﻿Asargeb.
11.
Uca immewc ayi ijj n uɣanim, igga am yijj n uqeṭṭab n řeɛbar, uca ibedd din lmalak, inna: “Kkar uca ɛbar Zzawect Tameqqrant n AREBBI d uɛalṭar d yinni dayes iɛebbden,    
maca řemraḥ nni ɣar daxeř n Zzawect Tameqqrant, ejj i-t, war t ttɛebbar, minzi aqa immewc i řegnus uca nitni ad ɛefsen x tendint iqeddsen tnayen u arebɛin n iyuren.    
Necc ad wceɣ ṣṣulṭa i tnayen n řechud inu, maḥend ad nebban s wawař n Arebbi ařef u mitayen u-settin n wussan, am yarḍen txancet n wecḍan.” 
Nitni d tnayen n tzitunin d tnayen n řeqnadeř i ibedden zzat i wudem n Sidi n marra tammurt. 
Mařa din ca n yijjen ixs ad ten ihweř, ad teffeɣ tmessi zeg uqemmum nsen uca ad tecc řɛedyan nsen. Ammu i ɣa ttwanɣen inni ixsen ad ten ḍarren. 
Nitni ɣarsen ṣṣulṭa maḥend ad qqnen ajenna, ḥima war dd-iweṭṭi wenẓar deg wussan nni di ɣa nebban nitni, u ɣarsen ṣṣulṭa ḥima ad arren aman d idammen u ḥima ad seyyḥen tammurt s marra jjriḥect meřmi ma xsen. 
Xmi ɣa kemmřen cchadat nsen, ad dd-igeɛɛed řweḥc zi řaǧaɣ, ad kisen immneɣ, ad xasen iɣelleb uca ad ten ineɣ. 
Řxecbat nsen ad iřint deg wazzay n tendint tameqqrant umi qqaren s řmeɛna arruḥi nnes ‘Sadum’ d ‘Miṣra’, mani nɣin Siditsen x ṣṣalib. 
Uca zi ccuɛub d tqebbař d iřsawen d řegnus ad ẓaren iwdan řxecbat nsen, řqedd n třata n wussan d wezyen, war ttejjin řxecbat nsen ad ttwammarsent deg imeḍřan. 
Imezdaɣ n temmurt ad zzaysen farḥen, ad ɛeyyden, ad arezfen ijjen ɣar wenneɣni, ad ssekken ikaduten i wayawya, minzi tnayen n inabiyyen-a tuɣa ɣezzan deg imezdaɣ n temmurt. 
Maca awarni třata n wussan d wezyen yudef daysen Arruḥ Iddaren zi AREBBI uca kkaren, bedden x iḍaren nsen u tewḍa-dd xasen Arruḥ n Tudart uca tiggʷudi temɣar tewḍa-dd x marra inni ten iẓrin. 
Nitni sřin ict n tmijja tejhed tᵉttřaɣa zeg ujenna, teqqar asen: “Geɛɛdem-dd da!” Uca nitni geɛɛden ɣar ujenna deg useynu uca řɛedyan nsen ẓrin ten. 
Di tsaɛɛet nni imsar ijj n wenhezzi n temmurt d ameqqran. Ict n tɛeccart n tendint tehdem uca sebɛa-ařaf n yeryazen ɣarsen isem icennɛen mmuten s wenhezzi-ya n temmurt. Wi iqqimen, dewřen ggʷeden aṭṭas uca ssuɛřan zi AREBBI n ujenna. 
‘Xzar, tnayen n wuctat ɛdunt, uca xzar ‘Uct!’ wiss třata ad dd-tas deɣya. 
Lmalak wiss sebɛa isuḍ di řbuq nnes uca kkarent-i-dd tmijjawin timeqqranin deg ujenna, ttřaɣant: “Tagelda n ddunect aqa-tt n AREBBI nneɣ u n Lmasiḥ nnes, uca Netta ad iḥkem am Ujeǧid i řebda qaɛ.” 
Arebɛa u ɛicrin n imɣaren, inni iqqimen zzat i AREBBI x řekrasi nsen igellden, wḍan s uɣembub nsen ɣar temmurt uca sejden i AREBBI, 
nnan: “Neccin nettqada Cek, a SIDI AREBBI, Amzemmar x kuřci, Cek d wenni iǧan d wenni tuɣa, aqa teksid jjehd nnec ameqqran deg ufus nnec, uca tebdid ad tḥekmed am Ujeǧid. 
Řegnus tuɣa xeyyqen xak, maca yusa-dd weɣḍab nnec, uca tiweḍ-dd řweqt n imettinen ḥima ad ttwaḥasben u ḥima ad temmewc řmunet i imsexxaren nnec, inabiyyen, u i imqeddasen u i yinni itteggʷeden Isem nnec, am imeẓyanen am yimeqqranen, u Cek ad tareyybed inni ittaredǧen tammurt.” 
Tᵉnnurzem Zzawect Tameqqrant deg ujenna ařami tᵉttwaẓar Ttabut n Řɛahd nnes di Zzawect Tameqqrant, uca kkaren wassamen d wajjajen d tmijjawin uca imsar ijj n wenhezzi n temmurt u wḍan ibquqen imeqqranen n tebruri.    
