﻿Iɛibraniyyen.
7.
Malkiṣadiq wanita tuɣa d ajeǧid n Salim, akehhan n AREBBI wenni d Amɛuǧi x kuřci, u netta iffeɣ-dd ḥima ad iřqa Ibrahim řami dd-idweř zi tareẓẓit n ijeǧiden, u netta ibarek Ibrahim. 
Ibrahim iksi ijj n řeɛcur zi marra min ɣares i netta. Isem nnes ixs ad yini: ‘ajeǧid n tsegda’, u ɛawed: ‘ajeǧid n Salim’, min ixs ad yini ‘ajeǧid n řehna’. 
Nḥřa ma ttwazemmen babas d yemmas deg idlisen n jjadira, u nḥřa beddu n wussan nnes niɣ aneggar n tudart nnes, maca deg warwas n Mmis n AREBBI, aqa teqqim tukehhant nnes i řebda. 
Xzarem řexxu, mecḥař tuɣa imɣar wanita x arrays n řejdud nneɣ Ibrahim i t iwcin řeɛcur zi min iṣebḥen qaɛ! 
Maɣar inni iksin tukehhant zeg ayt n Lawi, aqa ɣarsen tawṣeyyet ɛlaḥsab Ccariɛa ḥima ad ksin řeɛcur zi řgens, iɛna zeg aytmatsen, umi nitni ffɣen-dd ɛawed zi dwaxeř n Ibrahim. 
Maca Malkiṣadiq wanita, wenni war izemmen deg idlisen nsen n jjadira, iksi zi Ibrahim řeɛcur uca ibarek i wenni iṭṭfen lwaɛd. 
Aqa břa awař, wenni iǧan qell, aqa ad ittwabarek zeg wenni iǧan ḥsen zzayes. 
Aqa danita iwdan ifennan kessin řeɛcur, maca dinni ten iṭṭef netta, netta d wenni x cehhdent Tira Iqeddsen, aqa iddar. 
Ammu nzemmar ad nini belli Lawi, wenni iksin řeɛcur, aqa iɛeccar ɛawed s ufus n Ibrahim, 
minzi tuɣa-t ɛad di dwaxeř n babas ařami imsagar wanita ak-d Malkiṣadiq. 
Mařa řekmařet tuɣa-tt s tukehhant n Lawi, minzi tanita tᵉttwaḍmen i řgens s Ccariɛa, mayemmi ɛad ittxeṣṣa ad dd-ikkar ukehhan nneɣni deg warwas n Malkiṣadiq? Mařa ammu i teǧa, zeɛma inna Netta belli ad yiři di ṣṣifet n Harun! 
Maca am mammec tuɣa din ijj n ubeddeř n tukehhant, ammu tuɣa din ɛawed ijj n ubeddeř n Ccariɛa. 
Minzi Wenni mixef ittwanna aya, aqa ittwaxřeq-dd zi teqbič nneɣnit, i zi uřa d ijj war isexxar ɛemmarṣ ɣar uɛalṭar. 
Aqa bayen belli Siditneɣ iffeɣ-dd zi Yahuda, zi taqbič i war x issiweř Musa uřa s yijj n wawař x tukehhant. 
S man aya ɛawed tban qaɛ mliḥ, aqa Netta inna belli ad dd-ikkar ukehhan nneɣni deg warwas n Malkiṣadiq, 
wenni war ittwaggen ɛlaḥsab Ccariɛa n tweṣṣa i itthiman arrimet, maca ɛlaḥsab jjehd n Tudart war ifennan. 
Minzi Netta iched xas: “Cek d Akehhan i řebda deg warwas n Malkiṣadiq!” 
Minzi tawṣeyyet tenni tuɣa qbeř tᵉttwaxřef zi ssibbet n tuḍɛeft nnes d břa nnfaɛ nnes. 
Minzi Ccariɛa war tᵉttiwi qaɛ akemmeř, maca deg wemcan nnes yusa-dd usitem d ameqqran i zi nzemmar ad nades AREBBI, 
u Netta iḍmen man aya s ict n tjaǧit. 
Maɣar nitni dewřen d ikehhanen břa tajaǧit, maca Wanita s ict n tjaǧit umi Netta d as inna s uqemmum n Dawud: “Aqa SIDI ijjuǧ, war issxarriq ɛemmarṣ: ‘Cek d Akehhan i řebda di ṣṣifet n Malkiṣadiq.’” 
Di marra man aya iǧa Řɛahd-a, i zi idweř Yasuɛ d aḍman, qaɛ ḥsen. 
Tuɣa din di řweqt nni ɛawed aṭṭas n ikehhanen, minzi nitni mmuten, ttwamenɛen ad qqimen. 
Maca x Wanita war xas tɛeddu Tukehhant nnes, minzi Netta ad iqqim ibedd i řebda. 
S uyenni izemmar ad iwc Tudart ittduman i yinni zzayes i dd ɣa qarrben ɣar AREBBI, minzi Netta iddar i řebda uca iwehheb tiẓaǧitin di ṭṭweɛ nneɣ. 
Minzi tuɣa ittřiq aneɣ ijj n Ukehhan am Wanita: amezdag, břa řɣecc d taxmuji, ittwafarzen zeg imednab, yuɛřan x ijenwan, 
wenni war ɣar iǧi řxeṣṣ ass x wass am irruyas n ikehhanen, ḥima ad iqeddem amezwar tiɣarṣin x ddnub n yixef nnes, uca xenni ɛawed x ddnub n řgens, minzi aya igga i-t ict n twařa i řebda qaɛ, řami iwca Ixef nnes d taɣarṣt. 
Aqa Ccariɛa tessgeɛɛed iwdan iḍeɛfen d ikehhanen, maca awař n tjaǧit, wenni awarni Ccariɛa, issgeɛɛed Mmis wenni ittwakemmřen i řebda. 
