﻿Iɛibraniyyen.
12.
S uya neccin ɛawed, umi d aneɣ dd-nnḍen marra řechud-a am iseynuten, ad nenḍar marra ddqeř n ddenb i d aneɣ dd-isswejden i řebda. Ejj aneɣ ad nuyur s ṣṣbar amḥizwar nni xaneɣ dd-immarsen. 
Ejj aneɣ ad nenḍar tiṭṭawin di Yasuɛ, Amgewwad d Umkemmeř n l’iman nneɣ, wenni, zi ssibbet n řefraḥet i ɣares, yarbu ṣṣalib, war t icqi ubehdeř, uca iqqim x yefus n řɛarc n AREBBI.    
Xzarem mliḥ, mecḥař i iksi Netta zeg imednab, inni d iɣrimen n řeɛmar n yixef nsen, ḥima war tᵉttiḥřem u war tarexxum ca di řeɛmar nwem. 
Aqa kenniw, war truḥem ca tiggʷejem ak-d ddenb, war temmɛařim ca ař usizzeř n idammen nwem. 
Tᵉttum taɣuri i xawem issawařen am iḥenjiren: “Mmi inu, war ttegg ca s weɛrur x ttarbiyyet n SIDI, war ttiři ca d amarxu di řeɛmar nnec, xmi ɣa tᵉttwawebbxed zzayes. 
Minzi wenni ittexs SIDI, yarebba i-t s uqessaḥ, uca iḥenjiren nnes i xas iɛizzen, iksi ten kuř ijj zzaysen ɣar uɣezdis.” 
X uya, ksim ttarbiyyet, minzi AREBBI ittegg awem am iḥenjiren nnes. Minzi man mmis wenni babas war t yarebbi ca s uqessaḥ? 
Mařa aqa kenniw břa ttarbiyyet i di carcen marra, řexdenni kenniw am ibarraniyyen i teǧam, war iǧi d arrawen. 
Mařa neksi ttarbiyyet zi babatneɣ ɛlaḥsab arrimet uca nweqqar i-ten, mecḥař d aneɣ ittxeṣṣa ad nṭaɛ i Babatneɣ n arruḥat, ḥima ad neddar! 
Minzi nitni webbxen aneɣ ca n wussan am mammec d asen ittɣiř mliḥ, maca AREBBI igga i-tt i tizi nneɣ, ḥima ad ncarc di tqeddast nnes. 
Aqa war din uřa d ict n ttarbiyyet s uqessaḥ i ittbanen d řefraḥet deɣya, maca d řeḥriq, maca awarni as tiwi-dd řɣiǧet n řehna d tsegda i yinni zzayes ittwadarrben. 
S uyenni, sjehdem ifassen nwem yarxun d ifadden nwem yarehfen, 
uca ggem nican iṣuraf n iḍaren nwem, ḥima min iǧan d aqejdaḥ war ittefriɣ ca, maca ad iggenfa. 
Ḍfarem-dd řehna d tuqeddsi ak-d marra, tenni břa zzayes war iẓar ḥed Siditneɣ. 
Ɣarwem aqa uřa d ijj jar awem ad ittwaf inqeṣ as arḍa n AREBBI, niɣ aqa ad iɣmi weẓwar n tarzugi, ad kenniw iḍarr uca xenni ad zzayes ttwaxemjen aṭṭas, 
uca ḥḍam, aqa war ittwiffi ḥed jar awem wenni d bu-farq-ccɣeř niɣ d ameqjuḥ am Ɛisu nni izzenzen řḥeqq n umenzu nnes x ijj n macca. 
Minzi aqa tessnem, belli awarni man aya tuɣa yarezzu ɛad ad iwart lbaraka, maca yugi as, maɣar war yufi ca ttasiɛ i weɛdař, waxxa yarezzu t s imeṭṭawen. 
Minzi kenniw war tiwiḍem ca ɣar tmessi yarɣin niɣ ɣar wedrar i nzemmar ad nḥada, uřa ɣar tayyut tbarcant d tḥaryaḍt, 
niɣ ɣar zzhir n uṣudi deg uyicc n icarri uřa ɣar řḥess n wawařen di ssibbet nsen zawgen inni d as isřin, maḥend war ten kisen issiwiř ɛad. 
S minzi war zemmaren x ddqeř n tweṣṣa, minzi mařa iqarreb-dd mɣir ijj n umuddar adrar, ad ittwarjem netta.    
Min ẓrin tuɣa issaggʷad aṭṭas, ařami inna Musa: “Aqa ggʷedeɣ u ttarjijiɣ!” 
Maca kenniw tiwḍem ɣar wedrar n Ṣihyun, ɣar Tendint n AREBBI iddaren, ɣar Urcalim nni iǧan deg ijenwan u ɣar tmesmunt n ɛecra n řuřufat n lmalakat, 
ɣar tmesmunt n imenza, inni ittwazemmemen deg ijenwan, u ɣar AREBBI, Řqaḍi x marra u ɣar arruḥat n imseggaden nni iwḍen ɣar řekmaret, 
u ɣar Yasuɛ, Lwasit n Řɛahd n Jdid, u ɣar urucci s Idammen nnes, inni issawařen ḥsen zeg inni n Habil. 
Ɣarwem war tagim ca x Wenni akidwem issawařen, minzi mařa inni war ittwassnejmen ugin Wenni kidsen issawařen di temmurt, mahu ɛad neccin, mařa nḥeyyed x Wenni akidneɣ issawařen zeg ijenwan, 
Wenni tuɣa tmijja nnes tessenhezza tammurt, maca Wenni řexxu iwaɛd, inna: “Ad ssenhezzeɣ ɛawed ict n twařa, war iǧi tammurt waha, aqa uřa d ajenna.” 
Awař-a: ‘Ict n twařa!’, aqa imřa belli ad ittwakkes min ittenhezzan, minzi man aya ittwagg, ḥima ad qqiment tmesřayin war ttenhezzint. 
S uya, minzi ad neṭṭef tageldit yarekknen, ejj aneɣ ad neqqim nᵉtteṭṭef di arḍa i zi nettsexxar i AREBBI u nessarḍa i-t s uweqqar d tiggʷudi, 
minzi AREBBI nneɣ d ict n timessi ittetten. 
