﻿Iɛibraniyyen.
5.
Minzi kuř arrays n ikehhanen ittwakkes-dd zeg iwdan, ittwassgeɛɛed di ṭṭweɛ n iwdan x min iǧan n AREBBI, maḥend ad iqeddem tiwhibin d tɣarṣin x ddnub. 
Izemmar ad immars ixef nnes, ad iḥinn x iqubbaniyyen d imweddaren, minzi uřa d netta simant nnes yarḍ tuḍɛeft. 
Maɣar s man aya d icten ittxeṣṣa as ad issgeɛɛed tiɣarṣin x ddnub n řgens uca ɛawed x ddnub n yixef nnes. 
Uřa d ijjen ad iksi i yixef nnes ccan-a, mɣir wenni ittwařaɣan zi AREBBI am mammec ittwařaɣa Harun. 
Ammu ɛawed Lmasiḥ war issɛuǧi ca Ixef nnes umi idweř d Arrays n ikehhanen, maca issɛuǧa wenni dd ɣares issiwřen: “Cek d Mmi, Necc jjiɣ-dd Cek ass-a!” 
Am mammec inna ɛawed di mani nneɣni: “Cek d Akehhan i řebda, deg warwas n Malkiṣadiq.” 
Řami tuɣa yarreḍ arrimet n weysum nnes, iqeddem tiẓaǧitin d tutra s iɣuyyan aṭṭas u s imeṭṭawen i Wenni tuɣa izemmaren ad t-i-dd-issnekkar zi řmewt i Tudart, uca Netta isřa as. 
Netta, waxxa tuɣa-t d Mmis, aqa iřmed ṭṭaɛet s tiggʷudi u zeg uweddeb i iksi. 
Ammu i idweř Netta ikemmeř, idweř d ssibbet n Tudart ittduman i marra inni d as i ɣa iṭṭaɛen, 
uca igga i-t AREBBI d Arrays n ikehhanen deg warwas n Malkiṣadiq. 
Aqa ɣarneɣ aṭṭas min ɣa nini x Malkiṣadiq wanita, maca iwɛar ad t nfessar, minzi tdewřem tewɛarem ad tesřem. 
Maɣar tuɣa ittxeṣṣa ad tiřim d imesɣaren zi jjihet n řmijař n řweqt i tḍeffarem tɣuri-ya. Maca řexxu ittxeṣṣa awem ɛad ad třemdem lḥuruf imezwura n beddu n wawařen n AREBBI, kenniw teḥdajem ɛad aɣi deg wemcan n macca ijehden. 
Minzi kuř ijjen wenni icarcen deg uɣi, war iqedd x wawař n tsegda, minzi netta d aseymi ɛad. 
Maca macca ijehden iffeɣ-dd i yinni imɣaren, inni aqa nnumen ad darrben tacit nsen ḥima ad farzen řxar x řɣar. 
