tandint nsen.
MAT 22:8 Xenni inna i imsexxaren nnes: ‘Aqa urar iwjed maca inni tuɣa ittwaɛarḍen war t sdihiǧen ca.
MAT 22:9 S uya uyurem ɣar mani ttemsebḍan ibriden, řaɣam-dd x marra inni i ɣa tafem din ɣar wurar.’
MAT 22:10 [Xenni] ffɣen-dd imsexxaren nni ɣar ibriden uca ssmunen marra inni ufin, am yiṣebḥanen am yiɛeffanen, uca taddart n wurar tedweř teccur s [inewjiwen] i iqqimen dinni.
MAT 22:11 Řami dd-yudef ujeǧid, maḥend ad iẓar [inewjiwen] nni iqqimen dinni, iḥekkar i yijj n bnadem war yarḍ ca arruḍ n wurar.
MAT 22:12 Inna as: ‘[A] ameddukkeř inu, mammec dd-tudfed danita břa arruḍ n wurar?’ Maca netta idweř ignu.
MAT 22:13 Xenni inna ujeǧid i imsexxaren: ‘Carfem t s ifassen d iḍaren uca nḍarem t barra ɣar uneggar n taǧest mani ɣa iřin imeṭṭawen d uɣezzi n teɣmas.’
MAT 22:14 Minzi aqa din aṭṭas inni ittwařaɣan maca drus inni ittwafarzen.”
MAT 22:15 Xenni ruḥen Ifarisiyyen, mcawaren mammec ad as ggen ijj n řfex di ssibbet n wawař[en] nnes.
MAT 22:16 Ssekken ɣares imeḥḍaren nsen ak-d inni zi taddart n Hirudus, nnan: “[A] Amseɣɣar, aqa nessen belli Cek d tidett, tesseřmaded abrid n AREBBI s tidett, nhřa ma tesseřqid uřa x yijj, minzi Cek war tᵉttegged s wudmawen.
MAT 22:17 Iwa ini aneɣ mammec i twařid Cek: Ma iḥeqq [ɛlaḥsab Ccariɛa] ad tᵉttwaxeǧeṣ ḍḍariba i qayṣar niɣ lla?”
MAT 22:18 Maca Yasuɛ issen taḥraymect nsen uca inna: “Mayemmi d ayi tᵉttjarrabem, [kenniw, a] imnafqen?
MAT 22:19 Seccnem ayi [ijj n uqiyya n] dinar n ḍḍariba x kuř azeǧif!” Iwyen as-dd ijj n dinar.
MAT 22:20 Xenni inna asen: “Wi yiřan taṣwirt-a d tira-ya?”
MAT 22:21 Nnan as: “N qayṣar!” Xenni inna asen: “Wcem i qayṣar min iǧan i qayṣar u i AREBBI min iǧan i AREBBI.”
MAT 22:22 Řami sřin man aya, tbehten, semḥen dayes uca ruḥen.
MAT 22:23 Deg wass nni usin-dd ɣares Iṣaduqiyyen, qqaren as: ‘Aqa war din bu tudart [i] imettinen!’, uca sseqsan t,
MAT 22:24 nnan as: “[A] Amseɣɣar, Musa aqa inna: ‘Mařa immut ḥed war dd-yejji bu tarwa, ittxeṣṣa i umas ad imřec ak-d temɣart nnes ad kides dd-yejj aḥenjir i umas.’
MAT 22:25 Tuɣa ɣarneɣ sebɛa n wawmaten. Amezwaru imřec, immut. Umi war dd-yejji ca tarwa, aqa ijja tamɣart nnes i umas.
MAT 22:26 Ammu [i immut] uřa d wenni wiss tnayen d wiss třata ař wenni wiss sebɛa.
MAT 22:27 Ɣar uneggaru nsen marra temmut temɣart.
MAT 22:28 I man wen zzaysen i ɣa tiři temɣart di tnukra, minzi nitni marra iwyen tt d tamɣart?”
MAT 22:29 Yasuɛ yarra-dd, inna asen: “Aqa kenniw tweddarem, minzi war tessinem ca Tira [Iqeddsen] uřa d jjehd n AREBBI.
MAT 22:30 Minzi di tnukra war ttiwyen nitni timɣarin, u timɣarin war ttiřint i yeryazen, maca ad iřin am lmalakat n AREBBI deg ujenna.
MAT 22:31 [Maca] zi jjihet n tnukra jar imettinen, ma war teɣrim ca min d awem inna AREBBI i iqqaren:
MAT 22:32 ‘Aqa Necc d AREBBI n Ibrahim, AREBBI n Isḥaq, AREBBI n Yaɛqub!’ AREBBI war iǧi d AREBBI n imettinen maca n yinni iddaren.”
MAT 22:33 Řami sřin řɣaci man aya, tbehten deg useřmed nnes.
MAT 22:34 Řami sřin Ifarisiyyen belli Netta ibelleɛ aqemmum n Iṣaduqiyyen, munen jar asen.
MAT 22:35 Ijjen zzaysen, ijjen wenni issnen Ccariɛa [mliḥ], isseqsa t ḥima ad t ijarreb:
MAT 22:36 “[A] Amseɣɣar, man tawṣeyyet i iǧan d tameqqrant di Ccariɛa?”
MAT 22:37 Inna as Yasuɛ: “Ad texsed SIDI, AREBBI nnec, s marra wuř nnec, s marra řeɛmar nnec, s marra jjehd nnec u s marra řeɛqeř nnec.
MAT 22:38 D ta d tawṣeyyet tameqqrant d tamezwarut.
MAT 22:39 Tenni wiss tnayen tarwes dayes, aqa nettat: ‘Ad texsed jjar nnec amecnaw ixef nnec’.
MAT 22:40 X tnayen n tweṣṣa-ya tᵉttwabna marra Ccariɛa d Inabiyyen.”
MAT 22:41 Am tuɣa munen Ifarisiyyen, isseqsa ten Yasuɛ,
MAT 22:42 inna: “Min teqqarem x Lmasiḥ? Umi igga mmis?” Nnan as: “Mmis n Dawud!”
MAT 22:43 Inna asen: “Mammec i ɣa yegg Dawud ad as isemma zi Arruḥ ‘SIDI’, am iqqar:
MAT 22:44 ‘SIDI inna i Sidi inu: Qqim-dd x ufusi inu ař ɣa ggeɣ řɛedyan nnec sadu iḍaren nnec.’
MAT 22:45 Mařa Dawud iřaɣa as ‘SIDI’, mammec ɣa yiři d mmis?”
MAT 22:46 Uřa d ijjen war izemmar ad xas dd-yarr u uřa d ijj war iqqim izeɛɛem ittseqsa t [ca] ɛad zeg wass nni.
MAT 23:1 Řexdenni issiweř Yasuɛ ak-d řɣaci u ak-d imeḥḍaren nnes,
MAT 23:2 inna: “Imseřmaden n idlisen d Ifarisiyyen ssɣimen simant nsen x řkursi n Musa.
MAT 23:3 S uya marra min d awem qqaren maḥend ad dayes tcebbarem, ggem t, maca war tteggem ɛlaḥsab řexdayem nsen, minzi nitni waxxa qqaren [t], war [t] tteggen.
MAT 23:4 Ttceddan řeḥmeř iḍeqřen, ssrusan ten x tɣardin n iwdan, maca nitni s yixef nsen war xsen ad ten ssenhezzen uřa s yijj n uḍaḍ.
MAT 23:5 Marra řexdayem nsen i itteggen, tteggen tent ḥima ad ten ẓaren iwdan minzi nitni tteggen tiḥezzanin nsen n tẓaǧit d imiriwen uca ticrurin [i iǧan ɣar ubeḥřuř] n řkacni n tẓaǧit nsen, ggin tent d timeqqranin.
MAT 23:6 Nitni ttexsen imucan iṣebḥen ɣar řefruḥ u řekrasi iṣebḥen di temzidawin,
MAT 23:7 uřa d ssřam di řeswaq, uca iɛjeb asen ad asen řaɣan iwdan ‘[A] amseřmad inu!’
MAT 23:8 Maca kenniw war ttejjim ad awem řaɣan ‘[A] amseřmad inu!’, minzi Amseřmad nwem d Ijjen, maca kenniw marra d awmaten.
MAT 23:9 War ttejjim ad awem řaɣan di temmurt ‘[A] baba!’, minzi Babatwem i iǧan deg ijenwan d Ijjen.
MAT 23:10 War ttejjim ad awem řaɣan ‘imgewwaden’, minzi Ijjen d wenni d Amgewwad nwem, aqa-t d Lmasiḥ.
MAT 23:11 Maca ameqqran nwem ad yiři d amsexxar nwem.
MAT 23:12 Wenni i ɣa issuɛřan ixef nnes, ad ittwassemẓi, u wenni i ɣa issmeẓyen ixef nnes, ad ittwassuɛřa.”
MAT 23:13 “Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, kenniw tᵉttettem tudrin n tijjař am tᵉttarem tiwhibin di ṭṭweɛ n tẓaǧatin nwem tizirarin. S uyenni ad teksim řḥukm d ameqqran.
MAT 23:14 Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, kenniw tᵉttbellɛem Tageldit n ijenwan i iwdan, minzi kenniw simant nwem war tt tᵉttidfem, uca inni yarezzun ad dd-adfen, war ten tᵉttejjim ad dd-adfen.
MAT 23:15 Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, kenniw tekkem x řbarr u x řebḥar, ḥima ad dd-tarrem ijjen d amɛacar n ddin n Wudayen, u xmi i kidwem ɣa yiři, tᵉttarram t d mmis n jᵉhennama d aɛeffan mahu x kenniw tnayen n tseqqar.
MAT 23:16 Uct xawem, [a kenniw] imgewwaden idarɣařen, inni iqqaren: ‘Wenni ijjuǧen ɣar Zzawect Tameqqrant, aqa tajaǧit nnes war tessekkwi walu, maca wenni i ɣa ijjuǧen s wureɣ i iǧan di Zzawect Tameqqrant, aqa netta iqqen ɣar iřes nnes.’
MAT 23:17 [A] ifɣař, [a] idarɣařen, min isekkwan ktar, ureɣ niɣ Zzawect Tameqqrant tenni tessqeddes ureɣ?
MAT 23:18 Uca [ammu i teqqarem ɛawed]: ‘Wenni ijjuǧen ɣar uɛalṭar, aqa tajaǧit nnes war tsekkwi walu, maca wenni i ɣa ijjuǧen s tmewci i xas immarsen, aqa netta iqqen ɣar iřes nnes.’
MAT 23:19 [A] ifɣař, [a] idarɣařen, min isekkwan ktar, tamewci niɣ aɛalṭar wenni issqeddes tamewci?
MAT 23:20 S uya wi ɣa ijjaǧen [xenni] ɣar uɛalṭar, aqa ijjuǧ ɣar uɛalṭar u ɣar marra min xas iǧan.
MAT 23:21 U wi ɣa ijjaǧen ɣar Zzawect Tameqqrant, ijjuǧ ɣares u ɣar Wenni dayes izeddɣen.
MAT 23:22 U wi ɣa ijjaǧen ɣar ujenna, aqa ijjuǧ ɣar řɛarc n AREBBI d Wenni xas iqqimen.
MAT 23:23 Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, minzi kenniw tᵉtticem taɛcart n nneɛnaɛ d ssanuǧ d řcemmum, maca war d awem icqi min iǧan d ameqqran di Ccariɛa, aqa řḥukm d arreḥmet d l’iman. Ina i ittxeṣṣa ad teggem, war daysen tsemmḥem.
MAT 23:24 A imgewwaden idarɣařen inni ifarrnen tizit, [maca] tessɣeǧayem ařɣem.
MAT 23:25 Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, minzi tessizdagem barra n řkas d ṭṭebṣi, maca ɣar daxeř aqa ccuren s tkeccaḍt d min war iseggden.
MAT 23:26 [A] Ifarisiyyen idarɣařen, sizdegem amezwar daxeř n řkas d ṭṭebṣi, maḥend ad yiři izdig uřa min iǧan ɣar barra nsen.
MAT 23:27 Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, minzi teggim am yimeḍřan inni ittwajiyyaren, ttbanen d iṣebḥanen ɣar barra, maca ɣar daxeř aqa ccuren s iɣsan n řxecbat u s marra řexmej.
MAT 23:28 Amenni kenniw ɛawed, aqa teḍharem d imseggaden qibač i iwdan, maca ɣar daxeř aqa teccurem s řmuɛṣiyyet u s nnifaq.
MAT 23:29 Uct xawem, [a kenniw] imseřmaden n idlisen d Ifarisiyyen, [kenniw, a] imnafqen, minzi tbennam imeḍřan n inabiyyen u tzewwqem řqubbat n imeḍřan n imseggaden,
MAT 23:30 teqqarem: ‘Mři tuɣa neǧa deg wussan n řejdud nneɣ, ad yiři war ncarrec deg [usizzeř n] idammen n inabiyyen.’
MAT 23:31 S uya tcehhdem x yixef nwem belli kenniw d tarwa n yinni inɣin inabiyyen.
MAT 23:32 [Iwa] kemmřem kenniw [xenni] uřa řeqyas n [min ggin] řejdud nwem!
MAT 23:33 A iřefsawen, tarwa n ifiɣran, mammec ɣa teggem ad tᵉttwassnejmem zi řḥukm [n tmessi] n jᵉhennama?
MAT 23:34 S uyenni xzarem, Necc ad ɣarwem dd-ssekkeɣ inabiyyen d imiɣisen d imseřmaden n idlisen. Ca zzaysen ad ten tenɣem, ca zzaysen ad ten tṣellbem u ca zzaysen ad ten thettkem s urekkuḍ di temzidawin nwem uca ad xasen taẓẓřem zi tendint ɣar tendint [nneɣni],
MAT 23:35 ařami ad xawem iřin marra idammen iseggden i issizzřen x temmurt, zeg idammen n Habil amseggad ař idammen n Zakariyya, mmis n Birixya, i tenɣim jar Zzawect Tameqqrant d uɛalṭar.
MAT 23:36 S tidett, Necc ad awem iniɣ: Marra timesřayin-a ad dd-asent x jjiř-a.”
MAT 23:37 “[A] Urcalim, [a] Urcalim, cem i ineqqen inabiyyen u yarejjmen inni d am dd-ittwassekken, mecḥař tuɣa xseɣ ad ssmuneɣ tarwa nnem am yict n tyaẓiḍt tegga ifiǧusen nnes sadu afriwen nnes, [maca] kenniw tuɣa war tᵉttexsem.
MAT 23:38 Xzar, Taddart nwem ad tᵉttwajj i cem d řxarbet,
MAT 23:39 minzi Necc ad awem iniɣ: Kenniw war d ayi tẓarrem ař ɣa tinim: ‘Lbaraka i Wenni dd-yusin s Yisem n SIDI.’”   *
MAT 24:1 [Xenni] iffeɣ Yasuɛ zi Zzawect Tameqqrant maḥend ad yuyur, [maca] usin-dd ɣares imeḥḍaren nnes, ssecnen as řebniyyat n Zzawect Tameqqrant.   *
MAT 24:2 Netta inna asen: “Ma war teẓrim marra man aya? S tidett, Necc ad awem iniɣ: War da ittɣimi uřa d ijj n weẓru x weẓru nneɣni i war ittnehdim.”
MAT 24:3 Umi tuɣa Yasuɛ iqqim x wedrar n Zzitun, usin-dd imeḥḍaren nnes, tuɣa ttemsawařan, nnan as: “Ini aneɣ, meřmi i ɣa imsar aya u man řeɛřamet n twasit nnec u n qeṭṭu n ddunect?”
MAT 24:4 Yasuɛ yarra-dd, inna asen: “Ḥḍam ixef nwem, war kenniw ixeddeɛ ḥed.
MAT 24:5 Minzi aṭṭas ad dd-asen s Yisem inu, ad inin: ‘Aqa Necc d Lmasiḥ!’, uca ad xedɛen aṭṭas.
MAT 24:6 Uca ad tesřem x garrat u x řexburat n imenɣan. Ɣarwem aqa ad teggʷedem, minzi s uɣiř ad yiři man aya, maca war ittiři ɛad d aneggar.
MAT 24:7 Minzi řgens ad iɣewweɣ x ijj n řgens [nneɣni] u tageldit x tgeldit [nneɣni], ad yiři řaẓ d řehřacat yewɛaren d inhezzan n temmurt da d diha.
MAT 24:8 Marra man aya d beddu n řewjeɛ [n tarut].
MAT 24:9 Xenni ad kenniw dd-awyen ɣar řmeḥnet uca ad kenniw nɣen, u marra řegnus ad kenniw carhen zi ssibbet n Yisem inu.
MAT 24:10 Řexdenni ad nqarḍen waṭṭas, ad carhen ijjen wenneɣni uca ad sellmen ijjen wenneɣni.
MAT 24:11 Ad kkaren waṭṭas n inabiyyen issxarriqen uca ad ɣwan aṭṭas.
MAT 24:12 S waṭṭas n řmuɛṣiyyet ad tudrus tayri n waṭṭas [n iwdan],
MAT 24:13 maca wi ɣa iṣbaren ɣar uneggar, aqa netta ad iddar.
MAT 24:14 Řexbar-a Aṣebḥan n Tgeldit ad zzayes barrḥen di ddunect marra d cchadet i marra řegnus uca řexdenni ad dd-yas uneggar.”
MAT 24:15 “Xmi ɣa tẓarem řeɛřamet n nnɛi n wareyyeb, min xef issiweř unabi Daniyal, deg wemcan iqeddsen - ejj wenni t i ɣa iɣaren ad iften -
MAT 24:16 řexdenni jjem inni iǧan di Yahudiyya ad arewřen ɣar idurar.
MAT 24:17 Wenni iǧan x tzeqqa war dd-ihekkwi ca ḥima ad iksi ca zi taddart nnes,
MAT 24:18 u wenni iǧan deg iyyar, war dd-iddikkʷiř ca ḥima ad dd-yawi arruḍ nnes.
MAT 24:19 Uct x tinni iǧan s ddeyset d tinni issuṭṭuḍen deg wussan nni!
MAT 24:20 Ẓaǧem, ḥima war tᵉttiři tarewřa nwem di řmecta niɣ di ssebt,
MAT 24:21 minzi řexdenni ad tiři řmeḥnet tameqqrant i war imsaren ɛemmarṣ zeg wami teǧa ddunect ař i řexxu u ɛemmarṣ war tᵉttiři ɛad.
MAT 24:22 Mři ussan nni war ttwassmeẓyen, xenni war ittwassenjem uřa d ijj n bnadem, maca [ussan nni] ad ttwassmeẓyen di ṭṭweɛ n yinni ittwafarzen.
MAT 24:23 Mařa inna awem ḥed: ‘Xzarem, aqa da Lmasiḥ!’ niɣ: ‘Aqa-t diha!’ war [t] ttimnem.
MAT 24:24 Minzi ad iřin imasiḥen ifalsuten d inabiyyen issxarriqen, ad ggen řeɛřamat mɣarent, ḥima, mři zemmaren, ad xedɛen ɛawed inni ittwafarzen.
MAT 24:25 Xzarem, aqa nniɣ awem t qbeř.
MAT 24:26 Mařa nnan awem: ‘Xzarem, Netta aqa-t di řexřa!’, war ttriḥem ca din, [niɣ]: ‘Xzarem, Netta aqa-t daxeř i wexxam!’, war [tt] ttimnem.
MAT 24:27 Minzi am wajjaj i dd-itteffɣen zi ccarq uca ittegg tafawt ař řɣarb, ammu i ɣa tiři twasit n Mmis n bnadem.
MAT 24:28 Mani ɣa tiři arrimet diha ad munen igidaren.”
MAT 24:29 “Řexdenni awarni řmeḥnet n wussan nni, ad tbarcen tfuct u taziri war tᵉttic ɛad ṭṭya nnes u itran ad dd-wḍan zeg ujenna u ṣṣulaṭat n ijenwan ad ttwanhezzent.
MAT 24:30 Xenni ad dd-teḍhar řeɛřamet n Mmis n bnadem deg ujenna u marra tiqebbař n temmurt ad wtent agejdur uca ad ẓarent Mmis n bnadem yusa-dd x iseynuten n ujenna s jjehd u s uɛuǧi aṭṭas.
MAT 24:31 Netta ad issekk lmalakat nnes s řḥess ijehden n usuḍi deg uyicc n icarri, uca ad dd-ssmunent inni ittwafarzen zi arebɛa n iɣezdisen n usemmiḍ, zi ṭṭarf aneggaru n ijenwan ař wenneɣni.”
MAT 24:32 “Řemdem zeg umedya n wartu: xmi ɣa dewřen řefruɛ nnes d iřeqqaɣen, ad dd-ssuffɣen tifray, ad tessnem aqa anebdu yudes-dd.
MAT 24:33 Ammu ɛawed kenniw, xmi ɣa tẓarem marra man aya, ad tessnem aqa yudes-dd, ɣar tewwart.”
MAT 24:34 “S tidett, Necc ad awem iniɣ: Jjiř-a war iɛeddu ař ɣa imsar man aya marra.
MAT 24:35 Ajenna d temmurt ad ɛdun, [maca] awařen inu war ɛeddun ɛemmarṣ.
MAT 24:36 Maca x wass nni niɣ x tsaɛɛet nni war xas issin uřa d ijj, uřa d lmalakat n ijenwan, mɣir Baba weḥḥdes.
MAT 24:37 Am mammec tuɣa iǧa deg wussan n Nuḥ ammu i ɣa tiři ɣar twasit n Mmis n bnadem.
MAT 24:38 Minzi am mammec ten tuɣa [deg wussan] qbeř ṭṭufan, ttᵉtten, sessen, meǧcen u ssmeǧacen ař ass i di yudef Nuḥ ɣar uɣarrabu,
MAT 24:39 uca war ucin walu ařami dd-yusa ṭṭufan, imḥa i-ten marra, ammu i ɣa tiři ɣar twasit n Mmis n bnadem.
MAT 24:40 Di řweqt nni ad iřin tnayen deg iyyar, ijjen ad t ksin u wenneɣni ad t jjen.
MAT 24:41 Tnayen n temɣarin ad ḥaryent s tsirt, icten ad tt ksin u tenneɣni ad tt jjen.
MAT 24:42 S uya ḥḍam, minzi war tessinem ca di man tasaɛɛet i dd ɣa yas Siditwem.
MAT 24:43 Maca ssnem aya: mařa bab n taddart issen di man ḥeṭṭu [n ǧiřet] i dd ɣa yas uceffar, iři iqqim iḥeṭṭa, war t ittejji ad yadef ɣar taddart nnes.
MAT 24:44 S uya, iřim twejdem, minzi Mmis n bnadem ad dd-yas deg ict n tsaɛɛet war tt tᵉttrijim.”
MAT 24:45 “Wi iǧan xenni d amsexxar amtiqqi d amiɣis i igga bab nnes, ḥima ad ibḍa x aytbab n taddart nnes min ɣa ccen di řweqt nnes?
MAT 24:46 Sseɛd n umsexxar wenni i ɣa yafen sidis iřha ammu xmi dd ɣa yas.
MAT 24:47 S tidett, Necc ad awem iniɣ, ad t igg x marra agřa nnes.
MAT 24:48 Maca mařa amsexxar aɛeffan nni ad yini deg wuř nnes: ‘Sidi inu iɛeṭṭař maḥend ad dd-yas!’,
MAT 24:49 uca ibda iccat imsexxaren imɛacaren nnes, ad icc ad isu ak-d imeskaren,
MAT 24:50 xenni ad dd-yas sidis n umsexxar nni deg ijj n wass i di war t ittriji u deg ict n tsaɛɛet war tt issin,
MAT 24:51 ad t iqess d iwetwiten uca ad tiři tesɣart nnes ak-d imnafqen. Din i ɣa yiřin imeṭṭawen d uɣezzi n teɣmas.”
MAT 25:1 “Xenni ad tiři Tgeldit n ijenwan amecnaw ɛecra n teɛzariyyin iwyent řefnarat nsent, ffɣent, ḥima ad mmeřqent ak-d wesři d tesřit.
MAT 25:2 Xemsa zzaysent d timiɣisin u xemsa d tifɣař.
MAT 25:3 Tinni iǧan d tifɣař ksint řefnarat nsent, maca war iwyint ca zzect.
MAT 25:4 Timiɣisin iwyent-i-dd zzect di tziyyatin nsent ak-d řefnarat nsent.
MAT 25:5 Řami iɛḍeř umuřay, bdant ttnudument marra uca ṭṭṣent.
MAT 25:6 Di řwesṭ n ǧiřet tuɣa din tɣuyyit: ‘Xzarem, aqa amuřay yusa-dd, ffɣem-dd, ad t teřqam!’
MAT 25:7 Xenni kkarent teɛzariyyin nni, ssewjdent-i-dd řefnarat nsent.
MAT 25:8 Tifɣař nnant i tmiɣisin: ‘Wcent aneɣ zi zzect nkent minzi řefnarat nneɣ xesyent.’
MAT 25:9 Arrint-i-dd xasent tmiɣisin, nnant: ‘Ɛemmarṣ, war d aneɣ ittqeddi i neccin d kennint. Ruḥent ɣar isebbaben, maḥend ad tesɣent i yixef nkent.’
MAT 25:10 Řami ruḥent nitenti ḥima ad sɣent, yusa-dd umuřay, u tinni tuɣa iwejden udfent akides ɣar taddart n řefraḥet n wurar uca tbelleɛ tewwart.
MAT 25:11 Awarni man aya usint teɛzariyyin nneɣni, qqarent: ‘[A] siditneɣ, [a] siditneɣ, arzem aneɣ!’
MAT 25:12 Netta yarra-dd, inna: ‘S tidett, necc ad akent iniɣ, war kennint ssineɣ.’
MAT 25:13 S uyenni ḥḍam, minzi kenniw war tessinem ca ass uřa d tasaɛɛet.”
MAT 25:14 “Minzi tamesřact am yijj n bnadem isafar barra i temmurt nnes, iřaɣa-dd x imsexxaren nnes uca ikellef i-ten x wagřa nnes.
MAT 25:15 Iwca i yijjen xemsa talint, i wenneɣni tnayen, i wenni wiss třata icten [n talint], kuř ijjen ɛlaḥsab tizemmar nnes, řexdenni ikkar, isafar deɣya.
MAT 25:16 Iruḥ wenni iṭṭfen xemsa talint, isebbeb daysen uca yarbeḥ xemsa.
MAT 25:17 Amenni ɛawed wenni iṭṭfen tnayen [talint], yarbeḥ tnayen nneɣni.
MAT 25:18 Maca wenni iṭṭfen ict [n talint], iruḥ, iɣza di temmurt uca issnuffar [tmenyat n] nnuqart n bab nnes.
MAT 25:19 Řami teɛdu aṭṭas n řweqt yusa-dd bab n imsexxaren nni uca igga akidsen řeḥsab.
MAT 25:20 [Xenni] yusa-dd wenni iṭṭfen xemsa talint, yiwi-dd xemsa talint nneɣni, inna: ‘A sidi, tewcid ayi xemsa talint, aqa da, arebḥeɣ xemsa nneɣni ktar.’
MAT 25:21 Yarra-dd xas bab nnes, inna: ‘Mliḥ i teggid, [a] amsexxar aṣebḥan d amtiqqi. Tuɣa cek d amtiqqi x drus, ad ac ggeɣ x waṭṭas, adef-dd ɣar řefraḥet n sidi nnec.’
MAT 25:22 Xenni yusa-dd ɛawed wenni iṭṭfen tnayen talint, inna: ‘[A] sidi, tewcid ayi tnayen talint, aqa arebḥeɣ tnayen nneɣni ktar.’
MAT 25:23 Inna as sidi nnes: ‘Mliḥ i teggid, [a] amsexxar aṣebḥan d amtiqqi. Tuɣa cek d amtiqqi x drus, ad ac ggeɣ x waṭṭas, adef-dd ɣar řefraḥet n sidi nekk.’
MAT 25:24 Maca wenni iṭṭfen ict n talint, yusa-dd ɛawed, inna: ‘[A] sidi, ssneɣ aqa cek d bnadem tqesḥed, tmejjared mani war tzarrɛed, tyarrwed mani war tᵉssarwated.
MAT 25:25 [S uyenni] ggʷedeɣ uca ruḥeɣ, ssnuffareɣ talint nnec di temmurt. Aɣac tenni nnec.’
MAT 25:26 Yarra-dd sidi nnes, inna as: ‘[A] amsexxar aɛeffan ameɛguz, aqa tessned belli aqa mjareɣ mani war zarɛeɣ u yarweɣ mani war ssarweteɣ.
MAT 25:27 Xenni mři tiwyed nnuqart inu ɣar řbanku, xenni necc, xmi dd ɣa yaseɣ, ad ttareɣ min iǧan inu s arriba.
MAT 25:28 S uya kksem as talint nni, ewc i-tt i wenni ɣar iǧa ɛecra talint!’
MAT 25:29 Minzi i kuř ijjen wenni ɣar iǧa ad as immewc uca ad ɣares yiři s waṭṭas, maca wenni war ɣar iǧi, uřa d min ɣares ad as ittwakkes.
MAT 25:30 Nḍarem amsexxar ibeṭṭřen ɣar barra deg uneggar n taǧest mani ɣa iřin imeṭṭawen d uɣezzi n teɣmas.”
MAT 25:31 “Xmi dd ɣa yas Mmis n bnadem deg uɛuǧi nnes u marra lmalakat nnes iqeddsen akides, xenni ad iqqim x řɛarc n uɛuǧi nnes.
MAT 25:32 Ad ssmunen marra řegnus qibač nnes uca Netta ad ten imssebḍa am mammec ameksaw issbeṭṭa iḥuřiyyen x iɣayḍen.
MAT 25:33 Netta ad igg iḥuřiyyen x ufusi nnes, maca iɣayḍen x uzeřmaḍ nnes.
MAT 25:34 Řexdenni ad ini Ujeǧid i yinni x ufusi nnes: ‘Asem-dd, [a] kenniw inni ittwabarken zi Baba, wartem Tageldit i d awem dd-iwejden zeg wami tᵉttwagg ddunect.
MAT 25:35 Minzi tuɣa dayi řaẓ uca kenniw tesseccem ayi. Tuɣa ffudeɣ, tewcim ayi ad sweɣ. Tuɣa ayi d abarrani, kenniw tesszedɣem ayi,
MAT 25:36 tuɣa ayi d aɛaryan, kenniw tessyarḍem ayi, tuɣa heřceɣ, kenniw tessijem-dd xafi, tuɣa ayi di řeḥbes, kenniw tusim-dd ɣari.’
MAT 25:37 Xenni ad xas dd-arren imseggaden, qqaren: ‘A Siditneɣ, meřmi Cek neẓra tǧuẓed uca nessecc i Cek, niɣ [meřmi Cek neẓra] tᵉffuded uca newc ac ad teswed?
MAT 25:38 Meřmi Cek neẓra d abarrani uca nessezdeɣ i Cek, niɣ d aɛaryan uca nessyarḍ i Cek?
MAT 25:39 Meřmi Cek neẓra theřced niɣ di řeḥbes uca nusa-dd ɣarek?’
MAT 25:40 Ad dd-yarr ujeǧid, ad asen yini: ‘S tidett, Necc ad awem iniɣ, min i teggim i yijjen zeg wawmaten imeẓyanen inu, i Necc umi t teggim.’
MAT 25:41 Řexdenni ad yini i yinni iǧan x uzeřmaḍ nnes: ‘Beɛɛdem xafi, a kenniw inni ittwaneɛřen, ɣar tmessi n řebda i iwejden i ibřis d lmalakat nnes.
MAT 25:42 Minzi tuɣa dayi řaẓ war d ayi tesseccem, ffudeɣ war d ayi tewcim ad sweɣ.
MAT 25:43 tuɣa ayi d abarrani, kenniw war d ayi tesszedɣem, tuɣa ayi d aɛaryan, war d ayi tessyarḍem, heřceɣ u ttwaḥebseɣ war xafi dd-tessijem ca.’
MAT 25:44 Řexdenni uřa d nitni ad [xas] dd-arren, ad inin: ‘A Siditneɣ, meřmi Cek neẓra teǧuẓed niɣ tᵉffuded niɣ d abarrani niɣ d aɛaryan niɣ theřced niɣ di řeḥbes, xenni neccin war xak nsexxar ca?’
MAT 25:45 Xenni ad xasen dd-yarr, ad yini: ‘S tidett, Necc ad awem iniɣ: Min war teggim i yijjen zeg imeẓyanen inu, i Necc umi war t teggim ɛawed.’
MAT 25:46 Ad raḥen nitni ɣar řeɛdab ittduman, maca imseggaden ɣar Tudart ittduman.”
MAT 26:1 Awarni řami ikemmeř Yasuɛ awařen-a, inna i imeḥḍaren nnes:
MAT 26:2 “Tessnem belli awarni tnayen n wussan ad tiři [Řɛid n Tɣarṣt n] Useɛdu u řexdenni ad immewc Mmis n bnadem, ḥima ad ittwaṣelleb.”
MAT 26:3 Řexdenni munen imeqqranen n ikehhanen d imseřmaden n idlisen d imɣaren n řgens di řemraḥ n arrays n ikehhanen, wenni umi qqaren Qayafa,
MAT 26:4 uca mcawaren mammec ɣa ṭṭfen Yasuɛ s teḥraymect uca ad t nɣen,
MAT 26:5 nnan: “War ittiři di Řɛid ḥima war ittekkar uɣewweɣ di řgens.”
MAT 26:6 Řami tuɣa Yasuɛ di Bayt-Ɛanya, di taddart n Cimɛun, wenni di iǧa řbarṣ,
MAT 26:7 tusa-dd ɣares ict n temɣart s ijj n uɣarraf n alabaster iccur s zzect iɣřan i wedhan, uca tfarreɣ i-tt x uzeǧif nnes am iqqim Yasuɛ [ɣar ṭṭabřa].
MAT 26:8 Umi ẓrin imeḥḍaren man aya, iqqes asen řḥař aṭṭas, nnan: “Min umi teǧa txessart-a?
MAT 26:9 Tuɣa izemmar ad temmenz [zzect-a n wedhan] s ttaman d ameqqran, uca [xenni] ad temmewc i imezřaḍ.”
MAT 26:10 Maca Yasuɛ tuɣa issen man aya, inna: “Mayemmi tziyyarem x temɣart-a, minzi nettat tegga ayi ict n řxedmet teṣbeḥ.
MAT 26:11 Minzi imezřaḍ aqa aten řebda akidwem, maca Necc war kiwem ttiřiɣ i řebda.
MAT 26:12 Minzi nettat, mařa tfarreɣ-dd [zzect-a i] wedhan x arrimet inu, aqa tegga man aya i usewjed n wenḍeř inu.
MAT 26:13 S tidett, Necc ad awem iniɣ: Mani ma i ɣa ittwabarreḥ zi Řexbar-a Aṣebḥan xafi di marra ddunect, ad ssiwřen ɛawed x min [dayi] tegga, d řiḍaret i nettat.”
MAT 26:14 Řexdenni iřuḥ ijjen zi tenɛac, qqaren as Yahuda Isxariyuṭi, ɣar imeqqranen n ikehhanen,
MAT 26:15 inna: “Min d ayi ɣa tewcem maḥend ad awem sellmeɣ Yasuɛ?” Uca waɛden [t] s třatin [n řweznat] n nnuqart.
MAT 26:16 Ssenni tuɣa yarezzu ict n tewwart ḥima ad t isellem.
MAT 26:17 Deg wass amezwaru n [Weɣrum] břa Antun, usin-dd imeḥḍaren ɣar Yasuɛ, nnan: “Mani texsed ad nessewjed i Cek maḥend ad tecced [amensi n] Useɛdu?”
MAT 26:18 Inna asen: “Uyurem ɣar tendint ɣar ijj n fřan, inim as: ‘Amseřmad nneɣ iqqar: Aqa řweqt inu tiweḍ-dd, ad ɣarek ggeɣ [amensi n] Useɛdu ak-d imeḥḍaren inu.’”
MAT 26:19 Imeḥḍaren ggin am mammec ten iweṣṣa Yasuɛ uca ssewjden i [umensi n] Useɛdu.
MAT 26:20 Řami dd-tiweḍ tmeddit, iqqim [ɣar umensi] ak-d tenɛac [n imeḥḍaren nnes].
MAT 26:21 Am ttᵉtten nitni, inna: “S tidett, Necc ad awem iniɣ, ijjen zzaywem ad ayi iɣdar.”
MAT 26:22 Nitni dewřen ceḍnen aṭṭas uca kuř ijjen zzaysen ibda ad as yini: “Ma war iǧi d necc, a Sidi?”
MAT 26:23 Yarra-dd xasen, inna: “Wenni issisnen afus akidi di ṭṭebṣi d netta i d ayi ɣa iɣdaren.
MAT 26:24 Mmis n bnadem ad iraḥ am mammec xas tura, maca uct x bnadem nni i ɣa iɣdaren Mmis n bnadem. Iḥřa as i bnadem nni war dd-ixřiq ɛemmarṣ.”
MAT 26:25 Yahuda, aɣeddar, yarra-dd, inna: “Ma war iǧi d necc, [a] Amseřmad inu?” Netta inna as: “Aqa cek tennid [t].”
MAT 26:26 Am tuɣa ttᵉtten, iksi Yasuɛ aɣrum u awarni řami ibarek, yarẓa [i-t], iwca [i-t] i imeḥḍaren, inna: “Ksim, ccem, ta d Arrimet inu.”
MAT 26:27 Iksi řkas, iqada uca iwca asen t, inna: “Swem zzayes marra idwem,
MAT 26:28 minzi wa d Idammen inu n Řɛahd n Jdid inni i ɣa ittwassizřen i weɣfar n ddnub.
MAT 26:29 Necc ad awem iniɣ, zi řexxu tsawent war sesseɣ ɛad zi řɣiǧet n tzayart ař ass i di tt ɣa sweɣ zi jdid akidwem di Tgeldit n Baba.”
MAT 26:30 U [awarni řami] ɣennjen izři n ttesbiḥ, ffɣen ɣar wedrar n Zzitun.
MAT 26:31 Xenni inna asen Yasuɛ: “Marra kenniw ad dayi tenderfem di ǧiřet-a, minzi aqa tura: ‘Ad wteɣ Ameksaw, uca iḥuřiyyen n tḥimart ad ttwazuzzaren.’
MAT 26:32 Maca awarni řami i dd ɣa ttwassnekkareɣ, ad awem izwareɣ ɣar Ljalil.”
MAT 26:33 [Maca] Buṭrus yarra-dd, inna as: “Mařa dayek i ɣa nderfen marra, necc war dayek ttendrifeɣ ca ɛemmarṣ!”
MAT 26:34 Inna as Yasuɛ: “S tidett, Necc ad ac iniɣ, di ǧiřet-a, qbeř i ɣa issquqeɛ uyaẓiḍ, ad ayi tenkared třata n twařawin.”
MAT 26:35 Buṭrus inna as: “Waxxa tuɣa ittxeṣṣa ayi ad mmteɣ akidek, necc war Cek nekkareɣ ɛemmarṣ.” Ammu i nnan marra imeḥḍaren ɛawed.
MAT 26:36 Řexdenni iruḥ Yasuɛ akidsen ɣar ijj n wemcan qqaren as Xitsimaniy, inna i imeḥḍaren nnes: “Qqimem danita, am i ɣa ẓẓaǧeɣ [din].”
MAT 26:37 Am kis yiwi Buṭrus d tnayen n iḥenjiren n Zabdi, ibda ittnexřaɛ, iggʷed aṭṭas.
MAT 26:38 Xenni inna asen: “Řeɛmar inu issḥissif aṭṭas ař řmewt. Qqimem da, ḥḍam akidi.”
MAT 26:39 [Xenni] iɛzeř cwayt ktar, iwḍa x uɣembub nnes, ittẓaǧa, inna: “A Baba, mařa iɛeddeř, ejj ad xafi iɛdu řkas-a! Maca war ittiři am mammec xseɣ Necc, maca am mammec [texsed] Cek.”
MAT 26:40 [Řexdenni] idweř-dd ɣar imeḥḍaren nnes uca yufa i-ten ṭṭṣen. Inna i Buṭrus: “Ma war tzemmarem ad kidi teḥḍam uřa d ict n tsaɛɛet?
MAT 26:41 Ḥḍam, ẓẓaǧem, ḥima war dd-tᵉttidfem deg ujarreb. Arruḥ aqa iwjed, maca ddat teḍɛef.”
MAT 26:42 Yuyur ɛawed i umur wiss tnayen uca iẓẓuǧ, inna: “A Baba, mařa řkas-a war izemmar ad xafi yekk mɣir mařa Necc swiɣ t, aqa ad yiři min texsed Cek!”
MAT 26:43 Řami dd-idweř, yufa i-ten ɛawed ṭṭṣen, minzi tiṭṭawin nsen tuɣa ḍeqqřent.
MAT 26:44 Ijja i-ten, yuyur ɛawed uca iẓẓuǧ i twařa wiss třata, iqqar awařen-a ɛawed.
MAT 26:45 Řexdenni idweř-dd ɣar imeḥḍaren nnes, inna asen: “Kemmřem x yiḍeṣ nwem řexxu, areyyḥem. Xzarem, aqa tsaɛɛet tiweḍ-dd aqa Mmis n bnadem ad immewc deg ifassen n imednab.
MAT 26:46 Kkarem, ad nraḥ. Xzarem, wenni d ayi ɣa iɣdaren, yudes-dd.”
MAT 26:47 Am tuɣa issawař ɛad, yusa-dd Yahuda, aɣeddar, ijjen zi tenɛac, ak-d ijj n řɣaci ameqqran s řesyuf d iɛumad, usin-dd zeg imeqqranen n ikehhanen d imɣaren n řgens.
MAT 26:48 Yahuda, aɣeddar, aqa iwca asen ict n řeɛřamet, inna: “Wenni i ɣa ssudmeɣ d wenni Netta, ṭṭfem t.”
MAT 26:49 Řexdenni dd-iqarreb ɣar Yasuɛ, inna: “Sřam xak, [a] Amseřmad inu!”, uca issudem i-t.
MAT 26:50 [Xas uca] Yasuɛ inna as: “[A] ameddukkeř inu, min xef dd-tusid da?” Řexdenni qarrben-dd [ɣares], ḥarten x Yasuɛ uca ṭṭfen t.
MAT 26:51 U xzar, ijjen zeg inni iǧan ak-d Yasuɛ, isswiẓẓeḍ afus nnes, ijbed ssif uca iwta amsexxar n arrays n ikehhanen, iqess as amezzuɣ.
MAT 26:52 Xenni inna as Yasuɛ: “Arr ssif ɣar wemcan nnes, minzi marra inni ikessin ssif ad mmten s ssif.
MAT 26:53 Niɣ ittɣiř ac belli Necc war zemmareɣ ad ẓẓaǧeɣ i Baba, aqa Netta ad d ayi dd-issekk řexxu ktar zi tenɛac n ilixiyunen n lmalakat?
MAT 26:54 Mammec xenni i ɣa ttwakemmřent Tira [Iqeddsen] [i iqqaren] belli ittxeṣṣa ad imsar ammu?”
MAT 26:55 Di tsaɛɛet nni ɛawed issiweř Yasuɛ ak-d řɣaci: “Axmi x ijj n uqṭaṭɛiy i dd-teffɣem s řesyuf d iɛumad maḥend ad ayi tᵉṭṭfem. Kuř ass tuɣa qqimeɣ ɣarwem, sseřmadeɣ di Zzawect Tameqqrant, war dayi tᵉṭṭifem.
MAT 26:56 Maca man aya marra imsar, ḥima ad ttwakemmřent Tira n inabiyyen.” Řexdenni semḥen dayes marra imeḥḍaren uca arewřen.
MAT 26:57 Inni iṭṭfen Yasuɛ, iwyen t ɣar Qayafa, arrays n ikehhanen, wenni ɣar tuɣa munen imseřmaden n idlisen d imɣaren [n řgens].
MAT 26:58 Cimɛun Buṭrus iḍfar i-t-i-dd zi řaggʷaj ařami d yiweḍ ɣar řemraḥ n arrays n ikehhanen u řami yudef, iqqim jar iɛessasen ḥima ad iẓar mammec i ɣa teffeɣ.
MAT 26:59 Imeqqranen n ikehhanen d imɣaren [n řgens] u marra Jmaɛet [Tameqqrant], tuɣa arezzun icehhaden issxarriqen x Yasuɛ, maḥend ad t nɣen.
MAT 26:60 Maca war zemmaren ad tt afen, waxxa usin-dd aṭṭas n řechud issxarriqen. Ɣar uneggar usin-dd tnayen
MAT 26:61 i innan: “Wa aqa inna: ‘Necc zemmareɣ ad hedmeɣ Zzawect Tameqqrant n AREBBI u di třata n wussan ad tt bniɣ [ɛawed].’”
MAT 26:62 Arrays n ikehhanen ikkar-dd, inna as: “Ma war dd-tarrid s walu? Min xak cehhden ina?”
MAT 26:63 Maca Yasuɛ isqar. Inna as arrays n ikehhanen: “Necc ad Cek jjeɣ ad tejjaǧed s AREBBI iddaren, belli Cek ad aneɣ tinid, ma xenni Cek d Lmasiḥ, Mmis n AREBBI?”
MAT 26:64 Inna as Yasuɛ: “Cek tennid [t]. Maca Necc ad awem iniɣ: ‘Zi ssa tsawent ad tẓarem Mmis n bnadem iqqim x ufusi n jjehd xmi dd ɣa yas x iseynuten n ujenna.”
MAT 26:65 Řexdenni icarreg arrays n ikehhanen arruḍ nnes, inna: “Netta aqa iceqqef [di AREBBI], mayemmi neḥdaj ɛad řechud? Xzarem, řexxu aqa tesřim i uceqqef nnes.
MAT 26:66 Min d awem ittɣiř kenniw?” Nitni arrin-dd xas, nnan: “Netta isdaheǧ řmewt.”
MAT 26:67 Xenni bdan ssusufen [as] x uɣembub, ccaten t s řpuniyyat [x uzeǧif] u inneɣni wtin t [ɛawed],
MAT 26:68 nnan: “Nabb aneɣ, [a Cek], Lmasiḥ, wi Cek iwtin?”
MAT 26:69 Buṭrus iqqim ɣar barra di řemraḥ. Tqarreb-dd ɣares ict n tayya, tenna: “Uřa d cek tuɣa cek ak-d Yasuɛ, zi Nnaṣira.”
MAT 26:70 Maca netta inkar zzat i marra, inna: “War ssineɣ min xef tessawařed.”
MAT 26:71 Am iggur ɣar usqif n tewwart, teẓra i-t ict n tayya nneɣni, tenna asen i yinni din iqqimen: “Uřa d wa tuɣa ak-d Yasuɛ zi Nnaṣira.”
MAT 26:72 Netta inkar ɛawed s ict n tjaǧit, inna: “War ssineɣ Bnadem nni.”
MAT 26:73 Cwayt ɣar zzat qarrben-dd inni din ibedden ɣar Buṭrus, nnan: “Nican, uřa d cek d ijjen zzaysen, minzi řhard nnec issbeyyen i cek.”
MAT 26:74 Xenni ibda ineɛɛeř, ittjjaǧa: “Necc war ssineɣ Bnadem nni.” Řexdenni issquqeɛ uyaẓiḍ
MAT 26:75 uca iɛqeř Buṭrus awař i d as inna Yasuɛ: “Qbeř i ɣa issquqeɛ uyaẓiḍ, ad ayi tenkared třata n twařawin.” Uca iffeɣ, iru s imeṭṭawen imerzagen.
MAT 27:1 Ɣar ṣṣbeḥ zic, aqa marra imeqqranen n ikehhanen d imɣaren n řgens mcawaren x Yasuɛ, mammec i t ɣa nɣen.
MAT 27:2 Uca nitni carfen t, iwyen t uca sellmen t i lɛamil [Arumani], qqaren as Pilaṭus.
MAT 27:3 Umi iẓra Yahuda, aɣeddar, belli Yasuɛ ittwaḥkem, indem, uca yarra-dd třatin [n řweznat] n nnuqart ɣar imeqqranen n ikehhanen d imɣaren [n řgens].
MAT 27:4 Inna: “Necc xḍiɣ, aqa ɣdareɣ idammen imezdagen.” Maca nitni nnan: “Min d aneɣ iruḥen? Xzar-dd cek.”
MAT 27:5 Awarni řami inḍar [řweznat n] nnuqart di Zzawect Tameqqrant, iffeɣ uca iruḥ, yuyeř ixef nnes.
MAT 27:6 Imeqqranen n ikehhanen ksin [řweznat n] nnuqart, nnan: “War icuwwar ad ten nessars deg wexxam n ṣṣdaqi, minzi [řweznat nni] d ttaman n usizzeř n idammen.”
MAT 27:7 Kksen awař jar asen maḥend ad zzayes sɣen iyyar n bu-třaxt, maḥend ad yiři i imeḍřan n ibarraniyyen.
MAT 27:8 S uyenni ittwasemma iyyar nni ‘Iyyar n idammen’ ař ass n řexxu.
MAT 27:9 Řexdenni ittwakemmeř min ittwannan zeg unabi i innan: “Ksiɣ třatin [n řweznat n] nnuqart, řqedd n Wenni iɣřan, mixef inni zi tarwa n Israil kksen awař,
MAT 27:10 uca necc wciɣ tent i iyyar n bu-třaxt, am mammec i d ayi yumur SIDI.”
MAT 27:11 Yasuɛ tuɣa ibedd qibač i lɛamil. Lɛamil isseqsa as, inna: “Ma Cek d Ajeǧid n Wudayen?” Yasuɛ inna as: “Cek aqa tennid [t]!”
MAT 27:12 Uca řami t tehmen imeqqranen n ikehhanen d imɣaren [n řgens], yarra-dd s walu.
MAT 27:13 Xenni inna as Pilaṭus: “Ma war tesřid mecḥař xak cehhden?”
MAT 27:14 Netta war xas dd-yarri uřa s ijj n wawař, ařami iqqim [lɛamil] ittebhet aṭṭas.
MAT 27:15 Tuɣa lɛamil innum yarexxu di kuř řɛid i yijj n umeḥbus i řɣaci, wenni ixsen nitni.
MAT 27:16 Tuɣa ɣarsen deg wussan nni ijj n umeḥbus ittwassen, qqaren as Bar-Abbas.
MAT 27:17 Řami munen, inna asen Pilaṭus: “Wi texsem ad awem dd-arxuɣ, Bar-Abbas niɣ Yasuɛ wenni umi qqaren Lmasiḥ?”
MAT 27:18 Minzi Pilaṭus issen aqa nitni sellmen t zi řeḥsed.
MAT 27:19 Am tuɣa lɛamil iqqim x řkursi n řḥukm, tessekk-dd ɣares temɣart nnes, tenna: “Barra ixef nnec zeg Umseggad nni, minzi aqa ass-a ttwaɛeddbeɣ aṭṭas di tarjit inu di ssibbet nnes.”
MAT 27:20 Maca imeqqranen n ikehhanen d imɣaren [n řgens] ssqenɛen řɣaci, ḥima ad ttaren Bar-Abbas u ḥima ad areddǧen Yasuɛ.
MAT 27:21 Lɛamil yarra-dd, inna asen: “Man wen zi tnayen-a i texsem ad arxuɣ i kenniw?” Nnan: “Bar-Abbas!”
MAT 27:22 Pilaṭus inna asen: “Min ɣa ggeɣ [xenni] ak-d Yasuɛ umi qqaren Lmasiḥ?” Nnan as marra: “Ṣellb i-t!”
MAT 27:23 Inna asen lɛamil: “Man tuɛeffna i igga?” Sɣuyyen s jjehd ktar, nnan: “Ṣellb i-t.”
MAT 27:24 Řami iẓra Pilaṭus belli war yiweḍ ɣar walu, mahu ad ikkar uɣuwweɣ, iksi aman, issird ifassen nnes qibač i řɣaci, inna: “Necc war tturseɣ ca deg idammen n Umseggad-a, xzarem kenniw!”
MAT 27:25 Řgens marra yarra-dd, inna: “[Ejj] idammen nnes [ad] xaneɣ [iřin] u x tarwa nneɣ.”
MAT 27:26 Xenni yarxu asen-dd i Bar-Abbas, maca awarni řami ihettek Yasuɛ s urekkuḍ, isellem i-t ḥima ad ittwaṣelleb.
MAT 27:27 Řexdenni iwyen iɛeskariyyen n lɛamil Yasuɛ ɣar Taddart n Ccraɛ, [umi qqaren ‘Prituriyum’], uca ssmunen xas marra řkumpaniyyet n řɛeskar.
MAT 27:28 Kksen as-dd arruḍ, uca arḍen as ijj n ujeǧab d azeggʷaɣ.
MAT 27:29 Nitni muden as ijj n ttaj s isennanen, ssarsen t x uzeǧif nnes uca ggin as ijj n uɣanim deg ufus nnes afusi, xenni wḍan ɣar iḍaren nnes zzates, qqimen ttbuṣaren xas, nnan: “Azul xak, a Cek, [a] Ajeǧid n Wudayen!”
MAT 27:30 Ssusfen as x uɣembub nnes, ksin aɣanim uca wtin t [zzayes] ɣar uzeǧif.
MAT 27:31 [Awarni řami] t deǧen, ksin xas aseřham, arḍen as arruḍ nnes uca nedhen t, maḥend ad t ṣellben.
MAT 27:32 Am ffɣen ɣar barra [n tendint], ufin ijj n weryaz zi Qayrawan, qqaren as Cimɛun, uca ziyyaren xas ḥima ad yarbu ṣṣalib nnes.
MAT 27:33 Ařami iwḍen ɣar wemcan umi qqaren ‘Juljuta’, min ixs ad yini ‘Taceqquft’,
MAT 27:34 wcin as řxeǧ ixeǧḍen s tarzugi uca umi t iqqas, yugi ad isu.
MAT 27:35 Awarni řami t ṣellben, bḍan arruḍ nnes jar asen umi xas ggin akeccuḍ,
MAT 27:36 am qqimen dinni, ttɛessan xas.
MAT 27:37 Ggin as sennej i uzeǧif nnes ict n tira mayemmi xas ḥekmen s řmewt: ‘Wa d Yasuɛ, Ajeǧid n Wudayen.’
MAT 27:38 Xenni ṣellben akides tnayen n ixewwanen, ijjen ɣar ufusi nnes u ijjen ɣar uzeřmaḍ nnes.
MAT 27:39 Inni tuɣa ittekkan, ttceqqafen dayes, tthezzan azeǧif nsen,
MAT 27:40 nnan: “A Cek, wenni ihedmen Zzawect Tameqqrant u di třata n wussan ad tt tebnid [ɛawed], senjem Ixef nnec. Mařa Cek d Mmis n AREBBI, hwa-dd xenni zi ṣṣalib.”
MAT 27:41 Uřa d imeqqranen n ikehhanen ak-d imseřmaden n idlisen d imɣaren [n řgens] d Ifarisiyyen stehzan zzayes amenni, nnan:
MAT 27:42 “Issenjem inneɣni maca war izemmar ad issenjem xef nnes. Mařa Netta d Ajeǧid n Israil, ejj i-t ad dd-ihwa zi ṣṣalib, ad zzayes namen.
MAT 27:43 Ittceř x AREBBI. Ejj i-t Netta ad t issenjem mařa yarḍa xas, minzi inna: ‘Necc d Mmis n AREBBI’.”
MAT 27:44 Uřa d ixewwanen, inni tuɣa ittwaṣellben akides, tuɣa ssfeṭṭaḥen zzayes amenni.
MAT 27:45 Zi tsaɛɛet wiss setta, [aqa-tt d ḍḍhur], tewḍa-dd taǧest x marra tammurt ař tasaɛɛet wiss tesɛa, [aqa-tt d třata n uɛecci].
MAT 27:46 Jjwayeh n tsaɛɛet wiss tesɛa isɣuy Yasuɛ s tmijja ijehden, inna: “[A] AREBBI inu, [a] AREBBI inu, mayemmi dayi tsemḥed?”
MAT 27:47 Řami d as sřan inni din ibedden, nnan ca zzaysen: “Ittřaɣa x Iliya.”
MAT 27:48 Deɣya yuzzeř-dd ɣares ijjen zzaysen, iksi spunxa, issuff i-tt s řxeǧ, igga i-tt x ijj n uɣanim uca iwca as ad isu.
MAT 27:49 Inneɣni nnan: “Ejj i-t, ad nẓar, ma ad dd-yas Iliya ḥima ad t issenjem.”
MAT 27:50 Isɣuyy Yasuɛ ɛawed s tmijja ijehden uca issarxu Arruḥ nnes.
MAT 27:51 Xzar, ařeḥḥaf n wadaf ɣar Zzawect Tameqqrant ittwacarreg x tnayen zi sennej ař swadday, tammurt tenhezz, tiṣuḍar feǧqent,
MAT 27:52 imeḍřan ttwarezmen uca aṭṭas n arrimat n imqeddasen inni tuɣa iṭṭṣen [din], ttwassnekkarent-dd.
MAT 27:53 Nitni ffɣen [zeg imeḍřan], uca awarni i tnukra nnes udfen ɣar tendint iqeddsen uca banen-dd i waṭṭas.
MAT 27:54 Řami řqebṭan x mya d yinni tuɣa akides iḥeṭṭan Yasuɛ, ẓrin anhezzi n temmurt d min imsaren, ggʷeden aṭṭas, nnan: “S tidett tuɣa Wa d Mmis n AREBBI.”
MAT 27:55 Tuɣa din aṭṭas n temɣarin tinni tuɣa ixezzaren zi řaggʷaj, ḍfarent Yasuɛ zi Ljalil ḥima ad xas sexxarent.
MAT 27:56 Jarasent Maryam n Majdala d Maryam, yemmas n Yaɛqub d Yasi, d yemmas n ayt n Zabdi.
MAT 27:57 Řami dd-tiweḍ tmeddit, yusa-dd ijj n weryaz zi Ramta, qqaren as Yusuf. Netta tuɣa ɛawed d ameḥḍar n Yasuɛ.
MAT 27:58 Iruḥ ɣar Pilaṭus, ittar [as] arrimet n Yasuɛ. [Řexdenni] iweṣṣa Pilaṭus, maḥend ad as wcen arrimet
MAT 27:59 Yusuf iksi arrimet inneḍ i-tt deg ict n txeyyaḍt n řeqṭen [azdad] iṣfan,
MAT 27:60 issars i-tt deg ijj n wenḍeř n jdid i tuɣa iɣza, uca awarni řami isseqnunni ict n teṣḍart ḥima ad iqfeř tawwart n wenḍeř, iruḥ.
MAT 27:61 Tuɣa din Maryam n Majdala d Maryam nneɣnit qqiment qibač i wenḍeř.
MAT 27:62 Tiwecca nnes awarni [ass n] Usewjed, munen imeqqranen n ikehhanen d Ifarisiyyen ɣar Pilaṭus,
MAT 27:63 nnan: “A siditneɣ, neɛqeř belli aɣeccac-a, am tuɣa [ɛad] iddar, inna: ‘Awarni třata n wussan ad kkareɣ!’
MAT 27:64 S uya umur, ḥima ad ḍemnen anḍeř ař ass wiss třata, ḥima ad taɣ imeḥḍaren nnes war dd-ttisen s ǧiřet ad t acaren, [xenni] ad inin i řgens, aqa ikkar-dd zi taddart n imettinen, uca [ammu i] ɣa yiři uweddar aneggaru ktar x umezwar.”
MAT 27:65 Inna asen Pilaṭus: “Aqa ɣarwem iɛessasen, ruḥem, ḍemnen t am mammec tᵉttwařam.”
MAT 27:66 Ruḥen ḥima ad ɛessen x wenḍeř uca ḍemnen aẓru, nitni jmiɛ ak-d iɛessasen.
MAT 28:1 Awarni řami teɛdu ssebt, ɣar řefjar n [wass] amezwaru n ssimana, tusa-dd Maryam n Majdala d Maryam nneɣnit ḥima ad ssijjent x wenḍeř.
MAT 28:2 Xzar, imsar ijj n wenhezzi n temmurt imɣar, minzi lmalak n SIDI ihwa-dd zeg ujenna, iqarreb-dd, isseqnunni taṣḍart zeg wadaf uca iqqim xas.
MAT 28:3 Tuɣa ṣṣifet nnes am wajjaj u warruḍ nnes d acemřař am wedfeř.
MAT 28:4 Iɛessasen fecřen zi teggʷudi zzayes uca dewřen am yimettinen.
MAT 28:5 Lmalak iṭṭef deg wawař, inna i temɣarin: “War tteggʷedent ca, minzi ssneɣ aqa kennint tarezzunt x Yasuɛ wenni ittwaṣellben.
MAT 28:6 War da iǧi, minzi Netta ikkar-dd, am mammec inna. Asent-i-dd da, xzarent amcan mani tuɣa immars Siditneɣ.
MAT 28:7 Ruḥent deɣya, inint i imeḥḍaren nnes, aqa ittwassnekkar-dd zi taddart n imettinen, u xzar Netta d awem i ɣa izwaren ɣar Ljalil. Din ad t tẓarem. Xzar, aqa nniɣ awem tt.”
MAT 28:8 Ffɣent nitenti deɣya zeg wenḍeř s tiggʷudi d řefraḥet imɣaren, ttazzřent ḥima ad tt xebbarent imeḥḍaren.
MAT 28:9 Uca xzar, Yasuɛ iřqa tent [deg webrid], inna asen: “Sřam xakent!” Nitenti usint-i-dd ɣares, ṭṭfent deg iḍaren nnes uca sejdent as.
MAT 28:10 Řexdenni inna asent Yasuɛ: “War tteggʷedent ca, ssiwḍent řexbar[-a] i aytma, ḥima ad raḥen ɣar Ljalil, diha ad ayi ẓaren.”
MAT 28:11 Am ruḥent, xzar, aqa ca zeg iɛessasen usin-dd ɣar tendint, ḥima ad xebbaren imeqqranen n ikehhanen x marra min imsaren.
MAT 28:12 Řexdenni munen nitni ak-d imɣaren [n řgens] uca mcawaren akidsen, [uca] wcin asen i iɛessasen [ttmenyat n] nnuqart, war iǧi drus,
MAT 28:13 nnan: “Inim: ‘Imeḥḍaren nnes usin-dd s ǧiřet uca ucaren t am tuɣa neṭṭeṣ!’
MAT 28:14 Mařa isřa i-t lɛamil, ad t nesseqneɛ uca ad negg war tᵉttiřim deg imunas.”
MAT 28:15 Ṭṭfen [tmenyat n] nnuqart uca ggin am mammec d asen ɛeřmen. [Ammu] i dd-itteffeɣ řexbar-a jar Wudayen ař ass n yiḍa.
MAT 28:16 Ḥiṭac n imeḥḍaren nni ruḥen ɣar Ljalil, ɣar wedrar mani ten yumur Yasuɛ.
MAT 28:17 Ařami t ẓrin, sejden as, maca ca cekken.
MAT 28:18 Iqarreb-dd ɣarsen Yasuɛ, issiweř akidsen, inna: “Temmewc ayi marra ṣṣulṭa deg ujenna u x temmurt. Am mammec i d ayi dd-issekk Baba, ammu kenniw i ɣa ssekkeɣ Necc.
MAT 28:19 Ruḥem, arrem marra řegnus d imeḥḍaren inu u ssɣeḍṣem ten s Yisem n Baba d Mmis d Arruḥ Iqeddsen,
MAT 28:20 u sřemdem asen ad ṭṭfen di marra min xef kenniw umureɣ zzayes, u xzar, Necc aqa ayi akidwem marra ussan ař qeṭṭu n ddunect.” Aneggar n L’Injil Iqeddsen am mammec t ibarreḥ Matta.
MAR 1:1 Beddu n L’Injil n Yasuɛ Lmasiḥ, Mmis n AREBBI.
MAR 1:2 Am mammec tura deg [wedlis n] unabi Icaɛya ... “Aqa Necc ad ssekkeɣ zzat i wudem nnec lmalak inu, wenni i ɣa isswejden abrid nnec.”
MAR 1:3 “Tmijja n wenni isɣuyyun di řexřa: ‘Swejdem abrid n SIDI, seggmem imesraq nnes!’”
MAR 1:4 ... [ammu i] tuɣa Yuḥanna isseɣḍaṣ di řexřa, ittbarreḥ s useɣḍeṣ n ttubet i weɣfar n ddnub.
MAR 1:5 Ffɣen-dd ɣares marra jjwayeh n Yahudiyya d ayt n Urcalim, ttwassɣeḍṣen zzayes deg iɣzar n L’Urdun am neɛɛmen s ddnub nsen.
MAR 1:6 Tuɣa Yuḥanna wanita yarḍ taḍuft n iřeɣman, ibekkes s yijj n webyas n yiřem x tejɛinna nnes, u tuɣa ittett iburexsen d tamment taḥurrect.
MAR 1:7 Tuɣa ittbarreḥ, iqqar: “Xzar, ad dd-yas awarni ayi wenni ijehden xafi, wenni umi war sdihiǧeɣ ad aḍareɣ maḥend ad fesyeɣ ifiřan n sandaliyat nnes.
MAR 1:8 Necc ssɣeḍṣeɣ kenniw deg waman, maca Netta ad kenniw isseɣḍeṣ di Arruḥ Iqeddsen.”
MAR 1:9 Deg wussan nni yusa-dd Yasuɛ zi Nnaṣira, di Ljalil, ittwasseɣḍeṣ zi Yuḥanna deg yeɣzar n L’Urdun.
MAR 1:10 Deɣya, am dd-igeɛɛed zeg waman, iẓra ijenwan arzmen uca Arruḥ am tedbirt tehwa-dd xas.
MAR 1:11 Tusa-dd ict n tmijja zeg ijenwan: “Cek d Mmi iɛizzen, dayek ufiɣ arḍa inu.”
MAR 1:12 Deɣya igewwed i-t Arruḥ ɣar řexřa.
MAR 1:13 Uca iqqim din di řexřa arebɛin n wussan, ijarreb i-t cciṭan, tuɣa-t ak-d řewḥuc uca sexxarent xas lmalakat.
MAR 1:14 Awarni řami ṭṭfen Yuḥanna, yudef-dd Yasuɛ ɣar Ljalil, ittbarreḥ s Řexbar Aṣebḥan n Tgeldit,
MAR 1:15 inna: “Aqa řweqt tiweḍ-dd, tqarreb-dd Tgeldit n AREBBI. Tubem, amnem di Řexbar Aṣebḥan.”
MAR 1:16 Am tuɣa iggur ɣar řebḥar n Ljalil, iẓra Cimɛun d Andrawus umas, neṭṭaren tracca di řebḥar, maɣar nitni d ineymaren n iseřman.
MAR 1:17 Inna asen Yasuɛ: “Asem-dd awarni ayi uca ad kenniw arreɣ d ineymaren n yewdan.”
MAR 1:18 Řexdenni jjin tiracciwin nsen uca ḍfaren t.
MAR 1:19 Xenni awarni řami iɛdu cwayt ssenni, iẓra Yaɛqub mmis n Zabdi d umas Yuḥanna di tɣarrabut, ɛedřen tiracciwin nsen.
MAR 1:20 Iřaɣa xasen uca řexdenni jjin babatsen Zabdi ak-d ixemmasen di tɣarrabut, uca ḍfaren t.
MAR 1:21 Xeccen ɣar Kafarnaḥum uca deɣya [ibda] isseřmad di ssebt di temzida.
MAR 1:22 Tbehten zeg useřmed nnes, minzi isseřmed i-ten am wenni ɣar teǧa ṣṣulṭa, war iǧi am yimseřmaden n idlisen.
MAR 1:23 Tuɣa di temzida nsen ijj n bnadem dayes ijj n řaryaḥ d amengus, isɣuyyu,
MAR 1:24 iqqar: “Min din jar aneɣ neccin d Cek a Yasuɛ Nnaṣiri. Ma tusid-dd ḥima ad aneɣ tesshellked? Aqa necc ssneɣ Cek min teɛnid: [Aqa Cek] d Amqeddas n AREBBI.”
MAR 1:25 Uca iɛřem as Yasuɛ, inna as: “Sqar! Ffeɣ zzayes!”
MAR 1:26 Immenḍar i-t řaryaḥ amengus, isɣuy s ict n tɣuyyit tejhed uca xenni iffeɣ-dd zzayes.
MAR 1:27 Tbehten marra, mmseqsan ak-d wayawya, nnan: “Man aya? Mana taɣuri-ya n jdid? Minzi s ṣṣulṭa yumur uřa d řaryaḥ imengas uca tteggen as array.”
MAR 1:28 Řexdenni iffeɣ řexbar nnes ɣar marra jjwayeh i d as dd-innḍen i Ljalil.
MAR 1:29 [Awarni řami] dd-ffɣen zi temzida, ruḥen ɣar taddart n Cimɛun d Andrawus ak-d Yaɛqub d Yuḥanna.
MAR 1:30 Tuɣa taḍekkwač n Cimɛun tezzeř s tmessi, uca nitni ssiwřen xas akides.
MAR 1:31 Iqarreb-dd ɣares, icebbar deg ufus nnes, issgeɛɛed i-tt-i-dd. Deɣya tejja xas tmessi uca nettat [tebda] tᵉttsexxar xasen.
MAR 1:32 Řami dd-tiweḍ tmeddit, tafuct truḥ ad teɣři, iwyen ɣares marra imehřac d inni daysen ccwaṭen.
MAR 1:33 Tuɣa tandint marra tmun ɣar tewwart.
MAR 1:34 Issgenfa aṭṭas n imeḥřac s ɛřam kuř řehřacat uca issuffeɣ aṭṭas n ccwaṭen, war ijji ccwaṭen ad ssiwřen, minzi ssnen t.
MAR 1:35 Tiwecca zic, [tuɣa ɛad d ǧiřet,] ikkar uca iffeɣ ɣar ijj n wemcan ixřan, tuɣa ittẓaǧa din.
MAR 1:36 Cimɛun d yinni tuɣa akides, arzun xas.
MAR 1:37 Řami t ufin, nnan as: “Marra iwdan arezzun xak!”
MAR 1:38 Inna asen: “Ittxeṣṣa ad nraḥ ɣar dcurat d tneddam yudsen, ḥima ad din barrḥeɣ ɛawed minzi aqa i uya umi dd-usiɣ.”
MAR 1:39 Tuɣa isseřmad di temzidawin nsen di marra Ljalil, u issuffuɣ ccwaṭen.
MAR 1:40 Yusa-dd ɣares ijjen dayes řbarṣ, iwḍa ɣar iḍaren nnes, ittar as, inna: “Mařa texsed, tzemmared ad ayi tessizdeged.”
MAR 1:41 Izziǧez i Yasuɛ, isswiẓẓeḍ afus nnes, iḥada i-t, inna as: “Xseɣ! Iwa, dweř d amezdag!”
MAR 1:42 Di tsaɛɛet nni, řexdenni iruḥ xas řbarṣ uca idweř izdig.
MAR 1:43 Uca [awarni řami] d as iɛřem, issekk i-t řexdenni,
MAR 1:44 inna as: “Xzar, war t ttɛiwid uřa i yijjen, maca ruḥ, scen ixef nnec i ukehhan uca ewc x usizdeg nnec min yumur Musa maḥend ad tcehded i nitni.”
MAR 1:45 Maca řami iruḥ, ibda ittbarreḥ aṭṭas, issuffeɣ řexbar ařami war izemmar Yasuɛ ad yadef ɣar tandint s bṭayṭay, maca tuɣa-t barra deg imucan ixřan, tuɣa ttasen-dd ɣares zi kuř jjwayeh.
MAR 2:1 Awarni i ca n wussan Yudef Yasuɛ ɛawed ɣar Kafarnaḥum. Řami sřin belli aqa-t di taddart,
MAR 2:2 munen xas waṭṭas [n iwdan], ařami war zemmaren ad dd-awḍen uřa ɣar tewwart, u Netta tuɣa issawař akidsen s Wawař.
MAR 2:3 Usin-dd ca ɣares, iwyen-dd ijj n uneɛḍab ɣares, arbun t-i-dd jar asen arebɛa n yeryazen.
MAR 2:4 Minzi war zemmaren ad ɣares dd-qarrben zi ssibbet n řɣaci, gaɛɛden x tzeqqa, ksin cwayt zi tzeqqa sennej amcan mani tuɣa Yasuɛ, uca ssehwan-dd tassut min xef izzeř uneɛḍab.
MAR 2:5 Umi iẓra Yasuɛ l’iman nsen, inna i uneɛḍab: “[A] mmi, aqa ddnub nnec ttwaɣfaren.”
MAR 2:6 Tuɣa qqimen din ca n imseřmaden n idlisen d Ifarisiyyen, ttxarraṣen deg wuř nsen:
MAR 2:7 “Min iɛna wa i ittceqqafen [ammu]? Wi izemmaren ad iɣfar ddnub mɣir AREBBI weḥḥdes?”
MAR 2:8 Yuca Yasuɛ s Arruḥ nnes belli aqa ttxarraṣen ammu deg ixef nsen. Inna asen: “Mayemmi tᵉttxemmamem di man aya deg wuřawen nwem?
MAR 2:9 Min ihewnen ad iniɣ i uneɛḍab: ‘Ttwaɣfaren ddnub nnec’ niɣ ad iniɣ: ‘Kkar, ksi tassut nnec uca uyur’?
MAR 2:10 Maca ḥima ad tessnem belli Mmis n bnadem ɣares ṣṣulṭa x temmurt, maḥend ad iɣfar ddnub, inna xenni i uneɛḍab:
MAR 2:11 ‘Necc ad ac iniɣ: Kkar, ksi tassut nnec, truḥed ɣar taddart nnec!’”
MAR 2:12 Deɣya ikkar, řexdenni iksi tassut nnes uca iffeɣ qibač i marra [iwdan], ařami tbehten marra, ssemɣaren di AREBBI, nnan: “Ɛemmarṣ war neẓri man aya!”
MAR 2:13 Xenni iffeɣ ɛawed ɣar řebḥar, uca yusa-dd ɣares řɣaci marra uca isseřmed i-ten.
MAR 2:14 Am yeɛdu, ibarq Lawi mmis n Ḥalfa iqqim ɣar taddart n ḍḍariba, uca inna as: “Ḍfar ayi-dd!”. Ikkar uca iḍfar i-t.
MAR 2:15 Am iqqim Netta [ɣar ṭṭabřa] di taddart nnes, tuɣa aṭṭas n ayt n ḍḍariba d imednab qqimen ak-d Yasuɛ d imeḥḍaren nnes, minzi tuɣa aten deg waṭṭas uca ḍfaren t.
MAR 2:16 Umi ẓrin imseřmaden n idlisen d Ifarisiyyen aqa ittett ak-d ayt n ḍḍariba d imednab, nnan i imeḥḍaren nnes: “Mayemmi ittett, isess ak-d ayt n ḍḍariba d imednab?”
MAR 2:17 Řami isřa Yasuɛ man aya, inna asen: “Inni iṣeḥḥen war ḥdijen ca aḍbib, maca imehřac wah. Aqa war dd-usiɣ ḥima ad řaɣiɣ i yinni iseggden maca i imednab.”
MAR 2:18 Tuɣa imeḥḍaren n Yuḥanna [Amseɣḍaṣ] d Ifarisiyyen ttẓumman uca [xenni] usin-dd ɣares, nnan as: “Mayemmi ttẓumman imeḥḍaren n Yuḥanna d Ifarisiyyen, [maca] imeḥḍaren nnec war ttẓummin ca?”
MAR 2:19 Inna asen Yasuɛ: “Ma zemmaren tarwa n umuřay ad ẓummen d umuřay [ɛad] akidsen? Lla!
MAR 2:20 Maca ad dd-asen wussan xmi d ɣa immeksi umuřay xasen, xenni ad ẓummen, deg wussan nni.
MAR 2:21 War iǧi ḥed ittxeyyeḍ taneqqič zi tcuqqet n jdid x warruḍ aqdim, niɣ xenni taneqqič nni n jdid ad teqřeɛ zeg [warruḍ] abuřay, uca ad idweř ucarreg imɣar.
MAR 2:22 Uřa d ijj war ittfarreɣ binu n jdid di txuncay tiqdimin, ḥima binu n jdid war ittcarrig tixuncay u tixuncay ad ḍeyyɛent uca binu ad izeǧeɛ. Maca ittxeṣṣa ad ittwaffareɣ binu n jdid di txuncay n jdid.”
MAR 2:23 Xenni imsar aqa icuq Yasuɛ deg iyyaren n imendi di ssebt, uca imeḥḍaren nnes bdan řeqqḍen tidrin am gguren.
MAR 2:24 Nnan as Ifarisiyyen: “Xzar, mayemmi tteggen di ssebt min war iḥeǧřen?”
MAR 2:25 Inna asen Yasuɛ: “Ma war teɣrim qaɛ min igga Dawud, řami tuɣa ittwaḥṣar, iṭṭef i-t řaẓ, netta d yinni akides?
MAR 2:26 Mammec dd-yudef ɣar Taddart n AREBBI deg wussan n Abyatar, arrays n ikehhanen, uca icca aɣrum n wescan n SIDI i war iḥeǧřen ad t ccen mɣir ikehhanen waha, uca iwca ɛawed i yinni tuɣa akides?”
MAR 2:27 [Xenni] inna asen: “Aqa ass n ssebt ittwagg i bnadem, war iǧi bnadem i ssebt.
MAR 2:28 Ammu i iǧa Mmis n bnadem uřa d Bab n ssebt.”
MAR 3:1 Uca yudef-dd Yasuɛ ɛawed ɣar temzida. Tuɣa din ijj n weryaz, afus nnes iqucceḥ.
MAR 3:2 Bdan ḥeṭṭan t, ma ad taɣ ad t issgenfa di ssebt, ḥima zemmaren ad zzayes cetcan.
MAR 3:3 Inna as i weryaz wenni ɣar iǧa afus iqucceḥ: “Bedd di řwesṭ.”
MAR 3:4 Xenni inna asen ɛawed: “Ma iḥeǧeř [i bnadem] di ssebt, maḥend ad igg řxar niɣ řɣar, ad issenjem ijj n řeɛmar niɣ ad t yareddeǧ?” [Maca] nitni sqaren.
MAR 3:5 Ixzar ɣar yinni d as dd-innḍen s tefqeḥt zi ssibbet n řeqsaḥet n wuřawen nsen, uca inna i weryaz: “Swiẓẓeḍ afus nnec!” Isswiẓẓeḍ i-t-i-dd, idweř ufus nnes iṣeḥḥ ɛawed.
MAR 3:6 Řexdenni ffɣen Ifarisiyyen ak-d ca zi taddart n Hirudus, uca mcawaren xas, mammec ɣa ggen ad t areddǧen.
MAR 3:7 Iffeɣ Yasuɛ ak-d imeḥḍaren nnes ɣar řebḥar, uca yarni iḍeffar i-t-dd řɣaci aṭṭas zi Ljalil, zi Yahudiyya,
MAR 3:8 zi Urcalim, zi Idumiya, zeg ujemmaḍ n L’Urdun, zi Ṣur u zi Ṣaydun. Aqa ijj n řɣaci d ameqqran yusa-dd ɣares, minzi nitni sřin marra min igga.
MAR 3:9 Inna i imeḥḍaren nnes maḥend ad awyen ict n tɣarrabut ɣares s ssibbet n řɣaci, ḥima war t ddeḥḥsen.
MAR 3:10 Minzi tuɣa issgenfa [din] aṭṭas, ařami xas wḍan ḥima ad t awḍen ad t ḥadan.
MAR 3:11 Inni ittwajeyyḥen zi řaryaḥ imengas, wḍan zzates ɣar iḍaren nnes, řami t ẓrin, sɣuyen, nnan: “Aqa Cek d Mmis n AREBBI.”
MAR 3:12 [Maca] iweṣṣa ten aṭṭas ḥima war xas ssuffuɣen řexbar.
MAR 3:13 [Xas uca] yuři ɣar wedrar, iřaɣa-dd ɣares inni ixs, uca usin-dd ɣares.
MAR 3:14 Ifarz zzaysen tenɛac ḥima ad kides iřin u ḥima ad ten issekk maḥend ad barrḥen
MAR 3:15 u maḥend ad ɣarsen tiři ṣṣulṭa x usgenfi n řehřac u x usuffeɣ n ccwaṭen.
MAR 3:16 Cimɛun igga as Buṭrus, [isem wanita ixs ad yini ‘aẓru’],
MAR 3:17 d Yaɛqub, mmis n Zabdi, d Yuḥanna, umas n Yaɛqub, isemma aten ‘Buwanirjis’, min ixs ad yini ‘ayt n wajjaj’,
MAR 3:18 uca [ifarz ɛawed] Andrawus d Filippus d Bar-Tulumawus d Matta d Tuma d Yaɛqub, mmis n Ḥalfa, d Tadday d Cimɛun, [wenni umi ttkennan] Amɛessab,
MAR 3:19 d Yahuda Isxariyuṭi wenni t i ɣa iɣdaren.
MAR 3:20 Usin-dd ɣar taddart uca inneyru din ɛawed řɣaci, ařami war ufin tawwart x macca n weɣrum.
MAR 3:21 Umi sřin řaǧ nnes [man aya], ffɣen-dd, ḥima ad t ṭṭfen, minzi nnan: “Aqa ibbuhři.”
MAR 3:22 Maca imseřmaden n idlisen inni dd-ihwan zi Urcalim nnan: “Aqa dayes ‘Bᵉɛalzabub’!” uca [nnan:] “S umeqqran n ccwaṭen issuffuɣ ccwaṭen.”
MAR 3:23 Iřaɣa asen-dd uca issiweř akidsen s imedya: “Mammec izemmar cciṭan ad issuffeɣ cciṭan?
MAR 3:24 Maɣar mařa temsebḍa ict n tgeldit x yixef nnes, war tzemmar tgeldit nni ad tbedd.
MAR 3:25 Mařa temsebḍa ict n taddart x yixef nnes, war tzemmar taddart nni ad tbedd.
MAR 3:26 Mařa ikkar cciṭan ḍidd i yixef nnes, xenni war ittiři d ijjen, uca war izemmar ad ibedd, maca ad yiři man aya d aneggar nnes.
MAR 3:27 War izemmar ḥed ad yadef ɣar taddart n wenni ijehden maḥend ad ikecceḍ řeqcuɛ nnes, mařa war icarf wenni ijehden amezwar. Xenni izemmar ad ikecceḍ taddart nnes.
MAR 3:28 S tidett, Necc ad awem iniɣ belli ad asen ttwaɣfaren i tarwa n bnadem marra ddnub nsen uřa d aceqqef i zi ɣa ceqqfen,
MAR 3:29 maca wenni i ɣa iceqqfen di Arruḥ Iqeddsen war ɣares bu weɣfar qaɛ, maca aqa ittwaḥkem xas s řḥukm ittduman.”
MAR 3:30 Minzi nitni nnan: “Aqa dayes řaryaḥ amengus.”
MAR 3:31 Řexdenni tusa-dd yemmas d aytmas, bedden barra i taddart, ssekken-dd ɣares, řaɣan as-dd maḥend ad ɣarsen dd-yas.
MAR 3:32 Uca řɣaci qqimen nnḍen as-dd, nnan as: “Xzar, yemmac d aytmac aqa aten di barra, arezzun xak.”
MAR 3:33 Yarra-dd xasen, inna: “Man ten i iǧan d yemma u man yen i iǧan d aytma?”
MAR 3:34 Uca umi ixzar ɣar yinni ɣares iqqimen, inna: “Xzar, aqa yemma d aytma,
MAR 3:35 minzi wenni itteggen min ixs AREBBI d netta d uma d učma d yemma.”
MAR 4:1 Ibda isseřmad ɛawed ɣar řebḥar u imun-dd xas řɣaci aṭṭas ařami yenya di tɣarrabut uca iqqim [dayes] x řebḥar, am řɣaci marra tuɣa-t x tma n řebḥar x řbarr.
MAR 4:2 Tuɣa isseřmad i-ten s imedya aṭṭas. Inna di tɣuri nnes:
MAR 4:3 “Sřem! Xzar, ijj n ufeǧaḥ iffeɣ ḥima ad izarɛ.
MAR 4:4 Am tuɣa izarreɛ, tewḍa ca [n zzariɛet] x tma n webrid, ixecc-dd ijj n ujḍiḍ, ineqb i-tt.
MAR 4:5 Tewḍa ca [n zzariɛet] nneɣni x weẓru mani war dayes tuɣi bu ucař aṭṭas. Deɣya teɣmi s minzi tammurt war tuǧiɣ.
MAR 4:6 Maca umi dd-tenqar tfuct, tecmeḍ, minzi war ɣares tuɣi bu weẓwar, xenni tisřaw.
MAR 4:7 Tewḍa ca [n zzariɛet] nneɣni jar isennanen uca mɣaren xas isennanen uca jeyyḥen tt, war tewci ca řɣiǧet.
MAR 4:8 Tewḍa ca [n zzariɛet] nneɣni x temmurt teṣbeḥ uca teɣmi, tegma, tewca řɣiǧet. Ca [n zzariɛet] tusa-dd s třatin, ca s settin u ca s mya n tseqqar.”
MAR 4:9 [Xenni] inna: “Wenni ɣar iǧa imezzuɣen i useǧi, ejj i-t ad iseř.”
MAR 4:10 Umi tuɣa aten weḥḥedsen, sseqsan t inni d as dd-innḍen [jmiɛ] ak-d tenɛac x umedya [nni].
MAR 4:11 Inna asen: “Aqa immewc awem maḥend ad tessnem ssirr n Tgeldit n AREBBI, maca inni di barra ad asen yiři kuřci s imedya,
MAR 4:12 ḥima am ttwařan, ttwařan, [maca] war ttwiřin, am ttesřan, ttesřan, [maca] war fehhmen, ḥima war ttᵉtuben uca ad asen ittwaɣfar ddnub nsen.’”
MAR 4:13 Inna asen: “Ma war tefhimem ca i umedya-ya? Mammec i ɣa tessnem marra imettiřen-a?
MAR 4:14 Afeǧaḥ nni izarɛen, izarreɛ Awař.
MAR 4:15 Ina aqa d inni x webrid, aqa yina d yinni daysen ittwazarɛ Wawař, [maca] awarni řami d as sřin, řexdenni yusa-dd cciṭan uca ikkes Awař i ittwazarɛen deg wuřawen nsen.
MAR 4:16 Uca yina d inni ittwazarɛen x temmurt uḥejri, aqa yina d inni xmi ɣa sřen Awař, ad t qebřen deɣya s řefraḥet,
MAR 4:17 [maca] war ɣarsen bu jjadira deg ixef nsen, ad qqimen ɣar ijj n řmijař [waha]. Mařa temsar řmeḥnet niɣ umarret di ssibbet n Wawař, ad nqarḍen deɣya.
MAR 4:18 Uca yina d inni ittwazarɛen jar isennanen, aqa yina d inni xmi ɣa sřen Awař,
MAR 4:19 ad ɣarsen dd-adfent tḥissaf n ddunect-a d uɣekkʷi n wagřa d [marra] nnecwat inneɣni, ad jeyyfent Awař, xenni idakkʷař [Wawař] břa řɣiǧet.
MAR 4:20 Uca yina d inni ittwazarɛen x temmurt iṣebḥen, aqa yina d inni, xmi ɣa sřen Awař, ad t qebřen, ad wcen řɣiǧet, ca [zzaysen] třatin, inneɣni settin u inneɣni mya n tseqqar.”
MAR 4:21 Inna asen: “Ma ad dd-asen s řqendiř, ḥima ad immars sadu řmud n imendi niɣ sadu qama? Ma war ittmarsi ca x řmerfeɛ?
MAR 4:22 Minzi war din min inuffaren war dd-ittwassargeb, uca [war din] uřa d ict n řḥajjet di tnuffra war tᵉtwasseḍhari.
MAR 4:23 Mařa [din] ḥed i ɣar iǧa imezzuɣen i useǧi, ejj i-t ad iseř.”
MAR 4:24 Inna asen: “Ḥḍam min ɣa tesřem. S řeqyas nni zzayes i ɣa teɛbarem, zzayes i d awem ɣa ɛbaren [ɛawed], uca i kenniw inni ittesřan ad asen immarni ɛad.
MAR 4:25 Minzi wenni ɣar iǧa ad as immarni, u wenni war ɣar iǧi, uřa d min ɣares ad as ittwakkes.”
MAR 4:26 Inna: “S uyenni ad tiři Tageldit n AREBBI am yijj n weryaz ineṭṭar zzariɛet di temmurt,
MAR 4:27 xenni ad iṭṭeṣ, ad dd-ikkar, ǧiřet d wass. Uca zzariɛet ad tgeɛɛed, ad tegma, maca netta war issin mammec.
MAR 4:28 Minzi tammurt tᵉttawi-dd řɣiǧet [s yixef nnes]: amezwar aɣemmuy, xenni tidart, awarni as irden ikemmřen di tidart.
MAR 4:29 Řami dd-tiweḍ řɣiǧet, řexdenni issekk amjar, minzi tameyra tiweḍ-dd.”
MAR 4:30 Inna: “Min di i ɣa narwes Tageldit n AREBBI niɣ s man amedya i zi tt i ɣa narcem?
MAR 4:31 Aqa-tt am tḥebbuct n zzariɛet n uxerdel, tenni, řami tᵉttwazarɛ di temmurt, aqa nettat d tameẓyant x marra tiḥebba n zzariɛet i iǧan di temmurt.
MAR 4:32 Awarni řami tᵉttwazarɛ, teɣmi-dd, temɣar x marra tibbi, ad tegg řefruɛ imɣaren ařami ijḍaḍ n ujenna zemmaren ad ggen řeɛwacc di tiři nnes.”
MAR 4:33 Tuɣa Yasuɛ issawař awař akidsen s imedya aṭṭas am yina, s imedya ittřiqen maḥend ad ten sřen [iwdan].
MAR 4:34 Břa imedya war kisen issiweř ca, maca tuɣa issefham kuřci i imeḥḍaren nnes weḥḥedsen.
MAR 4:35 Deg wass nni, řami d tewḍa tmeddit, inna asen: “Ejj aneɣ ad neẓwa ɣar ujemmaḍin.”
MAR 4:36 Semḥen di řɣaci, iwyen t umi t tuɣa ɛad di tɣarrabut, uca tuɣa din akidsen ɛawed tiɣarruba nneɣni.
MAR 4:37 Uca tekkar-dd ict n tḥaryaḍt temɣar, řemwaj ccaten di tɣarrabut ařami tebda tᵉttcura.
MAR 4:38 [Maca] Yasuɛ tuɣa iṭṭeṣ x ict n tsunta ɣar ḍeffar n tɣarrabut. Nitni ssfaqen t, nnan as: “[A] Amseřmad nneɣ, ma war d ac necqi ca neccin mařa nettwahellek?”
MAR 4:39 [Xenni] ikkar, iwebbex asemmiḍ, inna i řebḥar: “Ars! Sqar!” Yarsa usemmiḍ uca idweř kuřci yarsa.
MAR 4:40 [Xenni] inna asen: “Mayemmi teggʷedem ammu? Min kenniw yuɣin war daywem bu l’iman?”
MAR 4:41 Tudef i-ten tiggʷudi temɣar, nnan i wayawya: “Min iɛna Wa, aqa uřa d asemmiḍ d řebḥar ttᵉṭṭaɛen as?”
MAR 5:1 Uca yiweḍ Netta ɣar ujemmaḍin n řebḥar di temmurt n Gadarinis.
MAR 5:2 Umi dd-iffeɣ zi tɣarrabut, iřqa i-t ijj n bnadem zeg imeḍřan dayes ijj n řaryaḥ d amengus.
MAR 5:3 Tuɣa izeddeɣ deg imeḍřan uca war izemmar ḥed ad t icarf uřa s ssnaseř,
MAR 5:4 minzi waxxa tuɣa carfen t aṭṭas n twařawin s iceddiyyen ɣar iḍaren u s ssnaseř, aqa netta iqḍu ssnaseř [nni], yarẓa iceddiyyen u war izemmar ḥed ad t iqemmeɛ.
MAR 5:5 Tuɣa-t řebda, ass d ǧiřet, deg idurar u deg imeḍřan, isɣuyyu, iyezzem ixef nnes s iẓra.
MAR 5:6 Umi iẓra netta Yasuɛ zi řaggʷaj, yuzzeř uca isjed as.
MAR 5:7 Isɣuy s jjehd uca inna as: “Min din jar ayi akidek, a Yasuɛ, mmis n AREBBI, Amɛuǧi x kuřci. Ttzawgeɣ Cek s AREBBI, war d ayi ttmarrat!”
MAR 5:8 Minzi aqa inna as: “Ffeɣ zi bnadem-a, [a] řaryaḥ amengus!”
MAR 5:9 Isseqsa t: “Mammec d ac qqaren?” Yarra-dd, inna: “Isem inu ‘Lixyun’, [man aya ixs ad yini ‘Abarru’], minzi neccin deg waṭṭas.”
MAR 5:10 Izawg i-t aṭṭas ḥima war t issiggʷej barra i temmurt [nni].
MAR 5:11 Tuɣa din ɣar wedrar ict n tḥimart temɣar n iřfan tᵉtthedda.
MAR 5:12 Zawgen t ccwaṭen nni, nnan: “Sekk aneɣ ɣar iřfan, ḥima nzemmar ad daysen nadef.”
MAR 5:13 Isamḥ asen Yasuɛ. Řexdenni ffɣen řaryaḥ imengas [zeg weryaz nni], udfen deg iřfan, uca tuzzeř tḥimart nni ɣar ijj n jjarf yuɛřan uca tewḍa di řebḥar. Tuɣa-ten ɛřaḥař deg wařfayen zzaysen uca ɣarqen di řebḥar.
MAR 5:14 Maca imeksawen n iřfan arewřen, xebbaren man aya di tendint u x iyyaren. [Iwdan] ffɣen-dd ḥima ad ẓaren min imsaren.
MAR 5:15 Usin-dd ɣar Yasuɛ, ttwařan amaryaḥ i dayes tuɣa ccwaṭen, wenni di tuɣa izeddeɣ ‘Lixyun’, iqqim, yarḍ, s řbař nnes, uca ggʷeden.
MAR 5:16 Inni iẓrin man aya, xebbaren ten min imsaren i umaryaḥ i di tuɣa ccwaṭen, u ɛawed x yiřfan nni.
MAR 5:17 Uca bdan ttzawgen t maḥend ad iggʷej x temmurt nsen.
MAR 5:18 Řami inya Netta di tɣarrabut, izawg i-t umaryaḥ i dayes tuɣa ccwaṭen ḥima ad iqqim akides.
MAR 5:19 War t ijji, maca inna as: “Ruḥ ɣar taddart nnec d řaǧ nnec, xebbar i-ten marra min zzayek igga SIDI, mammec xak yarḥem.”
MAR 5:20 Uca iruḥ, ibda ittbarreḥ di Dikapulis marra min d as igga Yasuɛ, uca marra tbehten.
MAR 5:21 Awarni řami iẓwa Yasuɛ s tɣarrabut ɣar ujemmaḍ, imun-dd xas ɛawed aṭṭas n řɣaci am tuɣa-t x tma n řebḥar.
MAR 5:22 Yusa-dd [ɛawed] ijjen zeg imeqqranen n temzida, qqaren as Yayrus. Umi t iẓra, iwḍa as ɣar iḍaren.
MAR 5:23 Izawg i-t aṭṭas, inna as: “Iǧi tmaẓuẓt tḥeřc aṭṭas. Ttzawgeɣ Cek ad dd-tased, ad xas tessarsed ifassen nnec, ḥima ad teggenfa, ad teddar.”
MAR 5:24 Iruḥ akides uca iḍfar i-t-i-dd waṭṭas n řɣaci, uca nitni deḥḥsen t.
MAR 5:25 Maca tuɣa [din] ict n temɣart ttazzřen zzayes idammen tenɛac n iseggʷusa,
MAR 5:26 uca tekka xas tamara aṭṭas zeg iḍbiben umi tessuffeɣ marra min ɣares, [maca] war testenfiɛ s walu, uca yarni ɛad xas řḥař.
MAR 5:27 Aqa tesřa x Yasuɛ uca tusa-dd [ɣares] am tekka x ddḥas n řɣaci zi ḍeffar nnes uca tḥada arruḍ nnes,
MAR 5:28 minzi tenna: “Mařa ḥadiɣ mɣir arruḍ nnes, ad [qqimeɣ] ddareɣ.”
MAR 5:29 Řexdenni yuẓeɣ usizzeř n idammen, tuca ak-d arrimet nnes belli teggenfa zi řehřac nnes.
MAR 5:30 Řexdenni yuca Yasuɛ ak-d Yixef nnes belli iffeɣ zzayes jjehd uca inneqřeb ɣar řɣaci, inna: “Wi iḥadan arruḍ inu?”
MAR 5:31 Nnan as imeḥḍaren nnes: “Cek twařid řɣaci ideḥḥes i Cek u Cek tesseqsid: ‘Wi d ayi iḥadan?’”
MAR 5:32 [Maca] iqqim ixezzar ḥima ad iẓar wi yeggin man aya.
MAR 5:33 Tuɣa tameṭṭut teggʷed, tᵉttarjiji, am tessen min d as imsaren, uca tusa-dd, tewḍa as ɣar iḍaren uca tɛawed as tidett marra.
MAR 5:34 [Xenni] inna as: “[A] yeǧi, l’iman nnem aqa iwca am tudart, ruḥ s řehna ad tiřid teggenfid zi řehřac nnem!”
MAR 5:35 Am tuɣa ɛad issawař, usin-dd ca zi taddart n umeqqran n temzida, nnan as: “Iǧic temmut, mayemmi tṣeddaɛed ɛad Amseɣɣar?”
MAR 5:36 [Maca] Yasuɛ isřa awařen i innan uca inna i umeqqran n temzida: “War tteggʷed ca! Amen waha!”
MAR 5:37 War ismiḥ uřa i yijjen ad t yuyur akides, mɣir Cimɛun Buṭrus d Yaɛqub d Yuḥanna, umas n Yaɛqub.
MAR 5:38 Usin-dd ɣar taddart n umeqqran n temzida uca iẓra i-ten ccaten agejdur, ttrun uca sɣuyyun.
MAR 5:39 Umi dd-yudef, inna asen: “Mayemmi teccatem agejdur, tᵉttrum? Taḥenjirt war temmut ca, maca aqa tᵉṭṭeṣ.”
MAR 5:40 Nitni ḍeḥcen zzayes. [Maca] Netta issuffeɣ i-ten kuřci barra uca yiwi akides babas d yemmas n tḥenjirt d yinni tuɣa akides, xenni yudef-dd mani tuɣa tᵉttwassars tḥenjirt.
MAR 5:41 Iṭṭef deg ufus n tḥenjirt, inna as: “Kkar, [a] taḥenjirt!”
MAR 5:42 Řexdenni tekkar tḥenjirt uca tuyur, minzi tuɣa taḥenjirt ɣares tenɛac n iseggʷusa. Tbehten nitni s yijj n utebhet imɣar.
MAR 5:43 Uca Netta yumur i-ten s jjehd, ḥima uřa d ijjen ad ibarreḥ s man aya. [Xenni] iweṣṣa ad as wcen ḥima ad tecc.
MAR 6:1 Iffeɣ ssenni, yusa-dd ɣar tendint nnes, uca ḍfaren t-i-dd imeḥḍaren nnes.
MAR 6:2 Řami dd-tiweḍ ssebt, ibda isseřmad di temzida. Aṭṭas n yinni d as isřin, tbehten, nnan: “Zi manis dd-usint tmesřayin-a ɣar Wanita? Mana tiɣit-a i d as immewcen ařami msarent x ifassen nnes řeɛjayeb am tina?
MAR 6:3 Ma war iǧi Wa d anejjar, mmis n Maryam, d umas n Yaɛqub d Yusis d Yahuda d Cimɛun? Ma war ǧint suyᵉtmas da akidneɣ?” U nitni nderfen dayes.
MAR 6:4 [Maca] Yasuɛ inna asen: “Anabi ɛemmarṣ war iǧi břa ccan mɣir di tendint nnes, jar řaǧ nnes u di taddart nnes.”
MAR 6:5 Uca Netta war izemmar ad din igg uřa d ijj n řeɛjeb, illa issars afus nnes x drus n imehřac waha uca issgenfa i-ten.
MAR 6:6 Tuɣa ittebhet zi tikkest n l’iman nsen. [Xenni] iruḥ, ittsara dcurat yudsen, isseřmad.
MAR 6:7 Iřaɣa-dd i tenɛac [n rrusul], ibda issekk i-ten tyuya tyuya uca iwca asen ṣṣulṭa x řaryaḥ imengas, maḥend ad ten ssuffɣen.
MAR 6:8 Yumur i-ten ḥima war kessin walu deg webrid mɣir taɣɣarct waha, lla ttesṭim, lla aɣrum, lla [tipyisin n] nnḥas di tecyarin nsen,
MAR 6:9 [maca] iwc asen ttesriḥ maḥend ad qqnen sandaliyat, [maca] war yarrḍen tyuya n tcamirat.
MAR 6:10 Inna asen: “Mani ma tudfem ɣar ca n taddart, qqimem dayes, ař ssenni i ɣa teffɣem.
MAR 6:11 Ɣar marra inni war kenniw iqbiřen u war ɣarwem ttesřin, zzerzem taɛejjajt zeg iḍaren nwem d cchadet i nitni. S tidett, Necc ad awem iniɣ, ad yiři [řḥař] ihwen i temmurt n Sadum d Ɛamurra deg wass n lḥisab zi tendint nni.”
MAR 6:12 Uca ruḥen, barrḥen ḥima ad tuben.
MAR 6:13 Ssuffɣen aṭṭas n ccwaṭen, dehnen imehřac aṭṭas s zzect uca ssgenfan ten.
MAR 6:14 Isřa xas ujeǧid Hirudus, minzi Isem nnes idweř icneɛ, inna: “Aqa Yuḥanna Amseɣḍaṣ ittwassnekkar-dd zi taddart n imettinen, s uyenni ttwaggent zzayes řeɛjayeb nni.”
MAR 6:15 Inneɣni nnan: “Aqa-t d Iliya!”, u inneɣni nnan ɛawed: “Aqa-t d nnabi am yijjen zeg inabiyyen!”
MAR 6:16 Řami isřa Hirudus man aya, inna: “Wa d Yuḥanna wenni umi qesseɣ azeǧif, aqa netta ittwassnekkar-dd zi taddart n imettinen.”
MAR 6:17 Minzi Hirudus simant nnes, tuɣa issekk-dd [ɣares] uca iḥebbes Yuḥanna, icarf i-t di řeḥbes x ssibbet n Hirudiyya, tamɣart n umas Filippus, tenni i-k-d imřec [Hirudus].
MAR 6:18 Minzi Yuḥanna tuɣa iqqar i Hirudus: “War d ac iḥeǧeř ad ɣarek tiři temɣart n umac.”
MAR 6:19 [S uyenni] tuɣa Hirudiyya tenḍar dayes tiṭṭawin uca tarezzu ad t tneɣ, maca war tzemmar,
MAR 6:20 minzi Hirudus tuɣa itteggʷed zi Yuḥanna, issen belli netta d aryaz d amseggad d amqeddas u iḥeṭṭa xas. Isřa zzayes aṭṭas n tmesřayin, [x min] tuɣa ittegg, uca ifarḥ ad as iseř.
MAR 6:21 Deg ijj n wass ittwassnen igga Hirudus ict n zzardet deg wass n třařit nnes i řḥukkam nnes i ɣarsen řemɣaret aṭṭas, i arruyas x wařef n řɛeskar u i imeqqranen n Ljalil.
MAR 6:22 Uca tudef-dd yeǧis [n Hirudiyya], tecḍeḥ, teɛjeb as i Hirudus d yinni iqqimen akides. Xenni inna as ujeǧid i tḥenjirt: “Ttar zzayi marra min texsed, ad am t wceɣ!”
MAR 6:23 Ijjuǧ as: “Mecḥař ma zzayi i ɣa tᵉttared, ad am t wceɣ, waxxa ař azyen n tgeldit inu!”
MAR 6:24 Teffeɣ-dd nettat, tenna i yemmas: “Min d as i ɣa ttareɣ?” Tenna as tanita: “Azeǧif n Yuḥanna Amseɣḍaṣ.”
MAR 6:25 Tudef deɣya s tazřa ɣar ujeǧid, tenna as: “Xseɣ ad ayi dd-tessarsed di tsaɛɛet-a azeǧif n Yuḥanna x ijj n ṭṭebṣi.”
MAR 6:26 Icḍen ujeǧid aṭṭas, maca x ssibbet n tjaǧit u x ssibbet n [inewjiwen] i iqqimen [ɣar ṭṭabřa], war ixs ad tt iqemmeɛ,
MAR 6:27 u řexdenni issekk ujeǧid ijj n uɛessas ɣar řeḥbes s ssif, yumur ḥima ad dd-yawi azeǧif n Yuḥanna. Wanita iruḥ, iqess as azeǧif i Yuḥanna di řeḥbes.
MAR 6:28 [Xas uca] yiwi-dd [azeǧif nnes] x ṭṭebṣi, iwca as t i tḥenjirt u taḥenjirt tewc as t i yemmas.
MAR 6:29 Řami sřin imeḥḍaren nnes man aya, usin-dd, ksin řxecbet nnes, ssarsen tt deg wenḍeř.
MAR 6:30 Munen rrusul ɛawed ɣar Yasuɛ, xebbaren t x kuřci, x min ggin d x min tuɣa sseřmaden.
MAR 6:31 Inna asen: “Asem-dd, ejj aneɣ ad nraḥ weḥḥedneɣ ɣar ijj n wemcan ixřan, [ḥima] ad tareyyḥem cwayt!” Minzi tuɣa din aṭṭas n yinni dd-yusin d n yinni iruḥen, ařami war iwiḍen ad ccen.
MAR 6:32 [Xenni] ruḥen weḥḥedsen di tɣarrabut ɣar ijj n wemcan ixřan.
MAR 6:33 [Maca] řɣaci iẓra i-ten ffɣen-dd [di tɣarrabut] uca aṭṭas i-t ɛeqřen. Uca izwaren as am ttazzřen x iḍaren ɣar dinni zi marra tineddam.
MAR 6:34 Umi dd-iḍra Yasuɛ, iẓra aṭṭas n řɣaci, zziǧzen as, minzi tuɣa aten am wuǧi břa ameksaw. [Xenni] ibda ad ten isseřmed aṭṭas.
MAR 6:35 Rami iruḥ wass ad iqḍa, qarrben-dd ɣares imeḥḍaren nnes, nnan as: “Amcan-a ixřa u řweqt teɛdu.
MAR 6:36 Sekk i-ten ḥima ad raḥen ɣar řeɛraṣiyyat u ɣar dcurat yudsen, ḥima ad sɣen aɣrum i yixef nsen, minzi war ɣarsen min ɣa ccen.”
MAR 6:37 Maca Netta inna asen: “Wcem asen kenniw min ɣa ccen!” Nnan as: “Ma ad nraḥ maḥend ad asen nseɣ aɣrum s mitayen dinar uca ad asen newc min ɣa ccen?”
MAR 6:38 Inna asen: “Ruḥem, xzarem mecḥař n tecnifin i ɣarwem danita!” Umi argben, nnan as: “Xemsa n tecnifin n weɣrum d tnayen n iseřman.”
MAR 6:39 Yumur i-ten ad [ten] ssɣimen marra di tɛurricin x arbiɛ [aziza].
MAR 6:40 Uca qqimen di tɛurricin n mya u di tɛurricin n xemsin.
MAR 6:41 Umi iksi [Yeccu] xemsa n tecnifin d tnayen n iseřman [nni], issgeɛɛed tamuɣři nnes ɣar ujenna, ibarek uca yarẓa ticnifin, iwca i-tent i imeḥḍaren nnes, ḥima ad tent ssarsen zzatsen. [Ammu i] farqen nitni [ɛawed] tnayen n iseřman i marra.
MAR 6:42 Ccin marra, jjiwnen.
MAR 6:43 [Xenni] řeqḍen iřeqqʷaz iceṭṭen, ccuren tenɛac n tsuǧatin, uřa d iseřman [iceṭṭen].
MAR 6:44 Inni iccin zi tecnifin tuɣa aten di xemsa-ařaf n yeryazen.
MAR 6:45 Řexdenni iziyyar x imeḥḍaren nnes maḥend ad adfen ɣar tɣarrabut, ad as izwaren ɣar ujemmaḍ, ɣar Bayt-Ṣayda am isqad Netta řɣaci.
MAR 6:46 Uca [awarni řami] ten isqad, iruḥ ɣar wedrar ḥima ad iẓẓaǧ.
MAR 6:47 Řami dd-tewḍa tmeddit tuɣa taɣarrabut di řbuɣaz uca Netta tuɣa weḥḥdes x řbarr.
MAR 6:48 Iẓra belli nitni ttemqetmaren s uqeddef [n tɣarrabut], minzi asemmiḍ yusa asen-dd deg uɣembub. Ɣar ḥeṭṭu wiss arebɛa n ǧiřet yusa-dd ɣarsen Yasuɛ, iggur x wawan n řebḥar, uca tuɣa ixs ad ten iɛdu.
MAR 6:49 Umi t ẓrin iggur di řebḥar, ittɣiř asen d řexyař aɣeddar uca sɣuyen,
MAR 6:50 minzi marra ẓrin t uca nnxeřɛen. Řexdenni issiweř akidsen, inna asen: “Ggem uř! Aqa d NECC, war teggʷedem ca!”
MAR 6:51 Inyi-dd ɣarsen di tɣarrabut uca yarsa usemmiḍ. Tuɣa nitni ttbehten, arewwɛen aṭṭas deg yixef nsen,
MAR 6:52 minzi war fhimen walu i [lmuɛjiza n] tecnifin, minzi uř nsen tuɣa iqseḥ.
MAR 6:53 Awarni řami ẓwan ɣar ujemmaḍ, usin-dd ɣar temmurt n Jinnisaret.
MAR 6:54 Umi dd-ffɣen zi tɣarrabut, ɛeqřen t iwdan deɣya.
MAR 6:55 Uzzřen ɣar marra jjwayeh nni uca bdan ad dd-awyen inni tuɣa iheřcen aṭṭas di tassut ɣar wemcan mani sřin aqa-t Netta.
MAR 6:56 Mani ma dd-yusa, di tendint niɣ di ředcur niɣ di řeɛraṣiyyat, ssrusan [as-dd] imehřac deg ibriden uca ttzawagen t ad asen ismeḥ ad ḥadan mɣir abeḥřuř n ujeǧab nnes, u marra inni t iḥadan, ggenfan.
MAR 7:1 Munen ɣares Ifarisiyyen d imseřmaden n idlisen i dd-yusin zi Urcalim.
MAR 7:2 [Umi] ẓrin belli ca n imeḥḍaren nnes ccin aɣrum břa ggin ad ssirden ifassen nsen [d amezwaru], ɛeyyben xasen.
MAR 7:3 Minzi marra Ifarisiyyen d Wudayen war ttᵉtten mɣir awarni řami ssirden ifassen s yijj n řuḍu mliḥ, minzi tteṭṭfen di tubbart n imɣaren.
MAR 7:4 U řami dd-usin zi ssuq, war ttᵉtten mařa war ssɣeḍṣen [ifassen nsen di tbanyut] d amezwaru, u aqa din aṭṭas n tmesřayin nneɣni qebřen tent, maḥend ad zzaysent ṭṭfen [ɛlaḥsab tubbart nsen], am useɣḍas n řkisan d teydurin d tebriqin n nnḥas d [dduri] n řectawat [deg ict n tbanyut].
MAR 7:5 [Xenni] sseqsan t Ifarisiyyen d imseřmaden n idlisen: “Mayemmi war ḍfaren imeḥḍaren nnec tubbart n imɣaren, maca ttᵉtten aɣrum am war ssiriden ifassen?”
MAR 7:6 Yarra-dd, inna asen: “Nican inebba Icaɛya xawem, [a] imnafqen, am mammec tura: ‘Řgens-a iweqqar ayi s iyencicen nnes, maca uř nsen iggʷej xafi!
MAR 7:7 Maca nitni cennɛen ayi baṭeř, minzi sseřmaden tiɣuriwin tinni d tiweṣṣa n iwdan.’
MAR 7:8 Minzi tejjim tawṣeyyet n AREBBI, tᵉṭṭfem di tubbart n iwdan, am useɣḍas n řkisan d teydurin [deg ict n tbanyut] u aṭṭas n tmesřayin nneɣni am tina.”
MAR 7:9 Inna asen: “Nican aqa tneṭṭařem tawṣeyyet n AREBBI, ḥima ad teqqimem tᵉttᵉṭṭfem di tubbart nwem.
MAR 7:10 Minzi Musa inna: ‘Weqqar babac d yemmac!’, u: ‘Wenni i ɣa ixzan babas niɣ yemmas, ittxeṣṣa as ad immet.’
MAR 7:11 Maca kenniw teqqarem: ‘Mařa ijj n weryaz inna i babas niɣ i yemmas: Min ma tzemmarem ad zzayi testenfɛem, aqa ggiɣ t d ṣṣedqet!’,
MAR 7:12 ammu war t tᵉttejjim qaɛ ad igg ca i babas d yemmas.
MAR 7:13 [Ammu i] tesseḥqaram Awař n AREBBI s tubbart nwem i tᵉttsellamem, u tᵉtteggem aṭṭas n tmesřayin am tina.”
MAR 7:14 Iřaɣa-dd Yasuɛ ɣares marra řɣaci, inna asen: “Sřem-dd ɣari marra uca fehmem [man aya mliḥ]:
MAR 7:15 War din uřa d ict n řḥajjet i dd-ittadfen ɣar bnadem zi barra tzemmar ad t tessexmej. Maca min i dd-itteffɣen zi bnadem, aqa man aya issexmaj bnadem.
MAR 7:16 Wenni ɣar ǧan imezzuɣen i useǧi, ejj i-t ad iseř.”
MAR 7:17 Umi dd-yudef ɣar taddart, iggwej x řɣaci, sseqsan t imeḥḍaren nnes x umedya [nni].
MAR 7:18 Inna asen: “Ma kenniw ɛad břa řefhamet? Ma war tefhimem ca belli marra min ɣa yadfen bnadem zi barra, war izemmar ad t issexmej,
MAR 7:19 minzi man aya war dd-ittidef ca ɣar wuř nnes, maca ɣar uɛeddis, xenni ad iffeɣ ɣar wemcan nnes, ař ittwassizdeg marra macca.”
MAR 7:20 [Xenni] inna: “Min i dd-itteffɣen zi bnadem d man aya issxemmaj bnadem.
MAR 7:21 Minzi zi daxeř, zeg wuřawen n iwdan i dd-itteffɣen inwayen iɛeffanen: zzina, farq-ccɣeř, tukkarḍa, anɣay,
MAR 7:22 ṭṭmeɛ, řɣar, taḥraymect, afucceḥ, tiṭṭ taɛeffant, aceqqef, tuffet d tubbuheřya.
MAR 7:23 Marra timesřayin-a tiɛeffanin tteffɣent-i-dd zi daxeř uca ssxemmajent bnadem.”
MAR 7:24 Ikkar ssenni uca iruḥ ɣar temmurt n weymir n Ṣur d Ṣaydun. Řami dd-yudef ɣar ict n taddart, war ixs ad t issen ḥed, waxxa amenni war izemmar ad innuffar.
MAR 7:25 Minzi ict n tmeṭṭut, ɣares yeǧis dayes ijj n řaryaḥ d amengus, tesřa xas deɣya. Nettat tusa-dd ɣares, tewḍa as ɣar iḍaren nnes.
MAR 7:26 Tuɣa tamɣart-a d ict n temɣart takafriwt zi [temmurt n] Finiqiya nni tuɣa d tasɣart n Suriya. Nettat tzawg i-t maḥend ad issuffeɣ cciṭan zeg yeǧis.
MAR 7:27 [Maca] Yasuɛ inna as: “Ejj iḥenjiren amezwar ad jjiwnen, minzi war ittřiq ad ittwakkes weɣrum n iḥenjiren ḥima ad immenḍar i yiṭan.”
MAR 7:28 Maca nettat tarra-dd, tenna as: “Wah, [a] Sidi, uřa d iṭan ttᵉtten iřeqqʷaz n iḥenjiren sadu ṭṭabřa.”
MAR 7:29 Inna as Yasuɛ: “Uyur, minzi x ssibbet n wawař-a [i tennid], aqa iffeɣ cciṭan zeg yeǧim.”
MAR 7:30 Řami dd-tusa ɣar taddart nnes, tufa yeǧis tezzeř di qama u cciṭan ittwassuffeɣ zzayes.
MAR 7:31 Iffeɣ-dd Yasuɛ ɛawed zi temmurt n Ṣur d Ṣaydun, yiweḍ ɣar řebḥar n Ljalil ɣar ṭṭarf n temmurt n Dikapulis.
MAR 7:32 Iwyen-dd ɣares ijj n udehcur, itewtaw, uca ttaren zzayes ad xas issars afus nnes.
MAR 7:33 Issiggʷej i-t zi řɣaci ɣar uɣezdis uca igga as iḍewḍan deg imezzuɣen nnes, issusef uca iḥada iřes nnes.
MAR 7:34 [Xenni] ixzar ɣar ujenna, izehhar, inna as: “Nurzem!”
MAR 7:35 Řexdenni nnurzmen imezzuɣen nnes uca tefsi tesɣunt n yiřes nnes, [ibda] issawař nican.
MAR 7:36 Iɛřem asen war [t] qqaren i ḥed, maca mecḥař ma ten yumur, waxxa amenni tuɣa ssuffuɣen xas řexbar mahu.
MAR 7:37 Uca tbehten s unexřiɛ ařami nnan: “Marra igga i-t mliḥ! Yarra idehcar ttesřan d ignawen ssawařen.”
MAR 8:1 Deg wussan nni, am tuɣa din [ɛawed] aṭṭas n řɣaci uca war tuɣi ɣarsen min ɣa ccen, iřaɣa Yasuɛ x imeḥḍaren nnes, inna asen:
MAR 8:2 “Aqa zziǧzen ayi řɣaci, minzi qqimen akidi [ɛad] třata n wussan, war ɣarsen min ɣa ccen.
MAR 8:3 Mařa ssekkeɣ ten ɣar tudrin nsen am [ɛad] ǧuẓen, ad ttwaheyyfen deg webrid, minzi ca zzaysen usin-dd zi řaggʷaj.”
MAR 8:4 Nnan as imeḥḍaren nnes: “Zi manis izemmar ḥed ad yaf aɣrum di řexřa-ya maḥend ad issjjiwen marra ina?”
MAR 8:5 Isseqsa ten: “Mecḥař n tecnifin i ɣarwem?” Nnan: “Sebɛa.”
MAR 8:6 [Xenni] yumur řɣaci ad iqqim di temmurt, uca iksi sebɛa nni n tecnifin, u awarni řami ibarek, yarẓa i-tent, iwca i-tent i imeḥḍaren nnes ḥima ad tent qeddmen, uca xenni qeddmen tent i řɣaci.
MAR 8:7 Tuɣa ɣarsen cwayt n iseřman d imeẓyanen. Ibark i-ten ɛawed, inna ad qeddmen ina.
MAR 8:8 Ccin, jjiwnen, uca yarwen min iceṭṭen, aqa sebɛa n tsuǧatin.
MAR 8:9 Inni iccen tuɣa aten ɛřaḥař di arebɛa-ařaf.
MAR 8:10 [Xenni] issekk i-ten, uca řexdenni inya di tɣarrabut ak-d imeḥḍaren nnes, yiweḍ ɣar jjwayeh n Dalmanuta.
MAR 8:11 Ffɣen Ifarisiyyen, bdan ttqacaḥen dayes, ttaren zzayes ict n řeɛřamet zeg ujenna ḥima ad t jarrben.
MAR 8:12 Izehhar di Arruḥ nnes, inna: “Mayemmi ittettar jjiř-a ict n řeɛřamet? S tidett, Necc ad awem iniɣ, ɛemmarṣ war d as temmewc i jjiř-a ict n řeɛřamet!”
MAR 8:13 [Xenni] ismeḥ daysen uca inya di tɣarrabut, uca ruḥen nitni ɣar ujemmaḍ.
MAR 8:14 Imeḥḍaren nnes ttun ad kisen ksin aɣrum, uca war tuɣi ɣarsen walu di tɣarrabut mɣir ict n tecnift n weɣrum waha.
MAR 8:15 Uca yumur i-ten, inna: “Xzarem, ḥḍam zeg wentun n Ifarisiyyen d wentun n Hirudus.”
MAR 8:16 Mcawaren jar asen, nnan: “D man aya minzi war [ɣarneɣ] bu [tecnifin n] weɣrum.”
MAR 8:17 [Maca] yargeb Yasuɛ, inna asen: “Mayemmi temcawarem belli war ɣarwem bu [tecnifin n] weɣrum? Ma war tucim, ma war tefhimem? Ma ɛad uřawen nwem qesḥen?
MAR 8:18 Ma ɣarwem tiṭṭawin, maca war tᵉttwiřim? Ma ɣarwem imezzuɣen, maca war tᵉttesřim? Ma war tɛeqqiřem ɛad?
MAR 8:19 Umi arẓiɣ xemsa n tecnifin n weɣrum i xemsa-ařaf, mecḥař n tsuǧatin i iccuren s iřeqqʷaz i tyarwem?” Nnan as: “Tenɛac.”
MAR 8:20 “U ɣar sebɛa [n tecnifin n weɣrum] i arebɛa-ařaf, mecḥař n tsuǧatin iccuren s iřeqqʷaz i tyarwem?” Nnan: “Sebɛa!”
MAR 8:21 [Xenni] inna asen: “Mammec ɛad war tefhimem ař řexxu?”
MAR 8:22 Yusa-dd ɣar Bayt-Ṣayda uca nitni iwyen as-dd ijj n udarɣař, zawgen t ad iḥada wanita.
MAR 8:23 Netta imneɛ adarɣař zeg ufus, indeh i-t barra i dcar uca issusef di tiṭṭawin nnes, issars [xas] afus nnes, isseqsa min ittwařa.
MAR 8:24 Isewḍ, inna: “Ttwařiɣ iwdan gguren am ticejjura.”
MAR 8:25 Xenni issars ɛawed afus nnes x tiṭṭawin nnes. [Xenni] iggenfa, idweř ittwařa marra mliḥ.
MAR 8:26 Issekk i-t ɣar taddart nnes, inna: “War d ttidef dcar, war t qqar i ḥed di dcar!”
MAR 8:27 [Xenni] yuyur Yasuɛ ak-d imeḥḍaren nnes ɣar ředcur n Qayṣariya-Filippus. Deg webrid isseqsa imeḥḍaren nnes, inna asen: “Min qqaren iwdan min ɛniɣ Necc?”
MAR 8:28 Arrin-dd: “Yuḥanna Amseɣḍaṣ!”, ca nneɣni [nnan]: “Iliya!”, inneɣni [ɛawed]: “Ijjen zeg inabiyyen!”
MAR 8:29 Inna asen: “I kenniw min teqqarem xafi?” Yarra-dd Cimɛun, inna as: “Cek d Lmasiḥ, Mmis n AREBBI iddaren!”
MAR 8:30 Yumur i-ten mliḥ, maḥend war [tt] xas qqaren uřa i yijj.
MAR 8:31 Ibda isseřmad aqa Mmis n bnadem ittxeṣṣa ad iweddeb aṭṭas uca ad ittwasseḥqar zeg imɣaren [n řgens] d imeqqranen n ikehhanen d imseřmaden n idlisen, ad t nɣen uca deg wass wiss třata ad dd-ikkar.
MAR 8:32 Inna awař-a s bṭayṭay. [Maca] iksi t Buṭrus ɣares ɣar uɣezdis uca ibda ittwebbex i-t.
MAR 8:33 [Xas uca] inneqřeb, ixzar deg imeḥḍaren nnes uca iwebbex i Cimɛun, iqqar: “Aggʷej xafi awarni ayi, [a] cciṭan minzi cek war d ac icqi min iǧan n AREBBI, maca min iǧan n iwdan.”
MAR 8:34 Iřaɣa-dd Yasuɛ i řɣaci ak-d imeḥḍaren nnes ɣares, inna asen: “Wenni ixsen ad ayi iḍfar, ad inkar ixef nnes, ad iksi ṣṣalib nnes uca ad ayi iḍfar.
MAR 8:35 Minzi wenni ixsen ad issenjem tudart nnes, ad tt ixsar, [maca] wenni i ɣa ixsaren tudart nnes di ṭṭweɛ inu u di ṭṭweɛ n Řexbar Aṣebḥan, ad tt issenjem.
MAR 8:36 Minzi man řefḍeř n bnadem mařa yarbeḥ ddunect marra, [maca] ad ixsar řeɛmar nnes?
MAR 8:37 Minzi min ɣa iwc bnadem deg wemcan n řeɛmar nnes?
MAR 8:38 Minzi wenni zzayi i ɣa iseḍḥan u zeg wawařen inu di jjiř-a izennan ixḍan, aqa uřa d Mmis n bnadem ad zzayes iseḍḥa, xmi dd ɣa yas s uɛuǧi n Babas ak-d lmalakat iqeddsen.”
MAR 9:1 Inna asen: “S tidett, Necc ad awem iniɣ, aqa ca zeg inni da ibedden war ttqasin ca řmewt ař ɣa ẓaren Tageldit n AREBBI ad dd-tas s jjehd.”
MAR 9:2 Awarni setta n wussan Yasuɛ yiwi-dd [akides] Buṭrus d Yaɛqub d Yuḥanna weḥḥedsen ɣar ijj n wedrar yuɛřan, uca ibeddeř qibač i tiṭṭawin nsen.
MAR 9:3 Arruḍ nnes idweř yařeqq d acemřař aṭṭas am wedfeř, war izemmar uřa d ijj n bnadem x temmurt ad issemřeř amenni.
MAR 9:4 Iḍhar asen-dd Iliya ak-d Musa am tuɣa ssawařen ak-d Yasuɛ.
MAR 9:5 Inna as Buṭrus: “[A] Amseřmad inu, aqa mliḥ umi da neǧa, ejj aneɣ ad newwet třata n iɛuccuten n tseṭṭa, ijjen i Cek, ijjen i Musa u ijjen i Iliya.”
MAR 9:6 Maca tuɣa iweddar as min ɣa yini, minzi nitni ggʷeden aṭṭas.
MAR 9:7 Ikka-dd useynu issduriy i-ten s tiři nnes, uca třaɣa-dd ict n tmijja zeg useynu, teqqar: “Wa d Mmi iɛizzen, sřem ɣares!”
MAR 9:8 Umi ssgeɛɛden nitni tiṭṭawin nsen, deg ict n tecti war qqimen ttwařan ɛad ḥed akidsen, mɣir Yasuɛ weḥḥdes.
MAR 9:9 Ařami dd-hwan zeg wedrar, yumur i-ten ḥima war ttɛiwiden i ḥed walu zi min ẓrin ař dd ɣa ikkar Mmis n bnadem jar imettinen.
MAR 9:10 Xemmřen awař-a deg yixef nsen am tuɣa ttseqsan ixef nsen min ixs ad yini [wawař-a]: ‘Ař dd ɣa ikkar zi taddart n imettinen’?
MAR 9:11 Sseqsan t, nnan as: “Mayemmi qqaren imseřmaden n idlisen belli ittxeṣṣa ad dd-yas Iliya d amezwaru?”
MAR 9:12 Yarra-dd, inna asen: “Aqa Iliya ad dd-yas d amezwaru uca ad yarr kuřci, uca [ad tiři] am mammec tura x Mmis n bnadem, aqa ad iweddeb aṭṭas uca ad t sseḥqaren.
MAR 9:13 Maca Necc ad awem iniɣ, Iliya aqa yusa-dd uca ggin zzayes min xsen am mammec xas tura.”
MAR 9:14 Řami dd-yusa ɣar imeḥḍaren, iẓra ijj n řɣaci d ameqqran ittenneḍ asen-dd u imseřmaden n idlisen ttqacaḥen ten.
MAR 9:15 Deɣya iẓra i-t marra řɣaci, tbehten aṭṭas, uca uzzřen-dd [ɣares], seǧmen xas.
MAR 9:16 Xenni isseqsa imseřmaden n idlisen: “Min xef kidsen tᵉttqacaḥem?”
MAR 9:17 Yarra-dd ijjen zi řɣaci, inna: “[A] Amseɣɣar, iwyeɣ-dd mmi ɣarek. Aqa dayes řaryaḥ nni t yarrin d agnaw.
MAR 9:18 Řebda xmi t itteṭṭef, ineṭṭar i-t ɣar temmurt, itteffeɣ as-dd ukuffu zeg uqemmum, ittɣezza tiɣmas nnes uca ittaẓeɣ. Nniɣ i imeḥḍaren nnec ad t ssuffɣen, [maca] war d as zemmaren.”
MAR 9:19 Yasuɛ yarra-dd, inna asen: “[A] jjiř war yuminen, mecḥař kidwem i ɣa qqimeɣ, mecḥař i kenniw i ɣa yarbuɣ ɛad? Awyem t-i-dd ɣari!”
MAR 9:20 Uca iwyen t-i-dd ɣares. Umi t iẓra, řexdenni immenḍar i-t řaryaḥ, ařami iwḍa ɣar temmurt, ibda ittbarkikkiḍ, ittekk as-dd ukuffu [zeg uqemmum].
MAR 9:21 Yasuɛ isseqsa babas: “Mecḥař zeg wami t-i-dd-iḥkem uya?” Inna as: “Zi temẓi nnes.
MAR 9:22 Aṭṭas n imuren ineṭṭar i-t di tmessi u deg waman ḥima ad t isshellek. Maca mařa tzemmared x ca, ɛawen ayi u ḥinn xafi!”
MAR 9:23 Inna as Yasuɛ: “Mařa tzemmared ad tamned, aqa kuřci izemmar i wenni yumnen.”
MAR 9:24 Řexdenni isɣuy babas n uḥenjir s imeṭṭawen, inna: “Umneɣ, [a] Sidi! Ɛawen l’iman ineqṣen inu.”
MAR 9:25 Umi iẓra Yasuɛ řɣaci ittazzeř uca ssmunen-dd ɣares nitni, iwebbex řaryaḥ amengus, inna as: “[A] řaryaḥ agnaw, Necc umureɣ cek: Ffeɣ zzayes! War ttdekkwiř dayes ɛemmarṣ!”
MAR 9:26 Isɣuy cciṭan nni aṭṭas, ijebbed i-t aṭṭas ammu d wammu uca iffeɣ [zzayes]. [Xenni] idweř uḥenjir am yijj n umettin, ařami tuɣa nnan aṭṭas, aqa immut.
MAR 9:27 Maca Yasuɛ iṭṭef i-t zeg ufus nnes, issbedd i-t.
MAR 9:28 Umi dd-yudef ɣar taddart, sseqsan t imeḥḍaren nnes weḥḥedsen: “Mayemmi war nzemmar neccin ad t nessuffeɣ?”
MAR 9:29 Inna asen: “Ddegg-a war izemmar ad ittwassuffeɣ uřa s ict n řḥajjet mɣir s uẓummi d tẓaǧit waha.”
MAR 9:30 Ffɣen-dd ssenni uca cuqen di Ljalil. Netta tuɣa war ixs ad t iɛqeř uřa d ijjen.
MAR 9:31 Maɣar tuɣa isseřmad imeḥḍaren nnes, iqqar asen: “Aqa Mmis n bnadem ad immewc deg ifassen n iwdan, ad t nɣen uca awarni řami t ɣa nɣen, ad dd-ikkar deg wass wiss třata.”
MAR 9:32 Maca nitni war fhimen i wawař-a uca ggʷeden ad t sseqsan [x uya].
MAR 9:33 Usin-dd ɣar Kafarnaḥum u awarni řami udfen ɣar taddart, isseqsa ten: “Di min di tuɣa tḥarrḍem ak-d wayawya deg webrid?”
MAR 9:34 Maca sqaren, minzi tuɣa ttemqacaḥen deg webrid di win iǧan d ameqqran zzaysen.
MAR 9:35 Iqqim, iřaɣa-dd i tenɛac, inna asen: “Mařa ixs ḥed ad yiři d amezwar, ad yiři d aneggar uřa d amsexxar i marra.”
MAR 9:36 Iksi aḥenjir, issbedd i-t di řwesṭ nsen, idarreɛ as, uca inna asen:
MAR 9:37 “Wi ɣa iqebřen [mɣir] ijj [n uḥenjir] am uḥenjir-a s Yisem inu, aqa iqbeř ayi u wi d ayi ɣa iqebřen, war d ayi iqebbeř, maca iqebbeř wi d ayi-dd-issekken.”
MAR 9:38 Yarra-dd xas Yuḥanna, inna as: “[A] Amseřmad inu, neẓra ijjen issuffuɣ ccwaṭen s Yisem nnec u nemneɛ i-t minzi netta war dd aneɣ iḍeffar.”
MAR 9:39 Inna asen Yasuɛ: “War [t] mennɛem ca, minzi war din uřa d ijj i ɣa yeggen timegga ijehden s Yisem inu, uca řexdenni deɣya ad xafi issiweř s řɣar.
MAR 9:40 Minzi wi war iǧin ḍidd nwem, aqa-t akidwem.
MAR 9:41 Wi kenniw i ɣa isseswen s yijj n řkas n waman waha, minzi aqa kenniw n Lmasiḥ [i teǧam], aqa s tidett, Necc ad awem iniɣ, netta war ixessar ca řmunet nnes.
MAR 9:42 Wi ɣa issenqraḍen ijjen zeg imeẓyanen-a i dayi yumnen, iḥřa as ad as tᵉttwagg ict n teṣḍart n tsirt tedqeř deg iri nnes, ad immenḍar di řebḥar.
MAR 9:43 Mařa issenqarḍ cek ufus nnec, qess i-t. Iḥřa ac ad tadfed ɣar Tudart d ameɛḍuř x wadaf s tnayen n ifassen di jᵉhennama,
MAR 9:44 mani tikecca nsen war tᵉttmetti u timessi nsen war txessi.
MAR 9:45 Mařa issenqarḍ cek uḍar nnec, qess i-t. Iḥřa ac ad tadfed ɣar Tudart d aqejdaḥ x uweṭṭu s tnayen n iḍaren di jᵉhennama,
MAR 9:46 mani tikecca nsen war tᵉttmetti u timessi nsen war txessi.
MAR 9:47 Mařa tessenqarḍ cek tiṭṭ nnec, qeřɛ i-tt. Iḥřa ac ad tadfed ɣar Tgeldit n AREBBI s ict n tiṭṭ x uweṭṭu s tnayen n tiṭṭawin di tmessi n jᵉhennama,
MAR 9:48 mani tikecca nsent war tᵉttmetti u timessi nsent war txessi.
MAR 9:49 Minzi kuř ijjen ad ittwameǧeḥ s tmessi u kuř taɣarṣt ad tᵉttwameǧeḥ s tmeǧaḥt.
MAR 9:50 Tameǧaḥt teṣbeḥ, maca mařa tameǧaḥt ixsar uředdi nnes, s min zi tt i ɣa ɛedřen. Ad tiři tmeǧaḥt daywem uca ḥḍam řehna jar awem.”
MAR 10:1 Ikkar, yuyur ssenni uca yiweḍ ɣar temmurt n Yahudiyya, ɣar wemcan n uẓekkwi n L’Urdun. Munen-dd xas řɣaci aṭṭas u ɛawed tuɣa isseřmad i-ten am mammec tuɣa innum.
MAR 10:2 Usin-dd ɣares Ifarisiyyen, sseqsan t ḥima ad t jarrben: “Ma iḥeǧeř i weryaz ad iǧef i temɣart nnes?”
MAR 10:3 Yarra-dd, inna asen: “Min xef tuɣa kenniw yumur Musa?”
MAR 10:4 Nnan: “Musa iwca ttesriḥ ad tᵉttwari tebrat n waǧaf maḥend [aryaz] ad as iǧef.”
MAR 10:5 Yarra-dd Yasuɛ, inna asen: “X ssibbet n řeqsaḥet n wuřawen nwem aqa yura awem tawṣeyyet-a,
MAR 10:6 maca zi beddu [zi mani tᵉttwagg ddunect], ixřeq i-ten-dd AREBBI d awtem d tewtemt.
MAR 10:7 S uyenni ad ismeḥ weryaz di babas d yemmas, ad iqqen ɣar temɣart nnes,
MAR 10:8 uca tnayen idsen xenni ad iřin d ict n ddat, uca ammu war ttiřin ɛad d tnayen, maca ad iřin d ict n arrimet.
MAR 10:9 S uya min issmun AREBBI, war t ibeṭṭi bnadem.”
MAR 10:10 Di taddart sseqsan t imeḥḍaren nnes ɛawed x man aya.
MAR 10:11 Inna asen: “Wi ɣa iǧfen i temɣart nnes uca ad yawi tenneɣnit, aqa netta izna.
MAR 10:12 U mařa tamɣart teǧef i weryaz nnes, uca xenni ad tiři i weryaz nneɣni, aqa nettat tezna.”
MAR 10:13 Iwyen as-dd iḥenjiren ḥima ad ten iḥada, maca imeḥḍaren webbxen inni ten dd-yiwyen.
MAR 10:14 Umi iẓra Yasuɛ man aya, ixeyyeq, inna asen: “Jjem iḥenjiren ad ɣari dd-asen, war ten mennɛem, minzi Tageldit n AREBBI n yinni iǧan am nitni.
MAR 10:15 S tidett, Necc ad awem iniɣ: “Wi war iqebbřen Tageldit n AREBBI am yijj n uḥenjir, aqa ɛemmarṣ war ɣares ittidef.”
MAR 10:16 Idarreɛ asen, uca am xasen issars ifassen nnes, ibark i-ten.
MAR 10:17 Umi iffeɣ maḥend ad yuyur deg webrid, yuzzeř-dd ɣares ijjen, iwḍa as ɣar ifadden uca isseqsa t, inna: “[A] Amseɣɣar Aṣebḥan, min ɣa ggeɣ ḥima ad warteɣ Tudart ittduman?”
MAR 10:18 Inna as Yasuɛ: “Mayemmi d ayi tᵉttřaɣid: ‘Aṣebḥan’? Uřa d ijj war iǧi d aṣebḥan, mɣir Ijjen waha: AREBBI!
MAR 10:19 Cek tessned tiweṣṣa: ‘War zenni, war neqq, war tticar, war cehhed s ẓur, war ttɣecca, weqqar babac d yemmac.’”
MAR 10:20 Yarra-dd, inna as: “[Wah, a] Amseɣɣar, aqa marra tina tuɣa ḍeffareɣ tent zi temẓi inu.”
MAR 10:21 Ixzar dayes Yasuɛ uca issɛizz i-t, inna as: “Teqqim icten [ɛad]: Uyur, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ujenna. Xenni ksi ṣṣalib nnec, ḍfar ayi-dd!”
MAR 10:22 Maca netta tuɣa iḥzen s wawař nni, uca iruḥ icḍen, minzi tuɣa ɣares aṭṭas n wagřa.
MAR 10:23 Ixzar Yasuɛ ɣar imeḥḍaren nnes, inna asen: “Mecḥař iwɛar x yinni ɣar iǧa agřa ḥima ad adfen ɣar Tgeldit n AREBBI!”
MAR 10:24 Tbehten imeḥḍaren zeg wawařen nnes. Maca Yasuɛ iɛawed iṭṭef deg wawař, inna asen: “[A] tarwa inu, mecḥař iwɛar x yinni ittcařan x wagřa nsen maḥend ad dd-adfen ɣar Tgeldit n AREBBI!
MAR 10:25 Ihwen ad yadef weřɣem zi tiṭṭ n tsineft zeg wadaf n bu-wagřa ɣar Tgeldit n AREBBI.”
MAR 10:26 Immarni daysen ɛad unexřiɛ, nnan i wayawya: “Wi izemmaren [xenni] ad ittwassenjem?”
MAR 10:27 Ixzar daysen Yasuɛ, inna: “Ɣar iwdan war izemmar, maca ɣar AREBBI war iǧi amenni, minzi aqa ɣar AREBBI kuřci di tzemmar nnes.”
MAR 10:28 Ibda Buṭrus ad yini: “Xzar, aqa neccin nejja kuřci, neḍfar i Cek-dd.”
MAR 10:29 Yarra-dd xas Yasuɛ, inna: “S tidett, Necc ad awem iniɣ: War din iǧi uřa d ijjen wenni isemḥen di taddart niɣ deg aytmas niɣ di yessmas niɣ di babas niɣ di yemmas niɣ di temɣart niɣ di tarrawt uřa deg iyyaren di ṭṭweɛ inu u di ṭṭweɛ n Řexbar Aṣebḥan,
MAR 10:30 i war ikessin mya n tseqqar. Řexxu di řweqt-a [ad iksi] tudrin d aytmas d yessmas d tyemmatin d tarrawt d yeyyaren ak-d umarret, uca di zzman i dd ɣa yasen [ad iksi] Tudart ittduman.
MAR 10:31 Maca aṭṭas n yinni iǧan d imezwura ad iřin d ineggura, uca inni iǧan d ineggura ad iřin d imezwura.”
MAR 10:32 Tuɣa-ten deg webrid maḥend ad geɛɛden ɣar Urcalim u Yasuɛ tuɣa izwar asen. Nitni tuɣa ttbehten uca ggʷeden umi t-i-dd-ḍeffaren. Iksi tenɛac [ɣar uɣezdis] uca ibda iqqar asen x min d as ɣa imsaren, [inna]:
MAR 10:33 “Xzar, neccin ad ngeɛɛed ɣar Urcalim u Mmis n bnadem ad immewc [deg ifassen n] imeqqranen n ikehhanen d imseřmaden n idlisen, u nitni ad xas ḥekmen s řmewt, ad t sellmen i řegnus.
MAR 10:34 Ad t sseḥqaren, ad t hettken s urekkuḍ, ad xas ssusfen, ad t nɣen, uca deg wass wiss třata ad ikkar.”
MAR 10:35 Yusa-dd ɣares Yaɛqub d Yuḥanna, tarwa n Zabdi, nnan as: “[A] Amseɣɣar, nexs ad aneɣ tegged marra min zzayek ɣa nettar.”
MAR 10:36 Inna asen: “Min texsem ad awem ggeɣ?”
MAR 10:37 Nnan as: “Ewc aneɣ ad neqqim, ijjen ɣar ufusi nnec u wenneɣni ɣar uzeřmaḍ nnec, deg uɛuǧi nnec.”
MAR 10:38 Maca Netta inna asen: “Aqa war tessinem ca min tᵉttarem. Ma tzemmarem ad teswem řkas i zi ɣa sweɣ Necc niɣ ad tᵉttwassɣeḍṣem s useɣḍeṣ i zi ɣa ttwassɣeḍṣeɣ Necc?”
MAR 10:39 Nnan as: “Nzemmar!” Inna asen Yasuɛ: “Řkas i ɣa sweɣ Necc, ad t teswem, u aseɣḍeṣ i zi ttwassɣeḍṣeɣ Necc, ad zzayes ttwassɣeḍṣem,
MAR 10:40 maca aɣimi x yefus inu niɣ x uzeřmaḍ inu, war ɣari iǧi deg ufus inu maḥend ad t wceɣ, maca ad immewc i yinni umi ittwassewjed.”
MAR 10:41 Řami sřin ɛecra [n imeḥḍaren] man aya, xeyyqen x Yaɛqub d Yuḥanna.
MAR 10:42 [Xenni] iřaɣa asen-dd Yasuɛ ɣares, inna asen: “Kenniw tessnem belli inni ittwaḥesben d řḥukkam n řegnus, aqa ḥekkmen xasen, u imeqqranen nsen, aqa ttṣeǧaḍen xasen.
MAR 10:43 War ittiři ammu jar awem, maca wenni ixsen ad idweř d ameqqran jar awem, aqa netta ad yiři d amsexxar nwem,
MAR 10:44 u wenni ixsen ad yiři d amezwaru jar awem, aqa netta ad yiři d amsexxar i marra.
MAR 10:45 Minzi ɛawed Mmis n bnadem war dd-yusi, ḥima ad xas sexxaren, maca ḥima ad ixdem, ad iwc tudart nnes d aṣřaḥ i waṭṭas [n iwdan].”
MAR 10:46 Iwḍen-dd ɣar Ariḥa. Řami dd-iffeɣ Yasuɛ zi Ariḥa ak-d imeḥḍaren nnes d waṭṭas n řɣaci, tuɣa Timawus, mmis n Timawus, ijj n weryaz d adarɣař, iqqim deg webrid, ittettar.
MAR 10:47 Umi isřa belli Yasuɛ Nnaṣiri aqa-t din, ibda isɣuyyu, iqqar: “[A], Mmis n Dawud, arḥem ayi!”
MAR 10:48 Webbxen t aṭṭas ḥima ad isqar, maca netta iqqim isɣuyyu ktar: “A Mmis n Dawud, arḥem ayi!”
MAR 10:49 Ibedd Yasuɛ uca yumur ad xas dd-řaɣan. Řaɣan-dd i udarɣař, nnan as: “Egg uř! Kkar, aqa ittřaɣa-dd xak!”
MAR 10:50 Inḍar udarɣař ajeǧab nnes, ikkar uca yusa-dd ɣar Yasuɛ.
MAR 10:51 Yarra-dd Yasuɛ, inna as: “Min texsed ad ac t ggeɣ?” Inna as udarɣař: “[A] Amseřmad inu, ḥima ad twařiɣ.”
MAR 10:52 Inna as Yasuɛ: “Xzar, l’iman nnec iwca ac Tudart!” Řexdenni idweř ittwařa, uca iḍfar [i-t] deg webrid.
MAR 11:1 Umi dd-qarrben ɣar Urcalim zeg uɣezdis n Bayt-Faji d Bayt-Ɛanya, zzat i wedrar n Zzitun, issekk tnayen n imeḥḍaren nnes,
MAR 11:2 inna asen: “Ruḥem ɣar dcar [nni] qibač nwem. Xmi ɣares i ɣa tadfem, řexdenni ad tafem ijj n wesnus iqqen, war xas inyi uřa d ijj n bnadem. Fesyem as-dd uca awyem t-i-dd ɣari.
MAR 11:3 Mařa inna awem ḥed: ‘Mayemmi i tᵉtteggem aya?’, xenni inim: ‘Aqa Siditneɣ iḥdaj i-t, uca řexdenni ad t-i-dd-issekk da [ɛawed].’”
MAR 11:4 Nitni ruḥen, ufin asnus nni iqqen ɣar tewwart barra x webrid. Řami d as dd-arxun,
MAR 11:5 nnan asen ca n yinni tuɣa din ibedden: “Min tᵉtteggem, tfessyem i wesnus?”
MAR 11:6 Nnan asen am mammec ten iweṣṣa Yasuɛ, uca jjin ten.
MAR 11:7 Iwyen-dd asnus ɣar Yasuɛ, ssarsen xas arruḍ nsen uca inya xas Yasuɛ
MAR 11:8 Aṭṭas ssun arruḍ nsen x webrid, ca nneɣni qessen-dd řefruɛ ak-d wafriwen zi tcejjura uca ssun ten [ɛawed] x webrid.
MAR 11:9 Inni t izwaren d yinni t-i-dd-iḍfaren, tuɣa sɣuyyun s jjehd, qqaren: “Uṣanna! Lbaraka i Wenni dd-yusin s Yisem n SIDI!
MAR 11:10 Ad tᵉttwabarek Tgeldit tenni i dd ɣa yasen s ufus n babatneɣ Dawud. Uṣanna di řuɛřa x řuɛřa [n ijenwan]!”
MAR 11:11 Yusa-dd Yasuɛ ɣar Urcalim, yudef ɣar Zzawect Tameqqrant uca iẓra marra [min din imsaren]. Řami tuɣa issutem řḥař, iffeɣ ɣar Bayt-Ɛanya ak-d tenɛac.
MAR 11:12 Tiwecca nnes, řami dd-iffeɣ zi Bayt-Ɛanya, iṭṭef i-t-i-dd řaẓ.
MAR 11:13 Umi iẓra zi řaggʷaj ijj n wartu n tazart ɣares tifray, yuyur din ḥima ad yarzu ma ad taɣ ad dayes yaf ca. Umi ɣares dd-yiweḍ, war yufi walu mɣir tifray, minzi war tuɣi bu řweqt n tazart.
MAR 11:14 Iṭṭef deg wawař, inna as [i wartu]: “Zi řexxu d tsawent war zzayem ittett uřa d ijj ɛad řɣiǧet.” Tuɣa imeḥḍaren nnes ttesřan [min iqqar].
MAR 11:15 Uca yudef Yasuɛ ɣar Zzawect Tameqqrant n AREBBI, ibda issuffuɣ imsewwaqen d isebbaben [nni iǧan] di Zzawect Tameqqrant, uca ibda issneqřab ṭṭwabeř n iṣarrafen [n tmenyat] d řekrasi n yinni tuɣa iznuzan idbiren,
MAR 11:16 uca war ijji ḥed ad iɛdu Zzawect Tameqqrant uřa s ict n řqecɛet.
MAR 11:17 Tuɣa isseřmad, inna asen: “Ma war turi: Taddart inu ad as řaɣan ‘Taddart n tẓaǧit i marra řegnus?’ Maca kenniw tarrim tt d ifri n iceffaren.”
MAR 11:18 Imseřmaden n idlisen d imeqqranen n ikehhanen sřin man aya, kkaren uca arezzun mammec ɣa ggen ad t nɣen, minzi ggʷeden zzayes, minzi řɣaci marra tuɣa ittebhet s useřmed nnes.
MAR 11:19 Řami dd-tewḍa tmeddit, ffɣen ɣar barra n tendint.
MAR 11:20 Di ṣṣbeḥ zic, řami dinni ɛdun, ẓrin belli wartu [nni] isřaw zeg iẓewran.
MAR 11:21 Cimɛun iften, xenni inna as: “[A] Amseřmad inu, xzar, artu i tneɛřed, aqa isřaw.”
MAR 11:22 Yarra-dd Yasuɛ, inna asen: “Maɛlik ad daywem yiři l’iman n AREBBI,
MAR 11:23 maɣar s tidett, Necc ad awem iniɣ, mařa ḥed ad yini i wedrar-a: ‘Meksi, wḍa di řebḥar!’, war ittcekki deg wuř nnes maca ad yamen belli min inna ad iffeɣ, iwa aqa ad iffeɣ i netta am mammec inna netta.
MAR 11:24 S uyenni Necc ad awem iniɣ, marra min ɣa tᵉttarem am tᵉttẓaǧam, amnen belli ad t tkesbem, uca ad ɣarwem yiři.
MAR 11:25 U xmi ɣa tbeddem tᵉttẓẓaǧam, ɣfarem min ɣarwem x ca n ijjen, ḥima ad awem iɣfar ɛawed Babatwem i iǧan deg ijenwan ddnub nwem.
MAR 11:26 Mařa war tɣeffarem kenniw, war d awem iɣeffar uřa d Babatwem i iǧan deg ijenwan i ddnub nwem.”
MAR 11:27 Usin-dd ɛawed ɣar Urcalim. Am tuɣa iggur di Zzawect Tameqqrant, qarrben-dd ɣares imeqqranen n ikehhanen d imseřmaden n idlisen d imɣaren [n řgens].
MAR 11:28 Nnan as: “S man ttesriḥ i [zi] tᵉttegged timesřayin-a? Wi d ac iwcin ṣṣulṭa-ya ḥima ad tegged timesřayin-a?”
MAR 11:29 Yarra-dd Yasuɛ, inna asen: “Uřa d Necc ad kenniw sseqsiɣ ijj n useqsi, ḥima kenniw ad xafi tarrim, uca [xenni] uřa d Necc ad awem iniɣ s man ttesriḥ i zi tteggeɣ aya.
MAR 11:30 Aseɣḍaṣ n Yuḥanna, ma ikka-dd zeg ujenna niɣ zeg iwdan? Arrem-dd xafi!”
MAR 11:31 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi war zzayes tuminem?’
MAR 11:32 Maca mařa nenna: ‘Zeg iwdan!’, [xenni] ittxeṣṣa ad neggʷed zi řgens!”, minzi marra ḥesben Yuḥanna d anabi s tidett.
MAR 11:33 Arrin-dd, nnan i Yasuɛ: “War nessin!” Netta inna asen: “Xenni uřa d Necc war d awem qqareɣ zi man ttesriḥ i zi tteggeɣ timesřayin-a.”
MAR 12:1 Ibda issawař akidsen s imedya: “Ijj n bnadem igga ijj n umarjeɛ n uḍiř, iẓẓu dayes tizayarin, iqewwar as-dd s ijj n wefray, iɣza tasirt n uḍiř, ibna dayes ṣṣumɛet uca iwekkeř [amarjuɛ nni] i ixemmasen uca isafar.
MAR 12:2 Řami dd-yiweḍ řḥař, issekk amsexxar nnes ɣar ixemmasen, ḥima ad iksi [tasɣart nnes] zeg weřqaḍ n umarjeɛ n uḍiř.
MAR 12:3 Maca nitni wtin t uca ssekken t ixwa.
MAR 12:4 Ɛawed issekk ɣarsen ijj n umsexxar nneɣni, arejmen t, marẓen as, uca řami t ssbeḥtřen, uẓẓřen [xas].
MAR 12:5 Ɛawed issekk-dd ɣarsen wenneɣni uca nɣin t [uřa d netta]. Ammu [i issekk ɛad] aṭṭas n inneɣni, hettken ca zzaysen s urekkuḍ d ca nneɣni zzaysen nɣin ten.
MAR 12:6 Ɣar uneggar issekk ɣarsen ayenni n mmis i ɣares i xas iɛizzen, maɣar inna: ‘Nican ad weqqaren mmi!’
MAR 12:7 Maca ixemmasen, nni nnan jar asen: ‘Aqa d wa d awrit. Zidem, ad t neneɣ uca ad ɣarneɣ yiři řwart.’
MAR 12:8 Ṭṭfen t, nɣin t uca nḍaren t barra i umarjeɛ n uḍiř.
MAR 12:9 Min ɣa yegg bab n umarjeɛ n uḍiř? Ad dd-yas, ad ineɣ ixemmasen uca ad iwc amarjeɛ n uḍiř i inneɣni.
MAR 12:10 Ma war teɣrim [awař-a n] Tira [Iqeddsen]? ... ‘Aẓru i tuɣa immenḍaren ibennayen, aqa idweř d aẓru d Azeǧif n teɣmart.
MAR 12:11 Wa yusa-dd zi SIDI u man aya d řeɛjeb di tiṭṭawin nneɣ.’”
MAR 12:12 Xsen ad t ṭṭfen maca nitni ggʷeden zi řɣaci, minzi fehmen belli tuɣa issawař xasen s umedya nni. Nitni jjin t uca uyuren.
MAR 12:13 Xenni ssekken ɣares ca n yeryazen zeg Ifarisiyyen u ca zi taddart n Hirudus, ḥima ad as ṭṭfen s wawařen nnes.
MAR 12:14 Umi dd-usin, nnan as: “[A] Amseɣɣar, neccin nessen aqa Cek d tidett, war teggʷided zeg iwdan u war txezzared ca ɣar wudem n iwdan, maca tesseřmaded abrid n AREBBI s tidett. Ma iḥeǧeř ad newc ddariba i kuř ijjen [zzayneɣ] i qayṣar niɣ lla? Ma ittxeṣṣa aneɣ ad nxeǧeṣ ḍḍariba niɣ lla?”
MAR 12:15 Řami Netta yargeb x nnifaq nsen, inna asen: “Mayemmi d ayi tᵉttjarrabem? Awyem ayi-dd ijj n dinar ḥima ad t ẓareɣ!”
MAR 12:16 Iwyen as-dd ijj [n dinar]. Xenni inna asen: “Wi yiřan taṣwirt-a d tira-ya?” Nnan as: “N qayṣar!”
MAR 12:17 Yarra-dd Yasuɛ, inna asen: “Wcem [xenni] i qayṣar min iǧan i qayṣar, u min iǧan i AREBBI i AREBBI.” Uca ttɛejben dayes.
MAR 12:18 Usin-dd ɣares [ɛawed] Iṣaduqiyyen nni iqqaren belli war din bu tnukra. Sseqsan t, nnan:
MAR 12:19 “[A] Amseɣɣar, aqa yura aneɣ Musa, mařa immut i ḥed umas uca ijja tamɣart, [maca] war dd-ijji bu tarrawt, ad yawi umas tamɣart nni uca ad dd-yejj aḥenjir i umas.
MAR 12:20 Tuɣa din sebɛa n wawmaten. Amezwaru yiwi ict n temɣart uca awarni řami immut, war dd-ijji bu dduriyet.
MAR 12:21 Xenni yiwyi i-tt wenni wiss tnayen uca immut, war dd-ijji bu dduriyet uřa d netta, uca ammu uřa d wenni wiss třata.
MAR 12:22 Marra sebɛa [nni] iwyen tt, war dd-jjin bu dduriyet. Aneggar nsen marra temmut temɣart [nni] ɛawed.
MAR 12:23 Iwa di tnukra, xmi dd ɣa kkaren, umi ɣa tiři temɣart nni? Minzi sebɛa [nni marra] iwyen tt d tamɣart.”
MAR 12:24 Yarra-dd Yasuɛ, inna asen: “Ma war txeṭṭim ca minzi war tessinem ca Tira [Iqeddsen] d jjehd n AREBBI?
MAR 12:25 Maɣar xmi dd ɣa kkaren jar imettinen, war tent ttiwyen d tamɣart u war ssmiǧicen timɣarin i yeryazen, maca ad iřin am lmalakat [i iǧan] deg ujenna.
MAR 12:26 Maca zi jjihet n imettinen aqa ttwassnekkaren: Ma war teɣrim deg wedlis n Musa, mammec akides issiweř AREBBI zi cbarq ak-d isennanen, inna: ‘D NECC d AREBBI n Ibrahim d AREBBI n Isḥaq d AREBBI n Yaɛqub’?
MAR 12:27 Netta war iǧi d AREBBI n imettinen, maca [d AREBBI] n yinni iddaren. S uyenni aqa kenniw txeṭṭam aṭṭas.”
MAR 12:28 Ijjen zeg imseřmaden n idlisen iqarreb-dd ɣares, isřa asen ttemharwaḍen jar asen uca issen belli Netta aqa yarra-dd xasen mliḥ. [Xenni] isseqsa t: “Man tent iǧan d tawṣeyyet tamezwarut x kuřci?”
MAR 12:29 Yarra-dd xas Yasuɛ: “Aqa tamezwarut x marra tiweṣṣa: Seř a Israil! SIDI, AREBBI nneɣ, SIDI d Ijj.
MAR 12:30 Ad texsed SIDI, AREBBI nnec s marra wuř nnec s marra řeɛmar nnec s marra řeɛqeř nnec s marra jjehd nnec. Ta d tawṣeyyet tamezwarut.
MAR 12:31 U tawṣeyyet wiss tnayen, amecnaw tanita, aqa d ta: Ad texsed jjar nnec amecnaw ixef nnec. War din bu tewṣeyyet nneɣnit d tameqqrant x tina [s tnayen].”
MAR 12:32 Inna as umseřmad n idlisen: “Nican, [a] Amseřmad inu, s tidett tennid belli Netta d Ijjen, war din uřa d ijj nneɣni mɣir Netta,
MAR 12:33 u belli mařa ijj n bnadem ad t ixs s wuř marra, s řeɛqeř marra, s řeɛmar marra u s jjehd marra, uca ad ixs jjar nnes amecnaw ixef nnes, aqa d man aya ḥsen zi marra tiɣarṣin n wecmaḍ d marra tiɣarṣin nneɣnit.”
MAR 12:34 Umi iẓra Yasuɛ belli yarra-dd s řeɛqeř, inna as: “Aqa cek war tiggʷijed ca x Tgeldit n AREBBI.” Xenni war iɛewweř ḥed ad t isseqsa uřa deg ict n tmesřact.
MAR 12:35 Řami tuɣa isseřmad di Zzawect Tameqqrant iṭṭef Yasuɛ deg wawař, inna: “Mammec qqaren imseřmaden n idlisen belli Lmasiḥ d Mmis n Dawud?
MAR 12:36 Minzi Dawud s yixef nnes inna s Arruḥ Iqeddsen: ‘Inna SIDI i Sidi inu: Qqim-dd x ufusi inu ař dd ɣa ggeɣ řɛedyan nnec d tanebdat sadu iḍaren nnec.’
MAR 12:37 S uya ittřaɣa as-dd Dawud: ‘Sidi inu!’ Manis dd-ikka d mmis?” Marra řɣaci tuɣa isřa as s řefraḥet.
MAR 12:38 Inna asen deg useřmad nnes: “Ḥḍam ixef nwem zeg imseřmaden n idlisen inni umi itteɛjib asen řḥař xmi ɣa uyuren s řeɛbayat tizirarin u xmi xasen i ɣa seǧmen [iwdan] di řeswaq,
MAR 12:39 inni [umi itteɛjib asen] řekrasi n zzat di temzidawin, uřa d imucan imezwura ɣar imensiwen [n wuraren].
MAR 12:40 Nitni ttetten tudrin n tijjař [am ttᵉttaren] tiwhibin di ṭṭweɛ n tẓaǧatin nsen tizirarin. Aqa ina ad ksin řḥukm d ameqqran.”
MAR 12:41 Am iqqim Yasuɛ qibač i ssenduq n ṣṣedqet, iẓra mammec ineṭṭar řɣaci tinɛacin di ssenduq. Aṭṭas n aytbab n wagřa tuɣa neṭṭaren dayes aṭṭas.
MAR 12:42 Tusa-dd ict n tajjač d řmeskina tenḍar dayes tnayen n uqiyyat, semman tent ‘camunat’.
MAR 12:43 [Xenni] iřaɣa Yasuɛ i imeḥḍaren nnes, inna asen: “S tidett, Necc ad awem iniɣ, tajjač-a řmeskina aqa tenḍar dayes ktar x marra iwdan nni inḍaren di ssenduq n ṣṣedqet.
MAR 12:44 Minzi marra nḍaren dayes zi min ɣarsen aṭṭas, maca ta zi drus nnes tenḍar dayes kuřci min ɣares, aqa tenḍar marra min ɣares d agřa.”
MAR 13:1 Ařami dd-iffeɣ zi Zzawect Tameqqrant, inna as ijjen zeg imeḥḍaren nnes: “[A] Amseɣɣar, xzar, mammec ǧan iẓra-ya d řebni-ya!”
MAR 13:2 Yarra-dd Yasuɛ, inna as: “Ma teẓrid řebni-ya imɣaren? War da ittɣimi uřa d ijj n weẓru x weẓru nneɣni i war ittnehdim.”
MAR 13:3 Řami tuɣa iqqim x wedrar n Zzitun qibač i Zzawect Tameqqrant, sseqsan t Buṭrus d Yaɛqub d Yuḥanna d Andrawus řami ten tuɣa weḥḥedsen:
MAR 13:4 “Ini aneɣ meřmi i ɣa yiři man aya, u man ad tiři řeɛřamet aqa marra timesřayn-a ad awḍent?”
MAR 13:5 Ibda Yasuɛ iqqar asen: “Xzarem, ḥima war kenniw iɣekkwi ḥed.
MAR 13:6 Aqa aṭṭas ad dd-asen s Yisem inu qqaren: ‘Aqa d Necc!’, uca ad ɣwan aṭṭas.
MAR 13:7 Mařa tesřim x imenɣan d řexbar n garrat, war ttnexřiɛem ca, minzi s uɣiř ad yiři man aya, maca war ittiři ɛad d aneggar.
MAR 13:8 Minzi řgens ad ikkar ḍidd i řgens nneɣni u tageldit ḍidd i tgeldit nneɣni. Ad iřin inhezzan n temmurt zeg wemcan ɣar wemcan nneɣni uca ad yiři řaẓ d uɣewwuɣ. Timesřayin-a d beddu n řewjeɛ [n tarwa].
MAR 13:9 Ḥḍam ixef nwem, minzi ad kenniw sellmen i tudrin n ccreɛ, ad kenniw hettken s urekkuḍ di temzidawin nsen uca ad kenniw ssiwḍen ɣar ijeǧiden d řḥukkam di ssibbet inu, d cchadet i nitni.
MAR 13:10 Maca ɣar umezwar ittxeṣṣa ad ittwabarreḥ s Řexbar Aṣebḥan di marra řegnus.
MAR 13:11 Xmi kenniw i ɣa gewwden ḥima ad kenniw sellmen, war kessim s wemnus qbeř zi min ɣa tinim, war dayes txarriṣem ca, [maca] min ma d awem i ɣa immewcen di tsaɛɛet nni, siwřem zzayes, minzi war teǧim d kenniw i issawařen, maca d Arruḥ Iqeddsen.
MAR 13:12 Umas ad isellem umas maḥend ad [t] nɣen, u babas ad isellem mmis, uca ad tekkar tarwa x lwalidin nnes uca ad ten nɣen.
MAR 13:13 Ad kenniw carhen marra di ssibbet n Yisem inu, maca wenni i ɣa iṣbaren ař aneggar, ad ittwassenjem.
MAR 13:14 Xmi ɣa tẓarem nnɛi n wareyyeb, min xef tuɣa issawař unabi Daniyal, ittbedda mani war ittxeṣṣa ad ibedd - wenni iɣrin ad ifhem! - řexdenni ittxeṣṣa i yinni iǧan di Yahudiyya, ad arewřen ɣar idurar,
MAR 13:15 u wenni iǧan x tzeqqa war dd-ihekkwi ca ɣar taddart u war ittidef ca ḥima ad iksi ca zi taddart nnes,
MAR 13:16 u wenni iǧan deg iyyar war dd-ittɛiqqib ca ḥima ad iksi aseřham nnes.
MAR 13:17 Uct x tinni iǧan s ddeyset d tinni issuṭuḍen deg wussan nni!
MAR 13:18 Ẓaǧem ḥima war tᵉttiři tarewřa nwem di řmecta,
MAR 13:19 Minzi deg wussan nni ad din tiři ict n řmeḥnet i war tuɣi am nettat zeg wami dd-ixřeq AREBBI ddunect ař řexxu, uca war tᵉttiři ɛemmarṣ ɛawed.
MAR 13:20 Mařa SIDI war issemẓi ussan nni, war tnejjem uřa d ict n ddat, maca di ṭṭweɛ n yinni ittwafarzen, inni i ixḍar Netta, aqa issemẓi ussan nni.
MAR 13:21 Xenni mařa inna awem ijjen: ‘Aqa Lmasiḥ da!’, niɣ: ‘Aqa-t diha!’, war t ttamnem.
MAR 13:22 Minzi ad kkaren imasiḥen ifalsuten d inabiyyen issxarriqen, ad ggen řeɛřamat d řeɛjayeb ḥima, mařa izemmar, ad xedɛen ɛad inni ittwafarzen.
MAR 13:23 Kenniw maca, ḥḍam, aqa marra nniɣ awem t qbeř.
MAR 13:24 Maca deg wussan nni, awarni řmeḥnet nni, ad tebbarcen tfuct uca taziri war tᵉttic ɛad tafawt nnes,
MAR 13:25 itran ad dd-wḍan zeg ujenna uca ṣṣulaṭat i iǧan deg ijenwan ad ttwanhezzent.
MAR 13:26 Xenni ad ẓaren Mmis n bnadem xmi dd ɣa yas deg iseynuten, s jjehd d uɛuǧi ameqqran.
MAR 13:27 Řexdenni ad issekk lmalakat nnes uca ad iyru inni zzayes ittwafarzen zi arebɛa n tɣemmura n usemmiḍ, zi ṭṭarf aneggaru n temmurt ař ṭṭarf aneggaru n ujenna.
MAR 13:28 Řemdem zeg wartu n tazart amettiř-a: xmi ɣa dewřen řefruɛ nnes ad dd-areḍben uca tifray ad dd-ffɣent, xenni ad tessnem aqa anebdu yiweḍ-dd.
MAR 13:29 Ammu ittxeṣṣa uřa d kenniw, xmi ɣa tẓarem timesřayin-a ttemsarant, ad tessnem, aqa man aya yudes-dd, x tewwart.
MAR 13:30 S tidett ad awem iniɣ, jjiř-a war iɛeddu ca ař d ɣa yiři man aya marra.
MAR 13:31 Ajenna d temmurt ad ɛdun, [maca] awařen inu war ɛeddun ɛemmarṣ.
MAR 13:32 Maca ass nni d tsaɛɛet nni uřa d ijj war t issin, uřa d lmalakat nni iǧan deg ujenna, uřa d Mmis, mɣir Babas.
MAR 13:33 Xẓarem, ḥḍam, ẓaǧem, minzi war tessinem ca meřmi dd ɣa taweḍ řweqt nni.
MAR 13:34 Aqa-t am yijj n bnadem ittxeṣṣa as ad isafar, ijja taddart nnes, iwekkeř imsexxaren nnes s ṣṣulṭa, iwca i kuř ijj [zzaysen] řxedmet nnes, uca iɛřem as i uɛessas n tewwart maḥend ad iqqim ad iḥḍa.
MAR 13:35 Iwa ḥḍam xenni, minzi war tessinem ca meřmi i dd ɣa yas bab n taddart, ɣar uɛecci niɣ ɣar wezyen n ǧiřet niɣ ɣar usquqeɛ n uyaẓiḍ niɣ ɣar ṣṣbeḥ [zic],
MAR 13:36 ḥima, mařa dd-ittis deɣya, war kenniw ittif tᵉtteṭṭṣem.
MAR 13:37 Min d awem qqareɣ řexxu, qqareɣ t i marra: Faqem!”
MAR 14:1 Awarni i tnayen n wussan tuɣa teǧa [Tɣarṣt n] Useɛdu n [Řɛid n Weɣrum] břa Antun, u tuɣa imeqqranen n ikehhanen d imseřmaden n idlisen arezzun ict n tewwart maḥend ad t ṭṭfen s teḥraymect uca ad t nɣen.
MAR 14:2 Maca nitni nnan: “War ittiři di Řɛid, ḥima war ittiři uɣewwuɣ di řgens.”
MAR 14:3 Řami tuɣa iqqim [ɣar ṭṭabřa] di Bayt-Ɛanya di taddart n Cimɛun, wenni di iǧa řbarṣ, tusa-dd ict n temɣart, aqa-t ɣares ijj n uɣarraf n alabaster dayes zzect i wedhan zi řeɛṭur n ṣṣenbel teṣbeḥ, tiɣřa. Tarzem taziyyat nni, tfarreɣ i-tt x uzeǧif n Yasuɛ.
MAR 14:4 Tuɣa din ca n imeḥḍaren, xeyyqen aṭṭas deg ixef nsen x man aya, nnan: “Mayemmi aḍeyyeɛ n zzect-a i wedhan?
MAR 14:5 Minzi iři ad tᵉttwammenz [zzect-a] s ktar zi teřt-mya dinar uca xenni ad immewc i imezřaḍ.” Uca xeyyqen xas aṭṭas.
MAR 14:6 Maca Yasuɛ inna: “Jjem tt! Mayemmi xas tᵉttɛeddam? Aqa tegga dayi ijj n cɣeř icna.
MAR 14:7 Minzi imezřaḍ aqa aten řebda akidwem, tzemmarem ad kisen teggem řxar meřmi ma texsem, maca Necc war kidwem ttɣimiɣ řebda.
MAR 14:8 Nettat tegga min umi tzemmar. Aqa tizzar temseḥ arrimet inu s řeɛṭur i wenḍeř.
MAR 14:9 S tidett, Necc ad awem iniɣ: Mani ma i ɣa ittwabarreḥ s Řexbar-a Aṣebḥan zzayi di marra ddunect, ad xebbaren ɛawed x min tegga, d řidaret i nettat.”
MAR 14:10 [Xenni] iruḥ Yahuda Isxariyuṭi, ijjen zi tenɛac, ɣar imeqqranen n ikehhanen ḥima ad asen isellem Yasuɛ.
MAR 14:11 Umi sřin man aya, farḥen uca waɛden ad as wcen [tmenyat n] nnuqart. U netta tuɣa yarezzu ict n tewwart, ḥima ad [asen] t isellem.
MAR 14:12 Deg wass amezwar n [Weɣrum] břa Antun, umi ttnuman Wudayen ad ɣarṣen i [Tɣarṣt n] Useɛdu, nnan as imeḥḍaren nnes: “Mani texsed ad nraḥ ḥima ad nessewjed maḥend ad tecced [amensi n] Useɛdu?”
MAR 14:13 Issekk tnayen zeg imeḥḍaren nnes, inna asen: “Ruḥem ɣar tendint, u xzar, ad temsagarem ak-d ijj n weryaz, yarbu ict n teqbuct n waman. Ḍfarem t!
MAR 14:14 U mani ɣa yadef, inim i bab n taddart: ‘Amseřmad nneɣ iqqar: Mani teǧa tɣurfet ḥima ad cceɣ [amensi n] Useɛdu ak-d imeḥḍaren inu?’
MAR 14:15 [Xenni] netta ad awem immeř ijj n arwa imɣar sennej, issu, iɛdeř. Dinni i d aneɣ ɣa tesswejdem.”
MAR 14:16 Ffɣen imeḥḍaren, usin-dd ɣar tendint uca ufin [marra] am mammec tuɣa d asen inna, xenni sswejden i [umensi n] Useɛdu.
MAR 14:17 Ɣar uɛecci yusa-dd ak-d tenɛac [n rrusul] nnes.
MAR 14:18 Řami tuɣa qqimen [ɣar ṭṭabřa], ttᵉtten, inna Yasuɛ: “S tidett, Necc ad awem iniɣ, aqa ijjen zzaywem wenni kidi ittᵉtten, ad ayi iɣdar!”
MAR 14:19 Bdan ttecḍinen, nnan as ijjen awarni wenneɣni: “Ma d necc?”
MAR 14:20 Inna asen: “[Aqa-t] d ijjen zi tenɛac i issisnen akidi aɣrum di ṭṭebṣi.
MAR 14:21 Aqa Mmis n bnadem ad iraḥ mammec d as tura. Maca uct x weryaz nni zi ɣa ittwaɣdar Mmis n bnadem. Iḥřa as i weryaz nni mři war dd-ixřiq.”
MAR 14:22 Řami tuɣa ttᵉtten, iksi Yasuɛ aɣrum, ibarek i-t, yarẓa i-t uca iwca asen t, inna: “Ksim, ccem, aqa ta d Arrimet inu.”
MAR 14:23 Xenni iksi řkas, iqada, ibarek, uca iwca asen t, u marra idsen swin zzayes.
MAR 14:24 Inna asen: “Aqa ina d Idammen inu n Řɛahd n Jdid i ɣa ittwassizřen i waṭṭas [n iwdan].
MAR 14:25 S tidett, Necc ad awem iniɣ, Necc war sesseɣ ɛemmarṣ ɛad zi řɣiǧet n tzayart ař ass i di i tt ɣa sweɣ jdid di Tgeldit n AREBBI.”
MAR 14:26 Awarni řami ɣennjen nitni iẓři n ttesbiḥ, ffɣen ɣar wedrar n Zzitun.
MAR 14:27 Inna asen Yasuɛ: “Aqa marra kenniw ad dayi tenderfem di ǧiřet-a, minzi tura: ‘Aqa ad wteɣ Ameksaw uca ad ttwazuzzaren iḥuřiyyen.’
MAR 14:28 Maca awarni řami ttwassnekkareɣ, ad awem izwareɣ ɣar Ljalil.”
MAR 14:29 Inna as Buṭrus: “Waxxa ad [dayek] nderfen marra, necc war dayek ttnedrifeɣ ca.”
MAR 14:30 Inna as Yasuɛ: “S tidett, Necc ad ac iniɣ, aqa ass-a di ǧiřet-a, qbeř i ɣa issquqeɛ uyaẓiḍ tnayen n twařawin, ad ayi tenkared třata n twařawin.”
MAR 14:31 Maca netta tuɣa iqqar s tmijja ijehden ɛad aṭṭas: “Mařa ittxeṣṣa ad mmteɣ akidek, war Cek nekkareɣ, [a] Sidi inu!” Uca am netta, ammu i nnan uřa d nitni marra.
MAR 14:32 Usin-dd ɣar wemcan umi qqaren ‘Xitsimaniy’. Inna i imeḥḍaren nnes: “Qqimem da, ařami ẓuǧeɣ Necc”
MAR 14:33 [Xenni] iksi akides Buṭrus d Yaɛqub d Yuḥanna uca ibda ittnexřaɛ, iggʷed aṭṭas.
MAR 14:34 Inna asen: “Aqa řeɛmar inu icḍen ař řmewt. Qqimem da, teḥḍam!”
MAR 14:35 Yuyur cwayt ɣar zzat uca iwḍa ɣar temmurt, iẓẓuǧ ḥima, mařa iɛeddeř, ad xas teɛdu tsaɛɛet nni.
MAR 14:36 Inna: “Baba, Baba inu, kuřci tzemmared xas! Ksi xafi řkas-a, maca war ittiři min xseɣ Necc, maca min texsed Cek.”
MAR 14:37 Uca idweř-dd, yufa i-ten ṭṭṣen. Inna as i Buṭrus: “A Cimɛun, ma aqa cek tᵉtteṭṭṣed? Ma war tzemmared ad teḥḍid uřa d ict n tsaɛɛet?
MAR 14:38 Ḥḍam, ẓaǧem, ḥima war tᵉttidfem deg ujarreb. Arruḥ aqa iwjed, maca ddat aqa teḍɛef.”
MAR 14:39 Uca yuyur ɛawed, iẓẓuǧ, iɛawed i wawařen nni d ijjen.
MAR 14:40 Idweř-dd ɛawed, yusa-dd [ɣarsen] twařa nneɣni yufa i-ten ṭṭṣen, maɣar tuɣa tiṭṭawin nsen deqřent u nitni war ssinen mammec xas dd ɣa yarren.
MAR 14:41 Uca idweř-dd Netta ɣarsen twařa wiss třata, inna asen: “Ṭṭṣem řexxu, tareyyḥem! Aqa yudes-dd uneggar, tiweḍ-dd tsaɛɛet. Xzarem, Mmis n bnadem ad immewc deg ifassen n imednab.
MAR 14:42 Kkarem, ad nraḥ. Xzarem, aqa da wenni d ayi ɣa isellmen, aqa yudes-dd.”
MAR 14:43 Am tuɣa [ɛad] issawař, yusa-dd Yahuda, ijjen zi tenɛac. Tuɣa akides iryazen aṭṭas s řesyuf d iɛumad. Usin-dd nitni zeg imeqqranen n ikehhanen d imseřmaden n idlisen d imɣaren [n řgens].
MAR 14:44 Uca wenni t i ɣa iɣdaren tuɣa ittegg asen ict n řeɛřamet, iqqar: “Wenni i ɣa ssudmeɣ d wenni Netta. Ṭṭfem t uca awyem t-i-dd.”
MAR 14:45 Deɣya yuyur ɣares, inna: “[A] Amseřmad inu, [a] Amseřmad inu!”, uca issudem i-t.
MAR 14:46 Ssarsen xas ifassen uca ṭṭfen t.
MAR 14:47 Ijjen zeg inni din ibedden ijbed ssif [nnes], iwta amsexxar n arrays n ikehhanen, iqess as amezzuɣ.
MAR 14:48 Yarra-dd Yasuɛ, inna asen: “Ma axmi x yijj n uqṭaṭɛiy i teffɣem xafi s řesyuf d iɛumad, ḥima ad ayi tᵉṭṭfem?
MAR 14:49 Kuř ass tuɣa ayi akidwem di Zzawect Tameqqrant sseřmadeɣ, war d ayi tᵉṭṭifem. Maca man aya imsar, ḥima ad ttwakemmřent Tira [Iqeddsen].”
MAR 14:50 [Xenni] jjin t imeḥḍaren nnes uca arewřen.
MAR 14:51 Iḍfar i-t ijj n uɛezri, tuɣa yarḍ ict n tecḍaḍt [n řeqṭen waha] x tqeddit nnes, uca ṭṭfen t-i-dd.
MAR 14:52 Maca netta ijja tacḍaḍt uca yarweř zzaysen d aɛaryan.
MAR 14:53 Iwyen Yasuɛ ɣar Qayafa, arrays n ikehhanen, uca munen-dd ɣares marra imeqqranen n ikehhanen d imɣaren [n řgens] d imseřmaden n idlisen.
MAR 14:54 Tuɣa Cimɛun iḍfar i-t-i-dd zi řaggʷaj, ɣar daxeř n řemraḥ n arrays n ikehhanen, uca tuɣa iqqim jar iɛessasen, ittweqqaḥ ixef nnes ɣar tmessi.
MAR 14:55 Tuɣa imeqqranen n ikehhanen d marra Jmaɛet [Tameqqrant] arezzun cchadet ḍidd i Yasuɛ ḥima ad t nɣen, maca war tt ufin,
MAR 14:56 minzi aṭṭas tuɣa xas cehhden s ẓur, [maca] cchadat nsen war ttmeřqint.
MAR 14:57 [Xenni] kkaren ca uca cehden xas s ẓur, nnan:
MAR 14:58 “Neccin nesřa as umi inna: ‘Ad hedmeɣ Zzawect Tameqqrant i ittwaggen s ifassen uca di třata n wussan ad bniɣ icten nneɣnit i war ittwaggen s ifassen.’”
MAR 14:59 [Maca] uřa ammu war ttmeřqint ca cchadat nsen.
MAR 14:60 Xenni ikkar arrays n ikehhanen di řwesṭ [nsen] uca isseqsa Yasuɛ, inna [as]: “Ma war dd-tarrid s ca? Min xak cehhden yina?”
MAR 14:61 Maca Netta isqar, war dd-yarri s ca. Isseqsa t arrays n ikehhanen ɛawed, inna as: “Ma Cek d Lmasiḥ, Mmis n Lmubarek?”
MAR 14:62 Inna as Yasuɛ: “Aqa d NECC! U kenniw ad tẓarem Mmis n bnadem ittɣima x ufusi n jjehd, ad dd-yas s iseynuten n ujenna.”
MAR 14:63 Icarreg arrays n ikehhanen tcamir nnes, inna: “Mayemmi neḥdaj ɛad řechud!
MAR 14:64 Aqa tesřim aceqqef [nni]! Min dd awem iḍharen?” Uca marra ḥekmen xas belli isdaheǧ řmewt.
MAR 14:65 Ca [zzaysen] bdan ssusufen xas, ttřeḥḥafen i uɣembub nnes, ccaten t s řpuniyyat, qqaren as: “Nabb!” Uca wtin t iɛessasen x uqabsi nnes.
MAR 14:66 Řami tuɣa Cimɛun di řemraḥ swadday, tusa-dd [din] icten zi tiyya n arrays n ikehhanen.
MAR 14:67 Umi t teẓra ittweqqaḥ, texzar dayes, tenna: “Aqa tuɣa cek ak-d Yasuɛ Nnaṣiri.”
MAR 14:68 Maca netta inkar, inna: “War [t] ssineɣ, war fhimeɣ min teqqared.” Iffeɣ barra ɣar tesqift n tewwart, uca řexdenni issquqeɛ uyaẓiḍ.
MAR 14:69 Umi t teẓra tayya ijj n umur nneɣni, tebda teqqar i yinni din ibedden: “Aqa wa d ijjen zzaysen!”
MAR 14:70 Maca netta inkar i umur nneɣni. Cwayt xenni nnan inni tuɣa din ibedden i Buṭrus: “S tidett, cek zzaysen nican, minzi cek ɛawed d Ajalili. Řḥarḍ nnec am wenni nsen.”
MAR 14:71 Ibda ineɛɛeř ixef nnes, ittjjaǧa: “War ssineɣ Bnadem-a mixef tessawařem.”
MAR 14:72 Řexdenni issquqeɛ uyaẓiḍ wiss martayen. Ifekkar Cimɛun deg wawař i inna Yasuɛ: “Qbeř i ɣa issquqeɛ uyaẓiḍ wiss martayen, ad ayi tenkared třata n twařawin.” Xenni ibda ittru [aṭṭas].
MAR 15:1 Deɣya ɣar ṣṣbeḥ zic mcawaren imeqqranen n ikehhanen ak-d imɣaren [n řgens] d imseřmaden n idlisen d marra Jmaɛet [Tameqqrant]. Nitni carfen Yasuɛ, iwyen t uca sellmen t i Pilaṭus.
MAR 15:2 Isseqsa i-t Pilaṭus: “Ma Cek d Ajeǧid n Wudayen?” Yarra-dd xas, inna as: “Cek tennid [t].”
MAR 15:3 Tuɣa imeqqranen n ikehhanen ttcetcan zzayes zeg waṭṭas n tmesřayin.
MAR 15:4 Isseqsa t Pilaṭus ɛawed, inna as: “Ma war dd-tᵉttarid s ca? Xzar, aṭṭas n yinni xak ittcetcan!”
MAR 15:5 War dd-yarri Yasuɛ s walu, ařami itebhet Pilaṭus.
MAR 15:6 Innum iḍeǧeq i ijj n umeḥbus di kuř řɛid, wenni ixsen nitni.
MAR 15:7 Tuɣa din ijjen umi qqaren Bar-Abbas, ḥebbsen t ak-d imɣewwɣen, inni inɣin ijjen deg uɣewweɣ.
MAR 15:8 Isɣuyy řɣaci uca nitni bdan ttᵉttarren zzayes ḥima ad igg am mammec tuɣa innum ittegg i nitni.
MAR 15:9 Yarra-dd Pilaṭus, inna: “Ma texsem ad awem dd-arxuɣ i Ujeǧid n Wudayen?”
MAR 15:10 Minzi tuɣa issen belli imeqqranen n ikehhanen aqa sellmen t zi řeḥsed.
MAR 15:11 Maca imeqqranen n ikehhanen ɛarnen řɣaci, maḥend [ad ttaren] ad asen dd-iḍřeq i Bar-Abbas.
MAR 15:12 Pilaṭus inna asen: “Min texsem ad ggeɣ s wenni umi tᵉttřaɣam Ajeǧid n Wudayen?”
MAR 15:13 Sɣuyyen ɛawed: “Ṣellb i-t!”
MAR 15:14 Inna asen Pilaṭus: “Man tuɛeffna i igga?” Xenni arnin di tɣuyyit ɛad ktar: “Ṣellb i-t!”
MAR 15:15 Am tuɣa ixs Pilaṭus ad issarḍa řɣaci, iḍřeq i Bar-Abbas, [maca] isellem asen Yasuɛ, awarni řami t hettken s urekkuḍ, ḥima ad t ṣellben.
MAR 15:16 Gewwden t iɛeskariyyen ɣar daxeř n řemraḥ n Taddart n Ccraɛ, [umi qqaren ‘Prituriyum’,] uca ssmunen marra řkumpaniyyet n řɛeskar.
MAR 15:17 Ssyarḍen as [ijj n werruḍ] d azeggʷaɣ, muden as ijj n ttaj s isennanen uca qqnen as-t,
MAR 15:18 bdan ttseǧamen xas, qqaren as: “Azul xak, a Ajeǧid n Wudayen!”
MAR 15:19 Tuɣa ccaten t ɣar uzeǧif s yijj n weɛmud n uɣanim, ssusufen xas uca uḍaren x ifadden nsen, ɛebden t.
MAR 15:20 Awarni řami t sseḥqaren, kksen as aseřham azeggʷaɣ uca ssyarḍen as arruḍ nnes, xenni ssuffɣen t ḥima ad t ṣellben.
MAR 15:21 Ḥṣaren ijjen wenni dd-ikkin ssenni am dd-yusa zeg iyyar, Cimɛun zi Qayrawan, babas n Aliksandir d Rufus, ḥima ad as yarbu ṣṣalib.
