﻿Iɛibraniyyen.
6.
S uyenni ad nejj tamezwarut n wawař n Lmasiḥ, ad nuyur zzat ɣar ukemmeř. Mayemmi xenni texsem ad tessarsem ɛawed dsas nneɣni i ttubet zi řexdayem immuten u i l’iman di AREBBI, 
u i tɣuri n useɣḍeṣ d usarsi n ifassen uřa i tnukra zi taddart n imettinen d lḥisab i řebda? 
Mařa ad aneɣ ismeḥ SIDI man aya, ad t negg. 
Maca war d asen izemmar i yinni dd-ihwan i useɣḍeṣ ict n twařa uca qqasen tawhibt n ujenna uca ṭṭfen Arruḥ Iqeddsen, 
uca qqasen ɛawed awař icnan n AREBBI d jjehd n zzman i dd ɣa yasen, 
maḥend ad xḍan ɛawed, uca ad ttwassfaqen i ttubet zi jdid, uca ad ṣellben u ad sseḥqaren Mmis n AREBBI ict n twařa nneɣni. 
Minzi tammurt, tenni isessen anẓar wenni xas iccaten aṭṭas n twařawin, tessɣemmi aɣemmuy icna i yinni umi tᵉttwafeǧeḥ, aqa teksi lbaraka zi AREBBI. 
Maca mařa tesseɣmi-dd temmurt isennanen d tzeggʷart, aqa temmenḍar u tudes i nneɛřet uca aneggar n temmurt ad yiři d acmaḍ. 
Maca waxxa nessawař ammu, zi jjihet nwem a aytma, aqa nettwasseqneɛ aqa din timesřayin icnan ittraḥen nican ak-d Tudart. 
Minzi AREBBI war iǧi d wenni war iseggden maḥend ad ittu řxedmet nwem d tayri nwem, tini tuɣa tessecnem deg Yisem nnes, i zzayes tuɣa kenniw tsexxarem i imqeddasen uca tᵉttsexxarem asen ɛad. 
Maca dayneɣ meẓri ḥima kuř ijjen zzaywem ad isscen amḥaḍ d ijj i ukemmeř n usitem ař aneggar, 
aqa war tᵉddekkwařam d imeɛgaz, maca ad tiřim d imeḍfaren n yinni s l’iman d ttasiɛ n řxaḍar dewřen d iwriten n lwaɛd. 
Minzi řami iwaɛd AREBBI Ibrahim, ijjuǧ s Yixef nnes, minzi war din iǧi wenneɣni imɣar xas maḥend ad as ijjaǧ, 
inna: “S tidett, ad ac barkeɣ uca ad ac arniɣ aṭṭas s waṭṭas.” 
Uca ammu, am ittṣebbar Ibrahim, aqa iksi lwaɛd. 
Maɣar iwdan jjuǧen ɣar min xasen iǧan d ameqqran u marra amcubbec jar asen ad iqḍa nican s ict n tjaǧit. 
S uyenni tuɣa ixs AREBBI ad isscen s ufeyyeḍ i iwriten belli lwaɛd nnes war ittbeddiř ca, uca iḍmen i-t s ict n tjaǧit. 
ḥima s tnayen n tmesřayin war ttbeddiřent ca - am war izemmar xenni ad issxarreq AREBBI - ad dayneɣ ittwagg uř s waṭṭas, aqa dayneɣ di neccin inni ɣares arewřen, ḥima ad neṭṭef deg usitem i d aneɣ ittwawaɛden, 
d wenni ɣarneɣ am yijj n uřeyzim icebbaren s řmetnet di řeɛmar nneɣ, ijj n uřeyzim i dd-ittadfen ɣar daxeř n uřeḥḥaf n wadaf. 
mani yudef Yasuɛ wenni d aneɣ izwaren x tizi nneɣ, aqa idweř d Akehhan i řebda deg warwas n Malkiṣadiq. 
