﻿Asargeb.
21.
Uca ẓriɣ ajenna n jdid d ict n temmurt n jdid, maɣar ajenna amezwaru d temmurt tamezwarut tuɣa ɛdun, řebḥar war iqqim ɛad. 
Necc ẓriɣ tandint iqeddsen, Urcalim n jdid, tehwa-dd zeg ujenna zi zzat AREBBI, tegga am tesřit izehhjen i wesři. 
Uca sřiɣ ict n tmijja tᵉttřaɣa-dd zeg ujenna s jjehd: “Xẓar, Aqiḍun n AREBBI aqa-tt jar iwdan, uca Netta ad ɣarsen izdeɣ. Nitni ad iřin d řgens nnes, uca AREBBI simant nnes ad ɣarsen yiři, uca ad yiři d AREBBI nsen. 
Ad asen issiẓeɣ kuř imeṭṭan zi tiṭṭawin nsen, uca war tᵉttiři ɛad řmewt d wecḍan d ucetci d řeḥriq.” 
U xmi ggureɣ, inna ayi wenni iqqimen x řɛarc: “Xẓar, ad ggeɣ marra d jdid!” Xas uca inna ayi: “Ari: Awařen-a aqa daysen řaman d tidett.” 
Netta inna ayi: “Aqa ittwakemmeř. Necc d Alif u Necc d Taw, Necc d Beddu d Akemmeř. Wenni iffuden ad as wceɣ ad isu baṭeř zi řɛunṣar n Waman n Tudart. 
Wi ɣa iɣellben ad iwart man aya, uca Necc ad iřiɣ d AREBBI nnes, u netta ad yiři d mmi. 
Maca inni ittcekkan, d lkuffar, d iɛeffanen, d imexmaj, d yinni ineqqen, d yinni iggin taseḥḥart, d ayt n farq-ccɣeř d yinni iɛebbden l’aṣnam d marra ayt n bu-ixarriqen, ad tiři tesɣart nsen di řebḥar ittcefcufen s tmessi d řecbareyyet, ta d řmewt wiss tnayen.” 
Uca yusa-dd ijjen zi sebɛa n lmalakat, tinni ɣarsent sebɛa n ṭṭawyat ccurent s sebɛa n jjrayeḥ tineggura, issiweř akidi, inna: “As-dd, ad ac ssecneɣ tasřit, tamɣart n Yezmar.” 
Indeh ayi di Arruḥ ɣar ijj n wedrar d ameqqran yuɛřan aṭṭas uca isscen ayi tandint iqeddsen, Urcalim, am dd-tehwa zeg ujenna, zi zzat n AREBBI. 
Aɛuǧi n AREBBI tuɣa ɣares, uca ṭṭya nnes tᵉttissiq am yiẓra iɣřan aṭṭas, am weẓru n yaspis nni dd-iḍharen am ukristal. 
Iquwwar as dd ijj n weɣbar d ameqqran yuɛřa, ɣares tenɛac n tewwura u tenɛac n lmalakat tuɣa ttbeddant ɣar tiwwura. U ttwarin ismawen x tiwwura nni, aqa ismawen n tenɛac n tqebbař n Israil. 
Aqa din třata n tewwura ɣar manis d tneqqar tfuct u ɣar ccamal třata n tewwura u ɣar ljanub třata n tewwura u aqa din třata n tewwura ɣar mani tɣeǧi tfuct. 
Aɣbar n tendint ibedd x tenɛac n dsusa ttwarin xasen tenɛac n ismawen n rrusul n Mmis n AREBBI. 
Wenni tuɣa akidi issawařen, ɣares ijj n uɣanim n řeɛbar ḥima ad zzayes iɛbar tandint d weɣbar nnes. 
Tandint tuɣa temmars din am ijj n ukwadrun, tazuggart nnes am tiru nnes. Netta iɛbar tandint s uɣanim nnes n řeɛbar: tenɛac-ařef n ‘istadiyyen’, ɛřaḥař ařfayen u mitayen kilumitr. Tazuggart nnes d tiru nnes d řuɛřa nnes d icten. 
Iɛbar aɣbar nnes: mya u-arebɛa u-rebɛin n iɣaǧen, aqa-t d řqedd n ijj n bnadem, aqa-t n lmalak. 
Aɣbar nnes ggin t s yaspis, u tandint ggint s wureɣ iṣfan, ittban am zzaj iṣfan. 
Dsusa n weɣbar n tendint tuɣa ttwazewwqen kuřci s iẓra iɣřan. Tuɣa dsas amezwaru n weẓru n yaspis, wenni wiss tnayen n ṣaffir, wenni wiss třata n xalcidun, wenni wiss arebɛa n smiralda, 
wenni d wiss xemsa n sarduniks, wenni wiss setta n sardiyus, wenni wiss sebɛa n weẓru n wureɣ, wenni wiss tmenya n biril, wenni wiss tesɛa n tupas, wenni wiss ɛecra n krisupras, wenni wiss ḥiṭac n yazint uca wenni wiss tenɛac n umetist. 
Tenɛac n tewwura d tenɛac n tyaqutin, ict ict. Kuř icten zi tewwura nni tuɣa zeg ict n tyaqut. Maca abrid yiriwen n tendint tuɣa-t n wureɣ iṣfan, am zzaj iṣfan. 
War ẓriɣ ca Zzawect dayes minzi SIDI AREBBI, Amzemmar x kuřci, Netta Simant nnes d Zzawect nnes. 
Izmar d tendint war ḥdajen ca tafuct uřa d taziri, ḥima ad xas ssarɣent, minzi aɛuǧi n AREBBI yareqq dayes uca Izmar d Řefnar nnes. 
Řegnus ad uyuren s tfawt nnes uca ijeǧiden n temmurt ad ɣares ssidfen aɛuǧi nsen. 
Tiwwura nnes war ttwaqqnent ɛemmarṣ s uziř, minzi ǧiřet war tᵉttɣimi ca din. 
Nitni ad awyen ɣares aɛuǧi d ccan n řegnus. 
Ɛemmarṣ ad dayes tadef ca n řḥajjet tamengust niɣ wenni iggin nnɛawat niɣ wenni issxarriqen, mɣir inni ittwazemmemen deg Wedlis ittwanḍen n Yezmar waha. 