MAR 15:22 Iwyen [Yeccu] ɣar wemcan [umi qqaren] ‘Juljuta’, min ixs ad yini ‘Taceqquft’.
MAR 15:23 Wcin as binu ixeǧḍen s mirru [d amarzag], ḥima ad t isuw, maca Netta war ixs ad t isuw.
MAR 15:24 Umi t ṣellben, bḍan arruḍ nnes, ggin xas akeccuḍ x min ɣa iksi kuř ijj [zzaysen].
MAR 15:25 Tuɣa tasaɛɛet d třata, [aqa-tt d tesɛa n ṣṣbeḥ], umi t ṣellben.
MAR 15:26 Ssibbet n řmewt nnes aqa-tt di tira-ya [sennej nnes]: ‘Wa d Ajeǧid n Wudayen’.
MAR 15:27 Ṣellben akides tnayen n ixewwanen, ijjen x ufusi nnes, wenneɣni x uzeřmaḍ nnes.
MAR 15:28 Ammu i ttwakemmřent Tira [Iqeddsen] i iqqaren: “Ittwaḥseb ak-d inni war iseggden.”
MAR 15:29 Inni ssenni dd-ittekken, tuɣa ttceqqafen dayes, tthezzan izeǧifen nsen, nnan: “A Cek wenni i ɣa ihedmen Zzawect Tameqqrant uca ad tt tebnid [ɛawed] di třata n wussan,
MAR 15:30 senjem Ixef nnec, hwa-dd zi ṣṣalib!”
MAR 15:31 Ammu i t sseḥqaren ɛawed imeqqranen n ikehhanen ak-d imseřmaden n idlisen, nnan: “Tuɣa issenjem inneɣni, maca war izemmar ad issenjem Ixef nnes.
MAR 15:32 Ejj Lmasiḥ, Ajeǧid n Israil, ad dd-ihwa řexxu zi ṣṣalib, ḥima ad nẓar uca ad dayes namen.” Uřa d yinni ittwaṣellben akides, kkwaren t.
MAR 15:33 Umi dd-tiweḍ tsaɛɛet setta, [aqa-tt d ḍḍhur], tewḍa-dd taǧest x temmurt marra ař tesɛa, [aqa-tt d třata n uɛecci].
MAR 15:34 Di tsaɛɛet tesɛa isɣuy Yasuɛ s tmijja tejhed, inna: “Il, Il, lmana cabaqtani?”, min ixs ad yini: “[A] AREBBI inu, [a] AREBBI inu, mayemmi dayi tsemḥed?”
MAR 15:35 Ca zeg inni [din] ibedden, umi sřin aya, nnan: “Aqa Netta iřaɣa i Iliya!”
MAR 15:36 Yuzzeř-dd ɣares ijjen, issuff ict n spunxa s řxeǧ, igga i-tt x uɣanim, iwca as ḥima ad isuw. Maca nitni nnan: “Raja! Ejj aneɣ ad nẓar ma ad dd-yas Iliya ḥima ad t-i-dd-issehwa.”
MAR 15:37 [Xenni] isɣuy Yasuɛ s ict n tmijja tejhed uca isellem [arruḥ nnes].
MAR 15:38 Ařeḥḥaf n wadaf ɣar Zzawect Tameqqrant ittwacarreg x tnayen zi sennej ɣar swadday.
MAR 15:39 Umi iẓra řqebṭan n mya i [din] ibedden zzates, isɣuyyu ammu s jjehd uca [xenni] ibedd usuffeɣ n nnefs, inna: “S tidett tuɣa Bnadem-a d Mmis n AREBBI!”
MAR 15:40 Tuɣa din ɛawed timɣarin xezzarent i-dd zi řaggʷaj, jar asent ɛawed Maryam n Majdala d Maryam, yemmas n Yaɛqub, amaẓuẓ, u n Yusis, d Salumi.
MAR 15:41 tinni t-i-dd-iḍfaren, sexxarent xas umi t tuɣa di Ljalil. Tuɣa din uřa d aṭṭas n timɣarin nneɣnit tinni tuɣa akides i dd-igeɛɛden ɣar Urcalim.
MAR 15:42 Řami dd-tiweḍ tmeddit n Usewjed, [tameddit] nni iǧan qbeř i ssebt,
MAR 15:43 yusa-dd Yusuf zi Ramta, ijj n umcawar icennɛen n Jmaɛet [Tameqqrant], wenni tuɣa ittrajan Tageldit n AREBBI. Uca netta izɛem ad yadef ɣar Pilaṭus maḥend ad as ittar arrimet n Yasuɛ.
MAR 15:44 Itebhet Pilaṭus umi immut ammu deɣya. Iřaɣa-dd i řqebṭan n mya, isseqsa t, ma immut qbeř řweqt.
MAR 15:45 Umi ifhem man aya [zi řqebṭan n mya], iwca arrimet i Yusuf.
MAR 15:46 Isɣa Yusuf řecfen n řeqṭen [azdad], iksi t [zi ṣṣalib], icfen i-t [di řecfen nni], issars i-t deg wenḍeř i xebcen di sseǧaḥ uca isseqnunni ict n teṣḍart x tewwart n wenḍeř.
MAR 15:47 Tuɣa Maryam n Majdala d Maryam, yemmas n Yusi, ẓrint mani t ssarsen.
MAR 16:1 Umi iɛdu ssebt, tesɣa Maryam n Majdala d Maryam, [yemmas] n Yaɛqub, d Salumi řeɛṭur ḥima ad t dehnent.
MAR 16:2 Ɣar ṣṣbeḥ zic deg [wass] amezwar n ssimana iwḍent-i-dd ɣar wenḍeř, ařami dd-tenqar tfuct.
MAR 16:3 Nnant jar asent: “Wi d aneɣ i ɣa isseqnunnyen taṣḍart nni iǧan x wadaf n wenḍeř?”
MAR 16:4 Řami xzarent, ẓrint aqa taṣḍart tᵉttwasseqnunni [zeg wenḍeř], waxxa tuɣa temɣar aṭṭas.
MAR 16:5 Řami udfent ɣar [yifři n] wenḍeř, ẓrint ijj n ubřiɣ iqqim ɣar uɣezdis afusi, yarḍ arruḍ d acemřař, uca nitenti nnxeřɛent.
MAR 16:6 [Maca] netta inna asent: “War ttnexřiɛent ca! Kennint tarezzunt x Yasuɛ Nnaṣiri wenni ittwaṣellben. Aqa Netta ikkar, war da iǧi, xzarent, aqa amcan mani t ssarsen.
MAR 16:7 Maca ruḥent, inint i imeḥḍaren nnes uřa i Buṭrus, aqa ad awem izwar ɣar Ljalil. Dinni ad t tẓarem am mammec tuɣa i d awem inna.”
MAR 16:8 Ffɣent [deɣya] uca arewřent zeg wenḍeř, minzi tqebs i-tent tarjijit d ddehcan, uca war t nnint i ḥed, minzi tuɣa ggʷedent.
MAR 16:9 Ɣar ṣṣbeḥ zic deg [wass] amezwar n ssimana ikkar-dd uca iḍhar-dd d amezwaru i Maryam n Majdala, tenni zi tuɣa issuffeɣ sebɛa n ccwaṭen.
MAR 16:10 Tanita truḥ uca txebbar aya i yinni tuɣa akides iǧan, inni tuɣa iceḍnen u ttrun.
MAR 16:11 Řami ina sřin belli Netta aqa iddar uca iban asent, war zzaysent uminen.
MAR 16:12 Awarni aya iban-dd s yijj n waddud nneɣni i tnayen zzaysen, umi tuɣa gguren nitni ɣar ijj n dcar.
MAR 16:13 Uřa d ina ruḥen ɛawed uca xebbaren inneɣni, maca war uminen uřa d ina.
MAR 16:14 Ɣar uneggar iban-dd i ḥiṭac ařami tuɣa qqimen [ɣar ṭṭabřa] uca iɛayar i-ten zi ssibbet n tikkest n l’iman nsen u zi ssibbet n řeqsaḥet n wuřawen nsen, minzi war uminen zeg inni t iẓrin awarni řami dd-ittwassnekkar Netta.
MAR 16:15 Inna asen: “Ruḥem ɣar ddunect marra, barrḥem s Řexbar Aṣebḥan di marra min dd-ittwaxeřqen.
MAR 16:16 Wenni yuminen u ittwasseɣḍeṣ, aqa iddar, maca wenni war yuminen, aqa ittwaḥaseb.
MAR 16:17 Tina d řeɛřamat i ɣa iḍfaren inni yuminen: aqa nitni ad ssuffɣen ccwaṭen s Yisem inu, ad ssiwřen s iřsawen n jdid,
MAR 16:18 ad ksin ifiɣran s ifassen nsen u mařa swin min ineqqen, war ten iḍḍarri ca man aya, uca ad ssarsen ifassen nsen x imehřac, ad ggenfan.”
MAR 16:19 Awarni řami kidsen issiweř, immeksi Siditneɣ Yasuɛ ɣar ujenna uca issɣim Ixef nnes x ufusi n AREBBI.
MAR 16:20 Maca nitni ffɣen uca barrḥen di kuř amcan, u Siditneɣ tuɣa iɛawen i-ten uca issars řxeṭ nnes x wawařen nsen s řeɛřamat i yeggin. Amin. Aneggar n L’Injil Iqeddsen am mammec t ibarreḥ Markus.
LUK 1:1 Umi aṭṭas idsen tuɣa nwan ad arin imezruyen x tmesřayin i zi nettwasseqneɛ
LUK 1:2 - am mammec tent i d aneɣ xebbaren nitni, inni iẓrin Awař zeg umezwaru u tuɣa aten d imsexxaren nnes -
LUK 1:3 iban ayi-dd uřa i necc, minzi ḍfareɣ marra timesřayin mliḥ zeg umezwaru, ḥima ad ac dd-ariɣ kuřci s usettef, [a] Tiyufilis iɛizzen,
LUK 1:4 ḥima ad tessned [mliḥ] tidett n wawařen nni zi tᵉttwassřemded.
LUK 1:5 Tuɣa din deg wussan n Hirudus, ajeǧid n Yahudiyya, ijj n ukehhan, qqaren as Zakariyya. Netta zi terbiɛt [n ikehhanen] n taddart n Abiya uca tamɣart nnes tuɣa-tt zi tarrawt n Harun, qqaren as Iliṣabit.
LUK 1:6 Tuɣa s tnayen idsen d imseggaden ɣar AREBBI, ḍfaren marra tiweṣṣa u uyuren [di řatarat n] tsegda n SIDI břa řɛib.
LUK 1:7 War tuɣi ɣarsen bu uḥenjir minzi Iliṣabit tuɣa war dd-tᵉttiruw ca u tuɣa s tnayen idsen mɣaren deg wussan.
LUK 1:8 Aqa imsar, řami tuɣa [Zakariyya] ittegg řxedmet n ukehhan qibač i AREBBI x nnubet n terbiɛt nnes [n ikehhanen],
LUK 1:9 aqa yusa-dd dayes ukeccuḍ ɛlaḥsab lqaɛida n tukehhant, ḥima ad iqeddem tawhibt n řebxur, uca yudef netta ɣar Zzawect Tameqqrant n SIDI.
LUK 1:10 Tuɣa qaɛ abarru n řgens ittẓaǧa barra di tsaɛɛet n tewhibt n řebxur.
LUK 1:11 [Řexdenni] iḍḥar as-dd lmalak n SIDI i Zakariyya nni tuɣa ibedden x ufusi n uɛalṭar n řebxur.
LUK 1:12 Umi t iẓra Zakariyya, innexřeɛ uca iggʷed.
LUK 1:13 Inna as lmalak: “War tteggʷed ca, [a] Zakariyya, minzi tᵉttwaqbeř tẓaǧit nnec. Aqa Iliṣabit, tameṭṭut nnec, ad ac dd-taruw aḥenjir, ad t tsemmid Yuḥanna.
LUK 1:14 Ad tfarḥed u ad tesřiwřewed uca aṭṭas n iwdan ad farḥen i wexřaq nnes,
LUK 1:15 minzi ad yiři d ameqqran ɣar SIDI, war isess binu uřa d ccrab. Ad ittwaccur s Arruḥ Iqeddsen deg uɛeddis n yemmas,
LUK 1:16 uca ad dd-yarr aṭṭas n iḥenjiren n Israil ɣar SIDI, AREBBI nsen.
LUK 1:17 Netta ad yuyur zzates s arruḥ d jjehd n unabi Iliya, ḥima ad dd-yarr uřawen n ibabaten ɣar tarrawt nsen u inni war yuminen ɣar tussna n Umsegged, ḥima ad issewjed ijj n řgens ikmeř i SIDI.”
LUK 1:18 Yarra-dd Zakariyya x lmalak: “Mammec i ɣa ggeɣ ad fehmeɣ aya, minzi necc d awessar uřa d tamɣart inu temɣar aṭṭas!”
LUK 1:19 Yarra-dd lmalak, inna as: “Necc d Jibril, wenni ibedden zzat i AREBBI, ttwassekkeɣ-dd ḥima ad kik ssiwřeɣ, ad cek xebbareɣ řexbar-a wanita aṣebḥan.
LUK 1:20 Zi řexxu ad tegnud u war tzemmared ad tessiwřed ař ass min di i ɣa imsar uya, minzi war tumined ca s wawařen inu nni i ɣa ittwakemmřen di řweqt nsen.”
LUK 1:21 Tuɣa řgens [di barra] ittraja Zakariyya uca [iwdan] ttbehten umi iɛeṭṭař daxeř di Zzawect Tameqqrant.
LUK 1:22 Umi dd-iffeɣ Zakariyya, tuɣa war izemmar ad kisen issiweř. Xenni fehmen belli iban as-dd ca n řewḥiy di Zzawect Tameqqrant. Tuɣa ittceyyar asen, [maca] iqqim ignu.
LUK 1:23 Umi kemmřen wussan n řxedmet [n tukehhant] nnes, iɛqeb-dd ɣar taddart nnes.
LUK 1:24 Awarni ussan nni teksi tamɣart nnes Iliṣabit s ddeyset. Teffar ixef nnes xemsa n iyuren, uca tebda teqqar:
LUK 1:25 “Ammu i zzayi igga SIDI deg wussan nni umi ɣari dd-ixzar, ḥima ad xafi ikkes aseḥqar n iwdan.”
LUK 1:26 Deg uyur wiss setta issekk-dd AREBBI lmalak Jibril ɣar ict n tendint di Ljalil, qqaren as Nnaṣira,
LUK 1:27 ɣar ict n teɛzarect d tanexḍabt ɣar weryaz zi taddart n [ujeǧid] Dawud, qqaren as Yusuf. Tuɣa isem n teɛzarect nni Maryam.
LUK 1:28 Yudef-dd ɣares lmalak, inna as: “Sřam xam, [a] tamimunt! Siditneɣ akidem! Cem aqa tᵉttwabarked jar temɣarin!”
LUK 1:29 Umi t teẓra, tennexřeɛ zeg wawař nnes uca txarreṣ min ixs ad yini sřam-a.
LUK 1:30 Inna as lmalak: “War tteggʷed ca, [a] Maryam, minzi tufid arḍa ɣar AREBBI.
LUK 1:31 Ad teksid ddeyset uca ad tarwed Aḥenjir, ad t tsemmid ‘Yeccu’.
LUK 1:32 Wanita ad yiři d ameqqran, ad xas ttřaɣan Mmis n Umɛuǧi x kuřci, u ad as iwc SIDI AREBBI řɛarc n jeddis Dawud.
LUK 1:33 Netta ad iḥkem x taddart n Yaɛqub i řebda, war ittiři uneggar i Tgeldit nnes.”
LUK 1:34 Tenna Maryam i lmalak: “Mammec i ɣa yiři uya am war mřiceɣ ca ak-d weryaz?”
LUK 1:35 Yarra-dd lmalak, inna as: “Arruḥ Iqeddsen ad dd-yas uca jjehd n Umɛuǧi x kuřci ad xam yarsa. S uyenni ad yiři wenni i dd ɣa ixeřqen zzayem d amqeddas u ad t semman Mmis n AREBBI.
LUK 1:36 Xzar, Iliṣabit, řaǧ nnem, nettat ɛawed aqa-tt s ddeyset di tewsar nnes. Aqa d ayur wiss setta i nettat umi qqaren ‘war tᵉttiruw!’
LUK 1:37 Minzi war din min yewɛaren i AREBBI.”
LUK 1:38 Tenna Maryam: “Xzar, necc d tayya n SIDI, ad ayi imsar ɛlaḥsab awař nnec.” [Xas uca] yuyur xas lmalak.
LUK 1:39 Deg wussan nni tekkar Maryam, truḥ deɣya ɣar idurar, ɣar ict n tendint n Yahudiyya.
LUK 1:40 Tudef ɣar taddart n Zakariyya, tseǧem x Iliṣabit.
LUK 1:41 Umi tesřa Iliṣabit i sřam n Maryam, imsar aqa inhezz useymi deg uɛeddis nnes, uca tedweř Iliṣabit teccur s Arruḥ Iqeddsen.
LUK 1:42 Nettat tesɣuy s jjehd, tenna i Maryam: “Cem aqa tᵉttwabarked jar temɣarin, tᵉttwabarek řɣiǧet n uɛeddis nnem!
LUK 1:43 Zi manis ɣari aya, ḥima ad ɣari dd-tas yemmas n Sidi inu?
LUK 1:44 Maɣar řami dd-tiweḍ tmijja n sřam nnem ɣar umezzuɣ inu, inhezz useymi deg uɛeddis inu s řefraḥet tameqqrant.
LUK 1:45 Sseɛd n tenni yumnen aqa ad ittwakemmeř min d as ittwanna zi SIDI.”
LUK 1:46 Tenna Maryam: “Řeɛmar inu issemɣara di SIDI,
LUK 1:47 ifarḥ buḥbeř inu s AREBBI, wenni d ayi itticen Tudart,
LUK 1:48 s minzi ixzar ɣar umeddur awaḍeɛ n tayya nnes. Xzar, zi řexxu marra arrawen ad ayi semman ‘D tamimunt!’
LUK 1:49 Minzi wenni d Amzemmar igga dayi timesřayin mɣarent, aqa Isem nnes iqeddes.
LUK 1:50 Arreḥmet nnes x tarwa d jjiřat, x yinni t ittweqqaren.
LUK 1:51 S uɣiř nnes aqa yiwi-dd řeɣřeb. Ifartek inni iɛeffaren deg ixarriṣen n wuřawen nsen.
LUK 1:52 Inni ɣar teǧa ṣṣulṭa iɣḍeř i-ten zi řekrasi nsen, imwaḍɛen issgeɛɛed i-ten.
LUK 1:53 Issjiwen s řxar inni iǧuẓen, isqad aytbab n wagřa s ifassen xwan.
LUK 1:54 Amsexxar nnes Israil, iɛawen i-t, aqa iɛqeř x arreḥmet nnes,
LUK 1:55 am mammec issiweř ak-d řejdud nneɣ, ak-d Ibrahim d zzariɛet nnes, i řebda.”
LUK 1:56 Tekka Maryam ɛřaḥař třata n iyuren ɣar Iliṣabit, [xenni] teɛqeb ɣar taddart nnes.
LUK 1:57 Řami dd-tiweḍ řweqt n Iliṣabit, ḥima ad dd-taruw, tejj-dd aḥenjir.
LUK 1:58 Sřin jjiran d řaǧ nnes belli AREBBI isscen as arreḥmet nnes aṭṭas, farḥen nitni akides.
LUK 1:59 Deg wass wiss tmenya usin-dd, ḥima ad xetnen i uḥenjir uca semman t s yisem n babas Zakariyya.
LUK 1:60 [Maca] tᵉṭṭef yemmas deg wawař, tenna: “Lla. war ittwasemma ammu, maca ad ittwasemma Yuḥanna.”
LUK 1:61 Nnan as: “War iǧi ḥed zi řaǧ nnem ttřaɣan as-dd s yisem-a.”
LUK 1:62 [Xenni] ciyyaren ɣar babas, mammec ixs ad t isemma.
LUK 1:63 Ittar tařwiḥt uca yura xas, inna: “Isem nnes Yuḥanna.” Uca tbehten iwdan marra.
LUK 1:64 Řexdenni yarzem aqemmum nnes uca [ittwaḍřeq] yiřes nnes uca issiweř [ɛawed], ibarek AREBBI.
LUK 1:65 Tehwa-dd tiggʷudi x marra jjiran nsen, ssiwřen aṭṭas x marra man aya di kuř idurar n Yahudiyya.
LUK 1:66 Marra inni isřin i man aya, xemmřen t deg wuřawen nsen, nnan: “Aqa min ɣa yiři uḥenjir-a?” Tuɣa afus n SIDI akides.
LUK 1:67 Ittwaccur Babas Zakariyya s Arruḥ Iqeddsen, inebba, inna:
LUK 1:68 “Ad ittwabarek SIDI, AREBBI n Israil, minzi ifekkar di řgens nnes uca yiwi asen-dd asenjem.
LUK 1:69 Issgeɛɛed aneɣ-dd ijj n yicc n usenjem di taddart n Dawud, amsexxar nnes,
LUK 1:70 - am mammec tuɣa d aneɣ inna s uqemmum n inabiyyen iqeddsen nnes, inni din tuɣa zeg wecḥař uya -
LUK 1:71 ḥima ad aneɣ ifekk zi řɛedyan nneɣ, zeg ifassen n yinni i d aneɣ icarrhen.
LUK 1:72 Netta igga arreḥmet nnes i řejdud nneɣ, aqa iɛqeř x řɛuhud nnes iqeddsen,
LUK 1:73 x tajaǧit tenni ijjuǧ i Ibrahim, jedditneɣ, ḥima ad d aneɣ iwc,
LUK 1:74 maḥend ad nettwafekk zeg ifassen n řɛedyan nneɣ, ad as nsexxar břa tiggʷudi,
LUK 1:75 s tqeddast d tsegda, marra ussan n tudart nneɣ.
LUK 1:76 I cek, a aḥenjir, ad ac ttřaɣan anabi n Umɛuǧi x kuřci, minzi ad traḥed zzat i uɣembub n SIDI, ḥima ad tesswejded abrid nnes,
LUK 1:77 ḥima ad iwc i řgens nnes tussna n Tudart, i iǧan s weɣfar n ddnub nsen,
LUK 1:78 s řaǧaɣ n arreḥmet n AREBBI nneɣ, i zi xaneɣ i ɣa iḥinn řefjar zi řuɛřa,
LUK 1:79 ḥima ad issirɣ tfawt i yinni iqqimen di taǧest d tiři n řmewt, ḥima ad igewwed iḍaren nneɣ deg webrid n řehna.”
LUK 1:80 Am iggam uḥenjir, yarenni dayes Arruḥ u tuɣa-t di řexřa ař ass i di dd-iḍhar i Israil.
LUK 2:1 Deg wussan nni iffeɣ-dd ijj n řumur zi qayṣar Uɣustus ḥima ad ttwazemmemen marra imezdaɣ n řeḥkamet nnes.
LUK 2:2 Azemmem-a tuɣa-t d amezwaru umi tuɣa Qiriniyus iḥekkem di Suriya.
LUK 2:3 Kuř ijjen iřuḥ ɣar tendint nnes, ḥima ad ittwazemmem dinni.
LUK 2:4 Igeɛɛed ɛawed Yusuf zi Nnaṣira, ict n tendint di Ljalil, ɣar Yahudiyya, ɣar tendint n Dawud tenni umi qqaren Bayt-Laḥm umi t tuɣa zi taddart u zi jjiř n Dawud,
LUK 2:5 ak-d Maryam, tanexḍabt nnes, tenni tuɣa s ddeyset, ḥima ad ittwazemmem dinni.
LUK 2:6 Uca imsar, ařami ten tuɣa dinni, qefřen wussan nnes ḥima ad taru.
LUK 2:7 Turuw-dd Mmis amenzu, tessenneḍ i-t di teḥřucin uca tessars i-t di řkuri, minzi war ɣarsen bu wemcan mani [zemmaren] ad qqimen.
LUK 2:8 Di jjwayeh nni tuɣa din ca n imeksawen, ḥeṭṭan tiḥimriwin nsen di ǧiřet.
LUK 2:9 U xzar, lmalak n AREBBI ibedd-dd ɣarsen uca aɛuǧi n SIDI issarɣ xasen, inneḍ asen, uca třeḥḥef asen ict n tiggʷudi temɣar.
LUK 2:10 Inna asen lmalak nni: “War tteggʷedem ca, ad awem barrḥeɣ řexbar aṣebḥan, ad tiři řefraḥet temɣar i ddunect marra.
LUK 2:11 Aqa ittwaxřeq awem-dd ass-a Umsenjem, SIDI, Lmasiḥ, di tendint n Dawud.
LUK 2:12 D wa d awem i ɣa yiřin d řeɛřamet: Ad tafem Aseymi ittwanneḍ di teḥřucin, immars di řkuri.”
LUK 2:13 Řexdenni iban-dd ak-d lmalak ijj n řɣaci ameqqran n řɛeskarat n ujenna ttṣebbaḥen AREBBI, qqaren:
LUK 2:14 “Aɛuǧi i AREBBI di řuɛřa, řehna x temmurt, u asitem d aṣebḥan i yewdan.”
LUK 2:15 Umi xasen uyurent lmalakat ɣar ujenna, ssiwřen imeksawen ak-d wayawya, nnan: “Ejj aneɣ ad nraḥ ɣar Bayt-Laḥm, ḥima ad nẓar min imsaren min xef d aneɣ issargeb SIDI.”
LUK 2:16 Usin-dd s tazřa, ufin Maryam d Yusuf d Useymi immars di řmedwed.
LUK 2:17 Umi t ẓrin, ɛawden awař i d asen ittwannan x Uḥenjir.
LUK 2:18 Marra inni isřin, tbehten s min d asen nnan imeksawen.
LUK 2:19 Maca Maryam tuɣa txemmeř marra awařen-a, tᵉttxarraṣ daysen deg wuř nnes.
LUK 2:20 Xenni ɛeqben-dd imeksawen, ttṣebbaḥen u ssemɣaran di AREBBI x marra min sřin d marra min ẓrin, [nican] am mammec d asen tuɣa ittwanna.
LUK 2:21 Umi kemmřen tmenya n wussan, ḥima ad ittwaxten Useymi, semman t ‘Yeccu’, am mammec tuɣa t isemma lmalak qbeř i ɣa ittwaksi deg uɛeddis.
LUK 2:22 Umi kemmřen wussan n usizdeg nsen ɛlaḥsab Ccariɛa n Musa, iwyen t ɣar Urcalim, ḥima ad t qeddmen zzat i SIDI
LUK 2:23 - am mammec tura di Ccariɛa n SIDI: ‘Aqa kuř [mmis] amenzu i dd-ittwaxeřqen zeg uɛeddis n yemmas ad ittwasemma d amqeddas i SIDI!’ -
LUK 2:24 u ḥima ad ḥḍaren taɣarṣt am mammec tᵉttwanna di Ccariɛa n SIDI: tnayen n idbiren niɣ tyuya n iwarruḍen n idbiren.
LUK 2:25 Tuɣa di Urcalim ijj n weryaz qqaren as Cimɛun. Tuɣa aryaz-a nican d amsegged, ittraja afewwej n Israil uca tuɣa Arruḥ Iqeddsen xas.
LUK 2:26 Tuɣa Arruḥ Iqeddsen iweḥḥa as-dd aqa war ittmetti ca qbeř i ɣa iẓar Lmasiḥ n SIDI.
LUK 2:27 Yusa-dd ɣar Zzawect Tameqqrant [am t iɛarren] Arruḥ Iqeddsen, umi dd-udfen lwalidin s Uḥenjir Yasuɛ, ḥima ad as ggen ɛlaḥsab lqaɛida n Ccariɛa.
LUK 2:28 Iksi t deg iɣaǧen nnes uca ibarek AREBBI, inna:
LUK 2:29 “A Sidi inu, ejj amsexxar nnec ad iraḥ di řehna řexxu, ɛlaḥsab awař nnec,
LUK 2:30 minzi tiṭṭawin inu ẓrint arreḥmet nnec,
LUK 2:31 i tesswejded zzat i wudem n marra řegnus:
LUK 2:32 Tafawt i ɣa tᵉttwasargeb i řegnus d uɛuǧi i řgens nnec Israil!”
LUK 2:33 Itebhet Yusuf d yemmas s min xas ittwannan.
LUK 2:34 [Xenni] ibark i-ten Cimɛun, inna i Maryam yemmas: “Aqa Wa immars i uweṭṭu d tnukra n waṭṭas di Israil u i řeɛřamet i ɣa ittwaɛekksen.
LUK 2:35 Ad icuq ssif di řeɛmar nnem, ḥima ad dd-ttwasseḍharen ixarriṣen zeg waṭṭas n wuřawen.”
LUK 2:36 Ict n tnabit, [qqaren as] Ḥanna, yeǧis n Fanwil, zi teqbič n Acir, tuɣa-tt uřa d nettat tewsar aṭṭas. Teddar ak-d weryaz nnes sebɛa n iseggʷusa zeg wami tt tuɣa [ɛad] d taɛzarect.
LUK 2:37 Tuɣa-tt d tajjač i yijj n řmijař n arebɛa u-tmanyin n iseggʷusa, war tᵉttbeɛɛid ca x Zzawect Tameqqrant. Tuɣa tɛebbed [AREBBI] s uẓummi d tẓaǧit ǧiřet d wass.
LUK 2:38 Ɣar tsaɛɛet nni tbedd nettat ɛawed, tᵉttṣebbaḥ i SIDI, tessawař xas ak-d marra inni ittrajan asenjem n Urcalim.
LUK 2:39 Umi kemmřen nitni kuřci ɛlaḥsab Ccariɛa n SIDI, ɛeqben ɣar tendint nsen Nnaṣira di Ljalil.
LUK 2:40 Tuɣa Aḥenjir iggam, yarenni dayes Arruḥ, idweř iccur s tiɣit, u arḍa n AREBBI aqa-t xas.
LUK 2:41 Tuɣa řaǧ nnes ttraḥen kuř aseggʷas ɣar Urcalim di Řɛid n [Tɣarṣt n] Useɛdu.
LUK 2:42 Umi ɣares yiweḍ tenɛac n iseggʷusa, geɛɛden ɣar Řɛid am mammec nnumen nitni.
LUK 2:43 Awarni řami ɛdun wussan [n Řɛid], ɛeqben-dd, maca Aḥenjir, Yasuɛ, iqqim awarni asen di Urcalim, umi Yusuf d yemmas war argiben ca x man aya.
LUK 2:44 Ittɣiř asen aqa-t jar imsebriden. Awarni řami uyuren ict n ticři n wass, arezzun xas jar řaǧ nsen d yinni ten issnen.
LUK 2:45 Umi war t ufin, ɛeqben ɣar Urcalim, arezzun xas.
LUK 2:46 Awarni třata n wussan ufin t di Zzawect Tameqqrant, tuɣa iqqim di řwesṭ n imesɣaren [n Ccariɛa], ittesřa ɣarsen, ittseqsa ten.
LUK 2:47 Marra inni d as isřin tbehten di řefhamet d wawař i dd-ittarra.
LUK 2:48 Řami t ẓrin, tbehten. Tenna as yemmas: “[A] Mmi, mayemmi d aneɣ teggid ammu? Aqa, babac d necc nedɛeq s tarezzut xak.”
LUK 2:49 Inna asen: “Mayemmi xafi tarzum? Ma war targibem ca belli [ittxeṣṣa ayi] ad iřiɣ di Taddart n Baba?”
LUK 2:50 Maca war fhimen awař i d asen inna.
LUK 2:51 Uca ihwa-dd akidsen ɣar Nnaṣira, tuɣa ittegg asen array. Maca yemmas txemmeř marra awařen-a deg wuř nnes.
LUK 2:52 Uca tuɣa Yasuɛ yarenni di tiddi nnes d tiɣit nnes u di arḍa ɣar AREBBI d yewdan.
LUK 3:1 Deg useggʷas wiss xemmesṭac zi řeḥkamet n qayṣar Tibaryus, řami tuɣa Punṭiyus Pilaṭus d řḥakem x Yahudiyya, u Hirudus d řḥakem x Ljalil, ijj n arbeɛ n temmurt, u Filippus, umas, d řḥakem x Ituriya d jjihet n Traxunitis, ijj n arbeɛ nneɣni n temmurt, u Lisanyus d řḥakem x jjihet n Abilini, [tenni ɛawed] d ijj n arbeɛ nneɣni n temmurt,   *
LUK 3:2 umi tuɣa Ḥannan d Qayafa d arruyas n ikehhanen, aqa yusa-dd wawař n AREBBI x Yuḥanna, mmis n Zakariyya, di řexřa.
LUK 3:3 Yiweḍ-dd ɣar marra jjwayeh i d as dd-innḍen i L’Urdun, ittbarreḥ s useɣḍeṣ n ttubet i weɣfar n ddnub,
LUK 3:4 am mammec tura deg wedlis n wawařen n unabi Icaɛya i innan: “Tmijja n wenni isɣuyyun di řexřa: Swejdem abrid n SIDI, seggmem amesraq i AREBBI nneɣ di řewḍa.
LUK 3:5 Marra tiddaɣin ad ttwaccurent, marra idurar d tewririn ad dd-ttwassehwan, ddmani ad ttwaseggment, u imucan iwɛaren ad dewřen d řewḍa.
LUK 3:6 Kuř ddat s idammen d weysum ad tẓar Tudart n AREBBI.”
LUK 3:7 Tuɣa iqqar i řɣaci i dd-itteffɣen ḥima ad ttwassɣeḍṣen: “[A] tarwa n iřefsawen, wi d awem imřen maḥend [ad tarzum] ad tarewřem zeg weɣḍab i dd ɣa yasen?
LUK 3:8 S uya ggem řɣiǧet i ɣa iřiqqen i ttubet. War ttbeddam ad tinim deg ixef nwem: ‘Aqa ɣarneɣ Ibrahim d jedditneɣ!’, minzi Necc ad awem iniɣ, belli AREBBI izemmar ad issnekkar zeg iẓra-ya tarwa i Ibrahim.
LUK 3:9 Xzar, aqa tᵉttwassars tcaqurt ɣar iẓewran n tcejjura. S uya kuř tacejjart i war itticen řɣiǧet tecna ad tᵉttwaqess uca ad tewḍa di tmessi.”
LUK 3:10 Isseqsa t řɣaci, inna: “Min ɣa negg?”
LUK 3:11 Yarra-dd, inna asen: “Ejj wenni ɣar iǧa tyuya n tcamirat, ad iwc i wenni war ɣar iǧi ca, u ejj wenni ɣar iǧa macca, ad igg amenni.”
LUK 3:12 Usin-dd ɛawed ayt n ḍḍariba, ḥima ad ttwassɣeḍṣen, nnan as: “[A] Amseɣɣar, min ɣa negg?”
LUK 3:13 Inna asen: “War ttᵉṭṭfem ḍḍariba ktar zi min d awem weṣṣan maḥend ad tt tᵉṭṭfem.”
LUK 3:14 Sseqsan t ɛawed iɛeskariyyen, nnan as: “Min ɣa negg neccin?” Inna asen: “War tteggem řɣar uřa deg ijj, war deǧmem ḥed, qennɛem s řmunet nwem.”
LUK 3:15 Am ibda řgens ad ittceř x Yuḥanna, u xarrṣen deg wuřawen nsen ma Yuḥanna netta d Lmasiḥ,
LUK 3:16 xenni iṭṭef Yuḥanna deg wawař, inna asen: “Necc sseɣḍaṣeɣ kenniw deg waman, maca awarni ayi ad dd-yas wi ijehden xafi, wenni umi necc war sdihiǧeɣ uřa ad as fesyeɣ ifiřan n sandaliyat nnes. Aqa Netta ad kenniw isseɣḍeṣ di Arruḥ Iqeddsen u di tmessi.
LUK 3:17 Netta ɣares tazzart deg ufus nnes uca ad issizdeg andrar nnes. Ad issmun irden ɣar řmarsi nnes, maca icarfa ad ten issecmeḍ s tmessi war ixsin ɛemmarṣ.”
LUK 3:18 S tmesřayin nneɣni ɛad aṭṭas tuɣa isseřmad [iwdan] uca ittbarreḥ s Řexbar Aṣebḥan i řgens.
LUK 3:19 Maca umi iɛayar Yuḥanna Hirudus, řḥakem x ijj n arbeɛ n temmurt, zi ssibbet n Hirudiyya tamɣart n Filippus umas, u zi ssibbet n marra tuɛeffna i igga,
LUK 3:20 aqa yarni [Hirudus] ɛawed di man aya marra, řami tuɣa iḥebbes Yuḥanna [Amseɣḍaṣ].
LUK 3:21 Awarni řami isseɣḍeṣ [Yuḥanna] marra řgens, isseɣḍeṣ ɛawed Yasuɛ, uca am tuɣa Wanita ittẓaǧa, innurzem ujenna,
LUK 3:22 uca ihwa-dd xas Arruḥ Iqeddsen s ṣṣifet n ddat n tedbirt. Uca ict n tmijja zeg ujenna tuɣa teqqar: “Cek d Mmi iɛizzen, dayek ufiɣ arḍa inu.”
LUK 3:23 Tuɣa Yasuɛ ɣares ɛřaḥař třatin n iseggʷusa u ittɣiř asen aqa Netta d mmis n Yusuf, mmis n Hayli,
LUK 3:24 mmis n Mattat, mmis n Lawi, mmis n Malki, mmis n Yanna, mmis n Yusuf,
LUK 3:25 mmis n Mattata, mmis n Ɛamus, mmis n Naḥum, mmis n Ḥasli, mmis n Najjay,
LUK 3:26 mmis n Maɛat, mmis n Mattat, mmis n Cimɛi, mmis n Yusuf, mmis n Yahuda,
LUK 3:27 mmis n Yuḥanna, mmis n Risa, mmis n Zarubbabil, mmis n Caɛaltiyil, mmis n Niri,
LUK 3:28 mmis n Malki, mmis n Addi, mmis n Quṣam, mmis n Almudam, mmis n Ɛir,
LUK 3:29 mmis n Yusi, mmis n Aliɛazar, mmis n Yuram, mmis n Matita, mmis n Lawi,
LUK 3:30 mmis n Cimɛun, mmis n Yahuda, mmis n Yusuf, mmis n Yunam, mmis n Alyaqim,
LUK 3:31 mmis n Maliya, mmis n Miynan, mmis n Mattata, mmis n Natan, mmis n Dawud,
LUK 3:32 mmis n Yassa, mmis n Ɛubid, mmis n Buɛaz, mmis n Salmun, mmis n Naḥcun,
LUK 3:33 mmis n Ɛamminadab, mmis n Aram, mmis n Ḥaṣrun, mmis n Fariṣ, mmis n Yahuda,
LUK 3:34 mmis n Yaɛqub, mmis n Isḥaq, mmis n Ibrahim, mmis n Taraḥ, mmis n Naḥur,
LUK 3:35 mmis n Saruj, mmis n Raɛuw, mmis n Falaj, mmis n Ɛabir, mmis n Calaḥ,
LUK 3:36 mmis n Qinan, mmis n Arfakcad, mmis n Cam, mmis n Nuḥ, mmis n Lamak,
LUK 3:37 mmis n Matucalaḥ, mmis n Ḥanux, mmis n Yarad, mmis n Mahalal-Il, mmis n Qinan,
LUK 3:38 mmis n Anuc, mmis n Cit, mmis n Adam, mmis n AREBBI.
LUK 4:1 Yasuɛ iɛqeb-dd zi L’Urdun am tuɣa iccur s Arruḥ Iqeddsen uca Arruḥ indeh i-t ɣar řexřa,
LUK 4:2 ḥima ad ittwajarreb zeg ibřis arebɛin n wussan. War icci walu deg wussan nni uca awarni řami ɛdun [wussan nni], iṭṭef i-t řaẓ ɣar uneggar.
LUK 4:3 Inna as ibřis: “Mařa Cek d mmis n AREBBI, ini i weẓru-ya ad idweř d aɣrum.”
LUK 4:4 Yarra-dd xas Yasuɛ, inna: “Aqa tura: ‘Bnadem war iddar s weɣrum waha, maca s kuř awař n AREBBI.’”
LUK 4:5 [Xenni] issgeɛɛed i-t cciṭan ɣar ijj n wedrar yuɛřan, isscen as marra tigeldiwin n ddunect deg ijjen wermac.
LUK 4:6 Inna as ibřis: “Ad ac wceɣ ṣṣulṭa-ya marra d uɛuǧi nnes, minzi i necc umi temmewc u tticeɣ [tt] i umi xseɣ.
LUK 4:7 Mařa tɛebded ayi, ad ɣarek yiři marra aya.”
LUK 4:8 Yarra-dd xas Yasuɛ, inna as: “Aqa tura: ‘SIDI, AREBBI nnec, umi ɣa tsejded u i Netta weḥḥdes umi ɣa tsexxared.’”
LUK 4:9 Yiwyi t ɣar Urcalim uca issbedd i-t ɣar ṭṭarf n tzeqqa n Zzawect Tameqqrant, inna as: “Mařa Cek d Mmis n AREBBI, nḍar Ixef nnec ssa ɣar wadday,
LUK 4:10 minzi tura: ‘Ad yumur lmalakat nnes xak maḥend ad Cek ḥḍant,
LUK 4:11 aqa x ifassen nsent ad Cek ksint, ḥima aḍar nnec war ineggeḥ ca aẓru.’”
LUK 4:12 Yarra-dd xas Yasuɛ inna as: “Aqa ittwanna: ‘War ttjarrab SIDI, AREBBI nnec.’”
LUK 4:13 Umi ikemmeř ibřis marra ajarreb nnes, yuyur xas ca n řweqt.
LUK 4:14 Iɛqeb-dd Yasuɛ s jjehd n Arruḥ ɣar Ljalil, uca iffeɣ řexbar xas di marra jjwayeh i d asen dd-innḍen.
LUK 4:15 Tuɣa isseřmad di temzidawin nsen, ssɛuǧan t [iwdan] marra.
LUK 4:16 Yusa-dd ɣar Nnaṣira mani tuɣa ittwarebba, uca yudef ɣar temzida [n Wudayen] deg wass n ssebt ɛlaḥsab tanamit nnes, uca ikkar, ḥima ad issɣar.
LUK 4:17 Immewc as adlis ittwannḍen n unabi Icaɛya, uca yarzem Yasuɛ adlis ittwanḍen, yufa amcan mani tura:
LUK 4:18 “Arruḥ n SIDI xafi, minzi Netta idhen ayi ḥima ad barrḥeɣ s Řexbar Aṣebḥan i imezřaḍ, issekk ayi-dd ḥima ad ssgenfiɣ inni umi yarẓ wuř, ḥima ad barrḥeɣ i imeḥbas s usarreḥ, i idarɣařen s řxeẓrat, u ḥima ad ssfewwjeɣ inni ittwarẓen s weɣfar n ddnub nsen,
LUK 4:19 ḥima ad barrḥeɣ s useggʷas n arḍa n SIDI.”
LUK 4:20 Xenni yenneḍ adlis, iwca i-t i umsexxar, iqqim, am dayes nḍaren tiṭṭawin nsen marra inni tuɣa di temzida.
LUK 4:21 [Xenni] ibda iqqar asen: “Aqa ass-a ttwakemmřent Tira-ya [Iqeddsen] deg imezzuɣen nwem.”
LUK 4:22 Tuɣa marra cehhden xas, tbehten s wawařen n arḍa i dd-iffɣen zeg uqemmum nnes, uca nnan: “Ma war iǧi wa d mmis n Yusuf?”
LUK 4:23 Inna asen Yasuɛ: “Nican ad ayi tinim lmatal-a: ‘[A] Aḍbib, sgenfa Yixef nnec! Mecḥař nesřa belli ijra di Kafarnaḥum, egg man aya ɛawed di tendint nnec.’”
LUK 4:24 [Xenni] inna: “S tidett, ad awem iniɣ, war iǧi unabi d ameqbuř di temmurt nnes.
LUK 4:25 S tidett ad awem iniɣ: Tuɣa din tijjař aṭṭas di taddart n Israil deg wussan n Iliya umi ittwabelleɛ ujenna třata n iseggʷusa d setta n iyuren, ařami tuɣa řaẓ imɣar di temmurt marra.
LUK 4:26 War dd-ittwassekk Iliya uřa ɣar icten zzaysent, mɣir ɣar Ṣarfat [i iǧan di jjwayeh] n Ṣaydun, ɣar ict n tajjač.
LUK 4:27 Tuɣa din di Israil di řweqt n unabi Ilicaɛ aṭṭas n iwdan i di iǧa řbarṣ, uca uřa d ijj zzaysen war ittwassizdig mɣir Naɛman zi Aram waha.”
LUK 4:28 Umi sřin aya, ttwaccuren marra [inni iǧan] di temzida, s tefqeḥt.
LUK 4:29 Kkaren, ssuffɣen t barra i tendint, iwyen t ɣar tqiccet n wedrar i xef tuɣa tebna tendint nsen, ḥima ad t nḍaren zi jjarf yuɛřan.
LUK 4:30 Maca Netta icuq di řwesṭ nsen, iruḥ.
LUK 4:31 Ihwa ɣar Kafarnaḥum, ict n tendint di Ljalil, tuɣa isseřmad i-ten deg wussan n ssebt.
LUK 4:32 Tbehten s useřmed nnes, minzi awař nnes tuɣa t s ṣṣulṭa.
LUK 4:33 Tuɣa di temzida ijj n weryaz dayes buḥbeř n ijj n cciṭan amengus. Netta isɣuyyu s jjehd aṭṭas,
LUK 4:34 inna: “Tewwej [xafi]! Min din jar aneɣ akidek, [a] Yasuɛ Nnaṣiri? Ma tusid-dd [da] ḥima ad aneɣ tᵉteḥḥid? Necc ssneɣ min teɛnid, aqa Cek d Amqeddas n AREBBI.”
LUK 4:35 Iwebbex i-t Yasuɛ, inna as: “Sqar, ffeɣ-dd zzayes!” Inḍar i-t cciṭan di řwesṭ, iffeɣ zzayes, břa ma ad as issexsar ca.
LUK 4:36 Yarsa utebhet x marra, uca bdan ssawařen jar asen, nnan: “Mana awař-a? Aqa s ṣṣulṭa d jjehd ittamar řaryaḥ imengas, uca ffɣen!”
LUK 4:37 Iffeɣ-dd xas řexbar ɣar marra jjwayeh i d as dd-innḍen.
LUK 4:38 Řami dd-iffeɣ Yasuɛ zi temzida, yudef ɣar taddart n Cimɛun. Tuɣa taḍekkʷač n Cimɛun dayes timessi aṭṭas u ttaren zzayes di ṭṭweɛ nnes.
LUK 4:39 Iɣnes xas uca iwebbex timessi uca tejja xas [tmessi]. Řexdenni tekkar, tedweř tᵉttsexxar xasen.
LUK 4:40 Řami teɣři tfuct, iwyen-dd ɣares marra inni tuɣa ɣar iǧa imehřac i di iǧa ɛřam kuř řehřacat. Uca Netta issars afus nnes x kuř ijjen zzaysen, issgenfa i-ten.
LUK 4:41 Tuɣa ccwaṭen tteffɣen-dd ɛawed zeg waṭṭas idsen, tuɣa sɣuyyun, qqaren: “Cek d Lmasiḥ Mmis n AREBBI!” [Maca] iwebbex i-ten, war ten ijji ad ssiwřen, minzi ssnen belli Netta d Lmasiḥ.
LUK 4:42 Řami tuɣa d aziř, iffeɣ-dd, iruḥ ɣar ijj n wemcan ixřan, tuɣa řɣaci yarezzu xas, usin-dd ɣares uca arezzun ad t mennɛen, ḥima war xasen ittriḥ.
LUK 4:43 Inna asen Yasuɛ: “Aqa ittxeṣṣa ayi ad barrḥeɣ ɛawed i tneddam nneɣni s Tgeldit n AREBBI, minzi i man aya umi dd-ttwassekkeɣ.”
LUK 4:44 Uca ittbarreḥ di temzidawin n Ljalil.
LUK 5:1 Ařami xas imun řɣaci ḥima ad sřen i Wawař n AREBBI, [am] tuɣa Netta ibedd x tma n řebḥar n Jinnisaret,
LUK 5:2 iẓra tnayen n tɣarruba beddent x tma n řebḥar. Ineymaren n iseřman ffɣen-dd zzayes, tuɣa ssirden tiracciwin.
LUK 5:3 Icten zi tɣarruba nni tuɣa n Cimɛun Buṭrus. Inya Yasuɛ di tɣarrabut, isseqsa ten ad aggʷejen cwayt x tma n řbař ɣar řebḥar. Xenni iqqim, isseřmad řɣaci zi tɣarrabut.
LUK 5:4 Umi ikemmeř awař, inna i Cimɛun: “Ruḥem ɣar řaǧaɣ, nḍarem tiracciwin nwem i tneymart.”
LUK 5:5 Yarra-dd Cimɛun, inna as: “[A] Amseřmad inu, aqa nuḥeř ǧiřet tekmeř, war neymar walu, maca x wawař nnec ad nḍareɣ tracca.”
LUK 5:6 Umi ggin man aya, ṭṭfen aṭṭas n iseřman ařami dewřent tracciwin nsen ttcarragent.
LUK 5:7 Aqa ciyyaren ɣar imeddukkař nsen inni tuɣa di tɣarrabut nneɣni, ḥima ad dd-asen ad ten ɛawnen. Nitni usin-dd, uca ccuren tnayen n tɣarruba ařami ɛřayen ad ɣarqent.
LUK 5:8 Ařami iẓra Cimɛun Buṭrus man aya, iwḍa ɣar iḍaren n Yasuɛ, inna as: “Ttzawgeɣ Cek, a Sidi, aggʷej xafi, aqa necc d bnadem d amednub.”
LUK 5:9 Itebhet netta d marra inni iǧan akides x tneymart n iseřman i ṭṭfen,
LUK 5:10 uřa d Yaɛqub d Yuḥanna, tarwa n Zabdi, inni tuɣa d icricen n Cimɛun. [Maca] Yasuɛ inna i Cimɛun: “War tteggʷed ca, zi ssa d tsawent ad tafed tyemmared iwdan i usenjem.”
LUK 5:11 Nitni iwyen-dd tiɣarruba ɣar řbarr, jjin kuřci uca ḍfaren t.
LUK 5:12 Umi tuɣa Yasuɛ deg icten zi tneddam [nni], yusa-dd [ɣares] ijj n weryaz iřqef i-t marra řbarṣ. Umi iẓra netta Yasuɛ, iwḍa x uɣembub nnes uca izaweg i-t, inna: “A Sidi inu, mařa texsed, tzemmared ad ayi tessizdeged!”
LUK 5:13 Isswiẓẓeḍ Yasuɛ s ufus nnes ɣares, iḥada t, inna: “Necc xseɣ, iři tizdiged!” Řexdenni iruḥ xas řbarṣ.
LUK 5:14 Yumur i-t: “War teqqar i ḥed, maca ruḥ, scen ixef nnec i ukehhan, ewc tawhibt x usizdeg nnec, am mammec [t] yumur Musa, d cchadet i nitni.”
LUK 5:15 Ccenɛet nnes tuyur mani ma ktar ɛad uca inneyru řɣaci aṭṭas, ḥima ad as sřen u ḥima ad zzayes ttwassgenfan zi řehřacat nsen.
LUK 5:16 Maca Netta iffeɣ-dd ɣar řexřa, ittẓaǧa din.
LUK 5:17 Deg ijj n wass zeg wussan nni am tuɣa Yasuɛ isseřmad, qqimen [din] Ifarisiyyen d imseřmaden n Ccariɛa inni dd-yusin zi marra dcurat n Ljalil d Yahudiyya u zi Urcalim. Tuɣa din jjehd n SIDI maḥend ad ten iggenfa.
LUK 5:18 Xenni iwyen-dd ijj n uneɛḍab x tassut tuɣa arezzun ad t ssidfen ɣar daxeř, maḥend ad t ssarsen zzates.
LUK 5:19 Umi war ufin manis t i ɣa ssidfen zi ssibbet n řɣaci, geɛɛden x tzeqqa uca seyyben t zeg uqarmud ɣar wadday ak-d tassut [nican] ɣar řwesṭ, zzat i Yasuɛ.
LUK 5:20 Umi iẓra Yasuɛ l’iman nsen, inna i uneɛḍab nni: “[A] bnadem, ddnub nnec ttwaɣfaren ac.”
LUK 5:21 Bdan imseřmaden n idlisen d Ifarisiyyen ttxarraṣen, nnan: “Min iɛna Wa, řami Netta ittceqqaf [ammu]. Wi izemmaren ad iɣfar ddnub mɣir AREBBI weḥḥdes?”
LUK 5:22 [Maca] yargeb Yasuɛ x ixarriṣen nsen, uca Netta iṭṭef deg wawař, inna asen: “Min tᵉttxarraṣem deg wuřawen nwem?
LUK 5:23 Min ihewnen ad iniɣ: ‘Ttwaɣfaren ddnub nnec!’ niɣ ad iniɣ: ‘Kkar, uyur’?
LUK 5:24 Maca ḥima ad tessnem belli Mmis n bnadem ɣares ṣṣulṭa x temmurt, ḥima ad iɣfar ddnub - inna i uneɛḍab - I cek umi ɣa iniɣ, kkar, ksi tassut nnec uca ruḥ ɣar taddart nnec!”
LUK 5:25 Řexdenni ikkar zzat i tiṭṭawin nsen, iksi tassut nnes uca iruḥ ɣar taddart nnes, issemɣara di AREBBI.
LUK 5:26 Atebhet ihwa-dd x marra iwdan, ssemɣaran di AREBBI uca tudef i-ten tiggʷudi, nnan: “Aqa ass-a neẓra řeɛjayeb!”
LUK 5:27 Awarni man aya iffeɣ Yasuɛ, iẓra ijj n bu-ḍḍariba, qqaren as Lawi, iqqim deg wemcan n ḍḍariba, inna as: “Ḍfar ayi-dd!”
LUK 5:28 Ijja kuřci, ikkar uca iḍfar i-t-i-dd.
LUK 5:29 Issnewji as Lawi ijj n usnewji d ameqqran di taddart nnes, uca inni akides iqqimen [ɣar ṭṭabřa] tuɣa aten deg waṭṭas n řɣaci zeg ayt n ḍḍariba d inneɣni.
LUK 5:30 [Maca] imseřmaden n idlisen d Ifarisiyyen cetcan, nnan i imeḥḍaren nnes: “Mayemmi tᵉttettem, tessessem ak-d ayt n ḍḍariba d imednab?”
LUK 5:31 Yarra-dd Yasuɛ, inna asen: “Inni iṣeḥḥen war ḥdijen ca aḍbib, maca imehřac wah.
LUK 5:32 War dd-usiɣ ad řaɣiɣ x imseggaden, maca x imednab ɣar ttubet.”
LUK 5:33 Nnan as: “Mayemmi tẓumman u ttẓaǧan imeḥḍaren n Yuḥanna aṭṭas, uřa d yinni n Ifarisiyyen, maca inni nnec ttᵉtten, sessen?”
LUK 5:34 Inna asen: “Ma texsem ad tejjem ayt n umuřay ad ẓummen mařa Amuřay aqa-t [ɛad] akidsen!
LUK 5:35 Maca ad dd-awḍen wussan xmi xasen ɣa ittwammeksi Umuřay, řexdenni ad ẓummen deg wussan nni.”
LUK 5:36 Inna asen ɛawed ijj n umedya: “War din ḥed icarreg taneqqič zeg warruḍ n jdid, uca ittegg i-tt x warruḍ abuřay, ḥima war tᵉttarri tneqqič n jdid ad tcarreg abuřay, minzi taneqqič n jdid war tᵉttřiqi abuřay.
LUK 5:37 Uca war iǧi ḥed ittegg binu n jdid di txuncay tiqdimin n yiřem, ḥima binu n jdid war ittcarrig ca tixuncay uca ad izeǧeɛ binu, ad ḍeyyɛent txuncay.
LUK 5:38 Maca tteggen binu n jdid di txuncay n jdid uca ad xemmřen s tyuya.
LUK 5:39 Uřa d ijj, mařa iswa aqdim, war ittexs ɛad řexdenni jdid, minzi netta ad yini: ‘Aqdim ittfuḥ!’”
LUK 6:1 Imsar di ssebt aqa Yasuɛ yuyur deg iyyaren n zzariɛet n imendi. Tuɣa imeḥḍaren nnes řeqqḍen tidrin, ttḥekkan tent s ifassen nsen, ttᵉtten [tent].
LUK 6:2 Ca n Ifarisiyyen nnan asen: “Mayemmi tᵉtteggem min war iḥeǧřen ad ittwagg di ssebt?”
LUK 6:3 Yarra-dd Yasuɛ, inna asen: “Ma war teɣrim min igga Dawud umi iǧuẓ netta d yinni akides?
LUK 6:4 Mammec yudef ɣar Taddart n AREBBI, iksi aɣrum n wescan i iǧan x tzewḍa n SIDI i war iḥeǧřen macca nnes mɣir i ikehhanen waha, uca icca [zzayes] u iwca ɛawed i yinni tuɣa iǧan akides?”
LUK 6:5 [Xenni] inna asen: “Aqa Mmis n bnadem d Bab n ssebt.”
LUK 6:6 Deg ijj n [wass n] ssebt nneɣni yudef [Yeccu] ɣar temzida, ibda issɣara. Tuɣa din ijj n bnadem wenni umi afus nnes iqucceḥ.
LUK 6:7 Ḥḍan t imseřmaden n idlisen d Ifarisiyyen, ma ad issgenfa di ssebt, ḥima ad xas afen ca n ttuhmet.
LUK 6:8 Maca Netta yargeb x ixarriṣen nsen uca inna i bnadem wenni umi iqucceḥ ufus nnes: “Kkar, bedd di řwesṭ n temzida.” Umi ikkar u tuɣa ibedd [din],
LUK 6:9 inna asen Yasuɛ: “Ad kenniw sseqsiɣ x min iḥeǧřen ad ittwagg di ssebt. [Ma iḥeǧeř i bnadem maḥend] ad igg řxar niɣ řɣar, ad issenjem ijj n řeɛmar niɣ ad [t] yareddeǧ?”
LUK 6:10 Tuɣa ixezzar ɣar marra inni d as dd-innḍen, inna as [i bnadem nni]: “Swiẓẓeḍ afus nnec!” Isswiẓẓeḍ Netta afus nnes uca idweř ufus nnes iṣeḥḥ am wenneɣni.
LUK 6:11 [Maca] nitni dewřen ccuren s zzɛaf uca ssiwřen jar asen x min ɣa ggen i Yasuɛ.
LUK 6:12 Imsar deg wussan nni, aqa iffeɣ Yasuɛ ɣar ijj n wedrar, ḥima ad iẓẓaǧ uca isseɛdu din ǧiřet tekmeř, ittẓaǧa i AREBBI.
LUK 6:13 Umi tuɣa d aziř, iřaɣa-dd i imeḥḍaren nnes, uca ixḍar zzaysen tenɛac, isemma ten rrusul.
LUK 6:14 Cimɛun, wenni ittkennan Buṭrus, [‘aẓru’], d Andrawus umas, d Yaɛqub d Yuḥanna, d Filippus d Bar-Tulumawus
LUK 6:15 d Matta d Tuma d Yaɛqub, mmis n Ḥalfa, d Cimɛun wenni umi ttkennan ‘Amɛessab’,
LUK 6:16 Yahuda, mmis n Yaɛqub, d Yahuda Isxariyuṭi wenni iǧan d aɣeddar.
LUK 6:17 Ihwa-dd Yasuɛ akidsen uca ibedd di řewḍa. Tuɣa akides ijj n ubarru n imeḥḍaren nnes d ijj n ubarru n iwdan zi marra Yahudiyya d Urcalim u zi tma n řebḥar ɣar Ṣur d Ṣaydun.
LUK 6:18 Nitni usin-dd ḥima ad as sřen u ad ttwassgenfan zi řehřac nsen, [tuɣa akidsen] uřa d inni ittwaɣezzan zi řaryaḥ imengas, uca ttwassgenfan.
LUK 6:19 Marra řɣaci tuɣa ittexs ad t iḥada, minzi tuɣa itteffeɣ-dd zzayes jjehd nni issgenfan kuřci.
LUK 6:20 Issgeɛɛed tiṭṭawin nnes ɣar imeḥḍaren nnes, inna: “Sseɛd nwem, kenniw, a imezřaḍ, minzi Tageldit n AREBBI i kenniw.
LUK 6:21 Sseɛd nwem, kenniw, inni iǧuẓen řexxu, minzi kenniw ad tᵉttwassjiwnem. Sseɛd nwem, kenniw, inni ittrun řexxu, minzi kenniw ad tḍeḥcem.
LUK 6:22 Sseɛd nwem, umi kenniw carrhen iwdan, ttaẓẓřen xawem, ttekkwaren kenniw, uca ssfeṭṭaḥen zeg yisem nwem x ssibbet n Mmis n bnadem.
LUK 6:23 Farḥem deg wass nni, negzem s řefraḥet, minzi, aqa řajar nwem imɣar deg ujenna, minzi ammu tuɣa tteggen řejdud nsen deg inabiyyen.
LUK 6:24 Maca uct xawem, kenniw, aytbab n wagřa, minzi aqa tᵉṭṭfem afewwej nwem.
LUK 6:25 Uct xawem, kenniw, inni ijjiwnen, minzi ad tǧaẓem. Uct xawem, kenniw inni iḍeḥḥcen řexxu, minzi ad tceḍnem, ad trum.
LUK 6:26 Uct xawem umi iwdan ad xawem ssiwřen mliḥ, minzi ammu tuɣa tteggen řejdud nsen ak-d inabiyyen issxarriqen.”
LUK 6:27 “Maca Necc ad awem iniɣ, i yinni ittesřan: Xsem řɛedyan nwem, thillam deg inni kenniw icarrhen,
LUK 6:28 barkem i yinni kenniw ineɛɛřen u ẓaǧem x yinni xawem ittɛeddan.
LUK 6:29 I wenni cek iwtin ɣar umeggiz, arr as-dd s wenneɣni, u wenni d ac ɣa ikksen ajeǧab, war t ttᵉṭṭef ad iksi uřa d tcamir nnec.
LUK 6:30 Marra wenni d ac ɣa ittaren, ewc as t, u wenni i ɣa iksin min iǧan nnec, war d as [t] ttᵉttar.
LUK 6:31 Am mammec texsed ad awem ggen iwdan, ggem uřa d kenniw daysen amenni.
LUK 6:32 Mařa texsem ɣar yinni kenniw ittexsen, man tcuni i ɣarwem. Aqa uřa d imednab ttexsen inni i ten ittexsen.
LUK 6:33 Mařa teggem řxar i yinni d awem itteggen řxar, man tcuni i ɣarwem. Aqa uřa d imednab tteggen amenni.
LUK 6:34 U mařa tarḍřem i iwdan i zi tᵉttrajam ad awem dd-arren, man tcuni i ɣarwem? Aqa uřa d imednab arḍřen i imednab, ḥima ad asen dd-idweř amenni ɛawed.
LUK 6:35 Maca xsem řɛedyan nwem, ggem d asen tcuni, arḍřem, war tqeṭṭɛem řayas i ca n yijjen. Xenni ad yiři řajar nwem imɣar, ad tiřim d tarwa n Umɛuǧi x kuřci, minzi aqa ittegg s ttasiɛ n řxaḍar ak-d iɛeffanen d yinni war t icekkaren.
LUK 6:36 Areḥmem am mammec iǧa Babatwem d arḥim.
LUK 6:37 War ḥekkem, war tᵉttwaḥakamem. War ttḥasabem, war tᵉttwaḥasbem. Ɣfarem, ad awem ittwaɣfar.
LUK 6:38 Wcem, ad awem immewc, ad nḍaren ijj n řmud icna, ideqqes, ittwassenhezz, ifeyyeḍ deg weḥsin nwem. Minzi s řmud i zi ɣa tweznem kenniw, ad zzayes tᵉttwaweznem uřa d kenniw.”
LUK 6:39 Netta inna asen ijj n umedya: “Ma izemmar udarɣař ad indeh adarɣař? Ma war weṭṭin s tnayen idsen deg weḥfur?
LUK 6:40 Ameḥḍar war iǧi ca ḥsen zeg umseřmad nnes, maca kuř ameḥḍar nican ad yiři am umseřmad nnes.
LUK 6:41 Mayemmi txezzared ɣar uxecciw, tenni di tiṭṭ n umac, maca taḥnact, tenni di tiṭṭ nnec, war kis teřhid?
LUK 6:42 Mammec tᵉttegged teqqared i umac: ‘Uma, ejj ayi ad ac dd-ssuffɣeɣ axecciw i dayek di tiṭṭ nnec!’, u xzar, cek simant nnec war tᵉttwiřid ca taḥnact i ɣarek di tiṭṭ nnec. [Cek, a] amnafeq, suffeɣ-dd amezwaru taḥnact nni ɣarek di tiṭṭ nnec, xenni ad tᵉttwařid [mliḥ] maḥend ad tessuffɣed axecciw zi tiṭṭ n umac.”
LUK 6:43 “War din bu tcejjart taṣebḥant i dd-issɣemmayen řɣiǧet texsar, niɣ tacejjart ixsaren i dd-issɣemmayen řɣiǧet taṣebḥant.
LUK 6:44 Minzi kuř tacejjart tᵉttwassen s řɣiǧet nnes, minzi war yrun zeg isennanen řbacur, u war řeqqḍen aḍiř zi cbarq ak-d isennanen.
LUK 6:45 Bnadem aṣebḥan zi řkenz n wuř nnes d aṣebḥan ad issuffeɣ min iṣebḥen uca bnadem aɛeffan zi řkenz n wuř nnes d aɛeffan ad dd-issuffeɣ tuɛeffna. S min zi iccur wuř, zzayes ssawařen iyencicen.”
LUK 6:46 “Mayemmi d ayi tᵉttřaɣam: ‘[A] Sidi, [a] Sidi!’ uca war tᵉtteggem ca min qqareɣ?
LUK 6:47 Marra wenni ɣari i dd ɣa yasen, ad iseř i wawařen inu uca ad zzaysen igg, Necc ad awem ssecneɣ min di yarwes netta.
LUK 6:48 Netta yarwes deg ijj n bnadem i ibnan ict n taddart. Netta iɣza, iḥfar uca issars dsas x sseǧaḥ. Umi dd-tusa sseḥřet, tqebbeḍ řḥemřet taddart nni uca war tzemmar ad tt tessenhezz, minzi tuɣa dsas nnes x sseǧaḥ.
LUK 6:49 Maca wenni ittesřan war ittegg, yarwes di bnadem i ibnan taddart nnes x temmurt břa dsas. Umi tt-i-dd-tqebbeḍ řḥemřet, řexdenni tewḍa. Tuɣa afartek n taddart nni d ameqqran.”
LUK 7:1 Awarni řami ikemmeř marra awařen nnes am d as sřan iwdan, yudef Yasuɛ ɣar Kafarnaḥum.
LUK 7:2 Amsexxar n ijj n řqebṭan x mya, wenni tuɣa issɛizz aṭṭas, tuɣa ihřec, war d as iqqim ca ad immet.
LUK 7:3 Umi isřa x Yasuɛ, issekk ɣares ca n imɣaren n Wudayen, ittar [as] maḥend ad dd-yas uca ad issenjem amsexxar nnes.
LUK 7:4 Řami dd-iwḍen ɣar Yasuɛ, ḥeccmen t aṭṭas, nnan: “Aqa isdaheǧ ad as tegged aya,
LUK 7:5 minzi netta ittexs řgens nneɣ u ibna aneɣ tamzida.”
LUK 7:6 [Xas uca] iruḥ Yasuɛ akidsen. Ařami tuɣa war iggʷij ɛad x taddart, issekk řqebṭan x mya ca n imeddukkař [ɣares], uca netta inna as: “[A] Sidi, war ssiḥiř ixef nnec, minzi necc war sdiheǧeɣ ad tadfed sadu tazeqqa inu.
LUK 7:7 S uyenni necc war ḥesbeɣ ixef inu sdaheǧeɣ ḥima ad ɣarek dd-aseɣ, maca ini awař [waha] uca ad iggenfa umsexxar ameẓyan inu.
LUK 7:8 Minzi uřa d necc ɛawed d ijj n bnadem sadu ifassen i ǧiɣ u ɣari [ɛawed] iɛeskariyyen swadday i ufus inu. Qqareɣ i wa: ‘Ruḥ!’, xenni ittraḥ, i wenneɣni: ‘As-dd!’, xenni ittas-dd uca i umsexxar inu: ‘Egg aya!’, xenni ittegg i-t.”
LUK 7:9 Umi isřa Yasuɛ aya, ittebhet dayes. Inneqřeb uca inna i řɣaci wenni tuɣa i-t-i-dd-iḍeffaren: “Necc ad awem iniɣ, war ufiɣ uřa di marra Israil l’iman ameqqran am řqedd n wa.”
LUK 7:10 Ařami ɛeqben inni ittwassekken ɣar taddart, ufin amsexxar amehřuc iggenfa.
LUK 7:11 Tiwecca nnes iruḥ ɣar ict n tendint qqaren as Nayin. Tuɣa din akides imeḥḍaren nnes d ijj n řɣaci d ameqqran.
LUK 7:12 Ařami dd-iqarreb ɣar tewwart n tendint, xzar, ksin-dd ijj n umettin [x řmeḥmeř] ɣar barra. Netta d ayenni n mmis nni tuɣa ɣar yemmas. Yemmas tuɣa-tt d tajjač u tuɣa akides aṭṭas n řɣaci zi tendint.
LUK 7:13 Umi tt iẓra Yasuɛ, tezziǧez as, inna as: “War ttru!”
LUK 7:14 Xenni iqarreb-dd, iḥada řmeḥmeř, uca bedden yinni t yarbun, inna: “[A] abřiɣ, i cek umi ɣa iniɣ, kkar-dd!”
LUK 7:15 Iqqim umettin, ibda issawař, xenni yarra as t-i-dd i yemmas.
LUK 7:16 Tudef tiggʷudi di marra uca ssemɣaren AREBBI, nnan: “Aqa ikkar-dd dayneɣ unabi imɣar!”, uca: “Aqa issijj-dd AREBBI x řgens nnes.”
LUK 7:17 Iffeɣ řexbar-a xas ɣar marra Yahudiyya u ɣar marra jjwayeh i d asen dd-innḍen.
LUK 7:18 Imeḥḍaren n Yuḥanna ɛawden as man aya marra.
LUK 7:19 Iřaɣa Yuḥanna i tnayen zeg imeḥḍaren nnes uca issekk i-ten ɣar Yasuɛ, iqqar [s uqemmum nsen]: “Ma d Cek d wenni dd ɣa yasen, niɣ ad nraja wenneɣni?”
LUK 7:20 Umi ruḥen yeryazen ɣar Yasuɛ, nnan as: “Yuḥanna Amseɣḍaṣ aqa issekk aneɣ-dd ɣarek, inna: ‘Ma d Cek d wenni i dd ɣa yasen niɣ ad nraja wenneɣni?’”
LUK 7:21 Di tsaɛɛet nni tuɣa issgenfa aṭṭas [n iwdan] zi řehřacat d uweddeb [nsen] u zi řaryaḥ iɛeffanen, uca yarra aṭṭas n idarɣařen ttwařan.
LUK 7:22 Yarra-dd Yasuɛ, inna asen: “Ruḥem, ɛawdem i Yuḥanna min teẓrim d min tesřim. Aqa idarɣařen ttwařan u ineɛḍaben gguren u yinni di iǧa řbarṣ ttwassizdegen u idehcar ttesřan u imettinen ttekkaren uca ittᵉttwabarreḥ s Řexbar Aṣebḥan i imezřaḍ.
LUK 7:23 Sseɛd n wenni war d ayi ittendrifen.”
LUK 7:24 Umi ffɣen imeḥḍaren n Yuḥanna, ibda Yasuɛ iqqar i řɣaci x Yuḥanna: “Min ɣar i ɣa dd-teffɣem ɣar řexřa ad tẓarem? Ma ijj n uɣanim issenhezza t usemmiḍ?
LUK 7:25 Mařa lla, min ɣar tuɣa dd-teffɣem ad tẓarem? Ma ijj n bnadem yarḍ arruḍ yarḍeb? Xzar inni yarḍen arruḍ iɣřan yarḍeb u ddaren deg ufuhart, aqa aten di řeqṣur n ijeǧiden.
LUK 7:26 Maca min ɣar tuɣa dd-teffɣem ad tẓarem? Ma ijj n unabi? Wah, ad awem iniɣ d ameqqran ktar zeg unabi.
LUK 7:27 Aqa d wa i xef ittwari: ‘Aqa Necc ad ssekkeɣ lmalak inu zzat i uɣembub nnec, wenni i ɣa isswejden abrid nnec ɣar zzat nnec.’
LUK 7:28 Necc ad awem iniɣ, jar inni dd-ittwaxeřqen zi temɣarin uřa d ijj war iǧi d anabi ameqqran x Yuḥanna [Amseɣḍaṣ], maca [waxxa amenni] d ameẓyan qaɛ di Tgeldit n AREBBI imɣar xas.”
LUK 7:29 Marra iwdan nni d as isřin, uřa d ayt n ḍḍariba cehden i tsegda n AREBBI, minzi nitni ttwassɣeḍṣen s useɣḍeṣ n Yuḥanna.
LUK 7:30 Maca Ifarisiyyen d imseřmaden n idlisen ugin x ccwar n AREBBI i yixef nsen, minzi ugin ad zzayes ttwassɣeḍṣen.
LUK 7:31 [Inna Netta]: “Min zi ɣa cebbheɣ iwdan n jjiř-a? Wi di yarwesen?
LUK 7:32 Nitni amecnaw iḥenjiren i iqqimen di ssuq, ttřaɣan ijjen wenneɣni, qqaren: ‘Neccin newta awem di temja, kenniw war tecḍiḥem, u neccin nɣennej ijj n weẓri n wecḍan i kenniw, [maca] kenniw war trum ca.’
LUK 7:33 Minzi yusa-dd Yuḥanna Amseɣḍaṣ, war ittett aɣrum, war isess binu uca tennam: ‘Aqa dayes cciṭan!’
LUK 7:34 Yusa-dd Mmis n bnadem ittett, isess, tennam: ‘Xzar, bnadem-a iřhef x macca d binu, aqa-t d ameddukkeř n ayt n ḍḍariba d imednab.’
LUK 7:35 Maca tiɣit tᵉttwasegged zi marra tarwa nnes.”
LUK 7:36 Iɛarḍ i-t ijj n Ufarisi ḥima ad kis icc. Yudef Netta ɣar taddart n Ufarisi uca iqqim [ɣar ṭṭabřa].
LUK 7:37 Tuɣa tzeddeɣ ict n temɣart tamednubt di tendint nni. Umi tessen aqa iqqim [ɣar ṭṭabřa] di taddart n Ufarisi, tusa-dd s ijj n uɣarraf n alabaster dayes [zzect] i wedhan,
LUK 7:38 uca umi tbedd ɣar iḍaren nnes ɣar ḍeffar nnes, tru uca tebda tessuffa iḍaren nnes s imeṭṭawen nnes uca tebda tessaẓaɣ i-ten s ucuwwaf [n uzeǧif] nnes, tessudem as iḍaren uca temseḥ i-ten s ict n zzect n wedhan.
LUK 7:39 Umi iẓra Ufarisi wenni i-t-i-dd-iɛarḍen man aya, ixarreṣ deg yixef nnec, inna: “Mařa Wa d anabi [s tidett], iři aqa issen min teɛna tanita u mammec tᵉttwassen nettat, minzi tenni t iḥadan, aqa-tt d tamednubt.”
LUK 7:40 Yarra-dd Yasuɛ, inna as: “[A] Cimɛun, ɣari ict n řḥajjet ad ac tt iniɣ.” Inna as: “Ini tt, [a] Amseřmad inu!”
LUK 7:41 Inna as Yasuɛ: “Ijj n bab n umarwas tuɣa ɣares tnayen ttursen as. Ijjen tuɣa itturs as xemsa-mya dinar u wenneɣni xemsin.
LUK 7:42 Am war tuɣi ɣarsen min zi ɣa arren amarwas, isamḥ asen [amarwas] s tnayen idsen. [Ini ayi,] wi zzaysen t ɣa ixsen ktar?”
LUK 7:43 Yarra-dd Cimɛun, inna: “Ittɣiř ayi wenni umi isamḥ ktar.” Inna as: “Cek tḥekmed s ṣṣaḥ.”
LUK 7:44 [Xas uca] inneqřeb Yasuɛ ɣar temɣart nni, inna i Cimɛun: “Ma tᵉttwařid tamɣart-a? Aqa udfeɣ ɣar taddart nnec. Aman i iḍaren inu war d ayi ten tewcid. Maca nettat tessuff iḍaren inu s imeṭṭawen [nnes] uca tessiẓeɣ i-ten s ucuwwaf [n uzeǧif] nnes.
LUK 7:45 Cek war d ayi tessudmed, maca nettat, zeg wami dd-udfeɣ, war tbedd zeg usudem n iḍaren inu.
LUK 7:46 S zzect war tmesḥed ca azeǧif inu, maca nettat temseḥ iḍaren inu s zzect n wedhan.
LUK 7:47 S uyenni ad ac iniɣ: Aqa ittwaɣfar as aṭṭas n ddnub nnes, minzi texs aṭṭas. Wenni umi ittwaɣfar drus, ad ɣares yiři drus n tayri.”
LUK 7:48 [Xenni] inna as: “[A] tameṭṭut, aqa ttwaɣfaren ddnub nnem.”
LUK 7:49 Inni akides iqqimen [ɣar ṭṭabřa] bdan qqaren deg ixef nsen: “Min iɛna Wanita maḥend ad iɣfar uřa i ddnub.”
LUK 7:50 Inna as Yasuɛ i tmeṭṭut nni: “L’iman nnem aqa iwca am Tudart. Ruḥ di řehna.”
LUK 8:1 Awarni uya icuq Yasuɛ di tneddam d dcurat, ittbarreḥ s Tgeldit n AREBBI. Tuɣa akides tenɛac [n rrusul] nnes,
LUK 8:2 uřa d temɣarin aya nni tuɣa ittwassgenfan zi řeḥřacat u zi řaryaḥ iɛeffanen: [aqa-tt] Maryam, qqaren as ‘tenni n Majdala’, i zi ttwassuffɣen sebɛa n ccwaṭen,
LUK 8:3 d Yuḥanna, tamɣart n Xuza, awkiř n Hirudus, d Susanna, d tinneɣni aṭṭas i tuɣa ttsexxarent xasen s wagřa nsent.
LUK 8:4 Řami din issmun ijj n řɣaci d ameqqran, usin-dd ɣares zi marra tineddam, inna s yijj n umedya:
LUK 8:5 “Iffeɣ-dd ijj n umzarraɛ, ḥima ad izarɛ zzariɛet nnes. Am izarreɛ, tewḍa [cwayt n zzariɛet] deg webrid, iɛfes xas uca neqben i-tt ijḍaḍ.
LUK 8:6 Tewḍa [cwayt n zzariɛet] nneɣni x weẓru, umi dd-teɣmi deɣya, tuẓeɣ, minzi war ɣares tuɣi tuffet.
LUK 8:7 Tewḍa [cwayt n zzariɛet] nneɣni di řwesṭ n isennanen uca isennanen ɣemyen-dd akides uca jeyyfen tt.
LUK 8:8 Tewḍa [cwayt n zzariɛet] nneɣni di temmurt yareḍben d lemliḥ, uca umi dd-teɣmi, tegga řɣiǧet n mya imuren.” Awarni řami tuɣa iqqar man aya, iřaɣa: “Wenni ɣar iǧa imezzuɣen i useǧi, ejj i-t ad iseř.”
LUK 8:9 Sseqsan t imeḥḍaren nnes: “Min ixs ad yini umedya-a?”
LUK 8:10 Inna asen: “I kenniw umi immewc ad tessnem ssirr n Tgeldit n AREBBI, maca i inneɣni ad dd-yas wawař s imedya, ařami nitni ttwařan maca war ttwiřin uca ttesřan war fehhmen.
LUK 8:11 D wa d [řmeɛna n] umedya: zzariɛet nettat d Awař n AREBBI.
LUK 8:12 Ina x ṭṭarf n webrid, nitni d inni ittesřan Awař, maca [xenni] ittas-dd ibřis, ittekkes Awař zeg wuř nsen ařami war ttimnen uca ad ddaren.
LUK 8:13 Ina x weẓru, nitni d inni xmi ɣa sřen, ad qebřen Awař s řefraḥet, [maca] war ɣarsen bu weẓwar, ttamnen ɣar xennit, di řweqt n ujarreb ad nqarḍen.
LUK 8:14 Ina i iwḍan deg isennanen, nitni d inni ittesřan Awař, xenni ttraḥen, ttbuxsuyen deg imnusen d wagřa d ṭṭamuɛ n ddunect, war ssendayen ca řɣiǧet.
LUK 8:15 Ina di temmurt yareḍben, nitni d inni ittesřan i Wawař, xemmřen t deg wuř nican, iṣbeḥ, uca ssendayen řɣiǧet s ṣṣbar.”
LUK 8:16 “Uřa d ijj war issruɣi řefnar uca iqebbar xas s yijj n uqedduḥ niɣ issrusa t sadu qama, maca [s řemqřub] issrusa t x řmerfeɛ, ḥima inni dd-ittadfen ad ẓaren tafawt nnes.
LUK 8:17 Minzi war din min idřin, war dd-itteffiɣ ɣar barra, u [war din] min innuffaren, war ittwissin, war dd-itteffiɣ ɣar barra.
LUK 8:18 Ḥḍam mammec tᵉttesřam, minzi wenni ɣar iǧa ad as immarni, u wenni war ɣar iǧi, min d as ittɣiř ɣares, ad zzayes ittwakkes.”
LUK 8:19 Yemmas d aytmas usin-dd ɣares, war zemmaren ad akides ssiwřen s ssibbet n řɣaci.
LUK 8:20 Nnan as: “Yemmac d aytmac bedden barra, xsen ad Cek ẓaren.”
LUK 8:21 Yarra-dd, inna asen: “Yemma d aytma, aqa d inni ittesřan Awař n AREBBI u tteggen zzayes.”
LUK 8:22 Deg ijjen zeg wussan nni inya deg ict n tɣarrabut, Netta d imeḥḍaren nnes. Inna asen: “Ejj aneɣ ad neẓwa ɣar ujemmaḍin n řebḥar!”
LUK 8:23 Am ten tuɣa ruḥen di řebḥar, ikka yiḍeṣ x Yasuɛ. Xenni tehwa-dd ict n tḥaryaḍt n usemmiḍ di řebḥar, tebda tɣarrabut ɛřayen ad tehwa.
LUK 8:24 Qarrben ɣares uca ssfaqen t, nnan as: “[A] Amseřmad nneɣ, [a] Amseřmad nneɣ, aqa nɣarreq.” Netta ikkar-dd, iwebbex asemmiḍ d řemwaj n waman uca ssqaren, yarsa řḥař.
LUK 8:25 Xenni inna asen: “Mani iǧa l’iman nwem?” Ggʷeden, tbehten, nnan jar asen: “Min iɛna Wa, aqa ittamar uřa d asemmiḍ d waman uca ttᵉṭṭaɛen as.”
LUK 8:26 Uyuren s tɣarrabut, usin-dd ɣar temmurt n Gadarinus tenni qibač i Ljalil.
LUK 8:27 Umi dd-iffeɣ ɣar temmurt, iřqa t-i-dd ijj n weryaz zi tendint. Aṭṭas zeg wami tuɣa dayes ijj n cciṭan u tuɣa war ittirḍ arruḍ, war izeddeɣ di taddart maca deg imeḍřan.
LUK 8:28 Umi iẓra Yasuɛ, isɣuy, iwḍa ɣar iḍaren nnes, inna s jjehd “Min din jar aneɣ necc d Cek a Yasuɛ, Mmis n AREBBI, Amɛuǧi x kuřci? Ttzawageɣ Cek, war d ayi tɛeddibed?”
LUK 8:29 Maɣar Netta yumur i řaryaḥ amengus, ḥima ad dd-iffeɣ zi bnadem nni, minzi tuɣa-t dayes [ɛad] ijj n řmijar n řweqt d ameqqran. [Tuɣa arezzun] ad t carfen s ssnaseř d iceddiyyen, maca netta tuɣa ittareẓẓa iceddiyyen nnes uca [xenni] yuẓẓeř xas ijj n cciṭan ɣar řexřa.
LUK 8:30 Isseqsa t Yasuɛ: “Mammec d ac qqaren?” Inna as: “Lixyun ”, minzi ccwaṭen aṭṭas tuɣa udfen dayes.
LUK 8:31 Nitni ttaren zzayes, ḥima war ten ittamar ad raḥen ɣar weḥfur.
LUK 8:32 Tuɣa din ict n tḥimart d tameqqrant n iřfan, tuɣa thedda deg wedrar. Ttaren zzayes ḥima ad ten ijj ad adfen deg iřfan. Uca Netta isamḥ asen.
LUK 8:33 Ffɣen ccwaṭen zi bnadem [nni], udfen deg iřfan. [Xenni] teqnunni tḥimart zi jjarf di řebḥar uca tɣarq.
LUK 8:34 Umi ẓrin imeksawen min imsaren, arewřen uca ɛawden t di tendint u di dcurat.
LUK 8:35 Ffɣen-dd iwdan ḥima ad ẓaren min imsaren. Nitni usin-dd ɣar Yasuɛ, ufin bnadem nni zi ffɣen ccwaṭen, yarḍ, s řeɛqeř, iqqim ɣar iḍaren n Yasuɛ, uca ggʷeden.
LUK 8:36 Inni iẓrin man aya, ɛawden asen mammec ittwassgenfa umaryaḥ.
LUK 8:37 Řɣaci n Ijadariyyen zawgen t, ḥima ad xasen iggʷej, minzi tudef i-ten tiggʷudi temɣar. [Xas uca] yenya Yasuɛ di tɣarrabut, iggʷej xasen.
LUK 8:38 Aryaz i zi ffɣen ccwaṭen, ittar zzayes, ma ad taɣ izemmar ad ɣares iqqim, maca Yasuɛ issekk i-t, inna as:
LUK 8:39 “Ɛqeb ɣar taddart nnec, ɛawed [i ayt bab n taddart] min dayek igga AREBBI.” [Xas uca] iruḥ, ibarreḥ di qaɛ tandint s marra min dayes igga Yasuɛ.
LUK 8:40 Ařami dd-iɛqeb Yasuɛ, yareḥḥeb zzayes ijj n řɣaci d ameqqran, minzi marra ttrajan t.
LUK 8:41 U xzar, yusa-dd ijj n weryaz qqaren as Yayrus, tuɣa-t d ameqqran n temzida, iwḍa ɣar iḍaren n Yasuɛ uca izawg i-t ad yadef ɣar taddart nnes,
LUK 8:42 minzi ayenni n yeǧis i ɣares tenni ɣar iǧa tenɛac n iseggʷusa, tuɣa ɛřayen ad temmet. Am kides iggur Yasuɛ, issdeḥḥes i-t řɣaci.
LUK 8:43 Ict n temɣart, tuɣa ttazzřen zzayes idammen řqedd n tenɛac n iseggʷusa, tseyyar marra řeɛweč nnes x iḍbiben, war izemmar ḥed ad tt issgenfa,
LUK 8:44 tusa-dd ɣares zi ḍeffar, tḥada abeḥřuř n warruḍ nnes, uca řexdenni ibedd usizzeř n idammen nnes.
LUK 8:45 [Xas uca] Inna Yasuɛ: “Wi d ayi iḥadan?” Umi nkaren marra, inna Cimɛun Buṭrus d yinni akides: “[A] Amseřmad nneɣ, řɣaci issdeḥḥes i-c u Cek teqqared: ‘Wi d ayi iḥadan?’”
LUK 8:46 [Maca] Yasuɛ inna: “Aqa ijjen iḥada ayi, minzi Necc uciɣ jjehd iffeɣ zzayi.”
LUK 8:47 Umi tessen temɣart, belli war teqqim war temẓar, tusa-dd s uqefqef uca tewḍa ɣar iḍaren n Yasuɛ, isjed as. Qibač i marra iwdan txebbar x man ssibbet i zi t tḥada d mammec tᵉttwassgenfa deɣya.
LUK 8:48 Inna as Yasuɛ: “Egg uř, a yeǧi, aqa l’iman nnem iwca am Tudart. Ruḥ di řehna.”
LUK 8:49 Am issawař [ɛad], yusa-dd ijj n weryaz zi taddart n umeqqran n temzida, inna as: “Aqa yeǧic temmut, war ssaḥař ɛad Amseɣɣar.”
LUK 8:50 Maca Yasuɛ isřa man aya, inna i babas n tḥenjirt: “War teggʷed ca! Amen waha, nettat ad teddar!”
LUK 8:51 Umi dd-yusa Yasuɛ ɣar taddart, war ijji uřa d ijjen ad yadef mɣir Cimɛun d Yaɛqub d Yuḥanna d babas n tḥenjirt d yemmas.
LUK 8:52 Tuɣa marra ittru, wtin xas agejdur. Netta inna: “War ttrum, nettat war temmut ca, maca nettat tᵉṭṭeṣ.”
LUK 8:53 Nitni ḍeḥcen dayes, ssnen belli nettat tuɣa temmut.
LUK 8:54 Maca awarni řami issuffeɣ marra, iṭṭef i-tt zeg ufus nnes, iřaɣa, inna as: “[A] taḥenjirt, kkar!”
LUK 8:55 Idweř-dd dayes buḥbeř uca tekkar řexdenni. Xenni yumur ad as wcen min ɣa tecc.
LUK 8:56 Tbehten lwalidin nnes, maca Netta iweṣṣa i-ten, war qqaren i ḥed min imsaren.
LUK 9:1 Yasuɛ iřaɣa-dd [ɣares] tenɛac [n rrusul] nnes, iwca asen jjehd d ṣṣulṭa x marra ccwaṭen u [x marra] řehřacat, ḥima ad ssgenfan [iwdan].
LUK 9:2 Issekk i-ten ḥima ad barrḥen s Tgeldit n AREBBI u ḥima ad ssgenfan imehřac.
LUK 9:3 Inna asen: “War kessim walu deg webrid niɣ taɣɣarct niɣ ttesṭim niɣ aɣrum uřa d nnuqart, uca war kessim uřa d tnayen n tcamirat.
LUK 9:4 Man taddart i ɣa tadfem, qqimem dinni uca ffɣem ssenni.
LUK 9:5 Mařa teffɣem zi tendint, zerzem [xenni] taɛejjajt zeg iḍaren nwem qibač i yinni war kenniw iqebbřen, d cchadet xasen.”
LUK 9:6 [Xas uca] ffɣen rrusul, tuɣa ttcuqan di dcurat d tneddam. Nitni ttbarrḥen s Řexbar Aṣebḥan, ssgenfan [imehřac] di kuř amcan.
LUK 9:7 Hirudus, řḥakem x ijj n arbeɛ n temmurt isřa x marra min ittwaggen zzayes uca yarjef, minzi ca [n iwdan] nnan, aqa Yuḥanna ikkar-dd zi taddart n imettinen.
LUK 9:8 Ca nneɣni nnan aqa Iliya iḍhar-dd u ca nneɣni [ɛawed] aqa ijjen zeg inabiyyen n wecḥař uya ikkar-dd.
LUK 9:9 Inna Hirudus: “Aqa d necc i iqessen azeǧif n Yuḥanna, maca manis Wa i xef sřiɣ [marra] man aya?” Uca tuɣa yarezzu ad t iẓar.
LUK 9:10 Umi dd-ɛeqben rrusul, ɛawden i Yasuɛ marra min ggin. Xenni yiwyi ten akides ɣar ijj n wemcan ixřa ɣar Bayt-Ṣayda, [ḥima ad iřin] weḥḥedsen akides.
LUK 9:11 Umi yargeb řɣaci x man aya, iḍfar i-t. Netta tuɣa yareḥḥeb zzaysen, issiweř akidsen x Tgeldit n AREBBI u inni ḥdajen ad ttwassgenfan, issgenfa i-ten.
LUK 9:12 Řami ibda řḥař issutum, qarrben-dd ɣares imeḥḍaren nnes, nnan as: “Sekk řɣaci, ḥima ad raḥen ɣar ředcur d iyyaren i d asen dd-innḍen, ad dinni afen mani ɣa ssensen d min ɣa ccen, minzi aqa aneɣ da deg ijj n wemcan ixřan.”
LUK 9:13 Maca Yasuɛ inna asen: “Wcem asen kenniw ḥima ad ccen.” Nnan as: “War ɣarneɣ mɣir xemsa n tecnifin d tnayen n iseřman, niɣ ittxeṣṣa ad nraḥ ad nseɣ macca i marra iwdan-a!”
LUK 9:14 Minzi tuɣa aten di ca n xemsařaf n yeryazen. [Maca] Yasuɛ inna asen: “Sɣimem ten di tɛurricin n xemsin.”
LUK 9:15 Uca ggin imeḥḍaren amenni uca ssɣimen ten marra.
LUK 9:16 Iksi Yasuɛ ticnifin s xemsa uřa d tnayen n iseřman [nni], issgeɛɛed tamuɣři nnes ɣar ujenna, uca ibark [i-tent], yarẓa uca iwca [zi tecnifin nni] i imeḥḍaren nnes, ḥima ad wcen i řɣaci.
LUK 9:17 Ccin, jjiwnen marra. Ařami d jarwen min iqqimen zeg iřeqqwaz, tuɣa dinni tenɛac n tsuǧatin.
LUK 9:18 Am tuɣa Yasuɛ ittẓaǧa weḥḥdes, am tuɣa imeḥḍaren akides, isseqsa ten, inna: “Min iqqar řɣaci min ɛniɣ?”
LUK 9:19 Arrin-dd, nnan as: “‘Yuḥanna Amseɣḍaṣ!’, u inneɣni: ‘Iliya!’, u ca inneɣni: ‘Aqa ikkar-dd ijj n unabi, ijjen zeg inabiyyen n wecḥař uya’.”
LUK 9:20 Inna asen: “I kenniw, min teqqarem min ɛniɣ?” Yarra-dd Cimɛun, inna: “Lmasiḥ n AREBBI.”
LUK 9:21 [Xenni] iɛřem asen s jjehd uca iweṣṣa ten, war t qqaren i ḥed.
LUK 9:22 Inna asen: “Ittxeṣṣa i Mmis n bnadem ad iweddeb aṭṭas uca ad immenḍar zeg imɣaren [n řgens] d imeqqranen n ikehhanen d imseřmaden n idlisen, ad ittwaneɣ uca deg wass wiss třata ad dd-ikkar.”
LUK 9:23 [Xas uca] inna i marra: “Mařa ixs ḥed ad dd-yas awarni ayi, ittxeṣṣa as ad inkar ixef nnes, ad iksi ṣṣalib nnes kuř ass uca ad ayi dd-iḍfar.
LUK 9:24 Minzi wi ixsen ad issenjem tudart nnes, ad tt iweddar. Maca wi ixsen ad iweddar tudart nnes di ṭṭweɛ inu, ad tt issenjem.
LUK 9:25 Minzi man řefḍeř i bnadem mařa yarbeḥ ddunect marra, maca ad yareddeǧ řeɛmar nnes niɣ ad t iweddar?
LUK 9:26 Minzi wenni i ɣa iseḍḥan zzayi u zeg wawařen inu, ad zzayes iseḍḥa [ɛawed] Mmis n bnadem xmi dd ɣa yas deg uɛuǧi nnes u deg uɛuǧi n Babas ak-d lmalakat nnes iqeddsen.
LUK 9:27 S tidett, Necc ad awem iniɣ, aqa ca zeg inni da iḥḍaren, war ttqisin ca řmewt ař ɣa ẓaren Tageldit n AREBBI.”
LUK 9:28 Ɛřaḥař tmenya n wussan awarni řami [inna] awařen-a, iwyi-dd Yasuɛ akides Cimɛun d Yaɛqub d Yuḥanna uca igeɛɛed ɣar wedrar, ḥima ad iẓẓaǧ.
LUK 9:29 Am tuɣa ittẓaǧa, ibeddeř wudem n uɣembub nnes u arruḍ nnes idweř d acemřař ittissiqen.
LUK 9:30 Xzar, tnayen n yeryazen ssiwřen akides, tuɣa aten d Musa d Iliya,
LUK 9:31 inni dd-iḍharen s uɛuǧi, tuɣa ssawařen x wuffuɣ nnes i tuɣa i ɣa ittwakemmeř di Urcalim.
LUK 9:32 Cimɛun d yinni akides, tuɣa ikka xasen yiḍeṣ, ařami ɛřayen war zemmaren ad qqimen faqen. Nitni ẓrin aɛuǧi nnes d tnayen n yeryazen bedden akides.
LUK 9:33 Ařami xas farqen ina, inna Cimɛun i Yasuɛ: “[A] Amseřmad inu, aqa mliḥ umi i da neǧa. Ejj aneɣ ad newwet třata n iɛuccuten n tseṭṭa, ijjen i Cek, ijjen i Musa u ijjen i Iliya.” Netta [maca] war issin min inna.
LUK 9:34 Awarni řami inna man aya, ikka-dd xasen ijj n useynu, issduriy i-ten uca nitni dewřen ggʷeden umi ẓrin Musa d Iliya udfen ɣar useynu.
LUK 9:35 Tusa-dd ict n tmijja zeg ujenna, teqqar: “D wa d Mmi Iɛizzen, sřem ɣares!”
LUK 9:36 Ařami dd-tusa tmijja, ufin Yasuɛ weḥḥdes. Nitni ssqaren uca war xebbaren ḥed deg wussan nni s min ẓrin.
LUK 9:37 Tiwecca nnes, ařami tuɣa dd-hekkwan zeg wedrar, iřqa ten-i-dd ijj n řɣaci d ameqqran.
LUK 9:38 U xzar, ijj n weryaz zi řɣaci isɣuy, inna: “[A] Amseɣɣar, ttzawgeɣ Cek, ḥinn xafi, aqa-t d ayenni n mmis i ɣari.
LUK 9:39 Xzar, itteṭṭef i-t ijj n řaryaḥ, xenni isɣuyyu deɣya, ittɣeẓẓa tiɣmas u ittekk as-dd kuffu zeg uqemmum, ɛřaḥar war d as yarexxu am t iyezzem [ammu].
LUK 9:40 Ttareɣ zeg imeḥḍaren nnec ad t ssuffɣen, maca war zemmaren.”
LUK 9:41 Yarra-dd Yasuɛ, inna: “A jjiř i war yuminen imɛewwjen, mecḥař ɣarwem i ɣa kkeɣ ad kenniw ksiɣ? Awi-dd mmic da!”
LUK 9:42 Ařami ɣares t-i-dd-issqarreb, inḍar i-t cciṭan [di temmurt], imezzeq i-t. Maca Yasuɛ iwebbex řaryaḥ amengus, issgenfa aḥenjir uca yarra i-t i babas.
LUK 9:43 Marra tuɣa ttɛejjben di řemɣaret n AREBBI. Uca umi tbehten marra nitni di marra min igga Yasuɛ, inna i imeḥḍaren nnes:
LUK 9:44 “Ggem awařen-a deg imezzuɣen nwem, minzi Mmis n bnadem ad immewc deg ifassen n iwdan.”
LUK 9:45 Maca nitni war fhimen i wawař-a, tuɣa ittwassnuffar xasen maḥend war t fehhmen. Uca nitni ggʷeden ad t sseqsan x wawař-a.
LUK 9:46 Yudef i-ten ijj n umcubbec x man wen zzaysen i ɣa yiřin d ameqqran qaɛ.
LUK 9:47 Maca issen Yasuɛ axarreṣ n wuřawen nsen uca iksi ijj n uḥenjir issbedd i-t ɣares.
LUK 9:48 Inna asen: “Wi ɣa iqebřen aḥenjir-a s Yisem inu, iqbeř ayi Necc, u wi d ayi ɣa iqebřen, iqbeř wenni d ayi dd-issekken. Minzi wenni d ameẓyan qaɛ jar awem, netta ad yiři d ameqqran.”
LUK 9:49 Iṭṭef Yuḥanna deg wawař, inna: “[A] Amseřmad nneɣ, neẓra ijjen issuffuɣ ccwaṭen s Yisem nnec uca nessbedd i-t, minzi netta war Cek iḍeffar [jmiɛ] akidneɣ.”
LUK 9:50 Inna as Yasuɛ: “War t sbeddam, minzi wi war iǧin ḍidd nwem, aqa-t akidwem.”
LUK 9:51 Umi dd-iwḍen ad kemmřen wussan n tmeksit nnes nnes [ɣar ujenna], yarra aɣembub nnes ɣar Urcalim.
LUK 9:52 Issekk zzates ireqqasen, uca ina udfen ɣar ijj n dcar n Isamariyyen, ḥima ad as wejden [din].
LUK 9:53 Nitni [maca] war t qbiřen, minzi yarra aɣembub nnes, ḥima ad iraḥ ɣar Urcalim.
LUK 9:54 Umi ẓrin Yaɛqub d Yuḥanna, imeḥḍaren nnes, man aya, nnan: “A Siditneɣ, ma texsed ad numur, ḥima ad dd-tehwa tmessi zeg ujenna, maḥend ad ten tecc am mammec igga ɛawed Iliya?”
LUK 9:55 [Maca] am dd-inneqřeb, iwebbex i-ten, inna: “War tessinem ca man arruḥ i zi teǧam kenniw!
LUK 9:56 Minzi Mmis n bnadem war dd-yusi ca ḥima ad isshellek řeɛmur n iwdan, maca ḥima ad iwc Tudart!” Xenni ruḥen ɣar dcurat nneɣni.
LUK 9:57 Am gguren nitni deg webrid, inna as ijj n weryaz: “A Sidi inu, ad Cek ḍfareɣ mani ma i ɣa traḥed.”
LUK 9:58 Inna as Yasuɛ: “Iceɛbawen ɣarsen ifran d ijḍaḍ n ujenna ɣarsen řeɛwacc, maca Mmis n bnadem war ɣares uřa mani ɣa isenned azeǧif nnes.”
LUK 9:59 Inna i wenneɣni: “Ḍfar ayi-dd!” Maca wanita inna: “[A] Sidi inu, ejj ayi amezwar ad areggʷeḥeɣ ad neḍřeɣ baba!”
LUK 9:60 [Maca] inna as Yasuɛ: “Ejj imettinen ad neḍřen imettinen nsen, maca cek ruḥ, tbarrḥed s Tgeldit n AREBBI.”
LUK 9:61 Inna as wenneɣni: “Ad Cek ḍfareɣ, [a] Sidi, maca ejj ayi amezwar ad ggeɣ allah ihennik x yinni ɣari di taddart inu, [xenni] ad dd-aseɣ.”
LUK 9:62 Inna as Yasuɛ: “Uřa d ijj, mařa issrusa afus nnes x usɣar, xenni ad ixzar ɣar ḍeffar, ad iṣřeḥ i Tgeldit n AREBBI.”
LUK 10:1 Awarni man aya iřeqqem Yasuɛ ɛawed sebɛin nneɣni zeg imeḥḍaren nnes uca issekk i-ten tyuya tyuya qibač i uɣembub nnes ɣar marra tineddam d jjwayeh mani tuɣa Netta igga ad iraḥ.
LUK 10:2 Inna asen: “Tameyra aṭṭas, maca ixeddamen drus, s uyenni ttarem i Bab n tmeyra, ḥima ad issekk ixeddamen ɣar tmeyra nnes.
LUK 10:3 Ruḥem! Aqa ad kenniw ssekkeɣ am wuǧi jar wuccanen.
LUK 10:4 War kiwem kessim ticyarin řa d ttesṭayem uřa d sandaliyat, war ttseǧamem x ḥed deg webrid.
LUK 10:5 Man ma taddart i ɣa tadfem, inim d amezwaru: ‘Řehna x taddart-a.’
LUK 10:6 Mařa din mmis n řehna, řehna nwem ad xas yarsa, mařa war iǧi amenni, řehna nwem ad ɣarwem dd-iɛqeb.
LUK 10:7 Qqimem di taddart nni, ccem, swem zi min ɣarsen, minzi axeddam isdaheǧ řmunet nnes. [S uya] war ggurem ca zi taddart ɣar taddart nneɣni.
LUK 10:8 Man tandint i ɣa tadfem uca ad kenniw qebřen, ccem [din] min d awem ɣa wcen.
LUK 10:9 Sgenfam imehřac i din iǧan, inim asen: “Aqa tqarreb-dd ɣarwem Tgeldit n AREBBI.”
LUK 10:10 Man ma tandint i ɣa tadfem, war kenniw qbiřen, ffɣem ɣar zznaqi nnes, inim:
LUK 10:11 “Ɛad uřa d taɛejjajt i dayneɣ iřeṣqen x [iḍaren] nneɣ n tendint nwem, ad tt nezzerz xawem. Maca snem aya, aqa tqarreb-dd ɣarwem Tgeldit n AREBBI!
LUK 10:12 Ad awem iniɣ belli deg wass nni ad yiři řḥař n Sadum ihwen zi tendint nni.”
LUK 10:13 Uct xam, [a] Xurazin, uct xam, [a] Bayt-Ṣayda! Mři msarent di Ṣur d Ṣaydun řeɛjayeb i ittwaggen daykent, ad tiři tubent zi zzman am qqiment di txancet n wecḍan d yiɣɣeḍ [x izeǧifen nsent].
LUK 10:14 Maca ad yiři řḥař n Ṣur d Ṣaydun ihwen zi řḥař nkent di lḥisab.
LUK 10:15 U cem, [a] Kafarnaḥum, tenni tuɣa ittwassgeɛɛden ɣar ujenna, aqa ad tᵉttwassehwid ɣar řaxart!
LUK 10:16 Wi zzaywem i ɣa isřen, ad zzayi iseř, wi kenniw ɣa yagin, ad ayi yagi, u wi d ayi ɣa yagin, ad yagi wenni d ayi dd-issekken.”
LUK 10:17 [Xenni] ɛeqben sebɛin nni s řefraḥet aṭṭas, nnan as: “[A] Siditneɣ, uřa d ccwaṭen ṭṭaɛen aneɣ s Yisem nnec.”
LUK 10:18 [Xas uca] inna asen: “Ẓriɣ cciṭan iwḍa-dd amecnaw assam zeg ujenna.
LUK 10:19 Xzar, Necc ad awem wceɣ ṣṣulṭa ḥima ad tɛefsem x ifiɣran d iɣarḍmiwen uřa [d ṣṣulṭa] x marra jjehd n řeɛdu. Uřa d ict n řḥajjet war kenniw tḍarri.
LUK 10:20 Maca war farrḥem ca s uya, belli aqa ccwaṭen ad awem ṭṭaɛen, maca farḥem belli aqa ismawen nwem ttwazemmemen deg ijenwan.”
LUK 10:21 Di tsaɛɛet nni ifarḥ Yasuɛ di Arruḥ Iqeddsen, inna: “Necc ttqadiɣ Cek, a Baba, Bab n ujenna d temmurt, minzi tessnuffared timesřayin-a x imiɣisen u x aytbab n řeɛqeř uca tessaregbed tent i iḥenjiren. Wah, a Baba, ammu i tuɣa ixs řxaḍar nnec!”
LUK 10:22 [Xas uca] inneqřeb ɣar imeḥḍaren nnes, inna: “Kuřci immewc ayi zi Baba uca uřa d ijj war issin man wen d Mmis mɣir Babas uca [uřa d ijj war issin] man wen d Babas mɣir Mmis, d wenni umi ixs Mmis ad [t] issargeb.”
LUK 10:23 [Xenni] inneqřeb-dd ɣar imeḥḍaren weḥḥedsen, inna: “Sseɛd n tiṭṭawin i ittwařan min tᵉttwařam kenniw.
LUK 10:24 Minzi Necc ad awem iniɣ, aqa aṭṭas n inabiyyen d ijeǧiden tuɣa xsen ad ẓaren min tᵉttwařam kenniw, [maca] war tt ttwiřin, uřa ad sřen min tᵉttesřam, [maca] war tt sřin.”
LUK 10:25 Xzar, ijj n umseřmad n idlisen ikkar ḥima ad t ijarreb, inna: “[A] Amseɣɣar, min ɣa ggeɣ ḥima ad warteɣ Tudart ittduman?”
LUK 10:26 Yasuɛ inna as: “Mammec t yurin di Ccariɛa? Mammec teqqared?”
LUK 10:27 Yarra-dd, inna as: “Ad texsed SIDI, AREBBI nnec s marra wuř nnec, s marra řeɛmar nnec, s marra jjehd nnec, s marra řeɛqeř nnec, uca [ad texsed] jjar nnec amecnaw ixef nnec.”
LUK 10:28 Inna as Yasuɛ: “Aqa tarrid nican. Egg man aya uca ad teddared.”
LUK 10:29 Maca netta ixs ad issegged ixef nnes, inna as: “Man wen iǧan d jjar inu?”
LUK 10:30 Yarra-dd xas Yasuɛ, inna as: “Ijj n weryaz ihwa-dd zi Urcalim ɣar Ariḥa uca iwḍa deg ifassen n iceffaren, kksen as arruḍ, wtin t s weɛmud, xenni ruḥen, jjin t jar řmewt d tudart.
LUK 10:31 Xenni ihwa-dd ijj n ukehhan ɣar webrid nni. Netta iẓra i-t, maca ikka [xas].
LUK 10:32 Ammu ɛawed uřa d ijj n Ulawi iɛdu-dd x wemcan nni, iẓra i-t, maca ikka [xas].
LUK 10:33 Maca ijj n weryaz Asamiri, tuɣa-t deg usafar, yiweḍ-dd ɣares, iẓra i-t uca iḥinn xas.
LUK 10:34 Iqarreb-dd ɣares, icedd as iyezzimen nnes, iseyyeḥ xasen binu d zzect. [Xenni] issenya i-t x zzayřet nnes, yiwyi i-t ɣar wenwař, ithella dayes.
LUK 10:35 Tiwecca nnes řami iruḥ, iwca tnayen dinar i bab n wenwař, inna as: ‘Thilla dayes u mařa txeǧṣed ktar zi man aya, ad cek xeǧṣeɣ xmi dd ɣa ɛeqbeɣ.’
LUK 10:36 Man wen zi třata nni tᵉttwařid d jjar n wenni iwḍan deg [ifassen n] iceffaren?”
LUK 10:37 Inna as: “Wenni xas iḥinnen!” Inna as Yasuɛ: “Iwa uyur, uřa d cek tegged amenni!”
LUK 10:38 Am tuɣa gguren nitni, yudef ɣar ijj n dcar, uca ict n temɣart, qqaren as Marta, tareḥḥeb zzayes di taddart nnes.
LUK 10:39 Tuɣa ɣar ta ict n učmas, qqaren as Maryam, tenni tuɣa teqqim ɣar iḍaren n Siditneɣ uca tuɣa tessḥessa i wawař nnes.
LUK 10:40 Maca Marta tuɣa tecɣeř aṭṭas s tsexxart. Nettat tusa-dd [ɣares], tenna as: “[A] Sidi, ma war d ac icqi belli učma tejja ayi ttsexxareɣ weḥḥdi? Ini as ḥima ad ayi tɛawen.”
LUK 10:41 Maca Yasuɛ yarra-dd, inna as: “Marta, Marta, cem tceɣřed u tqeǧiqed x waṭṭas n tmesřayin,
LUK 10:42 maca ittxeṣṣa ict n řḥajjet [waha]! Aqa Maryam tixḍar tasɣart taṣebḥant tenni war zzayes ittwattekksen.”
LUK 11:1 Am tuɣa ittẓaǧa deg ijj n wemcan, imsar, umi ikemmeř Netta taẓaǧit nnes, aqa ijjen zeg imeḥḍaren nnes inna as: “[A] Siditneɣ, seřmed aneɣ ad neẓẓaǧ am mammec tuɣa Yuḥanna isseřmad ɛawed imeḥḍaren nnes.”
LUK 11:2 Yasuɛ inna asen: “Meřmi ma teẓẓuǧem, inim: ‘Babatneɣ i iǧan deg ijenwan, ad ittwaqeddes Isem nnec, ad dd-tas Tgeldit nnec, ad tᵉttwagg am mammec texsed Cek, am deg ujenna, ammu ɛawed di temmurt.
LUK 11:3 Ewc aneɣ kuř ass aɣrum nneɣ i kuř ass,
LUK 11:4 uca ɣfar aneɣ ddnub nneɣ, minzi uřa d neccin nsameḥ i marra inni dayneɣ ittursen. War d aneɣ ssidif ca deg ujarreb, maca senjem aneɣ zeg umɛeffan.’”
LUK 11:5 Xenni inna asen: “Man wen zzaywem i ɣar iǧa ijj n umeddukkeř, ad ɣares iraḥ deg wezyen n ǧiřet uca ad as ini: ‘A ameddukkeř, arḍeř ayi třata n tecnifin,
LUK 11:6 minzi ijj n umeddukkeř inu, ixecc-dd ɣari zeg usafar, war ɣari min d as ɣa qeddmeɣ!’,
LUK 11:7 uca [xenni] ad xas dd-yarr umeddukkeř nnes zi daxeř, ad as yini: ‘War dd ayi ttṣeddaɛ, tawwart tbelleɛ u tarwa aqa-tt akidi di tassut, war zemmareɣ ad dd-kkareɣ maḥend ad ac wceɣ [aɣrum].’
LUK 11:8 Ad awem iniɣ, mařa war dd-ikkar ḥima ad as iwc umi netta d ameddukkeř nnes, iwa ad dd-ikkar ad as iwc mecḥař ma iḥdaj x ssibbet n řewɛaret [n umeddukkeř] nnes.
LUK 11:9 Ad awem iniɣ: Ttarem, xenni ad awem immewc, arzum, xenni ad tafem, ssqarqbem, xenni ad awem arezmen.
LUK 11:10 Minzi marra wi ɣa ittaren ad iksi, u wi ɣa yarzun ad yaf, u wi ɣa issqarqben ad as ittwarzem.
LUK 11:11 Niɣ din jar awem babas, wenni umi d as i ɣa ittar mmis aɣrum, ad as iwc aẓru? Niɣ umi ɣa ittar asřem, ad as iwc afiɣar deg wemcan n wesřem?
LUK 11:12 Niɣ mařa ittar zzayes tameǧač, ad as iwc taɣarḍent?
LUK 11:13 Mařa kenniw, inni iǧan d iɛeffanen, tessnem ad tewcem timewca tiṣebḥanin i tarwa nwem, mecḥař s waṭṭas ad iwc Babatwem i iǧan deg ijenwan Arruḥ Iqeddsen i yinni d as t ittaren!”
LUK 11:14 Umi issuffeɣ Netta ijj n cciṭan agnaw, imsar, awarni řami issuffeɣ cciṭan nni, aqa agnaw ibda issawař. [Uca xenni] itebhet řɣaci [marra].
LUK 11:15 Maca ca zzaysen nnan: “Issuffuɣ ccwaṭen s Bᵉɛalzabub, ameqqran n ccwaṭen.”
LUK 11:16 Inneɣni jarrben t, ttaren zzayes ict n řeɛřamet zeg ujenna.
LUK 11:17 Maca Netta yargeb x ixarriṣen nsen, inna asen: “Kuř tageldit i ibḍan x yixef nnes ad tᵉttwareddeǧ u taddart i ibḍan x yixef nnes, ad tewḍa.
LUK 11:18 Mařa ibḍa cciṭan x yixef nnes, mammec ɣa teqqim tgeldit nnes? Minzi kenniw teqqarem belli Necc ssuffuɣeɣ ccwaṭen s Bᵉɛalzabub.
LUK 11:19 Mařa Necc ssuffuɣeɣ ccwaṭen s Bᵉɛalzabub, s minzi i ten ssuffuɣen tarwa nwem? S uyenni ad iřin nitni d lquḍat xawem.
LUK 11:20 Maca mařa tuɣa s uḍaḍ n AREBBI i zi ssuffuɣeɣ ccwaṭen, xenni aqa tqarreb-dd ɣarwem Tgeldit n AREBBI.
LUK 11:21 Min ɣa yekk weryaz ijehden iḥezzmen s řesnaḥ ittɛessa x řemraḥ nnes, ad yiři wagřa nnes di řaman.
LUK 11:22 Maca meřmi i dd ɣa yas wenni iǧan d jjiheř xas, uca ad t iɣřeb, aqa netta ad as ikkes řesnaḥ min xef tuɣa ittcař, uca ad ibḍa min tuɣa zzayes iksi.
LUK 11:23 Wenni war iǧin akidi, aqa-t ḍidd inu u wenni war kidi issmunin, aqa netta ittzeǧaɛ.”
LUK 11:24 “Xmi ɣa iffeɣ řaryaḥ amengus zi bnadem, ad icuq deg imucan war daysen bu waman, ad yarzu arraḥet uca xmi war tt ittif, ad yini: ‘Ad ɛeqbeɣ ɣar taddart inu tenni zi dd-ffɣeɣ.’
LUK 11:25 Xmi dd ɣa yas, ad tt yaf, tfarḍ, teɛdeř.
LUK 11:26 Xenni ad iraḥ, ad iksi sebɛa n řaryaḥ nneɣni iɛeffanen xas, ad dd-adfen uca ad zedɣen dinni. Xenni ad idweř uneggar n bnadem nni d aɛeffan mahu x mammec t tuɣa ɣar umezwar.”
LUK 11:27 Am issawař s uya, tessgeɛɛed ict n temɣart zi řɣaci tmijja nnes, tenna as: “Sseɛd n uɛeddis i Cek iksin u tabbuct i zi tᵉṭṭḍed!”
LUK 11:28 Netta inna: “Sseɛd n yinni ittesřan awař n AREBBI uca ḥeffḍen t.”
LUK 11:29 Am tuɣa imun řɣaci, ibda iqqar: “Ttaṣiřet-a d taɛeffant tᵉttᵉttar řeɛřamet, war d as tᵉttmewci řeɛřamet mɣir řeɛřamet n Yunus anabi.
LUK 11:30 Minzi am mammec tuɣa Yunus d řeɛřamet i aytbab n Ninwa, ammu i ɣa yiři Mmis n bnadem ɛawed [d řeɛřamet] i jjiř-a.
LUK 11:31 Tajeǧidt n ljanub ad tekkar deg [wass n] lḥisab ak-d yeryazen n jjiř-a, ad ten tḥaseb. Minzi tusa-dd zi tneggarut n temmurt, ḥima ad tseř i tiɣit n Suliman. Xzar, aqa da wenni imɣaren x Suliman.
LUK 11:32 Iryazen n Ninwa ad dd-kkaren deg [wass n] lḥisab ak-d jjiř-a uca ad t ḥasben, minzi nitni tuben awarni i ubarreḥ n Yunus. Xzar, aqa da wenni imɣaren x Yunus!”
LUK 11:33 Uřa d ijj war issreqqi řqendiř uca issrusa t deg wemcan inuffaren niɣ sadu řmud n imendi, maca [issrusa i-t] x řmerfeɛ, ḥima inni dd ɣa yadfen ad ẓaren tfawt.
LUK 11:34 Řqendiř n arrimet nnec d tiṭṭ nnec. Mařa tiṭṭ nnec teṣfa, ad tiři tfawt uřa di marra arrimet nnec. Mařa [tiṭṭ nnec] d taɛeffant, uřa d arrimet nnec ad tiři d taǧest.
LUK 11:35 Ḥḍa xenni, ḥima tafawt i dayek [iǧan], war tᵉttiři d taǧest.
LUK 11:36 Mařa marra arrimet nnec teccur s tfawt, war dayes uřa d ijj n uɣezdis ibarrcen, xenni ad dayes tiři tfawt kuřci am mammec xmi yareqq řqendiř s uceɛɛař nnes.”
LUK 11:37 Am tuɣa issawař s man aya, iɛarḍ i-t ijj n Ufarisi ɣar umecři akides. Xenni yudef, iqqim ɣar ṭṭabřa.
LUK 11:38 Umi t iẓra Ufarisi, itebhet minzi Netta war issird ca d amezwar qbeř i umecři.
LUK 11:39 Maca Yasuɛ inna as: “Kenniw, [a] Ifarisiyyen, tessizdagem barra n řkas d ṭṭebṣi, maca di daxeř nwem tcurrem s [ṭṭmeɛ n] tkeccaḍt d řɣar.
LUK 11:40 Kenniw, [a] ifɣař, ma war iǧi Wenni iggin min iǧan ɣar barra, igga uřa d min iǧan daxeř?
LUK 11:41 Maca mařa ad tewcem [marra] min iǧan daxeř d ṣṣedqet, xzar, marra min daywem ad yiři d amezdag.”
LUK 11:42 Maca uct xawem, [a] Ifarisiyyen minzi tᵉttɛeccaram nneɛnaɛ d wazar d marra tibbi, [maca] tejjim řḥukm d tayri n AREBBI ɣar uɣezdis. Iwa ittxeṣṣa awem ad teggem timesřayin-a, nhřa ma ad tᵉttum inneɣni.
LUK 11:43 Uct xawem, [a] Ifarisiyyen, minzi iɛjeb awem ad teqqimem x řekrasi n zzat di temzidawin u iɛjeb awem ad xawem seǧmen [iwdan] di řeswaq.
LUK 11:44 Uct xawem, a imseřmaden n idlisen d Ifarisiyyen, [kenniw, a] imnafqen, minzi kenniw tᵉtteggem am yimeḍřan idduryen min xef gguren iwdan am war ssinen.”
LUK 11:45 Ijjen zeg imseřmaden n idlisen iṭṭef deg wawař, inna as: “[A] Amseɣɣar, aqa xmi teqqared aya, tessfeṭṭaḥed aneɣ uřa d neccin.”
LUK 11:46 Maca Netta inna: “Uct xawem, [a] imseřmaden n idlisen, minzi tessarebbum řeḥmuř iḍeqřen i tkessit x iwdan, maca kenniw s yixef nwem war tᵉttḥidim řeḥmuř nni uřa s ijjen zeg iḍewḍan nwem!
LUK 11:47 Uct xawem, minzi tbennam imeḍřan n inabiyyen, am řejdud nwem nɣin ten.
LUK 11:48 S man aya tneɛɛmem, aqa kenniw tareṭṭam s min ggin řejdud nwem, minzi nitni nɣin ten uca kenniw tbennam imeḍřan nsen.
LUK 11:49 S uyenni tiɣit n AREBBI tenna: “Aqa ad asen dd-ssekkeɣ inabiyyen d rrusul. Ad aẓẓřen nitni x [ca] zzaysen uca ad ten nɣen,
LUK 11:50 ḥima ad ttwattaren zi jjiř-a idammen n marra inabiyyen i ittwassizzřen zeg wami tᵉttwagg ddunect:
LUK 11:51 zeg idammen n Habil ař idammen n Zakariyya, wenni nɣin jar Zzawect Tameqqrant d uɛalṭar! Wah, ad awem iniɣ belli ggur ad ttwattaren [idammen nsen] zi jjiř-a.
LUK 11:52 Uct xawem, [a] imseřmaden n idlisen, minzi tkessim tisarutin n tussna. Kenniw s yixef nwem war tᵉttidfem u inni ittadfen, tᵉṭṭfem ten.”
LUK 11:53 Am tuɣa akidsen issawař s uya, bdan imseřmaden n idlisen d Ifarisiyyen ttḍaddan t aṭṭas. Ffugmen, ḥeccen x wawařen nnes,
LUK 11:54 uca ggin zzayes s tḥraymect aṭṭas, arezzun ad t ṭṭfen s ca zeg uqemmum nnes, ḥima ad t ḍeřmen.
LUK 12:1 Umi munen ibarruten n řɣaci s waṭṭas, ařami bdan [ɛřayen] ɛeffsen ijj x wenneɣni, ibda iqqar i imeḥḍaren nnes: “Ɣar umezwar ḥḍam ixef nwem zeg wentun n Ifarisiyyen, aqa-t d nnifaq!
LUK 12:2 Minzi war din min idřin, war ittᵉttwasseḍhar, u [war din] min inuffaren, war ittᵉttwissin.
LUK 12:3 Minzi marra min tennam di taǧest, ad ittwaseř di tfawt, u min xef tessiwřem deg umezzuɣ deg wexxam n daxeř, ad ittwabarreḥ zzayes x tzeɣwin.”
LUK 12:4 “Necc ad awem iniɣ, [a] imeddukkař inu: War teggʷdem ca zeg inni ineqqen arrimet, [maca] awarni man aya war zemmaren ad ggen ktar ɛad.
LUK 12:5 Maca Necc ad awem ssecneɣ wenni zi ɣa teggʷedem: Ggʷedem zeg Wenni ɣar iǧa ṣṣulṭa, maḥend ad inḍar di jᵉhennama awarni řami inɣa. Wah, ad awem iniɣ, zeg Wanita i ɣa teggʷedem!
LUK 12:6 Ma war ttmenzin xemsa n ẓẓawec s tnayen n iṣuldiyyen n nnḥas? Uca uřa d ijj zzaysen war ittᵉttwattu zzat i AREBBI.
LUK 12:7 Maca zzaywem, ɛad iẓuṭṭan n ucuwwaf n uzeǧif nwem ttwaḥesben. S uyenni war teggʷdem ca, kenniw ḥsen zi ẓẓawec aṭṭas!”
LUK 12:8 “Necc ad awem iniɣ, marra wi zzayi i ɣa icehden qibač i iwdan, ad zzayes iched ɛawed Mmis n bnadem zzat i lmalakat n AREBBI.
LUK 12:9 Maca wi d ayi ɣa inkaren qibač i iwdan, uřa d netta s yixef nnes ad ittwankar qibač i lmalakat n AREBBI.
LUK 12:10 Kuř ijj wenni i ɣa inin awař ḍidd n Mmis n bnadem, aqa ad as ittwaɣfar man aya. Maca wenni i ɣa iceqqfen di Arruḥ Iqeddsen war d as ittᵉttwaɣfar ca man aya!”
LUK 12:11 “Xmi kenniw i ɣa nedhen ɣar temzidawin, zzat i řḥukkam d ayt n bu-ṣṣulṭa, war kessim ca s wemnus min zi i dd ɣa tarrem niɣ min ɣa tinim,
LUK 12:12 minzi Arruḥ Iqeddsen ad awem isseřmed di tsaɛɛet nni min ittxeṣṣa ad tinim.”
LUK 12:13 Inna as ijjen zi řɣaci: “[A] Amseɣɣar, ini as i uma, ḥima ad kidi ibḍa řwart.”
LUK 12:14 [Maca] Yasuɛ inna as: “[A] bnadem, wi d ayi yarrin xawem d řqaḍi niɣ d řɛadeř?”
LUK 12:15 Inna i imeḥḍaren nnes: “Ɣarwem, ḥḍam ixef nwem zi ṭṭmeɛ, maɣar tudart war teǧi deg ufeyyeḍ n wagřa.”
LUK 12:16 [Xas uca] iḥaja asen ijj n umedya: “Tammurt n ijj n weryaz d bab n wagřa tiwyi as-dd ṣṣabet aṭṭas.
LUK 12:17 Ixarreṣ deg ixef nnes: ‘Min ɣa ggeɣ?, minzi war ɣari bu řmarsi i di i ɣa yarweɣ [marra] řɣiǧet inu.’
LUK 12:18 Inna: ‘Ammu i ɣa ggeɣ: Ad hedmeɣ řemrasi inu, xenni ad bniɣ [řemrasi] d imeqqranen xasen uca ad daysen xezneɣ marra řɣiǧet d wagřa inu.
LUK 12:19 Ad iniɣ i yixef inu: ‘[A] řeɛmar [inu], ɣarek aṭṭas n wagřa i ittwaxzen din i waṭṭas n iseggʷusa. Areyyeḥ, tecced, teswed u tfarḥed!’
LUK 12:20 Maca inna as AREBBI: ‘[A] afɣuř, aqa ǧiřet-a ad zzayek ittwattar řeɛmar nnec. Xenni i umi ɣa yiři min tesswejded?’
LUK 12:21 Ammu i ɣa imsar i wenni iyarrwen řeknuz i yixef nnes, [maca] war iǧi d bab n wagřa di AREBBI.”
LUK 12:22 Inna i imeḥḍaren nnes: “S uyenni Necc ad awem iniɣ: War kessim s wemnus i řeɛmar nwem min ɣa teccem, uřa i arrimet nwem min ɣa tyarḍem.
LUK 12:23 Řeɛmar ktar zi macca u arrimet ktar zeg werruḍ.
LUK 12:24 Xzarem ɣar ibaɣřiwen! Aqa war zarrɛen, war mejjaren, war ɣarsen tisrafin niɣ d řemrasi, [maca] AREBBI issecca i-ten. Mecḥař aṭṭas tsekkwim kenniw ktar x ijḍaḍ!
LUK 12:25 Man wen zzaywem izemmar s wemnus nnes ad yarni di tuzzeggart nnes ijj n uɣiř [waha]?
LUK 12:26 Mařa kenniw war tzemmarem uřa x min iǧan d ameẓyan qaɛ, mayemmi ɣa teksim s wemnus x min iqqimen?”
LUK 12:27 “Xzarem mammec ɣemmyent tlillicin! War xeddment, war ttqareḍcent, [maca] Necc ad awem iniɣ, aqa uřa d Suliman di qaɛ aɛuǧi nnes war yarḍ ca am uřa d ict zzaysent.
LUK 12:28 Mařa AREBBI issyarḍ ammu arbiɛ i iǧan ass-a deg iyyar uca tiwecca ad immenḍar di tefqunt, mecḥař iḥřa aṭṭas ad issyarḍ Netta kenniw i di iǧa drus n l’iman!”
LUK 12:29 “S uyenni war arezzum ca x min ɣa teccem uřa x min ɣa teswem, war ttejjim ixarriṣen nwem ad ɣefřem x man aya.
LUK 12:30 Minzi marra timesřayin-a arezzun daysent řegnus n ddunect, maca Babatwem issen belli teḥdajem tent.
LUK 12:31 Maca arzum Tageldit n AREBBI uca timesřayin-a marra ad awem ttwammarnint.”
LUK 12:32 “War tteggʷed, [cem,] [a] taḥimart tameẓyant, minzi yarḍa Babatwem ad awem iwc Tageldit.
LUK 12:33 Zenzem min ɣarwem, wcem ṣṣedqet! Ggem i yixef nwem ticyarin n tmenyat i war yareccin, uca [xemmřem] ijj n řkenz i war iqeṭṭin deg ijenwan, mani war ittidef uceffar uřa d tcinda war tᵉttegg ssuss.
LUK 12:34 Minzi mani ɣa yiři řkenz nwem, dinni i ɣa yiři ɛawed wuř nwem.”
LUK 12:35 “Ad iřint tejɛinnatin nwem ḥezzmemt s ibuyas u řefnarat nwem areqqent.
LUK 12:36 Iřim am iwdan i ittrajan sidi nsen xmi dd ɣa yeɛqeb zeg wexxam n wurar, ḥima, xmi dd ɣa yas, ad issqarqeb, zemmaren ad as arzmen deɣya.
LUK 12:37 Sseɛd n imsexxaren nni, xmi dd ɣa yas siditsen, ad ten yaf faqen. S tidett, Necc ad awem iniɣ, aqa ad iḥezzem ixef nnes uca ad ten issɣim, xenni ad dd-yas ad xasen isexxar.
LUK 12:38 Mařa yusa-dd ɣar ḥeṭṭu wiss tnayen n ǧiřet niɣ ɣar ḥeṭṭu wiss třata uca yufa i-ten ammu, sseɛd n imsexxaren nni.
LUK 12:39 Maca ssnem aya: mařa bab n taddart issen di man tsaɛɛet i di ɣa ixecc uceffar, xenni ad yiři ifaq, war ittejji taddart nnes ad tt acaren.
LUK 12:40 Iřim kenniw ɛawed twejdem, minzi Mmis n bnadem ad dd-yas deg ict n tsaɛɛet i war tᵉttrijim.”
LUK 12:41 Inna as Cimɛun Buṭrus: “[A] Siditneɣ, ma i neccin i tɛawded amedya-ya niɣ i marra?”
LUK 12:42 Inna as Yasuɛ: “Man wen iǧan xenni d awkiř amiɣis i di iǧa řaman, d wenni i ɣa yegg sidis x imsexxaren nnes ḥima ad [asen] iwc řeɛweč [nsen] di řweqt nnes?
LUK 12:43 Sseɛd n umsexxar nni i ɣa yaf sidi nnes, xmi dd ɣa yas, ittegg ammu.
LUK 12:44 S tidett, Necc ad awem iniɣ, belli ad t yegg x marra agřa nnes.
LUK 12:45 Maca mařa amsexxar nni ad yini deg wuř nnes: ‘Aqa sidi inu iɛeṭṭař x weɛqab!’, uca ibda iccat imsexxaren d tiyya, ittett, isess, iscar,
LUK 12:46 xenni ad dd-yas sidi n umsexxar nni deg ijj n wass war ittriji u deg ict n tsaɛɛet i war issin. Wanita ad t iqeṭṭes d iceǧiqen, ad igg tasɣart nnes ak-d iɣeddaren.
LUK 12:47 Amsexxar nni issnen řxaḍar n sidi nnes uca war issewjed ixef nnes uřa war iggi ɛlaḥsab řxaḍar n sides, ad iksi tiyyita aṭṭas.
LUK 12:48 Maca wenni war issinen [řxaḍar n sides] [am] igga ca min isdaheǧen tiyyita, ad ittwawwet s drus n tiyyita. Zi kuř ijjen umi immewc aṭṭas, ad zzayes ittwattar aṭṭas, u wi umi ittwakellef aṭṭas, ad zzayes ittwattar ktar.”
LUK 12:49 “Usiɣ-dd ḥima ad nḍareɣ timessi x temmurt u meɛlik ufiɣ ad tiři tarɣa.
LUK 12:50 [Maca] ɣari ijj n useɣḍeṣ i zi ɣa ttwassɣeḍṣeɣ, u ttwaḥṣareɣ aṭṭas ař d ɣa ittwakemmeř.
LUK 12:51 Ma ittɣiř awem belli usiɣ-dd ḥima ad ssiwḍeɣ řehna x temmurt? Lla, ad awem iniɣ, d amezwar abeṭṭu.
LUK 12:52 Minzi zi řexxu d tsawent ad mmsebḍan xemsa deg ict n taddart, třata ḍidd tnayen u tnayen ḍidd třata.
LUK 12:53 Babas ad immsebḍa x mmis, u mmis x babas, u yemmas x yeǧis, u yeǧis x yemmas, u řallas x tesřit, u tasřit x řallas.”
LUK 12:54 Inna i řɣaci: “Xmi ɣa tẓarem ijj n useynu igeɛɛed-dd zi řɣarb, deɣya ad tinim: ‘Ad yiři wenẓar!’ uca ammu i ɣa imsar!
LUK 12:55 Xmi ɣa tẓarem asemmiḍ n ljanub ittsuḍ, xenni ad tinim: ‘Ad yiři řeḥmu!’, uca [ammu] i ɣa imsar.
LUK 12:56 [A] imnafqen, aqa tessnem ad tmeyyzem udem n temmurt d ujenna. Ma zzman-a mammec war tzemmaren ad t tmeyyzem?”
LUK 12:57 “Mayemmi war tḥekkmem s yixef nwem min iǧan d ṣṣaḥ?
LUK 12:58 Minzi, xmi ɣa traḥed ɣar řḥakem ak-d weɣrim nnec, egg tizemmar am teǧid ɛad [akis] deg webrid maḥend ad zzayes tᵉttwafekked, ḥima war cek ittjarri ɣar řqaḍi uca řqaḍi ad cek isellem i wemxazni, xenni ad cek inḍar umxazni di řeḥbes.
LUK 12:59 Ad ac iniɣ, cek war dd ssenni tᵉtteffɣed ař ɣa txeǧṣed aṣuldi aneggaru!”
LUK 13:1 Di řweqt nni usin-dd [ɣares] ca n iwdan, xebbaren t x Ijaliliyyen inni ixeǧeḍ Pilaṭus idammen nsen ak-d tɣarṣin nsen.
LUK 13:2 Yarra-dd Yasuɛ, inna asen: “Ma ittɣiř awem belli Ijaliliyyen-a d imednab ktar zeg Ijaliliyyen nneɣni umi d asen imsar uweddeb-a?
LUK 13:3 Ad awem iniɣ, lla! Maca kenniw ad tᵉttwahellkem marra am nitni, mařa war tᵉttubem.
LUK 13:4 U zi jjihet n tmenṭac [n iwdan] i xef dd-tewḍa ṣṣumɛet di Siluwam uca mmuten zzayes, ma ittɣiř awem aqa aten d imednab ktar zeg iwdan [nneɣni] i izeddɣen di Urcalim?
LUK 13:5 Ad awem iniɣ, lla! Maca kenniw ad tᵉttwahellkem marra am nitni, mařa war tᵉttubem!”
LUK 13:6 Inna asen amedya-ya: “Tuɣa ɣar ijj n weryaz ijj n wartu i ittwaẓẓun deg umarjeɛ nnes n uḍiř, uca netta yusa-dd, yarezzu dayes tazart, [maca] war tt yufi.
LUK 13:7 Inna i bab n umarjeɛ n uḍiř: ‘Aqa třata n iseggʷusa ttaseɣ-dd, arezzuɣ tazart deg wartu-ya, war tt ufiɣ. Qess i-tt [xenni], mayemmi tessaḥař ɛad tammurt?’
LUK 13:8 Yarra-dd xas ufeǧaḥ: ‘A sidi, ejj i-tt [ad tbedd] ɛad aseggʷas-a. Ad tt ɣziɣ, u ad as ggeɣ řeɣbar.
LUK 13:9 Ad taɣ ad tarr řɣiǧet, mařa lla, xenni qess i-tt deg useggʷas i dd ɣa yasen.’”
LUK 13:10 Řami tuɣa isseřmad Yasuɛ deg icten zi temzidawin di ssebt,
LUK 13:11 tuɣa din ict n temɣart i iḍɛef buḥbeř nnes řmijař n tmenṭac n iseggʷusa. Tuɣa teqwes, war tzemmar ad tseggem aɛrur.
LUK 13:12 Umi tt iẓra Yasuɛ, iřaɣa-dd xas ɣares, inna as: “[A] tamɣart, aqa cem tenfekked zi tuḍɛeft nnem!”
LUK 13:13 Issars xas afus nnes uca nettat tedweř tseggem řexdenni, tebda tessemɣara di AREBBI!
LUK 13:14 Maca ameqqran n temzida, umi ixeyyeq, minzi Yasuɛ issgenfa [ijjen] di ssebt, iṭṭef deg wawař, inna i řɣaci: “Aqa di setta n wussan ittxeṣṣa řxedmet, asem-dd deg wussan nni maḥend ad tᵉttwassgenfam, war iǧi deg wass n ssebt!”
LUK 13:15 [Maca] yarra-dd Yasuɛ, inna as: “[A cek,] amnafeq! Ma war ifessi kuř ijjen zzaywem di ssebt i ufunas nnes niɣ i weɣyuř nnes zi řmedwed, xenni ad t indeh maḥend ad t iward?
LUK 13:16 Maca tamɣart-a aqa-tt d yeǧis n Ibrahim, tenni icedd ibřis, xzar, [ɛad] řmijař n tmenṭac n iseggʷusa, ma war d as dd-yusi ad tᵉttwafekk zeg uceddi-ya deg wass n ssebt?”
LUK 13:17 Am inna man aya, seḍḥan marra inni tuɣa akides ittemɛařan, [maca] marra řɣaci ifarḥ zi lmuɛjizat nni tuɣa ittwaggen s ufus nnes.
LUK 13:18 Yasuɛ inna: “Min di tarwes Tgeldit n AREBBI uca min zi tt ɣa ssemquddeɣ?
LUK 13:19 Aqa-tt am yict n tḥebbuct n zzariɛet n uxerdel iksi tt ijj n weryaz, inḍar i-tt di teḥwict nnes, uca teɣmi-dd, tedweř d tacejjart temɣar uca ggin ijḍaḍ n ujenna řeɛwacc nsen di řefruɛ nnes.”
LUK 13:20 Yasuɛ inna ɛawed: “S min zi ɣa ssemquddeɣ Tageldit n AREBBI?
LUK 13:21 Aqa-tt am wentun, teysi t temɣart, teffar i-t di třata n řemdud n waren, ařami issmemm marra!”
LUK 13:22 Iẓwa tineddam d dcurat, am tuɣa isseřmad, iggur ɣar Urcalim.
LUK 13:23 Ijjen isseqsa i-t, ma aqa din drus n yinni i ɣa ṭṭfen Tudart.
LUK 13:24 Yarra-dd Yasuɛ, inna asen: “Ggem jjehd nwem, ḥima ad tadfem zi tewwart iḥṣaren, aqa Necc ad awem iniɣ, aṭṭas ad arzun ad dd-adfen, [maca] war zemmaren.
LUK 13:25 Zeg wami i ɣa ikkar Bab n taddart maḥend ad ibelleɛ tawwart, xenni ad tbeddem di barra, ad tessqareqbem, ad tebdam ad tinim: ‘[A] Siditneɣ, [a] Siditneɣ, arzem aneɣ!’ Maca Netta ad dd-yarr, ad yini: ‘Necc war kenniw ssineɣ, manis kenniw?’
LUK 13:26 Ad tebdam ad tinim: ‘Neccin aḥeqqa tuɣa necca neswa qibač nnec, uca Cek tuɣa tesseřmaded deg imesraq nneɣ!’
LUK 13:27 [Maca] Netta ad yini: ‘War kenniw ssineɣ, [war ssineɣ] manis kenniw! Aggʷejem xafi, kenniw inni itteggen řmuɛṣiyyet!’
LUK 13:28 Ad din tiři tɣuyyit d uɣezzi n teɣmas, xmi ɣa tẓarem Ibrahim d Isḥaq d Yaɛqub d marra inabiyyen di Tgeldit n AREBBI, maca kenniw ad temmenḍarem barra.
LUK 13:29 Ad dd-asen zi manis d tneqqar tfuct u zi mani tɣeǧi tfuct uřa zi ccamal uřa zi ljanub, ad qqimen [ɣar ṭṭabřa] di Tgeldit n AREBBI.
LUK 13:30 Xzar, aqa din ineggura inni i ɣa yiřin d imezwura, u aqa din imezwura inni i ɣa yiřin d ineggura.”
LUK 13:31 Deg wass nni qarrben-dd ca n Ifarisiyyen, nnan as: “Ffeɣ, ruḥ ssa, minzi Hirudus ixs ad Cek ineɣ!”
LUK 13:32 Yasuɛ inna asen: “Ruḥem, inim as i wecɛeb-a: ‘Xẓar, aqa Necc ssuffuɣeɣ ccwaṭen, ssgenfiɣ ass-a d tiwecca, uca deg wass wiss třata ad iwḍeɣ ɣar řekmaret.”
LUK 13:33 Maca ittxeṣṣa ayi ad xedmeɣ ass-a d tiwecca, uca deg wass awarni as ad raḥeɣ, minzi war izemmar ad ittwaneɣ ijj n unabi barra i Urcalim.
LUK 13:34 [A] Urcalim, [a] Urcalim, tenni ineqqen inabiyyen d tenni yarejjmen inni i ɣarem dd-ittwassekken, mecḥař n twařawin tuɣa xseɣ ad ssmuneɣ tarwa nnem am mammec tessmuna tyaẓiḍt ifiǧusen nnes sadu wafriwen nnes, [maca] kenniw war texsem.
LUK 13:35 Xzar, taddart nwem ad awem teqqim d řxarbet. Maɣar Necc ad awem iniɣ, aqa war d ayi tẓarrem ař dd ɣa tas řweqt i di i ɣa tinim: ‘Lbaraka i Wenni dd ɣa yasen s Yisem n SIDI’.”
LUK 14:1 Řami yudef ɣar taddart n ijj zeg imeqqranen n Ifarisiyyen ḥima ad icc aɣrum deg wass n ssebt, tuɣa ḥeṭṭan t.
LUK 14:2 U xzar, ibedd din qibač nnes ijj n bnadem ihřec s tuffet n waman [n arrimet nnes].
LUK 14:3 Iṭṭef Yasuɛ deg wawař, inna i imseřmaden n idlisen d Ifarisiyyen, inna: “Ma iḥeǧeř usgenfi di ssebt?”
LUK 14:4 Nitni sqaren waha. [Xenni] iṭṭef i-t, issgenfa i-t uca ijja i-t ad iraḥ.
LUK 14:5 Xenni yarra-dd xasen inna: “Man wen zzaywem, mařa mmis niɣ afunas nnes iwḍa as deg wanu, war t-i-dd-issuffuɣ zzayes deɣya deg wass n ssebt?”
LUK 14:6 War ufin s min zi xas dd ɣa yarren.
LUK 14:7 Iɛawed ijj n umedya i inewjiwen am d asen iḥekkar ixḍaren imucan imezwura. [Inna asen]:
LUK 14:8 “Mařa iɛarḍ ḥed i cek ɣar ijj n wurar xenni war ttɣimi deg wemcan amezwaru, ḥima war ittwaɛarḍ wenneɣni yuɛřan [xak], maḥend ad iqqim din,
LUK 14:9 uca [xenni] ad dd-yas wenni xak iɛarḍen, ad ac yini: ‘Egg amcan i weryaz-a!’, [uca xenni] ad tseḍḥid, ad tekkared ḥima ad teksid amcan aneggaru.
LUK 14:10 Mařa cek tᵉttwaɛarḍed, ruḥ, qqim deg wemcan aneggaru, ḥima, xmi dd ɣa yadef wenni xak iɛarḍen, ad taɣ ad ac yini: ‘[A] ameddukkeř, geɛɛed, qqim!’ Xenni ad ac yiři ccan zzat i yinni akidek iqqimen.
LUK 14:11 Minzi marra wi ɣa issuɛřan ixef nnes ad ittwasswaḍeɛ u wi ɣa isswaḍɛen ixef nnes ad ittwassuɛřa.”
LUK 14:12 Inna ɛawed i wenni t iɛarḍen: “Mařa cek teggid ijj n umecři niɣ amensi, war ɛarreḍ imeddukkař nnec niɣ aytmac, uřa d řaǧ nnec niɣ jjiran nnec i ɣar iǧa wagřa, niɣ aqa ad cek ɛarḍen uřa d nitni uca ad ɣarek yiři řexřaṣ.
LUK 14:13 Mařa tɛarḍed [x iwdan], xenni ɛarḍ x imezřaḍ d iqiydaren d ineɛḍaben d idarɣařen.
LUK 14:14 [Xenni] ad tiřid d amesɛud umi war ɣarsen s minzi cek i ɣa xeǧṣen, minzi ad tᵉṭṭfed řexraṣ nnec di tnukra n imseggaden.”
LUK 14:15 Umi isřa aya ijjen zeg inni din iqqimen [ɣar ṭṭabřa], inna as wanita: “Sseɛd n wenni i ɣa iccen aɣrum di Tgeldit n AREBBI!”
LUK 14:16 Yasuɛ inna as: “Ijj n weryaz igga ict n zzardet temɣar uca iɛarḍ aṭṭas [n iwdan].
LUK 14:17 Issekk amsexxar nnes di tsaɛɛet n zzardet, ḥima ad ini i inewjiwen: ‘Xzar, kuřci aqa iwjed i kenniw. Araḥem-dd!’
LUK 14:18 [Xenni] ibda kuř ijjen zzaysen ad igg ssibbet. Inna as umezwar: ‘Sɣiɣ ijj n iyyar, aqa ittxeṣṣa ayi ad raḥeɣ ad t ẓareɣ. Ttareɣ ac ad ayi tsamḥed!’
LUK 14:19 Wenneɣni inna: ‘Sɣiɣ xemsa n tyuya n iyenduzen, aqa ad raḥeɣ ad ten jarrbeɣ, ttareɣ ac ad ayi tsamḥed!’
LUK 14:20 U wenneɣni inna: ‘Aqa mammec meřceɣ tamɣart, x uyenni war zemmareɣ ad dd-aseɣ!’
LUK 14:21 Idweř-dd umsexxar nni uca ixebbar sidi nnes s man aya. Xenni ixeyyeq bab n taddart, inna i umsexxar nnes: ‘Ruḥ deɣya ɣar wazzayen d zznaqi n tendint, uca ndeh-dd imezřaḍ d iqiydaren d ineɛḍaben d idarɣařen!’
LUK 14:22 Inna umsexxar: ‘[A] sidi, aqa imsar am mammec i tumured, uca aqa din ɛad amcan.’
LUK 14:23 Inna bab i umsexxar nnes: ‘Ffeɣ ɣar ibriden d zznaqi uca ḥṣar i-ten ad adfen ař ɣa teccur taddart inu,
LUK 14:24 minzi Necc ad awem iniɣ, belli uřa d ijj zeg yeryazen inni tuɣa ittwaɛarḍen, ad yiři ɣar zzardet inu’”
LUK 14:25 Am tuɣa ijj n ubarru d ameqqran n řɣaci iggur akides, inneqřeb-dd, inna asen:
LUK 14:26 “Mařa yusa-dd ḥed ɣari uca war icarreh babas niɣ yemmas, aytmas niɣ suyᵉtmas, tamɣart nnes niɣ tarwa nnes, u ɛad uřa d ixef nnes, war izemmar ad yiři d ameḥḍar inu.
LUK 14:27 Wenni war iksin ṣṣalib nnes, ad ayi dd-iḍfar, war izemmar ad yiři d ameḥḍar inu.
LUK 14:28 U man wen zzaywem i ixsen ad ibna ict n ṣṣumɛet, war ittɣimi amezwar ḥima ad igg řeḥsab, ma ɣares min ixeṣṣen i ukemmeř,
LUK 14:29 ḥima, mařa issars dsas, [xenni] war izemmar ad as ikemmeř, war xas ḍeḥḥcen marra inni t iẓrin,
LUK 14:30 ad inin: ‘Aryaz-a ibda řebni uca war izemmar ad t ikemmeř.’
LUK 14:31 Niɣ man ajeǧid, mařa iffeɣ ɣar umenɣi ḍidd n ijj n ujeǧid nneɣni, war ittemcawar amezwar ma izemmar ad imqudda s ɛecra-ařaf ak-d wenni ɣares i dd ɣa yasen s ɛicrin-ařef?
LUK 14:32 Mařa war iǧi amenni, xenni ad dd-issekk ireqqasen am iǧa [ujeǧid] nni ɛad ɣar řaggʷaj, ḥima ad [zzayes] ittar aṣřaḥ.
LUK 14:33 S uyenni uřa d ijj zzaywem wenni war ittejji marra agřa nnes, war izemmar ad yiři d ameḥḍar inu.”
LUK 14:34 “Tameǧaḥt teḥřa, maca mařa texsar tmeǧaḥt aředdi nnes, s min zi tt i ɣa iɛedřen?
LUK 14:35 War tṣeǧeḥ ca i temmurt uřa i tzubač, xenni ad tt nḍaren. Wenni ɣar iǧa imezzuɣen i useǧi, ejj i-t ad iseř.”
LUK 15:1 Xenni tuɣa ayt n ḍḍariba d imednab ttqarraben ɣares ḥima ad as sřen.
LUK 15:2 Ttmeɛmiɛen imseřmaden n idlisen d Ifarisiyyen, qqaren: “Aqa Wa yareḥḥeb s imednab uca ittett akidsen.”
LUK 15:3 [Xenni] iḥaja asen Yasuɛ amedya-ya:
LUK 15:4 “Man bnadem zzaywem i ɣar iǧa mya n iḥuřiyyen uca iweddar as ijjen zzaysen, ma war ittejji tesɛa u tesɛin di řexřa uca ad yarzu x wenni iweddaren ař t ɣa yaf?
LUK 15:5 U xmi t ɣa yaf, ad ifraḥ, ad t issars x tɣardin nnes.
LUK 15:6 Xmi dd ɣa yaweḍ ɣar taddart, ad iřaɣa x imeddukkař nnes d jjiran nnes, ad asen yini: ‘Farḥem akidi, minzi ufiɣ ahuři inu iweddaren!’
LUK 15:7 Necc ad awem iniɣ, ammu i ɣa tiři řefraḥet deg ujenna x ijj n umednub i ɣa ituben ktar x tesɛa u-tesɛin n imseggaden i war ixsen ad tuben!”
LUK 15:8 “Niɣ man tamɣart i ɣar iǧa ɛecra [n tepyisin n ijj n] ‘jjuz’, mařa iweddar icten zzaysent, ma war tessruɣi řqendiř, ad tfarḍ taddart uca ad tarzu mliḥ ař tt ɣa taf?
LUK 15:9 Mařa tufi tt, ad třaɣa x tmeddukař d tijjarin, ad asent tini: ‘Farḥent akidi, minzi ufiɣ [tapyist n] ‘jjuz’ nni tuɣa d ayi iweddaren.’
LUK 15:10 Necc ad awem iniɣ, ammu i ɣa tiři řefraḥet qibač i lmalakat n AREBBI s yijj n umednub i ɣa ituben.”
LUK 15:11 Yasuɛ inna asen ɛawed: “Ijj n bnadem tuɣa ɣares tnayen n iḥenjiren.
LUK 15:12 Inna umaẓuẓ nsen i babas: ‘A baba, ewc ayi tasɣart tenni d ayi dd-yusin zeg wagřa nnec!’ [Xas uca] ibḍa asen [babas] agřa nnes.
LUK 15:13 Awarni ca n wussan issmun mmis amaẓuẓ kuřci min d as immewcen, xenni isafar ɣar ict n temmurt tiggʷej. Iqarḍ marra agřa nnes am isseɛdu dinni ict n tudart n ufecceḥ.
LUK 15:14 Awarni řami iqarḍ kuřci, iwḍa-dd ijj n řaẓ iwɛar di temmurt nni uca ibda ad iḥwaj.
LUK 15:15 Iruḥ uca iřṣeq deg ijjen zeg imezdaɣ n temmurt nni uca wanita issekk i-t ɣar iyyar nnes ḥima ad yarwes iřfan.
LUK 15:16 Tuɣa immeẓri ad iccur aɛeddis nnes s tesriɣwa, tenni ittetten iřfan, [maca] uřa d ijj war d as iwci ca.
LUK 15:17 Idweř ɣar řeɛqeř nnes, inna: ‘Mecḥař n ixemmasen n baba i ɣar iǧa aɣrum aṭṭas u necc da ttmettiɣ s řaẓ!
LUK 15:18 Ad kkareɣ, ad raḥeɣ ɣar baba uca ad as iniɣ: ‘[A] baba, aqa xḍiɣ ak-d ujenna u akidek!
LUK 15:19 War sdiheǧeɣ ad ayi třaɣid d mmic. Egg ayi am yijjen zeg icuwwaren nnec.’
LUK 15:20 Ikkar uca iɛqeb ɣar babas. Am t tuɣa ɛad ɣar řaggʷaj, ibarq i-t babas, iḥinn xas, uca yuzzeř ɣares, ingez as x yiri, issudem i-t.
LUK 15:21 Inna as mmis: ‘[A] baba, xḍiɣ ak-d ujenna u akidek. War sdiheǧeɣ ad ayi řaɣan mmic.’
LUK 15:22 Maca babas inna i imsexxaren nnes: ‘Suffɣem-dd arruḍ iḥřan aṭṭas, syarḍem as t, ggem txadent deg ufus nnes uca qqnem as sandaliyat [i iḍaren nnes].
LUK 15:23 Awyem-dd ayenduz iṣeḥḥen, tɣarṣem as, xenni ad necc, ad nfarḥ,
LUK 15:24 minzi mmi wanita tuɣa immut, iddar. Tuɣa iweddar, [maca] ittwaf.’ Xenni bdan ad farḥen!
LUK 15:25 Maca mmis ameqqran tuɣa deg iyyar. Ařami dd-yareggʷeḥ, idweř iqarreb-dd ɣar taddart, xenni isřa i ǧɣa d uɣennej n waṭṭas n iwdan.
LUK 15:26 Iřaɣa i yijjen zeg imsexxaren imeẓyanen nnes, isseqsa t: ‘Man aya?’
LUK 15:27 Wanita inna as: ‘Umac yusa-dd, babac iɣarṣ i uyenduz iṣeḥḥen, minzi iɛqeb-dd ɣares mliḥ!’
LUK 15:28 Maca [mmis ameqqran] ixeyyeq, war ixs ad yadef. Xenni iffeɣ babas ɣar barra, iḥeccem i-t.
LUK 15:29 Maca netta yarra-dd, inna as i babas: ‘Aqa necc xedmeɣ ɣarek řexxu aṭṭas n iseggʷusa, ɛemmarṣ war jjiɣ zi tewṣeyyet nnec. [Maca] cek war d ayi tewcid ɛemmarṣ uřa d ijj n iɣayḍ, ḥima ad farḥeɣ ak-d imeddukkař inu.
LUK 15:30 Maca umi dd-yusa mmic wanita wenni iccen agřa nnec ak-d temɣarin n farq-ccɣeř, tɣarṣed as i uyenduz iṣeḥḥen!’
LUK 15:31 Inna as babas: ‘A mmi, tuɣa cek akidi řebda, aqa marra min iǧan inu, aqa nnec.
LUK 15:32 Aqa iɛeddeř i neccin ad nfarḥ ad nezhu, minzi umac wanita tuɣa immut, [maca] iddar [ɛawed], tuɣa iweddar uca ittwaf!’”
LUK 16:1 Inna ɛawed i imeḥḍaren nnes: “Tuɣa din ijj n bnadem, aqa-t d bab n wagřa, ɣares ijj n wewkiř nni zi cetcan [iwdan], aqa zeɛma tuɣa ittzuzzar agřa n sides.
LUK 16:2 Iřaɣa as, inna as: ‘Man aya i xak ttesřiɣ? Ewc řeḥsab i uwekkeř nnec, minzi war izemmar ad tiřid ɛad d awkiř!’
LUK 16:3 Inna wewkiř ak-d ixef nnes: ‘Min ɣa ggeɣ umi sidi inu ad xafi ikkes awekkeř-a? War zemmareɣ i uqqaz n temmurt u ttseḍḥiɣ tutra!
LUK 16:4 Aqa ssneɣ min ɣa ggeɣ ḥima, xmi ɣa ttwaḥuzeɣ x uwekkeř, ad ayi qebřen di tudrin nsen.’
LUK 16:5 Uca iřaɣa-dd i kuř ijjen zeg aytbab n umarwas n sides. Inna as i umezwar: ‘Mecḥař d ac itturs sidi?’
LUK 16:6 Yarra-dd xas netta: ‘Mya n ibidawen n zzect!’ Inna as: ‘Ksi řciɣed n umarwas nnec, qqim deɣya, tarid: Xemsin n ibidawen.’
LUK 16:7 [Xenni] inna i wenneɣni: ‘I cek, mecḥař d ac itturs sidi?’ Yarra-dd xas: ‘Mya n txuncay timeqqranin n yirden.’ Inna as: ‘Ksi řciɣed n umarwas nnec, tarid: Tmanyin.’
LUK 16:8 Siditneɣ igga řfaǧ deg wewkiř iɣecc, aqa tuɣa ittegg s tiɣit, minzi tarwa n ddunect-a d imiɣisen di jjiř nsen wanita x tarwa n Tfawt.
LUK 16:9 Ɛawed Necc ad awem iniɣ: ‘Ggem imeddukkař i yixef nwem s wagřa-ya n řɣecc, ḥima, xmi ɣa iqḍa, ad kenniw qebřen deg iqiḍan nsen n řebda.’”
LUK 16:10 “Wenni iǧan d amtiqqi di drus, aqa-t d amtiqqi uřa deg waṭṭas, u wenni iɣeccen di drus, aqa iɣecc uřa deg waṭṭas.
LUK 16:11 Mařa war teǧim d imtiqqan zi jjihet n wagřa n řɣecc, wi kenniw i ɣa iwekkřen x min iǧan nican?
LUK 16:12 Mařa war teǧim d imtiqqan di min iǧan n wenneɣni, wi d awem i ɣa iwcin min iǧan nwem?
LUK 16:13 Uřa d ijj n umsexxar war izemmar ad ixdem tnayen n isiditen, minzi niɣ ad icarh ijjen uca ad issɛizz wenneɣni, niɣ ad icebbar deg ijjen uca ad isseḥqar wenneɣni. War tzemmarem ad tsexxarem i AREBBI d wagřa.
LUK 16:14 Řami sřin Ifarisiyyen marra man aya, sseḥqaren t, minzi nitni tuɣa ttexsen tmenyat.
LUK 16:15 Yasuɛ inna asen: “Kenniw d inni isseggden ixef nwem zzat i iwdan, maca AREBBI yargeb x wuřawen nwem, minzi min yuɛřan ɣar iwdan, aqa-t d nnɛi zzat i AREBBI.
LUK 16:16 Ccariɛa d Inabiyyen aqa aten ař Yuḥanna. Zi řweqt nni ittwabarreḥ s Tgeldit n AREBBI uca marra idsen ttemsedḥasen ɣares ḥima ad din adfen.
LUK 16:17 Maca tikkest n ujenna d temmurt tehwen x uweṭṭu n ict n tneqqiṭ zi Ccariɛa.”
LUK 16:18 “Marra wi ɣa iǧfen i temɣart nnes uca ad imřec ak-d tenneɣnit, aqa izna, u marra wi ɣa imeřcen tamɣart tenni umi iǧfen, aqa netta izna.”
LUK 16:19 “Tuɣa din ijj n bnadem, aqa-t d bab n wagřa, yarḍ řeqṭen acemřař azdad d [řeḥrir d] azeggʷaɣ. Ittɣebba zzhu kuř ass.
LUK 16:20 Tuɣa din ɛawed ijj n umezřuḍ qqaren as Aliɛazar. Tuɣa ssbuẓẓřen t ɣar tewwart n bab n wagřa, iccur s řḥebb.
LUK 16:21 Tuɣa dayes meẓri ad ijjiwen s iřeqqwaz i dd-iweṭṭan zi ṭṭabřa n bab n wagřa. Ttasen-dd yiṭan ɛawed, řessḥen ibuɛrusen nnes.
LUK 16:22 Immut umezřuḍ, ksint t lmalakat ɣar weḥsin n Ibrahim. Uřa d bab n wagřa immut, neḍřen t.
LUK 16:23 Am tuɣa ittɛeddab di řaxart, issgeɛɛed tamuɣři nnes, iẓra Ibrahim zi řaggʷaj u Aliɛazar tuɣa-t deg weḥsin nnes.
LUK 16:24 Iřaɣa s jjehd: ‘[A] baba Ibrahim, arḥem ayi. Sekk-dd Aliɛazar ḥima ad issuff ixef n uḍaḍ nnes s waman uca ad issesmeḍ iřes inu, minzi aqa ttɛeddabeɣ di tmessi-ya.’
LUK 16:25 Inna as Ibrahim: ‘A mmi, ɛqeř aqa tkemmřed marra řxar nnec di tudart nnec, uca ammu i ikemmeř Aliɛazar řɣar. Řexxu netta ittᵉttwafewwej u cek tᵉttwaɛeddabed.
LUK 16:26 Sennej i man aya marra, aqa jar aneɣ neccin d kenniw ijj n ttasiɛ imɣar, ařami inni ixsen ad ɣarwem dd-ẓwan ssa, war zemmaren uca uřa d inni din iǧan war zemmaren ad ɣarneɣ dd-ẓwan ssenni.’
LUK 16:27 Inna as: ‘Ttzawgeɣ cek xenni, a baba, ad t tessekked ɣar taddart n baba,
LUK 16:28 minzi ɣari xemsa n aytma. Ejj i-t ad asen iɛřem, ḥima war dd-ttisen uřa d nitni ɣar wemcan-a n uɛeddeb.’
LUK 16:29 Inna as Ibrahim: ‘Aqa ɣarsen Musa d inabiyyen. Ejj i-ten ad ɣarsen sřen!’
LUK 16:30 Maca netta inna as: ‘Lla, [a] baba Ibrahim, mařa iruḥ ɣarsen ijjen zeg imettinen, xenni ad tuben!’
LUK 16:31 Inna as Ibrahim: ‘Mařa nitni war sřin ɣar Musa d inabiyyen, xenni war zzayes ttwassqenɛen ɛawed, [ɛad] xmi dd ɣa ikkar ijjen jar imettinen!’”
LUK 17:1 Inna Yasuɛ i imeḥḍaren nnes: “War tɛeddeř ila ad iřint tɛenkrifin, maca uct x wenni zi i dd ɣa yasent!
LUK 17:2 Iḥřa as ad xas tᵉttwagg ict n teṣḍart n tsirt tedqeř ɣar yiri nnes uca ad immenḍar di řebḥar x minni ɣa issenqarḍ ijjen zeg imeẓyanen-a.
LUK 17:3 Ḥḍam ixef nwem. Mařa ixḍa umac, webbex i-t, u mařa itub, samḥ as.
LUK 17:4 Mařa ixḍa akidek sebɛa n twařawin deg ijj n wass uca idweř-dd ɣarek sebɛa n twařawin, iqqar: ‘Aqa tubeɣ!’, ittxeṣṣa ad as tsamḥed.”
LUK 17:5 Nnan rrusul: “[A] Siditneɣ, arni aneɣ l’iman nneɣ!”
LUK 17:6 Netta inna asen: “Mři tuɣa daywem l’iman am yict n tḥebbuct n zzariɛet n uxerdel uca ad tinim i tcejjart-a n tut: ‘Twaqřeɛ zeg iẓewran nnem, twaẓẓu di řebḥar!’, xenni ad awem tᵉṭṭaɛ.”
LUK 17:7 Man wen zzaywem i ɣar iǧa umsexxar icarrez niɣ yarekkwes uǧi, ad as yini deɣya mařa iɛqeb-dd zeg iyyar uca yudef [ɣar taddart]: ‘Qarreb-dd, teqqimed [ɣar ṭṭabřa]’?
LUK 17:8 Ma war d as iqqar: ‘Sewjed min ɣa mmunesweɣ, tbeysed, tsexxared xafi ař ɣa cceɣ, sweɣ. Awarni man aya ad tecced, ad teswed uřa d cek’?
LUK 17:9 Ma ad iksi umsexxar nni aqadi, minzi netta igga min d as ittwannan ad t yegg? Ittɣiř ayi, lla!
LUK 17:10 Ammu uřa d kenniw, xmi teggim marra min d awem yumuren, [ittxeṣṣa] ad tinim: ‘Aqa neccin d imsexxaren war ineffɛen, minzi negga min tuɣa xaneɣ’.”
LUK 17:11 Rami iruḥ Yasuɛ ɣar Urcalim icuq di řwesṭ [n temmurt] n Isamariyyen, tenni iǧan zzat n Ljalil.
LUK 17:12 Ařami tuɣa ittadef ɣar ijj n dcar, řqan t ɛecra n yeryazen daysen řbarṣ, qqimen bedden ɣar řaggʷaj.
LUK 17:13 Ssgeɛɛden tmijja nsen, nnan: “[A] Amseřmad nneɣ, Yasuɛ, arḥem aneɣ!’”
LUK 17:14 Umi daysen ixzar, inna asen: “Ruḥem, secnem ixef nwem i ikehhanen!” Xenni imsar, am gguren nitni, aqa ttwassizedgen.
LUK 17:15 Ijjen zzaysen iɛqeb, umi iẓra belli iggenfa, uca issemɣara di AREBBI s tmijja tejhed.
LUK 17:16 Iwḍa x uɣembub nnes ɣar iḍaren n Yasuɛ, iqada t. Wa tuɣa d ijj n [weryaz] Asamiri.
LUK 17:17 Iṭṭef Yasuɛ deg wawař, inna: “Ma war ttwassizedgen marra s ɛecra? Mani qqimen tesɛa?
LUK 17:18 Mayemmi jjin nitni ad dd-asen ḥima ad ssɛuǧen AREBBI, mɣir wanita waha, wenni iǧan zeg ijj n řgens d abarrani?”
LUK 17:19 Xenni inna as: “Kkar, truḥed, aqa l’iman nnec issenjem i cek!”
LUK 17:20 Umi Ifarisiyyen sseqsan Yasuɛ: “Meřmi i dd ɣa tas Tgeldit n AREBBI?”, yarra-dd xasen, inna: “War dd-tᵉttis Tgeldit n AREBBI s yijj n wudem ittwasscanen.
LUK 17:21 War qqaren: ‘Aqa-tt da!’, niɣ: ‘Aqa-tt diha!’, minzi Tageldit n AREBBI aqa-tt di [ca] zzaywem.”
LUK 17:22 Inna i imeḥḍaren nnes: “Ad dd-awḍen wussan i di i ɣa texsem ad tẓarem ijj n wass waha zeg wussan n Mmis n bnadem, [maca] kenniw war [t] tẓarrem.
LUK 17:23 Mařa nnan awem: ‘Aqa-t da!’ niɣ: ‘Aqa-t diha!’, war din ttriḥem.
LUK 17:24 Minzi am mammec iccat wassam zi ṭṭarf sadu ujenna ɣar ṭṭarf nneɣni sadu ujenna, ammu ɛawed ad yiři Mmis n bnadem deg wass nnes.
LUK 17:25 Maca ittxeṣṣa as amezwaru ad iweddeb aṭṭas uca ad ittwammenḍar zi jjiř-a!
LUK 17:26 Am mammec tuɣa deg wussan n Nuḥ, ammu i ɣa yiři [ɛawed] deg wussan n Mmis n bnadem.
LUK 17:27 Tuɣa ttᵉtten, sessen, ttawyen timɣarin, smeǧacen [timɣarin] i yeryazen ař ass i di yudef Nuḥ ɣar uɣarrabu uca yusa-dd ṭṭufan, isshellek i-ten marra.
LUK 17:28 Ammu tuɣa imsar ɛawed deg wussan n Lut. Tuɣa ttᵉtten, sessen, ssaɣen, zznuzan, tteẓẓun, bennan.
LUK 17:29 Maca deg wass i di dd-iffeɣ Lut zi Sadum, ijja SIDI ad dd-tewḍa tmessi d řecbareyyet zeg ujenna, iteḥḥa ten marra.
LUK 17:30 Ammu i ɣa yiři deg wass i di i ɣa ittwassargeb Mmis n bnadem.
LUK 17:31 Wenni iǧan x tzeqqa deg wass nni u řqecc nnes aqa-t di taddart, war dd-ihekkwi ca maḥend ad t iksi. Ammu uřa d wenni iǧan deg iyyar, war dd-ittɛiqib ca.
LUK 17:32 Ɛeqřem x temɣart n Lut!
LUK 17:33 Wenni yarezzun ad issenjem tudart nnes, ad tt ixsar, u wenni tt i ɣa ixsaren, ad tt issenjem.
LUK 17:34 Ad awem iniɣ, aqa di ǧiřet nni ad din iřin tnayen x ict n tassut: ijjen ad ittwaksi, wenneɣni ad ittwajj.
LUK 17:35 Ad din iřint tnayen n temɣarin ḥarryent jmiɛ, ict ad tᵉttwaksi, tenneɣni ad tᵉttwajj.
LUK 17:36 Ad din iřin tnayen deg iyyar: ijjen ad ittwaksi, wenneɣni ad ittwajj.”
LUK 17:37 Arrin-d, nnan as: “Mani, a Siditneɣ?” Netta inna asen: “Mani teǧa arrimet din ittmunan ɛawed igidaren.”
LUK 18:1 Inna asen ɛawed ijj n umedya belli aqa ittxeṣṣa asen ad ẓẓaǧen di kuř řweqt břa amelli.
LUK 18:2 “Tuɣa deg ict n tendint ijj n řqaḍi war itteggʷed ca AREBBI, war ittweqqar bnadem.
LUK 18:3 Ict n tajjač di tendint nni tusa-dd ɣares, tenna as: ‘Ewc ayi tasɣart inu x weɣrim inu!’
LUK 18:4 Aṭṭas i ikka tuɣa yugi. Xenni inna deg ixef nnes: ‘Necc zeɛma war tteggʷedeɣ ca AREBBI u war ttweqqireɣ bnadem,
LUK 18:5 qaɛ ammu, minzi tajjač-a thekkweř ayi [břa qeṭṭu], ad as wceɣ tasɣart nnes, ḥima war dd-tᵉttɛiqqib řebda uca ad ayi tarẓ azeǧif.’”
LUK 18:6 Siditneɣ inna: “Sřem min iqqar řqaḍi aɣeccac!
LUK 18:7 Ma war ittic AREBBI tasɣart ktar aṭṭas i yinni zzayes ittwafarzen, inni ɣares dd-isɣuyyun ass d ǧiřet? Ma war ittegg Netta [ktar aṭṭas] s ttasiɛ n řxaḍar xasen?
LUK 18:8 Ad awem iniɣ, aqa ad asen iwc tasɣart deɣya. Maca xmi dd ɣa iɛqeb Mmis n bnadem, ma ad yaf l’iman di temmurt?”
LUK 18:9 Inna amedya-ya i iwdan nni ɣar teǧa ttiqqet deg yixef nsen aqa aten d imseggaden u sseḥqaran inneɣni marra.
LUK 18:10 “Gaɛɛden tnayen n iwdan ɣar Zzawect Tameqqrant, ḥima ad ẓẓaǧen, ijjen d Afarisi u wenneɣni d ijj n bu-ḍḍariba.
LUK 18:11 Ibedd Ufarisi, ittẓaǧa ak-d yixef nnes: ‘[A] AREBBI, ttqadiɣ Cek umi war ǧiɣ ca am iwdan nneɣni: iɣeccacen d yinni iḥeṣṣaren d yinni izennan, uřa am bu-ḍḍariba wanita.
LUK 18:12 Necc ttẓummiɣ tnayen n imuren di ssimana, tticeɣ řeɛcur zi marra min ɣari iǧan d agřa.’
LUK 18:13 Maca bu-ḍḍariba wenni ibedden ɣar řaggʷaj, war izɛim uřa ad issiři tiṭṭawin nnes ɣar ujenna, maca iwta ixef nnes ɣar idmaren, inna: ‘[A] AREBBI, arḥem ayi, aqa necc d amednub!’
LUK 18:14 Necc ad awem iniɣ, aqa wanita ad yiři ittwasegged s waṭṭas x Ufarisi nni umi dd-ihwa ɣar taddart nnes. Minzi marra wenni i ɣa issuɛřan ixef nnes ad ittwasswaḍeɛ, u wenni i ɣa isswaḍɛen ixef nnes ad ittwassuɛřa.”
LUK 18:15 Iwyen as-dd iḥenjiren imeẓyanen ḥima ad ten isřuf. Umi ten ẓrin imeḥḍaren, webbxen ten.
LUK 18:16 Maca Yasuɛ iřaɣa xasen, inna asen: “Jjem iḥenjiren ad ɣari dd-asen, war ten ttᵉṭṭfem, minzi Tageldit n ijenwan i yinni am yina.
LUK 18:17 S tidett, Necc ad awem iniɣ: Wenni war iqbiřen Tageldit n AREBBI am uḥenjir war tt ittidef ɛemmarṣ!”
LUK 18:18 Isseqsa t ijj n umeqqran, inna as: “[A] Amseɣɣar Aṣebḥan, min ɣa ggeɣ, ḥima ad warteɣ Tudart ittduman?”
LUK 18:19 Inna as Yasuɛ: “Mayemmi d ayi třaɣid s ‘Aṣebḥan’? Uřa d ijj war iǧi d aṣebḥan mɣir ijjen, aqa-t d AREBBI.
LUK 18:20 Cek tessned tiweṣṣa: War zenni, war neqq, war tticar, war cehhed s ẓur, weqqar babac d yemmac!”
LUK 18:21 Inna as: “Aqa marra tina ḥḍiɣ tent zi temẓi inu.”
LUK 18:22 Umi isřa Yasuɛ aya, inna as: “Ict teqqim ac. Uyur, zenz marra min ɣarek, farq i-t x imezřaḍ uca ad ɣarek yiři řkenz deg ijenwan, [xenni] ḍfar ayi-dd.”
LUK 18:23 Umi isřa man aya, icḍen minzi tuɣa-t d bab n wagřa ameqqran.
LUK 18:24 Umi iẓra Yasuɛ belli netta icḍen, inna: “Mammec yewɛar x aytbab n wagřa maḥend ad dd-adfen ɣar Tgeldit n AREBBI.
LUK 18:25 Minzi adaf n weřɣem zi tiṭṭ n tsineft ihwen x wadaf n bab n wagřa ɣar Tgeldit n AREBBI.”
LUK 18:26 Inni tuɣa ittesřan aya, nnan: “Wi izemmaren [xenni] ad ittwassenjem?”
LUK 18:27 Yasuɛ inna: “Min war izemmaren ad yiři ɣar iwdan, ɣar AREBBI izemmar ad yiři.”
LUK 18:28 Inna asen Buṭrus: “Aqa neccin nejja kuřci uca neḍfar i Cek.”
LUK 18:29 Yasuɛ inna as: “S tidett, Necc ad awem iniɣ, war din uřa d ijj i ittejjin taddart niɣ lwalidin niɣ tawmat, niɣ tamɣart niɣ tarrawt di ṭṭweɛ n Tgeldit n AREBBI,
LUK 18:30 i war iksin aḍeffus x uḍeffus n tseqqar di řweqt-a, uca di zzman i dd ɣa yasen [ad iksi] Tudart ittduman.”
LUK 18:31 Yasuɛ iksi tenɛac [n rrusul] nnes ɣares, inna asen: “Ad ngeɛɛed ɣar Urcalim uca marra min yuran s ufus n inabiyyen x Mmis n bnadem ad ittwaqfeř.
LUK 18:32 Minzi Netta ad ittwasellem i řegnus, uca ad zzayes stehzan, ad xas ssusfen x uɣembub nnes,
LUK 18:33 ad t hettken s urekkuḍ, ad t sseḥqaren, ad t nɣen uca deg wass wiss třata ad dd-ikkar.”
LUK 18:34 Nitni war fhimen walu zi man aya. Tuɣa awař-a iwɛar xasen, u nitni war fhimen min d asen ittwannan.
LUK 18:35 Ařami dd-qarrben ɣar Ariḥa tuɣa ijj n udarɣař iqqim deg webrid, ittᵉttar.
LUK 18:36 Řami isřa i řḥess n řɣaci iɛdu, isseqsa: “Man aya?”
LUK 18:37 Nnan as: “Yeccu Nnaṣiri iɛeddu.”
LUK 18:38 Iřaɣa, inna: “[A] Yasuɛ, [a] Mmis n Dawud, arḥem ayi!”
LUK 18:39 Inni tuɣa igguren ɣar zzat n Yasuɛ, webbxen t maḥend ad isqar, maca netta ibda ittřaɣa s jjehd ktar: “[A] Mmis n Dawud, arḥem ayi!”
LUK 18:40 Ibedd Yasuɛ uca yumur ad t-i-dd-awyen ɣares. Umi dd ɣares iqarreb, isseqsa t,
LUK 18:41 inna as: “Min texsed ad ac t ggeɣ?” Inna: “[A] Sidi, xseɣ ad dewřeɣ ttwařiɣ!”
LUK 18:42 Inna as Yasuɛ: “Twařa, aqa l’iman nnec issgenfa cek.”
LUK 18:43 Řexdenni ittwařa uca iḍfar i-t, issemɣara di AREBBI. Marra iwdan i iẓrin man aya, ssɛuǧen AREBBI.
LUK 19:1 Umi yudef Yasuɛ ɣar Ariḥa, icuq [tendint nni],
LUK 19:2 tuɣa din ijj n weryaz qqaren as Zakkayu. Wanita tuɣa d bab n wagřa uřa d ameqqran n ayt n ḍḍariba.
LUK 19:3 Netta tuɣa yarezzu ad iẓar Yasuɛ d min iɛna, [maca] war izemmar s ssibbet n řɣaci, minzi tuɣa Zakkayu d aquḍaḍ n tiddi.
LUK 19:4 [S uyenni] izwar i Yasuɛ uca igeɛɛed x ijj n wartu n řexřa, ḥima ad t iẓar, minzi tuɣa Netta igga ad dd-yekk ssenni.
LUK 19:5 Umi dd-yusa Yasuɛ ɣar wemcan nni, ixzar ɣar ujenna, ibarq i-t. Inna as: “[A] Zakkayu, qeǧeq-dd, hwa-dd deɣya, minzi ass-a ittxeṣṣa ayi ad qqimeɣ di taddart nnec!”
LUK 19:6 Iqeǧeq-dd, ihwa-dd deɣya uca yareḥḥeb zzayes s řefraḥet.
LUK 19:7 Marra inni iẓrin man aya, bdan ttmeɛmiɛen xas, nnan: “Aqa yudef ɣar ijj n weryaz d amednub, ḥima ad ɣares iqqim!”
LUK 19:8 Ikkar Zakkayu, inna i Yasuɛ: “Xzar, Sidi, ad wceɣ azyen n wagřa inu i imezřaḍ u marra wenni zi kkseɣ ca n řḥajjet s řɣecc, ad [as t] arreɣ arebɛa n tseqqar!”
LUK 19:9 Inna as Yasuɛ: “Ass-a tiweḍ-dd Tudart i taddart-a, minzi uřa d wa d ijj n mmis n Ibrahim.
LUK 19:10 Minzi Mmis n bnadem yusa-dd ḥima ad yarzu u ad issenjem min iweddaren.”
LUK 19:11 Umi tuɣa ttesřan aya, yarni-dd ɛawed ijj n umedya, minzi ittɣiř asen, umi tuɣa dd-iqarreb ɣar Urcalim, aqa Tageldit n AREBBI ad dd-teḍhar deɣya.
LUK 19:12 Inna: “Ijj n bnadem zi řejwad iruḥ ɣar ict n temmurt tiggʷej, ḥima ad iṭṭef tagelda i yixef nnes, uca [xenni] ad dd-idweř [awarni man aya].
LUK 19:13 Iřaɣa-dd i ɛecra n imsexxaren nnes uca iwca asen ɛecra n řminat uca inna asen: ‘Ggem ttijara ař dd ɣa ɛeqbeɣ’.
LUK 19:14 Maca imezdaɣ n tendint tuɣa carrhen t uca ssekken awarni as ireqqasen, nnan: ‘War nexs wanita ad yiři d ajeǧid xaneɣ!’
LUK 19:15 Umi dd-iɛqeb awarni řami d iksi tagelda, yumur maḥend ad řaɣan i imsexxaren nni umi iwca nnuqart, ḥima ad issen arbeḥ i dd-yiwi kuř ijjen di tsebbabt nnes.
LUK 19:16 Yusa-dd umezwar, inna: ‘[A] sidi, řmina nnec tiwi-dd ɛecra řminat’.
LUK 19:17 Inna as: ‘Mliḥ cek, [a] amsexxar aṣebḥan, minzi tuɣa cek d amtiqqi x drus, ad tiřid d azeǧif x ɛecra n tneddam.’
LUK 19:18 Yusa-dd wenni wiss tnayen, inna: ‘[A] sidi, řmina nnec tiwi-dd xemsa řminat.’
LUK 19:19 Inna i wanita ɛawed: ‘Uřa d cek ad tiřid d azeǧif x xemsa n tneddam!’
LUK 19:20 Xenni yusa-dd wenneɣni, inna: ‘A sidi, xzar řmina nnec i tuɣa xemmřeɣ deg [ijj n zzif n] řeqṭen.
LUK 19:21 Minzi ggʷedeɣ zzayek, minzi cek d ijj n bnadem tqesḥed. Cek tkessid min war tessrusid u tmejjared min war tzarɛed!’
LUK 19:22 Inna as: ‘S uqemmum nnec ad xak carrɛeɣ, [a] amsexxar aɛeffan! Tessned belli necc d bnadem iqseḥ, kessiɣ min war ssrusiɣ, mejjareɣ min war zarɛeɣ.
LUK 19:23 Mayemmi war tessarsed [ttmenyat n] nnuqart inu di řbanku? Xenni xmi dd ɣa yaseɣ, ad tent ksiɣ s lfayda.’
LUK 19:24 Inna i yinni din ibedden akides: ‘Ksim xas řmina nnes, wcem tt i wenni ɣar iǧa ɛecra n řminat.’”
LUK 19:25 Nnan as: ‘[A] Siditneɣ, aqa ɣares ɛecra n řminat [ɛad]?”
LUK 19:26 “Netta inna asen: ‘Ad awem iniɣ, belli marra wenni ɣar iǧa, ad as immewc, maca wenni war ɣar iǧi, ad as ittwakkes ɛad uřa d min ɣares.
LUK 19:27 Maca řɛedyan inu inni war ixsen ad xasen dewřeɣ d ajeǧid, awyem ten-dd danita uca ɣarṣem asen zzati.’”
LUK 19:28 Awarni řami inna Yasuɛ man aya, izwar asen uca igeɛɛed ɣar Urcalim.
LUK 19:29 Ařami dd-iqarreb ɣar Bayt-Faji d Bayt-Ɛanya ɣar uɣezdis n wedrar umi qqaren ‘Taddart n Zzitun’, issekk tnayen n imeḥḍaren nnes,
LUK 19:30 inna asen: “Ruḥem ɣar dcar i iǧan ɣar zzat nwem. Xzar, xmi din i ɣa tadfem, ad tafem ijj n wesnus iqqen, war xas inyi uřa d ijj n bnadem ɛad. Fesyem as uca awyem t-i-dd [da].
LUK 19:31 Mařa isseqsa kenniw ca n ijjen: ‘Mayemmi d as tfesyem?’, ad as tinim ammu: ‘Aqa Siditneɣ iḥwaj i-t!’”
LUK 19:32 Inni dd-ittwassekken ruḥen uca ufin [t] am mammec d asen inna.
LUK 19:33 Ařami d fesyen i wesnus, sseqsan ten aytbab nnes: “Mayemmi tfessyem i wesnus?”
LUK 19:34 Nnan asen: “Aqa Siditneɣ iḥwaj i-t!”
LUK 19:35 Usin-dd zzayes ɣar Yasuɛ, nḍaren arruḍ nsen x wesnus, ssenyen Yasuɛ xas.
LUK 19:36 Am tuɣa iggur, ssun nitni abrid s warruḍ nsen.
LUK 19:37 Umi dd-iqarreb ɣar teysart [n wedrar] n ‘Taddart n Zzitun’, ibda řɣaci n imeḥḍaren marra ad farḥen, ttsebbaḥen AREBBI s ict n tmijja tejhed aṭṭas x ssibbet n lmuɛjizat timeqqranin nni tuɣa ẓrin.
LUK 19:38 Nitni nnan: “Lbaraka i Ujeǧid i dd-yusin s Yisem n SIDI! Řehna deg ujenna d uɛuǧi di řuɛřa x řuɛřa qaɛ!”
LUK 19:39 Maca ca n Ifarisiyyen jar řɣaci nnan as: “[A] Amseřmad inu, webbex imeḥḍaren nnec!”
LUK 19:40 Inna asen: “Ad awem iniɣ, mařa sqaren ina, xenni ad řaɣan yeẓra.”
LUK 19:41 Ařami dd-iqarreb uca iẓra tandint, iru xas,
LUK 19:42 inna: “Mři tfehmed min d am dd ɣa yawyen řehna nnem, ɛad deg wass-a nnem! Maca řexxu aqa man aya inuffar x tiṭṭawin nnem.
LUK 19:43 Aqa ad ɣarem dd-asen wussan i d am dd ɣa quwwaren řɛedyan nnem u ad cem ḥṣaren zi marra iɣezdisen.
