﻿Iɛibraniyyen.
3.
S uyenni, a aytma imqeddasen, inni ittwařaɣan s třaɣit n ujenna, xzarem ɣar Rrasul wanita, ɣar Arrays n ikehhanen n cchadet nneɣ, Yasuɛ Lmasiḥ,    
wenni d amtiqqi i Wenni i-t-i-dd-issgeɛɛden, am mammec tuɣa Musa d amtiqqi di marra taddart nnes. 
Minzi aɛuǧi n Wanita d ameqqran s waṭṭas x wenni n Musa, am ccan n ubennay n taddart imɣar x ccan n řebni nnes. 
Minzi marra taddart tᵉttwabna zeg ijjen, maca Wenni ibennan marra d AREBBI. 
Tᵉttwawekkeř i Musa marra taddart nnes am i yijj n umsexxar, maḥend ad iched x tmesřayin min xef ɣa issiweř netta. 
Maca Lmasiḥ am Mmis ittwagg x taddart nnes, u taddart nnes d neccin, mařa neqqim nᵉtteṭṭef di řaman u deg uɛuǧi n usitem nnes ař aneggar. 
Maca minzi Arruḥ Iqeddsen inna ... “Aqa ass-a mařa tesřim tmijja nnes, 
war ttᵉsseqsiḥem ca uřawen nwem maḥend ad t tesɛarem, am inni iɣewwɣen, am deg wass n ujarreb di řexřa, 
umi d ayi jarrben řejdud nwem, qeǧben ayi, am ẓrin timegga inu arebɛin n iseggʷusa. 
... s uya ɛiffeɣ zi jjiř nni, nniɣ: ‘Wa d ijj n řgens i iweddaren deg wuř nnes nitni war ssinen ca ibriden inu!’, 
ařami jjuǧeɣ deg weɣḍab inu: ‘War dd-ttidfen ca ɣar arraḥet inu!’” 
S uyenni, a aytma, ḥḍam ḥima ɛemmarṣ war ittiři ḥed zzaywem ɣares uř d aɛeffan i war ittimnen umi ɣa taggʷejem x AREBBI iddaren, 
maca qeǧbem ixef nwem kuř ass, ař ass umi qqaren: ‘Ass-a!’, ḥima uřa d ijj zzaywem war itteqsiḥ ca s uɣekkwi n ddenb. 
Minzi nettwassmun aṭṭas ak-d Lmasiḥ mařa neqqim ncebbar zeg umezwar ař aneggar di Řɛahd-a i dayes řaman. 
S uya ittwanna ammu: “Aqa ass-a, mařa tesřim řḥess n tmijja nnes, war tesseqsiḥem ca uřawen nwem maḥend ad t tesɛarem.” 
Xenni min iɛnan nitni inni isřin t, xenni ɣewwɣen? Ma war ǧin nitni marra d inni dd-iffɣen zi Miṣra s ufus n Musa? 
Zi man wen iɛiff Netta xenni arebɛin n iseggʷusa? Ma war iǧi zeg yinni ixḍan, inni umi iwḍan iɣsan nsen di řexřa? 
I umi ijjuǧ Netta, belli war dd-ttidfen ca ɣar arraḥet nnes? Ma war iǧi i yinni war d as ttiqqen? 
Aqa nettwařa belli nitni war zemmaren ad adfen x ssibbet n břa l’iman nsen. 