LUK 19:44 Ad cem areddǧen, cem d tarwa nnem akidem, war dayem ttejjin aẓru ibedd x weẓru nneɣni, minzi war teftined i řweqt n warzef [n Arebbi] ɣarem.”
LUK 19:45 Umi yudef ɣar Zzawect Tameqqrant, ibda issuffuɣ inni i tuɣa issaɣen u izznuzan dayes.
LUK 19:46 Inna asen: “Aqa tura: ‘Taddart inu d Taddart n tẓaǧit!’, maca kenniw tarrim tt d ijj n ifri n iceffaren!”
LUK 19:47 Tuɣa isseřmad marra ussan di Zzawect Tameqqrant, maca imeqqranen n ikehhanen d imseřmaden n idlisen d imɣaren n řgens tuɣa arezzun ḥima ad t nɣen.
LUK 19:48 [Maca] war ufin min xas ɣa ggen, minzi marra iwdan tuɣa řeṣqen dayes, ttesřan ɣares.
LUK 20:1 Deg ijj zeg wussan nni, am tuɣa netta isseřmad řgens di Zzawect Tameqqrant, ittbarreḥ s Řexbar Aṣebḥan, [xenni] ɣewwɣen xas imeqqranen n ikehhanen d imseřmaden n idlisen ak-d imɣaren [n řgens].
LUK 20:2 Ssiwřen akides, nnan: “Ini aneɣ, s man ttesriḥ i tᵉttegged aya, niɣ man wen i d ac iwcin ttesriḥ-a?”
LUK 20:3 Yarra-dd Yasuɛ, inna asen: “Uřa d Necc ad kenniw sseqsiɣ ijj n useqsi. Inim ayi:
LUK 20:4 Ma aseɣḍeṣ n Yuḥanna zeg ujenna niɣ zeg iwdan?”
LUK 20:5 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi xenni war zzayes tuminem?’
LUK 20:6 Mařa nenna: ‘Zeg iwdan!’, ad aneɣ yarjem marra řgens, minzi nitni ttwassqenɛen belli Yuḥanna d anabi.”
LUK 20:7 Nnan as: “Neccin war nessin zi manis!”
LUK 20:8 [Xenni] inna asen Yasuɛ: “Xenni uřa d Necc war d awem qqareɣ s man ttesriḥ i tteggeɣ aya!”
LUK 20:9 Ibda ittɛawad i řgens amedya-ya: “Ijj n bnadem igga ijj n umarjeɛ n uḍiř, iẓẓu dayes tizayarin, icra amarjeɛ i ixemmasen, uca isafar ijj n řmijař n řweqt d azirar.
LUK 20:10 Ařami dd-yiweḍ řḥař, issekk ijj n umsexxar ɣar ixemmasen ḥima ad as wcen zeg uḍiř n umarjeɛ. Wtin t ixemmasen [nni] uca ssekken t-i-dd ixwa.
LUK 20:11 Xenni issekk ɛawed ijj n umsexxar nneɣni, wtin t ɛawed, deǧen t, xenni sekken t-i-dd ixwa.
LUK 20:12 Issekk ɛawed [amsexxar] wiss třata, maca nitni ssyezmen t ɛawed uca nḍaren t ɣar barra.
LUK 20:13 Inna bab n umarjeɛ n uḍiř: ‘Min ɣa ggeɣ? Ad ssekkeɣ mmi iɛizzen. Xmi t ɣa ẓaren, ad t weqqaren nican.’
LUK 20:14 Umi t ẓrin ixemmasen, mcawaren jar asen, nnan: ‘Aqa d wa d awrit. Zid ad t nneɣ, ḥima ad ɣarneɣ dd-idweř řwart.’
LUK 20:15 Mmenḍaren t barra i umarjeɛ n uḍiř uca nɣin t. Min zzaysen i ɣa yegg xenni bab n umarjeɛ n uḍiř?
LUK 20:16 Ad dd-yas, ad ineɣ ixemmasen nni, uca ad iwc amarjeɛ n uḍiř i inneɣni.” Umi sřin aya, nnan as: “Ɛemmarṣ!”
LUK 20:17 Maca Netta ixzar ɣarsen, inna: “Min ixs ad yini xenni [wawař-a] i yuran: ‘Aẓru i tuɣa iɛiffen ibennayen, aqa idweř d aẓru n Uzeǧif n teɣmart!
LUK 20:18 Marra wi ɣa iwḍan x weẓru-ya, ad ifartek, u wenni xef i ɣa iwḍa, ad t iřbez’?”
LUK 20:19 Arezzun imseřmaden n idlisen d imeqqranen n ikehhanen ad xas ssarsen ifassen di tsaɛɛet nni, maca nitni ggʷeden zeg iwdan, minzi ssnen belli Netta inna amedya-ya xasen.
LUK 20:20 Ḥḍan t uca ssekken ibergagen inni iggin ixef nsen amecnaw imseggaden, ḥima ad as ggen ijj n řfex di ssibbet n ijj n wawař, maḥend ad t sellmen i řqaḍi d jjehd n lɛamil.
LUK 20:21 Sseqsan t, nnan: “[A] Amseɣɣar, nessen belli Cek tessawařed u tesseřmaded nican, war tᵉttegged ca s wudmawen u tesseřmaded abrid n AREBBI s tidett.
LUK 20:22 Ma iḥeǧeř aneɣ ad newc řeɛcur i kuř ijjen uzeǧif i qayṣar niɣ lla?”
LUK 20:23 Yuca s teḥraymect nsen uca inna asen: “Mayemmi d ayi tᵉttjarrabem?
LUK 20:24 Secnem ayi-dd dinar. Wi yiřan taṣwirt-a d tira-ya?” Nnan as: “N qayṣar!”
LUK 20:25 [Xas uca] inna asen Yasuɛ: “Wcem xenni i qayṣar min iǧan i qayṣar u i AREBBI min iǧan i AREBBI!”
LUK 20:26 War zemmaren ad t ṭṭfen s wawař nnes qibač i iwdan, [maca] qqimen ttbehten s temwarrit nnes uca sseɣden.
LUK 20:27 Usin-dd ca zeg Iṣaduqiyyen inni iqqaren, war din bu tnukra [zi řmewt]. Sseqsan t,
LUK 20:28 nnan as: “[A] Amseɣɣar, yura aneɣ Musa, mařa immut i weryaz umas i ɣar iǧa tamɣart uca immut břa iḥenjiren, xenni ad yawi umas tamɣart nni, maḥend ad dd-yejj aḥenjir i umas.
LUK 20:29 Tuɣa din sebɛa n wawmaten. Amezwar yiwi ict n temɣart, [maca] immut břa iḥenjiren.
LUK 20:30 Yiwi wenni d wiss tnayen tamɣart nni uca uřa d netta immut břa iḥenjiren.
LUK 20:31 Xenni wenni d wiss třata yiwi tamɣart nni uca ammu inneɣni ař wiss sebɛa. Mmuten nitni [marra idsen], war dd-jjin ca iḥenjiren.
LUK 20:32 Ɣar uneggar temmut temɣart ɛawed.
LUK 20:33 Di tnukra i man wen zzaysen i ɣa tiři d tamɣart? Minzi marra sebɛa nni iwyen tt [d tamɣart]!”
LUK 20:34 Inna asen Yasuɛ: “Ayt n ddunect-a iwyen timɣarin, u timɣarin ttwassmeǧacent i yeryazen.
LUK 20:35 Maca inni ittwaḥesben sdaheǧen ad awḍen ɣar ddunect nni u ɣar tnukra zi taddart n imettinen, war ttiwyen timɣarin, u timɣarin war ttiřint i yeryazen.
LUK 20:36 Maɣar war zemmaren ɛad ad mmten, minzi nitni am lmalakat u nitni d tarwa n AREBBI, minzi nitni dewřen d tarwa n tnukra.
LUK 20:37 Maca zi jjihet n imettinen ad ttwassnekkaren, tuɣa issbeyyan Musa ɛawed umi iḥaja x cbarq ak-d isennanen, aqa SIDI inna: ‘[NECC] d AREBBI n Ibrahim d AREBBI n Isḥaq d AREBBI n Yaɛqub.’
LUK 20:38 Netta war iǧi ca d AREBBI n imettinen, maca n yinni iddaren, minzi ɣares Netta nitni marra ddaren.”
LUK 20:39 Arrin-dd ca zeg imseřmaden n idlisen, nnan: “[A] Amseɣɣar, tessiwřed mliḥ aṭṭas!”
LUK 20:40 Uca war zɛimen ɛad ad t sseqsan x ca.
LUK 20:41 Inna asen: “Mammec zemmaren imseřmaden n idlisen ad inin belli Lmasiḥ d Mmis n Dawud?
LUK 20:42 Dawud [simant nnes] iqqar deg wedlis n Izehhiden: ‘SIDI inna i Sidi inu: Qqim x ufusi inu,
LUK 20:43 ař d ɣa ssarseɣ řɛedyan nnec sadu iḍaren nnec.’
LUK 20:44 Mařa Dawud isemma t ‘Sidi’, mammec ɣa yiři Netta d mmis?”
LUK 20:45 Am tuɣa marra iwdan [zemmaren] ad sřen, inna i imeḥḍaren nnes:
LUK 20:46 “Ḥḍam ixef nwem zeg imseřmaden n idlisen inni ittexsen ad uyuren s ijeǧaben iziraren, inni umi itteɛjib asen ad xasen seǧmen iwdan di řeswaq u ad qqimen x řekrasi iṣebḥen di temzidawin u x imucan imezwura ɣar imensiwen.
LUK 20:47 Nitni ttᵉtten tudrin n tijjař am ttᵉttaren tiwhibin di ṭṭweɛ n tẓaǧatin nsen tizirarin. Aqa ina ad ksin ijj n řḥukm iqseḥ.”
LUK 21:1 Xenni isweḍ Yasuɛ ɣar aytbab n wagřa ssrusan ṣṣdaqi nsen di ssenduq.
LUK 21:2 Iẓra ɛawed ict n tajjač tamezřuḍt tessars dayes tnayen n [uqiyyat, semman tent] ‘camunat’.
LUK 21:3 Inna asen: “S tidett, Necc ad awem iniɣ, aqa tajjač-a řmeskina tenḍar [dayes] ktar zzaysen marra.
LUK 21:4 Minzi marra nitni nḍaren zi zziyada n wagřa nsen [ict n ṣṣedqet] deg wexxam n ṣṣdaqi n AREBBI, maca nettat zi řexṣeṣ nnes aqa tenḍar dayes marra min ɣares.”
LUK 21:5 Ařami tuɣa ca [n iwdan] ssawařen x Zzawect Tameqqrant, tenni tzewweq s iẓra iṣebḥen d ṣṣdaqi, inna asen Yasuɛ:
LUK 21:6 “Ma tᵉttwařam timesřayin-a? Ad dd-asen wussan war ittɣimi uřa d ijj n weẓru x weẓru nneɣni i war ittareddǧen.”
LUK 21:7 Sseqsan t, nnan: “[A] Amseɣɣar, meřmi i ɣa yiři uya d man řeɛřamet aqa timesřayin-a udsent-i-dd?”
LUK 21:8 Inna asen: “Ɛessem, war tᵉttwaɣarrem, minzi aṭṭas ad dd-asen s Yisem inu, ad inin: ‘Aqa Necc d Lmasiḥ!’ u: ‘Řweqt aqa tiweḍ-dd!’, maca war ggurem awarni asen.
LUK 21:9 Mařa tesřim x řbaruḍ d iɣewwɣen, war ttnexřiɛem ca, minzi s uɣiř ad yiři uya d amezwar, maca war ittiři ɛad deɣya uneggar.
LUK 21:10 Maɣar ijj n řgens ad dd-igeɛɛed ḍidd n ijj n řgens [nneɣni] u ict n tgeldit ḍidd n ict n tgeldit [nneɣnit].
LUK 21:11 Ad iřin inhezziyyen n temmurt mɣaren di ɛřam kuř imucan d řaẓ d jjrayeḥ d tiggʷudi d usnexřiɛ. Uca ad dd-banent řeɛřamat mɣarent zeg ujenna u ad din iřint tḥaryaḍin ijehden.
LUK 21:12 Maca qbeř man aya marra ad xawem ssarsen ifassen, ad kenniw sellmen ɣar temzidawin d řeḥbusat, uca ad kenniw nedhen zzat i ijeǧiden d řḥukkam x ssibbet n Yisem inu.
LUK 21:13 Maca man aya ad yarra kenniw ad tcehdem.
LUK 21:14 Ggem deg wuřawen nwem maḥend war [tarezzum] ad třemdem mammec i dd ɣa tarrem.
LUK 21:15 Minzi Necc ad awem wceɣ aqemmum d tiɣit i war zemmaren ad ten ssbedden marra řɛedyan nwem.
LUK 21:16 Ad kenniw sellmem lwalidin nwem d tawmat nwem d řaǧ nwem d imeddukkař nwem uca ad nɣen ca zzaywem,
LUK 21:17 u kenniw ad tᵉttwacarhem zi marra s ssibbet n Yisem inu.
LUK 21:18 [Waxxa amenni] uřa d ijj n uẓeṭṭu [n ucuwwaf] n uzeǧif nwem war ittweddari ca,
LUK 21:19 maca s ṣṣbar nwem ad tarebḥem řeɛmur nwem.”
LUK 21:20 “Xmi ɣa tẓarem Urcalim aqa inneḍ as-dd řɛeskar, xenni snem belli aqa iqarreb-dd wareddeǧ nnes.
LUK 21:21 Xenni ittxeṣṣa ad arewřen inni iǧan di Yahudiyya ɣar idurar, ejj inni iǧan di řwesṭ nnes ad zzayes ffɣen, ad arewřen, d yinni iǧan di dcurat, war tt ttidfen,
LUK 21:22 minzi ina d ussan n nneqmet ḥima ad ittwakemmeř marra min yurin.
LUK 21:23 Uct x temɣarin nni s ddeyset d tinni issuṭṭuḍen deg wussan nni, minzi ad din tiři řmeḥnet d tameqqrant x temmurt d weɣḍab x řgens-a.
LUK 21:24 Nitni ad wḍan s řeqḍeɛ n ssif, ad ttwaḥebbsen am ttwanedhen jar marra řegnus, uca Urcalim ad xas ɛefsen řegnus ař ɣa kemmřent zzmanat n řegnus.”
LUK 21:25 “Ad din iřint řeɛřamat di tfuct, di tziri u deg itran, uca x temmurt [ad din tiři] řmeḥnet di řegnus, ař d asen iweddar min ɣa ggen zeg unexřiɛ n zzhir ameqqran n řebḥar,
LUK 21:26 u [zeg] wenhezzi n temmurt d ameqqran ad issnexřiɛ řeɛmar n iwdan zi tiggʷudi zi min i dd ɣa yasen x temmurt, u ṣṣulaṭat n ijenwan ad ttwanhezzent.
LUK 21:27 Řexdenni ad ẓaren Mmis n bnadem, xmi dd ɣa yas deg iseynuten, s jjehd d uɛuǧi aṭṭas.
LUK 21:28 Xmi ɣa bdant tmesřayin-a, ggem taryast, sgeɛɛdem izeǧifen nwem minzi asenjem nwem aqa yiweḍ-dd.”
LUK 21:29 Iɛawed asen ijj n umedya: “Xzarem ɣar wartu n tazart u ɣar marra ticejjura.
LUK 21:30 Xmi ɣa ssneḍyent, ad tessnem s man aya aqa anebdu yiweḍ-dd.
LUK 21:31 Ammu [ittxeṣṣa] ɛawed kenniw, xmi ɣa tᵉttwařam timesřayin-a ttemsarant, snem [xenni] belli Tageldit n AREBBI tudes-dd.
LUK 21:32 S tidett ad awem iniɣ, aqa war iɛeddu jjiř-a ař ɣa yiři uya kuřci.
LUK 21:33 Ajenna d temmurt ad ɛeddun, [maca] awařen inu war ɛeddun ɛemmarṣ.
LUK 21:34 Ḥḍam ixef nwem ḥima war tteḍqiřen wuřawen nwem zeg ufucceḥ d wescar d imunas n ddunect-a, u war xawem dd-iwḍi wass nni deɣya.
LUK 21:35 Minzi ad dd-yas [ass nni] am řfex x marra inni iqqimen x uɣembub n temmurt.
LUK 21:36 Ḥḍam xenni řebda, ẓaǧem ḥima ad tiřim tesdaheǧem maḥend ad tnejmem zi marra min ɣa imsaren, uca ad tbeddem zzat i Mmis n bnadem.”
LUK 21:37 S uziř tuɣa isseřmad di Zzawect Tameqqrant, [maca] s ǧiřet tuɣa itteffeɣ, ittɣima ittnusa x wedrar umi qqaren: ‘Taddart n Zzitun’.
LUK 21:38 Di ṣṣbeḥ zic tuɣa marra iwdan ttasen-dd ɣares di Zzawect Tameqqrant ḥima ad sřen Awař nnes.
LUK 22:1 Iqarreb-dd Řɛid n [Weɣrum] břa Antun umi qqaren [Řɛid n] [Taɣarṣt n] Useɛdu.
LUK 22:2 Tuɣa imeqqranen n ikehhanen d imseřmaden n idlisen arezzun ict n tewwart, ḥima ad t nɣen, maca nitni ggʷeden zeg iwdan.
LUK 22:3 [Xenni] yudef cciṭan di Yahuda wenni umi qqaren Isxariyuṭi. Netta tuɣa d ijjen zi tenɛac [n imeḥḍaren].
LUK 22:4 Iruḥ, issiweř ak-d imeqqranen n ikehhanen d imseřmaden n idlisen d imgewwaden n iɛessasen n Zzawect Tameqqrant mammec t i ɣa isellem i nitni.
LUK 22:5 Farḥen uca ttafqen ad as wcen [tinɛacin n] nnuqart.
LUK 22:6 Netta iwca asen awař uca yarzu ict n tewwart, ḥima ad asen t isellem barra i řɣaci.
LUK 22:7 Yiweḍ-dd wass n [Weɣrum] břa Antun i di tuɣa ittxeṣṣa ad tᵉttwaɣarṣ i [Tɣarṣt n] Useɛdu.
LUK 22:8 Yasuɛ issekk-dd Buṭrus d Yuḥanna, inna [asen]: “Ruḥem, tesswejdem aneɣ i [umensi n] Useɛdu ḥima ad necc.”
LUK 22:9 Nnan as: “Mani texsed ad nessewjed?”
LUK 22:10 Inna asen: “Xzar, xmi ɣa tadfem ɣar tendint ad kenniw iřqa ijj n weryaz, yarbu ict n teqbuct n waman. Ḍfarem t!
LUK 22:11 Inim i bab n taddart: ‘Amseřmad nneɣ isseqsa: Mani iǧa wexxam n inewjiwen i di i ɣa cceɣ [umensi n] Useɛdu ak-d imeḥḍaren inu?’
LUK 22:12 Netta ad awem isscen ict n tɣurfet tmiriwt sennej, yessu [s ipayasen]. Swejdem din [kuřci]!”
LUK 22:13 Nitni ruḥen, ufin [marra] am mammec tuɣa d asen inna uca sswejden i [umensi n] Useɛdu.
LUK 22:14 Umi dd-tiweḍ tsaɛɛet, yusa-dd Yasuɛ, iqqim [ɣar ṭṭabřa] d tenɛac n rrusul akides.
LUK 22:15 Inna asen: “Necc tuɣa weḥḥceɣ aṭṭas ad cceɣ [amensi-ya n] Useɛdu akidwem qbeř i ɣa weddbeɣ.
LUK 22:16 Minzi ad awem iniɣ, aqa war zzayes ttᵉtteɣ [ɛad] ař ɣa tᵉttwakemmeř di Tgeldit n AREBBI.”
LUK 22:17 [Xenni] iṭṭef ijj n řkas uca iqada, inna: “Ksim wa, bḍam t jar awem!
LUK 22:18 Minzi Necc ad awem iniɣ, war sesseɣ ca zi řɣiǧet n tzayart ař dd tusa Tgeldit n AREBBI.”
LUK 22:19 Iksi aɣrum, iqada, yarẓa [i-t] uca iwca asen t, inna: “Ta d Arrimet inu tenni xawem immewcen. Ggem aya i řidaret inu.”
LUK 22:20 Ammu [i inna] ɛawed x řkas awarni i umensi: “Řkas-a d Řɛahd n Jdid s Idammen inu inni i xawem i ɣa ittwassizzřen.
LUK 22:21 Maca aqa da, afus n wenni d ayi ɣa iɣdaren aqa-t akidi ɣar ṭṭabřa.
LUK 22:22 Mmis n bnadem ad iraḥ am mammec xas ittwakkes, maca uct x bnadem nni i t ɣa iɣdaren!”
LUK 22:23 Bdan ttemsseqsan jar asen, man wen zzaysen i ɣa yegg man aya.
LUK 22:24 Tuɣa jar asen ɛawed amcubbec x man wen zzaysen iǧan d ameqqran qaɛ.
LUK 22:25 Xenni inna asen Yasuɛ: “Ijeǧiden n řegnus ṣellṭen xasen, u inni xasen iṣellṭen ttwařaɣan ‘tarwa n rejwad!’
LUK 22:26 Kenniw maca war tteggem ammu, maca ameqqran daywem ad yiři am umaẓuẓ, u amezwar [ad yiři] am umsexxar.
LUK 22:27 Minzi man wen iǧan d ameqqran? Ma d wenni iqqimen [ɣar ṭṭabřa] niɣ d wenni ittsexxaren? Maca Necc di řwesṭ nwem am wenni ittsexxaren.
LUK 22:28 Aqa kenniw d inni akidi iqqimen deg ijarriben inu.
LUK 22:29 Necc ad awem weɛdeɣ ict n Tageldit am mammec i d ayi tt iwaɛd Baba,
LUK 22:30 ḥima ad teccem ad teswem x ṭṭabřa inu di Tgeldit inu uca ad teqqimem x řekrasi n tgeldit, ad tḥekmem x tenɛac n tqebbař n ayt n Israil.”
LUK 22:31 Inna Yasuɛ i Cimɛun: “Cimɛun, Cimɛun, aqa cciṭan tuɣa yarezzu ad kenniw izzuzar am yirden.
LUK 22:32 [Maca] Necc ẓuǧeɣ xak ḥima war ifenni l’iman nnec. Uřa d cek, tub di řweqt ittwaggen, stebbet aytmac.”
LUK 22:33 Inna as Cimɛun: “[A] Sidi, necc aqa wejdeɣ ḥima ad kik raḥeɣ uřa ɣar řeḥbes d řmewt.”
LUK 22:34 [Maca] Yasuɛ inna as: “Necc ad ac iniɣ, [a] Cimɛun, war issququɛ uyaẓiḍ ass-a qbeř ma ad ayi tenkared třata n twařawin belli aqa tessned ayi.”
LUK 22:35 Inna asen: “Řami kenniw ssekkeɣ břa tacyart, břa ttesṭim niɣ sandaliyat, ma tuɣa ittxeṣṣa awem ca?” Nnan as: “Walu!”
LUK 22:36 [Xas uca] inna asen: “Maca řexxu wenni ɣar iǧa tecyart, ad tt iksi, ammu uřa d ttesṭim, uca wenni war ɣar iǧi ssif, ad izzenz arruḍ nnes uca ad [zzayes] iseɣ ssif i yixef nnes.
LUK 22:37 Minzi Necc ad awem iniɣ, aqa ittxeṣṣa ad ttwakemmřent tira-ya dayi: ‘Aqa ittwaḥseb ak-d inni war iseggden!’, minzi marra min xafi yuran, ad ittwakemmeř.”
LUK 22:38 Nnan asen: “[A] Siditneɣ, aqa da tnayen n řesyuf!” Inna asen: “Ikfa!”
LUK 22:39 Iffeɣ, iruḥ ɣar wedrar ‘Taddart n Zzitun’ am mammec tuɣa innum, uca ḍfaren t ɛawed imeḥḍaren nnes.
LUK 22:40 Umi ixecc ɣar wemcan nni, inna asen: “Ẓaǧem ḥima war dd-tᵉttidfem deg ujarreb.”
LUK 22:41 Ifekk Ixef nnes zzaysen ɛřaḥař ticti n ijj n uḥejjar n weẓru, yuḍar x ifadden nnes, iẓẓuǧ,
LUK 22:42 inna: “[A] Baba, mařa texsed, ejj řkas-a ad xafi iɛdu. Maca war ittiři min xseɣ Necc maca min texsed Cek.”
LUK 22:43 [Xenni] iḍhar as-dd ijj n lmalak zeg ujenna, iwca as jjehd.
LUK 22:44 Tuɣa Netta iggwed aṭṭas, ittẓaǧa aṭṭas uca tidi nnes tuɣa tᵉttegg am tneqqiḍin n idammen weṭṭant ɣar temmurt.
LUK 22:45 [Xenni] ikkar zi tẓaǧit, yusa-dd ɣar imeḥḍaren nnes uca yufa i-ten ṭṭṣen s wecḍan.
LUK 22:46 Inna asen: “Mayemmi tᵉṭṭṣem? Kkarem, teẓẓaǧem ḥima war tᵉttidfem deg ujarreb.”
LUK 22:47 Am tuɣa ɛad issawař, xzar, aqa yusa-dd ijj n řɣaci ak-d wenni i d as qqaren Yahuda, wenni d ijjen zi tenɛac, uca netta tuɣa izwar asen, iqarreb-dd ɣar Yasuɛ, issudem i-t, maɣar aqa iwca asen ijj n wescan: “Wenni i ɣa ssudmeɣ, d wenni Netta!”
LUK 22:48 Inna as Yasuɛ: “[A] Yahuda, ma s usudem ad teɣdared Mmis n bnadem?”
LUK 22:49 Umi ẓrin inni d as dd-innḍen min imsaren, nnan as: “A Siditneɣ, ma ad t newwet s řesyuf?”
LUK 22:50 Ijjen zzaysen tuɣa iwta amsexxar n arrays n ikehhanen, iqess as amezzuɣ afusi.
LUK 22:51 Iṭṭef Yasuɛ deg wawař, inna: “Ṣafi, baraka!” Xenni iḥada as amezzuɣ uca issgenfa i-t.
LUK 22:52 Inna Yasuɛ i imeqqranen n ikehhanen d imɣaren [n řgens] d imgewwaden n iɛessasen n Zzawect Tameqqrant, inni tuɣa ɣares dd-yusin: “Ma teffɣem-dd ɣari axmi dd-teffɣem ɣar ijj n uxewwan, s řesyuf d iɛumad, maḥend ad ayi tᵉttfem?
LUK 22:53 Ass x wass tuɣa ayi akidwem di Zzawect Tameqqrant, kenniw war ɣari tesswiẓẓḍem s ifassen, maca ta d tasaɛɛet nwem d ṣṣulṭa n taǧest.”
LUK 22:54 Ṭṭfen t, nedhen t uca ssidfen t di taddart n arrays n ikehhanen. Uca iḍfar i-t Cimɛun zi řaggʷaj.
LUK 22:55 Nitni ssarɣen timessi di řwesṭ n řemraḥ, xenni qqimen deg wenneḍ nnes. Uca Cimɛun iqqim jar asen.
LUK 22:56 Teẓra i-t ict n tayya am iqqim ɣar tmessi uca texzar dayes mliḥ, tenna: “Uřa d wa tuɣa-t akides.”
LUK 22:57 Maca netta inkar t, inna: “[A] tamɣart, necc war t ssineɣ!”
LUK 22:58 War din min iɛdun iẓra i-t wenneɣni, inna: “Uřa d cek d ijjen zzaysen.” Maca Buṭrus inna: “War iǧi bu d necc!”
LUK 22:59 Umi teɛdu ɛřaḥař ict n tsaɛɛet, ibda wenneɣni ad iqaceḥ, inna: “S tidett, uřa d wa tuɣa-t akides, minzi uřa d netta d Ajalili.”
LUK 22:60 Inna Buṭrus: “[A] bnadem, necc war ssineɣ min xef tessawařed!” Řexdenni, am tuɣa ɛad issawař, issquqeɛ uyaẓiḍ.
LUK 22:61 Inneqřeb Yasuɛ uca ixzar ɣar Buṭrus. Uca iɛqeř Cimɛun x wawař i d as inna Siditneɣ: “Qbeř i ɣa issquqeɛ uyaẓiḍ, ad ayi tenkared třata n twařawin!”
LUK 22:62 Uca iffeɣ-dd Cimɛun barra, iru imeṭṭawen imerzagen.
LUK 22:63 Iryazen nni iṭṭfen Yasuɛ, tuɣa sthezzan zzayes,
LUK 22:64 dřin [tiṭṭawin nnes], [xenni] wtin t ɣar uɣembub, nnan: “Nabb, man wen i Cek iwtin?”
LUK 22:65 S waṭṭas n tmesřayin nneɣni tuɣa ttceqqafen dayes, ssawařen ḍidd nnes.
LUK 22:66 Umi dd-yiweḍ uziř, munen imɣaren [n řgens] d imeqqranen n ikehhanen d imseřmaden n idlisen uca nedhen t ɣar wexxam n Jmaɛet nsen.
LUK 22:67 Nnan as: “Mařa Cek d Lmasiḥ, [xenni] ini aneɣ t.” Inna asen: “Mařa nniɣ awem t, war dayi tᵉttimnem,
LUK 22:68 u mařa sseqsiɣ kenniw, war xafi dd-tarrim niɣ war d ayi tarexxum.
LUK 22:69 Zi řexxu d tsawent ad iqqim Mmis n bnadem x ufus afusi n jjehd n AREBBI.”
LUK 22:70 Nnan marra: “Ma Cek d Mmis n AREBBI?” Inna asen: “Kenniw [s yixef nwem] teqqarem, aqa d Necc!”
LUK 22:71 Nnan: “Umi neḥdaj ɛad řechud? Minzi aqa neccin [s yixef nneɣ] nesřa t zeg uqemmum nnes.”
LUK 23:1 Marra tmesmunt nsen tekkar uca nitni nedhen t ɣar Pilaṭus.
LUK 23:2 Bdan ad t ḍeřmen, nnan: “Neccin nufa aqa Wa issefsed řgens nneɣ am imenneɛ ad wcen ḍḍariba i kuř azeǧif i qayṣar, iqqar belli Netta d Ajeǧid, Lmasiḥ!”
LUK 23:3 Isseqsa t Pilaṭus, inna: “Ma Cek d Ajeǧid n Wudayen?” Yarra-dd, inna: “Cek i t iqqaren!”
LUK 23:4 Inna Pilaṭus i řɣaci u i imeqqranen n ikehhanen: “Aqa war ufiɣ bu uřa d ijj n řɛib di Bnadem-a!”
LUK 23:5 [Maca] sɣuyen nitni, nnan: “Netta issɣewwaɣ řgens, isseřmad di marra Yahudiyya, ibda zi Ljalil ař da.”
LUK 23:6 Umi isřa Pilaṭus ‘Ljalil’, isseqsa: “Ma aryaz-a d Ajalili?”
LUK 23:7 Umi ifhem belli Netta tuɣa sadu ufus n Hirudus, issekk i-t ɣar Hirudus, minzi wanita tuɣa-t di Urcalim deg wussan nni.
LUK 23:8 Ařami iẓra Hirudus Yasuɛ, ifarḥ aṭṭas, minzi aṭṭas zeg wami tuɣa ixs ad t iẓar, minzi isřa xas aṭṭas n tmesřayin, u tuɣa issitim ad zzayes iẓar ca n řeɛřamet.
LUK 23:9 Isseqsa t x waṭṭas n tmesřayin, maca Yasuɛ war xas dd-yarri s ca.
LUK 23:10 Imeqqranen n ikehhanen d imseřmaden n idlisen kkaren, ḍeřmen t s řḥarret.
LUK 23:11 Hirudus ak-d řɛeskar nnes sseḥqaren t, u awarni řami istehza zzayes, yarḍ as ijj n useřham adehmani, uca issekk i-t ɣar Pilaṭus.
LUK 23:12 Dewřen Pilaṭus d Hirudus d imeddukkař deg wass nni, minzi qbeř tuɣa din řeɛdawet jar asen.
LUK 23:13 [Xas uca] iřaɣa Pilaṭus x imeqqranen n ikehhanen d imeqqranen n řgens, inna asen:
LUK 23:14 “Kenniw tiwyem ayi-dd bnadem-a am yijjen wenni issɛiǧen řgens nwem. Xzar, necc sseqsiɣ t zzatwem, war ufiɣ uřa d ijj n řɛib deg weryaz-a zi jjihet marra i zzayes tᵉttcetcam xas kenniw.
LUK 23:15 Uřa d Hirudus [war dayes yufi ca], minzi necc ssekkeɣ t ɣares. U xzar, war din uřa d ict n řḥajjet i igga tesdaheǧ řmewt.
LUK 23:16 Necc ad t hettkeɣ s urekkuḍ uca ad as arxuɣ.”
LUK 23:17 Maɣar tuɣa din ict n tnamit maḥend ad asen yarxu i yijjen di Řɛid.
LUK 23:18 Maca marra řɣaci isɣuy deg ijj n umur, inna: “Kksem Wa, arxu aneɣ-dd i Bar-Abbas!”
LUK 23:19 Wa tuɣa ittwammenḍar di řeḥbes x ssibbet n ijj n uɣuwweɣ i imsaren di tendint u [x ssibbet n] wenɣay.
LUK 23:20 Issiweř Pilaṭus ɛawed akidsen, minzi tuɣa ixs ad yarxu i Yasuɛ.
LUK 23:21 Maca sɣuyen nitni, nnan: “Ṣellb i-t! Ṣellb i-t!”
LUK 23:22 Inna asen i twařa wiss třata: “Man tuɛeffna igga Wa [xenni]? Necc war dayes ufiɣ bu uxeṭṭu i [isdaheǧen] řmewt? S uyenni awarni řami t hettkeɣ s urekkuḍ, ad as arxuɣ!”
LUK 23:23 Maca nitni ziyyaren xas s tmijjawin jjehdent, ttaren [maḥend] ad t ṣellben. Timijjawin nsen d tenni n imeqqranen n ikehhanen tuɣa arennyent di jjehd.
LUK 23:24 [Xenni] iḥkem Pilaṭus ad asen iqḍa cɣeř nsen.
LUK 23:25 Iḍřeq asen i wenni immenḍaren di řeḥbes zi ssibbet n uɣuwweɣ d wenɣay, d wenni ttaren nitni, maca isellem Yasuɛ [i nitni] x řeḥsab řxaḍar nsen.
LUK 23:26 Umi t gewwden ssenni, ṭṭfen Cimɛun zi Qayrawan, tuɣa yusa-dd zi řkampu, uca ssarsen xas ṣṣalib ḥima ad [t] yarbu awarni Yasuɛ.
LUK 23:27 Iḍfar i-t-i-dd ijj n řɣaci n iwdan d temɣarin nni tuɣa iwtin agejdur, ttrunt xas.
LUK 23:28 Inneqřeb-dd ɣarsent Yasuɛ, inna: “[A] yessis n Urcalim, war ttrunt ca xafi, maca runt x ixef nkent d tarwa nkent.
LUK 23:29 Minzi ad dd-asen wussan i di i ɣa inin: ‘Sseɛd n temɣarin i war izemmaren ad urwent u [sseɛd n] iɛeddisen nni war yurwen, d tibbac tinni war issuṭṭuḍen!’
LUK 23:30 Xenni ad inin i idurar: ‘Wḍam-dd xaneɣ!’, u i tiwririn: ‘Dřent aneɣ!’
LUK 23:31 Minzi mařa ggin aya s ukeccuḍ aziza, min ɣa imsaren xenni i [ukeccuḍ] yuẓɣen?”
LUK 23:32 Nedhen akides ɛawed tnayen nneɣni inni tuɣa iqeṭṭɛen abrid, ḥima ad ten nɣen [akides].
LUK 23:33 Řami iwḍen ɣar wemcan umi qqaren ‘Taceqquft’, ṣellben t din ak-d yinni tuɣa iqeṭṭɛen abrid, ijjen x yefus nnes u wenneɣni x uzeřmaḍ nnes.
LUK 23:34 Maca Yasuɛ inna: “[A] Baba, ɣfar asen, minzi nitni war ssinen min tteggen!” Uca bḍan arruḍ nnes, nḍaren xas akeccuḍ.
LUK 23:35 Tuɣa iwdan bedden din, xezzaren. Uřa d imeqqranen [n řgens] sthezzan zzayes, nnan: “Tuɣa issenjem inneɣni, řexxu ejj i-t ad issenjem Ixef nnes mařa Netta d Lmasiḥ, d Wenni ittwafarzen zi AREBBI?”
LUK 23:36 Uřa d iɛeskariyyen stehzan zzayes am ɣares dd-qarrben uca wcin as řxeǧ.
LUK 23:37 Nnan as: “Mařa Cek d Ajeǧid n Wudayen, [xenni] senjem Ixef nnec!”
LUK 23:38 Tuɣa din ɛawed ict n tira sennej nnes, urin tt [s lḥuruf] n Tyunanit d Tlatinit d Tɛibranit: ‘Wa d Ajeǧid n Wudayen.’
LUK 23:39 Ijjen zeg iqṭaṭɛiyyen i yuyřen akides, tuɣa ittceqqaf dayes, iqqar: “Mařa Cek d Lmasiḥ, senjem Ixef nnec uřa d neccin!”
LUK 23:40 Maca wenneɣni iwebbex i-t, inna: “Ma cek war teggʷided ca ɛad zi AREBBI umi cek iřqef ccreɛ d ijjen?
LUK 23:41 Neccin s řḥeqq minzi neṭṭef axeǧeṣ n min negga. Maca Wa war iggi min war iḥřin!”
LUK 23:42 [Xas uca] inna i Yasuɛ: “Ɛqeř xafi, [a] Sidi inu, xmi dd ɣa tased di Tgeldit nnec.”
LUK 23:43 Inna as Yasuɛ: “S tidett, Necc ad ac iniɣ, aqa ass-a ad tiřid akidi di jjennet.”
LUK 23:44 Tuɣa tasaɛɛet ɛřaḥař d setta, [aqa-tt d ḍḍhur], xenni tewḍa-dd taǧest x temmurt marra ařami d tesɛa, [aqa-tt d třata n uɛecci].
LUK 23:45 [Xenni] tebbarcen tfuct uca ařeḥḥaf n wadaf ɣar Zzawect Tameqqrant ittwacarreg deg wezyen.
LUK 23:46 Yasuɛ iřaɣa s jjehd, inna: “[A] Baba, deg ifassen nnec ad ssarseɣ Arruḥ inu.” Umi inna aya, isellem Ixef nnes [ɣares].
LUK 23:47 Umi iẓra řqebṭan x mya min tuɣa imsaren, ibda issemɣara di AREBBI, inna: “S tidett tuɣa Bnadem-a d amseggad!”
LUK 23:48 Umi marra řɣaci i d imunen ḥima ad ẓaren afurrej-a, ẓrin min imsaren, ɛeqben am wtin deg idmaren nsen.
LUK 23:49 Marra inni issnen Yasuɛ d temɣarin i kides dd-yusin zi Ljalil, bedden ɣar řaggʷaj, ẓrin [marra] aya.
LUK 23:50 Ijj n weryaz, qqaren as Yusuf, tuɣa-t d amcawar di Jmaɛet [Tameqqrant]. Netta zi Ramta, ict n tendint di Yahuda, aqa-t d ijj n weryaz d aṣebḥan d amseggad.
LUK 23:51 Netta war yarḍi ca x ccwar nsen u x min ggin, u netta tuɣa ittraja Tageldit n AREBBI.
LUK 23:52 Wanita yuyur ɣar Pilaṭus uca ittar [as] arrimet n Yasuɛ.
LUK 23:53 Issehwa tt-i-dd [zi ṣṣalib], inneḍ i-tt deg ict n txeyyaḍt n řeqṭen [azdad] uca issars i-tt deg wenḍeř i iɣza di sseǧaḥ mani war inḍiř ḥed ɛad.
LUK 23:54 Tuɣa d ass n Usewjed, aqa ssebt tqarreb-dd.
LUK 23:55 Timɣarin i kides dd-yusin zi Ljalil, qarrbent-i-dd, ẓrint anḍeř d mammec ssarsen arrimet nnes.
LUK 23:56 [Xas uca] ɛeqbent, ssewjdent řeɛṭur d zzect ittfuḥen, [maca] di ssebt areyyḥent am mammec teǧa di tewṣeyyet.
LUK 24:1 Deg [wass] amezwar [n ssimana] ɣar ṣṣbeḥ, řami tuɣa ɛad d taǧest, ruḥent ɣar wenḍeř, ksint řeɛṭur i tuɣa ssewjdent, u tuɣa din [ɛad] timɣarin nneɣni akidsent.
LUK 24:2 Aqa ufint, taṣḍart i tuɣa x wenḍeř, tᵉttwasseqnuni zzayes.
LUK 24:3 Udfent, [maca] war ufint ca arrimet n Yasuɛ.
LUK 24:4 Am tbehtent di man aya, xzar, aqa din tnayen n yeryazen deg warruḍ ittissiqen, bedden sennej nsent.
LUK 24:5 Nitenti ggʷedent aṭṭas uca qbařent azeǧif nsent ɣar temmurt. Nitni [maca] nnan asent: “Mayemmi tarezzunt x Wenni iddaren jar imettinen?
LUK 24:6 Aqa war da iǧi, minzi aqa ikkar! Ɛeqřent x min d akent inna umi t tuɣa ɛad di Ljalil,
LUK 24:7 inna: ‘Aqa tura belli Mmis n bnadem ad immewc deg ifassen n imednab, ad ittwaṣelleb uca deg wass wiss třata ad dd-ikkar.’”
LUK 24:8 [Xenni] ɛeqřent x wawařen nnes.
LUK 24:9 Ɛeqbent-i-dd zeg wenḍeř uca xebbarent marra man aya i ḥiṭac u i inneɣni.
LUK 24:10 Ina tuɣa d Maryam n Majdala d Yuḥanna d Maryam, yemmas n Yaɛqub, d min tuɣa iqqimen [n temɣarin] i iǧan akidsent, ḥajant nitenti man aya i rrusul.
LUK 24:11 Nitni ḥesben awařen-a d aṭemmes uca war tent ttiqqen.
LUK 24:12 Maca Cimɛun ikkar-dd, yuzzeř deɣya ɣar wenḍeř, ixezzar daxeř, iẓra taxeyyaḍt n řeqṭen [azdad] tᵉttwamars ɣar uɣezdis. [Xenni] iruḥ, ittebhet deg yixef nnes s min imsaren.
LUK 24:13 U xzar, deg wass nni tuɣa tnayen zzaysen deg webrid ɣar ijj n dcar qqaren as Ɛimwas, iggʷej settin ‘istadiyyen’ x Urcalim, [ɛřaḥař ḥiṭac kilumitr].
LUK 24:14 Tuɣa ssawařen ak-d wayawya x marra min tuɣa imsaren.
LUK 24:15 Am ssawařen nitni, ttemsawaḍen, iqarreb-dd ɣarsen Yasuɛ, yuyur akidsen.
LUK 24:16 Ttwacebbarent tiṭṭawin nsen ařami war t ɛqiřen.
LUK 24:17 Inna asen: “Man awařen-a i xef tessawařem ak-d wayawya deg webrid, am teggurem u ttbanent řxeẓrat nwem ceḍnent?”
LUK 24:18 Ijjen zzaysen umi qqaren Kliyupas, inna as: “Ma Cek d ayenni n ubarrani di Urcalim i war issinen min din imsaren deg wussan-a?”
LUK 24:19 Inna asen: “Min imsaren?” Nnan as: “Min imsaren i Yasuɛ zi Nnaṣira, tuɣa-t d anabi, tuɣa ɣares jjehd di min ittegg u di min issawař qibač i AREBBI d marra řgens.
LUK 24:20 Sellmen t imeqqranen n ikehhanen d imɣaren [n řgens] i řḥukm s řmewt uca ṣellben t.
LUK 24:21 Neccin tuɣa nessitim, aqa d Netta i ɣa isellken Israil, maca xzar, ass-a [ɛdun ɛad] třata n wussan zeg wami imsar man aya marra.
LUK 24:22 Maca ca n temɣarin zzayneɣ ssḥeyyarent aneɣ ɛawed, maɣar nitenti ruḥent zic ɣar wenḍeř.
LUK 24:23 Řami war din ufint arrimet nnes, usint-i-dd, nnant: “Aqa neẓra din lmalakat, u [lmalakat] nnant xas: ‘Aqa iddar!’”
LUK 24:24 Ca zeg inni akidneɣ iǧan, ruḥen ɣar wenḍeř, ufin timesřayin am mammec xas nnant ɛawed temɣarin, maca Netta war t ẓrin ca.”
LUK 24:25 Inna asen: “Mecḥař d ifɣař d ineḍqař n wuř i teǧam maḥend ad tamnem di marra min ssiwřen inabiyyen!
LUK 24:26 Ma war ittxeṣṣi ad iweddeb Lmasiḥ ḥima ad yadef ɣar uɛuǧi nnes?”
LUK 24:27 Xenni ibda zi Musa u zi marra inabiyyen, ittfessar asen x Yixef nnes zi marra Tira [Iqeddsen].
LUK 24:28 [Umi] dd-qarrben ɣar dcar i ɣar tuɣa gguren, igga Netta axmi tuɣa ixs ad yarni deg webrid ɣar ijj n wemcan iggʷejen.
LUK 24:29 [Maca] nitni ggin xas bezzez, nnan: “Qqim akidneɣ, minzi tameddit ad tewḍa, aqa imeyyeř uziř.” Uca yudef, iqqim akidsen.
LUK 24:30 Imsar ařami tuɣa akidsen iqqim [ɣar umensi] iksi aɣrum, ibarek [i-t], yarẓa [i-t], xenni iwca asen [t].
LUK 24:31 Deɣya nnurzment tiṭṭawin nsen, ɛeqřen t. [Xas uca] ittwammeksi zzaysen.
LUK 24:32 Nnan ijjen i wenneɣni: “Ma war tuɣi ideqqeř wuř nneɣ ařami tuɣa akidneɣ issawař deg webrid, issefham aneɣ Tira [Iqeddsen]?”
LUK 24:33 Di tsaɛɛet nni kkaren nitni, ɛeqben ɣar Urcalim, uca ufin ḥiṭac [n rrusul] munen, nitni d yinni akidsen.
LUK 24:34 Uca nitni nnan: “D tidett, aqa ikkar-dd Siditneɣ, iban-dd i Cimɛun.”
LUK 24:35 Uřa d nitni xebbaren ɛawed s min imsaren deg webrid u mammec t ɛeqřen ařami yarẓa aɣrum.
LUK 24:36 Am tuɣa ssawařen nitni x man aya, ibedd Yasuɛ simant nnes di řwesṭ nsen, inna asen: “Sřam xawem, aqa d NECC, war tteggʷedem ca!”
LUK 24:37 [Maca] nitni nnxeřɛen uca ggʷeden aṭṭas, ittɣiř asen belli ttwařan ijj n řexyař.
LUK 24:38 Inna asen Yasuɛ: “Mayemmi tᵉttnexřiɛem, mayemmi tᵉtteggem ixarriṣen deg wuřawen nwem?
LUK 24:39 Xzarem ifassen d iḍaren inu, aqa d Necc Necc. Ḥadam ayi, u snem belli ijj n řexyař war ɣares bu weysum uřa d iɣsan am mammec d ayi tᵉttwařam.”
LUK 24:40 Umi inna aya, isscen asen ifassen nnes d iḍaren nnes.
LUK 24:41 War uminen ɛad zi ssibbet n řefraḥet, qqimen ttbehten. Inna asen: “Ma ɣarwem da ca n macca?”
LUK 24:42 Wcin as ict n tecwiḥt n wesřem icennfen d ca n tezřeft n tamment.
LUK 24:43 Iksi tt uca icca i-tt qibač nsen.
LUK 24:44 Inna asen: “Ina d awařen i zi kidwem ssiwřeɣ umi d ayi tuɣa ɛad akidwem, aqa ittxeṣṣa ad ittwakemmeř marra min xafi yuran di Ccariɛa n Musa, deg Inabiyyen u deg Izehhiden.”
LUK 24:45 Xenni yarzem asen řeɛqeř nsen, ḥima ad fehmen i Tira [Iqeddsen].
LUK 24:46 Inna asen: “Ammu i tura u ammu i tuɣa ittxeṣṣa ad imarret Lmasiḥ u ad dd-ikkar zi taddart n imettinen deg wass wiss třata,
LUK 24:47 [ḥima] ad ittwabarreḥ s ttubet i weɣfar n ddnub i marra řegnus s Yisem nnes, d amezwaru di Urcalim.
LUK 24:48 Kenniw d řechud x man aya.
LUK 24:49 Aqa Necc ad awem dd-ssekkeɣ lwaɛd n Baba. Qqimem [maca] di tendint n Urcalim ař ɣa tᵉttwassyarḍem s jjehd zi řuɛřa!”
LUK 24:50 Xenni indeh i-ten ɣar [tendint n] Bayt-Ɛanya, issgeɛɛed ifassen nnes uca ibark i-ten.
LUK 24:51 Awarni řami ten tuɣa ittbarak, imsar, aqa immsebḍa xasen uca iggeɛɛed ɣar ujenna.
LUK 24:52 Sejden as uca ɛeqben ɣar Urcalim s řefraḥet temɣar.
LUK 24:53 Tuɣa-ten řebda di Zzawect Tameqqrant, ssemɣaran u ttbaraken AREBBI. Amin. Aneggar n L’Injil Iqeddsen am mammec t ibarreḥ Luka.
JOH 1:1 Deg umezwaru tuɣa iǧa Wawař, Awař tuɣa-t ɣar AREBBI u AREBBI tuɣa-t d Awař.
JOH 1:2 Wanita d wenni iǧan ɣar AREBBI deg umezwaru.
JOH 1:3 Zzayes Netta iǧa kuřci u břa Netta war teǧi uřa d ict n tmesřact zi [marra] min iǧan.
JOH 1:4 Dayes i teǧa Tudart u Tudart teǧa Tafawt n iwdan.
JOH 1:5 Tafawt tareqq di taǧest, taǧest war tt tᵉṭṭif.
JOH 1:6 Tuɣa [din] ijj n bnadem issekk i-t-i-dd AREBBI, qqaren as Yuḥanna.
JOH 1:7 Netta yusa-dd am ccahed ḥima ad iched i Tfawt, ḥima ad zzayes amnen marra.
JOH 1:8 Netta war iǧi ca d Tafawt, maca [tuɣa-t] ḥima ad iched i Tfawt.
JOH 1:9 Maɣar [Tafawt] nni, tuɣa d Tafawt n tidett i itticen tafawt i kuř bnadem i dd-ittasen ɣar ddunect.
JOH 1:10 Netta tuɣa-t di ddunect u zzayes tᵉttwagg ddunect, [maca] ddunect war t tessin ca.
JOH 1:11 Yusa-dd ɣar wi iǧan nnes, [maca] wi iǧan nnes war t qbiřen.
JOH 1:12 Maca marra inni t iqebřen, iwca asen ṣṣulṭa, ḥima ad dewřen d tarwa n AREBBI, i yinni ittamnen deg Yisem nnes,
JOH 1:13 inni war dd-ixřiqen uřa zeg idammen, uřa zi min ixs ddat [n bnadem], uřa zi min ixs weryaz, maca zi AREBBI dd-ittwaxeřqen.
JOH 1:14 Awař idweř d ddat, izdeɣ jar aneɣ, neccin neẓra aɛuǧi nnes, aɛuǧi n Uyenni [n Mmis] zi ɣar Babas i iccuren s arḍa d tidett.
JOH 1:15 Iched xas Yuḥanna, iřaɣa, inna: “D Wa min xef nniɣ, aqa Netta ad dd-yas awarni ayi, waxxa Netta idweř zzati, minzi Netta tuɣa-t qbeř inu.”
JOH 1:16 Zi řekmařet nnes niwi-dd marra, arḍa x arḍa.
JOH 1:17 Ccariɛa temmewc x ufus n Musa, maca arḍa d tidett usin-dd zi Yasuɛ Lmasiḥ.
JOH 1:18 Uřa d ijj war iẓri AREBBI. Ayenni n AREBBI i iǧan deg weḥsin n Babas, d Netta i [zzayes] issxebbaren.
JOH 1:19 Ta d cchadet n Yuḥanna řami dd-ssekken Wudayen ikehhanen d Ilawiyyen zi Urcalim ḥima ad t sseqsan: “Min teɛnid cek?”
JOH 1:20 Tuɣa iched, war issnuffar ca, iched: “Necc war ǧiɣ ca d Lmasiḥ.”
JOH 1:21 Sseqsan t: “I min teɛnid cek xenni? Ma d cek d [anabi] Iliya?” Inna: “Lla, war ǧiɣ d necc!” “Ma d cek d anabi?” Yarra-dd: “Lla!”
JOH 1:22 [Xas uca] nnan as: “Min teɛnid cek? Ittxeṣṣa aneɣ ad narr i yinni d aneɣ dd-issekken. Min teqqared x yixef nnec?”
JOH 1:23 Inna: “Necc d tmijja i ittřaɣan di řexřa: ‘Seggmem abrid n SIDI nican!’, am mammec inna unabi Icaɛya.”
JOH 1:24 Inni dd-ittwassekken, tuɣa aten zeg Ifarisiyyen.
JOH 1:25 Nitni sseqsan t, nnan as: “Mařa war teǧid ca d Lmasiḥ uřa d Iliya uřa d anabi, i xenni mayemmi tᵉsseɣḍaṣed?”
JOH 1:26 Yuḥanna yarra-dd, inna asen: “Necc sseɣḍaṣeɣ deg waman, maca aqa din di řwesṭ nwem wenni war tessinem ca.
JOH 1:27 Netta d wenni i dd ɣa yasen awarni ayi, Netta iǧa qbeř inu, necc war sdiheǧeɣ ad as fesyeɣ ifiřan n sandaliyat nnes.”
JOH 1:28 Man aya imsar di Baytɛanya x ujemmaḍ n L’Urdun, mani tuɣa Yuḥanna isseɣḍaṣ.
JOH 1:29 Tiwecca nnes iẓra Yuḥanna Yasuɛ iggur-dd ɣares, inna: “Xzarem, aqa-t d Izmar n AREBBI i ittekksen ddnub x ddunect!
JOH 1:30 D Wa min xef nniɣ: ‘Ad dd-yas awarni ayi ijj n Weryaz nni iǧan zzati, minzi Netta tuɣa-t qbeř inu.’
JOH 1:31 Necc war t ssineɣ ca, maca ḥima ad ittwassargeb ɣar Israil, x uyenni usiɣ-dd ḥima ad ssɣeḍṣeɣ deg waman.”
JOH 1:32 Yuḥanna iched, inna: “Ẓriɣ Arruḥ ihwa-dd am yict n tedbirt zeg ujenna, tarsa xas.
JOH 1:33 Necc war t ssineɣ ca, maca wenni d ayi dd-issekken ḥima ad ssɣeḍṣeɣ deg waman, Netta inna ayi: ‘Wenni teẓrid ihwa-dd xas Arruḥ uca yarsa xas, d Wa d wenni isseɣḍaṣen di Arruḥ Iqeddsen.’
JOH 1:34 U Necc ẓriɣ, cehdeɣ belli Wanita d Mmis n AREBBI.”
JOH 1:35 Tiwecca nnes tuɣa Yuḥanna ibedd ak-d tnayen n imeḥḍaren nnes.
JOH 1:36 Am tuɣa ixezzar ɣar Yasuɛ i [din] igguren, inna: “Xzarem, [d Wa d] Izmar n AREBBI!”
JOH 1:37 Tnayen n imeḥḍaren nnes sřin as am tt iqqar uca ḍfaren Yasuɛ.
JOH 1:38 Inneqřeb-dd Yasuɛ, iẓra i-ten ḍeffaren t-i-dd, isseqsa ten: “Min xef tarezzum?” Nitni nnan as: “[A] Amseřmad nneɣ, mani tzeddɣed?”
JOH 1:39 Inna asen: “Araḥem-dd, ad tẓarem!” Ruḥen akides, ẓrin mani izdeɣ, qqimen akides ass nni. Tasaɛɛet tuɣa-tt ɛřaḥař d ɛecra, [ixs ad yini ɛřaḥař tasaɛɛet wiss arebɛa n tmeddit].
JOH 1:40 Andrawus, umas n Cimɛun, tuɣa-t d ijjen zeg yinni isřin aya zi Yuḥanna uca ḍeffaren Yasuɛ.
JOH 1:41 D wa i iẓrin amezwaru umas Cimɛun, inna as: “Aqa nufa Lmasiḥ!”
JOH 1:42 Issiweḍ i-t-i-dd ɣar Yasuɛ. Ixzar dayes Yasuɛ, inna: “Cek d Cimɛun, mmis n Yuna, ad ac řaɣan: ‘Kifa’, [ixs ad yini ‘aẓru’] ”
JOH 1:43 Tiwecca nnes tuɣa ixs Yasuɛ ad iraḥ ɣar Ljalil. Immeřqa ak-d Filippus, inna as: “Ḍfar ayi-dd!”
JOH 1:44 Filippus s yixef nnes tuɣa zi Bayt-Ṣayda zi tandint n Andrawus d Cimɛun.
JOH 1:45 Filippus yufa Natanayil, inna as: “Nufa wenni xef yura Musa di Ccariɛa uřa d Inabiyyen, aqa-t d Yasuɛ, mmis n Yusuf zi Nnaṣira.”
JOH 1:46 Natanayil inna as: “Ma ad taɣ izemmar ad dd-teffeɣ zi Nnaṣira ca n tcuni?” Filippus inna as: “Araḥ-dd, texzared!”
JOH 1:47 Yasuɛ iẓra Natanayil iggur-dd ɣares, inna xas: “Xzar, wa d ijj n mmis d tidett n Israil nni war dayes bu řɣecc!”
JOH 1:48 Natanayil inna as: “Manis d ayi tessned?” Yasuɛ inna as: “Ẓriɣ cek swadday i wartu qbeř ma ad ac dd-iřaɣa Filippus.”
JOH 1:49 Natanayil yarra-dd xas: “[A] Amseřmad inu, Cek d Mmis n AREBBI, Cek d Ajeǧid n Israil.”
JOH 1:50 Yasuɛ inna as: “Ma tumned s minzi d ac nniɣ: ‘Aqa ẓriɣ cek swadday i wartu’? Ad tẓared min iǧan ktar zi man aya.”
JOH 1:51 Inna as: “S tidett, s tidett, Necc ad awem iniɣ, zi ssa d tsawent ad tẓarem ajenna innurzem u lmalakat n AREBBI ttařyent hekkwant ɣar Mmis n bnadem!”
JOH 2:1 Deg wass wiss třata temsar ict n tmeɣra di Qana, ict n tendint di Ljalil. Tuɣa din yemmas n Yasuɛ.
JOH 2:2 Uřa d Yasuɛ d imeḥḍaren nnes ttwaɛarḍen-dd ɣar tmeɣra.
JOH 2:3 Řami iqḍa binu, tenna as yemmas i Yasuɛ: “War ɣarsen bu binu!”
JOH 2:4 Yasuɛ inna as: “Min din jar ayi akidem, [a] tamɣart? Tasaɛɛet inu war dd-tiwiḍ ɛad!”
JOH 2:5 Yemmas tenna i imsexxaren: “Min d awem i ɣa yini, ggem t.”
JOH 2:6 Tuɣa din setta n iqeddwaḥ n weẓru daysen aman, mmarsen dinni am mammec nnumen tteggen Wudayen řuḍu, kuř ijjen [zzaysen] ɣares řqedd n tnayen ař třata n ‘iribaɛen’.
JOH 2:7 Yasuɛ inna asen: “Ccurem iqeddwaḥ s waman!” Uca ccuren ten s waman ař aqemmum.
JOH 2:8 [Xas uca] inna asen: “Řexxu ssfarrɣem [cwayt] zzaysen, wcem t i bab n wurar.” Uca ssiwḍen t.
JOH 2:9 Umi bab n wurar iqeǧeb aman i idewřen d binu - [maca] netta war issin manis dd-ikka, maca imsexxaren nni d as dd-yuymen aman, ssnen - iřaɣa-dd bab n tmeɣra x wesři.
JOH 2:10 Inna as: “Kuř bnadem ittqeddam binu aṣebḥan d amezwaru. Mařa inewjiwen swin aṭṭas, ad asen iwc binu war iḥřin, maca cek txemmřed binu iṣebḥen ař i řexxu.”
JOH 2:11 D ta d řeɛřamet tamezwarut i igga Yasuɛ, di Qana di Ljalil. Isseḍhar-dd aɛuǧi nnes uca umnen zzayes imeḥḍaren nnes.
JOH 2:12 Awarni man aya ihwa-dd ɣar Kafarnaḥum, Netta d yemmas, d aytmas, d imeḥḍaren nnes, uca qqimen din ca n wussan.
JOH 2:13 Řami dd-yiweḍ [Řɛid n Tɣarṣt n] Useɛdu, Řɛid n Wudayen, igeɛɛed Yasuɛ ɣar Urcalim.
JOH 2:14 Yufa di Zzawect Tameqqrant inni din izznuzan iyenduzen d wuǧi d idbiren, uřa d iṣarrafen n tenɛacin i din iqqimen.
JOH 2:15 Igga ijj n urekkuḍ zeg iseɣwan i Yixef nnes, uca yuẓẓeř xasen marra zi Zzawect Tameqqrant, uřa d uǧi d iyenduzen d iṣarrafen, uca izeǧeɛ iṣuldiyyen nsen di temmurt, inneqřeb ṭṭwabeř nsen.
JOH 2:16 Inna i yinni izznuzan idbiren: “Kksem man aya ssa! War ttarrim ca Taddart n Baba d taddart n ssuq!”
JOH 2:17 [Xenni] ɛeqřen imeḥḍaren nnes belli tura: “Cḍaret i Taddart nnec icca ayi.”
JOH 2:18 [Maca] Udayen arrin-dd, nnan as: “Man řeɛřamet i d aneɣ ɣa temřed, belli [aqa ɣarek řḥeqq ḥima] ad tegged man aya?”
JOH 2:19 Yasuɛ yarra-dd, inna asen: “Hedmem Zzawect Tameqqrant tanita uca di třata n wussan ad tt ssbeddeɣ.”
JOH 2:20 Nnan as Wudayen: “Zzawect Tameqqrant tanita tebna di setta u-rebɛin n iseggʷusa, ma Cek texsed ad tt-i-dd-tessbedded di třata n wussan?”
JOH 2:21 Maca Netta tuɣa issawař x Zzawect Tameqqrant n Arrimet nnes.
JOH 2:22 Awarni řami dd-ikkar Yasuɛ zi taddart n imettinen, ɛeqřen imeḥḍaren nnes min d asen inna, uca umnen di Tira [Iqeddsen] u deg wawař i inna Yasuɛ.
JOH 2:23 Umi Yasuɛ tuɣa di Urcalim, di Řɛid n [Tɣarṣt n] Useɛdu, umnen waṭṭas dayes řami ẓrin řeɛřamat i igga.
JOH 2:24 Maca Yasuɛ war isscen ca Ixef nnes ɣarsen, minzi Netta issen marra iwdan,
JOH 2:25 war iḥdij ca ad as iched ḥed x bnadem, minzi Netta s Yixef nnes issen min iǧan di bnadem.
JOH 3:1 Tuɣa din ijj n bnadem zeg Ifarisiyyen qqaren as Nikudimus, netta d ijj n umeqqran n Wudayen.
JOH 3:2 Yusa-dd ɣar Yasuɛ s ǧiřet, inna as: “[A] Amseřmad inu, neccin nessen belli Cek d Amseɣɣar i dd-yusin zi ɣar AREBBI, minzi war izemmar uřa d ijj ad igg řeɛřamat-a i teggid Cek, mɣir mařa akides AREBBI.”
JOH 3:3 Yarra-dd Yasuɛ, inna as: “S tidett, s tidett, Necc ad ac iniɣ, uřa d ijj war izemmar ad iẓar Tageldit n AREBBI mɣir mařa ittwaxřeq-dd zi jdid.”
JOH 3:4 Nikudimus inna as: “Mammec izemmar ijj n uwessar ad dd-ittwaxřeq [́́ɛad]? War izemmar ad yadef ɛawed deg uɛeddis n yemmas, maḥend ad dd-ittwaxřeq i twařa wiss tnayen?”
JOH 3:5 Yasuɛ yarra-dd, inna as: “S tidett, s tidett, Necc ad ac iniɣ: Mařa ca n yijjen war dd-ixřiq ca zeg waman u zeg Arruḥ, war izemmar ad yadef ɣar Tgeldit n AREBBI.
JOH 3:6 Min dd-ittwaxeřqen zi ddat, netta d ddat, u min dd-ittwaxeřqen zi Arruḥ, netta d Arruḥ.
JOH 3:7 War tbehtem ca mařa nniɣ ac, ittxeṣṣa kenniw ad dd-tᵉttwaxeřqem zi jdid.
JOH 3:8 Asemmiḍ ittsuḍ manis ixs, tᵉttesřid i usuḍi nnes, war tessined ca manis dd-ittas uřa mani ittraḥ. Ammu i iǧa ɛawed marra wenni dd-ittwaxeřqen zi Arruḥ.”
JOH 3:9 Nikudimus yarra-dd, inna as: “Mammec i ɣa yegg ad yiři man aya?”
JOH 3:10 Yasuɛ yarra-dd, inna as: “Ma Cek d amseɣɣar n Israil u war tessined ca man aya?
JOH 3:11 S tidett, s tidett, Necc ad ac iniɣ: Neccin nessawař x min nessen, neched x min neẓra, waxxa amenni kenniw war teqbiřem ca cchadet Nneɣ.
JOH 3:12 Mařa ssiwřeɣ awem x min iǧan x temmurt, kenniw war timnem, mammec ɣa teggem ad tamnem mařa ssiwřeɣ awem x min iǧan deg ujenna?
JOH 3:13 Uřa d ijj war yuři ɣar ujenna mɣir wenni dd-ihwan zeg ujenna, aqa-t d Mmis n bnadem, d Wenni iǧan deg ujenna.
JOH 3:14 Am mammec issgeɛɛed Musa afiɣar di řefyafi, ammu ittxeṣṣa ad ittwassgeɛɛed Mmis n bnadem [ɛawed],
JOH 3:15 ḥima marra wenni zzayes i ɣa yamnen, war itthellik ca, maca ad ɣares tiři Tudart ittduman.
JOH 3:16 Ammu i yexs AREBBI ddunect ař mani iwca ayenni n Mmis, ḥima kuř ijjen wenni zzayes i ɣa yamnen, war ihellik ca, maca ad ɣares tiři Tudart ittduman.
JOH 3:17 Minzi AREBBI war dd-issekk ca Mmis ɣar ddunect, ḥima ad iḥaseb ddunect, maca issekk i-t-i-dd ḥima ad zzayes teddar ddunect.
JOH 3:18 Wenni zzayes i ɣa yamnen, war ittwaḥasab ca. Wenni war ittimnen ca, aqa ittwaḥaseb zi řexxu, minzi netta war yumin ca deg Yisem n uyenni n Mmis n AREBBI.
JOH 3:19 D wa d řeḥkam, aqa Tafawt tusa-dd ɣar ddunect, [maca] iwdan xsen taǧest x Tfawt, minzi timegga nsen tuɣa atent d tiɛeffanin.
JOH 3:20 Marra wenni itteggen tuɛeffna, icarreh Tafawt, war dd-ittis ca ɣar Tfawt, ḥima war ttwawebbxent ca timegga nnes.
JOH 3:21 Maca wenni itteggen tidett ad dd-yas ɣar Tfawt, ḥima ad banent timegga nnes, aqa ttwaggent di AREBBI.”
JOH 3:22 Awarni man aya yusa-dd Yasuɛ d imeḥḍaren nnes ɣar temmurt n Yahudiyya, isseɛdu din ca n řweqt akidsen uca tuɣa isseɣḍaṣ.
JOH 3:23 Uřa d Yuḥanna tuɣa isseɣḍaṣ di Ɛaynun i dd-yusin ṭṭarf i Salim, minzi dinni aman aṭṭas. Usin-dd [iwdan] dinni uca ttwassɣeḍṣen,
JOH 3:24 minzi Yuḥanna tuɣa ɛad war immenḍar ca di řeḥbes.
JOH 3:25 Imsar ijj n umḥarweḍ jar ijjen zeg imeḥḍaren n Yuḥanna d ijj n Wuday x mammec ɣa yiři řuḍu.
JOH 3:26 Nitni usin-dd ɣar Yuḥanna, nnan as: “[A] Amseřmad nneɣ, xzar, wenni akidek iǧan x ujemmaḍ n L’Urdun, wenni min xef tcehded, aqa uřa d Netta isseɣḍaṣ u marra ttasen-dd ɣares.”
JOH 3:27 Yarra-dd Yuḥanna, inna asen: “Bnadem war izemmar ad iqbeř uřa d ict n tmesřact mařa war d as temmewc zeg ujenna.
JOH 3:28 Kenniw simant nwem tcehhdem belli necc nniɣ: ‘Necc war ǧiɣ ca d Lmasiḥ!’, maca aqa necc ttwassekkeɣ-dd zzates.
JOH 3:29 Wenni ɣar teǧa tesřit, netta d asři. Ameddukkeř n wesři wenni ittbeddan [zzates], ittesřa ɣares, ifarreḥ s řefraḥet tameqqrant s tmijja n wesři. S uyenni, xzar, aqa tᵉttwakemmeř řefraḥet inu tanita.
JOH 3:30 Ittxeṣṣa ad igma Netta u necc ad neqṣeɣ.
JOH 3:31 Maɣar wenni dd-yusin zi sennej, Netta sennej i marra. Wenni iǧan zi temmurt, zi temmurt issawař. Wenni dd-yusin zeg ujenna, Netta sennej i marra,
JOH 3:32 u Netta icehhed zi min iẓra d zi min isřa, [maca] cchadet nnes war tt iqebbiř uřa d ijjen.
JOH 3:33 Wenni iqebbřen cchadet nnes d wenni issarsen ṭṭabeɛ nnes n ucemmiɛ belli aqa AREBBI d tidett.
JOH 3:34 Minzi wenni dd-issekk AREBBI, issawař s wawařen n AREBBI, minzi AREBBI war ittic ca Arruḥ s řmizan.
JOH 3:35 Babas ittexs Mmis uca igga as kuřci deg ifassen nnes.
JOH 3:36 Wenni ittamnen di Mmis ɣares Tudart ittduman, maca wenni war iṭṭiɛ ca Mmis, war iẓarr Tudart, [maɣar] aɣḍab n AREBBI ad xas iqqim.”
JOH 4:1 [Umi] issen Yasuɛ, aqa Ifarisiyyen sřin belli Netta ittegg u issɣeṭṭaṣ imeḥḍaren ktar zi Yuḥanna
JOH 4:2 - waxxa Yasuɛ simant nnes war isseɣḍiṣ ca, maca imeḥḍaren nnes -
JOH 4:3 iffeɣ-dd zi Yahudiyya, iruḥ ɛawed ɣar Ljalil.
JOH 4:4 Maca tuɣa ittxeṣṣa ad icuq di Samarya.
JOH 4:5 Netta yusa-dd ɣar ict n tendint n Isamariyyen, qqaren as Suxar, tenni ɣar ṭṭarf n iyyar i iwca Yaɛqub i mmis Yusuf.
JOH 4:6 Tuɣa din anu n Yaɛqub. Yuḥeř Yasuɛ zeg ibriden uca iruḥ iqqim amenni ɣar wanu, tuɣa tasaɛɛet d setta, [ixs ad yini azyen n wass].
JOH 4:7 Tusa-dd ict n temɣart zi Samarya ḥima ad tagem aman. Yasuɛ inna as: “Ewc ayi aman, ad sweɣ!”,
JOH 4:8 minzi imeḥḍaren nnes tuɣa ruḥen ɣar tendint maḥend ad sɣen macca i yixef nsen.
JOH 4:9 Tamɣart n Samarya tenna as: “Mammec teggid tᵉttared zzayi ad teswed, aqa Cek d Uday u necc d tamɣart zi Samarya?” Minzi Udayen war nnumen ttemṣurufen ak-d imezdaɣ n Samarya.
JOH 4:10 Yasuɛ yarra-dd, inna as: “Maɛlik tessned timewca n AREBBI d wenni d am iqqaren: ‘Ewc ayi ad sweɣ!’, iři cem tᵉttar tt zzayes, uca Netta ad yiři iwc am Aman Iddaren.”
JOH 4:11 Tenna as temɣart: “[A] Sidi, war ɣarek i zi ɣa tagmed uca anu yuǧeɣ, manis i d ɣa tawyed Aman Iddaren?
JOH 4:12 Ma Cek d ameqqran zi jedditneɣ Yaɛqub wenni d aneɣ iwcin anu wanita, iswa zzayes, netta d tarwa nnes d řebhayem nnes?”
JOH 4:13 Yasuɛ yarra-dd, inna as: “Marra wenni i ɣa iswen zeg waman-a, ad ifud ɛawed,
JOH 4:14 maca wenni i ɣa iswen zeg waman i d as ɣa wceɣ Necc, netta war ittfadi ɛemmarṣ. Minzi aman i d as ɣa wceɣ Necc, ad dayes dewřen d řɛunṣar n waman i dd itteffɣen ɣar Tudart ittduman.”
JOH 4:15 Tamɣart tenna as: “[A] Sidi, ewc ayi aman-a ḥima war ttfideɣ, war dd-ttiseɣ ɛad da, ḥima ad agmeɣ.”
JOH 4:16 Inna as Yasuɛ: “Ruḥ, řaɣa-dd i weryaz nnem uca dweř-dd danita.”
JOH 4:17 Nettat tenna as: “War ɣari bu weryaz!” Yasuɛ inna as: “Tessiwřed nican umi tennid: ‘War ɣari bu weryaz!’,
JOH 4:18 minzi tuɣa ɣarem xemsa n yeryazen d wenni ɣarem řexxu, war iǧi bu d aryaz nnem. Man aya i tennid d tidett.”
JOH 4:19 Tamɣart tenna as: “[A] Sidi, ttwařiɣ belli Cek d anabi.
JOH 4:20 Řejdud nneɣ sejden deg wedrar-a, maca kenniw teqqarem belli di Urcalim mani iǧa wemcan i di icuwwar ad nesjed.”
JOH 4:21 Yasuɛ inna as: “Ttiqq ayi, [a] tameṭṭut, aqa tasaɛɛet ad dd-tas i di war tɛebbdem Baba uřa deg wedrar-a uřa di Urcalim.
JOH 4:22 Kenniw tɛebbdem min war tessinem, [maca] neccin nɛebbed min nessen, minzi Tudart zeg Wudayen.
JOH 4:23 Maca ad dd-taweḍ tsaɛɛet, nettat aqa-tt řexxu, belli inni iɛebbden nican, ad ɛebden Baba di Arruḥ u di tidett, minzi Baba yarezzu inni t i ɣa iɛebden ammu.
JOH 4:24 AREBBI d Arruḥ u inni t iɛebbden, ittxeṣṣa asen ad ɛebden s Arruḥ d tidett.”
JOH 4:25 Tamɣart tenna as: “Necc ssneɣ belli ad dd-yas Lmasiḥ. Xmi dd ɣa yas Netta, ad aneɣ isseřmed kuřci.”
JOH 4:26 Yasuɛ inna as: “Aqa d NECC, wenni kim issawařen.”
JOH 4:27 Am tuɣa issawař, usin-dd imeḥḍaren nnes, ttɛejben řami t ufin issawař ak-d ict n temɣart. Waxxa amenni uřa d ijj war ini: “Min tarezzud?” niɣ: “Mayemmi akides tessawařed?”
JOH 4:28 [Xas uca] tejja temɣart aqedduḥ nnes s waman, tuyur ɣar tendint, tenna i iwdan:
JOH 4:29 “Araḥem-dd, ad tẓarem Aryaz i d ayi inna marra min ggiɣ. Ma [ad taɣ] Netta d Lmasiḥ?”
JOH 4:30 Iwdan ffɣen-dd zi tendint, usin-dd ɣares.
JOH 4:31 Jar u jar ttaren [zzayes] imeḥḍaren nnes, nnan: “[A] Amseřmad nneɣ, ecc!”
JOH 4:32 Maca Netta inna asen: “Necc aqa ɣari ijj n macca ḥima ad zzayes ittwacc, war tt tessinem ca kenniw.”
JOH 4:33 Imeḥḍaren mmseqsan jar asen: “Ma yiwyi as-dd ḥed ca n macca?”
JOH 4:34 Yasuɛ inna asen: “Macca inu aqa ad ggeɣ min ixs wenni d ayi dd-issekken u ad kemmřeɣ řxedmet nnes.
JOH 4:35 Ma war teqqarem: ‘Iqqim ɛad arebɛa n iyuren uca ad dd-tas ṣṣabet’?’ Xzarem, Necc ad awem iniɣ, sgeɛɛdem tiṭṭawin nwem, xzarem deg iyyaren, aqa warɣen, wejden i ṣṣabet.
JOH 4:36 Wenni imejjaren ad iksi řmunet nnes, iyru řɣiǧet i Tudart ittduman, ḥima ad farḥen jmiɛ wenni izarrɛen d wenni imejjaren.
JOH 4:37 Minzi di man aya aqa awař-a d tidett: ‘Ijjen ad izarɛ u wenneɣni ad imjar.’
JOH 4:38 Necc ssekkeɣ-dd kenniw ḥima ad temjarem min umi war texdimem kenniw. Inneɣni tuɣa xeddmen, kenniw tudfem ɣar řxedmet nsen.”
JOH 4:39 Aṭṭas n Isamariyyen zi tendint nni umnen zzayes x wawař n temɣart i tuɣa icehhden: “Netta inna ayi marra min ggiɣ.”
JOH 4:40 Řami ɣares dd-usin Isamariyyen nni, sseqsan t ḥima akidsen iqqim, uca iqqim akidsen tnayen n wussan dinni.
JOH 4:41 Uca aṭṭas umnen zzayes zi ssibbet n wawař nnes,
JOH 4:42 nnan i temɣart nni: “Neccin war nettimen ca ɛad zi min d aneɣ tennid, minzi neccin nesřa i-t s yixef nneɣ, nessen belli Wa s tidett d Lmasiḥ, wenni itticen Tudart i ddunect.”
JOH 4:43 Awarni tnayen n wussan iffeɣ-dd Yasuɛ ssenni, iruḥ ɣar Ljalil.
JOH 4:44 Minzi Yasuɛ simant nnes aqa iched belli anabi war ɣares bu ccan di temmurt nnes.
JOH 4:45 Umi dd-yusa ɣar Ljalil, areḥḥben t-i-dd Ijaliliyyen, minzi nitni ẓrin marra min igga di Řɛid di Urcalim, minzi uřa d nitni usin-dd ɣar Řɛid.
JOH 4:46 Yusa-dd Yasuɛ ɛawed ɣar [tendint n] Qana di Ljalil mani yarra aman d binu. Tuɣa din ijj n umsexxar n ujeǧid di Kafarnaḥum ɣares mmis ihřec.
JOH 4:47 Řami isřa belli Yasuɛ yusa-dd zi Yahudiyya ɣar Ljalil, iruḥ ɣares, isseqsa t ḥima ad dd-ihwa maḥend ad issgenfa mmis, wenni tuɣa igguren ad immet.
JOH 4:48 Yasuɛ inna as: “Kenniw war ttimnem ca mařa war teẓrim řeɛřamat d lmuɛjizat.”
JOH 4:49 Inna as uxeddam n ujeǧid: “[A] Sidi, hwa-dd qbeř i ɣa immet uḥenjir inu.”
JOH 4:50 Yasuɛ inna as: “Ruḥ aqa mmic iddar!” Aryaz nni ittiqq deg wawař i d as inna Yasuɛ uca iruḥ.
JOH 4:51 Řami dd-ihwa, mmeřqan akides imsexxaren nnes, xebbaren t, nnan as: “Aqa mmic iddar”.
JOH 4:52 Isseqsa ten x tsaɛɛet min di iggenfa. Nnan as: “Iḍennaḍ ɣar tsaɛɛet wiss sebɛa, [ixs ad yini ɣar tsaɛɛet tamezwarut n uziř,] tejja xas tmessi.”
JOH 4:53 Xenni issen babas belli aqa imsar ɣar tsaɛɛet i d as inna Yasuɛ: “Aqa mmic iddar!” Yumen netta d marra aytbab n taddart nnes.
JOH 4:54 Ta tuɣa ɛawed d řeɛřamet wiss tnayen i igga Yasuɛ zeg wami dd-iffeɣ zi Yahudiyya ɣar Ljalil.
JOH 5:1 Awarni man aya yiweḍ-dd Řɛid n Wudayen uca igeɛɛed Yasuɛ ɣar Urcalim.
JOH 5:2 [Ɣar Tewwart n Wuǧi] di Urcalim tuɣa din ict n tyeřmamt n useɣḍeṣ umi qqaren s Tɛibranit ‘Bayt-Xisda’, tuɣa ɣares xemsa n iseqqifen ak-d ikulwaren d ipilaren.
JOH 5:3 Daysen tuɣa iqqim ijj n řɣaci d ameqqran n imehřac d idarɣařen d iqejdaḥen d ineɛḍaben, ttrajan anhezzi n waman.
JOH 5:4 Minzi zi řweqt ɣar řweqt ihekkwa-dd ijj n lmalak ɣar tyeřmamt-a n useɣḍeṣ, issenhezza aman, u wenni i dd ɣa ihwan d amezwaru awarni anhezzi n waman, ad ittwassgenfa, mammec ma iǧa řehřac nnes.
JOH 5:5 Tuɣa din ijj n bnadem dayes řehřac i yijj n řmijař n tmenya u-třatin n iseggʷusa.
JOH 5:6 Iẓra Yasuɛ aryaz-a isenned dinni, issen belli tuɣa [iḥřec ammu] aṭṭas zeg wami. Inna as: “Ma texsed ad teggenfid?”
JOH 5:7 Yarra-dd xas umehřuc, inna: “Wah, [a] Sidi, maca war ɣari ijjen wenni d ayi ɣa yiwyen ɣar tuyeřmamt n useɣḍeṣ xmi ɣa ttwassenhezzen waman. Xmi ttraḥeɣ necc, ihekkwa-dd wenneɣni zzati.”
JOH 5:8 Yasuɛ inna as: “Kkar, teksid tassut nnec, tuyured!”
JOH 5:9 Deɣya iggenfa bnadem nni uca iksi tassut nnes, yuyur. Man aya tuɣa deg wass n ssebt.
JOH 5:10 Nnan Wudayen i wenni tuɣa ittwassgenfan: “Wa d ssebt, war ɣarek bu ttesriḥ maḥend ad teksid tassut nnec!”
JOH 5:11 Yarra-dd, inna asen: “Wenni d ayi issgenfan, inna: ‘Ksi tassut nnec, traḥed!’”
JOH 5:12 [Xenni] sseqsan t: “Min iɛna Bnadem-a i d ac innan: ‘Ksi tassut nnec, traḥed’?”
JOH 5:13 Wenni ittwassgenfan war issin min iɛna Yasuɛ, minzi innejra minzi aqa din aṭṭas n řɣaci deg wemcan nni.
JOH 5:14 Awarni man aya yufa i-t Yasuɛ di Zzawect Tameqqrant, inna as: “Xzar, aqa teggenfid, war ttegg bu ddnub ɛad, ḥima war d ac ittemsar min iǧan d aɛeffan zi min iǧan qbeř.”
JOH 5:15 Aryaz iruḥ, ixebbar Udayen belli d Yasuɛ i-t issgenfan.
JOH 5:16 S uyenni darrcen Wudayen x Yasuɛ, arezzun ad t nɣen, minzi igga man aya di ssebt.
JOH 5:17 Maca Yasuɛ yarra-dd, inna asen: “Aqa Baba ixeddem ař yiḍa u [xenni] Necc ɛawed aqa xeddmeɣ.”
JOH 5:18 Di ssibbet-a arezzun Wudayen ɛad ktar ḥima ad t nɣen, war iǧi waha minzi ixařef ssebt, maca uřa minzi Netta inna aqa AREBBI d Babas, issqudda Ixef nnes ak-d AREBBI.
JOH 5:19 Yarra-dd Yasuɛ, inna asen: “S tidett, s tidett, Necc ad awem iniɣ, Mmis war izemmar ad igg uřa d ict n tmesřact s Yixef nnes, mɣir mařa iẓra Babas ittegg i-tt. Min ma ittegg Babas uřa d Mmis ittegg amenni.
JOH 5:20 Babas ittexs Mmis, isscen as marra min ittegg, uca ad as isscen řexdayem timeqqranin x tina, ḥima ad tdehcem.
JOH 5:21 Am mammec d issnekkar Babas imettinen uca ittic tudart, amenni uřa d Mmis ittic tudart i wenni ixs.
JOH 5:22 Babas war ittḥasab uřa d ijj, maca iwca lḥisab marra i Mmis
JOH 5:23 ḥima ad weqqaren marra Mmis am ttweqqaren Babas. Wenni war ittweqqaren Mmis war ittweqqar ca uřa d Baba wenni i-t-i-dd-issekken.
JOH 5:24 S tidett, s tidett, Necc ad awem iniɣ: Wenni ittesřan i wawař inu uca yumen deg wenni d ayi dd-issekken, ɣares Tudart ittduman, war dd-ittis ca ɣar lḥisab, maca netta aqa immuṭṭi zi řmewt ɣar Tudart.
JOH 5:25 S tidett, s tidett, Necc ad awem iniɣ: Ad dd-tas tsaɛɛet, aqa-tt řexxu, i di imettinen ad sřen tmijja n Mmis n AREBBI u inni i [tt] ɣa isřen, ad ddaren.
JOH 5:26 Maɣar am mammec Babas ɣares Tudart di ṭṭbiɛet n Yixef nnes, ammu i iwca uřa i Mmis ḥima ad ɣares tiři Tudart di ṭṭbiɛet n Yixef nnes,
JOH 5:27 uca iwca as ṣṣulṭa ḥima ad iḥaseb, minzi Netta d Mmis n bnadem.
JOH 5:28 War ttɛejibem ca s man aya, aqa ad dd-tas tsaɛɛet i di marra inni iǧan deg imeḍřan ad sřen tmijja nnes,
JOH 5:29 uca ad dd-ffɣen [zeg imeḍřan]: inni iggin taṣebḥant ad kkaren ad raḥen ɣar tnukra i tudart, u inni iggin tuɛeffna ad kkaren, ad raḥen ɣar tnukra i lḥisab.
JOH 5:30 Necc war zemmareɣ ad ggeɣ ca zeg Ixef inu, maca am mammec ttesřiɣ, ad ḥasbeɣ u lḥisab inu d řḥeqq, minzi Necc war arezzuɣ min xseɣ, maca min ixs Wenni d ayi dd-issekken.
JOH 5:31 Meɛlik cehhdeɣ i ixef inu, iři aqa cchadet inu war teǧi ca nican.
JOH 5:32 Aqa din Ijjen nneɣni wi xafi icehhden, u Necc ssneɣ belli cchadet i xafi icehhed, aqa d tidett i teǧa.
JOH 5:33 Kenniw tessekkem-dd [ca n ireqqasen] ɣar Yuḥanna uca netta iched i tidett.
JOH 5:34 Maca Necc war qebbřeɣ ca cchadet n bnadem, maca Necc qqareɣ [marra] man aya ḥima ad teddarem.
JOH 5:35 Tuɣa Netta d řefnar yareqqen, ittlillicen, u kenniw texsem ad tfarḥem s tfawt nnes ɣar ict n tsaɛɛet.
JOH 5:36 Maca Necc ɣari ict n cchadet d tameqqrant x tenni n Yuḥanna, minzi řexdayem i d ayi iwca Baba, ḥima ad tent kemmřeɣ, řexdayem nni i tteggeɣ cehhdent simant nsent aqa d Baba d Netta i d ayi dd-issekken.
JOH 5:37 Baba, wenni d ayi-dd issekken, d Netta i xafi icehhden. Kenniw ɛemmarṣ war tesřim tmijja nnes uca war teẓrim ca udem nnes,
JOH 5:38 uca awař nnes war daywem ittɣimi ca řebda, minzi kenniw war tᵉttimnen ca deg wenni i-t-i-dd-issekken.
JOH 5:39 Arzum di Tira [Iqeddsen], minzi ittɣiř awem aqa daysent Tudart ittduman, u aqa atent d inni i xafi icehhden.
JOH 5:40 [Waxxa amenni] kenniw war tᵉttexsem ad ɣari dd-tasem ḥima ad ɣarwem tiři Tudart ittduman.
JOH 5:41 War qebbřeɣ ca aɛuǧi n iwdan,
JOH 5:42 maca ssneɣ kenniw, aqa kenniw war ɣarwem bu tayri n AREBBI deg ixef nwem.
JOH 5:43 Necc usiɣ-dd s Yisem n Baba, kenniw war d ayi tqebbřem ca. Mařa yusa-dd ca n yijjen s yisem nnes, ad t tqebřem.
JOH 5:44 Mammec tzemmarem ad tamnem, mařa kenniw tᵉttexsem aɛuǧi n wayawya, maca war tarezzum ca x uɛuǧi n uyenni n AREBBI d Ijjen?
JOH 5:45 Ma ittɣiř awem ad zzaywem cetciɣ ɣar Baba? Wenni zzaywem i ɣa icetcan d Musa x wenni tessrusam asitem nwem.
JOH 5:46 Minzi meɛlik tumnem zi Musa, iři tumnem dayi ɛawed, minzi netta yura xafi.
JOH 5:47 Mařa kenniw war tuminem ca deg Idlisen nnes, mammec ɣa teggem ad tamnem deg wawařen inu?”
JOH 6:1 Awarni man aya iruḥ Yasuɛ ɣar ujemmaḍ n řebḥar n Ljalil, wenni umi qqaren ɛawed [řebḥar n] Tibiriyas.
JOH 6:2 Iḍfar i-t-i-dd ijj n řɣaci d ameqqran, minzi ẓrin řeɛřamat i igga i imehřac.
JOH 6:3 Řexdenni igeɛɛed Yasuɛ ɣar wedrar uca iqqim dinni ak-d imeḥḍaren nnes.
JOH 6:4 Iqarreb-dd Řɛid n Tɣarṣt n Useɛdu n Wudayen.
JOH 6:5 Řexdenni issgeɛɛed Yasuɛ tiṭṭawin nnes uca, umi iẓra ijj n řɣaci d ameqqran yusa-dd ɣares, inna i Filippus: “Manis i ɣa nseɣ aɣrum, ḥima ad ccen ina?”
JOH 6:6 Inna ammu ḥima ad t ijarreb, minzi Netta issen min ɣa yegg.
JOH 6:7 Yarra-dd xas Filippus: “Aɣrum s mitayen dinar war ten ittqeddi, [ɛad] mařa kuř ijjen zzaysen ad iksi [mɣir] drus [waha].”
JOH 6:8 Ijjen zeg imeḥḍaren nnes, netta d Andrawus, umas n Cimɛun Buṭrus, inna as:
JOH 6:9 “Aqa da ijj n uḥenjir ɣares xemsa n tecnifin n imendi d tnayen n iseřman, maca man aya war ittqeddi i marra ina!”
JOH 6:10 Yasuɛ inna asen: “Sɣimem iwdan.” Tuɣa din aṭṭas n arbiɛ deg wemcan nni. S uyenni qqimen yeryazen, aqa aten di xemsa-ařaf idsen.
JOH 6:11 Yasuɛ iksi ticnifin, u awarni řami ibarek i tent, ibḍa i-tent x yinni [din] iqqimen. [Ibḍa Netta] amenni ɛawed iseřman, ɛlaḥsab anect ixsen [ad ccen].
JOH 6:12 Řami jjiwnen, inna i imeḥḍaren nnes: “Yrumem iřeqqwaz iceṭṭen, ḥima uřa d ict n řḥajjet war tᵉttḍeyyiɛ!”
JOH 6:13 Yrun ten uca ɛemmaren tenɛac n tsuǧatin s iřeqqwaz nni iceṭṭen ɣar yinni iccin zi xemsa n tecnifin n imendi.
JOH 6:14 Řami ẓrin iwdan řeɛřamet i igga Yasuɛ, nnan: “Wa d tidett d Anabi i igguren ad dd-yas ɣar ddunect.”
JOH 6:15 Umi issen Yasuɛ, belli ad dd-asen nitni, ad t ṭṭfen ḥima ad t ggen d ajeǧid, xenni innejra ɣar wedrar, ḥaca Netta weḥḥdes.
JOH 6:16 Řami dd-tewḍa tmeddit, hwan-dd imeḥḍaren nnes ɣar řebḥar,
JOH 6:17 u [awarni řami] nyin di tɣarrabut, qeḍɛen [řebḥar] ɣar Kafarnaḥum. Tqarreb-dd taǧest u Yasuɛ tuɣa ɛad war ɣarsen dd-yusi.
JOH 6:18 Řebḥar innehweř xasen, minzi asemmiḍ tuɣa ittsuḍ aṭṭas.
JOH 6:19 Ařami tuɣa qeddfen řqedd n ɛřaḥař xemsa u-ɛicrin ař třatin ‘istadiyyen’, [ɛřaḥař xemsa kilumitr], ẓrin Yasuɛ iggur x řebḥar, ittqarrab-dd ɣar tɣarrabut nsen, uca ggʷeden.
JOH 6:20 [Maca] Netta inna asen: “Aqa d NECC, war tteggʷedem ca.”
JOH 6:21 Nitni xsen ad t ssqebřen di tɣarrabut, uca xenni tiweḍ-dd tɣarrabut deɣya ɣar řbarr i ɣar iǧa ttraḥen.
JOH 6:22 Tiwecca nnes iẓra řɣaci nni ibedd x ujemmaḍ n řebḥar, belli war din tuɣi uřa d ict n tɣarrabut nneɣnit mɣir icten, tenni mani dayes udfen imeḥḍaren nnes, u Yasuɛ war yudif ca di tɣarrabut ak-d imeḥḍaren nnes.
JOH 6:23 [Maca] usint-i-dd iɣarruba nneɣni zi Tibiriyas zzat i wemcan mani ccin aɣrum nni ibarek Yasuɛ.
JOH 6:24 Řami iẓra řɣaci belli Yasuɛ war din iǧi [ɛad] uřa d imeḥḍaren nnes, nyin uřa d nitni deg iɣarruba-ya uca usin-dd ɣar Kafarnaḥum, arezzun x Yasuɛ.
JOH 6:25 Řami t ufin x ujemmaḍ n řebḥar, nnan as: “[A] Amseřmad nneɣ, meřmi dd-tusid da?”
JOH 6:26 Yasuɛ yarra-dd xasen, inna: “S tidett, s tidett, Necc ad awem iniɣ: Kenniw tarezzum xafi, war iǧi umi teẓrim řeɛřamat, maca umi teccim aɣrum uca tejjiwnem.
JOH 6:27 War ttxedmem i macca ixessaren, maca i macca ittɣiman i Tudart ittduman, tenni d awem i ɣa iwc Mmis n bnadem, minzi AREBBI, Babas, issars ṭṭabeɛ nnes xas.”
JOH 6:28 Nnan as: “Min ɣa negg, ḥima ad negg řexdayem n AREBBI?”
JOH 6:29 Yarra-dd Yasuɛ, inna asen: “Ta d řxedmet n AREBBI, aqa ad tamnem deg Wenni dd-issekk Netta.”
JOH 6:30 [Xas uca] nnan as: “Man řeɛřamet i ɣa tegged xenni ḥima ad [t] nẓar uca ad zzayek namen? Man [řxedmet] i ɣa tegged?
JOH 6:31 Řejdud nneɣ ccin ‘manna’ di řexřa am mammec tura: ‘Netta iwca asen-dd aɣrum zeg ujenna, ḥima ad t ccen’.”
JOH 6:32 Inna asen Yasuɛ: “S tidett, s tidett, Necc ad awem iniɣ: War iǧi d Musa i d awem iwcin aɣrum zeg ujenna, maca Baba ittic awem Aɣrum n tidett zeg ujenna.
JOH 6:33 Minzi Aɣrum n AREBBI d Netta wenni dd-ihwan zeg ujenna uca ittic Tudart i ddunect.”
JOH 6:34 Nnan as: “[A] Siditneɣ, ewc aneɣ-dd řebda aɣrum-a.”
JOH 6:35 Yasuɛ inna asen: “NECC d Aɣrum Iddaren. Wenni ɣari dd ɣa yasen, war ittřiẓ ɛemmarṣ, u wenni dayi i ɣa yamnen, war ittfidi [ɛad] ɛemmarṣ.
JOH 6:36 Maca Necc nniɣ awem, [waxxa] kenniw teẓrim ayi, war tuminem ca.
JOH 6:37 Kuř ijj i d ayi ɣa iwc Baba, ad ɣari dd-yas u wenni ɣari dd ɣa yasen, war t ssuffuɣeɣ ca ɣar barra.
JOH 6:38 Minzi Necc hwiɣ-dd zeg ujenna, war iǧi ca ḥima ad ggeɣ min xseɣ Necc, maca [ḥima ad ggeɣ] min ixs wenni d ayi dd-issekken.
JOH 6:39 D man aya min ixs Wenni d ayi dd-issekken, aqa Necc war ssweddareɣ uřa d ijjen zeg yinni d ayi iwca, maca ad t-i-dd-ssnekkareɣ deg wass aneggaru.
JOH 6:40 D man aya min ixs Baba wenni d ayi dd-issekken, aqa kuř ijj wenni i ɣa iẓaren Mmis uca ad dayes yamen, ad ɣares tiři Tudart ittduman, uca Necc ad t-i-dd-ssnekkareɣ deg wass aneggaru.”
JOH 6:41 Udayen cetcan zzayes, minzi inna: “Necc d Aɣrum i dd-ihwan zeg ujenna.”
JOH 6:42 Nnan: “Ma d wanita war iǧi bu d Yasuɛ, mmis n Yusuf? Neccin nessen babas d yemmas! Mammec i ɣa yini Weryaz-a: ‘Necc hwiɣ-dd zeg ujenna?’”
JOH 6:43 Yasuɛ yarra-dd xasen, inna: “War ttcetcam ca jar awem.
JOH 6:44 War izemmar uřa d ijj ad ɣari dd-yas, mɣir mařa ijebd i-t-i-dd Baba wenni d ayi dd-issekken uca Necc ad t-i-dd-ssnekkareɣ deg wass aneggaru.
JOH 6:45 Aqa tura deg [idlisen n] inabiyyen: ‘Nitni marra ad ttwassřemden zi AREBBI!’ S uyenni kuř ijj wenni d as isřin zi Baba u iřmed i-t zzayes, ad ɣari dd-yas.
JOH 6:46 Uřa d ijj war izemmar ad iẓar Baba, mɣir wenni iǧan zi AREBBI, d Netta i ittwařin Baba.
JOH 6:47 S tidett, s tidett, Necc ad awem iniɣ: Wenni dayi ittamnen, ad ɣares tiři Tudart ittduman.
JOH 6:48 NECC d Aɣrum Iddaren.
JOH 6:49 Řejdud nwem ccin ‘manna’ di řexřa uca mmuten,
JOH 6:50 [maca] man aya d Aɣrum i dd-ihwan zeg ujenna, ḥima bnadem ad zzayes yecc, war ittmetti ca:
JOH 6:51 NECC d Aɣrum Iddaren i dd-ihwan zeg ujenna. Mařa ijjen icca zeg Weɣrum-a, ad iddar i řebda. Aɣrum nni i ɣa wceɣ Necc, netta d Arrimet inu i ɣa wceɣ i Tudart n ddunect.”
JOH 6:52 Udayen mmenɣen jar asen, nnan: “Mammec i ɣa yegg Wanita ad aneɣ iwc Arrimet nnes ḥima ad [tt] necc?”
JOH 6:53 Inna asen Yasuɛ: “S tidett, s tidett, Necc ad awem iniɣ: Mařa war tᵉttᵉttem Arrimet n Mmis n bnadem u war tessesem Idammen nnes, war ɣarwem bu Tudart deg ixef nwem.
JOH 6:54 Wenni i ɣa iccen Arrimet inu uca ad isuw Idammen inu, ad ɣares tiři Tudart ittduman u Necc ad t-i-dd-ssnekkareɣ deg wass aneggaru.
JOH 6:55 Minzi Arrimet inu d macca d tidett uca Idammen inu d tissit d tidett.
JOH 6:56 Wenni i ɣa iccen Arrimet inu uca ad isu Idammen inu, ad dayi iqqim u Necc dayes.
JOH 6:57 Am mammec d ayi dd-issekk Baba iddaren uca Necc ddareɣ zi Baba, ammu ɛawed wenni zzayi i ɣa iccen, ad zzayi iddar.
JOH 6:58 Wa d Aɣrum i dd-ihwan zeg ujenna. War iǧi ca am mammec ccin řejdud nwem ‘manna’ uca mmuten, wenni i ɣa iccen Aɣrum-a, ad iddar i řebda.”
JOH 6:59 Inna man aya di temzida, am tuɣa isseřmad di Kafarnaḥum.
JOH 6:60 Aṭṭas n imeḥḍaren nnes, umi sřin man aya, nnan: “Awař-a iqseḥ. Wi izemmaren ad as iseř?”
JOH 6:61 Maca Yasuɛ issen deg Ixef nnes, aqa imeḥḍaren nnes cetcan x man aya, uca inna asen: “Ma ad tenqarḍem di man aya?
JOH 6:62 I mammec mařa teẓrim Mmis n bnadem ittgeɛɛad ɣar mani iřa iǧa qbeř?
JOH 6:63 Arruḥ d Netta isseddaren, arrimet war tneffeɛ i walu. Awařen i d awem nniɣ, aqa aten d Arruḥ d Tudart.
JOH 6:64 Maca aqa din ca jar awem inni war yuminen.” Minzi Yasuɛ issen zeg umezwaru man yen iǧan inni war yuminen u man wen t i ɣa iɣdaren.
JOH 6:65 Inna asen: “S uyenni nniɣ awem: War izemmar uřa d ijj ad ɣari dd-yas, mɣir mařa temmewc as zi Baba.”
JOH 6:66 Zi řweqt nni dewřen aṭṭas zeg imeḥḍaren nnes ɣar ḍeffar, war qqimen ca gguren akides.
JOH 6:67 Inna Yasuɛ i tenɛac: “Ma uřa d kenniw texsem ad tuyurem?”
JOH 6:68 Cimɛun Buṭrus yarra-dd xas, inna: “[A] Sidi, wi ɣar i ɣa nraḥ? Cek ɣarek awařen n Tudart ittduman,
JOH 6:69 u neccin numen u nessen aqa Cek d Lmasiḥ, Mmis n AREBBI Iddaren.”
JOH 6:70 Yasuɛ inna asen: “Ma war iǧi d Necc i kenniw dd-ixḍaren d tenɛac? Uca ijjen zzaywem d cciṭan.”
JOH 6:71 Inna man aya x Yahuda, mmis n Cimɛun Isxariyuṭi, minzi wanita tuɣa ixs ad t isellem. Netta d ijjen zi tenɛac.
JOH 7:1 Awarni man aya tuɣa Yasuɛ iggur di Ljalil, war ixs ad yuyur di Yahudiyya, minzi Udayen tuɣa arezzun ad t nɣen.
JOH 7:2 Iqarreb-dd Řɛid n Iɛuccuten n Wudayen.
JOH 7:3 Nnan as aytmas: “Ffeɣ ssanita, ruḥ ɣar [temmurt n] Yahudiyya ḥima uřa d imeḥḍaren nnec ad ẓaren řexdayem nni tᵉttegged.
JOH 7:4 Uřa d ijj war ittegg ca n tmesřact s tnuffra, mařa yarezzu ad isseḍhar ixef nnes s bṭayṭay. Mařa teggid timesřayin-a, scen Ixef nnec i ddunect.”
JOH 7:5 Minzi uřa d aytmas war dayes uminen ca.
JOH 7:6 Inna asen Yasuɛ: “Řweqt inu ɛad war dd-tiwiḍ, maca řweqt nwem aqa-tt řebda akidwem.
JOH 7:7 Ddunnit war tzemmar ad kenniw tcarh, maca nettat tcarh ayi, minzi Necc cehhdeɣ xas belli řexdayem nnes d tiɛeffanin.
JOH 7:8 Ruḥem kenniw ɣar Řɛid-a. Necc war ttriḥeɣ ca ɣar Řɛid-a, minzi řweqt inu ɛad war tkemmeř.”
JOH 7:9 Awarni řami inna ammu, iqqim di Ljalil.
JOH 7:10 Maca umi geɛɛden aytmas ɣar Řɛid, iruḥ uřa d Netta ɣar Řɛid, war iǧi s bṭayṭay, maca igga axmi innufar.
JOH 7:11 Udayen arezzun xas di Řɛid, nnan: “Mani iǧa Wanita?”
JOH 7:12 Aṭṭas zi řɣaci temtumen xas. Ca [zzaysen] nnan: “Netta d aṣebḥan” Maca inneɣni nnan: “Lla, maɣar issxarriq x řɣaci!”
JOH 7:13 Maca uřa d ijj war xas issiweř s bṭayṭay zi ssibbet n tiggʷudi zeg Wudayen.
JOH 7:14 Maca ařami iɛdu wezyen n Řɛid, igeɛɛed Yasuɛ ɣar Zzawect Tameqqrant, isseřmad [din].
JOH 7:15 Udayen dehcen, nnan: “Mammec igga Weryaz-a issen Idlisen am war iɣri ca?”
JOH 7:16 Yasuɛ yarra-dd, inna: “Taɣuri inu war teǧi ca inu, maca n Wenni d ayi dd-issekken.
JOH 7:17 Mařa ijjen ixs ad igg min ixs Netta, ad issen ma aqa taɣuri-ya zi AREBBI niɣ aqa ssawařeɣ ɛlaḥsab řxaḍar inu.
JOH 7:18 Wenni issawařen zeg uxarreṣ n řxaḍar n yixef nnes, yarezzu aɛuǧi nnes, maca Wenni yarezzun aɛuǧi n wenni t-i-dd issekken, aqa Netta d tidett, war dayes bu řɣecc.
JOH 7:19 Ma war iǧi d Musa i d awem iwcin Ccariɛa? Maca uřa d ijj zzaywem war ittegg Ccariɛa? I mayemmi [xenni] tarezzum ad ayi tenɣem?”
JOH 7:20 Řɣaci yarra-dd, nitni nnan: “Dayek ijj n cciṭan, wi yarezzun ad Cek nɣen?”
JOH 7:21 Yasuɛ yarra-dd, inna asen: “Ggiɣ ict n řxedmet uca kenniw tᵉttbehtem marra.
JOH 7:22 I uya Musa iwca awem-dd axtan, war iǧi minzi axtan zi Musa i yeǧa, maca [minzi axtan iǧa] zi řejdud nwem, u [xenni] txettnem i bnadem di ssebt.
JOH 7:23 Mařa iqbeř bnadem ad ittwaxten deg wass n ssebt, ḥima war tᵉttwareẓẓi Ccariɛa n Musa, mammec i xafi i ɣa tcetcam řami ssgenfiɣ bnadem ikmeř deg wass n ssebt?
JOH 7:24 War ḥekkmem x teqcurt [n bnadem], maca ḥekmem s yijj n řḥukm iseggden.”
JOH 7:25 Nnan iryazen zi Urcalim: “Ma war iǧi d Wa i yarezzun ad t nɣen?
JOH 7:26 Maca xzar, issawař s bṭayṭay, war d as qqaren walu. Ad taɣ aqa ssnen imɣaren [n řgens] nican belli s tidett Wanita d Lmasiḥ?
JOH 7:27 Maca nessen Wa, manis Netta, maca xmi dd ɣa yas Lmasiḥ, uřa d ijj war issin manis Netta.”
JOH 7:28 Řami tuɣa isseřmad di Zzawect Tameqqrant, issgeɛɛed Yasuɛ tmijja nnes s jjehd, inna: “Kenniw tessnem ayi u tessnem manis Necc. Necc war dd-usiɣ s řxaḍar n Yixef inu, maca Wenni d ayi dd-issekken aqa-t d tidett, kenniw war t tessinem ca.
JOH 7:29 Maca Necc ssneɣ t, minzi Necc zzayes u Netta d wenni d ayi-dd issekken.”
JOH 7:30 Xenni arezzun ad t ṭṭfen, maca uřa d ijj war xas issars afus, minzi tasaɛɛet nnes war dd-tiweḍ ɛad.
JOH 7:31 Aṭṭas zi řɣaci umnen zzayes, nnan: “Xmi dd ɣa yas Lmasiḥ, ma ad igg řeɛřamat ktar zi tina i igga Wa?”
JOH 7:32 Sřin Ifarisiyyen marra min xas itemten řɣaci. Uca nitni d imeqqranen n ikehhanen ssekken-dd iɛessasen ḥima ad t ṭṭfen.
JOH 7:33 Yasuɛ inna: “Necc ad kidwem qqimeɣ drus n řweqt ɛad, [xenni] ad raḥeɣ ɣar Wenni d ayi dd-issekken.
JOH 7:34 Ad xafi tarzum, war dayi tᵉttifem, u mani ɣa iřiɣ Necc, war tzemmarem ad dd-tadfem.”
JOH 7:35 Nnan Wudayen jar asen: “Mani ɣa iraḥ Netta ařami war nzemmar ad t naf. Ma xenni ixs ad iraḥ ɣar temmura n řegnus? Ma ixs ad isseřmed i lkuffar?
JOH 7:36 Min iɛna wawař-a i inna: ‘Ad xafi tarzum, war dayi tᵉttᵉṭṭifem!’, u ‘Mani ɣa iřiɣ Necc, war tzemmarem ad dd-tadfem’?”
JOH 7:37 Deg wass ameqqran, ass aneggaru n Řɛid, [ikkar] ibedd-dd Yasuɛ, iřaɣa, inna: “Mařa ifud ḥed, ejj i-t ad ɣari dd-yas, ad isu.
JOH 7:38 Wenni dayi i ɣa yamnen, am mammec nnant Tira [Iqeddsen]: Ad zzayes azzřen iɣezran n Waman Iddaren!”
JOH 7:39 Inna man aya x Arruḥ i ɣa qebřen inni dayes ittamnen. Minzi Arruḥ [Iqeddsen] war d asen immewc [ɛad], minzi Yasuɛ war ittwassɛuǧi ɛad.
JOH 7:40 Aṭṭas zi řɣaci, umi sřin awař-a, nnan: “D Wa d Anabi s tidett!”
JOH 7:41 Inneɣni nnan: “Wa d Lmasiḥ!”, maca ca nneɣni [zzaysen] nnan: “Ma ad dd-yas Lmasiḥ zi Ljalil?
JOH 7:42 Ma war qqarent Tira [Iqeddsen], aqa Lmasiḥ ad dd-yas zi zzariɛet n Dawud, zi Bayt-Laḥm, zi dcar n Dawud?”
JOH 7:43 Uca imsar umsebḍi n řɣaci di ssibbet nnes.
JOH 7:44 Ca zzaysen xsen ad t ṭṭfen, maca uřa d ijj war xas issars ifassen.
JOH 7:45 Xenni dewřen-dd iɛessasen nni ɣar imeqqranen n ikehhanen d Ifarisiyyen. Ikehhanen nnan asen: “Mayemmi war t-i-dd-tiwyem?”
JOH 7:46 Arrin-dd xasen iɛessasen: “Ɛemmarṣ war issiweř uřa d ijj n bnadem am mammec [issawař] Weryaz-a!”
JOH 7:47 Nnan asen Ifarisiyyen: “Ma uřa d kenniw ttwaxedɛem [zzayes]?
JOH 7:48 Ma xenni din ca n ijjen zeg imeqqranen [n řgens] niɣ zeg Ifarisiyyen yumen zzayes?
JOH 7:49 Maca řɣaci-ya i war issinen ca Ccariɛa, aqa ittwanɛeř.”
JOH 7:50 Nikudimus, wenni tuɣa d ijjen zzaysen u wenni dd-yusin ɣar Yasuɛ s ǧiřet, inna asen:
JOH 7:51 “Ma ad teḥkem Ccariɛa nneɣ x ijj n bnadem, břa ma ad zzayes sřen, ad ssnen min igga?”
JOH 7:52 Arrin-dd, nnan as: “Ma uřa d cek [ad taɣ] zi Ljalil? Arzu, xzar, uřa d ijj n unabi war dd-ittekk ca zi Ljalil.”
JOH 7:53 [Xas uca] iruḥ kuř ijjen ɣar taddart nnes. Maca Yasuɛ iruḥ ɣar wedrar n Zzitun.
JOH 8:1 ...
JOH 8:2 Di ṣṣbeḥ yusa-dd ɛawed ɣar Zzawect Tameqqrant, usin-dd ɣares iwdan marra. [Xenni] am iqqim, ibda isseřmad i-ten.
JOH 8:3 Imseřmaden n idlisen d Ifarisiyyen iwyen as-dd ict n temɣart, tᵉttwaṭṭef tᵉttegg zzina. Ssbedden tt di řwesṭ,
JOH 8:4 nnan as: “[A] Amseɣɣar, tamɣart-a tᵉttwaṭṭef s bṭayṭay, tᵉttegg zzina.
JOH 8:5 Iweṣṣa Musa di Ccariɛa ad narjem [timɣarin] am tanita. Min ɣa tinid Cek?”
JOH 8:6 Nnan as aya ḥima ad t jarrben, ḥima ad ɣarsen tiři minzi xas i ɣa cetcan. Maca Yasuɛ yuḍar swadday, yura [s uḍaḍ nnes] di temmurt.
JOH 8:7 Řami qqimen ammu t ttesseqsan, ibedd, inna asen: “Wi zzaywem iǧan břa ddnub, ad xas inḍar aẓru amezwaru.”
JOH 8:8 Xenni yuḍar ɛawed swadday uca yura di temmurt.
JOH 8:9 Řami sřin man aya, ffɣen ijjen awarni wenneɣni, imeqqranen d amezwaru. Tamɣart nni ibedden di řwesṭ jjin tt weḥḥdes.
JOH 8:10 Řexdenni Yasuɛ ikkar, inna i temɣart: “Mani ǧan nitni? Ma war cem iḥakem uřa d ijjen?”
JOH 8:11 Nettat tenna: “Uřa d ijj, [a] SIDI!” Yasuɛ inna as: “Uřa d Necc war cem ttḥakameɣ ca. Ruḥ, war ttɛawad ad tegged ddnub zi ssa tsawent!”
JOH 8:12 Issiweř Yasuɛ ɛawed akidsen, inna: “NECC d Tafawt n ddunect. Wenni d ayi ɣa iḍfaren, war iggur ɛemmarṣ di taǧest, maca ad yaf Tfawt n Tudart.”
JOH 8:13 Nnan as Ifarisiyyen: “Cek tcehhded x Yixef nnec, cchadet nnec war teǧi ca d tidett.”
JOH 8:14 Yasuɛ yarra-dd, inna asen: “Ɛad mařa Necc cehhdeɣ x Yixef inu, cchadet inu aqa d tidett, minzi Necc ssneɣ manis dd-usiɣ u mani ɣa raḥeɣ, maca kenniw war tessinem ca manis dd-usiɣ uřa mani ɣa raḥeɣ.
JOH 8:15 Kenniw tᵉttḥakamem ɛlaḥsab ddat, Necc war ttḥakameɣ uřa x ijjen.
JOH 8:16 U Necc, mařa ḥakmeɣ, ad yiři řeḥkam inu d tidett, minzi Necc war ǧiɣ bu weḥḥdi, maca Necc d Baba wenni d ayi dd-issekken.
JOH 8:17 Tura ɛawed di Ccariɛa nwem, belli cchadet n tnayen n iwdan d tidett.
JOH 8:18 NECC d wenni icehhden x Yixef inu, uca uřa d Baba wenni d ayi-dd issekken, iched xafi.”
JOH 8:19 Nitni nnan as: “Mani iǧa Babac?” Yasuɛ yarra-dd, inna asen: “Kenniw war d ayi tessinem ca u war tessinem Baba. Meɛlik kenniw d ayi tessnem, ad tiři tessnem uřa d Baba.”
JOH 8:20 Inna awařen-a di mani tuɣa řexzen n ṣṣedqet, am tuɣa isseřmad di Zzawect Tameqqrant. War t iṭṭif uřa d ijj, minzi tasaɛɛet nnes tuɣa ɛad war dd-tiwiḍ.
JOH 8:21 Yasuɛ inna asen ɛawed: “Necc ad raḥeɣ, kenniw ad xafi tarzum, ad temmtem di ddnub nwem. Mani ɣa raḥeɣ Necc, war tzemmarem kenniw ad dd-tasem.”
JOH 8:22 Udayen nnan: “Ma ad ineɣ Ixef nnes [řexxu], minzi Netta inna: ‘Mani ɣa raḥeɣ Necc, war tzemmarem kenniw ad dd-tasem’?”
JOH 8:23 Netta inna asen: “Kenniw zi swadday, Necc zi sennej, kenniw zi ddunect-a, maca Necc war ǧiɣ ca zi ddunect-a.
JOH 8:24 Necc nniɣ awem, ad temmtem di ddnub nwem, maɣar mařa war tuminem ca aqa d Necc, ad temmtem di ddnub nwem.”
JOH 8:25 Udayen nnan: “Min teɛnid Cek?” Yasuɛ inna asen: “Waxxa Necc bdiɣ ad kidwem ssiwřeɣ -
JOH 8:26 [uca] Necc ɣari aṭṭas n tmesřayin i xef zemmareɣ ad xawem ssiwřeɣ uca ad xawem ḥekmeɣ - [ittxeṣṣa ɛad ad tessnem,] aqa Wenni d ayi dd-issekken aqa-t d tidett, uca min zzayes sřiɣ, ad t iniɣ i ddunect.”
JOH 8:27 Nitni war fhimen ca, belli tuɣa issawař akidsen x Babas.
JOH 8:28 Yasuɛ inna asen ɛawed: “Xmi ɣa tessgeɛɛdem Mmis n bnadem, ad tfehmem belli aqa d Necc, u belli war tteggeɣ uřa d ict n řḥajjet zeg Ixef inu, maca ssawařeɣ am mammec d ayi isseřmed Baba.
JOH 8:29 Wenni d ayi dd-issekken aqa-t akidi. Baba war d ayi ijji ca weḥḥdi, minzi tteggeɣ řebda min t yarḍan.”
JOH 8:30 Umi tuɣa issawař x tmesřayin-a, umnen dayes aṭṭas.
JOH 8:31 Xenni inna Yasuɛ i Wudayen nni dayes yumnen: “Mařa teqqimem tᵉṭṭfem deg wawař inu, ad tiřim s tidett d imeḥḍaren inu,
JOH 8:32 uca ad tessnem tidett uca tidett ad kenniw tḥarr.”
JOH 8:33 Nnan as: “Neccin d zzariɛet n Ibrahim, ɛemmarṣ war neɛbid ḥed s tesmuɣi. Mammec tzemmared ad tinid: ‘Kenniw ad tᵉttwaḥarrem’?”
JOH 8:34 Yasuɛ yarra-dd xasen: “S tidett, s tidett, Necc ad awem iniɣ, marra wenni itteggen ddnub netta d amsexxar n ddnub.
JOH 8:35 Amsexxar war ittɣimi ca di taddart řebda, maca Mmis ad din iqqim i řebda.
JOH 8:36 Xmi kenniw i ɣa iḥarr Mmis, ad tiřim s tidett d iḥurriyyen.
JOH 8:37 Necc ssneɣ, aqa kenniw d tarwa n Ibrahim, maca kenniw tarezzum ad ayi tenɣem, minzi awař inu war tzemmarem ad t tfehmem.
JOH 8:38 Necc ssawařeɣ s min ẓriɣ zi Baba. Uřa d kenniw tᵉtteggem zi min teẓrim zi babatwem.”
JOH 8:39 Arrin-dd, nnan as: “Babatneɣ d Ibrahim.” Inna asen Yasuɛ: “Maɛlik kenniw teǧim d tarwa n Ibrahim, ad yiři aqa tᵉtteggem řexdayem n Ibrahim.
JOH 8:40 Maca řexxu tarezzum ad ayi tenɣem, Necc d ijj n Bnadem i tuɣa akidwem issawařen s tidett i sřiɣ zi AREBBI. Man aya war t iggi ca Ibrahim.
JOH 8:41 Kenniw tᵉtteggem řexdayem n babatwem.” Nitni nnan as: “Neccin war dd-nexřiq ca zi farq-ccɣeř, aqa ɣarneɣ Ijjen wenni d Babatneɣ, aqa-t d AREBBI.”
JOH 8:42 Inna asen Yasuɛ: “Maɛlik AREBBI d Babatwem, iři aqa texsem ayi, minzi Necc ffɣeɣ-dd zi AREBBI. Necc war dd-usiɣ ca zeg Ixef inu, maca Netta issekk ayi-dd.
JOH 8:43 Mayemmi war tefhimem i wawařen inu? Minzi kenniw war tzemmarem ad tesřem i wawař[en] inu!
JOH 8:44 Aqa kenniw [teffɣem] zi babatwem, ibřis, uca texsem ad teggem imeẓran n babatwem. Netta tuɣa ineqq iwdan zeg umezwaru u war ibedd di tidett, minzi war dayes bu tidett. Meřmi ma issawař s uxarriq, issawař s min dayes, minzi netta d bu-ixarriqen uřa d babas n uxarriq.
JOH 8:45 Maca umi Necc qqareɣ awem tidett, kenniw war dayi tᵉttimnem ca.
JOH 8:46 Wi zzaywem ad ayi isseqneɛ x ddnub? Umi qqareɣ tidett, mayemmi war dayi tᵉttimnem ca?
JOH 8:47 Wenni iǧan zi AREBBI, ittesřa i wawařen n AREBBI. Minzi kenniw war teǧim ca zi AREBBI, s uyenni kenniw war tᵉttesřim ca.”
JOH 8:48 Udayen arrin-dd, nnan as: “Ma war iǧi nican umi nenna, aqa Cek zi Samarya u dayek ijj n cciṭan?”
JOH 8:49 Yasuɛ yarra-dd, inna: “Necc war dayi uřa d ijj n cciṭan, maca Necc ttweqqareɣ Baba, uca kenniw tesseḥqaram ayi.
JOH 8:50 Necc war arezzuɣ ca aɛuǧi inu. Aqa din Ijjen i xas yarezzun d wenni i ɣa iḥekmen.
JOH 8:51 S tidett, s tidett, Necc ad awem iniɣ: Mařa ca n yijjen iṭṭef deg wawař inu, ɛemmarṣ war ittwiři řmewt i řebda.”
JOH 8:52 Nnan as Wudayen: “Řexxu nessen belli dayek ijj n cciṭan. Aqa Ibrahim d inabiyyen mmuten. Cek teqqared: ‘Mařa ca n yijjen iṭṭef deg wawař inu, ɛemmarṣ ad iqqas řmewt i řebda!’
JOH 8:53 Ma Cek temɣared x jedditneɣ Ibrahim wenni immuten, uřa x inabiyyen nni immuten? Min tḥesbed Ixef nnec?”
JOH 8:54 Inna asen Yasuɛ: “Mařa Necc ssɛuǧiɣ Ixef inu, aɛuǧi inu war iǧi d walu. Baba, aqa issɛuǧa ayi, Wenni xef teqqarem: ‘Netta d AREBBI nneɣ!’
JOH 8:55 Kenniw war t tessinem, maca Necc aqa ssneɣ t. Mařa nniɣ: ‘War t ssineɣ!’, ad iřiɣ Necc d bu-ixarriqen am kenniw. Maca Necc ssneɣ t u ttᵉṭṭfeɣ deg wawař nnes.
JOH 8:56 Jedditwem Ibrahim tuɣa ittraja s řefraḥet ḥima ad iẓar ass inu, uca iẓra i-t, ifarḥ.”
JOH 8:57 Nnan as Wudayen: “Ɛad war ɣarek bu xemsin n iseggʷusa, mammec teggid teẓrid Ibrahim?”
JOH 8:58 Inna asen Yasuɛ: “S tidett, s tidett, Necc ad awem iniɣ, qbeř ma tuɣa Ibrahim, tuɣa NECC ǧiɣ.”
JOH 8:59 [Xenni] ksin iẓra ḥima ad t arejmen. Maca Yasuɛ issnuffar Ixef nnes uca iffeɣ zi Zzawect Tameqqrant [am] icuq di řwesṭ nsen, uca [ammu i] iruḥ.
JOH 9:1 Umi xasen dd-ikka, iẓra ijj n weryaz tuɣa d adarɣař zeg wami dd-ixřeq.
JOH 9:2 Imeḥḍaren nnes sseqsan t, nnan: “[A] Amseřmad nneɣ, wi ixḍan, ma d wa niɣ lwalidin nnes, ařami dd-ixřeq d adarɣař?”
JOH 9:3 Yasuɛ inna asen: “Uřa d netta war ixḍi uřa d lwalidin nnes, maca [man aya aqa imsar], ḥima ad dayes ḍharent řexdayem n AREBBI.
JOH 9:4 Icuwwar ad xedmeɣ řexdayem n Wenni d ayi dd-issekken maḥend ɛad d aziř. Ad dd-tas taǧest mani war izemmar uřa d ijj ad ixdem.
JOH 9:5 Mintra Necc aqa ayi di ddunect, Necc d Tafawt n ddunect.”
JOH 9:6 Awarni řami inna ammu, issusef di temmurt, igga abeǧaɛ zeg ikuffan nni uca iḥennec zzayes tiṭṭawin n udarɣař s ubeǧaɛ.
JOH 9:7 [Xas uca] inna as: “Ruḥ, tessirded di tuyeřmamt n useɣḍeṣ n Siluwam!” Iruḥ, issird, idweř ittwařa.
JOH 9:8 Jjiran d yinni tuɣa t iẓrin qbeř ittettar, nnan: “Ma war iǧi d wa d wenni tuɣa ittɣiman ittettar?”
JOH 9:9 Ca zzaysen nnan: “Aqa d netta!” Nnan inneɣni: “Lla, maca ittawi-dd dayes!” Maca netta [s yixef nnes] inna: “Aqa d necc!”
JOH 9:10 Nnan as: “Mammec [temsar] ttwarezment tiṭṭawin nnec?”
JOH 9:11 Yarra-dd, inna asen: “Bnadem umi qqaren Yasuɛ, igga abeǧaɛ, iḥennec tiṭṭawin inu uca inna ayi: ‘Ruḥ ɣar tuyeřmamt n Siluwam, tessirded!’ Xenni ruḥeɣ, ssirdeɣ uca dewřeɣ ttwařiɣ.”
JOH 9:12 Nnan as: “Mani iǧa Netta?” Inna: “War ssineɣ.”
JOH 9:13 Awyen-dd wenni tuɣa iǧa qbeř d adarɣař, ɣar Ifarisiyyen.
JOH 9:14 Tuɣa d ssebt řami igga Yasuɛ abeǧaɛ u yarzem as tiṭṭawin nnes.
JOH 9:15 Sseqsan t Ifarisiyyen ɛawed: “Mammec tdewřed tᵉttwařid?” Yarra-dd xasen: “Igga abeǧaɛ x tiṭṭawin inu, xenni ssirdeɣ uca dewřeɣ ttwařiɣ.”
JOH 9:16 Ca zeg Ifarisiyyen nnan: “Bnadem-a war iǧi ca zi AREBBI, minzi Netta war ittweqqar ca ssebt.” Ca nneɣni nnan: “Mammec izemmar ijj n bnadem d aɛeffan ad igg řeɛřamat am tina?” Uca imsar ubeṭṭu jar asen.
JOH 9:17 Nnan ɛawed i udarɣař: “Min xas teqqared cek, ařami yarzem tiṭṭawin nnec?” Netta inna asen: “Aqa-t d anabi!”
JOH 9:18 Maca Udayen war zzayes uminen ca belli netta tuɣa d adarɣař uca idweř ittwařa, ařami d řaɣan x lwalidin n wenni idewřen ittwařa.
JOH 9:19 Sseqsan ten: “Ma wa d mmitwem min xef teqqarem aqa ittwaxřeq-dd d adarɣař? I mammec igga ittwařa řexxu?”
JOH 9:20 Arrin-dd lwalidin nnes, nnan: “Neccin nessen belli wa d mmitneɣ, aqa ittwaxřeq-dd d adarɣař,
JOH 9:21 maca mammec igga ittwařa řexxu, war nessin, u wi d as yarezmen tiṭṭawin nnes war t nessin ca [ɛawed]. Seqsam t simant nnes, netta aqa d abřiɣ, ad issiweř x yixef nnes.”
JOH 9:22 Nnan lwalidin nnes ammu minzi ggʷeden zeg Wudayen, minzi Udayen mɛahaden belli wenni i ɣa icehden aqa Netta d Lmasiḥ, ad t mmenḍaren zi temzida.
JOH 9:23 S uyenni nnan lwalidin nnes: “Netta aqa-t d abřiɣ, seqsam t simant nnes.”
JOH 9:24 [Xas uca] řaɣan-dd wiss martayen x weryaz wenni tuɣa d adarɣař, nnan as: “Sɛuǧa AREBBI! Aqa nessen belli Aryaz-a d ijj n umednub.”
JOH 9:25 Netta yarra-dd, inna asen: “Ma Netta d amednub war ssineɣ. Necc ssneɣ ict n tmesřact, aqa tuɣa ayi d adarɣař, řexxu ttwařiɣ!”
JOH 9:26 Nnan as ɛawed: “Min zzayek igga? Mammec d ac igga yarzem tiṭṭawin nnec?”
JOH 9:27 Inna asen: “Aqa nniɣ awem t, [maca] kenniw war tesřim. Mayemmi texsem ad t tesřem i twařa nneɣni? Ma texsem uřa d kenniw ad tdewřem d imeḥḍaren nnes?”
JOH 9:28 Kkwaren t, nnan: “Cek d ameḥḍar nnes! Maca neccin aqa d imeḥḍaren n Musa.
JOH 9:29 Neccin nessen aqa AREBBI issiweř ak-d Musa, maca Aryaz-a wanita war nessin ca manis Netta.”
JOH 9:30 Yarra-dd weryaz, inna asen: “Aqa di man aya řeɛjeb, kenniw war tessinem ca manis Netta, waxxa Netta yarzem ayi tiṭṭawin inu.
JOH 9:31 Neccin nessen, aqa AREBBI war ittesři ca ɣar imednab, maca mařa ca n ijjen ittweqqar i-t uca ittegg min ixs Netta, aqa Netta ad ɣares iseř.
JOH 9:32 Ɛemmarṣ war ittwasři qaɛ, aqa ca n ijjen yarzem tiṭṭawin n ijjen ixřeq-dd d adarɣař.
JOH 9:33 Meɛlik Wa war iǧi ca zi AREBBI, war izemmar ad igg man aya!”
JOH 9:34 Arrin-dd, nnan as: “Cek txeřqed-dd tkemmřed di ddnub, ma xenni texsed ad aneɣ tesseřmaded?” [Xenni] nḍaren t ɣar barra.
JOH 9:35 Isřa Yasuɛ belli nḍaren t ɣar barra, uca umi t yufa, inna as: “Ma tumned di Mmis n AREBBI?”
JOH 9:36 Yarra-dd, inna: “Min iɛna Netta, [a] Sidi, ḥima ad dayes amneɣ?”
JOH 9:37 Inna as Yasuɛ: “Aqa cek teẓrid t uřa d wenni akik issawařen aqa-t d Netta.”
JOH 9:38 Netta inna: “Umneɣ, a Sidi!”. Uca iɛebd as.
JOH 9:39 Yasuɛ inna: “I řḥukm i dd-usiɣ ɣar ddunect-a, ḥima ad ẓaren inni war ittwiřin, u [ḥima] inni ittwařan ad darɣřen.”
JOH 9:40 Sřin ca n Ifarisiyyen i kides iǧan man aya, nnan as: “Ma aqa d neccin ɛawed d idarɣařen?”
JOH 9:41 Inna asen Yasuɛ: “Maɛlik teǧam d idarɣařen war ɣarwem ittiři bu ddnub, maca řexxu teqqarem: ‘Aqa nettwařa!’ S uyenni ad iqqim ddnub nwem ibedd.”
JOH 10:1 “S tidett, s tidett, Necc ad awem iniɣ: Wenni war ittidfen zi tewwart ɣar řkuri n wuǧi, maca ad igeɛɛed manis nneɣni, aqa-t d aceffar d axewwan.
JOH 10:2 Maca wenni i ɣa yadfen zi tewwart, netta d ameksaw n tḥimart.
JOH 10:3 Aɛessas n tewwart ad as yarzem i wanita uca ad tseř tḥimart i tmijja nnes. Netta ad iřaɣa i wuǧi nnes s ismawen nsen uca ad ten issuffeɣ ɣar barra.
JOH 10:4 Awarni řami issuffeɣ marra taḥimart nnes, ad yuyur zzates, uca ad t-i-dd-ḍfaren wuǧi nnes, minzi ssnen tmijja nnes.
JOH 10:5 Maca abarrani war t tḍeffar tḥimart ɛemmarṣ, maca ad zzayes tarweř, minzi war tessin tmijja n ubarrani.”
JOH 10:6 Inna asen Yasuɛ amettiř-a, maca nitni war fhimen ca i tmesřayin min xef tuɣa akidsen issawař.
JOH 10:7 Yasuɛ inna asen ɛawed: “S tidett, s tidett, Necc ad awem iniɣ: Necc d Tawwart n tḥimart.
JOH 10:8 Marra inni dd-yusin [qbeř inu] aqa aten d iceffaren d ixewwanen. Maca taḥimart war d asen tesři ca.
JOH 10:9 NECC d Tawwart. Wenni zzayi i ɣa yadfen, ad iddar. Netta ad yadef, ad iffeɣ uca ad yaf mani ɣa yarwes.
JOH 10:10 Aceffar war dd-ittis mɣir ḥima ad yacar, ad ineɣ u ad isshellek. Necc [maca] usiɣ-dd ḥima ad ɣarsen tiři Tudart d ufeyyeḍ.
JOH 10:11 NECC d Ameksaw Aṣebḥan. Ameksaw Aṣebḥan issrusa tudart nnes i tḥimart nnes.
JOH 10:12 Maca amcaray, wenni war iǧi ca d ameksaw, war iǧi ca d bab n wuǧi, x minni i ɣa iẓar uccen yusa-dd, ad yejj taḥimart uca ad yarweř. Xenni ad dd-yas wuccen, ad ixḍef taḥimart uca ad tt izzuzar.
JOH 10:13 Amcaray yarweř, minzi netta d amcaray, war t icqi taḥimart.
JOH 10:14 NECC d Ameksaw Aṣebḥan. Ssneɣ uǧi inu uca uǧi inu ssnen ayi,
JOH 10:15 am mammec i d ayi issen Baba, ammu i ssneɣ Necc Baba. Necc ad wceɣ tudart inu i tḥimart.
JOH 10:16 Ɣari ɛad uǧi nneɣni, inni war iǧin ca zi řkuři-ya. Icuwwar ayi ad ten dd-ssmuneɣ ɛawed uca ad sřen i tmijja inu, uca ad dewřen marra d ict n tḥimart [sadu ufus n] ijj n Umeksaw.
JOH 10:17 S man aya ittexs ayi Baba, minzi Necc wciɣ tudart inu ḥima ad tt-i-dd-ksiɣ ɛawed.
JOH 10:18 Uřa d ijj war zzayi tt iksi, maca Necc wciɣ tt s řxaḍar inu. Ɣari ṣṣulṭa ḥima ad tt wceɣ u ɣari ṣṣulṭa ḥima ad tt-i-dd-ksiɣ ɛawed. Tawṣeyyet-a ṭṭfeɣ tt zi Baba.”
JOH 10:19 Xenni imsar ɛawed ubeṭṭu jar Wudayen s ssibbet n wawařen-a.
JOH 10:20 Aṭṭas zzaysen nnan: “Aqa dayes ijj n cciṭan, Netta d aṭemmes ameqqran. Mayemmi ɣares tᵉttesřam?”
JOH 10:21 Inneɣni nnan: “Awařen-a war ǧin ca n ijj n umaryaḥ. Ma izemmar ijj n cciṭan ad yarzem tiṭṭawin n idarɣařen?”
JOH 10:22 Yiweḍ-dd Řɛid n Udeccen [n Zzawect Tameqqrant] di Urcalim. Tuɣa d řmecta.
JOH 10:23 Yasuɛ iggur di Zzawect Tameqqrant deg useqqif ak-d ukulwar d ipilaren n Suliman.
JOH 10:24 Nnḍen as-dd Wudayen, nnan as: “Ař meřmi d aneɣ i ɣa tejjed nuyeř [ɛad]? Mařa Cek d Lmasiḥ, ini aneɣ t s bṭayṭay.”
JOH 10:25 Yarra-dd Yasuɛ, inna asen: “Nniɣ awem t uca kenniw war tuminem. Řexdayem i ggiɣ s Yisem n Baba, cehhdent xafi.
JOH 10:26 Maca kenniw war tuminem, minzi kenniw war teǧim ca d uǧi inu, am mammec tuɣa d awem nniɣ.
JOH 10:27 Uǧi inu isřa ɣar tmijja inu u Necc ssneɣ asen uca nitni ad ayi-dd ḍfaren.
JOH 10:28 Ad asen wceɣ Tudart ittduman uca war ttwahellken ɛemmarṣ qaɛ uca uřa d ijj war ten ixeṭṭef zeg ufus inu.
JOH 10:29 Baba wenni d ayi ten iwcin, aqa-t d ameqqran x kuřci. Uřa d ijj war izemmar ad [ten] ixḍef zeg ufus n Baba.
JOH 10:30 Necc d Baba d Ijjen.”
JOH 10:31 Xenni ksin Wudayen ɛawed iẓra ḥima ad t arejmen.
JOH 10:32 Yasuɛ inna asen: “Aqa ssecneɣ awem aṭṭas n řexdayem tiṣebḥanin zi Baba. I man řxedmet zzaysent [i texsem] ad ayi tarejmem?”
JOH 10:33 Nnan as Wudayen: “War Cek narejjem x ict n řxedmet taṣebḥant, maca umi tekfared u tarrid Ixef nnec d AREBBI, waxxa Cek d bnadem i teǧid.”
JOH 10:34 Inna asen Yasuɛ: “Ma war turi di Ccariɛa nwem: ‘Necc nniɣ, aqa kenniw d irebbiten’?
JOH 10:35 Mařa Netta isemma ten ‘irebbiten’, yinni umi dd-yusa wawař n AREBBI, uca war izemmar ad ttwarẓent Tira [Iqeddsen],
JOH 10:36 mammec teqqarem kenniw x wenni ittwaqeddsen zi Baba u [x wenni] issekk i-t-i-dd ɣar ddunect: ‘Aqa Cek tekfared!’, minzi Necc nniɣ: ‘Aqa Necc d Mmis n AREBBI’?
JOH 10:37 Mařa Necc war xeddmeɣ ca řexdayem n Baba, [xenni] war dayi ttimnem ca.
JOH 10:38 Maca mařa xedmeɣ tent, amnem xenni di řexdayem, waxxa kenniw ɛad war dayi tuminem, ḥima ad tessnem aqa Baba dayi u Necc aqa ayi di Baba.”
JOH 10:39 Arezzun ad t ṭṭfen ɛawed, [maca] ixtutteř asen jar ifassen nsen.
JOH 10:40 Iruḥ ɣar ujemmaḍ [n iɣzar] n L’Urdun, ɣar wemcan mani tuɣa issɣeṭṭaṣ Yuḥanna deg umezwaru, uca iqqim dinni.
JOH 10:41 Usin-dd ɣares waṭṭas [n iwdan], nnan: “Yuḥanna war iggi uřa d ict n řeɛřamet, maca marra min inna x Weryaz-a d tidett!”
JOH 10:42 Uca umnen dayes aṭṭas [diha].
JOH 11:1 Tuɣa din ijj n bnadem ihřec, [qqaren as] Aliɛazar, zi dcar n Bayt-Ɛanya. Netta tuɣa d umas n Maryam d Marta.
JOH 11:2 Maryam tanita nettat d tenni i tuɣa idehnen Yasuɛ s řefwaḥet n mirru u temseḥ iḍaren nnes s ucuwwaf nnes, u umas Aliɛazar tuɣa ihřec.
JOH 11:3 Ssekkent-i-dd tnayen n suyᵉtmas [ijjen] ɣar Yasuɛ, nnant: “[A] Siditneɣ, xzar, wenni texsed, aqa ihřec.”
JOH 11:4 Maca Yasuɛ inna: “Řehřac-a war iǧi ca i řmewt, maca i uɛuǧi n AREBBI, ḥima ad zzayes ittwassɛuǧ Mmis n AREBBI.”
JOH 11:5 Tuɣa Yasuɛ ittexs Marta d Maryam d Aliɛazar.
JOH 11:6 Ařami isřa aqa [Aliɛazar] ihřec, řexdenni iqqim ɛad tnayen n wussan deg wemcan mani t tuɣa.
JOH 11:7 Awarni man aya inna i imeḥḍaren nnes: “Ejj aneɣ ad nraḥ ɛawed ɣar [temmurt n] Yahudiyya!”
JOH 11:8 Imeḥḍaren nnan as: “[A] Amseřmad nneɣ, drus zeg wami tuɣa Udayen arezzun ad Cek arejmen, mammec Cek ad traḥed dinni ɛawed?”
JOH 11:9 Yarra-dd Yasuɛ: “Ma war din tenɛac n tsaɛɛetin deg uziř? Mařa ca n yijjen yuyur s uziř, war ittneqriḍ ca, minzi ittwařa tafawt n ddunect-a.
JOH 11:10 Maca mařa ca n yijjen ad yuyur s ǧiřet, ad inqareḍ, minzi war dayes bu tfawt.”
JOH 11:11 Awarni řami inna man aya, inna asen: “Aliɛazar, ameddukkeř nneɣ aqa iṭṭeṣ, maca ad raḥeɣ ḥima ad t-i-dd-ssnekkareɣ.”
JOH 11:12 Nnan as imeḥḍaren: “[A] Siditneɣ, mařa netta iṭṭeṣ, [xenni] ad iggenfa!”
JOH 11:13 [Maca] Yasuɛ uɣa issawař x řmewt nnes, maca ittɣiř asen belli Netta issawař x arraḥet n yiḍeṣ.
JOH 11:14 Xenni inna asen Yasuɛ s bṭayṭay: “Aqa Aliɛazar immut.
JOH 11:15 U Necc farḥeɣ awem umi Necc war din ǧiɣ, ḥima ad tamnem. Maca ittxeṣṣa kenniw ad traḥem dinni.”
JOH 11:16 Inna Tuma, wenni umi qqaren ‘Acniw’, i imeḥḍaren imɛacaren nnes: “Ejj aneɣ ad nraḥ uřa d neccin, ḥima ad nemmet akides.”
JOH 11:17 Řami dd-yiweḍ Yasuɛ ɣar Bayt-Ɛanya, yufa aqa ɛdun arebɛa n wussan zeg wami tuɣa-t deg wenḍeř.
JOH 11:18 Bayt-Ɛanya tuɣa tudes Urcalim, ɛřaḥař xemmesṭac ‘istadiyyen’, [ɛřaḥař třata kilumitr].
JOH 11:19 Aṭṭas n Wudayen usin-dd ɣar Marta d Maryam ḥima ad tent ɛezzan x umatsent.
JOH 11:20 Řami tesřa Marta, aqa Yasuɛ yiweḍ-dd, teffeɣ ḥima ad t teřqa, maca Maryam teqqim di taddart.
JOH 11:21 Tenna Marta i Yasuɛ: “[A] Sidi, meɛlik Cek tuɣa da, iři war ittmetti ca uma.
JOH 11:22 Maca řexxu ɛad ssneɣ ɛawed belli marra min ɣa tᵉttared zi AREBBI, Netta ad ac t iwc.”
JOH 11:23 Yasuɛ inna as: “Ad dd-ikkar umam.”
JOH 11:24 Tenna as Marta: “Ssneɣ belli ad dd-ikkar di tnukra deg wass aneggaru.”
JOH 11:25 Yasuɛ inna as: “NECC d Tanukra d Tudart. Wenni zzayi i ɣa yamnen, ad iddar, waxxa immut.
JOH 11:26 Marra wenni iddaren uca yumen zzayi, war ittmetti i řebda. Ma tumned di man aya?”
JOH 11:27 Tenna as: “Wah, [a] Sidi inu, umneɣ aqa Cek d Lmasiḥ, Mmis n AREBBI wenni tuɣa i d ttasen ɣar ddunect.”
JOH 11:28 Awarni řami tenna aya, truḥ třaɣa i učmas Maryam s řḥess, tenna as: “Amseřmad nneɣ yusa-dd, ittřaɣa-dd xam.”
JOH 11:29 Řami tesřa Maryam aya, tekkar s tazřa, truḥ ɣares.
JOH 11:30 Tuɣa Yasuɛ war dd-yusi ca ɛad ɣar dcar, maca tuɣa-t [ɛad] deg wemcan mani t teřqa Marta.
JOH 11:31 Uřa d Udayen, inni iǧan akides di taddart, tuɣa ttɛezzan tt, ḍeffaren tt řami ẓrin aqa Maryam tekkar s tazřa, teffeɣ, minzi ittɣiř asen aqa truḥ ɣar wenḍeř ḥima ad tru dinni.
JOH 11:32 Řami dd-tusa Maryam ɣar mani tuɣa Yasuɛ, uca teẓra i-t, tewḍa ɣar iḍaren nnes, tenna as: “A Sidi, meɛlik tuɣa Cek danita, iři uma war ittmetti ca!”
JOH 11:33 Řami tt iẓra Yasuɛ tᵉttru, uřa d Wudayen inni dd-yusin akides ttrun, innehweř Arruḥ nnes, inhezz di řeɛmar nnes.
JOH 11:34 Inna: “Mani t tessarsem?” Nnan as: “Araḥ-dd, [a] Siditneɣ, ad texzared!”
JOH 11:35 [Xenni] ffɣent as-dd i Yasuɛ imeṭṭawen.
JOH 11:36 Udayen nnan: “Xzarem, mecḥař t ittexs.”
JOH 11:37 [Maca] ca zzaysen nnan: “Ma war izemmar Wa, wenni yarezmen tiṭṭawin i udarɣař, ad igg ca maḥend uřa d wanita war ittmetti ca?”
JOH 11:38 Umi dd-yusa ɣar waxxam n wenḍeř, innehweř Yasuɛ aṭṭas deg Ixef nnes. Axxam n wenḍeř aqa-t d ijj n ifri uca ict n teṣḍart tuɣa temmars x wadaf nnes.
JOH 11:39 Yasuɛ inna: “Ksim taṣḍart-a.” Tenna as Marta, učmas n wenni immuten: “[A] Sidi, aqa yarṣuḍ, minzi teɛdu xas arebɛa n wussan.”
JOH 11:40 Inna as Yasuɛ: “Ma war d am nniɣ, mařa tumned, ad tẓared aɛuǧi n AREBBI?”
JOH 11:41 Kksin taṣḍart. Xenni issgeɛɛed Yasuɛ tiṭṭawin nnes ɣar sennej, inna: “[A] Baba, ɛafak řami d ayi tesřid.
JOH 11:42 Necc ssneɣ aqa řebda tᵉttesřid ɣari, maca di ṭṭweɛ n řɣaci i d ayi dd-innḍen, nniɣ t, ḥima ad amnen belli Cek tessekked ayi-dd.”
JOH 11:43 Řami inna aya, iřaɣa s jjehd: “Aliɛazar, ffeɣ-dd!”
JOH 11:44 Řexdenni iffeɣ-dd umettin, tuɣa ifassen d iḍaren nnes carfen s řecfen [n řeqṭen] u tuɣa ijj umendiř [n řeqṭen] ittwacarf x uɣembub nnes. Inna asen Yasuɛ: “Fesyem as-dd. Jjem t ad iraḥ.”
JOH 11:45 Aṭṭas n Wudayen inni dd-yusin ɣar Maryam, uca ẓrin min igga Yasuɛ, umnen zzayes.
JOH 11:46 Maca ca zzaysen ruḥen ɣar Ifarisiyyen, nnan asen min igga Yasuɛ.
JOH 11:47 Uca ggin imeqqranen n ikehhanen d Ifarisiyyen ijj n umuni, nnan: “Min ɣa negg, minzi Aryaz-a ittegg aṭṭas n řeɛřamat.
JOH 11:48 Mařa nejja i-t amya, marra ad zzayes amnen. [Xenni] ad dd-asen Irumaniyyen, ad zzayneɣ kksen amcan nneɣ [iqeddsen] uřa d [iwdan n] řgens nneɣ.”
JOH 11:49 Inna asen ijjen zzaysen, aqa-t d Qayafa, netta d arrays n ikehhanen deg useggʷas nni: “Kenniw war tessinem walu,
JOH 11:50 uca war tefhimem ca belli ineffeɛ i neccin x minni i ɣa immet ijj n bnadem di ṭṭweɛ n řgens, uca war ittmetti ca řgens nneɣ marra.”
JOH 11:51 War ini ca man aya zeg ixef nnes, maca, umi tuɣa d arrays n ikehhanen deg useggʷas nni, tuɣa ittnebba belli Yasuɛ ad immet di ṭṭweɛ n řgens.
JOH 11:52 War iǧi ḥaca di ṭṭweɛ n řgens, maca uřa ḥima ad issmun iḥenjiren ittwazuzzaren n AREBBI ɣar ijjen.
JOH 11:53 Zeg wass nni nwan ad t nɣen.
JOH 11:54 Maca Yasuɛ war iqqim iggur jar Wudayen s bṭayṭay, maca iruḥ ssenni ɣar ict n temmurt tudes řexřa, ɣar ict n tendint qqaren as Ifrayim, uca iqqim dinni ak-d imeḥḍaren nnes.
JOH 11:55 Tuɣa [Řɛid n Tɣarṣt n] Useɛdu n Wudayen ɛřayen yiweḍ-dd. Aṭṭas zi dcurat usin-dd ɣar Urcalim ḥima ad ṭehharen ixef nsen qbeř Řɛid.
JOH 11:56 Nitni tuɣa arezzun x Yasuɛ, nnan jar asen umi nitni bedden di Zzawect Tameqqrant: “Min tᵉttwařam? Ma zeɛma war dd-ittis ɣar Řɛid?”
JOH 11:57 [Maca] imeqqranen n ikehhanen d Ifarisiyyen weṣṣan belli, mařa ca n yijjen issen mani iǧa, ad t ini, ḥima ad t ṭṭfen.
JOH 12:1 Setta n wussan qbeř [Řɛid n Tɣarṣt n] Useɛdu, yusa-dd Yasuɛ ɣar Bayt-Ɛanya, mani tuɣa iǧa Aliɛazar, wenni dd-issnekkar Yasuɛ zi taddart n imettinen.
JOH 12:2 Ggin as din ijj n umensi. Marta tuɣa tsexxar, u Aliɛazar tuɣa d ijjen zeg inni akides iqqimen [ɣar ṭṭabřa].
JOH 12:3 Teksi-dd Maryam ijj n uɣarraf n zzect i wedhan zi řeɛṭur n ṣṣenbel teṣfa tiɣřa, tedhen iḍaren n Yasuɛ, xenni temseḥ iḍaren nnes s ucuwwaf nnes. Taddart teccur s řefwaḥet n [zzect n] wedhan.
JOH 12:4 Ijjen zeg imeḥḍaren nnes wenni umi qqaren Yahuda Isxariyuṭi wenni t i ɣa iɣdaren, inna:
JOH 12:5 “Mayemmi war temmenz ca řefwaḥet-a n ṣṣenbel s teřt mya n dinar, ḥima ad temmewc i imezřaḍ?”
JOH 12:6 Netta inna aya, war iǧi minzi cqan t imezřaḍ, maca minzi netta d aceffar, tuɣa ɣares ssenduq, uca yarbu min dayes immarsen.
JOH 12:7 Yasuɛ inna: “Jjem tt, aqa txemmeř i-tt i wass n wenḍeř inu.
JOH 12:8 Minzi imezřaḍ aqa aten řebda akidwem, maca Necc war kidwem ǧiɣ i řebda.”
JOH 12:9 Aṭṭas n řɣaci zeg Wudayen sřin belli Yasuɛ aqa-t dinni. Usin-dd nitni, war iǧi ḥaca zi ssibbet n Yasuɛ, maca ɛawed ḥima ad ẓaren Aliɛazar, wenni dd-issnekkar zi taddart n imettinen.
JOH 12:10 Mcawaren imeqqranen n ikehhanen, ḥima ad nɣen uřa d Aliɛazar,
JOH 12:11 minzi aṭṭas n Wudayen ffɣen-dd zi ssibbet nnes uca umnen di Yasuɛ.
JOH 12:12 Tiwecca nnes, umi sřin aṭṭas n řɣaci inni dd yusin ɣar Řɛid belli Yasuɛ yusa-dd ɣar Urcalim,
JOH 12:13 ksin ifetwan n tini uca ffɣen, ḥima ad t řqan, řaɣan: “Uṣanna! Sseɛd n Wenni dd-yusin s Yisem n SIDI, Ajeǧid n Israil!”
JOH 12:14 Yufa Yasuɛ ijj n wesnus uca inya xas, am mammec tura:
JOH 12:15 “War tteggʷed ca, [a] yeǧis n Ṣihyun, xzar, Ajeǧid nnem ad dd-yas, iqqim x wesnus, aḥenjir n teɣyuč.”
JOH 12:16 Imeḥḍaren nnes war fhimen ca timesřayin-a di řweqt nni. Maca awarni řami ittwassuɛřa Yasuɛ, řexdenni ɛeqřen belli man aya tura xas uca belli nitni ggin zzayes man aya.
JOH 12:17 Řɣaci i tuɣa iǧan akides, tuɣa iched aqa Netta iřaɣa-dd x Aliɛazar zeg wenḍeř uca issnekkar i-t-i-dd zi taddart n imettinen.
JOH 12:18 S man aya iffeɣ řɣaci ameqqran maḥend ad t mmeřqan, minzi nitni sřin belli igga řeɛřamet-a.
JOH 12:19 Ifarisiyyen nnan jar asen: “Tᵉttwařam mliḥ belli kenniw tᵉttakkwaḍem ɣar walu, xzarem, aqa qaɛ ddunect teḍfar i-t-i-dd.”
JOH 12:20 Tuɣa din ca n iwdan zi řegnus jar asen inni dd-igeɛɛden [ɣar Urcalim] ḥima ad ɛebden di Řɛid.
JOH 12:21 Ina ruḥen ɣar Filippus, wenni zi [tendint n] Bayt-Ṣayda di Ljalil. Sseqsan t, nnan: “A Sidi, nexs ad nẓar Yasuɛ.”
JOH 12:22 Yusa-dd Filippus, inna [tt] i Andrawus, uca Andrawus d Filippus nnan [tt] i Yasuɛ.
JOH 12:23 Yasuɛ yarra-dd, inna asen: “Aqa tiweḍ-dd tsaɛɛet i di i ɣa ittwassɛuǧ Mmis n bnadem.
JOH 12:24 S tidett, s tidett, Necc ad awem iniɣ: Mařa war dd-iwḍi řḥebb n yirden di temmurt, ad immet, xenni ad iqqim weḥḥdes, maca mařa immut, xenni ad dd-yawi řɣiǧet aṭṭas.
JOH 12:25 Wenni ittexsen tudart nnes, ad tt ixsar, [maca] wenni i ɣa icarhen tudart nnes di ddunect-a, ad tt ixemmeř i Tudart ittduman.
JOH 12:26 Mařa ca n yijjen isexxar ayi, ejj i-t ad ayi iḍfar. Mani ɣa iřiɣ Necc, dinni i ɣa yiři ɛawed umsexxar inu. Mařa ca n ijjen ixdem ayi, ad t icenneɛ Baba.
JOH 12:27 Řexxu uř inu innehweř, min ɣa iniɣ? [A] Baba, senjem ayi zi tsaɛɛet-a? Maca x uyenni i dd-usiɣ ɣar tsaɛɛet-a.
JOH 12:28 [A] Baba, sɛuǧi Isem nnec.” Xenni tusa-dd ict n tmijja zeg ujenna, [tenna]: “Sɛuǧeɣ t uca ad t sɛuǧeɣ ɛawed!”
JOH 12:29 Řɣaci i tuɣa ibedden din isřa i-tt, nitni nnan: “Aqa imsar wajjaj.” Inneɣni nnan: “Aqa issiweř-dd ijj n lmalak akides.”
JOH 12:30 Yarra-dd Yasuɛ, inna asen: “Tmijja-ya war teǧi ca di ṭṭweɛ inu maca di ṭṭweɛ nwem.
JOH 12:31 Řexxu ad yiři řḥukm x ddunect-a, řexxu ad immenḍar umeqqran n ddunect-a ɣar barra.
JOH 12:32 U Necc, x minni i ɣa ttwassgeɛɛdeɣ zi temmurt, ad ɣari dd-jebdeɣ marra.”
JOH 12:33 Inna man aya ḥima ad isscen ɣar man řmewt i ɣa immet.
JOH 12:34 Řɣaci yarra-dd xas: “Neccin nesřa zi Ccariɛa aqa Lmasiḥ ad iqqim i řebda. I mammec teqqared Cek belli ittxeṣṣa i Mmis n bnadem ad ittwassgeɛɛed? Min iɛna Mmis-a n bnadem?”
JOH 12:35 Yasuɛ inna asen: “Tafawt ad tiři akidwem drus n řweqt ɛad. Uyurem, řami ɣarwem Tafawt, ḥima war kenniw tᵉttᵉṭṭef taǧest. Wenni igguren di taǧest, war issin mani iggur.
JOH 12:36 Amnem di Tfawt maḥend Tafawt ɛad aqa-tt ɣarwem, ḥima kenniw ad tiřim tarwa n Tfawt.” Ammu i tuɣa issawař Yasuɛ. [Řexdenni] yuyur uca innufar zzaysen.
JOH 12:37 Waxxa tuɣa Netta ittegg marra řeɛřamat-a zzatsen, nitni war zzayes uminen ca,
JOH 12:38 ḥima ad ittwakemmeř wawař n unabi Icaɛya i innan: “A Sidi, wi yumnen s řexbar nneɣ u i umi ittwassargeb ufus n SIDI?”
JOH 12:39 S uyenni war zemmaren ad amnen, minzi Icaɛya inna ɛawed:
JOH 12:40 “Nitni ssdarɣřen tiṭṭawin n yixef nsen, sseqseḥen uřawen nsen, ḥima war ttᵉtwiřin s tiṭṭawin nsen, war fehhmen s wuř nsen, ad tuben uca Necc ad ten ssgenfiɣ.”
JOH 12:41 Inna Icaɛya ammu, umi iẓra aɛuǧi nnes uca tuɣa issawař xas.
JOH 12:42 Umnen zzayes ɛawed aṭṭas n imeqqranen [n řgens], maca s ssibbet n Ifarisiyyen war zzayes cehden ca [s bṭayṭay], ḥima war ten ssuffuɣen zi temzida.
JOH 12:43 Minzi nitni tuɣa xsen aɛuǧi zeg iwdan x uɛuǧi zi AREBBI.
JOH 12:44 Maca Yasuɛ iřaɣa, inna: “Wenni dayi ittamnen, war dayi ittimen ca, maca deg Wenni d ayi dd-issekken.
JOH 12:45 Wenni d ayi iẓrin, iẓra wenni d ayi dd-issekken.
JOH 12:46 Necc d Tafawt i dd-yusin ɣar ddunect, ḥima kuř ijjen wenni dayi ittamnen, war ittɣimi ca di taǧest.
JOH 12:47 Mařa ca n yijjen isřa i wawařen inu, [maca] war daysen ittᵉṭṭef, Necc war xas ḥekkmeɣ ca. Necc war dd-usiɣ ca, ḥima ad ḥekmeɣ x ddunect, maca ḥima ad wceɣ Tudart i ddunect.
JOH 12:48 Wenni d ayi isseḥqaren uca war iqbiř awařen inu, ɣares wenni xas i ɣa iḥekmen: awař i nniɣ, ad xas iḥkem deg wass aneggaru.
JOH 12:49 Minzi Necc war ssiwřeɣ ca zi ɣari, maca Baba Wenni d ayi-dd-issekken iwca ayi ict n tewṣeyyet x min ɣa iniɣ d min xef ɣa ssiwřeɣ,
JOH 12:50 u Necc ssneɣ tiweṣṣa nnes, aqa atent d Tudart ittduman. S uya, min ssawařeɣ, ssawařeɣ t am mammec d ayi inna Baba.”
JOH 13:1 Qbeř i Řɛid n [Tɣarṣt n] Useɛdu, umi issen Yasuɛ aqa tasaɛɛet nnes tiweḍ-dd belli ad iffeɣ zi ddunect-a ɣar Babas, tuɣa ittexs inni iǧan nnes, inni iǧan di ddunect, uca Netta ittexs i-ten ař aneggaru.
JOH 13:2 Ɣar umensi, umi iɛarn cciṭan uř n Yahuda, mmis n Cimɛun Isxariyuṭi, maḥend ad t isellem,
JOH 13:3 ikkar-dd Yasuɛ x umensi, minzi tuɣa issen belli Babas iwca as kuřci deg ifassen nnes u belli iffeɣ-dd zi ɣar AREBBI u ɣar AREBBI i ɣa iraḥ,
JOH 13:4 uca ikkes arruḍ nnes, iksi ijj n umendiř uca ibyes i-t i Yixef nnes.
JOH 13:5 Ifarreɣ aman di tbanyut uca ibda issirid iḍaren n imeḥḍaren, imesseḥ asen s umendiř i zi tuɣa ibyes.
JOH 13:6 Řami dd-yusa ɣar Cimɛun Buṭrus, inna as Cimɛun: “[A] Sidi, ma ad tessirded iḍaren inu?”
JOH 13:7 Yarra-dd Yasuɛ, inna as: “Cek war tefhimed ca řexxu min tteggeɣ, maca ad tfehmed man aya awarni manawenni.”
JOH 13:8 Inna as Cimɛun Buṭrus: “Qaɛ ɛemmarṣ ad tessirded iḍaren inu.” Yarra-dd xas Yasuɛ: “Mařa war d ac ssirdeɣ, war ɣarek tᵉttiři bu tasɣart akidi.”
JOH 13:9 Inna as Cimɛun Buṭrus: “[A] Sidi, [xenni] war tessirid iḍaren inu waha, maca uřa d ifassen inu d uzeǧif inu.”
JOH 13:10 Yasuɛ inna as: “Wenni ittwasirden qaɛ [di tbanyut], war iḥdij mɣir ad ttwasirden iḍaren nnes waha, minzi ɛad netta d amezdag. Uřa d kenniw tizdigem, maca war iǧi marra.”
JOH 13:11 Yasuɛ tuɣa issen wi t ɣa iɣdaren, s uyenni inna: “Kenniw war teǧim ca marra d imezdag.”
JOH 13:12 Awarni řami issird iḍaren nsen, yarḍ arruḍ nnes [ɛawed], xenni iqqim, inna asen: “Ma tfehmem min daywem ggiɣ?
JOH 13:13 Kenniw tᵉttřaɣam ayi ‘Amseřmad nneɣ!’ d ‘Siditneɣ!’, uca tidett i tennam, minzi wa d Necc.
JOH 13:14 Mařa Necc d Sidi nwem d Amseřmad nwem, uca ssirdeɣ iḍaren nwem, mahu ittxeṣṣa uřa i kenniw ad tessirdem iḍaren ijjen i wenneɣni!
JOH 13:15 Minzi Necc zeɛma wciɣ awem amedya-ya, ḥima, am mammec ggiɣ Necc akidwem, ad teggem kenniw ɛawed [ak-d wayawya].
JOH 13:16 S tidett, s tidett, Necc ad awem iniɣ: War din iǧi umsexxar wenni yuɛřan x sides, uřa d areqqas yuɛřan x wenni i-t-i-dd-issekken.
JOH 13:17 Mařa tessnem timesřayin-a, ad tiřim tᵉttwabarkem mařa teggim zzaysent.
JOH 13:18 War t qqareɣ ca xawem marra, maɣar ssneɣ inni i xḍareɣ, maca ḥima ad ittwakemmeř min yuran deg Wedlis [i iqqaren]: ‘Wenni i ɣa iccen zeg weɣrum akidi, aqa issgeɛɛed xafi anirz nnes.’
JOH 13:19 Řexxu ad awem t iniɣ qbeř ma ad imsar, ḥima, x minni i ɣa imsar, ad tamnem belli aqa d Necc.
JOH 13:20 S tidett, s tidett, Necc ad awem iniɣ: Wenni i ɣa iqebřen wenni dd ɣa ssekkeɣ, ad ayi iqbeř, u wenni d ayi ɣa iqebřen, ad iqbeř uřa d Wenni d ayi dd-issekken.”
JOH 13:21 Řami inna Yasuɛ man aya, innehweř Arruḥ nnes aṭṭas, uca iched, inna: “S tidett, s tidett, Necc ad awem iniɣ: Ijjen zzaywem ad dayi iɣder!”
JOH 13:22 Imeḥḍaren xzaren ɣar wayawya, minzi war ssinen di min xef tuɣa issawař.
JOH 13:23 Tuɣa din ijjen zeg imeḥḍaren nnes i tuɣa ittexs Yasuɛ, tuɣa isenned ɣar weḥsin n Yasuɛ.
JOH 13:24 Isscen Cimɛun Buṭrus ɣares, ḥima netta ad t isseqsa min iɛna wenni min xef tuɣa issawař [ammu].
JOH 13:25 Ameḥḍar nni yarra ixef nnes ittmeyyeř ɣar idmaren n Yasuɛ, inna as: “[A] Sidi, min iɛna?”
JOH 13:26 Yarra-dd Yasuɛ, inna: “D wenni umi ɣa ssisneɣ [ařeqqim n] weɣrum, ad as [t] wceɣ.” Řexdenni issisen [ařeqqim n] weɣrum, iwca as [t-i]-dd i Yahuda, mmis n Cimɛun Isxariyuṭi.
JOH 13:27 Awarni [iṭṭef uřeqqim n] weɣrum, yudef i-t cciṭan. Inna as Yasuɛ: “Min [texsed] ad t tegged, egg i-t deɣya.”
JOH 13:28 Uřa d ijj zeg inni tuɣa iqqimen [ɣar umensi] war issin mayemmi Netta i d as inna man aya.
JOH 13:29 Maɣar ittɣiř asen i ca [zzaysen], umi Yahuda aqa-t x ssenduq, aqa Yasuɛ yumur i-t ḥima ad iseɣ ca min ḥdajen nitni i Řɛid, niɣ ḥima ad iwc ca i imezřaḍ.
JOH 13:30 Wanita, awarni řami iṭṭef [ařeqqim n] weɣrum, iffeɣ deɣya. Tuɣa d ǧiřet umi iffeɣ.
JOH 13:31 Inna Yasuɛ: “Aqa řexxu ittwassɛuǧ Mmis n bnadem uca ittwassɛuǧ AREBBI dayes.
JOH 13:32 Mařa AREBBI aqa ittwassɛuǧ dayes, řexdenni AREBBI ad issɛuǧ Ixef nnes dayes, [wah,] ad t issɛuǧ deɣya.
JOH 13:33 [A] iḥenjiren inu imeẓyanen, Necc aqa ayi akidwem drus n řweqt ɛad. Kenniw ad xafi tarzum, uca am mammec nniɣ i Wudayen: ‘Mani ɣa raḥeɣ Necc, war tzemmarem ad dd-tasem!’, ammu i d awem ɣa iniɣ ɛawed řexxu.
JOH 13:34 Tawṣeyyet n jdid i d awem ɣa wceɣ ḥima ad texsem ijjen wenneɣni. Am mammec Necc ttexseɣ kenniw, ittxeṣṣa uřa d kenniw ad texsem ayawya.
JOH 13:35 S man aya ad ssnen marra, aqa kenniw d imeḥḍaren inu, mařa din ɣarwem tayri jar awem.”
JOH 13:36 Cimɛun Buṭrus inna as: “[A] Siditneɣ, mani ɣa traḥed?” Yarra-dd Yasuɛ, inna as: “Mani ɣa raḥeɣ Necc, war tzemmared řexxu ad ayi teḍfared, maca ɣar uneggaru ad tased.”
JOH 13:37 Cimɛun Buṭrus inna as: “[A] Sidi, mayemmi war zemmareɣ ad aseɣ awarni ac řexxu? Necc ad wceɣ tudart inu i Cek.”
JOH 13:38 Inna as Yasuɛ: “Ma texsed ad tessarsed tudart nnec di ṭṭweɛ inu? S tidett, s tidett, Necc ad ac iniɣ: War isququɛ uyaẓiḍ, qbeř ma ad ayi tenkared třata n twařawin.”
JOH 14:1 “War ttejjim ad innehweř uř nwem. Kenniw tumnem di AREBBI, amnem ɛawed dayi.
JOH 14:2 Di taddart n Baba dayes aṭṭas n tzeddiɣin. Meɛlik war iǧi amenni, iři nniɣ awem t, minzi Necc ad raḥeɣ, ḥima ad awem sswejdeɣ amcan.
JOH 14:3 Awarni řami ruḥeɣ uca sswejdeɣ awem amcan, xenni ad ɛeqbeɣ, ad kenniw dd-awyeɣ ɣari, ḥima, mani ǧiɣ Necc, ad din tiřim uřa d kenniw.
JOH 14:4 Aqa tessnem mani ɣa raḥeɣ uca tessnem abrid.”
JOH 14:5 Inna as Tuma: “[A] Siditneɣ, war nessin mani ɣa traḥed i mammec nzemmar ad nessen abrid?”
JOH 14:6 Yasuɛ inna as: “NECC d Abrid d Tidett d Tudart, war dd-ittis uřa d ijj ɣar Baba mɣir zzayi.
JOH 14:7 Mařa tuɣa tessnem ayi, ad tiři aqa tessnem uřa d Baba. Zi řexxu aqa tessnem t, teẓrim t.”
JOH 14:8 Filippus inna as: “[A] Siditneɣ, scen aneɣ Babac, uca ikfa.”
JOH 14:9 Yasuɛ inna as: “Anect uya n řweqt qaɛ Necc akidwem, ma war d ayi tessined [ɛad], [a] Filippus? Wenni d ayi iẓrin, iẓra Baba. Mammec teqqared: ‘Scen aneɣ Babac’?
JOH 14:10 Ma war tumined ca aqa Necc aqa ayi di Baba d Baba aqa-t dayi? Awařen i qqareɣ, war ten qqareɣ ca zi ɣari, maca Baba wenni dayi izeddɣen, Netta ittegg řexdayem-a.
JOH 14:11 Amnem ayi, aqa Necc aqa ayi di Baba u Baba aqa-t dayi, u mařa lla, amnem ayi x ssibbet n řexdayem simant nsent.
JOH 14:12 S tidett, s tidett, Necc ad awem iniɣ: Wenni dayi yumnen, aqa řexdayem i tteggeɣ, ad zzaysent igg uřa d netta, uca ad igg tinni iǧan d timeqqranin x man aya, minzi Necc ad raḥeɣ ɣar Baba.
JOH 14:13 Uca marra min ɣa tᵉttarem s Yisem inu, ad t ggeɣ i kenniw, ḥima ad ittwassɛuǧ Baba di Mmis.
JOH 14:14 Mařa d ayi ɣa tᵉttarem s Yisem inu, ad t ggeɣ.
JOH 14:15 Mařa texsem ayi, ṭṭfem di tweṣṣa inu,
JOH 14:16 uca Necc ad ẓẓaǧeɣ i Baba u Netta ad awem iwc ijj n Umseṣřaḥ nneɣni, ḥima ad kiwem iqqim i řebda:
JOH 14:17 Arruḥ n tidett tenni war tzemmar ddunect ad t teqbeř, minzi war t tᵉttwiři, war t tessin. Maca kenniw tessnem t, minzi Netta ittɣima akidwem u Netta aqa-t daywem.”
JOH 14:18 “War kenniw ttejjiɣ ca d iyujiřen, maɣar awarni drus n řweqt Necc ad ɣarwem dd-aseɣ [ɛawed].
JOH 14:19 Ddunect war d ayi tẓarr, maca kenniw ad ayi twařam. Minzi Necc ddareɣ, ad teddarem uřa d kenniw.
JOH 14:20 Deg wass nni ad tessnem, aqa Necc aqa ayi di Baba, kenniw dayi u Necc daywem.
JOH 14:21 Wenni ɣar iǧa tiweṣṣa inu uca ad daysent iṭṭef, d wenni d ayi ittexsen, u wenni d ayi ittexsen, uřa d Baba ad t ixs u Necc ad t xseɣ [ɛawed] uca ad as ssecneɣ Ixef inu.”
JOH 14:22 Inna as Yahuda, war iǧi d Isxariyuṭi: “[A] Sidi, mammec d aneɣ i ɣa tessecned Ixef nnec, war iǧi ca i ddunect?”
JOH 14:23 Yasuɛ yarra-dd, inna as: “Mařa ca n yijjen ixs ayi, xenni ad iṭṭef deg wawař inu uca Baba ad t ixs, uca ɣares i dd ɣa nas u ɣares i ɣa negg tazeddiɣt nneɣ.
JOH 14:24 Wenni war d ayi ittexsen, war ittᵉṭṭif ca deg wawař inu, uca awař-a i tesřim, war iǧi ca zi ɣari, maca zi Baba, wenni d ayi dd-issekken.
JOH 14:25 Ssiwřeɣ akidwem man aya umi Necc [ɛad] akidwem.
JOH 14:26 Maca Umseṣřaḥ, Arruḥ Iqeddsen, Wenni i dd ɣa issekk Baba s Yisem inu, ad awem isseřmed kuřci, ad awem issfekkar marra min d awem nniɣ.
JOH 14:27 Řehna ad awem t jjeɣ, Necc ad awem wceɣ řehna inu. Necc ad awem [t] wceɣ, war iǧi ca am mammec [t] tᵉttic ddunect. War tejjim ad innehweř uř nwem, war tteggʷedem ca.
JOH 14:28 Aqa tesřim Necc nniɣ awem: ‘Necc ad uyureɣ uca ad ɣarwem dd-aseɣ ɛawed’. Mařa texsem ayi, ad tfarḥem, minzi aqa ad raḥeɣ ɣar Baba, minzi Baba imɣar xafi!
JOH 14:29 Uca řexxu, xzar, Necc nniɣ awem tt qbeř ma ad yiři, ḥima kenniw, x minni i ɣa yiři uya, ad tamnem.
JOH 14:30 Awarni man aya war kiwem ssiwiřeɣ [ɛad] aṭṭas ktar, maɣar ad dd-yas umeqqran n ddunect-a, war ɣares ittiři walu dayi,
JOH 14:31 maca ittxeṣṣa ad tessen ddunect aqa Necc ttexseɣ Baba uca tteggeɣ min d ayi iweṣṣa Baba. Kkarem, ad nuyur ssanita.”
JOH 15:1 “NECC d Tazayart n tidett, Baba d bab n weḥwic n tzayart.
JOH 15:2 Kuř taseṭṭa dayi i war itticen řɣiǧet, ad tt ikkes, uca kuř [taseṭṭa] i dd-ittawyen řɣiǧet, ad tt issizdeg, ḥima ad tarni di řɣiǧet.
JOH 15:3 Kenniw aqa tᵉttwassizedgem zi ssibbet n wawař i d awem nniɣ.
JOH 15:4 Qqimem dayi, [am mammec] Necc aqa ayi daywem. Am tseṭṭa i war izemmaren ad dd-tawyi řɣiǧet zeg ixef nnes mařa war teqqim di tzayart, amya uřa d kenniw, mɣir mařa teqqimem dayi.
JOH 15:5 NECC d Tazayart, kenniw d tiseḍwin. Wenni dayi i ɣa iqqimen u Necc dayes, netta ad dd-yawi řɣiǧet aṭṭas, minzi břa zzayi war tzemmarem ad teggem walu.
JOH 15:6 Mařa ca n yijjen war dayi iqqim, ad immenḍar ɣar barra am tseṭṭa tuẓeɣ, xenni ad tt yarwen, ad tt nḍaren di tmessi, ad yareɣ.
JOH 15:7 Maca mařa teqqimem dayi uca awařen inu ad daywem qqimen, ttarem min texsem uca ad ɣarwem yiři.
JOH 15:8 Zi man aya ad ittwassɛuǧ Baba, xmi i dd ɣa tawyem aṭṭas n řɣiǧet uca ad tiřim d imeḥḍaren inu.
JOH 15:9 Am mammec Baba tuɣa ittexs ayi, ammu uřa d Necc tuɣa ttexseɣ kenniw. Qqimem di tayri inu.
JOH 15:10 Mařa tᵉṭṭfem di tweṣṣa inu, ad teqqimem di tayri inu, am mammec Necc tuɣa ttᵉṭṭfeɣ di tweṣṣa n Baba uca ttɣimeɣ di tayri nnes.
JOH 15:11 Nniɣ awem man aya, ḥima ad daywem tiři řefraḥet inu uca ḥima ad tᵉttwakemmeř řefraḥet nwem.
JOH 15:12 Tawṣeyyet inu d tanita: aqa ad texsem ijjen wenneɣni am mammec Necc tuɣa xseɣ kenniw.
JOH 15:13 Uřa d ijj war ɣares bu tayri tameqqrant x tanita: belli ca n yijjen ad iwc tudart nnes i imeddukkař nnes.
JOH 15:14 Kenniw d imeddukkař inu, mařa teggim marra min kenniw weṣṣiɣ.
JOH 15:15 War ttɛiwideɣ ad awem semmiɣ ‘imsexxaren’, minzi amsexxar war issin min ittegg sidis. Maca Necc tuɣa ttřaɣiɣ awem d ‘imeddukkař inu!’, minzi Necc ssecneɣ kenniw marra min sřiɣ zi Baba.
JOH 15:16 War iǧi d kenniw i d ayi ixḍaren, maca d Necc i kenniw ixḍaren uca Necc ggiɣ kenniw ḥima ad traḥem, ad dd-tawyem řɣiǧet u ḥima ad teqqim řɣiǧet nwem, ḥima marra min ɣa tᵉttarem zi Baba s Yisem inu, ad awem [t] iwc Netta.
JOH 15:17 D man aya i zi kenniw umureɣ, ḥima ad texsem ijjen wenneɣni.”
JOH 15:18 “Mařa ddunect ad kenniw tcarh, snem aqa tcarh ayi qbeř kenniw.
JOH 15:19 Mařa aqa kenniw zi ddunect, iři aqa ddunect tuɣa tᵉttexs inni zzayes. Maca minzi kenniw war teǧim ca zi ddunect, maca Necc ixḍareɣ kenniw zi ddunect, s uyenni tcarreh ddunect kenniw.
JOH 15:20 Ɛeqřem awař i d awem nniɣ: ‘Amsexxar war yuɛři x sidis!’ Mařa darracen ayi, ad kenniw darrcen ɛawed. Mařa ṭṭfen deg wawař inu, ad ṭṭfen ɛawed deg wawař nwem.
JOH 15:21 Maca ad zzaywem ggen man aya marra di ssibbet n Yisem inu, minzi nitni war ssinen ca Wenni d ayi dd-issekken.
JOH 15:22 Mařa war dd-usiɣ u war kisen ssiwřeɣ, ad yiři war ɣarsen bu ddnub. Maca řexxu war ɣarsen bu smaḥet x ddnub nsen.
JOH 15:23 Wenni d ayi icarrhen, ad icarh uřa d Baba.
JOH 15:24 Mařa war ggiɣ zzat i tiṭṭawin nsen řexdayem i war tent yeggi uřa d ijj bnadem nneɣni, ad yiři war ɣarsen bu ddnub. Maca řexxu ẓrin [tent], carhen ayi Necc uřa d Baba.
JOH 15:25 S uya ad ittwakemmeř wawař i yuran di Ccariɛa nsen: ‘Carhen ayi x walu’.
JOH 15:26 Xmi dd ɣa yas Umseṣřaḥ, wenni ɣarwem dd ɣa ssekkeɣ zi Baba, Arruḥ n tidett i dd-yusin zi ɣar Baba, xenni wanita ad ayi iched.
JOH 15:27 Uca ad tcehdem uřa d kenniw, minzi tuɣa kenniw akidi zeg umezwaru.”
JOH 16:1 “Aqa ssiwřeɣ akidwem aya, ḥima war ttenqarḍem.
JOH 16:2 Ad kenniw ssuffɣen zi temzidawin nsen. Iwa, tasaɛɛet ad dd-tas umi kuř ijjen wenni kenniw i ɣa inɣen, ad as ittɣiř aqa iwca ict n tewhibt i AREBBI.
JOH 16:3 Ad zzaywem ggen man aya, minzi nitni war ssinen Baba uřa d Necc.
JOH 16:4 Maca aqa nniɣ awem man aya, ḥima, xmi i dd ɣa tas tsaɛɛet, xenni ad tɛeqřem x man aya. Necc war daywem nniɣ ca man aya qbeř, minzi Necc tuɣa ayi [ɛad] akidwem.
JOH 16:5 Maca řexxu ad raḥeɣ ɣar Wenni d ayi dd-issekken, [maca] uřa d ijj zzaywem war d ayi isseqsi: ‘Mani ɣa traḥed?’
JOH 16:6 Maɣar minzi nniɣ awem man aya, aqa acḍan iccur uřawen nwem.
JOH 16:7 Maca Necc ad awem iniɣ tidett: Ḥsen awem ad raḥeɣ, maɣar mařa war ruḥeɣ ca, war ɣarwem dd-ittis Umseṣřaḥ. Mařa ruḥeɣ, ad awem t-i-dd-ssekkeɣ.
JOH 16:8 Řami dd-yusa wanita, ad isseqneɛ ddunect x ddnub, x tsegda u x řḥukm.
JOH 16:9 X ddnub minzi nitni war zzayi uminen,
JOH 16:10 x tsegda, minzi Necc ad raḥeɣ ɣar Baba uca war d ayi tẓarrem ɛad,
JOH 16:11 uca x řḥukm, minzi ameqqran n ddunect-a aqa ittwaḥaseb.
JOH 16:12 Ɣari aṭṭas min daywem i ɣa iniɣ, maca řexxu war tzemmarem ad t teksim.
JOH 16:13 Maca řami dd-yusa Arruḥ n tidett, ad kenniw indeh di marra tidett, minzi Netta war issiwiř ca zeg Ixef nnes, maca marra min ɣa isřa, ad zzayes issiweř, uca ad awem isscen timesřayin i dd ɣa yasen.
JOH 16:14 Netta ad ayi issɛuǧ, minzi ad iksi zi min ɣari uca ad kenniw issargeb zzayes.
JOH 16:15 Marra min iǧan ɣar Baba, aqa-t inu. S uyenni nniɣ, belli Netta ad iksi zi min ɣari uca ad kenniw tt issargeb.”
JOH 16:16 “War ittɣimi ca uca war d ayi tẓarrem [ɛad], u xenni [ɛawed] war ittɣimi ca uca ad ayi tẓarem, minzi Necc ad raḥeɣ ɣar Baba.”
JOH 16:17 Imeḥḍaren nnes nnan jar asen: “Manawya min d aneɣ inna: ‘War ittɣimi ca uca war d ayi tẓarrem [ɛad] u xenni ɛawed war ittɣimi ca uca ad ayi tẓarem!’ u: ‘Necc ad raḥeɣ ɣar Baba’?”
JOH 16:18 Uca nitni nnan: “Manawya min iqqar: ‘War ittɣimi ca’? War nessin ca min xef issawař.”
JOH 16:19 Issen Yasuɛ min xsen ad t sseqsan, inna asen: “Ma temmseqsam minzi nniɣ: ‘War ittɣimi ca uca war d ayi tẓarrem [ɛad] u xenni ɛawed war ittɣimi ca uca ad ayi tẓarem’?”
JOH 16:20 “S tidett, s tidett, Necc ad awem iniɣ: Kenniw ad trum, ad tɛebbsem, maca ddunect ad tfarḥ. Kenniw ad tceḍnem, maca acḍan nwem ad idweř d řefraḥet.
JOH 16:21 Tamɣart, xmi ɣa taruw, ad dayes yiři řeḥriq, minzi tasaɛɛet nnes aqa tiweḍ-dd. Maca xmi dd ɣa taruw mmis, war tfekkar ca ɛad di řmeḥnet nnes s řefraḥet, minzi tarni-dd ijj n bnadem ɣar ddunect.
JOH 16:22 Uřa d kenniw aqa daywem acḍan řexxu, maca ad kenniw ẓareɣ ɛawed, uca ad farḥen wuřawen nwem uca uřa d ijj war zzaywem ittekkes řefraḥet nwem.
JOH 16:23 Deg wass nni war d ayi tᵉttarem ca. S tidett, s tidett, Necc ad awem iniɣ: Marra min ɣa tᵉttarem zi Baba s Yisem inu, ad awem t iwc.
JOH 16:24 Ař i řexxu war tᵉttarem ca s Yisem inu. Ttarem, ad teksim, ḥima ad tiři řefraḥet nwem tekmeř.
JOH 16:25 Ssiwřeɣ awem x man aya s imedya, maca ad dd-taweḍ tsaɛɛet i di war ɣarwem i ɣa ssiwiřeɣ ɛad s imettiřen, maca ad awem barrḥeɣ x Baba s bṭayṭay.
JOH 16:26 Deg wass nni ad tᵉttarem s Yisem inu. Necc war d awem qqareɣ ca belli ad ttareɣ [ca] zi Baba di ṭṭweɛ nwem,
JOH 16:27 minzi Baba simant nnes ittexs kenniw, minzi kenniw tuɣa tᵉttexsem ayi uca aqa tumnem aqa Necc zi ɣar AREBBI i dd-ffɣeɣ.
JOH 16:28 Ffɣeɣ-dd zi Baba, usiɣ-dd ɣar ddunect. Ad jjeɣ ɛawed ddunect uca ad raḥeɣ ɣar Baba.”
JOH 16:29 Nnan as imeḥḍaren nnes: “Aqa řexxu tessawařed s bṭayṭay, war tessiwiřed ca s uřa d ijj n umedya.
JOH 16:30 Řexxu nessen aqa tessned kuřci, war teḥdijed ad Cek isseqsa ḥed. Zi manawenni numen aqa Cek teffɣed-dd zi AREBBI.”
JOH 16:31 Yasuɛ yarra-dd xasen: “Ma řexxu tumnem?
JOH 16:32 Ad dd-taweḍ tsaɛɛet, aqa tiweḍ-dd, i di i ɣa tᵉttwazuzzarem, kuř ijj ad iṭṭef ɣar wemcan nnes, ad ayi tejjem weḥḥdi, [maca] Necc war ǧiɣ bu weḥḥdi, minzi Baba aqa-t akidi.
JOH 16:33 Aqa ssiwřeɣ akidwem s man aya, ḥima ad ɣarwem yiři řehna dayi. Di ddunect ad ɣarwem tiři řmeḥnet, maca ggem uř, Necc aqa ɣellbeɣ x ddunect.”
JOH 17:1 Tuɣa Yasuɛ issawař s man aya uca issgeɛɛed tiṭṭawin nnes ɣar ujenna, inna: “[A] Baba, aqa tasaɛɛet tiweḍ-dd. Suɛřa Mmic, ḥima uřa d Mmic ad Cek issuɛřa,
JOH 17:2 ařami d as tewcid ṣṣulṭa x marra ddat, ḥima xenni Netta ad iwc Tudart ittduman i kuř ijjen i d as tewcid.
JOH 17:3 D tanita d Tudart ittduman, aqa nitni ad Cek ssnen, maɣar Cek weḥḥdek d AREBBI d tidett, d Yasuɛ Lmasiḥ wenni dd-tessekked.
JOH 17:4 Necc ssuɛřiɣ Cek x temmurt. Necc kemmřeɣ řxedmet i d ayi tewcid ḥima ad tt ggeɣ.
JOH 17:5 Řexxu, sɛuǧi ayi, [a] Baba, ɣar Ixef nnec s uɛuǧi i tuɣa ɣari qbeř ma ad tiři ddunect.
JOH 17:6 Secneɣ Isem nnec i iwdan inni d ayi tewcid zi ddunect. Nitni tuɣa aten nnec, tewcid ten i Necc, aqa ṭṭfen deg Wawař nnec.
JOH 17:7 Řexxu ssneɣ belli marra min d ayi tewcid, aqa-t zzayek dd-yusa.
JOH 17:8 Minzi Necc wciɣ asen awařen i d ayi tewcid uca nitni qebřen zzaysen, ssnen s tidett belli Necc ffɣeɣ-dd zzayek, umnen aqa Cek tessekked ayi-dd.
JOH 17:9 Necc ttareɣ di ṭṭweɛ nsen, war ttᵉttareɣ di ṭṭweɛ n ddunect, maca di ṭṭweɛ n yinni d ayi tewcid, minzi aqa aten nnec.
JOH 17:10 Marra min iǧan inu aqa-t nnec u min iǧan nnec aqa-t inu, u Necc ttwassɛuǧeɣ daysen.
JOH 17:11 Zi řexxu Necc war ǧiɣ ɛad di ddunect, maca nitni aqa aten di ddunect, uca Necc ad ɣarek dd-aseɣ. [A] Baba iqeddsen, ḥḍa ten deg Yisem nnec, [Isem] nni d ayi tewcid, ḥima nitni ad iřin d ijjen am Neccin.
JOH 17:12 Řami d ayi tuɣa akidsen, ḥḍiɣ ten deg Yisem nnec. Necc ɛesseɣ x yinni d ayi tewcid. Uřa d ijj zzaysen war ittwahellek, mɣir mmis n tehliket, ḥima ad ittwakemmeř [min yuran] di Tira [Iqeddsen].
JOH 17:13 Maca řexxu ad ɣarek dd-aseɣ u ssawařeɣ x man aya di ddunect, ḥima ad tiři řefraḥet inu tekmeř daysen.
JOH 17:14 Wciɣ asen awař nnec uca ddunect tuɣa tcarreh i-ten, minzi war ǧin ca zi ddunect, am Necc war ǧiɣ ca zi ddunect.
JOH 17:15 Necc war ttareɣ ḥima ad ten teksid zi ddunect, maca ḥima ad ten teḥḍid zeg umɛeffan.
JOH 17:16 Nitni war ǧin ca zi ddunect am Necc war ǧiɣ ca zi ddunect.
JOH 17:17 [A] Baba, sqeddes i-ten di tidett, awař nnec d tidett.
JOH 17:18 Am mammec i d ayi dd-tessekked ɣar ddunect, [ammu i] ten ssekkeɣ ɛawed ɣar ddunect.
JOH 17:19 Ssqeddaseɣ Ixef inu di ṭṭweɛ nsen, ḥima ad ttwaqeddsen uřa d nitni di tidett.
JOH 17:20 War ttareɣ di ṭṭweɛ n yina waha, maca ɛawed di ṭṭweɛ n yinni dayi yumnen s wawař nsen.
JOH 17:21 ḥima ad iřin marra d ijjen, [a] Baba, am Cek dayi u Necc dayek, ḥima uřa d nitni ad iřin d ijjen dayneɣ, ḥima ad tamen ddunect belli aqa d Cek i d ayi dd-issekken.
JOH 17:22 Necc wciɣ asen aɛuǧi i d ayi tewcid, ḥima ad iřin d ijjen am mammec Neccin neǧa d Ijjen.
JOH 17:23 Necc daysen, Cek dayi, ḥima ad iřin ttwakemmřen ɣar ijjen, ḥima ad tessen ddunect aqa Cek tessekked ayi-dd u texsed ten am mammec i d ayi texsed.
JOH 17:24 [A] Baba, xseɣ i yinni d ayi tewcid ad iřin akidi mani ma ǧiɣ Necc, uca ad ẓaren aɛuǧi inu i d ayi tewcid, minzi Cek texsed ayi qbeř ma ad tᵉttwagg ddunect.
JOH 17:25 [A] Baba inu iseggden, aqa ddunect war Cek tessin, maca Necc aqa ssneɣ Cek u ina ssnen aqa Cek tessekked ayi-dd.
JOH 17:26 Necc ssecneɣ asen Isem nnec u ad t ssecneɣ, ḥima tayri i zi tuɣa d ayi tᵉttexsed ad tiři daysen u Necc daysen.”
JOH 18:1 Awarni řami inna Yasuɛ aya, iffeɣ ak-d imeḥḍaren nnes, ẓwan x yeɣzar n Qidrun. Tuɣa din ijj n weḥwic, yudef ɣares ak-d imeḥḍaren nnes.
JOH 18:2 Maca uřa d Yahuda, aɣeddar, issen amcan nni ɛawed, minzi Yasuɛ tuɣa issmuna dayes aṭṭas ak-d imeḥḍaren nnes.
JOH 18:3 Yiwi-dd Yahuda akides ict n terbiɛt n řɛeskar uřa d iɛessasen zeg wudem n imeqqranen n ikehhanen d Ifarisiyyen, uca yusa-dd diha s iṣefḍawen d řeqnadeř d řesnaḥ.
JOH 18:4 Yasuɛ, wenni issen marra min d as ɣa imsaren, iffeɣ-dd [ɣarsen], inna asen: “Min xef tarezzum?”
JOH 18:5 Arrin-dd xas: “Yasuɛ Nnaṣiri!” Yasuɛ inna asen: “D NECC!” Tuɣa Yahuda, aɣeddar, ibedd ɛawed akidsen.
JOH 18:6 Řami d asen inna Yasuɛ: “D Necc!”, dewřen nitni ɣar ḍeffar uca wḍan ɣar temmurt.
JOH 18:7 Isseqsa ten Yasuɛ ɛawed: “Min xef tarezzum?” Nnan: “Yasuɛ Nnaṣiri!”
JOH 18:8 Yasuɛ yarra-dd: “Aqa nniɣ awem, aqa d Necc. Mařa tarezzum xafi, jjem ina ad raḥen!”,
JOH 18:9 ḥima ad ittwakemmeř wawař i tuɣa inna: “Inni d ayi tewcid, war zzaysen weddareɣ uřa d ijj.”
JOH 18:10 Cimɛun Buṭrus wenni tuɣa ɣares ssif, ijbed i-t-i-dd, iwta zzayes amsexxar n arrays n ikehhanen, iqess as amezzuɣ nnes afusi. Tuɣa amsexxar [nni] qqaren as Malxis.
JOH 18:11 [Xas uca] inna Yasuɛ i Buṭrus: “Arr ssif ɣar weɣřaf nnes, řkas nni d ayi iwca Baba, ma war t sesseɣ?”
JOH 18:12 Tarbiɛt n řɛeskar d imeqqranen x wařef [n iɛeskariyyen] uřa d iɛessasen n Wudayen ṭṭfen Yasuɛ, carfen t.
JOH 18:13 Nedhen t amezwaru ɣar Ḥannan, minzi netta d aḍeggʷař n Qayafa, wenni tuɣa d arrays n ikehhanen deg useggʷas nni.
JOH 18:14 Qayafa d netta tuɣa iweṣṣa i Wudayen, aqa ḥsen ad immet ijj n Bnadem di ṭṭweɛ n řgens.
JOH 18:15 Cimɛun Buṭrus iḍfar Yasuɛ ak-d ijjen zeg imeḥḍaren inneɣni. Ameḥḍar nni tuɣa ittwassnen ɣar arrays n ikehhanen uca yudef ak-d Yasuɛ ɣar řemraḥ n taddart [n arrays n ikehhanen].
JOH 18:16 Cimɛun ibedd-dd barra ɣar tewwart. Iffeɣ-dd umeḥḍar i tuɣa ittwassnen ɣar arrays n ikehhanen, issiweř ak-d tɛessast tenni iḥeṭṭan tawwart uca issidef-dd Cimɛun ɣar daxeř.
JOH 18:17 Tabřiɣt tenni iḥeṭṭan tawwart, tenna i Cimɛun: “Ma war teǧid uřa d cek zeg imeḥḍaren n bnadem-a?” Inna: “Lla!”
JOH 18:18 Tuɣa imsexxaren d iɛessasen bedden [din], ssarɣen timessi s řefḥem, minzi tuɣa tesmeḍ, uca tuɣa ttweqqaḥen. Uřa d Cimɛun ibedd akidsen, ittweqqaḥ.
JOH 18:19 Isseqsa arrays n ikehhanen Yasuɛ x imeḥḍaren nnes u x tɣuri nnes.
JOH 18:20 Yarra-dd xas Yasuɛ: “Necc tuɣa ssawařeɣ i řgens s bṭayṭay, ssɣareɣ řebda di temzida u di Zzawect Tameqqrant mani ttmunan Wudayen řebda. Di tnuffra war ssiwřeɣ uřa d ict n řḥajjet.
JOH 18:21 Mayemmi d ayi tesseqsid? Seqsa inni isřan min d asen nniɣ. Xzar, nitni ssnen min nniɣ!”
JOH 18:22 Řami inna ammu, xenni ijjen zeg iɛessasen i tuɣa din ibedden, iwta Yasuɛ x umeggiz nnes, inna as: “Ma ammu i dd ɣa tarred x arrays n ikehhanen?”
JOH 18:23 Yarra-dd xas Yasuɛ, inna: “Mařa ssiwřeɣ min war iḥřin, ched x min war iḥřin, maca mařa ssiwřeɣ mliḥ, mayemmi d ayi teccated [xenni]?”
JOH 18:24 [Xas uca] Ḥannan issekk i-t ittwacarf ɣar Qayafa, arrays n ikehhanen.
JOH 18:25 Tuɣa Cimɛun Buṭrus ibedd dinni ittweqqaḥ. Nnan as: “Ma war teǧid uřa d cek zeg imeḥḍaren nnes?” Netta inkar, inna: “War ǧiɣ ca d necc!”
JOH 18:26 Ijjen zeg imsexxaren n arrays n ikehhanen i tuɣa itteɛnan i wenni umi iqess Cimɛun amezzuɣ, inna: “Ma war cek ẓriɣ akides deg weḥwic?”
JOH 18:27 Řexdenni inkar Cimɛun ɛawed uca deɣya issquqeɛ uyaẓiḍ.
JOH 18:28 Xenni iwyen-dd Yasuɛ zi Qayafa ɣar taddart n ccreɛ, [umi qqaren ‘Prituriyum’]. Tuɣa d zic di ṣṣbeḥ. Nitni war udifen ca ɣar taddart n ccreɛ, ḥima war ttwessixen qbeř ma i ɣa ccen [Tɣarṣt n] Useɛdu.
JOH 18:29 [S uyenni] iffeɣ-dd ɣarsen Pilaṭus, inna asen: “Man acetci i ɣarwem x Weryaz-a?”
JOH 18:30 Arrin-dd, nnan as: “Mařa Wanita war tuɣi d mmis n řmuɛṣiyyet, ad tiři war d ac t-i-dd-nettiwi.”
JOH 18:31 Inna asen Pilaṭus: “[Xenni] awyem t-i-dd kenniw, tḥekmem xas ɛlaḥsab Ccariɛa nwem.” Xenni nnan as Wudayen: “War ɣarneɣ bu ttesriḥ maḥend ad neneɣ uřa d ijj!”,
JOH 18:32 ḥima ad ittwakemmeř wawař n Yasuɛ i tuɣa iqqar, am tuɣa isscanen i man řmewt i ɣa immet.
JOH 18:33 Xenni yudef-dd Pilaṭus ɛawed ɣar taddart n Ccraɛ, [umi qqaren Prituriyum], iřaɣa-dd x Yasuɛ, inna as: “Ma Cek d Ajeǧid n Wudayen?”
JOH 18:34 Yarra-dd xas Yasuɛ: “Ma teqqared aya zi ɣarek niɣ tuɣa inneɣni qqaren ac t xafi?”
JOH 18:35 Inna as Pilaṭus: “Ma necc d Uday? Aqa řgens nnec d imeqqranen n ikehhanen iwyen-dd Cek ɣari. Min tuɣa teggid?”
JOH 18:36 Yarra-dd xas Yasuɛ: “Tageldit inu war teǧi ca zi ddunect-a. Mařa teǧa Tgeldit inu zi ddunect-a, ad yiři aqa imsexxaren inu ad mmenɣen, ḥima war ttwasellameɣ i Wudayen, maca řexxu Tageldit inu war teǧi ca ssanita.”
JOH 18:37 Inna as Pilaṭus: “Xenni aqa Cek d Ajeǧid nican!” Yarra-dd Yasuɛ: “Cek teqqared, aqa Necc d Ajeǧid. I man aya i dd-xeřqeɣ u i uya i dd-usiɣ ɣar ddunect, ḥima ad cehdeɣ i tidett. Marra wenni iǧan zi tidett, ad iseř i tmijja inu.”
JOH 18:38 Inna as Pilaṭus: “Umi qqaren d tidett?” Řami inna ammu, iffeɣ-dd ɛawed ɣar Wudayen, inna asen: “War dayes ufiɣ uřa d ijj n uxeṭṭu.
JOH 18:39 Maca aqa tennumem ad awem sarrḥeɣ ijj n bnadem di [Řɛid n Tɣarṣt n] Useɛdu. Ma texsem xenni ad awem sarrḥeɣ Bnadem-a, Ajeǧid n Wudayen?”
JOH 18:40 Sɣuyyen ɛawed marra, nnan: “War iǧi ca Wanita, ḥaca Bar-Abbas!” Tuɣa Bar-Abbas d aqṭaṭɛiy.
JOH 19:1 Xenni [ijja] Pilaṭus ad hettken Yasuɛ s urekkuḍ.
JOH 19:2 Awarni řami muden iɛeskariyyen ijj n ttaj s isennanen, ssarsen as tt x uzeǧif nnes uca yarḍen as ijj n useřham d arjuwani,
JOH 19:3 nnan: “Sřam xak, [a] Ajeǧid n Wudayen!”, uca wtin t x igemmizen nnes.
JOH 19:4 Iffeɣ-dd ɛawed Pilaṭus, inna asen: “Ad awem t-i-dd-ssuffɣeɣ, ḥima ad tessnem belli necc war dayes ufiɣ ssibbet i ucetci, uřa d ict.”
JOH 19:5 [Xenni] iffeɣ-dd Yasuɛ s ttaj n isennanen d ujeǧab ajurwani. Inna asen Pilaṭus: “Xzarem, Bnadem!”
JOH 19:6 Řami t ẓrin imeqqranen n ikehhanen d iɛessasen, sɣuyen, nnan: “Ṣellb i-t, ṣellb i-t” Inna asen Pilaṭus: “Awyem t-i-dd kenniw, ṣellbem t, minzi necc war dayes ufiɣ uřa d ijj n řɛib.”
JOH 19:7 Arrin-dd xas Wudayen: “Ɣarneɣ Ccariɛa, u ɛlaḥsab Ccariɛa nneɣ ittxeṣṣa ad immet, minzi Netta ittarra Ixef nnes d Mmis n AREBBI.”
JOH 19:8 Řami isřa Pilaṭus awař-a, yarni di tiggʷudi.
JOH 19:9 Yudef ɛawed ɣar taddart n ccreɛ, inna i Yasuɛ: “Manis Cek?” Maca Yasuɛ war xas dd-yarri ca.
JOH 19:10 Inna as Pilaṭus: “Ma war [texsed ad] kidi tessiwiřed? Ma war tessined ca aqa ɣari ṣṣulṭa ḥima ad ac ssarrḥeɣ u ɣari ṣṣulṭa ḥima ad Cek ṣellbeɣ?”
JOH 19:11 Yarra-dd xas Yasuɛ: “War ɣarek tᵉttiři bu ṣṣulṭa xafi, mařa war d ac dd-temmewc zi sennej. S uya, wenni d ayi isellmen i cek, aqa xas ddenb imɣar zeg wenni [i iǧan] xak.”
JOH 19:12 Zi řexdenni tuɣa Pilaṭus yarezzu ad as isarreḥ, maca Udayen sɣuyen, nnan: “Mařa tsarrḥed i Weryaz-a, war teǧid ca d ameddukkeř n qayṣar. Kuř ijjen wenni ittarran ixef nnes d ajeǧid, ittɛekkas qayṣar.”
JOH 19:13 Řami isřa Pilaṭus i wawař-a, issuffeɣ Yasuɛ, iqqim x řkursi n ccreɛ deg wemcan umi qqaren ‘Azzay n luṣa’, maca qqaren as s Tɛibranit ‘Gpipta’.
JOH 19:14 Tuɣa d [ass n] Usewjed i [Tɣarṣt n] Useɛdu. Tuɣa ɛřaḥař d tsaɛɛet wiss setta [ɣar tuffut], řami inna i Wudayen: “Xzarem, Ajeǧid nwem!”
JOH 19:15 Maca nitni sɣuyen: “Ksi t, ksi t, ṣellb i-t!” Inna asen Pilaṭus: “Ma ad ṣellbeɣ [xenni] Ajeǧid nwem?” Arrin-dd xas imeqqranen n ikehhanen: “War ɣarneɣ bu ujeǧid mɣir qayṣar!”
JOH 19:16 Xenni isellem asen t ḥima ad t ṣellben. Uca nitni ksin Yasuɛ, iwyen t ssenni.
JOH 19:17 Yarbu ṣṣalib nnes ɣar wemcan umi qqaren ‘Taceqquft’, maca s Tɛibranit qqaren as ‘Juljuta’.
JOH 19:18 Ṣellben t dinni, uca ṣellben akides tnayen nneɣni, ijjen ɣar ijj n uɣezdis u wenneɣni ɣar uɣezdis nneɣni, u Yasuɛ di řwesṭ.
JOH 19:19 Yura Pilaṭus ɛawed deg ict teřwiḥt, issars i-tt x ṣṣalib. Ammu i ittwari [dayes]: ‘Wanita d Yasuɛ Nnaṣiri, Ajeǧid n Wudayen’.
JOH 19:20 Tira-ya ɣrin tent aṭṭas n Wudayen, minzi amcan mani tuɣa ṣellben Yasuɛ yudes-dd i tendint. [Tira-ya] ttwarint s Tɛibranit d Tlatinit d Tyunanit.
JOH 19:21 Nnan imeqqranen n ikehhanen i Pilaṭus: “War ttari ca: ‘Ajeǧid n Wudayen’, maca aqa inna: ‘Necc d Ajeǧid n Wudayen!’”
JOH 19:22 Yarra-dd Pilaṭus: “Min uriɣ, aqa uriɣ t.”
JOH 19:23 Řami ṣellben iɛeskariyyen Yasuɛ, ksin arruḍ nnes, bḍan t x arebɛa n tseqqar, i kuř aɛeskari ict n tesɣart. Maca tcamir nnes tuɣa břa taxeyyaḍt, tᵉttwaxeyyeḍ qaɛ zi sennej.
JOH 19:24 Nnan i wayawya: “War t nettcarrig ca, ad xas negg akeccuḍ, ad nẓar wi t ɣa yawyen!” Ammu i ittwakemmeř awař n Tira [Iqeddsen] i iqqaren: “Bḍan arruḍ inu jar asen u x tcamir inu ggin akeccuḍ.” Man aya i iggin iɛeskariyyen.
JOH 19:25 Ɣar ṣṣalib n Yasuɛ tbedd yemmas, d učmas n yemmas, d Maryam [tamɣart] n Kliyupas, d Maryam n Majdala.
JOH 19:26 Řami iẓra Yasuɛ yemmas d umeḥḍar wenni tuɣa ittexs, ibedd din, inna i yemmas: “[A] tamɣart, xzar, mmim!”
JOH 19:27 Řexdenni inna i umeḥḍar nni: “Aqa-c yemmac!” Zi tsaɛɛet nni iksi tt umeḥḍar [ɣar taddart nnes].
JOH 19:28 Awarni man aya issen Yasuɛ aqa kuřci ittwakemmeř, řexdenni inna, ḥima ad yiři [min yuran] di Tira [Iqeddsen]: “Necc ffudeɣ!”
JOH 19:29 Ittwamars din ijj n uɣarraf iccur s řxeǧ. Ssɣeḍṣen ict n spunxa [n hisub] s řxeǧ uca ggin tt x [ijj n uɣanim n] tɛelǧet, ssiwḍen as tt ɣar uqemmum nnes.
JOH 19:30 Řami iqqas Yasuɛ řxeǧ, inna: “Aqa ittwakemmeř!” Uca issaḍar azeǧif nnes, isellem Arruḥ nnes.
JOH 19:31 Umi tuɣa [ass n] Usewjed [n Tɣarṣt n Useɛdu], nnan Wudayen: “War iɛeddeř ad qqiment arrimat [nsen] x ṣṣalib di ssebt, minzi ssebt yudes-dd!”, minzi ass nni n ssebt tuɣa d ass ameqqran. S uya ttaren Wudayen zi Pilaṭus, ḥima ad arẓen iḍaren n yinni ittwaṣellben, ad ten ssiggʷejen ssenni.
JOH 19:32 [Xenni] usin-dd iɛeskariyyen, arẓin iḍaren n umezwaru u n wenneɣni i tuɣa ittwaṣelleb akides.
JOH 19:33 Maca řami dd-usin ɣar Yasuɛ, war arẓin ca iḍaren nnes umi ẓrin aqa immut.
JOH 19:34 Maca ijjen zeg iɛeskariyyen issnuqqeb i-t s ict n lansa deg uɣezdis nnes uca ffɣen-dd idammen d waman deɣya.
JOH 19:35 Wenni iẓrin man aya, tuɣa iched u cchadet nnes d tidett uca netta issen, aqa inna tidett, ḥima ad tamnem uřa d kenniw.
JOH 19:36 Timesřayin-a msarent, ḥima ad ttwakemmřent Tira [Iqeddsen] i iqqaren: “War zzayes ittareẓẓi yiɣes.”
JOH 19:37 Uca ijj n wawař nneɣni zi Tira [Iqeddsen] iqqar: “Nitni ad ẓaren Wenni t issnuqqben.”
JOH 19:38 Awarni man aya imsar aqa Yusuf zi Ramta, wenni tuɣa d ijj n umeḥḍar n Yasuɛ maca s tnuffra zi tiggʷudi zeg Wudayen, ittar as i Pilaṭus ttesriḥ ḥima ad iksi arrimet n Yasuɛ, uca Pilaṭus isarreḥ as. Xenni yusa-dd, iksi arrimet n Yasuɛ.
JOH 19:39 Yusa-dd ɛawed Nikudimus wenni tuɣa dd-yusin qbeř ɣar Yasuɛ s ǧiřet, yiwi-dd akides axeǧeḍ n řefwaḥet n mirru d wecfir ɛřaḥař mya litru.
JOH 19:40 Ksin nitni arrimet n Yasuɛ, řeḥḥfen tt di řecfun n řeqṭen [azdad] ak-d řeɛṭur, am mammec nnumen tteggen tt Wudayen i wenḍeř.
JOH 19:41 Tuɣa din ijj n weḥwic deg wemcan mani ṣellben Yasuɛ, uca deg weḥwic ijj n wenḍeř n jdid, ɛemmarṣ war dayes ssarsen uřa d ijj.
JOH 19:42 Ssarsen Yasuɛ din, minzi tuɣa yiweḍ-dd ssebt u minzi anḍeř [nni] tuɣa yudes.
JOH 20:1 Deg [wass] amezwaru n ssimana tusa-dd Maryam n Majdala di ṣṣbeḥ zic ɣar wenḍeř, tuɣa ɛad d taǧest. Teẓra taṣḍart aqa temmeksi x wenḍeř.
JOH 20:2 Tuzzeř-dd, tusa-dd ɣar Cimɛun Buṭrus u ɣar umeḥḍar nneɣni wenni umi tuɣa ittexs Yasuɛ, tenna asen: “Ksin Siditneɣ zeg wenḍeř, war ssineɣ mani t ggin.”
JOH 20:3 Iffeɣ-dd Cimɛun d umeḥḍar nneɣni uca usin-dd ɣar wenḍeř.
JOH 20:4 Nitni uzzřen s tnayen idsen, [maca] ameḥḍar [nneɣni] izwar i Cimɛun uca yiweḍ d amezwaru ɣar wenḍeř.
JOH 20:5 Ixzar, iẓra řecfun n řeqṭen [azdad] mmarsen [din], maca war yudif ca.
JOH 20:6 Iḍfar i-t Cimɛun, yudef ɣar wenḍeř, iẓra [ɛawed] řecfun n řeqṭen [azdad] mmarsen [din].
JOH 20:7 Amendiř nni tuɣa x uzeǧif nnes, war immars ca ak-d řecfun n řeqṭen [azdad], maca tuɣa iḍfeṣ, ittwagg deg wemcan weḥḥdes.
JOH 20:8 Řexdenni yudef-dd uřa d ameḥḍar nneɣni nni dd-yusin d amezwaru ɣar wenḍeř, iẓra uca yumen.
JOH 20:9 Minzi nitni tuɣa ɛad war ssinen Tira [Iqeddsen], belli ittxeṣṣa as ad ikkar jar imettinen.
JOH 20:10 Xenni dewřen imeḥḍaren nni ɣar taddart nsen.
JOH 20:11 Maryam teqqim tbedd ɣar wenḍeř barra, tᵉttru. Řami tuɣa tᵉttru, tesweḍ deg wenḍeř,
JOH 20:12 teẓra tnayen n lmalakat s warruḍ d acemřař, qqiment mani tuɣa temmars arrimet n Yasuɛ, ijjen ɣar tsummtin nnes n uzeǧif, ijjen ɣar iḍaren nnes.
JOH 20:13 Nnan as: “[A] tamɣart, mayemmi tᵉttrud?” Tenna asen: “Maɣar kksen Sidi inu, war ssineɣ mani t ssarsen.”
JOH 20:14 Umi tenna aya, tenneqřeb ɣar ḍeffar, teẓra Yasuɛ ibedd, maca war tessin ca aqa-t d Yasuɛ.
JOH 20:15 Yasuɛ inna as: “[A] tamɣart, mayemmi tᵉttrud? Min xef tarezzud?” Tᵉttɣiř as Netta d bab n teḥwict, tenna as: “[A] sidi mařa cek i-t iksin, ini ayi mani t tessarsed, [xenni] ad t ksiɣ.”
JOH 20:16 Yasuɛ inna as: “[A] Maryam!” Nettat tenneqřeb, tenna as s Tɛibranit: “[A] Rabbuli!”, ixs ad yini: ‘[A] Amseɣɣar inu’.
JOH 20:17 Yasuɛ inna as: “War d ayi tᵉttḥidi ca, aqa Necc ɛad war geɛɛdeɣ ca ɣar Baba, maca ruḥ ɣar aytma, ini asen: ‘Necc aqa ad geɛɛdeɣ ɣar Baba d Babatwem, ɣar AREBBI inu d AREBBI nwem.’”
JOH 20:18 Teɛqeb-dd Maryam n Majdala txebbar imeḥḍaren belli nettat teẓra Siditneɣ u belli Netta inna as man aya.
JOH 20:19 Ɣar tmeddit n wass nni, netta d [ass] amezwaru n ssimana, umi tuɣa tiwwura mani tuɣa [qqimen] imeḥḍaren qqnent s tiggʷudi zeg Wudayen, yudef-dd Yasuɛ, ibedd di řwesṭ nsen, inna asen: “Sřam xawem.”
JOH 20:20 Awarni řami inna aya, immeř asen ifassen nnes d uɣezdis nnes. Farḥen imeḥḍaren řami ẓrin Siditneɣ.
JOH 20:21 Inna asen ɛawed Yasuɛ: “Sřam xawem, am mammec d ayi dd-issekk Baba, ad kenniw dd-ssekkeɣ uřa d Necc.”
JOH 20:22 Awarni řami inna man aya, isuḍ daysen, inna asen: “Qebřem Arruḥ Iqeddsen.”
JOH 20:23 Wenni umi ɣa teɣfarem ddnub nnes, ad as ttwaɣfaren [ddnub nnes]. Wenni umi d as i ɣa tᵉṭṭfem di ddnub nnes, ad as ttwaṭṭfen [ddnub nnes].”
JOH 20:24 Maca Tuma, ijjen zi tenɛac, wenni umi qqaren ‘Acniw’, war tuɣi ca akidsen řami dd-yusa Yasuɛ.
JOH 20:25 Nnan as imeḥḍaren: “Aqa neẓra Siditneɣ!” Maca netta inna asen: “Mařa war ẓriɣ řimařt n imesmiren deg ifassen nnes, ad ssarseɣ aḍaḍ inu deg wemcan n imesmiren uca ad ssarseɣ afus inu deg uɣezdis nnes, war ttimneɣ.”
JOH 20:26 Awarni tmenya n wussan tuɣa imeḥḍaren [nnes] ɛawed ɣar daxeř u Tuma tuɣa akidsen. Yudef-dd Yasuɛ, waxxa tiwwura tuɣa qqnent, uca ibedd-dd di řwesṭ nsen, inna: “Sřam xawem!”
JOH 20:27 Inna i Tuma: “Awi-dd aḍaḍ nnec uca xzar deg ifassen inu, sars afus nnec [danita] u sidef i-t deg uɣezdis inu. War ttiři d akafriw, maca d řmumen.”
JOH 20:28 Yarra-dd Tuma, inna as: “A Sidi inu d AREBBI inu!”
JOH 20:29 Inna as Yasuɛ: “Umi teẓrid ayi řexxu, aqa tumned, [a] Tuma! Sseɛd n yinni yumnen, waxxa nitni war [d ayi] ẓrin.”
JOH 20:30 Yasuɛ igga aṭṭas n řeɛřamat nneɣni qibač i imeḥḍaren nnes, tinni war yurint ca deg wedlis-a,
JOH 20:31 maca tina urant ḥima ad tamnem belli Yasuɛ Netta d Lmasiḥ, Mmis n AREBBI, uca xmi ɣa tamnem, ad ɣarwem tiři Tudart s Yisem nnes.
JOH 21:1 Awarni uya tuɣa Yasuɛ immeř ixef nnes ɛawed i imeḥḍaren nnes ɣar řebḥar n Tibiriyas, iḍhar-dd ammu.
JOH 21:2 Tuɣa [din] jmiɛ Cimɛun Buṭrus d Tuma, wenni umi qqaren ‘Acniw’, d Natanayil, wenni tuɣa zi Qana di temmurt n Ljalil, d tarwa n Zabdi uřa d tnayen nneɣni zeg imeḥḍaren [nnes].
JOH 21:3 Inna asen Cimɛun Buṭrus: “Necc ad raḥeɣ ad gmareɣ [iseřman].” Nnan as: “Ad kik nraḥ uřa d neccin.” Ffɣen-dd uca nyin deɣya di tɣarrabut. Di ǧiřet nni war ṭṭifen walu.
JOH 21:4 Ɣar tuffut, ibedd-dd Yasuɛ x tma n řebḥar, maca imeḥḍaren war ssinen ca aqa d Yasuɛ.
JOH 21:5 Inna asen Yasuɛ: “[A] iḥenjiren, ma ad taɣ ɣarwem ca n macca?” Arrin-dd xas “Lla!”
JOH 21:6 Inna asen: “Nḍarem tracca nwem ak-d uɣezdis afusi n tɣarrabut, ad tafem.” Xenni nḍaren [tracca] uca war zemmaren ad tt-i-dd-jebden zi ssibbet n ubarru n iseřman i dayes ittwaṭṭfen.
JOH 21:7 Inna umeḥḍar wenni tuɣa ittexs Yasuɛ i Buṭrus: “Aqa Netta d Siditneɣ.” Řami isřa Cimɛun aqa Netta d Sidi, iṭṭef tcamir nnes minzi tuɣa d aɛaryan, inḍar ixef nnes di řebḥar ařami ɣa dd-iqarreb ɣar Yasuɛ.
JOH 21:8 Maca imeḥḍaren inneɣni usin-dd s tɣarrabut minzi war iggʷijen ca x řbarr mɣir mitayen n iɣaǧen, uca jebden-dd tracca ak-d iseřman.
JOH 21:9 Řami dd-ffɣen ɣar řbarr, ẓrin diha aqa ittwassewjed ijj n ufennic n řefḥem mixef mmarsen iseřman d weɣrum.
JOH 21:10 Inna asen Yasuɛ: “Awyem-dd zeg iseřman i tegmarem řexxu.”
JOH 21:11 Cimɛun Buṭrus yuyur, ijbed tracca teccur s iseřman imeqqranen ɣar řbarr, aqa-tt dayes mya u-třata u-xemsin. Waxxa dayes s wanect uya [aṭṭas], war tcarreg ca tracca.
JOH 21:12 Inna asen Yasuɛ: “Araḥem-dd da, ad tariyyqem!” Uřa d ijj zeg imeḥḍaren war izɛim ad t isseqsa ‘Min teɛnid Cek?’, minzi ssnen aqa-t d Siditneɣ.
JOH 21:13 Řexdenni yusa-dd Yasuɛ, iksi aɣrum d iseřman, iwca asen.
JOH 21:14 Wanita d twařa wiss třata i dd-iḍhar Yasuɛ i imeḥḍaren nnes awarni řami dd-ittwassnekkar zi taddart n imettinen.
JOH 21:15 Awarni řami ariyyqen, inna Yasuɛ i Cimɛun Buṭrus: “[A] Cimɛun, mmis n Yuna, ma tᵉttexsed ayi ktar zeg yina?” Inna as: “Wah, a Sidi, Cek tessned aqa necc ttexseɣ Cek.” Inna as: “Arwes izmaren inu!”
JOH 21:16 Inna as ɛawed i twařa wiss tnayen: “[A] Cimɛun, mmis n Yuna, ma tᵉttexsed ayi?” Inna as: “Wah [a] Sidi, Cek tessned aqa necc ttexseɣ Cek.” Inna as: “Arwes icarriyyen inu!”
JOH 21:17 Inna as i twařa wiss třata: “[A] Cimɛun, mmis n Yuna, ma tᵉttexsed ayi?” Icḍen Buṭrus minzi inna as t twařa wiss třata: ‘Ma tᵉttexsed ayi?’, uca inna as: “[A] Sidi, Cek tessned kuřci, tessned aqa necc ttexseɣ Cek.” Inna as Yasuɛ: “Arwes tixsiwin inu!
JOH 21:18 S tidett, s tidett, Necc ad ac iniɣ: Řami cek tuɣa d ameẓyan, tbeysed i yixef nnec, truḥed mani texsed, maca x minni i ɣa tewsared, ad tesswiẓẓḍed ifassen nnec uca wenneɣni ad cek ibyes uca ad cek yawi ɣar mani war tᵉttexsed.”
JOH 21:19 Inna ammu ḥima ad isscen i man řmewt i zi ɣa issɛuǧ AREBBI. Awarni řami [d as] inna ammu, inna as: “Ḍfar ayi-dd!”
JOH 21:20 Inneqřeb Cimɛun Buṭrus, iẓra ameḥḍar nni tuɣa ittexs Yasuɛ, iḍfar i-t, netta d wenni tuɣa yarra ixef nnes ad imeyyeř ɣar idmaren n Yasuɛ ɣar umensi i innan: “[A] Sidi inu, wi Cek i ɣa iɣdaren?”
JOH 21:21 Řami iẓra Buṭrus wa, inna i Yasuɛ: “[A] Sidi, i wa, min d as ɣa imsaren?”
JOH 21:22 Inna as Yasuɛ: “Mařa xseɣ ad iqqim ař dd ɣa ɛeqbeɣ, min d ac iruḥen? Cek ḍfar ayi-dd!”
JOH 21:23 Uca iffeɣ-dd wawař-a jar wawmaten belli ameḥḍar nni war ittmetti ca, maca Yasuɛ war d as inni ca belli netta war ittmetti ca, maca: “Mařa xseɣ ad iqqim ař dd ɣa ɛeqbeɣ, min d ac iruḥen?”
JOH 21:24 D wa d ameḥḍar i icehhden s man aya uca netta yura man aya, u neccin nessen aqa cchadet nnes d tidett.
JOH 21:25 Aqa din ɛad aṭṭas n tmesřayin nneɣni i igga Yasuɛ. Mařa ttwarint ict awarni tenneɣnit, ittɣiř ayi, ad tiři ddunect simant nnes war dayes ca ttasiɛ ḥima ad teksi idlisen i ɣa ittwarin. Amin! Aneggar n L’Injil Iqeddsen am mammec t ibarreḥ Yuḥanna. Aneggar n tira n idlisen n arebɛa n [idlisen] n L’Injil. Aɛuǧi i Babas, i Mmis u i Arruḥ Iqeddsen, řexxu, řebda u i řebda n řebdat.
ACT 1:1 Adlis amezwaru i uriɣ, [a] Tiyufilis, [uriɣ t] x marra min ibda Siditneɣ Yasuɛ Lmasiḥ ad igg u ad isseřmed,
ACT 1:2 ař ass i di immeksi [ɣar ujenna], awarni řami iweṣṣa i rrusul i tuɣa yixḍar Netta s Arruḥ Iqeddsen,
ACT 1:3 inni umi, awarni řami tuɣa iweddeb, isscen asen Ixef nnes s waṭṭas n řeɛřamat belli aqa iddar, am d asen dd-iḍhar arebɛin n wussan, issawař x Tgeldit n AREBBI.
ACT 1:4 Řami akidsen icca aɣrum, iweṣṣa ten ḥima war dd-tteffɣen ca zi Urcalim, maca ad qqimen ad rajan lwaɛd n Baba i tuɣa kenniw, [ammu i inna,] “tesřim zzayi,
ACT 1:5 minzi Yuḥanna tuɣa isseɣḍaṣ deg waman, [maca] kenniw ad ttwassɣeḍṣem di Arruḥ Iqeddsen awarni drus n wussan.”
ACT 1:6 Xenni sseqsan t inni tuɣa din imunen, nnan: “[A] Siditneɣ, ma di řweqt-a ad dd-tarred Tageldit i Israil ɛawed?”
ACT 1:7 Inna asen: “War d awem dd-yusi ad taregbem x zzman d zzmanat i igga Baba di ṣṣulṭa n Yixef nnes.
ACT 1:8 Maca kenniw ad teksim jjehd xmi xawem dd ɣa ihwa Arruḥ Iqeddsen uca kenniw ad tiřim d řechud di Urcalim, di marra Yahudiyya, di Samarya, [wah,] ař ineggura n ddunect.”
ACT 1:9 [Awarni řami] inna aya, immeksi uca, am t ẓrin nitni, iksi t ijj n useynu, idweř inuffar x tiṭṭawin nsen.
ACT 1:10 Am d as sseḍfaren s tiṭṭawin nsen am iruḥ ɣar ujenna, [xzar], aqa bedden ɣarsen tnayen n yeryazen arḍen arruḍ d acemřař,
ACT 1:11 uca nnan asen: “[A,] iryazen zi Ljalil, min kenniw ideɛwen tᵉttbeddam txezzarem ɣar ujenna? Aqa Yasuɛ wanita, wenni immeksin xawem ɣar ujenna, ad dd-iɛqeb am mammec t teẓrim igeɛɛed ɣar ujenna!”
ACT 1:12 Xenni ɛeqben ɣar Urcalim zeg wedrar umi qqaren ‘Taddart n Zzitun’ i iǧan zzat i Urcalim, iggʷej xas ɛřaḥař sebɛa ‘istadiyyen’, [ixs ad yini ɛřaḥař ijj n kilumitr u třata meyya mitr].
ACT 1:13 Awarni řami dd-udfen [ɣar tendint], geɛɛden ɣar tɣurfet sennej mani tuɣa ttɣiman nitni: Buṭrus, Yuḥanna, Yaɛqub, Andrawus, Filippus, Tuma, Matta, Bar-Tulumawus, Yaɛqub mmis n Ḥalfa, Cimɛun umi qqaren ‘Amɛessab’, d Yahuda, mmis n Yaɛqub.
ACT 1:14 Ina marra idsen tuɣa ṣbaren s yijj n dmam x tẓaǧit, ak-d temɣarin u ak-d Maryam, yemmas n Yasuɛ, u ak-d aytmas.
ACT 1:15 Deg wussan nni ikkar Cimɛun Buṭrus jar asen, di řwesṭ n imeḥḍaren. Tuɣa din munen ɛřaḥař mya u-ɛicrin n iwdan, u netta inna:
ACT 1:16 “[A] iryazen tawmat, tuɣa ittxeṣṣa nican ad ittwakemmeř [awař] n Tira [Iqeddsen] i ittwannan qbeř s Arruḥ Iqeddsen s uqemmum n Dawud x Yahuda, wenni idewřen d amgewwed n yinni iḥebbsen Yasuɛ,
ACT 1:17 minzi netta tuɣa ittwaḥseb zzayneɣ, [zi tenɛac], u tuɣa iṭṭef tasɣart di tsexxart-a.
ACT 1:18 Aqa wa tuɣa ikesseb ijj n iyyar i yixef nnes s řmunet n ddenb [nnes] uca umi iwḍa x uɣembub nnes ɣar temmurt, aqa ifeǧeq ɣar tejɛinnatin nnes uca ffɣen-dd marra adan nnes ɣar barra.
ACT 1:19 Aqa man aya idweř ittwassen ɣar marra imezdaɣ n Urcalim ařami semman iyyar nni deg iřes n temmurt nsen ‘Ḥaql-Dama’, min ixs ad yini ‘Iyyar n idammen’.
ACT 1:20 Minzi tura deg wedlis n Izehhiden [n Dawud]: ‘Ad tedweř taddart nnes d řxarbet, uřa d ijj war dayes izeddeɣ!’ uca: ‘Ad iksi wenneɣni tasexxart nnes.’
ACT 1:21 S uyenni ittřiq, aqa ijjen zeg yeryazen inni tuɣa d imɛacaren akidneɣ kuř řweqt i di tuɣa Siditneɣ Yasuɛ ittadef u itteffeɣ jar aneɣ -
ACT 1:22 zeg useɣḍeṣ n Yuḥanna ař ass i di immeksi xaneɣ - ad idweř d acehhad akidneɣ x tnukra nnes.”
ACT 1:23 Areccḥen tnayen: Yusuf, umi qqaren Bar-Saba wenni umi ttkennan Yustus, d Mattiya.
ACT 1:24 Am tuɣa ttẓaǧan, nnan: “[A] SIDI, Cek tessned uřawen n marra, scen [aneɣ] man wen zi tnayen-a i tixḍared,
ACT 1:25 ḥima ad icarc di tsexxart-a u di řxedmet n rrusul i di ismeḥ Yahuda ḥima ad iraḥ ɣar wemcan nnes.”
ACT 1:26 Xenni ggin akeccuḍ uca yusa-dd [ukeccuḍ] x Mattiya uca arnin t ɣar ḥiṭac n rrusul.
ACT 2:1 Umi kemmřen wussan ař Řɛid n Xemsin n Wussan, tuɣa aten marra jmiɛ munen.
ACT 2:2 X ict n řɣefřet yusa-dd ijj n zzhir zeg ujenna, igga axmi d asemmiḍ ijehden aṭṭas, iccur marra taddart mani tuɣa qqimen.
ACT 2:3 Uca ḍharen asen-dd iřsawen am n tmessi nni ittemsebḍan, arsin x kuř ijjen zzaysen,
ACT 2:4 u marra nitni dewřen ccuren s Arruḥ Iqeddsen, bdan ad ssiwřen s ijj n yiřes nneɣni am mammec d asen iwca Arruḥ ad zzaysen neṭqen.
ACT 2:5 Tuɣa ttɣiman di Urcalim iryazen nni ittegʷeden AREBBI, Udayen zi marra řegnus sadu ujenna.
ACT 2:6 Umi ikkar zzhir-a, imun marra řgens [dinni] uca tbehten, minzi kuř ijj tuɣa ittesřa asen ssawařen s yiřsawen nsen [ifarzen].
ACT 2:7 Dehcen, tbehten marra, nnan jar asen: “Ma war ǧin marra ina inni [din] issawařen d Ijaliliyyen?
ACT 2:8 Mammec d asen nesřa neccin, kuř ijj zzaysen, [ssawařen] s yiřes i zi dd-netwaxřeq?
ACT 2:9 Ipartiyyen d Imidiyyen d Iɛilamiyyen d imezdaɣ n Misuputamya, [tenni d tammurt jar tnayen n iɣezran], d Wudayen d inni zi Kappadukiya, inni dd-yusin zi jjwayeh n Punṭus d Asiya,
ACT 2:10 zi jjwayeh n Frixiya, Pamfiliya d Miṣra u zi jjwayeh n Libiya ɣar Qayrawan, uřa d inni dd-yusin zi Ruma, am Udayen am yinni idewřen d imɛacaren n ddin n Wudayen,
ACT 2:11 inni[dd-yusin] zi Krita u [zi] Ɛarabiyya, aqa neccin nesřa asen ssawařen s yiřes nneɣ x řeɛjayeb imeqqranen n AREBBI!”
ACT 2:12 Marra tbehten uca nnan ijj i wenneɣni: “Min ixs ad yini man aya?”
ACT 2:13 Maca inneɣni sthezzan zzaysen, nnan: “Nitni swin binu n jdid.”
ACT 2:14 Awarni as ikkar Cimɛun Buṭrus, ak-d ḥiṭac n rrusul. Netta issgeɛɛed tmijja nnes, inna asen: “[Kenniw], [a] iryazen d Udayen u marra imezdaɣ n Urcalim, ittxeṣṣa ad snem aya, sřem ɣar wawařen inu!
ACT 2:15 [Iwdan-a] war scaren ca am mammec d awem ittɣiř, minzi aqa-tt d tasaɛɛet d třata [n wass].
ACT 2:16 Maca aya min ittwannan zeg unabi Yuwil:
ACT 2:17 ‘Ad yiři deg wussan ineggura, iqqar AREBBI, aqa ad farrɣeɣ Arruḥ inu x marra ddat. Ad nebban iḥenjiren nwem d tḥenjirin nwem, ibřiɣen nwem ad twařan iweḥḥan, uca imeqqranen nwem ad arjan tirja.
ACT 2:18 Uřa x imsexxaren inu u x tiyya inu ad farrɣeɣ Arruḥ inu deg wussan nni, uca ad nebban.
ACT 2:19 Ad wceɣ lmuɛjizat deg ujenna uřa d řeɛřamat x temmurt: idammen d tmessi d řefwar n ddexxan.
ACT 2:20 Ad tedweř tfuct ɣar taǧest, d tziri ɣar idammen, qbeř dd ɣa yas wass imɣaren iɛuǧen n SIDI.
ACT 2:21 Uca ad yiři, aqa marra wi ɣa iřaɣan x Yisem n SIDI, ad ittwassenjem!’
ACT 2:22 [A] iryazen, ayt n Israil, sřem awařen-a: Yasuɛ Nnaṣiri, aqa-t d Bnadem i d awem dd-ittwasscanen zi AREBBI s tmegga timeqqranin d řeɛřamat d lmuɛjizat i yegga AREBBI s ufus nnes di řwesṭ nwem, am mammec tessnem kenniw,
ACT 2:23 aqa Wanita, wenni ittwaḥuzen i man aya i Netta ɛlaḥsab tussna n AREBBI qbeř u ɛlaḥsab řxaḍar nnes, aqa kenniw tsellmem t deg ifassen n iɛeffanen u tṣellbem t u tenɣim t.
ACT 2:24 Maca issnekkar i-t-i-dd AREBBI uca issarxu iseɣwan n řaxart, maɣar war izemmar ad ittwaṭṭef di řaxart.
ACT 2:25 Minzi Dawud inna xas: ‘Tuɣa ttwařiɣ Sidi zzati di kuř amur, aqa-t x yefus inu, ḥima war ttmeyyiřeɣ.
ACT 2:26 S uya ifarreh uř inu uřa d asemɣar inu ifeyyeḍ s řefraḥet, uřa d arrimet inu ad yareyyeḥ x usitem wanita,
ACT 2:27 minzi war tᵉttejjid řeɛmar inu di řaxart, uřa war tᵉttejjid Amsizdeg nnec ad ikiccu.
ACT 2:28 Cek tessecned ayi abrid n Tudart, Cek ad ayi teccured s řefraḥet di lḥaḍar nnec.’
ACT 2:29 [A] iryazen tawmat, aqa teɛdeř ayi ad awem ssiwřeɣ s bṭayṭay x arrays n řejdud [nneɣ] Dawud, wenni aqa immut, ittwanḍeř, uca anḍeř nnes aqa-t ɣarneɣ ař ass-a.
ACT 2:30 Maɣar netta tuɣa d anabi, issen belli AREBBI ijjuǧ as s ict n tjaǧit: ‘Ad ssɣimeɣ ijjen zi řɣiǧet n tɛeddist nnec x řkursi n řɛarc nnes.’
ACT 2:31 Ammu tuɣa netta izwar iẓra uca issiweř x tnukra n Lmasiḥ, belli war ittwajji ca di řaxart uca arrimet nnes war tᵉttaci akiccu.
ACT 2:32 Yasuɛ wanita aqa issnekkar i-t-i-dd AREBBI u neccin marra d řechud nnes.
ACT 2:33 Netta ittwassgeɛɛed ař [a]fus afusi n AREBBI uca iṭṭef lwaɛd n Arruḥ Iqeddsen zi Babas. Aqa ifarreɣ tawhibt-a [řexxu] am mammec tᵉttwařam u tᵉttesřam.
ACT 2:34 Dawud maca war igeɛɛed ca ɣar ijenwan, maɣar inna: ‘SIDI inna i Sidi inu: Qqim x yefus inu,
ACT 2:35 ař d ɣa ggeɣ řɛedyan nnec d tanebdat sadu iḍaren nnec.’
ACT 2:36 Ad tessen marra taddart n Israil nican, belli AREBBI igga Yasuɛ wanita, wenni tṣellbem kenniw, d SIDI d Lmasiḥ.”
ACT 2:37 Řami sřin man aya, tudef asen deg wuř nsen daxeř, nnan i Cimɛun u i rrusul nneɣni: “Min ɣa negg, a tawmat nneɣ?”
ACT 2:38 Inna asen Cimɛun: “Tubem, ejj kuř ijjen zzaywem ad ittwasseɣḍeṣ s Yisem n SIDI Yasuɛ i weɣfar n ddnub, uca ad tqebřem tawhibt n Arruḥ Iqeddsen.
ACT 2:39 Minzi lwaɛd i kenniw u i tarwa nwem u i marra inni iǧan ɣar řaggʷaj, inni x i d ɣa iřaɣa AREBBI nneɣ.”
ACT 2:40 Uca s wawařen nneɣni aṭṭas tuɣa isseqneɛ u iɛřem asen, inna: “Nejmem zi taṣiřet-a ifarɣen.”
ACT 2:41 Tuɣa jar asen inni iwejden ad qebřen awař nnes uca ttwassɣeḍṣen nitni. Mmarnin-dd deg wass nni ɛřaḥař teřt-ařaf n řeɛmur.
ACT 2:42 Nitni qqimen ṣbaren di tɣuri n rrusul u carrcen di tẓaǧit u di tareẓẓit n weɣrum n nniɛmet.
ACT 2:43 Kuř ijjen tudef i-t tiggʷudi uca msarent lmuɛjizat d řeɛřamat aṭṭas s ifassen n rrusul di Urcalim.
ACT 2:44 Marra inni yumnen tuɣa aten munen jmiɛ, u marra min ɣarsen tuɣa icarc.
ACT 2:45 Inni ɣar iǧa wagřa tuɣa zznuzan man aya uca beṭṭan [arbeḥ] ɛlaḥsab min iḥdaj kuř ijj.
ACT 2:46 Tuɣa ttmunen kuř ass di Zzawect Tameqqrant s dmam d ijjen, ttareẓẓan aɣrum di tudrin, ksin macca nsen s řefraḥet u s wuř iṣfa,
ACT 2:47 am ssemɣaran di AREBBI u tuɣa ttwassɛizzen ɣar marra iwdan. Kuř ass tuɣa Siditneɣ yarenni ɣar tmesmunt inni iwḍen ɣar Tudart.
ACT 3:1 D man aya imsar umi geɛɛden Cimɛun Buṭrus d Yuḥanna jmiɛ ɣar Zzawect Tameqqrant di tsaɛɛet n tẓaǧit tenni d wiss tesɛa, [ixs ad yini d třata awarni ḍḍhur].
ACT 3:2 Xzar, tuɣa din ijj n weryaz d aneɛḍab zeg uɛeddis n yemmas, arbun t inni innumen ad t-i-dd-awyen, ssɣiman t ɣar tewwart n Zzawect Tameqqrant umi qqaren ‘Tawwart Taṣebḥant’, ḥima ad ittar ṣṣedqet zeg inni ittadfen ɣar Zzawect Tameqqrant.
ACT 3:3 Aqa wa, umi iẓra belli Cimɛun d Yuḥanna ttadfen ɣar Zzawect Tameqqrant, ittar zzaysen ḥima ad as wcen ict n ṣṣedqet.
ACT 3:4 Cimɛun ak-d Yuḥanna nḍaren dayes tiṭṭawin, nnan as: “Xzar dayneɣ!”
ACT 3:5 Netta iqceɛ daysen, ittraja ad zzaysen iṭṭef ca.
ACT 3:6 Inna as Cimɛun: “Nnuqart d wureɣ war ɣari ǧin, maca min ɣari d man aya i d ac ɣa wceɣ s Yisem n Yasuɛ Lmasiḥ Nnaṣiri! Kkar, tuyured!”
ACT 3:7 Iṭṭef i-t zeg ufus nnes afusi uca issnekkar i-t. Řexdenni menɛen iḍaren nnes d ticeɛbin nnes,
ACT 3:8 uca ingez uca ibedd [x iḍaren], iggur uca yudef akidsen ɣar Zzawect Tameqqrant, iggur, ineggez, issemɣara di AREBBI.
ACT 3:9 Marra řgens iẓra i-t iggur, issemɣara di AREBBI.
ACT 3:10 Ssnen [iwdan] aqa netta d wenni tuɣa ittɣiman ittettar kuř ass ɣar Tewwart n Zzawect Tameqqrant umi qqaren ‘Taṣebḥant’ uca nitni dewřen ccuren s wedhac d utebhet x min d as imsaren.
ACT 3:11 Am tuɣa [aryaz aneɛḍab] ittcebbar di Cimɛun d Yuḥanna, dduqqzen xasen marra iwdan ɣar useqqif ak-d ukulwar d ipilaren, umi qqaren ‘aseqqif n Suliman’, tbehten.
ACT 3:12 Umi iẓra Cimɛun aya, iṭṭef deg wawař, inna asen: “[A] iryazen, iḥenjiren n Israil, min kenniw ideɛwen tᵉttbehtem s uya? Mayemmi dayneɣ tejɛarem axmi s jjehd n yixef nneɣ niɣ s ṣṣulṭa n yixef nneɣ narra i-t iggur?
ACT 3:13 AREBBI n Ibrahim d Isḥaq d Yaɛqub, AREBBI n řejdud nneɣ, aqa issɛuǧa Mmis Yasuɛ wenni tsellmem u tmenḍarem zzat n wudem n Pilaṭus wenni tuɣa xas iḥkem s ijj n řḥukm iseggden u tuɣa ixs ad as yarxu.
ACT 3:14 Maca kenniw aqa temmenḍarem Amqeddas d Amseggad, tzawgem ad awem immewc aryaz aqettař.
ACT 3:15 Aqa tenɣim Azeǧif n Tudart, wenni dd-issnekkar AREBBI zi taddart n imettinen, aqa neccin marra d řechud x man aya.
ACT 3:16 S l’iman deg Yisem nnes, aqa issejhed u issgenfa Netta wa, wenni tᵉttwařam, tessnem t. L’iman dayes aqa iwca as agenfi-ya zzatwem marra.
ACT 3:17 Řexxu, [a] aytma, ssneɣ, aqa teggim aya s tqubbanect, am mammec i ggin uřa d imeqqranen nwem.
ACT 3:18 Ammu aqa ikemmeř AREBBI min tuɣa issizwar ixebbar xas s uqemmum n marra inabiyyen belli Lmasiḥ iggur ad iweddeb.
ACT 3:19 S uyenni tubem, tdewřem [ɣar webrid] ḥima ad awem ttwamesḥen ddnub nwem uca xenni ad dd-asen zzmanat n arraḥet zzat i wudem n SIDI,
ACT 3:20 uca Netta ad awem dd-issekk wenni iwejden i kenniw [i man aya]: Yasuɛ Lmasiḥ,
ACT 3:21 wenni ittxeṣṣa ujenna ad t iqbeř ař ukemmeř n zzmanat, n marra min xef tuɣa issawař AREBBI s uqemmum n marra inabiyyen nnes iqeddsen zi zzman.
ACT 3:22 Maɣar Musa inna: ‘SIDI ad awem dd-issgeɛɛed ijj n Unabi am necc zeg wawmatwem. I Netta umi ɣa tesřem di marra mixef d awem i ɣa issiweř.’
ACT 3:23 Ad yiři belli kuř řeɛmar i war isřin ɣar Unabi nni, ad ittwasshellek zeg řgens.
ACT 3:24 Marra inabiyyen zi Camwil d [marra inabiyyen] nni i-t-i-dd-ixeřfen, aqa izwaren xebbaren x wussan-a.
ACT 3:25 Kenniw d ayt n inabiyyen u n Řɛahd i igga AREBBI ak-d řejdud nwem řami tuɣa iqqar i Ibrahim: ‘S zzariɛet nnec ad ttwabarkent marra tiqebbař n temmurt!’
ACT 3:26 Zic igga Netta [Řɛahd nnes] akidwem uca issekk-dd AREBBI řexxu Mmis maḥend ad awem ibarek, mařa ad tdewřem, ad tᵉtubem zi řɣar nwem.”
ACT 4:1 Am tuɣa ssawařen awařen-a ak-d řgens, xeccen-dd xasen ikehhanen ak-d Iṣaduqiyyen d imeqqranen x Zzawect Tameqqrant,
ACT 4:2 minzi tuɣa xeyyqen xasen aṭṭas, maɣar nitni tuɣa sseřmaden řgens u ttbarrḥen tanukra zi taddart n imettinen s Lmasiḥ.
ACT 4:3 Ssarsen xasen ifassen uca ḥebbsen ten ař tiwecca nnes, minzi tuɣa tewḍa-dd tmeddit.
ACT 4:4 Aṭṭas zeg inni isřin awař-a umnen u řqedd n yeryazen yiweḍ-dd ɛřaḥař xemsa-ařaf.
ACT 4:5 Tiwecca nnes munen imeqqranen d imɣaren [n řgens] d imseřmaden n idlisen di Urcalim,
ACT 4:6 uřa d Ḥannan, arrays n ikehhanen, d Qayafa d Yuḥanna d Aliksandir d [marra] inni tuɣa dd-iqqarṣen zi řaǧ n imeqqranen n ikehhanen.
ACT 4:7 Umi ten ssbedden di řwesṭ, sseqsan ten: “S man jjehd niɣ s man isem i teggim aya?”
ACT 4:8 Řexdenni inna asen Cimɛun Buṭrus iccuren s Arruḥ Iqeddsen: “Sřem, [a] imeqqranen n řgens d imɣaren n taddart n Israil!
ACT 4:9 Mařa ass-a nettwaḥkem zzaywem x řxar i ittwaggen i umehřuc, s min zi idweř weryaz-a iggenfa,
ACT 4:10 ittxeṣṣa ad tessnem kenniw d marra řgens n Israil belli aryaz wanita ibedd zzatwem iṣeḥḥ s Yisem n Yasuɛ Lmasiḥ Nnaṣiri, wenni tṣellbem, [maca] wenni dd-issnekkar AREBBI zi taddart n imettinen, [wah,] aqa zzayes ibedd [aryaz-a] zzatwem iṣeḥḥ.
ACT 4:11 D wa d Aẓru nni temmenḍarem [kenniw], [a] ibennayen, [maca] Netta aqa idweř d [aẓru] Azeǧif n teɣmart.
ACT 4:12 Asenjem war iǧi s ijjen bnadem nneɣni, minzi war din Isem nneɣni sadu ujenna i zi ɣa nettwassenjem.”
ACT 4:13 Řami sřin awařen i ssiwřen Cimɛun d Yuḥanna s bṭayṭay, uca ufin belli nitni war ǧin d imusnawen n Wedlis niɣ d iwdan inni iřemden aṭṭas, aqa tbehten uca ɛeqřen belli nitni tuɣa aten ak-d Yasuɛ.
ACT 4:14 Nitni ẓrin bnadem i tuɣa d aneɛḍab uca idweř iggenfa, ibedd akidsen, uca war ufin min ɣa inin x man aya.
ACT 4:15 U awarni řami umuren maḥend ad ten ssuffɣen barra i Jmaɛet nsen [Tameqqrant], mcawaren ak-d wayawya, [nnan]:
ACT 4:16 “Min ɣa negg s iryazen-a? Minzi aqa iban-dd mliḥ i marra imezdaɣ n Urcalim belli řeɛřamet temsar s ufus nsen, war nzemmar ad tt nenkar.
ACT 4:17 Maca ḥima war ittwabarreḥ řexbar-a ktar jar weydud, ejj aneɣ ad ten nessiggʷed ḥima war ssiwiřen ɛemmarṣ ɛawed deg Yisem-a, uřa ak-d ijj n bnadem.”
ACT 4:18 [Xas uca] řaɣan-dd xasen, umuren ten maḥend war ssiwiřen war sseřmiden ɛemmarṣ ɛad deg Yisem n Yasuɛ.
ACT 4:19 Maca Cimɛun Buṭrus d Yuḥanna arrin-dd xasen, nnan asen: “Ḥekmem kenniw, ma iḥiqq zzat i AREBBI maḥend ad nseř ktar i kenniw x AREBBI,
ACT 4:20 minzi war nzemmar ad neqqim war nessiwiř x min neẓra u x min nesřa.”
ACT 4:21 Maca nitni ssiggʷeden ten [ɛad ktar], xenni jjin ten ad raḥen, ařami war ufin min zi ten i ɣa ɛaqben zi ssibbet n iwdan, minzi marra [iwdan] tuɣa ssemɣaran di AREBBI x min imsaren,
ACT 4:22 minzi aryaz i dayes ittwagg řeɛřamet-a n ugenfi, tuɣa ɣares ktar zi arebɛin n iseggʷusa.
ACT 4:23 Awarni řami d asen arxun, ruḥen nitni ɣar aytmatsen uca xebbaren ten s marra min d asen nnan imeqqranen n ikehhanen d imɣaren [n řgens].
ACT 4:24 Umi sřin aya, ssgeɛɛden tmijja nsen ɣar AREBBI s dmam d ijjen, nnan: “[A] SIDI, Cek d AREBBI wenni iggin ajenna d temmurt d řebḥur d marra min dayes,
ACT 4:25 Cek d Wenni innan s Arruḥ Iqeddsen s uqemmum n umsexxar nnec Dawud: ‘Mayemmi ɣewwɣen řegnus u mayemmi xarrṣen řegnus di min ixwan?
ACT 4:26 Aqa kkaren ijeǧiden n ddunect, uca inni ɣarsen teǧa ṣṣulṭa mcawaren ḍidd n SIDI u ḍidd n Lmasiḥ nnes.’
ACT 4:27 Minzi s tidett aqa Hirudus d Punṭiyus Pilaṭus d řegnus d ibarruten n Israil munen x Mmic nnec amqeddas Yasuɛ, wenni umi tmesḥed,
ACT 4:28 ḥima ad ggen marra min tuɣa izwar ineyyec ufus nnec d ccwar nnec ad yiři.
ACT 4:29 Ɛad řexxu, a SIDI, xzar ɣar usiggʷed nsen uca ewc i imsexxaren nnec ḥima ad ssiwřen s wawař nnec s taryast,
ACT 4:30 am tesswiẓẓḍed afus nnec i usgenfi u ḥima ad [din] iřint timegga jehdent d řeɛřamat d řeɛjayeb deg Yisem n Mmic nnec amqeddas: Yasuɛ.”
ACT 4:31 Awarni řami kemmřen taẓaǧit d tkessit s řmeɛruf, inhezz wemcan i di tuɣa munen, u marra dewřen ccuren s Arruḥ Iqeddsen, ssawařen s Wawař n AREBBI s teryast.
ACT 4:32 Uca řɣaci n yinni yumnen tuɣa s řeɛmar d uxarreṣ d ijjen uca uřa d ijj war iqqar belli min tuɣa ɣares aqa i netta weḥḥdes, maca nitni carcen di kuřci jar asen.
ACT 4:33 Tuɣa rrusul nni cehhden s yijj n jjehd imɣar x tnukra n Yasuɛ Lmasiḥ uca yiweḍ-dd arḍa imɣar x marra nitni.
ACT 4:34 War tuɣi jar asen uřa d ijj dayes řexṣeṣ, minzi marra inni ɣar iǧa iyyaren niɣ tudrin zznuzan ten, uca ttawyen-dd ttaman n min zznuzan,
ACT 4:35 ssrusan t ɣar iḍaren n rrusul. Nitni bḍan [zzayes] i kuř ijj ɛlaḥsab min tuɣa iḥwaj.
ACT 4:36 Yusuf wenni umi řaɣan rrusul Bar-Naba[s], min ixs ad yini ‘mmis n ufewwej’, netta [zi teqbič] n Lawi, yusa-dd zi tegzirt n Qubrus,
ACT 4:37 tuɣa ɣares ijj n iyyar, izzenz i-t uca yiwi-dd tmenyat, issars i-tent ɣar iḍaren n rrusul.
ACT 5:1 Ijj n weryaz qqaren as Ananiyas, ak-d temɣart nnes, qqaren as Saffira, izzenz iyyar nnes.
ACT 5:2 Netta iksi ijj n wezyen n tmenyat n ttaman [n yeyyar], am tessen temɣart nnes [man aya], uca issnufar i-t. [Xas uca] yiwi-dd ca n tmenyat n nnuqart zzayes, issars i-tt ɣar iḍaren n rrusul.
ACT 5:3 Inna as Cimɛun: “[A] Ananiyas, mayemmi iccur cciṭan uř nnec ḥima ad tessxarqed x Arruḥ Iqeddsen u ḥima ad tnuffared ca n tmenyat deg iyyar?
ACT 5:4 Ma war iǧi [yiyyar] nnec qbeř ittwammenz? U řami ittwammenz, tuɣa ṣṣulṭa x ttaman nnes [ɛad] deg ufus nnec! Min cek ideɛwen tᵉttegged man aya deg wuř nnec? Aqa cek war tessxarqed ca x iwdan maca x AREBBI.”
ACT 5:5 Umi isřa Ananiyas awařen-a, iwḍa ɣar temmurt, immut, uca tedweř tiggʷudi temɣar x marra inni isřin aya.
ACT 5:6 Kkaren ibřiɣen, cefnen t, arbun [t] ɣar barra, neḍřen t.
ACT 5:7 Awarni řami ɛdunt ɛřaḥař třata n tsaɛɛetin, tudef-dd temɣart nnes, war tessin min imsaren.
ACT 5:8 Inna as Cimɛun: “Ini ayi, ma aqa tezzenzem iyyar s wanect uya?” Tenna as: “Wah, s wanect uya!”
ACT 5:9 Inna as Cimɛun: “Min kenniw ideɛwen tᵉttafqem jar awem maḥend ad tjarrbem Arruḥ n SIDI? Xzar, iḍaren n yinni ineḍřen aryaz nnem, aqa aten ɣar tewwart, ad cem ksin barra ɛawed.”
ACT 5:10 Řexdenni tewḍa ɣar iḍaren nnes uca temmut. Udfen-dd ibřiɣen nni, ufin tt temmut, ksin tt, arbun tt ɣar barra uca neḍřen tt zzat i weryaz nnes,
ACT 5:11 uca tedweř tiggʷudi temɣar ɣar marra tamesmunt u ɣar marra inni isřin man aya.
ACT 5:12 Msarent waṭṭas n řeɛřamat d řeɛjayeb jar iwdan s ifassen n rrusul uca marra nitni tuɣa munen s wuř d ijjen deg useqqif ak-d ukulwar d ipilaren n Suliman.
ACT 5:13 Maca zeg iwdan inneɣni war izɛim ḥed ad kisen igg azeǧif, maca řgens iweqqar ten aṭṭas.
ACT 5:14 Mmarenyen-dd ktar ɛad ɣar yinni yumnen di SIDI, ibarruten n yeryazen d temɣarin,
ACT 5:15 ařami tuɣa kessin imehřac barra ɣar zznaqi, ssrusan ten x tassut ḥima, xmi dd ɣa yas Cimɛun, balak ad tekk mɣir tiři nnes xasen.
ACT 5:16 Usin-dd uřa d aṭṭas zi tneddam nneɣni i d as dd-innḍen i Urcalim, iwyen-dd imehřac nsen d yinni daysen řaryaḥ imengas, uca marra ggenfan.
ACT 5:17 Arrays n ikehhanen d marra inni iǧan akides, inni iǧan zi tebridt n Iṣaduqiyyen, dewřen ccuren s řeḥsed.
ACT 5:18 Nitni ssarsen ifassen x rrusul, ṭṭfen ten uca arrin ten di řeqyud di řeḥbes.
ACT 5:19 Maca lmalak n SIDI yarzem tiwwura n řeḥbes s ǧiřet, issuffeɣ i-ten ɣar barra, inna asen:
ACT 5:20 “Ruḥem, xenni tbeddem di Zzawect Tameqqrant, siwřem i řgens s marra awařen-a n Tudart!”
ACT 5:21 Ffɣen-dd nitni ɣar wenqar n tfuct, udfen ɣar Zzawect Tameqqrant, bdan sseřmaden. Maca ikkar-dd arrays n ikehhanen d yinni akides iǧan, uca řaɣan x yinni ibedden akidsen u x imɣaren n ayt n Israil, uca ssekken [imsexxaren nsen] ɣar řeḥbes ḥima ad ten dd-awyen.
ACT 5:22 Umi dd-ffɣen inni [zzaysen] dd-ittwassekken [dinni], war ten ufin ca di řeḥbes, uca ɛeqben, nnan:
ACT 5:23 “Aqa nufa řeḥbes ibelleɛ mliḥ u iɛessasen bedden barra ɣar tewwura, [maca] umi narzem tawwart, war din nufi ḥed daxeř.”
ACT 5:24 Řami sřin imeqqranen n ikehhanen d imeqqranen n Zzawect Tameqqrant awařen-a, tbehten aṭṭas, iweddar asen min ɣa ggen.
ACT 5:25 Uca yusa-dd ijj n weryaz ixebbar i-ten, [iqqar]: “Xzar, iryazen nni teggim di řeḥbes, aqa bedden di Zzawect Tameqqrant, sseřmaden iwdan!”
ACT 5:26 Řexdenni ruḥen [din] řquyad ak-d iɛessasen, iwyen ten-dd, war t ggin s uɣiř minzi tuɣa ggʷeden aqa řgens ad ten iḥejjar.
ACT 5:27 Umi ten dd-iwyen, ssbedden ten zzat i marra Jmaɛet [Tameqqrant]. Isseqsa ten arrays n ikehhanen, iqqar:
ACT 5:28 “Ma war kenniw numur s jjehd maḥend war tessɣaram uřa d ijjen s Yisem-a? U xzar, aqa kenniw teccurem Urcalim s tɣuri nwem, kenniw texsem ad xaneɣ tarrem Idammen n Bnadem-a!”
ACT 5:29 Cimɛun d rrusul arrin-dd, nnan: “Ittxeṣṣa aneɣ ad nᵉttaɛ AREBBI ktar zeg iwdan.
ACT 5:30 AREBBI n řejdud nneɣ issnekkar-dd Yasuɛ wenni tenɣim kenniw, tuyřem t x tefřawt.
ACT 5:31 AREBBI igga i-t d Azeǧif d wenni itticen Tudart, uca issgeɛɛed i-t ɣar ufus nnes ufusi maḥend ad iwc ttubet d weɣfar n ddnub i Israil.
ACT 5:32 Neccin d řechud x man aya uca uřa d Arruḥ Iqeddsen, i yewca AREBBI i yinni dayes yumnen.”
ACT 5:33 Řami sřin aya, hajen aṭṭas uca ttemcawaren ḥima ad ten nɣen.
ACT 5:34 Maca ikkar ijjen zeg Ifarisiyyen, qqaren as Gamaliyal. Netta d amseřmad n Ccariɛa u marra řgens ittweqqar i-t. Yumur netta ḥima ad nedhen rrusul ɣar barra i cwayt n řweqt.
ACT 5:35 Inna asen: “[A] iryazen, ayt n Israil, ḥḍam ixef nwem, xzarem mliḥ aqa [marra] min ɣa teggem s iwdan-a ad yiři s řḥeqq.
ACT 5:36 Minzi qbeř řweqt-a tuɣa ikkar Tuddas, inna aqa netta d ca, řeṣqen dayes ɛřaḥař ca n arebɛa-mya n yeryazen. Aqa nɣin t u marra inni tuɣa t iḍeffaren, dewřen ttwazuzzaren, ikemmeř array nsen.
ACT 5:37 Awarni man aya ikkar Yahuda Ajalili deg wussan n uzemmem i uxeǧeṣ n ḍḍariba i kuř uzeǧif [i Zzawect Tameqqrant], uca isseɣwa aṭṭas [n iwdan] di řgens awarni as. Uca netta immut uca marra inni i-t-i-dd-iḍfaren, dewřen ttwazeǧɛen.
ACT 5:38 Řexxu ad awem iniɣ: “Sbeɛɛdem ixef nwem x iwdan-a, jjem ten ad raḥen, minzi mařa axarreṣ-a niɣ řxedmet-a zeg iwdan i yeǧa, xenni ad iqḍa.
ACT 5:39 Maca mařa tuɣa-t zi AREBBI, war tzemmarem ad t tbeṭṭřem, ḥima ad taɣ kenniw war tᵉttwifim d inni ittmenɣan ak-d AREBBI.”
ACT 5:40 Ggin ad ttwassqenɛen zzayes uca awarni řami d řaɣan x rrusul, jjin ad ten hettken s urekkuḍ, ɛeřmen asen ḥima war ssiwiřen ɛad s Yisem n Yasuɛ, xenni arxun asen.
ACT 5:41 Nitni ruḥen zzaysen, farḥen řami [ufin belli nitni] ttwaḥesben ad sdaheǧen abehdeř di ṭṭweɛ n Yisem [nnes].
ACT 5:42 War ssbedden ca zeg useřmad di mkuř ass di Zzawect Tameqqrant u di tudrin u zeg ubarreḥ s Siditneɣ Yasuɛ Lmasiḥ.
ACT 6:1 Deg wussan nni, řami tuɣa ktaren imeḥḍaren aṭṭas, aqa imeḥḍaren inni ɣarsen iřes n Iyunaniyyen ɛeksen inni ɣarsen iřes n Tɛibranit minzi tijjař nsen farrḍen daysent di tsexxart [n zzad] n kuř ass.
ACT 6:2 [S uya] řaɣan tenɛac n rrusul x marra agraw n imeḥḍaren maḥend ad munen, nnan asen: “War iɛeddeř ad nsexxar ṭṭwabeř [i macca] am nᵉttejja deg Wawař n AREBBI.
ACT 6:3 Arzum xenni, [a] aytma, u xḍarem sebɛa n yeryazen zzaywem inni ɣar teǧa cchadet [tecna], ccuren s Arruḥ n SIDI d tiɣit, uca neccin ad ten nkellef [xenni] s tmesřact-a.
ACT 6:4 Maca neccin ad neṣbar di tẓaǧit u di tsexxart n Wawař.”
ACT 6:5 Iɛjeb wawař-a i marra řɣaci uca nitni ixḍaren Stifanus, ijj n weryaz iccuren s l’iman d Arruḥ Iqeddsen, [xenni] Filippus d Pruxurus d Nikanur d Timun d Parminas d Nikulas, ijj n umɛacar n ddin n Wudayen zi Antiyuxiya.
ACT 6:6 Ssbedden ten qibač i rrusul uca, awarni řami ẓẓuǧen, ssarsen xasen ifassen nsen.
ACT 6:7 Tuɣa Awař n AREBBI iggam u řqedd n imeḥḍaren di Urcalim tuɣa imeqqar aṭṭas. Ijj n ubarru d ameqqran n Wudayen iṭaɛ i l’iman.
ACT 6:8 Stifanus, iccur s arḍa d jjehd, tuɣa ittegg řeɛřamat d řeɛjayeb mɣarent jar řgens.
ACT 6:9 Kkaren yeryazen zi temzida umi qqaren ‘Alibertinu’, [iryazen zi] Qayrawan d Iskandariyya, uřa zi Kilikiya d Asiya, uca nitni tuɣa ttqacaḥen Stifanus.
ACT 6:10 [Maca] war zemmaren ad ɛeksen tiɣit d Arruḥ i zzayes tuɣa issawař.
ACT 6:11 Řexdenni ssekken iryazen, ɛarrnen ten maḥend ad inin: “Aqa nesřa asen ssawařen s wawařen iceqqfen di Musa u di AREBBI!”
ACT 6:12 Aqa ssɣewwɣen řgens d imɣaren [n řgens] d imseřmaden n idlisen uca umi xas dd-dduqqzen, ṭṭfen t, nedhen t ɣar Jmaɛet [Tameqqrant].
ACT 6:13 Ggin řechud issxarriqen, inni innan: “Bnadem-a war issbeddi ad iceqqef di Ccariɛa u deg wemcan-a iqeddsen,
ACT 6:14 minzi nesřa as iqqar belli Yasuɛ Nnaṣiri wanita ad yareddeǧ amcan-a, ad ibeddeř ṭṭbayeɛ i d aneɣ iwca Musa.”
ACT 6:15 Marra inni tuɣa ɣar iǧa řkursi di Jmaɛet [Tameqqrant], ḥekkaren dayes u ẓrin aɣembub nnes am uɣembub n ijj n lmalak.
ACT 7:1 Arrays n ikehhanen inna: “Ma man aya d tidett?”
ACT 7:2 [Xenni] inna [Stifanus]: “A kenniw, [a] iryazen, aytmatneɣ d ibabaten nneɣ, sřem! AREBBI n uɛuǧi iḍhar i jedditneɣ Ibrahim am tuɣa ɛad di Misuputamya, [tenni d tammurt jar tnayen n iɣezran], qbeř ma ad izdeɣ di Ḥaran.
ACT 7:3 Netta inna as: ‘Ffeɣ zi temmurt nnec u zi řaǧ nnec, ruḥ ɣar temmurt tenni i d ac ɣa ssecneɣ.’
ACT 7:4 Řexdenni iffeɣ Ibrahim zi temmurt n Ikaldaniyyen uca izdeɣ di Haran. Awarni řami immut babas, issmuṭṭiy i-t-i-dd AREBBI ɣar temmurt-a i di tzeddɣem ass-a.
ACT 7:5 Netta war d as iwci ca dayes řwart uřa d ijj n uṣurif n uḍar, [maca] iwaɛd ad as tt iwc d řwart, i netta u i zzariɛet nnes awarni as, am war tuɣi ɣares ɛad mmis.
ACT 7:6 Issiweř AREBBI akides, inna as: ‘Ad tiři zzariɛet nnec d amɛezzeb deg ict n temmurt teɣribt, uca nitni ad ten arren d isemɣan, ad daysen ɣezzan arebɛa-mya n iseggʷusa.
ACT 7:7 Uca řgens i d as ɣa ɛebden am yisemɣan, ad t ḥasbeɣ.’ Uca yarni AREBBI deg wawař nnes, inna: ‘Awarni man aya ad ffɣen, ad ayi ɛebden deg wemcan-a’.
ACT 7:8 Netta iwca as řɛahd n wextan. Xas uca ijja-dd Isḥaq uca ixten i-t deg wass wiss tmenya uca Isḥaq ijja-dd Yaɛqub, Yaɛqub ijja-dd tenɛac n řejdud [imezwura].
ACT 7:9 Řejdud [imezwura] ɣarren zi Yusuf uca zzenzen t ɣar Miṣra. [Maca] AREBBI tuɣa-t akides,
ACT 7:10 issenjem i-t zi marra řemḥayem nnes. Netta iwca as arḍa d tiɣit qibač i firɛun, ajeǧid n Miṣra, uca wanita igga i-t d azeǧif x Miṣra u x marra taddart nnes.
ACT 7:11 [Maca] yusa-dd řaẓ d ict n řmeḥnet temɣar di marra tammurt n Miṣra u di temmurt n Kenɛan, war tuɣi i řejdud nneɣ ḥima ad jiwnen.
ACT 7:12 Maca umi isřa Yaɛqub belli aqa din [ɛad] min iqqimen [n řḥebb] di Miṣra, issekk řejdud nneɣ [dinni] i umur amezwaru.
ACT 7:13 Řami din ruḥen i umur wiss tnayen isseḍhar Yusuf ixef nnes i yaytmas uca yargeb firɛun x řaǧ n Yusuf.
ACT 7:14 Issekk Yusuf, yumur maḥend ad dd-yas babas Yaɛqub d marra řaǧ nnes: xemsa u-sebɛin n řeɛmur.
ACT 7:15 Ihwa-dd Yaɛqub ɣar Miṣra, immut netta d řejdud nneɣ.
ACT 7:16 Iwyen t ɣar Cakim, ssarsen t deg wenḍeř nni isɣa Ibrahim s yijj n ttaman n nnuqart zeg ayt n Ḥamur, babas n Cakim.
ACT 7:17 Maca ařami dd-tiweḍ řweqt i tuɣa iwaɛd zzayes AREBBI i Ibrahim s ict n tjaǧit, tuɣa igam řgens, idweř ijhed di Miṣra,
ACT 7:18 ařami dd-ikkar ijj n ujeǧid nneɣni x Miṣra i tuɣa war issinen Yusuf.
ACT 7:19 Wanita tuɣa ittegg s řeɣdar ak-d jjadira nneɣ uca iɣezza x řejdud nneɣ. Yumur i-ten maḥend ad nḍaren iseyman nsen ḥima war ttɣimin ad ddaren.
ACT 7:20 Di řweqt nni ixřeq-dd Musa, yusa as-dd x řxaḍar i AREBBI. Sseymen t di taddart n babas třata n iyuren.
ACT 7:21 Řami ittwammenḍar zeg yemmas [deg iɣzar], tufa i-t yeǧis n firɛun, tesseyem i-t am mammec [iǧa] d mmis n yixef nnes.
ACT 7:22 Ittwassɣar Musa di marra tiɣit n Imiṣriyyen uca tuɣa ittqedda x wawař u x min tuɣa ittegg.
ACT 7:23 Ařami ɣares arebɛin n iseggʷusa, iḍar-dd xas deg wuř nnes maḥend ad yarzef aytmas, ayt n Israil.
ACT 7:24 Umi iẓra aqa ḍeǧen ijjen zeg aytmas zi teqbič nnes, ixřef zzayes di ṭṭweɛ nnes, igga ixef nnes d řqaḍi di ssibbet nnes uca inɣa Amiṣri nni t iḍeǧen.
ACT 7:25 Tuɣa ittraja belli tawmat nnes, ayt n Israil, ad fehmen aqa AREBBI ad asen issiwiḍ asenjem s ufus nnes, maca nitni war fhimen.
ACT 7:26 Deg wass awarni as iḍhar asen-dd ɛawed, řami tuɣa ttmenɣan. Iɛřem asen maḥend ad messeṣřaḥen, iqqar: ‘[A] iryazen, kenniw d awmaten, mayemmi tɛeddam ijjen x wenneɣni?’
ACT 7:27 Wenni tuɣa ittɛeddan x umeddukkeř nnes, iɛarren i-t, iqqar: ‘Wi cek iggin xaneɣ d azeǧif d řqaḍi?
ACT 7:28 Ma ad taɣ ad texsed ad ayi tenɣed am mammec tenɣid iḍennaḍ Amiṣri?’
ACT 7:29 Řexdenni yarweř Musa di ssibbet n wawař-a uca idweř d amɛezzeb di temmurt n Midyan mani dd-yejja tnayen iḥenjiren.
ACT 7:30 Awarni řami ɛdun i netta arebɛin n iseggʷusa, iban as-dd lmalak n SIDI di řexřa n wedrar n Sina di tmessi itteḥduduqen di cbarq ak-d isennanen.
ACT 7:31 Umi iẓra Musa man aya, itebhet s řewḥiy i iẓra, uca umi dd-iqarreb ḥima ad iẓar, inna as SIDI s ict n tmijja:
ACT 7:32 ‘Aqa d NECC, AREBBI n řejdud nwem, AREBBI n Ibrahim, n Isḥaq u n Yaɛqub!’ Ibda Musa ittarjiji aṭṭas, war izɛim ad ixzar ɣar řewḥiy.
ACT 7:33 Inna as SIDI: ‘Kkes sandaliyat nnec zeg iḍaren nnec, minzi tammurt mixef tbedded tqeddes [i teǧa].’
ACT 7:34 Aqa ẓriɣ řmeḥnet n řgens inu di Miṣra uca sřiɣ i uzehhar nsen, hwiɣ-dd ḥima ad ten ssnejmeɣ. Uca řexxu, as-dd da, ad dd cek ssekkeɣ ɣar Miṣra.’
ACT 7:35 Musa wanita, wenni inḍaren nitni umi nnan: ‘Wi cek iggin xaneɣ d azeǧif d řqaḍi?’, wanita issekk i-t i-dd AREBBI ɣarsen d azeǧif d umsenjem s ufus n lmalak nni d as dd-iḍharen di cbarq ak-d isennanen.
ACT 7:36 Wanita issuffeɣ i-ten [zi Miṣra] am igga řeɛřamat d řeɛjayeb d tmegga timeqqranin di temmurt n Miṣra, ɣar Řebḥar n Uɣanim u di řexřa řmijař n arebɛin n iseggʷusa.
ACT 7:37 Wa d Musa wenni innan i ayt n Israil: ‘SIDI, AREBBI nwem, ad awem dd-issgeɛɛed ijj n Unabi am necc zi tawmat nwem. I Netta umi ittxeṣṣa ad tesřam!’
ACT 7:38 Wanita tuɣa-t di tmesmunt n řgens di řexřa ak-d lmalak wenni tuɣa akides issawařen x wedrar n Sina uřa ak-d řejdud nneɣ. Aqa netta tuɣa itteṭṭef awařen n Tudart ḥima ad aneɣ ten yewc.
ACT 7:39 [Maca] řejdud nneɣ war xsen ad as mmarsen ixef nsen, maca sstewwjen t xasen uca ɛeqben ɣar Miṣra deg wuřawen nsen.
ACT 7:40 Maɣar nnan i Harun: ‘Egg aneɣ irebbiten inni d aneɣ i ɣa izwaren, minzi Musa wanita wenni d aneɣ igewwden zi temmurt n Miṣra, war nessin min d as imsaren.’
ACT 7:41 Ggin ijj n ufunas n ṣṣanam i yixef nsen deg wussan nni, ssgeɛɛden tiɣarṣa i l’aṣnam uca farḥen s min ggin ifassen nsen.
ACT 7:42 AREBBI iwca [asen] s weɛrur uca yarra i-ten ad ɛebden řɛeskarat n ujenna am mammec tuɣa tura deg wedlis n inabiyyen: ‘Mayemmi tiwyem ayi-dd zeɛma immudaren d tiɣarṣa arebɛin n iseggʷusa di řexřa, a ayt n Israil?
ACT 7:43 Aqa tiwyem-dd tazeddiɣt n Malkum, d itri n arebbi Rimfan, řexyařat i teggim ḥima ad tent tɛebdem. Necc ad kenniw ssbeɛɛdeɣ aɣirin qaɛ i Babil.’
ACT 7:44 Tazeddiɣt n Cchadet n řejdud nneɣ tuɣa-tt di řexřa am mammec tuɣa yumur Netta wenni tuɣa issawař ak-d Musa maḥend ad tt igg x umedya i d as isscen.
ACT 7:45 Řejdud nneɣ ak-d Yacuwa ssidfen Tazeddiɣt-a ɣar temmurt nni d asen iwca AREBBI d řwart zi řegnus, [řegnus] nni issuffeɣ i-ten AREBBI qibač i uɣembub nsen, u nitni arbun tt ař wussan n Dawud.
ACT 7:46 Wanita yufa arḍa ɣar AREBBI uca ittar [as] ad yaf ict n Tzeddiɣt i AREBBI n Yaɛqub.
ACT 7:47 Maca Suliman ibna as Taddart.
ACT 7:48 Maca Amɛuǧi x kuřci war izeddeɣ deg [ict n tzeddiɣt] i ittwaggen s ifassen [n iwdan] am mammec iqqar unabi:
ACT 7:49 ‘Ajenna d řɛarc inu u temmurt d tanebdat sadu iḍaren inu. Mani taddart i d ayi ɣa tebnam, iqqar SIDI, niɣ mani amcan n arraḥet inu?
ACT 7:50 Ma war iggi ufus inu man aya marra?’
ACT 7:51 [A kenniw] inni ittɣennan d yinni war ittwaxetnen n wuř d utesři, řebda tᵉttemɛařam x Arruḥ Iqeddsen. Am mammec ggin řejdud nwem, ammu i tᵉtteggem uřa d kenniw.
ACT 7:52 Man wen zeg inabiyyen war ten marrten u war ten nɣin řejdud nwem, aqa inni izwaren barrḥen x twasit n Umseggad, wenni tsellmem, tenɣim t kenniw,
ACT 7:53 kenniw inni iksin Ccariɛa s řumur n lmalakat maca war dayes tᵉṭṭifem.”
ACT 7:54 Umi sřin aya, dduqqzen nitni s uxeyyeq, ɣeẓẓen tiɣmas nsen ɣares.
ACT 7:55 Maca am tuɣa iccur s l’iman d Arruḥ Iqeddsen, ikessi netta tiṭṭawin nnes deg ujenna, iẓra aɛuǧi n AREBBI, d Yasuɛ ibedd ɣar yefus n AREBBI,
ACT 7:56 inna: “Xzar, ttwařiɣ ijenwan arzmen u Mmis n bnadem ibedd ɣar yefus n AREBBI.”
ACT 7:57 Maca nitni, am sɣuyyun s ict n tmijja d tameqqrant, qqnen imejjan nsen uca hejmen xas marra.
ACT 7:58 Tṭfen t, ssuffɣen t barra i tendint, bdan ttḥejjaren t u řechud ssarsen arruḍ nsen ɣar iḍaren n ijj n ubřiɣ qqaren as Cawul.
ACT 7:59 Tuɣa ttḥejjaren Stifanus am ittřaɣa, iqqar: “A Siditneɣ Yasuɛ, ṭṭef arruḥ inu.”
ACT 7:60 Xenni iwḍa [x ifadden nnes], isɣuy s ict n tmijja tejhed, inna: “A Siditneɣ, war d asen ttḥasab ddnub-a!” Awarni řami inna aya, iṭṭeṣ [s yiḍes n řmewt].
ACT 8:1 Cawul yarḍa x řmewt nnes uca icarc deg uneqqi nnes. Deg wussan nni imsar ijj n umarret imɣar x tmesmunt di Urcalim u marra ttwazuzzaren ɣar dcurat n Yahudiyya d Samarya, mɣir rrusul lla.
ACT 8:2 Ca n yeryazen yumnen ksin t, arbun Stifanus ɣar wenḍeř uca ggin xas ijj n wecḍan ameqqran.
ACT 8:3 Maca Cawul tuɣa ittdarrec tamesmunt xmi ittadef ɣar tudrin, ittjarra iryazen d temɣarin, ineddeh i-ten ɣar řeḥbes.
ACT 8:4 Inni ittwazuzzaren tuɣa gguren, ttennḍen, ttbarrḥen s Wawař n AREBBI.
ACT 8:5 Amu ihwa-dd Filippus [ɛawed] ɣar ict n tendint n Isamariyyen, ibarreḥ i-ten s Lmasiḥ.
ACT 8:6 Umi sřin i wawař nnes, ttwassqenɛen iwdan i tuɣa ittesřan s marra min ittwannan zi Filippus, maɣar ẓrin řeɛřamat i igga.
ACT 8:7 Minzi aṭṭas n yinni ittwaṭṭfen zi řaryaḥ imengas, sɣuyyun s tmijja ijehden uca ffɣen zzaysen. Inneɣni i tuɣa d ineɛḍaben d iqejdaḥen ttwassgenfan.
ACT 8:8 Tuɣa din ict n řefraḥet temɣar di tendint nni.
ACT 8:9 Tuɣa din ijj n weryaz, qqaren as Cimun, tuɣa izeddeɣ di tendint nni aṭṭas zeg wami. Netta tuɣa issɣekkwa řgens n Isamariyyen s tseḥḥart nnes, ittbarren x yixef nnes, inna: “Necc, [aqa] necc d wenni imɣaren!”
ACT 8:10 Marra sřin ɣares, am umeẓyan, am umeqqran, nnan: “Wanita d jjehd imɣaren n AREBBI.”
ACT 8:11 Isseqneɛ i-ten marra s minzi tuɣa issarjef i-ten s ssḥur nnes aṭṭas zeg wami.
ACT 8:12 Maca umi yumnen di Filippus wenni tuɣa ittbarreḥ s Řexbar Aṣebḥan n Tgeldit n AREBBI u s Yisem n Siditneɣ Yasuɛ Lmasiḥ, ttwassɣeḍṣen nitni, am yeryazen am temɣarin.
ACT 8:13 Cimun s yixef nnes ɛawed yumen, ittwasseɣḍeṣ uca iqqim iḍeffar Filippus. Řami iẓra lmuɛjizat d řeɛřamat imɣaren i imsaren s ufus nnes, itebhet, yarjef.
ACT 8:14 Umi sřin rrusul inni iǧan di Urcalim belli řgens n Samarya iqbeř Awař n AREBBI, ssekken ɣarsen Cimɛun Buṭrus d Yuḥanna.
ACT 8:15 Nitni hwan-dd ɣarsen, ẓẓuǧen asen ḥima ad ṭṭfen Arruḥ Iqeddsen,
ACT 8:16 minzi Wanita tuɣa ɛad war dd-yusi x uřa d ijj zzaysen, tuɣa ttwassɣeḍṣen waha s Yisem n Sidi Yasuɛ.
ACT 8:17 Xenni ssarsen xasen ifassen uca nitni ṭṭfen Arruḥ Iqeddsen.
ACT 8:18 Umi iẓra Cimun belli s usarsi n ifassen n rrusul immewc asen Arruḥ Iqeddsen, xenni ixs ad asen iwc [tmenyat n] nnuqart,
ACT 8:19 inna: “Ewc ayi ɛawed ṣṣulṭa-ya, ḥima man wen i x ɣa ssarseɣ afus inu, ad iqbeř Arruḥ Iqeddsen.”
ACT 8:20 [Maca] inna as Cimɛun Buṭrus: “Ad tᵉtteḥḥa nnuqart nnec akidek, minzi ittɣiř ac ad tkesbed tawhibt n AREBBI s wagřa n ddunect!
ACT 8:21 War ɣarek bu tesɣart uřa d ca di l’iman wanita, minzi uř nnec war iǧi isegged zzat i AREBBI.
ACT 8:22 Tub zi tuɛeffna nnec uca ttar zi AREBBI maḥend ad xak tᵉttwaɣfar teḥraymect-a n wuř nnec,
ACT 8:23 minzi ttwařiɣ aqa cek tewḍid-dd deg ijj n uḥrir d amerzag u deg ijj n uceddi n tuɛeffna.”
ACT 8:24 Yarra-dd Cimun, inna: “Ttarem i AREBBI xafi ḥima war dd-ittis xafi ca zi min tennam.”
ACT 8:25 Awarni řami cehden Cimɛun d Yuḥanna u ssřemden Awař n AREBBI, ɛeqben ɣar Urcalim, barrḥen s Řexbar Aṣebḥan deg waṭṭas n ředcur n Isamariyyen.
ACT 8:26 Uca lmalak n SIDI issiweř ak-d Filippus, inna: “Kkar, truḥed ɣar ljanub deg webrid n řexřa i dd-ihwan zi Urcalim ɣar Ɣazza.”
ACT 8:27 Ikkar iruḥ, uca immeřqa ak-d ijj n řewzir zi [temmurt n] Kuc, ijj n řewzir n Kandaki, tajeǧidt n ayt n Kuc. Tuɣa-t ɣares ṣṣulṭa x marra řeknuz nnes, yusa-dd ɣar Urcalim ḥima ad [din] iɛbed.
ACT 8:28 Umi dd-iɛqeb, iqqim x ijj n ukarru, iqqar [deg wedlis] n unabi Icaɛya.
ACT 8:29 [Xenni] inna Arruḥ i Filippus: “Zid, tmuned ak-d ukarru-ya.”
ACT 8:30 Iqarreb-dd [ɣares] Filippus, isřa as min iqqar [zeg wedlis] n unabi Icaɛya, inna as: “Ma tfehmed min teqqared?”
ACT 8:31 Inna as: “Mammec zemmareɣ ad fehmeɣ mařa war din ḥed i d ayi ɣa issefhemen?” Uca ittar zi Filippus maḥend ad yenya uca ad kis iqqim.
ACT 8:32 Udem i tuɣa iqqar zeg Wedlis d wa: “Amecnaw izmar ittwandeh ɣar řgurnet i tɣarṣt, amecnaw texsi tegnu qibač i wenni tt iǧasen, war yarzim Netta aqemmum nnes.
ACT 8:33 Deg useḥqar nnes ittwakkes zi tmeḥbast u zi řḥukm. Wi ɣa iɛawden x dduriyet nnes? Minzi tudart nnes tᵉttwassgeɛɛed zi temmurt.”
ACT 8:34 Yarra-dd řewzir x Filippus, inna: “Ad cek sseqsiɣ, x wi xef issawař unabi man aya, ma x yixef nnes niɣ x ijjen nneɣni?”
ACT 8:35 Yarzem Filippus aqemmum nnes, uca ibda ittbarreḥ as s Řexbar Aṣebḥan n Siditneɣ Yasuɛ s wawař-a zi Tira [Iqeddsen].
ACT 8:36 Am tuɣa gguren nitni deg webrid, iwḍen ɣar ijj n wemcan mani tuɣa ǧan waman. Inna řewzir: “Xzar, aqa din aman. Min dayi iṭṭfen war ttwasseɣḍaṣeɣ?”
ACT 8:37 Inna Filippus: “Mařa tumned s wuř nnec marra, tḥeǧeř!” Uca netta yarra-dd, inna: “Umneɣ aqa Yasuɛ Lmasiḥ d Mmis n AREBBI.”
ACT 8:38 Yumur ad ibedd ukarru, hwan tnayen idsen deg waman uca Filippus isseɣḍeṣ řewziř.
ACT 8:39 Ařami dd-geɛɛden zeg waman, ixḍef Arruḥ n SIDI Filippus. Uca řewzir war t iẓri ɛad, maca iruḥ deg webrid nnes s řefraḥet.
ACT 8:40 Maca Filippus ittwaf di Acdud u ssenni ittcuqa [di temmurt], ittbarreḥ s Řexbar Aṣebḥan di marra tineddam ařami dd-yiweḍ ɣar Qayṣariya.
ACT 9:1 Maca Cawul tuɣa [ɛad] ittsuḍ s uɛeddi d řmewt ḍidd n imeḥḍaren n Siditneɣ.
ACT 9:2 Ittar zeg arrays n ikehhanen tibratin i temzidawin n Dimacq, maḥend, mařa yufa ca n yinni iḍeffaren ‘Abrid-a’, iryazen niɣ timɣarin, izemmar ad ten icedd u ad ten dd-indeh ɣar Urcalim.
ACT 9:3 Řami [din] iruḥ, imsar, am tuɣa ittqarrab ɣar Dimacq, tařɣa-dd xas deɣya ict n tfawt zeg ujenna.
ACT 9:4 Iwḍa ɣar temmurt, xenni isřa i yict n tmijja teqqar as: “Cawul, Cawul mayemmi xafi tdarraced? Tzeyyared x yixef nnec umi teccated di sřek n buykucḍan.”
ACT 9:5 Yarra-dd, inna: “Min teɛnid Cek, a Sidi?” Inna as Siditneɣ: “Aqa d NECC, Yasuɛ wenni x tdarrced.
ACT 9:6 Kkar, tudfed ɣar tendint, ad ac ittwanna dinni min ittxeṣṣa ad tegged!”
ACT 9:7 Uca iryazen inni kis isafaren, bedden ttbehten, minzi nitni sřin tmijja, maca war ẓrin ḥed.
ACT 9:8 Ikkar-dd Cawul zi temmurt, waxxa arzment tiṭṭawin nnes war izemmar ad ittwařa, u nitni gewwden t zeg ufus, nedhen t ɣar Dimacq.
ACT 9:9 Třata n wussan tuɣa war ittwiři, war icci, war iswi.
ACT 9:10 Tuɣa [din] di Dimacq ijj n umeḥḍar qqaren as Ananiyas. SIDI inna as deg ijj n řewḥiy: “[A] Ananiyas!” Inna as: “Aqa ayi da, [a] Sidi inu!”
ACT 9:11 Inna as Siditneɣ: “Kkar, truḥed ɣar webrid umi qqaren ‘Abrid isseggden’, xenni ɣar taddart n Yahuda, seqsa x ijj n weryaz zi Tarsus, qqaren as Cawul, xzar, aqa ittẓaǧa [din],
ACT 9:12 uca yusa-dd ɣares deg ijj n řewḥiy, aqa ijj n weryaz qqaren as Ananiyas yudef-dd, issars xas afus nnes ḥima ad ttwarzment tiṭṭawin nnes.”
ACT 9:13 Yarra-dd Ananiyas: “A Sidi, aqa sřiɣ aṭṭas [n tmesřayin] x weryaz-a, mecḥař d řɣar i igga deg imqeddasen nnec di Urcalim.
ACT 9:14 Aqa da, ɛawed danita ɣares ttesriḥ zeg [uɣezdis] n imeqqranen n ikehhanen, maḥend ad iḥebbes marra inni ittřaɣan x Yisem nnec.”
ACT 9:15 [Maca] SIDI inna as: “Ruḥ minzi wa aqa-t ɣari d řqecɛet ifarzen ḥima ad yarbu Isem inu ɣar řegnus u ɣar ijeǧiden u jar ayt n Israil,
ACT 9:16 minzi ad as ssecneɣ mecḥař ittxeṣṣa as ad iweddeb di ṭṭweɛ n Yisem inu.”
ACT 9:17 Iruḥ Ananiyas, yudef ɣar taddart, issars xas afus nnes, inna: “[A] uma Cawul, aqa Siditneɣ Yasuɛ, wenni d ac dd-iḍharen deg webrid i zi dd-tusid, issekk ayi-dd, ḥima ad tᵉttwařid ɛawed u ad tᵉttwaccured s Arruḥ Iqeddsen.”
ACT 9:18 Řexdenni tewḍa-dd ca am teqcurt zi tiṭṭawin nnes, ttwarzment tiṭṭawin nnes. Ikkar uca ittwasseɣḍeṣ.
ACT 9:19 Umi icca, imḥeḍ uca iqqim ca n wussan ak-d imeḥḍaren di Dimacq.
ACT 9:20 Řexdenni ibda ittbarreḥ di temzida n Wudayen x Yasuɛ, belli Netta d Mmis n AREBBI.
ACT 9:21 Marra inni tuɣa ittesřan, ttbehten, qqaren: “Ma war iǧi d wanita i tuɣa imarrten marra inni tuɣa ittřaɣan s Yisem-a di Urcalim, u [ma war iǧi d wanita] i dd-ittwassekken ɛad danita zi ssibbet d ict, maḥend ad ten icarf u ad ten igewwed ɣar imeqqranen n ikehhanen?”
ACT 9:22 Cawul tuɣa yarenni di jjehd, issedhec Udayen inni izeddɣen di Dimacq am d asen isscen belli [Yeccu] wanita d Lmasiḥ.
ACT 9:23 Umi ɛdun wussan, ggin Wudayen ijj n wenway s teḥraymect ḥima ad t nɣen.
ACT 9:24 Maca taḥiřet nsen i zi tuɣa arezzun ad t nɣen, tᵉttwassargeb i Cawul. [Maca] nitni tuɣa ḥeṭṭan tiwwura [n tendint] s uziř d ǧiřet, maḥend ad awḍen ad t nɣen.
ACT 9:25 Maca imeḥḍaren nnes ggin t deg ict n tsuǧet uca ssehwan t zi řḥiḍ s ǧiřet.
ACT 9:26 Yuyur netta ɣar Urcalim, yarzu ad imun ak-d imeḥḍaren, maca nitni marra ggʷeden zzayes, war ttiqqen ca belli netta [idweř] d ameḥḍar.
ACT 9:27 Maca Bar-Naba iksi t ɣares uca indeh i-t ɣar rrusul uca [Cawul] ixebbar i-ten mammec iẓra SIDI deg webrid u mammec kis issiweř u mammec tuɣa ittbarreḥ s teryast s Yisem n Yasuɛ di Dimacq.
ACT 9:28 Tuɣa iqqim akidsen ittadef itteffeɣ zi Urcalim,
ACT 9:29 uca ittbarreḥ s teryast s Yisem n Yasuɛ, ittqacaḥ ak-d Wudayen inni issnen [iřes n] Tyunanit, maca nitni arzun ad t nɣen.
ACT 9:30 Umi ssnen tawmat man aya, nedhen t ɣar Qayṣariya di ǧiřet uca sekken t ssenni ɣar Tarsus.
ACT 9:31 Tamesmunt di marra Yahudiyya d Ljalil d Samarya tuɣa dayes řehna, tᵉttwabna [di l’iman], teggur di tiggʷudi n AREBBI uca truḥ di tyumi s ufewwej n Arruḥ Iqeddsen.
ACT 9:32 Řami tuɣa Cimɛun iggur di tneddam, ihwa-dd ɣar imqeddasen inni izeddɣen di tendint n Lidda.
ACT 9:33 Yufa din ijj n bnadem, qqaren as Aniyas, izzeř s tassut u teɛdu xas tmenya n iseggʷusa d aneɛḍab.
ACT 9:34 Inna as Cimɛun: “[A] Aniyas, Yasuɛ Lmasiḥ ad cek issgenfa. Kkar, tessud i ixef nnec!” Řexdenni ikkar deɣya.
ACT 9:35 Uca ẓrin t marra imezdaɣ n Lidda d Sarun, uca dewřen-dd ɣar AREBBI.
ACT 9:36 Tuɣa di tendint n Yaffa ict n tmeḥḍart, qqaren as Tabita, [maca s yiřes n Tyunanit qqaren as ‘Durka’, ixs ad yini ‘Ɣazala’]. Ta tuɣa teccur s řexdayem tiṣebḥanin i tuɣa tᵉttegg u s ṣṣdaqi [i tuɣa tessuffuɣ].
ACT 9:37 Deg wussan nni tehřec uca temmut. Sirden tt uca ssarsen tt di tɣurfet.
ACT 9:38 Maca imeḥḍaren sřin belli Cimɛun aqa-t di tendint n Lidda, tenni zzat n Yaffa. [Xenni] ssekken nitni tnayen n yeryazen ḥima ad zzayes ḥeccmen, ḥima war ittɛeṭṭař maḥend ad kidsen yuyur!
ACT 9:39 Ikkar Cimɛun, yuyur akidsen. Řami dd-yiweḍ, nedhen t ɣar tɣurfet sennej. Beddent-i-dd ɣares marra tijjař, runt, sscanent as tcamirat d ijeǧaben i d asent tewca Tabita ařami tuɣa-tt ɛad teddar.
ACT 9:40 Maca Cimɛun issuffeɣ i-tent marra ɣar barra, isjed, iẓẓuǧ uca inneqřeb-dd ɣar řxecbet inna: “Tabita, kkar!” Nettat tarzem tiṭṭawin nnes uca řami teẓra Cimɛun, teqqim.
ACT 9:41 Isswiẓẓeḍ ɣares afus nnes, issnekkar i-tt-i-d, xenni iřaɣa-dd x imqeddasen d tijjař, isscen asen tt, belli aqa teddar.
ACT 9:42 Iffeɣ-dd řexbar-a ɣar tendint marra uca aṭṭas umnen di Siditneɣ.
ACT 9:43 Uca iqqim di Yaffa, war iǧi drus n wussan, ɣar ijj n weryaz nni tuɣa iɛeddeř iřmawen, qqaren as Cimɛun.
ACT 10:1 Tuɣa di Qayṣariya ijj n weryaz, isem nnes Kurniliyus, aqa-t d řqebṭan [x mya], inni zi řkumpaniyyet umi qqaren ‘Aṭalyan’.
ACT 10:2 Netta tuɣa ittweqqar u itteggʷed AREBBI ak-d aytbab n taddart nnes marra, ittic aṭṭas n ṣṣdaqi i iwdan uca ikessi s řmeɛruf i AREBBI řebda.
ACT 10:3 Wa iẓra deg ijj n řewḥiy iṣfa aqa ijj n lmalak n AREBBI yudef-dd ɣares ɣar tsaɛɛet wiss tesɛa n wass, [ixs ad yini ɣar tsaɛɛet wiss třata n uziř], inna as: “[A] Kurniliyus!”
ACT 10:4 Umi dayes inḍar tiṭṭawin nnes, iggʷed aṭṭas, inna: “Min din, a Sidi?” Inna as lmalak: “Tiẓaǧitin nnec d ṣṣdaqi nnec iwḍent ɣar řidaret zzat i [wudem n] AREBBI.
ACT 10:5 Ssekk řexxu iryazen ɣar Yaffa, tɛarḍed x Cimɛun, wenni umi qqaren ɛawed Buṭrus.
ACT 10:6 Xzar, netta yarzef ɣar Cimɛun, wenni iɛeddřen iřmawen, wenni ɣar iǧa taddart ɣar tma n řebḥar.”
ACT 10:7 Umi iruḥ lmalak wenni tuɣa akides issawařen, iřaɣa netta x tnayen n imsexxaren zi taddart nnes u x ijj n uɛeskari itteggʷeden AREBBI, wenni tuɣa iṭaɛ as.
ACT 10:8 Ihaja asen marra min iẓra uca issekk i-ten ɣar Yaffa.
ACT 10:9 Tiwecca nnes, am tuɣa aten deg webrid ttqarraben ɣar tendint, igeɛɛed Cimɛun x tzeqqa ɣar tsaɛɛet wiss setta, [aqa-tt d ḍḍhur], ḥima ad iẓẓaǧ.
ACT 10:10 Iǧuẓ aṭṭas uca tuɣa immeẓri ad icc, uca, am tuɣa d as ssewjaden, iwyi t řewḥiy.
ACT 10:11 Iẓra ajenna yarzem uca ict n řqecɛet am yict n tcuqqet tameqqrant zi řeqṭen [azdad] ittwaṭṭfen zi arebɛa n tɣemmura nnes, tehwa-dd zeg ujenna ɣar temmurt.
ACT 10:12 Tuɣa dayes marra imuddaren n temmurt s arebɛa n iḍaren uřa d imuddaren nni ittbuɛen x temmurt d ijḍaḍ n ujenna.
ACT 10:13 Tusa-dd ɣares ict n tmijja, teqqar as-dd: “[A] Cimɛun, kkar, ɣarṣ, tecced!”
ACT 10:14 Maca Cimɛun inna: “Lla, [a] Sidi, war cciɣ ɛemmarṣ min iǧan d řeḥram uřa min war izdigen.”
ACT 10:15 Tmijja [tessiweř] ɣares ɛawed i twařa wiss tnayen, [teqqar]: “Min issizdeg AREBBI, war dd t tᵉttarrid ca cek d řeḥram.”
ACT 10:16 Man aya imsar třata n imuřen, uca deɣya tᵉttwassgeɛɛed tajartiřt [ɛawed] ɣar ujenna.
ACT 10:17 Am tuɣa Cimɛun [ɛad] ittxarraṣ deg ixef nnes min ixs ad yini řewḥiy i iẓra, xzar, usin-dd tnayen n yeryazen inni dd-ittwassekken zi Kurniliyus, sseqsan x taddart mani tuɣa iqqim Cimɛun. Nitni bedden-dd ɣar tewwart n řemraḥ.
ACT 10:18 Řaɣan, sseqsan: “Ma Cimɛun, umi ttkennan Buṭrus, aqa-t danita?”
ACT 10:19 Umi tuɣa Cimɛun [ɛad] ittxarraṣ di řewḥiy i iẓra, inna as Arruḥ: “Xzar, aqa da třata n yeryazen arezzun xak!
ACT 10:20 Kkar, tehwid-dd, ruḥ akidsen břa ma ad tcekked di ca, minzi d Necc i-ten-dd-issekken.”
ACT 10:21 [Řexdenni] ihwa Cimɛun ɣar yeryazen nni, inna asen: “Xzar, aqa d necc wenni xef tarezzum. Min ɣar dd-tusim da?”
ACT 10:22 Nnan as: “Kurniliyus, ijj n řqebṭan x mya d ijj n weryaz isegged itteggʷed AREBBI, wenni xef icehhed mliḥ marra řgens n Wudayen, aqa ijj n lmalak iqeddsen tuɣa iɛřem as deg ijj n řewḥiy, maḥend ad dd-issekk ɣarek, ḥima ad cek dd-aywyen ɣar taddart nnes, [maḥend] ad zzayek iseř ict n tebrat.”
ACT 10:23 Cimɛun issidef i-ten ɣar daxeř, igga ten d inewjiwen mani iqqim. Tiwecca nnes ikkar, iruḥ akidsen u ca n wawmaten inni iǧan zi Yaffa ruḥen akides.
ACT 10:24 Tiwecca nnes awarni as iwḍen ɣar Qayṣariya. Kurniliyus tuɣa ittraja ten am ssmunan ɣares marra aytbab n řaǧ nnes uřa d imeddukkař i-t-i-dd-yudsen aṭṭas.
ACT 10:25 Umi yudef Cimɛun, iřqa t-i-dd Kurniliyus, iwḍa as ɣar iḍaren uca isjed as.
ACT 10:26 [Maca] issnekkar i-t-i-dd Cimɛun, inna as: “Kkar, aqa uřa d necc d bnadem [am cek]!”
ACT 10:27 Am kides issawař, yudef uca yufa din aṭṭas inni dd-yusin [ttmunan] dinni.
ACT 10:28 Inna asen: “Kenniw tessnem aqa war iḥeǧer x weryaz d Uday ad imun ak-d ijj n ubarrani i war dd-iqqarṣen zi teqbič n řgens nnes. Maca AREBBI isscen ayi belli war icuwwar ad řaɣiɣ uřa x ijj n bnadem ixmej niɣ d řeḥram.
ACT 10:29 S uyenni usiɣ-dd ɛawed [da] břa ma ad cekkeɣ di ca umi xafi tɛarḍed. Maca xseɣ ad kenniw sseqsiɣ, mayemmi d ayi tejjim ad dd-aseɣ?”
ACT 10:30 Inna as Kurniliyus: “Arebɛa n wussan zeg wami tuɣa ttẓummeɣ, uca xzar, ɣar tsaɛɛet wiss tesɛa umi tuɣa ttẓaǧiɣ di taddart inu, aqa din ijj n weryaz ibedd-dd qibač inu s warruḍ d acemřař!
ACT 10:31 Inna ayi: ‘[A] Kurniliyus, taẓaǧit nnec tᵉttwaseř u ṣṣdaqi nnec iwḍent ɣar řidaret n AREBBI.”
ACT 10:32 Sekk [ijjen] ɣar Yaffa, tɛarḍed x Cimɛun wenni umi ttkennan Buṭrus. Xzar, aqa netta d anewjiw di taddart n Cimɛun, wenni iɛeddřen iřmawen, tenni ɣar tma n řebḥar. Netta ad dd-yas uca ad kidek issiweř.
ACT 10:33 S uyenni ssekkeɣ-dd ɣarek řexdenni u cek aqa teggid mliḥ umi dd-tusid da. Neccin marra i da neǧa qibač i cek, nᵉttexs ad nseř marra min zi cek yumur AREBBI.”
ACT 10:34 Yarzem Cimɛun aqemmum nnes, inna: “S tidett, ufiɣ belli AREBBI war ittegg ca s wudmawen.
ACT 10:35 Maca wenni t itteggʷeden d wenni itteggen tasegda zi kuř řgens, yusa-dd as x řxaḍar nnes.
ACT 10:36 Maɣar wa d Awař i issekk ɣar ayt n Israil d wenni zi i d asen ibarreḥ: řehna d řhudnet s Yasuɛ Lmasiḥ, wenni d SIDI n marra.
ACT 10:37 Kenniw tessnem aqa Awař yiweḍ-dd ɣar marra Yahudiyya, [awarni řami] ibda zi Ljalil awarni i useɣḍaṣ i zi tuɣa ittbarreḥ Yuḥanna,
ACT 10:38 [řexbar] zi jjihet n Yasuɛ zi Nnaṣira, mammec t idhen AREBBI s Arruḥ Iqeddsen u s jjehd. Netta issara [tammurt], igga řxar, issgenfa inni ittwaɣezzan zeg umɛeffan minzi AREBBI tuɣa-t akides.
ACT 10:39 Neccin d řechud xas u x marra min igga di temmurt n Yahudiyya u di Urcalim. Aqa uyřen t Wudayen x teḥnact, nɣin t.
ACT 10:40 Wa issnekkar i-t-i-dd AREBBI deg wass wiss třata uca isseḍhar i-t s bṭayṭay,
ACT 10:41 maca war iǧi i marra řgens, maca i řechud inni izwar ixḍar i-ten AREBBI, i neccin inni akides iccin iswin awarni tanukra nnes zi taddart n imettinen.
ACT 10:42 Yumur aneɣ ad nbarreḥ u ad neched i řgens, aqa d Netta d Wenni igga AREBBI d Řqaḍi x yinni iddaren u x yinni immuten.
ACT 10:43 Cehhden xas marra inabiyyen, belli kuř ijjen wenni i ɣa yamnen deg Yisem nnes, ad as ttwaɣfaren ddnub nnes.”
ACT 10:44 Am tuɣa Cimɛun issawař [ɛad], ihwa-dd Arruḥ Iqeddsen x marra inni tuɣa ittesřan i wawař.
ACT 10:45 Tawmat nni ittwaxetnen, inni dd-yusin akides, tbehten, umi tamewci n Arruḥ Iqeddsen ittwafarreɣ ɛawed x [yenni iǧan zi] řegnus.
ACT 10:46 Minzi tuɣa ten ttesřan ssawařen s ijj n yiřes nneɣni, ssmeɣɣaran di AREBBI. Řexdenni iqqar Cimɛun:
ACT 10:47 “Ma izemmar ḥed ad iqḍeɛ aman maḥend war ttwasseɣḍiṣen ina? Maɣar, xzar, aqa qebřen Arruḥ Iqeddsen am neccin!”
ACT 10:48 Xenni yumur ad ten ssɣeḍṣen s Yisem n Siditneɣ Yasuɛ Lmasiḥ, uca nitni ttaren zzayes ad iqqim akidsen [ɛad] ca n wussan.
ACT 11:1 Rrusul d tawmat inni iǧan di Yahudiyya sřin belli uřa d řegnus qebřen Wawař n AREBBI.
ACT 11:2 Řami igeɛɛed Cimɛun ɣar Urcalim, mcubbcen akides inni iǧan zeg wextan.
ACT 11:3 Nnan, belli netta yudef-dd ɣar iwdan i war ittwaxetnen, icca akidsen.
ACT 11:4 Maca Cimɛun iqḍeɛ [daysen řhard], uca ibda ad asen iɛawed awař iḍfar umas:
ACT 11:5 “Řami tuɣa ayi di [tendint n] Yaffa ttẓaǧiɣ, ẓriɣ deg ijj n řewḥiy aqa ict n řqecɛet am tcuqqet tameqqrant n řeqṭen [azdad] ittwaṭṭfen zi arebɛa n tɣemmura nnes tehwa-dd zeg ujenna, tiweḍ-dd ɣari.
ACT 11:6 Xzareɣ mliḥ u ẓriɣ aqa dayes [imuddaren] n temmurt s arebɛa n iḍaren d [imuddaren] inni ittbuɛen x temmurt uřa d ijḍaḍ n ujenna.
ACT 11:7 Sřiɣ awarni ayi ict n tmijja, tenna ayi: ‘[A] Cimɛun, kkar, ɣarṣ, tecced!’
ACT 11:8 Maca necc nniɣ: ‘Lla, [a] Sidi, ɛemmarṣ war yudif ɛad ɣar uqemmum inu min war izdigen niɣ min iǧan d řeḥram.’
ACT 11:9 Tenna xafi tmijja zeg ujenna ɛawed: ‘Min issizdeg AREBBI, war dd t tᵉttarrid ca cek d řeḥram!’
ACT 11:10 Man aya imsar třata n imuren uca [xenni] ittwassjbed marra ɛawed ɣar ujenna.
ACT 11:11 U xzar, řexdenni aqa din třata n yeryazen inni ɣari dd-ittwassekken zi Kurniliyus zi Qayṣariya, bedden ɣar tewwart n řemraḥ mani d ayi tuɣa.
ACT 11:12 Inna ayi Arruḥ aqa ittxeṣṣa ad kisen raḥeɣ břa ma ad cekkeɣ. Tuɣa akidi uřa d setta n wawmaten u nudef ɣar taddart n weryaz [nni].
ACT 11:13 Netta issargeb aneɣ mammec iẓra ijj n lmalak i ibedden di taddart nnes, wenni d as innan: ‘Sekk [ijj n weryaz] ɣar Yaffa, tɛarḍed x Cimɛun wenni umi ttkennan Buṭrus.
ACT 11:14 Netta ad ac issiweř awařen i zi ɣa tᵉṭṭfed Tudart, cek d marra taddart nnec.’
ACT 11:15 Umi qqimeɣ ssiwřeɣ, ihwa-dd Arruḥ Iqeddsen xasen am mammec xaneɣ dd-ihwa ɛawed ɣar umezwaru.
ACT 11:16 Ttwassɛeqřeɣ x wawař n Siditneɣ, mammec inna: ‘Yuḥanna tuɣa isseɣḍaṣ s waman maca kenniw ad ttwassɣeḍṣem s Arruḥ Iqeddsen.’
ACT 11:17 Mařa AREBBI iwca tamewci-ya i řegnus nni yumnen di Siditneɣ Yasuɛ Lmasiḥ am mammec d aneɣ tt iwca, xenni min ɛniɣ necc maḥend ad ssbeddeɣ AREBBI?”
ACT 11:18 Umi sřin awařen-a, heddnen, ssemɣaren AREBBI, nnan: “Ad taɣ iwca AREBBI uřa i řegnus maḥend ad dd-dewřen ad tuben i Tudart.”
ACT 11:19 Inni ittwazuzzaren zi ssibbet n řmeḥnet i imsaren s ssibbet n Stifanus, ẓwan ɣar Finiqiya u ɣar jjwayeh n Qubrus u ɣar Antiyuxiya, am war ssiwiřen ak-d ḥed s wawař mɣir ak-d Wudayen waha.
ACT 11:20 Tuɣa din jar asen ca n yeryazen zi Qubrus u zi Qayrawan inni, ařami dd-usin ɣar Antiyuxiya, tuɣa issawařen ak-d Iyunaniyyen, barrḥen asen s Řexbar Aṣebḥan n Siditneɣ Yasuɛ.
ACT 11:21 Tuɣa afus n SIDI akidsen uca aṭṭas umnen, dewřen-dd ɣar SIDI.
ACT 11:22 Ikka-dd řexbar xasen x imezzuɣen n ayt n tmesmunt di Urcalim. Nitni ssekken Bar-Naba ɣar Antiyuxiya.
ACT 11:23 Ařami dd-yiweḍ [din], iẓra arḍa n AREBBI, uca ifarḥ, iɛřem asen ḥima ad qqimen ttcebbaren di Siditneɣ s marra uř nsen.
ACT 11:24 Minzi tuɣa-t d aryaz isegged, iccur s Arruḥ Iqeddsen d l’iman, uca ijj n ubarru d ameqqran [n iwdan] immarni-dd ɣar Siditneɣ.
ACT 11:25 Xenni iruḥ ɣar Tarsus ḥima ad yarzu x Cawul,
ACT 11:26 uca ařami t yufa, yiwi i-t akides ɣar Antiyuxiya. Uca imsar aqa nitni munen di tmesmunt aseggʷas ikmeř uca ssřemden ijj n řɣaci d ameqqran. Zi  řweqt nni ttwasemman imeḥḍaren d ‘imasiḥiyyen’ i umur amezwaru.
ACT 11:27 Deg wussan nni hwan-dd ca n inabiyyen zi Urcalim ɣar din.
ACT 11:28 Uca ikkar ijj n zzaysen qqaren as Aɣabus, iɛřem asen s Arruḥ belli ijj n řaẓ imɣar ad yekk x marra tammurt. Uca yusa-dd řaẓ-a deg wussan n qayṣar Kludiyus.
ACT 11:29 Xenni ggin imeḥḍaren aqa kuř ijj zzaysen ad igg ca n twiza ɣar uɣezdis ɛlaḥsab tizemmar nnes i wawmaten i izeddɣen di Yahudiyya.
ACT 11:30 Uca amenni i ggin nitni, uca ssekken t din ɣar imɣaren [n řgens] i din iǧan s ufus n Bar-Naba d Cawul.
ACT 12:1 Di řweqt nni ɛřaḥař isswiẓẓeḍ Hirudus afus nnes ḥima ad ikarfes x ca n yinni iǧan zi tmesmunt.
ACT 12:2 Inɣa Yaɛqub umas n Yuḥanna s ssif.
ACT 12:3 Umi iẓra aqa man aya iɛjeb asen i Wudayen, ikemmeř deg webrid nni maḥend ad iṭṭef uřa d Cimɛun Buṭrus. Tuɣa d ussan n [Weɣrum] břa Antun.
ACT 12:4 [Řami] t iṭṭef, igga i-t di řeḥbes, uca igga as deg ifassen n setta-ɛecra n iɛessasen, ḥima ad xas ɛessen. Tuɣa ixs ad t iqeddem zzat i Wudayen awarni i [Řɛid n Tɣarṣt n] Useɛdu.
ACT 12:5 Umi tuɣa ɛessen x Cimɛun di řeḥbes, tuɣa teẓẓaǧa tmesmunt i AREBBI břa qeṭṭu di ṭṭweɛ nnes.
ACT 12:6 Di ǧiřet, ɣar tuffut i di tuɣa izɛem [Hirudus] ad t iqeddem, umi iṭṭeṣ Cimɛun am t cedden s tnayen n ssnaseř jar tnayen n iɛessasen n řɛeskar u inneɣni ḥeṭṭan ɣar tewwart n řeḥbes,
ACT 12:7 ibedd-dd lmalak n SIDI sennej nnes u ṭṭya n tfawt tᵉttceɛciɛ di marra axxam uca netta iɛarn i-t deg uɣezdis nnes, issfaq i-t, inna: “Kkar deɣya!” Deɣya wḍant ssnaseř zeg ifassen nnes.
ACT 12:8 Inna as lmalak: “Byes, teqqned tisiřa nnec!” Igga ammu. Inna as xenni: “Arḍ ajeǧab nnec, ḍfar ayi-dd!”
ACT 12:9 Xenni iffeɣ, iḍfar i-t, war issin min d as igga lmalak, aqa man aya d tidett, maɣar ittɣiř as iẓra ijj n řewḥiy.
ACT 12:10 Ařami kkin x uɛessas amezwaru d x wenni wiss tnayen, iwḍen ɣar tewwart n wuzzař tenni ittawyen ɣar tendint, tennurzem asen weḥḥdes. Awarni řami zzayes ffɣen, qeḍɛen ict n zzenqet, řexdenni ijja i-t lmalak.
ACT 12:11 Xenni idweř-dd Cimɛun ɣar řbař nnes, inna: “Řexxu ssneɣ s tidett belli SIDI issekk-dd lmalak nnes, issenjem ayi zeg ifassen n Hirudus u zi marra min zeɛmen ad ayi ggen Wudayen.”
ACT 12:12 Umi tuɣa ittxarreṣ di man aya, yusa-dd ɣar taddart n Maryam, yemmas n Yuḥanna, wenni ittkennan Markus, mani tuɣa ttmunan aṭṭas, ttẓaǧan [din].
ACT 12:13 Ařami issqarqeb di tewwart n barra n řemraḥ, tusa-dd ict n tḥenjirt, qqaren as Ruda ḥima ad tseř [wi dinni].
ACT 12:14 Teɛqeř tmijja n Cimɛun, uca zi ssibbet n řefraḥet war tarzim ca tewwart, [maca] teɛqeb deɣya uca txebbar i-ten, inna asen: “Xzar, Cimɛun, aqa ibedd ɣar tewwart n řemraḥ!”
ACT 12:15 Nnan as: “Aqa cem txeřfed!” Maca nettat teqqim teqqar aqa man aya nican. Nnan as: “Ma ad taɣ d lmalak nnes!”
ACT 12:16 Maca Cimɛun, iqqim issqarqub uca ffɣen, ẓrin t uca tbehten.
ACT 12:17 Iceyyar asen s ufus nnes ḥima ad sqaren uca iɛawed asen mammec t-i-dd-issuffeɣ SIDI zi řeḥbes, inna: “Xebbarem Yaɛqub d tawmat x uya!” Xenni iffeɣ ɣar ijj n wemcan nneɣni.
ACT 12:18 Řami dd-yiweḍ uziř, imsar ijj n uxarweḍ i war iǧin drust jar řɛeskar x min imsaren i Cimɛun.
ACT 12:19 Awarni řami tuɣa xas yarezzu Hirudus, maca war t yufi, iḥkem x iɛessasen s řmewt, iffeɣ zi Yahudiyya, iqqim izeddeɣ di Qayṣariya.
ACT 12:20 Umi tuɣa řeɛdawet di Hirudus ḍidd i ayt n Ṣur d Ṣaydun, munen nitni, iwḍen ad ssqenɛen Blastus amsexxar icennɛen n ujeǧid uca ttaren as maḥend ad asen iwc ijj n weṣřaḥ, minzi macca n temmurt nsen tekka-dd zi tgeldit n Hirudus.
ACT 12:21 Deg ijj n wass [n řfarḥ] ittwassnen yarḍ Hirudus ajeǧab n ujeǧid am iqqim x řkursi n ccreɛ, uca issiweř i řɣaci.
ACT 12:22 Uca marra řgens isɣuy ɣares: “Aqa d awařen n AREBBI, war iǧi n bnadem.”
ACT 12:23 Řexdenni iwta i-t lmalak n SIDI, minzi netta war iwci aɛuǧi i AREBBI. Uca dřen t ikeccawen, iffeɣ zzayes buḥbeř.
ACT 12:24 Awař n AREBBI ittwabarreḥ [zzayes], imeqqar.
ACT 12:25 Bar-Naba d Cawul ɛeqben-dd zi Urcalim ɣar Antiyukiya awarni řami kemmřen tasexxart nsen uca iwyen akidsen Yuḥanna, wenni umi ttkennan Markus.
ACT 13:1 Tuɣa din di Antiyuxiya di tmesmunt inabiyyen d imseřmaden: Bar-Naba, d Cimɛun wenni ittkennan Nijer, d Lukiyus zi tendint n Qayrawan, d Manaɛin wenni d mmis n wenni yarebban Hirudus, řḥakem x ijj n arbaɛ n temmurt, d Cawul.
ACT 13:2 Am tuɣa ttẓumman, ttzawgen AREBBI, inna asen Arruḥ Iqeddsen: “Farzem ayi-dd Bar-Naba d Cawul i řxedmet tenni umi d asen dd-řaɣiɣ.”
ACT 13:3 Awarni řami ẓummen, ẓẓuǧen, ssarsen xasen ifassen, sekken ten.
ACT 13:4 Řami tuɣa dd-ttwassekken zi Arruḥ Iqeddsen, hwan-dd ɣar Salukiya uca ssenni ruḥen di řebḥar ɣar Qubrus.
ACT 13:5 Umi iwḍen ɣar Salamis, barrḥen s wawař n Siditneɣ di temzidawin n Wudayen. Tuɣa Yuḥanna ittsexxar i-ten.
ACT 13:6 Awarni řami ẓwan marra tagzirt, iwḍen-dd ɣar Pafus. Nitni ufin din ijj n weryaz d Uday, tuɣa wanita d aseḥḥar, d anabi issxarriqen, qqaren as Bar-Cuma.
ACT 13:7 Netta ɣares ict n tesɣunt imten ak-d ijj n bnadem d amiɣis, lɛamil umi qqaren Sarjiyus Bulus. Iřaɣa-dd lɛamil i Bar-Naba d Cawul, tuɣa immeẓri ad iseř awař n AREBBI.
ACT 13:8 Maca aseḥḥar Bar-Cuma, isem wanita ittwatarjem s ‘Ilimas’, tuɣa ittɛekkas i-ten, yarzu ad issbeɛɛed lwali x l’iman.
ACT 13:9 Maca Cawul umi qqaren ɛawed Bulus, ittwaccur s Arruḥ Iqeddsen, ijɛar dayes mliḥ, inna:
ACT 13:10 “A [cek], aqa teccured s kuř řɣecc d kuř teḥraymect, [a cek] mmis n ibřis d řeɛdu n marra tasegda. Ma aqa cek war tbedded [ɛemmarṣ] ad tessxarwḍed ibriden iseggden n SIDI?
ACT 13:11 Řexxu, xzar, aqa da afus n SIDI ḍidd nnec, ad tdewřed d adarɣař, war tᵉttwiřid tafuct [ɛad] i yijj n řmijař.” Řexdenni tewḍa-dd xas tayyut d taǧest uca ibda iddura ittfafa, yarezzu wi t ɣa igewwden zeg ufus.
ACT 13:12 Řami iẓra lɛamil min imsaren, itebhet uca yumen di tɣuri n SIDI.
ACT 13:13 Bulus d Bar-Naba kkin x řebḥar zi tendint n Pafus uca iwḍen ɣar tendint n Pirxa di Pamfiliya. Ssenni yuyur xasen Yuḥanna, iɛqeb ɣar Urcalim.
ACT 13:14 Maca nitni ruḥen zi Pirxa, [kkin x temmurt,] uca iwḍen ɣar Antiyuxiya, ict n tendint di [jjwayeh n] Pisidiya. Udfen nitni ɣar temzida deg wass n ssebt uca qqimen dinni.
ACT 13:15 Awarni tiɣri n Ccariɛa d Inabiyyen, ssekken ɣarsen imɣaren n temzida, nnan: “[A] iryazen tawmat, mařa tuɣa ɣarwem ijj n wawař n ucejjeɛ i iwdan, barrḥem zzayes i řgens!”
ACT 13:16 [Xenni] ikkar Bulus iceyyar s ufus nnes, inna: “A kenniw, iryazen n Israil u kenniw inni itteggʷeden AREBBI, sřem!
ACT 13:17 AREBBI n řgens-a tuɣa ifarz řejdud nneɣ uca issgeɛɛed i-ten u immarni daysen aṭṭas řami ten tuɣa d imeɛzab di temmurt n Miṣra uca issuffeɣ i-ten s ufus nnes yuɛřan,
ACT 13:18 issecca i-ten řmijař n arebɛin n iseggʷusa di řexřa.
ACT 13:19 Iteḥḥa sebɛa n řegnus di temmurt n Kenɛan, uca iwca asen temmurt nsen d řwart i nitni.
ACT 13:20 Netta iwca asen řquḍat i yijj n řmijař n arebɛa-mya u-xemsin n iseggʷusa, ař řweqt n unabi Camwil.
ACT 13:21 Xenni ttaren ijj n ujeǧid i yixef nsen uca AREBBI iwca asen Cawul, mmis n Kis, ijj n weryaz zi teqbič n Binyamin, řmijař n arebɛin n iseggʷusa.
ACT 13:22 [Xenni] ikkes i-t, issgeɛɛed asen Dawud d ajeǧid, wenni umi x iched [AREBBI] ɛawed [ammu]: ‘Ufiɣ Dawud mmis n Yassa, aqa-t d ijj n weryaz yusa-dd x řxaḍar inu, wenni i ɣa iggin marra min xseɣ Necc.’
ACT 13:23 Zi zzariɛet nnes igga AREBBI i Israil Yasuɛ Amsenjem am mammec tuɣa zzayes iwaɛd.
ACT 13:24 Issekk Yuḥanna ḥima ad ibarreḥ s uṣeɣḍaṣ n ttubet qbeř twasit nnes i marra řgens n Israil.
ACT 13:25 Umi dd-yiweḍ Yuḥanna ikemmeř tasexxart nnes, inna: ‘Min d awem ittɣiř aqa d necc? War ǧiɣ d [Lmasiḥ], maca, xzar, Netta ad dd-yas awarni ayi, Wenni umi necc war sdiheǧeɣ ad as fesyeɣ ifiřan n sandaliyat nnes!’
ACT 13:26 [A] iryazen tawmat, tarwa n jjiř n Ibrahim d yinni akidwem itteggʷeden AREBBI: I kenniw umi dd-ittwassekk Netta, Wenni d Awař Iddaren.
ACT 13:27 Minzi imezdaɣ n Urcalim d imeqqranen nsen war d as fhimen uřa d idlisen n inabiyyen i iqqaren kuř ssebt, maca nitni ḥekmen xas u [ammu] kemmřen nitni min yuran.
ACT 13:28 Waxxa war ufin uřa d ijj n řesbab ḥima ad xas ḥekmen s řmewt, ttaren zi Pilaṭus [ttesřiḥ] ḥima ad t nɣen.
ACT 13:29 Umi kemmřen marra min xas yuran, ssehwan t-i-dd zi teḥnact uca ssarsen t deg wenḍeř.
ACT 13:30 Maca AREBBI issnekkar i-t-i-dd zi taddart n imettinen.
ACT 13:31 Iḍhar asen-dd aṭṭas n wussan i yinni akis igeɛɛden zi Ljalil ɣar Urcalim uca řexxu aqa aten d řechud nnes zzat i řgens.
ACT 13:32 Xzar, uřa d neccin nettbarreḥ i kenniw s wawař n lwaɛd i ittwannan i řejdud nneɣ.
ACT 13:33 Xzar, AREBBI ikemmeř [lwaɛd] i neccin, inni iǧan d tarwa nsen, umi dd-issnekkar Yasuɛ [zi řmewt]. Am mammec tura deg uzehhid wiss tnayen: ‘Cek d Mmi, ass-a jjiɣ-dd Cek!’
ACT 13:34 S uya issnekkar i-t-i-dd AREBBI zi taddart n imettinen ařami war dd-iddikkwiř ɛemmarṣ ařami ɣa ikiccu, am t inna: ‘Necc ad awem wceɣ timegga n arḍa n Dawud i daysent řaman.’
ACT 13:35 S uyenni iqqar ɛawed deg ijj n wemcan nneɣni: ‘Cek war tᵉttejjid Amsizdeg nnec ad ikiccu.’
ACT 13:36 Minzi Dawud isexxar jar jjiř nnes ɛlaḥsab min ixs AREBBI, uca immut, ittwassmun ɣar řejdud nnes, xenni ikiccu.
ACT 13:37 Maca Wanita, wenni dd-issnekkar AREBBI, war ittkicci.
ACT 13:38 S uya, [a] tawmat, snem aqa s Wa ittwabarreḥ s weɣfar n ddnub i kenniw,
ACT 13:39 u [snem] aqa zi marra min zi war tzemmarem ad tᵉttwaseggdem s Ccariɛa n Musa, aqa ad ttwaseggden marra inni yumnen zzayes Netta.
ACT 13:40 Ḥḍam xenni ḥima war xawem dd-iweṭṭi ca n min yuran deg [idlisen n] inabiyyen:
ACT 13:41 ‘Xzarem, a kenniw inni ittbuṣaren, tɛejbem u tweddarem, minzi Necc ad ggeɣ ict n řxedmet deg wussan nwem i war tᵉttiqqim waxxa iɛawed awem tt ca n ijjen.’”
ACT 13:42 Řami zzaysen dd-ffɣen, ttaren zzaysen ḥima ad kisen ssiwřen s wawařen d ijjen deg ijj n ssebt nneɣni.
ACT 13:43 Řami immsebḍa [umuni n] temzida, aṭṭas n Wudayen d waṭṭas n imɛacaren n Wudayen inni itteggʷeden AREBBI ḍfaren Bulus d Bar-Naba. Nitni tuɣa kisen ssawařen, ɛeřmen asen ḥima ad qqimen ttᵉṭṭfen deg arḍa n AREBBI.
ACT 13:44 Di ssebt i dd-yusin tusa-dd tendint marra ḥima ad tseř i Wawař n AREBBI.
ACT 13:45 Ařami ẓrin Wudayen řɣaci d ameqqran, dewřen ɛemmaren s řeḥsed, ɛeksen min xef issiweř Bulus, qacḥen u ceqqfen [dayes].
ACT 13:46 Maca Bulus d Bar-Naba nnan s teryast: “Tuɣa ittřiq ad awem nessiweř d amezwaru Awař n AREBBI, maca umi t tugim, u tekksem awař ḍidd i yixef nwem belli war tesdiheǧem Tudart ittduman, xzar, aqa [řexxu] neccin ad nwejjeh řegnus.
ACT 13:47 Minzi ammu d aneɣ iweṣṣa Siditneɣ, iqqar: ‘Necc arriɣ Cek d tafawt i řegnus, ḥima ad tiřid i Tudart ař ṭṭrufa n ddunect.’”
ACT 13:48 Umi sřin řegnus man aya, farḥen ssemɣaren awař n Sidi uca umnen marra inni tuɣa ittwafarzen i Tudart ittduman.
ACT 13:49 Uca iffeɣ Awař n SIDI ɣar jjihet nni marra.
ACT 13:50 Maca Udayen ssḥarrcen imcennɛen n tendint d temɣarin tinni ɣarsent ccan u ɛebbdent i AREBBI akidsen. Ammu ssekkaren nitni ict n umarret x Bulus d Bar-Naba uca ssuffɣen ten barra i temmurt nsen.
ACT 13:51 Maca nitni zzerzen taɛejjajt zeg iḍaren nsen xasen uca iwḍen ɣar tendint n Ikuniya.
ACT 13:52 Imeḥḍaren dewřen ccuren s řefraḥet n Arruḥ Iqeddsen.
ACT 14:1 Deg Ikuniya udfen nitni jmiɛ ɣar temzida n Wudayen uca ssiwřen ařami umnen aṭṭas n řɣaci, am Wudayen am Iyunaniyyen.
ACT 14:2 Maca Udayen inni war yuminen, ssekkaren [iryazen n tendint i yeǧan zi] řegnus, maḥend ad ssɛiǧten tawmat.
ACT 14:3 [Waxxa amenni] kkin dinni aṭṭas n řweqt, ttbarrḥen s bṭayṭay s SIDI. U Netta tuɣa ittic cchadet i Wawař n arḍa nnes s řeɛřamat d řeɛjayeb i igga s ifassen nsen.
ACT 14:4 Marra řɣaci [n imezdaɣ] n tendint immsebḍa. Ca [zzaysen] ruḥen ak-d Wudayen u ca nneɣni ak-d rrusul.
ACT 14:5 Tuɣa din ict n tmeɛmuč xasen zeg yinni zi řegnus u zeg Wudayen ak-d imeqqranen nsen, ḥima ad xasen karfsen u ḥima ad ten arejmen.
ACT 14:6 Řami ssnen man aya, ffɣen-dd uca arewřen ɣar tneddam n Likaɛunya, aqa aten d Listra d Dirbi, u ɣar dcurat i d as dd-innḍen,
ACT 14:7 uca ttbarrḥen dinni s Řexbar Aṣebḥan.
ACT 14:8 Tuɣa izeddeɣ ijj n weryaz di Listra wenni d aneɛḍab deg iḍaren nnes, aqa-t d aqejdaḥ zeg uɛeddis n yemmas, war yuyur ɛemmarṣ.
ACT 14:9 Tuɣa ittesřa i Bulus am issawař netta. Řami t iẓra Bulus, yuca aqa dayes l’iman ḥima ad ittwassgenfa.
ACT 14:10 Inna as s ict n tmijja tejhed: “Ad ac iniɣ deg Yisem n Siditneɣ Yasuɛ Lmasiḥ, kkar, tbedded nican x iḍaren nnec!” Ingez, ikkar, uca iggur.
ACT 14:11 Řami iẓra řɣaci min igga Bulus, ssgeɛɛden tmijja nsen, nnan s řhard n temmurt nni: “Aqa irebbiten dewřen arewsen deg iwdan, hwan-dd ɣarneɣ!”
ACT 14:12 Nitni semman Bar-Naba s yisem ‘Sidi n irebbiten’, u Bulus s yisem ‘Hirmis’, minzi netta izwar ɣar wawař.
ACT 14:13 Akehhan n ‘Sidi n irebbiten’ tuɣa barra i tendint, yiwi iyenduzen d tseddiyin n nnuwwac ɣar tiwwura n řemraḥ mani qqimen, tuɣa ixs ad ten iqeddem d tɣarṣt i nitni.
ACT 14:14 Řami sřin Bar-Naba d Bulus x man aya, carrgen arruḍ nsen, negzen, ffɣen ɣar barra jar řɣaci, sɣuyyun, nnan:
ACT 14:15 “[A] iryazen, min i tᵉtteggem? Uřa d neccin d lbacar d ijjen am kenniw, nettbarreḥ kenniw ḥima ad tbeɛɛdem x tmesřayin-a ibeṭṭřen, ḥima ad tubem ɣar AREBBI iddaren i dd-ixeřqen ajenna d temmurt d řebḥar d marra min daysen.
ACT 14:16 Di řweqt n řejyuř iɛdun ijja Netta marra řegnus ad uyuren deg ibriden nsen,
ACT 14:17 waxxa war ijji Ixef nnes břa cchadet am d asen iwca tcuni zeg ujenna, issehwa-dd anẓar u iwca aṭṭas n řɣiǧet di řweqt nsen [ittwaggen] uca issjiwen uřawen nneɣ s macca d řefraḥet.”
ACT 14:18 Waxxa ssawařen amenni, tuɣa ɛad iqseḥ xasen ad ssbedden řɣaci, maḥend uřa d ijj war ittqeddim tiɣarṣin i nitni.
ACT 14:19 Maca usin-dd Wudayen zi Ikuniya d Antiyuxiya, ssḥarrcen xasen řɣaci uca arejmen Bulus, jarren t barra i tendint, minzi ittɣiř asen aqa immut.
ACT 14:20 Maca am d as dd-nnḍen imeḥḍaren, ikkar uca yudef ɣar tendint. Xenni tiwecca nnes iffeɣ ak-d Bar-Naba, iwḍen nitni ɣar tendint n Dirbi.
ACT 14:21 Umi barrḥen s Řexbar Aṣebḥan i imezdaɣ n tendint nni, ggin aṭṭas n imeḥḍaren. Xenni ɛeqben ɣar Listra d Ikuniya d Antiyuxiya,
ACT 14:22 ggin uř di řeɛmur n imeḥḍaren, ɛeřmen asen ad cebbaren di l’iman, nnan asen belli ittxeṣṣa ad nadef ɣar Tgeldit n AREBBI s waṭṭas n řemḥayem.
ACT 14:23 Areccḥen imɣaren di kuř tamesmunt am ttẓuman u ttẓaǧan akidsen, uca xenni sellmen ten i Siditneɣ i di umnen nitni.
ACT 14:24 Xas uca ẓwan Pisidiya, usin-dd ɣar Pamfiliya.
ACT 14:25 Awarni řami ssiwřen s Wawař n SIDI di Pirxa, hwan-dd ɣar Attalya.
ACT 14:26 Ssenni ruḥen di řebḥar ɣar Antiyuxiya minzi ssenni tuɣa ttwassqebbḍen i arḍa n SIDI di ṭṭweɛ n řxedmet tenni aqa kemmřen.
ACT 14:27 Řami din iwḍen, řaɣan x tmesmunt, xebbaren s marra řexdayem timeqqranin i yegga AREBBI s ifassen nsen u mammec yarzem tawwart n l’iman i řegnus.
ACT 14:28 Uca qqimen din ict řweqt d azirar ak-d imeḥḍaren. *
ACT 15:1 Hwan-dd yeryazen zi Yahudiyya [ɣar Antiyuxiya] uca bdan sseřmaden i tawmat, nnan: “Mařa war tᵉttwaxetnem ɛlaḥsab tnamit n Ccariɛa [n Musa], war tzemmarem ad tᵉttwassnejmem.”
ACT 15:2 Ikkar ijj n uxarweḍ d unaqec akidsen zi ṭṭarf n Bulus d Bar-Naba. Imsar aqa Bulus d Bar-Naba, u akidsen ɛad inneɣni, ruḥen ɣar rrusul d imɣaren di Urcalim zi ssibbet n unaqec-a.
ACT 15:3 Tessqebbeḍ u tessekk i-ten tmesmunt. Nitni cuqen di marra Finiqiya d temmurt n Samarya uca xebbaren mammec tuben inni iǧan zi řegnus, ssfarḥen marra tawmat aṭṭas.
ACT 15:4 Řami iwḍen ɣar Urcalim, tareḥḥeb zzaysen tmesmunt d rrusul d imɣaren u nitni xebbaren [i-ten] s marra min zzaysen igga AREBBI.
ACT 15:5 Maca ca zi tebridt n Ifarisiyyen inni idewřen umnen, kkaren, nnan: “Ittxeṣṣa ad ten txetnem u ad ten umuren ad cebbaren di Ccariɛa n Musa.”
ACT 15:6 Munen rrusul d imɣaren ḥima ad mcawaren x tmesřact-a.
ACT 15:7 Awarni řami tuɣa ttqacaḥen aṭṭas, ibedd Cimɛun, inna asen: “A iryazen tawmat, kenniw tessnem belli aṭṭas zeg wami AREBBI ixḍar aqa řegnus ad sřen i wawař n Řexbar Aṣebḥan s uqemmum inu uca ad [zzayes] amnen.
ACT 15:8 AREBBI, wenni issnen min iǧan deg wuřawen, iched xasen am d asen iwca Arruḥ Iqeddsen am i neccin.
ACT 15:9 Netta war ittegg bu řfarz jar neccin d nitni, am issizdeg uřawen nsen s l’iman.
ACT 15:10 Iwa řexxu, mayemmi tᵉttjarrabem ɛad AREBBI u tᵉtteggem ijj n uzayřu x irawen n imeḥḍaren i war zemmaren řejdud nneɣ uřa d neccin ad t narbu?
ACT 15:11 Maca s arḍa n Siditneɣ Yasuɛ Lmasiḥ numen aqa ad neṭṭef Tudart am nitni.”
ACT 15:12 Isqar řɣaci, nitni sřan i Bar-Naba d Bulus ttɛawaden x řeɛřamat d řeɛjayeb timeqqranin i zzaysen igga AREBBI jar řegnus.
ACT 15:13 Umi qqimen sqaren, ikkar Yaɛqub, inna: “[A] iryazen tawmat, sřem-dd ɣari.
ACT 15:14 Cimɛun ixebbar mammec tuɣa igga AREBBI deg umezwar ḥima ad ixdar ijj n řgens zi řegnus i Yisem nnes.
ACT 15:15 Man aya ittas-dd ak-d wawařen n inabiyyen am mammec tura:
ACT 15:16 “‘Awarni man aya ad dd-ɛeqbeɣ uca ad ssbeddeɣ ɛawed Tazeddiɣt iwḍan n Dawud, u min zzayes yareddǧen ad tt ssgeɛɛdeɣ uca ad tt areqqɛeɣ ɛawed,
ACT 15:17 ḥima min iqqimen n iwdan ad arzun x SIDI, uřa d marra řegnus i xef ittwařaɣa s Yisem inu!’, ammu i iqqar SIDI wenni iggin marra aya.”
ACT 15:18 Řexdayem n AREBBI aqa ttwassnent zi řebda.
ACT 15:19 S uyenni ttwařiɣ icuwwar war nesseḍqiř ca x yinni dd-iddakkwařen ɣar AREBBI zi řegnus,
ACT 15:20 maca ad asen nari ḥima ad beɛɛden x texmuji zi tɣarṣa [i l’aṣnam] u x farq-ccɣeř u x jjiyfat u x idammen.
ACT 15:21 Minzi Musa tuɣa ɣares di kuř tandint imxeṭṭaben di temzidawin di řejyuř iɛdun, inni zzayes qqaren di marra ussan n ssebt.”
ACT 15:22 Xenni ixḍaren rrusul d imɣaren, [jmiɛ] ak-d marra tamesmunt, iryazen zi řwesṭ nsen uca ssekken Yahuda, umi qqaren ɛawed Bar-Saba, d Sila ak-d Bulus d Bar-Naba ɣar Antiyuxiya. Iryazen-a tuɣa aten d imeqqranen jar tawmat.
ACT 15:23 Urin s ufus nsen ammu: “Rrusul d imɣaren d tawmat. I tawmat i yeǧan di Antiyuxiya d Suriya d Kilikiya, i tawmat i yeǧan zi řegnus. Sřam xawem!
ACT 15:24 Nesřa belli ca n yinni dd-yusin zi řwesṭ nneɣ, ṣedɛen kenniw s wawařen nsen, ssenhezzen tanefsect nwem, qqaren: ‘Ittxeṣṣa ad tᵉttwaxetnem u ad tᵉṭṭfem di Ccariɛa!’, umi neccin war d asen numur s man aya.
ACT 15:25 S uya nemcawar awarni řami nmun marra, uca nfarz ca n yeryazen ḥima ad ten nessekk ɣarwem ak-d imɛizzen nneɣ Bar-Naba d Bulus.
ACT 15:26 Nitni d iryazen inni iṭṭewwɛen tudart nsen i Yisem n Siditneɣ Yasuɛ Lmasiḥ.
ACT 15:27 Nessekk-dd akidsen Yahuda d Sila, inni kenniw i ɣa ixebbaren man aya ɛawed s uqemmum nsen.
ACT 15:28 Minzi aqa-t di řxaḍar n Arruḥ Iqeddsen u di řxaḍar nneɣ, ḥima war xawem nesseḍqiř ca sennej i timesřayin tinni labudda zzaysent,
ACT 15:29 aqa ad taggʷejem x min wehhben d taɣarṣt i l’aṣnam řa x idammen řa x jjiyfat uřa x farq-ccɣeř! Mařa teḥḍam ixef nwem zi man aya, ad teggem mliḥ. Iřim d imtiqqan di Siditneɣ.”
ACT 15:30 Inni dd-ittwassekken iwḍen ɣar Antiyuxiya uca ssmunen marra iwdan, wcin asen tabrat.
ACT 15:31 Řami tt ɣrin, farḥen nitni, ttwassfewwjen.
ACT 15:32 S wawařen aṭṭas ssjehden nitn tawmat uca ssmetnen inni iǧan ak-d Yahuda d Sila, maɣar uřa d nitni tuɣa aten d inabiyyen.
ACT 15:33 Awarni řami qqimen dinni ca n řweqt, ssqebbḍen ten wawmaten s řehna ḥima ad dd-dewřen ɣar rrusul.
ACT 15:34 Maca Sila tuɣa ixs ad iqqim dinni.
ACT 15:35 Bulus d Bar-Naba qqimen di Antiyuxiya, ssɣaran, ttbarrḥen s Wawař n AREBBI ak-d waṭṭas inneɣni.
ACT 15:36 Awarni ca n wussan inna Bulus i Bar-Naba: “Ejj aneɣ ad neɛqeb ɣar tawmat di kuř tandint mani tuɣa nettbarreḥ s Wawař n AREBBI, ad nargeb mammec ɣa iffeɣ umeddur nsen.”
ACT 15:37 Bar-Naba tuɣa ixs ad kisen indeh Yuḥanna, wenni ittkennan Markus,
ACT 15:38 maca Bulus tuɣa war ixs ad t yiwi, minzi [Markus] ismeḥ daysen umi tuɣa aten di Pamfiliya, u minzi war kisen iruḥ.
ACT 15:39 Ikkar ijj n umcubbec d ameqqran jar asen ařami mmsebḍan ijjen x wenneɣni. Bar-Naba yiwi Markus akides uca ibeḥḥar ɣar tegzirt n Qubrus.
ACT 15:40 Maca Bulus ixḍar Sila uca iffeɣ, awarni řami sellmen t wawmaten ɣar arḍa n AREBBI.
ACT 15:41 Icuq di Suriya d Kilikiya, ittcejjaɛ timesmunin.
ACT 16:1 [Řami] dd-yusa ɣar tneddam n Dirbi d Listra, tuɣa din ijj n umeḥḍar qqaren as Timutiyu. Tuɣa netta d mmis n ict n temɣart d tudact d řmumina, maca babas d Aramiyu.
ACT 16:2 Marra tawmat n Listra d Ikuniya cehden xas s řxar.
ACT 16:3 Bulus tuɣa ixs wa ad isafar akides. [Xenni] iksi t uca ixten as, minzi Udayen di tendint nni ssnen belli babas d Aramiyu.
ACT 16:4 Umi kkin x tneddam, ttbarrḥen, sseřmaden ten ɛawed maḥend ad ṭṭfen di tiweṣṣa i yuran rrusul d imɣaren di Urcalim.
ACT 16:5 Ammu dewřent tmesmunin beddent mliḥ di l’iman uca tuɣa řqedd nsent imeqqar kuř ass.
ACT 16:6 Umi cuqen nitni di jjwayeh n Frixiya d Galaṭiya, imneɛ i-ten Arruḥ Iqeddsen maḥend ad beccaren s Wawař n AREBBI di Asiya.
ACT 16:7 Řami dd-usin ɣar jjihet n Misya, arzun ad raḥen ɣar Bitiniya, maca Arruḥ n Yasuɛ war ten ijji.
ACT 16:8 [Xenni] ffɣen-dd zi Misya, hwan ɣar temmurt n Truwas.
ACT 16:9 Deg ijj n řewḥiy s ǧiřet iban-dd ijj n weryaz zi Makiduniya ɣar Bulus, ibedd [dinni], ittar zzayes, inna: ‘Hwa-dd ɣar Makiduniya ḥima ad ayi tewced afus!’
ACT 16:10 Awarni řami iẓra Bulus řewḥiy-a, nekkar řexdenni maḥend ad nraḥ ɣar Makiduniya, minzi nefhem belli Siditneɣ iřaɣa aneɣ-dd ḥima ad asen nbarreḥ s Řexbar Aṣebḥan.
ACT 16:11 Aqa nuyur di řebḥar zi Truwas uca nruḥ nican ɣar Samutraki, u tiwecca nnes [nruḥ] ssenni ɣar Niyapulis.
ACT 16:12 Ssenni [nruḥ] ɣar Filippi, tenni d lɛaṣima n Makiduniya, tuɣa ṭṭfen tt Irumaniyyen d tzeddiɣt i nitni. Neqqim ijj n řmijař n ca n wussan di tendint nni.
ACT 16:13 Deg wass n ssebt neffeɣ zi tewwart n tendint ɣar tma n iɣzar minzi neẓra din ict n taddart n tẓaǧit. Awarni řami neqqim din, nessiweř ak-d temɣarin tinni tuɣa imunen [dinni].
ACT 16:14 Ict n temɣart nni izzenzen řeḥrar, qqarent as Ludiya zi tendint n Tiyatira, tuɣa tᵉtteggʷed AREBBI. Siditneɣ yarzem as uř nnes ḥima ad tseř mliḥ mixef issawař Bulus.
ACT 16:15 Ttwasseɣḍeṣ nettat d aytbab n taddart nnes, uca xenni tᵉttar zzayneɣ, tenna: “Mařa s tidett tᵉttwařam belli necc umneɣ di Siditneɣ, iwa araḥem-dd, qqimem di taddart inu!” Tuɣa tzawg aneɣ aṭṭas.
ACT 16:16 Am neggur ɣar taddart n tẓaǧit, temmseřqa akidneɣ ict n tayya, dayes řaryaḥ n tgezzant, tiwi-dd ijj n řefḍeř imɣar i aytbab nnes s tgezzant nni.
ACT 16:17 Nettat tḍeffar Bulus d neccin, tesɣuyyu, teqqar: “Iwdan-a d imsexxaren n AREBBI, Amɛuǧi x kuřci, nitni ttbarrḥen i kenniw s webrid n Tudart!”
ACT 16:18 Ammu i teqqim aṭṭas n wussan. Maca Bulus, umi tuɣa ittxeyyaq x man aya, inneqřeb, inna i řaryaḥ: “Ttumureɣ cek s Yisem n Yasuɛ Lmasiḥ, ffeɣ zzayes.” Uca iffeɣ-dd [řaryaḥ] di tsaɛɛet nni.
ACT 16:19 Umi ẓrin aytbab nnes belli asitem n řefḍeř nsen iffeɣ zzayes, ṭṭfen Bulus d Sila, jarren ten, iwyen ten ɣar ssuq.
ACT 16:20 Nitni iwyen ten zzat i imxazniyyen u zzat i imḍebbaren n tendint, nnan: “Iwdan-a ttxarwaḍen tandint nneɣ, minzi nitni d Udayen.
ACT 16:21 Nitni ttbarḥen aneɣ s ttaqalid nni war iḥeǧeř ad tent neqbeř niɣ ad tent neḍfar, minzi neccin d Irumaniyyen!”
ACT 16:22 Issmun xasen ijj n řɣaci d ameqqran. Xenni carrgen imxazniyyen arruḍ nsen, umuren ad ten hettken s urekkuḍ.
ACT 16:23 Awarni řami ten hettken aṭṭas s urekkuḍ, nḍaren ten di řeḥbes, umuren i uɛessas n řeḥbes ḥima ad xasen iɛess mliḥ.
ACT 16:24 U netta, umi iksi tawṣeyyet-a, issidef i-ten ɣar daxeř qaɛ n řeḥbes, iqqen i-ten zeg iḍaren nsen deg ijj n řqařeb n ǧuḥ.
ACT 16:25 Deg wezyen n ǧiřet tuɣa Bulus d Sila ttẓaǧan u ttsebbaḥen AREBBI am d asen sřin imeḥbas.
ACT 16:26 Řexdenni imsar ijj n wenhezzi n temmurt d ameqqran ařami ittwanhezz dsas n řeḥbes, uca deɣya nnurzment marra tiwwura uca dewřen iceddiyyen n marra [imeḥbas] fesyen.
ACT 16:27 Řami d ifaq uɛessas n řeḥbes, iẓra tiwwura arzment, ijbed ssif nnes, tuɣa iggur ad ineɣ ixef nnes, ittɣiř as belli imeḥbas arewřen.
ACT 16:28 Maca Bulus iřaɣa s jjehd: “War ttḍarra ixef nnec, aqa aneɣ da marra!”
ACT 16:29 Xenni issareɣ ijj n řefnar, ingez ɣar daxeř, ittarjiji, inḍar ixef nnes ɣar iḍaren n Bulus d Sila.
ACT 16:30 Issuffeɣ i-ten-dd ɣar barra, inna: “[A] řejwad, min ittxeṣṣa ad ggeɣ ḥima ad ṭṭfeɣ Tudart?”
ACT 16:31 Nitni nnan as: “Amen di Siditneɣ Yasuɛ Lmasiḥ, ad tᵉṭṭfed Tudart, cek d [aytbab n] taddart nnec!”
ACT 16:32 Ssiwřen Awař n SIDI akides u ak-d marra aytbab n taddart nnes.
ACT 16:33 Di tsaɛɛet nni n ǧiřet iwyi ten-dd [ɣares], issird asen iyezzimen nsen uca deɣya ittwasseɣḍeṣ netta ak-d marra aytbab n taddart nnes.
ACT 16:34 Xenni iwyi ten ɣar taddart nnes, issewjed asen ṭṭabřa, ifarḥ netta d aytbab n taddart nnes, minzi ṭṭfen l’iman zi AREBBI.
ACT 16:35 Umi dd-yiweḍ uziř, ssekken imxazniyyen iweqqafen x řaman, ḥima ad inin i uzeǧif n řeḥbes: “Ḍeřq asen-dd i iwdan nni.”
ACT 16:36 Umi isřa aya uzeǧif n řeḥbes, yudef-dd ɣar daxeř uca issiweḍ awařen-a ɣar Bulus, inna: “Imxazniyyen sekken-dd ḥima ad awem ḍeřqen. Xenni řexxu, ffɣem, řuḥem di řehna!”
ACT 16:37 Maca Bulus inna as: “Waxxa neccin d Irumaniyyen, jjin ad aneɣ hettken s urekkuḍ s bṭayṭay am war dayneɣ iǧi řɛib, nḍaren aneɣ di řeḥbes, uca řexxu, ma xsen nitni ad aneɣ ḍeřqen s tnuffra? Lla, ejj i-ten ad dd-asen s yixef nsen, ḥima ad aneɣ ḍeřqen.”
ACT 16:38 Iweqqafen x řaman ruḥen, ssiwḍen awařen-a nni d asen ittwannan ɛawed ɣar izeǧifen n tendint. Uca nitni ggʷeden umi sřin aqa-ten d Irumaniyyen.
ACT 16:39 [Xenni] usin-dd ɣarsen, ttaren zzaysen ad ruḥen, ad ffɣen zi tendint.
ACT 16:40 Awarni řami ffɣen-dd zi řeḥbes, ɛeqben ɣar Ludiya, mani ẓrin tawmat. Sscejjɛen ten uca uyuren.
ACT 17:1 Ẓwan x Amfipulis d Apulluniya, iwḍen ɣar Tissalunika mani tuɣa ict n temzida n Wudayen.
ACT 17:2 Bulus yudef-dd din ɣarsen, am tuɣa d lqaɛida nnes. Di třata [n wussan] n ssebt issiweř akidsen zi Tira [Iqeddsen].
ACT 17:3 Iffessar u issbeyyen [asen ammu]: “Tuɣa ittxeṣṣa i Lmasiḥ ad ittwaweddeb u ad dd-ikkar zi taddart n imettinen. Aqa Netta d Yasuɛ, Lmasiḥ min xef d awem barrḥeɣ.”
ACT 17:4 Ca zzaysen umnen, munen ak-d Bulus d Sila, uřa d aṭṭas n Iyunaniyyen inni itteggʷeden AREBBI, uřa d timɣarin icennɛen, war iǧi drust zzaysent,
ACT 17:5 Maca Udayen dewřen ttasmen, nedhen ca n yeryazen iɛeffanen zeg ibriden n tendint, ssgeɛɛden ijj n řɣaci d ameqqran ɣarsen, sshajan tandint uca ssekkaran ten ḍidd n taddart n Yasun, arzun ad ten sellmen i řɣaci.
ACT 17:6 Umi war ten ufin din, jarren Yasun d wawmaten i din iǧan ɣar izeǧifen n tendint, sɣuyyun: “Xzar, ina, inni issɣewwɣen tammurt marra, aqa usin-dd ɛawed da!
ACT 17:7 Yasun issidef i-ten ɣares d inewjiwen, [waxxa] nitni marra ttɛekksen tiwṣeyyat n qayṣar, qqaren aqa da ajeǧid nneɣni, aqa-t d Yasuɛ.”
ACT 17:8 Ssarejfen izeǧifen n tendint d řgens umi sřin aya.
ACT 17:9 Maca awarni řami ṭṭfen řɛarbunat zi Yasun d yinneɣni, arxun asen.
ACT 17:10 Řexdenni ssekken tawmat Bulus d Sila ɣar Biriya s ǧiřet. Umi din iwḍen, ruḥen ɣar temzida n Wudayen,
ACT 17:11 minzi Udayen dinni tuɣa aten xar zeg inni i yeǧan di Tissalunika, minzi tuɣa xsen ad sřen i Wawař kuř ass, arezzun ad ssnen zi Tira Iqeddsen, ma timesřayin-a aqa tent amenni.
ACT 17:12 Aṭṭas zzaysen umnen, uřa d aṭṭas n temɣarin d yeryazen zeg Iyunaniyyen.
ACT 17:13 Maca, umi Udayen n Tissalunika ssnen belli Bulus tuɣa ittbarreḥ Awař n AREBBI di Biriya, usin-dd nitni ɛawed din, war ssbedden zeg usɣewweɣ u zeg usxarweḍ jar imezdaɣ [n tendint].
ACT 17:14 [Xas uca] jjin wawmaten ad ihwa Bulus řexdenni ɣar řebḥar, maca Sila d Timutiyu qqimen din.
ACT 17:15 Inni issqebḍen Bulus, iwyen t ɣar tendint n Atina. Xenni, umi t jjin, ṭṭfen zzayes ict n tebrat i Sila d Timutiyu maḥend nitni ad ɣares dd-asen deɣya.
ACT 17:16 Am ten tuɣa ittraja Bulus di Atina, tuɣa arruḥ nnes ixeyyeq umi iẓra tandint teccur s [řexyařat n] l’aṣnam.
ACT 17:17 S uyenni tuɣa issawař di temzida ak-d Wudayen u ak-d yinni itteggʷeden AREBBI, u di ssuq uřa ak-d inni i tuɣa ittmunen dinni kuř ass.
ACT 17:18 Ɛad ca n ifaylasufen zi temzida n Ipikurus u ca nneɣni, qqaren as Istuwakiyyen, mnaqacen akides. Ca [zzaysen] nnan: “Min ixs ad yini wanita s řhard-a qaɛ?” Maca inneɣni nnan: “Iḍhar-dd aqa-t d ambarreḥ n irebbiten iɣriben, minzi tuɣa ittbarreḥ asen s Yasuɛ d tnukra nnes [zeg imettinen].
ACT 17:19 Uca iwyen t, nedhen t ɣar řebni n taddart n ccreɛ umi qqaren Ariyupagus, nnan as: “Ma iɛeddeř ad nessen man taɣuri n jdid i tᵉttbarrḥed?”,
ACT 17:20 minzi cek tiwyed ca n tmesřayin tiɣribin i imezzuɣen nneɣ, u neccin nexs ad nessen min ixs ad yini man aya.”
ACT 17:21 Marra inni zi Atina d marra ibarraniyyen inni din iqqimen, sseɛdun řweqt mɣir ḥima ad xebbaren u ḥima ad sřen ict n řḥajjet n jdid.
ACT 17:22 Ikkar-dd Bulus, ibedd di [taddart n ccreɛ qqaren as] ‘Ariyupagus’, inna: “[A] iryazen n Atina, ufiɣ belli kenniw tᵉttɛemmarem sennej i ṭṭarf s tiggʷudi n ccwaṭen [zi kuř aɣezdis].
ACT 17:23 Minzi umi nnḍeɣ [di tendint nwem], ẓriɣ timzidawin nwem, ufiɣ ɛawed ijj n uɛalṭar zemmen xas: ‘I AREBBI i war ittwassnen’. S uyenni wenni tɛebbdem kenniw, am war t tessinem, d Wa i zi d awem ttbeccareɣ.
ACT 17:24 Minzi AREBBI wenni dd-yejjin ddunect d marra min dayes, wenni iǧan d Sidi n ujenna d temmurt, war izeddeɣ ca di tzawiyyin i ittwaggen s ifassen [n iwdan],
ACT 17:25 uřa war xas ittwasexxar s ifassen n iwdan axmi Netta iḥwaj ca, minzi Netta simant nnes iwca i mkuř bnadem tudart d twarrit n nnefs.
ACT 17:26 Zeg idammen n yijjen igga marra řegnus n bnadem ḥima ad zedɣen x wudem n temmurt marra, u s řumur nnes ifarz asen řmijařat n řweqt uca igga iymiren n tzeddiɣt n iwdan,
ACT 17:27 ḥima ad arzun x AREBBI u ad [zzayes] ttaren, ad taɣ ad t afen s marra min zzayes ittwaggen, maɣar Netta war iggʷij ca aṭṭas x kuř ijjen zzayneɣ.
ACT 17:28 Minzi neccin dayes i neddar u [dayes i] nᵉttenhezza u [dayes i] neǧa, am mammec nnan ca n imiɣisen nwem: ‘Aqa neqqarṣ zzayes Netta!’
ACT 17:29 S uyenni, am dd-iqqarṣ bnadem zi AREBBI, ittxeṣṣa war nḥesseb ca belli ureɣ niɣ nnuqart niɣ aẓru i ittwaggen s lfenn u s tzemmar n bnadem, aqa aten am AREBBI i ǧan.
ACT 17:30 AREBBI ijja ad ɛdunt zzmanat n uweddar, [maca řexxu,] di zzman-a ittamar i marra iwdan, aqa ittxeṣṣa i kuř bnadem di kuř amcan ad dd-idweř ɣar AREBBI!
ACT 17:31 Minzi Netta igga ijj n wass i di i ɣa iḥkem x marra tammurt s řḥeqq s ijj n Bnadem i ifarz. Netta igga kuř ijjen ittxeṣṣa as maḥend ad zzayes yamen, řami t-i-dd-issnekkar zi taddart n imettinen.”
ACT 17:32 Umi sřin x tnukra zi taddart n imettinen, bdan sthezzan s man aya, maca inneɣni nnan: “Ict n twařa nneɣni nexs ad zzayek nseř ktar x man aya.”
ACT 17:33 Ammu iffeɣ Bulus zi řwesṭ nsen.
ACT 17:34 Ca zzaysen ḍfaren t, umnen. Tuɣa Diyunisiyus d ijjen zzaysen, aqa-t jar řquḍat n Ariyupagus, uřa d ict n temɣart qqaren as Damaris u inneɣni akidsen. *
ACT 18:1 Awarni man aya ijja Bulus tandint n Atina, yusa-dd ɣar Kurintus.
ACT 18:2 Yufa [din] ijj n weryaz d Uday qqaren as Akwila. Wanita yiweḍ-dd [din] zi Punṭus, yusa-dd zi Iṭalya di řweqt nni, ak-d Priskilla, tamɣart nnes, minzi [qayṣar] Kludiyus tuɣa yumur maḥend marra Udayen ad ffɣen zi Ruma. Uca yusa-dd [Bulus] ɣarsen.
ACT 18:3 Umi tuɣa ɣares ṣṣenɛet d icten akidsen, iqqim ɣarsen, ixeddem akidsen, minzi nitni tuɣa aten di ṣṣenɛet nsen d imɛicwen, tteggen iqiḍan.
ACT 18:4 Tuɣa ittḥeddat kuř ssebt di temzida, yarezzu ad isseqneɛ Udayen d ikafriwen, [maḥend ad amnen].
ACT 18:5 Umi dd-ihwa Sila d Timutiyu zi Makiduniya, ssbedden nitni Bulus zeg ubarreḥ n Wawař, minzi Udayen tuɣa ttḍaddan t, ttceqqfen [dayes] umi iched aqa Yasuɛ Netta d Lmasiḥ.
ACT 18:6 Izzerz [taɛejjact] zeg warruḍ nnes, inna asen: “Zi řexxu ttbariɣ ixef inu zzaywem, [uca] ad raḥeɣ ɣar řegnus.”
ACT 18:7 Iruḥ ssenni uca yusa-dd ɣar taddart n ijj n weryaz qqaren as Titus wenni tuɣa iɛebbden AREBBI. Tuɣa taddart nnes teřṣeq ak-d temzida.
ACT 18:8 U Krispus, ameqqran x temzida, yumen di Siditneɣ ak-d marra aytbab n taddart nnes, uřa d aṭṭas n Ikurintiyyen umi d as sřin, umnen di AREBBI, ttwassɣeḍṣen.
ACT 18:9 [Xenni] inna SIDI i Bulus deg ijj n řewḥiy: “War tteggʷed, siweř, war ttseqqara,
ACT 18:10 minzi Necc akidek uca uřa d ijj war izemmar ad cek iḍarr, minzi ɣari aṭṭas n iwdan di tendint-a!”
ACT 18:11 Uca iqqim ijj n useggʷas d setta n iyuren di Kurintus, isseřmad asen awař n AREBBI.
ACT 18:12 Maca umi tuɣa Ɣaliyun lɛamil x Axaya, kkaren Wudayen am yijj n weryaz x Bulus uca iwyen t-i-dd ɣar řkursi n ccreɛ,
ACT 18:13 nnan: “Wa isseqnaɛ iwdan maḥend ad ɛebden AREBBI s řɛeks n Ccariɛa.”
ACT 18:14 Umi ittar Bulus ttesriḥ maḥend ad yarzem aqemmum nnes, inna Ɣaliyun i Wudayen: “Mařa tusim-dd da ak-d icetciyen zi ssibbet n ijj n ufturi niɣ n ijj n řɣecc niɣ n ijj n nnɛi n taɛeffant, [a] Udayen, xenni iři ad iřiq ad kenniw qebřeɣ s řḥeqq.
ACT 18:15 Maca mařa din ixarwiḍen di ssibbet n ijj n wawař, niɣ [di ssibbet n] n ca n ismawen, niɣ [di ssibbet n] Ccariɛa nwem, ḥḍam t kenniw s yixef nwem, minzi necc war xseɣ ad iřiɣ d řqaḍi x tmesřayin-a!”
ACT 18:16 Uca yuẓẓeř xasen zi řkursi n ccreɛ.
ACT 18:17 Řexdenni ṭṭfen marra lkuffar Sustinis, amɣar n temzida, wtin t qibač i řkursi n ccreɛ, [maca] Ɣaliyun war d as icqi man aya qaɛ.
ACT 18:18 [Awarni řami] iqqim Bulus din ɛad aṭṭas n wussan, iweddeɛ tawmat uca ibeḥḥar ɣar Suriya u Priskilla d Akwila ruḥen akides. Netta tuɣa iḥeff azeǧif nnes di Kinxriyus, minzi tuɣa ijjaǧ ict n tjaǧit.
ACT 18:19 [Umi] dd-iwḍen ɣar Afasus, yudef Bulus ɣar temzida, tuɣa ittḥeddat Udayen.
ACT 18:20 Řami zzayes ttaren ad kisen iqqim ktar, war ijji ad t ssqenɛen.
ACT 18:21 Netta inna: “Ittxeṣṣa nican ad ɛeyydeɣ Řɛid i dd ɣa yasen di Urcalim. Maca ad ɣarwem dd-ɛeqbeɣ ɛawed mařa ixs AREBBI!” Uca ijja Akwila d Priskilla di Afasus.
ACT 18:22 Icuq řebḥar uca yiweḍ-dd ɣar Qayṣariya, igeɛɛed [ɣar Řɛid di Urcalim], iseǧem s řehna x tmesmunt, xenni isafar ɣar Antiyuxiya.
ACT 18:23 Ařami din isseɛdu ijj n řmijař n ca n wussan, iffeɣ uca icuq di jjwayeh n Galaṭiya d Frixiya, issemḥeḍ marra imeḥḍaren.
ACT 18:24 Ijj n weryaz, qqaren as Apullus, ijj n weryaz d Uday i dd-ittwaxeřqen di Iskandariyya, yusa-dd ɣar Afasus. Netta tuɣa d ijj n weryaz issen ad issiweř, ittḥaka deg idlisen iqeddsen.
ACT 18:25 Wa tuɣa ittwasseřmed deg webrid n SIDI, tuɣa-t s arruḥ imeḥḍen. Issawař u isseřmad zi jjihet n Yasuɛ s cḍaret, waxxa netta war issin mɣir aseɣḍeṣ n Yuḥanna.
ACT 18:26 Ibda issawař s bṭayṭay di temzida. Řami d as sřin Akwila d Priskilla, iwyen t-i-dd ɣarsen uca ssfehmen as abrid n SIDI marra.
ACT 18:27 Ařami tuɣa ixs ad isafar ɣar Axaya, cejjɛen t wawmaten, urin ɣar imeḥḍaren ad t qebřen [mliḥ]. Umi dd-yiweḍ wa ɣar din, iɛawen s arḍa [i d as iwcin] marra inni tuɣa yumnen.
ACT 18:28 Minzi netta tuɣa ittqacaḥ s jjehd ḍidd n Wudayen zzat i ubarru [n iwdan], issbeyyen asen zi Tira [Iqeddsen] belli Yasuɛ Netta d Lmasiḥ.
ACT 19:1 Řami tuɣa Apullus di Kurintus, icuq Bulus di jjwayeh yuɛřan, yiweḍ-dd ɣar Afasus, uca ibda ittseqsa imeḥḍaren i din yufa.
ACT 19:2 [Isseqsa ten:] “Ma tqebřem Arruḥ Iqeddsen řami tumnem?” Nitni arrin-dd xas, nnan: “War nesři qaɛ belli din Arruḥ Iqeddsen.”
ACT 19:3 Inna asen: “Xenni min zi tᵉttwassɣeḍṣem?” Nnan as: “S useɣḍeṣ n Yuḥanna!”
ACT 19:4 [Xenni] inna Bulus: “Tuɣa Yuḥanna isseɣḍaṣ řgens s useɣḍeṣ n ttubet. Iqqar asen ittxeṣṣa ad amnen s wenni i dd ɣa yasen awarni as, aqa Netta d Yasuɛ Lmasiḥ.”
ACT 19:5 Awarni řami sřin timesřayin aya, ttwassɣeḍṣen deg Yisem n Siditneɣ Yasuɛ Lmasiḥ.
ACT 19:6 Umi xasen issars Bulus afus, ihwa-dd xasen Arruḥ Iqeddsen, uca bdan ssawařen s ijj n yiřes nneɣni uca [bdan] ttnabben.
ACT 19:7 Tuɣa-ten qaɛ tenɛac n yeryazen.
ACT 19:8 Yudef [Bulus] ɣar temzida, issawař akidsen teřt n iyuren s teryast, ittḥeddat ɣarsen, yarezzu ad ten isseqnaɛ di min itthemman Tageldit n AREBBI.
ACT 19:9 Maca řami dewřen ca zzaysen qesḥen, ttemcubbucen, ceqqfen deg Webrid n AREBBI zzat i yinni [din] imunen zi řegnus, xenni iggʷej Bulus xasen, uca issbeɛɛed xasen imeḥḍaren, ibda issawař akidsen kuř ass di temzida n ijj n weryaz qqaren as Tirannus.
ACT 19:10 Ammu i yegga tnayen n iseggʷusa ařami marra inni tuɣa izeddɣen di Asiya sřin Awař n SIDI, am Udayen am Iramiyyen.
ACT 19:11 Tuɣa AREBBI ittegg řeɛjayeb imeqqranen s ifassen n Bulus,
ACT 19:12 ařami ksin řemḥamat [n řeqṭen] d westawen n ibuyas i iǧan arruḍ x arrimet nnes, ssarsen ten x imehřac, uca [xenni] ruḥen xasen řehřacat uca ccwaṭen ffɣen [zzaysen].
ACT 19:13 Tuɣa din ɛawed ca n Wudayen inni tuɣa igguren di temmurt, tuɣa ssuffuɣen ccwaṭen. Nitni ttɛezzmen x yinni di iǧa řaryaḥ aɛeffan s Yisem n Siditneɣ Yasuɛ, qqaren: “Neccin nettɛezzem xak s Yisem n Yasuɛ i zi ittbarreḥ Bulus.”
ACT 19:14 Inni t iggin, aqa aten sebɛa n tarwa n Skiwa, wenni d ijj n umeqqran n ikehhanen d Uday.
ACT 19:15 [Maca] cciṭan aɛeffan yarra-dd, inna asen: “Yeccu ssneɣ t uřa d Bulus ssneɣ t, maca min teɛnam kenniw?”
ACT 19:16 Uca bnadem i di iǧa řaryaḥ d aɛeffan ingez xasen, iɣeřb i-ten, inḍar i-ten [x temmurt], ařami arewřen zi taddart d iɛaryanen d iyezmen.
ACT 19:17 Řexbar-a iffeɣ-dd ɣar marra Wudayen d Iramiyyen inni izeddɣen di Afasus. Tewḍa-dd ict n tiggʷudi temɣar x marra nitni uca ittwassemɣar Isem n Siditneɣ Yasuɛ Lmasiḥ.
ACT 19:18 Aṭṭas n yinni yumnen usin-dd, steɛtarefen x iɛeddiyyen nsen, neɛmen s min tuɣa tteggen.
ACT 19:19 Uřa d aṭṭas n iseḥḥaren yarwen idlisen nsen, sscemmḍen ten zzat i marra. Nitni ggin asen řeḥsab uca ufin belli ssekkwan xemsin-ařaf [n řweznat n] nnuqart.
ACT 19:20 Ammu tuɣa l’iman n AREBBI iggam, yarenni di jjehd.
ACT 19:21 Awarni řami kemmřent tmesřayin-a, igga Bulus maḥend ad icuq di Makiduniya d Axaya marra, ḥima ad isafar ɣar Urcalim, inna: “Xmi din i ɣa reḥḥgeɣ, ittxeṣṣa ayi ad ẓareɣ Ruma ɛawed.”
ACT 19:22 Issekk tnayen n yinni tuɣa ixeddmen akides ɣar Makiduniya, ina d Timutiyu d Irastus, [maca] netta [simant] nnes tuɣa iqqim din [ɛad] ca n řweqt di Asiya.
ACT 19:23 Di řweqt nni ikkar din ijj n uxarweḍ d ameqqran x ssibbet n Webrid n AREBBI.
ACT 19:24 Minzi tuɣa din ijj n usiyaɣ n nnuqart, qqaren as Dimitriyu, wenni tuɣa ittṣennaɛ tizawiyyin timeẓyanin n nnuqart n ‘Artimis’ [di řeqwařeb], uca ammu i yarbeḥ i ayt n ṣṣenɛet nnes ijj n arbeḥ d ameqqran.
ACT 19:25 Issmun-dd ayt n ṣṣenɛet nnes ak-d inni ixeddmen akidsen, inna asen: “A iryazen, kenniw tessnem belli marra arbeḥ nneɣ yusa-dd ak-d ṣṣenɛet-a.
ACT 19:26 Kenniw tesřim u tessnem belli Bulus wanita isseqnaɛ aṭṭas n iwdan, war iǧi imezdaɣ n Afasus waha, maca uřa d ibarruten n marra Asiya, aqa issbeɛɛed i-ten [x řexyařat-a], iqqar: ‘[Řexyařat-a] i ittwaggen s ifassen war ǧin ca d irebbiten!’
ACT 19:27 War teǧi tsebbabt-a waha di lxaṭar uca teggur ad tedweř d ict n tmesřact ibeṭṭřen, maca uřa d zzawect n ‘Artimis’, tarebbit tameqqrant, ad tt ḥesben d walu uca ad sseḥqaren tarebbit-a i tɛebbed [temmurt n] Asiya uřa d marra řegnus.”
ACT 19:28 Umi sřin man aya, dewřen xeyqqen aṭṭas. Sɣuyyun, nnan: “Tameqqrant d [tarebbit] ‘Artimis’ n Ifasusiyyen!”
ACT 19:29 Tandint qaɛ txarweḍ am tekmeř uca uzzřen am yijj n bnadem ɣar tiyatir n lmesraḥ, uca Xayus d Aristarxus, iryazen zi Makiduniya, inni d imɛacaren n Bulus deg usafar nnes, ṭṭfen ten uca iwyen ten-dd akidsen.
ACT 19:30 Uřa d Bulus tuɣa ixs ad yadef ɣar tiyatir n lmesraḥ, maca imeḥḍaren [nnes] ssbedden t.
ACT 19:31 Izeǧifen [imḍebbaren n jjwayeh] n Asiya, umi tuɣa aten d imeddukkař nnes, ssekken ɛawed [ireqqasen], maḥend ad zayes ttaren ḥima war ittsebbeř ixef nnes ad yadef ɣar tiyatir.
ACT 19:32 Řɣaci i ittwassmunen di tiyatir, tuɣa ssekkaren t aṭṭas. Nitni sɣuyyun ijj i wenneɣni, maɣar azyen ameqqran zzayes war issin mixef tuɣa munen.
ACT 19:33 Řgens n Wudayen i din iǧan, nedhen ijj n weryaz zzaysen ɣar zzat, ijj n Wuday qqaren as Aliksandir. Netta ikkar, iceyyar s ufus nnes u tuɣa ixs ad issiweř x udafeɛ [n Bulus] zzat i řgens.
ACT 19:34 Maca umi fehmen belli aqa-t d Uday, sɣuyen marra s tmijja d icten ɛřaḥař tnayen n tsaɛɛetin: “Tameqqrant d ‘Artimis’ n Ifasusiyyen!”
ACT 19:35 Azeǧif n tendint isshedden řɣaci, inna: “[A] iryazen n Afasus, man wen war issinen belli tandint n Ifasusiyyen d takehhant tḥeṭṭa nican x zzawect n ‘Artimis’ u x řexyař i dd-iwḍan zeg ujenna!
ACT 19:36 S uyenni, umi war izemmar uřa d ijjen ad iɛekkes timesřayin-a, icuwwar awem ad tarsem, war tteggem ca s uqeǧeq,
ACT 19:37 minzi tiwyem-dd iryazen-a [danita], inni war iǧin d iceffaren n tzawiyyin uřa war ttceqqafen di trebbit nneɣ.
ACT 19:38 Maca mařa tuɣa ɣar Dimitriyu u ɣar yinni iǧan akides di ṣṣenɛet ca n ucetci x yijjen, aqa din ijj n lɛamil di tendint. Ejj i-ten ad [ɣares] dd-qarrben u ad carrɛen ak-d wayawya [zzates].
ACT 19:39 Maca mařa texsem ca n tmesřact nneɣni, ittxeṣṣa ad ittwafekk man aya deg ijj n wemcan i ittweṣṣan i tmesmunt ɛlaḥsab ccariɛa,
ACT 19:40 minzi aqa aneɣ di lxaṭar ad xaneɣ ḍeřmen ass-a zi ssibbet n uɣuwweɣ, minzi war din bu řesbab i zi nzemmar ad dd-narr s yijj n wawař di tmesřact n wegraw-a, minzi nessmuna di řbaṭeř u nettɣewweɣ amenni waha.”
ACT 19:41 Awarni řami inna aya, ismeḥ i wegraw ad yuyur.
ACT 20:1 Awarni řami yarsa uɣuwweɣ, iřaɣa-dd Bulus x imeḥḍaren, iweddeɛ i-ten s usudem [n wawmaten], uca iffeɣ ḥima ad iraḥ ɣar Makiduniya.
ACT 20:2 Řami icuq di jjwayeh nni, icejjeɛ i-ten s waṭṭas n wawařen, xenni yiweḍ ɣar Hillas, [ixs ad yini ɣar jjihet Axaya].
ACT 20:3 Ařami isseɛdu din třata n iyuren, ssewjden as Wudayen ijj n řfex, umi tuɣa iggur ad ibeḥḥar ɣar Suriya. S uya igga ad yeɛqeb x webrid n Makiduniya.
ACT 20:4 Supatrus zi tendint n Biriya, Aristarxus d Sikundus zi Tissalunika, Xayus zi Dirbi, Timutiyu zi Listra u Ticikus d Trufimus zi Asiya uyuren akides ař Asiya.
ACT 20:5 Ina izwaren aneɣ, ttrajan aneɣ di Truwas.
ACT 20:6 Maca neccin neffeɣ zi Filippi, tandint [tamezwarut] n Makiduniya, awarni řami kemmřen wussan n [Weɣrum] břa Antun, nekka x řebḥar u di xemsa n wussan niweḍ-dd ɣar Truwas mani neqqim sebɛa n wussan.
ACT 20:7 Deg wass amezwaru n ssimana umi munen imeḥḍaren maḥend ad arẓen aɣrum [n tnemmirt], issiweř Bulus akidsen. Isszugar Bulus di řhard nnes ař řwesṭ n ǧiřet, maɣar netta tuɣa inwa ad isafar tiwecca nnes.
ACT 20:8 Aqa areqqen din aṭṭas n řefnarat di tɣurfet n sennej i di tuɣa nmun.
ACT 20:9 Tuɣa din ijj n ubřiɣ qqaren as Utixus, iqqim di řkazi, ittesřa, řexdenni ikka xas yiḍeṣ yuǧeɣ am tuɣa Bulus isszugar di řhard nnes. Umi tuɣa iṭṭeṣ, iwḍa-dd zi ṭṭebqet wiss třata ɣar wadday, ksin t immut.
ACT 20:10 Maca Bulus ihwa, iwḍa xas, idarreɛ as, inna: “War tennexřiɛem ca, aqa dayes tudart.”
ACT 20:11 Xenni yuři ɛawed, yarẓa aɣrum, icca [cwayt zzayes], xenni issiweř akidsen [ɛad] aṭṭas ařami d řefjar. Xas uca iruḥ isafar x temmurt,
ACT 20:12 am dd-iwyen nitni aḥenjir iddar, farḥen as aṭṭas.
ACT 20:13 Maca neccin nenya deg uɣarrabu, nbeḥḥar ɣar řmarsa n Tissus maḥend ad kidneɣ dd-nawi Bulus ssenni, am mammec tuɣa ittḍebbar, maɣar netta s yixef nnes ikka [ɣar din] x temmurt.
ACT 20:14 Ařami zzayes nareḥḥeb di Tissus, neksi t di tɣarrabut uca niweḍ-ḍḍ ɣar Mitilini.
ACT 20:15 Ssenni neɛdu tiwecca nnes ɣar tegzirt n Xiyus u farwecca nnes niwed ɣar Samus, neqqim di Truxiliyun. Deg wass awarni as niweḍ ɣar Militus,
ACT 20:16 minzi Bulus igga ad iɛdu Afasus x řebḥar ḥima war ittɛeṭṭař dinni, minzi tuɣa ittqeǧeq ḥima, meɛlik iɛeddeř, ad iɛeyyed Řɛid n Xemsin n Wussan di Urcalim.
ACT 20:17 Zi Militus ijja ad dd-asen imɣaren n tmesmunt di Afasus.
ACT 20:18 Řami dd-usin ɣares, inna asen: “Kenniw tessnem zeg wass amezwaru umi dd-udfeɣ ɣar Asiya, mammec ǧiɣ akidwem marra ussan,
ACT 20:19 am tuɣa ttsexxareɣ i AREBBI s marra awaḍeɛ u s imeṭṭawen, uřa deg iɣekkwan i xafi ikkin zi ssibbet n tmeɛmač n Wudayen.
ACT 20:20 War jjiɣ ca zi min inefɛen i řeɛmur nwem war d awem t barrḥeɣ, war t ssřemdeɣ di řeswaq u di tudrin,
ACT 20:21 am ssqenɛeɣ Udayen d Iramiyyen maḥend ad dd-dewřen ɣar AREBBI, ad amnen di Siditneɣ Yasuɛ Lmasiḥ.
ACT 20:22 U řexxu ad raḥeɣ ɣar Urcalim am ttwacarfeɣ zi Arruḥ, war ssineɣ min d ayi ittrajan din,
ACT 20:23 mɣir aqa Arruḥ Iqeddsen iched ayi di kuř tandint, iqqar: ‘Aqa iceddiyyen d řemḥayem ttrajan cek!’
ACT 20:24 Maca necc war ḥessbeɣ tudart inu ca tiɣřa i yixef inu, maḥend ad kemmřeɣ ticři inu d řxedmet n tsexxart i ksiɣ zi Siditneɣ Yasuɛ ḥima ad cehdeɣ x Řexbar Aṣebḥan n arḍa n AREBBI.
ACT 20:25 U řexxu ssneɣ, aqa uřa d ijj zzaywem ad iẓar aɣembub inu ɛad, marra kenniw inni jar awem ggureɣ, ttbarrḥeɣ s Tgeldit n AREBBI.
ACT 20:26 S uyenni ad xawem cehdeɣ ass-a, belli necc ttbarriɣ ixef inu zeg idammen nwem marra.
ACT 20:27 Minzi war ɛgizeɣ ad awem ssecneɣ marra min ittexs AREBBI.
ACT 20:28 S uyenni ḥḍam x yixef nwem u x tḥimart tmun min xef igga Arruḥ Iqeddsen kenniw d imeḥḍayen, ḥima ad tarwesem tamesmunt n Lmasiḥ tenni d ikesseb s Idammen nnes.
ACT 20:29 Minzi ssneɣ belli awarni twaḥit inu ad ɣarwem dd-adfen wuccanen imuzzaren [inni] war ittejjin taḥimart.
ACT 20:30 Ɛad ad zzaywem dd-kkaren yeryazen inni i ɣa issiwřen řhard iɛewwjen ḥima ad ssuffɣen imeḥḍaren zeg webrid, ad ten jarren awarni asen.
ACT 20:31 S uyenni faqem, tɛeqřem belli třata n iseggʷusa, ǧiřet d wass, war beddeɣ ad ssmeḥdeɣ kuř ijjen zzaywem s imeṭṭawen.
ACT 20:32 U řexxu ad kenniw sellmeɣ i AREBBI u i wawař n arḍa nnes, i Wenni ɣar iǧa tizemmar ḥima ad kenniw ibna u ad awem iwc řwart ak-d marra imqeddasen.
ACT 20:33 War ḍmiɛeɣ di nnuqart niɣ deg wureɣ niɣ deg warruḍ uřa zeg ijjen.
ACT 20:34 Kenniw tessnem simant nwem belli ifassen inu aqa xedmen i min ḥwajeɣ u i min ḥwajen inni iǧan akidi.
ACT 20:35 Di kuřci ssecneɣ awem belli ittxeṣṣa, am nxeddem ammu, ad newc afus i yinni iḍeɛfen uca ad nfekkar deg wawařen n Siditneɣ Yasuɛ, belli inna: ‘Sseɛd n wenni iwcin x wenni iksin.’”
ACT 20:36 Awarni řami inna aya, iwḍa x ifadden nnes, iẓẓuǧ u marra iryazen akides.
ACT 20:37 Aqa din jar asen aṭṭas n imeṭṭawen uca darrɛen as, ssudmen t.
ACT 20:38 Ceḍnen aṭṭas, amezwar n marra x wawař i inna, belli war ẓarren ca aɣembub nnes ɛad, uca ssqebbḍen t ɣar uɣarrabu. *
ACT 21:1 Awarni řami xasen nemmsebḍa, nebda nẓekkwa řebḥar, nruḥ nican uca niweḍ ɣar tegzirt n Kus. Tiwecca nnes niweḍ ɣar Rudus u ssenni ɣar Patara.
ACT 21:2 Nufa din ijj n uɣarrabu i tuɣa ad iẓwa ɣar Finiqiya, nenya dayes uca nruḥ.
ACT 21:3 Řami dd-niweḍ ɣar tegzirt n Qubrus, nejja i-tt x uzeřmaḍ uca nruḥ x řebḥar ɣar Suriya uca ssenni niweḍ ɣar Ṣur, minzi aɣarrabu tuɣa igga ad ifarreɣ sseřɛet nnes din.
ACT 21:4 Umi nufa din imeḥḍaren, neqqim ɣarsen sebɛa n wussan. Kuř ass nnan nitni s Arruḥ i Bulus maḥend war ittgeɛɛid ca ɣar Urcalim.
ACT 21:5 Awarni i wussan-a neffeɣ, nuyur. Marra nitni ssqebḍen aneɣ, nitni d temɣarin nsen d iḥenjiren nsen, ař barra n tendint. X tma n řebḥar wḍan x ifadden nsen uca ẓẓuǧen.
ACT 21:6 Umi nweddeɛ ayawya s usudem, nenya deg uɣarrabu, maca nitni ɛeqben, kuř ijjen ɣar taddart nnes.
ACT 21:7 Umi nkemmeř x usafar zi Ṣur niweḍ ɣar Ptulumayu, nseǧmen x wawmaten uca neqqim akidsen ijj n wass.
ACT 21:8 Tiwecca nnes neffeɣ ssenni, niweḍ ɣar Qayṣariya. Nudef ɣar taddart n umbeccar Filippus, wenni tuɣa d ijjen zi sebɛa [n imsexxaren], uca neqqim [ɣares].
ACT 21:9 Tuɣa ɣar wa arebɛa n tḥenjirin, [ɛad] d tiɛezriyyin, tinni ittnabben.
ACT 21:10 Umi nenniwjew din aṭṭas n wussan, ihwa-dd ijj n unabi zi Yahudiyya, qqaren as Aɣabus.
ACT 21:11 Yusa-dd ɣarneɣ uca iksi abyas n Bulus, icarf ixef nnes ifassen d iḍaren, inna: “Ammu i iqqar Arruḥ Iqeddsen: ‘Aryaz i ɣar iǧa abyas-a, ammu i t ɣa carfen Wudayen di Urcalim uca ad t sellmen deg ifassen n řegnus.’”
ACT 21:12 Umi nesřa awařen-a, nettar zzayes, am neccin am yinni zi jjwayeh nni, ḥima war ittgeɛɛid ɣar Urcalim.
ACT 21:13 Maca Bulus yarra-dd, inna: “Min kenniw yuɣin, tᵉttrum uca tessareḍbem uř inu? Minzi aqa ayi wejdeɣ, war iǧi ḥima ad ayi carfen waha, maca ɛawed ḥima ad mmteɣ di Urcalim x ssibbet n Yisem n Siditneɣ Yasuɛ Lmasiḥ.”
ACT 21:14 Umi war d aneɣ ijji ad t nesseqneɛ, nesqar, neqqar: “Ad yiři min ixs Siditneɣ.”
ACT 21:15 Awarni ussan nni nessewjed uca ngeɛɛed ɣar Urcalim.
ACT 21:16 Ruḥen akidneɣ ca n iryazen, imeḥḍaren zi Qayṣariya, iwyen-dd ijj n tewmat, qqaren as Mnasun zi Qubrus, aqa-t d ijjen zeg imeḥḍaren imezwura, ḥima ad ɣares nenniwjew.
ACT 21:17 Ařami dd-niweḍ ɣar Urcalim, tareḥḥeb zzayneɣ tawmat s řefraḥet.
ACT 21:18 Tiwecca nnes yudef Bulus akidneɣ ɣar Yaɛqub, umi ḥḍaren din akides marra imɣaren.
ACT 21:19 Awarni řami xasen nseǧem, ibda Bulus ad iɛawed s usettef x marra min igga AREBBI jar řegnus s tsexxart nnes.
ACT 21:20 Umi sřin aya, ssemɣaren AREBBI, nnan as: “[A] umatneɣ, tᵉttwařid mecḥař n ɛecra n řuřuf di Yahudiyya i yumnen, u nitni marra ttasmen x Ccariɛa.
ACT 21:21 Maca yiweḍ asen-dd řexbar xak belli tesseřmaded i marra Udayen inni iǧan jar řegnus maḥend ad semḥen di [Ccariɛa n] Musa am d asen teqqared ittxeṣṣa war xettnen iḥenjiren nsen war gguren deg webrid n Ccariɛa.
ACT 21:22 S uyenni, minzi sřin belli aqa tusid-dd da,
ACT 21:23 egg min d ac ɣa nini! Ɣarneɣ arebɛa n yeryazen inni ɣar iǧa ijj n lwaɛd mahend ad ssizdigen ixef nsen.
ACT 21:24 Awi ina akidek, tessizdeged ixef nnec akidsen, uca xeǧeṣ xasen ḥima ad ḥeffen izeǧifen nsen. Xenni ad ssnen marra belli min xak ittwannan war iǧi bu nican, u belli cek tᵉttkemmřed Ccariɛa u tᵉttᵉṭṭfed dayes.
ACT 21:25 Maca zi jjihet n yinni yumnen jar řegnus, aqa nura belli ad beɛɛden x min iɣarṣen [i l’aṣnam], x farq-ccɣeř, x jjiyfat, uřa x idammen.”
ACT 21:26 Xenni yiwyi Bulus iryazen nni akides uca tiwecca nnes issizdeg ixef nnes akidsen. Ruḥen ɣar Zzawect Tameqqrant, isscen asen mammec ittxeṣṣa ad kemmřen wussan n usizdeg, ař d iqeddem zi mkuř ijjen zzaysen taɣarṣt [nnes].
ACT 21:27 Ařami dd-yiweḍ wass sebɛa, ẓrin t Wudayen n Asiya di Zzawect Tameqqrant, ssenhezzen řgens marra ḍidd nnes, ḥarten xas s ifassen,
ACT 21:28 sɣuyyun: “A kenniw, [a] ayt n Israil, ɣawřem ɣar twiza! Wa d bnadem nni isseřmaden iwdan marra ḍidd i řgens nneɣ u ḍidd i Ccariɛa u ḍidd i wemcan-a. Ɛawed issidef-dd Iramiyyen ɣar Zzawect Tameqqrant uca issexmej amcan iqeddsen wanita!”
ACT 21:29 Minzi tuɣa izwaren akides ẓrin Trufimus zi Afasus di tendint, ittɣiř asen belli netta yudef ɣar Zzawect Tameqqrant ak-d Bulus.
ACT 21:30 Tandint marra thaj uca iwdan dduqqzen-dd, ḥarten x Bulus, jarren t barra i Zzawect Tameqqrant, řexdenni bellɛent tiwwura.
ACT 21:31 Am yarezzu řɣaci ad t ineɣ, yiweḍ řexbar ɣar ukumandar n řkumpaniyyet, aqa Urcalim amen tekmeř txarweḍ.
ACT 21:32 Řexdenni yiwyi-dd ijj n řqebṭan x mya uřa d ijj ubarru n iɛeskariyyen, uca uzzřen ɣarsen. Ařami ẓrin nitni akumandar d řɛeskar, ssbedden ad wten Bulus.
ACT 21:33 Ařami ɣares dd-iqarreb ukumandar, iṭṭef i-t, yumur ad t carfen s tnayen n ssnaseř, xenni isseqsa min iɛna netta d min igga.
ACT 21:34 Jar řɣaci aqa din ijjen ittřaɣa ammu u wenneɣni ammu. Řami war izemmar ad issen tidett zi ssibbet n lharaj, yumur ad t awyen ɣar lqecla.
ACT 21:35 Ařami dd-yiweḍ Bulus ɣar ddruj, imsar belli iɛeskariyyen arbun t x ssbab n lɛunf n řgens,
ACT 21:36 minzi aṭṭas n iwdan tuɣa ḍeffaren t, sɣuyyun, nnan: “Kksem t zeg webrid!”
ACT 21:37 Ařami dd-iqarreb ɣar lqecla, ḥima ad yadef ɣar daxeř, inna Bulus i ukumandar: “Ma iḥiqq ayi ad ac iniɣ ca?” Inna as: “Ma tessned Tayunanit?
ACT 21:38 Ma war teǧid cek d Amiṣri wenni iggin aɣuwweɣ qbeř ussan-a, indeh akides arebɛa ařaf n yeryazen d iqettařen ɣar řexřa?”
ACT 21:39 Inna as Bulus: “Necc d aryaz d Uday zi Tarsus, ict n tendint ittwassnen di Kilikiya mani dd-xeřqeɣ. Necc ttareɣ zzayek ttesriḥ ḥima ad ssiwřeɣ ɣar řgens.”
ACT 21:40 Umi d as ismeḥ, ibedd Bulus x ddruj, iceyyar s ufus ɣarsen, uca umi arsin qaɛ, issiweř akidsen s iřes n Tɛibranit, inna asen ...
ACT 22:1 ... “[A] tawmat d ibabaten, sřem i min d awem ɣa iniɣ x udafeɛ inu.”
ACT 22:2 Umi sřin, aqa issawař akidsen s [yiřes n] Tɛibranit, qqimen sqaren ɛad ktar. Inna asen:
ACT 22:3 “Necc d ijj n bnadem d Uday, xeřqeɣ-dd di Tarsus di Kilikiya, maca arebbiɣ di tendint-a ɣar iḍaren n Gamaliyal u ttwassřemdeɣ ɛlaḥsab tidett nican n Ccariɛa n řejdud nneɣ. Ceṭṭareɣ x min iǧan n AREBBI am mammec uřa d kenniw marra.
ACT 22:4 Necc tuɣa ḍeffareɣ Abrid-a s řmewt am carrfeɣ iryazen d temɣarin, ttsellameɣ ten ɣar řeḥbes.
ACT 22:5 Arrays n ikehhanen d marra imɣaren [n řgens] zemmaren ad cehden belli ksiɣ tibratin i tawmat, maḥend ad ruḥeɣ ɣar Dimacq ḥima ad awyeɣ inni din iǧan ɛawed s tcarfin ɣar Urcalim, ḥima ad ṭṭfen lɛiqab.
ACT 22:6 Umi d ayi tuɣa deg webrid uca iwḍeɣ ɣar Dimacq ɣar wezyen n wass, tařɣa xafi s řɣefřet ict n tfawt temɣar zeg ujenna.
ACT 22:7 Wḍiɣ x temmurt, sřiɣ ict n tmijja, teqqar ayi: ‘Cawul, Cawul, mayemmi d ayi tdarrced?’
ACT 22:8 Arriɣ-dd xas: ‘Min teɛnid Cek, a Sidi?’ Inna ayi: ‘Necc d Yasuɛ, Nnaṣiri, wenni tᵉttdarraced!’
ACT 22:9 Iryazen nni tuɣa iǧan akidi, ẓrin tafawt, maca war sřin ca i tmijja n Wenni akidi issawařen.
ACT 22:10 Nniɣ: ‘Min ɣa ggeɣ, a Sidi?’ Inna ayi Siditneɣ: ‘Kkar, traḥed ɣar Dimacq, din ad ac ittwanna x marra min d ac yuran ad tegged!’
ACT 22:11 Umi dewřeɣ war ttwiřiɣ zi tissiqt n tfawt nni, gewwden ayi inni i tuɣa akidi iǧan zeg ufus, uca [ammu] i dd-iwḍeɣ ɣar Dimacq.
ACT 22:12 Tuɣa din ijj weryaz, qqaren as Ananiyas. Netta d amsegged ɛlaḥsab Ccariɛa, am mammec tuɣa xas cehhden marra Udayen.
ACT 22:13 Netta yusa-dd ɣari, inna ayi: ‘[A] uma Cawul, arzem tiṭṭawin nnec!’ Řexdenni di tsaɛɛet nni ttwarzment tiṭṭawin inu, uca ẓriɣ t.
ACT 22:14 Netta inna ayi: ‘Aqa AREBBI n řejdud nneɣ ixḍar i cek, ḥima ad tessned min ixs Netta, u ḥima ad tẓared Amseggad, ad tesřed tmijja nnes zeg uqemmum nnes.
ACT 22:15 Cek ad as tiřid d acehhad ɣar marra iwdan s marra min teẓrid u s min tesřid.
ACT 22:16 Iwa řexxu, mayemmi war tezɛimed ɛad? Kkar, ejj ad cek ssɣeḍṣen, ad tᵉttwasizedged zi ddnub nnec am tᵉttřaɣid x Yisem nnes!’
ACT 22:17 Awarni řami dd-ɛeqbeɣ, iwḍeɣ da ɣar Urcalim, uca am tuɣa ttẓaǧiɣ di Zzawect Tameqqrant,
ACT 22:18 ẓriɣ t deg ijj n řewḥiy, inna ayi: ‘Azzeř, teffɣed deɣya zi Urcalim minzi war qebbřen ca cchadet nnec xafi!’
ACT 22:19 Nniɣ necc: ‘[A] Sidi, aqa nitni ssnen belli tuɣa ttḥebbseɣ inni yumnen zzayek, hettkeɣ ten s urekkuḍ di temzidawin,
ACT 22:20 u řami ttwasizzřen idammen n ucehhad nnec Stifanus, tuɣa beddeɣ akidsen, arḍiɣ x yinni t nɣin u ḥḍiɣ arruḍ n yinni t yarejmen.’
ACT 22:21 [Xenni] inna ayi: ‘Ruḥ, minzi ad cek ssekkeɣ ɣar řaggʷaj ḥima ad tbarrḥed [L’Injil] i řegnus!’”
ACT 22:22 Tuɣa ttesřan as ař awař-a, xenni kkaren ssgeɛɛden tmijja nsen, qqaren: “Kksem t zi temmurt, minzi am wanita war isdiheǧ ad iddar.”
ACT 22:23 Am tuɣa sɣuyyun, neṭṭaren arruḍ nsen uca zuzzaran ucař ɣar ujenna.
ACT 22:24 Yumur ukumandar maḥend ad t ssidfen ɣar lqecla, ad t sseqsan am t tthettaken s urekkuḍ ḥima ad [zzayes] ifhem mayemmi xas sɣuyen [ammu].
ACT 22:25 Umi t jebden s tḥezzamin [i uhettek s urekkuḍ], inna Bulus i řqebṭan x mya i din ibedden: “Ma iḥeǧeř awem ɛlaḥsab ccariɛa [nwem] ad thettkem ijj n bnadem d Arumani s urekkuḍ am war xas teḥkimem [ɛad]?”
ACT 22:26 Umi isřa řqebṭan x mya man aya, iruḥ ɣar ukumandar, inna as: “Min ɣa tegged? Aqa aryaz-a d Arumani!”
ACT 22:27 Iqarreb-dd ɣares ukumandar, inna as: “Ini ayi, ma cek d Arumani?” Yarra-dd xas Bulus: “Wah!”
ACT 22:28 Yarra-dd xas ukumandar, inna: “Necc ṭṭfeɣ řḥeqq-a n umezdaɣ Arumani s ijj n řqedd d ameqqran n tmenyat!” Bulus inna: “Maca necc xeřqeɣ-dd zzayes!”
ACT 22:29 Řexdenni, inni tuɣa nwan ad t hettken s urekkud, jjin t. Akumandar idweř iggʷed, minzi ifhem aqa-t d Arumani u minzi ijja i-t ad t carfen.
ACT 22:30 Tiwecca nnes am tuɣa ixs ad issen tidett min xef t ḍeřmen Wudayen, igga ad fesyen iceddiyyen [nnes] uca yumur ad ssmunen izeǧifen n ikehhanen d marra Jmaɛet [Tameqqrant] n imeqqranen nsen uca issehwa-dd Bulus [ɣar din], issbedd i-t di řwesṭ nsen.
ACT 23:1 Bulus iqceɛ [deg inni iqqimen] di Jmaɛet [Tameqqrant], inna: “A iryazen tawmat! Aqa necc uyureɣ s tnefsect teṣfa ɣar marra [iɣezdisen] zzat i AREBBI ař ass-a!”
ACT 23:2 Ananiyas, akehhan, yumur inni i tuɣa din akides ibedden, ad t wten ɣar uqemmum.
ACT 23:3 Xenni inna as Bulus: “Ad cek iwwet AREBBI, cek d řḥiḍ ijiyyaren! Aqa cek teqqimed da maḥend ad xafi tḥekmed ɛlaḥsab Ccariɛa, [maca] txařafed Ccariɛa s yixef nnec am tumured ad ayi wten!”
ACT 23:4 Inni i tuɣa kis ibedden, nnan: “Ma tdeǧmed akehhan n AREBBI?”
ACT 23:5 Inna Bulus: “[A] tawmat, war ssineɣ aqa-t d akehhan, minzi tura: ‘Azeǧif n řgens nnec war t neɛɛeř!’”
ACT 23:6 Umi issen Bulus, aqa [azyen] n řgens d Iṣaduqiyyen u [azyen nneɣni] zeg Ifarisiyyen, iřaɣa di Jmaɛet [Tameqqrant]: “A iryazen tawmat, necc d Afarisi, mmis n Ifarisiyyen, necc ttᵉttwaḥakameɣ di ssibbet n usitem d tnukra n imettinen.”
ACT 23:7 Ařami inna aya, imsar ijj n uxarweḍ jar Ifarisiyyen d Iṣaduqiyyen uca ittwabḍa řgens,
ACT 23:8 minzi Iṣaduqiyyen qqaren belli war teǧi ca d tanukra niɣ d lmalakat uřa d buḥbeř, maca Ifarisiyyen cehhden x marra man aya.
ACT 23:9 Ikkar ijj n uxarweḍ d ameqqran. Ca n imseřmaden n idlisen zeg wezyen n Ifarisiyyen kkaren, ttemnaqacen akidsen s jjehd, nnan: “War nufi uřa d ijj n řɣar di bnadem-a. Mařa issiweř akides ijj n buḥbeř niɣ ijj n lmalak, man řɛib i yeǧa [xenni] di man aya?”
ACT 23:10 Umi ikkar ijj n uxarweḍ d ameqqran, iggʷed ukumandar ad mezzqen Bulus. Xenni yumur iɛeskariyyen Irumaniyyen maḥend ad dd-asen, ad t xeḍfen zi řwesṭ nsen, uca ad t awyen ɣar lqecla.
ACT 23:11 Di ǧiřet iḍhar-dd Siditneɣ i Bulus, inna as: “Egg uř, minzi am mammec xafi tcehded di Urcalim ammu i ɣa tcehded uřa di Ruma!”
ACT 23:12 Ařami d iṣbeḥ řḥař, munen ca zeg Wudayen, qqnen ixef nsen s ict n nneɛřet maḥend war ttᵉtten war sessen ař d nɣen Bulus.
ACT 23:13 Ktar zi arebɛin n yeryazen kksen wawař-a s ict n tjaǧit.
ACT 23:14 Ina ruḥen ɣar imeqqranen n ikehhanen d imɣaren [n řgens], nnan: “Aqa neqqen ixef nneɣ s ict n nneɛřet maḥend war nᵉttett walu ař ɣa nenneɣ Bulus.
ACT 23:15 Xenni řexxu, [mařa] kenniw d imeqqranen n Jmaɛet [Tameqqrant] ad tᵉttarem zeg ukumandar maḥend ad t-i-dd-indeh ɣarwem axmi texsem ad txebbcem di tmesřact-a mliḥ, aqa neccin newjed ḥima ad t nenneɣ qbeř ma ad ɣarwem dd-yaweḍ.”
ACT 23:16 Isřa mmis n učmas n Bulus x tḥiřet-a. [Xenni] yudef ɣar lqecla uca ixebbar Bulus x man aya.
ACT 23:17 Iřaɣa Bulus i yijjen zeg řqebṭanat x mya, inna as: “Ruḥ s ubřiɣ-a ɣar ukumandar minzi ɣares ca ad as t yini.”
ACT 23:18 Iksi řqebṭan x mya abřiɣ, uca iwyi t ɣar ukumandar, inna: “Bulus, ameḥbus, iřaɣa ayi-dd, ittar ayi ad ac awyeɣ abřiɣ-a i ɣar iǧa ca ad ac t ini.”
ACT 23:19 Iṭṭef ukumandar abřiɣ s ufus, iddur zzayes weḥḥdes uca isseqsa t: “Min ɣarek ad ayi t tinid?”
ACT 23:20 Inna as ubřiɣ: “Aqa Udayen arezzun ad zzayek ttaren maḥend ad dd-tessehwid Bulus tiwecca ɣar Jmaɛet nsen [Tameqqrant], axmi xsen ad t sseqsan ɛad.
ACT 23:21 War ttejji ad cek ssqenɛen, minzi ktar zi arebɛin n yeryazen zzaysen ggin as ijj n řfex deg webrid, qqnen ixef nsen s ict n nneɛřet maḥend war ttᵉtten war sessen ař t nɣen. Aqa nitni wejden řexxu, ttrajan ad tewced ttesriḥ nnec.”
ACT 23:22 Akumandar ijja abřiɣ ad iraḥ, inna as: “War ttejji ḥed ad issen, aqa tessaregbed ayi x man aya.”
ACT 23:23 [Xenni] iřaɣa-dd ɣares x tnayen n iqebṭanen x mya, inna: “Swejdem mitayen n iɛeskariyyen Irumaniyyen maḥend ad raḥen ɣar Qayṣariya ɣar třata n ǧiřet, akidsen sebɛin n yinni inyin x yiysan u mitayen n imjebbaden n řqews s ufus ufusi.
ACT 23:24 Ejj i-ten ad sswejden ict n zzayřet maḥend ad xas ssɣimen Bulus, ad t nedhen ɣar lɛamil Filiks di řaman.”
ACT 23:25 [Xenni] yura ict n tebrat, iwca asen tt. Ammu i dayes [yura]:
ACT 23:26 “Kludiyus Lisiyas, i lɛamil yuɛřan Filiks: Sřam [xak!]
ACT 23:27 Udayen aqa ṭṭfen aryaz-a u tuɣa xsen ad t nɣen. Wciɣ [as] afus ak-d iɛeskariyyen Irumaniyyen uca fekkeɣ t umi sřiɣ aqa-t d Arumani.
ACT 23:28 Minzi tuɣa xseɣ ad ssneɣ min xef t ḍeřmen, iwyeɣ t ɣar Jmaɛet nsen [Tameqqrant].
ACT 23:29 Ufiɣ aqa ḍeřmen t di ssibbet n ca n ixarwiḍen n Ccariɛa nsen, maca war din [ufiɣ] aḍřam i isdaheǧen iceddiyyen niɣ řmewt.
ACT 23:30 Umi d ayi ittwanna, belli Udayen ggin as ijj n řfex deg webrid s tnuffra, ssekkeɣ t-i-dd řexdenni ɣarek, umureɣ i yinni t iḍeřmen ad ɣarek ruḥen maḥend ad kides ssiwřen zzatek [mi xef t ḍeřmen]. S ttisir!”
ACT 23:31 Iɛeskariyyen Irumaniyyen ksin Bulus, am mammec d asen yumur, uca iwyen t s ǧiřet ɣar tendint n Antipatris.
ACT 23:32 Tiwecca nnes jjin inni inyin x yeysan ad ɛeqben iɛeskariyyen imeddukkař nsen x iḍaren ɣar lqecla.
ACT 23:33 [Xenni] iwyen t ɣar Qayṣariya, wcin tabrat i lɛamil uca ssbedden Bulus zzates.
ACT 23:34 Awarni řami iɣra tabrat [nni], isseqsa x man jjihet i zi dd-yusa netta, uca řami yufa belli netta yusa-dd zi Kilikiya,
ACT 23:35 inna as: “Ad ac sřeɣ mařa uřa d yinni i cek iḍeřmen iwḍen-dd da!” Xenni yumur ad t ḥḍan di taddart n ccreɛ n Hirudus, [umi qqaren ‘Prituriyum’].
ACT 24:1 Awarni xemsa n wussan ihwa Ananiyas, arrays n ikehhanen, ak-d imɣaren [n řgens] u ak-d ijj n weryaz s řhard iṣebḥen, qqaren as Tartulus, uca xebbaren lɛamil x Bulus.
ACT 24:2 Umi xas dd-řaɣan, iqarreb-dd Tartulus ɣar zzat maḥend ad t iḍřem, inna: “Aqa zzayek ɣarneɣ řehna tameqqrant u ssiyasa nnec aqa tiwi-dd aṭṭas n weɛdeř di ṭṭweɛ n řgens-a i dd-yiwyen ssahřa,
ACT 24:3 u di kuř amcan marra neccin neqbeř tcuni nnec, [a sidi] Filiks yuɛřan.
ACT 24:4 Maca ḥima war cek hekkweřeɣ aṭṭas, ttareɣ zzayek ad tesřid mɣir cwayt ɣar tutra nneɣ i [zzayek] nettar s uwaḍeɛ.
ACT 24:5 Minzi nufa belli bnadem-a aqa-t d ijj n řeḥřac, ittsebbeb aɣuwweɣ jar marra Udayen di mkuř tammurt, minzi netta d azeǧif n tebridt n Inaṣiriyyen.
ACT 24:6 Řami netta tuɣa yarezzu maḥend ad issexmej Zzawect Tameqqrant nneɣ, xenni neṭṭef i-t uca tuɣa nexs ad xas neḥkem s Ccariɛa nneɣ.
ACT 24:7 Maca akumandar Lisiyas yusa-dd di řwesṭ s uhettek aṭṭas, iksi t jar ifassen nneɣ, issekk i-t ɣarek,
ACT 24:8 uca yumur maḥend inni ixsen ad t ḍeřmen, ad ɣarek dd-asen. Mařa t tesseqsid, ad tfehmed zzayes s yixef nnec marra timesřayin-a min xef t neḍřem.”
ACT 24:9 Ccetcan xas Wudayen nni ɛawed, nnan: “Man aya ammu i iǧa!”
ACT 24:10 Xas uca iceyyar lɛamil i Bulus maḥend ad issiweř. Bulus yarra-dd, inna: “Necc ssneɣ belli cek d řqaḍi x řgens-a i yijj n řmijař n waṭṭas n iseggʷusa, s uyenni ad wteɣ x yixef inu s teryast ktar.
ACT 24:11 Am mammec ɣa yiři tessned cek, aqa ɛdun mɣir tenɛac n wussan waha zeg wami geɛɛdeɣ ḥima ad ɛebdeɣ di Urcalim.
ACT 24:12 Nitni war d ayi ufin di Zzawect Tameqqrant ssawařeɣ ak-d ca n ijjen niɣ ssmuneɣ ijj n ubarru n řgens, war iǧi di temzidawin nsen, war iǧi di tendint.
ACT 24:13 Nitni war zemmaren ad ssbeyynen min zi d ayi ḍeřmen řexxu.
ACT 24:14 Maca man aya ad ac neɛmeɣ, belli ɛebbdeɣ AREBBI n řejdud inu x řeḥsab tɣuri nni x ssawařen, minzi umneɣ marra min yurin di Ccariɛa u deg Inabiyyen,
ACT 24:15 am ɣari simant n usitem di AREBBI am mammec uřa d nitni ɣarsen, aqa ad din tiři tnukra zi taddart n imettinen, [tanukra] n imseggaden uřa d [tanukra] n yinni war iseggden.
ACT 24:16 Ammu uřa d necc tteggeɣ tizemmar ḥima ad ɣari tiři řebda tnefsect teṣfa zzat i AREBBI u zzat i iwdan.
ACT 24:17 Awarni i waṭṭas n iseggʷusa usiɣ-dd ɣar řgens inu maḥend ad awyeɣ ṣṣdaqi d tɣarṣin.
ACT 24:18 Aqa iwdan-a ufin ayi di Zzawect Tameqqrant awarni řami ttwassizdegeɣ, am war din [ɣari] řɣaci niɣ d axarweḍ.
ACT 24:19 Maca Udayen nni dd-yusin zi Asiya, inni issekkaren iwdan, aqa ittxeṣṣa ad ḥḍaren da akidi zzatek maḥend ad ayi ḍeřmen zi min ma ɣarsen [xafi].
ACT 24:20 Niɣ ad inin ina i da [ibedden] man řɛib i dayi ufin umi beddeɣ zzat i Jmaɛet nsen [Tameqqrant],
ACT 24:21 mɣir awař-a i tuɣa řaɣiɣ umi beddeɣ jar asen: ‘Ass-a ttwaḥekmeɣ zzatwem di ssibbet n tnukra n imettinen!’”
ACT 24:22 Maca umi issen Filiks Abrid-a mliḥ, issbedd i-ten, inna: “Xmi dd ɣa yas ukumandar, ad kemmřeɣ aseǧi ɣar min din jar awem.”
ACT 24:23 [Xas uca] yumur i řqebṭan x mya ḥima ad iḥḍa Bulus s cwayt n lḥurriya ktar u war imenneɛ uřa d ijj zeg inni t issnen ad xas sexxaren.
ACT 24:24 Awarni ca n wussan ijja Filiks d Drusilla, tamɣart nnes d Tudact, ad dd-awyen Bulus uca sřan zzayes x l’iman n Lmasiḥ.
ACT 24:25 Ařami yiweḍ řhard x tsegda d ḍḍebṭ n nnefs u x lḥisab i dd ɣa yasen, iggʷed Filiks, inna as: “Ruḥ řexxu! Xmi ɣari i ɣa yiři řweqt, ad ac dd-řaɣiɣ.”
ACT 24:26 Netta tuɣa issitim ɛawed maḥend Bulus ad as iwc tmenyat [ḥima ad as iḍřeq]. S uyenni tuɣa xas dd-iřaɣa aṭṭas n twařawin ḥima ad kis issiweř.
ACT 24:27 Maca umi kemmřen tnayen n iseggʷusa, yusa-dd lɛamil wenni t i ɣa ixeřfen, qqaren as Purkiyus Fastus. Umi tuɣa Filiks ixs ad yarḍa Udayen, ijja Bulus di ssnaseř [di řeḥbes].
ACT 25:1 Ařami dd-yiweḍ Fastus ɣar Qayṣariya, iruḥ ɣar Urcalim awarni řami ɛdun třata n wussan.
ACT 25:2 Imeqqranen n ikehhanen d imcennɛen n Wudayen ssaregben t [dinni] x min xef ḍeřmen Bulus uca qeddmen as ict n tutra.
ACT 25:3 Ttaren zzayes maḥend ad [asen] igg s řxaḍar ḥima ad indeh Bulus ɣar Urcalim, ařami zemmaren nitni ad sswejden ijj n řfex deg webrid maḥend ad t nɣen.
ACT 25:4 Maca Fastus yarra-dd: “Bulus ittwaḥḍa di Qayṣariya u necc simant inu ad din raḥeɣ deɣya.
ACT 25:5 Ejj inni zzaywem izemmaren ad afen tawwart ad raḥen akidneɣ, uca ejj i-ten ad t ḍeřmen mařa din ca n řɛib deg weryaz-a.”
ACT 25:6 Awarni řami iqqim din tmenya niɣ ɛecra n wussan ihwa ɣar Qayṣariya u tiwecca nnes iqqim x řkursi n ccreɛ uca yumur ad dd-awyen Bulus.
ACT 25:7 Umi dd-yiweḍ, nnḍen xas Wudayen inni tuɣa dd-ihwan zi Urcalim, uca ggin [xas] aṭṭas n icetciten iḍeqřen, war zemmaren ad ten ssbeyynen.
ACT 25:8 Umi iwta Bulus x yixef nnes, aqa war ixḍi netta di walu, war teǧi di Ccariɛa n Wudayen niɣ di Zzawect Tameqqrant uřa di qayṣar,
ACT 25:9 inna Fastus i Bulus, am tuɣa ixs ad igg řxaḍar i Wudayen: “Ma texsed ad tgeɛɛded ɣar Urcalim, ḥima ad din tᵉttwaḥakmed zzati?”
ACT 25:10 Yarra-dd Bulus, inna: “Necc aqa beddeɣ zzat i řkursi n ccreɛ n qayṣar mani ittxeṣṣa ad xafi ittwaḥkem. War xḍiɣ deg Wudayen s walu am mammec cek tessned mliḥ.
ACT 25:11 Mařa xḍiɣ niɣ mařa ggiɣ min isdaheǧen řmewt, war ttrikkʷiřeɣ zi řmewt. Maca mařa war din bu tidett nican i zi d ayi ḍeřmen, xenni war izemmar uřa d ijjen ad ayi isellem ɣarsen i arḍa nsen. Necc uriɣ ddeɛwet inu ɣar qayṣar.”
ACT 25:12 Awarni řami tuɣa imcawar ak-d wegraw, yarra-dd Fastus: “Aqa tessgeɛɛded ddeɛwet nnec ɣar qayṣar, [xenni] ɣar qayṣar i ɣa traḥed!”
ACT 25:13 Awarni řami ɛdun ca n wussan yusa-dd ujeǧid Aɣripas d Barniki ɣar Qayṣariya ḥima ad seǧmen x Fastus.
ACT 25:14 Umi nitni sseɛdun din aṭṭas n wussan iɛawed Fastus i ujeǧid ddeɛwet n Bulus, inna: “Aqa da ijj n weryaz wenni da ijja Filiks d ameḥbus.
ACT 25:15 Řami d ayi tuɣa di Urcalim, ssaregben ayi xas imeqqranen n ikehhanen d imɣaren n Wudayen, arezzun zzayi ad ittwaḥakem zzatsen.
ACT 25:16 Necc arriɣ-dd xasen belli Irumaniyyen war nnumin ad sellmen ijj n bnadem ḥima ad ittwaneɣ maḥend ad ggen řxaḍar [i iwdan]. Ittxeṣṣa ad ḥḍaren zzates inni t iḍeřmen uca ad ɣares yiři ttasiɛ [i bnadem nni] maḥend ad idafeɛ x yixef nnes zi jjihet n ttuhmet.
ACT 25:17 Umi da dd-iwḍeɣ, war ɛgizeɣ, uca tiwecca nnes qqimeɣ x řkursi n ccreɛ, umureɣ ad dd-awyen aryaz nni ɣari.
ACT 25:18 Inni t iḍeřmen nnḍen as-dd, maca am mammec tuɣa ttrajiɣ war zemmaren ad dd-awyen uřa d ict n ttuhmet i tuɣa zemmaren ad ssbeyynen.
ACT 25:19 Maca tuɣa ɣarsen xas ca n ixarwiḍen di ssibbet n ddin nsen u zi jjihet n ijj n bnadem qqaren as Yasuɛ wenni aqa immut, [maca] wenni xef tuɣa Bulus iqqar belli aqa iddar.
ACT 25:20 Am tuɣa cekkeɣ di tmesřayin-a i di tuɣa arzuɣ, nniɣ i Bulus: ‘Ma zeɛma texsed ad traḥed ɣar Urcalim ḥima ad tᵉttwaḥakmed din x tmesřayin-a?’
ACT 25:21 Maca umi tuɣa yarezzu ad ittwaḥḍa ař xas ɣa iḥkem qayṣar, umureɣ ad t ḥḍan ař t ɣa ssekkeɣ ɣar qayṣar.”
ACT 25:22 Inna Aɣripas i Fastus: “Uřa d necc xseɣ ad sřeɣ i bnadem-a!” Yarra-dd xas: “Tiwecca ad as tesřed!”
ACT 25:23 Tiwecca nnes yusa-dd Aɣripas d Barniki s marra ccan uca udfen ɣar taddart n ccreɛ ak-d ikumandaren n řɛeskar d izeǧifen n tendint. Xenni yumur Fastus, uca yudef-dd Bulus.
ACT 25:24 Inna Fastus: “[A] ajeǧid Aɣripas u kenniw marra iryazen i da iḥḍaren akidneɣ: Aqa x weryaz-a nni teẓrim danita, aqa cetcan xas ɣari marra řɣaci n Wudayen di Urcalim uřa danita, sɣuyyun maḥend war ittɣimi ad iddar ɛad.
ACT 25:25 Maca ufiɣ netta war iggi walu min isdaheǧen řmewt, maca umi issgeɛɛed ddeɛwet nnes ɣar qayṣar, umureɣ ad ittwassekk din.
ACT 25:26 Maca war ɣari bu tmesřact nican ssneɣ tt zi jjihet nnes ḥima ad tt ariɣ i qayṣar. S uyenni sseḥḍareɣ t-i-dd i kenniw, d amezwaru i cek, [a] ajeǧid Aɣripas, ḥima, awarni řami i ɣa nkemmeř tarezzut, ad ɣari yiři min ɣa ariɣ [i qayṣar],
ACT 25:27 minzi war icuwwar ad ssekkeɣ ijj n umeḥbus břa ma ad ariɣ ixeṭṭan nnes.”
ACT 26:1 [Xas uca] inna Aɣripas i Bulus: “Cek ɣarek ttesriḥ ḥima ad tessiwřed x yixef nnec!” Xenni isswiẓẓeḍ Bulus afus nnes uca iwta x yixef nnes, inna:
ACT 26:2 “Di marra min xef d ayi ḍeřmen Wudayen, [a] ajeǧid Aɣripas, ḥessbeɣ ixef inu d [bnadem] d amimun, aqa ass-a zemmareɣ ad wteɣ x yixef inu qibač nnec.
ACT 26:3 Deg umezwaru s minzi aqa cek tessned mliḥ marra ixarwiḍen d izerfan n Wudayen. S uyenni ttareɣ zzayek ad ayi tesřed s ttasiɛ n řxaḍar.
ACT 26:4 Minzi Udayen, iwa, mařa xsen ad cehden [waha x man aya], ssnen abrid n tudart inu mliḥ zi temẓi inu, am mammec t tuɣa zeg umezwaru jar řgens inu u di Urcalim.
ACT 26:5 Nitni ssnen ayi mliḥ aṭṭas zeg wami, ssnen aqa tuɣa ddareɣ ɛlaḥsab taɣuri nican n Ifarisiyyen.
ACT 26:6 U řexxu beddeɣ [danita], ttwaḥakameɣ di ṭṭweɛ n usitem n lwaɛd i zi iwaɛd AREBBI i řejdud nneɣ.
ACT 26:7 Maɣar wa d asitem nni ttrajant tenɛac n tqebbař nneɣ ad ɣares dd-awḍent, am ssgeɛɛdent tiẓaǧitin yuǧɣen ǧiřet d wass. Di ṭṭweɛ n usitem-a, [a] ajeǧid Aɣripas, ḍeřmen ayi Wudayen.
ACT 26:8 Mammec tḥekkmem kenniw? Ma war ittxeṣṣa ad namen belli AREBBI ad issnekkar-dd imettinen?
ACT 26:9 Zic tuɣa zeɛmeɣ nican, aqa ittxeṣṣa ad ggeɣ aṭṭas n tmesřayin ḍidd i Yisem n Yasuɛ Nnaṣiri.
ACT 26:10 Uca aya i ggiɣ ɛawed di Urcalim. Am ṭṭfeɣ tizemmar zi jjihet n imeqqranen n ikehhanen, ḥebbseɣ aṭṭas n imqeddasen. Uca řami ttwanɣen zzaysen, tuɣa areṭṭiɣ s man aya ak-d inni xas iḥekmen.
ACT 26:11 Ɛedbeɣ ten di marra timzidawin, ggiɣ xasen uɣiř maḥend ad ceqqfen Isem n Yasuɛ. Tuɣa tthajeɣ xasen aṭṭas u tuɣa ggureɣ ɣar tneddam inneɣni maḥend ad ten marrteɣ.
ACT 26:12 Řami tuɣa ggureɣ ɣar Dimacq zi ssibbet nni s ṣṣulṭa d ttesriḥ zi jjihet n imeqqranen n ikehhanen,
ACT 26:13 xenni, [a] ajeǧid, umi tuɣa ayi deg webrid, ẓriɣ ict n tfawt zeg ujenna ɣar wezyen n wass, tᵉttissiqq ktar zi tfuct, tenneḍ ayi-dd u i yinni akidi imsafaren.
ACT 26:14 Neccin newḍa marra di temmurt, sřiɣ i ict n tmijja tessawař-dd akidi, teqqar s Tɛibranit: ‘Cawul, Cawul, mayemmi xafi tdarrced? Aqa tarenyed tzeyyared x yixef nnec umi cek teccated [awarni ac] di sřek n buykucḍan.’
ACT 26:15 Nniɣ: ‘Min teɛnid Cek, a Sidi?’ Inna Siditneɣ: ‘Necc d Yasuɛ Annaṣiri, wenni tmarrted.’
ACT 26:16 Xenni inna ayi: ‘Kkar, tbedded x iḍaren nnec, minzi i uya i d ac dd-ḍhareɣ ḥima ad cek arecḥḥeɣ d amsexxar d acehhad, aqa umi d ayi teẓrid u aqa ad ayi tẓared ɛawed.
ACT 26:17 Ad fekkeɣ cek zeg weydud n Wudayen u zi řegnus nneɣni i ɣar cek ɣa ssekkeɣ,
ACT 26:18 ḥima ad tarezmed tiṭṭawin nsen, ḥima ad tuben zi taǧest ɣar tfawt u zi ṣṣulṭa n cciṭan ɣar AREBBI, u ad ṭṭfen aɣfar n ddnub d ict n tesɣart n řwart jar imqeddasen s l’iman i dayi iǧan.’
ACT 26:19 S uyenni, [a] ajeǧid Aɣripas, war ɛekkseɣ ca řewḥiy nni ẓriɣ zeg ujenna,
ACT 26:20 maca ɣar umezwar bdiɣ ad barrḥeɣ [s Řexbar Aṣebḥan] i yinni iǧan di Dimacq d Urcalim u i marra inni [izeddɣen] di dcurat n Yahudiyya, uca [xenni] barrḥeɣ ɛawed i řegnus ḥima ad tuben ad dewřen ɣar AREBBI, ad ggen řexdayem i ittřiqen i ttubet.
ACT 26:21 S uyenni ṭṭfen ayi Wudayen di Zzawect Tameqqrant uca xsen ad ayi nɣen.
ACT 26:22 Maca AREBBI iwca ayi afus ař ass-a, u xzar, aqa beddeɣ [da] zzat i umeẓyan d umeqqran, war qqareɣ walu i dd-itteffɣen zi Ccariɛa n Musa d Inabiyyen, mɣir timesřayin waha nni zi qqaren nitni aqa ad iřint,
ACT 26:23 belli tuɣa ittxeṣṣa i Lmasiḥ ad iweddeb u belli Netta ad yiři d Amenzu n Tnukra zi taddart n imettinen, ad ibarreḥ s Tfawt i řgens[-a] u i řegnus [marra].”
ACT 26:24 Awarni řami idafeɛ Bulus s yixef nnes ammu, inna Fastus s jjehd: “Aqa cek d abuhaři, a Bulus. Aṭṭas n tɣuri tessbuhři i cek.”
ACT 26:25 Maca Bulus inna as: “Necc war ttwaxeřfeɣ ca, [a] sidi Fastus yuɛřan, aqa qqareɣ awařen n tidett, daysen řaman.
ACT 26:26 Uřa d ajeǧid Aɣripas issen mliḥ x tmesřayin-a. S uyenni ssawařeɣ s teryast minzi ittřiɣ ayi belli uřa d ict n řḥajjet zi tmesřayin-a aqa tennuffar xas, minzi marra man aya war imsar di tnuffra.
ACT 26:27 Ma tumned zeg inabiyyen, [a] ajeǧid Aɣripas? Necc ssneɣ belli tumned [zzaysen].”
ACT 26:28 Maca Aɣripas inna as: “[Mɣir] s drus tessqenɛed ayi ḥima ad dewřeɣ d amasiḥi.”
ACT 26:29 Inna [as] Bulus: “Ttareɣ AREBBI belli deɣya u i waṭṭas, war iǧi cek waha, maca uřa d marra inni d ayi ittesřan ass-a, ad dewřen am necc, maca břa iceddiyyen-a.”
ACT 26:30 Ikkar ujeǧid d lɛamil d Barniki d [marra] inni tuɣa akidsen iqqimen,
ACT 26:31 uca ffɣen ssenni am ssawařen ak-d wayawya, nnan jar asen: “Aryaz-a war iggi ca min isdaheǧen řmewt uřa d iceddiyyen.”
ACT 26:32 Inna Aɣripas i Fastus: “Maɛlik war tuɣi issgeɛɛed ddeɛwet nnes ɣar qayṣar, iři aqa ittwaḍřeq bnadem-a.”
ACT 27:1 Xas uca ikkes Fastus awař, aqa ittxeṣṣa ad ittwassekk ɣar Iṭalya. Netta isellem Bulus d ca n imeḥbas nneɣni i yijj n řqebṭan x mya qqaren as Yuliyus, tuɣa-t zi řkumpaniyyet n qayṣar.
ACT 27:2 Řami nenwa ad nbeḥḥar, nenya deg ijj n uɣarrabu zi Adramantus, tuɣa ad ikk x jjwayeh i iǧan x tma n Asiya, uca nruḥ. Inya akidneɣ deg uɣarrabu Aristarxus, ijj n weryaz zi Tissalunika di Makiduniya.
ACT 27:3 Tiwecca nnes niweḍ ɣar Ṣaydun. Řqebṭan x mya tuɣa iǧa mliḥ ak-d Bulus, isamḥ as ad iraḥ ɣar imeddukkař nnes ḥima ad xas sexxaren.
ACT 27:4 Ssenni neffeɣ, nbeḥḥar s ijj n ddura, neɛdu x Qubrus, minzi asemmiḍ tuɣa iccat dayneɣ deg uɣembub.
ACT 27:5 Neẓwa řebḥar n Kilikiya d Pamfiliya, uca niweḍ ɣar Mira, ict n tendint di Likiya.
ACT 27:6 Řqebṭan x mya yufa din ijj n uɣarrabu zi Iskandariyya, ittraḥ ɣar Iṭalya, issenya aneɣ dayes.
ACT 27:7 Maɣar [aɣarrabu] war iruḥ ɣar zzat aṭṭas n wussan, niweḍ s uɣiř zzat i tegzirt n Knidus, u minzi war d aneɣ yejji usemmiḍ ad nraḥ [ɣar zzat], nbeḥḥar deg udduri n Krita zzat i Salmuni.
ACT 27:8 [Řami] tuɣa war nzemmar ɛřayen ad nendeh ɣar zzat, niweḍ, řami newta ict n ddura temɣar, ɣar ijj n wemcan umi qqaren ‘Řmuyyat Iṣebḥanen’, wenni iǧan ṭṭarf i tendint qqaren as Lasiyya.
ACT 27:9 Neqqim aṭṭas n řweqt dinni ař dd-iɛdu ass n uẓummi n Wudayen. Umi idweř usafar di řebḥar yewɛar, iɛřem [asen] Bulus,
ACT 27:10 inna: “[A] iryazen, ttwařiɣ asafar ad yawi druct d txessart [aṭṭas], war teǧi i sseřɛet d uɣarrabu nneɣ waha, maca uřa i tudart nneɣ.”
ACT 27:11 Maca řqebṭan x mya tuɣa isřa ktar ɣar umendah d řqebṭan n uɣarrabu x min tuɣa ittesřa ɣar wawařen n Bulus.
ACT 27:12 Umi tuɣa amcan n řmuyyi war iḥři ḥima ad sseɛdun řmecta din, ibedd array n wezyen ameqqran nsen ad ffɣen ssenni, balak ad awḍen ɣar Finiks, ijj n řmuyyi di Krita, iwařan ljanub, ḥima ad din sseɛdun řmecta. *
ACT 27:13 Umi isaha usemmiḍ n ljanub, tuɣa nitni ssittimen ad awḍen am mammec tt xsen, uca nebda ttcuqan x ṭṭarf n tma n Krita.
ACT 27:14 Maca cwayt awarni man aya, tekkar ict n tḥaryaḍt, qqaren as ttifun ‘Uruklidun’.
ACT 27:15 Ittwaksi zzayes uɣarrabu s jjehd, war izemmar i usemmiḍ. [Xenni] nestewṭeɛ [uca nettwandeh].
ACT 27:16 Am nekka deg udduri n ict n tegzirt d tameẓyant umi qqaren ‘Qawda’, s uɣiř i nemneɛ ḍman n tɣarrabut n usellek [i iǧan ɣar ḍeffar n uɣarrabu].
ACT 27:17 Nessgeɛɛed i-tt, u nessejhed aɣarrabu am t nebyes swadday s iḥezzamen. Maɣar tuɣa neggʷed aqa aɣarrabu ad immenḍar x ict n řgeɛɛdet n ijdi di řebḥar, nessehwa-dd řbacc uca nettwandeh s usemmiḍ u ammu i nřaḥ.
ACT 27:18 Uca umi taḥaryaḍt thaj xaneɣ aṭṭas, xenni tiwecca nnes nenḍar sseřɛet nneɣ di řebḥar.
ACT 27:19 Deg wass wiss třata nenḍar řeqcuɛ n uɣarrabu s ifassen nneɣ.
ACT 27:20 Řami taḥaryaḍt teqqim tᵉttsuḍ aṭṭas n wussan, war tbin tfuct řa d taziri uřa d itran, xenni ittwaqḍeɛ marra řayas ad neqqim neddar.
ACT 27:21 Řami war izemmar uřa d ijj ad iṣbar ɛad, ibedd Bulus di řwesṭ nsen, inna: “A iryazen, tuɣa ittxeṣṣa awem ad ɣari tesřem, xenni war neffiɣ ca zi Krita u war d aneɣ třeqqef druct-a d řeḥṣaret-a.
ACT 27:22 Řexxu ad kenniw cejjɛeɣ, minzi uřa d ijj zzaywem war ittweddari ca tudart nnes, mɣir aɣarrabu waha [ad iɣebbař].
ACT 27:23 Minzi ibedd-dd ɣari ǧiřet-a lmalak n AREBBI wenni necc nnes u wenni umi ɛebbdeɣ.
ACT 27:24 Netta inna ayi: “War tteggʷed ca, a Bulus, minzi ittxeṣṣa ac ad tbedded qibač i qayṣar. Xzar marra inni akidek ittbeḥḥaren, aqa iwca ac ten AREBBI.”
ACT 27:25 S uya ggem taryast, a iryazen, minzi ttiqqeɣ di AREBBI, belli ad teffeɣ am mammec d ayi inna.
ACT 27:26 Maca ad nemmenḍar x ict n tegzirt.”
ACT 27:27 Awarni řami nettwaɛaren zi ssa ɣar diha u nessiḥeř ixef nneɣ di Řebḥar n Hadriyus, ittɣiř asen i ibeḥriyyen di řwesṭ n ǧiřet, aqa nqarreb-dd ɣar řbarr.
ACT 27:28 Nitni nḍaren ayřizim di raǧaɣ n řebḥar, ɛebbaren ɛicrin n tiddiwin. Umi ɛdun cwayt, ɛebbaren nitni xemmesṭac n tiddiwin.
ACT 27:29 Am neggʷed ad neřqef imucan n sseǧaḥ, nenḍar arebɛa n iyřizam zi ḍeffar n uɣarrabu, uca nettar ad dd-yaweḍ uziř.
ACT 27:30 Řami tuɣa ibeḥriyyen xsen ad arewřen zeg uɣarrabu, ssḍaren taɣarrabut n usellek ɣar řebḥar axmi xsen ad dayes nyin maḥend ad cedden aɣarrabu ɣar temmurt.
ACT 27:31 Umi iẓra Bulus man aya, inna i řqebṭan x mya u i iɛeskariyyen: “Mařa ina war qqimen deg uɣarrabu, war tzemmarem ad ttwassnejmem.”
ACT 27:32 Xenni qessen iɛeskariyyen iseɣwan n tɣarrabut [n usellek] uca jjin tt ad truḥ.
ACT 27:33 Ařami dd-iqarreb ad iṣbeḥ řḥař, iziyyar i-ten Bulus marra ḥima ad ccen, inna: “Arbeɛṭac n wussan aqa war teccim walu zi ssibbet n lxaṭar.
ACT 27:34 S uyenni cejjɛeɣ kenniw ad teccem, ḥima ad teqqimem teddarem, minzi war iweṭṭi uřa d ijj n uẓeṭṭu [n ucuwwaf] n uzeǧif n uřa d ijjen zzaywem.”
ACT 27:35 Awarni řami inna aya, iksi aɣrum, issemɣar AREBBI qibač i marra, yarẓa i-t, ibda ad icc.
ACT 27:36 Marra ttwacejjɛen u ksin macca.
ACT 27:37 Tuɣa aneɣ deg uɣarrabu di mitayen u-setta u-sebɛin n yeryazen.
ACT 27:38 Řami jjiwnen s macca, bdan ssefsasen aɣarrabu, am ksin řḥebb [n yirden], nḍaren t di řebḥar.
ACT 27:39 Ařami iṣbeḥ řḥař, tuɣa ibeḥriyyen war ssinen man tammurt [i teǧa], maca ẓrin ijj n umesruq n řebḥar ɣar tma n řbarr uca mcawaren, ma zemmaren ad din ɛarnen aɣarrabu.
ACT 27:40 Umi qeḍwen iyřizam n uɣarrabu, jjin ten di řebḥar, fesyen iceddan n řemqadef, ssgeɛɛden řbacc n zzat i usemmiḍ ittsuḍen, wejjhen ɣar tma n řbarr.
ACT 27:41 Maca aɣarrabu iwta ijj n uɛarric n yejdi mani iǧa řebḥar ɣar tnayen n iɣezdisen uca nnuɣen s uɣarrabu. Yarsa zzat n uɣarrabu [x uɛarric n yejdi], war izemmar ad inhezz, maca ḍeffar n uɣarrabu iqeřɛ i-t jjehd n řemwaj.
ACT 27:42 Tuɣa newwan iɛeskariyyen ad nɣen imeḥbas ḥima war immenḍar ḥed ixef nnes [di řebḥar] maḥend ad iɛumm, uca ad yarweř.
ACT 27:43 Maca řqebṭan x mya wenni tuɣa ixs ad issenjem Bulus, issbedd i-ten, yumur belli inni izemmaren ad mmenḍaren ixef nsen [deg waman], maḥend ad ɛummen, ad ɛummen d amezwaru, maḥend ad awḍen ɣar řbarr.
ACT 27:44 Wi iqqimen, ijja i-ten ad ẓwan x tfeřwin u x izeynan n ikeccuḍen n uɣarrabu, uca ammu i iwḍen marra ɣar řbarr, ttwassnejmen.
ACT 28:1 Awarni man aya nefhem, belli tagzirt-a qqaren as Malta.
ACT 28:2 Ibarraniyyen inni din izedɣen ggin akidneɣ mliḥ aṭṭas, am ssiɣen ict n tmessi d tameqqrant uca řaɣan aneɣ marra ɣarsen, ḥima ad neẓɣeř minzi anẓar tuɣa iccat aṭṭas u tuɣa tesmeḍ.
ACT 28:3 [Umi] tuɣa issmun Bulus aɛurric n ikecwaḍ, issars i-ten x tmessi, xenni s řeḥmu nni iffeɣ-dd ijj n ufiɣar uca iqqes as deg ufus.
ACT 28:4 Umi ẓrin ibarraniyyen aqa yuyeř [ufiɣar] ɣar ufus nnes, nnan: “Ad taɣ bnadem-a d aqettař, war t tejji ‘[lalla] řḥeqq’ ad iddar, waxxa injem-dd zi řebḥar.”
ACT 28:5 Maca Bulus izzerz s ufus nnes, immenḍar afiɣar di tmessi, břa ma d as temsar uřa d ict n druct.
ACT 28:6 Maca nitni tuɣa ttrajan ad yuff řexdenni uca ad iwḍa ad immet. Maca umi ẓrin, awarni řami rajan aṭṭas, belli war d as temsar uřa d ict n řḥajjet taɛeffant, ibeddeř řhard nsen, nnan, aqa-t d ijj n arebbi.
ACT 28:7 Tuɣa d jjihet nni iyyaren i yeǧan d agřa n ijj n weryaz umi qqaren Publiyus. Netta tuɣa d azeǧif n tegzirt, issnewju aneɣ s řxar třata n wussan di taddart nnes.
ACT 28:8 Babas n Publiyus tuɣa dayes timessi d řeḥriq. Dayes ijj n řeḥřac n teqqrint. Yudef Bulus ɣares, iẓẓuǧ, issars xas afus uca issgenfa i-t.
ACT 28:9 Umi imsar man aya, usin-dd ɣares inneɣni n tegzirt inni tuɣa ɣar iǧa imehřac uca ttwassgenfan.
ACT 28:10 Karmen xaneɣ ina s waṭṭas n ccan. Umi nruḥ nbeḥḥar ssenni, wcin aneɣ min tuɣa neḥwaj.
ACT 28:11 Awarni teřt n iyuren nruḥ, nbeḥḥar deg ijj n uɣarrabu zi Iskandariyya i isseɛdun řmecta di tegzirt, tuɣa xas arcam n ‘Tecniwin’.
ACT 28:12 Umi dd-niweḍ ɣar Siragusa, neqqim din třata n wussan.
ACT 28:13 Ssenni ndur uca niweḍ-dd ɣar Rixiyum. Awarni ijj n wass ikkar-dd usemmiḍ n tcarmin uca niweḍ-dd deg ijj n řmijař n tnayen n wussan ɣar Putiyuli, ict n tendint di Iṭalya.
ACT 28:14 Dinni i nufa tawmat nni zzayneɣ ittaren ad [kidsen] neqqim, uca neqqim akidsen sebɛa n wussan. Xenni nruḥ ɣar Ruma.
ACT 28:15 Umi sřin tawmat [di Ruma] x umeddur nneɣ, usin-dd ḥima ad kidneɣ mmeřqan deg wazzay umi qqaren ‘Apiyus Furus’ u ɣar ‘Třata n Tḥuna’. Umi ten iẓra Bulus, icekkar AREBBI uca ittwacejjeɛ.
ACT 28:16 Umi dd-niweḍ ɣar Ruma, iwca řqebṭan x mya ttesriḥ i Bulus maḥend ad izdeɣ mani ixs netta, ak-d ijj n uɛessas wenni t i ɣa iḥḍan.
ACT 28:17 Awarni třata n wussan iřaɣa Bulus i imcennɛen n Wudayen. Ařami munen, inna asen: “[A] iryazen tawmat, waxxa necc war ggiɣ uřa d ict n řḥajjet ḍidd i řgens niɣ ḍidd i Ccariɛa n řejdud inu, aqa ttwasellmeɣ d ameḥbus zi Urcalim deg ifassen n Irumaniyyen.
ACT 28:18 Awarni řami d ayi beqqcen, tuɣa xsen ad ayi arxun minzi war dayi ufin uřa d ict n řḥajjet tessdaheǧ řmewt.
ACT 28:19 Maca umi ɛekksen Wudayen x man aya, s uɣiř xafi ad ssgeɛɛdeɣ ddeɛwet inu ɣar qayṣar, maca břa ma ad ɣari yiři ijj n ucetci x řgens inu.
ACT 28:20 X ssibbet-a ttareɣ ḥima ad kenniw ẓareɣ uca ad kiwem ssiwřeɣ. Minzi di ssibbet n usitem n Israil, aqa ayi carfeɣ s ssnesřet-a.”
ACT 28:21 Maca nitni nnan as: “War xak neṭṭif ca tibratin zi Yahudiyya uca uřa d ijj n tawmat war dd-yusi da wi innan niɣ issiwřen xak s ca n řɛib.
ACT 28:22 Maca neccin nexs ad zzayek nseř min tᵉttwařid, minzi zi jjihet n tebridt-a, aqa nessen belli ttɛekksen tt mani ma.”
ACT 28:23 Nitni mɛahaden akides x ijj n wass, uca munen. Aṭṭas i-dd-yusin ɣar wemcan mani izeddeɣ. Netta tuɣa ittfessar asen Tageldit n AREBBI, am icehhed u yarezzu ad ten isseqneɛ zi jjihet n Yasuɛ, zi Ccariɛa n Musa u zeg inabiyyen, zi řefjar ařami d tameddit.
ACT 28:24 Ca ttwassqenɛen s wawařen nnes, [maca] inneɣni war ttwassqenɛen ca.
ACT 28:25 Nitni ffɣen xas am war dd-usin ak-d wayawya. [Xenni] inna asen Bulus [ɛad] awař-a: “S řḥeqq issiweř Arruḥ Iqeddsen x [uqemmum n] Icaɛya i řejdud nwem, inna:
ACT 28:26 ‘Ruḥ ɣar řgens-a, ini asen: ‘S useǧi ad tesřem, war tfehhemem, s tmuɣři ad texzarem, war tᵉttwiřim,
ACT 28:27 minzi uř n řgens-a aqa idweř iqseḥ, Imezzuɣen nsen ssḍeqřen ten i useǧi, u tiṭṭawin nsen qqnen tent, maḥend war ttwiřin s tiṭṭawin nsen, war ttesřin s imezzuɣen nsen, war fehhemen s wuř nsen, ařami war ɣari dekkwiřen uca ad asen ɣfareɣ.’
ACT 28:28 Man aya ittxeṣṣa ad tessnem: [Areqqas n] usenjem-a n AREBBI aqa ittwassekk-dd i řegnus uca uřa d nitni ad ɣares sřen.”
ACT 28:29 Awarni řami inna man aya, ffɣen Wudayen, am tuɣa ttemcubbucen jar asen aṭṭas.
ACT 28:30 Bulus icra ict n taddart, ixeǧeṣ i-tt s yixef nnes, izeddeɣ dayes tnayen n iseggʷusa. Tuɣa ittareḥḥab s marra inni tuɣa ɣares dd-ittasen,
ACT 28:31 ittbarreḥ s Tgeldit n AREBBI, isseřmad x Siditneɣ Yasuɛ Lmasiḥ s bṭayṭay u břa ma tᵉttwassbedd uřa d ict n tɛenkrift.
ROM 1:1 Bulus, amsexxar n Yasuɛ Lmasiḥ, [rrasul] ittwařaɣan d ittwasekken, ittwaḥuzen i L’Injil n AREBBI
ROM 1:2 - [L’Injil] nni izzar iwaɛd zzayes zeg umewaru s inabiyyen nnes di Tira Iqeddsen -
ROM 1:3 x Mmis, wenni dd-ittwaxeřqen zi jjihet n weysum zi zzariɛet n taddart n Dawud,
ROM 1:4 [maca] zi jjihet n jjehd d Arruḥ Iqeddsen i dd-issnekkaren Yasuɛ Lmasiḥ, Siditneɣ, zi taddart n imettinen, aqa ittwassargeb d Mmis n AREBBI.
ROM 1:5 Maɣar zzayes i neṭṭef arḍa u zzayes i nettwařaɣa d rrusul jar marra řegnus ḥima ad ṭṭaɛen [řegnus] i l’iman deg Yisem nnes,
ROM 1:6 maɣar uřa d kenniw tᵉttwařaɣam [zi řegnus] s Yasuɛ Lmasiḥ.
ROM 1:7 Ɣar marra inni iǧan di Ruma, [a] imɛizzen n AREBBI, inni ittwařaɣan d inni d imqeddasen: arḍa d řehna ad kidwem iřin zi AREBBI Babatneɣ u zi Siditneɣ Yasuɛ Lmasiḥ.
ROM 1:8 Amezwar ttcekkareɣ AREBBI inu s Yasuɛ Lmasiḥ zi jjihet nwem marra, minzi l’iman nwem aqa sřin xas di ddunect marra.
ROM 1:9 Maɣar AREBBI, wenni ɛebbdeɣ di Arruḥ di L’Injil n Mmis, iched xafi aqa necc ttidareɣ kenniw řebda di tẓaǧitin inu.
ROM 1:10 Ttẓaǧiɣ ad ayi tᵉttwarzem zi řexxu d tsawent ict n tewwart s array n AREBBI, maḥend ad ɣarwem dd-aseɣ.
ROM 1:11 Minzi weḥḥceɣ ad kenniw ẓareɣ u ad awem wceɣ ca n tmewca n Arruḥ, ḥima ad dayes tᵉttwassmetnem.
ROM 1:12 Ad nettwassfewwej jmiɛ s l’iman nwem d wenni inu.
ROM 1:13 Maca xseɣ, [a] aytma, ad tessnem belli aṭṭas n imuren ggiɣ ad ɣarwem dd-aseɣ, [maca] ař ass-a ttwamenɛeɣ, ḥima ad ɣari tiři řɣiǧet daywem ɛawed, am mammec di řegnus nneɣni,
ROM 1:14 [maɣar] Necc d bu-umarwas maḥend ad barrḥeɣ [s L’Injil] i Iyunaniyyen u i ibarbariyyen, i ayt n tiɣit u i ibuhařiyyen, i marra iwdan.
ROM 1:15 Ammu i ttwajebdeɣ maḥend ad barrḥeɣ s Řexbar Aṣebḥan uřa i kenniw i yeǧan di Ruma.
ROM 1:16 Minzi war ttseḍḥiɣ ca s L’Injil, minzi netta d jjehd n AREBBI i Tudart i marra wi yumnen, [i yinni yumnen] zeg Wudayen ɣar umezwar, uca [xenni ɛawed i yinni] zeg Iramiyyen.
ROM 1:17 Minzi tasegda n AREBBI aqa tban dayes [di L’Injil] zi l’iman ɣar l’iman, am mammec tura: ‘Amseggad s l’iman ad iddar.’
ROM 1:18 Minzi aɣḍab n AREBBI ittban-dd zeg ujenna x marra řmuɛṣiyyet d tuɛeffna n iwdan inni issdurruyen tidett s řmuɛṣiyyet,
ROM 1:19 minzi tussna n AREBBI ittban daysen, minzi AREBBI aqa isscen asen t-i-dd.
ROM 1:20 Minzi min innuffaren n AREBBI, aqa ittwaẓar s řeɛqeř s yinni zzayes dd-ittwaxeřqen zeg wami tᵉttwagg ddunect, am jjehd nnes n řebda, am tifras nnes n AREBBI, ařami nitni war ɣarsen bu smaḥet.
ROM 1:21 Minzi, umi ssnen AREBBI, war t ssɛuǧen niɣ war t cekkaren am AREBBI, maca dewřen beṭṭřen deg ixariṣṣen nsen uca uř nsen ibarcen, ařami idweř břa ɛeqř.
ROM 1:22 Umi ḥessben ixef nsen d imiɣisen, dewřen d ifɣař,
ROM 1:23 beddřen aɛuǧi n AREBBI i war ifennin s ca deg warwas n ṣṣifet n bnadem ifennan, deg warwas n ijḍaḍ, n [imuddaren] s arebɛa n iḍaren u n [imuddaren] nni ittbuɛen x temmurt.
ROM 1:24 S uyenni isellem i-ten AREBBI ɣar nnecwat ixemjen n wuřawen nsen ḥima ad ssfeḍḥen arrimat nsen jar asen.
ROM 1:25 Aqa nitni beddřen tidett n AREBBI s uxarriq, ɛebden u sexxaren i min dd-ittwaxeřqen sennej i Wenni dd-ixeřqen kuřci, Wenni umi ɣar iǧa [marra] asemɣar d [marra] lbarakat i řebda qaɛ. Amin.
ROM 1:26 S uyenni isellem i-ten AREBBI ɣar ccehwat infeḍḥen, minzi uřa d timɣarin nsen beddřent abrid n ṭṭbiɛet, ttnumant i min war iǧin d ṭṭbiɛet.
ROM 1:27 Amenni iryazen ɛawed jjin tamunt ɛlaḥsab ṭṭbiɛet ak-d temɣarin, deɛqen s nnecwat ak-d wayawya: iryazen i itteggen řefḍiḥet ak-d yeryazen uca qebbřen deg ixef nsen řmunet i isdaheǧen i uweddar nsen.
ROM 1:28 Minzi war xsen ad kksen awař maḥend ad ssnen AREBBI, isellem i-ten AREBBI ɣar řeɛqeř war isekkwin ḥima ad ggen min war iɛeddřen.
ROM 1:29 Nitni ɛemmaren s ɛřam kuř řmuɛṣiyyet, s farq-ccɣeř d tarzugi d tuɛeffna d ṭṭmeɛ, s řeḥsed d wenɣay d umenɣi d teḥraymect d inwayen iɛeffnen.
ROM 1:30 [Nitni] ssawařen s řɣar, ttceqqafen, carrhen AREBBI, [nitni] d imeɣṣaben d imɛeffaren d ayt n bu-uqemmum d imesuffɣen n tuɛeffna, war ɣarsen bu řɛqeř, [nitni] war ṭṭiɛen i lwalidin nsen,
ROM 1:31 war daysen [uř] imten, war daysen tayri d weṣřaḥ uřa d arreḥmet.
ROM 1:32 Waxxa nitni ssnen řḥukm n AREBBI - aqa inni itteggen aya sdaheǧen řmewt - nitni war tteggen [marra] man aya waha, maca areṭṭan ɛawed x yinni itteggen timesřayin-a.
ROM 2:1 S uyenni aqa cek břa smaḥet, a bnadem, cek d wenni iḥekkmen x wenni d ac yudsen, minzi di min tḥekkmed x umeddukkeř nnec, aqa uřa d cek d bu-umarwas di man aya, maɣar cek, wenni ittḥasaben [inneɣni], řesqent ɣarek uřa d simant n tmesřayin.
ROM 2:2 Neccin nessen belli řḥukm n AREBBI d tidett x yinni ɣar teǧa tesɣart di tmesřayin am tina.
ROM 2:3 Maca mayemmi d ac ittɣiř, [a] bnadem, wenni iḥekkmen x yinni itteggen timesřayin-a am uřa d cek tᵉttegged tent simant nnec, aqa tzemmared ad tarewřed zi řḥukm n AREBBI?
ROM 2:4 Niɣ tesseḥqarad agřa n tcuni nnes d ttasiɛ n uraji nnes d ttasiɛ i d ac iwcin, uca war tessined ca belli tcuni n AREBBI aqa ineddeh i cek ɣar ttubet?
ROM 2:5 Maca di ssibbet n řeqsaḥet d nnuqṣan n ttubet n wuř nnec, tyarwed i yixef nnec ijj n řeqdar n weɣḍab i wass n weɣḍab u i usargeb n řḥukm iseggden n AREBBI,
ROM 2:6 wenni i ɣa ixeǧṣen kuř ijjen ɛlaḥsab řexdayem nnes:
ROM 2:7 ... i yinni yarezzun aɛuǧi d ccan d min war ifennin am ttṣebbaren nitni di řexdayem iṣebḥen, [aqa ad asen ixeǧeṣ s] Tudart ittduman,
ROM 2:8 ... maca i yinni ittɣewwɣen, inni war ittnumen ttᵉṭṭaɛen i tidett, maca ttnumen ttᵉṭṭaɛen i min war iseggden, aqa ad asen ixeǧeṣ s weɣḍab d tefqeḥt,
ROM 2:9 ... u s řmeḥnet d řeḥsaret ad ixeǧeṣ kuř řeɛmar n bnadem i itteggen řɣar, Udayen d amezwar, [xenni] Iramiyyen,
ROM 2:10 ... maca aɛuǧi d ccan d řehna [ad iřin] i marra wi itteggen tcuni, i Wudayen d amezwar uca [xenni] i Iramiyyen,
ROM 2:11 minzi AREBBI war ittegg ca s wudmawen.
ROM 2:12 Minzi marra inni ɣa ixḍan břa Ccariɛa, břa Ccariɛa ad ttwahellken uca marra inni ɣa ixḍan sadu Ccariɛa, aqa s Ccariɛa ad ttwaḥasben
ROM 2:13 maɣar war iǧi inni ittesřan i Ccariɛa nitni d imseggaden ɣar AREBBI, maca inni itteggen Ccariɛa aqa nitni ad ttwaseggden.
ROM 2:14 Minzi mařa řegnus nni war ɣar iǧi bu Ccariɛa, tteggen s ṭṭbiɛet min dayes di Ccariɛa, aqa yina d Ccariɛa i yixef nsen, waxxa nitni war ɣarsen bu Ccariɛa,
ROM 2:15 uca sscanen belli řxedmet n Ccariɛa tura deg wuřawen nsen, am teched ɛawed tnefsect nsen, am ixarriṣen nsen deǧen uřa ttdafaɛen x yixef nsen jar asen
ROM 2:16 deg wass min di i ɣa iḥaseb AREBBI x min innufaren deg iwdan s Yasuɛ Lmasiḥ ɛlaḥsab L’Injil inu.
ROM 2:17 Maca mařa cek, umi řaɣan Uday, tsennaded x Ccariɛa u tessemɣared di AREBBI,
ROM 2:18 aqa tessned min ixs Netta, tfarrzed min iṣebḥen, minzi tᵉttwassřemded zi Ccariɛa,
ROM 2:19 u tḥasbed ixef nnec d amgewwed n idarɣařen d tfawt i yinni iǧan di taǧest,
ROM 2:20 d amseggem yarebban ibuhařiyyen d amseřmad n iḥenjiren, u aqa ɣarek ṣṣifet n tussna d tidett di Ccariɛa,
ROM 2:21 [iwa] cek wenni isseřmaden inneɣni, ma war tesseřmided ca ixef nnec? Cek wenni ittbarrḥen ‘War tticar!’, ma tᵉttacared?
ROM 2:22 Cek wenni iqqaren ‘War zenni!’, ma tzennid? Cek d wenni icarrhen l’aṣnam, ma tacared zzawect [nsen] iqeddsen?
ROM 2:23 Cek wenni issemɣaran di Ccariɛa, ma tfeḍḥed AREBBI umi texḍid di Ccariɛa?
ROM 2:24 Minzi x ssibbet nwem ttceqqafen deg Yisem n AREBBI jar řegnus am mammec tura.
ROM 2:25 Aqa axtan ineffeɛ mařa tḍeffared Ccariɛa nican, maca mařa tᵉttɛeddid x Ccariɛa, aqa axtan nnec ittwaḥseb břa axtan.
ROM 2:26 Mařa wenni břa axtan ittᵉṭṭef di řumar iseggden n Ccariɛa, ma [xenni] war iḥesseb břa axtan nnes d axtan?
ROM 2:27 Wenni iḍeffaren Ccariɛa s ṭṭbiɛet am iǧa břa axtan, ad cek iḥaseb, cek wenni ittɛeddan x Ccariɛa s Tira d wextan!
ROM 2:28 Minzi Uday war iǧi d Uday s wudem, u axtan [s tidett] war iǧi min ittbanen deg weysum,
ROM 2:29 maca netta d Uday wenni ittiřin d Uday di tnuffra, u axtan aqa netta d wenni deg wuř, s Arruḥ, war iǧi [d wenni ittwaggen] ɛlaḥsab Tirra [n Ccariɛa], ařami asemɣar nnes war dd-ittis ca zeg iwdan maca zi AREBBI.
ROM 3:1 I xenni, man řefḍeř ɣar Wudayen, niɣ man tizi n wextan?
ROM 3:2 Aṭṭas x kuř iɣezdisen! Xenni ɣar umezwar mmewcen asen ‬wawařen n‮ ‬AREBBI.
ROM 3:3 Maɣar mařa tuɣa ca zzaysen war uminen ca, ma xenni beḍřen nitni řaman n AREBBI zi ssibbet n břa l’iman nsen?
ROM 3:4 Ɛemmarṣ! Maɣar AREBBI d tidett uca kuř bnadem d bu-ixarriqen, am mammec tura: “Cek ad tbaned d Amsegged s wawařen nnec, ad tiřid tkemmřed di řeṣfayet xmi Cek i ɣa ḥasben.”
ROM 3:5 Maca mařa min war isseggden dayneɣ aqa issbeyyen tasegda n AREBBI, min ɣa nini ɛad xenni? Ma AREBBI war ɣares bu řḥeqq umi xaneɣ igga aɣḍab nnes? Necc ssawařeɣ am yijj n bnadem [d amednub].
ROM 3:6 War xas nessiwiř! Mammec i ɣa iḥaseb AREBBI ddunect řexdenni?
ROM 3:7 Mammec mařa tfeyyeḍ tidett n AREBBI ɣar uɛuǧi nnes s uxarriq inu, mayemmi ɛad i ɣa ttwaḥasbeɣ am umednub?
ROM 3:8 War iɛeddeř aqa tamesřact teǧa am mammec qqaren inni dayneɣ iceqqfen belli neccin neqqar: “Ejj aneɣ ad negg tuɛeffna, ḥima ad zzayes dd-yekk min icnan!”?, inni aqa řḥukm xasen ad ittwaxemmeř ař ccreɛ iseggden.
ROM 3:9 I xenni mammec? Ma neccin ḥsen? Qbeř aqa nufa aqa Udayen d Iramiyyen marra sadu ddenb,
ROM 3:10 am mammec tura: “Uřa d ijj war iǧi d amsegged,
ROM 3:11 uřa d ijj war ifehhem, uřa d ijj war yarezzu x AREBBI.
ROM 3:12 Marra ffɣen zeg webrid, mmenḍaren, uřa d ijj war ittegg tcuni, uřa d ijj.
ROM 3:13 Tmijjawin nsen d imeḍřan yarezmen, s iřsawen nsen cemmten, ssem n ifiɣran sadu iyencicen nsen,
ROM 3:14 aqemmum nsen iccur s nneɛřet d tarzugi,
ROM 3:15 s iḍaren nsen ttqeǧiqen ɣar usizzeř n idammen,
ROM 3:16 areyyeb d tamara deg ibriden nsen,
ROM 3:17 abrid n řehna war t ssinen ca,
ROM 3:18 tiggʷudi n AREBBI war teǧi qibač i tiṭṭawin nsen.”
ROM 3:19 Neccin nessen belli marra min teqqar Ccariɛa, aqa teqqar i-t i yinni iǧan sadu Ccariɛa, ḥima ad ittwaqqen kuř aqemmum uca ad tedweř marra ddunect dayes řɛib zzat i AREBBI,
ROM 3:20 maɣar zi řexdayem n Ccariɛa war ittwasegged uřa d ijj n bnadem qibač nnes, minzi s Ccariɛa aqa ttwassnen ddnub.
ROM 3:21 Maca řexxu aqa teḍhar-dd tsegda n AREBBI břa Ccariɛa, tcehhed xas Ccariɛa d Inabiyyen,
ROM 3:22 aqa tasegda n AREBBI zi l’iman n Yasuɛ Lmasiḥ ɣar marra u x marra inni zzayes yumnen, minzi war din bu řfarz.
ROM 3:23 Minzi marra xḍan uca ineqṣ i-ten uɛuǧi n AREBBI,
ROM 3:24 uca ttwaseggden baṭeř s arḍa nnes s ufekki i iǧan di Yasuɛ Lmasiḥ.
ROM 3:25 AREBBI igga i-t d aṣřaḥ qbeř s l’iman deg Idammen nnes, di ssibbet n ddnub nneɣ nni tuɣa negga zic di řmijař n řweqt i d aneɣ iwca AREBBI s ttasiɛ n řxaḍar nnes, ḥima ad isscen tasegda nnes di řweqt-a,
ROM 3:26 maḥend di tsegda ad yarr d amseggad wi iǧan di l’iman n Siditneɣ Yasuɛ Lmasiḥ.
ROM 3:27 Mani iǧa xenni usemɣar? War xas nessiwiř. S man Ccariɛa? S man řexdayem? Ɛemmarṣ, maca s Ccariɛa n l’iman.
ROM 3:28 S uya neḥseb belli bnadem ad ittwasegged s l’iman, war iǧi s řexdayem n Ccariɛa.
ROM 3:29 Niɣ AREBBI n Wudayen waha, war iǧi n řegnus ɛawed? Wah, uřa n řegnus!
ROM 3:30 Minzi AREBBI d Ijjen wenni i ɣa iseggden inni ittwaxetnen s l’iman, u ɛawed inni war ittwaxtinen s l’iman.
ROM 3:31 Ma nbeṭṭeř Ccariɛa s l’iman? Wayyaw, s řemqřub, neccin ad neḍmen Ccariɛa.
ROM 4:1 Min i ɣa nini xenni x Ibrahim, azeǧif n řejdud nneɣ, aqa yufa di [arrimet nnes n] weysum?
ROM 4:2 Minzi mařa Ibrahim tuɣa ittwasegged s řexdayem, aqa ɣares ccan, maca war iǧi ca ɣar AREBBI.
ROM 4:3 Minzi min qqarent Tira [Iqeddsen]? “Yumen Ibrahim di AREBBI uca ittwaḥseb as-dd man aya d tasegda.”
ROM 4:4 Wenni ixeddmen war d as tᵉttwaḥesseb ca řmunet x řeḥsab n arḍa, maca x řeḥsab n umarwas, [minzi ttursen as-dd].
ROM 4:5 Maca wenni war ixeddmen, maca yumen deg Wenni ittseggaden imednab, aqa l’iman nnes ad as dd-ittwaḥseb d tasegda.
ROM 4:6 Am mammec inna Dawud ɛawed x sseɛd n bnadem wenni umi dd as iḥseb AREBBI tasegda břa řexdayem, umi inna:
ROM 4:7 “Sseɛd n yinni umi ittwaɣfar ixeṭṭan nsen, inni umi issduriy Netta ddnub nsen.
ROM 4:8 Sseɛd n bnadem umi war dd as iḥesseb ca AREBBI ddnub nnes.”
ROM 4:9 Ma sseɛd-a x yinni ittwaxetnen waha niɣ ɛawed x yinni war ittwaxetnen? S minzi neqqar: “L’iman n Ibrahim ittwaḥseb as-dd d tasegda!”
ROM 4:10 Mammec d as t-i-dd ittwaḥseb? Ma řami tuɣa s wextan niɣ mařa tuɣa břa axtan? War tuɣi s wextan, maca tuɣa břa axtan.
ROM 4:11 Minzi iksi axtan d řeɛřamet d ucemmiɛ n tsegda n l’iman nni ɣares umi t tuɣa břa axtan, ḥima ad yiři d jedditsen n marra inni yumnen waxxa nitni břa axtan, ḥima ad asen dd-ittwaḥseb [l’iman] d tasegda ɛawed.
ROM 4:12 Netta d jedditsen i yinni s wextan, [maca] war iǧi i yinni [idewřen yumnen] zeg wextan waha, [maca] ɛawed i yinni igguren deg iṣuraf n l’iman n jedditneɣ Ibrahim umi tuɣa břa axtan.
ROM 4:13 Minzi lwaɛd i Ibrahim u i zzariɛet nnes belli ad yiři d awrit n ddunect, war dd-ittis ca s Ccariɛa, maca s tsegda n l’iman nnes.
ROM 4:14 Minzi mařa inni zi Ccariɛa d iwriten, aqa l’iman ixessaren uřa d lwaɛd ibeḍřen.
ROM 4:15 Maɣar Ccariɛa tᵉttaru aɣḍab. Mani war teǧi Ccariɛa, war din iǧi uřa d aɛeddi n Ccariɛa.
ROM 4:16 S uyenni nettwasegged s l’iman, ixs ad yini s arḍa, maḥend ad yiři lwaɛd nican i qaɛ zzariɛet nnes, war iǧi i yinni iǧan zi Ccariɛa waha, maca ɛawed i yinni iǧan zi l’iman n Ibrahim, wenni d jedditneɣ n marra idneɣ,
ROM 4:17 am mammec tura: “Aqa ggiɣ cek d jedditsen i waṭṭas n řegnus!”, zzat i AREBBI Wenni zi tuɣa tumned, wenni itticen Tudart i imettinen d wenni ittřaɣan timesřayin i war iǧin axmi ǧan.
ROM 4:18 Waxxa iqḍeɛ as řayas, aqa yumen s usitem ad idweř d jedditsen i waṭṭas n řegnus am mammec tura: “Ammu i ɣa tiři zzariɛet nnec!”
ROM 4:19 L’iman nnes war tuɣi iḍɛef, umi iḥseb arrimet nnes temmut am tuɣa ɣares mya n iseggʷusa, u umi immut uɛeddis n Sara.
ROM 4:20 Netta war icekk ca di lwaɛd n AREBBI axmi s nneqṣ n l’iman, maca imḥeḍ di l’iman nnes, iwca aɛuǧi i AREBBI.
ROM 4:21 Tuɣa issen nican belli min zzayes tuɣa iwaɛd AREBBI, izemmar ad t igg ɛawed.
ROM 4:22 S uyenni ittwaḥseb as-dd [l’iman] d tasegda.
ROM 4:23 Maca war turi di ssibbet nnes waha, aqa ittwaḥseb as-dd l’iman nnes d tasegda,
ROM 4:24 maca ɛawed di ssibbet nneɣ, ḥima Netta ad aneɣ t-i-dd-iḥseb [d tasegda], i neccin inni ittamnen deg Wenni i dd-issnekkaren Siditneɣ Yasuɛ Lmasiḥ zi taddart n imettinen,
ROM 4:25 [Yeccu Lmasiḥ] wenni ittwasellmen di ssibbet n ddnub nneɣ uca ikkar-dd ḥima ad aneɣ isegged.
ROM 5:1 Xenni neccin, am nettwasegged s l’iman, aqa ad ɣarneɣ yiři řehna ak-d AREBBI s Siditneɣ Yasuɛ Lmasiḥ.
ROM 5:2 Maɣar zzayes idweř aneɣ-dd adaf s l’iman ɣar arḍa-ya min di nbedd, u nessemɣar deg usitem n uɛuǧi n AREBBI.
ROM 5:3 [Maca] war iǧi di man aya waha, maca nessemɣar ɛawed di řemḥayem, nessen belli řmeḥnet tᵉttaru-dd dayneɣ ṣṣbar,
ROM 5:4 d ṣṣbar [ad yawi] taqeǧebt, uca taqeǧebt [ad tawi] asitem,
ROM 5:5 uca asitem war ittseḥcim ca, minzi tayri n AREBBI aqa tᵉttwafarreɣ deg wuřawen nneɣ s Arruḥ Iqeddsen i d aneɣ immewcen.
ROM 5:6 Di ssibbet n tuḍɛeft nneɣ, aqa immut Lmasiḥ di řweqt-a di ṭṭweɛ n iɛeffanen.
ROM 5:7 S řweḥřan ad immet ḥed di ṭṭweɛ n ijj n uɛeffan, maca di ṭṭweɛ n iṣebḥanen ad taɣ izemmar ad izɛem ḥed ad immet.
ROM 5:8 Di man aya imřa aneɣ AREBBI tayri nnes, aqa Lmasiḥ immut di ṭṭweɛ nneɣ umi tuɣa aneɣ ɛad d imednab.
ROM 5:9 Mecḥař ktar aqa nettwasegged řexxu s Idammen nnes uca nettwafekk zzayes zeg weɣḍab!
ROM 5:10 Minzi řami d aneɣ tuɣa d řɛedyan, ijja AREBBI ad isseṣřeḥ Ixef nnes akidneɣ s řmewt n Mmis, mecḥař qaɛ řexxu ad neddar s Tudart nnes, awarni řami zzayes nufa aṣřaḥ.
ROM 5:11 U war iǧi man aya waha, maca ad nessemɣar di AREBBI ɛawed s Siditneɣ Yasuɛ Lmasiḥ, wenni zi neksi řexxu aṣřaḥ.
ROM 5:12 Maɣar am mammec s yijj n bnadem yudef-dd ddenb ɣar ddunect uca s ddenb tudef-dd řmewt, ammu dd-tudef řmewt ɣar iwdan marra, minzi xḍan marra.
ROM 5:13 Minzi qbeř ma tuɣa teǧa Ccariɛa, tuɣa ddenb di ddunect, maca ddenb war ittwaḥsib ca minzi war din teǧi Ccariɛa.
ROM 5:14 Maca řmewt tuɣa teḥkem zi Adam ař Musa uřa x yinni war ixḍin di ṣṣifet n uxeṭṭu i zi ixḍa Adam ak-d ccariɛa. [Adam] wenni d ṣṣifet n Wenni dd ɣa yasen.
ROM 5:15 Maca am mammec teǧi [tmesřact] s uweṭṭu, ammu war teǧi s tewhibt n arḍa. Minzi mařa mmuten aṭṭas x ssibbet n ijj n uxeṭṭu, mecḥař qaɛ i ɣa ifeyyeḍ arḍa n AREBBI d tewhibt nnes i waṭṭas s uyenni n Bnadem [nni], Yasuɛ Lmasiḥ.
ROM 5:16 Tawhibt s arḍa war tᵉttiři am uxeṭṭu n yijjen. S minzi řḥukm yiwi-dd lḥisab zeg ijj n uxeṭṭu, maca tawhibt n arḍa tiwi-dd zeg waṭṭas n ddnub ɣar tsegda.
ROM 5:17 Minzi mařa s uxeṭṭu n ijjen aqa teḥkem řmewt, mecḥař qaɛ i ɣa ḥekmen di Tudart inni iksin afeyyeḍ n arḍa d tewhibt n tsegda s uyenni [n bnadem nni], aqa-t d Yasuɛ Lmasiḥ.
ROM 5:18 Am mammec xenni s uxeṭṭu n ijjen, aqa idweř řḥukm i marra iwdan, ammu i ɣa tiři řeṣfayet ikemmřen i Tudart i marra iwdan s tsegda n Yijjen.
ROM 5:19 Minzi am s řmuɛṣiyyet n ijj n bnadem dewřen aṭṭas d imednab, ammu ɛawed s ṭṭaɛet n Ijjen ad dewřen aṭṭas d imseggaden.
ROM 5:20 Maca umi dd-tusa Ccariɛa, immarni ddenb, u mani immarni ddenb, immarni arḍa aṭṭas s waṭṭas,
ROM 5:21 ḥima, am mammec iḥkem ddenb ař řmewt, ad iḥkem arḍa ɛawed s tsegda ař Tudart ittduman s Siditneɣ Yasuɛ Lmasiḥ.
ROM 6:1 Min ɣa nini xenni? Ma ad neqqim di ddenb ḥima ad immarni arḍa?
ROM 6:2 Ɛemmarṣ! Neccin inni immuten i ddenb, mammec ɛad dayes i ɣa neddar?
ROM 6:3 Ma war tessinem ca belli inni zzayneɣ ittwassɣeḍṣen di Yasuɛ Lmasiḥ, ttwassɣeḍṣen di řmewt nnes?
ROM 6:4 Aqa nettwanḍeř akides s useɣḍeṣ di řmewt, ḥima, am mammec dd-ittwassnekkar Lmasiḥ zi taddart n imettinen ɣar uɛuǧi n Babas, ammu i ɣa nuyur uřa d neccin di Tudart n jdid.
ROM 6:5 Minzi mařa nettwaẓẓu [di temmurt] d ijjen akides s [tefras n] řmewt nnes, xenni ammu i ɣa niři ɛawed [d ijjen akides] s tefras n tnukra nnes.
ROM 6:6 Aqa nessen belli bnadem nneɣ aqdim ittwaṣelleb akides, ḥima ad tebḍeř arrimet n ddenb, war ndikkwiř ɛawed d imsexxaren i ddenb.
ROM 6:7 Minzi wenni immuten, aqa ittwafekk zi ddnub.
ROM 6:8 Mařa xenni nemmut ak-d Lmasiḥ, aqa numen belli neddar [ɛawed] akides, ak-d Lmasiḥ.
ROM 6:9 Minzi nessen belli Lmasiḥ ittwassnekkar-dd zi taddart n imettinen, war ittmetti ɛawed. Aqa řmewt war xas tḥekkem ca.
ROM 6:10 Minzi zeg uɣezdis n řmewt i immut, aqa immut i ddnub ijj n umur, maca zeg uɣezdis n Tudart nnes, Netta iddar i AREBBI.
ROM 6:11 Ammu kenniw ɛawed: ḥesbem ixef nwem d imettinen i ddenb, [maca] d imuddaren i AREBBI di Siditneɣ Yasuɛ Lmasiḥ.
ROM 6:12 Xenni war ttejjim ddenb ad iḥkem di arrimet nwem ifennan, ařami ad as tᵉṭṭaɛem di nnecwat nnes,
ROM 6:13 uca war ttewcim iɣezdisen [n arrimet] nwem am dduzan i řmuɛṣiyyet, maca wcem ixef nwem i AREBBI, am iwdan inni idewřen ɣar Tudart zeg imettinen, uca [wcem] iɣezdisen [n arrimet] nwem am dduzan i tsegda n AREBBI.
ROM 6:14 Ddenb war xawem iḥekkem ca, minzi war teǧim sadu Ccariɛa maca sadu arḍa.
ROM 6:15 Mammec xenni? Ma ad nexḍa minzi war neǧi ca sadu Ccariɛa, maca sadu arḍa? Ɛemmarṣ!
ROM 6:16 Ma war tessinem ca aqa kenniw d imsexxaren n wenni umi tewcim ixef nwem maḥend ad as tsexxarem s ṭṭaɛet, n wenni umi tᵉttᵉṭṭaɛem, ma i ddenb i tᵉttᵉṭṭaɛem niɣ i tsegda?
ROM 6:17 Tqad as i AREBBI, aqa kenniw inni tuɣa d imsexxaren i ddenb, aqa tdewřem tᵉttᵉṭṭaɛem s wuř i ddab [iṣfan] n useřmed i d awem ittwasellmen.
ROM 6:18 Řami tᵉttwafekkem zi ddenb, tdewřem d imsexxaren n tsegda.
ROM 6:19 Ssawařeɣ x řeḥsab řeɛqeř n bnadem x ssibbet n tuḍɛeft n weysum nwem, minzi am mammec tewcim iɣezdisen nwem d imsexxaren i řexmej d min war iseggden, amenni řexxu wcem iɣezdisen nwem d imsexxaren i tsegda d tqeddast.
ROM 6:20 Minzi řami tuɣa kenniw d imsexxaren n ddenb, tuɣa kenniw d iḥurriyyen zi jjihet n tsegda.
ROM 6:21 Man řɣiǧet i tuɣa ɣarwem řexdenni? Timesřayin i zi tᵉttseḍḥam řexxu? S minzi aneggar nsent d řmewt.
ROM 6:22 [Maca] řexxu, umi tᵉttwafekkem zi ddenb uca tdewřem d imsexxaren n AREBBI, aqa řɣiǧet nwem tᵉttwaqeddes uca uneggar nnes d Tudart ittduman.
ROM 6:23 Minzi řexřaṣ n ddenb d řmewt, maca tawhibt n AREBBI d Tudart ittduman s Siditneɣ Yasuɛ Lmasiḥ.
ROM 7:1 Ma war tessinem ca, [a] aytma, ssawařeɣ ak-d yinni issnen Ccariɛa, aqa Ccariɛa tṣeǧeḍ x bnadem min ɣa yekk iddar?
ROM 7:2 Tamɣart teqqen ɣar weryaz nnes s Ccariɛa min ɣa yekk iddar, maca mařa immut weryaz nnes, aqa tᵉttwafekk zi Ccariɛa zi jjihet n weryaz nnes.
ROM 7:3 Maca mařa ad teqqen ɣar weryaz nneɣni min ɣa yekk weryaz iddar, tᵉttwaḥseb zzayes aqa nettat tezna. Maca mařa immut weryaz nnes, ad taf ad tᵉttwafekk zi Ccariɛa, aqa war tezni mařa temřec ak-d weryaz nneɣni.
ROM 7:4 Xenni, [a] aytma, kenniw ɛawed aqa temmutem i Ccariɛa s Arrimet n Lmasiḥ, ḥima ad tdewřem i Wenneɣni i wenni dd-ikkaren zi taddart n imettinen, ḥima ad tewcem řɣiǧet i AREBBI.
ROM 7:5 Minzi umi d aneɣ tuɣa deg weysum, tuɣa ccehwat n ddnub xeddment deg iɣezdisen [n arrimet] nneɣ am ttwaɛarnent zi Ccariɛa ařami ɣa awyent řɣiǧet i řmewt.
ROM 7:6 Maca řexxu aqa nettwafekk zi Ccariɛa, aqa nemmut x min di tuɣa nettwaḥbes, ḥima ad neɛbed [AREBBI] s tejdidet n Arruḥ, war iǧi di ṣṣifet taqdimt n Tira [Iqeddsen].
ROM 7:7 Min ɣa nini xenni? Ma Ccariɛa d ddenb? Ɛemmarṣ! Maca war ssineɣ ddenb mɣir s Ccariɛa waha, maɣar war ssineɣ nnecwet mařa war tenni Ccariɛa: “War ttasem!”
ROM 7:8 Maca ddenb yufa lfurṣa s tewṣeyyet uca tegma dayi kuř nnecwet, minzi břa Ccariɛa ddenb immut.
ROM 7:9 Zic tuɣa ddareɣ břa Ccariɛa, maca umi dd-tusa tewṣeyyet, ibda ddenb ad iddar, uca mmuteɣ.
ROM 7:10 Ufiɣ belli tawṣeyyet i iǧan i tudart tneddeh ɣar řmewt.
ROM 7:11 Minzi ddenb am yufa lfurṣa s tewṣeyyet, icmet ayi uca inɣa ayi zzayes.
ROM 7:12 Xenni Ccariɛa iqeddsen i teǧa u tawṣeyyet iqeddsen i teǧa, tsegged u teṣbeḥ.
ROM 7:13 Ma idweř ayi min iǧan d aṣebḥan d řmewt inu? Ɛemmarṣ! Maca ddenb, ḥima ad iban d ddenb, issegma dayi řmewt s min iǧan d aṣebḥan, ḥima ad idweř ddenb d ddenb ktar s tewṣiyyet.
ROM 7:14 Aqa nessen belli Ccariɛa n Arruḥ i teǧa, maca necc d aysum, mmenzeɣ i ddenb,
ROM 7:15 minzi war ssineɣ min ɣa ggeɣ, uca min xseɣ, war t tteggeɣ, maca min carrheɣ d manawenni i tteggeɣ.
ROM 7:16 Mařa tteggeɣ min war ttexseɣ, ad wafqeɣ ak-d Ccariɛa, belli aqa nettat teṣbeḥ.
ROM 7:17 Maca řexxu necc war tteggeɣ man aya [ɛad], maca ddenb i d ayi izeddɣen [ittegg i-t].
ROM 7:18 Minzi ssneɣ war dayi izeddeɣ min icnan, ixs ad yini deg weysum inu. Minzi ihwen xafi maḥend ad xseɣ tcuni, maca war zemmareɣ ad tt ggeɣ.
ROM 7:19 Minzi war tteggeɣ tcuni i xseɣ, maca řɣar i war ttexseɣ ca, d manawenni i tteggeɣ.
ROM 7:20 Mařa tteggeɣ min war ttexseɣ, war iǧi ɛad d necc i itteggen man aya, maca ddenb wenni d ayi izeddɣen.
ROM 7:21 Xenni ttafeɣ ict n ccariɛa tenni tusa-dd ak-d tnefsect inu, tenni ixsen ad igg tcuni, am yudes ayi-dd řɣar.
ROM 7:22 Minzi farḥeɣ s Ccariɛa n AREBBI zi jjihet n bnadem nni iǧan di daxeř inu,
ROM 7:23 maca ttwařiɣ din ccariɛa nneɣni deg iɣezdisen [n arrimet] inu, tᵉttmenɣa ak-d ccariɛa n řeɛqeř inu uca tḥebbes ayi s ccariɛa n ddenb tenni iǧan deg iɣezdisen [n arrimet] inu.
ROM 7:24 Ayeḥḥat mana wemcum-a n bnadem i ǧiɣ! Wi d ayi ɣa issnejmen zi arrimet-a n řmewt?
ROM 7:25 Ttqadiɣ AREBBI, [wenni i d ayi issenjmen] s ufus n Siditneɣ Yasuɛ Lmasiḥ! Ammu aqa necc simant inu s řeɛqeř i xeddmeɣ i Ccariɛa n AREBBI, maca deg weysum inu i ccariɛa n ddenb.
ROM 8:1 Xenni war dinni bu řḥukm x yinni igguren war iǧi [ɛad] deg weysum s Yasuɛ Lmasiḥ.
ROM 8:2 Minzi Ccariɛa n Arruḥ n Tudart di Yasuɛ Lmasiḥ, aqa tfekk ac zi Ccariɛa n ddenb d řmewt.
ROM 8:3 Minzi maɣar tuɣa Ccariɛa teḍɛef s tuḍɛeft n weysum, issekk-dd AREBBI Mmis di ṣṣifet n weysum n ddenb x ssibbet n ddenb, maḥend ad iḥaseb ddenb deg weysum,
ROM 8:4 ḥima ad dayneɣ tᵉttwakemmeř tasegda n Ccariɛa, maḥend war neggur deg weysum, maca di Arruḥ.
ROM 8:5 Minzi inni iǧan deg weysum tteggen nneyyet nsen deg weysum, maca inni n Arruḥ tteggen nneyyet nsen di Arruḥ.
ROM 8:6 Minzi nneyyet n weysum d řmewt, maca nneyyet n Arruḥ d tudart d řehna.
ROM 8:7 Minzi nneyyet n weysum, aqa-tt d řeɛdawat i AREBBI, minzi war tᵉttegg ca array i Ccariɛa n AREBBI, maɣar war d as tzemmar.
ROM 8:8 Inni iǧan deg weysum war izemmaren ad arḍan AREBBI.
ROM 8:9 Maca kenniw war teǧim ca deg weysum, maca di Arruḥ mařa izdeɣ daywem Arruḥ n AREBBI. Maca mařa ḥed war ɣares bu Arruḥ n Lmasiḥ, d wenni war ittiři nnes.
ROM 8:10 Mařa daywem Lmasiḥ, aqa arrimet temmut zi ssibbet n ddnub, maca Arruḥ iddar zi ssibbet n tsegda.
ROM 8:11 Mařa izdeɣ daywem Arruḥ n wenni dd-issnekkaren Siditneɣ Yasuɛ Lmasiḥ zi taddart n imettinen, aqa wenni dd-issnekkaren Yasuɛ Lmasiḥ zi taddart n imettinen ad isseddar ɛawed arrimat nwem ifennan s Arruḥ nnes i izeddɣen daywem.
ROM 8:12 Xenni, [a] aytma, aqa aneɣ s umarwas, [maca] war iǧi i weysum, ḥima ad neddar x řeḥsab n weysum,
ROM 8:13 minzi mařa teddarem x řeḥsab n weysum, ad temtem. Maca mařa tᵉttarrim ad mmtent řexdayem n arrimet s Arruḥ, ad teddarem.
ROM 8:14 Minzi marra inni ittwanedhen s Arruḥ n AREBBI, nitni d arrawen n AREBBI.
ROM 8:15 Minzi kenniw war teksim ca arruḥ n tesmuɣi [wenni kenniw i ɣa yarren d isemɣan], ḥima ad teggʷedem ɛawed, maca aqa teksim Arruḥ i zi nettwaqbeř d arrawen, i zi nettřaɣa: ‘Tababat, Babatneɣ!’
ROM 8:16 Arruḥ nni simant nnes icehhed ak-d arruḥ nneɣ, belli neccin d arrawen n AREBBI.
ROM 8:17 Mařa neccin d arrawen, aqa aneɣ ɛawed d iwriten, iwriten n AREBBI d iwriten ak-d Yasuɛ Lmasiḥ, maɣar mařa nweddeb akides, ad nettwaɛuǧi akides ɛawed.
ROM 8:18 Necc ttwassqenɛeɣ belli aweddeb i xaneɣ ittekken iḍa, war isdiheǧ ca ad ittwaɛbar s uɛuǧi i dd ɣa ittwasseḍharen dayneɣ.
ROM 8:19 Minzi marra min dd-ittwaxeřqen ixezzar s usitem d uraji ɣar usargeb n warrawen n AREBBI.
ROM 8:20 Minzi marra min dd-ittwaxeřqen aqa ittwagg di řbaṭeř, war iǧi s řxaḍar, maca s wenni t iggin di řbaṭeř
ROM 8:21 s usitem belli marra min dd-ittwaxeřqen ad ittwafekk ɛawed zi tesmuɣi i řɣecc ɣar tiřelli n uɛuǧi n warrawen n AREBBI.
ROM 8:22 Aqa nessen belli marra min dd-ittwaxeřqen izehhar jmiɛ s unezbar n tarwa ař ass-a.
ROM 8:23 War iǧi nitni waha, maca uřa d neccin, inni ɣar teǧa dayneɣ [řɣiǧet] tamezwarut n Arruḥ, nzehhar deg ixef nneɣ, nettraja ad nettwaqbeř d mmis, uřa d afekki n arrimat nneɣ.
ROM 8:24 S uyenni neddar deg usitem nni. Maca asitem ittbanen war iǧi d asitem, minzi min ittbanen i ḥed, mammec ɣa yegg ad dayes issitem ɛad?
ROM 8:25 Maca mařa nessittim di min war nettwiři, aqa nettraja t s ṣṣbar.
ROM 8:26 Di man aya ittɛawan aneɣ Arruḥ ɛawed di teḍɛeft nneɣ, minzi war nessin ca mammec d aneɣ i ɣa icuwwar ad neẓẓaǧ, maca Arruḥ simant nnes ittẓaǧa di ṭṭweɛ nneɣ s zzhir war ineṭqen.
ROM 8:27 Maca wenni ittbeqqcen deg wuřawen issen min iǧan d nneyyet n Arruḥ, aqa ittẓaǧa di ṭṭweɛ n imqeddasen am mammec t ixs AREBBI.
ROM 8:28 Neccin nessen aqa Netta iɛawen di kuřci i řxar i yinni ittexsen AREBBI, inni iɛeǧem i-ten qbeř maḥend ad ttwařaɣan.
ROM 8:29 Minzi inni izwar issen i-ten, aqa izwar iɛeǧem i-ten ḥima ad arwesen di ṣṣifet n Mmis, ḥima ad yiři Netta d Amenzu jar waṭṭas n wawmaten.
ROM 8:30 Uca inni Netta izzar iɛeǧem i-ten, aqa d inni x d iřaɣa ɛawed, u inni x d iřaɣa, aqa d inni isegged ɛawed, u inni isegged aqa d inni issɛuǧa ɛawed.
ROM 8:31 Min ɣa nini xenni di man aya? Mařa AREBBI akidneɣ wi d aneɣ i ɣa iḍadden?
ROM 8:32 Wenni war iceṭṭaren ca x Mmis, maca iwca i-t di ṭṭweɛ nneɣ marra, mammec war d aneɣ ittic kuřci ak-d Mmis ɛawed?
ROM 8:33 Wi ɣa iksin tanfuč i yinni ittwafarzen zi AREBBI? AREBBI d wenni ittseggaden.
ROM 8:34 Wi ɣa iqḍan řḥukm? Lmasiḥ immut u ikkar-dd u Netta [iqqim] ɣar ufusi n AREBBI, ittẓaǧa i neccin.
ROM 8:35 Min d ayi ɣa ibḍan x tayri n Lmasiḥ? Ma řmeḥnet, niɣ řḥebs, niɣ adarrec, niɣ řaẓ, niɣ tuɛaryent, niɣ lxaṭar, niɣ ssif?
ROM 8:36 Am mammec tura: “Aqa x ssibbet nnec nettmetta kuř ass, nettwaḥseb am iḥuřiyyen i tɣarṣt.”
ROM 8:37 Maca di man aya marra nedweř zeg inni iɣellaben s Wenni d aneɣ ixsen.
ROM 8:38 Aqa necc ttwassqenɛeɣ belli niɣ řmewt, niɣ tudart, niɣ lmalakat, niɣ řḥukkam, niɣ ṣṣulaṭat, niɣ min n yiḍa, niɣ min i dd ɣa yasen,
ROM 8:39 niɣ řuɛřa, niɣ raǧaɣ, niɣ uřa d ict n řḥajjet nneɣni zi min dd-ittwaxeřqen, tzemmar ad aneɣ tebḍa x tayri n AREBBI, tenni di Siditneɣ Yasuɛ Lmasiḥ.
ROM 9:1 Qqareɣ tidett di Lmasiḥ, war ssxarriqeɣ ca, uca tanefsect inu tcehhed dayi s Arruḥ Iqeddsen,
ROM 9:2 belli ɣari acḍan imɣar d řeḥriq war ittbeddi deg wuř inu.
ROM 9:3 Tuɣa ttẓaǧiɣ meɛlik ufiɣ ttwaḥarrmeɣ [di mummu inu] x Lmasiḥ [s ict nneɛřet] di ṭṭweɛ n wawmaten inu, řaǧ inu zi jjihet n weysum [n arrimet].
ROM 9:4 arrawen n Israil, inni ittwaqebřen d mmis. Ɣarsen i yeǧa uɛuǧi, řɛuhud, Ccariɛa, tasexxart [i iǧan di Zzawect Iqeddsen] i ɣares dd-iqqnen, lwuɛud d řejdud.
ROM 9:5 Zzaysen i dd-iban Lmasiḥ x webrid n weysum [n arrimet] wenni d AREBBI x marra. I Netta i ɣa yiři [marra] asemɣar d [marra] lbaraka i řebda qaɛ. Amin!
ROM 9:6 Maca war iǧi ařami awař n AREBBI war yiwiḍ, minzi marra inni zi Israil war ǧin ca d Israil.
ROM 9:7 Uca uřa d marra nitni war ǧin ca d tarwa n Ibrahim, minzi nitni zi zzariɛet n Ibrahim, minzi ittwanna: “Di Isḥaq ad ac řaɣan zzariɛet.”
ROM 9:8 Man aya war ixs ad yini aqa tarwa ɛlaḥṣab jjadira n arrimet aqa-ten d tarwa n AREBBI, maca tarwa n lwaɛd ad ttwaḥesben d zzariɛet.
ROM 9:9 Minzi awař n lwaɛd d wa: “Ɣar řweqt-a ad dd-aseɣ uca ad ɣares yiři ɣar Sara mmis!”
ROM 9:10 Man aya war iǧi waha di tmesřact n Sara, maca uřa [di tmesřact n] Rifqa, umi tmun ak-d uyenni n bnadem nni, jedditeɣ Isḥaq,
ROM 9:11 tuɣa tizzar tettwassen řixḍaret n AREBBI umi tuɣa ɛad war dd-xřiqen iḥenjiren nnes, war zemmaren ad ggen [ɛad] řxar niɣ řɣar, ḥima war tᵉttiři tmesřact deg webrid n řexdayem, maca deg webrid n wenni ittřaɣan.
ROM 9:12 Maɣar ittwanna [i Rifqa]: “Aqa ameqqran ad isexxar i umeẓyan!”,
ROM 9:13 am mammec tura: “Yaɛqub i xseɣ, maca carheɣ Isu.”
ROM 9:14 Min ɣa nini xenni? Ma iqedd ad yiři ɣar AREBBI min war iseggden? Ɛemmarṣ!
ROM 9:15 Xzar, Netta inna ɛawed i Musa: “Ad areḥmeɣ wi xseɣ ad areḥmeɣ, uca ad ḥinneɣ x wi xseɣ ad ḥinneɣ.”
ROM 9:16 Xenni tamesřact war teqqim ca ɣar wi ittexsen uřa ɣar wi ittazzřen, maca ɣar AREBBI wenni yareḥḥmen.
ROM 9:17 Minzi ɛlaḥsab Tira [Iqeddsen] inna Netta i firɛun: “Aqa i man aya ssnekkareɣ-dd cek, ḥima ad zzayek ssecneɣ jjehd inu, uca ad ittwabarreḥ Isem inu di marra ddunect.”
ROM 9:18 Xenni Netta ad yarḥem wi ixs, uca ad isseqseḥ wi ixs.
ROM 9:19 Iwa, ad taɣ ad tinid: Mayemmi ittcetca ɛad, minzi wi ɣa immɛařan ak-d min ixs Netta?
ROM 9:20 Maca min teɛnid cek, a bnadem, wenni ittqacaḥen AREBBI? Ma min ittwaggen izemmar ad ini i wenni t iggin: “Mayemmi d ayi teggid ammu?”
ROM 9:21 Ma war iǧi ɣar bu-třaxt ṣṣulṭa x třaxt ḥima ad igg [zeg ict n řɛejnet] ict n řqecɛet i lkarama u wenneɣni i ubehdeř?
ROM 9:22 Maɣar AREBBI, [wenni] tuɣa ixs ad isscen aɣḍab nnes d jjehd nnes, issiweḍ lɣaḍab nnes s waṭṭas n ttasiɛ n řxaḍar x řeqcuɛ n weɣḍab inni ittwasswejden marra i uhellek,
ROM 9:23 uca ifarɣ tayri nnes x řeqcuɛ n arreḥmet inni izwar issewjed i-ten i uɛuǧi i AREBBI!
ROM 9:24 Maɣar neccin d inni ittwařaɣan, war iǧi zeg Wudayen waha, maca ɛawed zi řegnus.
ROM 9:25 Am mammec ittwanna ɛawed di Ḥuciɛa: “Ad semmiɣ i yinni war iǧin d řgens inu ‘Řgens inu!’, uca i yinni war iǧin d amɛizz d ‘Amɛizz!’”
ROM 9:26 Ad yiři deg wemcan mani d asen ittwařaɣa: ‘War iǧi d řgens inu!’, belli dinni ad asen řaɣan: ‘Arrawen n AREBBI iddaren!’
ROM 9:27 Maca Icaɛya ibarreḥ zi jjihet n ayt n Israil: “Mařa tuɣa řqedd n ayt n Israil anect n ijdi n řebḥar, mɣir min i ɣa iqqimen ad injem.”
ROM 9:28 “Tamesřact tbedd nican u ad tᵉttwaqfeř, SIDI ad tt igg x temmurt.”
ROM 9:29 Am mammec izwar Icaɛya inna: “Maɛlik SIDI n řɛeskarat war d aneɣ ijji inni iqqimen ddaren, iři nedweř am Sadum u narwes di Ɛamurra.”
ROM 9:30 Min ɣa nini xenni? Ma xenni řegnus inni war yarezzun tasegda, aqa ksin tasegda? Iwa, maca tasegda tenni s l’iman.
ROM 9:31 Maca Israil nni iḍeffaren Ccariɛa n tsegda, war yiwiḍ ca ɣar Ccariɛa n tsegda.
ROM 9:32 Mayemmi? Minzi [tasegda] nni war teǧi ca zi l’iman maca zi řexdayem n Ccariɛa, minzi nitni nderfen deg Weẓru n unedref,
ROM 9:33 am mammec tura: “Aqa ad ggeɣ di Ṣihyun Aẓru i unedref d Weẓru i uneqrad. Marra wi zzayes i ɣa yamnen, war ittseḍḥa.”
ROM 10:1 [A] aytma, ameẓri n wuř inu u taẓaǧit tenni ẓuǧeɣ ɣar AREBBI di ṭṭweɛ n [Israil], aqa-tt ḥima ad ɣarsen tiři Tudart.
ROM 10:2 Aqa cehhdeɣ xasen aqa nitni ɣarsen cḍaret i AREBBI, maca břa tussna.
ROM 10:3 Maɣar war ssinen tasegda n AREBBI, maca arezzun ad ṭṭfen di tsegda n ixef nsen. S uya war sswaḍɛen ixef nsen i tsegda n AREBBI.
ROM 10:4 Minzi akemmeř n Ccariɛa netta d Lmasiḥ i tsegda i kuř ijjen i ittamnen.
ROM 10:5 Minzi Musa yura zi jjihet n tsegda di Ccariɛa: “Wenni itteggen man aya, ad zzayes iddar.”
ROM 10:6 Maca tasegda tenni zi l’iman teqqar ammu: “War teqqar deg wuř nnec: ‘Wi ɣa igaɛɛden ɣar ujenna uca ad issehwa Lmasiḥ?”
ROM 10:7 niɣ: “Wi dd-ihwan deg weḥfur n řaxart, uca issgeɛɛed Lmasiḥ zi taddart n imettinen?”
ROM 10:8 Maca min ixs ad yini man aya [xenni]? “Tamwarrit tudes i cek, aqa-t deg uqemmum nnec uřa deg wuř nnec. Wa d Awař n l’iman i zi nettbarreḥ.”
ROM 10:9 Mařa tcehded i Siditneɣ Yasuɛ s uqemmum nnec uca ad tamned s wuř nnec belli AREBBI issnekkar i-t zi taddart n imettinen, ad teddared.
ROM 10:10 Minzi uř i dayes ittamen ad ittwasegged, uca aqemmum i zzayes icehhden, ad iddar.
ROM 10:11 Minzi Tira [Iqeddsen] qqarent: “Marra wi zzayes i ɣa yamnen, war ittseḍḥi ca.”
ROM 10:12 Minzi Netta war ittegg bu řfarz jar Wudayen d Iramiyyen, minzi Netta d Ijjen, SIDI nsen marra nni ittenfeyyaḍ řxar x marra inni xas dd-ittřaɣan.
ROM 10:13 “Minzi kuř ijjen wenni i ɣa iřaɣan s Yisem n SIDI, ad iddar.”
ROM 10:14 Mammec i ɣa řaɣan x Wenni di war uminen ca? Niɣ mammec ɣa yamnen deg Wenni mixef war sřin, niɣ mammec ɣa sřen, mařa uřa d ijj war zzayes ibarreḥ ca?
ROM 10:15 Mammec i ɣa barrḥen mařa war dd-ttwassekken? Am mammec tura: “Mecḥař ḍarfen iḍaren n yinni ittbarrḥen s řehna, n yinni ittbarrḥen s tebratin tiṣebḥanin.”
ROM 10:16 Maca war iǧi marra ṭṭaɛen i ubarreḥ n Řexbar Aṣebḥan n L’Injil, minzi Icaɛya iqqar: “A Sidi inu, wi ɣa yamnen di tebrat nneɣ?”
ROM 10:17 Aqa l’iman zeg usḥessi uca asḥessi zeg Wawař n AREBBI.
ROM 10:18 Maca ad iniɣ: “Ma zeɛma nitni war sřin?”, “Xzar, řḥess nsen iffeɣ-dd ɣar marra tammurt, uca awařen nsen ɣar tneggura n ddunect.”
ROM 10:19 Maca ad iniɣ: “Ma Israil war tefhim ca man aya?” Ɣar umezwar Musa inna: “Ad daywem ggeɣ tusmi zeg ijj n řgens i war iǧin ca d řgens, uca s yijj n řgens i war ittᵉṭṭiɛen ad daywem ggeɣ axeyyeq.”
ROM 10:20 Uca Icaɛya izɛem ad yini: “Aqa baneɣ-dd i yinni war xafi yarezzun, aqa ufin ayi inni war xafi isseqsan.”
ROM 10:21 Maca zi jjihet n Israil iqqar: “Ass ikmeř sswiẓẓḍeɣ ifassen inu i ijj n řgens ittɛekksen, iɛeṣṣan.”
ROM 11:1 Maca necc ad iniɣ: Ma yugi AREBBI xenni řgens nnes? Ɛemmarṣ! Aqa necc simant inu ɛawed d ijj n weryaz zi Israil, zi zzariɛet n Ibrahim, zi teqbič n Binyamin.
ROM 11:2 AREBBI war ineṭṭar ca řgens nnes i tuɣa issen zeg umezwaru. Niɣ war tessinem ca min iqqar Wedlis [Iqeddsen] x Iliya, am mammec tuɣa iksi tanfuč x Israil ɣar AREBBI, inna:
ROM 11:3 “A Sidi, nɣin inabiyyen nnec, areddǧen iɛalṭaren nnec. Qqimeɣ necc waha, uca nitni arezzun řeɛmar inu.”
ROM 11:4 Ittwanna as s ijj n řewḥiy: “Aqa jjiɣ i yixef inu sebɛa-ařaf n yeryazen, inni war ḍrin ca ɣar iḍaren zzat i Baɛal, war ɛebden i Baɛal.”
ROM 11:5 Ammu di řweqt n yiḍa ɛawed, aqa iqqim yijj n řbaqi am t ixḍar Netta x řeḥsab n arḍa.
ROM 11:6 Mařa teǧa s arḍa, aqa war tᵉttiři ɛad s řexdayem, niɣ xenni arḍa war iǧi ɛad d arḍa. Maca mařa s řexdayem, war teǧi ɛad d arḍa. Mařa lla, aqa řxedmet war teǧi ɛad d řxedmet.
ROM 11:7 Min ɣa nini xenni? Min tuɣa tarezzu Israil war t tᵉṭṭif, maca inni ittwafarzen ṭṭfen t uca inneɣni dewřen d idarɣařen deg wuřawen nsen,
ROM 11:8 am mammec tura: “Aqa AREBBI iwca asen arruḥ iḍbaren d tiṭṭawin i war ittwiřin, d imezzuɣen i war ittesřin, ař ass n yiḍa.”
ROM 11:9 Dawud inna ɛawed: “Ad tedweř tazewḍa n tiɣarṣin nsen d řfex i nitni, uca ad tedweř řmunet nsen d tɛenkrift.
ROM 11:10 Ejj ad darɣřent tiṭṭawin nsen ḥima war ttwiřin nitni, uca ejj ad qewsen iɛurar nsen i řebda.”
ROM 11:11 Maca necc ad iniɣ [xenni]: Ma nderfen, maɣar ittxeṣṣa ad wḍan? Ɛemmarṣ! Maca s uweṭṭu nsen tiweḍ-dd Tudart i řegnus, ḥima ad dewřen ttasmen.
ROM 11:12 Mařa idweř unedref nsen d agřa d ameqqran i ddunect uca řḥukm xasen d agřa i řegnus, mecḥař qaɛ i ɣa yiweḍ uɛemmar nsen d afeyyeḍ.
ROM 11:13 Aqa ssawařeɣ akidwem, [a] řegnus, necc d wenni d rrasul i řegnus, aqa ttssemɣareɣ di řxedmet n tsexxart inu:
ROM 11:14 Ad taɣ ad zemmareɣ ad ssekkareɣ tusmi deg ayt n řgens inu uca ad ssnejmeɣ ca zzaysen.
ROM 11:15 Iwa, mařa amenḍar nsen aqa-t d aṣřaḥ i ddunect, mammec ɣa yiři wedwař nsen mɣir d Tudart zi taddart n imettinen!
ROM 11:16 Mařa tuɣa tamezwarut [n ṣṣabet] tqeddes, amenni uřa d řɛejnet [n arecti] tqeddes! Mařa tuɣa aẓwar iqeddes, amenni uřa d řefruɛ.
ROM 11:17 Uca mařa ttwaqessen ca n řefruɛ u [xenni] cek, am yijj n uzemmur n řexřa, tᵉttwařeqqmed deg wemcan nsen, tdewřed tnefɛed zeg iẓewran d zzect n tzitunt,
ROM 11:18 war tuff ca x řefruɛ. Mařa tuffed, [ssen], aqa cek war teksid ca aẓwar, maca aẓwar iksi cek.
ROM 11:19 Ad taɣ ad tinid: “Aqa ttwaqessen řefruɛ, ḥima necc ad ttwařeqqmeɣ.”
ROM 11:20 Iwa, nitni ttwaqessen zi ssibbet n břa l’iman nsen, uca cek s l’iman [tᵉttwařeqqmed uca] teksid [amcan nsen]. War tuff ca, maca ggʷed.
ROM 11:21 Minzi mařa tuɣa AREBBI war ittceṭṭar ca x řefruɛ n ṭṭbiɛet, war xak ittceṭṭar ca ɛawed.
ROM 11:22 Aqa da d řeḍrafet n AREBBI d řewɛaret nnes: řewɛaret x yinni iwḍan, maca řeḍrafet xak mařa tᵉṭṭfed di řeḍrafet nnes, niɣ uřa d cek ad tᵉttwaqessed.
ROM 11:23 Uřa d nitni ad ttwařeqqmen, mařa war qqimen di tikkest n l’iman nsen, minzi ɣar AREBBI tizemmar, ḥima ad ten iřeqqem ɛawed.
ROM 11:24 Minzi mařa cek, wenni iǧan s ṭṭbiɛet d ijj n uzemmur n řexřa, tᵉttwaqessed uca tᵉttwařeqqmed di tzitunt taṣebḥant, mecḥař ihewnen ktar ad ttwařeqqmen nitni di tzitunt nni dd-ittasen ak-d ṭṭbiɛet nsen!
ROM 11:25 Minzi ttexseɣ ad tessnem ssirr-a, [a] aytma, ḥima war ttiřim d imiɣisen ak-d yixef nwem, aqa temsar ict n usdaɣeř n wuř x Israil i drus n řweqt ař dd ɣa yadef uɛemmar n řegnus,
ROM 11:26 uca xenni marra Israil ad tedweř ɣar Tudart am mammec tura: “Amsenjem ad dd-iffeɣ zi Ṣihyun uca ad issbeɛɛed řmuɛṣiyyet x Yaɛqub.”
ROM 11:27 ”Xenni ad ṭṭfen di Řɛahd i dd-yusin Zzayi, x minni i ɣa ɣfareɣ i ddnub nsen.”
ROM 11:28 Zi jjihet n L’Injil nitni aqa d řɛedyan di ṭṭweɛ nwem, maca zi jjihet n řixḍaret [i zi ttwaxḍaren nitni], aqa nitni d imɛizzen x ssibbet n řejdud.
ROM 11:29 Minzi AREBBI war ittbeddař tawhibt nnes [n arḍa] uřa d třaɣit nnes.
ROM 11:30 Minzi am mammec tuɣa kenniw zic war tᵉṭṭiɛem ca AREBBI, maca řexxu aqa teksim arreḥmet s řmuɛṣiyyet nsen,
ROM 11:31 ammu nitni ɛawed war ṭṭiɛen ca řexxu i arreḥmet tenni xawem [dd-yusin], ḥima ad xasen dd-tas arreḥmet.
ROM 11:32 Minzi AREBBI iḥebbes i-ten marra sadu řmuɛṣiyyet, ḥima ad ten yarḥem marra.
ROM 11:33 A, raǧaɣ n wagřa d tiɣit d tussna n AREBBI, mammec ɣa yegg bnadem ad iqeǧeb řeḥkamat nnes, mammec ɣa yegg ad yaf ibriden nnes.
ROM 11:34 “Minzi wi ɣa issnen nneyyet n SIDI?” niɣ: “Wi d as iǧan d amcawar?”
ROM 11:35 niɣ: “Wi d as izzaren iwca as ca, umi d as ittxeṣṣa ad ittwaxeǧeṣ zzayes?”
ROM 11:36 Minzi marra zzayes i iǧa, u marra dayes, u marra aqa-t s ufus nnes. I Netta i ɣa yiři [marra] asemɣar d [marra] lbaraka i řebda qaɛ. Amin!
ROM 12:1 X uyenni ttřaɣiɣ kenniw, [a] aytma, s arreḥmet tameqqrant n AREBBI, ad tqeddmem arrimat nwem d taɣarṣt iddaren, iqeddsen, yarḍan i AREBBI, wa d aɛbad nwem icuwwaren.
ROM 12:2 War temquddam ak-d ddunect-a, maca beddřem s uřeqqem n řeɛqeř nwem zi jdid, ḥima ad tqeǧbem min ixs AREBBI: min icnan d min yarḍan d min ikemmřen.
ROM 12:3 Aqa s arḍa tenni d ayi immewcen, qqareɣ awem marra: war ttxarriṣem sennej i min ittřiq uxarraṣ nnes, maca xarrṣem nican ɛlaḥsab řqedd n l’iman i iwca AREBBI i kuř ijjen [zzaywem].
ROM 12:4 Am mammec ɣarneɣ aṭṭas n iɣezdisen deg ict n arrimet uca marra iɣezdisen [n arrimet] war ɣarsen bu řxedmet d icten,
ROM 12:5 ammu neccin, waxxa d aṭṭas, aqa aneɣ d ict n Arrimet di Lmasiḥ d iɣezdisen ijjen i wenneɣni.
ROM 12:6 Maca ɣarneɣ tiwhibin immsebḍan ɛlaḥsab arḍa i d aneɣ immewcen: [ijjen ɣares tawhibt] maḥend ad inebb ɛlaḥsab řqedd n l’iman,
ROM 12:7 wenneɣni ɣares nneyyet n tsexxart maḥend ad isexxar, niɣ [tawhibt] n umseɣɣar maḥend ad issɣar,
ROM 12:8 [niɣ tawhibt n] usfewwej maḥend ad issfewwej, [niɣ tawhibt] maḥend ad iwc s tecrimet, [niɣ tawhibt n] uḍebbar s wemḥaḍ, [niɣ tawhibt n] arreḥmet s řefraḥet.
ROM 12:9 Ad tiři tayri nwem břa nnifaq. Carhem řɣar, tcebbarem di min icnan.
ROM 12:10 Iřim mliḥ ijjen ak-d tawmat nwem, xsem ijj i wenneɣni, izzarem ad tcennɛem ijjen wenneɣni.
ROM 12:11 Iřim d imḥaḍen, war ttiřim d ifinyanen. Iřim d timessi di arruḥ, ɛebdem Siditwem,
ROM 12:12 Farḥem di min iǧan asitem nwem, di řmeḥnet nwem ṣbarem uca ṭṭfem řebda di tẓaǧit.
ROM 12:13 Wcem afus di min iḥdajen imqeddasen. Ggem s řeḍrafet ak-d ibarraniyyen.
ROM 12:14 Barkem inni kenniw imarrten, barkem war neɛɛřem ca.
ROM 12:15 Farḥem ak-d inni ifarḥen, rum ak-d yinni ittrun.
ROM 12:16 Ḥesbem aytmatwem am mammec tḥessbem ixef nwem, War ttiřim d imɛeffaren, maca ruḥem ak-d imwaḍɛen. War ttiřim ca d imiɣisen ak-d yixef nwem.
ROM 12:17 War ttarrim ca ḥed x řɣar s řɣar, maca ggem min icnan i marra iwdan.
ROM 12:18 Mařa tzemmarem, mecḥař ma i dd-ittasen zzaywem, ṣeřḥem ak-d marra iwdan.
ROM 12:19 War ttentiqimem ca i yixef nwem, [a] imɛizzen, maca wcem amcan i weɣḍab, minzi tura: “Mařa kenniw war tarrim tasɣart s yixef nwem, Necc ad arreɣ tasɣart newem, iqqar AREBBI.”
ROM 12:20 Mařa iǧuẓ řeɛdu nwem, seccem t, mařa ifud, wcem as ad isu, minzi mařa teggid aya, ad tyarwed řefḥem itteḥduduqen x uzeǧif nnes.
ROM 12:21 War ttejjim ca řɣar ad kenniw iɣřeb, maca ɣeřbem x řɣar s řxar.
ROM 13:1 Ejj kuř ijj ad iwaḍeɛ i ṣṣulaṭat inni iǧan s lɛaḍama, minzi war din ṣṣulṭa mɣir s AREBBI, uca ṣṣulaṭat tinni iǧan, aqa issbedd i-tent AREBBI.
ROM 13:2 S uya wenni i ɣa immɛařan ak-d ṣṣulṭa, ittemɛařa ak-d min issbedd AREBBI, d yinni ittemɛařan ad ksin řḥukm nsen.
ROM 13:3 Minzi řquḍat war ǧin i tiggʷudi n yinni itteggen řxar, maca n yinni itteggen řɣar. Ma texsed ad tiřid břa tiggʷudi zi ṣṣulṭa [n řquḍat]? Egg min icnan, ad ac yiři ccan zzayes,
ROM 13:4 minzi [ṣṣulṭa] d tamsexxart n AREBBI i řefḍeř nnec. Maca mařa teggid řɣar, ggʷed, minzi [ṣṣulṭa] war tbekkes ca ssif baṭeř umi nettat d tamsexxart n AREBBI, aqa tneqqem s weɣḍab iqesḥen x yinni itteggen řɣar.
ROM 13:5 S uya ittxeṣṣa aneɣ ad neṭṭaɛ, war iǧi x ssibbet n weɣḍab waha, maca ɛawed x ssibbet n tnefsect.
ROM 13:6 X ssibbet-a tᵉttxeǧṣem ḍḍariba i kuř azeǧif umi nitni d imsexxaren n AREBBI i ittwaggen i man aya simant nnes.
ROM 13:7 X uya, wcem i marra min d asen ittxeṣṣan: ḍḍariba i wenni umi dd-tusa ḍḍariba i kuř azeǧif, řexřaṣ i wenni umi dd-yusa řexřaṣ, aweqqar i wenni umi dd-yusa uweqqar, ccan i wenni isdaheǧen ccan.
ROM 13:8 War tteggem amarwas ɣar ḥed mɣir wenni n tayri ak-d wayawya, minzi wenni ittexsen wenni d as yudsen, aqa ikemmeř Ccariɛa.
ROM 13:9 Minzi [Ccariɛa] teqqar ɛawed: “War zenni, war neqq, war tticar, war ttasem!”, uca mařa din ca n tewṣeyyet nneɣni, aqa atent munent deg wawař-a: “Ad texsed jjar nnec am ixef nnec!”
ROM 13:10 Tayri war ttḍarri ca jjar. S uyenni tayri nettat d řekmař n Ccariɛa.
ROM 13:11 Aqa ssneɣ aqa ta d řweqt d tsaɛɛet ḥima ad nfaq zeg iḍeṣ, minzi řexxu Tudart nneɣ tudes-dd ktar zeg wami nedweř numen.
ROM 13:12 Řexxu teɛdu ǧiřet, yiweḍ-dd uziř. Ejj aneɣ ad nessars řexdayem n taǧest, ad neksi řesnaḥ n tfawt.
ROM 13:13 Ejj aneɣ ad nuyur s ucuwwar axmi d aziř, war iǧi di zzhu abarcan, řa deg uɣelli, řa di texmuji n farq-ccɣeř di qama uřa deg umenɣi d řeḥsed,
ROM 13:14 maca arḍem Siditneɣ Yasuɛ Lmasiḥ, war tticem taynit i nnecwat n weysum nwem.
ROM 14:1 Wi iḍeɛfen di l’iman, wcem as afus, war ttemsebḍam deg ixarriṣen nwem jar awem.
ROM 14:2 Aqa din ḥed yumen izemmar ad icc kuřci, maca wenni iḍeɛfen ad icc tibbi waha.
ROM 14:3 Wenni ittetten, war isseḥqari wenni war ittetten, d wenni war ittetten, war iḥekkem x wenni ittetten, minzi AREBBI iqbeř i-t.
ROM 14:4 Min teɛnid cek wenni iḥekkmen x umsexxar n wenneɣni? Minzi mařa ibedd, d man aya i bab nnes, u mařa iwḍa, d man aya i bab nnes. Sides izemmar ad t issbedd d abeddi.
ROM 14:5 Aqa din ḥed ittɣiř as aqa din ass sennej i wass nneɣni, u wenneɣni ittɣiř as aqa kuř ass kifkif. Ejj kuř ijjen ad iqneɛ di řbař nnes nican.
ROM 14:6 Wenni iweqqaren ijj n wass, i Sides i t ɣa iweqqar. Wenni war iweqqaren ass, i Sides i war t iweqqar. Wenni ittetten, ittett i Sides, minzi ad icekkar AREBBI. Wenni war ittetten ca, i Sides war ittett ca uca netta ad icekkar AREBBI [ɛawed].
ROM 14:7 Minzi uřa d ijj zzayneɣ aqa iddar i yixef nnes, uca uřa d ijjen immut i yixef nnes.
ROM 14:8 Minzi mařa neddar, ad neddar i Siditneɣ, niɣ mařa nemmut ad nemmet i Siditneɣ. S uya, ma neddar niɣ nemmut, aqa neccin i Siditneɣ.
ROM 14:9 Minzi i uya i immut Lmasiḥ, uca idweř iddar [ɛawed] uca ikkar-dd, ḥima ad yiři d SIDI i yinni immuten uřa i yinni iddaren.
ROM 14:10 Maca cek, mayemmi ɣa tḥekmed x umac? Niɣ mayemmi ɛawed cek tesseḥqarad umac? Minzi neccin marra ad nbedd qibač i řkursi n ccreɛ n Lmasiḥ.
ROM 14:11 Am mammec tura: “S tidett, am ddareɣ Necc, iqqar SIDI, ad ayi aḍaren marra ifadden u kuř iřes ad xafi iched.”
ROM 14:12 Xenni ejj kuř ijjen zzayneɣ ad igg řeḥsab x yixef nnes qibač i AREBBI.
ROM 14:13 Zi řexxu d tsawent war ḥekkmem ijjen x wenneɣni, maca ḥsen ad teksed awař maḥend war tessarsed ca ijj n weẓru maḥend ad dayes inqarḍ umac.
ROM 14:14 Minzi necc ssneɣ, aqa ttwassqenɛeɣ di SIDI Yasuɛ, belli uřa d ict n řḥajjet texmej i Netta, mɣir i wenni tt iḥesben d řexmej, aqa i netta waha umi texmej.
ROM 14:15 Mařa ixeyyeq umac x ssibbet n macca i teccid, aqa cek war tuyured di tayri. War tteḥḥi ca s macca nnec wenni i xef immut Lmasiḥ.
ROM 14:16 Min nḥesseb d řxar i neccin, war ttejji ḥed ad xas issiweř s řɣar.
ROM 14:17 Minzi Tageldit n AREBBI war teǧi di macca d tissit, maca di tsegda d řehna d řefraḥet s Arruḥ Iqeddsen.
ROM 14:18 Minzi wenni isexxaren i Lmasiḥ di man aya, aqa yarḍa AREBBI uca netta d ameqbuř ɣar iwdan.
ROM 14:19 Ad neḍfar xenni min iǧan i řehna d řebni n ijjen i wenneɣni.
ROM 14:20 War ttareddeǧ ca řxedmet n AREBBI x ssibbet n macca. Marra timesřayin aqa atent d timezdag, maca uct x bnadem wenni i ɣa igg aẓru i unedref s macca nnes.
ROM 14:21 Mliḥ umi war nᵉttett ca aysum u war nsess ca binu niɣ war nᵉttegg uřa d ict n řḥajjet i di i ɣa inderf umac.
ROM 14:22 Ma tᵉttwassqenɛed i yixef nnec? Ad ac yiři man aya i yixef nnec zzat i AREBBI. Sseɛd n wenni war ittikkwiḍ ccreɛ x yixef nnes di min d as ittɣiř mliḥ.
ROM 14:23 Maca wenni ittcekkan xmi ittett, ittwaḥaseb, minzi man aya war iǧi zi l’iman. Qaɛ min war iǧin zi l’iman, aqa-t d ddenb.
ROM 15:1 Maca neccin inni ijehden, ittxeṣṣa aneɣ ad narbu tuḍɛeft n yinni iḍeɛfen, war nettiwi ca arḍa i yixef nneɣ.
ROM 15:2 Kuř ijjen ad issarḍa jjar nnes i tcuni d řebni.
ROM 15:3 Minzi Lmasiḥ ɛawed war issarḍi ca Ixef nnes, maca am mammec tura: “Tikkwura n yinni i Cek ikkwaren, wḍant-i-dd xafi.”
ROM 15:4 Minzi marra min tura zic, tura i useřmed nneɣ, ḥima s ṣṣbar d ucejjeɛ s min iǧan di Tira [Iqeddsen] ad ɣarneɣ yiři usitem.
ROM 15:5 AREBBI n ṣṣbar d ufewwej ad awem iwc maḥend ad tḥesbem ijj wenneɣni ɣares řqimet d ict di Yasuɛ Lmasiḥ,
ROM 15:6 ḥima s ijj n array d ict n tmijja ad tessɛuǧam AREBBI, Babas n Siditneɣ Yasuɛ Lmasiḥ.
ROM 15:7 S uyenni qebřem ijjen wenneɣni u ṣebrem ijjen ak-d wenneɣni, am mammec d aneɣ iqbeř Lmasiḥ ɛawed i uɛuǧi n AREBBI.
ROM 15:8 Maɣar ad awem iniɣ, aqa Yasuɛ Lmasiḥ idweř d amsexxar n wextan di ṭṭweɛ n tidett n AREBBI, ḥima ad iḍmen lwuɛud [i iwaɛd AREBBI] i řejdud,
ROM 15:9 u ḥima řegnus ad ssemɣaren di AREBBI x ssibbet n arreḥmet i xasen dd-tusa am mammec tura: “S uyenni ad Cek cekkareɣ jar řegnus, uca ad ṣebbḥeɣ Isem nnec.”
ROM 15:10 Uca iqqar ɛawed: “Farḥem, a kenniw řegnus, jmiɛ ak-d řgens nnes.”
ROM 15:11 Uca inna ɛawed: “Ḥemdem SIDI, a marra řegnus, ṣebbḥem t, a marra ccuɛub!”
ROM 15:12 Ɛawed Icaɛya iqqar: “Ad yiři weẓwar n Yassa, u Wenni dd-ikkaren ad yiři d Azeǧif x řegnus, ad dayes yiři usitem n řegnus.”
ROM 15:13 AREBBI n usitem ad kenniw iccur s řefraḥet d řehna di l’iman, ḥima ad tfeyyḍem s usitem nnes zi jjehd n Arruḥ Iqeddsen.
ROM 15:14 Necc simant inu ttwasqenɛeɣ zi jjihet nwem, [a] aytma, aqa kenniw tɛemmarem s tcuni, teccurem s marra tussna, ḥima ad tessřemdem ɛawed inneɣni.
ROM 15:15 Maca zeg uɣezdis aqa uriɣ awem s teryast, [a] aytma, maḥend ad kenniw ssɛeqřeɣ, s arḍa i d ayi immewcen zi AREBBI,
ROM 15:16 ḥima ad iřiɣ d amsexxar n Yasuɛ Lmasiḥ i řegnus, umi ttsexxareɣ i L’Injil n AREBBI, ḥima ad tiři tɣarṣt n řegnus d tameqbuč, tᵉttwaqeddes s Arruḥ Iqeddsen.
ROM 15:17 S uyenni ssemɣareɣ di Yasuɛ Lmasiḥ zzat i AREBBI.
ROM 15:18 Minzi war zeɛmeɣ ad ssiwřeɣ deg imezzuɣen n řegnus x ca war zzayi t iggi Lmasiḥ s wawař d řxedmet.
ROM 15:19 S jjehd n řeɛřamat d řeɛjayeb uca s jjehd n Arruḥ n AREBBI, aqa tuɣa ggureɣ ttenḍeɣ zi Urcalim ař Illirikun uca kemmřeɣ [abarreḥ n] Řexbar Aṣebḥan n Lmasiḥ.
ROM 15:20 Di [marra] man aya tuɣa arezzuɣ ad barrḥeɣ s Řexbar Aṣebḥan, war iǧi mani ittwařaɣa x Yisem n Lmasiḥ [qbeř], ḥima war benniɣ x dsas n wenneɣni,
ROM 15:21 maca am mammec tura: “Inni war zzayes ittwabarrḥen ad t ẓaren, u yinni war xas isřin, ad amnen.”
ROM 15:22 S uyenni tuɣa war iwiḍeɣ aṭṭas n imuren, maḥend ad ɣarwem dd-aseɣ.
ROM 15:23 Maca řexxu war ɣari bu ttasiɛ ḥima ad beccareɣ ɛad di jjwayeh-a u tuɣa ɛawed xseɣ ad ɣarwem dd-aseɣ aṭṭas n iseggʷusa zeg wami.
ROM 15:24 Xmi ɣa raḥeɣ ɣar Seppanya, ssitimeɣ ad ɣarwem dd-aseɣ, ad kenniw ẓareɣ, u ad zzaywem ttwassqebbḍeɣ ɣar dinni, awarni řami i ɣa arreɣ meẓri cwayt umi i ɣa ẓriɣ kenniw.
ROM 15:25 Maca řexxu aqa ruḥeɣ ɣar Urcalim, ḥima ad sexxareɣ i imqeddasen.
ROM 15:26 Minzi tuɣa yarḍa i yinni iǧan di Makiduniya d Axaya ad ggen ca n twiza i imqeddasen imezřaḍ nni iǧan di Urcalim.
ROM 15:27 Tuɣa arḍan x man aya, maca tuɣa t ɛawed daysen d amarwas. Minzi mařa tuɣa [řegnus] carcen di min ɣarsen d agřa x řeḥsab n Arruḥ, aqa-t ɛawed d amarwas di řegnus maḥend ad ten sexxaren s min ɣarsen d agřa x řeḥsab ddat.
ROM 15:28 Xmi ɣa kemmřeɣ [tasexxart-a] uca ad asen ssiwḍeɣ řɣiǧet [n twiza-ya] s řaman, ad dd xawem kkeɣ d abrid xmi ɣa raḥeɣ ɣar Seppanya.
ROM 15:29 Maca ssneɣ belli, mařa usiɣ-dd ɣarwem, ad dd-aseɣ s řmud iccuren s lbaraka n L’Injil n Lmasiḥ.
ROM 15:30 Ttareɣ zzaywem, [a] aytma, s Siditneɣ Yasuɛ Lmasiḥ uca s tayri n Arruḥ, ad tbeddem nican akidi di tẓaǧit ɣar AREBBI x ssibbet inu,
ROM 15:31 ḥima ad ttwafekkeɣ zeg inni war yuminen ca di Yahudiyya, ḥima ad tiři tsexxart inu i imqeddasen di Urcalim d tameqbuč,
ROM 15:32 ḥima ad ɣarwem dd-aseɣ [ccureɣ] s řefraḥet s array n AREBBI uca ad ɣarwem areyyḥeɣ.
ROM 15:33 AREBBI n řehna ad kiwem yiři marra idwem. Amin.
ROM 16:1 Wekkřeɣ awem učmatneɣ Fubi, tenni d tamsexxart n tmesmunt di Kinxriyus,
ROM 16:2 ḥima ad zzayes tareḥḥbem di Siditneɣ, am mammec ittřiq i imqeddasen, uca ad tt tɛawnem di marra min zzaywem tᵉttar nettat, minzi aqa tɛawen aṭṭas, uřa řa d necc.
ROM 16:3 Seǧmem s řehna x Priskilla d Akwila, inni d imsexxaren akidi di Yasuɛ Lmasiḥ,
ROM 16:4 Nitni sebbřen tudart nsen x ssibbet inu. War ǧiɣ d necc waha wenni ten ittqadan, maca ɛawed marra timesmunin n řegnus.
ROM 16:5 Seǧmem ɛawed s řehna x tmesmunt tenni di taddart nsen. Seǧmem x Ibanitus, amɛizz inu, s řehna. Netta d [ṣṣabet] tamezwarut n Axaya di Lmasiḥ.
ROM 16:6 Seǧmem x Mariya s řehna. Netta tuɣa tᵉttamar aṭṭas xawem.
ROM 16:7 Seǧmem s řehna x Andrunikus d Yuniyas inni d raǧ inu d imeḥbas akidi, aqa aten d iryazen ittwassnen ɣar rrusul, tuɣa aten di Lmasiḥ qbeř xafi.
ROM 16:8 Seǧmem s řehna x Ampliyas, amɛizz inu di Siditneɣ.
ROM 16:9 Seǧmem s řehna x Urbanus, wenni d amsexxar akidneɣ di Lmasiḥ, u x Astaxis amɛizz inu.
ROM 16:10 Seǧmem s řehna x Apillis wenni ittwafarzen di Siditneɣ. Seǧmem s řehna x aytbab n taddart n Aristubulus.
ROM 16:11 Seǧmem s řehna x Hirudiyun wenni d řaǧ inu. Seǧmem s řehna x aytbab n taddart n Narkissus inni iǧan di Siditneɣ.
ROM 16:12 Seǧmem s řehna x Tarifina d Tarifusa, tinni ittamaren di Siditneɣ. Seǧmem s řehna x Parsis, amɛizz inu, wenni ittamaren aṭṭas di Siditneɣ.
ROM 16:13 Seǧmem s řehna x Rufus wenni ittwafarzen di Siditneɣ, uřa x yemmas tenni [ɛawed am yict n yemma] i necc.
ROM 16:14 Seǧmem s řehna x Asinkritus, Fligun, Hirmas, Batrubas, Hirmis uca x wawmaten inni akidsen.
ROM 16:15 Seǧmem s řehna x Filuluɣus d Juliya d Niriyus d učmas, d Ulimbas d marra imqeddasen inni akidsen.
ROM 16:16 Seǧmem x wayawya s usudem iqeddsen. Marra timesmunin n Lmasiḥ marra ttseǧament xawem.
ROM 16:17 Maca ttzawageɣ [kenniw, a] aytma, maḥend ad teḥḍam zi wi itteggen amsebḍi d tɛinkrifin, barra i tɣuri i teɣrim. Beɛɛdem xasen.
ROM 16:18 Minzi am yina war sexxaren ca i Siditneɣ Yasuɛ Lmasiḥ, maca i uɛeddis nsen. S řehrud iṣebḥen d wawařen izewwqen xeddɛen uřawen n iḥafiyyen.
ROM 16:19 Minzi ṭṭaɛet nwem tᵉttwassen ɣar marra [iwdan]. S uyenni farḥeɣ zzaywem, maca xseɣ ad tiřim d imiɣisen di tcuni uřa d imezdagen zi řɣar.
ROM 16:20 AREBBI n řehna ad iteḥḥa cciṭan sadu iḍaren nwem deɣya. Arḍa n Siditneɣ Yasuɛ Lmasiḥ ad kiwem yiři. Amin.
ROM 16:21 Timutiyu, wenni d amsexxar akidi, ittseǧam-dd xawem s řehna, uřa d inni zi řaǧ inu: Lukiyus d Yasun d Susipatrus.
ROM 16:22 Necc, Tartiyus, wenni yuran tabrat-a, ttseǧameɣ xawem di Siditneɣ s řehna.
ROM 16:23 Ittseǧam-dd xawem Xayus s řehna. Netta yareḥḥeb zzayi uřa zi tmesmunt marra. Ttseǧamen-dd xawem Irastus, wenni x ssenduq n tendint, d Kwartus, tawmat.
ROM 16:24 I Wenni ɣar teǧa ṣṣulṭa maḥend ad kenniw iḍmen ɛlaḥsab L’Injil inu - [L’Injil] i ittwabarrḥen zi jjihet n Yasuɛ Lmasiḥ ɛlaḥsab asargab n ssirr nni tuɣa innufaren di zzmanat [n zic],
ROM 16:25 maca aqa ittwasseḍhar-dd řexxu s Tira [Iqeddsen] [s ufus] n inabiyyen, uca ittwasscen i marra řegnus ɛlaḥsab řumur n AREBBI, wenni iǧan i řebda, ařami [d as] ɣa ṭṭaɛen [řegnus] s l’iman -
ROM 16:26 aqa i Netta wenni d Bab n tiɣit weḥḥdes, i Netta umi ɣa yiři uɛuǧi s Yasuɛ Lmasiḥ i řebda qaɛ. Amin.
ROM 16:27 Arḍa n Siditneɣ Yasuɛ Lmasiḥ ad kiwem yiři marra. Amin.
1CO 1:1 Bulus, [rrasul] ittwařaɣan d ittwasekken n Yasuɛ Lmasiḥ ɛlaḥsab min ixs AREBBI, d tawmat Sustinis,
1CO 1:2 i tmesmunt n AREBBI i iǧan di Kurintus, inni ittwařaɣan d inni d imqeddasen, inni ittwaqeddsen di Yasuɛ Lmasiḥ, u i marra inni mani ma ittřaɣan x Yisem n Siditneɣ Yasuɛ Lmasiḥ, wenni d Siditsen d Siditneɣ.
1CO 1:3 Ad xawem yiři arḍa d řehna zi AREBBI, Babatneɣ, u zi Siditneɣ Yasuɛ Lmasiḥ.
1CO 1:4 Necc řebda ttqadiɣ AREBBI inu di ṭṭweɛ nwem x arḍa n AREBBI i d awem immewcen di Yasuɛ Lmasiḥ.
1CO 1:5 Minzi di marra tdewřem zzayes d ttujjar, di marra awař u di marra tussna,
1CO 1:6 maɣar cchadet n Lmasiḥ tᵉttwaḍmen daywem,
1CO 1:7 minzi uřa d ijj n zzɛaf n tewhibin nnes war daywem iqqim, [am] tᵉttrajam asargab n Siditneɣ Yasuɛ Lmasiḥ,
1CO 1:8 Minzi Netta ad kenniw iḍmen ɛawed ɣar uneggar, ḥima ad tiřim břa řɛib deg wass n Siditneɣ Yasuɛ Lmasiḥ.
1CO 1:9 AREBBI d amtiqqi, d wenni zi tᵉttwařaɣam kenniw ɣar tmunt ak-d Mmis Yasuɛ Lmasiḥ, Siditneɣ.
1CO 1:10 Maca ttzawageɣ kenniw, [a] aytma, s Yisem n Siditneɣ Yasuɛ Lmasiḥ, ad tessiwřem marra s ijj n wawař, war tᵉttemsebḍim jar awem, maca iřim tmunem nican s nneyyet d icten d uxarreṣ d ijjen.
1CO 1:11 Minzi ssargben ayi inni zi taddart n Kluwi, [a] aytma inu, belli jar awem imenɣan.
1CO 1:12 Xseɣ ad iniɣ, aqa ca zzaywem qqaren: ‘Necc aqa ayi zi Bulus!’ u ca nneɣni: ‘Necc zi Apullus!’, u ca nneɣni [ɛawed]: ‘Necc zi Kifa!’, u ca nneɣni qqaren: ‘Necc zi Lmasiḥ!’
1CO 1:13 Ma aqa Lmasiḥ ittwabḍa [d iwetwiten]? Ma tuɣa Bulus ittwaṣelleb di ssibbet nwem? Niɣ tuɣa kenniw tᵉttwassɣeḍṣem s yisem n Bulus?
1CO 1:14 Necc ttqadiɣ AREBBI inu war ssɣeḍṣeɣ uřa d ijj zzaywem mɣir Krispus d Xayus waha,
1CO 1:15 ařami uřa d ijjen ad yini belli ssɣeḍṣeɣ deg yisem inu.
1CO 1:16 Ɛawed ssɣeḍṣeɣ tawacunt n Stifanus, xenni war ssineɣ ca, ma ssɣeḍṣeɣ ḥed nneɣni.
1CO 1:17 Maɣar Lmasiḥ war d ayi dd-issekk ḥima ad ssɣeḍṣeɣ, maca ḥima ad barrḥeɣ s Řexbar Aṣebḥan, war iǧi s tiɣit n wawařen, ḥima war ittᵉttwassbeṭṭeř ṣṣalib n Lmasiḥ.
1CO 1:18 Minzi awař n ṣṣalib d tubbuheřya di tiṭṭawin n yinni i ɣa iweddaren, maca i neccin, inni iddaren, man aya d jjehd n AREBBI.
1CO 1:19 Minzi tura: “Ad areddǧeɣ tiɣit n imiɣisen uca ad kkseɣ řefhamet n ifehhamen.”
1CO 1:20 Mani iǧa umiɣis? Mani iǧa umseřmad n idlisen? Mani iǧa bu-umḥarweḍ n ddunect-a? Ma war isscen AREBBI belli tiɣit n ddunect-a d tubbuheřya?
1CO 1:21 Minzi di tiɣit n AREBBI, ddunect war tessin ca AREBBI zi ssibbet n tiɣit [n yixef nnes], aqa tuɣa yarḍa AREBBI ad iwc Tudart i yinni yumnen s tubbuheřya n tbarreḥt.
1CO 1:22 Minzi Udayen ttaren řeɛřamat u Iramiyyen arezzun tiɣit,
1CO 1:23 maca neccin nettbarreḥ Lmasiḥ, d wenni ittwaṣellben, aqa-t d taɛenkrift i Wudayen, d tubbuheřya i Iramiyyen,
1CO 1:24 maca i yinni ittwařaɣan, am Wudayen am Iramiyyen, aqa Lmasiḥ d jjehd n AREBBI d tiɣit n AREBBI.
1CO 1:25 Minzi tubbuheřya n AREBBI d tmiɣist x iwdan, u tuḍɛeft n AREBBI tejhed x iwdan.
1CO 1:26 Xenni, [a] aytma, xzarem [mammec teǧam] ɣar [wass n] třaɣit nwem, aqa war teǧim d aṭṭas n imiɣisen ɛlaḥsab bnadem, niɣ d aṭṭas n yinni ɣar teǧa ṣṣulṭa, niɣ d aṭṭas n tarwa n taṣiřet.
1CO 1:27 Maɣar AREBBI aqa ifarz ibuhařiyyen n ddunect, ḥima ad zzaysen isseḥcem imiɣisen, uca imuḍɛifen n ddunect ifarz i-ten AREBBI, ḥima ad zzaysen isseḥcem ayt n bu-ṣṣulṭa.
1CO 1:28 uca yinni dd-ixeřqen am war ɣarsen ca di ddunect, d yinni ittwasseḥqaren, d yinni war iǧin d ca, aqa ifarz i-ten AREBBI, ḥima ad ibḍeř inni iǧan d ca,
1CO 1:29 ḥima uřa d ijj n [bnadem n] weysum, war ittfeyyec ca zzates.
1CO 1:30 Maca kenniw teǧam zzayes di Yasuɛ Lmasiḥ, wenni d aneɣ idewřen d tiɣit n AREBBI d tsegda d tuqeddsi d usenjem,
1CO 1:31 am mammec tura: “Ejj wenni issemɣaran, ad issemɣar di SIDI.”
1CO 2:1 [A] aytma, řami dd-usiɣ ɣarwem, war dd-usiɣ ca ḥima ad awem barrḥeɣ Řexbar Aṣebḥan n ssirr n AREBBI s tbezzaḥt n wawař niɣ s tiɣit,
1CO 2:2 minzi aqa tuɣa ɛewwřeɣ ḥima war ttessneɣ ca jar awem mɣir Yasuɛ Lmasiḥ, d Wenni ittwaṣellben ɛawed.
1CO 2:3 Tuɣa ayi akidwem s waṭṭas n tiggʷudi d uqdides.
1CO 2:4 Tabrat inu d tbarreḥt inu war dd-usint-i-dd s wawařen izewwqen n tiɣit [n bnadem], maca s wescan n Arruḥ d jjehd,
1CO 2:5 ḥima l’iman nwem war ittbeddi ca x tiɣit n iwdan, maca x jjehd n AREBBI.
1CO 2:6 Maca nessawař s tiɣit i yinni t iwḍen, aqa s ict n tiɣit tenni war iǧin n ddunect-a niɣ n řḥukkam n ddunect-a, inni i ɣa ittwassbeṭṭřen,
1CO 2:7 maca nessawař tiɣit n AREBBI s ijj n ssirr i tuɣa inuffaren, wenni tuɣa izzar ifarz i-t AREBBI i uɛuǧi nneɣ qbeř i tuɣa din zzmanat.
1CO 2:8 [Wa d ssirr] nni war t issin uřa d ijj zi řḥukkam n ddunect-a, minzi mařa tuɣa ssnen t, iři war ṣellben ɛemmarṣ Sidi n uɛuǧi.
1CO 2:9 Maca am mammec tura: “Min war teẓri tiṭṭ d min war isři umezzuɣ d min war yudifen ca ɣar wuř n bnadem, aqa man aya issewjed i-t AREBBI i yinni t ittexsen.”
1CO 2:10 Maca AREBBI immeř aneɣ t s Arruḥ nnes, minzi Arruḥ tarezzu kuřci uřa d řaǧaɣ n AREBBI.
1CO 2:11 Minzi man wen d bnadem i issnen min iǧan di bnadem mɣir arruḥ n bnadem wenni dayes iǧan. Ammu ɛawed uřa d ijj war issin ca min iǧan di AREBBI mɣir Arruḥ n AREBBI.
1CO 2:12 Aqa neccin war neksi ca arruḥ n ddunect, maca Arruḥ i dd-yusin zi AREBBI, ḥima ad nessen min d aneɣ iwca AREBBI.
1CO 2:13 S uyenni awařen i zi nessawař, war ǧin d tɣuri s wawařen n tiɣit n bnadem, maca d tɣuri zi Arruḥ, ḥima ad nessemqudda min iǧan n arruḥ ak-d min iǧan n arruḥ.
1CO 2:14 Maɣar bnadem s yixef nnes war iqebbeř ca min iǧan n Arruḥ, minzi iḥesb i-t d tubbuheřya, war izemmar ad t ifhem, minzi man aya izemmar ad ittwafarz s Arruḥ waha.
1CO 2:15 Maca bnadem arruḥani aqa izemmar ad ifarz kuřci, maca netta simant nnes war xas iḥekkem uřa d ijj.
1CO 2:16 Minzi wi issnen axemmem n SIDI ařami [izemmar] ad t isseřmed? Maca neccin ɣarneɣ axemmem n Lmasiḥ.
1CO 3:1 [A] aytma, necc war zemmareɣ ad kiwem ssiwřeɣ am iwdan inni iddaren ɛlaḥsab Arruḥ, maca am yinni iddaren ɛlaḥsab aysum [n bnadem] waha, amecnaw iseyman di Lmasiḥ.
1CO 3:2 Aqa wciɣ awem ad teswem aɣi, war iǧi d ařeqqim imten, minzi tuɣa war d as tzemmarem, ař i řexxu u war d as tzemmarem ɛad,
1CO 3:3 s minzi kenniw ɛad deg weysum. Maɣar mařa din [ɛad] jar awem řeḥsed d imenɣan d umsebḍi, ma war teǧim ɛad n ddat niɣ teggurem [ɛad] deg weysum?
1CO 3:4 Minzi mařa ijjen zzaywem iqqar: ‘Necc aqa ayi zi Bulus!’ u wenneɣni iqqar: ‘Necc aqa ayi zi Apullus!’, ma xenni kenniw war teǧim ca ddat?
1CO 3:5 Maɣar min iɛna Apullus u min iɛna Bulus? Aqa aten mɣir d imsexxaren i zi tdewřem tumnem, uca kuř ijjen am mammec d as iwca SIDI.
1CO 3:6 Aqa necc ẓẓuɣ, Apullus issu, maca AREBBI isseɣmi.
1CO 3:7 Xenni wenni itteẓẓun war iǧi d ca uřa d wenni ittessun, maca AREBBI wenni issɣemmayen.
1CO 3:8 Maca wenni itteẓẓun d wenni ittessun d ijjen, waxxa kuř ijj tekkar as-dd řmunet nnes am mammec řxedmet nnes.
1CO 3:9 Minzi neccin d imsexxaren ak-d AREBBI uca kenniw d tafeǧaḥt d řebni n AREBBI i teǧam.
1CO 3:10 Ɛlaḥsab arḍa n AREBBI i d ayi immewcen, necc, am řemɛeǧem abennay amiɣis, ggiɣ dsas u wenneɣni ad xas ibna. Ejj kuř ijj ad iḥḍa mammec xas i ɣa ibna.
1CO 3:11 Minzi uřa d ijjen war izemmar ad igg dsas nneɣni x wenni immarsen, aqa-t d Yasuɛ Lmasiḥ.
1CO 3:12 Uca mařa ibna ḥed x dsas nni s wureɣ, nnuqart, iẓra iɣřan, tefřawt. řum niɣ s uxecxuc,
1CO 3:13 řxedmet n kuř ijjen ad tban, minzi ass ad tt isscen. Minzi s timessi ad ittwasseḍhar mammec teǧa řxedmet n kuř ijj, timessi ad tt tfarz.
1CO 3:14 Mařa teqqim řxedmet [n řebni] i [xas] tuɣa ibna ca n ijjen, aqa netta ad iṭṭef řmunet nnes,
1CO 3:15 u mařa tecmeḍ řxedmet n ca n ijjen, aqa netta ad yarbu taxessart nnes, maca netta simant nnes ad injem axmi ikka timessi.
1CO 3:16 Ma war tessinem ca belli teǧam d zzawect n AREBBI uca belli Arruḥ n AREBBI izeddeɣ daywem?
1CO 3:17 Mařa yareyyeb ḥed zzawect n AREBBI, AREBBI ad t yareyyeb, minzi zzawect n AREBBI, tenni teǧam kenniw, tqeddes i teǧa.
1CO 3:18 War ttejji ḥed ad ixeddeɛ ixef nnes! Mařa din ḥed jar awem ittɣiř as ixef nnes d amiɣis di ddunect-a, ejj i-t ad idweř d abuhaři maḥend ad yiři d amiɣis.
1CO 3:19 Minzi tiɣit n ddunect-a teǧa d tubbuheřya ɣar AREBBI, minzi tura: “Iṭṭef imiɣisen s teḥraymect nsen!”,
1CO 3:20 uca ɛawed: “SIDI issnen aqa ixarriṣen n imiɣisen d řbaṭeř.”
1CO 3:21 S uya, uřa d ijjen war issemɣari ca zeg iwdan, minzi marra nwem,
1CO 3:22 ma d Bulus, niɣ d Apullus, niɣ d Kifa, niɣ d ddunect, niɣ d tudart, niɣ d řmewt, niɣ d iḍa niɣ d tiwecca, aqa marra nwem,
1CO 3:23 maca kenniw n Lmasiḥ uca Lmasiḥ n AREBBI.
1CO 4:1 Ejj aneɣ xenni ad nettwaḥseb zzaywem am imsexxaren n Lmasiḥ u am iwkiřen n řesrar n AREBBI.
1CO 4:2 Xenni ittxeṣṣa i mkuř awkiř ad ittwaf d amtiqqi.
1CO 4:3 Necc war d ayi icqi ca mařa ttwaḥekmeɣ zzaywem niɣ zeg ijj n bnadem [nneɣni]. Uřa d necc war ḥekkmeɣ ca x ixef inu.
1CO 4:4 Minzi necc war uciɣ s ca [war iḥřin] dayi, maca s man aya war ttwaseggdeɣ, maɣar aqa SIDI d Řqaḍi inu.
1CO 4:5 S uyenni war ḥekkmem ca x walu qbeř řweqt nni di dd ɣa yas SIDI, wenni i ɣa issuffɣen ɣar tfawt min innufaren di taǧest, wenni i ɣa isseḍharen ixarriṣen n wuřawen. Uca řexdenni kuř ijj ad ɣares yiři usemɣar zi AREBBI.
1CO 4:6 Aqa man aya, [a] aytma, iwyeɣ t-i-dd xafi u x Apullus am yijj n umedya di ṭṭweɛ nwem, ḥima ad zzayneɣ třemdem, maḥend war tᵉttxarriṣem ca barra i min iǧan di tira, ḥima uřa d ijj ad issemɣar ixef nnes ḍidd i wenni d as yudsen di ssibbet n yijjen nneɣni.
1CO 4:7 Man wen yarezzun dayek? Niɣ min ɣarek nni war tᵉṭṭifed? Uca mařa tᵉṭṭfed t, mayemmi tcennɛed axmi war t tᵉṭṭifed ca?
1CO 4:8 Řexxu aqa tejjiwnem u tdewřem tᵉttejjarem, uca břa neccin aqa tḥekkmem [am ijeǧiden]. Meɛlik kenniw tḥekkmem [am ijeǧiden], ad yiři neccin xenni ad neḥkem ɛawed akidwem!
1CO 4:9 Minzi ittɣiř ayi belli AREBBI igga aneɣ ɣar uneggar, neccin inni iǧan d rrusul, axmi [xaneɣ ḥekmen s] řmewt, minzi aqa nedweř d afurrej i ddunect, i lmalakat u i iwdan.
1CO 4:10 Neccin neǧa d ibuhařiyyen x ssibbet n Lmasiḥ, maca kenniw teǧam d imiɣisen di Lmasiḥ. Neccin nheyyef, kenniw tjehdem, kenniw tᵉttwacennɛem, neccin nettwasseḥqara.
1CO 4:11 Ař řexxu neccin dayney řaẓ d ufadi d tuɛaryent, ccaten aneɣ, war ɣarneɣ bu tzeddiɣt,
1CO 4:12 narebber am nxeddem s ifassen nneɣ. Nitni sseḥqaran aneɣ, aqa aneɣ ad nbarek, darrcen xaneɣ, maca aqa nkessi armeḥ,
1CO 4:13 ceqqfen dayneɣ, aqa nettḥeccem i-ten [di řxir]. Ař řexxu nedweř am tzubač n ddunect, am ifuraḍ n marra, ař i řexxu.
1CO 4:14 War ttariɣ aya ḥima ad kenniw sseḥcimeɣ, maca ttziyyareɣ kenniw am tarwa iɛizzen.
1CO 4:15 Waxxa mařa tuɣa din ɣarwem ɛecra-ařaf n yinni i kenniw yarebban di Lmasiḥ, aqa war ɣarwem aṭṭas n ibabaten, minzi necc jjiɣ-dd kenniw di Yasuɛ Lmasiḥ s L’Injil.
1CO 4:16 S uyenni ttarreɣ zzaywem: Arewsem ayi!
1CO 4:17 S uyenni ssekkeɣ awem-dd Timutiyu, wenni iǧan d mmi iɛizzen d amtiqqi di SIDI, ḥima ad d awem issfekkar ibriden inu i iǧan di Lmasiḥ, am mammec ten sseřmadeɣ di marra timesmunin.
1CO 4:18 Maca ca zzaywem aqa ttneffaxen, axmi necc war ɣarwem ttiwiḍiɣ.
1CO 4:19 Maca mařa ixs SIDI ad ɣarwem dd-aseɣ deɣya. Xenni war ttexseɣ [zeɛma] ad ssneɣ awařen n yinni issgeɛɛden ixef nsen, maca jjehd nsen.
1CO 4:20 Minzi Tageldit n AREBBI war teǧi ca deg wawař[en], maca di jjehd.
1CO 4:21 Min texsem? Ma ad ɣarwem dd-aseɣ s weɛmud niɣ s tayri u s arruḥ n temhint?
1CO 5:1 Řḥasuř, ittwanna belli aqa din jar awem farq-ccɣeř, u anect n farq-ccɣeř nni war iǧin qaɛ jar lkuffar, aqa ijj n mmis ɣares tamɣart n babas.
1CO 5:2 Kenniw tessuffam ixef nwem, waxxa ittxeṣṣa awem di tidett ad tceḍnem, ḥima ad tḥeyyḍem wenni iggin man aya zi řwesṭ nwem.
1CO 5:3 Waxxa necc aggʷejeɣ ɛlaḥsab arrimet, aqa ayi ḥḍareɣ di Arruḥ, uca aqa ḥekmeɣ axmi ḥḍareɣ x wenni iggin man aya.
1CO 5:4 Ittxeṣṣa ad tmunem marra deg Yisem n Siditneɣ Yasuɛ Lmasiḥ, u necc akidwem di Arruḥ, s jjehd n Siditneɣ Yasuɛ Lmasiḥ,
1CO 5:5 uca kenniw ad t tsellmem i cciṭan i txessart n arrimet nnes, ḥima ad iddar di Arruḥ deg wass n Siditneɣ Yasuɛ Lmasiḥ.
1CO 5:6 War dd xawem yusi ufeyyec! Ma war tessinem ca belli cwayt n wentun issmemm marra taɛebbuzt n warecti?
1CO 5:7 Sizedgem ixef nwem xenni zeg wentun aqdim, ḥima ad tiřim d ict n řɛejnet n warecti n jdid. Aqa kenniw d aɣrum břa antun, minzi [Taɣarṣt nneɣ n] Useɛdu aqa tᵉttwaɣarṣ i neccin, aqa [Netta] d Lmasiḥ.
1CO 5:8 S uyenni ejj aneɣ ad nɛeyyed, war iǧi s wentun aqdim niɣ s wentun n tuɛeffna d řɣar, maca s wentun n řeṣfayet d tqeddast.
1CO 5:9 Aqa uriɣ awem-dd di tebrat, ittxeṣṣa war ttɛacarem ayt n farq-ccɣeř
1CO 5:10 War ssiwřeɣ x ayt n farq-ccɣeř nni iǧan di ddunect-a, niɣ x iḍemmaɛen niɣ x ibeɛɛaj niɣ x yinni iɛebbden l’aṣnam, mařa ammu, iři ad teffɣem zi ddunect-a.
1CO 5:11 Maca uriɣ awem-dd řexxu, ḥima war tᵉttɛacarem ca ḥed, waxxa qqaren as uma, maca aqa-t d bu-farq-ccɣeř, niɣ d aḍemmaɛ, niɣ d wenni iɛebbden l’aṣnam, niɣ d amceqqaf, niɣ d askarji, niɣ d aceffar. Ak-d ḥed am wanita war kis tᵉttettem [ɛad] aɣrum!
1CO 5:12 Minzi man řḥeqq ɣari, ḥima ad ḥekmeɣ x yinni iǧan barra? Ḥekkmem kenniw x yinni iǧan daxeř!
1CO 5:13 Maca inni iǧan barra, AREBBI ad xasen iḥkem. Sḥeyydem xawem aɛeffan!
1CO 6:1 Ma izɛem ḥed zzaywem, xmi ɣares ccreɛ ak-d wenneɣni, ad [zzayes] iḥkem zzat n yinni war iseggden, war iǧi zzat i imqeddasen?
1CO 6:2 Niɣ war tessinem ca belli imqeddasen ad ḥekmen ddunect? Uca mařa [xenni] ddunect ad tᵉttwaḥkem zzaywem, ma war tzemmarem [xenni] ad tɛedřem ddɛawi timeẓyanin [jar awem]?
1CO 6:3 Niɣ war tessinem ca belli ad neḥkem x lmalakat? Mecḥař ɛad ktar [i ɣa neḥkem x] yinni iǧan n ddunect-a?
1CO 6:4 Maca mařa din jar awem ict n ddeɛwet x tmesřayin n tudart-a, ma tᵉtteggem inni ɣar iǧa drus n uweqqar waha di tmesmunt ḥima ad ḥekmen?
1CO 6:5 Qqareɣ awem t ḥima ad tseḍḥam. Ma xenni war dinni ḥed jar awem d amiɣis wenni izemmaren ad iḥkem jar tawmat d umas?
1CO 6:6 Maca [řexxu], ijj n tawmat ad icarreɛ ak-d umas u man aya qibač i yinni war yuminen ca.
1CO 6:7 S uya tḥekkmem x yixef nwem, minzi temcarraɛem jar awem. Mayemmi war tqebbřem ad kenniw ḍeǧen? Mayemmi war tqebbřem ca ad kenniw ɣeccen?
1CO 6:8 Maca [řexxu] tᵉtteggem min war iseggden uca tᵉttɣeccam ɛad i aytmatwem.
1CO 6:9 Ma war tessinem ca belli inni war iseggden war warrten ca Tageldit n AREBBI? War ttraḥem ca di ɣalaṭ! Ayt n farq-ccɣeř, niɣ inni iɛebbden l’aṣnam, niɣ inni itteggen zzina, niɣ inni issexsaran, niɣ zzwameř,
1CO 6:10 niɣ iḍemmaɛen, niɣ iceffaren, niɣ iskarjiyyen, niɣ imceqqafen uřa d ibeɛɛajen war warrten Tageldit n AREBBI.
1CO 6:11 Tuɣa timesřayin-a řesqent ɣar ca zzaywem, maca aqa kenniw tᵉttwassirdem, aqa tᵉttwaqeddsem, aqa tᵉttwaseggdem s Yisem n Siditneɣ Yasuɛ Lmasiḥ u s Arruḥ n AREBBI nneɣ.
1CO 6:12 Marra timesřayin ḥeǧřent ayi, maca marra war neffɛent. Marra timesřayin ḥeǧřent ayi, maca war d ayi ittḍebbar uřa d ijjen bnadem.
1CO 6:13 Macca i uɛeddis uca aɛeddis i macca, maca AREBBI ad ten ibeṭṭeř s tyuya. Maca arrimet war teǧi i farq-ccɣeř, maca i Siditneɣ, uca Siditneɣ i arrimet.
1CO 6:14 Maca AREBBI wenni dd-issnekkaren Siditneɣ, ad aneɣ dd-issnekkar s jjehd nnes.
1CO 6:15 Ma war tessinem ca belli arrimat nwem ǧant d iɣezdisen n Lmasiḥ? Ma ad ksiɣ xenni ijj n uɣezdis n Lmasiḥ, maḥend ad t ggeɣ d aɣezdis n ict n temɣart n farq-ccɣeř? Ɛemmarṣ!
1CO 6:16 Niɣ war tessinem ca belli wi imunen ak-d temɣart n farq-ccɣeř, aqa-t d ict n arrimet [akides]? Minzi iqqar: ‘Nitni s tnayen ad iřin d ict n arrimet.’
1CO 6:17 Maca wenni imunen ak-d Siditneɣ, aqa-t d ijj n arruḥ akides.
1CO 6:18 Arewřem zi farq-ccɣeř. Kuř ca n ddenb i ittegg bnadem, aqa-t barra i arrimet nnes, maca wenni issefsaden ixef nnes s farq-ccɣeř, aqa netta ixeṭṭa ḍidd i arrimet nnes.
1CO 6:19 Ma war tessinem ca belli arrimet nwem d zzawect n Arruḥ Iqeddsen wenni daywem iǧan, wenni i ṭṭfem zi AREBBI, u aqa kenniw war teǧim ca i yixef nwem?
1CO 6:20 Aqa temmesɣem-dd s ttaman. Semɣarem xenni AREBBI di arrimet nwem u di arruḥ nwem tinni iǧan n AREBBI.
1CO 7:1 Zi jjihet min d ayi turim, aqa mliḥ i bnadem war ittḥidi ca tamɣart.
1CO 7:2 Maca zi ssibbet n farq-ccɣeř, kuř aryaz ad yawi tamɣart nnes uca kuř ict n temɣart ad tᵉṭṭef aryaz nnes.
1CO 7:3 Ejj aryaz ad isscen i temɣart nnes tayri i d as dd-yusin, ammu ɛawed tamɣart i weryaz nnes.
1CO 7:4 Tamɣart war tᵉttḍebbari ca di arrimet nnes, maca aryaz nnes. Uca ammu ɛawed aryaz war ittḍebbari ca di arrimet nnes, maca tamɣart nnes.
1CO 7:5 War [tt] qeṭṭɛem ca x wayawya, mɣir mařa tekksem deg wawař ca n umur ḥima ad ceɣřem s uẓummi d tẓaǧit. Awarni man aya munem ɛawed maḥend ad tawyem ariqqi i řemrac, ḥima war kenniw ittjarrib cciṭan zi ssibbet n meẓri n arrimet.
1CO 7:6 Qqareɣ man aya di ṭṭweɛ n yinni iḍeɛfen, war iǧi s řumur.
1CO 7:7 Xseɣ ɛad mliḥ mařa marra iwdan ad iřin am necc di tazdugi, maca kuř ijj ɣares tawhibt nnes i d as iwca AREBBI, ijjen ammu, wenneɣni ammu.
1CO 7:8 Maca i yinni war ɣarsen bu temɣart u i tijjař qqareɣ, aqa mliḥ i nitni mařa qqimem am necc.
1CO 7:9 Maca mařa war zemmaren ad qqimen ṭṭfen di man aya, ejj i-ten ad meřcen, minzi iḥřa ad awyen tamɣart x wecmaḍ n nnecwet.
1CO 7:10 Maca i yinni yiwyen ict n temɣart, umureɣ, war iǧi d necc, maca Sidi inu, belli tamɣart war tbeṭṭi x weryaz.
1CO 7:11 Uca mařa tebḍa, ad teqqim břa aryaz, niɣ ad tᵉmmesseṣřeḥ ak-d weryaz nnes, uca aryaz war ittejji tamɣart nnes.
1CO 7:12 Xenni i inneɣni qqareɣ necc, war iǧi Sidi: Mařa ijj n tawmat ɣares tamɣart war ittimnen, uca nettat teqbeř ad tezdeɣ akides, war tt ineṭṭar ca.
1CO 7:13 Uca mařa ict n temɣart tenni ɣar iǧa weryaz war yuminen, u netta ixs ad kides izdeɣ, war tsemmeḥ ca nettat deg weryaz nnes.
1CO 7:14 S minzi aryaz war yuminen ittwaqeddes di temɣart tenni yumnen, uřa d tamɣart war yuminen tᵉttwaqeddes deg weryaz i yumnen, mařa mammec nneɣni ad iřin iḥenjiren nwem d imengas, maca řexxu aqa nitni d imezdagen.
1CO 7:15 Maca mařa wenni war ittimnen ad iǧef, ejj i-t ad iǧef. Xenni tawmat niɣ tawečmat war ttwaqqnen ca di řḥař nni. Aqa AREBBI iřaɣa aneɣ-dd ɣar řehna.
1CO 7:16 Minzi manis tessned cem, [a] tamɣart, ad tessnejmed aryaz nnem? Niɣ manis tessned cek, [a] aryaz, ad tessnejmed tamɣart nnec?
1CO 7:17 Maca kuř ijj am mammec d as iwca SIDI, am mammec i d iřaɣa AREBBI i kuř ijj, ejj i-t ad iddar ammu. Ammu i umureɣ i marra timesmunin.
1CO 7:18 Mařa ittwařaɣa i weryaz ittwaxetnen [ɣar umuni ak-d Lmasiḥ], wanita war yarezzu ad dd-idweř ɣar břa axtan nnes, uca mařa ittwařaɣa i ḥed břa axtan, ejj i-t war yarezzu ad t xetnen.
1CO 7:19 Axtan d walu u břa axtan d walu, maca aḥeṭṭu n tweṣṣa n AREBBI, wah!
1CO 7:20 Ejj kuř ijjen ad iqqim di třaɣit i zi dd-ittwařaɣa.
1CO 7:21 Mařa tuɣa cek tᵉttwařaɣid-dd d ismeɣ war tessḥissifed ca i man aya, maca mařa tzemmared ad tᵉttwassarḥed, ixḍar xenni s yixef nnec, maḥend ad tsexxared.
1CO 7:22 Minzi wenni ittwařaɣan di Siditneɣ am tuɣa d ismeɣ, aqa-t d aḥurri n AREBBI, am mammec wenni ittwařaɣan d aḥurri, aqa-t d ismeɣ n Lmasiḥ.
1CO 7:23 Aqa temmesɣem-dd s ttaman, [xenni] war iɛeddeř ad tiřim ɛad d isemɣan n iwdan.
1CO 7:24 [A] aytma, ejj kuř ijjen ad isiɣi ak-d AREBBI deg webrid nni di dd-ittwařaɣa.
1CO 7:25 Deg wazzay n tuɛezriya, aqa war ɣari bu řumur n AREBBI, maca ad wceɣ array inu, am wi yiwḍen s arḍa n AREBBI ḥima ad yiři d amtiqqi.
1CO 7:26 Ittɣiř ayi mliḥ i řeɣben i iǧan di řweqt-a, belli aqa icna i bnadem ad iqqim am iǧa.
1CO 7:27 Ma třeṣqed di temɣart? War arezzu ca ad [zzayes] tennfekked. Mařa cek war třeṣqed di temɣart? War arezzu x temɣart.
1CO 7:28 Maca mařa tiwyed tamɣart, war txeṭṭid. Uca mařa taɛzarect tedweř ɣar weryaz, nettat war txeṭṭi ca. Maca inni [iqqnen i wayawaya s řemřac], tᵉttraja i-ten řmeḥnet di arrimet, uca xseɣ ad tt xawem kkseɣ.
1CO 7:29 D man aya i qqareɣ, [a] aytma, aqa řḥař imẓi. S uyenni inni ɣar iǧa temɣart, ejj i-ten ad iřin axmi war ɣarsen teǧi,
1CO 7:30 inni ittrun axmi war ttrun, inni ifarrḥen axmi war friḥen, inni issaɣen axmi war mellken,
1CO 7:31 u inni istenfaɛen zi ddunect-a, ittxeṣṣa war ttaggʷijen x ustenfeɛ i dd-ittřiqen, minzi udem n ddunect aya ad iɛdu.
1CO 7:32 S uyenni xseɣ ad tiřim břa amnus, maɣar wenni war ɣares teǧi temɣart, ad ixarreṣ di min iǧan n Sides d mammec ɣa yarḍa Sides.
1CO 7:33 Maca wenni ɣar teǧa temɣart, ad iksi s wemnus i tmesřayin n ddunect-a u mammec ɣa yarḍa tamɣart nnes.
1CO 7:34 Aqa din ijj n řfarq jar temɣart d teɛzarect. Tenni war ɣar iǧi weryaz ɛemmarṣ, ad txarreṣ di Sides, ḥima ad tiři tqeddes am di arrimet am di arruḥ, maca tenni ɣar teǧa weryaz, ad txarreṣ di tmesřayin n ddunect, i mammec ɣa tarḍa aryaz nnes.
1CO 7:35 Degga qqareɣ awem-dd i tizi nwem, war iǧi ḥima ad awem ggeɣ řfex, maca [nniɣ t] ḥima ad teqqimen d imtiqqan i Siditwem x ubrid nican, am war tseřhim ak-d ddunect.
1CO 7:36 Maca mařa ixarreṣ ḥed belli aqa sthezzan zzayes zi ssibbet n yeǧis taɛzarect, tenni x ɛdun wussan n temẓi nnes am war tt issemřec ɛad i weryaz, uca ittɣiř as nican ad tt issemřec, netta war ixeṭṭi ca. Ejj i-tt ad tmeřc.
1CO 7:37 Maca wi iǧan nican deg wuř nnes, břa ma yuca s uziyyar, uca ɣares ṣṣulṭa x yixef nnes, ikkes deg wuř nnes ad yejj taɛzarect nnes teṣfa, mliḥ i yegga.
1CO 7:38 S uyenni, wenni issmeřcen yeǧis taɛzarect igga mliḥ, u wenni war issmeǧicen yeǧis taɛzarect, igga mliḥ aṭṭas.
1CO 7:39 Tamɣart teqqen ɣar weryaz nnes s Ccariɛa min ɣa yekk weryaz nnes iddar, maca mařa aryaz nnes immut, aqa-tt tsarreḥ zzayes, tzemmar ad temřec ak-d wi texs, maca di Siditneɣ waha.
1CO 7:40 Maca necc ɣari, aqa nettat ad tᵉttwabarek ktar mařa teqqim amenni. U aqa Necc ttwařiɣ Arruḥ n AREBBI [ixeddem] ɛawed dayi.
1CO 8:1 Zi jjihet n tɣarṣin i l’aṣnam, aqa nessen, belli marra ɣarneɣ tussna. Tussna [maca] tᵉttegg tuffet, maca tayri tessyemma.
1CO 8:2 Mařa din ḥed ittɣiř as belli issen ca, ɛad war issin walu anect mammec ittxeṣṣa ad issen.
1CO 8:3 Maca mařa ittexs ḥed AREBBI, aqa d wa ittwassen zzayes.
1CO 8:4 X macca tenni ittwaɣarṣen i l’aṣnam, aqa nessen belli ṣṣanam war iǧi d walu di ddunect, u belli war din iǧi ca AREBBI nneɣni mɣir Ijjen.
1CO 8:5 Xenni, waxxa aqa din inni umi qqaren irebbiten, niɣ deg ujenna niɣ di temmurt - am mammec ǧan din aṭṭas n irebbiten d waṭṭas n isiditen -
1CO 8:6 i neccin aqa ɣarneɣ ijj n AREBBI, Babatneɣ, maɣar zzayes i dd-usint marra timesřayin u dayes i neǧa, u aqa ɣarneɣ ijj n SIDI, aqa-t d Yasuɛ Lmasiḥ, maɣar marra timesřayin ǧant s ufus nnes, uca uřa d neccin aqa s ifassen nnes i neǧa.
1CO 8:7 Maca tussna-ya war daysen teǧi marra, minzi din ca n yinni di tnefsect nsen ttᵉtten min ittwaɣarṣen i l’aṣnam, uca [xenni] tᵉttwassexmej [tnefsect nsen] s manayenni, minzi teḍɛef tnefsect nsen.
1CO 8:8 Maca macca war d aneɣ tessiwiḍ ca ɣar AREBBI, minzi mařa necca, aqa war dayneɣ yarenni ca, niɣ mařa war necci, aqa war dayneɣ bu řexṣeṣ.
1CO 8:9 Maca ɣarwem, aqa ttesriḥ nwem war dd-tusi ad tiři d taɛenkrift i yinni iḍeɛfen.
1CO 8:10 S minzi mařa ḥed ittwařa kenniw, inni ɣar teǧa tussna, tᵉttɣimam di zzawect mani ɛebbden l’aṣnam, ma tanefsect nnes, minzi netta iḍɛef, war tᵉttwajbed ca ad tekkar maḥend ad yecc min ɣarṣen i l’aṣnam?
1CO 8:11 Ammu s tussna nnec ad iweddar wenni iḍeɛfen, wenni i xef immut Lmasiḥ.
1CO 8:12 Xmi txeṭṭim ammu x wawmaten nwem uca tessyezzmem tuḍɛeft n tnefsect nsen, aqa txeṭṭim x Lmasiḥ.
1CO 8:13 S uyenni, mařa macca aqa tarra uma ad innedref, war ttᵉtteɣ aysum ɛemmarṣ, ḥima war ssendrifeɣ ca uma.
1CO 9:1 Ma war ǧiɣ d aḥurri? Ma war ǧiɣ d rrasul? Ma war ẓriɣ Siditneɣ Yasuɛ Lmasiḥ? Ma war teǧim kenniw d řxedmet inu di Sidi inu?
1CO 9:2 Mařa war ǧiɣ d rrasul i wenneɣni, i kenniw nican ɛniɣ t, [wah,] kenniw d acemmiɛ n řxedmet inu n rrasul.
1CO 9:3 Necc arriɣ-dd x yinni xafi iḥekkmen ammu:
1CO 9:4 Ma war ɣarneɣ bu ttesriḥ ḥima ad necc, ad nsu?
1CO 9:5 Ma war ɣarneɣ bu ttesriḥ ad nawi akidneɣ ict n twečmat d tamɣart am ɛawed rrusul inneɣni d wawmaten n Siditneɣ d Kifa?
1CO 9:6 Niɣ waha Bar-Naba d necc war ɣarneɣ bu ttesriḥ ḥima war nxeddem?
1CO 9:7 Man wen i ɣa ixeddmen di řɛeskar ad ixeǧeṣ řmunet i yixef nnes? Man wen i ɣa iẓẓun ict n tzayart deg ijj n umarjeɛ n uḍiř, war ittett ca zi řɣiǧet nnes? Niɣ man wen i ɣa yarekkwesen ict n tḥimart, war isess ca aɣi n tḥimart?
1CO 9:8 Ma qqareɣ man aya am bnadem [waha]? Xzar, uřa d Ccariɛa teqqar aya!
1CO 9:9 Minzi tura di Ccariɛa n Musa: “War ttegg tacmant i uyenduz issarwaten.” Ma AREBBI iḥeṭṭa x iyenduzen s tidett?
1CO 9:10 Nessen aqa inna i-t di ṭṭweɛ nneɣ u man aya tura di ṭṭweɛ nneɣ, minzi wenni icarrzen, ad icarz s usitem u wenni issarwaten, ad issarwat s usitem ad ɣares yiři ṣṣabet.
1CO 9:11 Mařa neccin aqa nzarreɛ daywem min iǧan n Arruḥ, xenni ma d aṭṭas mařa nemjar zzaywem [ca] zi min iǧan n temmurt?
1CO 9:12 Mařa inneɣni ɣarsen ttesriḥ-a xawem, [maḥend ad carcen di min iǧan nwem], mayemmi neccin ktar lla? Maca neccin war nesstenfiɛ zi ttesriḥ-a, maca neksi marra, ḥima war nᵉttegg uřa d ict n tɛenkrift i Řexbar Aṣebḥan n Lmasiḥ.
1CO 9:13 Ma war tessinem ca belli inni ittsexxaren deg Uqeddas ad ttwarezqen zi [min iǧan deg] Uqeddas? Uca inni ittsexxaren ɣar uɛalṭar ad ṭṭfen tasɣart nsen zeg uɛalṭar?
1CO 9:14 Ammu ɛawed yumur Siditneɣ i yinni ittbarrḥen Řexbar nnes Aṣebḥan, aqa ad ddaren zi Řexbar Aṣebḥan.
1CO 9:15 Maca necc war sstenfiɛeɣ zeg uřa d ict zi tmesřayin-a. U necc war t uriɣ ca, ḥima ad ittwagg man aya i necc, meɛlik ufiɣ ad mmteɣ x usebḍeř n usemɣar inu s ca n yijjen.
1CO 9:16 Xenni mařa necc ttbarrḥeɣ s Řexbar Aṣebḥan, necc war ɣari ca min di ɣa ssemɣareɣ, minzi ittxeṣṣa ayi man aya. Ayeḥḥat xafi, mařa war ttbarrḥeɣ ca s Řexbar Aṣebḥan!
1CO 9:17 S uyenni, mařa ggiɣ tt s řxaḍar inu, ad ɣari tiři řmunet, maca mařa war tt tteggiɣ s řxaḍar, aqa ad iqqim uwekkeř deg ufus inu.
1CO 9:18 Man ten qaɛ iǧan d řmunet inu? Aqa-tt d ta: am ttbarrḥeɣ s Řexbar Aṣebḥan ad sseḥḍareɣ Řexbar Aṣebḥan n Lmasiḥ baṭeř, war kessiɣ ca ttesriḥ inu i dayi iwca [Arebbi] di L’Injil.
1CO 9:19 Necc, umi qqimeɣ ttwaḥarreɣ zi marra, aqa arreɣ ixef inu d amsexxar n marra, ḥima ad arebḥeɣ aṭṭas [n iwdan].
1CO 9:20 I Wudayen dewřeɣ am Wuday ḥima ad arebḥeɣ Udayen, i yinni iǧan sadu Ccariɛa dewřeɣ am yinni sadu Ccariɛa, ḥima ad arebḥeɣ inni iǧan sadu Ccariɛa.
1CO 9:21 I yinni iǧan břa Ccariɛa dewřeɣ am wenni břa Ccariɛa - war ǧiɣ břa Ccariɛa qibač i AREBBI, maca aqa-yi ddareɣ di Ccariɛa n Lmasiḥ - ḥima ad arebḥeɣ inni iǧan břa Ccariɛa.
1CO 9:22 Tuɣa ayi ḍeɛfeɣ ɣar yinni iḍeɛfen, ḥima ad arebḥeɣ inni iḍeɛfen. Aqa dewřeɣ d marra i marra, ḥima beɛda ad wceɣ Tudart i marra.
1CO 9:23 Man aya tteggeɣ, ḥima ad ṭṭfeɣ tasɣart di Řexbar Aṣebḥan.
1CO 9:24 Ma war tessinem ca belli inni itteggen tḥamat n tazřa di řmeřɛeb, marra nican aqa ttazzřen, maca ijjen zzaysen i ɣa yarebḥen waha? Xenni azzřem kenniw ammu ař d ɣa tarebḥem.
1CO 9:25 Maca kuř aryaz i itteggen ict n tḥamet, iḥekkem x yixef nnes di marra. Nitni uzzřen ḥima ad arebḥen ijj n ttaj ifenna, maca neccin ḥima ad narbeḥ ijj n ttaj war ifenni.
1CO 9:26 S uyenni necc war ttizzřeɣ ca amenni waha, war ttmenɣiɣ am wenni iccaten di řeɛwin,
1CO 9:27 maca ttmarrateɣ arrimet inu, ad as qetmareɣ, ḥima necc war ttwassuffuɣeɣ ca barra awarni řami barrḥeɣ inneɣni.
1CO 10:1 [A] aytma, xseɣ ad tessnem, belli řejdud nneɣ tuɣa aten marra sadu useynu uca marra cuqen di řebḥar,
1CO 10:2 uca marra ttwassɣeḍṣen di Musa deg useynu u di řebḥar,
1CO 10:3 uca marra ccin macca taruḥect d ict,
1CO 10:4 uca marra swin tisessit taruhect d ict, minzi nitni swin zeg weẓru n Arruḥ wenni tuɣa akidsen, u aẓru nni tuɣa-t d Lmasiḥ.
1CO 10:5 Maca AREBBI tuɣa war yarḍi x wezyen ameqqran zzaysen, minzi aqa aten wḍan di řexřa.
1CO 10:6 Man aya imsar d lmital i neccin, ḥima war dayneɣ ittiři mmeẓri di min iɛeffnen, am mammec tuɣa nitni daysen meẓri.
1CO 10:7 Ejj aneɣ war ndikkwiř ca ad neɛbed l’aṣnam, am [ca] zzaysen, am mammec tura: “Řgens iqqim ḥima ad icc ad issu uca kkaren ḥima ad iraren.”
1CO 10:8 War iɛeddeř ad nessefsad ixef nneɣ, am [ca] zzaysen. Aqa mmuten din třata u-ɛicrin-ařef deg ijj n wass.
1CO 10:9 War iɛeddeř ad njarreb Lmasiḥ, am mammec jarrben [t] [ca] zzaysen uca ttwahelken s ifiɣran.
1CO 10:10 War iɛeddeř ɛawed ad nessfixex am mammec [ca] zzaysen ssfixixen, uca [xenni] ttwahellken s ufus n umhellek.
1CO 10:11 Marra min d asen imsaren, aqa t d lmital i neccin, uca tura d aɛřam i neccin mixef dd-yusa uneggar n zzmanat.
1CO 10:12 S uyenni wenni umi ittɣiř aqa ibedd, ejj i-t ad iḥḍa war iweṭṭi.
1CO 10:13 War xawem ittekk ujarreb mɣir wenni i ɣa yawḍen ɣar iwdan. [Maca] AREBBI dayes řaman. Netta war kenniw ittejji ad tᵉttwajarrbem sennej i min tzemmarem, maca Netta ittic uffuɣ ak-d ujarreb nwem, ḥima ad tzemmarem ad tarbum [aɣekkwi].
1CO 10:14 S uya, imɛizzen inu, arewřem zeg uɛbad i l’aṣnam.
1CO 10:15 Ssawařeɣ [akidwem] axmi ssawařeɣ ak-d imiɣisen. Ḥekmem kenniw [xenni] x min d awem qqareɣ.
1CO 10:16 Řkas n uqadi nni nettbarak, ma war iǧi d tamunt ak-d Idammen n Lmasiḥ? Aɣrum nni ntareẓẓa, ma war iǧi d tamunt ak-d Arrimet n Lmasiḥ?
1CO 10:17 Am mammec iǧa aɣrum d ijjen, ammu marra neccin d ict n Arrimet, minzi marra neccin neṭṭef zeg ijj n weɣrum.
1CO 10:18 Xzarem ɣar Israil ɛlaḥsab arrimet! Ma inni ittetten zi tɣarṣa war ɣarsen acrac ak-d uɛalṭar?
1CO 10:19 Min ɣa iniɣ di man aya? Ma belli min immewcen d taɣarṣt i l’aṣnam d ca, niɣ belli l’aṣnam d ca? Lla.
1CO 10:20 Min wcin lkuffar d taɣarṣt, wehhben tt i ccwaṭen, war iǧi i AREBBI. Uca necc war xseɣ ad tcarcem ak-d ccwaṭen.
1CO 10:21 War tzemmarem ad teswem řkas n Siditneɣ uřa d řkas n ccwaṭen, uca war tzemmarem ad tcarcem tazewḍa n Siditneɣ uřa d tazewḍa n ccwaṭen.
1CO 10:22 Niɣ ad nessekkar tusmi n Siditneɣ? Ma nejhed xas neccin?
1CO 10:23 Marra ittḥeǧeř ayi, maca marra war ineffeɛ. Marra ittheǧeř, maca marra war ibenni.
1CO 10:24 Uřa d ijj war yarezzu ca tizi nnes [waha], maca [ejj] kuř ijj [ad yarzu] ɛawed tenni n wenni d as yudsen.
1CO 10:25 Marra min ittmenzan di ssuq n igezzaren, tzemmarem ad t teccem břa aseqsi di ṭṭweɛ n tnefsect,
1CO 10:26 minzi i SIDI umi ɣar teǧa temmurt d uɛemmar nnes.
1CO 10:27 Mařa ca n yijjen zeg lkuffar, iɛarḍ i kenniw u texsem ad traḥem, ccem zi marra min d awem i d ɣa issars, war tesseqsim ca x ssibbet n tnefsect.
1CO 10:28 Maca mařa ḥed inna awem: “Degga ittwaɣarṣ i l’aṣnam!”, war zzayes tᵉttettem di ṭṭweɛ n wenni d awem iɛeřmen uřa di ṭṭweɛ n tnefsect.
1CO 10:29 Mařa necc nniɣ [di ṭṭweɛ n] ‘tnefsect’, war ɛniɣ tanefsect nwem, maca tenni n wenneɣni. Minzi mayemmi ɣa tᵉttwaḥakem třelli inu s tnefsect n wenneɣni?
1CO 10:30 Mařa necc carceɣ s uweqqar [ɣar umensi], mayemmi ɣa ttwaceqqfeɣ di ssibbet mixef ttqadiɣ?
1CO 10:31 Xenni mařa tᵉttettem niɣ tsessem niɣ tᵉtteggem ca n řḥajjet nneɣni, ggem tt marra i uɛuǧi n AREBBI.
1CO 10:32 War ttiřim d taɛenkrift i Wudayen niɣ i Iramiyyen uřa i tmesmunt n AREBBI,
1CO 10:33 am mammec uřa d necc arezzuɣ ad dd-aseɣ ak-d marra di kuřci, war arezzuɣ min iǧan i tizi inu, maca min iǧan i tizi n waṭṭas, ḥima ad ɣarsen tiři Tudart.
1CO 11:1 Ḍfarem ayi-dd am mammec ḍfareɣ Lmasiḥ.
1CO 11:2 Ssemɣareɣ kenniw, [a] aytma inu, minzi tᵉttfekkarem dayi di marra uca tᵉtteṭṭfem di tewṣeyyat, am mammec d awem tent wciɣ.
1CO 11:3 Maca xseɣ ad tessnem belli Lmasiḥ d Azeǧif n kuř aryaz uca aryaz d azeǧif n temɣart, uca AREBBI d Azeǧif n Lmasiḥ.
1CO 11:4 Kuř aryaz wenni ittẓaǧan niɣ ittnabben am iřeḥḥef x uzeǧif nnes, ifeṭṭeḥ azeǧif nnes.
1CO 11:5 Maca kuř tamɣart tenni ittẓaǧan niɣ ittnabben am tessɛarra uzeǧif nnes, tfeṭṭeḥ azeǧif nnes, minzi nettat am tenni iḥeffen azeǧif nnes.
1CO 11:6 Minzi mařa tamɣart war třeḥḥif, ejj i-tt ad tḥeff ɛawed. Maca mařa d řefḍiḥet i temɣart mařa tqess [acuwwaf] niɣ tḥeff, ḥsen mařa třeḥḥef.
1CO 11:7 Minzi aryaz war itteḥwiji ca ad iřeḥḥef azeǧif nnes, minzi netta d ṣṣifet d aɛuǧi n AREBBI, maca tamɣart teǧa d aɛuǧi n weryaz.
1CO 11:8 Minzi aryaz war iǧi ca zi temɣart, maca tamɣart zeg weryaz.
1CO 11:9 Aryaz ɛawed war dd-ixřiq ca i temɣart, maca tamɣart i weryaz.
1CO 11:10 S uyenni ittxeṣṣa as i temɣart ad ɣares tiři ṣṣulṭa x uzeǧif nnes x ssibbet n lmalakat.
1CO 11:11 Maca di Siditneɣ aryaz war [iǧi] břa tamɣart, uřa d tamɣart war [teǧi] břa aryaz.
1CO 11:12 Minzi am mammec tamɣart tusa-dd zeg weryaz, amenni ɛawed iǧa weryaz s temɣart, maca marra min iǧan aqa-t zi AREBBI.
1CO 11:13 Ḥekmem kenniw simant nwem: Ma tusa-dd x temɣart ad teẓẓaǧ i AREBBI am tessɛarra i uzeǧif nnes?
1CO 11:14 Ma tubbart simant nnes war d awem tesscan belli acuwwaf d azirar d řefḍiḥet i weryaz?
1CO 11:15 Maca i temɣart d aɛuǧi mařa ɣares yiři ucuwwaf d azirar, minzi immewc as ucuwwaf am uřeḥḥaf.
1CO 11:16 Maca mařa ixs ḥed ad ixarweḍ man aya, neccin war ɣarneɣ bu tnamit nni uřa d timesmunin n AREBBI.
1CO 11:17 Weṣṣiɣ kenniw x tmesřayin-a [řexxu], aqa war d awem tteggeɣ ccan, minzi war tuyurem ɣar zzat, maca tuyurem ɣar ḍeffar.
1CO 11:18 [Ɣar umezwar], mařa tmunem am tmesmunt, sřiɣ aqa din jar awem amsebḍi, u man aya zemmareɣ ad t amneɣ i ijj n wezyen,
1CO 11:19 s minzi ittxeṣṣa ad din iřin jar awem imcubbcen, ḥima ad iban man wen zzaywem i iǧan d amqeǧeb.
1CO 11:20 Xmi ttmunam, war tᵉttettem d tsessem am mammec icuwwar deg wass n Siditneɣ,
1CO 11:21 maca kuř ijjen ittett amensi nnes i yixef nnes, [uca xenni] ijjen nneɣni dayes řaẓ uca nneɣni iscara.
1CO 11:22 Ma war ɣarwem tudrin mani ɣa teccem u mani ɣa teswem? Niɣ tesseḥqaram tamesmunt n AREBBI uca tessḥeccamem inni war ɣar iǧi ca? Min d awem i ɣa iniɣ? Ma ad awem ggeɣ ccan? [Lla,] war d awem tteggeɣ ccan!
1CO 11:23 Minzi min ṭṭfeɣ zi Siditneɣ, ssiwḍeɣ awem t-i-dd, aqa Siditneɣ Yasuɛ di ǧiřet i di ittwaɣdar, iksi aɣrum,
1CO 11:24 ibarek, yarẓa i-t, inna: “Ksim, ta d Arrimet inu i xawem ittwarẓen, ggem aya ammu i řidaret xafi!”
1CO 11:25 Uca ammu awarni amensi iwca řkas, inna: “Řkas-a d Řɛahd n Jdid deg Idammen inu. Ggem aya, mecḥař ma zzayes teswim, i řiḍaret xafi.”
1CO 11:26 S minzi mecḥař ma i ɣa teccem aɣrum-a u ad teswem zi řkas-a, aqa tᵉttidarem řmewt n Siditneɣ ař dd ɣa yas.
1CO 11:27 S uyenni man wen i ɣa iccen aɣrum n SIDI uca ad isu zi řkas nnes, [am] war ittiři s usdaheǧi i man aya, ad yiři s umarwas i Idammen n SIDI u i Arrimet nnes.
1CO 11:28 S uyenni ejj kuř ijj ad iqeǧeb ixef nnes, uca ejj i-t ad icc xenni zeg weɣrum u ad isu zi řkas.
1CO 11:29 Minzi wi ɣa iccen d wi ɣa iswen am war isdiheǧ, aqa netta ad issiweḍ řḥukm ɣar ixef nnes am ittett u am isess, minzi netta war ifarrez ca Arrimet n SIDI.
1CO 11:30 S uyenni aqa din aṭṭas n yinni iḍeɛfen d yinni iheřcen jar awem uca aṭṭas dewřen ttᵉṭṭṣen [iḍeṣ n řmewt].
1CO 11:31 Maca mařa neḥkem x ixef nneɣ, xenni war nettwaḥakem.
1CO 11:32 Maca mařa nettwaḥkem zi Siditneɣ, aqa nettwarebba, ḥima war nettwaḥakem ca ak-d ddunect.
1CO 11:33 Zi řexxu, [a] aytma, xmi ɣa tmunem ḥima ad teccem, rajam ijjen wenneɣni.
1CO 11:34 Mařa ḥed dayes řaẓ, ejj i-t ad icc di taddart nnes, ḥima war tᵉttmunem i ccreɛ. Min iqqimen, ad t ɛedřeɣ xmi dd ɣa yaseɣ.
1CO 12:1 X tmesřayin n arruḥ, [a] aytma, xseɣ ad tessnem,
1CO 12:2 tuɣa kenniw d lkuffar u tᵉttwanedhem ɣar l’aṣnam ignawen břa ma tucim.
1CO 12:3 S uyenni ssaregbeɣ kenniw, aqa war din uřa d ijjen wenni i ɣa issiwřen s Arruḥ n AREBBI, ad yini: ‘Aqa ittwanɛeř Yasuɛ!’, u war din uřa d ijjen wenni i ɣa yinin: ‘Yasuɛ d SIDI!’, mɣir s Arruḥ Iqeddsen waha.
1CO 12:4 Aqa din tiwhibin ifarzen, maca Arruḥ aqa-t d Ijj.
1CO 12:5 U aqa din řexdayem n tsexxart ifarzen, maca SIDI aqa-t d Ijj.
1CO 12:6 Uca aqa din řeɛjayeb ifarzen, maca AREBBI aqa-t d Ijj, d Wenni itteggen marra di marra bnadem.
1CO 12:7 Maca asargeb n Arruḥ ad immewc i kuř ijj ḥima ad t iɛawen.
1CO 12:8 Aqa s Arruḥ immewc i yijjen awař n tiɣit, i wenneɣni awař n tussna s Arruḥ [d ijjen],
1CO 12:9 i wenneɣni l’iman s Arruḥ, i wenneɣni tawhibt i usgenfi s Arruḥ [d ijjen],
1CO 12:10 i wenneɣni maḥend ad igg řeɛjayeb, i wenneɣni mahend ad inebb, i wenneɣni řfarz n arruḥat, i wenneɣni ɛřam kuř iřsawen uca i wenneɣni afessar n iřsawen.
1CO 12:11 Maca man aya marra ittegg i-t Arruḥ d Ijjen, wenni ibeṭṭan i kuř ijj anect mammec ixs Netta.
1CO 12:12 Minzi am arrimet aqa-tt d ict u ɣares aṭṭas n iɣezdisen, ɛad aqa aten marra d iɣezdisen n ict n arrimet. Waxxa nitni deg waṭṭas, aqa tteggen ict n arrimet waha, [uca] ammu [i teǧa tmesřact] uřa ak-d Lmasiḥ.
1CO 12:13 Minzi nettwasseɣḍeṣ marra s yijj n Arruḥ deg ict n Arrimet, niɣ Udayen niɣ Iramiyyen niɣ isemɣan niɣ iḥurriyyen, uca marra neccin nsu zeg ijj n Arruḥ.
1CO 12:14 Uřa d arrimet war teǧi ca s ijj n uɣezdis [waha], maca s waṭṭas n iɣezdisen.
1CO 12:15 Mařa aḍar ad ini: “Minzi war ǧiɣ d afus, war ǧiɣ zi arrimet!”, ma xenni war ittiři zi arrimet?”
1CO 12:16 Uca mařa amezzuɣ inna: “Minzi war ǧiɣ d tiṭṭ, war ǧiɣ zi arrimet!”, ma xenni war ittiři zi arrimet?
1CO 12:17 Mařa marra arrimet tuɣa-tt d tiṭṭ, manis d ikka useǧi? Mařa marra [arrimet] tuɣa-tt d aseǧi, manis d ikka ucemmi?
1CO 12:18 Maca řexxu AREBBI igga iɣezdisen di arrimet, kuř ijj zzaysen am mammec ixs Netta.
1CO 12:19 Minzi mařa marra tuɣa d ijj n uɣezdis, mani teǧa arrimet xenni?
1CO 12:20 Maca řexxu aqa din aṭṭas n iɣezdisen, maca d ict n arrimet waha.
1CO 12:21 Tiṭṭ war tzemmar ad tini i ufus: “War cek ḥwijeɣ ca!”, niɣ ɛawed azeǧif i iḍaren: “War kenniw ḥwijeɣ ca!”
1CO 12:22 Maca s řɛeks iɣezdisen n arrimet inni nḥesseb ḍeɛfen, aqa nitni ttwaḥdajen aṭṭas.
1CO 12:23 [Iɣezdisen] nni n arrimet i d aneɣ ittɣiřen d imuqřiřen, nᵉttegg asen ccan ktar, uca iɣezdisen inni ittawyen aseḍḥi, ad asen nessḥinneb s waṭṭas n řehzuṭ.
1CO 12:24 Minzi iɣezdisen nneɣ nni ɣar iǧa řehzuṭ, war ḥdajen man aya, maɣar AREBBI igga arrimet, uca i iɣezdisen i iǧan d qell, iwca asen ccan ktar,
1CO 12:25 ḥima war ittiři ubeṭṭu di arrimet, maca iɣezdisen ad wcen taynit ijjen i wenneɣni deg uqaren d ijjen.
1CO 12:26 Mařa ijj n uɣezdis tᵉttekk xas tamara, marra [iɣezdisen] ad ksin tamara akides, u mařa ijj n uɣezdis ifarḥ, ad farḥen marra [iɣezdisen] akides.
1CO 12:27 Kenniw d Arrimet n Lmasiḥ d iɣezdisen deg wemcan i d awem [ittwaggen].
1CO 12:28 Zeɛma AREBBI aqa igga di tmesmunt d amezwaru rrusul, awarni asen inabiyyen, awarni asen imesɣaren, awarni asen inni itteggen řeɛjayeb, awarni asen tiwhibin n usgenfi, inni itticen afus, inni iḍebbaren uca uřa d ɛřam kuř iřsawen.
1CO 12:29 Ma zeɛma marra nitni d rrusul? Ma marra d inabiyyen? Ma marra d imesɣaren? Ma marra nitni tteggen řeɛjayeb?
1CO 12:30 Ma marra ɣarsen tiwhibin n usgenfi? Ma ssawařen marra s iřsawen? Ma ttfessaren marra [iřsawen]?
1CO 12:31 Maca mařa tarzum xenni di tewhibin timeqqranin [qaɛ], aqa necc ad awem ssecneɣ ijj n webrid yuɛřan.
1CO 13:1 “Maɛlik necc ssawařeɣ s iřsawen n iwdan d lmalakat, maca war ɣari bu tayri, aqa dewřeɣ d nnḥas ittentunen, niɣ d aǧun iddendunen.
1CO 13:2 Maɛlik ɣari tawhibt maḥend ad nebbeɣ, fehhmeɣ marra řesrar u ɣari marra tussna d marra l’iman ař d ssmuṭṭiyeɣ idurar, maca war d ayi teǧi tayri, xenni necc d walu i ǧiɣ.
1CO 13:3 Meɛlik bḍiɣ marra agřa inu d macca x imezřaḍ, maɛlik wciɣ arrimet inu ḥima ad tt sscemḍen, maca war dayi teǧi tayri, war d ayi tneffeɛ di walu.
1CO 13:4 Tayri teǧa ɣares ttasiɛ n řxaḍar d řeḍrafet, tayri war dayes bu tusmi, tayri war tᵉttfeyyec s yixef nnes, war dayes bu nnfaxet,
1CO 13:5 Tayri war tᵉttegg bu řefḍiḥet, war tarezzu tizi nnes, war tᵉttwassarzag, uca war tᵉttxemmam di min iǧan d aɛeffan.
1CO 13:6 aqa war tfarreḥ ca zi řɣecc, maca tfarreḥ zi tidett.
1CO 13:7 Aqa tṣebber di marra, tᵉttamen di marra, tessatem marra, uca tarebbu marra.
1CO 13:8 Tayri war tfenni ɛemmarṣ, maca awařen n nnubuwat ad ɣarsen yiři uneggar, iřsawen ad gnun, u tussna ad tebḍeř.
1CO 13:9 Minzi aqa nessen ɣar ijj n uɣezdis waha, uca nettnabb mɣir ijj n wezyen,
1CO 13:10 maca xmi dd ɣa tas řekmaret řexdenni min iǧan ɣar ijj n wezyen ad ibḍeř.
1CO 13:11 Řami tuɣa ayi d aḥenjir, ssiwřeɣ am uḥenjir, fekkareɣ am uḥenjir, xarṣeɣ am uḥenjir, maca řami dewřeɣ d aryaz, jjiɣ awarni ayi min iǧan n uḥenjir.
1CO 13:12 Řexxu nettwařa s ict n tisit ibarcnen ɣar ijj n warwas, maca xenni ad nẓar tifras ɣar tifras. Řexxu ssneɣ ɣar ijj n wezyen waha, maca xenni ad ssneɣ mammec tuɣa ttwassneɣ necc.
1CO 13:13 Maɣar třata-ya ad qqimen: l’iman, asitem d tayri, maca ameqqran nsen aqa-tt d tayri.”
1CO 14:1 Ḍfarem tayri u njebdem ɣar tewhibin n Arruḥ, d amezwaru ḥima ad tnebbam.
1CO 14:2 Minzi wenni issawařen s iřsawen [nneɣni], war issiwiř ca i iwdan, maca i AREBBI, minzi uřa d ijj war d as ifehhem, maca issawař řesrar s Arruḥ.
1CO 14:3 Maca wenni ittnabben, issawař ɣar yewdan, ḥima ad ten ibna, ad ten isejjeɛ, ad ten issfewwej.
1CO 14:4 Wenni issawařen s yijj n iřes [nneɣni], ibenna ixef nnes, maca wenni ittnabben ibenna tamesmunt.
1CO 14:5 Iwa xseɣ marra kenniw ad tessiwřem s iřsawen [nneɣni], maca mliḥ ɛad ad tnebbam, minzi amenzu wi ittnebban x wi issiwřen s iřsawen [nneɣni], mɣir mařa wanita ad [t] ifessar, minzi mařa ifessar ad tᵉttwabna tmesmunt.
1CO 14:6 Xenni řexxu, [a] aytma, mařa usiɣ-dd ɣarwem uca ad kiwem ssiwřeɣ s iřsawen [nneɣni], man nnfeɛ i ɣarwem i ɣa yawyeɣ mařa war d awem ssiwřeɣ ca s usargeb niɣ s tussna niɣ s ijj n wawař i ɣa nebbeɣ niɣ s useřmed?
1CO 14:7 Maɣar uřa d řeḥwayec war iddaren am tamja niɣ lgambri, ggin řḥess. Mařa war ggin řfarz jar ijj n řḥess d umas, mammec ɣa ssnen inni ittesřan min ttiraren s tamja niɣ s lharpa?
1CO 14:8 Iwa, mařa asuḍi deg uyicc ittegg řḥess war iṣfi, wi ɣa isswejden [xenni] i umenɣi?
1CO 14:9 Ammu ɛawed kenniw, mařa tessiwiřem awařen s ijj n yiřes [nneɣni], maca war ten tfessarem, mammec ɣa fehmen min teqqarem? Ad tessiwřem xenni am wenni issawařen di řeɛwin.
1CO 14:10 Aqa din wi issnen mecḥař n iřsawen di ddunect uca uřa d ijjen zzaysen war iǧi břa řḥess [nnes].
1CO 14:11 Xenni mařa war ssineɣ řaǧaɣ n řḥess, ad iřiɣ necc d ijj n ubarrani i wenni issawařen, d wenni issawařen ad yiři d abarrani i necc.
1CO 14:12 Ammu ɛawed kenniw, umi tenjebdem ɣar tewhibin n Arruḥ, arzum ad tfeyyḍem di ṭṭweɛ n řebni n tmesmunt.
1CO 14:13 Wenni issawařen s ca n iřes [nneɣni], ad iẓẓaǧ ḥima izemmar i ufessar nnes.
1CO 14:14 Minzi mařa necc ẓẓuǧeɣ s ca n yiřes [nneɣni], arruḥ inu aqa iẓẓuǧ, maca řefhamet inu ad teqqim břa řɣiǧet.
1CO 14:15 Mammec i ɣa ggeɣ? Ad ẓẓaǧeɣ s arruḥ inu, maca ad ẓẓaǧeɣ ɛawed s řeɛqeř inu, ad ɣennjeɣ s arruḥ inu, maca ad ɣennjeɣ ɛawed s řeɛqeř inu.
1CO 14:16 Mammec nneɣni, mařa tbarkem s Arruḥ, izemmar ḥed i din iqqimen am war ifhim, ad yini ‘Amin!’ i tẓaǧit n uqadi nnec, minzi netta war issin min teqqared.
1CO 14:17 Minzi waxxa cek tbarked mliḥ, maca wenni d ac yudsen war ittwabenni ca [zi man aya].
1CO 14:18 Necc ttqadiɣ AREBBI aqa ssawařeɣ s iřsawen ktar zzaywem marra,
1CO 14:19 maca di tmesmunt aqa meɛlik ufiɣ ad iniɣ xemsa n wawařen s řeɛqeř inu, ḥima ad ssřemdeɣ ɛawed inneɣni, x ɛecra-ařaf n wawařen s yijj n yiřes [nneɣni].
1CO 14:20 [A] aytma inu, war ttiřim d tarwa deg ixarriṣen nwem, maca iřim d iseyman di tuɛeffna, u iřim tiwḍem di řefhamet.
1CO 14:21 Aqa tura di Ccariɛa: “Ad ssiwřeɣ i řgens-a s ijj n řhard n řbarrani u s ijj n yiřes nneɣni. Waxxa ammu war d ayi ttesřin ca, iqqar SIDI.”
1CO 14:22 Ammu xenni iřsawen d řeɛřamet, war iǧi i yinni yumnen, maca i yinni war yuminen ca, maca awař i ittwanabben zzayes war iǧi i yinni war yuminen, maca i yinni yumnen.
1CO 14:23 Mařa marra tamesmunt tessmun u marra tuɣa ssawařen s iřsawen, uca [xenni] udfen inni ijehřen niɣ inni war yuminen, ma nitni war qqaren belli aqa [iwdan-a] ttxeřfen?
1CO 14:24 Maca mařa marra tnebbam uca yudef-dd ḥed war yumin niɣ ḥed ijheř, xenni wanita ad ittwasseqneɛ zi marra kenniw uca ad ittwawebbex zzaywem marra,
1CO 14:25 uca min innufaren deg wuř nnes ad ittwaɛarra. Netta ad yaḍar s wudem nnes, ad isjed i AREBBI, ad yini: “Aqa s tidett AREBBI aqa-t jar awem!”
1CO 14:26 S uyenni ad awem iniɣ, [a] aytma inu, mařa tmunem, ejj kuř ijjen zzaywem wenni ɣar iǧa ijj n uzehhid [niɣ] ict n tɣuri [niɣ] ijj n usargeb [niɣ] ijj n yiřes [niɣ] ijj n ufessar ad zzayes dd-inṭeq. Ejj ad yiři marra i řebni.
1CO 14:27 Mařa din ḥed issiweř s yijj n iřes [nneɣni], [ejj i-ten] ad ssiwřen s tnayen niɣ s waṭṭas s třata yidsen, uca kuř ijjen [zzaysen] s nnubet nnes, u ejj ijj ad t ifessar.
1CO 14:28 Maca mařa war din iǧi wi izemmaren ad ifessar, ad isqar netta di tmesmunt, ad issiweř i yixef nnes u i AREBBI.
1CO 14:29 Jjem ad ssiwřen tnayen niɣ třata n inabiyyen, uca inneɣni ad ḥekmen.
1CO 14:30 Maca mařa ittwassargeb ca i ḥed am iqqim dinni, ejj xenni ad issusem wenni issawařen d amezwaru,
1CO 14:31 Minzi tzemmarem ad tnebbam marra ijjen awarni wenneɣni, ḥima marra ad řemden uca ad daysen ittwagg wuř marra.
1CO 14:32 Maɣar arruḥ n inabiyyen, aqa-t immars sadu inabiyyen,
1CO 14:33 minzi AREBBI war iǧi d AREBBI n uxarweḍ, maca n řehna, ammu [i yeǧa] di marra timesmunin n imqeddasen.
1CO 14:34 Tusa-dd x temɣarin nwem ad ssusment di tmesmunin, minzi war d asent ismiḥ ad ssiwřent, maca icuwwar asent ad iřint ttwaḍɛent am mammec teqqar ɛawed Ccariɛa.
1CO 14:35 Uca mařa xsent ad řemdent ca, ad sseqsant iryazen nsent di taddart nsen, minzi aqa-tt d řefḍiḥet i temɣarin ad ssiwřent di tmesmunt.
1CO 14:36 Ma zeɛma iffeɣ-dd zzaywem awař n AREBBI? Niɣ yiweḍ-dd ɣarwem waha?
1CO 14:37 Mařa ḥed ittɣiř as d anabi niɣ d bnadem arruḥani, ejj i-t ad iɛqeř mliḥ belli min d awem ttariɣ, aqa atent d tiweṣṣa n Siditneɣ.
1CO 14:38 Maca mařa [ixs] ḥed ad iqqim ijheř, ejj i-t ad ijheř.
1CO 14:39 Ammu xenni, [a] aytma inu, njebdem ḥima ad tnebbam, war mennɛem ca awař s iřsawen [inneɣni].
1CO 14:40 Ad imsar marra s ladab u s usettef.
1CO 15:1 [A] aytma inu, ad awem ssargbeɣ x L’Injil wenni d awem barrḥeɣ, d wenni tqebřem u d wenni di tbeddem [nican],
1CO 15:2 i zi tᵉṭṭfem Tudart, s Wawař i d awem barrḥeɣ, mařa [xas] tɛeqřem ɛad. Mammec nneɣni, zeɛma tumnem amenni waha.
1CO 15:3 Minzi zeg umezwar sseɛduɣ awem-dd min tuɣa ṭṭfeɣ s yixef inu, aqa Lmasiḥ immut x ddnub nneɣ ɛlaḥsab min yuran,
1CO 15:4 aqa ittwanḍeř uca ittwassnekkar-dd deg wass wiss třata ɛlaḥsab min yuran.
1CO 15:5 Netta iḍhar-dd ɣar Kifa, xenni ɣar tenɛac [n imeḥḍaren].
1CO 15:6 Awarni as iban-dd i tiwwa n xemsa-mya n wawmaten deg umur d ijjen, aṭṭas zzaysen ddaren [ɛad] ař i řexxu, maca inneɣni aqa ṭṭṣen [iḍeṣ n řmewt].
1CO 15:7 Awarni as iḍhar-dd i Yaɛqub, xenni i marra rrusul.
1CO 15:8 Am ɣar uneggar n marra, iḍhar ayi-dd ɛawed am i yijj n umexřuq dd-izwaren i řweqt nnes.
1CO 15:9 Minzi necc ǧiɣ d amaẓuẓ qaɛ zi rrusul, war sdihijeɣ ad ayi řaɣan rrasul, minzi necc tuɣa darrceɣ x tmesmunt n AREBBI.
1CO 15:10 Maca s arḍa n AREBBI i ǧiɣ min ǧiɣ uca arḍa nnes i dayi iǧan war iǧi baṭeř, minzi xedmeɣ mahu qaɛ xasen marra, [maca] war iǧi d necc, maca arḍa n AREBBI nni iǧan akidi.
1CO 15:11 Xenni ma d necc niɣ d nitni, ammu i nettbarreḥ, ammu i tumnem.
1CO 15:12 Maca mařa ittwabarreḥ s Lmasiḥ wenni dd-ittwassnekkaren zi taddart n imettinen, mammec xenni zemmaren ca jar awem ad inin belli war din bu Tudart i imettinen?
1CO 15:13 Minzi mařa war din bu Tudart i imettinen, uřa d Lmasiḥ war dd-ittwassnekkar ca,
1CO 15:14 uca mařa Lmasiḥ war dd-ittwassnekkar, xenni baṭeř i teǧa tbarreḥt nneɣ, baṭeř i yeǧa [xenni] l’iman nwem.
1CO 15:15 Xenni neccin nban ɛawed d řechud issxarriqen n AREBBI, minzi neched x AREBBI belli aqa issnekkar-dd Lmasiḥ, waxxa Netta war i-t-i-dd-issnekkar ca.
1CO 15:16 Minzi mařa imettinen war dd-ttᵉtwasnekkaren ca, aqa Lmasiḥ war dd-ittwassnekkar ɛawed.
1CO 15:17 U mařa Lmasiḥ war dd-ittwassnekkar ca, aqa l’iman nwem ixwa, u aqa kenniw ɛad di ddnub nwem,
1CO 15:18 uca ttwahellken uřa d inni ittᵉṭṭṣen di Lmasiḥ [awarni řami mmuten].
1CO 15:19 Mařa tuɣa nessitim di Lmasiḥ di tudart-a waha, aqa aneɣ qaɛ d imcumen n marra iwdan.
1CO 15:20 Maca řexxu umi dd-ittwassnekkar Lmasiḥ zi taddart n imettinen, aqa idweř Netta d Amenzu n yinni iṭṭṣen [deg wenḍeř].
1CO 15:21 U am mammec dd-tusa řmewt zeg ijj n bnadem, ammu uřa d tanukra n imettinen teǧa zeg ijj n Bnadem.
1CO 15:22 Minzi am iwdan marra ad mmten di Adam, ammu ɛawed i ɣa ddaren marra nitni ɛawed di Lmasiḥ.
1CO 15:23 Maca kuř ijj di nnubet nnes: Lmasiḥ tuɣa d Amenzu, xenni awarni as inni iǧan n Lmasiḥ ɣar twasit nnes.
1CO 15:24 Awarni man aya d aneggaru, xmi ɣa iwc tageldit i AREBBI, Babatneɣ, xmi ɣa issebḍeř marra řeḥkamet d marra ṣṣulṭa d marra jjehd.
1CO 15:25 Maɣar Netta ad iḥkem am Ujeǧid ař d ɣa yegg marra řɛedyan nnes sadu iḍaren nnes.
1CO 15:26 Řeɛdu aneggaru wenni i ɣa ittwabeḍřen, aqa-tt d řmewt.
1CO 15:27 Minzi aqa igga marra sadu iḍaren nnes. Maca xmi ittwanna: “Aqa marra timesřayn ttwaggent sadu Netta!”, aqa iban [mliḥ] belli wenni d as iggin marra sadu Netta, aqa Netta simant nnes war iǧi sadu Netta.
1CO 15:28 Uca řami d as ittwagg marra sadu i Netta, řexdenni Mmis [n AREBBI] ɛawed ad ittwagg sadu i Wenni umi d as iggin marra sadu i Netta, ḥima ad yiři AREBBI d marra di min di mma.
1CO 15:29 Niɣ, min ɣa ggen inni ittwassɣeḍṣen di ṭṭweɛ n imettinen mařa war dd-tᵉttwassnekkaren imettinen ɛemmarṣ? Maɣar mayemmi ɣa ttwassɣeḍṣen ɛad di ṭṭweɛ n imettinen?
1CO 15:30 U mayemmi neccin [ɛad] di lxaṭar di kuř tsaɛɛet?
1CO 15:31 [A] aytma, ttjaǧiɣ ɣar usemɣar nwem i iǧan ɣari di Siditneɣ Yasuɛ Lmasiḥ, aqa ttmettiɣ kuř ass.
1CO 15:32 U mammec, mařa ttwamenḍareɣ zzat i řewḥuc di Afasus x řeḥsab bnadem, man řefḍeř i ɣari, mařa imettinen war dd-ttwassnekkaren ca? Ejj aneɣ ad necc ad nsu, minzi tiwecca ad nemmet.
1CO 15:33 War ttɣeccim yixef nwem: řhard war iḥřin tjeyyaḥ nneyyet taṣebḥant.
1CO 15:34 Sfaqem uřawen nwem [ɣar] tsegda, war xeṭṭim ca. Minzi ca [zzaywem] war ɣarsen teǧi tussna n AREBBI. I řeḥya nwem qqareɣ tt.
1CO 15:35 Ad inin ca zzaywem: “Mammec i dd ɣa ttwassnekkaren imettinen? S man arrimet i dd ɣa yasen?”
1CO 15:36 [A] afɣuř, min tzarrɛed cek, war iddar mařa war immut [qbeř].
1CO 15:37 Min tzarrɛed, war teǧi ca d arrimet nni i ɣa tiři, maca tzarrɛed taɛeqqact iɣeryen n yirden niɣ n imendi niɣ n ca n zzariɛet nneɣni.
1CO 15:38 Maca AREBBI iwca as arrimet am mammec ixs Netta, i kuř ddab n zzariɛet iwca as arrimet ɛlaḥsab ṭṭbiɛet n kuř icten zzaysent.
1CO 15:39 War iǧi marra arrimet [d arrimet] d ijj, maca tenni n iwdan immsebḍa x tenni n řmař, u tenni n ijḍaḍ wenneɣni n tenni n iseřman.
1CO 15:40 Aqa din arrimat n ujenna d arrimat n temmurt, maca aɛuǧi n yinni n ujenna wenneɣni n yinni n temmurt.
1CO 15:41 Ijjen d aɛuǧi n tfuct, wenneɣni d aɛuǧi n uyur, u wenneɣni d aɛuǧi n itřan, uca aɛuǧi n ijj n itři iɛeddun x uɛuǧi n ijj n itři nneɣni.
1CO 15:42 Ammu xenni i ɣa tiři Tudart i yinni mmuten. Aqa ttwazarrɛen nitni di min iɣeccen uca ttwassnekkaren-dd břa řɣecc.
1CO 15:43 Aqa ttwazarrɛen nitni di min war icniɛen, [maca] ad dd-ttwassnekkaren deg uɛuǧi. Nitni ttwazarrɛen deg weḍɛaf, [maca] ad dd-ttwassnekkaren di jjehd.
1CO 15:44 Aqa ttwazarrɛen nitni s ict n arrimet n ṭṭbiɛet uca [xenni] ad dd-ittwassnekkar [bnadem] s ict n arrimet tarruḥanit. Aqa din arrimet n ṭṭbiɛet, ammu aqa din uřa d arrimet n Arruḥ.
1CO 15:45 Ammu i tura ɛawed: “Aryaz amezwaru Adam, [idweř] d řeɛmar iddaren!”, Adam aneggaru idweř d Arruḥ i itticen Tudart.
1CO 15:46 Maca min [iǧan] zi Arruḥ war dd-yusi ca d amezwaru, maca min iǧan n ṭṭbiɛet, xenni awarni man aya min [iǧan] zi Arruḥ.
1CO 15:47 Bnadem amezwaru ikka-dd zeg ucař n temmurt, Bnadem wiss tnayen d SIDI i dd-ikkin zeg ujenna.
1CO 15:48 Am mammec iǧa wenni zeg ucař, ammu i ǧan uřa d nitni zeg ucař, uca am mammec iǧa Wenni n ujenna, ammu i ǧan uřa d inni [n ujenna].
1CO 15:49 Uca am mammec narbu ṣṣifet n wenni ittwaggen zeg ucař, ammu xenni ad narbu ṣṣifet n Wenni iǧan zeg ujenna.
1CO 15:50 [A] aytma inu, ddegga [xseɣ] ad iniɣ: Aqa aysum d idammen war zemmaren ad warten Tageldit n ijenwan, uca min ifennan war iwarret min war ifennin.
1CO 15:51 Xzarem, ad kenniw ssaregbeɣ x ijj n ssirr: aqa aneɣ war nettᵉṭṭeṣ ca marra [s yiḍeṣ n řmewt], maca neccin marra ad nettwabeddeř,
1CO 15:52 deɣya, deg wermac n wabřiwen, ɣar řḥess n usuḍi aneggaru deg uyicc n icarri: imettinen ad dd-ttwassnekkaren ɣar min war ifennin uca neccin ad nettwabeddeř.
1CO 15:53 Minzi min ifennan ittxeṣṣa as ad yarḍ min war ifennin u min ɣa immuten ittxeṣṣa as ad yarḍ min war ittmettin.
1CO 15:54 Uca xmi min ifennan ad yarḍ min war ifennin u min ɣa immuten [ad yarḍ] min war ittmettin, řexdenni ad ikemmeř wawař i ittwarin: “Řmewt aqa tᵉttwaṣarḍ deg řeɣřeb.”
1CO 15:55 “A řmewt, mani iǧa usennan nnem? A řaxart, mani iǧa řeɣřeb nnem?”
1CO 15:56 Aqa asennan n řmewt d ddenb, uca jjehd n ddenb aqa-tt d Ccariɛa.
1CO 15:57 Maca aqadi i AREBBI, wenni d aneɣ iwcin řeɣřeb s Siditneɣ Yasuɛ Lmasiḥ.
1CO 15:58 S uya, [a] aytma iɛizzen, beddem nican u břa anhezzi, arnim řebda di řxedmet n SIDI s ufeyyeḍ, am tessnem belli řxedmet nwem war teǧi baṭeř di SIDI.
1CO 16:1 Zi jjihet n wesmuni [n ṣṣdaqi] i imqeddasen, ggem kenniw ɛawed am mammec ḍebbreɣ i-tt-i-dd di tmesmunin n Galaṭiya.
1CO 16:2 Kuř [ass] amezwar n ssimana kuř ijjen zzaywem ad iḥuz ca n tesɣart di taddart nnes uca ad tt ixemmeř ɛlaḥsab mammec iwesseɛ, ḥima, xmi dd ɣa awḍeɣ, war ibeddi ɛad řexdenni wesmuni [n ṣṣdaqi].
1CO 16:3 Uca xmi dd ɣa awḍeɣ, ad ssekkeɣ inni i ɣa tfarzem kenniw ak-d tebrat, ḥima ad awyen tacrimet [n ṣṣdaqi] nwem ɣar Urcalim.
1CO 16:4 Uca mařa tuɣa icuwwar ad raḥeɣ necc ɛawed [dinni], xenni ad kkaren ad raḥen akidi.
1CO 16:5 Ad ɣarwem dd-aseɣ xmi dd ɣa kkeɣ x Makiduniya. Minzi ad dd-kkeɣ x webrid n Makiduniya,
1CO 16:6 uca mařa izemmar ad qqimeɣ akidwem niɣ ad sseɛduɣ řmecta akidwem, ḥima xenni kenniw tzemmarem ad ayi tessqebbḍem mani ɣa raḥeɣ.
1CO 16:7 Minzi war xseɣ ad kenniw ẓareɣ řexxu am dd xawem i ɣa kkeɣ abrid waha, minzi ssitimeɣ ad qqimeɣ akidwem ca n řweqt, mařa ismeḥ Sidi inu.
1CO 16:8 Maca ad qqimeɣ ɛad di Afasus ař ass n Řɛid n Xemsin n Wussan.
1CO 16:9 Minzi aqa tennurzem ayi-dd tewwart tameqqrant, [maca] aqa din ijj n ubarru n řɛedyan.
1CO 16:10 Mařa yiweḍ-dd Timutiyu ɣarwem, ḥḍam maḥend izemmar ad din yiři jar awem břa tiggʷudi, minzi netta ittegg řxedmet n SIDI am necc.
1CO 16:11 S uya uřa d ijjen ad t isseḥqar, maca qebbḍem t di řehna, ḥima ad ɣari dd-yas, minzi necc ttrajiɣ t ak-d wawmaten.
1CO 16:12 Zi jjihet n tawmat Apullus, [a] awmaten inu, aqa zawgeɣ t aṭṭas, ḥima ad ɣarwem dd-yas ak-d wawmaten, maca netta tuɣa war iɛewweř ad dd-yas řexxu, maca ad dd-yas xmi d as i ɣa isarreḥ řweqt.
1CO 16:13 Ḥḍam, beddem nican di l’iman, ḥezmem s teryast, iřim tmeḥḍem.
1CO 16:14 Jjem marra min tᵉtteggem ad yiři s tayri.
1CO 16:15 Ttzawgeɣ kenniw, [a] aytma, zi jjihet n twacunt n Stifanus, maɣar tessnem aqa aten d [ṣṣabet] tamezwarut n Axaya, u nitni ṭewwɛen ixef nsen i tsexxart di ṭṭweɛ n imqeddasen,
1CO 16:16 aqa ggem ixef nwem sadu ufus n yinni am nitni uca sadu kuř ijjen i ixeddmen akidneɣ u i d [aneɣ] ittɛawanen.
1CO 16:17 Aqa farḥeɣ s twasit n Stifanus d Furtunatus d Axayikus, minzi nitni kemmřen min d ayi ittxeṣṣan daywem,
1CO 16:18 s minzi nitni ssareyyḥen arruḥ inu d wenni nwem. Weqqarem [iryazen] am yina.
1CO 16:19 Marra timesmunin n Asiya ttseǧament-i-dd xawem s řehna. Akwila d Priskilla ak-d tmesmunt i iǧan di taddart nsen ttseǧamen-dd xawem s řehna aṭṭas di Siditneɣ.
1CO 16:20 Ttseǧamen-dd xawem marra awmaten nneɣ s řehna. Ttseǧamem-dd x wayawya s řehna s usudem iqeddsen.
1CO 16:21 Ijj n sřam i ttariɣ s ufus inu, zi Bulus.
1CO 16:22 Mařa ḥed war ittexs Siditneɣ Yasuɛ Lmasiḥ, ad yiři d amenɛuř. Siditneɣ aqa yusa-dd!
1CO 16:23 Arḍa n Siditneɣ Yasuɛ Lmasiḥ ad yiři akidwem.
1CO 16:24 Tayri inu aqa-tt akidwem marra di Lmasiḥ Yasuɛ. Amin.
2CO 1:1 Bulus, rrasul n Yasuɛ Lmasiḥ ɛlaḥsab řxaḍar n AREBBI, d tawmat Timutiyu, i tmesmunt n AREBBI i iǧan di Kurintus u i marra imqeddasen inni iǧan di marra Axaya:
2CO 1:2 Ad kidwem yiři arḍa d řehna n AREBBI, Babatneɣ, u n Siditneɣ Yasuɛ Lmasiḥ.
2CO 1:3 Lbaraka aqa-tt i AREBBI, Babas n Siditneɣ Yasuɛ Lmasiḥ, Babas n arreḥmet d AREBBI n marra afewwej.
2CO 1:4 Netta issfewwaj aneɣ di marra řmeḥnet nneɣ, ḥima uřa d neccin nqedd ad nessfewwej x yinni iǧan di mammec ma teǧa řmeḥnet am neccin, s ufewwej i zi nettwassfewwej zi AREBBI.
2CO 1:5 Minzi amen ifeyyeḍ dayneɣ aweddeb n Lmasiḥ, ammu ifeyyeḍ ɛawed ufewwej nneɣ s Lmasiḥ.
2CO 1:6 Maca ɛawed mařa ḥṣaren aneɣ, aqa nettwaḥsar i ufewwej nwem u i Tudart nwem. U mařa nettwafewwej, aqa d man aya ḥima ad tᵉttwassfewwjem uřa d kenniw, maḥend ad ɣarwem yiři ṣṣabr ařami tzemmarem ɛawed ad teksim aweddeb am neksi uřa d neccin aweddeb.
2CO 1:7 Asitem nneɣ i kenniw imten, minzi nessen mařa tcarrcem deg uweddeb, ad tcarcem uřa deg ufewwej.
2CO 1:8 [A kenniw,] aytmatneɣ, neccin nexs ad tessnem x řmeḥnet i xaneɣ dd-ikkin di Asiya, aqa tekka-dd xaneɣ řmeḥnet sennej x tzemmar nneɣ, ařami ɛřaḥař neqḍeɛ řayas zi tudart nneɣ.
2CO 1:9 Aqa neḥkem x yixef nneɣ s řmewt, ḥima war nettiqqi ca deg ixef nneɣ, maca di AREBBI wenni dd-issnekkaran imettinen.
2CO 1:10 Netta aqa ifekk aneɣ zi řmewt ineqqen uca nettraja ad aneɣ ifekk twařa nneɣni
2CO 1:11 s uɛawen n tẓaǧitin nwem xaneɣ, maḥend ad tiři tawhibt nnes i neccin d lbaraka i waṭṭas, ḥima aṭṭas ad as qadan zi ssibbet nneɣ.
2CO 1:12 Minzi wa d asemɣar nneɣ, cchadet n tnefsect nneɣ, belli aqa aneɣ neggur di ddunect s ṣfa d tazdugi, war iǧi s tiɣit n bnadem, [maca] di arḍa n AREBBI, d amezwaru i kenniw.
2CO 1:13 Minzi war d awem nuri uřa d ict n tmesřact mɣir min tessnem u ad as tfehmem, iwa ssitimeɣ ad tfehmem ař aneggaru,
2CO 1:14 am mammec ɛawed tfehmem zzayneɣ drus belli aqa aneɣ d asemɣar nwem, am mammec uřa d kenniw [d asemɣar] nneɣ deg wass n Siditneɣ Yasuɛ Lmasiḥ.
2CO 1:15 Di řaman-a tuɣa xseɣ ad ɣarwem dd-aseɣ qbeř, ḥima ad ɣarwem yiři arḍa tnayen n tseqqar.
2CO 1:16 Tuɣa xseɣ ad ɣarwem dd-usiɣ [deg webrid] ɣar Makiduniya. Awarni man aya tuɣa xseɣ ad ɣarwem dd-ɛeqbeɣ ɛawed zi Makiduniya, ḥima kenniw ad ayi tessqebbḍem ɣar Yahudiyya.
2CO 1:17 Řami tuɣa ɛewwřeɣ ad ggeɣ man aya, ma qeǧqeɣ? Niɣ min xarṣeɣ ad t ggeɣ, ma xarṣeɣ t ɛlaḥsab aysum [inu], ařami dayes ittwaf ‘Wah, wah!’ uřa d ‘Lla, lla’?
2CO 1:18 Maca AREBBI d amtiqqi i yeǧa, ařami awař nneɣ i kenniw war iǧi ‘Wah!’ uřa d ‘Lla!’
2CO 1:19 Minzi Mmis n AREBBI, Yasuɛ Lmasiḥ, wenni i zi ittwabarreḥ jar awem zzayneɣ, zzayi u zi Silwanus u zi Timutiyu, aqa Netta war iǧi d ‘Wah!’ uřa d ‘Lla!’, maca ‘Wah’ dayes i yeǧa.
2CO 1:20 Minzi marra lwuɛud n AREBBI, aqa aten d ‘Wah!’ dayes, di Lmasiḥ. S uyenni neqqar zzayes ɛawed ‘Amin!’ i uɛuǧi n AREBBI.
2CO 1:21 Maca AREBBI d wenni d aneɣ iḍmen akidwem di Lmasiḥ, [aqa-t d Amedhun], nni i d aneɣ idhen.
2CO 1:22 Igga xaneɣ acemmiɛ nnes uca iwca aneɣ Arruḥ d řɛarbun deg wuřawen nneɣ.
2CO 1:23 Maca necc cehhdeɣ zzat i AREBBI x yixef inu, aqa tuɣa ayi d aḥnin xawem, řami war dd-usiɣ ɣar Kurintus.
2CO 1:24 War iǧi minzi nettṣelleṭ x l’iman nwem, maca neccin d imsexxaren i řefraḥet nwem, minzi zi l’iman tbeddem tmetnem.
2CO 2:1 Degga aqa ggiɣ t deg yixef inu, aqa war ɣarwem dd-ttiseɣ twařa nneɣnit s wecḍan.
2CO 2:2 Minzi mařa zeɛma necc ssffugmeɣ kenniw, wi xenni d ayi ɣa issfarḥen mɣir wenni di ggiɣ afugem?
2CO 2:3 Uriɣ awem-dd man aya, ḥima necc, xmi dd ɣa yawḍeɣ din, war ttwassffugmeɣ ca zeg inni ittxeṣṣa ad zzaysen farḥeɣ. Aqa ttiqqeɣ daywem marra, belli řefraḥet inu, aqa-tt d řefraḥet nwem marra.
2CO 2:4 Minzi uriɣ awem-dd di řmeḥnet temɣar s waṭṭas n imeṭṭawen uřa s wuř yarejfen, war iǧi ḥima ad tffugmem, maca ḥima ad tessnem tayri i ɣari i kenniw s ufeyyeḍ.
2CO 2:5 Maca mařa din wenni issffugmen, netta war d ayi issffugem waha, maca zeg ijj n uɣezdis i kenniw marra, ařami war kenniw ssḍeqřeɣ [ɛad ktar] s wawař-a.
2CO 2:6 Cfa yas i wanita, aqa azyen ameqqran [zzaywem] tuɣa iwebbex i-t.
2CO 2:7 Zi jjihet nneɣni aqa ittxeṣṣa awem řexxu ad as tsamḥem uca ad xas tessfewwjem, ḥima war xas yarenni ufugem ař aneggaru.
2CO 2:8 S uyenni ttzawageɣ kenniw maḥend ad as tesstebbtem tayri nwem i netta.
2CO 2:9 Minzi ɛawed i man aya uriɣ awem-dd, ḥima ad ssneɣ s tidett, ma tᵉttᵉṭṭaɛem di marra.
2CO 2:10 Wenni umi tsamḥem, necc ɛawed ad as samḥeɣ. Minzi x mixef umi d as samḥeɣ, samḥeɣ t di ṭṭweɛ nwem qibač i wudem n Lmasiḥ,
2CO 2:11 ḥima xenni cciṭan war d aneɣ izemmar, minzi nessen ixarriṣen nnes.
2CO 2:12 Řami dd-iwḍeɣ ɣar Truwas s Řexbar Aṣebḥan n Lmasiḥ, tennurzem ayi-dd tewwart s [ufus n] SIDI,
2CO 2:13 [maca] war areyyḥeɣ ca di arruḥ inu, minzi war ufiɣ ca uma Titus. Uca mmsebḍiɣ xasen, uyureɣ ɣar Makiduniya.
2CO 2:14 Maca aqadi i AREBBI, wenni d aneɣ igga ad niři nᵉttban řebda di Lmasiḥ, uca isscan zzayneɣ řefwaḥet n tussna nnes di marra imucan.
2CO 2:15 Minzi neǧa d ict n řefwaḥet icnan i AREBBI di Lmasiḥ jar inni iddaren u jar inni i ɣa ittwahellken.
2CO 2:16 I ineggura aqa aneɣ d řefwaḥet n řmewt i řmewt uca i imezwura d řefwaḥet n tudart i Tudart. Uca man wen d as iqedden i ssuq-a?
2CO 2:17 Aqa neccin war neǧi anect inneɣni inni issfarraɣen awař n AREBBI, maca nessiweř di Lmasiḥ qibač i AREBBI ɛlaḥsab tidett u ɛlaḥsab min iǧan zi AREBBI.
2CO 3:1 Ma ittxeṣṣa aneɣ ad awem nweṣṣa ixef nneɣ [min neɛna] twařa nneɣni? Niɣ neḥdaj, am inneɣni, tibratin n uweṣṣi i kenniw? Niɣ ittxeṣṣa aneɣ ad awem nari ḥima kenniw ad aneɣ tweṣṣam?
2CO 3:2 Aqa kenniw d tabrat nneɣ i yuran deg wuřawen nneɣ, ittwassen u ittwassɣaren zeg iwdan marra.
2CO 3:3 Minzi tessnem, aqa kenniw d tabrat n Lmasiḥ i ittwaggen s tsexxart nneɣ, [tabrat] yuran, war teǧi s ssmex maca s Arruḥ n AREBBI iddaren, war teǧi di teřwiḥin n weẓru, maca di teřwiḥin n wuřawen n weysum.
2CO 3:4 Maɣar ammu i teǧa ttiqqet i ɣarneɣ di Lmasiḥ zzat i AREBBI.
2CO 3:5 War nzemmar ad neḥseb ca n řḥajjet axmi dd-tusa zzayneɣ, maca tizemmar nneɣ tusa-dd zi AREBBI.
2CO 3:6 Netta yarra aneɣ aqa nesdaheǧ ad niři d imsexxaren i Řɛahd n Jdid, war iǧi s tira [s lḥuruf], maca s [tirra n] Arruḥ, minzi tira [s lḥuruf] neqqent, maca Arruḥ isseddar.
2CO 3:7 Maca mařa tuɣa tsexxart n řmewt i ittwaxebcen s tira deg iẓra s wanect uɛuǧi maḥend tarwa n Israil war zemmaren ad sewḍen ɣar wudem n Musa x ssibbet n uɛuǧi n uɣembub nnes, waxxa [aɛuǧi nni] iɛeddun,
2CO 3:8 mecḥař ktar i ɣa tiři tsexxart n Arruḥ deg uɛuǧi?
2CO 3:9 Minzi mařa tasexxart i ineddhen ɣar lḥisab tuɣa-tt s uɛuǧi, mahu ɛad tasexxart i ineddhen ɣar tsegda ad dd-tawi aɛuǧi ař afeyyeḍ.
2CO 3:10 Minzi min ittwassɛuǧen, iban-dd war ittwassɛuǧi ca deg wudem n uɛuǧi-ya i xas iɛuǧen.
2CO 3:11 Minzi mařa min iɛeddun tuɣa ɣares aɛuǧi, mahu min iqqimen ad ɣares yiři uɛuǧi.
2CO 3:12 Ejj aneɣ xenni, maɣar ɣarneɣ asitem am wanita, ad nuyur s teryast,
2CO 3:13 war nᵉttegg ca am Musa, wenni iggin lltam x wudem nnes, maḥend tarwa n Israil war sekkweḍen ca aneggar n min ɣa iɛdun.
2CO 3:14 Maca ixarriṣen nsen ttwassdaraɣřen, minzi ař ass-a ittɣima lltam d ijjen x teɣri n Řɛahd Aqdim břa ma d asen ittwassargeb, aqa [lltam] ittwabḍeř di Lmasiḥ.
2CO 3:15 Ař ass-a, xmi d ɣa ɣaren zeg [idlisen n] Musa, lltam aqa-t x wuř nsen.
2CO 3:16 Maca xmi dd ɣa idweř ḥed zzaysen ɣar SIDI, lltam ad zzayes ittwakkes.
2CO 3:17 Aqa SIDI s Yixef nnes d Arruḥ uca mani iǧa Arruḥ n SIDI, aqa din tiřelli.
2CO 3:18 Maca marra neccin nettwařa aɛuǧi n SIDI s iɣembab war iřeḥḥfen amecnaw di tisit, uca ad nbeddeř zeg uɛuǧi ɣar uɛuǧi ɣar ṣṣifet d icten, am [s uɣembub n] SIDI, Arruḥ.
2CO 4:1 S uyenni tasexxart i d aneɣ ittwaggen war [d aneɣ] tessiḥeř ca, zi ssibbet n arreḥmet i xaneɣ [iǧan].
2CO 4:2 Maca aqa nenḍar timesřayin innufaren isseḥcimen, war neggur ca s teḥraymect. [Ɛawed] war nettẓuwwar ca awař n AREBBI, maca aqa nessargeb ixef nneɣ am narezzem tawwart n tidett i qaɛ tanefsect n iwdan zzat i AREBBI.
2CO 4:3 Maca mařa L’Injil nneɣ ɛad iřeḥḥef, aqa ittřeḥḥaf i yinni i ɣa iweddaren,
2CO 4:4 i yinni issdarɣeř asen arebbi n ddunect-a řeɛqeř nsen, ḥima xenni war xasen tareqq ṭṭya n L’Injil n uɛuǧi n Lmasiḥ wenni iǧan d ṣṣifet n AREBBI.
2CO 4:5 Minzi war nettbarreḥ ca ixef nneɣ, maca Lmasiḥ Yasuɛ, Siditneɣ, maca neccin s ixef nneɣ d imsexxaren nwem di ṭṭweɛ n Yasuɛ.
2CO 4:6 Minzi AREBBI d wenni innan: “Ad tareqq tfawt zi taǧest!”, aqa d wenni issruɣan uřawen nneɣ, ḥima ad aneɣ issarɣ s tussna n uɛuǧi n AREBBI deg wudem n Yasuɛ Lmasiḥ.
2CO 4:7 Maca ɣarneɣ řkenz-a di řeqcuɛ n třaxt, ḥima xenni řemɣaret n jjehd ad tiři n AREBBI, war teǧi zzayneɣ.
2CO 4:8 Maɣar nettwaziyyar di marra, maca war nettwajeyyef, aqa ccaten aneɣ, maca war nettwaḥkem ca,
2CO 4:9 ttdarracen xaneɣ, maca war nettwasmeḥ, aqa nemmenḍar, maca war nettwahellek.
2CO 4:10 Aqa narebbu řmewt n Yasuɛ řebda di arrimet nneɣ, ḥima uřa d Tudart n Yasuɛ ad tᵉttwasseḍhar di arrimet nneɣ.
2CO 4:11 Minzi mařa neccin, inni iddaren, aqa nettwasellem i řmewt di ṭṭweɛ n Yasuɛ, ad tesseḍhar uřa d Tudart n Yasuɛ di arrimet nneɣ ittmettan.
2CO 4:12 Řexxu xenni txeddem řmewt dayneɣ, maca tudart daywem.
2CO 4:13 Am ɣarneɣ Arruḥ d ijj n l’iman - am mammec tura: “Aqa umneɣ, s uya ssiwřeɣ ɛawed!” - aqa nettamen neccin, u s uya nessawař ɛawed
2CO 4:14 uca nessen belli wenni dd-issnekkaren Siditneɣ Yasuɛ, ad aneɣ dd-issnekkar ɛawed ak-d Yasuɛ uca ad aneɣ igg akidwem zzates.
2CO 4:15 Minzi marra timesřayin-a ttwaggent di ṭṭweɛ nwem, ḥima ad yarni arḍa i waṭṭas, uca ad ifeyyeḍ uqadi i uɛuǧi n AREBBI.
2CO 4:16 S uyenni war nxessar ca uřawen, waxxa bnadem nneɣ n barra ittwahellak, aqa bnadem n daxeř iddakkwař d jdid zeg wass ɣar wenneɣni.
2CO 4:17 Waxxa řmeḥnet n řweqt-a ifsusen d řmijař nnes drus waha, ɛad tᵉttawi aneɣ-dd ijj n řqedd n uɛuǧi i war ɣares iǧi uneggar i řebda qaɛ.
2CO 4:18 Maɣar war nfarreḥ ca zi min ittwařan maca zi min war ittwiřin, minzi min ittwařan aqa i yict n řweqt waha, maca min war ittwiřin aqa-t i řebda.
2CO 5:1 Minzi nessen, belli, xmi ɣa tefna taddart nneɣ n temmurt i yeǧan d arrimet, ad ɣarneɣ yiři ijj n řebni n AREBBI i řebda deg ijenwan, ict n taddart war tᵉttwagg ca s ifassen.
2CO 5:2 X man aya i nzehhar u dayneɣ meẓri, ḥima ad narḍ taddart nneɣ tenni iǧan zeg ujenna,
2CO 5:3 meɛlik qaɛ i ɣa niři nyarḍ, war d aneɣ ttifen d iɛeryanen.
2CO 5:4 Maca min ma ɣa nekk ɛad di taddart-a, ad neqqim nzehhar s ddqeř nnes, minzi war nexs ad tt nejj, maca nexs ad tt nyarḍ, ḥima min ifennan ad ittwaṣard zi Tudart.
2CO 5:5 Wenni d aneɣ dd-isswejden i man aya d Netta d AREBBI wenni d aneɣ iwcin Arruḥ nnes d řɛarbun.
2CO 5:6 S uyenni nessen u ɣarneɣ ttiqqet, aqa xenni min ɣa nekk nzeddeɣ di arrimet, ad niři neggʷej x Siditneɣ,
2CO 5:7 minzi s l’iman i neggur, war iǧi s min ittbanen.
2CO 5:8 S uyenni nettiqqa uca dayneɣ meẓri, maḥend ad nesmeḥ di arrimet ḥima ad niři ak-d Siditneɣ.
2CO 5:9 Nettceṭṭar ḥima ad as arḍan, ma neǧa neggʷej x taddart niɣ di taddart.
2CO 5:10 Minzi marra idneɣ ad neḍhar zzat i řkursi n ccreɛ n Lmasiḥ, ḥima kuř ijjen ad iṭṭef di arrimet nnes ɛlaḥsab min igga [s arrimet], tcuni niɣ tuɛeffna.
2CO 5:11 S uyenni, am nessen aqa ittxeṣṣa ad neggʷed zi Siditneɣ, aqa narezzu ad nesseqneɛ iwdan, maca ɣar AREBBI aqa neccin nettwassen ɣares, uca ssitimeɣ aqa nettwassen ɣarwem ɛawed di tnefsect nwem.
2CO 5:12 War nettweṣṣi ca ixef nneɣ twařa nneɣnit, maca ad awem newc lfurṣa i usemɣar dayneɣ zzat i yinni issemɣaran di min ittbanen, war iǧi di min iǧan deg wuř.
2CO 5:13 Minzi mařa tuɣa nᵉttexřef, aqa man aya i AREBBI, mařa tuɣa aneɣ s řeɛqeř, aqa man aya i kenniw.
2CO 5:14 Maɣar tayri n Lmasiḥ tɛarren aneɣ maḥend ad nxarreṣ ammu: [mařa] Ijjen immut deg wemcan n marra, aqa marra mmuten akides.
2CO 5:15 Aqa Netta immut deg wemcan n marra, ḥima inni iddaren, war ddaren ca ɛad i ixef nsen, maca i Wenni immuten d Wenni dd-ittwassnekkaren i nitni.
2CO 5:16 S uya war nessin ca uřa d ijj ɛlaḥsab arrimet. Mařa tuɣa nessen Lmasiḥ di arrimet, řexdenni war ittiři ɛad nessen t ammu řexxu.
2CO 5:17 S uyenni mařa ḥed di Lmasiḥ i iǧa, aqa netta ittwaxřeq-dd jdid. Xenni min iǧan d aqdim iɛdu
2CO 5:18 u marra idweř d jdid s AREBBI, wenni d aneɣ isseṣřeḥ ak-d Yixef nnes s Lmasiḥ uca iwca aneɣ tasexxart n weṣřaḥ.
2CO 5:19 Minzi AREBBI tuɣa isseṣřeḥ ddunect ak-d řemɣaret nnes di Lmasiḥ di mani war d asen iḥsib ca ixeṭṭan nsen uca issars dayneɣ awař n weṣřaḥ.
2CO 5:20 S uya i neǧa d imsekkan n Lmasiḥ, axmi xawem dd-iřaɣa AREBBI zzayneɣ. S uya nettřaɣa neccin deg wemcan n Lmasiḥ: “Ruḥem ad tᵉttwaṣeřḥem ak-d AREBBI!”
2CO 5:21 Maɣar Wenni war issinen ca ddenb, igga i-t d ddenb i kenniw, ḥima ad nedweř d tasegda n AREBBI dayes.
2CO 6:1 Aqa neccin, am imɛacaren [n AREBBI], nzaweg kenniw ammu, ḥima arḍa n AREBBI i tᵉṭṭfem, war daywem ittwassbeṭṭeř ca,
2CO 6:2 minzi inna: “Di řweqt n arḍa sřiɣ ac, uca deg wass n usenjem ɛawneɣ cek!” Xzar, aqa da řexxu d řweqt n arḍa, xzar, aqa da řexxu d ass n usenjem.
2CO 6:3 Mayemmi ɣa tewced ssibbet i ca n yijjen ařami i ɣa inderf? Ittxeṣṣa war din ittiři ca n řɛib di tsexxart nneɣ,
2CO 6:4 maca di marra nettweṣṣa ixef nneɣ am imsexxaren n AREBBI: deg waṭṭas n ṣṣbar, di řemḥayem, di řeɣben, di řeḥbusat,
2CO 6:5 sadu tiyyita, di ssnaseř, deg uɣuwweɣ, di tamara, di ǧyaři břa iḍeṣ, deg [wussan n] uẓummi,
2CO 6:6 di řeṣfayet, di tussna, di ttasiɛ n řxaḍar, di řeḍrafet, di Arruḥ Iqeddsen, di tayri břa nnifaq,
2CO 6:7 s wawař n tidett, di jjehd n AREBBI, s řesnaḥ n tsegda ɣar ufusi d uzeřmaḍ,
2CO 6:8 s uɛuǧi d ddeǧ, s ccenɛet taɛeffant u s ccenɛet taṣebḥant, am iɣeccacen, [waxxa amenni] d imtiqqan,
2CO 6:9 axmi war nettwissen, waxxa nettwassen, axmi nettmetta, u xzar, aqa neddar, axmi nettwaɛaqeb maca war nettmetti ca,
2CO 6:10 axmi neccin neffugem, maca nfarreḥ řebda, axmi nezřeḍ, waxxa nᵉttejjar aṭṭas, axmi war ɣarneɣ ca, waxxa ɣarneɣ kuřci.
2CO 6:11 Aqemmum nneɣ innurzem i kenniw, a Ikurintiyyen, uř nneɣ imɣar aṭṭas.
2CO 6:12 Kenniw war tᵉttwaḥṣarem zzayneɣ, maca tᵉttwaḥṣarem s twacit i iǧan di daxeř nwem.
2CO 6:13 Maca ad kiwem ssiwřeɣ axmi ssawařeɣ ak-d iḥenjiren: Arrem ayi-dd s min dayi tᵉttursem u swessɛem tayri nwem i necc!
2CO 6:14 War ttmunem ca deg uzayřu ak-d lkuffar, maɣar man acrac i ɣar teǧa ɣar tsegda ak-d tuɛeffna, u man tamunt i ɣar teǧa i tfawt ak-d taǧest?
2CO 6:15 Niɣ man arwas i din iǧa jar Lmasiḥ d cciṭan? Niɣ man tasɣart n řmumen ak-d ukafriw?
2CO 6:16 Niɣ man tasɣunt i din jar Zzawect Tameqqrant n AREBBI d [tenni n] ccwaṭen? Aqa kenniw d zzawect n AREBBI iddaren, am mammec inna AREBBI: “Necc ad zedɣeɣ akidsen uca ad uyureɣ jar asen. Necc ad iřiɣ d AREBBI nsen, nitni ad iřin d řgens inu.
2CO 6:17 S uyenni, ffɣem-dd zi řwesṭ nsen, bḍam xasen, iqqar SIDI. War ttḥadam min inegsen, u Necc ad kenniw qebřeɣ.
2CO 6:18 Necc ad awem iřiɣ d Babatwem, kenniw ad ayi tiřim d iḥenjiren d tḥenjirin, iqqar SIDI, wenni d Amzemmar x kuřci.”
2CO 7:1 [A] imɛizzen, ařami ɣarneɣ lwuɛud-a, ejj aneɣ ad nessizdeg ixef nneɣ zi marra řexmej n arrimet u n arruḥ, ejj aneɣ ad nessqeddes ixef nneɣ zi tiggʷudi n AREBBI.
2CO 7:2 Qebřem aneɣ, [kenniw a] aytmatneɣ, uřa d ijj war dayes neggi řɣar, uřa d ijj war t nɣecc, uřa d ijj war zzayes nestenfiɛ.
2CO 7:3 War ssiwřeɣ ḥima ad xawem ḥekmeɣ, min zi izzareɣ nniɣ, aqa kenniw deg wuřawen nneɣ maḥend ad nemmet jmiɛ uca ad neddar jmiɛ.
2CO 7:4 Taryast inu qibač i kenniw temɣar uca asemɣar inu xawem imɣar. Aqa ayi ccureɣ s ufewwej, aqa řefraḥet tfeyyeḍ dayi aṭṭas di kuřci řemḥayem inu.
2CO 7:5 Minzi zeg wami dd-nusa ɣar Makiduniya, war nufi arraḥet i arrimet nneɣ, maca tuɣa nessḥissif zi marra iɣezdisen, zi barra aqa din imcubbecen, zi daxeř aqa din tiggʷudi.
2CO 7:6 Maca AREBBI, wenni issfewwajen x imwaḍɛen, issfewwej-dd xaneɣ s twasit n Titus,
2CO 7:7 war iǧi s twasit nnes waha, maca ɛawed s ufewwej i zi tuɣa ittwassfewwej zzaywem, maɣar issargeb aneɣ x tayri nwem d wecḍan nwem d cḍaret nwem xaneɣ. Umi sřiɣ aya, farḥeɣ aṭṭas.
2CO 7:8 Minzi waxxa ssfugmeɣ kenniw s ict n tebrat, war ndimeɣ ca, waxxa ndimeɣ, maɣar ttwařiɣ aqa tabrat nni tessfugem i kenniw i ict n tsaɛɛet [waha].
2CO 7:9 Maca farḥeɣ aṭṭas, war iǧi řami tᵉttwassfugmem, maca umi afugem nwem yarra kenniw ɣar ttubet, minzi afugem nwem yusa-dd zi AREBBI, ařami uřa d ict n txessart war kenniw třeqqef ca zzayneɣ di ca n tmesřact.
2CO 7:10 Minzi afugem nni iǧan di ṭṭweɛ n AREBBI, ineddeh ɣar ttubet n buḥbeř u ɣar wedwař i Tudart, maca afugem n ddunect ittawi ɣar řmewt.
2CO 7:11 Maca xzar, aqa d man aya imsar, minzi tᵉttwassffugmen di ṭṭweɛ n AREBBI. Mecḥař i kenniw ittejjan n cḍaret d udafeɛ n yixef nwem d warzam n uqemmum d tiggʷudi d tayri d tusmi d uwebbex! Di min di ma iffeɣ-dd aqa kenniw s ixef nwem d imezdagen di tmesřact-a.
2CO 7:12 Min d awem uriɣ, war iǧi x ssibbet n wenni ixeṭṭan niɣ x ssibbet n wenni umi i di ittwagg řɛib, maca ḥima ad tban jar awem cḍaret nwem i neccin zzat i wudem n AREBBI.
2CO 7:13 S uyenni aqa nettwassfewwej u ɣar ufewwej nneɣ aqa nfarreḥ s ufeyyeḍ ktar zi řefraḥet n Titus umi arruḥ nnes ittwassareyyeḥ akidwem marra.
2CO 7:14 Minzi di min di ssemɣareɣ daywem ɣares, aqa war ttwassḥecmeɣ ca, maɣar am d awem nenna tidett kuřci, ammu ɛawed iban-dd, aqa asemɣar nneɣ ɣar Titus ibedd x tidett.
2CO 7:15 Aqa řeḥnunect nnes xawem temmarni aṭṭas umi ittfekkar di ṭṭaɛet nwem marra, aqa tqebřem t s tiggʷudi d tarjijit.
2CO 7:16 Farḥeɣ umi zemmareɣ ad xawem ttecřeɣ di min di mma.
2CO 8:1 Nessargeb i kenniw, aytmatneɣ, arḍa n AREBBI i immewcen i tmesmunin di Makiduniya,
2CO 8:2 maɣar umi xasen dd-ikka uqeǧeb imɣar n řmeḥnet nsen, tfeyyeḍ řefraḥet nsen, u aṭṭas n wagřa n tecrimet nsen iɛdu zzeřḍ nsen imɣaren,
2CO 8:3 minzi cehhdeɣ, aqa ɛlaḥsab jjehd nsen u [ɛad] sennej i jjehd nsen - řami ttexsen s wuř nsen -
2CO 8:4 aqa zawgen aneɣ s jjehd maḥend ad carcen di arḍa n tsexxart n imqeddasen.
2CO 8:5 Uca nitni war ggin min tuɣa nessitim [waha], maca aqa wcin ixef nsen amezwar i Siditneɣ, xenni uřa i neccin ɛlaḥsab min ixs AREBBI,
2CO 8:6 ařami nzaweg Titus, am mammec tuɣa ibda qbeř, ḥima ad ikemmeř ɣarwem uřa d tecrimet-a [n ṣṣdaqi].
2CO 8:7 Maca am mammec tfeyyḍem di marra - di l’iman, deg wawař, di tussna, di marra cḍaret, u di [tewhibt n] tayri nneɣ i ɣarwem iǧan - ittxeṣṣa ad tfeyyḍem ɛawed di tecrimet-a [n ṣṣdaqi].
2CO 8:8 War ttumureɣ kenniw [waha], maca arezzuɣ ad qeǧbeɣ tidett n tayri nwem s cḍaret n imeddukkař nwem [di l’iman].
2CO 8:9 Minzi aqa tessnem arḍa n Siditneɣ Yasuɛ Lmasiḥ, belli idweř d amezřuḍ di ṭṭweɛ nwem, waxxa tuɣa-t s wagřa, ḥima kenniw ad tdewřem d twajjar s zzeřḍ nnes.
2CO 8:10 Ad kenniw weṣṣiɣ mliḥ - minzi man aya i nnfeɛ nwem - maḥend min tebdam ad tenwam deg useggʷas iɛdun, ad t teggem ɛawed.
2CO 8:11 Kemmřem řexxu s tmegga min tuɣa tenwam, kemmřem s tmegga min tuɣa kenniw tᵉmmeẓrem ad t teggem ɛlaḥsab min iǧan ɣarwem.
2CO 8:12 Maca mařa din meẓri, aqa ittwajeb ɛlaḥsab min ɣares, war iǧi ɛlaḥsab min war ɣares iǧi.
2CO 8:13 Minzi war ittřiq ḥima ad din tiři řefsaset i inneɣni u ad xawem tiři řmeḥnet,
2CO 8:14 maca ḥḍam ad tiwḍem ɣar řmizan di řweqt-a, uca ejj afeyyeḍ nwem ad iɛemmar řeɣben nsen di řweqt-a, ařami afeyyeḍ nsen di man aya ad iɛemmer řeɣben nwem, ḥima xenni ad yiři řmizan,
2CO 8:15 am mammec tura: “Wenni issmunen aṭṭas, war d as iceṭṭ ca, d wenni tuɣa iyarrwen drus, war dayes iqqim řexṣeṣ.”
2CO 8:16 Maca aqadi i AREBBI wenni iggin cḍaret-a xawem deg wuř n Titus,
2CO 8:17 minzi iqbeř tutra nneɣ uca, am tuɣa dayes amnus [xawem], iṭṭewweɛ maḥend ad ɣarwem dd-yas.
2CO 8:18 Uca nessekk-dd akides ɛawed umatneɣ wenni ɣar iǧa uweqqar di L’Injil di marra timesmunin,
2CO 8:19 wenni ittwafarzen zi ssibbet-a s jjehd zi tmesmunin maḥend ad yuyur akidneɣ ak-d tecrimet-a n ṣṣdaqi i ittwaggen s tsexxart nneɣ i uɛuǧi n AREBBI u i ucejjeɛ i neccin.
2CO 8:20 Maca nḥeṭṭa maḥend war d aneɣ iḍeǧem ḥed mařa nseyyar tacrimet-a n [ṣṣdaqi] ifeyyḍen,
2CO 8:21 ḥima min d aneɣ icqan ad iɛdu mliḥ, war iǧi waha qibač i AREBBI maca ɛawed zzat i iwdan.
2CO 8:22 Nessekk ɛawed akidsen umatneɣ, wenni d aneɣ isscanen řebda deg waṭṭas n tmesřayin, aqa netta ittceṭṭar, maca řexxu ittceṭṭar ktar minzi netta ittcař xawem aṭṭas.
2CO 8:23 Mařa xenni Titus d amɛacar inu d umɛawen inu jar awem, u mařa xenni aytmatneɣ nneɣni aqa aten d rrusul n tmesmunin n uɛuǧi n Lmasiḥ,
2CO 8:24 ejj xenni taqeǧebt n tayri nwem u n usemɣar nneɣ daywen zi jjihet n tmesřayin-a ad teffeɣ ɣar barra zzat i marra tmesmunin.
2CO 9:1 Minzi ḥesbeɣ belli nhřa ma uriɣ awem-dd x twiza i imqeddasen,
2CO 9:2 minzi ssneɣ nneyyet nwem iṣebḥen mixef xawem ssemɣareɣ jar inni n Makiduniya, belli Axaya tuɣa tewjed zeg useggʷas iɛdun, uca cḍaret nwem aqa tesfaq azyen ameqqran.
2CO 9:3 Maca ssekkeɣ-dd awmaten, maḥend asemɣar nneɣ daywem war ittiři ca baṭeř di tmesřact-a, ḥima ad tiřim tḥezzmem am mammec nniɣ,
2CO 9:4 ḥima, xmi kidi i dd ɣa yasen Imakiduniyyen uca ad kenniw afen war tḥezzmem, neccin - maḥend war qqareɣ ca ‘kenniw’ - war nɣeṭṭer zeg usemɣar i [zzaywem] nessemɣar.
2CO 9:5 S uyenni ggiɣ ad ttareɣ awmaten nni, maḥend ad ɣarwem dd-asen d amezwaru uca ad ssewjden qbeř lbaraka [n ṣṣdaqi] tinni x ittwanna qbeř i kenniw, aqa ittxeṣṣa ad tiři [ṣṣedqet nni] ɣar ufus am yict n lbaraka, war iǧi axmi tt-i-dd-kksen zi teřmect nwem s ṭṭmeɛ.
2CO 9:6 Maca [snem] ddegga: “Wenni i ɣa izarɛen s tceṭṭart, ad imjar s taceṭṭart, uca wenni i ɣa izarɛen s tecrimet, ad imjar ɛawed s tecrimet.”
2CO 9:7 Ad igg kuř ijjen am mammec inwa deg wuř nnes, war iǧi s imeṭṭawen niɣ s uɣiř, minzi AREBBI ittexs wenni itticen s řefraḥet.
2CO 9:8 Minzi AREBBI aqa izemmar ad awem iwc kuř arḍa s ufeyyeḍ, ḥima řebda u di marra ad ɣarwem yiři min teḥdajem uca ad tarnim aṭṭas di marra řxedmet iṣebḥen,
2CO 9:9 am mammec tura: “Aqa ibeṭṭa, iwca i imezřaḍ, tasegda nnes tᵉttɣima i řebda.”
2CO 9:10 Maɣar wenni itticen zzariɛet i wenni izarɛen uřa d aɣrum i macca, ad awem iwc zzariɛet nwem, ad yarni dayes uca ad issegma řɣiǧet n tsegda nwem,
2CO 9:11 maḥend ad tiřim ttejjarem di marra i marra tacrimet nni i ɣa issegman aqadi i AREBBI s ufus nneɣ.
2CO 9:12 Minzi řxedmet n tsexxart tanita war teǧi waha di ṭṭweɛ n min ineqṣen i imqeddasen, maca tᵉttawi ɛawed ɣar waṭṭas n uqadi i AREBBI.
2CO 9:13 Minzi s tqeǧebt n tsexxart-a, aqa ssemɣaran di AREBBI minzi temmarsem ixef nwem i cchadet n Řexbar Aṣebḥan n Lmasiḥ, u minzi tcarcem s tecrimet akidsen u ak-d marra.
2CO 9:14 Nitni ad dd-qarrben [ɣar AREBBI] s tẓaǧitin i kenniw, s tayri aṭṭas x ssibbet n ufeyyeḍ n arḍa n AREBBI nni xawem iǧan.
2CO 9:15 Tqad as i AREBBI x tewhibt nnes i war nzemmar ad zzayes nenṭeq.
2CO 10:1 Maca necc Bulus simant inu ttzawageɣ kenniw s temhint d uwaḍeɛ n Lmasiḥ, necc d wenni iǧan d asexxay xmi ḥḍareɣ, maca xmi ɣa ɣabeɣ aqa ayi s teryast,
2CO 10:2 aqa ttzawageɣ kenniw, xmi ɣarwem dd ɣa yaseɣ, nhřa ma ad ttwaḥṣareɣ maḥend ad mmɛarriɣ - s teryast nni ḥessbeɣ aqa-tt ɣari - ak-d iwdan nni iḥessben aqa neccin neddar di [ddnub nneɣ n] arrimet.
2CO 10:3 Minzi waxxa neggur deg weysum, war nettmenɣi ca ɛlaḥsab aysum,
2CO 10:4 s minzi řesnaḥ n umenɣi nneɣ war ǧin zeg weysum, maca ccuren s jjehd n AREBBI, u zzayes i ntarra lburjat iɣewwɣen sadu afus nneɣ.
2CO 10:5 Nᵉttreẓẓa ixarriṣen d marra řuɛřa igeɛɛden x tussna n AREBBI, uca ad nḥebbes marra array i ṭṭaɛet n Lmasiḥ.
2CO 10:6 Uca nekkar maḥend ad nwebbex inni war ittᵉṭṭiɛen, xmi ɣa tiři ṭṭaɛet nwem tekmeř.
2CO 10:7 Ma txezzarem ɣar tmesřayin s wudem? Mařa ittiqq ḥed deg ixef nnes belli netta n Lmasiḥ, ittxeṣṣa ad ixarreṣ ɛawed, belli am netta n Lmasiḥ, amenni ɛawed neccin n Lmasiḥ i neǧa.
2CO 10:8 Meɛlik necc mařa ssemɣareɣ s cwayt n ufeyyeḍ ktar di ṣṣulṭa nneɣ tenni d ayi iwca Siditneɣ, ad yiři nehřa ma ad seḍḥiɣ, maɣar Netta iwca aneɣ tt i řebni nwem, war iǧi i wareddeǧ nwem,
2CO 10:9 maca ssbeɛɛdeɣ aya, ḥima war ittɣiř i ca n ijj aqa xseɣ ad kenniw ssiggʷedeɣ s tebrat [inu].
2CO 10:10 Minzi aqa din inni iqqaren: “Tibratin [nnes] qesḥent jehdent, maca zi jjihet n arrimet iheyyef, uca awařen nnes ttwasseḥqaren.”
2CO 10:11 Wenni issawařen ammu ejj i-t ad iɛqeř, aqa, am mammec neǧa neccin deg wawař s tebratin mařa war neḥḍar, ammu i neǧa s tmegga nneɣ xmi ɣa neḥḍar.
2CO 10:12 Minzi war nezɛim ca ad neḥseb niɣ ad nessemqudda ixef nneɣ ak-d ca n yinni issemɣaran ixef nsen, maɣar umi ɛbaren nitni ixef nsen s yixef nsen, aqa nitni war fhimen [walu].
2CO 10:13 Maca neccin war nessemɣari ca barra i řeɛbar n tesɣart nneɣ, maca ɛlaḥsab řeɛbar n tesɣart i d aneɣ iwca AREBBI, ḥima ad ɣarwem dd-naweḍ.
2CO 10:14 Minzi war iǧi am mammec war ɣarwem dd-niweḍ, minzi nesswiẓẓeḍ ixef nneɣ ɣarwem uca niweḍ-dd ɣarwem s Řexbar Aṣebḥan n Lmasiḥ.
2CO 10:15 Aqa war nessemɣar ca am nekka sennej i řeɛbar n tesɣart nneɣ, mani xedmen nneɣni, maca nessitim, umi imeqqar l’iman nwem, ad nettwawesseɛ aṭṭas zzaywem ɛlaḥsab řeɛbar n tesɣart nneɣ,
2CO 10:16 ḥima ad nbarreḥ s Řexbar Aṣebḥan uřa deg imucan aɣirin xawem, ḥima war nessemɣari ca x řeɛbar n tesɣart n inneɣni, x řeɛbar ař mani iwḍen nitni.
2CO 10:17 Maca wi ixsen ad issemɣar, ejj i-t ad issemɣar di SIDI.
2CO 10:18 S minzi war iǧi wenni iweṣṣan x yixef nnes, maca wenni xas iweṣṣa SIDI, aqa d wenni ittwafen d amqeǧeb.
2CO 11:1 Ttzawgeɣ akidi teṣbarem cwayt, am yijj n ubuhaři i ssawařeɣ, iwa ḥemřem ayi.
2CO 11:2 Minzi ceṭṭareɣ xawem s ict n cḍaret n AREBBI, minzi xeḍbeɣ kenniw i yijj n Weryaz, maḥend ad kenniw ssqarrbeɣ am yict n teɛzarect tizdig i Lmasiḥ.
2CO 11:3 Maca ttᵉggʷedeɣ, am mammec iɣwa ufiɣar Ḥawwa s teḥraymect nnes, amenni [ɛawed] i ɣa ttwaɣwan ixarriṣen nwem zi řeṣfayet n wecḍar i Lmasiḥ.
2CO 11:4 Minzi mařa yusa-dd ḥed ittbarreḥ awem s yijj n Yasuɛ nneɣni x wenni x ttbarrḥeɣ necc, niɣ mařa tqebřem ijj n arruḥ nneɣni wenni war teqbiřem ca, niɣ ijj n řexbar aṣebḥan nneɣni wenni war tᵉṭṭifem ca, ad t teksim deɣya.
2CO 11:5 Waxxa amenni necc ḥessbeɣ ixef inu war ǧiɣ qell i rrusul [nni] ‘imɣaren aṭṭas’.
2CO 11:6 Waxxa war zemmareɣ i wawař, maca i tussna zemmareɣ, minzi tuɣa aneɣ jar awem s bṭayṭay zi marra iɣezdisen.
2CO 11:7 Niɣ xḍiɣ umi tuɣa sswaḍɛeɣ ixef inu, ḥima kenniw ad ttwassuɛřam, am d awem barrḥeɣ s Řexbar Aṣebḥan s břa?
2CO 11:8 Aqa ‘kecḍeɣ’ tmesmunin nneɣni am xasent ṭṭfeɣ taxřiṣet, ḥima ad sexxareɣ i kenniw.
2CO 11:9 Uca umi tuɣa ḥḍareɣ akidwem uca tuɣa dayi řexṣeṣ, war bessřeɣ uřa x ḥed zzaywem, maca min d ayi ixeṣṣen, ɛemmaren t wawmaten inni dd yusin zi Makiduniya. Necc ḥḍiɣ ixef inu di marra, maḥend war xawem ttbessřeɣ, uca ammu i ɣa qqimeɣ ḥḍiɣ ixef inu.
2CO 11:10 Tidett n Lmasiḥ aqa-t dayi, aqa asemɣar-a war d ayi imenneɛ di jjwayeḥ n Axaya.
2CO 11:11 Mayemmi? Ma minzi war kenniw ttexseɣ? AREBBI issen.
2CO 11:12 Maca min tteggeɣ, ad qqimeɣ tteggeɣ t xenni, ḥima ad kkseɣ tizi n yinni yarezzun lfurṣa, maḥend nitni, di min di ssemɣaran, ad banen am neccin.
2CO 11:13 Minzi nitni d rrusul issxarriqen d ixeddamen icemmaten inni itteggen ixef nsen axmi d rrusul n Lmasiḥ.
2CO 11:14 Man aya war kenniw ittejji ad tettbehtem, minzi uřa d cciṭan ittegg ixef nnes axmi netta d lmalak n tfawt.
2CO 11:15 Waxxa ammu war teǧi d ca n řḥajjet, mařa ttarran ɛawed imsexxaren nnes ixef nsen d imsexxaren n tsegda, inni taneggarut nsen ad tiři ɛlaḥsab řexdayem nsen.
2CO 11:16 Qqareɣ i umur nneɣni, uřa d ijjen ad as ittɣiř aqa ayi d abuhaři, maca mařa war iǧi amenni, ḥesbem ayi d abuhaři maḥend xenni ɛawed necc ad ssemɣareɣ cwayt.
2CO 11:17 Min ssawařeɣ, war t qqareɣ zi Siditneɣ, maca ggiɣ t s tubbuheřya maḥend ad ufiɣ zeɛma lfurṣa i usemɣar.
2CO 11:18 Umi din aṭṭas n inni issemɣaran ɛlaḥsab aysum, uřa d necc ggur ad ssemɣareɣ.
2CO 11:19 Minzi kenniw tarḍam ad tesřem i ibuhařiyyen waxxa kenniw d imiɣisen i teǧam.
2CO 11:20 Aqa tᵉmmarsem ixef nwem i ḥed i ittarran kenniw d isemɣan, wenni kenniw itteffzen, wenni ittekksen awem min ɣarwem, u wenni xawem issuɛřan [ixef nnes] d wenni kenniw issmeddarḍaren.
2CO 11:21 Ssawařeɣ axmi ttseḍḥiɣ, axmi neḍɛef zi ssibbet n tiɣit war iǧin: marra min [xef] zeɛɛmen nitni [ad ssemɣaren], necc ɛawed zeɛɛmeɣ [ad ssemɣareɣ].
2CO 11:22 Ma nitni d Iɛibraniyyen? Uřa d necc. Ma nitni d Israiliyyen? Uřa d necc. Ma nitni d zzariɛet n Ibrahim? Uřa d necc.
2CO 11:23 Ma nitni d imsexxaren n Lmasiḥ, necc ɛad mahu, waxxa necc ssawařeɣ am wenni ittxeřfen: necc ksiɣ tamara mahu, cciɣ tiyyita ktar zzaysen, tuɣa ayi di řeḥbes aṭṭas n imuren ktar zzaysen uca ẓriɣ řmewt aṭṭas n twařawin.
2CO 11:24 Wtin ayi Wudayen xemsa n twařawin [s urekkuḍ] s arebɛin n tiyyita qell ict,
2CO 11:25 třata n imuren wtin ayi s weɛmud, ict n twařa ḥejjaren ayi, třata n twařatin yarreẓ zzayi uɣarrabu, ǧiřet d uziř d aqettus tuɣa ayi di řbuɣaz n řebḥar břa tɣarrabut.
2CO 11:26 Umi d ayi tuɣa deg webrid aṭṭas n twařawin tuɣa ayi di lxaṭar n iɣezran, di lxaṭar n iceffaren, di lxaṭar n yinni n řgens inu, di lxaṭar n yinni zi řegnus nneɣni, di lxaṭar di tendint, di lxaṭar di řexřa, di lxaṭar x řebḥar, di lxaṭar s wawmaten issxarriqen,
2CO 11:27 [di lxaṭar] di řxedmet, di tamara, umi dayi tuɣa di ǧyaři břa iḍeṣ aṭṭas n twařawin, di řaẓ d ufadi, deg uẓummi aṭṭas, umi dayi tuɣa di tesmeḍ d tuɛaryent,
2CO 11:28 uca ɛad war ssiwřeɣ ca x waṭṭas n tmesřayin nneɣni, niɣ x řhemm inu n kuř ass x tmesmunin uřa x wemnus nni xafi i marra timesmunin.
2CO 11:29 Mařa iḍɛef ḥed, ma war ttiřiɣ uřa d necc ḍeɛfeɣ? Mařa ixeyyeq ḥed zi ca n unedref, ma necc war cemmḍeɣ?
2CO 11:30 Mařa ittxeṣṣa ad ittwassemɣar, ad ssemɣareɣ di tuḍɛeft inu.
2CO 11:31 AREBBI, Babas n Siditneɣ Yasuɛ Lmasiḥ - wenni ittwabarken i řebda qaɛ - issen aqa necc war ssxarriqeɣ ca.
2CO 11:32 Řqebṭan n řɛeskar n ujeǧid Aritas di Dimacq tuɣa iḥeṭṭa tandint n Idimacqiyyen, yarezzu ad ayi iṭṭef,
2CO 11:33 [maca] ssekken ayi-dd zeg ijj n řkazi, ssehwan ayi-dd zi řḥiḍ deg ijj n uqbub, arewřeɣ zeg ifassen nnes.
2CO 12:1 Mařa ittxeṣṣa ad din yiři usemɣar, waxxa man aya war ineffeɛ ca, meɛlik ufiɣ ad iwḍeɣ necc ɣar iweḥḥan d isargaben n Siditneɣ.
2CO 12:2 Aqa ssneɣ ijj n bnadem di Lmasiḥ, tuɣa ktar zeg arbeɛṭac n iseggʷusa zeg wami, ma tuɣa di arrimet niɣ barra i arrimet, war ssineɣ ca, AREBBI issen! [Bnadem] nni immeksi ɣar ujenna wiss třata.
2CO 12:3 Uca ssneɣ bnadem-a, ma tuɣa di arrimet niɣ břa arrimet, war ssineɣ ca, AREBBI issen.
2CO 12:4 [Bnadem] nni immeksi ɣar jjennet mani isřa awařen nni war izemmar ad ttwaneṭqen, inni war iḥeǧřen i bnadem ad ten inṭeq.
2CO 12:5 Zeg bnadem nni ad ssemɣareɣ, maca war ssemɣariɣ ca deg ixef inu, mɣir deg weḍɛaf inu.
2CO 12:6 Maca mařa xseɣ ad ssemɣareɣ, war ttiřiɣ d abuhaři, minzi ad iniɣ tidett. Maca ad t jjeɣ ḥima uřa d ijj war xafi ittxarraṣ mammec ǧiɣ sennej min zzayi iẓra niɣ sennej min zzayi isřa.
2CO 12:7 Ḥima war ssgiɛɛdeɣ ca ixef inu zi ssibbet n ṭṭbiɛet yuɛřan n isargaben [nni], immewc ayi ijj n usennan deg weysum [n arrimet], aqa-t ijj n lmalak n cciṭan i d ayi iccaten s řpuniyyat maḥend war ttesgeɛɛideɣ ca ixef inu.
2CO 12:8 Třata n twařawin ttareɣ Sidi inu, maḥend ad t xafi isseggʷej,
2CO 12:9 [maca] Netta inna ayi: “Aqa arḍa inu icfa, minzi jjehd inu ittwakemmeř di tuḍɛeft!” S uyenni aqa mliḥ mařa ssemɣareɣ di tuḍɛeft inu, ḥima ad xafi yarsa jjehd n Lmasiḥ.
2CO 12:10 S uyenni arḍiɣ s tuḍɛeft, s řefḍiḥet, di řeɣben, deg udarrec, di řeḥṣaret di ṭṭweɛ n Lmasiḥ, minzi xmi ttiřiɣ ḍeɛfeɣ, řexdenni ttiřiɣ jehhdeɣ.
2CO 12:11 Xzar, dewřeɣ d abuhaři umi ggiɣ ad ssemɣareɣ deg yixef inu, [maca] kenniw teḥṣarem ayi ɣares. Minzi tuɣa ittxeṣṣa i kenniw ad ayi tqeddarem, aqa war ǧiɣ qell uřa deg ict n řḥajjet zi rrusul nni ‘imɣaren aṭṭas’, waxxa necc d walu.
2CO 12:12 Ggiɣ jar awem řeɛřamat n rrasul s marra ṣṣbar, s tmegga ijjehden, s lmuɛjizat u s řeɛjayeb.
2CO 12:13 Maɣar min di tdewřem ɣar ḍeffar x tmesmunin inneɣni, mɣir di min di necc war xawem bessřeɣ waha? Samḥem ayi x řfarz-a!
2CO 12:14 Xzar, řexxu d twařa wiss třata aqa ayi wejdeɣ ḥima ad ɣarwem dd-aseɣ uca war xawem ttbessiřeɣ, minzi war arezzuɣ min nwem, maca [arezzuɣ] xawem kenniw. Minzi war dd-tusi i iḥenjiren ad xemmřen řeknuz i lwalidin nsen, maca lwalidin i iḥenjiren nsen.
2CO 12:15 Wejdeɣ s řefraḥet ad xeǧṣeɣ řeḥsab marra, u ad sebbřeɣ ixef inu di ṭṭweɛ n řeɛmur nwem, ɛad mařa ṭṭfeɣ zzaywem tayri qell mařa wciɣ awem tayri s waṭṭas.
2CO 12:16 Maca ad taɣ, waxxa necc war xawem ttbessiřeɣ, aqa ṭṭfeɣ kenniw s teḥraymect am yijj n weryaz aqeddac?
2CO 12:17 Niɣ ad taɣ meẓreɣ di ca zzaywem s ca n ijj nneɣni i tuɣa ɣarwem dd-ssekkeɣ?
2CO 12:18 Xmi ttareɣ Titus u ssekkeɣ-dd akides tawmat, ma yarzu Titus ca zzaywem [di tizi nnes]? Ma war nuyur ca s Arruḥ d ijjen d iṣuraf d ijjen?
2CO 12:19 Ma ittɣiř awem ɛawed belli neccin nesřeqqa x yixef nneɣ zzaywem? Aqa qibač i AREBBI di Lmasiḥ i nessawař uca man aya marra, [a] imɛizzen inu, di ṭṭweɛ n řebni nwem.
2CO 12:20 Minzi aqa tteggʷedeɣ, xmi dd ɣa yawḍeɣ ɣarwem, ad taɣ war kenniw ttifeɣ ca am mammec xseɣ, uřa war d ayi tᵉttifem ca am mammec texsem kenniw, balak ad iřin imcubbecen, řeḥsed, tafqeḥt, taɣennant, taxbarject, axewwej, nnfaxet uřa d ixarwiḍen,
2CO 12:21 xmi dd ɣa yawḍeɣ ɣarwem twařa nneɣni, ad taɣ AREBBI ad ayi isswaḍeɛ uca ad ceḍneɣ x waṭṭas n yinni ixḍan, war tuben ca zi řexmej d farq-ccɣeř d ufucceḥ i ggin.
2CO 13:1 Aqa ta d twařa wiss třata ad ɣarwem dd-aseɣ. “X uqemmum n tnayen niɣ třata n řechud ad ittwaḍmen marra wawař!”
2CO 13:2 Nniɣ tt qbeř uca ad awem tt iniɣ qbeř ɛawed, axmi tt nniɣ řami d ayi tuɣa akidwem wiss martayen, uca ɛawed řexxu, umi ɣabeɣ, ttariɣ tt i yinni ixḍan u i marra inneɣni, aqa, mařa usiɣ-dd twařa nneɣnit, war areḥḥmeɣ ca.
2CO 13:3 Minzi kenniw tarezzum lburhan belli aqa Lmasiḥ i d ayi issawařen, wenni war iḍɛifen daywem, maca aqa ijhed daywem.
2CO 13:4 Waxxa Netta ittwaṣelleb di tuḍɛeft, aqa iddar s jjehd n AREBBI. Uřa d neccin aqa neḍɛef akides, maca ad kis neddar zi jjehd n AREBBI i daywem iǧan.
2CO 13:5 Qeǧbem ixef nwem, ma aqa kenniw tᵉttbeddam di l’iman, arzum řeɛmur nwem. Niɣ war tessinem ca belli Yasuɛ Lmasiḥ aqa-t daywem, u mařa war iǧi amenni, aqa kenniw temmenḍarem?
2CO 13:6 Maca ssitimeɣ ad tessnem, belli war nemmenḍar.
2CO 13:7 Ttᵉttareɣ AREBBI, maḥend war daywem tᵉttwif uřa d ict n řḥajjet d taɛeffant, ḥima ad dd-tban tqeǧebt nneɣ uca kenniw tᵉtteggem min iǧan d aṣebḥan, waxxa neccin nban axmi nᵉmmenḍar.
2CO 13:8 Minzi neccin war nzemmar walu ḍidd i tidett, maca i tidett wah.
2CO 13:9 Minzi neccin nfarreḥ, řami neḍɛef u kenniw tjehdem. Uca nettẓaǧa ɛawed ad tiřim tkemmřem.
2CO 13:10 S uyenni ttariɣ [awem-dd] man aya am ɣabeɣ, maḥend, xmi dd ɣa yaseɣ, ittxeṣṣa war tteqsiḥeɣ ca ɛlaḥsab ṣṣulṭa i d ayi iwca Sidi inu i řebni, war iǧi i wareddeǧ.
2CO 13:11 Zi ssa d tsawent, [a] aytma, iřim tfarrḥem d tkemmřem, iřim tᵉttfewwjem, xarrṣem s yijj n uxarreṣ, uca jjem ad din tiři řhudnet jar awem, [xenni] ad kiwem yiři AREBBI n tayri d řehna.
2CO 13:12 Seǧmem ijjen x wenneɣni s řehna s usudem iqeddsen.
2CO 13:13 Marra imqeddasen ttseǧamen xawem s řehna.
2CO 13:14 Řehna n Siditneɣ Yasuɛ Lmasiḥ d tayri n AREBBI d tmunt n Arruḥ Iqeddsen ad iřin akidwem marra. Amin.
GAL 1:1 Bulus, rrasul - war iǧi zeg iwdan uřa s [řxaḍar n] ijj n bnadem, maca s Yasuɛ Lmasiḥ, u s AREBBI, Babas, wenni i-t-i-dd-issnekkaren zi taddart n imettinen -
GAL 1:2 u marra awmaten inni iǧan akidi, i tmesmunin n Galaṭiya:
GAL 1:3 Arḍa d řehna ad xawem iřin zi AREBBI, Babatneɣ, u zi Siditneɣ Yasuɛ Lmasiḥ,
GAL 1:4 wenni iwcin Ixef nnes x ddnub nneɣ, ḥima ad aneɣ ifekk zi ddunect-a taɛeffant am mammec tt ixs AREBBI, Babatneɣ.
GAL 1:5 I Netta umi i ɣar iǧa uɛuǧi i řebda qaɛ. Amin.
GAL 1:6 Ttbehteɣ umi tsemḥem ammu deɣya di Lmasiḥ, wenni d awem dd-iřaɣan s arḍa nnes. [Tᵉttexsem ad tdewřen] ɣar ijj n řexbar aṣebḥan nneɣni,
GAL 1:7 nni war din iǧi, maca din ca n yinni kenniw iḥeyyaren uca xsen ad ssɛewwjen Řexbar Aṣebḥan n Lmasiḥ.
GAL 1:8 Maca mařa neccin niɣ ijj n lmalak zeg ujenna ad awem ibarreḥ s yijj n řexbar aṣebḥan nneɣni x Řexbar Aṣebḥan i zi nbarreḥ i kenniw, ad yiři d amenɛuř.
GAL 1:9 Am izzareɣ nniɣ, qqareɣ t ɛawed řexxu ijj n umur nneɣni: mařa ibeccar ḥed i kenniw s ijj ‘řexbar aṣebḥan’ nneɣni x wenni tqebřem, ad taf ad ittwanɛeř.
GAL 1:10 Ma arezzuɣ řexxu ad ssqennɛeɣ iwdan niɣ AREBBI? Niɣ arezzuɣ ad arḍiɣ iwdan? Mařa arezzuɣ ad arḍiɣ iwdan, war ttiřiɣ d amsexxar n Lmasiḥ.
GAL 1:11 Maca ad awem mřeɣ, [a] aytma, belli Řexbar Aṣebḥan i d ittwabarrḥen zzayi, war iǧi zi bnadem,
GAL 1:12 maɣar necc war t ttᵉṭṭfeɣ niɣ war t řmideɣ zi bnadem, maca s usargeb n Yasuɛ Lmasiḥ.
GAL 1:13 Aqa tesřim mammec tuɣa ggureɣ qbeř di ddin n Wudayen, tuɣa darrceɣ x tmesmunt n AREBBI aṭṭas, arezzuɣ ad tt areddǧeɣ.
GAL 1:14 Tuɣa izzareɣ di ddin n Wudayen x waṭṭas n iqrinen zi řgens inu, minzi tuɣa meḥḍeɣ aṭṭas x tɣuri n řejdud inu.
GAL 1:15 Maca řami tuɣa yarḍa Netta, Wenni d ayi iḥuzen [umi d ayi tuɣa ɛad] deg uɛeddis n yemma, uca iřaɣa ayi s arḍa nnes,
GAL 1:16 maḥend ad dayi dd-isseḍhar Mmis ḥima ad zzayes barrḥeɣ jar řegnus, xenni war ssargibeɣ man aya deɣya i [yenni ɣarsen iǧa] ddat d idammen.
GAL 1:17 Ɛawed war ruḥeɣ ca ɣar Urcalim, ɣar yinni i tuɣa d rrusul qbeř inu, maca ruḥeɣ ɣar Ɛarabiyya, uca dewřeɣ-dd [xenni] ɛawed ɣar Dimacq.
GAL 1:18 Třata n iseggʷusa awarni as, ruḥeɣ ɣar Urcalim ḥima ad mmeřqiɣ ak-d Kifa uca zedɣeɣ akides xemmesṭac n wussan.
GAL 1:19 War ẓriɣ ḥed nneɣni zi rrusul mɣir Yaɛqub, umas n Siditneɣ.
GAL 1:20 Min d awem ttariɣ řexxu, aqa da [cehhdeɣ] zzat i AREBBI: War ssxarriqeɣ ca!
GAL 1:21 Awarni man aya ruḥeɣ ɣar jjwayeh n Suriya d Kilikiya.
GAL 1:22 Timesmunin n Yahudiyya i iǧan di Lmasiḥ, war ssinen aɣembub inu.
GAL 1:23 Nitni tuɣa sřin xafi ammu waha: “Aqa wenni tuɣa xaneɣ idarrcen qbeř, řexxu ittbarreḥ s l’iman i tuɣa yareddeǧ zic!”,
GAL 1:24 uca ssemɣaren di AREBBI zi ssibbet inu.
GAL 2:1 Awarni řami ɛdun arbeɛṭac n iseggʷusa, ruḥeɣ ɛawed ɣar Urcalim ak-d Bar-Naba uca iwyeɣ akidi ɛawed Titus.
GAL 2:2 Maca tuɣa ruḥeɣ ɛlaḥsab ijj n usargeb [n Arebbi] u mřeɣ asen Řexbar Aṣebḥan i ttbarrḥeɣ jar řegnus, i yinni ɣar iǧa uweqqar weḥḥedsen, ḥima war ttizzřeɣ niɣ ad azzřeɣ baṭeř.
GAL 2:3 Ɛawed Titus, wenni tuɣa akidi, waxxa netta d Aramiyu, war xas ggen s uɣiř maḥend ad ittwaxten.
GAL 2:4 Maca minzi udfen-dd awmaten issxarriqen ɣarneɣ, ḥima ad cekkmen x tiřelli tenni ɣarneɣ di Yasuɛ Lmasiḥ, ḥima ad ayi ggen d ismeɣ,
GAL 2:5 aqa neccin war d asen nwaḍeɛ uřa d ict n tzeḥziḥt i řeḥṣaret nsen, ḥima tidett n Řexbar Aṣebḥan ad teqqim akidwem.
GAL 2:6 Inni tuɣa ittbanen d ca [jar asen] - min ma ɛnan war d ayi icqi, minzi AREBBI war ittegg ca s wudmawen - aqa war xafi nnan walu.
GAL 2:7 S řɛeks, maɣar ẓrin, belli ttkellfeɣ x Řexbar Aṣebḥan i yinni břa axtan am mammec [ittkellef] Buṭrus x Řexbar Aṣebḥan i yinni s wextan,
GAL 2:8 - minzi Wenni iɛarrnen Buṭrus di řxedmet nnes am rrasul jar inni ixetnen, iɛarren ayi ɛawed, ḥima ad ggeɣ řxedmet n rrasul jar řegnus -
GAL 2:9 uca umi Yaɛqub d Kifa d Yuḥanna, inni ittwaḥesben d imɣaren, neɛmen s arḍa i d ayi immewcen, wcin aneɣ afus afusi n tmunt [n tawmat] i necc d Bar-Naba, ḥima neccin ad niři [nᵉttsexxar] jar řegnus uca nitni jar inni s wextan.
GAL 2:10 Tuɣa ittxeṣṣa aneɣ ad nfekkar deg imezřaḍ waha, uca xenni cḍareɣ ɛawed maḥend ad ggeɣ man aya.
GAL 2:11 Maca umi dd-yusa Kifa ɣar Antiyuxiya, mmɛařiɣ akides s bṭayṭay, minzi nitni nnqarḍen zzayes.
GAL 2:12 Minzi qbeř ma dd-usin ca zi Yaɛqub, tuɣa ittett ak-d yinni [yumnen] zi řegnus, maca awarni řami dd-usin nitni, iɛqeb uca issbeɛɛed ixef nnes zzaysen, minzi tuɣa iggʷed zeg inni iǧan zeg wextan.
GAL 2:13 Uřa d Udayen inneɣni ttwajebbden akides ɣar man aya, amenni ɛawed Bar-Naba, aqa nedhen t di nnifaq nsen.
GAL 2:14 Maca umi ẓriɣ belli war gguren ca nican x webrid n tidett n L’Injil, nniɣ i Kifa zzat i marra: “Mařa cek, am teǧid d Uday, teddared am yijj n Aramiyu, war iǧi am Wuday, mayemmi teggid aɣiř x yinni zi řegnus, ḥima ad ddaren am Wudayen?
GAL 2:15 Aqa neccin, inni iǧan d Udayen ɛlaḥṣab ṭṭbiɛet, war neǧi ca d imednab zi řegnus,
GAL 2:16 numen di Yasuɛ Lmasiḥ, minzi nessen belli bnadem war ittwasegged ca s řexdayem n Ccariɛa, maca s l’iman n Yasuɛ Lmasiḥ, ařami uřa d neccin ad nettwasegged s l’iman n Lmasiḥ, war iǧi s řexdayem n Ccariɛa, minzi s řexdayem n Ccariɛa uřa d ijj n bnadem war ittwaseggad ca [ɛemmarṣ].
GAL 2:17 Maca mařa neccin, am narezzu ad nettwasegged s Lmasiḥ, nufa belli neccin ɛawed d imednab, ma Yasuɛ Lmasiḥ [xenni] d amsexxar n ddnub? Wayyaw!
GAL 2:18 Minzi mařa bniɣ ɛawed min hedmeɣ, ad ssecneɣ belli necc s ixef inu d wenni iɛeddun x tewṣiyyet.
GAL 2:19 Minzi s Ccariɛa [aqa necc] mmuteɣ i Ccariɛa, ḥima ad ddareɣ i AREBBI.
GAL 2:20 Ttwaṣellbeɣ ak-d Lmasiḥ uca zi ssa d tsawent war qqimeɣ ddareɣ ɛad necc, maca Lmasiḥ iddar dayi. Uca min ddareɣ řexxu ɛad di arrimet, ddareɣ s l’iman n Mmis n AREBBI wenni d aneɣ ittexsen u iwca Ixef nnes xaneɣ.
GAL 2:21 War beḍřeɣ ca arḍa n AREBBI, minzi mařa tuɣa tasegda s Ccariɛa, ad yiři immut Lmasiḥ x walu.”
GAL 3:1 [A] Igalaṭiyyen ifɣuřen, wi kenniw issuffɣen zeg webrid? Aqa Lmasiḥ tuɣa ittwarcem qibač i tiṭṭawin nwem am wenni immuten x ṣṣalib.
GAL 3:2 Degga waha xseɣ ad t ssneɣ zzaywem: Ma tᵉṭṭfem Arruḥ s řexdayem n Ccariɛa niɣ umi tᵉtteggem array i l’iman?
GAL 3:3 Ma amenni teǧam d ifɣuřen, aqa tebdam s Arruḥ, ma řexxu ad tkemmřem s ddat?
GAL 3:4 Ma teksim tamara aṭṭas x walu? Ma tuɣa s tidett x walu?
GAL 3:5 Wenni d awem iwcin Arruḥ uca ittegg lmuɛjizat jar awem, ma ittegg i-tent zi řexdayem n Ccariɛa niɣ umi tᵉttesřam [tabarreḥt] n l’iman,
GAL 3:6 am mammec tuɣa Ibrahim yumen di AREBBI uca [xenni] ittwaḥseb as-dd man aya d tasegda.
GAL 3:7 S uyenni ssnem, belli inni iǧan n l’iman, nitni d ayt n Ibrahim.
GAL 3:8 Minzi issen AREBBI qbeř, aqa řegnus ad ttwaseggden s l’iman, izzar ibeccar Netta i Ibrahim s Řexbar Aṣebḥan, am mammec qqarent Tira Iqeddsen: “Dayek i ɣa ttwabarken řegnus marra.”
GAL 3:9 S uyenni inni yumnen ad ttwabarken ak-d řmumen Ibrahim.
GAL 3:10 Marra inni iddaren s řexdayem n Ccariɛa, aqa nitni sadu nneɛřet, minzi tura: “D amenɛuř kuř ijjen wenni war iqqimen ittᵉṭṭef di marra timesřayin yuran deg wedlis n Ccariɛa ḥima ad tent igg!”
GAL 3:11 Aqa ittban mliḥ belli war din ḥed i ɣa ittwaseggden ɣar AREBBI s Ccariɛa, minzi tura: “Amseggad s l’iman ad iddar!”
GAL 3:12 [Xenni] Ccariɛa war tkemmeř ca s l’iman, maca bnadem wenni itteggen min dayes yurin, ad zzayes iddar.
GAL 3:13 [Maca] Lmasiḥ aqa ixeǧeṣ xaneɣ, ḥima ad aneɣ ifekk zi nneɛřet nni iǧan x yinni sadu Ccariɛa am d idweř xaneɣ d amenɛuř, minzi tura: “D amenɛuř kuř ijjen i t ɣa yuyřen x teḥnact!”,
GAL 3:14 ḥima ad tiweḍ lbaraka n Ibrahim ɣar řegnus s Yasuɛ Lmasiḥ, maḥend s l’iman ad neṭṭef lwaɛd n Arruḥ.
GAL 3:15 [A] aytma, ad ssiwřeɣ x řeḥsab řeɛqeř n bnadem: aqa ijj n řɛahd ittwaggen jar iwdan, war izemmar uřa d ijj ad t ibḍeř niɣ ad dayes ibeddeř ca.
GAL 3:16 Aqa lwuɛud ttwaggen i Ibrahim d zzariɛet nnes. Netta war d as yini ca: “I iɛeqqayen n zzariɛet nwem!”, am i waṭṭas, maca: “I uɛeqqa n zzariɛet nnec!”, am i yijjen, aqa-t d Lmasiḥ.
GAL 3:17 [Xenni] qqareɣ [ammu]: Řɛahd nni iggin AREBBI zic di Lmasiḥ, war t tbeṭṭiř ca Ccariɛa, tenni tusa-dd arebɛa-mya u-třatin n iseggʷusa awarni man aya, ḥima ad tegg lwaɛd ixwan.
GAL 3:18 Minzi mařa řwart iǧa s Ccariɛa, aqa war iǧi ɛad s lwaɛd i Ibrahim. Maca AREBBI aqa iwca as t s lwaɛd.
GAL 3:19 Xenni i umi tneffeɛ Ccariɛa? Aqa tᵉttwammarni [ɣar lwaɛd] x ssibbet n ddnub ařami dd-tusa Zzariɛet tenni umi ittwagg lwaɛd. U s lmalakat temmewc Ccariɛa deg ufus n ijj n lwasit.
GAL 3:20 Lwasit war iǧi [d lwasit] n ijjen, maca AREBBI d Ijjen.
GAL 3:21 Ma xenni Ccariɛa ḍidd i lwaɛd n AREBBI? Ɛemmarṣ! Minzi mařa tuɣa temmewc ict n Ccariɛa tzemmar ad tesseddar, d tidett tuɣa tasegda s Ccariɛa.
GAL 3:22 Maca Tira [Iqeddsen] bellɛent x marra di ddnub, ḥima lwaɛd ad immewc s l’iman di Yasuɛ Lmasiḥ i yinni yumnen.
GAL 3:23 Maca qbeř ma i dd ɣa yas l’iman, tuɣa aneɣ nᵉmmeḥḍa di Ccariɛa uca ittwabelleɛ xaneɣ zi l’iman, wenni tuɣa i ɣa iḍharen [ɛad].
GAL 3:24 S uyenni tuɣa Ccariɛa am wenni d aneɣ ittarebban ař Lmasiḥ, ḥima ad nettwasegged s l’iman.
GAL 3:25 Maca řexxu, umi dd-yusa l’iman, aqa war neqqim ɛad sadu wenni ittarebban.
GAL 3:26 Minzi marra kenniw d arrawen n AREBBI s l’iman n Yasuɛ Lmasiḥ.
GAL 3:27 Minzi marra inni ittwassɣeḍṣen di Lmasiḥ, aqa arḍen Lmasiḥ.
GAL 3:28 [Xenni] war din Uday niɣ Aramiy, war din [ɛad] ismeɣ niɣ aḥurri, war din [ɛad] aryaz niɣ tamɣart, minzi marra kenniw d ijjen i teǧam di Yasuɛ Lmasiḥ.
GAL 3:29 Mařa kenniw teǧam n Lmasiḥ, aqa kenniw d zzariɛet n Ibrahim uca ɛlaḥsab lwaɛd d iwriten.
GAL 4:1 Xseɣ ad iniɣ, mecḥař ma d awrit aqa-t [ɛad] d aḥenjir, war din bu řfarq x umsexxar, waxxa netta d bab n marra nitni.
GAL 4:2 Netta iǧa ɛad sadu imeḥdayen u sadu inni ittseyyaren taddart ař řweqt i yegga babas.
GAL 4:3 Ammu ɛawed neccin, umi d aneɣ tuɣa ɛad d iḥenjiren, tuɣa aneɣ d isemɣan sadu [ṣṣulṭa n] lfarayiḍ n ddunect[-a].
GAL 4:4 Maca umi dd-yiweḍ uɛemmar n řweqt, AREBBI aqa issekk-dd Mmis i yeǧan zi temɣart d wenni iǧan sadu Ccariɛa,
GAL 4:5 ḥima ad ifdi inni iǧan sadu Ccariɛa uca [xenni] neccin ad neṭṭef řefḍeř maḥend ad nettwaqbeř d mmis.
GAL 4:6 Minzi kenniw teǧam d arrawen, AREBBI issekk Arruḥ n Mmis deg wuřawen nwem, wenni ittřaɣan: ‘Baba, Babatneɣ!’
GAL 4:7 S uyenni war teǧim ɛad d imsexxaren, maca d arrawen u mařa arrawen i teǧam, aqa kenniw ɛawed d iwriten n AREBBI s Yasuɛ Lmasiḥ.
GAL 4:8 Maca di zzman i war tessinem ca AREBBI, tuɣa tɛebbdem inni war iǧin s tewwa d irebbiten.
GAL 4:9 Maca řexxu, awarni řami tessnem AREBBI, ɛad ḥsen AREBBI yargeb xawem, aqa tɛeqbem ɛawed ɣar [ṣṣulṭa n] lfarayiḍ iḍeɛfen izeřḍen [n ddunect-a], texsem ɛawed ad asent tᵉmmarsem ixef nwem am zeg wecḥař uya!
GAL 4:10 Tḥeṭṭam ussan d iyuren d zzmanat d iseggʷusa.
GAL 4:11 Ttᵉggʷedeɣ xawem aqa ttamareɣ jar awem x walu.
GAL 4:12 [A] aytma, ttzawageɣ kenniw, iřim am necc, minzi necc am kenniw. Kenniw war d ayi teggim walu min war iḥřin.
GAL 4:13 Aqa kenniw tessnem belli barrḥeɣ awem-dd s Řexbar Aṣebḥan deg umezwaru s tuḍɛeft n arrimet inu.
GAL 4:14 Kenniw war tesseḥqarem niɣ tessṭeyyḥem zeg umarret n arrimet inu, maca tqebřem ayi am yijj n lmalak n AREBBI u am Yasuɛ Lmasiḥ.
GAL 4:15 Mani truḥ xenni lbaraka nwem? Minzi cehhdeɣ xawem belli, mařa tuɣa tzemmarem, ad tqeřɛem tiṭṭawin nwem, ḥima ad ayi tent tewcem.
GAL 4:16 Ma dewřeɣ d řeɛdu nwem, minzi barrḥeɣ kenniw s tidett?
GAL 4:17 Nitni cḍaren aṭṭas xawem, maca war iǧi amenni waha, maɣar xsen ad kenniw ḥebbsen, ḥima kenniw ad tecḍarem xasen.
GAL 4:18 [Wah], mliḥ ad tiřim řebda tceṭṭarem di min iǧan d aṣebḥan, [maca] war iǧi xmi kiwem i ɣa ḥḍareɣ waha.
GAL 4:19 [A] iḥenjiren inu, twařa nneɣnit aqa ayi i kenniw am yict n temɣart tenni iksin ddeyset zzaywem s unezbar n tarwa, ař daywem i ɣa iřint tefras n Lmasiḥ.
GAL 4:20 Xseɣ řexxu ad iřiɣ akidwem uca ad beddřeɣ tmijja inu, minzi aqa ugnuɣ zzaywem.
GAL 4:21 Inim ayi, kenniw inni ittexsen ad tiřim sadu Ccariɛa, ma war tᵉṭṭiɛem ca Ccariɛa?
GAL 4:22 Minzi aqa tura belli Ibrahim tuɣa ɣares tnayen n iḥenjiren, ijjen n tayya, wenneɣni n tḥurrect.
GAL 4:23 Wenni n tayya aqa ittwaxřeq-dd ɛlaḥsab ddat, maca wenni n tḥurrect ittwaxřeq-dd ɛlaḥsab lwaɛd.
GAL 4:24 Tina d tnayen n imedya n tnayen n řɛuhud, ijjen n wedrar n Sina, wenni i dd-ittarwen tasmuɣi, aqa-t Hajar.
GAL 4:25 Minzi Hajar d adrar n Sina di Ɛarabiyya, tenni yarewsen di Urcalim n řexxu, tenni iǧan di tesmuɣi ak-d tarwa nnes.
GAL 4:26 Maca Urcalim n sennej d taḥurrect, aqa-tt d yemmatneɣ.
GAL 4:27 Minzi tura: “Farḥ, tenni war ittirwen ɛemmarṣ! Duqqez s usřiwřew, sɣuyy s jjehd, a cem tenni war issinen řewjeɛ n tarwa, maɣar tarwa n tenni di semḥen d aṭṭas x tarwa n tenni ɣar iǧa weryaz.”
GAL 4:28 Maca neccin [a] aytma, d tarwa n lwaɛd am Isḥaq.
GAL 4:29 Maca am di řweqt nni wi dd-itwaxeřqen ɛlaḥsab ddat tuɣa imarret wenni dd-ittwaxeřqen ɛlaḥsab Arruḥ, ammu ɛawed řexxu.
GAL 4:30 Maca min qqarent Tira Iqeddsen? “Nḍarem barra tayya d mmis, minzi war ittiři mmis n tayya d awrit ak-d mmis n tḥurrect.”
GAL 4:31 S uyenni, [a] aytma, aqa war neǧi ca d tarwa n tayya, maca tarwa n tḥurrect.
GAL 5:1 Beddem nican di tiřelli tenni umi d aneɣ ifekk Lmasiḥ, uca war ttdekkwiřem ɛawed, maḥend ad teksim azayřu n tesmuɣi.
GAL 5:2 Aqa ayi necc Bulus ad awem iniɣ, mařa tᵉttwaxetnem, Lmasiḥ war kenniw ineffeɛ deg walu.
GAL 5:3 Ɛawed cehhdeɣ i marra bnadem i ɣa ittwaxetnen, aqa netta s umarwas ḥima ad igg marra min iǧan di Ccariɛa.
GAL 5:4 Kenniw inni [ittexsen] ad ttwaseggdem s Ccariɛa, aqa tdewřen tarxum zi Lmasiḥ, uca zi arḍa i zi dd-tewḍam.
GAL 5:5 Minzi neccin nettraja asitem n tsegda s Arruḥ nni iǧan zi l’iman.
GAL 5:6 Maɣar di Yasuɛ Lmasiḥ, axtan niɣ břa axtan war isekkwi walu, maca mɣir l’iman waha nni ittwakemmřen s tayri.
GAL 5:7 Kenniw tuzzřem mliḥ! Wi kenniw imenɛen ařami war tᵉttᵉṭṭifem ɛad s řaman di tidett?
GAL 5:8 Ṭwaɛ-a nwem war iǧi zeg wenni d awem ittřaɣan.
GAL 5:9 Cwayt n wentun issmemm marra řɛejnet [n warecti].
GAL 5:10 Necc ttiqqeɣ daywem di Siditneɣ, aqa war ɣarwen tiři nneyyet nneɣni. U wenni kenniw ittseddaɛen, aqa ad yarbu řḥukm, man wen ma iɛna netta.
GAL 5:11 [A] aytma, mařa necc ttbarrḥeɣ kenniw ɛad s wextan, mayemmi ɛad i ɣa ttwamarrteɣ? Ma [xenni] tᵉttwabeṭṭeř taɛenkrift n ṣṣalib?
GAL 5:12 Meɛlik qaɛ ttexseɣ, aqa inni ittexsen ad kenniw qessen, ad ttwaqessen simant nsen.
GAL 5:13 I tiřelli umi dd-tᵉttwařaɣam kenniw, [a] aytma, maca war ttqeǧbem tiřelli am lfurṣa i weysum, maca sexxarem ijjen i wenneɣni s tayri.
GAL 5:14 Minzi marra Ccariɛa tkemmeř s yijj n wawař, aqa s man aya: “Ad texsed jjar nnec amecnaw ixef nnec.”
GAL 5:15 Maca mařa tzeɛɛfem u tᵉttettem ijjen wenneɣni, [xenni] ḥḍam ixef nwem war tᵉttᵉttem ca ayawya [qaɛ].
GAL 5:16 Maca necc ad awem iniɣ: Uyurem di Arruḥ, war ttkemmřen ɛemmarṣ nnecwat n weysum.
GAL 5:17 Minzi ddat yarezzu min iǧan ḍidd n Arruḥ, uca Arruḥ yarezzu min iǧan ḍidd n weysum. Nitni s tnayen ttbeddan ak-d wayawya, x uyenni war tzemmarem ad teggem min texsem.
GAL 5:18 Maca mařa Arruḥ indeh i kenniw, war teǧim ɛad sadu Ccariɛa.
GAL 5:19 Řexdayem n weysum banent, aqa atent d zzina d řexmej d farq-ccɣeř
GAL 5:20 d uɛbad i l’aṣnam d tseḥḥart d řeɛdawet d umcebbec d řeḥsed d tefqeḥt d uɣewweɣ d ubeṭṭu d tɣuriwin i dd-itteffɣen zeg webrid,
GAL 5:21 d tusmi d wenɣay d uɣelli d řefsed uřa d timesřayin nneɣnit am tina. Inni ittceɣřen ixef nsen ak-d tmesřayin-a, aqa izwareɣ nniɣ t, u ad t iniɣ ɛawed, aqa nitni war warrten ca Tageldit n AREBBI.
GAL 5:22 Maca řɣiǧet n Arruḥ aqa-tt d tayri d řefraḥet d řehna d řeḍrafet d ttasiɛ n řxaḍar d tcuni d l’iman d temhint uřa d ṣṣbar.
GAL 5:23 Ccariɛa war teǧi ḍidd n tmesřayin-a.
GAL 5:24 Maca inni iǧan zi Lmasiḥ aqa ṣellben aysum nsen ak-d marra ccehwat d nnecwat.
GAL 5:25 Ejj aneɣ ad neddar s Arruḥ u ad nsellem ixef nneɣ i Arruḥ.
GAL 5:26 War d aneɣ ittejji ad nweqqar ijj wenneɣni s nnifaq, am nesseḥqara ijjen wenneɣni u nettasem uřa d ijjen zeg wenneɣni.
GAL 6:1 [A] aytma, mařa ḥed jar awem iwḍa-dd xas ddenb, ejj [xenni] inni igguren di Arruḥ ad t seggden s arruḥ n temhint. Ḥḍam, ḥima war tᵉttwajarrbem uřa d kenniw.
GAL 6:2 Ksim ddqeř ijjen x wenneɣni, ammu i ɣa tkemmřem Ccariɛa n Lmasiḥ.
GAL 6:3 Maɣar mařa ca n yijjen ittɣiř as aqa netta d ca, am t war iǧi, ixeddeɛ ixef nnes.
GAL 6:4 Maca ejj kuř ijjen ad iqeǧeb řxedmet n yixef nnes, xenni ad ɣares yiři usemɣar deg yixef nnes, war iǧi deg inneɣni,
GAL 6:5 minzi kuř ijjen ad iksi ddqeř n yixef nnes.
GAL 6:6 Ejj wenni isřin Awař, ad icarc zi marra tiṣebḥanin [i ɣares] ak-d wenni zzayes t isřan.
GAL 6:7 War ttxeddɛem ixef nwem, AREBBI war ittejji ḥed ad xas iqeṣṣar. Minzi min ma izarɛ bnadem, ad t imjar ɛawed.
GAL 6:8 Minzi wenni izarrɛen deg weysum, zeg weysum ad imjar řɣecc. Maca wenni izarrɛen di Arruḥ, zi Arruḥ ad imjar Tudart ittduman.
GAL 6:9 Ejj aneɣ war nᵉttiḥeř ca umi nᵉttegg min iǧan d aṣebḥan, minzi ad dd-tas řweqt nni di ɣa nemjar, u man aya war d aneɣ issihiř ca.
GAL 6:10 Ejj aneɣ řexxu, ařami ɣarneɣ ɛad lfurṣa, ad negg tcuni i marra, amezwaru i yinni d icricen akidneɣ di taddart n yinni yumnen.
GAL 6:11 Xzarem, [marra] tira-ya i d awem dd-uriɣ, uriɣ tt s ufus inu.
GAL 6:12 Marra wi ixsen ad ssemɣaren deg weysum, aqa nitni tteggen xawem aɣiř ḥima ad tᵉttwaxetnem ḥima war ttwamarrten nitni x ssibbet n ṣṣalib n Lmasiḥ.
GAL 6:13 Minzi uřa d inni ittwaxetnen war ṭṭifen ca di Ccariɛa, maca nitni xsen ad tᵉttwaxetnem ḥima ad ssemɣaren [di řextan] deg weysum nwem.
GAL 6:14 Maca iggʷejen xafi maḥend ad ssemɣareɣ mɣir di ṣṣalib n Siditneɣ Yasuɛ Lmasiḥ s Wenni tᵉttwaṣelleb ddunect i necc u necc i ddunect.
GAL 6:15 Axtan niɣ břa axtan war isekkwi walu, maca wenni dd-ittwaxeřqen zi jdid wah.
GAL 6:16 Marra wi ɣa yuyuren ɛlaḥsab abrid-a, ad xasen yiři řehna d arreḥmet uřa x Israil n AREBBI.
GAL 6:17 War d ayi ittseddiɛ ḥed, minzi iwyeɣ-dd ccamat n Siditneɣ Yasuɛ di arrimet inu.
GAL 6:18 [A] aytma, ad yiři arḍa n Siditneɣ Yasuɛ Lmasiḥ ak-d arruḥ nwem. Amin.
EPH 1:1 Bulus, rrasul n Yasuɛ Lmasiḥ ɛlaḥsab řxaḍar n AREBBI, i yinni iǧan di Afasus, [i] imqeddasen d yinni yumnen di Yasuɛ Lmasiḥ
EPH 1:2 Arḍa d řehna ad kidwem iřin zi AREBBI, Babatneɣ, u zi Siditneɣ Yasuɛ Lmasiḥ.
EPH 1:3 Ad ittwabarek AREBBI, Babas n Siditneɣ Yasuɛ Lmasiḥ, wenni d aneɣ ibarken s marra lbarakat n Arruḥ i iǧan deg ijenwan di Lmasiḥ,
EPH 1:4 am mammec ixḍar aneɣ dayes, deg umezwaru qbeř ma ad ittwagg dsas n ddunect, ḥima ad niři d imqeddasen břa řɛib qibač nnes.
EPH 1:5 Di tayri izwar ad aneɣ yarcem i Yixef nnes uca aqa igga aneɣ d arrawen di Yasuɛ Lmasiḥ am mammec t ixs řxaḍar nnes,
EPH 1:6 i usemɣar n uɛuǧi n arḍa nnes i xaneɣ ifarreɣ deg Umɛizz nnes.
EPH 1:7 Dayes ɣarneɣ asenjem d weɣfar n ddnub s Idammen nnes ɛlaḥsab agřa n arḍa nnes
EPH 1:8 i dayneɣ iǧan s ufeyyeḍ, di marra tiɣit d marra řefhamet.
EPH 1:9 Aqa issargeb aneɣ x ssirr n řxaḍar nnes, i tuɣa izɛem qbeř maḥend ad t ikemmeř deg Yixef nnes,
EPH 1:10 ḥima, i řeḥkamet n uɛemmar n zzmanat, ad dd-ixřeq marra [min iǧan] deg ijenwan u x temmurt d jdid zeg Uzeǧif s Lmasiḥ.
EPH 1:11 Aqa nettwaxḍar dayes, am mammec i izwar ad immars i neccin u tuɣa ixs ad [zzayneɣ] igg, Netta d wenni itteggen marra ɛlaḥsab lqarar n array nnes,
EPH 1:12 ḥima neccin ad niři d imezwura i ɣa issitimen di Lmasiḥ i usemɣar n uɛuǧi nnes.
EPH 1:13 Dayes aqa tesřim awař n tidett, Řexbar Aṣebḥan n usenjem nwem, [xenni] tumnem dayes uca teksim acemmiɛ n Arruḥ Iqeddsen i d [aneɣ] iwaɛd,
EPH 1:14 wenni d řɛarbun n řwart nneɣ i usenjem n yinni iddaren u i usemɣar n uɛuǧi nnes.
EPH 1:15 Xzar, s uyenni necc, řami sřiɣ x l’iman nwem di Siditneɣ Yasuɛ Lmasiḥ u x tayri nwem i marra imqeddasen,
EPH 1:16 war beddeɣ ca ad qadiɣ i kenniw niɣ ad daywem fekkareɣ di tẓiǧatin inu,
EPH 1:17 ḥima AREBBI n Siditneɣ Yasuɛ Lmasiḥ, Babas n uɛuǧi, ad awem iwc Arruḥ n tiɣit d usargeb ḥima ad t tessnem,
EPH 1:18 uca ad awem iwc tifawt di tiṭṭawin n wuřawen nwem, ḥima ad tessnem man asitem n třaɣit nnes d mammec [imɣar] agřa n uɛuǧi n řwart nnes di marra imqeddasen,
EPH 1:19 u mammec imɣar aṭṭas i yeǧa jjehd nnes dayneɣ, deg inni yumnen ɛlaḥsab aqarru n jjehd n ṣṣulṭa nnes
EPH 1:20 i ixeddmen di Lmasiḥ umi t-i-dd-issnekkar zi taddart n imettinen uca igga i-t ɣar uɣezdis afusi nnes deg ijenwan,
EPH 1:21 sennej i kuř azeǧif d ṣṣulṭa d jjehd d řeḥkamet d marra isem ittwasemman, war iǧi di ddunect-a waha, maca ɛawed di tenni i dd ɣa yasen.
EPH 1:22 Aqa Netta yarra as-dd marra sadu iḍaren nnes u Wenni iǧan sennej i marra, aqa igga i-t d Azeǧif i Tmesmunt,
EPH 1:23 tenni d Arrimet nnes uřa d aɛemmar n Wenni ittɛemmaren kuřci di marra.
EPH 2:1 Uřa d kenniw tuɣa temmutem s ddnub nwem u s tubbuheřya nwem
EPH 2:2 min di tuɣa tuyurem ɛlaḥsab tudart n kuř ass n ddunect-a, ɛlaḥsab řxaḍar n uzeǧif n ṣṣulṭa x wazzay n řeɛwin, u [ɛlaḥsab řxaḍar] n arruḥ nni ixeddmen di tarwa n řmuɛṣiyyet.
EPH 2:3 Uřa d neccin tuɣa nruḥ qbeř di ccɣuřat nni, umi neḍfar nnecwat n weysum nneɣ, negga min ixs weysum nneɣ d nneyyet nneɣ, u tuɣa aneɣ d tarwa n weɣḍab qaɛ am inneɣni.
EPH 2:4 Maca AREBBI iccur s arreḥmet s tayri nnes tameqqrant i zi xaneɣ iɛizz.
EPH 2:5 Řami tuɣa aneɣ [ɛad] d imettinen di ddnub nneɣ, aqa yarr aneɣ-dd ɣar tudart ak-d Lmasiḥ, u s arḍa nnes issenjem aneɣ
EPH 2:6 u issnekkar aneɣ-dd akides uca issɣima aneɣ akides deg ijenwan di Yasuɛ Lmasiḥ,
EPH 2:7 ḥima ad isscen afeyyeḍ n wagřa n arḍa nnes d tcuni nnes di zzmanat i dd ɣa yasen, wenni xaneɣ dd-yusin s Yasuɛ Lmasiḥ.
EPH 2:8 Minzi s arḍa nnes nettwassenjem, s l’iman, war iǧi zzaywem, aqa-tt d tawhibt n AREBBI,
EPH 2:9 war teǧi s řxedmet, maḥend war ittuff uřa d ijj.
EPH 2:10 Maɣar neccin d axeřqi nnes, nettwaxřeq-dd di Yasuɛ Lmasiḥ ḥima ad negg řexdayem tiṣebḥanin nni d aneɣ issewjed AREBBI qbeř, maḥend ad nuyur daysent.
EPH 2:11 S uyenni ɛeqřem, aqa zic tuɣa kenniw d řegnus ɛlaḥsab [jjadira] n arrimet, tᵉttwasemmam ‘nbřa axtan’ zeg inni tuɣa s wextan nni iǧan d řxedmet n ifassen deg weysum.
EPH 2:12 Di řweqt nni tuɣa kenniw břa Lmasiḥ, d iɣriben zi jjihet n řeḥkamet n Israil, aqa tiggʷjem am ibarraniyyen x Řɛahd n lwaɛd. Tuɣa kenniw břa asitem u břa AREBBI di ddunect.
EPH 2:13 Maca řexxu, di Yasuɛ Lmasiḥ, aqa kenniw inni tuɣa iggʷejen, aqa [řexxu] tudsem-dd s Idammen n Lmasiḥ.
EPH 2:14 Maɣar Netta d řehna nneɣ am d yarra tnayen nni ɣar yijj, aqa Netta ihdem aɣbar n řeqwar wenni tuɣa ten ibḍan.
EPH 2:15 Deg weysum [n arrimet] nnes ibḍeř Netta řeɛdawet d Ccariɛa n tweṣṣa ak-d tweṣṣa i-dd-iḍfaren, ḥima ad dd-ixřeq di ṭṭbiɛet n Yixef nnes tnayen nni ɣar ijj n bnadem n jdid am ittegg řehna.
EPH 2:16 Aqa Netta isseṣřeḥ tnayen nni ak-d AREBBI deg ict n Arrimet u inɣa řeɛdawet s ṣṣalib nnes.
EPH 2:17 Yusa-dd ḥima ad ibarreḥ s Řexbar Aṣebḥan n řehna [nni], i yinni tuɣa iggʷejen u i yinni tuɣa yudsen,
EPH 2:18 minzi zzayes nzemmar ad nadef s tnayen idneɣ s yijj n Arruḥ ɣar Babatneɣ.
EPH 2:19 S uya kenniw war teǧim d ibarraniyyen uřa d imeɛzab, maca kenniw d imezdaɣ n tendint n imqeddasen d tarwa n taddart n AREBBI.
EPH 2:20 Tᵉttwabnam x dsas n rrusul d inabiyyen, uca Netta d [Aẓru] Azeǧif n teɣmart, aqa-t d Yasuɛ Lmasiḥ.
EPH 2:21 Zzayes i ɣa ittwabna řebni marra, ad iyma uca ad idweř d ict n Zzawect Tameqqrant Iqeddsen di SIDI,
EPH 2:22 am zzayes i ɣa tᵉttwabnam uřa d kenniw, ad tiřim d tazeddiɣt n AREBBI di Arruḥ.
EPH 3:1 X uyenni necc, Bulus, aqa ayi d ameḥbus n Yasuɛ Lmasiḥ, i kenniw [inni iǧan zi] řegnus,
EPH 3:2 mařa [zeɛma] aqa tesřam x tsexxart n arḍa n AREBBI i d ayi immewcen jar awem,
EPH 3:3 belli ittwassargeb ayi-dd ssirr, am izzareɣ uriɣ awem-dd s drus.
EPH 3:4 Xmi ɣa tɣarem man aya, tzemmarem ad tfehmem řefhamet inu n ssirr n Lmasiḥ,
EPH 3:5 wenni war ittwassargeb ca di tarwa n bnadem di řejyuř nneɣni, am mammec ittwaɛarra xas řexxu s Arruḥ i rrusul imqeddasen nnes u i inabiyyen nnes,
EPH 3:6 [aḥeqqa] inni zi řegnus ad iřin d iwriten akidsen d iɣezdisen akidsen n Arrimet nnes uřa [d icricen] n lwaɛd nni dayes immewcen s L’Injil,
EPH 3:7 i zi dewřeɣ d amsexxar ɛlaḥsab tawhibt n arḍa n AREBBI i d ayi immewcen ɛlaḥsab jjehd nnes i [dayi] ixeddmen.
EPH 3:8 Aqa immewc ayi arḍa-ya, i necc d amuqřiř qaɛ jar marra imqeddasen, ḥima ad barrḥeɣ s Řexbar Aṣebḥan, [iwa] agřa n Lmasiḥ i war nzemmar ad nefhem,
EPH 3:9 u ḥima ad ssuffɣeɣ ɣar tfawt i marra, min ixs ad yini uwekkeř n ssirr i tuɣa inuffaren di zzmanat n zic di AREBBI, Wenni i dd-ixeřqen kuřci,
EPH 3:10 ḥima tiɣit n AREBBI ak-d waṭṭas n iɣezdisen nnes ad tiři tᵉttwassnen s tmesmunt ɣar řeḥkamat d ṣṣulaṭat deg ijenwan,
EPH 3:11 [tiɣit] i tuɣa issewjed Netta zi zzman uca ikemmeř i-tt di Siditneɣ Yasuɛ Lmasiḥ,
EPH 3:12 wenni dayes aqa ɣarneɣ taryast d wadaf ak-d ttiqet s l’iman zzayes.
EPH 3:13 S uyenni ttzawageɣ kenniw, maḥend war ttiḥřem ca s řemḥayem inu di ṭṭweɛ nwem. Aqa man aya i uɛuǧi i kenniw.
EPH 3:14 Ad adareɣ s ifadden inu zzat i Babas n Siditneɣ Yasuɛ Lmasiḥ,
EPH 3:15 i Wenni umi semman [kuř ijj n] tbabat i iǧan deg ijenwan d temmurt,
EPH 3:16 ḥima ad awem iwc ɛlaḥsab agřa n uɛuǧi nnes u ḥima ad tᵉttwassjehdem s jjehd s Arruḥ nnes di bnadem nwem n daxeř.
EPH 3:17 ḥima Lmasiḥ ad izdeɣ deg wuřawen nwem s l’iman, s tayri, x minni teccatem iẓewran u dsas nwem ad yiři imten,
EPH 3:18 ḥima ad tzemmarem ad tfehmem ak-d marra imqeddasen min teɛna tiru d tuzzeggart d řuɛřa d řaǧaɣ,
EPH 3:19 u ad tessnem [ɛawed] řemɣaret n tussna n tayri n Lmasiḥ, uca ad tiřim tɛemmarem s marra aɛemmar n AREBBI.
EPH 3:20 Maca i Netta umi ɣares tizemmar ifeyyḍen ḥima ad igg di ṭṭweɛ nneɣ sennej i min nettᵉttar niɣ nettxarreṣ, ɛlaḥsab jjehd nnes i ixeddmen dayneɣ,
EPH 3:21 i Netta ikkar as-dd uɛuǧi di tmesmunt nnes, di Yasuɛ Lmasiḥ, di marra řejyuř i řebda qaɛ. Amin.
EPH 4:1 Am umeḥbus di Siditneɣ, ziyyareɣ xawem, ḥima ad tuyurem am mammec dd-tusa ak-d třaɣit i zi tᵉttwařaɣam,
EPH 4:2 s marra awaḍeɛ n buḥbeř, s temhint u s ttasiɛ n řxaḍar, aqa ad tqebbřem ijj wenneɣni di tayri,
EPH 4:3 ad tecḍarem maḥend ad teqqimem tmunem d ijj di Arruḥ s tseɣwin n řehna,
EPH 4:4 maḥend ad tiřim deg ict n Arrimet u deg ijj n Arruḥ am mammec umi tᵉttwařaɣam deg usitem n třaɣit nwem d ijjen.
EPH 4:5 Maɣar SIDI d Ijjen, d l’iman d ijjen uřa d aseɣḍeṣ d ijjen,
EPH 4:6 u AREBBI d Ijjen, Babatneɣ marra u x marra u s marra u dayneɣ marra.
EPH 4:7 Maca arḍa immewc aneɣ marra idneɣ ɛlaḥsab řmijař n min d aneɣ iwca Lmasiḥ.
EPH 4:8 S uyenni qqaren: “Igeɛɛed ɣar řuɛřa, yiwyi akides imeḥbas di tmeḥbast, iwca tirzifin i iwdan.”
EPH 4:9 Maca min iɛna ɛawed [wawař-a], aqa Netta igeɛɛed sennej, mɣir aqa Netta ɣar umezwar ɛawed tuɣa ihwa-dd ɣar ṭṭrufa n temmurt n wadday qaɛ?!
EPH 4:10 Wenni tuɣa dd-ihwan, Netta ɛawed d Wenni tuɣa igeɛɛden sennej i marra ijenwan, ḥima ad issiweḍ marra ɣar řekmařet.
EPH 4:11 Netta yarra ca d rrusul, ca d inabiyyen, ca d imbeccaren, ca d imeksawen u ca d imseřmaden,
EPH 4:12 ḥima ad [zzaysen] ttwakemmřen imqeddasen i řxedmet n tsexxart, i řebni n Arrimet n Lmasiḥ,
EPH 4:13 ař i ɣa naweḍ marra ɣar umuni d ijjen di l’iman u di tussna n Mmis n AREBBI, ad niři d ijj n bnadem ikmeř s řeɛbar n ṣṣifet tmun n Lmasiḥ.
EPH 4:14 Ittxeṣṣa war nettiři am iḥenjiren inni ittwaɛarran zi ṭṭarf ɣar wenneɣni uca dewřen iggʷjen zi kuř asemmiḍ n useřmed d aḥraymi zeg iwdan nni yarezzun ad [aneɣ] ɣarren s teḥraymect nsen,
EPH 4:15 maca ittxeṣṣa ad nbedd nican di tayri nneɣ, maḥend marra min ɣarneɣ iǧan ad igma di Lmasiḥ wenni d Azeǧif.
EPH 4:16 Zzayes tennejru u tᵉttwassmun Arrimet marra s marra řemfaṣeř, ɛlaḥsab min immewcen s řeɛbar i mkuř aɣezdis i tyumi n Arrimet, ař ɣa ittwakemmeř řebni nnes di tayri.
EPH 4:17 Maca necc qqareɣ u cehhdeɣ man aya di SIDI, ḥima war teggurem ɛad am mammec uyuren řegnus inneɣni, inni iddaren di řbaṭeř n ixarriṣen nsen,
EPH 4:18 barcnen di řeɛqeř nsen u aggʷejen x Tudart n AREBBI, minzi war daysen bu tussna, u x ssibbet n tqubbanect i daysen iǧan, u x ssibbet n řeqsaḥet n wuř nsen.
EPH 4:19 Nitni qeḍɛen ixef nsen zeg usitem, sellmen ixef nsen i ufucceḥ u i weḍfar n marra markat n řexmej ɛlaḥṣab meẓri nsen.
EPH 4:20 Maca war iǧi ammu i tessnem Lmasiḥ,
EPH 4:21 řami zeɛma kenniw tuɣa tesřam ɣares nican uca třemdem zzayes ɛlaḥsab tidett i iǧan di Yasuɛ.
EPH 4:22 Maca s řɛeks ittxeṣṣa kenniw ad tenḍarem ticři nwem n zic, ad tejjem bnadem aqdim i ittwassexsaren s nnecwat iɣeccen.
EPH 4:23 Ttwaɛedřem zi jdid s nneyyet n řeɛqeř nwem.
EPH 4:24 Arḍem bnadem n jdid i dd-ittwaxeřqen di AREBBI di tsegda u di taqeddast d tidett.
EPH 4:25 S uyenni jjem ixarriqen, siwřem tidett kuř ijj ak-d jjar nnes, minzi neccin d ixfawen ijjen i wenneɣni.
EPH 4:26 Xeyyqem, [maca] war tteggem ca ddnub, war ttejji ad teɣri tfuct x [ijj n uduqqez n] uxeyyeq nwem.
EPH 4:27 War tticem ca amcan i ibřis.
EPH 4:28 War tejji wenni ittacaren ad yacar ɛad, maca ḥsen ad yarber s ifassen nnes maḥend ad issuffeɣ ict d řḥajjet d taṣebḥant, maḥend ad tt iwc i yinni iḥdajen.
EPH 4:29 War dd-ittekk ca wawař n wecrah zeg uqemmum nwem, maca min iṣebḥen u min ineffɛen i řebni, ḥima ad tessiwḍem arḍa i yinni i ɣa isřan.
EPH 4:30 War ttessffugmem ca Arruḥ Iqeddsen n AREBBI i zi tᵉttwacemmɛem ař ass n usenjem.
EPH 4:31 Jjem ad zzaywem tᵉttwakkes marra tarzugi d tefqeḥt d weɣḍab d uṣeddeɛ d uceqqef ak-d marra tuɛeffna [i dd-ittasen ak-d man aya].
EPH 4:32 Iřim tḍarfem u ggem řeḥnunect deg wayawa. Samḥem i wayawya am AREBBI ɛawed aqa iɣfar aneɣ di Lmasiḥ.
EPH 5:1 S uya iřim d imeḍfaren n AREBBI am iḥenjiren iɛizzen,
EPH 5:2 uyurem di tayri am mammec uřa d Lmasiḥ tuɣa ittexs aneɣ, iwca ixef nnes xaneɣ d tawhibt d tɣarṣt i AREBBI, aqa-tt d ict n řefwaḥet taṣebḥant.
EPH 5:3 Maca x farq-ccɣeř d marra řexmej d ṭṭmeɛ, war xas ittiři bu wawař jar awem am mammec icuwwar i imqeddasen,
EPH 5:4 uřa x řhard issbehdřen niɣ x wawařen ixwan niɣ x tqeṣṣart niɣ x řefḍiḥet, timesřayin i war neffɛent [di walu], maca mammec nneɣni ittxeṣṣa aqadi.
EPH 5:5 Minzi tessnem aqa kuř ijj wenni itteggen farq-ccɣeř, niɣ wenni dayes řexmej niɣ ṭṭmeɛ, aqa wanita iɛebbed l’aṣnam, war ɣares bu tesɣart di tgeldit n Lmasiḥ u n AREBBI.
EPH 5:6 War ttejjim uřa d ijjen ad kenniw iɣekkwi s wawařen ixwan, aqa zi man aya dd-ihekkwa weɣḍab n AREBBI x tarwa n řmuɛṣiyyet.
EPH 5:7 War carrcem ca akidsen!
EPH 5:8 Minzi zic tuɣa kenniw d taǧest, maca aqa řexxu kenniw d tafawt di Siditneɣ. S uyenni uyurem am tarwa n Tfawt,
EPH 5:9 minzi řɣiǧet n Tfawt tᵉttiři di marra tcuni d tsegda d tidett.
EPH 5:10 Farzem min ɣa yarḍan Siditneɣ.
EPH 5:11 War carrcem ca di řexdayem tibarcanin i war dd-ittiwyen řɣiǧet, maca webbxem tent.
EPH 5:12 Minzi min tteggen di tnuffra, aqa-t d nnɛi i war tzemmared uřa ad t tɛawded.
EPH 5:13 Minzi marra ad ittwasegged s Tfawt u ad ittwassargeb s Tfawt u marra min issargaben d Tifawt i yeǧa.
EPH 5:14 S uyenni qqaren: “Faq cek, a bu yiḍeṣ. Kkar-dd zi taddart n imettinen, uca ad xak igg Lmasiḥ tafawt.”
EPH 5:15 Ḥḍam ad tuyurem s uweqqar, war iǧi am ibuhařiyyen, maca am imiɣisen,
EPH 5:16 inni i ɣa yawyen ariqqi i řweqt nsen, minzi ussan-a d iɛeffanen.
EPH 5:17 X uyenni war ttiřim d ibuhařiyyen, maca fehmem min ixs AREBBI.
EPH 5:18 War seccaram ca s binu i ittawyen ɣar řeqjaḥet, maca iřim tɛemmarem s Arruḥ.
EPH 5:19 Siwřem di řeɛmur nwem s izehhiden d izřan n uṣebbeḥ d izřan n Arruḥ, ɣennjem deg wuřawen nwem i SIDI.
EPH 5:20 Qadam řebda AREBBI Babatneɣ x kuř ijjen deg Yisem n Siditneɣ Yasuɛ Lmasiḥ.
EPH 5:21 Waḍḍɛem ixef nwem i wayawya di tayri n Lmasiḥ.
EPH 5:22 [A] timɣarin, waḍḍɛent i yeryazen nkent am tᵉttwaḍḍɛent i Siditneɣ,
EPH 5:23 minzi aryaz aqa d azeǧif n temɣart am uřa d Lmasiḥ i yeǧan d Azeǧif n tmesmunt d wenni itticen Tudart i Arrimet.
EPH 5:24 Am tmesmunt tᵉttwaḍḍeɛ ixef nnes i Lmasiḥ, amenni ɛawed timɣarin ad waḍḍɛent ixef nsent i yeryazen nsent di marra.
EPH 5:25 [A] iryazen, xsem timɣarin nwem am mammec tuɣa ixs Lmasiḥ tamesmunt uca isellem Ixef nnes di ṭṭweɛ nnes,
EPH 5:26 ḥima ad tt yarr d tamqeddast u ad as issizdeg s usird [n Waman Iddaren] u s Wawař.
EPH 5:27 Netta ad igg tamesmunt qibač i Yixef nnes s uɛuǧi, břa abeqqiḍ niɣ acebriq, břa uřa d ict n řḥajjet zi marra man aya, maca ad tiři d tamqeddast u břa řɛib.
EPH 5:28 Ammu ittxeṣṣa ad xsen yeryazen timɣarin nsen am arrimet nsen. Aqa wenni ittexsen tamɣart nnes, aqa ittexs ixef nnes.
EPH 5:29 Uřa d ijj war icarh ɛemmarṣ arrimet nnes, maca issecca i-t, ittḥawař xas am mammec [ittḥawař] ɛawed Lmasiḥ x tmesmunt,
EPH 5:30 minzi neccin d ixfawen n Arrimet nnes, n weysum nnes u n iɣsan nnes.
EPH 5:31 S uyenni aryaz ad yejj babas d yemmas maḥend ad iqqen ɣar temɣart nnes, ad iřin s tnayen idsen d ijj n weysum.
EPH 5:32 Ssirr-a d ameqqran, maca necc qqareɣ t zi jjihet n Lmasiḥ d tmesmunt.
EPH 5:33 Maca ittxeṣṣa ɛawed i kuř ijj zzaywem maḥend ad ixs amenni tamɣart nnes am yixef nnes, maca tamɣart ad tweqqar aryaz.
EPH 6:1 [A] iḥenjiren, ṭaɛem i lwalidin nwem di Siditneɣ, minzi man aya nican i yeǧa.
EPH 6:2 Ta d tawṣeyyet tamezwarut s yijj n lwaɛd: ‘Weqqar babac d yemmac,
EPH 6:3 ḥima ad tiřid mliḥ u ad teddared aṭṭas di temmurt.”
EPH 6:4 [A] ibabaten, war sɛarem ca iḥenjiren nwem, maca arebbam ten s usettef u di tɣuri n Siditneɣ.
EPH 6:5 [A] imsexxaren, ṭaɛem aytbab nwem di ddunect-a s tiggʷudi d tarjijit, u s řeṣfayet n wuř axmi i Lmasiḥ.
EPH 6:6 War iǧi qibač i tiṭṭawin, axmi tᵉttexsem ad tarḍam iwdan, maca am yimsexxaren n Lmasiḥ inni itteggen min yareṭṭan AREBBI.
EPH 6:7 Xedmem asen s marra uř nwem di tayri, am i Siditneɣ, war iǧi i iwdan.
EPH 6:8 Aqa tessnem mařa din ḥed, ismeɣ niɣ d aḥurri, wenni i ɣa iggin ca d taṣebḥant, Siditneɣ ad ɣares yarr.
EPH 6:9 Ɛawed kenniw, [a] aytbab, ggem amenni ak-d imsexxaren nwem. Samḥem asen iɛeddiyen nsen, maɣar tessnem, aqa Siditwem deg ijenwan i yeǧa, u Netta war ittegg ca s wudmawen.
EPH 6:10 S uyenni, [a] wawmaten inu, meḥḍem di Siditneɣ u di jjehd n tzemmar nnes.
EPH 6:11 Arḍem s marra řesnaḥ n AREBBI, ḥima ad tessbeddem ibriden n tḥraymect n ibřis.
EPH 6:12 Aqa war nettmenɣi ca ak-d weysum d idammen, maca ak-d řeḥkamat, ak-d řḥukkam d ṣṣulaṭat n ddunect-a tabarcant u ak-d řaryaḥ iɛeffanen inni iǧan sadu ijenwan.
EPH 6:13 S uyenni arḍem s marra řesnaḥ n AREBBI maḥend ad temmɛařam ak-d umɛeffan. Xmi ɣa tiřim twejdem kuřci, ad teqqimem tbeddem.
EPH 6:14 S uyenni beddem, tbeysem s tidett u sduryem idmaren nwem s tsegda,
EPH 6:15 ad iřin iḍaren nwem ttwaqqnen s řxaḍar n L’Injil n řehna.
EPH 6:16 Ak-d man aya marra, ksim taseddart n l’iman [deg ufus nwem], maḥend ad tessxesyem marra fřitcat itteḥduduqen s tmessi n umɛeffan.
EPH 6:17 Ggem lkask n usenjem [x uzeǧif nwem] uca ṭṭfem ssif n Arruḥ i iǧan d Awař n AREBBI.
EPH 6:18 Ẓẓaǧam di marra tiẓaǧa d tutra [nwem] řebda di Arruḥ, u ḥḍam břa qeṭṭu di tẓaǧit, am tᵉttẓaǧam u tkessim s řmeɛruf řebda di ṭṭweɛ n marra imqeddasen,
EPH 6:19 uřa di ṭṭweɛ inu, ḥima ad ayi immewc Awař xmi ɣa arzmeɣ aqemmum inu, maḥend ad barrḥeɣ ssirr n Řexbar Aṣebḥan s teryast,
EPH 6:20 i zi necc d amsekki s ssnaseř, ḥima ad xas ssiwřeɣ s teryast am mammec icuwwar ad ssiwřeɣ.
EPH 6:21 Ḥima ad tessnem mammec ɣa yiři umeddur inu u min tteggeɣ, xzar, Ticikus, ijj n umatneɣ iɛizzen d amsexxar amtiqqi n Siditneɣ, ad kenniw ixebbar.
EPH 6:22 Aqa ssekkeɣ t-i-dd i man aya simant nnes, ḥima ad tessnem ameddur inu, uca ḥima ad daywem yegg uř.
EPH 6:23 Řehna ad yiři ak-d tawmat nneɣ uřa d tayri ak-d l’iman, zi AREBBI, Babatneɣ, u zi Siditneɣ Yasuɛ Lmasiḥ.
EPH 6:24 Ad yiři arḍa ak-d marra inni ittexsen Siditneɣ Yasuɛ Lmasiḥ břa řɣecc. Amin.
PHI 1:1 Bulus d Timutiyu, imsexxaren n Yasuɛ Lmasiḥ, i marra imqeddasen di Yasuɛ Lmasiḥ inni iǧan di Filippi, ak-d imɣaren d imsexxaren [di tmesmunt]:
PHI 1:2 Arḍa ad kiwem yiři, uřa d řehna zi AREBBI Babatneɣ, u zi Siditneɣ Yasuɛ Lmasiḥ.
PHI 1:3 Ttqadiɣ AREBBI inu řami daywem ttfekkareɣ řebda,
PHI 1:4 maɣar di kuř tiẓaǧitin inu xawem, aqa ksiɣ s řmeɛruf s řefraḥet
PHI 1:5 di ssibbet n tmunt nwem ak-d L’Injil, zeg wass amezwaru ař iḍa.
PHI 1:6 Aqa ttiqqeɣ belli Wenni daywem ibdan řexdayem iṣebḥen, ad tent ikemmeř ař ass n Siditneɣ Yasuɛ Lmasiḥ.
PHI 1:7 Icna ayi ad fekkareɣ daywem marra ammu, minzi aqa kenniw ɣari deg wuř inu, xmi ǧiɣ di ssnaseř uřa xmi ɣa awteɣ x tidett n L’Injil, [minzi] kenniw tcarcem akidi di arḍa.
PHI 1:8 Minzi AREBBI d Acehhad inu mecḥař kenniw ttexseɣ s řeḥnunect yuǧɣen n Yasuɛ Lmasiḥ.
PHI 1:9 Man aya i ttẓaǧiɣ, aqa tayri nwem ad tfeyyeḍ aṭṭas s waṭṭas di tussna d qaɛ řefhamet taruḥanect,
PHI 1:10 maḥend ad tfarzem min ittřiqen, u maḥend ad tiřim teqqurem u břa řɛib deg wass n Lmasiḥ,
PHI 1:11 teccurem s řɣiǧet n tsegda i yeǧan di Yasuɛ Lmasiḥ i uɛuǧi d usemɣar n AREBBI.
PHI 1:12 [A] aytma, necc xseɣ ad tessnem belli timesřayin i d ayi imsaren arnint ɛad di tuzzeggart [n tbarreḥt] n L’Injil,
PHI 1:13 minzi tᵉttwassen tmeḥbast inu zi ssibbet n Lmasiḥ i qaɛ inni iǧan di řeqṣar n qayṣar u i qaɛ min iqqimen.
PHI 1:14 Azyen ameqqran n wawmaten di Siditneɣ, umi ǧiɣ di tmeḥbast, idweř ɣarsen ttiqqet ktar uca dewřen zeɛɛmen ssawařen awař n AREBBI s teryast ktar, břa tiggʷudi.
PHI 1:15 Ca [zzaysen] ttbarrḥen Lmasiḥ zi řeḥsed d umɛaned, maca ca nneɣni ɛawed zi nneyyet tecna u s tayri,
PHI 1:16 minzi nitni ssnen aqa ttwaggeɣ maḥend ad wteɣ x L’Injil.
PHI 1:17 Maca inni ittbarrḥen s Lmasiḥ s umɛaned, war t tteggen s nneyyet tecna, maca ttexsen ad xafi arnin řmeḥnet i ssnaseř inu.
PHI 1:18 S man aya farrheɣ, [wah,] ad farḥeɣ: aqa ittwabarreḥ Lmasiḥ s ibriden ifarzen, ma s ijj n lɣaraḍ nneɣni, niɣ s tidett.
PHI 1:19 Minzi ssneɣ aqa timesřayin-a ad iřint i Tudart i necc s tẓaǧit nwem u s tewhibt n Arruḥ n Yasuɛ Lmasiḥ,
PHI 1:20 maḥend necc, am sitimeɣ u ttrajiɣ, war ttseḍḥiɣ ca x walu, maca am řebda, uřa d řexxu ad ittwassemɣar Lmasiḥ s bṭayṭay di arrimet inu, ma s tudart [inu] niɣ s řmewt [inu].
PHI 1:21 Minzi tudart inu d Lmasiḥ uca řmewt d arbeḥ i necc.
PHI 1:22 Maca mařa din řɣiǧet di tudart-a di arrimet zi jjihet n řxedmet inu, [xenni] war ssineɣ min ɣa xḍareɣ.
PHI 1:23 Maɣar aqa ayi jar tnayen n iɣezdisen: dayi meẓri maḥend ad raḥeɣ ad iřiɣ ak-d Lmasiḥ, minzi man aya qaɛ ḥsen,
PHI 1:24 maca aɣimi di arrimet ittxeṣṣa ɛad ktar di ṭṭweɛ nwem.
PHI 1:25 D man aya ssneɣ nican, aqa ad qqimeɣ, [wah,] ad qqimeɣ di ṭṭweɛ n řefraḥet nwem u maḥend ad igma l’iman nwem,
PHI 1:26 ḥima, xmi dd ɣa yaseɣ ɣarwem ɛawed, aqa asemɣar nwem di Lmasiḥ waha ad ifeyyeḍ, umi necc [qqimeɣ].
PHI 1:27 Uyurem s uweqqar i Řexbar Aṣebḥan n Lmasiḥ, ḥima, xmi dd ɣa yaseɣ uca ad kenniw ẓareɣ uřa xmi ɣa ɣabeɣ, ad zzaywem sřeɣ, aqa tbeddem nican deg ijj n arruḥ u s ijj n řeɛmar, uca tᵉttɣellbem s l’iman di L’Injil.
PHI 1:28 War tteggʷdem ca ɛemmarṣ zeg inni xawem dd-ikkaren. Man aya d aɛeǧem i nitni ɣar uhellek, maca i kenniw ɣar usenjem.
PHI 1:29 Minzi aqa immewc awem zi AREBBI, war iǧi ad tamnem di Lmasiḥ waha, maca ɛawed maḥend ad tmarrtem di ṭṭweɛ nnes,
PHI 1:30 u ad teksim amenɣi, am mammec i d ayi t teẓrim uca řexxu aqa xafi tesřim.
PHI 2:1 Mařa xenni ɣarwem ca n ufewwej di Lmasiḥ, awařen s tayri i wuř, niɣ tamunt n Arruḥ, niɣ řeḥnunect di daxeř d arreḥmet,
PHI 2:2 kemmřem řefraḥet inu umi ɣa imun array nwem, ad ɣarwem tiři tayri d icten, d řeɛmar d ijjen uřa d uxarraṣ d ijjen.
PHI 2:3 War tteggem ca uřa d ict n řḥajjet s umɛaned niɣ zi tuffet ixwan, maca ejj kuř ijj ad iweqqar wenneɣni ktar zeg ixef nnes s uwaḍeɛ.
PHI 2:4 War ixezzar uřa d ijj ɣar ixef nnes waha, maca ejj kuř ijj ad ixzar ɛawed ɣar wenni d as yudsen.
PHI 2:5 Ejj ad daywem tiři nneyyet i tuɣa ɛawed di Yasuɛ Lmasiḥ,
PHI 2:6 wenni, am iǧa deg warwas n AREBBI, war iḥsib ca d takeccaḍt umi imqudda ak-d AREBBI,
PHI 2:7 maca issexwa Ixef nnes, iksi ṣṣifet n umsexxar. Netta idweř deg warwas n bnadem, uca ittwaf di furma n bnadem.
PHI 2:8 Netta isswaḍeɛ Ixef nnes uca idweř iṭṭaɛ ař řmewt, [wah,] ař řmewt n ṣṣalib.
PHI 2:9 S uya issuɛřa i-t AREBBI qaɛ sennej uca iwca as Isem sennej i kuř isem,
PHI 2:10 ḥima deg Yisem n Yasuɛ ad aḍaren marra ifadden nni iǧan deg ujenna u x temmurt u sadu temmurt,
PHI 2:11 u [ḥima] ad iched kuř iřes belli Yasuɛ Lmasiḥ d SIDI i uɛuǧi n AREBBI, Babas.
PHI 2:12 S uyenni, [a] imɛizzen inu, am mammec tuɣa tᵉṭṭaɛem řebda, war iǧi xmi akidwem ǧiɣ waha, řexxu ɛad ktar xmi xawem i ɣa aggʷjeɣ, xedmem s ufeyyeḍ i Tudart nwem s tiggʷudi d tarjijat,
PHI 2:13 minzi AREBBI d wenni daywem ixeddmen ař ɣa texsem u ad teggem min di tᵉmmeẓřem kenniw.
PHI 2:14 Ggem marra břa řeɛkaset u břa amcubbec,
PHI 2:15 ḥima ad tiřim břa řɛib, am tarwa imezdagen n AREBBI inni izeddɣen di řwesṭ n jjiř iɛewwjen d ifarɣen, u [ḥima] ad tbanem jar asen am tfawin di ddunect,
PHI 2:16 maḥend ad tiřim di ṭṭweɛ nsen deg wemcan n Tudart, ḥima ad ɣari yiři usemɣar deg wass n Lmasiḥ, war uyureɣ baṭeř niɣ xedmeɣ s walu.
PHI 2:17 Maca mařa ttᵉttwarucceɣ am yict n tewhibt [n useyyeb] x tɣarṣt u x tsexxart di ṭṭweɛ n l’iman nwem, ad farḥeɣ ɛawed uca ad arecqeɣ akidwem marra.
PHI 2:18 [Xenni uřa d kenniw,] farḥem uca farḥem ɛawed akidi.
PHI 2:19 Maca necc ssitimeɣ di Siditneɣ Yasuɛ ad awem dd-ssekkeɣ Timutiyu deɣya, ḥima ad iřiɣ x řxaḍar inu xmi ɣa ssneɣ ameddur nwem.
PHI 2:20 Minzi war ɣari danita uřa d ijjen am necc, wenni ikessin s wemnus x mammec iffeɣ umeddur nwem s cḍaret.
PHI 2:21 Minzi marra yarezzun di min nsen, war iǧi di min iǧan n Yasuɛ Lmasiḥ.
PHI 2:22 Maca kenniw tessnem taqeǧebt nnes, belli tuɣa ixeddem akidi di [tbarreḥt n] Řexbar Aṣebḥan am yijj n mmis ɣar babas.
PHI 2:23 Necc ssitimeɣ ad ɣarwem t-i-dd-ssekkeɣ deɣya, xmi ɣa ẓareɣ mammec ɣa iffeɣ umeddur inu.
PHI 2:24 Maca ttiqqeɣ di Sidi inu, belli ɛawed necc ad ɣarwem dd-aseɣ deɣya.
PHI 2:25 Maca ittɣiř ayi belli tuɣa ittxeṣṣa ad dd-awem ssekkeɣ uma Ipafruditus, wenni d amɛawen inu d amsexxar akidi, maca netta [ɛawed] d rrasul nwem d amsexxar nwem di min ḥdajeɣ.
PHI 2:26 Minzi tuɣa iweḥḥec aṭṭas ad kenniw iẓar marra, uca tuɣa iksi s wemnus minzi kenniw tesřim belli tuɣa ihřec.
PHI 2:27 S tidett, tuɣa ihřec ař řmewt, maca AREBBI tuɣa yarḥem i-t, war iǧi netta waha, aḥeqqa uřa d necc, ḥima war ɣari ittiři ufeqquṣ x ufeqquṣ.
PHI 2:28 S uyenni ssekkeɣ t s tazřa aṭṭas, ḥima, xmi t ɣa tẓarem ɛawed, ad tfarḥem uca ad dayi yiři drus n wemnus.
PHI 2:29 S uyenni qebřem t di SIDI, s marra řefraḥet, weqqarem inni iǧan am wanita,
PHI 2:30 minzi x ssibbet n řxedmet n Lmasiḥ, tuɣa iqarreb ɣar řmewt am isebbeř tudart n yixef nnes, maḥend ad ikemmeř min ineqṣen di tsexxart nwem i necc.
PHI 3:1 S uyenni, [a] aytma, farḥem di Siditneɣ. War xafi yewɛar ad awem ariɣ timesřayin-a twařa nneɣnit, minzi ad zzaysent tᵉttwaḥḍam.
PHI 3:2 Ḥḍam ixef nwem zeg yiṭan, ḥḍam zeg ixeddamen iɛeffanen, ḥḍam zeg inni iqeṭṭɛen aysum.
PHI 3:3 Minzi neccin d axtan, [neccin] inni ittsexxaren i AREBBI s Arruḥ, inni issemɣaran di Yasuɛ Lmasiḥ, uca war ttiqqen ca deg [wextan n] weysum [n bnadem].
PHI 3:4 Necc zemmareɣ ad ttiqqeɣ deg weysum [inu], minzi mařa ittɣiř i ḥed ad ittiqq deg weysum [nnes], necc ktar:
PHI 3:5 aqa ayi d amextan zeg wami ɣari tmenya n wussan, zi řgens n Israil, zeg ayt n Binyamin, necc d Aɛibrani zeg Iɛibraniyyen, zi jjihet n Ccariɛa necc d Afarisi,
PHI 3:6 zeg uɣezdis n cḍaret tuɣa darrceɣ x tmesmunt [n Lmasiḥ], zeg uɣezdis n tsegda tenni di Ccariɛa aqa ayi břa řɛib.
PHI 3:7 Maca min tuɣa ɣari arbeḥ, aqa ggiɣ t d taxessart x ssibbet n Lmasiḥ.
PHI 3:8 Necc ggiɣ marra man aya d taxessart zi ssibbet n tussna n Sidi Yasuɛ Lmasiḥ, wenni di ṭṭweɛ nnes xsareɣ kuřci, ggiɣ t amecnaw wefraḍ yurṣuḍen ḥima ad arebḥeɣ Lmasiḥ,
PHI 3:9 maḥend ad ttwafeɣ dayes, war iǧi s tsegda n ixef inu tenni zi Ccariɛa - maca ak-d tenni dd-itteffɣen zi l’iman n Lmasiḥ, aqa-tt d tasegda tenni zi AREBBI -
PHI 3:10 ḥima ammu i ɣa ssneɣ Yasuɛ d jjehd n tnukra nnes, u [maḥend] ad carceɣ deg uweddeb nnes, ad dewřeɣ deg warwas n řmewt nnes,
PHI 3:11 ḥima s ca n webrid ad awḍeɣ ɣar tnukra zi taddart n imettinen.
PHI 3:12 Necc war ttiwiḍeɣ niɣ ttwakemmřeɣ ɛad, maca yemmareɣ i man aya, ḥima, mařa iɛeddeř, ad ṭṭfeɣ min xef i d ayi iṭṭef Yasuɛ Lmasiḥ.
PHI 3:13 [A] aytma, war d ayi ittɣiř aqa ṭṭfeɣ t, maca tteggeɣ ict n řḥajjet: ttuɣ min awarni ayi uca ad sswiẓẓḍeɣ ixef inu ɣar min din zzati.
PHI 3:14 Ttizzareɣ ɣar lɣaraḍ ḥima ad ṭṭfeɣ [ttaj n] uɣelleb n třaɣit yuɛřan n AREBBI tenni iǧan di Yasuɛ Lmasiḥ.
PHI 3:15 Ejj inni iwḍen ɣar řekmaret, ad rekkzen xenni di tmesřayin-a. Uca mařa ɣarwem nneyyet nneɣni di ca, aqa AREBBI ad awem isscen man aya ɛawed.
PHI 3:16 Maca ejj aneɣ, ḥima ad naweḍ ɣar man aya, ad nuyur deg webrid d ijjen s ixariṣṣen nneɣ d ijjen.
PHI 3:17 Ḍfarem ayi-dd, [a] aytma, ksim tiweṣṣaf i inni yuyuren ɛlaḥsab amedya i zzayneɣ teẓrim.
PHI 3:18 Minzi aqa din aṭṭas inni yuyuren war iǧi amenni, nniɣ awem tt aṭṭas n imuren - uca řexxu ad tt iniɣ s imeṭṭawen - aqa aten d řɛedyan n ṣṣalib n Lmasiḥ.
PHI 3:19 Aneggaru nsen d ahellek, arebbi nsen d aɛeddis nsen uca aɛuǧi nsen d abehdeř nsen, u nneyyet nsen di tmesřayin n ddunect.
PHI 3:20 Maca neccin nᵉttsexxar deg ijenwan i zzayes nettraja ɛawed wenni d aneɣ itticen Tudart, Siditneɣ Yasuɛ Lmasiḥ,
PHI 3:21 wenni i ɣa ibeddřen arrimet nneɣ iḥebḍen, ḥima ad tedweř di ṣṣifet n Arrimet nnes iɛuǧen, ɛlaḥsab jjehd nnes tameqqrant i zi i ɣa ittwagg marra min iǧan swadday Nnes.
PHI 4:1 S uya, [a] aytma iɛizzen d iɣřan, aqa kenniw d řefraḥet inu d ttaj inu, beddem xenni ammu nican di Siditneɣ, [a] imɛizzen inu!
PHI 4:2 Necc ttzawageɣ zeg Uwudiya d Sintici, maḥend ad imun array nsent di Siditneɣ.
PHI 4:3 Ttzawageɣ ɛawed zzayek, [a] amɛacar amtiqqi inu, maḥend ad tewced afus i tinni i ixeddmen akidi x ssibbet n [tbarreḥt n] L’Injil, uřa ak-d Klimins d imsexxaren inu nneɣni, inni ismawen nsen yuran deg Wedlis [ittwanḍen] n Tudart.
PHI 4:4 Farḥem řebda di Siditneɣ, necc qqareɣ ɛawed: Farḥem!
PHI 4:5 Ad yiři uwaḍeɛ nwem ittwassen ɣar iwdan marra. Siditneɣ aqa yudes.
PHI 4:6 War kessim ca s wemnus x walu, maca ad yiři marra min tᵉttarem řebda ittwassen ɣar AREBBI s tẓaǧit d tkessit n řmeɛruf ak-d uqadi.
PHI 4:7 Uca řehna n AREBBI i iɛdun marra řefhamet ad iḥḍa uřawen d ixarriṣen nwem di Yasuɛ Lmasiḥ.
PHI 4:8 Ɣar uneggar, [a] aytma, marra min iǧan d tidett, marra min iqquren, marra min iseggden, marra min izdigen, marra min iɛizzen, marra min ɣar iǧa řḥess aṣebḥan, u marra min ɣa isdaheǧen ccan d usemɣar, xarṣem dayes.
PHI 4:9 Min teɣrim u tqebřem, min tesřim u teẓrim zzayi, ggem t, uca AREBBI n řehna ad kiwem yiři!
PHI 4:10 Aqa farḥeɣ aṭṭas di Siditneɣ umi daywem iǧa wemnus maḥend ad ayi tᵉthillam, am mammec daywem t tuɣa [qbeř], maca war d as tufim mammec [ad teggem].
PHI 4:11 War tt nniɣ, minzi necc ḥwajeɣ ca, minzi řemdeɣ ad qenɛeɣ mammec ma dd-tusa.
PHI 4:12 Necc aqa ssneɣ umi qqaren ddeǧ, uca aqa ssneɣ umi qqaren afeyyeḍ. Mani ma u di marra aqa řemdeɣ, am di tyawant, am di řaẓ am deg ufeyyeḍ uřa di řeɣben.
PHI 4:13 Qeddeɣ qaɛ zi Lmasiḥ wenni d ayi iwcin jjehd.
PHI 4:14 Waxxa amenni mliḥ řami d ayi tewcim afus di řemḥayem inu.
PHI 4:15 Tessnem ɛawed simant nwem, [a] Ifilippiyyen, belli ɣar umezwaru n [tbarreḥt n] Řexbar Aṣebḥan, umi dd-ffɣeɣ zi Makiduniya, uřa d ict n tmesmunt war teggi akidi řeḥsab x min wcin d min ksin, mɣir tenni nwem waha.
PHI 4:16 Minzi ɛawed di Tissalunika tᵉssekkem ayi-dd min d ayi ittxeṣṣan, ijj n umur u ijj n umur nneɣni.
PHI 4:17 War arezzuɣ ad dayi tewcem ca, maca arezzuɣ ad twesseɛ řɣiǧet nwem.
PHI 4:18 Necc ṭṭfeɣ kuřci u ɣari kuřci s zzyada, aqa jjiwneɣ. Necc ksiɣ marra min d ayi dd-tᵉssekkem s ufus n Ipafruditus: ict n řefwaḥet ittfuḥen d ict n tɣarṣt yarḍan qibač i AREBBI.
PHI 4:19 Maca AREBBI inu ad issyiwen marra min teḥdajem ɛlaḥsab agřa nnes deg uɛuǧi i iǧan n Yasuɛ Lmasiḥ.
PHI 4:20 Aqa i AREBBI, Babatneɣ, ad ɣares yiři uɛuǧi d ccan i řebda qaɛ. Amin.
PHI 4:21 Seǧmem x kuř imqeddasen di Yasuɛ Lmasiḥ s řehna. Awmaten inni akidi, ttseǧamen xawem s řehna.
PHI 4:22 Aqa marra imqeddasen ttseǧamen xawem s řehna, amezwaru inni iǧan zi taddart n qayṣar.
PHI 4:23 Arḍa n Siditneɣ Yasuɛ Lmasiḥ ad yiři akidwem marra. Amin.
COL 1:1 Bulus, rrasul n Yasuɛ Lmasiḥ s řxaḍar n AREBBI, d tawmat Timutiyu.
COL 1:2 I inni iǧan di Kulussi, awmaten imqeddasen d yinni yumnen di Yasuɛ Lmasiḥ: řehna d arḍa ad kiwem iřin zi AREBBI, Babatneɣ.
COL 1:3 Řebda nettqada AREBBI, Babas n Siditneɣ Yasuɛ Lmasiḥ, uca nettẓaǧa xawem.
COL 1:4 Xzar, nesřa x l’iman nwem di Yasuɛ Lmasiḥ u x tayri nwem i marra imqeddasen,
COL 1:5 x ssibbet n usitem i d awem isswejden deg ijenwan, i x tizzarem tesřam zeg umezwaru s Wawař n tidett n Řexbar Aṣebḥan.
COL 1:6 [Awař]-a ittwabarreḥ awem u i ddunect marra, uca igemma uca ittawi-dd řɣiǧet, am mammec i yegga [wawař-a] ɛawed jar awem zeg wass umi t tesřim u tessnem arḍa n AREBBI di tidett,
COL 1:7 am mammec t třemdem zi Ipafras, amsexxar amɛacar nneɣ iɛizzen, wenni d amsexxar d amtiqqi n Lmasiḥ i kenniw.
COL 1:8 Netta issargeb aneɣ-dd x tayri nwem di Arruḥ.
COL 1:9 S uyenni, uřa d neccin, zeg wass umi nesřa x man aya, war nessbeddi ca taẓaǧit xawem, nettᵉttar ad tdewřem teccurem s tussna n řxaḍar n AREBBI, di marra tiɣit d řefhamet n Arruḥ,
COL 1:10 ḥima ad tuyurem am mammec isdaheǧ, ad tarḍam AREBBI di marra řexdayem tiṣebḥanin, u ḥima ad dd-tawyem řɣiǧet uca ad teymam di tussna n AREBBI,
COL 1:11 ad tᵉttwassjehdem s marra jjehd ɛlaḥsab řemɣaret n uɛuǧi nnes, s marra ṣṣbar d ttasiɛ n řxaḍar d řefraḥet.
COL 1:12 Qadam AREBBI, Babatneɣ, wenni d aneɣ isswejden ḥima ad nessdaheǧ ad ncarc di řwart n imqeddasen di tfawt.
COL 1:13 Netta issenjem aneɣ zi ṣṣulṭa n taǧest u issmuṭṭiy aneɣ ɣar tgeldit n Mmis nnes iɛizzen,
COL 1:14 Wenni dayes ɣarneɣ asenjem d weɣfar n ddnub.
COL 1:15 Wanita d ṣṣifet n AREBBI i war nettwiři ca, Amenzu x marra min dd-ittwaxeřqen,
COL 1:16 Zzayes dd-ittwaxřeq marra min iǧan deg ijenwan d min iǧan di temmurt, min nettwařa d min war nettwiři ca: řekrasi n ijeǧiden niɣ tiṣeǧaḍin niɣ řeḥkamat uřa d ṣṣulaṭat, marra min iǧan aqa ittwaxřeq-dd s ufus nnes u zzayes Netta.
COL 1:17 Netta tuɣa-t qbeř marra min iǧan, uca marra min iǧan aqa-t zzayes.
COL 1:18 Netta d Azeǧif n Arrimet, tenni iǧan d tamesmunt. Netta d Azeǧif d Mmis Amenzu i dd-ittwaxeřqen zi taddart n imettinen, ḥima ad yiři d Amezwar di kuřci.
COL 1:19 Minzi tusa as-dd i řxaḍar i marra Aɛemmar maḥend ad izdeɣ dayes,
COL 1:20 [maḥend] ad zzayes isseṣřeḥ marra min iǧan ak-d Yixef nnes, u [maḥend] ad igg řehna s Idammen n ṣṣalib nnes, am i yinni iǧan di temmurt am i yinni iǧan deg ijenwan.
COL 1:21 Uřa i kenniw - inni tuɣa qbeř d ibarraniyyen d řɛedyan deg ixarriṣen nwem zi ssibbet n řexdayem nwem tiɛeffanin - iwca řexxu řehna
COL 1:22 s arrimet n weysum nnes u n řmewt nnes, ḥima ad kenniw issbedd d imqeddasen qibač nnes, břa ma ad daywem ittwaf řa d ijj n řexmej uřa d ijj n řɛib,
COL 1:23 mařa teqqimem tuyurem di l’iman nwem, am dsas nwem iqqim imten, war tsemmḥem ca deg usitem n L’Injil i tesřim, wenni zi ittwabarraḥ ɣar marra min dd-ittwaxeřqen nni iǧan sadu ujenna, wenni zi dewřeɣ necc, Bulus, d amsexxar.
COL 1:24 Aqa ayi farḥeɣ am kessiɣ tamara xawem u ttkemmřeɣ di arrimet inu min iqqimen zi řemḥayem n Lmasiḥ di ṭṭweɛ n Arrimet nnes tenni d tamesmunt,
COL 1:25 i zi dewřeɣ d amsexxar ɛlaḥsab awekkeř i d ayi immewcen xawem zi AREBBI, ḥima ad ssiwḍeɣ [tabarreḥt n] Wawař n AREBBI ɣar řekmaret,
COL 1:26 ssirr i tuɣa innufaren di zzmanat d řjiřat [n zic], maca ittwassargeb řexxu i imqeddasen nnes,
COL 1:27 inni umi ixs AREBBI ad asen isscen igeřwan n uɛuǧi n ssirr-a jar řegnus, wenni iǧan d Lmasiḥ daywem, asitem n uɛuǧi nneɣ.
COL 1:28 Aqa nettbarreḥ zzayes, u zzayes Netta nesseřmad u nɛeǧem i kuř bnadem s marra tiɣit, ḥima ad nessbedd kuř bnadem nican qibač i Yasuɛ Lmasiḥ.
COL 1:29 I man aya umi jehhdeɣ u ttmenɣiɣ s ufus n jjehd i d ayi immewcen.
COL 2:1 Minzi xseɣ ad tessnem mecḥař d ameqqran amenɣi i tteggeɣ xawem u x yinni di Layudikiya u x marra inni war d ayi ẓrin ca s arrimet d wudem inu,
COL 2:2 ḥima ad yadef ufewwej ɣar wuřawen nsen u ḥima ad awḍen nitni s tayri ɣar marra wagřa n řaman, u ɣar řefhamet n tussna n ssirr n AREBBI, Babatneɣ, u n Lmasiḥ
COL 2:3 nni di nnuffaren marra řeknuz n tiɣit d tussna.
COL 2:4 Man aya qqareɣ t, ḥima uřa d ijj war kenniw iɣekkwi ca s wawařen izewwqen.
COL 2:5 Maɣar waxxa aqa ayi ɣabeɣ zi jjihet n arrimet, nican aqa ayi akidwem zi jjihet n Arruḥ uca farrḥeɣ am ttwařiɣ asettef d l’iman nwem nican di Lmasiḥ.
COL 2:6 Am mammec tqebřem Yasuɛ Lmasiḥ, Siditneɣ, uyurem dayes,
COL 2:7 am tewtim iẓewran u tᵉttwabnam dayes uca tᵉttwaḍmem di l’iman i di tᵉttwasseřmadem, am tᵉttfeyyḍem s uqadi.
COL 2:8 Ḥḍam uřa d ijj war kenniw iɣekkwi ca umi ittexxs tiɣit [n yixef nnes] niɣ acmat ixwan ɛlaḥsab taɣuri n iwdan u ɛlaḥsab lfarayiḍ n ddunect, war iǧi ɛlaḥsab Lmasiḥ.
COL 2:9 Minzi dayes izeddeɣ qaɛ aɛemmar n Arebbi di ṣṣifet n arrimet.
COL 2:10 Aqa dayes teǧam tkemmřem ɛawed, maɣar Netta d Azeǧif x qaɛ řeḥkamat d ṣṣulaṭat.
COL 2:11 Aqa tᵉttwaxetnem dayes ɛawed s yijj n wextan, war iǧi s ifassen [n iwdan], maca umi ittwakkes zzaywem weysum [n arrimet] n ddnub s wextan n Lmasiḥ.
COL 2:12 Kenniw tᵉttwaneḍřem akides deg useɣḍeṣ, u zzayes tᵉttwassnekkarem ɛawed akides, minzi tumnem di jjehd n AREBBI, wenni t-i-dd-issnekkaren zi taddart n imettinen.
COL 2:13 Aqa Netta yarra kenniw, inni tuɣa d imettinen s ddnub nwem u s břa axtan n weysum nwem, ɣar tudart akides, uca iɣfar aneɣ marra ddnub nneɣ.
COL 2:14 Aqa imseḥ tabrat nneɣ n tenfuč, tenni d aneɣ ittehmen ak-d marra tiweṣṣa nnes, aqa iksi tt zi řwesṭ am tt isemmar x ṣṣalib nnes.
COL 2:15 Am issars arrimet nnes, aqa issɛarra řeḥkamat d ṣṣulaṭat bṭayṭay uca yarra i-tent ad seḍḥant s ṭṭbiɛet n mummu n Yixef nnes.
COL 2:16 War tejjim ad kenniw issehweř uřa d ijj, niɣ di macca řa di tissit, niɣ di řfarz deg [wussan n] řeɛyudat řa deg [wass n] uyur n jdid uřa deg [wussan n] ssebt,
COL 2:17 maɣar tina d tiřiwin n min i dd ɣa yasen, maca Lmasiḥ aqa-t d arrimet [i d asent dd-ittřiqen].
COL 2:18 War ttejjim ḥed ad yarzu maḥend ad xawem yegg bezzez maḥend ad tesswaḍɛem ixef nwem i weɛbad n lmalakat, umi netta issniɛmiř aqa ɣares řbař immars, [maca s tidett] yarezzu s zzaɛmet nnes ad dd-yadef di min war iẓri. Aqa netta ixwa di tuffet nnes s nneyyet nnes n weysum n bnadem,
COL 2:19 am war ittcebbar deg Uzeǧif i zi tyemma qaɛ Arrimet s řemɣaret i d as ittic AREBBI, am tᵉttwabna u tᵉttwasenned s řemfaṣeř d iɣezdisen [nnes].
COL 2:20 Maɣar mařa temmutem ak-d Lmasiḥ i lfarayiḍ n ddunect, mayemmi tᵉttwaḥakamem axmi teddarem [ɛad] di ddunect?
COL 2:21 ‘War tḥada!’, ‘War tqasa!’, u ‘War ttᵉṭṭef!’,
COL 2:22 aqa atent d tinamitin ad weddarent, aqa atent d tiweṣṣa d tɣuri n iwdan.
COL 2:23 Aqa-tent ttbanent axmi ɣarsen ict n tɣuri tamiɣist, s wudem n uwaḍeɛ d nneyyet tadiyanect, nhřa aceṭṭar x arrimet, maca war iǧi i min icennɛen, maca i tyawant nnecwat n weysum [n yixef nsen].
COL 3:1 Mařa tᵉttwassnekkarem-dd ak-d Lmasiḥ, xenni arzum min iǧan sennej, mani iqqim Lmasiḥ x ufusi n AREBBI.
COL 3:2 Ɛeqřem min iǧan sennej, war iǧi min iǧan di temmurt,
COL 3:3 minzi kenniw aqa temmutem uca tudart nwem tennuffar ak-d Lmasiḥ di AREBBI.
COL 3:4 Xmi dd ɣa iḍhar Lmasiḥ, wenni iǧan d Tudart nneɣ, řexdenni uřa d kenniw ad kides dd-teḍharem deg uɛuǧi.
COL 3:5 S uyenni nɣem iɣezdisen [n arrimet] nwem inni x temmurt: farq-ccɣeř, řexmej, acahi, nnecwat tiɛeffanin d ṭṭmeɛ, wenni d aɛbad i l’aṣnam,
COL 3:6 s minzi ad dd-yas weɣḍab n AREBBI x ayt n řmuɛṣiyyet.
COL 3:7 Uřa d kenniw tuɣa teggurem ammu zic, umi kenniw tuɣa teddarem [ɛad] di tmesřayin nni.
COL 3:8 Maca řexxu, sarsem man aya [marra] x uɣezdis: aɣḍab d tefqeḥt d tuɛeffna d uceqqef d řhard ixmej.
COL 3:9 War sxarriqem ca x wayawya, maca sarsem ɣar uɣezdis bnadem aqdim ak-d marra ibriden nnes,
COL 3:10 u tyarrḍem [bnadem] n jdid, wenni iddekkwařen jdid s tussna [zzayes Netta], ɣar ṣṣifet n Wenni i-t-i-dd-ixeřqen.
COL 3:11 Dayes war iǧi Wuday řa d Arami, řa d axtan, řa břa axtan, řa d Ayunaniy, řa řbarrani, řa d ismeɣ uřa d ḥurr, maca Lmasiḥ d kuřci u di kuř ijjen.
COL 3:12 X uyenni, kenniw, [a] imqeddasen d imɛizzen inni ittwafarzen zi AREBBI, arḍem s arreḥmet d řeḥnunect d řeḍrafet d uwaḍeɛ n arruḥ d temhint d ttasiɛ n řxaḍar.
COL 3:13 Qebřem u samḥem i wayawya. Mařa ca n yijjen ɣares acetci x wenni d as yudsen, ɣfarem kenniw ijj i wenneɣni, am mammec i d awem iɣfar Lmasiḥ.
COL 3:14 Uca ak-d marra aya, arnim tayri tenni d taxadent n řekmařet.
COL 3:15 [Xenni] ad iḥkem řehna n Lmasiḥ deg wuřawen nwem, [řehna] nni ɣar tᵉttwařaɣam deg ict n Arrimet, uca qadam i Lmasiḥ.
COL 3:16 Jjem Awař nnes ad daywem izdeɣ s marra tiɣit. Sřemdem, sejjɛem ijj wenneɣni s uɣennej n izehhiden d tesbiḥ d izřan n Arruḥ, u ɣennjem i AREBBI s wuřawen nwem ccuren s arḍa.
COL 3:17 Marra min tᵉtteggem s wawař niɣ s tmegga, ggem t s Yisem n Siditneɣ Yasuɛ Lmasiḥ u cekkarem zzayes AREBBI, Babatneɣ.
COL 3:18 A timɣarin, dewřent sadu iryazen nkent am mammec dd-ittas ak-d Lmasiḥ.
COL 3:19 [A] iryazen, xsem timɣarin nwem, war ttqesḥem daysent s tarzugi.
COL 3:20 [A] iḥenjiren, ṭaɛem i lwalidin nwem di marra, minzi man aya yareṭṭa i Siditneɣ.
COL 3:21 [A] lwalidin, war darracem ca iḥenjiren nwem, ḥima war d asen tᵉttraḥ teryast.
COL 3:22 [A] imsexxaren, ṭaɛem i yinni iǧan d aytbab nwem di temmurt di marra, war ttsexxarem ca i tiṭṭawin n iwdan am yinni ixsen ad arḍan iwdan [waha], maca [sexxarem] s řeṣfayet n wuř u zi tiggʷudi n SIDI.
COL 3:23 Qaɛ min ɣa teggem, ggem t s marra řeɛmar nwem, [ggem t] axmi i Siditneɣ, war iǧi i iwdan.
COL 3:24 Snem aqa ad teksim řexřaṣ zi Siditneɣ di řwart, maɣar tᵉttsexxarem i SIDI, Lmasiḥ.
COL 3:25 Minzi wenni itteggen řɣecc, ad ittwaxřef ɛlaḥsab řɣecc i yegga, minzi war din iǧi řfarz n bnadem.
COL 4:1 Kenniw, [a] aytbab, ggem s uweqqar d tsegda ak-d imsexxaren nwem. Snem, belli kenniw ɣarwem ɛawed Sidi deg ujenna.
COL 4:2 Ṣbarem di tẓaǧit, ḥḍam dayes u wcem aqadi [i Arebbi].
COL 4:3 Ẓaǧem ɛawed i neccin, ḥima AREBBI ad aneɣ yarzem tawwart n Wawař, ḥima ad nessiweř x ssirr n Lmasiḥ, wenni umi ǧiɣ ɛawed [d ameḥbus] di ssnaseř,
COL 4:4 ḥima ad t ssaregbeɣ uca ad zzayes ssiwřeɣ nican am mammec i xafi icuwwar.
COL 4:5 Uyurem di tiɣit ak-d yinni n barra, arebḥem řweqt i yeǧan.
COL 4:6 Ad yiři wawař nwem řebda s řxaḍar, meǧḥem t s tmeǧaḥt, u ssnem min zi ɣa dd-tarrem nican x kuř ijjen.
COL 4:7 Ticikus, uma iɛizzen d umsexxar amtiqqi, wenni d amsexxar amɛacar nneɣ di SIDI, ad kenniw issargeb x umeddur inu.
COL 4:8 Ssekkeɣ t ɣarwem, ḥima ad issen mammec teǧam u ḥima ad issareyyeḥ uřawen nwem,
COL 4:9 [jmiɛ] ak-d Unisimus, umatneɣ amtiqqi iɛizzen, wenni iǧan d ijjen zzaywem. Nitni ad kenniw ssaregben mammec neǧa neccin.
COL 4:10 Aristarxus wenni di řeḥbes akidi, ittseǧam-dd xawem s řehna, am mammec xawem ittseǧam uřa d Markus, ayyaw n Bar-Naba wenni x teksim kenniw tiweṣṣa - mařa yusa-dd ɣarwem, qebřem t -
COL 4:11 d Yasuɛ, umi d as qqaren Yustus. Nitni ǧan zeg wextan. Nitni weḥḥedsen ɛawnen ayi di [tmesřact n] Tgeldit n AREBBI uca ssfewwjen ayi.
COL 4:12 Ittseǧam-dd xawem Ipafras s řehna. Netta d ijjen zzaywem, aqa-t d amsexxar n Lmasiḥ, ittedɛa awem řebda di tẓaǧit nnes s jjehd, ḥima ad tbeddem nican, ad tiřim tkemmřen di marra min ixs AREBBI.
COL 4:13 Minzi cehhdeɣ xas, aqa netta aṭṭas i xawem iksi uřa x yinni di Layudikiya d yinni di Hirapulis.
COL 4:14 Luka, aḍbib nneɣ iɛizzen, d Dimas ttseǧamen-dd xawem s řehna.
COL 4:15 Seǧmem x wawmaten inni iǧan di Layudikiya s řehna, x Nimfas u x tmesmunt di taddart nnes.
COL 4:16 Xmi ɣa tᵉttwassɣar tebrat-a jar awem, xenni ḥḍam ad tᵉttwassɣar ɛawed di tmesmunt n Layudikiya uca ad tɣarem kenniw ɛawed tenni zi Layudikiya.
COL 4:17 Ini i Arxippus: “Ḥḍa ad tkemmřed řxedmet n tsexxart i teksid zi Siditneɣ!”
COL 4:18 Sřam wanita [uriɣ t] s ufus inu, zi Bulus. Ɛeqřem x ssnaseř inu. Ad kiwem yiři arḍa. Amin.
1TH 1:1 Bulus d Silwanus d Timutiyu, i tmesmunt n Itissalunikiyyen, [tenni] di AREBBI, Babatneɣ, u di Siditneɣ Yasuɛ Lmasiḥ: arḍa d řehna ad kiwem iřin.
1TH 1:2 Aqa nettqada AREBBI i kenniw marra řebda, u ntidar kenniw břa qeṭṭu di tẓaǧitin nneɣ.
1TH 1:3 Qibač i [wudem n] AREBBI Babatneɣ, nettfekkar di řexdayem n l’iman nwem, deg utamar n tayri nwem u di ṣṣbar n usitem nwem di Siditneɣ Yasuɛ Lmasiḥ,
1TH 1:4 maɣar nessen aqa kenniw tᵉttwafarzem, [a] aytma, imɛizzen n AREBBI,
1TH 1:5 Minzi Řexbar Aṣebḥan nneɣ war dd ɣarwem yiwiḍ s wawařen waha, maca uřa s jjehd, s Arruḥ Iqeddsen u s řeqnaɛet d tidett. Aqa tessnem mammec d aneɣ tuɣa jar awem di ṭṭweɛ nwem.
1TH 1:6 Aqa kenniw tdewřem d imeḍfaren zzayneɣ uřa zi Siditneɣ, maɣar umi xawem tekka řmeḥnet tameqqrant, tᵉṭṭfem deg wawař s řefraḥet n Arruḥ Iqeddsen.
1TH 1:7 Ammu tdewřem d amedya i qaɛ yinni yumnen di Makiduniya u di Axaya.
1TH 1:8 Minzi řexbar n Wawař n Siditneɣ aqa iffeɣ-dd zzaywem, war iǧi di Makiduniya d Axaya waha, maca l’iman nwem di AREBBI idweř ittwassen tanya di marra imucan, ařami nehřa ma nessiweř xas ɛad.
1TH 1:9 Minzi nitni s yixef nsen ɛawden aneɣ, mammec tuɣa tarezmem aneɣ tawwart, uca mammec dd-tdewřem zi l’aṣnam ɣar AREBBI, ḥima ad tɛebdem AREBBI iddaren wenni d tidett,
1TH 1:10 am tᵉttrajam Mmis zeg ijenwan, Wenni dd-issnekkar zi taddart n imettinen, Yasuɛ, wenni d aneɣ i ɣa issnejmen zeg weɣḍab i dd ɣa yasen.
1TH 2:1 Maɣar kenniw simant nwem, [a] aytma, tessnem belli adaf nneɣ nni d ɣarwem negga, war tuɣi iǧi baṭeř.
1TH 2:2 Tuɣa xaneɣ ikka uweddeb d řḥagra di Filippi qbeř, am mammec tessnem. Awarni man aya, aqa nbarreḥ awem Řexbar Aṣebḥan n Lmasiḥ s teryast di AREBBI nneɣ u s umenɣi ameqqran.
1TH 2:3 S minzi afewwej nneɣ war iǧi ca zeg uɣekkwi niɣ zi řexmej niɣ zi řɣecc,
1TH 2:4 maca nessawař am [iwdan] i ittwaḥesben nican zi AREBBI ařami d aneɣ iwekkeř [tabarreḥt n] Řexbar nnes d Aṣebḥan, war iǧi i arḍa n iwdan, maca [i arḍa] n AREBBI wenni iqeǧben uřawen nneɣ.
1TH 2:5 Minzi ɛemmarṣ war tuɣi nᵉttegg tiqedduḥin, aqa kenniw tessnem tt, u war nᵉttegg ɛemmarṣ ijj n uřeḥḥaf x ṭṭmeɛ nneɣ, AREBBI aqa-t din!
1TH 2:6 War narezzu aɛuǧi n iwdan, uřa zzaywem uřa zeg inneɣni, waxxa tuɣa nzemmar ad negg ixef nneɣ jar awen am rrusul n Lmasiḥ.
1TH 2:7 Maca tuɣa aneɣ d iḥninen akidwem, am yict n tebřiɣt tᵉtthilla deg iḥenjiren nnes.
1TH 2:8 Ammu ɛawed tuɣa nᵉttexs kenniw u tuɣa dayneɣ meẓri maḥend ad ncarc akidwem, war iǧi Řexbar Aṣebḥan n AREBBI waha, aḥeqqa uřa d tudart nneɣ, minzi tdewřem d imɛizzen ɣarneɣ.
1TH 2:9 Ɛeqřem xenni, [a kenniw] awmaten nneɣ, mammec tuɣa nᵉttamar u nxeddem s ifassen nneɣ ǧiřet d wass, ḥima war xawem nᵉttegg ddqeř.
1TH 2:10 Kenniw d AREBBI aqa d řechud x mammec d awem tuɣa nettbarreḥ s Řexbar Aṣebḥan n AREBBI di řeṣfayet d tnicant [n wuř], u mammec tuɣa neggur břa řɛib jar marra inni yumnen.
1TH 2:11 Aqa tessnem ɛawed mammec tuɣa nɛeǧem ijj-ijj zzaywem, am yijj n babas i iḥenjiren nnes, u [mammec] negga daywem uř u neched i kenniw,
1TH 2:12 maḥend ad tuyurem am mammec isdaheǧ qibač i AREBBI, wenni d awem dd-iřaɣan ɣar Tgeldit nnes u ɣar uɛuǧi nnes.
1TH 2:13 S uyenni nettqada AREBBI břa qeṭṭu, umi kenniw tqebřem Awař n AREBBI i tᵉṭṭfem zzayneɣ, war iǧi am yijj n wawař n iwdan, maca am Wawař n AREBBI, uca d man aya i yeǧa d tidett, u [Awař-a] ixeddem daywem s řexdayem n yinni yumnen.
1TH 2:14 Minzi kenniw, [a] aytma, tdewřem d imeḍfaren n tmesmunin n AREBBI i iǧan di Yahudiyya di Yasuɛ Lmasiḥ, minzi kenniw teksim ɛawed arrmeḥ zeg ayt n řgens nwem, am mammec ksin uřa d nitni [arrmeḥ] zeg Wudayen,
1TH 2:15 inni inɣin Siditneɣ Yasuɛ Lmasiḥ uřa d inabiyyen i zzaysen [dd-ffɣen], uca [ɛawed] darrcen xaneɣ. Aqa aten war areṭṭin ca i AREBBI, [maca] dewřen ḍidd n iwdan marra.
1TH 2:16 Maɣar menɛen aneɣ, maḥend ad nessiweř ɣar řegnus, ḥima [řegnus] ad ṭṭfen Tudart. Ammu i ttɛemmaren nitni [řmizan n] ddnub nsen řebda, maca iwḍa-dd xasen weɣḍab ař aneggar.
1TH 2:17 [A kenniw] aytmatneɣ, ɣar drus n řweqt nedweř neccin d iyujiřen nwem zi jjihet n uɣembub, maca war iǧi zi jjihet n wuř. S uya tuɣa narezzu s meẓri d ameqqran ad nẓar aɣembub nwem.
1TH 2:18 Tuɣa nexs ad ɣarwem dd-nas, necc Bulus ict n twařa d ict n twařa nneɣni [ɛad], maca cciṭan ibedd ayi deg webrid.
1TH 2:19 Minzi man wen i iǧan d asitem nneɣ, d řefraḥet nneɣ niɣ d ttaj n uɛuǧi nneɣ zzat i Siditneɣ Yasuɛ Lmasiḥ xmi dd ɣa yas, illa kenniw waha?
1TH 2:20 Aqa kenniw d aɛuǧi nneɣ d řefraḥet nneɣ.
1TH 3:1 Umi war nzemmar ad t neṣbar ktar, tuɣa ittɣiř aneɣ mliḥ maḥend ad neqqim di Atina weḥḥedneɣ,
1TH 3:2 uca nessekk awem-dd umatneɣ Timutiyu. Netta d amsexxar n AREBBI d amɛawen nneɣ di [tbarreḥt n] Řexbar Aṣebḥan n Lmasiḥ, ařami izemmar ad kenniw issejhed u ad iqeǧeb l’iman nwem,
1TH 3:3 ḥima uřa d ijj zzaywem war iqeṭṭeɛ řayas zi ssibbet n řemḥayem-a. Aqa kenniw tessnem simant nwem, belli nettwagg i man aya.
1TH 3:4 Maɣar řami d aneɣ tuɣa akidwem, nizzar nenna, belli ad xaneɣ tekk řeḥṣaret, uca ammu i imsar am mammec tessnem kenniw.
1TH 3:5 S uyenni, umi war zemmareɣ ad ṣbareɣ ktar, aqa ssekkeɣ t-i-dd ḥima ad ssneɣ x l’iman nwem, ma ad taɣ wenni ittjarraben aqa ijarreb kenniw uca ad iffeɣ arber nneɣ d walu.
1TH 3:6 Maca řexxu idweř-dd ɣarneɣ zzaywem Timutiyu uca issiweḍ aneɣ-dd řexbar aṣebḥan n l’iman nwem d tayri nwem, aqa kenniw řebda tᵉttidarem aneɣ s řxar zi marra iɣezdisen u daywem meẓri maḥend ad aneɣ tẓarem, am uřa d neccin [dayneɣ meẓri ad kenniw nẓar].
1TH 3:7 S uyenni nettwafewwej zzaywem, [a kenniw] awmaten nneɣ, di marra tamara nneɣ d řemḥayem nneɣ, zi ssibbet n l’iman nwem,
1TH 3:8 uca řexxu nettwanɛecc, mařa kenniw tᵉttɣimam tᵉttbeddam [nican] di Siditneɣ.
1TH 3:9 Mammec i ɣa negg ad nqada AREBBI zi ssibbet nwem x marra řefraḥet i zi nfarreḥ zzaywem,
1TH 3:10 mɣir umi nettᵉttar ǧiřet d wass s waṭṭas zzat i wudem n AREBBI, ḥima ad kenniw nẓar s uɣembub uca ad nkemmeř min ittxeṣṣan ɛad i l’iman nwem.
1TH 3:11 Maca AREBBI, Babatneɣ, d Siditneɣ Yasuɛ Lmasiḥ, ad iseggem abrid nneɣ ɣarwem.
1TH 3:12 Netta ad yarni di tayri nwem n ijjen i wenneɣni u [tayri nwem] i marra, am mammec nᵉttexs neccin uřa i kenniw,
1TH 3:13 uca Netta ad issmeḥḥed uřawen nwem, ḥima ad tiřim břa řɛib di tqeddast qibač i AREBBI Babatneɣ, x minni dd ɣa yas Siditneɣ Yasuɛ Lmasiḥ ak-d marra imqeddasen nnes.
1TH 4:1 S uyenni, [a] aytma, aqa nettzaweg kenniw u nettẓaǧa i kenniw di Siditneɣ Yasuɛ, ḥima, am zzayneɣ třemdem mammec ittxeṣṣa ad tuyurem u ad tarḍam i AREBBI, ad teymam di man aya ktar,
1TH 4:2 minzi kenniw tessnem tiweṣṣa nni d awem newca s Siditneɣ Yasuɛ.
1TH 4:3 Aqa d man aya min ixs AREBBI, aqa ad teymam di tqeddast, ad tḥeyydem x marra farq-ccɣeř,
1TH 4:4 u maḥend kuř ijjen zzaywem ad issen mammec ittxeṣṣa ad yawi tamɣart nnes s tqeddast d ccan,
1TH 4:5 war iǧi di ccehwat n nnecwet, am řegnus nni war issinen ca AREBBI.
1TH 4:6 Ejj uřa d ijj zzaywem ad izɛem ad issehřec umas niɣ ad t iɣecc di tmesřact-a, minzi Siditneɣ ad ineqqem di man aya marra, am mammec nizzar nenna u neched awem.
1TH 4:7 Minzi AREBBI war xaneɣ dd-iřaɣa i řexmej, maca i tqeddast.
1TH 4:8 S uyenni wenni i ɣa issdeǧen, war issdeǧi ca bnadem, maca AREBBI, wenni iwcin Arruḥ nnes Iqeddsen daywem.
1TH 4:9 Nhřa ma nura awem-dd x tayri tenni jar wawmaten, aqa kenniw s yixef nwem ttwassřemdem zi AREBBI ḥima ad texsem ayawya.
1TH 4:10 Maɣar ammu i tᵉtteggem ak-d marra awmaten di Makiduniya tmun. Maca ttareɣ zzaywem, [a] aytma, ḥima ad tfeyyḍem [di man aya].
1TH 4:11 Arzum ad teddarem di řhudnet, ad tewcem taynit i min iǧan nwem, ad txedmem s ifassen nwem, am mammec kenniw numur,
1TH 4:12 ḥima ad tuyurem s uweqqar ak-d yenni iǧan di barra, uca war tehdajem uřa d ict n řḥajjet zi ca n ijjen.
1TH 4:13 [A] aytma, aqa xseɣ ad tessnem belli war ittxeṣṣi ad teksim s wemnus x yenni idewřen ṭṭṣen, am t tteggen iwdan inneɣni inni umi iqḍeɛ řayas.
1TH 4:14 Minzi mařa numen belli Yasuɛ tuɣa immut uca ikkar-dd, [xenni] ad kides yiwi AREBBI ɛawed inni idewřen ṭṭṣen ammu [deg wenḍeř] di Yasuɛ.
1TH 4:15 Maca ad awem nini aya s Wawař n Siditneɣ, aqa neccin, inni i ɣa iqqimen ař dd ɣa yas Siditneɣ, inni [ɛad] iddaren, war nᵉttizzar i yinni idewřen ad ṭṭṣen [deg wenḍeř].
1TH 4:16 Minzi Siditneɣ s Ixef nnes ad dd-ihwa zeg ujenna, xmi dd ɣa iffeɣ řumur d tmijja n uzeǧif n lmalakat, u xmi i ɣa tiři [tmijja n usuḍi s] uyicc n AREBBI, uca imettan inni iǧan di Lmasiḥ ad dd-kkaren d imezwura.
1TH 4:17 Xas uca neccin, inni iqqimen u [ɛad] ddaren, ad kidsen nettwakkes deg iseynuten ɣar umeřqi ak-d Siditneɣ deg ujenna uca ammu i ɣa niři řebda ak-d Siditneɣ.
1TH 4:18 S uya ggem uř deg wayawya s wawařen-a.
1TH 5:1 Maca zi jjihet n zzmanat d tsaɛɛetin, [a] aytma, aqa nhřa ma ad awem dd-ariɣ.
1TH 5:2 Kenniw simant nwem tessnem nican aqa ass n Siditneɣ ad dd-yas am uceffar di ǧiřet.
1TH 5:3 Xmi ɣa inin nitni: ‘Aqa řehna d řhudnet!’, řexdenni ad xasen ikk wareyyeb deɣya, am ttekken řewjeɛ [n tarut] x temɣart tenni s ddeyset, uca war din mani ɣa yarewřen.
1TH 5:4 Maca kenniw, [a] aytma, war teǧim ca di taǧest maḥend ad xawem-dd iwḍa wass nni am uceffar,
1TH 5:5 [maɣar] kenniw marra d tarwa n tfawt d tarwa n wass, war teǧim ca n ǧiřet niɣ n taǧest.
1TH 5:6 S uyenni ittxeṣṣa aneɣ war nᵉtteṭṭeṣ am wenneɣni, maca ad niři nfaq, neḥḍa,
1TH 5:7 minzi inni ittᵉṭṭṣen, aqa ttᵉṭṭṣen di ǧiřet, u inni ittɣellan, aqa ttɣellan s ǧiřet,
1TH 5:8 maca ejj aneɣ, neccin i yeǧan d iḥenjiren n wass, ad niři neḥḍa deg ixariṣṣen nneɣ, ad nḥezzem idmaren nneɣ s warruḍ n wuzzař n l’iman d tayri, u ad nessars lkask n usitem n Tudart [x uzeǧif].
1TH 5:9 Minzi AREBBI war d aneɣ yeggi i weɣḍab, maca ḥima ad neṭṭef Tudart di Siditneɣ Yasuɛ Lmasiḥ,
1TH 5:10 wenni xaneɣ immuten, ḥima neccin, ma nfaq niɣ neṭṭeṣ, ad kides neddar.
1TH 5:11 S uyenni ggem uř deg wayawya, bnam ijjen wenneɣni am t teggim ɛawed.
1TH 5:12 Maca nettar zzaywem, [a] aytma, ad tessnem inni itteggen tizemmar aṭṭas jar awem d inni xawem iǧan di Siditneɣ d inni kenniw isseřmaden,
1TH 5:13 maḥend ad ttweqqaren zzaywem umi d asen tᵉttemmřem tayri s ufeyyeḍ uca ad teḥḍam řehna akidsen zi ssibbet n řxedmet nsen.
1TH 5:14 Neɛřem awem, [a] aytma, ad tseggmem inni dd-iffɣen zeg webrid, ggem uř deg inni war ɣarsen teǧi teryast, arbum ddqeř n yinni iḍeɛfen, iřim d iṣebbaren ak-d marra.
1TH 5:15 Ḥḍam maḥend uřa d ijj war ittentiqim řɣar s řɣar, maca arzum řebda min iṣebḥen ak-d wayawya uca i kuřci.
1TH 5:16 Farḥem řebda,
1TH 5:17 ẓẓaǧem břa qeṭṭu,
1TH 5:18 qadem di marra timesřayin, minzi d man aya min ixs AREBBI di Yasuɛ Lmasiḥ i kenniw.
1TH 5:19 War ssxessyem ca Arruḥ,
1TH 5:20 war sseḥqaram awařen n nnubuwat,
1TH 5:21 weznem qaɛ min iǧan uca ṭṭfem ɣar min iṣebḥen.
1TH 5:22 Aggʷejem x marra min iǧan ddab n tuɛeffna.
1TH 5:23 Iři ad kenniw issqeddes AREBBI n řehna marra uca ad iḥḍa marra arruḥ d řeɛmar d arrimet nwem břa řɛib ař tawasit n Siditneɣ Yasuɛ Lmasiḥ.
1TH 5:24 Aqa d Wenni xawem dd-ittřaɣan d amtiqqi, aqa Netta ad t igg.
1TH 5:25 [A] aytma, ksim aneɣ řmeɛruf ɛawed.
1TH 5:26 Seǧmem x wawmaten nneɣ s usudem iqeddsen.
1TH 5:27 Necc ssjuǧeɣ kenniw deg wudem n Siditneɣ maḥend ad tɣarem tabrat-a i marra awmaten imqeddasen.
1TH 5:28 Arḍa n Siditneɣ Yasuɛ Lmasiḥ ad kiwem yiři.
2TH 1:1 Bulus d Silwanus d Timutiyu, i tmesmunt n Itissalunikiyyen, tenni iǧan di AREBBI, Babatneɣ, u di Siditneɣ Yasuɛ Lmasiḥ.
2TH 1:2 Arḍa d řehna zi AREBBI, Babatneɣ, u zi Siditneɣ Yasuɛ Lmasiḥ ad kiwem iřin.
2TH 1:3 Icuwwar ad nqada AREBBI i kenniw řebda, [a] aytma, am mammec ittřiq, minzi l’iman nwem imeqqar aṭṭas, am mammec uřa d tayri n kuř ijjen zzaywem marra i wenni d as yudsen tarenni tmeqqar ktar,
2TH 1:4 ař nettfeyyec xawem di tmesmunin n AREBBI x ssibbet n l’iman nwem d ṣṣbar nwem di marra adarrec nwem d řemḥayem nwem nni teksim.
2TH 1:5 Man aya d lburhan n řḥukm isseggden n AREBBI, aqa tᵉttwaḥasbem tesdaheǧem Tageldit, tenni xef teksim amarret.
2TH 1:6 U mařa xenni d řḥeqq zzat i AREBBI umi ɣa ixeǧeṣ s řmeḥnet i yinni kenniw iḥeṣṣaren,
2TH 1:7 [xenni] Netta ad kidneɣ isseddar uřa d kenniw inni ittwaḥṣaren, [wah ad aneɣ isseddar akidwem] ɣar usargeb n Siditneɣ Yasuɛ Lmasiḥ zeg ujenna ak-d řɛeskarat n lmalakat nnes,
2TH 1:8 x minni i ɣa intaqem di tmessi itteḥduduqen x yinni war issinen ca AREBBI u x yinni war xsen ad cehden s Řexbar Aṣebḥan n Siditneɣ Yasuɛ Lmasiḥ.
2TH 1:9 Minzi ina ad ttwaɛaqben di řḥukm s uhellek i řebda am yaggwejen x wudem n Siditneɣ u x uɛuǧi n jjehd nnes,
2TH 1:10 xmi dd ɣa yas Netta ḥima ad ittwaɛuǧi deg wass nni di marra imqeddasen nnes, u ḥima ad isscen řeɛjayeb nnes s yinni dayes yumnen, minzi tumnem zi cchadet nneɣ i kenniw deg wass nni.
2TH 1:11 S uyenni nkessi awem řmeɛruf řebda, ḥima AREBBI nneɣ ad kenniw yegg ad tesdaheǧem tařaɣit nwem, u [ḥima] ad kenniw iccur s jjehd maḥend ad tiřim twejdem qaɛ i [tmegga n] tcuni u i řexdayem n l’iman,
2TH 1:12 ḥima ad daywem ittwaɛuǧi Isem n Siditneɣ Yasuɛ, uca uřa d kenniw dayes, ɛlaḥsab arḍa n AREBBI nneɣ d Siditneɣ Yasuɛ Lmasiḥ.
2TH 2:1 Aqa nᵉttzaweg kenniw, [a] aytma, zi jjihet n twasit n Siditneɣ Yasuɛ Lmasiḥ d wesmuni nneɣ ɣares,
2TH 2:2 aqa war tᵉttnexřiɛem niɣ tesḥissfem ca deɣya, war iǧi s ijj n wawař niɣ s ca n arruḥ niɣ s ict n tebrat axmi zzayneɣ, [i iqqaren]: “Xzar, ass n Siditneɣ yusa-dd!”
2TH 2:3 War ttejji uřa d ijj ad kenniw iɣwa s ca n webrid, minzi [ass] nni war dd-ittis qbeř i dd ɣa yas uɣewweɣ uca ad dd-iban bnadem n ddnub, aqa-t d mmis n tehliket.
2TH 2:4 Netta ittemɛařa u issɛuǧa ixef nnes x marra min ittwasemman ‘AREBBI’ niɣ ‘aɛbad’, ař ɣa iqqim di Zzawect Tameqqrant n AREBBI amecnaw netta d AREBBI i yeǧa, uca ad isscen i yixef nnes, aqa netta axmi AREBBI.
2TH 2:5 Ma war teɛqiřem ca umi tuɣa ayi kiwem, aqa nniɣ awem-t?
2TH 2:6 Maca řexxu tiwḍem tessnem min d as ibedden ɛad deg webrid, ḥima ad dd-iban di řweqt nnes.
2TH 2:7 Ssirr n řmuɛṣiyyet aqa ixeddem [řexxu]. Maca mařa immeksi zi řwesṭ min d as issbedden ɛad deg webrid řexxu,
2TH 2:8 ad dd-iḍhar bab n řmuɛṣiyyet, wenni ɣa isshellek Siditneɣ Yasuɛ s twarrit n nnefs zeg uqemmum nnes, ad t issebḍeř xmi dd ɣa tban twasit nnes.
2TH 2:9 Maɣar tawasit n [bab nni n řmuɛṣiyyet] ad traḥ [jmiɛ] ak-d řxedmet n cciṭan s marra jjehd d řeɛřamat d lmuɛjizat issxarriqen,
2TH 2:10 u s marra řɣecc n řmuɛṣiyyet deg yinni i ɣa ihellken, minzi nitni war qbiřen ca tayri n tidett ḥima ad zzayes afen Tudart.
2TH 2:11 S uyenni AREBBI ad ɣarsen dd-issekk min ten ɣa yarr s jjehd ɣar uweddar, ař ɣa yamnen deg uxarriq.
2TH 2:12 Marra inni war yuminen ca di tidett, maca ixsen řmuɛṣiyyet ktar, ad ttwaḥakmen.
2TH 2:13 Maca icuwwar aneɣ ad nqada AREBBI řebda xawem, [a] awmaten nneɣ, inni xef iɛizz Siditneɣ, aqa AREBBI ixḍar i kenniw zeg umezwaru i Tudart, s tqeddast zi Arruḥ u s l’iman n tidett.
2TH 2:14 Aqa iřaɣa-dd xawem i man aya s ubarreḥ nneɣ s Řexbar Aṣebḥan, ḥima ad tiřim i uɛuǧi n Siditneɣ Yasuɛ Lmasiḥ.
2TH 2:15 S uyenni, [a] aytma, beddem nican uca ṭṭfem di tweṣṣa i d awem ittwassřemden zzayneɣ, ma s wawař niɣ s tebrat nneɣ.
2TH 2:16 Maca Netta, Siditneɣ Yasuɛ Lmasiḥ, u AREBBI, Babatneɣ, wenni d aneɣ ixsen d wenni d aneɣ iwcen afewwej ittduman d usitem icnan s arḍa nnes,
2TH 2:17 ad issfewwej uřawen nwem uca ad kenniw issejhed di marra awař u di marra řxedmet taṣebḥant.
2TH 3:1 [A kenniw,] awmaten nneɣ, zi ssa d tsawent ksim aneɣ řmeɛruf ḥima Awař n Siditneɣ ad dd-iffeɣ deɣya u ad ittwassɛuǧ, am mammec tuɣa imsar jar awem ɛawed,
2TH 3:2 ḥima ad nettwafekk zeg iwdan war iḥřin, iɛeffanen, minzi l’iman war iǧi ɣar marra.
2TH 3:3 Maca SIDI d amtiqqi. Netta ad xawem iḥḍa uca ad kenniw ifekk zeg umɛeffan.
2TH 3:4 Maca neccin nettiqq daywem di Siditneɣ, belli min xef nweṣṣa kenniw, aqa tᵉtteggem t uca ad teqqimem tᵉtteggem t.
2TH 3:5 Ad indeh Siditneɣ uřawen nwem ɣar tayri n AREBBI u ɣar ubarreḥ s Řexbar Aṣebḥan n Lmasiḥ.
2TH 3:6 Nweṣṣa kenniw, [a] aytma, deg Yisem n Siditneɣ Yasuɛ Lmasiḥ, ad tḥeyydem i kuř uma i igguren di min war iḥřin, war iǧi ɛlaḥsab tiweṣṣa i zzayneɣ iksi.
2TH 3:7 Aqa kenniw tessnem mammec icuwwar ad aneɣ teḍfarem, minzi neccin war nuyur jar awem di min war iḥřin.
2TH 3:8 War necci aɣrum ak-d ḥed baṭeř, maca s řxedmet d tamara tuɣa aneɣ nxeddem ǧiřet d wass, ḥima war dd-nettis nedqeř x ca n ijjen zzaywem.
2TH 3:9 War iǧi minzi war ɣarneɣ ttesriḥ i man aya, maca ḥima ad negg ixef nneɣ d lmital i ɣa teḍfarem.
2TH 3:10 Minzi řami tuɣa aneɣ neǧa akidwem, aqa nweṣṣa ammu: mařa ḥed war ixs ad ixdem, war ittett ɛawed.
2TH 3:11 Minzi nesřa aqa din ca jar awem inni igguren di min iɛeffnen, war xeddmen qaɛ, maca tteggen [mɣir] min war isekkwin.
2TH 3:12 Aqa numur u nziyyar i-ten di Siditneɣ Yasuɛ Lmasiḥ ḥima ad xedmen di řhudnet, ad ccen aɣrum nsen.
2TH 3:13 Maca kenniw, [a] aytma, war ttuḥiřem ca maḥend ad teggem min icnan.
2TH 3:14 Maca mařa ca n ijjen war iṭaɛ i wawařen i yuran di tebrat-a, bḍam xas, war ttxeǧaḍem ca akides, ḥima ad idweř ittseḍḥa,
2TH 3:15 maca war t tᵉttḥessbem d řeɛdu maca nedhem t ɣar webrid am yijj n tawmat.
2TH 3:16 Maca Sidi n řehna ad awem iwc řehna i řebda x marra iɣezdisen. Siditneɣ ad yiři akidwem marra.
2TH 3:17 Ijj n useǧem s ufus inu. Necc, Bulus, uriɣ aya. Ta d řeɛřamet di marra tibratin inu. Ammu i d uriɣ.
2TH 3:18 Arḍa n Siditneɣ Yasuɛ Lmasiḥ ad akidwem yiři marra, [a awmaten inu]. Amin.
1TI 1:1 Bulus, rrasul n Yasuɛ Lmasiḥ, ɛlaḥsab řumur n AREBBI, wenni d aneɣ itticen Tudart, u n Lmasiḥ Yasuɛ, wenni d asitem nneɣ.
1TI 1:2 I Timutiyu, mmi d tidett di l’iman: arḍa d arreḥmet d řehna [ad ac iřin] zi AREBBI, Babatneɣ, u zi Lmasiḥ Yasuɛ, Siditneɣ.
1TI 1:3 Řami ruḥeɣ ɣar Makiduniya zawgeɣ cek ad teqqimed di Afasus, ḥima ad tumured i ca n yeryazen ḥima war sseřmiden ca iseřmaden nneɣni,
1TI 1:4 [u] ḥima war tticen ca taynit i tḥuja ixwan d taṣiřat war iqeṭṭin nni dd-ittawyen ɣar imḥarwaḍen ktar, war iǧi ɣar min iǧan i řebni di l’iman n AREBBI.
1TI 1:5 Ssum n tweṣṣa aqa d tayri zeg wuř amezdag d tnefsect icnan u zi l’iman d tidett.
1TI 1:6 Aqa dinni ca inni iheyyḍen x man aya uca nnqeřben ɣar řhard ixwan.
1TI 1:7 Nitni xsen ad iřin d imesɣaren n Ccariɛa břa řefhamet di min qqaren u x min xef ttemcubbucen.
1TI 1:8 Maca nessen belli Ccariɛa teṣbeḥ mařa ḥed ijja ixef nnes ad ittwandeh zzayes ɛlaḥsab Ccariɛa,
1TI 1:9 am nessen aqa Ccariɛa war temmewc ca i umseggaden, maca i yinni war iseggden u i imɣewwaɣen, i iɛeffanen d imednab, i imeqjaḥ, i imexmujen, i yinni iwtin babatsen u i yinni iwtin yemmatsen u i yinni ineqqen [iwdan],
1TI 1:10 i ayt n farq-ccɣeř d zzwameř, i yinni ittsebbaben deg iwdan, i ayt n bu-ixarriqen d yinni ittareẓẓan tajaǧit nsen uca zeɛma i marra min war dd-ittisen ca ak-d useřmed iṣeḥḥen
1TI 1:11 n L’Injil i d ayi ittwawekkřen, zi jjihet n uɛuǧi n AREBBI ittwabarken.
1TI 1:12 Necc ttqadiɣ Wenni d ayi issjehden, aqa Siditneɣ Yasuɛ Lmasiḥ, umi iḥseb ayi-dd d amtiqqi řami d ayi igga di řxedmet n tsexxart [nnes],
1TI 1:13 necc d wenni tuɣa iǧan qbeř d amceqqaf d ijj n umarrat [n imasiḥiyyen] uřa d ijj n bu-řɛunf. Maca temmewc ayi-dd arreḥmet, minzi ggiɣ t war ssineɣ, [umi d ayi tuɣa] břa l’iman.
1TI 1:14 Arḍa n Siditneɣ tuɣa ifeyyeḍ dayi s waṭṭas, uřa d l’iman d tayri tenni iǧan di Yasuɛ Lmasiḥ.
1TI 1:15 Wa d awař dayes řaman, i isdaheǧen ad yiři iggur, aqa Yasuɛ Lmasiḥ yusa-dd ɣar ddunect ḥima ad issenjem imednab, inni zzaysen necc d amezwaru.
1TI 1:16 Maca x uya ksiɣ arreḥmet maḥend Yasuɛ Lmasiḥ ad isscen dayi d amezwaru marra ttasiɛ n řxaḍar nnes, d lmital i yinni zzayes i ɣa yamnen i Tudart ittduman.
1TI 1:17 Aqa i Ujeǧid n zzmanat, d Wenni war ifennin, d Wenni war ittwiřin, Wenni d AREBBI d Ijj, ad ɣares yiři ccan d uɛuǧi i zzman n zzmanat qaɛ. Amin.
1TI 1:18 Tasexxart-a, [a] mmi Timutiyu, sswekkřeɣ cek xas, ḥima ad temmenɣed amenɣi aṣebḥan ɛlaḥsab min xak ittwanabben qbeř,
1TI 1:19 s l’iman d tnefsect icnan, maɣar inni ugin man aya, aqa ssexwan ixef nsen zi l’iman.
1TI 1:20 Jar asen Himiniyus d Aliksandir, inni sellmeɣ i cciṭan ḥima ad řemden maḥend war ttceqqafen.
1TI 2:1 S uyenni ttzawageɣ kenniw, ḥima ad tqarrbem d amezwaru ɣar AREBBI s tutra d tẓaǧitin d tkessit s řmeɛruf d uqadi di ṭṭweɛ n marra iwdan,
1TI 2:2 di ṭṭweɛ n ijeǧiden d imeqqranen, ḥima xenni ad neddar di řehna d řhudnet u s marra tiggʷudi d tezdugi zzat AREBBI.
1TI 2:3 Minzi man aya d aṣebḥan u yusa as-dd i řxaḍar i AREBBI, wenni d aneɣ itticen Tudart,
1TI 2:4 wenni ixsen aqa marra iwdan ad ṭṭfen Tudart uca ad dd-dewřen ɣar tussna n tidett.
1TI 2:5 Minzi aqa din ijj n AREBBI d ijj n Lwasit jar AREBBI d iwdan, aqa Netta d Mmis n bnadem, Yasuɛ Lmasiḥ,
1TI 2:6 wenni iwcin Ixef nnes d aṣřaḥ i marra bnadem, aqa-tt d cchadet i dd-yusin di řweqt nnes.
1TI 2:7 I man aya ttwaggeɣ d ambarreḥ d rrasul, aqa qqareɣ tidett, war ssxarriqeɣ ca, ḥima ad iřiɣ d amseɣɣar n řegnus di l’iman n tidett.
1TI 2:8 S uya xseɣ belli iryazen ad ẓẓaǧen di mkuř amcan, am ssgeɛɛaden ifassen nsen s tezdugi, břa axeyyeq d umcubbec.
1TI 2:9 Ammu uřa d timɣarin ad yarḍent s uweqqar, ittxeṣṣa ad zehhjent ixef nsent s ijj n webrid n řeḥya u n tsexxayt, war iǧi s umudi n ucuwwaf niɣ s wureɣ niɣ s tyaqutin niɣ s warruḍ iɣřan,
1TI 2:10 maca [ad zehhjent ixef nsent] s řexdayem iṣebḥen am mammec dd-yusa x temɣarin, tinni ittnejbaden ɣar uweqqar n AREBBI.
1TI 2:11 Ejj tamɣart ad teřmed di řhudnet, ak-d marra tamwaḍeɛt,
1TI 2:12 maca necc war ttejjiɣ tamɣart ad tesseřmed niɣ ad ɣares yiři jjehd x weryaz, maca ad tiři tesqar.
1TI 2:13 Minzi Adam ittwagg d amezwar, awarni as Ḥawwa.
1TI 2:14 Uca Adam war ittwaɣarr ca, maca tamɣart tᵉttwaɣarr, xenni texḍa x tewṣeyyet.
1TI 2:15 Maca ad teddar s tarwa nnes, mařa ttɣiman nitni ttcebbaren di l’iman d tayri d tqeddast d řeḥya.
1TI 3:1 Wa d awař dayes řaman: mařa ixs ḥed ad yiři d amɣar, aqa ittmeẓri deg ict n řxedmet tecna.
1TI 3:2 Maca ittxeṣṣa i umɣar ad itwaf břa řɛib, ad yiři d aryaz n ict n temɣart, ɣares amekken n nnefs, ad yiři d asexxay, ad igg s usettef, ad yareḥḥeb s inewjiwen, izemmar ad isseřmed.
1TI 3:3 Netta war ittiři d amescar niɣ iwwet deɣya s ufus nnes, maca ad yiři d amwaḍeɛ, war ittemcubbuc, war ittiři d aqezzaz.
1TI 3:4 Aqa netta isseggur taddart nnes mliḥ uca iḥekkem x iḥenjiren nnes s marra řeṣfayet.
1TI 3:5 Maca mařa netta war izemmar ad issuyur taddart nnes, mammec ɣa igg ad iḥḍa tamesmunt n AREBBI?
1TI 3:6 War ittiři d ameḥḍar n jdid [di l’iman], ḥima war ittuff [s řefyuc] uca ad iwḍa di ccreɛ n cciṭan.
1TI 3:7 Ɛawed ittxeṣṣa ad ɣares tiři ṣṣumɛet tecna ɣar yinni di barra, ḥima war xas ttɛeyyiben uca war iweṭṭi ca di řefxux n cciṭan.
1TI 3:8 Ittxeṣṣa ɛawed i imsexxaren [di tmesmunt] ad iřin d imezdagen, war ssiwiřen ca s tnayen n iřsawen, war xezzaren ca ɣar binu aṭṭas, war ḍemmɛen di arrbeḥ war iḥřin.
1TI 3:9 Ittxeṣṣa asen ad ṭṭfen di ssirr n l’iman s tnefsect teṣfa.
1TI 3:10 Ejj i-ten ad ttwaqeǧben d amezwaru, řexdenni, mařa iban-dd war daysen ittiři bu řɛib, ad sexxaren.
1TI 3:11 Ammu ittxeṣṣa uřa i timɣarin ad arsint s tsexxayt, ad ḥḍant di řeɛquř nsent, ad daysent tiři řmanet di marra, war d ttiřint d timceqqafin.
1TI 3:12 Ittxeṣṣa i imsexxaren [di tmesmunt], aqa [kuř ijjen zzaysen] ad yiři s ict n temɣart, uca ittxesṣa as ad issuyur mliḥ iḥenjiren nnes d taddart nnes.
1TI 3:13 Minzi inni itteggen taseyyart nsen mliḥ, ad ṭṭfen i yixef nsen ijj n wemcan icna d waṭṭas n teryast di l’iman n Yasuɛ Lmasiḥ.
1TI 3:14 Uriɣ ac-dd man aya uca ssitimeɣ ad ɣarek dd-aseɣ deɣya.
1TI 3:15 Maca mařa ɛeṭṭařeɣ xak, ad tessned mammec ittxeṣṣa ad nuyur di taddart n AREBBI, tenni iǧan d Tamesmunt n AREBBI iddaren, apilar d dsas n tidett.
1TI 3:16 Ssirr wanita n tsegda d ameqqran s tidett! “D Wenni ittwassargben di ddat, ittwaseggden di Arruḥ, iḍḥaren-dd i lmalakat, ittwabarrḥen zzayes jar řegnus, d Wenni zzayes yumnen di ddunect, immeksin deg uɛuǧi.”
1TI 4:1 Maca Arruḥ iqqar nican belli di zzmanat tineggura ca ad ḥeyyden x l’iman umi ɣa ḍfaren řaryaḥ issɣekkwan d tɣuri n ccwaṭen.
1TI 4:2 Nitni sɣekkwan am ssniɛmiřen ixef nsen, ssxarriqen u tteqqden tanefsect nsen.
1TI 4:3 Nitni ttᵉṭṭfen řemřac uca ttamaren asbeɛɛed x macca nni dd-ittwaxeřqen zi AREBBI maḥend ad tiři i nnfeɛ d uqadi i yinni yumnen u ssnen tidett.
1TI 4:4 Minzi marra min dd-ittwaxeřqen zi AREBBI iṣbeḥ uca war dayes min ɣa nagi mařa neqbeř zzayes s uqadi,
1TI 4:5 minzi ad ittwaqeddes s Wawař n AREBBI d tẓaǧit.
1TI 4:6 Mařa tessřemded man aya i wawmaten nnec, ad tiřid d amsexxar n Yasuɛ Lmasiḥ, aqa tᵉttwarebbid deg wawařen n l’iman u tᵉttwassřemded di tɣuri n ṣṣaḥ.
1TI 4:7 Maca aggʷej x tḥuja ixwan n twessura u marres ixef nnec di tsegda.
1TI 4:8 Minzi arriyaḍa n arrimet tᵉttawi ɣar nnfaɛ i drus n řweqt waha, maca tasegda tneffeɛ řebda, uca aqa ɣares lwaɛd n Tudart i yiḍa u i řweqt i dd ɣa yasen.
1TI 4:9 Wa d awař dayes řaman, isdaheǧ ad ittwaqbeř.
1TI 4:10 Minzi i man aya umi nxeddem u nettwasseḥqara ɛawed, minzi asitem nneɣ aqa-t di AREBBI iddaren, wenni itticen Tudart i marra iwdan, amezwaru i yinni yumnen.
1TI 4:11 Seřmed, tumured s man aya.
1TI 4:12 Ejj uřa d ijj war cek isseḥqiri ca x temẓi nnec, maca iři d lmital i yinni yumnen, s wawař, s wendah, s tayri, s l’iman u s tazdugi.
1TI 4:13 Iři tecḍared di tɣuri [i tmesmunt], di ṭẓaǧit u deg useřmed ař dd ɣa yaseɣ.
1TI 4:14 War sḥeqqara ca tawhibt i dayek, tenni i d ac immewcen umi tuɣa ttnabben u ssarsen imɣaren xak ifassen.
1TI 4:15 Ɛqeř x tmesřayin-a, cebbar daysent, ḥima ticři nnec ɣar zzat ad tban i marra.
1TI 4:16 Ḥḍa ixef nnec u ḥḍa x useřmed, ṣbar di man aya, minzi mařa teggid ddegga, ad teḥḍid ixef nnec di Tudart uřa d inni d ac ittesřan.
1TI 5:1 War tiřid tewɛared i uwessar, maca nesḥ i-t am babac, uca ibřiɣen am wawmaten nnec,
1TI 5:2 tiwessura am tiyemmatin, uca tiɛezriyyin am suyᵉtmac nnec, s marra řeṣfayet.
1TI 5:3 Weqqar tijjař, tinni d tidett ǧant d tijjař.
1TI 5:4 Mařa ca n tajjač ɣares iḥenjiren niɣ ayyawen, ejj i-ten ad řemden d amezwar maḥend ad ggen min ittřiqen di ṭṭweɛ n řaǧ nsen, ad dd-arren i lwalidin min ttursen, minzi ddegga yusa-dd x řxaḍar n AREBBI.
1TI 5:5 Maca tajjač nican d tenni iǧan weḥḥdes, tessitim di AREBBI uca tṣebbar di tutra d tẓaǧitin, ǧiřet d wass.
1TI 5:6 Maca tenni iwḍan di tudart n nnecwet, aqa temmut waxxa teddar.
1TI 5:7 Weṣṣa i-tent timesřayin-a, ḥima ad iřint břa řɛib.
1TI 5:8 Minzi mařa ca n yijj war itthilli ca di wi iǧan nnes, d amewaru deg yinni iǧan d aytbab n taddart n familya n yinni yumnen, aqa wanita immenḍar l’iman uca netta mahu x yinni war yuminen ca.
1TI 5:9 Ixḍar xenni ict n tajjač illa mařa ɣares zi settin n iseggʷusa ař tsawent, ict n tajjač nni tuɣa [d tamɣart] n ijj n weryaz,
1TI 5:10 tenni ɣar teǧa cchadet aqa tegga řexdayem tiṣebḥanin: niɣ tesseymi iḥenjiren nnes, niɣ tareḥḥeb s ibarraniyyen, niɣ tessired iḍaren n imqeddasen, niɣ tewca fus i yinni ittwaḥṣaren, [wah,] aqa tegga marra řxedmet taṣebḥant.
1TI 5:11 Maca war qebbeř tijjař timeẓyanin, minzi nitenti ttexsent ad ssarxunt i Lmasiḥ s nnecwat nsent, arezzunt x ijj n weryaz.
1TI 5:12 Aqa ccreɛ nsent imten, minzi ssarsent l’iman nsent amezwar ɣar uɣezdis.
1TI 5:13 Maɣar nitenti ssřemdent [inneɣni] řeɛqez am ggurent x tudrin, war iǧi ssřemdent waha řeɛgez, maca nitenti ttɛawadent řexburat, ttadfent di cɣuřat [n midden], qqarent min war icuwwaren.
1TI 5:14 S uyenni xseɣ ad meřcent tijjař timeẓyanin, ad dd-jjent iḥenjiren, ad ssuyurent taddart nsen, war ttejjint ca i řeɛdu ssibbet ḥima ad iceqqef.
1TI 5:15 Minzi aqa ca [zzaysent] bdant ad ffɣent abrid, ḍeffarent cciṭan.
1TI 5:16 Mařa din iryazen niɣ timɣarin yumnen ɣarsen tijjař, ejj i-ten ad daysent thillan, maḥend war ittiři ddqeř ɛad x tmesmunt, ḥima [tamesmunt] ad ɣares yiři maḥend ad tɛawen tinni iǧan d tijjař s tidett.
1TI 5:17 Imɣaren nni ittḍebbaran mliḥ, sdahǧen aweqqar tnayen n imuren, abeɛda inni ixeddmen deg Wawař u deg useřmed.
1TI 5:18 Minzi Tira [Iqeddsen] qqarent: “War ttegg tacmant i uyenduz issarwaten!”, u: “Axeddam isdaheǧ řmunet nnes!”
1TI 5:19 War qebbeř ca tanfuč ḍidd i umɣar, mɣir x uqemmum n tnayen niɣ n třata n řechud.
1TI 5:20 Inni ixḍan, ɛeyyeb i-ten zzat i marra, ḥima inneɣni ad ggʷeden ɛawed.
1TI 5:21 Ziyyareɣ xak zzat i AREBBI d Siditneɣ Yasuɛ Lmasiḥ d lmalakat nnes ittwafarzen, ad teḥḍid man aya břa řfarz, war ttegg uřa d ict n tmesřact ɛlaḥsab udmawen.
1TI 5:22 War ssrusa ifassen nnec x ḥed s uqeǧeq, war carrec di ddnub n inneɣni, ḥḍa ixef nnec di řeṣfayet.
1TI 5:23 War sess aman waha, maca su drus n binu i stumaɣu nnec u i řeḥřac nnec azirar.
1TI 5:24 Aqa din iwdan i ɣar iǧa ddnub nsen banen mliḥ deɣya, aqa [ddnub nsen] ttizzaren asen ɣar ccreɛ, uca aqa din ca nneɣni ḍeffaren ten [ddnub nsen].
1TI 5:25 Ammu dd-banent uřa d řexdayem tiṣebḥanin, maca [uřa d] tinni i war iǧin ammu, war zemmarent ad qqiment nnuffarent.
1TI 6:1 Ittxeṣṣa i marra inni iǧan sadu azayřu n tesmuɣi ad weqqaren aytbab nsen di marra, ḥima war ittiři uceqqef deg Yisem n AREBBI u di tɣuri nnes.
1TI 6:2 Ejj [isemɣan] nni ɣar iǧa imasen umnen war ten sseḥqirin ca, umi nitni d awmaten i iǧan. Maca s řɛeks ejj i-ten ad asen sexxaren [mliḥ], minzi nitni umnen u aqa aten d [awmaten] iɛizzen, inni ɣarsen xeddmen nitni di řaman. Seřmed man aya u zeyyar xasen.
1TI 6:3 Maca mařa din ḥed isseřmed ict n řḥajjet nneɣni uca war yareddef ca awařen iṣeḥḥen n Siditneɣ Yasuɛ Lmasiḥ d tɣuri x mammec icuwwar ad neɛbed AREBBI s tiggʷudi,
1TI 6:4 aqa netta ittuff am war issin walu, iweddar deg imḥarwaḍen d imcubbecen i-dd-ittawyen řeḥsed d umenɣi d uceqqef d ict n nneyyet d taɛeffant
1TI 6:5 uřa d tamara i dd-yekkin zeg iwdan inni ittwaɣeccen di řeɛqeř nsen, tweddar asen ttidet, ittɣiř asen aqa arbeḥ iqqim ɣar tiggʷudi zi AREBBI. Beɛɛed xasen.
1TI 6:6 Maca arbeḥ nneɣ d ameqqran. Aqa-t d tiggʷudi zi AREBBI, [am] ɣarneɣ min neḥdaj.
1TI 6:7 Minzi war dd-niwi walu ɣar ddunect uca aqa nessen war nzemmar akidneɣ neksi walu zzayes.
1TI 6:8 S uyenni, mařa ɣarneɣ řmeɛteq d dduri, aqa neqneɛ.
1TI 6:9 Maca inni ixsen ad ssmunen agřa, ad wḍan deg ijarriben u di řefxux u deg waṭṭas n nnecwat tifɣař ittḍarran, tinni ittejjan iwdan ad ɣarqen deg uteḥḥi d řekḥeḍ.
1TI 6:10 Minzi aẓwar n marra tuɛeffna aqa t d ṭṭmeɛ n tmenyat. Aqa din ca inni tuɣa ittmeẓřin di man aya, iweddar asen l’iman uca jebbden aṭṭas n tamara i yixef nsen.
1TI 6:11 Maca cek, a bnadem n AREBBI, arweř zi man aya uca arzu x tsegda, x tnicant, x l’iman, x tayri, x ṣṣbar u x temhint.
1TI 6:12 Mneɣ amenɣi aṣebḥan n l’iman, cebbar di Tudart ittduman nni umi ɣar dd-tᵉttwařaɣid, min xef tcehded cchadet taṣebḥant zzat i waṭṭas n řechud.
1TI 6:13 Cehhdeɣ i cek zzat i AREBBI, wenni iwcin Tudart i marra, u zzat i Yasuɛ Lmasiḥ, wenni tuɣa icehhden cchadet taṣebḥant aṭṭas zzat i Punṭiyus Pilaṭus,
1TI 6:14 ḥima ad teḥḍid ttewṣeyyet břa ssuss niɣ řɛib ař dd ɣa iban Siditneɣ Yasuɛ Lmasiḥ.
1TI 6:15 Netta ad ittwasseḍhar di řweqt nnes: AREBBI ittwabarken, Amzemmar kuřci x marra min iǧan, Ajeǧid x [marra] ijeǧiden d Sidi n isiditen,
1TI 6:16 Wenni weḥḥdes war ifennin, Wenni izeddɣen di tfawt i war izemmar ad ɣares yadef ḥed, Wenni war iẓri bnadem niɣ izemmar ɛad ad t iẓar, i Netta umi ɣar iǧa ccan d ṣṣulṭa i řebda qaɛ. Amin.
1TI 6:17 Ɛřem i aytbab n wagřa di ddunect-a war ttiřin d imɛeffaren, war ttcařen x wagřa war yarekknen, maca [ad ttecřen] x AREBBI iddaren, wenni d aneɣ itticen marra timesřayin s ufeyyeḍ ḥima ad xaneɣ ifewwej,
1TI 6:18 uca [ɛřem] i-ten ad ggen řexdayem iṣebḥen, ad ɣarsen iřint tmegga tiṣebḥanin, ad wejden maḥend ad wcen u ad carcen.
1TI 6:19 Ejj i-ten ad ssarsen [ammu] dsas aṣebḥan i yixef nsen i řweqt i dd ɣa yasen, maḥend ad ɣarsen tiři Tudart d Tidett.
1TI 6:20 A Timutiyu, ḥḍa min d ac ittwawekkřen, aggʷej x řhard ixwan uřa x řɛekasat i dd-itteffɣen zi tussna issxarriqen.
1TI 6:21 Aqa din ca n iwdan řami seɛfen man aya, semḥen di l’iman. Ad kidek yiři arḍa! Amin.
2TI 1:1 Bulus, rrasul n Yasuɛ Lmasiḥ ɛlaḥsab řxaḍar n AREBBI, ɛlaḥsab lwaɛd n Tudart i [din] iǧan di Yasuɛ Lmasiḥ.
2TI 1:2 I Timutiyu, mmi iɛizzen: arḍa d arreḥmet d řehna zi AREBBI, Babatneɣ, u zi Yasuɛ Lmasiḥ, Siditneɣ.
2TI 1:3 Necc ttqadiɣ AREBBI wenni umi ɛebdeɣ am řejdud inu s tnefsect tezdeg, [am] ttidareɣ cek břa qeṭṭu di tẓaǧitin inu ass d ǧiřet.
2TI 1:4 Weḥḥceɣ ad cek ẓareɣ, xmi ttfekkareɣ deg imeṭṭawen nnec u ttwaccureɣ s řefraḥet,
2TI 1:5 umi ttidareɣ di l’iman nnec břa nnifaq, [l’iman] nni tuɣa izeddɣen amezwar di ḥennac Luwis u deg yemmac Uniki, uca, aqa ssneɣ nican belli izdeɣ dayek ɛawed.
2TI 1:6 S uyenni ssɛeqřeɣ cek ad tessekkared tawhibt n AREBBI tenni dayek s [webrid n] wesrusi n ifassen inu [xak].
2TI 1:7 Minzi AREBBI war d aneɣ iwci arruḥ n řɛurret, maca [arruḥ] n jjehd d tayri d utebbet.
2TI 1:8 S uya war ttseḍḥi ca ḥima ad tewced cchadet x Siditneɣ, u war ttseḍḥi zzayi necc, wenni d ameḥbus nnes, maca ksim [marra] řɣar di ṭṭweɛ n L’Injil s jjehd n AREBBI,
2TI 1:9 wenni aqa iwca aneɣ Tudart uca iřaɣa aneɣ-dd s třaɣit iqeddsen, war iǧi ɛlaḥsab řexdayem nneɣ, maca ɛlaḥsab řxaḍar nnes d arḍa nni i d aneɣ immewcen di Yasuɛ Lmasiḥ qbeř řweqt n zzmanat.
2TI 1:10 [Aqa arḍa-ya] ittwasseḍhar řexxu s uxecci n wenni d aneɣ itticen Tudart, Yasuɛ Lmasiḥ, wenni tuɣa ibeḍřen řmewt uca isseḍhar Tudart war ifennin s L’Injil.
2TI 1:11 Zzayes ttwassgeɛɛdeɣ necc d ambarreḥ d rrasul d umseřmad n řegnus.
2TI 1:12 X ssibbet-a ɛawed ksiɣ armeḥ u war ttseḍḥiɣ ca, minzi ssneɣ man wen i zi ttamneɣ uca aqa ttwassqenɛeɣ belli Netta aqa ɣares ṣṣulṭa, maḥend ad iḥḍa i necc aḍman inu ař ass nni.
2TI 1:13 Ejj ad ɣarek iqqim lmital n wawařen iṣeḥḥen i zzayi tesřid s l’iman d tayri i iǧan di Yasuɛ Lmasiḥ.
2TI 1:14 Ḥḍa aḍman aṣebḥan [i d ac ittwawekkřen] s Arruḥ Iqeddsen nni dayneɣ izeddɣen.
2TI 1:15 Aqa tessned belli marra inni iǧan di Asiya jjin ayi, zzaysen Fixilus d Hirmuxinis.
2TI 1:16 Ad yarzef Siditneɣ s arreḥmet di taddart n Unisifurus, minzi tuɣa issareyyeḥ ayi aṭṭas n twařawin uca war iseḍḥi ca zi ssnaseř n tmeḥbast inu.
2TI 1:17 Maɣar řami dd-yusa ɣar Ruma, tuɣa yarezzu xafi s cḍaret aṭṭas uca yufa ayi.
2TI 1:18 Ad as iwc Siditneɣ, aqa ad yaf arreḥmet ɣar Siditneɣ deg wass nni. Uca mecḥař isexxar ayi di Afasus, cek tessned ktar.
2TI 2:1 Cek xenni, [a] mmi, iři tmeḥḥḍed di arḍa nni iǧan di Yasuɛ Lmasiḥ,
2TI 2:2 u min zzayi tesřid zzat i waṭṭas n řechud, wekkeř i-t i iwdan imtiqqan, inni izemmaren ad ssřemden ɛawed inneɣni.
2TI 2:3 Arbu řɣar ak-d inneɣni am yijj n uɛeskari icnan n Yasuɛ Lmasiḥ.
2TI 2:4 War din uřa d ijj n uɛeskari iřehha ak-d řeswaq n tudart. Ittxeṣṣa as ad yarḍa wenni t iggin d aɛeskari [waha].
2TI 2:5 Uca [ɛawed] wenni ittemḥizwaren am bu-umḥizwar, war d as tticen ttaj mařa war immniɣ ɛlaḥsab řqanun.
2TI 2:6 Afeǧaḥ i itteggen řxedmet iqesḥen, ittxeṣṣa as ad iksi d amezwar zi řɣiǧet.
2TI 2:7 Xarreṣ di min d ac qqareɣ. Ad ac iwc Siditneɣ řefhamet di kuřci.
2TI 2:8 Ɛqeř [řebda] belli Yasuɛ Lmasiḥ, wenni dd-ittwassnekkaren zi taddart n imettinen, aqa-t zi zzariɛet n Dawud ɛlaḥsab L’Injil inu,
2TI 2:9 [Řexbar Aṣebḥan] nni xef ksiɣ tuɛeffna, ɛad ssnaseř axmi [ǧiɣ necc d] ijj n uɛeffan! Maca awař n AREBBI war izemmar ad ittwaqqen s ssnaseř.
2TI 2:10 S uyenni ttḥemřeɣ marra di ṭṭweɛ n yinni ittwafarzen, ḥima ad afen uřa d nitni Tudart di Yasuɛ Lmasiḥ ak-d uɛuǧi ittduman.
2TI 2:11 Wa d awař dayes řaman, minzi mařa nemmut akides, ad kis neddar ɛawed,
2TI 2:12 u mařa nṣebbar, ad kis neḥkem ɛawed [am ijeǧiden], maca mařa nenkar i-t, Netta ad aneɣ inkar ɛawed.
2TI 2:13 Mařa war dayes nettiqq, aqa Netta ittɣima d amtiqqi, minzi war izemmar ad inkar Ixef nnes.
2TI 2:14 Seɛqeř asen man aya, ɛřem asen zzat i Siditneɣ maḥend war ttmenɣin ca s wawařen war ineffɛen, inni dd ɣa yawyen areddeǧ x yinni ittṣennaten.
2TI 2:15 Ḥḍa ixef nnec, maḥend ad tarred ixef nnec am tkemřed zzat i AREBBI, am uxeddam nni war ɣares min zi ɣa iseḍḥa, wenni ittbarrḥen nican awař n tidett.
2TI 2:16 Aggʷej x wawařen ixwan i war ineffɛen, minzi [nitni] ad arnin aṭṭas di řeqjaḥet n yinni iceɣřen ixef nsen ak-d man aya.
2TI 2:17 Awař nsen ad ittwaɣiyyez am uxsas. Aqa Himiniyus d ijjen zzaysen u Filitus d ijjen nneɣni.
2TI 2:18 Nitni ffɣen zeg webrid n tidett, qqaren belli tanukra aqa temsar, uca qeřben l’iman n ca.
2TI 2:19 Maca dsas n AREBBI ibedd nican uca wa d acemmiɛ nnes: “SIDI issen inni iǧan nnes!”, uca” ‘Ejj marra inni ittřaɣan x SIDI ad aggʷejen x řmuɛṣiyyet.”
2TI 2:20 Maca di taddart tameqqrant war dayes řeqcuɛ n wureɣ d nnuqart waha, maca ɛawed n ukeccuḍ d třaxt, ca [zzaysen] n ccan u ca n ubehdeř.
2TI 2:21 Xenni mařa issizdeg ḥed ixef nnes zi ddegga, ad yiři d ict n řqecɛet n ccan, tᵉttwaqeddes i teǧa uca tedweř tneffeɛ i Sides, aqa tᵉttwassewjed i marra řexdayem iṣebḥen.
2TI 2:22 Arweř zi marra nnecwat n temẓi uca ardef tasegda d l’iman d tayri d řehna ak-d yinni ittřaɣan x Siditneɣ zeg wuř izdig.
2TI 2:23 Beɛɛed x imḥarwaḍen ibuhařiyyen i war iǧin i řebni, maɣar tessned aqa neddhen ɣar imcubbac.
2TI 2:24 War icuwwar i umsexxar n Siditneɣ ad imcubbec, maca icuwwar as ad yuyur s temhint ak-d marra, issen ad isseřmed, aqa ɣares ttasiɛ n řxaḍar,
2TI 2:25 maḥend ad isseřmed s temhint inni t ittɛekkasen. Ad taɣ AREBBI ad asen iwc ad tuben ad ssnen tidett,
2TI 2:26 uca ad dd asen-yarr řbař, ad nfekken zi řfex n cciṭan, wenni i-ten iḥebbsen i tizi nnes.
2TI 3:1 Maca ssen ddegga, aqa deg wussan ineggura ad din iřin řmijařat n řweqt iwɛaren.
2TI 3:2 Minzi iwdan ad xsen ixef nsen, ad iřin d iceṭṭaren, d ayt n bu-nnfaxet d imɛeffaren d imceqqafen, war ttᵉṭṭiɛin ca i iwdan [nsen], ad nḍaren arḍa, ad iřin d iɛeffanen,
2TI 3:3 ad ceqqfen, ad meẓřen řebda di [ɛřam kuř] nnecwat, ad iřin qesḥen, carrhen min iṣebḥen,
2TI 3:4 ad iřin d iɣeddaren d ifentrusen, daysen nnfaxet, ad xsen nnecwat ktar zi AREBBI.
2TI 3:5 Nitni ɣarsen udem n tiggʷudi zi AREBBI, [maca] bedden aggʷejen x jjehd nnes. Inni iǧan amenni, ittxeṣṣa ad ten tessiggʷejed xak.
2TI 3:6 Zzaysen inni ittḥaman tudrin uca nitni ssusumen timɣarin tinni yarebbun ddnub, ttwaɛarrent s ubarru n nnecwat,
2TI 3:7 tinni xsent ad řemdent řebda. Ɛemmarṣ ad awḍen [ddab n yeryazen nni] ɣar tussna n tidett,
2TI 3:8 maca am mammec tuɣa Yannis d Yambris ttemɛařan ak-d Musa, ammu ɛawed ina ttemɛařan ak-d tidett: aqa-ten d iwdan, inni ittwaɣecc řeɛqeř nsen, nitni ttwammenḍaren zi l’iman.
2TI 3:9 Maca war ttriḥen ca ktar ɣar zzat, minzi afɣuř nsen iban-dd i marra, am mammec tuɣa ittwassen uřa d [afɣuř] n yinni [s tnayen].
2TI 3:10 Maca cek tsiɣid akidi deg useřmed inu, am mammec ggureɣ, tsiɣid akidi di lɣaraḍ [inu], l’iman inu, ttasiɛ n řxaḍar inu, tayri inu d ṣṣbar inu,
2TI 3:11 di řeḥṣarat d uweddeb inu. Tessned timesřayin i xafi ikkin di Antiyuxiya d Ikuniya d Listra, man markat n udarrec i ksiɣ, uca aqa Sidi issenjem ayi zzaysent marra.
2TI 3:12 Marra inni ixsen ad ddaren s tiggʷudi zi AREBBI di Yasuɛ Lmasiḥ, ad ttwadarrcen.
2TI 3:13 Maca iwdan iɛeffanen d icemmaten ad arnin di tuɛeffna nsen, ad ɣwan uca ad ttwaɣwan.
2TI 3:14 Maca cek, qqim di min tuɣa třemded u di min tᵉttwassqenɛed, maɣar tessned man wen i zi t třemded,
2TI 3:15 u aqa zi temẓi nnec tᵉttwassřemded di Tira Iqeddsen, tinni zemmarent ad cek arrent d amiɣis ař [ɣa tᵉṭṭfed] Tudart s l’iman n Yasuɛ Lmasiḥ.
2TI 3:16 Kuř tira i yuran s Arruḥ [Iqeddsen], aqa ineffeɛ ɛawed i useřmed, i uṣeḥḥi, i weɛdař uca i ttarbiyyet di tsegda,
2TI 3:17 ḥima bnadem n AREBBI ad yiři iɛess, iḥezzem i marra řxedmet iṣebḥen.
2TI 4:1 [D man aya i] ttɛewwřeɣ xak zzat i AREBBI d Siditneɣ Yasuɛ Lmasiḥ, wenni i ɣa iḥekmen x yinni iddaren u x yinni immuten ɣar uxecci n Tgeldit nnes:
2TI 4:2 barreḥ s Wawař, iři tfaqed di man aya di řweqt niɣ barra i řweqt, ṣeḥḥ, ɛaqeb, ɛřem s marra ttasiɛ n řxaḍar u s useřmed.
2TI 4:3 Minzi ad dd-tas ict n řweqt xmi iwdan war qebbiřen ɛad taɣuri iṣeḥḥen, maca ad ssmunen i ixef nsen aṭṭas n imesɣaren ɛlaḥsab tizi nsen, inni issareyyḥen imezzuɣen nsen.
2TI 4:4 Ad jemden tidett x imejjan nsen uca ad ffɣen zeg webrid ɣar tḥuja ixwan.
2TI 4:5 Maca cek, faq di kuřci, ksi armeḥ, egg řxedmet n umbeccar uca kemmeř řxedmet n tsexxart nnec.
2TI 4:6 Minzi necc aqa ttwazeǧɛeɣ am tewhibt [n useyyeb] u řmijař n twaḥit inu yiweḍ-dd.
2TI 4:7 Necc menɣeɣ amenɣi aṣebḥan, aqa kemmřeɣ tazzřa inu, ḥḍiɣ l’iman.
2TI 4:8 Xenni řexxu, ttaj n tsegda, tenni i d ayi ɣa iwc Sidi deg wass nni, xmi ɣa iḥkem imseggaden, aqa iwjed. Maca war iǧi i necc waha, maca ɛawed i [marra] inni ittexsen axecci nnes.
2TI 4:9 Cḍaret ḥima ad ɣari dd-tased deɣya.
2TI 4:10 Minzi Dimas ismeḥ dayi, [maɣar] netta ittexs ddunect [n yiḍa] uca iruḥ ɣar Tissalunika, u Kriskis iruḥ ɣar Galaṭiya u Titus ɣar Dalmatiya.
2TI 4:11 Mɣir Luka i kidi iqqimen. Awi-dd Markus uca gewwed i-t akidek, minzi ineffeɛ ayi di řxedmet n tsexxart.
2TI 4:12 Sekkeɣ-dd Ticikus ɣar Afasus.
2TI 4:13 Xmi dd ɣa tased, awi-dd akidek aqrab i idlisen ittwanḍen nni jjiɣ di Truwas ɣar Karpus uřa d idlisen, d amezwaru řemṣaḥef n ccark.
2TI 4:14 Aliksandir, amziř [n nnḥas], tuɣa igga dayi aṭṭas n tuɛeffna. Siditneɣ ad t ixeǧeṣ ɛlaḥsab řexdayem nnes.
2TI 4:15 Ḥḍa ixef nnec zzayes, minzi netta tuɣa ittɛekkas awařen nneɣ aṭṭas.
2TI 4:16 Umi kkareɣ ad wteɣ x ixef inu twařa tamezwarut, uřa d ijj war kidi dd-yusi, maca marra semḥen d ayi. Ejj war ittiři d axeǧeṣ nsen.
2TI 4:17 Maca Sidi tuɣa-t ɣar uɣezdis inu uca iwca ayi jjehd, ḥima xenni zzayi i ɣa tkemmeř tbarreḥt, u marra řegnus ad sřen, aqa necc ttwafekkeɣ-dd zeg uxenfuc n wayrad.
2TI 4:18 Sidi ad ayi ifekk zi marra [tameɛmuč] taɛeffant, ad ayi iwc Tudart di Tgeldit nnes deg ijenwan, maɣar i Netta i ɣa yiři uɛuǧi i řebda qaɛ. Amin.
2TI 4:19 Seǧem x Priskilla d Akwila u x [aytbab n] taddart n Unisifurus s řehna.
2TI 4:20 Irastus iqqim di Kurintus u Trufimus jjiɣ t di Militus ihřec.
2TI 4:21 Cḍaret ad dd-tased qbeř tagrist. Iwbulus d Pudins d Linus d Kludiya d marra awmaten ttseǧamen xak s řehna.
2TI 4:22 Ad yiři Siditneɣ Yasuɛ Lmasiḥ ak-d arruḥ nnec. Arḍa ad kidek yiři. Amin.
TIT 1:1 Bulus, amsexxar n AREBBI d rrasul n Yasuɛ Lmasiḥ, di l’iman n yinni ittwafarzen zi AREBBI u [di] tussna n tidett, tenni iǧan di tiggʷudi zi AREBBI,
TIT 1:2 x usitem n Tudart ittduman, tenni zi tuɣa iwaɛd AREBBI d tidett, qbeř zzmanat n řweqt-a.
TIT 1:3 Netta aqa issargeb Awař nnes di řweqt nnes s tbarreḥt nneɣ i d ayi ittwawekkřen ɛlaḥsab řumur n AREBBI, wenni d aneɣ itticen Tudart.
TIT 1:4 I Titus, mmi d tidett ɛlaḥsab l’iman nneɣ icarcen: arḍa d řehna zi AREBBI, Babatneɣ, u zi Siditneɣ Yasuɛ Lmasiḥ, wenni d aneɣ itticen Tudart.
TIT 1:5 S uyenni jjiɣ cek di Krita, ḥima ad tɛedřed min tuɣa ɛad ittxeṣṣa, u ḥima ad tessgeɛɛded imɣaren di kuř tandint, am mammec cek umureɣ.
TIT 1:6 [Amɣar] d ijjen nni war di iǧi řɛib, aqa-t d aryaz i ɣares [mɣir] ict n temɣart, ɣares iḥenjiren ttamnen, war ttᵉkkwaren, war ttwaṭṭfen zeg ufucceḥ.
TIT 1:7 Minzi ittxeṣṣa i umɣar ad yiři břa řɛib am wewkiř n AREBBI. Ittxeṣṣa war dayes ittiři uɛeffar niɣ zzɛaf, war isess ccrab sennej i řqedd, war iccit s ufus nnes deɣya u war ittexs arbeḥ war iḥřin.
TIT 1:8 Ejj i-t ad yareḥḥeb s inewjiwen, ad ixs min iṣebḥen, ittxeṣṣa ad yiři d asexxay, d amseggad, d amezdag, ad iḥkem x ixef nnes.
TIT 1:9 Ittxeṣṣa as ad iḥḍa tɣuri [n ṣṣaḥ] n wawař n l’iman, ḥima iqedd ad igg wuř deg [yinni yumnen] s tɣuri nnes n ṣṣaḥ u ad iseggem tarwa n bu-tɣennant.
TIT 1:10 Minzi aqa din aṭṭas n iwdan inni war ixsen ad sswaḍḍɛen ixef nsen, ssawařen awařen ixwan. Nitni ssxarwaḍen ixarriṣen n iwdan, ɣar umezwaru nsen d inni iǧan zeg wextan.
TIT 1:11 Ittxeṣṣa ad asen ittwaqqen uqemmum, minzi nitni qeřɛen x waṭṭas n řaǧat, sseřmaden min war icuwwaren maḥend ad ṭṭfen arbeḥ war iḥřin.
TIT 1:12 Ijjen zzaysen, aqa-t d anabi nsen, tuɣa inna: “Ikritiyyen ssxariqqen řebda, aqa-ten d řewḥuc iɛeffanen, imeɛgazen i daysen aɛeddis [waha].”
TIT 1:13 Cchadet-a d tidett. S uyenni webbex asen s jjehd, ḥima ad iřin d iṣḥaḥen di l’iman,
TIT 1:14 war tticen ca taynit i tḥuja n Wudayen d tiweṣṣa n iwdan nni iwcin s weɛrur i tidett.
TIT 1:15 I umezdag marra d tazdugi, maca i yinni ittwaxemjen d yinni war yuminen, i nitni uřa d ict n řḥajjet war tizdig, minzi ixarriṣen nsen d tnefsect nsen xemjen.
TIT 1:16 Nitni cehhden aqa ssnen AREBBI, maca nḍaren t s řexdayem nsen. Yaɛɛut min tteggen, aqa war ttᵉṭṭiɛen ca, war neffɛen uřa i yict n řxedmet iṣebḥen.
TIT 2:1 Maca cek, siweř min ittřiqen i tɣuri n ṣṣaḥ.
TIT 2:2 Seřmed imɣaren maḥend ad iřin faqen, ad uyuren s tsexxayt d tazdugi d l’iman n ṣṣaḥ u s tayri d ṣṣbar.
TIT 2:3 [Seřmed] tiwessura ɛawed ammu, maḥend ad ggurent am dd-ittřiq ak-d tiggʷudi zi AREBBI, war ttceqqifent ca, war wcint i binu, maca ejj i-tent ad ssřemdent min iṣebḥen,
TIT 2:4 ḥima ad cejjɛent tibřiɣin ad uyurent s uweqqar, ad xsent iryazen nsent d tarwa nsent,
TIT 2:5 uca ad daysent yiři utebbet d tqeddast, ad wcent taynit i [ayt bab n] taddart nsent, ad ggent array i yeryazen nsent, ḥima uřa d ijj war ittceqqaf ca deg wawař n AREBBI.
TIT 2:6 Cejjɛet ɛawed ibřiɣen ḥima ad uyuren s tsexxayt.
TIT 2:7 Egg ixef nnec di marra d lmital, di marra řexdayem tiṣebḥanin, u xmi tessřemded, ḥḍa maḥend ad yiři wawař nnec d ṣṣeḥ,
TIT 2:8 s řeṣfayet břa řɣecc, uca war t isseḥqar uřa d ijj, ař ɣa iseḍḥa wenni d aneɣ ittɛekkasen umi war izemmar ad xaneɣ issiweř s uřa d ijj n wawař issfeṭṭaḥen.
TIT 2:9 Ittxeṣṣa i imsexxaren ḥima ad ṭṭaɛen i aytbab nsen di marra, ad asen arḍan, war ten ttɛekksen.
TIT 2:10 War iɛeddeř ad acaren, maca ejj i-ten ad ssecnen řmanet nsen icnan, ḥima ad ittwagg ccan i tɣuri n AREBBI, wenni d aneɣ itticen Tudart.
TIT 2:11 Minzi arḍa n AREBBI i issakkwaḍen asenjem i marra, aqa iffeɣ-dd i marra iwdan.
TIT 2:12 Arḍa nni ittarebba aneɣ maḥend ad nᵉttejj řeqjaḥet d nnecwat n ddunect, maḥend ad neddar di ddunect-a s tsexxayt d tsegda u s tiggʷudi zi AREBBI.
TIT 2:13 [Ammu] i nettraja asitem ittwabarken uřa d asargeb n uɛuǧi n AREBBI ameqqran d wenni d aneɣ itticen Tudart: Yasuɛ Lmasiḥ.
TIT 2:14 Netta d wenni i xaneɣ iwcin Ixef nnes deg wemcan nneɣ, maḥend ad aneɣ isellek zi marra řmuɛṣiyyet, ḥima ad issizdeg i Yixef nnes ijj n řgens imeḥḥḍen i řexdayem tiṣebḥanin.
TIT 2:15 Siweř x man aya, ziyyar u webbex s marra jjehd, war ttejji ḥed ad cek isseḥqar.
TIT 3:1 Seɛqeř i-ten, maḥend ad ṭṭaɛen i řḥukkam u i ṣṣulaṭat, ad asen ggen array, ad iřin wejden i řxedmet taṣebḥant mammec ma tegga,
TIT 3:2 war ttceqqifen di ḥed, war ttemcubbucen, ad iřin ttebten uca ad ssecnen řeḍrafet i marra iwdan zi marra iɣezdisen.
TIT 3:3 Aqa uřa d neccin zic tuɣa aneɣ d ifɣař, [s wuř] war imtinen, nweddar, aqa aneɣ d isemɣan n ɛřam kuř nnecwat d ccehwat, tuɣa neddar di tuɛeffna uřa di řeḥsed, dayneɣ acrah uca ncarh ijjen wenneɣni.
TIT 3:4 Maca xmi tban tcuni d tayri n AREBBI, wenni d aneɣ itticen Tudart,
TIT 3:5 aqa iwca aneɣ Tudart, war iǧi ɛlaḥsab řexdayem n tsegda i negga, maca ɛlaḥsab arreḥmet nnes, ɛlaḥsab asird n wexřaq n jdid d tajdidet s Arruḥ Iqeddsen
TIT 3:6 i xaneɣ dd-ifarreɣ s ufeyyeḍ s Yasuɛ Lmasiḥ, wenni d aneɣ itticen Tudart,
TIT 3:7 ḥima ad nettwasegged s arḍa nnes, ad nedweř d iwriten s usitem di Tudart ittduman.
TIT 3:8 Awař-a dayes řmanet, uca necc xseɣ ɛawed ad tekkared ad tbedded s jjehd x man aya, ḥima inni ittecřen x AREBBI, ad meḥḍen maḥend ad cebbaren řebda di řexdayem tiṣebḥanin. Timesřayin-a cnant u daysent nnfaɛ i iwdan.
TIT 3:9 Maca beɛɛed x umḥarweḍ abuhaři, x thuja n taṣiřat, x umenɣi u x imcubbac n imseřmaden n idlisen, minzi di [marra] man aya war dayes bu nnfaɛ, aqa man aya d řbaṭeř.
TIT 3:10 Mařa din ḥed issbeṭṭa, ittxeṣṣa kenniw ad as tagim awarni řami t twebbxem ict n twařa u ict n twařa nneɣni.
TIT 3:11 Aqa tessnem belli wanita d amfaryaḍ, aqa d amednub, aqa ittwaḥaseb zeg ixef nnes.
TIT 3:12 X minni i ɣarek dd ɣa ssqadeɣ Artimas niɣ Ticikus, egg tizemmar maḥend ad ɣari dd-tased deɣya ɣar Nikupulis, minzi aqa ggiɣ ad din sseɛduɣ řmecta.
TIT 3:13 Zenas, amseřmad n idlisen, d Apullus, awyem ten-dd mliḥ deg webrid, ḥima war d asen ittxeṣṣi uřa d ict n tmesřact.
TIT 3:14 Nitni ad sseřmaden inni nneɣ maḥend ad ggen řexdayem tiṣebḥanin mařa din řeḥwej ameqqran, ḥima war ttiřin břa řɣiǧet.
TIT 3:15 Marra wi kidi danita ttseǧamen xak s řehna. Seǧem s řehna ɛawed x yinni d aneɣ ittexsen di l’iman. Arḍa ad kiwem yiři marra idwem! Amin.
PHM 1:1 Bulus, ameḥbus n Yasuɛ Lmasiḥ, d tawmat Timutiyu, i Filimun iɛizzen wenni d amsexxar akidneɣ,
PHM 1:2 i [učmatneɣ] Apfiya iɛizzen, i Arxippus, wenni d amsexxar akidneɣ, u i tmesmunt di taddart nnec:
PHM 1:3 arḍa d řehna ad kidwem iřin zi AREBBI, Babatneɣ, u [zi] Siditneɣ Yasuɛ Lmasiḥ.
PHM 1:4 Necc ttqadiɣ AREBBI inu řebda u ttfekkareɣ dayek di tẓaǧitin inu,
PHM 1:5 xzar, [ɛad] zeg wami necc sřiɣ x l’iman d tayri nnec i dayek iǧan zi jjihet n Siditneɣ Yasuɛ u zi jjihet n marra imqeddasen,
PHM 1:6 ḥima ad din yiři ijj n uqarri yuǧɣen n l’iman nnec ař ɣa tawyed řɣiǧet di řexdayem u di tussna n marra řxar i ɣarwem di Yasuɛ Lmasiḥ.
PHM 1:7 Maɣar neccin aqa ɣarneɣ řefraḥet tameqqrant d ufewwej, minzi zi ssibbet n tayri nnec ttwassareyyḥen uřawen n imqeddasen.
PHM 1:8 S uyenni, [waxxa] necc ɣari taryast aṭṭas di Lmasiḥ ḥima ad cek umureɣ min icuwwaren,
PHM 1:9 aqa necc ɣari ḥsen, di ssibbet n tayri, ad zzayek ttareɣ. Necc Bulus, aqa ayi d awessar am mammec tessned, uca řexxu ɛawed d ameḥbus n Yasuɛ Lmasiḥ,
PHM 1:10 necc ɣari ict n tutra zi jjihet n mmi Unisimus, wenni dd-jjiɣ di ssnaseř [da di řeḥbes].
PHM 1:11 Netta tuɣa war cek ineffeɛ zic, maca řexxu aqa ineffeɛ cek d nnec aṭṭas.
PHM 1:12 Necc aqa arriɣ ac t-i-dd ɣarek, maca qbeř i-t am mmi.
PHM 1:13 Maɣar necc mři ufiɣ iři aqa jjiɣ t danita akidi maḥend ad xafi isexxar deg wemcan nnec min da ɣa kkeɣ di ssnaseř x ssibbet n L’Injil.
PHM 1:14 Maca necc war xseɣ ca ad ggeɣ walu břa ma i ɣa mcawareɣ akidek, ḥima tcuni i teggid war tᵉttiři s uɣiř, maca s řxaḍar.
PHM 1:15 Minzi nican tuɣa immsebḍa xak i drus n řweqt, ḥima ad ɣarek yiři ɛawed i řebda,
PHM 1:16 zi ssa d tsawent war iǧi ɛad am umsexxar, maca am yijjen i iǧan ktar zeg umsexxar, am wuma iɛizzen, [i necc beɛda], mahu i cek, am di ddat am di Siditneɣ!
PHM 1:17 Mařa teǧid d amɛacar akidi [di l’iman], qebř i-t am wenni nnec.
PHM 1:18 Mařa netta tuɣa iḍḍarri cek niɣ zeɛma dayes amarwas, egg i-t xafi!
PHM 1:19 Necc, Bulus, uriɣ s ufus inu, aqa ad t xeǧṣeɣ! Maḥend war qqareɣ ca, aqa uřa d cek tᵉttursed ayi ixef nnec.
PHM 1:20 Wah, [a] tawmat inu, aqa ttwassareyyḥeɣ zzayek di Siditneɣ, sareyyeḥ tayri inu di Lmasiḥ.
PHM 1:21 Necc ttiqqeɣ ad ayi tesřid. Uriɣ ac-dd, uca ssneɣ aqa cek ad tegged mahu min d [ac] iniɣ.
PHM 1:22 Sewjed ayi amcan mani ɣa ssenseɣ, minzi ssitimeɣ ad ɣarwem dd-arezfeɣ s tẓaǧit nwem.
PHM 1:23 Ipafras, wenni akidi da di řeḥbes di Yasuɛ Lmasiḥ, aqa iseǧem xak s řehna,
PHM 1:24 uřa d Markus d Aristarxus d Dimas d Luka inni d ayi itticen afus.
PHM 1:25 Arḍa n Siditneɣ Yasuɛ Lmasiḥ ad yiři ak-d buḥbeř nwem. Amin!
HEB 1:1 Deg wussan iɛdun issiweř AREBBI di kuř řweqt u deg waṭṭas n ibriden ak-d řejdud nneɣ s inabiyyen.
HEB 1:2 Deg wussan-a ineggura aqa issiweř-dd akidneɣ s Mmis, wenni igga d Awrit n kuřci, s Wenni [ɛawed] igga zzmanat.
HEB 1:3 Minzi Netta d talellect n uɛuǧi nnes uřa d tteswirt n Simant nnes, u [Netta d] wenni yarebbun marra timesřayin s jjehd n Wawař nnes. Aqa Netta issizdeg ddnub nneɣ di ṭṭbiɛet n Yixef nnes, uca iruḥ iqqim ɣar yefus n Lɛaḍim di řuɛřa.
HEB 1:4 Netta yuɛřa aṭṭas x lmalakat am Isem i iṭṭef d řwart, aqa icna x wenni nsen.
HEB 1:5 Minzi i man ten zi lmalakat inna AREBBI: “Mmi i teǧid Cek, ass-a Necc jjiɣ-dd Cek!”, uca ɛawed inna: “Necc ad as iřiɣ d Babas u Netta ad ayi yiři d Mmi”?
HEB 1:6 Uca xenni xmi dd-issidef Amenzu ɣar ddunect, inna: “Ad as sejdent marra lmalakat n AREBBI.”
HEB 1:7 [Maca] x lmalakat inna: “Netta igga lmalakat nnes d isemmiḍen, uca imsexxaren nnes d ict n tmessi itteḥduduqen”,
HEB 1:8 Maca x Mmis: “Řɛarc nnec, a AREBBI, aqa iǧa i řebda qaɛ. Azeǧaḍ n Tgeldit nnec, aqa-tt d azeǧaḍ iseggden.
HEB 1:9 Aqa texsed tasegda, tcarhed řɣar. S uyenni aqa idhen i c AREBBI, AREBBI nnec, s zzect n řefraḥet sennej i imɛacaren nnec.”
HEB 1:10 Uca xenni: “Zeg ubeddu teggid Cek dsas n temmurt, ijenwan ǧan d řxedmet n ifassen nnec.
HEB 1:11 Ina ad ttwateḥḥan, maca Cek ad tdumed, uca ina marra ad arcan am warruḍ.
HEB 1:12 Amecnaw ijj n useřham ad ten ttḍefsed. Ad ttwabeddřen am warruḍ, maca Cek ad tiřid d wenni uca iseggʷusa nnec war qeṭṭin ca.”
HEB 1:13 [Maca] i man ten zi lmalakat inna ijj n wass: “Qqim ɣar yefus inu ař d ɣa ggeɣ řɛedyan nnec d tanebdat sadu iḍaren nnec”?
HEB 1:14 Ma war ǧint nitenti d arruḥat i tsexxart, ttwassekkent-i-dd ḥima ad sexxarent i yinni ɣa iwarten Tudart?
HEB 2:1 S uyenni ittxeṣṣa aneɣ ad newc taynit ktar i min nesřa, ḥima war nᵉtteffeɣ zeg webrid.
HEB 2:2 Minzi, mařa awař i innan lmalakat tuɣa tbedd u marra wi t isřin, [maca] iɛdu xas, aqa ittwaxeǧeṣ s řḥeqq,
HEB 2:3 mammec i ɣa negg ad narweř neccin, mařa nesseḥqara timesřayin i iǧan d Tudart i neccin, [timesřayin] i xef tuɣa issawař Siditneɣ ɣar umezwaru, uca [xenni] ttwaḍemnent aneɣ zeg yinni jaraneɣ i tuɣa [tent] zzayes isřin,
HEB 2:4 [umi] AREBBI iched akidsen s řeɛřamat d lmuɛjizat d řeɛjayeb ifarzen u s tmewci n Arruḥ Iqeddsen, tinni immewcen am mammec ixs Netta.
HEB 2:5 Minzi war issars ca zzman i dd ɣa yasen x tenni nessiweř, sadu [řumur n] lmalakat,
HEB 2:6 maca am mammec cehhdent u qqarent Tira [Iqeddsen]: “Min iɛna bnadem, aqa Cek i dayes ittxarraṣen, u min iɛna Mmis n bnadem, aqa Cek i dayes itthillan?
HEB 2:7 Cek teggid t cwayt sadu lmalakat, teggid as aɛuǧi d ccan x uxeǧif nnes, tewcid as ṣṣulṭa x řexdayem n ifassen nnec.
HEB 2:8 Aqa marra timesřayin teggid tent sadu iḍaren nnes.” Umi igga marra timesřayin sadu Netta, aqa war ijji walu war t iggi sadu Netta. Maca řexxu war nẓar ɛad marra ittwagg sadu Netta,
HEB 2:9 maca nettwařa belli Netta, aqa-t d Yasuɛ, tuɣa ittwagg cwayt sadu lmalakat di ssibbet n uweddeb n řmewt nnes, [nettwařa i-t] s ttaj n uɛuǧi d ccan x uzeǧif nnes, maɣar AREBBI iqqas řmewt i marra iwdan ɛlaḥsab arḍa nnes.
HEB 2:10 Minzi tuɣa ittřiq as i Netta s Wenni u i Wenni ǧant marra tmesřayin - Netta d [Wenni] i dd-ittawyen aṭṭas n iḥenjiren ɣar uɛuǧi - maḥend ad ikemmeř Uzeǧif n Tudart nsen s uweddeb nnes.
HEB 2:11 Minzi d Wenni issqeddsen d yinni ittwaqeddsen, nitni marra d ijjen. S uyenni Netta war iseḍḥi ca ad asen iřaɣa awmaten nnes,
HEB 2:12 umi inna: “Ad barrḥeɣ i wawmaten inu s Yisem nnec, di řwesṭ n tmesmunt ad Cek ṣebbḥeɣ.”
HEB 2:13 Uca ɛawed: “Necc ad dayes ttiqqeɣ!” Uca ɛawed: “Aqa da, Necc d tarwa i d ayi iwca AREBBI.”
HEB 2:14 Minzi tarwa carcen deg weysum d idammen, uřa d Netta icarc ammu kifkif di man aya, ḥima ad ibeṭṭeř s řmewt nnes wenni ɣar teǧa ṣṣulṭa x řmewt, aqa netta d cciṭan,
HEB 2:15 uca [xenni] ad ifekk inni isseɛddun qaɛ tudart nsen am isemɣan zi tiggʷudi n řmewt.
HEB 2:16 Minzi řmewt war ɣares teǧi ṣṣulṭa x lmalakat, maca [řmewt] ɣares ṣṣulṭa x zzariɛet n Ibrahim.
HEB 2:17 S uyenni tuɣa ittxeṣṣa as ad idweř am wawmaten nnes zi marra iɣezdisen, ḥima ad idweř d Arrays n ikehhanen arḥim d amtiqqi di min iǧan i AREBBI, uca ad yiři břa řɛib zi jjihet n ddnub n řgens.
HEB 2:18 Minzi min di tuɣa Netta simant nnes iweddeb u ittwajarreb, aqa izemmar ad iɛawen inni ittwajarrben.
HEB 3:1 S uyenni, [a] aytma imqeddasen, inni ittwařaɣan s třaɣit n ujenna, xzarem ɣar Rrasul wanita, ɣar Arrays n ikehhanen n cchadet nneɣ, Yasuɛ Lmasiḥ,
HEB 3:2 wenni d amtiqqi i Wenni i-t-i-dd-issgeɛɛden, am mammec tuɣa Musa [d amtiqqi] di marra taddart nnes.
HEB 3:3 Minzi aɛuǧi n Wanita d ameqqran s waṭṭas x wenni n Musa, am ccan n ubennay n taddart imɣar x ccan n řebni nnes.
HEB 3:4 Minzi marra taddart tᵉttwabna zeg ijjen, maca Wenni ibennan marra d AREBBI.
HEB 3:5 Tᵉttwawekkeř i Musa marra taddart nnes am i yijj n umsexxar, maḥend ad iched x tmesřayin min xef ɣa issiweř netta.
HEB 3:6 Maca Lmasiḥ am Mmis [ittwagg] x taddart nnes, u taddart nnes d neccin, mařa neqqim nᵉtteṭṭef di řaman u deg uɛuǧi n usitem nnes ař aneggar.
HEB 3:7 Maca minzi Arruḥ Iqeddsen inna ... “Aqa ass-a mařa tesřim tmijja nnes,
HEB 3:8 war ttᵉsseqsiḥem ca uřawen nwem maḥend ad t tesɛarem, am inni iɣewwɣen, am deg wass n ujarreb di řexřa,
HEB 3:9 umi d ayi jarrben řejdud nwem, qeǧben ayi, am ẓrin timegga inu arebɛin n iseggʷusa.
HEB 3:10 ... s uya ɛiffeɣ zi jjiř nni, nniɣ: ‘Wa d ijj n řgens i iweddaren deg wuř nnes nitni war ssinen ca ibriden inu!’,
HEB 3:11 ařami jjuǧeɣ deg weɣḍab inu: ‘War dd-ttidfen ca ɣar arraḥet inu!’”
HEB 3:12 S uyenni, [a] aytma, ḥḍam ḥima ɛemmarṣ war ittiři ḥed zzaywem ɣares uř d aɛeffan i war ittimnen umi ɣa taggʷejem x AREBBI iddaren,
HEB 3:13 maca qeǧbem ixef nwem kuř ass, ař ass umi qqaren: ‘Ass-a!’, ḥima uřa d ijj zzaywem war itteqsiḥ ca s uɣekkwi n ddenb.
HEB 3:14 Minzi nettwassmun [aṭṭas] ak-d Lmasiḥ mařa neqqim ncebbar zeg umezwar ař aneggar di Řɛahd-a i dayes řaman.
HEB 3:15 S uya ittwanna [ammu]: “Aqa ass-a, mařa tesřim řḥess n tmijja nnes, war tesseqsiḥem ca uřawen nwem maḥend ad t tesɛarem.”
HEB 3:16 [Xenni] min iɛnan nitni inni isřin t, [xenni] ɣewwɣen? Ma war [ǧin] nitni marra d inni dd-iffɣen zi Miṣra s ufus n Musa?
HEB 3:17 Zi man wen iɛiff Netta [xenni] arebɛin n iseggʷusa? Ma war iǧi zeg yinni ixḍan, inni umi iwḍan iɣsan nsen di řexřa?
HEB 3:18 I umi ijjuǧ Netta, belli war dd-ttidfen ca ɣar arraḥet nnes? Ma war iǧi i yinni war d as ttiqqen?
HEB 3:19 Aqa nettwařa belli nitni war zemmaren ad adfen x ssibbet n břa l’iman nsen.
HEB 4:1 Ejj aneɣ ad neḥḍa xenni, aqa uřa d ijj zzaywem, [umi ɛad] din ijj n lwaɛd n wadaf di arraḥet nnes, ad iḍhar ittɣima ɣar ḍeffar ɣar wadaf.
HEB 4:2 Minzi ittwabarreḥ Řexbar Aṣebḥan ɛawed i neccin, am [ittwabarreḥ] uřa i nitni, maca awař war d asen infiɛ i yinni d as isřin, minzi tuɣa war dd-ittis ca ak-d l’iman deg inni [d as] isřan.
HEB 4:3 Maca neccin, inni yumnen, ad nadef ɣar arraḥet. Maca am mammec inna: “Am mammec jjuǧeɣ deg weɣḍab inu: ‘Nitni war dd-ttidfen ca ɣar arraḥet inu!’” U xzar, řexdayem n AREBBI aqa ttwakemmřent zeg wami tᵉttwagg ddunect,
HEB 4:4 am mammec inna x ssebt: “Yareyyeḥ AREBBI zi marra řexdayem nnes deg wass wiss sebɛa.”
HEB 4:5 [Ammu] i inna ɛawed deg [wawař-a] wanita: “War dd-ttidfen ca ɣar arraḥet inu!”
HEB 4:6 Umi teqqim belli marra zemmaren ad dd-adfen [ɣar arraḥet-a], [maca] inni umi ittwabarreḥ s Řexbar Aṣebḥan ɣar umezwaru, war udifen ca x ssibbet n řmuɛṣiyyet nsen,
HEB 4:7 aqa Netta igga ɛawed, awarni aṭṭas n řweqt, ijj n wass nneɣni, am mammec ittwari qbeř aqa Dawud inna: “Ass-a mařa tesřim i tmijja nnes, war seqsiḥem ca uřawen nwem!”
HEB 4:8 Minzi mařa tuɣa Yacuwa, mmis n Nun, issidef i-ten di arraḥet, war ɣares ittiři ɛad řhard [s uqemmum n Dawud] x ijj n wass nneɣni awarni man aya.
HEB 4:9 S uya ad teqqim aqa din ɛad arraḥet n ssebt i řgens n AREBBI.
HEB 4:10 Minzi wi yudfen ɣar arraḥet nnes, yareyyeḥ ɛawed zi řexdayem nnes am mammec AREBBI zi tinni nnes.
HEB 4:11 S uya jjem aneɣ ad nemkabar ḥima ad nadef ɣar arraḥet nni, maḥend war nweṭṭi am mammec wḍan inni war iṭṭiɛen.
HEB 4:12 Minzi Awař n AREBBI iddar, ixeddem mani ma, iqḍeɛ ktar zi kuř ssif s tnayen n wudmawen, ittakkwaḍ ař abeṭṭu n řeɛmar d arruḥ, ař [ttasiɛ] jar řemfaṣeř, ař [aymir] jar waḍuf d iɣsan, uca iḥekkem x tnawi d ixarriṣen n wuř.
HEB 4:13 Uřa d ict n tmesřact i zzayes dd-ittwaxeřqen war zzayes tᵉttwassnuffar ca, maca marra [timesřayin] aqa atent ttwaɛarryent, ttwarezzment ɣar tiṭṭawin n Wenni umi i-k-dd i ɣa negg řeḥsab.
HEB 4:14 S uyenni, am ɣarneɣ Arrays n ikehhanen imɣar, Yasuɛ Lmasiḥ, Mmis n AREBBI, wenni issgeɛɛden ɣar ujenna, ejj aneɣ ad ncebbar di cchadet nnes.
HEB 4:15 Minzi war ɣarneɣ arrays n ikehhanen i war izemmar ad yaca ak-d tuḍɛeft nneɣ, maca Ijjen wenni ittwajarrben di marra am neccin, maca břa ddenb.
HEB 4:16 S uyenni ejj aneɣ ad dd-nqarreb xenni s ttiqqet ɣar řɛarc n arḍa nnes, ḥima ad neksi arreḥmet uca ad naf arḍa di řweqt n řmeḥnet.
HEB 5:1 Minzi kuř arrays n ikehhanen [ittwakkes-dd] zeg iwdan, ittwassgeɛɛed di ṭṭweɛ n iwdan x min iǧan n AREBBI, maḥend ad iqeddem tiwhibin d tɣarṣin x ddnub.
HEB 5:2 Izemmar ad immars ixef nnes, ad iḥinn x iqubbaniyyen d imweddaren, minzi uřa d netta simant nnes yarḍ tuḍɛeft.
HEB 5:3 Maɣar s man aya d icten ittxeṣṣa as ad issgeɛɛed tiɣarṣin x ddnub n řgens uca ɛawed x [ddnub n] yixef nnes.
HEB 5:4 Uřa d ijjen ad iksi i yixef nnes ccan[-a], mɣir wenni ittwařaɣan zi AREBBI am mammec [ittwařaɣa] Harun.
HEB 5:5 Ammu ɛawed Lmasiḥ war issɛuǧi ca Ixef nnes umi idweř d Arrays n ikehhanen, maca [issɛuǧa] wenni dd ɣares issiwřen: “Cek d Mmi, Necc jjiɣ-dd Cek ass-a!”
HEB 5:6 Am mammec inna ɛawed di mani nneɣni: “Cek d Akehhan i řebda, deg warwas n Malkiṣadiq.”
HEB 5:7 Řami tuɣa yarreḍ [arrimet n] weysum [nnes], iqeddem tiẓaǧitin d tutra s iɣuyyan aṭṭas u s imeṭṭawen i Wenni tuɣa izemmaren ad t-i-dd-issnekkar zi řmewt i Tudart, uca Netta isřa as.
HEB 5:8 Netta, waxxa tuɣa-t d Mmis, aqa iřmed ṭṭaɛet s tiggʷudi u zeg uweddeb i iksi.
HEB 5:9 Ammu i idweř Netta ikemmeř, idweř d ssibbet n Tudart ittduman i marra inni d as i ɣa iṭṭaɛen,
HEB 5:10 uca igga i-t AREBBI d Arrays n ikehhanen deg warwas n Malkiṣadiq.
HEB 5:11 Aqa ɣarneɣ aṭṭas min ɣa nini x Malkiṣadiq wanita, maca iwɛar ad t nfessar, minzi tdewřem tewɛarem ad tesřem.
HEB 5:12 Maɣar tuɣa ittxeṣṣa ad tiřim d imesɣaren zi jjihet n řmijař n řweqt i tḍeffarem tɣuri-ya. Maca řexxu ittxeṣṣa awem ɛad ad třemdem lḥuruf imezwura n beddu n wawařen n AREBBI, kenniw teḥdajem [ɛad] aɣi deg wemcan n macca ijehden.
HEB 5:13 Minzi kuř ijjen wenni icarcen deg uɣi, war iqedd x wawař n tsegda, minzi netta d aseymi [ɛad].
HEB 5:14 Maca macca ijehden iffeɣ-dd i yinni imɣaren, inni aqa nnumen ad darrben tacit nsen ḥima ad farzen řxar x řɣar.
HEB 6:1 S uyenni ad nejj tamezwarut n wawař n Lmasiḥ, ad nuyur zzat ɣar ukemmeř. Mayemmi xenni texsem ad tessarsem ɛawed dsas nneɣni i ttubet zi řexdayem immuten u i l’iman di AREBBI,
HEB 6:2 u i tɣuri n useɣḍeṣ d usarsi n ifassen uřa i tnukra zi taddart n imettinen d lḥisab i řebda?
HEB 6:3 Mařa [ad aneɣ] ismeḥ SIDI man aya, ad t negg.
HEB 6:4 Maca war d asen izemmar i yinni dd-ihwan i useɣḍeṣ ict n twařa uca qqasen tawhibt n ujenna uca ṭṭfen Arruḥ Iqeddsen,
HEB 6:5 uca qqasen [ɛawed] awař icnan n AREBBI d jjehd n zzman i dd ɣa yasen,
HEB 6:6 maḥend ad xḍan ɛawed, uca ad ttwassfaqen i ttubet zi jdid, uca ad ṣellben u ad sseḥqaren Mmis n AREBBI ict n twařa nneɣni.
HEB 6:7 Minzi tammurt, tenni isessen anẓar wenni xas iccaten aṭṭas n twařawin, tessɣemmi aɣemmuy icna i yinni umi tᵉttwafeǧeḥ, aqa teksi lbaraka zi AREBBI.
HEB 6:8 Maca mařa tesseɣmi-dd [temmurt] isennanen d tzeggʷart, aqa temmenḍar u tudes i nneɛřet uca aneggar [n temmurt] ad yiři d acmaḍ.
HEB 6:9 Maca waxxa nessawař ammu, zi jjihet nwem [a] aytma, aqa nettwasseqneɛ aqa din timesřayin icnan ittraḥen nican ak-d Tudart.
HEB 6:10 Minzi AREBBI war iǧi d wenni war iseggden maḥend ad ittu řxedmet nwem d tayri nwem, tini tuɣa tessecnem deg Yisem nnes, i zzayes tuɣa kenniw tsexxarem i imqeddasen uca tᵉttsexxarem [asen ɛad].
HEB 6:11 Maca dayneɣ meẓri ḥima kuř ijjen zzaywem ad isscen amḥaḍ d ijj i ukemmeř n usitem ař aneggar,
HEB 6:12 aqa war tᵉddekkwařam d imeɛgaz, maca ad tiřim d imeḍfaren n yinni s l’iman d ttasiɛ n řxaḍar dewřen d iwriten n lwaɛd.
HEB 6:13 Minzi řami iwaɛd AREBBI Ibrahim, ijjuǧ s Yixef nnes, minzi war din iǧi wenneɣni imɣar xas maḥend ad as ijjaǧ,
HEB 6:14 inna: “S tidett, ad ac barkeɣ uca ad ac arniɣ aṭṭas s waṭṭas.”
HEB 6:15 Uca ammu, am ittṣebbar [Ibrahim], aqa iksi lwaɛd.
HEB 6:16 Maɣar iwdan jjuǧen ɣar min xasen iǧan d ameqqran u marra amcubbec jar asen ad iqḍa nican s ict n tjaǧit.
HEB 6:17 S uyenni tuɣa ixs AREBBI ad isscen s ufeyyeḍ i iwriten belli lwaɛd nnes war ittbeddiř ca, uca iḍmen i-t s ict n tjaǧit.
HEB 6:18 ḥima s tnayen n tmesřayin war ttbeddiřent ca - am war izemmar xenni ad issxarreq AREBBI - ad dayneɣ ittwagg uř s waṭṭas, aqa dayneɣ di neccin inni ɣares arewřen, ḥima ad neṭṭef deg usitem i d aneɣ ittwawaɛden,
HEB 6:19 d wenni ɣarneɣ am yijj n uřeyzim icebbaren s řmetnet di řeɛmar nneɣ, [ijj n uřeyzim] i dd-ittadfen ɣar daxeř n uřeḥḥaf n wadaf.
HEB 6:20 mani yudef Yasuɛ wenni d aneɣ izwaren x tizi nneɣ, aqa idweř d Akehhan i řebda deg warwas n Malkiṣadiq.
HEB 7:1 Malkiṣadiq wanita tuɣa d ajeǧid n Salim, akehhan n AREBBI wenni d Amɛuǧi x kuřci, u netta iffeɣ-dd ḥima ad iřqa Ibrahim řami dd-idweř zi tareẓẓit n ijeǧiden, u netta ibarek [Ibrahim].
HEB 7:2 Ibrahim iksi ijj n řeɛcur zi marra min ɣares i netta. Isem nnes ixs ad yini: ‘ajeǧid n tsegda’, u ɛawed: ‘ajeǧid n Salim’, min ixs ad yini ‘ajeǧid n řehna’.
HEB 7:3 Nḥřa ma ttwazemmen babas d yemmas deg [idlisen n] jjadira, u nḥřa beddu n wussan nnes niɣ aneggar n tudart nnes, [maca] deg warwas n Mmis n AREBBI, aqa teqqim tukehhant nnes i řebda.
HEB 7:4 Xzarem řexxu, mecḥař tuɣa imɣar wanita x arrays n řejdud [nneɣ] Ibrahim i t iwcin řeɛcur zi min iṣebḥen qaɛ!
HEB 7:5 Maɣar inni iksin tukehhant zeg ayt n Lawi, aqa ɣarsen tawṣeyyet ɛlaḥsab Ccariɛa ḥima ad ksin řeɛcur zi řgens, iɛna zeg aytmatsen, umi nitni ffɣen-dd ɛawed zi dwaxeř n Ibrahim.
HEB 7:6 Maca [Malkiṣadiq] wanita, wenni war izemmen deg idlisen nsen n jjadira, iksi zi Ibrahim řeɛcur uca ibarek i wenni iṭṭfen lwaɛd.
HEB 7:7 Aqa břa awař, wenni iǧan qell, aqa ad ittwabarek zeg wenni iǧan ḥsen zzayes.
HEB 7:8 Aqa danita iwdan ifennan kessin řeɛcur, maca dinni ten [iṭṭef] netta, netta d wenni x cehhdent Tira [Iqeddsen], aqa iddar.
HEB 7:9 Ammu nzemmar ad nini belli Lawi, wenni iksin řeɛcur, aqa iɛeccar [ɛawed] s ufus n Ibrahim,
HEB 7:10 minzi tuɣa-t ɛad di dwaxeř n babas ařami imsagar wanita ak-d Malkiṣadiq.
HEB 7:11 Mařa řekmařet tuɣa-tt s tukehhant n Lawi, minzi tanita tᵉttwaḍmen i řgens s Ccariɛa, mayemmi ɛad ittxeṣṣa ad dd-ikkar ukehhan nneɣni deg warwas n Malkiṣadiq? [Mařa ammu i teǧa], zeɛma inna Netta belli ad yiři di ṣṣifet n Harun!
HEB 7:12 Maca am mammec tuɣa din ijj n ubeddeř n tukehhant, ammu tuɣa din ɛawed ijj n ubeddeř n Ccariɛa.
HEB 7:13 Minzi Wenni mixef ittwanna aya, aqa ittwaxřeq-dd zi teqbič nneɣnit, i zi uřa d ijj war isexxar ɛemmarṣ ɣar uɛalṭar.
HEB 7:14 Aqa bayen belli Siditneɣ iffeɣ-dd zi Yahuda, zi taqbič i war x issiweř Musa uřa s yijj n wawař x tukehhant.
HEB 7:15 S man aya ɛawed tban qaɛ mliḥ, aqa Netta inna belli ad dd-ikkar ukehhan nneɣni deg warwas n Malkiṣadiq,
HEB 7:16 wenni war ittwaggen ɛlaḥsab Ccariɛa n tweṣṣa i itthiman arrimet, maca ɛlaḥsab jjehd n Tudart war ifennan.
HEB 7:17 Minzi Netta iched xas: “Cek d Akehhan i řebda deg warwas n Malkiṣadiq!”
HEB 7:18 Minzi tawṣeyyet tenni tuɣa qbeř tᵉttwaxřef zi ssibbet n tuḍɛeft nnes d břa nnfaɛ nnes.
HEB 7:19 Minzi Ccariɛa war tᵉttiwi qaɛ akemmeř, maca deg wemcan nnes yusa-dd usitem d ameqqran i zi nzemmar ad nades AREBBI,
HEB 7:20 u Netta iḍmen man aya s ict n tjaǧit.
HEB 7:21 Maɣar nitni dewřen d ikehhanen břa tajaǧit, maca Wanita s ict n tjaǧit umi Netta d as inna s [uqemmum n] Dawud: “Aqa SIDI ijjuǧ, war issxarriq ɛemmarṣ: ‘Cek d Akehhan i řebda di ṣṣifet n Malkiṣadiq.’”
HEB 7:22 Di marra man aya iǧa Řɛahd-a, i zi idweř Yasuɛ d aḍman, qaɛ ḥsen.
HEB 7:23 Tuɣa din [di řweqt nni ɛawed] aṭṭas n ikehhanen, minzi nitni mmuten, ttwamenɛen ad qqimen.
HEB 7:24 Maca x Wanita war xas tɛeddu Tukehhant nnes, minzi Netta ad iqqim ibedd i řebda.
HEB 7:25 S uyenni izemmar ad iwc Tudart ittduman i yinni zzayes i dd ɣa qarrben ɣar AREBBI, minzi Netta iddar i řebda uca iwehheb tiẓaǧitin di ṭṭweɛ nneɣ.
HEB 7:26 Minzi tuɣa ittřiq aneɣ ijj n Ukehhan am Wanita: amezdag, břa řɣecc d taxmuji, ittwafarzen zeg imednab, yuɛřan x ijenwan,
HEB 7:27 wenni war ɣar iǧi řxeṣṣ ass x wass am irruyas n ikehhanen, ḥima ad iqeddem amezwar tiɣarṣin x ddnub n yixef nnes, uca xenni ɛawed x ddnub n řgens, minzi aya igga i-t ict n twařa i řebda qaɛ, řami iwca Ixef nnes d taɣarṣt.
HEB 7:28 Aqa Ccariɛa tessgeɛɛed iwdan iḍeɛfen d ikehhanen, maca awař n tjaǧit, wenni awarni Ccariɛa, issgeɛɛed Mmis wenni ittwakemmřen i řebda.
HEB 8:1 Lmufid zi marra man aya, aqa ɣarneɣ Arrays n ikehhanen, wenni iqqimen ɣar yefus n řɛarc n Lɛaḍim deg ijenwan.
HEB 8:2 Netta d Amseyyar n Zzawect Iqeddsen u n Tzeddiɣt Iqeddsen d tidett nni ibna AREBBI, war iǧi d bnadem.
HEB 8:3 Minzi kuř arrays n ikehhanen ittwassgeɛɛed ḥima ad iwc tiwhibin d tɣarṣin. S uyenni tuɣa ittxeṣṣa as i Wanita ɛawed ad ɣares yiři ca ḥima ad t iwc.
HEB 8:4 Meɛlik iǧa di temmurt, Netta war ittiři d akehhan, minzi aqa din ikehhanen [ɛad] inni ittqeddamen tiwhibin ɛlaḥsab Ccariɛa.
HEB 8:5 Nitni sexxaren i umedya d tiři n min iǧan deg ujenna, am mammec ittwanna i Musa umi tuɣa iřha ak-d Uqiḍun Iqeddsen: “Ḥḍat, ad tegged marra am lmital wenni d ac ssecneɣ x wedrar.”
HEB 8:6 [Maca] řexxu Yasuɛ Lmasiḥ iksi tasexxart tecna xas, minzi Řɛahd i zi idweř Netta d Lwasit, aqa ḥsen qaɛ, uca immewc s lwuɛud icnan x yinni [i dd-ittasen ak-d Řɛahd aqdim].
HEB 8:7 Minzi mařa tuɣa [Řɛahd] amezwaru břa řɛib, war ittiři ɛad wemcan i wenni d wiss tnayen.
HEB 8:8 Maɣar Netta yufa daysen řɛib, inna: “Xzar, ad dd-asen wussan, inna SIDI, xmi ɣa ggeɣ ijj n Řɛahd n Jdid di řekmaret, i řaǧ n taddart n Israil u i řaǧ n taddart n Yahuda,
HEB 8:9 war iǧi am Řɛahd nni wciɣ i řejdud nsen, deg wass min di ten ṭṭfeɣ zeg ufus, gewwdeɣ ten zi temmurt n Miṣra. Minzi nitni war qqimen ca di Řɛahd inu, nḍareɣ ten, iqqar SIDI.
HEB 8:10 Maca d wa d Řɛahd i ɣa wceɣ i řaǧ n taddart n Israil: ‘Awarni wussan nni, inna SIDI, ad ggeɣ izerfan inu di řeɛqeř nsen, uca ad ten ariɣ deg wuřawen nsen, uca Necc ad asen iřiɣ d AREBBI, nitni ad ayi iřin d řgens.
HEB 8:11 Uřa d ijjen ad isseřmed mmis n temmurt niɣ umas, ad yini: Ssen SIDI!, minzi marra ad ayi ssnen, am umeẓyan nsen am umeqqran nsen.
HEB 8:12 Minzi Necc ad ten sseṣfiɣ zi řmuɛṣiyyet nsen, uca ddnub nsen war daysen ttfekkareɣ ɛad.’”
HEB 8:13 Řami inna: ‘Jdid!’, aqa igga [Řɛahd] amezwaru d aqdim, uca min yarcan u idduysar, aqa ad ifna.
HEB 9:1 Maca ɣar umezwar tuɣa din řefruḍ i tsexxart u [tuɣa din] ict n Zzawect Iqeddsen di ddunect-a.
HEB 9:2 Minzi Tazeddiɣt tamezwarut i tᵉttwagg, tuɣa dayes řqendiř d tzewḍa d weɣrum n wescan uca qqaren as: ‘Aqeddas’.
HEB 9:3 Maca Tazeddiɣt n daxeř, awarni i uřeḥḥaf wiss tnayen, qqaren as ‘Aqdas x Uqeddas’.
HEB 9:4 Aqa dayes řqecɛet n wureɣ i řebxur uřa d Ttabut n Řɛahd iɣeǧfen s wureɣ ɣar marra iɣezdisen. Tuɣa dayes ijj n uzenbiř n wureɣ dayes ‘manna’, u [dayes] uřa d taɣɣarct n Harun tenni ittwanuwwcen d teřwiḥin [n weẓru] n Řɛahd.
HEB 9:5 Sennej i man aya aqa din ‘ixiruben’ n řɛezz, inni iddřin taqebbart n weṣřaḥ [i iǧan x Ttabut] s tiři n wafriwen nsen. Maca war ɣarneɣ bu řweqt [řexxu] ḥima ad nessiweř x kuř icten zi tmesřayin-a i ittwasswejden ammu.
HEB 9:6 Maca ikehhanen tuɣa ttadfen řebda ɣar Tzeddiɣt nni ɣar barra, [tenni d tamezwarut], ḥima ad [dayes] kemmřen tasexxart nsen.
HEB 9:7 Maca arrays n ikehhanen tuɣa ittadef ict n twařa deg useggʷas ɣar Tzeddiɣt n daxeř ak-d idammen i iqeddem x yixef nnes uřa x uweddar n řgens.
HEB 9:8 S tebridt-a isscen Arruḥ Iqeddsen mliḥ belli abrid iqeddsen ɛad war dd-ittwammeḍhar, umi ɛad Tazeddiɣt tamezwarut tbedd.
HEB 9:9 Tanita tuɣa d amedya i řweqt nni di tuɣa ttqeddamen ṣṣdaqi d tɣarṣin nni war zemmarent ad awyent řekmaret ɣar tnefsect n wenni i-tent iqeddmen.
HEB 9:10 Aqa atent tuɣa tthimmant mɣir macca d tsessi d ibriden ifarzen n useɣḍas [deg waman], aqa atent d řefruḍ i itthimman ddat waha, ttwamurent ař řweqt n weɛdař n tsegda.
HEB 9:11 Maca Lmasiḥ i dd-yusin, aqa idweř d Arrays n ikehhanen x řxar i igga. Netta yudef ɣar Tzeddiɣt Tameqqrant ikemmřen, tenni war ittwaggen ca s ifassen, war teǧi zi min dd-ittwaxeřqen.
HEB 9:12 War yudif ca ak-d idammen n iɣayḍen d iɛejmiyyen n ijj n useggʷas, maca aqa yudef ict n twařa ak-d Idammen n Yixef nnes ɣar Zzawect Iqeddsen u [ammu i] dd-yiwi asenjem ittduman.
HEB 9:13 Minzi mařa idammen n iɣayḍen d ifunasen imeẓyanen d iɣɣeḍ n uɛejmi [azeggʷaɣ] i ittwaruccen x yinni ittwaxemjen, aqa qeddsen u ssizdigen ten zi jjihet n weysum nsen [n arrimet],
HEB 9:14 mecḥař ɛad ad ssizedgen Idammen n Lmasiḥ tanefsect nneɣ zi řexdayem immuten, ḥima ad nexdem AREBBI iddaren, aqa Lmasiḥ wenni iwcin Ixef nnes i AREBBI s Arruḥ n řebda d taɣarṣt war dayes bu řɛib!
HEB 9:15 S uyenni aqa Netta d Lwasit n Řɛahd n Jdid, maɣar s řmewt nnes idweř Netta d asenjem i yinni ixeṭṭan ḍidd Řɛahd amezwar, ḥima nitni inni ittwařaɣan i řwart n řebda, ad ṭṭfen lwaɛd.
HEB 9:16 Minzi mani iǧa řɛahd, ittxeṣṣa ad tᵉttwassargeb řmewt n wenni iggin řɛahd.
HEB 9:17 Minzi řɛahd ad idweř iṣřeḥ waha xmi ɣa immet ḥed, war ittiři ca nican min ɣa yekk iddar wenni iggin [řɛahd].
HEB 9:18 S uya uřa d [Řɛahd] amezwar war ittwaḍmen ca břa idammen.
HEB 9:19 Minzi awarni řami kuř tawṣiyyet nni iǧan di Ccariɛa aqa iweṣṣa i řgens s ufus n Musa, iksi netta idammen n ufunas ameẓyan ak-d waman uřa d taḍuft tazeggwaɣt d tɛelǧet, uca irucc i-ten x idlisen ittwannḍen u x marra řgens,
HEB 9:20 inna asen: “Ina d idammen n Řɛahd, i d awem yumur AREBBI.”
HEB 9:21 Tuɣa irucc ɛawed Tazeddiɣt Iqeddsen d marra řeqcuɛ n tsexxart s idammen.
HEB 9:22 Maɣar marra timesřayin nni iǧan di Ccariɛa ttwassizedgent s idammen uca břa asizzeř n idammen war din iǧi ca weɣfar.
HEB 9:23 Tuɣa qaɛ ittxeṣṣa ad ttwassizdegent tmesřayin-a s tɣarṣa i iǧan d řemtuř n timesřayin i iǧan deg ijenwan, maca timesřayin nni iǧan n ujenna simant nsen s tɣarṣin icnan zi tina.
HEB 9:24 Minzi Lmasiḥ war yudif ca ɣar Zzawect Iqeddsen i ittwaggen s ifassen, d wenni netta d lmital n min iǧan d tidett, maca ɣar ujenna simant nnes, ḥima ad dd-iḍhar di ṭṭweɛ nneɣ qibač i AREBBI.
HEB 9:25 War iǧi ḥima ad iqeddem Ixef nnes aṭṭas n twařawin am mammec tuɣa ittadef arrays n ikehhanen kuř aseggʷas ɣar Zzawect Iqeddsen s idammen war iǧin nnes
HEB 9:26 - minzi mařa ammu i iǧa, iři ittxeṣṣa ad iweddeb [Yeccu] aṭṭas n twařawin zi beddu n ddunect - maca řexxu, ɣar qeṭṭu n ddunect, iwca Netta Ixef nnes ict n twařa ḥima ad ibeṭṭeř ddnub s tɣarṣt nnes.
HEB 9:27 Am mammec d ittwassars i iwdan ad mmten ict n twařa, uca xenni awarni i řmewt nsen [ad dd-yas] řḥukm,
HEB 9:28 ammu ɛawed immewc Lmasiḥ ict n twařa d taɣarṣt, iwca deg Yixef nnes taɣarṣt n ddenb i waṭṭas, maca ɣar twasit nnes i twařa wiss tnayen ad ittwaẓar břa ddenb i Tudart n yinni t ittrajan.
HEB 10:1 Minzi tuɣa Ccariɛa d tiři n řxar i dd ɣa yasen [waha], war ɣares ṭṭbiɛet n tmesřayin simant nsent. S uyenni war zemmarent tɣarṣa nni, waxxa iwyen tent-i-dd kuř aseggʷas, ad awyent řekmaret x yinni tent dd-ittqarraben.
HEB 10:2 Minzi mařa iban-dd aqa tᵉttawyent ɣar řekmaret, ad tiři ttwassbedden nitni zeg uwehheb n tɣarṣa nsen aṭṭas zeg wami, minzi war tᵉttwakkʷur ɛad tnefsect nsen s ddenb awarni řami ttwassizedgen ict n twařa.
HEB 10:3 Maca s man aya ttwassfekkaren asen-dd ddnub nsen kuř aseggʷas,
HEB 10:4 minzi idammen n ifunasen imeẓyanen d iɣayḍen war zemmaren ad ssizdegen zi ddnub.
HEB 10:5 S uyenni řami dd-yudef ɣar ddunect, inna: “Tiɣarṣa niɣ tiwhibin war tent texsed, maca aqa tessyarḍed ayi ict n arrimet.
HEB 10:6 Tiɣarṣin n wecmaḍ ak-d tiɣarṣa n řehna i ddnub war tent tᵉttared.”
HEB 10:7 Řexdenni nniɣ: “Xzar, ad dd-aseɣ! - minzi yura xafi deg Wedlis ittwanḍen - ḥima ad ggeɣ min texsed Cek, a AREBBI!”
HEB 10:8 Tuɣa inna qbeř: “Tiɣarṣin d tewhibin d tɣarṣin s tmessi d tɣarṣin i ddnub war tent texsed!”, waxxa aqa atent ttwaqeddment ɛlaḥsab Ccariɛa.
HEB 10:9 Awarni man aya inna: “Xzar, usiɣ-dd ḥima ad ggeɣ min texsed Cek, [a] AREBBI.” S uya ikkes amezwar, ḥima ad issgeɛɛed wiss tnayen.
HEB 10:10 Maɣar s man aya, s řxaḍar nnes, aqa nettwaqeddes [deg] ict n twařa s tɣarṣt n Arrimet n Yasuɛ Lmasiḥ.
HEB 10:11 Maɣar kuř akehhan i tuɣa ittsexxar kuř ass, aqa iwehheb aṭṭas n twařawin simant n tɣarṣa, tinni war izemmaren ad ssizedgent zi ddnub.
HEB 10:12 Maca Wanita iqeddem ict n tɣarṣt x ddnub, uca xenni iqqim x yefus n AREBBI i řebda.
HEB 10:13 Zi řexdenni ittraja ař d as ttwaggen řɛedyan nnes d tanebdat sadu iḍaren nnes.
HEB 10:14 Minzi s ict n tɣarṣt aqa yiwi inni zzayes ittwaqeddsen ɣar řekmaret i řebda.
HEB 10:15 Maca Arruḥ Iqeddsen ɛawed iched i neccin, iqqar:
HEB 10:16 “D wa d Řɛahd i d asen ɣa wceɣ awarni i wussan nni, iqqar SIDI: ‘Ad ggeɣ Ccariɛa inu di řeɛqeř nsen, ad tt ariɣ ɛawed deg wuřawen nsen,
HEB 10:17 uca ddnub nsen d ixeṭṭan nsen, ɛemmarṣ ad daysen fekkareɣ ɛad.’”
HEB 10:18 Mani ittiři [xenni] weɣfar i ddnub, war din iqqim ɛad tɣarṣt x ddnub.
HEB 10:19 S uyenni, [a] aytma, aqa ɣarneɣ ttiqqet maḥend ad nadef ɣar Zzawect Iqeddsen s Idammen n Yasuɛ,
HEB 10:20 x Webrid n jdid iddaren i d aneɣ issewjed am [Webrid] n jdid i dd-ittadfen ɣar daxeř n uřeḥḥaf n tewwart, wenni d weysum nnes,
HEB 10:21 uca aqa ɣarneɣ [ɛawed] Arrays n ikehhanen x Taddart n AREBBI.
HEB 10:22 Ejj aneɣ xenni ad dd-nqarreb s wuř n tidett, di ttiqqet n l’iman, am ttwaruccen wuřawen nneɣ u ttwassizdegen [ɛawed] zi tnefsect taɛeffant, u am tᵉttwassird [ɛawed] arrimet nneɣ s waman iṣfan.
HEB 10:23 Ejj aneɣ ad ncebbar di cchadet n usitem nneɣ břa ma ad narjij, minzi d Wenni d aneɣ iwcin lwaɛd, dayes řaman.
HEB 10:24 Ejj aneɣ ad neḥḍa ijj i wenneɣni ḥima ad negg uř deg wayawya ɣar tayri u ɣar řexdayem tiṣebḥanin.
HEB 10:25 War nᵉttejji ca tamesmunt nneɣ am mammec nnumen ca, maca ad nessemḥeḍ ijjen wenneɣni, mahu ɛad xmi ɣa tẓarem aqa ass nni yiweḍ-dd.
HEB 10:26 Minzi mařa ixḍa ca n ijj neɛmada awarni ma iṭṭef tussna n tidett, xenni war teqqim ɛad tɣarṣt x ddnub,
HEB 10:27 maca [mɣir] araji n lḥisab issnexřɛen d řɛabuq n tmessi nni i ɣa iccen řɛedyan.
HEB 10:28 Mařa ixḍa ḥed ak-d Ccariɛa n Musa, ittxeṣṣa ad immut břa arreḥmet x uqemmum n tnayen niɣ třata n řechud.
HEB 10:29 Mecḥař ktar ittxeṣṣa ad ihwa lɛiqab x uzeǧif n wenni iɛeffsen x Mmis n AREBBI, d wenni iḥessben Idammen n Řɛahd nnes i zi tuɣa ittwaqeddes amecnaw idammen n marra iwdan, d wenni isseḥqaren [ɛawed] Arruḥ n arḍa?
HEB 10:30 Minzi nessen d Wenni innan: “Antaqem i Necc umi iǧa, Necc ad t xeǧṣeɣ!” Uca ɛawed: “SIDI ad iḥkem řgens nnes.”
HEB 10:31 Sseɛd d abarcan i wenni i ɣa iwḍan deg ifassen n AREBBI iddaren.
HEB 10:32 S uya fekkarem deg wussan imezwura řami tᵉttwassɣeḍṣem u tuɣa tarebbum amenɣi ameqqran am mammec xawem tekka řefḍiḥet d řmeḥnet.
HEB 10:33 Tdewřem d ijj n afurrej u tcarcem ak-d inneɣni umi daysen ittwagg ammu kifkif.
HEB 10:34 Minzi teksim amnus x yinni ittwaḥebbsen, uca tqebřem akecceḍ n wagřa nwem s řefraḥet, tessnem belli ɣarwem agřa imɣar i war ifennin deg ijenwan.
HEB 10:35 War neṭṭarem ca taryast nwem nni ɣar teǧa ict n řmunet temɣar.
HEB 10:36 Minzi ittxeṣṣa kenniw ṣṣbar ḥima ad teggem min ixs AREBBI u maḥend ad tᵉṭṭfem lwaɛd.
HEB 10:37 “Minzi drus n řweqt i dinni, wah drus, ař Wenni dd ɣa yasen ad ixecc, war ittɛeṭṭař ca.
HEB 10:38 Maca amseggad s l’iman inu ad iddar, maca mařa ismeḥ, war dayes yareṭṭi řeɛmar inu.”
HEB 10:39 Maca neccin war ɣarneɣ min ɣa negg s tarexxut i ittawyen ɣar txessart, maca ɣarneɣ l’iman i ittawyen ɣar usenjem n řeɛmar nneɣ.
HEB 11:1 L’iman řexxu d aḍman n tmesřayin nni di issitim bnadem, axmi tina ɛad xeddment, uřa d asargeb n tmesřayin innuffaren.
HEB 11:2 Minzi s man aya tusa-dd ict n cchadet x imɣaren.
HEB 11:3 S l’iman nefhem belli zzmanat ttwaggent s wawař n AREBBI, u belli timesřayin-a i dd-ittbanen aqa ttwaggent zi tmesřayin nni innuffaren.
HEB 11:4 S l’iman tuɣa Habil iqeddem ict n tɣarṣt tecna aṭṭas x min tuɣa iqeddem Qayin i AREBBI. S uya i din teǧa cchadet xas belli tuɣa-t d amseggad. Uca AREBBI iched i tɣarṣt nnes u s uya issawař ɛad, waxxa netta immut.
HEB 11:5 S l’iman immeksi Inux břa ma iqqas řmewt. War ittwif ɛad, minzi iksi i-t AREBBI. Minzi qbeř ma ad t iksi, tuɣa xas cchadet-a: aqa tuɣa yareṭṭa AREBBI.
HEB 11:6 Maca břa l’iman war izemmar bnadem ad yarḍa AREBBI, minzi wenni i ɣa dd-iqarrben ɣar AREBBI, ittxeṣṣa as ad yamen belli Netta aqa-t din, u belli Netta d amxeǧaṣ n yinni xas yarezzun.
HEB 11:7 S l’iman tuɣa Nuḥ itteggʷed, awarni řami d as ittwanna min tuɣa war dd-ittbinen, uca igga aɣarrabu i usenjem n iḥenjiren n twacunt nnes. S man aya aqa iḥkem x ddunect uca idweř netta d awrit n tsegda nni iǧan s l’iman.
HEB 11:8 S l’iman tuɣa Ibrahim, řami dd-ittwařaɣa, iṭṭaɛ uca iffeɣ ɣar wemcan i ɣa iṭṭef d řwart, uca iffeɣ břa ma ad issen mani ɣa yaweḍ.
HEB 11:9 S l’iman tuɣa izeddeɣ am umɛezzeb di temmurt i d as ittwawaɛden, am di temmurt n ibarraniyyen. Netta izdeɣ deg iqiḍan ak-d Isḥaq d Yaɛqub, inni d iwriten akides n lwaɛd nni.
HEB 11:10 Minzi ittraja Tandint s dsusa i zi iǧa AREBBI d Bab n řebni d Wenni tt iggin.
HEB 11:11 S l’iman immewc as i Sara jjehd maḥend ad teksi ddeyset - waxxa nettat war dd-tᵉttiruw, uca am tt tuɣa ɛad barra i řmijař n tewsar nnes - turuw-dd minzi tuɣa tessen nican belli wenni d as iwaɛden, dayes řaman.
HEB 11:12 S uyenni ɛawed zeg ijjen, aqa zeg wenni di ibḍeř jjehd nnes s tewsar, ttwařwen as-dd am yitran n ujenna s ubarru nsen u am yijdi x tma n řebḥar i war izemmar ad ittwaḥseb.
HEB 11:13 Di l’iman mmuten yina marra břa ma ad ṭṭfen min d asen ittwawaɛden, maca ẓrin t zi řaggʷaj uca farḥen zzayes uca neɛmen belli nitni d ibarraniyyen d imeɛzab x temmurt.
HEB 11:14 [Minzi] inni iqqaren timesřayin am tina, ssecnen mliḥ belli nitni arezzun Tandint nsen.
HEB 11:15 Meɛlik arzun x temmurt manis dd-ffɣen, iři aqa ufin lfurṣa ḥima ad ɛeqben din ɛawed.
HEB 11:16 Maca řexxu iban-dd mliḥ aqa daysen meẓri ɣar [temmurt] nni ḥsen, min ixs ad yini ɣar tenni deg ujenna. S uyenni AREBBI war iseḍḥi ca ad as řaɣan ‘AREBBI nsen’, minzi aqa issewjed asen ict n Tendint.
HEB 11:17 S l’iman iwca Ibrahim, řami ittwaqeǧeb, Isḥaq d taɣarṣt, uca issars ayenni n mmis nni iṭṭef s lwaɛd, x uɛalṭar.
HEB 11:18 Maca ittwanna as: “Di Isḥaq ad ac řaɣan zzariɛet nnec.”
HEB 11:19 Tuɣa ixarreṣ ak-d ixef nnes, belli AREBBI izemmar ɛawed ad t-i-dd-issnekkar jar imettinen. S uya idweř-dd ɣares ɛawed s webrid n yijj n umedya, [am s tnukra].
HEB 11:20 S l’iman zi jjihet n min tuɣa dd-igguren ɛad, ibarek Isḥaq iḥenjiren nnes, Yaɛqub d Ɛisu.
HEB 11:21 S l’iman tuɣa Yaɛqub, řami immut, ibarek kuř ijjen zeg iḥenjiren n Yusuf am tuɣa iṭṭef deg ixef n teɣɣarct nnes.
HEB 11:22 S l’iman tuɣa Yusuf, řami tuɣa immut, issiweř x wuffuɣ n ayt n Israil uca iweṣṣa ten x iɣsan nnes.
HEB 11:23 S l’iman tuɣa Musa, řami dd-ixřeq, ittwassnuffar zi lwalidin nnes třata n iyuren, řami ẓrin aḥenjir iṣbeḥ, uca [s l’iman] war ggʷiden ca zeg řumur n ujeǧid.
HEB 11:24 S l’iman yugi Musa, řami imɣar netta, ad as řaɣan ɛad mmis n yeǧis n firɛun.
HEB 11:25 Mři yufa ad yiři ittwazeyyar ak-d řgens n AREBBI uřa d tarrit n meẓri di ddnub i drus n řweqt.
HEB 11:26 Tuɣa iḥesseb aseḥqar n Lmasiḥ d agřa ameqqran sennej i řeknuz n Miṣra, minzi tuɣa ixezzar ɣar zzat ɣar řmunet.
HEB 11:27 S l’iman ijja Miṣra, war iggʷid ca zeg uxeyyeq n ujeǧid, minzi iziyyar ixef nnes axmi iẓra AREBBI i war ittwaẓaren.
HEB 11:28 S l’iman igga [Taɣarṣt n] Useɛdu, uca irucc idammen, ḥima amkeḥḥaḍ n imenza nsen war ten ittḥidi ca.
HEB 11:29 S l’iman ẓwan Řebḥar n Uɣanim axmi kkin di řbarr, am ttwaṣarḍen Imiṣriyyen [zi řebḥar] umi tuɣa xsen ad dayes cuqen.
HEB 11:30 S l’iman wḍan řeḥyuḍ n Ariḥa umi kkin sebɛa n wussan, ttennḍen as.
HEB 11:31 S l’iman war thellik ca Raḥab, tamɣart n farq-ccɣeř ak-d yinni war iṭṭiɛen, am tuɣa tareḥḥeb ibergagen s řehna.
HEB 11:32 Uca min ɣa iniɣ ɛad? Minzi řweqt war tqeddi ad ssiwřeɣ x Jidɛun d Barak d Camcun d Yifta d Dawud d Camwil u x inabiyyen inneɣni,
HEB 11:33 inni tuɣa iɣellben x tgeldiwin s l’iman, ggin tasegda, ṭṭfen lwuɛud, qqnen ixenfucen n wayraden,
HEB 11:34 ssxesyen jjehd n tmessi, arewřen zi řeqḍeɛ n ssif, ksin jjehd di tuḍɛeft, dewřen jehden deg imenɣan u qeřɛen x řemrageḥ n řɛeskar n ibarraniyyen.
HEB 11:35 Arrin-dd i temɣarin iḥenjiren nsent s tnukra n imettinen, ca nneɣni mmuten s řeɛdab, tuɣa war ttrijin ad ttwafekken, maca ad ṭṭfen di tnukra icnan ḥsen zi man aya,
HEB 11:36 ca nneɣni ksin abehdeř d urekkuḍ, u [ɛad] inneɣni ttwaggen di ssnaseř u di řeḥbes.
HEB 11:37 Inneɣni ttwarejmen, ttwaqessen di tnayen, inneɣni mmuten s řeqḍeɛ n ssif, telɛen am arḍen iřmawen n wuǧi d iɣayḍen, daysen řeɣben, ttwaḥṣaren, ttwaḍeřmen.
HEB 11:38 Nitni d iwdan i war d asen tessdaheǧ ddunnit [ḥima ad dayes zedɣen]. Nitni dewřen d inni itelɛen di řexřawat, x idurar u deg ifran d ixerdusen n temmurt.
HEB 11:39 Marra ina mixef tᵉttwaf ict n cchadet n l’iman nsen, war ṭṭifen ca di lwaɛd,
HEB 11:40 minzi AREBBI tuɣa izwar iẓra di ṭṭweɛ nneɣ, aqa nitni war ttikkʷiḍen ca ɣar řekmaret břa neccin.
HEB 12:1 S uya neccin ɛawed, umi d aneɣ dd-nnḍen marra řechud-a am iseynuten, ad nenḍar marra ddqeř n ddenb i d aneɣ dd-isswejden i řebda. Ejj aneɣ ad nuyur s ṣṣbar amḥizwar nni xaneɣ dd-immarsen.
HEB 12:2 Ejj aneɣ ad nenḍar tiṭṭawin di Yasuɛ, Amgewwad d Umkemmeř n l’iman nneɣ, wenni, zi ssibbet n řefraḥet i ɣares, yarbu ṣṣalib, war t icqi ubehdeř, uca iqqim x yefus n řɛarc n AREBBI.
HEB 12:3 Xzarem mliḥ, mecḥař i iksi Netta zeg imednab, inni d iɣrimen n řeɛmar n yixef nsen, ḥima war tᵉttiḥřem u war tarexxum ca di řeɛmar nwem.
HEB 12:4 Aqa kenniw, war truḥem ca tiggʷejem ak-d ddenb, war temmɛařim ca ař [usizzeř] n idammen [nwem].
HEB 12:5 Tᵉttum taɣuri i xawem issawařen am iḥenjiren: “Mmi inu, war ttegg ca s weɛrur x ttarbiyyet n SIDI, war ttiři ca d amarxu di řeɛmar nnec, xmi ɣa tᵉttwawebbxed zzayes.
HEB 12:6 Minzi wenni ittexs SIDI, yarebba i-t s uqessaḥ, uca iḥenjiren nnes i xas iɛizzen, iksi ten kuř ijj zzaysen ɣar uɣezdis.”
HEB 12:7 X uya, ksim ttarbiyyet, minzi AREBBI ittegg awem am iḥenjiren nnes. Minzi man mmis wenni babas war t yarebbi ca s uqessaḥ?
HEB 12:8 Mařa aqa kenniw břa ttarbiyyet i di carcen marra, řexdenni kenniw [am] ibarraniyyen i teǧam, war iǧi d arrawen.
HEB 12:9 Mařa neksi ttarbiyyet zi babatneɣ ɛlaḥsab arrimet uca nweqqar i-ten, mecḥař d aneɣ ittxeṣṣa ad nṭaɛ i Babatneɣ n arruḥat, [ḥima] ad neddar!
HEB 12:10 Minzi nitni webbxen aneɣ ca n wussan am mammec d asen ittɣiř mliḥ, maca AREBBI igga i-tt i tizi nneɣ, ḥima ad ncarc di tqeddast nnes.
HEB 12:11 Aqa war din uřa d ict n ttarbiyyet s uqessaḥ i ittbanen d řefraḥet deɣya, maca d řeḥriq, maca awarni as tiwi-dd řɣiǧet n řehna d tsegda i yinni zzayes ittwadarrben.
HEB 12:12 S uyenni, sjehdem ifassen nwem yarxun d ifadden nwem yarehfen,
HEB 12:13 uca ggem nican iṣuraf n iḍaren nwem, ḥima min iǧan d aqejdaḥ war ittefriɣ ca, maca ad iggenfa.
HEB 12:14 Ḍfarem-dd řehna d tuqeddsi ak-d marra, tenni břa zzayes war iẓar ḥed Siditneɣ.
HEB 12:15 Ɣarwem aqa uřa d ijj jar awem ad ittwaf inqeṣ as arḍa n AREBBI, niɣ aqa ad iɣmi weẓwar n tarzugi, ad kenniw iḍarr uca xenni ad zzayes ttwaxemjen aṭṭas,
HEB 12:16 [uca] ḥḍam, aqa war ittwiffi ḥed jar awem wenni d bu-farq-ccɣeř niɣ d ameqjuḥ am Ɛisu nni izzenzen řḥeqq n umenzu nnes x ijj n macca.
HEB 12:17 Minzi aqa tessnem, belli awarni man aya tuɣa yarezzu [ɛad] ad iwart lbaraka, maca yugi as, maɣar war yufi ca ttasiɛ i weɛdař, waxxa yarezzu t s imeṭṭawen.
HEB 12:18 Minzi kenniw war tiwiḍem ca ɣar tmessi yarɣin niɣ ɣar wedrar i nzemmar ad nḥada, uřa ɣar tayyut tbarcant d tḥaryaḍt,
HEB 12:19 niɣ ɣar zzhir n uṣudi deg uyicc [n icarri] uřa ɣar řḥess n wawařen di ssibbet nsen zawgen inni d as isřin, maḥend war ten kisen issiwiř ɛad.
HEB 12:20 S minzi war zemmaren x ddqeř n tweṣṣa, minzi mařa iqarreb-dd mɣir ijj n umuddar adrar, ad ittwarjem netta.
HEB 12:21 Min ẓrin tuɣa issaggʷad aṭṭas, ařami inna Musa: “Aqa ggʷedeɣ u ttarjijiɣ!”
HEB 12:22 Maca kenniw tiwḍem ɣar wedrar n Ṣihyun, ɣar Tendint n AREBBI iddaren, ɣar Urcalim nni iǧan deg ijenwan u ɣar tmesmunt n ɛecra n řuřufat n lmalakat,
HEB 12:23 ɣar tmesmunt n imenza, inni ittwazemmemen deg ijenwan, u ɣar AREBBI, Řqaḍi x marra u ɣar arruḥat n imseggaden nni iwḍen ɣar řekmaret,
HEB 12:24 u ɣar Yasuɛ, Lwasit n Řɛahd n Jdid, u ɣar urucci s Idammen nnes, inni issawařen ḥsen zeg inni n Habil.
HEB 12:25 Ɣarwem war tagim ca x Wenni akidwem issawařen, minzi mařa inni war ittwassnejmen ugin Wenni kidsen issawařen di temmurt, mahu ɛad neccin, mařa nḥeyyed x Wenni akidneɣ issawařen zeg ijenwan,
HEB 12:26 Wenni tuɣa tmijja nnes tessenhezza tammurt, maca Wenni řexxu iwaɛd, inna: “Ad ssenhezzeɣ ɛawed ict n twařa, war iǧi tammurt waha, aqa uřa d ajenna.”
HEB 12:27 [Awař-a]: ‘Ict n twařa!’, aqa imřa belli ad ittwakkes min ittenhezzan, minzi man aya ittwagg, ḥima ad qqiment tmesřayin war ttenhezzint.
HEB 12:28 S uya, minzi ad neṭṭef tageldit yarekknen, ejj aneɣ ad neqqim nᵉtteṭṭef di arḍa i zi nettsexxar i AREBBI u nessarḍa i-t s uweqqar d tiggʷudi,
HEB 12:29 minzi AREBBI nneɣ d ict n timessi ittetten.
HEB 13:1 Ejj ad teqqim tayri n tawmat jar awem.
HEB 13:2 War tᵉttum ca ad tiřim tecnam ak-d ibarraniyyen, aqa zeɛma s uya areḥḥben ca s lmalakat am war ssinen.
HEB 13:3 Xarrṣem deg imeḥbas axmi kenniw ḥebbsem akidsen, xarrṣem deg inni ittwaḥsaren, am iwdan [am] kenniw, inni yarḍen aysum [n arrimet].
HEB 13:4 Ejj ad yiři řemřac d aweqqar ɣar marra, d qama nsen [n řemřac] d amezdag, maca AREBBI ad iḥkem x ayt n farq-ccɣeř u x yinni itteggen zzina.
HEB 13:5 War tteggem nneyyet nwem di tenɛacin, maca qenɛem s min ɣarwem, minzi SIDI inna: “Necc war cek ttejjiɣ niɣ ad semmḥeɣ deg ufus nnec.”
HEB 13:6 Man aya [ittwanna] i neccin, maḥend ad nini s teryast: “Sidi d Amɛawen inu, war tteggʷdeɣ ca, min d ayi ɣa yegg bnadem?”
HEB 13:7 Ɛeqřem x imgewwaden nwem, inni d awem issiwřen awař n AREBBI. Beqqcem řɣiǧet n tecri nsen uca ḍfarem l’iman nsen.
HEB 13:8 Yasuɛ Lmasiḥ d Netta Netta iḍennaḍ d yiḍa, u i řebda.
HEB 13:9 War tejjim ad kenniw ɣarren s tɣuriwin ittbeddařen [n deɣya], minzi řḥajjet n lemliḥ mařa cebbaren wuřawen nneɣ di arḍa, war iǧi di macca, minzi inni tuɣa dayes yeřhan, war dayes ufin bu nnfeɛ.
HEB 13:10 Ɣarneɣ ijj n uɛalṭar i umi war iɛeddeř ad zzayes ccen inni ittsexxaren di Tzeddiɣt.
HEB 13:11 Minzi zeg imuddaren, inni idammen nsen ttwaksin ɣar Zzawect Iqeddsen s ufus n arrays n ikehhanen, ittwassarɣ weysum nsen barra i řmargeḥ.
HEB 13:12 S uyenni tuɣa Yasuɛ imarret ɛawed barra i tendint, ḥima ad issqeddes řgens s Idammen nnes.
HEB 13:13 S uyenni ejj aneɣ ad neffeɣ ɣar barra n řmargeḥ, am narebbu řɛar nnes.
HEB 13:14 Minzi war ɣarneɣ da tandint n řebda, maca narezzu x tenni i dd ɣa yasen.
HEB 13:15 Ejj aneɣ řebda ad zzayes nqeddem tiwhibin n usemɣar i AREBBI, řɣiǧet n iyencicen nni dd-ittwayen aqadi i Yisem nnes.
HEB 13:16 War ttᵉttum ca arreḥmet uřa d tecrimet i imeẓřaḍ, minzi s tewhibin-a ad yarḍa bnadem AREBBI.
HEB 13:17 Iřim d imtiqqan i yinni i kenniw ittgewwaden, ṭaɛem asen, minzi nitni ttɛessan x řeɛmur nwem am yinni itteggen řeḥsab xawem, ḥima ad tt ggen s řefraḥet, war iǧi s uweḥweḥ, minzi man aya war kenniw ineffeɛ.
HEB 13:18 Ẓaǧem xaneɣ, minzi ɣarney ttiqqet belli ɣarneɣ tanefsect tecna, am dayneɣ meẓri, ḥima ad nuyur nican di marra.
HEB 13:19 Ttzawgeɣ kenniw s jjehd ad teggem ammu ɣar umezwaru, ḥima xenni necc deɣya ad ɣarwem dd-dewřeɣ.
HEB 13:20 AREBBI n řehna wenni dd-issnekkaren Ameksaw Ameqqran n wuǧi, Yasuɛ Lmasiḥ, Siditneɣ, zi taddart n imettinen s Idammen n Řɛahd i řebda,
HEB 13:21 ad kenniw ikemmeř di kuř řxedmet icnan, ḥima ad teggem min ixs Netta. Netta ad dayneɣ igg min iǧan i arḍa nnes s Yasuɛ Lmasiḥ wenni ɣar iǧa uɛuǧi i řebda qaɛ. Amin.
HEB 13:22 Xenni ttzawageɣ zzaywem, [a] aytma inu, qebřem awař-a n usejjeɛ s ttasiɛ n řxaḍar, minzi uriɣ awem-dd s drus.
HEB 13:23 Snem aqa arxun i umatneɣ Timutiyu. Mařa yusa-dd deɣya, ad kenniw ẓareɣ [akides].
HEB 13:24 Seǧmem x marra inni i kenniw ittgewwaden s řeḥna u x marra imqeddasen. Marra [awmaten] n Iṭalya ttseǧamen-dd xawem s řehna.
HEB 13:25 Arḍa ad kidwem yiři marra. Amin.
JAM 1:1 Yaɛqub, amsexxar n AREBBI u n Siditneɣ Yasuɛ Lmasiḥ, i tenɛac n tqebbař tinni ittwazeǧɛen jar řegnus: Řehna [xawem]!
JAM 1:2 [A] aytma, mařa ad xawem kken ɛřam kuř ijarriben, ḥesbem man aya marra d řefraḥet,
JAM 1:3 maɣar kenniw tessnem belli taqeǧebt n l’iman, ad dd-tejj ṣṣbar nwem.
JAM 1:4 Maca ittxeṣṣa ṣṣbar ad ittwakemmeř, ḥima ad tawḍem u ad tkemmřem, uca war kenniw ittxeṣṣi walu.
JAM 1:5 Mařa ca n ijjen zzaywem teqqim as ɛad tiɣit, ad tt ittar zi AREBBI wenni itticen s tecrimet i marra břa azawar, uca ad as temmewc.
JAM 1:6 Maca ejj i-t ad ittar s l’iman, břa acekki, minzi wenni ittcekkan aqa netta am řemwaj n řebḥar nni ittwaɛarrnen zeg usemmiḍ.
JAM 1:7 War ttejji ad as ittɣiř i bnadem nni ad iksi ca zi SIDI,
JAM 1:8 [maɣar netta] s tnayen izeǧifen, war yarsi di marra ibriden nnes.
JAM 1:9 Ejj umatwem iwaḍɛen ad issemɣar di řuɛřa nnes,
JAM 1:10 u bu-wagřa deg uwaḍeɛ nnes, minzi am twardect di arbiɛ ad ifna netta.
JAM 1:11 Maɣar ad tenqar tfuct s řeḥmu nnes, ad tessecmeḍ arbiɛ uca tawardect ad tisřaw uca ad as iraḥ waẓri n wudem nnes. Ammu i ɣa ifna ɛawed bu-wagřa di [marra] ibriden nnes.
JAM 1:12 Sseɛd n weryaz nni i ɣa iḥemřen ajarreb, minzi mařa idweř d amqeǧeb, ad iṭṭef ttaj n Tudart nni tuɣa iwaɛd zzayes AREBBI i yinni t ittexsen.
JAM 1:13 War ttejji ḥed mařa ittwajjareb, ad yini: “AREBBI i d ayi ittjarraben!” Aqa AREBBI war izemmar ad ittwajarreb zi řɣar uca Netta s yixef nnes war ittjjarrib uřa d ijj.
JAM 1:14 Maca kuř ijj ad ittwaɣwa zi nnecwet nnes uca [nnecwet] ad t tᵉṭṭef uca ad zzayes ittwaɣwa.
JAM 1:15 Mařa nnecwet teksi s uɛeddis, ad dd-taruw ddenb, uca xmi ɣa imɣar ddenb, ad dd-yawi řmewt.
JAM 1:16 [A] aytma iɛizzen, war ttweddarem!
JAM 1:17 Kuř tawhibt taṣebḥant d ikemmřen thekkwa-dd zi sennej, zi Babatsent n tfawin i war ɣar iǧi ubeddeř niɣ tiři n ddewřan.
JAM 1:18 Yusa-dd as x řxaḍar, maḥend ad aneɣ dd-yejj s wawař n tidett, ḥima ad niři d [ṣṣabet] tamezwarut zi [marra] min zzayes dd-ixeřqen.
JAM 1:19 Snem aya, [a] aytma iɛizzen, ejj kuř bnadem ad iqeǧeq ḥima ad iseř, war tqeǧiqem ca ɣar wawař niɣ ɣar tefqeḥt.
JAM 1:20 Minzi tafqeḥt n weryaz war dd-tᵉttiwi ca tasegda zzat i AREBBI.
JAM 1:21 S uyenni ssbeɛɛdem xawem qaɛ taxmuji d waṭṭas n tuɛeffna, uca qebřem s temhint awař i ittwaẓẓun di ṭṭbiɛet nneɣ, [awař] i izemmaren ad issenjem řeɛmur nwem.
JAM 1:22 Iřim d inni itteggen awař, war iǧi d inni ittesřan waha, war cemtem ixef nwem!
JAM 1:23 Minzi mařa isřa ḥed i wawař, [maca] war zzayes iggi, aqa netta am yijj n weryaz i ixezzaren di tisit deg uɣembub nnes.
JAM 1:24 Minzi ittwařa ixef nnes, iruḥ, uca řexdenni ad ittu mammec tuɣa iǧa.
JAM 1:25 Maca wenni i ɣa ixzaren di Ccariɛa ikemmřen n tiřelli uca iqqim ixezzar dayes, war iǧi am yijjen ittesřa řexdenni ittᵉttu [deɣya], maca am yijjen wenni tt itteggen s tidett, aqa wanita d amimun di min ittegg.
JAM 1:26 Mařa din wenni umi ittɣiř aqa netta ittsexxar i AREBBI am war iḥeṭṭi iřes nnes, maca ixeddeɛ uř nnes, [xenni] aqa tasexxart nnes baṭeř.
JAM 1:27 Maɣar tasexxart tamezdagt d iqeddsen qibač i AREBBI, Babatneɣ, aqa-t d ta: athili deg iyujiřen d tijjař di řmeḥnet nsent, u maḥend bnadem ad iḥeyyed ixef nnes zi ddunect břa řɣecc.
JAM 2:1 [A] aytma, war tteggem s wudmawen di l’iman iɛuǧen n Siditneɣ Yasuɛ Lmasiḥ.
JAM 2:2 Minzi mařa yudef-dd ɣar tmesmunt nwem ijj n weryaz s txadent n wureɣ u s warruḍ icnan, [am] dd-yudef ɛawed ijj n umezřuḍ s warruḍ ixemjen,
JAM 2:3 [maca] ad tewcem taynit i wenni ɣar iǧa warruḍ icnan, ad as tinim: “Aqa da ijj n wemcan iṣebḥen!”, maca i umezřuḍ ad as tinim: “Cek bedd diha!” niɣ: “Qqim zzat i tnebdat n iḍaren nneɣ!”,
JAM 2:4 ma war ttemṣurrufem [xenni] jar awem s iɣembab uca tdewřem d řḥukkam s ixarriṣen iɛeffanen?
JAM 2:5 Sřem, [a] aytma iɛizzen, ma war ǧin imezřaḍ n ddunect-a d bu-wagřa di l’iman? Aqa ixḍar-i-ten AREBBI, ḥima ad iřin d iwriten n Tgeldit i zzayes iwaɛd AREBBI i yinni t ittexsen.
JAM 2:6 Maca kenniw tɣeṭṭrem zeg imezřaḍ! Xzar, ma war ǧin d inni s wagřa d inni xawem iḥekkmen u d inni kenniw ineddhen ɣar řfusina?
JAM 2:7 Xzar, ma war ǧin d nitni inni ittceqqafen deg Yisem iṣebḥen wenni xawem ittwařaɣan?
JAM 2:8 [Maca] mařa tkemmřem Ccariɛa n AREBBI di man aya am mammec tura: “Ad texsed jjar nnec am yixef nnec!”, aqa tᵉtteggem mliḥ,
JAM 2:9 maca mařa teggim s wudmawen, aqa tᵉtteggem ddnub uca ad tᵉttwaḥekmem s Ccariɛa am yinni ixḍan ak-d Ccariɛa.
JAM 2:10 Minzi wenni iḍfaren marra Ccariɛa, maca yarẓa ict n tewṣeyyet, aqa netta d bu-umarwas zi Ccariɛa marra.
JAM 2:11 Minzi wenni innan: “War zenni!”, inna ɛawed: “War neqq!” Mařa war teznid, maca tenɣid, aqa cek d axeṭṭay n Ccariɛa.
JAM 2:12 Siwřem uca ggem am yinni i ɣa ittwaḥekmen s tebridt n Ccariɛa n tiřelli.
JAM 2:13 Minzi řḥukm war yareḥḥem ca x wenni tuɣa war yareḥḥmen, maca s arreḥmet ad tiřim tᵉttwassuɛřam x řḥukm.
JAM 2:14 [A] aytma, man řefḍeř mařa ijjen iqqar: “Necc aqa ayi ɣari l’iman!”, [maca] netta war ɣares bu řexdayem? Ma izemmar l’iman nnes ad t issenjem?
JAM 2:15 Mařa ittxeṣṣa as i yijj n tewmat niɣ i yict n twečmat min ɣa yarḍen niɣ min ɣa ccen kuř ass,
JAM 2:16 uca ijjen zzaywem ad asen yini: “Uyurem di řehna, arḍem min isseḥman, jjiwnem macca!”, maca war d asen iwci walu min ittxeṣṣan i arrimet, man nnfaɛ?
JAM 2:17 Aqa ammu uřa d l’iman břa řexdayem, aqa immut s ixef nnes.
JAM 2:18 Mařa ad ac inna ijjen: “Cek ɣarek l’iman, necc ɣari řexdayem!” Scen ayi l’iman nnec břa řexdayem uca necc ad ac ssecneɣ l’iman inu zi řexdayem inu!
JAM 2:19 Ma cek tumned belli AREBBI d ijjen? Aqa teggid mliḥ. Uřa d ccwaṭen umnen di man aya uca ttarjijen.
JAM 2:20 Ma texsed ad tessned, [a] bnadem iḍeɛfen, belli l’iman břa řexdayem immut?
JAM 2:21 Ma war ittwasegged jedditneɣ Ibrahim zi řexdayem umi ikkar ad iɣarṣ i mmis Isḥaq x uɛalṭar?
JAM 2:22 Aqa teẓrim belli l’iman nnes tuɣa ixdem ak-d řexdayem nnes, uca l’iman ittwakemmeř s řexdayem.
JAM 2:23 Ammu ittwakemmeř [wawař n] Tira [Iqeddsen] i iqqaren: “Ibrahim yumen di AREBBI uca ittwaḥseb as-t-i-dd d tasegda!”, uca řaɣan as ‘ameddukkař n AREBBI’.
JAM 2:24 Tᵉttwařam [xenni], belli bnadem ittwasegged zi řexdayem, war iǧi zi l’iman waha.
JAM 2:25 Ma war tuɣi Raḥab, tamɣart n farq-ccɣeř, tᵉttwasegged ammu zi řexdayem umi tareḥḥeb zeg ibergagen, tessuffeɣ i-ten zeg webrid nneɣni?
JAM 2:26 [S uya,] am arrimet břa buḥbeř temmut, ammu uřa d l’iman břa řexdayem immut.
JAM 3:1 War ttejjim aṭṭas zzaywem ad dewřen d imesɣaren, [a] aytma, aqa kenniw tessnem belli ad neksi řḥukm ameqqran.
JAM 3:2 Minzi marra neccin nᵉnnedref deg waṭṭas. [Mařa] ca n yijjen war ittnedraf deg wawař, aqa netta d bnadem ikmeř, izemmar ad iqemmeɛ marra arrimet [nnes].
JAM 3:3 Xzar, nᵉttegg sřimat deg iqemmumen n iysan ḥima ad aneɣ mmarsen, aqa nzemmar ad [zzaysent] nessuyur arrimet nsen tmun.
JAM 3:4 [Uřa d] iɣarruba imeqqranen inni ittwaɛarrnen zeg usemmiḍ ijehden, ttwaneddhen s yijj n řgidun ameẓyan, mani ma ixs řxaḍar n řqebṭan [ad indeh].
JAM 3:5 Ammu uřa d iřes, aqa-t d ijj n ixef ameẓyan, [waxxa amenni] issgeɛɛed ixef nnes. Xzar, mammec timessi tameẓyant ad tessecmeḍ řɣabet tameqqrant.
JAM 3:6 Iřes d ict n tmessi u ddunect n ddenb am yict n wezɣar. Iřes-a jar iɣezdisen nneɣ am yict n řḥajjet tessexmej arrimet marra, issarɣ jjiřat i iḍeffaren ijj i wenneɣni, inni iqnunniyen am tjarrarin. Uca [uřa d yiřes s yixef nnes] aqa ittwassareɣ s tmessi.
JAM 3:7 Minzi marra ddarb n řmař, n ijḍaḍ u n imuddaren inni ittbuɛen di řebḥar u x temmurt, ttwamarsen i ṭṭbiɛet n bnadem.
JAM 3:8 Maca iřes war izemmar ad t issqemmeɛ uřa d ijj n bnadem. Aqa-t d ijj n řɣar i war ittwassqemmɛen, aqa iccur s ssem ineqqen.
JAM 3:9 Zzayes i nbarek SIDI d Babatneɣ uca zzayes nᵉneɛɛeř x iwdan inni ittwaggen di ṣṣifet n AREBBI.
JAM 3:10 Aqa zeg ijj n uqemmum tᵉtteffeɣ-dd lbaraka d nneɛřet. [A] aytma, man aya war iɛeddeř ad yiři ammu!
JAM 3:11 Ma izemmar ad dd-ffɣen zeg ijj n řɛunṣar [waman] imiẓiden d [waman] imerzagen?
JAM 3:12 [A] aytma, ma izemmar wartu ad iwc zzitun niɣ tzayart řbacur? Ammu uřa d aman imeǧaḥen war zemmaren ad ten arren d imiẓiden.
JAM 3:13 Wi zzaywem iǧan d amiɣis u s řeɛqeř? Ad isscen wanita řexdayem nnes zi ticři nnes iṣebḥen s tiɣit ak-d temhint.
JAM 3:14 Maca mařa din řeḥsed amerzag d umcubbec deg wuřawen nwem, war sgiɛɛid ixef nnec x tidett u war sxarriq ca!
JAM 3:15 Tanita war teǧi d tiɣit i dd-ihwan zi sennej, aqa-tt zi temmurt, zeg ixarriṣen n buḥbeř n bnadem u zi ccwaṭen.
JAM 3:16 Minzi mani iǧa řeḥsed d umcubbec, aqa din ixarwiḍen d [ɛřam] kuř tuɛeffna.
JAM 3:17 Maca tiɣit zi sennej tezdeg, xenni dayes řehna d řeḍrafet, tᵉttegg array, teccur s arreḥmet d řɣiǧet iṣebḥen, war ttegg ca s řeḥzab niɣ s wudmawen.
JAM 3:18 [Maca] řɣiǧet n tsegda tᵉttwazarreɛ di řhudnet zeg yinni itteggen řehna.
JAM 4:1 Manis dd-ikka umenɣi d imcubbecen jar awem? Ma zeɛma zeg ccehwat i immenɣen deg iɣezdisen nwem?
JAM 4:2 Kenniw temmeẓrem [maca] kenniw war ɣarwem walu. Kenniw tneqqem u tᵉttasmem uca qaɛ amenni war dd awem ittikkwiḍ walu. Kenniw tᵉttemcubbucem u tᵉttmenɣam, maca war ɣarwem walu, minzi kenniw war tᵉttᵉttaram.
JAM 4:3 [Niɣ] kenniw tᵉttᵉttaram, maca war teksim ca, minzi tᵉttᵉttarem min war iḥřin, ḥima ad teggem ɣar ccehwat nwem.
JAM 4:4 [A kenniw] inni izennan! Ma war tessinem ca belli tamexsiwt n ddunect aqa-tt d řeɛdawet x AREBBI? Aḥeqqa wenni ittexsen ad yiři d ameddukkeř n ddunect, ad yiři d řeɛdu n AREBBI.
JAM 4:5 Niɣ ittɣiř awem belli Tira [Iqeddsen] war ɣarsent lmeɛna: “Arruḥ i dayneɣ izeddɣen ittasem s tusmi!”?
JAM 4:6 Maca Siditneɣ ittic aneɣ arḍa ktar, maɣar inna: “AREBBI isswaḍḍeɛ imɛeffaren, maca i imwaḍɛen ittic asen arḍa.”
JAM 4:7 S uya marsem ixef nwem zzat i AREBBI, mɛařam ak-d cciṭan uca netta ad zzaywem yarweř.
JAM 4:8 Adsem AREBBI uca Netta ad kenniw dd-yades. Sirdem ifassen nwem, [a] imednab, qeddsem uřawen nwem, [a kenniw], inni ɣar iǧa tnayen n izeǧifen.
JAM 4:9 Marsem ixef nwem, ceḍnem! Jjem taḍeḥḥact nwem ad tedweř d acḍan u řefraḥet nwem ad tedweř d řeḥzen.
JAM 4:10 Marsem ixef nwem zzat i SIDI uca Netta ad kenniw issɛuǧ.
JAM 4:11 [A] aytma, war ttceqqafem ca deg wayawya! Wenni iceqqafen deg umas niɣ iḥekkem x umas, aqa wa ittceqqaf di Ccariɛa uca iḥekkem x Ccariɛa. Uca mařa tḥekmed x Ccariɛa, aqa war teǧid ca d wenni itteggen Ccariɛa, maca [tarrid ixef nnec] d řqaḍi [n Ccariɛa].
JAM 4:12 Ijjen waha i iǧan d Bab n Ccariɛa, Netta d wenni ɣar teǧa tzemmar, ḥima ad iwc Tudart niɣ ad tt yareyyeb. Maca min teɛnid cek umi tḥekkmed x jjar nwem?
JAM 4:13 Ma xenni i ɣa nini x yinni iqqaren: “Ass-a niɣ tiwecca ad nraḥ ɣar tendint-a ɣar tendint-in, ad din negg tasebbabt řmijař n ijj n useggʷas, ad nseɣ ad nezzenz ad narbeḥ!”?
JAM 4:14 Nitni war ssinen mammec ɣa tiři tiwecca. Min teɛna tudart nneɣ? Aqa-tt mɣir d ijj n řefwar i ɣa dd-iḍhar, ad idurreq, ad tefsi řexdenni.
JAM 4:15 S uya ittxeṣṣa ad inin: “Mařa ixs SIDI, ad neddar, ad negg ta d tin.”
JAM 4:16 Iwa nitni ttfeyycen deg uɛeffar nsen, maca qaɛ afeyyec-a d aɛeffan.
JAM 4:17 Wenni issnen mammec i ɣa igg řxar uca war t ittegg, ad as dd-ittwaḥseb d ddenb.
JAM 5:1 Iwa kenniw, [a] aytbab n wagřa, sḥissfem, rum i lmuṣibat i kenniw ittrajan.
JAM 5:2 Minzi agřa nwem aqa iɣumm, yarṣuḍ, uca arruḍ nwem ccin t tcinda,
JAM 5:3 ureɣ nwem d nnuqart nwem aqa arcan uca arecci nsen ad xawem teched, ad icc ddat nwem am tmessi. Aqa kenniw teyrum timessi i yixef nwem i wussan ineggura.
JAM 5:4 Xzar, řmunet n icewwařen nni tessɛizzem x yenni imjaren iyyaren nwem tesɣuyyu, uca tɣuyyit n yinni imjaren tiweḍ as-dd ař imezzuɣen n SIDI n řɛeskarat.
JAM 5:5 Aqa kenniw tfeyycem x temmurt, teḍfarem meẓri nwem. Aqa tessjiwnem arrimat nwem am deg wass n tɣarṣit.
JAM 5:6 Aqa kenniw tḥekmem x umseggad s řmewt, [am] netta war xawem immɛařa ca.
JAM 5:7 Maca kenniw, [a] aytma, ṣbarem ař dd ɣa yas SIDI, am mammec ittraja ufeǧaḥ ɣar řɣiǧet iɣřan [n temmurt], iṣbar s řxaḍar ař xas iwwet wenẓar n zic d uneggar.
JAM 5:8 Uřa d kenniw, ṣbarem, smeḥḥdem uřawen nwem, aqa tawasit n Siditneɣ tudes-dd.
JAM 5:9 [A] aytma, war tsuḍem x wayawya, ḥima war ɣarwem dd-ittikkwiḍ řḥukm. Maɣar xzar, Řqaḍi ibedd ɣar tewwart.
JAM 5:10 [A] aytma, mquddam ak-d inabiyyen inni tuɣa issiwřen s Yisem n SIDI maḥend ad teṣbarem di řeḥṣarat nwem.
JAM 5:11 Xzarem, ad nbarek inni ittṣebbaren. Aqa kenniw tesřam x ṣṣbar n Ayub uca twařam řɣiǧet tenni d as igga SIDI, maɣar SIDI d arḥim d aḥnin.
JAM 5:12 Amezwaru n marra, [a] aytma, war ttjaǧam ca, řa ɣar ujenna řa ɣar temmurt uca uřa d ict n tjaǧit nneɣni. Ad ɣarwem yiři ‘Wah!’ nwem d ‘Wah!’, d ‘Lla!’ nwem d ‘Lla!’, niɣ aqa ad tiřim sadu řḥukm.
JAM 5:13 Ma aqa [din] ca n ijjen jar awem iweddeb? Ejj i-t ad ittar. Ma aqa [din] ca n ijjen ifarḥ? Ejj i-t ad iɣennej s izřan n uṣebbeḥ.
JAM 5:14 Ma din jar awem ḥed ihřec? Ejj i-t ad dd-iřaɣa x imɣaren n tmesmunt [ɣares], ḥima ad as ksin s řmeɛruf, ad t retfen s zzect n wedhan s Yisem n Siditneɣ.
JAM 5:15 Uca taẓaǧit n l’iman ad tessgenfa amehřuc uca Siditneɣ ad t issnekkar. Uca mařa tuɣa ittegg ddnub, ad as ttwaɣfaren.
JAM 5:16 Neɛmem ijj i wenneɣni s iɛediyyen nwem u ẓaǧem i wayawya, ḥima ad tᵉttwassgenfam, maɣar jjehd n tẓaǧit n umseggad aqa-t d ameqqran.
JAM 5:17 Iliya tuɣa d bnadem ittaca am neccin. Iẓẓuǧ ḥima war iccit wenẓar x temmurt. [Xenni anẓar] war iwti ca x temmurt třata n iseggʷusa d setta n iyuren.
JAM 5:18 Uca tuɣa iẓẓuǧ ɛawed, řexdenni ajenna iwta anẓar uca tammurt tewca ṣṣabet nnes.
JAM 5:19 [A] aytma, mařa din ḥed jar awem iffeɣ x webrid n tidett uca ca n yijjen yarr i-t-i-dd ad dd-idweř zeg uweddar nnes,
JAM 5:20 ejj i-t ad issen, aqa wenni dd ɣa yarren amednub zeg uweddar nnes, ad issenjem řeɛmar zi řmewt uca ad issduriy aṭṭas n ddnub.
1PE 1:1 Buṭrus, rrasul n Yasuɛ Lmasiḥ, i yinni ittwafarzen d imeɛzab, inni ittwaẓeǧɛen di Punṭus, Galaṭiya, Kappadukiya, Asiya d Bitiniya,
1PE 1:2 inni ittwafarzen ɛlaḥsab tussna i iǧan ɣar AREBBI, Babatneɣ, qbeř, s tuqeddsi n Arruḥ, i ṭṭaɛet u i urucci s Idammen n Yasuɛ Lmasiḥ: arḍa d řehna ad daywem immarni.
1PE 1:3 Lbaraka i AREBBI, Babas n Siditneɣ Yasuɛ Lmasiḥ, wenni d aneɣ dd-yejjin zi jdid s arreḥmet nnes tameqqrant s tnukra n Yasuɛ Lmasiḥ, maḥend [ad tiřim] d asitem iddaren,
1PE 1:4 maḥend [ad ɣarwem tiři] ict n řwart war tfenni, war tᵉttwabeqqeḍ, war tᵉttesřiw, wenni i d awem ittwasswejden deg ijenwan,
1PE 1:5 am tᵉttwaḥḍam kenniw s jjehd n AREBBI u s l’iman i Tudart i iwejden ḥima ad tᵉttwasseḍhar di řweqt taneggarut.
1PE 1:6 Dayes i ɣa tfarḥem i řebda, waxxa tḥeznem di řweqt-a drus zi ssibbet n ɛřam kuř ijarriben i xawem dd-ittekken,
1PE 1:7 ḥima taqeǧebt n l’iman nwem, tenni tiɣřa x wureɣ iqquren wenni ittwassiṣfen zi tmessi, ad tiři i usemɣar d ccan d uɛuǧi x minni dd-ɣa iḍhar Yasuɛ Lmasiḥ,
1PE 1:8 wenni war t teẓrim, waxxa tᵉttexsem t. S l’iman zzayes tfarrḥem kenniw s ict n řefraḥet iɛuǧen war izemmar ad zzayes inṭeq iřes,
1PE 1:9 maɣar ad tᵉṭṭfem řmunet n l’iman nwem, aqa-tt d Tudart n buḥbeř nwem.
1PE 1:10 Tudart-a tuɣa arezzun xas inabiyyen, inni tuɣa ittnabben x arḍa i d awem dd-ikkaren,
1PE 1:11 umi tuɣa arezzun man řweqt [i d asen] isscen Arruḥ n Lmasiḥ i daysen izeddɣen, [u man řweqt i xef] tuɣa icehhed, aqa ad dd-yas uweddeb i ɣa ikken x Lmasiḥ uřa d aɛuǧi nnes awarni man aya.
1PE 1:12 Aqa ittwassargeb asen, aqa marra min xef tuɣa arezzun, aqa war t arzun di tizi nsen, maca tuɣa ttnabben di tizi nneɣ u zi ssibbet nneɣ x tmesřayin i d awem ittwasssargben řexxu zeg yinni i d awem ibeccaren s Řexbar Aṣebḥan s Arruḥ Iqeddsen nni dd-ittwasssekken zeg ujenna, [timesřayin] i di ttmeẓẓrent uřa d lmalakat ad daysent xzarent.
1PE 1:13 S uyenni ḥezmem řxansra n řeɛqeř nwem, iřim tᵉttfaqem nican, uca smunem [marra] asitem nwem di řefraḥet i d awem ɣa yawḍen xmi dd ɣa iḍhar Siditneɣ Yasuɛ Lmasiḥ.
1PE 1:14 Iřim am tarwa ittᵉṭṭaɛen, war dd-tdekkwiřem tcarrcem di nnecwat nwem tinni tuɣa teḍfarem qbeř s nnecwet, umi tuɣa kenniw [ɛad] d iqubbaniyyen.
1PE 1:15 Maca [řexxu] iřim d imqeddasen di marra min tᵉtteggem, am mammec Netta wenni xawem dd-iřaɣan, aqa-t d amqeddas,
1PE 1:16 minzi tura: “Iřim d imqeddasen, minzi uřa d Necc d Amqeddas!”
1PE 1:17 U mařa tᵉttřaɣam i Tababat, wenni war itteggen s wudmawen, d wenni iḥekkmen kuř ijjen ɛlaḥsab řexdayem nnes, xenni uyurem s tiggʷudi di řweqt-a umi kenniw ɛad d imeɛzab [di ddunect-a].
1PE 1:18 Maɣar tessnem belli kenniw war tᵉttwafdim s nnuqart d wureɣ ifennan zi řexdayem nwem ibeḍřen tinni tᵉṭṭfem kenniw zi řejdud nwem,
1PE 1:19 maca s Idammen iɣřan n Izmar war dayes bu řɛib, war ibeqqḍen, aqa-t d Lmasiḥ.
1PE 1:20 Netta tuɣa ittwafarz i man aya qbeř ma ad ittwagg dsas n ddunect, uca ittwasseḍhar awem-dd řexxu di zzmanat ineggura n řweqt di ṭṭweɛ nwem,
1PE 1:21 [i kenniw] inni zzayes ittamnen di AREBBI, wenni t-i-dd-issnekkaren zi taddart n imettinen uca iwca as aɛuǧi, ḥima l’iman d usitem nwem ad iřin x AREBBI.
1PE 1:22 [D man aya] ḥima ad ttwaqeddsen řeɛmur nwem s ṭṭaɛet i tidett, ad ttwaɛemmaren s tayri břa řfarz n bnadem, [uca] ad texsem ayawya s wuř izdig ikmeř,
1PE 1:23 am iwdan i dd-ittwaxeřqen d jdid, war iǧi zi zzariɛet ifennan, maca zi tenni war ifennin, aqa zeg Wawař iddaren n AREBBI i ittduman i řebda.
1PE 1:24 “Minzi marra ddat am arbiɛ uca marra aẓri nnes am tawardect deg yeyyar s arbiɛ, Arbiɛ ad isřaw, tawardect ad tewḍa,
1PE 1:25 maca Awař n AREBBI nneɣ ittɣima i řebda qaɛ.” Awař-a netta d Řexbar Aṣebḥan wenni d awem dd-ittwabarrḥen.
1PE 2:1 S uyenni beɛɛdem x marra min iǧan d aɛeffan, x ɛřam kuř taḥraymect d nnifaq d řeḥsed u x uceqqef.
1PE 2:2 Iřim am iseyman [itteṭṭḍen], weḥḥcem Awař am uɣi izdigen d arruḥani, ḥima ad zzayes tegmam i Tudart,
1PE 2:3 mařa aqa kenniw tᵉqqasem u tᵉttwařam aqa SIDI iṣbeḥ.
1PE 2:4 Netta d Wenni ɣar dd-tᵉttakkwaḍem, Aẓru Iddaren, wenni mmenḍaren iwdan, [maca] ɣar AREBBI aqa-t ittwafarz iɣřa.
1PE 2:5 Ammu kenniw ɛawed, am yiẓra iddaren, jjem ad [zzaywem] tᵉttwabnant tizawiyyin n Arruḥ, ad tiřim d ikehhanen iqeddsen, ḥima ad tewcem tiɣarṣin n Arruḥ i arḍa n AREBBI s Yasuɛ Lmasiḥ.
1PE 2:6 S uyenni ittwanna di Tira [Iqeddsen]: “Aqa da, ad ssarseɣ di Ṣihyun ijj n weẓru iɣřa am uzeǧif n teɣmart, uca wenni i zzayes ɣa yamnen, war dayes ittidef useḍḥi ɛemmarṣ.”
1PE 2:7 I kenniw, inni ittamnen, aqa temmewc ccenɛet-a, maca i yinni war yuminen, aqa-tt d Taṣḍart n uneqraḍ d Aẓru n unedref.
1PE 2:8 Uca nitni ttneqraḍen dayes, minzi war ttimnen deg Wawař, am mammec d asen yura.
1PE 2:9 Maca kenniw teǧam d ijj n jjiř ittwafarzen, tᵉttsexxarem am ikehhanen i Tgeldit, kenniw d ijj n řgens iqeddsen, ijj n umuni ittwafdin, maḥend ad tbarrḥem asemɣar n Wenni d aneɣ dd-iřaɣan zi taǧest ɣar ufeyyeḍ n Tfawt nnes.
1PE 2:10 Kenniw war tᵉttwiḥsibem am řgens, maca řexxu aqa kenniw d řgens n AREBBI. Ɛawed tuɣa arreḥmet war kenniw třeḥḥef, maca řexxu tᵉttwafarreɣ-dd xawem arreḥmet nnes.
1PE 2:11 [A] imɛizzen inu, aqa kenniw d ibarraniyyen d imeɛzab, x uyenni ziyyareɣ xawem, war ḍeffarem ca nnecwat n arrimet nni ittmenɣan ak-d řeɛmar [nwem].
1PE 2:12 Uyurem nican zzat i marra tarwa n bnadem inni xawem ittɛawaden řexburat tiɛeffanin, ařami ɣa ẓaren řexdayem nwem tiṣebḥanin, ad ssemɣaren di AREBBI deg wass n uqeǧeb.
1PE 2:13 Ṭṭaɛem i marra bnadem di ṭṭweɛ n AREBBI: i ijeǧiden zi ssibbet n ṣṣulṭa i ɣarsen teǧa,
1PE 2:14 u i řquḍat, minzi nitni ttwassekken zzayes, ḥima ad ɛaqben iɛeffanen, u ḥima ad ssemɣaren inni itteggen taṣebḥant.
1PE 2:15 Minzi man aya ittexs i-t AREBBI, ḥima, xmi ɣa teggem min iṣebḥen, ad tesseɣdem aqemmum n iwdan ifɣař i war issinen AREBBI,
1PE 2:16 am tarwa n bnadem nni iddaren [nican] di tiřelli, war iǧi am yinni iggin tiřelli nsen am yijj n uřeḥḥaf x tuɛeffna nsen, maca am imsexxaren n AREBBI.
1PE 2:17 Weqqarem marra iwdan, sɛizzem tawmat, ggʷedem AREBBI, cennɛem ijeǧiden.
1PE 2:18 Jjem inni d imsexxaren jar awem ad ṭṭaɛen i aytbab nsen s tiggʷudi, war iǧi i yinni iṣebḥen iḍarfen [waha], maca ɛawed i yinni iqesḥen d yewɛaren.
1PE 2:19 Minzi [imsexxaren am] ina ad dd-asen i AREBBI ɣar řxaḍar nnes, minzi nitni ksin tamara nni war tt isdihiǧen, di ṭṭweɛ n tnefsect tecna.
1PE 2:20 Man ccan i din i yinni iksin tamara zi ssibbet n iɛeddiyen nsen? Maca mařa kenniw teggim tcuni, [am] daywem tteggen tuɛeffna, aqa man aya issemɣar ccan nwem ɣar AREBBI.
1PE 2:21 Minzi kenniw tᵉttwařaɣam-dd i man aya umi immut Lmasiḥ di ṭṭweɛ nneɣ uca ijja aneɣ-dd lmital-a, ḥima ad nuyur di jjurret n iḍaren nnes:
1PE 2:22 Netta war iggi ca ddnub u war ittwif deg uqemmum nnes ca n řɣecc,
1PE 2:23 Wenni, mařa zawaren t, war dd-ittarri awař, u mařa iweddeb, war dd-ittarri ca ddenf, maca ittarra ddeɛwet nnes ɣar Řqaḍi n tsegda,
1PE 2:24 Wenni iksin ddnub nneɣ s Yixef nnes uca issgeɛɛed i-ten di arrimet nnes x ṣṣalib. Maɣar mařa nemmut i ddnub, ad neddar di tsegda nnes, minzi kenniw aqa tᵉttwassgenfam s iyezzimen nnes.
1PE 2:25 Minzi kenniw tuɣa tweddarem am yiḥuřiyyen, řexxu maca tdewřem-dd ɣar Umeksaw d Umeḥḍay n řeɛmur nwem.
1PE 3:1 Ammu ɛawed kennint, a timɣarin, marsent ixef nkent i yeryazen nkent nni war iṭṭiɛen i wawař, ḥima ad ten tarebḥent břa arbar s ticři nkent icnan,
1PE 3:2 x minni i ɣa ẓaren mammec tᵉtteggurent s tiggʷudi d řehya.
1PE 3:3 War ttzehhjent s min ittbanen ɣar barra: amudi n ucuwwaf, timegga n wureɣ niɣ tyarḍi n warruḍ iṣebḥen,
1PE 3:4 maca zehhjent s bnadem innufaren deg wuř, s arruḥ n temhint i war ittwaɣeccen, aqa-t d ijj n uzehhej iṣebḥen zzat i AREBBI.
1PE 3:5 Aqa ammu tuɣa zehhjent zic temɣarin timqeddasin, inni tuɣa issitimen x AREBBI, řeɛmur nsent, uca tuɣa ṭṭaɛent i yeryazen nsent.
1PE 3:6 Ammu tuɣa Sara tᵉmmars ixef nnes i Ibrahim, třaɣa as: “Sidi!”, uca kennint tdewřent d yessis am tᵉtteggent min iṣebḥen, mařa war tᵉtteggʷedent.
1PE 3:7 Kenniw, a iryazen, zedɣem ak-d temɣarin nwem s řeɛqeř u weqqarem tent am iɣarrafen yarexfen, ḥima war tᵉttwamenɛent ca tẓaǧitin nwem, minzi nitenti ad wartent timewca n Tudart ittduman akidwem.
1PE 3:8 Ɣar uneggar, munem marra ɣar array d ijjen, weddbem ak-d yinni iweddben, xsem ijjen wenneɣni s tayri, areḥmem, iřim tḍarfem.
1PE 3:9 War dd-ttarrim x řɣar s řɣar, niɣ tikkwura s tikkwura, maca s řɛeks barkem, minzi kenniw aqa tᵉttwařaɣam-dd ḥima ad twartem lbaraka.
1PE 3:10 S uya, ejj wenni ixsen Tudart d wussan icnan, ad iḥḍa iřes nnes zi min war iḥřin uřa d iyencicen nnes zeg wawař icemmten.
1PE 3:11 Ejj i-t ad iggʷej x min iǧan d aɛeffan, ad igg min iṣebḥen, ad yarzu x řehna uca ad t iḍfar s cḍaret.
1PE 3:12 Minzi tiṭṭawin n SIDI x imseggaden, u imezzuɣen nnes aqa aten maḥend ad [asen] sřen, [maca] udem n SIDI aqa-t ḍidd i umɛeffan.
1PE 3:13 Wi izemmaren ad daywem igg řɣar, mařa kenniw teḍfarem min iṣebḥen?
1PE 3:14 [Mařa] tweddbem di ṭṭweɛ n tsegda, aqa sseɛd nwem. War tteggʷedem zeg yinni kenniw issiggʷeden, war ttnexřiɛem ca,
1PE 3:15 maca qeddsem SIDI, Lmasiḥ, deg wuřawen nwem, u iřim řebda twejdem maḥend ad tarrem s temhint d uweqqar x yinni kenniw i ɣa isseqsan x usitem n l’iman nwem,
1PE 3:16 zi tnefsect icnan, ḥima inni xawem iɛawden axmi x iwdan iɛeffanen, ad seḍḥan umi ttceqqafen di tecri n tudart nwem icnan di Lmasiḥ.
1PE 3:17 Aqa ineffeɛ ad tweddbem, mařa ixs AREBBI, am tᵉtteggem min iṣebḥen, maca war iǧi mařa kenniw tᵉtteggem min iǧan d aɛeffan.
1PE 3:18 Minzi uřa d Lmasiḥ tuɣa immut ict n twařa i ddnub, aqa Amseggad di ṭṭweɛ n imednab, ḥima ad kenniw issiweḍ ɣar AREBBI, [Netta] d wenni immuten di arrimet, maca aqa iddar di Arruḥ,
1PE 3:19 [d wenni] ibarrḥen i řeɛmur nni ittwaṭṭfen di řaxart,
1PE 3:20 inni tuɣa war ittwassqenɛen deg wussan n Nuḥ, umi tumur ttasiɛ n řxaḍar n AREBBI, aqa ad din yiři uɣarrabu am tuɣa ittraja Netta ad tuben nitni. Udfen [ɣar uɣarrabu] mɣir tmenya n řeɛmur nni ittwaḥḍan ddaren deg waman.
1PE 3:21 Ɛlaḥsab amedya nni, aqa uřa d kenniw tᵉttwassnejmem s useɣḍeṣ - wenni war iǧin asird n řexmej n arrimet, maca [ad yiři] mařa tcehhdem x AREBBI s tnefsect icnan - u s tnukra n Yasuɛ Lmasiḥ,
1PE 3:22 wenni ittwassuɛřan ɣar ujenna, iqqim ɣar ufusi n AREBBI, am d as ttwammarsent lmalakat d ṣṣulaṭat d jjehd sadu Netta.
1PE 4:1 Řami xawem iksi Lmasiḥ armeḥ di ddat, ittxeṣṣa kenniw ɛawed ad tᵉṭṭfem deg uxarraṣ-a: aqa wenni immuten di arrimet, wanita aqa issbedd ddenb.
1PE 4:2 S uyenni wanita war iddar [ɛad] ɛlaḥṣab nnecwat n bnadem am t igga qbeř di arrimet, maca ɛlaḥsab min ixs AREBBI.
1PE 4:3 Minzi aqa icfa awem řweqt řami tuɣa kenniw tɛebbdem i min xsen lkuffar, umi kenniw tuɣa teggurem deg ufucceḥ, ssekran, řefsad d fictat n uɣelli u di řxedmet [n swadday swadday] n ccwaṭen.
1PE 4:4 U xzar, řexxu ttbehten nitni umi war tᵉttizzřem [ɛad] akidsen deg wezqaq n řeqjaḥet d ijjen, uca nitni ttceqqafen daywem.
1PE 4:5 [Maca] nitni ad arren řeḥsab i AREBBI, wenni i ɣa iḥekmen x yinni iddaren u x yinni immuten.
1PE 4:6 S uyenni ittwabarreḥ ɛawed s Řexbar Aṣebḥan i imettinen, ḥima nitni ad ttwaḥasben am tarwa n bnadem zi jjihet n ddat, maca ad ddaren di AREBBI s Arruḥ.
1PE 4:7 Aneggar n marra aqa yudes-dd. S uyenni iřim s řeɛqeř, rekkzem ixef nwem xmi teẓẓaǧam.
1PE 4:8 Sennej i marra, xsem ayawya břa qeṭṭu, minzi tayri tessdurruy x ubarru n ddnub.
1PE 4:9 Areḥḥbem i ibarraniyyen břa řeɛkaset.
1PE 4:10 Ejj kuř ijjen ad isexxar inni d as yudsen ɛlaḥsab min d as immewcen zi AREBBI, am yinni iwekkřen mliḥ x ɛřam kuř arḍa n AREBBI.
1PE 4:11 Ejj marra wi issawařen, ad issiweř ɛlaḥsab Awař n AREBBI, u ejj kuř ijj wenni ittsexxaren, ittsexxar ɛlaḥsab jjehd i d as iwca AREBBI, ḥima di marra min tᵉtteggem ad idweř usemɣar ɣar AREBBI s Yasuɛ Lmasiḥ wenni ɣar iǧa uɛuǧi d ccan i řebda qaɛ. Amin.
1PE 4:12 [A] imɛizzen, war dehhcem ca zeg waṭṭas n ijarriben i xawem i dd ɣa ikkin, axmi kenniw teřqef ca n tmesřact d taɣribt, maɣar man aya maḥend ad tettwaqeǧbem.
1PE 4:13 Maca farḥem umi tcarcem deg uweddeb i ikkin x Lmasiḥ, ḥima ad tfarḥem s řefraḥet ɛawed xmi dd ɣa iḍhar uɛuǧi nnes.
1PE 4:14 Mařa ɛeyyben kenniw x ssibbet n Yisem n Lmasiḥ, sseɛd nwem minzi aɛuǧi n Arruḥ n AREBBI ad xawem yarsa.
1PE 4:15 War ttejjim ḥed zzaywem ad iweddeb am uqettař niɣ am uceffar niɣ am uɛeffan.
1PE 4:16 Maca mařa iweddeb ḥed am umasiḥi, war ittseḍḥi ca, maca ad ikkar ad issuɛřa AREBBI zi ssibbet n yisem-a.
1PE 4:17 Maɣar tiweḍ-dd řweqt maḥend ad ibda řḥukm ɣar Taddart n AREBBI. Maca mařa řḥukm zzayneɣ i ɣa issizwar, mammec ɣa yiři uneggaru n yinni war iṭṭiɛen ca Řexbar Aṣebḥan n AREBBI?
1PE 4:18 Uca mařa amseggad yiweḍ ad iṭṭef Tudart s řweḥřan, mani ɛad i dd ɣa iḍhar ukafriw d umednub?
1PE 4:19 S uyenni marra inni ittweddaben ɛlaḥsab min ixs AREBBI, ejj i-ten ad as sellmen řeɛmur nsen am i Wenni dd-ixeřqen kuřci, Wenni di iǧa řaman, maḥend ad ggen min iṣebḥen.
1PE 5:1 Ttzawgeɣ inni d imɣaren jar awen, necc d wenni d amɣar akidwem d acehhad n uweddeb i ikkin x Lmasiḥ uřa d amɛacar deg uɛuǧi nnes i dd ɣa ittwasseḍhar:
1PE 5:2 Arewsem taḥimart n AREBBI tenni tḥeṭṭam, war iǧi s uɣiř maca s řxaḍar, war iǧi di ṭṭmeɛ n arbeḥ war iḥřin, maca s marra wuř nwem,
1PE 5:3 war iǧi am yinni iǧan x tḥimart, maca umi teǧam d ijj n umedya icna i nitni.
1PE 5:4 Uca xmi dd ɣa iḍhar Umeksa Ameqqran ad zzayes tᵉṭṭfem ttaj n uɛuǧi i war ifennin.
1PE 5:5 U kenniw, ibřiɣen, sarsem ixef nwem sadu imɣaren nwem, beysem ixef nwem s uwaḍeɛ n arruḥ ijj i wenneɣni, minzi AREBBI ittɛekkas imɛeffaren, [maca] imwaḍɛen iwca asen arḍa.
1PE 5:6 Semẓayem ixef nwem sadu afus ijehden n AREBBI, ḥima ad kenniw issuɛřa di řweqt nnes nican.
1PE 5:7 Marra imnusen nwem arrem ten ɣar AREBBI, aqa Netta itthilla daywem.
1PE 5:8 Arrem-dd řbař, ḥḍam, minzi řeɛdu nwem, cciṭan ameqqran, ittzehhar am wayrad u ittḥama, yarezzu min izemmar ad isarḍ.
1PE 5:9 Mɛařam t, tbeddem nican di l’iman, aqa tessnem belli aytmatwem di ddunect uřa d nitni kessin aweddeb-a.
1PE 5:10 Maca AREBBI n arḍa wenni d aneɣ dd-iřaɣan ɣar uɛuǧi nnes ittduman i řebda s Yasuɛ Lmasiḥ, aqa Netta, awarni řami nweddeb řeḥṣarat-a timuqřiřin, ad aneɣ issejhed, ad aneɣ iḍmen u ad aneɣ isedd i řebda.
1PE 5:11 Ɣares Netta aɛuǧi d ṣṣulṭa d řɛezz i řebda qaɛ. Amin.
1PE 5:12 Uriɣ awem-dd ca n tmesřayin di tira taquḍaḍt s ufus n Silwanus, uma d amtiqqi, u necc qenɛeɣ u cehhdeɣ, aqa man aya di min di tbeddem [nican], aqa-t d arḍa n AREBBI d tidett.
1PE 5:13 Tamesmunt ittwafarzen i iǧan di Babil, tseǧam xawem s řehna, uřa d mmi Markus.
1PE 5:14 Seǧmem x wayawya s řehna u s usudem iqeddsen. Řehna ad kiwem yiři marra idwem i iǧan di Lmasiḥ. Amin.
2PE 1:1 Cimɛun Buṭrus, amsexxar d rrasul n Yasuɛ Lmasiḥ, i inni ittwaḥesben am neccin ssdaheǧen l’iman s tsegda n Siditneɣ d Umsenjem nneɣ, Yasuɛ Lmasiḥ, ɛlaḥsab ccan d ijjen akidneɣ.
2PE 1:2 Arḍa d řehna ad ɣarwem mmarenyen xmi i ɣa tessnem Siditneɣ, Yasuɛ Lmasiḥ,
2PE 1:3 am Wenni iwcin marra min iǧan zi jjehd n AREBBI, maḥend ad yiwi Tudart d tiggʷudi zi AREBBI s tussna n Wenni d aneɣ dd-iřaɣan ɣar uɛuǧi nnes d lɛaḍama nnes,
2PE 1:4 d Wenni zzayes Netta iwca awem lwuɛud imɣaren iɣřan aṭṭas, ḥima ad zzaysen tcarcem di ṭṭbiɛet nnes n AREBBI, am tᵉttrakkʷarem zi nnecwat iɣeccen i yeǧan di ddunect.
2PE 1:5 Am teǧa tmesřact ammu, arnim s marra cḍaret i l’iman nwem tcuni ifeyyḍen, i tcuni nwem ifeyyḍen tussna,
2PE 1:6 i tussna řewɛaret, i řewɛaret ṣṣbar, i ṣṣbar tiggʷudi zi AREBBI,
2PE 1:7 i tiggʷudi zi AREBBI tayri i wawmaten u i tayri i wawmaten tayri.
2PE 1:8 Mařa ttwafent daywem timesřayin-a uca ad daywem feyyḍent, war kenniw ttejjint texwam niɣ břa řɣiǧet di tussna n Siditneɣ Yasuɛ Lmasiḥ.
2PE 1:9 Minzi wenni war ɣar ǧint tmesřayin-a, aqa iddarɣeř, minzi war ittwiři illa ittu asizdeg n ddnub nnes inni tuɣa xas.
2PE 1:10 S uyenni, a aytma, cḍarem ktar ḥima ad tḍemnem tařaɣit d usixḍar nwem s řexdayem tiṣebḥanin, minzi mařa teggem aya, xenni ɛemmarṣ ad tenqarḍem.
2PE 1:11 Minzi ammu i d awem ɣa immarni s waṭṭas wadaf icnan ɣar tgeldit ittduman n Siditneɣ d Umsenjem nneɣ, Yasuɛ Lmasiḥ.
2PE 1:12 S uyenni war ttejjiɣ ad kenniw ssɛeqřeɣ zi man aya řebda, waxxa kenniw tessnem u aqa kenniw tbeddem [x dsas n] tidett tanita.
2PE 1:13 Maca ittɣiř ayi nican min ɣa kkeɣ [ɛad] di arrimet-a, ḥima ad kenniw ssfaqeɣ am ssɛeqřeɣ kenniw,
2PE 1:14 minzi ssneɣ aqa takessit n arrimet inu ad dd-tas deɣya, am mammec d ayi issargeb Siditneɣ Yasuɛ Lmasiḥ.
2PE 1:15 Maca ad ggeɣ tizemmar, ḥima ad tɛeqřem x tmesřayin-a awarni uffuɣ inu.
2PE 1:16 Minzi neccin war neḍfar ca tiḥuja isaysen, umi tuɣa d awem nettbarreḥ jjehd d twasit n Siditneɣ Yasuɛ Lmasiḥ, maca aqa neched s tiṭṭawin nneɣ x lɛaḍama nnes.
2PE 1:17 Minzi Netta aqa iṭṭef zi AREBBI Babas ccan d uɛuǧi umi d as dd-tusa tmijja-ya zeg uɛuǧi i dd-yusin ak-d lɛaḍama nnes: “Wa d Mmi inu iɛizzen wenni dayes ufiɣ arḍa inu.”
2PE 1:18 Uřa d neccin nesřa tmijja-ya zeg ujenna, umi tuɣa issawař akides, řami neǧa akides x wedrar iqeddsen.
2PE 1:19 Uřa d neccin ɣarneɣ awař d tidett n inabiyyen, [u] kenniw ad teggem mliḥ mařa tewcim taynit i wawař nni am i yijj n řefnar yareqqen deg ijj n wemcan ibbubbes, ař ɣa idduqqez wass uca ad tenqar tfuct deg wuřawen nwem.
2PE 1:20 Amezwar ittxeṣṣa kenniw ad tessnem aqa war din uřa d ict n nnubuwa tᵉnnufseř x tira nnes [iqeddsen].
2PE 1:21 Minzi min ittwanabben war dd-itteffiɣ ɛemmarṣ zi min ixs bnadem, maca yusa-dd [zeg uqemmum n] yeryazen iqeddsen n AREBBI nni issiwřen am d asen dd-indeh Arruḥ Iqeddsen.
2PE 2:1 Maca tuɣa din ɛawed jar řgens inabiyyen issxarriqen, am mammec i ɣa iřin uřa d imesɣaren issxarriqen jar awem, ad ssidfen tibridin ittareddǧen, ad nkaren Sidi i ten isɣin, ad ssiwḍen [ammu] areyyeb deɣya x yixef nsen.
2PE 2:2 Aṭṭas i ɣa iḍfaren taxmuji nsen ař ɣa ittwaceqqef webrid n tidett zi ssibbet nsen.
2PE 2:3 S ṭṭmeɛ u s wawařen ittwaggen ad zzaywem ggen am zi sseřɛet, [maca] řḥukm xasen zeg wecḥař uya war ibḍiř ca uca ahellek nsen war ittnudum ca.
2PE 2:4 Minzi mařa AREBBI war issar x lmalakat i yeggin ddnub, maca inḍar i-ten di ssnaseř n taǧest di řaǧaɣ yuǧɣen uca isellem i-ten ḥima ad ttwaxemmřen ař řḥukm n uɛeddeb,
2PE 2:5 u [ɛawed] war issar x ddunect n zic, maca tuɣa iḥḍa Nuḥ, wenni d wiss tmenya, ambarreḥ n tsegda, řami dd-iḍřeq řḥemřet x ddunect n lkuffar,
2PE 2:6 u [ɛawed] řami issecmeḍ Netta tineddam n Sadum d Ɛamurra u iḥkem xasent s uneqřeb, aqa yarra i-tent d lmital i lkuffar i ɣa yiřin ɛad.
2PE 2:7 Ɛawed issenjem Netta Lut, amseggad, wenni tuɣa iweddben aṭṭas zi ticři ixemjen n yinni war ɣar teǧi ccariɛa.
2PE 2:8 Maɣar umi amsegged wanita iẓra d isřa timegga nsen i war dd-yusin ak-d ccariɛa, ittwaɛeddab řeɛmar [nnes] iseggden zeg wass ař wass, am tuɣa izeddeɣ jar asen.
2PE 2:9 [Ammu] i issen SIDI mammec i ɣa issuffeɣ inni t itteggʷeden, zi řmeḥnet, [maca] Netta iḥeṭṭa inni war iseggden ḥima ad ttwaɛeddben deg wass n lḥisab,
2PE 2:10 mahu qaɛ inni iḍfaren ddat [nsen] am ttmeẓẓren di min ixemjen, u seḥqarran ṣṣulṭa [n ijenwan]. Aqa aten d imɛeffaren d imneffxen, war ttarjijin zzat min iɛuǧen am ttceqqafen.
2PE 2:11 Waxxa lmalakat ujarent ten di ṣṣulṭa d jjehd, war xasen ssiwiḍent řḥukm n SIDI di ssibbet n uceqqaf.
2PE 2:12 [Maca] nitni [s řɛeks] ǧan am imuddaren ignawen ɛlaḥsab ṭṭbiɛet, inni yuran i tɣarṣt s řmus d tajeyyaft am ttceqqafen di min di war fehhmen. Ad ttwajeyyfen di tjeyyaft [n yixef] nsen.
2PE 2:13 Ina d inni x teǧa řmuɛṣiyyet d řmunet i řmuɛṣiyyet. Nitni ḥesben tawarrit n meẓri deg nnecwat s uziř d abarreɛ am ccuren nitni s ibeqqiḍen [n řewsex]. Xmi ttarran nnitni meẓri deg uraren nsen n uɣebbi, sellmen ixef nsen ɣar twarrit n meẓri tameqqrant.
2PE 2:14 Tiṭṭawin nsen ccurent s zzina u s ddenb war iqeṭṭin, xmi ɣekkwan nitni řeɛmur n yinni war ibedden nican. Aqa ɣarsen uř ittwarebban x ṭṭmeɛ, aqa nitni d tarwa n nneɛřet,
2PE 2:15 ffɣen zeg webrid iseggmen, weddaren, uca ḍfaren abrid nni ikka Balɛam, mmis n Faɣur, wenni tuɣa ittexsen řmunet n řɣecc.
2PE 2:16 Maca netta iksi awebbex i řmuɛṣiyyet nnes, minzi zzayřet tagnawt tessiweř ɣares s ict n tmijja n iwdan, temneɛ tubbuheřya n unabi.
2PE 2:17 Nitni d řɛunṣarat war dayes bu waman, d iseynuten ttwaɛarrnen s tḥaryaḍt, aqa tubbarcent n taǧest tᵉttwassewjed asen.
2PE 2:18 Maɣar mařa ssiwřen s nnɛi n řhard [nsen] ixwan, aqa nitni ssɣekkʷan s nnecwat ixemjen n arrimet inni igguren ad arewřen zeg inni isellmen ixef nsen i uɣekkwi.
2PE 2:19 Waɛden ten s tiřelli, waxxa nitni simant nsen d isemɣan n řɣecc. Minzi wi zi ittwaɣelleb bnadem, aqa i netta ad yiři d amsexxar.
2PE 2:20 Maɣar awarni řami dd-arewřen nitni zi řexmej n ddunect s tussna n Siditneɣ d Amsenjem nneɣ, Yasuɛ Lmasiḥ, aqa dewřen-dd ɣar řexmej nni ɛawed uca ttwaɣellben zzayes twařa nneɣni, aqa xenni aneggar nsen ad asen yura mahu x umezwar.
2PE 2:21 Aqa ḥsen asen meɛlik qqimen war ssinen abrid n tsegda zi min ssnen, uca řexdenni ad ffɣen ɛawed x tewṣeyyet iqeddsen i d asen dd-ittwasellmen.
2PE 2:22 Aqa temsar asen am tt iqqar wawař-a n tidett: “Aqzin aqa idweř-dd x min tuɣa dd-iɛuqq!” niɣ [mammec d as qqaren nneɣni]: “Tiřeft tenni ittwassirden qaɛ, [tedweř-dd] tᵉttmarraɣ deg ubaryuḍ [nnes]!”
2PE 3:1 [A] imɛizzen inu, ta d tabrat wiss tnayen i d awem dd-uriɣ řexxu, u [di tnayen n tebratin-a] arezzuɣ ad ssfaqeɣ nneyyet nwem iṣfan am kenniw ssɛeqřeɣ,
2PE 3:2 ḥima ad teqqimen tᵉttfekkarem deg wawařen nni tuɣa innan inabiyyen iqeddsen zic, uřa di tewṣeyyat n Siditneɣ d Amsenjem nneɣ, tinni [ɣarneɣ dd-yiwḍen] s rrusul.
2PE 3:3 Man aya ittxeṣṣa ad tessnem d amezwaru, aqa deg wussan ineggura ad dd-asen imestehzayen inni istehzan am uyuren ɣar nnecwat nsen,
2PE 3:4 ad inin: “Mani iǧa lwaɛd n twasit nnes? Zeg wami ṭṭṣen řejdud nneɣ, ammu i yeqqim kuřci am tuɣa iǧa zeg umezwar řami tᵉttwagg ddunect.”
2PE 3:5 Meɛlik ufin ad ttun belli s wawař n AREBBI aqa ijenwan izwaren ad iřin, u aqa řbarr igeɛɛed zeg waman u s ufus n waman s Wawař n AREBBI,
2PE 3:6 [aman] i zi tᵉttwahellek ddunect n řweqt nni umi dd xas ssefyen waman [n řḥemřet deg wussan n Nuḥ,] uca tᵉttwamḥa.
2PE 3:7 Maca ijenwan d temmurt n yiḍa aqa ttwaḥefḍen s wawař nnes, xemmřen i tmessi ař ass n lḥisab d uweddar n lkuffar.
2PE 3:8 Maca ittxeṣṣa kenniw war tᵉttᵉttum ict n řḥajjet, [a] imɛizzen, aqa-tt d ta: ɣar SIDI ijj n wass am ařef n iseggʷusa uca ařef n iseggʷusa am yijj n wass.
2PE 3:9 Aqa SIDI war issɛizzi deg usuffeɣ n řwuɛud nnes am mammec d asen ittɣiř i ca [n iwdan], maca Netta iggur akidwem s ttasiɛ n řxaḍar, minzi Netta war ittexs ca ad yareyyeb uřa d ijj, maca maḥend ad tuben marra.
2PE 3:10 Maca ass n SIDI ad dd-yas am uxewwan s ǧiřet. Deg wass nni ad weddaren ijenwan s řɣefřet u timesřayin timezwura [n ddunect] ad fesyent di tmessi uca tammurt d řexdayem i xas iǧan ad ttwafent.
2PE 3:11 Am marra timesřayin-a ad fesyent ammu, mammec ittcuwwar ad tuyurem kenniw s tqeddast d tiggʷudi zi AREBBI,
2PE 3:12 am tᵉttrajam tawasit n wass n AREBBI, am tᵉttmeẓrem dayes, xmi ɣa fnan ijenwan am ttwaqeǧben s tmessi uca ad fesyent timesřayin timezwura [n ddunect] s řɛabuq nnes.
2PE 3:13 Maca neccin aqa nettraja ijenwan n jdid d temmurt n jdid mani ɣa tezdeɣ tsegda ɛlaḥsab lwaɛd nnes.
2PE 3:14 S uyenni, [a] imɛizzen inu, umi kenniw tᵉttrajam man aya, cḍarem maḥend ad tᵉttwafem břa řexmej u břa řɛib zzates di řehna.
2PE 3:15 Ḥesbem ttasiɛ n řxaḍar n SIDI d [tawwart i] weṣřaḥ, am mammec uřa d umatneɣ iɛizzen Bulus d awem dd-yura ɛlaḥsab tiɣit i d as immewcen,
2PE 3:16 am mammec xas issiweř netta di marra tibratin nnes. Aqa din ca n tmesřayin iwɛaren i řefhamet, tinni i ssfarraɣen řjuhhař d yewdan war imtinen [deg wuř nsen], am mammec ggin uřa i Tira [Iqeddsen] nneɣni i wareyyeb n yixef nsen.
2PE 3:17 S uyenni kenniw [a] imɛizzen inu, am tessnem man aya qbeř, ḥḍam ixef nwem, ḥima war tḍeffaram awarni i uweddar n yinni iǧan břa ccariɛa uca ad tewḍam waxxa tuɣa tᵉttbeddam nican,
2PE 3:18 maca [s řɛeks ḥḍam] ad teymem deg arḍa d tussna n Siditneɣ d Amsenjem nneɣ, Yasuɛ Lmasiḥ, u n AREBBI, Babas, i Wenni umi ɣa yiři uɛuǧi, am řexxu am řebda, ař deg wussan n řebda! Amin.
1JO 1:1 Wenni tuɣa din zeg umezwaru, d Netta i d awem nettbarreḥ: Wenni nesřa d Wenni neẓra s tiṭṭawin nneɣ, d Wenni netwařa u nḥada t s ifassen nneɣ d Wenni iǧan d Awař Iddaren.
1JO 1:2 Aqa Tudart teḍhar-dd, neccin neẓra i-tt, uca ncehhed u nettbarreḥ awem Tudart ittduman, tenni tuɣa ak-d Babatneɣ uca tᵉttwassargeb-dd i neccin.
1JO 1:3 Min neẓra d min nesřa, ad awem t-i-dd-nesscen, ḥima ɛawed kenniw ad tiřim deg umuni akidneɣ, uca amuni nneɣ ak-d Babatneɣ u ak-d Mmis Yasuɛ Lmasiḥ.
1JO 1:4 Aqa nettari man aya i kenniw, ḥima řefraḥet nneɣ ad tiři tekmeř.
1JO 1:5 D wa d Řexbar Aṣebḥan i zzayes nesřa uca ad awem nbarreḥ: AREBBI d Tafawt, Netta war dayes bu jjurret n taǧest.
1JO 1:6 Mařa neqqar, aqa ɣarneɣ amuni akides, uca neggur di taǧest, aqa nessxarriq, war nḍeffar ca tidett.
1JO 1:7 Maca mařa nuyur di Tfawt, am Netta di Tfawt, ɣarneɣ amuni ak-d wayawya, uca ad taf Idammen n Yasuɛ, Mmis, ad aneɣ ssizdegen zi marra ddnub nneɣ.
1JO 1:8 Mařa neqqar, war dayneɣ bu ddnub, aqa nessxarriq x yixef nneɣ uca tidett war dayneɣ teǧi.
1JO 1:9 Maca mařa nenɛem s ddnub nneɣ, aqa Netta d amtiqqi d amseggad ḥima ad aneɣ iɣfar ddnub nneɣ uca ad aneɣ issizdeg zi marra min war iseggden.
1JO 1:10 Mařa neqqar: ‘Neccin war dayneɣ bu ddnub!’, nettarra i-t d bu-ixarriqen uca awař nnes war dayneɣ iǧi.
1JO 2:1 A iḥenjiren inu, uriɣ aya i kenniw, ḥima war txeṭṭim ca. Uca mařa ixḍa ca n ijjen, aqa ɣarneɣ Umseṣřaḥ, d Wenni iǧan ɣar Babatneɣ, Yasuɛ Lmasiḥ, Amseggad.
1JO 2:2 Maɣar Netta d aṣřaḥ i ddnub nneɣ, war iǧi x ddnub nneɣ waha, maca ɛawed i yinni n ddunect marra.
1JO 2:3 S man aya i nettwařa belli aqa nessen i-t, mařa neṭṭef di tweṣṣa nnes.
1JO 2:4 Wenni iqqaren: “Necc ssneɣ t!”, maca war iṭṭif ca di tweṣṣa nnes, netta d bu-ixarriqen uca tidett war dayes teǧi.
1JO 2:5 Maca wenni ittᵉṭṭfen deg wawař nnes, ad dayes tkemmeř tayri n AREBBI s tidett. S man aya nessen, belli aqa neccin dayes.
1JO 2:6 Wenni iqqaren: ‘Necc dayes!’, ittxeṣṣa ad yuyur am mammec tuɣa iggur Netta.
1JO 2:7 A imɛizzen inu, war d awem ttariɣ ca tawṣeyyet n jdid, maca tawṣeyyet taqdimt i tuɣa ɣarwem zeg umezwaru. Tawṣeyyet-a taqdimt d awař i tuɣa tesřim.
1JO 2:8 Waxxa amenni ad awem dd-ariɣ tawṣeyyet n jdid, tenni iǧan d tidett dayes u daywem, minzi taǧest teɛdu uca Tafawt n tidett aqa tᵉtteḍhar-dd řexxu.
1JO 2:9 Wenni iqqaren belli aqa-t di Tfawt, [maca] icarreh umas, netta aqa-t di taǧest ař iḍa.
1JO 2:10 Wenni ittexsen umas, ad iqqim di Tfawt uca war dayes bu řefḍiḥet i zi ɣa inqard [umas].
1JO 2:11 Maca wenni icarrhen umas, aqa-t di taǧest uca iggur di taǧest, war issin mani ɣa iraḥ, minzi taǧest tessdarɣeř tiṭṭawin nnes.
1JO 2:12 Ad awem dd-ariɣ, a iḥenjiren, minzi ddnub nwem ttwaɣfaren awem di ṭṭweɛ n Yisem nnes.
1JO 2:13 Ad awem dd-ariɣ, a ibabaten, minzi aqa tessnem Wenni iǧan zeg umezwaru. Ad awem dd-ariɣ, a ibřiɣen, minzi aqa tɣellbem x umɛeffan. Aqa uriɣ awem-dd, a iḥudriyyen, minzi tessnem Babatneɣ.
1JO 2:14 Aqa uriɣ awem-dd, a ibabaten, minzi tessnem Wenni iǧan zeg umezwaru. Aqa uriɣ awem-dd, a ibřiɣen, minzi aqa kenniw tjehdem uca Awař n AREBBI izeddeɣ daywem uca tɣellbem x umɛeffan.
1JO 2:15 War ttexsem ca ddunect uřa d min iǧan di ddunect, minzi mařa ca n ijjen ittexs ddunect, tayri n Babatneɣ war dayes teǧi.
1JO 2:16 Minzi marra min iǧan di ddunect - aqa-t d nnecwet n ddat d nnecwet n tiṭṭawin d tuffet n ddunect[-a] - war dd-ittis ca zi Babatneɣ, maca zi ddunect.
1JO 2:17 Uca ddunect tɛeddu uřa d nnecwat nnes, maca wenni itteggen min ixs AREBBI, ad iqqim i řebda.
1JO 2:18 A iḥenjiren inu, aqa řweqt taneggarut tiweḍ-dd, uca am tesřim belli ad dd-yas lmasiḥ afalsu, amenni řexxu ḍharen-dd aṭṭas n imasiḥen ifalsuten. S uyenni nessen belli řweqt taneggarut aqa tiweḍ-dd.
1JO 2:19 Ffɣen-dd zzayneɣ, maca war ten tuɣi zzayneɣ. Meɛlik nitni tuɣa zzayneɣ, ad iři qqimen akidneɣ. Maca nitni ffɣen-dd zzayneɣ, ḥima ad iban belli nitni marra war ǧin ca zzayneɣ.
1JO 2:20 Aqa ɣarwem adhan n Umqeddas uca tessnem ad tfarzem kuř ijj n bnadem.
1JO 2:21 War d awem uriɣ minzi war tessinem ca tidett, maca minzi aqa tᵉttessnem tt, u tessnem [ɛawed] uřa d ijj n uxarriq war dd-itteffeɣ ca zi tidett.
1JO 2:22 Wi iǧan d bu-ixarriqen mɣir wenni inkaren belli Yasuɛ d Lmasiḥ! D wa d lmasiḥ afalsu, wenni inkaren Babas d Mmis.
1JO 2:23 Marra wenni inkaren Mmis war yumin ɛawed di Babas. Wenni icehhden i Mmis, icehhed ɛawed i Babas.
1JO 2:24 Ejj ad daywem iqqim min tesřim zeg umezwaru. Mařa iqqim daywem min tesřim zeg umezwaru, ad teqqimem kenniw ɛawed di Babas u di Mmis.
1JO 2:25 Ta d tikkest n wawař i d aneɣ iwca: Tudart ittduman.
1JO 2:26 Man aya uriɣ awem-t-i-dd x yinni kenniw ixeddɛen.
1JO 2:27 Mařa adhan i zzayes tᵉṭṭfem ad iqqim daywem, war teḥdajem ad kenniw isseřmed ḥed. Minzi adhan n AREBBI, ad kenniw isseřmad di marra, uca Netta d tidett war dayes ǧin ixarriqen. Xenni qqimem dayes, [di Lmasiḥ], am mammec i d awem isseřmed Netta.
1JO 2:28 Xenni řexxu, a iḥenjiren inu, qqimem dayes, ḥima war nettseḍḥi ca qibač nnes x minni dd ɣa iḍhar, maca ad ɣarneɣ tiři ttiqqet ɣar twasit nnes.
1JO 2:29 Mařa tessnem, belli Netta d amseggad, snem ɛawed belli marra wi itteggen tasegda, aqa [ittwaxřeq-dd] zzayes.
1JO 3:1 Xzar, mecḥař temɣar tayri i zi d aneɣ ittexs Babatneɣ, ařami iřaɣa u igga aneɣ tarwa. S uyenni ddunect war d aneɣ tessin ca, minzi war t tessin ca.
1JO 3:2 A imɛizzen inu, řexxu neccin d tarwa n AREBBI i neǧa, war dd-iḍhar ɛad min ɣa niři. Aqa nessen xmi dd ɣa iban Netta, ad niři di ṣṣifet nnes, minzi ad t nẓar am mammec iǧa Netta.
1JO 3:3 Marra wenni ɣar iǧa usitem-a dayes [deg wuř nnes], ad issizdeg ixef nnes, am mammec iǧa Netta d amezdag.
1JO 3:4 Marra wenni itteggen ddnub, ittegg řmuɛṣiyyet, minzi marra ddenb d řmuɛṣiyyet.
1JO 3:5 Tessnem belli Netta iban-dd, ḥima ad ikkes ddnub nneɣ: Netta war dayes bu ddnub.
1JO 3:6 Marra wi dayes i ɣa iqqimen, war ittegg ca ddnub. Marra wi itteggen ddnub, war t iẓri, war t issin.
1JO 3:7 A iḥenjiren inu, war ttejjim ad kenniw ixarweḍ ḥed. Wenni itteggen tasegda d netta d amseggad am mammec ɛawed Lmasiḥ d amseggad.
1JO 3:8 Wenni itteggen ddnub d netta zi cciṭan, minzi cciṭan tuɣa d amednub zeg umezwaru. I man aya i dd-iḍhar Mmis n AREBBI: ḥima ad issexsar řexdayem n cciṭan.
1JO 3:9 Marra wenni dd-ittwaxeřqen zi AREBBI, war ittegg ca ddnub, minzi Zzariɛet nnes aqa-tt dayes uca war izemmar ad ixḍa, minzi ittwaxřeq-dd zi AREBBI.
1JO 3:10 Di man aya ad dd-ḍharen tarwa n AREBBI d tarwa n cciṭan: marra wenni war itteggen tasegda u war ittexsen umas, war iǧi ca zi AREBBI.
1JO 3:11 Maɣar ta d tawṣiyyet i tuɣa tesřim zeg umezwaru belli ad texsem ijjen wenneɣni!’
1JO 3:12 War iǧi am Qayin wenni iǧan zeg umɛeffan uca inɣa umas. Mayemmi inɣa umas? S minzi řexdayem nnes tuɣa atent ɛeffnent uca tinni n umas seggdent.
1JO 3:13 War tedhicem ca, [a] aytma, mařa ddunect tcarh i kenniw.
1JO 3:14 Neccin nessen, aqa neẓwa zi řmewt ɣar Tudart, minzi nexs awmaten nneɣ. Wenni war ittexsen umas, ad iqqim di řmewt.
1JO 3:15 Marra wi icarrhen umas d aqettař, uca kenniw tessnem belli Tudart ittduman war tzemmar ad teqqim deg ijj n uqettař.
1JO 3:16 Zi man aya nessen tayri nnes i neccin, aqa Netta issars Tudart nnes deg wemcan nneɣ. Ɛawed ittxeṣṣa aneɣ nican ad nessars tudart nneɣ x aytmatneɣ.
1JO 3:17 Wenni ɣar iǧa agřa n ddunect uca ittwařa umas izřeḍ, xenni iqqen xas uř nnes, mammec i ɣa tezdeɣ tayri n AREBBI dayes?
1JO 3:18 A iḥenjiren inu, ejj aneɣ war nᵉttexs ijjen wenneɣni s wawař niɣ s iřes, maca s řexdayem u di tidett.
1JO 3:19 S man aya nessen aqa neccin zi tidett uca ad nesseqneɛ uřawen nneɣ qbeř i dd ɣa yas.
1JO 3:20 Minzi mařa iḥkem wuř nneɣ xaneɣ, mecḥař d ameqqran AREBBI x wuř nneɣ! Aqa Netta issen marra.
1JO 3:21 A imɛizzen inu, mařa uř nneɣ war xaneɣ iḥkem, aqa ɣarneɣ ttiqqet zzat i AREBBI,
1JO 3:22 uca man řḥajjet i ɣa nettar, ad tt neksi zzayes, minzi neccin nḥeṭṭa tiweṣṣa nnes uca ad negg min ɣa yarḍan qibač Netta.
1JO 3:23 D ta d tawṣeyyet nnes belli ad namen deg Yisem n Mmis Yasuɛ Lmasiḥ uca ad nexs ijj wenneɣni am mammec i d aneɣ yumur.
1JO 3:24 Wenni iḥeṭṭan tiweṣṣa nnes, ad zzayes ittwaḥḍa u Netta izeddeɣ dayes. S man aya nessen belli Netta ittɣima dayneɣ, zi Arruḥ nnes i d aneɣ iwca.
1JO 4:1 A imɛizzen inu, war ttiqqem ca di marra arruḥat, maca qeǧbem arruḥat, ma zi AREBBI i iǧan, minzi aṭṭas n inabiyyen issxarriqen aqa ffɣen-dd ɣar ddunect.
1JO 4:2 S man aya ad tessnem Arruḥ n AREBBI: marra arruḥ wenni icehhden belli Yasuɛ Lmasiḥ yusa-dd di ddat aqa netta zi AREBBI.
1JO 4:3 Marra arruḥ wenni war icehhden belli Yasuɛ yusa-dd di ddat, war iǧi ca zi AREBBI, maca zi arruḥ n lmasiḥ afalsu wenni i xef tesřam ad dd-yas, aqa netta da řexxu di ddunect.
1JO 4:4 Maca kenniw d tarwa n AREBBI i teǧam, aqa tɣellbem xasen, minzi d Wenni iǧan daywem d ameqqran x wenni iǧan di ddunect.
1JO 4:5 Nitni zi ddunect, s uyenni ssawařen zi ddunect uca ddunect tᵉttesřa asen-dd.
1JO 4:6 Aqa aneɣ zi AREBBI. Wenni issnen AREBBI, ittesřa aneɣ. Wenni war iǧin zi AREBBI war d aneɣ ittesři ca. S man aya i ɣa nessen Arruḥ n Tidett d arruḥ n uweddar.
1JO 4:7 A imɛizzen inu, ejj aneɣ ad nexs ayawya, minzi tayri zi AREBBI, u marra wenni ittexsen, d netta ittwaxřeq-dd zi AREBBI uca issen AREBBI.
1JO 4:8 Minzi AREBBI d tayri, u wenni war ittexsen, war issin ca AREBBI.
1JO 4:9 S man aya teḍhar aneɣ-dd tayri n AREBBI, belli AREBBI aqa issekk-dd ayenni n Mmis i ɣares ɣar ddunect, ḥima ad zzayes neddar.
1JO 4:10 Di man aya i teǧa tayri, war iǧi belli neccin nᵉttexs AREBBI, maca belli Netta ittexs aneɣ uca issekk-dd Mmis d aṣřaḥ x ddnub nneɣ.
1JO 4:11 A imɛizzen inu, mařa tuɣa AREBBI ittexs aneɣ ammu, ittxeṣṣa aneɣ ɛawed ad nexs ijj wenneɣni.
1JO 4:12 Uřa d ijjen ma iẓra AREBBI. Maca mařa nᵉttexs ayawya, AREBBI ad dayneɣ iqqim, uca tayri nnes aqa tedweř tekmeř dayneɣ.
1JO 4:13 Zi man aya nessen belli nettɣima dayes u Netta dayneɣ, minzi Netta iwca aneɣ zi Arruḥ nnes.
1JO 4:14 Aqa neẓra u ncehhed belli Babas issekk-dd Mmis d Amsenjem n ddunect.
1JO 4:15 Marra wenni icehhden belli Yasuɛ d Mmis n AREBBI, AREBBI ad dayes izdeɣ u netta ad izdeɣ di AREBBI.
1JO 4:16 Aqa neccin numen u nessen tayri tenni iǧan ɣar AREBBI i neccin. AREBBI d tayri u wenni i ɣa iqqimen di tayri, ad iqqim di AREBBI.
1JO 4:17 Di man aya tᵉttwakemmeř tayri nnes dayneɣ, ařami ad ɣarneɣ tiři ttiqqet deg wass n lḥisab, minzi am mammec iǧa Netta, ad niři neccin ɛawed di ddunect-a.
1JO 4:18 Di tayri war tᵉttiři tiggʷudi, maca tayri nican tessuffuɣ tiggʷudi, minzi tiggʷudi tᵉttas-dd ak-d unexřiɛ. Wenni itteggʷeden, war ittiři ikmeř di tayri.
1JO 4:19 X uya ad nexs AREBBI, minzi Netta tuɣa ittexs aneɣ d amezwaru.
1JO 4:20 Mařa ca n ijjen iqqar: “Necc ttexseɣ AREBBI!”, am icarreh umas, aqa netta d bu-ixarriqen. Minzi wenni war ittexsen umas wenni ittwařa, xenni mammec ɣa yegg ad ixs AREBBI wenni war ittwiři.
1JO 4:21 Aqa tawṣeyyet-a neṭṭef i-tt zzayes, belli kuř ijjen i ittexsen AREBBI, ad ixs uřa d umas.
1JO 5:1 Marra wenni yumnen belli Yasuɛ d Lmasiḥ, aqa netta ittwaxřeq-dd zi AREBBI, uca marra wenni ittexsen wenni t-i-dd yejjin, ad ixs ɛawed wenni zzayes dd-ittwaxeřqen.
1JO 5:2 Zi man aya nessen belli nᵉttexs tarwa n AREBBI, xmi nᵉttexs AREBBI u nᵉttegg tiweṣṣa nnes.
1JO 5:3 Minzi ta d tayri n AREBBI, ad neḥḍa tiweṣṣa nnes, uca tiweṣṣa nnes war wɛarent ca.
1JO 5:4 Maɣar mkuř ijjen i dd-ittwaxeřqen zi AREBBI ad iɣelleb x ddunect. D wa d aɣřab i ittɣellaben x ddunect, aqa-t d l’iman nneɣ.
1JO 5:5 Man wen i ɣa iɣellben x ddunect, mɣir wenni yumnen belli Yasuɛ d Mmis n AREBBI!
1JO 5:6 D Wa i dd-ikkin zeg waman d Idammen, Yasuɛ Lmasiḥ. War dd-yekki zeg waman waha, maca zeg waman d Idammen.
1JO 5:7 Arruḥ d wenni icehhden, minzi Arruḥ d tidett.
1JO 5:8 Aqa din třata n yinni icehhden: Arruḥ d waman d Idammen, uca nitni s třata deg ijjen.
1JO 5:9 Mařa neqbeř cchadet n iwdan, mecḥař d tameqqrant cchadet n AREBBI. Ta d cchadet n AREBBI tenni iched x Mmis.
1JO 5:10 Wenni yumnen di Mmis n AREBBI, ɣares cchadet-a deg ixef nnes. Wenni war yuminen ca di AREBBI, aqa igga i-t d bu-ixarriqen, minzi netta war yumin ca di cchadet tenni iwca AREBBI x Mmis.
1JO 5:11 Uca ta d cchadet: AREBBI iwca aneɣ Tudart ittduman uca Tudart nni aqa-tt di Mmis.
1JO 5:12 Wenni ɣar iǧa Mmis, ɣares Tudart. Wenni war ɣar iǧi Mmis n AREBBI, war ɣares bu Tudart.
1JO 5:13 Uriɣ awem-dd man aya, ḥima ad tessnem belli ɣarwem Tudart ittduman, kenniw inni ittamnen deg Yisem n Mmis n AREBBI.
1JO 5:14 D ta d ttiqqet tenni ɣarneɣ dayes, mařa nettar zzayes ca n řḥajjet ɛlaḥsab min ixs Netta, Netta ad ɣarneɣ iseř.
1JO 5:15 Mařa nettwasseqneɛ nican aqa ad aneɣ iseř min ma d as nettar, xenni nettiqq belli aqa yusa-dd aneɣ min d as nettar.
1JO 5:16 Mařa ḥed iẓra umas ixeṭṭa, ijj n uxeṭṭu war ihdijen ca řmewt, ejj i-t ad iẓẓaǧ [di ṭṭweɛ nnes], uca ad as temmewc Tudart, i wenni war ixeṭṭin ca ař řmewt. Aqa din axeṭṭu ař řmewt, war qqareɣ ca aqa ittxeṣṣa ad iẓẓaǧ i man aya.
1JO 5:17 Marra řmuɛṣiyyet, aqa-tt d ddenb uca aqa din ddenb i war iǧin ca ař řmewt.
1JO 5:18 Nessen belli kuř ijjen wenni dd-ittwaxeřqen zi AREBBI, war ixeṭṭi ca, minzi wenni dd-ittwaxeřqen zi AREBBI ad iḥḍa ixef nnes u amɛeffan war t ittḥidi.
1JO 5:19 Nessen, aqa aneɣ zi AREBBI uca ddunect marra aqa-tt deg [ifassen n] umɛeffan.
1JO 5:20 Nessen belli Mmis n AREBBI aqa yusa-dd uca iwca aneɣ-dd řefhamet ḥima ad nessen Wenni iǧan d tidett u ḥima ad niři deg Wenni d tidett, di Mmis Yasuɛ Lmasiḥ. D wa d AREBBI s tidett d Tudart ittduman.
1JO 5:21 A iḥenjiren inu, ḥḍam ixef nwem zeg weɛbed n l’aṣnam!
2JO 1:1 Amɣar, i tmeṭṭut ittwafarzen d tarwa nnes, inni ttexseɣ di tidett, war iǧi necc waha, maca ɛawed qaɛ inni issnen tidett,
2JO 1:2 di ṭṭweɛ n tidett i dayneɣ izeddɣen uca ad kidneɣ tiři i řebda:
2JO 1:3 arḍa d arreḥmet d řehna ad kidneɣ iřin zi AREBBI, Babatneɣ, u zi Siditneɣ Yasuɛ Lmasiḥ, Mmis n Babas, di tidett u di tayri.
2JO 1:4 Aqa farḥeɣ aṭṭas umi ufiɣ jar tarwa nnem ca inni igguren di tidett, am mammec tawṣeyyet nni neksi zi Babatneɣ.
2JO 1:5 Uca řexxu ttᵉttareɣ am, [a] tameṭṭut, war iǧi axmi d am uriɣ tawṣeyyet n jdid, maca tenni aqa-tt ɣarney zeg umezwaru: ejj aneɣ ad nexs ayawya.
2JO 1:6 Ta d tayri, aqa ad nuyur ɛlaḥsab tiweṣṣa nnes. Ta d tawṣeyyet am mammec i tesřim zeg umezwaru, aqa ittxeṣṣa ad tuyurem dayes.
2JO 1:7 Minzi aṭṭas n ixeddaɛen udfen ɣar ddunect, inni war icehhden ca i twasit n Yasuɛ Lmasiḥ di ddat. D wa d axeddaɛ d amḍidd n Lmasiḥ.
2JO 1:8 Ḥḍam ixef nwem, ḥima war txessarem ca min xef txedmem kenniw, maca ad tawyem řmunet tmun.
2JO 1:9 Marra wenni i ɣa ixḍan uca war iqqim ca di tɣuri n Lmasiḥ, war ɣares bu AREBBI deg yixef nnes. Wenni i ɣa iqqimen di tɣuri nnes, aqa ɣares Babas d Mmis
2JO 1:10 Mařa yusa-dd ɣarwem ca n ijjen uca war dd-yiwi ca taɣuri-ya, xenni war t qebbřem di taddart [nwem], war zzayes areḥḥbem.
2JO 1:11 Minzi wenni xas i ɣa yareḥḥben, ɣares amuni ak-d řexdayem nnes tiɛeffanin.
2JO 1:12 Aqa ɣari aṭṭas i d awem ɣa ariɣ, maca tuɣa war xseɣ ad t ariɣ di tewriqt s ssmex, maca ssitimeɣ ad ɣarwem dd-aseɣ, ḥima ad kiwem ssiwřeɣ zeg uqemmum ɣar uqemmum, ḥima řefraḥet nneɣ ad tiři tekmeř.
2JO 1:13 Tarwa n učmam ittwafarzen, ttseǧamen xam s řehna. Amin.
3JO 1:1 Amɣar, i Xayus iɛizzen, wenni ttexseɣ di tidett.
3JO 1:2 A amɛizz nneɣ, ssitimeɣ ad tiřid mliḥ di marra u ad tiři uřa d ṣṣeḥḥet nnec mliḥ, am mammec ittiři řeɛmar nnec d lemliḥ.
3JO 1:3 Minzi farḥeɣ aṭṭas, řami dd-usin wawmaten, cehden x řaman i dayek, mammec teggured di tidett.
3JO 1:4 War ɣari řefraḥet temɣar x ta: aqa sřiɣ tarwa inu gguren di tidett.
3JO 1:5 A amɛizz nneɣ, marra min tᵉttegged i wawmaten, tᵉttegged t s l’iman, d amezwaru i ibarraniyyen,
3JO 1:6 inni icehden x tayri nnec qibač i tmesmunt marra. Teggid mliḥ umi d asen tewcid afus di min hdajen nitni, am mammec yarḍa AREBBI,
3JO 1:7 minzi nitni ffɣen x ssibbet n Yisem nnes, am war ksin walu zi řegnus.
3JO 1:8 S uyenni ittxeṣṣa ad neqbeř [iwdan] am nitni, ḥima ad niři d imsexxaren akidsen i tidett.
3JO 1:9 Necc tuɣa xseɣ ad ariɣ i tmesmunt, maca Diyutrifu, wenni ittexsen ad yiři d amezwaru jar asen, war d aneɣ iqbiř ca.
3JO 1:10 S uyenni xmi dd ɣa yaseɣ, ad t ssɛeqřeɣ di řexdayem i ittegg, umi xaneɣ ittḥarreḍ řehrud tiɛeffanin. U řami war d as iɛjib řḥar ɛad, war iqbiř awmaten, u inni ten qebřen, immɛařa akidsen, issuffeɣ i-ten zi tmesmunt.
3JO 1:11 A amɛizz, war ḍeffar ca tuɛeffna maca tcuni! Wenni itteggen tcuni, netta zi AREBBI. Wenni itteggen tuɛeffna, war iẓri ca AREBBI.
3JO 1:12 Marra cehden mliḥ x Dimitriyu řa d tmesmunt uřa d tidett simant nnes. Uřa d neccin ncehhed [xas] mliḥ uca tessnem belli cchadet nneɣ d tidett.
3JO 1:13 Aqa ɣari aṭṭas i d ac dd ɣa ariɣ, maca war xseɣ ca ad ac dd-ariɣ s ssmex d řeqřem,
3JO 1:14 maca ssitimeɣ ad cek ẓareɣ deɣya, [xenni] ad nessiweř zeg wudem ɣar wudem.
3JO 1:15 Řehna ad yiři akidek. Imeddukkař ttseǧamen xak s řehna. Seǧem x imeddukkař s ismawen nsen.
JUD 1:1 Yahuda, amsexxar n Yasuɛ Lmasiḥ, d umas n Yaɛqub. I řegnus ittwařaɣan, inni ittwaɛizzen zi AREBBI, Babatneɣ, d inni ittwaḥḍan zi Yasuɛ Lmasiḥ.
JUD 1:2 Iři ad ɣarwem tᵉmmarni arreḥmet d řehna d tayri.
JUD 1:3 [A] imɛizzen inu, umi ceṭṭareɣ maḥend ad awem dd-ariɣ x Tudart nneɣ imunen, aqa ufiɣ belli ittxeṣṣa ayi ad awem dd-ariɣ s uziyyar, ḥima ad tᵉmmenɣem s jjehd x l’iman i immewcen ict n twařa [i řebda] i imqeddasen.
JUD 1:4 Minzi ca n iwdan xtuttřen ɣar daxeř, inni tuɣa ittwazemmemen i řḥukm-a qbeř: aqa nitni d iɛeffanen, inni ibeddřen arḍa n AREBBI nneɣ deg ijj n nnɛi n ufucceḥ, uca nekkaren ayenni n Sidi AREBBI d Siditneɣ Yasuɛ Lmasiḥ.
JUD 1:5 Maca xseɣ ad kenniw ssɛeqřeɣ, aqa marra kenniw tessnem man aya mliḥ, belli AREBBI, umi ifekk řgens zi temmurt n Miṣra, tuɣa isshellek awarni man aya inni war yuminen ca.
JUD 1:6 Uca lmalakat nni war ḥḍint aweqqar nsen amezwaru, maca jjint tazeddiɣt nsen, aqa Netta iḥḍa xasen s ssnaseř war ittwiřin sadu taǧest i řḥukm n wass ameqqran,
JUD 1:7 am mammec Sadum d Ɛamurra d tneddam i d as dd-innḍen, mani ggin nitni farq-ccɣeř s webrid d ijjen am ggint tina [s tnayen] u ḍfarent ddat nneɣni, aqa ttwammarsent d imedya n tmessi ittduman, ttwaḥekment ɣar ccreɛ.
JUD 1:8 Amenni ɛawed [i ɣa hellken] ina, inni issexmajen ddat am dd-ttadfen di tirja, inni immenḍaren ṣṣulṭa [n ijenwan] uca ttceqqafen deg uɛuǧi [nnes].
JUD 1:9 Maca řami tuɣa issawař Mixayil, azeǧif n lmalakat, ak-d ibřis x arrimet n Musa, war xas iḥkim s ijj n řḥukm ittceqqafen, maca inna: “SIDI ad cek ixeǧeṣ!”
JUD 1:10 Maca ina ttceqqafen di marra min war ssinen, uca s tmesřayin i ɣar ttwajebbden nitni am imuddaren ignawen ɛlaḥsab ṭṭbiɛet nsen, aqa areddǧen nitni ixef nsen.
JUD 1:11 Uct xasen, minzi nitni uyuren abrid n Qayin uca umi ttmeẓren di řmunet ḍfaren nitni aɣekkwi n Balɛam u ttwahelken deg uɣewweɣ n Kurax.
JUD 1:12 Ina d inni issfeṭṭaḥen ixef nsen s unecwet nsen, war ttseḍḥin ca ad ɣebban. Aqa aten d iseynuten břa anẓar, ttwaɛarrnen zi ssa ɣar diha s usemmiḍ, aqa aten d ticejjura nni di teǧa řɣiǧet nsent tweddar, aqa war daysent teǧi bu řɣiǧet, mmutent wiss martayen uca ttwaqeřɛent zeg iẓewran nsent.
JUD 1:13 Nitni d řemwaj n řebḥar ihajen, inni issusufen ikuffan n řefḍiḥet nsen, aqa aten d itran weddaren, inni umi tᵉttwassewjed tubbarcent n taǧest i řebda.
JUD 1:14 Maca Ḥanux, wenni d wiss sebɛa zi Adam, inebba xasen, inna: “Xzar, SIDI ad dd-yas ak-d řuřuf n řuřuf n imqeddasen nnes,
JUD 1:15 ḥima ad igg řḥukm nnes x marra iwdan zi ssibbet n marra timegga n yinni iggin tuɛeffna, u zi ssibbet n wawařen iqesḥen i zi ssiwřen imednab iɣeccacen.”
JUD 1:16 Ina ttɛekkasen, ttcetcan x kuř ddab n ssibbet, am gguren ɣar nnecwat nsen, aqemmum nsen issawař s tmesřayin tiɛeffanin ař ṭṭarf, tteggen tiqedduḥin i iwdan i tizi n yixef nsen.
JUD 1:17 Maca kenniw, [a] imɛizzen inu, ɛeqřem awařen i izzar ssiwřen [zzaysen] rrusul n Siditneɣ Yasuɛ Lmasiḥ,
JUD 1:18 inni d awem innan, aqa deg uneggar n zzmanat ad din iřin imestehzayen, inni i ɣa iḍfaren řeqjahet ɛlaḥsab nnecwat nsen.
JUD 1:19 Aqa d yina d inni ifarrzen ixef nsen am iwdan iḍeffaren ṭṭbiɛet n yixef nsen, minzi war ɣarsen bu Arruḥ.
JUD 1:20 Maca kenniw, [a] imɛizzen inu, ttwabnam zeg Uzeǧif di l’iman nwem iqeddsen s Arruḥ Iqeddsen, am teẓẓaǧam.
JUD 1:21 Ejj aneɣ ad neḥḍa ixef nneɣ di tayri n AREBBI am nᵉttraja arreḥmet n Siditneɣ Yasuɛ Lmasiḥ i Tudart nneɣ ittduman.
JUD 1:22 Qeřɛem ca zzaysen zi tmessi.
JUD 1:23 Mařa tuben nitni, secnem asen arreḥmet, maca ak-d tiggʷudi, [wah,] ɛiffem ɛad zi tcamir i ittwassxemjen zeg weysum.
JUD 1:24 Maca i Netta, wenni izemmaren ad aneɣ iḥḍa břa aneqřaḍ u břa řexmej u [wenni] ad [aneɣ] yegg ad nbedd nican břa řɛib zzat i uɛuǧi nnes s řefraḥet
JUD 1:25 - aqa Netta d AREBBI weḥḥdes, Amsenjem nneɣ - aqa i Netta dd-ittas usemɣar d řɛezz d ccan d lɛaḍama, am řexxu am i řebda qaɛ. Amin.
REV 1:1 Asargab n Yasuɛ Lmasiḥ i d as iwca AREBBI, ḥima ad isscen i imsexxaren nnes min ittxeṣṣa ad imsar deɣya, uca issargeb i-t am t issekk s [ufus n] lmalak nnes i umsexxar nnes Yuḥanna.
REV 1:2 Wanita iched x Wawař n AREBBI u zi cchadet n Yasuɛ Lmasiḥ u zi marra min iẓra,
REV 1:3 Sseɛd n wenni iqqaren d yinni ittesřan awařen n nnubuwa-ya u qqimen ttᵉṭṭfen di min daysen yuran, maɣar aqa řweqt tiweḍ-dd.
REV 1:4 Yuḥanna, i sebɛa n tmesmunin di Asiya: Ad kidwem yiři arḍa d řehna zeg wenni iǧan d wenni tuɣa d wenni dd ɣa yasen, uřa zi sebɛa n Arruḥat nni iǧan zzat i řɛarc nnes,
REV 1:5 u zi Yasuɛ Lmasiḥ, Acehhad amtiqqi, Amenzu n imettinen d Ameqqran n ijeǧiden n temmurt. [I] wenni d aneɣ ittexsen u d aneɣ ifekken zi ddnub nneɣ s Idammen nnes,
REV 1:6 d wenni yarr aneɣ d ict n Tagelda n ikehhanen ɣar AREBBI d Babas, i Netta ad ɣares yiři uɛuǧi d ṣṣulṭa i řebda qaɛ. Amin!
REV 1:7 Xzar, Netta ad dd-yas ak-d iseynuten, kuř tiṭṭ ad t tẓar, uřa d inni t issnuqqben. Marra tiqebbař n temmurt ad xas wtent agejdur. Wah, amin!
REV 1:8 Necc d Alif d Taw, [Amezwaru d Uneggaru], iqqar SIDI AREBBI, d wenni iǧan d wenni tuɣa d wenni dd ɣa yasen, Amzemmar x kuřci.
REV 1:9 Necc, Yuḥanna, umatwem d umɛacar nwem di řmeḥnet u di ṣṣbar nni iǧan di Yasuɛ, tuɣa ayi di tegzirt qqaren as Batmus di ṭṭweɛ n Wawař n AREBBI d cchadet n Yasuɛ Lmasiḥ.
REV 1:10 Usiɣ-dd di Arruḥ deg wass amezwaru n ssimana uca sřiɣ awarni ayi ict n tmijja tejhed am usuḍi deg uyicc n ucarri,
REV 1:11 teqqar: “Min tᵉttwařid, ari t deg ijj n wedlis [ittwanḍen], ssekk i-tt-i-dd i sebɛa n tmesmunin: ɣar Afasus, ɣar Smirna, ɣar Pirɣamus, ɣar Tiyatira, ɣar Sardis, ɣar Filadilfiya uca ɣar Layudikiya.”
REV 1:12 Xenni nnqeřbeɣ, ḥima ad ssneɣ wi kidi issawařen. Ařami nnqeřbeɣ, ẓriɣ sebɛa n řeqnadeř n wureɣ.
REV 1:13 Di řwesṭ n řeqnadeř ijjen am Mmis n bnadem, tuɣa yarḍ apalṭu [n ukehhan] u ɣares ijj n webyas n wureɣ x idmaren.
REV 1:14 Azeǧif nnes d ucuwwaf nnes tuɣa aten d icemřařen am taḍuft, am wedfeř, uca tiṭṭawin nnes am yiḥudaq n tmessi,
REV 1:15 iḍaren nnes am nnḥas zi Lubnan, iḥman deg ufarran, u řḥess nnes am řḥess n waṭṭas n waman.
REV 1:16 Tuɣa ɣares deg ufus nnes afusi sebɛa n yetran uca zeg uqemmum nnes itteffeɣ-dd zzayes lansa iqḍeɛ uca aɣembub nnes am tfuct s jjehd nnes.
REV 1:17 Ařami t ẓriɣ, wḍiɣ as ɣar iḍaren nnes axmi mmuteɣ uca Netta issars xafi afus nnes afusi, inna: “War tteggʷed ca! Aqa Necc d Amezwaru d Uneggaru,
REV 1:18 Necc d wenni iddaren, u Necc tuɣa mmuteɣ, u xzar, aqa Necc d wenni iddaren i řebda qaɛ! Aqa ɣari tsarut n řmewt d řaxart.
REV 1:19 S uyenni ari min teẓrid uřa d timesřayin nni iǧan d timesřayin nni i ɣa imsaren awarni man aya.
REV 1:20 Aqa ssirr n sebɛa n itran i teẓrid deg ufus inu afusi u [ssirr] n sebɛa n řeqnadeř n wureɣ d wa: sebɛa n itran aqa aten d lmalakat n sebɛa n tmesmunin uca sebɛa n řeqnadeř, aqa aten d sebɛa n tmesmunin.”
REV 2:1 Ari i lmalak di tmesmunt n Afasus! “Ammu i iqqar wenni ɣar iǧa sebɛa n itran deg ufus nnes, wenni igguren di řwesṭ n sebɛa n řeqnadeř n wureɣ:
REV 2:2 ‘Necc ssneɣ řexdayem nnec d warbar nnec d ṣṣbar nnec, belli war tzemmared ad tḥemřed inni iɛeffnen uca tqeǧbed inni itteggen ixef nsen d rrusul, maca war ǧin ca, uca tufid ten d ayt n bu-ixarriqen.
REV 2:3 Cek tṣebbared u teksid armeḥ x ssibbet n Yisem inu u war tuḥiřed ca.
REV 2:4 Maca ɣari xak ca, belli tejjid tayri nnec tamezwarut.
REV 2:5 Ɛqeř manis-dd tewḍid uca tub, xenni egg řexdayem timezwura! Mařa war iǧi amenni, ad ɣarek dd-aseɣ deɣya, ad kesseɣ řqendiř nnec, mařa war tᵉttubed ca.
REV 2:6 Maca man aya tiwḍed, aqa tcarrhed řexdayem n ayt n Inikulayiten, tinni carrheɣ uřa d Necc.
REV 2:7 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin. Wenni i ɣa iɣellben ad t ssecceɣ zi Tcejjart n Tudart i yeǧan di jjennet n AREBBI.’”
REV 2:8 Ari i lmalak n tmesmunt n Smirna! “Ammu i iqqar wenni d Amezwaru d Uneggaru, Wenni immuten uca iddar:
REV 2:9 ‘Aqa ssneɣ řmeḥnet nnec d wezřaḍ nnec, qaɛ amenni cek tᵉttejjared, u [aqa-yi ssneɣ] uřa d aceqqef n yinni iqqaren aqa aten d Udayen s tidett, maca nitni war ǧin ca [d Udayen], maca d tamzida n cciṭan.
REV 2:10 War tteggʷed ca zi min ɣa tᵉttwaɛeddbed. Aqa ibřis ad inḍar [ca] zzaywem di řeḥbes, ḥima ad tᵉttwajarrbem. Ad ɣarwem tiři řmeḥnet n ɛecra n wussan. Iřim d imtiqqan ař řmewt, řexdenni ad awem wceɣ ttaj n Tudart.
REV 2:11 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin. Wenni i ɣa iɣellben war d as dd-tᵉttiwi ca txessart zi řmewt wiss tnayen.’”
REV 2:12 Ari i lmalak di tmesmunt n Pirɣamus! “Ammu i iqqar wenni ɣar iǧa ssif iqḍeɛ x tnayen n wudmawen:
REV 2:13 ‘Necc ssneɣ mani tzeddɣed, [diha mani ittbedda] řɛarc n cciṭan. Aqa teqqimed tᵉṭṭfed deg Yisem inu uca war tenkared ca l’iman dayi, Uca deg wussan umi tuɣa cek tᵉttmenɣed [jmiɛ] ak-d ucehhad amtiqqi inu di ṭṭweɛ n marra icehhaden inu imtiqqan, aqa ittwaneɣ netta jar awem.
REV 2:14 Maca ɣari xak ca, minzi ɣarek dinni [ca] inni itteṭṭfen deg useřmed n Balɛam, wenni tuɣa issřemden i Balak mammec ɣa inḍar taɛenkrift i ayt n Israil, ḥima ad ccen zi min ɣarṣen i l’aṣnam uca ad sefssaden ixef nsen.
REV 2:15 Ɣarek din ɛawed [ca] inni itteṭṭfen di tɣuri n Inikulayiten.
REV 2:16 S uyenni tub! Mařa war iǧi amenni, ad ɣarwem dd-aseɣ deɣya, ad kisen mmenɣeɣ s ssif n uqemmum inu.
REV 2:17 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin. Wenni i ɣa iɣellben ad as ssecceɣ ‘manna’ innufaren uca ad as wceɣ ijj n uqayas d acemřař, uca x uqayas nni ittwari xas ijj n isem n jdid, war t issin ḥed mɣir wenni t iṭṭfen.’”
REV 2:18 Ari i lmalak di tmesmunt n Tiyatira! “Ammu i iqqar Mmis n AREBBI wenni ɣar iǧa tiṭṭawin am yiḥudaq n tmessi d iḍaren nnes am nnḥas zi Lubnan:
REV 2:19 ‘Necc ssneɣ řexdayem nnec uřa d tayri nnec d l’iman nnec d tsexxart nnec d ṣṣbar nnec, aqa řexdayem nnec tineggura imɣaren x tmezwura.
REV 2:20 Maca ɣari xak aṭṭas, minzi tejjid tameṭṭut nnec Izabil, tenni iqqaren belli nettat d tanabit, tesseřmad uca tessɣekkʷa imsexxaren inu, ḥima ad ssfesden ixef nsen uca ad ccen min ittwaɣarṣen i l’aṣnam.
REV 2:21 Aqa wciɣ as ca n řweqt ḥima ad tᵉtub, [maca] nettat war tᵉttexs ca ad tᵉtub zi farq-ccɣeř nnes.
REV 2:22 Xzar, ad tt ɣeḍřeɣ di tassut, [ad tiři teḥřec ař řmewt], uca inni akides izennan, [ad ten nedheɣ] di řmeḥnet tameqqrant mařa war tuben ca zi min ggin.
REV 2:23 Tarwa nnes ad ten wteɣ s řmewt uca marra timesmunin ad fehment aqa Necc d wenni iqeǧben tiẓẓař d wuřawen uca ad wceɣ i kuř ijjen zzaywem anect n řexdayem nwem.
REV 2:24 Maca i kenniw u i inneɣni di Tiyatira - [ixs ad yini] i marra inni war ɣar teǧi ca taɣuri-ya, war ssinen umi qqaren nitni ‘řaǧaɣ n cciṭan’ - ad awem iniɣ: Necc war xawem ttdarraceɣ ca taɣrart nneɣnit.
REV 2:25 [Maca] min ɣarwem, ṭṭfem dayes ař dd ɣa yaseɣ.
REV 2:26 Wenni i ɣa iɣellben u wenni i ɣa iṭṭfen di řexdayem inu, ad as wceɣ ṣṣulṭa x řegnus
REV 2:27 maḥend ad ten yarwes s uzeǧaḍ n wuzzař, ad ten tarẓim am iɣarrafen n bu-třaxt, am mammec i tᵉṭṭfeɣ uřa d Necc zi Baba,
REV 2:28 uca Necc ad as wceɣ itri n řefjar.
REV 2:29 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’”
REV 3:1 Ari i lmalak di tmesmunt n Sardis! “Ammu i iqqar wenni ɣar iǧa sebɛa n Arruḥat n AREBBI d sebɛa n yetran: ‘Necc ssneɣ řexdayem nnec, aqa ɣarek isem, belli aqa teddared, [maca] cek aqa tᵉttmettid.
REV 3:2 Ḥḍa, sejhed min iqqimen, inni tenwid cek ad ten tᵉttejjid ad tᵉmmtem, maɣar ufiɣ aqa řexdayem nnec war kemmřent ca ɣar AREBBI.
REV 3:3 Ɛqeř mliḥ, mammec [xas] tesřid u mammec tᵉṭṭfed, ḥḍa uca tub! Maca mařa war tᵉttfiqed, ad ɣarek dd-aseɣ am uceffar, war tessined ca di man tasaɛɛet i xak dd ɣa beddeɣ.
REV 3:4 Maca ɣari ca n ismawen di Sardis, inni war issxemjen ca arruḍ nsen uca nitni gguren zzati s [warruḍ] d acemřař, minzi nitni sdaheǧen t.
REV 3:5 Wenni i ɣa iɣellben ammu, ad as yarḍen arruḍ d acemřař. Ɛemmarṣ ad kkseɣ isem nnes zeg Wedlis ittwanḍen n Tudart, maca ad cehdeɣ x yisem nnes zzat i Baba d lmalakat nnes.
REV 3:6 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’”
REV 3:7 Ari i lmalak n tmesmunt n Filadilfiya! “Ammu i iqqar Umqeddas wenni d Tidett d wenni ɣar iǧa tsarut n Dawud d wenni i ɣa yarezmen, [xenni] uřa d ijjen ad ibelleɛ, d wenni i ɣa ibellɛen, [xenni] uřa d ijjen ad yarzem:
REV 3:8 ‘Necc ssneɣ řexdayem nnec. Xzar, Necc ggiɣ zzatec ict n tewwart tarzem, tenni uřa d ijj war izemmar ad tt ibelleɛ, minzi waxxa jjehd nnec d ameẓyan, qaɛ amenni teḥḍid Awař inu uca war tenkared ca Isem inu.
REV 3:9 Xzar, ad wceɣ ca zi temzida n cciṭan, inni iqqaren aqa nitni d Udayen, [maca] nitni war ǧin ca amenni, maca nitni ssxarriqen. Xzar, ad ten arreɣ ad ac wḍan ɣar iḍaren nnec. Nitni ad neɛmen belli Necc ssɛizzeɣ cek.
REV 3:10 Minzi aqa cek teḥḍid Awař inu n ṣṣbar, ad xak ḥḍiɣ ɛawed zi [tsaɛɛet n] ujarreb tenni i d ɣa yasen x temmurt marra i ujarreb n yinni izeddɣen x temmurt.
REV 3:11 Necc ad dd-aseɣ deɣya. Ṭṭef di min ɣarek, ḥima uřa d ijj war d ac ittekkes ca ttaj nnec.
REV 3:12 Wenni i ɣa iɣellben ad t ggeɣ d apilar di Zzawect Tameqqrant n AREBBI uca war zzayes ittwammeksi ɛemmarṣ. Necc ad xas ariɣ Isem n AREBBI inu d yisem n tendint n jdid, Urcalim i dd ɣa ihwan zeg ujenna zi AREBBI inu, uřa d Isem inu n jdid.
REV 3:13 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’”
REV 3:14 Ari i lmalak n tmesmunt n Layudikiya “Ammu i iqqar wenni d Amin, Acehhad amtiqqi d tidett, wenni d beddu n marra min dd-ixřeq AREBBI:
REV 3:15 ‘Necc ssneɣ řexdayem nnec, aqa cek war tesmiḍed war teḥmid. Meɛlik beɛda tsemḍed niɣ teḥmid!
REV 3:16 S uyenni, umi cek temřuded, war teḥmid, war tesmiḍed, ad cek ɛuqqeɣ zeg uqemmum inu.
REV 3:17 Minzi cek teqqared: Necc ɣari agřa uca immarni-dd ɣari wagřa, war d ayi ittxeṣṣi walu, [am] war tessined ca belli aqa cek tḥeřced u dayek řeɣben d zzeřḍ u aqa cek d adarɣař d aɛaryan,
REV 3:18 ad cek neṣḥeɣ maḥend ad xafi tesɣed wureɣ iqquren, ikkin timessi, ḥima ad tdewřed d bu-wagřa, uřa d arruḍ d acemřař, ḥima ad t tyarḍed u war teqqim tḍehhar ɛad řefḍiḥet n tuɛɛaryent nnec. U dhen [ɛawed] ddhen x tiṭṭawin nnec maḥend ad taf tettwařid.
REV 3:19 Marra wenni ssɛizzeɣ, ttwebbxeɣ t u arebbiɣ t. Xenni cḍar, tub!
REV 3:20 Aqa da, Necc beddeɣ ɣar tewwart, ssqarqubeɣ-dd. Mařa isřa ḥed i tmijja inu, ad yarzem tawwart, Necc ad ɣares adfeɣ uca ad kis mmunesweɣ d netta akidi.
REV 3:21 Wenni i ɣa iɣellben ad as wceɣ, ḥima ad iqqim akidi x řɛarc inu, am Necc ɣellbeɣ uca qqimeɣ ak-d Baba x řɛarc nnes.
REV 3:22 Wenni ɣar ǧan imezzuɣen, ejj i-t ad iseř min iqqar Arruḥ i tmesmunin.’” *
REV 4:1 Awarni man aya, xzar, ict n tewwart tennurzem deg ujenna. Uca tmijja i sřiɣ akidi dd-issawařen am yijj n usuḍi deg uyicc n icarri, tenna: “Geɛɛed da, [xenni] Necc ad ac ssecneɣ min ggur ad imsar awarni man aya.”
REV 4:2 Řexdenni ireḥḥef ayi-dd Arruḥ, u xzar, ijj n řɛarc ibedd deg ujenna, tuɣa Netta iqqim xas.
REV 4:3 U tifras n Wenni [xas] iqqimen am [weẓru n] yaspis d sardiyus, uca tasřit n wenẓar n iseynuten i-dd-ittennḍen i řɛarc iḍhar am [weẓru n] smaraxt.
REV 4:4 Quwwaren as i řɛarc arebɛa u ɛicrin n řekrasi igellden uca arebɛa u-ɛicrin n imɣaren tuɣa qqimen x řekrasi igellden, arḍen arruḍ d acemřař, ɣarsen x uzeǧif ttijan n wureɣ.
REV 4:5 Uca zi řɛarc nni tteffɣen-dd zzayes wajjajen d assamen d tmijjawin. Zzat i řɛarc areqqen sebɛa n iṣefḍawen, tina d sebɛa n Arruḥat n AREBBI.
REV 4:6 Ɣar zzat n řɛarc tuɣa din ijj n řebḥar n zzaj, igga am akristal. Di řwesṭ n řɛarc d min d as dd-innḍen tuɣa din arebɛa n imuddaren, ɛemmaren s tiṭṭawin marra ɣar zzat d ḍeffar.
REV 4:7 Amuddar amezwaru yarwes deg wayrad, ameddar wiss tnayen yarwes deg uɛejmi, ameddar wiss třata tuɣa aɣembub nnes axmi n bnadem uca amuddar wiss arebɛa yarwes deg ugider iṭṭawen.
REV 4:8 Kuř ijjen zi arebɛa n imuddaren tuɣa ibedd, tteffɣen-dd zeg waccaren nnes d sennej setta n wafriwen i dd as dd-innḍen, ɛemmaren s tiṭṭawin ɣar daxeř. Nitni war ẓrin arraḥet ass d ǧiřet, nnan: “Amqeddas, amqeddas, amqeddas d SIDI AREBBI, Amzemmar x kuřci d wenni tuɣa, d wenni iǧan, d wenni dd ɣa yasen.”
REV 4:9 Uca xmi ɣa wcen arebɛa n imuddaren aɛuǧi d ccan d uqadi i wenni iqqimen x řɛarc, d wenni iddaren i řebda qaɛ - “Amin!” -
REV 4:10 [xenni] arebɛa u ɛicrin n imɣaren wḍan ɣar temmurt ɣar zzat n wenni iqqimen x řɛarc, sejden i wenni iddaren i řebda qaɛ - “Amin!” - uca ssarsen ttijan nsen ɣar zzat i řɛarc, nnan:
REV 4:11 “Cek, a Siditneɣ d AREBBI nneɣ, tesdaheǧed ad teksid aɛuǧi d ccan d jjehd, maɣar Cek d wenni iggin marra timesřayin-a, u aqa atent din u ttwaxeřqent s řxaḍar nnec!”
REV 5:1 Uca ẓriɣ ɣar ufus afusi n wenni iqqimen x řɛarc ijj n Wedlis [ittwanḍen], tuɣa xas tira ɣar daxeř d barra, uca [Adlis] tuɣa ittwacemmeɛ s sebɛa n icemmiɛen.
REV 5:2 Uca ẓriɣ ijj n lmalak ijhed nneɣni, ittřaɣa s jjehd: “Man wen isdaheǧen ad yarzem Adlis-a ittwannḍen, uca ad ikkes icemmiɛen nnes?”
REV 5:3 Uca uřa d ijj deg ujenna niɣ di temmurt niɣ sadu temmurt izemmar ad yarzem Adlis-a [ittwannḍen] u ad ikkes icemmiɛen nnes, ad dayes ixzar.
REV 5:4 Necc ruɣ aṭṭas umi war ufin wi isdaheǧen ad yarzem Adlis-a [ittwannḍen] u ad yarzem icemmiɛen nnes.
REV 5:5 Ijjen zeg imɣaren inna ayi: “War ttru ca! Xzar, Ayrad zi teqbič n Yahuda, Aẓwar n Dawud, aqa iɣelleb, ḥima ad yarzem Adlis-a [ittwannḍen] d icemmiɛen nnes.”
REV 5:6 Uca ẓriɣ di řwesṭ n řɛarc d arebɛa n imuddaren uca di řwesṭ n imɣaren, ijj n Izmar ibedd, igga axmi d taɣarṣt. Netta ɣares sebɛa n waccawen d sebɛa n tiṭṭawin, nitni d sebɛa n Arruḥat n AREBBI inni dd-ittwassekken ɣar ddunect tmun.
REV 5:7 Aqa Netta yusa-dd uca iksi Adlis [ittwannḍen] zeg ufus n wenni iqqimen x řɛarc.
REV 5:8 Ařami iṭṭef Adlis [ittwannḍen], wḍan-dd arebɛa n imuddaren d arebɛa u-ɛicrin n imɣaren ɣar temmurt zzat i Yezmar. Nitni marra idsen ɣarsen ict n lharpa d ijj n ṭṭebṣi n wureɣ iccur s řebxur: man aya d tiẓaǧitin n imqeddasen.
REV 5:9 Uca ttɣennajen ijj n izři n jdid, qqaren: “Cek tesdaheǧed ad teksid Adlis ittwannḍen, ad tekksed icemmiɛen nnes, minzi Cek tᵉttwaɣarṣed uca s Idammen nnec tesɣid aneɣ i AREBBI, zi kuř taqbič d řgens d cceɛb.”
REV 5:10 ”Cek tarrid ten d ict n tgelda n ikehhanen d ijeǧiden i AREBBI nneɣ, u nitni ad ḥekmen am ijeǧiden x temmurt.”
REV 5:11 Xenni ẓriɣ, uca sřiɣ tmijja n waṭṭas n lmalakat nnḍent i řɛarc uřa n imuddaren d imɣaren, uca tuɣa atent ɛecra-ařaf di ɛecra n řuřuf u ařaf di řuřuf,
REV 5:12 qqaren s tmijja ijehden: “Izmar nni ittwaɣarṣen isdaheǧ ad iṭṭef ṣṣulṭa d wagřa d tiɣit, d jjehd d ccan d uɛuǧi, d lbaraka!”
REV 5:13 Uca kuř ijj i dd-ixeřqen deg ujenna u x temmurt d sadu temmurt u x řebḥar, [wah,] qaɛ min iǧan daysen, sřiɣ asen, qqaren: “Lbaraka d ccan d uɛuǧi d ṣṣulṭa ad iřin i wenni iqqimen x řɛarc u i Yezmar i řebda qaɛ!”
REV 5:14 Uca umi arebɛa n imuddaren nnan: “Amin!”, wḍan imɣaren ɣar temmurt, sejden.
REV 6:1 Uca ẓriɣ umi Izmar ifsi ijjen zi sebɛa n icemmiɛen, uca sřiɣ i yijjen zi arebɛa n imuddaren iqqar s tmijja am wajjaj: “As-dd, xzar!”
REV 6:2 Xenni sřiɣ u ẓriɣ, u xzar ijj n uyis d acemřař, d wenni xas inyin ɣares ijj n řqewṣ [n fřitca] uca immewc as ijj n ttaj uca iffeɣ-dd, iɣřeb, ittɣellab, u maḥend ad iɣřeb.
REV 6:3 Ařami yarzem acemmiɛ wiss tnayen, sřiɣ i umuddar wiss tnayen, iqqar: “As-dd!”
REV 6:4 Uca iffeɣ-dd ijj n uyis d azeggʷaɣ, uca wenni xas inyin, ggin t ḥima ad ikkes řehna x temmurt, ḥima ad kkaren iwdan ad ɣarṣen i wayawya uca immewc as ijj n ssif imɣar.
REV 6:5 Ařami yarzem acemmiɛ wiss třata, sřiɣ i umuddar wiss třata iqqar: “As-dd!” Xzar, ijj n uyis d abarcan, d wenni xas inyin ɣares ijj n řmizan deg ifassen nnes.
REV 6:6 Zi řwesṭ n imuddaren sřiɣ i yict n tmijja teqqar: “Ijj n řmud n yirden s yijj n dinar u třata n řemdud n imendi s yijj n dinar, u zzect d binu war ten ttḍiyyiɛem ca!”
REV 6:7 Ařami yarzem acemmiɛ wiss arebɛa, sřiɣ i tmijja n umuddar [wiss arebɛa] teqqar: “As-dd!”
REV 6:8 Uca ẓriɣ ijj n uyis d asnabi, d wenni xas inyin, qqaren as ‘Řmewt’, uca teḍfar i-t řaxart. Temmewc as ṣṣulṭa x ijj n arbeɛ n temmurt ḥima ad nɣen s ssif, s řaẓ, s řmewt u s řewḥuc n temmurt.
REV 6:9 Ařami yarzem acemmiɛ wiss xemsa, ẓriɣ sadu uɛalṭar řeɛmur n yinni ittwanɣen di ṭṭweɛ n Wawař n AREBBI u di ṭṭweɛ n cchadet n Yasuɛ i tuɣa ɣarsen.
REV 6:10 Nitni řaɣan s jjehd, nnan: “[A] SIDI, [a] Amqeddas d Bab n tidett, mecḥař i ɣa teqqimed war tḥekkmed, war tᵉttneqmed ca i idammen nneɣ zeg inni izeddɣen di temmurt?”
REV 6:11 Uca wcin i kuř ijjen zzaysen řeɛbayat d ticemřařin, u ittwanna asen belli ad areyyḥen drus n řweqt ař ɣa ikemmeř lɛadad n imsexxaren imɛacaren nsen d wawmaten nsen, inni i ɣa ittwanɣen ɛawed am nitni.
REV 6:12 Uca ẓriɣ ařami yarzem acemmiɛ wiss setta, aqa imsar ijj n wenhezzi n temmurt d ameqqran u tafuct tedweř d tabarcant amecnaw ict n txancet n wecḍan uca taziri tmun tegga amecnaw idammen,
REV 6:13 uca itran n ujenna wḍan-dd ɣar temmurt am wartu immenḍar iqurraɛ nnes xmi t-i-dd-iɣeṭṭeř ijj n usemmiḍ d ameqqran.
REV 6:14 Ittwafeǧqen ijenwan uca ttwanḍen nitni am mammec [nneḍen] idlisen. Uca kuř adrar d marra tigzirin ttwakksen zeg imucan nsen.
REV 6:15 Ijeǧiden n temmurt d imeqqranen d yinni d izeǧifen x wařef d aytbab n wagřa d yinni ɣar teǧa ṣṣulṭa d kuř ismeɣ d aḥurri, aqa nitni [marra] ssnuffaren ixef nsen deg ifran u jar řejruf n idurar,
REV 6:16 nnan i idurar d řejruf: “Wḍam-dd xaneɣ, ffarem aneɣ zeg wudem n Izmar,
REV 6:17 minzi ass ameqqran n weɣḍab nnes aqa yusa-dd, man wen izemmaren ad iqqim ibedd!”
REV 7:1 Awarni man aya ẓriɣ arebɛa n lmalakat beddent ɣar arebɛa n tɣemmura n temmurt, ṭṭfent arebɛa n isemmiḍen n temmurt, ḥima war ittsuḍi usemmiḍ řa x řbarr řa x waman uřa x ca n tcejjart.
REV 7:2 Uca ẓriɣ ijj n lmalak nneɣni yuři-dd manis d tneqqar tfuct, aqa ɣares acemmiɛ n AREBBI iddaren uca iřaɣa s jjehd i arebɛa n lmalakat nni umi temmewc tzemmar ḥima ad ssexsarent tammurt d řebḥar,
REV 7:3 iqqar: “War ttsexsarem tammurt uřa d řebḥar uřa d ticejjura ař ɣa negg acemmiɛ x tenyarin n imsexxaren n AREBBI nneɣ.”
REV 7:4 Uca sřiɣ řqedd n yinni ittwacemmɛen, mya u-arebɛa u-rebɛin-ařef aqa ttwacemmɛen zi marra tiqebbař n Israil:
REV 7:5 tenɛac-ařef zi teqbič n Yahuda, tenɛac-ařef zi teqbič n Rubin, tenɛac-ařef zi teqbič n Jad,
REV 7:6 tenɛac-ařef zi teqbič n Acir, tenɛac-ařef zi teqbič n Naftali, tenɛac-ařef zi teqbič n Manassa,
REV 7:7 tenɛac-ařef zi teqbič n Cimɛun, tenɛac-ařef zi teqbič n Issakar, tenɛac-ařef zi teqbič n Lawi,
REV 7:8 tenɛac-ařef zi teqbič n Zibulun, tenɛac-ařef zi teqbič n Yusuf, tenɛac-ařef zi teqbič n Binyamin.
REV 7:9 Awarni man aya aqa ẓriɣ ijj n ubarru n řɣaci ameqqran i war izemmar uřa d ijj ad t iḥseb, zi kuř řgens d teqbič u [zi marra] ccuɛub d iřsawen. Nitni bedden zzat i řɛarc d yezmar, arḍen řeɛbayat tizirarin d ticemřařin, uca ɣarsen tiseḍwin n tini deg ifassen nsen,
REV 7:10 ttřaɣan s jjehd: “Asenjem aqa s AREBBI nneɣ, wenni iqqimen x řɛarc u s Yezmar.”
REV 7:11 Uca marra lmalakat tuɣa beddent nnḍent i řɛarc ak-d imɣaren d arebɛa n imuddaren, wḍan ɣar temmurt s wudmawen nsen qibač i řɛarc,
REV 7:12 qqaren “Amin! Aɛuǧi d lbaraka d tiɣit d uqadi d ccan d ṣṣulṭa d jjehd aqa-ten i AREBBI nneɣ i řebda qaɛ. Amin!”
REV 7:13 Iṭṭef ijjen zeg imɣaren nni deg wawař, inna ayi: “Min ɛnan ina, inni yarḍen řeɛbayat ticemřařin, min ɛnan u manis dd-usin?”
REV 7:14 Necc nniɣ as: “A sidi, cek i issnen.” Inna ayi: “Ina aqa usin-dd zi řmeḥnet tameqqrant. Aqa nitni sizdigen řeɛbayat nsen uca arrin tent d ticemřařin deg Idammen n Izmar.
REV 7:15 S uyenni bedden nitni zzat i řɛarc n AREBBI uca sexxaren as ass d ǧiřet di Zzawect Tameqqrant, uca wenni iqqimen x řɛarc ad xasen iwwet [Aqiḍun nnes].
REV 7:16 War iqqim ɛad ad ǧaẓen niɣ ad ffaden, war ten tᵉttqeddi uřa d tafuct uřa d ict n jjurret n řeḥmu,
REV 7:17 minzi Izmar nni iǧan di řwesṭ n řɛarc ad ten yarwes, ad ten indeh ɣar Tudart u ɣar tařawin n waman, uca Netta ad asen imseḥ kuř ameṭṭa zi tiṭṭawin nsen.”
REV 8:1 Ařami yarzem Netta acemmiɛ wiss sebɛa, tuɣa ajenna yarsa ɛřaḥař azyen n tsaɛɛet.
REV 8:2 Uca ẓriɣ sebɛa n lmalakat nni ibedden zzat i AREBBI uca immewc asent sebɛa n waccawen n uyicc n icarri.
REV 8:3 Aqa ijj n lmalak nneɣni yusa-dd, yuyur ad ibedd ɣar uɛalṭar s ict n teqduḥt n wureɣ i řebxur. Immewc as waṭṭas n řebxur ḥima ad t iwehheb ak-d tẓaǧitin n marra imqeddasen x uɛalṭar qibač i řɛarc.
REV 8:4 Uca arriḥet n řebxur ak-d tẓaǧitin n imqeddasen tuɣa tᵉttgeɛɛad zeg ufus n lmalak ɣar zzat n AREBBI.
REV 8:5 Lmalak iksi taqduḥt n řebxur, iccur i-tt s tmessi zeg uɛalṭar uca inḍar i-t ɣar temmurt uca usin-dd wajjajen d tmijjawin d wassamen d ijj n wenhezzi n temmurt.
REV 8:6 Uca ḥezzment sebɛa n lmalakat tinni ɣar iǧa sebɛa n waccawen n uyicc n icarri ḥima ad [daysen] suḍent.
REV 8:7 Uca isuḍ umezwaru [di řbuq nnes] uca tewḍa-dd tebruri d tmessi xeǧḍent ak-d waman, ttwamenḍarent x temmurt, uca tecmeḍ ict n ttuřut n temmurt d ict n ttuřut n tcejjura uřa d marra arbiɛ n temmurt icmeḍ.
REV 8:8 Xenni isuḍ wenni d wiss tnayen [di řbuq nnes] uca ca n tmesřact am wedrar ameqqran icemmḍen, immenḍar di řebḥar uca ict n ttuřut n řebḥar idweř d idammen,
REV 8:9 u ict n ttuřut n imuddaren di řebḥar inni ɣarsen řeɛmar, mmuten, uca ict n ttuřut n iɣarruba tareddeǧ.
REV 8:10 Xenni isuḍ wenni d wiss třata [di řbuq nnes] uca iwḍa-dd ijj n itri ameqqran zeg ujenna, yurɣa am yijj n uɛeccař n tmessi, iwḍa-dd x ict n ttuřut n iɣezran u x tařawin n waman.
REV 8:11 Itri-ya qqaren-as ‘Absinta’, [niɣ ‘cciḥ’]. Uca ict n ttuřut n waman tedweř tarzeg am ‘absint’, uca mmuten aṭṭas n yewdan s waman umi dewřen d imerzagen.
REV 8:12 Xenni isuḍ wenni d wiss arebɛa [di řbuq nnes] uca tᵉttwaṭṭef ict n ttuřut n tfuct d ict n ttuřut n tziri d ict n ttuřut n itran, [ařami] tbbarcen ict n ttuřut zzaysen, war tᵉttiři ɛad tfawt i yict n ttuřut n uziř uca ammu uřa di ǧiřet.
REV 8:13 Uca sřiɣ ijj n ugider iṭṭaw-dd di řwesṭ n ujenna, iqqar: “Uct, uct, uct x yinni izeddɣen x temmurt x ssibbet n tmijjawin inneɣni n waccawen n icarri n třata n lmalakat i ɣa isuḍen ɛad [di řbuq]!”
REV 9:1 Xenni isuḍ wenni d wiss xemsa [di řbuq nnes] uca ẓriɣ ijj n yetri iwḍa-dd zeg ujenna x temmurt, temmewc as tasarut n uqemmum n tesraft yuǧɣen.
REV 9:2 Uca igeɛɛed-dd ddexxan zeg uqemmum n tesraft, am ddexxan n tefqunt tameqqrant iḥman, uca tfuct d řeɛwin bbarcnen s ddexxan n tesraft.
REV 9:3 Zi ddexxan ffɣen-dd zzayes iburexsen ɣar temmurt, temmewc asen ṣṣulṭa am tenni iǧan ɣar tɣarḍmiwin n temmurt.
REV 9:4 Ittwanna asen, maḥend war jeyyḥen arbiɛ n temmurt uřa d qaɛ aɣemmuy aziza uřa d ticejjura, mɣir iwdan waha inni war ɣar iǧi ucemmiɛ n AREBBI x tenyart nsen.
REV 9:5 Temmewc asen [tzemmar] maḥend war ten neqqen, maca ad ten ɛeddben řqedd n xemsa n iyuren, uca aɛeddeb nsen am uɛeddeb n tɣarḍent xmi tᵉtteqqes i bnadem.
REV 9:6 Deg wussan nni ad arzun iwdan x řmewt, [maca] war tt ttᵉṭṭifen, uca ad ttaren ad mmten, [maca] řmewt ad zzaysen tarweř.
REV 9:7 Iburexsen ggin am yiysan iwejden i umenɣi, u ɣarsen x izeǧifen nsen [ca] am ttijan axmi tent ggin s wureɣ, u iɣembab nsen am iɣembab n iwdan,
REV 9:8 u acuwwaf nsen am ucuwwaf n temɣarin u tiɣmas nsen am tinni n wayraden,
REV 9:9 u tuɣa ɣarsen tcappat x idmaren nsen am tcappat n wuzzař [i useřqi], u ddriz n wafriwen nsen am ddriz n ikarruten ak-d waṭṭas n iysan itteqnunnuyen ɣar umenɣi,
REV 9:10 u ɣarsen ikennasen am yinni n tɣarḍmiwin u tuɣa din isennanen deg ikennasen nsen. Nitni ɣarsen ṣṣulṭa ḥima ad ssehwan druct x iwdan, řmijař n xemsa n iyuren.
REV 9:11 Nitni ɣarsen lmalak n tesraft d ajeǧid xasen, qqaren as s Tɛibranit ‘Abaddu’ u s Tramit qqaren as ‘Cara’.
REV 9:12 Uct tamezwarut teɛdu, awarni man aya ad dd-asent ɛad tnayen n wuctat.
REV 9:13 Awarni man aya isuḍ lmalak wiss setta [di řbuq nnes] uca sřiɣ tmijja i dd-yusin zi arebɛa n waccawen n uɛalṭar n wureɣ i ibedden qibač i AREBBI,
REV 9:14 tenna i lmalak wiss setta i ɣar iǧa uyicc n icarri: “Fsiy i arebɛa n lmalakat nni icarfen ṭṭarf n iɣzar ameqqran, Lfuraṭ.”
REV 9:15 Uca arxun asen i arebɛa n lmalakat nni tuɣa iwejden dinni ɣar wass d uyur d useggʷas, ḥima ad nɣent ict n ttuřut n iwdan.
REV 9:16 Tuɣa řqedd n řɛeskarat n yinni ineddhen iysan tyuya n ɛecra-ařaf s ɛecra n řuřuf, uca sřiɣ mecḥař di ǧan.
REV 9:17 Ammu i ẓriɣ iysan di řewḥiy, aqa inni xasen inyin tuɣa ssdurruyen idmaren nsen s tcappat n wuzzař [i useřqi d tizeggʷaɣin] am tmessi, cabent, d tiwraɣin am řecbareyyet. Izeǧifen n iysan nni am yizeǧifen n wayraden uca zeg iqemmumen nsen teffeɣ-dd zzaysen tmessi d ddexxan d řecbareyyet.
REV 9:18 Aqa ict n ttuřut n iwdan tᵉttwaneɣ s třata-ya n jjrayeḥ: s tmessi d řecbareyyet d ddexxan i dd-itteffɣen zeg iqemmumen nsen.
REV 9:19 Minzi ṣṣulṭa nsen aqa-tt deg iqemmumen d ikennasen nsen, [minzi ikennasen nsen ggin am ifiɣran nni ɣar iǧa izeǧifen, uca ttjeyyḥen zzaysen iwdan].
REV 9:20 Iwdan iqqimen, inni war ittwanɣen ca s jjrayeḥ-a, war tuben ca zi řxedmet n ifassen nsen ařami war ɛebbden ɛad ccwaṭen d l’aṣnam n wureɣ d nnuqart d nnḥas d weẓru d ukeccuḍ, inni war ittwiřin, war ittesřin, war igguren,
REV 9:21 uca nitni war tuben ca zeg wenɣay nsen, řa zi tseḥḥart nsen uřa zi farq-ccɣeř nsen.
REV 10:1 Uca ẓriɣ ijj n lmalak nneɣni ihwa-dd zeg ujenna, tuɣa yarḍ aseynu uca tasřit n wenẓar n ujenna tbedd as x uzeǧif. Aɣembub nnes igga am tfuct, iḍaren nnes am ipilaren n tmessi.
REV 10:2 Iṭṭef deg ufus nnes ijj n wedlis [ittwannḍen] ameẓyan yarzem. Issars aḍar nnes afusi x řebḥar, aḍar nnes azeřmaḍ x temmurt,
REV 10:3 uca iřaɣa s tmijja tejhed, am wayrad ittzehharen, uca awarni řami dd-iřaɣa, jjin sebɛa n wajjajen ad sřen tmijjawin nsen.
REV 10:4 Řami kemmřen sebɛa n wajjajen nni awař nsen, tuɣa xseɣ ad t ariɣ, [maca] sřiɣ i yict n tmijja třaɣa-dd zeg ujenna wiss sebɛa: “Egg acemmiɛ x min nnan sebɛa n wajjajen, war t ttari ca.”
REV 10:5 Lmalak nni tuɣa ẓriɣ ibedd x řebḥar d temmurt, iksi afus nnes ɣar ujenna
REV 10:6 uca ijjuǧ ɣar wenni iddaren i řebda qaɛ, wenni iggin ajenna d min dayes u tammurt d min dayes uřa d řebḥar d min dayes: “War teqqim bu řweqt ɛad!”
REV 10:7 Maɣar deg wussan n lmalak wiss sebɛa, xmi ɣa isuḍ netta [di řbuq nnes], ggur ad ikmeř ssirr n AREBBI nni tuɣa ittbarreḥ i imsexxaren nnes, inabiyyen.
REV 10:8 Uca tmijja zeg ujenna i sřiɣ tessiweř ɣari ict n twařa nneɣnit, tenna: “Uyur, ksi adlis [ittwannḍen] ameẓyan yarezmen i iǧan deg ufus n lmalak nni ibedden x řebḥar d temmurt.”
REV 10:9 Uca uyureɣ ɣar lmalak, ttareɣ as ad ayi iwc adlis [ittwannḍen] ameẓyan. Inna ayi: “Ksi [adlis-a ameẓyan], teccid t uca ad issarzeg aɛeddis nnec, maca deg uqemmum nnec ad yiři [d amiẓid] am tamment.”
REV 10:10 Necc ksiɣ adlis ameẓyan [ittwannḍen] zeg ufus n lmalak uca cciɣ t. Tuɣa-t d amiẓid deg uqemmum inu, [maca] řami t cciɣ, yarzeg deg uɛeddis inu.
REV 10:11 [Xenni] inna ayi: “Temmewc as ɛawed řweqt maḥend ad tnebbid i waṭṭas n řegnus d temmura d iřsawen d ijeǧiden.”
REV 11:1 Uca immewc ayi ijj n uɣanim, igga am yijj n uqeṭṭab [n řeɛbar], uca ibedd [din] lmalak, inna: “Kkar uca ɛbar Zzawect Tameqqrant n AREBBI d uɛalṭar d yinni dayes iɛebbden,
REV 11:2 [maca] řemraḥ nni ɣar daxeř n Zzawect Tameqqrant, ejj i-t, war t ttɛebbar, minzi aqa immewc i řegnus uca nitni ad ɛefsen x tendint iqeddsen tnayen u arebɛin n iyuren.
REV 11:3 Necc ad wceɣ ṣṣulṭa i tnayen n řechud inu, maḥend ad nebban [s wawař n Arebbi] ařef u mitayen u-settin n wussan, am yarḍen txancet n wecḍan.”
REV 11:4 Nitni d tnayen n tzitunin d tnayen n řeqnadeř i ibedden zzat i wudem n Sidi n marra tammurt.
REV 11:5 Mařa din ca n yijjen ixs ad ten ihweř, ad teffeɣ tmessi zeg uqemmum nsen uca ad tecc řɛedyan nsen. Ammu i ɣa ttwanɣen inni ixsen ad ten ḍarren.
REV 11:6 Nitni ɣarsen ṣṣulṭa maḥend ad qqnen ajenna, ḥima war dd-iweṭṭi wenẓar deg wussan nni di ɣa nebban nitni, u ɣarsen ṣṣulṭa ḥima ad arren aman d idammen u ḥima ad seyyḥen tammurt s marra jjriḥect meřmi ma xsen.
REV 11:7 Xmi ɣa kemmřen cchadat nsen, ad dd-igeɛɛed řweḥc zi řaǧaɣ, ad kisen immneɣ, ad xasen iɣelleb uca ad ten ineɣ.
REV 11:8 Řxecbat nsen [ad iřint] deg wazzay n tendint tameqqrant umi qqaren s řmeɛna arruḥi nnes ‘Sadum’ d ‘Miṣra’, mani nɣin Siditsen x ṣṣalib.
REV 11:9 Uca zi ccuɛub d tqebbař d iřsawen d řegnus ad ẓaren [iwdan] řxecbat nsen, [řqedd n] třata n wussan d wezyen, war ttejjin řxecbat nsen ad ttwammarsent deg imeḍřan.
REV 11:10 Imezdaɣ n temmurt ad zzaysen farḥen, ad ɛeyyden, ad arezfen ijjen ɣar wenneɣni, ad ssekken ikaduten i wayawya, minzi tnayen n inabiyyen-a tuɣa ɣezzan deg imezdaɣ n temmurt.
REV 11:11 [Maca] awarni třata n wussan d wezyen yudef daysen Arruḥ Iddaren zi AREBBI uca kkaren, bedden x iḍaren nsen u tewḍa-dd xasen Arruḥ n Tudart uca tiggʷudi temɣar tewḍa-dd x [marra] inni ten iẓrin.
REV 11:12 Nitni sřin ict n tmijja tejhed [tᵉttřaɣa] zeg ujenna, teqqar asen: “Geɛɛdem-dd da!” Uca nitni geɛɛden ɣar ujenna deg useynu uca řɛedyan nsen ẓrin ten.
REV 11:13 Di tsaɛɛet nni imsar ijj n wenhezzi n temmurt d ameqqran. Ict n tɛeccart n tendint tehdem uca sebɛa-ařaf n yeryazen ɣarsen isem [icennɛen] mmuten s wenhezzi-ya n temmurt. Wi iqqimen, dewřen ggʷeden aṭṭas uca ssuɛřan zi AREBBI n ujenna.
REV 11:14 ‘Xzar, tnayen n wuctat ɛdunt, uca xzar ‘Uct!’ wiss třata ad dd-tas deɣya.
REV 11:15 Lmalak wiss sebɛa isuḍ [di řbuq nnes] uca kkarent-i-dd tmijjawin timeqqranin deg ujenna, ttřaɣant: “Tagelda n ddunect aqa-tt n AREBBI nneɣ u n Lmasiḥ nnes, uca Netta ad iḥkem am Ujeǧid i řebda qaɛ.”
REV 11:16 Arebɛa u ɛicrin n imɣaren, inni iqqimen zzat i AREBBI x řekrasi nsen igellden, wḍan s uɣembub nsen [ɣar temmurt] uca sejden i AREBBI,
REV 11:17 nnan: “Neccin nettqada Cek, a SIDI AREBBI, Amzemmar x kuřci, Cek d wenni iǧan d wenni tuɣa, aqa teksid jjehd nnec ameqqran deg ufus nnec, uca tebdid ad tḥekmed am Ujeǧid.
REV 11:18 Řegnus tuɣa xeyyqen xak, maca yusa-dd weɣḍab nnec, uca tiweḍ-dd řweqt n imettinen ḥima ad ttwaḥasben u ḥima ad temmewc řmunet i imsexxaren nnec, inabiyyen, u i imqeddasen u i yinni itteggʷeden Isem nnec, am imeẓyanen am yimeqqranen, u Cek ad tareyybed inni ittaredǧen tammurt.”
REV 11:19 Tᵉnnurzem Zzawect Tameqqrant deg ujenna ařami tᵉttwaẓar Ttabut n Řɛahd nnes di Zzawect Tameqqrant, uca kkaren wassamen d wajjajen d tmijjawin uca imsar ijj n wenhezzi n temmurt u [wḍan] [ibquqen] imeqqranen [n] tebruri.
REV 12:1 Xenni tᵉttwaẓar ict n řeɛřamet tameqqrant deg ujenna: ict n tmeṭṭut tyarḍ tafuct, u taziri sadu iḍaren nnes uca ɣares x uzeǧif nnes ijj n ttaj s tenɛac n itran.
REV 12:2 Tuɣa teksi ddeyset, tesɣuyyu s řewjeɛ, tᵉttwaḥṣar s unezbar n tarut.
REV 12:3 Xenni tᵉttwaẓar ict n řeɛřamet nneɣni deg ujenna, aqa din ict n řhaycet tameqqrant tazeggwaɣt am tmessi, ɣares sebɛa n izeǧifen d ɛecra n waccawen, uca x izeǧifen nnes sebɛa n ttijan.
REV 12:4 uca akennas nnes ifarḍ ict n ttuřut n itran zeg ujenna, tessẓareyyeḍ i-ten ɣar temmurt. Uca řhaycet tuɣa tbedd zzat i tmeṭṭut i ɣa yarwen, ḥima ad tṣarḍ Mmis xmi t-i-dd i ɣa taruw.
REV 12:5 Uca turuw-dd Mmis, Aryaz nni i ɣa iḥekmen x marra řegnus s uzeǧaḍ n wuzzař, uca Mmis immeksi deɣya ɣar AREBBI u ɣar řɛarc nnes.
REV 12:6 Maca tameṭṭut tarweř ɣar řexřa, ɣar mani tuɣa d as igga AREBBI amcan ḥima ad as sseccen, řqedd n wařef u-mitayn u-settin n wussan.
REV 12:7 Uca ikkar umenɣi deg ujenna. Mixayil d lmalakat nnes mmenɣent ak-d řhaycet, uca uřa d řhaycet d lmalakat nnes mmenɣent,
REV 12:8 maca nitni war jhiden ca uca war ittwif ɛad wemcan deg ujenna i nitni.
REV 12:9 Temmenḍar-dd řhaycet tameqqrant, nettat d ufiɣar nni tuɣa zic, qqaren as ‘ibřis’ niɣ ‘cciṭan’, wenni iɣekkwan marra tammurt, [wah], aqa immenḍar-dd x temmurt uca lmalakat nnes mmenḍarent-i-dd [ɛawed] akides.
REV 12:10 Uca sřiɣ ict n tmijja tameqqrant zeg ujenna teqqar s jjehd: “Aqa yusa-dd ufekki d ṣṣulṭa d Tgeldit n AREBBI nneɣ, minzi wenni iḍeřmen aytmatneɣ, aqa immenḍar, wenni i ten iḍeřmen ass d ǧiřet.
REV 12:11 Ɣellben xas s Idammen n Izmar, d wawař n cchadet nnes, uca nitni war ssɛizzen ca tudart nsen ař řmewt.
REV 12:12 X uyenni, farḥem, a ijenwan d yinni daysen izeddɣen! Uct x temmurt d řebḥar, ibřis aqa ihwa-dd ɣarwem s tefqeḥt nnes imɣaren aṭṭas, issen ad ɣares iqqim drust n řweqt waha.”
REV 12:13 Ařami řhaycet tufa ixef nnes temmenḍar ɣar temmurt, teḍfar tameṭṭut i dd-yurwen [Mmis] d Awtem.
REV 12:14 Mmewcen as i tmeṭṭut tnayen n wefriwen n ugider ameqqran, ḥima ad teḍwu ɣar wemcan nnes di řexřa, maḥend ad tᵉttwassecc dinni, ijj n řmijař n řweqt d řewqat d ijj n wezyen n yijj n řmijař n řweqt, mani war tt iẓarr ufiɣar.
REV 12:15 Afiɣar issusef zeg uqemmum nnes awarni i tmeṭṭut, igga ict n řḥemřet n waman am yeɣzar, ḥima ad tt awyen waman.
REV 12:16 Tammurt tɛawen tameṭṭut uca tarzem temmurt aqemmum nnes, teḥruw iɣzar wenni dd-issusfen řhaycet zeg uqemmum nnes.
REV 12:17 Uca řhaycet txeyyeq aṭṭas x tmeṭṭut uca tuyur ḥima ad temmneɣ ak-d yinni iqqimen zi zzariɛet nnes uca ak-d inni itteṭṭfen di tweṣṣa n AREBBI u di cchadet n Yasuɛ.
REV 13:1 Uca dewřeɣ beddeɣ x ijdi [ɣar tma] n řebḥar, uca ẓriɣ ijj n řweḥc igeɛɛed-dd zi řebḥar, ɣares ɛecra n waccawen d sebɛa n izeǧifen. X waccawen nnes ɛecra n ttijan uca x izeǧifen nnes ittwari xasen ijj n yisem n ttekfir.
REV 13:2 Řweḥc i ẓriɣ, yarwes deg uɣiřas, iḍaren nnes am yiḍaren n ddub, axenfuc nnes am uxenfuc n wayrad. Řhaycet tewca as jjehd nnes d řɛarc nnes uřa d ṣṣulṭa imɣaren.
REV 13:3 Ijjen zeg izeǧifen nnes igga axmi t wtin ař řmewt, xenni ittwassgenfa uyezzim nnes i iggin axmi iyzem ař řmewt, uca marra tammurt teḍfar řweḥc s utebhet ameqqran.
REV 13:4 Aqa nitni ɛebden řhaycet, minzi nettat tewca ṣṣulṭa i řweḥc, uca nitni ɛebden řweḥc, nnan: “Wi yarwesen di řweḥc?” u: “Wi izemmaren ad kides immɛařan?”
REV 13:5 Immewc as [i řweḥc] aqemmum nni issawařen s ukebbar u s uceqqef [di AREBBI], uca temmewc as ṣṣulṭa ḥima ad ixdem i yijj n řqedd n tnayen u-rebɛin n iyuren.
REV 13:6 Uca netta yarzem aqemmum nnes ḥima ad iceqqef di AREBBI, u ḥima ad iceqqef deg Yisem nnes u di Tzeddiɣt n yinni izeddɣen deg ujenna.
REV 13:7 Immewc as ṣṣulṭa maḥend ad immneɣ ak-d imqeddasen u maḥend ad xasen iɣelleb. Temmewc as ṣṣulṭa x marra tiqebbař d ccuɛub d yiřsawen d řegnus.
REV 13:8 Marra inni tuɣa izeddɣen di temmurt ad t ɛebden, inni umi war ittwazemmemen [ismawen nsen] deg Wedlis ittwanḍen n Tudart n Yezmar wenni umi ittwaɣarṣ qbeř tamarsiwt n ddunect.
REV 13:9 Wenni ɣar ǧan imezzuɣen, ejj i-t ad iseř.
REV 13:10 Mařa [din] ijjen wenni issidfen ɣar tmeḥbast, ad ittwandeh netta [s yixef nnes] ɣar tmeḥbast. Inni inɣin s ssif, ad ttwanɣen s ssif: aqa da [ittban-dd] l’iman d ṣṣbar n imqeddasen.
REV 13:11 [Xenni] ẓriɣ ijj n řweḥc nneɣni ittgeɛɛad-dd zi temmurt. Tuɣa ɣares tnayen n waccawen uca yarwes deg Izmar, [maca] issiweř am řhaycet.
REV 13:12 Tuɣa iḥekkem s marra ṣṣulṭa n řweḥc amezwaru zzates, yarra-dd tammurt d imezdaɣ nnes marra ad ɛebden řweḥc amezwaru, wenni iggenfan zeg uyezzim i iggin axmi iyzem ař řmewt.
REV 13:13 Netta ad igg řeɛřamat timeqqranin ařami i ɣa yarr timessi ad dd-tehwa zeg ujenna x temmurt qibač i [tiṭṭawin n] iwdan.
REV 13:14 Ad iɣwa inni izeddɣen di temmurt s řeɛřamat i d as immewcen ḥima ad tent igg qibač i [tiṭṭawin n] řweḥc [amezwaru], maḥend ad yini i yinni izeddɣen di temmurt ad kkaren ad ssbedden ijj n řexyař i řweḥc, wenni tuɣa iyzem s ssif, [maca] iddar [ɛad].
REV 13:15 Uca immewc as ad igg ijj n arruḥ i řexyař n řweḥc u ḥima ad igg belli marra inni war iɛebbden řweḥc, ad ttwanɣen.
REV 13:16 Uca ad igg maḥend ad temmewc i marra, i imeẓyanen d imeqqranen, i aytbab n wagřa d imezřaḍ, i ayt n ccan d isemɣan, ict n řmarka x ufus nsen afusi niɣ x tenyart nsen,
REV 13:17 maḥend uřa d ijj war izemmar ad iseɣ niɣ ad izzenz mɣir wenni x teǧa řmarka n yisem n řweḥc niɣ nnumru n yisem nnes.
REV 13:18 Danita teǧa tiɣit: wenni ɣar iǧa řeɛqeř, ejj i-t ad iḥseb nnumru n řweḥc, minzi netta d nnumru n ijj n bnadem uca nnumru nnes d setta-mya u-setta u-settin.
REV 14:1 Uca ẓriɣ, aqa Izmar ibedd-dd x wedrar n Ṣihyun, uca akides mya u-arebɛa u-rebɛin-ařef, inni x tenyart nsen yura Isem nnes d Yisem n Babas.
REV 14:2 Sřiɣ ict n tmijja tusa-dd zeg ujenna, am řḥess n waṭṭas n waman u am řḥess n wajjaj ameqqran, uca řḥess i sřiɣ tuɣa am yijj n bu-lharpa ittiraren di lharpa nnes.
REV 14:3 Aqa nitni ɣennjen [min iǧan] am yijj n yezři n uṣebbeḥ d jdid [qaɛ] zzat i řɛarc u zzat i arebɛa n imuddaren d imɣaren, uca uřa d ijj war izemmar ad iřmed izři [aya] n uṣebbeḥ mɣir mya u-arebɛa u-rebɛin-ařef, inni ittwafdin zi temmurt.
REV 14:4 Ina d inni war issefseden ixef nsen ak-d temɣarin, minzi nitni d iɛezriyyen imezdagen. Nitni ḍeffaren Izmar mani ma ikka. Aqa ina ittwafdin zeg iwdan [am] [ṣṣabet] tamezwarut i AREBBI u i Yezmar.
REV 14:5 Aqa war ittwiffi ca řɣecc deg uqemmum nsen, aqa war daysen bu řɛib.
REV 14:6 Uca ẓriɣ ijj n lmalak nneɣni tuɣa iṭṭaw di řwesṭ n ujenna, ɣares Řexbar Aṣebḥan i Řebda ḥima ad zzayes ibarreḥ i yinni izeddɣen di temmurt, i kuř řgens d cceɛb d teqbič d yiřes,
REV 14:7 uca inna s jjehd: “Ggʷedem AREBBI, wcem as-dd aɛuǧi, aqa tasaɛɛet n lḥisab nnes tiweḍ-dd. Sejdem i wenni iggin ajenna d temmurt d řebḥar d tařawin n waman.”
REV 14:8 Uca wenneɣni, wenni d wiss tnayen, iḍfar i-t, inna: “Aqa tewḍa, aqa tewḍa tendint tameqqrant Babil, i yejjin ad swen marra řegnus zi binu n tefqeḥt n farq-ccɣeř nnes.”
REV 14:9 Uca wenneɣni, ijj n lmalak wiss třata, iḍfar i-ten uca iřaɣa s jjehd: “Wenni iɛebden řweḥc d řexyař nnes d wenni iksin řmarka x tenyart nnes niɣ deg ufus nnes,
REV 14:10 d netta ad isu ɛawed zi binu n tefqeḥt n SIDI, wenni isswejden břa axeǧeḍ di řkas n weɣḍab nnes, uca ad ittwaɛeddeb s tmessi d řecbareyyet qibač i tiṭṭawin n lmalakat iqeddsen u qibač i tiṭṭawin n Yezmar.
REV 14:11 Uca ddexxan n uɛeddeb nsen ad iqqim igeɛɛed i řebda qaɛ. War din bu arraḥet ass d ǧiřet i wenni isejjden i řweḥc d řexyař nnes u i wenni iksin řmarka n yisem nnes.
REV 14:12 Aqa da ittban-dd ṣṣbar n imqeddasen, inni itteṭṭfen di tweṣṣa n AREBBI u ḥeṭṭan l’iman n Yasuɛ.”
REV 14:13 Uca sřiɣ ict n tmijja tᵉttřaɣa-dd zeg ujenna, teqqar: “Ari: Sseɛd n imettinen inni i ɣa mmten di Siditneɣ, zi řexxu tsawent!” “Wah, inna Arruḥ, maɣar ad areyyḥen zi řexdayem nsen!”, aqa řexdayem nsen ad ten ḍfarent.
REV 14:14 Uca ẓriɣ, aqa ijj n useynu d acemřař, uca x useynu iqqim xas wenni yarwesen deg ijj n Mmis n bnadem, ɣares ttaj n wureɣ x uzeǧif nnes u amjar iqḍeɛ deg ufus nnes.
REV 14:15 Uca ijj n lmalak nneɣni iffeɣ-dd zi Zzawect Tameqqrant uca iřaɣa s jjehd x wenni iqqimen x useynu: “Sekk-dd amjar nnec, mjar! Aqa tasaɛɛet n tmeyra tiweḍ-dd!”
REV 14:16 Uca Wenni iqqimen x useynu, issekk-dd amjar nnes ɣar temmurt uca tᵉttwamjar temmurt.
REV 14:17 Uca ijj n lmalak nneɣni iffeɣ-dd zi Zzawect Tameqqrant i iǧan deg ujenna, [uca uřa d] netta ɣares ijj n wemjar iqḍeɛ.
REV 14:18 Uca ijj n lmalak nneɣni wenni ɣar teǧa ṣṣulṭa x tmessi, iffeɣ-dd zeg uɛalṭar, uca iřaɣa-dd s jjehd x wenni ɣar iǧa wemjar iqḍeɛ, inna: “Sekk-dd amjar nnec iqeḍɛen, řqeḍ izekkunen n tzayarin n temmurt, minzi aḍiř nnes aqa yiweḍ.”
REV 14:19 Uca lmalak issekk-dd amjar nnes ɣar temmurt, iřqeḍ aḍiř n tzayart n temmurt, inḍar i-t di tsirt tameqqrant n weɣḍab n AREBBI.
REV 14:20 Ḥaryen di tsirt n uḍiř ař barra n tendint uca ruccen-dd idammen zi tsirt ařami iwḍen ɣar sřimat n yeysan, řqedd n ařef u-mitayen n ‘istadiyyen’, [ixs ad yini ɛřaḥař mitayen u-ɛicrin kilumitr].
REV 15:1 Uca ẓriɣ deg ujenna ict n řeɛřamet nneɣni, d tameqqrant d tanebhet: sebɛa n lmalakat nni dd-iwyen sebɛa n jjrayeḥ tineggura, minzi ikmeř zzaysent weɣḍab n AREBBI.
REV 15:2 Uca ẓriɣ ca ittemcabeh di řebḥar n zzaj, wenni ixeǧḍen ak-d tmessi, uca inni iɣellben x řweḥc d řexyař nnes d nnumru n yisem nnes, bedden x řebḥar n zzaj, ɣarsen lharpat n AREBBI.
REV 15:3 Nitni ɣennjen izři n uṣebbeḥ n Musa, amsexxar n AREBBI, d yezři n uṣebbeḥ n Yezmar, qqaren: “D timeqqranin d tṣebḥanin řexdayem nnec, a, SIDI AREBBI, Amzemmar x kuřci, řexdayem nnec d tasegda d tidett, a Ajeǧid n n zzmanat!
REV 15:4 Man wen war Cek itteggʷeden, a SIDI, man wen war issemɣaran Isem nnec? Cek weḥḥdek i iǧan d amezdag qaɛ, maɣar marra řegnus ad dd-asen, ad sejden zzatek, minzi Cek tbaned d amsegged di řeḥkamat nnec.”
REV 15:5 Awarni as ẓriɣ, aqa tennurzem Zzawect Tameqqrant n Tzeddiɣt n Cchadet deg ujenna,
REV 15:6 uca sebɛa n lmalakat nni ɣar ǧant sebɛa n jjrayeḥ ffɣent-i-dd zi Zzawect Tameqqrant, yarḍent řeqṭen azdad izdigen ittissiqen, uca ɣarsen x idmaren ijj n webyas n wureɣ.
REV 15:7 Uca ijjen zi arebɛa n imuddaren iwca asen i sebɛa n lmalakat sebɛa n ṭṭawyat, ccurent s weɣḍab n AREBBI, wenni d Tudart i řebda qaɛ. “Amin!”
REV 15:8 Uca tᵉttwaɛemmar Zzawect Tameqqrant s ddexxan [i dd-itteffɣen] zeg uɛuǧi n AREBBI u zi jjehd nnes. Uřa d ijjen war izemmar ad dd-yadef ɣar Zzawect Tameqqrant ař ɣa kkent qaɛ sebɛa n jjrayeḥ tinni dd-iwyen sebɛa n lmalakat.
REV 16:1 Uca sřiɣ ict n tmijja zi Zzawect Tameqqrant tᵉttřaɣa x sebɛa n lmalakat nni, tenna: “Uyurent, ttfarrɣent sebɛa n ṭṭawyat n weɣḍab n AREBBI x temmurt!”
REV 16:2 Wenni d amezwaru yuyur, ifarreɣ ṭṭawya nnes x temmurt. Uca idweř ijj n ubuɛrus d aɛeffan iqbeḥ ɣar iwdan i ɣar teǧa řmarka n řweḥc, inni isejden i řexyař nnes.
REV 16:3 Xenni ifarreɣ lmalak wiss tnayen ṭṭawya nnes di řebḥar uca idweř řebḥar am [idammen n ijj n] umettin, uca kuř řeɛmar iddaren di řebḥar immut.
REV 16:4 Xenni ifarreɣ lmalak wiss třata ṭṭawya nnes x iɣezran d tařawin, uca aman nsen dewřen d idammen.
REV 16:5 Uca sřiɣ i lmalak n waman iqqar: “Cek d amseggad, Cek d wenni iǧan d wenni tuɣa, d wenni d amezdag qaɛ, umi tkemmřed řeḥkamat-a ammu.
REV 16:6 Minzi nitni ssizzřen idammen n inabiyyen d imqeddasen, tewcid asen [ɛawed] ad swen idammen, maɣar ammu i d asen dd-iffeɣ.”
REV 16:7 Uca sřiɣ aqa aɛalṭar iqqar: “Wah, a SIDI AREBBI, Amzemmar x kuřci, řeḥkamat nnec d tidett d tasegda.”
REV 16:8 Xenni ifarreɣ lmalak wiss arebɛa ṭṭawya nnes x tfuct uca temmewc as [i tfuct], ḥima ad tecnef iwdan s tmessi.
REV 16:9 Uca cemḍen iwdan s řɛabuq imɣaren n tmessi uca ceqqfen deg Yisem n AREBBI wenni ɣar teǧa ṣṣulṭa x jjrayeḥ-a uca war tuben ca maḥend ad as wcin aɛuǧi.
REV 16:10 Xenni ifarreɣ lmalak wiss xemsa ṭawya nnes x řɛarc n řweḥc uca tewḍa-dd taǧest x tgeldit n řweḥc. Uca zeɛfen deg iřes nsen s ssibbet n řeḥriq
REV 16:11 uca ceqqfen deg Yisem n AREBBI n ijenwan s ssibbet n řeḥriq d ibuɛrusen nsen, [maca] war tuben ca zi řexdayem nsen.
REV 16:12 Xenni ifarreɣ lmalak wiss setta ṭṭawya nnes deg iɣzar ameqqran, [iɣzar n] Lfuraṭ uca uẓɣen waman nnes, ařami issewjed abrid i ijeǧiden inni dd ɣa yasen zi manis dd-tneqqar tfuct.
REV 16:13 Xenni ẓriɣ, aqa třata n řaryaḥ imengas am iqarqriwen [ffɣen-dd] zeg uxenfuc n řhaycet u zeg uqemmum n řweḥc u zeg uqemmum n unabi issxarriqen,
REV 16:14 maɣar nitni d řaryaḥ n ccwaṭen inni itteggen řeɛřamat i d igguren ɣar ijeǧiden n ddunect, maḥend ad ten ssmunen i umenɣi deg wass ameqqran n AREBBI, Amzemmar x kuřci.
REV 16:15 “Xzar, Necc ad dd-aseɣ am yijj n uceffar! Sseɛd n wenni i ɣa iqqimen ifaq, wenni i ɣa iḥḍan arruḍ nnes ḥima war iggur d aɛaryan, war ittwaẓar useḍḥi nnes.”
REV 16:16 Uca issmun i-ten ɣar wemcan umi ttřaɣan s Tɛibranit ‘Megiddu’.
REV 16:17 Xenni ifarreɣ lmalak wiss sebɛa ṭṭawya nnes x řeɛwin uca tusa-dd ict n tmijja tejhed zi Zzawect Tameqqrant, zi zzat n řɛarc, teqqar: “Aqa ittwakemmeř!”
REV 16:18 Uca usin-dd wassamen d wajjajen, uca imsar ijj n wenhezzi n temmurt d ameqqran, war temsar ammu zeg wami iǧa bnadem di temmurt, ammu i imɣar.
REV 16:19 Tandint tameqqrant tewḍa tebḍa x třata n tseqqar uca marra tineddam n řegnus hedment uca AREBBI iɛqeř x [tendint] tameqqrant Babil, ḥima ad as iwc řkas n binu n tefqeḥt n weɣḍab nnes.
REV 16:20 Uca kuř tagzirt tarweř, war ttwifin ca idurar [ɛad],
REV 16:21 wḍan-dd ibquqen imeqqranen n tebruri zeg ujenna x iwdan, tuɣa ddqeř nsen anect n ict n ‘talint’, uca iwdan ceqqfen di AREBBI zi ssibbet n jjriḥect n tebruri, minzi jjriḥect nnes tuɣa temɣar aṭṭas.
REV 17:1 Uca yusa-dd ijjen zi sebɛa n lmalakat, tinni ɣar iǧa sebɛa n ṭṭawyat, issiweř akidi, inna: “As-dd, ad ac ssecneɣ řḥukm x temɣart n farq-ccɣeř i iqqimen x waṭṭas n waman,
REV 17:2 tenni zi ssfesden ijeǧiden n temmurt ixef nsen, uca marra imezdaɣ n temmurt scaren s binu n farq-ccɣeř nnes.”
REV 17:3 Indeh ayi di Arruḥ ɣar řexřa uca ẓriɣ ict n tmeṭṭut tenya x ijj n řweḥc azeggʷaɣ iḥedqen, iccuren s ismawen n ttekfir, tuɣa ɣares sebɛa n izeǧifen d ɛecra n waccawen.
REV 17:4 Tuɣa tameṭṭut tyarḍ taqendurt turjuwanit d tazeggwaɣt iḥedqen teqqen s wureɣ d yeẓra iɣřan d tyaqutin. Tuɣa ɣares deg ufus nnes ijj n uɣarraf n wureɣ iccur s řexmej u s nnɛi n farq-ccɣeř nnes.
REV 17:5 Ittwari x tenyart nnes ijj n isem: ‘Ssirr n Babil tameqqrant, yemmatsent n temɣarin n farq-ccɣeř d marra nnɛawat n temmurt’.
REV 17:6 Uca ẓriɣ tameṭṭut tescar s idammen n imqeddasen u s idammen n yinni icehhden x Yasuɛ. Ařami tt ẓriɣ, ttbehteɣ aṭṭas.
REV 17:7 Inna ayi lmalak: “Mayemmi tᵉttbehted? Necc ad cek ssargbeɣ x ssirr n tmeṭṭut d řweḥc s sebɛa n izeǧifen d ɛecra n waccawen, wenni tt yarebbun.
REV 17:8 Řweḥc i teẓrid, d wenni tuɣa d wenni war iǧin, ad igeɛɛed zi řebḥar, ad iweddar. Uca ad tbehten imezdaɣ n temmurt, inni isem nsen war ittwazemmem ca deg Wedlis ittwanḍen n Tudart zeg wami ittwagg dsas n ddunect, [ad tbehten] xmi ɣa ẓaren řweḥc wenni tuɣa, d wenni war iǧin, [ɛad] ad dd-iqarreb.
REV 17:9 Aqa da řmeɛna [nnes] i wenni ɣar teǧa řefhamet: sebɛa n izeǧifen aqa d sebɛa n idurar min xef teqqim tmeṭṭut.
REV 17:10 Aqa-ten uřa d sebɛa n ijeǧiden, xemsa zzaysen wḍan, ijjen aqa iǧa [ɛad], d wenneɣni aqa-t ɛad war dd-yusi. Mařa netta ad dd-yas, ad as immewc drus [n řweqt] i iqqimen [ɛad].
REV 17:11 Uca řhaycet d řweḥc nni dd-yiwi u war iǧi d wenni, [řhaycet nni] aqa-tt d [ajeǧid] wiss tmenya, [maca] ad teffeɣ zi sebɛa nni uca ad thellek.
REV 17:12 Ɛecra n waccawen i teẓrid, aqa d ɛecra n ijeǧiden, war ṭṭifen tagelda ɛad, maca ad ṭṭfen ṣṣulṭa n ijeǧiden řqedd n ict n tsaɛɛet ak-d řweḥc.
REV 17:13 Nitni ɣarsen array d ijjen, ad wcen jjehd nsen d ṣṣulṭa nsen i řweḥc.
REV 17:14 Ina ad mmenɣen ak-d Izmar uca Izmar ad xasen iɣřeb minzi Netta d Sidi x [marra] isiditen d Ujeǧid x [marra] ijeǧiden, u inni akides [iǧan] aqa-ten d inni ittwařaɣan d yinni ittwafarzen d imtiqqan.”
REV 17:15 Inna ayi [ɛawed]: “Aman i teẓrid i x teqqim temɣart n farq-ccɣeř, aqa aten d řegnus, d ibarruten n řɣaci, d ccuɛub, d iřsawen.
REV 17:16 Uca ɛecra n waccawen i teẓrid x řweḥc, nitni ad carhen tamɣart n farq-ccɣeř ad tt areddǧen, ad tt arren d taɛeryant, ad ccen aysum nnes, ad tt sscemḍen s tmessi.
REV 17:17 Maɣar AREBBI iwca asen deg wuřawen nsen ḥima ad ggen nneyyet [n řweḥc], u maḥend ad tt ggen s array d ijjen, uca ad wcen tagelda nsen i řweḥc ař ɣa ttwakemmřen awařen n AREBBI.
REV 17:18 Uca tameṭṭut i teẓrid, nettat d tandint tameqqrant, tenni ɣar teǧa tgelda x ijeǧiden n temmurt.”
REV 18:1 Awarni as ẓriɣ ijj n lmalak nneɣni ihekkwa-dd zeg ujenna, ɣares ṣṣulṭa tameqqrant, uca ṭṭya n uɛuǧi nnes tegga tafawt kuřci i temmurt.
REV 18:2 Netta iřaɣa s tmijja tejhed, iqqar: “Aqa tewḍa, tewḍa tendint tameqqrant Babil, tedweř d tazeddiɣt i ccwaṭen d řeḥbes i kuř řaryaḥ amengus amenɛi,
REV 18:3 minzi tessxeǧeḍ binu n farq-ccɣeř nnes i marra řegnus, u minzi ijeǧiden n temmurt aqa ssfesden ixef nsen zzayes, u minzi isebbaben n temmurt dewřen d twajjar s jjehd n uṭemmes nnes n wagra.”
REV 18:4 Uca sřiɣ i tmijja nneɣni třaɣa-dd zeg ujenna: “Ffeɣ zzayes, a řgens inu, ḥima war ttiřin ddnub nnes x yiri nnec uca war tkessid zi jjrayeḥ nnes,
REV 18:5 minzi ddnub nnes aqa iwḍen ɣar ujenna, uca AREBBI aqa iɛqeř x řmuɛṣiyyet nnes.
REV 18:6 Arrem-dd xas am mammec dd-tarra nettat, arrem-dd xas s uḍeffus ɛlaḥsab řexdayem nnes, xeǧeḍ as s uḍeffus deg uɣarraf nni tuɣa txeǧeḍ nettat.
REV 18:7 Xeřfem as-dd aɛeddeb d wecḍan anect tuɣa nettat tessɛuǧi u tessgeɛɛed ixef nnes minzi tenna deg wuř nnes: ‘Aqa qqimeɣ am tjeǧidt, war ǧiɣ d tajjač, uca acḍan war t ẓarreɣ ca!’
REV 18:8 S uyenni deg ijj n wass ad xas wḍant marra jjrayeḥ nnes: řmewt, acḍan d řaẓ, uca ad tᵉttwacmeḍ di tmessi, minzi SIDI, d wenni xas i ɣa iḥekmen, aqa ijhed.
REV 18:9 Ijeǧiden n temmurt, inni kides iggin farq-ccɣeř u ssgeɛɛden ixef nsen, ad xas run, ad xas wten agejdur xmi ɣa ẓaren ddexxan n tmessi nnes.
REV 18:10 Nitni ad qqimen bedden ɣar řaggʷaj zi teggʷudi n uɛeddeb nnes, qqaren: ‘Uct, uct, uct, xam, a tandint tameqqrant, Babil, tandint ijehden, minzi aqa yusa-dd řḥukm nnem deg ict n tsaɛɛet!’”
REV 18:11 Isebbaben n temmurt ad xas run, ad ceḍnen, minzi uřa d ijj war issiɣ ɛad sseřɛet nsen:
REV 18:12 sseřɛet n wureɣ d nnuqart d yeẓra yiɣřan d tyaqutin d řeqṭen d arjuwani d řeḥrir azeggʷaɣ iḥedqen d ɛřam kuř akeccuḍ ittfuḥen d ɛřam kuř řeqcuɛ zi řɛaj d ɛřam kuř řeqcuɛ zeg ukeccuḍ iɣřan d nnḥas d wuzzař d řmarmur
REV 18:13 d řqarfa d řebxur d mirru d jjawi d binu d zzect n zzitun d aren n ssmid d wuǧi d yeysan d ikarruten uřa d arrimat d řeɛmur n iwdan.
REV 18:14 Aqa řɣiǧet i di tuɣa ittmeẓri řeɛmar nnem, aqa tiggʷej xam, uřa d marra min tuɣa ɣarem d agřa d min ittissiqen, aqa iweddar, war t tẓarred ɛemmarṣ [ɛad].
REV 18:15 Isebbaben n řeḥwayej-a, inni idewřen zzaysent d twajjar, war tent ttifen ɛad, uca ad qqimen ɣar řaggʷaj zi teggʷudi n uɛeddeb nnes, am ttrun u am ceṭṭnen,
REV 18:16 ad inin: “Uct, uct xam, a cem, tandint tameqqrant i yarḍen řeqṭen d arjuwani d azeggwaɣ iḥedqen iqqen s wureɣ d yeẓra iɣřan d tyaqutin,
REV 18:17 s minzi deg ict n tsaɛɛet aqa iweddar wagřa ameqqran nni!” Marra inni ineddhen iɣarruba d marra inni ittekken [x řebḥar] deg iɣarruba d marra ibeḥriyyen d marra inni ittsebbaben di řebḥar qqimen bedden ɣar řaggʷaj.
REV 18:18 Nitni sɣuyyen umi ẓrin ddexxan n tmessi nnes, nnan: “Wi izemmaren ad imqudda ak-d tendint-a tameqqrant?”
REV 18:19 Ssuyusen ucař x izeǧifen nsen uca sɣuyen, am ttrun u am ttecḍinen, nnan: “Uct, uct xam, a cem, tandint tameqqrant nni di dewřen d twajjar marra inni ɣar iǧa iɣarruba di řebḥar, s ubarru n wagřa nnes, minzi deg ict n tsaɛɛet tweddar!”
REV 18:20 “Farḥet zzayes, a ajenna, u kenniw, a imqeddasen d rrusul d inabiyyen, minzi AREBBI aqa issuffeɣ-dd řeḥkamet nnes xas!”
REV 18:21 Uca ijj zi lmalakat nni issgeɛɛed ijj n weẓru ameqqran anect n teṣḍart n tsirt, inḍar i-t di řebḥar, iqqar: “Ammu s jjehd ad tᵉmmenḍar tandint tameqqrant Babil uca war tᵉttwifi ɛad ɛemmarṣ!
REV 18:22 Řḥess n lharpa d usuḍi deg uyicc n icarri, d řḥess n ɛřam kuř aɣennej u n yinni ittsuḍen di řbuq, war ittwaseř ɛad dayem.
REV 18:23 Ɛemmarṣ ad dayem tᵉttwaẓar ɛad ṭṭya n řefnar, uca uřa d řḥess n wesři d řḥess n tesřit war ittwaseř ɛad dayem. Isebbaben nnem tuɣa aten d imeqqranen n temmurt, minzi s tseḥḥart nnem, aqa txedɛed řegnus marra.
REV 18:24 Aqa ittwaf dayem idammen n inabiyyen d imqeddasen, inni ittwanɣen di temmurt.”
REV 19:1 Awarni as sřiɣ ijj n řḥess ameqqran n waṭṭas n řɣaci deg ujenna, nnan: “Hallilu-Yah! Asenjem d uɛuǧi d jjehd aqa aten ɣar AREBBI nneɣ,
REV 19:2 minzi řeḥkamat nnes mɣir d tidett d řḥeqq, umi iḥaseb x temɣart n farq-ccɣeř, tenni yareddǧen ddunect s farq-ccɣeř nnes, uca Netta yuɣa tasɣart x idammen n imsexxaren nnes i yumsen ɣar ifassen nnes.”
REV 19:3 Nnan i [umur] wiss tnayen: “Hallilu-Yah!” Uca ad yaři ddexxan nnes ɣar ujenna i řebda qaɛ.
REV 19:4 Uca arebɛa u-ɛicrin n imɣaren d arebɛa n imuddaren wḍan ɣar temmurt, sejden i AREBBI nneɣ wenni iqqimen x řɛarc, nnan: “Amin, Hallilu-Yah!”
REV 19:5 Uca tusa-dd ict n tmijja zi řɛarc, tenna: “Semɣarem AREBBI nneɣ, a kenniw marra imsexxaren nnes, u marra inni itteggʷeden Isem nnes, am umeẓyan am umeqqran!”
REV 19:6 Uca sřiɣ aqa nnan am s tmijja n ubarru n řɣaci, am s řḥess n waṭṭas n waman, am s zzhir n wajjajen imeqqranen: “Hallilu-Yah, minzi SIDI AREBBI, Amzemmar x kuřci, aqa iḥekkem.
REV 19:7 Ejj ad nfarḥ, ad nesřiwřiw, ad as negg aɛuǧi, maɣar Urar n Yezmar yiweḍ-dd, uca tamɣart nnes aqa tḥezzem,
REV 19:8 uca temmewc as ad tyarḍ arruḍ zi řqeṭṭan ifsusen izdigen ittissiqen, minzi řqeṭṭan nni d řexdayem iseggden n imqeddasen.”
REV 19:9 Nitni nnan ayi: “Ari: Sseɛd n yinni ittwaɛarḍen ɣar umensi n Wurar n Izmar.’ [Xas uca] inna ayi ca n yijjen: “Ina d awařen n tidett n AREBBI.”
REV 19:10 Uca wḍiɣ as ɣar iḍaren nnes ḥima ad t ɛebdeɣ, [maca] netta inna ayi: “Lla, war ttegg ca man aya! Aqa necc d amsexxar amɛacar am cek d aytmac inni ɣar teǧa cchadet n Yasuɛ. Ɛebdet AREBBI, minzi cchadet n Yasuɛ nettat d Arruḥ n min ittwanabben.”
REV 19:11 [Awarni aya] ẓriɣ ajenna innurzem, u xzar, aqa din ijj n uyis d acemřař d Wenni xas inyin, qqaren as ‘Dayes řaman!’, ‘Dayes tidett!’, uca Netta ad iḥaseb u ad immneɣ s tsegda.
REV 19:12 Tuɣa tiṭṭawin nnes amecnaw iḥudaq n tmessi, uca ɣares x uzeǧif nnes aṭṭas n ttijan, uca yura xas Isem i war t issin ḥed mɣir Netta waha.
REV 19:13 Tuɣa yarḍ ijj n useřham ittwaruccen s idammen, uca wa d Isem nnes: ‘Awař n AREBBI’.
REV 19:14 Řɛeskarat n ujenna ḍfaren t-i-dd x yeysan icemřařen, arḍen řqeṭṭan d acemřař izdig.
REV 19:15 Ffɣen-dd řesyuf iqeḍɛen zeg iqemmumen nsen maḥend ad zzaysen nɣen řegnus, u Netta ad ten iḥḍa s uzeǧaḍ n wuzzař, u Netta [simant nnes] ad iɛfes di tsirt n weɣḍab n AREBBI, Amzemmar x kuřci.
REV 19:16 X warruḍ nnes u x tmeṣṣaḍin nnes yura xasen Isem-a: ‘Ajeǧid x marra ijeǧiden’, ‘Sidi x marra řḥukkam’.
REV 19:17 Uca ẓriɣ ijj n lmalak nneɣni ibedd di tfuct. Netta iřaɣa s jjehd, inna i marra ijḍaḍ iṭṭawen di řwesṭ n ujenna: “Asettiw-d, munettiw-dd ɣar umensi ameqqran n AREBBI,
REV 19:18 ḥima ad teccem aysum n ijeǧiden d weysum n imeqqranen x wařef d weysum n yinni ijehden d weysum n iysan d yinni xasen inyin, d weysum n iḥurriyyen d isemɣan, am n imeẓyanen am n imeqqranen.”
REV 19:19 Uca ẓriɣ řweḥc ak-d řɛeskarat nnes d ijeǧiden n temmurt d iɛeskarriyyen nsen, inni imunen ḥima ad mmenɣen ak-d Wenni inyin x uyis, u ak-d iɛeskariyyen nnes.
REV 19:20 Aqa ittwaṭṭef řweḥc ak-d unabi issxarriqen, wenni iggin zzates řeɛřamat nni zi tuɣa iɣecc inni iksin řmarka n řweḥc uca sejden i řexyař nnes. Nitni s tnayen idsen ttwammenḍaren di řebḥar n tmessi ittcefcufen ɛawed s řecbareyyet.
REV 19:21 Maca wi iqqimen ttwanɣen s wuzzař i dd-ikkin zeg uqemmum n wenni inyin x uyis. Uca marra ijḍaḍ ittkeccaḍen jjiwnen s weysum nsen.
REV 20:1 Uca ẓriɣ ijj n lmalak nneɣni ihwa-dd zeg ujenna, ɣares tasarut n tesraft i iǧan sadu i temmurt d ict n ssnesřet tameqqrant deg ufus nnes.
REV 20:2 Netta iṭṭef řhaycet, afiɣar awessar, wenni d ibřis d cciṭan uca icarf i-t i yijj n řqedd n wařef n iseggʷusa,
REV 20:3 uca inḍar i-t di tesraft sadu temmurt, ibelleɛ xas uca igga xas acemmiɛ, ḥima war ittɣecci ɛad řegnus. Awarni man aya ad ittwaḍřeq ɣar cwayt n řweqt.
REV 20:4 Necc ẓriɣ řekrasi n ijeǧiden uca nitni ssɣimin ixef nsen xasen, uca immewc asen řḥukm. Aqa řeɛmur-a - n yinni umi kksen izeǧifen nsen di ṭṭweɛ n cchadet n Yasuɛ d wawař n AREBBI, war sejden i řweḥc uřa i řexyař, war ṭṭifen ca řmarka x tenyart nsen uřa deg ufus nsen - [aqa řeɛmur-a] ddaren u ḥekmen ak-d Lmasiḥ ařef iseggʷusa.
REV 20:5 Ta d tanukra tamezwarut.
REV 20:6 Sseɛd d umqeddas n wenni i ɣa iṭṭfen tasɣart di tnukra tamezwarut. Řmewt wiss tnayen war ɣares tiři bu ṣṣulṭa xasen, maca nitni ad iřin d ikehhanen n AREBBI u n Lmasiḥ uca ad kis ḥekmen ařef n iseggʷusa.
REV 20:7 Xmi ɣa iqfeř ařef n iseggʷusa, ad ittwaḍřeq cciṭan zi řeḥbes nnes,
REV 20:8 uca ad dd-iffeɣ ḥima ad iɣecc marra řegnus inni iǧan ɣar arebɛa n tɣemmura n temmurt, [Ha]juj d Majuj, ad ten issmun i umenɣi, u řqedd nsen am yejdi n řebḥar.
REV 20:9 Ḥarrcen-dd zi ṭṭarf n temmurt uca nnḍen as i řmargeḥ n řɛeskar n imqeddasen d tendint iɛizzen, uca tewḍa-dd tmessi zeg ujenna, zi [zzat] AREBBI, uca tecca i-ten.
REV 20:10 Uca ibřis, wenni tuɣa ten iɣwan, aqa immenḍar di řebḥar n tmessi ittcefcufen s řecbareyyet mani iǧa řweḥc d unabi issxarriqen uca ad ttwaɛeddben ass d ǧiřet i řebda qaɛ.
REV 20:11 Uca ẓriɣ ijj n řɛarc d ameqqran d acemřař d Wenni xas iqqimen, aqa zi arendad n uɣembub nnes tarweř temmurt d ujenna, [maca] war d asen iqqim bu wemcan.
REV 20:12 Necc ẓriɣ imettinen bedden zzat i řɛarc, imeqqranen d imeẓyanen. Aqa nnurzmen idlisen [ittwanḍen] uca innurzem wedlis [ittwanḍen] nneɣni, [Adlis ittwanḍen] n Řḥukm. Uca ittwaḥkem x imettinen zi min yuran deg wedlis [ittwanḍen] x řeḥsab n řexdayem nsen.
REV 20:13 Uca řebḥar iwca imettinen inni tuɣa aten dayes, uca řmewt d řaxart wcint imettinen inni tuɣa aten daysent, uca ittwaḥkem xasen, kuř ijjen anect n řexdayem nnes.
REV 20:14 Řmewt d řaxart mmenḍarent di řebḥar n tmessi. Ta d řmewt wiss tnayen.
REV 20:15 Mařa ittwaf ḥed war ittwazemmem deg Wedlis [ittwanḍen] n Tudart, immenḍar di řebḥar n tmessi.
REV 21:1 Uca ẓriɣ ajenna n jdid d ict n temmurt n jdid, maɣar ajenna amezwaru d temmurt tamezwarut tuɣa ɛdun, řebḥar war iqqim ɛad.
REV 21:2 Necc ẓriɣ tandint iqeddsen, Urcalim n jdid, tehwa-dd zeg ujenna zi zzat AREBBI, tegga am tesřit izehhjen i wesři.
REV 21:3 Uca sřiɣ ict n tmijja tᵉttřaɣa-dd zeg ujenna s jjehd: “Xẓar, Aqiḍun n AREBBI aqa-tt jar iwdan, uca Netta ad ɣarsen izdeɣ. Nitni ad iřin d řgens nnes, uca AREBBI simant nnes ad ɣarsen yiři, uca ad yiři d AREBBI nsen.
REV 21:4 Ad asen issiẓeɣ kuř imeṭṭan zi tiṭṭawin nsen, uca war tᵉttiři ɛad řmewt d wecḍan d ucetci d řeḥriq.”
REV 21:5 U xmi ggureɣ, inna ayi wenni iqqimen x řɛarc: “Xẓar, ad ggeɣ marra d jdid!” [Xas uca] inna ayi: “Ari: Awařen-a aqa daysen řaman d tidett.”
REV 21:6 Netta inna ayi: “Aqa ittwakemmeř. Necc d Alif u Necc d Taw, Necc d Beddu d Akemmeř. Wenni iffuden ad as wceɣ ad isu baṭeř zi řɛunṣar n Waman n Tudart.
REV 21:7 Wi ɣa iɣellben ad iwart man aya, uca Necc ad iřiɣ d AREBBI nnes, u netta ad yiři d mmi.
REV 21:8 Maca inni ittcekkan, d lkuffar, d iɛeffanen, d imexmaj, d yinni ineqqen, d yinni iggin taseḥḥart, d ayt n farq-ccɣeř d yinni iɛebbden l’aṣnam d marra ayt n bu-ixarriqen, ad tiři tesɣart nsen di řebḥar ittcefcufen s tmessi d řecbareyyet, ta d řmewt wiss tnayen.”
REV 21:9 Uca yusa-dd ijjen zi sebɛa n lmalakat, tinni ɣarsent sebɛa n ṭṭawyat ccurent s sebɛa n jjrayeḥ tineggura, issiweř akidi, inna: “As-dd, ad ac ssecneɣ tasřit, tamɣart n Yezmar.”
REV 21:10 Indeh ayi di Arruḥ ɣar ijj n wedrar d ameqqran yuɛřan aṭṭas uca isscen ayi tandint iqeddsen, Urcalim, am dd-tehwa zeg ujenna, zi zzat n AREBBI.
REV 21:11 Aɛuǧi n AREBBI tuɣa ɣares, uca ṭṭya nnes tᵉttissiq am yiẓra iɣřan aṭṭas, am weẓru n yaspis nni dd-iḍharen am ukristal.
REV 21:12 Iquwwar as dd ijj n weɣbar d ameqqran yuɛřa, ɣares tenɛac n tewwura u tenɛac n lmalakat [tuɣa ttbeddant] ɣar tiwwura. U ttwarin ismawen [x tiwwura nni], aqa ismawen n tenɛac n tqebbař n Israil.
REV 21:13 [Aqa din] třata n tewwura ɣar manis d tneqqar tfuct u ɣar ccamal třata n tewwura u ɣar ljanub třata n tewwura u [aqa din] třata n tewwura ɣar mani tɣeǧi tfuct.
REV 21:14 Aɣbar n tendint ibedd x tenɛac n dsusa ttwarin xasen tenɛac n ismawen n rrusul n Mmis [n AREBBI].
REV 21:15 Wenni tuɣa akidi issawařen, ɣares ijj n uɣanim n řeɛbar ḥima ad [zzayes] iɛbar tandint d weɣbar nnes.
REV 21:16 Tandint tuɣa temmars [din am] ijj n ukwadrun, tazuggart nnes am tiru nnes. Netta iɛbar tandint s [uɣanim nnes] n řeɛbar: tenɛac-ařef n ‘istadiyyen’, [ɛřaḥař ařfayen u mitayen kilumitr]. Tazuggart nnes d tiru nnes d řuɛřa nnes d icten.
REV 21:17 Iɛbar aɣbar nnes: mya u-arebɛa u-rebɛin n iɣaǧen, aqa-t d řqedd n ijj n bnadem, aqa-t n lmalak.
REV 21:18 Aɣbar nnes ggin t s yaspis, u tandint ggint s wureɣ iṣfan, ittban am zzaj iṣfan.
REV 21:19 Dsusa n weɣbar n tendint tuɣa ttwazewwqen kuřci s iẓra iɣřan. Tuɣa dsas amezwaru n [weẓru n] yaspis, wenni wiss tnayen n ṣaffir, wenni wiss třata n xalcidun, wenni wiss arebɛa n smiralda,
REV 21:20 wenni d wiss xemsa n sarduniks, wenni wiss setta n sardiyus, wenni wiss sebɛa n weẓru n wureɣ, wenni wiss tmenya n biril, wenni wiss tesɛa n tupas, wenni wiss ɛecra n krisupras, wenni wiss ḥiṭac n yazint uca wenni wiss tenɛac n umetist.
REV 21:21 Tenɛac n tewwura d tenɛac n tyaqutin, ict ict. Kuř icten [zi tewwura] nni tuɣa zeg ict n tyaqut. Maca abrid yiriwen n tendint tuɣa-t n wureɣ iṣfan, am zzaj iṣfan.
REV 21:22 War ẓriɣ ca Zzawect dayes minzi SIDI AREBBI, Amzemmar x kuřci, Netta Simant nnes d Zzawect nnes.
REV 21:23 Izmar d tendint war ḥdajen ca tafuct uřa d taziri, ḥima ad xas ssarɣent, minzi aɛuǧi n AREBBI yareqq dayes uca Izmar d Řefnar nnes.
REV 21:24 Řegnus ad uyuren s tfawt nnes uca ijeǧiden n temmurt ad ɣares ssidfen aɛuǧi [nsen].
REV 21:25 Tiwwura nnes war ttwaqqnent ɛemmarṣ s uziř, minzi ǧiřet war tᵉttɣimi ca din.
REV 21:26 Nitni ad awyen ɣares aɛuǧi d ccan n řegnus.
REV 21:27 Ɛemmarṣ ad dayes tadef ca n řḥajjet tamengust niɣ wenni iggin nnɛawat niɣ wenni issxarriqen, mɣir inni ittwazemmemen deg Wedlis [ittwanḍen] n Yezmar waha.
REV 22:1 Uca netta isscen ayi ijj n iɣzar izdig n Waman Iddaren, d amezdag, iṣfa am ukristal, i dd-itteffɣen zi řɛarc n AREBBI u n Yezmar.
REV 22:2 Di řwesṭ n wazzay nnes, x tma-ya u x tma nni n iɣzar, tuɣa Tacejjart n Tudart tenni tessenḍay řɣiǧet tenɛac [n twařawin]. Di mkuř ayur tettic řɣiǧet nnes d tifray nnes i usgenfu n řegnus.
REV 22:3 War dayes tᵉttiři ɛad nneɛřet. Ad dayes yiři řɛarc n AREBBI u n Yezmar uca imsexxaren nnes ad xas sexxaren.
REV 22:4 Nitni ad ẓaren udem nnes, Isem nnes ad yiři x tenyarin nsen.
REV 22:5 War din tᵉttiři ǧiřet uca nitni war tteḥdijen ɛad ṭṭya n řefnarat niɣ n tfawin niɣ n tfawt n tfuct, minzi SIDI AREBBI ad asen igg tafawt uca ad yiři d Ajeǧid nsen i řebda qaɛ.
REV 22:6 [Xas uca] inna ayi: “Awařen-a daysen řaman d tidett! SIDI, AREBBI n Arruḥ n inabiyyen iqeddsen, aqa issekk lmalak nnes, ḥima ad isscen i imsexxaren nnes min i ɣa yiřin deɣya.”
REV 22:7 “Xzar Necc ad dd-aseɣ deɣya! Sseɛd n wenni ittᵉṭṭfen deg wawařen n nnubuwat n Wedlis-a ittwanḍen.”
REV 22:8 Necc, Yuḥanna, aqa ẓriɣ u sřiɣ timesřayin-a. Uca řami tent ẓriɣ u sřiɣ, wḍiɣ ɣar iḍaren n lmalak wenni d ayi issecnen timesřayin-a, ḥima ad [as] ɛebdeɣ.
REV 22:9 [Maca] netta inna ayi: “Ḥḍa, lla, war ttegg man aya, maɣar necc d amsexxar amɛacar nnec, u n aytmac, inabiyyen, uřa n yinni ittᵉṭṭfen deg wawařen n Wedlis-a ittwanḍen. Ɛebdet AREBBI!”
REV 22:10 [Xas uca] inna ayi: “War ttegg acemmiɛ x wawařen i ittwanabben deg Wedlis-a ittwanḍen, minzi řweqt aqa tiweḍ-dd.”
REV 22:11 “Wenni itteggen min war iseggden, ad igg min war iseggden ktar, amengus ad idweř d amengus ktar, amseggad ad igg tasegda ktar uca amqeddas ad idweř d amqeddas ktar.”
REV 22:12 “Xzar, Necc ad dd-aseɣ deɣya uca řmunet inu aqa-tt akidi, ḥima ad xeǧṣeɣ kuř ijjen anect n řxedmet nnes.
REV 22:13 Necc d Alif u Necc d Taw, d Amezwaru d Aneggaru, d Beddu d Akemmeř.”
REV 22:14 “Sseɛd nsen i yinni itteggen tiweṣṣa nnes. Ad ɣarsen tiři ṣṣulṭa x Tcejjart n Tudart uca ad dd-adfen ɣar tendint zi tewwura nnes.
REV 22:15 Barra iǧan inni itteggen farq-ccɣeř d yinni ineqqen d yinni iɛebbden l’aṣnam d yinni daysen řexmej d yinni ittseḥḥaren d marra imwařawen d inni itteggen min i dd-itteffɣen zeg uxarriq.”
REV 22:16 “Necc, Yasuɛ, aqa ssekkeɣ lmalak inu maḥend ad xawem iched man aya zzat i tmesmunin. Aqa d NECC, d Aẓwar d Zzariɛet n Dawud, d Wenni akides, d Itri n Řefjar yareqqen.”
REV 22:17 Arruḥ d tesřit qqaren: “As-dd!” Uca ejj wenni t isřin, ad yini: “As-dd!” “D wenni ifuden, ejj i-t ad dd-yas, ad isu Aman Iddaren baṭeř.”
REV 22:18 “Necc cehhdeɣ i marra inni ittesřan i wawařen n nnubuwa n Wedlis-a ittwanḍen: Mařa din ḥed wenni xasen i ɣa yarnin, AREBBI ad xas yarni jjrayeḥ, tinni ittwazemmemen deg wedlis-a.
REV 22:19 Mařa ca n ijjen ikkes zeg wawařen n Wedlis ittwanḍen n nnubuwa-ya, ad as ikkes AREBBI tasɣart nnes zi Tcejjart n Tudart u zi Tendint iqeddsen.”
REV 22:20 Xmi Netta iched x man aya, inna: “Wah, Necc ad dd-aseɣ deɣya!” “As-dd, a SIDI Yasuɛ!”
REV 22:21 Arḍa n Siditneɣ Yasuɛ Lmasiḥ [aqa-t] ak-d marra imqeddasen nnes. “Amin!” Aneggar n Řɛahd n Jdid. Aɛuǧi i Yisem n AREBBI, Babatneɣ d Siditneɣ Yasuɛ Lmasiḥ d Arruḥ Iqeddsen.
